Pakutanga Mwari wakasika denga nenyika. Nyika yaiya isina muemo, isina chiro, nechidima chaiya padera pemvura yakadzama; noMweya waMwari wakavhamira padera pemvura. Mwari wakati, “Ngakuapo kujeka,” nokujeka kwakaapo. NaMwari wakaona kuti kujeka kwaiya kwakanaka; naMwari wakaparadzanisa kujeka kubva muchidima. Mwari wakadudza kujeka kuti, “Masikati,” naye wakadudza chidima kuti, “Usiku.” Kwakaapo madeekoni nemangwanani, zuva rokutanga. Mwari wakati, “Ngakuapo mukana pakati pemvura, ngauparadzanise mvura nemvura.” NaMwari wakaita mukana, akaparadzanisa mvura yaiya pashi pomukana kubva kune mvura iyo yaiya padera pomukana. Zvakaitika kudaro. NaMwari wakadudza mukana kuti, “Denga.” Kwakaapo madeekoni nemangwanani, zuva rechipiri. Mwari wakati, “Mvura iri pashi pedenga ngaiunganidzwe pandau imwe, mavhu akaoma ngaaoneke.” Zvakaitika kudaro. Mwari wakadudza mavhu akaoma kuti, “Nyika,” nemvura yakaunganidzwa pamwepo wakaidudza kuti, “Ruandhle,” naMwari wakaona kuti zvaiya zvakanaka. Mwari wakati, “Nyika ngaimere mwenje nemiriwo inobereka mbeu, miti inobereka michero, kudai ngokuteererana kwembeu dzayo, idzo tsangu dzayo dziri mukati mwayo, padera penyika.” Zvakaitika kudaro. Nyika yakamera zvisimwa, zvinobereka mbeu ngokuteererana kwembeu dzayo idzo, nemiti inobereka michero, tsangu dzayo dziri mukati mwayo, umwe ngaumwe kudai ngokuteererana kwembeu dzayo, naMwari wakaona kuti zvaiya zvakanaka. Kwakaapo madeekoni nemangwanani, zuva rechitatu. Mwari wakati, “Ngakuapo zvinojeka mumukana wedenga, kuti zviparadzanise masikati nousiku; ngazviite zvioniso zvenguva, zvemazuva nezvemakore. Zve, ngazviite zvinojekisa mumukana wedenga kuti zvijekise padera penyika.” Zvakaitika kudaro. NaMwari wakaita zvinojeka zviiri zvakakura; chokujeka chikuru chinotonga masikati, nechokujeka chidoko chinotonga usiku, wakaitazve nyeredzi. Mwari wakazviisa mumukana wedenga, kuti zvijekise padera penyika, kuti zvitonge padera pemasikati nousiku, kuti zviparadzanise kujeka kubva kune chidima. NaMwari wakaona kuti zvaiya zvakanaka. Kwakaapo madeekoni nemangwanani, zuva rechirongomuna. Mwari wakati, “Mvura ngaibudise ngokuwanzisa zvisikwa zvinopona, neshiri ngadzimbururuke padera penyika mumukana womudenga.” Ndizvo Mwari wakasika zvikara zvikurutu zvomuruandhle, nezvisikwa zveshe zvinopona zvinohamba, izvo zvakabudiswa ngemvura ngokuwanzwa, kudai ngokuteererana kwembeu dzazvo, nembeu dzeshe dzeshiri kudai ngokuteererana kwembeu dzadzo. NaMwari wakaona kuti zvaiya zvakanaka. NaMwari wakazvifumisa echiti, “Baranai muwande, muzadze mvura yomuruandhle, neshiri ngadziwande munyika.” Kwakaapo madeekoni nemangwanani, zuva rechishanu. NaMwari wakati, “Nyika ngaibudise zvisikwa zvinopona kudai ngokuteererana kwembeu dzazvo; zvifuyo zvipuka zvidoko nezvinogwezva nezvikara zvenyika kudai ngokuteererana kwembeu dzazvo.” Zvakaitika kudaro. NaMwari wakaita zvikara zvenyika kudai ngokuteererana kwembeu dzazvo, nezvifuyo kudai ngokuteererana kwembeu dzazvo, nazvo zveshe zvipuka zvidoko nezvinogwezva pashi kudai ngokuteererana kwembeu dzazvo. NaMwari wakaona kuti zvaiya zvakanaka. Mwari wakati, “Ngatiite vanhu ngomuedzaniso wedu, vatodzane nesu; ngavatonge padera pehove dzomuruandhle, padera peshiri dzomumweya, padera pezvifuyo, padera pemhuka dzeshe dzomushango nepadera pezviro zveshe zvipuka zvidoko nezvinogwezva munyika.” Ndizvo Mwari wakasika vanhu ngomuedzaniso wake wemene, ngomuedzaniso waMwari wakavasika; wakasika mwamuna nomukadzi. Mwari wakavafumisa; naMwari wakati kwavari, “Baranai muwande, muzadze nyika, muinyise; mutonge padera pehove dzomuruandhle, padera peshiri dzomumweya nepadera pezviro zveshe zvipuka zvidoko nezvinopona zvinogwezva padera penyika.” Mwari wakati, “Ringirai ndamupa zvisimwa zveshe zvinobereka tsangu, zviri padera pehope yeshe yenyika, nemiti yeshe, iyo mukati mwayo mune michero ine mbeu inobereka miti; kwomuri inozoita chokudya. Ndapa miriwo yeshe yakasvipirika kuita zvokudya kune zvikara zveshe zvenyika nokushiri dzeshe dzomumweya nokuzviro zveshe zvinogwezva padera penyika, izvo zveshe zvipuka zvidoko nezvinopona.” Zvakaitika kudaro. NaMwari wakaona zveshe zvaaiya aita, kuti zvaiya zvakanasa kunaka. Kwakaapo madeekoni nemangwanani, zuva rechitanhatu. Ndizvo denga nenyika zvakapedzwa ngokudaro, nazvo zveshe ngouwandu hwazvo. Ngezuva rechinomwe Mwari wakapedza mushando wake waakaita, naye wakazorora ngezuva rechinomwe kubva kumushando wake weshe waakaita. Ndizvo Mwari wakafumisa zuva rechinomwe akarichenesa, ngokuti ngeiro zuva Mwari wakazorora kubva kumushando wake weshe waakaita wokusika. Aya ndiwo masikirwe edenga nenyika. Ngezuva iro Mambo Mwari raakasika ndiro nyika nedenga, naapo kusati kwatongo apo nechisimwa cheshango munyika, nomuriwo naumwe waiya wamera, ngokuti Mambo Mwari waiya asati aita kuti mvura inaye padera penyika, paiya pasina munhu wokurima ivhu; asi mhute yakapwititika kubva panyika, ikanyakatisa padera pemavhu eshe. NaMambo Mwari wakasika munhu ngebukuta remavhu, akafemera mumiro dzake mweya wokupona; nomunhu wakaita unopona. NaMambo Mwari wakasima munda muEdheni ngokumabvazuva, ndimwo umwo mwaakaisa munhu waakasika. Kubva mumavhu Mambo Mwari wakameresa miti yeshe inodakadza madziso, neinonaka kudya; nomuti wokupona waiyawo pakati pomunda, nomuti woruziyo rwezvakanaka nezvakashata. Rwizi rwakanyuka kubva muEdheni kudiridzira munda; nokubvamwo rwakaparadzaniswa kuita mhararano mirongomuna. Zina rorwizi rwokutanga runozwi Phishoni; ndirwo runopopoma kutendenedza nyika yeshe yeHavhira, umwo muno mukore; nomukore wenyika iyo wakanaka; kuripo bedheriamu nemapuwe eonikisi arimwo. Zina rorwizi rwechipiri runozwi Gihoni; ndirwo runopopoma kutendenedza nyika yeshe yeKhushi. Zina rorwizi rwechitatu runozwi Tigrisi; ndirwo runopopoma ngokumabvazuva kweAsiria. Norwizi rwechirongomuna runozwi Yufratesi. Mambo Mwari wakatora munhu, akamuisa mumunda weEdheni kuti aurime nokuungwarira. NaMambo Mwari wakapanga munhu echiti, “Ungadya kumuti weshe womumunda; asi kumuti woruziyo rwezvakanaka nezvakashata usazodya, ngokuti ngezuva rounozodya kwouri ngegwinyiso unozofa.” NaMambo Mwari wakati, “Akuzi kunaka kuti munhu agare ari ega; ndinozomuitira mudetseri wakamunakira.” Ndizvo kubva kumavhu Mambo Mwari wakasika mhuka dzeshe dzomushango, neshiri dzeshe dzomumweya, akazviunza kumunhu aone kuti unozozvidudza zina rokutinyi. Nezina iro raakadudza munhu kuchisikwa cheshe chinopona, ndiro rakaa zina racho. Munhu wakadudza mazina ezvifuyo zveshe, nokushiri dzomumweya, nokuzvikara zvomushango; asi kumunhu akuzi kuoneka mudetseri wakamunakira. Ndizvo Mambo Mwari wakaita kuti hope dzemadzikirira dzigumire munhu, naapo wakaata; wakatora rumwe rwenhii dzake, akanamira nyama pandau yarwo. Mambo Mwari wakanasira mukadzi ngorunhii urwo rwaakatora kubva kumwamuna, akamuunza kunomwamuna. Nomwamuna wakati, “Zvino uyu uri godo remagodo angu, nenyama yenyama yangu. Unozodudzwa kuti, ‘Mukadzi,’ ngokuti wakabviswa kunomwamuna.” Ngeiyi ndaa mwamuna unozosiya baba ake namai, unozonamatira kumukadzi wake; naavo vairi vanozoita nyama imweyo. Navo veshe vaiya vari mititinini, mwamuna nomukadzi wake, avazi kutsveruka. Zvino nyoka yaiya nourimbwi kupinda zvikara zvimweni zvomushango zvaakaita Mambo Mwari. Nayo yakati kunomukadzi, “Ngegwinyiso Mwari wakaronza here kuti musazodya kumuti nokuti ngouri womumunda?” Nomukadzi wakati kunenyoka, “Tingadya kumichero yemiti yomumunda. Asi Mwari wakati ‘Muchero womuti uwo uri pakati pomunda amuzoudyi, zve, amuzoubati, kuti musazofa.’ ” Asi nyoka yakati kunomukadzi, “Ngegwinyiso amuzofi. Ngokuti Mwari unozia kuti apo pomunozoudya, madziso enyu anozopembenudzwa, nemwi munozodai ndiMwari, mwechizia zvakanaka nezvakashata.” Ndizvo apo mukadzi aona kuti muti wakanaka kudyiwa nokuti waidakadza madziso, nokuti muti waiya wechidikanwa kuti munhu angwadzwe, wakatora muchero wawo wakaudya; akapawo umweni kumwamuna wake, waiya naye, nayewo wakadya. Naapo madziso avo veshe akapembenudzwa, vakazia kuti vaiya mititinini; vakasonera mashakani omuonde pamwepo, vakadziitira zvokusimira. Navo vakazwa Mambo Mwari echihamba mumunda ngomukuwo wokupipirira kwezuva. Munhu nomukadzi wake vakahwara pakati pemiti yomumunda, kubva mukuapo kwaMambo Mwari. Asi Mambo Mwari wakadaidza munhu, akati kwaari, “Uri pari?” Naye wakati, “Ndazwa izwi rako ndiri mumunda, neni ndatya, ngokuti ndaiya ndiri mutitinini; neni ndahwara.” Naye wakati, “Ndiani wakuronzera kuti waiya uri mutitinini? Wadya here muti wendakakupanga ndiwo kuti, usazodya?” Nomunhu wakati, “Mukadzi wowakandipa kuti agare neni ndiye wandipa muchero womuti, neni ndaudya.” Naapo Mambo Mwari wakati kunomukadzi, “Chiinyi ichi chowaita?” Mukadzi wakati, “Nyoka yandichengedzera, neni ndaudya.” Mambo Mwari wakati kunenyoka, “Ngokuti waita ichi, unotukwa kupinda zvifuyo zveshe nokupinda zvikara zveshe zvomushango; unozogwezva ngendani yako, newe unozodya bukuta mazuva eshe okupona kwako. Ndinozoisa ugaa pakati pako nomukadzi, nepakati pemibarirwana yako nemibarirwana yake; mibarirwana yake inozoremadza soro rako, newe unozoremadza chisisinho chake.” Kumukadzi wakati, “Ndinozowanza kakurutu kurwadziwa kwako mukutora kwako mimba noukosha; mukurwadziwa kukurutu unozobara vana; nokudisisa kwako kunozoa kumwamuna wako, naye unozotonga padera pako.” NokunaAdhamu wakati, “Ngokuti wapurutana izwi romukadzi wako, ukadya kumuti wendakakupanga ndechiti, ‘Usazoudya,’ ivhu ratukwa ngendaa yako; unozodya zvinobva kweriri ngokushanda mazuva eshe okupona kwako; zve, rinozokumerera minzwa nemakato; newe unozodya miriwo yomushango. Ngeziya rehope yako unozodya kudya, metsa uhwirire kumavhu; ngokuti wakabviswa kwaari; ngokuti uri bukuta, newe unozohwirira kuita bukuta.” Munhu wakadudza zina romukadzi wake kuti Evha; ngokuti iye waiya mai waavo veshe vanopona. Mambo Mwari wakaitira Adhamu nomukadzi wake mabhachi ematoo, akavafukidza. Naapo Mambo Mwari wakati, “Wona, munhu wadai ngoumwe wedu, mukuzia zvakanaka nezvakashata; zvino kuti asazotambanudza nyara yake, atorezve michero yomuti wokupona, adye apone mhera nariini.” Ndizvo Mambo Mwari wakamubudisa kubva mumunda weEdheni, kuti arime mavhu aakabviswa mwaari. Ndizvo wakamudzinga munhu, akaisa ngokumabvazuva kwomunda weEdheni makerubhi, neshoti inovaima nokutenderera kumarupande eshe, kungwarira njira yomuti wokupona. Zvino Adhamu wakazia Evha mukadzi wake, naye wakaita mimba, akabara Kheni, wakati, “Ndabara munhu ndechidetserwa ndiMambo Mwari.” Zve, wakabara munun'una wake Abhera. Zvino Abhera waiya muushi wemakwai, asi Kheni waiya murimi wemavhu. Ngesure kwomukuwo Kheni wakaunza michero yemavhu kuita mudiro kunaMambo Mwari, naAbhera wakaunzawo dzematangwe omuhlambi emakwai ake nemafuta awo. Mambo Mwari wakaremeredza Abhera nomudiro wake, asi aazi kuremeredza Kheni nomudiro wake. NaKheni wakatseneka kakurutu, nehope yake yakaonyana. Mambo Mwari wakati kunaKheni, “Unotseneka ngenyi, nehope yako inoonyana ngenyi? Kudai wechiita zvakanaka, ausaizoashirika here? Kudai usikaiti zvakanaka, chishaishi chinokuhwarira pamusiwo, nokudisisa kwacho ngekwokuda kutonga padera pako, asi iwewe unosisira kuchinyisa.” Kheni wakaronza izvi kunaAbhera munun'una wake echiti, “Ngatiende mushango.” Naapo vaiya mushango Kheni wakamukira Abhera munun'una wake, akamuuraya. Mambo Mwari wakati kunaKheni, “Uri pari Abhera munun'una wako?” Naye wakati, “Andizii, ndini mungwariri womunun'una wangu here?” NaMambo Mwari wakati, “Waitenyi? Ngazi yomunun'una wako inondichemera yechibva muvhu kudai ngeizwi rinoda kuunzidzirwa. Nazvino iwewe watukwa kubva kumavhu awo akashama muromo wao kuashira ngazi yomunun'una wako kubva munyara yako. Apo wechirima ivhu arichazokuberekeri ngesimba raro, unozoita usina kanyi nomupepesheki munyika.” Kheni wakati kunaMambo Mwari, “Kuororwa kwangu kunopinda ukwo kwendingakona kutwara. Penya, wandidzinga nyamashi kubva panyika; ndinozofishika kubva kuhope yako; ndinozoita usina kanyi nomupepesheki munyika; kunozoitika kuti kunyazwi ndiani unozondiona, unozondiuraya.” Mambo Mwari wakati kwaari, “Haiwa, andizvopi! Uwo unozouraya Kheni, kuunzidzirwa kunozouya padera pake kwakapetwa kanomwe.” Mambo Mwari wakaisa chioniso panaKheni, kuti uwo unomuona asazomuuraya. Naapo Kheni wakabuda kubva pamberi paMambo Mwari, akagara munyika yeNodhi, ngokumabvazuva kweEdheni. Kheni wakazia mukadzi wake, naye wakaita mimba, akabara Enokhi. Naye wakaaka dhorobha, akaridudza zina romukororo wake, Enokhi. KunaEnokhi kwakabarwa Iradhi, naIradhi wakabara Mehujaeri, naMehujaeri wakabara Methushaeri, naMethushaeri wakabara Ramekhi. NaRamekhi wakaroora vakadzi vairi, zina roumwe ndiAdha, nezina roumweni ndiZira. NaAdha wakabara Jabhari; iye waiya baba weavo vanogara mumatende, vane n'ombe. Nezina romunun'una wake raiya Jubhari; ndiye waiya baba weavo veshe vanoridza dimbwi neminanzi. NaZira wakabara Thubhari-kheni; ndiye waiya mupfuri weizvo zveshe zvokucheka ndizvo zvethusi nezvesimbi, nomukunda waThubhari-kheni waiya Naama. NaRamekhi wakati kuvakadzi vake, “Adha naZira, izwai izwi rangu; imwimwi vakadzi vaRamekhi, purutanai kuereketa kwangu; ngokuti ndakauraya munhu wakandibaya, uri jaha, ngendaa yokuti ndinozouraya munhu unozondiremadza, kunyazwi jaha, ngendaa yokuti randiremedza. Kudai Kheni echiunzidzirwa kanomwe, ngegwinyiso Ramekhi unozounzidzirwa makumi manomwe namanomwe akapetwa.” NaAdhamu wakaziazve mukadzi wake, naye wakabara mukororo, akadudza zina rake kuti Sethi, ngokuti echiti, “Ngokuti Mwari wandipa mwana umweni pandau yaAbhera; ngokuti Kheni wakamuuraya.” KunaSethi kwakabarwa mukororo; naye wakadudza zina rake kuti Enoshi. Naapo vanhu vakaamba kukumbira ngezina raMambo Mwari. Iri ibhuku remibarirwana yaAdhamu. Naapo paakasika munhu Mwari, wakamusika ngomuedzaniso waMwari. Wakavasika mwamuna nomukadzi; akavafumisa, akadudza zina ravo kuti, “Munhu,” ngezuva revakasikwa. Adhamu wakapona makore zana nemakumi matatu (130), wakabara mukororo ngomuedzaniso wake wemene, wakatodzana naye; akadudza zina rake kuti Sethi. Nemazuva aAdhamu ngesure kwokubara Sethi aiya makore mazana masere (800); naye wakabara vamweni vakororo nevasikana. Nemazuva eshe akapona Adhamu aiya makore mazana mapfumbamwe nemakumi matatu (930), naye wakafa. Naapo Sethi apona makore zana nemashanu (105), akabara Enoshi. Sethi wakapona ngesure kwokubara Enoshi makore mazana masere nemanomwe (807), akabara vamweni vakororo nevasikana. Nemazuva eshe akapona Sethi aiya makore mazana mapfumbamwe negumi namairi (912), naye wakafa. Naapo Enoshi apona makore makumi mapfumbamwe (90), akabara Khenani. Enoshi wakapona ngesure kwokubara Khenani makore mazana masere negumi namashanu (815), akabara vamweni vakororo nevasikana. Nemazuva eshe akapona Enoshi aiya makore mazana mapfumbamwe nemashanu (905), naye wakafa. Naapo Khenani apona makore makumi manomwe (70), akabara Maharareri. Khenani wakapona ngesure kwokubara Maharareri makore mazana masere nemakumi marongomuna (840), akabara vamweni vakororo nevasikana. Nemazuva eshe akapona Khenani aiya makore mazana mapfumbamwe negumi (910), naye wakafa. Naapo Maharareri apona makore makumi matanhatu namashanu (65), akabara Jaredhi. Maharareri wakapona ngesure kwokubara Jaredhi makore mazana masere nemakumi matatu (830), akabara vamweni vakororo nevasikana. Nemazuva eshe akapona Maharareri aiya makore mazana masere nemakumi mapfumbamwe namashanu (895), naye wakafa. Naapo Jaredhi apona makore zana nemakumi matanhatu namairi (162), akabara Enokhi. Jaredhi wakapona ngesure kwokubara Enokhi makore mazana masere (800), akabara vamweni vakororo nevasikana. Nemazuva eshe akapona Jaredhi aiya makore mazana mapfumbamwe nemakumi matanhatu namairi (962), naye wakafa. Naapo Enokhi apona makore makumi matanhatu namashanu (65), akabara Methusera. Enokhi wakahamba naMwari ngesure kwokubara Methusera makore mazana matatu (300), akabara vamweni vakororo nevasikana. Nemazuva eshe akapona Enokhi aiya makore mazana matatu nemakumi matanhatu namashanu (365). Enokhi wakahamba naMwari, naye wakangarangaka; ngokuti Mwari wakamutora. Naapo Methusera apona makore zana nemakumi masere namanomwe (187), akabara Ramekhi. Methusera wakapona ngesure kwokubara Ramekhi makore mazana manomwe nemakumi masere namairi (782), akabara vamweni vakororo nevasikana. Nemazuva eshe akapona Methusera aiya makore mazana mapfumbamwe nemakumi matanhatu nemapfumbamwe (969), naye wakafa. Naapo Ramekhi apona makore zana nemakumi masere namairi (182), wakabara mukororo; wakadudza zina rake kuti Noa echiti, “Uyu unozotiembedzera kubva kumushando wedu, munhamburiko dzenyara dzedu ngendaa yemavhu aakatuka Mambo Mwari.” Ramekhi wakapona ngesure kwokubara Noa makore mazana mashanu nemakumi mapfumbamwe namashanu (595), akabara vamweni vakororo nevasikana. Nemazuva eshe akapona Ramekhi aiya makore mazana manomwe nemakumi manomwe namanomwe (777), naye wakafa. Naapo Noa waiya nemakore mazana mashanu (500), Noa wakabara Shemu, Hamu naJafethi. Naapo vanhu pevakatanga kuwanda padera penyika, nevasikana vakabarwa kwavari, vakororo vaMwari vakaona kuti vanasikana vevanhu vakanaka; navo vakadzitorera kuita vakadzi avo vavakada kudai ngokutsanangura kwavo. Naapo Mambo Mwari wakati, “Mweya wangu auzogari wechitongana nevanhu mhera nariini, ngokuti uri nyama, asi nomunhu mazuva ake anozoita makore zana nemakumi mairi.” (120) Ngemazuva awo aiyapo magakanyara munyika, zve, ngesure kweizvi, apo vakororo vaMwari vakapotera kuvasikana vevanhu, navo vakavabarira vana, avo vaiya vanhu vane simba vekare, vanhu vane mbiri. Mambo Mwari wakaona kuti kushata kwevanhu kwaiya kwakura munyika, nokuti kukarakadza kweshe kwemipinimidzo yomwoyo yavo kwaiya kwakashata nguva dzeshe. NaMambo Mwari wakadzishoora kuti waiya akasika munhu panyika, nazvo zvakarwadza mwoyo wake. Ndizvo Mambo Mwari wakati, “Ndinozoparadza vanhu vendakasika padera penyika, zveshe, vanhu, zvikara, zvinogwezva neshiri dzomumweya; ngokuti zvinondirwadza mwoyo kuti ndakazviita.” Asi Noa wakaona nyasha mukuona kwaMambo Mwari. Iyi ndiyo mibarirwana yaNoa. Noa waiya munhu wakarurama, ari wakaperera pakati pevanhu venguvayo. Noa wakahamba naMwari. NaNoa wakabara vakororo vatatu, Shemu, Hamu naJafethi. Nenyika yaiya yashata pamberi paMwari, nyika yaiya yazara ngokugebenga. Mwari wakaona nyika, ringira, yaiya yashata; ngokuti vanhu veshe vaiya vashaishira njira yavo padera penyika. NaMwari wakati kunaNoa, “Kupera kwenyama yeshe kwaguma pamberi pangu, ngokuti nyika yazara ngokugebenga kubudikidza ndivo; wona, ndinozovauraya pamwepo nenyika. Ita ngarava ngomuti unozwi gofa; unozonasira makamera mungarava, unozoinama mukati nokubanze ngenamo. Iyi ndiyo njira younozoinasira; kureba kwengarava kunozoita mamitha zana nemakumi matatu namatatu (133), kupamhama kwayo kunozoita mamitha makumi mairi namairi (22) noudzamu hwayo hunozoita mamitha gumi namatatu (13). Unozoita fasitera rengarava, naro rinozoita masendimitha makumi marongomuna namarongomuna (44) kureba; newe unozoita musiwo ngeparutii rwayo; unozoinasira inemakamera epashi, noomuturika wechipiri, noomuturika wechitatu. Ngokuti, wona, inini ndinozounza ndambi yemvura padera penyika, kuti iuraye nyama yeshe, iyo mukati mwayo ino mweya unorarama kubva pashi pomudenga; zveshe zviri munyika zvinozofa. Asi ndinozogwinyisa chitenderano changu newe; newe unozopotera mungarava, iwewe nevakororo vako nomukadzi wako nevakadzi vevakororo vako pamwepo newe. Newe unozounza mungarava zviiri ngezviiri zvembeu dzeshe dzezviro zvinopona zvenyama yeshe, kuti uzvingwarire zvipone newe; zvinozoita mwamuna nomukadzi. Kushiri kudai ngokuteererana kwembeu yadzo, nokun'ombe kudai ngokuteererana kwembeu yadzo, nokuzviro zveshe zvinogwezva zvenyika kudai ngokuteererana kwembeu yazvo, zviiri ngezviiri zvembeu dzeshe zvinozouya kwouri, kuti uzvingwarire zvipone. Utorewo mbeu dzeshe dzokudya kunodyiwa, ukuunganidze kwouri, nakwo kunozoita kudya kwako nekwazvo.” Noa wakaita kudaro, wakaita kudai ngeizvo zveshe zvaakapangirwa ndiMwari. Naapo Mambo Mwari wakati kunaNoa, “Pinda mungarava, iwewe nemhuri yako yeshe, ngokuti ndaona kuti uri wakarurama pamberi pangu pamubarirwana uyu. Tora newe zviiri zviiri kanomwe pamhuka yeshe yakacheneswa, mukono nehadzi yawo; nokumhuka dzisikazi kucheneswa zviiri zviiri, mukono nehadzi yawo; kushiri dzomumweya zviiri zviiriwo kanomwe, mwamuna nomukadzi wayo, kuti mbeu ingwaririke padera pehope yenyika yeshe. Ngokuti ngesure kwemazuva manomwe, neni ndinozoita kuti mvura inaye padera penyika mazuva makumi marongomuna nousiku makumi marongomuna; nezviro zveshe zvinopona zvendakaita ndinozozviuraya kubva padera penyika.” Noa wakaita zveshe izvo zvaakapangwa ndiMambo Mwari. Noa waiya aane makore mazana matanhatu (600) apo pakauya mvura yendambi padera penyika. Noa wakapotera mungarava nevakororo vake nomukadzi wake nevakadzi vevakororo vake, kutiza mvura yendambi. Kumhuka dzakasukika nokumhuka dzisikazi kusukika neshiri nokuzviro zveshe zvinogwezva padera pemavhu, zviiri zviiri, mukono nehadzi, zvakapotera mungarava naNoa kudai ngezvaakapanga Mwari kunaNoa. Ngesure kwamazuva manomwe mvura yendambi yakauya padera penyika. Ngegore remazana matanhatu (600) okupona kwaNoa, ngomwedzi wechipiri, ngezuva regumi namanomwe romwedziwo, ngeiro zuva zvinyuka zveshe zvepashi penyika zvakatubuka nemafasitera omudenga akabeurwa. Nemvura yakanaya padera penyika mazuva makumi marongomuna (40), nousiku makumi marongomuna (40). Ngeiro zuva rakatanga kunaya mvura Noa nevakororo vake, Shemu, Hamu naJafethi, nomukadzi waNoa nevakadzi vatatu vevakororo vake, vakapotera mungarava, ivo nemhuka dzeshe, ngokuteererana kwembeu yadzo, nezvifuyo zveshe ngokuteererana kwembeu yazvo, nazvo zveshe zvipuka zvidoko zvinogwezva padera penyika, ngokuteererana kwembeu yazvo, neshiri dzeshe ngokuteererana kwembeu yadzo, shiri dzeshe dzembeu dzeshe. Nazvo zvakapotera mungarava naNoa zviiri zviiri zvembeu yeshe yeizvo zvaiya nomweya wokurarama. Neizvo zvakapoteramwo zvakapotera zviri mukono nehadzi zvembeu yeshe, kudai ngezvaakapanga Mwari, naMambo Mwari wakamukonyeramwo. Mvura yendambi yakanaya mazuva makumi marongomuna padera penyika; nemvura yakawanzisa ikamirudza ngarava, nayo yakamirudzwa padera penyika. Mvura yakakwirira, ikawanda kakurutu padera penyika; nengarava yakaangararika padera pemvura. Nemvura yakakwira kakurutu padera penyika; nemitunhu yeshe yakareba pashi pedenga reshe yakafukidzwa Mvura yakakwira kakurutu metsa yakaita mamitha manomwe padera pemitunhu. Nenyama yeshe yakafa yaihamba padera penyika, shiri, zvifuyo, zvikara nazveshe zvinohamba nezvinogwezva padera penyika, nomunhu weshe; zveshe izvo mumiro yazvo zvinomweya yokurarama, zveizvo zveshe zvaipona munyika yakaoma, zvakafa. Zveshe zvairarama zvakaurawa, izvo zvaiya padera pemavhu, zveshe vanhu nezvifuyo nezvinogwezva neshiri dzomudenga; zvakaparadzwa kubva panyika. NdiNoa ega wakasara, naavo vaiya naye mungarava. Nemvura yakaramba yakakwira padera penyika mazuva zana nemakumi mashanu (150). Asi Mwari wakakarakadza Noa nemhuka dzeshe dzomushango nezvifuyo zveshe zvaiya naye mungarava. NaMwari wakaita kuti dutu rivhuvhute padera penyika, nemvura yakapwa; zvinyuka zvepashi penyika zvakadzama nemafasitera omudenga zvakakonywa, nemvura yainaya kubva mudenga yakaemeswa, nemvura yakaangira kupwa kubva padera penyika. Ngesure kwemazuva zana nemakumi mashanu (150) mvura yakadzerera. Ngomwedzi wechinomwe ngezuva regumi namanomwe romwedziwo ngarava yakagara padera pemitunhu yaArarati. Mvura yakaangira kudzerera metsa mwedzi wechigumi; ngomwedzi wechigumi, ngezuva rokutanga romwedziwo, misoro yemitunhu yakaoneka. Ngesure kwemazuva makumi marongomuna (40) Noa wakabeura fasitera rengarava yaakaita, naye wakatuma gunguwo, naro rakahamba apo naapo metsa mvura yapwa panyika. Wakatumazve gora kubva kwaari, koona kuti mvura yaiya yapwa here padera pemavhu; asi gora arizi kuona pokuzororera rutsoka rwaro, naro rakahwirira kwaari mungarava, ngokuti mvura yaiya ichi padera penyika yeshe. Ndizvo wakatambanudza nyara yake, akaritora, akaripotedza kwaari mungarava. Wakagara mazuva amweni manomwe, wakatumazve gora kubva mungarava; negora rakapotera mukati kwaari madeekoni; wona, mumuromo waro mwaiya neshakani romuorivhi rakaphazurwa. Ndizvo Noa wakazia kuti mvura yapwa panyika. Wakagarazve mazuva amweni manomwe; akatumazve gora; naro arizi kuchazopetuka kwaari. Ngegore remazana matanhatu narimwe (601), ngomwedzi wokutanga, ngezuva rokutanga romwedziwo, mvura yakapwa panyika; naNoa wakadusa icho chaidumaidza ngarava, akaringira, wona, padera pemavhu paiya paoma. Mumwedzi wechipiri, ngezuva remakumi mairi namanomwe romwedziwo, nyika yaiya yaoma. Zvino Mwari wakaereketa kunaNoa echiti, “Buda mungarava, iwewe nomukadzi wako nevakororo vako nevakadzi vevakororo vako. Budisa zveshe zvinopona zvinewe zvenyama yeshe, shiri zvifuyo nezvinohamba, izvo zvinogwezva padera penyika; kuti zvibare kakurutu munyika, zvibarane zviwande padera penyika.” Ndizvo Noa wakabuda nevakororo vake nomukadzi wake nevakadzi vevakororo vake pamwepo naye. Nemhuka dzeshe nezveshe zvinogwezva neshiri dzeshe, kunyazwi chiinyi chinohamba padera penyika, kudai ngokuteererana kwembeu dzazvo, zvakabuda kubva mungarava. Zvino Noa wakaakira Mambo Mwari arita; wakatora imwe kubva kumbeu imwe ngaimwe yemhuka yeshe yakasukika, nokune mbeu yeshiri yeshe yakasukika, akaita midiro inopishwa padera pearita. Naapo Mambo Mwari wakafemba gwema rakanaka; naMambo Mwari wakati mumwoyo mwake, “Andichazotukizve mavhu ngendaa yomunhu, ngokuti kupinimidza kwomwoyo womunhu kwakandoshata kubvira muudoko hwake; zve, andichazoparadzizve zveshe zvinopona kudai ngezvendaita. Apo nyika ichindoripo mukuwo wokukusha nokukukura, kutonhora nokupisha, chirimo nechando, masikati nousiku azvizokoreri.” NaMwari wakafumisa Noa nevakororo vake, naye wakati kwaari, “Baranai muwande, muzadze nyika. Kutyiwa kwenyu nokutyisa kwenyu kunozoapo padera pemhuka yeshe yomunyika, nepadera peshiri yeshe yomumweya, nepadera peicho cheshe chinogwezva panyika, nehove dzeshe dzomuruandhle, zvakaiswa munyara dzenyu. Chiro cheshe chinohamba chinopona chinozoita kudya kwomuri; kudai ngezvendakamupa miriwo yakasvipirika, ndinopa zveshe kwomuri. Asi amuzodyi nyama inokupona kwayo, kuronza kuti, ngazi yayo. Ngegwinyiso ndinozobvunza ngazi yokupona kwenyu, kunyara dzemhuka dzeshe ndinozoibvunza, nokunyarazve dzevanhu, eya, kunyara dzeshe dzehama yomunhu ndinozobvunza kupona kwomunhu. “Kunyazwi ndiani unoparadza ngazi yomunhu, ngazi yake inozoparadzwa ngomunhu; ngokuti Mwari wakaita munhu ngomuedzaniso wake. Imwimwi, baranai muwande; mubarane kakurutu munyika, muwande mukati mwayo.” Zvino Mwari wakaereketa kunaNoa nokuna vakororo vake pamwepo echiti, “Wonai, inini ndinogwinyisa chitenderano changu nemwi, nokumibarirwana yenyu inozoteera sure kwenyu, nokuzvisikwa zveshe zvinopona zvinemwi, shiri, zvifuyo nemhuka dzeshe dzomunyika dzinemwi, zveshe zvinobuda kubva mungarava. Ndinogwinyisa chitenderano changu nemwi kuti nyama yeshe aichazoparadzwizve ngemvura yendambi. Zve, aichazoapo ndambi kuparadza nyika.” Mwari wakati, “Ichi ndicho chioniso chechitenderano chendinoita pakati pangu nemwi, nepakati pezvisikwa zveshe zvinopona zvinemwi, nemibarirwana inozoteera sure kwenyu. Ndinozoisa utahwadande-mutande hwangu mugore, nahwo hunozoita chioniso chechitenderano pakati pangu nenyika. Naapo pendinounza gore padera penyika utahwadande-mutande hunozooneka mugore, neni ndinozokarakadza chitenderano changu chiri pakati pangu nemwi, nepakati pezvisikwa zveshe zvinopona zvenyama yeshe; nemvura aichazoitizve ndambi kuparadza nyama yeshe. Naapo utahwadande-mutande hwaa mugore, ndinozohuringira, naapo ndinozokarakadza chitenderano chisina magumo chiri pakati paMwari nezvisikwa zveshe zvinopona zvenyama yeshe iri padera penyika.” Mwari wakati kunaNoa, “Ichi ndicho chioniso chechitenderano chendakagwinyisa pakati pangu nepenyama yeshe iri padera penyika.” Vakororo vaNoa avo vakabuda kubva mungarava vaiya Shemu, Hamu naJafethi. Hamu ndiye baba waKhenani. Ava vatatu ndivo vakororo vaNoa; ngaavo nyika yeshe yakazadzwa ndivo ngevanhu. Noa wakatanga kuita murimi wevhu, akasima munda wemivhini. Naye wakamwa vhini, akadhakwa; wakaata mutitinini mutende rake. NaHamu, baba aKhenani, wakaona utitinini hwababa ake, akaronzera vakoma vake vaiya pabanze. Zvino Shemu naJafethi vakatora chokufuka, vakachiisa pamapfudzi avo vari vairi, vakahamba ngefundamutete, vakafukidza utitinini hwababa avo; hope dzavo dzaiya dzakaringira sure, avazi kuona utitinini hwababa avo. Naapo Noa amuka kubva mukudhakwa ngevhini, wakazia izvo zvaiya zvaitwa kwaari ngomukororo wake mudoko. Wakati, “Khenani ngaatukwe; unozoita hloko yehloko kunehama dzake.” Naye wakatizve, “Ngaakudzwe Mambo Mwari, Mwari waShemu; naKhenani ngaaite hloko yake. Mwari ngaakurise Jafethi, ngaagare mumatende aShemu; naKhenani ngaaite hloko yake.” Noa wakapona makore mazana matatu nemakumi mashanu (350) ndambi yapera. Mazuva eshe akapona Noa aiya makore mazana mapfumbamwe nemakumi mashanu (950), naye wakafa. Iyi ndiyo mibarirwana yevakororo vaNoa, Shemu, Hamu naJafethi; vana vakabarwa kwavari ngesure kwendambi. Vakororo vaJafethi ndiGoma, Magogi, Madhai, Javhani, Tubhari, Meshekhi naTirasi. Vakororo vaGoma ndiAshikenazi, Rifathi naTogarma. Vakororo vaJavhani ndiErisha, Thashishi, Kitimi naDhodhanimu. Kubva kuneava kwakabuda vanhu vakapararira mumarutii oruandhle. Umwe ngaumwe ane ndimi yake, ngemhatso dzavo mumadzinza avo. Vakororo vaHamu ndiKhushi, Miziraimu, Phuti naKhenani. Vakororo vaKhushi ndiSebha, Havhira, Sabhita, Raama naSabhiteka. Vakororo vaRaama ndiShebha naDhedhani. Khushi wakabara Nimrodhi; ndiye wakatanga kuita munhu mukuru munyika. Waiya phisa muvhimi mukuru pamberi paMambo Mwari; ndizvo zvinozwi, “Kudai ndiNimrodhi phisa muvhimi mukuru pamberi paMambo Mwari.” Nokuamba kwoumambo hwake hwakaambira paBhabheri, Erekhi, Akadhi naKharine munyika yeShina. Kubva munyika iyo wakabuda kuenda Asiria, akaaka Ninevhe, Rehobhoti-Iri, Kara naReseni pakati peNinevhe naKara, iro riri dhorobha guru. Miziraimu wakabara Rudhimu, Anamimu, Rehabhimu, Nafithuhimu, Pathirusimu, Kasiruhimu, (kwaari ndikwo kwakabarwa vaFiristia) naKafithorimu. Khenani wakabara Sidhoni dangwe rake naHethi; navaJebhusi, vaAmori, vaGirigashi, vaHivhi, vaAriki, vaSini, vaArivhadhi, vaZemari nevaHamathi; ngesure kweizvi mhuri dzevaKhenani dzakapararira. Nomugano wevaKhenani waibvira paSidhoni, wechienda Gera metsa kuguma Gaza; wechidarika wakaringira kuenda Sodhoma, Gomora, Adhima neZebhoimu, metsa kuguma Rasha. Ava ndivo vakororo vaHamu, ngokuteererana kwemhatso dzavo nendimi dzavo, munyika dzavo nomumadzinza avo. Shemuwo, baba wevana veshe vaEbha, mukoma mukuru waJafethi, vana vakabarwa kwaari. Vana vaShemu ndiEramu, Ashuri, Aphakishadhi, Rudhi naAramu. Vana vaAramu ndiUzi, Huri, Geta naMashi. Aphakishadhi wakabara Shera; naShera wakabara Ebha. KunaEbha kwakabarwa vakororo vairi, zina roumwe ndiPheregi; ngokuti ngemazuva ake nyika yakagurwa; nezina romunun'una wake ndiJokithani. Jokithani wakabara Arimodhadhi, Sherefi, Hazamavhethi, Jera, Hadhoramu, Uzari, Dhikira; Obhari, Abhimaeri, Shebha, Ofiri, Havhira naJobhabhi; ava veshe vaiya vakororo vaJokithani. Munyika mwevaigara yaibvira Mesha, yechienda Sefa, mutunhu wenyika yokumabvazuva. Ava ndivo vakororo vaShemu, kudai ngokuteererana kwemhatso dzavo, nendimi dzavo, munyika dzavo, kudai ngemadzinza avo. Ava ndivo vemhatso dzevakororo vaNoa, kudai ngokuteererana kwemibarirwana yavo, mumadzinza avo; kubva kune ava madzinza eshe akapararira munyika ngesure kwendambi. Zvino nyika yeshe yaiya nendimi imwe nokuereketa kumwekwo. Naapo vanhu vechithutha kuenda kumabvazuva, vakaona bani rakaterama munyika yeShina; navo vakagaramwo. Navo vakati umwe kunoumweni, “Uyai, ngatiite zvidhina, tizvipishe kakurutu.” Navo vaiya nezvidhina pandau yemapuwe, nebhithumini pandau yematope. Zvino vakati, “Uyai, ngatidziakire dhorobha nethawa rine chachungu charo chinoguma mudenga, ngatidziitire mbiri, kuti tisazopararira padera penyika yeshe.” Zvino Mambo Mwari wakadzaka kuti aone dhorobha nethawa rakaakiwa ngevana vevanhu. Mambo Mwari wakati, “Wonai, vanhu vari umwe, navo veshe vanendimi imweyo; uku ndikwo kutanga kwezviro zvevanozoita; apana chiro chinozovapinga kuita izvo zvevanodziemesera. Uyai, ngatidzake pashi, tikangaidze ndimi yavo, kuti vasazwana umwe noumweni mukuereketa kwavo.” Ndizvo Mambo Mwari wakavaparadzira kubvapo kuenda munyika yeshe; navo vakarekera kuaka dhorobha. Ndizvo zina raro rakadudzwa kuti Bhabheri, ngokuti ndipo apo Mambo Mwari paakakangaidza ndimi yenyika yeshe, kubvapo Mambo Mwari wakavaparadzira padera penyika yeshe. Iyi ndiyo mibarirwana yaShemu. Apo Shemu aane makore zana (100), wakabara Aphakishadhi makore mairi ngesure kwendambi. Shemu wakapona ngesure kwokubara Aphakishadhi makore mazana mashanu (500), akabara vamweni vakororo nevasikana. Naapo Aphakishadhi apona makore makumi matatu namashanu (35), wakabara Shera; naAphakishadhi wakapona ngesure kwokubara Shera makore mazana marongomuna namatatu (403), akabara vamweni vakororo nevasikana. Naapo Shera apona makore makumi matatu (30), wakabara Ebha; naShera wakapona ngesure kwokubara Ebha makore mazana marongomuna namatatu (403), akabara vamweni vakororo nevasikana. Naapo Ebha apona makore makumi matatu namarongomuna (34), wakabara Pheregi; naEbha wakapona ngesure kwokubara Pheregi makore mazana marongomuna nemakumi matatu (430), akabara vamweni vakororo nevasikana. Naapo Pheregi apona makore makumi matatu (30), wakabara Reu, naPheregi wakapona ngesure kwokubara Reu makore mazana mairi nemapfumbamwe (209), akabara vamweni vakororo nevasikana. Naapo Reu apona makore makumi matatu namairi (32), wakabara Serugi; naReu wakapona ngesure kwokubara Serugi makore mazana mairi namanomwe (207), akabara vamweni vakororo nevasikana. Naapo Serugi apona makore makumi matatu (30), wakabara Naho; naSerugi wakapona ngesure kwokubara Naho makore mazana mairi (200), akabara vamweni vakororo nevasikana. Naapo Naho apona makore makumi mairi nemapfumbamwe (29), wakabara Thera; naNaho wakapona ngesure kwokubara Thera makore zana negumi nemapfumbamwe (119), akabara vamweni vakororo nevasikana. Naapo Thera apona makore makumi manomwe (70), wakabara Abrama, Naho naHarani. Zvino iyi ndiyo mibarirwana yaThera. Thera wakabara Abrama, Naho naHarani; naHarani wakabara Roti. Harani wakafa mukuona kwababa ake Thera munyika yechibarirwe chake, muUri revaKharadhea. Abrama naNaho vakaroora vakadzi; zina romukadzi waAbrama raizwi Sarai, nezina romukadzi waNaho raizwi Mirikha, mwana waHarani, uwo waiya baba aMirikha naIsikha. Zvino Sarai waiya ngomwa; waiya asina mwana. Thera wakatora Abrama mukororo wake naRoti mukororo waHarani, mwana womukororo wake, naSarai muzakazi wake, mukadzi waAbrama mukororo wake; navo vakabuda kubva muUri revaKharadhea kuenda munyika yeKhenani; asi apo vaguma Harani, vakagaramwo. Mazuva aThera aiya makore mazana mairi namashanu (205); naThera wakafira muHarani. Zvino Mambo Mwari wakati kunaAbrama, “Buda kubva munyika yako, nokuhama dzako, nokumhatso yababa ako, uende kunyika yendinozokuonisa. Neni ndinozokuita dzinza guru, neni ndinozokufumisa nokuita kuti zina rako riite mbiri; newe unozoita chifumiso. Inini ndinozofumisa avo vanokufumisa, nouwo unokutuka ndinozomutuka; kubudikidza ndiwe mhuri dzeshe dzomunyika dzinozofumiswa.” Ndizvo Abrama wakaenda, kudai ngezvaakaronzerwa ndiMambo Mwari, naRoti wakaenda naye. Abrama waiya aane makore makumi manomwe namashanu (75) apo paakabva Harani. Abrama wakatora Sarai mukadzi wake, naRoti mwana womunun'una wake, nepfuma yavo yeshe yevaiya vaunganidza, nevanhu avo vevakaona muHarani; navo vakabuda kuenda munyika yeKhenani. Naapo vaguma munyika yeKhenani, Abrama wakapinda ngomunyika kuenda kundau yeShekhemu, metsa pamuti womuokhi weMore. Panguvayo vaKhenani vaigaramwo munyikayo. Zvino Mambo Mwari wakaoneka kunaAbrama, akati, “Ndinozopa iyi nyika kune mibarirwana yako.” Naapo wakaakira Mambo Mwari arita, uwo wakaoneka kwaari. Wakabvapo, akaenda kumutunhu uri ngokumabvazuva kweBhetheri, wakaemesa tende rake, Bhetheri riri ngokumabirirazuva neAi ngokumabvazuva. Naapo wakaakira Mambo Mwari arita, akakumbira ngezina raMambo Mwari. Abrama wakahamba, echiangira kuenda Negebhi. Zvino yaiyapo nzara munyikayo. Ndizvo Abrama wakadzaka kuenda Egipite kumbogarayo, ngokuti nzara yaiya huru munyikamwo. Naapo aapasinde pokupotera muEgipite, wakati kunaSarai mukadzi wake, “Inini ndinonasa kuzia kuti uri mukadzi wakanaka mukuringirika. Naapo vaEgipite vookuona, vanozoti, ‘Uyu mukadzi wake.’ Zvino vanozondiuraya, asi iwewe vanozokuponesa. Ndapota, ronza kuti uri hanzvadzi yangu, kuti zvinake kwendiri ngendaa yako, kuti mweya wangu upone ngendaa yako.” Naapo Abrama apinda muEgipite, vaEgipite vakaona kuti mukadzi waiya akanaka kakurutu. Naapo nduna dzaFaro dzakamuona, dzakamuirikidza pamberi paFaro, nomukadzi wakapotedzwa mumhatso yaFaro. Faro wakanasa kubata Abrama ngendaa yaSarai, naAbrama waiya nemakwai, n'ombe, madhuna embongoro, hloko vamuna, nevakadzi, mbongoro hadzi nemakamera. Asi Mambo Mwari wakatambudza Faro nemhatso yake ngemadambudziko makuru ngendaa yaSarai, mukadzi waAbrama. Ndizvo Faro wakadaidza Abrama, akati kwaari, “Chiinyi ichi chowaita kwendiri? Auzi kundironzera ngenyi kuti waiya mukadzi wako? Ngenyi wakaronza kuti, ‘Mukunda wangu?’ Ngokudaro ndakamutora kuita mukadzi wangu. Ndizvo zvino mukadzi wako uyu, mutore, uende.” Faro wakapanga vanhu vake ngendaa yake, navo vakamuperekedza murwendo rwake, nomukadzi wake, nazvo zveshe zvaaiya nazvo. Ndizvo Abrama wakakwira kubva muEgipite, iye nomukadzi wake, nazvo zveshe zvaaiya nazvo, naRoti naye, vakaenda muNegebhi. Zvino Abrama waiya gurudza kakurutu muzvifuyo, sirivha nomukore. Naye wakahamba murwendo rwake kubva Negebhi metsa kuguma Bhetheri, kundau iyo yaiya netende rake pakutanga, pakati peBhetheri neAi, pandau apo paaiya akaita arita pakutanga; naapo Abrama wakakumbira ngezina raMambo Mwari. Zvino Roti uwo wakahamba naAbrama, waiyawo nen'ombe, makwai nematende. Ndizvo nyika aizi kuvakwana, kuti vagare pamwepo, ngokuti pfuma yavo yaiya yakawanda, ndizvo vaiya vasikakoni kuchagara pamwepo. Pakamuka hasha pakati pevaushi vezvifuyo zvaAbrama nevaushi vezvifuyo zvaRoti. Panguva iyo vaKhenani nevaPherizi vaigara munyikamwo. Zvino Abrama wakati kunaRoti, “Ndinokupota, kusaapo hasha pakati pangu newe, nepakati pevaushi vangu nevaushi vako; ngokuti tiri hama. Nyika yeshe airipopi here pamberi pako? Paradzana neni. Kudai iwewe wechienda kumuoshwe, inini ndinozoenda kumudyo; nokuti kudai wechienda kumudyo, inini ndinozoenda kumuoshwe.” Roti wakamirudza madziso ake, akaona bani reshe reJorodhani, kuti raiya nemvura yakawanda kundau dzeshe, kudai ngomunda waMambo Mwari, wakadai ngenyika yeEgipite munjira inoenda Zoa; izvi zvakaitika ngepamberi Mambo Mwari asati aparadza Sodhoma neGomora. Ndizvo Roti wakadzitsanangurira pachake bani reshe reJorodhani; naRoti wakahamba kuenda kumabvazuva; vakaparadzana umwe kubva kunoumweni. Abrama wakagara munyika yeKhenani, naRoti wakagara mumadhorobha omubani, echindothuthisa tende rake metsa kuguma Sodhoma. Zvino vanhu veSodhoma vaiya vakashata, vashaishi vakurutu pamberi paMambo Mwari. Mambo Mwari wakati kunaAbrama, ngesure apo Roti aparadzana naye, “Zvino mirudza madziso ako uringire kubvira pandau youri, dera kubani, kumabvazuva nokumabirirazuva. Ngokuti nyika yeshe younoona, ndinozoipa kwouri nokune mibarirwana yako mhera nariini. Ndinozoita kuti mibarirwana yako idai ngebukuta renyika, kuti kudai aripo munhu angaerenga bukuta renyika, ngokudaro mibarirwana yako ingaerengwa. Miruka, uhambe padera penyika mukureba kwayo nokupamhama kwayo; ngokuti ndinozoipa kwouri.” Ndizvo Abrama wakathuthisa tende rake, akauya, akagara mumiokhi yeMamure, iri muHebroni, wakaakirapo Mambo Mwari arita. Mumazuva amambo Amraferi weShina, mambo Ariokhi weErasa, mambo Kedhoraoma weEramu, namambo Thidhari weGoyimu, madzimambo aya akarwa hondo namambo Bhera weSodhoma, mambo Bhirsha weGomora, mambo Shinabhi weAdhima, mambo Shemebha weZebhoimu, namambo weBhera, (iro ndiro Zoa). Ava veshe vakashongana muBani reSidhimu, (ndiro Ruandhle rwoMunyu.) Vakashandira Kedhoraoma makore gumi namairi, asi ngegore regumi namatatu vakamumukira. Mugore regumi namarongomuna Kedhoraoma wakauya, namadzimambo awo aiya naye, vakanyisa vaRefaimu muAshiterothi-karenaimu, vaZuzimu muHamu, vaEmimu muShavhe-kiriathaimu, nevaHori munyika yemutunhu weSeira, metsa kuguma Eri-pharani, iro riri pamuganu peshango. Zvino vakapetuka, vakauya Eni-mishipati, (iro ndiro Kedheshi), vakanyisa nyika yeshe yevaAmareki, navo vaAmori vaigara Hazazoni-thama. Zvino mambo weSodhoma, mambo weGomora, mambo weAdhima, mambo weZebhoimu namambo weBhera (iro ndiro Zoa) vakabuda, vakaronga hondo kurwa navo muBani reSidhimu, namambo Kedhoraoma weEramu, mambo Thidhari weGoyimu, mambo Amraferi weShina namambo Ariokhi weErasa; madzimambo marongomuna echirwa nemadzimambo mashanu. Zvino Bani reSidhimu raiya rakazara ngemigodhi yebhithumini; naapo madzimambo eSodhoma neeGomora vatiza, vamweni vakawiramwo, naavo vakasara vakatizira kumutunhu. Magaa akatora pfuma yeshe yeSodhoma neGomora, nokudya kwavo kweshe, vakaenda; vakatorawo Roti mukororo womunun'una waAbrama, uwo waigara muSodhoma, nepfuma yake, vakaenda. Zvino umwe wakapokonyoka, wakauya akaronzera Abrama muHebheru, uwo waigara pamiti yemiokhi yeMamure muAmori, mukoma waEshikhori nomukoma waAna; ava vakabatana pamwepo naAbrama. Naapo Abrama azwa kuti hama yake yakabatwa kuitwa hloko, wakatungamirira varwi vake vakadzidziswa, vakabarwa mumhatso yake, vaiya mazana matatu negumi navasere (318), wakavarumbirira metsa kuguma Dhani. Wakapaura varwi vake usiku, iye nevaranda vake, wakavanyisa, akavarumbirira metsa kuguma Hobha, dera kweDhamasekusi. Wakapetudza pfuma yeshe, akapetudzawo Roti hama yake nepfuma yake, vakadzi nevanhu. Ngesure kwokupetuka kwake kubva kwokuuraya Kedhoraoma nemadzimambo aiya naye, mambo weSodhoma wakabuda kooshongana naye muBani reShavhe, (iro ndiro Bani raMambo). Namambo Merekhizedheki weSaremu wakaunza chingwa nevhini; waiya mupristi waMwari Uripadera-Pezveshe. Wakamufumisa, akati, “Ngaafumiswe Abrama ndiMwari Uripadera-Pezveshe, muiti wedenga nenyika. Ngaakudzwe Mwari Uripadera-Pezveshe, uwo wakaisa magaa ako munyara dzako.” Abrama wakamupa chimwe chegumi chazvo zveshe. Namambo weSodhoma wakati kunaAbrama, “Ndipe vanhu, asi iwewe utore hako pfuma.” Asi Abrama wakati kunamambo weSodhoma, “Ndakapika mhiko kunaMambo Mwari, Mwari Uripadera-Pezveshe, muiti wedenga nenyika, kuti andizotori katambo, nokuti rusinga rwegwada, nokuti chiro nachimwe chiri chako, kuitira kuti usazoronza kuti, ‘Ndini ndakafumisa Abrama.’ Andizotori chiro asi izvo zvakadyiwa ngemajaha, nechikoaniswa chevanhu avo vakaenda neni, Ana, Eshikhori naMamure. Ngavatore chikoaniswa chavo.” Ngesure kweizvi zviro izwi raMambo Mwari rakauya kunaAbrama muchioniso rechiti, “Usatya, Abrama, inini ndiri chihlangu chako; nomuthuso wako unozoita mukuru yaamho.” Asi Abrama wakati, “A Mambo Mwari, unozondipenyi, kwechioneka kuti andina mwana, nouwo unogara nhaka yemhatso yangu ndiErieza weDhamasekusi?” NaAbrama wakati, “Wona, auzi kundipa mubarirwana, ndizvo hloko yakabarwa mumhatso yangu ndiyo inozogara nhaka yangu.” Asi izwi raMambo Mwari rakauya kwaari rechiti, “Uyu munhu aazogari nhaka yako; asi uwo unozobva mumuiri wako ndiye unozogara nhaka yako.” Wakamubudisa kubanze, akati, “Ringira mudenga, uerenge nyeredzi, kudai wechikona kudzierenga.” Zvino wakati kwaari, “Ndizvo zvichaita mibarirwana yako.” Naye wakagonda Mambo Mwari, nakwo kwakaerengerwa kwaari kuti kururama. Zvino wakati kwaari, “Ndini Mambo Mwari uwo wakakubudisa kubva kuUri revaKharadhea, kuti ndikupe iyi nyika kuita nhaka yako.” Asi wakati, “A Mambo Mwari, ndinozoita maziirenyi kuti ndinozoigara nhaka?” Wakati kwaari, “Ndiunzire tsiru rine makore matatu, thokazi rembudzi rine makore matatu, gondohwe rine makore matatu, gora nenjia itsva.” Wakamuunzira izvi zveshe, akazviadza ngepakati, wakaisa rupande rumwe panorumweni; asi aazi kuadza shiri. Naapo makodzi akamata padera pemiiri yakaurawa, Abrama wakaadzinga. Naapo zuva roobira, hope huru dzakabata Abrama; wona, chidima chikurutu chinotyisa chakawira padera pake. Zvino Mambo Mwari wakati kunaAbrama, “Zia ngegwinyiso kuti mibarirwana yako inozoita vapfumba munyika isiri yavo, vanozoitamwo hloko; vanozotambudzwa makore mazana marongomuna (400). Asi ndinozoritonga iro dzinza revanozoshandira; ngesure vanozobudamwo vane pfuma yakawanda. Asi iwewe pachako unozoenda kune madzibaba ako mukunyarara; unozotsirwa waa musharuka yaamho. Ngomubarirwana wechirongomuna vanozopetuka panozve, ngokuti kushata kwavaAmori akusati kwaperera.” Naapo zuva rapota, kwasvipa, wona, hari inopwititika chiushi nesasi rinobaka zvakapinda pakati pezvigurwa. Ngeiro zuva Mambo Mwari wakaita chitenderano naAbrama echiti, “Ndapa iyi nyika kune mibarirwana yako, kubvira kurwizi rweEgipite, kuguma kurwizi rukuru, rwizi Yufratesi, nyika yevaKheni, vaKhenizi, vaKadhimoni, vaHiti, vaPherizi, vaRefaimu, vaAmori, vaKhenani, vaGirigashi nevaJebhusi.” Zvino Sarai mukadzi waAbrama aazi kumubarira vana. Waiya nehloko, musikana waibva Egipite, zina rake ndiHaga; naSarai wakati kunaAbrama, “Wona, zvino Mambo Mwari wakandiita kuti ndisabara vana; potera, ndinokupota, kuhloko, musikana wangu; pamweni ndingaita vana ndiye.” NaAbrama wakapurutana izwi raSarai. Ndizvo Abrama agara makore gumi munyika yeKhenani, Sarai mukadzi waAbrama wakatora Haga muEgipite hloko yake, akamupa kunaAbrama mwamuna wake kuita mukadzi. Wakapotera munaHaga, naye akaita mimba, naapo aona kuti waane mimba, wakashoora tenzi wake. Sarai wakati kunaAbrama, “Kushaishirwa kwangu ngakugare kwouri! Ndakakupa hloko musikana wangu paditi rako, naapo aona kuti waane mimba, wakandishoora mukuona kwake. Mambo Mwari ngaatonge pakati pako neni.” Asi Abrama wakati kunaSarai, “Wona, hloko musikana wako uri munyara yako; ita kwaari kudai ngechiri chakanaka mukuona kwako.” Zvino Sarai wakamutambudza, naye wakatiza kubva kwaari. Ngirosi yaMambo Mwari yakamuona ari pachinyuka chemvura mushango, pachinyuka chiri munjira inoenda Shuri. Nayo yakati, “Haga, hloko musikana waSarai, wabva kuri? Unoenda kuri?” Wakati, “Ndinotiza kubva kuhope yatenzi wangu, Sarai.” Ngirosi yaMambo Mwari yakati kwaari, “Hwirira kunatenzi wako, udzipfaise pashi penyara dzake.” Ngirosi yaMambo Mwari yakatizve kwaari, “Ndinozowanza kakurutu mibarirwana yako, kuti isakona kuerengwa ngokuwanda.” Nengirosi yaMambo Mwari yakati kwaari, “Wona, waane mimba, unozobara mukororo; unozodudza zina rake kuti Ishumaeri, ngokuti Mambo Mwari wakazwa kutambudzika kwako. Unozodai ngembongoro yomushango; nyara yake inozorwisana nomunhu weshe, nenyara yomunhu weshe inozorwisana naye; naye unozogara echirwisana nehama dzake dzeshe.” Ndizvo wakadudza zina raMambo Mwari uwo wakaereketa kwaari kuti, “Iwewe ndiwe Mwari unondiona,” ngokuti wakati, “Ngegwinyiso ndaona Mwari neni ndikasara ndechipona ndamuona here?” Ndizvo chinyuka chakadudzwa kuti, “Bheeri-rahai-roi;” chiri pakati peKadheshi neBheredhi. Haga wakabarira Abrama mukororo; naAbrama wakadudza zina romukororo wake, waakabarirwa ndiHaga, kuti Ishumaeri. Abrama waiya aane makore makumi masere namatanhatu (86) apo Haga paakabarira Abrama Ishumaeri. Naapo Abrama aane makore makumi mapfumbamwe nemapfumbamwe (99), Mambo Mwari wakaoneka kunaAbrama, wakati kwaari, “Inini ndini Mwari Unesimbareshe; hamba pamberi pangu, uite wakaperera. Neni ndinozoita chitenderano changu pakati pangu newe, ndinozokuwanza kakurutu.” Abrama wakawa pashi ngehope yake; naMwari wakati kwaari, “Wona, chitenderano changu chinewe, newe unozoita baba wemadzinza akawanda. Zina rako arichazodaidzwi kuti Abrama, asi zina rako rinozozwi Abrahama; ngokuti ndakuita baba wemadzinza akawanda. Neni ndinozokuita kuti ubare kakurutu; ndinozoita madzinza ndiwe, nemadzimambo anozobuda mwouri. Ndinozogwinyisa chitenderano changu pakati pangu newe, nemibarirwana yako inouya sure kwako, nemibarirwana yavo kuti chiite chitenderano chemhera nariini, ndiite Mwari kwouri nokumibarirwana yako inouya sure kwako. Ndinozopa kwouri nokumibarirwana yako inouya sure kwako nyika iyo youri mupara kweiri, nyika yeshe yeKhenani, kuita nhaka yenyu metsa nariini; neni ndinozoita Mwari wavo.” Mwari wakati kunaAbrahama, “Asi iwewe, unozongwarira chitenderano changu, iwewe nemibarirwana yako inouya sure kwako nokumibarirwana yavo yeshe. Ichi ndicho chitenderano changu chomunozongwarira, chiri pakati pangu nemwi, nemibarirwana yako inouya sure kwako; mwamuna weshe uri pakati penyu unozochekwa. Munozochekwa panyama, ganda repamberi pomuiri wenyu; chinozoita chioniso chechitenderano pakati pangu nemwi. Uwo waane mazuva masere pakati penyu unozochekwa; mwamuna weshe pakati pemibarirwana yenyu, kunyazwi wakabarwa mumhatso yako, nokuti wakatengwa ngemare kubva kuvapara, usiri wedzinza rako. Weshe wakabarwa mumhatso yako, nowakatengwa ngemare yako, vanosisira kuti vachekwe. Ndizvo chitenderano changu chinozoa munyama yenyu kuita chitenderano chemhera nariini. Mwamuna weshe usikazi kuchekwa, uwo usikazi kuchekwa nyama yeganda repamberi pomuiri wake unozogurwa kubva kuvanhu vake; iye wagura chitenderano changu.” NaMwari wakati kunaAbrahama, “Ngendaa yaSarai mukadzi wako, auchazodaidzi zina rake kuti Sarai, asi zina rake rinozozwi Sara. Neni ndinozomufumisa, ndinozokupa mukororo ndiye; ndinozomufumisa, naye unozoita mai wemadzinza; madzimambo evanhu anozobuda mwaari.” Naapo Abrahama wakawa pashi ngehope yake naye wakasheka, akati mumwoyo mwake, “Mwana unozobarwa here kumunhu kwaari waane makore zana (100)? Sara uwo une makore makumi mapfumbamwe (90) unozobara mwana here?” Abrahama wakati kunaMwari, “A kudai Ishumaeri angapona pamberi pako!” Mwari wakati, “Haiwa, asi Sara mukadzi wako unozokubarira mukororo; newe unozodudza zina rake kuti Isaka. Ndinozogwinyisa chitenderano changu naye kuita chitenderano chemhera nariini kune mibarirwana yake inouya sure kwake. Asi ngendaa yaIshumaeri, ndakuzwa; wona, ndinozomufumisa, ndinozoita kuti abare kakurutu, ndinozomuwanzisa kakurutu; unozoita baba wevazvare gumi navairi, ndinozomuita dzinza guru. Asi ndinozogwinyisa chitenderano changu naIsaka, uwo waanozokubarira Sara ngomukuwo uyu wakaemeswa gore rinouya.” Naapo apedza kuereketa naye, Mwari wakakwira kubva pana Abrahama. Naapo Abrahama wakatora Ishumaeri mukororo wake, nehloko dzeshe dzakabarwa mumhatso yake, naavo veshe vakatengwa ngemare yake, mwamuna weshe waiya pakati pevanhu vemhatso yaAbrahama, wakavacheka nyama yeganda repamberi pomuiri wavo, ngezuva rimwero raakaereketa Mwari kwaari. Abrahama waiya aane makore makumi mapfumbamwe nemapfumbamwe (99) apo paakachekwa nyama yeganda repamberi pomuiri wake. Ishumaeri mukororo wake waiya aane makore gumi namatatu apo pakachekwa nyama yeganda repamberi pomuiri wake. Ngezuva rimwero Abrahama naIshumaeri mukororo wake vakachekwa. Nevamuna veshe vemhatso yake, avo vakabarwa mumhatso, naavo vakatengwa ngemare kubva kuvapara vakachekwa pamwepo naye. Mambo Mwari wakaoneka kunaAbrahama pamiti yemiokhi yeMamure, apo paaiya akagara pamusiwo wetende ngomukuwo wokupisha kwezuva. Wakamirudza madziso ake akaringira, akaona, vamuna vatatu vakaema vakaringirana naye, naapo avaona, wakarumba kooshongana navo echibva pamusiwo wetende, akadzikotamisa pashi, akati, “Mambo wangu ndapota, kudai zvino ndaona nyasha mukuona kwenyu, musapinda kuenda mberi kubva kuno muranda wenyu. Mvura shomani ngaiunzwe, mushambe tsoka dzenyu, muzorore pashi pomuti, apo ndechiunza chigurwa chechingwa, mugwinyise mwoyo yenyu; mwapedza munozopinda kuenda mberi, ngokuti mwauya pane muranda wenyu.” Navo vakati, “Ita kudai ngezvewaronza.” Abrahama wakakasira kupotera mutende, mwaiya naSara, akati, “Kasira kunasira zvipimo zvitatu zvoufu hwakamoseka, uhukanye, uite zvingwa.” Abrahama wakarumba kuenda kudanga, akaunza konyana rakapfaa, rakanuna, akaripa kumuranda; uwo wakakasira kurinasira. Wakatora mukaka wakakora nomukaka mumbishi, nekonyana raaiya anasirira, akazvigadzika pamberi pavo; naye wakaema pasinde pavo pashi pomuti, navo vakadya. Vakati kwaari, “Sara mukadzi wako uri pari?” Wakati, “Uri mutende.” Wakati, “Ngegwinyiso ndinozopetuka kwouri ngomukuwo uyu waguma, naSara mukadzi wako unozoa nomukororo.” NaSara waipurutana ari pamusiwo wetende, uwo waiya sure kwake. Zvino Abrahama naSara vaiya vaavasharuka, vatigwedere ngouwandu hwemakore; nomuitiro wevakadzi waiya usikachaitiki kunaSara. Ndizvo Sara wakasheka mumwoyo mwake echiti, “Ndaachembere kudai, ndingadakara here, nemwamuna wangu aaharahwa naye?” Mambo Mwari wakati kunaAbrahama, “Ngenyi Sara asheka nokuronza kuti, ‘Ngegwinyiso inini ndinozobara mwana here, ndaachembere kudai?’ Chiripo here chinonyanya kukonza kunaMambo Mwari? Ngomukuwo wakaemeswa ndinozopetuka kwouri, apo nguva yaguma, Sara unozobara mukororo.” Asi Sara wakaramba echiti, “Andizi kusheka;” ngokuti waitya. Wakati, “Haiwa, asi washeka.” Zvino vanhu avo vakamiruka kubvapo, vakaringira Sodhoma, naAbrahama wakahamba navo kuvaperekedza parwendo rwavo. Mambo Mwari wakati, “Ndinozofishira Abrahama zvendinoda kuita here, zvechioneka kuti ngegwinyiso Abrahama unozoita dzinza guru rine simba, nemadzinza eshe enyika anozofumiswa mwaari? Haiwa, ngokuti ndakamutsanangura kuti apange vana vake nevemhatso yake vanozouya sure kwake, kuti vangwarire njira yaMambo Mwari, kuti vaite zvakarurama nokutonga kwakanaka; kuti Mambo Mwari aunze padera paAbrahama izvo zvaakamugondisa.” Zvino Mambo Mwari wakati, “Ngokuti kuchemerwa kweSodhoma nokweGomora kukurutu nokushaisha kwavo kwakashata yaamho, ndinozodzaka ndione kuti vakaita here kudai ngokuchema ukwo kwakaguma kwendiri; kuti zvisikazi kudaro ndinozozia.” Ndizvo vamuna vakakunukuka kubvapo, vakaenda Sodhoma, asi Abrahama wakaramba akaema pamberi paMambo Mwari. Zvino Abrahama wakakwedzera pasinde, akati, “Unozovaparadza here vakarurama pamwepo nevakashata? Pamweni varipo vakarurama makumi mashanu mudhorobhamwo; unozovaparadza usikakunguriri ndau iyo here ngendaa yevakarurama vari makumi mashanu varimwo? Ngazviite kuretu kubva kwouri zviro zvakadaro, kuuraya vakarurama pamwepo nevakashata, ngokudaro vakarurama vangazodai ngevakashata! Ngazviite kuretu kubva kwouri! Mutongi wenyika yeshe aazoiti zvakarurama here?” NaMambo Mwari wakati, “Kudai ndikaona muSodhoma vakarurama makumi mashanu mudhorobhamwo, naapo ndinozokungurira ndau yeshe ngendaa yavo.” Abrahama wakapingura, akati, “Ringira zvino, ndakatsunga kuereketa kunaMambo, inini ndiri chiinyi asi bukuta nemarota. Pamweni vanozotamika vashanu kuita makumi mashanu evakarurama, unozoparadza dhorobha reshe here ngokutamika kwevashanu?” Naye wakati, “Kudai ndechizoonamwo makumi marongomuna navashanu, andizoriparadzi.” Wakaereketazve kwaari, akati, “Pamweni vanozoonekamwo makumi marongomuna.” Naye wakati, “Andizoriparadzi ngendaa yevari makumi marongomuna.” Wakati, “A Mambo asatseneka, neni ndinozoereketa. Pamweni panozoonekamwo makumi matatu.” Naye wakati, “Andizochiiti kudai ndikaonamwo makumi matatu.” Naye wakati, “Ringira, ndatsunga kuereketa kunaMambo. Pamweni vanozoonekamwo makumi mairi.” Naye wakati, “Andizoriparadzi ngendaa yevari makumi mairi.” Naapo wakati, “A Mambo asatseneka, neni ndinozoereketa kamwe kano kega. Pamweni vanozoonekamwo gumi.” Naye wakati, “Andizoriparadzi ngendaa yevari gumi.” Mambo Mwari wakaenda, apo aiya arekera kuereketa naAbrahama, naAbrahama wakapetuka kundau yake. Ngirosi mbiri dzakaguma Sodhoma madeekoni; naRoti waiya akagara pamusiwo weSodhoma. Naapo Roti adziona, wakamiruka kooshongana nadzo, wakadzikotamisa pashi ngehope yake. Naye wakati, “Madzimambo angu, paukai ndinomupota, mupotere mumhatso yomuranda wenyu, mugare usiku hweshe, mushambe tsoka dzenyu; nemwi munozofumira kumiruka mwechienda rwendo rwenyu.” Dzakati, “Haiwa; asi tinozogara mupato usiku hweshe.” Asi wakadzinyengerera kakurutu; nadzo dzakapauka kwaari dzikapinda mumhatso yake; akadzinasirira kudya, akabika zvingwa zvisina mumera, nadzo dzakadya. Asi vasati vaata, vamuna vomudhorobha, vamuna veSodhoma, veshe majaha nevakuru, vamuna veshe metsa pamwamuna wokugumisira vakatendenedza mhatso. Vakadaidzira kunaRoti, vakati kwaari, “Vari pari vamuna avo vapotera kwouri usiku huno? Vabudise kubanze kwetiri, kuti tivazie.” Roti wakabuda pamusiwo kuenda kuvanhu, akakonya musiwo sure kwake, naye wakati kwavari, “Ndinomupota, hama dzangu, musaita zvakashata kudaro. Ringirai, ndine vasikana vairi vasikazi kumbozia mwamuna; ngandivabudise kwomuri, muite kwavari kudai ngezvinonakira mukuona kwenyu; asi kune ava vamuna musaita chiro, ngokuti vauya pashi pedenga rangu.” Asi vakati, “Ema ngesure!” Navo vakati, “Uyu wakauya kuzogara muno ari munhu mupara, naye unoda kuita mutongi; zvino tinozoita zvakapinda kushata kwouri kune avo.” Navo vakamutsikirira kakurutu munhu uwo Roti, vakakwedzera kuti vapwanye musiwo. Asi vamuna vakabudisa nyara dzavo, vakakweera Roti mukati mwemhatso kwavari, vakakonya musiwo. Vakapofomadza vamuna vaiya pamusiwo, veshe vadoko nevakuru; ngokudaro vakatambudzika ngokutsvaka musiwo. Zvino vamuna vakati kunaRoti, “Une vamweni muno here ngepabanze peava? Vakwambo, vakororo vako, nevanasikana vako, kunyazwi ndiani wounaye mudhorobha muno, vabudise kubva mundau iyi; ngokuti tinozoparadza ndau iyi, ngokuti kuchemerwa ngendaa yevanhu varo kwaita kwakakura pamberi paMambo Mwari; naMambo Mwari wakatituma kuti tiiparadze.” Ndizvo Roti wakabuda kubanze, akaereketa kuvakwambo vake, avo vakaroora vana vake, akati, “Mirukai, mubude kubva mundau iyi, ngokuti Mambo Mwari unozoparadza dhorobha iri.” Asi vakwambo vake vakapinimidza kuti unoita jee. Naapo kwooita mambakwedza, ngirosi dzakakasirisa Roti dzechiti, “Miruka, utore mukadzi wako nevanasikana vako vairi, vari pano, kuti usazoparadzwa mukushata kwedhorobha.” Asi wakazungaira; vamuna avo vakabata nyara yake, nenyara yomukadzi wake, nenyara dzevanasikana vake vairi, Mambo Mwari echimuitira nyasha; vakamubudisa kubanze, vakamuisa ngokubanze kwedhorobha. Naapo vaiya vavabudisa kubanze, vakati, “Tiza kuti upone; usaringira sure kwako, usagarazve mubani kunyazwi ngepari; tiza uende kumitunhu, kuti usazourawa.” Roti wakati kwavari, “Haiwa, madzimambo angu Wona zvino, muranda wako waona nyasha mukuona kwako, newe wakurisa nyasha dzako, dzewaonisa kwendiri ngokuponesa ndaramo yangu; asi andingatiziri kumitunhu, kuti kushata kusazondigumira, neni ndife. Ringira zvino, iri dhorobha riri pasinde kuti nditizire kweriri, naro idoko. A, nditendere nditiziremwo (asi arisidokopi here?) Nomweya wangu unozopona.” Naye wakati kwaari, “Wona, ndakutenderawo; andizoparadzi dhorobha iro rowaereketa ndiro. Kasira, tiziramwo; ngokuti andikoni kuita chiro usati wagumayo.” Ndizvo zina redhorobha iro rakadudzwa kuti Zoa. Zuva raiya rabuda padera penyika apo Roti paakapotera muZoa. Zvino Mambo Mwari wakanayisa padera peSodhoma neGomora surufa nomuriro zvinobva kunaMambo Mwari mudenga. Wakaparadza madhorobha awo nebani reshe, navo veshe vagari vemadhorobha awo, nezvaimera pamavhu. Asi mukadzi waRoti, ari sure kwake, wakaringira sure akaita chituka chomunyu. Abrahama wakafumira mangwanani kuenda kundau iyo yaaiya akaema pamberi paMambo Mwari; naye wakaringira Sodhoma neGomora, nokunyika yeshe yomubani, akaona chiushi chenyika chechipwititika kudai ngechiushi chechoto. Ndizvo zvakaitika, apo Mwari paakaparadza madhorobha omubani, Mwari wakakarakadza Abrahama, akabudisa Roti kubva pakati pezvakaparadzwa, apo paakaparadza madhorobha awo mwaigara Roti. Zvino Roti wakakwira kubva Zoa, akagara mumitunhu, nevanasikana vake vairi, ngokuti waitya kugara muZoa. Wakagara mubako, iye nevanasikana vake vairi. Zvino dangwe rakati kunomudoko, “Baba edu yaaharahwa, akuna mwamuna munyika ungazopotera kwetiri kudai ngomushuma wenyika yeshe. Uya, ngatiite kuti baba edu vamwe vhini, nesu tinozoatana navo, kuti tingwarire rudzi rwababa edu.” Vakaita kuti baba avo vamwe vhini usiku uhwo, wedangwe wakapotera akaatana nababa ake; navo avazi kuzia apo paakaata pashi nokuti paakamuka. Mangwani mangwanani wedangwe wakati kuno mudoko, “Wona, ndakaatana usiku hwezuro nababa angu; ngatiite kuti vamwe vhini usiku hunozve; upotere iwewe uatane navo, kuti tingwarire rudzi rwababa edu.” Vakaita kuti baba avo vamwe vhini ngouhwo usikuzve, nomudoko wakamiruka, akaatana navo; navo avazi kuzia apo paakaata pashi nokuti paakamuka. Ngokudaro vanasikana veshe vaRoti vakaita mimba ndibaba avo. Wedangwe wakabereka mukororo, akadudza zina rake kuti Moabhi; ndiye wakaita baba wevaMoabhi metsa nanyamashi. Nomudoko wakaberekawo mukororo, akadudza zina rake kuti, Bhenami; ndiye wakaita baba wevana vaAmoni metsa nanyamashi. Abrahama wakabvapo akaenda kunyika yeNegebhi, akagara pakati peKadheshi neShuri; naye wakagara kamukuwo muGera. NaAbrahama wakati ngendaa yaSara mukadzi wake, “Mukunda wangu.” NaAbhimerekhi mambo weGera wakatuma vanhu, akatora Sara. Asi Mwari wakauya kunaAbhimerekhi mukurota usiku, akati kwaari, “Wona, iwewe uchafa, ngendaa yomukadzi wewakatora; ngokuti mukadzi womunhu.” Zvino Abhimerekhi waiya asati akwedzera kwaari; wakati, “Mambo Mwari, unozouraya here nedzinza rakarurama? Iye aazi kuronza here emene kwendiri kuti, ‘Mukunda wangu?’ Naye emene wakaronza kuti, ‘Mukoma wangu.’ Mugwinyiso romwoyo wangu nokutama ndaa kwenyara dzangu ndakaita ichi.” Zvino Mwari wakati kwaari mukurota, “Eya, ndinozia kuti wakaita ichi mugwinyiso romwoyo wako; ndini ndakakupinga kuti usandishaishira; ndizvo andizi kukutendera kuti umugwame. Ndizvo zvino hwirinza mukadzi womunhu; ngokuti iye muprofeti, naye unozokukumbirira, newe unozorarama. Asi kuti ukarekera kumuhwirinza, zia kuti ngegwinyiso unozofa, iwewe navo veshe vari vako.” Ndizvo Abhimerekhi wakafumira kumiruka mangwanani, akadaidza varanda vake veshe, akavaronzera zviro zveshe izvi; vamuna vakatya kakurutu. Naapo Abhimerekhi wakadaidza Abrahama, akati kwaari, “Waitenyi kwetiri? Ndakakushaishirenyi, zvaita kuti uunze padera pangu nepoumambo chishaishi chikuru? Waita kwendiri zvisikasisiri kuti zviitwe.” Abhimerekhi wakati kunaAbrahama, “Chiinyi chowakaona iwewe kuti uite ichi chiro?” Abrahama wakati, “Ndakachiita ngokuti ndakapinimidza kuti, ‘Ngegwinyiso akuna vanotya Mwari kundau iyi; vanozondiuraya ngendaa yomukadzi wangu.’ ” Zvakanyadaro, ngegwinyiso mukunda wangu, mwana wababa angu, asi haiwa mwana wamai angu; naye wakaita mukadzi wangu. Naapo Mwari paakaita kuti ndipepesheke kubva kumhatso yababa angu, ndakati kwaari, “Idzi ndidzo nyasha dzounosisira kuita kwendiri; kuti, kundau dzeshe kwetinozoguma, uronze ngendaa yangu kuti, ‘Mukoma wangu.’ ” Abhimerekhi wakatora makwai, n'ombe nehloko vamuna nevakadzi, akavapa kunaAbrahama, akahwirinza kwaari Sara mukadzi wake. Abhimerekhi wakati, “Ringira, nyika yangu iri pamberi pako, gara apo pounoda.” Wakati kunaSara, “Ringira, ndapa mukoma wako zvigurwa zvesirivha gumi remazana, kuonisa kuti wapembedzwa, auna ndaa, pamberi pomunhu weshe iwewe waruramiswa.” Zvino Abrahama wakakumbira kunaMwari; naMwari wakaponesa Abhimerekhi nomukadzi wake, nehloko dzake dzevakadzi kuti vabare vana. Ngokuti Mambo Mwari waiya atsiira ndani dzeshe dzevemhatso yaAbhimerekhi, ngendaa yaSara mukadzi waAbrahama. Mambo Mwari wakahambira Sara kudai ngezvaakaronza, naMambo Mwari wakaita kunaSara kudai ngezvaakagondisa. NaSara wakaita mimba, wakabarira Abrahama mukororo aamusharuka kakurutu, ngomukuwo uwo wakaemeswa waakaereketa ndiwo Mwari kwaari. Abrahama wakadudza zina romukororo wake, uwo wakabarirwa kwaari, waakamubarira Sara, kuti Isaka. Abrahama wakacheka mukororo wake Isaka apo aane mazuva masere, kudai ngezvaakamupanga Mwari. Abrahama waiya nemakore zana apo Isaka mukororo wake paakabarwa kwaari. Sara wakati, “Mwari wakaita kuti ndisheke; ndizvo veshe vanozozwa vanozosheka pamwepo neni.” Wakati, “Ndiani waizoronza kunaAbrahama kuti Sara unozoamwisa vana? Ngokuti ndamubarira mukororo aamusharuka kakurutu.” Nomwana wakakura, akarumurwa; naAbrahama wakanasirira dhiri guru ngeiro zuva rakarumurwa Isaka. Asi Sara wakaona mukororo waHaga muEgipite waakabarira Abrahama, echiita jee naIsaka, mukororo wake. Ndizvo wakati kunaAbrahama, “Dzinga uyu mukadzi hloko nomukororo wake, ngokuti mukororo womukadzi uyu hloko aazogari nhaka pamwepo nomukororo wangu, Isaka.” Ichi chiro chakarwadza kakurutu kunaAbrahama, ngendaa yomukororo wake. Asi Mwari wakati kunaAbrahama, “Usarwadziwa ngendaa yomurumbwana, nendaa yomukadzi wako uri hloko. Kunyazwi ngechiri chaanoronza Sara kwouri, chiite kudai ngezvaanoronza; ngokuti kubudikidza ndiIsaka rudzi rwako runozodaidzwa ngezina raIsaka. Ndinozoitazve dzinza ngomukororo womukadzi hloko, ngokuti iye rudzi rwako.” Ndizvo Abrahama wakamiruka mangwanani, akatora chingwa nenyede yemvura, akazvipa Haga, echiriisa papfudzi pake, nomwana, akamuendesa. Naye wakabvapo, akapepesheka mushango reBheeri-shebha. Naapo mvura yaiya munyede yapera, wakaisa mwana pashi perimwe remapfiba. Iye wakaenda akagara pashi pakaringirana naye kamuhambo kokuposhera musee kuendayo; ngokuti wakati, “Ndisazoona kufa kwomwana.” Naye wakagara akaringirana naye, akaboorera ngeizwi rake, echichema. Mwari wakazwa izwi romurumbwana; nengirosi yaMwari yakadaidzira kunaHaga iri mudenga, yakati kwaari, “Chiinyi chinokutambudza, Haga? Usatya; ngokuti Mwari wazwa izwi romurumbwana apo paari. Miruka, umirudze murumbwana, umutengure munyara dzako; ngokuti ndinozomuita dzinza guru.” Zvino Mwari wakapembenudza madziso ake, akaona chinyuka chemvura; wakaenda akazadza nyede ngemvura, akaipa murumbwana kuti amwe. Mwari waiya nomurumbwana, wakakura; akagara mushango akaita muvhimi ngouta. Naye wakagara mushango rePharani; namai ake vakamutorera mukadzi kubva kunyika yeEgipite. Panguva iyo Abhimerekhi naFikori nduna yehondo yake vakati kunaAbrahama, “Mwari unewe kuneizvo zveshe zvounoita. Ndizvo zvino pika kwendiri panapa ndiMwari kuti auzondibati ngokuchengedzera inini nokuti mubarirwana wangu nokuti mubarirwana womukororo wangu, asi kudai ngenyasha dzandakaita kwouri, unozondiitira inini nokunyika youri chigarandimo kweiri.” NaAbrahama wakati, “Ndinozopika.” Abrahama wakagunun'unira Abhimerekhi ngendaa yechinyuka chemvura, icho chaiya chabvukwa ngesimba ngevaranda vaAbhimerekhi. Abhimerekhi wakati, “Andimuzii kuti ndiani wakaita ichi chiro; auzi kundironzera, neni andizi kumbozvizwa metsa nyamashi.” Ndizvo Abrahama wakatora makwai nen'ombe akazvipa Abhimerekhi, nevanhu vairi ava vakaita chitenderano. Abrahama wakapaura makwai makadzi manomwe akaaisa ega. NaAbhimerekhi wakati kunaAbrahama, “Chiinyi biningidzo remakwai makadzi manomwe ewaisa ega?” Iye wakati, “Makwai makadzi manomwe aya unozoatora kubva munyara yangu kuti aite chapupu kwendiri, kuti ndini ndakatsa ichi chinyuka.” Ndizvo ndau iyo yakadudzwa zina kuti Bheeri-shebha; ngokuti apapo veshe vairi vakapikirana mhiko. Ndizvo vakaita chitenderano paBheeri-shebha; Abhimerekhi naFikori nduna yehondo yake vakamiruka, vakahwirira kunyika yevaFiristia. Abrahama wakasima muti wemuthamarisiki muBheeri-shebha, akakumbirapo ngezina raMambo Mwari, Mwari wemhera nariini. Abrahama wakagara ari munhu mupara munyika yevaFiristia mazuva akawanda. Ngesure kweizvi zviro, Mwari wakaedza Abrahama, wakati kwaari, “Abrahama!” Naye wakati, “Ndiri pano.” Wakati, “Tora mukororo wako, mukororo wako ega, Isaka, uwo wounoda, uende kunyika yeMoria; umupirepo kuita mudiro wokupisha, padera poumwe wemitunhu wendinozokuronzera.” Ndizvo Abrahama wakafumira kumiruka mangwanani, wakasungira chigaro pambongoro yake, akatora vairi vemajaha ake naye naIsaka mukororo wake; wakaadza huni dzokupisha mudiro, akamiruka, akaenda kundau yaakamuronzera ndiyo Mwari. Ngezuva rechitatu Abrahama wakamirudza madziso ake, akaona ndau iri kuretu. Zvino Abrahama wakati kune majaha ake, “Garai pano imwimwi nembongoro; inini nomurumbwana tinozoendayo koodira, tinozouyazve kwomuri.” Abrahama wakatora huni dzokupisha mudiro, akadzitwarisa Isaka mukororo wake; naye wakatora muriro nebanga munyara dzake. Ndizvo vakahamba veshe pamwepo. Isaka wakati kunaAbrahama baba ake, “Baba angu!” Naye wakati, “Ndiri pano, mukororo wangu.” Wakati, “Ringirai, muriro nehuni zviri pano, asi riri pari gwai rokuita mudiro wokupisha?” Abrahama wakati, “Mukororo wangu, Mwari unozodzionera emene gwai rokuita mudiro wokupisha.” Ndizvo vakahamba veshe pamwepo. Naapo vaguma pandau yaakaronzerwa ndiMwari, Abrahama wakaakapo arita, akaronga huni, akasunga Isaka mukororo wake, akamuradzika paarita, padera pehuni. Zvino Abrahama wakatambanudza nyara yake, akatora banga kuti auraye mukororo wake. Asi ngirosi yaMambo Mwari yakadaidzira kwaari iri mudenga, ikati, “Abrahama, Abrahama!” Naye wakati, “Ndiri pano.” Nayo yakati, “Usaisa nyara yako padera pomurumbwana nokuti kuita chiro kwaari; ngokuti zvino ndinozia kuti iwewe unomutya Mwari, ngokuti auzi kuramba nomukororo wako, mukororo wako umwe ega, kubva kwendiri.” Abrahama wakamirudza madziso ake, akaringira, akaona sure kwake gondohwe raiya rakabatwa muchitenhere ngenyanga dzaro; Abrahama wakaenda, akatora gondohwe, akaripira kuita mudiro wokupisha pandau yomukororo wake. Ndizvo Abrahama wakadudza zina reiyo ndau kuti Mambo Mwari-jira, kudai ngezverinodaidzwa metsa nanyamashi, “Pamutunhu waMambo Mwari unozopuwa.” Ngirosi yaMambo Mwari yakadaidzira kunaAbrahama kubva mudenga ngokwechipiri, ikati, “Ndakapika inini pachangu, unoronza Mambo Mwari, ngokuti waita ichi chiro, auzi kuramba nomukororo wako, mukororo wako umwe ega, ngegwinyiso ndinozokufumisa, ndinozoita kuti mibarirwana yako iwande kudai ngenyeredzi dzomudenga nokudai ngejecha riri pahumbikumbi yoruandhle. Mibarirwana yako inozotora misiwo yemagaa ayo. Madzinza eshe enyika anozofumiswa ngorudzi rwako, ngokuti wakapurutana izwi rangu.” Ndizvo Abrahama wakahwirira paiya nemajaha ake, navo vakamiruka, vakaenda pamwepo Bheeri-shebha; naAbrahama wakagara Bheeri-shebha. Zvino ngesure kweizvi zviro Abrahama wakaronzerwa kuti, “Ringira, Mirikha wakabarira munun'una wako Naho vana: Uzi dangwe rake, Bhuzi munun'una wake, Kemueri baba vaAramu, Khesedhi, Hazo, Phiridhashi, Jidhirafi naBhethueri.” Bhethueri wakabara Rebheka. Ava vasere vakabarirwa Naho munun'una waAbrahama ndiMirikha. Nebunha rake raizwi Reuma, naro rakabara Thebha, Gahamu, Thahashi naMaakha. Sara wakapona makore zana nemakumi mairi namanomwe (127); aya ndiwo makore okupona kwaSara. NaSara wakafa paKiriathi-abha, (ndiro Hebroni), munyika yeKhenani, naAbrahama wakapinda mukuchema Sara nokubonda. NaAbrahama wakamiruka kubva pamberi powakafa wake, akaereketa kunevaHiti, echiti, “Ndiri mupfumba nomunhu mupara pakati penyu; ndipei ndau yokuti nditsire vakafa vangu kubva mukuona kwangu.” VaHiti vakapingura Abrahama, vechiti kwaari, “Tizwe, mambo wangu; uri muzvare mukuru pakati pedu. Tsira vakafa vako mundau younopinda kuda pakati pemaiba edu pakapinda kunaka; akuna unozoramba neiba rake kubva kwouri, kuti uike wakafa wako.” Abrahama wakamiruka, akadzikotamisa kune vaHiti, vanhu venyika. Naye wakati kwavari, “Kudai kuri kuda kwenyu kuti ndiike wakafa wangu kubva mukuona kwangu, ndipurutanei, mundikumbirire kunaEfroni, mukororo waZoha, kuti andipe bako reMakhipera raanaro; riri kumagumo kwomunda wake. Ngaaripe kwendiri ngomutengo wakazara, pamberi penyu kuti riite ndau yangu yokuika vakafa.” Zvino Efroni waiya akagara pakati pevaHiti, naEfroni muHiti wakapingura Abrahama mukuzwa kwevaHiti, avo veshe vaipotera pamusiwo wedhorobha rake, echiti, “Haiwa, mambo wangu, ndizwei; ndinomupa munda nokumupa bako riri mukati mwawo; mukuona kwevakororo vevanhu vangu ndinoripa kwouri; ika wakafa wako.” Zvino Abrahama wakadzikotamisa pashi pamberi pevanhu venyika. Wakaereketa kunaEfroni mukuzwa kwevanhu venyika echiti, “Asi kudai wechindipurutana, ndapota, ndizwe; ndinozokupa mutengo womunda; ashira kubva kwendiri, kuti ndiikepo wakafa wangu.” Efroni wakapingura Abrahama, echiti kwaari, “Mambo wangu, purutanai kwendiri. Mutengo womunda mazana marongomuna ezvigurwa zvesirivha, chinenyi icho pakati pangu newe? Ndizvo ika wakafa wako.” Abrahama wakatenderana naEfroni; naAbrahama wakapimira Efroni sirivha yaakaronza mukuzwa kwevaHiti, mazana marongomuna ezvigurwa zvesirivha, kudai ngechipimo chokutengesa chinoashirika kuvatengisi. Ndizvo munda waEfroni, waiya muMakhipera, waiya ngokumabvazuva kweMamure, munda waiya nebako mukati mwawo, nemiti yeshe yaiya mumunda, mundau yawo yeshe inotendenedza, zvakagwinyiswa kupuwa kunaAbrahama kuita nhaka yake mukuona kwevaHiti, pamberi pavo veshe vaipotera ngepamusiwo wedhorobha rake. Ngesure kweizvi Abrahama wakaika Sara mukadzi wake mubako romunda weMakhipera, uri kumabvazuva kweMamure, (ndiro Hebroni) munyika yeKhenani. Munda nebako riri mukati mwawo zvakapuwa kunaAbrahama kuita nhaka yake ngevaHiti kuita ndau yokuika. Abrahama waiya aamusharuka, atigwedere ngouwandu hwemakore; naMambo Mwari waiya afumisa Abrahama ngezviro zveshe. NaAbrahama wakati kuno muranda wake, mukuru wemhatso yake, uwo waitonga padera pazvo zveshe zvaaiya nazvo, “Isa, ndinokupota, nyara yako pashi pechizva changu, neni ndinozokupikisa ndiMambo Mwari, Mwari womudenga nomunyika, kuti auzotori mukadzi womukororo wangu kubva kuvakunda vevaKhenani, avo vendinogara pakati pavo, asi unozoenda kunyika yangu nokuhama dzangu, utoreyo mukadzi womukororo wangu Isaka.” Nomuranda wakati kwaari, “Pamweni mukadzi aazotendi kunditeera kuuya kunyika iyi; kunosisira here kuti ndihwirinze mukororo wako kunyika yowakabva kweiri?” Abrahama wakati kwaari, “Ngwarira kuti usazohwirinzeyozve mukororo wangu. Mambo Mwari, Mwari womudenga, uwo wakandibvisa kubva kumhatso yababa angu nokubva kunyika yechibarirwe changu, uwo wakaereketa kwendiri akapikazve kwendiri, echiti, ‘Ndinozopa iyi nyika kune mibarirwana yako’ iye unozotuma ngirosi yake kukutungamirira, newe unozotora kubveyo mukadzi womukororo wangu. Asi kudai mukadzi asikazotendi kukuteera, naapo unozosunhurika kune mhiko yangu iyi; asi usazohwirinzeyo mukororo wangu.” Ndizvo muranda wakaisa nyara yake pashi pechizva chaAbrahama mambo wake, akapika kwaari ngeiyi ndaa. Zvino muranda wakatora makamera gumi kubva kumakamera amambo wake, akaenda; akatora zvipo zvembeu dzeshe zvakapinda kunaka kubva kunamambo wake; wakamiruka, akaenda Mesopotamia kudhorobha raNaho. Wakaita kuti makamera agwadame pashi pachinyuka chemvura kubanze kwedhorobha, ngomukuwo wemadeekoni, mukuwo wevanobuda vakadzi koochera mvura. Wakati, “A Mambo Mwari, Mwari wamambo wangu Abrahama, ndipei kubudirira nyamashi, ndinomukumbira, muonise nyasha kunamambo wangu Abrahama. Ringira, ndinoema pachinyuka chemvura, nevanasikana vevanhu vedhorobha vanobuda kuchera mvura. Ngakuitike kuti musikana uwo wendinozoti kwaari, ‘Dzasa nhuvi yako, ndapota, kuti ndimwe;’ naye unozoti, ‘Imwa, neni ndinozopazve makamera ako mvura yokumwa;’ uwo ngaaite wowakaemesera muranda wako Isaka. Ngeizvi ndinozozia kuti waonisa nyasha kunamambo wangu.” Asati apedza kuereketa, wona, Rebheka, uwo wakabarirwa Bhethueri mukororo waMirikha, mukadzi waNaho, munun'una waAbrahama, wakagumapo ane nhuvi yake papfudzi rake. Musikana uwo waiya akanaka kuringirika, ari mhandwe, akunazve mwamuna waiya amuzia; wakadzaka kuchinyuka, akazadza nhuvi yake, akakwira. Zvino muranda wakarumba kooshongana naye, akati, “Ndinokupota, ndipe, ndimwe mvura shomani kubva munhuvi yako.” Naye wakati, “Imwai, mambo wangu;” wakakasira, akadzasa nhuvi yake padera penyara yake, akamupa kuti amwe. Naapo apedza kumupa mvura yokumwa, wakati, “Ndinozochera mvura yemakamera ako nawo, metsa apedza kumwa.” Ndizvo wakakasira, akadurura nhuvi yake muchidziyo chokumwira, akarumbazve kuchinyuka koochera, akacherera makamera ake eshe. Munhu wakamuringisisa mukunyarara, kuti azie kuti Mambo Mwari waita here kuti rwendo rwake rubudirire nokuti haiwa. Naapo makamera apedza kumwa, wakatora mhete yomukore ine hafu yeshekeri kurema kwayo, nemabhengere mairi omumioko yake anoita mashekeri gumi omukore kurema kwawo. Wakati, “Uri mwana waani? Ndironzere. Mune ndau here mumhatso yababa ako kuti ndiatemwo?” Wakati kwaari, “Ndiri mwanasikana waBhethueri mukororo waMirikha, waakabarira Naho.” Wakatizve kwaari, “Tinazvo zveshe mwenje nezviyo zvinokwana, nekamera rokuata.” Munhu wakakotama pashi soro rake, akadira Mambo Mwari, akati, “Unomuchena Mambo Mwari, Mwari wamambo wangu Abrahama, uwo usikazi kurekera nyasha dzake nokugondeka kwake kunamambo wangu. Asi inini Mambo Mwari wakanditungamirira munjira kuuya kumhatso yomunun'una wamambo wangu.” Zvino musikana wakarumba, akaronzera vemhatso yamai ake ngezviro izvi. Rebheka waiya nomukoma, zina rake raizwi Rabhani; naRabhani wakarumba kuenda kuno munhuwo kuchinyuka. Naapo aona mhete nemabhengere mumioko yomukunda wake, naapo azwa mazwi aRebheka mukunda wake echiti, “Ndizvo zvakaereketa munhu kwendiri;” wakaenda kuno munhu; akamuona akaema pane makamera pachinyuka. Wakati, “Potera, iwewe wakafumiswa waMambo Mwari; unoema ngenyi kubanze? Ngokuti ndanasira mhatso nendau yemakamera.” Ndizvo munhu wakapotera mumhatso, naRabhani wakasunhura makamera, akaapa mwenje nezviyo zvemakamera, nemvura yokushamba tsoka dzake netsoka dzevanhu avo vaiya naye. Zvino kwakagadzikwa kudya pamberi pake kuti adye, asi wakati, “Andizodyi metsa ndaronza zvendatumirwa.” Iye wakati, “Ereketa.” Ndizvo wakati, “Ndiri muranda waAbrahama. Mambo Mwari wakafumisa mambo wangu kakurutu, naye waita mukuru; wakamupa makwai, n'ombe, sirivha nomukore, varanda vamuna nevakadzi, makamera nembongoro. Sara mukadzi wamambo wangu wakamubarira mukororo mambo wangu, apo aiya achembera; kwaari wakamupa zveshe zvaanazvo. Mambo wangu wakaita kuti ndipike echiti, ‘Usazotorera mukororo wangu mukadzi kubva kuvanasikana vevaKhenani, avo vendinogara munyika yavo, asi unozoenda kumhatso yababa angu nokuhama dzangu, utoreyo mukadzi womukororo wangu.’ Ndakati kunamambo wangu, ‘Pamweni mukadzi aazotendi kunditeera.’ Asi wakati kwendiri, ‘Mambo Mwari, uwo wendinohamba pamberi pake, unozotuma ngirosi yake newe, kuti ubudirire munjira yako; newe unozotora mukadzi womukororo wangu kubva kune hama dzangu nokumhatso yababa angu. Naapo unozosunhurika kubva kumhiko yangu, naapo waguma kuhama dzangu; kunyazwi dzisikazomupi kwomuri, unozosunhurika kubva kumhiko yangu.’ “Ndaguma nyamashi pachinyuka, ndikati, ‘Mambo Mwari, Mwari wamambo wangu Abrahama, kudai zvino mwechida kubudiririsa rwendo rwangu. Wonai, ndakaema pachinyuka chemvura; ngakuitike kuti mhandara inobuda kuzochera mvura, yendinozoti kweiri, “Ndipewo, ndapota, zvimvura kubva munhuvi yako ndimwe.” Nayo inozoti kwendiri, “Imwai, neni ndinozochererawo makamera enyu,” uwo ngaaite mukadzi waakaemesera Mambo Mwari kumukororo wamambo wangu.’ “Ndisati ndapedza kuereketa mumwoyo mwangu, wonai, Rebheka wakabuda nenhuvi yake pafudzi rake; wakadzaka kuchinyuka, akachera. Ndakati kwaari, ‘Ndapota, ndipeiwo ndimwe.’ Wakakasira, akadzasa nhuvi yake kubva pafudzi rake, akati, ‘Imwai, neni ndinozopawo makamera enyu kuti amwe,’ ndizvo ndakamwa naye wakaita kuti makamera amwewo. Ndakamubvunza ndechiti, ‘Uri mwanasikana waani?’ Naye wakati, ‘Ndiri mwanasikana waBhethueri, mukororo waNaho, uwo waakabarirwa ndiMirikha.’ Ndizvo ndaisa mhete pamiro yake nemabhengere pamioko yake. Ndakakotamisa soro rangu, ndikadira Mambo Mwari, ndikakudza Mambo Mwari, Mwari wamambo wangu Abrahama, uwo wakanditungamirira ngenjira yakanaka kuti nditore mwanasikana womunun'una wamambo wangu kuita mukadzi womukororo wake. Zvino kudai mwechida kuzoitira mambo wangu nyasha negwinyiso, ndironzerei; kudai musikaiti kudaro, ndironzerei; kuti ndikunukukire kuenda kumudyo nokuti kumuoshwe.” Zvino Rabhani naBhethueri vakapingura, vakati, “Ichi chiro chinobva kunaMambo Mwari. Isusu atikoni kuereketa kwouri zvakashata nokuti zvakanaka. Ringira, Rebheka uri pamberi pako, mutore, uende, ngaaite mukadzi womukororo wamambo wako, kudai ngezvaakaereketa Mambo Mwari.” Naapo muranda waAbrahama azwa mazwi avo, wakadzikotamisa pashi pamavhu pamberi paMambo Mwari. Nomuranda wakabudisa zvinemeso zvesirivha, zvomukore nezvokusimira, akazvipa kunaRebheka, wakapawo zviro zvinomutengo mukuru kuno mukoma wake nokuna mai ake. Navo vakadya nokumwa, iye nevamuna vaiya naye, vakapedzapo usiku hweshe. Naapo vamuka mangwanani, wakati, “Nditenderenyi kuti ndiende kunamambo wangu.” Mukoma wake namai ake vakati, “Musikana ngaambogara nesu mazuva mashomani, anyaita mazuva gumi; ngesure kwawo unozoenda.” Asi wakati kwavari, “Musandinonosa, ngokuti Mambo Mwari wakaita kuti rwendo rwangu rubudirire; nditenderenyi kuti ndiende kunamambo wangu.” Vakati, “Tinozodaidza musikana, timubvunze.” Vakadaidza Rebheka, vakati kwaari, “Unozoenda here nomunhu uyu?” Wakati, “Ndinozoenda.” Ndizvo vakaendesa Rebheka mukunda wavo nomureri wake, nomuranda waAbrahama nevanhu vake. Vakafumisa Rebheka, vakati kwaari, “Iwewe mukunda wedu, ita mai wemakumi emazana gumi, nemibarirwana yako ngainyise madhorobha eavo vanoinyenya!” Zvino Rebheka nevasikana vake vakamiruka, vakagadha padera pemakamera, vakateera munhuwo. Nomuranda wakatora Rebheka, akaenda rwendo rwake. Zvino Isaka wakauya ngenjira yomushango reBheeri-rahai-roi, naye waigara muNegebhi. NaIsaka wakabuda koopinimidza mumunda madeekoni, wakamirudza madziso ake, akaringira, wona, makamera aiuya. NaRebheka wakamirudza madziso ake, naapo aona Isaka, wakadzaka kubva pakamera, akati kumuranda, “Ndiani munhu uwo unohamba mumunda kooshongana nesu?” Nomuranda wakati, “Ndimambo wangu.” Ndizvo wakatora jira, akaita mukutukutu. Nomuranda wakaronzera Isaka zveshe zvaakaita. Isaka wakamuunza mutende ramai ake, Sara, akatora Rebheka, naye wakaita mukadzi wake; wakamuda. Ndizvo Isaka wakaembedzerwa ngesure kwokufa kwamai ake. Abrahama wakaroora mukadzi umweni, zina rake raizwi Ketura. Wakamubarira Zimrani, Jokishani, Medhani, Midhiani, Ishibhaki naShua. Jokishani wakabara Shebha naDhedhani. Vakororo vaDhedhani vaiya Ashurimu, Retushimu naReumimu. Vakororo vaMidhiani ndiEfa, Efe, Hanokhi, Abhidha naEridhaa. Veshe ava vaiya vana vaKetura. Abrahama wakapa zveshe zvaaiya nazvo kunaIsaka. Asi kuvakororo vemabunha aaiya nawo, Abrahama wakavapa zvipo; akavaita kuti vabve kunaIsaka mukororo wake, achapona, kuenda kumabvazuva kunyika yokumabvazuva. Aya ndiwo mazuva nemakore okurarama kwaAbrahama, makore zana nemakumi manomwe namashanu (175). Abrahama wakafema kwokugumisira, akafa aamusharuka kakurutu, nemakore mazhinjitu; wakaunganidzwa kune vanhu vake. Isaka naIshumaeri vakororo vake vakamuika mubako reMakhipera, mumunda waEfroni mukororo waZoha muHiti, pakaringirana neMamure. Munda uwo waakatenga Abrahama kubva kuvaHiti, ndimwo mwaakaikwa Abrahama naSara mukadzi wake. Ngesure kwokufa kwaAbrahama Mwari wakafumisa Isaka mukororo wake; naIsaka wakagara paBheeri-rahai-roi. Iyi ndiyo mibarirwana yaIshumaeri mukororo waAbrahama waakabarirwa Abrahama ndiHaga muEgipite hloko yaSara. Aya ndiwo mazina evakororo vaIshumaeri, anodudzwa ngokuteererana kudai ngokubarwa kwavo, dangwe raIshumaeri ndiNebhaiothi, Khedha, Adhibheeri, Mibhisamu, Mishima, Dhuma, Masa, Hadhadhi, Thema, Jeturi, Nafishi naKedhema. Ava ndivo vakororo vaIshumaeri, naaya ndiwo mazina avo, ngokuteererana kwemaguta avo nepamatende avo; vaiya vazvare gumi navairi ngokuteererana kwemadzinza avo. Aya ndiwo makore okurarama kwaIshumaeri, makore zana nemakumi matatu namanomwe (137); iye wakafema kwokugumisira akafa; wakaunganidzwa kune vanhu vake. Navo vakagara kubvira Havhira kuguma Shuri iyo yakaringirana neEgipite, ngenjira inoenda Asiria; wakagara akaringisana nehama dzake dzeshe. Iyi ndiyo mibarirwana yaIsaka, mukororo waAbrahama; Abrahama ndiye baba vaIsaka. Isaka waiya aane makore makumi marongomuna (40) apo paakaroora Rebheka, mwana waBhethueri muAramu wePadhana-aramu, mukunda waRabhani muAramu. NaIsaka wakakumbirira mukadzi wake kunaMambo Mwari, ngokuti waiya ngomwa, naMambo Mwari wakaashira mukumbiro wake, naRebheka mukadzi wake wakaita mimba. Vana vakaphinyaukirana mukati mwake; wakati, “Kuti zvakadaro, ndinoponerenyi?” Wakaenda koobvunza Mambo Mwari. Mambo Mwari wakati kwaari, “Madzinza mairi ari mundani yako, nevanhu vairi vanobarwa ndiwe vanozoparadzana; umwe unozogwinya kupinda umweni, nomukuru unozoshandira mudoko.” Naapo mazuva ake okubara akwana, wonai, manyambiri aiya mundani yake. Dangwe rakabuda riri shava, muiri waro weshe wakadai ngechokufuka chine mviri; vakadudza zina rake kuti Isau. Ngesure kwake munun'una wake wakabuda, nenyara yake yaiya yakabata chisisinho chaIsau; nezina rake rakadudzwa kuti Jakobe. Isaka waiya aane makore makumi matanhatu (60) apo paakavabara. Naapo varumbwana vakura, Isau waiya muvhimi mukuru, munhu womushango; naJakobe waiya munhu wakanyararisa, waigara mumatende. Isaka wakada Isau, ngokuti waidya nyama dzake dzaaivhima, asi Rebheka wakada Jakobe. Kamwe apo Jakobe paakabika muriwo, Isau wakauya echibva mushango, waiya ademera. Isau wakati kunaJakobe, “Ndipe, ndidye, ndapota, uwo muriwo wakatsvuka; ngokuti ndademera!” Ndizvo zina rake rakadudzwa kuti Edhomu. Jakobe wakati kwaari, “Kutanga nditengesere udangwe hwako.” Isau wakati, “Wona, inini ndiri pasinde pokufa; udangwe hunozondidetserenyi?” Jakobe wakati, “Pika kwendiri kutanga.” Ndizvo wakapika kwaari, akatengesa udangwe hwake kunaJakobe. Zvino Jakobe wakapa Isau chingwa nomuriwo worupiza, naye wakadya, akamwa, akamiruka, akaenda ngenjira yake. Ngokudaro Isau wakashoora udangwe hwake. Zvino kwakaita nzara munyika, isikazi kudai ngenzara yaiyapo pamazuva aAbrahama. Isaka wakaenda muGera kunaAbhimerekhi mambo wevaFiristia. Mambo Mwari wakaoneka kwaari, akati, “Usadzaka Egipite; gara munyika iyo yendinozokuronzera. Ita chigarandimo munyika iyi, neni ndinozoapo newe, ndinozokufumisa; ngokuti ndinozopa idzi nyika dzeshe kwouri nokumibarirwana yako, ndinozogwinyisa mhiko yendakapika kunaAbrahama baba ako. Ndinozowanza mibarirwana yako kudai ngenyeredzi dzomudenga, ndinozopa kumibarirwana yako nyika idzi dzeshe; kubudikidza ngemibarirwana yako madzinza eshe enyika anozofumiswa, ngokuti Abrahama wakapurutana izwi rangu, akangwarira kupanga kwangu, mirau yangu, zviemeso zvangu nezvironzo zvangu.” Ndizvo Isaka wakagara muGera. Naapo vanhu vendau iyo vamubvunza ngendaa yomukadzi wake, wakati, “Mukunda wangu,” ngokuti wakatya kuronza kuti, “Mukadzi wangu;” echiti, “Pamweni vanhu vendau iyi vanozondiuraya ngendaa yaRebheka, ngokuti waiya akanaka pakuringirika.” Naapo aiya agarapo mukuwo wakareba, Abhimerekhi mambo wevaFiristia wakaringira ngepafasitera, akaona, Isaka waitamba naRebheka mukadzi wake. Abhimerekhi wakadaidza Isaka, akati, “Ringira, mukadzi wako! Wakaronza ngenyi kuti ‘Mukunda wangu?’ ” Isaka wakati kwaari, “Ngokuti ndakapinimidza kuti pamweni ndingazofa ngendaa yake.” Abhimerekhi wakati, “Chiinyi ichi chowaita kwetiri? Kwaizoitika, kuti umwe wevanhu waidai akaatana nomukadzi wako, newe waizounza ndaa padera pedu.” Abhimerekhi wakapanga vanhu vake veshe echiti, “Uwo unozogwama uyu munhu nokuti mukadzi wake, ngegwinyiso unozourawa.” NaIsaka wakakusha mbeu munyikayo, akakukura ngeiro gore zana rakapetwa kune zvakakushwa. Mambo Mwari wakamufumisa. Munhu wakaita gurudza, wakaangirira kuuyirwa nokuuyirwa metsa waita gurudza gurutu. Waiya nepfuma yemakwai, n'ombe nehloko zhinji, nevaFiristia vakaita ndurumwa ndiye. Zvino vaFiristia vaiya vafushira zvinyuka zveshe zvakatsiwa ngehloko dzababa ake ngemazuva aAbrahama baba ake, vakazvizarisa ngemavhu. NaAbhimerekhi wakati kunaIsaka, “Ibva kwetiri, ngokuti waita mukuru kakurutu kupinda isusu.” Ndizvo Isaka wakabvapo, akaemesa tende rake mubani reGera, akagarapo. Isaka wakatsazve zvinyuka zvemvura, izvo zvaiya zvakatsiwa ngemazuva aAbrahama baba ake; ngokuti vaFiristia vakazvifushira ngesure kwokufa kwaAbrahama, wakazvidudza mazina awo ezvakadudzwa ndibaba ake. Asi hloko dzaIsaka dzakatsa mubani, dzakaonapo chinyuka chemvura chinoveruka mvura, vaushi veGera vakaambana nevaushi vaIsaka vechiti, “Mvura ngeyedu.” Ndizvo wakadudza zina rechinyuka kuti Eseki, ngokuti vakaita hasha naye. Ndizvo vakatsa chinyuka chimweni, vakaambanazve ndicho; naye wakadudza zina racho kuti Sitina. Naye wakabvapo, akatsa chinyuka chimweni; navo avazi kuambana ngendaa yacho; wakadudza zina racho kuti Rehobhoti; wakati, “Ngokuti zvino Mambo Mwari wakatiitira ndau, nesu tinozowanda munyika.” Wakabvapo akakwira kuenda Bheeri-shebha. Mambo Mwari wakaoneka kwaari ngouhwo usiku, akati, “Ndiri Mwari waAbrahama baba ako; usatya, ngokuti ndinewe, ndinozokufumisa, ndiwanze mibarirwana yako ngendaa yomuranda wangu Abrahama.” Ndizvo wakaakapo arita, akakumbira ngezina raMambo Mwari, wakaemesapo tende rake. Nehloko dzaIsaka dzakatsapo chinyuka. Zvino Abhimerekhi wakaenda kwaari kubva Gera, naAhuzathi mhangamazano yake, naFikori nduna yehondo yake. Isaka wakati kwaari, “Mwauyirenyi kwendiri, kwechioneka kuti munondinyenya, mwakandidzinga kuti ndibve kwomuri?” Vakati, “Taona pamhene kuti Mambo Mwari unewe, ndizvo tinoti, ‘Zvino ngakuapo mhiko pakati pako nesu, ngatiite chitenderano newe, kuti usazotishaishira, kudai tisu tisikazi kukugwama, kudai ngezvetisikazi kukuitira chiro asi zvakanaka, tikakuendisa mukunyarara. Zvino iwewe ndiwe wakafumiswa waMambo Mwari.’ ” Wakavanasirira dhiri, vakadya nokumwa. Vakafumira kumiruka mangwanani, vakapika mhiko umwe kunoumweni; naIsaka wakavaendisa, vakaenda kubva kwaari mukunyarara. Ngezuva ririro hloko dzaIsaka dzakauya, dzikamuronzera ngendaa yechinyuka chedzakatsa, dzikati kwaari, “Taiona mvura.” Wakachidudza kuti Shibha; ndizvo zina redhorobha rinodaidzwa kuti Bheeri-shebha metsa nanyamashi. Naapo Isau aane makore makumi marongomuna (40), wakaroora mukadzi Judhithi mwanasikana waBheeri muHiti, naBhasemathi mwanasikana waEroni muHiti, navo vakaita dambudziko mukupona kwaIsaka nekwaRebheka. Naapo Isaka aamusharuka, nemadziso ake apofomadzwa asikachakoni kuona, wakadaidza Isau mukororo wake mukuru, akati kwaari, “Mukororo wangu;” naye wakati, “Ndiri pano.” Wakati, “Wona, zvino ndaa musharuka; andirizii zuva rokufa kwangu. Ndizvo zvino, ndapota, tora zvokuvhima ndizvo nechikomwe chako nouta hwako, uende mushango, undiuraire mhuka. Undibikire nyama inonasa kunaka, yendinoda, uiunze kwendiri kuti ndidye; kuti ndikufumise ndisati ndafa.” Zvino Rebheka wakazwa apo Isaka echiereketa kunaIsau mukororo wake. Ndizvo apo Isau aenda mushango koovhima mhuka nokuiunza, Rebheka wakaereketa kunaJakobe mukororo wake echiti, “Wona, ndazwa baba ako vechiereketa kunaIsau mukoma wako vechiti, ‘Ndiunzire mhuka yomushango, undibikire nyama inonasa kunaka, kuti ndiidye, ndikufumise pamberi paMambo Mwari ndisati ndafa.’ Ndizvo zvino, mukororo wangu, purutana izwi rangu kudai ngezvendinokupanga. Enda zvino kuzvifuyo, undiunzire zvimbudzana zviiri zvakanaka; neni ndinozobikira baba ako ndizvo nyama inonasa kunaka iyo yevanoda; newe unozoenda nayo kunababa ako, kuti vadye, vakufumise vasati vafa.” Asi Jakobe wakati kunaRebheka mai ake, “Wonai, Isau mukoma wangu munhu une mamviri, neni ndiri munhu wakangwizira. Pamweni baba angu vanozondiambamira, neni ndinozooneka kwaari ndiri muchengedzeri; ndinozounza kutukwa padera pangu, haiwa kufumiswa.” Mai ake vakati kwaari, “Kutukwa kwako ngakuuye padera pangu, mukororo wangu; kwega purutana izwi rangu, enda uzviunze kwendiri.” Ndizvo wakaenda, akazvitora, akazviunza kunamai ake; namai ake vakabika nyama inonasa kunaka kudai ngezvevaida baba ake. Zvino Rebheka wakatora zvokusimira zvakanaka zvomukororo wake mukuru Isau, zvaaiya nazvo mumhatso, wakazvipfekesa Jakobe mukororo wake mudoko. Akapfekesa matoo embudzana mumioko yake nomumutsipa mwake mwakangwizira. Wakapa munyara yomukororo wake Jakobe nyama inonasa kunaka nechingwa, zvaaiya abika. Ndizvo wakaenda kunababa ake, akati, “Baba angu;” navo vakati, “Ndiri pano; ndiwe anani, mukororo wangu?” Jakobe wakati kunababa ake, “Ndini Isau dangwe rako; ndaita kudai ngezvowandironzera; miruka, ndapota, mugare kudya nyama yemhuka yomushango, kuti mweya wako undifumise.” Asi Isaka wakati kunomukororo wake, “Wakasira ngenyi kuiona kudai, mukororo wangu?” Naye wakati, “Ngokuti Mambo Mwari, Mwari wako wandipa kubudirira.” Isaka wakati kunaJakobe, “Kwedzera pasinde, ndinokupota, kuti ndikuambamire, mukororo wangu, kuti ndiwe mukororo wangu emene Isau here nokuti haiwa.” Jakobe wakakwedzera pasinde kunaIsaka baba ake; naye wakamuambamira, akati, “Izwi, izwi raJakobe, asi nyara inyara dzaIsau.” Aazi kumuzia ngokuti nyara dzake dzaiya nemviri kudai ngenyara dzomukoma wake Isau, ndizvo wakafumisa. Wakati, “Uri mukororo wangu emene Isau here?” Iye wakati, “Ndini.” Wakati, “Iunze pasinde pangu, neni ndinozodya nyama yomukororo wangu yomushango ndikufumise.” Iye wakaiunza pasinde pake, naye wakadya, akamuunzira vhini, akarimwa. Zvino baba ake Isaka vakati kwaari, “Kwedzera zvino undichingamidze ngomuromo, mukororo wangu.” Ndizvo wakakwedzera pasinde, akamuchingamidza ngomuromo; wakazwa gwema rezvokusimira zvake, akamufumisa, akati, “Wona, gwema romukororo wangu rakadai ngegwema romushango rakafumiswa ndiMambo Mwari. Mwari ngaakupe beto romudenga, nyika yakavhundira, zviyo zvakawanda nevhini. Vanhu ngavakushandire, nemadzinza akugwadamire. Ita mambo padera pevanun'una vako, nevakororo vamai ako ngavakugwadamire. Ngavatukwe veshe vanokutuka, ngavafumiswe veshe vanokufumisa!” Naapo Isaka apedza kufumisa Jakobe, naapo Jakobe echitobuda kubva pamberi paIsaka baba ake, Isau mukoma wake wakapotera echibva koovhima kwake. Wakabikawo nyama inonasa kunaka, akaiunza kunababa ake. Akati kunababa ake, “Baba angu ngavamiruke, vadye nyama yomukororo wavo yomushango, kuti mwoyo wavo undifumise.” Isaka baba ake vakati kwaari, “Ndiwe anani?” Wakati, “Ndini mukororo wako, dangwe rako Isau.” Zvino Isaka wakahuta kakurutu, akati, “Ndiani zvino uwo wakavhima mhuka yomushango, akaiunza kwendiri, neni ndaidya yeshe usati waguma iwewe, neni ndamufumisa? Eya, naye unozofumiswa.” Naapo Isau azwa mazwi ababa ake, wakachema kakurutu kunorwadza mwoyo, akati kunababa ake, “Ndifumisei neniwo, baba angu!” Wakati, “Munun'una wako wauya ngourimbwi, watora chidakadziso chako.” Isau wakati, “Iye aazi kunasa kududzwa here kudai ngezvinosisira kuti Jakobe? Ngokuti wandipambira mikuwo miiri iyi. Wakatora nhaka youdangwe hwangu; wonai, zvino wanditorera chifumiso changu.” Zvino wakati, “Auzi kusara nechifumiso changu here?” Isaka wakapingura, akati kunaIsau, “Ringira, ndamuita mambo wako, nehama dzake dzeshe ndapa kwaari kuti vaite varanda; ngezviyo nevhini ndamugwinyisa, zvino chiinyi chendingaita kwouri, mukororo wangu?” Isau wakati kunababa ake, “Mune chifumiso chimwe here, baba angu? Ndifumiseiwo neni, A baba angu!” Isau wakachema kakurutu. Zvino Isaka baba ake vakapingura, vakati kwaari, “Ringira, kugara kwako kunozoita kuretu nemafuta enyika nebeto rinobva mudenga. Newe unozopona ngebanga remakara rako, unozoshandira munun'una wako; asi apo pounozodzisunhura iwewe, unozopwanya joka rake kubva mumutsipa wako.” Zvino Isau wakanyenya Jakobe ngendaa yechifumiso chaakafumiswa ndicho ndibaba ake; naIsau wakati mumwoyo mwake, “Mazuva okuchema baba angu aapasinde; naapo ndinozouraya munun'una wangu Jakobe.” Asi mazwi aIsau mukororo wake mukuru akaronzerwa kunaRebheka; ndizvo wakatuma akadaidza Jakobe mukororo wake mudoko, akati kwaari, “Ringira, mukoma wako Isau unodziembedzera ngokuronga kukuuraya. Ndizvo zvino, mukororo wangu, purutana izwi rangu; miruka, utizire Harani kunaRabhani mukoma wangu; ugare naye mazuva mashomani metsa ushungu hwomukoma wako hwapera. Naapo ushungu hwomukoma wako hwapera kubva kwouri, ariyarwa zvewakaita kwaari, ndinozotumira kuti ndikutore kubveyo. Ndingatorerwa ngenyi mweshe ngezuva rimwe?” Zvino Rebheka wakati kunaIsaka, “Ndaremba ngokupona kwangu ngendaa yevakadzi vevaHiti; kudai Jakobe echizoroora umwe wevakadzi vevaHiti wakadai ngaava vakadzi venyika, kupona kwangu kunozondidetserenyi?” Ndizvo Isaka wakadaidza Jakobe, akamufumisa, akamupanga, akati kwaari, “Usazoroora mukadzi kubva kuvaKhenani. Miruka, uende Padhana-aramu kumhatso yaBhethueri baba amai ako; urooreyo mukadzi umwe wevanasikana vaRabhani mukoma wamai ako. Mwari Unesimba-reshe ngaakufumise, aite kuti mubarane, amuwanze, kuti muite dzinza guru revanhu. Ngaape chifumiso chaAbrahama kwouri nokumibarirwana yako, kuti ugare nhaka yenyika iyo youri chigarandimo kweiri, yaakapa Mwari kunaAbrahama.” Ndizvo Isaka wakaendisa Jakobe, iye wakaenda Padhana-aramu kunaRabhani, mukororo waBhethueri muAramu, mukoma waRebheka, mai aJakobe naIsau. Zvino Isau aona kuti Isaka waiya afumisa Jakobe nokumuendisa Padhana-aramu, kuti arooreyo mukadzi; nokuti waiya amufumisa, wakamupanga echiti, “Usazoroora mukadzi kubva kuvaKhenani,” nokuti Jakobe wakapurutana baba namai ake, nokuti wakaenda Padhana-aramu. Naapo Isau wakaona vakadzi vevaKhenani avazi kudakadza Isaka baba ake, Isau wakaenda kunaIshumaeri, akatora kuita mukadzi wake Maharathi, mwanasikana waIshumaeri, mukororo waAbrahama, mukunda waNebhaiothi, kututsira kuvakadzi vaaiya navo. Jakobe wakabuda kubva Bheeri-shebha, akaenda Harani. Wakaguma pandau imweni, akaatapo usiku hweshe, ngokuti zuva raiya rabira. Wakatora rimwe remapuwe epandauyo, akariita mutsamiro, akaata pashi pandau iyo. Wakarota hope, echiona danhidzo rakaemeswa padera penyika, nedera kwaro kwakaguma mudenga; wona, ngirosi dzaMwari dzaikwira nokudzaka padera paro. Wona, Mambo Mwari wakaema padera paro, akati, “Ndini Mambo Mwari, Mwari waAbrahama baba ako naMwari waIsaka; ndinozopa kwouri nokumibarirwana yako nyika younoata padera payo; nemibarirwana yako inozodai ngebukuta renyika, newe unozopararira kuenda kumabirirazuva nokumabvazuva, dera nokubani; mhuri dzeshe dzomunyika dzinozofumiswa mwouri, nomumibarirwana yako. Wona, ndinewe, ndinozokungwarira kundau dzeshe dzounozoenda, ndinozokuunzazve munyika ino; ngokuti andizokusii metsa ndaita icho chendakaereketa ndicho kwouri.” Jakobe wakamuka muhope, akati, “Ngegwinyiso Mambo Mwari uri mundau ino; neni andizi kuzvizia.” Wakatya, akati, “A kutyisanyi kwendau iyi! Iyi ngegwinyiso imhatso yaMwari neichi musiwo womudenga.” Ndizvo Jakobe wakafumira kumiruka mangwanani, akatora buwe raaiya akaita mutsamiro, akaridzimika kuita sika, wakadurura mafuta padera paro. Wakadudza zina reiyo ndau kuti Bhetheri; asi zina reiro dhorobha raizwi Ruzi pakutanga. Zvino Jakobe wakapika mhiko echiti, “Kudai Mwari echizoa neni, andingwarire munjira iyi yendinohamba, andipe chingwa chokudya nemachira okusimira, kuti ndipetukezve kumhatso yababa angu mukunyarara, naapo Mambo Mwari unozoita Mwari wangu, neiri buwe rendadzimika kuita sika, rinozoita mhatso yaMwari; kwezviri zveshe zvounozondipa, ngegwinyiso ndinozopa chimwe chegumi kwouri.” Zvino Jakobe wakaenda rwendo rwake, akaguma munyika yevanhu vokumabvazuva. Wakaringira, akaona chinyuka mubani, akaona mihlambi mitatu yemakwai yaiya yakaatapo pasinde pacho; ngokuti vaimwisa mihlambi yavo pachinyuka icho. Buwe guru raitsiira pamuromo wechinyuka, naapo mihlambi yeshe yakaunganidzwapo, vaushi vaimburumbudza buwe kubva pamuromo wechinyuka nokumwisa makwai, vaihwirinzazve buwe pamuromo wechinyuka paugaro hwaro. Jakobe wakati kwavari, “Hama dzangu, munobva pari?” Vakati, “Tinobva Harani.” Wakati kwavari, “Munoziawo Rabhani here mukororo waNaho?” Vakati, “Tinomuzia.” Wakati kwavari, “Unotamba here?” Vakati, “Unotamba, wona, Racheri mwanasikana wake unouya nemakwai.” Wakati, “Ringirai, achiri masikati, zve, ausati waamukuwo wokuti zvifuyo zviunganidzwe pamwepo; mwisai makwai muende koousha.” Asi vakati, “Atingaiti kudaro metsa mihlambi yeshe yaunganidzwa pamwepo, nebuwe ramburumbudzwa kubva pamuromo wechinyuka; naapo tinozomwisa makwai.” Naapo achaereketa navo, Racheri wakaguma nemakwai ababa ake; ngokuti ndiye waiausha. Zvino apo Jakobe echiona Racheri mwanasikana waRabhani, mukoma wamai ake, nemakwai aRabhani mukoma wamai ake, Jakobe wakakwedzera pasinde, akamburumbudza buwe kubva pamuromo wechinyuka, akamwisa muhlambi waRabhani mukoma wamai ake. Jakobe wakachingamidza Racheri ngomuromo, akachema kakurutu. Jakobe wakaronzera Racheri kuti muzukuru wababa ake, mukororo waRebheka; wakarumba, akaronzera baba ake. Naapo Rabhani azwa mashoko aJakobe, mukororo womukunda wake, wakarumba koomuashira, akamukumbatira, akamuchingamidza ngomuromo, wakamuunza mumhatso yake. Jakobe wakaronzera Rabhani zviro izvi zveshe. Rabhani wakati kwaari, “Ngegwinyiso uri godo rangu nenyama yangu!” Wakagara naye mwedzi. Rabhani wakati kunaJakobe, “Ngokuti uri muzukuru wangu, ungazondishandira usina chounothuswa here? Ndironzere musharo wounoda.” Rabhani waiya nevasikana vairi, zina romukuru waiya Rea nezina romudoko raiya Racheri. Madziso aRea aiya akarembedzeka; asi Racheri waiya akanaka kuringirika, ane chiemo chakanaka. Jakobe wakada Racheri; akati, “Ndinozokushandira makore manomwe kuti ndipuwe Racheri mwanasikana wako mudoko.” Rabhani wakati, “Kwakapinda kunaka kuti ndimupe kwouri kuno kuti ndimupe kunomunhu umweni; gara neni.” Ndizvo Jakobe wakashanda makore manomwe kuti apuwe Racheri; akaoneka kwaari akadai ngemazuva mashomani ngendaa yorudo rwaaiya narwo kwaari. Zvino Jakobe wakati kunaRabhani, “Chindipa mukadzi wangu kuti ndipotere kwaari ngokuti mazuva angu akwana.” Ndizvo Rabhani wakaunganidza vanhu veshe veiyo ndau, akaita dhiri. Asi madeekoni wakatora Rea mwanasikana wake, akamuunza kunaJakobe; naye wakapotera kwaari. Rabhani wakapa Ziripha murandakadzi wake kuno mwanasikana wake Rea kuita mushandiri wake. Zvino mumangwanani wakaona kuti ndiRea, wakati kunaRabhani, “Chiinyi ichi chowaita kwendiri? Andizi kukushandira here kuti undipe Racheri? Ndizvo zvino wakandichengedzera ngenyi?” Rabhani wakati, “Azviitwi kudaro munyika yedu, kuti mudoko atange kuroodzwa dangwe risati. Pedzisa vhiki rouyu, nesu tinozokupa umweniwo ngomushando wounozondishandira makore amweni manomwe.” Jakobe wakaita kudaro, wakapedzisa vhiki rouwo. Rabhani wakamupa Racheri mwanasikana wake kuti aite mukadzi wake. Rabhani wakapa Bhiriha murandakadzi wake kunaRacheri kuita mushandiri wake. Wakapoterawo kunaRacheri, akamudazve kupinda Rea, akashandira Rabhani makore amweni manomwe. Mambo Mwari wakaona kuti Rea waiya asikadiwi, wakabeura ndani yake; asi Racheri waiya ngomwa. Rea wakaita mimba, akabara mukororo, akadudza zina rake kuti Rubheni, ngokuti wakati, “Ngendaa yokuti Mambo Mwari wakaona kutambudzika kwangu; ngegwinyiso zvino mwamuna wangu unozondida.” Wakaitazve mimba, akabara mukororo, akati, “Ngokuti Mambo Mwari wakazwa kuti andidiwi, ndizvo wakandipazve uyu mukororo;” wakadudza zina rake kuti Simeoni. Wakaitazve mimba, akabara mukororo, akati, “Zvino ngouyu mukuwo mwamuna wangu unozonamatira kwendiri, ngokuti ndamubarira vakororo vatatu;” ndizvo zina rake rakadudzwa kuti Revhi. Wakaitazve mimba, akabara mukororo, akati, “Nguva ino ndinozokudza Mambo Mwari;” ndizvo wakadudza zina rake kuti Judha, wakarekera kubereka. Naapo Racheri aona kuti aazi kubarira Jakobe vana, wakaitira ndurumwa taita ake; wakati kunaJakobe, “Ndipe vana, ukarekera ndinozofa!” Ushungu hwaJakobe hwakabaka kunaRacheri akati, “Ndiri pandau yaMwari here, uwo wakakupinga kuti usabara mwana?” Zvino wakati, “Uri pano mushandiri wangu Bhiriha; potera kwaari, kuti iye abare pamabvi angu, kuti ininiwo ndione vana kubudikidza ndiye.” Ndizvo wakamupa Bhiriha mushandiri wake kuita mukadzi, naJakobe wakapotera kwaari. Bhiriha wakaita mimba, akabarira Jakobe mukororo. Racheri wakati, “Mwari wanditonga, wazwawo izwi rangu, wandipa mukororo,” ndizvo wakadudza zina rake kuti Dhani. Bhiriha mushandiri waRacheri wakaitazve mimba, akamubarira Jakobe mukororo wechipiri. Zvino Racheri wakati, “Ngokuita matsimba kakurutu, endakaita nataita angu, ndakanyisa;” wakadudza zina rake kuti Nafitari. Apo Rea aona kuti waguma kubara, wakatora Ziripha, mushandiri wake, akapa Jakobe kuita mukadzi. Ziripha mushandiri waRea wakabarira Jakobe mukororo. Rea wakati, “Ndinomuchena!” Wakadudza zina rake kuti Gadhi. Ziripha mushandiri waRea wakabarira Jakobe mukororo wechipiri. Rea wakati, “Ndinodakara! Ngokuti vakadzi vanozondidaidza kuti ndinomuchena;” ndizvo wakadudza zina rake kuti Asha. Rubheni wakaenda ngemazuva okucheka koroni, akaona mamandrekisi mubani, akaaunza kunamai ake Rea. Naapo Racheri wakati kunaRea, “Ndipe, ndapota, amweni emamandrekisi omukororo wako.” Asi wakati kwaari, “Indaa doko here kuti wakatora mwamuna wangu, wodazve kutora mamandrekisi omukororo wangu here?” Racheri wakati, “Ndizvo iye unozoatana newe usiku huno, ngendaa yemamandrekisi omukororo wako.” Jakobe wakauya madeekoni echibva mushango, Rea wakabuda kooshongana naye, akati, “Kunosisira kuti upotere kwendiri, ngokuti ngegwinyiso ndakutenga ngomusharo wemamandrekisi omukororo wangu.” Wakaatana naye ngouhwo usiku. Mwari wakazwa Rea, wakaita mimba, akabarira Jakobe mukororo wechishanu. Rea wakati, “Mwari wandipa musharo wangu, ngokuti ndakapa mushandiri wangu kunomwamuna wangu;” ndizvo wakadudza zina rake kuti Isakha. Rea wakaitazve mimba, akabarira Jakobe mukororo wechitanhatu. Rea wakati, “Wakandipa chipo chakanaka; zvino mwamuna wangu unozogara neni, ngokuti ndakamubarira vakororo vatanhatu;” ndizvo wakadudza zina rake kuti Zebhuruni. Ngesure kweizvi wakabara musikana, akadudza zina rake kuti Dhaina. Mwari wakakarakadza Racheri, naMwari wakamuzwa, akabeura ndani yake. Wakaita mimba, akabara mukororo, akati, “Mwari wabvisa chimene changu.” Wakadudza zina rake kuti Josefa echironza kuti, “Mambo Mwari ngaatutsire kwendiri mukororo umweni.” Naapo Racheri abara Josefa, Jakobe wakati kunaRabhani, “Ndirekere, kuti ndiende kanyi kwangu, kunyika yangu. Ndipei vakadzi vangu nevana vangu vendakakushandira, nditendere kuti ndiende, ngokuti unozia mushando wangu wendakakuitira.” Asi Rabhani wakati kwaari, “Ndapota, kudai ndaona nyasha mukuona kwako, gara ngokuti ndaona muchioniso kuti Mambo Mwari wakandifumisa ngendaa yako.” Wakati, “Ndironzere misharo yako, neni ndinozoipa kwouri.” Iye wakati kwaari, “Unozia mashandire endakakuitira nokugara kwedzakaita n'ombe dzako kwendiri. Ngokuti mwaiya nezvishomani ndisati ndauya pano, nazvo zvakawanzwa kuita zvizhinjitu; naMambo Mwari wakakufumisa nokuti ngepari pendakaenda. Asi zvino ndinozonasirirawo riini zvemhatso yangu?” Wakati, “Ndinozokupenyi?” Jakobe wakati kwaari, “Auzondipi chiro; kudai wechitenda kundiitira izvi, ndinozoushazve zvifuyo zvako nokuzvingwarira. Ndichahamba pakati pezvifuyo zvako zveshe nyamashi, ndechibvisamwo zveshe zvine maara, nezvebvumbidza, nazvo zveshe zvakasvipa pakati pemakwai, nezvine maara, nezvine matsaratsa pakati pembudzi, nezvakadarozvo zvinozoita musharo wangu. Ngokudaro kururama kwangu kunozondipingurira ngomukuwo unouya, apo pounozouya kuringira ngendaa yomusharo wangu uri pamberi pako. Zveshe zvisina maara nokuti zvisina tsaratsa pakati pembudzi nezvisikazi kusvipa pakati pemakwai, izvo kuti zvineni zvinozoerengwa kuti zvakabiwa.” Rabhani wakati, “Zvakanaka! Ngazviitike kudai ngezvewaronza.” Ngeiro zuva wakabvisa magotokoto aiya nemisweeswee nedzine maarakata, nembudzi dzeshe dzehadzi dzine maara nedzebvumbidza, idzo dzeshe dzaiya nemaara akachena, nezvakasvipa zveshe pakati pemakwai, akazvipa munyara dzevakororo vake. Wakaisa muhambo wemazuva matatu pakati pake naJakobe, naJakobe wakausha zvifuyo zvakasara zvaRabhani. Jakobe wakatema madziro omupopura muishi noomuarimondi noomuprane; akaibura mapande kuita miara yakachena, akaita kuti kuchena kwawo kuoneke, ukwo kwaaiya nakwo madziro. Wakaemesa madziro awo aakabura mapande pamberi pezvifuyo mumigero, kuronza zvidziyo zvemvura apo paiuya zvifuyo koomwa; ngokuti dzaiita mabee apo pedzaiuya koomwa. Zvifuyo zvaiita mabee pamberi pemadziro, nezvifuyo zvakabara zvine misweeswee nezvine maara nezvebvumbidza. Jakobe wakaparadzanisa makwai, akaemesa hope dzezvifuyo kuti zviringire kune izvo zvine misweeswee, nokune zvakasvipa zveshe muzvifuyo zvaRabhani; akaisa zvifuyo zvake zvega, aazi kukumanidza nezvaRabhani. Peshe apo zvifuyo zvakapinda kugwinya pezvaiita mabee, Jakobe wakaisa madziro pamberi pokuona kwezvifuyo mumigero, kuti zviite mabee pakati pemadziro. Asi zvifuyo zvaiya zvakarembaremba aazi kuzvipinzamwo; ndizvo zvakarembaremba zvaiya zvaRabhani nezvakagwinya zvaiya zvaJakobe. Munhu uwo wakakura mupfumi kakurutu, waiya nezvifuyo zvakawanda, waiya nevaranda vakadzi nevamuna, makamera nembongoro. Zvino Jakobe wakazwa vakororo vaRabhani vechiti, “Jakobe watora zveshe zvaiya zvababa edu; wakadzionera upfumi uhwu hweshe ngeizvo zvaiya zvababa edu.” NaJakobe wakaona kuti hope yaRabhani yaiya isikacharingiriki kwaari kudai ngekaretu. Zvino Mambo Mwari wakati kunaJakobe, “Hwirira kunyika yemadzibaba ako nokuhama dzako, neni ndinozoa newe.” Ndizvo Jakobe wakatuma, kudaidza Racheri naRea kuuya mushango, kwaiya nezvifuyo zvake. Wakati kwavari, “Ndinoona hope yababa enyu kuti aicharingiriki kwendiri kudai ngekaretu. Asi Mwari wababa angu waiya neni. Nemwi munozia kuti ndakashandira baba enyu ngesimba rangu reshe. Baba enyu vakandichengedzera, vakatsandura misharo yangu kagumi; asi Mwari aazi kumutendera kuti andiremadze. Kudai aizoronza kuti, ‘Dzine maara dzinozoita misharo yako,’ zvino zvifuyo zveshe zvakabara zvine maara; nokudai aizoronza kuti, ‘Dzine misweeswee dzinozoita misharo yako,’ zvino zvifuyo zveshe zvakabara zvine misweeswee. Ndizvo Mwari wakatora zvifuyo zvababa enyu, akazvipa kwendiri. “Panguva yokuita mabee kwezvifuyo, ndakamirudza madziso angu, ndikaona mukurota, ndakaona magondohwe aivevedza zvifuyo aiya nemisweeswee neemabvumbidza neane maara. Zvino ngirosi yaMwari yakaereketa kwendiri mukurota yechiti, ‘Jakobe.’ Ndakati, ‘Ndiri pano!’ Yakati, ‘Mirudza zvino madziso ako, uone, eshe magondohwe anovevedza zvifuyo ane misweeswee neemabvumbidza, neane maara, ngokuti ndakaona zveshe zvaanoita Rabhani kwouri. Ndini Mwari waBhethueri, apo powakadzodza sika, powakapika mhiko kwendiri. Zvino miruka, ubve munyika iyi, uhwirire kunyika yechibarirwe chako.’ ” Zvino Racheri naRea vakapingura, vakati kwaari, “Chichipo here chikoaniswa nenhaka yedu mumhatso mwababa edu? Avatierengi here kuti taavapara? Ngokuti vakatitengesa, vakadya chuma chedu. Ngokuti upfumi hweshe hwaakatora Mwari kubva kunababa edu ngohwedu nohwevana vedu; ndizvo zvino, kunyazwi chiinyi chaakaronza Mwari kwouri, chiita.” Ndizvo Jakobe wakamiruka, akakwidza vakororo vake nevakadzi vake padera pemakamera; wakatora zveshe zvifuyo zvake zvaakauyirwa ndizvo, zvifuyo zvaakaunganidza muPadhana-aramu, kuti aende kunaIsaka baba ake munyika yeKhenani. Zvino Rabhani waiya aenda koogunda makwai ake, Racheri wakaba miedzaniso yokudira yababa ake. Jakobe wakachengedzera Rabhani muAramu, ngokuti aazi kumuronzera kuti waida kutiza. Ndizvo wakatiza anazvo zveshe zvaaiya nazvo; wakamiruka aambuka rwizi, akaringira hope yake kuenda kudunhu reGireadhi. Zvino ngezuva rechitatu Rabhani wakaronzerwa kuti Jakobe watiza. Wakatora hama dzake, akamuteera muhambo wemazuva manomwe; wakamubatira kudunhu reGireadhi. Asi Mwari wakauya kunaRabhani muAramu usiku mukurota, akati kwaari, “Ngwara kuti usaereketa kunaJakobe zvakanaka nokuti zvakashata.” Rabhani wakaguma kunaJakobe. Zvino Jakobe waiya aemesa tende rake munyika yemitunhu, Rabhani nehama dzake vakaemesa matende avo mudunhu reGireadhi. Rabhani wakati kunaJakobe, “Wakaitenyi iwewe kundichengedzera, ukatora vana vangu kudai ngevasungwa vakachakatwa ngeshoti? Wakatiza ngokufishika ngenyi, ukandichengedzera, usikazi kundironzera kuti ndikuendise ngokudakara, ngenduyo, mbira nedimbwi. Auzi kunditendera kuti ndivhaise ngomuromo vazukuru vangu nevanasikana vangu? Zvino wakaita zviro zvoupenzi. Zviri musimba renyara yangu kukuremadza; asi Mwari wababa ako wakaereketa kwendiri usiku hwezuro echiti, ‘Ngwara kuti usaereketa kunaJakobe zvakanaka nokuti zvakashata.’ Zvino watiza ngokuti unoda kuti uende ngokuti unoshuwira kakurutu vemhatso yababa ako, asi wakaba ngenyi miedzaniso yangu yokudira?” Jakobe wakapingura, akati kunaRabhani, “Ngokuti ndaitya, ndikapinimidza kuti pamweni unganditorera vana vako ngesimba. Kwaari uwo wounoona anazvo zvimiedzaniso zvake zvokudira, asazopona. Pamberi pehama dzedu, ringira iwewe zviri zvako kwendiri, uzvitore.” Ngokuti Jakobe aazi kuzia kuti Racheri waiya azviba. Rabhani wakapotera mutende raJakobe, mutende raRea nomutende revashandiri vairi; asi aazi kuzvionamwo. Oroobuda kubva kutende raRea, wakapotera mutende raRacheri. Zvino Racheri waiya akatora zvimiedzaniso zvake zvokudira, akazviisa muchigaro chekamera, akagara padera pazvo. Rabhani wakatsvakisisa mutende reshe, asi aazi kuzviona. Wakati kunababa ake, “Mambo wangu, musatseneka ngokuti andikoni kumiruka pamberi pako; ngokuti muitiro wevakadzi wandigumira.” Wakatsvakisisa asi aazi kuzviona zvimiedzaniso zvokudira. Jakobe wakatseneka, akaganyira Rabhani; wakati kunaRabhani, “Ndaa yangu ngeyenyi? Chishaishi changu ngechiri chaita kuti iwewe undirumbirire kakurutu? Zvino zvemwabata-bata zvidziyo zvangu zveshe, mwaonenyi pazviro zveshe zvemhatso yenyu? Zviise pano pamberi pehama dzangu nehama dzako, kuti vagure ndaa pakati pedu isusu vairi. Ndakagara newe aya makore makumi mairi; makwai ako nembudzi dzako adzizi kusvodza, andizi kudya magondohwe ezvifuyo zvako. Andizi kuunza kwouri idzo dzakarumwa ngezvikara; ndini ndakadziripira pachangu; ukadzibvunza kubva munyara dzangu, kunyazwi zvakabiwa masikati nokuti usiku. Ndizvo zvendaigara ndakaita: masikati ndaipishwa ngezuva, nousiku ndaitonhorwa ngechando, nehope dzaipera usiku. Ndaigara mumhatso mwako aya makore makumi mairi; ndakakushandira makore gumi namarongomuna kuti undipe vanasikana vako vairi, nemakore matanhatu kuti ndipuwe zvifuyo zvako; newe wakatsandura musharo wangu mikuwo kagumi. Kudai asaiya neni Mwari wababa angu, Mwari waAbrahama, nouwo waakatyiwa ndiIsaka, ngegwinyiso mwaizodai mwandiendisa ndisina chiro. Mwari wakaona kutambudzika kwangu nomushando wenyara dzangu, akakuganyira usiku hwezuro.” Rabhani wakapingura, akati kunaJakobe, “Ava vanasikana vanasikana vangu, naava vana vana vangu, neizvi zvifuyo zvifuyo zvangu, nazvo zveshe zvounazvo ngezvangu. Ndingaitenyi nyamashi kune ava vanasikana vangu, nokuti kuvana vavo vevakabara? Zvino uya, ngatiite chitenderano, iwewe neni; ngachiite chapupu pakati pako neni.” Jakobe wakatora buwe, akaridzimika kuita mujeki. Jakobe wakati kuhama dzake, “Unganidzai mapuwe;” navo vakatora mapuwe, vakaita murwi; vakadyirapo pasinde pomurwi. Rabhani wakaududza kuti Jegari-sahadhutha, asi Jakobe wakaududza kuti Gareedhi. Rabhani wakati, “Uyu murwi chapupu pakati pako neni nyamashi.” Ndizvo zina rawo rakadudzwa kuti Gareedhi nomujeki kuti Mizipha, ngokuti wakati, “Mambo Mwari ngaarinde pakati pako neni apo takaparadzana umwe kunoumweni. Kudai wechizotambudza vanasikana vangu, nokuti wechizotora vakadzi vamweni ngokubanze kwevana vangu, kunyazwi akuna munhu uri pano nesu, wona, Mwari ndiye chapupu pakati pako neni.” Rabhani wakati kunaJakobe, “Wona murwi uyu nomujeki uyu wendaemesa pakati pako neni. Murwi uyu chapupu nomujeki uyu chapupu, kuti inini andizoudariki kuuya kwouri, nokuti iwewe auzoudariki kuuya kwendiri, kuti tishaishirane. Mwari waAbrahama naMwari waNaho, Mwari wababa avo, ngaatonge pakati pedu.” Jakobe wakapika ngouwo waityiwa ndibaba ake Isaka. Jakobe wakapa mudiro pamutunhuwo, akadaidza hama dzake kudya chingwa, vakadya chingwa, vakaatapo usiku hweshe. Rabhani wakafumira mangwanani kumiruka, akachingamidza ngomuromo vazukuru vake nevanasikana vake, akavafumisa. Rabhani wakabvapo, akahwirira kanyi kwake. Jakobe wakaenda rwendo rwake, nengirosi dzaMwari dzakashongana naye; naapo Jakobe adziona wakati, “Iyi ihondo yaMwari!” Wakadudza zina reiyo ndau kuti Mahanaimu. Jakobe wakatuma nhumwa pamberi pake kunaIsau mukoma wake munyika yeSeira, nyika yeEdhomu, echivapanga, echiti, “Ndizvo zvomunozoereketa kunamambo wangu Isau: Muranda wako Jakobe unoronza kudai, ‘Ndakaita chigarandimo kunaRabhani metsa zvino. Ndine n'ombe nembongoro nezvifuyo nevaranda, vamuna nevakadzi; ndatuma kuronzera mambo wangu, kuti ndione nyasha mukuona kwako.’ ” Nenhumwa dzakapetukazve kunaJakobe dzechiti, “Takaguma kunomukoma wako Isau, unouyawo kushongana newe, ane vamuna mazana marongomuna naye.” Naapo Jakobe wakatya kakurutu nokutambudzika, wakaparadzanisa kuita zvikwata zviiri vanhu vaiya naye nezvifuyo, n'ombe nemakamera, echiti, “Kudai Isau echizoguma kuchikwata chimwe nokuchiuraya, naapo chikwata chimweni chasara chinozotiza.” Jakobe wakati, “A Mwari wababa angu Abrahama, Mwari wababa angu Isaka, Mambo Mwari, uwo wakati kwendiri, ‘Hwirira kunyika yako nokuhama dzako, neni ndinozokuitira zvakanaka,’ andisisirwi nepadoko ngenyasha dzako dzeshe negwinyiso reshe rowakaonisa kumuranda wako; ngokuti ndakaambuka urwo rwizi Jorodhani ndine ndonga yangu; zvinopano ndaita zvikwata zviiri. Ndinunurei, ndapota, kubva kunyara yomukoma wangu, nyara yaIsau, ngokuti ndinomutya, kuti pamweni ungauya, akatiuraya isusu teshe, vanamai pamwepo nevana. Asi iwewe wakati, ‘Ngegwinyiso ndinozokuitira zvakanaka, ndiite kuti mibarirwana yako iwande kudai ngejecha roruandhle, risikaerengeki ngouwandu.’ ” Wakaatapo usikuhwo, akatora kubva paneizvo zvaaiya nazvo kuita chipo chaIsau mukoma wake: Mazana mairi (200) embudzi dzehadzi, magotokoto makumi mairi (20), mazana mairi (200) emakwai makadzi, magondohwe makumi mairi (20), makamera makumi matatu (30) anosengwa nevana vawo, n'ombe makumi marongomuna (40) nemikono gumi (10), nemadhuna embongoro gumi (10), mbongoro dzehadzi makumi mairi (20) nemadhuna embongoro gumi (10). Wakazvipa munyara yevaranda vake, zvechitinhwa zvakati izvi zvega izvi zvega; wakati kuvaranda vake, “Ambukai muende mberi kwangu, muise nharauko pakati pechikwata nechikwata.” Wakapanga uwo wepamberi pemene echiti, “Apo Isau mukoma wangu paanoshongana newe, echikubvunza, echiti, ‘Uriwaani? Unoenda kuri? Ngezvani izvi zviri pamberi pako?’ Zvino unozoti, ‘Ngezvomuranda wako Jakobe; zviri chipo chakatumwirwa kunamambo wangu Isau; zvakanyadaro naye uri sure kwedu.’ ” Wakapanga kudarozve uwo wechipiri nowechitatu naavo veshe vaiteera zvikwata echiti, “Ngenjira imweyo munozoereketa kunaIsau apo pomunomuona. Munozoronzazve kuti, ‘Ringira, muranda wako Jakobe uri sure kwedu.’ ” Ngokuti wakapinimidza echiti, “Ndinozomupfaisa ngechipo chinotungamidzwa pamberi, ngesureni ndinozoona hope yake; pamweni unozondiashira.” Ndizvo chipo chakatungamidzwa pamberi pake; iye emene wakaata ngouhwo usiku mukati mwechikwata. Wakamiruka ngouhwo usiku, akatora vakadzi vake vairi, nevarandakadzi vake vairi, nevana vake gumi naumwe, akaambuka zambuko romukova unozwi Jabhoki. Wakavatora, akavaambusa ruseri rwomukova, akaendisa zveshe zvaaiya nazvo. Jakobe wakasara ari ega; nomunhu wakaita matsimba naye metsa kuedza kwokubanze. Apo aona kuti aazi kumunyisa, wakagwama mudzira wenhunji yake; nenhunji yaJakobe yakanika echiita matsimba naye. Wakati, “Ndirekere, ndiende, ngokuti kubanze kwoedza.” Naye wakati, “Andizokurekeri kuti uende, metsa wandifumisa.” Wakati kwaari, “Zina rako ndiani?” Iye wakati, “Jakobe.” Zvino wakati, “Zina rako arichazodaidzwi kuti Jakobe, asi kuti Isuraeri, ngokuti wakadzipana naMwari nevanhu, ukanyisa.” Jakobe wakamubvunza, akati, “Ndironzere, ndapota, zina rako.” Asi wakati, “Ngenyi wechibvunza zina rangu?” Wakamufumisapo. Jakobe wakadudza zina rendau iyo kuti Phenieri, zvinoronza kuti, “Ngokuti ndaonana naMwari hope ngehope, asi kupona kwangu kwakangwaririka.” Zuva rakabuda echiambuka Phenieri, waikumhina ngendaa yenhunji yake. Ndizvo vana vaIsuraeri avadyi murunda uri pagodo romuchiunu metsa nanyamashi, ngokuti wakagwama nhunji yaJakobe pamurunda wenhunji. Jakobe wakamirudza madziso ake, akaringira, akaona Isau echiuya, ane vanhu mazana marongomuna (400). Wakapaura vana pakati paRea naRacheri nevarandakadzi vairi. Wakaisa varandakadzi vairi nevana vavo pamberi, Rea nevana vake ngepasure, Racheri naJosefa ngepamagumisiro. Iye emene wakaambuka ngepamberi pavo, akadzikotamisa kanomwe pamavhu, metsa wakakwedzera kunomukoma wake. Isau wakarumba kooshongana naye, akamukumbatira, akawira pamutsipa wake, akamuchingamidza ngomuromo, vakachema. Wakamirudza madziso ake, akaona vakadzi nevana, akati, “Ndiani avo vounavo?” Iye wakati, “Vana vaakapa Mwari ngenyasha kunomuranda wako.” Naapo varandakadzi vakakwedzera pasinde nevana vavo, vakadzikotamisa; Rea nevana vake vakakwedzerawo pasinde, vakadzikotamisa; ngesure wakakwedzera pasinde Josefa naRacheri, vakadzikotamisa. Wakati, “Unoronzenyi ngeizvo zvikwata zveshe zvendashongana nazvo?” Iye wakati, “Ngezvokuitira kuti ndione nyasha mukuona kwamambo wangu.” Isau wakati, “Ndine zvakakwana, munun'una wangu. Izvo zvounazvo ngazviite zvako.” Jakobe wakati, “Haiwa, ndapota, kudai zvino ndaona nyasha mukuona kwako, ashira chipo changu kubva munyara yangu, ngokuti ndaona hope yako kudai ngomunhu waona hope yaMwari, newe wadakara ndini. Ashira, ndinokupota, chipo changu icho chaunzwa kwouri, ngokuti Mwari wakaita nyasha kwendiri, ngokuti ndinazvo zvakakwana.” Wakamunyengerera, akazviashira. Wakati, “Ngatihambe rwendo rwedu, ngatiende, neni ndinozotungamira pamberi pako.” Asi wakati kwaari, “Mambo wangu unozia kuti vana vachi vatete, makwai nen'ombe zvineni zvinoamwisa, kudai vechizonyanya kuzvitinha zuva rimwe, nezvifuyo zveshe zvinozofa. Ndinomupota, mambo wangu ngaatungamire pamberi pomuranda wake, neni ndinozohamba padoko padoko, kudai ngezvingagwinyirwa ngezvifuyo zvinohamba pamberi pangu, nokudai ngezvinogwinyirwa ngevana, metsa ndigume kunamambo wangu kuSeira.” Isau wakati, “Ngandisiye kwouri zvino vamweni vevanhu vaneni.” Iye wakati, “Muchaitirenyi kudaro? Ngandione nyasha mukuona kwamambo wangu.” Ndizvo Isau wakahwirira ngeiro zuva ngenjira yake yokuenda Seira. Jakobe wakahamba kuenda Sukothi, akadziakira mhatso, wakaaka zvibaya zvezvifuyo zvake, ndizvo zina rendau iyo rakadudzwa kuti Sukothi. Jakobe wakaguma zvakanaka kudhorobha reShekhemu, riri munyika yeKhenani, apo abva Padhana-aramu; wakaemesa matende ake akaringirana nedhorobha. Wakatenga chigurwa chenyika kubva kunevana vaHamori, baba aShekhemu, ngezvigurwa zvesirivha zana (100), apo paaiya aemesa matende ake. Wakaakapo arita, akaridudza kuti Eri-erohe-Isuraeri. Dhaina mwana waRea, waakabarira Jakobe, wakabuda kuvhakachira vakunda venyikayo. Shekhemu mukororo waHamori muHivhi, muzvare wenyikayo, wakamuona; wakamutora ngesimba, akaatana naye, akamushaishira. Mweya wake wakanamatira kunaDhaina mwana waJakobe, akamuda uwo musikana, akapfaisa kuereketa kunomusikana. Shekhemu wakaereketa kunababa ake Hamori echiti, “Nditorerei uyu musikana kuti aite mukadzi wangu.” Zvino Jakobe wakazwa kuti iye waiya ashaishira Dhaina mwana wake; vakororo vake vaiya nen'ombe dzake mushango, naJakobe wakanyarara metsa vakauya. Hamori, baba aShekhemu, wakabuda kuenda kunaJakobe koopangana naye. Vakororo vaJakobe vakauya kubva mushango; naapo vazvizwa, vamuna ava vakatambudzika, vakatseneka kakurutu, ngokuti wakaita chiro chakapinda kushata kuvaIsuraeri ngokuatana nomwana waJakobe; chiro chisikasisiri kuti chiitwe. Hamori wakapangana navo echiti, “Mwoyo womukororo wangu Shekhemu unodisisa mwana wenyu, ndapota kwomuri, mupei kwaari kuita mukadzi. Roodzanai nesu mutipe vana venyu, wechitora vana vedu. Munozogara nesu, nyika inozoa pamberi penyu; garai, mwechitengesa muri mukati mwayo mudziunganidziremwo upfumi.” Shekhemu wakati kunababa ake nokunevakoma vake, “Ngandione nyasha mukuona kwenyu, neizvo zvomunozoronza kwendiri ndinozozvipa. Mukadaidza chuma chakanyaitawani nechipo, neni ndinozopa kudai ngezvomunoronza kwendiri, asi ndipei musikana kuita mukadzi wangu.” Vakororo vaJakobe vakapingura Shekhemu naHamori baba ake ngourimbwi, vakaereketa kudaro ngokuti waiya ashaishira mukunda wavo Dhaina. Vakati kwaari, “Atikoni kuita chiro ichi, kupa mukunda wedu kunouwo usikazi kuchekwa, ngokuti izvo zvingaita chitsverudzo kwetiri. Kwega ngokuita izvi tinozokutendera, kudai mwechizoita kudai ngezvetinoita isusu, kuti vamuna veshe kwomuri vachekwe. Naapo tinozopa vakunda vedu kwomuri, nesu tinozotora vakunda venyu kwetiri, tinozogara nemwi, tinozoita vanhu vamwevo. Asi kudai musikapurutani kwetiri, kuti muchekwe, naapo tinozotora mwana wedu tiende.” Mazwi avo akadakadza Hamori naShekhemu mukororo waHamori. Jaha arizi kunonoka kuita kudaro, ngokuti raiya nokudakara ngemwana waJakobe, naro raipinda kuremeredzeka kune vemhatso yaro yeshe. Hamori naShekhemu mukororo wake vakauya pamusiwo wedhorobha ravo, vakapangana nevamuna vedhorobha ravo vechiti, “Ava vanhu vanoiyana nesu; ndizvo tendai kuti vagare munyika, vatengise mukati mwayo, ngokuti, wonai, nyika yakakura inovakwana; ngatitore vana vavo kuita vakadzi, ngativape vana vedu. Kwega ngokuita izvi vanhu avo vanozotenda kugara nesu, kuita vanhu vamwevo, kudai vamuna veshe pakati pedu vechichekwa kudai ndivo vakachekwa. N'ombe dzavo noupfumi hwavo nezvifuyo zvavo zveshe azvizoiti zvedu here? Kwega ngativatendere, navo vanozogara nesu.” Avo veshe vaibuda ngepamusiwo wedhorobha vakapurutana kunaHamori nokunaShekhemu, mukororo wake; vamuna veshe vakachekwa, avo veshe vaibuda ngepamusiwo wedhorobha rake. Ngezuva rechitatu, apo voorwadziwa, vairi vevakororo vaJakobe, Simeoni naRevhi vakoma vaDhaina, vakatora shoti dzavo, vakauya kudhorobha ngokushinga, vakauraya vamuna veshe. Vakauraya Hamori naShekhemu mukororo wake ngokupinza kweshoti, vakabudisa Dhaina kubva mumhatso yaShekemu, vakaenda. Vakororo vaJakobe vakauya kune vakaurawa, vakachakata dhorobha, ngokuti vakasvipisa mukunda wavo. Vakatora makwai avo, n'ombe dzavo, mbongoro dzavo neizvo zvaiya mukati mwedhorobha, neizvo zvaiya muminda. Noupfumi hwavo hweshe, vadoko vavo veshe nevakadzi vavo, vakavatora kuita hloko, vakachakata zveshe zvaiya mumhatso. Jakobe wakati kunaSimeoni naRevhi, “Mwandiunzira madambudziko, mwandiita kuti ndinuhwe pakati pevagari venyika, pakati pevaKhenani nevaPherizi; vangu vashomani, vanozodziunganidza kurwa neni; ndinozourawa, inini nevemhatso yangu.” Asi vakati, “Waisisira here kubata mukunda wedu kudai ngehure?” Mwari wakati kunaJakobe, “Miruka, ukwire Bhetheri, ugareyo; umuakire apo Mwari arita, uwo wakaoneka kwouri apo waitiza kubva kuhope yaIsau mukoma wako.” Ndizvo Jakobe wakati kunevemhatso yake, nokwavari veshe vaiya naye, “Rashai zvimwari zviri pakati penyu, mudzichenese ngokwenyu, musimire zvokusimira zvimweni. Ngatimiruke, tikwire Bhetheri; ndinozomuakirapo Mwari arita, uwo wakandipingura ngezuva rokutambudzika kwangu, waiya neni munjira yendakahamba.” Ndizvo vakapa Jakobe zveshe zvimwari zvipara zvaiya munyara dzavo, nemativhera aiya munzee dzavo; Jakobe wakazvifushira pashi pomuokhi uwo waiya pasinde peShekemu. Vakahamba rwendorwo, nokutyisa kwaMwari kwaiya padera pemadhorobha aivatendenedza, avazi kurumbirira vakororo vaJakobe. Ndizvo Jakobe wakauya Ruzi, rinozwi Bhetheri, riri munyika mweKhenani, iye nevanhu veshe vaiya naye. Naapo wakaakapo arita, akadudza zina rendau iyo kuti Eri-bhetheri, ngokuti Mwari wakaonekapo kwaari, apo aitiza kubva kuhope yomukoma wake. Dhebhora mureri waRebheka wakafa, akatsirwa ngokubani kweBhetheri pashi pomuokhi, nezina rawo rakadudzwa kuti Aroni-Bhakuthi. Mwari wakaonekazve kunaJakobe, apo paakauya kubva Padhana-aramu, akamufumisa. Mwari wakati kwaari, “Zina rako ndiJakobe; zina rako arichazodaidzwizve kuti Jakobe, asi rinozozwi Isuraeri.” Wakadudza zina rake kuti Isuraeri. Mwari wakati kwaari, “Ndiri Mwari Unesimba-reshe; baranai muwande; kunozobva kwouri dzinza nechiunga chemadzinza, nemadzimambo anozobarwa kubva muchiunu chako. Nyika yendakapa kunaAbrahama naIsaka ndinozoipa kwouri, nokumibarirwana yako inozoteera sure kwako ndinozoipa iyi nyika.” Zvino Mwari wakakwira kubva kwaari, kubva pandau yaakaereketa naye. Jakobe wakadzimika mujeki pandaupo paakaereketa naye, chaiya chioniso chebuwe, akadurura mudiro wokumwa padera pawo, akadurura mafuta padera pawo. Jakobe wakadudza zina rendau iyo paakaereketa naye Mwari kuti Bhetheri. Zvino vakahamba kubva Bhetheri; naapo vachiri kamuhambo kadoko kuguma Efrathi, Racheri wakapotwa ngokuda kubara, akarwadziwa kakurutu. Naapo achiri pakurwadziwa kakurutu, muashiri wakati kwaari, “Usatya; ngokuti zvino unozobara mukororo umweni.” Naapo mweya wake uchabuda kubva mwaari (ngokuti wakafa), wakadudza zina rake kuti Bhenoni, asi baba ake vakamududza kuti Bhenjamini. Racheri wakafa, akatsirwa munjira yokuenda Efrathi, iro ndiro Bhetherehema. Jakobe wakadzimika mujeki paiba rake, uwo unozwi mujeki weiba raRacheri metsa nanyamashi. Isuraeri wakahamba, akaemesa tende rake ngepamberi porusvingo rweEdheri. Zvino Isuraeri echigara munyika iyo, Rubheni wakaenda akaatana naBhiriha bunha rababa ake, naIsuraeri wakazwa ndizvo. Zvino vakororo vaJakobe vaiya gumi navairi. Vakororo vaRea vaiya Rubheni, dangwe raJakobe, Simeoni, Revhi, Judha, Isakha, naZebhuruni. Vakororo vaRacheri vaiya Josefa naBhenjamini. Vakororo vaBhiriha murandakadzi waRacheri vaiya Dhani naNafitari. Vakororo vaZiripha murandakadzi waRea vaiya Gadhi naAsha, ava ndivo vakororo vaJakobe vaakabarirwa muPadhana-aramu. Jakobe wakauya kunababa ake Isaka kuMamure, nokuti Kiriathi-Abha, (ndiro Hebroni), apo pevakambogara Abrahama naIsaka. Mazuva aIsaka aiya makore zana nemakumi masere (180). Isaka mweya wake wakabuda; akafa, akaunganidzwa kune vanhu vake, aamusharuka yaamho ane makore mazhinji; Isau naJakobe vakororo vake vakamutsira. Zvino iyi ndiyo mibarirwana yaIsau, (unozwi Edhomu). Isau wakadzitorera vakadzi vake kubva kuvaKhenani; Adha, mwanasikana waEroni muHiti, Ohoribhama mwanasikana waAna, mwanasikana waZibheoni muHivhi, naBhasemathi mwanasikana waIshumaeri, mukunda waNebhaiothi. Adha wakabarira Isau Erifazi; naBhasemathi wakabarira Isau Reueri. NaOhoribhama wakabara Jeushi, Jaramu naKhora. Ava vakororo vaIsau vaakabarirwa munyika yeKhenani. Zvino Isau wakatora vakadzi vake, vakororo vake, vanasikana vake nevanhu veshe vemhatso yake, n'ombe dzake, zvifuyo zvake zveshe nepfuma yake yeshe, zvaaiya auyirwa ndizvo munyika yeKhenani; wakaenda munyika imweni kuretu kubva kunomunun'una wake Jakobe. Ngokuti upfumi hwavo hwaiya hwawanda kwavari vasikachakoni kugara pamwepo; nenyika yevaiya zvigarandimo yaiya isikachakwani ngendaa yezvifuyo zvavo. Isau wakagara munyika yemitunhu yeSeira; Isau ndiye Edhomu. Iyi ndiyo mibarirwana yaIsau baba wevaEdhomu weSeira. Aya ndiwo mazina evakororo vaIsau: Erifazi mukororo waAdha mukadzi waIsau, Reueri mukororo waBhasemathi mukadzi waIsau. Vakororo vaErifazi vaiya Temani, Omari, Zefo, Gatamu naKhenazi. Thimina waiya bunha raErifazi mukororo waIsau; wakabarira Erifazi Amareki. Ava ndivo vakororo vaAdha mukadzi waIsau. Ava ndivo vakororo vaReueri: Nahathi, Zera, Shama naMiza. Ava ndivo vakororo vaBhasemathi, mukadzi waIsau. Ava ndivo vakororo vaOhoribhama mwanasikana waAna, mukunda waZibheoni, mukadzi waIsau; iye wakabarira Isau Jeushi, Jaramu naKhora. Ava ndivo madzimambo evakororo vaIsau. Vakororo vaErifazi dangwe raIsau: mambo Temani, mambo Omari, mambo Zefo, mambo Khenazi, mambo Khora, mambo Gatamu namambo Amareki; ava ndivo madzimambo akabarwa ndiErifazi munyika yeEdhomu; ava vakororo vaAdha. Ava ndivo vakororo vaReueri mukororo waIsau: mambo Nahathi, mambo Miza; ava ndivo madzimambo akabarwa ndiReueri munyika yeEdhomu; ava vakororo vaBhasemathi mukadzi waIsau. Ava ndivo vakororo vaOhoribhama mukadzi waIsau: mambo Jeushi, mambo Jaramu namambo Khora; ava madzimambo akabarwa ndiOhoribhama mwanasikana waAna mukadzi waIsau. Ava ndivo vakororo vaIsau (ndiye Edhomu), naavo ndivo madzimambo avo. Ava ndivo vakororo vaSeira, muHori, vagari venyikayo; Rotani, Shobhari, Zibheoni, Ana, Dhishoni, Eza naDhishani. Ava madzimambo akabarwa ngevaHori, vana vaSeira munyika yeEdhomu. Vakororo vaRotani ndiHori naHemani; nomukunda waRotani ndiThimina. Ava ndivo vana vaShobhari: Arivhani, Manahathi, Ebhari, Shefo naOnamu. Ava ndivo vana vaZibheoni: Aia naAna; uyu ndiye uwo Ana wakaona zvinyuka zvemvura mushango, echiusha mbongoro dzaZibheoni baba ake. Ava ndivo vana vaAna: Dhishoni naOhoribhama mwanasikana waAna. Ava ndivo vana vaDhishoni: Hemudhani, Eshibhani, Ithirani naKerani. Ava ndivo vana vaEza: Bhirihani, Zaavhani naAkhani. Ava ndivo vana vaDhishani: Uzi naArani. Ava ndivo madzimambo evaHori: mambo Rotani, mambo Shobhari, mambo Zibheoni, mambo Ana, mambo Dhishoni, mambo Eza, mambo Dhishani; ava vari madzimambo akabarwa ngevaHori, kudai ngoumambo hwavo munyika yeSeira. Ava ndiwo madzimambo akatonga munyika yeEdhomu, pasati paana mambo wakatonga padera pevana vaIsuraeri. Bhera, mukororo waBheo, wakatonga muEdhomu, nezina redhorobha rake raizwi Dhinihabha. Bhera wakafa, naJobhabhi mukororo weZera weBhozira wakatonga pandau yake. Jobhabhi wakafa, naHushamu wenyika yevaTemani wakatonga pandau yake. Hushamu wakafa, naHadhadhi mukororo waBhedhadhi, uwo wakanyisa vaMidhiani munyika yevaMoabhi, wakatonga pandau yake, nezina redhorobha rake raizwi Avhithi. Hadhadhi wakafa, naSamira weMasireka wakatonga pandau yake. Samira wakafa, naShauri weRehobhothi repasinde porwizi, wakatonga pandau yake. Shauri wakafa, naBhaari-hanani mukororo waAkhebhori wakatonga pandau yake. Bhaari-hanani mukororo waAkhebhori wakafa, naHadhari wakatonga pandau yake, nezina redhorobha rake raizwi Pau; nezina romukadzi wake raiya Mehetabheri, mwanasikana waMatredhi, mwanasikana waMezahabhi. Aya ndiwo mazina emadzimambo awo akabarwa kubva kunaIsau, kudai ngokuteererana kwemhatso dzavo, kwemaguta avo nokwemazina avo: mambo Timina, mambo Arivha, mambo Jethethi, mambo Ohoribhama, mambo Era, mambo Pinoni, mambo Khenazi, mambo Temani, mambo Mibhiza, mambo Magidhieri, mambo Iramu; ava ndivo madzimambo veEdhomu, (kuronza Isau, baba veEdhomu) kudai ngokuteererana kwougaro hwavo, munyika yavo. Jakobe wakagara munyika umwo mwaiya baba ake vakaita chigarandimo, nyika yeKhenani. Iyi ndiyo mibarirwana yaJakobe. Josefa, aane makore gumi namanomwe, waiusha zvifuyo nevakoma vake, vakororo vaBhiriha nevakororo vaZiripha, vakadzi vababa ake, naJosefa wakauya nemashoko akashata ndivo kunababa ake. Zvino Isuraeri wakada Josefa kupinda vana vake veshe, ngokuti iye waiya mukororo wousharuka hwake; wakamuitira bhachi rine miara yakawanda. Asi apo vakoma vake vaona kuti baba vavo vakamuda kupinda ivo vakoma vake veshe, vakamuzonda, vasaikona kuereketa naye ngokunyarara. Josefa wakarota hope, akadzironzera vakoma vake; vakapinda kumuzonda. Wakati kwavari, “Izwai, ndinomupota, uku kurota kwendarota. Ringirai, taiya techisunga mwanda mumunda, ndikaona, mwanda wangu wamiruka; ukaema, ndikaona, mwanda yenyu yakautendenedza, yakakotamira mwanda wangu.” Vakoma vake vakati kwaari, “Ngegwinyiso unozotonga padera pedu here? Nokuti ngegwinyiso unozoita mambo padera pedu here?” Vakapindisisa kumuzonda ngendaa yokurota kwake, nendaa yemazwi ake. Wakarota hope dzimweni, akadzironzera vakoma vake, akati, “Wonai, ndarota hope dzimweni; ndaona, zuva nomwedzi nenyeredzi gumi naimwe zvakandikotamira.” Wakadzironzera kunababa ake nevakoma vake; baba ake vakamuganyira, vakati kwaari, “Kurotanyi uku kwowarota? Ngegwinyiso here kuti inini namai ako nevakoma vako tinozouya kudzikotamisa kwouri?” Vakoma vake vakaita ndurumwa ndiye; asi baba ake vakakarakadza ngeizwi iro. Vakoma vake vakaenda koousha zvifuyo zvababa avo paShekhemu. Isuraeri wakati kunaJosefa, “Vakoma vako avaushiri zvifuyo paShekhemu here? Uya, ndinozokutuma kwavari.” Iye wakati kwavari, “Ndiri pano.” Ndizvo vakati kwaari, “Enda, ndapota, uone kuti vakoma vako vanogara zvakanaka here nezvifuyo, undiunzirezve izwi.” Ndizvo wakamutuma kubva mubani reHebroni, akaguma Shekhemu. Nomunhu wakamuona, penya, waihamba-hamba mushango nomunhuwo wakamubvunza kuti, “Unotsvakenyi?” Wakati, “Ndinotsvaka vakoma vangu; ndapota, ndironzere pevanoushira.” Munhuwo wakati, “Vakabva pano, ngokuti ndakazwa vechiti, ‘Ngatiende Dhothani.’ ” Ndizvo Josefa wakateera vakoma vake naye wakavaona paDhothani. Vakamuona achikuretu, asati akwedzera kwavari, vakaita dumba ndiye rokumuuraya. Vakati umwe kunoumweni, “Ringirai, uyu muroti unouya. Ndizvo zvino uyai, ngatimuuraye, timukandire mukati mwerimwe remarindi, nesu tinozoti wakadyiwa ngechikara chakashata, nesu tinozoona ngokurota kwake.” Rubheni wakazvizwa, akamununura kubva panyara dzavo; akati, “Tisamuuraya.” Rubheni wakati kwavari, “Musaparadza ngazi; asi mukandirei murindi iri riri mushango, asi musaisa nyara padera pake.” Waida kumununura kubva munyara dzavo, amuhwirinze kunababa ake. Naapo Josefa paakauya pavakoma vake, vakamubvisa bhachi rake, bhachi iro raiya nemiara yakawanda, raaiya akapfeka. Vakamutora, vakamukandira murindi raiya risina chiro, mwaiya musina mvura mukati mwaro. Vakagara pashi kudya chingwa; vakamirudza madziso avo, vakaringira, vakaona chikwata chevaIshumaeri chaiuya chechibva Gireadhi, chine makamera acho, akatwara mutombo inonuhwira nemaka nemhura, kudzaka nazvo Egipite. Judha wakati kuhama dzake, “Zvingatidetserenyi kudai techiuraya munun'una wedu nokufisha ngazi yake? Uyai ngatimutengise kuvaIshumaeri kuti nyara dzedu dzisaa padera pake; ngokuti munun'una wedu nenyama yedu.” Hama dzake dzakamupurutana. Zvino vaMidhiani vatengisi vakapinda ndipo; navo vakakweya nokubudisa Josefa kubva murindi, vakatengesa Josefa kuvaIshumaeri ngezvigurwa zvesirivha makumi mairi (20), vakaunza Josefa muEgipite. Rubheni wakahwirira kurindi; wakaona, Josefa asirimwo murindi; naye wakabaura zvokusimira zvake. Wakahwirira kuvanun'una vake, akati, “Mwana amuchina, neni ndinozoenda pari?” Vakatora bhachi raJosefa, vakauraya chiphongo, vakanyika bhachi mungazi. Vakatumira bhachi iro raiya nemiara yakawanda, vakariisa kunababa avo, vakati, “Taona iri, ringirai zvino muone kuti ibhachi romukororo wenyu here.” Naye wakarizia, akati, “Ndiro bhachi romukororo wangu; chikara chakamudya; azvirambiki Josefa wakabvajurwa kuita zvigurwa.” Jakobe wakabaura zvokusimira zvake, akapfeka jira resaka pachiunu chake, akabonda mazuva akawanda ngendaa yomukororo wake. Veshe vakororo vake nevanasikana vake vakamiruka kumuembedzera; akati, “Ndinozodzaka muiba kunomukororo wangu ndechibonda.” Ngokudaro baba ake vakamuchema. VaMidhiani vakamutengesa muEgipite kunaPotifa, nduna huru yaFaro, yaiya nduna yemajoni. Ndizvo ngouwo mukuwo Judha wakadzaka kubva kuhama dzake, akaguma kuno munhu umweni muAdhuramu, zina rake raizwi Hira. Judha wakaonayo mwanasikana womuKhenani umweni, zina rake raizwi Shua; akamutora, akapotera kwaari. Wakaita mimba, wakabara mukororo; akadudza zina rake kuti Eri. Wakaitazve mimba, akabara mukororo; akadudza zina rake kuti Onani. Wakaitazve mimba, akabara mukororo; akadudza zina rake kuti Shera. Waiya paKezibhi apo paakamubara. Judha wakaroodza Eri dangwe rake mukadziwo zina rake raizwi Thamari. Eri dangwe raJudha raiya rakashata mukuona kwaMambo Mwari, naMambo Mwari wakamuuraya. Judha wakati kunaOnani, “Potera kumukadzi womukoma wako, umuroore, umusire mukoma wako dzinza.” Onani wakazia kuti vana avazoiti vake; ndizvo apo oopotera kunomukadzi womukoma wake, wairashira mbeu pashi pamavhu, kuitira kuti asazopa vana kunomukoma wake. Izvo zvaakaita zvaiya zvakashata mukuona kwaMambo Mwari, ndizvo wakamuurayawo. Zvino Judha wakati kunaThamari muzakazi wake, “Gara uri shirikadzi kumhatso yababa ako metsa Shera mukororo wangu akura,” ngokuti wakatya kuti pamweni ungazofawo, kudai ngevakoma vake. Ndizvo Thamari wakaenda, akagara mumhatso yababa ake. Ngesure kwomukuwo mwanasikana waShua mukadzi waJudha wakafa; naJudha wakaembedzerwa, akakwira kuenda kune vaigunda makwai ake kuThimina, iye nomungani wake Hira muAdhuramu. Thamari wakaronzerwa kuti, “Ringira, sezara vako vanokwira Thimina koogunda makwai avo.” Wakadusa zvokusimira zvoushirikadzi, akadzifukidza, akagara pamusiwo wokuenda Enaimu, uri munjira yokuenda Thimina; ngokuti wakaona kuti Shera wakura, asi aazi kupuwa kwaari kumuita mukadzi. Naapo Judha amuona, wakapinimidza kuti waiya chifebi; ngokuti waiya akadzifukidza hope yake. Wakapauka kuenda kwaari kubva munjira, akati, “Hambai, ndapota, nditendere ndipotere kwouri,” ngokuti aazi kuzia kuti muzakazi wake. Naye wakati, “Unozondipenyi, kuti upotere kwendiri?” Wakati, “Ndinozokutumira mbudzana kubva kuzvifuyo.” Wakati, “Unozondipa chibatiso here, metsa uitumire?” Wakati, “Ndinozokupa chibatiso chenyi?” Iye wakati, “Ndandazi yako, tambo yako nendonga yako iri munyara dzako.” Wakazvipa kwaari, akapotera kwaari, naye wakaita mimba ndiye. Wakamiruka, akaenda, akadusa vheri rake, akasimira zvokupfeka zvake zvoushirikadzi. Judha wakatumira mbudzana ngenyara yemungani wake muAdhuramu, kuti aashire chibatiso chake kubva kunyara dzomukadziwo, asi aazi kumuona. Naapo wakabvunza vanhu veiyo ndau echiti, “Chiri pari chifebi chaiya pamusiwo paEnaimu ngeparutii penjira?” Vakati, “Paiya pasina chifebi pandau iyi.” Wakahwirira kunaJudha, akati, “Andizi kuchiona; zve, nevanhu vendau iyo vakati, ‘Paiya pasina chifebi pano.’ ” Judha wakati, “Ngaazvitore hake, kuti tisazotsverudzwa; wona, ndakatumira iyi mbudzana, newe auzi kuchiona.” Kwakaitika ngesure kwemwedzi inoda kuita mitatu, Judha wakaronzerwa kuti, “Thamari muzakazi wako wakaita chifebi; zve, waanemimba ngoufebi.” Judha wakati, “Mubudisenyi kubanze, kuti apishwe.” Naapo echibudiswa, wakatumira kunasezara ake izwi echiti, “Ndakaitiswa mimba ngomunhu munikazi weizvi zviro. Ringisisa, ndapota, kuti ngezvaani izvi, ndandazi, tambo nendonga.” Judha wakazvizia, akati, “Wakarurama kupinda inini, ngokuti andizi kumupa kunaShera mukororo wangu.” Aazi kuchazopoterazve kwaari. Naapo nguva yokubara kwake, ringira, manyambiri aiya mundani mwake. Naapo abara, umwe wakabudisa nyara yake, muashiri wakatora tambo yakatsvuka, akaisunga panyara yake echiti, “Uyu watanga kubuda.” Naapo ahwirinza nyara yake, munun'una wake wakabuda; akati, “Ndizvo ndiyo njira yewabuda ndiyo!” Ndizvo zina rake rakadudzwa kuti Pherezi. Ngesure wakabuda mukoma wake, uwo waiya netambo yakatsvuka mumuoko wake, nezina rake rakadudzwa kuti Zera. Josefa wakadzaswa Egipite; Potifa, nduna huru yaFaro, nduna yemajoni, muEgipite, wakamutenga kubva kunyara dzevaIshumaeri, avo vakadzaka nayeyo. Mambo Mwari waindoiya naJosefa, naye waiya munhu unomuchena; waigara mumhatso yamambo wake muEgipite. Mambo wake wakaona kuti Mambo Mwari waiya naye, nokuti Mambo Mwari wakaita kuti zveshe zvaakaita zvibudirire munyara dzake. Josefa wakaona nyasha mukuona kwake, akamushandira; wakamuita mukuru padera pemhatso yake, nepadera peizvo zveshe zvaaiya nazvo, wakazviisa munyara dzake. Zvino kubvira ngomukuwo waakamuemesa kuita mukuru wemhatso yake, nepadera pazvo zveshe zvaaiya nazvo, Mambo Mwari wakafumisa mhatso yomuEgipite ngendaa yaJosefa; nokufumisa kwaMambo Mwari kwaiya padera pazvo zveshe zvaaiya nazvo mumhatso nomuminda. Wakaturira zveshe zvaaiya nazvo munyara dzaJosefa; waiya asikachatambudziki ngechiro nachimwe cheizvo zvaaiya nazvo, asi kwega kudya ukwo kwaakadya. Zvino Josefa waiya akanaka, ane chiemo chinoringirika. Zvino ngesure kweizvi mukadzi wamambo wake wakaringira Josefa; akati, “Ata neni.” Asi iye wakaramba, akati kuno mukadzi wamambo wake, “Ringira, mambo wangu aazii zvineni mumhatso, wakaisa zveshe zvaanazvo munyara dzangu. Akuna mumhatso muno ari mukuru kupinda inini; nokuti kusara nechiro nachimwe asi iwewe, ngokuti uri mukadzi wake. Ndizvo ndingaita maitirenyi uku kushata kukurutu, ndishaishe kunaMwari?” Kunyazwi wakaereketa kunaJosefa zuva ngezuva, aazi kumupurutana, kuti aatane naye nokuti kugara naye. Asi zuva rimweni Josefa wakapinda mumhatso ooita mushando wake; mwaiya musina munhu naumwe mukati mwemhatso. Wakamubata ngechokusimira chake, echiti, “Atana neni.” Asi wakasiya chokusimira chake munyara mwake, akatiza, akabuda. Naapo aona kuti wakasiya chokusimira chake munyara mwake, naye akatiza kubuda mumhatso, wakadaidzira kune vamuna vemhatso yake, akaereketa kwavari echiti, “Ringirai, wakatiunzira muHebheru, kuti atiitire jee! Wakapinda kwendiri kuti aatane neni, ndakadaidzira ngeizwi guru; naapo azwa kuti ndakaboorera nokuchema, wakasiya chokusimira chake, chiri pasinde pangu, akatiza kubuda mumhatso.” Wakaisa chokusimira chake pasinde pake, metsa mambo wake wakauya kanyi. Wakaereketa kwaari kudai ngaaya mazwi echiti, “Muranda muHebheru uwo wowakaunza kwetiri, wapotera kwendiri kundiitira jee; asi apo ndaboorera ngeizwi rangu, ndechidaidzira, wasiya chokusimira chake chineni, akatiza kubuda mumhatso.” Naapo mambo wake azwa mazwi omukadzi wake, aakaereketa kwaari echiti “Muranda wako wakaita zvakadai kwendiri,” ushungu hwake hwakabaka. Mambo waJosefa wakamutora, akamupinza mutirongo, mundau iyo yaipinzwa mabhanditi amambo, wakagaramwo mutirongo. Asi Mambo Mwari waiya naJosefa, wakamuonisa nyasha, akamupa kudikanwa mukuona kwomungwariri wetirongo. Mungwariri wetirongo wakapa munyara dzaJosefa mabhanditi eshe aiya mutirongo; kunyazwi chiinyi chaiitwamwo, ndiye waichiita. Mungwariri wetirongo aazi kutambudzika ngechiro nachimwe chaiya pashi penyara dzaJosefa ngokuti Mambo Mwari waiya naye; kunyazwi ngechiri chaakaita, Mambo Mwari wakaita kuti chibudirire. Panguva imweni ngesure kweizvi, mubati wezvidziyo zvamambo weEgipite, nomubiki wake, vakanyangadza mambo wavo, mambo weEgipite. Faro wakanyangadzirwa varanda vake vairi, mukuru wevabati vezvidziyo nomukuru wevabiki. Wakavapinza mutirongo mumhatso yenduna huru yevangwariri, mutirongo pandau apo paaiya pakasungirwa Josefa. Nduna huru yevangwariri yakapanga Josefa kuvangwarira, naye wakavashandira, vakagara mukuwo vari mutirongo. Vakarota hope, vari vairi, umwe ngaumwe wakarota hope dzake usiku humwehwo, munhu umwe ngaumwe kudai ngokukumuchwa kwehope dzake, mubati wezvidziyo nomubiki wamambo weEgipite, avo vakasungwa mutirongo. Josefa wakapotera kwavari mangwanani, wakavaringira, akaona, vasikadakari. Wakabvunza varanda vaFaro vaiya navo mutirongo mumhatso yamambo wake echiti, “Ngenyi hope dzenyu dzisikadakari kudaro nyamashi?” Vakati kwaari, “Tarota hope, akuna unokona kudzidudzira.” Josefa wakati kwavari, “Kududzira angekwaMwaripi here? Dzironzei kwendiri, ndapota.” Mukuru wevabati vezvidziyo wakaronzera Josefa kurota kwake, akati kwaari, “Mukurota kwangu ndakaona muvhini waiya pamberi pangu, paiya nematai matatu mumuvhini; naapo abuda maruva awo akatseneneka, nezvikore zvawo zvakabara mavhini akaibva. Tsani yaFaro yaiya munyara mwangu; ndakatora mavhini, ndikaakamurira mutsani mwaFaro, ndikaipa tsani munyara yaFaro.” Josefa wakati kwaari, “Uku ndikwo kududzirwa kwadzo: matai matatu mazuva matatu. Mumazuva matatu Faro unozomirudza soro rako echikuhwirinza pamushando wako; newe unozopa tsani yaFaro munyara yake, kudai ngezvowaiita uchiri mubati wezvidziyo. Asi uzondikarakadzawo apo pezvinozonaka kwouri, uonise nyasha kwendiri, ndapota, undiereketerewo kunaFaro, neni undibudiswe kubva mumhatso iyi. Ngokuti ngegwinyiso ndakabiwa ngesimba kubva kunyika yevaHebheru, nepanozve andizi kuita chiro chinondiita kuti ndiiswe mutirongo.” Naapo mukuru wevabiki aona kuti kududzirwa kwaiya kwakanaka, wakati kunaJosefa, “Ininiwo mukurota kwangu ndaiya nezvitundu zvitatu zvezvingwa zvakachena padera pesoro rangu. Muchitundu chaiya ngepadera, mwaiya nembeu dzeshe dzokudya kwakabikwa kwaFaro; asi shiri dzakadya muchitundu chaiya padera pesoro rangu.” Josefa wakapingura, akati, “Uku ndikwo kududzirwa kwadzo, zvitundu zvitatu mazuva matatu. Mumazuva matatu Faro unozomirudza soro rako kubva kwouri nokukuturika pamuti; neshiri dzinozodya nyama yomuiri wako.” Ngezuva rechitatu raiya zuva rokubarwa kwaFaro, wakaitira varanda vake veshe dhiri. Wakamirudza soro romukuru wevabati vezvidziyo nesoro romukuru wevabiki pakati pevaranda vake. Wakahwirinza mukuru wevabati vezvidziyo pamushando wake, naye wakapa tsani munyara yaFaro; asi wakaturika mukuru wevabiki, kudai ngezvaaiya akadudzira Josefa kwavari. Asi mukuru wevabati vezvidziyo aazi kukarakadza Josefa asi wakamuriyarwa. Ngesure kwemakore mairi akazara apera, Faro wakarota hope: akaema parwizi, wakaona kwechibuda kubva murwizi n'ombe nomwe dzakanaka dzakakora, dzikafura mutsanga. Wakaonazve, n'ombe dzimweni nomwe dzakavhiririka, dzakaonda dzakabuda murwizi ngesure kwadzo, dzikaema pasinde pen'ombe dzimweni nomwe pahumbikumbi yorwizi. N'ombe dzakavhiririka dzakaonda dzakadya n'ombe nomwe dzakanaka dzakakora. Naapo Faro wakamuka. Wakaata, akarota ngokwechipiri: akaona, mitsonzoti minomwe yekoroni yakatumbuka paguri rimwe, yakakura yakanaka. Wakaona, mitsonzoti minomwe yakatetepa, yakafota ngedutu rokumabvazuva yakabuda ngesure kwayo. Mitsonzoti yakatetepa yakadya mitsonzoti minomwe yakakura, yakazara. Faro wakamuka, akaona kuti kwaiya kurota. Zvino mumangwanani mweya wake wakatambudzika; wakatuma vanhu koodaidza n'anga dzeshe dzeEgipite nevanhu veshe vakangwara. Faro wakavaronzera kurota kwake, asi paiya pasina waikona kudzidudzira kunaFaro. Naapo mukuru wevabati vezvidziyo wakaereketa kunaFaro echiti, “Ndinokarakadza nyamashi kushaisha kwangu. Naapo Faro paakatsenekera varanda vake, wakandipinza mutirongo mumhatso yenduna huru yevangwariri, inini nomukuru wevabiki. Takarota hope ngousiku humwehwo, inini naye; takarota umwe ngaumwe kudai ngokududzirwa kwokurota kwake. Waiyapo nesu mujaha, muHebheru, muranda wenduna huru yevangwariri; naapo tamuronzera, wakadudzira kwetiri kurota kwedu; wakadudzira kunomunhu umwe ngaumwe kudai ngokurota kwake. Zvakaitika kudai ngokududzira kwake kwetiri, wakandihwirinza pamushando wangu, wakamuturika uwo mukuru wevabiki.” Naapo Faro wakatuma munhu, akadaidza Josefa, vakakasira kumuunza kubva mutirongo, naapo akapara ndebvu dzake wadusa zvokusimira zvake, akadzisimidza zvimweni, wakapotera kunaFaro. Faro wakati kunaJosefa, “Ndakarota hope, akuna naumwe unokona kudzidudzira; ndakazwa vechiti ndiwe, unoti apo wazwa hope, unokona kudzidudzira.” Josefa wakapingura Faro echiti, “Andinipi; Mwari ndiye unozopa mupinguro wokunyarara kunaFaro.” Faro wakati kunaJosefa, “Mukurota kwangu, ndakaona, ndakaema pahumbikumbi yomufuya Naeri. Ndakaona, dzechibuda kubva murwizi n'ombe nomwe dzakakora dzakanaka; dzakafura mutsanga; ndikaona, n'ombe dzimweni nomwe dzakabuda ngesure kwadzo, dzakashata dzakavhiririka, dzakaonda; andizi kumboona dzakadaro munyika yeshe yeEgipite. Nen'ombe dzakaonda, dzakavhiririka dzakadya n'ombe nomwe dzokutanga dzakakora. Naapo dzadzidya, akuna naumwe waizozia kuti dzadzidya, ngokuti dzaiya dzichakavhiririka, kudai ngokutanga. Ndizvo ndakamuka. Ndakaonazve mukurota kwangu, mitsonzoti minomwe yakatumbuka paguri rimwe, yakazara yakanaka; ndikaona, mitsonzoti minomwe yakafota, yakatetepa, yakapishwa ngedutu rokumabvazuva, yakabuda ngesure kwayo; nemitsonzoti yakatetepa yakadya mitsonzoti minomwe yakanaka. Neni ndakadzironzera n'anga; asi akuna waikona kudzidudzira kwendiri.” Zvino Josefa wakati kunaFaro, “Kurota kwaFaro ndikumwe; Mwari wakaonisa kunaFaro izvo zvaanoda kuita. N'ombe nomwe dzakanaka makore manomwe; nemitsonzoti minomwe yakanaka makore manomwe; kurota ndikumwe. Nen'ombe nomwe dzakaonda dzakavhiririka dzakabuda ngesure kwadzo makore manomwe, zve, nemitsonzoti minomwe isina chiro, yakapishwa ngedutu rokumabvazuva, inozoita makore manomwe enzara. Izvi ndizvo zvendaereketa kunaFaro; Mwari wakaonisa zvaanoda kuita kunaFaro. Kuchauya makore manomwe okuibva kukurutu munyika yeshe yeEgipite. Ngesure kwaawo kunozouya makore manomwe enzara, nokuibva kweshe kunozoriyarikanwa munyika yeEgipite; nenzara inozopedza nyika, nokuibvisa akuzoziikanwi munyika ngendaa yenzara inozoteera, ngokuti inozoshata kakurutu. Ngokuti kurota ukwo kwakahwirinzirwazve kunaFaro kairi ngokuti izvo zviro zvakaemeswa ndiMwari, naMwari unozokasira kuti zviitike. Ndizvo zvino Faro ngaatsvake munhu unozia nowakangwara, amuemese padera penyika yeEgipite. Faro ngaaite izvi, ngaaemesezve nduna padera penyika, atore rupande rwechishanu rwezviyo zvenyika yeEgipite pamakore manomwe okuibvisa. Ngavaunganidze kudya kweshe kwemakore aya akanaka anouya, vaunganidze koroni mumadhorobha pashi pesimba raFaro, kuita kudya kwemumadhorobha, vakungwarire. Nokudya ukwo kunozongwaririrwa makore manomwe enzara inozouya munyika yeEgipite, kuti nyika isazopera ngenzara.” Izvi zvaiya zvakanaka mukuona kwaFaro nomukuona kwavaranda vake veshe. Faro wakati kuvaranda vake, “Tingaona here munhu wakadai ngouyu, uwo uno Mweya waMwari mukati mwake?” Faro wakati kunaJosefa, “Ngokuti Mwari wakaonisa kwouri izvi zveshe, akuna unoruziyo noungwaru kudai ndiwe. Iwewe unozoita mukuru padera pemhatso yangu, vanhu vangu veshe vanozopurutana kupanga kwako. Kwega padendemaro inini ndinozoita mukuru kunewe.” Faro wakati kunaJosefa, “Wona, ndakuemesa padera penyika yeshe yeEgipite.” Faro wakadusa ndandazi yake kubva munyara yake, akaiisa munyara yaJosefa, akamupfekesa ngezvokusimira zvakanaka zvorukangaza, akaisa ketani yomukore muhuro mwake. Wakaita kuti agadhe mungoro yechipiri yaaiya nayo; vakadaidzira vari pamberi pake kuti, “Gwadamai!” Wakamuemesa kuita mutongi padera penyika yeshe yeEgipite. Faro wakati kunaJosefa, “Ndini Faro, ngokubanze kwokutenderwa ndiwe akuna munhu unozomirudza nyara yake nokuti rutsoka rwake munyika yeshe yeEgipite.” Faro wakadudza zina raJosefa kuti Zafenathi-panea; akamupa kuita mukadzi Asenathi mwanasikana waPotifera mupristi waOni. Josefa wakabuda, akahamba munyika yeshe yeEgipite. Josefa waiya nemakore makumi matatu apo paakapinda mushando waFaro mambo weEgipite. Josefa wakabuda kubva pamberi paFaro, akahamba munyika yeshe yeEgipite. Mumakore manomwe okuibvisa, nyika yakabudisa zvakawanda. Wakaunganidza kudya kweshe kwemakore manomwe apo kuchakawanda munyika yeEgipite, wakaunganidza kudya mumadhorobha; wakaunganidza mudhorobha reshe kudya kwaibva muminda yaitendenedza dhorobha rimwe ngarimwe. Josefa wakaunganidza koroni yakawanda kakurutu kudai ngejecha roruandhle, metsa wakarekera kuipima; ngokuti yaiya isikachapimiki. Gore renzara risati rasvika, Josefa wakabarirwa vakororo vairi ndiAsenathi mwanasikana waPotifera mupristi weOni. Josefa wakadudza zina redangwe kuti Manase, ngokuti wakati, “Mwari wakaita kuti ndiriyarwe kweshe kutambudzika kwangu nemhatso yeshe yababa angu.” Zina rowechipiri wakaridudza kuti Efuremu, ngokuti wakati, “Mwari wakaita kuti ndibare munyika yokutambudzika kwangu.” Makore manomwe okuibvisa aiya munyika yeEgipite akapera; nemakore manomwe enzara akatanga kuuya, kudai ngezvaakaronza Josefa; yakauya nzara munyika dzeshe; asi munyika yeshe yeEgipite chaiyapo chingwa. Naapo nyika yeshe yeEgipite yaiya yaa nenzara, vanhu vakachemera Faro, kuti vapuwe chingwa; naFaro wakati kuvaEgipite veshe, “Endai kunaJosefa; chaanoronza kwomuri, chiitei.” Naapo nzara yaiya yapararira padera penyika yeshe, Josefa wakabeura matura eshe, akatengisira vaEgipite, ngokuti nzara yaiya yashata munyika yeEgipite. Nyika dzeshe dzakauya muEgipite kunaJosefa kootenga zviyo, ngokuti nzara yaiya yashata munyika dzeshe. Zvino Jakobe azia kuti kune zviyo muEgipite, wakati kuvakororo vake, “Munoringirana ngenyi?” Wakati, “Ringirai, ndakazwa kuti zviripo zviyo muEgipite; dzakaiyo, mwootitengereyo zviyo, kuti tipone, tisafa.” Ndizvo vakoma vaJosefa gumi vakadzaka Egipite kootenga zviyo. Asi Jakobe aazi kutuma Bhenjamini, munun'una waJosefa, nevakoma vake, ngokuti waitya kuti pamweni ungagumirwa ngezvakashata. Vakororo vaIsuraeri vakauya kootenga zviyo pakati pevamweni avo vakauya, ngokuti nzara yaiya yashata munyika yeKhenani. Josefa waiya mutongi padera penyika, ngokuti ndiye waitengisira vanhu veshe venyika. Vakoma vaJosefa vakauya, vakadzikotamisa pashi pamberi pake nehope dzavo pamavhu. Josefa wakaona vakoma vake, akavazia, asi wakavabata kudai ngevapara nokuereketa kwavari ngoushungu. Wakati kwavari, “Munobva kuri?” Vakati, “Tabva kunyika yeKhenani, tauya kuti titenge kudya.” Josefa wakazia vakoma vake, asi ivo avazi kumuzia. Josefa wakakarakadza hope dzaakarota ndivo; akati kwavari, “Muri vanengeri; mwauya koona pakarembedzeka nyika.” Vakati kwaari, “Haiwa, mambo wedu, asi varanda vako vauya kootenga kudya. Isusu teshe tiri vakororo vomunhu umwe; tiri vanhu vegwinyiso, varanda vako avari vanengeripi.” Wakati kwavari, “Haiwa, asi mwauya kuti muone kurembedzeka kwenyika.” Vakati, “Isusu varanda vako, tiri gumi navairi, vakororo vomunhu umwe munyika yeKhenani; ringirai, wokugumisira nyamashi uri kunababa edu noumweni apachina.” Josefa wakati kwavari, “Ndizvo zvendaereketa kwomuri ndechiti, ‘Muri vanengeri.’ Munozoedzwa ngeichi: ngokupona kwaFaro, amutongozobvi pano, kwega kuti munun'una wenyu mudoko auya pano. Tumai umwe wenyu, atore munun'una wenyu, nemwi munozosungwa kuti mazwi enyu aedzwe, kuti aoneke kuti muri vegwinyiso; kuti kusikazi kudaro, ngokupona kwaFaro ngegwinyiso muri vanengeri.” Wakavaisa veshe pamwepo mutirongo mazuva matatu. Ngezuva rechitatu Josefa wakati kwavari, “Itai ichi, mupone; ngokuti ndinomutya Mwari. Kuti muri vanhu vegwinyiso, umwe wevanun'una venyu ngaasare akasungwa mutirongo mwenyu; asi imwimwi mweshe endai, mutware zviyo ngendaa yenzara yomumhatso dzenyu, muunze kwendiri munun'una wenyu mudoko; ngokudaro mazwi enyu anozogwinyiswa, nemwi amuzofi.” Vakaita kudaro. Vakati umwe kunoumweni, “Ngegwinyiso tine ndaa yomunun'una wedu, ngokuti takaona kutambudzika kwomwoyo wake, apo paakatipota, nesu atizi kupurutana; ndizvo uku kutambudzika kwatigumira.” Rubheni wakavapingura echiti, “Andizi kumuronzera here kuti musashaishira murumbwana? Asi amuzi kupurutana. Ndizvo, wonai, tinotambudzwa ngendaa yengazi yake.” Avazi kuzia kuti Josefa waivazwa, ngokuti wakaereketa kwavari ngomukumuchi. Wakakunukuka kubva kwavari, akachema; wakahwirira kwavarizve, akaereketa navo, akatora Simeoni kubva pakati pavo, akamusunga mukuona kwavo. Naapo Josefa wakapanga kuti masaka avo azadzwe ngezviyo, nokuhwirinza mare yomunhu weshe musaka rake, nokuvapa mbuva yomuhambo wavo. Izvi zvakaitwa kudaro kwavari. Vakatwikisa mbongoro zviyo zvavo, vakabvapo. Naapo umwe wavo paakabeura saka rake kuti ape mbongoro yake kudya pandau pevakaata, wakaona mare yake pamuromo wesaka rake; akati kuhama dzake, “Mare yangu yahwirinzwa, iyi iri pamuromo wesaka rangu!” Nomwoyo yavo yakademera. Vakaringirana vechihuta, vechiti umwe kunoumweni, “Chiinyi ichi chaaita Mwari kwetiri?” Naapo vakaguma kunaJakobe baba avo munyika yeKhenani, vakavaronzera zveshe zvakavagumira vechiti, “Munhu uwo, mambo wenyika, wakaereketa ngoushungu kwetiri, akatierenga kuti tiri vanengeri venyika. Takati kwaari, ‘Tiri vanhu vegwinyiso, atiri vanengeripi. Tiri gumi navairi, vakororo vababa edu; umwe apachina, nowokugumisira nyamashi uno uri kunababa edu munyika yeKhenani.’ Zvino munhu, mambo wenyika, wakati kwetiri, ‘Ngeichi ndinozozia kuti muri vanhu vegwinyiso; siyai umwe wehama dzenyu neni, mutore zviyo ngendaa yenzara yomumhatso dzenyu, muende. Muunze munun'una wenyu wokugumisira kwendiri; naapo ndinozozia kuti amuri vanengeripi, asi kuti muri vanhu vegwinyiso. Ndizvo ndinozomupa hama yenyu, nemwi munozotenga munyika.’ ” Zvino vachadurura masaka avo, munhu weshe wakaona butwa remare raiya musaka rake; naapo ivo nababa avo vaona maputwa avo emare, vakatyiswa. Jakobe baba avo wakati kwavari, “Mwandipedzera vana vangu, Josefa apachina, Simeoni apachina, nemwi mwoda kutora Bhenjamini. Zveshe izvi zvinondikonzera!” Rubheni wakaereketa kunababa ake echiti, “Munozouraya vakororo vangu vairi, kuti ndisamuunza kwomuri. Muisenyi munyara dzangu, neni ndinozomuunzazve kwomuri.” Wakati, “Mukororo wangu aazoendiyo nemwi; ngokuti mukoma wake wakafa, ndiye ega wasara. Kudai chakashata chechimugumira munjira yomunozohamba ndiyo, naapo munozodzasa bvudzi rangu rinemvi muiba mukusvipa mwoyo.” Nzara yaiya yashata munyika. Naapo vadya zviyo zvevaiya vaunza kubva Egipite, baba avo vakati kwavari, “Endaizve, mutitengere kudya kushomani.” Judha wakaereketa navo echiti, “Munhuwo wakagwinyisisa kutironzera echiti, ‘Amutongozooni hope yangu, kwega kuti munun'una wenyu anemwi.’ Kudai mwechizotuma munun'una wedu nesu, tinozodzaka, timutengere kudya; asi kudai musikazomutumi, atizodzakiyo, ngokuti munhuwo wakati kwetiri, ‘Amutongozooni hope yangu, kwega kuti munun'una wenyu anemwi.’ ” Isuraeri wakati, “Mwakandiitira zvakashata kudaro ngenyi kuronzera munhuwo kuti muno munun'una umweni?” Vakati, “Munhuwo wakatibvunzisisa ngokugara kwedu nendaa yehama dzedu echiti, ‘Baba enyu vachapona here? Muno munun'una umweni here?’ Nesu takamuronzera kudai ngaaya mazwi mukupingura mibvunzo iyi. Taizoita maziirenyi kuti unozoti, ‘Dzakai nomunun'una wenyu?’ ” Judha wakati kunaIsuraeri baba ake, “Tuma murumbwana neni, nesu tinozomiruka tiende; kuti tipone, tisafa, teshe isusu nemwi nevadoko vedu. Inini ndinozoita chibatiso chake; munozobvunza munyara dzangu kudai ndisikamuunzi kwomuri, ndimuise pamberi penyu, ngandiane ndaa yemhera nariini. Ngokuti, dai tisikazi kunonoka, ngegwinyiso zvino taizodai tauya kwechipiri.” Baba avo Isuraeri vakati kwavari, “Kuti zvakadaro, zvino itai izvi; torai michero yakapinda kunaka yomunyika muzvidziyo zvenyu, mudzake mwakatwara kuita chipo kumunhuwo, makha mashomani nezviuchi zvishomani zvinonuhwira nemhura nemichero yomupistakhio nemaarimondi. Mutore munyara dzenyu mare yakahwirinzirwa kairi; nemare iyo yakapetudzwa mumiromo yemasaka enyu, hwirirai nayo iri munyara dzenyu; pamweni kwaiya kukangaidzwa. Mutorezve munun'una wenyu, mumiruke, muendezve kunomunhuwo. Mwari Unesimba-reshe ngaamuitire nyasha pamberi pomunhuwo, kuti amusunungurire hama yenyu umweni naBhenjamini. Kudai ndanyapedzerwa vana vangu, ndatopedzerwa.” Vamuna avo vakatora icho chipo, vakatora mare yakahwirinzirwa kairi munyara mwavo, naBhenjamini; vakamiruka, vakadzaka Egipite, vakaema pamberi paJosefa. Naapo Josefa aona Bhenjamini anavo, wakati kune mungwariri wemhatso yake, “Unza ava vamuna mumhatso, uuraye mhuka, unasirire; ngokuti ava vamuna vanozodya neni masikati.” Nomunhuwo wakaita kudai ngezvaakaronza Josefa; munhuwo akapotedza avo vamuna mumhatso mwaJosefa. Vamuna vakatya ngokuti vakapotedzwa mumhatso mwaJosefa navo vakati, “Tapotedzwa muno ngendaa yemare yakahwirinzwa mumasaka edu ngomukuwo wokutanga; kuti atsvake chokutiitira ndaa ndicho, atipambe, atitore kuita hloko nembongoro dzedu.” Vakakwedzera kune mungwariri wemhatso yaJosefa, vakaereketa naye vari pamusiwo wemhatso, vakati, “A mambo wedu, ngegwinyiso takadzaka ngomukuwo wokutanga kootenga kudya; naapo taguma kundau petakaata, takabeura masaka edu, takaona kuti mare yomunhu weshe yaiya mumuromo wesaka rake, mare yedu ngouremu hwayo hweshe. Nesu taiunzazve munyara dzedu. Nesu tadzaka nemare imweni munyara dzedu yokutenga ndiyo zvokudya. Atizii kuti ndiani wakaisa mare yedu mumasaka edu.” Wakati, “Kunyarara ngakugare kwomuri, musatya; Mwari wenyu, Mwari wababa enyu, ndiye wakamupa upfumi mumasaka enyu; ndini ndakaashira mare yenyu.” Naapo wakabudisa Simeoni kwavari. Naapo munhuwo aunza vamuna avo mumhatso yaJosefa, wakavapa mvura, vakashamba tsoka dzavo; akapa mbongoro dzavo zvokudya. Vakanasirira chipo kuti vachipe Josefa apo ouya masikati, ngokuti vakazwa kuti vanozodyapo chingwa. Naapo Josefa auya mumhatso, vakamuunzira chipo chaiya munyara dzavo, vakapinda mumhatso, vakadzikotamisa pashi pamberi pake. Wakabvunza ngokutamba kwavo, akati, “Baba enyu vanotamba here, harahwa yomwakaereketa ndiyo? Ichapona here?” Vakapingura vechiti, “Muranda wako, baba edu vanotamba, vachapona.” Vakagwadama, vakakotamisa masoro avo pamberi pake. Wakamirudza madziso ake, akaona munun'una wake Bhenjamini, mukororo wamai ake, wakati, “Uyu ndiye here munun'una wenyu womwakaereketa ndiye kwendiri?” Wakati, “Mwari ngaakuitire nyasha, mukororo wangu!” Josefa wakakasira, ngokuti mweya wake waishuwira munun'una wake, wakatsvaka pokuchemera; wakapotera mukamera rake, akachemeremwo. Wakashamba hope yake, akabudazve; akadzinyaradza, akati, “Burai kudya.” Vakaisa kwake ari ega, nokwavo vari vega, nokwavaEgipite vakadya naye vari vega; ngokuti vaEgipite avangadyi kudya nevaHebheru, ngokuti icho chinyangadzo kuvaEgipite. Vakagariswa pamberi pake, dangwe kudai ngoutangwe hwaro, nechigumisirwa kudai ngouchigumisirwa hwacho nevamuna vakaringira umwe noumweni mukushamiswa. Wakavakoanisira tsima kubva pamberi pake, asi tsima yaBhenjamini yakahwirinzirwa kashanu kune dzavo veshe. Vakamwa, vakadakara naye. Wakapanga mungwariri wemhatso yake echiti, “Zadza masaka evamuna ava ngezvokudya, kudai ngokwavanokona kutwara, uise mare yomunhu weshe mumuromo wesaka rake. Uise tsani yangu, tsani yesirivha, mumuromo wesaka romudoko, nemare yomutengo wezviyo zvake.” Iye wakaita kudai ngeizwi raakaereketa Josefa. Ngokukasira kwaedza vamuna vakatenderwa kuenda, ivo nembongoro dzavo. Naapo vaiya vabuda kubva mudhorobha, vasati vaakuretu, Josefa wakati kune mungwariri wemhatso yake, “Miruka, uteere vamuna avo; naapo wavabata, wechiti kwavari, ‘Mwaunzidzira ngenyi zvakanaka ngezvakashata? Ichi andichopi here chaanomwa ndicho mambo wangu nokufembera ndicho? Ngegwinyiso mwaita zvakashata ngokuita kudaro.’ ” Avabata, wakaereketa kwavari aya mazwi. Vakati kwaari, “Mambo wedu unoereketa ngenyi mazwi akadai? Mwari asatenda kuti varanda vako vaite chiro chakadaro! Ringira, mare yetakaona iri mumiromo yemasaka edu, takaiunzazve kwouri kubva kunyika yeKhenani; ndizvo tingaita mabirenyi sirivha nokuti mukore mumhatso yamambo wako? Kunyazwi ndiani wevaranda vako weinozooneka anayo, ngaafe, nesuzve tinozoita hloko dzamambo wedu.” Wakati, “Ngakuitikezve kudai ngemazwi enyu; uwo weinozooneka anayo, unozoita hloko yangu; imwimwi mweshe munozoita vasina ndaa.” Naapo munhu weshe wakakasira kutura saka rake pamavhu, munhu weshe wakabeura saka rake. Wakatsvakisisa, wakatanga ngokumukuru, akapedzisira ngokumudoko, tsani yakaoneka musaka raBhenjamini. Naapo vakabaura zvokusimira zvavo, munhu weshe akatwarisa mbongoro yake, vakahwirira kudhorobha. Naapo Judha nehama dzake vakauya kumhatso yaJosefa; ngokuti waiya achipo; navo vakawa pashi pamberi pake. Josefa wakati kwavari, “Chiinyi ichi chemwaita? Amuzii here kuti munhu wakadai ndini unokona ngegwinyiso kufembera?” Judha wakati, “Tingachatinyi kunamambo wangu? Tingachaereketenyi? Tingachadzipembedza ngokuitawani? Mwari waonisa kushata kwevaranda vako; wona, taa hloko dzamambo wedu, teshe isusu nouwo weyaoneka kwaari tsani.” Wakati, “Mwari asatenda kuti ndiite kudaro! Munhu uwo weyaoneka kwaari tsani, iye unozoita hloko yangu; asi imwimwi kwirai muende mukunyarara kunababa enyu.” Naapo Judha wakakwedzera kwaari, akati, “A mambo wangu, ndapota, tendera muranda wako kuti aerekete izwi mukuzwa kwamambo wangu, husazobaka ushungu hwako kuno muranda wako, ngokuti iwewe wakandodai ndiFaro emene. Mambo wangu wakabvunza varanda vake echiti, ‘Muna baba here nokuti munun'una?’ Nesu takati kunamambo wangu, ‘Tina baba, harahwa, nomwana wousharuka hwake, mudoko; nomukoma wake wakafa, ndiye ega wasara mwana wamai ake, nababa ake vanomuda.’ Newe wakaronzera varanda vako wechiti, ‘Mudzasenyi kwendiri, kuti ndimuone ngemadziso angu.’ Isusu takati kunamambo wangu, ‘Murumbwana aangasii baba ake, ngokuti kudai echizosiya baba ake, baba ake vangafa.’ Newe wakati kuvaranda vako, ‘Kudai asikadzaki nemwi munun'una wenyu mudoko, amutongozooni hope yangu.’ “Naapo takakwira kuno muranda wako baba angu, takavaronzera mazwi amambo wangu. Baba edu vakati, ‘Endaizve, mutitengere kudya kushomani.’ Isusu takati, ‘Atikoni kudzakeyo, kwega kuti munun'una wedu mudoko aende nesu, naapo tinozodzaka; ngokuti atizokoni kuona hope yomunhuwo, kwega kuti munun'una wedu mudoko anesu.’ Naapo muranda wako baba edu vakati kwetiri, ‘Munozia kuti mukadzi wangu wakandibarira vakororo vairi; umwe wavo wakabuda kubva kwendiri, neni ndakati, ngegwinyiso wakabvajurwa kuita zvigurwa; andizi kuchazomuonazve. Kudai mwechitora uyuzve kubva kwendiri, nechakashata chechizomugumira, munozodzasa bvudzi rangu rinemvi kuiba ngokusvipa mwoyo.’ “Ndizvo zvino, apo pendinozoguma kunomuranda wako baba edu, nomurumbwana asipo nesu, ngokuti kupona kwavo kwakasungwa pamwepo nokupona kwomurumbwana, naapo paanoona kuti murumbwana aasiripo akadi nesu, vanozofa; nevaranda vako vanozodzasa bvudzi rinemvi romuranda wako baba edu muiba ngokusvipa mwoyo. Ngokuti muranda wako wakaita chibatiso chomurumbwana kunababa edu ndechiti, ‘Kudai ndisikazomupetudzi kwouri, naapo ndinozoane ndaa kunababa edu mhera nariini.’ Ndizvo zvino, ndapota, tendera kuti muranda wako asare pandau yomurumbwana kuita hloko kunamambo wangu; murumbwana akwire kuenda nevakoma vake. Ngokuti ndingazoita makwirirenyi kunababa angu, murumbwana asiripo neni? Ndinotya kuzoona kushata kunozowira padera pababa angu.” Zvino Josefa waiya asikachakoni kudzibata pamberi pavo veshe vaiema pasinde pake; wakadaidzira echiti, “Budisai munhu weshe kubva kwendiri.” Ndizvo apana naumwe wakaema naye apo Josefa paakadziziisa kuvakoma vake. Wakachema kakurutu; vaEgipite vakazwa, nevemhatso yaFaro vakazvizwa. Josefa wakati kuvakoma vake, “Ndini Josefa; baba angu vachapona here?” Asi vakoma vake avazi kukona kumupingura, ngokuti vakatyiswa ngokuapo kwake. Ndizvo Josefa wakati kuvakoma vake, “Ndapota, kwedzerai kwendiri.” Navo vakakwedzera. Wakati, “Ndini Josefa munun'una wenyu womwakatengesa kuEgipite. Zvino musatambudzika nokuti kudzishoora, ngokuti mwakanditengesa uno; ngokuti Mwari wakandituma ngepamberi penyu kuti ndiponese ndaramo. Ngokuti nzara yaapo panyika makore aya mairi, achipo makore mashanu umwo mwevasikazorimi nokuti kukukura. Mwari wakandituma ngepamberi penyu kuti ndimungwarire muite vanosara panyika, nokuponesa vazhinji ngokusunhurwa kukuru. Ndizvo zvino, andimwipi mwakandituma uno, asi ndiMwari; ndiye wakandiita baba kunaFaro, namambo wevemhatso yake yeshe, nomutongi wenyika yeshe yeEgipite. Kasirai mukwire kunababa angu, mwechiti kwavari, ‘Izvi ndizvo zvinoronza mukororo wenyu Josefa, Mwari wakandiita mambo weEgipite reshe; dzakai kwendiri, musanonoka. Munozogara munyika yeGosheni, iri pasinde pangu, imwimwi nevana venyu, nevana vevana venyu, nezvifuyo zvenyu nemihlambi yenyu nazvo zveshe zvomunazvo. Ndinozomungwarira, ngokuti achipo makore mashanu enzara; kuti imwimwi nemhuri yenyu, nazvo zveshe zvomunazvo musazogumirwa ngourombo.’ Zvino madziso enyu anoona, namadziso omunun'una wangu Bhenjamini anoona, kuti muromo wangu unoereketa nemwi. Munozovaronzera baba angu ngoukuru hwangu hweshe muEgipite, nazvo zveshe zvemwakaona. Mukasire kuvadzasa baba angu uno.” Wakawira pamutsipa waBhenjamini munun'una wake, akachema; naBhenjamini wakachema ari pamutsipa wake. Naapo echichema, wakachingamidzazve vakoma vake veshe ngomuromo, ngesure kweizvi vakoma vake vakaereketa naye. Naapo mbiri yazvo yakazwika mungome yaFaro kuti vakoma vaJosefa vaguma, zvakanasa kudakadza Faro nevaranda vake. Faro wakati kunaJosefa, “Wechironzera kuvakoma vako wechiti, ‘Itai izvi: twarisai mbongoro dzenyu, mupetuke kunyika yeKhenani; mutore baba enyu nemhuri dzenyu muuye kwendiri. Ndinozomupa zvakapinda kunaka zvenyika yeEgipite, nemwi munozodya zvakanuna zvenyika.’ Vapangezve, ‘Itai izvi: torerai vana venyu nevakadzi venyu ngoro kubva muno munyika yeEgipite, mutore baba enyu, muuye. Musapinimidza ngezviro zvenyu; ngokuti kunaka kwenyika yeshe yeEgipite ngokwenyu.’ ” Vakororo vaIsuraeri vakaita kudaro. Josefa wakavapa ngoro, kudai ngezvaakapangwa ndiFaro, naye wakavapa mbuva yomunjira. Wakavapa veshe umwe ngaumwe zvipani zvokusimira; asi wakapa kunaBhenjamini zvigurwa zvesirivha mazana matatu, nezvokusimira zvipani zvishanu. Wakatumirazve kunababa ake izvi: mbongoro gumi dzakatwariswa zviro zvakanaka zveEgipite, nembongoro dzehadzi gumi dzakatwariswa zviyo nezvingwa nezvokudya kuita mbuva yababa ake munjira. Ndizvo wakatuma vakoma vake, naapo vechienda wakati kwavari, “Ngwarai kuti musazotukana munjira.” Ndizvo vakakwira kubva Egipite, vakaguma munyika yeKhenani kunababa avo Jakobe. Vakavaronzera vechiti, “Josefa uchapona, ndiye mutongi wenyika yeshe yeEgipite.” Mwoyo waJakobe wakapera simba, ngokuti aazi kuvagonda. Asi apo vavaronzera mazwi eshe aJosefa, aakaereketa kwavari, naapo aona ngoro dzaakatumira Josefa kuvatwara, mweya waJakobe baba avo wakamusirirwa. Isuraeri wakati, “Zvakwana; Josefa mukororo wangu uchapona; inini ndinozoenda ndimuone ndisati ndafa.” Isuraeri wakahamba rwendo rwake, nazvo zveshe zvaaiya nazvo, wakaguma Bheeri-shebha, wakapira mibairo kunaMwari wababa ake Isaka. Mwari wakaereketa kunaIsuraeri ngezvioniso usiku, akati, “Jakobe, Jakobe.” Iye wakati, “Ndiri pano.” Wakati, “Ndini Mwari, Mwari wababa ako, usatya kudzaka Egipite; ngokuti ndinozokuiteyo dzinza guru. Ndinozodzaka newe muEgipite, ngegwinyiso ndinozokuunzazve uno; nyara yaJosefa inozokonya madziso ako.” Jakobe wakamiruka kuenda kubva Bheeri-shebha; vakororo vaIsuraeri vakatwara Jakobe baba avo, vadoko vavo nevakadzi vavo, mungoro dzaakatumira Faro kumutwara. Vakatora zvifuyo zvavo nezvidziyo zvavo, zvevakaona munyika yeKhenani, vakauya Egipite, Jakobe norudzi rwake rweshe, vakororo vake nevana vevakororo vake pamwepo naye, nevanasikana vake nevanasikana vevakororo vake; norudzi rwake rweshe wakauya narwo muEgipite. Aya ndiwo mazina evana vaIsuraeri avo vakauya Egipite, Jakobe nevakororo vake. Rubheni, dangwe raJakobe, nevakororo vaRubheni vaiya Hanokhi, Paru, Hezironi, naKhami. Vakororo vaSimeoni vaiya Jemueri, Jamini, Ohadhi, Jakhini, Zoha naShauri, mukororo womukadzi womuKhenani. Vakororo vaRevhi vaiya Gershoni, Kohathi naMerari. Vakororo vaJudha vaiya Eri, Onani, Shera, Pherizi naZera (asi Eri naOnani vakafa vachiri munyika yeKhenani). Vakororo vaPherizi vaiya Hezironi naHamuri. Vakororo vaIsakha vaiya Tora, Puvha, Jashubhi naShimuroni. Vakororo vaZebhuruni vaiya Seredhi, Eroni naJahireeri. Ava vakororo vaRea, vaakabarira Jakobe muPadhana-aramu, nomwanasikana wake Dhaina; pamwepo vakororo nevanasikana vake veshe vaiya vanhu makumi matatu navatatu (33). Vakororo vaGadhi vaiya Zifioni, Hagi, Shuni, Ezibhoni, Eri, Arodhi naAreri. Vakororo vaAsha vaiya Jimina, Ishivha, Ishivhi, Bheria naSera, mukunda wavo. Vakororo vaBheria vaiya Hebha naMarikhieri. Vakororo vaZiripha vaiya ava vaakapa Rabhani kunaRea mwanasikana wake; ava ndivo vaakamubarira Jakobe vana gumi navatanhatu (16). Vakororo vaRacheri mukadzi waJakobe vaiya Josefa naBhenjamini. Josefa wakabarirwa Manase naEfuremu munyika yeEgipite ndiAsenathi mwanasikana waPotifera mupristi waOni. Vakororo vaBhenjamini vaiya Bhera, Bhekheri, Ashibheri, Gera, Naamani, Ehi, Roshi, Muphimi, Huphimi naAdhi. Ava ndivo vakororo vaRacheri, vaakabarira Jakobe. Veshe vanhu vaiya gumi navarongomuna (14). Mukororo waDhani waiya Hushimu. Vakororo vaNafitari vaiya Jahizeeri, Guni, Jeza naShiremu. Ava vakororo vaBhiriha, uwo waakapa Rabhani kunaRacheri mwanasikana wake, avo vaakabarira Jakobe vanhu veshe vaiya vanomwe. Vanhu veshe vaJakobe vaakauya navo muEgipite, avo vaiya mibarirwana yaJakobe vasikaerengi vakadzi vevakororo vaJakobe, veshe vaiya makumi matanhatu navatanhatu (66). Vakororo vaJosefa vaakabarirwa muEgipite vaiya vanhu vairi; vanhu veshe vemhatso yaJakobe avo vakauya muEgipite vaiya makumi manomwe (70). Wakatuma Judha pamberi pake kunaJosefa, kuti amutungamirire njira yokuenda Gosheni; navo vakaguma munyika yeGosheni. Naapo Josefa wakanasirira ngoro yake, akakwira kuenda Gosheni kooshongana naIsuraeri baba ake; akadzionisa kwaari, akamukumbatira pamutsipa wake, akachema ari pamutsipa wake mukuwo wakatikuti. Isuraeri wakati kunaJosefa, “Zvino, ngandichifa, ngokuti ndaiona hope yako, ndikazia kuti uchapona.” Josefa wakati kuvana vababa ake nokune vemhatso yababa ake, “Ndinozokwira, ndironzere Faro ndechiti kwaari, ‘Vaguma kwendiri vana vababa angu nevemhatso yababa angu, avo vaigara munyika yeKhenani. Vamuna ava vaushi, ngokuti vaiusha zvifuyo; navo vakaunza zvifuyo zvavo nemihlambi yavo nazvo zveshe zvevanazvo.’ Naapo Faro amudaidza echiti, ‘Mushando wenyu ngowenyi?’ Munozoti, ‘Mushando wevaranda vako ngowokuusha n'ombe kubvira paudoko hwedu metsa nazvino, isusu teshe nemadzibaba edu,’ kuitira kuti mugare munyika yeGosheni; ngokuti muushi weshe chinyangadzo kune vaEgipite.” Zvino Josefa wakapotera kunaFaro, akamuronzera echiti, “Baba angu nevana vababa angu vaguma nezvifuyo zvavo nemihlambi yavo, nazvo zveshe zvevanazvo kubva kunyika yeKhenani; zvino wona, vari munyika yeGosheni.” Wakatora vanhu vashanu kubva pakati pevana vababa ake, akavaisa pamberi paFaro. Faro wakati kuvakoma vake, “Mushando wenyu ngowenyi?” Vakati kunaFaro, “Varanda venyu vaushi, teshe isusu nemadzibaba edu.” Vakati kunaFaro, “Tauya kuita zvigarandimo munyika; ngokuti akuna mafuro ezvifuyo zvevaranda vako, ngokuti nzara yashata munyika yeKhenani. Ndizvo zvino, tapota, tendera kuti varanda vako vagare munyika yeGosheni.” Zvino Faro wakaereketa kunaJosefa echiti, “Baba ako nevana vababa ako vauya kwouri. Nyika yeEgipite iri pamberi pako; ita kuti baba ako nevana vababa vako vagare munyika yakapindisisa kunaka; ngavagare munyika yeGosheni. Kudai mwechizia vamweni vavo vanokona, vaemese kuita vangwariri vezvifuyo zvangu.” Josefa wakapotera nababa ake Jakobe, akavaemesa pamberi paFaro naJakobe wakafumisa Faro. Faro wakati kunaJakobe, “Mazuva emakore okupona kwako aamangani?” Jakobe wakati kunaFaro, “Mazuva emakore okuhamba kwangu makore zana nemakumi matatu (130); mashomani neakashata mazuva emakore okupona kwangu, aazi kuwanda kudai ngemazuva emakore okupona kwemadzibaba angu mumazuva okuhamba kwavo.” Jakobe wakafumisa Faro, akabuda kubva pamberi paFaro. Josefa wakapa baba ake nevana vababa ake ugaro, wakavapa nharaunda dzavo munyika yeEgipite, munyika yakapindisisa kunaka, munyika yeRamesesi, kudai ngezvaakapanga Faro. Josefa wakapa baba ake nevana vababa ake navo veshe vemhatso yababa ake kudya kudai ngouwandu hwemhuri dzavo. Zvino kwaiya kusina chokudya munyika yeshe; ngokuti nzara yaiya yashata kakurutu. Nyika yeEgipite nenyika yeKhenani dzakademera ngendaa yenzara. Josefa wakaunganidza mare yeshe yaiyamwo munyika yeEgipite nomunyika yeKhenani, ngezviyo zvevakatenga; Josefa wakaunza mare iyo mumhatso yaFaro. Naapo mare yeshe yapera munyika yeEgipite nomunyika yeKhenani, veshe vaEgipite vakauya kunaJosefa, vakati, “Tipei kudya; tingafa ngenyi mukuona kwako? Ngokuti mare yedu yapera.” Josefa wakati, “Ipai n'ombe dzenyu; neni ndinozotenganisa ngezvifuyo zvenyu, kuti mare yapera.” Vakaunza zvifuyo zvavo kunaJosefa, naJosefa wakavapa zviyo kutenganisana nemahachi, makwai, mbudzi, n'ombe nembongoro. Wakavapa kudya kutenganisana nezvifuyo zvavo zveshe ngeiro gore. Naapo gore iro rapera, vakauya kwaari ngegore rechipiri, vakati kwaari, “Atizomufishiri mambo wangu, kuti mare yedu yapera; nemihlambi yezvifuyo zvedu zvaazvamambo wangu; akuna chasara mukuona kwamambo wangu, yega miiri yedu nenyika dzedu. Tingafa ngenyi pamberi pemadziso enyu, teshe isusu nenyika yedu? Titenge isusu nenyika yedu ngezviyo. Isusu nenyika yedu tinozoita hloko kunaFaro; tipei mbeu kuti tipone, tisafa, kuti nyika isazoita matongo.” Ndizvo Josefa wakatengera Faro nyika yeshe yeEgipite; ngokuti vaEgipite veshe vakatengesa munhu weshe munda wake, ngokuti nzara yaiya yashata kwavari nenyika yakaita yaFaro. Nevanhu vakaita hloko, wakavathuthisa kuti vagare mumadhorobha, kubvira kumugano umwe weEgipite metsa kuguma kumugano umweni wayo. Yega nyika yevapristi aazi kuitenga ngokuti vapristi vaiya nechikoaniswa chaibva kunaFaro, vakadya chikoaniswa chavo chevaipuwa ndiFaro; ndizvo avazi kutengesa nyika dzavo. Naapo Josefa wakati kuvanhu, “Ringirai, ndamutenga nyamashi, imwimwi nenyika yenyu kuita vaFaro. Wonai mbeu dzenyu dziri pano, nemwi munozodzikusha munyika. Kunozoitika apo mwookukura, kuti munozopa kunaFaro chimwe chechishanu, marupande marongomuna anozoita enyu, kuita mbeu yeminda, nokuita kudya kwenyu nokwavari vemhatso dzenyu, nokuita kudya kwevadoko venyu.” Vakati, “Waponesa ndaramo dzedu; ngazvidakadze mambo wangu, isusu tinozoita hloko dzaFaro.” Josefa wakaita mutemo munyika yeEgipite metsa nanyamashi, kuti Faro unozopuwa chimwe chechishanu; yega nyika yevapristi isikazi kuita yaFaro. VaIsuraeri vakagara munyika yeEgipite, munyika yeGosheni: vakapfumamwo, vakabarana, vakawanda kakurutu. Jakobe wakagara munyika yeEgipite makore gumi nemanomwe; ndizvo mazuva emakore aJakobe okupona kwake aiya zana nemakumi marongomuna namanomwe (147). Naapo mukuwo wakwedzera wokuti Isuraeri afe, wakadaidza mukororo wake Josefa, akati kwaari, “Kudai zvino ndaona nyasha mukuona kwako, ndapota, isa nyara yako pashi pechizva changu, ugondise kundibata ngenyasha negwinyiso. Usandiika muEgipite. Asi ndiradzike nemadzibaba angu; nditware kubva muEgipite, undiike kundau yavo yokuika.” Naye wakati, “Ndinozoita kudai ngokuronza kwenyu.” Wakati, “Pika kwendiri,” naye wakapika kwaari. Zvino Isuraeri wakakotamira kusoro romubhedhi. Ngesure kweizvi Josefa wakaronzerwa kuti, “Ringira, baba ako vanorwara;” wakatora vakororo vake vairi kuenda navo, Manase naEfuremu. Naapo Jakobe aronzerwa kuti, “Mukororo wako Josefa wauya kwouri,” zvino Isuraeri wakadzigwinyisa, akagara pamubhedhi. Jakobe wakati kunaJosefa, “Mwari Unesimba-reshe wakaoneka kwendiri paRuzi munyika yeKhenani, akandifumisa, akati kwendiri, ‘Ringira, ndinozokuita kuti ubare, ndikuwanze; ndinozokuita chiunga chevanhu, ndinozopa nyika iyi kumibarirwana yako inouya sure kwako kuita yavo mhera nariini. Zvino vakororo vako vairi vewakabarirwa munyika yeEgipite ndisati ndauya kwouri muEgipite, ngevangu; Efuremu naManase vanozoita vangu kudai ndiRubheni naSimeoni ngevangu. Nevana vounozobara ngesure kwavo, vanozoita vako; vanozodaidzwa ngezina revakoma vavo mukati mwenhaka yavo. Ngokuti inini, apo pendakauya kubva Padhana, Racheri wakafa mukutambudzika kwangu munyika yeKhenani, tiri murwendo, apo uchipo muhambo wokuguma Efrathi neni ndakamuikapo munjira yokuenda Efrathi,’ ” (ndiro Bhetherehema.) Naapo Isuraeri paakaona vakororo vaJosefa, wakati, “Ndiani ava?” Josefa wakati kunababa ake, “Ndivo vakororo vangu, vaakandipa Mwari uno.” Wakati, “Ndapota, vaunze kwendiri, kuti ndivafumise.” Zvino madziso aIsuraeri aiya aita mazweezwee ngousharuka, asikachakoni kuona. Ndizvo Josefa wakavakwedzedza kwaari; akavachingamidza ngomuromo nokuvafungatira. Isuraeri wakati kunaJosefa, “Andizi kupinimidza kuti ndichazoona hope yako. Wona, Mwari wakanditendera kuti ndionewo rudzi rwako.” Josefa wakavabvisa kubva pakati pemabvi aJakobe; wakakotamisa hope yake pashi pamavhu. Josefa wakavatora veshe, Efuremu ari munyara yake yokumudyo kumuisa kunyara yokumuoshwe yaIsuraeri, naManase ari munyara yake yokumuoshwe kumuisa kunyara yokumudyo yaIsuraeri, akavakwedzedza kwaari. Isuraeri wakatambanudza nyara yake yokumudyo, akaiisa padera pesoro raEfuremu uwo waiya mudoko, nenyara yake yokumuoshwe padera pesoro raManase, echichinjikisa nyara dzake echizia; ngokuti Manase ndiye waiya dangwe. Naye wakafumisa Josefa, akati, “Mwari uwo madzibaba angu akahamba pamberi pake madzibaba angu Abrahama naIsaka. Mwari uwo waiya Muushi wangu mukupona kwangu kweshe metsa nyamashi, ngirosi iyo yakandinunurira kubva mukushata kweshe, ngaifumise varumbwana ava; nezina rangu ngaritumidzwe padera pavo, nemazina emadzibaba angu Abrahama naIsaka; ngavakure vawande kakurutu panyika.” Naapo Josefa aona kuti baba ake vakaisa nyara yavo yokumudyo padera pesoro raEfuremu, azvizi kumudakadza; naye wakabvisa nyara yababa ake kubva pasoro raEfuremu kuiisa pasoro raManase. Josefa wakati kunababa ake, “Haiwa kudaro, baba angu; nokuti uyu ndiye dangwe; isa nyara yenyu yokumudyo padera pesoro rake.” Baba ake vakaramba, vakati, “Ndinozia, mukororo wangu, ndinozia; iye naye unozoita dzinza, iye nayewo unozoita mukuru; munun'una wake unozoita mukuru kupinda iye, norudzi rwake runozoita madzinza akawandisa.” Wakavafumisa ngeiro zuva echiti, “Kubudikidza ndiwe vaIsuraeri vachafumisa vechiti, ‘Mwari ngaakuite kudai ndiEfuremu naManase;’ ” naye wakaisa Efuremu ngepamberi paManase. Naapo Isuraeri wakati kunaJosefa, “Wona, inini ndaa kuda kufa, asi Mwari unozoa nemwi nokumuhwirinzazve kunyika yamadzibaba enyu. Nepadera peizvi ndapa kwouri chikoaniswa chimwe kupinda vana vababa ako, bandaanda romutunhu rendakatora kubva kunyara yevaAmori ngeshoti yangu nouta hwangu.” Zvino Jakobe wakadaidza vakororo vake, akati, “Dziunganidzenyi pachenyu pamwepo, kuti ndimuronzere izvo zvinozomugumira ngemazuva achauya. Unganai, muzwe, imwimwi vakororo vaJakobe; mupurutane kunaIsuraeri baba enyu. Rubheni, ndiwe dangwe rangu, simba rangu, nokuamba kwokugwinya kwangu; kunakisisa kwokuremeredzwa kwangu nokunakisisa kwesimba rangu. Usikatsimi kudai ngemvura, auzoa nokunakisisa akadi, ngokuti wakakwira pamubhedhi wababa ako; naapo wakausvipisa, wakakwira pamubhedhi wangu. Simeoni naRevhi vana vamai umwe; shoti dzavo zvikhayo zvokugebenga. A mweya wangu, usazopotera pakupangana kwavo; uthende hwangu husazoiyaniswa navo mumushongano wavo; ngokuti muushungu hwavo vakauraya munhu, ngorunya rwavo vakatema-tema mirunda yekabi. Ushungu hwavo ngahutukwe, ngokuti hwaityisa; nokutseneka kwavo, ngokuti kwaiya norunya! ndinozovaparadzanisa pakati paJakobe, ndivaparadzire muIsuraeri. Judha, vana vababa ako vanozokukurisa; nyara yako inozoa padera pemitsipa yemagaa ako; vakororo vababa ako vanozokugwadamira. Judha, mwana wemhondoro; mukororo wangu, wakakwira kubva kune zvakachakatwa, wakakotama, wakanyangwira kudai ngemhondoro, nokudai ngehadzi yemhondoro; ndiani unotsunga kumumusa? Ndonga youmambo aizobvi kunaJudha, nokuti mudondoro womutongi kubva pakati petsoka dzake, metsa auye Shiro; ndudzi dzevanhu dzichamuremeredza. Echisunga mwana wembongoro yake pamuvhini, tsiru rembongoro kumuvhini wakapindisisa kunaka; unosuka zvokusimira zvake muvhini, nezvokufuka zvake mungazi yemavhini; madziso ake anozotsvukiswa ngevhini, nemazino ake anozochena ngomukaka. Zebhuruni unozogara pachipforo choruandhle naye unozoita chipforo panoema ngarava; nomugano wake unozoguma Sidhoni. Isakha imbongoro yakagwinya, inomvududa pashi pakati pemihlambi yemakwai. Wakaona ndau yokuzorora kuti yaiya yakanaka nokuti nyika yaiya yechidakadza; wakakotamisa pfudzi rake kudzvara, wakaita hloko yokuangiridzwa mumushando. Dhani unozotonga vanhu vake, kudai ngerimwe remadzinza aIsuraeri. Dhani unozoita nyoka munjira, nebuura pamhiri pegondo, iro rinoruma tsoka dzehachi, kuti mugadhi waro awe ngegotsi. Ndakagarira ruponeso rwenyu, imwimwi Mambo Mwari. Gadhi unozorwiswa ngehondo, asi iye unozovarwisa pazvisisino zvavo. Asha kudya kwake kwakanuna, naye unozokukura zvinonaka zvoumambo. Nafitari imhara yakasunhurika unoereketa mazwi akanaka. Josefa inhai inobereka michero yakawanda, inhai inobereka michero yakawanda iri pasinde pechinyuka; matai ake anotambarara ngepadera porukumbati. Vanofura ngouta vakamurwisa ngesimba kakurutu, nokuposhera kwaari nokumutambudza kakurutu. Asi uta hwake hunondogara hwakagwinya nemioko yenyara dzake yakagwinyiswa ngenyara dzoUwo Unesimba raJakobe, kubudikidza ngezina roMuushi, Buwe raIsuraeri, ndiMwari wababa ako, uwo unozokudetsera, ndiMwari Unesimba-reshe uwo unozokufumisa ngezvifumiso zvinobva mudenga padera, nezvifumiso zvinobva muruandhle ruri ngepashi, zvifumiso zvemazamo nezvechibereko. Zvifumiso zvababa ako zvakagwinya kupinda zvifumiso zvamadzibaba angu metsa kuguma kumugano wokugumisira wezvimitunhu zvemhera nariini; ngazvigare padera pesoro raJosefa nepadera penhuvhuma yesoro rouwo wakaparadzaniswa nevana vababa ake. Bhenjamini uri thika rinokara, mangwanani unozodya zvakaurawa, nemadeekoni unozokoanisa zvakachakatwa.” Eshe aya ndiwo madzinza gumi namairi aIsuraeri. Izvi ndizvo zvavakaereketa baba avo kwavari, apo paakavafumisa, echifumisa umwe ngaumwe ngechifumiso chakamunakira Naye wakavapanga, akati kwavari, “Ndinozounganidzwa kuvanhu vangu; ndiikei pamwepo nemadzibaba angu mubako riri mumunda waEfroni muHiti, mubako riri mumunda weMakhipera, uri kumabvazuva kweMamure, munyika yeKhenani, raakatenga Abrahama pamwepo nomunda kubva kunaEfroni muHiti kuita ndau yokuika, apo pevakaika Abrahama naSara mukadzi wake; apo pevakaika Isaka naRebheka mukadzi wake; naapo pendakaika Rea. Munda nebako ririmwo, zvakatengwa kubva kuvana vaHiti.” Naapo Jakobe apedza kupanga vakororo vake, wakapfinya tsoka dzake mumubhedhi akafa, akaunganidzwa kunevanhu vake. Zvino Josefa wakawira padera pehope yababa ake, akachema aripo padera pavo, akavachingamidza ngomuromo. Josefa wakapanga varanda vake, madhokodheya kuti vaomese muiri wababa ake ngemitombo kuti usaora, nemadhokodheya akaomesa muiri waIsuraeri; vakapedza mazuva makumi marongomuna kwaari; ngokuti ndiwo mazuva akadaro aidiwa kuomesa muiri; nevaEgipite vakamuchema mazuva makumi manomwe. Naapo mazuva okumuchema apera, Josefa wakaereketa kunevemhatso yaFaro echiti, “Kudai zvino ndaona nyasha mukuona kwenyu, ndapota, ereketai mukuzwa kwaFaro mwechiti, ‘Baba angu vakandipikisa vechiti, Wona, ndaa kufa; unozondiika muiba rangu rendakadzitsira munyika yeKhenani. Ndizvo zvino, ndapota, nditenderei kuti ndiende, ndiike baba angu, neni ndinozopetukazve.’ ” Faro wakati, “Kwira, uende, uike baba ako, kudai ngezvaakakupikisa.” Ndizvo Josefa wakakwira kooika baba ake. Vakakwira naye varanda veshe vaFaro, vakuru vemhatso yake, nevakuru veshe venyika yeEgipite, nemhatso yeshe yaJosefa, nevana vababa ake, nevemhatso yababa ake. Vega vadoko vavo nezvifuyo zvavo nemihlambi yavo vakazvisiya munyika yeGosheni. Dzakakwira naye dzeshe ngoro, nevagadhi vemahachi vaiya chiunga chikurutu. Naapo vakaguma kumbuwa yaAthadhi, iri ruseri rweJorodhani, vakachema ngechiriro chikurutu: naye wakaemesa mazuva manomwe okuchema baba ake. Apo vagari vomunyika iyo, vaKhenani, vakaona kuchema kwaiya pambuwa yaAthadhi, vakati, “Uku kuchema kunosvipisa mwoyo kuvaEgipite.” Ndizvo zina rendau iyo rakaudzwa kuti Abheri-miziraimu, riri ruseri rweJorodhani. Ndizvo vakororo vake vakaita kwaari kudai ngezvaakavapanga. Vakororo vake vakamutwara kuenda kunyika yeKhenani, vakamuika mubako romumunda weMakhipera, riri kumabvazuva kweMamure, iro raakatenga Abrahama pamwepo nomunda kubva kunaEfroni muHiti, kuita ndau yokuika. Apedza kuika baba ake, Josefa wakahwirira Egipite nevakoma vake, navo veshe vakakwira naye kooika baba ake. Naapo vakoma vaJosefa vaona kuti baba avo vafa, vakati, “Pamweni Josefa unozotizonda nokutiunzidzira kushata kweshe kwetakamuitira.” Vakatumira izwi kunaJosefa vechiti, “Baba ako vakatipanga, vasati vafa, vechiti, ‘Munozoronza kudai kunaJosefa: Rekerera zvino, ndapota, kupauka kwevakoma vako nokushaisha kwavo, ngokuti vakakuitira zvakashata.’ Zvino, tinokupota, rekerera kupauka kwevaranda vaMwari wababa ako.” Josefa wakachema apo pevakaereketa naye. Vana vababa ake vakauya, vakawira pamberi pake; vakati, “Wona, tiri varanda vako.” Asi Josefa wakati kwavari, “Musatya! Ndiri pandau yaMwari here? Imwimwi mwakandipinimidzira zvakashata, asi Mwari wakandipinimidzira kuti zvindinakire, kuitira kuti vanhu vazhinji vaponeswe, kudai ngezviripo nyamashi. Ndizvo zvino musatya; ndinozomupa zvokudya nevadoko venyu.” Wakavaembedzera, akaereketa ngenyasha kwavari. Josefa wakagara Egipite, iye nevemhatso yababa ake; Josefa wakapona makore zana negumi (110). Josefa wakaona vana vaEfuremu vomubarirwana wechitatu; zve, nevana vaMakhiri, mukororo waManase, vakatengurwa pamabvi aJosefa. Josefa wakati kuvana vababa ake, “Ndaakufa; asi Mwari unozomuhambira, amubudise kubva munyika muno kuenda kunyika yaakapika ndiyo, kunaAbrahama, kunaIsaka nokunaJakobe.” Josefa wakapikisa vana vaIsuraeri mhiko echiti, “Ngegwinyiso Mwari unozomuhambira, nemwi munozotwara magodo angu kukwira nawo kubva pano.” Ndizvo Josefa wakafa, aane makore zana negumi (110); vakaomesa muiri wake ngemitombo kuti usaora, naye wakaiswa mubhokisi muEgipite. Aya ndiwo mazina evakororo vaIsuraeri vakauya Egipite naJakobe; munhu weshe nevemhatso yake: vaiya Rubheni, Simeoni, Revhi naJudha; Isakha, Zebhuruni, naBhenjamini; Dhani naNafitari, Gadhi naAsha. Veshe vakabarwa kubva muchiunu chaJakobe vaiya vanhu makumi manomwe: Josefa waiya atogara muEgipite. Zvino Josefa wakafa nevakoma vake veshe nomubarirwana uwo weshe. Asi vana vaIsuraeri vakaberekana, vakawanda kakurutu; vakawandisisa, vakaita vane simba kakurutu; ndizvo nyika yakazara ndivo. Zvino kwakabuda mambo mutsva padera peEgipite, uwo waiya asikazii Josefa. Wakati kune vanhu vake, “Wonai, vanhu vaIsuraeri vawanda kakurutu nokugwinya kakurutu kupinda isusu. Uyai, ngativabate ngourimbwi kuitira kuti vasawandisa, kuti kwanyamuka hondo, ivo vasabatana nemagaa edu, vaambane nesu, vatize kubva munyika ino.” Ndizvo vakaemesa padera pavo nduna dzomushando kuti dzivatambudze ngemitwaro inorema. Navo vakaakira Faro madhorobha okuunganidziramwo zviyo, aiya Pithomu naRaamesesi. Asi kudai ngouwandu hwokutambudzwa kwavo, navowo vakanyanya kuwandisa nokupararira. Ndizvo vakatyiswa ngendaa yevana vaIsuraeri. VaEgipite vakamanikidza vana vaIsuraeri kuti vashande ngokurwadziwa. Navo vakavavisa kupona kwavo ngokushanda kunodzimbira mukukanya madhaka nokuforoma zvidhina nembeu dzeshe dzemishando yomuminda. Kweshe kushanda kwavo kwevakamanikidzwa kwaidzimbira. Mambo weEgipite wakaronzera vaashiri vevana vavaHebheru, zina roumwe wavo raizwi Shifira noumweni raizwi Pua. Wakati, “Naapo mwoita mushando wokuashira vana vevakadzi vevaHebheru, mwechivaona pachigaro chokuashira kuti ari murumbwana, munozomuuraya; asi kuti ari musikana, munozomuponesa.” Asi vaashiri vevana vaitya Mwari; avazi kuita kudai ngezvaakavapanga mambo weEgipite, asi vakaponesa vana vevarumbwana. Ndizvo mambo weEgipite wakadaidza vaashiri vevana, akati kwavari, “Mwakaita izvi ngenyi, kuponesa vana vevarumbwana?” Vaashiri vevana vakati kunaFaro, “Ngokuti vakadzi vevaHebheru avazi kudai ngevakadzi vevaEgipite; ngokuti vakagwinya, vanobara muashiri wevana asati aguma kwavari.” Ndizvo Mwari wakavaitira zvakanaka vaashiri vevana; navanhu vakawandiswa, vakaita vakagwinya kakurutu. Ngokuti vaashiri vevana vakatya Mwari, iye wakavapa mhuri. Zvino Faro wakapanga vanhu vake veshe echiti, “Murumbwana weshe unobarwa muvaHebheru, munozomukandira murwizi Naire, asi munozoita kuti musikana weshe apone.” Zvino munhu wemhatso yaRevhi wakaenda, akatora mukadzi mukunda wemhatso yaRevhi. Mukadzi uwo wakaita mimba, wakabara mukororo; naapo aona kuti waiya mwana wakanaka, wakamufisha mwedzi mitatu. Naapo asikachakoni kumufisha, wakamutorera chitundu chetsanga, akachiseta ngebhitumini nenamo, akaisa mwana mukati mwacho, akachigadzika pakati petsanga pahumbikumbi yorwizi. Hanzvadzi yake yakaema ngokuretu, kuti aone chinozoitika kwaari. Mwanasikana waFaro wakadzaka kooshamba kurwizi nevasikana vake vakahamba pahumbikumbi yorwizi. Wakaona chitundu pakati petsanga, akatuma murandakadzi wake koochitora. Wakachibeura, akaona mwana. Wona, mwana waichema. Naye wakarwadziwa mwoyo ndiye, akati, “Uyu ngoumwe wevana vevaHebheru.” Naapo hanzvadzi wake wakati kunomwanasikana waFaro, “Ndiende here ndikudaidzire mureri kubva kuvakadzi vevaHebheru kuti akurerere mwana?” Mwanasikana waFaro wakati kwaari, “Enda.” Ndizvo musikana wakaenda akadaidza mai omwana. Mwanasikana waFaro wakati kwaari, “Tora mwana uyu undirerere, neni ndinozokupa musharo wako.” Ndizvo mukadzi uwo wakatora mwana, akamurera. Naapo mwana akura, wakamuunza kuno mwanasikana waFaro, akamuita kudai ngomukororo wake. Wakadudza zina rake kuti Mosi, akati, “Ngokuti ndakamunyura kubva mumvura.” Zuva rimweni apo Mosi akura, wakabuda kuenda kunehama dzake, akaona vechiangiridzwa kuita mishando yavo. Wakaona muEgipite echiponda muHebheru, umwe wehama dzake. Wakaringira apo naapo, akaona kuti akuna munhu, wakauraya muEgipite, akamufushira mujecha. Naapo abudazve ngezuva rechipiri, wakaona, vamuna vairi vevaHebheru vaiambana; naye wakati kuno uwo waiya nendaa, “Unoponda hama yako ngenyi?” Iye wakati, “Ndiani wakuita mambo nomutongi padera pedu? Unopinimidza ngokuda kundiuraya here, kudai ngezvewakauraya muEgipite?” Mosi wakatya, akapinimidza, “Ngegwinyiso chiro ichi chaziikanwa.” Naapo Faro azwa ichi, wakatsvaka kuuraya Mosi. Asi Mosi wakatiza kubva mukuona kwaFaro. Wakagara munyika yeMidhiani; naye wakagara pashi pasinde pechinyuka. Zvino mupristi weMidhiani waiya nevanasikana vanomwe. Vakauya vakachera mvura, vakazadza mabiya ngemvura yokumwisa zvifuyo zvababa avo. Vaushi vamweni vakauya, vakavadzinga; asi Mosi wakamiruka, akavadetsera, akamwisa zvifuyo zvavo. Naapo vaguma kunaRueri baba avo, wakati, “Kwaitikenyi mwakasira kuuya nyamashi?” Vakati, “MuEgipite watinunura kubva kunyara dzevaushi, naye waticherera mvura, akamwisa zvifuyo.” Wakati kuvasikana vake, “Uri pari? Ngenyi mwamusiya munhuwo? Mudaidzenyi kuti adye chingwa.” Mosi wakatenda kugara nomunhuwo; naye wakapa Mosi Ziphora mwanasikana wake. Iye wakabara mukororo, akadudza zina rake kuti Gershomu; ngokuti wakati, “Ndakaita chigarandimo munyika yevapara.” Mumazuva mazhinji apera mambo weEgipite wakafa. VaIsuraeri vakagomera ngendaa youhloko hwavo, navo vakachema kuti vadetserwe, nokuchema kwavo ngendaa youhloko hwavo kwakakwira kunaMwari. Mwari wakazwa kugomera kwavo, naMwari wakakarakadza chitenderano chake naAbrahama, Isaka naJakobe. Mwari wakaona vaIsuraeri, naMwari wakanyera ndivo. Zvino Mosi waingwarira zvifuyo zvaJethuro muzvere wake, mupristi weMidhiani; naye wakatungamirira zvifuyo zvake kuenda kurupande rwekumabirirazuva kwerubaya, akaguma kumutunhu waMwari, Horebhi. Ngirosi yaMambo Mwari yakaoneka kwaari mumurazvu womuriro waibva mukati mwepfiba; naye wakaringira, wona, pfiba raibaka muriro, asi raiya risikatsvi. Mosi wakati, “Ndinozopauka, ndione ichi chishamiso chikuru, kuti ngenyi pfiba risikatsvi.” Naapo Mambo Mwari aona kuti wapauka kuona, Mwari wakadaidzira kwaari ari mukati mwepfiba, akati, “Mosi, Mosi!” Naye wakati, “Ndiri pano.” Zvino wakati, “Usakwedzera pano! Dusa magwada ako mutsoka dzako, ngokuti ndau yowakaema ivhu rakachena.” Wakatizve, “Ndini Mwari wababa ako, Mwari waAbrahama, Mwari waIsaka naMwari waJakobe.” Mosi wakafisha hope yake, ngokuti wakatya kuringira Mwari. Mambo Mwari wakati, “Ngegwinyiso ndaona kutambudzwa kwevanhu vangu muEgipite, ndakazwa kuchema kwavo ngendaa yenduna dzavo dzemishando; ndinorwadziwa ngokutambudzwa kwavo, neni ndadzaka kuti ndivanunure kubva kunyara dzevaEgipite nokuvabudisa kubva kunyika iyo, ndivaunze kunyika yakanaka, yakakura, nyika inoerera mukaka nouchi, kundau yevaKhenani, yevaHiti, yevaAmori, yevaPherizi, yevaHivhi neyevaJebhusi. Zvino, wona, kuchema kwevana vaIsuraeri kwaguma kwendiri; neni ndaona kutambudzwa kwevanotambudzwa ndikwo ngevaEgipite. Ndizvo uya, ndinozokutuma kunaFaro kuti ubudise vanhu vangu vana vaIsuraeri kubva muEgipite.” Asi Mosi wakati kunaMwari, “Ndiri ani inini ndingaende kunaFaro nokuti ndibudise vana vaIsuraeri kubva muEgipite?” Wakati, “Ngegwinyiso ndinozoa newe; neichi chinozoita chioniso kwouri kuti ndini ndakutuma; naapo wabudisa vanhu kubva muEgipite, munozodira Mwari padera pomutunhu uyu.” Mosi wakati kunaMwari, “Ringira, kuti ndikaguma kuvana vaIsuraeri ndechiti kwavari, ‘Mwari wamadzibaba enyu wandituma kwomuri;’ vanozoti kwendiri, ‘Zina rake ndiani?’ Ndinozotinyi kwavari?” Mwari wakati kunaMosi, “NDIRIYE WENDIRIYE.” Naye wakati, “Unozoronza izvi kunevana vaIsuraeri, ‘NDIRIYE ndiye wakandituma kwomuri.’ ” Mwari wakatizve kunaMosi, “Unozoronza izvi kunevana vaIsuraeri, ‘Mambo Mwari, Mwari wemadzibaba enyu, Mwari waAbrahama, Mwari waIsaka naMwari waJakobe, ndiye wakandituma kwomuri:’ iri ndiro zina rangu mhera nariini, ndiro zina rinozoita mukarakadziso wangu kumibarirwana yeshe. Enda, uunganidze pamwepo vakuru veshe vaIsuraeri wechiti kwavari, ‘Mambo Mwari, Mwari wamadzibaba enyu, Mwari waAbrahama, waIsaka nowaJakobe, wakaoneka kwendiri’ echiti, ‘Ngegwinyiso ndakamuhambira, ndikaona izvo zvinoitwa kwomuri muEgipite.’ Neni ndakagondisa kuti, ‘Ndinozomubudisa kubva mukutambudzwa kwenyu muEgipite kuenda kunyika yevaKhenani, yevaHiti, yevaAmori, yevaPherizi, yevaHivhi neyevaJebhusi, nyika inoerera mukaka nouchi.’ Navo vanozopurutana izwi rako, unozoenda iwewe nevakuru vaIsuraeri kunaMambo wevaEgipite, munozoti kwaari, ‘Mambo Mwari, Mwari wevaHebheru wakashongana nesu; zvino, titendere, tinokupota, kuti tiende rwendo rwemazuva matatu murubaya, kuti tipire mibairo kunaMambo Mwari, Mwari wedu.’ Ndinozia kuti mambo weEgipite aazomutenderi kuti muende, asi kuti aangiridzwa ngenyara inesimba. Ndinozotambanudza nyara yangu, ndichaye Egipite ngemishamiso yangu yeshe yendinozoita mukatimwo; ngesure kweizvi unozomutendera kuti muende. Ndinozoita kuti vanhu ava vadiwe mukuona kwevaEgipite; naapo mwooenda, amuzoendi musina chiro. Asi mukadzi weshe unozokumbira kubva kumuakirwana wake nokubva kwaari uwo unovhakacha kumhatso yake, zvinemeso zvesirivha nezvinemeso zvomukore nezvokusimira; nemwi munozozvipfekesa vakororo venyu nevanasikana venyu; munozotorera vaEgipite zviro zvavo.” Mosi wakapingura, akati, “Asi, wonai, pamweni avazondigondi nokuti kupurutana izwi rangu, ngokuti vanozoti, ‘Mambo Mwari aazi kuoneka kwouri.’ ” Mambo Mwari wakati kwaari, “Chiinyi icho chiri munyara yako?” Wakati, “Indonga.” Wakati, “Ikandire pashi.” Naye wakaikandira pashi, nayo yakapinduka kuita nyoka; naMosi wakaitiza. Mambo Mwari wakati kunaMosi, “Tambanudza nyara yako, uibate ngomuswe,” naye wakatambanudza nyara yake, akaibata, nayo yakapindukazve kuita ndonga munyara yake, “Kuitira kuti vatende kuti Mambo Mwari wemadzibaba avo, Mwari waAbrahama, Mwari waIsaka naMwari waJakobe wakaoneka kwouri.” Mambo Mwari wakatizve kwaari, “Isa nyara yako mukati mwegauni paditi rako.” Ndizvo wakaisa nyara yake mukati mwegauni paditi rake; naapo aibudisa, wona, nyara yake yaiya yaane mapere, yachena kudai ngechando. Naapo wakati, “Isazve nyara yako mukati mwegauni paditi rako.” Ndizvo wakaisazve nyara yake mukati mwegauni paditi rake, naapo aibudisa kubva muditi rake, wona, yakatsandukazve ikadai ngenyama yake. “Kuti vasikazokutendi nokuti kupurutana izwi romushamiso wokutanga, vanozotenda izwi romushamiso wechipiri. Kuti vasikazotendi iyi mishamiso miiri nokuti kupurutana izwi rako, unozotora mvura yomurwizi rweNaire, uidururire padera pemavhu akaoma; nemvura younozotora kubva murwizi inozoita ngazi padera pemavhu akaoma.” Asi Mosi wakati kunaMambo Mwari, “A Mambo Mwari, andisiri gamba rokuereketapi, karetu nokuti kubvira apo pewatanga kuereketa kumuranda wako; ngokuti ndiri mbeveve, ndine chirimi.” Zvino Mambo Mwari wakati kwaari, “Ndiani wakaita muromo womunhu? Nokuti ndiani unoita munhu chimbungumbungu, nokuti dziiranzee, nokuti aone, nokuti bofu? Andinipi here Mambo Mwari? Ndizvo zvino, enda, neni ndinozoa nomuromo wako, ndikudzidzise chounozoereketa.” Asi wakati, “A Mambo Mwari, tuma, ndapota ngenyara youmweni wounozotuma.” Zvino ushungu hwaMambo Mwari hwakabaka kunaMosi, wakati, “Apana Aroni muRevhi, mukoma wako here? Ndinozia kuti iye uri gamba rokuereketa. Zve, ringira, unouya kooshongana newe; naapo akuona unozodakara mumwoyo mwake. Unozoereketa kwaari, uise mazwi mumoromo wake; neni ndinozoa nomuromo wako nomuromo wake, ndinozokudzidzisa icho chounozoita. Unozoita muereketeri wako kuvanhu: naye unozoita muromo wako, newe unozoita kudai ndiMwari kwaari. Newe unozotora ndonga iyi munyara yako, iyo younozoita mioniso ndiyo.” Mosi wakahwirira kunaJethuro muzvere wake, akati kwaari, “Nditendere kuti ndihwirire kuhama dzangu dziri muEgipite, ndoona kuti vachapona here.” Jethuro wakati kunaMosi, “Enda mukunyarara.” Mambo Mwari wakati kunaMosi ari muMidhiani, “Hwirira Egipite; ngokuti vanhu veshe vaitsvaka kukuuraya vakafa.” Mosi wakatora mukadzi wake nevakororo vake, akavakwidza pambongoro, wakahwirira kunyika yeEgipite: Mosi wakatora ndonga yaMwari munyara yake. Mambo Mwari wakati kunaMosi, “Naapo wohwirira Egipite, ngwara kuti uite mishamiso yeshe yendakaisa munyara yako, pamberi paFaro; asi inini ndinozokonzesa mwoyo wake, kuitira kuti asazotendera vanhu kuti vaende. Unozoti kuna Faro, ‘Mambo Mwari unoronza izvi; Isuraeri mukororo wangu, idangwe rangu.’ Neni ndakati kwouri, ‘Tendera mukororo wangu kuti aende, andidire. Ukaramba kumutendera kuti aende; penya, ndinozouraya mukororo wako, dangwe.’ ” Vachiri munjira pandau pevakaata, Mambo Mwari wakashongana naye, akatsvaka kumuuraya. Zvino Ziphora wakatora buwe rinopinza, akacheka ganda repamberi pomukororo wake, akarigwamisa patsoka dzaMosi; wakati, “Ngegwinyiso uri mwamuna wengazi kwendiri!” Ndizvo wakamurekera. Zvino wakati, “Uri mwamuna wengazi, ngendaa yokuchekwa.” Mambo Mwari wakati kunaAroni, “Enda mushango kooshongana naMosi.” Ndizvo wakaenda, akashongana naye pamutunhu waMwari, akamuchingamidza ngomuromo. Mosi wakaronzera Aroni eshe mazwi aMambo Mwari, aakamutuma nawo, nemioniso yeshe yaakamupanga kuti aite. Zvino Mosi naAroni vakaenda, vakaunganidza vakuru veshe vevana vaIsuraeri. Aroni wakaereketa eshe mazwi aakaereketa Mambo Mwari kunaMosi, wakaita mioniso mukuona kwevanhu. Nevanhu vakatenda; naapo vazwa kuti Mambo Mwari wakahambira vana vaIsuraeri nokuti wakaona kutambudzwa kwavo, vakakotamisa masoro avo vakadira. Ngesure kweizvi Mosi naAroni vakaenda kunaFaro vakati, “Unoronza izvi Mambo Mwari, Mwari waIsuraeri, ‘Tendera vanhu vangu kuti vaende, kuti vandiitire dhiri mushango.’ ” Asi Faro wakati, “Ndiani Mambo Mwari, kuti ndipurutane izwi rake nokutendera vaIsuraeri kuti vaende? Andimuzii Mambo Mwari, kupinda izvi zveshe, andizotenderi vaIsuraeri kuti vaende.” Navo vakati, “Mwari wevaHebheru wakashongana nesu; titendere tiende, tinokupota, muhambo wemazuva matatu mushango, tipire mibairo kunaMambo Mwari, Mwari wedu; kuti asazotiunzira nhenda nokuti shoti.” Asi mambo weEgipite wakati kwavari, “Imwimwi Mosi naAroni, ngenyi mwechitora vanhu kubva kumishando yavo? Endai kumishando yenyu!” NaFaro wakati, “Ringira, vanhu vawanda kupinda vomunyika muno, nemwi munoita kuti vazorore kubva kumitwaro yavo!” Ngezuva rimwero Faro wakapanga nduna huru dzemishando yevanhu nenduna dzavo echiti, “Musazopa vanhu tsengwe kuita zvidhina, kudai ngekare: ngavaende vadziunganidzire tsengwe vemene. Nouwandu hwezvidina hwevaiita karetu, munozovaemesera; amuzozvitsonzi nepadokodoko; ngokuti vane nungo; ndizvo vanochema vechiti, ‘Titendere tiende tipire mibairo kunaMwari wedu.’ Mushando wakapinda kurema ngautwikiswe padera pevanhu, kuti vaushande; musavatendera kuti vapurutane mazwi okunyepa.” Ndizvo nduna huru dzemishando yevanhu vakabuda, nenduna dzavo, vakaronzera vanhu vechiti, “Faro unoronza izvi, ‘Andichazomupi tsengwe. Endai mwemene, mutonhere tsengwe apo pomungadziona; ngokuti mushando wenyu auzotsonzwi nepadodoko.’ ” Ndizvo vanhu vakapararira munyika yeshe yeEgipite kutonhera zvitsotso pandau yetsengwe. Nduna dzemishando dzakavakasirisa, dzechiti, “Pedzai mishando yenyu, mishando yenyu yezuva ngezuva, kudai ngaapo pomwaiya netsengwe.” Nenduna dzevana vaIsuraeri, idzo dzakaemeswa padera pavo ngenduna huru dzemishando yaFaro, dzakachayiwa, dzikabvunzwa kuti, “Ngenyi musikazi kupedza mushando wenyu wezuro nanyamashi, wokuita zvidhina kudai ngekaretu?” Naapo nduna dzevana vaIsuraeri dzakauya, dzechichema kunaFaro dzechiti, “Ngenyi wechiita kudai kunevaranda vako? Akuna tsengwe dzinopuwa kuvaranda vako, navo vanoti kwetiri, ‘Itai zvidhina!’ Penya varanda vako vanorohwa; asi ndaa iri kuvanhu vako.” Asi iye wakati, “Mune nungo, mune nungo; ndizvo munoti, ‘Titendere kuti tiende tipire mubairo kunaMambo Mwari.’ Ndizvo endai zvino, mushande; ngokuti akuna tsengwe dzinozopuwa kwomuri, asi munozobudisa uwandu hwezvidhina zvakaemeswa.” Nenduna dzevana vaIsuraeri dzakaona kuti vapinda mungozi yakashata, apo pevakaronzerwa kuti, “Amuzotsonzi nepadoodoko uwandu hwezvidhina zvenyu, zvezuva ngezuva.” Dzakashongana naMosi naAroni, avo vaiya vakavaemera munjira, vechiuya kubva kunaFaro. Nadzo dzakati kwavari, “Mambo Mwari ngaamuringire, amutonge! Ngokuti mwakaita kuti gwema redu riite chinuho mukuona kwaFaro nomukuona kwevaranda vake, navo vaisa shoti munyara dzavo kuti vatiuraye ndiyo.” Zvino Mosi wakahwirirazve kunaMambo Mwari, akati, “Mambo Mwari, ngenyi mwaitira vanhu ava zvakashata? Mwakanditumirenyi? Ngokuti kubvira mukuwo wendakaguma kunaFaro kuereketa ngezina renyu, iye wakaitira vanhu ava zvakashata; nemwi amusati mwanunura vanhu venyu nepadoodoko.” Zvino Mambo Mwari wakati kunaMosi, “Zvino uchaona zvendinozoita kunaFaro, ngokuti ngenyara yakagwinya unozovatendera kuti vaende, ngenyara yakagwinya unozovadzinga kubva munyika yake.” Mwari wakaereketa kunaMosi echiti, “Ndini Mambo Mwari. Ndakaoneka kunaAbrahama, kunaIsaka nokunaJakobe, ndini Mwari Une-simba-reshe, asi ngezina rangu Mambo Mwari andizi kuita kuti ndiziikanwe pachangu kwavari. Ininiwo, ndakaemesa chitenderano changu navo, kuvapa nyika yeKhenani, nyika yevakagaramwo vari zvigarandimo. Ndakazwa kugomera kwavana vaIsuraeri, avo vanoitwa hloko ngevaEgipite, neni ndakarakadza chitenderano changu. Ndizvo ronzai kune vana vaIsuraeri, kuti, ‘Ndini Mambo Mwari, ndinozomubudisa kubva pashi pemitwaro yevaEgipite, ndinozomusunhura kubva muuhloko hwavo, ndinozomuripira ngomuoko wakatambanudzwa nezvitongero zvikuru. Ndinozomutora kuita vanhu vangu, neni ndinozoita Mwari wenyu. Nemwi munozozia kuti ndini Mambo Mwari, Mwari wenyu, uwo unomubudisa kubva pashi pemitwaro yevaEgipite. Ndinozomupotedza munyika yendakamirudza nyara yangu kupika kuti ndinozoipa kunaAbrahama, kunaIsaka nokunaJakobe; ndinozoipa kwomuri kuita nhaka yenyu. Ndini Mambo Mwari.’ ” Mosi wakaereketa kudaro kuvana vaIsuraeri; asi avazi kupurutana kunaMosi ngendaa yokutambudzika kwomweya yavo, ngendaa youhloko hunorunya. Zvino Mambo Mwari wakaereketa kunaMosi echiti, “Potera, uronzere Faro mambo weEgipite kuti atendere vana vaIsuraeri kuti vabude kubva munyika yake.” Asi Mosi wakaereketa pamberi paMambo Mwari echiti, “Ringira, vana vaIsuraeri avazi kundipurutana; zvino Faro ungazopurutana kwendiri ngenjiranyi, ndiri uwo une miromo isikazi kuchekwa?” Asi Mambo Mwari wakaereketa kunaMosi naAroni, akapa mupango kunevana vaIsuraeri nokunaFaro mambo weEgipite, kuti vabudise vana vaIsuraeri kubva munyika yeEgipite. Ava ndivo vakuru vemhatso dzemadzibaba avo: vakororo vaRubheni, dangwe raIsuraeri: Hanokhi, Paru, Hezironi, naKhami; ava ndivo vemhatso dzaRubheni. Vakororo vaSimeoni: Jemueri, Jamini, Ohadhi, Jakhini, Zoha naShauri, mukororo wakabarwa ngomukadzi muKhenani; ava ndivo vemhatso dzaSimeoni. Aya ndiwo mazina evakororo vaRevhi kudai ngokuteererana kwemibarirwana yavo: Gershoni, Kohathi naMerari. Makore okupona kwaRevhi aiya zana nemakumi matatu nemanomwe (137). Vakororo vaGershoni vaiya Ribhini naShimei, kudai ngokuteererana kwemhatso dzavo. Vakororo vaKohathi vaiya Amiramu, Izha, Hebroni naUzieri. Makore okupona kwaKohathi aiya zana nemakumi matatu nematatu (133). Vakororo vaMerari vaiya Mahiri naMushi. Ava ndivo vemhatso dzaRevhi kudai ngokuteererana kwemibarirwana yadzo. Amiramu wakaroora Jokhebhedhi mukunda wababa ake; iye wakamubarira Aroni naMosi. Makore okupona kwaAmiramu aiya zana nemakumi matatu nemanomwe (137). Vakororo vaIzha vaiya Khora, Nefegi naZikhiri. Vakororo vaUzieri vaiya Mishaeri, Erizafani naSithiri. Aroni wakaroora Erishebha, mwanasikana waAminadhabhi mukunda waNashoni; iye wakamubarira Nadhabhi, Abhihu, Ereaza naIthama. Vakororo vaKhora vaiya Asiri, Erikana naAbhiasafi; ava ndivo vemhatso dzaKhora. Ereaza mukororo waAroni wakaroora umwe wevanasikana vaPutieri; iye wakamubarira Finehasi. Ava ndivo vakuru vemhatso dzemadzibaba evaRevhi, kudai ngokuteererana kwemhatso dzavo. Ava ndivo Aroni naMosi vaakaronza Mambo Mwari kwavari, kuti, “Budisai vana vaIsuraeri kubva munyika yeEgipite, kudai ngokuteererana kwezvikwata zvavo.” Ndivo vakaereketa kunaFaro, mambo weEgipite, kuti vabudise vana vaIsuraeri kubva muEgipite, uyu Mosi nouyu Aroni. Ngezuva iro raakaereketa Mambo Mwari kunaMosi munyika yeEgipite, Mambo Mwari wakati kunaMosi, “Ndini Mambo Mwari; ronzera Faro mambo weEgipite zveshe zvendinoereketa kwouri.” Asi Mosi wakati pamberi paMambo Mwari, “Ringirai, ndiri mbeveve, ungazopurutana kwendiri Faro ngenjiranyi?” Mambo Mwari wakati kunaMosi, “Wona, ndakuita kudai ndi Mwari kunaFaro naAroni mukoma wako unozoita muprofeti wako. Iwewe unozoereketa zveshe zvendinokupanga, naAroni mukoma wako unozoronzera Faro kuti atendere vana vaIsuraeri kuti vabude kubva munyika yake. Asi neni ndinozokonzesa mwoyo waFaro, kunyazwi ndikanyawanza mioniso yangu nemishamiso yangu munyika yeEgipite. Faro aazopurutani kwouri, naapo ndinozoisa nyara yangu padera peEgipite, ndibudise hondo dzangu, vanhu vangu vana vaIsuraeri, kubva munyika yeEgipite ngokutonga kukuru. VaEgipite vanozozia kuti ndini Mambo Mwari, apo pendinozotambanudza nyara yangu padera peEgipite, ndibudise vana vaIsuraeri kubva pakati pavo.” Mosi naAroni vakaita kudaro; vakaita kudai ngezvaakavapanga Mambo Mwari. Mosi waiya nemakore makumi masere (80), naAroni waiya nemakore makumi masere namatatu (83), apo pevakaereketa kunaFaro. Mambo Mwari wakaereketa kunaMosi naAroni echiti, “Naapo Faro paanozoereketa kwomuri echiti, ‘Itai mushamiso’ zvino unozoti kunaAroni, ‘Tora ndonga yako, uikandire pashi pamberi paFaro, kuti ipinduke kuita nyoka.’ ” Mosi naAroni vakapotera kunaFaro, vakaita kudai ngezvaakavapanga Mambo Mwari; Aroni wakakandira pashi ndonga yake pamberi paFaro nevaranda vake, nayo yakapinduka kuita nyoka. Naapo Faro wakadaidzawo vanhu vakangwara nevarombi; navowo, vasaramusi veEgipite, vakaitawo kudai ngemasaramuso avo. Ngokuti munhu weshe wakakandira pashi ndonga yake, nadzo dzakapinduka kuita nyoka; asi ndonga yaAroni yakamedza ndonga dzavo. Zvakanyadaro mwoyo waFaro wakakonzeswa, naye aazi kupurutana kwavari, kudai ngezvaakaronza Mambo Mwari. Ngozi Yakawira Egipite. Mambo Mwari wakati kunaMosi, “Mwoyo waFaro watindiara; unoramba kutendera vanhu kuti vaende. Enda kunaFaro mangwanani, paanobuda kuenda kumvura; newe unozomuemera pahumbikumbi yorwizi kuti ushongane naye; unozotora ndonga munyara yako iyo yakapinduka kuita nyoka. Newe unozoti kwaari, ‘Mambo Mwari, Mwari wevaHebheru, wakandituma kwouri echiti, “Tendera vanhu vangu kuti vaende, vandidire mushango. Wona, metsa zvino auzi kupurutana.” Mambo Mwari unoronza izvi, “Ngeizvi unozozia kuti ndini Mambo Mwari.” Ringira, ndinozochaya mvura iri murwizi, rweNaire ngendonga iri munyara yangu nayo inozopinduka kuita ngazi, nehove dziri murwizi dzinozofa, norwizi runozonuhwa; nevaEgipite vanozonyenya kumwa mvura yorwizi.’ ” Mambo Mwari wakati kunaMosi, “Ronza kunaAroni, ‘Tora ndonga yako, utambanudze nyara yako padera pemvura yeEgipite, padera pendwizi dzavo, pemikova yavo, pemakandwa avo nepemadziya eshe avo kuti zviite ngazi; nengazi inozoapo munyika yeshe yeEgipite kunyazwi mukati mwezvidziyo zvemiti nomwezvidziyo zvemapuwe.’ ” Mosi naAroni vakaita kudai ngezvaakapanga Mambo Mwari; wakamirudza ndonga, akachaya mvura yaiya murwizi Naire, mukuona kwaFaro nevaranda vake; nemvura yeshe yaiya murwizi yakapinduka kuita ngazi. Hove dzaiya murwizi dzakafa; norwizi rwakanuhwa, nevaEgipite avazi kukona kumwa mvura kubva murwizi; nengazi yaiya panyika yeshe yeEgipite. Nevasaramusi veEgipite vakaita kudaro ngemasaramuso avo: nomwoyo waFaro wakakonzeswa, naye aazi kupurutana kwavari kudai ngezvaakaronza Mambo Mwari. Faro wakakunukuka, akapotera mumhatso yake, aazi kukarakadza ngeichi mumwoyo mwake. NevaEgipite veshe vakatsa muhumbikumbi dzorwizi kutsvaka mvura yokumwa; ngokuti avazi kukona kumwa mvura yomurwizi. Mazuva manomwe akapera kubva pakachaiwa rwizi Naire ndi Mambo Mwari. Zvino Mambo Mwari wakati kunaMosi, “Potera kunaFaro, wechiti kwaari, ‘Mambo Mwari unoronza izvi, Tendera vanhu vangu vaende, vandidire. Asi kuti ukaramba kuvatendera kuti vaende, ringira, ndinozochaya nyika yako yeshe ngemitanja. Norwizi Naire runozozara ngemitanja, nayo inozokwira nokupotera mumhatso mwako nomukamera rako nepadera pomubhedhi wako nomumhatso yevaranda vako nepadera pevanhu vako nomukati mwezvoto zvako nomukati mwezvidziyo zvako zvokukanyira zvingwa. Nemitanja inozokwira padera pako nepadera pevanhu vako nepevaranda vako veshe.’ ” Mambo Mwari wakati kunaMosi, “Ronza kunaAroni, ‘Tambanudza nyara yako ine ndonga padera pemvura, pemikova, pemakandwa, uite kuti mitanja ikwire padera penyika yeEgipite.’ ” Ndizvo Aroni wakatambanudza nyara yake padera pemvura yeEgipite; nemitanja yakakwira, ikazadza nyika yeEgipite. Nevasaramusi vakaita kudaro ngemasaramuso avo, vakakwidza mitanja padera penyika yeEgipite. Naapo Faro wakadaidza Mosi naAroni, akati, “Potai kunaMambo Mwari kuti aduse mitanja kubva kwendiri nokune vanhu vangu; neni ndinozotendera vanhu kuti vaende, vapire midiro kunaMambo Mwari.” Mosi wakati kunaFaro, “Ndapota ndironzere panguvanyi yaunoda kuti ndizokukumbirira ngendaa yako, nenduna dzako nevanhu vako kuti mitanja iparadzwe kubva kwouri nokumhatso dzako, isare muNaeri mwega?” Iye wakati, “Mangwani.” Mosi wakati, “Ngazviitike kudai ngeizwi rako, kuti uzie kuti akuna wakadai ndiMambo Mwari, Mwari wedu. Nemitanja inozobva kwouri, kumhatso dzako, kunduna dzako nokuvanhu vako, nayo inozosara muNaeri mwega.” Zvino Mosi naAroni vakabuda kubva kunaFaro; naMosi wakachemera Mambo Mwari ngendaa yemitanja yaakaunza padera paFaro. NaMambo Mwari wakaita kudai ngeizwi raMosi; nemitanja yakafa yaiya mumhatso, yaiya mumaruwanze neyaiya muminda. Navo vakaiunganidza pamwepo kuita mirwi; nenyika yakanuhwa. Asi apo Faro aona kuti zvanaka, wakakonzesa mwoyo wake, akaramba kupurutana kwavari, kudai ngezvaakaereketa Mambo Mwari. Zvino Mambo Mwari wakati kunaMosi, “Ronzera Aroni kuti, ‘Tambanudza ndonga yako, uchaye bukuta remavhu, kuitira kuti riite nhata munyika yeshe yeEgipite.’ ” Vakaita kudaro; Aroni wakatambanudza nyara yake ine ndonga, akachaya bukuta renyika, kwakabuda nhata padera pevanhu nemhuka; bukuta reshe renyika rakapinduka kuita nhata munyika yeshe yeEgipite. Nevasaramusi vakaita kudaro ngemasaramuso avo kuti dzibudepo nhata, asi avazi kukona. Dzakaapo nhata padera pevanhu nepemhuka. Naapo vasaramusi vakati kunaFaro, “Ichi chinwe chaMwari!” Asi mwoyo waFaro wakakonzeswa, wakaramba kupurutana kwavari, kudai ngezvaakaereketa Mambo Mwari. Zvino Mambo Mwari wakati kunaMosi, “Fumira kumiruka mangwanani, ueme pamberi paFaro, apo paanobuda kuenda kumvura, wechiti kwaari, ‘Mambo Mwari unoronza izvi: Tendera vanhu vangu vaende, vandidire. Nokuti kudai wechiramba kuti vanhu vangu vaende, ringira, ndinozotuma mitanda yenhunzi padera pako, padera penduna dzako nepevanhu vako nomumhatso dzako; nemhatso dzevaEgipite dzinozozara ngemitanda yenhunzi, nepadera pemavhuwo apo pedziri. Asi ngeiro zuva ndinozoparadzanisa nyika yeGosheni inogarwa ngevanhu vangu, kuti kusazoapo mitanda yenhunzi kuitira kuti uzie kuti ndini Mambo Mwari mukati mwenyika. Neni ndinozoisa muparadzaniso pakati pevanhu vangu nepevanhu vako. Ichi chioniso chinozoitika kuti chiwepo mangwani.’ ” Mambo Mwari wakaita kudaro, nemitanda yenhunzi mikurutu yakauya mumhatso yaFaro, mumhatso dzenduna dzake nomunyika yeshe yeEgipite; nyika yakashaishirwa ngendaa yemitanda yenhunzi. Zvino Faro wakadaidza Mosi naAroni, akati, “Endai, mupire midiro kunaMwari wenyu munyika iyi.” Mosi wakati, “Azvizi kunaka kuita kudaro; ngokuti tinozopira kuita mudiro kunaMambo Mwari, Mwari wedu, zvinonyangadza vaEgipite. Ringira, dai echizopira kuita midiro zvinonyangadza vaEgipite mukuona kwavo, avazotipondi here ngemapuwe? Tinozoenda rwendo rwemazuva matatu mushango, tinozopira midiro kunaMambo Mwari, Mwari wedu, kudai ngezvaanozotipanga.” Ndizvo Faro wakati, “Ndinozomutendera kuti muende mupire midiro kunaMambo Mwari, Mwari wenyu mushango; asi musazoenda kuretu. Mundikumbirire.” Mosi wakati, “Ringirai, ndinobuda kubva kwouri, ndinozokumbira kunaMambo Mwari kuti mitanda yenhunzi mangwani ibve kunaFaro, nokubva kune nduna dzake nokubva kune vanhu vake; asi kwega Faro asachatichengedzerazve ngokusikatendera vanhu kuti vaende koopira midiro kunaMambo Mwari.” Ndizvo Mosi wakabuda kubva kunaFaro, akakumbira kunaMambo Mwari. Mambo Mwari wakaita kudai ngeizwi raMosi; wakabvisa mitanda yenhunzi kubva kunaFaro, kubva kune nduna dzake nokubva kune vanhu vake; akuzi kusara naimwe. Asi Faro wakakonzesa mwoyo wake panguva iyiwo, naye aazi kutendera vanhu kuti vaende. Zvino Mambo Mwari wakati kunaMosi, “Potera kunaFaro, umuronzere uti, ‘Unoronza izvi Mambo Mwari, Mwari wevaHebheru: Tendera vanhu vangu vaende, vandidire. Ngokuti kudai wechiramba kuvatendera kuti vaende, nokuangira kuvabata, ringira, nyara yaMambo Mwari iri padera pezvifuyo zvako zviri mushango, padera pamahachi, pembongoro, pemakamera, pen'ombe, nepemakwai; inozoapo nhenda yakashata kakurutu. Asi Mambo Mwari unozoisa muparadzaniso pakati pezvifuyo zvavaIsuraeri nezvevaEgipite, kuitira kuti chisazoapo nechimwe chinozofa cheizvo zveshe zvevana vaIsuraeri.’ ” Mambo Mwari wakaemesa mukuwo echiti, “Mangwani Mambo Mwari unozoita chiro ichi munyika.” Ngezuva raiteera Mambo Mwari wakaita ichi chiro; zvifuyo zveshe zvevaEgipite zvakafa, asi akuna nachimwe chezvifuyo zvevana vaIsuraeri chakafa. Faro wakatuma vanhu, ringira, apana nachimwe chezvifuyo zvevaIsuraeri chakafa. Asi mwoyo waFaro wakatindiara, naye aazi kutendera vanhu kuti vaende. Zvino Mambo Mwari wakati kunaMosi naAroni, “Torai tsimba yemarota epachoto, naMosi ngaakushire mudenga mukuona kwaFaro. Nayo inozoita bukuta rakamotseka padera penyika yeshe yeEgipite. Rinozoita mota dzinoputika kuita mabandwa padera pevanhu nepadera pemhuka munyika yeshe yeEgipite.” Ndizvo vakatora marota kubva pachoto, vakaema pamberi paFaro; naMosi wakaakushira mudenga; akaita mota dzinoputika kuita mabandwa padera pevanhu nepadera pemhuka. Nevarombi vasaikona kuema pamberi paMosi ngendaa yemota; ngokuti mota dzaiya padera pevarombi nepadera pevaEgipite veshe. Asi Mambo Mwari wakakonzesa mwoyo waFaro, naye aazi kupurutana kwavari, kudai ngezvaakaereketa Mambo Mwari kunaMosi. Zvino Mambo Mwari wakati kunaMosi, “Fumira kumiruka mangwanani, ueme pamberi paFaro, wechiti kwaari, ‘Unoronza izvi Mambo Mwari, Mwari wevaHebheru: Tendera vanhu vangu vaende, vandidire. Ngokuti ngouyu mukuwo ndinozotuma nhenda dzangu dzeshe padera pomwoyo wako, padera penduna dzako nepevanhu vako kuitira kuti uzie kuti akuna wakadai ndini munyika yeshe. Ngokuti zvino ndingadai ndatotambanudza nyara yangu, ndikakuchaya iwewe nevanhu vako ngenhenda, newe waizodai wagurwa kubva panyika. Asi ngeiyi ndaa, ngegwinyiso ndakakuemesa kuti ndikuonise simba rangu, kuti zina rangu riteketeswe munyika yeshe. Uchandodzikudza here kurwisana nevanhu vangu, newe usikavatenderi kuti vaende? Ringira, mangwani panguva yakadai ngeino ndinozoita kuti matsanza akashata kakurutu anaye, asikazi kumboapo akadaro muEgipite kubvira pazuva rokuemeswa kwayo metsa nanyamashi. Ndizvo zvino tuma, kasira kupotedza pandau pakangwaririka zvifuyo zvako zveshe zvounazvo zviri mushango; ngokuti munhu weshe nezvifuyo zveshe zvinozooneka mushango zvisikazi kuunzwa kanyi matsanza anozonaya padera pazvo, nazvo zvinozofa.’ ” Zvino uwo wakatya izwi raMambo Mwari pakati penduna dzaFaro wakaita kuti hloko dzake nezvifuyo zvake zvitizire mumhatso. Asi uwo usikazi kupinimidza ngeizwi raMambo Mwari wakarekera hloko dzake nezvifuyo zvake zviri mushango. Mambo Mwari wakati kunaMosi, “Tambanudzira nyara yako mudenga, kuti matsanza awe panyika yeshe yeEgipite, padera pevanhu nepemhuka nepezvakamera zveshe zvomushango, panyika yeshe yeEgipite.” Mosi wakatambanudzira ndonga yake mudenga naMambo Mwari wakatuma kutinhira nematsanza, nomuriro wakadzaka panyika. Mambo Mwari wakanayisa matsanza padera penyika yeEgipite; zvakaapo matsanza nemheni, dzaiangira kuvaima, nematsanza akakura kakurutu, izvo zvisikazi kumboapo munyika yeshe yeEgipite kubvira mukuwo weyakaita dzinza. Matsanza akarigira pashi chiro cheshe chaiya mushango munyika yeshe yeEgipite, zveshe vanhu nemhuka; nematsanza akarigira pashi mapfiba eshe omushango, akavhunira pashi miti yeshe yomushango. Kwega munyika yeGosheni umwo mwaigara vaIsuraeri, mwaiya musina matsanza. Faro wakatuma, akadaidza Mosi naAroni, akati kwavari, “Ndashaisha nguva ino; Mambo Mwari wakarurama, inini nevanhu vangu takashata. Kumbira kunaMambo Mwari! Ngokuti zvakwana uku kutinhira ngesimba nematsanza; neni ndinozomutendera kuti muende, amuchazogari.” Mosi wakati kwaari, “Apo ndabuda kubva kudhorobha, ndinozotambanudza nyara dzangu kunaMambo Mwari; kutinhira kunozonyarara, akuchazoapopi matsanza, kuti uzie kuti nyika ngeyaMambo Mwari. Asi iwewe nenduna dzako, ndinozia kuti amusati mwamutya Mambo Mwari.” Rukangaza nebhari zvakarigwa, ngokuti bhari raiya rootumbuka, norukangaza rwaiya rwaane maruwa. Asi koroni nesipereti azvizi kurigwa, ngokuti zvaiya zvisati zvakura. Ndizvo Mosi wakabuda kubva kudhorobha nokubva kunaFaro, akatambanudza nyara dzake kunaMambo Mwari; nokutinhira nematsanza zvakanyarara, nemvura yaiya isikachatsvotsvomi panyika. Asi apo Faro aona kuti mvura nematsanza nokutinhira zvakanyarara, wakaphinda kushaishazve, akakonzesa mwoyo wake, iye nenduna dzake. Ndizvo mwoyo waFaro wakakonzeswa, naye aazi kutendera vanhu vaIsuraeri kuti vaende, kudai ngezvaakaereketa Mambo Mwari kubudikidza ndiMosi. Zvino Mambo Mwari wakati kunaMosi, “Potera kunaFaro; ngokuti ndakakonzesa mwoyo wake nemwoyo yenduna dzake, kuitira kuti ndionise izvi zvioniso zvangu pakati pavo, kuitira kuti iwewe uzoronzera mukuzwa kwomukororo wako nokwomukororo womukororo wako izvo zviro zvendakaita pakati pevaEgipite ngoushungu, nezvioniso zvangu zvendakaita pakati pavo; kuti muzie kuti ndini Mambo Mwari.” Mosi naAroni vakapotera muna Faro, vakati kwaari, “Unoronza izvi Mambo Mwari, Mwari wevaHebheru, ‘Unozoramba kudzipfaisa pamberi pangu mukuwo wakaitawani? Tendera vanhu vangu kuti vaende, vandidire. Ngokuti, kudai wechiramba kutendera vanhu vangu kuti vaende, ringira, mangwani ndinozounza ndongwe munyika yako. Dzinozofukidza mavhu kuti munhu asakona kuona mavhu nadzo dzinozodya izvo zvakasiiwa kwomuri ngematsanza, dzinozodya miti yeshe inokura munyika. Nadzo dzinozozadza mhatso dzako nemhatso dzenduna dzako dzeshe nemhatso dzevaEgipite veshe; dzevasikazi kumboona dzakadaro madzibaba ako nokuti madzibaba emadzibaba ako, kubvira pazuva revaiya padera penyika metsa kuzuva iri.’ ” Naye wakakunukuka, akabuda kubva kunaFaro. Nduna dzaFaro dzakati kwaari, “Munhu uyu unozoita murau kwetiri mukuwo wakaitawani? Tendera vanhu kuti vaende, kuti vadire Mambo Mwari, Mwari wavo; ausati wandozia here kuti Egipite yaparadzwa?” Ndizvo Mosi naAroni vakaunzwazve kunaFaro; naye wakati kwavari, “Endai mudire Mambo, Mwari wenyu; asi ndiani vanozoenda?” Mosi wakati, “Tinozoenda nevadoko vedu nevasharuka vedu; nevakororo vedu, vanasikana vedu, nemakwai edu nen'ombe dzedu tinozoenda; ngokuti kunosisira kuti tiite dhiri raMambo Mwari.” Naye wakati kwavari, “Mambo Mwari ngaagare nemwi, kuti inini ndikamutendera kuti muende nevadoko venyu! Ngwarai, ngokuti zviri pamhene kuti kushata kuri pamberi penyu. Haiwa azviitiki! Endai, imwimwi vamuna, mudire Mambo Mwari ngokuti ndizvo zvomunodisisa.” Vakadzingwa kubva pamberi paFaro. Zvino Mambo Mwari wakati kunaMosi, “Tambanudza nyara yako padera penyika yeEgipite, kuitira kuti ndongwe dziuye padera penyika yeEgipite, dzidye zvinokura zveshe zvepanyika, zveshe izvo zvakasiiwa ngematsanza.” Ndizvo Mosi wakatambanudza ndonga yake padera penyika yeEgipite, naMambo Mwari wakaunza dutu rokumabvazuva padera penyika zuva iro reshe, nousiku hweshe; naapo kwaedza dutu rokumabvazuva rakaunza ndongwe. Ndongwe dzakauya padera penyika yeshe yeEgipite, dzikamata munyika yeshe yeEgipite; dzaiya dzakawanda kakurutu; ndongwe dzakadaro adzizi kumboapo karetu, adzimbozoapozve dzakadaro. Ngokuti dzakafukidza hope yenyika yeshe, ndizvo nyika yakatibikirwa kuti zvii; nadzo dzakadya zvinokura zveshe zvepanyika, nemichero yeshe yemiti yakasiiwa ngematsanza; akuzi kusara chiro chakasvipira, kunyazwi muti nokuti pfiba romushango, munyika yeshe yeEgipite. Naapo Faro wakadaidza Mosi naAroni ngokukasira; akati, “Ndashaisha pamberi paMambo Mwari, Mwari wenyu, nokwomuri. Ndizvo zvino, kungurirai kushaisha kwangu, ndapota kamwe kano kega, mupote kunaMambo, Mwari wenyu kwega, kuti aduse kubva kwendiri uku kufa.” Ndizvo wakabuda kubva kunaFaro, akakumbira kunaMambo Mwari. Mambo Mwari wakakunukudza dutu kuti ribve ngokumabirirazuva, rine simba gurutu yaamho, rakamirudza ndongwe, rikadzikandira muRuandhle Rwakatsvuka; akuzi kusara naimwe ndongwe munyika yeshe yeEgipite. Asi Mambo Mwari wakakonzesa mwoyo waFaro, aazi kutendera vana vaIsuraeri kuti vaende. Mambo Mwari wakati kunaMosi, “Tambanudzira nyara yako mudenga, kuti chiapo chidima padera penyika yeshe yeEgipite, chidima chinozwika.” Ndizvo Mosi wakatambanudzira nyara yake mudenga, kwakaapo chidima chikurutu munyika yeshe yeEgipite mazuva matatu. Avazi kukona kuonana, akuna munhu wakamiruka kubva pandau yake mazuva matatu; asi veshe vanhu vaIsuraeri vaiya nokujeka mukanyi mwavo. Zvino Faro wakadaidza Mosi, akati, “Endai, mudire Mambo Mwari; nevana venyu vangaendawo nemwi; asi makwai enyu nen'ombe dzenyu ngazvisare.” Asi Mosi wakati, “Unosisira kuti upe munyara dzedu mibairo nemidiro yokupisha, kuti tipire kunaMambo Mwari, Mwari wedu midiro. Zvifuyo zvedu zvinozoenda nesu; akuzosari nesondo haro uno: ngokuti tinozotora kubva kwezviri tidire Mambo Mwari, Mwari wedu; nesu atizii chinosisira kuti tidire ndicho Mambo Mwari metsa tagumayo.” Asi Mambo Mwari wakakonzesa mwoyo waFaro, akaramba kuvatendera kuti vaende. Faro wakati kwaari, “Ibva kwendiri! Dzingwarire iwewe pachako kuti usachazoonazve hope yangu; ngokuti ngezuva rounozoona hope yangu, unozofa.” Mosi wakati, “Wanasa kuronza; andichazooni hope yako.” Mambo Mwari wakati kunaMosi, “Ndichazounzazve dambudziko rimweni padera paFaro nepadera peEgipite; ngesure kweizvo unozomutendera kuti muende kubva pano; naapo paanozomutendera kuti muende, ngegwinyiso unozomudzinga yaamho kubva pano. Ereketa zvino mukuzwa kwevanhu, ngavakumbire mwamuna weshe kubva kuno muakirwana wake, nomukadzi weshe kubva kuno muakirwana wake, zvinemeso zvesirivha nezvinemeso zvomukore.” Mambo Mwari wakaitira vanhu nyasha kuti vadikanwe mukuona kwevaEgipite. Kupinda zveshe, munhu uyu Mosi waiya mukuru kakurutu munyika yeEgipite, mukuona kwenduna dzaFaro nomukuona kwevanhu. Mosi wakati, “Unoronza izvi Mambo Mwari, kwooita pakati pousiku ndinozobuda kuenda pakati peEgipite. Matangwe eshe omunyika mweEgipite anozofa, kubvira kudangwe raFaro unogara padera pachigaro choumambo chake, metsa kuguma kudangwe romurandakadzi uri paguyo nematangwe eshe ezvifuyo. Kunozoapo kuchema kukurutu munyika yeshe yeEgipite, kusikazi kumboapo kwakadaro, akuchazoapozve kwakadaro nakamwe. Asi pakati pevana vaIsuraeri akuna imbwa inozoukura kuno umwe wavo, kuno munhu nokuti kune chifuyo: kuti muzie kuti Mambo Mwari unoisa muparadzaniso pakati pevaEgipite nevaIsuraeri. Idzi dzeshe nduna dzako dzinozouya kwendiri, dzidzikotamise kwendiri, dzechiti, ‘Buda iwewe nevanhu veshe vanokuteera.’ Ngesure kweizvo ndinozobuda.” Naye wakabuda kubva kunaFaro anoushungu hunobaka. Mambo Mwari wakati kunaMosi, “Faro aazopurutani kwouri, kuti mishamiso yangu iwanziswe munyika yeEgipite.” Mosi naAroni vakaita yeshe iyi mishamiso pamberi paFaro; naMambo Mwari wakakonzesa mwoyo waFaro, naye aazi kutendera vana vaIsuraeri kuti vabude kubva munyika yake. Mambo Mwari wakaereketa kunaMosi naAroni vari munyika yeEgipite echiti, “Mwedzi uyu unozoita kwomuri kutanga kwemwedzi; unozoita mwedzi wokutanga wegore kwomuri. Ronzerai mushongano weshe wevaIsuraeri mwechiti, ‘Ngezuva regumi romwedzi uyu vanozodzitorera munhu weshe kagwai, kudai ngouwandu hwemhatso dzemadzibaba avo, kagwai kamwe kumhatso imwe.’ Kudai vemhatso vakanyanya kutsonga, vasikakoni kupedza kagwai, vanozobatana nomuakirwana wayo unogara pasinde pavo; vanozotora kamwe kudai ngezvevanokona kudya umwe ngaumwe, vanozogurirana zvimakwai zvavo ngokudaro. Kagwai kenyu kanozoita kasina kuremara, gondohwe rine gore rimwe; munozoritora kubva pamakwai nokuti kubva pambudzi. Munozoringwarira metsa zuva regumi namarongomuna omwedziwo; nembungano yeshe yevaIsuraeri vanozoriuraya madeekoni. Vanozotora imweni yengazi nokuiisa padera pemadziro mairi epamusiwo nepadera pemusiwo wemhatso mwevanozoadyira. Vanozodya nyama ngousikuhwo, yakakochwa ngomuriro, nechingwa chisina mumera; vanozoidya pamwepo nemiriwo inovava. Musazoidya iri mbishi nokuti yakabikwa ngemvura, asi yakakochwa ngomuriro; soro rayo pamwepo nemirenje yayo nezvomukati mwayo. Musazosiya nachimwe chayo metsa nechimangwani; cheshe chinosara metsa mangwani, munozochipisha ngomuriro. Ngenjira iyi munozoridya: zviunu zvenyu zvakasungwa, magwada enyu ari mutsoka dzenyu, nemidondoro yenyu munyara dzenyu; nemwi munozoidya ngokukasira. Ndiro phasika raMambo Mwari. Ngokuti ndichahamba pakati penyika yeEgipite ngouhwo usiku, ndichauraya matangwe eshe omunyika yeEgipite, eshe evanhu neemhuka; neni ndinozotonga zvimwari zveshe zveEgipite. Ndini Mambo Mwari. Ngazi inozoita chioniso kwomuri pamhatso pomunogara; naapo pendinozoona ngazi, ndinozomudarika, nedambudziko arizowiri padera penyu kumuparadza, apo pendinozoparadza nyika yeEgipite. Nezuva iri rinozoita mukarakadziso kwomuri, nemwi munozoringwarira kuita dhiri kunaMambo Mwari; kumibarirwana yenyu yeshe munozoringwarira kuita mutemo mhera nariini. “Munozodya chingwa chisina mumera mazuva manomwe; ngezuva rokutanga munozobvisa mumera kubva kumhatso dzenyu: ngokuti uwo unozodya chingwa chino mumera kubvira pazuva rokutanga metsa kuguma pazuva rechinomwe, uwo munhu unozogurwa kubva kuvana vaIsuraeri. Ngezuva rokutanga munozoita mushongano wakacheneswa, ngezuva rechinomwe munozoitazve mushongano wakacheneswa; akuna mushando unozoitwa pamazuva aya, asi uwo wokunasirira kuti mudye; ndiwo wega ungazoitwa ndimwi. Nemwi munozongwarira dhiri rechingwa chisina mumera, ngokuti ngezuva ririro ndakabudisa hondo dzenyu kubva kunyika yeEgipite; munozoringwarira zuva iri kumibarirwana yenyu yeshe, kuita mutemo mhera nariini. Mumwedzi wokutanga, ngezuva regumi nemarongomuna romwedziwo madeekoni, munozodya chingwa chisina mumera metsa kuzuva remakumi mairi narimwe romwedziwo madeekoni. Usazoapo mumera mumhatso dzenyu metsa apera mazuva manomwe: ngokuti uwo unozodya icho chinomumera, uwo munhu unozogurwa kubva mumushongano wevaIsuraeri, kunyazwi muhambi nokuti uwo wakabarirwa munyika. Musazodya chiro chino mumera; muugaro hwenyu hweshe munozodya chingwa chisina mumera.” Zvino Mosi wakadaidza vakuru veshe vaIsuraeri, akati kwavari, “Budai, mutsanangure makwai enyu kudai ngouwandu hwemhuri dzenyu, muurayire gwai rephasika. Munozotora hombori yehisopi, muinyike mungazi iri muchidziyo nokupazaira ngengazi iri muchidziyo padera pamusiwo pamadziro mairi epamusiwo, akuna naumwe wenyu unozobuda pamusiwo wemhatso yake metsa kuedze. Ngokuti Mambo Mwari unozohamba ngepakati kuuraya vaEgipite; naapo paanozoona ngazi iri pamusiwo nepamadziro mairi, Mambo Mwari unozodarika musiwo, aazotenderi muurayi kuti apotere kumhatso yenyu kumuuraya. Nemwi munozongwarira ichi chiro kuita mutemo kwomuri nokune vakororo venyu mhera nariini. Naapo mwaguma kunyika yaanozomupa Mambo Mwari, kudai ngezvaakagondisa, munozongwarira mushando uyu. Naapo vana venyu vechizoti kwomuri, ‘Biningidzo rouyu mushando chiinyi?’ Munozoti, ‘Mudiro wephasika raMambo Mwari, uwo wakadarika kusiya mhatso dzevana vaIsuraeri muEgipite, apo paakauraya vaEgipite, akaponesa mhatso dzedu.’ ” Nevanhu vakakotamisa masoro avo, vakadira. Vana vaIsuraeri vakaenda, vakaita kudaro. Kudai ngezvaakapanga Mambo Mwari kunaMosi naAroni, ndizvo zvevakaita. Zvino pakati pousiku Mambo Mwari wakauraya eshe matangwe omunyika yeEgipite, kubvira kudangwe raFaro waigara pachigaro chake choumambo, kuguma kudangwe romusungwa waiya mutirongo, nematangwe eshe ezvifuyo. Faro wakamiruka usiku, iye nenduna dzake dzeshe nevaEgipite veshe; kwaiyapo kuchema kukurutu muEgipite; ngokuti kwaiya kusina mhatso isina umwe wakafa. Naye wakadaidza Mosi naAroni usiku, akati, “Mirukai, budai mubve pakati pevanhu vangu, mweshe imwimwi nevana vaIsuraeri; muende, mumudire Mambo Mwari kudai ngezvemwakaronza. Torai zveshe, mitanga yenyu, nemihlambi yenyu, kudai ngezvemwakaronza, muende. Mundifumisewo!” NevaEgipite vakaangiridza vanhu, kuvabudisa kubva munyika ngokukasira; ngokuti vakati, “Teshe taavanhu vakafa.” Vanhu vakatora hlama yavo isati yafema, zvidziyo zvavo zvokukanyira zvaisungwa mumachira avo padera pemapfudzi avo. Vana vaIsuraeri vakaita kudai ngeizwi raMosi; vakakumbira kunevaEgipite zvinemeso zvesirivha, nezvinemeso zvomukore nezvokusimira. Mambo Mwari wakavaitira nyasha kuti vanhu vadiwe mukuona kwevaEgipite, ndizvo vakavatendera kuti vapuwe zvevakakumbira. Navo vakapedzera vaEgipite. Vana vaIsuraeri vakahamba kubva Ramesesi kuenda Sukothi, vaida kuguma mazana matanhatu emakumi emazana (600,000) kuwanda vamuna vaihamba ngetsoka, vasikaerengi vakadzi nevana. Nechiunga chevanhu vakakumana chakakwirawo navo, makwai n'ombe nezifuyo zvakawanda kakurutu. Navo vakabika zvingwa zvisina mumera zvehlama yevakaunza kubva Egipite, ngokuti yaiya isikazi kuiswa mumera; ngokuti vakadzingwa ngokukasira kubva muEgipite, vaiya vasikachakoni kuema nokuti kudzinasirira zvokudya. Zvino mukuwo uwo vana vaIsuraeri wevakagara muEgipite waiya makore mazana marongomuna nemakumi matatu (430). Pakupera kwemakore mazana marongomuna nemakumi matatu (430), ngezuva ririro hondo dzeshe dzaMambo Mwari dzakabuda kubva munyika yeEgipite. Ndihwo usiku uhwo Mambo Mwari hwaakagara akarindira kuvabudisa kubva munyika yeEgipite: ndihwo usiku uhu hwaMambo Mwari hunosisira kungwarirwa kakurutu ndivo vana vaIsuraeri veshe nemibarirwana yavo yeshe. Mambo Mwari wakati kunaMosi naAroni, “Ichi ndicho chiemeso chephasika: akuna mupara unozoridya. Asi hloko yeshe yakatengwa ngemare ingaridya kuti mwaicheka. Munhu mupara nomuranda wakatengwa ngemare avazoridyi. Rinozodyiwa mumhatso imweyo; auzobudisi imweni yenyama yaro kubva kumhatsoyo; nemwi, amuzoguri godo raro. Mbungano yeshe yevaIsuraeri inozoringwarira. Apo mupara panozogara nemwi, echida kungwarira phasika kunaMambo Mwari, vamuna veshe ngavachekwe, naapo ngaakwedzere, aringwarire; naye unozodai ngouwo wakabarwa munyikemwo. Asi akuna munhu usikazi kuchekwa unozoridya. Kuchaapo nechironzo chimwecho chinozobata unobarwa munyikemwo nomupara unogara pakati penyu.” Ndizvo vakaita kudaro veshe vana vaIsuraeri; kudai ngezvaakapanga Mambo Mwari kunaMosi naAroni, ndizvo zvevakaita. Ngezuva rimwero Mambo Mwari wakabudisa vana vaIsuraeri kubva munyika yeEgipite kudai ngezviunga zvavo. Mambo Mwari wakaereketa kunaMosi echiti, “Ndichenesere matangwe eshe evamuna, anotanga kubeura ndani pakati pevana vaIsuraeri, eshe evanhu, neemhuka, ngaangu.” Mosi wakati kuvanhu, “Karakadzai iri zuva romwakabuda ndiro kubva Egipite, kubva kumhatso youranda; ngokuti Mambo Mwari wakamubudisa kubva kundau iyi ngenyara ine simba; akuzodyiwi chingwa chinomumera. Nyamashi munobuda, ngomwedzi unozwi Abhibhi. Naapo Mambo Mwari paanomupotedza munyika yevaKhenani, yevaHiti, yevaAmori, yevaHivhi neyevaJebhusi, yaakapika ndiyo kune madzibaba ako kumupa, nyika inoerera mukaka nouchi, munozoita iri dhiri ngomwedzi uyu. Munozodya chingwa chisina mumera mazuva manomwe, ngezuva rechinomwe kunozoita dhiri kunaMambo Mwari. Chingwa chisina mumera chinozodyiwa mazuva manomwe; chisazoapo nemwi chingwa chinomumera, mumera usazooneka uripo nemwi mukati mwenyika yenyu yeshe. Newe unozoronzera mukororo wako ngeiro zuva wechiti, ‘Zvinoitwa ngendaa yeizvo zvaakandiitira Mambo Mwari apo ndakabuda kubva muEgipite.’ Chinozoita chioniso kwouri padera penyara yako, nokuita mukarakadziso pakati pemadziso ako, kuti mipango yaMambo Mwari iwepo pamuromo pako; ngokuti Mambo Mwari wakakubudisa kubva muEgipite ngenyara ine simba. Ndizvo unozongwarira ichi chiemeso ngezuva racho gore ngegore. “Naapo Mambo Mwari paanokupotedza munyika yeKhenani, kudai ngezvaakapika kwouri nokune madzibaba ako, kuipa kwouri. Unozoemesera Mambo Mwari eshe anotanga kubeura ndani. Matangwe eshe ounawo anobva kuzvifuyo; mikono inozoita yaMambo Mwari. Matangwe eshe embongoro unozoaripira ngegwai; nokudai usikazoiripiri, unozogura mutsipa wayo; nematangwe eshe evanhu pakati pevakororo vako unozoaripira. Naapo mukororo wako paanokubvunza ngenguva inozouya echiti, ‘Chinoronzenyi ichi?’ Unozoti kwaari, ‘Ngenyara ine simba Mambo Mwari wakatibudisa kubva Egipite, kubva kumhatso youranda. Naapo Faro paakada kuramba kutitendera kuti tiende, Mambo Mwari wakauraya eshe matangwe munyika yeEgipite, matangwe evanhu neezvifuyo; ndizvo ndinopira kuita mudiro kunaMambo Mwari eshe anotanga kubeura ndani, ari mikono; asi ndinoripira eshe matangwe evakororo vangu.’ Ichi chinozoita chioniso padera penyara yako, nokuita mundanyara pahuma yako; ngokuti ngenyara ine simba Mambo Mwari wakatibudisa kubva muEgipite.” Naapo Faro atendera vanhu kuti vaende, Mwari aazi kuvatungamirira ngenjira yenyika yevaFiristia, kunyazwi yaiya pasinde; ngokuti Mwari wakati, “Pamweni vanhu vanozodzishoora apo voona hondo, vahwirire Egipite.” Asi Mwari wakatungamirira vanhu kutenderera ngenjira, yomushango ngepaRuandhle Rwakatsvuka. Vana vaIsuraeri vakakwira, vakapakatira zvokurwa hondo vechibva kunyika yeEgipite. Mosi wakatora magodo aJosefa kuenda nawo; ngokuti Josefa waiya apikisa vana vaIsuraeri echiti, “Ngegwinyiso Mwari unozomuhambira; nemwi munozotwara magodo angu kukwira nawo kubva pano.” Vakahamba rwendo rwavo kubva Sukothi, vakaemesa matende avo muEthamu, kumhiri kweshango. Mambo Mwari wakahamba pamberi pavo masikati ngemvumi yegore, kuvatungamirira munjira; nousiku ari mumurazvu womuriro, kuvajekisira, kuti vahambe masikati nousiku. Mvumi yegore masikati nomurazvu womuriro usiku azvizi kubva pamberi pevanhu. Mambo Mwari wakaereketa kunaMosi echiti, “Ronzera vana vaIsuraeri kuti vapetuke nokuemesa matende pamberi pePihahirothi, pakati peMigidhori noruandhle, pamberi peBhaari-zefoni; munozoemesa matende ngeparuandhle mwakaringirana narwo. Faro unozoti ngevana vaIsuraeri, ‘Vakodyaniswa munyika; shango rakavakonyera mukati.’ Neni ndinozokonzesa mwoyo waFaro, naye unozovateera; inini ndicharemeredzwa padera paFaro nepehondo yake yeshe; nevaEgipite vanozozia kuti ndini Mambo Mwari.” Vakaita kudaro. Naapo pakaronzerwa mambo weEgipite kuti vanhu vatiza, nomwoyo waFaro nowenduna dzake yakatsandukira vanhu, vakati, “Chiinyi ichi chetakaita, takatendera Isuraeri kuti aende kubva mukutishandira?” Wakanasirira ngoro yake, wakatora hondo yake naye; vakatora ngoro dziri mazana matanhatu (600) dzakatsanangurwa, nengoro dzeshe dzeEgipite, nenduna dzakaemeswa padera padzo dzeshe. Mambo Mwari wakakonzesa mwoyo waFaro mambo weEgipite, naye wakarumbirira vana vaIsuraeri, ngokuti vana vaIsuraeri vakabuda kuenda ngenyara yakamirudzwa. VaEgipite vakavarumbirira, eshe mahachi nengoro dzaFaro, nevagadhi vake vemahachi nehondo yake, vakavabata vari mumatende paruandhle, ngepamberi pePihahirothi, pamberi peBhaari-zefoni. Apo Faro akwedzera, vana vaIsuraeri vakamirudza madziso avo, vakaona, vaEgipite vakafora ngesure kwavo; navo vakatya kakurutu. Vana vaIsuraeri vakadaidzira kunaMambo Mwari, navo vakati kunaMosi, “Ngokuti kwaiya kusina maiba here muEgipite zvowakatitora kuti tifire mushango? Ngenyi wakaita kudaro kwetiri, kutiunza kubva muEgipite? Andiro izwi retakaereketa kwouri here tiri muEgipite techiti, ‘Tirekere kuti tishandire vaEgipite? Ngokuti kwaipinda kunaka kwetiri kuti tishandire vaEgipite, kuno kuti tifire mushango.’ ” Mosi wakati kunevanhu, “Musatya. Emai, muone ruponeso rwaMambo Mwari, rwaanozomuitira nyamashi; ngokuti vaEgipite vomunoona nyamashi, amuchazovaonizve nariini. Mambo Mwari unozomurwira, nemwi munozonyarara.” Mambo Mwari wakati kunaMosi, “Ngenyi wechindichemera? Ronzera vana vaIsuraeri kuti vaende mberi. Mirudza ndonga yako, utambanudze nyara yako padera poruandhle, urigure ngepakati; nevana vaIsuraeri vanozohamba pakati poruandhle padera pemavhu akaoma. Neni ndinozokonzesa mwoyo yevaEgipite, navo vanozopoteremwo kuvateera: ndinozoremeredzwa padera paFaro nepehondo yake yeshe, nepengoro dzake nepevagadhi vake vemahachi. VaEgipite vanozozia kuti inini ndini Mambo Mwari, apo pendinozokudzwa padera paFaro nepengoro dzake nepevagadhi vake vemahachi.” Ngirosi yaMwari yaihamba pamberi pehondo yevaIsuraeri yakabveyo ikaenda ngesure kwavo; nesika yemvumi yakabva pamberi pavo, ikaema sure kwavo, ikauya pakati pehondo yevaEgipite neyevaIsuraeri. Usiku hweshe gore rakapa kujeka kuvaIsuraeri, asi rakaita chidima kuvaEgipite; avazi kukwedzera vamweni kunevamweni usiku hweshe. Zvino Mosi wakatambanudza nyara yake padera poruandhle, naMambo Mwari wakaita kuti ruandhle rupetuke sure ngedutu rinesimba rokumabvazuva usiku hweshe, wakaita kuti ruandhle ruite mavhu akaoma, nemvura yakaparadzaniswa. Vana vaIsuraeri vakahamba pakati poruandhle padera pemavhu akaoma, nemvura yakaita rukumbati kwavari kunyara yokumudyo kwavo neyokumuoshwe kwavo. VaEgipite vakavarumbirira, vakapotera ngesure kwavo pakati poruandhle, zveshe mahachi aFaro nengoro dzake nevagadhi vake vemahachi. Naapo ngomukuwo womurindo wemangwanani kuti Mambo Mwari wakaringira padera pehondo yevaEgipite ari mumurazvu womuriro nomumvumi yegore, akakarudza hondo yevaEgipite. Wakanzvaidza mavhiri engoro dzavo, akadziita kuti dzihambe ngokuremerwa; ndizvo vaEgipite vakati, “Ngatitize kubva kuhope dzevaIsuraeri; ngokuti Mambo Mwari unovarwira kurwisana nevaEgipite.” Mambo Mwari wakati kunaMosi, “Tambanudza nyara yako padera poruandhle kuitira kuti mvura iuyezve padera pevaEgipite, pengoro dzavo nepevagadhi vavo vemahachi.” Ndizvo Mosi wakatambanudza nyara yake padera poruandhle, noruandhle rwakahwirira kuerera perwaiya apo kwoita mangwanani; nevaEgipite vakatizira mukati mwarwo; Mambo Mwari wakazuwira vaEgipite pakati poruandhle. Nemvura yakahwirira ikambonya ngoro, vagadhi vemahachi, nehondo yeshe yaFaro iyo yakapotera ngesure kwavo muruandhle; akuzi kusara naumwe wavo. Asi vana vaIsuraeri vakahamba pamavhu akaoma pakati poruandhle, nemvura yakaita rukumbati kwavari ngokumudyo kwavo nokumuoshwe kwavo. Ngokudaro Mambo Mwari wakaponesa Isuraeri ngeiro zuva kubva kunyara yevaEgipite; navaIsuraeri vakaona vaEgipite vafa pahumbikumbi yoruandhle. VaIsuraeri vakaona mushando mukuru waakaita Mambo Mwari padera pevaEgipite, nevanhu vakatya Mambo Mwari; navo vakagonda Mambo Mwari nomuranda wake Mosi. Zvino Mosi navana vaIsuraeri vakaemba iyi nduyo kunaMambo Mwari vechiti, “Ndinozoembera Mambo Mwari, ngokuti wakanyisa ngenjira inouthende: wakakandira hachi nomugadhi waro muruandhle. Mambo Mwari ndiro simba rangu, nengoma yangu, naye waita ruponeso rwangu; uyu ndiye Mwari wangu, neni ndinozomuirikidza; Mwari wababa angu, ndinozomukudza. Mambo Mwari ingwazi yokurwa; Mambo Mwari ndiro zina rake. Wakakandira muruandhle ngoro dzaFaro nehondo yake; nenduna dzake dzakatsanangurwa dzakanzvaidzwa muRuandhle Rwakatsvuka. Mvura yakadzama yakavambonya; vakanzvaira muudzamu kudai ngebuwe. Nyara yenyu yokumudyo, A Mambo Mwari, inokudzwa ngesimba, nyara yenyu yokumudyo, A Mambo Mwari, inoputsa magaa kuita zvigurwa. Muukuru hwoumambo hwako unovaparadza vanokumukira; unotumira ushungu hwako, hunovapisha kudai ngemazungu. Ngokufuridza kwemiro dzenyu mvura yakaturikidzwa, ndambi dzakaema kuita murwi; mvura yakadzama yakakora mumwoyo mworuandhle. Gaa rakati, ‘Ndinozoteera, ndinozovabata, ndinozokoanisa zvakapambiwa; kuemura kwangu kunozogutswa ndivo. Ndinozoshwamura shoti yangu, nyara yangu inozovaparadza.’ Mwakafuridza ngedutu renyu, ruandhle rwakavambonya; vakanzvaira kudai ngemuthovhi mumvura ine simba. Ndiani wakadai ndimwi, A Mambo Mwari, pakati pezvimwari? Ndiani wakadai ndimwi, unouthende mukuchena, unokutyisa mukuirikidzwa, unoita mishamiso? Imwimwi mwakatambanudza nyara yenyu yokumudyo, nyika yakavamedza. Imwimwi ngenyasha dzenyu mwakatungamirira vanhu venyu vomwakaripira: mwakavatungamirira ngesimba kuenda kuugaro hwenyu hwakachena. Vanhu vazwa, vanohuta; maharura avabata vanogara Firistia. Zvino madzimambo veEdhomu vashamiswa; ngwazi dzeMoabhi dzinobatwa ngokuhuta; veshe vagari veKhenani vanyunguruka. Kutyisa nemaharura zvawira padera pavo; ngendaa youkuru hwomuoko wako avatsukunuki kudai ngebuwe, metsa vaambuka vanhu venyu, A Mambo Mwari, metsa vanhu vaambuka avo vomwakatenga. Munozovapotedza nokuvadzimika pamutunhu wenhaka yenyu, paugaro, A Mambo Mwari, wemwakadziitira kugaramwo, pandau yakachena, A Mambo Mwari, yemwakaemesa ngenyara dzenyu. Mambo Mwari unozotonga mhera nariini nariini.” Naapo mahachi aFaro pamwepo nengoro nevagadhi vake vemahachi vakapotera muruandhle, Mambo Mwari wakapetudza mvura yoruandhle padera pavo; asi vana vaIsuraeri vakahamba pamavhu akaoma pakati poruandhle. Miriamu muprofeti womukadzi hanzvadzi yaAroni yakatora chigubhu munyara yake; nevakadzi veshe vakamuteera vane zvigubhu vechizvina. Miriamu wakavaembera echiti, “Emberai Mambo Mwari, ngokuti iye wakanyisa ngenjira inouthende; hachi nomugadhi waro wazvikandira muruandhle.” Zvino Mosi wakatungamirira Isuraeri kuenda mberi kubva kuRuandhle Rwakatsvuka, navo vakapinda mushango reShuri; vakahamba mazuva matatu mushango, navo avazi kuona mvura. Naapo vaguma Mara, avazi kukona kumwa mvura yepaMara, ngokuti yaivava; ndizvo zina rayo rakadudzwa kuti Mara. Vanhu vakavhuruvhutira Mosi vechiti, “Tinozomwenyi?” Iye wakachema kunaMambo Mwari; naMambo Mwari wakamuonisa muti, wakaukandira mumvura, nemvura yakapinduka kuita inotapira. Apo wakavaitira chiemeso nomutemo, naapo wakavaedza echiti, “Kudai mwechizogwinyisira kupurutana izwi raMambo Mwari, Mwari wenyu, nokuita izvo zvakarurama mukuona kwake, mwechipurutana mipango yake nokungwarira zviemeso zvake zveshe, andizoisi naimwe yeidzi nhenda padera penyu, dzendakaisa padera pevaEgipite; ngokuti ndini Mambo Mwari uwo unomuponesa.” Vakaguma Erimu, apo paiya nezvinyuka zvemvura gumi nazviiri, nemichindwi makumi manomwe; vakaemesa matende apo pasinde pemvura. Vakamiruka kubva Erimu, nembungano yeshe yevana vaIsuraeri vakaguma mushango reSini, iro riri pakati peErimu neSinai, ngezuva regumi namashanu romwedzi wechipiri ngesure kwokubva kwavo munyika yeEgipite. Nembungano yeshe yevana vaIsuraeri yakavhuruvhutira Mosi naAroni mushango. Vana vaIsuraeri vakati kwavari, “Zvaiya zvakapinda kunaka kudai taiya takafa ngenyara yaMambo Mwari munyika yeEgipite apo takagara pane hari dzenyama, nokudya chingwa techiguta; ngokuti imwimwi mwakatibudisa kuuya mushango muno kuuraya mbungano iyi yeshe ngenzara.” Naapo Mambo Mwari wakati kunaMosi, “Ringira, ndichamunaisira chingwa chinobva mudenga; nevanhu vanozobuda nokuunganidza chikoaniswa chezuva, zuva ngezuva, kuti ndivaedze ndione kuti vanozohamba here muzvironzo zvangu nokuti avazoiti. Ngezuva rechitanhatu apo pavanozonasirira izvo zvevanounza, nazvo zvinozoita zvakapetwa kairi kupinda izvo zvevanounganidza zuva ngezuva.” Mosi naAroni vakati kuvanhu veshe vaIsuraeri, “Madeekoni munozozia kuti ndiMambo Mwari wakamubudisa kubva munyika yeEgipite. Mangwani munozoona uthende hwaMambo Mwari; ngokuti wazwa kuvhuruvhuta kwenyu kwomunomukira ndikwo Mambo Mwari; isusu tiri vanaani kuti mutivhuruvhutire?” Mosi wakati, “Izvo zvinozoitika apo Mambo Mwari paanozomupa nyama madeekoni kuti mudye, nemangwanani chingwa, kuti mugute; ngokuti Mambo Mwari wazwa kuvhuruvhuta kwenyu kwomunomuvhuruvhutira ndikwo. Isusu tiri vanaani? Kuvhuruvhuta kwenyu akurwisani nesu, asi kunorwisana naMambo Mwari.” Mosi wakati kunaAroni, “Ronzera mbungano yeshe yevana vaIsuraeri, ‘Kwedzerai pasinde pamberi paMambo Mwari; ngokuti wakazwa kuvhuruvhuta kwenyu.’ ” Naapo Aroni echiereketa kumbungano yeshe yevana vaIsuraeri, vakaringira mushango, ringira, uthende hwaMambo Mwari hwakaoneka mugore. Mambo Mwari wakaereketa naMosi echiti, “Ndakazwa kuvhuruvhuta kwevana vaIsuraeri. Ereketa kwavari wechiti, ‘Madeekoni munozodya nyama, mangwanani munozogutswa ngechingwa; nemwi munozozia kuti ndini Mambo Mwari, Mwari wenyu.’ ” Zvino madeekoni zvikware zvakakwira zvikambonya matende: mangwanani beto rakawa kutendenedza matende. Naapo beto raiyapo raparara, wona, chaiyapo padera peshango chiro chakatsonga chakaita chimburumbwa, chakatsonga kudai ngechando padera pemavhu. Naapo vana vaIsuraeri vachiona, vakati umwe kunoumweni, “Ichi chiinyi?” Ngokuti avazi kuzia kuti chiinyi. Mosi wakati kwavari, “Ndicho chingwa chaakamupa Mambo Mwari kuti mudye. Ichi ndicho chaakamupanga Mambo Mwari, ‘Chiunganidzei munhu weshe kudai ngechinokwana kudya kwake; unganidzai kuzadza chipimo chinozwi oma, chinogutisa munhu, munozochiunganidza kudai ngouwandu hwevanhu venyu. Munhu weshe unozounganidzira avo vari mutende rake.’ ” Vana vaIsuraeri vakaita kudaro, vakaunganidza, vamweni zvakapinda kuwanda, nevamweni zvishomani. Naapo vakachipima ngechipimo chinozwi oma, uwo wakaunganidza zvakawanda, aazi kuane chakasara, nouwo wakaunganidza zvishomani aazi kutama; vakaunganidza munhu weshe kudai ngokudya kwake. Mosi wakati kwavari, “Apana munhu unochisiya metsa mangwanani.” Kunyazwi zvakanyadaro avazi kupurutana kunaMosi asi vamweni vavo vakasiya metsa mangwanani, nacho chakaita honye, chakanuhwa; naMosi wakavatsenekera. Vaizviunganidza mangwanani eshe munhu weshe kudai ngokudya kwake; naapo zuva ropisha zvakanyunguruka. Ngezuva rechitanhatu vakaunganidza chingwa chaikwana kairi, zvipimo zviiri zvinozwi oma pamunhu weshe; nevatongi veshe vembungano vakauya, vakamuronzera Mosi. Wakati kwavari, “Izvi ndizvo zvaakaronza Mambo Mwari, ‘Mangwani izuva rokuzorora, iSabatha rakachena kunaMambo Mwari; kangai izvo zvomunozokanga, mubike izvo zvomunozobika; nazvo zveshe zvinosara, muzvingwarire metsa mangwanani.’ ” Ndizvo vakazvingwarira metsa mangwanani, kudai ngezvaakavapanga Mosi, nazvo azvizi kunuhwa, zve, azvizi kuita honye mukati mwazvo. Mosi wakati, “Idyai izvozvo nyamashi, ngokuti nyamashi iSabatha kunaMambo Mwari; nyamashi amuzozvioni mushango. Munozozviunganidza mazuva matanhatu; asi zuva rechinomwe Isabatha, ngeiro azvizoapo.” Zvino ngezuva rechinomwe vanhu vamweni vakabuda koozviunganidza, navo avazi kuona nachimwe. Mambo Mwari wakati kunaMosi, “Munozoramba kungwarira mitemo yangu nemipango yangu mukuwo wakaitawani? Wonai! Mambo Mwari wamupa Sabatha, ndizvo ngezuva rechitanhatu unomupa zvingwa zvemazuva mairi; garai munhu weshe muugaro hwake, apana munhu unobuda kubva kuugaro hwake ngezuva rechinomwe.” Ndizvo vanhu vakazorora ngezuva rechinomwe. Vemhatso yaIsuraeri vakadudza zina razvo kuti mana; nazvo zvaiya zvakadai ngembeu dzekhorianda, zvakachena, nokurairika kwacho kwaiya kwakadai ngezvingwa zvakanywa ngouchi. Mosi wakati, “Ichi ndicho chaakapanga Mambo Mwari: ‘Chipimo cheoma chakazara ndicho ngachingwaririrwe mibarirwana yenyu, kuitira kuti vaone chingwa chendakamupa kuti mudye muri mushango, apo pendakamubudisa kubva munyika yeEgipite.’ ” Mosi wakati kunaAroni, “Tora hari, uisemwo chipimo cheoma chakazara ngemana, uigadzike pamberi paMambo Mwari, kuti ingwaririrwe mibarirwana yenyu.” Kudai ngezvaakapanga Mambo Mwari kunaMosi, ngokudaro Aroni wakaigadzika pamberi pechapupu, kuti ingwarirwe. Vana vaIsuraeri vakadya mana makore makumi marongomuna, metsa vakaguma kunyika yaigarwa ngevanhu; vakadya mana metsa vakaguma pamugano wenyika yeKhenani. Zvino chipimo chinozwi oma chiri rupande rwechegumi rweefa. Mbungano yeshe yevana vaIsuraeri yakahamba kubva mushango reSini, ngemihambo yavo kudai ngomupango waMambo Mwari, vakaemesa matende avo muRefidhimu, asi paiya pasina mvura kuti vanhu vamwe. Ndizvo vanhu vakaita hasha naMosi, vakati, “Tipe mvura timwe.” Mosi wakati kwavari, “Ngenyi mwechirwisana neni? Ngenyi mwechiedza Mambo Mwari?” Vanhu vakapera ngenyota ngokutama mvura apo; nevanhu vakavhuruvhutira Mosi, vakati, “Wakatikwidzirenyi kubva Egipite kutiuraya nevana vedu nen'ombe dzedu ngenyota?” Ndizvo Mosi wakachema kunaMambo Mwari echiti, “Ndinozoitenyi ngevanhu ava? Votoda kundiponda ngemapuwe.” Mambo Mwari wakati kunaMosi, “Pinda pamberi pevanhu, utore vamweni vevakuru vaIsuraeri nendonga yowakachaya ndiyo rwizi munyara mwako, uende. Ringira, ndinozoema pamberi pako padera pebuwe muHorebhi; newe unozochaya buwe, nemvura inozobuda kubva mukati mwaro, kuti vanhu vamwe.” Mosi wakaita kudaro mukuona kwevakuru vaIsuraeri. Wakadudza zina reiyo ndau kuti Masa naMeribha, ngendaa yokurwisa kwevana vaIsuraeri, zve, ngokuti vakaedza Mambo Mwari vechiti, “Mambo Mwari uri pakati pedu here, nokuti apana?” Naapo vaAmareki vakauya, vakaambana navaIsuraeri muRefidhimu. Mosi wakati kunaJoshua, “Titsanangurire vamuna, ubude uambane navaAmareki; mangwani ndinozoema padera pechimutunhu ndine ndonga yaMwari munyara mwangu.” Ndizvo Joshua wakaita kudai ngezvaakaronzerwa ndiMosi, wakaambana navaAmareki, Mosi, Aroni naHuri vakakwira padera pechimutunhu. Naapo Mosi wakamirudza nyara dzake, vaIsuraeri vakanyisa; naapo adzasa nyara dzake, vaAmareki vakanyisa. Asi nyara dzaMosi dzaiya dzoorema; navo vakatora buwe, vakarigadzika pashi pake, wakagara padera paro; Aroni naHuri vakatsimisa nyara dzake, umwe ngorutii rumwe, noumweni ngorutii rumweni; nenyara dzake dzakatsimiswa metsa kupota kwezuva. Joshua wakanyisa Amareki navanhu vake ngokupinza kweshoti. Mambo Mwari wakati kunaMosi, “Nyora ichi mutsamba kuita chikarakadziso, ududzire mukuzwa kwaJoshua: kuti ndinozodzima yaamho kukarakadzwa kwaAmareki kubva pashi pomudenga.” Mosi wakaaka arita, akadudza zina raro kuti Mambo Mwari Mujeki wangu. Wakati, “Nyara padera pomujeki waMambo Mwari! Mambo Mwari unozoambana navaAmareki kubvira kumibarirwana kuenda kumibarirwana.” Jethuro, mupristi weMidhiani, muzvere waMosi, wakazwa ndizvo zveshe zvaakaita Mwari kunaMosi nokuvaIsuraeri, vanhu vake ngenjira Mambo Mwari yaakavabudisa ndiyo vaIsuraeri kubva Egipite. Zvino Jethuro muzvere waMosi wakatora Ziphora mukadzi waMosi, ngokuti waiya amupetudza nevakororo vake vairi, avo zina roumwe wavo raizwi Gershomu, ngokuti wakati, “Ndaiya chigarandimo munyika yevapara,” nezina roumweni raizwi Erieza; ngokuti wakati, “Mwari wababa angu waiya Mudetseri wangu, wakandinunurira kubva kushoti yaFaro.” Jethuro muzvere waMosi wakauya nomukadzi waMosi nevakororo vake kunaMosi mushango apo paaiya akaemesa matende, pamutunhu waMwari. Wakati kunaMosi, “Inini muzvere wako Jethuro ndauya kwouri, nomukadzi wako nevakororo vake vairi naye.” Mosi wakabuda kooshongana nomuzvere wake, akakotamira pashi, akamuchingamidza ngomuromo; navo vakabvunzana kutamba; vakapotera mutende. Mosi wakaronzera muzvere wake zveshe zvakaitwa ndiMambo Mwari kunaFaro nokune vaEgipite ngendaa yevaIsuraeri, kweshe kurwadziwa kwakavagumira munjira, nokununurwa kwavo ndiMambo Mwari. Jethuro wakadakara ngokunaka kweshe kwaakaitira vaIsuraeri Mambo Mwari, kwokuvanunura kubva munyara dzevaEgipite. Jethuro wakati, “Ngaakudzwe Mambo Mwari uwo wakakununurira kubva munyara dzevaEgipite nokubva munyara yaFaro. Zvino ndinozia kuti Mambo Mwari mukuru kupinda zvimwari zveshe ngokuti wakabudisa vanhu kubva pashi penyara dzevaEgipite, apo pevakavabata ngokudzikudza kwavari.” Jethuro muzvere waMosi wakatora mudiro wokupisha nemibairo kupira kunaMwari; naAroni wakauya nevakuru veshe vaIsuraeri koodya chingwa nomuzvere waMosi pamberi paMwari. Zuva remangwani Mosi wakagara kutonga vanhu; nevanhu vakaema vakatendenedza Mosi kubvira mangwanani metsa madeekoni. Naapo muzvere waMosi aona zveshe zvaaiitira vanhu, wakati, “Zviinyi izvi zvaunoitira vanhu? Ngenyi wechigara wega, nevanhu veshe vanokutendenedza kubvira mangwanani metsa madeekoni?” Mosi wakati kunemuzvere wake, “Ngokuti vanhu vanouya kwendiri kubvunza kunzwisisa ndiMwari. Naapo vane ndaa, vanouya kwendiri neni ndinogura pakati pomunhu nomuakirwana wake, ndinovaziisa zviemeso zvaMwari nemipango yake.” Muzvere waMosi wakati kwaari, “Zvounoita azvizi kunaka. Ngegwinyiso iwewe nevanhu vounavo munozodzipedza simba pachenyu, ngokuti mushando unonyanya kukuremera; aukoni kuita uri wega. Purutana zvino izwi rangu; ndinozokupanga, naMwari agare newe! Unozoemerera vanhu pamberi paMwari, uunze ndaa dzavo kunaMwari, newe unozovadzidzisa zviemeso nemipango, nokuvaonisa njira yevanosisira kuti vahambe ndiyo, nomushando wevanosisira kuti vaite. Unosisirazve kutsanangura pakati pevanhu veshe vamuna vanokona, vanomutya Mwari, vamuna vanoereketa, vanonyenya kutuswa kusikazi kururama; uvaemese vamuna vakadarovo padera pevanhu, kuita vatongi vemakumi emazana, vatongi vemazana, vatongi vemakumi mashanu nevatongi vemakumi. Navo ngavatonge vanhu nguva dzeshe; ndaa dzeshe dzakakura vanozodziunza kwouri, asi dzeshe dzakatsonga vanozodzigura pachavo: ndizvo zvinozopinda kureruka kwouri, navo vanozotwara mutwaro newe. Kudai wechiita izvi, naMwari echikupanga, zvino unozokona kushingirira nevanhu ava veshe vanozoendawo kuugaro hwavo mukunyarara.” Ndizvo Mosi wakapurutana izwi romuzvere wake, akaita zveshe zvaakaronza. Mosi wakatsanangura vamuna vanokona pakati pevaIsuraeri veshe, akavaita vakuru padera pevanhu, vatongi vemakumi emazana, vatongi vemazana, vatongi vemakumi mashanu nevatongi vemakumi. Vakatonga vanhu nguva dzeshe; ndaa dzakakonza vakadziunza kunaMosi, asi dzeshe dzakatsonga vakadzigura pachavo. Mosi wakaendesa muzvere wake; naye wakaenda kunyika yake. Ngomwedzi mutsva wechitatu ngesure kwokubuda kwevana vaIsuraeri kubva munyika yeEgipite, ngezuvaro vakaguma mushango reSinai. Naapo vabva Refidhimu nokuguma mushango reSinai, vakaemesa matende mushango; naapo vaIsuraeri vakaemesa matende pamberi pomutunhu. Mosi wakakwira kunaMwari, naMambo wakamudaidza ari pamutunhu echiti, “Izvi ndizvo zvounoronza kune vemhatso yaJakobe, uronzere vana vaIsuraeri: Mwakaona zvendakaita kuvaEgipite, nenjira yendakamutwara ndiyo pamaphaphiro egodzi, nokumuunza kwendiri. Ndizvo zvino kudai mwechizopurutana izwi rangu ngegwinyiso nokungwarira chitenderano changu, naapo munozoita pfuma yangu yemene kwendiri kubva pakati pevanhu veshe, ngokuti nyika yeshe ngeyangu. Nemwi munozoita umambo hwevapristi kwendiri nedzinza rakacheneswa. Aya ndiwo mazwi ounozoereketa kunevana vaIsuraeri.” Ndizvo Mosi wakauya, akadaidza vakuru vevanhu, akaisa mazwi aya eshe pamberi pavo aakamupanga Mambo Mwari. Vanhu veshe vakapingura pamwepo vechiti, “Zveshe zvaakaronza Mambo Mwari tinozozviita.” Mosi wakaronzera Mambo Mwari mazwi evanhu. Mambo Mwari wakati kunaMosi, “Ringira, ndinozouya kwouri ndiri mugore rakatimba, kuti vanhu vazwe apo pendinoereketa newe, zve, kuti vakugonde mhera nariini.” NaMosi wakaronzera Mambo Mwari mazwi evanhu. Mambo Mwari wakati kunaMosi, “Enda kuvanhu, uvachenese nyamashi namangwani. Ngavasuke zvokusimira zvavo, vadzinasirire risati raguma zuva rechitatu, ngokuti ngezuva rechitatu Mambo Mwari unozodzaka padera poMutunhu weSinai mukuona kwevanhu veshe. Newe unozogurira vanhu migano kutendenedza mutunhu wechiti, ‘Dzingwarirei kuti musazokwira pamutunhu nokuti kugwama bandaanda rawo. Kunyazwi ndiani unozogwama mutunhuwo ngegwinyiso unozourawa. Akuna nyara inozomugwama, asi ngegwinyiso iye unozopondwa ngemapuwe nokuti ngokufurwa; kunyazwi mhuka nokuti munhu, aazoponi.’ Apo perinoridzwa gwama mukuwo wakareba, vanozokwedzera kumutunhu.” Mosi wakadzaka kune vanhu kubva pamutunhu, akachenesa vanhu; navo vakasuka zvokusimira zvavo. Wakati kune vanhu, “Dzinasirirei risati raguma zuva rechitatu: musazokwedzera pasinde pemukadzi.” Mangwanani zuva rechitatu apo kwakaapo kutinhira nemheni, negore rakatimba riri padera pomutunhu, nokurira kwegwama kukurutu; vanhu veshe vaiya kumatende vakahuta. Zvino Mosi wakabudisa vanhu kubanze kwematende kooshongana naMwari; navo vakaema pashi pomutunhu. NoMutunhu weSinai waiya wechipwititika chiushi weshe, ngokuti Mambo Mwari wakadzaka padera pawo ari mumuriro; nechiushi chakakwira mudenga kudai ngechiushi chepachoto chinobaka aemho, nomutunhu weshe wakazungunyika kakurutu. Naapo kurira kwegwama kwakakura nokukura, Mosi wakaereketa, naMwari wakamupingura ngokutinhira. Mambo Mwari wakadzaka padera poMutunhu weSinai, kumagumo omutunhu; Mambo Mwari wakadaidza Mosi kukwira kumagumo omutunhu; naMosi wakakwira. Mambo Mwari wakati kunaMosi, “Dzaka, upange vanhu kuti vasadarika kuuya kunaMambo Mwari omuringira nevazhinji vavo vafe. Nevapristiwo vanokwedzera kunaMambo Mwari, ngavadzichenese pachavo, kuti Mambo Mwari asazovaparadza.” Mosi wakati kunaMambo Mwari, “Vanhu avangakwiri kuMutunhu weSinai: ngokuti iwewe pachako wakatipanga, wechiti, ‘Gura migano kutendenedza mutunhu, uuchenese.’ ” Mambo Mwari wakati kwaari, “Enda, udzake; ukwire, iwewe naAroni; asi vapristi nevanhu vasazodarika kukwira kunaMambo Mwari kuti asazovaparadza.” Ndizvo Mosi wakadzaka kune vanhu, akavaronzera. Mwari wakaereketa eshe mazwi aya echiti, “Ndini Mambo Mwari, Mwari wako, uwo wakakubudisa kubva munyika yeEgipite, kubva kumhatso youhloko. “Usazoa nezvimwari zvimweni ngepabanze pangu. “Usazodziitira muedzaniso wakatsetswa, nokuti muedzaniso womuemo wechiro kunyazwi ngechiri chiri mudenga ngepadera, nokuti wechiri munyika ngepashi, nokuti wechiri mumvura ngepashi penyika. Usazoigwadamira nokuti kuishandira; ngokuti inini, Mambo Mwari, Mwari wako, ndiri Mwari une ndurumwa, ndechiunzidzira kushata kwemadzibaba padera pevana, padera pomubarirwana wechitatu nowechirongomuna waavo vanondinyenya, asi ndechionisa nyasha kune vari makumi emazana eavo vanondida nokungwarira mipango yangu. “Usazoshandisa zina raMambo Mwari, Mwari wako ngenjira isina shwiro; ngokuti Mambo Mwari aazomuerengi kuti aana ndaa uwo unoshandisa zina rake ngenjira isina shwiro. “Karakadza zuva reSabatha kuringwarira rakachena. Mazuva matanhatu unozoshanda, uite mushando wako weshe. Asi zuva rechinomwe iSabatha kunaMambo Mwari, Mwari wako; ngeiro zuva usazoita mushando nokuti ngouri, iwewe, nokuti mukororo wako, nokuti mwanasikana wako, muranda wako, nokuti murandakadzi wako, nokuti n'ombe dzako, nokuti mupfumba wako, uri mukati mwemisiwo yako. Ngokuti ngemazuva matanhatu Mambo Mwari wakaita denga nenyika, ruandhle, nazvo zveshe zviri mukati mwazvo, wakazorora ngezuva rechinomwe; ndizvo Mambo Mwari wakaremeredza zuva reSabatha, akarichenesa. “Remeredza baba ako namai ako, kuti mazuva ako awande munyika yaanokupa Mambo Mwari, Mwari wako. “Usazouraya. “Usazoomba. “Usazoba. “Usazoita uchapupu hwokunyepa kumuakirwana wako. “Usazoemura mhatso yomuakirwana wako; usazoemura mukadzi womuakirwana wako, nokuti muranda wake, nokuti murandakadzi wake, nokuti kabi yake, nokuti mbongoro yake, nokuti chiro kunyazwi ngechiri chomuakirwana wako.” Zvino apo vanhu veshe vakaona kutinhira nemheni nokurira kwegwama, nomutunhu wechipwititika chiushi, vanhu vakatyiswa, vakahuta; vakaema kuretu, vakati kunaMosi, “Ereketa iwewe kwetiri, nesu tinozozwa; asi usatendera Mwari kuti aerekete kwetiri, kuti tisafa.” Mosi wakati kune vanhu, “Musatya; ngokuti Mwari wauya kumuedza nokuti kutyisa kwake kugare pamberi penyu, kuti musazoshaisha.” Vanhu vakaema kuretu, naMosi wakakwedzera kuchidima chikurutu, mwaiya naMwari. Mambo Mwari wakati kunaMosi, “Izvi ndizvo zvounozoereketa kune vana vaIsuraeri, ‘Imwimwi mwemene mwakadzionera kuti ndaereketa nemwi ndiri mudenga. Musazoita zvimwari zvesirivha zviapo neni nokuti kudziitira pachenyu zvimwari zvomukore. Unozondiitira arita remavhu, unozopira padera paro midiro yako yokupisha, nemidiro yako yokuiyanisa, makwai ako, nekabi dzako; kundau dzeshe dzendinozoemesa zina rangu kuti rikarakadzwe ndinozouya kwouri nokukufumisa. Kudai wechizondiitira arita remapuwe, usazoriaka ngemapuwe akatsetswa; ngokuti ukamirudza chokutsetsa ndicho padera paro, warisvipisa. Usazokwira ngemakwiro kuarita rangu, kuti utitinini hwako husazooneka padera paro.’ “Zvino izvi ndizvo zvitongero zvounozoisa pamberi pavo. “Kuti ukatenga hloko muHebheru, unozokushandira makore matanhatu, nangegore rechinomwe unozobuda akasunhurika asikadusi chiro. Kudai echiuya ari ega, unozobuda kuenda ari ega; kuti echiuya aroora, zvino mukadzi wake unozobuda kuenda naye. Kudai tenzi wake echimupa mukadzi, naye echimubarira vakororo nevanasikana, mukadzi nevana vake vanozoita vatenzi wake, iye unozobuda kuenda ega. Asi kudai hloko yechironza pamhene kuti, ‘Ndinomuda tenzi wangu nomukadzi wangu nevana vangu; andizobudi kuenda ngokusunhurika,’ zvino tenzi wake unozomuunza kunaMwari, naye unozomuunza pamusiwo nokuti pasika dzemusiwo; natenzi wake unozodura nzee yake ngechiro chakapinza; naye unozomushandira kupona kwake kweshe. “Naapo munhu akatengesa mwanasikana wake kuita hloko, uwo aazobudi kudai ngezvedzinoita hloko dzevamuna. Kudai asikadakadzi tenzi wake, uwo wakamuemesa pachake kuita mukadzi wake, zvino unozomutendera kuti aripirwe; aazokoni kumutengesa kudzinza revapara, ngokuti wakamuchengedzera. Nokudai echizomugangisira kuno mukororo wake, unozomubata kudai ngemwanasikana. Kudai echidzitorera mukadzi umweni, asazomunyima zvokudya kwake, zvokusimira zvake nechinosisira mukuroorwa kwake. Kuti asikaiti izvi zviro zvitatu kwaari, unozobuda kuenda asikadusi chiro, asikabhadhari mare. “Kunyazwi ndiani unochaya munhu, akafa, ngegwinyiso unozourawa. Asi kuti munhu asikazi kumuhwarira, asi Mwari akamutendera kuti awire munyara mwake, naapo ndinozokuemesera ndau yokuti atiziremwo. Asi kudai munhu echizoambana nomuakirwana wake ngokuda nokumuuraya ngourimbwi, unozomubvisa paarita rangu kuti afe. “Kunyazwi ndiani unozochaya baba ake nokuti mai ake, ngegwinyiso unozourawa. “Kunyazwi ndiani unoba munhu nokumutengesa, nokuti kuoneka ari munyara mwake, ngegwinyiso unozourawa. “Kunyazwi ndiani unotuka baba ake nokuti mai ake, ngegwinyiso unozourawa. “Naapo vanhu vechiambana, noumwe akachaya umweni ngebuwe, nokuti ngechibhakera chake, naye akarekera kufa, asi akaata pamubhedhi wake, zvino kudai munhu echimirukazve nokuhamba kubanze ngomudondoro wake, naapo uwo wakamuchaya unozosunhurika; kwega unozobhadhara mukuwo waasikazi kushanda, nokuita kuti anase kupora. “Naapo munhu echichaya hloko yake, mwamuna nokuti mukadzi ngendonga, nehloko ikafira pashi penyara yake, ngegwinyiso unozoororwa. Asi kuti hloko ikapona zuva rimwe nokuti mairi, aazojeziswi; ngokuti uri wemare yake. “Naapo vanhu vechirwa, vorovoremadza mukadzi unemimba, ikabva, asi pasina kuremadzwa kwateera, uwo wamuremadza unozoripiswa, kudai ngezvaanozogura mwamuna womukadzi; naye unozoripa kudai ngezvevanozogura vatongi. Asi kudai pane kuremadzwa kwateera, naapo unozopa kupona ngendaa yokupona, dziso ngendaa yedziso, zino ngendaa yezino, nyara ngendaa yenyara, rutsoka ngendaa yorutsoka, kupishwa ngendaa yokupisha, bonje ngendaa yebonje, muzvimbo ngendaa yomuzvimbo. “Naapo munhu akachaya dziso rehloko yake, mwamuna nokuti mukadzi, akaritochora; unozotendera hloko kuti iende ngokusunhurika ngendaa yedziso rayo. Kudai echichaya zino rehloko yake, mwamuna nokuti mukadzi, rikabva, unozoitendera kuti iende ngokushunhurika ngendaa yezino rayo. “Kudai kabi yechitunga munhu, murume nokuti mukadzi kuti akafa, kabi inozopondwa ngemapuwe, nenyama yayo aizodyiwi; asi tenzi wekabi unozosunhurika. Asi kudai kabi iyo yaitunga karetu, natenzi wayo wakaronzerwa kudaro, asi aazi kuikonyera, nayo ikauraya munhu, murume nokuti mukadzi, kabi inozopondwa ngemapuwe, natenzi wayo unozourawa. Kudai echiripiswa muripo, zvino unozopa muripo wokupona kwake kunyazwi chiinyi chinoemeserwa kwaari. Kunyazwi ikatunga mukororo nokuti mwanasikana womunhu, unozoitirwa kudai ngokugura kwomutemo umwewo. Kudai kabi yechitunga hloko, mwamuna nokuti mukadzi, tenzi wayo unozopa kunaMambo wouwo munhu zvigurwa zvesirivha makumi matatu, nekabi inozopondwa ngemapuwe. “Naapo munhu akasiya hunza yakabeuka, nokuti kudai munhu echitsa hunza asikaishosheri, nekabi nokuti mbongoro ikawira mukati mwayo, mune wehunza unozoiripa; unozobhadhara mare kunatenzi wayo, neiyo yakafa inozoita yake. “Naapo kabi imwe yomunhu yechiremadza youmweni kuti ikafa, zvino vanozotengesa kabi inozwa, nokukoanisana mutengo wayo; neiyo yakafawo vanozoikoanisana. Nokuti kudai kwaiziikanwa kuti kabi yaitunga karetu, natenzi wayo aazi kuikonyera, unozoripa kabi ngekabi, neyakafa inozoita yake. “Kudai munhu echiba kabi nokuti gwai nokuiuraya nokuti kuitengesa, unozoripa ngekabi shanu pakabi imwe, nemakwai marongomuna pagwai imwe. Kudai mbavha ikaoneka yechipwanya, nayo ikachayiwa ikafa, apana ndaa yengazi yayo; kudai zuva rabuda padera payo inozoapo ndaa yengazi yayo. Inozoripa, asi kudai isina chiro, zvino inozotengeswa ngendaa yokuba kwayo. Kudai chakabiwa chikaoneka chechizwa munyara mwayo, kunyazwi ikabi nokuti mbongoro nokuti gwai, unozoripa kairi. “Kudai munhu echizoita kuti munda nokuti munda wemivhini udyiwe, nokuti kusunhura chifuyo chake, nacho chechidya mumunda woumweni unozoripa ngezvakapinda kunaka zvomunda wake, nezvakapinda kunaka zvomunda wake wemivhini. “Kudai muriro wechiambura nokubaka mukati mweminzwa, kuti zvitarahwi zvezviyo, nokuti zviyo zvisati zvachekwa, nokuti munda zvechipishwa, ngegwinyiso uwo wakabasa muriro unozozviripa. “Kudai munhu echizopa kuno muakirwana wake mare nokuti zvidziyo kuti angwarire, nazvo zvikabiwa kubva mumhatso yomunhuwo, zvino kudai mbavha iyo yechioneka, inozoripa kairi. Kudai mbavha isikaoneki, naapo mune wemhatso unozokwedzera pasinde naMwari, kuonisa kuti wakaisa nokuti aazi kuisa here nyara yake pazvidziyo zvomuakirwana wake. Ndaa yeshe yokupauka, kunyazwi yekabi, yembongoro, yegwai, yezvokusimira nokuti yechiro chakarashika, chaanoronza umwe kuti, ‘Ichi ndicho’: ndaa yaavo vairi inozoiswa pamberi paMwari; uwo waanozoitira ndaa Mwari unozoripa kairi kumuakirwana wake. “Kudai munhu echipa muakirwana wake mbongoro nokuti kabi nokuti gwai nokuti chifuyo chimweni, nacho chechifa nokuti chechiremadzwa nokuti chechipambwa pasina munhu unoona, kupikirana ndiMambo Mwari kunozoa pakati pavo veshe, kuti vaone kuti wakaisa nokuti aazi kuisa here nyara yake pazvifuyo zvomuakirwana wake; natenzi wacho unozoashira mhiko, naye aazoripi akadi. Asi kudai chechibiwa kubva kwaari unozoripa kunatenzi wacho. Kudai chechirumwa ngaachiunze kuita chapupu; aazoripi icho chakarumwa. “Kudai munhu echikwereta chifuyo chomuakirwana wake, nacho chikaremadzwa nokuti chechifa, tenzi wacho asipo nacho, ngegwinyiso unozochiripa. Kudai tenzi wacho aripo nacho, aazochiripi; kudai chiri chiro chakatorwa kushandisa chechizobhadharwa ngemare, mubhadharo wacho ndiwo unozoerengwa kwechiri. “Kudai munhu echinyenga mhandwe isikazi kugangiwa ngomunhu nokuatana nayo, ngegwinyiso unozodusa chuma chake kuti aite mukadzi wake. Kudai baba ake vechiramba yaamho kumupa kwaari, unozoripa mare yakadai ngechuma chemhandwe. “Usazotendera musaramusi kuti ararame. “Kunyazwi ndiani unoatana nemhuka ngegwinyiso unozourawa. “Kunyazwi ndiani unopira mubairo kune chimwari chimweni, asi kwega kunaMambo Mwari, unozourawa. Usazoshaishira mupara nokuti kuzomutambudza, ngokuti imwimwi mwaiya vapara munyika yeEgipite. Musazotambudza shirikadzi nokuti ngeiri nokuti nherera. Kudai wechizovatambudza, navo vechichema kwendiri, ngegwinyiso ndinozozwa kuchema kwavo, noushungu hwangu hunozobaka, neni ndinozomuuraya ngeshoti; nevakadzi venyu vanozoita shirikadzi, nevana venyu vanozoita nherera. “Kudai wechikweretesa mare kuno umwe wevanhu vangu vanemwi uwo uri murombo, usazoita kwaari kudai ngouri mukweretesi; newe usazomubvunza kubara kwayo. Kudai wechitora chokufuka chomuakirwana wako kuita chibatiso, nokuti ngouri mukuwo, unozochihwirinza kwaari zuva risati rapota. Ngokuti ndicho chokufuka chake chega, ndicho chokufuka chaanofukidza ndicho muiri wake; ungazoata akafukenyi? Kudai echichema kwendiri, ndinozozwa, ngokuti ndine nyasha. “Usazotuka Mwari, nokuti kutuka mutongi wevanhu vako. Usanonoka kupa zvouwandu hwezviyo zvako nokubva kunezvokumwa zvako. Unozopira kwendiri dangwe kubva pakati pevakororo vako. Unozoita kudaro kabi dzako nemakwai ako; inozogara namai ayo mazuva manomwe; ngezuva rechisere unozoipira kwendiri. Nemwi munozoita vanhu vakacheneswa kwendiri; ndizvo musazodya nyama yakarumwa ngezvikara mushango; munozoikandira imbwa. “Usazohambisa mashoko okunyepa. Usazoisa nyara yako pamwepo nevakashata kuita chapupu chisikazi kururama. Usazoteera chiunga mukuita zvakashata; nokuti usazoita uchapupu mudare kupaukisa chiunga kuti chishaishe kugura ndaa; nokuti usazoita mukheto kumunhu murombo wechimuitira nyasha mundaa yake. “Kudai wechishongana nekabi nokuti mbongoro yegaa rako yechirashika, unozoipetudzazve kwaari. Kudai ukaona mbongoro youwo unokunyenya yechiata pashi pomutwaro wayo, usaramba kumudetsera, unozodetserana naye kuimirudza. “Usazoshaishira kugura kwakarurama ndaa dzomurombo wako, mukutongwa kwake. Tarauka kubva kundaa yokunyepa; usauraya usina ndaa nouwo wakarurama, ngokuti andizopembedzi wakashata. Usazotora chitengero, ngokuti chitengero chinopofomadza avo vanoona nokupaukisa mazwi evakarurama. Usazotambudza mupara; ngokuti munozia mwoyo womupara, ngokuti imwimwi mwaiya vapara munyika yeEgipite. “Makore matanhatu unozokusha nyika yako nokukukura zviyo zvayo; asi pagore rechinomwe unozoirekera kuti izorore kuita mafusi, kuti varombo vevanhu vako vadye; nezvevanosiya mhuka dzomushango dzinozozvidya. Unozoita kudaro nomunda wako wemivhini nomunda wako wemiorivhi. Unozoita mushando wako ngemazuva matanhatu, asi ngezuva rechinomwe unozozorora, kuti n'ombe dzako nembongoro dzako dzizorore, nomukororo womurandakadzi wako nomupara vamusirirwe. Ngwarai kuneizvo zveshe zvendakaereketa kwomuri. Musazoereketa ngemazina ezvimwari zvimweni, nokuti kuita kuti azwike kubva pamuromo wenyu. “Katatu pagore unozondiitira dhiri. Unozoita dhiri rechingwa chisina mumera; unozodya chingwa chisina mumera mazuva manomwe, kudai ngezvendakakupanga, ngomukuwo wakaemeswa mumwedzi Abhibhi, ngokuti ndiwo wewakabuda ndiwo kubva muEgipite. Apana naumwe unozouya pamberi pangu asina chiro. Unozoita dhiri rokukukura, mitanguro yemishando yako, yeizvo zvounokusha mumunda; nedhiri rokupedza kukukura ngokupera kwegore, apo woounganidza zvemishando yako kubva mumunda. Katatu pagore vamuna vako veshe vanozouya pamberi paMambo Mwari. “Usazopira ngazi yomubairo wangu pamwepo nechingwa chino mumera, nokuti mafuta edhiri rangu asazosara usiku hweshe metsa kuedze. Unozounza kumhatso yaMambo Mwari, Mwari wako, mitanguro yezviyo zvokutanga kwemavhu ako. Usazobika chimbudzana mumukaka wamai acho. “Wona, ndinotuma ngirosi pamberi penyu, kuti imungwarire munjira nokumugumisa kundau yendakamunasirira. Muipurutane, muzwe izwi rayo; musazoitsenesa, ngokuti aizokunguriri kupauka kwenyu; ngokuti zina rangu riri mweiri. Asi kudai mwechizopurutana izwi rayo ngegwinyiso nokuita zveshe zvendinoereketa, zvino ndinozoita gaa kumagaa enyu, nokurwisa vanomurwisa. Naapo ngirosi yangu inotanga pamberi penyu nokumugumisa kunyika yevaAmori, yevaHiti, yevaPherizi, yevaKhenani, yevaHivhi neyevaJebhusi, neni ndinozovauraya, musazogwadamira zvimwari zvavo nokuti kuzvidira nokuti kuita kudai ngemishando yavo; asi munozovaparadza yaamho nokuputsa sika dzavo. Munozodira Mambo Mwari, Mwari wenyu, naye unozofumisa chingwa chenyu nemvura yenyu; neni ndinozobvisa nhenda kubva pakati penyu. Akuna unozopfupfudzika nokuti kuita ngomwa munyika mwenyu; ndinozozadzisa uwandu hwemazuva enyu. “Ndinozotuma kutyisa kwangu pamberi penyu, ndikarudze yaamho vanhu veshe vomunoguma kwavari, ndinozoita kuti magaa enyu eshe amufuratire. Ndinozotuma mago pamberi penyu, anozodzinga vaHivhi, vaKhenani nevaHiti kubva pamberi penyu. Andizovadzingi kubva pamberi penyu ngegore rimwe, kuti nyika isazoita shango, nezvikara zvomushango zviwande kupinda imwimwi. Ndinozovadzinga kubva pamberi penyu padoko nepadoko, metsa mwawanda, mutore nyika kuita nhaka yenyu. Ndinozoemesa migano yenyu kubvira kuRuandhle Rwakatsvuka metsa kuguma kuRuandhle rwevaFiristia, nokubvira mushango metsa kuguma kuurwo rwizi Yufratesi; ngokuti ndinozopira vagari veiyo nyika munyara dzenyu nemwi munozovadzinga kubva pamberi penyu. Musazoita chitenderano navo nokuti nezvimwari zvavo. Vasazogara munyika yenyu, kuti vasazoita kuti mushaishe kwendiri; ngokuti kudai mwechidira zvimwari zvavo, ngegwinyiso chinozoita murau kwomuri.” Zvino wakati kunaMosi, “Kwira kunaMambo Mwari, iwewe naAroni, Nadhabhi naAbhihu, nevakuru vaIsuraeri makumi manomwe, mudire muri kuretu. Mosi ega ndiye unozokwedzera pasinde kunaMambo Mwari; asi vamweni avazokwedzeri pasinde akadi; nevanhu avazokwiri naye.” Mosi wakauya, akaronzera vanhu mazwi eshe aMambo Mwari nezvitongero zveshe; nevanhu veshe vakapingura ngeizwi rimwero, vakati, “Mazwi eshe aakaereketa Mambo Mwari tinozoita.” Mosi wakanyora eshe mazwi aMambo Mwari, akafumira mangwanani kuaka arita pashi pomutunhu, nesika gumi nambiri kudai ngouwandu hwemadzinza gumi namairi aIsuraeri. Naye wakatuma majaha evana vaIsuraeri akapira midiro yokupisha, akabaira midiro yokuiyanisa yen'ombe kunaMambo Mwari. Mosi wakatora rupande rwengazi, akaiisa muzvidziyo; akafafazira rupande rwengazi paarita. Zvino wakatora tsamba yechitenderano, akaidzidza mukuzwa kwevanhu; navo vakati, “Zveshe zvaakaereketa Mambo Mwari tinozozviita, techipurutana.” Mosi wakatora ngazi, akaifafazira padera pevanhu, akati, “Ringirai ngazi yechitenderano, chaakaita Mambo Mwari nemwi ngaaya mazwi eshe.” Zvino Mosi, Aroni, Nadhabhi, Abhihu nevakuru vaIsuraeri makumi manomwe vakakwira, vakaona Mwari waIsuraeri. Kwaiyapo pashi petsoka dzake kugangatwa kwemapuwe esafire, akaera kudai ngedenga remene. Naye aazi kuisa nyara yake padera pevakuru vaIsuraeri; navo vakaona Mwari, vakadya nokumwa. Mambo Mwari wakati kunaMosi, “Kwira kwendiri mumutunhu, ugaremwo; neni ndinozokupa marusamba emapuwe nezvironzo nemipango, izvo zvendakanyora, kuti adzidziswe.” Mosi wakamiruka naJoshua mushandiri wake, naMosi wakakwira mumutunhu waMwari. Wakati kuvakuru, “Tigarirei pano, metsa tiuyezve kwomuri; ringirai, Aroni naHuri vanemwi; kunyazwi ndiani une ndaa ngaauye kwavari.” Zvino Mosi wakakwira mumutunhu, negore rakambonya mutunhu. Nouthende hwaMambo Mwari hwakagara padera poMutunhu weSinai, negore rakaumbonya mazuva matanhatu; ngezuva rechinomwe wakadaidza Mosi ari mukati mwegore. Nokuoneka kwouthende hwaMambo Mwari hwaiya hwakadai ngomuriro unopisha padera pomutunhu mukuona kwevana vaIsuraeri. Mosi wakapotera mukati mwegore, akakwira mumutunhu; naMosi wakagara mumutunhu mazuva makumi marongomuna nousiku makumi marongomuna. Mambo Mwari wakaereketa kunaMosi echiti, “Ereketa kune vana vaIsuraeri kuti vanditorere zvipo kubva kunomunhu weshe unomwoyo unotenda. Izvi ndizvo zvipo zvomunozoashira kubva kwavari: mukore, sirivha nethusi, machira matema neakatsvukuruka, eharahara, erukangaza rwakanaka neemamviri embudzi, matoo emagondohwe akatsvukiswa nematoo emadenhe, nemapuranga ehlafunga, mafuta ezvibani, mafuta emaka okudzodza, mutombo une gwema rakanaka wokupisha, mapuwe eonikisi, nemapuwe omunemo eefodhi neechihlangu chepaditi. Ngavandiitire ndau yakachena, kuti ndigare pakati pavo. Kudai ndizvo zveshe zvendakamuonisa, chionero chetende romushongano nechionero chezvidziyo zveshe zvaro, ndizvo munozozviita. “Navo vanozoita bhokisi remapuranga ehlofunga; kureba kwaro kunozoita masendimitha zana negumi rimwe, kupamhama nokukwira mudenga masendimitha makumi matanhatu namatanhatu. Unozoriseta ngomukore wakaera, unozoriseta mukati nokubanze, unozonasira padera paro hata yomukore kuritendenedza. Unozoumba ndandazi murongomuna dzomukore dzaro, udziise mutsoka dzaro murongomuna; ndandazi mbiri dzinozoapo kurutii rumwe rwaro, nendandazi mbiri kurutii rumweni rwaro. Unozoita mipingo yehlofunga uisete ngomukore. Unozoita mipingo mukati mwendandazi dziri pamarutii ebhokisi, kutwara ndiyo bhokisi. Mipingo inozoramba irimwo mukati mwendandazi dzebhokisi: aizobviswi kweriri. Unozoisa mubhokisi chitenderano chendinozokupa. “Zvino unozoita chigaro chenyasha chomukore wakaera; kureba kwacho kunozoita masendimitha zana negumi rimwe nokupamhama kwacho kunozoita masendimitha makumi matanhatu namatanhatu. Ita makherubhi ane maphaphiro mairi omukore; kumagumo mairi echigaro chenyasha unozoaita ngomukore wakapfurwa. Ita chipuka chimwe kumagumo amwe, nechipuka chimwe kumagumo amweni; munozoita makherubhi padera pemagumo mairi acho akabatana pamwepo nechigaro chenyasha. Makerubhi ane maphaphiro anozotambanudza maphaphiro awo ngepadera, echitibikira chigaro chenyasha ngemaphaphiro azvo, ane hope dzazvo dzakaringirana; hope dzemakherubhi dzinozoringira kuchigaro chenyasha. Unozoisa chigaro chenyasha padera pebhokisi; nomukati mwebhokisi unozoisa chitenderano chendinozokupa. Apapo ndinozoshongana newe, ndierekete newe, ndiri padera pechigaro chenyasha, ndizvo zveshe zvendinozokupa kupanga vana vaIsuraeri, pakati pemakherubhi zviiri zvine maphaphiro mairi zviri padera pebhokisi rechitenderano. “Unozoita tafura remapuranga ehlofunga; kureba kwaro kunozoita masendimitha makumi masere namasere, kupamhama kwaro kunozoita, masendimitha makumi marongomuna namarongomuna. Unozoriseta ngomukore wakaera nokuriitira hata yomukore kuritendenedza. Newe unozoriitira gomo kuritendenedza kupamhama kwaro kwakadai ngenyara, unozoita hata yomukore pamagumo aro kuritendenedza. Unozoriitira ndandazi murongomuna dzomukore, uise ndandazi mumakhona marongomuna aro ari patsoka murongomuna dzaro. Ndandazi dzinozoiswa ngepasinde pehata, kuita ndau dzemipingo yokutwara tafura. Unozoita mipingo yomuti wehlofunga, uisete ngomukore, kuitira kuti tafura ritwarwe ndiyo. Newe unozoita ndiro dzaro, nemikheyo yaro, nemajomeya aro, netsani yaro yokudurura ndiyo; munozoiita ngomukore wakaera. Newe unozoisa zvingwa zvokuonisa padera petafura pamberi pangu nguva dzeshe. “Unozoita chigadzikiro chechibani ngomukore wakaera. Chigadzikiro nechibato chinozoitwa ngomukore wakapfurwa, tsani dzacho, chibato chacho nemashakani acho, zvinozoita chiro chimwecho. Anozoapo matai matanhatu anobuda kumarutii acho; matai matatu echigadzikiro chechibani anobuda kurutii rumwe nematai matatu echigadzikiro chechibani anobuda kurutii rumweni. Zvigadzikiro zvitatu zvakaitwa kudai ngemaarimondi kunhai imwe nefundo neruva nezvigadzikiro zvitatu zvakadai ngemaruva earimondi kunhai imweni nefundo neruva; zvakadaro kumatai matanhatu anobuda kubva pachigadzikiro chechibani. Pachigadzikiro chechibani pachacho, zvigadzikiro zvirongomuna zvakadai ngemaruva earimondi, zvine mafundo nemaruva azvo. Fundo pashi pematai mairi rinozobuda kwechiri, nefundo pashi pematai mairi rinozobuda kwechiri, nefundo pashi pematai mairi anozobuda kwechiri, kumatai matanhatu anozobuda kuchigadzikiro chechibani. Mafundo acho nematai acho anozobuda kwechiri; cheshe chinozoita mushando umwe womukore wakapfurwa wakaera. Newe unozoita zvibani zvacho zvinomwe; navo vanozotungidza zvibani zvacho nokuzvigadzika kuitira kuti zvijekise pandau iri pamberi pacho. Zvibato zvacho nendiro dzacho dzokuisa marota zvinozoita zvomukore wakaera. Zvinozoitwa ngemakhirogiramu makumi matatu nemashanu omukore wakaera, nezvidziyo izvi zveshe. Ngwara kuti uzviite ngechionero chazvo chakaoniswa kwouri pamutunhu. “Zve, unozoita tende rine machira okusitira ndiwo gumi remachira akanakisisa, akarukwa ngezvakakoshwa zvakasvipirika nezvakatsvukuruka nezvakatsvuka, anezvipuka zvine maphaphiro, mushando wengwazi. Kureba kwejira rimwe ngarimwe kunozoita mamitha gumi namairi, nokupamhama kwejira rimwe ngarimwe kunozoita mamitha mairi: machira eshe anozoita chipimo chimwe. Machira mashanu anozorimbanidzwa rimwe kune rimweni; nemachira amweni mashanu anozorimbanidzwa rimwe kune rimweni. Newe unozoita magangiro ngejira rakasvipirika pamupendero wejira rimwe rokupedzisira rokubanze pane akarimbanidzwa ekutanga; ngokudarozve unozoita magangiro pamupendero wejira rokupedzisira rokubanze pane akarimbanidzwa echipiri. Unozoita magangiro makumi mashanu pajira rimwe, nemagangiro makumi mashanu pamupendero wejira rokupedzisira rokubanze pane akarimbanidzwa echipiri; magangiro anozoringirana. Unozoita zvikoreko zvomukore makumi mashanu nokurimbanidza machira rimwe kune rimweni ngezvikoreko, kuti tende riite rimwe. “Newe unozoita machira emamviri embudzi okufukidza padera petende; gumi narimwe. Urebu hwejira rimwe ngarimwe hunozoita mamitha gumi namatatu, nokupamhama kwejira rimwe ngarimwe kunozoita mamitha mairi; machira gumi narimwe anozoita chipimo chimwe. Unozorimbanidza machira mashanu ega, nemachira matanhatu ega, unozopeta jira rechitanhatu riri pamberi petende. Unozoita magangiro makumi mashanu pamupendero wejira rimwe rokubanze nemagangiro makumi mashanu pamupendero wejira pane akarimbanidzwa echipiri. “Unozoita zvikoreko makumi mashanu zvethusi nokuisa zvikoreko mumagangiro, urimbanidze tende pamwepo kuti riite rimwe. Rupande runosara rwejira romutende, rupande rwejira rinosara, rakatikapa sure kwetende. Masendimitha makumi mashanu kureba kurutii rumwe ngarumwe zvinosara kuurebu hwemachira etende, inozotikapakapa kumarutii ethabhenakeri, kurutii urwu nokurutii urwo, kurifukidza. Newe unozoita chifukidziro chetende chematoo akasukutwa emagondohwe, akatsvukiswa, nechifukidziro chematoo ematenhe ngepadera. “Newe unozoita sika dzethabhenakeri ngemiti yehlafunga dzokuemesa. Urebu hwesika hunozoita mamitha marongomuna nokupamhama kwesika imwe ngaimwe kunozoita masendimitha makumi matanhatu namatanhatu. Sika imwe ngaimwe inozoitwa manyanga mairi, okudzirimbanidza pamwepo; unozoita kudaro pasika dzeshe. Unozoita sika dzetende makumi mairi orupande rwokubani. Newe unozoita zvigadzikiro makumi marongomuna zvesirivha pashi pesika makumi mairi; zvigadzikiro zviiri pashi pesika imwe zvemanyanga mairi, nezvigadzikiro zviiri pashi pesika imweni zvemanyanga ayo mairi; nokurutii rwechipiri rwetende rwedera unozoita sika makumi mairi. Anozoa nehoko dzao dziri makumi marongomuna ezvigadzikiro zvadzo zvesirivha, zvigadzikiro zviiri pashi pesika imwe, nemanyanga mairi pashi pesika imweni. Unozoita sika nhanhatu sure kwetende ngokumabirira-zuva. Unozoita sika mbiri dzepamakhona etende kurupande rwesure. Ngaaite mairi ngepashi, asi akarimbanidzwa padera, panyanga yokutanga; ndizvo zvinozoitwa kwaari eshe; anozoita makhona mairi. Dzinozoapo sika sere, nemanyanga adzo esirivha, manyanga mairi pashi pesika imwe, nemanyanga mairi pashi pesika imweni. “Unozoita mwamba yehlofunga, mwamba mishanu yesika dzorutii rumwe rwetende, nemwamba mishanu yesika dzorutii rwetende nemwamba mishanu yesika dzorutii rumweni rwesure ngokumabirira zuva. Mwamba wepakati uri pakati pesika rinozobva kumagumo kuenda kumagumo. Unozoseta sika ngomukore, nokuita ndandazi dzadzo ngomukore kuita pangagara mwamba; newe unozoseta mwamba ngomukore. Unozodzimika tende kudai ngechionero chakaoniswa kwouri pamutunhu. “Unozoita chisitiro chejira rakasvipirika, rakatsvukuruka, rakatsvuka, nejira rakanakisa rakakoshwa; rinozoitwa makherubhi zvine maphaphiro, mushando wengwazi. Unozoriturika padera pesika murongomuna dzehlofunga dzakasetwa ngomukore, zvikoreko zvadzo zviite zvomukore, dziri zvigadzikiro zvirongomuna zvesirivha. Unozoturika chisitiro pashi pezvikoreko, nokupotedzamwo mukati mwechisitiro bhokisi rechapupu; nejira rechisitiro rinozoparadzanisa kwomuri pakati pendau yakachena neyakapindisisa kuchena. Unozoisa chigaro chenyasha padera pebhokisi rechapupu mundau yakapindisisa kuchena. Unozoisa tafura ngokubanze kwejira rechisitiro, nechigadzikiro chechibani chakaringirana netafura kurutii rwetende rwokubani; unozoisa tafura kurutii rwedera. “Unozoita jira repamusiwo petende, rakarukwa ngezvakasvipira, zvakatsvukuruka, zvakatsvuka, nejira rakanakisisa rakakoshwa, mushando wengwazi. Unozoitira jira repasiwo sika shanu dzemiti yehlofunga, udzisete ngomukore; zvikoreko zvadzo zvinozoita zvomukore, newe unozodziumbira zvigadzikiro zvishanu zvethusi. “Unozoita arita resika dzehlofunga, kureba kwaro kunozoita mamitha mairi, nokupamhama kwaro kunozoita mamitha mairi; arita rinozoedzana marutii aro marongomuna; nokureba kwaro kuenda mudenga kunozoita mitha rimwe nezvidoko zvitatu. Unozoita nyanga dzaro kumakhona marongomuna aro; nyanga dzaro dzinozoita chiro chimwe naro: unozoriseta ngethusi. Unozoita hari dzaro dzokudusa marota aro, mafoshoro aro, zvidziyo zvaro, maforoko aro enyama nemaruwenda omuriro: unozoita zvidziyo zvaro zveshe ngethusi. Newe unozoriitira chokutsimisa muriro chakarukwa kudai ngemumbure chethusi; nepadera pemumbure unozoita ndandazi murongomuna kumakhona marongomuna acho. Unozochiisa ngepashi mubandaanda raro kutendenedza arita ngepashi, kuti mumbure ugume pakati pearita. “Newe unozoita mipingo yearita, mipingo yemiti yehlofunga, uisete ngethusi. Mipingo yaro inozoiswa mundandazi, nemipingo inozoa kumarutii mairi earita, apo rootwarwa. Unozoriita ngemiti risina chiro mukati; kudai ngezvewakaoniswa pamutunhu, rinozoitwa kudaro. “Unozoita ruwanze rwetende. Kurupande rwokubani ruwanze runozoiswa magangiro akaitwa ngemachira akapindisisa kunaka rakakoshwa, urebu worutii rumwe rwaro runozoita mamitha makumi marongomuna namarongomuna. Sika dzarwo dzinozoita makumi mairi, nezvigadzikiro zvadzo dzinozoita makumi mairi dzethusi; zvikoreko zvesika nemwamba yadzo zvinozoita zvesirivha. Ngokudaro kurutii rwedera anozoapo machira okuturika ano urebu hwemamitha makumi marongomuna namarongomuna, sika dzawo makumi mairi nezvigadzikiro zvadzo makumi mairi, zvethusi; zvikoreko zvesika, nemwamba yadzo zviri zvesirivha. Kupamhama kworuwanze kurutii rwokumabirira zuva anozoapo machira okuturika anoita mamitha makumi mairi namairi kureba, sika gumi nezvigadzikiro zvadzo gumi. “Kupamhama kworuwanze kurutii rwokumabvazuva kunozoita mamitha makumi mairi namairi. Machira okuturika orutii rumwe rwepamusiwo anozoita mamitha matanhatu nezvidoko zvitanhatu, sika dzarwo dzinozoita nhatu, nezvigadzikiro zvadzo zvitatu. Kurutii rumweni anozoapo machira okuturika anoita mamitha matanhatu namatanhatu, sika nhatu zvigadzikiro zvadzo zvitatu. Nepamusiwo poruwanze anozoapo machira okuturika ane mamitha mapfumbamwe kureba, akaitwa ngemachira akapinda kunaka akasvipirika, akatsvukuruka, akatsvuka, neorukangaza rwakanaka rwakakoshwa, mushando wengwazi yokutunga, sika dzawo murongomuna zvigadzikiro zvadzo zvethusi. Sika dzeshe dzinotendenedza ruwanze dzinozorimbanidzwa ngemwamba yesirivha; zvikoreko zvadzo zvinozoita zvesirivha, nezvigadzikiro zvadzo zvethusi. Urebu hworuwanze hunozoita mamitha makumi marongomuna namarongomuna nokupamhama kwarwo kundau dzeshe kunozoita mamitha makumi mairi, nokureba kwarwo kukwira mudenga mamitha mairi nezvidoko zviiri nezvigadzikiro zvethusi. Midziyo yeshe yetende yemishando yaro yeshe, nehoko dzaro dzeshe, nehoko dzoruwanze, dzinozoita dzethusi. “Unozopanga vana vaIsuraeri kuti vakuunzire mafuta akaera emaorivhi echibani kuti chirambe chechibaka nguva dzeshe. Mutende romushangano ngokubanze kwejira rechisitiro riri pamberi pebhokisi rechitenderano, Aroni nevakororo vake vanozochingwarira chechibaka pamberi paMambo Mwari kubvira madeekoni metsa mangwani mangwanani. Mupango uyu unozongwarirwa mhera nariini ngevana vaIsuraeri nemibarirwana yavo. “Kwedzedza kwouri Aroni mukoma wako, nevakororo vake pamwepo naye kubva pakati pevana vaIsuraeri, kuti vandishandire mushando woupristi, vanoti Aroni, Nadhabhi, Abhihu, Ereaza, naIthama, vakororo vaAroni. Newe unozoita zvokusimira zvakacheneswa zvaAroni mukoma wako, zvouthende nezvounaku. Unozoereketa kwavari veshe vano ungwaru hwokukona kuita zviro, vendakazadza ngomweya woungwaru kuti vaite zvokusimira zvaAroni kumuchenesa, kuti andishandire mushando woupristi. Izvi ndizvo zvokusimira zvevanozoita: chokungwarira diti, neefodhi, gauni, bhachi rine matyabi, chiqoko nebhande; navo vanozoita zvokusimira zvakacheneswa zvaAroni mukoma wako nezvevakororo vake, kuti vandishandire mumushando woupristi. Vanozoshandisa mukore, zvakasvipirika, zvakatsvukuruka, zvakatsvuka nemachira akapinda kunakisisa. “Navo vanozoita efodhi ngomukore, ngezvakasvipirika, ngezvakatsvukuruka, ngezvakatsvuka, namachira akapinda kunaka akakoshwa, mushando wengwazi. Rinozoiswa nemabande mairi epamapfudzi akashonganiswa kumagumo mairi aro, kuti ririmbanidzwe pamwepo. Nebande rakarukwa ngoungwaru, riri padera paro, rokurisunga ndiro, rinozoitwa ngenjira imweyo, nezviro zvimwezvo, mukore, zvakasvipirika, zvakatsvukuruka, zvakatsvuka, nejira rakapinda kunaka, rakarukwa. Newe unozotora mapuwe mairi eonikisi, unangure padera pawo mazina evana vaIsuraeri, mazina avo matanhatu pabuwe rimwe nemazina matanhatu anosara pabuwe rimweni, kudai ngokuteererana kwokubarwa kwavo. Unozonangura mapuwe mairi kudai ngomushando womunanguri wendandazi, kudai ngokuteererana kwemazina evana vaIsuraeri: unozoanyika muzvigadzikiro zvomukore. Unozoemesa mapuwe mairi padera pemabande epamapfudzi eefodhi, kuti aite mapuwe okukarakadzisa ndiwo vana vaIsuraeri; naAroni unozotwara mazina avo padera pemapfudzi ake, pamberi paMambo Mwari kuita mukarakadziso. Newe unozoita zvigadzikiro zvomukore, nemaketani mairi omukore wakaera; unozoanasira akadai ngebote rakarukwa; unozorimbanidza maketani akarukwa padera pezvigadzikiro. “Unozoita chokungwarira diti chokutonga ndicho, mushando wengwazi; chinozoita mushando wakadai ngomushando weefodhi; uchiite ngomukore, ngeakasvipirika, ngeakatsvukuruka, ngeakatsvuka, nejira rakapindisisa kunaka, rakarukwa. Chinozoita marutii marongomuna akaedzana, chakapetwa; urebu hwacho hunozoita masendimitha makumi mairi, kupamhama masendimitha makumi mairi namairi. Unozoisa mapuwe omunemo, misara mirongomuna yemapuwe: musara umwe unozoitwa ngemapuwe esardhiusi, topazi, nekhabhunikeri, unozoita musara wokutanga; nomusara wechipiri unozoitwa ngeemerodhi, safire nedhaimondi; nomusara wechitatu unozoitwa ngejakinithi, agate neametisti; nomusara wechirongomuna unozoitwa ngebheriri, onikisi nejasipa; anozoiswa muzvigadzikiro zvomukore. Panozowa nemapuwe gumi namairi, nemazina awo kudai ngokuteererana kwemazina evana vaIsuraeri; kudai ngendandazi; rimwe ngarimwe rinozonangurwa zina raro, anozoita emadzinza gumi namairi. Unozoita maketani akaphotwa kudai ngemapote echokungwarira diti, ngomukore wakaera; newe unozoitira chokungwarira diti ndandazi mbiri dzomukore nokuisa idzo ndandazi mbiri kumagumo mairi echokungwarira diti. Newe unozoisa maketani mairi akaphotwa omukore pandandazi mbiri dziri kumagumo mairi echokungwarira diti. Nemagumo mairi amweni emaketani akaphotwa, unozoaisa pazvigadzikiro zviiri, nokuzviisa padera pemabhande pamapfudzi eefodhi, kurupande rwemberi rwaro. Unozoita ndandazi mbiri dzomukore nokudziisa pamagumo mairi echokungwarira diti, pamagumo acho omukati, pasinde peefodhi. Unozoita ndandazi mbiri dzomukore, nokudzirimbanidza pamabhande mairi epamapfudzi eefodhi ngepashi, kurutii rwemberi rwaro, ngepasinde pezvisungo zvaro, ngepadera pebhande rakarukwa ngengwazi reefodhi. Navo vanozosunga chokungwarira diti ngendandazi dzacho kundandazi dzeefodhi ngebote rakasvipirika, kuti chiapo pabhande reefodhi rakarukwa ngengwazi nokuti chokungwarira diti chisazosunhurwa kubva kuefodhi. Ndizvo Aroni unozotwara mazina evana vaIsuraeri mukati mwechokungwarira diti chokutonga ndicho padera pomwoyo wake, apo oopotera kundau yakachena, kuti arambe achivaunza kuita mukarakadziso pamberi paMambo Mwari. Newe unozoisa mukati mwechokungwarira diti chokutonga ndicho Urimi neThumimu; nazvo zvinozoa pamwoyo waAroni, apo oopotera pamberi paMambo Mwari; ndiAroni unozotwara kutongwa kwevana vaIsuraeri mumwoyo mwake pamberi paMambo Mwari nguva dzeshe. “Newe unozoita gauni reefodhi rakasvipirika reshe. Naro rinozoa neuri resoro pakati paro: rinozoa nomupendero wakarukwa kutendenedza uri, kudai ngeuri rebhachi rokurwa, kuti risazobauka. Pamipendero yaro unozoita zvakadai ngemaphomegraniti zveakasvipirika, zvakatsvukuruka nezvakatsvuka kutendenedza mipendero yaro; nezvokuridza zvomukore pakati pazvo. Chokuridza chomukore nechakadai ngephomegraniti, chokuridza chomukore nechakadai ngephomegraniti, kutendenedza mumipendero yegauni. Nayo inozofukwa ndiAroni apo ooita mushando: nokurira kwazvo kunozozwika apo oopotera kundau yakachena pamberi paMambo Mwari naapo oobuda, kuti asafa. “Unozoita ndiro yomukore wakaera, unangure padera payo, kudai ngokunangurwa kwendandazi, kuti, ‘KUCHENESWA KUNA MAMBO MWARI.’ Newe unozoiisa ngebote rakasvipirika; inozoa padera parupande rwemberi rwechiqoko. Nayo inozopfekwa pahuma yaAroni, naAroni unozotwara zvakashata zvingaitika pazviro zvakacheneswa izvo vanhu vaIsuraeri zvevanopira kuita zvipo zvakacheneswa; inondozogara nguva dzeshe pahuma yake, kuti zviashirike pamberi paMambo Mwari. “Unozoruka bhachi rinematyabi ngejira rakapinda kunaka, unozoita chiqoko ngejira rakapinda kunaka, unozoita bhande, mushando womutungi unokona. Newe unozoitira vakororo vaAroni mabhachi, mabhande, nezviqoko zvouthende nounaku. Unozozvisimidza Aroni mukoma wako, pamwepo nevakororo vake; unozovadzodza nokuvaparadzanisa nokuvachenesa, kuti vandishandire mumushando woupristi. Unozovaitira mabhuruku ngejira rakapindisisa kunaka kufukidza utitinini hwenyama yavo; kubvira pachiunu kuguma kuzvizva. Ngaapfekwe ndiAroni navakororo vake apo voopotera mutende romushongano nokuti vookwedzera kuarita kushanda mundau yakachena, kuti vasazodziunzira kushata, vafe. Ichi chinozoita chiemeso chemhera nariini kwaari nokune mibarirwana yake inozouya ngesure kwake. “Zvino ichi ndicho chounozoita kwavari kuvaparadzanisa, kuti vandishandire mumushando woupristi. Tora mukono umwe mutsva nemagondohwe mairi zvisina kuremara, nechingwa chisina mumera, nemakeke asina mumera, zvakakanywa ngemafuta, nezvingwa zvidoodoko zvisina mumera, zvakadzodzwa ngemafuta. Unozozviita ngoufu hwakamotseka hwekoroni. Unozozviisa muchitundu chimwe, uzviunze muchitundu, uunzezve mukono nemagondohwe mairi. Unozounza Aroni nevakororo vake kumusiwo wetende romushongano nokuvashamba ngemvura. Unozotora zvokusimira, upfekedze Aroni bhachi, negauni yeefodhi, neefodhi, nechokungwarira diti, nokumusunga ngebhande rakarukwa ngengwazi reefodhi. Unozoisa chiqoko padera pesoro rake, nokuisa dzungudza rakacheneswa padera pechiqoko. Naapo unozotora mafuta okudzodza, uadurure padera pesoro rake, umudzodze. Unozounza vakororo vake, uvapfekedze mabhachi. Unozovasunga ngemabhande Aroni nevakororo vake, uise zviqoko pamasoro avo: noupristi unozoita wavo ngechiemeso chemhera nariini. Unozogadza Aroni nevakororo vake. “Unozounza mukono pamberi petende romushongano. Aroni nevakororo vake vanozoisa nyara dzavo padera pesoro romukono. Unozouraya mukono pamberi paMambo Mwari, pamusiwo petende romushongano. Unozotora rupande rwengazi yomukono nokuiisa panyanga dzearita ngechinwe chako, nokudurura ngazi yeshe ngepashi pearita. Unozotora mafuta eshe anofukidza mathumbu, nemafuta ari padera pechiropa netsvo mbiri, nemafuta ari padera padzo, uzvipishe padera pearita. Asi nyama yomukono nedoo rawo nemadisa awo unozozvipisha ngomuriro kubanze kwekamba, mudiro wokushaisha. “Unozotorazve gondohwe rimwe; Aroni nevakororo vake vanozoisa nyara dzavo padera pesoro regondohwe, newe unozouraya gondohwe, unozotora ngazi yaro, uifafazire kutendenedza padera pearita. Unozocheka gondohwe kuriita zvigurwa, nokusuka mathumbu aro, nemirenje yaro, nokuzviisa pamwepo nezvigurwa zvaro nesoro raro. Unozopisha gondohwe reshe padera pearita; uyu mudiro wokupisha kunaMambo Mwari; uri gwema rakanaka, mudiro unoitwa ngokupishwa kunaMambo Mwari. “Unozotora gondohwe rimweni; Aroni nevakororo vake vanozoisa nyara dzavo padera pesoro regondohwe, newe unozouraya gondohwe, utore rupande rwengazi yaro, nokuiisa panogumira nzee yokumudyo yaAroni, nepanogumira nzee dzokumudyo dzevakororo vake, nepagunwe renyara dzavo dzokumudyo, nepagunwe retsoka dzavo dzokumudyo, nokufafazira ngazi yeshe padera pearita kuritendenedza. Newe unozotora rupande rwengazi iri padera pearita nemafuta okudzodza, nokuzvifafazira padera paAroni nepezvokusimira zvake, nepadera pevakororo vake pamwepo nepezvokusimira zvavo; naye unozocheneswa nezvokusimira zvake, nevakororo vake nezvokusimira zvevakororo vake pamwepo naye. “Unozotorawo mafuta egondohwe nemafuta omuswe, mafuta anofukidza mathumbu nemafuta anofukidza chiropa, itsvo mbiri, nemafuta akadziputira, nechitho chokumudyo; ngokuti igondohwe rokugadzwa ndiro, nechingwa chimwe chakakanywa ngemafuta, nechingwa chimwe chidoko, zvinotorwa kubva muchitundu chezvingwa zvisina mumera zviri pamberi paMambo Mwari. Newe unozoisa zveshe panyara dzaAroni nepanyara dzevakororo vake nokuzvizunguzira kuita chipo chinozunguzirwa pamberi paMambo Mwari. Zvino unozozvitora kubva kunyara dzavo nokuzvipisha padera pearita pamwepo nomudiro wokupisha, kuti zviite gwema rakanaka pamberi paMambo Mwari; mudiro wokupisha ngomuriro kunaMambo Mwari. “Unozotora chifuba chegondohwe rokugadzwa kwaAroni nokurizunguzira kuita mudiro wokuzunguzirwa pamberi paMambo Mwari; naro rinozoita chikoaniswa chako. Newe unozochenesa chifuba chomudiro wokuzunguzirwa, nomutezo womudiro wokumirudzwa, unozozunguzirwa, nouwo unomirudzwa, kubva pagondohwe rokugadzwa ndiro, kubva pane zvaAroni nezvevakororo vake. Zvinozoita zvaAroni nevakororo vake mhera nariini zvinobva kuvana vaIsuraeri, ngokuti uyu mudiro wevapristi unopirwa ngevanhu vaIsuraeri kubva kumidiro yavo yokuiyana; midiro yavo yezvipo kunaMambo Mwari. “Zvokusimira zvakacheneswa zvaAroni zvinozoita zvevakororo vake ngesure kwake, kuti vadzodzwe vakazvipfeka, nokugadzwa vakazvipfeka. Mukororo uwo unoita mupristi pandau yake unozozvisimira mazuva manomwe, apo oopotera mutende romushongano kushanda mundau yakachena. “Unozotora gondohwe rokugadzwa kubika nyama yaro mundau yakachena. Aroni nevakororo vake vanozodya nyama yegondohwe nezvingwa zviri muchitundu, pamusiwo wetende romushongano. Vanozodya izvo zvakapirwa kuripa ndizvo, pakugadzwa nepakucheneswa; asi mupara aazozvidyi, ngokuti zvakacheneswa. Kudai kunenyama imweni yokugadzwa, nokuti zvingwa zvakasara metsa mangwani, naapo unozopisha zvasara ngomuriro; azvizodyiwi akadi, ngokuti zvakacheneswa. “Ndizvo zveunozoita kunaAroni nokuvakororo vake, kudai ngeizvo zveshe zvendakakupanga; mumazuva manomwe unozovagadza. Mazuva eshe unozopira mukono wokuita mudiro wokushaisha kuita muripo; newe unozochenesa arita apo unoriripira; unozoridzodza kurichenesa. Mazuva manomwe unozoripira arita, urichenese; nearita rinozoita rakapindisisa kuchena; kunyazwi chiinyi chinogwama arita chinozocheneswa. “Zvino izvi ndizvo zvounozopira padera pearita; zvikwai zviiri zvaane gore rimwe zuva ngezuva ngenguva dzeshe. Unozopira kakwai kamwe mangwanani, nekamweni unozopira madeekoni. Pamwepo nekakwai unozopira rupande rwechegumi khirogramu rimwe roufu hwakamotseka hwekoroni hwakakumanidzwa neritha rimwe remafuta emaorivhi, neritha rimwe remafuta akaengwa, neritha rimwe revhini kuita mudiro wokumwa. Nekakwai kamweni unozopira madeekoni, unozopira noufu mudiro wokumwa kudai ngomudiro wemangwanani, kudaizve ngomudiro wegwema rakanaka, mudiro unoitwa ngomuriro kunaMambo Mwari. Unozoita mudiro unopishwa ngenguva dzeshe kumibarirwana yenyu pamusiwo wetende romushongano pamberi paMambo Mwari, apo pendinozoshongana newe, kuti ndierekete apo newe. Naapo ndinozoshongana nevana vaIsuraeri; netende rinozocheneswa ngouthende hwangu. Ndinozochenesa tende romushongano nearita; ndinozochenesawo Aroni nevakororo vake, kuti vandishandire mumushando woupristi. Ndinozogara pakati pevana vaIsuraeri, ndiite Mwari wavo. Navo vanozozia kuti ndiri Mambo Mwari, Mwari wavo, uwo wakavabudisa kubva munyika yeEgipite, kuti ndigare pakati pavo. Inini ndiri Mambo Mwari, Mwari wavo. “Unozoita arita rokupishirapo mutombo unegwema rakanaka; unozoriita ngemiti yehlofunga. Urebu hwaro hunozoita masendimitha makumi marongomuna nemashanu, nokupamhama kwaro kunozoita masendimitha makumi marongomuna namashanu rinozoita marupande marongomuna akaedzana; kureba kukwira mudenga kwaro kunozoita masendimitha makumi mapfumbamwe; nyanga dzaro dzinozoita chiro chimwe naro. Unozoriseta ngomukore wakaera, padera paro nemarutii aro kuritendenedza nenyanga dzaro; unozoriitira hata yomukore kuritendenedza. Unozoriitira ndandazi mbiri dzomukore; pashi pehata yaro, kumarutii aro mairi akaparadzana, unozodziita; nadzo dzinozoita ndau dzemipingo yokuritwara ndiyo. Unozoita mipingo yehlofunga, uisete ngomukore. Unozoriisa pamberi pevheri riri pasinde pebhokisi rechitenderano, pamberi pechigaro chenyasha chiri padera pebhokisi rechitenderano, apo pendinozoshongana newe. Aroni unozopishirapo mutombo une gwema rakanaka; mangwanani eshe apo paanonasirira zvibani unozoupisha. Naapo Aroni echibasira zvibani madeekoni, unozoupisha, kuita mutombo unopishwa ngenguva dzeshe pamberi paMambo Mwari metsa kumibarirwana yenyu yeshe. Musazopirapo mutombo wokupisha wakasvipiswa nokuti mudiro wokupisha nokuti mudiro woufu, musazodurura mudiro wokumwa padera paro. Aroni unozoita muripo padera penyanga dzaro kamwe ngegore; nengazi yokuripa yomudiro wokushaisha, unozopira mudiro wokuripa kamwe ngegore metsa kumibarirwana yenyu yeshe; iri yakapindisisa kucheneswa kunaMambo Mwari.” Mambo Mwari wakaereketa kunaMosi echiti, “Naapo wooerenga uwandu hwevana vaIsuraeri, zvino umwe ngaumwe unozopa muripo womweya wake kunaMambo Mwari, apo woovaerenga, kuti nhenda isazoapo pakati pavo, apo woovaerenga. Umwe ngaumwe wakaerengwa; unozopa muripo wakaemeswa, unouremu wechipimo chakaemeswa chepandau yakachena. Munhu weshe unozopa muripo uyu kuita mudiro kunaMambo Mwari. Munhu weshe pane vakaerengwa, kubvira vane makore makumi mairi kuenda mberi, unozopa mudiro kunaMambo Mwari. Vapfumi avazopi zvinopinda, nevarombo avazopi zvishomani, apo voopa mudiro kunaMambo Mwari kuita muripo womweya yenyu. Unozotora mare yomuripo kubva kuvana vaIsuraeri, unozoiemesera kuita mushando wetende romushongano, kuti iite mukarakadziso kuvana pamberi paMambo Mwari kuripira mweya yenyu.” Mambo Mwari wakaereketa kunaMosi echiti, “Unozoitawo chidziyo chethusi nechigadzikiro chacho chethusi chokushambiramwo. Unozochiisa pakati petende romushongano nepaarita, unozoisa mvura mukati mwacho. Aroni nevakororo vake vanozoshambiramwo nyara dzavo netsoka dzavo. Apo voopotera mutende romushongano, vanozoshamba ngemvura, kuti vasazofa, nokuti vookwedzera kuarita kooshanda, kupisha mudiro unoitwa ngomuriro kunaMambo Mwari. Vanozoshamba nyara dzavo netsoka dzavo kuti vasazofa; chinozoita chiemeso chemhera nariini kwavari, kunyazwi kwaari emene nokumibarirwana yake yeshe.” Mambo Mwari wakaereketa kunaMosi echiti, “Torazve makha akapindisisa kunaka, makhirogramu matanhatu emhura inoerera, makhirogramu matatu resinamoni inegwema rakapinda kunaka, makhirogramu matatu ekhane inegwema rakapinda kunaka nekasia makhirogramu matanhatu, eshe anopimwa ngechipimo chakaemeswa chendau yakachena, nemaritha marongomuna emafuta emaorivhi. Newe unozoita ndizvo mafuta akacheneswa okudzodza ndiwo, mutombo unegwema rakanaka; anozoita mafuta okudzodza akacheneswa. Unozodzodza ndiwo tende romushongano, nebhokisi rechitenderano, netafura nezvidziyo zvaro zveshe, nechigadzikiro chechibani nezvidziyo zvacho, nearita rokupishira mutombo unonuhwira, nearita rokupishira mudiro pamwepo nezvidziyo zvaro zveshe, nechidziyo chokushambiramwo nechigadzikiro chacho. Unozozvichenesa kuti zviite zvakapindisisa kuchena; kunyazwi chiinyi chinozozvigwama chinozocheneswa. Unozodzodza Aroni nevakororo vake nokuvachenesa, kuti vandishandire mumushando woupristi. Unozoereketa kune vana vaIsuraeri wechiti, ‘Aya anozoita mafuta angu akacheneswa okudzodza ndiwo kumibarirwana yenyu yeshe. Aazodururwi pamuiri womunhuwo zvake, musazoita anotodzana nawo, kudai ngokukumanidzwa kwawo; nawo anozoita akachena kwouri. Kunyazwi ndiani unozokumanidza akadai ndiwo, nokuti unoisa amweni awo padera pomupara, unozogurwa kubva pakati pevanhu vake.’ ” Mambo Mwari wakati kunaMosi, “Dzitorere mitombo inegwema rakanaka, staketi, naonikha negaribhanumu, mitombo inonuhwira pamwepo nefrankinisensi yakaera; zveshe zvinozoita uremu humwehwo. Newe unozoita ndiwo mutombo une gwema rakanaka, wakanasirwa ngoungwaru hwengwazi yokunasira mitombo, yakarungwa ngomunyu, wakaera nokuchena. Unozotwa umweni wawo kuti umotseke kakurutu, nokuisa umweni wawo pamberi pebhokisi rechitenderano mutende romushongano, apo pendinozoshongana newe; unozoita wakapindisisa kuchena kwouri. Nomutombo une gwema rakanaka wounozoita kudai ngokukumanidzwa kwawo, musazodziitira pachenyu kudaro; kwomuri unozoita wakachena kunaMambo Mwari. Kunyazwi ndiani unozoita wakadai ngouwo, kuti adzinuhwidze gwema rawo, iye unozogurwa kubva pakati pevanhu vake.” Mambo Mwari wakaereketa kunaMosi echiti, “Ringira, ndadaidza ngezina Bhezareri mukororo waUri, mukororo waHuri, wedzinza raJudha; neni ndakamuzadza ngomweya waMwari, muungwaru nokuzwisisa, nomukuzia nomukukona mbeu dzeshe dzemishando, kuronga mishando youngwazi, kushanda ngomukore nesirivha nethusi, kutsetsa mapuwe okuemesa, nokutsetsa miti, yembeu dzeshe dzemishando. Ringira, ndaemesa pamwepo naye Ohoriabhi, mukororo waAhisamakhi, wedzinza raDhani; nomumwoyo mwaavo veshe vakangwara ndakaisa ungwaru, kuti vaite zveshe zvendakupanga: Tende romushongano, nebhokisi rechitenderano, nechigaro chenyasha chiri padera paro, nezvidziyo zveshe zvetende, netafura nezvidziyo zvaro, nechigadzikiro chechibani chakaera nezvidziyo zvacho zveshe, nearita rokupishira mutombo, unegwema rakanaka, nearita romudiro wokupisha nezvidziyo zvaro zveshe, nechidziyo chokushambiramwo nechigadzikiro chacho, nezvokusimira zvakanasa kurukwa, nezvokusimira zvakacheneswa zvaAroni mupristi nezvevakororo vake, zvokusimira vechishanda mushando woupristi, nemafuta okudzodza ndiwo, nomutombo wokupisha unegwema rakanaka wendau yakachena. Vanozoita kudai ndizvo zveshe zvendakupanga.” Mambo Mwari wakaereketa kunaMosi echiti, “Ereketazve kunevana vaIsuraeri wechiti, ‘Ngegwinyiso munozongwarira maSabatha angu, ngokuti chioniso chiri pakati pangu nemwi kumibarirwana yenyu yeshe, kuti muzie kuti inini ndini Mambo Mwari unomuchenesa. Ndizvo munozongwarira Sabatha, ngokuti rakachena kwomuri; munhu weshe usakazoringwariri ngegwinyiso unozourawa; kunyazwi ndiani unozoshanda ngeiro zuva, mweya uwo unozourawa kubva pakati pevanhu vake. Munozoshanda mazuva matanhatu, asi ngezuva rechinomwe iSabatha rokuzorora, rakachena kunaMambo Mwari; kunyazwi ndiani unozoshanda nokuti ngouri mushando ngezuva reSabatha ngegwinyiso unozourawa. Ndizvo vana vaIsuraeri vanozongwarira Sabatha, varingwarire Sabatha nokumibarirwana yavo yeshe, kuita chitenderano chariini nariini. Chioniso pakati pangu nevana vaIsuraeri chariini nariini; ngokuti ngemazuva matanhatu Mambo Mwari wakaita denga nenyika, ngezuva rechinomwe wakazorora, wakagwinyiswa.’ ” Naye wakapa kunaMosi, apo aiya apedza kuereketa naye padera poMutunhu weSinai, marusamba mairi echapupu, marusamba emapuwe akanyorwa ngechinwe chaMwari. Naapo vanhu vaona kuti Mosi wanonoka kudzaka kubva pamutunhu, vanhu vakaungana pana Aroni, vakati kwaari, “Miruka, utiitire zvimwari, zvinozohamba pamberi pedu; ngokuti ngendaa youyu Mosi, munhu wakatibudisa kubva kunyika yeEgipite, atizii zvaitika kwaari.” Aroni wakati kwavari, “Torai ndandazi dzomukore dziri munzee dzevakadzi venyu, dzevakororo venyu nedzevanasikana venyu, mudziunze kwendiri.” Vanhu veshe vakatora ndandazi dzomukore dzaiya munzee dzavo, vakadziunza kunaAroni. Naye wakaashira mukore kubva kunyara dzavo, akaita muemo ndiwo, wekonyana rakaumbwa ngomukore wakanyunguruswa. Navo vakati, “Izvi ndizvo zvimwari zvenyu, A Isuraeri, izvo zvakamubudisa kubva kunyika yeEgipite.” Naapo Aroni aona izvi, wakaaka arita pamberi paro; naAroni wakadaidzira, akati, “Mangwani rinozoapo dhiri kunaMambo Mwari.” Vakafumira remangwanani kumiruka, vakapira midiro yokupisha nokuunza midiro yokuiyanisa; nevanhu vakagara pashi kudya nokumwa, vakamiruka kutamba. Mambo Mwari wakati kunaMosi, “Enda, dzaka pashi; ngokuti vanhu vako vowakabudisa kubva kunyika yeEgipite vadzishaishira. Vakasira kupauka kubva kunjira yendakavapanga; vadziitira konyana rakaumbwa ngomukore wakanyunguruswa, varidira nokupira mudiro kweriri vechiti, ‘Izvi ndizvo zvimwari zvenyu, A Isuraeri, zvakamubudisa kubva kunyika yeEgipite.’ ” Mambo Mwari wakati kunaMosi, “Ndakaona ava vanhu, wona, vanhu vane mitsipa yakakukutara. Zvino ndirekere, kuti ushungu hwangu hubake padera pavo, ndivapedze; asi ndiwe ndinozoita dzinza guru.” Mosi wakapota kunaMambo Mwari, Mwari wake, akati, “Mambo Mwari, ushungu hwako hunobaka ngenyi kurwisana navanhu vako, avo vowakabudisa kubva kunyika yeEgipite ngesimba gurutu ngenyara ine simba? VaEgipite vanozoereketa ngenyi vechiti, ‘Mukushaisha wakavabudisa kuti avauraye pamitunhu nokuvapedza kubva padera pehope yenyika?’ Kunukuka kubva kuushungu hwako hunotyisa, utenderuke kubva mune uku kushata kuvanhu vako. Karakadza Abrahama, Isaka naIsuraeri varanda vako, vowakadzipikira kwavari wemene, wakati kwavari, ‘Ndinozowanza mibarirwana yenyu kuti idai ngenyeredzi dzomudenga, neiyi nyika yeshe yendakagondisa, ndinozoipa kumibarirwana yenyu, vanozoigara nhaka riini nariini.’ ” Mambo Mwari wakatenderuka ngendaa yokushata kwaaipinimidza kuzoita kune vanhu vake. Mosi wakakunukuka, akadzaka pashi kubva pamutunhu, ane marusamba mairi echitenderano munyara dzake; marusamba aiya akanyorwa kumarutii awo mairi; kurutii rumwe nokurutii rumweni aiya akanyorwa. Nemarusamba aiya mushando waMwari, nokunyorwa kwaiya kunyora kwaMwari, rwakanangurwa padera pemarusamba. Naapo Joshua azwa bope revanhu apo vechidaidzira, wakati kunaMosi, “Riripo bope rokurwa mumatende.” Naye wakati, “Andiropi bope raavo vanodaidzira ngokunyisa, nokuti raavo vanochema ngokunyiswa; asi ibope raavo vanoemba rendinozwa.” Naapo akwedzera kumatende, wakaona konyana nokuzvina; ushungu hwaMosi hwakabaka, naye wakakandira pashi marusamba kubva munyara dzake, akaaputsa pashi pemutunhu. Wakatora konyana revaiya vaita, akaripisha ngomuriro, akarikuya kuita bukuta, akaisa bukuta padera pemvura, akaita kuti vana vaIsuraeri vamwe mvura yacho. Mosi wakati kunaAroni, “Vanhu ava vakaitenyi kwouri kuti uunze chishaishi chikuru padera pavo?” Aroni wakati, “Musaita kuti ushungu hwamambo wangu hubake; unozia vanhu kuti vanorovedzera kuita zvakashata. Ngokuti vakati kwendiri, ‘Tiitire zvimwari zvinozotungamira pamberi pedu; ngokuti ngendaa yaMosi uyu, munhu wakatibudisa kubva kunyika yeEgipite, atizii zvakaitika kwaari.’ Neni ndakati kwavari, ‘Kunyazwi ndiani unomukore, ngaautore; ndizvo vakapa kwendiri, ndakaukandire mumuriro, mukabuda iri konyana.’ ” Naapo Mosi aona kuti vanhu vaiya vapauka, ngokuti Aroni wakavatendera kupauka kuti vatsverudzwe pakati pemagaa avo, zvino Mosi wakaema pamusiwo wematende, akati, “Ndiani unorwira Mambo Mwari? Ngaauye kwendiri.” Nevakororo veshe vaRevhi vakadziunganidza kwaari. Wakati kwavari, “Unoronza izvi Mambo Mwari, Mwari waIsuraeri, ‘Munhu weshe ngaapakatire shoti yake panhunji yake, aende apo naapo kubva kuchimana kuenda pachimana mutende, auraye munhu weshe mungani wake, nomunhu weshe muakirwana wake.’ ” Vakororo vaRevhi vakaita kudai ngeizwi raMosi; kwakaurawa ngeiro zuva vanhu vanoda kuita makumi emazana matatu (3,000). Mosi wakati, “Mwadzipira nyamashi kuita mushando waMambo Mwari, eya, munhu weshe arwisane nomukororo wake nehama yake, kuti afumise nyamashi.” Mangwani mangwanani Mosi wakati kunevanhu, “Mwashaisha chishaishi chikuru. Zvino ndinozokwira kunaMambo Mwari; pamweni ndingaita muripo wechishaishi chenyu” Ndizvo Mosi wakahwirira kunaMambo Mwari, akati, “Haiwa, vanhu ava vashaisha chishaishi chikuru; vakadziitira zvimwari zvomukore. Asi, zvino, kudai mwechivakungurira chishaishi chavo; kani kudai musikaiti, ndinomupota, nditsukutidzei kubva mubhuku renyu remwakanyora.” Mambo Mwari wakati kunaMosi, “Kunyazwi ndiani wakandishaishira, ndiye wendinozotsukutidza kubva mubhuku rangu. Asi zvino enda, utungamirire vanhu kuenda kundau yendakaereketa kwouri ndiyo; ringira, ngirosi yangu inozotungamira pamberi pako. Asi zvakanyadaro ngezuva rendinozohambira, ndinozounzidzira chishaishi chavo padera pavo.” Mambo Mwari wakaunza nhenda padera pevanhu ngokuti vakaita konyana rakaitwa ndiAroni. Mambo Mwari wakaereketa kunaMosi, “Ibva pano, enda, kwira, iwewe nevanhu vowakabudisa kubva muEgipite, muende kunyika yendakapikira Abrahama, Isaka naJakobe ndechiti, ‘Ndinozoipa kumibarirwana yenyu.’ Ndinozotuma ngirosi pamberi pako; ndinozodzinga vaKhenani, vaAmori, vaHiti, vaPherizi, vaHivhi nevaJebhusi. Kwirai kunyika inoerera mukaka nouchi; asi inini andizokwiri ndiri pakati penyu ngokuti ndinozomupedza munjira, ngokuti muri vanhu vane mitsipa yakakukutara.” Naapo vanhu vazwa mashoko aya akashata, vakabonda: apana munhu wakasimira zvinemeso zvake. Ngokuti Mambo Mwari wakati kunaMosi, “Ronza kuvana vaIsuraeri kuti, ‘Muri vanhu vane mitsipa yakakukutara; kudai ndikahamba kukwira ndiri pakati penyu kanguva kadoko, ndinozomupedza. Ndizvo zvino bvisai zvinemeso zvenyu, kuti ndizie chokuita ndimwi.’ ” Ndizvo vana vaIsuraeri vakadzidusira zvinemeso zvavo kubvira vari paMutunhu Horebhi. Zvino Mosi waisitora tende echiriemesa ngokubanze kwematende, kuretu nematende; akaridudza kuti, “Tende romushongano.” Munhu weshe waitsvaka Mambo Mwari waibuda kuenda kutende romushongano, raiya kubanze kwematende. Zvino Mosi abuda kuenda mutende, vanhu veshe vakamiruka vakaema, munhu weshe pamusiwo wetende rake, vakaringira Mosi metsa akapotera mutende. Naapo Mosi apotera mutende, sika yegore yaizodzaka nokuema pamusiwo wetende, naMambo Mwari waizoereketa naMosi. Naapo vanhu veshe vakaona sika yegore yechiema pamusiwo wetende, vanhu veshe vaizomiruka nokudira, munhu weshe ari pamusiwo wetende rake. Mambo Mwari waiereketa kunaMosi hope kuhope, kudai ngomunhu unoereketa kunemungani wake. Naapo Mosi paakakunukukazve kupotera mukampa; muranda wake Joshua, mukororo waNuni, jaha, aazi kubuda kubva mutende. Mosi wakati kunaMambo Mwari, “Wona, unoti kwendiri, ‘Kwira uunze ava vanhu;’ asi auzi kundiziisa uwo wounozotuma neni. Asi wakati, ‘Ndinokuzia ngezina rako, newe wakaonazve nyasha mukuona kwangu.’ Ndizvo zvino, ndinokupota, kudai ndaona nyasha mukuona kwako, ndiziise zvino njira dzako, ndikuzie, kuti ndione nyasha mukuona kwako. Karakadzazve kuti dzinza iri vanhu vako.” Wakati, “Kuapo kwangu kunozohamba newe, neni ndinozokupa kuzorora.” Wakati kwaari, “Kudai kuapo kwako kusikazohambi neni, usazotikwidza kubva pano. Ngokuti zvino kunozoziikanwa ngenyi kuti ndakaona nyasha mukuona kwako, inini nevanhu vako? Andikwo kuti unohamba nesu here, kuti kuapo mupauko, inini nevanhu vako kubva kune vanhu veshe vari padera pehope yenyika?” Mambo Mwari wakati kunaMosi, “Chiro ichi chewakaereketa ndicho ndinozochiita; ngokuti wakaona nyasha mukuona kwangu, neni ndinokuzia ngezina rako.” Naye wakati, “Ndionise, ndapota, uthende hwako.” Wakati, “Ndinozoita kuti kunaka kwangu kweshe kupinde pamberi pako; ndinozodaidzira pamberi pako zina raMambo Mwari; ndinozomuitira nyasha uwo wendinoda kuitira nyasha, ndinozoonisa nyasha kwaari wendinoda kuonisa nyasha.” Asi, wakati, “Aungakoni kuona hope yangu; ngokuti akuna munhu ungandiona, akapona.” Mambo Mwari wakati, “Ringira, iripo ndau pasinde pangu, pounozoema padera pebuwe. Naapo uthende hwangu hwechipinda, ndinozokuisa murutwe rwebuwe, neni ndinozokufukidza ngenyara yangu metsa ndapinda. Zvino ndinozodusa nyara yangu, newe unozoona mushana wangu; asi hope yangu aizoonekwi.” Mambo Mwari wakati kunaMosi, “Tsetsa marusamba mairi emapuwe akadai ngeokutanga; neni ndinozonyora pamarusamba mazwi aiya pamarusamba okutanga, ewakaputsa. Udzinasirire mangwanani, ukwire mangwanani kuMutunhu weSinai, udziemese pamberi pangu padera pomutunhu. Apana munhu unozokwira newe, usatendera munhu kuti azooneka kumutunhu weshe; makwai nekuti n'ombe zvisazofura pamberi pouwo mutunhu.” Ndizvo Mosi wakatsetsa marusamba mairi emapuwe akadai ngeokutanga; naye wakafumira kumiruka mangwanani akakwira Mutunhu weSinai, kudai ngezvaakamupanga Mambo Mwari, wakatora marusamba mairi munyara dzake. Mambo Mwari wakadzaka ari mumvumi, akaemapo naye, akadaidzira zina raMambo Mwari. Mambo Mwari wakapinda ngepamberi pake, wakadaidzira echiti, “Mambo Mwari, Mambo Mwari, Mwari, wakazara ngokukungurira nenyasha, unononoka kutseneka, unowanza rudo negwinyiso. Unongwarira nyasha dzine rudo kune makumi emazana, unokungurira kushata, kupauka nokushaisha; uwo usikapembedzi vane ndaa, echiunzidzira kushata kwemadzibaba padera pevana nepadera pevana vevana, metsa padera pomubarirwana wechitatu nepewechirongomuna.” Mosi wakakasira, akatsikitsira soro rake pamavhu, akadira. Wakati, “Zvino, kudai ndaona nyasha mukuona kwako, A Mambo Mwari, ndapota, hambai pakati pedu. Kunyazwi vanhu vane mitsipa yakakukutara, ukungurire kushata kwedu nokushaisha kwedu, utitore kuita nhaka yako.” Naye wakati, “Ringira, ndinoita chitenderano. Pamberi pevanhu vako veshe ndinozoita zvishamiso, zvisikazi kumboitwa zvakadaro munyika mweshe, nokuti kuneiri dzinza; nevanhu veshe vouri pakati pavo vanozoona mushando waMambo Mwari, ngokuti chiri chiro chinotyisa chendinozoita newe. “Ngwarira izvo zvendinokupanga nyamashi. Ringira ndinozodzinga kubva pamberi pako vaAmori, vaKhenani, vaHiti, vaPherizi, vaHivhi nevaJebhusi. Ngwara kuti usazoita chitenderano nevagari venyika younoenda kweiri, kuti chisazoita murau pakati pako. Asi unozoputsa maarita avo, upwanye sika dzavo, unozotemera pashi miedzaniso yavo yokudira yaashera wavo; ngokuti usazodira zvimwari zvimweni: ngokuti Mambo Mwari uwo zina rake ndiNdurumwa, ndiMwari une ndurumwa. Usazoita chitenderano nevagari venyikayo, ngokuti naapo voohura ngokuteera zvimwari zvavo nokupira mudiro kuzvimwari zvavo, noumwe wavo unozomukoka, nemwi munozodya mudiro wake nemwi munozotora vanasikana vavo kuroodza vakororo venyu, nevanasikana vavo vanodzihurisa kuzvimwari zvavo vanozoita kuti vakororo venyu vaitewo vahuri kuzvimwari zvavo. “Usazodziitira zvimwari zvakanyunguruswa. Unozongwarira mushongano wokudya chingwa chisina mumera. Unozodya chingwa chisina mumera mazuva manomwe kudai ngezvendakakupanga, ngomukuwo wakaemeswa ngomwedzi Abhibhi: ngokuti ngomwedzi Abhibhi ndiwo womwakabuda ndiwo kubva Egipite. “Eshe matangwe ngaangu; nezvifuyo zvako zveshe zviri zvemikono, matangwe en'ombe neemakwai. Nedangwe rembongoro unozoriripira ngegwai: usikariripiri, unozogura mutsipa waro. Unozoripira eshe matangwe evakororo vako. Akuna naumwe unozouya pamberi pangu asina chiro. “Unozoshanda mazuva matanhatu, asi ngezuva rechinomwe unozozorora; ngomukuwo wokurima nowokucheka unozozorora. Newe unozongwarira dhiri remavhiki, ndiro rokucheka koroni, rokuunganidza koroni ngokupera kwegore. Katatu ngegore vamuna venyu veshe vanozooneka pamberi paMambo Mwari, Mwari waIsuraeri. Ngokuti ndinozodzinga madzinza kubva pamberi pako, ndikudze migano yako; akuna munhu unozoemura nyika yako apo wookwira kuoneka pamberi paMambo Mwari, Mwari wako, katatu ngegore. “Usazopira ngazi yomubairo wangu pamwepo nechingwa chinomumera; nokuti mubairo wedhiri rePhasika auzosiiwi metsa mangwanani. Unozounza yokutanga yemichero yemitanguro yeminda yenyu kumhatso yaMambo Mwari, Mwari wenyu. Usazobika chimbudzana mumukaka wamai acho.” Mambo Mwari wakati kunaMosi, “Nyora aya mazwi; ngokuti kudai ngokuteererana kwaaya mazwi ndaita chitenderano newe naIsuraeri.” Naye waiyapo naMambo Mwari mazuva makumi marongomuna nousiku makumi marongomuna; aazi kudya chingwa nokuti kumwa mvura. Wakanyora pamarusamba mazwi echitenderano, mipango gumi. Naapo Mosi adzaka kubva paMutunhu weSinai, ane marusamba mairi echitenderano munyara yake, aazi kuzia kuti ganda rehope yake rakan'anikira ngokuti waiya echiereketa naMwari. Naapo Aroni nevana veshe vaIsuraeri vaona Mosi, wona, ganda rehope yake rakan'anikira; navo vakatya kukwedzera kwaari. Asi Mosi wakadaidzira kwavari; naAroni nevakuru veshe vembungano vakahwirira kwaari naMosi wakaereketa kwavari. Ngesure kwazvo vana vaIsuraeri veshe vakakwedzera pasinde: wakavapa ngokupanga zveshe zvaakaereketa naye Mambo Mwari paMutunhu weSinai. Naapo Mosi apedza kuereketa navo, wakaisa vheri padera pehope yake. Asi apo Mosi apotera pamberi paMambo Mwari kuereketa naye, waidusa vheri, metsa abudemwo; naapo akabuda nokuronzera vana vaIsuraeri izvo zvaakapangwa. Vana vaIsuraeri vakaona hope yaMosi, kuti ganda rehope yaMosi rain'anikira, naMosi wakafukidzazve hope yake ngevheri, metsa apotera kuereketa naye. Mosi wakaunganidza mbungano yeshe yevana vaIsuraeri, akati kwavari, “Izvi ndizvo zviro zvaakapanga Mambo Mwari kuti muzviite. Mazuva matanhatu munozoshanda, asi ngezuva rechinomwe rinozoita kwomuri zuva rakacheneswa, Sabatha rokuzorora kunaMambo Mwari; kunyazwi ndiani unozoita mushando ngeiro zuva unozourawa. Musazobasa muriro muugaro hwenyu hweshe ngezuva reSabatha.” Mosi wakaereketa kumbungano yeshe yevana vaIsuraeri echiti, “Ichi ndicho chiro chaakapanga Mambo Mwari. Torai kubva pakati penyu zvipo zvokuita mudiro kunaMambo Mwari; kunyazwi ndiani uno mwoyo unenyasha, ngaaunze zvipo: mukore sirivha nethusi; zvakarukwa zvakasvipirika, zvakatsvukuruka, zvakatsvuka, zvakarukwa ngerukangaza rwakanaka, nezvemamviri embudzi; matoo emagondohwe akatsvukiswa nematoo emadenhe, mapuranga ehlofunga; mafuta ezvibani nemaka emafuta okudzodza neomutombo wokupisha une gwema rakanaka; mapuwe eonikisi, nemapuwe omunemo eefodhi, neechokungwarira diti. “Nomwamuna weshe uri ngwazi wakangwara pakati penyu ngaauye nokuita zveshe zvaakapanga Mambo Mwari: thabhenakeri, tende raro nechifukidziro charo, zvikoreko zvaro, mapuranga aro, mwamba yaro, sika dzaro nemagadzikiro aro; bhokisi rechitenderano nemipingo yaro, chigaro chenyasha nevheri rokusitira; tafura nemipingo yaro nezvidziyo zvaro zveshe, nezvingwa zvokuonisa; nechigadzikiro chechibani chokujekisa nezvidziyo zvacho nezvibani zvacho nemafuta ezvibani zvokujekisa; arita rokupishira mutombo nemipingo yaro, mafuta okudzodza nomutombo wokupisha une gwema rakanaka, jira rokusitira pamusiwo, pamusiwo wethabhenakeri; arita rokupishira mudiro nejira rechisitiro charo chethusi, mipingo yaro nezvidziyo zvaro zveshe, chidziyo chokushambiramwo nechigadzikiro chacho; machira okusitira ndiwo oruwanze nesika dzawo nezvigadzikiro zvadzo, machira okusitira ndiwo epamusiwo weruwanze; hoko dzethabhenakeri nehoko dzoruwanze nemapote adzo; zvokusimira zvakanasa kurukwa, zvokusimira mumushando wendau yakachena, zvokusimira zvakachena zvaAroni mupristi nezvokusimira zvevakororo vake, vechishanda mushando woupristi.” Zvino yeshe mbungano yevana vaIsuraeri yakapararira kubva kunaMosi. Navo vakauya, munhu weshe wakasundwa ngomwoyo wake, nomunhu weshe wakasundwa ngomweya wake kuti atende, vakaunza zvipo kunaMambo Mwari, zvomushando wetende romushongano, nomushando waro weshe, nowokunasira zvokusimira zvakacheneswa. Ndizvo vakauya, veshe vamuna nevakadzi; avo veshe vaiya nomwoyo unenyasha, vakaunza zvipeneti zvakanemeswa, mativera, ndandazi dzomunzee, mubeda nezvinemeso, zveshe zvaiya zvinemeso zvomukore. Munhu weshe uwo wakapa zvipo zvomukore zvakazunguzirwa kunaMambo Mwari. Nomunhu weshe wakaoneka anemachira akasvipirika, akatsvukuruka, akatsvuka, neorukangaza rwakanaka, emamviri embudzi, matoo akatsukiswa emagondohwe, matoo akatsukiswa emagotokoto nematoo emadenhe, vakazviunza. Munhu weshe wakapa zvipo zvesirivha nokuti zvethusi wakaunza zvipo zvaMambo Mwari; munhu weshe waiya nemapuranga ehlofunga aikona kushandiswa mumushando, wakaaunza. Nevakadzi veshe vaiya ngwazi dzokuruka vakaruka ngenyara dzavo, vakaunza izvo zvevakaruka, zvakasvipirika, zvakatsvukuruka, zvakatsvuka, nezvorukangaza rwakanaka. Vakadzi veshe vakasundwa mumwoyo yavo ngoungwazi, vakaruka mamviri embudzi. Nevakuru vakaunza mapuwe eonikisi nemapuwe omunemo eefodhi, neokuisa pachokungwarira diti, mitombo inonuhwira, nemafuta ezvibani, nemafuta okudzodza, neomutombo wokupisha unegwema rakanaka. Veshe vamuna nevakadzi, vana vaIsuraeri, vakasundwa ngomwoyo yavo vakaunza zvipo zvomushando waakapanga Mambo Mwari kubudikidza ndiMosi kuti uitwe, vakazviunza ngomwoyo inoda kunaMambo Mwari. Zvino Mosi wakati kuvana vaIsuraeri, “Ringirai, Mambo Mwari wakadaidza ngezina Bhezareri mukororo waUri, mukororo waHuri, wedzinza raJudha. Wakamuzadza ngomweya waMwari, unoungwazi hwokuita, kuzwisisa, kuzia nokuita mbeu dzeshe dzemishando, nokuronga mishando youngwazi, mukushanda ngomukore, sirivha nethusi, mukucheka mapuwe omunemo, nomukutsetsa miti, kushanda mbeu dzeshe dzemishando youngwazi. Naye wakamufemera kuti adzidzise, veshe iye naOhoriabhi, mukororo waAhisamakhi, wedzinza raDhani. Wakavazadza ngoungwaru hwokukona, kushanda mbeu dzeshe dzemishando, wokunangura, newoungwazi, newomunemesi wezvakasvipirika, zvakatsvukuruka, zvakatsvuka, zvorukangaza zvakanaka, newomuruki, nowaavo vanoita mushando nokuti ngouri, nowaavo vanoronga mishando youngwazi. “Bhezareri naOhoriabhi nomunhu weshe unoungwaru, mwaari Mambo Mwari wakaisa ungwaru nokuzwisisa kuzia njira yokushanda mishando yeshe yendau yakachena, vanozoshanda kudai ndizvo zveshe zvaakapanga Mambo Mwari.” Mosi wakadaidza Bhezareri naOhoriabhi, nomunhu weshe unoungwaru, mwaari Mambo Mwari waakaisa ungwaru hwokukona kuita, munhu weshe wakasundwa ngomwoyo wake, kuuya kumushando nokuuita. Vakaashira kubva kunaMosi zvipo zveshe zvakaunzwa ngokuda ngevana vaIsuraeri zvokuita mushando wendau yakachena. Vakaangirira kuunza kwaari zvipo zvokupa ngokuda mangwanani eshe. Ndizvo vanhu veshe vakangwara vakashanda mushando weshe wendau yakachena, vakauya munhu weshe kubva kumushando wake waaiya echiita, navo vakati kunaMosi, “Vanhu vanounza zvakanyanya kuwanda kupinda zvinodikanwa kuita mushando, waakatipanga Mambo Mwari kuita.” Mosi wakapa mupango, navo vakauteketesa mumatende vechiti, “Mwamuna nokuti mukadzi asachaunza zvipo zvomushando wendau yakachena.” Ndizvo vanhu vakapingwa kuti vasachaunza; ngokuti zvipo zvevaiya vaanazvo zvaikwana mushando weshe kuuita nezvakanyanya kuwanda. Vanhu veshe vakangwara pakati pavo vaiita mushando vakaita thabhenakeri rine machira okusitira gumi orukangaza rwakanaka, rwakakoshwa, akasvipirika, akatsvukuruka, akatsvuka; wakaemesa ngemakherubhi, mushando wengwazi. Urebu hwejira rimwe ngarimwe hwaiya hwakaedzana, mamitha gumi namairi, noupamhu hwejira rimwe ngarimwe hwaiya mamitha mairi; machira okusitira eshe aiya nechipimo chimwecho. Naye wakasungira machira mashanu pamwepo rimwe pane rimweni, neamweni machira mashanu wakaasungira rimwe pane rimweni. Wakaita magangiro ezvakarukwa zvakasvipirika pamupendero wejira rimwe rokupedzisira reakasungirwa pamwepo okutanga; wakaitazve kudaro pamupendero wejira rokupedzisira kubanze reakasungirwa pamwepo echipiri. Wakaita magangiro makumi mashanu pajira rimwe, naye wakaita magangiro makumi mashanu pajira rokubanze reakasungirwa pamwepo echipiri; magangiro aiya akaringirana rimwe kune rimweni. Wakaita zvikoreko makumi mashanu zvomukore, akasunganidza machira rimwe pane rimweni ngezvikoreko; ndizvo thabhenakeri rakaita rimwero. Wakaita machira okusitira ngemavhiri embudzi, emutende padera pethabhenakeri; wakaita machira gumi narimwe. Urebu hwejira rimwe ngarimwe hwaiya hwakaedzana mamitha gumi namatatu, noupamhu hwejira rimwe ngarimwe hwaiya mamitha mairi; machira gumi narimwe aiya nechipimo chimwecho. Wakasungira machira mashanu ega, nemachira matanhatu ega. Wakaita magangiro makumi mashanu pamupendero wejira rokupedzisira reakasungirwa pamwepo okutanga, wakaitazve magangiro makumi mashanu pamupendero wejira rokupedzisira reakasungirwa pamwepo echipiri. Wakaita zvikoreko makumi mashanu zvethusi zvokusunganidza tende pamwepo, kuti riite chiro chimwe. Naye wakaita chifukidziro chetende ngematoo emagondohwe akatsvukiswa, nechifukidziro chematoo emadenhe ngepadera. Wakaita sika dzehlofunga dzokuemesa. Urebu hwesika imwe ngaimwe hwaiya mamitha marongomuna, noupamhu hwesika imwe ngaimwe hwaiya masendimitha makumi matanhatu namatanhatu. Sika imwe ngaimwe yaiya nemhanda mbiri, dzokurimbanidza ndidzo imwe pane imweni; wakaita izvi pasika dzeshe dzethabhenakeri. Wakaita sika dzethabhenakeri; sika makumi mairi orutii rwokubani; naye wakaita zvigadzikiro zvesirivha makumi marongomuna pashi pesika makumi mairi; zvigadzikiro zviiri pashi pesika imwe nemhanda dzayo mbiri, zvigadzikiro zviiri pashi pesika imweni nemhanda dzayo mbiri. Kurutii rwethabhenakeri, kurupande rwedera, wakaita sika makumi mairi, nezvigadzikiro zvadzo zvesirivha makumi marongomuna; zvigadzikiro zviri pashi pesika imwe, nezvigadzikiro zviiri pashi pesika imweni. Kurupande rwesure rwethabhenakeri ngokumabirirazuva wakaita sika nhanhatu. Wakaita sika mbiri dzepamakhona ethabhenakeri kurupande rwesure. Nawo aiya akaparadzana ngepashi, asi akabatana padera, pandandazi yokutanga; ngokudaro wakaita mairi awo emakhona mairi. Dzaiyapo sika sere, nezvigadzikiro zvadzo zvesirivha; zvaiyapo zvigadzikiro gumi nazvitanhatu; pashi pesika imwe ngaimwe paiya nezvigadzikiro zviiri. Wakaita marukasha mashanu omuhlofunga, mashanu esika dzorupande rumwe rwethabhenakeri, nemarukasha mashanu esika dzorupande rumweni rwethabhenakeri nemarukasha mashanu esika dzethabhenakeri dzorupande rwesure kumabirira-zuva. Wakaita rukasha rwepakati kuti rupinde ngepakati pesika kubva pamagumo amwe kuguma pamagumo amweni kuenda pakati pesika. Wakaseta sika ngomukore, akaita ndandazi dzadzo ngomukore kuita panobata ndipo marukasha, akaseta marukasha ngomukore. Wakaita vheri ngemachira akasvipirika, akatsvukuruka, akatsvuka akarukwa, ngorukangaza rwakanaka rwakakoshwa; wakarinemesa ngemakherubhi, mushando wengwazi. Naye wakariitira sika murongomuna dzehlofunga, akadziseta ngomukore; nezvikoreko zvadzo zvaiya zvomukore; wakadziumbira zvigadzikiro zvirongomuna zvesirivha. Wakaita machira okusitira epamusiwo petende, ngemachira akasvipirika, akatsvukuruka, akatsvuka, akarukwa ngorukangaza rwakanaka rwakakoshwa, mushando womunemesi; nesika dzawo shanu nezvikoreko zvadzo. Wakaseta zvipanda zvadzo nezvinemeso zvadzo ngomukore; asi zvigadzikiro zvadzo zvishanu zvaiya zvethusi. Bhezareri wakaita bhokisi rechitenderano ngomuti wehlofunga; urebu hwaro hwaiya masendimitha zana negumi rimwe, upamhu hwaro hwaiya masendimitha makumi matanhatu namatanhatu nokuturama kwaro kwaiya masendimitha makumi matanhatu namatanhatu kukwira mudenga. Wakariseta ngomukore wakaera, mukati nokubanze, akaita hata kuritendenedza. Naye wakariumbira ndandazi murongomuna dzomukore, mumirenje mirongomuna yaro; ndandazi mbiri kurutii rumwe rwaro nendandazi mbiri kurutii rumweni rwaro. Wakaita mipingo yehlofunga, akaiseta ngomukore. Wakapinza mipingo mukati mwendandazi dziri pamarutii ebhokisi rechitenderano, kuritwara ndiyo. Wakaita chigaro chenyasha ngomukore wakaera; urebu hwacho hwaiya masendimitha zana negumi rimwe, noupamhu hwacho hwaiya masendimitha makumi matanhatu namatanhatu. Wakaita makherubhi mairi ngomukore wakapfurwa, wakaaisa kumagumo mairi echigaro chenyasha, kherubhi rimwe kumagumo amwe, nekherubhi rimweni kumagumo amweni; wakaarimbanidza kuita chiro chimwe nechigaro chenyasha, wakaisa makherubhi kumarutii acho mairi. Makherubhi akatambanudza maphaphiro awo mudenga, echithibikira padera pechigaro chenyasha ngemaphaphiro awo, nehope dzawo dzakaringirana rimwe kunerimweni; hope dzemakherubhi dzakaringira kuchigaro chenyasha. Wakanasirawo tafura ngomuti wehlofunga; urebu hwaro hwaiya masendimitha makumi masere nemasere, noupamhu hwaro hwaiya masendimitha makumi marongomuna namarongomuna nokuturama kwaro kwaiya masendimitha makumi matanhatu namatanhatu kukwira mudenga. Naye wakariseta ngomukore wakaera, akariitira hata yomukore kuritendenedza. Wakaitira rukasha rwakadai ngenyara kupamhama, kuritendenedza, akaita hata yomukore padera perukasha kurutendenedza. Wakauumbira ndandazi murongomuna dzomukore, akadziisa pamakhona marongomuna awo padera pemirenje mirongomuna yaro. Ngepasinde perukasha paiya nendandazi, dzokutwarisa ndidzo ngemipingo yokutwara tafura. Wakaita mipingo ngomuti wehlofunga, akaiseta ngomukore, yokutwara ndiyo tafura. Wakaita zvidziyo zvokugadzika padera petafura, ndiro dzaro, nemikheyo yaro, nemikangasi yaro, netsani dzaro dzokudurura ndidzo, zvaiya zvomukore wakaera. Wakaita chigadzikiro chechibani ngomukore wakaera. Chigadzikiro nechibato chakaitwa ngomukore wakapfurwa; netsani dzacho, chibato chacho nemashakani acho zvakaita chiro chimwecho. Dzaiyapo mhanda nhanhatu dzaibuda kubva kumarutii acho; mhanda nhatu dzaibuda kurutii rumwe rwacho, nemhanda nhatu dzaibuda kurutii rumweni rwacho; tsani nhatu dzakaumbwa kudai ngemaruva earimondi pamhanda imwe nefundo nemaruva; tsani nhatu dzaiya pamhanda imweni, dzakaumbwa kudai ngemaruva earimondi, nefundo nemaruva; ndizvo mhanda nhanhatu dzaibuda kubva kuchigadzikiro chechibani. Muchigadzikiro chechibani dzaiyapo tsani murongomuna dzakaumbwa kudai ngemaruva earimondi, nemafundo adzo nemaruva adzo. Fundo pashi pematai mairi rakabuda kwechiri, nefundo pashi pematai mairi rakabuda kwechiri, nefundo pashi pematai mairi rakabuda kwechiri. Mafundo azvo nemhanda dzazvo zvaiya zvakarimbana nacho; cheshe chaiya chiro chimwe chakapfurwa ngomukore wakaera. Wakaita zvibani zvacho zvinomwe, nembato dzacho, nendiro dzokudusira marota, dzomukore wakaera. Wakachiita nemidziyo yacho yeshe yetarenta romukore wakaera. Wakaita arita rokupishira mutombo unegwema rakanaka ngomuti wehlofunga; urebu hwaro hwaiya masendimitha makumi marongomuna namarongomuna, nokupamhama kwaro kwaiya masendimitha makumi marongomuna namarongomuna, raiya namarupande marongomuna akaedzana; nokuturama kwaro kwaiya masendimitha makumi masere nemasere; nyanga dzaro dzaiya dzechigurwa chimwe chakarimbana naro. Wakariseta ngomukore wakaera, padera paro, nemarutii aro kuritendenedza, nenyanga dzaro; naye wakaita hata yomukore kuritendenedza. Wakaita ndandazi mbiri dzomukore ngepashi pehata yaro, padera pemarutii mairi aro akapesana, kuita pokuritwara ndipo ngemipingo. Wakaita mipingo yomuti wehlofunga, akaiseta ngomukore. Wakaita mafuta akacheneswa okudzodza, nomutombo wokupisha wakaera wakabvengedzwa inegwema rakanaka, kudai ngomuitiro womunasiri wemitombo inegwema rakanaka. Wakaita arita rokupishira midiro ngomuti wehlofunga; urebu hwaro hwaiya mamitha mairi nezvidoko zviiri, nokupamhama kwaro kwaiya mamitha mairi nezvidoko zviiri, pamarupande aro marongomuna akaedzana; nokuturama kwaro kwaiya mitha rimwe nezvidoko zvitatu. Wakaita nyanga dzaro padera pamakhona marongomuna, kuti dzirimbanidzwe kuita chigurwa chimwe nearita. Wakariseta reshe ngethusi. Wakaita zvidziyo zveshe zvearita, hari, mafoshoro, mabhasini, zvikwiko zvenyama nemaruwenda omuriro wakaita zvidziyo zveshe zvaro ngethusi. Wakaitira arita chokufukidza chakarukwa chethusi, ngepashi pechitsikiro chakatendenedza kudzaka kugumira pakati. Wakaumba ndandazi murongomuna pamakhona marongomuna echokufukidza chethusi, kuti paite pokutwara ndipo ngemipingo. Wakaita mipingo ngomuti wehlofunga, akaiseta ngethusi. Wakaisa mipingo mukati mwendandazi ngemumarutii rwearita, yokuritwara ndiyo; wakariita ngemiti yehlofunga, risina chiro mukati. Wakaita chidziyo chokushambiramwo chethusi nechigadzikiro chacho chethusi, ngezviboniboni zvevakadzi vaishanda pamusiwo wetende romushongano. Wakaita ruwanze; ngokurutii rwokubani machira oruwanze akarukwa ngorukangaza rwakanaka, rwakakoshwa, mamitha makumi marongomuna namarongomuna. Sika dzarwo dzaiya makumi mairi, nezvigadzikiro zvadzo zvaiya makumi mairi zvethusi; zvikoreko zvesika nemarukasha zvaiya zvesirivha. Kurutii rwedera machira eruwanze aiya akaedzana, sika dzarwo dzaiya makumi mairi, nezvigadzikiro zvadzo zvaiya makumi mairi zvethusi; zvikoreko zvesika nemarukasha adzo zvaiya zvesirivha. Norutii rwokumabirirazuva aiyapo machira aiya mamitha makumi mairi namairi, sika dzarwo dzaiya gumi, nezvigadzikiro zvadzo zvaiya gumi; zvikoreko zvesika nemarukasha adzo zvaiya zvesirivha. Kurutii rwokumabvazuva aiyapo machira aiya mamitha makumi mairi namairi. Machira orutii rumwe rwomusiwo aiya mamitha matanhatu nezvidoko zvitanhatu, sika dzaiya nhatu, nezvigadzikiro zvadzo zvaiya zvitatu. Ndizvo nokurutii rumweni; ino neino kwomusiwo woruwanze aiyapo machira ane mamitha matanhatu nezvidoko zvitanhatu; sika dzarwo dzaiya nhatu nezvigadzikiro zvitatu. Machira eshe oruwanze aitendenedza aiya orukangaza rwakanaka rwakakoshwa. Zvigadzikiro zvesika zvaiya zvethusi; zvikoreko nesika nemarukasha adzo aiya esirivha; nezvipanda zvadzo zvakasetwa ngesirivha; nesika dzeshe dzoruwanze dzakasunganidzwa ngemarukasha esirivha. Machira epamusiwo woruwanze aiya mushando womunemesi, akarukwa ngezvakasvipirika, zvakatsvukuruka, zvakatsvuka, nezvorukangaza rwakanaka, rwakakoshwa; urebu hwawo hwaiya mamitha masere nezvidoko zvisere, nokuturama kwawo kuenda mudenga kwaiya mamitha mairi nezvidoko zviiri, akaedzana nemachira oruwanze. Sika dzawo dzaiya murongomuna, nezvigadzikiro zvadzo zvaiya murongomuna, zviri zvethusi; zvikoreko zvadzo zvaiya zvesirivha, nezvipanda zvadzo zvaiya zvesirivha, nezvipanda zvadzo zvaiya zvakasetwa ngesirivha, nemarukasha adzo aiya esirivha. Hoko dzeshe dzethabhenakeri nedzoruwanze rwaitendenedza dzaiya dzethusi. Uhu ndihwo uwandu hwezviro zvethabhenakeri rechapupu, kudai ngokuerengwa kwazvo, pamupango waMosi, mushando wevaRevhi wevakaita vari pashi penyara yaIthama, mukororo waAroni mupristi. Bhezareri mukororo waUri, mukororo waHuri, wedzinza raJudha wakaita zveshe zvaakapanga Mambo Mwari kunaMosi; naye waiya pamwepo naOhoriabhi mukororo waAhisamakhi, wedzinza raDhani, munanguri, waiya ngwazi nomunemesi wezvakarukwa zvakasvipirika, zvakatsvukuruka, zvakatsvuka, nezvakarukwa ngerukangaza zvakanaka. Mukore weshe wakashandiswa kumushando wokuaka weshe wendau yakachena, mukore wezvipo zvakazunguzirwa, waiya makhirogramu gumi rimwe ramazana (1,000), wakapimwa ngechipimo chaishandiswa mundau yakachena. Nesirivha yeavo vakaerengwa vembungano yairema makhirogramu makumi emazana matatu nemazana marongomuna nemakumi matatu, (3,430) yakapimwa ngechipimo chakashandiswa mundau yakachena. Munhu weshe waipa chipo ngechipimo kudai ngechipimo chakaemeserwa munhu weshe wakaerengwa chendau yakachena, kubvira munhu weshe waidarika kuenda kwavari vakaerengwa, kubvira vaane makore makumi mairi nokuendamberi, rainikerwa kunevamuna mazana matanhatu nematatu emakumi emazana nemazana mashanu nemakumi mashanu (603,550.) Makhirogramu esirivha makumi emazana matatu nemazana marongomuna (3,400) yakashandiswa kunasira zvigadzikiro zana zvendau yakachena nezvigadzikiro dzevheri; makhirogramu makumi matatu nemarongomuna esirivha okunasira zvigadzikiro zveshe. Ngemakhirogiramu makumi matatu esirivha wakaita ndiwo zvikoreko zvesika, wakaseta zvipanda zvadzo, nokuita marukasha adzo. Nethusi rezvipo raiya makhirogramu makumi emazana mairi nemazana marongomuna nemakumi mairi nemashanu (2,425). Naye wakaita zvigadzikiro zvomusiwo wetende romushongano, nearita rethusi, nechitsiiro chethusi, nezvidziyo zveshe zvearita, nezvigadzikiro kurutendenedza ruwanze, nezvigadzikiro zvomusiwo woruwanze, nehoko dzeshe dzethabhenakeri, nehoko dzeshe dzoruwanze kurutendenedza. Vakaita zvokusimira zvakanasa kunaka zvakaitwa ngezvakarukwa zvakasvipirika, zvakatsvukuruka, zvakatsvuka, zvokusimira zvaavo vaishanda mundau yakachena, vakaita zvokusimira zvakacheneswa zvaAroni, kudai ngezvaakapanga Mambo Mwari kunaMosi. Naye wakaita efodhi ngomukore, akasvipirika, akatsvukuruka, akatsvuka, neorukangaza rwakanaka, rwakakoshwa. Naavo vakapfura mukore kuita maruepepe, vakaachekera kuita tambo dzokutunga ndidzo akatsvukuruka, akatsvuka, neorukangaza rwakanaka, mushando wengwazi yokutunga. Vakaitira efodhi mabhande epamapfudzi aro, akarimbanidzwa periri pamakhona mairi. Nebhande rakarukwa ngoungwazi, padera paro, kurisunga ndiro, raiya rakanasirwa ngechiro chimwecho naro, romukore, nezvakarukwa zvakasvipirika, zvakatsvukuruka, zvakatsvuka, nezverukangaza rwakanaka rwakakoshwa, kudai ngezvaakapanga Mambo Mwari kunaMosi. Vakatsetsa mapuwe eonikisi, akanamwa muhata dzomukore, akanangurwa kudai ngokunangurwa kwendandazi, kudai ngokuteererana kwemazina evana vaIsuraeri. Wakaisa padera pemabhande epamapfudzi eefodhi, kuti mapuwe aite mukarakadziso wevana vaIsuraeri, kudai ngezvaakapanga Mambo Mwari kunaMosi. Wakaita chokungwarira diti, mushando wengwazi, kudai ngokuitwa kweefodhi; wakariita ngomukore, nezvakarukwa zvakasvipirika, zvakatsvukuruka, zvakatsvuka, nezvorukangaza rwakanaka rwakakoshwa. Marutii acho aiya akaedzana; vakaita chokungwarira diti chakapetwa; urebu hwacho hwaiya masendimitha makumi mairi namairi, chakapetwa. Vakaisa mukati mwacho misara mirongomuna yemapuwe. Musara wesardhiusi, topazi, nekhabhunikeri ndiwo waiya musara wokutanga; nomusara wechipiri waiya neemerodhi, safire, nedhaimondi; nomusara wechitatu waiya nejakinithi, agate, neametisti; nomusara wechirongomuna waiya nebheriri, onikisi, nejasipa; aiya akanamwa muhata dzomukore. Pakaiswa mapuwe gumi namairi nemazina awo akadai ngemazina evana vaIsuraeri, kudai ngokunangurwa kwendandazi, rimwe ngarimwe rakanangurwa zina raro, emadzinza gumi namairi. Navo vakaita padera pechokungwarira diti maketani akadai ngebote romukore wakaera. Vakaita zvinemeso zviiri zvomukore, nendandazi mbiri dzomukore, vakaisa ndandazi mbiri pamakhona mairi echokungwarira diti. Vakaisa mapote mairi akarukwa omukore mukati mwendandazi mbiri pamupendero wechokungwarira diti. Magumo mairi emapote mairi akarukwa aakabatanidza pamberi pamapfudzi eefodhi. Zvino vakaita ndandazi mbiri dzomukore, vakadziisa pamakhona mairi echokungwarira diti, parutii rwacho rwomukati, pasinde neefodhi. Vakaita ndandazi mbiri dzomukore, vakadzisungira mberi ngepashi pemapfudzi mairi eefodhi, pezvinosunganidzwa padera pebhande rakarukwa ngoungwazi reefodhi. Vakasunga chokungwarira diti ngendandazi dzacho kundandazi dzeefodhi, ngechitambo chakasvipirika, kuti chiwe padera pebhande rakarukwa ngoungwazi reefodhi, kuitira kuti chokungwarira diti chisazosunhurwa kubva kuefodhi, kudai ngezvaakapanga Mambo Mwari kunaMosi. Wakanasirawo gauni reefodhi ngezvakarukwa, zveshe zvakasvipirika. Neuri raiya pakati payo, raiya rakadai ngeuri riri pagauni rokurwa, rine mupendero kutendenedza uri raro, kuti risazobauka. Pamipendero yegauni vakarukira maphomegraniti akasvipirika, akatsvukuruka, akatsvuka neorukangaza rwakakoshwa. Vakanasira zvisimbi zvinoridzwa zvemukore zvakaeriswa, vakaisa zvinorira pakati pemaphomegraniti pamupendero wegauni kuritendenedza. Simbi yokuridza nephomegraniti, simbi yokuridza nephomegraniti, pamipendero yegauni kuritendenedza, rokusimira echiita mushando, kudai ngezvaakapanga Mambo Mwari kunaMosi. Vakaita mabhachi akarukwa orukangaza rwakanaka aAroni neevakororo vake, nechiqoko chorukangaza rwakanaka, nezviqoko zvakanaka zvorukangaza rwakanaka, nemaburuku orukangaza rwakanaka rwakakoshwa, nebhande rorukangaza rwakanaka rwakakoshwa, nezvakarukwa zvakasvipirika, zvakatsvukuruka, nezvakatsvuka, mushando womunemesi, kudai ngezvaakapanga Mambo Mwari kunaMosi. Vakaita rusamba rwedzungudza rwakacheneswa ngomukore wakaera, vakanyora padera parwo chinyoro, kudai ngokunangurwa kwendandazi, kuti, “RWAKACHENESWA KUNA MAMBO MWARI.” Vakasungira kweriri tambo yakarukwa ngezvakasvipirika, kuisungira pachiqoko ngepadera, kudai ngezvaakapanga Mambo Mwari kunaMosi. Ndizvo wakapera mushando weshe wethabhenakeri retende romushongano; nevana vaIsuraeri vakaita kudai ndizvo zveshe zvaakapanga Mambo Mwari kunaMosi, ndizvo vakaita kudaro. Vakaunza thabhenakeri kunaMosi, tende, nezvidziyo zvaro zveshe, zvikoreko zvaro, mwamba yaro, marukasha aro, sika dzaro, nezvigadzikiro zvaro; nechifukidziro chematoo emagondohwe chakatsvukiswa, nechifukidziro chematoo emadenhe, nejira rokusitira; bhokisi rechitenderano, nemipingo yaro, nechigaro chenyasha; tafura, nezvidziyo zvaro zveshe, nechingwa chokuwapo kwaMambo Mwari; chigadzikiro chezvibani chomukore wakaera, nezvibani zvacho, nezvibani zvakanasirirwamwo, nezvidziyo zveshe zvacho, nemafuta ezvibani; nearita romukore, nemafuta okudzodza, nomutombo wokupisha unegwema rakanaka, nejira rokusitira repamusiwo petende; arita rethusi, nechakarukwa chethusi chokufukidza, nemipingo yaro, nezvidziyo zveshe zvaro, chokushambiramwo, nechigadzikiro chacho; machira okusitira oruwanze, sika dzarwo nezvigadzikiro zvadzo, nemachira epamusiwo weruwanze, mapote arwo nehoko dzarwo; nezvidziyo zveshe zvomushando wethabhenakeri, dzetende romushongano; zvokusimira zvakanasa kurukwa zvokushanda nazvo mundau yakachena, nezvokusimira zvakacheneswa zvaAroni mupristi, nezvokusimira zvevakororo vake, zvokushandisa mumushando woupristi. Kudai ndizvo zveshe zvaakapanga Mambo Mwari kunaMosi, ndizvo vana vaIsuraeri vakaita mushando weshe. NaMosi wakaringira mushando weshe, akaona kuti vaiya vauita kudai ngezvaakapanga Mambo Mwari, ndizvo vaiya vauita; Mosi wakavadakadzisa. Mambo Mwari wakaereketa kunaMosi echiti, “Ngezuva rokutanga romwedzi wokutanga unozoemesa thabhenakeri retende romushongano. Unozoisa mukati mwaro bhokisi rechitenderano, unozositira bhokisi ngevheri. Unozopotedza tafura, nokurongedza zviro zviri padera paro; unozopotedza chigadzikiro chechibani, nokujekisa zvibani zvacho. Unozoisa arita romukore rokupishira mutombo pamberi pebhokisi rechitenderano, uise jira rokusitira pamusiwo wethabhenakeri. Unozoisa arita rokupishira mudiro pamberi pomusiwo wethabhenakeri retende romushongano. Unozogadzika chidziyo chokushambiramwo pakati petende romushongano nearita, nokuisa mvura mukati mwacho. Unozonasira ruwanze kuritendenedza, nokuturika machira okusitira epamusiwo woruwanze. Zvino unozotora mafuta okudzodza, udzodze thabhenakeri nazvo zveshe zviri mukati mwaro, urichenese, nezvidziyo zvaro zveshe; naro rinozoita rakachena. Unozodzodza arita rokupishira midiro, nezvidziyo zvaro zveshe, uchenese arita; nearita rinozoita rakapindisisa kucheneswa Unozodzodzawo chidziyo chokushambiramwo, nechigadzikiro chacho, uchichenese. Zvino unozounza Aroni nevakororo vake pamusiwo wetende romushongano, uvashambidze ngemvura. Unozosimidza Aroni zvokusimira zvakacheneswa; unozomudzodza, umuchenese, kuti andishandire mumushando woupristi. Unozounza vakororo vake, uvapfekedze zvokupfeka zvavo, uvadzodze kudai ngezvewakadzodza baba avo, kuti vandishandire mumushando woupristi; nokudzodzwa kwavo kunozoita kwoupristi hwemhera nariini kumibarirwana yavo yeshe.” Mosi wakaita kudaro; kudai ndizvo zveshe zvaakapangwa ndiMambo Mwari, wakaita kudaro. Ndizvo ngomwedzi wokutanga, wegore rechipiri, ngezuva rokutanga romwedzi, kuti thabhenakeri rakaemeswa. Mosi wakaemesa thabhenakeri, akagadzika zvigadzikiro zvaro, akaemesa mwamba yaro, akaisa marukasha aro, akaemesa sika dzaro. Naye wakafukidza ngetende padera pethabhenakeri, akaisa chifukidziro chetende padera paro, kudai ngezvaakapanga Mambo Mwari kunaMosi. Wakatora, akaisa marusamba emapuwe mairi mubhokisi rechitenderano, akaisa mipingo padera pebhokisi rechitenderano, akaisa chigaro chenyasha padera pebhokisi rechitenderano. Naye wakapotedza bhokisi rechitenderano muthabhenakeri, akaemesa machira okusitira, wakasitira bhokisi rechitenderano, kudai ngezvaakapanga Mambo Mwari kunaMosi. Wakaisa tafura mutende romushongano, ngeparutii rwethabhenakeri rwedera, ngokubanze kwevheri; wakaronga zvakanaka chingwa padera paro pamberi paMambo Mwari, kudai ngezvaakapanga Mambo Mwari kunaMosi. Wakaisa chigadzikiro chezvibani mutende romushongano, pakaringirana netafura, kurutii rwokubani rwethabhenakeri. Wakabasa zvibani pamberi paMambo Mwari, kudai ngezvaakapanga Mambo Mwari kunaMosi. Wakaisa arita romukore mutende romushongano pamberi pevheri, wakapishirapo mutombo unegwema rakanaka padera paro, kudai ngezvaakapanga Mambo Mwari kunaMosi. Wakaisa jira repamusiwo wethabhenakeri. Wakaisa arita rokupishira mudiro pamusiwo wethabhenakeri retende romushongano, akapirapo padera paro mudiro wokupisha newezviyo, kudai ngezvaakapanga Mambo Mwari kunaMosi. Wakagadzika chidziyo chokushambiramwo pakati petende romushongano nearita, naye wakaisamwo mvura yokushamba ndiyo, iyo Mosi naAroni nevakororo vake vakashamba nyara dzavo netsoka dzavo. Apo voopotera mutende romushongano, naapo vookwedzera kuarita vaishamba kudai ngezvaakapanga Mambo Mwari kunaMosi. Wakaemesa ruwanze kutendenedza thabhenakeri nearita, akaisa machira epamusiwo woruwanze. Ndizvo Mosi wakapedza mushando. Naapo gore rakambonya tende romushongano nouthende hwaMambo Mwari hwakazadza thabhenakeri. Mosi aazi kukona kupotera mutende romushongano, ngokuti gore rakagara padera paro, nouthende hwaMambo Mwari hwakazadza thabhenakeri. Zvino naapo gore rakwidzwa kubva padera pethabhenakeri, vana vaIsuraeri vaihamba kuendamberi murwendo rwavo rweshe. Asi kudai gore risikazi kukwidzwa, vasaihamba kuendamberi metsa zuva reraikwidzwa. Ngokuti gore raMambo Mwari raiyapo padera pethabhenakeri masikati, nomuriro waiyamwo mukati mwaro usiku, mukuona kwevemhatso yeshe yaIsuraeri, murwendo rwavo rweshe. Mambo Mwari wakadaidza Mosi, akaereketa kwaari kubva mutende romushongano echiti, “Ereketa kuvaIsuraeri, wechiti kwavari, ‘Naapo umwe wenyu kunyazwi ngouri pakati penyu achizounza mudiro wemhuka kunaMambo Mwari, munozounza mudiro wenyu kubva pakati pomutanga wen'ombe, nokubva pakati pomutanga wemakwai nembudzi.’ “Kudai mudiro wake uri mudiro wokupisha wezvifuyo, ngaape yomukono isina kuremara naye unozopa kudai ngokuda kwake pamusiwo wetende romushongano pamberi paMambo Mwari. Unozoisa nyara yake padera pesoro romudiro wokupisha, nawo unozoashirika kwaari kuita kuripirwa kwake. Unozouraya mukono pamberi paMambo Mwari, nevapristi, vakororo vaAroni, vanozopira ngazi, vechifafaza ngazi kumarutii eshe earita iro riri pasinde pomusiwo wetende romushongano. Mudiro wokupisha unozovhiiwa nokugurwagurwa kuita zvigurwa. Vakororo vaAroni mupristi vanozoisa muriro paarita nokuronga huni padera pomuriro. Vakororo vaAroni vapristi vanozoronga zvigurwa izvo, soro nemafuta, padera pehuni dzomuriro wearita. Asi maura ayo nemadondova ayo unozozvisuka ngemvura. Zvino mupristi unozopisha zveshe paarita, kuti uite mudiro wokupisha, mudiro unoitwa ngomuriro, unegwema rakanaka kunaMambo Mwari. “Kudai mudiro wake wokupisha wechibva pazvifuyo, makwai nembudzi, mudiro wake wokupisha unozoita wegondohwe negotokoto zvisina kuremara. Unozoriuraya ngokurutii rwedera rwearita pamberi paMambo Mwari nevapristi, vakororo vaAroni, vanozofafazira ngazi yaro kumarutii eshe earita. Unozoritematema kuita zvigurwa, zveshe soro nemafuta aro, nomupristi unozozvironga padera pehuni dzomuriro wearita. Asi unozosuka maura nemadondova aro ngemvura. Zvino mupristi unozopira zveshe, nokuzvipisha padera pearita; uyu mudiro wokupisha, mudiro unoitwa ngomuriro, wegwema rakanaka kunaMambo Mwari. “Kudai mudiro wake wokupisha kunaMambo Mwari uri weshiri, unozounza mudiro wake wegora nokuti wenjia itsva. Mupristi unozoiunza paarita, nokushongorora mutsipa wayo, nokuipisha padera pearita; nengazi yayo inozodururwa parutii rwearita. Unozodusa dokoriro rayo pamwepo nemanhenga ayo, nokuzvirasha ngepamberi pearita ngokumabvazuva pandau yemarota. Unozoibadzura inemaphaphiro ayo, asi asazoiadza kuita zvigurwa. Zvino mupristi unozoipisha paarita, padera pehuni dzomuriro; uyu mudiro wokupisha, mudiro unoitwa ngomuriro, wegwema rakanaka kunaMambo Mwari. “Naapo munhu peanozopa mudiro wezviyo kunaMambo Mwari, mudiro wake ngauite woufu hwakamotseka; naye unozodurura mafuta padera pahwo, nokuisa makha padera pahwo, naye unozohuunza kunevakororo vaAroni vapristi, nomupristi unozonokora tsimba yahwo, hunemafuta nemakha; nomupristi unozohupisha kuita chicherechedziso padera pearita, kuti huite mudiro unoitwa ngomuriro, wegwema rakanaka kunaMambo Mwari. Nouhwo hunozosara hwomudiro wezviyo hunozoita hwaAroni nevakororo vake, chiri chiro chakapinda chakachenesesa chomudiro unoitwa ngomuriro kunaMambo Mwari. “Naapo wechizounza mudiro wezviyo wakabikwa, unozoita wezvingwa zvoufu hwakamotseka zvisina mumera, zvakakanywa nemafuta, nokuti zvingwa zvakatetepa zvisina mumera zvakadzodzwa mafuta. Kudai mudiro wako uri wezviyo wakabikwa muhari yedongo, ngauite woufu hwakamotseka husina mumera, hwakakanywa nemafuta. Unozochigura kuita zvigurwa, nokudurura mafuta padera pazvo; uyu mudiro wezviyo. Kudai mudiro wako uri wezviyo wakakangwa muruwenda, unozoita woufu hwakamotseka hunemafuta. Newe unozounza mudiro wezviyo wakaitwa ngeizvi zviro kunaMambo Mwari, naapo unozopirwa kunomupristi, iye unozouunza paarita. Mupristi unozotora kwouri mudiro wezviyo rupande rwawo kuita chicherechedziso, unozorupisha padera pearita; uri mudiro wakaitwa ngomuriro wegwema rakanaka kunaMambo Mwari. Neicho chinosara chomudiro wezviyo chinozoita chaAroni nevakororo vake; chiri chakapinda kuchenesesa chemidiro inoitwa ngomuriro kunaMambo Mwari. “Kusazoapo mudiro wezviyo, womunozounza kunaMambo Mwari unozoa nomumera, ngokuti amutongozopishi mumera nokuti uchi mumudiro nokuti ngouri unoitwa ngomuriro. Asi ngendaa yemidiro yemichero yomutanguro, munozoipira kunaMambo Mwari, asi aizopishwi padera pearita kuita gwema rakanaka. Auzorekeri midiro yako yeshe yezviyo yokudya inozorungwa ngomunyu; zve, usazotenda kuti chitenderano chaMwari chitamikirwe ngomunyu; mumidiro yako yeshe yezviyo, unozoipira nomunyu. “Kudai wechizounza mudiro wezviyo wemichero yokutanga kunaMambo Mwari, unozounza mudiro wezviyo wemichero yako yokutanga, mitsonzoti yekoroni mimbishi yakakochwa ngomuriro, eya koroni yakapurwa kubva kumitsonzoti. Unozotutsira mafuta padera payo, nokuisa makha padera payo, uyu mudiro wezviyo. Nomupristi unozopisha chicherechedziso chayo, rupande rwekoroni yakapurwa, norupande rwemafuta ayo, nemakha ayo eshe, uyu mudiro wakaitwa ngomuriro kunaMambo Mwari. “Kudai mudiro uri mudiro wokuiyana, kudai wechipira mhuka kubva kumutanga wezvifuyo, kunyazwi uri mukono nokuti tukazi, unozoupira pamberi paMambo Mwari isina kuremara. Unozoisa nyara yake padera pesoro romudiro, uiuraye pamusiwo wetende romushongano; nevakororo vaAroni vapristi vanozofafazira ngazi paarita kuritendenedza. Unozopira kubva kumudiro wokuiyana kudai ngomudiro unoitwa ngomuriro kunaMambo Mwari; mafuta awo anofukidzira maura, nemafuta eshe akatendenedza maura. Itsvo mbiri nemafuta adzo akadziputira ari pasinde pechigaratsvo, nemafuta ari padera pechiropa, awo anozotorwa pamwepo netsvo. Zvino vakororo vaAroni vanozozvipisha padera pearita, ngepadera pomudiro wokupisha, uri padera pehuni dzomuriro, kudai ngomudiro unoitwa ngomuriro wegwema rakanaka kunaMambo Mwari. “Kudai mudiro wake wokuita mudiro wokuiyana kunaMambo Mwari wechibva kumakwai nembudzi, ngauite mukono nokuti thukazi, unozopira iyo isina kuremara. Kudai echipa hwai kuita mudiro wake, unozoiunza pamberi paMambo Mwari. Unozoisa nyara yake padera pomudiro wake. Inozouraiwa pamberi petende romushongano, nevakororo vaAroni vanozofafazira ngazi yayo paarita kuritendenedza. Unozopira mudiro wokuiyana unoitwa ngomuriro kunaMambo Mwari; mafuta aro nomuswe waro wakapamhama weshe ugure ngepasinde pegodo romushana waro, nemafuta eshe ari kumaura; itsvo mbiri, nemafuta adzo, ari ngepadera pechiropa, awo ounozodusa pamwepo netsvo. Zvino mupristi unozozvipisha padera pearita, kudai ngomudiro wokudya wakaitwa ngomuriro kunaMambo Mwari. “Kudai mudiro wake uri wembudzi, unozoiunza pamberi paMambo Mwari. Unozoisa nyara yake padera pesoro rayo, nokuiuraira pamberi petende romushongano; nevakororo vaAroni vanozofafazira ngazi yayo paarita kuritendenedza. Unozopa kuita mudiro wake unoitwa ngomuriro kunaMambo Mwari; mafuta akafukidza maura, nemafuta eshe akatendenedza maura. Itsvo mbiri, nemafuta adzo, ari padera pechiropa anozotorwa pamwepo netsvo. Zvino mupristi unozozvipisha padera pearita, kudai ngomudiro wokudya unoitwa ngomuriro, kuita gwema rakanaka. Mafuta eshe ayo ngaaMambo Mwari. “Chinozoita chiemeso chinoitwa mhera nariini kunemibarirwana yenyu kundau dzeshe dzokugara: Musazodya mafuta nokuti ngazi.” Mambo Mwari wakaereketa kunaMosi echiti, “Ereketa kunevanhu vaIsuraeri wechiti, ‘Naapo munhu echishaisha ngokusada ngokugura chironzo kunyazwi ngechiri chaMambo Mwari, ngeicho chiro chisaisisa kuitwa, echipauka kubva kuchironzo kunyazwi ngechiri.’ “Kudai mupristi wakadzodzwa echishaisha, ndizvo akaisa vanhu mundaa, naapo ngaaunze kunaMambo Mwari mukono usina kuremara ngendaa yokushaisha kwake kwaakashaisha kuti aite mudiro wokushaisha. Unozounza mukono uwo pamusiwo wetende romushongano pamberi paMambo Mwari; unozoisa nyara yake padera pesoro rawo, auuraire pamberi paMambo Mwari. Mupristi wakadzodzwa unozotora rupande rwengazi nokuriunza kutende romushongano. Mupristi unozonyika chinwe chake mungazi afafazire ndiyo kanomwe pamberi paMambo Mwari, pamberi pejira rendau yakachena. Mupristi unozodzodza imweni ngazi panyanga dzearita rokupishira mutombo unegwema rakanaka pamberi paMambo Mwari, riri mutende romushongano; naye unozodurura ngazi yeshe yomukono pashi pearita romudiro wokupisha, riri pamusiwo wetende romushongano. Unozodusa mafuta eshe kubva kumukono womudiro wokushaisha: mafuta eshe akafukidza maura nemafuta eshe akatendenedza maura; itsvo mbiri nemafuta adzo ari pachigaratsvo; nemafuta ari padera pechiropa, awo aanozodusa pamwepo netsvo, kudai ngeizvo zvakaduswa kubva kun'ombe yomudiro wokuiyana. Mupristi unozozvitora kuti azvipishe padera pearita romudiro wokupisha. Asi doo romukono, nenyama yeshe yawo, pamwepo nesoro rawo, nemadondova awo, nemaura awo, nemadisa awo, mukono weshe unozobudiswa kubanze kwekamba kundau yakanaka, apo paanodururwa marota unozoupishira padera pehuni; padera peduthu remarota inozopishwa. “Kudai mbungano yeshe yaIsuraeri yechishaisha ngokusikazia, neicho chiro chakafishika kubva mukuona kwembungano yeshe, vakaita chiro chimwe chokugura mupango kunyazwi ngouri waMambo Mwari, icho chisaisisa kuti chiitwe, navo vane ndaa; naapo chishaishi chevakaita chaziikanwa, mbungano yeshe inozopira mudiro womukono mutsva kuti uite mudiro wokushaisha, nokuunza pamberi petende romushongano. Vakuru vembungano vanozoisa nyara dzavo padera pesoro romukono pamberi paMambo Mwari, nomukono uwo unozourawa pamberi paMambo Mwari. Mupristi wakadzodzwa unozounza ngazi imweni yomukono kutende romushongano, nomupristi unozonyika chinwe chake mukati mwengazi, naye unozofafaza ndiyo kanomwe pamberi paMambo Mwari, pamberi pejira rendau yakachena. Unozodzodza imweni ngazi panyanga dzearita riri pamberi paMambo Mwari mutende romushongano, unozodurura ngazi imweni yeshe pashi pearita remidiro yokupisha, riri pamusiwo wetende romushongano. Naye unozodusa mafuta awo eshe, nokuapisha padera pearita. Unozoitazve kumukono uwo kudai ngezvaakaita kunomukono womudiro wokushaisha; nomupristi ngokudaro unozoita muripo ngepamusoro pavo, nakwo kunozorekererwa kwavari. Naye unozobudisa mukono uwo kubanze kwekamba, nokuupisha kudai ngezvaakapisha mukono wokutanga; uri mudiro wokushaisha wembungano yeshe. “Naapo mutongi echishaisha ngokusikazia, ngokugura mupango kunyazwi ngouri waMambo Mwari, Mwari wake, icho chisaisisa kuitwa, naye unendaa, naapo chishaishi chake chaakashaisha chaziikanwa kwaari, unozounza chigotokoto chisina kuremara kuita mudiro wake. Naye unozoisa nyara yake padera pesoro racho, achiuraye apo panourairwa midiro yokupisha pamberi paMambo Mwari; uri mudiro wokushaisha. Mupristi unozotora imweni ngazi yomudiro wokushaisha ngechinwe chake, nokuidzodza panyanga dzearita remidiro yokupisha, unozodurura ngazi imweni yeshe pashi pearita romudiro wokupisha. Naye unozopisha mafuta acho eshe padera pearita, kudai ngemafuta omudiro wokuiyana; ngokudaro mupristi unozoita muripo ngendaa yechishaishi chake, nacho chinozorekererwa kwaari. “Kudai umwe wevanhu nhando echishaisha ngokusikazia, ngokugura mupango kunyazwi ngouri waMambo Mwari, chisaisisa kuitwa, naye unendaa, naapo chishaishi chake chaakashaisha chaziikanwa kwaari, unozounza mudiro wake wethukazi rechimbudzi risina kuremara, ngendaa yechishaishi chake chaakashaisha. Unozoisa nyara yake padera pesoro romudiro wokushaisha, unozouraya uwo mudiro wokushaisha pandau yemidiro yokupisha. Mupristi unozotora imweni ngazi yawo ngechinwe chake, unozoidzodza panyanga dzearita rokupisha midiro, unozodurura ngazi yayo yeshe pashi pearita. Naye unozodusa mafuta ayo eshe, kudai ngemafuta anoduswa kubva kumudiro wokunyarara; nomupristi unozoapishira padera pearita kuita gwema rakanaka kunaMambo Mwari; ngokudaro mupristi unozoita muripo ngendaa yake, nakwo kunozorekererwa kwaari. “Kudai echiunza gwai kuti riite mudiro wokushaisha, ngaaunze thukazi risina kuremara. Unozoisa nyara yake padera pesoro romudiro wokushaisha, nokuriuraya kuti riite mudiro wokushaisha pandau panourairwa midiro yokupisha. Mupristi unozotora imweni ngazi ngechinwe chake yomudiro wokushaisha, nokuidzodza panyanga dzearita remidiro yokushaisha, naye unozodururira ngazi yeshe pashi pearita. Unozotora mafuta aro eshe, kudai ngemafuta egwai anotorwa kubva kumudiro wokuiyana, nomupristi unozoapisha padera pearita, kudai ngezvinoitwa kumidiro yomuriro kunaMambo Mwari. Ndizvo mupristi unozoita muripo ngendaa yechishaishi chake chaakashaisha, nacho chinozorekererwa kwaari. “Kudai munhu echishaisha ngokuti aadi kupupura apo azwa ndaa inoda kuti apupure ngechiro chaakaona nokuti chaakazwa, unozotwara ndaa yake. Nokuti kudai umwe wenyu echibata chiro chakasvipiswa, kunyazwi muiri wemhuka yakasvipiswa nokuti muiri wechifuyo chakasvipiswa, nokuti muiri wechiro chinotamanda chakasvipiswa, nokudai chakafishika kubva kwaari; unozoita usikazi kusukika, unozoa nendaa. Nokuti kudai echibata kusikasukika kwomunhu, kunyazwi ngokuri kusikasukika kwakadini, ukwo kwaanosvipiswa ndikwo munhu, nokudai chakafishika kwaari, apo azochizia unozoa nendaa. Nokuti kudai umwe wenyu echipika, echiereketa kuita zvakashata ngomuromo wake, nokuti kuita zvakanaka, kunyazwi chiinyi chaanoereketa munhu ngokupika, nacho chechifishika kwaari, apo azochizia unozoa nendaa. Naapo pounozia kuti unendaa yechimwe cheizvi, unozotenda chishaishi icho chaakaita. Unozounza kunaMambo Mwari mudiro wokupauka kwake, wechishaishi chake chaakashaisha, thukazi regwai nokuti rembudzi kuti riite mudiro wokushaisha kwake; nomupristi unozoita muripo ngendaa yechishaishi chake. “Asi kudai asikakoni kuunza gwai, unozounza kunaMambo Mwari ngendaa yechishaishi chake chaakashaisha magora mairi, nokuti njia mbiri, imwe yomudiro wechishaishi, neimwenizve yomudiro wokupisha. Unozozviunza kunomupristi, iye unozopira kutanga kuita mudiro wokushaisha, ashongorore soro rayo kubva pamutsipa wayo, asi asazoiadza. Unozofafaza ngazi yomudiro wokushaisha parutii rwearita; nengazi imweni inozodururwa pashi pearita; uri mudiro wokushaisha. Unozopira yechipiri kuita mudiro wokupisha, kudai ngomuitiro wacho. Ndizvo mupristi unozoita muripo ngendaa yechishaishi chake chaakashaisha, naye unozorekererwa. “Asi kudai asikakoni kuunza magora mairi nokuti njia mbiri, unozounza mudiro wekhirogramu rimwe roufu hwakamotseka kuita mudiro wokushaisha. Asazodururira mafuta kwouri, zve, asazoisa makha kwouri, ngokuti mudiro wokushaisha. Unozohuunza kumupristi, nomupristi unozonokora tsimba kubva kwohuri, kuita chicherechedziso chahwo, ahupishe padera pearita, kudai ngemiitiro yokupira midiro inoitwa ngomuriro kunaMambo Mwari; mudiro wokushaisha. Ndizvo mupristi unozoita muripo wechishaishi chake chaakashaisha kunoumwe weizvi, naye unozorekererwa. Kudai ngomudiro wezviyo uhwo hunosara hunozoita hwomupristi.” NaMambo Mwari wakaereketa kunaMosi echiti, “Naapo umwe wenyu echizoita chishaishi chokupauka, echishaisha ngokusikazia kuneizvo zvakachena zvaMambo Mwari; naapo unozounza kunaMambo Mwari kuita mudiro wechishaishi chokupauka kwake, gondohwe risina kuremara kubva mumitanga, zvinoshandurwa kuita zvigurwa zvesirivha, kudai ngechipimo chinoshandiswa mundau yakachena, kuita mudiro wechishaishi chokupauka. Unozoripa kushata kwaakaita ngendaa yeicho chiro chakacheneswa, unozotutsira rupande rwechishanu, unozozvipa kunomupristi. Unozoita muripo ngendaa yechishaishi chake, naye unozorekererwa. “Kudai umwe wenyu echizoshaisha asikazii echiita nokuti ngechiri cheizvi zviro zvakapangwa ngezvironzo zvaMambo Mwari kuti zvisazoitwa; waanendaa, naye unotwara kushata kwake. Unozounza kunomupristi gondohwe risina kuremara kubva mumitanga, nokuti zvakaedzana kuita mudiro wechishaishi chokupauka; nomupristi ngokudaro unozoita muripo ngendaa yokusikazia kwake kwaakapauka asikazi kuzia, naye unozorekererwa. Uyu mudiro wokushaisha; ngegwinyiso wakashaisha ngokupauka pamberi paMambo Mwari.” NaMambo Mwari wakaereketa kunaMosi echiti, “Kudai umwe wenyu echishaisha, nokuita chishaishi chokupauka kubva kunaMambo Mwari, echinyepa kunomuakirwana wake ngendaa yeicho chakapuwa kwaari kuti achingwarire, nokuti ngendaa yechibatiso, nokuti ngendaa yokupamba, nokuti ngokuchengedza muakirwana wake, nokudai echizoona chiro chakarashika, echinyepa ngendaa yacho, kudai echipika ngokunyepa ngendaa yeizvi zveshe zviro zvaanoita munhu echishaisha ndizvo, naapo washaisha nokuzia kuti unendaa, nokuhwirinzira chaakapamba, nokuti chaakatora ngokuchengedzera, nokuti icho chiro chakapuwa kwaari kuti achingwarire, nokuti chakarashika chaakaona, nokuti chaakapika ngokunyepa ndicho, eya, achipetudze, nokututsira chechishanu padera pacho, azvipe kunouwo uri muridzi wazvo. Unozounza mudiro wokupauka kwake kunaMambo Mwari, kunomupristi, mudiro wechishaishi chake, gondohwe romutanga, risina kuremara, kudai ngokuedzanisa kwake, kuti uite mudiro wokushaisha. Mupristi unozoita muripo pamberi paMambo Mwari naye unozorekererwa kunyazwi ngechiri chaakaita chokupauka ndicho.” Mambo Mwari wakaereketa kunaMosi echiti, “Panga Aroni nevakororo vake wechiti, ‘Ichi ndicho chironzo chomudiro wokupisha. Mudiro wokupisha, ngokuti unopishwa padera pearita usiku hweshe metsa kuedze, nomuriro wearita unozogara wechibaka kweriri. Mupristi unozopfeka chokusimira chake chorukangaza, nokusimira bhuruku rake rorukangaza, naye unozodusa marota okupishwa kwomudiro paarita, aaise parutii rwearita. Naye unozokhumura zvokusimira zvake, echipfeka zvimweni, nokudusa marota nokuarasha kubanze kwekamba, kundau yakanaka. Nomuriro uri paarita unozogara wechibaka kweriri; usazodzimwa. Mupristi unozotutsira huni padera paro mangwanani eshe, nokuronga mudiro wokupisha padera paro; naye unozopishapo mudiro wemafuta wokunyarara. Muriro unogara wechibaka padera pearita; usatongozodzimwa.’ “Neichi ndicho chironzo chomudiro wezviyo: vakororo vaAroni vanozoupira pamberi paMambo Mwari paarita. Vanozonokora tsimba youfu hwomudiro wezviyo, nemafuta ahwo, nemakha ari padera pomudiro wezviyo, unozohupisha padera pearita kuita gwema rakanaka, kuita chicherechedziso chahwo, kunaMambo Mwari. Nouhwo hunosara hunozodyiwa ndiAroni nevakororo vake; nahwo hunodyiwa husina mumera, mundau yakachena; muruwanze rwetende romushongano vanozohudya. Husazobikwa nomumera. Ndakahupa kwavari kuita chikoaniswa chavo chemidiro yangu inoitwa ngomuriro; iri yakachenesesa, kudai ngomudiro wokushaisha nokudai ngomudiro wokupauka. Veshe vevamuna pakati pemibarirwana yaAroni vanozohudya. Chinozoita chiemeso chemhera nariini kumibarirwana yenyu ngendaa yemidiro yaMambo Mwari inoitwa ngomuriro; veshe vanoigwama vanoita vakacheneswa.” Mambo Mwari wakaereketa kunaMosi echiti, “Uyu ndiwo mudiro waAroni nevakororo vake, wevanozopira kunaMambo Mwari ngeiro zuva raanozodzodzwa; khirogramu rimwe roufu hwakamotseka kuita mudiro wezviyo wezuva rimwe ngarimwe, norupande rwahwo mangwanani, norupande rwahwo madeekoni. Hunozobikwa muhari nemafuta; unozohuunza hwakakumanidzwa yaamho nezvigurwa zvomudiro wezviyo hwakabikwa, unozozvipira kuti zviite gwema rakanaka kunaMambo Mwari. Ndizvo mupristi wakadzodzwa kubva pakati pemibarirwana yaAroni unozomuteera ndiye unozounasirira; chinozoita chiemeso chemhera nariini kunaMambo Mwari; unozopishwa weshe. Mudiro weshe wezviyo womupristi unozopishwa weshe; auzodyiwi.” Mambo Mwari wakaereketa kunaMosi echiti, “Ereketa kunaAroni nevakororo vake wechiti, ‘Ichi ndicho chironzo chomudiro wokushaisha: Mudiro wokushaisha unozourairwa pamberi paMambo Mwari pandau apo panourairwa mudiro wokupisha; uri wakachenesesa. Mupristi unozoupira ngendaa yokushaisha unozoudya; unozodyirwa kundau yakachenesesa, muruwanze rwetende romushongano. Kunyazwi ndiani unozoigwama iyi nyama unozoita wakacheneswa; naapo ngazi yawo yechifafazwa pajira nokuti ngeriri, unozogeza ndau inemadonhwe mundau yakachena. Chidziyo chedongo cheyakabikwa ndicho chinozoputswa, asi kudai yechizobikwa muhari yethusi, ngarinase kukwizhwa, nokusukisiswa ngemvura. Veshe vamuna vevapristi ngavaidye; iri yakachenesesa. Akuna mudiro wokushaisha unozodyiwa uwo ngazi yawo yakaunzwa mutende romushongano, kuti iripe mundau yakachena; unozopishwa ngomuriro.’ “Ngokudaro ndicho chiemeso chomudiro wokupauka: uri wakachenesesa. Pandau inourairwa mudiro ndipozve panozourairwa mudiro wokupauka; nengazi yawo unozoifafaza kutendenedza arita. Unozopira mafuta awo eshe; muswe wakapamhama, mafuta anofukidzira maura, netsvo mbiri, nemafuta adzo, ari pachigaratsvo, nemafuta ari padera pechiropa, anozotorwa pamwepo netsvo. Mupristi unozozvipisha padera pearita kuita mudiro unoitwa ngomuriro kunaMambo Mwari; uri mudiro wokupauka. Vamuna veshe pakati pevapristi vanozoudya; unozodyirwa mundau yakachena; uri wakachenesesa. “Mudiro wokupauka wakadai ngomudiro wokushaisha, ngokuti chironzo chazvo ndichimwecho; mupristi unoita muripo ngowake. Ndizvozve mupristi unopira mudiro wokupisha unozotora doo romudiro wokupisha waakapira. Nemidiro yeshe yezviyo yakabikwa pachoto, neyakabikwa muhari, neyakakangwa muruwenda, inozoita yomupristi wakaipira. Asi midiro yeshe imweni yezviyo yakavhenganidzwa nemafuta, nokuti yakaoma, inozoita yevakororo veshe vaAroni, umwe ngoumwe vanozoedzanisirana. “Ichi ndicho chironzo chomudiro wokuiyana, waanozopira kunaMambo Mwari. Kudai echizoupira kuti uite mudiro wokubonga, unozoupira pamwepo nomudiro wokuiyana, zvingwa zvisina mumera zvakakanywa nemafuta, nezvimakhekhe zvakadzodzwa mafuta, nezvingwa zvoufu hwakamotseka zvakakanywa nemafuta. Nomudiro wake wokubonga wokuiyana unozounza mudiro wake nezvingwa zvisina mumera. Kubva kuneizvi unozopira khekhe rimwe kumudiro umwe kuita chipo kunaMambo Mwari, nawo unozoita womupristi uwo unofafaza ngazi yomudiro wokuiyana. Nenyama yakapirwa yemidiro yake yokubonga neyokuiyana, ngaidyiwe ngeiro zuva reyakapirwa ndiro, asazoisiya metsa mangwanani. Asi kudai uri mudiro wemhiko, wokupira ngomwoyo unoda, ngaudyiwe ngeiro zuva rowakapirwa ndiro mudiro wake, zve nechimangwani icho chakasara chinozodyiwa. Asi nyama inozosara yomudiro metsa zuva rechitatu ngaipishwe ngomuriro. Asi kudai nyama kunyazwi ngeiri yakapirwa yemidiro yake yokuiyana yechizodyiwa ngezuva rechitatu, aizoashiriki, zve, akuzoerengwi kunouwo wakaipira; asi chinozoita chinyangadzo, nomunhu unozodya kweiri unozotwara kushaisha kwake. “Nyama inogwama chiro chisikazi kusukika isazodyiwa; inozopishwa ngomuriro. Asi ngendaa yenyama imweni, veshe vakasukika vanozoidya. Asi avo vasikazi kusukika vechizodya nyama yakapirwa kuita mudiro wokuiyana kunaMambo Mwari, uwo munhu unozogurwa kubva pakati pehama dzake. Naapo umwe wenyu unozogwama chiro chisikazi kusukika, kudai ngokusikasukiki kwomunhu, nokuti ngeiri mhuka isikazi kusukika, nokuti ngechiri chiro chinonyangadza chisikazi kusukika, oroodya nyama yemidiro yokuiyana iyo yakaemera Mambo Mwari, uwo munhu unozogurwa kubva pakati pehama dzake.” Mambo Mwari wakaereketa kunaMosi echiti, “Ereketa kunevanhu vaIsuraeri wechiti, ‘Musazodya mafuta nokuti ngaari, en'ombe nokuti egwai neembudzi. Mafuta ezvifuyo zvakadzifira, nemafuta eidzo dzakarumwa ngezvikara, angashandiswa kumishando imweni yeshe, asi musazoadya. Kudai umwe wenyu kunyazwi ndiani echizodya mafuta emhuka kunyazwi ngeiri, dzaanopira munhu kuita mudiro unoitwa ngomuriro kunaMambo Mwari, uwo munhu unozogurwa kubva pakati pehama dzake. Musazodya ngazi kunyazwi ngeiri, yeshiri, nokuti yemhuka, nokuti ngepari pomunogara. Kunyazwi ngouri wenyu unozodya ngazi nokuti ngeiri, uwo munhu unozogurwa kubva pakati pehama dzake.’ ” Mambo Mwari wakaereketa kunaMosi echiti, “Ereketa kunevanhu vaIsuraeri wechiti, ‘Uwo unopira midiro yake yokuiyana kunaMambo Mwari unozounza mudiro wake kunaMambo Mwari wezvinopirwa kuita midiro yokuiyana. Ngenyara dzake unozounza midiro inoitwa ngomuriro yaMambo Mwari; mafuta pamwepo nechifuba unozozviunza kuti chifuba chizunguzirwe kuita mudiro wokuzunguzira pamberi paMambo Mwari. Mupristi unozopisha mafuta padera pearita, asi chifuba chinozoita chaAroni nevakororo vake. Nechityu chokumudyo munozochipa kuita mudiro wokumirudzwa wezvinopirwa kuita midiro yokuiyana. Umwe pakati pevakororo vaAroni, unozopira ngazi yemidiro yokuiyana nemafuta, ndiye unozotora chityu chokumudyo kuita chikoaniswa chake. Ngokuti ndakatora kubva kuvanhu vaIsuraeri chifuba chokuzunguzira, nechizva chokumirudza kubva kwezvinopirwa zvemidiro yavo yokuiyana, neni ndakazvipa kunaAroni mupristi nevakororo vake ngechiemeso chemhera nariini kubva pakati pevana vaIsuraeri.’ ” Ichi ndicho chikoaniswa chokudzodzwa chaAroni, nechokudzodzwa kwevakororo vake, kubva kumidiro inoitwa ngomuriro kunaMambo Mwari. Izvi zvaakapanga Mambo Mwari kuti zvipuwe kwavari ngevaIsuraeri, ngeiro zuva raakavadzodza, ngechiemeso chemhera nariini kumibarirwana yavo yeshe. Ichi ndicho chironzo chomudiro wokupisha, wezviyo, wokushaisha, wokupauka, wokudzodzwa nemidiro yokuiyana. Icho chaakapanga Mambo Mwari kunaMosi paMutunhu weSinai, apo akapanga vanhu vaIsuraeri kuti vaunze midiro yavo kunaMambo Mwari, mushango reSinai. Mambo Mwari wakaereketa kunaMosi echiti, “Tora Aroni nevakororo vake, nezvokufuka, nemafuta okudzodza, nomukono wokuita mudiro wokushaisha, nemagondohwe mairi, nechitundu chezvingwa zvisina mumera; uunganidze mbungano yeshe pamwepo pamusiwo wetende romushongano.” NaMosi wakaita kudai ngezvaakapangwa ndiMambo Mwari. Naapo mbungano yakaunganidzwa pamwepo pamusiwo wetende romushongano, Mosi wakati kunembungano, “Ichi ndicho chiro chaakapanga Mambo Mwari kuti chiitwe.” Zvino Mosi wakaunza Aroni nevakororo vake, wakavashambidza ngemvura. Naye wakamupfekesa bhachi, wakamupfekesa bhande, wakamusimidza ngegauni, wakaisa efodhi padera pake, wakamusungira bhande rakanemeswa riri reefodhi, wakarisungira kwaari. Wakaisa chokungwarira diti; nepechokungwarira diti wakaisa Urimu neThumimu. Naye wakaisa ngundu pasoro rake; nepangundu ngemberi kwehope yake, wakaisa dzungudza romukore, dzungudza rakachena, kudai ngezvaakapanga Mambo Mwari kunaMosi. Zvino Mosi wakatora mafuta okudzodza, wakadzodza tende romushongano nazvo zveshe zvaiya mukati mwaro wakazvichenesa. Naye wakafafaza ndio paarita kanomwe, wakadzodza arita nezvidziyo zvaro zveshe, zveshe nebhavhu nechigadzikiro charo, kuti zvicheneswe. Naye wakadururira amweni emafuta okudzodza padera pesoro raAroni, wakamudzodza, kuti amuchenese. NaMosi wakaunza vakororo vaAroni, wakavapfekesa mabhachi, wakavasungira mabhande, wakasunga ngundu pamasoro avo, kudai ngezvaakapanga Mambo Mwari kunaMosi. Wakaunza pamberi mukono kuita mudiro wokushaisha; Aroni nevakororo vake vakaisa nyara dzavo padera pesoro romukono womudiro wokushaisha. Mosi wakauraya mukono; wakatora ngazi yawo, akaidzodza padera penyanga dzearita ngechinwe chake kuritendenedza, wakachenesa arita, akadururira ngazi pashi pearita, wakarichenesa, kuti aite kuiyanisa padera paro. Mosi wakatora mafuta eshe aiya mumaura, nemafuta aiya padera pechiropa, netsvo mbiri, nemafuta adzo, naMosi wakazvipisha padera pearita. Asi mukono pachawo, doo rawo, nyama yawo nemadisa awo, wakazvipisha ngomuriro kubanze kwekamba, kudai ngezvaakapanga Mambo Mwari kunaMosi. Zvino wakaunza gondohwe romudiro wokupisha. Aroni nevakororo vake vakaisa nyara dzavo padera pesoro raro, naro rakaurairwa. Mosi wakafafazira arita ngengazi kuritendenedza. Wakatema gondohwe kuita zvigurwa, naMosi wakapisha soro nezvigurwa nemafuta. Ngesure kwokusuka maura nemadondova ngemvura, Mosi wakapisha gondohwe reshe paarita; naro rakaita mudiro wokupisha kuita gwema rakanaka, mudiro unoitwa ngomuriro kunaMambo Mwari, kudai ngezvaakapanga Mambo Mwari kunaMosi. Zvino wakaunza pamberi gondohwe rimweni, gondohwe rokudzodzwa. Aroni nevakororo vake vakaisa nyara dzavo padera pesoro regondohwe, naro rakauraiwa. Mosi wakatora ngazi yaro, wakaiisa kumagumo enzee yokumudyo yaAroni, nokugunwe renyara yake yokumudyo, nepadera pechikunwe chake chikuru chetsoka chokumudyo. Ngesure kwokuunzwa pamberi kwevakororo vaAroni, Mosi wakatora imweni yengazi, akaiisa kumagumo kwenzee dzavo dzokumudyo, nepadera pemakunwe enyara dzavo dzokumudyo nepadera pemakunwe makuru etsoka dzavo dzokumudyo, naMosi wakafafaza ngazi paarita kuritendenedza. Wakatora mafuta, nomuswe wakapamhama, nemafuta eshe akatendenedza maura, nemafuta aiya padera pechiropa, netsvo mbiri, nemafuta adzo, nechityu chokumudyo. Nokubva muchitundu chezvingwa zvisina mumera, zvaiya pamberi paMambo Mwari, wakatora khekhe rimwe risina mumera, nekhekhe rimwe rechingwa chine mafuta, nekakhekhe kadodoko, wakazviisa padera pemafuta, nepadera pechityu chokumudyo. Wakaisa zveshe munyara dzaAroni, nomunyara dzevakororo vake, naye wakazvizunguza kuita mudiro wakazunguzwa pamberi paMambo Mwari. Zvino Mosi wakazvitora kubva panyara dzavo, wakazvipisha paarita kuita mudiro wokupisha. Izvi zvaiya mudiro wokudzodzwa kuita gwema rakanaka, mudiro unoitwa ngomuriro kunaMambo Mwari. Mosi wakatora chifuba, wakachizunguza kuti chiite mudiro wokuzunguzwa pamberi paMambo Mwari, ngokuti gondohwe romudiro wokudzodzwa raiya chikoaniswa chaMosi, kudai ngezvaakapanga Mambo Mwari kunaMosi. Zvino Mosi wakatora amweni emafuta okudzodza, nengazi yaiya paarita, wakazvifafazira padera paAroni, nepadera pezvokufuka zvake, nepadera pevakororo vake, nepadera pezvokufuka zvevakororo vake; ndizvo wakachenesa Aroni, nezvokufuka zvake, nevakororo vake, nezvokufuka zvevakororo vake. NaMosi wakati kunaAroni nokuvakororo vake, “Bikai nyama pamusiwo wetende romushongano, muidye apo pamwepo nechingwa chiri muchitundu chomudiro wokudzodzwa, kudai ngezvendakapanga ndechiti, ‘Aroni nevakororo vake vanozozvidya.’ Neizvo zvinozosara zvenyama nezvezvingwa munozozvipisha ngomuriro. Nemwi amuzobudi kubva kumusiwo wetende romushongano metsa kupere mazuva manomwe, metsa mazuva okudzodzwa kwenyu apera, ngokuti zvinotora mazuva manomwe kumudzodza. Kudai ngeizvi zvaitwa nyamashi ndizvo Mambo Mwari wapanga kuti zviitwe, kuita kuripirwa kwenyu. Ndizvo munozogara pamusiwo wetende romushongano mazuva manomwe masikati nousiku, mungwarire kupanga kwaMambo Mwari kuti musafa; ngokuti ndakapangwa kudaro kwomuri.” Ndizvo Aroni nevakororo vake vakaita zveshe zvaakaronza Mambo Mwari kubudikidza ndiMosi. Ngezuva rechisere Mosi wakadaidza Aroni nevakororo vake, nevakuru vaIsuraeri. Naye wakati kunaAroni, “Tora mukono mutsva kuita mudiro wokushaisha, negondohwe risina kuremara kuita mudiro wokupisha, uzvipire pamberi paMambo Mwari. Unozoereketa kuvanhu vaIsuraeri wechiti, ‘Torai gotokoto rembudzi kuita mudiro wokushaisha, nekonyana nekakwai, zveshe zvinegore rimwe, zvisina kuremara, kuti zviite mudiro wokupisha, nomukono negondohwe kuti zviite midiro yokuiyana, kuti zvipirwe pamberi paMambo Mwari, nomudiro wezviyo wakakumanidzwa nemafuta. Ngokuti nyamashi Mambo Mwari unozooneka kwomuri.’ ” Vakaunza izvo zvaakapanga Mosi pamberi petende romushongano; nembungano yeshe yakakwedzera yakaema pamberi paMambo Mwari. NaMosi wakati, “Ichi ndicho chiro chaakapanga Mambo Mwari kuti muite, nouthende hwaMambo Mwari hunozooneka kwomuri.” Zvino Mosi wakati kunaAroni, “Kwedzera paarita, upire mudiro wako wokupisha, upire muripo wako iwewe nevanhu; upire mudiro wevanhu, nokuita muripo wavo, kudai ngezvaakapanga Mambo Mwari.” Aroni wakakwedzera kuarita, wakauraya konyana romudiro wokushaisha, waiya wake emene. Nevakororo vaAroni vakaunza ngazi kwaari, naye wakanyika chinwe chake mungazi, wakaidzodza padera penyanga dzearita, wakadurura ngazi imweni ngepashi pearita. Asi mafuta, itsvo, nemafuta ari padera pechiropa omudiro wokushaisha, wakazvipisha padera pearita, kudai ngokuronza kwaMambo Mwari kunaMosi. Nyama nedoo wakazvipisha ngomuriro kubanze kwekamba. Zvino wakauraya mudiro wokupisha. Vakororo vaAroni vakaunza ngazi kwaari, yaakafafaza paarita kuritendenedza. Vakaunza kwaari mudiro wokupisha, pamwepo nezvigurwa zvawo, nesoro, naye wakazvipisha paarita. Wakasuka maura nemadondova, wakazvipisha padera pomudiro wokupisha paarita. Wakaunza mudiro wevanhu. Wakatora mbudzi, yaiya yomudiro wokushaisha kwevanhu, wakaiuraya, wakaipira kuita mudiro wokushaisha, kudai ngeyokutanga. Wakaunza mudiro wokupisha, akaupira kudai ngomuitiro wacho. Wakaunza mudiro wezviyo wakanokora tsimba yawo, wakaupisha padera pearita, ngepabanze pomudiro wokupisha wemangwanani. Naye wakauraya mukono negondohwe kuita mudiro wokuiyana, waiya wevanhu. Vakororo vaAroni vakamuunzira ngazi, yaakafafaza paarita kuritendenedza, nemafuta omukono neegondohwe, nomuswe wakapamhama, nemafuta anofukidza maura, netsvo, nemafuta ari padera pechiropa. Navo vakaisa mafuta padera pechifuba, wakapisha mafuta padera pearita. Aroni wakazunguza chifuba nechityu chokumudyo kuita mudiro wokuzunguzwa pamberi paMambo Mwari, kudai ngezvaakapanga Mosi. Aroni wakatambanudzira nyara yake kunevanhu, akavafumisa, wakadzaka pashi apo aiya apira mudiro wokushaisha, nomudiro wokupisha, nemidiro yokuiyana. Mosi naAroni vakapotera mutende romushongano, vakabuda, vakafumisa vanhu; nouthende hwaMambo Mwari hwakaoneka kuvanhu veshe. Kwakabuda muriro kubva pamberi paMambo Mwari, wakapedza kupisha mudiro wokupisha nemafuta, zvaiya paarita; uwo wakaoneka ngevanhu veshe, vakadaidzira, vakawa pashi ngehope dzavo. Zvino Nadhabhi naAbhihu vakororo vaAroni vakatora vari vairi umwe ngoumwe chidziyo chake chokupishira mutombo unegwema rakanaka, vakaisa muriro mukati mwazvo, vakaisa mitombo inegwema rakanaka umwo, vakapira muriro usaitenderwa pamberi paMambo Mwari, uwo waasikazi kuvapanga. Kwakabuda muriro kubva pamberi paMambo Mwari wakavapedza, navo vakafa pamberi paMambo Mwari. Zvino Mosi wakati kunaAroni, “Ichi ndicho chaakaereketa Mambo Mwari echiti, ‘Ndinozocheneswa mukati mweavo vanokwedzera kwendiri, nepamberi pevanhu veshe ndinozoirikidzwa.’ ” NaAroni wakanyarara. Mosi wakadaidza Mishaeri naErizafani, vakororo vaUzieri sekuru vaAroni, wakati kwavari, “Kwedzerai, muduse hama dzenyu kubva pamberi pendau yakachena muvaise kubanze kwekamba.” Vakakwedzera pamberi, vakavatwara ngemabhachi avo kuenda kubanze kwekamba, kudai ngezvaakaronza Mosi. NaMosi wakati kunaAroni nokunaEreaza nokunaIthama, vakororo vake, “Musadusa ngundu dzenyu kubva pamasoro enyu, zve, musabaura zvokusimira zvenyu, kuti musafa, nokuti ushungu husazodzaka padera pevanhu veshe; asi hama dzenyu, mhatso yeshe yaIsuraeri vangachema uku kupisha kwaakabasa Mambo Mwari. Nemwi musazobuda kubva pamusiwo wetende romushongano, kuti musafa; ngokuti mafuta okudzodzwa aMambo Mwari ari padera penyu.” Navo vakaita kudai ngokupanga kwaMosi. Mambo Mwari wakaereketa kunaAroni echiti, “Usazomwa vhini nokuti zvinoradzisa, iwewe nokuti vakororo vako, apo munopinda mutende romushongano, kuti musafa; chinozoita chiemeso chemhera nariini kwomuri nomumibarirwana yenyu yeshe. Munosisira kuita muparadzaniso pakati pezvakachena nezvisikazi kuchena, nepakati pezvakasukika nezvisikazi kusukika; zve, kuti mudzidzise vanhu vaIsuraeri zviemeso zveshe zvakaereketa Mambo Mwari kwavari kubudikidza ndiMosi.” Mosi wakaereketa kunaAroni nokunaEreaza nokunaIthama, vakororo vake vaiya vasara, “Torai mudiro wezviyo wakasara wemidiro yaMambo Mwari inoitwa ngomuriro, muudye usina mumera muri pasinde pearita, ngokuti uri wakachenesesa. Nemwi munozoudya pandau yakachena, ngokuti uri chikoaniswa chako nechikoaniswa chevakororo vako, chemidiro yaMambo Mwari inoitwa ngomuriro; ngokuti ndakapangwa kudaro. Asi chifuba chakazunguzwa nechityu chokumirudzwa munozozvidya pandau yakasukika, iwewe nevakororo vako nevanasikana vako mweshe. Ngokuti zviri zvikoaniswa zvako nezvevakororo vako, zvinopirwa kubva kumidiro yokuiyana yevanhu vaIsuraeri. Vanozounza chityu chokumirudzwa nechifuba chokuzunguzwa pamwepo nemidiro inoitwa ngomuriro yemafuta, kuti zvizunguzwe kuita mudiro wokuzunguzwa pamberi paMambo Mwari; nazvo zvinozoita zvako iwewe nevakororo vako, ngechiemeso chemhera nariini, kudai ngezvaakapanga Mambo Mwari.” Zvino Mosi wakatsvakisisa mbudzi yokuita mudiro wokushaisha, penya, yaiya yapishwa; naye wakatsenekera Ereaza naIthama, vakororo vaAroni avo vaiya vachapona echiti, “Amuzi kudya ngenyi mudiro wokushaisha kundau yakachena? Ngokuti chiri chakachenesesa, naMwari wakachipa kwomuri kuti mubvise kushaisha kwembungano, kuita muripo wevanhu pamberi paMambo Mwari. Ngazi yacho aizikuunzwa mukati mwendau yakachena. Ngegwinyiso mwaisisira kuidyira mundau yakachena, kudai ngezvendakamupanga.” Aroni wakati kunaMosi, “Ringira, nyamashi vapira mudiro wavo wokushaisha nomudiro wokupisha pamberi paMambo Mwari, asi zviro zvakadai zvaitika kwendiri! Kudai ndaiya ndadya mudiro wokushaisha nyamashi, chaizoashirika here mukuona kwaMambo Mwari?” Naapo Mosi azwa izvi wakatenderana nazvo. Mambo Mwari wakaereketa kunaMosi nokunaAroni, echiti kwavari, “Ereketai kunevanhu vaIsuraeri mwechiti, ‘Idzi ndidzo mhuka dzomungadya pakati pemhuka dzeshe dzomunyika. Idzo dzeshe dzinemadondova akamweswa kuita mairi, nokutsengesa marukurwa, pakati pemhuka idzo mungadzidya. Asi pakati peidzi dzinotsengesa marukurwa, nokuti idzo dzinemadondova akamweswa; amuzodzidyi idzi kudai ngekamera kunyazwi rinotsengesa marukurwa asi arina madondova akamweswa, rakasvipiswa kwomuri; nembira, kunyazwi inotsengesa marukurwa, asi madondova aazi kumweswa; yakasvipiswa kwomuri; netsuro, kunyazwi inotsengesa marukurwa asi aizi kumweswa madondova; yakasvipiswa kwomuri; nenguruve, kunyazwi madondova ayo akamweswa, kuita masondo mairi, asi aitsengesi marukurwa; yakasvipiswa kwomuri. Nyama yadzo musazoidya, nemiiri yadzo musazoigwama; dzakasvipiswa kwomuri.’ “Idzi mungadya kwedziri dzeshe dziri mumvura: zviro zveshe izvo zvinemabesu nezvinemagwamba zviri mumvura, nezviri muruandhle, nezviri mumikova, izvo mungadya. Asi chiro cheshe chisina mabesu nemagwamba chiri muruandhle, nechiri mumikova, cheizvo zveshe zvinogeza mumvura, neizvo zveshe zvinopona mumvura, zvinozoita chinyangadzo kwomuri. Zvinogara zvakaita chinyangadzo kwomuri; musazodya nyama yadzo, asi munozoerenga miiri yadzo kuti zvinyangadzo. Chiro cheshe chisina mabesu nemagwamba chinogara mumvura, chinozoita chinyangadzo kwomuri. “Idzi munozodzierenga kuita chinyangadzo pakati peshiri; musazodzidya, ngadziite zvinyangadzo: madorambudzi, makwanga, chapungu, gwakura mapande, nechiatsi, nembeu yacho yeshe; nemakungu eshe ngembeu dzao dzeshe; nemhowani, nekwekwi, nechikodzi nembeu yacho yeshe; nechimwaduku, nehwazi, nezizi guru; nenonera, nezvinyamundanda, nenjerere, nomukwasi, neriti, mbeu yaro yeshe, netsungururu, nechinyamuremwaremwa. “Mbeu dzeshe dzezviro zvinemaphaphiro zvinohamba ngemirenje mirongomuna, zvinozoita chinyangadzo kwomuri. Asi pakati peizvi mungadya kwezviri zveshe zvinemaphaphiro, zvinotamanda ngemirenje mirongomuna, zvinemirenje inenhengo padera petsoka dzazvo, kuti zvitomuke ndiyo padera penyika. Ndizvo izvi mungadya pakati pazvo; ndongwe ngembeu dzadzo, nemabupwe ngembeu dzao, nemandere ngembeu dzao, nemakwiza ngembeu dzao. Asi zvimweni zviro zvinemaphaphiro, zvinotamanda, zvinetsoka murongomuna, zvinozoita chinyangadzo kwomuri. “Ngeizvi munozoita vakasvipiswa ndizvo: kunyazwi ndiani unozogwama miiri yazvo unozoita wakasvipiswa metsa madeekoni. Nouwo unozotwara nokuti ngechiri chomuiri wazvo unozosuka zvokusimira zvake, unozoita wakasvipiswa metsa madeekoni. Mhuka dzeshe dzinetsoka dzakaparadzana asi dzinemadondova asikazi kumweswa, nokuti kutsengesa marukurwa, dziri dzakasvipiswa kwomuri; veshe vanodzigwama vanozoita vakasvipiswa. Dzeshe dzinohamba ngendwara, pakati pemhuka dzeshe dzinohamba ngemirenje mirongomuna, dzakasvipiswa kwomuri. Uwo unogwama miiri yadzo unozoita wakasvipiswa metsa madeekoni. Nouwo unotwara miiri yadzo unozosuka zvokusimira zvake, nokuita usikazi kusukika metsa madeekoni; idzi dzinoita dzisikazi kusukika kwomuri. “Izvi zvinozoita zvisikazi kusukika kwomuri kwezviri zviro zvinotamanda munyika: chikoo, nembeya, gwavava nembeu dzaro dzeshe, gwama, nerwaivhi, nomukodyo, mukodyo womujecha. Izvi zviri zvakasvipiswa kwomuri pakati peizvo zvinotamanda; nouwo unozvigwama, apo zvafa, unozoita wakasvipiswa metsa madeekoni. Kunyazwi chiinyi chezvinowira padera pazvo, apo zvafa, chinozoita chakasvipiswa; kunyazwi chiri chidziyo chomuti, nokuti chokusimira, nokuti doo, nokuti saka, nokuti ngechiri chinoshandiswa, kunotamika kuti chiiswe mumvura, chinozoita chakasvipiswa metsa madeekoni; ngokudaro chinozoita chakasukika. Nezvidziyo zveshe zvedongo apo pezvinozowiremwo, kunyazwi chiri mukati mwazvo chinozoita chakasvipiswa; nemwi munozozviputsa. Kudya kweshe kungadyiwa, kunozoita kwakasvipiswa apo kwagwamiwa ngemvura iyi; nazvo zveshe zvinomwiwa zvinozoita zvakasvipiswa kudai zvaiya muzvidziyo izvi. Naapo peshe peinozowa miiri yazvo panozoita pakasvipiswa kunyazwi pachoto, nokuti pandau dzinogadzikwa hari, zvinozoputsirwa pashi; ngokuti zviri zvisikazi kusukika kwomuri. Asi apo pane chinyuka chemvura nokuti gandwa, apo peiri mvura yakawanda, panozoita pakasukika; asi uwo unobata iyo miiri yakafa unozoita usikazi kusukika. Kudai miiri yazvo zvechiwira padera pembeu dzokukusha, dzinoda kukushwa, dzinozoita dzakasukika kwomuri. Asi kudai mvura yechidururirwa padera padzo, dzinozoita dzisikazi kusukika kwomuri. “Kudai mhuka yechifa, kunyazwi ngeiri, yomungadya, uwo unogwama muiri wayo unozoita wakasvipiswa metsa madeekoni. Avo vanozodya muiri wayo vanozosuka zvokusimira zvavo, navo vanozoita vakasvipiswa metsa madeekoni. Naavo vanotwara muiri wayo vanozosuka machira avo, vanozoita vakasvipiswa metsa madeekoni. “Zvisikwa zveshe zvinotamanda padera penyika zvinozoita chinyangadzo; azvizodyiwi. Kunyazwi chiinyi cheizvo zvinogwezva ngendani, nokuti zvinohamba ngetsoka murongomuna, nokuti zvinemirenje yakawanda pakati pezviro zveshe zvinotamanda padera penyika, izvo musazodya, ngokuti zviri chinyangadzo. Musazodziita chinyangadzo ngezviro zvinogwezva, zve, musazodzisvipisa ndizvo; kuti musvipiswe ndizvo. Ngokuti inini ndini Mambo Mwari, Mwari wenyu; ndizvo munozodzichenesa, munozoita vakachena, ngokuti inini ndiri wakachena. Zve, musazodzisvipisa ngezviro zvinogwezva padera penyika. Ngokuti ndini Mambo Mwari uwo wakamubudisa kubva kunyika yeEgipite, kuti ndiite Mwari wenyu; ndizvo munozoita vakachena, ngokuti inini ndiri wakachena. “Ichi ndicho chironzo chemhuka necheshiri nechezvipuka zveshe zvinopona zvinohamba mumvura nechezvipuka zveshe zvinogwezva padera penyika, kuita muparadzaniso pakati pezvakasvipiswa nezvisikazi kusvipiswa, nepakati pemhuka dzinodyiwa, neidzo dzisikadyiwi.” Mambo Mwari wakaereketa kunaMosi echiti, “Ereketa kunevanhu vaIsuraeri wechiti, ‘Kudai mukadzi anemimba nokubara mwana womukomana, unozogara akasvipiswa mazuva manomwe; kudai ngemazuva okuenda kwake kumwedzi unozoita wakasvipiswa. Ngezuva rechisere mwana womukomana unozochekwa ganda repamberi pomuiri wake. Naye unozogara mazuva makumi matatu nematatu okubva mungazi yokubara kwake; asazobata chiro chakachena, nokuti kupotera kundau yakachena, metsa mazuva okusukika kwake apere. Asi kudai echibara mwanasikana unozoita usikazi kusukika mavhiki mairi, kudai ngemazuva okuenda kwake kumwedzi; naye unozopedza mazuva makumi matanhatu nematanhatu engazi yokubara kwake.’ “Naapo mazuva okusukika kwake apera, omwana womukomana nokuti omusikana, ngaaunze kunomupristi gwai raane gore rimwe, kuita mudiro wokupisha, nokuti njia itsva nokuti gora, kuita mudiro wokushaisha, pamusiwo wetende romushongano. Naye unozopira pamberi paMambo Mwari, kuita muripo wake; unozosukika kubva kumubvidza wake. Ichi ndicho chironzo chouwo unobara mwana womukomana nokuti mwanasikana. Kuti asikakoni kuunza gwai ngaaunze magora mairi nokuti njia itsva mbiri, imwe iite mudiro wokupisha, neimweni iite mudiro wokushaisha; nomupristi unozomuitira muripo wake, naye unozoita wakasukika.” Mambo Mwari wakaereketa kunaMosi naAroni echiti, “Kudai munhu echimera mota pamuiri wake, nokuti chiparambudzi, nokuti gumwa, nacho chinozoita pamuiri wake kudai ngenhenda yemapere, naapo unozounzwa kunaAroni mupristi, nokuti kunoumwe wevakororo vake mupristi. Mupristi unozoringira ara riri mumuiri wake; kudai mviri iri apo panenhenda yechikunukuka kuchena, neara rechioneka rechidzama kuenda mumuiri wake, riri ara remapere; nomupristi unozomuringira, nokuronza kuti wakasvipiswa. Asi kudai ara iro riri rakachena mumuiri wake, naro rinooneka kuti aridzaki pashi munyama yomuiri wake, nemviri iripo aikunukuki kuchena, naapo mupristi unozokonyera uwo uneara mazuva manomwe. Nomupristi unozomuringirazve ngezuva rechinomwe; kudai ara rechioneka kuti ariendi mberi kukura, naro ariparariri mumuiri wake naapo mupristi unozomukonyerazve mazuva amweni manomwe. Nomupristi unozomuringirazve ngezuva rechinomwe; penya, kudai ara rinonga rakasvipa, neara risikaparariri mumuiri, mupristi unozomuronzera kuti wakasukika; chiri chiparambudzi chega; naye unozosuka zvokufuka zvake, unozoita wakasukika. Asi kudai ara rechipararira kakurutu mumuiri wake, ngesure aiya aonwa ngomupristi kuti uri wakasukika, unozooniwazve ngomupristi. Nokudai mupristi unozomuringirazve, kudai echiona kuti chiparambudzi chinopararira mumuiri wake naapo mupristi unozomuronzera kuti uri wakasvipiswa; mapere. “Naapo kudai nhenda yemapere yabatira pamunhu, ngaaiswe kunomupristi. Nomupristi unozomuringira; kudai panemota yakachena iri mumuiri wake, nayo yakunukudza mviri kuti ichene, nokudai iripo nyama isina urwa yakatsvuka mumota, mapere ekare ari pamuiri wake. Mupristi unozomuronzera kuti uri wakasvipiswa; naye aazomukonyeri, ngokuti uri wakasvipiswa. Nokudai mapere echipararira mumuiri, nemapere echizara muiri weshe wouwo uneara kubvira kusoro rake metsa kutsoka, mundau dzeshe mumuiri apo paanoringira mupristi, zvino mupristi unozomuringisisa, kudai gumwa razadza muiri wake weshe, unozomuronzera kuti uri wakasukika; uwo uneara rakakunukuka kuita rakachena kundau dzeshe, wakasukika. Asi apo kunozooneka nyama mbishi yakatsvuka kwaari, unozoita wakasvipiswa. Nomupristi unozoringira nyama mbishi, unozoronza kuti wakasvipiswa. Asi kudai nyama mbishi yakatsvuka inozokunukukazve, iitwe yakachena, unozouyazve kunomupristi. Mupristi unozomuringira, nokudai gumwa rakunukuka kuita rakachena, naapo mupristi unozomuronzera kuti uri wakasukika kwaari waiya negumwa. “Naapo muiri uwo waiya nemota munyama yawo, nayo yapora, nepandau yechironda paiya nemota yakachena, nokuti ara rakachena nokutsvukuruka, naro rinozopangidzwa kumupristi. Mupristi unozoriringira, kudai mukuoneka kwaro rinodzaka pashi mumuiri, nemviri yaro yakunukuka kuchena, mupristi ngaamuronzere kuti wakasvipiswa; riri gumwa remapere rakamera kubva muchironda chemota. Asi kudai mupristi echizoringira, nemviri iri padera pawo isikazi kuchena, nokudai risikadzaki pashi mumuiri, asi rapumhuruka, naapo mupristi unozomukonyera mazuva manomwe. Nokudai rechipararira kakurutu mumuiri, naapo mupristi unozomuronzera kuti uri wakasvipiswa; iri igumwa remapere. Asi kudai ara rinogara pandau yaro, risikaparariri, iara remota. Mupristi unomuronzera kuti wakasukika. “Nokuti kudai kuripo mumuiri rupande rwakatsva, nenyama mbishi yakatsva ineara rakachena nokutsvukuruka, nokuti kuchena, mupristi unozoriringira. Kudai mviri iri paara yakakunukuka kuchena, nayo yadzaka pashi mumuiri, iyi inhenda yemapere; akabuda kubva ngepakatsva; ndizvo mupristi unozomuronzera kuti wakasvipiswa. Iyi inhenda yemapere. Asi kudai mupristi echiringira nokuona mviri isikazi kuchena, naro risikadzaki pashi munyama, asi rapumhuruka, mupristi unozomukonyera mazuva manomwe. Mupristi unozomuringirazve ngezuva rechinomwe; kudai rechipararira kakurutu mumuiri, naapo mupristi unozomuronzera kuti wakasvipiswa. Iyi inhenda yemapere. Asi kudai ara rechigara pandau yaro, risikaparariri mumuiri, asi rapumhuruka, iri mota yakamera pakatsva, nomupristi unozomuronzera kuti wakasukika; ngokuti iara rokutsva. “Naapo mwamuna nokuti mukadzi anenhenda pasoro nokuti mumurebvu, mupristi unozoringira nhenda iyo. Kudai yechioneka yechidzaka pashi munyama nokudai inebvudzi dete rakatsvuka nokucheneruka, naapo mupristi unozomuronzera kuti wakasvipiswa; chiri chironda chakaoma, eya, mapere ari musoro nokuti pamurebvu. Kudai mupristi echiringira nhenda inovava, nayo yechioneka yechidzaka pashi peganda mumuiri, risina bvudzi rakasvipa, mupristi unozomukonyera mazuva manomwe uwo unenhenda inovava. Ngezuva rechinomwe mupristi unozoringira nhenda inovava; kudai nhenda inovava isikazi kupararira, nomukati mwayo musina bvudzi rakatsvukuruka nokucheneruka, nenhenda inovava ichioneka isikaparariri, isikadzaki pashi peganda mumuiri, unozoparwa bvudzi, asi panenhenda inovava pasazoparwa. Mupristi unozomukonyerazve uwo unenhenda mazuva manomwe. Ngezuva rechinomwe mupristi unozoringira nhenda inovava, kudai isikaparariri muganda mumuiri, nokusikadzaka pashi, mupristi unozomuronzera kuti uri wakasukika. Unozosuka machira ake, unozoita wakasukika. Asi kudai nhenda inovava yechipararira kakurutu muganda mumuiri mwake ngesure kwokushambidzwa kwake, mupristi unozomuringira. Kudai nhenda inovava yechipararira muganda mumuiri, mupristi asazotsvaka bvudzi rakatsvukuruka; uri wakasvipiswa. Asi kudai kwechioneka kuti nhenda inovava aiparariri, nobvudzi dema rakura mukati mwayo, nhenda yapora, uri wakasukika; nomupristi unozomuronzera kuti wakasukika. “Naapo kudai mwamuna nokuti mukadzi anemaara paganda pamuiri, maara akachena, kudai maara ari paganda romuiri akachena anojeka, mupristi ngaamuringire; kudai maara ari muganda mumuiri ari akasvipirika akachena, kuri kurwarwauka ukwo kwabuda kunokura mumuiri; wakasukika. “Kudai munhu unebvudzi rinotapuka musoro mwake, unoita mhanza, uri wakasukika. Kudai unebvudzi rinotapuka kubva pahuma yesoro rake, ngokuhope, iye unemhanza yepahuma, asi wakasukika. Asi kudai kuripo mukati mwemhanza, nokuti mhanza iri muhuma resoro, chironda chakachena nokutsvukuruka, ari mapere abuda mumhanza yake, nokuti mumhanza yehuma yake. Mupristi unozomuringira; kudai chironda chiri chakachena nokutsvukuruka mumhanza yesoro rake, nokuti mumhanza yehuma yake, kudai ngenjira yaanoamba ndiyo mapere muganda romuiri wake, munhu unemapere, wakasvipiswa. Mupristi unozomuronzera kuti uri wakasvipiswa; nhenda iri musoro rake. “Munhu unenhenda yemapere unozopfeka mbatya dzakabaurwa nebvudzi resoro rake risakamwa, naye unozofukidza muromo wake wedera, echidaidzira kuti, ‘Ndiri wakasvipiswa, ndiri wakasvipiswa.’ Eshe mazuva aanenhenda, unozogara ari wakasvipiswa; uri wakasvipiswa. Unozogara ega; unozogara kubanze kwekamba. “Ngendaa yezvokusimira: naapo nhenda yemapere yaoneka munezvokusimira zvemviri nokuti zvorukangaza, kunyazwi iri mutambo dzokuemesa mukurukwa, kunyazwi iri mutambo dzokuchinjika mukurukwa, orukangaza nokuti emviri, kunyazwi iri doo nokuti muchiro chakaitwa ngedoo, kudai nhenda yechionesa kusvipirika nokuti kutsvukuruka muchokufuka, nokuti mudoo, nokuti mutambo dzokuemesa mukurukwa, nokuti mutambo dzokuchinjika mukurukwa, nokuti iri mudoo kunyazwi ngeriri, iri nhenda yemapere, nayo inozopangidzwa kumupristi. Nomupristi unozoringira nhenda iyo, echikonyera chiro chinenhenda iyo mazuva manomwe. Naye unozoringira nhenda ngezuva rechinomwe. Kudai nhenda yechipararira muchokufuka icho, nokuti mutambo dzakaemeswa mukurukwa, nokuti mutambo dzakachinjikwa mukurukwa, nokuti mudoo, nokuti muzviro zvakaitwa ngedoo, nhenda iyo yemapere inopararira; chiri chakasvipiswa. Ndizvo unozopisha chokufuka icho chinenhenda iri mutambo dzakaemeswa mukurukwa, nokuti mutambo dzorukangaza, kunyazwi iri muchiro chakaitwa ngedoo, ngokuti inhenda yemapere inopararira; chinozopishwa ngomuriro. “Kudai mupristi echiringira, isikaparariri muchokufuka, nokuti mutambo dzakaemeswa mukurukwa, nokuti mutambo dzakachinjikwa mukurukwa, nokuti ngechiri chakaitwa ngedoo, naapo mupristi unozovapanga kuti vasuke icho chiro chinenhenda, naye unozochikonyerazve mazuva manomwe. Mupristi unozoringira chiro chinenhenda iyo ngesure kwokusukwa kwacho. Kudai nhenda isikakunukudzi muara wayo, nhenda isikaparariri, chiri chakasvipiswa; ngachipishwe ngomuriro, iyi inhenda inodya ngomukati nokuti ngokubanze. “Kudai mupristi echiringira, nhenda iri yakasvipa ngesure kwokurishamba, naapo unozoribaura kubva pachokufuka, nokuti kubva kunedoo, nokuti kubva kunetambo dzokuemesa mukurukwa, nokuti kubva kunetambo dzokuchinjika mukurukwa. Kudai rechiangira kuoneka muchokufuka, nokuti mutambo dzokuemesa mukurukwa, nokuti mutambo dzokuchinjika mukurukwa, nokuti muchiro chakaitwa ngedoo, inhenda inopararira; ngachipishwe ngomuriro chiro chinenhenda iyo. Asi kudai nhenda yabva muchokufuka, nokuti mutambo dzokuemesa mukurukwa, nokuti mutambo dzokuchinjika mukurukwa, nokuti chiro chakaitwa ngedoo, apo chakasukwa, naapozve chinozosukwa mukuwo wechipiri, chinozoita chakasukika.” Ichi ndicho chironzo chenhenda yemapere muchokufuka chemviri nokuti chorukangaza, kunyazwi iri mutambo dzokuemesa mukurukwa, nokuti iri mutambo dzokuchinjika mukurukwa, nokuti muchiro chakaitwa ngedoo, kuti kuronzwe kuti chiri chakacheneswa, nokuti kuronza kuti chiri chakasvipiswa. Mambo Mwari wakaereketa kunaMosi echiti, “Ichi ndicho chinozoita chironzo chomunhu unemapere ngezuva rokushambidzwa kwake: Unozounzwa kunomupristi. Mupristi unozobuda kubva mukamba nomupristi unozomuringira. Kudai nhenda yemapere yapora kunouwo waiya nemapere, mupristi unozopanga kuti atorerwe ngepamsoro pake uwo wodo kushambidzwa, shiri mbiri dzinopona dzakasukika, nomuti womusidhari, netambo tsvuku, nechimwanda chehisopi. Nomupristi unozopanga kuti imwe yeshiri iurawe muchidziyo chedongo chakamirudzirwa padera pemvura inoerera. Unozotora shiri inopona, pamwepo nomuti womusidhari, netambo yakatsvuka, nechimwanda chehisopi, naye unozozvinyika pamwepo neshiri inopona mungazi yeshiri yakaurawa padera pemvura inoerera. Unozoifafazira kanomwe padera pouwo unoda kusukwa kubva kumapere ake; zvino unozoronza kuti uri wakasukika, unozorekera shiri inopona kuti idzimbururukire mushango. Uwo unoda kuti acheneswe unozosuka zvokufuka zvake, nokupara bvudzi rake reshe, adzishambidze pachake mumvura, naye unozoita wakacheneswa. Ngesure kweizvo unozouya mukamba, asi unozogara kubanze kwetende rake mazuva manomwe. Ngezuva rechinomwe unozopara bvudzi resoro rake reshe nemurebvu wake, netsiyo dzemadziso ake, eya, nebvudzi rake reshe unozoripara. Zvino unozosuka zvokufuka zvake, nokushamba muiri wake ngemvura, naye unozoita wakacheneswa. “Ngezuva rechisere unozotora magondohwe mairi asina kuremara, nethukazi rimwe regwai rinegore rimwe, risina kuremara, nomudiro wezviyo makhirogramu matatu oufu hwakamotseka, kuita mudiro wezviyo unokumanidzwa nemafuta, nebhesini rendiro yemafuta. Mupristi unozomuchenesa unozomuunza uwo unoda kucheneswa, neizvi zviro pamberi paMambo Mwari, pamusiwo wetende romushongano. Mupristi unozotora gondohwe rimwe, unozoripira kuita mudiro wechishaishi chokupauka, pamwepo nebhesini rendiro yemafuta, naye unozozvizunguza kuita mudiro wakazunguzwa pamberi paMambo Mwari. Unozouraya gondohwe pandau panourairwa mudiro wokushaisha nomudiro wokupisha mundau yakachena; ngokuti mudiro wechishaishi chokupauka kudai ngomudiro wokushaisha ngezvomupristi; wakachenesesa. Mupristi unozotora imweni yengazi yomudiro wechishaishi chokupauka, nomupristi unozoiisa kumagumo kwenzee yake yokumudyo youwo unoda kucheneswa, nepadera pegunwe renyara yake yokumudyo, nepadera pegunwe guru retsoka yake yokumudyo. Nomupristi unozotora rupande rwemafuta ari mundiro, nokuadururira pachanza chake chenyara yake yokumuoshwe, nomupristi unozonyika chinwe chake chenyara yokumudyo mumafuta ari munyara yake yokumuoshwe, unozofafaza ngaao mafuta ngechinwe chake pamberi paMambo Mwari mikuwo minomwe. Naamweni emafuta ari munyara yake mupristi unozoaisa kumagumo enzee yake yokumudyo, nepadera pegunwe renyara yake yokumudyo, nepadera pechikunwe chake chikuru chorutsoka rwake rwokumudyo, nepadera pengazi yomudiro wokupauka. Mafuta eshe anosara munyara yomupristi unozoadurura padera pesoro rouwo unoda kucheneswa. Mupristi unozomuitira muripo pamberi paMambo Mwari: Mupristi unozopira mudiro wokushaisha amuripire uwo unoda kucheneswa kubva kwokusvipiswa kwake. Ngesure kweizvi unozouraya mudiro wokupisha; nomupristi unozopira mudiro wokushaisha, nomudiro wezviyo padera pearita. Mupristi unozomuitira muripo, naye unozoita wakacheneswa. “Asi kudai ari murombo, asikakoni kuona zvakawanda kudaro, ngaatore gondohwe rimwe kuti riite mudiro wokupauka kuti uzunguzwe, kuti uitwe muripo kwaari, nekhirogramu rimwe roufu hwakamotseka hwakakumanidzwa nemafuta kuita mudiro wezviyo, nendiro yemafuta, nemagora mairi, nokuti njia mbiri itsva, zvaanokona kuona; imwe inozoita mudiro wokushaisha neimweni inozoita mudiro wokupisha. Naye unozozviunza ngezuva rechisere kunomupristi, pamusiwo wetende romushongano, pamberi paMambo Mwari; nomupristi unozotora gondohwe romudiro wokupauka, nendiro yemafuta, nomupristi unozozvizunguza kuita mudiro wokuzunguzwa pamberi paMambo Mwari. Mupristi unozouraya gondohwe romudiro wokupauka, unozotora ngazi yomudiro wokupauka, nokuiisa kumagumo kwenzee yokumudyo, nepadera pegunwe renyara yake yokumudyo, nepadera pechikunwe chikuru chorutsoka rwake rwokumudyo. Mupristi unozodurura rupande rwemafuta muchanza chenyara yake yokumudyo, nomupristi unozofafazira ngechinwe chake chokumudyo amweni emafuta ari munyara yake yokumuoshwe kanomwe pamberi paMambo Mwari. Mupristi unozotora amweni emafuta ari munyara yake nokuaisa kumagumo enzee youwo unoda kusukika, nepadera pegunwe renyara yake yokumudyo, nepadera pechikunwe chake chikuru chorutsoka rwake rwokumudyo, kundau yengazi yomudiro wokupauka. Mafuta eshe anosara munyara yomupristi unozoaisa padera pesoro rouwo unoda kucheneswa, kumuitira muripo pamberi paMambo Mwari. Naye unozopira rimwe regora, nokuti imwe yenjia itsva, kudai ngezvaanokona kuona, chimwe kuita mudiro wokushaisha, nechimwe kuita mudiro wokupisha, pamwepo nomudiro wezviyo, nomupristi unozomuitira muripo uwo unoda kucheneswa pamberi paMambo Mwari.” Ichi ndicho chironzo chouwo unenhenda yemapere, usikakoni kuona izvo zvakaemeserwa kuita zvokucheneswa kwake. Mambo Mwari wakaereketa kunaMosi naAroni echiti, “Naapo mwoguma munyika yeKhenani, nyika yendinozomupa kuita nhaka, neni ndechizoisa nhenda yemapere mumhatso munyika iri nhaka yenyu, mune wemhatso unozouya kunomupristi echiti, ‘Kunooneka kwendiri kunga kunenhenda yemapere mumhatso mwangu.’ Mupristi unozopanga kuti kuduswe zviro zviri mumhatso, asati apotera mupristi kuti aone nhenda, kuti zveshe zviri mumhatso zvisazoita zvakasvipiswa. Ngesure kweizvo unozopotera kuti aringire mhatso. Unozoringira nhenda iyo; kudai nhenda iri parukumbati rwemhatso, inemiara yakasvipirika nokuti yakatsvukuruka, nokuti kudai yechioneka yakapinda kudzama iri pashi kuno padera perukumbati, mupristi unozobuda mumhatso kuenda pamusiwo wemhatso, naye unozokonya mhatso mazuva manomwe. Mupristi unozouyazve ngezuva rechinomwe, echiringira; penya, kudai nhenda yechipararira murukumbati rwemhatso, mupristi unozopanga kuti mapuwe awo akaoneka anenhenda aduswe, navo vanozorasha kubanze kwedhorobha kundau isikazi kusukika. Naye unozoita kuti mhatso iparwe ngomukati kundau dzeshe; vanozodurura maondo eshe akaparwa kubanze kwedhorobha kundau isikazi kusukika. Vanozotora mapuwe amweni nokuaisa pandau yeao mapuwe akaduswa, vechitorazve madhaka amweni, vechisetazve mhatso ndiwo. “Kudai nhenda yechiuyazve, yechibuda mumhatso iyo, ngesure kwokuduswa kwemapuwe awo, kwokuparwa kwemhatso, nangesure kwokusetwa kwemhatso, mupristi unozouya echiringira; kudai nhenda yapararira mumhatso, inhenda yemapere inopararira mumhatso; yakasvipiswa. Naye unozopwanyira pashi mhatso, mapuwe ayo, miti yayo, nemaondo eshe emhatso; unozozvitwara kurasha kubanze kwedhorobha kundau isikazi kusukika. Veshe vanozopotera mumhatso iyo ngomukuwo wokukonywa kwayo vanozoita vakasvipiswa metsa madeekoni; navo veshe vanozoata mumhatso iyo vanozosuka zvokufuka zvavo; navo veshe vanodyira mumhatsoyo vanozosuka zvokufuka zvavo. “Kudai mupristi echipotera nokuringira, nenhenda isikazi kupararira mumhatso, ngesure mhatso yakasetwazve, naapo mupristi unozoronza kuti mhatso yakasukika, ngokuti nhenda yapora. Kusukika kwemhatso unozotora shiri mbiri, muti womusidhari, jira rakatsvuka nehisopi kuisuka ndizvo. Unozouraya shiri imwe muchidziyo chedongo padera pemvura inoerera. Unozotora muti womusidhari, nehisopi, jira rakatsvuka, neshiri inozwa, nokuzvinyika mungazi yeshiri yakaurawa, nomumvura inoerera, nokufafazira mhatso kanomwe. Ndizvo unozosuka mhatso ngengazi yeshiri, ngemvura inoerera, ngeshiri inopona, muti womusidhari, hisopi, nejira rakatsvuka. Asi shiri inopona unozoirekera kubanze kwedhorobha idzimbururukire mushango; ndizvo unozoita muripo wemhatso, nayo inozoita yakasukika.” Ichi ndicho chironzo chembeu dzeshe dzenhenda yemapere, anovava, nokuti nhenda yemapere yechokupfeka, nenhenda yemhatso, neyemota, yechiperembudzi, nechegumwa, kuonisa muparadzaniso wechakasvipiswa nechakasukika. Ichi ndicho chironzo chemapere. Mambo Mwari wakaereketa kunaMosi naAroni echiti, “Ereketa kuvanhu vaIsuraeri, wechiti kwavari, ‘Apo munhu anomutunda ngazi kubva mumuiri wake, wakasvipiswa ngendaa yomutunda ngazi wake. Uku kunozoita kusikasukika kwake kwomutunda ngazi wake: kunyazwi muiri wake wechibudisa mutunda ngazi, kunyazwi muiri wake wapwa, kuri kusvipiswa kwake. Mubhedhi weshe apo paanoata unomutunda ngazi uri wakasvipiswa nechiro cheshe chaanozogara padera pacho chinozoita chakasvipiswa. Weshe unobata mubhedhi wake unozosuka zvokufuka zvake, nokudzishamba ngemvura, naye unozoita wakasvipiswa metsa madeekoni. Veshe vanogara pachiro nokunyazwi ngechiri chagariwa ngouwo unotunda ngazi, unozosuka zvokufuka zvake, nokushamba muiri wake, unozoita wakasvipiswa metsa madeekoni. Veshe vanogwama muiri wouwo unomutunda ngazi vanozosuka zvokufuka zvavo, vashambe muiri wavo, vanozoita vakasvipiswa metsa madeekoni. Kudai uwo unomutunda ngazi echipfira mata padera peavo vakasukika, naapo vanozosuka zvokufuka zvavo, nokudzishamba mumvura, vanozoita vakasvipiswa metsa madeekoni. Kunyazwi ngechiri chigaro chaanogara ari padera pacho, uwo unomutunda ngazi chinozoita chakasvipiswa. Veshe avo vanogwama chiro chaiya pashi pake vanozoita vakasvipiswa metsa madeekoni, navo veshe vanotwara chiro chakadaro vanozosuka zvokufuka zvavo nokudzishambidza ngemvura, navo vanozoita vakasvipiswa metsa madeekoni. Kunyazwi ndiani unogwamwa ngouwo unemubvidza, asikazi kushamba nyara dzake ngemvura, unozosuka zvokufuka zvake, nokushamba ngemvura, naye unozoita wakasvipiswa metsa madeekoni. Chidziyo cheshe chedongo chaanogwama unemubvidza, chinozoputswa; nechidziyo cheshe chakaitwa ngomuti chinozosukwa ngemvura.’ “Naapo uwo unomubvidza acheneswa kubva kumubvidza wake ngaadzierengere mazuva manomwe okucheneswa kwake, asuke zvokufuka zvake, nokushamba muiri wake mumvura inoerera, naye unozoita wakasukika. Ngezuva rechisere unozodzitorera magora mairi nokuti njia mbiri itsva, auye pamberi paMambo Mwari kumusiwo wetende romushongano, nokuzvipa kunomupristi. Mupristi unozopira imwe kuita mudiro wokushaisha, neimweni kuita mudiro wokupisha; nomupristi unozomuitira muripo pamberi paMambo Mwari ngendaa yomutunda ngazi yake. “Kudai munhu wemwamuna echidzirotera, naye unozoshamba muiri wake weshe ngemvura, unozoita wakasvipiswa metsa madeekoni. Zvokufuka zveshe, zvakaitwa ngemachira nematoo dzinodonherwa ngembeu yeshe youhwamuna, zvinozosukwa ngemvura, nokuita zvakasvipiswa metsa madeekoni. Kudai mwamuna echiatana nomukadzi vakadonherwa ngembeu youhwamuna, ngavashambe veshe ngemvura, navo vanozoita vakasvipiswa metsa madeekoni. “Naapo mukadzi ari kumwedzi, kudai ngomuitiro wake anengazi kubva pamuiri wake, unozoita wakasvipiswa mazuva manomwe, nouwo unomugwama unozoita wakasvipiswa metsa madeekoni. Zviro zveshe zvaanoata padera pazvo ngenguva yokusvipiswa kwake zvinozoita zvakasvipiswa; nezviro zveshe zvaanozogara padera pazvo zvinozoita zvakasvipiswa. Kunyazwi ndiani unozogwama mubhedhi wake unozosuka zvokufuka zvake, ashambe muiri wake ngemvura, unozoita wakasvipiswa metsa madeekoni. Kunyazwi ndiani unozogwama chiro chaaigara padera pacho, unozosuka machira ake, nokudzishamba mumvura, naye unozoita wakasvipiswa metsa madeekoni. Kunyazwi chiinyi, mubhedhi wake nokuti chiro chaanogara padera pacho, kudai munhu echizvigwama, unozoita wakasvipiswa metsa madeekoni. Kudai mwamuna kunyazwi ngouri echiata nomukadzi achiri kumwedzi akadonherwa ngokusikasukika kwake, unozoita wakasvipiswa mazuva manomwe; nomubhedhi weshe waanoatapo unozoita wakasvipiswa. “Kudai mukadzi anomubvidza wengazi mazuva akawanda kudarika mazuva okusikasukika kwake, nokuti kuita mubvidza unopinda mazuva okusikasukika, eshe mazuva omubvidza wake unozoangira kuita wakasvipiswa; kudai ngemazuva okusvipiswa kwake, unozoita wakasvipiswa. Yeshe mibhedhi yaanoatapo mazuva eshe omubvidza wake inozoita kwaari kudai ngomubhedhi wake wakasvipiswa. Kunyazwi ngechiri chaanogara padera pacho chinozoita chakasvipiswa, kudai ngokusvipiswa kwemazuva okusikasukika kwake. Kunyazwi ndiani unozogwama izvo zviro unozoita wakasvipiswa, naye unozosuka zvokufuka zvake, nokudzishamba ngemvura, unozoita wakasvipiswa metsa madeekoni. Kudai mubvidza wake wechizopwa, ngaadzierengere mazuva manomwe, ngesure kweizvo unozoita wakasukika. Ngezuva rechisere unozodzitorera magora mairi, nokuti njia mbiri itsva, nokudziunza kunomupristi, kumusiwo wetende romushongano. Mupristi unozopira rimwe kuita mudiro wokushaisha, nerimweni kuita mudiro wokupisha; nomupristi unozomuitira muripo pamberi paMambo Mwari ngendaa yomubvidza wake. “Ngokudaro munozoparadzanisa vanhu vaIsuraeri kubva kwokusikasukika kwavo, kuti vasazofa mukusvipa kwavo, apo vechizosvipisa tende rangu romushongano riri pakati pavo.” Ichi ndicho chironzo chouwo unomubvidza chouwo unobudisa mbeu youhwamuna, naye echisvipiswa ndiyo, chouwo unorwara ngomubvidza wake, chouwo unomubvidza wevamuna nokuti wevakadzi, nechouwo unoatana nomukadzi wakasvipiswa. Mambo Mwari wakaereketa kunaMosi ngesure kwokufa kwevakororo vairi vaAroni, apo pevakauya pasinde pamberi paMambo Mwari, vakafa. Mambo Mwari wakati kunaMosi, “Ereketa kunaAroni mukoma wako, kuti asazopotera nguva dzeshe kundau yakachenesesa mukati mwejira pamberi pechigaro chenyasha, chiri padera pebhokisi rechitenderano, kuti asazofa; ngokuti ndinozooneka mugore padera pechigaro chenyasha. Ngenjira yakadai Aroni unozopotera kundau yakachenesesa: anomukono mutsva kuita mudiro wokushaisha, negondohwe kuita mudiro wokupisha. Unozopfeka bhachi rorukangaza nokusimira bhuruku rorukangaza, unozodzisimidza ngebhande, unozopfeka ngundu yorukangaza; izvi zviri zvokusimira zvakachena. Ndizvo unozoshamba muiri wake ngemvura, nokuzvipfeka. Unozotora kubva kunembungano yevanhu vaIsuraeri zviphongo zviiri kuti zviite mudiro wokushaisha, negondohwe rimwe rokuita mudiro wokupisha. “Aroni unozopira mukono wake kuita mudiro wokushaisha, uri wake emene, unozoita muripo wake pachake nowemhatso yake. Naye unozotora zviphongo zviiri, nokuzvipira pamberi paMambo Mwari pamusiwo wetende romushongano; naAroni unozoita mabhigidha padera pezviphongo zviiri, rimweni bhigidha kupangidzira chiri chaMambo Mwari, nerimweni bhigidha kupangidzira chiri chiphongo chaAzazeri. NaAroni unozounza chiphongo chakabatwa ngebhigidha raMambo Mwari, unozochipira kuita mudiro wokushaisha; asi chiphongo chakabatwa ngebhigidha kuita chaAzazeri, chinozopirwa chechizwa pamberi paMambo Mwari, kumuitira muripo ndicho, nokuchirekera kuti chiende mushango chiite chaAzazeri. “Aroni unozounza mukono wokuita mudiro wokushaisha pachake, adziitire muripo pachake nowemhatso yake; naye unozouraya mukono wokuita mudiro wokushaisha pachake. Unozotora chidziyo chakazara ngemasimbe omuriro anopisha kubva paarita pamberi paMambo Mwari, nenyara dzake dzakazara ngomutombo unegwema rakanaka wakanasa kukuiwa, unozozviunza mukati mwejira rendau yakachena. Naye unozoisa mutombo unegwema rakanaka mumuriro pamberi paMambo Mwari, kuti chiushi chomutombo unegwema rakanaka chitibikire chigaro chenyasha, icho chiri padera pechitenderano, nokuti asazofa. Unozotora imweni yengazi yomukono, nokufafazira ngechinwe chake padera pechigaro chenyasha, nepamberi pechigaro chenyasha, unozofafazira ngazi ngechinwe chake kanomwe. “Naapo unozouraya chiphongo chomudiro wokushaisha wevanhu, unozounza ngazi yacho mukati mwejira rendau yakachenesesa, nokuita ngeiyo ngazi kudai ngezvaakaita ngengazi yomukono, afafazire pachigaro chenyasha, nepamberi pechigaro chenyasha. Ndizvo unozoita muripo wendau yakachenesesa, ngendaa yokusvipiswa kwevanhu vaIsuraeri, nendaa yezvipauka zvavo, nezvishaishi zvavo zveshe; ndizvo zvaanozoita kutende romushongano, iro rinosara navo pakati pokusakasukika kwavo. Akuzoapo munhu mukati mwetende romushongano apo opotera kuita muripo mundau yakachenesesa, metsa iye abuda adziitira muripo pachake, nowemhatso yake yeshe, nowembungano yeshe yaIsuraeri. Zvino unozobuda umwo kuenda kuarita riri pamberi paMambo Mwari, nokuriitira muripo; naye unozotora imweni yengazi yomukono, neimweni yechiphongo, nokuiisa padera penyanga dzearita kuritendenedza. Unozofafazira imweni yengazi padera paro ngechinwe chake mikuwo minomwe, nokurisuka, nokurichenesa kubva kwokusvipiswa kwevanhu vaIsuraeri. “Naapo apedza kuiyanisa ndau yakachena netende romushongano nearita, unozounza chiphongo chichazwa. NaAroni unozoisa nyara dzake dzeshe padera pesoro rechiphongo chichazwa, atende padera pacho kushata kweshe kwevanhu vaIsuraeri, nokupauka kwavo kweshe, nezvishaishi zvavo zveshe, echizviisa padera pesoro rechiphongo, naye unozochiendesa ngenyara yomunhu wakaemeswa, kuenda nacho mushango. Nechiphongo chinozotwara padera pacho zvishaishi zvavo zveshe kuenda kunyika isikagarwi ngomunhu; unozorekera apo chiphongo mushango. “Zvino Aroni unozouya kupotera mutende romushongano, naye unozokhumura zvokusimira zvake zvorukangaza, zvaakapfeka apo apotera mundau yakachenesesa, naye unozozviisa umwo. Unozoshamba muiri wake ngemvura mundau yakachena, nokupfeka zvokusimira zvake, nokubudemwo, nokupira mudiro wake wokupisha, nomudiro wokupisha wevanhu, echidziitira muripo pachake newevanhu. Nemafuta omudiro wokushaisha unozoapisha padera pearita. Nouwo wakaendesa chiphongo chaAzazeri unozosuka zvokufuka zvake, nokugeza muiri wake ngemvura; ngesure kweizvo unozouya mukamba. Mukono wokuita mudiro wokushaisha, nechiphongo chokuita mudiro wokushaisha, ngazi yazvo yakaunzwa mundau yakachenesesa kuti iite muripo, umwewo unozozvibudisa kubanze kwekamba; vanozozvipisha ngomuriro matoo azvo, nenyama yazvo, nemadisa azvo. Nouwo unozozvipisha unozosuka zvokufuka zvake, nokushamba muiri wake ngemvura, ngesure kweizvo unozopotera mukamba. “Neichi chinozoita chiemeso kwomuri chinoti mhera nariini: kuti ngomwedzi wechinomwe, ngezuva regumi romwedzi, munozotambudza mweya yenyu, musazoita mushando nokuti ngouri, kunyazwi vemhuri yenyu nokuti mupara unogara pakati penyu. Ngokuti ngeiro zuva mupristi unozomuitira muripo wokumusuka, kuti musukike kubva kuzvishaishi zvenyu pamberi paMambo Mwari. Izuva reSabatha rokuzorora kwomuri, munozotambudza mweya yenyu, ngechiemeso chemhera nariini. Mupristi uwo waanozodzodza, nokuemesa kuti ashandire mundau youpristi paugaro hwababa ake, iye unozomuitira muripo, naye unozosimira zvokusimira zvorukangaza, zvokusimira zvakacheneswa. Unozoita muripo wendau yakachenesesa, unozoita muripo wetende romushongano newearita unozoita muripo wevapristi nowevanhu veshe vembungano. Neichi chinozoita chiemeso kwomuri chemhera nariini, kuita muripo wevanhu vaIsuraeri wezvishaishi zvavo kamwe ngegore.” Mosi wakaita kudai ngezvaakapanga Mambo Mwari kwaari. Mambo Mwari wakaereketa kunaMosi echiti, “Ereketa kunaAroni nevakororo vake, nokwavari vanhu vaIsuraeri veshe wechiti kwavari: ‘Ichi ndicho chiro chaakapanga Mambo Mwari echiti, kunyazwi ngouri munhu wemhatso yaIsuraeri, unozouraya n'ombe nokuti gwai nokuti mbudzi, mukamba, nokuti unoiuraya kubanze kwekamba, asikaiunzi kumusiwo wetende romushongano, kuipira kuita mudiro kunaMambo Mwari pamberi petabhenakeri raMambo Mwari, munhu uwo unozoa nendaa yengazi, ngokuti wakaparadza ngazi; unozogurwa kubva pakati pevanhu vake. Uku kuitira kuti vaIsuraeri vaunze midiro yavo yevanouraira kubanze, vaiunze kunaMambo Mwari, kumusiwo wetende romushongano, kumupristi nokuipira kunaMambo Mwari kuita midiro yokunyarara. Mupristi unozofafaza ngazi paarita raMambo Mwari, riri pamusiwo wetende romushongano, nokupisha mafuta kuita gwema rakanaka kunaMambo Mwari. Ndizvo avachazopiri midiro yavo kunemiedzaniso yokudira yembudzi, yevanoteera sure kwao kuita umhombo. Ichi chinozoita chiemeso kwavari kunoti mhera nariini pakati pemibarirwana yavo.’ “Newe unozoti kwavari, ‘Kunyazwi ngouri munhu pakati pevaIsuraeri, nokuti munhu mupara unogara pakati penyu, unopira mudiro wokupisha nokuti mubairo, asikauunzi kumusiwo wetende romushongano, kuti aupire kunaMambo Mwari, uwo munhu unozogurwa kubva pakati pevanhu vake.’ “Kunyazwi ngouri munhu uri wemhatso yaIsuraeri, nokuti wevapara unogara pakati penyu, unozodya ngazi, ndinozoemesa hope yangu kubva kunomunhu uwo unodya ngazi, ndinozomugura kubva pakati pevanhu vake. Ngokuti kupona kwomuiri kuri mungazi; neni ndakaipa kwomuri padera pearita kuti iite muripo womweya wenyu; ngokuti ngazi inoita muripo womweya. Ndizvo ndakati kunevanhu vaIsuraeri, ‘Akuna munhu kwomuri unozodya ngazi, zve, akuna mupara unogara pakati penyu unozodya ngazi.’ “Kunyazwi ngouri munhu wevanhu vaIsuraeri, nokuti wevapara unogara pakati penyu, unovhima nokubata mhuka nokuti ngeiri, nokuti shiri inodyiwa, iye unozoparadza ngazi yayo, nokuifushira ngemavhu. Ngokuti kupona kwenyama yeshe ingazi yayo; ndizvo ndakati kunevaIsuraeri, ‘Musazodya ngazi nokuti ngeyeiri nyama, ngokuti kupona kwemiiri yeshe kuri mungazi yayo; uwo unoidya unozogurwa. Munhu weshe unozodya muiri wechadzifira chega, nokuti weicho chakabaurwa ngezvikara, kunyazwi umwe wenyika yenyu nokuti umwe wevapara, unozosuka zvokufuka zvake, nokushamba muiri wake ngemvura, naye unozoita wakasvipiswa metsa madeekoni; naapo unozoita wakasukika. Asi kudai asikazosuki zvokufuka zvake, nokushamba muiri wake, naapo unozoa nendaa yokushata kwake.’ ” Mambo Mwari wakaereketa kunaMosi echiti, “Ereketa kunavanhu vaIsuraeri, wechiti kwavari: ‘Inini ndini Mambo Mwari, Mwari wenyu. Musazoita kudai ngemishando yevanhu venyika yeEgipite kwemwaigara; musazoitazve kudai ngemishando yevanhu venyika yeKhenani, kwendinomuendesa. Musazohamba ngezviitiro zvavo. Imwimwi munozoita zvitongero zvangu, mungwarire zviemeso zvangu, muhambe mukati mwazvo: inini ndini Mambo Mwari, Mwari wenyu!’ Ndizvo munozongwarira zviemeso zvangu, nezvitongero zvangu; izvo kudai munhu echizviita unozopona ndizvo: inini ndini Mambo Mwari. “Akuna naumwe wenyu unozokwedzera kuti afukure upunu hwouwo uri hama yake: ngokuti inini ndini Mambo Mwari. Usazofukura upunu hwababa ako, nokuti upunu hwamai ako usazohufukura; ngokuti mai ako, newe usazofukura upunu hwake. Usazofukura upunu hwomukadzi wababa ako; ngokuti huri upunu hwababa ako. Upunu hwehanzvadzi yako, mwanasikana wababa ako, nokuti mwanasikana wamai ako, kunyazwi uwo wakabarwa mukanyi iro, nokuti usikazi kubarwa mukanyi iro, eya, usazofukura upunu hwavo. Upunu hwomwanasikana womukororo wako, nokuti hwomwanasikana womwanasikana wako, eya, upunu hwavo usazohufukura; ngokuti upunu hwavo huri hwako. Upunu hwomwanasikana womukadzi wababa ako, wakabarwa ndibaba ako uri hanzvadzi yako, newe usazofukura upunu hwake. Usazofukura upunu hwehanzvadzi yababa ako ngokuti muiri wababa ako. Usazofukura upunu hwomunun'una wamai ako; ngokuti muiri wamai ako. Usazofukura upunu hwomunun'una wababa ako, newe usazokwedzera kuatana nomukadzi wake; ngokuti iye ndimainini ako. Usazofukura upunu hwomuzakazi wako; ngokuti iye uri mukadzi womukororo wako; usazofukura upunu hwake. Usazofukura upunu hwomukadzi womunun'una wako; ngokuti huri upunu hwomunun'una wako. Usazofukura upunu hwomudzimai nohwomwanasikana wake, zve, usazoroora mwanasikana womukororo wake nokuti mwanasikana womwanasikana wake, kuti ufukure upunu hwake; ngokuti ava muiri wako; kushata. Zve, usazoroora mukadzi nomunun'una wake pamwepo, kumutambudza nokufukura upunu hwake, ngenguva yokupona kwake. “Usazokwedzera kumukadzi kumufukura upunu hwake, ngemazuva eshe okusvipiswa kwake aari kumwedzi ngokusvipiswa kwake. Zve, usazoatana nomukadzi womuakirwana wako, kuti udzisvipise ndiye. Usazopa noumwe worudzi rwako kuti apotye mumuriro kuna Morekhi, zve, usazotsverudza zina raMwari wako: ngokuti inini ndini Mambo Mwari. Usazoatana nomunhu wemwamuna kudai ngokuatana nomukadzi; chiri chinyangadzo. Zve, usazoatana nemhuka nokuti ngeiri kuti udzisvipise ndiyo; zve, nokuti munhu womukadzi kunyazwi ngouri asazoema pamberi pemhuka kuti aatane nayo; chiri chinyangadzo. “Musazodzisvipisa kunyazwi ngechiri cheizvi zviro, ngokuti ngeizvi zveshe madzinza endakadzinga kubva pamberi penyu vakadzisvipisa ndizvo. Nenyika yakasvipiswa; ndizvo ndakaiorora ngendaa yechishaishi chayo, nenyika yemene yakarutsa vagari vayo. Asi imwimwi munozongwarira zviemeso zvangu nezvitongero zvangu, musazoita kunyazwi ngechiri cheizvi zvinyangadzo, zve, kunyazwi ndiani uri wedzinza renyu, nokuti kunyazwi ngouri wevapara avo vanogara pakati penyu, (ngokuti izvi zveshe zvinyangadzo zvaiitwa ngevanhu venyika, avo vaiya pamberi penyu, nenyika yakasvipiswa,) kuti nyika isazomurutsawo, apo mwechiisvipisa, kudai ngezveyakarutsa madzinza aiya pamberi penyu. Ngokuti kunyazwi ndiani unozoita izvi zvinyangadzo, eya, munhu unozviita unozogurwa kubva pakati pevanhu vake. Ndizvo munozongwarira chiemeso changu, chokuti musazoita nokuti ngechiri chemiitiro iyi inonyangadza, yakaitwa ngepamberi penyu, nokuti musazodzisvipisa ndiyo: ngokuti ndini Mambo Mwari, Mwari wenyu.” Mambo Mwari wakaereketa kunaMosi echiti, “Ereketa kumbungano yeshe yevanhu vaIsuraeri, wechiti kwavari, ‘Munozoita vakachena ngokuti inini Mambo Mwari, Mwari wenyu ndiri wakachena. Munhu weshe unozoremeredza mai ake nababa ake, nokungwarira maSabatha angu: ndini Mambo Mwari, Mwari wenyu. Musapetukira kumiedzaniso, nokuti kudziitira zvimwari zvakanyunguruswa: inini ndini Mambo Mwari, Mwari wenyu.’ “Naapo munozopira mubairo yemidiro yokuiyana kunaMambo Mwari, munozopira ngenjira inoita kuti muashirike. Munozoidya ngezuva ririro romunozouraya, nokuti nechimangwani; nokunyazwi chiinyi chinosara metsa zuva rechitatu, chinozopishwa ngomuriro. Nokudai chechizodyiwa ngezuva rechitatu, chinozoita chinyangadzo; achizoashiriki. Munhu weshe unozochidya, unozodzitwarira ndaa yake, ngokuti wakatsverudza icho chiro chakachena chaMambo Mwari; nouwo munhu unozogurwa kubva pakati pevanhu vake. “Naapo munozokukura zviyo zveminda yenyu, musazokukura kupedzera makhona eminda yenyu, zve, musazonongeredza izvo zvinosara mukukukura kwenyu. Nemwi musazozuwa mivhini yenyu kuti isare isina zviro nokuti kunongeredza mavhini akawira pashi; munozozvisiira varombo nevapara: inini ndini Mambo Mwari, Mwari wenyu. “Musazoba, nokuti kuradzikidza, nokuti kunyeperana. Musazopika ngokunyepa ngezina rangu, zve, musazotsverudza zina raMwari wenyu: inini ndini Mambo Mwari. “Musazoradzikidza muakirwana wako, nokuti kumubira; misharo youwo unoshanda isazogara nemwi usiku hweshe metsa nechimangwani. Musazotuka dziiranzee, nokuti kuisa chipumhuniso munjira yemapofu; asi munozotya Mwari wenyu: inini ndini Mambo Mwari. “Musazotonga ngokusikaruramisa; musazoa nomutsananguro kumurombo, nokuti kuremeredza uri mukuru; asi munozotonga muakirwana wenyu ngokururamisa. Musazohambahamba mwechiita tura wakaema pakati pevanhu; musazodetsera kuitira ndaa yengazi yomuakirwana wenyu: inini ndini Mambo Mwari. “Musazonyenya hama yenyu mumwoyo mwenyu; ngegwinyiso munozopanga muakirwana wenyu, kuti musazogara nechishaishi imwimwi pachenyu ngendaa yake. Musazounzidzira, nokuti kugara unebundu kunevanhu venyu, asi munozoda muakirwana wenyu kudai ngokudzida kwenyu: inini ndini Mambo Mwari. “Munozongwarira zviemeso zvangu. Musazotendera kuti zvifuyo zvenyu zvivevedzwe ngeizvo zvembeu imweni; musazokusha munda wenyu ngembeu dzinokumanidzwa nedzimwe; musazopfeka chokusimira chakarukwa ngetambo dzemviri pamwepo netambo dzorukangaza. “Kunyazwi ndiani unozoatana nomukadzi uri hloko, wakaemeserwa mwamuna umweni, asi asikazi kuripirwa, nokuti kusunhurwa, vanozotongwa. Avazourawi, ngokuti iye waiya asati asunhurwa. Asi munhuwo unozounza mudiro wake wokupauka kunaMambo Mwari, kumusiwo wetende romushongano, gondohwe kuita mudiro wokupauka. Nomupristi unozomuitira muripo pamberi paMambo Mwari ngegondohwe romudiro wokupauka ngendaa yechishaishi chake chaakaita, nechishaishi chaakaita chinozorekererwa kwaari. “Naapo mwazoguma munyika iyo, mwazosima mbeu dzeshe dzemiti yemichero, naapo munozoerenga michero yayo kuti iri yakarambidzwa; makore matatu munozoierenga kuti iri yakarambidzwa, aizodyiwi. Mugore rechirongomuna yeshe michero yayo inozoita yakacheneswa kuti mukudze Mambo Mwari ndiyo. Asi mugore rechishanu munozodya michero yayo, kuti kubereka kwayo kuwanzwe kwomuri: inini ndini Mambo Mwari, Mwari wenyu. “Musazodya chiro chinengazi yacho. Zve, musazoshandisa masaramuso nokuti kushandisa uroyi. Musazopara masoro enyu kuita mabaraara kutendenedza soro, zve, musazopara makhona endebvu dzenyu. Musazocheka miiri yenyu kuita nyora ngendaa yewakafa, nokuti kucheka nyora pamuiri yenyu: inini ndini Mambo Mwari. “Musazotsverudza mwanasikana wenyu ngokumuita hure, kuti vanhu venyika vasazodzaka pashi kuita mahure, nenyika izare ngokushata. Munozongwarira maSabatha angu, nokuremeredza ndau yangu yakachena: inini ndini Mambo Mwari. “Musakunukukira kwavari vanomweya yokufembera, nokuti kutsvaka vari man'anga kuti musvipiswe ndivo: inini ndini Mambo Mwari, Mwari wenyu. “Munozomirukira uwo waanemvi, nokuremeredza hope yomunhu musharuka, utye Mwari wako: inini ndini Mambo Mwari. “Naapo munhu mupara echizogara munyika yenyu, musazomutambudza. Mupara unogara pakati penyu unozodai ngoumwe wakabarwa pakati penyu, nemwi munozomuda kudai ngokudzida kwenyu, ngokuti imwimwi mwaiya vapara munyika yeEgipite: inini ndini Mambo Mwari, Mwari wenyu. “Musazobira mukupima, nokuti urebu, uremu nokuti uwandu hwechiro. Munozoa nezvipimo zvakanaka, nemasimbi okupima ndio akanaka, chipimo chezviro, chemafuta chakanaka: inini ndini Mambo Mwari, Mwari wenyu, uwo wakamubudisa kubva kunyika yeEgipite. Ndizvo munozongwarira zveshe zviemeso zvangu, nazveshe zvitongero zvangu, muzviite: inini ndini Mambo Mwari.” Mambo Mwari wakaereketa kunaMosi echiti, “Ereketa kunevanhu vaIsuraeri wechiti, ‘Kunyazwi ndiani wevanhu vaIsuraeri, nokuti wevapara, unogara muIsuraeri, kudai echizopira nokuti ndiani worudzi rwake kuti apotye muriro kunaMorekhi, ngegwinyiso unozourawa; vanhu vaIsuraeri vanozomuponda ngemapuwe. Inini pachangu ndinozoemesa hope yangu kubva kunouwo munhu, ndimugure kubva pakati pevanhu vake; ngokuti wakapa worudzi rwake kuti apotye muriro kunaMorekhi, kusvipisa ndau yangu yakachena, nokutsverudza zina rangu rakachena. Nokudai vanhu venyika vechizotswatira madziso avo kubva kunomunhuwo, apo anopa worudzi rwake kupotya mumuriro kunaMorekhi, vasikamuurayi, inini pachangu ndinozoemesa hope yangu kubva kunouwo munhu, nemhuri yake, ndimugure kubva kunevanhu vake, naavo veshe vanoita umhombo kumuteera, kuti vaite umhombo naMorekhi.’ “Nouwo munhu unokunukuka kuenda kune vanomweya wokufembera nokuman'anga, kuita umhombo kuateera, eya, ndinozoemesa hope yangu kurwa nouwo munhu, ndinozomugura kubva pakati pevanhu vake. Ndizvo dzichenesenyi ngokwenyu, muite vakachena; ngokuti inini ndini Mambo Mwari, Mwari wenyu. Nemwi munozongwarira zviemeso zvangu, nokuzviita; inini ndini Mambo Mwari uwo unomuchenesa. Ngokuti munhu weshe unozotuka baba ake nokuti mai ake ngechakwadi unozourawa; uwo unozotuka baba ake nokuti mai ake, ngazi yake inozoa padera pake. “Kudai munhu echiomba nomukadzi womuakirwana wake, muombi nanyamuombwa ngegwinyiso vanozourawa. Nomunhu unozoatana nomukadzi wababa ake wakafukura upunu hwababa ake; ngegwinyiso veshe vairi vanozourawa; ngazi yavo inozoa padera pavo. Nokudai munhu echizoatana nomuzakazi wake, ngegwinyiso veshe vairi vanozourawa; vakapauka; ngazi yavo inozoa padera pavo. Zve, kudai munhu wemwamuna echizoatana nomunhu wemwamuna umweni kudai ngezvaanoatana nomukadzi, veshe vairi vakaita chinyangadzo; ngegwinyiso vanozourawa; ngazi yavo inozoa padera pavo. Kudai munhu echizoroora mukadzi namai ake pamwepo, kuri kushata; vanozopishwa ngomuriro, pamwepo iye navo, kuti kusazoapo kushata pakati penyu. Kudai munhu echizoatana nemhuka, ngegwinyiso unozourawa; nemwi munozouraya mhuka iyo. Kudai munhu womukadzi echizokwedzera kunemhuka nokuti ngeiri, nokuatwa ndiyo, ngokudaro unozouraya mukadzi uwo nemhuka; ngegwinyiso zvinozourawa; ngazi yazvo inozoa padera pazvo. “Kudai munhu echizotora hanzvadzi yake, mwanasikana wababa ake, nokuti mwanasikana wamai ake, nokufukura upunu hwake, naye echiona upunu hwake, chiri chiro chakashata, navo vanozogurwa pamberi pokuona kwevanhu vavo; iye wakafukura upunu hwehanzvadzi yake; unozotwara kushata kwake. Kudai munhu echizoatana nomukadzi uri kumwedzi wake, iye wafukura upunu hwomubvidza wake, naye wafukura upunu hwomubvidza wake; navo vari vairi vanozogurwa kubva pakati pevanhu vavo. Usazofukura upunu hwamainini amai ako, nohwaatate ako, ngokuti ngokudaro unofukura upunu hwehama yake; vanozotwara kushata kwavo. Kudai munhu echizoatana nomukadzi wasekuru ake, wafukura upunu hwasekuru ake; vanozotwara kushaisha kwavo; navo vanozofa vasina mwana. Kudai munhu echizotora mukadzi womunun'una wake, chiro chakasvipiswa; wafukura upunu hwomunun'una wake; navo vanozogara vasina mwana. “Ndizvo imwimwi munozongwarira zviemeso zvangu zveshe nezvitongero zvangu zveshe, muzviite kuti nyika yendinomuendesa kweiri isazomurutsa. Musazohamba ngemiitiro yevanhu venyika, avo vendakadzinga kubva pamberi penyu. Ngokuti avo vakaita zveshe izvi zviro, ndizvo ndakavanyenya. Asi ndakati kwomuri, ‘Munozogara nhaka yenyika yavo, ndinozopa kwomuri kuti iite yenyu, iri nyika inoerera mukaka nouchi.’ Inini ndini Mambo Mwari, Mwari wenyu, uwo wakamuparadzanisa kubva kunevanhu vamweni. Ndizvo munozoita muparadzaniso pakati pemhuka dzakasukika, neidzo dzakasvipiswa, nepakati peshiri dzakasvipiswa, neidzo dzakasukika; nemwi musazodziunzira chinyangadzo pachenyu ngeidzi mhuka, nokuti ngeidzi shiri, nokuti kunyazwi ngeiri mbeu yezviro zvinotamanda munyika, izvo zvendakamuparadzanisira kuti zviri zvakasvipiswa. Munozoita vakachena kwendiri; ngokuti inini Mambo Mwari ndiri wakachena, neni ndakamuparadzanisa kubva pakati pevanhu vamweni, kuti muite vanhu vangu. “Munhu wemwamuna nokuti womukadzi unomweya wokufembera, nokuti n'anga, ngegwinyiso unozourawa; vanozovaponda ngemapuwe; ngazi yavo inozoa padera pavo.” Mambo Mwari wakati kunaMosi, “Ereketa kunavapristi vakororo vaAroni, wechiti kwavari, ‘Asazoapo noumwe unozodzisvipisa ngendaa yevanhu vakafa pakati pevanhu vake, kwega ngendaa yeavo vari hama dzake, ukwo kunoti, mai ake, baba ake, mukororo wake, mwanasikana wake, mukoma wake nokuti hanzvadzi yake, iyo ichimhandara, iri hama yake, uwo waiya asati aanomwamuna; ngepamsoro pouwo ungadzisvipisa. Asi asazodzisvipisa pachake kudai ngemwamuna uri pakati pevanhu vake, kuti adzitsverudze pachake. Vasazodzipara mabaraara musoro, nokuti kupara makhona endebvu dzavo, nokuti kucheka nyora mumuiri yavo. Vanozoita vakachena kunaMwari wavo, vasazotsverudza zina raMwari wavo; ngokuti ndivo vanopira midiro yaMambo Mwari, inoitwa ngomuriro, nokudyazve kwaMwari; ndizvo vanozoita vakachena. Vasazoroora mukadzi uri chifebi, nokuti wakasvipiswa; zve, vasazoroora mukadzi wakarambana nomwamuna wake, ngokuti mupristi uri wakachena kunaMwari wake. Ndizvo munozovabata kudai ngevakacheneswa, ngokuti ndivo vanopira kudya kwaMwari wenyu; vanozoita vakachena kwomuri, ngokuti inini Mambo Mwari, uwo unomuchenesa, ndiri wakachena. Naapo mwanasikana womupristi kunyazwi ngouri, kudai echizotsverudza ngokuita chifebi, unotsverudza baba ake; unozopishwa ngomuriro.’ “Nouwo uri mupristi mukuru pakati pevakoma vake, wakadzodzwa pasoro rake ngemafuta akachena, wakaemeswa kuti asimire zvokusimira zvakacheneswa, iye asazofukura soro rake, nokuti kubaura zvokusimira zvake. Zve, asazopotera kunomuiri wakafa kunyazwi ngowenyi, nokuti kudzisvipisa ngepamusoro pababa ake nokuti mai ake. Zve, asazobuda kubva kundau yakachena, nokuti kusvipisa ndau yakachena yaMwari wake; ngokuti dzungudza remafuta okudzodza raMwari wake riri padera pake: inini ndini Mambo Mwari. Unozoroora mukadzi uchiri mhandara. Shirikadzi, nokuti mukadzi wakarambana nomwamuna wake, nokuti uwo wakasvipiswa, nokuti chifebi, ava vakadai asazoroora. Unozotora mhandara yorudzi rwevanhu vake kuita mukadzi, kuti asazotsverudza rudzi rwevanhu vake; ngokuti inini ndini Mambo Mwari uwo unomuchenesa.” Mambo Mwari wakaereketa kunaMosi echiti, “Ereketa kunaAroni wechiti, ‘Kunyazwi ndiani uri worudzi rwako, mumibarirwana yavo, uwo uri wakaremara, asazokwedzera kupira kudya kwaMwari wake. Ngokuti uwo wakaremara, kunyazwi ngouri, asazokwedzera: uwo uri bofu, nokuti unokumhina, nokuti unemiro yakapofoka, nokuti unembarikidzwa nokuti ngepari, nokuti munhu unetsoka yakaguka, nokuti unenyara yakaguka, nokuti unenunda, nokuti chimwandionandaapari, nokuti unechonjoro redziso, nokuti gwembe, nokuti unemachende akaremara. Akuna munhu worudzi rwaAroni, mupristi uri wakaremara unozokwedzera kupira midiro yaMambo Mwari inoitwa ngomuriro; uri wakaremara; aazokwedzeri kuti apire kudya kwaMwari wake. Unozodya kudya kwaMwari wake, kweshe ukwo kwakachenesesa noukwo kwakachena. Asi kwega asazopinda mukati mwendau yejira rakachena, nokuti kukwedzera kuarita, ngokuti uri wakaremara, kuti asazosvipisa ndau dzangu dzakachena; ngokuti ndini Mambo Mwari unovachenesa.’ ” Ndizvo Mosi wakazvironzera kunaAroni nevakororo vake, nokunevanhu vaIsuraeri veshe. Mambo Mwari wakaereketa kunaMosi echiti, “Ereketa kuna Aroni nevakororo vake, kuti vadziparadzanise kubva kunezvakachena zvevanhu vaIsuraeri, zve, kuti vasazotsverudza zina rangu rakachena ngeizvo zvevanopira kwendiri; inini ndini Mambo Mwari. Ronza kwavari, ‘Kunyazwi ndiani worudzi rwenyu pakati pemibarirwana yenyu, unokwedzera kunezvipo zvakachena, izvo zvevanopira vanhu vaIsuraeri kunaMambo Mwari, apo ari muchiemo chokusvipiswa kwake, uwo munhu unozogurwa kubva mukuona kwangu; inini ndini Mambo Mwari. Akuna noumwe worudzi rwaAroni unemapere nokuti unomubvidza unozodya zvezvipo zvakachena, metsa asukika. Kunyazwi ndiani unozogwama nokuti ngechiri chakasvipiswa ngomuiri wakafa, kunyazwi ngomunhu unoduruka mbeu youhwamuna, zve, kunyazwi ndiani unozogwama chiro chinogwezva, chingaita kuti asvipiswe, nokuti munhu ungaita kuti asvipiswe, kunyazwi ngokuri kusvipiswa kwaanakwo, munhuwo unozogwama zvakadai unozoita wakasvipiswa metsa madeekoni, asazodya zvipo zvakachena, ngepabanze pokuti ashambe muiri wake ngemvura. Naapo zuva rapota, unozoita wakasukika; ngesure kweizvo unozodya zvipo zvakachena, ngokuti kuri kudya kwake. Icho chakafa chega, nokuti icho chakabaurwa ngezvikara, asazodzisvipisa ngokuzvidya; inini ndini Mambo Mwari. Ndizvo vanozongwarira zviemeso zvangu, kuti vasazotwara ndaa yokushaisha ndizvo, vechifira mukati mwendau yakachena ngendaa yokuisvipisa; inini ndini Mambo Mwari uwo unovachenesa.’ “Akuna munhu usiri wemhuri yevapristi unozodya zvipo zvakachena. Akuna mupfumba womupristi, nokuti mushandi unozodya zvipo zvakachena. Asi kudai mupristi echitenga munhu ngemare yake, unozozvidya; nouwo wakabarwa mumhatso yake, avo vanozodya kudya kwake. Zve, kudai mwanasikana womupristi echiroorwa ngomupara, aazodyi zvezvipo zvakachena. Asi kudai mwanasikana womupristi ari shirikadzi, nokuti wakarambana nomwamuna wake, asina mwana, oroopetuka kumhatso yababa ake, kudai ngepaumhandara hwake, ungadya kudya kwababa ake. Asi akuna usiri mupristi unozokudya. Kudai munhu echizodya chipo chakachena ngokusikazia, naapo unozotutsira rupande rwechishanu kwechiri, unozopa mupristi pamwepo neicho chakachena. Navo vasazonyenyeredza zvipo zvakachena zvevanhu vaIsuraeri, izvo zvevanozopira kunaMambo Mwari, ngokuvatendera kuti vatware kushaisha kwokupauka, apo vanozodya zvipo zvavo zvakachena; ngokuti inini ndiri Mambo Mwari uwo unovachenesa.” Mambo Mwari wakaereketa kunaMosi echiti, “Ereketa kuna Aroni nokuvakororo vake, nokwavari veshe vanhu vaIsuraeri, wechiti kwavari, ‘Kunyazwi ndiani munhu wemhatso yaIsuraeri, nokuti wevapara vanogara muIsuraeri, unozopira mudiro wake kuripira mhiko dzake, nokuti yemidiro yaanopira ngokuda kwake, yaanozopira kunaMambo Mwari kuita mudiro wokupisha, kuti zviashirike kubva kwomuri, nemwi munozopira mikono isina kuremara, yen'ombe, nokuti yemakwai, nokuti yembudzi. Musazopira chiro cheshe chakaremara, ngokuti achizoashiriki kubva kwomuri.’ “Kunyazwi ndiani unozopira mibairo yemidiro yokuiyana, kuti aripire mhiko dzake, nokuti kuita midiro yokupira ngokuda kwake yemikono, nokuti yemakwai, inozoita yakaperera kuti iashirwe; akuzoapo chakaremara. Amuzopiri kunaMambo Mwari iri bofu, nokuti yakaguka murenje, nokuti yakaremara, nokuti inemota, nokuti inegwembe, nokuti inechikurukuta, zve, musazopira dzakadaro kunaMambo Mwari, kuti dziite mudiro unoitwa ngomuriro paarita kunaMambo Mwari. N'ombe nokuti hwai inechiro chinembarikidzwa, nokuti chiro chinotamika kweiri, iyo mungapira kuita mudiro ngokuda; asi wokuripira mhiko auzoashirwi wakadaro. Amuzopiri kunaMambo Mwari yakakwengwa, nokuti yakakuvadzwa, nokuti kubvajurwa, nokuti yakachekwa; zve, musazodzipira kuita mubairo nokuti ngouri munyika yenyu. Zve, musazoashira yakadai kubva munyara yomupara kupira kuita kudya kunaMambo Mwari; ngokuti kushata kwayo kuri kweiri, nokuremara kwayo kuri kweiri, isazoashirwa kwomuri.” Mambo Mwari wakaereketa kunaMosi echiti, “Kudai kwechibarwa n'ombe, nokuti hwai, nokuti mbudzi, inozogara namai mazuva manomwe; nokubvira ngezuva rechisere nokuenda mberi inozoashirika kuti iite mudiro unoitwa ngomuriro kunaMambo Mwari. Asi kunyazwi iri tsiru nokuti hwai inobereka, musazouraya mai nomwana pamwepo ngezuva rimwe. Naapo munozopira kunaMambo Mwari mubairo wokubonga, munozopira kuti uashirike kubva kwomuri. Ngezuva ndiro ndiro munozoudya; musazosiya nachimwe chawo metsa mangwani; inini ndini Mambo Mwari. Ndizvo munozongwarira mipango yangu, nokuiita; inini ndini Mambo Mwari. Musazotsverudza zina rangu rakachena; asi ndinozoita wakacheneswa pakati pevanhu vaIsuraeri; inini ndini Mambo Mwari uwo unomuchenesa. Inini ndini ndakamubudisa kubva kunyika yeEgipite, kuti ndiite Mwari wenyu; inini ndini Mambo Mwari.” Mambo Mwari wakaereketa kunaMosi echiti, “Ereketa kunavanhu vaIsuraeri, wechiti kwavari, ‘Aya ndiwo madhiri akaemeswa aMambo Mwari omunozodaidzira kuti mishongano yakachena, ndiwo madhiri angu akaemeswa.’ “Mazuva matanhatu munozoshanda; asi zuva rechinomwe iSabatha rokuzorora yaamho, mushongano wakachena; ngeiro zuva musazoita mushando nokuti ngouri; riri Sabatha kunaMambo Mwari muugaro hwenyu hweshe. “Aya ndiwo madhiri akaemeswa aMambo Mwari, mishongano yangu yakachena, omunozopemberera ngenguva yawo. Ngomwedzi wokutanga, ngezuva regumi namarongomuna rawo madeekoni iPhasika raMambo Mwari. Ngezuva regumi namashanu romwedziwo iDhiri reChingwa chisina Mumera kunaMambo Mwari; mazuva manomwe munozodya chingwa chisina mumera. Ngezuva rokutanga munozoa nomushongano wakachena; musazoshanda mushando ngeiro zuva. Asi munozopira mudiro kunaMambo Mwari unoitwa ngomuriro kupedza mazuva manomwe; ngezuva rechinomwe unozoapo mushongano wakachena; musazoshanda mushando ngeiro zuva.” Mambo Mwari wakaereketa kunaMosi echiti, “Ereketa kunevanhu vaIsuraeri, wechiti kwavari, ‘Apo mwazoguma kunyika yendinozomupa, mwechizokukura zviyo zvayo, munozounza kunomupristi mwanda wemichero wokutanga wezviyo zvenyu. Unozozunguza mwanda uwo pamberi paMambo Mwari, kuti muashirike; nechimangwani ngesure kweSabatha mupristi unozouzunguza. Nemwi munozopira gondohwe rinegore rimwe risina kuremara, ngeiro zuva raanozozunguza ndiro mwanda, kuti riite mudiro wokupisha kunaMambo Mwari. Nomudiro wezviyo unozoita makhirogramu mairi oufu hwakakumanidzwa namafuta, kuita mudiro unoitwa ngomuriro kunaMambo Mwari, wegwema rakanaka; nomudiro wokumwa unozoita ritha rimwe revhini. Musazodya chingwa nokuti koroni yakakochwa, nokuti mushosho, risati raguma zuva romunozounza ndiro mudiro kunaMwari wenyu. Chinozoita chiemeso chemhera nariini kumibarirwana yenyu muugaro hwenyu hweshe.’ “Munozoerenga kwomuri kubvira ngezuva rinoteera reSabatha, kubvira kuzuva remwakaunza mwanda, womudiro wokuzunguzwa, metsa maSabatha manomwe apere. Eya, kuzuva rinoteera ngesure kweiro Sabatha rechinomwe, munozoerenga naro kuita mazuva makumi mashanu; munozopira mudiro wezviyo zvitsva kunaMambo Mwari. Munozounza kubva kuugaro hwenyu zvingwa zviiri zvokuzunguzira zvinemakhirogramu mairi oufu hwakamotseka; zvinozobikwa nomumera, zviri michero yomutanguro kunaMambo Mwari. Munozopira pamwepo nezvingwa, magondohwe manomwe asina kuremara egore rimwe, nomukono umwe mutsva, nemagondohwe mairi kuita mudiro wokupisha kunaMambo Mwari, pamwepo nemidiro yayo yezviyo neyokumwa, mudiro unoitwa ngomuriro, wegwema rakanaka kunaMambo Mwari. Munozopirawo mubairo wechipongo kuita mudiro wokushaisha, nemagondohwe mairi anegore rimwe kuita mubairo womudiro wokuiyana. Mupristi unozozvizunguza pamwepo nezvingwa zvemichero yokutanga, kuita mudiro wokuzunguza pamberi paMambo Mwari, nemagondohwe mairi: zvinozoita zvakachena kunaMambo Mwari, zviri zvevapristi. Naapo munozodaidzira zuva ririro kuti riite zuva romushongano wakachena kwomuri; ngeiro zuva musazoshanda mushando. Chinozoita chiemeso chemhera nariini kwomuri muugaro hwenyu, kumibarirwana yenyu. “Naapo mwokukura zviyo zveminda yenyu, musazokukura kupedzera yaamho makhona eminda yenyu, zve, musazonongeredza zviyo zveminda yenyu; munozozvisiira varombo nevapara; inini ndini Mambo Mwari, Mwari wenyu.” Mambo Mwari wakaereketa kunaMosi echiti, “Ereketa kunevanhu vaIsuraeri wechiti, ‘Ngomwedzi wechinomwe, ngezuva rokutanga romwedzi munozoa nezuva rokuzorora, riri chikarakadziso chokuridza magwama, mushongano wakachena. Ngeiro zuva musazoshanda mushando; asi munozopira mudiro unoitwa ngomuriro kunaMambo Mwari.’ ” Mambo Mwari wakaereketa kunaMosi echiti, “Zvino, ngezuva regumi romwedzi uyu wechinomwe, rinozoita zuva rokuripirwa; rinozoita romushongano wakachena kwomuri; nemwi munozotambudza mweya yenyu, nokupira mudiro unoitwa ngomuriro kunaMambo Mwari; nemwi musazoita mushando nokuti ngouri ngeiro zuva; ngokuti riri zuva rokuripirwa, rokuita muripo ngepamsoro penyu pamberi paMambo Mwari, Mwari wenyu. Kunyazwi ngouri munhu usikazodzitambudzi ngeiro zuva, unozogurwa kubva pakati pevanhu vake. Kunyazwi ngouri munhu unozoshanda mushando ngeiro zuva, uwo munhu ndinozomugura kubva pakati pevanhu vake. Musazoita mushando; chinozoita chiemeso chemhera nariini kumibarirwana yenyu yeshe muugaro hwenyu hweshe. Rinozoita Sabatha rokuzorora kwomuri, munozotambudza mweya yenyu; ngezuva rechipfumbamwe romwedzi ngenguva yemadeekoni, kubvira madeekoni kuguma madeekoni amweni, munozongwarira Sabatha renyu.” Mambo Mwari wakaereketa kunaMosi echiti, “Ereketa kunavanhu vaIsuraeri wechiti, ‘Ngezuva regumi namashanu rouyu mwedzi wechinomwe unozoita mushongano wokudya wemichacha kunaMambo Mwari kupedza mazuva manomwe. Zuva rokutanga rinozoita mushongano wakachena; amuzoiti mishando yenyu ngeiro zuva. Munozopira mudiro unoitwa ngomuriro kunaMambo Mwari metsa kupere mazuva manomwe; ngezuva rechisere munozoita mushongano wakachena; munozopira mudiro unoitwa ngomuriro kunaMambo Mwari; uri mushongano wakachena; musazoita mushando ngeiro zuva.’ “Iyi ndiyo mishongano yokudya yaMambo Mwari, yomunozodaidza kuti mishongano yakachena, kuti mupire mudiro unoitwa ngomuriro kunaMambo Mwari: mudiro wokupisha, nomudiro wezviyo, nomubairo, nemidiro yokumwa, umwe ngaumwe mudiro ngezuva rawo, ngepabanze pemaSabatha aMambo Mwari, nangepabanze pezvipo zvenyu, nangepabanze pemhiko dzenyu, nangepabanze pemidiro yenyu yomunopira ngokuda, zvomunopira kunaMambo Mwari. “Zvino, ngezuva regumi namashanu romwedzi wechinomwe apo mwapedza kuunganidza zveshe zvomuminda yenyu, munozongwarira mushongano wokudya kunaMambo Mwari metsa kupere mazuva manomwe; zuva rokutanga rinozoita zuva reSabatha, nezuva rechisere rinozoita Sabatha. Ngezuva rokutanga munozodzitorera matai emiti yakanaka emibvumo, nematai emiti yakavhivha, neemiti yemishambangwena, nemwi munozodakara pamberi paMambo Mwari, Mwari wenyu mazuva manomwe. Munozoungwarira ngokuita mushongano wokudya kunaMambo Mwari mazuva manomwe mukati mwegore. Chinozoita chiemeso chemhera nariini kumibarirwana yenyu; munozoungwarira ngomwedzi wechinomwe. Munozogara mumichacha mazuva manomwe; veshe vari vaIsuraeri ngokubarwa vanozogara mumichacha, kuti mibarirwana yenyu izie kuti ndakaita kuti vanhu vaIsuraeri vagare mumichacha, apo ndakavabudisa kubva munyika yeEgipite; inini ndini Mambo Mwari, Mwari wenyu.” Ndizvo Mosi wakaronzera vanhu vaIsuraeri ngemishongano yaMambo Mwari yakaemeswa. Mambo Mwari wakaereketa kunaMosi echiti, “Panga vanhu vaIsuraeri kuti vaunze kwouri mafuta akaera akanasa kuengwa omuorivhi, okuisa muzvibani kuti zvibani zvigare zvechindobaka. Aroni unozozvinasira ngokubanze kwejira rendau yakachena kuzvijekisa kubvira madeekoni metsa kuedza kwezuva pamberi paMambo Mwari ngokuangirira; ichi chinozoita chiemeso chemhera nariini kwomuri kumibarirwana yenyu. Unozonasirira zvibani zviri zvigadzikiro zvezvibani zvomukore wakaperera pamberi paMambo Mwari ngokuangirira. “Unozotora ufu hwakamotseka, ubike zvingwa zviri gumi nazviiri ndihwo; nechingwa chimwe chinozoa nekhirogramu rimwe roufu. Newe unozozvironga kuita misara miiri, zvitanhatu mumusara umwe ngoumwe, padera petafura romukore wakaperera pamberi paMambo Mwari. Unozoisa mafuta emakha akanaka padera pomusara umwe ngoumwe, kuita chikarakadziso chomudiro wezvingwa, kudai ngomudiro unoitwa ngomuriro kunaMambo Mwari. Sabatha ngeSabatha unozozvironga pamberi paMambo Mwari ngokuangirira, zvinopirwa ngepamsoro pevanhu vaIsuraeri kuita chitenderano chemhera nariini. Nazvo zvinozoita zvaAroni nezvevakororo vake; vanozozvidyira mundau yakachena, ngokuti zviri zvakachenesesa kwaari, zvemidiro yaMambo Mwari inoitwa ngomuriro, ngechiemeso chemhera nariini.” Mukororo womukadzi wevaIsuraeri, uwo baba ake waiya muEgipite, wakabuda kuenda pakati pevanhu vaIsuraeri, nomukororo womukadzi wevaIsuraeri noumweni wevaIsuraeri vakatanga kuambana mukamba. Nouyu mukororo womukadzi wevaIsuraeri wakashoora zina raMambo Mwari, wakatuka; navo vakamuunza kunaMosi; (zvino zina ramai ake raiya Sheromithi, mwanasikana waDhibhiri, wedzinza raDhani.) Navo vakamukonyera metsa chiri kuda kwaMambo Mwari chipangidzirwe kwavari. Mambo Mwari wakaereketa kunaMosi echiti, “Mubudise kubanze kwekamba uwo wakatuka; naavo veshe vakamuzwa echituka ngavaise nyara dzavo padera pesoro rake, nembungano yeshe ngaimuponde ngemapuwe. Newe unozoereketa kunevanhu vaIsuraeri wechiti, ‘Uwo unozotuka Mwari wake unozotwara chishaishi chake. Nouwo unozotuka zina raMambo Mwari ngegwinyiso unozourawa, nembungano yeshe ngegwinyiso inozomuponda ngemapuwe. Uwo uri mupara, kudai ndiye unobarwa munyika, apo echizotuka zina raMambo Mwari, unozopondwa ngemapuwe. Kunyazwi ndiani unozouraya munhu, ngegwinyiso unozourawa. Kunyazwi ndiani unozouraya chifuyo unozochiripira, chifuyo ngechifuyo. Kunyazwi ndiani unozokuvadza muakirwana wake, kudai ngeicho chaaita kwaari, chinozoitwazve kunouwo: Kuguka ngendaa yokuguka, dziso ngendaa yedziso, zino ngendaa yezino; kudai ngokukuvadza kwaaita munhu, ngokudaro ngakuitwewo kwaari. Nouwo unozouraya chifuyo, ngaachiripe; asi uwo unozouraya munhu naye unozourawa. Munozoa nechironzo chimwecho kwaari mupara nokuti wenyika yenyu; inini ndini Mambo Mwari, Mwari wenyu.’ ” Mosi wakaereketa kunavanhu vaIsuraeri kuti vamubudise kubva mukamba uwo wakatuka, nokumuponda ngemapuwe. Vanhu vaIsuraeri vakaita kudai ngezvaakapanga Mambo Mwari kunaMosi. Mambo Mwari wakaereketa kunaMosi, ari paMutunhu weSinai echiti, “Ereketa kunevanhu vaIsuraeri, wechiti kwavari, ‘Apo mwopinda munyika yendinomupa, naapo nyika inozongwarira Sabatha kunaMambo Mwari. Makore matanhatu munozorima minda yenyu, nemakore matanhatu munozotongora mivhini yenyu, mwechiunganidza michero yayo. Asi gore rechinomwe rinozoita Sabatha rokuzorora renyika, riri Sabatha raMambo Mwari; usazorima munda wako, nokuti kutongora mivhini yako. Neizvo zviyo zvemakikizeya ako, usazozvikukura, nokuti kukaya mavhini emivhini yako isikazi kutongorwa; ngokuti riri gore rokuzorora kwenyika. Neiro Sabatha renyika rinozoita kudya kwako: kwouri iwewe nokwomuranda wako womwamuna nowomukadzi, nokwomuranda wako unobhadharwa, nokwomupara wako unogara newe; nokwen'ombe dzako, nokwezvifuyo zviri munyika mwako, kuwanzirwa kweshe kwayo kunozoita kudya kwezviri.’ “Unozoerenga kwouri maSabatha manomwe, nokuerengwa kwemaSabatha manomwe anozoita kwomuri makore makumi marongomuna namapfumbamwe. Zvino munozoridza gwama; ngezuva rechigumi romwedzi wechinomwe, ngezuva rokuripirwa, munozoridza gwama mukati mwenyika dzenyu dzeshe. Munozochenesa gore rechimakumi mashanu, mudaidzire kusunhurika munyika yenyu kuvanhu veshe vayo. Rinozoita jubiri kwomuri; munozohwirira munhu weshe kunhaka yake nomunhu weshe kumhuri yake. Iro gore remakumi mashanu rinozoita jubiri kwomuri; musazorima nokuti kukukura zvemakikizeya, nokuti kukaya mavhini emivhini yenyu isikazi kutongorwa. Ngokuti riri jubiri; rinozoita rakachena kwomuri; munozodya zvinozobudiswa kubva muminda zvega. “Ngegore iri rejubiri munozohwirira munhu weshe umwe ngaumwe kunhaka yake. Kudai wechitengesa chiro kunyazwi ngechiri kumuakirwana wako, nokuti wechitenga chiro nokunyazwi ngechiri kunyara yomuakirwana wako, musazobirana. Kudai ngouwandu hwemakore ngesure kwejubiri unozotenga kudaro kunomuakirwana wako, nokudai ngouwandu hwemakore okubereka michero kwomunda unozotengesera kwouri. Kudai ngouwandu hwemakore unozowandisa mutengo wayo, nokudai ngoushomani hwemakore unozotsonza mutengo wayo; ngokuti kudai ngouwandu hwemakore okubereka michero kwayo iye unozoitengesa kwouri kudaro. Ndizvo musazobirana; asi munozotya Mwari wenyu; ngokuti inini ndini Mambo Mwari, Mwari wenyu. “Ndizvo munozoita zviemeso zvangu, mungwarire zvitongero zvangu ngokugondeka, muzviite; nemwi munozogara munyika mukugarisika. Nyika inozobereka michero yayo, nemwi munozodya mwechiguta nokugara umwo mukugarisika. Kudai mwechizobvunza, kuti, ‘Tinozodyenyi ngegore rechinomwe? Ringirai, atizorimi nokuti kuunganidza zvinowanzwa zvedu.’ Naapo ndinozotutsira chidakadziso changu padera penyu ngegore rechitanhatu, nayo inozobereka kudya kunokwana makore matatu. Naapo munozorima ngegore rechisere, mudye kudya kwomusharu metsa gore rechipfumbamwe; metsa zviyo zvayo zviibve munozodya zvomusharu. “Nyika aizotengiswi kunoti nariini, ngokuti nyika ngeyangu; ngokuti imwimwi muri vapara nevahambi kwendiri. Nokunyika dzenyu dzeshe munozotenda kuti nyika iripirwe. “Kunyazwi ndiani wehama yako akaita murombo, orootengesa rupande rwenhaka yake, nokudai umwe wehama dzake echiuya kuiripira, naapo unozoripira iyo yakatengeswa ngehama yake. Kudai uwo munhu asina hama yokuiripira, asi kuti akabudirira naye ngokwake echikona kuiripira, naapo ngaaerenge makore okutengeswa kwayo, nokuhwirinzira zviri padera pokutengeswa kwayo, kwaari wakaitengeserwa, kuti iye ahwirinzirwe nhaka yake. Asi kudai asikakoni kuihwirinzira kwaari, naapo iyi yakatengeswa inozogara munyara youwo wakaitenga metsa gore rejubiri; ngegore rejubiri inozobva kwaari, naye unozohwirinzirwa nhaka yake. “Kudai munhu echizotengesa mhatso mudhorobha rakashosherwa ngorukumbati, unozotenderwa kuiripirazve kusati kwapera gore; kusati kwapera gore yaamho, unozotenderwa kuti airipire. Nokudai kukapera yaamho gore isati yaripirwa, naapo mhatso iri mudhorobha rakashosherwa ngorukumbati inozoita yake uwo wakaitenga kunoti mhera nariini kumibarirwana yake yeshe; aizobvi kwaari ngegore rejubiri. Asi mhatso dzemaguta, dzisina rushosha rworukumbati rwakadzitendenedza, dzinozodai ngeminda yenyika; dzingaripirwa, nadzo dzinozobuda ngegore rejubiri. Kudai ngemadhorobha evaRevhi, nemhatso dzemadhorobha enhaka yavo, vaRevhi vangadziripira nokuti ngouri mukuwo. Kudai munhu echizotenga mhatso kubva kuvaRevhi, naapo mhatso yakatengeswa nedhorobha renhaka yake zvinozobuda kubviswa kwaari ngegore rejubiri; ngokuti mhatso dzemadhorobha evaRevhi dziri nhaka yavo pakati pevanhu vaIsuraeri. Asi minda yenharaunda yavo aizotengiswi; ngokuti inhaka yavo nariini. “Kudai hama yako ikaita murombo, yechipera simba iri kwouri, unozomutseya; eya kunyazwi ari mupara, nokuti muhambi, kuti akone kugara newe. Usatora kubva kwaari uyirwa nokuti zvinowanzirwa, asi unozotya Mwari wako; kuti hama yako igare newe. Usazokweretesa mare yako kwaari kuti uzouyirwa nokuti kukweretesa kwaari kudya kwako kuti uzowanzirwa. Inini ndini Mambo Mwari, Mwari wenyu, uwo wakamukwidza kubva kunyika yeEgipite, kuti ndimupe nyika yeKhenani, zve, ndiite Mwari wenyu. “Kudai hama yako inogara pasinde pako akaita murombo, echitengeswa kwouri, usazomushandisa kudai ngomuranda wouhloko. Asi ngaaite kwouri kudai ngomuranda unothuswa, nokudai ngomuhambi, naye unozokushandira metsa gore rejubiri. Zvino unozobuda kubva kwouri, iye nevana vake, unozohwirira kunemhuri yake, nokunhaka yemadzibaba ake. Ngokuti ava varanda vangu, vendakabudisa kubva kunyika yeEgipite; avazotengeswi kudai ngehloko. Auzomutongi ngenjira yakakonza, asi unozotya Mwari wako. Veshe varanda vevamuna nevevakadzi, vounozoa navo vanozoita vevanhu vasikatendi, vakamutendenedza; kwavari munozotenga varanda vevamuna nevarandakadzi vouhloko. Mungazovatengazve kubva kuvapara vanogara pakati penyu, kumhuri dzavo dziri kwomuri, avo vakabarirwa munyika yenyu; navo vanozoita nhaka yenyu. Nemwi munozotora kuita nhaka yevana venyu ngesure kwenyu, kuti vazoita nhaka kwavari. Vanozoita hloko dzenyu metsa kufa, asi musazotonga padera pehama dzenyu vanhu vaIsuraeri ngenjira yakakonza. “Kudai chigarandimo nokuti mupara echizofumiswa, nehama yako inogara pasinde pako echizoita murombo echidzitengesa kunomupara nokuti kunechigarandimo chiri kwomuri, nokuti kunomubarirwana wouwo mupara, ngesure kwokudzitengesa kwake ungazoripirwazve; umwe wehama dzake ungazomuripira. Ungaripirwa ndisekuru ake, nokuti ngomukororo wasekuru ake, nokuti kunyazwi ndiani uri wehama yake, wemhuri yake; nokuti kudai iye emene echikona, ungadziripira. Naye unozoerengerana nouwo wakamutenga kubvira ngegore raakadzitengesa ndiro kwaari, metsa kuguma kugore rejubiri; nomutengo wokutengeswa kwake unozoedzaniswa ngouwandu hwemakore ake, kudai ngomukuwo wakaemeserwa munhu wakatorwa kuti abhadharwe kunozoita kudaro kwaari. Kudai akapedza makore akawanda ngaaedzanise mare yokuripirwa kwake kudai ngouwandu hwemakore awo kubva kumare yaakatengwa ndiyo. Kudai kwechisara makore mashomani metsa kuguma kugore rejubiri, naapo unozoerengerana naye echihwirinzira kwaari mare yokuripirwa kwake, kudai ngouwandu hwemakore ake. Naye unozogara kwouri kudai ngomuranda unobhadharwa ngegore; noumweni asazomutonga ngenjira yakakonza mukuona kwako. Nokudai asikazi kuripirwa ngenjira idzi, unozobuda ngegore rejubiri, iye nevana vake. Ngokuti vanhu vaIsuraeri varanda vangu, varanda vangu vendakabudisa kubva kunyika yeEgipite; inini ndini Mambo Mwari, Mwari wenyu. “Musazodziitira miedzaniso nokuti muedzaniso wakatsetswa, zve, musazodziemesera muedzaniso wakaema, zve, musazodziemesera nokuti ngouri muedzaniso webuwe munyika yenyu, kuti mugwadamire kweriri; ngokuti inini ndini Mambo Mwari, Mwari wenyu. Munozongwarira maSabatha angu, nokuremeredza ndau yangu yakachena; inini ndini Mambo Mwari. “Kudai mwechizohamba muzviemeso zvangu, nokungwarira mipango yangu, nokuiita, ndinozomupa mvura ngenguva yayo, neminda inozowanzira zviyo zvayo, nemiti yomuminda inozobereka michero yayo. Kupura kwenyu kunozoguma kunguva yokukaya mavhini, nomukuwo wokukaya mavhini unozoguma kumukuwo wokurima; nemwi munozodya zvokudya zvenyu mwechiguta, nokugara munyika yenyu mwechigarisika. Ndinozomupa kunyarara munyika, munozoata pashi, pasina unomutyisidzira; ndinozodzinga zvikara zvakashata kubva munyika, neshoti aizoparuri nyika yenyu. Munozorumbirira magaa enyu, anozourawa pamberi penyu ngeshoti. Vashanu venyu vanozorumbirira zana, nezana renyu rinozorumbirira gumi remakumi emazana (10,000); nemagaa enyu anozourawa pamberi penyu ngeshoti. Ndinozomuringira ngokumuda, ndinozoita kuti mubereke, muwande, ndigwinyise chitenderano changu nemwi. Munozodya zvomusharu, nokubudisa musharu kuisa zvitsva. Ndinozoemesa tende rangu romushongano pakati penyu, nomweya wangu auzomushoori. Ndinozohamba pakati penyu ndiite Mwari wenyu, muite vanhu vangu. Inini ndini Mambo Mwari, Mwari wenyu, uwo wakamubudisa kubva kunyika yeEgipite, kuti musaizwe hloko ndivo; ndakagura zvisungo zvejoka renyu, ndikaita kuti muhambe ngokururama. “Asi kudai musikazopurutani kwendiri, musikaiti mipango iyi yeshe, nokudai mwechizoshoora zviemeso zvangu, nokuti kudai mweya yenyu yechizoshoora zvitongero zvangu, musikazoiti mipango yangu yeshe, asi mwechigura chitenderano changu, ininiwo ndinozoita izvi kwomuri: ndinozoemesa kuti zviuye padera penyu kutyiswa, norufuba, nomutsarara inozopedza madziso enyu, nokudzerera kwomwoyo. Munozokusha mbeu dzenyu nhando ngokuti magaa enyu anozodzidya. Ndinozoemesa hope yangu kurwa nemwi, munozourawa pamberi pemagaa enyu; avo vanomunyenya ndivo vanozotonga padera penyu, nemwi munozotiza pasina unomurumbirira. Nokudai musikazondipurutani ngendaa yeizvi, naapo ndinozomuorora kanomwe ngendaa yezvishaishi zvenyu. Ndinozogura kudzikudza kwesimba renyu, ndikaita denga renyu ridai ngesimbi, nenyika yenyu kuti idai ngethusi. Simba renyu rinozopera nhando; ngokuti nyika yenyu aizobereki michero yayo, zve, nemiti yenyika aizobereki michero yayo. “Kudai mwechizohamba kutsvatsvana neni, musikandipurutani, ndinozomuunzira madambudziko akahwirinzirwa kanomwe kudai ngezvishaishi zvenyu. Ndinozotuma zvikara zvomushango pakati penyu, zvinozomutorera vana venyu, zvechiuraya n'ombe dzenyu, zvechiita kuti mushomanike. Nemapato enyu anozoita matongo. “Kudai musikazopangwi ndini ngeizvi, asi mwechihamba mwechitsvatsvana neni, ndizvo ndinozotsvatsvana nemwi, nokumuorora kanomwe ngendaa yezvishaishi zvenyu. Ndinozomuunzira shoti inozounzidzira kupauka kwokubva muchitenderano changu; naapo munozoungana pamwepo mumadhorobha enyu, ndinozotuma denda pakati penyu; munozopirwa munyara dzemagaa enyu. Naapo ndinozogura mudondoro wechingwa chenyu, vakadzi gumi vanozobika chingwa chenyu pachoto chimwecho, navo vanozomupa chingwa ngokupima; munozodya musikaguti. “Asi kudai ngeizvi zveshe musikazondipurutani, asi mwechihamba ngokutsvatsvana neni, ndinozotsvatsvanazve nemwi ngoushungu; ndinozomurova kanomwe kakahwirinzirwa ngendaa yezvishaishi zvenyu. Nemwi munozodya miiri yevakororo venyu, nemiiri yevanasikana venyu munozoidya. Neni ndinozoparadza ndau dzenyu dzakakwirira, ndiputsire pashi miedzaniso yenyu, ndikandire miiri yenyu yakafa padera pemiiri yemiedzaniso yenyu; nomweya wangu unozomushoora. Ndinozoita kuti madhorobha enyu aite matongo, ndiunze ndau dzenyu dzakachena kuti dziite matongo; andizozwi gwema remitombo yenyu inegwema rakanaka. Ndinozoparadza nyika kuti iite mafusi; nemagaa enyu anogara kweiri anozoshamiswa ndiyo. Ndinozomuparadzira pakati pemadzinza, ndinozomushwamurira shoti padera penyu; nenyika inozoita mafusi, nemadhorobha enyu anozoita matongo. “Zvino nyika inozodakara ngemaSabatha ayo, mukuwo weshe weinogara yakaita mafusi, muri munyika yemagaa enyu; naapo nyika inozozorora, idakare ngemaSabatha ayo. Nguva dzeshe dzeinogara yakaita mafusi inozozorora; ngokuti aizi kuzorora ngemaSabatha enyu apo mwaigara kweiri. Nokwavari vanosara vachapona venyu ndinozotuma kudemera mumwoyo mwaavo vari munyika dzemagaa avo. Vanozotiza ngebope remashakani rinovhuvhuta; vanozotiza kudai ngevanotiza kubva kuneshoti; navo vanozowa kunyazwi vasikazi kurumbirirwa. Vanozowa umwe padera poumweni, kudai ngevanotiza shoti, vasikazi kurumbirirwa. Amuzoa nesimba rokuema pamberi pemagaa enyu. Munozopera pakati pemadzinza, nenyika yemagaa enyu inozomupedza. Naavo vanosara venyu vanozodzeerera mukushata kwavo vari munyika dzemagaa enyu; ngokushata kwemadzibaba avo vanozodzeerera pamwepo navo. “Asi kudai vechizotenda kushaisha kwavo nokwemadzibaba avo, pamwepo nokupauka kwevakapauka ndikwo kwendiri, nokuhambazve ngokutsvatsvana kwavo neni, ndizvo inini ndakatsvatsvana navo, ndakavaunza munyika yemagaa avo; kudai mwoyo yavo isikazi kuchekwa yechipfaiswa, navo varipa muripo wokushaisha kwavo. zvino ndinozokarakadza chitenderano changu naJakobe, Isaka, naAbrahama; ndinozokarakadza nyika. Ngokuti nyika inozosiiwa ndivo, inozodakara ngemaSabatha ayo, apo inogara yechiita mafusi, isinavo; navo vanozoashira kuororwa kwokushaisha kwavo, ngokuti ivo vemene vakashoora zvitongero zvangu, ngokutizve mweya yavo yakanyenyeka zviemeso zvangu. Asi zvakanyadaro apo vari munyika yemagaa avo, andizovarashi akadi, andizovanyenyizve, kuti ndivapedze yaamho, nokuti kugura chitenderano changu navo; ngokuti ndini Mambo Mwari, Mwari wavo. Asi ngepamusoro pavo ndinozokarakadza chitenderano chemadzibaba avo, avo vendakabudisa kubva kunyika yeEgipite mukuona kwemadzinza, kuti ndiite Mwari wavo; inini ndini Mambo Mwari.” Izvi ndizvo zviemeso nezvitongero nezvironzo, zvaakaita Mambo Mwari pakati pake navaIsuraeri paMutunhu weSinai ngenyara yaMosi. Mambo Mwari wakaereketa kunaMosi echiti, “Ereketa kunevanhu vaIsuraeri, wechiti kwavari, ‘Naapo munhu echizopika mhiko kunaMambo Mwari yakaedzana nomunhu, uwo munhu unozoita waMambo Mwari. Kuerengwa kwomunhu womwamuna unemakore makumi mairi metsa kuguma makore makumi matanhatu, kunozoita zvigurwa makumi mashanu zvesirivha, kudai ngechipimo chaishandiswa mundau yakachena. Kudai ari munhu womukadzi, kuerengwa kwake kunozoita zvigurwa makumi matatu. Kudai anemakore mashanu metsa kuguma kumakore makumi mairi, naapo kuerengwa kwake kwezvigurwa zvomunhu wemwamuna kunozoita makumi mairi ezvigurwa, nokuerengwa kwomunhu womukadzi kunozoita zvigurwa gumi. Kudai anemwedzi metsa kuguma makore mashanu, kuerengwa kwomunhu wemwamuna kunozoita zvigurwa zvishanu zvesirivha, nokuerengwa kwomunhu womukadzi kunozoita zvigurwa zvitatu zvesirivha. Kudai anemakore makumi matanhatu nokuti anopinda, kudai ari munhu wemwamuna kuerengwa kwake kunozoita zvigurwa gumi namashanu, nokuerengwa kwomunhu womukadzi kunozoita zvigurwa gumi. Kudai ari murombo asikakoni kupa kuerengwa kwake, ngaauye kunomupristi, nomupristi unozomuerengera; mupristi unozomuerengera kudai ngokukona kwouwo wakapika mhiko.’ “Kudai iri mhiko yemhuka, idzo dzevangaunza vanhu kuita mubairo kunaMambo Mwari, dzeshe idzi dzaangaunza munhu kunyazwi ngouri kunaMambo Mwari, dzinozoita dzakachena. Asazodzitsandura nokuti kutenganisana neimweni, yakanaka ngeyakashata, nokuti yakashata ngeyakanaka; echidaro iyo neimweni yaakatenganisana nayo dzeshe dzinozoita dzakachena. Kudai iri mhuka yakasvipiswa isikapirwi kunaMambo Mwari, kuita mudiro, naapo unozoiunza kunomupristi. Nomupristi unozoemesera mutengo wayo, kunyazwi yakanaka nokuti yakashata; kudai ngezveinozoemeserwa mutengo wayo ngomupristi, unozoita wakadaro. Asi kudai yechizoripirwa, unozotutsira rupande rwechishanu kweiri kudai ngokuerenga kwake. “Kudai munhu echipira mhatso yake kunaMambo Mwari kuti iite yakacheneswa, mupristi unozoierenga; kunyazwi yakanaka nokuti yakashata, ndizvo kunozoitika kudai ngezvaakaerenga mupristi. Kudai uwo wakaipira echida kuripira mhatso yake, naapo unozotutsira rupande rwechishanu rwemare rwakaerengwa kweiri, nayo inozoita yake. “Kudai munhu echizopira kunaMambo Mwari rupande rwomunda wake uri nhaka yake, naapo kuerenga kwake kunozodai ngezvinomeremwo: pachipimo chinoita zvigurwa gumi zvesirivha pamakumi mairi eshe emakhirogramu ebhari. Kudai echipira munda wake kubvira gore rejubiri, kudai ngokuerenga kwake kunozogara kwakadaro. Asi kudai iye echizopira munda wake ngesure kwegore rejubiri, mupristi unozomuerengera mare kudai ngemakore anosara metsa kuguma kugore rejubiri, naapo kunozotsonzedzwa kubva kwokuerenga kwake. Nokudai uwo unopira munda echida kuuripira, zvino unozotutsira rupande rwechishanu rwemare yokuerengwa kwawo, nawo unozogara uri wake. Asi kudai munda usikazi kuripirwa nokuti kudai munda wakatengeswa kunomunhu umweni, auchazoripirwizve nariini. Asi munda uwo, apo unozosunhurwa ngegore rejubiri, unozouita wakachena kunaMambo Mwari, kudai ngomunda wakapirwa; nhaka yawo inozoita yomupristi. Kudai munhu echizopira munda kunaMambo Mwari waakatenga, usiri weminda yenhaka yake, mupristi unozomuerengera mare yokuerenga kwake, metsa kuguma kugore rejubiri; naye unozokupa kuerenga kwake ngeiro zuva, kuita chiro chakachena kunaMambo Mwari. Ngegore rejubiri munda unozohwirinzirwa kunouwo wakautengerwa, uwo waigara nhaka yomunda uwo. Kuerenga kwake kweshe kunozodai ngokuerengwa kunoshandiswa mundau yakachena; unozopima magira makumi mairi kuita chigurwa chimwe. “Asi dangwe remhuka rinozoita dangwe kunaMambo Mwari, akuna munhu kunyazwi ngouri unozoripira; kunyazwi ngeren'ombe, nokuti regwai: ngeraMambo Mwari. Kudai riri remhuka yakasvipiswa, naapo unozoiripira kudai ngokuerenga kwake, naye unozotutsira rupande rwechishanu kweriri; kudai risikaripirwi, naapo rinozotengeswa kudai ngokuerenga kwako. “Akuna chiro chakapirwa kunaMambo Mwari ngomunhu cheizvo zvaanazvo, kunyazwi vanhu nokuti mhuka nokuti minda yenhaka yake, chinozotengeswa nokuti kuripirwa. Zveshe zvakapirwa zviri zvakachenesesa kunaMambo Mwari. Akuna munhu wakapirwa kunaMambo Mwari unozoripirwa; asi ngegwinyiso unozourawa. “Zveshe zvechegumi zveminda, zvinyari zvembeu dzomumunda nokuti zvemichero yemiti, zviri zvaMambo Mwari; zvakachena kunaMambo Mwari. Kudai munhu echizoripira zvechegumi zvake, unozotutsira kwezviri rupande rwechishanu chazvo. Nangendaa yechegumi chezvifuyo nechemakwai nembudzi zvazveshe zvinopinda ngepashi pendonga yomuushi, chegumi chinozoita chakachena kunaMambo Mwari. Aazotsananguri kuti iyi yakanaka nokuti yakashata, zve, aazoitenganisi neimweni; asi kudai echizotenganisa neimweni, naapo iyo neimweni yaakatenganisana nayo dzeshe dzinozoita dzakachena. Zve, adzizoripirwi.” Iyi ndiyo mipango yaakapanga Mambo Mwari kunaMosi paMutunhu weSinai, yevanhu vaIsuraeri. NaMambo Mwari wakaereketa kunaMosi mushango reSinai, ari mutende romushongano, ngezuva rokutanga romwedzi wechipiri, ngegore rechipiri ngesure kwokubuda kwavo kubva munyika yeEgipite echiti, “Erenga uwandu hwembungano yeshe yaIsuraeri, kudai ngemhuri dzavo, ngemhatso dzemadzibaba avo, nouwandu hwemazina avo, munhu weshe womwamuna umwe ngaumwe; kubvira vane makore makumi mairi kuenda mberi, veshe vanokona kuenda kuhondo vevaIsuraeri. Iwewe naAroni munozovaerenga ngezvikwata zvavo. Pamwepo nemwi kunozoapo munhu wemwamuna umwe kubva kudzinza reshe, umwe ngaumwe uri mukuru wemhatso yababa ake.” Aya ndio mazina evamuna vanozoema nemwi: worudzi rwaRubheni, ndiErizuri mukororo waShedheuri. Worudzi rwaSimeoni, ndiSherumieri mukororo waZurishadhai. Worudzi rwaJudha, ndiNashoni mukororo waAminadhabhi. Worudzi rwaIsakha, ndiNethaneri mukororo waZua. Worudzi rwaZebhuruni, ndiEriabhi mukororo waHeroni. Wevana vorudzi rwaJosefa: waEfuremu, ndiErishama mukororo waAmihudhi, nowaManase, ndiGamarieri mukororo waPhedhazuri. Worudzi rwaBhenjamini, ndiAbhidhani mukororo waGidheoni. Worudzi rwaDhani, ndiAhieza mukororo waAmishadhai. Worudzi rwaAsha, ndiPhagieri mukororo waOkrani. Worudzi rwaGadhi, ndiEriasafi mukororo waDheueri. Worudzi rwaNafitari, ndiAhira mukororo waEnani. Ava ndivo vakuru vakatsanangurwa kubva kumbungano, vatungamiriri vemadzinza emadzibaba avo, nduna padera pemakumi emazana muIsuraeri. Mosi naAroni vakatora ava vamuna vakadudzwa ngemazina avo, navo vakaunganidza pamwepo mbungano yeshe yevanhu ngezuva rokutanga romwedzi wechipiri. Vakaemesa pamberi mibarirwana yemadzibaba avo, kudai ngouwandu hwemazina avo, kubvira vaiya nemakumi mairi emakore kuenda mberi, kudai ngokuerengwa kwoumwe ngoumwe wavo, kudai ngezvaakapanga Mambo Mwari kunaMosi. Ndizvo wakavaerenga mushango reSinai. Nevana vaRubheni, dangwe raIsuraeri, kudai ngemibarirwana yavo, nokudai ngokuteererana kwemhuri dzavo, nemhatso dzemadzibaba avo, vakaerengwa ndivo, kudai ngouwandu hwemazina avo, ngokuerengwa umwe ngoumwe wavo, vamuna veshe kubvira ngevaane makore makumi mairi kuenda mberi, veshe avo vaikona kuenda kuhondo. Avo vakaerengwa vedzinza raRubheni vaiya makumi marongomuna nematanhatu emakumi emazana nemazana mashanu (46,500). Mibarirwana yaSimeoni, kudai ngokuteererana kwayo, nokudai ngokuteererana kwemhuri dzayo, nemhatso dzemadzibaba ayo, kudai ngouwandu hwemazina ayo, ngokuerengwa kwoumwe ngaumwe wavo vamuna veshe kubvira ngavaane makore makumi mairi kuenda mberi, veshe avo vaikona kuenda kuhondo. Avo vakaerengwa vedzinza raSimeoni, vaiya makumi mashanu nemapfumbamwe emakumi emazana nemazana matatu (59,300). Mibarirwana yaGadhi, kudai ngokuteererana kwayo, nokudai ngokuteererana kwemhuri dzayo, nemhatso dzemadzibaba ayo, kudai ngouwandu hwemazina ayo, kubvira ngevaane makore makumi mairi kuenda mberi, veshe avo vaikona kuenda kuhondo. Avo vakaerengwa vedzinza raGadhi vaiya makumi marongomuna namashanu emakumi emazana nemazana matanhatu nemakumi mashanu (45,650). Mibarirwana yaJudha, kudai ngokuteererana kwayo, nokudai ngokuteererana kwemhuri dzayo, nemhatso dzemadzibaba ayo, kudai ngouwandu hwemazina ayo, kubvira ngevaane makore makumi mairi kuenda mberi, veshe avo vaikona kuenda kuhondo. Avo vakaerengwa vedzinza raJudha vaiya makumi manomwe nemarongomuna emakumi emazana namazana matanhatu (74,600). Mibarirwana yaIsakha, kudai ngokuteererana kwayo, nokudai ngokuteererana kwemhuri dzayo, nemhatso dzemadzibaba ayo, kudai ngouwandu hwemazina ayo, kubvira ngevaane makore makumi mairi kuenda mberi, veshe avo vaikona kuenda kuhondo. Avo vakaerengwa vedzinza raIsakha vaiya makumi mashanu nemarongomuna emakumi emazana nemazana marongomuna (54,400). Mibarirwana yaZebhuruni, kudai ngokuteererana kwayo, nokudai ngokuteererana kwemhuri dzayo, nemhatso dzemadzibaba ayo, kudai ngouwandu hwemazina ayo, kubvira ngevaane makore makumi mairi kuenda mberi, veshe avo vaikona kuenda kuhondo. Avo vakaerengwa vedzinza raZebhuruni vaiya makumi mashanu nemanomwe emakumi emazana nemazana marongomuna (57,400). Mibarirwana yaJosefa, kuronza vana vaEfuremu, kudai ngokuteererana kwavo, nokudai ngokuteererana kwemhuri dzavo, nemhatso dzemadzibaba avo, kudai ngouwandu hwemazina avo, kubvira ngevaane makore makumi mairi kuenda mberi, veshe avo vaikona kuenda kuhondo. Avo vakaerengwa vedzinza raEfuremu vaiya makumi marongomuna emakumi emazana nemazana mashanu (40,500). Mibarirwana yaManase, kudai ngokuteererana kwayo, nokudai ngokuteererana kwemhuri dzayo, nemhatso dzemadzibaba ayo, kudai ngouwandu hwemazina ayo, kubvira ngevaane makore makumi mairi kuenda mberi, veshe avo vaikona kuenda kuhondo. Avo vakaerengwa vedzinza raManase vaiya makumi matatu namairi emakumi emazana nemazana mairi (32,200). Mibarirwana yaBhenjamini, kudai ngokuteererana kwayo, nokudai ngokuteererana kwemhuri dzayo, nemhatso dzemadzibaba ayo, kudai ngouwandu hwemazina ayo, kubvira ngevaane makore makumi mairi kuenda mberi, veshe avo vaikona kuenda kuhondo. Avo vakaerengwa vedzinza raBhenjamini vaiya makumi matatu namashanu emakumi emazana nemazana marongomuna (35,400). Mibarirwana yaDhani, kudai ngokuteererana kwayo, nokudai ngokuteererana kwemhuri dzayo, nemhatso dzemadzibaba ayo, kudai ngouwandu hwemazina ayo, kubvira ngevaane makore makumi mairi kuenda mberi, veshe avo vaikona kuenda kuhondo. Avo vakaerengwa vedzinza raDhani vaiya makumi matanhatu namairi emakumi emazana nemazana manomwe (62,700). Mibarirwana yaAsha, kudai ngokuteererana kwayo, nokudai ngokuteererana kwemhuri dzayo, nemhatso dzemadzibaba ayo, kudai ngouwandu hwemazina ayo, kubvira ngevaane makore makumi mairi kuenda mberi, veshe avo vaikona kuenda kuhondo. Avo vakaerengwa vedzinza raAsha vaiya makumi marongomuna narimwe emakumi emazana nemazana mashanu (41,500). Mibarirwana yaNafitari, kudai ngokuteererana kwayo, nokudai ngokuteererana kwemhuri dzayo, nemhatso dzemadzibaba ayo, kudai ngouwandu hwemazina ayo, kubvira ngevaane makore makumi mairi kuenda mberi, veshe avo vaikona kuenda kuhondo. Avo vakaerengwa vedzinza raNafitari vaiya makumi mashanu namatatu emakumi emazana nemazana marongomuna (53,400). Ava ndivo vakaerengwa, vakaerengwa ndiMosi naAroni vechidetserwa ngevakuru vaIsuraeri gumi navairi, umwe ngaumwe echiemera pandau yemhatso yababa ake. Ndizvo uwandu hwavo veshe vaIsuraeri, kudai ngemhatso dzemadzibaba avo, kubvira ngevaane makore makumi mairi kuenda mberi, veshe avo vaikona kuenda kuhondo, uwandu hwavo veshe vakaerengwa vaiya mazana matanhatu nematatu emakumi emazana nemazana mashanu nemakumi mashanu (603,550). Asi vaRevhi, kudai ngokuteererana kwemhatso dzemadzibaba avo, avazi kuerengwa navo. Ngokuti Mambo Mwari waiya akaereketa kunaMosi echiti, “Kwega dzinza raRevhi usazorierenga, usazoerenga uwandu hwavo pakati pevana vaIsuraeri. Asi unozoemesa vaRevhi padera pethabhenakeri rechapupu, nepadera pezvidziyo zvaro zveshe, nepadera pezviro zveshe zviri zvaro; ndivo vanozotwara thabhenakeri nezvidziyo zvaro zveshe; navo vanozoritwara, navo vanozoemesa matende avo kutendenedza thabhenakeri. Naapo thabhenakeri rooda kuthuthiswa, vaRevhi ndivo vanozoridusa kubva perakaakwa; naapo thabhenakeri riri kuemeswazve, vaRevhi ndivo vanozoriemesa; nomupara unozokwedzera pasinde unozourawa. NevaIsuraeri vamweni vanozoemesa matende avo, umwe ngaumwe kukamba yake, umwe ngaumwe pachioniso chake, mukati mwehondo dzavo dzeshe. Asi vaRevhi vanozoemesa matende avo kutendenedza thabhenakeri rechapupu, kuti kusazoapo ushungu padera pembungano yevana vaIsuraeri; nevaRevhi ndivo vanozongwarira thabhenakeri rechapupu.” Nevana vaIsuraeri vakaita zveshe zvaakapanga Mambo Mwari kunaMosi. NaMambo Mwari wakaereketa kunaMosi naAroni echiti, “Vanhu vaIsuraeri vanozoemesa matende avo umwe ngaumwe pasinde pechioniso chekwake, panechioniso chemhatso yababa ake; vanozoemesa matende avo akaringisana netende romushongano kumarutii eshe akaritaraukira.” Avo vanozoemesa matende avo ngokumabvazuva nokunobudazuva, vanozoita vechioniso chekamba raJudha ngezvikwata zvavo. Nashoni mukororo waAminadhabhi unozoita nduna yevana vaJudha. Nechikwata chake chevakaerengwa vavo vaiya makumi manomwe namarongomuna emakumi emazana nemazana matanhatu (74,600). Naavo vanozoemesa matende avo pasinde pavo idzinza raIsakha. NaNethaneri mukororo waZua unozoita nduna yevana vaIsakha. Nechikwata chake chevakaerengwa vavo vaiya makumi mashanu namarongomuna emakumi emazana namazana marongomuna (54,400). Naapo kwaiteera dzinza raZebhuruni. Eriabhi mukororo waHeroni unozoita nduna yevana vaZebhuruni. Nechikwata chake chevakaerengwa vavo vaiya makumi mashanu namanomwe emakumi emazana namazana marongomuna (57,400). Veshe avo vakaerengwa mukamba raJudha vaiya zana nemakumi masere namatanhatu emakumi emazana namazana marongomuna (186,400) ngezvikwata zvavo. Ava ndivo vanozotanga kuhamba. Ngorutii rwokubani kunozoapo chioniso chekamba yaRubheni, kudai ngezvikwata zvavo. Erizuri mukororo waShedheuri unozoita nduna yevana vaRubheni. Nechikwata chake chevakaerengwa vavo vaiya makumi marongomuna namatanhatu emakumi emazana namazana mashanu (46,500). Nedzinza raSimeoni ndiro rinozoteera kuemesa matende avo pasinde pake. Sherumieri mukororo waZurishadhai unozoita nduna yevana vaSimeoni. Nechikwata chake chevakaerengwa vavo vaiya makumi mashanu namapfumbamwe emakumi emazana namazana matatu (59,300). Naapo panozoteera dzinza raGadhi. Eriasafi mukororo waDheueri unozoita nduna yevakororo vaGadhi. Nechikwata chake chevakaerengwa vavo vaiya makumi marongomuna namashanu emakumi emazana namazana matanhatu namakumi mashanu (45,650). Veshe avo vakaerengwa mukamba raRubheni vaiya zana namakumi mashanu narimwe emakumi emazana namazana marongomuna namakumi mashanu (151,450), kudai ngezvikwata zvavo. Naava ndivo vechipiri vanozoteera kuhamba. Naapo tende romushongano roothuthiswa kuenda pamwepo nekamba yevaRevhi, iri pakati pemakamba; vanozohamba kudai ngezvevakaemesa matende avo, munhu weshe ari pandau yake pachioniso chekwake. Ngokumabirirazuva kunozoapo chioniso chekamba yaEfuremu kudai ngezvikwata zvavo. Erishama mukororo waAmihudhi ndiye unozoita nduna yevakororo vaEfuremu. Nechikwata chake chevakaerengwa vavo vaiya makumi marongomuna emakumi emazana namazana mashanu (40,500). Vanomuteera idzinza raManase. Gamarieri mukororo waPhedhazuri ndiye unozoita nduna yevakororo vaManase. Nechikwata chake chevakaerengwa vavo vaiya makumi matatu nemairi emakumi emazana namazana mairi (32,200). Zvino panoteera dzinza raBhenjamini. Abhidhani mukororo waGidheoni ndiye unozoita nduna yevakororo vaBhenjamini. Nechikwata chake chevakaerengwa vavo vaiya makumi matatu namashanu emakumi emazana namazana marongomuna (35,400). Veshe avo vakaerengwa mukamba yaEfuremu ngezvikwata zvavo vaiya zana nemasere emakumi emazana nezana rimwe (108,100). Ndivo vechitatu vanozoteera kuhamba. Nechioniso chekamba yaDhani chinozoa ngedera nezvikwata zvavo. Ahieza mukororo waAmishadhai unozoita nduna yevakororo vaDhani. Nechikwata chake chevakaerengwa vavo vaiya makumi matanhatu namairi emakumi emazana namazana manomwe (62,700). Nedzinza raAsha ndiro rinozomuteera. Phagieri mukororo waOkrani unozoita nduna yevakororo vaAsha. Nechikwata chake chevakaerengwa vavo vaiya makumi marongomuna narimwe emakumi emazana nemazana mashanu (41,500). Zvino panoteera dzinza raNafitari. Ahira mukororo waEnani ndiye unozoita nduna yevakororo vaNafitari. Nechikwata chake chevakaerengwa vavo vaiya makumi mashanu namatatu emakumi emazana namazana marongomuna (53,400). Naavo vakaerengwa veshe vekamba yaDhani vaiya zana nemakumi mashanu namanomwe emakumi emazana nemazana matanhatu (157,600). Ava ndivo vanozohamba pakugumisira ngezvikwata zvavo. Ava ndivo vakaerengwa vevana vaIsuraeri kudai ngemhatso dzemadzibaba avo; veshe avo vakaerengwa mumakamba muzvikwata zvavo vaiya mazana matanhatu namatatu emakumi emazana nemazana mashanu namakumi mashanu (603,550). Asi vaRevhi avazi kuerengerwa pakati pevana vaIsuraeri, kudai ngokuronza kwaMambo Mwari kunaMosi. Nevana vaIsuraeri vakaita zveshe kudai ngezvaakapanga Mambo Mwari kunaMosi; ndizvo vakaemesa matende avo pazvioniso zvavo, ndizvo vakaenda mberi, munhu weshe kudai ngokuteererana kwemhuri yake nokudai ngemhatso yemadzibaba avo. Iyi ndiyo mibarirwana yaAroni naMosi ngezuva raakaereketa Mambo Mwari kunaMosi ari paMutunhu weSinai. Aya ndiwo mazina evakororo vaAroni; Nadhabhi dangwe rake, naAbhihu, Ereaza, naIthama. Aya ndiwo mazina evakororo vaAroni, vapristi vakadzodzwa, vaakagadza kuti vashande mushando woupristi. Nadhabhi naAbhihu vakafa pamberi paMambo Mwari, apo pavakapira muriro usikatenderwi pamberi paMambo Mwari vari mushango reSinai, navo vaiya vasina vana. Ereaza naIthama vakashanda mushando woupristi mukuona kwaAroni baba avo. NaMambo Mwari wakaereketa kunaMosi echiti, “Kwedzedza dzinza revaRevhi pasinde, uvaemese pamberi paAroni mupristi, kuti vamudetsere. Navo vanozongwarira kupanga kwake, nokupanga kwembungano yeshe pamberi petende romushongano, kuti vaite mishando yethabhenakeri. Navo vanozongwarira zvidziyo zveshe zvetende romushongano, nokupanga kwevana vaIsuraeri, kuti vaite mishando yethabhenakeri. Newe unozopa vaRevhi kunaAroni nevakororo vake; vari vakapirwa yaamho kwaari kubva pakati pevana vaIsuraeri. Unozoemesa Aroni nevakororo vake, ndivo vanozongwarira mushando woupristi; nomupara unozokwedzera apo unozourawa.” NaMambo Mwari wakaereketa kunaMosi echiti, “Inini ndemene, wona, ndakatora vaRevhi kubva pakati pevaIsuraeri pandau yematangwe eshe awo anobeura ndani pakati pevana vaIsuraeri, ndizvo vaRevhi vanozoita vangu. Ngokuti matangwe eshe ngaangu; ngezuva rendakauraya ndiro matangwe enyika yeEgipite, ndakadzichenesera matangwe eshe evaIsuraeri, evanhu neemhuka; anozoita angu. Ndini Mambo Mwari.” NaMambo Mwari wakaereketa kunaMosi ari mushango reSinai echiti, “Erenga vana vevaRevhi kudai ngokuteererana kwemhatso dzemadzibaba avo nemhuri dzavo. Munhu weshe womwamuna kubvira kune waane mwedzi wokubarwa kuenda mberi unozovaerenga.” Ndizvo Mosi wakavaerenga kudai ngeizwi raMambo Mwari, kudai ngezvaakapangwa. Naava ndivo vakororo vaRevhi ngemazina avo: Gershoni, Kohathi naMerari. Naaya ndiwo mazina evakororo vaGershoni kudai ngemhuri dzavo: Ribhini naShimei. Navakororo vaKohathi kudai ngemhuri dzavo: Amiramu, Izihari, Hebroni naUzieri. Navakororo vaMerari kudai ngemhuri dzavo: Mahiri naMushi. Ava ndivo vemhuri dzevaRevhi kudai ngokuteererana kwemhatso dzemadzibaba avo. KunaGershoni ndikwo kwakabva mubarirwana wevaRibhini, nomubarirwana wevaShimei; ava ndivo mibarirwana yaGershoni. Avo vakaerengwa vavo, kudai ngokuerengwa kwevamuna veshe kubvira ngevaane mwedzi wokubarwa kuenda mberi vaiya makumi manomwe emazana namazana mashanu (7,500). Mhuri dzaGershoni dzinozoemesa matende adzo ngesure kwetabhanekeri ngokumabirirazuva. Eriasafi mukororo waRaeri ndiye nduna yemhuri yemadzibaba evaGershoni. Vakororo vaGershoni ndivo vangwariri veizvi zviro mutende romushongano, zviri thabhenakeri nezvinorifukidza zvaro, nejira rakaturikwa rinokonya musiwo wetende romushongano, machira okuturika oruwanze, nejira romusiwo woruwanze, rinotendenedza marutii eshe ethabhenakeri nearita netambo dzaro nokuita mishando yeshe yakaemeswa. KunaKohathi kwakabva mubarirwana wavaAmiramu, nomubarirwana wavaIzihari, nomubarirwana wevaHebroni, nomubarirwana wevaUzieri; ava ndivo mhuri dzevaKohathi. Mukuerengwa kwevamuna veshe kubvira ngevaane mwedzi wokubarwa kuenda mberi vaiya makumi emazana masere namazana matanhatu (8,600) yeavo vaingwarira ndau yakacheneswa. Mhuri yevaKohathi inozoemesa matende ayo ngokurutii rwokubani rwethabhenakeri. Erizafani mukororo waUzieri ndiye unozoita mutungamiriri wemhuri yemhatso yemadzibaba yevaKohathi. Mushando wavo vanozongwarira bhokisi rechitenderano, tafura, zvigadzikiro zvezvibani, maarita, zvidziyo zvendau yakacheneswa zvevanoshanda ndizvo vapristi, nemachira okuturika nazvo zveshe zvinoshandiswamwo. NaEreaza mukororo waAroni mupristi unozoita mukuru padera penduna dzevaRevhi, naye unozongwarira avo vanozoita mushando mundau yakacheneswa. KunaMerari ndikwo kwakabva mubarirwana wavaMahiri nomubarirwana wavaMushi; ava ndivo mhuri dzaMerari. Naavo vakaerengwa vavo kudai ngokuerengwa kwevamuna veshe, kubvira ngevaane mwedzi kuenda mberi vaiya makumi matanhatu emazana namazana mairi (6,200). Zurieri mukororo waAbhihairi ndiye unozoita mutungamiriri wemhatso dzemadzibaba emhuri yaMerari; ivo vanozoemesa matende avo ngorutii rwedera rwethabhenakeri. Vakororo vaMerari vakapuwa mushando wokungwarira mapuranga ethabhenakeri, mwamba yaro, sika dzaro, zvitsimiso zvaro, zvidziyo zvaro nazvo zveshe zvinoshandiswamwo, nesikazve dzoruwanze dzinoritendenedza, zvitsimiso zvadzo nehoko dzaro nemapote aro. Asi avo vanozoemesa matende avo ngepamberi pethabhenakeri kwakaringira kumabvazuva, kunyazwi pamberi petende romushongano kumabvazuva, ndivo Mosi naAroni nevakororo vake, vechiita mushando womundau yakacheneswa, vechingwarira kupanga kwevana vaIsuraeri, nomupara unozokwedzera pasinde unozourawa. Veshe vakaerengwa vevaRevhi, avo vakaerengwa ndiMosi naAroni kudai ngomupango waMambo Mwari, kumhuri dzavo dzeshe, veshe vamuna kubvira ngevaane mwedzi wokubarwa kuenda mberi vaiya makumi mairi namairi emakumi emazana (22,000). Mambo Mwari wakati kunaMosi, “Erenga matangwe eshe evamuna vaIsuraeri; kubvira ngevaane mwedzi wokubarwa kuenda mberi, uerenge uwandu hwemazina avo. Unozonditorera vaRevhi (Inini ndini Mambo Mwari) pandau yematangwe eshe evana vaIsuraeri; nen'ombe dzevaRevhi pandau yematangwe en'ombe dzevana vaIsuraeri.” Ndizvo Mosi wakaerenga matangwe eshe pakati pevana vaIsuraeri, kudai ngokupanga kwaMambo Mwari kwaari. Vakaerengwa veshe matangwe evamuna, kubvira ngevaane mwedzi wokubarwa kuenda mberi, ngouwandu hwemazina avo, vaiya makumi mairi namairi emakumi emazana namazana mairi nemakumi manomwe nevatatu (22,273). Zvino Mambo Mwari wakaereketa kunaMosi echiti, “Tora vaRevhi pandau yematangwe eshe pakati pevana vaIsuraeri, nen'ombe dzevaRevhi pandau yen'ombe dzavo; nevaRevhi vanozoita vangu. Inini ndiri Mambo Mwari. Nokwavari vanozoripirwa mazana mairi nemakumi manomwe navatatu vematangwe (273) evana vaIsuraeri, vakapinda vaRevhi kuwanda. Unozotora zvigurwa zvesirivha zvishanu, panoumwe ngoumwe ngokuerengwa kwemasoro, kudai ngechipimo chesirivha chomundau yakacheneswa, (chigurwa chesirivha chinokwana magera makumi mairi.) Unozopa mare iyo kunaAroni nevakororo vake, inoedzana nouwandu hweavo vanoripirwa.” Ndizvo Mosi wakatora mare yokuita muripo weavo vakapinda kuwanda, avo vakaripirwa ngevaRevhi. Wakatora mare yematangwe evana vaIsuraeri zvigurwa zvesirivha gumi rimwe remazana nemazana matatu nemakumi matanhatu namashanu (1,365), kudai ngechipimo chendau yakacheneswa. NaMosi wakapa mare yeavo vakaripirwa kunaAroni nevakororo vake, kudai ngezvakaronza izwi raMambo Mwari, kudai ngokupanga kwaMambo Mwari kunaMosi. Mambo Mwari wakaereketa kunaMosi naAroni echiti, “Erenga uwandu hwevakororo vaKohathi kubva pakati pevakororo vevaRevhi, kudai ngokuteererana kwemhuri dzavo, kudai ngemhatso dzemadzibaba avo, kubvira ngevaane makore okubarwa makumi matatu kuenda mberi metsa kuguma kunevaane makore makumi mashanu okubarwa, kuti vaite mushando mutende romushongano. Uyu ndiwo mushando wevakororo vaKohathi mutende romushongano, wezviro zvakapindisisa kuchena. “Naapo kamba yooda kumiruka kuenda, Aroni unozouya nevakororo vake, navo vanozodzasa jira rokufukidza ndiro, vechifukidza ndiro bhokisi rechitenderano. Zvino vanozofukidza padera paro ngematoo akasukutwa, nepadera pawo vanozofukidza ngejira rakasvipirika yaamho, vanozopfeka mipingo yaro mukati. Nepadera petafura rezvingwa zvokuapo kwaMambo Mwari vanozochinga jira rakasvipirika, nokuisa padera paro ndiro, ndiro dzomutombo unegwema rakanaka, zvidziyo, nejomeya rokupira mudiro wokumwa; nezvingwa zvokuangirira zvinozoapo. Navo vanozofukidza padera paro ngejira rakatsvuka, nokufukidza padera paro ngechokufukidza chematoo akasukutwa, vanozoisa mipingo pandau yayo. Vanozotora jira rakasvipirika vanozofukidza chigadzikiro chechibani, nezvibani zvacho, nembato dzaro, nezvidziyo zvokudzima ndizvo, nezvidziyo zveshe zvemafuta zvazvo, zvevanoshanda ndizvo kwezviri. Navo vanozoriisa nezvidziyo zveshe zvaro ngomukati mwematoo akasukutwa, vanozoriisa pamupingo. Nepadera pearita romukore vanozochinga jira rakasvipirika, vanozorifukidza ngematoo akasukutwa, vanozoisa mipingo yaro; navo vanozotora zvidziyo zveshe zvomushando zvinoshandiswa mundau yakacheneswa, nokuzviisa mujira rakasvipirika, nokuzvifukidza ngematoo akasukutwa, vanozozviisa pamupingo. Vanozodusa marota kubva paarita, nokufukidza padera paro ngejira rakatsvukuruka. Vanozoisa padera paro zvidziyo zveshe zvearita, izvo zvevanoshandisa kweriri, zvokupishira mutombo inegwema rakanaka, nemaforoko enyama, nemafoshoro, nendiro, nezvidziyo zveshe zvearita, vanozofukidza padera paro ngematoo akasukutwa, nokuisa mipingo mundau yaro. Naapo Aroni nevakororo vake vapedza kufukidza ndau yakacheneswa, nezvidziyo zveshe zvemundau yakacheneswa apo kamba yooda kubvapo; ngesure kweizvo vakororo vaKohathi vanozouya kootwara izvi; asi vasazogwama chiro chakacheneswa kunyazwi ngechiri, kuti vasazofa. Izvi ndizvo zviro zvomutende romushongano zvinosisira kutwarwa ngevakororo vaKohathi. “Nomushando waEreaza mukororo waAroni mupristi ngewokungwarira mafuta ezviveneko, nemitombo inegwema rakanaka, nomudiro wokudya wezuva ngezuva, nemafuta okudzodza, nokungwarira thabhenakeri reshe, nazvo zveshe zviri mukati mwaro, mundau yakacheneswa nomukati mwezvidziyo zvaro.” Mambo Mwari wakaereketa kunaMosi naAroni echiti, “Dzinza remhuri yevakororo vaKohathi risazoparadzwa kubva pakati pevaRevhi. Asi munozoita kwavari kuti vapone, vasafa, apapo vokwedzera pasinde kunezviro zvakachenesesa. Aroni navakororo vake vanozopotera mukati, nokuemesa munhu umwe ngaumwe kumushando wake nokumutwaro wake. Asi vaKohathi vasazopotera mukati kooringira zviro zvakachenesesa kunyazwi kwenguva doko, kuti vasazofa.” NaMambo Mwari wakaereketa kunaMosi echiti, “Erenga uwandu hwevakororo vaGershoni, ngemhatso dzeshe dzemadzibaba avo nemhuri dzavo. Kubvira ngevaane makore makumi matatu kuenda mberi kuguma ngevaane makore makumi mashanu, unozovaerenga; veshe vanozopoteramwo kuti vaite mushando wetende romushongano. Uyu ndiwo mushando wemhuri dzevaGershoni, kuti vashande nokutwara. Navo vanozotwara machira okuturika ethabhenakeri netende romushongano, nezvifukidzo zvaro zvematoo akasukutwa zviri padera paro, nejira rokuturika pamusiwo wetende romushongano, nemachira okuturika oruwanze, nemachira okuturika omusiwo wechimana choruwanze akatendenedza thabhenakeri nearita, nemapote aro, nezviro zveshe zvevanoshanda ndizvo, nazvo zveshe zvezvakanasirirwa; ngokudaro vanozoshandira. Mishando yeshe yevakororo vaGershoni inozoitwa kudai ngokupanga kwaAroni nevakororo vake, muizvo zveshe zvevanozotwara nazvo zveshe zvevanozoshanda; nemwi munozoemesa kwavari zveshe izvo zvevanozotwara. Uyu ndiwo mushando wemhuri yevakororo vaGershoni mutende romushongano; nokupangwa kwavo kunozobva pashi penyara yaIthama mukororo waAroni mupristi. “Ngendaa yevakororo vaMerari, unozovaerenga kudai ngemhuri dzavo nemhatso dzemadzibaba avo. Unozovaerenga kubvira ngevaane makore makumi matatu kuenda mberi metsa kuguma ngevaane makore makumi mashanu, veshe umwe ngaumwe unokona kuita mushando wetende romushongano. Izvi ndizvo zvevanopangwa kutwara, kudai ngomushando wavo weshe mutende romushongano; mapuranga ethabhenakeri, mwamba yaro, sika dzaro nezvitsimiso zvaro, nesika dzoruwanze dzinoritendenedza, nezvitsimiso zvadzo, nehoko dzaro, nemapote adzo, pamwepo nemidziyo yeshe nazvo zveshe zvemishando yavo. Munozoemesa ngemazina midziyo iyo yevanosisira kutwara. Uyu ndiwo mushando wemhuri dzevakororo vaMerari, kudai ngemishando yavo yeshe yevanoshanda mutende romushongano, vari pashi penyara yaIthama mukororo waAroni mupristi.” Ndizvo Mosi naAroni nevatungamiriri vembungano vakaerenga uwandu hwevakororo vaKohathi, kudai ngemhuri dzavo nokudai ngemhatso dzemadzibaba avo, kubvira ngevaane makore makumi matatu kuenda mberi metsa kuguma ngevaane makore makumi mashanu, umwe ngaumwe unokona kuita mushando wetende romushongano. Nokuerengwa kwavo ngokuteererana kwemhuri dzavo vaiya makumi mairi emazana namazana manomwe nemakumi mashanu (2,750). Ava ndivo vakaerengwa vemhuri dzevaKohathi, veshe avo vaishanda mushando wetende romushongano, avo vakaerengwa ndiMosi naAroni kudai ngokupanga kwaMambo Mwari ngenyara yaMosi. Vakaerengwa vevakororo vaGershoni, kudai ngokuteererana kwemhuri dzavo nemhatso dzamadzibaba avo, kubvira ngevaane makore makumi matatu kuenda mberi metsa kuguma ngevaane makore makumi mashanu, veshe avo vanokona kuita mushando wetende romushongano. Vakaerengwa vavo kudai ngokuteererana kwemhuri dzavo nemhatso dzemadzibaba avo vaiya makumi mairi emazana namazana matanhatu nemakumi matatu (2,630). Ava ndivo vakaerengwa vemhuri dzevakororo vaGershoni, veshe avo vaishanda mushando wetende romushongano, avo vakaerengwa ndiMosi naAroni kudai ngokupanga kwaMambo Mwari. Vakaerengwa vemhuri yevakororo vaMerari, kudai ngokuteererana kwemhuri dzavo nemhatso dzemadzibaba avo, kubvira ngevaane makore makumi matatu kuenda mberi metsa kuguma ngevaane makore makumi mashanu, veshe avo vanokona kuita mushando wetende romushongano. Vakaerengwa vavo kudai ngokuteererana kwemhuri dzavo, vaiya makumi matatu emazana nemazana mairi (3,200). Ava ndivo vakaerengwa vevakororo vaMerari, avo vakaerengwa ndiMosi naAroni kudai ngomupango waMambo Mwari, waakapanga kunaMosi. Veshe avo vakaerengwa vevaRevhi avo vakaerengwa ndiMosi naAroni nevatungamiriri vevaIsuraeri kudai ngokuteererana kwemhuri dzavo nemhatso dzemadzibaba avo, kubvira ngevaane makore makumi matatu kuenda mberi metsa ngevaane makore makumi mashanu, veshe avo vaikona kuita mushando wokushandira, nomushando wokutwara mitwaro yetende romushongano. Avo vakaerengwa vavo vaiya makumi masere emazana nemazana mashanu nemakumi masere (8,580). Kudai ngokupanga kwaMambo Mwari kubudikidza ndiMosi, vakaemeswa kumishando yavo mizhinji yokushandira nokutwara; ngokudaro vakaerengwa ndiye, kudai ngezvaakapanga Mambo Mwari kunaMosi. Mambo Mwari wakaereketa kunaMosi echiti, “Panga vana vaIsuraeri kuti vabudise kubanze kwekamba munhu weshe unemapere, unomubvidza nomunhu weshe wakasvipiswa ngokubata vakafa. Munozobudisa veshe vamuna nevakadzi kubanze, muvaise kubanze kwekamba, kuti vasasvipisa kamba yavo, apo pendinogara pakati pavo.” Nevana vaIsuraeri vakaita kudaro, vakavabudisa kubanze kwekamba; kudai ngezvaakaereketa Mambo Mwari kunaMosi, ndizvo zvevakaita vana vaIsuraeri. Mambo Mwari wakaereketa kunaMosi echiti, “Ereketa kunevana vaIsuraeri kuti, ‘Kudai munhu womwamuna nokuti womukadzi echishaishira umweni, kunyazwi ngechiri chinoitwa ngevanhu, kushaisha kunaMambo Mwari, nouwo munhu unozoita unendaa, naye unozotenderuka chishaishi chake chaakaita. Munhuwo unozoripa ndaa yaakashaisha yeshe, echitutsira rupande rwechishanu kweiri nokurupa kunouwo waakashaishira. Kudai munhu wakashaishirwa asina hama iyo inozoashira muripo wokushaisha, uwo muripo wokushaisha ukwo ngauripirwe kunaMambo Mwari, uende kumupristi; ngokubanze kwegondohwe rinoita muripo wokushaisha kwaari. Nemidiro yokupira yeshe yezvakacheneswa zvevana vaIsuraeri, zvipo zveshe zvevanounza kunomupristi zvinozoita zvake. Zvipo zvakacheneswa zvomunhu weshe zvinozoita zvake; kunyazwi ngechiri chaanozopa munhu kunomupristi chinozoita chake.’ ” Mambo Mwari wakaereketa kunaMosi echiti, “Ereketa kunevana vaIsuraeri, wechiti kwavari, ‘Kudai mukadzi womunhu nokuti ngouri echizopauka, echiita usikagondeki kwaari, kudai munhu umweni akaatana naye, asi zvakafishika kumwamuna wake, zvikagara zvakafishika, kunyazwi wakadzisvipisa pachake, pasina chapupu chinomuitira ndaa, ngokuti apana wakamubata echizviita ukosha, kudai mweya wendurumwa wechizouya kwaari, naye echiitira ndurumwa mukadzi wake uwo wakadzisvipisa pachake, nokuti kudai mweya wendurumwa wechizouya kwaari, echiitira ndurumwa mukadzi wake, kunyazwi asikazi kudzisvipisa pachake; naapo munhuwo unozouya nomukadzi wake pamberi pomupristi. Unozomuunzira mudiro unosisira kwaari, rupande rwechegumi cheefa roufu hwebhare. Asazodurura mafuta kwouri, nokuti kuisa makha padera pawo; ngokuti uri mudiro wezviyo wendurumwa, mudiro wezviyo wokukarakadza, echiunza kucherechedziswa kwokushata.’ “Zvino mupristi unozounza mukadzi pasinde nokumuemesa pamberi paMambo Mwari; mupristi unozotora mvura yakacheneswa muchidziyo chedongo; unozotora bukuta riri pashi pethabhenakeri nokuriisa mumvura. Mupristi unozoemesa mukadzi uwo pamberi paMambo Mwari, nokusunhura bvudzi romukadzi, nokuisa munyara dzake mudiro wezviyo wokucherechedzisa, uri mudiro wezviyo wendurumwa nomupristi unozoa nemvura inovava munyara dzake, iyo inounza chituko. Nomupristi unozomupikisa mhiko, echizoti kumukadziwo, ‘Kudai pasina mwamuna wakaatana newe, nokudai usikazi kupauka kuita zvinosvipisa nemwamuna umweni usiri mwamuna wako, ita wakasunhurika kubva kuiyi mvura inovava inounza chituko. Asi kudai wakapauka kuenda kunemwamuna umweni usiri mwamuna wako, nokudai iwewe wakadzisvipisa pachako, nomwamuna umweni wakaatana newe usiri mwamuna wako,’ ” mupristi unozopikisa mukadziwo mhiko yechituko, nomupristi unozoti kumukadzi, “Mambo Mwari ngaaite kuti zina rako riite chituko pakati pevanhu vako, apo Mambo Mwari unozoita kuti mbumbu yako ipute, nendani yako izvimbe. Zvino mvura iyi inounza chituko inozopotera mumaura ako, kuita kuti ndani yako ibvidze, nembumbu yako kuti ipute;” nomukadzi unozoti, “Ameni, ameni.” “Naapo mupristi unozonyora izvi zvituko, unozozvitsukutidza ngemvura inovava. Unozoita kuti mukadziwo amwe mvura inovava inounza chituko, nemvura inounza chituko inozopotera mukati mwake, nokumuunzira kuvava kunorwadza. Naapo mupristi unozotora mudiro wezviyo wendurumwa kubva munyara dzomukadziwo, nokuzunguzira mudiro wezviyo pamberi paMambo Mwari, nokuupira padera pearita. Nomupristi unozonokora tsimba yezviyo zvomudiro uwo, kuita rupande rwechicherechedziso chawo, unozoupisha padera pearita, ngesure kweizvo unozoita kuti mukadziwo amwe mvura. Naapo amuita kuti amwe mvura iyo, kunozoitika kuti kudai akadzisvipisa pachake, akaita usikazi kugondeka kunemwamuna wake, mvura iyo inounza chituko inozopotera mukati mwake, nokuita kuvava kunorwadza, nendani yake inozobvidza, nembumbu yake inozoputa, nomukadzi unozoita chituko pakati pevanhu vake. Asi kudai mukadziwo asikazi kudzisvipisa pachake, naye akasukika, unozoita wakasunhurika naye unozobereka vana. “Ichi chiri chironzo chendurumwa, apo mukadzi echipauka kuenda kunemwamuna umweni usiri mwamuna wake, naye echidzisvipisa pachake nokuti apo mweya wendurumwa wechiuya kunemwamuna, naye echiita ndurumwa kumukadzi wake, echizoemesa mukadzi pamberi paMambo Mwari, nomupristi unozomuitira kudai ngechironzo cheshe. Naapo mwamuna uwo unozoita usina ndaa yokushata ukwo, asi mukadzi unozodzitwarira kushata kwake.” Mambo Mwari wakaereketa kunaMosi echiti, “Ereketa kunevana vaIsuraeri, wechiti kwavari, ‘Kudai munhu wemwamuna nokuti womukadzi echiita mhiko huru yomuNaziriti, kuti adziparadzanisire kunaMambo Mwari pachake, unozodziparadzanisa pachake kubva mukumwa waini nokuti zvinesimba zvinoradzisa, asazomwa vhiniga rakanasirwa kubva kuwaini, nokuti zvinesimba zvinoradzisa, zve, asazomwa anosvinwa muto nokuti kudya michero yemavhini matsva nokuti akaoma. Mazuva ake eshe okudziparadzanisa kudai ngomuNaziriti aazodyi chiro chakaitwa ngemavhini, kunyazwi tsangu nokuti mateko.’ “Mazuva eshe emhiko yake youNaziriti yokuparadzanisa kwake aazoparwi bvudzi resoro rake ngechisvo; metsa mazuva asvika okudziparadzanisira kwake kunaMambo Mwari, unozoita wakacheneswa, unozorekera bvudzi resoro rake kuti rikure rirebe. “Mazuva eshe okudziparadzanisira kwake kunaMambo Mwari aazokwedzeri panomuiri wakafa. Aazodzisvipisi ngokufa kwababa ake, nokuti mai ake, nokuti mukoma wake, nokuti mukunda wake; ngokuti kudziparadzanisira kwake kunaMwari kuri padera pesoro rake. Ngemazuva eshe okudziparadzanisa kwake kwouNaziriti unozoita wakacheneswa kunaMambo Mwari. “Kudai munhu echizofa ngokukasira pasinde pake, naye echisvipisa soro rake ngezuva rokucheneswa kwake, ngezuva rechinomwe unozoripara. Ngezuva rechisere unozounza njia mbiri nokuti magora mairi kunomupristi pamusiwo wetende romushongano, nomupristi unozopira rimwe kuti riite mudiro wokushaisha, nerimweni kuita mudiro wokupisha, nokumuitira muripo wake, ngendaa yokushaisha kwaakaitirwa ngouwo wakafa. Unozochenesa soro rake ngeiro zuva naye unozodzipira pachake kunaMambo Mwari ngemazuva okudziparadzanisa kwake, naye unozounza kagondohwe kegore rimwe kuita mudiro wokushaisha. Asi mazuva ake okutanga aachazoerengwi, ngokuti kudziparadzanisa kwake kwakasvipiswa. “Ichi chironzo chouNaziriti, apo mazuva okudziparadzanisa kwake apera. Unozounzwa kumusiwo wetende romushongano, naye unozopira mudiro wake kunaMambo Mwari, gondohwe rimwe regore rimwe risina kuremara, kuita mudiro wokupisha, nekahwai kethokazi kegore rimwe kasina kuremara kuita mudiro wokushaisha, negondohwe rimwe risina mukovha kuita mudiro wokunyarara, nechitundu chezvingwa zvisina mumera, nemakhekhe oufu hwakamotseka hwakakumanidzwa nemafuta, nezvingwa zvidoko zvisina mumera zvakadzodzwa mafuta nemidiro yake yezviyo, nemidiro yake yokumwa. Mupristi unozozviunza pamberi paMambo Mwari, apire mudiro wake wokushaisha, nomudiro wake wokupisha. Unozopira gondohwe rokuita mudiro wokunyarara kunaMambo Mwari, pamwepo nechitundu chezvingwa zvisina mumera; mupristi unozopirawo mudiro wake wezviyo nomudiro wokumwa. Zvino muNaziriti unozopara bvudzi resoro rake rokudziparadzanisa kwake pamusiwo wetende romushongano, unozotora bvudzi resoro rake rokudziparadzanisa kwake, ariise mumuriro uri pashi pomudiro wakapirwa wokunyarara. Nomupristi unozotora bandauko regondohwe apo rabikwa, nechimwe chezvikhekhe zvisina mumera kubva muchitundu, nechingwa chidoko chimwe chisina mumera, naye unozozviisa munyara dzomuNaziriti, ngesure kwokuparwa bvudzi resoro rokuparadzaniswa kwake. Nomupristi unozozvizunguzira kuita mudiro wokuzunguzirwa pamberi paMambo Mwari; zviri mudiro wakachena womupristi, pamwepo nechifuba chakazunguzwa nechitho chinopirwa. Ngesure kweizvo muNaziriti unozomwa waini. “Ichi ndicho chironzo chomuNaziriti uwo unopika mhiko. Mudiro wake kunaMambo Mwari unosisira kuitwa kudai ngechironzo chevaNaziriti ngepabanze peizvo zvaangakona. Kudai ngemhiko kunyazwi ngeiri yaakapika, ndizvo unozoita echiteera chironzo chokudziparadzanisa kwake kudai ngomuNaziriti.” Mambo Mwari wakaereketa kunaMosi echiti, “Ereketa kunaAroni nevakororo vake wechiti, ‘Ngeiyi njira munozofumisa vana vaIsuraeri,’ mwechiti kwavari. “Mambo Mwari ngaamufumise nokumungwarira. “Mambo Mwari ngaaite kuti hope yake ijeke padera penyu, aite nyasha kwomuri. “Mambo Mwari ngaamirudze hope yake padera penyu, amupe kunyarara.” “Ndizvo vanozoisa zina rangu padera pevana vaIsuraeri; neni ndinozovafumisa.” Ngezuva iro raakapedza Mosi kuemesa thabhenakeri nokuridzodza, nokurichenesa nezvidziyo zvaro zveshe zvokushandisa, zveshe arita nezvidziyo zvaro, naapo azvidzodza nokuzvichenesa, vatungamiriri vaIsuraeri, vakuru vemhatso dzemadzibaba avo, vatungamiriri vemadzinza, avo vaiya padera pevakaerengwa, vakaita midiro. Vakaunza midiro yavo pamberi paMambo Mwari, mukati mwengoro nhanhatu dzaiya dzakafukidzirwa, nekabi gumi nambiri; ngoro imwe yaiya yevatungamiriri vairi, nekabi kunomutungamiriri umwe ngaumwe: navo vakazviunza pamberi pethabhenakeri. Zvino Mambo Mwari wakaereketa kunaMosi echiti, “Ashira izvi kubva kwavari, kuti zvizoshandiswa kuita mushando wetende romushongano; newe unozozvipa kuvaRevhi, umwe ngaumwe kudai ngomushando wake.” Ndizvo Mosi wakatora ngoro nekabi, wakazvipa kuvaRevhi. Ngoro mbiri nekabi murongomuna wakazvipa kuvakororo vaGershoni, kudai ngomushando wavo; nengoro murongomuna nekabi sere wakazvipa kuvakororo vaMerari, kudai ngomushando wavo, vari pashi penyara yaIthama mukororo waAroni mupristi. Asi vakororo vaKohathi aana chaakavapa, ngokuti mushando wendau yakachena waiya wakaemera kwavari kuti vatware ngemapfudzi avo. Vatungamiriri vakapa zvipo zvokupirwa kwearita ngezuva rerakadzodzwa; vatungamiriri vakapa zvipo zvavo pamberi pearita. Mambo Mwari wakati kunaMosi, “Vanozopa zvipo zvavo mutungamiriri umwe zuva rimwe, ngemazuva okupirwa kwearita.” Umwe wakapa zvipo zvake ngezuva rokutanga ndiNashoni mukororo waAminadhabhi, wedzinza raJudha. Nezvipo zvake zvaiya ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha kurema kwayo kwaiya magramu mazana masere (800), ngechipimo chaishandiswa mundau yakachena. Zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo. Ndiro imwe yomukore yairema magramu zana negumi (110), yakazara ngomutombo unegwema rakanaka; mukono umwe mutsva, gondohwe rimwe, nekagondohwe kamwe kanegore rimwe kuita mudiro wokupisha; gotokoto rimwe rembudzi kuita mudiro wokushaisha; nokuita mudiro wokunyarara, kabi mbiri, magondohwe mashanu, magotokoto mashanu, nezvikwai zvishanu zvinegore rimwe. Izvi zvaiya zvipo zvaNashoni mukororo waAminadhabhi. Ngezuva rechipiri Nethaneri mukororo waZua mutungamiriri waIsakha wakaunza mudiro: Zvipo zvake ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha kurema kwayo kwaiya magramu mazana masere (800), kudai ngechipimo chaishandiswa mundau yakachena. Zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo. Ndiro imwe yomukore yairema magramu zana negumi (110), yakazara ngomutombo unegwema rakanaka; mukono umwe mutsva, gondohwe rimwe, nekagondohwe kamwe kanegore rimwe kuita mudiro wokupisha; gotokoto rimwe rembudzi kuita mudiro wokushaisha; nokuita mudiro wokunyarara, kabi mbiri, magondohwe mashanu, magotokoto mashanu, nezvikwai zvishanu zvinegore rimwe. Izvi zvaiya zvipo zvaNethaneri mukororo waZua. Ngezuva rechitatu Eriabhi mukororo waHeroni mutungamiriri wevana vaZebhuruni wakaunza mudiro: Zvipo zvake ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha, kurema kwayo kwaiya magramu mazana masere (800), kudai ngechipimo chaishandiswa mundau yakachena. Zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo. Ndiro imwe yomukore yairema magramu zana negumi (110), yakazara ngomutombo unegwema rakanaka; mukono umwe mutsva, gondohwe rimwe, nekagondohwe kamwe kanegore rimwe kuita mudiro wokupisha; gotokoto rimwe rembudzi kuita mudiro wokushaisha; nokuita mudiro wokunyarara, kabi mbiri, magondohwe mashanu, magotokoto mashanu, nezvikwai zvishanu zvinegore rimwe. Izvi zvaiya zvipo zvaEriabhi mukororo waHeroni. Ngezuva rechirongomuna Erizuri mukororo waShedheuri mutungamiriri wevana vaRubheni wakaunza mudiro: Zvipo zvake ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha, kurema kwayo kwaiya magramu mazana masere (800), kudai ngechipimo chaishandiswa mundau yakachena. Zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo. Ndiro imwe yomukore yairema magramu zana negumi (110), yakazara ngomutombo unegwema rakanaka; mukono umwe mutsva, ngondohwe rimwe, kagondohwe kamwe kanegore rimwe, kuita mudiro wokupisha; gotokoto rimwe rembudzi kuita mudiro wokushaisha; nokuita mudiro wokunyarara, kabi mbiri, magondohwe mashanu, magotokoto mashanu, nezvikwai zvishanu zvinegore rimwe. Izvi zvaiya zvipo zvaErizuri mukororo waShedheuri. Ngezuva rechishanu Sherumieri mukororo waZurishadhai mutungamiriri wevana vaSimeoni wakaunza mudiro: Zvipo zvake ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha, kurema kwayo kwaiya magramu mazana masere (800), kudai ngechipimo chaishandiswa mundau yakachena; zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo. Ndiro imwe yomukore yairema magramu zana negumi (110), yakazara ngomutombo une gwema rakanaka; mukono umwe mutsva, gondohwe rimwe, nekagondohwe kamwe kanegore rimwe, kuita mudiro wokupisha; gotokoto rimwe rembudzi kuita mudiro wokushaisha; nokuita mudiro wokunyarara, kabi mbiri, magondohwe mashanu, magotokoto mashanu, nezvikwai zvishanu zvinegore rimwe. Izvi zvaiya zvipo zvaSherumieri mukororo waZurishadhai. Ngezuva rechitanhatu Eriasafi mukororo waDheueri, mutungamiriri wevana vaGadhi wakaunza mudiro: Zvipo zvake ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha, kurema kwayo kwaiya magramu mazana masere (800), kudai ngechipimo chaishandiswa mundau yakachena; zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo. Ndiro imwe yomukore yairema magramu zana negumi (110), yakazara ngomutombo une gwema rakanaka; mukono umwe mutsva, gondohwe rimwe, nekagondohwe kamwe kanegore rimwe, kuita mudiro wokupisha; gotokoto rimwe rembudzi kuita mudiro wokushaisha; nokuita mudiro wokunyarara, kabi mbiri, magondohwe mashanu, magotokoto mashanu nezvikwai zvishanu zvinegore rimwe. Izvi zvaiya zvipo zvaEriasafi mukororo waDheueri. Ngezuva rechinomwe Erishama mukororo waAmihudhi mutungamiriri wevana vaEfuremu wakaunza mudiro: Zvipo zvake ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha, kurema kwayo kwaiya magramu mazana masere (800), kudai ngechipimo chaishandiswa mundau yakachena; zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo. Ndiro imwe yomukore yairema magramu zana negumi (110), yakazara ngomutombo unegwema rakanaka; mukono umwe mutsva, gondohwe rimwe, nekagondohwe kamwe kanegore rimwe, kuita mudiro wokupisha; gotokoto rimwe rembudzi kuita mudiro wokushaisha; nokuita mudiro wokunyarara, kabi mbiri, magondohwe mashanu, magotokoto mashanu, nezvikwai zvishanu, zvinegore rimwe. Izvi zvaiya zvipo zvaErishama mukororo waAmihudhi. Ngezuva rechisere Gamarieri mukororo waPhedhazuri, mutungamiriri wevana vaManase wakaunza mudiro: Zvipo zvake ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha, kurema kwayo kwaiya magramu mazana masere (800), kudai ngechipimo chaishandiswa mundau yakachena. Zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo. Ndiro imwe yomukore yairema magramu zana negumi (110), yakazara ngomutombo unegwema rakanaka; mukono umwe mutsva, gondohwe rimwe, nekagondohwe kamwe kanegore rimwe, kuita mudiro wokupisha; gotokoto rimwe rembudzi kuita mudiro wokushaisha; nokuita mudiro wokunyarara, kabi mbiri, magondohwe mashanu, magotokoto mashanu nezvikwai zvishanu zvinegore rimwe. Izvi zvaiya zvipo zvaGamarieri mukororo waPhedhazuri. Ngezuva rechipfumbamwe Abhidhani mukororo waGidheoni mutungamiriri wevana vaBhenjamini wakaunza mudiro: Zvipo zvake ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha, kurema kwayo kwaiya magramu mazana masere (800), kudai ngechipimo chaishandiswa mundau yakachena. Zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo. Ndiro imwe yomukore yairema magramu zana negumi (110), yakazara ngomutombo unegwema rakanaka; mukono umwe mutsva, gondohwe rimwe, nekagondohwe kamwe kanegore rimwe, kuita mudiro wokupisha; gotokoto rimwe rembudzi kuita mudiro wokushaisha; nokuita mudiro wokunyarara, kabi mbiri, magondohwe mashanu, magotokoto mashanu nezvikwai zvishanu zvinegore rimwe. Izvi zvaiya zvipo zvaAbhidhani mukororo waGidheoni. Ngezuva regumi Ahieza mukororo waAmishadhai mutungamiriri wevana vaDhani wakaunza mudiro: Zvipo zvake ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha, kurema kwayo kwaiya magramu mazana masere (800), kudai ngechipimo chaishandiswa mundau yakachena. Zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo. Ndiro imwe yomukore yairema magramu zana negumi (110), yakazara ngomutombo unegwema rakanaka; mukono umwe mutsva, gondohwe rimwe, nekagondohwe kamwe kanegore rimwe, kuita mudiro wokupisha; gotokoto rimwe rembudzi kuita mudiro wokushaisha; nokuita mudiro wokunyarara, kabi mbiri, magondohwe mashanu, magotokoto mashanu, nezvikwai zvishanu zvinegore rimwe. Izvi zvaiya zvipo zvaAhieza mukororo waAmishadhai. Ngezuva regumi narimwe Phagieri mukororo waOkrani mutungamiriri wevana vaAsha wakaunza mudiro: Zvipo zvake ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha, kurema kwayo kwaiya magramu mazana masere (800), kudai ngechipimo chaishandiswa mundau yakachena. Zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo. Ndiro imwe yomukore yairema magramu zana negumi (110), yakazara ngomutombo unegwema rakanaka; mukono umwe mutsva, gondohwe rimwe, nekagondohwe kamwe kanegore rimwe, kuita mudiro wokupisha; gotokoto rimwe rembudzi kuita mudiro wokushaisha; nokuita mudiro wokunyarara, kabi mbiri, magondohwe mashanu, magotokoto mashanu, nezvikwai zvishanu zvinegore rimwe. Izvi zvaiya zvipo zvaPhagieri mukororo waOkrani. Ngezuva regumi namairi Ahira mukororo waEnani mutungamiriri wevana vaNafitari wakaunza mudiro. Zvipo zvake ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha, kurema kwayo kwaiya magramu mazana masere (800), kudai ngechipimo chaishandiswa mundau yakachena. Zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo. Ndiro imwe yomukore yairema magramu zana negumi (110), yakazara ngomutombo unegwema rakanaka; mukono umwe mutsva, gondohwe rimwe, nekagondohwe kamwe kanegore rimwe kuita mudiro wokupisha; gotokoto rimwe rembudzi kuita mudiro wokushaisha; nokuita mudiro wokunyarara, kabi mbiri, magondohwe mashanu, magotokoto mashanu, nezvikwai zvishanu zvinegore rimwe. Izvi zvaiya zvipo zvaAhira mukororo waEnani. Uku ndikwo kupirwa kwezvipo zvearita, ngezuva rerakadzodzwa, ngevatungamiriri vaIsuraeri: ndiro dzesirivha gumi nambiri, ndiro dzesirivha dzakapamhama gumi nambiri, ndiro dzomukore dzakapamhama gumi nambiri, ndiro yesirivha yakapamhama imwe ngaimwe kurema kwayo kwaiya makhirogramu rimwe nehafu, nokurema kwendiro imwe ngaimwe kwaiya magramu mazana masere (800). Sirivha yeshe yezvidziyo kurema kwayo kwaiya makhirogramu makumi mairi nemanomwe nezvidoko zvitanhatu, kudai ngechipimo chaishandiswa mundau yakachena. Ndiro dzomukore gumi nambiri dzaiya dzakazara ngomutombo unegwema rakanaka, kurema kwadzo imwe ngaimwe kwaiya makhirogramu rimwe nezvidoko makumi matatu nezviiri, kudai ngechipimo chaishandiswa mundau yakachena. Zvifuyo zveshe, kabi dzomudiro wokupisha gumi nambiri, magondohwe gumi namairi nezvimagondohwe zvinegore rimwe gumi nazviiri, nezvipo zvavo zvomudiro wezviyo, nemakotokoto embudzi omudiro wokushaisha gumi namairi, nezvifuyo zveshe zvomudiro wokunyarara mikono makumi mairi nemirongomuna, magondohwe makumi matanhatu, magotokoto makumi matanhatu, nezvimagondohwe zvinegore rimwe makumi matanhatu. Uku ndikwo kupirwa kwezvipo zvearita, ngesure kwokudzodzwa kwaro. Naapo Mosi apotera mukati mwetende romushongano kooereketa naMambo Mwari, wakazwa izwi rouwo waiereketa naye kubva pachigaro chenyasha chaiya padera pebhokisi rechitenderano, ari pakati pemakherubhi mairi, naye wakaereketa kwaari. Mambo Mwari wakaereketa kunaMosi echiti, “Ereketa kunaAroni, wechiti kwaari, ‘Apo wooemesa zvibani zvinomwe, zvinozojekisa pamberi pechigadzikiro chechibani.’ ” NaAroni wakaita kudaro; wakaemesa zvibani kuti zvivheneke pamberi pezvigadzikiro zvezvibani, kudai ngezvaakapanga Mambo Mwari kunaMosi. Uku ndikwo kunasirwa kwakaitwa chigadzikiro chechibani ngomukore wakapfurwa, kubvira pashi kuenda pamaruwa acho zvakaitwa ngokupfura; kudai ngechionero chaakaonisa Mwari kunaMosi, ndizvo wakanasira kudaro chigadzikiro chechibani. Mambo Mwari wakaereketa kunaMosi echiti, “Tora vaRevhi kubva pakati pevana vaIsuraeri, uvachenese. Newe unozoita kudai kwavari, kuvachenesa: unozovafafazira mvura yokuchenesa, navo vanozopara muiri wavo weshe ngechisvo, vasuke zvokusimira zvavo, ndikwo kudzichenesa pachavo. Zvino ngavatore mukono mutsva nezvipo zvavo zvezviyo, ufu hwakamotseka, hwakakumanidzwa nemafuta, utorezve mukono mutsva umweni kuita mudiro wokushaisha. Unozounza vaRevhi pamberi petende romushongano, uunganidze pamwepo mbungano yeshe yevaIsuraeri. Naapo waunza vaRevhi pamberi paMambo Mwari, vaIsuraeri veshe vanozoisa nyara dzavo padera pevaRevhi. NaAroni unozopira vaRevhi pamberi paMambo Mwari kuti vaite mudiro wakazunguzirwa wevana vaIsuraeri, kuti vaite mushando waMambo Mwari. Zvino vaRevhi vanozoisa nyara dzavo padera pemasoro emikono; unozopira umwe kuita mudiro wokushaisha noumweni kuita mudiro wokupisha kunaMambo Mwari, kuita muripo wevaRevhi. Unozoemesa vaRevhi pamberi paAroni nevakororo vake, nokuvapira kuita mudiro wakazunguzirwa kunaMambo Mwari. Ngokuita kudaro unozoparadzanisa vaRevhi kubva pakati pevaIsuraeri, nevaRevhi vanozoita vangu. Ngesure kweizvi vaRevhi vanozopotera mukati kuti vaite mushando mutende romushongano; newe unozovachenesa uvapire kuita mudiro wakazunguzirwa. Ngokuti vakapirwa kwendiri yaamho kubva pakati pevana vaIsuraeri; ndakadzitorera ava pachangu pandau yaavo vanotanga kubeura ndani, matangwe eshe evana vaIsuraeri. Ngokuti matangwe eshe ari pakati pevaIsuraeri ngaangu, eshe evanhu neemhuka. Ngezuva iro rendakauraya matangwe eshe munyika yeEgipite ndakavachenesa kuti vaite vangu. Asi ndakatora vaRevhi pandau yematangwe eshe ari pakati pevana vaIsuraeri. Ndakapira vaRevhi kuti vaite chipo kunaAroni nevakororo vake kubva pakati pevana vaIsuraeri, kuti vaite mushando wevana vaIsuraeri mutende romushongano, nokupira muripo ngepamusoro pevana vaIsuraeri, kuti kusazoapo nhenda pakati pevana vaIsuraeri, apo vana vaIsuraeri vechikwedzera pasinde kundau yakachena.” Mosi, Aroni nembungano yeshe yevaIsuraeri vakaita ngevaRevhi kudai ndizvo zveshe zvaakapanga Mambo Mwari kunaMosi ngendaa yevaRevhi. VaRevhi vakadzichenesa pachavo kubva pachishaishi, navo vakasuka zvokusimira zvavo; naapo Aroni wakavapira kuita mudiro wakazunguzirwa kunaMambo Mwari; naAroni wakapira muripo ngepamusoro pavo kuti vacheneswe. Ngesure kwazvo vaRevhi vakapotera mukati kuti vaite mushando wavo mutende romushongano pamberi paAroni nevakororo vake; kudai ngezvaakapanga Mambo Mwari kunaMosi ngendaa yevaRevhi vakaita kudaro kwavari. Mambo Mwari wakaereketa kunaMosi echiti, “Izvi ndizvo zvakaemeserwa kuvaRevhi; kubvira ngevaane makore makumi mairi namashanu kuenda mberi, vanozopotera mukati kuti vaite mushando wetende romushongano. Kubvira ngevaane makore makumi mashanu vanozorekera kuita mushando, avachazoshandi. Asi vangazodetsera hama dzavo mutende romushongano kuti vaite mishando yavo, asi vasikachaiti mushando. Izvi ndizvo zvounozoita kuvaRevhi kuvaemesa pamishando yavo.” Mambo Mwari wakaereketa kunaMosi ari mushango reSinai, ngomwedzi wokutanga wegore rechipiri sure kwokubuda kwavo kubva munyika yeEgipite echiti, “Vana vaIsuraeri ngavangwarire Phasika ngomukuwo waro wakaemeswa kweriri. Ngezuva regumi namarongomuna rouyu mwedzi, madeekoni, munozoringwarira ngomukuwo waro wakaemeswa: kudai ngezviemeso zvaro zveshe, nokudai ngemiitiro yaro yeshe, munozoringwarira kudaro.” Ndizvo Mosi wakaronzera vana vaIsuraeri kuti vangwarire Phasika. Navo vakangwarira Phasika mumwedzi wokutanga ngezuva regumi namarongomuna madeekoni mushango reSinai; kudai ndizvo zveshe zvaakapanga Mambo Mwari kunaMosi, ndizvo vana vaIsuraeri vakaita kudaro. Zvino vaiyapo vamuna vamweni vakasvipiswa ngokubata muiri womunhu wakafa, ndizvo avazi kukona kungwarira Phasika ngeiro zuva; navo vakauya kunaMosi naAroni ngeiro zuva. Avo vamuna vakati kwaari, “Isusu takadzisvipisa ngokubata muiri womunhu wakafa; ndizvo ngenyi tarambidzwa kuti tisapira mudiro kunaMambo Mwari, kudai ngenguva yawo yakaemeswa pakati pevana vaIsuraeri?” NaMosi wakati kwavari, “Emai, kuti ndizwe icho chaanopanga Mambo Mwari ndimwi.” Mambo Mwari wakaereketa kunaMosi echiti, “Ereketa kunevana vaIsuraeri, ‘Kudai munhu kunyazwi ngouri wenyu, nokuti wemibarirwana yenyu asvipiswa ngendaa yokubata muiri womunhu wakafa, nokuti ari murwendo kuretu, zvakanyadaro unozongwarira Phasika kunaMambo Mwari. Mumwedzi wechipiri ngezuva regumi namarongomuna, madeekoni vanozoringwarira; vanozoridya pamwepo nezvingwa zvisina mumera nemiriwo inovava. Vasazosiya zvimweni zvaro metsa nechimangwani, nokuti vasazogura godo narimwe raro; vanozongwarira Phasika kudai ngezviemeso zvaro zveshe. Asi munhu wakasukika, nousiri murwendo, echirekera kungwarira Phasika, uwo munhu unozobviswa kubva pakati pevanhu vake, ngokuti aazi kupira mudiro kunaMambo Mwari ngenguva yawo yakaemeswa; uwo munhu unozotwara kushaisha kwake. Nokudai mupara unogara pakati penyu, echida kungwarira Phasika kunaMambo Mwari, kudai ngezviemeso zveshe zvePhasika nokudai ngemiitiro yaro, ndizvo unozoita kudaro; munozoane chiemeso chimwe mweshe munhu mupara nouwo wakabarwa munyika yenyu.’ ” Ngezuva rerakaemeswa thabhenakeri, gore rakathibikira thabhenakeri, tende rechapupu; kubvira mumadeekoni metsa mangwanani raiya padera pethabhenakeri, rakadai ngomuriro kuoneka kwaro. Ndizvo zvakagara zvechidaro nguva dzeshe: gore rairithibikira masikati, rakadai ngomuriro kuoneka kwaro usiku. Naapo gore raimirudzwa kubva patende romushongano, naapo vana vaIsuraeri vaihamba kuenda; nepandau peraiema gore apo vana vaIsuraeri vaiemesa matende avo. Ngokupanga kwaMambo Mwari vaIsuraeri vaihamba kuenda, nokupanga kwaMambo Mwari vaiemesa matende avo; nguva yeshe gore peraigara padera pethabhenakeri vaizorora mumatende avo. Kunyazwi gore raiangira kugara apo pathabhenakeri mazuva akawanda vana vaIsuraeri vaingwarira kupanga kwaMambo Mwari, vasaihamba. Nguva dzimweni gore raigara mazuva mashomani padera pethabhenakeri; kudai ngokupanga kwaMambo Mwari vaigara mumatende avo; zvino kudai ngokupanga kwaMambo Mwari vaihamba. Nguva dzimweni gore raigara kubvira madeekoni metsa mangwani mangwanani, naapo gore raimirudzwa mangwanani, vaihamba kuenda; nokuti kudai raiangira masikati nokuti usiku apo gore ramirudzwa, vaihamba. Kunyazwi mazuva mairi, nokuti mwedzi, nokuti nguva yakareba, kuti gore rechiangira kugara padera pethabhenakeri, rechigarapo, vana vaIsuraeri vaigara mumatende avo, vasikahambi; asi apo raimirudzwa, vaihamba. Ngokupanga kwaMambo Mwari vaizorora mumatende avo, ngokupanga kwaMambo Mwari vaihamba; vaingwarira kupanga kwaMambo Mwari, kwaakapanga Mambo Mwari ndiMosi. Mambo Mwari wakaereketa kunaMosi echiti, “Nasira magwama mairi esirivha; unozoanasira ngesirivha yakapfurwa; newe unozoashandisa kudaidza mbungano, nokuziisa vanhu vekamba kuti vahambe. Naapo eshe aridzwa, mbungano yeshe inozoungana pamwepo kwouri pamusiwo wetende romushongano. Asi kudai wechizoridza gwama rimwe rega, zvino vatungamiriri, nduna dzemadzinza evaIsuraeri vanozodziunganidza kwouri. Naapo munozoridzisa gwama, ngokudaro makamba ari ngokumabvazuva anozohamba kuenda. Naapo munozoridzisa gwama ngokwechipiri, makamba ari ngokubani anozohamba kuenda; vanozoridzisa gwama rokuziisa kuhamba kwavo. Asi apo mbungano yechida kuunganidzwa pamwepo, munozoridza asi amuzoridzisi gwama. Vakororo vaAroni, vapristi vanozoridza magwama; neizvi zvinozoita mipango kwomuri nokumibarirwana yenyu mhera nariini. Naapo mwechienda koorwa hondo munyika yenyu namagaa avo vanomutambudza, naapo munozoridzisa magwama, kuti muzocherechedzwa pamberi paMambo Mwari, Mwari wenyu, nemwi munozoponeswa kubva kumagaa enyu. Zve, ngemazuva okudakara kwenyu, nemazuva enyu emadhiri okudira, nomukuamba kwokutawa kwomwedzi yenyu munozoridza magwama muri pamidiro yenyu yokupisha, nepamidiro yenyu yokunyarara; kuti zviite chicherechedziso pamberi paMwari wenyu. Inini ndini Mambo Mwari, Mwari wenyu.” Mugore rechipiri mumwedzi wechipiri, ngezuva remakumi mairi gore rakamirudzwa kubva padera pethabhenakeri yechapupu. Nevana vaIsuraeri vakahamba kubva mushango reSinai; negore rakaenda kooema mushango rePharani. Navo vakatanga kuhamba muhambo wavo kudai ngokupanga kwaMambo Mwari kubudikidza ndiMosi. Kutanga kwakahamba chioniso chekamba raJudha kudai ngezvikwata zvavo nenduna yehondo yake yaiya Nashoni mukororo waAminadhabhi. Nenduna yedzinza raIsakha yaiya Nethaneri mukororo waZua. Nenduna yedzinza raZebhuruni yaiya Eriabhi mukororo waHeroni. Zvino thabhenakeri rakadzaswa pashi; vakororo vaGershoni nevakororo vaMerari vakahamba vakatwara thabhenakeri. Chaiteera chioniso chekamba yaRubheni chakahamba kudai ngezvikwata zvavo nenduna yehondo yavo yaiya Erizuri mukororo waShedheuri. Nenduna yedzinza raSimeoni yaiya Sherumieri mukororo waZurishadhai. Nenduna yehondo yevana vaGadhi yaiya Eriasafi mukororo waDheueri. Zvino vaKohathi vakahamba kuenda, vakatwara zviro zvakacheneswa, nevamweni vakaemesa thabhenakeri ivo vasati vaguma. Chioniso chekamba yevana vaEfuremu chakahamba kudai ngezvikwata zvavo nenduna yehondo yake yaiya Erishama mukororo waAmihudhi. Nenduna yehondo yevana vaManase yaiya Gamarieri mukororo waPhedhazuri. Nenduna yehondo yedzinza raBhenjamini yaiya Abhidhani mukororo waGidheoni. Chioniso chekamba chevana vaDhani chakahamba chiri chokugumisira chemakamba eshe mukati mwehondo dzavo naAhieza mukororo waAmishadhai ndiye waiya nduna yehondo yavo. Nenduna yehondo yevana vaAsha yaiya Phagieri mukororo waOkrani. Nenduna yehondo yedzinza raNafitari yaiya Ahira mukororo waEnani. Uku ndikwo kwaiya kuhamba kwevana vaIsuraeri kudai ngokuteererana kwezvikwata zvavo. NaMosi wakati kuna Hobhabhi mukororo waRueri muMidhiani, muzvere waMosi, “Tinohamba kuenda kundau yaakaronza Mambo Mwari, kuti, ‘Ndinozoipa kwomuri;’ uya nesu, nesu tinozokuitira zvakanaka, ngokuti Mambo Mwari wakagondisa zvakanaka kunaIsuraeri.” Asi wakati kwaari, “Andizoendi nemwi, asi ndinozohwirira kunyika yangu nokuhama dzangu.” Naye wakati, “Usasiyana nesu, ndinokupota; kudai ngezvounozia kuti tinozoemesa matende edu mushango, newe unozoita madziso edu. Kudai wechizoenda nesu, kunyazwi kunaka kwakadini ukwo kwaanozoita Mambo Mwari kwetiri, isusu tinozoitawo kudaro kwouri.” Ndizvo vakahamba kubva pamutunhu waMambo Mwari muhambo wemazuva matatu; nebhokisi rechitenderano chaMambo Mwari rakatanga kuenda mberi kwavo, muhambo wemazuva matatu, kootsvaka ndau yavo yokuzorora. Negore raMambo Mwari raithibikira padera pavo masikati, apo vaihamba kubva mukamba. Naapo bhokisi rechitenderano roohamba kuenda, Mosi waiti, “Miruka, A Mambo Mwari, magaa ako ngaaparadzwe; naavo vanokuzonda ngavatize kubva pamberi pako.” Naapo roogadzikwa waiti, “Petukazve, A Mambo Mwari, kumakumi emakumi emazana akawanda evaIsuraeri.” Naapo vanhu vakavhuruvhuta mukuzwa kwaMambo Mwari ngendaa yemadambudziko avo naMambo Mwari azvizwa, ushungu hwake hwakabaka; nomuriro waMambo Mwari wakabaka pakati pavo, wakaparadza marupande okumagumo kwekamba. Asi vanhu vakachema kunaMosi; naMosi wakakumbira kunaMambo Mwari nomuriro wakadzimwa. Ndizvo wakadudza zina rendau iyo kuti, “Thabhera;” ngokuti muriro waMambo Mwari wakabaka pakati pavo. Zvino vapara vaigara pakati pavo vakabatwa ngenhomba yenyama; nevana vaIsuraeri vakachemawo vechiti, “Ndiani unozotipa nyama yokuti tidye. Tinokarakadza hove dzetakadya tisingatengi tiri munyika yeEgipite, makaka, makhebe, mariki, mahanyanisi nemagarikhi; asi zvino mweya yedu yaomerwa; apachina chiro nachimwe, asi mana iyi yega iri pamberi pemadziso edu.” Zvino mana yakadai ngetsangu yekhorianda, nomuara wayo waiya wakadai ngomuara webhidheriumu. Vanhu vaibuda vechipararira kooiunganidza, vaikuya pamakuyo, nokuti kuitwa mumaturi, nokuibika, nokuita makhekhe ndiyo; yainaka kudai ngezvimakhekhe zvakabikwa ngemafuta matsva. Naapo beto rawa padera pekamba usiku, nemana yaiwa naro. Mosi wakazwa kuchema kwevanhu, mukati mwemhuri dzavo, munhu weshe pamusiwo wetende rake; noushungu hwaMambo Mwari hwakabaka kakurutu, Mosi naye wakashatirwa kakurutu. Mosi wakati kunaMambo Mwari, “Unotambudzirenyi muranda wako? Andizi kuona nyasha ngenyi mukuona kwako, kuti uise mutwaro wevanhu ava veshe padera pangu? Ndakatonha ukosha hwevanhu ava veshe here? Ndakavabara here kwokuti iwewe uti kwendiri, ‘Vafungatire paditi rako, kudai ngomureri unofungatira mwana uchaamwa, kuenda navo kunyika yewakapika ndiyo kunemadzibaba avo?’ Ndingaona pari nyama yokupa vanhu ava veshe? Ngokuti vanochemera pamberi pangu, vechiti, ‘Tipe nyama kuti tidye.’ Andikoni kutwara ava vanhu veshe ndega, ngokuti vanondiremera. Kudai mwechida kundiitira zvakadai, ndiurayenyi ngokukasira, ndapota, kudai ndaona nyasha mukuona kwako; kuti ndisazoona kutambudzika kwangu.” Ndizvo Mambo Mwari wakati kunaMosi, “Ndiunganidzire vamuna makumi manomwe evakuru vaIsuraeri, avo vounozia kuti vakuru vevanhu, nduna padera pavo; vaunze kutende romushongano, kuti vaeme apo newe. Neni ndinozodzaka ndierekete newe apo; ndinozotora rupande rwomweya uri padera pako, ndiuise padera pavo; navo vanozotwara mutwaro wevanhu pamwepo newe, kuti usazoutwara wega pachako. Ereketa kunevanhu kuti: Dzichenesei pachenyu ngendaa yemangwani, nemwi munozodya nyama; ngokuti mwakachema mukuzwa kwaMambo Mwari mwechiti, ‘Ndiani unozotipa nyama yokuti tidye? Ngokuti zvaiya zvakanaka kwetiri tichimunyika yeEgipite.’ Ndizvo Mambo Mwari unozomupa nyama nemwi munozodya. Amuzoidyi zuva rimwe rega, nokuti mazuva mairi, nokuti mazuva mashanu, nokuti mazuva gumi, nokuti mazuva makumi mairi. Asi munozoidya mwedzi weshe, metsa ibude kubva ngomumiro mwenyu, metsa munyangadzwe ndiyo; ngokuti mwakashoora Mambo Mwari uri pakati penyu, mwakachema pamberi pake mwechiti, ‘Takabudirenyi kubva munyika yeEgipite?’ ” Asi Mosi wakati, “Vanhu vendinavo mazana matanhatu emakumi emazana (600,000) vanohamba ngetsoka; newe wakati, ‘Ndinozovapa nyama yokuti vadye mwedzi weshe.’ Vanozourairwa n'ombe nemakwai here, kuti vakwane? Nokuti vanozounganidzirwa hove dzeshe dzomuruandhle here kuvapa, kuti vakwane?” Mambo Mwari wakati kunaMosi, “Nyara yaMambo Mwari yakafupiswa here? Zvino unozoona kuti mazwi angu anozoitika here kwouri, nokuti aazoitiki.” Ndizvo Mosi wakaenda kooronzera vanhu mazwi aMambo Mwari; wakaunganidza vamuna makumi manomwe vakuru vevanhu, wakavaemesa kutendenedza tende romushongano. Zvino Mambo Mwari wakadzaka ari mugore, wakaereketa kwaari, akatora rupande rumweni rwomweya rwaiya padera pake, wakaukoanisira kunevakuru vaiya makumi manomwe; naapo mweya wagara padera pavo, vakaprofeta. Asi avazi kuzoitazve kudaro. Asi kwakasara vamuna vairi mukamba, zina roumwe ndiEridhadhi, nezina roumweni ndiMedhadhi, nomweya wakagara padera pavo; navo vaiya veavo vakanyorwa, asi avazi kubuda kuenda kutende romushongano; ndizvo vakaprofeta vandorimwo mukamba. Jaha rakarumba rikaronzera Mosi rechiti, “Eridhadhi naMedhadhi vanoprofeta vari mukamba.” NaJoshua mukororo waNuni, mudetseri waMosi, umwe wemajaha ake, wakapingura echiti kwaari, “Mambo wangu Mosi, varambidzei!” Asi Mosi wakati kwaari, “Unendurumwa here ngendaa yangu? Ndingada kuti vanhu veshe vaMambo Mwari vaite vaprofeti, nokuti Mambo Mwari aise mweya wake padera pavo!” Mosi nevakuru vaIsuraeri wakapetuka mukamba. Kwakabuda dutu kubva kunaMambo Mwari, naro rakaunza zvikware zvakabva kuruandhle, nazvo zvakarigirwa pasinde pekamba, muhambo waida kukwana wezuva kumarutii eshe aro, kuritendenedza kwaida kuita mitha rimwe padera pemavhu. Ndizvo vanhu vakamiruka zuva iro reshe, nousiku uhwo hweshe, nezuva reshe raiteera, vakaunganidza zvikware; uwo wakaunganidza zvishomani wakaunganidza zvaipinda makhirogramu gumi remazana (1,000) navo vakazvianika pachavo kundau dzeshe dzinotendenedza kamba. Asi nyama ichiri pakati pemazino avo, isati yatsengwa, ushungu hwaMambo Mwari hwakabaka kunevanhu, naMambo Mwari wakachaya vanhu ngenhenda huru. Ndizvo wakadudza zina rendau iyo kuti, “Kibrothi-hataava:” ngokuti vakatsirapo vanhu vakafa ngenhomba. Navanhu vakahamba kubva Kibrothi-hataava kuguma Hazerothi, vakagara Hazerothi. Miriamu naAroni vakaereketa vechiitira ndaa Mosi ngendaa yomukadzi weKhushi uwo waakaroora; ngokuti waiya akaroora mukadzi muKhushi. Navo vakati, “Ngegwinyiso Mambo Mwari wakaereketa kubudikidza ndiMosi ega here? Aazi kuereketa kubudikidza tisuwo here?” NaMambo Mwari wakazvizwa. (Zvino munhu uyu Mosi waiya munhu wakapfaa, kupinda vanhu veshe vaiya panyika.) Ngokukasira Mambo Mwari wakaereketa kunaMosi, Aroni, nokunaMiriamu echiti, “Budai imwimwi vatatu muuye kutende romushongano.” Navo vatatu vakabuda. NaMambo Mwari wakadzaka ari mumvumi yegore, wakaema pamusiwo wetende romushongano, wakadaidza Aroni naMiriamu; navo vairi vakabuda. Naye wakati, “Izwanyi zvino mazwi angu: Kudai aripo muprofeti pakati penyu, inini Mambo Mwari ndinozoita kuti ndiziikanwe kwaari muchioniso, ndinozoereketa kwaari mukurota. Muranda wangu Mosi aazi kudaro akadi, unogondeka mumhatso yangu yeshe. Kwaari ndinozoereketa takaringirana hope kuhope eya, pamhene, pasina chakafishika; naye unoona chiemo chaMambo Mwari. Ndizvo ngenyi musikazi kutya kuitira ndaa Mosi muranda wangu?” Noushungu hwaMambo Mwari hwakabaka kwavari; naye wakabvapo. Negore rakamiruka kubva padera petende romushongano; wonai, Miriamu waiya aanemapere, akachena kudai ngechando. NaAroni wakaringira Miriamu, akaona kuti waiya aanemapere. NaAroni wakati kunaMosi, “A mambo wangu, ndapota, usatijezisa, ngokuti takaita ngoupenzi, nesu takashaisha. Usatenda kuti aite kudai ngewakabarwa akafa, uwo nyama yake rupande rwayo yakaora apo echibuda mundani yamai ake.” NaMosi wakakumbira kunaMambo Mwari echiti, “Muponesei zvino, A Mwari, ndinopota kwouri.” Asi Mambo Mwari wakati kunaMosi, “Kudai baba ake vaiya vakamupfira mata muhope mwake, asaizoita unotsveruka here mazuva manomwe? Ngaabviswe akonyerwe kubanze kwekamba mazuva manomwe, ngesure kweizvo ngaaunzwezve.” Ndizvo Miriamu wakakonyerwa kubanze kwekamba mazuva manomwe; nevanhu avazi kuhamba kuenda metsa Miriamu aunzwazve mukamba. Nangesure kweizvo vanhu vakathutha kubva Hazerothi, vakaemesa matende avo mushango rePharani. NaMambo Mwari wakaereketa kunaMosi echiti, “Tuma vanhu, kuti vaende koonengera nyika yeKhenani, yendinopa vana vaIsuraeri: kubva kudzinza rimwe ngarimwe remadzibaba avo unozotuma munhu umwe, munhu weshe uri nduna pakati pavo.” Ndizvo Mosi wakavatuma kubva mushango rePharani, kudai ngokupanga kwaMambo Mwari, veshe ava vanhu vaiya vakuru vevana vaIsuraeri. Naaya ndiwo mazina avo: wedzinza raRubheni, ndiShamua mukororo waZakuri; wedzinza raSimeoni, ndiShafati mukororo waHori, wedzinza raJudha, ndiKharebhu mukororo waJefune; wedzinza raIsakha, ndiIgari mukororo waJosefa; wedzinza raEfuremu, ndiHoshea mukororo waNuni; wedzinza raBhenjamini, ndiPhariti mukororo waRafu; wedzinza raZebhuruni, ndiGadhieri mukororo waSodhi; wedzinza raJosefa, ukwo kunoti wedzinza raManase, ndiGadhi mukororo waSusi; wedzinza raDhani, ndiAmieri mukororo waGemari; wedzinza raAsha, ndiSethuri mukororo waMikhaeri; wedzinza raNafitari, ndiNabhi mukororo waVhophisi; wedzinza raGadhi, ndiGeueri mukororo waMakhi. Aya ndio mazina evamuna vakatumwa ndiMosi koonengera nyika. NaMosi wakadudza Hoshea mukororo waNuni, kuti Joshua. NaMosi wakavatuma kuti vaende koonengera nyika yeKhenani, wakati kwavari, “Kwirai muende muNegebhi, mukwire padera penyika yemitunhu. Muringire nyika kuti yakadini; nevanhu vanogaramwo, kuti vanesimba here nokuti avana; vashomani here nokuti vakawanda; nokunyazwi nyika yevanogara yakadini, kuti iri yakanaka here nokuti yakashata; nemadhorobha evanogara kuti akadini, kuti vanogara mumatende here, nokuti mumarusvingo; nokunyazwi nyika yakadini, kuti yakavundira here nokuti aizi, nokuti inehuni here nokuti aina. Itai vakashinga, muuye nemichero yenyikayo.” Zvino nguva iyi yaiya yemichero yemitanguro yemavhini. Ndizvo vakakwira, vakanengera nyika kubvira mushango reZini metsa kuguma Rehobhi, pasinde pamusiwo weHamathi. Navo vakakwira muNegebhi, vakaguma Hebroni; Ahimani, Sheshai naTharimai, mibarirwana yaAnaki yaiyapo. (Hebroni raiya rakaakiwa makore manomwe ngepamberi kutangira Zoani riri muEgipite.) Naavo vakaguma muBani reEshikhori, vakatemapo dai rimwe rinechikore chemavhini, rakapingatwa ngevanhu vairi; vakaunzazve maphomegranite nemaonde. Ndau iyo yakadudzwa kuti Bani reEshikhori, ngendaa yechikore chemavhini chevakatemapo vana vaIsuraeri. Navo vakapetuka kubva koonengera nyika ngesure kwemazuva makumi marongomuna. Navo vakauya kunaMosi, Aroni nembungano yeshe yevana vaIsuraeri mushango rePharani, paKadheshi; vakaunza izwi kwavari nokunembungano yeshe, vakavapangidzira michero yeiyo nyika. Vakamuronzera vechiti, “Takaguma kunyika iyo yewakatituma kweiri, eya ngegwinyiso inoerera mukaka nouchi; iyi ndiyo michero yayo. Asi zvakanyadaro, vanhu vanogara munyikamwo vanesimba nemadhorobha avo akakura akashosherwa ngemarukumbati, zve, takaonapo mibarirwana yaAnaki. VaAmareki vanogara munyika yeNegebhi, vaHiti, vaJebhusi nevaAmori vanogara munyika yemitunhu; nevaKhenani vanogara pasinde poruandhle nokumarutii eJorodhani.” Asi Kharebhu wakanyaradza vanhu pamberi paMosi akati, “Ngatikwireyo zvinopano, tiitore; ngokuti isusu tinesimba rokuti tiinyise.” Zvino vanhu vakaenda naye vakati, “Atikoni kukwira kooambana naavo vanhu; ngokuti vanesimba kupinda isusu.” Ndizvo vakaunza mashoko akashata kunevana vaIsuraeri, ngendaa yenyika yevakaenda koonengera vechiti, “Nyika yatakaenda koonengera, inyika inodya vagari vayo; nevanhu veshe vetakaona umwo magakanyara. Naapo takaona vaNefirimu (vakororo vaAnaki, avo vorudzi rwevaNefirimu); nesu pachedu takadziona takadai ngemadorondoro, ndizvo ngezvetaiya takaita mukuona kwavo.” Zvino mbungano yeshe yakamirudza izwi rayo, ikachema; nevanhu vakachema ngouhwo usiku. Nevana veshe vaIsuraeri vakagunun'unira Mosi naAroni; nembungano yeshe yakati kwavari, “Dai taiya takafira hedu munyika yeEgipite! Nokuti dai taiya takafira hedu mushango! Ngenyi Mambo Mwari akatiunza kunyika iyi kuti tiurawe ngeshoti, vakadzi vedu nevana vedu vaite vakachakatwa? Akuzi kupinda kunaka here kuti tihwirire Egipite?” Ndizvo vakati umwe kunoumweni, “Ngatitsanangure nduna, tihwirire Egipite.” Zvino Mosi naAroni vakawa ngehope dzavo pashi pamberi pembungano yeshe yevana vaIsuraeri. NaJoshua mukororo waNuni naKharebhu mukororo waJefune, avo vaiya pakati peavo vakaenda koonengera nyika, vakabaura zvokufuka zvavo, navo vakaereketa kunembungano yeshe yevana vaIsuraeri vechiti, “Nyika yetakahamba ndiyo koonengera, inyika yakanaka kakurutu. Kudai Mambo Mwari echidakara tisu, unozotipinza munyika iyi, nokuipa kwetiri, nyika inoerera mukaka nouchi. Kwega musamukira Mambo Mwari, zve, musatya vanhu venyika; ngokuti vari chokudya kwetiri; kurwirwa kwavo kwabviswa kwavari, naMambo Mwari unesu; musavatya.” Asi mbungano yeshe yakapanga kuti vapondwe ngemapuwe. Zvino uthende hwaMambo Mwari hwakaoneka mutende romushongano pamberi pevana vaIsuraeri. NaMambo Mwari wakati kunaMosi, “Kunozoita mukuwo wakaitawani ava vanhu vechindishoora? Kunozoita mukuwo wakaitawani vasikandigondi, kunyazwi ndakaita zvioniso zveshe pakati pavo? Ndinozovaorora ngenhenda, ndiite kuti vasagara nhaka, ndinozoita ndiwe dzinza rakakura rinesimba kupinda ivo.” Asi Mosi wakati kunaMambo Mwari, “Zvino vaEgipite vanozozwa ndizvo, ngokuti iwewe ndiwe wakakwidza vanhu ava ngesimba rako kubva pakati pavo, navo vanozoronzera vagari veiyi nyika. Vakazwa kuti iwewe Mambo Mwari uri pakati peava vanhu; ngokuti iwewe Mambo Mwari wakaoneka hope kuhope, negore rako rinoema padera pavo, newe unohamba pamberi pavo, masikati ngemvumi yegore nousiku ngomurazvu womuriro. Zvino kudai wechizouraya ava vanhu panguva imwe, naapo madzinza awo akazwa mbiri yako vanozoereketa vechiti, ‘Ngokuti Mambo Mwari waiya aazi kukona kuunza ava vanhu munyika yaakapika kuvapa, ndizvo wakavauraya mushango.’ Zvino, ndinokupota, simba raMambo Mwari ngarikuriswe, kudai ngezvewakagondisa wechiti, “Mambo Mwari unononoka kushatirwa, naye unenyasha huru, echirekerera kushaisha nokupauka, asi asikapembedzi uwo unendaa, echiunzidzira kushaisha kwemadzibaba padera pevana metsa kumubarirwana wechitatu nokuti wechirongomuna. Rekerera, ndinokupota, kushaisha kweava vanhu kudai ngouwandu hwenyasha dzako, nokudai ngezvewakarekerera ava vanhu kubvira Egipite metsa kuguma zvino.” Zvino Mambo Mwari wakati, “Ndavarekerera kudai ngokukumbira kwako. Asi kudai ngezvendinopona, nyika dzeshe dzinozozara ngouthende hwaMambo Mwari. Apana noumwe wevanhu vakaona uthende hwangu nemamina angu endakaita muEgipite nomushango, asi vakandiedza zvino mikuwo iyi gumi, vasikazi kupurutana izwi rangu, ngegwinyiso avazooni nyika iyo yendakapika kupa kunamadzibaba avo; akuna noumwe weavo vakandishoora unozoiona. Asi muranda wangu Kharebhu, ngokuti iye unomweya umweni mukati mwake, naye wakanditeera ngomwoyo weshe ndinozomuunza munyika yeakaenda kweiri; nemibarirwana yake inozogara nhaka yayo. Zvino ngokuti vaAmareki nevaKhenani vaigara mumabani, mangwanani kunukukai imwimwi muende mushango ngenjira yoRuandhle Rwakatsvuka.” NaMambo Mwari wakaereketa kunaMosi naAroni echiti, “Kunozoitika mukuwo wakaitawani ndichisengerera iyi mbungano yakashata, yechigunun'una ndini? Ndakazwa kugunun'una kwevana vaIsuraeri kwevanondigunun'unira ndikwo. Ereketa kwavari, ‘Kudai ngezvendinopona, unoronza Mambo Mwari, kudai ndinozozviitawo kwomuri izvo zvendakazwa mwechiereketa. Miiri yenyu yakafa inozowira mushango iri; naavo veshe vakaerengwa venyu, kudai ngouwandu hwenyu hweshe, kubvira vaane makore makumi mairi kuenda mberi, avo vanondigunun'unira. Ngegwinyiso apana noumwe wenyu unozoguma kunyika yendakapika ndiyo kuti munozogara mukati mwayo, ngokubanze kwaKharebhu mukororo waJefune naJoshua mukororo waNuni. Asi vadoko venyu, avo vemwakaereketa ndivo mwechiti, vanozoita vakachakatwa, ndivo vendinozogumisa munyika iyo, ivo vanozozia nyika iyo yemwakashoora. Asi imwimwi, miiri yenyu yakafa inozowira mushango iri. Nevana venyu vanozonzerereka mushango kupedza makore makumi marongomuna, navo vanozotambudzika ngokusikagonda kwenyu, metsa miiri yenyu yakafa inozotsakatika mushango. Kudai ngouwandu hwemazuva emwakaenda koonengera nyika ndiwo, mazuva makumi marongomuna, zuva rimwe ngarimwe rinozoita gore, muzotwara kushata kwenyu makumi marongomuna emakore, nemwi munozozia kusikadakara kwangu.’ Inini Mambo Mwari ndaereketa; ngegwinyiso ndinozozviita kuneiyi mbungano yeshe yakashata, yaungana pamwepo kundimukira; mukati mweiri shango vanozopedzwa, vanozofira muno.” Nevamuna vaakatuma Mosi koonengera nyika, avo vakapetuka, vakaita kuti mbungano yeshe ivhuruvhute kumumukira, ngokuunza mushumo wokushoora nyika iyo, vamuna vakaunza mushumo wakashata ngendaa yenyika iyo, vakafa ngenhenda pamberi paMambo Mwari. Asi Joshua mukororo waNuni naKharebhu mukororo waJefune, vakasara vechipona pakati peavo vakaenda koonengera nyika. Naapo Mosi wakaronza mazwi aya kuvana vaIsuraeri veshe, navanhu vakachema kakarutu. Vakamuka mangwanani maishi, vakakwira padera penyika yemitunhu vechiti, “Penya, tiri pano. Nesu tinozokwira kundau yaakagondisa Mambo Mwari, ngokuti takashaisha.” Asi Mosi wakati, “Zvino munoangira ngenyi kugura mupango waMambo Mwari? Izvi azvizobudiriri. Musakwirapo, ngokuti Mambo Mwari apana pakati penyu; musadziuraisa pamberi pemagaa enyu. Ngokuti vaAmareki nevaKhenani vanozomurwisapo, nemwi munozowa ngeshoti; ngokuti imwimwi mwakafuratira kubva mukuteera Mambo Mwari, ndizvo Mambo Mwari aazoa nemwi akadi.” Asi vakakukumidzana kukwira padera penyika yemitunhu, kunyazwi zvakanyadaro Mosi nebhokisi rechitenderano chaMambo Mwari aazi kubuda kubva mukamba. Naapo vaAmareki nevaKhenani vaigara munyika yemitunhu iyo vakadzaka, vakavanyisa, vakavarumbirira metsa vaguma Horma. Mambo Mwari wakaereketa kunaMosi echiti, “Ereketa kunevana vaIsuraeri wechiti kwavari, ‘Naapo mwaguma kunyika iyo yougaro hwenyu, yendinozomupa, nemwi mwechizoita mudiro wokupisha ngomuriro kunaMambo Mwari, kubva kun'ombe, nokuti makwai, nokuti mudiro wokupisha nokuti mubairo wokuripira mhiko, nokuti kupira ngomwoyo unotenda, nokuti mudiro wemadhiri, nokuita mudiro unegwema rakanaka kunaMambo Mwari, naapo uwo unozopa mudiro wakadaro kunaMambo Mwari unozounzawo mudiro wezviyo worupande rwechegumi choufu hwakamotseka, hwakakumanidzwa norupande rwechirongomuna rweritha remafuta. Norupande rwechirongomuna rweritha revhini kuita mudiro wokumwa, unozounasira pamwepo nomudiro wokupisha nokuti mudiro, kunegwai rimwe ngarimwe. Nokuti kunegondohwe unozonasira kuita mudiro wezviyo marupande mairi echegumi ezvipimo zvoufu hwakamotseka, hwakakumanidzwa nemafuta orupande rwechitatu rweritha; nokuita mudiro wokumwa unozopira rupande rwechitatu rweritha rwevhini, kuita gwema rakanaka kunaMambo Mwari. Naapo unozonasirira mukono kuita mudiro wokupisha, nokuti kuita mudiro wokuripira mhiko, nokuti kuita mudiro wokunyarara kunaMambo Mwari, Zvino unozounza pamwepo nomukono mudiro wezviyo wechegumi choufu hwakamotseka zvipimo zvitatu, hwakakumanidzwa norupande rweritha rwemafuta. Unozounza kuita mudiro wokumwa rupande rweritha rwevhini, kuita mudiro unoitwa ngomuriro kuti uite gwema rakanaka kunaMambo Mwari.’ “Ndizvo zvinozoitwa kumukono umwe, nokuti kugondohwe rimwe, nokuti kagondohwe kamwe, nokuti chimbudzana chimwe. Kudai ngouwandu hwomunozonasira, ngokudaro munozoita kunaimwe ngaimwe, kudai ngouwandu hwadzo. Veshe vakabarwa venyika iyo vanozoita izvi zviro kudai ngenjira yazvo, mukupira mudiro unoitwa ngomuriro, kuita gwema rakanaka kunaMambo Mwari. Nokudai mupara echigara nemwi, kunyazwi ndiani uri pakati penyu mumibarirwana yenyu, echizoda kupira mudiro unoitwa ngomuriro, kuita gwema rakanaka kunaMambo Mwari, unozoita kudai ngezvomunoita imwimwi. Ngokuti mbungano, painozoita chironzo chimwe kwomuri nokumupara unogara pakati penyu, ndichozve nokwaari mupara, chironzo chemhera nariini; kudai ngezvemuri, ndizvo zvinozoitawo mupara pamberi paMambo Mwari. Chironzo chimwe nenjira imwe zviri kwomuri nokunouwozve uri mupara unogara pakati penyu.” NaMambo Mwari wakaereketa kunaMosi echiti, “Ereketa kunevana vaIsuraeri wechiti kwevari, ‘Naapo mwaguma kunyika yendinozomuisa, naapo mwoodya kudya kwenyika iyo, munozopira mudiro wokumirudzwa pamberi paMambo Mwari. Munozopira chingwa chimwe chemitanguro youfu hwenyu kuita mudiro wokumirudzwa; kudai ngezvomunopira mudiro wepambuwa, ngokudaro munozoupira. Mitanguro youfu hwenyu munozoipira kunaMambo Mwari kuita mudiro wokumirudzwa kumibarirwana yenyu.’ “Asi kudai mwechipauka kuneizvi asiri maone, musikangwariri mipango iyi yeshe, yaakaereketa Mambo Mwari kunaMosi, zveshe zvaakamupanga Mambo Mwari ndiMosi, kubvira ngeiro zuva raakapa mupango ndiro Mambo Mwari, nokuenda mberi pakati pemibarirwana yenyu, zvino, kudai chiro chechizoitwa ngokusikazia, ngokubanze chisikaziikanwi kumbungano, mbungano yeshe inozopira mukono umwe kuita mudiro wokupisha, kuita gwema rakanaka kunaMambo Mwari, pamwepo nomudiro wezviyo, nomudiro wokumwa, kudai ngenjira yakaemeswa, gotokoto rimwe rokuita mudiro wokushaisha. Nomupristi unozoita muripo wembungano yeshe yevana vaIsuraeri, navo vanozorekererwa; ngokuti chaiya chishaishi chokusikazia; navo vaunza mudiro wavo womuriro kunaMambo Mwari, nomudiro wavo wokushaisha pamberi paMambo Mwari. Mbungano yeshe inozorekererwa yevana vaIsuraeri, nevapara vanogara pakati pavo; ngokuti vanhu veshe vaiya vakashaisha mukusikazia. “Kudai munhu echizoshaisha ngokusikazia, unozounza thokazi rembudzi regore rimwe kuita mudiro wokushaisha. Nomupristi unozoitira uwo munhu muripo pamberi paMambo Mwari wokushaisha ngokusikazia, apo akashaisha ngokusikazia, kumuitira muripo, naye unozorekererwa. Unozoa nechironzo chimwe kunouwo unoshaisha ngokusikazia, kwaari weshe unobarwa pakati pevana vaIsuraeri, nokuti mupara uri chigarandimo pakati pavo. Asi munhu uwo unoshaisha ngokuda, kunyazwi wakabarwa munyika yenyu nokuti mupara, munhu uwo unotuka Mambo Mwari; munhuwo unozoduswa kubva pakati pevanhu vake. Ngokuti wakashoora izwi raMambo Mwari, naye wakagura mupango wake, uwo munhu unozourawa, nokushaisha kwake kunozoa padera pake.” Naapo vana vaIsuraeri vaiya mushango, vakaona munhu waitheza huni ngezuva reSabatha. Naavo vakaona waitheza huni vakamuunza kunaMosi naAroni, nokumbungano yeshe. Vakamukonyera mutirongo, ngokuti kwaiya kusati kwakaronzwa chingaitwa kwaari. Mambo Mwari wakati kunaMosi, “Ngegwinyiso uwo munhu unozourawa; mbungano yeshe inozomuponda ngemapuwe kubanze kwekamba.” Nembungano yeshe yakamubudisa kubanze kwekamba, vakamuponda ngemapuwe, naye wakafa, kudai ngezvaakapanga Mambo Mwari kunaMosi. Mambo Mwari wakaereketa kunaMosi echiti, “Ereketa kunevana vaIsuraeri, uvapange kuti vadziitire mahlanguyo kumipendero yezvokusimira zvavo kumibarirwana yavo yeshe, nokuti vaise padera pemahlanguyo emipendero yavo mutiisa wakasvipirika. Mune mahlanguyo okuti muaringire, nokukarakadza yeshe mipango yaMambo Mwari, muiite, kuti musapauka kuteera mwoyo yenyu nokuti madziso enyu, izvo zvemwairovedzera kuita umhombo nokuzviteera. Ndizvo mucherechedze muite mipango yangu yeshe, muite vakachena kunaMwari wenyu. Inini ndini Mambo Mwari, Mwari wenyu, uwo wakamubudisa kubva munyika yeEgipite, kuti ndiite Mwari wenyu; inini ndini Mambo Mwari, Mwari wenyu.” Zvino Khora mukororo waIzihari, mukororo waKohathi, mukororo waRevhi, naDhathani naAbhiramu vakororo vaEriabhi, naOni, mukororo waPherethi, vakororo vaRubheni, vakaunganidza vamuna. Vakamukira Mosi, pamwepo nevakatikuti vevana vaIsuraeri, mazana mairi nemakumi mashanu (250) evatungamiriri vanembiri vakatsanangurwa kubva mumbungano. Navo vakadziunganidza pamwepo kumukira Mosi naAroni, vakati kwavari, “Mwanyanya! Mwechiona kuti mbungano yeshe yakachena, munhu weshe wayo, naMambo Mwari uri pakati pavo. Ngenyi mwechidzikudza kudaro, padera pembungano yaMambo Mwari?” Naapo Mosi azvizwa izvi, wakawa ngehope yake; zvino wakaereketa kunaKhora nokunembungano yake yeshe echiti, “Mangwanani Mambo Mwari unozopangidzira kuti ngavari vake, nokuti ndiani wakachena; unozoita kuti akwedzere pasinde pake; uwo waanozotsanangura, iye unozoita kuti akwedzere kwaari. Itai ichi: torai imwimwi zvidziyo zvokupishira mutombo unegwema rakanaka, iwewe Khora nechikwata chako cheshe; muise muriro mukati mwazvo, muise mutombo unegwema rakanaka mukati mwazvo mangwani pamberi paMambo Mwari; kunozoitika kuti uwo waanozotsanangura Mambo Mwari, ndiye unozoita wakachena. Imwimwi mwanyanya, vakororo vaRevhi!” NaMosi wakati kunaKhora, “Izwai, ndinomupota, imwimwi vakororo vaRevhi. Ichi chiro chakanyanya kutsonga here kuti Mwari waIsuraeri wakamuparadzanisa kubva pakati pembungano yaIsuraeri, kumuunza pasinde pake kuti muite mushando muthabhenakeri raMambo Mwari, nokuema pamberi pembungano kuvashandira; naye wakamukwedzedza pasinde pake, nehama dzenyu dzeshe vakororo vaRevhi nemwi? Mwotsvakawo noupristi here? Ndizvo ndiMambo Mwari wewamukira iwewe nechikwata chako cheshe; Aroni ndiani womunovhuruvhutira?” NaMosi wakadaidza Dhathani naAbhiramu vakororo vaEriabhi; asi vakati, “Atikwireyo isusu. Chiro chidodoko here kuti iwewe wakatibvisa kubva munyika inoerera mukaka nouchi, kuti utiuraye mushango muno, kwega kuti waakudziita muzvare padera pedu? Zve, auzi kutiunza kunyika inoerera mukaka nouchi, nokuti kutipa nhaka yeminda neminda yemivhini. Unozotumbura madziso eava vanhu here? Isusu atizokwiriyo.” NaMosi wakanyangadzwa kakurutu, wakati kunaMambo Mwari, “Usaremeredza midiro yavo. Andizi kutongotora mbongoro imwe yavo, zve, andina wendakakuvadza wavo.” NaMosi wakati kunaKhora, “Iwewe unozoapo nechikwata chako pamberi paMambo Mwari, iwewe, navo naAroni mangwani. Mutore umwe ngaumwe chidziyo chake chokupishira mutombo unegwema rakanaka, muise mutombo mukati mwazvo, muunze munhu weshe chidziyo chake pamberi paMambo Mwari, zvidziyo zvokupishira mutombo mazana mairi nemakumi mashanu (250); iwewe naAroni munhu weshe ane chidziyo chake.” Ndizvo munhu weshe wakatora chidziyo chake, wakaisa muriro mukati mwacho, wakaisamwo mutombo unegwema rakanaka umwo, wakaema pamusiwo wetende romushongano pamwepo naMosi naAroni. Zvino Khora wakaunganidza chikwata cheshe kuita maringwa navo pamusiwo wetende romushongano; nouthende hwaMambo Mwari hwakaoneka kunembungano yeshe. NaMambo Mwari wakaereketa kunaMosi naAroni echiti, “Dziparadzanisenyi kubva pakati peichi chikwata, kuti ndivapedze chiriporipo.” Navo vakawa pashi ngehope dzavo vechiti, “A Mwari, Mwari womweya nenyama yeshe, ngokushaisha kwomunhu umwe unozotsenekera mbungano yeshe here?” NaMambo Mwari wakaereketa kunaMosi echiti, “Ereketa kunombungano wechiti, ‘Budai kubva pakati petende raKhora, Dhathani, neraAbhiramu.’ ” Zvino Mosi wakamiruka akaenda kunaDhathani naAbhiramu; nevakuru vaIsuraeri vakamuteera. Naye wakaereketa kunombungano echiti, “Ibvai, ndinomupota, mukati mwematende eava vanhu vakashata, musagwama chiro nachimwe chavo, kuti musazopedzwa muzvishaishi zvavo zveshe.” Ndizvo vakabva mutende raKhora, Dhathani, neraAbhiramu kumarutii eshe; Dhathani naAbhiramu vakabuda, vakaema pamwepo pamisiwo yematende avo, vakadzi vavo, vakororo vavo nevadoko vavo. NaMosi wakati, “Ngeizvi munozozia kuti Mambo Mwari wakandituma kuti ndiite mishando iyi yeshe; ngokuti andizi kuzviita ngokupinimidza kwangu. Kudai avo vanhu vechifa ngokufa kunofa ndikwo vanhu veshe, nokuti vechihambirwa ukwo kunohambira vanhu veshe, Mambo Mwari aazi kundituma. Asi kudai Mambo Mwari echiita chiro chitsva, nevhu rechibeura muromo waro nokuvamedza, nazvo zveshe izvo zviri zvavo, navo vechidzaka murindi vechipona; naapo munozozia kuti ava vanhu vakashoora Mambo Mwari.” Kwakaitika apo apedza kuereketa mazwi aya eshe kuti ivhu iro raiya pashi pavo rakabeuka. Nevhu rakabeura muromo waro, rakavamedza, nematende avo, nevanhu veshe vaKhora, nezviro zvavo zveshe. Ndizvo ivo nezviro zvavo zveshe, vakadzaka murindi vechipona, nevhu rakasetera padera pavo; vakafa kubva pakati pembungano. NevaIsuraeri veshe vaiya vakavatendenedza vakatiza ngokuzwa kuchema kwavo; ngokuti vakati, “Pamweni ivhu rinozotimedzawo!” Kwakabuda muriro wakabva kunaMambo Mwari, wakapedza kuuraya vamuna vaiya mazana mairi nemakumi mashanu (250) vakapisha mutombo unegwema rakanaka. Zvino Mambo Mwari wakaereketa kunaMosi echiti, “Ronzera Ereaza mukororo waAroni mupristi, kuti atore zvidziyo zvokupishira mutombo kubva mumuriro uwo, newe uparadze muriro apo naapo; ngokuti zviri zvakachena. Zvidziyo zvokupishira mutombo zveava vanhu vashaisha varashikirwa ngokupona kwavo, ngavazvipfure kuita marusamba akapamhama kuita chifukidziro chearita, ngokuti vakazvipira pamberi paMambo Mwari, ndizvo zvakachena. Ndizvo zvinoita chioniso kuvana vaIsuraeri.” Ndizvo Ereaza mupristi wakatora zvidziyo zvokupishira mutombo zvethusi, zvevakapishira ndizvo avo vakapishwa; zvakaitwa marusamba akapamhama kuita chifukidziro chearita, kuita chicherechedziso kuvana vaIsuraeri, kuitira kusaapo noumwe usiri mupristi, usiri wedzinza raAroni ungakwedzera kupisha mutombo unegwema rakanaka pamberi paMambo Mwari, kuti asazodai ndiKhora nechikwata chake, kudai ngezvaakaronza Mambo Mwari kuna Ereaza kubudikidza ndiMosi. Asi nechimangwani mbungano yeshe yevana vaIsuraeri vakavhuruvhutira Mosi naAroni vechiti, “Imwimwi mwakauraya vanhu vaMambo Mwari.” Naapo mbungano yaungana kumukira Mosi naAroni, vakatenderukira kutende romushongano; penya, gore rakarifukidza, nouthende hwaMambo Mwari hwakaoneka. Mosi naAroni vakauya pamberi petende romushongano, naMambo Mwari wakaereketa kunaMosi echiti, “Budai kubva pakati peiyi mbungano, kuti ndivapedze chiriporipo.” Navo vakawa pashi ngehope dzavo. NaMosi wakati kunaAroni, “Tora chidziyo chokupishira mutombo, uise muriro mukati mwacho kubva paarita, uisemwo mutombo unegwema rakanaka, uende ngokukasira kumbungano, uvaitire muripo; ngokuti ushungu hwaMambo Mwari hwabudira kwavari; nhenda yauya.” Ndizvo Aroni wakachitora kudai ngezvaakapanga Mosi, wakarumba achienda pakati pembungano; penya, nhenda yaiya yaamba pakati pevanhu; naye wakaisa mutombo unegwema rakanaka, wakaitira vanhu muripo. Wakaema pakati pevakafa nevachapona; nenhenda yakaemeswa. Zvino avo vakaurawa ngenhenda vaiya gumi namarongomuna emakumi emazana nemazana manomwe (14,700), ngepabanze peavo vakafa ngendaa yaKhora. NaAroni wakahwirira kunaMosi pamusiwo wetende romushongano, apo nhenda yakaemeswa. Mambo Mwari wakaereketa kunaMosi echiti, “Ereketa kuvaIsuraeri, utore kubva kunoumwe ngaumwe wavo ndonga, kudai ngokuteererana kwemhatso dzemadzibaba avo, kubva kuvatungamiriri vavo veshe kudai ngokuteererana kwemhatso dzemadzibaba avo, ndonga gumi nambiri. Nyora zina romunhu umwe ngaumwe pandonga yake. Nyora zina raAroni pandonga yaRevhi, ngokuti ndonga imwe inozoemera soro remhatso yemadzibaba avo. Zvino unozodziunganidza mutende romushongano pamberi pebhokisi rechitenderano, pendinoshongana newe. Nendonga yomunhu wendinozotsanangura, inozobuda mashakani; ndinozoita kuti kupere kwendiri kuvhuruvhuta kwevaIsuraeri, kwevanoramba vechivhuruvhutira kwouri ndikwo.” Mosi wakaereketa kuvaIsuraeri, nevatungamiriri vavo veshe vakamupa ndonga, mutungamiriri umwe ngaumwe ndonga imwe, kudai ngokuteererana kwemhatso dzemadzibaba avo, ndonga gumi nambiri, nendonga yaAroni yaiya pakati pendonga dzavo. Ndizvo Mosi wakaisa ndonga idzo pamberi paMambo Mwari mukati mwetende rechapupu. Naapo nechimangwani Mosi wakapotera mutende rechapupu; ringira, ndonga yaAroni yemhatso yaRevhi yaiya yabuda mashakani, ikaita matai, ikabuda maruva, ikabereka maonde akaibva. Zvino Mosi wakabudisa ndonga dzeshe kubva pamberi paMambo Mwari, akadziisa kuvaIsuraeri; navo vakaringira, munhu weshe wakatora ndonga yake. NaMambo Mwari wakati kunaMosi, “Petudza ndonga yaAroni pamberi pebhokisi rechapupu kuti ingwarirwe kuita chioniso kuvamukiri, kuti zviite magumo okuvhuruvhuta kwavo kwendiri, kuti vasazofa.” Mosi wakaita kudaro; kudai ngezvaakamupanga Mambo Mwari, ndizvo wakaita kudaro. VaIsuraeri vakaereketa kunaMosi vechiti, “Ringira, toofa, topera, teshe topera! Munhu weshe unokwedzera pasinde pethabhenakeri raMambo Mwari unozofa. Tinozopera teshe here?” Ndizvo Mambo Mwari wakati kunaAroni, “Iwewe nevakororo vako nemhatso yababa ako pamwepo newe, munozotwara kushata kwendau yakachena; iwewe nevakororo vako munozotwara kushata kwoupristi hwenyu. Newe unozounzawo hama dzako dzedzinza raRevhi, dzinza rababa ako, kuti vabatanidzwe newe nokukushandira, apo iwewe nevakororo vako munozoshandira pamberi petende rechapupu. Vanozoita mishando yako nemishando yeshe yetende. Asi avazokwedzeri kuzvidziyo zvendau yakachena nokuarita, kuti ivo nokuti imwimwiwo musazofa. Vakabatanidzwa newe, kuti vaite mishando yetende romushongano, kuita mishando yeshe yetende romushongano; apana mupara unozokwedzera kwomuri. Iwewe pachako unozoita mishando yendau yakachena nearita, kuti kusachazoapozve ushungu padera pevaIsuraeri. Ndini uwo unotora hama dzenyu vaRevhi kubva pakati pevaIsuraeri; zvino vaavenyu kudai ngechipo chakapirwa kunaMambo Mwari, kuti vaite mishando yetende romushongano. Asi iwewe pamwepo nevakororo vako munozonasa kuita mushando woupristi, wezviro zveshe zvearita, nendau iri sure kwejira; ndakamupa mushando wenyu woupristi kuita chipo; nomupara unozokwedzera unozourawa.” Mambo Mwari wakaereketa kunaAroni echiti, “Ndakupa mushando wemidiro inopirwa kwendiri, zvipo zveshe zvakachena zvevaIsuraeri; ndakazvipa kwouri nokuvakororo vako, kuita chikoaniswa choupristi chewakaemeserwa mhera nariini. Izvi zvinozoita zvako kubva mukati mwezviro zvakachenesesa, izvo zvakangwarirwa kubva kumuriro: mudiro wavo weshe uwo wevanounza kuita mudiro kwendiri, kudai ngechiro chakapindisisa kuchena, kunyazwi mudiro wezviyo, mudiro wokushaisha nokuti mudiro wokupauka, zvinozoita zvako nevakororo vako. Kudai ngechiro chakapindisisa kuchena munozozvidya: mwamuna weshe unozozvidya. Zvinozoita zvakachenesesa kwouri. Izviwo ngezvako: ndazvipa kwouri pamwepo nevakororo vako nevanasikana vako, kuita chiemeso chemhera nariini, kunyazwi ngechiri chakaemeserwa parutii kubva kuzvipo zveshe zvomudiro wokuzunguzwa wevaIsuraeri; munhu weshe wakasukika wemhatso yako unozozvidya. Zveshe mafuta akanaka, nevhini reshe rakanaka, nekoroni yeshe yakanaka, mitanguro yemichero yayo yeizvo zvevanozopa kunaMambo Mwari, ndazvipa kwouri. Mitanguro yemichero yeshe yomunyika yavo, iyo yevanozounza kunaMambo Mwari inozoita yako; munhu weshe wakasukika wemhatso yako unozozvidya. Zviro zveshe zvakapirwa ngokwakaperera muIsuraeri zvinozoita zvako. Zviro zveshe zvinotanga kubeura ndani yevanhu neyemhuka, zvevanozounza kunaMambo Mwari, zvinozoita zvako; asi dangwe revanhu munozoriripira, neyokutangura yezvifuyo zvisikazi kusukika munozozviripira. Mutengo wokuripira munozozviripira kubvira zvaane mwedzi umwe wokubarwa kwazvo, kudai ngokuerenga kwako, ngezvigurwa zvesirivha zvishanu, kudai ngechipimo chaishandiswa mundau yakachena, (riri magera makumi mairi). Asi dangwe ren'ombe, nokuti regwai, nokuti rembudzi, amuzoaripiri; akachena. Unozofafazira ngazi yadzo padera pearita, nokupisha mafuta adzo kuita mudiro unoitwa ngomuriro, kuita gwema rakanaka kunaMambo Mwari. Asi nyama yadzo inozoita yako, kudai ngechifuba chakazunguzwa nebandauko rokumudyo zviri zvako. Midiro yeshe yakachena, yevanopa vaIsuraeri kunaMambo Mwari, ndapa kwouri, pamwepo nevakororo vako nevanasikana vako, kuita chiemeso chemhera nariini; chitenderano chomunyu pamberi paMambo Mwari kwouri nokumibarirwana yako newe mhera nariini.” Zvino Mambo Mwari wakaereketa kunaAroni echiti, “Iwewe auzoane nhaka munyika yavo, zve, auzoane chikoaniswa pakati pavo; inini ndini chikoaniswa chako nenhaka yako pakati pevaIsuraeri. “KuvaRevhi ndakapa zveshe zvechegumi muIsuraeri kuita nhaka yavo, ngendaa yomushando wavo wevanoshanda mutende romushongano. Kubvira zvinopano kuenda mberi vaIsuraeri vasazokwedzera pasinde petende romushongano, kuti vasazoa nokushaisha, vafe. Asi vaRevhi vanozoita mushando wetende romushongano, vanozotwara kushata kwavo; chinozoita chiemeso chemhera nariini kumibarirwana yenyu. Asi pakati pevaIsuraeri vasazoa nenhaka, ngendaa yokuti ndakapa vaRevhi kuita nhaka yavo zvegumi zvevaIsuraeri, zvevanopa kuita mudiro kunaMambo Mwari. Ndizvo ndakati kwavari, ‘Avazoa nenhaka pakati pevaIsuraeri.’ ” Zvino Mambo Mwari wakaereketa kunaMosi echiti, “Unozoereketa kuvaRevhi, wechiti kwavari, ‘Apo mwechiashira kubva kuvaIsuraeri zvechegumi izvo zvendinomupa kubva pakati pavo kuita nhaka yenyu, munozopa kuita mudiro kunaMambo Mwari chegumi chezvegumi. Chinozoerengwa kwouri kuita chipo chako, kudai ngezviyo zvembuwa nokudai ngezvinozarisa ndau yokukamurira vhini. Ngokudaro munozopa mudiro kunaMambo Mwari kwezviri zveshe zvechegumi zvenyu zvomunoashira kubva kuvaIsuraeri; nemwi munozopa kubva kwezviri kunaAroni mupristi kuita mudiro waMambo Mwari. Kubva kuzvipo zvenyu zveshe munozopa midiro yeshe yakaemeserwa Mambo Mwari, yeyakapinda kunaka yayo yeshe, urwo rupande ndirwo ruchazocheneswa.’ Ndizvo unozotizve kwavari, ‘Apo mwaemesa rupande urwo rwakapinda kunaka, naapo inozoerengwa kunevaRevhi kudai ngezvinobuda pandau yembuwa yokupurira, nokudai ngezvinobuda pandau yokukamurira vhini. Nemwi munozozvidya kundau dzeshe, imwimwi nemhuri dzenyu; ngokuti zviri mutuso wenyu womushando wenyu wetende romushongano. Nemwi amuzoa nokushaisha ngendaa yazvo, apo mwakapira zvezvakapinda kunaka zvazvo. Asi musazosvipisa zvipo zvakachena zvevaIsuraeri, kuti musazofa.’ ” Mambo Mwari wakaereketa kunaMosi naAroni echiti, “Uku ndikwo kuemeswa kwechironzo chaakapanga Mambo Mwari echiti, ‘Ronzera vaIsuraeri, kuti vakuunzire tsiru shava risina kuremara nokuti mukovha, risikazi kumbosungwa pajoka. Unozoripa kunaEreaza mupristi, kuti ariunze ngokubanze kwekamba, unozoriuraya mukuona kwake. Ereaza mupristi unozonomhora yengazi yaro ngechinwe chake, nokufafazira pamberi petende romushongano kanomwe. Zvino tsiru rinozopishwa mukuona kwake; doo raro nenyama yaro, nengazi yaro, nemadisa aro, unozozvipisha. Mupristi unozotora muti womusidare, nehisopi, zviro zvakatsvuka, nokuzvikandira mumuriro apo panopishwa tsiru. Zvino mupristi unozosuka machira ake, unozoshamba muiri wake ngemvura, ngesure kweizvo unozouya kupotera mukamba, asi mupristi unozoita wakasvipiswa metsa madeekoni. Nouwo unopisha tsiru unozosuka machira ake ngemvura, nokushamba muiri wake ngemvura, nayewo unozoita wakasvipiswa metsa madeekoni. Zvino munhu umweni wakasukika unozoorera marota etsiru, aaunganidze ngokubanze kwekamba, pandau yakachena, anozongwaririrwa mbungano yevaIsuraeri okunasira mvura yokushamba, yokucheneswa kwokushaisha. Nouwo wakaorera marota etsiru unozosuka machira ake, nokuita usikazi kusukika metsa madeekoni. Ichi chinozoita chiemeso chemhera nariini kuvaIsuraeri, nokumupara unogara pakati pavo.’ “Uwo unozogwama muiri womunhu wakafa kunyazwi ngouri, unozoita wakasvipiswa mazuva manomwe. Vanozodzichenesa pachavo ngemvura ngezuva rechitatu, ngezuva rechinomwe vanozoita vakasukika; asi kudai vasikazodzichenesi pachavo ngezuva rechitatu, ngezuva rechinomwe avazoiti vakasukika. Veshe vanozogwama muiri wakafa, muiri womunhu wafa, vasikadzichenesi pachavo, vanosvipisa thabhenakeri raMambo Mwari; vanhu vakadaro vanozobviswa kubva pakati pevaIsuraeri. Ngokuti mvura yokucheneswa aizi kufafazirwa padera pavo, vanozoita vasikazi kusukika; nokusvipiswa kwavo kundori padera pako. “Ichi ndicho chironzo apo munhu echizofa mutende: veshe avo vanopotera mutende nevarimwo veshe vanozoita vakasvipiswa mazuva manomwe. Nechidziyo cheshe chakaduhumurwa chisina chidumhaidzo padera pacho chinozoita chakasvipiswa. Kunyazwi ndiani unozogwama wakafa wakaurawa ngeshoti kundau yokubanze, nokuti muiri wakafa wega, nokuti godo romunhu, nokuti iba, unozoita wakasvipiswa mazuva manomwe. Kunomunhu wakasvipiswa vanozotora marota etsiru rakapishwa kuita kucheneswa kwokushaisha, nemvura inoerera inozoiswa nayo muchidziyo. Nomunhu wakasukika unozotora hisopi nokuimvota mumvura aifafazire padera petende nepadera pezvidziyo zveshe, nepadera pevanhu vaiyapo, kunyazwi ndiani wakagwama godo, wakaurawa, muiri wakafa nokuti wakagwama iba. Zvino munhu wakasukika unozoifafazira padera peavo vakasvipiswa ngezuva rechitatu, nezuva rechinomwe unozovachenesa. Zvino vanozosuka machira avo, nokushamba miiri yavo mumvura, navo vanozoita vakasukika madeekoni. Vanhu veshe vakasvipiswa, asi vasikadzichenesi pachavo, vanhu avo vanozobviswa kubva pakati pembungano, ngokuti vakasvipisa ndau yakachena yaMambo Mwari. Ngokuti mvura yokuchenesa aizi kufafazirwa padera pavo, vakasvipiswa. “Chinozoita chiemeso kwavari mhera nariini. Uwo unofafazira mvura yokuchenesa unozoshamba machira ake; kunyazwi ndiani unogwama mvura yokuchenesa unozoita wakasvipiswa metsa madeekoni. Kunyazwi ngechiri chaanozogwama uwo wakasvipiswa chinozoita chakasvipiswa; kunyazwi ngouri unozogwama icho chiro unozoita wakasvipiswa metsa madeekoni.” VaIsuraeri, mbungano yeshe, vakaguma mushango reZini ngomwedzi wokutanga, navanhu vakagara Kadheshi. Miriamu wakafa, wakatsirwapo. Zvino paiya pasina mvura yokumwa; ndizvo vakaungana pamwepo kuitira ndaa Mosi naAroni. Vanhu vakaita hasha naMosi, vakaereketa kuti, “Isusu dai takafawo apo pakafa hama dzedu dzakafa pamberi paMambo Mwari! Ngenyi mwakaunza mbungano yeshe yaMambo Mwari mushango muno kuti isusu nezvifuyo zvedu tifire muno? Mwakatibudisirenyi kubva Egipite kutiunza mundau iyi yakashata? Aisiri ndau inomera mbeu, nokuti maonde, nokuti mavhini, nokuti maphomegranite; zve, akuna nemvura yokumwa.” Zvino Mosi naAroni vakabva pamberi pembungano kuenda kumusiwo wetende romushongano, vakawa pashi ngehope dzavo, nouthende hwaMambo Mwari hwakaoneka kwavari. Mambo Mwari wakaereketa kunaMosi echiti, “Tora ndonga yako, uunganidze mbungano pamwepo, iwewe naAroni mukoma wako, uerekete kubuwe mukuona kwemadziso avo, naro rinozobudisa mvura yaro. Unozovabudisira mvura kubva kunebuwe; ngokudaro unozopa mvura yokumwa kunembungano yeshe nezvifuyo zvayo.” Ndizvo Mosi wakatora ndonga kubva pamberi paMambo Mwari, kudai ngezvaakamupanga. Mosi naAroni vakaunganidza mbungano yeshe pamwepo pamberi pebuwe; naye wakati kwavari, “Izwai zvino, imwimwi vamukiri; timubudisire mvura kubva kunebuwe iri here?” Zvino Mosi wakamirudza nyara yake, wakachaya buwe kairi ngendonga, nemvura yakabuda apo yakawanda kakurutu; mbungano yakamwa nezvifuyo zvavo. Asi Mambo Mwari wakaereketa kunaMosi naAroni echiti, “Ngokuti amuzi kundigonda, kuonisa kucheneswa kwangu mukuona kwevaIsuraeri, ndizvo amuzoigumisi iyi mbungano kunyika yendakapa kwavari.” Iyi ndiyo mvura yeMeribha; ngokuti vaIsuraeri vakaita hasha apo naMambo Mwari, ngenjira yaakavaonisa ndiyo kuchena kwake. Mosi wakatuma nhumwa kubva Kadheshi kuenda kunamambo weEdhomu echiti, “Izvi ndizvo zvinoronza munun'una wako Isuraeri: iwewe unozia madambudziko eshe akatigumira; ngenjira yaakadzaka ndiyo madzibaba edu munyika yeEgipite, nesu takagara mukuwo wakareba munyika yeEgipite, nevaEgipite vakatitambudza namadzibaba edu. Naapo patakachema kunaMambo Mwari, wakazwa izwi redu, naye wakatuma ngirosi yake, akatibudisa kubva muEgipite; zvino, nesu tiri muKadheshi, dhorobha riri kumagumo emigano yako. Zvino tenda, tinokupota, kuti tipinde ngomunyika yako. Atizohambi ngomuminda, nokuti ngomuminda yemivhini, zve, atizomwi mvura yezvinyuka; asi tinozohamba ngomupato ramambo, atizopaukiri kuenda kumudyo nokuti kumuoshwe, metsa tidarike migano yako.” Asi Edhomu wakati kwaari, “Auzopindi ngomuno, kuti ndisazouya ndiambane newe ngeshoti.” VaIsuraeri vakati kwaari, “Tinozohamba ngomupato; kudai isusu nokuti n'ombe dzedu techizomwa mvura yako, tinozoiripa. Chiro chidoko; titendere tidarike ngetsoka dzedu.” Asi wakati, “Nemwi amuzopindi.” NaEdhomu wakabuda kuambana navo, nevanhu vakawanda kakurutu nezvokurwa ndizvo zvakawanda. Ngokudaro Edhomu wakaramba kutendera Isuraeri kuti adarike ngomunyika yake; ndizvo Isuraeri vakapauka kubva kwaari. VaIsuraeri, mbungano yeshe, vakabva Kadheshi vakaguma kumutunhu unozwi Hori. Zvino Mambo Mwari wakaereketa kunaMosi naAroni vari mumutunhu unozwi Hori, ngokumugano wenyika yeEdhomu, echiti, “Aroni unozounganidzwa kuvanhu vake; ngokuti aazopoteri munyika yendakapa vaIsuraeri, ngokuti imwimwi mwakamukira izwi rangu pamvura yeMeribha. Tora Aroni naEreaza mukororo wake, uvaunze padera pomutunhu unozwi Hori; ukumure zvokufuka zvaAroni, uzvipfekese mukororo wake Ereaza. Asi Aroni unozounganidzwa kunevanhu vake, unozofapo.” Mosi wakaita kudai ngezvaakapanga Mambo Mwari; navo vakakwira padera pomutunhu unozwi Hori mukuona kwembungano yeshe. Mosi wakakumura zvokufuka zvaAroni, wakazvipfekesa Ereaza mukororo wake; naAroni wakafa apo padera pomutunhu. Mosi naEreaza vakadzaka kubva kumutunhu. Naapo mbungano yeshe yaiya yaona kuti Aroni waiya afa, mhatso yeshe yaIsuraeri yakachema Aroni mazuva makumi matatu. Naapo mambo Aradhi muKhenani, uwo waigara muNegebhi azwa kuti vaIsuraeri vaiuya ngenjira yokuAtharimu, wakaambana navaIsuraeri, wakatora vamweni vavo kuita usungwa. Zvino vaIsuraeri vakapika mhiko kunaMambo Mwari vechiti, “Ngegwinyiso kudai wechizopa ava vanhu munyara dzedu, tinozoparadza yaamho madhorobha avo.” Mambo Mwari wakapurutana izwi raIsuraeri, naye wakapa vaKhenani kwavari, navo vakavapedza nemadhorobha avo; ndizvo wakadudza ndau kuti, “Horma.” Vakahamba kubva kuMutunhu Hori ngenjira yokuRuandhle Rwakatsvuka kumonerera nyika yeEdhomu; vanhu vakapera simba vari munjira. Vanhu vakaereketa kuitira ndaa Mwari naMosi vechiti, “Mwakatikwidzirenyi kubva Egipite kuti tifire mushango muno? Ngokuti apana chingwa, zve, akuna mvura; nomweya yedu yafinhwa ngeichi chingwa chakafokosheka.” Zvino Mambo Mwari wakatuma nyoka dzinoukaira pakati pevanhu, nadzo dzakaruma vanhu; ndizvo vaIsuraeri vazhinji vakafa. Ndizvo vanhu vakauya kunaMosi, vakati, “Takashaisha, ngokuti takaereketa kuitira ndaa Mambo Mwari neiwewe; kumbira kunaMambo Mwari kuti atidusire nyoka idzi kubva pakati pedu.” Ndizvo Mosi wakakumbirira vanhu. NaMambo Mwari wakati kunaMosi, “Dziitire muedzaniso wenyoka inoukaira, uiemesere padziro romuti; weshe uwo wakarumwa, apo echizoringira kweiri unozopona.” Ndizvo Mosi wakanasira muedzaniso wenyoka yethusi, akaiisa padziro romuti; naapo nyoka yaruma munhu kunyazwi ngouri, apo aringira muedzaniso wenyoka yethusi, waipona. VaIsuraeri vakahamba kuenda, vakaemesa matende avo muObothi. Vakabva Obothi, vakaemesa matende avo muIyeabharimu, mushango riri ngemberi kweMoabhi, ngokumabvazuva. Vakathutha kubva apo, vakaemesa matende avo muBani reZeredhi. Vakathuthazve kubva apo, vakaemesa matende avo ngepamberi peArinoni mushango rinoganurirana nenyika yavaAmori; ngokuti Arinoni ndiwo mugano wevaMoabhi, pakati pevaMoabhi navaAmori. Ndizvo zvinoronzwa muBhuku reHondo dzaMambo Mwari, “Dhorobha reWahebhi munharaunda yoSufa nemabani; rwizi Arinoni nemidzaswa yemabani inodzaka metsa kudhorobha reAri kumugano weMoabhi.” Kubvapo vakaenda Bheeri; icho ndicho chinyuka chaakaereketa ndicho Mambo Mwari kunaMosi echiti, “Unganidza pamwepo vanhu, neni ndinozovapa mvura.” Zvino vaIsuraeri vakaemba urwu ruyo: “Nyuka, iwewe chinyuka! Emba kwechiri. Chinyuka chakatsiwa ngevatungamiriri, icho vakuru vevanhu vakachitsa ngendonga youmambo, ngemidondoro yavo.” Vakabva mushango iro vakaenda Mathana. Vakabva Mathana vakaenda Naharieri; vakabva Naharieri vakaenda Bhamothi. Vakabva Bhamothi mubani riri munyika yaMoabhi, vakakwira padera pePhisiga, uwo wakaringirana norubaya. Zvino vaIsuraeri vakatuma nhumwa kunaSihoni mambo wevaAmori vechiti, “Nditendere kuti ndidarike ngomunyika yako; atizopaukiri muminda, nokuti muminda yemivhini; atizomwi mvura yezvinyuka: asi tinozohamba ngomuPato raMambo, metsa tadarika migano yako.” Asi Sihoni aazi kutendera vaIsuraeri kuti vadarike ngomunyika mwake. Sihoni wakaunganidza vanhu vake veshe pamwepo, wakabuda kuambana nevaIsuraeri mushango; naye wakaguma Jahazi, akaambana nevaIsuraeri. VaIsuraeri vakamubaya ngokupinza kweshoti, vakatora nyika yake kubvira Arinoni metsa kuguma Jabhoki, metsa kuguma kuvaAmori; ngokuti mugano wevaAmoni waiya wakagwinya. VaIsuraeri vakatora madhorobha eshe aya; vaIsuraeri vakagara mumadhorobha eshe evaAmori, muHeshibhoni nenharaunda yaro yeshe. Ngokuti Heshibhoni raiya dhorobha raSihoni mambo wevaAmoni, avo vakaambana namambo wepamberi wevaMoabhi, akatora nyika yake yeshe kubva kunyara dzake, metsa kuguma Arinoni. Ndizvo avo vanoereketa ngezvisana vanoti, “Uyai muHeshibhoni, ngariakwe; dhorobha raSihoni ngariakwe rinasirwe. Ngokuti muriro wakabuda kubva Heshibhoni, murazvu womuriro wakabva mudhorobha raSihoni. Rakamedza Ari dhorobha revaMoabhi, rakamedza mitunhu nevakuru vendau dzakakwirira dzaArinoni. Ihehe kwouri Moabhi! Iwewe waparadzwa, vanhu vaKhemoshi! Wakaita kuti vakororo vake vapepesheke nevanasikana vake vaite vasungwa, kunaSihoni mambo wevaAmori. Ndizvo mibarirwana yavo yakaparadzwa kubvira Heshibhoni metsa kuguma Dhibhoni, nesu takavaparadza metsa kuguma Nofa, metsa Medhebha.” Ndizvo vaIsuraeri vakagara munyika yevaAmori. Mosi wakatuma koonengera nyika yaJaza, vakatora maguta ayo, vakadzinga vaAmori vaigaramwo. Vakakunukuka, vakakwira ngenjira yeBhashani; Ogi mambo wevaBhashani wakabuda kuambana navo, iye navanhu vake veshe, koorwa paEdrei. Asi Mambo Mwari wakati kunaMosi, “Usamutya, ngokuti ndakamupa munyara dzako, navanhu vake veshe, nenyika yake yeshe; newe unozoita kwaari kudai ngezvewakaita kunaSihoni mambo wevaAmori, waitonga Heshibhoni.” Ndizvo vakamuuraya, nevakororo vake, nevanhu vake veshe, metsa pasisina noumwe wakasara echipona; vakagara nhaka yenyika yake. VaIsuraeri vakaenda, vakaemesa matende avo murukaro rweMoabhi kuambuka rwizi rweJorodhani pakaringirana neJerikho. Zvino Bharaki mukororo waZiphori wakaona zveshe zvevakaita vaIsuraeri kunevaAmori. VaMoabhi vakatya vanhu ava kakurutu, ngokuti vaiya vazhinji; nevaMoabhi vakakakaseka ngendaa yevaIsuraeri. NevaMoabhi vakati kuvakuru vevaMidhiani, “Zvino iyi mbungano inozonambura zveshe zvinotitendenedza, kudai ngekabi inonambura mwenje weshe weshango.” Zvino Bharaki mukororo waZiphori waiya mambo ngouwo mukuwo. Ndizvo wakatuma nhumwa kunaBharamu mukororo waBheo muPhetori, riri pasinde porwizi Yufratesi munyika yehama dzake, echiti, “Vanhu vakabuda kubva Egipite; vakapararira padera penyika, navo vanogara vakaringirana neni. Uya zvinopano, unditukire ava vanhu, ngokuti vanesimba kupinda inini; pamweni ndingakona kuvanyisa, ndivadzinge kubva munyika iyi; ngokuti ndinozia kuti kunyazwi ndiani wounofumisa unozofumiswa, nouwo wounotuka unozotukwa.” Ndizvo vakuru vaMoabhi nevaMidhiani vakaenda vanezvipo zvavo zviri munyara dzavo; vakaguma kuna Bharamu, vakaereketa kwaari mazwi aBharaki. Naye wakati kwavari, “Atai pano usiku huno, ndinozomuunzira izwi kudai ngezvaanoereketa kwendiri Mambo Mwari.” Ndizvo vatungamiriri vevaMoabhi vakagara naBharamu. Mwari wakauya kunaBharamu, akati, “Ndiani ava vanhu vounavo?” Bharamu wakati kunaMwari, “Bharaki mukororo waZiphori, mambo weMoabhi, wakatumira izwi iri echiti, ‘Vanhu vakabuda kubva Egipite, vapararira nenyika; zvino uya unditukire ava vanhu; pamweni ndingakona kuvanyisa, ndivadzinge kubva munyika.’ ” Mwari wakati kunaBharamu, “Iwewe auzoendi navo; auzotuki ava vanhu, ngokuti vakafumiswa.” Ndizvo Bharamu wakamuka mangwanani, akati kunevatungamiriri vaBharaki, “Hwirirai kunyika yenyu, ngokuti Mambo Mwari unondirambidza kuenda nemwi.” Ndizvo vatungamiriri nevakuru veMoabhi vakamiruka, vakaenda kunaBharaki, vakati kwaari, “Bharamu wakaramba kuuya nesu.” Bharaki wakatumazve vakuru vamweni, vakapinda kuwanda, nokupinda kuremeredzeka kuneavo vokutanga. Vakaguma kunaBharamu, vakati kwaari, “Unoronza izvi Bharaki mukororo waZiphori, ‘Ndinokupota, usatendera chiro nachimwe kuti chikurambidze kuuya kwendiri; ngokuti ngegwinyiso ndinozokumirudza kuti uane kuremeredzwa kukuru, kunyazwi ngechiri chounozoronza kwendiri neni ndinozoita; uya, unditukire ava vanhu.’ ” Asi Bharamu wakapingura varanda vaBharaki echiti, “Kunyazwi Bharaki akanyandipa mhatso yake yakazara ngesirivha nomukore, andizodariki mupango waMambo Mwari, Mwari wangu, kuti ndiite zvakatsonga zvaro, nokuti zvinopinda kuwanda. Ndizvo zvino, ndinomupota, ataizve pano usiku huno, kudai ngezvakaita vamweni, kuti ndizie chaanozoronza kwendiri Mambo Mwari.” Mwari wakauya kunaBharamu usikuhwo, wakati kwaari, “Kudai vamuna vauya kookudaidza, miruka, uende navo; asi ita zvendinozokuronzera kwega.” Ndizvo Bharamu wakamiruka mangwanani, wakaisa chigaro pambongoro yake, wakaenda nevakuru veMoabhi. Ushungu hwaMambo Mwari hwakabaka ngokuti waienda, nengirosi yaMambo Mwari yakaema munjira kumutsiira kudai ngegaa rake. Zvino waigadha pambongoro yake, nevaranda vake vairi vaiya naye. Mbongoro yakaona ngirosi yaMambo Mwari yechiema munjira, neshoti yayo yakashwamurwa iri munyara yayo; ndizvo mbongoro yakapauka kubva munjira, yakaenda mushango; naBharamu wakachaya mbongoro, kuipetudza munjira. Zvino ngirosi yaMambo Mwari yakaema munjira yakamanikana pakati peminda yemivhini, apo paiya norukumbati ino neino. Naapo mbongoro yakaona ngirosi yaMambo Mwari, yakadzirovanidza norukumbati, yakarovanidza murenje waBharamu norukumbati, naye wakaichayazve. Zvino ngirosi yaMambo Mwari yakaenda mberi, yakaema pandau yakaita yakamanikana, apo paiya pasina ndau yokukunukukira kumudyo nokuti kumuoshwe. Naapo mbongoro yaona ngirosi yaMambo Mwari, yakaata pashi Bharamu ari padera payo, noushungu hwaBharamu hwakabaka, wakachaya mbongoro ngendonga. Zvino Mambo Mwari wakabeura muromo wembongoro, ikati kunaBharamu, “Chiinyi chendaita kwouri, kuti iwewe undichaye katatu aka?” NaBharamu wakati kunembongoro, “Ngokuti iwewe wandiita benzi! Ndingada kuti dai ndaiya neshoti munyara yangu! Ndaizokuuraya zvinopano!” Asi mbongoro yakati kunaBharamu, “Andiri mbongoro yako here, yewagadha padera payo kupona kwako kweshe metsa nyamashi? Ndakambokuitira kudai here?” Naye wakapingura akati, “Haiwa.” Zvino Mambo Mwari wakabeura madziso aBharamu, wakaona ngirosi yaMambo Mwari yakaema munjira, neshoti yayo yakashwamurwa munyara yayo; naye wakakotamisa soro rake pashi, akawa ngehope yake. Nengirosi yaMambo Mwari yakati kwaari, “Waichairenyi mbongoro yako mikuwo mitatu iyi? Penya, ndabuda kuti ndikurambidze, ngokuti njira yako ngeyokupauka pamberi pangu. Nembongoro yakandiona, yakapauka kubva kwendiri katatu aka. Kudai isikazi kupauka kubva kwendiri, ngegwinyiso ndaizodai ndakuuraya iwewe zvino, mbongoro ndaizoiponesa.” Zvino Bharamu wakati kunengirosi yaMambo Mwari, “Ndashaisha; ngokuti ndisaizia kuti iwewe waiema munjira kundirambidza. Ndizvo zvino, kudai zvisikakudakadzi ndinozohwirira kanyi.” Nengirosi yaMambo Mwari yakati kunaBharamu, “Enda naavo vamuna; asi ereketa izvo zvega zvendinozoronza kwouri.” Ndizvo Bharamu wakaenda nevakuru vaBharaki. Naapo Bharaki azwa kuti Bharamu waiya auya, wakabuda kuenda kooshongana naye kudhorobha raMoabhi, riri kumagumisiro yaamho omugano waArinoni. Bharaki wakati kunaBharamu, “Andizi kutuma kwouri here ndechinasa kupota kukudaidza? Ndizvo auzi kuuya ngenyi kwendiri? Andikoni here kukuremeredza?” Bharamu wakati kunaBharaki, “Ringira, ndauya kwouri zvino, asi ndinesimba here rokuereketa chiro? Mazwi aanoisa Mambo Mwari mumuromo wangu ndiwo endinozoereketa.” Zvino Bharamu wakaenda naBharaki, vakaguma Kiriathihuzothi. Bharaki wakapira mudiro wekabi newegwai, wakatumira kunaBharamu nokuvakuru vaiya naye. Nechimangwani Bharaki wakatora Bharamu, akamukwidza kuBhamothi-Bhaari, kubva apo waikona kuona rupande rwevanhu vaIsuraeri. Zvino Bharamu wakati kunaBharaki, “Ndiakire pano maarita manomwe, undinasirire pano mikono minomwe, nemagondohwe manomwe.” Bharaki wakaita kudai ngezvaakaronza Bharamu; Bharaki naBharamu vakapira mukono umwe negondohwe rimwe paarita rimwe ngarimwe. Zvino Bharamu wakati kunaBharaki, “Ema panapa nomudiro wako wokupisha, inini ndechienda parutii; pamweni Mambo Mwari unozouya kushongana neni. Kunyazwi ngechiri chaanozondionisa ndinozokuronzera.” Naye wakakwira kundau yakakwirira. Mwari wakashongana naBharamu; naBharamu wakati kwaari, “Ndanasira maarita manomwe, ndakapira mukono negondohwe paarita rimwe ngarimwe.” Mambo Mwari wakaisa izwi mumuromo waBharamu, wakati, “Hwirira kunaBharaki, wooronza kudaro.” Ndizvo wakahwirira kunaBharaki, waiya akaema pasinde pomudiro wake wokupisha, iye nevakuru veshe veMoabhi. Zvino Bharamu wakaereketa chiprofeti chake echiti, “Bharaki mambo weMoabhi wakandiunza kubva Aramu, kubva kumitunhu yokumabvazuva echiti, ‘Uya, unditukire Jakobe; uya, utsondore Isuraeri!’ Ndingaita matukirenyi avo vaasikazi kutuka Mwari? Nokuti ndingaita matsondorerenyi avo vaasikazi kutsondora Mambo Mwari? Ngokuti kubvira ndiri padera pamapuwe ndinomuona, nokubvira ndiri padera pezvimitunhu ndinomuringira; penya vanhu avo vanozogara vari vega, vasikazoerengwi pamwepo nemadzinza! Ndiani ungakona kuerenga bukuta raJakobe, nokuti kuerenga rupande rwechirongomuna rwaIsuraeri? Ngandife rufu rwowakarurama, nokupedzisira kwangu ngokudai ngokwake!” Zvino Bharaki wakati kunaBharamu, “Chiinyi chewaita kwendiri? Ndakakuunza kuti unditukire magaa angu, asi zvino apana chewaita asi kuvafumisa.” Naye wakapingura echiti, “Andizongwariri here izvo zvaakaisa Mambo Mwari mumuromo wangu, kuti ndizvierekete?” Ndizvo Bharaki wakati kwaari, “Ndinokupota, uya neni kundau imweni, kubvirapo ungavaona; unozoona rupande rwavo, asi auzovaoni veshe; newe unozonditukire avo kubvirapo.” Ndizvo wakamuunza kumunda weZofimu, padera pomutunhu wePhisiga, wakaaka maarita manomwe apo, wakapira mukono negondohwe kumaarita rimwe ngarimwe. Bharamu wakati kunaBharaki, “Ema panapa pasinde pomudiro wako wokupisha, neni ndechienda apo kushongana naMambo Mwari.” Mambo Mwari wakashongana naBharamu, akaisa izwi mumuromo wake, akati, “Hwirira kunaBharaki, wechironza kudaro.” Naapo akaguma kwaari, waiya akaema ngepasinde pomudiro wake wokupisha nevakuru veMoabhi. Bharaki wakati kwaari, “Chiinyi chaaereketa Mambo Mwari?” Zvino Bharamu wakaereketa chiprofeti chake echiti, “Miruka, Bharaki, uzwe; purutana kwendiri, iwewe mukororo waZiphori. Mwari aasiri munhu akadi, kuti anyepe; nokuti mukororo womunhu kuti atenderuke. Chaakagondisa aazochiiti here? Chaakaereketa aazochizadzisi here? Penya, ndakaashira mupango wokufumisa; naye wakafumisa, neni andichakoni kukunukudza. Aazi kuona kushata munaJakobe, zve, aazi kuona kupauka munaIsuraeri. Mambo Mwari, Mwari wavo unavo, nokudaidzira kwamambo kuri pakati pavo. Mwari wakavabudisa kubva Egipite, unesimba rakadai ngenyanga dzenyati. Ngegwinyiso akuna saramuso kunaJakobe, zve, akuna kuuka kunaIsuraeri; kunozoronzwa ngouyu mukuwo ngendaa yaJakobe naIsuraeri, ‘Wonai chaakaita Mwari!’ Ringirai, vanhu ava vanozomukira kudai ngemhondoro hadzi, vanomiruka kudai ngemhondoro; aizoati pashi metsa yadya zvakachakatwa nokusvuta ngazi yechakaurawa.” Zvino Bharaki wakati kunaBharamu, “Usachavatuka, nokuti kuvafumisa.” Asi Bharamu wakapingura kunaBharaki, akati, “Andizi kukuronzera here, kuti zveshe zvaanozoronza Mambo Mwari, ndizvo zvendinozoita?” Ndizvo Bharaki wakati kunaBharamu, “Ndinokupota, uya, ndinozoenda newe kundau imweni; pamweni Mwari unozotenda kuti unditukire avo kubvira apo.” Ndizvo Bharaki wakaunza Bharamu padera poMutunhu Peori, uwo wakaringirana norubaya. Bharamu wakati kunaBharaki, “Ndiakire pano maarita manomwe, undinasirire pano mikono minomwe nemagondohwe manomwe.” Ndizvo Bharaki wakaita kudai ngezvaakaronza Bharamu, wakapira apo mukono negondohwe panarimwe ngarimwe remaarita. Zvino Bharamu wakaona kuti Mambo Mwari waida kufumisa vaIsuraeri, ndizvo aazi kuenda kudai ngemikuwo imweni kuti atsvake masaramuso, asi wakaemesa hope yake kuringira mushango. Bharamu wakamirudza madziso ake, wakaona vaIsuraeri vechigara mumatende avo kudai ngokuteererana kwemadzinza avo. Mweya waMambo Mwari wakauya padera pake. Wakaereketa chiprofeti chake echiti, “Chiprofeti chaBharamu mukororo waBheo, chiprofeti chomunhu unemadziso ake akapembenudzwa, chiprofeti chouwo unozwa mazwi aMwari, uwo unoona chioniso choUnesimba-reshe, uwo unowa pashi, asi madziso ake akabeuka: A, kunakanyi kwematende ako, iwewe Jakobe, matende ako, iwewe Isuraeri! Kudai ngomuchindwi wakapamhama kuenda kuretu, nokudai ngeminda iri pasinde porwizi, kudai ngemiti yemaalo-erigini yaakasima Mambo Mwari, nokudai ngemiti yemisidhari iri pasinde pemvura. Mvura inozoerera kubva muzvidziyo zvake, nembeu dzake dzinozoa nemvura yakawanda, namambo wake unozoa padera paAgagi, noumambo hwake hunozokuriswa. Mwari unomubudisa kubva Egipite, unesimba rakadai ngenyanga dzenyati; unozodya madzinza ari magaa ake, unozopwanya magodo avo. Unozovapotya ngemisee yake. Unozohwarira kudai ngemhondoro, nokudai ngemhondoro yehadzi huru; ndiani unozomumusa? Unofumiswa uwo weshe unokufumisa, unotukwa uwo weshe unokutuka.” Noushungu hwaBharaki hwakabaka kunaBharamu, naye wakachaya nyara dzake pamwepo. Bharaki wakati kunaBharamu, “Ndakakudaidza kuti unditukire magaa angu, asi iwewe wakavafumisa katatu aka. Ndizvo zvino, tiza! Enda kundau yako! Ndakati, ‘Ndinozokubhadhara kakurutu.’ Asi Mambo Mwari wakakurambidza kuti usaanomubhadharo.” NaBharamu wakati kunaBharaki, “Andizi kuronza here kunhumwa dzako, dzewakatuma kwendiri, ndechiti, ‘Kudai Bharaki echinyazondipa mhatso yake yakazara ngesirivha nomukore, andingakoni kudarika mupango waMambo Mwari, kuti ndiite zvakanaka nokuti zvakashata ngomupinimidzo wangu; asi icho chaanozoronza Mambo Mwari, ndicho chendinozoereketa?’ Ndizvo zvino, ndinohwirira kuvanhu vangu; ngandikuronzere icho chinozoitwa ngaava vanhu kunevanhu vako ngemazuva okugumisira.” Ndizvo wakaprofeta chiprofeti chake echiti, “Chiprofeti chaBharamu mukororo waBheo, chiprofeti chomunhu unemadziso ake akabeuka, chiprofeti chouwo unozwa mazwi aMwari, nounozia kuzia kwoUripadera-pazveshe, uwo unoona chioniso choUnesimba-reshe, uwo unowa pashi, asi madziso ake akabeuka: Ndinomuona, asi haiwa zvino; ndinomuringira, asi haiwa pasinde; kunozobuda Nyeredzi kubva kunaJakobe, neNdonga youmambo inozobuda kubva kunaIsuraeri, inozopwanya nyika dzokumigano yeMoabhi, iuraye vana veshe vaShethi. Edhomu inozoitwa nhaka, neSeira nayo inozoitwa nhaka yemagaa ayo; naapo Isuraeri unozoangira kuita ngwazi. Kubva kunaJakobe kunozobuda uwo unozotonga, unozoparadza avo vanosara mudhorobha reIri.” Zvino wakaringira padera pevaAmareki, naye wakaprofeta chiprofeti chake echiti, “Amareki rakaita dzinza rokutanga pakati pemadzinza; asi kugumisira kwaro kupera mhera nariini.” Zvino wakaringira vaKheni, wakaprofeta chiprofeti chake echiti, “Ugaro hwako hwakagwinya wakaisa chisaki chako murutwe rwebuwe. Kunyazwi zvakanyadaro vaKheni vanozoparadzwa. Ashuri unozomutora kuita hloko metsa riini?” Wakaprofeta chiprofeti chake echiti, “Ihehe, ndiani ungazopona apo Mwari aita izvi? Asi ngarava dzinozouya kubva kumugano weKitimi, nadzo dzinozotambudza Ashuri, nokutambudza Ebha, naye unozoparadzwa mhera nariini.” Zvino Bharamu wakamiruka, akahwirira kundau yake, naBharaki wakaendawo njira yake. Naapo vaIsuraeri vakagara Shitimu, vanhu vakatanga kuita mhombo nevasikana veMoabhi. Ava vakadzi vakadaidza vanhu kumidiro yezvimwari zvavo; nevanhu vakaidya, vakakotamira zvimwari zvavo. NavaIsuraeri vakadzisungira kunaBhaari wePeori; noushungu hwaMambo Mwari hwakabaka kunavaIsuraeri. NaMambo Mwari wakati kunaMosi, “Tora vakuru veshe vevanhu, uvauraye pakujeka kwezuva pamberi paMambo Mwari kuitira kuti ushungu hunotyisa hwaMambo Mwari hubve pakati pevaIsuraeri.” NaMosi wakati kunevatongi veIsuraeri, “Umwe ngaumwe wenyu unozouraya munhu weshe wake uwo wakadzisungira kunaBhaari wePeori.” Naapo umwe wevaIsuraeri wakauya anomukadzi wevaMidhiani pakati pehama dzake mukuona kwaMosi, nomukuona kwembungano yeshe yaIsuraeri yaichema pamusiwo wetende romushongano. Naapo Finehasi, mukororo waEreaza, mukororo waAroni mupristi, wakazviona, wakamiruka kubva pakati pembungano. Wakatora mukhondo munyara yake, wakateera mwamuna muIsuraeri mutende, wakavabaya veshe vairi, mwamuna muIsuraeri nomukadzi kupotya ngomundani. Ndizvo nhenda yakapera pakati pevana vaIsuraeri. Ndizvo vakafa ngeiyi nhenda vaiya makumi mairi namarongomuna emakumi emazana (24,000.) Mambo Mwari wakaereketa kunaMosi echiti, “Finehasi mukororo waEreaza, mukororo waAroni mupristi, wakatenderudza ushungu hwangu kubva kuvana vaIsuraeri, apo waiya nendurumwa pakati pavo, ngepamusoro pangu, kuti andizi kupedza vana vaIsuraeri mundurumwa yangu. Ndizvo ronza izvi, ‘Wona, ndinopa kwaari chitenderano changu chokunyarara. Chinozoita chake nemibarirwana yake inoteera sure kwake, eya, chitenderano choupristi husina mugumo, ngokuti iye wakatsamwirira ngendaa yaMwari wake, wakaitira muripo vaIsuraeri.’ ” Zina romuIsuraeri wakaurawa pamwepo nomukadzi muMidhiani, raiya Zimuri, mukororo waSaru, mukuru wemhatso huru pakati pevaSimeoni. Zina romukadzi wevaMidhiani wakaurawa raiya Kozibhi, mukunda waZuri; uwo waiya mukuru wedzinza nowemhatso yemadzibaba muMidhiani. Mambo Mwari wakaereketa kunaMosi echiti, “Tambudza vaMidhiani, uvanyise. Ngokuti vakamutambudza ngourimbwi hwavo, hwevakamuchengedzera ndihwo ngendaa yaPeori, nendaa yaKozibhi, mwanasikana womunhu mukuru weMidhiani, mukunda wavo, uwo wakaurawa ngezuva renhenda ngendaa yaPeori.” Ngesure kwenhenda Mambo Mwari wakaereketa kunaMosi naEreaza, mukororo waAroni mupristi, echiti, “Erengai uwandu hweshe hwembungano yaIsuraeri, kubvira ngevaane makore makumi mairi kuenda mberi, kudai ngemhatso dzeshe dzemadzibaba avo, veshe avo vanokona kuenda kuhondo muIsuraeri.” Mosi naEreaza mupristi vakaereketa kwavari mushango reMoabhi pasinde peJorodhani pakaringirana neJerikho vechiti, “Erengai uwandu hwevanhu kubvira ngevaane makore makumi mairi kuenda mberi,” kudai ngokupanga kwaMambo Mwari kunaMosi. VaIsuraeri vakabuda kubva Egipite vaiya. Rubheni dangwe raIsuraeri. Mibarirwana yaRubheni: yaHanokhi, ndikwo kwakabva dzinza revaHanokhi; yaParu, ndikwo kwakabva dzinza revaParu; yaHezironi, ndikwo kwakabva dzinza revaHezironi; yaKhami ndikwo kwakabva dzinza revaKhami. Ava ndivo madzinza aRubheni; uwandu hweavo vakaerengwa vaiya makumi marongomuna namatatu emakumi emazana nemazana manomwe nemakumi matatu (43,730). Nemibarirwana yaParu: ndiEriabhi. Nemibarirwana yaEriabhi: ndiNemueri, Dhathani naAbhiramu. Ava ndivo Dhathani naAbhiramu vaiya vakatsanangurwa kubva pakati pembungano, avo vakamukira Mosi naAroni muchikwata chaKhora, apo pevakamukira Mambo Mwari, nevhu rakabeura muromo waro, rikavamedza pamwepo naKhora, apo pakafa chikwata icho, naapo muriro pewakapedza vamuna mazana mairi nemakumi mashanu (250); vakaita chioniso. Zvakanyadaro vakororo vaKhora avazi kufa. Mibarirwana yaSimeoni kudai ngokuteererana kwemadzinza avo: kubva kuneNemueri kwakabva dzinza revaNemueri; kubva kunaJamini kwakabva dzinza raJamini; kubva kunaJakhini kwakabva dzinza ravaJakhini; kubva kunaZera kwakabva dzinza revaZera; kubva kunaShauri kwakabva dzinza revaShauri. Ava ndivo madzinza aSimeoni, vaiya makumi mairi namairi emakumi emazana nemazana mairi (22,200). Vana vaGadhi kudai ngokuteererana kwemadzinza avo: kubva kunaZefoni kwakabva dzinza revaZefoni; kubva kunaHagi kwakabva dzinza revaHagi; kubva kunaShuni kwakabva dzinza revaShuni; kubva kunaOzini kwakabva dzinza revaOzini; kubva kunaEri kwakabva dzinza revaEri; kubva kunaArodhi kwakabva dzinza revaArodhi; kubva kunaAreri kwakabva dzinza revaAreri. Ava ndivo madzinza evana vaGadhi uwandu hweavo vakaerengwa vaiya makumi marongomuna emakumi emazana nemazana mashanu (40,500). Vakororo vaJudha ndiEri naOnani; Eri naOnani vakafa munyika yeKhenani. Mibarirwana yaJudha kudai ngokuteererana kwemadzinza avo vaiya ava: kubva kunaShera kwakabva dzinza revaShera; kubva kunaPherezi kwakabva dzinza revaPherezi; kubva kunaZera kwakabva dzinza revaZera. Mibarirwana yaPherezi vaiya: kubva kunaHezironi kwakabva dzinza revaHezironi; kubva kunaHamuri kwakabva dzinza revaHamuri. Ava ndivo madzinza aJudha, uwandu hwokuerengwa kwavo, vaiya makumi manomwe nematanhatu emakumi emazana namazana mashanu (76,500). Mibarirwana yaIsakha kudai ngokuteererana kwemadzinza avo: kubva kunaTora kwakabva dzinza yevaTora; kubva kunaPuvha kwakabva dzinza revaPuvha; Kubva kunaJashubhi kwakabva dzinza revaJashubhi; kubva kunaShimuroni kwakabva dzinza revaShimuroni. Ava ndivo madzinza aIsakha, uwandu hwokuerengwa kwavo, vaiya makumi matanhatu namarongomuna emakumi emazana nemazana matatu (64,300). Mibarirwana yaZebhuruni kudai ngokuteererana kwemadzinza avo: kubva kunaSeredhi, kwakabva dzinza revaSeredhi; kubva kunaEroni kwakabva dzinza revaEroni; kubva kunaJahireeri kwakabva dzinza revaJahireeri. Ava ndivo madzinza aZebhuruni uwandu hwokuerengwa kwavo, vaiya makumi matanhatu emakumi emazana namazana mashanu (60,500). Vakororo vaJosefa kudai ngokuteererana kwemadzinza avo vaiya Manase naEfuremu. Mibarirwana yaManase: kubva kunaMakhiri kwakabva dzinza revaMakhiri; naMakhiri wakabara Gireadhi; kubva kunaGireadhi kwakabva dzinza revaGireadhi. Ava ndivo mibarirwana yaGireadhi: kubva kunaIezeri kwakabva dzinza revaIezeri; kubva kunaHereki kwakabva dzinza revaHereki; kubva kunaAsirieri kwakabva dzinza revaAsirieri; kubva kunaShekhemu kwakabva dzinza revaShekhemu; kubva kunaShemidha kwakabva dzinza revaShemidha; kubva kunaHeferi kwakabva dzinza revaHeferi. Zvino Zerofehadhi mukororo waHeferi waiya asina vakororo, asi vanasikana; mazina evanasikana vaZerofehadhi vaiya Mahea, Noa, Hogira, Mirikha naThiriza. Ava ndivo madzinza aManase, uwandu hwokuerengwa kwavo, vaiya makumi mashanu namairi emakumi emazana nemazana manomwe (52,700). Ava ndivo mibarirwana yaEfuremu kudai ngokuteererana kwemadzinza avo: kubva kunaShuthera kwakabva dzinza revaShuthera; kubva kunaBhekheri kwakabva dzinza revaBhekheri; kubva kunaThahani kwakabva dzinza revaThahani. Ava ndivo mibarirwana yaShuthera: kubva kunaErani kwakabva dzinza revaErani. Ava ndivo madzinza aEfuremu, uwandu hwokuerengwa kwavo, vaiya makumi matatu namairi emakumi emazana namazana mashanu (32,500). Ava ndivo mibarirwana yaJosefa kudai ngokuteererana kwemadzinza avo. Mibarirwana yaBhenjamini kudai ngokuteererana kwemadzinza avo: kubva kunaBhera kwakabva dzinza revaBhera; kubva kunaAshibheri kwakabva dzinza revaAshibheri; kubva kunaAhiramu kwakabva dzinza revaAhiramu; kubva kunaShefufamu kwakabva dzinza revaShefufamu; kubva kunaHufamu kwakabva dzinza revaHufamu. Nevakororo vaBhera ndiArdhi naNaamani: kubva kunaArdhi kwakabva dzinza revaArdhi; kubva kunaNaamani kwakabva dzinza revaNaamani. ndivo mibarirwana yaBhenjamini kudai ngokuteererana kwemadzinza avo, uwandu hwokuerengwa kwavo, vaiya makumi marongomuna namashanu emakumi emazana nemazana matanhatu (45,600). Ava ndivo mibarirwana yaDhani kudai ngokuteererana kwemadzinza avo: kubva kunaShuhamu kwakabva dzinza revaShuhamu. Ava ndivo madzinza aDhani kudai ngokuteererana kwemadzinza avo. Madzinza eshe evaShuhamu uwandu hwokuerengwa kwavo, vaiya makumi matanhatu nemarongomuna emakumi emazana nemazana marongomuna (64,400). Mibarirwana yaAsha kudai ngokuteererana kwemadzinza avo: kubva kunaImina kwakabva dzinza revaImina; kubva kunaIshivhi kwakabva dzinza revaIshivhi; kubva kunaBheria kwakabva dzinza revaBheria. Kubva kumibarirwana yaBheria: kubva kunaHebha kwakabva dzinza revaHebha; kubva kuna Marikhieri kwakabarwa dzinza revaMarikhieri. Nezina remwanasikana waAsha ndiSera. Ava ndivo madzinza aAsha, uwandu hwokuerengwa kwavo vaiya makumi mashanu namatatu emakumi emazana nemazana marongomuna (53,400). Mibarirwana yaNafitari kudai ngokuteererana kwemadzinza avo: kubva kunaJahizeeri kwakabva dzinza revaJahizeeri; kubva kunaGuni kwakabva dzinza revaGuni; kubva kunaJeza kwakabva dzinza revaJeza; kubva kunaShiremu kwakabva dzinza revaShiremu. Ava ndivo madzinza aNafitari kudai ngokuteererana kwemadzinza avo, uwandu hwokuerengwa kwavo, vaiya makumi marongomuna namashanu emakumi emazana nemazana marongomuna (45,400). Uhu ndihwo uwandu hwevakaerengwa vaIsuraeri, vaiya mazana matanhatu negumi emakumi emazana, namazana manomwe namakumi matatu (610,730). Mambo Mwari wakaereketa kunaMosi echiti, “Nyika inozokoaniswa kuneava kuita nhaka yavo kudai ngouwandu hwemazina. Kunedzinza guru unozovapa nhaka huru, nokunedzinza doko unozovapa nhaka doko; dzinza rimwe ngarimwe rinozopuwa nhaka yaro kudai ngouwandu hweavo vakaerengwa. Asi nyika inozokoaniswa ngemabhigidha; kudai ngokuteererana kwemazina emadzinza emadzibaba avo evanozogara nhaka. Kudai ngokutsanangura kwemabhigidha nyika inozokoaniswa pakati pevakawanda nevashomani.” Ava ndivo vakaerengwa vevaRevhi kudai ngokuteererana kwemadzinza avo: kubva kunaGershoni kwakabva dzinza revaGershoni; kubva kunaKohathi kwakabva dzinza revaKohathi; kubva kunaMerari kwakabva dzinza revaMerari. Ava ndivo madzinza evaRevhi: dzinza revaRibhini, dzinza revaHebroni, dzinza revaMahiri, dzinza revaMushi, dzinza revaKhora. Zvino Kohathi wakabara Amiramu. Zina romukadzi waAmiramu raiya Jokhebhedhi, mwanasikana waRevhi, waakaberekerwa Revhi munyika yeEgipite; ndiye wakaberekera Amiramu: Aroni, Mosi naMiriamu mukunda wavo. KunaAroni kwakabarwa Nadhabhi, Abhihu, Ereaza naIthama. Asi Nadhabhi naAbhihu vakafa, apo pevakapa muriro usikatenderwi pamberi paMambo Mwari. Uwandu hweavo vakaerengwa vavo vaiya makumi mairi namatatu emakumi emazana (23,000), veshe vaiya vamuna kubvira vaiya vaanemwedzi wokubarwa kuenda mberi; ngokuti ava avazi kuerengwa pakati pevana vaIsuraeri, ngokuti vaiya vasina nhaka yakapuwa kwavari pakati pevaIsuraeri. Ava ndivo avo vakaerengwa ndiMosi naEreaza mupristi, avo vakaerenga vana vaIsuraeri vari mumashango eMoabhi paJorodhani pakaringirana neJerikho. Pakati peava paiya pasina noumwe weavo vakaerengwa ndiMosi naAroni mupristi, avo vaiya vaerenga vana vaIsuraeri mushango reSinai. Ngokuti Mambo Mwari waiya aronza kwavari kuti, “Ngegwinyiso vanozofira mushango.” Akuna naumwe wavo wakasara, kwega Kharebhu mukororo waJefune, naJoshua mukororo waNuni. Zvino kwakauya vanasikana vaZerofehadhi. Zerofehadhi mukororo waHeferi, mukororo waGireadhi, mukororo waMakhiri, mukororo waManase, mukororo waJosefa wedzinza raManase. Naaya ndiwo mazina evanasikana vake: Mahea, Noa, Hogira, Mirikha naThiriza. Vakaema pamberi paMosi, Ereaza mupristi, vatungamiriri nembungano yeshe, pamusiwo wetende romushongano vechiti, “Baba edu vakafira mushango, vaiya vasiri muchikwata cheavo vakaunganidzana pamwepo kumukira Mambo Mwari muchikwata chaKhora; asi vakafira muchishaishi chavo, vasina vakororo. Zina rababa edu ringazorova ngenyi kubva pakati pedzinza ravo, ngokuti vaiya vasina mukororo? Tipenyiwo nhaka pakati pevanun'una vababa edu.” Mosi wakaunza ndaa yavo pamberi paMambo Mwari. NaMambo Mwari wakaereketa kunaMosi echiti, “Vanasikana vaZerofehadhi vanasa kuereketa; ngegwinyiso unozovapa nhaka pakati pevanun'una vababa avo, uite kuti nhaka yababa avo iuye kwavari. Newe unozoereketazve kunavana vaIsuraeri wechiti, ‘Kudai munhu wechifa, asina mukororo, naapo munozoita kuti nhaka yake igarwe ngomwanasikana wake. Kudai asina mwanasikana, naapo munozopa nhaka yake kunevanun'una vake. Kudai asina vanun'una, naapo munozopa nhaka yake kunevanun'una vababa ake. Kudai baba ake asina vanun'una, naapo nhaka yake inozogarwa ngehama yake yepasinde yedzinza rake, ndiye unozogara nhaka yayo. Ichi chinozoita chiemeso nomupango kuvaIsuraeri, kudai ngezvaakapanga Mambo Mwari kunaMosi.’ ” Mambo Mwari wakati kunaMosi, “Kwira kumutunhu uyu weAbharimu, uone nyika yendakapa kuvana vaIsuraeri. Naapo waiona, newezve unozounganidzwa kuvanhu vako, kudai ngezvaakaunganidzwa Aroni mukoma wako. Ngokuti imwimwi mwakamukira mupango wangu muri mushango reZini, apo mbungano peyakaita hasha neni. Amuzi kuonisa kucheneswa kwangu pamberi pokuona kwavo pamvura.” (Iyi ndiyo mvura yeMeribha muKadheshi, mushango reZini.) Mosi wakaereketa kunaMambo Mwari echiti, “Mambo Mwari, Mwari womweya yevanhu veshe, ngaaemese munhu padera pembungano iyi, uwo unozobuda kuenda pamberi pavo nokupotera pamberi pavo; unozovatungamirira kubuda nokuvapotedza mukati, kuti mbungano yaMambo Mwari isazodai ngemakwai asina muushi.” Ndizvo Mambo Mwari wakati kunaMosi, “Tora Joshua mukororo waNuni, munhu uwo unomweya, uise nyara yako padera pake. Umuemese pamberi paEreaza mupristi nepamberi pembungano yeshe; umugadze kuita mutungamiriri. Unozomupa rupande rwesimba rako, kuti mbungano yeshe yevana vaIsuraeri imupurutane. Asi unozoema pamberi paEreaza mupristi, uwo unozomubvunzira kuda kwangu ngokushandisa Urimu pamberi paMambo Mwari; ngeizwi rake vanozobuda, ngeizwi rake vanozopotera, pamwepo iye nevana vaIsuraeri, mbungano yeshe.” Ndizvo Mosi wakaita kudai ngezvaakamupanga Mambo Mwari. Wakatora Joshua, akamuemesa pamberi paEreaza mupristi nepamberi pembungano yeshe; naye wakaisa nyara dzake padera pake, wakamugadza, kudai ngezvaakapanga Mambo Mwari kubudikidza ngenyara yaMosi. Mambo Mwari wakaereketa kunaMosi echiti, “Panga vaIsuraeri, uti kwavari, ‘Zvipo zvangu, kudya kwomudiro wangu unoitwa ngomuriro, wokuita gwema rakanaka kwendiri, munozongwarira kuzvipira kwendiri ngenguva yakaemeswa.’ Unozoti kwavari, ‘Uyu ndiwo mudiro unoitwa ngomuriro wounozopira kunaMambo Mwari: zvimagondohwe zviiri zvegore rimwe zvisina kuremara, kudai ngomudiro wezuva rimwe ngarimwe. Unozopira kagondohwe kamwe mangwanani, nekamweni kagondohwe unozokapira madeekoni, zvino rupande rwechegumi rwekhirogramu rimwe roufu unozoita mudiro wezviyo, hwakakumanidzwa norupande rwechirongomuna rweritha rimwe remafuta akanasa kuengwa. Uyu mudiro wokupisha wezuva rimwe ngarimwe, wakaemeswa paMutunhu weSinai, kuita gwema rakanaka, mubairo unoitwa ngomuriro kunaMambo Mwari. Nomudiro wawo wokumwa unozoita ritha rimwe rezvokumwa kugondohwe rimwe; mundau yakachena unozodurura zvokumwa zvinodhakisa kuita mudiro kunaMambo Mwari. Gondohwe rimweni unozoripira madeekoni nomudiro wezviyo nomudiro wokumwa, wakadai ngewemangwanani; unozoupira kudai ngomudiro unoitwa ngomuriro, kuita gwema rakanaka kunaMambo Mwari.’ “Ngezuva reSabatha munozopira zvimagondohwe zviiri zvinegore rimwe zvisina kuremara, nemakhirogramu mairi oufu hwokuita mudiro wezviyo, hwakakumanidzwa nemafuta, nomudiro wawo wokumwa. Uyu ndiwo mudiro wokupisha wemaSabatha eshe, ngepabanze pouwo wezuva rimwe ngarimwe wokupisha, nepouwo wokumwa. “Mukuamba kwokutawa kwomwedzi yenyu munozopira mudiro wokupisha kunaMambo Mwari: mikono miiri mitsva, gondohwe rimwe nezvimagondohwe zvinomwe zvinegore rimwe zvisina kuremara; nemakhirogramu matatu oufu hwokuita mudiro wezviyo hwakakumanidzwa nemafuta kumukono umwe; nemakhirogramu mairi oufu kuita mudiro wezviyo hwakakumanidzwa nemafuta kugondohwe rimwe; nekhirogramu rimwe roufu hwakakumanidzwa nemafuta kuita mudiro wezviyo kunegondohwe rimwe ngarimwe, kuita mudiro wokupisha unegwema rakanaka, mudiro unoitwa ngomuriro kunaMambo Mwari. Midiro yawo yokumwa inozoita ritha rimwe revhini kumukono umwe, ritha rimwe nehafu kugondohwe rimwe neritha rimwe kukagondohwe kamwe. Iyi midiro yokupisha yemwedzi yeshe mukati mwegore. Gotokoto rimwe rinozopirwa kunaMambo Mwari kuita mudiro wokushaisha, ngepabanze pomudiro wezuva rimwe ngarimwe wokupisha nomudiro wawo wokumwa. “Ngezuva regumi namarongomuna romwedzi wokutanga kunozoapo Phasika kunaMambo Mwari. Ngezuva regumi namashanu romwedzi uyu kunozoitwa dhiri rePhasika; mazuva manomwe munozodya chingwa chisina mumera. Ngezuva rokutanga unozoapo mushongano wakachena; amuzoiti mushando nokuti ngouri ngeiro zuva. Munozopira mubairo unoitwa ngomuriro kuita mudiro wokupisha kunaMambo Mwari: mikono miiri mitsva, gondohwe rimwe, nezvimagondohwe zvinomwe zvinegore rimwe zvisina kuremara. Mudiro wavo wezviyo unozoita woufu hwakakumanidzwa nemafuta; munozopira makhirogramu matatu kumukono umwe, makhirogramu mairi kugondohwe rimwe. Khirogramu rimwe rinozopirwa kunechigondohwe chimwe ngachimwe chezvimagondohwe zvinomwe; zve negotokoto rimwe rokuita mudiro wokushaisha, kuita muripo wenyu. Munozopira izvi ngepabanze pomudiro wokupisha wemangwanani, mudiro wezuva rimwe ngarimwe wokupisha. Ngenjira imweyo munozogara mwechipira mazuva eshe, metsa kupere mazuva manomwe, mudiro wokudya unoitwa ngomuriro, kuita gwema rakanaka kunaMambo Mwari; unozopira ngepabanze pomudiro wezuva rimwe ngarimwe wokupisha nowokumwa. Ngezuva rechinomwe munozoa nomushongano wakachena; amuzoiti mushando nokuti ngouri ngeiro zuva. “Ngezuva remitanguro yemichero, apo pomunozopira mudiro wezviyo kunaMambo Mwari, pamadhiri enyu emavhiki munozoa nomushongano wakachena; amuzoiti mushando nokuti ngouri ngeiro zuva. Munozopira mudiro wokupisha kuita gwema rakanaka kunaMambo Mwari: mikono miiri mitsva, gondohwe rimwe nezvimagondohwe zvinomwe zvinegore rimwe. Mudiro wavo wezviyo unozoita woufu hwakakumanidzwa nemafuta, makhirogramu matatu oufu kumukono umwe, makhirogramu mairi kugondohwe rimwe; khirogramu rimwe kunechigondohwe chimwe ngachimwe chezvimagondohwe zvinomwe; negotokoto rimwe kuita muripo wenyu. Munozozvipira ngepabanze pomudiro wezuva rimwe ngarimwe wokupisha, nomudiro wezviyo munozozvipira nomudiro wazvo wokumwa. Zvinozoita zvisina kuremara. “Ngomwedzi wechinomwe, ngezuva rokutanga munozoa nomushongano wakachena; amuzoiti mushando kunyazwi ngouri. Izuva rokuridza gwama kwomuri, nemwi munozopira mudiro wokupisha kuita gwema rakanaka kunaMambo Mwari: mukono umwe mutsva, gondohwe rimwe, nezvimagondohwe zvinomwe zvinegore rimwe, zvisina kuremara. Mudiro unopirwa pamwepo nazvo wezviyo unozoita ufu hwakakumanidzwa nemafuta, makhirogramu matatu kumukono umwe, makhirogramu mairi kugondohwe rimwe; khirogramu rimwe kunechigondohwe chimwe ngachimwe chezvimagondohwe zvinomwe; negotokoto rimwe rokuita mudiro wokushaisha, kuita muripo wenyu; ngepabanze pomudiro wokupisha womwedzi, nomudiro unopirwa nawo kuita wezviyo, nomudiro wokupisha wezuva ngezuva, nomudiro unopirwa nawo wezviyo, nemidiro yayo yokumwa, kudai ngokuemeswa kwayo, kuita gwema rakanaka, mubairo unoitwa ngomuriro kunaMambo Mwari. “Nemwi munozoa nomushongano wakachena ngezuva regumi romwedzi uyu wechinomwe; dzirambei pachenyu; amuzoiti mushando. Munozopira mudiro wokupisha kunaMambo Mwari kuita gwema rakanaka: mukono umwe mutsva, gondohwe rimwe nezvimagondohwe zvinomwe zvinegore rimwe, zvisina kuremara. Mudiro wezviyo unozopirwa nazvo unozoita woufu hwakamotseka hwakakumanidzwa nemafuta, makhirogramu matatu kumukono umwe, makhirogramu mairi kugondohwe rimwe; khirogramu rimwe kunechigondohwe chimwe ngachimwe chezvimagondohwe zvinomwe; negotokoto rimwe rokuita mudiro wokushaisha, ngepabanze pomudiro wokushaisha unoita muripo, nomudiro wezuva rimwe ngarimwe wokupisha, nomudiro wezviyo nowokumwa. “Ngezuva regumi namashanu romwedzi wechinomwe munozoa nomushongano wakachena; amuzoiti mushando ngeiro zuva. Munozoitira dhiri kunaMambo Mwari mazuva manomwe. Munozopira mudiro wokupisha, mubairo unoitwa ngomuriro, kuita gwema rakanaka kunaMambo Mwari: mikono mitsva gumi namitatu, magondohwe mairi, nezvimagondohwe gumi nazvirongomuna zvinegore rimwe. Zvinozoita zvisina kuremara. Mudiro wazvo wezviyo unozoita woufu hwakamotseka hwakakumanidzwa nemafuta, makhirogramu matatu kumukono umwe ngoumwe wemikono gumi namitatu, makhirogramu mairi kugondohwe rimwe ngarimwe remairi; khirogramu rimwe kunechigondohwe chimwe ngachimwe chezvimagondohwe gumi nezvirongomuna; negotokoto rimwe kuita mudiro wokushaisha, ngepabanze pomudiro wezuva rimwe ngarimwe wokupisha, nomudiro unopirwa wezviyo nowokumwa. “Ngezuva rechipiri munozopira mikono mitsva gumi namiiri, magondohwe mairi, nezvimagondohwe gumi nazvirongomuna, zvinegore rimwe, zvisina kuremara; nemidiro inopirwa yezviyo noyokumwa yemikono, yemagondohwe neyezvimagondohwe, kudai ngokuemeswa kwazvo ngouwandu hwazvo; negotokoto rimwe rokuita mudiro wokushaisha, ngepabanze pomudiro wezuva rimwe ngarimwe wokupisha, nomudiro wezviyo nowokumwa. “Ngezuva rechitatu: mikono gumi noumwe, magondohwe mairi, nezvimagondohwe gumi nazvirongomuna zvinegore rimwe, zvisina kuremara, nemidiro inopirwa yezviyo, neyokumwa yemikono, yemagondohwe neyezvimagondohwe, kudai ngokuemeswa kwazvo ngouwandu hwazvo; negotokoto rimwe rokuita mudiro wokushaisha, ngepabanze pomudiro wezuva rimwe ngarimwe wokupisha, nomudiro wezviyo nowokumwa. “Ngezuva rechirongomuna: mikono gumi, magondohwe mairi, nezvimagondohwe gumi nazvirongomuna zvinegore rimwe, zvisina kuremara; nemidiro inopirwa yezviyo neyokumwa yemikono, yemagondohwe, neyezvimagondohwe kudai ngokuemeswa kwazvo ngouwandu hwazvo; negotokoto rimwe rokuita mudiro wokushaisha, ngepabanze pomudiro wezuva rimwe ngarimwe wokupisha, nomudiro wezviyo nowokumwa. “Ngezuva rechishanu: mikono mipfumbamwe, magondohwe mairi, nezvimagondohwe gumi nazvirongomuna zvinegore rimwe zvisina kuremara; nemidiro inopirwa yezviyo neyokumwa yemikono, yemagondohwe, neyezvimagondohwe, kudai ngokuemeswa kwazvo ngouwandu hwazvo; negotokoto rimwe rokuita mudiro wokushaisha, ngepabanze pomudiro wezuva rimwe ngarimwe wokupisha, nomudiro wezviyo nowokumwa. “Ngezuva rechitanhatu mikono misere, magondohwe mairi, nezvimagondohwe gumi nazvirongomuna, zvinegore rimwe, zvisina kuremara; nemidiro inopirwa yezviyo neyokumwa yemikono, yemagondohwe neyezvimagondohwe, kudai ngokuemeswa kwazvo ngouwandu hwazvo; negotokoto rimwe rokuita mudiro wokushaisha, ngepabanze pomudiro wezuva rimwe ngarimwe wokupisha, nomudiro wezviyo nowokumwa. “Ngezuva rechinomwe mikono minomwe, magondohwe mairi, nezvimagondohwe gumi nazvirongomuna, zvinegore rimwe, zvisina kuremara; nemidiro inopirwa yezviyo, neyokumwa yemikono, yemagondohwe, neyezvimagondohwe kudai ngokuemeswa kwazvo ngouwandu hwazvo; negotokoto rimwe rokuita mudiro wokushaisha, ngepabanze pomudiro wezuva rimwe ngarimwe wokupisha, nomudiro wezviyo nowokumwa. “Ngezuva rechisere munozoa nomushongano wakachena; amuzoiti mushando kunyazwi ngouri ngeiro zuva. Munozopira mudiro wokupisha, mudiro unoitwa ngomuriro, kuita gwema rakanaka kunaMambo Mwari mukono umwe, gondohwe rimwe, nezvimagondohwe zvinomwe, zvinegore rimwe, zvisina kuremara; nemidiro inopirwa yezviyo neyokumwa yemikono, yemagondohwe, nezvimagondohwe, kudai ngokuemeswa kwazvo ngouwandu hwadzo; negotokoto rimwe rokuita mudiro wokushaisha, ngepabanze pomudiro wezuva rimwe ngarimwe wokupisha, nomudiro wezviyo nowokumwa. “Izvi munozozvipira kunaMambo Mwari mumishongano yenyu yakaemeswa yezviyo, ngepabanze pezvomunopira ngokupika, zvipo zvenyu zvomunopa ngokuda, kuita midiro yenyu yokupisha, midiro yenyu yezviyo, midiro yenyu yokumwa noyokunyarara.” Ndizvo Mosi wakaronzera vaIsuraeri zviro zveshe kudai ngezvaakapanga Mambo Mwari kunaMosi. Zvino Mosi wakaereketa kuvakuru vemadzinza evaIsuraeri echiti, “Ichi ndicho chaakapanga Mambo Mwari. Naapo munhu echizopika mhiko kunaMambo Mwari, nokuti echipika mhiko kusunga mweya wake ngechisungo; asazogura izwi rake, unozoita kudai ndizvo zveshe zvakabuda pamuromo wake. “Naapo munhu womudzimai echizopika mhiko kunaMambo Mwari, nokuti echidzisunga ngemhiko, ari mumhatso yababa ake muutsva hwake, nababa ake echizwa mhiko yake, nokuti chisungo chake, chaakasunga ndicho mweya wake, nababa ake echizonyarara kwaari; naapo mhiko dzake dzeshe dzinozogwinya, nechisungo chimwe ngachimwe chaakadzisunga ndicho mweya wake chinozogwinya. Asi kudai baba ake vechimurambidza ngezuva raakazwa ndiro, akuna naimwe yemhiko yake yaakadzisunga ndiyo mweya wake, inozogwinya; naMambo Mwari unozomurekerera, ngokuti baba ake vakamurambidza. “Nokudai echizoroorwa ngomwamuna, apo akapika mhiko, nokuti kuereketa chiro ngomwamuna wake, kuti asunge mweya wake ndicho, nokudai mwamuna wake echizwa kupika ukwo, echinyarara ngezuva raanozwa kupika ukwo; naapo kupika kwake kunozogwinya, nezvisungo zvake zvaakadzisunga ndizvo mweya wake zvinozogwinya. Asi kudai mwamuna wake akamurambidza ngezuva raakazwa kupika ukwo; naapo unozoita kuti zviite zvisina shwiro mhiko yaakapika, neicho chaakaereketa ngomuromo wake kusunga mweya wake ndicho; Mambo Mwari unozomurekerera. (Asi mhiko dzeshe dzeshirikadzi nedzouwo wakarambana nomwamuna wake, dzevakadzisunga ndidzo mweya yavo, vanozosungwa ndidzo.) Nokudai akapika ari mumhatso yomwamuna wake, nokuti akasunga mweya wake ngemhiko, nomwamuna wake akazvizwa, echinyarara kwaari, asikazi kumurambidza; naapo mhiko dzake dzeshe dzinozogwinya, nezvisungo zvake zveshe zvaakadzisunga ndizvo mweya wake zvinozogwinya. Asi kudai mwamuna wake echizvirambidza naapo ngezuva raakazvizwa; naapo kunyazwi chiinyi chinobuda kubva pamuromo wake ngendaa yemhiko dzake, nokuti ngendaa yechisungo chaakadzisunga ndicho mweya wake, achizogwinyi. Mwamuna wake wakazviita kuti zviite zvisina shwiro; naMambo Mwari unozomurekerera. Dzeshe mhiko, nemhiko dzeshe dzokutambudza ndidzo mweya, mwamuna wake ungadzigwinyisa, nokuti mwamuna wake ungadziita kuti dziite dzisina shwiro. Asi kudaizve mwamuna wake echizonyarara kwaari kubva kuzuva ngezuva, naapo unozogwinyisa mhiko dzake dzeshe, nokuti zvisungo zvake zveshe, dziri padera pake; unodzitendera ngokuti wakanyarara ngezuva raakadzizwa. Asi kudai echizodziita kuti dziite zvisina shwiro nokuti ngeiri njira; naapo unozotwara kushata kwake padera pake.” Izvi ndizvo zviemeso zvaakapanga Mambo Mwari kunaMosi, pakati pemwamuna nomukadzi wake, nepakati pababa nomwanasikana wake, apo achiri mutsva mumhatso yababa ake. Mambo Mwari wakaereketa kunaMosi echiti, “Unzidzira vaMidhiani ngendaa yevaIsuraeri; ngesure kweizvo unozounganidzwa kunevanhu vako.” Ndizvo Mosi wakaereketa kunevanhu echiti, “Vamweni venyu ngavapakatire zvokurwa zvehondo, kuitira kuti vabude koorwa nevaMidhiani, vaite kuunzidzira kwaMambo Mwari kuvaMidhiani. Kudzinza rimwe ngarimwe kubude gumi remazana, mukati mwemadzinza eshe eIsuraeri, munozovatuma kuhondo.” Ndizvo kwakabuda kubva pakati pemakumi emazana aIsuraeri, vamuna gumi remazana kudzinza rimwe ngarimwe, makumi emazana gumi namairi (12,000) vakapakatira zvokurwa. Mosi wakavatumira kuhondo, gumi remazana kubva kudzinza rimwe ngarimwe, ivo naFinehasi mukororo waEreaza mupristi, kuenda kuhondo, vanezviro zvokushandisa zvakachena, nemagwama okuridza munyara dzake. Navo vakarwa nevaMidhiani, kudai ngezvaakapanga Mambo Mwari kunaMosi; vakauraya veshe vamuna vavo. Vakauraya madzimambo evaMidhiani: ndiEvhi, Rekemu, Zuri, Huri naRebha, madzimambo mashanu evaMidhiani, ngepabanze pevamweni vakaurawa ndivo; zve, vakauraya Bharamu mukororo waBheo ngeshoti. VaIsuraeri vakatora veshe vakadzi vevaMidhiani nevadoko vavo, kuita hloko, vakatora n'ombe dzavo dzeshe, nezvifuyo zvavo zveshe, nezvidziyo zvavo zveshe. Vakapisha madhorobha avo eshe evaigara, nengome dzavo dzeshe ngomuriro; asi vakatora pfuma yeshe, nazveshe zvakachakatwa vanhu nezvifuyo. Zvino vakaunza vabatwa nezvakachakatwa nepfuma kunaMosi naEreaza mupristi, nokunembungano yeshe yevaIsuraeri, kukamba iri kubani raMoabhi, paJorodhani pasinde neJerikho. Mosi naEreaza mupristi, navo veshe vatungamiriri vembungano vakabuda kuenda koovaashira ngokubanze kwekamba. Mosi wakatsenekera vakuru vehondo, pamwepo nenduna dzemakumi emazana nenduna dzemazana, vakabva kuhondo. Mosi wakati kwavari, “Mwakasiya vakadzi veshe vechizwa here? Ava vakadzi ngokupanga kwaBharamu vakaita kuti vana vaIsuraeri vashaishe kunaMambo Mwari ngendaa yaPeori, ndizvo nhenda yakauya pakati pembungano yaMambo Mwari. Ndizvo zvino, urayai veshe varumbwana pakati pevana, nomukadzi weshe wakazia mwamuna ngokuatana naye. Asi veshe vanasikana vasikazi kuzia mwamuna ngokuatana naye, muvangwarire vechipona kuita venyu. Nemwi munozogara kubanze kwekamba mazuva manomwe; kunyazwi ndiani wenyu wakauraya munhu nokuti wakagwama muiri wakafa, dzichenesei pachenyu nehloko dzenyu, ngezuva rechitatu nezuva rechinomwe. Muchenese zvokufuka zvenyu, neizvo zveshe zvakaitwa ngematoo, nazvo zveshe zvakarukwa ngemviri yembudzi, nazvo zveshe zvakaitwa ngemiti.” NaEreaza mupristi wakati kuvamuna vakaenda koorwa, “Ichi ndicho chiemeso chechironzo chaakapanga Mambo Mwari kunaMosi: kwega mukore, sirivha, thusi, simbi, tini nomutovhi, chiro cheshe chisingatsvi ngomumuriro, munozoita kuti chipotedzwe ngomumuriro, chinozoita chakasukika. Zvakanyadaro chinozocheneswawo ngemvura yokuchenesa: nazvo zveshe zvinotsva ngomuriro ngazvizopinde ngomumvura. Munozosuka machira enyu ngezuva rechinomwe, munozoita vakasukika; ngesure kweizvo munozopotera mukamba.” Mambo Mwari wakaereketa kunaMosi echiti, “Iwewe naEreaza mupristi nevakuru vemhatso dzemadzibaba embungano, erengai uwandu hwezvakachakatwa zveshe, vanhu nemhuka. Uparadzanise zvakachakatwa kuita marupande mairi; pakati paavo vakarwa, avo vakaenda koorwa, nepakati pembungano yeshe. Kubva kuchikoaniswa cheavo vakaenda kuhondo, emesa parutii kuita chikoaniswa chaMambo Mwari chiro chimwe kubva pamazana mashanu, kunyazwi pavanhu, n'ombe, mbongoro makwai nembudzi. Muchitora kubva kurupande rwavo, muchipe kunaEreaza mupristi, kuita mudiro kunaMambo Mwari. Asi kubva kurupande rwevaIsuraeri, munozotora chikoaniswa chimwe pakati pemakumi mashanu chevanhu, chen'ombe, chembongoro, chemakwai nechembudzi, zvifuyo zveshe, nokuzvipa kunevaRevhi, vanongwarira mushando muthabhenakeri raMambo Mwari.” Mosi naEreaza vakaita kudai ngezvaakapanga Mambo Mwari kunaMosi. Zvakachakatwa zvakasara zvakatorwa ngevanhu vehondo, zvaiya makwai mazana matanhatu nemakumi manomwe namashanu emakumi emazana (675,000), n'ombe makumi manomwe namairi emakumi emazana (72,000), mbongoro makumi matanhatu negumi rimwe emakumi emazana (61,000), nevanhu veshe pamwepo vaiya makumi matatu namairi emakumi emazana (32,000), vakadzi vaiya vasikazi kuzia mwamuna ngokuatana naye. Norupande rwechikoaniswa cheavo vakaenda kuhondo, uwandu hwacho hwaiya makwai nembudzi mazana matatu nemakumi matatu namanomwe emakumi emazana, namazana mashanu (337,500), nechikoaniswa chaMambo Mwari chemakwai nembudzi chaiya mazana matanhatu nemakumi manomwe namashanu (675). N'ombe dzaiya makumi matatu namatanhatu emakumi emazana (36,000); nechikoaniswa chaMambo Mwari chaiya makumi manomwe namairi. Mbongoro dzaiya makumi matatu emakumi emazana nemazana mashanu (30,500); nechikoaniswa chaMambo Mwari chaiya makumi matanhatu naimwe. Vanhu vaiya gumi namatanhatu emakumi emazana (16,000); nechikoaniswa chaMambo Mwari chaiya chevanhu makumi matatu navairi. Mosi wakapa chikoaniswa, chaiya mudiro kunaMambo Mwari, kunaEreaza mupristi, kudai ngezvaakapanga Mambo Mwari kunaMosi. Nokubva kurupande rwevaIsuraeri rwaakaparadzanisa Mosi kubva kunevanhu vehondo, zvino rupande rwembungano rwaiya makwai nembudzi mazana matatu nemakumi matatu namanomwe emakumi emazana nemazana mashanu (337,500), n'ombe makumi matatu namatanhatu emakumi emazana (36,000), mbongoro makumi matatu emakumi emazana nemazana mashanu (30,500), nevanhu gumi namatanhatu emakumi emazana (16,000) Kubva kurupande rwevaIsuraeri, Mosi wakatora chikoaniswa chimwe kubva mukati mwemakumi mashanu, zveshe vanhu nezvifuyo, wakazvipa kuvaRevhi, vaingwarira mushando wethabhenakeri raMambo Mwari, kudai ngezvaakapanga Mambo Mwari kunaMosi. Zvino vakuru vaiya padera pemakumi emazana ehondo, nenduna dzaiya padera pemakumi emazana, nedzaiya padera pemazana, dzakauya kunaMosi. Navo vakati kunaMosi, “Varanda vako vakaerenga vamuna veshe vokurwa vari pashi pedu, akuzi kutamika munhu noumwe wedu. Ndizvo taunza mudiro kunaMambo Mwari, weizvo zvaakaona munhu umwe ngaumwe zvinemeso zvomukore, maketani, mabhande, ndandazi, mabhengere, ndandazi dzomunzee nousanga hwomunzee, kuita muripo womweya wedu pamberi paMambo Mwari.” Mosi naEreaza mupristi wakaashira mukore uyu kubva kwavari, zveshe zvinemeso zvakapfurwa. Nouwandu hwomukore weshe wakapirwa kunaMambo Mwari ngenduna dzemakumi emazana, nangenduna dzemazana, uremu hwazvo hwaida kuita makhirogramu mazana mairi (200). (Varwi vehondo vaiya vakadzitorera pachavo zvakachakatwa.) Ndizvo Mosi naEreaza mupristi vakaashira mukore kubva kunduna dzemakumi emazana nedzemazana, vakauisa mutende romushongano, kuita chicherechedziso kuvana vaIsuraeri pamberi paMambo Mwari. Zvino vana vaRubheni nevaGadhi vaiya nemitanga yakawanda yen'ombe. Naapo vaona nyika yaJaza nenyika yeGireadhi, kuti yaiya ndau yakanaka yen'ombe, vana vaGadhi nevana vaRubheni vakauya, vakaereketa kunaMosi naEreaza mupristi, nokuvatungamiriri vembungano vechiti, “Atarothi, Dhibhoni, Jaza, Nimira, Heshibhoni, Ereare, Sebhamu, Nebho naBheoni, nyika yaakarova Mambo Mwari pamberi pembungano yaIsuraeri, nyika yakanaka yen'ombe; nevaranda vako vane n'ombe.” Vakaangira vakati, “Kudai taona nyasha mukuona kwenyu, inyika iyi ngaipuwe kuvaranda vako kuita nhaka yedu; musatiambusa Jorodhani.” Asi Mosi wakati kuvana vaGadhi nokuvana vaRubheni, “Hama dzenyu dzinozoenda koorwa here, neimwimwi mwakagara pano? Munotyisidzira ngenyi mwoyo yevaIsuraeri kuti vasaambuka kunyika yevakapuwa ndiMambo Mwari? Ndizvo zviro zvevakaita madzibaba enyu apo pendakavatuma kubva Kadheshibharanea kuti vaone nyika. Naapo vakakwira kuenda muBani reEshikhori, vakaona nyika, vakatyisidzira mwoyo yevaIsuraeri, kuti vasazokwira kupotera munyika yaakavapa Mambo Mwari. Noushungu hwaMambo Mwari hwakabaka ngouwo mukuwo, naye wakapika echiti, ‘Ngegwinyiso akuna noumwe wevanhu avo vakakwira kubuda Egipite, vaiya vaane makore kubvira makumi mairi kuenda mberi ungazoona nyika yendakapika ndiyo kunaAbrahama, Isaka, nokunaJakobe, ngokuti avazi kunditeera ngokwakaperera, kwega Kharebhu mukororo waJefune, muKhenezi, naJoshua mukororo waNuni; ngokuti ivo vakateera Mambo Mwari ngokwakaperera.’ Noushungu hwaMambo Mwari hwakabaka kuvaIsuraeri, wakaita kuti vazungaire apo naapo mushango makore makumi marongomuna, metsa weshe mubarirwana uwo wakaita zvakashata mukuona kwaMambo Mwari vakafa. Nazvino, imwimwi mibarirwana yevashaishi, mwamiruka pandau yemadzibaba enyu, kututsira ushungu hunotyisa hwaMambo Mwari kuvaIsuraeri! Ngokuti kudai mwechizopauka kubva mukumuteera, iyezve unozovasiyazve mushango; nemwi munozouraya vanhu veshe ava.” Zvino vakauya kwaari vechiti, “Tinozoakira pano matanga en'ombe dzedu nemadhorobha evana vedu. Asi isusu ngokwedu tinozoenda takapakatira zvokurwa pamberi pevaIsuraeri, metsa tavagumisa kundau yevagari venyika iyi. Panguva iyi vana vedu vanozogara mumadhorobha anemarukumbati ngendaa yevagari venyika iyi. Atizopetuki kumizi yedu metsa vaIsuraeri umwe ngaumwe agara nhaka yake. Atizogari nhaka pamwepo navo ruseri rweJorodhani, nokuti kuenda mberi kwacho; ngokuti nhaka yedu yakapuwa kwetiri ngouno kweJorodhani ngokumabvazuva.” Ndizvo Mosi wakati kwavari, “Kudai mwechizoita ichi chiro, kudai mwechizoenda mwakapakatira zvokurwa pamberi paMambo Mwari kuenda kuhondo, mwechizoenda mweshe ruseri rweJorodhani pamberi paMambo Mwari mwakapakatira zvokurwa, metsa iye azoparadza magaa ake kubva pamberi pake, nenyika yanyiswa pamberi paMambo Mwari, zvino ngesure kwazvo munozopetuka, muite vasina ndaa pamberi paMambo Mwari nepamberi pevaIsuraeri; neiyi nyika inozoita nhaka yenyu pamberi paMambo Mwari. Asi kudai musikazoiti kudaro, mwashaisha pamberi paMambo Mwari; nasai kuzia kuti kushaisha kwenyu kunozomubata. Akanyi madhorobha evadoko venyu nematanga emakwai enyu; asi muite zvemwakagondisa ngemiromo yenyu.” Zvino vana vaGadhi nevaRubheni vakaereketa kunaMosi vechiti, “Varanda vako vanozoita kudai ngezvaakapanga mambo wedu. Vadoko vedu, vakadzi vedu, mitanga yedu nen'ombe dzedu dzeshe, zvinozogaramwo mumadhorobha eGireadhi. Asi varanda vako vanozopinda kuambuka, munhu weshe akapakatira zvokurwa ndizvo, pamberi paMambo Mwari koorwa, kudai ngezvaakaronza mambo wedu.” Ndizvo Mosi wakapanga Ereaza mupristi ngendaa yavo, naJoshua mukororo waNuni, nevakuru vemhatso dzemadzibaba vemadzinza aIsuraeri. NaMosi wakati kwavari, “Kudai vana vaGadhi nevana vaRubheni vechizoambuka nemwi Jorodhani, uwo nouwo akapakatira zvokurwa, pamberi paMambo Mwari, nenyika yechizonyiswa pamberi penyu; naapo munozovapa nyika yeGireadhi kuita nhaka yavo. Asi kudai vasikazoambuki nemwi, vakapakatira zvokurwa, vanozoane nhaka pamwepo nemwi munyika yeKhenani.” Vana vaGadhi nevana vaRubheni vakapingura vechiti, “Kudai ngezvaakaronza Mambo Mwari kuvaranda vake, ndizvo zvetinozoita. Tinozoambuka takapakatira zvokurwa pamberi paMambo Mwari, kuenda munyika yaKhenani, asi nhaka yenyika youno kweJorodhani inozogara iri yedu.” Mosi wakapa kwavari, vana vaGadhi nevaRubheni norupande rwedzinza raManase mukororo waJosefa, umambo hwaSihoni, mambo wevaAmori, noumambo hwaOgi, mambo wavaBhashani, nyika pamwepo nemadhorobha ayo, nenharaunda dzaitendenedza madhorobha. Vana vaGadhi vakaakisa Dhibhoni, Atarothi, Aroeri, Athirothishofani, Jaza, Jogibheha, Bhethinimira naBhethiharani, madhorobha akashosherwa, nematanga emakwai. Vana vaRubheni vakaakisa Heshibhoni, Ereare, Kiriathaimu, Nebho, Bhaarimeoni (mazina amweni akatsandudzirwa,) naSibhima; vakadudza mazina amweni kumadhorobha evakaaka. Mibarirwana yaMakhiri mukororo waManase vakaenda Gireadhi, vakaritora, vakadzinga vaAmori vaigara kweriri. Ndizvo Mosi wakapa Gireadhi kunaMakhiri mukororo waManase; naye wakagara kweriri. Jairi mukororo waManase wakaenda, akatora maguta, akaadudzazve kuti, “Havhothijairi.” NaNobha wakaenda, akatora Khenathi nemaguta aro, akaridudzazve ngezina rake kuti, “Nobha.” Iyi ndiyo mihambo yevana vaIsuraeri, avo vakabuda kubva kunyika yeEgipite vari muzvikwata zvavo pashi penyara yaMosi naAroni. Mosi wakanyora pakatangira mihambo yavo kudai ngokupanga kwaMambo Mwari; nouku ndikwo kuhamba kwavo kudai ngokubuda kwavo. Vakabuda kubva Ramesesi, ngomwedzi wokutanga, ngezuva regumi namashanu romwedzi wokutanga; ngechimangwani ngesure kwePhasika vana vaIsuraeri vakabuda vakashinga mukuona kwevaEgipite veshe. Naapo vaEgipite vaitsira matangwe avo eshe, vaakachaya Mambo Mwari pakati pavo. Mambo Mwari wakatonga nepadera pezvimwari zvavozve. Ndizvo vaIsuraeri vakathutha kubva Ramesesi, vakaemesa matende avo Sukothi. Vakathutha kubva Sukothi, vakaemesa matende avo Ethamu, riri kumagumo eshango. Vakathutha kubva Ethamu, vakahwirira Pihahirothi, riri pamberi peBhaarizefoni; vakaemesa matende avo pamberi peMigidhori. Vakathutha kubva pamberi pePihahirothi, vakaambuka pakati poruandhle, vakapinda mushango, vakahamba muhambo wemazuva matatu mushango reEthamu, vakaemesa matende avo paMara. Vakathutha kubva Mara, vakaguma Erimu; paErimu paiya nezvinyuka zvemvura gumi nazviiri nemiti yemibvumo makumi manomwe, vakaemesa matende avo apo. Vakathutha kubva Erimu, vakaemesa matende avo pasinde poRuandhle Rwakatsvuka. Vakathutha kubva paRuandhle Rwakatsvuka, vakaemesa matende avo mushango reSini. Vakathutha kubva mushango reSini, vakaemesa matende avo Dhofika. Vakathutha kubva Dhofika, vakaemesa matende avo paArushi. Vakathutha kubva Arushi, vakaemesa matende avo Refidhimu, apo paiya pasina mvura yokumwa. Vakathutha kubva Refidhimu, vakaemesa matende avo mushango reSinai. Vakathutha kubva mushango reSinai, vakaemesa matende avo paKibrothi-hataava. Vakathutha kubva Kibrothi-hataava, vakaemesa matende avo paHazerothi. Vakathutha kubva Hazerothi, vakaemesa matende avo paRithima. Vakathutha kubva Rithima, vakaemesa matende avo paRimoniperezi. Vakathutha kubva Rimoniperezi, vakaemesa matende avo paRibhina. Vakathutha kubva Ribhina, vakaemesa matende avo paRisa. Vakathutha kubva Risa, vakaemesa matende avo paKeheratha. Vakathutha kubva Keheratha, vakaemesa matende avo kuMutunhu weSheferi. Vakathutha kubva paMutunhu weSheferi, vakaemesa matende avo paHaradha. Vakathutha kubva Haradha, vakaemesa matende avo paMakherothi. Vakathutha kubva Makherothi, vakaemesa matende avo Thahathi. Vakathutha kubva Thahathi, vakaemesa matende avo paThera. Vakathutha kubva Thera, vakaemesa matende avo paMithika. Vakathutha kubva Mithika, vakaemesa matende avo paHashimona. Vakathutha kubva Hashimona, vakaemesa matende avo paMoserothi. Vakathutha kubva Moserothi, vakaemesa matende avo Bhenejaakani. Vakathutha kubva Bhenejaakani, vakaemesa matende avo Horhagidhigadhi. Vakathutha kubva Horhagidhigadhi, vakaemesa matende avo Jotibhatha. Vakathutha kubva Jotibhatha, vakaemesa matende avo paAbrona. Vakathutha kubva Abrona, vakaemesa matende avo Ezionigebha. Vakathutha kubva Ezionigebha, vakaemesa matende avo mushango reZini (ndikwo kuti Kadheshi). Vakathutha kubva Kadheshi, vakaemesa matende avo paMutunhu weHori, kumagumo enyika yeEdhomu. Aroni mupristi wakakwira paMutunhu weHori kudai ngokupanga kwaMambo Mwari, wakafa apo ngegore remakumi marongomuna ngesure kwokubuda kwevana vaIsuraeri kubva kunyika yeEgipite, ngezuva rokutanga romwedzi wechishanu. Aroni ingaane zana nemakumi mairi namatatu (123) emakore apo paakafa paMutunhu weHori. Mambo Aradhi muKhenani, waigara ngokubani kwenyika yeKhenani, wakazwa ngokuuya kwevana vaIsuraeri. Vakathutha kubva paMutunhu weHori, vakaemesa matende avo paZarimona. Vakathutha kubva Zarimona, vakaemesa matende avo paPunoni. Vakathutha kubva Punoni, vakaemesa matende avo Obothi. Vakathutha kubva Obothi, vakaemesa matende avo paIyeabharimu, kumugano weMoabhi. Vakathutha kubva Iyimu, vakaemesa matende avo paDhibhonigadhi. Vakathutha kubva Dhibhonigadhi, vakaemesa matende avo paArimonidhibrathaimu. Vakathutha kubva Arimonidhibrathaimu, vakaemesa matende avo kumitunhu yeAbharimu, ngepamberi peNebho. Vakathutha kubva kumitunhu yeAbharimu, vakaemesa matende avo mumarukaro eMoabhi paJorodhani pasinde neJerikho. Vakaemesa matende avo paJorodhani, kubvira Bhethijeshimothi metsa kuguma Abherishitimu mumarukaro eMoabhi. Mambo Mwari wakaereketa kunaMosi mumarukaro eMoabhi paJorodhani pasinde peJerikho echiti, “Ereketa kuvana vaIsuraeri, wechiti kwavari, ‘Apo pomunozoambuka Jorodhani kupotera munyika yeKhenani, munozodzinga veshe vagari veiyo nyika kubva pamberi penyu, munozoputsa yeshe miedzaniso yavo yemapuwe, nokuputsa yeshe miedzaniso yavo yakaumbwa, muputsire pashi ndau dzavo dzeshe dzakakwirira. Munozotora nyika yavo, mugaremwo, ngokuti ndakaipa kwomuri kuti iite nhaka yenyu. Munozokoanisa nyika ngemabhigidha kuita nhaka pakati pemadzinza enyu; kunedzinza guru munozopa nhaka huru, kunedzinza doko munozopa nhaka doko; nhaka yomunhu weshe inozoapo pandau yaanobata mabhigidha; kudai ngokuteererana kwemadzinza emadzibaba enyu munozogara nhaka dzenyu. Asi kudai musikadzingi vagari venyika kubva pamberi penyu, zvino kunozoitika kuti avo vomunotendera kuti vagare vanozoita kudai ngeminzwa inobaya mumadziso enyu, neminzwa inobaya munhii dzenyu; vanozomutambudza munyika yomunozogara. Neni ndinozoita kwomuri kudai ngezvendaipinimidza kuti ndiite kwavari.’ ” Mambo Mwari wakaereketa kunaMosi echiti, “Panga vana vaIsuraeri, wechiti kwavari, ‘Apo mwazoguma kunyika yeKhenani (iyi ndiyo nyika inozoita nhaka yenyu, nyika yeKhenani kugumira kumigano yayo), rupande rwenyu rwokubani runozoita rwokubvira ngomushango reZini kuteera mugano weEdhomu. Mugano wenyu wokubani unozotangira kumagumisiro oRuandhle rwoMunyu ngokumabvazuva; mugano wenyu unozomonerera kubva kubani, wechikwira kuguma Akrabhimu, wechidarika kuenda Zini; nokubuda kwavo kunozoita kwokubva kubani kuguma Kadheshibharanea, nokudarika kuenda Hazaradha nokudarika kuenda Azimoni; mugano unozokunukuka kukwira dera kubva Azimoni kuenda kuRwizi rweEgipite, nokutheya kwawo runozotheya muruandhle.’ “Mugano wokumabirirazuva unozogumira ngoRuandhle Rukuru; urwu ndirwo runozoita mugano wenyu wokumabirirazuva. “Nouyu unozoita mugano wenyu wedera: kubvira kuRuandhle Rukuru munozogura kururamisa noMutunhu Hori. Kubva kuMutunhu Hori munozogura mugano wenyu kururamisa ngokupotera Rebho-Hamathi, nokudarika kwomugano unozoguma Zedhadhi; nomugano unozodarika kuguma Zifroni, nokuguma kwawo kunozoita Hazarenani; uyu ndiwo mugano wenyu wedera. “Nemwi munozogura mugano wenyu wokumabvazuva kubvira Hazarenani kuguma Shefamu; nomugano unozodzaka kubva Shefamu kuguma Ribra, ngokumabvazuva kweAini, nomugano unozodzaka, wechiguma kumahumbikumbi oRuandhle rweKhinerethi ngokumabvazuva; nomugano unozodzaka kuguma Jorodhani, nawo unozodarika kuenda kuRuandhle rwoMunyu. Iyi inozoita nyika yenyu inemigano yayo yakaitendenedza.” Mosi wakapanga vana vaIsuraeri echiti, “Iyi ndiyo nyika yomunozogara nhaka ngokukoanisa kwemabhigidha, yaakapanga Mambo Mwari kuti ipuwe kumadzinza mapfumbamwe nokurupande rwedzinza; ngokuti dzinza revana vaRubheni kudai ngokuteererana kwemhatso yemadzibaba avo, vakaashira nhaka yavo; nedzinza revana vaGadhi kudai ngokuteererana kwemhatso yemadzibaba avo, vakaashira nhaka yavo; norupande rwedzinza raManase vakaashira nhaka yavo. Madzinza mairi norupande rwedzinza vakaashira nhaka yavo ngouno kwaJorodhani pasinde peJerikho ngokumabvazuva, kwakaringirana nokumabvazuva.” Mambo Mwari wakaereketa kunaMosi echiti, “Aya ndiwo mazina evamuna vanozokoanisa nyika kwomuri: ndiEreaza mupristi naJoshua mukororo waNuni. Nemwi munozotora mutungamiriri umwe kubva kunedzinza rimwe ngarimwe, kuti vakoanise nyika kuita nhaka. Aya ndiwo mazina evamuna: kudzinza raJudha, ndiKharebhu mukororo waJefune. Nokudzinza revana vaSimeoni, ndiShemueri mukororo waAmihudhi. Nokudzinza raBhenjamini, ndiEridhadhi mukororo waKhisironi. Nomutungamiriri wedzinza revana vaDhani, ndiBhuki mukororo waJogri. Nomutungamiriri wevana vaJosefa, dzinza raManase, ndiHanieri mukororo waEfodhi. Nomutungamiriri wedzinza revana vaEfuremu, ndiKemueri mukororo waShifitani. Nomutungamiriri wedzinza revana vaZebhuruni, ndiErizafani mukororo waPharnakhi. Nomutungamiriri wedzinza revana vaIsakha, ndiPharitieri mukororo waAzani. Nomutungamiriri wedzinza revana vaAsha, ndiAhihudhi mukororo waSheromi. Nomutungamiriri wedzinza revana vaNafitari, ndiPhedhaheri mukororo waAmihudhi.” Ava ndivo vaakapanga Mambo Mwari kuti vakoanise nhaka kuvana vaIsuraeri kunyika yeKhenani. Mambo Mwari wakaereketa kunaMosi mumarukaro aMoabhi paJorodhani pasinde neJerikho echiti, “Panga vaIsuraeri kuti vape kuvaRevhi rupande rwenhaka yavo, madhorobha okuti vagaremwo; munozopawo kwavari ndau yemafuro yakatendenedza madhorobha avo. Madhorobha anozoita avo kuti vagaremwo; nemafuro avo anozoita en'ombe dzavo, nezvifuyo zvavo zveshe nemhuka dzavo. Mafuro emadhorobha awo omunozopa kuvaRevhi anozoita mamitha mazana marongomuna nemakumi mashanu (450) kubva kurukumbati kubudira ngokubanze, kutendenedza dhorobha. Munozopima ngokubanze kwedhorobha kurutii rwokumabvazuva mamitha mazana mapfumbamwe (900), kurutii rwokubani nemitha mazana mapfumbamwe (900), kurutii rwokumabirirazuva mamitha mazana mapfumbamwe (900) nokurutii rwedera mamitha mazana mapfumbamwe (900); nedhorobha rinozoa ngepakati; ndau idzi dzinozoita mafuro emadhorobha avo. “Madhorobha omunozopa vaRevhi anozoerengera mukati mwawo madhorobha matanhatu okutizira kuti muponeremwo, omunozoemesera kumunhu uwo unonga azouraya munhu, kuti iye atiziremwo; nokuneaya munozotutsira amweni makumi marongomuna namairi. Ndizvo madhorobha eshe omunozopa kuvaRevhi anozoita eshe pamwepo makumi marongomuna namasere; munozoapa pamwepo nemafuro avo. Nemadhorobha omunozovapa anozoita enhaka yevana vaIsuraeri; kubva kwavari vaneakawanda, kunozobva akawanda nokunevane mashomani kunozobva mashomani; umwe ngoumwe unozopa madhorobha ake kuvaRevhi kudai ngouwandu hwenhaka yake yaanayo.” Mambo Mwari wakaereketa kunaMosi echiti, “Ereketa kunevana vaIsuraeri, wechiti kwavari, ‘Apo mwooambuka Jorodhani kupotera munyika yeKhenani, naapo munozodziemesera madhorobha okuita madhorobha okutiziramwo kwenyu; kuti uwo wauraya munhu asikadi kuuraya atiziremwo. Madhorobha anozoita kwomuri okutiziramwo kubva kunomuunzidziri, kuitira kuti uwo wakauraya munhu asazourawa, metsa aema pamberi pembungano mukutongwa.’ “Madhorobha aya omunozopa matanhatu awo anozoita madhorobha okuponeramwo. Munozopa madhorobha matatu ngoruseri rwouno rweJorodhani, nemadhorobha matatu munozoapa munyika yeKhenani, anozoita madhorobha okutiziramwo. Aya madhorobha matanhatu anozoita okuponeramwo, kuneveshe vana vaIsuraeri nomupara nechigarandimo chiri pakati pavo, kuti munhu weshe wauraya munhu asikadi ungatiziramwo. “Asi kudai munhu akachaya umweni ngesimbi, oroofa, muurayi; ngegwinyiso muurayi unozourawa. Nokudai amuchaya ngokuposhera buwe, ringaita kuti afe, naye akafa, muurayi; ngegwinyiso muurayi unozourawa. Nokuti kudai amuchaya ngendonga yomuti, ingaita kuti afe, naye akafa, muurayi; ngegwinyiso muurayi unozourawa. Muunzidziri wengazi ndiye emene unozouraya muurayi; naapo ashongana naye, unozomuuraya. Asi kudai echizomubaya ngokumuzonda, nokuti kuposhera kwaari ngokumuhwarira, naapo akafa, nokuti echimuchaya ngenyara yake ngokuita ugaa kwaari, naapo akafa; uwo wamuchaya ngegwinyiso unozourawa; ngokuti muurayi; ngegwinyiso muunzidziri wengazi unozouraya muurayi apo paanozoshongana naye. “Asi kudai umwe echizomubaya umweni chiriporipo pasina ugaa nokuti kuposhera kwaari nokuti ngechiri chiro asikazi kumuhwarira, nokuti kuposhera buwe, ringaita kuti afe ndiro, asikamuoni, roromufura kuti afe, asiri gaa rake, asaida kumukuvadza, naapo mbungano inozotonga pakati pouwo wakamuuraya, nomuunzidziri wengazi kudai ngeizvi zvitongero; nembungano inozomusunhura uwo wakauraya munhu kubva kunyara yomuunzidziri wengazi. Zvino mbungano inozomuhwirinza kudhorobha rake rokuponera raakatiziramwo. Muurayi unozogara arimwo metsa kufa kwomupristi mukuru, uwo wakadzodzwa ngemafuta akachena. Asi kudai muurayi echizouya nokuti ngouri mukuwo kumugano wedhorobha rokuponera, raakatiziramwo, nomuunzidziri wengazi echizomuona ari kubanze kwedhorobha rake rokuponeramwo, nomuunzidziri wengazi echizomuuraya, aazoane ndaa yengazi. Ngokuti muurayi unosisira kugara ari mudhorobha rokuponeramwo, metsa mupristi mukuru afe; asi ngesure kwokufa kwomupristi mukuru, muurayi unozohwirira kunyika yenhaka yake. “Ndizvo izvi zviro zvinozoita chiemeso chokutonga ndicho kwomuri mukati mwemibarirwana yenyu yeshe muugaro hwenyu hweshe. “Kudai umwe echizouraya umweni kunyazwi ngouri, muurayi unozourawawo ngokupupurirwa ngemiromo yezvapupu; asi uchapupu hwomunhu umwe ahuzoiti kuti munhu aurawe. Zve, musazotora chitengero kubva kunomuurayi unendaa inosisira kufa; ngegwinyiso muurayi unozourawa. Zve, musazotora chitengero chouwo wakatizira kudhorobha rokuponeramwo, kuti ahwirire koogara munyika yake, metsa kufa kwomupristi mukuru. Musazosvipisa nyika yomunogara; ngokuti ngazi inosvipisa nyika; akuna muripo ungaitwa wenyika, wengazi yakaparadzwa mweiri, asi kwega ngengazi youwo wakairasha. Ndizvo musasvipisa nyika yomunozogara, yendinogarawo kweiri; ngokuti Inini Mambo Mwari ndinogara pakati pevana vaIsuraeri.” Vakuru vemhatso dzemadzibaba vemadzinza emibarirwana yaGireadhi, mukororo waMakhiri, mukororo waManase, vedzinza revakororo vaJosefa, vakakwedzera pasinde, vakaereketa pamberi paMosi, nepamberi pevatungamiriri, vakuru vemhatso dzemadzibaba evana vaIsuraeri. Vakati, “Mambo Mwari wakapanga mambo wangu kuti ape nyika kuita nhaka ngemabhigidha kunevana vaIsuraeri; namambo wangu wakapangwa ndiMambo Mwari kuti ape nhaka yaZerofehadhi hama yedu kunevanasikana vake. Asi kudai vakaroorwa ngevakororo vemadzinza amweni avaIsuraeri, naapo nhaka yavo inozoduswa kubva kunhaka yemadzibaba edu, itutsirwe kunhaka yedzinza iro revanozoroorwa; ndizvo inozoduswa kubva kurupande rwenhaka yedu. Naapo rinozoguma Gore reJubiri revana vaIsuraeri, nhaka yavo inozotutsirwa kunedzinza iro revanoroorwa kweriri; ngokudaro nhaka yavo inozoduswa kubva kunhaka yedzinza remadzibaba edu.” Zvino Mosi wakapanga vana vaIsuraeri kudai ngeizwi raMambo Mwari echiti, “Mibarirwana yevana vaJosefa yanasa kuereketa zvakanaka. Izvi ndizvo zvaakapanga Mambo Mwari ngendaa yevanasikana vaZerofehadhi echiti, ‘Ngavaroorwe ngeavo vevanopinimidza kuti vakanaka; kwega ngavaroorwe mukati mwedzinza remadzibaba avo, kuitira kuti nhaka yevana vaIsuraeri aizotorwi kubva kudzinza rimwe kuenda kunerimweni; ngokuti umwe ngaumwe wevana vaIsuraeri unozobatirira kunhaka yedzinza ramadzibaba ake. Mwanasikana weshe umwe ngaumwe, unozogara nhaka kunyazwi ngeriri dzinza revana vaIsuraeri, unozoroorwa kunoumwe wemhuri yedzinza rababa ake, kuitira kuti vana vaIsuraeri vaangire kugara nhaka yemadzibaba avo. Apana nhaka inozobva kudzinza rimwe kuenda kudzinza rimweni; ngokuti umwe ngaumwe wemadzinza evana vaIsuraeri unozogara kunenhaka yake.’ ” Vanasikana vaZerofehadhi vakaita kudai ngezvaakapanga Mambo Mwari kunaMosi. Ngokuti Mahea, Thiriza, Hogira, Mirikha naNoa, vanasikana vaZerofehadhi, vakaroorwa ngevakororo vomukoma wababa avo. Navo vakaroorwa ngedzinza revakororo vaManase mukororo waJosefa, nenhaka yavo yakagara mudzinza remhatso yababa avo. Iyi ndiyo mipango nezvitongero, zvaakapanga Mambo Mwari ngenyara yaMosi kuvana vaIsuraeri vari mumabani eMoabhi paJorodhani pasinde peJerikho. Aya ndiwo mazwi aakaereketa Mosi kuvaIsuraeri veshe ngoruseri rweJorodhani vari mushango, mubani rakaringirirana neSufi, pakati pePharani neToferi, Rabhani, Hazerothi, neDhizahabhi. (Anoita mazuva gumi narimwe kuhamba kubva Horebhi, kuhamba ngenjira inoenda kuMutunhu weSeira, metsa kuguma Kadheshibharanea). Kwakaitika ngegore remakumi marongomuna, ngomwedzi wegumi noumwe, ngezuva rokutanga romwedziwo, kuti Mosi wakaereketa kunevanhu vaIsuraeri, kudai ndizvo zveshe zvaakamupanga Mambo Mwari kuti aronze kwavari; ngesure apo aiya auraya Sihoni mambo wevaAmori, waigara Heshibhoni, naOgi mambo weBhashani, waigara Ashitharothi muEdrei. NaMosi wakatanga kududzira zvironzo ari munyika yeMoabhi, ngoruseri rweJorodhani, echiti. “Mambo Mwari, Mwari wedu wakaereketa kwetiri, tiri paHorebhi echiti, ‘Mwagara nguva yakakwana pamutunhu uyu. Kunukukai zvino muhambe kuenda kumutunhu wevaAmori nokundau dzeshe dziri pasinde, Arabha, nyika yezvimitunhu, Shefera, Negebhi, nokumhiri kworuandhle, kunyika yevaKhenani neRebhanoni, metsa kumukova mukuru, rwizi Yufratesi. Wonai, ndaisa nyika pamberi penyu. Poterai kweiri mutore nhaka yenyika iyo yaakapika ndiyo Mambo Mwari kumadzibaba enyu, Abrahama, Isaka naJakobe, kupa kwavari nokunemibarirwana yavo ngesure kwavo.’ ” Neni ndakaereketa kwomuri ngouwo mukuwo ndechiti, “Andina simba inini pachangu rokumutwara ndega. Mambo Mwari, Mwari wenyu wakamuwanzisa, ndizvo nyamashi mwawanda kudai ngenyeredzi dzomudenga. Mambo Mwari, Mwari wemadzibaba enyu, ngaamuite kuti muwande ngemakumi emazana kupinda zvomuri, amufumise kudai ngezvaakamugondisa! Asi inini ndega ndingaita makonerei kutwara mitwaro yenyu inorema yehasha dzenyu? Dzitsanangurirenyi vamuna vakangwara, vanokuzia, vanoziikanwa pakati pemadzinza enyu, ndinozovaita vatongi padera penyu.” Nemwi mwakandipingura, mwechiti, “Chiro chewaereketa kwetiri chiri chakanaka kuti tichiite.” Ndizvo ndakatora vakuru vemadzinza enyu, vamuna vakangwara, nevanoziikanwa, ndikavaita vakuru padera penyu, nduna dzepadera pemakumi emazana, nduna dzepadera pemazana, nduna dzepadera pemakumi mashanu nenduna dzepadera pemakumi, nenduna dzepadera pemadzinza enyu. Neni ndakapanga vatongi venyu ngouwo mukuwo ndechiti, “Izwanyi ndaa dziri pakati pevakoma venyu, mudzitonge ngokururamisa pakati pomunhu umwe noumweni, kunyazwi nomupara waanaye. Musazoita mutsananguro kuvanhu mukutonga kwenyu; asi munozozwa ndaa yomudoko kundodai ngeyomukuru; musazotya hope yomunhu, ngokuti kugura ndaa kuri kwaMwari. Ndaa yakanyanya kumukonzera, munozoiunza kwendiri, neni ndinozoizwa.” Neni ndakamupanga ngouwo mukuwo ngeizvo zveshe zvomunozoita. Naapo takathutha kubva Horebhi, takahamba muiri shango rinotyisa remwakaona ngenjira inohamba ngemitunhu yevaAmori, kudai ngezvaakatipanga Mambo Mwari, Mwari wedu, metsa takaguma Kadheshibharanea. Ndakati kwomuri, “Mwaguma pamutunhu wevaAmori, waanozopa kwetiri Mambo Mwari, Mwari wedu. Wonai, Mambo Mwari, Mwari wenyu waisa nyika pamberi penyu; kwirai muigare, kudai ngezvaakaronza Mambo Mwari, Mwari wemadzibaba enyu, wakamugondisa; musatya nokuti kupera simba.” Mweshe mwakauya pasinde pangu, mwakati, “Tinozotuma vamuna pamberi pedu, vanozonengera nyika, nokutiunzira izwi ngenjira inosisira kuti tikwire ndiyo, nokuti ngaari madhorobha etinozopotera mwaari.” Icho chiro chakaoneka chakanaka kwendiri, neni ndakatsara vamuna gumi navairi, umwe kubva kudzinza rimwe ngarimwe. Navo vakakunukuka vakakwira kunyika yemitunhu, vakaguma muBani reEshikhori, vakarinengera, navo vakatora michero yenyika munyara dzavo, vakadzaka nayo kwetiri. Vakatiunzirazve izwi vechiti, “Inyika yakanaka iyo Mambo Mwari, Mwari wedu, yaanopa kwetiri.” Asi zvakanyadaro amuzi kuda kukwireyo. Mwakamukira mupango waMambo Mwari wenyu. Mwakagunun'una muri mumathende enyu mwechiti, “Ngokuti Mambo Mwari unotizonda, wakatibudisa kubva munyika yeEgipite, kuti atipire munyara dzevaAmori kuti vatiuraye.” Tinoenda kuri? Ngokuti hama dzedu dzatyisidzira mwoyo yedu, dzechiti, “Vanhu variyo magakanyara nokureba kupinda isisu; madhorobha makuru, akashosherwa ngemarukumbati akaguma mudenga! Takaona apo vakororo vaAnaki.” Naapo ndakati kwomuri, “Musaita maharura nokuti kuvatya. Mambo Mwari, Mwari wenyu uwo unohamba pamberi penyu, ndiye unozomurwira, kudai ndizvo zveshe zvaakamuitira munyika yeEgipite pamberi pokuona kwenyu, nomushango, apo pemwakaona njira yaakamutwara ndiyo Mambo Mwari, Mwari wenyu, kudai ngomunhu womwamuna unopakata mukororo wake, mukati mwenjira dzeshe dzemwakahamba ndidzo, metsa mwakaguma kundau iyi.” Kunyazwi zvaiya zvakadaro amuzi kugonda kunaMambo Mwari, Mwari wenyu, uwo wakamutungamirira munjira yenyu, kuti amutsvakire ndau yokuemesa mathende enyu, ngokumujekisira njira usiku ngomuriro nemasikati ngegore kumuonesa njira yomunosisira kuhamba ndiyo. Naapo Mambo Mwari azwa mazwi enyu, wakatseneka, akapika, echiti, “Ngegwinyiso akuna noumwe weiri dzinza risikazi kururama unozoona nyika yendakapika ndiyo kuti ndiipe kunemadzibaba enyu, kwega Kharebhu mukororo waJefune. Iye unozoiona, nokwaari ndinozopa nyika yaakahamba ngetsoka nokunevana vake, ngokuti iye wakateera Mambo Mwari ngokwakaperera.” Kunyazwi neni Mambo Mwari wakanditsenekera ngendaa yenyu echiti, “Newewo auzopoterimwo. Joshua mukororo waNuni, mudetseri wako, unozopoteremwo; mushingisenyi, ngokuti ndiye unozoita kuti vaIsuraeri vagare nhaka yayo. Vadoko venyu, vemwaiti, ‘Vanozoita vakachakatwa,’ vana venyu, avo nanyamashi avasati vazia kupaura pakati pezvakanaka nezvakashata, ndivo vanozopoteremwo; ndinozoipa kwavari, vanozogara nhaka yayo. Asi kwomuri kunukukai muhwirire mushango ngenjira yoRuandhle Rwakatsvuka.” Zvino imwimwi mwakapingura mwechiti, “Takashaisha kunaMambo Mwari! Tadzinasirira kukwireyo tiambane, kudai ndizvo zveshe zvaakatipanga Mambo Mwari, Mwari wedu.” Ndizvo imwimwi mweshe mwapakatira munhu weshe zvokurwa zvenyu, mwanasirira kuti mukwire kunyika yemitunhu. Mambo Mwari wakati kwendiri, “Varonzere kuti vasakwireyo, nokuti kurwa; ngokuti inini andisiri pakati penyu akadi kuti musazonyiswa ngemagaa enyu.” Kunyazwi ndakaereketa kwomuri, amuzi kundipurutana; asi mwakamukira chironzo chaMambo Mwari, mwakaita manyau mukakwira mutunhu. VaAmori vaigara munyika yemitunhu, vakabuda kurwa nemwi, vakamurumbirira, kudai ngezvedzinoita nyuchi.Vakamuparadza muSeira, metsa kuguma Horma. Naapo mwapetuka mwakachema pamberi paMambo Mwari, Mambo Mwari aazi kuzwa izwi renyu nokuti kumupurutana. Ndizvo imwimwi mwakagara muKadheshi mazuva kudai ngouwandu hwemazuva emwakagara apo. Takakunukuka tikahamba mushango ngenjira yoRuandhle Rwakatsvuka, kudai ngezvaakaereketa Mambo Mwari kwendiri; takatenderera Mutunhu Seira mazuva akawanda. Zvino Mambo Mwari wakaereketa kwendiri echiti, “Mwatenderera nyika iyi yemitunhu nguva yakwana. Kunukukirai kuenda dera, wechipanga vanhu kuti, ‘Munozohamba ngomunyika yehama dzenyu mibarirwana yaEsau, vanogara muSeira. Vanozomutya; ndizvo ngwarai. Musazoita hondo navo; ngokuti andizomupi nyika yavo, haiwa nendau yakadai ngoupamhu hwetsoka; ngokuti ndakapa Mutunhu weSeira kuita nhaka kunaEsau. Munozotenga zvokudya kubva kwavari ngemare, kuti mudye; munozotengawo mvura kubva kwavari ngemare kuti mumwe.’ Ngegwinyiso Mambo Mwari, Mwari wenyu wakamufumisa mumishando yeshe yenyara dzenyu; unozia kuhamba kwenyu mukati mweshango iri guru. Aya makore makumi marongomuna Mambo Mwari, Mwari wenyu waiya anemwi; amuzi kutama chiro. Ndizvo takahamba kupinda ngepasinde pehama dzedu vana vaEsau, avo vanogara muSeira, techisiya sure Erathi, neEzionigebha. Naapo takakumukuka tikapinda ngenjira yeshango reMoabhi, Mambo Mwari wakati kwendiri, ‘Musatambudza vaMoabhi, nokuti kurwa navo; ngokuti andizovapi nyika yavo kwomuri kuti mugare nhaka yayo; ngokuti ndakapa Ari kuvana vaRoti kuti iite nhaka yavo.’ ” (VaEmimu vaigara umwo ngenguva yakapinda, vanhu vaiya magakanyara, vakawanda, vakareba kudai ngevaAnakimu. Kudai ngevaAnakimu vaierengewa kuti vari vaRefaimu, kunyazwi vaMoabhi vakavadudza kuti vaEmimu. Zve, vaHori vaigara muSeira ngenguva yakapinda; asi vana vaEsau vakagara nhaka yavo, apo vakavauraya kubva pamberi pavo, vakagara mundau dzavo; kudai ngezvaakaita Isuraeri kunyika iri nhaka yake, yaakapuwa ndiMambo Mwari.) “Zvino mirukai, muambuke mukova Zeredhi.” Ndizvo takaambuka mukova Zeredhi. Nomukuwo wetakahamba ndiwo kubva Kadheshibharanea, metsa takaambuka mukova Zeredhi, wakaita makore makumi matatu nemasere, metsa mubarirwana wevamuna vehondo vapera kufa kubva pakati pekamba, kudai ngezvaakapika Mambo Mwari kwavari. Ngegwinyiso nyara yaMambo Mwari yaimukirana navo, kuvauraya kubva pakati pembungano, metsa vapera kufa veshe. Ndizvo kwakaitika apo veshe vamuna vehondo vapera kufa pakati pevanhu, kuti Mambo Mwari wakaereketa kwendiri echiti, “Iwewe nyamashi unozodarika mugano wevaMoabhi ngepaAri. Naapo unozokwedzera pasinde pevana vaAmoni, usazovatambudza, usazoita hondo navo, ngokuti andizokupi nyika yevana vaAmoni; ngokuti ndakaipa kunemibarirwana yaRoti kuita nhaka yavo.” (Nenyika iyo yaierengwawo kuti iri yevaRefaimu. VaRefaimu vaigaremwo ngomukuwo wekare kunyazwi vaAmoni vakavadudza kuti vaZamuzumimu, vanhu vakuru, vazhinji, vakareba, kudai ngevaAnakimu. Asi Mambo Mwari wakavauraya kubva pamberi pevaAmoni, kuti vavabvise vagare pandau yavo. Kudai nezvaakaitazve kuvana vaEsau, avo vaigara kuMutunhu Seira, auraya vaHorimu kubva pamberi pavo; navo vakagara nhaka yavo, vakagara pandau yavo, metsa nanyamashi. NavaAvhimu vaigara mumaguta, metsa kuguma Gaza, vaKafithorimu, avo vakabva Kafithori, vakavauraya, vakagara mundau yavo). “Mirukai imwimwi, muhambe muambuke mukova Arinoni. Wonai, ndamupa munyara dzenyu mambo Sihoni muAmori, mambo weHeshibhoni, nenyika yake. Ambai kuigara, murwe naye hondo. Ngeiri zuva ndinozotanga kuisa kukaruka kwenyu nokutyisa kwenyu padera penyika dzeshe dziri pashi pedenga reshe; naapo pevanozozwa mbiri ndimwi, navo vanozohuta nokukakaseka ngendaa yeimwimwi.” Ndizvo ndakatuma nhumwa kunaSihoni mambo weHeshibhoni kubva mushango reKedhemothi vanemazwi okunyarara ndechiti, “Nditendere kuti ndipinde ngomunyika yako, ndinozohamba ngomupato guru, andizopaukiri kumudyo nokuti kumuoshwe. Iwewe unozonditengesera kudya ngemare, kuti ndidye, undipe mvura ngemare, kuti ndimwe. Nditendere kwega ndihambe kupinda ngetsoka dzangu; (kudai ngemibarirwana yaEsau inogara muSeira zvevakaita kwendiri, kudaiwo ngevaMoabhi vanogara muAri;) metsa ndiambuke Jorodhani kupinda munyika yetinopuwa ndiMambo Mwari, Mwari wedu.” Asi Sihoni mambo waHeshibhoni aazi kutitendera kuti tihambe kudarika ngomunyika yake, ngokuti Mambo Mwari, Mwari wenyu wakakonzisa mwoyo wake, akaita kuti mwoyo wake ukukutare, kuti amupe munyara dzenyu, kudai ngezvaaita nyamashi. Mambo Mwari wakati kwendiri, “Wona, ndatanga kupa Sihoni nenyika yake pamberi pako. Ambai kuigara, kuti mugare nhaka yenyika yake.” Ndizvo apo Sihoni paakabuda kurwa nesu, iye nevanhu vake veshe kurwa nesu paJahazi, Mambo Mwari, Mwari wedu wakamupa kwetiri; nesu takamuuraya nevakororo vake nevanhu vake veshe. Takatora madhorobha eshe ngouwo mukuwo, takapedza kuuraya veshe vamuna nevakadzi nevana vemadhorobha eshe. Atizi kusiya noumwe echipona. Zvega zvifuyo takazvitora kuita zvakachakatwa zvedu temene, nezvakachakatwa zvemadhorobha awo etakanyisa. Inga kusina dhorobha raiya nesimba kupinda isusu, kubvira Aroeri, riri kumahumbikumbi oRwizi Arinoni, nokubvira dhorobha riri pasinde porwizi, metsa kuguma Gireadhi. Mambo Mwari, Mwari wedu wakaapa eshe kwetiri. Kwega amuzi kuguma kunyika yevana vaAmoni, nokuti kundau kunyazwi ngeiri yoRwizi Jabhoki, nokuti kumadhorobha ari munyika yemitunhu, nokuti kuneizvo zvaakatirambidza Mambo Mwari, Mwari wedu. Naapo takakunukuka takakwira munjira inoenda Bhashani; naOgi mambo weBhashani wakauya kurwa nesu, iye nevanhu vake veshe, paEdrei. Mambo Mwari wakati kwendiri, “Musamutya, ngokuti ndamupa iye nevanhu vake veshe, nenyika yake munyara dzenyu, nemwi munozoita kwaari kudai ngezvemwakaita kunaSihoni mambo wevaAmori, uwo waitonga muHeshibhoni.” Ndizvo Mambo Mwari, Mwari wedu wakapawo Ogi mambo weBhashani munyara dzedu nevanhu vake veshe. Takavauraya veshe metsa akuzi kusara nomunhu noumwe. Takatora madhorobha ake eshe ngouwo mukuwo; akuzi kusara nedhorobha narimwe retisikazi kutora kubva kwavari, aiya madorobha makumi matanhatu, yeshe nharaunda yaArigobhi, umambo hwaOgi muBhashani. Eshe aya madhorobha aiya akashosherwa ngemarukumbati akareba, misiwo yakapetwa nemipiningidzo, ngepabanze pemaguta akawanda kakurutu aiya asikazi kushosherwa. Nesu takaaparadza, kudai ngezvetakaita Sihoni mambo weHeshibhoni, takavapedza yaamho vamuna, nevakadzi nevana, kubva kumaguta eshe. Asi zvifuyo zveshe, nezvakachakatwa zvemadhorobha, takazvitora kuita zvedu. Ndizvo ngouwo mukuwo takatora kubva munyara dzemadzimambo mairi evaAmori, nyika dzaiya ngoruseri rweJorodhani, kubvira kuRwizi rweArinoni metsa kuguma kuMutunhu Hermoni, (uwo Mutunhu Hermoni unodudzwa ngevaSidhoni kuti Sirioni, nengevaAmori kuti Seniri,) eshe madhorobha endau dzakakwirira, nao eshe eGireadhi, nao eshe eBhashani, metsa kuguma Sareka naEdrei, madhorobha oumambo hwaOgi muBhashani. (Ngokuti kwega Ogi mambo weBhashani waiya asara ari weavo vakasara vari veRefaimu; penyai mubhedhi wake waiya wesimbi; aurimwo here muRabha revana vaAmoni? Kureba kwawo kwaiya mamitha marongomuna, nokufara kwawo kwaiya mamitha mairi kudai ngechipimo chaishandiswa nguveyo.) Neiyi nyika yetakatora ngouwo mukuwo, kubvira dera kweAroeri, riri pasinde poRwizi Arinoni, norupande rwomutunhu Gireadhi, nemadhorobha awo, ndakapa kunevaRubheni nevaGadhi. Neyakasara yeGireadhi, neBhashani reshe, idzo dziri umambo hwaOgi, ndakazvipa kunorupande rwedzinza raManase; (yeshe nharaunda yaArigobhi, neBhashani reshe, yaidaidzwa kuti inyika yemagakanyara. Jairi mukororo waManase wakatora nyika yeshe yeArigobhi metsa kuguma kumigano yeGeshuri naMaakathi; wakaidudza ngezina rake kuti Bhashani Havhothijairi metsa nanyamashi.) Neni ndakapa Gireadhi kunaMakhiri. NokunevaRubheni nokunevaGadhi ndakavapa nyika kubvira Gireadhi metsa kuRwizi Arinoni rupande rwokubani nomugano waro, metsa ugume kumukova Jabhoki, uwo uri mugano wevana vaAmoni; zve, Arabha neJorodhani, nehumbikumbi yarwo, kubvira Khinerethi metsa kuguma kuRuandhle rwoMunyu, kubani kwePhisiga ngokumabvazuva. Ndakamupanga ngouwo mukuwo ndechiti, “Kunyazwi Mambo Mwari, Mwari wenyu, akamupa iyi nyika kuti mugare nhaka yayo, munozopinda mberi kwehama dzenyu vaIsuraeri, veshe venyu vanokona kubuda kuhondo, mwakapakatira zvokurwa. Asi vakadzi venyu, nevana venyu, nezvifuyo zvenyu, (ngokuti ndinozia kuti mune zvifuyo zvakawanda,) zvinozosara mumadhorobha enyu endakamupa, metsa Mambo Mwari azopa kuzorora kuhama dzenyu, kudai ngezvaakapa kwomuri, metsazve ivo nemwi vagare nhaka yenyika yaakapa kwavari Mambo Mwari, Mwari wenyu ruseri rweJorodhani, naapo munozopetuka munhu weshe kunhaka yake yendakamupa.” Ndakapanga Joshua ngouwo mukuwo ndechiti, “Madziso ako akaona izvo zveshe zvaakaita Mambo Mwari kuneaya madzimambo mairi; ngokudaro Mambo Mwari unozoita kuumambo hweshe hwomunozopotera kwohuri. Amuzovatyi akadi, ngokuti Mambo Mwari, Mwari wenyu unozomurwira.” Ndakapota Mambo Mwari ngouwo mukuwo ndechiti, “A Mambo Mwari, Mwari, iwewe wakatanga kupangidzira ukuru hwako, nenyara yako inesimba kunomuranda wako; ngokuti chiri pari chimwari mudenga nokuti munyika chingaita kudai ngemishando yako, nokudai ngesimba rako? Ndinokupota, nganditenderwe kuti ndiambuke, ndione nyika yakanaka iri ngoruseri rweJorodhani, uwo mutunhu wakanaka neRebhanoni.” Asi Mambo Mwari wakanditsenekera ngendaa yenyu, aazi kundizwa. Mambo Mwari wakati kwendiri, “Zvakwana kubva kwouri! Usachazoereketa kwendiri ngeiyi ndaazve! Kwira padera pomutunhu Phisiga, umirudze madziso ako ngokumabirira nedera nokubani nokumabvazuva; uiringire ngemadziso ako, ngokuti auzoambuki iri Jorodhani. Asi panga Joshua, umushingise nokumugwinyisa; ngokuti ndiye unozotungamirira ava vanhu kuambuka, unozovaita kuti vagare nhaka yenyika younozoona ngemadziso ako.” Ndizvo takagara mubani rakaita maringwa neBhethipeori. Ndizvo zvino izwanyi, imwimwi vaIsuraeri, kuzviemeso nezvitongero zvendinomudzidzisa, kuti muzviite, kuti mupone nokupoteramwo, mugare nhaka yenyika yemwakapuwa ndiMambo Mwari, Mwari wemadzibaba enyu. Amuzotutsiri kumazwi ao endinomupanga, zve, amuzodusi chiro kutsonza kubva kwaari, asi mungwarire mipango yaMambo Mwari, Mwari wenyu, yendinomupanga. Madziso enyu akaona zvaakaita Mambo Mwari ngendaa yeBhaaripeori; ngokuti vanhu veshe vakateera Bhaaripeori, Mambo Mwari, Mwari wenyu, wakavauraya kubva pakati penyu; asi imwimwi mwakanamatira kunaMambo Mwari, Mwari wenyu, muchapona mweshe metsa nanyamashi. Penyai, ndakamudzidzisa zviemeso nezvitongero, eya, kudai ngezvaakandipanga Mambo Mwari, Mwari wangu, kuti muzozviita munyika yomunoenda koogara nhaka. Ndizvo zvingwarirenyi muzviite, ngokuti izvi ndikwo kungwara kwenyu nokuzwisisa kwenyu mukuona kweavo madzinza anozozwa izvi zviemeso zveshe, nokuronza kuti, “Ngegwinyiso iri dzinza guru riri rakangwara, rinokuzwisisa!” Ngokuti riri pari dzinza rakakura kudai, iro rinechimwari pasinde paro, kudai ndiMambo Mwari, Mwari wedu apo tinokumbira kwaari? Riri pari dzinza rakakura kudai rinezviemeso nezvitongero zvakarurama kudai ngeizvi zvironzo zvendaisa pamberi penyu nyamashi? Kwega dzingwarirenyi, mungwarire mweya yenyu kakurutu, kuti musazokanganwa zvemwakaona ngemadziso okupona kwenyu; asi zvidzidzisenyi kuvakororo venyu nevana vevakororo venyu, kakurutu zuva iro remwakaema ndiro pamberi paMambo Mwari, Mwari wenyu, muHorebhi, apo Mambo Mwari wakati kwendiri, “Ndiunganidzire vanhu pamwepo, ndinozoita kuti vazwe mazwi angu, vadzidze kunditya mazuva eshe okupona kwavo munyika, zve, kuti vadzidzise kuvana vavo.” Imwimwi mwakakwedzera pasinde mukaema ngepashi pomutunhu, nomutunhu wakabaka muriro kuguma pakati mumukana mudenga remene, wakafukidzwa ngemakore, akasvipa. Zvino Mambo Mwari wakaereketa kwomuri ari mukati mwomuriro. Mwakazwa bope remazwi, asi amuzi kuona muedzaniso wechiro; kwaiya neizwi rega. Wakaronza kwomuri chitenderano chake, chaakamupanga kuti muite, ndiyo mipango iri gumi; wakazvinyora pamarusamba mairi emapuwe. NaMambo Mwari wakandipanga ngouwo mukuwo kuti ndimudzidzise zviemeso nezvitongero, kuti muzviite munyika yomunoenda koogara nhaka. Ndizvo nasai kudzingwarira, ngokuti amuzikuona muedzaniso wechiro ngezuva raakaereketa Mambo Mwari, Mwari wenyu, kwomuri muHorebhi kubva pakati pomuriro, kuti musazodzishaishira, ngokudziitira muedzaniso wakatsetswa, muedzaniso nokuti ngowomuiri, muedzaniso womunhu womwamuna nokuti womukadzi, muedzaniso wemhuka kunyazwi ngeiri iri munyika, muedzaniso weshiri kunyazwi ngeiri inemaphaphiro, inombururuka mudenga, muedzaniso wechiro kunyazwi ngechiri chinogwezva pamavhu, muedzaniso wehove kunyazwi ngeiri, iri mumvura ngepashi penyika. Naapo mwomirudza madziso enyu mudenga nokuona zuva, mwedzi, nyeredzi, hondo yeshe yomudenga, musazopauswa nokugwadama kuidira nokuishandira, zviro zvaakapa Mwari kumadzinza eshe ari pashi pomudenga. Asi Mambo Mwari wakamutora imwimwi, wakamubudisa kubva muchoto chesimbi, kubva Egipite, kuti muite kwaari vanhu vanogara nhaka, kudai ngezvezviri azvo nyamashi. Zve, Mambo Mwari wakanditsenekera ngendaa yenyu, wakapika kuti ndisazoambuka Jorodhani, kuti ndisazopinda munyika yakanaka, yemwakapuwa ndiMambo Mwari, Mwari wenyu, kuita nhaka kwomuri. Ngokuti ndinozofira munyika iyi, andingaambuki Jorodhani; asi imwimwi munozoambuka, nokugara nhaka yeiyo nyika yakanaka. Ndizvo ngwarai kuti musazoriyarwa chitenderano chaMambo Mwari, Mwari wenyu, chaakaita kwomuri, nokudziitira muedzaniso wakatsetswa nokuti mutodzaniso nokuti ngowechiri chiro chaakamurambidza Mambo Mwari, Mwari wenyu. Ngokuti Mambo Mwari, Mwari wenyu, muriro unopisha, ndiMwari unendurumwa. Naapo munozobereka vana nevana vevana venyu, nemwi mwechizogara mukuwo wakareba munyika, mwechizodzishaishira, nokuita muedzaniso wakatsetswa, nokuti mutodzaniso wechiro kunyazwi ngechiri, mwechizoita zvakashata mukuona kwaMambo Mwari, Mwari wenyu, kumusa ushungu hwake, ndinodaidza denga nenyika kuti zviite zvapupu kwomuri nyamashi, kuti ngokukasira munozopera mweshe kubva kunyika yomunoambuka Jorodhani kooigara; amuzowanzi mazuva enyu mukati mwayo, asi munozopera yaamho kuparadzwa. Mambo Mwari unozomuparadzira mukati mwemadzinza eshe; munozosara muri vashomani pakati pevasikadiri Mwari, kundau dzaanozomuisa Mambo Mwari. Naapo munozoshandira zvimwari zvimweni zvakaitwa ngenyara dzevanhu, zviri zvemiti nezvemapuwe, zvisikakoni kuona, nokuti kuzwa, nokuti kudya, nokuti kufemba. Kubva apo munozotsvaka Mambo Mwari, Mwari wenyu, munozomuona, kudai mwechizomutsvaka ngomwoyo yenyu yeshe, nomweya yenyu yeshe. Naapo muri mukutambudzika, neizvi zviro zveshe zvinozouya padera penyu ngemazuva achauya, munozopetuka kunaMambo Mwari, Mwari wenyu, mwechizopurutana izwi rake. Ngokuti Mambo Mwari, Mwari wenyu, ndiMwari unenyasha, aazomusii, nokuti kumuuraya, nokuti kuriyarwa chitenderano chemadzibaba enyu chaakapika kwavari. Ngokuti bvunzai ngemazuva akapinda, aiya pamberi penyu kubvira kuzuva raakasika Mwari vanhu padera penyika; mubvunze kubvira kurutii rumwe rwomudenga metsa kunorumweni, kuti kwaiyapo here chiro chakadai ngeichi chiro chikuru, nokuti kwakambozwika chakadaro here? Varipo here vanhu vakambozwa izwi raMwari rechiereketa kubva mumuriro, kudai ngezvemwakarizwa imwimwi, vakapona? Nokuti mwari umweni wakamboedza kuenda nokudzitorera pachake dzinza rimweni, kubva pakati pedzinza rimweni, ngezviedzo, ngezvioniso neminana, ngokurwa, ngenyara inesimba nomuoko wakatambanudzwa, ngezvioniso zvesimba rinotyisa, kudai ngeizvo zveshe zvaakamuitira Mambo Mwari, Mwari wenyu, muEgipite, pamberi pokuona kwenyu? Izvi zvakapangidzirwa kwomuri, kuti muzie kuti Mambo Mwari uri Mwari; akunazve umweni ngepabanze pake. Wakaita kuti muzwe izwi rake kubva ari mudenga, kuti amudzidzise; nepadera penyika wakamupangidza muriro wake mukuru, nemwi mwakazwa mazwi ake ari pakati pomuriro. Ngokuti iye wakada madzibaba enyu, ndizvo wakatsanangura rudzi rwavo runoteera ngesure kwavo, naye wakamubudisa kubva Egipite mukuona ngesimba guru, kudzinga madzinza aiya pamberi penyu ari makuru nokupinda simba kuneimwimwi, kuti amupotedze umwo nokumupa nyika yavo kuti iite nhaka yenyu, kudai ngezvezvakadaro nyamashi. Ndizvo, ziai nyamashi, mupinimidze mumwoyo mwenyu, kuti Mambo Mwari ndiMwari mudenga padera nomunyika pashi; akunazve umweni. Ndizvo munozongwarira zviemeso zvake nemipango yake, zvendakamupanga nyamashi, kuti zvinake kwomuri nevana venyu veshe vanozoteera sure kwenyu, kuti muzowanza mazuva okupona kwenyu munyika, yaanomupa Mambo Mwari, Mwari wenyu, mhera nariini. Naapo Mosi wakaemesa madhorobha matatu ari ngouno kworuseri kweJorodhani ngokumabvazuva, kuti muurayi azotiziremwo, unonga auraya muakirwana wake asikadi, aiya asikamuzondi ngepamberi; kuti ngokutizira kurimwe raaya madhorobha ungapona: ari Bheza riri mushango, munyika yepadera yevaRubheni; naRamothi riri muGireadhi revaGadhi, naGorani riri muBhashani revaManase. Ichi ndicho chironzo chaakaisa Mosi pamberi pevaIsuraeri. Izvi ndizvo zvapupu nezviemeso nemipango, zvaakaereketa Mosi kuvaIsuraeri ngesure vabuda kubva muEgipite, vari ngoruseri rweJorodhani, mubani rakaringirana naBhethipeori, munyika yaSihoni mambo wevaAmori, waigara muHeshibhoni, uwo wakanyiswa ndiMosi nevaIsuraeri ngesure vabuda kubva munyika yeEgipite. Navo vakagara munyika yake nenyika yaOgi mambo wavaBhashani, madzimambo mairi avaAmori, vaiya ngoruseri rweJorodhani ngokumabvazuva: kubvira Aroeri, iro riri pasinde pehumbikumbi yorwizi Arinoni metsa kuguma Mutunhu Sirioni, uwo uri Hermoni, pamwepo neArabha reshe ngokumabvazuva kweJorodhani, metsa kuguma kuruandhle rweArabha, ngokubani kwemabandanda ePhisiga. NaMosi wakadaidza vaIsuraeri veshe, akati kwavari: “Izwai, imwimwi vaIsuraeri, zviemeso nezvitongero, zvendinoereketa munzee dzenyu nyamashi, kuti muzvidzidze, nokuzvingwarira nokuzviita kakurutu. Mambo Mwari, Mwari wedu, wakaita chitenderano nesu paHorebhi. Mambo Mwari aazi kuita chitenderano ichi nemadzibaba edu, asi neisusu, isusu tiri pano tichapona ngeiri zuva. Mambo Mwari wakaereketa nemwi hope kuhope pamutunhu kubva ari pakati pomuriro. (Ndakaema pakati penyu naMambo Mwari ngouwo mukuwo, kuti ndimupangidzire izwi raMambo Mwari; ngokuti imwimwi mwaiya mwechitya ngendaa yomuriro, amuzi kukwira pamutunhu.) Wakati. “Ndiri Mambo Mwari, Mwari wako, uwo wakakubudisa kubva kunyika yeEgipite, kubva mumhatso youhloko. “Usazoa nezvimwari zvimweni pamberi pangu. “Usazodziitira muedzaniso wakatsetswa, kunyazwi mutodzaniso nokuti wechiro chiri padera mudenga, nokuti chiri pashi munyika, nokuti chiri mumvura pashi penyika. Usazodzikotamisa pashi kwezviri, nokuti kuzvidira; ngokuti inini Mambo Mwari, Mwari wako, ndiri Mwari unendurumwa, ndechiunzidzira kushata kwemadzibaba padera pevana metsa kumubarirwana wechitatu nowechirongomuna waavo vanondiramba, asi ndechipangidzira nyasha kunevari makumi emazana eavo vanondida nokungwarira mipango yangu. “Usazoshandisa zina raMambo Mwari, Mwari wako, ngenjira isina shwiro, ngokuti Mambo Mwari aazomuiti usina ndaa uwo unoshandisa zina rake ngenjira isina shwiro. “Ngwarira zuva reSabatha kurichenesa, kudai ngezvaakakupanga Mambo Mwari, Mwari wako. Mazuva matanhatu unozoshanda uite mishando yako yeshe. Asi zuva rechinomwe iSabatha kunaMambo Mwari, Mwari wako; usazoita mushando nokuti ngouri ngeiro zuva, iwewe nokuti mukororo wako, nokuti mwanasikana wako, nokuti hloko yako yomwamuna nokuti yomukadzi, nokuti n'ombe yako, nokuti mbongoro yako, nokuti chimwe chezvifuyo zvako, nokuti muhambi uri mukati mwemadhorobha ako; kuti hloko yako yemwamuna noyomukadzi yako vazorore kudai ndiwe. Ucherechedze kuti iwewe waiya hloko munyika yeEgipite, nokuti Mambo Mwari, Mwari wako, wakakubudisa kubvemwo ngenyara inesimba nomuoko wakatambanudzwa; ndizvo Mambo Mwari, Mwari wako, wakakupanga kuti ungwarire zuva reSabatha. “Remeredza baba ako namai ako, kudai ngezvaakapanga Mambo Mwari, Mwari wako, kuti mazuva ako awanzwe, zve, kuti zvinake kwouri munyika yaanopa kwouri Mambo Mwari, Mwari wako. “Usazouraya. “Usazoomba. “Usazoba. “Zve, usazoita chapupu chokunyepa kunomuakirwana wako. “Zve, usazoemura mukadzi womuakirwana wako, zve usazoemura mhatso yomuakirwana wako, nokuti munda wake, nokuti hloko yake yomwamuna, nokuti yomukadzi yake, nokuti kabi yake, nokuti mbongoro yake, nokuti chiro kunyazwi ngechiri chomuakirwana wako.” Mambo Mwari wakaereketa aya mazwi kumbungano yenyu yeshe pamutunhu kubva ari pakati pomuriro, nepegore, nepechidima chikurutu, ngeizwi guru, naye aazi kututsira zvimweni. Wakazvinyora pamarusamba mairi emapuwe, aakapa kwendiri. Kwakaitika apo mwazwa izwi kubva pakati pechidima chikurutu, ngokuti mutunhu wakabaka ngomuriro, kuti imwimwi mwakakwedzera pasinde kwendiri, vatungamiriri vemadzinza enyu nevakuru venyu. Mwakati, “Ringira, Mambo Mwari, Mwari wedu, watipangidzira uthende hwake nokukura kwake, nesu tazwa izwi rake rechibva pakati pomuriro. Taona nyamashi kuti Mambo Mwari ungaereketa nomunhu, naye akasara echipona. Ndizvo zvino, tingafa ngenyi? Ngokuti uyu muriro mukuru unozotipedza; kudai techizozwazve izwi raMambo Mwari, Mwari wedu, naapo tinozofa. Ngokuti uri pari pakati pevanhu veshe wakambozwa izwi raMwari unopona rechiereketa kubva pakati pomuriro kudai tisu, oroopona? Kwedzera iwewe pasinde, uzwe zveshe zvaanozoereketa Mambo Mwari, Mwari wedu. Unozotironzera zveshe zvaanoereketa Mambo Mwari, Mwari wedu, kwouri; nesu tinozozvizwa nokuzviita.” Mambo Mwari wakazwa kuereketa kwemazwi enyu, emwakaereketa kwendiri, naMambo Mwari wakati kwendiri, “Ndazwa mazwi okuereketa kwaava vanhu, evakaereketa kwouri; vakanasa kuereketa zveshe zvevakaereketa ndizvo. A kudai kungaapo mukati mwavo mwoyo wokunditya, nokungwarira mukuwo weshe mipango yangu yeshe, kuti zvinake kwavari, nokuvana vavo kunoti mhera nariini! Enda, uerekete kwavari wechiti, ‘Hwirirai kumatende enyu.’ Asi iwewe unozoema pano kwendiri, neni ndinozoereketa kwouri yeshe mipango nezviemeso nezvitongero, zvounozovadzidzisa, kuti vazozviita vari munyika yendinovapa kuti vagare nhaka yayo.” Ndizvo munozongwarira kuita kudai ngezvaakamupanga Mambo Mwari, Mwari wenyu; musazopauka kuenda kumudyo nokuti kumuoshwe. Munozohamba ngenjira dzeshe dzaakamupanga Mambo Mwari, Mwari wenyu, kuti mupone, kuti zvinake kwomuri, kuti muwanzwe mazuva enyu muri munyika yomunozogara nhaka yayo. Zvino iyi ndiyo mipango nezviemeso nezvitongero, zvaakandipanga Mambo Mwari, Mwari wenyu, kuti ndimudzidzise, kuti muzviite muri munyika yomunoenda koogara nhaka yayo, kuti mutye Mambo Mwari, Mwari wenyu, kuti mungwarire zviemeso zvake zveshe nemipango yake, yendinokupanga, iwewe nomukororo wako, nomukororo womukororo wako, eshe mazuva okupona kwako, kuti mazuva ako awanzwe. Ndizvo izwai, imwimwi vaIsuraeri, mungwarire kuzviita kuti zvinake kwomuri, kuti muwanziswe kakurutu, kudai ngezvaakamugondisa Mambo Mwari, Mwari wemadzibaba enyu, munyika inoerera mukaka nouchi. Izwanyi, A iwewe Isuraeri: Mambo Mwari, Mwari wedu ndiMambo Mwari umwe. Newe unozomuda Mambo Mwari, Mwari wako, ngomwoyo wako weshe, ngomweya wako weshe, nesimba rako reshe. Ngwarira mazwi aya endinokupanga nyamashi mumwoyo mwako. Newe unozonasa kudzidzisa vana vako, uerekete ndiwo apo wechigara mumhatso yako, naapo wechihamba munjira, naapo woata pashi, naapo wopirimuka. Newe unozoasunga panyara yako kuti aite chioniso, anozoita kudai ngemundanyara unechibhokisi pamberi pamadziso ako, newe unozoanyora pasika dzemhatso yako nepamisiwo yako. Naapo Mambo Mwari, Mwari wenyu, echizomupotedza munyika yaakapika ndiyo kumadzibaba enyu, kunaAbrahama, nokunaIsaka, nokunaJakobe, kuti amupe, nyika inemaguta akanaka, maguta makuru, omusikazi kuaka, mhatso dzakazara ngezviro zveshe zvakanaka, dzomusikazi kuzadza, nezvinyuka zvakatsiwa, zvomusikazi kutsa, neminda yemivhini, nemiti yemiorivhi, isikazi kusimwa ndimwi, naapo munozodya, mwechiguta, ngwarai kuti musazoriyarwa Mambo Mwari uwo wakamubudisa kubva munyika yeEgipite, kubva mumhatso youhloko. Munozotya Mambo Mwari, Mwari wenyu, mumudire, munozopika ngezina rake. Musazoteera zvimwari zvimweni zvevanhu vakamutendenedza, ngokuti Mambo Mwari, Mwari wenyu, uwo unemwi ndiMwari unendurumwa; kuti ushungu hwaMambo Mwari, Mwari wenyu, husazobaka pakati penyu, nokumupedza kubva padera penyika. Musazoedza Mambo Mwari, Mwari wenyu, kudai ngezvemwakamuedza muri muMasa. Munozonasa kungwarira mipango yaMambo Mwari, Mwari wenyu, nezvapupu zvake, nezviemeso zvake zvaakamupanga. Newe unozoita zvakarurama nezvakanaka mukuona kwaMambo Mwari, kuti zvinake kwouri, kuti upotere ugare nhaka yenyika yakanaka yaakapika Mambo Mwari kumadzibaba ako, kudzinga eshe magaa ako kubva pamberi pako, kudai ngezvaakaereketa Mambo Mwari. Naapo mukororo wako echizokubvunza ngomukuwo unouya echiti, “Izvi zviemeso nezvapupu nezvitongero zvinoronzenyi, izvo zvaakamupanga Mambo Mwari, Mwari wedu?” Naapo unozoti kunevana vako, “Taiya tiri hloko dzaFaro muEgipite, asi Mambo Mwari wakatibudisa kubva muEgipite ngenyara inesimba. Naapo Mambo Mwari wakapangidzira zvioniso, nemishamiso mikuru neinotambudza, padera peEgipite, nepadera paFaro, napadera pemhatso yake yeshe mukuona kwedu. Wakatibudisa kubvemwo, kuti atiunze, kutipinza munyika yaakapika kunemadzibaba edu. NaMambo Mwari wakatipanga kuti tiite zveshe izvi zviemeso, kuti titye Mambo Mwari, Mwari wedu, kuti zviite zvakanaka kwetiri nguva dzeshe, kuti atingwarire techipona kudai ngezvezvakandodaro nanyamashi. Kudai techiita zveshe zvemipango pamberi paMambo Mwari, Mwari wedu, kudai ngezvaakatipanga, tinozoita vakarurama.” Naapo Mambo Mwari, Mwari wenyu, anozonga amupotedza munyika yomunoenda kooigara nhaka, nokudzinga madzinza mazhinji kubva pamberi penyu, vaHiti, nevaGirigashi, nevaAmori, nevaKhenani, nevaPherizi, nevaHivhi, nevaJebhusi, madzinza manomwe makuru anesimba kupinda imwimwi, naapo Mambo Mwari, Mwari wenyu, echizovapa kwomuri, nemwi mwechizovanyisa munozovabaya kuvapedza yaamho. Musazoita chitenderano navo nokuti kuvaitira nyasha. Zve, musazoroodzana navo; musazopa vanasikana venyu kunavakororo vavo, nokuti kutora vanasikana vavo kupa vakororo venyu, ngokuti vanozopaukisa vakororo venyu kubva kwokunditeera, kuti vashandire zvimwari. Ngokudaro ushungu hwaMambo Mwari hunozobaka kwomuri, humupedze paripo. Asi munozoita izvi kwavari: munozoputsa maarita avo, mupwanyire pashi miedzaniso yavo, nokutemera pashi makwasha avo okudira, nokupisha miedzaniso yavo yakanyunguruswa ngomuriro. Ngokuti imwimwi muri dzinza rakachena kunaMambo Mwari, Mwari wenyu; Mambo Mwari, Mwari wenyu, wakamutsanangura kuti muite dzinza riri pamwoyo wake, kupinda madzinza eshe ari padera penyika. Mambo Mwari aazi kuisa rudo rwake padera penyu, nokuti kumutsanangura ngokuti mwaiya mwakapinda kuwanda kunemadzinza amweni; ngokuti mwaiya vashomani kunemadzinza eshe. Asi ngokuti Mambo Mwari wakamuda, nokungwarira mhiko yaakapika kumadzibaba enyu, ndizvo Mambo Mwari wakamubudisa ngenyara inesimba, wakamuripira kubva kumhatso youhloko, kubva kunyara yaFaro mambo weEgipite. Ndizvo ziai kuti Mambo Mwari, Mwari wenyu, ndiye Mwari, Mwari wakagondeka, unongwarira chitenderano nenyasha kwavari vanomuda nokungwarira mipango yake metsa kumibarirwana iri gumi remazana, echiunzidzira kwavari vanomuramba. Aazononoki kuunzidzira avo vanomuramba. Ndizvo munozongwarira mipango nezviemeso nezvitongero, zvendinomupanga nyamashi, kuti muzviite. Kudai mwechipurutana kuneizvi zvitongero, nokuzvingwarira, nokuzviita Mambo Mwari, Mwari wenyu, unozongwarira chitenderano nenyasha zvaakapika kunemadzibaba enyu; naye unozomuda, amufumise, amuwanze; zve, unozofumisa vanobarwa ndimwi nemichero yeminda yenyu, nezviyo zvenyu, nevhini renyu, nemafuta enyu, nezvinoberekwa ngen'ombe dzenyu, nemitanga yehwai dzenyu, munyika iyo yaakapika ndiyo kunemadzibaba enyu kuipa kwomuri. Nemwi munozofumiswa kupinda vanhu veshe; akuzoapo munhu womwamuna nokuti womukadzi usikazobereki pakati penyu, nokuti pakati pezvifuyo zvenyu. Mambo Mwari unozodusa nhenda dzeshe kubva pakati penyu; aazoisizve padera penyu nokuti ngeiri nhenda dzeEgipite dzomunozia, asi unozodziisa padera peavo veshe vanomuzonda. Nemwi munozopedza vanhu veshe vaanozopa kwomuri Mambo Mwari, Mwari wenyu. Musazovazwira urombo; zve, musazodira zvimwari zvavo, ngokuti icho chinozoita murau kwomuri. Kudai mwechizoronza mumwoyo mwenyu kuti, “Aya madzinza ari akawanda kupinda isusu. Tingavaita madzingirenyi?” Musazovatya. Asi munozonasa kukarakadza chaakaita Mambo Mwari, Mwari wenyu, kunaFaro nomunyika yeshe yeEgipite, zviedzo zvikuru zvemwakaona ngemadziso enyu, zvioniso nemishamiso, nyara inesimba nomuoko wakatambanudzwa, waakamubudisa ndiwo Mambo Mwari, Mwari wenyu. Mambo Mwari, Mwari wenyu, unozoitazve zvakadaro kuneava vanhu veshe vanomutya. Zve, Mambo Mwari, Mwari wenyu, unozotuma mago pakati pavo, metsa avo vanosara vanozodzifisha kubva kwomuri, vapere kufa. Musazovatya, ngokuti Mambo Mwari, Mwari wenyu, uri pakati penyu, uri Mwari unesimba nounotyisa. Mambo Mwari, Mwari wenyu, unozodzinga awo madzinza kubva pamberi penyu padoko ngepadoko; musazovapedza paripo, kuti zvikara zvomushango zvisazowanda padera penyu. Asi Mambo Mwari, Mwari wenyu, unozovapa kwomuri nokuvakangaidza kakurutu, metsa vapedzwe. Naye unozopa madzimambo avo munyara dzenyu, munozodzima mazina avo kubva pashi pomudenga; akuzoapo nomunhu noumwe unozokona kuema pamberi penyu, metsa muvapedze. Miedzaniso yezvimwari zvavo yakatsetswa munozoipisha ngomuriro. Musazoemura sirivha nokuti mukore uwo uri kwezviri, nokuti kuutora kuita wenyu, kuti musazoteiwa ndiwo; ngokuti chinyangadzo kunaMambo Mwari, Mwari wenyu. Musazopotedza chinyangadzo mumhatso yenyu, kuti musazoita chituko kudai ndicho. Asi unozochinyenya yaamho, nokunyangadzwa ndicho, ngokuti chiri chiro chakatukwa. Yeshe mipango yendinomupanga nyamashi munozoingwarira kuiita, kuti mupone, muwanzwe, mupotere umwo kugara nhaka yenyika yaakapika ndiyo Mambo Mwari kumadzibaba enyu. Nemwi munozokarakadza kuhamba kweshe kwaakamutungamira Mambo Mwari eshe aya makore makumi marongomuna mukati mweshango kuti amupfaise, nokumuedza, nokuzia kuti chiinyi chiri mumwoyo mwenyu, kuti munozongwarira mipango yake here, nokuti amuzoingwariri. Naye wakamupfaisa, akamuita kuti muzwe nzara, akamugutisa ngemana, yomusaizia, nokuti madzibaba enyu vasaizia, kuti amuite kuti muzie kuti munhu aazoponi ngechingwa chega, asi ngemazwi eshe anobuda kumuromo waMambo Mwari. Zvokufuka zvenyu azvizi kusakara kwomuri, zve, netsoka dzenyu adzizi kuzvimba ngaaya makore makumi marongomuna. Zve, ziai mumwoyo mwenyu kuti kudai ngomunhu unoorora mwana wake, ngokudaro Mambo Mwari, Mwari wenyu, unomuorora. Ndizvo munozongwarira mipango yaMambo Mwari, Mwari wenyu, ngokuhamba ngenjira dzake nokumutya. Ngokuti Mambo Mwari, Mwari wenyu, unozomupotedza munyika yakanaka, nyika inemvura, inezvinyuka zvemvura zvinovheruka kuerera mubani nomumitunhu, nyika inekoroni, bhare, mavhini, miti yemionde, nemaphomegraniti, nyika yemafuta emaorivhi, neyouchi. Munyikayo yomunozodya zvisikatamiki amuzotami chiro nachimwe mukati mwayo; nyika inemapuwe ayo ari simbi, nokubva kumitunhu yayo munozotsa thusi. Nemwi munozodya mwechiguta, munozobonga Mambo Mwari, Mwari wenyu, ngendaa yenyika yakanaka yaakamupa. Ngwaridzirai kuti musazoriyarwa Mambo Mwari, Mwari wenyu, ngokusikangwarira mipango yake nezvitongero zvake nezviemeso zvake, zvendinomupanga nyamashi. Kusazoitika kuti mwadya, mwaguta, mwadziakira mhatso dzakanaka, dzokuti mugaremwo, naapo mitanga yenyu yezvifuyo yawanda, nesirivha nomukore wenyu zvawanzisa, nazvo zveshe zvomunazvo zvawanzisa, zvino mwoyo yenyu yatunhumadzwa, nemwi mwechiriyarwa Mambo Mwari, Mwari wenyu, uwo wakamubudisa kubva munyika yeEgipite, kubva kumhatso youhloko. Wakamutungamira kupotya mukati mweshango iri guru, rinotyisa rinenyoka dzinoukaira, nezvinyaada, nokuomerwa, apo paiya pasina mvura. Wakamubudisira mvura kubva pabuwe rakakonza. Uwo wakamugutisa mukati mweshango ngemana, isikazi kuziikanwa ngemadzibaba enyu, kuti amupfaise, amuedze, kumuitira zvakanaka kumagumisiro enyu. Nemwi musazoronza mumwoyo mwenyu kuti, “Isimba rangu, nesimba renyara dzangu kuti ndione uhwu upfumi.” Asi munozokarakadza Mambo Mwari, Mwari wenyu, ngokuti ndiye unomupa simba rokuti muone upfumi, kuti agwinyise chitenderano chake chaakapika nemadzibaba enyu, kudai ngezvezviri azvo nyamashi. Kunozoitika kuti kudai mwechizokanganwa Mambo Mwari, Mwari wenyu, mwechiteera zvimwari, nokuzvishandira, nokuzvidira, ndinoita chapupu kwomuri nyamashi kuti ngegwinyiso munozopera. Kudai ngemadzinza aakauraya Mambo Mwari kubva pamberi penyu, ngokudaro nemwi munozofa, ngokuti amuzi kuita vanopurutana kuizwi raMambo Mwari, Mwari wenyu. Izwai, imwimwi vaIsuraeri! Munozoambuka Jorodhani nyamashi, kuti mupotere umwo kugara nhaka yemadzinza akakura, naanesimba, kupinda imwimwi, madhorobha akakura, akashosherwa kuguma mudenga, vanhu magakanyara vakareba, vana vaAnakimu vomunozia, vomunozwa ndivo kuti, “Ndiani ungaema pamberi pevana vaAnaki!” Ndizvo nasai kuzwisisa nyamashi, kuti Mambo Mwari, Mwari wenyu, ndiye unotungamira pamberi penyu, kudai ngomuriro unopedza; naye unozovanyisa nokuvapfaisa pamberi pokuona kwenyu; ndizvo munozovadzinga nokuvapedza ngokukasira, kudai ngezvaakaronza Mambo Mwari kwomuri. Musazoereketa mumwoyo mwenyu apo Mambo Mwari azovadzinga kubva pamberi penyu mwechiti, “Ngokunaka kwangu Mambo Mwari wakandipotedza muno kuti ndigare nhaka yenyika iyi;” asi indaa yokushata kwaaya madzinza Mambo Mwari wakaadzinga kubva pamberi penyu. Amupoteri kugara nhaka yenyika iyi ngendaa yokururama kwenyu nokuti ngendaa yokururama kwomwoyo yenyu; asi ngendaa yokushata kwemadzinza awo Mambo Mwari, Mwari wenyu, unoadzinga kubva pamberi penyu, zve, kuti iye azarise izwi raakapika kumadzibaba enyu, Abrahama naIsaka naJakobe. Nasai kuzia, ndizvo, kuti Mambo Mwari, Mwari wenyu, aamupi iyi nyika yakanaka kuti muigare ngendaa yokururama kwenyu; ngokuti muri dzinza rinemitsipa yakakukutara. Karakadzai, musakanganwa, njira yemwakatsenesa Mambo Mwari, Mwari wenyu, mushango; kubvira kuzuva remwakabuda ndiro kubva kunyika yeEgipite, metsa kuguma kuneiyi ndau, munondomukira Mambo Mwari. Kunyazwi paHorebhi mwakatsenesa Mambo Mwari kuti aite ushungu, naMambo Mwari wakamutsenekera kuti amupedze. Apo ndaiya ndechikwira kumutunhu kuti ndiashire marusamba emapuwe, marusamba echitenderano chaakaita Mambo Mwari neimwimwi, naapo ndakagara mumutunhu uwo mazuva makumi marongomuna nousiku makumi marongomuna, andizi kudya nokuti kumwa mvura. Mambo Mwari wakapa kwendiri marusamba mairi emapuwe awo akanyorwa ngechinwe chaMwari; nepadera pao paiya pakanyorwa mazwi eshe aakaereketa Mambo Mwari kwomuri mumutunhu kubva pakati pomuriro ngezuva romushongano. Kwakaitika ngesure kwemazuva makumi marongomuna nousiku makumi marongomuna kuti Mambo Mwari wakandipa marusamba mairi emapuwe, marusamba echitenderano. Zvino Mambo Mwari wakati kwendiri, “Miruka, udzake ubve pano ngokukasira; ngokuti ava vanhu vowakabudisa kubva Egipite vadzishaishira. Vakasira kupauka kubva kunjira yendakavapanga; vakadziumbira muedzaniso.” Zve, Mambo Mwari wakaereketa kwendiri echiti, “Ndaona vanhu ava, ringira vari vanhu vanemitsipa yakakukutara. Ndirekere, ndivapedze, ndiridzime zina ravo kubva pashi pedenga; neni ndinozoita ndiwe dzinza rinesimba nokukura kupinda avo.” Ndizvo ndakakunukuka, ndakadzaka kubva kumutunhu, nomutunhu waibaka muriro; nemarusamba mairi emapuwe aiya munyara dzangu mbiri. Ndakaringira, ndikaona kuti mwakashaisha kunaMambo Mwari, Mwari wenyu, mwaiya mwakadziumbira muedzaniso wekonyana; mwaiya mwapauka ngokukasira kubva kunjira iyo yemwakapangwa ndiMambo Mwari. Neni ndakatora marusamba mairi, ndakaaposhera pashi kubva kunyara dzangu mbiri, ndakaaputsa mukuona kwenyu. Ndakawa pashi pamberi paMambo Mwari kudai ngokutanga, mazuva makumi marongomuna nousiku makumi marongomuna; andizi kudya chokudya, nokuti kumwa mvura, ngendaa yezvishaishi zvenyu zveshe zvemwakaita, ngokuita zvakashata mukuona kwaMambo Mwari, kumumusira ushungu. Ngokuti ndaiya ndechitya ushungu nokutseneka kukuru kwaMambo Mwari kwomwakamutsenesa ndikwo kuti amupedze. Asi Mambo Mwari wakandizwazve ngouwo mukuwo. Mambo Mwari wakatsenekera Aroni kakurutu kuti amuuraye, asi ndakakumbirira Aronizve ngouwo mukuwo. Neni ndakatora chishaishi chenyu, muedzaniso wekonyana wemwakaumba, ndakaupisha ngomuriro, ndakaudzengenesa, nokuukuya ukamotseka, eya, metsa ukadai ngebukuta; neni ndakarasha bukuta rawo mumukova unoerera kubva kumutunhu. Zve, nepaThabhera, nepaMasa, nepaKibrothihataava, imwimwi mwakamusa ushungu hwaMambo Mwari. Ngokudarozve apo Mambo Mwari wakamutuma kubva Kadheshibharanea achiti, “Kwirai muende koogara nhaka yenyika yendakamupa,” naapo mwakamukira mupango waMambo Mwari, Mwari wenyu, nemwi amuzi kumutenda, nokuti kupurutana kuneizwi rake. Mwakaita vanomukira kunaMambo Mwari kubvira zuva rendakaamba kumuzia. Ndizvo ndakawa pashi pamberi paMambo Mwari mazuva makumi marongomuna nousiku makumi marongomuna, ngokuti Mambo Mwari waiya aronza kuti unozomupedza. Ndakakumbira kunaMambo Mwari ndechiti, “A Mambo Mwari, Mwari Mukuru, usapedza vanhu vako vari nhaka yako yemene, avo vemwakaripira muukuru hwako vewakabudisa kubva Egipite ngenyara inesimba. Karakadza varanda vako, Abrahama, Isaka naJakobe; usaringira munzinini waava vanhu, nokuti kushata kwavo, nokuti kushaisha kwavo, kuti venyika iyo yewakatibudisa kweiri vasazoronza kuti, ‘Ngokuti Mambo Mwari waiya asina simba rokugumisa avo vanhu munyika yaakavagondisa, ngokuti waivazonda, wakavabudisa kuti avauraire mushango.’ Ngokuti vanhu vako, nenhaka yako, vewakabudisa ngesimba rako guru, ngomuoko wako wakatambanudzwa.” Ngouwo mukuwo Mambo Mwari wakati kwendiri, “Dzitsetserezve marusamba mairi emapuwe akadai ngeokutanga, ukwire mumutunhu, udzinasirire bhokisi romuti. Ndinozonyora padera pemarusamba mazwi aiya pamarusamba okutanga, owakaputsa, newe unozoaisa mubhokisi.” Ndakanasira bhokisi romuti womuakasiya, ndakatsetsa marusamba mairi emapuwe kudai ngeokutanga, ndakakwira mumutunhu ndinemarusamba mairi munyara yangu. Zvino wakanyora pamarusamba kudai ngokunyora kwaakaita kutanga, mipango iri gumi, yaakaereketa kwomuri Mambo Mwari mumutunhu kubva pakati pomuriro ngezuva romushongano; naMambo Mwari wakaapa kwendiri. Ndakakunukuka ngokwangu kudzaka mutunhu, ndakaisa marusamba mairi mubhokisi rechitenderano rendakanasira; noumwo ndimwo mwaari, kudai ngezvaakandipanga Mambo Mwari. (VaIsuraeri vakahamba muhambo wavo kubva Bheerothi revana vaJaakani metsa kuguma Mosera, paakafira Aroni, naye wakatsirwa apo; naEreaza mukororo wake wakaita mushando woupristi pandau pake. Kubvapo vakahamba kuenda Gudhigodha; nokubva Gudhigodha vakaguma Jotibhatha, nyika inendwizi dzemvura. Ngouwo mukuwo Mambo Mwari wakaparadzanisa dzinza revaRevhi, kuti vatware bhokisi rechitenderano chaMambo Mwari, kuti vaeme pamberi paMambo Mwari nokumushandira, nokudakadzisa ngezina rake, metsa nanyamashi. Ndizvo Revhi aana chikoaniswa nokuti nhaka pakati pevakoma vake; Mambo Mwari uri nhaka yake, kudai ngezvaakamugondisa Mambo Mwari, Mwari wenyu.) Neni ndakagara mumutunhu kudai ngokutanga, mazuva makumi marongomuna nousiku makumi marongomuna; naMambo Mwari wakandizwazve ngouwo mukuwo, naMambo Mwari aazi kumupedza. Mambo Mwari wakati kwendiri, “Miruka utungamire ava vanhu, kuti vapotere umwo vagare nhaka yenyika yendakapika ndiyo kunemadzibaba avo kupa kwavari.” Nazvino, imwimwi vaIsuraeri, Mambo Mwari, Mwari wenyu unodenyi kwomuri, kwega kuti mumutye Mambo Mwari, Mwari wenyu, kuhamba munjira dzake dzeshe, nokumuda, nokumushandira Mambo Mwari, Mwari wenyu, ngomwoyo wenyu weshe, nomweya wenyu weshe, mungwarire mipango yaMambo Mwari, nezviemeso zvake, zvendinomupanga nyamashi kuita kunaka kwenyu? Kunyazwi denga nedenga rematenga riri raMambo Mwari, Mwari wenyu, nyikazve, nazvo zveshe zvirimwo, asi Mambo Mwari waiya nokudakadzwa ngemadzibaba enyu kuvada, naye wakatsanangura rudzi rwavo runovateera ngesure kwavo, imwimwi, kupinda vanhu veshe, kudai ngezvezvadaro nyamashi. Ndizvo chekai nyama yeganda romwoyo wenyu, kuti musachaita vanemitsipa yakakukutara. Ngokuti Mambo Mwari, Mwari wenyu, ndiMwari padera pezvimwari, naMambo padera pemadzimambo, Mwari mukuru, unesimba nounotyisa, usikatsananguri vanhu, nousikatori chitengero. Unotongera ndaa dzevasina baba neshirikadzi, unomuda mupara, ngokumupa zvokudya nezvokufuka. Ndizvo idai vapara, ngokuti imwimwi mwaiya vapara munyika yeEgipite. Munozotya Mambo Mwari, Mwari wenyu; mumudire iye ega, nokwaari munozonamatira, nokupika ngezina rake. Iye uri kukudzwa kwenyu; uri Mwari wenyu, uwo wakamuitira izvi zviro zvikuru nezvinotyisa, zvemwakaona ngemadziso enyu. Madzibaba enyu vakadzaka Egipite vaiya vanhu vari makumi manomwe; nazvino Mambo Mwari, Mwari wenyu, wamuwanzisa kudai ngenyeredzi dzomudenga. Ndizvo munozomuda Mambo Mwari, Mwari wenyu, nokungwarira zvaanoronza, nezviemeso zvake, nezvitongero zvake, nemipango yake, nguva dzeshe. Muzie nyamashi; ngokuti andiereketi kuvana venyu vasikazii, nevasikazi kuona kuorora kwaMambo Mwari, Mwari wenyu, ukuru hwake, nomuoko wake unesimba, nomuoko wake wakatambanudzwa, neminana yake, nezviito zvake, zvaakaita muEgipite kunaFaro mambo weEgipite, nokunenyika yake yeshe; neizvo zvaakaita kunehondo yeEgipite, kumahachi avo nokungoro dzavo; nenjira yaakaita kuti mvura yoRuandhle Rwakatsvuka ivambonye vachamurumbirira ngesure, nenjira yaakavapedza ndiyo Mambo Mwari metsa nanyamashi; neizvo zvaakaita kwomuri mushango, metsa mugume kundau iyi; neizvo zvaakaita kunaDhathani naAbhiramu, vakororo vaEriabhi mukororo waRubheni, njira yerakabeura ivhu muromo waro, rikavamedza, nemhuri dzavo, nematende avo, nezviro zvavo zveshe zvevaiya nazvo, pakati pevaIsuraeri veshe. Ngokuti madziso enyu emene akaona zviito zvikuru zveshe zvaMambo Mwari zvaakaita. Ndizvo munozongwarira mipango yeshe yendinomupanga ngeiri zuva, kuti muite vanesimba, nokupotera umwo mugare nhaka yenyika apo pomunoedza kooigara, kuti muwanzirwe mazuva enyu munyika, yaakapika ndiyo Mambo Mwari kumadzibaba enyu kupa kwavari nokumibarirwana yavo, nyika inoerera mukaka nouchi. Ngokuti nyika yomunoenda koogara aizi kudai ngenyika yeEgipite, yemwakabuda kubva kweiri, apo pomwakakusha mbeu dzenyu, nokudiridzira ngokupikura kwetsoka dzenyu, kudai ngomunda womuriwo. Asi nyika yomunoenda koogara, inyika yemitunhu nemabani, inomwa mvura inobva mudenga, nyika yaanopinimidza ndiyo Mambo Mwari, Mwari wenyu; ngokuti madziso aMambo Mwari, Mwari wenyu anondogara akairingira, kubvira kwokuamba kwegore metsa kumagumo aro. Kunozoitika kudai mwechizonasa kupurutana mipango yangu yendinomupanga nyamashi, kumuda Mambo Mwari, Mwari wenyu, nokumushandira ngomwoyo wenyu weshe, nomweya wenyu weshe. Zvino ndinozomupa mvura kuti inaye munyika mwenyu ngenguva kwayo, mvura yokutanga neyokugumisira, kuti mukukure koroni yenyu, nevhini renyu, nemafuta enyu. Ndinozoita kuti mwenje ukure mumbusho dzenyu kuti zvifuyo zvenyu zvidye, kuti mudye mwechiguta. Dzingwarirenyi, kuti mwoyo yenyu isazochengedzwa, nemwi mupauke mushandire zvimwari nokuzvidira. Naapo ushungu hwaMambo Mwari hunozobaka kwomuri, naye echizokonya denga kuti mvura isazonaya, nenyika isazobereka michero yayo; neimwimwi munozofa ngokukasira kubva munyika yakanaka yemwakapuwa ndiMambo Mwari. Ndizvo munozongwarira aya mazwi angu mumwoyo mwenyu, nomumweya yenyu, muasungire mumioko yenyu kuita chioniso, kuti aite kudai ngemundanyara unechibhokisi pamberi pemadziso enyu. Nemwi munozoadzidzisa vana venyu, mwechiereketa ndiwo apo mwakagara mumhatso dzenyu, naapo mwechihamba munjira, naapo mwoata pashi, naapo mwopirimuka. Nemwi munozoanyora pasika dzemisiwo yemhatso dzenyu, nepazvimana zvenyu, kuti mazuva enyu nemazuva evana venyu awande, munyika yaakapika Mambo Mwari ndiyo kumadzibaba enyu kuti aipe kwavari, kudai ngemazuva omudenga panyika. Kudai mwechizonasa kungwarira iyi mipango yeshe yendinomupanga, kuita kuda kwaMambo Mwari, Mwari wenyu, nokuhamba ngenjira dzake dzeshe, nokunamatira kwaari, naapo Mambo Mwari unozodzinga eshe madzinza kubva pamberi penyu, nemwi munozogara nhaka yemadzinza akakura naanesimba kupinda imwimwi. Dzeshe ndau dzinotsikwa ngetsoka dzenyu dzinozoita dzenyu, kubvira mushango, metsa kuguma Rebhanoni, nokurwizi Yufratesi, metsa kuguma kuruandhle rwemberi, ngokunozogumira migano yenyu. Akuzoapo munhu unozokona kuema pamberi penyu, ngokuti Mambo Mwari, Mwari wenyu unozoisa nheruso yenyu nokutyisa kwenyu padera penyika dzeshe dzomunozotsika, kudai ngezvaakaronza kwomuri. Ringirai, ndaisa pamberi penyu ngeiri zuva chidakadziso nechituko. Chidakadziso chinozoa kwomuri kudai mwechipurutana mipango yaMambo Mwari, Mwari wenyu, yendinomupanga nyamashi; nechituko chinozoa kwomuri kudai musikazopurutani mipango yaMambo Mwari, Mwari wenyu, mwechipauka kubva kunjira yendinomupanga nyamashi, kuti muteere zvimwari zvomusaizia. Naapo Mambo Mwari, Mwari wenyu amupotedza munyika yomunoenda kweiri koogara nhaka, munozoisa chidakadziso icho padera poMutunhu Gerizimu, nechituko padera poMutunhu Ebhari. Kudai ngezvomunozia iri ngoruseri rweJorodhani ngokumabirirazuva, munyika yevaKhenani, avo vanogara muArabha akaringirana neGirigari, pasinde nemiokhi yeMore. Naapo munozoambuka Jorodhani kupotera umwo kuti mugare nhaka yenyika yemwakapuwa ndiMambo Mwari, Mwari wenyu, munozogara nhaka yayo, mwechigara kweiri, nemwi munozongwarira kuita zveshe izvi zviemeso nezvitongero zvendaisa pamberi penyu nyamashi. Izvi ndizvo zviemeso nezvitongero zvomunozongwarira kuzviita munyika yemwakapuwa ndiMambo Mwari, Mwari wemadzibaba enyu, kuti mugare nhaka yayo, mazuva eshe omunopona padera penyika. Munozoparadza yaamho ndau dzeshe dzevakashandira zvimwari zvavo madzinza omunoenda koogara nhaka yao, padera pemitunhu yakakwirira, nepadera pezvimitunhu, nepashi pemiti yeshe yakasvipirika. Munozopwanya maarita avo, nokuputsira pashi sika dzavo, nokupisha makwasha avo ngomuriro; munozotemera pashi miedzaniso yakatsetswa yezvimwari zvavo, nokudzima mazina azvo kubva kundau iyo. Amuzodiri kudaro kunaMambo Mwari, Mwari wenyu. Asi kundau yaanozotsanangura Mambo Mwari, Mwari wenyu kubva mukati mwemadzinza enyu eshe kuti aise zina rake apo, munozotsvaka ugaro hwake, munozoendayo. Munozounza apo midiro yenyu yokupisha, nemibairo yenyu, nezvegumi zvenyu, nemidiro yenyara dzenyu, nemidiro yenyu inopirwa ngokuda, nematangwe ezvifuyo zvenyu. Naapo munozodya pamberi paMambo Mwari, Mwari wenyu, nemwi munozodakara kwezviri zveshe zvomunozoita imwimwi nemhuri dzenyu, ngeizvo zveshe zvaakamudakadzisa ndizvo Mambo Mwari, Mwari wenyu. Amuzoiti kudai ndizvo zveshe zvomunoita uno nyamashi, munhu weshe icho chiri chakanaka mukuona kwake, ngokuti amusati mwaguma mukuzorora nokunhaka zvaanozomupa Mambo Mwari, Mwari wenyu. Naapo munozoambuka Jorodhani nokugara munyika yemwakapuwa ndiMambo Mwari, Mwari wenyu kuti mugare nhaka yayo, naapo unozomupa kuzorora kubva kumagaa enyu eshe anomutendenedza, kuti mugare ngokungwaririka, zvino kunozoa nendau yaanozotsanangura Mambo Mwari, Mwari wenyu kuita kuti zina rake rigare apo, munozounza apo zveshe zvendakamupanga: midiro yenyu yokupisha, nemibairo yenyu, nezvegumi zvenyu, nemidiro yenyara dzenyu zvakatsanangurwa zvemwakapika kupa kunaMambo Mwari. Munozodakara pamberi paMambo Mwari, Mwari wenyu, imwimwi pamwepo nevakororo nevanasikana venyu, nehloko dzenyu dzevamuna nedzevakadzi venyu, nomuRevhi uri mukati mwemadhorobha enyu, ngokuti iye aana nhaka pamwepo nemwi. Dzingwarirenyi kuti musazopira midiro yenyu yokupisha kundau dzeshe dzomunoona. Asi kundau yaanozotsanangura Mambo Mwari pakati perimwe remadzinza enyu, ndipo pomunozopira midiro yenyu yokupisha, naapo munozoita izvo zveshe zvendinomupanga. Kunyazwi zvakanyadaro mungauraya nyama pakati pemadhorobha enyu eshe, zveshe zvinodiwa ngomwoyo yenyu, kudai ngouwandu hwezvifumiso zvaMambo Mwari, Mwari wenyu zvaakamupa; veshe vasikazi kusukika nevakasukika vangadya iyo nyama, kudai ngemhara neshoma. Kwega musazodya ngazi; munozoidurura pamavhu kudai ngemvura. Amuzodyi mukati mwemadhorobha enyu zvechegumi zvekoroni yenyu, nokuti zvemivhini yenyu, nezvemafuta enyu, nokuti zvematangwe zvezvifuyo zvenyu nokuti ngezviri zvemhiko dzenyu dzomwakapika, nokuti zvipo zvenyu zvokupa ngomwoyo unoda, nokuti zvipo zvenyu zvomunopa. Asi munozozvidyira pamberi paMambo Mwari, Mwari wenyu mundau yaanozotsanangura Mambo Mwari, Mwari wenyu, imwimwi nevakororo venyu, nevanasikana venyu, nehloko dzenyu dzevamuna nedzevakadzi venyu, nevaRevhi vari mumadhorobha enyu; munozodakara pamberi paMambo Mwari, Mwari wenyu kuneizvo zveshe zvomunoshanda ngenyara dzenyu. Dzingwarirenyi kuti musazoteteredza vaRevhi ngenguva yeshe yomunopona padera penyika. Apo Mambo Mwari, Mwari wenyu unozowandisa nyika yenyu, kudai ngezvaakamugondisa, nemwi munozoti, “Tingadya nyama,” ngokuti mweya yenyu inedanha rokudya nyama; eya, mungadya nyama yomunedanha nayo mumweya yenyu. Kudai ndau yaakatsanangura Mambo Mwari, Mwari wenyu kuisa zina rake apo, iri kuretu kubva kwomuri, naapo munozouraya kubva kuzvifuyo zvenyu, zvaakamupa Mambo Mwari, Mwari wenyu, munozoidya muri mumadhorobha enyu zveshe izvo zvinedanha romweya yenyu kuzvidya. Eya, kudai ngemhara neshoma zvinodyiwa; ngokudaro munozozvidya: vakasvipiswa, navo vakasukika vanozozvidya veshe. Kwega ngwarirai kuti musazodya ngazi; ngokuti ngazi ndiyo kupona, nemwi musazodya kupona pamwepo nenyama. Nemwi amuzoidyi; asi munozoidururira pashi pamavhu kudai ngemvura. Musazoidya, kuti zvinake kwomuri nokuvana venyu vanozobarwa sure kwenyu, ngokuti munoita zvakanaka mukuona kwaMambo Mwari. Kwega munozotora zviro zvenyu zvakachena zvomunazvo, nezvemhiko dzenyu, muende kundau yaanozotsanangura Mambo Mwari. Nemwi munozopira midiro yenyu yokupisha, nyama nengazi, padera pearita raMambo Mwari, Mwari wenyu; nengazi yemibairo yenyu inozodururwa padera pearita raMambo Mwari, Mwari wenyu, nemwi munozodya nyama. Ngwarai muzwe eshe mazwi aya endinomupanga, kuti zvinake kwomuri nokuvana venyu vanozobarwa sure kwenyu kunoti mhera nariini, apo munozoita zvakanaka mukuona kwaMambo Mwari, Mwari wenyu. Naapo Mambo Mwari, Mwari wenyu unozogura madzinza kubva pamberi penyu, pomunozoenda koogara nhaka yao, mugare nhaka munyika yavo, dzingwarirenyi kuti musateiwa ngokuvateera, ngesure kwevanonga vapedzwa kubva pamberi penyu; kuti musazobvunza ngendaa yezvimwari zvavo, mwechiti, “Aya madzinza aiita madirirenyi zvimwari zvavo? Kuti nesu tiitewo kudai ndivo.” Musazoita kudaro kunaMambo Mwari, Mwari wenyu, ngokuti chinyangadzo cheshe chaanozonda Mambo Mwari chaiitwa kunezvimwari zvavo; ngokuti vakororo vavo nevanasikana vavo vaivapisha mumuriro kunezvimwari zvavo. Munosisira kungwarira cheshe chendinomupanga; musazotutsira kwechiri, nokuti kudusa kuchitsonza. Kudai kwechizobuda pakati penyu muprofeti, nokuti muroti wehope, echipa kwomuri chioniso nokuti munana, nechioniso nokuti munana chechiitika kudai ngokuronza kwake, ukwo kwaanozoereketa echiti, “Ngatiteere zvimwari zvimweni,” (zvomusikazi kuzia), “Ngatizvishandire.” Musazopurutana uwo muprofeti, nokuti muroti wehope; ngokuti Mambo Mwari, Mwari wenyu unomuedza, kuti azie kuti munomuda here Mambo Mwari, Mwari wenyu ngomwoyo wenyu weshe nomweya wenyu weshe. Munozoteera Mambo Mwari, Mwari wenyu, mumutye, nokungwarira zvironzo zvake, mupurutane izwi rake, munozomushandira munamatire kwaari. Nouwo muprofeti, nokuti muroti wehope, unozourawa; ngokuti wakaereketa kuti amupaukise kubva kunaMambo Mwari, Mwari wenyu, uwo wakamubudisa kubva kunyika yeEgipite, nokumuripira kubva kumhatso youhloko, kumupaukisa kubva munjira yaakamupanga Mambo Mwari, Mwari wenyu kuti muhambe ndiyo. Ngokudaro muzomudusa kushata kubva pakati penyu. Kudai mukoma wako, mukororo wamai ako, nokuti mukororo wako, nokuti mwanasikana wako, nokuti mukadzi wepaditi rako, nokuti shamwari yako echimuonga ngokufishika, echiti, “Ngatiende, tidire zvimwari zvimweni,” zvomusikazi kuzia, imwimwi nokuti madzibaba enyu, ngokudaro zvimwari zvevanhu vanomutendenedza, vari pasinde kwomuri, nokuti vari kuretu kwomuri, kubvira kurupande rumwe rwenyika metsa kuguma kurupande rumweni rwenyika, auzomutenderi nokuti kumupurutana. Madziso ako asazomuzwira urombo, zve, usazomuponesa, nokuti kumufisha. Asi ngegwinyiso unozomuuraya; nyara yako inozoita yokutanga kumuuraya, nesure nyara dzevanhu veshe. Unozomuponda ngemapuwe, kuti afe; ngokuti iye wakapinimidza kukupaukisa kubva kunaMambo Mwari, Mwari wako, uwo wakakubudisa kubva kunyika yeEgipite, kubva kumhatso youhloko. NevaIsuraeri veshe vanozozwa vatye, avachazoitizve kushata kwakadai ngouku pakati penyu. Kudai wechizozwa kurimwe remadhorobha ako, rewakapuwa ndiMambo Mwari, Mwari wako kuti ugaremwo, kwechizwi, vamuna vakatikuti vakashata vakabuda kubva pakati penyu, vabudisa vanhu vomudhorobha ravo, vechiti, “Ngatiende tidire zvimwari zvimweni,” zvomusikazi kuzia, zvino unozobvunza nokutsvakisisa. Kudai zvinegwinyiso, nendaa yakandodaro, kuti kushata kwakadaro kunoitwa pakati penyu, naapo ngegwinyiso munozouraya vagari veiro dhorobha ngokupinza kweshoti, kuripedza yaamho, nazvo zveshe zvirimwo, nezvifuyo zvavo, ngokupinza kweshoti. Munozounganidza zveshe zvakachakatwa zvaro pakati pemapato aro, munozopisha dhorobha iro ngomuriro, nazvo zveshe zvakachakatwa zvaro, kusasara nachimwe, ngepamusoro paMambo Mwari, Mwari wenyu, kuita mudiro wokupisha zveshe kunaMambo Mwari, Mwari wenyu. Rinozoita matongo mhera nariini; arichazoakwizve. Kusazonamira kunyara yako nechiro nachimwe cheizvo zvakatukwa, kuti Mambo Mwari akunukuke kubva kunoushungu hwake hunotyisa, amupangidzire nyasha, amuzwire kusvipa mwoyo, nokumuwandisa, kudai ngezvaakapika kumadzibaba enyu, kudai mwechizopurutana izwi raMambo Mwari, Mwari wenyu, ngokungwarira mipango yake yeshe yendinomupanga nyamashi, kuti muite zviri zvakanaka mukuona kwaMambo Mwari, Mwari wenyu. Imwimwi muri vana vaMambo Mwari, Mwari wenyu. Musazodzicheka nokuti kuparwa tsiyo pakati pemadzinza enyu ngepamusoro pevakafa. Ngokuti muri vanhu vakachena kunaMambo Mwari, Mwari wenyu, naMambo Mwari wakamutsanangura kuti muite vanhu vakatsanangurwa vari vake, kupinda madzinza eshe ari padera penyika. Musazodya chiro chinonyangadza. Idzi ndidzo mhuka dzomunozodya: n'ombe nehwai, nembudzi, shoma, mhara, nephiva, nengururu, nenyati, mbudzi yomushango, nhuka, nehwai yomushango. Nemhuka dzeshe dzinemadondova akamweka, kuita masondo mairi, dzechitsenga marukurwa, pakati pemhuka, munozodzidya. Kunyazwi zvakanyadaro amuzodyi idzi dzeidzo dzinotsengesa marukurwa, nokuti dzeidzo dzinemadondova akamweka kuita mairi: kudai ngekamera, tsuro, nembira, ngokuti idzi dzinotsengesa marukurwa, asi madondova aazi kumweka kuita mairi; ndizvo dziri dzakasvipiswa kwomuri. Nenguruve, ngokuti yakamweka madondova kuita mairi, asi aitsengesi marukurwa, ndizvo iri yakasvipiswa kwomuri. Musazodya nyama yadzo, nokuti kugwama miiri yadzo yakafa. Munozodya idzi dzeidzo dzeshe dziri mumvura: dzeshe dzinemabesu, nemagwamba munozodzidya. Kunyazwi ngedziri dzisina mabesu nemagwamba amuzodzidyi; dzakasvipiswa kwomuri. Dzeshe shiri dzakasukika munozodzidya. Asi kwedziri amuzodyi idzi: dorambudzi, ngwanga, chapungu; gwakuramapande, chiatsi, njerere nembeu yadzo yeshe; makungu eshe nembeu dzao dzeshe; kwikwi, chizizimbori, chimwanduku, chiangu ngembeu dzazvo dzeshe; muswerahope, zizi guru, huku yomumvura; zinyamundanda, hwizi, riti; mukwasi, hwazi ngembeu dzayo dzeshe, tsunguru nechinyamuremwaremwa. Nezviro zveshe zvinotamanda nokumbururuka zviri zvakasvipiswa kwomuri; zvisazodyiwa. Asi shiri dzeshe dzakasukika munozodya. Musazodya chiro nachimwe chakafa chega; unozochipa kunomupara uri mukati mwemadhorobha enyu kuti achidye nokuti mungachitengesere kunowedzinza mukanza. Ngokuti imwimwi muri vanhu vakachena kunaMambo Mwari, Mwari wenyu. Usazobika chimbudzana ngomukaka wamai acho. Ngegwinyiso unozopa chegumi chembeu dzako dzeshe, dzinoberekwa mumunda wako gore ngegore. Munozodya pamberi paMambo Mwari, Mwari wenyu mundau yaanozotsanangura kuisa zina rake apo, zvechegumi zvezviyo zvenyu zvekoroni, nezvevhini renyu, nezvemafuta enyu, nezvematangwe ezvifuyo zvenyu; kuti mudzidze kutya Mambo Mwari, Mwari wako ngenguva dzeshe. Nokudai muhambo wanyanya kuita kuretu kwomuri, yaanozotsanangura Mambo Mwari, Mwari wenyu kuti aise zina rake apo, apo Mambo Mwari, Mwari wenyu wakamudakadzisa, naapo unozochitsandudzira kuti chiite mare. Unozotora mare munyara yako, uende kundau yaanozotsanangura Mambo Mwari, Mwari wako. Unozotenga ngeiyo mare kunyazwi chiinyi mwoyo wako unedanha racho, n'ombe, nokuti hwai, nokuti vhini, nokuti zvokumwa zvinesimba kunyazwi chiinyi mweya wako unedanha racho. Unozodya apo pamberi paMambo Mwari, Mwari wako, unozodakara, iwewe nemhatso yako yeshe. NevaRevhi vari mukati mwemadhorobha ako, usazovateteredza, ngokuti avana chikoaniswa chenhaka pamwepo newe. Ngokumagumo kwemakore matatu unozounza zveshe zvechegumi zvezvirimwa zvako, unozozviunganidza mukati mwemadhorobha ako. NevaRevhi, (ngokuti avana chikoaniswa chenhaka pamwepo newe), nomupara, nousina baba, neshirikadzi, vari mukati mwemadhorobha ako, vanozouya, vadye, vagutiswe; kuti Mambo Mwari, Mwari wako akufumise mumushando weshe wounoita ngenyara dzako. Kumagumo kwemakore manomwe kunozoapo kurekererwa kwezvikwereti. Iyi ndiyo njira yomunozorekerera: munhu weshe wakakwereta chiro kunomuakirwana wake unozomurekerera; aazochibvunzi kunomuakirwana wake, nokuti mukoma wake, ngokuti kunodaidzwa kuti kurekererwa kwaMambo Mwari. Kunomupara munozochibvunzazve, asi icho chiri chako chinonga chiri kumukoma wako, nyara yako inozochirekerera. Kwega kuti kusazoapo varombo pakati penyu; ngokuti Mambo Mwari unozomufumisa kakurutu muri munyika yaanomupa Mambo Mwari, Mwari wenyu kuti muigare kuita nhaka yenyu. Kwega kuti munase kupurutana izwi raMambo Mwari, Mwari wenyu, kungwarira kuita yeshe mipango yendinomupanga nyamashi. Ngokuti Mambo Mwari, Mwari wenyu unomufumisa kudai ngezvaakamugondisa. Munozokweretesa madzinza akawanda, asi imwimwi amuzokwereti kwavari; munozotonga padera pemadzinza akawanda, asi ivo avazotongi padera penyu. Kudai unozoapo murombo pakati penyu mukati mwerimwe remadhorobha enyu munyika yenyu yomunopuwa ndiMambo Mwari, Mwari wenyu, usazokonzisa mwoyo wako, nokuti kutswatira madziso ako kubva kunomuakirwana wako uri murombo. Asi unozonasa kubeura nyara yako kupa kwaari, ngegwinyiso unozomukweretesa izvo zvinokwana kutama kwake, zveizvo zvaanoda. Ngwaridzira kuti kusazoapo mukarakadzo wakashata mumwoyo mwako wokuti, “Gore rechinomwe, riri gore rokurekerera raapasinde;” nemadziso ako asaa nougaa kumuakirwana wako uri murombo, newe auna chounomupa; naye akachema kunaMambo Mwari ngendaa yako, nacho chinozoita chishaishi kwouri. Ngegwinyiso unozomupa, nomwoyo wako usazogunun'una apo wamupa, ngokuti ngeiyi ndaa Mambo Mwari, Mwari wako unozokufumisa kumishando yako yeshe, neizvo zveshe zvounozoita ngenyara yako. Ngokuti varombo avazoperi kuapo munyika, ndizvo ndinokupanga ndechiti, “Newe unozonasa kubeura nyara yako kupa kumuakirwana wako, nokuvarombo vako, nokwavari vanotama, munyika yako.” Nokudai umwe wako, muHebheru, munhu wemwamuna, nokuti muHebheru, munhu womukadzi echitengeswa kwouri, echizokushandira makore matanhatu, naapo ngegore rechinomwe unozomutendera kuti aende kubva kwouri akasunhurika. Naapo unozomuendesa asunhurika, usamuendesa asina chiro. Unozomupa zvakawanda kubva kuzvifuyo zvako, nokubva kwezvembuwa yako yokupurira, nokubva kunezvokukamura vhini rako, nokuneizvo zvaakakufumisa ndizvo Mambo Mwari, Mwari wako unozomupa. Newe unozokarakadza kuti iwewe wakaita muranda munyika yeEgipite, naMambo Mwari, Mwari wako wakakusunhura; ndizvo ndinokupanga ngeichi chiro nyamashi. Kunozoitika kuti kudai echizoti kwouri, “Andizoendi kubva kwouri,” ngokuti unokuda, nevemhatso yako, ngokuti unogara newe zvakanaka, naapo unozotora runhumbura, udure nzee yake ndirwo yakagwamanidzwa nomusiwo, naye unozoita hloko yako mhera nariini. Zve kunehloko yomukadzi yako unozoita kudaro kwaari. Chisazoita chinokonza kwouri apo unomuendesa akasunhurika, ngokuti iye wakaita kwouri unoedzana nevaranda vairi avo vaishandira kubhadharwa, ngokukushandira makore matanhatu; naMambo Mwari, Mwari wako unzokufumisa kuneizvo zveshe zvounoita. Eshe matangwe emikono yen'ombe neyemakwai unozoaparadzanisa kunaMambo Mwari, Mwari wako; auzoiti mushando ngedzematangwe emikono yen'ombe dzako, nokuti kugunda dzematangwe emakwai ako. Unozodzidyira pamberi paMambo Mwari, Mwari wako gore ngegore mundau yaanozotsanangura Mambo Mwari, iwewe nemhuri yako. Nokudai yakaremara kukumhina, nokuti ubofu, nokuti gotsa rakashata, usaipa kuita mubairo kunaMambo Mwari, Mwari wako. Unozodyira mukati mwemadhorobha ako; vanhu vakasvipiswa nevasikazi kusvipiswa vanozoidya veshe, kudai ngezvevanodya mhara nokuti shoma. Kwega musazodya ngazi yayo; unozoidurura pashi pamavhu kudai ngemvura. Ngwarirai mwedzi Abhibhi, mungwarire Phasika raMambo Mwari, Mwari wenyu, ngokuti ngomwedzi Abhibhi Mambo Mwari, Mwari wenyu wakamubudisa kubva munyika yeEgipite usiku. Ndizvo munozopira mubairo wePhasika kunaMambo Mwari, Mwari wenyu, kubva kuzvifuyo zvenyu zvemakwai nezven'ombe, mundau yaanozotsanangura Mambo Mwari kuisa zina rake apo. Musazodya chingwa chinomumera nawo. Mazuva manomwe munozodya chingwa chisina mumera, chingwa chokutambudzika, ngokuti mwakabuda kubva munyika yeEgipite ngokukasira, kuti mucherechedze zuva remwakabuda ndiro kubva munyika yeEgipite, eshe mazuva okupona kwenyu. Kusazooneka chingwa chinemumera mukati mwenyika yenyu metsa mazuva manomwe; zve, akuzosari nyama yomunoita mubairo ndiyo madeekoni ngezuva rokutanga, usiku hweshe metsa kuedze. Amutenderwi kupira mudiro wePhasika mukati mwemadhorobha enyu kunyazwi awo omunopuwa ndiMambo Mwari, Mwari wenyu. Asi kundau yaanozotsanangura Mambo Mwari, Mwari wenyu kuti aise apo zina rake, apo ndipo pomunozopira mubairo wePhasika madeekoni, ngomukuwo wokubira kwezuva, ngenguva yemwakabuda ndiyo kubva Egipite. Nemwi munozoubika muudyire pandau yaanozotsanangura Mambo Mwari, Mwari wenyu; ngechimangwani munozohwirira kumatende enyu. Mazuva matanhatu munozodya chingwa chisina mumera; ngezuva rechinomwe kunozoita mushongano wakachena kunaMambo Mwari, Mwari wenyu; ngeiro zuva amuzoiti mushando. Erengai kwomuri mavhiki manomwe; munozotanga kuerenga kubvira ngomukuwo womunotanga kucheka koroni ngesikiri. Unozongwarira dhiri remavhiki kunaMambo Mwari, Mwari wako ngechipo chinopuwa ngomwoyo unoda ngenyara yako, unozochipa kunaMambo Mwari, Mwari wako, kudai ngokufumisa kwaakaita Mambo Mwari, Mwari wako kwouri. Unozodakara pamberi paMambo Mwari, Mwari wako, newe nevakororo nevanasikana vako, nehloko yako yomwamuna neyomukadzi, vaRevhi vari mukati mwemadhorobha ako, nomupara, nousina baba, neshirikadzi, vari pakati penyu, mundau yaanozotsanangura Mambo Mwari, Mwari wako kuti aise zina rake apo. Cherechedza kuti waiya hloko munyika yeEgipite; unozongwarira nokuita izvi zviemeso zveshe. Unozongwarira madhiri ematumba mazuva manomwe, ngesure wapedza kukukura koroni yako nevhini rako. Unozodakara mumadhiri, iwewe nevakororo vako, nevanasikana vako, nehloko yako yomwamuna neyomukadzi, nomuRevhi, nomupara, nevasina baba, neshirikadzi vari mukati mwemadhorobha ako. Mazuva manomwe unozongwarira madhiri kunaMambo Mwari, Mwari wako pandau yaanozotsanangura Mambo Mwari; ngokuti Mambo Mwari, Mwari wako unozokudakadzisa kwezviri zveshe zvinowanziswa zvako, nokumishando yeshe yenyara dzako, ndizvo ngegwinyiso unozodakara. Katatu ngegore vanhu vako veshe vevamuna vanozouya pamberi paMambo Mwari, Mwari wako kundau yaanozotsanangura; ngomukuwo wedhiri rechingwa chisina mumera, ngomukuwo wedhiri remavhiki, nomukuwo wedhiri rematumba. Navo vasazouya pamberi paMambo Mwari vasina chiro. Munhu weshe unozopa kudai ngezvaanokona, kudai ngechifumiso chaMambo Mwari, Mwari wako chaakakufumisa ndicho. Munozodzitsanangurira nevakuru mumadhorobha enyu eshe aanomupa Mambo Mwari, Mwari wenyu, mukati mwemadzinza enyu eshe, navo vanozotongera vanhu ndaa dzavo ngokutonga kwakarurama. Musazoshaisha kutonga mukutonga kwenyu; musazoita mutsananguro kumunhu, nokuti kuashira chitengero, ngokuti chitengero chinopofomadza munhu wakangwara, chinotsandudzira mazwi avakarurama. Izvo zviri zvakarurama yaamho ndizvo zvomunozoteera, kuti mupone, nokugara nhaka yenyika yaanomupa Mambo Mwari, Mwari wenyu. Musazosima muti kunyazwi ngouri kuita sika rokudira pasinde pearita raMambo Mwari, Mwari wenyu, romunozodziitira; nokuti kudziemesera sika yebuwe, yaanozonda Mambo Mwari, Mwari wenyu. Musazopira kuita mubairo kunaMambo Mwari, Mwari wenyu kunyazwi ngeiri n'ombe nokuti hwai yakaremara nokuti inechakashata kunyazwi ngechiri; ngokuti izvo zvinyangadzo kunaMambo Mwari, Mwari wenyu. Kudai kwechizooneka pakati penyu, mukati mwemadhorobha enyu emwakapuwa ndiMambo Mwari, Mwari wenyu, munhu wemwamuna nokuti womukadzi, wakaita zvakashata mukuona kwaMambo Mwari, Mwari wenyu, ngokugura chitenderano chake, naye wakaenda kooshandira nokudira zvimwari zvezuva, nokuti mwedzi, nokuti ngeiri yehondo yezvomudenga, zvendisikazi kumupanga; kudai kwechizoshumirwa kwomuri, nemwi mwechizvizwa, nokunasa kubvunzisisa ngegwinyiso, neicho chiri chakadaro, kuti kushata ukwo kwakaitwa mukati mweIsuraeri, naapo munozobudisa uwo munhu womwamuna, nokuti womukadzi, wakaita icho chakashata, kumuunza kumisiwo yenyu, uwo mwamuna nokuti mukadzi, nemwi munozomuponda ngemapuwe metsa afe. Ngouchapupu hwemiromo yevanhu vairi nokuti yevatatu unosisa kuurawa unozourawa; asi ngechapupu chomuromo womunhu umwe asazourawa. Nyara dzeavo vaiita zvapupu ndiye dzinozotanga kumuuraya, ngesure nyara dzevanhu veshe nadzo. Ngokudaro munozodusa ukwo kushata kubva kwomuri. Kudai kwechizobuda ndaa yakapinda kumukonzera kuti muigure, yepakati pengazi nengazi, nepakati pokupota nokupota, nepakati peyokurova nokurovana, dziri ndaa dzokuitirana hasha madhorobha enyu, naapo munozomiruka kuenda kundau yaakatsanangura Mambo Mwari, Mwari wenyu. Munozouya kunevapristi vaRevhi, nokunomutongi unonga aripo ngaawo mazuva, nokubvunza kwavari; navo vanozomuronzera izwi rokugura ndaa. Nemwi munozoita kudai ngeizwi revanozomuronzera, vari pandau yaanozotsanangura Mambo Mwari; munozongwarira kuita kudai ndizvo zveshe zvevanozomuronzera. Kudai ngokugura ndaa kwezvironzo zvevanozomudzidzisa apo, nokudai ngokugura ndaa kwevanozomuronzera, munozozviita; musazopaukira kubva kuizwi revanozomuronzera, kuenda kumudyo nokuti kumuoshwe. Nomunhu unoita muzvidzo, asikapurutani mupristi uwo wakaemeswa kuti ashandire apo pamberi paMambo Mwari, Mwari wenyu, nokuti mutongi, uwo munhu unozourawa. Nemwi munozodusa kushata ukwo kubva pakati pevaIsuraeri. Navanhu veshe vanozozwa, vatye, vasikazoitizve ngomuzvidzo. Apo mwazoguma kunyika yomunozopuwa ndiMambo Mwari, Mwari wenyu, nokuigara nhaka, mwechigaremwo, mwechizoti, “Tinozodziemesera mambo padera pedu, kudaiwo ngenyika dzeshe dzakatitendenedza,” ngegwinyiso munozoemesa kuita mambo padera penyu uwo waanozotsanangura Mambo Mwari, Mwari wenyu. Umwe kubva pakati pehama dzenyu munozoemesa uwo kuita mambo padera penyu; musazoemesa munhu mupara padera penyu, usiri woukama hwenyu. Asi asazodziwanzira mahachi, nokuti kuita kuti vanhu vapetuke Egipite kuti iye adziwanzire mahachi, ngokuti Mambo Mwari wakaronza kwomuri kuti, “Amuchazopetukiyo.” Naye asazodziwanzira vakadzi, kuti mwoyo wake usazopaukiswa; asazodziunganidzira sirivha nomukore zvakawanda kakurutu. Kunozoitika, apo echizogara padendemaro roumambo hwake, kuti azonyora tsamba yeizvi zvironzo kubva kweiyo iri pamberi pevapristi vaRevhi. Netsamba iyo inozoapo naye, naye unozoidzidza mazuva eshe okurarama kwake, kuti adzidze kutya Mambo Mwari, Mwari wake, kungwarira eshe mazwi aya ezvironzo, neizvi zviemeso, kuti azviite, kuti mwoyo wake usazodzikudza padera pehama dzake, kuti asazopauka kubva kuneiyi mipango, kuenda kumudyo nokuti kumuoshwe, kuti awanze mazuva ake muumambo hwake, iye nevana vake, mukati mwevaIsuraeri. Vapristi vaRevhi, nedzinza reshe raRevhi, avazoa nechikoaniswa chenhaka nevaIsuraeri; asi vanozodya midiro yaMambo Mwari, inoitwa ngomuriro, nenhaka yake. Asi avazoa nenhaka pakati pehama dzavo; nhaka yavo ndiMambo Mwari, kudai ngezvaakagondisa kwavari. Neizvo zvinozoita zvikoaniswa zvevapristi kubva kuvanhu, kubva kuneavo vanopira mudiro, kunyazwi uri wekabi nokuti hwai; navo vanozopira mupristi bandauko, netsaya mbiri nemaguru. Mitanguro yekoroni yenyu, neyevhini renyu, neyemafuta enyu, nemviri yokutanga yemakwai enyu, munozomupa. Ngokuti Mambo Mwari, Mwari wenyu wakatsanangura Revhi kubva mukati mwemadzinza enyu eshe, kuti aeme nokushandira muzina raMambo Mwari, iye nevakororo vake mhera nariini. Nokudai muRevhi echizouya kubva kumadhorobha enyu kunyazwi ngeriri muIsuraeri mweshe, apo paaiya chigarandimo, echiuya ngechidisiso cheshe chomwoyo wake, kundau yaanozotsanangura Mambo Mwari, zvino unozoshanda muzina raMambo Mwari, Mwari wake, kudai ngezvinoitwa ngehama dzake dzevaRevhi, avo vanoema apo pamberi paMambo Mwari. Vanozodya zvikoaniswa zvakaedzana, ngepabanze peizvo zvaanoona ngokutengeswa kwezviro zvake. Apo mwaguma munyika yomunopuwa ndiMambo Mwari, Mwari wenyu, musazodzidza kuita zvinonyangadza zvaavo madzinza. Kusazooneka pakati penyu noumwe unoita kuti mukororo wake nokuti mwanasikana wake apotye mumuriro, nokuti unoshandira kuuka, nokuti uwo unoita zvisi, nokuti muringidzi, nokuti nyamusoro, nokuti musaramusi, nokuti unoereketa nenyama inomukirwa, nokuti muthakathi, nokuti murombi. Ngokuti avo veshe vanoita izvi vari vanyangadzi pamberi paMambo Mwari; ngendaa yeizvi zvinyangadzo Mambo Mwari, Mwari wenyu unovadzinga kubva pamberi penyu. Ndizvo munozoita vakarurama kunaMambo Mwari, Mwari wenyu. Kunyazwi aya madzinza omunogara nhaka yavo, vakapurutana vezvisi nokuvafemberi; asi imwimwi Mambo Mwari, Mwari wenyu aazi kutendera kuti muite zvakadaro. Mambo Mwari, Mwari wenyu unozomirudza muprofeti kubva pakati penyu, wehama dzenyu, wakadai ndini; kwaari munozopurutana. Izvi ndizvo zveshe zvemwakakumbira kunaMambo Mwari, Mwari wenyu muHorebhi ngezuva romushongano mwechiti, “Ndisachazozwazve izwi raMambo Mwari, Mwari wangu, ndisazoonazve uyu muriro mukuru kuti ndisafa.” Zvino Mambo Mwari wakati kwendiri, “Vanasa kuereketa izvo zvevakaereketa. Ndinovamirudzira muprofeti kubva pakati pehama dzavo, wakadai ndiwe, ndinozoisa mazwi angu mumuromo wake; unozoereketa kwavari veshe zvendinozomupanga. Kunyazwi ndiani usikazopurutani mazwi angu aanozoereketa ngezina rangu, ndinozoa nendaa kwaari ndio. Asi muprofeti uwo unoereketa mazwi ngezina rezvimwari zvimweni nokuti echiereketa ngezina rangu izwi rendisikazi kupanga kuti aerekete, uwo muprofeti unozofa.” Nokudai mwechizoti mumwoyo mwenyu, “Tingaita maziirenyi izwi iro raasikazi kuereketa Mambo Mwari,” Apo muprofeti echizoereketa ngezina raMambo Mwari, kudai icho chiro chisikazoteeri, nokuti kuitika, ndicho chiro chisikazi kuereketwa ndiMambo Mwari. Asi muprofeti uwo wakachiereketa ngomunzinini; musazotya. Naapo Mambo Mwari, Mwari wenyu unozopedza madzinza eiyo nyika yaanozomupa Mambo Mwari, Mwari wenyu, nemwi mwechizogara nhaka yavo, mwechigara mumadhorobha avo nomumhatso dzavo, nemwi munozodziemesera madhorobha matatu pakati penyika yenyu, yomunozopuwa ndiMambo Mwari, Mwari wenyu, kuti mugare nhaka yayo. Nemwi munozodzinasirira pato, nokugura migano yenyika yomunopuwa ndiMambo Mwari, Mwari wenyu kuti muigare nhaka, kuita marupande matatu, kuti vaurayi veshe vatiziremwo. Iyi ndiyo ndaa yomuurayi unozotiziramwo, kuti apone, uwo unozouraya muakirwana wake asikadi, waasaizonda ngomukuwo wakapinda. Kudai ngomunhu unoenda mugwasha nomuakirwana wake kutema miti, naapo echimirudza nyara dzake kutema muti, nedemo rechitsvedzuka kubva mumupini, nokutema muakirwana wake, naye echifa; unozotizira kurimwe reawo madhorobha, kuti apone. Kuti muunzidziri wengazi asazorumbirira muurayi, apo mwoyo wake uchapisha ngoushungu, naye amubate, ngokuti ndau iri kuretu, amuuraye; apo pasaisisa kuti aurawe, ngokuti ngepamberi inga asikamuzondi. Ndizvo ndinomupanga ndechiti, munozoemesa madhorobha matatu. Nokudai Mambo Mwari, Mwari wenyu echizokurisa nyika yenyu, kudai ngezvaakapika kumadzibaba enyu, nokupa kwomuri nyika yeshe yaakagondisa kupa kumadzibaba enyu, kuti mwechizongwarira yeshe mipango kuiita yendinozomupanga nyamashi, kumuda Mambo Mwari, Mwari wenyu, nokuhamba nguva dzeshe ngenjira dzake; naapo munozodzitutsirira madhorobha matatu, ngepabanze paaya matatu, kuti kusazoparadzwa ngazi isina ndaa munyika yenyu, yomunozopuwa ndiMambo Mwari, Mwari wenyu kuita nhaka, ngokudaro ngazi ingazoa padera penyu. Asi kudai munhu echizonda muakirwana wake, nokumuhwarira, echimumukira, echimuchaya kuti afe, naye echizotizira kunerimwe remadhorobha aya, naapo vakuru vedhorobha rake vanozotuma nokumuunza kubveyo, nokumupa munyara dzomuunzidziri wengazi, kuti amuuraye Musazomuzwira urombo, asi munozodusa ndaa yengazi isina ndaa kubva muIsuraeri, kuti zvinake kwomuri. Usazodusa hoko dzomugano dzomuakirwana wako, dzakaemeswa ngeavo vekare munhaka yenyu, yomunozopuwa ndiMambo Mwari, Mwari wenyu kuti muigare. Chapupu chomunhu umwe achizopupuri kuitira ndaa munhu kwokushata nokuti ngokuri, nokuti kushaisha nokuti ngokuri kwaanoita. Asi ngokupupurwa kwemiromo yevanhu vairi, nokuti yevanhu vatatu, ndaa inozogwinyisiswa. Kudai chapupu chokunyepa chechimiruka kuitira ndaa munhu kuti apupurire zvakashata ndiye, zvino vamuna vanoitirana hasha, vanozoema pamberi paMambo Mwari, nepevapristi, nevatongi avo vanozoapo ngaawo mazuva, nevatongi vanozonasa kubvunzisisa. Kudai icho chapupu chiri chokunyepa, chakapupura ngokunyepa ngehama yake, naapo munozoita kwaari kudai ngeicho chaakapinimidza iye kuitira kunehama yake. Ngokudaro munozodusa kushata kubva pakati penyu. Navo vanozosara vanozozwa, vatye, nokubvira ngenguva iyo avachazoitizve ukwo kushata pakati penyu. Musazomuzwire urombo; asi kurarama kunozoparadzwa ngendaa yokurarama, nedziso ngendaa yedziso, nezino ngendaa yezino, nenyara ngendaa yenyara, norutsoka ngendaa yorutsoka. Naapo munozobuda kuenda koorwa namagaa enyu, mwechizoona mahachi nengoro, nevanhu vakawanda kupinda imwimwi, musazovatya; ngokuti Mambo Mwari, Mwari wenyu unemwi, uwo wakamubudisa kubva kunyika yeEgipite. Musati mwatanga kurwa, mupristi unozokwedzera kuti aerekete nevarwi, naye unozoti kwavari, “Izwanyi, A Isuraeri! Mwakwedzera pasinde nyamashi kurwa nemagaa enyu. Mwoyo yenyu isapera simba, musatya, nokuti kuhuta, zve, musatyiswa ndivo. Ngokuti Mambo Mwari, Mwari wenyu ndiye unohamba nemwi, kuti amurwire magaa enyu, amuite kuti munyise.” Nevatungamiriri vanozoereketa kuvanhu vechiti, “Uripo here munhu pakati penyu wakadziakira mhatso itsva, asati aipira? Ngaapetuke kumhatso yake, kuti pamweni ungazofa kuhondo, nomunhu umweni echizoipira. Uripo here munhu wakasima munda wemivhini, aasati audya? Iyezve ngaapetuke kumhatso yake, kuti pamweni ungazofa kuhondo, nomunhu umweni echizoudya. Uripo here munhu wakaripira chuma mukadzi, asati amutora? Iye ngaapetuke ahwirire kumhatso yake, kuti pamweni ungazofa kuhondo, noumweni munhu amuroore.” Vatungamiriri vanozoereketa kuvanhu vechiti, “Uripo here munhu unotya nomwoyo wake unemaharura? Ngaapetukezve ahwirire kumhatso yake, kuti mwoyo wehama dzake dzisazopera simba kudai ngomwoyo wake.” Kunozoitika apo vatungamiriri vapedza kuereketa kunavanhu, kuti vanozoemesa nduna padera pevanhu vehondo kuti dzivatungamire. Naapo munozoguma pasinde pedhorobha romunoda kurwa naro, tangai mwatsvaka kuiyana naro. Kudai vechizoashira izwi rokuiyana, nokudzipira kwomuri, zvino vanhu veshe vari mukati mwaro vanozoita varanda kwomuri, vanozomushandira. Nokudai vasikazotendi kuiyana nemwi, asi vechirwa nemwi, naapo munozorikomba. Naapo Mambo Mwari, Mwari wenyu echizopa dhorobha munyara dzenyu munozouraya veshe vamuna ngokupinza kweshoti. Asi vakadzi, nevana nen'ombe, nazvo zveshe zviri mudhorobha, zvakachakatwa zveshe, munozodzitorera kuita zvenyu. Munozodya zvakachakatwa zvemagaa enyu, zvemwakapuwa ndiMambo Mwari, Mwari wenyu. Munozoita izvi kumadhorobha eshe ari kuretu kubva kwomuri, asiri madhorobha eaya madzinza. Asi madhorobha eava vanhu, emwakapuwa ndiMambo Mwari, Mwari wenyu kuti aite nhaka kwomuri, amuzoponesi nachimwe chinosara chechizwa. Asi munozovapedza yaamho, vaHiti nevaAmori, nevaKhenani, nevaPherizi, nevaHivhi, nevaJebhusi, kudai ngezvaakamupanga Mambo Mwari wenyu, kuti vasazomudzidzisa kuita kudai ndizvo zveshe zvinyangadzo zvavo, zvevakaita nezvimwari zvavo; ngokudaro munozoshaisha kunaMambo Mwari, Mwari wenyu. Naapo munozokomba dhorobha mukuwo wakareba, ngokurwa naro kuritora, musazotema miti yaro ngematemo. Kunyazwi mwechizoidya, musazoitemera pashi. Miti yomuminda vanhu here vanosisira kuti vakombwe, varwiswe ndimwi? Kwega miti iyo yomunozoita kuti aibereki michero yokudya, ndiyo yomunozotemera pashi ipere; ngeiyo munozoaka rushosha kudhorobha iro romunorwa naro, metsa rinyiswe. Kudai munhu echizooneka afa munyika yaanomupa Mambo Mwari, Mwari wenyu kuti muigare nhaka, akati umburu murubaya, kusikaziikani kuti ndiani wamuuraya, zvino vanozobuda vakuru venyu nevatongi venyu, vanozopima kuguma kumadhorobha anotendenedza uwo wakaurawa. Vakuru vedhorobha iro riri pasinde pouwo waurawa, vanozotora tsiru, isikazi kushandwa ndiyo, isikazi kumbosungwa pajoka. Vakuru vedhorobha vanozounza kudzasa tsiru mubani rinemvura inoerera, risikazi kurimwa nokuti kukushwa mbeu, vanozogura mutsipa wetsiru mubani iro. Nevapristi vakororo vaRevhi vanozokwedzera pasinde, ngokuti ndivo vaakatsanangura Mambo Mwari kuti vamushandire, nokufumisa ngezina raMambo Mwari; ngokutonga kwavo ndaa nokurwisana kweshe zvinozogurwa. Vakuru veshe veiro dhorobha riri pasinde nomunhu wakaurawa, vanozoshamba nyara dzavo padera petsiru rakagurwa mutsipa mubani iro, navo vanozoereketa vechiti, “Nyara dzedu adzizi kuparadza ngazi iyi, zve madziso edu aazi kuona izvi. Itira nyasha, A Mambo Mwari, kunevanhu vako Isuraeri, avo vowakaripira; usaunzidzira ngazi isina ndaa padera pevanhu vako Isuraeri.” Nengazi iyo inozorekererwa kwavari. Ndizvo munozodusa ndaa yengazi isina ndaa kubva pakati penyu, apo mwechizoita icho chakarurama mukuona kwaMambo Mwari. Naapo munozobuda kuenda koorwa nemagaa enyu, naMambo Mwari, Mwari wenyu echivapa munyara dzenyu, nemwi mwechivatora kuita hloko, kudai wechiona pakati pehloko mukadzi unoringirika, newe wechimuda, kuti aite mukadzi wako, naapo unozomuunza kumatso yako. Iye unozopara soro rake, nokugurira ndwara dzake. Unozokumura zvokupfeka zvake zvouhloko kubva kwaari, naye unozogara mumhatso yako, acheme baba ake namai ake mwedzi weshe; nangesure kweizvo unozopotera kwaari, kuchiita mwamuna wake, naye echiita mukadzi wako. Asi kuti usikamudakariri, naapo unozomurekera kuti aende apo paanoda; asi usazomutengesa ngemare, usazomubata kudai ngehloko, ngokuti wakamutsverudza. Kudai munhu anevakadzi vairi, noumwe unomuda, noumweni asikamudi, navo veshe vari vakamuberekera vana, veshe, uwo unodikanwa nousikadikanwi; nokudai mwana wedangwe ari wouwo usikadikanwi, zvino kunozoitika, apo okoanisira nhaka yake kuvakororo vake, kuti asazoisa mukororo wouwo waanoda ngepadera pouwo mukororo waasikadi, uwo uri dangwe rake ngegwinyiso. Asi unozotenda mukororo wouwo waasikadi kuti idangwe, ngokumupa chikoaniswa chakahwirinzirwa cheizvo zveshe zvaanazvo; ngokuti iye uri kutanga kwesimba rake, nhaka youtangwe ngeyake. Kudai munhu anozoa nomukororo unomusikazwa nounomukira, uwo usikapurutani izwi rababa ake, nokuti izwi ramai ake, usikapurutani kwavari apo vakamuorora, naapo baba ake namai ake vanozomubata, nokumubudisa kuvakuru vedhorobha rake, kundau inotongerwa ndaa. Navo vanozoti kuvakuru vedhorobha rake, “Uyu mukororo wedu unomusikazwa nokumukira, aapurutani izwi redu. Uri mukari nechiradza.” Nevanhu veshe vedhorobha rake vanozomuponda ngemapuwe kuti afe. Ndizvo munozodusa kushata kubva kwomuri; nevaIsuraeri veshe vanozozwa, vatye. Naapo munhu echizoita chishaishi chinosisira kufa, naye echizourawa, nemwi munozomusungira pamuti, Muiri wake usazosara uri pamuti usiku hweshe, asi ngegwinyiso munozoutsira ngeiro zuva; ngokuti uwo unoturikwa uri chakatukwa ndiMwari. Nyika yenyu isazosvipiswa, yemwakapuwa ndiMambo Mwari, Mwari wenyu kuita nhaka. Usazorekera n'ombe nokuti hwai yomuakirwana wako wechiiona yechirashika, nokudzifisha kubva kwedziri: asi zvakanyadini unozodzipetudza kunomuakirwana wako. Nokudai muakirwana wako asiri pasinde pako, nokuti kudai usikamuzii, naapo unozoiunza kumhatso yako, inozogara apo newe metsa muakirwana wako aitsvake, unozoihwirinza kwaari. Unozoita kudaro nembongoro yake, zvokufuka zvake, nezveshe zvakarashika zvomuakirwana wako zvaakarasha, newe wakazviona, unozoita kudaro ndizvo. Usazozvifisha. Usazoringira mbongoro nokuti kabi yomuakirwana wako yechiwa munjira nokudzifisha kubva kweiri; ngegwinyiso unozomudetsera kuiunza. Munhu womukadzi asazopfeka izvo zvinopfekwa ngomunhu wemwamuna, zve, munhu wemwamuna asazopfeka izvo zvinopfekwa ngomunhu womukadzi; ngokuti avo veshe vanoita zvakadaro vari chinyangadzo kunaMambo Mwari, Mwari wenyu. Kudai kwechiitika kuti chisaki cheshiri chiapo mumuti kunyazwi ngouri, nokuti chiri pashi pamavhu, kudai aripo mabwipwi, nokuti mazanda, neshiri yechivhamira padera pao, mabwipwi nokuti mazanda, usatora shiri iyi pamwepo nemabwipwi ayo. Unozorekera shiri kuti iende, utore mabwipwi ayo kuti zvinake kwouri, kuti uwanze mazuva ako. Apo unozodziakira mhatso itsva, unozodziisira rukasha padera perukumbati rwako, kuti usazounza ngazi padera pemhatso yako, kudai pechizowa munhu kubva apo. Usazokusha munda wako ngembeu dzakaparadzana, kuti mbeu dzako dzewakakusha, nemichero yomunda wako wemivhini zvishaishirane. Auzorimi ngekabi nembongoro zvakasungirwa pamwepo. Auzopfeki zvokusimira zvakarukwa ngezviro zvakaparadzana, kudai ngemviri norukanganza pamwepo. Unozodziitira mahlanguyo kumipendero yezvokusimira zvenyu zvomunosimira. Kudai munhu kunyazwi ngouri echizoroora mukadzi, ngesure kwokupotera kwaari aachamudi, echimuitira ndaa yezvakashata, nokumuita kuti zina rake rishoorwe echiti, “Ndakatora uyu mukadzi, naapo ndapotera kwaari, ndakaona kuti inga asichiri mhandara yakazara.” Zvino baba omusikana uwo namai ake vanozotora nokubudisa kuvakuru vedhorobha panotongerwa ndaa zvioniso zvoumhandara hwake. Nababa omusikana unozoti kuvakuru, “Ndakapa mwanasikana wangu kunouyu munhu kuti aite mukadzi wake, naye aachamudi. Zvino waakumuitira ndaa kuti zvakashata zviereketwe kwaari, echiti, ‘Ndakaona mwanasikana wako asichiri mhandara yakazara.’ Asi izvi ndizvo zvioniso zvoumhandara hwomwanasikana wangu.” Navo vanozochinga jira iro pamberi pevakuru vedhorobha. Nevakuru vedhorobha iro vanozotora munhu uwo nokumuorora. Navo vanozomuripisa zvigurwa zvesirivha zana, nokuzvipa kunababa omusikana, ngokuti mhandara yaIsuraeri wakaiitira zina rakashata. Naye unozoita mukadzi wake; aazoparadzani naye mazuva eshe okupona kwake. Asi kudai ndaa iyi iri gwinyiso nezvioniso zvoumhandara zvouyu musikana zvisikazi kuoneka, zvino munozounza uyu musikana kumusiwo wemhatso yababa ake, nevanhu vedhorobha rake vanozomuponda ngemapuwe kuti afe, ngokuti wakaita zvinotsverudza muIsuraeri, ngokuita zvoumhombo mumhatso yababa ake. Ngokudaro munozodusa kushata kubva pakati penyu. Kudai munhu echizooneka echiatana nomukadzi womunhu umweni, naapo veshe vairi vanozourawa, veshe mwamuna uwo wakaatana nomukadziwo. Ngokudaro munozodusa kushata kubva kuvaIsuraeri. Kudai musikana uri mhandara akaemeserwa mwamuna, nomunhu echizomuona ari mudhorobha, nokuatana naye, zvino munozovabudisa veshe vairi kumusiwo wedhorobha iro, munozovaponda ngemapuwe kuti vafe; musikana, ngokuti aazikuridza mhere ari mudhorobha, nomwamuna, ngokuti wakatsverudzisa mukadzi womuakirwana wake. Ngokudaro munozodusa kushata kubva pakati penyu. Asi kudai munhu echizoona musikana wakaemeserwa mwamuna ari mushango, nokumubata ngokumuangiridza, kuatana naye, naapo munhuwo wakaatana naye ndiye unozourawa ega. Asi kunomusikana uwo amuzoiti chiro; ngokuti kumusikana akuna chishaishi chinosisira kuti aurawe, ngokuti iyi ndaa yakadai ngomunhu unomukira muakirwana wake nokumuuraya. Ngokuti wakamuona ari mushango, nomusikana wakaemeserwa pamweni wakachema pasina wokumununurira. Kudai munhu echiona musikana uri mhandara, isikazi kuemeserwa munhu, oroomubata, nokuatana naye, navo vechioneka, naapo munhu uwo wakaatana naye unozopa kunababa omusikana makumi mashanu ezvigurwa zvesirivha, naye unozoita mukadzi wake. Ngokuti wakamutsverudzisa, aazomurashi eshe mazuva okupona kwake. Munhu asazotora mukadzi wababa ake, nokuti kufukura upunu hwababa ake. Uwo wakaremara machende ake, nokuti wakagurwa mboro yake, asazopotera mumushongano waMambo Mwari. Mubvandirimwo aazopoteri mumushongano waMambo Mwari; metsa kumubarirwana wawo wechigumi vasazopotera mumushongano waMambo Mwari. MuAmoni nokuti muMoabhi aazopoteri mumushongano waMambo Mwari; metsa kuguma kumubarirwana wavo wechigumi, avazopoteri mumushongano waMambo Mwari kunoti mhera nariini, ngokuti avazi kumuchingamidza ngechingwa nemvura munjira, apo mwakabuda kubva Egipite; zve, ngokuti vakabhadhara Bharamu mukororo waBheo wePhetori yeMesopotamia, kuti amutuke. Kunyazwi zvakanyadaro Mambo Mwari, Mwari wenyu aazi kupurutana Bharamu; asi Mambo Mwari, Mwari wenyu wakakunukudza chituko icho kuita chifumiso kwomuri, ngokuti Mambo Mwari, Mwari wenyu unomuda. Musazotsvaka kuti vaanokunyarara nokuti kupfumiswa eshe mazuva enyu kunoti nariini. Musazomuzonda muEdhomu, ngokuti hama yenyu. Musazonda muEgipite, ngokuti imwimwi mwaiya vapara munyika yavo. Vana vomubarirwana wechitatu vanobarwa ndivo vanozopotera mumushongano waMambo Mwari. Apo varwi venyu voenda koorwa nemagaa enyu, naapo dzingwarirenyi kubva kunezviro zveshe zvakashata. Kudai aripo munhu kunyazwi ngouri pakati penyu, usikazi kusukika usiku, ngaabude kubanze kwekamba, asazopotera mukamba. Naapo amadeekoni, unozodzishamba ngemvura; naapo zuva rapota unozouyazve mukamba. Munozoa nendauzve ngokubanze kwekamba, yokuitira tsvina. Nemwi munozoisa kachipadza pazvidziyo zvenyu; nakwo kunozoitika kuti woenda kushango unozotsa ndicho, unozokunukuka kufushira izvo zvounonga wabudisa kubva kwouri. Ngokuti Mambo Mwari, Mwari wenyu unohamba pakati pekamba renyu, kumusunhura nokuparadza magaa enyu kubva pamberi penyu; ndizvo kamba renyu rinozoita rakachena, kuti iye asazoona chiro nachimwe chakasvipiswa pakati penyu, amufuratire. Musazohwirinza hloko dzinonga dzatiza kubva kumadzitenzi adzo kuuya kwomuri. Idzo dzinozogara nemwi, kundau yaanozotsanangura mukati mwerimwe remadhorobha enyu, apo paanoda; nemwi musazomutambudza. Kusazoapo mhombo yomumhatso yokudira pakati pevanasikana vaIsuraeri nokuti vakororo vaIsuraeri. Usazounza musharo unoashirwa ngoumhombo, nokuti mutengo wemhombo yemwamuna, mukati mwemhatso yaMambo Mwari, Mwari wako, kuti uripire ngeiri mhiko; ngokuti izvi zviiri zviri chinyangadzo kunaMambo Mwari, Mwari wako. Usazokweretesa muIsuraeri umweni kuti uashire kubarirwa; kubarirwa kwemare nokuti kwezvokudya, nokuti kubarirwa kwezviro zveshe zvinokwereteswa kubarirwa. Kunomupara ungakweretesa kuti ubarirwe, asi kunomuIsuraeri umweni usazomukweretesa kuti ubarirwe, kuti Mambo Mwari, Mwari wako akufumise ngezviro zveshe zvinoshandwa ngenyara dzako munyika yomunozogara nhaka yayo. Kudai wechizopika mhiko kunaMambo Mwari, Mwari wako, usazorekeredza kuripira; ngokuti Mambo Mwari, Mwari wako unozoibvunza kwouri ngegwinyiso, nacho chinozoita chishaishi kwouri. Asi kudai usikazopiki chiro, achizoiti chishaishi kwouri. Izvo zvounozoereketa ngomuromo wako, unozongwarira kuzviita; kupika kwokupa chipo ngokuda, kudai ngezvewakapika kunaMambo Mwari, Mwari wako, izvo zvewakagondisa ngomuromo wako. Kudai wechizopotera mumunda wemivhini womuakirwana wako, naapo ungadya mavhini ugute kudai ngezvounoda; asi usazoisa amweni muchidziyo chako. Kudai wechizopotera mumunda wekoroni isati yachekwa yomuakirwana wako, naapo ungapurura mitsonzoti yayo ngenyara yako; asi usazoicheka ngesikiri koroni isati yachekwa yomuakirwana wako. Kudai munhu echitora mukadzi, echimuroora, kukaitika kuti aachaiti unodikana mukuona kwake, ngendaa yokuti waona chiro chasvipiswa kwaari; naapo ngaamunyorere tsamba yokuparadzana, aipe munyara yake, amudzinge kubva kumhatso yake. Naapo abuda kubva kumhatso yake, ungaenda kuti aroorwe ngomunhu umweni. Nokudai uwo mwamuna naye asikamudi, nokumunyorera tsamba yokuparadzana, nokuipa munyara yake, nokumudzinga kubva kumhatso yake; nokuti kudai mwamuna wechipiri afa, uwo wakamutora kuti aite mukadzi wake, mwamuna wake wokutanga, uwo wakamudzinga kubva kwaari, asachazomutorazve kuita mukadzi wake, ngesure asvipiswa; ngokuti chiri chiro chinonyangadza pamberi paMambo Mwari; nemwi musazoita kuti nyika ishaishe, yomunopuwa ndiMambo Mwari, Mwari wenyu kuita nhaka yenyu. Naapo munhu atora mukadzi mutsva, asazoenda koorwa, zve asazopuwa mushando nokuti ngouri. Asi unozodzigarira pakanyi gore rimwe, adakadzise mukadzi waakaroora. Akuna munhu unozotora guyo nokuti tsiyo kuita chibatiso, ngokuti ngokudaro unotora kurarama kwomunhu kuita chibatiso. Kudai munhu echizobatwa echiba muIsuraeri umweni, echizomuita hloko nokuti kumutengesa; naapo iyo mbavha inozourawa. Nemwi munozodusa kushata kubva pakati penyu. Ngwarai ngenhenda yemapere, kuti munase kungwarira nokuita zveshe zvemwakadzidziswa ngevapristi vaRevhi; kudai ngezvendakamupanga, ndizvo zvomunozoita. Cherechedzai chaakaita Mambo Mwari, Mwari wenyu kunaMiriamu munjira, ngesure mwaiya mwabuda kubva Egipite. Apo unozokweretwa chiro ngomuakirwana wako, usazopotera mumhatso yake kuti utore chibatiso chake. Unozoema ngepabanze, nouwo munhu wewakakweretesa unozounza chibatiso chake kubanze kwouri. Nokudai munhu uwo uri murombo, usazoata unechibatiso chake. Unozohwirinza kwaari chibatiso chake apo zuva rapota, kuti iye aate anechokufuka chake, akufumise; nacho chinozoita kururama kwouri pamberi paMambo Mwari, Mwari wako. Usazotambudza muranda uri murombo nounotama, kunyazwi ari muIsuraeri umweni, nokuti wevapara venyu, avo vanogara munyika yenyu, mukati mwemadhorobha enyu. Ngeiro zuva unozomupa mubhadharo wemare yake, zve, zuva risazopota unawo; ngokuti iye murombo, naye unoudisisa mumwoyo mwake, kuti asazochema ndiwe kunaMambo Mwari kukuitira ndaa, nacho chiite chishaishi kwouri. Vabereki avazourawi ngepamusoro pendaa yevana, zve, nevana, avazourawi ngepamusoro pendaa yevabereki; asi munhu umwe ngaumwe unozourawa ngepamusoro pechishaishi chake chega. Zve, musazoshaishira ngokutsandudza kutongwa kwomupara, nokuti kwousina baba; nokuti kutora zvokufuka zveshirikadzi kuita chibatiso. Asi munozokarakadza kuti mwaiya hloko munyika yeEgipite, naMambo Mwari, Mwari wenyu wakamusunhura kubva apo. Ndizvo ndinomupanga ichi chiro. Apo wozokukura munda wako, newe wechiriyarwa mwanda wekoroni mumunda, usazohwirira kooutora; uwo unozoita womupara, nowevasina baba, noweshirikadzi, kuti Mambo Mwari, Mwari wako akudakadzise kumishando yenyara dzako. Apo unozozungunyisa muti wako womuorivhi, usazozungunyisa maorivhi anosara; anozoita evapara, neevasina baba, neshirikadzi. Naapo wozounganidza michero yomunda wemivhini wako, usazounongeredza mavhini anosara; anozoita evapara, neevasina baba, neeshirikadzi. Nemwi munozokarakadza kuti mwaiya hloko munyika yeEgipite. Ndizvo ndinomupanga kuti muite izvi zviro. Kudai iripo ndaa pakati pevanhu, navo vechiuya mukutongwa kuti vatongwe ngevatongi; naapo munozopembedza wakarurama nokuitira ndaa wakashata. Kunozoitika kuti kudai munhu wakashata echisisira kurohwa, mutongi unozomuita kuti aate pashi, arohwe mukuona kwake, kudai ngouwandu hwendonga dzakasisira ndaa yake. Ungachaiwa kakaita makumi marongomuna, haiwa kupinda apapo; echimuchaya mizvimbo yakawanda inopinda iyi iri makumi marongomuna, naapo muakirwana wako ungaoneka kuti unoshoorwa ndiwe. Usazoisa chokuvhara pamuromo wekabi yechipura koroni. Kudai vakoma vechigara pamwepo, umwe wavo echizofa, asina vana, mukadzi wouwo wakafa aazoroorwi ngomupara ngokubanze kwevemhuri iyo. Munun'una womwamuna wake ndiye unozopotera kwaari, amutore kuita mukadzi wake, echiita mushando womukoma kwaari. Kunozoitika kuti dangwe raanozobereka ndiye rinozogara nhaka yezina romukoma wake wakafa, kuti zina rake risazorova muIsuraeri. Nokudai munhu asikadi kutora mukadzi womukoma wake, naapo mukadzi womukoma wake ngaaende kuvakuru pamusiwo wedhorobha, echiti kwavari, “Munun'una wemwamuna wangu unoramba kumuitira zina mukoma wake muIsuraeri; aatendi kuita mushando womukoma wake waiya mwamuna wangu.” Naapo vakuru vedhorobha rake vanozomudaidza, nokuereketa kwaari. Kudai iye echizoema nokuronza kuti, “Andidi kumutora kuita mukadzi,” naapo mukadzi womukoma wake unozouya kwaari pamberi pevakuru, unozomusunhura gwada rake kubva kutsoka yake, nokumupfira mata muhope mwake; unozoereketa echiti, “Ndizvo zvinoitwa kunomunhu unoramba kumusira dzinza romukoma wake.” Nezina rake rinozodudzwa muIsuraeri rechizwi, “Mhatso youwo wakakhumurwa gwada rake.” Naapo vanhu vairi vechiambana, nomukadzi woumwe wavo echikwedzera kununurira mwamuna wake kubva kunyara youwo unomuchaya, naye echizotambanudza nyara yake, amubate uhwamuna hwake, naapo munozotema nyara yake. Mwoyo yenyu isazomuzwira urombo. Usazoa nezvipimo zvemapuwe okuchengedza mumukwama wako, makuru nemadoko. Usazoa nezvipimo zvakapaukana zvikuru nezvidoko mumhatso yako. Asi unozoa nezvipimo zvako zvisikachengedzi zvakaperera, kuti mazuva ako awande munyika yewakapuwa ndiMambo Mwari, Mwari wako. Ngokuti avo veshe vanoita izvi, navo veshe vanoita zvisikazi kururama, vari chinyangadzo kunaMambo Mwari, Mwari wavo. Cherechedzai izvo zvaakaita Amareki kwomuri muri munjira, apo mwaiya mwabuda kubva Egipite, ngenjira yaakashongana nemwi munjira, nokubaya kwaakaita kuneavo vaiya ngesure, vaiya vapera simba, apo mwaiya mwakaremba nokudemera; naye aazi kumutya Mwari. Ndizvo kunozoitika kuti apo Mambo Mwari, Mwari wenyu unozomupa kuzorora kubva kumagaa enyu eshe, muri munyika yomunozopuwa ndiMambo Mwari, Mwari wenyu kuita nhaka yenyu yokugara, kuti nemwi munozodzima zina raAmareki kubva pashi pomudenga; musazoriyarwa kuchiita. Naapo mwazopotera munyika yomunopuwa ndiMambo Mwari, Mwari wenyu, mwechizogara nhaka, munozotora michero yomutanguro yenyika yeshe, munozounza michero yenyika yomunozopuwa ndiMambo Mwari, nemwi munozoiisa muchitundu, munozoenda nayo kundau yaanozotsanangura Mambo Mwari, Mwari wenyu, kuti aise zina rake apo. Nemwi munozoenda kumupristi uwo unozoapo ngaawo mazuva, mwechiti kwaari, “Ndinodzishumira nyamashi kunaMambo Mwari, Mwari wako, kuti ndaguma munyika yaakapika ndiyo kunemadzibaba edu Mambo Mwari kuti unozopa kwetiri.” Nomupristi unozotora chitundu kubva munyara yako, unozochigadzika pashi pamberi pearita raMambo Mwari, Mwari wako. Newe unozoereketa pamberi paMambo Mwari, Mwari wako, wechiti, “Baba angu aiya muhambi weAramu, naye wakadzaka Egipite, wakaita chigarandimo apo anevanhu vashomani, wakaita dzinza guru, rinesimba, nokuwanda. NevaEgipite vakatibata ngenjira yakashata nokutitambudza, navo vakaisa padera pedu uhloko hwakakonza. Takachema kunaMambo Mwari, Mwari wemadzibaba edu; Mambo Mwari wakazwa izwi redu, naye wakaringira kutambudzika kwedu, nomushando wedu, nokudzimbirwa kwedu. Mambo Mwari wakatibudisa kubva muEgipite ngenyara inesimba, nomuoko wakatambanudzwa, nokutyisa kukuru, nezvioniso nemishamiso. Naye wakatiunza kundau iyi, wakatipa iyi nyika, nyika inoerera mukaka nouchi. Ndizvo zvino, ndaunza michero yomutanguro wenyika yewakandipa iwewe Mambo Mwari.” Newe unozoiisa pamberi paMambo Mwari, Mwari wako nokudira pamberi paMambo Mwari, Mwari wako. Unozodakara mukati mwezviro zveshe zvakanaka zvaakapa Mambo Mwari, Mwari wako, kwouri nokunemhuri yako, iwewe, nomuRevhi, nomupara uri pakati penyu. Naapo mwapedza kupa zvegumi zvegore rechitatu, riri gore rokupa zvechegumi nokuzvipa kuvaRevhi, nokumupara, nokunevasina baba, nokuneshirikadzi, kuti navo vadye mukati mwemadhorobha enyu vagute, naapo unozoti pamberi paMambo Mwari, Mwari wako, “Ndaunza izvo zvakachena kubva mumhatso mwangu, zve, ndazvipa kumuRevhi, nokumupara, nokunousina baba, nokuneshirikadzi, kudai ngemipango yako yeshe yewakandipanga ndiyo; andizi kugura mipango yako, zve, andizi kuiriyarwa. Andizi kudya kwezviri mukuchema kwangu, zve, andizi kutora kwezviri kuti ndishandise ngenjira yakasvipiswa, nokuti kuzvipira ngendaa yevakafa. Asi ndakapurutana kuneizwi raMambo Mwari, Mwari wangu, neni ndakaita kudai ndizvo zveshe zvewakandipanga. Ringira pasi kubva uri mudenga ugaro hwako hwakachena, ufumise vanhu vako vaIsuraeri, nenyika yewakatipa, kudai ngezvewakapika kunemadzibaba edu, nyika inoerera mukaka nouchi.” Ngeiri zuva Mambo Mwari, Mwari wenyu wamupanga kuti muite izvi zviemeso nezvitongero. Ndizvo munozozvingwarira nokuzviita ngomwoyo yenyu yeshe, nomweya yenyu yeshe. Imwimwi mwakatenda pamberi paMambo Mwari nyamashi kuti aite Mwari wenyu, nokuhamba ngenjira dzake, nemipango yake, nezvitongero zvake, nokupurutana izwi rake. Mambo Mwari wakatendera nyamashi kuti muite vanhu vepamwoyo wake, kudai ngezvaakamugondisa, kuti muingwarire mipango yake yeshe; nokumukudza padera kupinda madzinza eshe aakasika, mukuirikidza, nangezina, nomukuremeredzwa; zve, kuti muite vanhu vakacheneswa vaMambo Mwari, Mwari wenyu, kudai ngezvaakaereketa. Mosi pamwepo nevakuru vaIsuraeri vakapanga vanhu vechiti, “Ngwarirai mipango yeshe iyi yendamupanga nyamashi. Kunozoitika ngezuva romunozoambuka Jorodhani kupotera munyika yomunopuwa ndiMambo Mwari, Mwari wenyu, kuti munozodziemesera mapuwe makuru, nokuaseta ngesuko. Nemwi munozonangura padera pao eshe mazwi ezvironzo izvi, mwaambuka kupotera munyika yomunopuwa ndiMambo Mwari, Mwari wenyu, nyika inoerera mukaka nouchi, kudai ngezvaakamugondisa Mambo Mwari, Mwari wemadzibaba enyu. Ndizvo apo mwaambuka Jorodhani, munozoemesa aya mapuwe, endinomupanga ndiwo nyamashi, muMutunhu Ebhari, nemwi munozoaseta ngesuko. Naapo munozoakira Mambo Mwari, Mwari wenyu arita remapuwe; musazoshandisa chokuseta ndicho chesimbi kwaari. Munozoaka arita iro kunaMambo Mwari, Mwari wenyu ngemimhu yemapuwe. Munozopira midiro yokupisha apo kunaMambo Mwari, Mwari wenyu. Munozopira midiro yokunyarara, munozoidya apo, mudakare pamberi paMambo Mwari, Mwari wenyu. Munozonangura eshe mazwi ezvironzo izvi padera pemapuwe anase kuoneka pamhene.” Mosi nevapristi vaRevhi vakaereketa kunavaIsuraeri veshe vechiti, “Ngwarai, mupurutane imwimwi vaIsuraeri! Nyamashi maavanhu vaMambo Mwari, Mwari wenyu. Ndizvo munozopurutana izwi raMambo Mwari, Mwari wenyu, muite mipango yake nezvitongero zvake zvendinomupanga nyamashi.” Mosi wakapanga vanhu zuva ririro echiti: “Ava vanhu ndivo vanozoema padera poMutunhu weGerizimu kuti vadakadzise vanhu, apo mwazoambuka Jorodhani: vaSimeoni, nevaRevhi, nevaJudha, nevaIsakha, nevaJosefa, nevaBhenjamini. Naava ndivo vanozoema padera poMutunhu Ebhari kuti vatuke: vaRubheni, nevaGadhi, nevaAsha, nevaZebhuruni, nevaDhani, nevaNafitari. Zvino vaRevhi vanozodaidzira ngeizwi guru, vechiti kuvamuna veshe veIsuraeri. “Wakatukwa uwo munhu unozoita muedzaniso wakatsetswa, nokuti wakaumbwa, uri chinyangadzo kunaMambo Mwari, mushando womunhu unobheja, echiuisa mundau yakafishika.” Navanhu veshe vanozopingura vechiti, “Ameni!” “Wakatukwa uwo munhu unozoita chishekedzo ndibaba ake namai.” Navanhu veshe vanozoti, “Ameni!” “Wakatukwa uwo unodusa hoko yomugano wenyika yomuakirwana wake.” Navanhu veshe vanozoti, “Ameni!” “Wakatukwa uwo unopaukisa bofu kubva munjira.” Navanhu veshe vanozoti, “Ameni!” “Wakatukwa uwo unokunukudza kutongwa kwomupara, nokwousina baba, nokweshirikadzi.” Navanhu veshe vanozoti, “Ameni!” “Wakatukwa uwo unoatana nomukadzi wababa ake, ngokuti wafukura upunu hwababa, ake.” Navanhu veshe vanozoti, “Ameni!” “Wakatukwa uwo unoatana nokuti ngeiri mhuka.” Navanhu veshe vanozoti, “Ameni.” “Wakatukwa uwo unoatana nehanzvadzi yake, mwanasikana wababa ake, nokuti mwanasikana wamai ake.” Navanhu veshe vanozoti, “Ameni!” “Wakatukwa uwo unoatana navambuya vake.” Navanhu veshe vanozoti, “Ameni!” “Wakatukwa uwo unouraya muakirwana wake ngokufishika.” Navanhu veshe vanozoti, “Ameni!” “Wakatukwa uwo unoashira chitengero chokuuraya munhu usina ndaa.” Navanhu veshe vanozoti, “Ameni!” “Wakatukwa uwo usikapurutani mazwi aya eshe kuaita.” Navanhu veshe vanozoti, “Ameni!” Kudai mwechizonasa kupurutana kuizwi raMambo Mwari, Mwari wenyu, kungwarira nokuita mipango yake yeshe, yendinomupanga nyamashi, Mambo Mwari, Mwari wenyu unozomukudza kupinda madzinza eshe ari munyika. Nazveshe izvi zvifumiso zvinozouya kwomuri zvimugumire, kudai mwechizopurutana izwi raMambo Mwari, Mwari wenyu. Munozofumiswa muri mumadhorobha enyu, munozofumiswa muminda yenyu. Vanozofumiswa avo vanozobarwa ndimwi, nemichero yemavhu enyu, nezvinozobarwa ngezvifuyo zvenyu; zveshe zvifuyo zvenyu zvichawanzwa. Zvinofumiswa zvitundu zvenyu nendiro dzenyu dzokukanyira. Munozofumiswa mukupotera kwenyu nomukubuda kwenyu. Mambo Mwari unozoita kuti magaa enyu anomumukira aurawe pamberi pokuona kwenyu; vanozobuda kurwa nemwi ngenjira imwe, vechizotiza kubva kwomuri ngenjira nomwe. Mambo Mwari unozopanga zvifumiso padera penyu mumatura enyu, nokwezviri zveshe zvomunoshanda ngenyara dzenyu; naye unozomufumisa munyika yomunozopuwa ndiMambo Mwari, Mwari wenyu. Mambo Mwari unozomugwinyisa kuti muite dzinza rakachena kwaari, kudai ngezvaakapika kwomuri, kudai mwechizongwarira zvironzo zvaMambo Mwari, Mwari wenyu, nokuhamba munjira dzake. Vanhu veshe vomunyika vanozoona kuti imwimwi munodaidzwa ngezina raMambo Mwari; navo vanozomutya. NaMambo Mwari unozowanzisa nhumbi dzenyu, vana vanobarwa ndimwi, zvifuyo zvenyu, zvirimwa zvemavhu enyu, munyika yaakapika ndiyo Mambo Mwari kumadzibaba enyu, kuti ape kwomuri. Mambo Mwari unozomubeurira upfumi hwake hwakanaka, denga kuti rinayise mvura padera penyika ngenguva kwayo, nokufumisa mushando weshe wenyara dzenyu. Nemwi munozokweretesa madzinza akawanda, asi imwimwi amuzokwereti. Mambo Mwari unozomuita soro, haiwa kuti muite muswe; munozoita vari padera kwega, amuzoiti vari pashi, kudai mwechizopurutana mipango yaMambo Mwari, Mwari wenyu, vendinomupanga nyamashi, kuti muingwarire nokuiita. Musazopauka kubva kunerimwe remazwi mazhinji endinomupanga, kuenda kumudyo nokuti kuenda kumuoshwe, kuti muteere zvimwari kuzvishandira. Asi kudai musikazopurutani izwi raMambo Mwari, Mwari wenyu, kungwarira kuita yeshe mipango yake, nezviemeso zvake zvendinomupanga nyamashi, izvi zveshe zvituko zvinozomugumira nokumubata. Munozotukwa mumadhorobha enyu nomuminda yenyu. Zvinozotukwa zvitundu zvenyu nendiro dzokukanyira dzenyu. Zvinozotukwa vanobarwa ndimwi, nemichero yeminda yenyu, nezviyo zvenyu zvinozobarwa. Kunozotukwa kupotera kwenyu nokubuda kwenyu. Mambo Mwari unozounza padera penyu kutukwa, nokutsverudzwa, nokuganyirwa, kuneizvo zveshe zvomunozoita ngenyara dzenyu, metsa mupedzwe, metsa mufe paripo; ngendaa yokushata kwezviito zvenyu zvemwakaita, ngokuti mwakandiramba. Mambo Mwari unozoita kuti nhenda ibatire kwomuri, metsa amupedza kubva padera penyika yomunoenda koogara nhaka yayo. Mambo Mwari unozomurova ngorufuba, mutsaratsara, chizvimbo, kupisha kukurutu, kuoma kwenyika, chimbarara, rotarota, nazvo zvinozomuteera metsa mupere. Denga riri padera pemasoro enyu rinozoita thusi, nemavhu ari pashi penyu anozoita simbi. Mambo Mwari unozoita kunaya kwenyika yenyu kuti kuite unga nebukuta: zvinozonaya padera penyu kubva mudenga metsa mupedzwe. Mambo Mwari unozoita kuti munyiswe pamberi pemagaa enyu; munozobuda kuenda koorwa navo ngenjira imwe, mwechizobva pamberi pavo ngenjira nomwe. Munozoita vanonyenyiwa ngemadzinza enyika dzeshe. Miiri yenyu inozoita kudya kweshiri dzeshe dzomudenga, nokuzvikara zvomunyika, apana nomunhu unozozvidzinga. Mambo Mwari unozomuchaya ngemamota omuEgipite, maronda makuru, gwembe, mhezi, izvo zvisikarapiki. Mambo Mwari unozomuchaya ngoupengo, noubofu, nokukangaidzwa kwemipinimidzo. Nemwi munozopamhira masikati, kudai ngebofu rinopamhira muchidima, asi amuzobudiriri munjira dzenyu; munozoita vanotambudzwa, nevanochakatwa kwega kunoti mhera nariini, apana munhu noumwe unozomuponesa. Unozoroora mukadzi, asi umweni unozoatana naye. Unozoaka mhatso, asi umweni unozoigara. Unozosima munda wemivhini, asi auzodyi michero yayo. Kabi yako inozourawa pamberi pokuona kwako, newe auzoidyi. Mbongoro yako inozobvukwa kubva pamberi pehope yako, isikachazounzwizve kwouri. Makwai ako anozopuwa magaa ako, newe akuna unozokudetsera. Vakororo vako nevanasikana vako vanozopuwa kuvanhu vamweni, madziso ako akaringira; unozorwadzisa madziso ako ngokutsvaka zuva reshe, asi usina simba rokuita chiro. Mirimwa yenyika yako, nemishando yako yeshe zvinozodyiwa ngedzinza rousikazii; newe unozotambudzwa wechitsikwatsikwa pashi nguva dzeshe, metsa upenge ngendaa yeizvo zvounoona ngemadziso ako. Mambo Mwari unozochaya mumabvi nemirenje, ngemamota anorwadza asikarapiki, kubvira ngepashi petsoka dzako metsa kuguma kunhubvuma yesoro. Mambo Mwari unozomutora pamwepo namambo wenyu womunozoemesa padera penyu, kuenda kudzinza romusikazii, imwimwi nokuti madzibaba enyu; naapo munozoshandira zvimwari zvimweni zvemiti nezvemapuwe. Munozoita chiro chinonyenyesa chisana nechinai pakati pemadzinza eshe apo paanozomuisa Mambo Mwari. Nemwi munozobuda nembeu dzakawanda dzokukusha mumunda, asi munozokukura zvishomani, ngokuti ndongwe dzinozozvidya. Nemwi munozosima mivhini nokuitongora, asi amuzomwi vhini rayo, nokuti kukaya michero yayo, ngokuti inozodyiwa ngemakonye. Munozoa nemiorivhi munyika yenyu yeshe, asi amuzozori mafuta ayo, ngokuti miti yemiorivhi yenyu inozoporodza michero yayo. Nemwi munozobereka vakororo nevanasikana, asi avazogari vari venyu, ngokuti vanozotorwa kuitwa hloko. Miti yenyu yeshe, nemichero yenyika yenyu inozopedzwa ngendongwe. Vapara vari pakati penyu vanozokuriswa nokua padera penyu kakurutu; neimwimwi munozodzaswa pashi kakurutu. Vanozomukweretesa asi imwimwi amuzokweretesi kwavari; ivo vanozoita soro asi imwimwi munozoita muswe. Zveshe izvi zvituko zvinozomugumira nokumurumbirira metsa mupedzwe, ngokuti amuzi kupurutana kuizwi raMambo Mwari, Mwari wenyu, kuti mungwarire mipango yake nezviemeso zvake zvaakamupanga. Nazvo zvinozoa pakati penyu kuita chioniso nechishamiso, nepakati pemibarirwana yenyu mhera nariini. Ngokuti amuzi kumushandira Mambo Mwari, Mwari wenyu ngokudakara, nokudakara kwomwoyo, ngendaa youwandu hwezviro zvenyu zveshe, ndizvo munozoshandira magaa enyu, aanozotuma Mambo Mwari kurwa nemwi, munzara nenyota, nomuutitinini nomukutama zveshe. Unozoisa joka resimbi mumitsipa yenyu metsa amupedza. Mambo Mwari unozounza dzinza rinobva kuretu kurwisana nemwi, rinobva kumagumo enyika, rinokasira kudai ngokumbururuka kwegodzi, iro dzinza ndimi yaro amuzoizwi; dzinza rinehope dzinotyisa, risikaremeredzi munhu waa musharuka, nokuti kuitira nyasha munhu mudoko. Naro rinozodya michero inoberekwa ngezvifuyo zvenyu, nemichero yenyika yenyu, metsa mwapedzwa; arizomusiirizve zviyo, nokuti vhini, nokuti mafuta, nokuti zvinoberekwa ngen'ombe dzenyu, nokuti marumbu ehwai nembudzi dzenyu, metsa mwapedzwa. Rinozomukomba mumadhorobha enyu eshe, metsa marukumbati enyu akareba akashosherwa, anemagondero enyu, awa pashi mukati mwenyika yenyu yeshe; rinozomukomba mumadhorobha enyu eshe, mukati mwenyika dzenyu dzeshe dzemwakapuwa ndiMambo Mwari, Mwari wenyu. Nemwi munozodya vana venyu, nyama yevakororo venyu neyevanasikana venyu, avo vemwakapuwa ndiMambo Mwari, Mwari wenyu, muri mukukombwa, nomukutambudzika kwomunozotambudzwa ndikwo ngemagaa enyu. Kunyazwi mwamuna wakanakisisa, akapfaa pakati penyu, unozoita runya kunechokudya chehama yake, mukadzi wepaditi rake, nokunewokupedzisira wevana vake avo vaanozosiya, asikapi kunyazwi ngouri wavo nyama yevana vake, avo vaanozodya; ngokuti aana chiro chakasara kwaari mukukombwa, nomukutambudzika kwaanozomutambudza ndikwo magaa enyu mukati mwemadhorobha enyu eshe. Mukadzi wakanakisisa, akapfaa pakati penyu, uwo usikakoni nokutsika ngetsoka dzake pashi pamavhu, ngendaa yokupfaisisa kwake unozoita runya kunechokudya chemwamuna wepaditi rake, nokunomukororo wake, nokunemwanasikana wake, nokunoruchiya rwake runozobuda ngepakati pemahasva emirenje yake, nokunevana vake vaanozobereka; ngokuti unozovadya ngokufishika ngokutama chiro nachimwe mukukombwa, nomukutambudzika kwomunozotambudzwa ndikwo ngemagaa enyu mukati mwemadhorobha enyu. Kudai musikangwaridziri kuita eshe mazwi emipango akanyorwa mubhuku iri, mutye zina iri rakachena nerinotyisa raMambo Mwari, Mwari wenyu, zvino Mambo Mwari unozomuchaya imwimwi mweshe nemibarirwana yenyu, ngemadambudziko makuru, asikaperi nenhenda dzinorwadza kakurutu, dzinoangira mukuwo wakareba. Unozopetudzazve padera penyu nhenda dzeshe dzeEgipite, dzemwakatya, nadzo dzinozobatira kwomuri. Nhenda dzimweni dzeshe, nemadambudziko eshe, kunyazwi asikazi kunyorwa mubhuku remipango iyi, Mambo Mwari unozoaunza padera penyu metsa mwapera kuparara. Kunyazwi mwaiya mwakawanda kudai ngenyeredzi dzomudenga ngouwandu munozosara mwaa vashomani, ngokuti amuzi kutenda kupurutana izwi raMambo Mwari, Mwari wenyu. Nokudai ngezveaidakara ndimwi Mambo Mwari kumuitira zvakanaka nokumuwanzisa, ngokudaro Mambo Mwari unozodakara ngokumuparadza, nokumuita kuti mupere; nemwi munozobvitwa kubva munyika yomunoenda koogara nhaka. Mambo Mwari unozomuparadzira pakati pevanhu veshe, kubvira kurupande rumwe rwenyika metsa kuguma kunorumweni; naapo munozoshandira zvimwari zvimweni zvemiti nezvemapuwe zvomusaizia, imwimwi nokuti madzibaba enyu. Nepakati paaya madzinza amutongozooni kuzorora kwetsoka yenyu. Mambo Mwari unozomupa mwoyo unohuta muriapo, nokuponyonya kwemadziso nomweya wakaremba. Kupona kwenyu kunozogara kunemaharura pamberi penyu; munozotya usiku nemasikati, nemwi amuzoa nemagondero okupona kwenyu. Mangwanani munozoti, “Kudai aiya madeekoni!” Neamadeekoni munozoti, “Kudai aiya mangwanani!” Ngendaa yokutya kwomwoyo wenyu kwomunozotya ndikwo, neizvo zvomunozoona ngemadziso enyu. Mambo Mwari unozomupetudzazve Egipite ngengarava, ngenjira iyo yendakaereketa kwomuri kuti amuchazoionizve; naapo munozodzitengesa pachenyu kunemagaa enyu kuita hloko dzevamuna nedzevakadzi, asi akuna nomunhu unozomutenga. Aya ndiwo mazwi echitenderano chaakapanga Mambo Mwari kunaMosi kuti achiite nevaIsuraeri vari munyika yeMoabhi, kututsira kuchitenderano chaakaita navo vari muHorebhi. Mosi wakadaidza vaIsuraeri veshe, akati kwavari: Mwakaona izvo zveshe zvaakaita Mambo Mwari pamberi pokuona kwenyu munyika yeEgipite kunaFaro, nokuvaranda vake veshe, nokunyika yake yeshe, zviedzo zvikuru zvakaonwa ngemadziso enyu, zvioniso, neiyi minana mikuru. Asi Mambo Mwari metsa nyamashi aazi kumupa mwoyo wokunasa kuzwisisa, nokuti madziso okuona, nokuti nzee dzokuzwa. Ndakamutungamirira mushango aya makore makumi marongomuna. Machira enyu emwakasimira aazi kusakara, nemagwada mutsoka dzenyu aazi kusakara. Amuzi kudya chingwa, nokuti kumwa vhini rinesimba, kuti muzie kuti inini ndini Mambo Mwari, Mwari wenyu. Naapo petakaguma kundau iyi, Sihoni mambo weHeshibhoni naOgi mambo weBhashani, vakabuda kurwisana nesu, asi takavanyisa. Takatora nyika yavo, tikaipa kuita nhaka kuvaRubheni, nokuvaGadhi, nokurupande rwedzinza raManase. Ndizvo nasai kungwarira mazwi echitenderano ichi, kuti mubudirire kwezviri zveshe zvomunoita. Imwimwi mwakaema mweshe nyamashi pamberi paMambo Mwari, Mwari wenyu; nduna dzemadzinza enyu, vakuru venyu, vatungamiriri venyu, vanhu veshe vaIsuraeri, vadoko venyu, vakadzi venyu nevapara venyu vari pakati pekamba renyu, kubvira kuvatemi vehuni dzenyu metsa kuguma kuvacheri vemvura yenyu, kuti mupotere muchitenderano naMambo Mwari, Mwari wenyu, chinopikwa ngemhiko, chaanoita Mambo Mwari, Mwari wenyu nemwi nyamashi, kuti amugwinyise nyamashi kuti muite vanhu vake kwaari ega, kuti iye aite Mwari kwomuri, kudai ngezvaakamugondisa, nokudai ngezvaakapika kunemadzibaba enyu, kunaAbrahama, Isaka, nokunaJakobe. Ndinoita ichi chitenderano chinopikwa ngemhiko haiwa kwomuri mwega imwimwi mwakaema pano nesu nyamashi pamberi paMambo Mwari, Mwari wedu, asi ndinochiitawo neavo vasiri pano nesu nyamashi. Munozia ngokugara kwedu munyika yeEgipite, nokuhamba kwetakaita mukati mwemadzinza awo etakadarika. Mwakaona zvinyangadzo zvavo, nemiedzaniso yavo inonyenyesa yemiti, yemapuwe, yesirivha neyomukore, iyo yaiya pakati pavo. Kungaitika kuti kungaapo pakati penyu munhu womwamuna, nokuti womukadzi, nokuti mhuri, nokuti dzinza, unomwoyo watokunukuka nyamashi kubva kunaMambo Mwari, Mwari wedu, kuti aende kooshandira zvimwari zvemadzinza awo. Kungaitika kuti pakati penyu kungaapo runzinde runobudisa chanduru chinoukaira runovava. Avo veshe vanozwa aya mazwi emhiko iyi, vechidzifumisa pachavo, vechipinimidza mumwoyo yavo, “Takangwaririka kunyazwi techihamba munjira dzedu dzemisikanzwa” (ndizvo vechiunza madambudziko panezveshe zvakaoma nezvakapfaa.) Mambo Mwari aazovakunguriri, asi ushungu hwaMambo Mwari nendurumwa zvake zvinozobaka kuneavo vanhu. Zvituko zveshe zvakanyorwa mubhuku iri zvinozomugumira, naMambo Mwari unozodzima mazina eavo vanhu kubva pashi pomudenga. Mambo Mwari unozovabvisa kubva kumadzinza eshe aIsuraeri, kuti vapinde mukushata, kudai ngezvituko zveshe zvechitenderano zvakanyorwa mubhuku iri remipango. Mibarirwana inozoteera yevana venyu vanozoapo ngesure kwenyu, nomupara unozobva kunyika iri kuretu, vanozoona madambudziko eiyo nyika nenhenda yaanozoisa Mambo Mwari padera payo. Mavhu enyika yeshe anobaka ngesorufa nomunyu, apana chinosimwa, apana chinomera nokukura, apana nomwenje unokuremwo, kudai ngokuparadzwa kweSodhoma neGomora, Adhima neZebhoimu, ao aakaparadza Mambo Mwari muushungu hwake hunotyisa. Ngegwinyiso madzinza eshe anozoshamiswa echiti, “Mambo Mwari wakaita izvi ngenyi kuneiyi nyika? Kunozoronzenyi uku kubaka kwoushungu hwakadai kukura?” Naapo vanhu vanozoti, “Ngokuti vakasiya chitenderano naMambo Mwari, Mwari wemadzibaba avo, chaakaita navo apo akavabudisa kubva munyika yeEgipite. Vakapetuka kooshandira zvimwari zvimweni nokuzvidira, zvimwari zvevasaizia nezvaasikazi kupa kwavari. Ndizvo ushungu hwaMambo Mwari hwakabaka kuneiyi nyika, kuiunzira padera payo zvituko zveshe zvakanyorwa mubhuku iri. Mambo Mwari wakavabvita kubva munyika yavo muushungu, mukutseneka nomukunyangadzwa kukuru, naye wakavarashira kunyika imweni, kudai ngezvezvakadaro nyamashi.” Zvino zvakafishika ngezvaMambo Mwari, Mwari wedu; asi izvo zvakaoneswa pamhene ngezvedu nevana vedu kunoti mhera nariini, kuti tiite mazwi eshe emipango iyi. Naapo izvi zviro zveshe zvechizomugumira, zvifumiso nezvituko, zvendaisa pamberi penyu, nemwi mwechizozvikarakadza muri munyika dzeshe, apo pomunozodzingirwa ndiMambo Mwari, Mwari wenyu, tenderukirai kunaMambo Mwari, Mwari wenyu, nokupurutana izwi rake kudai ndizvo zveshe zvendinomupanga ngezuva ranyamashi, imwimwi nevana venyu, ngomwoyo yenyu yeshe, nomweya yenyu yeshe. Zvino ngouwo mukuwo Mambo Mwari, Mwari wenyu unozomutsandura uhloko hwenyu, nokumuitira nyasha, naye unozouyazve amuunganidze kubva kunyika dzeshe, paakamuparadzira Mambo Mwari, Mwari wenyu. Kunyazwi kudai mwakadzingirwa kuita hloko metsa kumagumo enyika, kubveyo Mambo Mwari, Mwari wenyu unozomuunganidza, kubveyo Mambo Mwari unozomupetudza. Mambo Mwari, Mwari wenyu unozomuhwirinzazve munyika iyo yevakagara nhaka madzibaba enyu, munozoigara nhaka; naye unozomuitira zvakanaka, amuwanzise kupinda madzibaba enyu. Zve, Mambo Mwari, Mwari wenyu, unozocheka mwoyo wenyu nomwoyo yemibarirwana yenyu, kuti mude Mambo Mwari, Mwari wenyu ngomwoyo wenyu weshe, nomweya wenyu weshe, kuti mupone. Mambo Mwari, Mwari wenyu, unozoa zveshe izvi zvituko padera pemagaa enyu, nepadera paavo vanomunyenya nokumutambudza. Zvino munozopetuka nokupurutana izwi raMambo Mwari, nokuita yeshe mipango yake yendinomupanga nyamashi. Mambo Mwari, Mwari wenyu, unozoita kuti mubudirire kakurutu kumishando yeshe inoitwa ngenyara dzenyu, nokunevanobarwa ndimwi, nokunezvinobarwa ngezvifuyo zvenyu, nokuzvirimwa zveshe zvenyika yenyu. Ngokuti Mambo Mwari unozodakara ndimwi mukubudirira kwenyu muzvakanaka, kudai ngezvaakadakara ngokubudirira kwemadzibaba enyu, naapo mwechizopurutana izwi raMambo Mwari, Mwari wenyu, kungwarira mipango yake nezviemeso zvake zvakanyorwa mubhuku iri remipango, nokudai mwechizotenderukira kunaMambo Mwari, Mwari wenyu ngomwoyo wenyu weshe nomweya wenyu weshe. Ngegwinyiso iyi mipango yendinomupanga nyamashi, aizi kunyanya kukonza kwomuri, zve, airi kuretu akadi kubva kwomuri. Aisiri mudenga, kuti mungaronza kuti, “Ndiani unozotikwirira mudenga, kuti aiunze kwetiri, kuti tiizwe nokuiita?” Zve, aisiri seri kworuandhle, kuti mungaronza, “Ndiani unozotiambukira ruandhle, kuti aiunze kwetiri, tiizwe nokuiita?” Haiwa, izwi iri riri pasinde penyu, riri mumuromo mwenyu, nomumwoyo mwenyu kuti muriite. Wonai, ndaisa pamberi penyu nyamashi kupona nokunaka, nokufa nokushata. Mukapurutana mipango yaMambo Mwari, Mwari wenyu yendinomupanga nyamashi ngokumuda Mambo Mwari, Mwari wenyu, kuhamba ngenjira dzake, nokungwarira mipango yake, nezviemeso zvake, nezvitongero zvake munozopona, mwechizowanda; naMambo Mwari, Mwari wenyu unozomufumisa munyika yomunoenda koogara nhaka yayo. Asi kudai mwoyo yenyu yechizokunukuka, musikazozwi, asi mwechizopaukiswa kugwadamira zvimwari zvimweni nokuzvishandira, ndinomuronzera nyamashi, kuti ngegwinyiso munozopera; amuzogari mazuva akawanda munyika iyo yomunoambuka Jorodhani kupotera koogara nhaka yayo. Ndinodaidza denga nenyika kuti zviite chapupu ndimwi nyamashi, kuti ndaisa pamberi penyu kupona nokufa, zvifumiso nezvituko. Ndizvo tsanangurai kupona, kuti mweshe imwimwi nemibarirwana yenyu mupone, mumude Mambo Mwari, Mwari wenyu, mupurutane izwi rake, munamatire kwaari; ngokuti zvinoronza kupona kwenyu, nouwandu hwemazuva enyu, kuti mugare munyika yaakapika Mambo Mwari kupa kunemadzibaba enyu, kunaAbrahama, Isaka, nokunaJakobe. Naapo Mosi apedza kuereketa eshe mazwi aya kunevaIsuraeri, wakati kwavari, “Ndaane makore zana nemakumi mairi. Andichakoni kubuda nokupotera, naMambo Mwari wakati kwendiri, ‘Auzoambuki iri Jorodhani.’ Mambo Mwari, Mwari wenyu emene ndiye unozoambuka pamberi penyu. Unozouraya aya madzinza kubva pamberi penyu, nemwi munozoagara nhaka. Joshua unozotungamirawo pamberi penyu, kudai ngezvaakagondisa Mambo Mwari. Mambo Mwari unozoita kwaari madzinza kudai ngezvaakaita kunaSihoni naOgi, madzimambo evaAmori, nokunyika yavo, apo paakavauraya. Mambo Mwari unozovapa kwomuri nemwi munozoita kwavari kudai ngemipango yendakamupanga. Itai vakagwinya, mushinge, musavatya, nokuti kutyiswa ndivo, ngokuti Mambo Mwari, Mwari wenyu, uwo unoenda nemwi; aazomurekeri nokuti kumusiya.” Zvino Mosi wakadaidza Joshua, akati kwaari mukuona kwevaIsuraeri veshe, “Ita wakagwinya, ushinge, ngokuti ndiwe unozoenda naava vanhu kunyika yaakapika ndiyo Mambo Mwari kunemadzibaba avo kuipa kwavari, newe unozoita kuti vagare nhaka yayo. NdiMambo Mwari ndiye unohamba pamberi pako. Unozoa newe, aazokukoreresi nokuti kukusiya. Usatya, usapera simbazve.” Zvino Mosi wakanyora izvi zvironzo, wakazvipa kuvapristi, vakororo vaRevhi, vaitwara bhokisi rechitenderano chaMambo Mwari, nokuvakuru veshe vaIsuraeri. Mosi wakavapanga echiti, “Panoperera makore manomwe ngomukuwo womushongano wegore rokusunhura, kumushongano wemichacha, apo vaIsuraeri veshe vanozouya kuoneka pamberi paMambo Mwari, Mwari wavo, mundau yaanozotsanangura, munozodzidza mipango iyi pamberi pevaIsuraeri veshe mukuzwa kwavo. Munozounganidza vanhu pamwepo, vamuna, vakadzi, vana nevapara vari mukati mwemadhorobha enyu, kuti vazwe, kuti vadzidze kumutya Mambo Mwari, Mwari wenyu, nokungwarira kuita eshe mazwi emipango iyi, kuti vana vavo, avo vasati vazia chiro, vazwe, vadzidze kumutya Mambo Mwari, Mwari wenyu, kudai ngemazuva eshe omunozopona munyika yomunozoambuka kooigara nhaka.” Mambo Mwari wakati kunaMosi, “Nguva yako yokuti ufe yaapasinde; daidza Joshua, dziemesei pachenyu mutende romushongano, kuti ndimutume.” Ndizvo Mosi naJoshua vakaenda vakadziemesa mutende romushongano, naMambo Mwari wakaoneka mutende romushongano ari mumvumi yegore; nemvumi yegore yakaema padera pomusiwo wetende romushongano. Mambo Mwari wakati kunaMosi, “Ngokukasira unozoata nemadzibaba ako. Zvino ava vanhu vanozomiruka, vaite umhombo ngokuteera zvimwari zvevanhu vapara venyika yevanozoenda koogara pakati pavo; navo vanozondisiya, nokugura chitenderano changu chendakaita navo. Ushungu hwangu hunozobaka kwavari ngeiro zuva. Ndinozovasiya, ndifishe hope yangu kubva kwavari; navo vanozopedzwa, nokushata kwakawanda nemadambudziko akawanda zvinozovagumira. Ndizvo vanozoti ngeiro zuva, ‘Kushata uku akutigumiri here ngokuti Mambo Mwari, Mwari wedu apana pakati pedu?’ Ngegwinyiso ndinozofisha hope yangu ngeiro zuva ngendaa yokushata kweshe kwevanozoita, ngokukunukuka kuenda kuzvimwari zvimweni. Zvino nyora urwu ruyo, urudzidzise vaIsuraeri; uruise mumuromo mwavo, kuti urwu ruyo ruite chapupu changu kuvaIsuraeri. Ngokuti apo ndazovaunza munyika yendakapika ndiyo kumadzibaba avo, inoerera mukaka nouchi, navo vadya vaguta, nokukora, vanozotenderukira kuzvimwari zvimweni nokuzvishandira, kundishoora nokugura chitenderano changu. Naapo kushata kwakawanda, nemadambudziko akawanda anozovagumira, urwu ruyo runozoita chapupu ndivo, ngokuti aruzoriyarikanwi kubva kumiromo yemibarirwana yavo. Ngokuti ndinozia mipinimidzo yavo yevatoronga zvinopano, ndisati ndavagumisa munyika yendakapika ndiyo kwavari.” Ndizvo Mosi wakanyora ruyo urwu ngezuva ririro, akarudzidzisa vaIsuraeri. Zvino Mambo Mwari wakapanga Joshua mukororo waNuni echiti, “Ita wakagwinya, ushinge, ngokuti ndiwe unozopotedza vaIsuraeri munyika yendakapika kupa kwavari; neni ndinozoa newe.” Apo Mosi aiya apedza kunyora mazwi emipango iyi mubhuku, metsa kumagumo, Mosi wakapanga vaRevhi vaitwara bhokisi rechitenderano chaMambo Mwari echiti, “Torai bhuku iri remipango, muriise ngeparutii mukati mwebhokisi rechitenderano chaMambo Mwari, Mwari wenyu, kuti rindogara ririmwo kuita chapupu kwomuri. Ngokuti ndinozia kumukira kwenyu, nemisikanzwa yenyu. Apo ndichapona nemwi nyamashi, mwamukira Mambo Mwari, kunozopinda kwakaitawani ngesure kwokufa kwangu! Ndiunganidzirenyi vakuru veshe vemadzinza enyu, nenduna dzenyu kuti ndierekete mazwi aya munzee dzavo, ndidaidze denga nenyika kuita chapupu ndivo. Ngokuti ndinozia kuti ngesure kwokufa kwangu munozodzisvipisa yaamho, mwechikunukuka kubva munjira yendakamupanga. Kushata kunozomugumira kumazuva okugumisira, ngokuti munozoita zvakashata mukuona kwaMambo Mwari, kumumusira ushungu ngendaa yemishando yenyara dzenyu.” Zvino Mosi wakaereketa mukuzwa kwembungano yeshe yaIsuraeri mazwi ourwu ruyo, metsa waiya aapedza. “Izwanyi, imwimwi matenga, neni ndinozoereketa; nyika ngaizwe mazwi omuromo wangu. Kudai kudzidzisa kwangu kukadonha kudai ngemvura, kuereketa kwangu kukagara kudai ngebeto, kudai ngezvimufatafata zvemvura padera pemafiba, nokudai ngebumhakamwe padera pomwenje. Ngokuti ndinozoteketesa zina raMambo Mwari; tunhumadzai imwimwi ukuru kunaMwari wedu! Ruware, mushando wake uri wakaperera nenjira dzake dzeshe dziri kutonga kwakanaka. Mwari wakagondeka, usina kuchengedza, wakarurama nokuperera, asi imwimwi muri vasikagondeki, amuzi kusisira kuita vana vake, muri mubarirwana unopauka nowakashongoroka. Ndiyo njira here yomunoripira Mambo Mwari ndiyo, imwimwi vanhu mapenzi nevasina kungwara? Andiye here baba wenyu uwo wakamusika, uwo wakamuita nokumugwinyisa? Cherechedzai mazuva ekare, pinimidzai ngemakore emibarirwana mizhinji; bvunzai madzibaba enyu, navo vanozomuronzera, nevakuru venyu, navo vanozomuronzera. Apo Uripadera-pazveshe wakakoanisira kumadzinza nhaka yavo, apo akaparadzanisa vakororo vaAdhamu, wakaemesa migano yevanhu kudai ngouwandu hwevana vaIsuraeri. Chikoaniswa chaMambo Mwari vanhu vake; Jakobe chikoaniswa chenhaka yake. Wakamuona ari munyika yakaoma hlengwe, nomushango risina nechiro, rinotyisa; wakamutendedza apo naapo, akamudzidzisa, akamungwarira kudai ngemboni yedziso rake. Kudai ngedorambudzi rinoteta chisaki charo, rechimbururuka padera pevana varo, rechitambanudza maphaphiro aro rechivatora nokuvatwara padera pemaphaphiro aro, Mambo Mwari ega wakamutungamira, inga pasina chimwari chipara naye. Naye wakaita kuti akwire padera pendau dzakakwirira dzomunyika, akamurera ngezvinobarwa muminda; wakamuita kuti amwe uchi hunobva mubuwe, nemafuta anobva kubuwe resimbi. Mukaka wakakora wezvifuyo, nomukaka wehwai nembudzi, nemafuta emakwai nemagondohwe; mikono yeBhashani, nembudzi, nemafuta ekoroni yakanaka; nemwi mwakamwa vhini rakanaka yaamho kubva kumavhini. Asi Jeshuruni wakakora, wakamukira. Wakaita mikanya yokukora, wakafema, wakaita michinya yemafuta! Wakasiya Mwari uwo wakamusika, wakanyenyeredza Ruware rwokupona kwake. Vakamumusira ndurumwa ngendaa yezvimwari zvipara, nezvinyangadzo zvevakamunyangadza ndizvo. Vakapira mibairo kunemadhimoni, haiwa kunaMwari, kuzvimwari zvevasaizia, kuzvimwari zvitsva zvichaamba kubuda, zvisaityiwa ngemadzibaba enyu. Amuzi kupinimidza ngoRuware urwo rwakamusika, nemwi mwakariyarwa Mwari uwo wakamurura. Mambo Mwari wakazviona, akava nendurumwa, naye wakaramba vakororo vake nevanasikana vake.” Wakati, “Ndinozofisha hope yangu kubva kwavari, ndinozoona kuti magumo avo anozoita akadini; ngokuti vari mubarirwana unopauka, vana vasina kugondeka mukati mwavo. Vanondimusira ndurumwa ngeicho chisiri mwari akadi; vanondimusira ushungu ngezvimiedzaniso zvavo. Neni ndinozovamusira ndurumwa ngeavo vasiri vanhu; ndinozovamusira ushungu ngedzinza rinoupenzi. Ngokuti muriro wabaswa muushungu hwangu, unozobaka metsa ugume kuSheori riri pashi; unozopedza nyika nezviro zvayo, unozopisha zvitsimiso zvemitunhu. Ndinozounganidza kushata padera pavo; ndinozopedzera misee yangu padera pavo. Vanozoonda ngenzara, nokupedzwa ngokupisha kukurutu, netupuka tunodya nenhenda. Mazino ezvikara ndinozoatuma kurwisana navo, pamwepo noukaira hwezviro zvinokambaira mubukuta. Kubanze mumapato shoti richavauraya, nokutyisa kuri mukati mwemhatso, nazvo zvinozopedza veshe majaha, nemhandara, nevachaamwa pamwepo nevakuru vachena imvi.” Ndakati, “Ndinozovaparadzira kuretu, ndinozoita kuti kucherechedzwa kwavo kupere kubva pakati pevanhu.” Asi ndakatya ushungu hwemagaa, kuti magaa avo angazoshaisha kuona, kuti varonze kuti, “Nyara dzedu dzinonyisa, andiye Mambo Mwari akadi wakaita izvi zveshe.” “Ngokuti riri dzinza risina pfungwa, zve, akuna kuzwisisa pakati pavo. Kudai vaiya vakangwara, vaizonasa kuzwisisa ichi, vaizopinimidza ngemagumo avo! Zvingaita maitikirenyi kuti umwe arumbirire gumi remazana avo, nevairi varumbirire makumi emazana gumi, asi kuti Ruware rwavo rwavatengesa, naMambo Mwari waiya akavapa mumaoko avo? Ngegwinyiso ruware rwavo aruzi kudai ngoRuware rwedu, nemagaa edu emene anotonga kudaro. Mavhini avo anobva mumuvhini weSodhoma, neweminda yeGomora. Mavhini avo ari mavhini echanduru, nezvikore zvavo zvinovava. Vhini ravo riri ukaira hwenyoka dzinotyisa, noukaira hwakashata hwerovambira. Izvi azvizi kuunganidzwa kungwarirwa neni here, nazvo zvakanamirwa pandau youpfumi hwangu? Kuunzidzira ngokwangu nokuthusa; tsoka dzavo dzinozotedzemuka ngomukuwo wakaemeswa; ngokuti zuva rokutambudzika kwavo riri pasinde, kuparadzwa kwavo kunouya ngokukasira. Ngegwinyiso Mambo Mwari unozopokonyora vanhu vake, nokuva nenyasha kuvaranda vake, apo echiona kuti simba ravo rapera, akuna unosara wakasungwa nokuti wakasunhurwa.” Zvino unozoti, “Zviripari zvimwari zvavo, ruware rwavo rwevanotizira, izvo zvaidya mafuta emibairo yavo, zvaimwa vhini remidiro yokumwa? Ngazvimiruke zvimudetsere, zviite vangwariri venyu.” “Wonai zvino kuti inini, kunyazwi inini, ndini, akunazve chimwari ngepabanze pangu. Inini ndinouraya, neni ndinoponesa; ndinokuvadza, neni ndinoporesa; akuna ungabvisa kubva munyara dzangu. Ngokuti ndinomirudza nyara yangu mudenga, ndechipika kuti, kudai ngezvendinopona mhera nariini, naapo ndechizorodzera shoti yangu inon'anikira, nenyara yangu yechibatirira mukutonga; ndinozounzidzira kumagaa angu, ndinozounzidzira avo vanondizonda. Ndinozoita kuti misee yangu iradze ngengazi, neshoti yangu inozodya nyama, pamwepo nengazi yevakaurawa, neyehloko, kubva kumagaa angu anebvudzi rakareba. Kudzai, imwimwi matenga, vanhu vake mudirei nemwi mweshe zvimwari! Ngokuti iye unozounzidzira ngazi yevana vake, naye unozopa kuunzidzira kumagaa ake, naye unozochenesa nyika ngendaa yevanhu vake.” Mosi wakauya, akaereketa mazwi eshe oruyo urwu mukuzwa kwevanhu, iye naJoshua mukororo waNuni. Apo Mosi apedza kuereketa eshe mazwi aya kwavari veshe vaIsuraeri, akati kwavari, “Isai mumwoyo yenyu mazwi eshe endinomupupurira ndiwo pakati penyu nyamashi; apei kuita mupango kuvana venyu kuti vaangwarire nokuaita eshe mazwi emipango iyi. Achisiri chiro chisina shwiro kwomuri, asi ari kupona kwenyu kwemene; kubudikidza ndiwo munozowanzisa mazuva enyu munyika iyo, yomunoambuka Jorodhani kooigara nhaka.” Mambo Mwari wakaereketa kunaMosi ngezuva ririro echiti, “Kwira padera pouyu Mutunhu weAbharimu, kuMutunhu Nebho, uri munyika yeMoabhi, wakaringirana neJerikho, uringire nyika yeKhenani, yendinopa kuvaIsuraeri kuita nhaka yavo. Unozofira mumutunhu uwo wounozokwira kwouri, unozounganidzwa kunevanhu vako; kudai ngezvaakafa Aroni mukoma wako muMutunhu Hori, akaunganidzwa kuvanhu vake. Ngokuti imwimwi mweshe mwakapauka kubva kwendiri pakati pevaIsuraeri pamvura yeMeribhathikadheshi, mushango reZini; ngokuti wakakorera kundichenesa pakati pevaIsuraeri. Kunyazwi unozoona nyika uri ngekure; auzopoterimwo kunyika yendinopa vaIsuraeri.” Ichi ndicho chifumiso chaakafumisa ndicho vaIsuraeri Mosi munhu waMwari, asati afa. Wakati, “Mambo Mwari wakabva Sinai, wakabuda kubva Seira kuuya kwetiri; wakajeka kubva Mutunhu Pharani. Wakauya anevari makumi emazana ari gumi evakacheneswa; kubva kunyara yake yokumudyo kwakabuda mirazvu yomuriro. Eya, unodikana pakati pevanhu, veshe vakacheneswa vake vari munyara dzake; navo vanohamba patsoka dzako, veshe umwe ngoumwe vanoashira kupanga kwako. Mosi wakatipanga mipango, kuita nhaka yembungano yaJakobe. Kwakamiruka mambo muJeshuruni, apo vatungamiriri vevanhu vakaungana pamwepo mubatanidzwa nevaIsuraeri. Rubheni ngaapone, asafa; kunyazwi vanhu vake vari vashomani.” Neichi ndicho chaakaereketa ndiJudha: “Izwa, Mambo Mwari, izwi raJudha, umuunze kuvanhu vake; mugwinyise nyara dzake, uite mudetseri wake kumagaa ake.” NdiRevhi wakati: “Ipa kunaRevhi Thumimu noUrimu zvako kunewakacheneswa wako, uwo wewakaedza paMasa, nowowakakanidzana naye pamvura yeMeribha; uwo wakati kunababa ake namai, ‘Andizi kuvaerenga;’ aazi kumboringira hama dzake, nokuti kuzia vana vake vemene, ngokuti vakangwarira izwi rako nechitenderano chako. Vanodzidzisa Jakobe zvitongero zvako, naIsuraeri mipango yako; vanoisa mutombo unegwema rakanaka pamberi pako, nomubairo wokupisha zveshe padera pearita rako. Fumisa, iwewe Mambo Mwari, zviro zvake, ashira mushando wenyara dzake; vabaye ngomuchiunu avo vanomumukira, necheavo vanomuzonda, kuti vasazomukazve.” NdiBhenjamini wakati: “Mudikani waMambo Mwari unogara mukungwaririka pasinde pake; Mwari Uri-Padera-pazvo-zveshe unozomutendenedza zuva reshe, mudikani unozogara pakati pemapfudzi ake.” NdiJosefa wakati: “Nyika yake ngaifumiswe ndiMambo Mwari ngezvipo zvinomutengo mukuru zvinobva mudenga, beto, nemikova inoerera ngepashi; nemichero inomutengo mukuru yezuva, nezvikohiwa zvinomutengo mukuru zvomwedzi; nezviro zvikuru zvakanakisisa zvemitunhu yekare, nezviro zvinomutengo mukuru zvemitunhu zvemhera nariini; nezvipo zvinomutengo mukuru zvomunyika, nazvo zveshe zviri mukati mwayo, nokuda kwakanaka kwouwo waigara mushango. Izvi ngazviuye padera pesoro raJosefa, nepadera pesoro rouwo wakaparadzaniswa kubva kuvakoma vake. Uthende hwake hwakadai ngedangwe romukono wen'ombe nenyanga dzake dzakadai ngenyanga dzenyati; ndidzo unozotunga vanhu pamwepo metsa kumagumo enyika; vari makumi emazana ari gumi evaEfuremu, nemakumi emazana evaManase.” NdiZebhuruni wakati: “Dakara, Zebhuruni, mukubuda kwako, newe Isakha mumatende ako. Vanozodaidza vanhu kumutunhu; naapo vanozopira mibairo yokururama; ngokuti vanozodya zvouwandu hwemaruandhle, nezvoupfumi hwakafishwa mujecha.” NdiGadhi wakati: “Ngaafumiswe uwo unowandisa Gadhi! Gadhi unogara kudai ngemhondoro, unokwenga muoko pamwepo nenhubvuma yesoro. Naye wakadzitsanangurira chikoaniswa chakapindisisa kunaka kuita chake, chikoaniswa chomupi wemipango; naye wakauya pamwepo nevakuru vevanhu, akaita zvakarurama zvaMambo Mwari, nokutonga kwake kuvaIsuraeri.” NdiDhani wakati: “Dhani uri duhwa remhondoro, unozonyanduka echibva Bhashani.” NdiNafitari wakati: “A Nafitari, unokwaniswa ngenyasha, unozozadzwa ngechifumiso chaMambo Mwari; gara nhaka yokumabirirazuva neyokubani.” NdiAsha wakati: “Ngaafumiswe Asha kupinda veshe; ngaashirike kuhama dzake, naye ngaanyike tsoka dzake mumafuta. Zvokukonyesa misiwo yako isimbi nethusi; kudai ngemazuva ako, zvinozodaro kusimba rako.” Akuna wakadai ndiMwari waJeshuruni, uwo unogadha padera pematenga kuuya kukudetsera, nokuukuru hwake kudarika ngomumakore. Mwari wemhera nariini uri ukona hwako, nepashi pako iripo mioko yemhera nariini: unozodzinga magaa ako kubva pamberi pako, unozoti, “Vapedze.” Ndizvo Isuraeri unozogara mukugarisika ari ega, chinyuka chaJakobe chinozopopoma padera penyika yezviyo nevhini, apo matenga ake anozodonhesa beto. Kudakara kwounakwo, A Isuraeri! Ndiani ungaedzaniswa newe, dzinza rakaponeswa ndiMambo Mwari? Uri chihlangu chokumudetsera, uri shoti yokunyisa kwenyu! Magaa enyu anozooneka ari echimugwadamira; nemwi munozotsikatsika padera pavo. NaMosi wakakwira kubva mumabani eMoabhi kuenda kuMutunhu Nebho, padera poMutunhu Phisiga, wakaringirana neJerikho, naMambo Mwari wakamupangidzira nyika yeshe yeGireadhi, metsa kuguma Dhani, nenyika yeshe yeNafitari, nenyika yeEfuremu, neyaManase, nenyika yeshe yaJudha, metsa kuguma kuruandhle rwokumabirirazuva, nokubani, norukaro rwebani rweJerikho, dhorobha remibvumo, metsa kuguma Zoa. Mambo Mwari wakati kwaari, “Iyi ndiyo nyika yendakapika ndiyo kunaAbrahama, nokunaIsaka, nokunaJakobe, ndechiti, ‘Ndinozoipa kumibarirwana yako.’ Ndaita kuti uione ngemadziso ako, asi auzopoterimwo.” Ndizvo Mosi muranda waMambo Mwari wakafira umwo munyika yeMoabhi, kudai ngokuronza kweizwi raMambo Mwari. Naye wakamutsira mubani renyika yeMoabhi, iro rakaringirana neBhethipeori, asi akuna munhu unozia pane iba rake metsa nanyamashi. Mosi waiya anezana nemakumi mairi emakore apo akafa; madziso ake aiya asati aita mazweezwee, simba romuiri wake raiya risati rapera. VaIsuraeri vakachema Mosi mumarukaro eMoabhi mazuva makumi matatu; ndizvo mazuva okuchema neechiriro chaMosi akapera. Joshua mukororo waNuni wakazadzwa ngomweya woungwaru, ngokuti Mosi waiya akaisa nyara dzake padera pake; nevaIsuraeri vakamupurutana, vakaita kudai ngezvaakapanga Mambo Mwari kunaMosi. Akuzi kutongoapo muIsuraeri muprofeti ngesure kwaMosi wakadai ndiye, uwo waakazia Mambo Mwari hope kuhope. Akuna waiya akatodzana naye muzvioniso zveshe nemishamiso, yaakamutuma Mambo Mwari kuita munyika yeEgipite, kunaFaro nevaranda vake, nokunyika yake yeshe, nenyara inesimba, nomukutyisa kweshe kukuru, kwaakapangidzira Mosi mukuona kwevaIsuraeri veshe. Zvino ngesure kwokufa kwaMosi muranda waMambo Mwari, Mambo Mwari wakaereketa kunaJoshua mukororo waNuni, mudetseri waMosi echiti, “Muranda wangu Mosi wafa; zvino miruka, uambuke Jorodhani, iwewe navanhu ava veshe, kuenda kunyika yendinovapa vaIsuraeri. Ndau dzeshe dzinozotsikwa ngetsoka dzenyu, ndapa kwomuri, kudai ngezvendakagondisa kunaMosi. Kubvira kushango, nokuRebhanoni metsa kuguma kurwizi rukuru, Rwizi Yufratesi, yeshe nyika yevaHiti, nokuguma kuruandhle rukuru ngokumabirirazuva, ndiyo inozoita nyika yenyu. Akuna nomunhu unozokona kuema pamberi pako eshe mazuva okupona kwako. Kudai ngezvendaiya naMosi, ngokudaro ndinozoa newe; andizokukoreresi, nokuti kukusiya. Ita wakagwinya newakashinga; ngokuti ndiwe unozokoanisira ava vanhu nyika kuita nhaka, yendakapika ndiyo kumadzibaba avo kuti ndinozovapa. Kwega ita wakagwinya, ushinge kakurutu, kuti ungwarire kuita yeshe mipango, yaakapanga Mosi muranda wangu usapauka kubva kweiri kuenda kumudyo nokuti kumuoshwe, kuti ubudirire kundau dzeshe dzounoenda. Iri bhuku remipango risazobva pamuromo wako; asi unozopinimidza ndiro masikati nousiku, kuti ungwarire zveshe zvakanyorwa mukati mwaro. Ngokuti ngokudaro unozopfumiswa munjira yako, naapo unozonasa kubudirira. Andizi kukupanga here? Ita wakagwinya, unase kushinga; usatya, usakaruka, ngokuti Mambo Mwari, Mwari wako unewe kundau dzeshe dzounozoenda.” Ndizvo Joshua wakapanga vatungamiriri vevanhu echiti, “Darikai ngepakati pembungano, mupange vanhu mwechiti, ‘Dzinasirirei zvokudya; ngokuti mumazuva matatu munozoambuka Jorodhani, kuti mupotere kugara nhaka yenyika yaanozomupa Mambo Mwari, Mwari wenyu kuti muigare nhaka.’ ” Joshua wakaereketa kuvaRubheni, nokuvaGadhi, nokurupande rwaManase echiti, “Cherechedzai izwi raakamupanga Mosi muranda waMambo Mwari echiti, ‘Mambo Mwari, Mwari wenyu unomupa ndau yokuzorora, naye unozomupa nyika iyi.’ Vakadzi venyu, nevana venyu, nezvifuyo zvenyu, zvinozosara munyika iyi yaakamupa Mosi ngouno kworuseri rweJorodhani; asi varwi veshe vari pakati penyu vanozoambuka vakapakatira zvokurwa ndizvo pamberi pehama dzenyu navo vanozovadetsera, metsa Mambo Mwari apa hama dzenyu kuzorora, pamwepo nemwi, navowo vagare nhaka yenyika yaanopa Mambo Mwari, Mwari wenyu kwavari. Zvino munozopetuka kunyika iyi yenhaka yenyu, mudakare ndiyo, yemwakapuwa ndiMosi muranda waMambo Mwari, ngoruseri rwouno rweJorodhani, ngokumabvazuva.” Navo vakapingura Joshua vechiti, “Zveshe zvewatipanga, tinozozviita, kunyazwi ngepari pounozotituma tinozoenda. Kudai ngezvetakamupurutana Mosi ngezviro zveshe, ndizvo tinozokupurutanawo. Kwega kuti Mambo Mwari, Mwari wako aanewe, kudai ngezvaaia naMosi! Kunyazwi ndiani unozomukira mipango yako, asikapurutani mazwi ako eshe ounomupanga, unozourawa. Kwega ita wakagwinya, ushinge.” NaJoshua mukororo waNuni wakatuma vairi kubva Shitimu, kuenda koonengera ngokufishika echiti, “Endai, mwodongorera nyika, kakurutu Jerikho.” Ndizvo vakaenda, vakaguma kumhatso yechifebi, zina racho raiya Rahabhi, navo vakaatapo. Mambo weJerikho akaronzerwa kwechizwi, “Penya, vaIsuraeri vamweni vaguma muno usiku uhwu, kunengera nyika.” Zvino mambo weJerikho wakatumira kunaRahabhi echiti, “Budisa vanhu vaguma kwouri, vapotera mumhatso yako, ngokuti vauya kunengera nyika yeshe.” Asi mukadzi wakatora avo vamuna vairi, akavafisha. Zvino wakati, “Ngegwinyiso vamuna vauya kwendiri, asi andizi kuzia kuti vanobva pari. Ngomukuwo wokukonywa kwomusiwo kwasvipa, ndizvo vamuna vabuda; andizii pevaenda. Kasirai kuvarumbirira, munovabata.” Asi iye waiya avakwidza pachachungu chemhatso, wakavafisha mumazhonje orukangaza, aaiya akarongedza padera pechachungu chemhatso. Ndizvo vamuna vakavarumbirira, kuteera njira inoenda Jorodhani kumazambuko. Ngesure vabuda vaivarumbirira, vakakonya musiwo. Vasati vaata, uwo mukadzi wakauya kwavari padera pechachungu chemhatso, naye wakati kwavari, “Ndinozia kuti Mambo Mwari wamupa iyi nyika, nokutyisa kwenyu kwawira padera pedu, nevagari veshe venyika vapera simba ngendaa yenyu. Ngokuti takazwa ngenjira yaakaemesa ndiyo Mambo Mwari mvura yoRuandhle Rwakatsvuka, ngepamsoro penyu, apo mwakakwira kubva Egipite, neizvo zvemwakaita kumadzimambo mairi evaAmori, vaiya ngoruseri urwo rweJorodhani, Sihoni naOgi, vemwakauraya. Paripo tazwa izvi mwoyo yedu yakapera simba, akuzi kusara nokushinga mukati mwomunhu nokuti ngouri, ngendaa yenyu. Mambo Mwari, Mwari wenyu ngegwinyiso ndiye Mwari womudenga padera nomunyika nepashi. Ndizvo zvino ndinomupota, pikai kwendiri ndi Mambo Mwari, mwechiona kuti ndamuitira nyasha, kuti nemwi munozopangidzira nyasha kunevemhatso yababa angu, mundipe chioniso chinegwinyiso, kuti munozoponesa baba angu, namai angu, nevakoma vangu, nemadziyaya angu, navo veshe vari vavo, nokuponesa ndaramo dzedu kubva mukufa.” Vamuna avo vakamupingura vechiti, “Tinozofa isusu kuti imwimwi mupone, kudai musikazodudziri uyu mushando wedu. Naapo kunozoitika apo Mambo Mwari paanozopa nyika kwetiri ngegwinyiso tinozokuitira nyasha.” Naapo wakavadzasa pashi ngebote ngepafasitera, ngokuti mhatso yake yaiya ngokurukumbati rwedhorobha, naye waigara parukumbati. Wakati kwavari, “Tizirai kumitunhu, kuti musashongana naavo vanomurumbirira. Mudzifishe apo mazuva matatu, metsa avo vanomurumbira vapetuka; zvino ngesure kweizvo munozoenda henyu.” Vamuna vakati kwaari, “Tinozoita vasina ndaa ngeiyi mhiko yewatipikisa ndiyo kwouri, kudai, apo toguma munyika iyi, ukasasungira rungoyi urwu rwakatsvuka ngepafasitera apo pewatidzasa ndipo, newe usikaunganidzi mumhatso yako baba ako, mai ako, vakoma vako, navo veshe vemhuri yako. Kudai umwe wenyu kunyazwi ndiani unozobuda kumisiwo yemhatso yako kuenda kubanze mupato, ngazi youwo inozoa padera pesoro rake, nesu tinozoita vasina ndaa; asi kudai nyara ikakuwadza kunyazwi ndiani unewe mumhatso mwako, tinozoa nendaa yokufa kwake. Asi kudai wechizodudzira uyu mushando wedu, naapo tinozosunhurwa kubva kumhiko iyi yewakatipikisa kwouri.” Naye wakati, “Ngakuitike kudai ngokuereketa kwenyu.” Wakavaendesa, navo vakaenda. Zvino wakasungira rungoyi rwakatsvuka pafasitera iro. Vakabva, vakaenda kumutunhu, vakagara apo mazuva matatu, metsa avo vaivarumbirira vapetuka. Varumbiriri vakatsvaka munjira yeshe, asi avazi kuvaona. Ndizvo vamuna vairi vakadzaka kubva kumutunhu. Vakaambuka, vakaguma kunaJoshua mukororo waNuni, vakamushumira zveshe zvaiya zvaitika kwavari. Navo vakati kunaJoshua, “Ngegwinyiso Mambo Mwari wapa nyika yeshe munyara dzedu; zve, vagari veshe venyika vanopera simba ngokutya pamberi pedu.” Joshua wakamuka mangwanani maishi; wakathutha nevaIsuraeri veshe kubva Shitimu, vakaguma Jorodhani. Vakagarapo vasati vaambuka. Kwapera mazuva matatu vatungamiriri vakahamba pakati pematende, navo vakapanga vanhu vechiti, “Apo mwozoona bhokisi rechitenderano chaMambo Mwari, Mwari wenyu, nevapristi vaRevhi vechiritwara, naapo munozomiruka kubva pandau dzenyu. Muriteere kuti muzie njira yomunozohamba ndiyo, ngokuti amusati mwambohamba ngeiyi njira. Asi panozoa nenharauko pakati penyu naro, inoda kuita khiromitha rimwe muri sure kwaro; musazokwedzera kweriri.” Zvino Joshua wakati kuvanhu, “Dzichenesenyi pachenyu; ngokuti mangwani Mambo Mwari unozoita zvishamiso pakati penyu.” Joshua wakaereketa kuvapristi echiti, “Torai bhokisi rechitenderano, mudarike ngepamberi pevanhu.” Navo vakatora bhokisi rechitenderano, vakadarika ngepamberi pavanhu. Mambo Mwari wakati kunaJoshua, “Nyamashi ndinozotanga kukukudza mukuona kwevanhu veshe vaIsuraeri, kuti vazie kuti ndinozoa newe kudai ngezvendaiya naMosi. Ndiwe unozopanga vapristi vanotwara bhokisi rechitenderano kuti, ‘Apo mwaguma kuhumbikumbi yemvura yeJorodhani, munozoema mukati mweJorodhani.’ ” Joshua wakati kuvaIsuraeri, “Kwedzerai pano, kuti muzwe mazwi aMambo Mwari, Mwari wenyu.” Joshua wakati, “Ngeichi munozozia kuti Mwari unopona uri pakati penyu, ngegwinyiso unozodzinga kubva pamberi penyu vaKhenani, vaHiti, vaHivhi, vaPherizi, vaGirigashi, vaAmori nevaJebhusi. Wonai, bhokisi rechitenderano chaMambo Mwari wenyika yeshe rinozopinda pamberi penyu kuenda muJorodhani. Ndizvo zvino dzitsanangurirei vamuna vari gumi navairi kubva kumadzinza evaIsuraeri, munhu umwe kubva kudzinza rimwe ngarimwe. Apo tsoka dzevapristi, vanotwara bhokisi rechitenderano chaMambo Mwari, Mambo wenyika dzeshe, dzoema mumvura yeJorodhani, mvura yeJorodhani inozogurwa, kubva kumvura inoerera yechibva dera; inozoema kuita rukumbati.” Naapo vanhu vabuda kubva kumatende avo, kuti vaambuke Jorodhani, vapristi vakatwara bhokisi rechitenderano pamberi pevanhu. Naapo vaitwara bhokisi rechitenderano tsoka dzavo dzapotera muhumbikumbi yemvura (ngokuti Jorodhani rinoteya kumahumbikumbi aro nguva yeshe yokukukura), mvura yaibva ngedera yakaema yechikwira kuita rukumbati kuzadza kuguma kuretu, kuguma kudhorobha Adhamu, riri pasinde naZarethani; neiyo yaidzaka kubani, kuenda kuruandhle rweArabha, Ruandhle Rwakafa, yakapera, yakagurwa yeshe. Vanhu vakaambuka vakaringirana neJerikho. Navapristi vaitwara bhokisi rechitenderano chaMambo Mwari vakaema vakagwinya pamavhu akaoma, vari pakati peJorodhani, nevaIsuraeri veshe vakaambuka pamavhu akaoma, metsa vanhu veshe vakapera kuambuka Jorodhani. Naapo vanhu veshe vaiya vapera kuambuka Jorodhani, Mambo Mwari wakaereketa kunaJoshua echiti, “Tsanangura vamuna gumi navairi kubva pakati pevanhu, umwe kubva kudzinza rimwe ngarimwe. Uvapange wechiti, ‘Torai mapuwe gumi namairi kubva pakati peJorodhani kubva apo paiema tsoka dzevapristi dzakagwinya, muambuke nawo, muaise pandau yomunozoata usiku uhwo.’ ” Zvino Joshua wakadaidza vamuna vari gumi navairi, vaaiya akatsanangura vevaIsuraeri, munhu umwe kubva kudzinza rimwe ngarimwe. Joshua wakati kwavari, “Hambai pamberi pebhokisi rechitenderano chaMambo Mwari, Mwari wenyu, mupinde pakati peJorodhani, mutore munhu weshe buwe ariise papfudzi rake, kudai ngouwandu hwemadzinza evaIsuraeri, kuti ichi chiite chioniso pakati penyu, kuti apo vana venyu vechizobvunza ngomukuwo unozouya kumadzibaba avo vechiti, ‘Biningidzo raaya mapuwe ngerenyi kwomuri?’ Zvino munozoti kwavari, ‘Mvura yeJorodhani yakagurwa pamberi pebhokisi rechitenderano chaMambo Mwari. Naapo rechiambuka Jorodhani, mvura yeJorodhani yakagurwa. Naaya mapuwe anozoita chicherechedziso kuvaIsuraeri mhera nariini.’ ” VaIsuraeri vakaita kudai ngezvaakapanga Joshua. Vakatora mapuwe gumi namairi kubva pakati peJorodhani, kudai ngezvaakaereketa Mambo Mwari kunaJoshua, kudai ngouwandu hwemadzinza evaIsuraeri, vakaatwara kuenda nawo kundau pevakaata, vaatura vakaaisa pashi. Joshua wakaemesa mapuwe gumi namairi mukati mweJorodhani, apo paiya pakaema tsoka dzevapristi vaitwara bhokisi rechitenderano, nawo aripo metsa nanyamashi. Vapristi vaitwara bhokisi rechitenderano vaiya vakaema pakati peJorodhani metsa zviro zveshe zvaiya zvaitwa zvaakapanga Mambo Mwari kunaJoshua, vanhu vakakasira kuambuka. Apo vanhu veshe vaiya vapera kuambuka, bhokisi rechitenderano chaMambo Mwari, nevapristi vakaambuka, mukuona kwevanhu. VaRubheni, vaGadhi norupande rwedzinza raManase, vakaambuka vakapakatira zvokurwa pamberi pevaIsuraeri veshe, kudai ngezvaakaereketa Mosi kwavari. Vaida kukwana makumi marongomuna emakumi emazana (40,000) vakaambuka vakapakatira zvokurwa pamberi paMambo Mwari, vakaguma marubaya eJerikho. Ngeiro zuva Mambo Mwari wakakudza Joshua mukuona kwevaIsuraeri veshe; navo vakamuremeredza kudai ngezvevakaremeredza Mosi, mazuva eshe okupona kwake. Mambo Mwari wakaereketa kunaJoshua echiti, “Panga vapristi vanotwara bhokisi rechapupu, kuti vabude kubva muJorodhani.” Ndizvo Joshua wakapanga vapristi echiti, “Budai kubva muJorodhani.” Apo vapristi vaitwara bhokisi rechitenderano chaMambo Mwari vaiya vabuda kubva pakati peJorodhani, netsoka dzevapristi dzaiya dzakaema pamavhu akaoma, mvura yeJorodhani yakahwirira kundau yayo, yakaerera kudarika mahumbikumbi aro, kudai ngekaretu. Vanhu vakabuda kubva muJorodhani ngezuva rechigumi romwedzi wokutanga, vakaemesa matende avo muGirigari, mumugano wokumabvazuva kweJerikho. Neawo mapuwe gumi namairi evakatora kubva muJorodhani, Joshua wakaemesa muGirigari. Wakaereketa kunevaIsuraeri echiti, “Naapo vana venyu vechizobvunza madzibaba avo ngomukuwo unouya vechiti, ‘Biningidzo raaya mapuwe ngerenyi?’ Naapo munozoziisa vana venyu mwechiti, ‘VaIsuraeri vakaambuka Jorodhani iri pamavhu akaoma.’ Ngokuti Mambo Mwari, Mwari wenyu wakaomesa mvura yeJorodhani pamberi penyu metsa mwaambuka, kudai ngezvaakaita Mambo Mwari, Mwari wenyu kuRuandhle Rwakatsvuka, urwo rwaakaomesa pamberi pedu metsa taiya taambuka, kuti vanhu veshe venyika vazie kuti nyara yaMambo Mwari inesimba, kuti imwimwi mutye Mambo Mwari, Mwari wenyu nariini.” Naapo madzimambo eshe evaAmori vaiya ruseri rweJorodhani ngokumabirira, nemadzimambo eshe eKhenani, vaiya ngokuruandhle, apo pevakazwa kuti Mambo Mwari wakaomesa mvura yeJorodhani pamberi pevaIsuraeri metsa taiya taambuka, mwoyo yavo yakapera simba, zve, kwaiya kusichina mweya wokushinga kwavari, ngendaa yevana vaIsuraeri. Ngouwo mukuwo Mambo Mwari wakati kunaJoshua, “Dzinasirire mapanga anopinza emapuwe, uchekezve vaIsuraeri ngokwechipiri.” Ndizvo Joshua wakadzinasirira mapanga anopinza emapuwe, wakacheka vaIsuraeri paGibheathihaararothi. Iyi ndiyo ndaa yakaita Joshua avacheke: vanhu veshe vevamuna vakabuda kubva Egipite, veshe vamuna vehondo vakafira mushango vari munjira, ngesure vaiya vabuda kubva Egipite. Kunyazwi vanhu veshe vakabuda kubva Egipite vaiya vakachekwa, asi vanhu veshe vakabarirwa mushango vari munjira mukubva kwavo Egipite, vaiya vasikazi kuchekwa. Ngokuti vaIsuraeri vakahamba makore makumi marongomuna mushango, metsa dzinza reshe varwi vehondo vapera kufa, avo vakabuda kubva Egipite, ngokuti avazi kupurutana izwi raMambo Mwari; avo vaakapika kwevari Mambo Mwari kuti aazovapangidzi nyika, yaakapika Mambo Mwari kumadzibaba avo kuti unozoipa kwetiri, nyika inoerera mukaka nouchi. Ndizvo vaiya vana vavo vaakamirudza pandau yavo, avavo Joshua wakavacheka; ngokuti vaiya vasikachekwi, ngokuti vaiya vasikazi kuchekwa munjira. Naapo vapedza kucheka dzinza reshe, vakagara mundau dzavo mumatende metsa vapora. Mambo Mwari wakati kunaJoshua, “Nyamashi ndadusa kutsverudzwa kwemwakatsverudzwa ndikwo muEgipite kubva kwomuri.” Ndizvo zvino zina rendau iyo rakadudzwa kuti Girigari metsa nanyamashi. Naapo vaIsuraeri vakaemesa matende avo muGirigari, vakangwarira Phasika madeekoni ngezuva rechigumi namarongomuna romwedzi, vari mumabani eJerikho. Navo vakadya zvomuminda ngechimangwani ngesure kwePhasika, zvingwa zvisina mumera, nekoroni yakakangwa ngezuva ndiro ndiro. Mana yakagumisira kuapo ngezuva revakadya zviyo zvenyika.VaIsuraeri avazi kuchazoa nemana; asi vakadya mirimwa yenyika yeKhenani ngeiro gore. Kwakaitika apo Joshua aiya ari pasinde peJerikho, wakamirudza madziso ake, akaringira, akaona munhu akaema pamberi pake, aneshoti yake yakashwamurwa munyara yake. Joshua wakaenda kwaari, akati kwaari, “Uri umwe wedu here, nokuti umwe wemagaa edu?” Wakati kwaari, “Haiwa; asi ndauya ndiri nduna yehondo yaMambo Mwari.” Joshua wakawira pashi ngehope, wakamudira, akati kwaari, “Unoronzenyi mambo wangu kunomuranda wake?” Nenduna yehondo yaMambo Mwari yakati kunaJoshua, “Dusa magwada ako kubva kutsoka dzako, ngokuti ndau yewakaema yakachena.” NaJoshua wakaita kudaro. Zvino Jerikho raiya rakakonywa kweshe mukati nokubanze ngendaa yevaIsuraeri; akuna munhu waibuda kubvamwo, nokuti waipoteremwo. NaMambo Mwari wakaereketa kunaJoshua echiti, “Wona, ndapa munyara dzako Jerikho, pamwepo namambo waro, nevarwi vehondo. Munozotenderera dhorobha, varwi vehondo munozohamba kuritenderera kamwe. Munozoita kudaro mazuva matanhatu, nevapristi vanomwe vanozobata magwama manomwe emagondohwe vari pamberi pebhokisi rechitenderano. Ngezuva rechinomwe munozohamba kutenderera dhorobha kanomwe, vapristi vechiridza magwama. Naapo vechizoridza magwama mukuwo wakareba, naapo mwazwa bope remagwama, vanhu veshe vanozodaidzira ngokudaidzira kukurutu; norukumbati rwedhorobha runozowa pashi, nevanhu veshe vanozopotera kubva apo pevari.” Ndizvo Joshua mukororo waNuni wakadaidza vapristi, akati kwavari, “Torai bhokisi rechitenderano, nevapristi vanomwe ngavabate magwama manomwe emagondohwe vari pamberi pebhokisi rechitenderano chaMambo Mwari.” Naye wakati kuvanhu, “Pindai mberi muhambe kutenderera dhorobha, naavo vakapakatira zvokurwa ngavapinde pamberi pebhokisi rechitenderano chaMambo Mwari.” Naapo Joshua aiya apanga vanhu, vapristi vanomwe vakabata magwama manomwe emagondohwe vapinda pamberi paMambo Mwari, vakaridza magwama; nebhokisi rechitenderano chaMambo Mwari rechivateera. Nevamuna vaipakatira zvokurwa vakahamba vari pamberi pevapristi vairidza magwama, nevarindi vaiteera ngesure kwebhokisi rechitenderano. Naapo vapristi vakaangira kuridza magwama. NaJoshua waiya akapanga vanhu echiti, “Musazodaidzira nokuti kuita kuti izwi renyu rizwike, musazobudisa izwi narimwe ngomuromo wenyu, metsa zuva rendinozomupanga kuti mudaidzire. Zvino munozodaidzira.” Ndizvo bhokisi rechitenderano chaMambo Mwari rakahamba kutenderera dhorobha, rakaritenderera kamwe; navo vakahwirira kukamba, vakaata mukamba. Zvino Joshua wakamuka mangwanani maishi, nevapristi vakatora bhokisi rechitenderano chaMambo Mwari. Vapristi vanomwe vakabata magwama emagondohwe manomwe vakahamba vari pamberi pebhokisi rechitenderano chaMambo Mwari, vakaangira kuridza magwama avo. Vamuna vakapakatira zvokurwa vakahamba pamberi pavo; nembungano yesure yakateera bhokisi rechitenderano chaMambo Mwari, vapristi vechihamba vechiangira kuridza magwama. Ngezuva rechipiri vakahamba kutenderera dhorobha kamwe, vakahwirira kukamba. Vakaita kudaro mazuva matanhatu. Ngezuva rechinomwe, vakafumira mangwanani mumambakwedza, vakahamba kutenderera dhorobha ngenjira imweyo kanomwe. Kwega ngeiro zuva vakahamba kutenderera dhorobha kanomwe. Ngomukuwo wechinomwe apo vapristi varidza magwama, Joshua wakati kunevanhu, “Daidzirai! Ngokuti Mambo Mwari wamupa dhorobha iri. Dhorobha nazvo zveshe zviri mukati mwaro, zvinozopirwa kunaMambo Mwari, zviparadzwe. Kwega Rahabhi chifebi unozopona, iye navo veshe vari mumhatso naye, ngokuti wakafisha vanengeri avo vakatumwa. Asi imwimwi mudzingwarire kubva kuneizvo zvakatukwa, kuti musazodziita vakatukwa apo mwechiemura mwechitora chimwe chezviro zvakatukwa, nokuti kuita kuti kamba reIsuraeri riite rakatukwa, nokuriunzira madambudziko. Asi sirivha yeshe nomukore, nezvidziyo zvethusi nezvesimbi, zvakachena kunaMambo Mwari; zvinozounzwa muupfumi hwaMambo Mwari.” Ndizvo vanhu vakadaidzira nemagwama akaridzwa. Naapo vanhu vazwa bope remagwama, vanhu vakadaidzira ngokudaidzira kukurutu, norukumbati rwakawa pashi kuti serere; ndizvo vanhu veshe vakakwira kupotera mudhorobha, munhu weshe kubvira paaiya apo, vakatora dhorobha. Vakaparadza zveshe zvaiya mudhorobha ngokupinza kweshoti, veshe vamuna nevakadzi, vatsva nevasharuka, n'ombe, hwai nezvimbongoro. Joshua wakati kuvamuna vairi avo vakanengera nyika, “Pindai mumhatso yechifebi, mumubudise uwo mukadzi, navo veshe vaanavo, kudai ngezvemwakapika kwaari.” Nevamuna vatsva vakanengera nyika vakapotera, vakabudisa Rahabhi, nababa ake, namai ake, nevakoma vake, navo veshe vaaiya navo; vakabudisa hama dzake dzeshe, vakavasia ngokubanze kwekamba yevaIsuraeri. Vakapisha dhorobha ngomuriro, nazvo zveshe zvaiya umwo; asi sirivha, nomukore, nezvidziyo zvethusi nezvesimbi, vakazviisya kunezvoupfumi hwemhatso yaMambo Mwari. Asi Joshua wakaponesa Rahabhi, nemhatso yababa ake, navo veshe vaaiya navo, naye unogara mukati mwevaIsuraeri metsa nanyamashi; ngokuti wakafisha vanengeri vaakatuma Joshua kuti vanengere Jerikho. Joshua wakavapikisa mhiko ngouwo mukuwo echiti, “Ngaatukwe uwo munhu pamberi paMambo Mwari unozoakisa dhorobha raJerikho! Unozoakisa matsikiro aro dangwe rake rechizofa, unozoemesa misiwo yaro mwana wake mudoko echizofa.” Ndizvo Mambo Mwari waiya naJoshua; nembiri yake yakaziikana mukati mwenyika yeshe. Asi vaIsuraeri vakapauka ngendaa yezviro zvakatukwa, ngokuti Akhani mukororo waKhami, mukororo waZabhudhi, mukororo waZera, wedzinza raJudha, wakatora zviro zvakatukwa; noushungu hwaMambo Mwari hwakabaka kunevaIsuraeri. Joshua wakatuma vanhu kubva Jerikho kuenda Ai, iro riri pasinde peBhethiavheni, ngokumabvazuva kweBhetheri, naye wakaereketa kwavari echiti, “Kwirai muende koonengera nyika.” Nevanhu vakakwira koonengera Ai. Vakapetuka kunaJoshua, vakati kwaari, “Usaita kuti vanhu veshe vakwireyo; asi ungaita kuti makumi emazana mairi (2,000) nokuti matatu akwireyo, vaparadze Ai; usatambudza vanhu veshe ngokukwireyo, ngokuti vashomani.” Ndizvo vakakwireyo vanhu vaida kuita makumi emazana matatu (3,000); navo vakatiza kubva pamberi pevamuna vedhorobha reAi. Nevamuna veAi vakauraya vanhu avo makumi matatu navatanhatu, ngokuti vakavarumbirira kubva pamberi pemusiwo metsa kuguma Shebharimu, nokuvauraya pamudzaswa. Ndizvo mwoyo yevanhu yakapera simba, yakaita kudai ngemvura. Zvino Joshua wakabaura zvokusimira zvake, wakawa pashi ngehope yake pamberi pebhokisi rechitenderano chaMambo Mwari metsa madeekoni, iye nevakuru vaIsuraeri; vakaisa bukuta padera pemasoro avo. NaJoshua wakati, “A Mambo Mwari, Mwari! Wakaambusirenyi ava vanhu Jorodhani, kuti utipire munyara dzavaAmori, kuti vatiuraye? Taizodai takakwaniswa kugara ruseri rweJorodhani! A Mambo Mwari, ndinozotinyi apo vaIsuraeri vechifuratira misana yavo kutiza kubva pamberi pemagaa avo! Ngokuti vaKhenani navo veshe vagari venyika vanozochizwa, vanozotitendenedza, kundau dzeshe, vanozodzima zina redu kubva padera penyika. Zvino unozoitenyi kunezina rako guru?” NaMambo Mwari wakati kunaJoshua, “Miruka! Unoatirenyi pashi ngehope yako? VaIsuraeri vakashaisha; vakagura chitenderano changu chendakavapa. Vakatora zviro zvakatukwa, vakaba nokuchengedza, vakazviisa mukati mwenhumbi dzavo. Ndizvo vaIsuraeri avazi kukona kuemesedzana nemagaa avo, asi vafuratira misana yavo kutiza magaa avo, ngokuti vaita chiro chakatukwa ivo pachavo. Andichazoa nemwizve nakamwe, ngepabanze pokuti mwarasha izvo zvakatukwa kubva pakati penyu. Miruka, uchenese vanhu wechiti dzichenesei mangwani; ngokuti Mambo Mwari, Mwari waIsuraeri unoronza, ‘Zviripo pakati penyu zviro zvakatukwa, A Isuraeri; amuzokoni kuema pamberi pemagaa enyu, metsa mwarasha zviro zvakatukwa kubva pakati penyu.’ Ndizvo mangwanani munozokwedzera kudai ngemadzinza enyu. Dzinza raanotsanangura Mambo Mwari rinozokwedzera kudai ngemhuri dzaro; nemhuri iyo yaanotsanangura Mambo Mwari inozouya kudai ngemhatso dzavo; nemhatso iyo yaanotsanangura Mambo Mwari inozouya pasinde munhu umwe ngaumwe. Nouwo unozotsanangurwa unezviro zvakatukwa unozopishwa ngomuriro, iye nazvo zveshe zvaanazvo, ngokuti wakagura chitenderano chaMambo Mwari, ngokuti wakaita zvakashata muIsuraeri.” Ndizvo Joshua wakamiruka mangwanani maishi, wakaunza vaIsuraeri ngemadzinza avo; nedzinza raJudha rakatsanangurwa. Wakaunza dzinza raJudha; wakatora mhuri yevaZera: wakaunza mhuri yevaZera mhatso ngemhatso; naZabhudhi wakatsanangurwa. Wakaunza mhatso yake, umwe ngaumwe; naAkhani mukororo waKhami, mukororo waZabhudhi, mukororo waZera, wedzinza raJudha wakatsanangurwa. NaJoshua wakati kuna Akhani, “Mukororo wangu ndinokupota, irikidza Mambo Mwari, Mwari waIsuraeri, utende kwaari, undironzere icho chewakaita; usandifishira.” NaAkhani wakapingura Joshua echiti, “Ngegwinyiso ndakashaisha kunaMambo Mwari, Mwari waIsuraeri, ndakaita ichi neicho. Apo ndakaona pakati pezviro zvakachakatwa nguwo yakanaka yeBhabhuroni, nemakhirogramu mairi esirivha, nechigurwa chomukore chairema kupinda rupande rwekhirogramu, naapo ndakazviemura ndakazvitora. Wona, zvakafishwa mumavhu, pakati petende rangu, nesirivha iri pashi pazvo.” Ndizvo Joshua wakatuma vanengeri navo vakarumba kuenda kutende; wona, zvaiya zvakafishwa mutende rake, nesirivha yaiya pashi pazvo. Navo vakazvibudisa kubva pakati petende, vakazviunza kunaJoshua, nokwavari veshe vaIsuraeri, vakazviisa pamberi paMambo Mwari. NaJoshua pamwepo nevaIsuraeri veshe vakatora Akhani mukororo waZera, nesirivha, nenguwo, nechigurwa chomukore, nevakororo vake, nevanasikana vake, nen'ombe dzake, nembongoro dzake, nehwai dzake, netende rake, nazvo zveshe zvaaiya nazvo; vakazviunza kuBani raAkho. Joshua wakati, “Watitambudzirenyi? Mambo Mwari unozokutambudzawo nyamashi.” NavaIsuraeri veshe vakamuponda ngemapuwe, nokuvapisha ngomuriro, vapedza kuvaponda ngemapuwe. Vakaunganidzira padera pake murwi mukuru wemapuwe uripo nanyamashi. Zvino Mambo Mwari wakakunukuka kubva muushungu hwake hunotyisa. Ndizvo zina reiyo ndau rakadudzwa kuti Bani raAkho metsa nanyamashi. Mambo Mwari wakati kunaJoshua, “Usatya, usapera simbazve; tora vanhu veshe vehondo uende navo, umiruke ukwire Ai. Ringira ndapa munyara yako mambo weAi, nevanhu vake, nedhorobha rake, nenyika yake. Newe unozoita kunedhorobha iri reAi namambo waro, kudai ngezvewakaita kuneJerikho namambo waro; kwega zvakachakatwa zvaro, nezvifuyo zvaro, munozozvitora kuita zvakachakatwa zvenyu. Ndizvo emesa vanohwarira ngesure kwedhorobha.” Ndizvo Joshua wakamiruka, nevanhu veshe vehondo, vakakwira kurwa neAi. Joshua wakatsanangura varwi vanesimba makumi matatu emakumi emazana (30,000), ngwazi wakavatuma usiku. Naye wakavapanga echiti, “Ringirai, munozohwarira muri pasinde pedhorobha, ngesure kwaro; musazoenda kuretu kubva kudhorobha, asi munozoita vakagara vakanasirira. Inini nevanhu veshe vanogara neni, tinozokwedzera kudhorobha. Naapo vechibuda kurwa nesu, kudai ngokutanga, tinozotiza kubva pamberi pavo. Vanozobuda kutirumbirira metsa tavakweya kubva kudhorobha; ngokuti vanozoti, ‘Vari kutiza kubva pamberi pedu kudai ngokutanga.’ Ndizvo tinozotiza kubva pamberi pavo. Naapo munozomiruka kubva pomunonga mwakahwarira, mutore dhorobha; ngokuti Mambo Mwari, Mwari wenyu unozoripa munyara dzenyu. Naapo mwatora dhorobha, munozoripisha ngomuriro; kudai ngokupanga kwaMambo Mwari munozoita. Wonai ndamupanga.” Ndizvo Joshua wakavatuma kuti vaende; navo vakaenda koohwarira, vakagara pakati peBhetheri neAi, ngokumabirirazuva kweAi; asi Joshua wakaata ngouhwo usiku pakati pevanhu. Joshua wakamiruka mangwanani maishi, wakaerenga vanhu, wakakwira, iye nevakuru vaIsuraeri, pamberi pevanhu kuenda kuAi. Vanhu veshe, vehondo vaiya naye vakakwira, vakakwedzera, vakauya pamberi pedhorobha, vakaemesa matende avo ngorutii rwedera rweAi; zvino raiyapo bani pakati pavo naAi. Wakatora vanhu vaida kuita makumi emazana mashanu (5,000), wakavaemesa kuti vahwarire ngepakati peBhetheri neAi, ngokumabirirazuva kwedhorobha. Ndizvo vakaemesa vanhu vehondo veshe vaiya ngedera kwedhorobha, nevahwariri vaiya ngokumabirirazuva kwedhorobha. Joshua wakaenda ngouhwo usiku mukati mwebani. Apo mambo weAi aona ichi, iye nevanhu vake veshe vagari vedhorobha, vakakasira kumuka mangwanani, kuenda kundau yakaemeswa kurwa nevaIsuraeri; asi aazi kuzia kuti vaiyapo vakahwarira ngesure kwedhorobha. Joshua navaIsuraeri veshe vakaita kunga vanyiswa pamberi pavo, vakatiza ngenjira yomushango. Ndizvo vanhu veshe veAi vakadaidzwa pamwepo kuti vavarumbirire; vakarumbirira Joshua vakakweyiwa kubva kudhorobha. Akuzi kusara mwamuna muAi nokuti Bhetheri, usikazi kubuda koorumbirira vaIsuraeri; vakasiya dhorobha rakabeuka, vakarumbirira vaIsuraeri. Zvino Mambo Mwari wakati kunaJoshua, “Tambanudza mukhondo wako uri munyara yako wakaringira Ai; ngokuti ndaripa munyara yako.” NaJoshua wakatambanudza mukhondo wake waiya munyara yake, akaringira kudhorobha. Nevahwariri vakakasira kumiruka kubva kundau yavo, vakarumba ngokukasira achatambanudza nyara yake. Vakapotera mudhorobha, vakaritora, vakakasira vakaripisha ngomuriro. Ndizvo vamuna veAi vakaringira sure kwavo, vakaona, penya chiushi chedhorobha chakakwira mudenga. Vaiya vasichina simba rokuti vatize apo, nokuti apo, nevanhu vaitiza kuenda mushango vakakunukukira kuneavo vaivarumbirira. Naapo Joshua nevaIsuraeri veshe vaona kuti vahwariri vaiya vatora dhorobha, nokuti chiushi chedhorobha chaiya chechikwira, naapo vakahwirirazve, vakauraya vamuna veAi. Nevamweni vanhu vakabuda kubva kudhorobha kurwa navo; ndizvo vaiya vaapakati pevaIsuraeri, vamweni ngeino; navamweni ngeino: vakavabaya, apana naumwe wakapona nokuti kupokonyoka. Vakamubata mambo weAi echizwa, vakamuunza kunaJoshua. Apo vaIsuraeri vaiya vapedza kuuraya vagari veAi veshe vaiya murubaya, apo pevakarumbirira, naapo vaIsuraeri veshe vakapetuka Ai, vakavauraya ngokupinza kweshoti. Uwandu hweavo veshe vakaurawa ngeiro zuva vamuna nevakadzi vaiya makumi emazana gumi namairi (12,000), vanhu veshe veAi. Ngokuti Joshua aazi kupfinyisa nyara yake yaakatambanudza ndiyo mukhondo wake, metsa aiya apedza yaamho vagari veshe veAi. Dzega n'ombe nezviro zvakachakatwa zveiro dhorobha, vaIsuraeri vakazvitora, kudai ngeizwi raMambo Mwari raakapanga Joshua. Ndizvo Joshua wakapisha Ai, wakariita murwi wematongo mhera nariini, eya, riri matongo metsa nanyamashi. Naye wakaturika mambo weAi pamuti metsa kwakasvipa; ngokukasira apo zuva rapota Joshua wakapanga kuti vadzase muiri wake kubva pamuti, nokuukandira pokupinda pamusiwo wedhorobha, nokuunganidza padera pawo murwi mukuru wemapuwe; aripo metsa nanyamashi. Zvino Joshua wakaakira Mambo Mwari, Mwari waIsuraeri arita muMutunhu Ebhari, kudai ngezvaakapanga Mosi muranda waMambo Mwari kuvaIsuraeri, kudai ngezvezvakanyorwa mubhuku remipango yaMosi, “Arita rakaakiwa ngemimhu yemapuwe, awo asikazi kutsetswa ngechokutsetsa chesimbi;” vakapira midiro yokupisha padera paro kunaMambo Mwari, navo vakapira mibairo yokunyarara. Naapo Joshua wakanyora mukuona kwevana vaIsuraeri padera pemapuwe mazwi emipango yaMosi, aakanyora. Naveshe vaIsuraeri, vapara nevagari, nevakuru vavo, nevatungamiriri vavo, nevatongi vavo, vakaema ngorutii rwouno norweiyo rwebhokisi rechitenderano pamberi pevapristi, nevaRevhi, avo vaitwara bhokisi rechitenderano chaMambo Mwari; rupande rumwe rwairingirana noMutunhu Gerizimu norupande rumweni rwairingirana noMutunhu Ebhari; kudai ngezvaakapanga Mosi muranda waMambo Mwari pakutanga, kuti vafumise vanhu vaIsuraeri. Ngesure kwazvo zveshe wakadzidza mazwi eshe emipango, zvifumiso nezvituko, kudai ndizvo zveshe zvakanyorwa mubhuku remipango. Paiya pasina izwi narimwe reizvo zveshe zvaakapanga Mosi raasikazi kudzidza Joshua pamberi pembungano yeshe yaIsuraeri, kunevakadzi, vana nokuvapara vaiya pakati pavo. Zvino apo madzimambo eshe azwa aiya ngoruseri rweJorodhani, ngouno, mumitunhu, nomumabani, nomuhumbikumbi yoruandhle rukuru rwakaringirana neRebhanoni, vaHiti, vaAmori, vaKhenani, vaPherizi, vaHivhi navaJebhusi, vakaungana pamwepo kurwa naJoshua navaIsuraeri, ngomwoyo umwewo. Asi apo vagari veGibheoni vaiya vazwa izvo zvaakaita Joshua kuneJerikho naAi, vakaita ngourimbwi, vakaenda vakadzinasirira zvokudya, vakaisa masaka akasakara pazvimbongoro zvavo, nenyede dzevhini dzakasakara, dzabauka, dzasonwasonwa, nemagwada asakara anezvitembwe mutsoka dzavo, nezvokusimira zvasakara padera pavo; nezvingwa zvavo zvaiya zvatipapata nokuita matsekeneswa. Vakaenda kunaJoshua ari mukamba reGirigari, vakati kwaari nokuvanhu vaIsuraeri, “Takabva kunyika iri kuretu; ndizvo zvino itai chitenderano nesu.” Asi vamuna vaIsuraeri vakati kuvaHivhi, “Pamweni imwimwi munogara pakati pedu; tingaita maitirenyi chitenderano nemwi?” Vakati kunaJoshua, “Tiri varanda vako.” NaJoshua wakati kwavari, “Muri vanaani, munobva kuri?” Vakati kwaari, “Varanda vako vanobva kunyika iri kuretu ngendaa yezina raMambo Mwari, Mwari wako; ngokuti isusu takazwa mbiri yake neizvo zveshe zvaakaita muEgipite, nazvo zveshe zvaakaita kumadzimambo mairi evaAmori, aiya rusere rweJorodhani, kunaSihoni mambo weHeshibhoni nokunaOgi mambo waBhashani, waiya muAshitharothi. Ndizvo vakuru vevagari veshe venyika yedu vakaereketa kwetiri vechiti torai munyara dzenyu mbuva yomuhambo wenyu, muende kooshongana navo, mwechiti kwavari, ‘Tiri varanda venyu: ndizvo zvino ita chitenderano nesu.’ Ichi ndicho chingwa chedu chetakatora kuita mbuva yomuhambo wedu kubva kumhatso dzedu zvaiya zvichapisha ngezuva retakabuda kuuya kushongana nemwi; asi zvino ringirai, zvatipapata, zvaita matsekeneswa. Neidzi mbudu dzevhini dzetakazadza dzaiya itsva; zvino ringirai dzapera kubauka, neizvi zvokusimira zvedu nemagwada edu zvapera kusakara ngendaa yomuhambo wedu mukuru.” Ndizvo vamuna vakaashira zvokudya zvavo ngendaa yokuona mbuva yavo, vasikazi kubvunza chirikuda kwaMambo Mwari kubva kumuromo wake. NaJoshua wakaiyana navo, akaita chitenderano navo, kuti vapone; nevatungamiriri vembungano vakaita mhiko kwavari. Asi ngesure kwemazuva matatu, vapedza kuita chitenderano navo, vakazwa kuti vari vaakirwana vavo, kuti vaigara pakati pavo. Ndizvo vaIsuraeri vakahamba, vakaguma kumadhorobha avo ngezuva rechitatu. Zvino mazina emadhorobha avo aiya Gibheoni, Khefira, Bheerothi naKiriathijearimu. Asi vaIsuraeri avazi kuvarwisa, ngokuti vatungamiriri vembungano vaiya vakapika mhiko kwavari ndiMambo Mwari, Mwari waIsuraeri. Mbungano yeshe yakavhuruvhutira vatungamiriri. Asi vatungamiriri veshe vakati kunembungano yeshe, “Takapika kwavari ndiMambo Mwari, Mwari waIsuraeri; ndizvo zvino atizovagwami. Ichi ndicho chetinozoita kwavari: Tinozovarekera kuti vagare, kuti ushungu husazoa padera pedu, ngendaa yemhiko yetakapika kwavari.” Vatungamiriri vakati kwavari, “Ngavapone; asi ngavaite vatemi vehuni, nevacheri vemvura kunembungano yeshe, kudai ngezvevakagondiswa ngevatungamiriri.” NaJoshua wakavadaidza kwavari echiti, “Mwakatichengedza ngenyi, mwechiti, ‘Tinogara kuretu kubva kwomuri,’ apo mwechigara pakati pedu? Ndizvo zvino mwatukwa, nevamweni venyu vanozogara vari hloko, vatemi vehuni nevacheri vemvura kumhatso yaMwari wangu.” Vakapingura Joshua vechiti, “Ngokuti ngegwinyiso kwakaronzerwa kuvaranda vako kuti Mambo Mwari, Mwari wako wakapanga Mosi muranda wake kuti unozomupa nyika yeshe, nokuuraya vagari vayo veshe kubva pamberi penyu; ndizvo ngokudaro taiya nokutya kukurutu ngendaa yokupona kwedu ngepamsoro penyu, ndizvo takaita ichi chiro. Zvino, ringira, tiri munyara dzako. Ita kudai ngezvinooneka kuti zvakanaka mukuona kwako.” Izvi ndizvo zvavakaita kwavari: Wakavaponesa kubva munyara dzevaIsuraeri, avazi kuvauraya. NaJoshua wakavaita ngeiro zuva vatemi vehuni nevacheri vemvura kumbungano, nepaarita raMambo Mwari, metsa nanyamashi, kundau yaanozotsanangura. Naapo Adhonizedheki mambo weJerusarema aiya azwa ngenjira yaakatora ndiyo Joshua Ai, naye ariparadza yaamho echiita kuAi nokunamambo waro kudai ngezvaakaita kuJerikho namambo waro, nenjira yevakaita nevanhu veGibheoni kuti vaiyane nevaIsuraeri, vaiya pakati pavo, vakatya kakurutu, ngokuti Gibheoni raiya dhorobha guru, riri rimwe remadhorobha oumambo, raiya guru kupinda Ai, nevamuna varo veshe vaiya ngwazi. Ndizvo Adhonizedheki mambo weJerusarema wakatumira kunaHohamu mambo weHebroni, nokunaPiramu mambo weJarimuthi, nokunaJafia mambo waRakhishi, nokunaDhebhiri mambo weEgironi, echiti, “Kwirai kwendiri mundidetsere, kuti tirwe neGibheoni; ngokuti rakaiyana naJoshua nevaIsuraeri.” Zvino madzimambo mashanu evaAmori, mambo weJerusarema, mambo weHebroni, mambo weJarimuthi, mambo waRakhishi namambo weEgironi, vakadziunganidza pamwepo, vakakwira, ivo nevarwi vavo veshe, vakaemesa matende avo pamberi peGibheoni, vakarwa naro. Navanhu veGibheoni vakatuma kunaJoshua mukamba yeGirigari vechiti, “Usarasha varanda vako; kasira kukwira kwetiri utiponese, utidetsere; ngokuti madzimambo eshe evaAmori vanogara mumitunhu vadziunganidza pamwepo kurwa nesu.” Ndizvo Joshua wakakwira kubva Girigari, iye nevanhu veshe vehondo, nevanhu veshe vari ngwazi dzinoshinga. Mambo Mwari wakati kunaJoshua, “Usavatya, ngokuti ndavapa munyara dzako; akuna nomunhu naumwe unozokona kuema pamberi pako.” Ndizvo Joshua wakauya kwavari ngokujuma, echikwira kubva Girigari usiku hweshe. NaMambo Mwari wakavaparadza pamberi pevaIsuraeri, vakavauraya ngokuuraya kukurutu muGibheoni, vakavarumbirira kuteera njira inokwira Bhethihoroni, vakavauraya metsa kuguma Azeka naMakedha. Kwakaitika apo vachatiza pamberi pevaIsuraeri, vachadzaka Bhethihoroni, Mambo Mwari wakaposhera matsanza makuru padera pavo kubva mudenga, metsa vakaguma Azeka, navo vakafa; vaiya vakapinda kuwanda vakaurawa ngematsanza kunevakaurawa ngevaIsuraeri ngeshoti. Ngezuva iro raakapira Mambo Mwari vaAmori kunevana vaIsuraeri, Joshua wakaereketa kunaMambo Mwari mukuona kwevaIsuraeri, “Zuva, ema kutimwii padera peGibheoni, newe mwedzi, kubani reAijaroni.” Nezuva rakaema utimwii, nomwedzi wakagara, metsa vanhu vaiya vadziunzidzira padera pemagaa avo. Ichi achizi kunyorwa here muTsamba yaJasha? Ndizvo zuva rakaema mumukana womudenga, arizi kukasira kubira kunonga zuva reshe. Kwaiya kusina zuva rakadaro ngepamberi nokuti ngesure kweiro, kuti Mambo Mwari apurutane izwi romunhu; ngokuti Mambo Mwari wakarwira vaIsuraeri. Zvino Joshua wakahwirira nevaIsuraeri veshe kukamba reGirigari. Asi ava madzimambo mashanu akatiza, akadzifisha mubako riri muMakedha. Kwakaronzerwa kunaJoshua kwechizwi, “Aya madzimambo mashanu akaoneka akahwara mubako riri muMakedha.” Joshua wakati, “Mburumbudzirai mapuwe makuru pamuromo webako, muemese vanhu apo kuti vavarinde. Musagara apo, asi rumbirirai magaa enyu, muvauraye vari sure. Musavatendera kuti vapotere mumadhorobha avo, ngokuti Mambo Mwari, Mwari wenyu wavapira munyara dzenyu.” Naapo Joshua nevaIsuraeri vaiya vapedza kuvauraya ngokuuraya kukuru, metsa vaparadzwa veshe, vamweni vakasara vakapotera mumadhorobha akashosherwa. Vanhu veshe vakahwirira kukamba kunaJoshua Makedha ngokunyarara; akuna naumwe wakaereketa kurwisana ngorurimi rwake kunevaIsuraeri. Zvino Joshua wakati, “Beurai muromo webako, mubudise awo madzimambo mashanu muvaunze kwendiri kubva mubako.” Vakaita kudaro, vakabudisa madzimambo mashanu kubva mubako, vakavaunza kwaari, mambo weJerusarema, mambo weHebroni, mambo weJarimuthi, mambo weRakhishi, namambo weEgironi. Apo vaunza kunaJoshua aya madzimambo, Joshua wakadaidza vanhu veshe vaIsuraeri, wakati kunduna dzevanhu vehondo, vaiya naye, “Kwedzerai, mutsike tsoka dzenyu padera pemitsipa yaaya madzimambo.” Navo vakakwedzera, vakatsika tsoka dzavo padera pemitsipa yavo. Joshua wakati kwavari, “Musatya, nokuti kupera simba, itai vane simba, mushinge; ngokuti ichi ndicho chaanozoita Mambo Mwari kumagaa enyu eshe anorwisana nemwi.” Ngesure kweizvo Joshua wakavabaya nokuvauraya, akavaturika pamiti mishanu. Vakati tsudzu pamiti metsa madeekoni. Pakupota kwezuva, Joshua wakapanga, vakavadzasa kubva pamiti, vakavakandira mubako umwo mwevaiya vakahwara; vakaisa mapuwe makuru pamuromo webako, nawo aripo metsa nanyamashi. Ngeiro zuva Joshua wakanyisa Makedha wakaribaya ngokupinza kweshoti, wakauraya mambo waro, ivo nevanhu veshe varo; aazi kusiya naumwe. Wakaita kunamambo weMakedha kudai ngezvaakaita kunamambo weJerikho. Joshua wakamiruka kubva Makedha navo veshe vaIsuraeri, vakaenda Ribhina, vakarwa naRibhina. NaMambo Mwari wakaripa kwavari namambo waro, munyara dzevaIsuraeri; naye wakaribaya ngokupinza kweshoti, nevanhu veshe vaiya umwo; aazi kusiya naumwe mukati mwaro. Wakaita kunamambo waro kudai ngezvaakaita kunamambo weJerikho. NaJoshua wakabva Ribhina, navaIsuraeri veshe naye, kuenda Rakhishi, vakarikomba, vakarwa naro. Mambo Mwari wakapa Rakhishi munyara dzevaIsuraeri, vakarinyisa ngezuva rechipiri, vakaribaya ngokupinza kweshoti, nevanhu veshe vaiya umwo, kudai ndizvo zveshe zvaakaita kunaRibhina. Zvino Horamu mambo weGeza wakauya kudetsera Rakhishi; naJoshua wakamubaya nevanhu vake, metsa aazi kusiya naumwe echipona. Kubva Rakhishi Joshua wakapinda nevaIsuraeri veshe vakaguma Egironi; vakarikomba, vakarwa naro. Vakaritora ngeiro zuva, vorovoribaya ngokupinza kweshoti, nevanhu veshe vaiya umwo wakavapedza yaamho ngeiro zuva, kudai ndizvo zveshe zvaaiya akaita kunaRakhishi. Zvino Joshua wakaenda kubva Egironi, nevaIsuraeri veshe naye, kuenda Hebroni; vakarwa naro. Vakaritora, vakaribaya ngokupinza kweshoti, namambo waro, madhorobha aro eshe, nevanhu veshe vaiya umwo; aazi kusiya naumwe echipona, kudai ndizvo zveshe zvaaiya akaita muEgironi; asi wakaripedza yaamho, nevanhu veshe vaiya mukati mwaro. Zvino Joshua wakahwirira nevaIsuraeri veshe naye Dhebhiri; vakarwa naro. Wakarinyisa, namambo waro, nemadhorobha aro eshe; vakavauraya ngokupinza kweshoti, vakapedza yaamho veshe vaiya umwo; aazi kusiya umwe echipona; kudai ngezvaaiya akaita kunaHebroni, nokudai ngezvaakaita kunaRibhina namambo waro, ngokudaro wakaitazve muDhebhiri nokunamambo waro. Ndizvo Joshua wakabaya vanhu veshe vokumitunhu, nokubani, nomubani, nevemubandanda nemadzimambo ayo eshe; aazi kusiya naumwe echipona, asi wakavapedza veshe kuuraya avo vaifema, kudai ngezvaakapanga Mambo Mwari, Mwari waIsuraeri. NaJoshua wakavanyisa kubva Kadheshibharanea metsa kuguma Gaza, nenyika dzeshe dzaGosheni, metsa kuguma Gibheoni. Naaya eshe madzimambo nenyika dzavo Joshua wakatora ngenguva imwe, ngokuti Mambo Mwari, Mwari waIsuraeri wakarwira Isuraeri. NaJoshua wakahwirira nevaIsuraeri veshe naye, mukamba reGirigari. Naapo Jabhini mambo weHazori azwa izvi, wakatuma kunaJobhabhi mambo weMadhoni, nokunamambo weShimuroni, nokunamambo weAkhishafi, nokunamadzimambo aiya ngedera, kunyika yemitunhu, naavo vaiya mumabani, ngokubani kweKhinerothi, nomubani, nomuNafothidhori ngokumabirirazuva, nokuna vaKhenani vaiya ngokumabvazuva nokumabirirazuva, nokuvaAmori, nokuvaHiti, nokuvaPherizi, nokuvaJebhusi vaiya kunyika yemitunhu, nokuvaHivhi, vaigara ngepashi pomutunhu Hermoni munyika yeMizipha. Vakabuda nehondo dzavo dzeshe, vanhu vazhinji, kudai ngouwandu hwejecha riri pahumbikumbi yoruandhle, vanemahachi nengoro zvakawanda kakurutu. Madzimambo aya eshe aiya aungana pamwepo, vakauya, vakaemesa pamwepo matende avo kumvura yeMeromu, kuti varwe nevaIsuraeri. Mambo Mwari wakati kunaJoshua, “Usatya ngendaa yavo, ngokuti mangwani ngouyu mukuwo ndinozovapira kuti vaurawe pamberi pevaIsuraeri; munozotematema mahachi avo, nokupisha ngoro dzavo ngomuriro.” Ndizvo Joshua wakaguma, nevanhu veshe vehondo, vakavajuma vari kumvura yeMeromu; navo vakavabaya. NaMambo Mwari wakavapira munyara dzevaIsuraeri, avo vakavauraya nokuvarumbirira metsa vakaguma Sidhoni guru, nokuMisirefothimaimu, nokumabani eMizipha ngokumabvazuva. Vakavauraya, metsa kusina naumwe waipona. NaJoshua wakaita kwavari kudai ngezvaakapanga Mambo Mwari kwaari; wakatematema mahachi avo, wakapisha ngoro dzavo ngomuriro. Joshua wakapetuka ngouwo mukuwo, akanyisa Hazori, wakauraya mambo waro ngeshoti. Nguva iyi isati yaguma Hazori raiya dhorobha guru roumambo uhwo hweshe. Navo vakauraya vanhu veshe vaigaremwo ngokupinza kweshoti, vechivapedza yaamho; akuzi kusara naumwe waipona; naye wakapisha Hazori ngomuriro. Joshua wakanyisa madhorobha eshe eawo madzimambo, nemadzimambo awo, wakaauraya ngokupinza kweshoti, naye wakaapedza yaamho, kudai ngezvaakapanga Mosi muranda waMambo Mwari. Asi ngendaa yemadhorobha aiya mumitunhu, vaIsuraeri avazi kupisha narimwe rawo, kwega Hazori, iri rakapishwa ndiJoshua. Nezvakachakatwa zveshe zvemadhorobha aya, nezvifuyo zvawo, vaIsuraeri vakazvichochota ngokwavo; asi vanhu veshe vakavabaya ngokupinza kweshoti, metsa vaiya vavapedza, navo avazi kusiya naumwe echipona. Kudai ngezvaakapanga Mambo Mwari kunomuranda wake Mosi, ndizvo Mosi wakapanga Joshua, ndizvo Joshua wakaita; aazi kusiya chiro nachimwe chisikazi kuitwa cheizvo zveshe zvaakapanga Mambo Mwari kunaMosi. Ndizvo Joshua wakanyisa nyika iyo yeshe, nyika yemitunhu, nenyika yeshe yokubani, nenyika yeshe yeGosheni, nemabani, nemabandanda, nenyika yemitunhu yaIsuraeri, nemabani ayo, kubva kuMutunhu Haraki, unokwira kuenda Seira, metsa kuguma kuBhaarigadhi mubani reRebhanoni ngepashi poMutunhu Hermoni. Madzimambo ayo eshe wakavatora, wakavabaya, akavauraya. NaJoshua wakarwa nemadzimambo awo eshe mukuwo wakareba. Akuna dhorobha rakaiyana nevaIsuraeri, ngepabanze pevaHivhi vega vagari veGibheoni; vamweni veshe vakavanyisa ngokurwa. Ngokuti kwaiya kuda kwaMambo Mwari kukonzisa mwoyo yavo, kuti vauye varwe nevaIsuraeri mukurwa, kuitira kuti avapedze yaamho, kuti asazovaitira nyasha, asi kuti avapedze kudai ngezvaakapanga Mambo Mwari kunaMosi. Ngouwo mukuwo Joshua wakauya, akaparadza vaAnaki, kubva kunyika yemitunhu, kubva Hebroni, kubva Dhebhiri, kubva Anabhi, nokubva kunyika yeshe yemitunhu yeJudha, nokubva kumitunhu yenyika yeshe yeIsuraeri. Joshua wakavapedza veshe yaamho, nemadhorobha avo. Akuna naumwe wevaAnaki wakasara munyika yevaIsuraeri; vamweni vakasara kwega muGaza, muGathi nomuAshidhodhi. Ndizvo Joshua wakatora nyika yeshe, kudai ndizvo zveshe zvaakaronza Mambo Mwari kunaMosi; naJoshua wakaipa kuvaIsuraeri kuita nhaka kudai ngokukoanisirwa kwavo kumadzinza avo. Nenyika yakazorora kubva kuhondo. Zvino aya ndiwo madzimambo enyika, avo vakanyiswa ngevaIsuraeri, nokugara nhaka yenyika yavo ngoruseri rwouno rweJorodhani ngokumabvazuva, kubvira mubani reArinoni metsa kuguma kuMutunhu weHermoni, nemabani eshe ari kumabvazuva: Sihoni mambo wevaAmori waigara muHeshibhoni, echitonga nyika inobvira Aroeri, riri kubandanda rebani Arinoni, nokubvira pakati pebani iro, nokubvira kurupande rweGireadhi, eya, metsa kuguma kurwizi Jabhoki, urwo ruri kumugano wevana vaAmoni parupande rweGireadhi, nokubva mubani metsa kuguma kuruandhle rweKhinerothi ngokumabvazuva, ngenjira inoenda Bhethijeshimothi; kuenda kuruandhle rweArabha, Ruandhle Rwakafa, kubva kubani, ngepashi pemabandanda Phisiga; naOgi mambo waBhashani, umwe wevakasara vevaRefaimu, waigara muAshitharothi nepaEdrei. Naye wakatonga paMutunhu weHermoni, nomuSareka, nomuBhashani reshe, metsa kuguma kumigano yevaGeshuri neveMaakathi, nepadera porupande Gireadhi, mugano waSihoni mambo weHeshibhoni. Mosi muranda waMambo Mwari nevaIsuraeri vakavanyisa naMosi muranda waMambo Mwari wakapa nyika yavo kuita nhaka vaRubheni, navaGadhi, nokurupande rwedzinza raManase kuita nhaka yavo. Naaya ndiwo madzimambo enyika aakauraya Joshua nevaIsuraeri ngoruseri rwouno rweJorodhani ngokumabirirazuva, kubvira Bhaarigadhi mubani reRebhanoni metsa kuguma kuMutunhu weHaraki, uwo unokwira kuguma Seira; nyika yaakapa Joshua kuvaIsuraeri kuita nhaka yavo kudai ngokukoanisirwa kwavo, kunyika yemitunhu, mundau yakaterama, mumabani, mubandanda nomushango, munyika dzokubani, dzevaHiti, dzevaAmori, dzevaKhenani, dzevaPherizi, dzevaHivhi nedzevaJebhusi: Mambo weJerikho, umwe, mambo weAi iro riri pasinde peBhetheri, umwe, mambo weJerusarema, umwe, mambo weHebroni, umwe, mambo weJarimuthi, umwe, mambo weRakhishi, umwe, mambo weEgironi, umwe, mambo weGeza, umwe, mambo weDhebhiri, umwe, mambo weGedha, umwe, mambo weHorma, umwe, mambo waAradhi, umwe, mambo weRibhina, umwe, mambo weAdhuramu, umwe, mambo weMakedha, umwe, mambo weBhetheri, umwe; mambo weTapua, umwe, mambo weHeferi, umwe, mambo waAfeki, umwe, mambo weRasharoni, umwe, mambo weMadhoni, umwe, mambo weHazori, umwe, mambo weShimuronimeroni, umwe, mambo weAkhishafi, umwe, mambo weTaanakhi, umwe, mambo weMegidho, umwe, mambo weKedheshi, umwe, mambo weJokineamu reKharmeri, umwe, mambo weDhori mumugano muNafathidhori, umwe, mambo weGoyimu muGarire, umwe, mambo weThiriza, umwe, madzimambo eshe aiya makumi matatu naumwe. Zvino Joshua waiya aamusharuka ati gwedere, naMambo Mwari wakati kwaari, “Iwewe waamusharuka wati gwedere, kuchi nenyika dzakasara dzakawanda dzichada kutorwa. Idzi ndidzo nyika dzasara: dzeshe nyika dzevaFiristia, neidzo dzeshe dzeGeshuri, kubvira Shihori, iri pamberi peEgipite, metsa kuguma kumugano weEkironi, ngedera, nyika inozwi ngeyevaKhenani; namadzimambo ari mashanu evaFiristia, dziri dzavaGaza, dzevaAshidhodhi, dzevaAshikeroni, dzevaGathi, nedzevaEkironi; nedzevaAvhimu, kubvira ngokubani, yeshe nyika yevaKhenani, neyeMeara iyo iri pasinde neyevaSidhoni, metsa kuguma Afeki, kumigano yevaAmori, nenyika yevaGebhari, neRebhanoni reshe, ngokumabvazuva, kubvira Bhaarigadhi ngepashi poMutunhu Hermoni metsa kuguma Rebhohamathi, veshe vagari venyika dzemitunhu kubvira Rebhanoni metsa kuguma Misirefothimaimu, nevaSidhoni veshe. Ndinozovadzinga pachangu kubva pamberi pevaIsuraeri; asi kwega koanisira vaIsuraeri iyo nyika ngemabhigidha kuti vaigare nhaka kudai ngezvendakakupanga. Ndizvo zvino koanisira iyi nyika kumadzinza ari mapfumbamwe, novorupande rwedzinza raManase, kuti vaigare nhaka.” Norupande rumweni rwaManase pamwepo nevaRubheni nevaGadhi vakaashira nhaka yavo, yevakapuwa ndiMosi, ngoruseri rweJorodhani ngokumabvazuva, kudai ngezvaakapa kwavari Mosi muranda waMambo Mwari: Kubvira Aroeri, riri pamabandanda eBani reArinoni, nedhorobha riri pakati pebani, nendau yakaterama yeshe yeMedhebha metsa kuguma Dhibhoni; nemadhorobha eshe aSihoni, mambo wevaAmori, uwo waitonga Heshibhoni, metsa kuguma kumugano wevaAmoni; neGireadhi, nomugano wevaGeshuri, nevaMaakathi, noMutunhu weshe Hermoni, neBhashani reshe metsa kuguma Sareka; hweshe umambo hwaOgi muBhashani, uwo wakatonga muAshitharothi nomuEdrei, (uwo ega wakasara ari wevaRefaimu); ava Mosi wakavauraya akavadzinga. Asi vaIsuraeri avazi kudzinga vaGeshuri, nokuti vaMaakathi; asi vaGeshuri, nevaMaakathi vanogara pakati pevaIsuraeri metsa nanyamashi. Kudzinza revaRevhi Mosi aazi kuvapa nhaka; midiro yaitwa ngomuriro kunaMambo Mwari, Mwari waIsuraeri ndiyo yaiya nhaka yavo, kudai ngezvaakaronza kwavari. Mosi wakapa kudzinza revaRubheni nhaka yavo kudai ngokuteererana kwemhuri dzavo. Nyika yavo yaibvira Aroeri, riri pamabandanda eBani reArinoni, nedhorobha riri pakati pebani nendau yakaterama yeshe iri pasinde peMedhebha; neHeshibhoni namadhorobha eshe aro ari mundau dzakaterama; Dhibhoni naBhamothibhaari, naBhethibhaarimeoni, naJahazi, naKedhemothi, naMefaathi, naKhiriathaimu, naSibhima, naZerethishahari pamutunhu webani, naBhethipeori, nemabandanda ePhisiga naBhethijeshimothi, ndiwo madhorobha eshe omundau dzakaterama, noumambo hweshe hwaSihoni mambo wevaAmori, uwo waitonga muHeshibhoni, uwo wakaurawa ndiMosi, pamwepo nevatungamiriri Midhiani, ndiEvhi, Rekemu, Zuri, Huri naRebha, avo vaiya vatungamiriri vaSihoni, vechigara munyika iyo. VaIsuraeri vakaurayazve Bharamu mukororo waBheo, svikiro, ngeshoti, pamwepo naavo vakaurawa ndivo. Nyika yevaRubheni yaiya Jorodhani, nemahumbikumbi aro. Iyi ndiyo nhaka yevaRubheni kudai ngokuteererana kwemhuri dzavo, madhorobha avo nenharaunda yavo. Mosi wakapa nhaka kudzinza raGadhi, kudai ngemhuri dzavo. Nyika yavo yaiya Jaza, nemadhorobha eshe eGireadhi, norupande rwenyika yevaAmoni, metsa kuguma Aroeri, riri pamberi paRabha nokubvira Heshibhoni metsa kuguma Ramathimizipha, naBhetonimu, nokubvira Mahanaimu metsa kuguma kunyika yeDhebhiri, nomubani Bhethiharamu naBhethinimira, naSukothi naZafoni, norupande rwakasara rwoumambo hwaSihoni mambo weHeshibhoni, naJorodhani, nemigano yaro, kuguma kuhumbikumbi yoRuandhle rweKhinerethi ngoruseri rumweni rweJorodhani ngokumabvazuva. Iyi ndiyo nhaka yevaGadhi kudai ngokuteererana kwemhuri dzavo, nokwemadhorobha avo, nokwenharaunda dzavo. NaMosi wakapa nhaka kurupande rwedzinza raManase: yakakoaniswa kuita nhaka kurupande rwedzinza raManase kudai ngokuteererana kwemhuri dzavo. Nyika yavo yaibvira Mahanaimu, naBhashani reshe, noumambo hweshe hwaOgi weBhashani, nemadhorobha eshe aJairi, ari muBhashani, madhorobha makumi matanhatu, norupande rweGireadhi, naAshitarothi, neEdrei, madhorobha oumambo hwaOgi muBhashani, aya aiya akaemera kunevana vaMakhiri mukororo waManase, kurupande rwaMakhiri kudai ngokuteererana kwemhuri dzavo. Aya ndiwo madhorobha aakakoanisa Mosi kuita nhaka mundau dzakaterama muMoabhi, ngoruseri rweJorodhani, ngepasinde peJerikho ngokumabvazuva. Asi kuvaRevhi Mosi aazi kupa nhaka; Mambo Mwari, Mwari waIsuraeri ndiyo nhaka yavo, kudai ngezvaakaronza kwavari. Idzi ndidzo nyika dzavakagara nhaka vaIsuraeri munyika yeKhenani, dzavakakoverwa ndiEreaza mupristi, naJoshua mukororo waNuni, nevakuru vemhuri dzemadzibaba emadzinza evaIsuraeri. Nhaka yavo yakakoanisirwa ngemabhigidha, kudai ngezvaakapanga Mambo Mwari ngenyara yaMosi, kunemadzinza ari mapfumbamwe norupande rwedzinza raManase. Ngokuti Mosi waiya akapa nhaka kunemadzinza mairi norupande rwedzinza ngoruseri rumweni rweJorodhani; asi aazi kupa nhaka kuvaRevhi pakati pavo. Ngokuti vana vaJosefa vaiya madzinza mairi, Manase naEfuremu; ndizvo avazi kupa vaRevhi chikoaniswa munyika, kwega madhorobha okugara, nembusho dzezvifuyo zvavo. VaIsuraeri vakaita kudai ngezvaakapanga Mambo Mwari kunaMosi, vakakoanisa nyika. Naapo vanhu vaJudha vakauya kunaJoshua muGirigari; naKharebhu mukororo waJefune muKhenezi wakati kwaari, “Unozia izwi raakaereketa Mambo Mwari kunaMosi munhu waMwari ndini neiwewe muKadheshibharanea. Ndaiya ndaane makore ari makumi marongomuna ousharuka apo Mosi muranda waMambo Mwari akandituma kubva Kadheshibharanea kuenda koonengerera nyika; neni ndakamuunzira izwi kudai ngezveraiya mumwoyo mwangu. Asi hama dzangu dzakaenda neni dzakaita kuti mwoyo yevanhu ipere simba: asi inini ndakateera yaamho Mambo Mwari, Mwari wangu. NaMosi wakapika ngeiro zuva echiti, ‘Ngegwinyiso nyika yewakatsika ngetsoka dzako inozoita nhaka yako neyevana vako kunoti mhera nariini, ngokuti wakateera yaamho Mambo Mwari, Mwari wangu.’ Zvino, kudai ngezvounoona, Mambo Mwari wakandingwarira ndichapona, kudai ngokuronza kwake, makore aya makumi marongomuna namashanu, kubvira mukuwo waakaereketa Mambo Mwari izwi iri kunaMosi, vaIsuraeri vachahamba mukati mweshango; zvino, ndaane makore ari makumi masere namashanu ousharuka. Nanyamashi ndichindori nesimba kudai ngezvendaiya ndakadaro ngezuva raakandituma ndiro Mosi; kudai ngezveraiya rakadaro simba rangu ngouwo mukuwo, richakandodaro nazvino, rokuenda kuhondo, nokuti kubuda, nokuti kupotera. Ndizvo zvino ndipe uyu mutunhu, waakaereketa ndiwo Mambo Mwari ngeiro zuva; ngokuti iwewe wakazwa ngeiro zuva kuti vaAnaki vaiyapo, nokuti madhorobha aiya makuru neakashosherwa; kudai Mambo Mwari echizoa neni, naapo ndinozoa nesimba rokuvadzinga, kudai ngezvaakaronza Mambo Mwari.” NaJoshua wakamufumisa, wakapa kunaKharebhu mukororo waJefune Hebroni kuti iite nhaka yake. Ndizvo Hebroni yakaita nhaka yaKharebhu mukororo waJefune muKhenezi metsa nanyamashi, ngokuti iye wakamuteera yaamho Mambo Mwari, Mwari waIsuraeri. Zvino zina raHebroni raidudzwa kuti Kiriathiabha; uwo Abha waiya munhu mukuru pakati pevaAnaki. Nenyika yakazorora kubva kuhondo. Ichi ndicho chikoaniswa chakaitwa ngemabhigidha chiri chevana vaJudha kudai ngokuteererana kwemhuri dzavo; eya, kuguma kumagumo eEdhomu mushango reZini ngokumagumo kwenyika yokubani. Nomugano wavo wokubani waibvira kuhumbikumbi yoRuandhle rwoMunyu, kubvira kuchipforo chinoringira kubani. Unobuda nokuenda ngokurutii rwokubani nokukwira kuenda Akrabhimu, wechidarika kuteera kuenda Zini, nawo waikwira ngokurutii rwokubani metsa kuguma Kadheshibharanea wechidarika kuteera kuenda Hezironi, nokukwira kuenda Adhari, wechimonerera kuenda Karika. Kubvira apo wakateera kuenda Azimoni, nokukwira kuenda kubani kweEgipite; nokupedzisira kwomugano uwo kwaiya kworuandhle. Uyu unozoita mugano wenyu worutii rwokubani. Nomugano wokumabvazuva waiya woRuandhle rwoMunyu, metsa kuguma kumuromo weJorodhani. Nomugano kurutii rwedera waibvira kuchipforo choruandhle chiri kumuromo weJorodhani. Nomugano waikwira kuenda Bhethihogira, wechidarika kuteera kuenda Bhethiarabha; nomugano waipinda kukwira kuenda kuBuwe raBhohani mukororo waRubheni. Nomugano waikwira wechienda Dhebhiri kubvira kuBani raAkho, wechiangirira kuenda dera, wechikunukuka kuringirana neGirigari, riri pamberi pokukwira kuenda Adhumimu, riri ngokurutii rwokubani kwebani; nomugano unodarika kuenda kumvura yeEnishemeshi, nokumagumo kwawo kwaiya Enirogeri. Zvino mugano waidarika kuenda ngepasinde pebani romukororo waHinomu metsa kurutii rwokubani rwevaJebhusi; (ndiro Jerusarema); nomugano waidarika kukwira kuenda dera kwomutunhu uri pamberi pebani raHinomu ngokumabirirazuva, uri ngokumagumo kwebani reRefaimu ngokurutii rwedera. Zvino mugano wakaenda kubvira ngepadera pomutunhu metsa kuguma kuchinyuka chemvura cheNefutoa, nokudarika kuenda kumadhorobha oMutunhu waEfroni; nomugano wakagurwa wechidarika kuenda Bhaara, (ndiro Kiriathijearimu.) Nomugano wakamonerera kubva Bhaara kuenda kumabirirazuva kuMutunhu Seira, kudarika kuteera kurutii rwoMutunhu Jearimu, (ndiro Khesaroni,) ngorutii rwedera, wechidzaka kuenda Bhethishemeshi, nokudarika kuenda Thimina. Nomugano wakadarika kuenda ngokurutii rwedera rweEkironi, nomugano wakamonerera kuenda Shikeroni, nokudarika kuteera kuenda kuMutunhu Bhaara, nokudarika kuenda Jabhineeri; zvino magumo omuganu aiya ruandhle. Nomugano wokumabirirazuva waiya woRuandhle Rukuru, kumahumbikumbi arwo. Uyu ndiwo mugano wenyika yevanhu vaJudha, kumarutii eshe anotendenedza kudai ngokuteererana kwemhuri dzavo. Kudai ngokupanga kwaMambo Mwari kunaJoshua, kunaKharebhu mukororo waJefune wakapa chikoaniswa chake pakati pevana vaJudha, dhorobha raAbha dhorobha reHebroni (Abha vaiya baba vaAnaki.) NaKharebhu wakadzinga kubva umwo vakororo vatatu vaAnaki, ndiSheshai, naAhimani, naTharimai, vakororo vaAnaki. Naye wakakwira kubvapo kuenda kuvagari veDhebhiri: zvino zina raDhebhiri ngepamberi raiya Kiriathiseferi. NaKharebhu wakati, “Uwo unozoparadza Kiriathiseferi, nokurinyisa ndinozomupa Akhisa mwanasikana wangu kuti aite mukadzi wake.” NaOthinieri mukororo waKhenazi, munun'una waKharebu, wakarinyisa, naye wakamupa Akhisa mwanasikana wake kuti aite mukadzi wake. Naapo aguma kwaari, wakamunyengerera kuti akumbire kunababa ake munda, naye wakadzaka kubva pambongoro yake; naKharebhu wakati kwaari, “Unodenyi?” Naye wakapingura, “Ndipe chifumiso; ngokuti wakandipa nyika yokubani; ndipezve nezvinyuka zvemvura.” Naye wakamupa zvinyuka zvedera nezvokubani. Iyi ndiyo nhaka yedzinza revaJudha kudai ngemhatso dzavo. Nemadhorobha okumagumo kwedzinza revanhu vaJudha aiya ngokumugano weEdhomu ngorutii rwokubani aiya Kabhizeeri, naEdheri, Jaguri, Kina, Dhimona, Adhadha, Kedheshi, Hazori, Ithinani, Zifi, Teremu, Bhearothi, Hazorihadhata, naKeriothihezironi, (ndiro Hazori), Amamu, Shema, Moradha, Hazarigadha, Heshimoni, Bhethiphereti, Hazarishuari, Bheerishebha, Bhiziothia, Bhaara, Iimu, Ezemu, Eritoradhi, Khesiri, Horma, Zikiragi, Madhimana, Sanisana, Rebhaothi, Shirihimu, Aini naRimoni. Eshe madhorobha aiya makumi mairi namapfumbamwe nemaguta awo. Nomubani kwaiya namaguta aya, Eshitaori, Zora, Ashina, Zanoa, Eniganimu, Tapua, Enamu, Jarimuthi, Adhuramu, Sokho, Azeka, Shaaraimu, Adhithaimu, Gedhera naGedherothaimu, madhorobha gumi namarongomuna nemaguta awo. Zenani, Hadhasha, Migidharigadhi, Dhireani, Miziphe, Jokitheeri, Rakhishi, Bhozikathi, Egironi, Kabhoni, Ramamu, Kitirishi, Gedherothi, Bhethidhagoni, Naama naMakedha, madhorobha gumi namatanhatu nemaguta awo. Ribhina, Etheri, Ashani, Ifita, Ashina, Nezibhi, Keira, Akhizibhi naMaresha, madhorobha mapfumbamwe nemaguta awo. Ekironi, pamwepo nemadhorobha ayo nemaguta awo. Kubvira Ekironi metsa kuguma kuruandhle, nayo yeshe iri pasinde naAshidhodhi, pamwepo nemaguta awo. Ashidhodhi, pamwepo namadhorobha ayo nemaguta awo. Gaza nemadhorobha ayo nemaguta awo, mubani reEgipite noruandhle rukuru nemahumbikumbi. Nemitunhu wenyika yeShamiri, Jatiri, Sokho, Dhana, Kiriathisana, (ndiro Dhebhiri), Anabhi, Eshitemo, Animu, Gosheni, Horoni naGiro, madhorobha gumi narimwe pamwepo nemaguta awo. Arabhi, Dhuma, Eshani, Janimu, Bhethitapua, Afeka, Humita, Kiriathiabha, (ndiro Hebroni,) naZiori, madhorobha mapfumbamwe nemaguta awo. Maoni, Kharimeri, Zifi, Juta, Jezireeri, Jokidheamu, Zanoa, Kaini, Gibhea naThimina, madhorobha gumi pamwepo nemaguta awo. Harihuri, Bhethizuri, Gedhori, Maarathi, Bhethanothi naEritekoni, madhorobha matanhatu pamwepo nemaguta awo. Kiriathibhaari, (ndiro Kiriathijearimu) naRabha, madhorobha mairi nemaguta awo. Mushango, aiya Bhethiarabha, Midhini, Sekaka, Nibhishani, Dhorobha roMunyu naEngedhi, madhorobha matanhatu pamwepo nemaguta awo. Asi ngendaa yemaJebhusi vagari veJerusarema, vanhu vaJudha avazi kukona kuvadzinga; ndizvo vaJebhusi vanogara muJerusarema nevana vaJudha metsa nanyamashi. Nyika yevakakoanisirwa ngemabhigidha vana vaJosefa vakapuwa kubvira Jorodhani ngepasinde peJerikho ngepamvura yeJerikho ngokumabvazuva, kuguma mushango rinokwira kubva Jerikho kuenda kumutunhu Bhetheri; Zvino kubva Bhetheri unokwira kuenda Ruzi, kudarika kuenda kumigano yevaAkhi kuguma Atarothi; zvino wechidzaka ngokumabirirazuva kumugano waJafureti, nokudarika kuenda kuguma kumugano weBhethihoroni rokubani, nokuGeza, nokumagumisiro kwayo kwaiya ruandhle. Ndizvo vana vaJosefa, Manase naEfuremu, vakaashira nhaka yavo. Mugano wenyika yevana vaEfuremu kudai ngokuteererana kwemhuri dzavo waiya wakadai: mugano wenhaka yavo ngorutii rwokumabvazuva waigumira kuAtarothiadha, metsa kuBhethihoroni redera, nomugano wakadarika kuenda kwakaringirana noruandhle kuguma Mikhimethathi ngorutii rwedera; nomugano wakakunukukira kuenda kumabvazuva kwaro, kuguma Taanathishiro, wakadarika ngokumabvazuva kwaJanoa. Zvino wakadarika kubva Janoa kuguma Atarothi, nokunaNaara, metsa kuguma Jerikho, wakagumira Jorodhani. Mugano wakadarika kubva Tapua wakaenda ngokumabvazuva kwebani rinozwi Khana, nomugano kwaro kwaiya kwokuruandhle. Iyi ndiyo nhaka yedzinza revana vaEfuremu kudai ngokuteererana kwemhuri dzavo, pamwepo nemadhorobha akatsanangurirwa vana vaEfuremu aiya pakati penyika yevana vaManase, madhorobha eshe nemaguta awo. Navo avazi kudzinga vaKhenani vaigara Geza; asi vaKhenani vanogara pakati pevaEfuremu metsa nanyamashi, asi vakaitwa hloko. Vakakoanisirwa nyika ngemabhigidha vedzinza raManase, ngokuti ndiye waiya dangwe raJosefa. Makhiri dangwe raManase, baba aGireadhi, wakapuwa Gireadhi naBashani ngokuti waiya munhu wehondo. Vakakoanisirwa mabhigidha vamweni vevana vaManase kudai ngokuteererana kwemhuri dzavo: Abhieza, Hereki, Asirieri, Shekhemu, Heferi naShemidha; ava ndivo vana vevamuna vaManase mukororo waJosefa kudai ngokuteererana kwemhuri dzavo. Zvino Zerofehadhi mukororo waHeferi, mukororo waGireadhi, mukororo waMakhiri, mukororo waManase, waiya asina vana vevakomana, asi waiya nevanasikana vega; aya ndiwo mazina evanasikana vake, Mahla, Noa, Hogira, Mirikha naThiriza. Navo vakauya pamberi paEreaza mupristi, nepamberi paJoshua mukororo waNuni, nepamberi pevatungamiriri vechiti, “Mambo Mwari wakapanga Mosi kuti atipe nhaka pakati pehama dzedu.” Ndizvo wakavapa nhaka pakati pehama dzababa avo kudai ngezvaakapanga Mambo Mwari. Ndizvo Manase wakaashira zvikoaniswa gumi ngepabanze penyika yeGireadhi neyeBhashani, dzaiya ruseri rweJorodhani. Ngokuti vanasikana vaManase vakagara nhaka pamwepo nevakororo vake. Vamweni vevakororo vaManase vakapuwa nyika yeGireadhi. Nyika yaManase yaibvira Asha kuguma Mikhimethathi, iri kumabvazuva kweShekhemu; zvino mugano unoenda ngokubani metsa kuguma kuvagari veEnitapua. Zvino Manase waiya nenyika yeTapua, asi dhorobha reTapua raiya pamugano waManase raiya revana vaEfuremu. Zvino mugano waidzaka kuenda kubani reKhana. Ngokurutii rwekubani, rwemukova: aya madhorobha aEfuremu ari pakati pemadhorobha aManase. Mugano waManase waiya ngedera kwebani, nemagumo awo aiya oruandhle. Ngokurutii rwokubani yaiya nyika yaEfuremu, nangokurutii rwedera rwaiya nyika yaManase, noruandhle rwaiya mugano wake navo; nayo yakashongana pamwepo ngedera muAsha, nomuIsakha ngokumabvazuva. Manase wakapuwa muIsakha nomuAsha Bhethisheani nemaguta aro, neIbhireamu nemaguta aro, nevagari veDhori, nemaguta aro, neveEnidhori nemaguta aro, nevagari veTaanakhi nemaguta aro, nevagari veMegidho nemaguta aro, (dhorobha rechitatu riri Nafathi.) Vana vaManase avazikukona kudzinga vagari vaaya madhorobha; asi vaKhenani vakaangira kugara munyika iyo. Asi apo vaIsuraeri vaiya vaane simba vakaita vaKhenani hloko dzavo; asi avazi kuvadzinga yaamho. Vana vaJosefa vakaereketa kunaJoshua vechiti, “Ngenyi watipa chikoaniswa chimwe nenyika yedu kuita imwe yega, wechiona kuti tiri dzinza guru, kudai ngezvaakatifumisa Mambo Mwari metsa nazvino?” NaJoshua wakati kwavari, “Kudai muri dzinza guru, endai kunyika yemakwasha, muteme makwasha munyika yevaPherizi, neyevaRefaimu ngokuti nyika yomutunhu yaEfuremu yakatsonga yaamho kwomuri.” Vana vaJosefa vakati, “Nyika yemitunhu aitikwani: vaKhenani veshe vanogara munyika yebani vanengoro dzesimbi, veshe veBhethisheani nemaguta aro, naavo vanogara muBani raJezireeri.” Zvino Joshua wakaereketa kunemhatso yaJosefa, kunevaEfuremu nokunavaManase, echiti, “Ngegwinyiso muri dzinza rakakura, munesimba guru; amuzoane chikoaniswa chimwe chega, asi nyika yemitunhu inozoita yenyu; kunyazwi iri gwasha, munozoritemera pashi, naro rinozoita nhaka yenyu metsa kumigano yokuretu; ngokuti munozodzinga vaKhenani, kunyazwi vanengoro dzesimbi, vanesimba guru.” Zvino mbungano yeshe yevaIsuraeri yakaungana muShiro, vakaemesa tende romushongano apo. Nyika yakanyiswa yaiya pamberi pavo. Kwakasara pakati peIsuraeri madzinza manomwe vaiya vasati vaashira chikoaniswa chenhaka yavo. Ndizvo Joshua wakati kuvaIsuraeri, “Munodzirekeredza mukuwo wakaitawani musikaendi koogara nhaka yenyika yaakamupa Mambo Mwari, Mwari wemadzibaba enyu? Tsarai vanhu vatatu kubva kudzinza rimwe ngarimwe, neni ndinozovatuma, vanozomiruka nokuhamba ngomunyika, nokuinyora kudai ngenhaka yavo. Vanozouyazve kwendiri. Vanozoigura kuita marupande manomwe; vaJudha vanozogara munyika yavo, ngokurutii rwokubani, nevemhatso yaJosefa vanozogara nyika yavo yedera. Ndizvo munozoguragura nyika kuita marupande manomwe, muuye muronze magurire acho kwendiri, kuti ndinozomuitira mabhigidha pamberi paMambo Mwari, Mwari wedu. Asi vaRevhi avazoa nechikoaniswa pakati penyu, ngokuti upristi hwaMambo Mwari hunozoita chikoaniswa chenhaka yavo; nevaGadhi nevaRubheni, norupande rwedzinza raManase, vakapuwa chikoaniswa chenhaka yavo ngoruseri rweJorodhani ngokumabvazuva, chevakapuwa ndiMosi muranda waMambo Mwari.” Ndizvo vamuna vakamiruka vakaenda; naJoshua wakapanga avo vakaenda koona migano yenyika echiti, “Endai muhambe ngomunyika, munyore mamiriro enyika, muuyezve kwendiri, kuti ndimuitire mabhigidha pamberi paMambo Mwari muShiro.” Ndizvo vamuna vakaenda, vakahamba ngomunyika, vakaiguragura ngemadhorobha kuita zvikoaniswa zvinomwe, nokuzvinyora mubhuku; vakauyazve kunaJoshua kunembungano muShiro, naJoshua wakaita mabhigidha muShiro pamberi paMambo Mwari; naapo Joshua wakakoanisa nyika kunevaIsuraeri kudai ngokuteererana kwemadzinza avo. Chikoaniswa chenhaka yedzinza raBhenjamini chakagurwa kudai ngokuteererana kwemhuri dzavo, nenyika yechikoaniswa chenhaka yavo yaiya ngepakati pevana vaJudha nevaJosefa. Mugano wavo ngorutii rwedera waibvira Jorodhani; wechikwira ngorutii rwedera rweJerikho, nawo wakadarika kupotya mitunhu ngokumabirirazuva; nokubuda kwokuguma kwawo kwaiya kweshango reBhethiavheni. Kubvapo mugano unodarika kuenda Ruzi, (iro riri Bhetheri,) ngorutii rwokubani; nomugano unodarika kudzaka Atarothiadha, ngepasinde pekamutunhu ako kari ngorutii rwokubani rweBhethihoroni rokubani. Zvino unodarika kubva apo wakamonerera kumhiri kworuandhle rwokumabirirazuva ngokubani; kubva kukamutunhu ako kari pamberi peBhethihoroni ngokurutii rwokubani; nokubuda kwokuguma kwawo kwaiya kwokuKiriathibhaari, rinozwi Kiriathijearimu, dhorobha revana vaJudha. Uyu ndiwo mugano worutii rwokumabirirazuva. Mugano worutii rwokubani waiya wechibvira kumugano weKiriathijearimu, nomugano unodarika kuenda ngokurutii rwokumabirirazuva, wechiguma kuchinyuka chemvura cheNefutoa. Zvino mugano unodzaka kuenda kumugano womutunhu uri pamberi pebani romukororo waHinomu, uwo uri mubani reRefaimu ngorutii rwedera, nawo unodarika kudzaka kubani raHinomu, ngokurutii rwevaJebhusi ngokubani, wechidzaka kudarika kuenda Enirogeri. Zvino nawo wakagurwa wechidarika kubva ngedera, wakapinda kuenda Enishemeshi, nokubapo unobuda kudarika kuenda Gerirothi, riri ngepamberi pokukwira kuenda Adhumimu, nawo unodarika kudzaka kuBuwe raBhohani mukororo waRubheni; nokudarika kuenda wakaringirana neArabha ngokurutii rwedera, wechidzaka kuenda Arabha. Zvino mugano unodarika kuenda ngokurutii rweBhethihogira ngokurutii rwedera nomugano unoguma kumugano kwaiya kuchiforo chedera choRuandhle rwoMunyu ngokurutii rwemagumo okubani eJorodhani: uyu waiya mugano wokubani. Jorodhani rinoita mugano ngokurutii rwokumabvazuva. Iyi ndiyo nhaka yenyika yevana vaBhenjamini, ngemigano yayo, yokutendenedza kumarutii eshe, kudai ngokuteererana kwemhuri dzavo. Zvino madhorobha edzinza revana vaBhenjamini kudai ngokuteererana kwemhuri dzavo aiya Jerikho, Bhethihogira, Emekezizi, Bhethiarabha, Zemaraimu, Bhetheri, Avhimu, Para, Ofira, Khefaramoni, Ofini naGebha; madhorobha ari gumi namairi nemaguta awo. Gibheoni, Rama, Bheerothi, Miziphe, Khefira, Moza, Rekemu, Iripeeri, Tarara, Zera, Haerefu, Jebhusi, (ndiro Jerusarema,) Gibhea, naKiriathi; madhorobha ari gumi namarongomuna nemaguta awo. Iyi ndiyo nhaka yenyika yavana vaBhenjamini kudai ngokuteererana kwemhuri dzavo. Chikoaniswa chechipiri chakaitwa ngemabhigidha chakapuwa kunaSimeoni, dzinza revana vaSimeoni, kudai ngokuteererana kwemhuri dzavo; nenhaka yenyika yavo yaiya pakati penhaka yenyika yevana vaJudha. Munhaka yavo mwaiya neBheerishebha, Shebha, Moradha, Hazarishuari, Bhara, Ezemu, Eritoradhi, Bhethuri, Horma, Zikiragi, Bhethimarikabhothi, Hazarisusa, Bhethirebhaothi naSharuheni; madhorobha ari gumi namatatu nemaguta awo. Aini, Rimoni, Etheri naAshani; madhorobha marongomuna nemaguta awo, pamwepo nemaguta eshe aitendenedza aya madhorobha metsa kuguma Bhaarathibheeri, Rama rokubani. Iyi ndiyo nhaka yevana vaSimeoni, kudai ngokuteererana kwemhuri dzavo. Nhaka yechikoaniswa chedzinza raSimeoni yakabva kuchikoaniswa chenyika chedzinza raJudha chaiya chikuru kwavari. Ndizvo dzinza raSimeoni rakapuwa chikoaniswa chenyika pakati pavo. Chikoaniswa chechitatu chakaitwa ngemabhigidha chakapuwa kuvana vaZebhuruni kudai ngokuteererana kwemhuri dzavo; nomugano wenyika yavo wakaguma Saridhi. Zvino mugano wavo unokwira kuenda ngokumabirirazuva metsa kuguma Marara, unogumira Dhabheshethi, unogumira kubani riri kumabvazuva kweJokineamu. Kubva Saridhi unoenda kumabvazuva kudarika kuenda kumugano weKhisirothitabhori, kubva apo unodarika kuenda Dhabherathi, zvino unokwira kuenda Jafia. Kubva apo unodarika kuenda kumabvazuva kuguma Gathiheferi, kuenda kuEthikazini, wechidarika kuenda Rimoni, wechimonoroka kuenda Nea. Zvino ngedera mugano unomonerera ngokurutii rwedera kuenda Hanathoni, nokuguma kwawo kubani rebani reIfitaheri; Katathi, Naharari, Shimuroni, Idhara naBhetherehema; madhorobha gumi namairi nemaguta awo. Iyi ndiyo nhaka yechikoaniswa chenyika chedzinza raZebhuruni kudai ngokuteererana kwemhuri dzavo, madhorobha ayo nemaguta awo. Chikoaniswa chechirongomuna chakaitwa ngemabhigidha chakapuwa Isakha, kunedzinza raIsakha kudai ngokuteererana kwemhuri dzavo. Nyika yavo inoerengera pamwepo naJezireeri, Khesurothi, Shunemu, Hafaraimu, Shioni, Anaharathi, Rabhithi, Kishioni, Ebhezi, Remethi, Eniganimu, Enihadha naBhethipazezi. Mugano unogumira Thabhori, Shahazuma naBhethishemeshi; migano yayo inoguma Jorodhani, madhorobha gumi namatanhatu nemaguta awo. Iyi ndiyo nhaka yenyika yedzinza revaIsakha kudai ngokuteererana kwemhuri dzavo, madhorobha nemaguta awo. Chikoaniswa chechishanu chakaitwa ngemabhigidha chakapuwa dzinza raAsha kudai ngokuteererana kwemhuri dzavo. Migano yayo inoerengera pamwepo naHerikathi, Hari, Bhetheni, Akhishafi, Aramerekhi, Amadhi neMishari; nawo unoguma Kharmeri ngokumabirirazuva, nokuShihoriribhinathi. Zvino unokunukuka kuenda kumabvazuva wechidarika kuenda Bhethidhagoni, unoguma Zebhuruni, nokubani kweIfitaheri ngokurutii rwedera rweBhethiemeki naNeieri, nawo unoangira kuenderera kuKabhuri, kuEbhuroni, kuRehobhi, kuHamoni nokuKhana, metsa unoguma kuSidhoni guru. Zvino mugano unokunukuka kuenda Rama, nokudhorobha rakashosherwa Thire; zvino mugano unomonerera kuenda Hosa; nawo unoperera muruandhle, Maharabhi, rwenyika Akhizibhi, Uma, Afeki naRehobhi, madhorobha makumi mairi namairi nemaguta awo. Iyi ndiyo nhaka yenyika yedzinza raAsha kudai ngokuteererana kwemhuri dzavo, madhorobha aya nemaguta awo. Chikoaniswa chechitanhatu chakaitwa ngemabhigidha chakapuwa kudzinza raNafitari, kudzinza raNafitari kudai ngokuteererana kwemhuri dzavo. Nomugano wavo waibvira Herefi, pamuokhi kuguma Zaananimu, naAdhaminekebhi, naJabhineeri, metsa kuguma Rakumu nawo waigumira paJorodhani. Zvino mugano unokunukuka kuenda kumabirirazuva, wechiguma Azinothitabhori, nawo unodarika kuenda Hukoki, wechiguma Zebhuruni ngorutii rwokubani, neAsha ngorutii rwokumabirirazuva, Judha ngomabvazuva paJorodhani. Madhorobha akashosherwa ndiwo Zidhimu, Zeri, Hamathi, Rakathi, Khinerethi, Adhama, Rama, Hazori, Kedheshi, Edrei, Enihazori, Ironi, Migidhareri, Horemu, Bhethanathi naBhethishemeshi, madhorobha gumi namapfumbamwe nemaguta awo. Iyi ndiyo nhaka yenyika yedzinza raNafitari kudai ngokuteererana kwemhuri dzavo, madhorobha nemaguta awo. Chikoaniswa chechinomwe chakaitwa ngemabhigidha chakapuwa kudzinza revana vaDhani kudai ngokuteererana kwemhuri dzavo. Nyika yenhaka yavo yaierengera mukati Zora, Eshitaori, Irishemeshi, Shaarabhini, Aijaroni, Ithira, Eroni, Thimina, Ekironi, Eriteke, Gibhethoni, Bhaarathi, Jehudhi, Bhenebheraki, Gathirimoni, Mejarikoni naRakoni, pamugano pakaringirana naJopa. Naapo nyika yevaDhani varashikirwa ndiyo, vaDhani vakakwira kooambana naReshemu, varinyisa, vakariparadza ngokupinza kweshoti, vakagara nhaka yaro, vakagaremwo, vakadudza Reshemu kuti Dhani, kutumidza zina rababa avo Dhani. Iyi ndiyo nhaka yenyika yedzinza revaDhani kudai ngokuteererana kwemhuri dzavo, aya madhorobha nemaguta awo. Naapo vaiya vapedza kukoanisa nyika kudai ngemigano yavo, vaIsuraeri vakapa kunaJoshua mukororo waNuni nhaka yenyika pakati pavo. Kudai ngeizwi raMambo Mwari vakamupa dhorobha iro raakakumbira, Timinathisera munyika yemitunhu yeEfuremu; naye wakaakisa dhorobha, wakagara kweriri. Iyi ndiyo nhaka yenyika yaakakoanisira Ereaza mupristi naJoshua mukororo waNuni, nevakuru vemhuri dzemadzinza evaIsuraeri kuita nhaka ngemabhigidha vari muShiro pamberi paMambo Mwari, pamusiwo wetende romushongano. Ndizvo vakapedza kukoanisa nyika. Zvino Mambo Mwari wakaereketa kunaJoshua echiti, “Ereketa kunevaIsuraeri, wechiti, ‘Emesai madhorobha okutiziremwo, awo endakaereketa ndiwo kwomuri kubudikidza ndiMosi, kuti muurayi uwo unouraya munhu asikazi kuita ngemabomo ungatiziremwo. Anozoita okutiziremwo kubva kumuunzidziri wengazi. Muurayi unozotizira kunerimwe raaya madhorobha, naye unozoema ngepamusiwo wedhorobha nokuronza ndaa yake mukuzwa kwevakuru vedhorobha iro; naapo vanozomuashira kwavari mudhorobha, nokumupa ndau, yokuti agare pakati pavo. Nokudai muunzidziri wengazi echimurumbirira, naapo vasazopira muurayi munyara dzomuunzidziri, ngokuti wakauraya muakirwana wake asikadi asikamunyenyi ngepamberi. Muurayi unozogara mudhorobha iro, metsa azoema pamberi pembungano kuti ndaa yake itongwe, metsa kufa kwomupristi mukuru uwo unozoapo ngamazuva awo; zvino muurayi unozohwirira kanyi nokuuya kudhorobha rake, nokumhatso yake, kudhorobha umwo mwaakaurayira munhu.’ ” Ndizvo vakaemesa Kedheshi muGarire, munyika yemitunhu weNafitari, naShekhemu munyika yemitunhu waEfuremu, naKiriathiabha, kuronza Hebroni, munyika yemitunhu waJudha. Noruseri rweiyo rweJorodhani ngepasinde peJerikho ngokumabvazuva, vakaemesa Bheza riri mushango munyika yedzinza raRubheni, naRamothi muGireadhi munyika yedzinza raGadhi, naGorani muBhashani, kubva kudzinza raManase. Aya madhorobha akaemeserwa vaIsuraeri veshe, nevapara vaiya zvigarandimo pakati pavo, kuti kunyazwi ndiani unouraya munhu asiri mabomo ungatiziremo, kuti asafa ngenyara yomuunzidziri wengazi, metsa aeme pamberi pembungano. Vakuru vemadzibaba vevaRevhi vakauya kunaEreaza mupristi, nokunaJoshua mukororo waNuni, nokuvakuru vemadzibaba emadzinza aIsuraeri. Vakaereketa kwavari muShiro munyika yeKhenani vechiti, “Mambo Mwari wakapanga kubudikidza ndiMosi kuti tipuwe madhorobha okuti tigaremwo, pamwepo nembusho dzawo yezvifuyo zvedu.” Ndizvo vaIsuraeri vakapa kuvaRevhi kubva pakati penhaka yavo madhorobha nembusho dzawo kudai ngezvaakapanga Mambo Mwari. Chikoaniswa chakaitwa ngemabhigidha chakapuwa kumhuri dzevaKohathi; ndivo vana vaAroni mupristi, vaRevhi, vakaashira ngokuitirwa mabhigidha chikoaniswa chakabva kudzinza raJudha, raSimeoni neraBhenjamini, madhorobha gumi namatatu. Nevamweni vevaKohathi vakaashira ngokuita mabhigidha kubva kumhuri yedzinza raEfuremu, raDhani, nokubva kurupande rwedzinza raManase, madhorobha gumi. VaGershoni vakaashira ngokuita mabhigidha chikoaniswa chakabva kumhuri yedzinza raIsakha, raAsha, raNafitari, nokubva kudzinza rorupande rumweni rwaManase muBhashani, madhorobha gumi namatatu. VaMerari kudai ngokuteererana kwemhuri dzavo vakaashira chikoaniswa kubva kudzinza raRubheni, raGadhi neraZebhuruni, madhorobha gumi namairi. VaIsuraeri vakapa ngokuita mabhigidha kuvaRevhi aya madhorobha nemaguta awo, kudai ngezvaakapanga Mambo Mwari kubudikidza ndiMosi. Vakapa kubva kudzinza raJudha, nokubva kudzinza raSimeoni, aya madhorobha akadudzwa pano ngemazina awo. Awo akapuwa kunevana vaAroni, vaiya imwe yemhuri yevaKohathi, vaiya vevaRevhi, ngokuti kwavari kwakapuwa chikoaniswa chakaitwa ngemabhigidha kutanga. Vakavapa Kiriathiabha (Abha waiya baba waAnaki,) iro dhorobha ndiro Hebroni, munyika yemitunhu yaJudha, pamwepo nembusho yaro yakaritendenedza. Asi minda yedhorobha, nemaguta aro, vakazvipa kunaKharebhu mukororo waJefune kuti zviite nhaka yake. Kuvana vaAroni mupristi vakapa Hebroni, nembusho yaro, kuti riite dhorobha rokutiziremwo muurayi, Ribhina nembusho yaro, Jatiri nembusho yaro, Eshitemoa nembusho yaro, Horoni nembusho yaro, Dhebhiri, nembusho yaro, Aini nembusho yaro, Juta nembusho yaro naBhethishemeshi nembusho yaro, madhorobha mapfumbamwe kubva kuneaya madzinza mairi. Nokubva kudzinza raBhenjamini, Gibheoni nembusho yaro, Geba nembusho yaro, Anathothi nembusho yaro naArimoni nembusho yaro, madhorobha marongomuna. Eshe madhorobha evana vaAroni vapristi aiya gumi namatatu nembusho dzawo. Vamweni vemhuri dzevaKohathi, vaRevhi vaiya vasara vevaKohathi, vakapuwa madhorobha ngokuita mabhigidha kubva kudzinza raEfuremu. Vakavapa Shekhemu nembusho yaro munyika yemitunhu yaEfuremu, kuti riite dhorobha rokutiziremwo romuurayi; naGeza nembusho yaro, naKibhizaimu nembusho yaro naBhethihoroni nembusho yaro, madhorobha marongomuna. Nokubva kudzinza raDhani, Eriteke nembusho yaro, Gibhethoni nembusho yaro, Aijaroni nembusho yaro naGathirimoni nembusho yaro, madhorobha marongomuna. Nokubva kurupande rwedzinza raManase, Taanakhi nembusho yaro naGathirimoni nembusho yaro, madhorobha mairi. Madhorobha eshe aiya gumi nembusho dzawo aiya emhuri dzakasara dzevaKohathi. Navo vakapa kuvaGershoni kubva kurupande rwedzinza raManase Gorani muBhashani nembusho yaro, kuti riite dhorobha rokutiziremwo romuurayi, naBheeshitera nembusho yaro, madhorobha mairi. Nokubva kudzinza raIsakha vakapa Kishioni nembusho yaro, Dhabherathi nembusho yaro, Jarimuthi nembusho yaro naEniganimu nembusho yaro, madhorobha marongomuna. Nokubva kudzinza raAsha vakapa Mishari nembusho yaro, Abhidhoni nembusho yaro, Herikathi nembusho yaro naRehobhi nembusho yaro, madhorobha marongomuna. Nokubva kudzinza raNafitari vakapa Kedheshi muGarire nembusho yaro, kuti riite dhorobha rokutiziremwo romuurayi, Hamothidhori nembusho yaro naKaritani nembusho yaro, madhorobha matatu. Eshe madhorobha evaGershoni kudai ngokuteererana kwemhuri dzavo aiya madhorobha gumi namatatu pamwepo nembusho dzawo. Nokune mhuri dzevaMerari, avo vakasara vevaRevhi, kubva kudzinza raZebhuruni, vakapa Jokineamu nembusho yaro, Karita nembusho yaro, Dhimina nembusho yaro, naNaharari nembusho yaro; madhorobha marongomuna. Nokubva kudzinza raRubheni vakapa Bheza nembusho yaro, Jahiza nembusho dzaro, Kedhemothi nembusho yaro, naMefaathi nembusho yaro, madhorobha marongomuna. Nokubva kudzinza raGadhi vakapa Ramothi muGireadhi nembusho yaro, kuti riite dhorobha rokutiziremwo romuurayi, Mahanaimu nembusho yaro, Heshibhoni nembusho yaro, naJaza nembusho yaro, eshe madhorobha marongomuna. Madhorobha eshe evaMerari kudai ngokuteererana kwemhuri dzavo avo vakasara vemhuri dzevaRevhi aiya madhorobha gumi namairi akapuwa ngokuita mabhigidha. Eshe madhorobha evaRevhi aiya pakati penhaka yevaIsuraeri aiya madhorobha makumi marongomuna nemasere nembusho dzawo. Aya madhorobha rimwe ngarimwe raiya nembusho dzawo dzaitendenedza; eshe inga akadaro madhorobha. NaMambo Mwari wakapa vaIsuraeri nyika yeshe yaakapika ndiyo kuvapa kumadzinza avo; navo vakaita nhaka, vakagara mukati mwayo. NaMambo Mwari wakavapa kuzorora kundau dzeshe dzinotendenedza, kudai ndizvo zveshe zvaakapika kumadzibaba avo; inga kusina munhu wemagaa avo waikona kuema pamberi pavo; Mambo Mwari wakapa eshe magaa avo munyara dzavo. Akuzi kutamika nechiro nachimwe chakanaka cheizvo zvaakaereketa ndizvo Mambo Mwari kunevemhatso yaIsuraeri; zveshe zvakaitika kudaro. Zvino Joshua wakadaidza vaRubheni, vaGadhi, norupande rwedzinza raManase. Wakati kwavari, “Imwimwi mwakangwarira izvo zveshe zvaakamupanga Mosi muranda waMambo Mwari, nemwi mwakandipurutana ngeizvo zveshe zvendakamupanga ngeizwi rangu. Amuzi kusiya hama dzenyu mazuva mazhinji aya metsa nanyamashi, asi mwakangwarira mipango nezvironzo zvaMambo Mwari, Mwari wenyu. Zvino Mambo Mwari, Mwari wenyu wakapa kuzorora kunehama dzenyu, kudai ngezvaakavagondisa, ndizvo zvino hwirirai muende kumatende enyu, nokunhaka yenyika yenyu, yemwakapuwa ndiMosi muranda waMambo Mwari ngoruseri rweJorodhani. Kwega nasai kungwaridzira kumipango nezvironzo, zvaakamupanga Mosi muranda waMambo Mwari, kuti mumude Mambo Mwari, Mwari wenyu, nokuhamba ngenjira dzake dzeshe, mungwarire mipango yake, nokubatirira kwaari, nokumushandira ngomwoyo wenyu weshe, nomweya wenyu weshe.” Ndizvo Joshua wakavafumisa akavaendisa, navo vakaenda kumatende avo. Zvino Mosi waiya akavapa rupande rwedzinza raManase nhaka yenyika yaBhashani; asi kurupande rumweni rwaro Joshua wakapa nyika pakati pehama dzavo ngouno kworuseri rweJorodhani ngokumabirirazuva. Naapo Joshua avaendesa kumatende avo wakavafumisawo. Wakaereketa kwavari echiti, “Hwirirai munepfuma yakawanda kumatende enyu, munen'ombe dzakawanda kakurutu, sirivha, mukore, thusi, simbi nezvokusimira zvakawanda; koveranai zvakachakatwa zvemagaa enyu nehama dzenyu.” Ndizvo vaRubheni nevaGadhi, norupande rwedzinza raManase vakahwirira kubva kuvaIsuraeri muShiro, riri munyika yeKhenani kuenda munyika yeGireadhi, kunyika yenhaka yavo yevakapuwa, kudai ngokupanga kwaMambo Mwari kubudikidza ndiMosi. Naapo vaguma kumigano yeJorodhani, iyo iri munyika yeKhenani, vaRubheni, vaGadhi, norupande rwedzinza raManase vakaaka apo pasinde peJorodhani arita guru mukuoneka kwaro. VaIsuraeri vakazwa kwechizwi, “Ringirai, vaRubheni, vaGadhi nevorupande rwedzinza raManase vaaka arita iro rakaringirana nenyika yeKhenani, mumigano yeJorodhani, apo paiya pokuambuka pevaIsuraeri.” Naapo vaIsuraeri vazvizwa, mbungano yeshe yevaIsuraeri vakaunganidzana pamwepo muShiro, kuti vaende koorwa navo. Zvino vaIsuraeri vakatuma Finehasi mukororo waEreaza, mupristi kunevaRubheni, vaGadhi, norupande rwedzinza raManase, kunyika yeGireadhi, pamwepo naye vatungamiriri gumi umwe kubva kuimwe yemhatso yemadzibaba mukati mwemadzinza eshe aIsuraeri; umwe ngaumwe wavo waiya mukuru wemhatso yemadzinza pakati pevaIsuraeri. Vakauya kunevaRubheni, vaGadhi, norupande rwedzinza raManase, munyika yeGireadhi, vakaereketa navo vechiti, “Inoronza izvi mbungano yeshe yaMambo Mwari yechiti, ‘Kupaukanyi uku kwomwaita kubva kunaMwari waIsuraeri, kukunukuka kuhwirira sure nyamashi, kubva mukuteera Mambo Mwari, ngokudziakira arita, kuti mumukire Mambo Mwari ngeiri zuva? Kushata kwaPheori kuri kudodoko here kwetiri, ukwo kwetisati tashambidzwa kwokuri metsa nanyamashi, ukwo kwakaunza nhenda mukati mwembungano yaMambo Mwari, kuti mukunukuke nyamashi kubva mukuteera Mambo Mwari? Kuti mukamukira nyamashi Mambo Mwari, mangwani unozotsenekera dzinza reshe revaIsuraeri. Kunyazwi zvakanyadaro kudai nyika yenyu yakasvipiswa, ambukai muuye kunyika yaMambo Mwari, apo perinogara thabhenakeri raMambo Mwari, muashire nhaka yenyika pakati pedu: asi musamukira Mambo Mwari, nokuti kumukira isusu, ngokuaka arita ngepabanze pearita raMambo Mwari, Mwari wedu. Akhani mukororo waZera aazi kupauka here ngokutora zvezviro zvakatukwa, noushungu hwakadzaka padera pembungano yeshe yaIsuraeri? Nouwo munhu aazi kufa ega mukati mwokushata kwake!’ ” Zvino vaRubheni, vaGadhi, norupande rwedzinza raManase vakapingura vechiti kunevakuru vemhuri dzaIsuraeri, “Mambo Mwari, Mwari wezvimwari! Mambo Mwari Mwari wezvimwari! Unozia, nevaIsuraeri pachavo veshe vanozozia! Kudai kwaiya kumukira, nokuti kudai kwaiya kupauka kwokugonda kunaMambo Mwari, musatiponesa nyamashi. Kudai takadziakira arita rokupauka kubva kwokuteera Mambo Mwari, nokuti takaita kudaro kupira mudiro wokupisha wezviyo newokunyarara, Mambo Mwari emene ngaaunzidzire. Haiwa! Takachiita ngokutya kuti panguva ichauya vana venyu vanozoti kuvana vedu, ‘Munenyi imwimwi kunaMambo Mwari, Mwari waIsuraeri?’ Ngokuti Mambo Mwari wakaita kuti Jorodhani riite mugano pakati pedu nemwi, imwimwi vaRubheni nevaGadhi; amuna chikoaniswa kunaMambo Mwari. Ndizvo vana venyu vanozoita kuti vana vedu vareke kudira Mambo Mwari. Ndizvo takati, ngatidziakire arita, haiwa rokupishira mudiro nokuti rokupira mubairo padera paro, asi kuti riite chapupu pakati pedu nemwi, nepakati pemibarirwana inozouya ngesure kwedu, kuti tiite mishando yaMambo Mwari pamberi pake ngemidiro yedu yokupisha, nemibairo yedu, nemidiro yedu yokunyarara; kuitira kuti vana venyu vasazoronza kunevana vedu panguva inouya vechiti, ‘Amuna chikoaniswa naMambo Mwari.’ Ndizvo takati kudai vechironza kudaro kwetiri nokuti kumibarirwana yedu panguva inouya, isusu tingazotizve, ‘Ringirai chionero chearita raMambo Mwari, iro revakaita madzibaba edu, haiwa rokupira midiro yokupisha, nokuti mibairo; asi kuita chapupu pakati pedu nemwi.’ Mwari asazotenda kuti isusu timukire Mambo Mwari, nokukunukuka nyamashi kuhwirira sure kubva kwokuteera Mambo Mwari, kuti tidziakire arita rokupira midiro yokupisha, midiro yezviyo, nokuti remibairo, ngepabanze pearita raMambo Mwari Mwari wedu riri pamberi pethabhenakeri.” Naapo Finehasi mupristi, nevatungamiriri vembungano, nevakuru vemhuri dzaIsuraeri, vaiya naye, apo vazwa mazwi awo, evakaereketa vaRubheni nevaGadhi, nevaManase, zvakavadakadza. Mupristi Finehasi mukororo waEreaza wakati kunevaRubheni nevaGadhi nevaManase, “Nyamashi tinoona kuti Mambo Mwari uri pakati pedu, ngokuti amuzi kuita uku kupauka kurwisana naMambo Mwari; zvino mwaponesa vaIsuraeri kubva kunyara yaMambo Mwari.” Zvino mupristi Finehasi mukororo waEreaza, nevatungamiriri vakahwirira kubva kunevaRubheni nevaGadhi, kubva kunyika yeGireadhi, kuenda kunyika yeKhenani, kuvaIsuraeri, navo vakavaunzirazve izwi. Izwi rakadakadza vaIsuraeri; nevana vaIsuraeri vakabonga Mwari, avazi kuchazoereketazve ngokukwira kuenda koorwa navo, kooparadza iyo nyika yaigarwa ngevaRubheni nevaGadhi. VaRubheni nevaGadhi vakadudza arita iro vechiti, “Chapupu, ngokuti rinoita chapupu pakati pedu kuti Mambo Mwari ndiye Mwari wedu.” Ngesure kwomukuwo wakareba apo Mambo Mwari waiya apa kuzorora kuvaIsuraeri kubva kumagaa avo eshe akavatendenedza, Joshua waiya aamusharuka aanemakore mazhinji. Joshua wakadaidza vaIsuraeri veshe, vakuru vavo, vatungamiriri vavo, vatongi vavo nenduna dzavo, akati kwavari, “Ndaamusharuka waanemakore mazhinji, nemwi mwakaona zveshe zvaakaita Mambo Mwari, Mwari wenyu kwaari eshe aya madzinza ngepamusoro penyu, ngokuti Mambo Mwari, Mwari wenyu ndiye wakamurwira. Ndakamukoanisira ngokuita mabhigidha eshe aya madzinza asara, kuti aite nhaka yemadzinza enyu, kubvira Jorodhani, pamwepo nemadzinza eshe endakaparadza, metsa kuguma kuruandhle rukuru ngokumabirirazuva. NaMambo Mwari, Mwari wenyu unozovadzinga, nokuvatinha kubva mukuona kwenyu; nemwi munozogara nhaka yenyika yavo, kudai ngezvaakagondisa Mambo Mwari, Mwari wenyu kwomuri. Ndizvo itai vanoshinga kakurutu kuti mungwarire nokuita zveshe zvakanyorwa mubhuku rezvironzo zvaMosi, kuti musazopauka kubva kwezviri kuenda kumudyo nokuti kumuoshwe, kuti musazobvengedzana naaya madzinza, anosara pakati penyu, nokuti musazoronza mazina ezvimwari zvawo, nokuti kuita mhiko ndizvo, nokuti kuzvishandira, nokuti kuzvigwadamira. Asi namatirai kunaMambo Mwari, Mwari wenyu, kudai ngezvemwakaita metsa nanyamashi. Ngokuti Mambo Mwari wakadzinga kubva pamberi penyu madzinza makuru anesimba; asi kwomuri kwaiya kusina munhu waikona kuema pamberi penyu metsa nanyamashi. Munhu umwe wenyu unodzinga gumi remazana; ngokuti Mambo Mwari, Mwari wenyu ndiye unomurwira, kudai ngezvaakagondisa. Ndizvo ngwarai kuti mumude Mambo Mwari, Mwari wenyu. Asi kudai mwechizohwirira sure nokuti ngeiri njira, mwechinamatira kuneveaya madzinza asara pakati penyu, mwechizoroodzana nawo, nokupotera kwavari, navo kwomuri, ziai ngegwinyiso kuti Mambo Mwari, Mwari wenyu aazodzingi aya madzinza kubva pakati penyu; asi anozoita murau nezvirimbana kwomuri, nemishwapu munhii dzenyu, neminzwa mumadziso enyu, metsa mupere kubva padera peiyi nyika yakanaka yaakapa Mambo Mwari, Mwari wenyu kwomuri. “Zvino, nyamashi ndinoenda ngenjira yaveshe venyika, nemwi munozia ngomwoyo yenyu yeshe nomweya yenyu yeshe, kuti akuna nachimwe chakatamika kwezviri zveshe zvakanaka zvaakaereketa ndizvo Mambo Mwari, ngepamusoro penyu; zveshe zvakaitika kwomuri, akuna nachimwe chazvo chisikazi kuitika. Asi kudai ngezvakaitika zveshe zvakanaka zvaakaereketa Mambo Mwari ndizvo kwomuri, ngokudaro Mambo Mwari unozounza padera penyu kushata kweshe, metsa mupere kubva padera penyika iyi yakanaka yaakamupa Mambo Mwari, Mwari wenyu. Kudai mwechizopauka kubva kuchitenderano chaMambo Mwari, Mwari wenyu, chaakamupanga, nokushandira zvimwari, nokudzikotamisa kwezviri, ushungu hwaMambo Mwari hunozobaka kwomuri, nemwi munozokasira kupera kubva padera penyika iyi yakanaka yaakamupa.” Zvino Joshua wakaunganidza madzinza eshe evaIsuraeri paShekhemu, wakadaidza vakuru vaIsuraeri, nevatungamiriri vavo, nevatongi vavo, nenduna dzavo; vakadzionisa pamberi paMwari. NaJoshua wakati kuvanhu veshe, “Unoronza izvi Mambo Mwari, Mwari waIsuraeri: Madzibaba enyu akagara ngoruseri rworwizi ngenguva yekare, ndiThera, baba vaAbrahama nababa vaNaho, navo vakashandira zvimwari zvimweni. Zvino ndakatora baba enyu Abrahama kubva ngoruseri rworwizi, ndikamutungamirira mukati mwenyika yeshe yeKhenani, ndakawanza rudzi rwake, ndakamupa Isaka. Ndakapa kunaIsaka Jakobe naEsau. Ndakapa kunaEsau nyika yemitunhu Seira, kuti agare nhaka yayo; asi Jakobe nevana vake vakadzaka Egipite. Zvino, ndakatuma Mosi naAroni, neni ndakarova Egipite, ngeizvo zvendakaita pakati pavo; ngesure ndakamubudisa kubva apo. Naapo ndabudisa madzibaba enyu kubva Egipite, nemwi mwakaguma kuruandhle; nevaEgipite vakarumbirira madzibaba enyu ngesure kwavo vanengoro nemahachi metsa vakaguma kuRuandhle Rwakatsvuka. Naapo vachema kunaMambo Mwari, wakaisa chidima pakati penyu nevaEgipite, naye wakaunzazve ruandhle padera pavo, rwakavambonya; nemadziso enyu akaona izvo zvendakaita muEgipite. Ngesure kwazvo mwakagara mukati mweshango mukuwo wakareba. Zvino ndakamuunza munyika yevaAmori, avo vaigara ngoruseri rweJorodhani; vakarwa nemwi; ndakavapira munyara dzenyu, kuti mugare nhaka yenyika yavo; ndakavapedza kubva pamberi penyu. Zvino Bharaki mukororo waZiphori mambo wevaMoabhi wakamiruka akarwa navaIsuraeri. Wakatuma kudaidza Bharamu mukororo waBheo kuti amutuke. Asi andizi kupurutana kunaBharamu, ndizvo iye wakaangirira kumufumisa; ndizvo ndakamununurira kubva kunyara dzake. Naapo mwaambuka Jorodhani, mukaguma Jerikho, vamuna veJerikho vakaambana nemwi, navaAmori, nevaPherizi, nevaKhenani, nevaHiti, nevaGirigashi, nevaHivhi, nevaJebhusi; ndakavapira munyara dzenyu. Ndakatuma mago pamberi penyu, akadzinga kubva pamberi penyu madzimambo mairi evaAmori, asi haiwa ngeshoti dzenyu nokuti uta hwenyu. Ndakamupa nyika yomusikazi kuishandira, nemadhorobha omusikazi kuaka, nemwi munogara mukati mwawo; munodya michero yemivhini neyemaorivhi zvomusikazi kusima. “Ndizvo zvino ityai Mambo Mwari, mumushandire musina ndemo ngegwinyiso; murashe zvimwari izvo zvakashandirwa ngemadzibaba enyu ngoruseri rworwizi nomuEgipite, mumushandire Mambo Mwari. Zvino kudai zvechioneka kwomuri kuti zvakashata kumushandira Mambo Mwari, tsanangurai nyamashi uwo womunozoshandira; pamweni zvimwari zvakashandirwa ngemadzibaba enyu aiya ngoruseri rworwizi, nokuti zvimwari zvevaAmori, vomunogara munyika yavo; asi kwendiri inini nevemhatso yangu, tinozoshandira Mambo Mwari.” Zvino vanhu vakapingura vechiti, “Mwari asatenda kuti tisiye Mambo Mwari nokushandira zvimwari zvimweni. Ngokuti ndiMambo Mwari, Mwari wedu wakatibudisa nemadzibaba edu kubva munyika yeEgipite, kubva mumhatso youhloko, uwo wakaita izvo zvioniso zvikuru mukuona kwedu, wakatingwarira munjira yeshe yetakahamba ndiyo, nepakati pevanhu veshe vetakadarika ngepakati pavo; naMambo Mwari wakadzinga kubva pamberi pedu vanhu veshe, vaAmori vaigara munyika. Ndizvo isusuwo tinozoshandira Mambo Mwari, ngokuti ndiye Mwari wedu.” Asi Joshua wakati kuvanhu, “Amungashandiri Mambo Mwari, ngokuti iye uri Mwari wakachena; uri Mwari unendurumwa; aazomurekereri kupauka kwenyu nezvishaishi zvenyu. Kudai mwechisiya Mambo Mwari nokuenda kooshandira zvimwari zvenyika, naapo unozokunukuka nokumuitira zvakashata nokumupedza, ngesure apo akamuitira zvakanaka.” Nevanhu vakati kunaJoshua, “Haiwa, asi tinozomushandira Mambo Mwari.” Zvino Joshua wakati kunevanhu, “Imwimwi muri zvapupu ngokwenyu, kuti mwadzitsanangurira Mambo Mwari kuti mumushandire.” Navo vakati, “Eya, tiri zvapupu.” Naye wakati, “Ndizvo zvino rashai zvimwari zvipara zviri pakati penyu, muemese mwoyo yenyu kunaMambo Mwari, Mwari waIsuraeri.” Vanhu vakati kunaJoshua, “Tinozoshandira Mambo Mwari, Mwari wedu, tipurutane izwi rake.” Ndizvo Joshua wakaita chitenderano navanhu ngeiro zuva, naye wakavaemesera zviemeso nemipango vari muShekhemu. Joshua wakanyora aya mazwi mubhuku rezvironzo zvaMwari; wakatora buwe guru, wakariemesa apo pashi pomuti womuokhi, waiya pasinde pendau yakachena yaMambo Mwari. Joshua wakati kunevanhu veshe, “Ringirai, iri buwe rinozoita chapupu kwetiri; ngokuti razwa mazwi aMambo Mwari aakaereketa kwetiri. Ndizvo rinozoita chapupu kwomuri, kuti musazoramba Mwari wenyu.” Ndizvo Joshua wakatendera vanhu kuti vaende, munhu weshe kunhaka yake. Ngesure kweizvi Joshua mukororo waNuni, muranda waMambo Mwari, wakafa, aanemakore zana negumi. Navo vakamuika munyika yenhaka yake muTiminathisera, iyo iri munyika yemitunhu yaEfuremu, ngorutii rwedera rwomutunhu Gaashi. VaIsuraeri vakashandira Mambo Mwari mazuva eshe okupona kwaJoshua, nemazuva eshe okupona kwevakuru avo vakapona kupinda Joshua, avo vaiya vakazia mishando yeshe yaMambo Mwari, yaaiya akaitira Isuraeri. Navo vakatsira muShekhemu magodo aJosefa, evaiya vakaunza kubva Egipite vana vaIsuraeri, mundau yaaiya atenga Jakobe kubva kunevana vaHamori baba aShekhemu ngezvigurwa zvesirivha zana; nayo yakaita nhaka yevana vaJosefa. NaEreaza mukororo waAroni wakafa; navo vakamuika muGibhea, dhorobha romukororo wake Finehasi, iro rakapuwa kwaari munyika yemitunhu yeEfuremu. Ngesure kwokufa kwaJoshua, vaIsuraeri vakabvunza Mambo Mwari vechiti, “Ndiani pakati pedu unozotanga kukwira koorwa nevaKhenani?” NaMambo Mwari wakati, “Judha ndiye unozokwira. Ringirai ndapa nyika munyara dzake.” Judha wakati kunaSimeoni hama yake, “Kwira neni munyika yechikoaniswa changu, kuti tirwe nevaKhenani; neni ngokudaro ndinozoendawo newe munyika yechikoaniswa chako.” Ndizvo Simeoni wakaenda naye. Zvino Judha wakakwira, naMambo Mwari wakapa vaKhenani nevaPherizi munyara dzavo; navo vakauraya vamuna vari makumi emazana gumi muBhezeki. Vakaona Adhonibhezeki ari muBhezeki; vakarwa naye, vakauraya vaKhenani nevaPherizi. Adhonibhezeki wakatiza; asi vakamurumbirira, vakamubata, vakagura makunwe ake makuru enyara nemakunwe makuru etsoka. Adhonibhezeki wakati, “Madzimambo makumi manomwe akagurwa makunwe nezvikunwe zvikuru zvavo, vainongeredza kudya kubva pashi petafura rangu; kudai ngezvendakaita, ndizvo Mwari wakandiunzidzira kudaro.” Vakamuunza Jerusarema, naye wakafira apo. Zvino vanhu vaJudha vakarwa naJerusarema navo vakaritora, vakaribaya ngokupinza kweshoti, nokuripisha ngomuriro. Ngesure kweizvo vanhu vaJudha vakadzaka koorwa nevaKhenani, vaigara munyika yemitunhu, nokubani, nomumapani. Judha wakaenda koorwa nevaKhenani vaigara muHebroni (zvino zina raHebroni karetu raizwi Kiriathiabha;) navo vakanyisa Sheshai, Ahimani naTharimai. Vechibva apo vakaenda koorwa nevagari veDhebhiri (zina reDhebhiri ngekaretu raizwi Kiriathiseferi.) Zvino Kharebhu wakati, “Uwo unozorwisa Kiriathiseferi nokurinyisa, ndinozomupa Akhisa mwanasikana wangu kuita mukadzi.” NaOthinieri mukororo waKhenazi munun'una waKharebhu wakarinyisa, naKharebhu wakamupa Akhisa mwanasikana wake kuti aite mukadzi wake. Naapo auya kwaari, wakamuonga kuti akumbire munda kunababa ake. Naapo adzaka kubva pambongoro yake, Kharebhu wakati kwaari, “Unodenyi?” Naye wakati kwaari, “Ndipe chipo; ngokuti wakandipa nyika yokubani, ndipezve zvinyuka zvemvura.” Ndizvo Kharebhu wakamupa zvinyuka zvedera nezvokubani. Mibarirwana yaHobhabhi muKheni, vazvere vaMosi, vakakwira kubva kudhorobha remiti remibvumo pamwepo nevaJudha kuenda mushango raJudha, riri ngokubani kweAradhi. Zvino vakaenda vakagara pakati peavo vanhu vaAmareki. Judha wakaenda naSimeoni hama yake, vakanyisa vaKhenani vaigara muZefathi, vakariparadza yaamho. Ndizvo dhorobha iro rakadudzwa kuti Horma. Judha wakanyisa Gaza nenyika yaro, naAshikeroni nenyika yaro, naEkironi nenyika yaro. Mambo Mwari waiya naJudha naye wakatora nhaka yenyika yemitunhu; asi aazi kukona kudzinga vagari vomubani, ngokuti vaiya nengoro dzesimbi. Hebroni rakapuwa kunaKharebhu, kudai ngezvaakaronza Mosi; naye wakadzinga kubvamwo vakororo vatatu vaAnaki. Asi vaBhenjamini avazi kudzinga vaJebhusi avo vaigara muJerusarema; ndizvo vaJebhusi vanogara pakati pevana vaBhenjamini metsa nanyamashi. Vemhatso yaJosefa vakakwirawo koorwa naBhetheri; naMambo Mwari waiya navo. Vemhatso yaJosefa vakatuma vanengeri koonengera Bhetheri (zina redhorobha iro ngekaretu raizwi Ruzi.) Naapo vanengeri vaona munhu echibuda kubva mudhorobha, vakati kwaari, “Tipangidzire, tapota, njira yokupotera ndiyo mudhorobha, nesu tinozokuitira nyasha.” Ndizvo wakavapangidzira njira yokupotera mudhorobha, vakarwisa dhorobha ngokupinza kweshoti; asi vakatendera munhuwo nemhuri yake yeshe kuti aende. Ndizvo munhuwo wakaenda munyika yevaHiti, wakaakamwo dhorobha, akadudza zina raro kuti Ruzi; iro ndiro zina raro metsa nanyamashi. Manase aazi kudzinga vagari vomuBhethisheani nemaguta aro, nokuti Taanakhi nemaguta aro, nokuti vagari veDhori nemaguta aro, nokuti vagari veIbhireamu nemaguta aro, nokuti vagari veMegidho nemaguta aro; asi vaKhenani vakaangira kugara munyika iyo. Naapo vaIsuraeri vaiya vaane simba, vakaangiridza vaKhenani kuti vavashandire, asi avazi kuvadzinga. NaEfuremu aazi kudzinga vaKhenani vaigara muGeza; asi vaKhenani vakagara pakati pavo muGeza. Zebhuruni aazi kudzinga vagari veKitironi, nokuti vagari veNaharori; asi vaKhenani vakagara pakati pavo, vechiangiridzwa kuvashandira. Asha aazi kudzinga vagari veAko, nokuti vagari veSidhoni, nokuti vagari veAhirabha, nokuti vagari veAkhizibhi, nokuti vagari veHeribha, nokuti vagari veAfeki, nokuti vagari veRehobhi. Asi vaAsha vakagara pakati pevaKhenani, vagari veiyo nyika, ngokuti avazi kuvadzinga kubvamwo. Nafitari aazi kudzinga vagari veBhethishemeshi, nokuti vagari veBhethanathi; asi vakagara pakati pevaKhenani, vagari venyika iyo; kunyazwi zvakanyadaro vagari veBhethishemeshi nevagari veBhethanathi vakaangiridzwa kuvashandira. VaAmori vakamanikidza vaDhani kutizira kunyika yezvimitunhu; ngokuti avazi kuvatendera kuti vadzake mubani. VaAmori vakaangira kugara kuMutunhu weHeresi muAijaroni nomuShaaribhimu; asi nyara dzevemhatso yaJosefa dzakavanyisa, ndizvo vakaangiridzwa kuvashandira. Mugano wevaAmori waibvira kwokukwira Akrabhimu, kubvira paSera nokuchikwira dera. Zvino ngirosi yaMambo Mwari yakakwira kubva Girigari kuenda Bhokhimu, yakati, “Ndakaita kuti mukwire kubva Egipite, ndakamuunza kunyika yendakapika ndiyo kunemadzibaba enyu. Ndakati, ‘Anditongozoguri chitenderano changu nemwi. Nemwi amuzoiti chitenderano nevagari veiyi nyika; asi munozopwanya maarita avo.’ Asi amuzi kupurutana izwi rangu. Wonai zvemwakaita! Ndizvo zvino ndinoti andizovadzingi kubva pamberi penyu; asi vanozoita magaa kwomuri, nezvimwari zvavo zvinozoita murau kwomuri.” Naapo ngirosi yaMambo Mwari yaiya yaereketa mazwi aya kunevaIsuraeri veshe, vanhu vakaboorera, vakachema. Ndizvo vakadudza zina reiyo ndau kuti Bhokhimu, navo vakapira mibairo apo kunaMambo Mwari. Naapo Joshua aiya aendesa vanhu, vaIsuraeri vakaenda munhu weshe kunyika yenhaka yake, kuti aigare. Vanhu vakamudira Mambo Mwari ngemazuva eshe okupona kwaJoshua, nemazuva eshe okupona kwevakuru vakapona kupinda Joshua, avo vaiya vakaona mishando yeshe mikuru yaakaita Mambo Mwari kunevaIsuraeri. Joshua mukororo waNuni, muranda waMambo Mwari, wakafa, aane makore zana negumi (110.) Ndizvo vakamutsira mukati mwenyika yenhaka yake muTiminathiheresi, munyika yemitunhu weEfuremu, ngorutii rwedera rwomutunhu Gaashi. Zve, nemibarirwana iyo yeshe yakaunganidzwa kunemadzibaba ayo; naapo kwakabarwa mubarirwana umweni ngesure kwavo, waiya usikazii Mambo Mwari, nokuti mishando yake yaaiya akaitira vaIsuraeri. Zvino vaIsuraeri vakaita zvakashata mukuona kwaMambo Mwari, vakadira vanaBhaari. Vakasiya Mambo Mwari, Mwari wemadzibaba avo, uwo wakavabudisa kubva munyika yeEgipite; vakateera zvimwari zvimweni kubva pakati pezvimwari zvevanhu vaivatendenedza, vakadzikotamisa kwezviri; vakamusira ushungu hwaMambo Mwari. Vakasiya Mambo Mwari, vakadira Bhaari naAshitharothi. Ndizvo ushungu hwaMambo Mwari hwakabaka kunevaIsuraeri, wakavapira munyara dzevachakati avo vakavachakata, wakavatengesa munyara dzemagaa avo vaivatendenedza, kuti vasachaane simba rokukona kuema pamberi pemagaa avo. Kunyazwi ngepari pevakabuda kuenda, nyara yaMambo Mwari yairwisana navo kuvaitira zvakashata, kudai ngezvaakaronza Mambo Mwari, nokudai ngezvaakapika Mambo Mwari kwavari; navo vakatambudzika kakurutu. Zvino Mambo Mwari wakaemesa vatongi, vakavasunhura kubva munyara dzeavo vakavachakata. Asi avazi kupurutana vatongi vavo, asi vakaita umhombo kuteera zvimwari zvimweni, vakadzikotamisa kwezviri. Vakakasira kupauka kubva munjira yevakahamba ndiyo madzibaba avo, vechipurutana mipango yaMambo Mwari; asi ivo avazi kuteera chionero chavo. Peshe Mambo Mwari paakaemesa vatongi, Mambo Mwari waiyapo nomutongi uwo, wakavaponesa kubva munyara dzemagaa avo mazuva eshe ouwo mutongi; ngokuti zvakamukunukusa Mambo Mwari ngendaa yokugomera kwavo ngendaa yeavo vakavatambudza nokuvanesa. Asi apo mutongi afa, vaihwirira sure, nokudzishaishira kupinda madzibaba avo, ngokuteera zvimwari zvimweni nokuzvidira nokuzvigwadamira. Avazi kurekera kubva kunezviito zvavo, nokuti kubva kunjira dzavo dzomutinini. Ndizvo ushungu hwaMambo Mwari hwakabaka kunevaIsuraeri; naye wakati, “Ngokuti ava vanhu vakagura chitenderano changu chendakapanga madzibaba avo, navo avazi kupurutana kuizwi rangu, andichazodzingi madzinza kunyazwi ngaari kubva pamberi pavo eidzo nyika dzaakasiya Joshua apo paakafa, kuti ndiedze vaIsuraeri, kuti vanozongwarira here njira yaMambo Mwari kuhamba mukati mwayo, kudai ngezvevakaingwarira madzibaba avo, nokuti avazoingwariri.” Ndizvo Mambo Mwari wakarekera madzinza awo, asikazi kuvadzinga ngokukasira; naye aazi kuapira munyara dzaJoshua. Zvino aya ndiwo madzinza aakarekera Mambo Mwari, kuti aedze vaIsuraeri veshe avo vaiya vasikazi kuzia hondo naimwe muKhenani (kwega kuti mibarirwana yevaIsuraeri vazie hondo kuti vadzidziswe kurwa, kakurutu avo vaiya vasikazi kumbozia hondo ngekaretu): madzimambo mashanu evaFiristia, vaKhenani veshe, vaSidhoni nevaHivhi vaigara mumutunhu weRebhanoni, kubvira kumutunhu Bhaariherimoni metsa kuguma Rebhohamathi. Nawo aiya okuedza vaIsuraeri ndiwo, kuti kuziikane kuti vanozopurutana mipango yaMambo Mwari here, yaakapanga madzibaba avo kubudikidza ndiMosi. Ndizvo vaIsuraeri vakagara pakati pevaKhenani, vaHiti, vaAmori, vaPherizi, vaHivhi nevaJebhusi; navo vakatora vanasikana vavo kuita vakadzi vavo, vakapa vanasikana kuvakororo vavo kuita vakadzi, vakadira zvimwari zvavo. VaIsuraeri vakaita zvakashata mukuona kwaMambo Mwari, vakariyarwa Mambo Mwari, Mwari wavo, vakadira vanaBhaari nevanaAshera. Ndizvo ushungu hwaMambo Mwari hwakabaka kunevaIsuraeri, naye wakavatengesa munyara yaKushanirishathaimu mambo weMesopotamia; nevaIsuraeri vakashandira Kushanirishathaimu makore masere. Naapo vaIsuraeri vachema kunaMambo Mwari, Mambo Mwari wakavapira musunhuri, uwo wakavasunungura, ndiOthinieri mukororo waKhenazi munun'una waKharebhu. Mweya waMambo Mwari wakauya padera pake, naye wakatonga Isuraeri; akabuda kuenda koorwa; naMambo Mwari wakapa Kushanirishathaimu mambo weMesopotamia munyara dzake; nenyara yake yakanyisa mukurwa naKushanirishathaimu. Ndizvo nyika yaiya nokuzorora makore makumi marongomuna. Zvino Othinieri mukororo waKhenazi wakafa. VaIsuraeri vakaitazve zvakashata mukuona kwaMambo Mwari; naMambo Mwari wakagwinyisa Egironi mambo wevaMoabhi kuti arwe nevaIsuraeri, ngokuti vaiya vaita zvakashata mukuona kwaMambo Mwari. Wakaunganidza kwaari vaAmoni nevaAmareki, wakaenda akanyisa vaIsuraeri; vakatora dhorobha remiti yemibvumo. Ndizvo vaIsuraeri vakashandira Egironi mambo wevaMoabhi makore gumi nemasere. Asi apo vaIsuraeri vachema kunaMambo Mwari, Mambo Mwari wakavapa musunhuri, Ehudhi mukororo waGera, muBhenjamini, munhu waishandisa boshwe. VaIsuraeri vakatumira muthero ndiye kunaEgironi mambo weMoabhi. Ehudhi wakadzinasirira shoti yemakara inopinza, urebu hwayo hwaida kuita masendimitha makumi mashanu; naye wakaisungira ngepashi pechokusimira chake pachizva chake chokumudyo. Zvino wakaunza muthero kunaEgironi mambo weMoabhi. Zvino Egironi waiya munhu wakakora kakurutu. Naapo Ehudhi aiya apedza kupa chipo, wakaendesa vanhu avo vaiya vakatwara chipo icho. Asi iye pachake wakakunukuka ari pamiedzaniso yemapuwe yakatsetswa yaiya pasinde naGirigari, wakati, “Ndine izwi rakafishika rendinoda kumushumira, A Mambo.” Ndizvo mambo wakati, “Chimbonyarara!” Navo veshe vaiema pasinde pake vakabuda kubva kwaari. Ehudhi wakakwedzera kwaari, naye waigara mumhatso yomuturikwa yaitonhorera kuti apipirirwe, iyo yaaishandisa ari ega. Ehudhi wakati, “Ndine izwi rinobva kunaMwari kwouri.” Naye wakamiruka kubva pachigaro chake. Zvino Ehudhi wakatambanudza nyara yake yeboshwe, wakatora shoti yake kubva pachizva chake chokumudyo, akamubaya ngomundani. Chibato chayo chakapindawo nomupanga, nemafuta akanamira pashoti ngokuti aazi kushwamura shoti kubva mundani yake; netsvina yakabuda kubanze. Zvino Ehudhi wakabuda muberere, akamukonyera misiwo yemhatso yomuturikwa yokupipirirwa, akaipinginidza. Naapo aiya abuda, varanda vake vakauya. Naapo vaona kuti misiwo yemhatso yaiya yapinginidzwa, vakati, “Ngegwinyiso unodzisengamisa mumhatso yake yokupipirirwa.” Ndizvo vakagarira metsa vakatsveruka! Apo aiya asati abeura misiwo yemhatso yokupipirirwa vakatora chivhuro, vakaibeura.Waiyamwo mambo wavo akawa pashi afa pamavhu. Ehudhi wakazvonga apo vachaarairwa, wakapinda kudarika miedzaniso yemapuwe yakatsetswa, akatizira Seira. Apo aguma, wakaridza gwama munyika yemitunhu waEfuremu, nevaIsuraeri vakadzaka naye kubva munyika yemitunhu, naye echivatungamira. Wakati kwavari, “Nditeerenyi; ngokuti Mambo Mwari wapa magaa enyu vaMoabhi munyara dzenyu.” Ndizvo vakadzaka kumuteera, vakatsiira mazambuko eJorodhani akaringirana neMoabhi, avazi kutendera kuti munhu naumwe aambuke. Navo vakauraya vaMoabhi ngouwo mukuwo vamuna vaida kuguma makumi emazana gumi (10,000), avo veshe vaiya vakagwinya, veshe vari ngwazi; akuna munhu naumwe wavo wakapona. Ndizvo vaMoabhi vakanyiswa ngenyara dzevaIsuraeri ngeiro zuva. Nenyika yakaano kunyarara makore makumi masere. Ngesure kwake kwakauya Shamugari mukororo waAnathi, uwo wakauraya mazana matanhatu (600) evaFiristia, ngomuti wokuchaira n'ombe. Nayewo wakasunhura vaIsuraeri. VaIsuraeri vakaitazve zvakashata mukuona kwaMambo Mwari, ngesure kwokufa kwaEhudhi. Ndizvo Mambo Mwari wakavapira munyara dzaJabhini mambo wevaKhenani, uwo waitonga muHazori; nenduna yehondo yake waiya Sisera, uwo waigara muHaroshethihagoimu. Zvino vaIsuraeri vakachema kunaMambo Mwari; ngokuti waiya nengoro dzesimbi dziri mazana mapfumbamwe (900), naye wakatambudza vaIsuraeri ngesimba makore makumi mairi. Panguva iyo Dhebhora muprofeti womukadzi, mukadzi waRapidhothi, waitonga vaIsuraeri. Waigara pashi pomuti womubvumo waDhebhora pakati paRama naBhetheri munyika yemitunhu waEfuremu; nevaIsuraeri vakauya kwaari kuti vatongwe. Wakatuma, akadaidza Bharaki mukororo waAbhinoamu kubva Kedheshi muNafitari, akati kwaari, “Mambo Mwari, Mwari waIsuraeri unokupanga, ‘Enda, ukwedzere Mutunhu weThabhori, utore newe vamuna gumi remakumi emazana (10,000) kubva kudzinza raNafitari nedzinza raZebhuruni. Neni ndinozokweera kwouri muBani reKishoni ushongane naSisera nduna yehondo yaJabhini, nengoro dzake nehondo yake; neni ndinozovapira munyara dzako.’ ” Bharaki wakati kwaari, “Kudai wechizoenda neni, naapo ndinozoenda; asi kudai usikazoendi neni, andizoendiyo.” Naye wakati, “Ngegwinyiso ndinozoenda newe; asi kunyazwi muhambo wounozohamba auzoremeredzwi, ngokuti Mambo Mwari unozopira Sisera munyara dzomunhu womukadzi.” Zvino Dhebhora wakamiruka, akaenda naBharaki Kedheshi. Bharaki wakadaidza Zebhuruni naNafitari kuti vauye Kedheshi; naye wakakwira nevamuna gumi remakumi emazana (10,000) avo vakamuteera patsoka dzake; naDhebhora wakaendawo naye. Zvino Hebha muKheni waiya wevana vaHobhabhi vazvere vaMosi, waiya akadziparadzanisa kubva kuvaKheni vamweni, naye wakaemesa tende rake metsa kuguma pamuti womuokhi paZaananimu, iro riri pasinde peKedheshi. Naapo Sisera azwa kuti Bharaki mukororo waAbhinoamu waiya akatizira kuMutunhu weThabhori, Sisera wakaunganidza pamwepo ngoro dzake dzeshe, ngoro mazana mapfumbamwe (900) dzesimbi, nevanhu veshe vehondo vaiya naye, kubvira Haroshethihagoimu metsa kuguma kuBani reKishoni. Zvino Dhebhora wakati kunaBharaki, “Miruka! Ngokuti nyamashi izuva raanozopira Mambo Mwari Sisera munyara dzako. Mambo Mwari ngegwinyiso aazi kukutungamirira here?” Ndizvo Bharaki wakadzaka kubva kuMutunhu Thabhori, nevanhu gumi remakumi emazana (10,000) vechimuteera. Mambo Mwari wakakangaidza Sisera, nengoro dzake dzeshe nehondo yake yeshe ngokupinza kweshoti, pamberi paBharaki; ndizvo Sisera wakadzaka kubva mungoro yake, akatiza ngetsoka dzake. Naapo Bharaki wakarumbirira ngoro, nehondo yake, metsa kuguma Haroshethihagoimu. Hondo yeshe yaSisera yakaurawa ngokupinza kweshoti; akuna nomunhu naumwe wakasara. Zvino Sisera wakatiza ngetsoka dzake metsa kuguma kutende raJaeri mukadzi waHebha muKheni; ngokuti kwaiyapo kuiyana pakati paJabhini mambo weHazori nevemhuri yaHebha muKheni. Jaeri wakabuda kooshongana naSisera, akati kwaari, “Paukirai kupotera uno, mambo wangu, paukirai kwendiri; musatya.” Ndizvo wakapaukira kwaari kupotera mutende, iye wakamufukidza ngegudza. Zvino wakati kwaari, “Ndipe mvura shomani yokumwa, ndinokupota; ngokuti ndapera ngenyota.” Ndizvo wakatsiura garafa romukaka, akamupa, akamufukidza. Naye wakati kwaari, “Ema ngepamusiwo wetende, kuti kukaguma munhu kunyazwi ngouri echibvunza kwouri echiti, ‘Pane munhu pano here?’ Unozoti, ‘Apana munhu.’ ” Asi Jaeri mukadzi waHebha wakatora mbambo yetende nehamera munyara yake, wakakwedzera kwaari zviuyanani, naye wakarovera mbambo pahuma yake, metsa ikati potyo nepashi; ngokuti iye waiya akabatwa ngehope nokurembedzeka. Ndizvo wakafa. Zvino apo Bharaki auya achiteera Sisera, Jaeri wakabuda kooshongana naye, wakati kwaari, “Uya, ndinozokupangidzira uwo munhu wounotsvaka.” Ndizvo wakapotera mutende rake, umwo mwaiya naSisera akaata afa, nembambo yaiya muhuma yake. Ndizvo Mwari wakanyisa Jabhini mambo weKhenani pamberi pevaIsuraeri ngeiro zuva. Zvino nyara yaIsuraeri yakabudirira, ikanyisa padera paJabhini mambo wevaKhenani, metsa yaparadza Jabhini mambo wevaKhenani. Zvino Dhebhora naBharaki mukororo waAbhinoamu vakaemba ngeiro zuva vechiti: “Kudzai Mambo Mwari, imwimwi ngendaa yokuunzidzira kwaakaitira Isuraeri apo vanhu vakadzipa ngokuda. Izwai, imwimwi madzimambo; purutanai, imwimwi vazvare; inini, inini ndinozoemba kukudza kunaMambo Mwari Mwari waIsuraeri. Mambo Mwari, apo iwewe wakabuda kubva Seira, apo wakahamba kubva mushango reEdhomu, nyika yakahuta, nematenga akadonha, nemakore nawo akadonha mvura. Mitunhu yakaondomoka pamberi paMambo Mwari, Umwe weSinai, kubva pamberi paMambo Mwari, Mwari waIsuraeri. Mumazuva aShamugari mukororo waAnathi, mumazuva aJaeri, mapato aazi kuhambwa ngomunhu, nevahambi vakahamba ngenjira dzemishwashwairo. Vagari vemaguta vakapera, muIsuraeri vakapera, metsa iwewe Dhebhora wamiruka, metsa wamiruka kudai ndimai muIsuraeri. Apo vatsanangura zvimwari zvitsva, ndizvo paiya nokurwa mumisiwo. Kwakaoneka here chihlangu nokuti mukhondo pakati pemakumi marongomuna emakumi emazana (40,000) muIsuraeri? Mwoyo wangu unechidisiso kuvatongi vaIsuraeri, avo vakadzipira ngokuda pakati pevanhu. Kudzai imwimwi Mambo Mwari. Pupurai ndizvo, imwimwi munogadha mbongoro dzakachena, imwimwi munogara pamanhi akanaka, nemwi munohamba munjira. Avo vakaponeswa kubva kunebope revaposhi vemisee mundau dzokuchera mvura, apo vanozopupura ngemishando yakarurama yaMambo Mwari, eya, mishando yake yakarurama kunevagari vemaguta ake muIsuraeri. Zvino vanhu vaMambo Mwari vakadzaka kumisiwo. Muka, muka, Dhebhora: muka, muka, emba ruyo! Miruka, Bharaki, utungamirire vabatwa vako kuita hloko, iwewe mukororo waAbhinoamu. Zvino wakaita kuti uwo wakasara atonge padera pevakuru, pakati pevanhu; naMambo Mwari wakandiita kuti nditonge padera pevanesimba. Kubva kunaEfuremu vakauya avo verunzinde rwaAmareki; sure kwako kwakauya Bhenjamini, nehama dzako; kubva Makhiri kwakadzaka vatongi, nokubva Zebhuruni kwakauya avo vanobata ndonga yokunyisa. Nduna dzaIsakha dzakauya naDhebhora; naIsakha wakagondeka kunaBharaki; mubani vakarumba kuteera tsoka dzake. Pakati pedzinza raRubheni kwaiyapo kutsvakisisa kukuru mumwoyo. Wakagara ngenyi mukati mwedanga rehwai wechipurutana kurira kwemitanga yehwai? Pakati pedzinza raRubheni kwaiyapo kutsvakisisa kukuru mumwoyo. Gireadhi wakagara ngoruseri rweJorodhani; naDhani wakagara ngenyi mungarava? Asha wakaangira kugara muhumbikumbi yoruandhle, wakagara muchipforo chake. Asi Zebhuruni naNafitariwo vanhu vaiya vasikatyi metsa parufu; mundau dzakakwirira dzomushango. Madzimambo akauya, akarwa, zvino akarwisa madzimambo evaKhenani paTaanakhi ngepasinde pemvura yeMegido; avazi kuuyirwa ngemare yesirivha. Nyeredzi dzakarwa kubva kudenga; nyeredzi munjira dzadzo dzakarwa naSisera. Ndwizi dzaKishoni dzakavakukuzva, urwo rwizi rwekare, rwizi Kishoni. Hamba, mweya wangu, ngesimba! Zvino madondova emahachi akatinhirisa nyika ngendaa yokurumba kwawo, kurumba kwemahachi avo anesimba. Tukai imwimwi Merozi, inoronza ngirosi yaMambo Mwari, vatukenyi imwimwi kakurutu vagari vayo; ngokuti avazi kuuya kudetsera Mambo Mwari, kudetsera Mambo Mwari kurwa nengwazi. Ngaafumiswe pakati pevakadzi Jaeri, mukadzi waHebha muKheni, unozofumiswa kupinda vakadzi vari mutende. Wakakumbira mvura, naye wakamupa mukaka; wakaunza mukaka wakakora muchidziyo chakapindisisa kunaka. Wakabata ngenyara hoko, nenyara yake yokumudyo wakabata hamera yevashandi; ngehamera iyo wakaponda Sisera, wakapwanya soro rake, akamurova kupotya huma yake. Wakakotama patsoka dzake, wakawa, wakaata; apo paakakotama ndipo paakafira. Mai aSisera vakaringira ngepafasitera, akadaidzira ngepamukana echiti, ‘Ngenyi ngoro dzake dzanonoka kuuya? Anononoka ngenyi madondova emhuka dzengoro dzake?’ Vasikana vake vakangwara vakamupingura, ngegwinyiso unopingura mubvunzo pachake, ‘Avazi kudzitsvakira nokukowana zvakachakatwa here? Munhu weshe adzitorere musikana nokuti vairi; Sisera unodzitorera zvokusimira zvinemaara akaparadzana, zvokusimira zvakachakatwa zvinemiara yakanemeswa ngokusonwa kumarutii eshe, inosisira mitsipa yeavo vanotora zvakachakatwa.’ Ndizvo ngavapere kufa magaa ako eshe, A Mambo Mwari! Asi avo vanokuda ngavadai ngokubuda kwezuva apo rinojeka musimba raro.” Nenyika yaiya nokuzorora makore makumi marongomuna. VaIsuraeri vakaita zvakashata mukuona kwaMambo Mwari, naMambo Mwari wakavapira munyara dzevaMidhiani makore manomwe. Nenyara yaMidhiani yakanyisa padera pevaIsuraeri; ngendaa yevaMidhiani vaIsuraeri vakadziitira ndau dzokuhwara mumitunhu, nomumapako, nendau dzakagwinya dzokuhwara. Ngokuti vaiti apo vaIsuraeri vakusha mbeu, vaMidhiani nevaAmareki, nevanhu vokumabvazuva vaikwira kuuya koorwisana navo. Vaiemesa matende avo kurwisana navo, nokuparadza zvirimwa zvenyika metsa kuguma Gaza, vasikasii nechiro chokudya kunevaIsuraeri, kunyazwi hwai, nokuti n'ombe, nokuti mbongoro. Ngokuti ivo nezvifuyo zvavo vaikwira, nematende avo, vechiuya vakawanda kudai ngendongwe; ngokuti ivo nemakamera avo zvaiya zvisikaerengeki; navo vaipotera munyika kuiparadza. Ndizvo vaIsuraeri vakaita varombo ngendaa yevaMidhiani, navo vakachema kuna Mambo Mwari kuti avadetsere. Naapo vaIsuraeri vachema kunaMambo Mwari ngendaa yevaMidhiani, Mambo Mwari wakatuma muprofeti kunevaIsuraeri, wakati kwavari, “Unoronza izvi Mambo Mwari, Mwari waIsuraeri: Ndakamuunza kubva Egipite, ndikamubudisa kubva kumhatso youhloko. Ndakamusunhura kubva munyara dzevaEgipite, nokubva kunyara dzeavo veshe vaimutambudza, ndikavadzinga kubva pamberi penyu, ndikamupa nyika yavo. Ndikati kwomuri, ‘Inini ndiri Mambo Mwari, Mwari wenyu; musadira zvimwari zvevaAmori, avo vomunogara munyika yavo.’ Asi amuzi kupurutana izwi rangu.” Zvino ngirosi yaMambo Mwari, yakauya ikagara pashi pomuti womuokhi waiya muOfira, uwo waiya waJoashi muAbhieza; naGidheoni mukororo wake waipura koroni pandau yokukamurira vhini, kuti aifishe kubva kuvaMidhiani. Ngirosi yaMambo Mwari yakaoneka kwaari, yakati kwaari, “Mambo Mwari unewe, iwewe ngwazi inesimba.” Gidheoni wakati kweiri, “Asi mambo, kudai Mambo Mwari anesu, izvi zveshe zvinotigumira ngenyi? Iri pari mishando yake yeshe inoshamisa, iyo madzibaba edu akatironzera ndiyo, vechiti, ‘Mambo Mwari aazi kutikwidza here kubva Egipite?’ Asi zvino Mambo Mwari wakatirasha, akatipira munyara dzevaMidhiani.” Zvino Mambo Mwari wakakunukukira kwaari akati, “Enda neiri simba rako, newe unozoponesa Isuraeri kubva munyara dzevaMidhiani. Andini here ndakutuma?” Naye wakati kwaari, “Asi Mambo wangu, ndingazoita maponeserenyi Isuraeri? Ringira dzinza rangu ndiro rakarembedzeka yaamho mudzinza raManase, neni ndakatsongesesa mumhatso yababa angu.” Asi Mambo Mwari wakati kwaari, “Ngegwinyiso ndinozoa newe, newe unozouraya vaMidhiani kudai ngomunhu umwe.” Zvino wakati kwaari, “Kudai ndaona nyasha mukuona kwako, zvino ndipangidzire chioniso chokuti ndiwe unoereketa neni. Usabva pano, ndinokupota, metsa ndiuyezve kwouri, ndiuye nechipo changu, ndichiise pamberi pako.” Naye wakati, “Ndinozogara metsa uuyezve.” Ndizvo Gidheoni wakapotera mumhatso yake, akanasira kachimbudzana kembudzi, nezvingwa zvisina mumera zveefa roufu; wakaisa nyama muchitundu, nomuto wakauisa muhari, wakazviunza kwaari pashi pomuti womuokhi, wakazvipa kweiri. Ngirosi yaMwari yakati kwaari, “Tora nyama nezvingwa zvisina mumera, uzviise padera pebuwe iri, udurure muto.” Naye wakaita kudaro. Zvino ngirosi yaMambo Mwari yakatambanudza ndonga yaiya munyara yayo, ikagwama nyama nezvingwa zvisina mumera ngokumagumo kwayo, naapo kwakabuda muriro kubva pabuwe, wakapedza kupisha nyama nezvingwa zvisina mumera; nengirosi yaMambo Mwari yakanyangarika kubva mukuona kwake. Zvino Gidheoni wakaona kuti ngirosi ingirosi yaMambo Mwari; Gidheoni wakati, “Ndidetserei, Mambo Mwari, Mwari! Ngokuti ndaona ngirosi yaMambo Mwari hope kuhope.” Asi Mambo Mwari wakati kwaari, “Kunyarara ngakugare newe; usatya, auzofi.” Zvino Gidheoni wakaakira apo Mambo Mwari arita, naye akaridudza kuti, “Mambo Mwari Kunyarara”: riripo nyamashi muOfira raAbhieza. Ngousiku uhwo Mambo Mwari wakati kwaari, “Tora mukono wababa ako, mukono wechipiri unemakore manomwe, upwanyire pashi arita raBhaari raanaro baba ako, utemere pashi sika yokudira iri pasinde paro. Uakire Mambo Mwari, Mwari wako arita padera peiri buwe, ngenjira kwayo, utore mukono wechipiri, uupire kuita mudiro wokupisha ngehuni dzesika yokudira yowakatemera pashi.” Ndizvo Gidheoni wakatora vamuna gumi kubva pakati pevaranda vake, wakaita kudai ngezvaakamupanga Mambo Mwari; asi ngokuti waitya vemhuri yemhatso yababa ake, nevamuna vedhorobha, kuzviita masikati, wakazviita usiku. Naapo vamuna vedhorobha vamuka mangwanani maishi, vakaona arita raBhaari rapwanyirwa pashi, nesika yokudira yaiya pasinde paro yaiya yatemerwa pashi, nomukono wechipiri waiya wapirwa kuita mudiro paarita raiya rakaakiwa. Ndizvo vakati umwe kunoumweni, “Ndiani waita ichi chiro?” Naapo vatsvakisisa nokubvunzisisa, vakaronzerwa, “NdiGidheoni mukororo waJoashi wakaita ichi chiro.” Zvino vamuna vedhorobha vakati kunaJoashi, “Budisa mwana wako kwetiri, kuti afe, ngokuti wakapwanyira pashi arita raBhaari, nokutemera pashi sika yokudira yaiya pasinde paro.” Asi Joashi wakati kwavari veshe vaimumukira, “Ndimwi munozorwira Bhaari here? Ndimwi munozomuponesa here? Nouwo unorwira Bhaari unozourawa mangwanani. Kuti ari chimwari ngaadzirwire emene, ngokuti umwe wakapwanyira pashi arita rake.” Ndizvo ngeiro zuva Gidheoni wakadudzwa kuti Jerubhaari, ndiko kuti, “Bhaari ngaarwe naye,” ngokuti iye wapwanyira pashi arita rake. Zvino vakaungana vaMidhiani, vaAmareki, nevanhu vokumabvazuva, vakaambuka Jorodhani, vakaemesa matende avo mubani raJezireeri. Asi Mweya waMambo Mwari wakadzaka padera paGidheoni, naye wakaridza gwama; vakaungana kwaari vaAbhieza kuti vamuteere. Wakatuma nhumwa kuhamba mukati mwenyika yaManase yeshe; navo vakadaidzwa kumuteera.Wakatuma nhumwa kunaAsha, Zebhuruni, nokunaNafitari; navo vakakwira kooshongana navo. Zvino Gidheoni wakati kunaMwari, “Kuti ndione kuti munozoponesa Isuraeri ngenyara yangu, kudai ngezvemwakaronza, ndinozoisa mamviri ehwai mumbuwa yokupurira; nokudai beto rechizoa padera pemamviri pega, pakaoma pamavhu eshe akaatendenedza, zvino ndinozozia kuti munozoponesa Isuraeri ngenyara yangu, kudai ngezvemwakaronza.” Nazvo zvakaitika kudaro. Naapo amuka mangwanani maishi, akakamura mamviri pamwepo, wakakamura beto kubva kumamviri kukadzara ndiro ngemvura. Zvino Gidheoni wakati kunaMwari, “Ushungu hwako husazobaka kwendiri, nditenderei neni ndinozoereketa kamwe kano kega; ngandiedzezve kamwe kano kega ngaaya mamviri; ngakuite kuti mamviri aome ega, nepadera pemavhu eshe ngariapo beto.” Mambo Mwari wakaita kudaro ngouhwo usiku. Paiya pakaoma pamamviri pega, asi raiyapo beto padera pemavhu eshe. Zvino Jerubhaari (uwo ndiye Gidheoni), nevanhu vehondo veshe vaiya naye, vakamuka mangwanani maishi, vakaemesa matende avo ngepasinde pechinyuka chaHarodhi; nematende evaMidhiani aiya ngorutii rwedera rwavo, ngomubani mweMutunhu weMore. Mambo Mwari wakati kunaGidheoni, “Vanhu vounavo vakanyanya kuwanda kuti ndikupire vaMidhiani munyara dzako, kuti vaIsuraeri vasadziganzisa kwendiri vechiti, ‘Nyara yangu ndiyo yakandiponesa.’ Ndizvo zvino enda, udaidzire mukuzwa kwevanhu wechiti, ‘Uwo unotya nokuita maharura, ngaapetuke kanyi kubva kuMutunhu Gireadhi.’ ” Kwakapetuka sure vanhu makumi mairi namairi emakumi emazana (22,000); kwakasara gumi remakumi emazana (10,000). Zvino Mambo Mwari wakati kunaGidheoni, “Vanhu vachakandowanda; dzaka navo kumvura, neni ndinozovaedzera iwewe apo. Naapo wendinozoti, ‘Uyu unozoenda newe,’ ndiye unozoenda newe; naapo wendinozoti, ‘Uyu aazoendi newe,’ aazoendi.” Ndizvo wakadzaka nevanhu kumvura; naMambo Mwari wakati kunaGidheoni, “Vanhu veshe vanokapa mvura ngorurimi rwavo, kudai ngezvinokapa imbwa, avo unozovaisa vega; veshe vanogwadama kumwa mvura, vechiisa nyara dzavo pamuromo, unozovaisa vega.” Nouwandu hwaavo vakakapa, vechiisa nyara yavo pamuromo, vaiya vamuna mazana matatu (300); asi uzhinji hwevanhu vakasara vakaita zvokugwadama kunatira mvura. Zvino Mambo Mwari wakati kunaGidheoni, “Ngevamuna mazana matatu (300) avo vakakapa mvura, ndinozomuponesa, nokupira vaMidhiani munyara dzako. Tendera vanhu vamweni veshe kuti vaende munhu weshe kundau yake.” Ndizvo vakatora mbuva yavo munyara dzavo, nemagwama avo; naye wakapetudza vanhu vamweni vaIsuraeri munhu weshe kutende rake, asi wakasara naava vamuna mazana matatu (300). Kamba yevaMidhiani yaiya ngepashi pake mubani. Ngouhwo usiku Mambo Mwari wakati kwaari, “Miruka, udzake urwise kamba; ngokuti ndaipira munyara dzako. Asi kudai wechitya kurwisa, dzaka iwewe naPhura muranda wako kukamba. Newe unozozwa zvevanoronza; ngesure kweizvo nyara dzako dzinozogwinyiswa kuti urwise kamba iyo.” Zvino wakadzaka nomuranda wake Phura metsa kumigano yokubanze yevarwi vehondo avo vaiya mukamba. VaMidhiani, nevaAmareki, nevanhu veshe vokumabvazuva vaiya varimwo mubani vakawandisa kudai ngendongwe, nemakamera awo akawandisa asikaerengeki kudai ngejecha riri pahumbikumbi yoruandhle. Naapo Gidheoni aguma, waiyapo munhu waironza hope dzake kuneshamwari yake echiti, “Ndarota hope, muhope idzi ndaona chingwa chebhari chakawira mukati mwehondo yevaMidhiani, chakaguma kunetende, chikarichaya kwokuti rakawa, chakaripinduridza, metsa tende rakati serere nepashi.” Neshamwari yake yakamupingura ikati, “Ichi achiri chiro chimweni asi ndiyo shoti yaGidheoni mukororo waJoashi munhu wevaIsuraeri. Munyara dzake Mwari wapiramwo vaMidhiani nehondo yavo yeshe.” Apo Gidheoni azwa kuronzwa kweidzi hope, nokududzirwa kwadzo, wakadira, wakahwirira kukamba yevaIsuraeri, akati, “Mirukai, ngokuti Mambo Mwari wakapira munyara dzenyu hondo yevaMidhiani.” Wakaparadzanisa vamuna avo vaiya mazana matatu (300) kuita zvikwata zvitatu, naye wakapa gwama munyara yomunhu weshe, pamwepo nejomeya risina chiro, kwega chivheneko chaiya mukati. Wakati kwevari, “Ringirai kwendiri, muitewo kudaro; zvino apo ndoguma kwakagumira kamba, chendinozoita, nemwi munozochiitawo. Naapo ndoridza gwama, inini neavo vanonga vaneni, imwimwi ridzaiwo magwama muri kumarutii eshe ekamba, mudaidzire mwechiti, ‘NgeyaMambo Mwari, neyaGidheoni!’ ” Ndizvo Gidheoni nevamuna zana (100) vaiya naye vakaguma apo kwakagumira kamba ngomukuwo wokuamba kwomurindo wepakati pousiku, nevarindi vachaamba kuiswa: vakaridza magwama vakaputsa majomeya aiya munyara dzavo. Ndizvo zvikwata zvitatu zvakaridza magwama, vakaputsa majomeya, vakamirudza zvivheneko ngenyara dzavo dzokumuoshwe, nemagwama okuridza ari kunyara yavo yokumudyo; navo vakadaidzira vechiti, “Shoti yaMambo Mwari, neyaGidheoni!” Vakaema munhu weshe kundau yake vakatendenedza kamba; nehondo yeshe yakarumba yakaboorera, yakatiza. Naapo mazana matatu (300) paakaridza magwama, naMambo Mwari wakaita kuti munhu weshe abaye ngeshoti shamwari yake, mukati mwehondo yeshe; nehondo yakatiza kuenda Bhethishita rakaringirana naZerera, metsa kuguma kumugano weAbherimehora, kuguma Tabhathi. Nevamuna vaIsuraeri vakadziunganidza pamwepo kubva Nafitari, nokubva Asha, navo veshe vaManase, vakarumbirira vaMidhiani. Zvino Gidheoni wakatuma nhumwa kuhamba munyika yemitunhu yeshe yaEfuremu echiti, “Dzakai kurwisana nevaMidhiani, muvatsiirire vasati vaguma kundwizi, metsa kuguma Bhethibhara neJorodhani.” Ndizvo vamuna veshe vaEfuremu vakaunganidzwa pamwepo, navo vakatsiira ndwizi metsa kuguma Bhethibhara neJorodhani. Vakabata nduna mbiri dzevaMidhiani, Orebhi naZeebhi; vakauraya Orebhi paruware runozwi Orebhi, naZeebhi vakamuuraira pokukamura vhini paZeebhi, apo vakarumbirira vaMidhiani. Vakaunza soro raOrebhi neraZeebhi kunaGidheoni ngoruseri rumweni rweJorodhani. Zvino vamuna vokwaEfuremu vakati kwaari, “Chiinyi ichi chewakaita kwetiri, kuti auzi kutidaidza apo pewakaenda koorwa nevaMidhiani?” Navo vakamuganyira kakurutu. Ndizvo wakati kwevari, “Chiinyi chendakaita inini chinoedzaniswa neimwimwi? Kuunganidzwa kwemavhini aEfuremu akuzikupinda kunaka here kunekuvhuna kwaAbhieza? Mwari wakapira munyara dzenyu nduna dzevaMidhiani, Orebhi naZeebhi; chiinyi chendaikona kuita chingaedzaniswa nemwi?” Naapo ushungu hwavo hwakapora kwaari, apo akaereketa kudaro. Zvino Gidheoni wakaguma Jorodhani, akaambuka, nevamuna mazana matatu (300) vaiya naye, varemba, kunyazwi vaiya vachandovarumbirira. Ndizvo wakati kunevanhu veSukothi, “Ipai zvingwa, ndapota, kunevanhu vanonditeera; ngokuti vafukama, neni ndinorumbirira Zebha naZarimuna, madzimambo eMidhiani.” Asi vatungamiriri veSukothi vakati, “Nyara dzaZebha nedzaZarimuna dzaa munyara mwako here, kuti isusu tipe zvingwa kunevarwi vako?” Gidheoni wakati, “Ndizvo apo Mambo Mwari paanozopa Zebha naZarimuna munyara dzangu, naapo ndinozokwenga miiri yenyu ngeminzwa yomushango nerukato.” Naye wakakwira kubvapo kuenda Phenueri, akaita chikumbiro chimwecho kwevari; nevanhu vePhenueri vakamupingura ndizvo ndizvo kudai ngevamuna veSukhothi. Ndizvo wakaereketa kunevanhu vePhenueri echiti, “Apo ndouyazve mukunyarara, ndinozoputsira pashi urwu rusvingo.” Zvino Zebha naZarimuna vaiya muKarikori, nevarwi vavo navo, vaida kukwana gumi namashanu emakumi emazana (15,000), avo vega vakasara vevarwi veshe vevanhu vokumabvazuva; ngokuti vakaurawa vamuna zana nemakumi mairi emakumi emazana (120,000) eavo vakapakatira shoti. Ndizvo Gidheoni wakakwira ngenjira yaavo vanogara mumatende ngokumabvazuva kweNobha naJogibheha, wakarwisa varwi; ngokuti varwi vakapinimidza kuti vakangwaririka. Naapo Zebha naZarimuna vatiza; wakavarumbirira, wakabata ao madzimambo mairi evaMidhiani, Zebha naZarimuna, wakakarudza varwi veshe. Naapo Gidheoni mukororo waJoashi apetuka kubva koorwa ngenjira yepaMutunhu Heresi, wakabata jaha rimwe revanhu veSukothi, wakaribvunza naro rakamupa mazita evatungamiriri nevakuru veSukothi makumi manomwe navanomwe. Zvino wakauya kunevanhu veSukothi, akati, “Ringirai Zebha naZarimuna, avo vemwakandidadira ndivo, mwechiti, ‘Nyara dzaZebha nedzaZarimuna dzaa munyara mwako here, kuti isusu tipire chingwa vanhu vako vademera?’ ” Ndizvo wakabata vakuru vedhorobha, akatora minzwa yomushango norukato, ngeizvo wakadzidzisa vanhu veSukothi. Wakaputsira pashi rusvingo rwePhenueri, akauraya vamuna vedhorobha iro. Zvino wakati kunaZebha nokunaZarimuna, “Vaiya vanhu vakaitawani vemwakauraya Thabhori?” Navo vakamupingura vakati, “Kudai ngezvouriazvo iwewe, navo vaiya vakadaro; umwe ngaumwe wavo waitodzana nevakororo vamambo.” Naye wakati, “Vaiya vakoma vangu, vakororo vamai vangu; kudai ngezvaanopona Mambo Mwari, dai mwaiya mwakavaponesa, inini ndisaizomuuraya.” Ndizvo wakati kunaJetha, dangwe rake, “Miruka uvauraye.” Asi murumbwana aazi kushwamura shoti yake; ngokuti waitya, ngokuti waiya achiri murumbwana mudoko. Naapo Zebha naZarimuna vakati, “Miruka iwewe, utiuraye: ngokuti kudai ngokukura kwomwamuna, rakadaro simba rake.” Ndizvo Gidheoni wakamiruka wakauraya Zebha naZarimuna, akatora zvinemeso zvaiya mumitsipa yemakamera avo. Zvino vamuna vaIsuraeri vakati kunaGidheoni, “Tonga iwewe padera pedu, iwewe nomukororo wakozve nomukororo womukororo wako; ngokuti iwewe wakatiponesa kubva kunyara dzevaMidhiani.” Gidheoni wakati kwevari, “Andizotongi padera penyu inini, nomukororo wangu aazotongi padera penyu. Mambo Mwari unozotonga padera penyu.” Zvino Gidheoni wakati kwavari, “Ndinoda kukumbira chiro kubva kwomuri, kuti mundipe munhu weshe ndandazi dzezvakachakatwa zvake.” (Ngokuti magaa aiya nendandazi dzomukore, ngokuti vaiya vaIshumaeri.) Navo vakapingura kwaari, “Tinozodzipa kwouri ngokuda.” Ndizvo vakachinga jira, vakakandira apo munhu umwe ngaumwe ndandazi yezvakachakatwa zvake. Nouremu hwendandazi dzomukore dzaakakumbira kwavari hwaida kuita makhirogramu makumi mairi (ngepabanze pezvinemeso, nemativera nemachira anemiara yakatsvuka akasimirwa ngemadzimambo eMidhiani, ngepabanze pemaketani aiya mumitsipa yemakamera.) Gidheoni wakanasira efodhi ndizvo, wakariisa mudhorobha rake, muOfira; nevaIsuraeri veshe vakaendeyo vechiita zvoumhombo ngokuriteera; nacho chakaita murau kunaGidheoni nemhatso yake. Ndizvo vaMidhiani vakanyiswa pamberi pevaIsuraeri, avazi kuchamirudzazve masoro avo. Nenyika yaiya nokunyarara makore makumi marongomuna ngemazuva aGidheoni. Jerubhaari mukororo waJoashi wakaenda, akagara mumhatso yake. Zvino Gidheoni waiya nevakororo makumi manomwe avo vakabarwa ndiye, ngokuti waiya nevakadzi vakawanda. Nebunha rake raiya muShekhemu rakamubarirawo mukororo, wakadudza zina rake kuti Abhimerekhi. Zvino Gidheoni mukororo waJoashi wakafa, aamusharuka, wakaikwa muiba rababa ake Joashi, muOfira revaAbhieza. Ngesure kwokufa kwaGidheoni, vaIsuraeri vakakunukukazve, vakaita umhombo kuteera vanaBhaari, vakaita Bhaaribherithi chimwari chavo. VaIsuraeri avazi kuchakarakadza Mambo Mwari, Mwari wavo, uwo wakavanunurira kubva munyara dzemagaa avo kumarutii eshe; avo avazi kupangidza kugondeka kumhatso yaJerubhaari, (ngokududzwa ndiye Gidheoni,) kudai ngokunaka kweshe kwaakaitira kunaIsuraeri. Zvino Abhimerekhi mukororo waJerubhaari wakaenda Shekhemu kunehama dzamai vake, naye wakapangana navo, navo veshe vemhuri vemhatso yamai ake echiti, “Ereketai, ndinomupota, kunzee dzevanhu veshe vari muShekhemu, kuti ngechiri chakapinda kunaka kwomuri, kuti vakororo veshe vaJerubhaari vari makumi manomwe evanhu vatonge padera penyu, nokuti munhu umwe atonge padera penyu? Cherechedzaizve kuti inini ndiri godo renyu nenyama yenyu.” Ndizvo hama dzamai ake dzakaereketa ndiye eshe aya mazwi mukuzwa kwenzee dzevanhu veshe veShekhemu; nomwoyo yavo yakaane chidisiso chokuteera Abhimerekhi, ngokuti vakati, “Ihama yedu.” Navo vakamupa zvigurwa zvesirivha makumi manomwe kubva kumhatso yaBhaaribherithi, ndiyo Abhimerekhi wakabhadhara vanhu vakashata asina shwiro, avo vakamuteera. Wakaenda kumhatso yababa ake muOfira, wakauraya vakoma vake vakororo vaJerubhaari, vaiya makumi manomwe evanhu, padera pebuwe rimwe; asi Jothamu chigumisirwa chaJerubhaari wakapona, ngokuti wakadzifisha. Zvino vamuna veshe veShekhemu vakadziunganidza pamwepo, naveshe veBhethimiro, vakaenda, vakaita Abhimerekhi mambo, ngepasinde pesika yomuokhi yaiya muShekhemu. Naapo vazvironza kunaJothamu, wakaenda akaema padera pomutunhu weGerizimu, wakaboorera ngeizwi rake, akadaidzira, akati kwavari, “Ndipurutanenyi, imwimwi vamuna veShekhemu, kuti Mwari apurutane kwomuri. Miti yakabuda ngomukuwo kuenda koodzodza mambo kuti atonge padera payo; nayo yakati kunomuorivhi, ‘Tonga iwewe padera pedu.’ Asi muti womuorivhi wakati kweiri, ‘Ndingarekera here kubudisa mafuta angu akanaka awo kubudikidza ndiwo zvimwari nevanhu vanokudzwa ndizvo, kuti ndiende ndipepereke padera pemiti yeshe?’ Zvino miti yakati kunomuonde, ‘Uya iwewe, utonge padera pedu.’ Asi muti womuonde wakati kweiri, ‘Ndingazorekera here kubudisa kutapira kwangu, nemichero yangu yakanaka, kuti ndiende ndipepereke padera pemiti yeshe?’ Zvino miti yakati kunomuvhini, ‘Uya iwewe, utonge padera pedu.’ Asi muvhini wakati kweiri, ‘Ndingazorekera kubudisa vhini rangu here rinodakadzisa ndiro zvimwari nevanhu, kuti ndiende ndipepereke padera pemiti yeshe?’ Ndizvo miti yeshe yakati kunerukato, ‘Uya iwewe, utonge padera pedu.’ Norukato rwakati kweiri, ‘Kudai ngegwinyiso mwechizondidzodza kuita mambo padera penyu, ndizvo uyai muhware kumumvuri wangu; asi kudai musikaiti kudaro, muriro ngaubude kubva kurukato, upedze kupisha misedare yeRebhanoni.’ “Ndizvo kudai mwakaita zvakarurama nokuremeredzeka, apo mwakagadza Abhimerekhi kuita mambo, nokudai mwakaita zvakanaka kunaJerubhaari nevemhatso yake, nemwi mwakaita kwaari kudai ngezvinosisira zviito zvake (ngokuti baba angu vakamurwira, akadzipinza mungozi kakurutu, akamusunhura kubva munyara dzevaMidhiani, asi mwamukira mhatso yababa angu ngeiri zuva, mwauraya vakororo vake, makumi manomwe evanhu, padera pebuwe rimwe, mukaita Abhimerekhi mukororo wehloko yake yomukadzi mambo padera pevamuna veShekhemu, ngokuti iye uri hama yenyu), dai ndechiti mwakaita zvakarurama nokuremeredza kunaJerubhaari, nevemhatso yake ngeiri zuva, naapo dakarai henyu kunaAbhimerekhi, nayezve ngaadakare kwomuri. Asi kudai zvisikazi kudaro, muriro ngaubude kubva kunaAbhimerekhi nokupedza vamuna veShekhemu, neBhethimiro, muriro ngaubude kubva kuvamuna veShekhemu neBhethimiro upedze Abhimerekhi.” Zvino Jothamu wakatiza kuenda, wakatizira Bheeri, akagareyo ngendaa yokutya Abhimerekhi mukoma wake. Abhimerekhi wakatonga makore matatu padera peIsuraeri. Asi Mwari wakatuma mweya wakashata pakati paAbhimerekhi nevamuna veShekhemu; nevamuna veShekhemu vakashanda ngokuchengedza kunaAbhimerekhi. Izvi zvakaitika kuti runya rwaakaita kunevakororo makumi manomwe vaJerubhaari ruunzidzirwe, nengazi yavo iitire ndaa kunaAbhimerekhi hama yavo, uwo wakavauraya, nepadera pevamuna veShekhemu avo vakamudetsera kuuraya vakoma vake. Ndizvo ngendaa yokuzondana pakati pavo vamuna veShekhemu vakamusira vahwariri padera pemitunhu. Vakabvukira veshe avo vaipinda ngenjira iyo; kwakashumirwa kunaAbhimerekhi. NaGaari mukororo waEbhedhi wakauya nehama dzake, vakaenda Shekhemu; nevamuna veShekhemu vakamugonda. Vakabuda kuenda muminda, vakakaya mavhini avo, vakakanya vhini ravo ngetsoka, vakadakara. Zvino vakapotera mumhatso yechimwari chavo, vakadya nokumwa, vakatuka Abhimerekhi. Gaari mukororo waEbhedhi wakati, “Abhimerekhi ndiani, isusu tiri anani kunaShekhemu, kuti isusu timushandire? Andiye here mukororo waJerubhaari naZebhuri andiye here nduna yake? Shandirai vamuna veHamori baba aShekhemu. Ngenyi zvino techisisira kumushandira? Kudai kwega ava vanhu vaiya munyara dzangu! Naapo ndaizobvisa Abhimerekhi, neni ndaizoti kwaari, ‘Wandisa varwi vako, ubude.’ ” Naapo Zebhuri nduna yedhorobha azwa mazwi aGaari mukororo waEbhedhi, ushungu hwake hwakabaka. Naye wakatuma nhumwa kunaAbhimerekhi ngokuhwara echiti, “Ringirai, Gaari mukororo waEbhedhi nehama dzake vakauya Shekhemu; vanovherudza mweya mudhorobha wokukumukira. Ndizvo zvino miruka usiku, iwewe nevanhu vako vanewe, muvahwarire mushango. Zvino mambakwedza mangwanani, apo zuva roobuda, unozofumira kumiruka, kuenda mudhorobha; naapo iye nevanhu vaanavo vanobuda koorwisana newe, unozoita kwavari kudai ngezvounokona.” Ndizvo Abhimerekhi nevanhu veshe vaiya naye vakamiruka usiku, vakahwarira Shekhemu vari zvikwata zvirongomuna. Naapo Gaari mukororo waEbhedhi abuda wakaema ngepamusiwo pedhorobha; Abhimerekhi wakamiruka nevanhu vaiya naye, kubva pevaihwarira. Naapo Gaari aona vanhu, wakati kunaZebhuri, “Ringira, vanhu vanodzaka kubva padera pemitunhu!” NaZebhuri wakati kwavari, “Iwewe unoona mabvute emitunhu akadai ngevanhu.” Gaari wakaereketazve echiti, “Wona kunodzaka vanhu ngenjira yepakati penyika, nechikwata chimweni chinodzaka ngenjira yomuokhi rweMeonenimu.” Naapo Zebhuri wakati kwaari, “Uri pari zvino muromo wako, wowakaereketa ndiwo wechiti, ‘Ndiani Abhimerekhi, kuti isusu timushandire?’ Ava andivo here vanhu vewakashoora? Buda zvino, urwisane navo.” Ndizvo Gaari wakabuda kuenda pamberi pevamuna veShekhemu, wakarwa naAbhimerekhi. NaAbhimerekhi wakamurumbirira, naye wakatiza kubva pamberi pake, nevazhinji vakaurawa nokuremadzwa metsa kuguma pakupotera pamusiwo. Ndizvo Abhimerekhi wakagara muAruma; naZebhuri wakarumbirira Gaari nehama dzake, kuti vasazogara muShekhemu. Ngechimangwani vanhu vakadarika kuenda mushango; vakashumira Abhimerekhi. Wakatora varwi vake, akavaparadzanisa kuita zvikwata zvitatu, wakavahwarira mushango. Wakaringira, akaona vanhu vechibuda kubva mudhorobha; naye wakamiruka kurwa navo, wakavauraya. Abhimerekhi nechikwata chaiya naye, vakarumba kuenda mberi, vakaema ngepokupotera pamusiwo wedhorobha; nezvikwata zviiri zvakamiruka zvakaenda kwavari vaiya mushango, zvakavauraya. NaAbhimerekhi wakarwisana nedhorobha ngezuva iro reshe; wakanyisa dhorobha, wakauraya vanhu vaiya umwo, akaputsira pashi dhorobha iro, akarikusha ngomunyu. Naapo vamuna veshe veThawa reShekhemu vazwa izvi, vakapotera muukona hwemhatso yechimwari Bherithi. Abhimerekhi wakaronzerwa kuti veshe vamuna veshe veThawa reShekhemu vakaungana pamwepo. Zvino Abhimerekhi wakakwira kuenda kuMutunhu weZarimoni, nevanhu veshe vaiya naye. Abhimerekhi wakatora sanho munyara dzake, wakatema dai kubva mumuti, wakaritora, akaridzvara papfudzi rake. Akati kunevarwi vaiya naye, “Icho chomunoona ndechiita inini, kasirai kuchiita.” Ndizvo vamuna veshe vehondo vakatema umwe ngaumwe dai rake, vakateera Abhimerekhi, vakaaisa pathawa, vakapisha thawa ngomuriro padera pavo; ngokudaro vanhu veshe veThawa reShekhemu vakafawo, vaida kukwana gumi remazana (1,000) revamuna nevakadzi. Zvino Abhimerekhi wakaenda Thebhezi, wakakomba Thebhezi, wakarinyisa. Asi raiyapo thawa rwakagwinya pakati pedhorobha, nevamuna veshe, nevakadzi, nevanhu veshe vedhorobha vakatiziremwo, vakarikonya, vakakwira ngepadera pethawa. NaAbhimerekhi wakauya kuthawa akarwa naro, wakakwedzera pamusiwo wethawa kuti aripishe ngomuriro. Asi mudzimai umweni wakakandira tsiyo yokukuya padera pesoro raAbhimerekhi, nayo yakaputsa dehenya resoro rake. Naapo wakakasira kudaidza jaha raitwara zvokurwa zvake, akati kwaari, “Shwamura shoti yako, undipedzise, kuti vanhu vasazoti, ‘Wakaurawa ngomunhu wedzimai.’ ” Nejaha rake rakamubaya rikamupotya, naye wakafa. Naapo vamuna vaIsuraeri vaona kuti Abhimerekhi waiya afa, vakaenda munhu weshe kundau yake. Ngokudaro Mwari wakaunzidzira kushata kwaAbhimerekhi, kwaakaita kunababa ake, ngokuuraya vakoma vake vaiya makumi manomwe. Nokushata kweshe kwevanhu veShekhemu Mwari wakakuunza padera pemasoro avo; nepadera pavo kwakaguma kutuka kwaJothamu mukororo waJerubhaari. Ngesure kwaAbhimerekhi kwakamiruka Thora mukororo waPhua, mukororo waDhodho, mukororo waIsakha, kurwira Isuraeri; naye waigara muShamiri munyika yemitunhu yeEfuremu. Wakatonga Isuraeri makore makumi mairi namatatu. Zvino wakafa, akaikwa muShamiri. Ngesure kwake kwakamiruka Jairi, muGireadhi, wakatonga Isuraeri makore makumi mairi nemairi. Waiya nevakororo makumi matatu, vaigadha zvimbongoro makumi matatu; navo vaiya nemadhorobha makumi matatu, anodaidzwa kuti Havhothi-jairi metsa nanyamashi, ari munyika yeGireadhi. Jairi wakafa, wakaikwa muKamoni. VaIsuraeri vakaitazve zvakashata mukuona kwaMambo Mwari, vakadira vanaBhaari, nevanaAshitharothi, nezvimwari zvevaAramu, nezvimwari zvevaSidhoni, nezvimwari zvevaMoabhi, nezvimwari zvevaAmoni, nezvimwari zvevaFiristia. Vakamuriyarwa Mambo Mwari, avazi kumudira. Ndizvo ushungu hwaMambo Mwari hwakabaka kunevaIsuraeri, naye wakavapira munyara dzevaFiristia, nomunyara dzevaAmoni, navo vakatambudza vaIsuraeri nokuvanesa ngeiro gore. Vakavatambudza makore gumi nemasere veshe vaIsuraeri avo vaiya ngoruseri rweJorodhani munyika yevaAmori, iyi iri muGireadhi. VaAmoni vakaambukawo Jorodhani koorwa naJudha, Bhenjamini nevemhatso yaEfuremu; ngokudaro vaIsuraeri vakatambudzika kakurutu. VaIsuraeri vakachema kunaMambo Mwari vechiti, “Takashaisha kwouri ngokusiya Mwari wedu, nokudira vanaBhaari.” Mambo Mwari wakati kuvaIsuraeri, “Andizi kumusunhura here kubva kuvaEgipite, nokubva kuvaAmori, nokubva kuvaAmoni, nokubva kuvaFiristia? VaSidhoni, vaAmareki nevaMaoni vakamutambudza; nemwi mwakachema kwendiri, neni ndakamusunhura kubva kunyara dzavo. Asi imwimwi mwakandisiya, mukadira zvimwari zvimweni; ndizvo andichamusunhurizve. Endai muchemere zvimwari zvemwakatsanangura; ngazvimusunhure zvemene ngenguva yokutambudzika kwenyu.” VaIsuraeri vakati kunaMambo Mwari, “Takashaisha; ita hako kwetiri kudai ngechinooneka chakanaka kwouri; asi kwega tisunhure, tinokupota, ngeiri zuva.” Navo vakarasha kubva pakati pavo zvimwari zvipara vakamudira Mambo Mwari; nomweya wake wakatambudzika ngendaa yokutambudzwa kwevaIsuraeri. Zvino vaAmoni vakadziunganidza pamwepo, vakaemesa matende avo muGireadhi. NevaIsuraeri vakadziunganidza pamwepo, vakaemesa matende avo muMizipha. Nduna dzeGireadhi dzakati umwe kunoumweni, “Ndiani uwo munhu unozotanga kurwa nevana vaAmoni? Iye unozoita mukuru padera pevagari veshe veGireadhi.” Zvino Jefetha muGireadhi mukororo wechifebi waiya ngwazi inesimba.Gireadhi waiya baba aJefetha. Mukadzi waGireadhi wakamuberekera vakororo; nevakororo vomukadzi wake vakura, vashononesa Jefetha, vakati kwaari, “Auzogari nhaka mumhatso yababa edu; ngokuti uri mukororo womukadzi chifebi.” Zvino Jefetha wakatiza kubva kuvanun'una vake, naye wakagara munyika yeTobhi. Kwakaungana kwaari Jefetha vanhu zvireshe, navo vakabuda kuenda naye. Ngesure kwomukuwo vaAmoni vakarwa nevaIsuraeri. Naapo vaAmoni vakarwa nevaIsuraeri, vakuru veGireadhi vakaenda kooteera Jefetha kubva kunyika yeTobhi. Navo vakati kunaJefetha, “Uya uite nduna yedu, kuti tirwe nevana vaAmoni.” Asi Jefetha wakati kuvakuru veGireadhi, “Amuzi kundiramba here, mukandidzinga kubva kumhatso yababa angu? Munouyirenyi kwendiri zvino apo mwaano kutambudzika?” Vakuru veGireadhi vakati kunaJefetha, “Ndizvo takunukukira kwouri zvino, kuti iwewe uende nesu, nokurwa nevaAmoni, uite nduna yedu padera pevagari veshe veGireadhi.” Jefetha wakati kuvakuru veGireadhi, “Kudai mwechizondiunzazve kanyi kuti ndirwe nevaAmoni, naMambo Mwari echizovapa kuti vanyiswe pamberi pangu, ndinozoita nduna yenyu here?” Nevakuru veGireadhi vakati kunaJefetha, “Mambo Mwari ngaaite chapupu pakati pedu, kudai tisikazoiti kudai ngokuronza kwemazwi ako.” Ndizvo Jefetha wakaenda nevakuru veGireadhi, nevanhu vakamuita mukuru nenduna padera pavo; naJefetha wakaereketa eshe mazwi ake pamberi paMambo Mwari muMizipha. Zvino Jefetha wakatuma nhumwa kunamambo wevaAmoni echiti, “Unendaa yenyi kwendiri yokuti unouya koorwisa munyika mwangu?” Mambo wevaAmoni wakapingura nhumwa dzaJefetha, “Ngokuti vaIsuraeri vakatora nyika yangu, apo vachabuda kubva Egipite, kubvira Arinoni metsa kuguma Jabhoki, nokuJorodhani; ndizvo zvino, petudza sure idzi nyika ngokunyarara.” NaJefetha wakatumazve nhumwa kunamambo wevaAmoni. Naye wakati kwaari, “Unoronza izvi Jefetha: VaIsuraeri avazi kutora nyika yaMoabhi, nokuti nyika yaAmoni. Asi apo vaIsuraeri vakwira kubva Egipite, vakahamba kuparura kuguma kuRuandhle Rwakatsvuka, vakaguma Kadheshi. Naapo vaIsuraeri vakatuma nhumwa kunamambo weEdhomu vechiti, ‘Nditendere, ndinokupota, kuhamba kupinda ngomunyika mwako;’ asi mambo weEdhomu aazi kupurutana icho. Ngokudarozve vakatuma kunamambo weMoabhi, asi iye aazi kuvatendera. Ndizvo vaIsuraeri vakagara muKadheshi. Naapo vakahamba ngomushango, vakamonerera nyika yeEdhomu, nenyika yeMoabhi, vakauya ngokumabvazuva kwenyika yeMoabhi, vakaemesa matende avo ngokurutii rwokumabvazuva rweArinoni. Asi avazi kuguma mukati mwenyika yeMoabhi, ngokuti Arinoni ndiwo mugano wenyika yeMoabhi. NevaIsuraeri vakatuma nhumwa kunaSihoni mambo wevaAmori, mambo weHeshibhoni; nevaIsuraeri vakati kwaari, ‘Titendere tinokupota kuti tihambe ngomunyika yako kuenda kunyika yedu.’ Asi Sihoni aazi kugonda vaIsuraeri kuti vahambe ngomunyika yake; asi Sihoni wakaunganidza pamwepo vanhu vake veshe, vakaemesa matende avo muJahazi, vakarwisana nevaIsuraeri. Zvino Mambo Mwari, Mwari waIsuraeri, wakapira Sihoni nevanhu vake veshe munyara dzevaIsuraeri, navo vakavauraya; ndizvo ngokudaro vaIsuraeri vakagara nhaka yenyika yeshe yevaAmori, vagari veiyo nyika. Vakagara nhaka yenyika yeshe yevaAmori, kubvira Arinoni metsa kuguma Jabhoki, nokubvira kushango metsa kuguma Jorodhani. Ndizvo zvino Mambo Mwari, Mwari waIsuraeri, wakadzinga vaAmori kubva pamberi pevanhu vake vaIsuraeri. Ndizvo zvino iwewe unoda kugara nhaka yavo ngenyi? Auzogari here nhaka yenyika younopuwa ngechimwari chako Khemoshi kuti uigare nhaka? Isusu atisisiriwo here kugara nhaka yeizvo zveshe zvaakanyisa Mambo Mwari, Mwari wedu, kuita zvedu? Zvino iwewe uri wakapinda kunaka here kunaBharaki mukororo waZiphori, mambo weMoabhi? Iye wakamboitirana hasha nevaIsuraeri here, nokuti kurwisana navo here? Naapo vaIsuraeri vachagara muHeshibhoni nomumaguta aro, nomuAroeri nemaguta aro, nomumadhorobha eshe akateererana nemigano yeArinoni, kupedza makore mazana matatu (300), ngenyi usikazi kupetudzazve kwouri ngepakati pouwo mukuwo? Ndizvo andina chendakashaisha kwouri, asi iwewe unondiitira zvakashata ngokurwisana neni. Asi Mambo Mwari uwo uri mutongi ngaaite mutongi pakati pevaIsuraeri nevaAmoni.” Asi mambo wevaAmoni aazi kupurutana mazwi aJefetha, aakatuma kwaari. Zvino Mweya waMambo Mwari wakauya padera paJefetha, naye wakahamba Gireadhi naManase. Wakahamba Mizipha reGireadhi, nokubva Mizipha reGireadhi wakahamba kuenda kuvaAmoni. Jefetha wakapika mhiko kunaMambo Mwari echiti, “Kudai ngegwinyiso wechizopira vaAmoni munyara dzangu, ndizvo kunyazwi ndiani unozobuda kubva kumisiwo yemhatso yangu, kuuya kooshongana neni, apo ndopetuka ngokunyarara kubva kuvaAmoni, ngegwinyiso unozoita waMambo Mwari, neni ndinozomupira kuita mudiro wokupisha.” Ndizvo Jefetha wakaambuka kuenda kunevaAmoni koorwa navo; naMambo Mwari wakavapira munyara dzake. Wakavabaya kubvira Aroeri, metsa kuguma Minithi, madhorobha makumi mairi, metsa kuguma Abherikeramimu, ngokuurawa kukurutu. Uku ngokudaro ndikwo kunyiswa kwevaAmoni pamberi pevaIsuraeri. Zvino Jefetha wakauya Mizipha kumhatso yake; kwakabuda kooshongana naye mwanasikana wake anemakandira, echizvina. Naye waiya mwana wake ega; ngepabanze pake waiya asina mukororo nokuti mwanasikana. Apo amuona wakabaura zvokusimira zvake, akati, “Ihehe, mwanasikana wangu! Iwewe warwadzisa mwoyo wangu kakurutu, newe waita umwe weavo vanonditambudza, ngokuti ndakabeura muromo wangu kunaMambo Mwari kupika, neni andingarekeri kuchiita.” Iye wakati kwaari, “Baba vangu, kudai mwakabeura muromo wenyu kunaMambo Mwari, itai kwendiri kudai ngeicho chakabuda kubva kumuromo wenyu, kwechioneka kuti Mambo Mwari wamupa kuunzidzira magaa enyu, vaAmoni.” Naye wakati kunababa ake, “Ichi chiro ngachiitwe kwendiri. Ndirekere mwedzi miiri, kuti ndihambe apo naapo padera pemitunhu, ndichemere umhandara hwangu, inini neshamwari dzangu.” Naye wakati, “Enda.” Naye wakamuendesa mwedzi miiri. Ndizvo wakaenda neshamwari dzake, wakachemera umhandara hwake padera pemitunhu. Ngokupera kwomwedzi miiri, wakapetuka kunababa ake, avo vakaita kwaari kudai ngokupika kwemhiko yavo yaakapika. Naye aazi kumbozia mwamuna. Nakwo kwakabuda mushuma muIsuraeri wokuti vanasikana vaIsuraeri vaienda gore ngegore kuchiriro chomwanasikana waJefetha muGireadhi mazuva marongomuna ngegore. Vamuna vokwaEfuremu vakadziunganidza pamwepo vakaambuka Zafoni, vakati kunaJefetha, “Wakaambuka ngenyi kuenda koorwa nevaAmoni, usikazi kutidaidza kuti tiende newe? Tinozopisha mhatso yako newe ngomuriro!” Jefetha wakati kwavari, “Inini nevanhu vangu tairwisana kakurutu nevaAmoni. Asi apo ndakamudaidza, amuzi kundinunura kubva kunyara dzavo. Naapo ndaona kuti amuzi kundinunura, ndakadzipinza kupona kwangu mungozi, ndikaambuka kuenda kunevaAmoni, naMambo Mwari wakavapira munyara dzangu. Ndizvo mwauya ngenyi ngeiri zuva kwendiri kurwisana neni?” Zvino Jefetha wakaunganidza pamwepo vanhu veshe vokwaGireadhi, vakarwisana nevokwaEfuremu; nevamuna veGireadhi vakanyisa vokwaEfuremu, ngokuti vakati, “Imwimwi vaGireadhi muri avo vakatiza kubva kuvaEfuremu, pakati pevaEfuremu nevaManase.” Zvino vaGireadhi vakatsiira mazambuko eJorodhani pamberi pevaEfuremu. Naapo umwe wevakatiza wevaEfuremu wakati, “Rekai ndiambuke,” vamuna veGireadhi vakati kwaari, “Uri umwe wevaEfuremu here?” Naapo aironza kuti, “Haiwa,” naapo vaiti kwaari, “Ronza zvino kuti, Shibhorethi,” naye aironza kuti “Sibhorethi,” ngokuti asaikona kurironza ngenjira kwayo. Zvino vaimubata nokumuuraya apo pazambuko reJorodhani. Kwakafa apo vokwaEfuremu ngouwo mukuwo vamuna makumi marongomuna nemairi emakumi emazana (42,000). Jefetha wakatonga Isuraeri makore matanhatu. Zvino wakafa Jefetha muGireadhi, wakaikwa mudhorobha rake muGireadhi. Ngesure kwake Ibhizani muBhetherehema wakatonga Isuraeri. Waiya nevakororo makumi matatu. Wakaroodza vanasikana vake makumi matatu kunyika dzimweni, naye wakaunzira vakororo vake vakadzi makumi matatu kubva kunyika dzimweni. Wakatonga Isuraeri makore manomwe. Naapo Ibhizani wakafa, wakaikwa muBhetherehema. Ngesure kwake Eroni muZebhuruni wakatonga Isuraeri; naye wakatonga Isuraeri makore gumi. NaEroni muZebhuruni wakafa, wakaikwa muAijaroni munyika yeZebhuruni. Ngesure kwake Abhidhoni mukororo waHireri muPhirathoni wakatonga Isuraeri. Waiya nevakororo makumi marongomuna nevakororo vevakororo vake vaiya makumi matatu, avo vaiagadha padera pezvimbongoro makumi manomwe. Wakatonga Isuraeri makore masere. Zvino Abhidhoni mukororo waHireri muPhirathoni wakafa, akaikwa muPhirathoni munyika yaEfuremu, mumutunhu wevaAmareki. VaIsuraeri vakaitazve zvakashata mukuona kwaMambo Mwari, naMambo Mwari wakavapira munyara dzevaFiristia makore makumi marongomuna. Kwaiyapo munhu umweni weZora wedzinza raDhani, uwo zina rake raiya Manoa; nomukadzi wake waiya ngomwa, asikabereki. Nengirosi yaMambo Mwari yakaoneka kunouwo mukadzi, yakati kwaari, “Ringira zvino, uri ngomwa, aubereki; asi unozoita ukosha, ubereke mukororo. Ndizvo zvino ngwara, ndinokupota, usamwa vhini nokuti zvinoradzisa, usadya chiro chinosvipisa, ngokuti unozoita ukosha, ubereke mukororo. Apana chisvo chinozopara soro rake, ngokuti mwana uwo unozoita muNaziriti kunaMwari kubvira mundani. Ndiye unozotanga kusunhura vaIsuraeri kubva munyara dzevaFiristia.” Zvino mukadzi wakauya, akaronzera mwamuna wake, akati, “Munhu waMwari wakauya kwendiri, nehope yake yakaringirika kudai ngehope yengirosi yaMwari, inotyisa kakurutu; asi andizi kumubvunza kuti wakabva kuri, aazi kundironzera zina rake. Asi wakati kwendiri, ‘Ringira, unozoita ukosha, ubereke mukororo. Ndizvo zvino usazomwa vhini nokuti zvinoradzisa, nokuti kudya chiro chakasvipiswa, ngokuti mwana uwo unozoita muNaziriti kunaMwari kubvira mundani metsa kuguma kuzuva rokufa kwake.’ ” Zvino Manoa akapota kunaMambo Mwari, akati, “A Mambo wangu, tendera munhu waMwari wowakatuma kuti auyezve kwetiri, atidzidzise zvetinozoita kunomwana uwo unozobarwa.” NaMwari wakapurutana izwi raManoa; nengirosi yaMambo Mwari yakauyazve kunomukadzi akagara mumunda, asi Manoa mwamuna wake waiya asipo naye. Ndizvo mukadzi wakakasira, akarumba, akaronzera mwamuna wake echiti, “Munhu wakauya kwendiri zuva rimweni wauyazve kwendiri.” NaManoa wakamiruka, akateera mukadzi wake, akaguma kumunhu, akati kwaari, “Ndiwe here munhu uwo wakaereketa nomukadzi uyu?” Naye wakati, “Ndini.” NaManoa wakati, “Zvino apo mazwi ako echizoitika, tinozoita maitirenyi kwaari?” Ngirosi yaMambo Mwari yakati kunaManoa, “Kuneizvo zveshe zvendakaereketa kunomukadzi, ngaanase kuzvingwarira. Asazodya chiro nachimwe chemivhini, zve, asazomwa vhini nokuti zvinoradzisa, nokuti kudya chiro chakasvipiswa. Izvo zveshe zvendakamupanga ngaazvingwarire.” Manoa wakati kungirosi yaMambo Mwari, “Ndinokupota, chimbogara pano metsa tikunasirire kachimbudzana.” Ngirosi yaMambo Mwari yakati kunaManoa, “Kudai mwechizondigarisa pano, andizodyi kudya kwako; asi kudai wechida kuita mudiro wokupisha, zvino upire kunaMambo Mwari.” (Ngokuti Manoa waiya asikazi kuzia kuti ingirosi yaMambo Mwari.) Zvino Manoa wakati kungirosi yaMambo Mwari, “Ndiani zina rako, kuti apo izvi zvewaereketa zvoitika, tingazokuremeredza?” Nengirosi yaMambo Mwari yakati kwaari, “Unondibvunzirenyi zina rangu, wechiona kuti riri rinoshamisa?” Ndizvo Manoa wakatora chimbudzana pamwepo nomudiro wezviyo, naye wakapira kunaMambo Mwari padera pebuwe. Ngirosi yakaita ngokushamisa, naManoa nomukadzi wake vakaringira. Zvino apo murazvu wakwira kubva paarita kuenda mudenga, ngirosi yaMambo Mwari yakakwira nomurazvu paarita, naManoa nomukadzi wake vakazviringira; vakawa pashi pamavhu ngehope dzavo. Asi ngirosi yaMambo Mwari aizi kuchazoonekazve kunaManoa nomukadzi wake. Zvino Manoa wakazia kuti waiya ngirosi yaMambo Mwari. NaManoa wakati kunomukadzi wake, “Ngegwinyiso tinozofa, ngokuti tamuona Mwari.” Asi mukadzi wake wakati kwaari, “Kudai Mambo Mwari aida kutiuraya, asaizotenda kuashira mudiro wokupisha, nowezviyo kubva kunyara dzedu, nokuti kutionesa izvi zviro zveshe, nokuti zvino kuronza kwetiri zviro zvakadai ngeizvi.” Mukadzi wakabereka mukororo, wakadudza zina rake kuti ndiSamusoni. Nomwana wakakura, naMambo Mwari wakamufumisa. Mweya waMambo Mwari wakatanga kumusunda muMahanedhani pakati peZora naEshitaori. NaSamusoni wakadzaka kuenda Thimina, nepaThimina wakaona mukadzi wevaFiristia. Naye wakakwira, akaronzera baba ake namai, “Ndaona mukadzi muFiristia paThimina. Zvino nditorerei kuti aite mukadzi wangu.” Asi baba ake namai ake vakati kwaari, “Akuna here mukadzi pakati pevanasikana vehama dzako, nokuti pakati pevanhu vedu veshe, zvounoda kuti uende kootora mukadzi kubva kuvaFiristia, avo vasikazi kuchekwa?” NaSamusoni wakati kunababa ake, “Nditorerenyi uwo, ngokuti unondidakadza kakurutu.” Asi baba ake namai ake vasaizia kuti ichi chakabva kunaMambo Mwari, ngokuti waitsvaka kuitira ndaa nevaFiristia. Panguva iyo vaFiristia vaitonga padera pevaIsuraeri. Zvino Samusoni nababa ake, namai ake, vakadzaka Thimina; naapo vaguma paminda yemivhini yeThimina, paripo mhondoro itsva yakabuda kwaari yechidzvova. Mweya waMambo Mwari wakauya ngesimba padera pake, naye wakabaura mhondoro kudai ngounobaura kambudzana, asina chiro munyara dzake. Asi aazi kuronzera baba ake nokuti mai ake izvo zvaaiya aita. Zvino wakadzaka, akaereketa nomukadzi uwo; naye wakamudakadza Samusoni kakurutu. Ngesure kwomukuwo wakapetukazve koomuroora; wakapauka parutii koona muiri wemhondoro, wakaona bumbira renyuchi dzaiya nouchi mukati mwomuiri wemhondoro. Wakatora uchi munyara dzake, akahamba echidya. Naapo aguma kunababa ake namai, wakavapa umweni, navo vakaudya. Asi aazi kuvaronzera kuti waiya atora uchi kubva mumuiri wemhondoro. Ndizvo baba ake vakadzaka kuenda kumukadzi uwo; naSamusoni wakanasira apo dhiri, ngokuti ndiwo waiya muitiro wemajaha. Naapo vanhu vamuona, vakaunza shamwari makumi matatu kuti dzigare naye. Samusoni wakati kwavari, “Zvino ndinozoita chinai kwomuri. Kudai mwechizokona kuchidudzira yaamho kwendiri pakati pemazuva ari manomwe edhiri nokuchizia, zvino ndinozomupa zvokusimira nemihizo zviri makumi matatu nezvokupfeka zvezvipani makumi matatu. Asi kudai mwechizokorera kuchidudzira kwendiri, zvino munozondipa mihizo makumi matatu nezvokupfeka zvezvipani makumi matatu.” Navo vakati kwaari, “Chironza chinai chako, kuti tichizwe.” Naye wakati kwavari, “Kubva kunomudyi kwakabuda chokudya, nokubva kune unesimba kwakabuda chinotapira.” Navo avazi kukona kududzira chinai ngepakati pemazuva matatu. Ngezuva rechirongomuna, vakati kunomukadzi waSamusoni, “Nyengerera mwamuna wako, kuti iye atidudzire chinai ichi, kuti tisazokupisha iwewe nemhatso yababa ako ngomuriro. Mwakatikoka kuti mutitorere zvetinazvo here?” Ndizvo mukadzi waSamusoni wakachema pamberi pake, akati, “Iwewe unondizonda, aundidi akadi. Wakaronza chinai kunevanhu vokwangu, auzi kuchidudzira kwendiri.” Naye wakati kwaari, “Ringira, inini andizi kuchidudzira kunababa angu, nokuti kunamai angu, neni ndingachidudzira kwouri ngenyi?” Naye wakachema pamberi pake mazuva manomwe edhiri. Ngezuva rechinomwe wakamuronzera, ngokuti iye wakamunesa kakurutu. Zvino wakadudzira chinai kunevanhu vake. Vamuna vedhorobha vakati kwaari ngezuva rechinomwe risati rapota zuva, “Chiinyi chinotapira kupinda uchi? Chinyini chinesimba kupinda mhondoro?” Naye wakati kwavari, “Kudai musikazi kurima ngetsiru rangu, musaizokona kuzia chinai changu.” Zvino mweya waMambo Mwari wakauya padera pake, naye wakadzaka kuenda Ashikeroni. Wakauraya vamuna vomudhorobha makumi matatu, wakatora zvakachakatwa zvavo, wakapa zvokusimira zvezvipani makumi matatu kwavari vaiya vakadudza chinai. Muushungu hwake hwaibaka wakakwira kumhatso yababa ake. Asi mukadzi waSamusoni wakapuwa kushamwari yake, iyo yaiya aita muemeri. Ngesure kwomukuwo, ngomukuwo wokucheka koroni, Samusoni wakahambira mukadzi wake anechimbudzana; wakati, “Ndinoda kupotera kunomukadzi wangu mukamera rake.” Asi baba ake aazi kumutendera kuti apoteremwo. Baba ake akati, “Ngegwinyiso ndaipinimidza kuti unomunyenya yaamho; ndizvo ndakamupa kuneshamwari yako. Munun'una wake aazi kupinda kuringirika here kuna iye? Mutore, ndinokupota, pandau yake.” Samusoni wakati kwevari, “Panguva ino ndikaita zvakashata kuvaFiristia zvino ndinozoita usina ndaa.” Ndizvo Samusoni wakaenda, akabata hava mazana matatu, akatora masasi, akasungira miswe kunemiswe, akaisa masasi pakati pemiswe. Naapo aiya atungidza muriro kumasasi, akadzitinhira pakati pekoroni isati yachekwa yevaFiristia, akapisha iyo yaiya yaitwa mwanda, neiyozve yaiya isati yachekwa, pamwepo nemivhini nemaorivhi. Naapo vaFiristia vakati, “Ndiani waita ichi?” Navo vakapingura, “NdiSamusoni, mukwambo womuThimina, ngokuti iye wakatora mukadzi wake akamupa kuneshamwari yake.” NevaFiristia vakakwira, vakamupisha iye nababa ake ngomuriro. Samusoni wakati kwavari, “Kudai izvi zvirizvo zvomunoita, ndinopika ngegwinyiso andizorekeri metsa ndaunzidzira.” Naye wakavabaya nhunji nezvizva ngokuuraya kukuru; wakadzaka akagara mubako rebuwe reEtamu. Zvino vaFiristia vakakwira, vakaemesa matende avo muJudha, vakarwisa muRehi. Vamuna vokwaJudha vakati, “Munokwirirenyi kurwa nesu?” Navo vakapingura vechiti, “Kuti tisunge Samusoni, tiite kwaari kudai ngezvaakaita kwetiri.” Zvino vamuna makumi emazana matatu (3,000) evaJudha vakadzaka kubuwe rinozwi Etamu, vakati kunaSamusoni, “Auzii here iwewe kuti vaFiristia vanotonga padera pedu? Chiinyi chewaita kwetiri?” Naye wakati kwavari, “Kudai ngezvevakaita kwendiri, ndizvo ndakaitawo kwavari.” Navo vakati kwaari, “Tadzaka kuuya kukusunga, kuti tikupire munyara dzevaFiristia.” NaSamusoni wakati kwavari, “Pikai kwendiri kuti imwimwi amuzondiurayi mwemene.” Vakaereketa kwaari vechiti, “Haiwa, asi tinozokusunga kwega, nokupira munyara dzavo; ngegwinyiso atizokuurayi.” Ndizvo vakamusunga ngetambo mbiri itsva, vakamukwidza kubva pabuwe. Naapo auya Rehi, vaFiristia vakamuheudza; noMweya waMambo Mwari wakauya padera pake ngesimba, netambo dzaiya mumioko yake dzakaita kudai ngetambo dzakatsva ngomuriro, nezvisungo zvake zvakasunhuka kubva munyara dzake. Naye wakaona godo rorutsaya rwembongoro rutsva, akatambanudza nyara yake, akarutora, akauraya vamuna gumi remazana (1,000) ndirwo. NaSamusoni wakati, “Ngorutsaya rwembongoro, mirwi padera pemirwi, ngorutsaya rwembongoro, ndakauraya vamuna gumi remazana.” (1,000) Naapo apedza kuereketa, wakarasha rutsaya rwembongoro kubva munyara yake; naye wakadudza zina reiyo ndau kuti Ramathi-rehi. Naye waiya apera ngenyota kakurutu, wakadaidza kunaMambo Mwari echiti, “Iwewe wakapa uku kusunhurwa kukuru munyara dzomuranda wako. Zvino ndinozofa here ngenyota, ndiwire munyara dzaavo vasikazi kuchekwa?” Ndizvo Mwari wakabeura mhango paRehi, nemvura yakabuda mukati mwayo; naapo amwa, mweya wake wakapetuka, naye wakagwinyiswa. Ndizvo wakadudza zina reiyo ndau kuti Enihakore, iri muRehi metsa nanyamashi. Naye wakatonga vaIsuraeri ngemazuva evaFiristia makore makumi mairi. Naapo Samusoni wakaenda Gaza, apo paakaona chifebi, wakapotera kwechiri. VaGaza vakaronzerwa kuti, “Samusoni waguma uno.” Navo vakamukombera mukati, vakamuhwarira usiku hweshe ngepamusiwo wedhorobha. Vakanyarara usiku hweshe vechiti, “Mangwanani apo kwaedza tinozomuuraya.” Asi Samusoni wakaata metsa pakati pousiku. Zvino wakamiruka pakati pousiku, naye wakabata kubvita misiwo nesika mbiri dzemusiwo wedhorobha, wakabuda kuenda nadzo, zveshe nomupiningidzo, wakazvidzvara pamapfudzi ake, akakwira nazvo padera pomutunhu wakaringirana naHebroni. Ngesure kweizvo wakada mudzimai waigara mubani reSoreki, zina rake raiya Dherira. Madzimambo evaFiristia vakwira kuuya kwaari, vakati kwaari, “Nasa kumunyengerera, uone kuti simba rake guru rinobva pari, nokuti tingamuita manyisirenyi, kuti tikone kumusunga timushwinyise; nesu tinozopa kwouri munhu weshe zvigurwa zvesirivha mazana ari gumi narimwe.” (1,100) Ndizvo Dherira wakati kunaSamusoni, “Ndinokupota, nasa kundironzera kuti simba rako guru rinobva pari, nokuti ungaita masungirwenyi kuti ushwinyiswe.” Samusoni wakati kwaari, “Kudai mwechizondisunga ngesinga nomwe dzisati dzaoma, naapo ndinozoita usina simba, ndiite kudai ngevamuna vamweni.” Zvino madzimambo evaFiristia vakaunza kwaari singa nomwe dzisati dzaoma, naye wakamusunga ndidzo. Zvino kwaiyapo vamuna vaigara mukamera rake vakahwarira. Naye wakati kwaari, “VaFiristia vaapano kukubata, Samusoni!” Naye wakadambura singa idzo kudai ngemabvurubvuru anodambuka apo apishwa ngomuriro. Ndizvo simba rake arizi kuziikanwa. Zvino Dherira wakati kunaSamusoni, “Wona, wandichengedzera wechindironzera manyepo; zvino ndironzere, ndinokupota, kuti ungaita masungirwenyi.” Naye wakati kwaari, “Kudai vechizondisunga kakurutu ngetambo itsva, dzisati dzamboshandiswa, naapo ndinozoita usina simba, ndiite kudai ngevamuna vamweni.” Ndizvo Dherira wakatora tambo itsva, akamusunga ndidzo, akati kwaari, “VaFiristia vaapano kukubata, Samusoni!” Zvino kwaiyapo vamuna vaigara naye mukamera rake vakahwarira. Asi wakadzidambura kubva mumioko yake kudai ngezvimapote. Dherira wakati kunaSamusoni, “Metsa zvino iwewe wandichengedzera, wechindironzera manyepo; ndironzere kuti ungaitwa masungirwenyi.” Naye wakati kwaari, “Kudai wechizoruka nyunzu dzangu nomwe dzesoro rangu ngebande udzigwinyise ngembambo, neni ndinozorembedzeka kudai ngevamuna vamweni.” Ndizvo apo achakaata, Dherira wakatora nyunzu nomwe dzesoro rake, akadziruka kuita nyunza imwe, akaigwinyisa ngembambo, akati kwaari, “VaFiristia vaapano kukubata, Samusoni!” Asi wakamuka kubva muhope dzake, akabvita rumbomba rwomuti wedando nebande rakarukwa. Zvino wakati kwaari, “Ungaita maronzerenyi kuti, ‘Ndinokuda,’ apo mwoyo wako usiri kwendiri? Wandiitira jee aka katatu, auzi kundironzera apo panobva simba rako guru.” Kwakaitika apo aangirira kumunyengerera mazuva eshe ngemazwi ake, akamutambudza metsa mweya wake wodo kufa. Ndizvo wakamuronzera zveshe zvaiya mumwoyo mwake, wakati kwaari, “Achizi kutongoapo chisvo padera pesoro rangu; ngokuti ndakaita muNaziriti kunaMwari kubvira mundani yamai angu. Kudai ndechizoparwa, simba rangu rinozobva kwendiri, neni ndinozoita usina simba ndidai ngevamuna vamweni.” Naapo Dherira aona kuti waiya amuronzera zveshe zvaiya mumwoyo mwake, wakatuma, akadaidza madzimambo evaFiristia echiti, “Kwirai kamwe kano kega, ngokuti iye wandironzera zveshe zviri mumwoyo mwake.” Naapo madzimambo evaFiristia vakakwira kwaari, vakaunza mare munyara dzavo. Iye wakamuita kuti aate pazvizva zvake; wakadaidza munhu, akamuita kuti agunde nyunzu nomwe dzesoro rake. Wakatanga kumushwinyisa, nesimba rake rakabuda kubva kwaari. Wakati, “VaFiristia vaapano kukubata, Samusoni!” Naye wakavunzumuka kubva muhope dzake akati, “Ndinozobuda kudai ngemikuwo imweni ndidzizuwe.” Naye aazi kuzia kuti Mambo Mwari waiya amusiya. Asi vaFiristia vakamubata, vakamutumbura madziso ake. Vakamuunza kudzaka Gaza, navo vakamusunga ngemanguri ethusi; iye waigaisa ari mumhatso yetirongo. Asi bvudzi resoro rake rakagundwa rakatangazve kukura. Zvino madzimambo evaFiristia vakadziunganidza pamwepo kuti vapire mubairo mukuru kunaDhagoni chimwari chavo, nokuti vadakare; ngokuti vakati, “Chimwari chedu chakatipa munyara dzedu Samusoni gaa redu.” Naapo vanhu vamuona, vakakudza chimwari chavo; ngokuti vakati, “Chimwari chedu chakatipa munyara dzedu gaa redu, nomuurayi wenyika yedu, uwo wakauraya vazhinji vedu.” Apo mwoyo yavo yaiya yechidakara, vakati, “Daidzai Samusoni, kuti ambotitambira.” Ndizvo vakadaidza Samusoni kubva kumhatso yetirongo; naye wakavatambira. Vakamuisa pakati pesika; naSamusoni wakati kunomurumbwana waimutungamirira ngokubata nyara, “Nditendere, ndinokupota, kuti ndibate sika dzemhatso dzinoigwinyisa, kuti nditseame kwedziri.” Zvino mhatso yaiya yakazara ngevamuna nevakadzi; nemadzimambo eshe evaFiristia waiya varimwo; kwaiyapo ngepadera pedenga remhatso vaida kukwana makumi emazana matatu (3,000) evamuna nevakadzi, vairingira apo Samusoni aivatambira. Samusoni wakakumbira kunaMambo Mwari, akati, “A Mambo Mwari, Mwari, ndicherechedze, ndinokupota, kega kamwe kano, A Mwari, kuti ndiunzidzire kamwe kuvaFiristia ngendaa yemadziso angu mairi.” Samusoni wakabata sika mbiri dzepakati, idzo dzakagwinyisa mhatso, dzaaiya akatseama kwedziri, imwe ngenyara yake yokumudyo, neimweni ngenyara yake yokumuoshwe. Zvino Samusoni wakati, “Ngandife pamwepo nevaFiristia.” Wakadzikotamisa ngesimba rake reshe; nemhatso yakawa padera pemadzimambo nevanhu veshe vaiya mukati mwayo. Ndizvo vakafa vaakauraya ngomukuwo wokufa kwake vakapinda kuwanda kuneavo vaakauraya achapona. Zvino hama dzake, nevemhatso yeshe yababa ake vakadzaka kuuya koomutora, vakakwira naye, vakamuika pakati peZora neEshitaori mundau yokuika yababa ake Manoa. Naye wakatonga Isuraeri makore makumi mairi. Kwaiyapo munhu munyika yemitunhu yaEfuremu, zina rake ndiMikha. Wakati kunamai ake, “Zvigurwa zvesirivha mazana gumi narimwe (1,100) zvakatorwa kubva kwomuri, zvemwakatuka ndizvo, mukaereketa ndizvozve mukuzwa kwangu, ringirai, sirivha iyo ineni; ndakazvitora asi zvino ndinozvipetudza kwomuri.” Namai ake akati, “Mambo Mwari ngaakufumise, mukororo wangu!” Zvino wakahwirinza kunamai ake zvigurwe zvesirivha mazana gumi narimwe; (1,100); mai ake akati, “Ndinopira yaamho sirivha iyi kunaMambo Mwari kubva kunyara dzangu kuita yomukororo wangu, kunasira ndiyo muedzaniso wakaumbwa.” Ndizvo apo ahwirinza mare iyo kunamai ake, namai ake akatora mazana mairi (200) ezvigurwa zvesirivha iyo, akaipa kumunyungurusi wesimbi, uwo wakanasira ndiyo muedzaniso wakatsetswa, nowakaumbwa; nawo waiya mumhatso yaMikha. Nouwo munhu Mikha waiya nemhatso yezvimwari, naye wakanasira efodhi neterafimu, wakadzodza umwe wevana vake, nouwo wakaita mupristi wake. Mumazuva awo kwaiya kusina mambo muIsuraeri, asi munhu weshe waiita izvo zvaiya zvakasisira mukuona kwake. Zvino kwaiyapo jaha muBhetherehema raJudha wedzinza raJudha waiya muRevhi, waiya chigarandimo apo. Nouwo munhu wakabuda kubva kudhorobha reBhetherehema muJudha, kuti aende koogara apo paanokona kugara. Wakauya kumhatso yaMikha munyika yemitunhu yaEfuremu. Mika wakati kwaari, “Unobva kuri?” Wakati, “Ndiri muRevhi weBhetherehema raJudha, ndiri murwendo kutsvaka ndau kunyazwi ngepari pendingagara.” Zvino Mikha wakati kwaari, “Gara neni, uite kwendiri baba nomupristi; ndinozokupa zvigurwa zvesirivha gumi ngegore, chipani chezvokusimira, nezvokudya kwako.” NomuRevhi wakatenda kuti agare nomunhu uwo; nejaha rakaita kwaari kudai ngoumwe wevakororo vake. Ndizvo Mikha wakadzodza uwo muRevhi; nejaha rakaita mupristi wake, wakagara mumhatso yaMikha. Zvino Mikha wakati, “Zvino ndinozia kuti Mambo Mwari unozondiitira zvakanaka, kwechioneka kuti ndaano muRevhi unoita mupristi wangu.” Mumazuva awo kwaiya kusina mambo muIsuraeri. Mumazuva awo dzinza raDhani rakadzitsvakira ndau yokuti rigare; ngokuti metsa ngeiro zuva vaiya vasati vaane nyika yeshe yenhaka yavo pakati pemadzinza aIsuraeri. Ndizvo vana vaDhani vakatuma vanhu vashanu vedzinza ravo kubva kumigano yavo, vamuna vanoshinga, kubva Zora nokubva Eshitaori, kuti vanengere nyika nokuiona; vakati kwavari, “Endai munengere nyika.” Naapo vaguma kunyika yemitunhu yeEfuremu, kumhatso yaMikha, vakaata apo. Naapo vari pamhatso yaMikha, vakazia izwi rejaha raiya muRevhi; ndizvo vakapaukira kuenda apo, vakati kwaari, “Ndiani wakakuunza pano? Unoshandenyi pandau iyi? Chiinyi chounacho pano?” Naye wakati kwavari, “Mikha wakandiitira ichi neichi, wakanditora ngomuthuso neni ndiri mupristi wake.” Zvino vakati kwaari, “Tibvunzire kubva kunaMwari, tinokupota, kuti tizie kuti rwendo rwedu runozobudirira.” Mupristi wakati kwavari, “Endai ngokunyarara. Njira yenyu yomunohamba ndiyo iri pamberi paMambo Mwari.” Vamuna vashanu vakaenda, naapo vaguma Raishi, vakaona vanhu avo vaigaremwo, vaigara vakangwaririka, kudai ngevaSidhoni, vakanyarara, vakangwaririka, vasikatami chiro, munyika, vaine upfumi.Navo vaiya kuretu kubva kuvaSidhoni, vaiya vasina chokuita naAramu kunyazwi ngouri. Vaguma kuhama dzavo paZora naEshitaori vakati kwavari, “Ronza tizwe.” Navo vakati, “Mirukai tiende koorwa navo; ngokuti takaiona nyika, yakanaka kakurutu. Nemwi munonyarara here? Musaita nungo. Musanonoka kuenda koogara nhaka yenyika iyo. Naapo mwechizoenda munozoguma kunevanhu vakangwaririka, nokunyika yakakura, ngokuti Mwari unoipa munyara dzenyu, ndau isikatamiki chiro kunyazwi ngechiri chomunyika.” Vamuna mazana matanhatu (600) vedzinza raDhani vakabuda kubva Zora neEshitaori, vaiya vakapakatira mhumbi dzokurwa. Navo vakakwira, vakaemesa matende avo muKiriathijearimu, rokwaJudha. Ngendaa iyi vakadudza zina reiyo ndau kuti Mahanedhani metsa nanyamashi; ringirai iri kumabirirazuva kweKiriathijearimu. Vakahamba kubva apo kuenda kunyika yemitunhu yaEfuremu, vakaguma kumhatso yaMikha. Zvino vakapingura avo vamuna vashanu vaiya vakaenda koonengera nyika yeRaishi, vakati kuhama dzavo, “Amuzii here kuti riripo muidzi mhatso efodhi, neterafimu, nomuedzaniso wakatsetswa nowakaumbwa? Ndizvo zvino pinimidzai kuti chiinyi chomungazoita.” Ndizvo vakapaukira kuenda apo, vakaguma kumhatso yejaha raiya muRevhi, kumhatso yaMikha, vakamuchingamidza. Naapo vamuna mazana matanhatu (600) vaiya vakapakatira nhumbi dzokurwa, vaiya vedzinza raDhani vakaema ngepamusiwo. Vamuna vashanu vaiya vakaenda koonengera nyika vakapotera apo, vakatora muedzaniso wakatsetswa, neefodhi, neterafimu, nomuedzaniso wakaumbwa; nomupristi wakaenda pokupotera pamusiwo pamwepo nevamuna mazana matanhatu (600) vaiya vakapakatira nhumbi dzokurwa. Naapo vapotera mumhatso yaMikha, vakatora muedzaniso wakatsetswa, neefodhi, neterafimu, nomuedzaniso wakaumbwa, mupristi wakati kwavari, “Munoitenyi?” Vakati kwaari, “Nyarara! Isa nyara yako pamuromo wako, uuye nesu, uite kwetiri baba edu nomupristi wedu. Kwakapinda kunaka here kuti uite mupristi kuvemhatso yomunhu umwe, kuno kuti uite mupristi kudzinza nemhuri muIsuraeri?” Zvino mupristi wakatenda, naye wakatora efodhi, neterafimu, nomuedzaniso wakatsetswa, akahamba ari pakati pevanhu. Ndizvo vakatangazve rwendo rwavo, vakaisa vadoko nen'ombe nemitwaro pamberi pavo. Naapo vahamba kuenda kuretu kwemhatso yaMikha, vamuna avo vaiya mumhatso dziri pasinde nemhatso dzaMikha vakadaidzwa, vakarwisa vaDhani. Vakadaidzira kunevaDhani, vakakunukuka hope dzavo vakati kunaMikha, “Ndaa ngeyenyi kwouri, kuti uuye nembungano yakadai?” Naye wakati, “Imwimwi mwakatora zvimwari zvangu zvendakaita, nomupristi, nemwi munoenda. Ndasara nei inini? Chiinyi ichi chomunoronza kwendiri mwechiti, ‘Ndaa ngeyenyi kwouri?’ ” NevaDhani vakati kwaari, “Izwi rako risazozwika pakati pedu, kuti vanhu vanoushungu vasazokubaya, uurawe iwewe, nevemhatso yako.” Zvino vaDhani vakaenda njira yavo. Naapo Mikha aona kuti vaiya nesimba kakurutu kupinda iye, wakakunukuka, akapetuka kumhatso yake. VaDhani vatora zviro zvaaiya akanasira Mikha, nomupristi waaiya naye, vakaguma Raishi, kunevanhu avo vaigara mukunyarara nomukungwaririka; navo vakavabaya ngokupinza kweshoti, vakapisha dhorobha iro ngomuriro. Kwaiya kusina mununuri, ngokuti raiya kuretu kubva Sidhoni, navo vaiya vasina chokuita naAramu; naro raiya mubani rakaita maringwa neBhethi-rehobhi. Navo vakaakisa dhorobha, vakagara umwo. Vakadudza zina redhorobha iro kuti Dhani, kutumidzira zina rababa avo Dhani, uwo wakabarwa ndiIsuraeri; asi zina redhorobha iro ngekaretu raiya Raishi. Zvino vaDhani vakadziemesera uwo muedzaniso wakatsetswa. Jonathani mukororo waGershomu, mukororo waMosi, nevakororo vake vaiya vapristi kudzinza raDhani metsa kuguma kuzuva rokutorwa kwevanhu venyika kuita hloko. Ndizvo vakaemesa muedzaniso wakatsetswa waMikha, waakanasira, mukuwo weshe wemhatso yaMwari yaiya muShiro. Ngaawo mazuva, apo kwaiya kusina mambo muIsuraeri muRevhi umweni waigara ngomujingachinga munyika yemitunhu yaEfuremu, wakadzitorera bunha kubva kuBhetherehema muJudha. Asi bunha rake rakaita ufebi rikabva kwaari, rakamusiya rikakwira kumhatso yababa aro kuBhetherehema muJudha, naro rakagareyo mwedzi yeshe mirongomuna. Zvino mwamuna waro wakamiruka akariteera, kuti aerekete kweriri ngokuiyanisa nokuhwirira narozve.Wakahamba nomuranda wake, nezvimbongoro zvake zviiri. Naapo aguma pamhatso yababa aro, baba omusikana uwo vamuona vakauya ngokudakara kukurutu kooshongana naye. Nomuzvere wake, baba omusikana, vakamuaraidza; naye wakagara navo mazuva matatu. Ndizvo vakadya vakamwa nokuata apo. Ngezuva rechirongomuna, vakamuka mangwanani maishi, naiye wakanasirira kuenda; asi baba omusikana vakati kumukwambo wavo, “Gwinyisa mwoyo wako ngekachingwa aka, ngesure kwazvo munozoenda henyu.” Ndizvo vamuna vairi avo vakagara pashi, vakadya nokumwa vari pamwepo; baba omusikana akati kunomunhu uwo, “Tenda, ndinokupota kuti uate usiku hweshe, nomwoyo wako ngaudakare.” Naapo munhu wakamiruka kuti aende, muzvere wake wakamupota. Ndizvo wakaata apozve. Naye wakamiruka mangwanani maishi ngezuva rechishanu kuti aende. Baba omusikana vakati kwaari, “Gwinyisa mwoyo wako, ndinokupota,” ndizvo vakazungaira, metsa kutengama kwezuva; navo vakadya vari vairi. Naapo munhu nebunha rake pamwepo nomuranda wake amiruka kuti aende, vazvere vake, baba omusikana, vakati kwaari, “Ringira zvino, zuva rodo kubira. Ndinokupota, atazve pano, kuti mwoyo wako udakare, namangwani unozofumira kuenda njira yako, kuti ugume kanyi.” Asi munhu aazi kutenda kuata apo uhwo usiku; wakamiruka akaenda, akaguma apo pakaringirana neJebhusi, (iro ndiro Jerusarema.) Waiya anazvo zvimbongoro zviiri zvakasungirwa, nebunha rake naro raiya naye. Naapo vaiya pasinde peJebhusi zuva rakabira; nomuranda wakati kunamambo wake, “Uya, ndinokupota, ngatipaukire mudhorobha revaJebhusi, tiatemwo.” Asi mambo wake wakati kwaari, “Atizopaukiri kudhorobha revapara, avo vasiri vaIsuraeri; tinozodarika kuenda Gibhea.” Zvino wakati kunomuranda wake, “Uya, tikwedzere kuneimwe yeidzi ndau tiatepo usiku hweshe, muGibhea nokuti muRama.” Ndizvo vakadarika kuenda ngenjira yavo; nezuva rakavapotera vaapasinde peGibhea, iro riri raBhenjamini. Navo vakapauka apo kupotera mudhorobha kuti vaate muGibhea. Vakapotera, vakagara pashi mupato romudhorobha, asi apana naumwe munhu wakavapinza mumhatso mwake kuti vaatemwo. Zvino madeekoni kwasvipa kwakaguma apo munhu musharuka echibva mumunda wake. Uwo naye waiya womunyika yemitunhu yaEfuremu, naye waigara muGibhea; (asi vamuna vendau iyo vaiya vaBhenjamini.) Naapo musharuka amirudza madziso ake, wakaona muhambi akagara mupato romudhorobha; nomunhu musharuka wakati, “Unoenda kuri? Wambobva kuri?” Wakati kwaari, “Tinopinda kubva Bhetherehema raJudha kuenda kujingachinga renyika yemitunhu yaEfuremu, ndikwo kwendinobva. Ndakaenda Bhetherehema raJudha, neni ndinoenda kumhatso yaMambo Mwari; asi akuna munhu wandiashira mumhatso yake. Asi tinazvo zveshe mwenje wakaoma nokudya kwembongoro dzedu; tinechingwazve nevhini zvinotikwanisa nomurandakadzi wako, nejaha iro rinohamba nomuranda wako. Akuna chiro chetinotama.” Munhu musharuka wakati, “Kunyarara ngakugare kwouri. Inini ndichakupa zveshe zvounotama; kwega musaata mupato.” Ndizvo wakamuunza mumhatso yake, wakapa zvimbongoro zvokudya; vakashamba tsoka dzavo, vakadya nokumwa. Zvino vachadakadzisa mwoyo yavo, penya, vamuna vedhorobha, vanhu vakashata, vakatendenedza mhatso, vakakuhudza pamusiwo. Vakaereketa nomunhu wemhatso, uwo musharuka, vechiti, “Budisai uwo munhu wapotera mumhatso yako, kuti tiite kwaari kudai ngomukadzi.” Nomunhu uwo wemhatso wakabuda kwavari, akati kwavari, “Haiwa hama dzangu, haiwa, ndinomupota, musaita kushata kwakadaro. Mwechiona kuti uyu munhu wapotera mumhatso yangu, musaita uhwo upenzi. Wonai, uri pano mwanasikana wangu waamhandara, nebunha rake; ava ndinovabudisa kwomuri zvino, muvapfaise, muite zvomunoda kwavari; asi kunouyu munhu musaita chiro chakadaro kushata kwaari.” Asi vanhu avazi kutenda kumupurutana. Ndizvo munhu wakatora bunha rake, wakaribudisa kwevari; navo vakashanja naro, vakamushaishira metsa usiku hweshe kukaedza mangwanani. Naapo zuva rotanga kuedza vakamurekera kuti aende. Naapo mukadzi uwo wakauya mukuedza kwokubanze, wakawa pamusiwo wemhatso yomunhuwo mwaiya namambo wake, metsa kwakaedza. Namambo wake wakamiruka mangwanani, wakabeura musiwo wemhatso, akabuda kuti aende njira yake. Penya, mukadziwo bunha rake raiya rakawa pashi pamusiwo wemhatso, nenyara dzake dzaiya padimba. Wakati kwaari, “Miruka ngatiende.” Asi apana mupinguro. Naapo uwo munhu wakamutora, akamuisa pambongoro, nomunhuwo wakamiruka akaenda kundau yake. Naapo apotera aguma mumhatso yake, wakatora banga naye wakabata bunha rake, wakaritematema, pamwepo nemagodo aro, kuita zvigurwa gumi nazviiri, wakazvitumira kunyika dzeshe dzaIsuraeri. Zvino wakapanga vamuna avo vaakatuma echiti, “Munozoti kuvaIsuraeri, ‘Akuzi kumboitika chiro chakadai nokuti kumbooneka metsa kuzuva revakakwira vaIsuraeri kubva kunyika yeEgipite metsa nanyamashi. Pinimidzai ndicho, mupangane, muerekete chomunopinimidza.’ ” Naapo vaIsuraeri veshe vakabuda, nembungano yakaunganidzwa pamwepo kuita munhu umwe, kubvira Dhani metsa kuguma Bheerishebha, pamwepo nevenyika yeGireadhi, pamberi paMambo Mwari muMizipha. Madzimambo evanhu veshe, vemadzinza eshe aIsuraeri vakadziunza mumushongano wevanhu vaMwari, vanhu mazana marongomuna emakumi emazana (400,000) vaihamba ngetsoka, vakapakatira shoti. Zvino vaBhenjamini vakazwa kuti vaIsuraeri vaiya vakwira Mizipha. Naapo vaIsuraeri vakati, “Tironzerenyi kuti uku kushata kwakaita maitirenyi?” NomuRevhi, mwamuna womukadzi wakaurawa, wakapingura echiti, “Ndakaguma Gibhea iro riri revaBhenjamini, inini nebunha rangu, kuti tiatemwo usiku. Vamuna veGibhea vakandimukira kundirwisa, vakatendenedza mhatso usiku, vanechidisiso chokundiuraya. Navo vakamanikidza bunha rangu, metsa rakafa. Neni ndakatora bunha rangu ndikaritematema kuita zvigurwa, ndikaritumira munyika dzeshe dzenhaka yaIsuraeri; ngokuti vakaita kushaisha nezvoupenzi muIsuraeri. Ndizvo zvino imwimwi muri vaIsuraeri, ronzai pano kupanga kwenyu nezano renyu.” Nevanhu veshe vakamiruka ngomwoyo umwe vechiti, “Akuna naumwe wedu unozoenda kutende rake, akunazve naumwe wedu unozokunukurira kuenda kumhatso yake. Asi zvino ichi ndicho chiro chetinozoita Gibhea: tinozokwira ngokuita mabhigidha kuti tirwe naro. Tinozotsanangura vamuna gumi kubva mukati mwezana (100) rimwe ngarimwe kubva kumadzinza eshe evaIsuraeri, nezana (100) revamuna kubva mukati mwevamuna varigumi emazana (1,000) negumi emazana (1,000) evamuna kubva kugumi emakumi emazana (1,000), kuti vaunzire zvokudya zvevarwi, vanozounzidzira Gibhea raBhenjamini kuti vaite kudai ngoupenzi hweshe hwevakaita muIsuraeri.” Ndizvo vamuna veshe vaIsuraeri vakaungana kumukira iro dhorobha, vakasungana pamwepo ngomwoyo umwe. Madzinza evaIsuraeri akatuma vamuna kuhamba mudzinza reshe raBhenjamini vechiti, “Kushata kwakaitawani uku kwakaitwa pakati penyu? Ndizvo zvino, budisai avo vamuna, vamuna vakashata vomuGibhea, kuti tivauraye, tiduse kushata kubva pakati pevaIsuraeri.” Asi vaBhenjamini avazi kupurutana izwi rehama dzavo vaIsuraeri. VaBhenjamini vakadziunganidza pamwepo kubva mumadhorobha, kuenda Gibhea, kuti vabude koorwa nevaIsuraeri. Ngezuvaro vaBhenjamini vakaerengwa ngouwo mukuwo vaiya makumi mairi namatanhatu emakumi emazana (26,000) vamuna vakapakatira shoti, kubva kumadhorobha ngepabanze pevagari veGibhea, avo vakaerengwa navo vaiya vamuna vari mazana manomwe vakatsanangurwa. Pakati peava vamuna vaiyapo vamuna vari manyaboshwe vakatsanangurwa mazana manomwe (700), umwe ngaumwe wavo waikona kuposhera ngechimvii mapuwe kufura katambo kakatsonga kebvudzi, vasikaposhi. Nevamuna vaIsuraeri ngepabanze paBhenjamini vakaerengwa vaiya mazana marongomuna emakumi emazana (400,000) veavo vamuna vaipakatira shoti, veshe ava vaiya varwi vehondo. VaIsuraeri vakamiruka, vakakwira kuBhetheri, apo pevakabunza kupangwa ndiMwari, vakati, “Ndiani pakati pedu unozotanga kukwira kurwisana nevaBhenjamini?” NaMambo Mwari wakati, “Judha ndiye unozotanga kukwira.” VaIsuraeri vakamiruka mangwanani, vakaemesa matende avo pasinde peGibhea. VaIsuraeri vakabuda koorwisana naBhenjamini; nevaIsuraeri vakadzirongedza kuzorwa navo muGibhea. VaBhenjamini vakabuda kubva kuGibhea, vakauraira pashi ngeiro zuva vamuna vaIsuraeri makumi mairi namairi emakumi emazana (22,000). VaIsuraeri vakadzishingisa, vakadzirongazve kurwa pandau yavaiya vakadzirongedza ngezuva rokutanga. VaIsuraeri vakakwira, vakachema pamberi paMambo Mwari metsa madeekoni, vakabvunza kupangwa ndiMambo Mwari vechiti, “Tinozokwirazve here koorwa nehama dzedu vaBhenjamini?” Mambo Mwari wakati, “Kwirai koorwa navo.” Ndizvo vaIsuraeri vakakwedzerazve pasinde pevana vaBhenjamini ngezuva rechipiri. Bhenjamini wakabuda kurwa navo kubva muGibhea ngezuva rechipiri, navo vakauraya vamuna veIsuraeri gumi nemasere emakumi emazana (18,000), veshe ava vaipakatira shoti. Zvino vaIsuraeri veshe, varwi veshe vakahwirira kuBhetheri, vakachema, vakagara apo pamberi paMambo Mwari; vakaera kudya ngeiro zuva metsa madeekoni. Zvino vakapira midiro yokupisha nemidiro yokunyarara pamberi paMambo Mwari. NevaIsuraeri vakabvunza kunaMambo Mwari, (ngokuti bhokisi rechitenderano chaMwari raiyapo ngaawo mazuva. NaFinehasi mukororo waEreaza mukororo waAroni, ndiye waiema pamberi paro ngaawo mazuva,) vechiti, “Tinozokwirazve here kuenda koorwa nehama dzedu vaBhenjamini, nokuti tirekere here?” Mambo Mwari wakati, “Kwirai, ngokuti mangwani ndinozovapira munyara dzenyu.” Ndizvo vaIsuraeri vakaemesa vamuna vakahwarira kutendenedza Gibhea. Zvino vaIsuraeri vakakwira koorwa nevaBhenjamini ngezuva rechitatu, vakadzirongedza koorwa neGibhea, kudai ngemikuwo imweni. Naapo vaBhenjamini vakabuda koorwa navanhu ava, navo vakakwezviwa kubva mudhorobha. Vakatanga kubaya vanhu nokuuraya kudai ngemikuwo imweni, vari mumapato, rimwe rawo raikwira kuenda kuBhetheri nerimweni raienda Gibhea nomushango, vakauraya vamuna vaida kuguma makumi matatu vevaIsuraeri. VaBhenjamini vakati, “Vanonyiswa pamberi pedu kudai ngemikuwo yokutanga.” Asi vaIsuraeri vakati, “Ngatitize tivaozve kubva kudhorobha kuenda kumapato.” Vamuna veshe vaIsuraeri vakamiruka kubva kundau dzavo, vakadzirongedza kurwisa kuBhaaritamari, nevahwariri vaIsuraeri vakamiruka kubva kundau dzavo, kubva kumabirirazuva eGibhea. Vakauya kurwisana neGibhea vamuna gumi remakumi emazana (10,000) vakatsanangurwa kubva kuvaIsuraeri veshe, nokurwisana kwakatyisa. Asi vaBhenjamini avazi kuzia kuti dambudziko raiya pasinde kuvagumira. Mambo Mwari wakanyisa Bhenjamini pamberi pevaIsuraeri; vaIsuraeri vakauraya ngeiro zuva vaBhenjamini vamuna makumi mairi namashanu emakumi emazana nezana rimwe, (25,100) veshe ava vaipakatira shoti. Zvino vaBhenjamini vakaona kuti vainyiswa. VaIsuraeri vakaita pfundamutete kunevaBhenjamini ngokuti vaigonda vahwariri vevaiya vaemesa kurwisa muGibhea. Varwi vaiya vakahwarira vakakasira kurumba kuenda Gibhea. Zvino vakabaya veshe vaiya mudhorobha ngokupinza kweshoti. Zvino kwakatenderwana chioniso pakati pevanhu vaIsuraeri nevahwariri chokuti vanozopisha muriro mukuru unechiushi kubaka kubva kudhorobha, vamuna veshe vaIsuraeri vaiya vapetuka kubva koorwa. Asi vaBhenjamini vakatanga kubaya nokuuraya vanhu vaIsuraeri vaida kuguma makumi matatu; ndizvo vakati, “Ngegwinyiso vanozonyiswa pamberi pedu, kudai ngehondo yokutanga.” Asi apo murazvu womuriro watanga kukwira kubva mudhorobha unemvumi yechiushi, vaBhenjamini vakaringira sure kwavo, nakwo kwaiya nechiushi chedhorobha reshe chaikwira mudenga. Zvino vamuna vaIsuraeri vakakunukukira sure, vamuna vaBhenjamini vakapera simba, ngokuti vakaona kuti kushata kunovagumira. Ndizvo vakafuratira mishana yavo kunevaIsuraeri kutiza ngenjira inoenda mushango; asi kurwa kwakavagumira, naavo vakabuda kubva pakati pemadhorobha vakavauraya vari pakati pavo. Ngokudaro vakatendenedza vaBhenjamini pakati, vakavarumbirira, vakavatsikatsika pashi kubvira Noha rakaringirana neGibhea ngokumabvazuva. Vakaurawa vaBhenjamini vamuna gumi namasere emakumi emazana (18,000), veshe ava vaiya ngwazi. Naapo vakunukuka kutiza kuenda mushango kubuwe reRimoni, vakavanongeredza mumapato vamuna makumi emazana mashanu (5,000), vakavarumbirira kakurutu metsa vaguma Gidhomu, vakauraya vamuna vavo makumi emazana mairi (2,000). Ndizvo avo vakaurawa vaBhenjamini ngeiro zuva vaiya makumi mairi namashanu emakumi emazana (25,000) evamuna, vaipakatira shoti; veshe ava vaiya ngwazi. Asi vamuna mazana matanhatu (600) vakakunukuka, vakatizira mushango kuenda kubuwe reRimoni, vakagara pabuwe reRimoni mwedzi mirongomuna. Nevamuna vaIsuraeri vakahwirira kuvaBhenjamini, vakavauraya ngokupinza kweshoti, vamuna vemadhorobha eshe nen'ombe dzeshe, neizvo zveshe zvevakaona umwozve. Vakapisha ngomuriro madhorobha eshe evakaguma kwaari. Zvino vamuna vaIsuraeri vaiya vakapika vari paMizipha vechiti, “Kusazoapo naumwe wedu unozoroodza mwanasikana wake kunavaBhenjamini.” Navanhu vakauya kuBhetheri, vakagara apo metsa madeekoni vari pamberi paMwari, navo vakaboorera, vakachema kakurutu. Vakati, “A Mambo Mwari, Mwari waIsuraeri, izvi zvaita ngenyi muIsuraeri, kuti kutamike nyamashi dzinza rimwe muIsuraeri?” Ngezuva rechimangwani vanhu vakamiruka mangwanani maishi, vakaaka apo arita, navo vakapira midiro yokupisha padera paro nemidiro yokunyarara. Zvino vaIsuraeri vakati, “Ndiani kwaari eshe madzinza aIsuraeri usikazi kuuya mumushongano waMambo Mwari?” Ngokuti vaiya vakapika kakurutu ngendaa youwo usikazi kuuya kunaMambo Mwari muMizipha, kwechizwi, “Ngegwinyiso unozourawa.” Asi vaIsuraeri vakasvipa mwoyo ngendaa yehama yavo Bhenjamini, vakati, “Riripo dzinza rimwe ragurwa nyamashi kubva muIsuraeri. Tinozoita maitirenyi kuti avo vakasara vaane vakadzi, techiona kuti takapika kunaMambo Mwari techiti, ‘Akuna naumwe wedu unozoroodza mwanasikana wake kwavari.’ ” Zvino vakati, “Uripo here umwe unobva kudzinza raIsuraeri usikazi kukwira kunaMambo Mwari paMizipha?” Ringirai, akuzi kuuya naumwe kubva Jabheshigireadhi kukamba kumushongano. Ngokuti vanhu vaerengwa, ringira, kwaiya kusina naumwe apo wevagari veJabheshigireadhi. Ndizvo mbungano yakatuma kuenda iyo vamuna gumi namairi emakumi emazana (12,000) veavo vaiya ngwazi, navo vakavapanga vechiti, “Endai mubaye vagari veJabheshigireadhi ngokupinza kweshoti, nevakadzi nevana. Ichi ndicho chiro chomunozoita; munozouraya vamuna veshe, nevakadzi veshe vakaatana nevamuna.” Navo vakaona pakati pevagari veJabheshigireadhi mhandara mazana marongomuna (400), dzisikazi kuatana nomwamuna, navo vakadziunza kukamba kuShiro, munyika yeKhenani. Mbungano yeshe yakatuma vamweni kuti vaende kooereketa nevaBhenjamini vaiya pabuwe reRimoni, nokudaidzira kunyarara kwavari. VaBhenjamini vakauyazve ngouwo mukuwo; vakavapa vakadzi vevaiya vaponesa kuvakadzi veJabheshigireadhi; asi avazi kuvakwana. Vanhu vakasvipa mwoyo ngendaa yaBhenjamini, ngokuti Mambo Mwari waiya akaisa mukana pakati pemadzinza aIsuraeri. Ndizvo vakuru vembungano vakati, “Tinozoitenyi kuti vaone vakadzi avo vakasara, techiona kuti vakadzi vakaurawa kubva kuvaBhenjamini?” Navo vakati, “Kunotamika kuti kuapo nhaka kwavari vakapokonyoka vaBhenjamini, kuti dzinza risazorova kubva muIsuraeri. Asi zvakanyadaro atingaroodzi vanasikana vedu kuti vaite vakadzi vavo.” Ngokuti vaIsuraeri vakapika vechiti, “Ngaatukwe uwo unopa mukadzi kunomunhu weBhenjamini.” Ndizvo vakati, “Ringira, uripo mushongano wokudya muShiro gore ngegore mundau iri ngedera kweBhetheri, ngokumabvazuva kwepato rinokwira kubva Bhetheri kuenda Shekhemu, ngokubani kweRebhona.” Navo vakapanga vaBhenjamini vechiti, “Endai muhwarire mumivhini. Murinde, muringire, naapo vanasikana veShiro vouya koozvina mukuzvina, naapo munozobuda kubva mumivhini, munhu weshe adzibatire mukadzi wake kuvanasikana veShiro, muende kunyika yaBhenjamini. Zvino kudai madzibaba avo nokuti vakoma vavo vechizouya kwetiri kuita ndaa, tinozoti kwavari, ‘Vaitire nyasha ngepamusoro pedu; ngokuti atizi kuponesera munhu weshe mukadzi wake mukurwa. Asi imwimwi amuzi kupa kwavari ngouwo mukuwo nokuti mungaane ndaa zvino.’ ” VaBhenjamini vakaita kudaro, navo vakadzitorera vakadzi kudai ngouwandu hwavo, kweavo vaizvina, vevakabata. Zvino vakaenda, vakahwirira kunhaka yavo, vakaakisa madhorobha, vakagara mukati mwawo. Ndizvo vaIsuraeri vakabva apo ngouwo mukuwo, munhu weshe kudzinza rake nokumhuri yake, vakabva apo munhu weshe kuenda kunhaka yake. Ngaawo mazuva kwaiya kusina mambo muIsuraeri; munhu weshe waiita izvo zvaioneka kuti zvakanaka mukuona kwake. Ngemazuva okutonga kwevatongi, kwakaita nzara munyika, nomunhu umweni weBhetherehema muJudha wakaenda akagaramwo munyika yeMoabhi, iye nomukadzi wake, nevakororo vake vairi. Zina romunhu uwo raiya Erimerekhi, nezina romukadzi wake raiya Naomi, nemazina evakororo vake vairi aiya Mahironi naKhirioni; vaiya vaEfratha veBhetherehema muJudha. Navo vakauya munyika yeMoabhi vakagaramwo. Asi Erimerekhi mwamuna waNaomi wakafa; naye wakasara nevakororo vake vairi. Ava vakadzitorera vakadzi kubva kuvasikana vekuMoabhi; zina roumwe raiya Orpha, nezina roumweni raiya Ruthe. Naapo vakagaramwo makore anoda kuita gumi, Mahironi naKhirioni vakafawo veshe; ndizvo mudzimai uwo wakafirwa ngevakororo vake vairi nemwamuna wake. Zvino iye wakamiruka kupetuka nevazakazi vake vairi, kubva kunyika yeMoabhi, ngokuti waiya azwa ari munyika yeMoabhi kuti Mambo Mwari wakahambira vanhu vake nokuvapa zvokudya. Ndizvo wakabuda kubva kundau yaaigara, iye nevazakazi vake vairi; vakaenda ngenjira yavo yokuhwirira kunyika yaJudha. Asi Naomi wakati kuvazakazi vake vairi, “Endai muhwirire umwe ngaumwe wenyu kumhatso yamai enyu. Mambo Mwari ngaamuitire zvakanaka, kudai ngezvemwakaita imwimwi kunevakafa nokwendiri. Mambo Mwari ngaape kwomuri kuzorora umwe ngaumwe wenyu kumhatso dzevamuna venyu.” Zvino wakavachingamidza ngomuromo, navo vakaboorera. Vakati kwaari, “Haiwa, tinozohwirira newe kuhama dzako.” Asi Naomi wakati kwevari, “Hwirirai sure, vanasikana vangu. Ngenyi muchide kuenda neni? Vachipozve here vakororo mundani mwangu kuti vazoita vamuna venyu? Hwirirai henyu, vanasikana vangu; endai henyu, ngokuti ndaguma andicharoorwi. Kudai ndaironza kuti, kunyazwi ndinegonda rokuti kudai ndingaa nomwamuna usiku huno nokubereka vakororo, mungavagarira here metsa vakura? Mungaramba kuroorwa ngevamuna vamweni here? Haiwa, vanasikana vangu; ngokuti kunopinda kundisvipisa mwoyo kakurutu kupinda imwimwi, ngokuti nyara yaMambo Mwari yakandimukira.” Zvino vakaboorerazve. Orpha wakachingamidza mazvarira ake ngomuromo; asi Ruthe wakanamatira kwevari. Ndizvo wakati, “Wona, hurwani ako wahwirira kuhama dzake nokuzvimwari zvake; hwirira newe kuteera hurwani ako.” Asi Ruthe wakati, “Usandiangiridza kuti ndikusiye, nokuti kuhwirira kubva mukukuteera! Apo pounoenda, neni ndinozoendawo; naapo pounogara ndipo pendinozogarawo; vanhu vako vanozoita vanhu vangu, naMwari wako unozoita Mwari wangu. Apo pounofira, ngependinozofirawo, naapo ndipo pendinozotsirwa. Mambo Mwari ngaaite kudaro kwendiri nokupindazve, kudai chiripo chiro chimweni chinozotiparadzanisa iwewe neinini, kwega kufa!” Naapo Naomi aona kuti wagwinyisira kuenda naye, wakarekera kuereketa kwaari. Ndizvo vairi ava vakaenda metsa vaguma Bhetherehema. Naapo vaiya vaguma Bhetherehema, dhorobha reshe rakaita nyongano ndivo nevakadzi, vakati, “Uyu ndiye Naomi here?” Naye wakati kwevari, “Musachandidaidza kuti Naomi, ndidaidze kuti Mara, ngokuti Uwo Unesimbareshe wakandiitira zvinovava. Ndakabuda kuenda ndakazara, asi Mambo Mwari wakandipetudza kanyi ndisichina chiro; muchandidaidza ngenyi kuti Naomi, mwechiona kuti Mambo Mwari akandiitira ushungu, noUwo Unesimbareshe wakandiunzira madambudziko?” Ndizvo Naomi wakapetuka pamwepo naRuthe muMoabhi, muzakazi wake, uwo wakapetuka naye kubva kunyika yeMoabhi. Navo vakaguma muBhetherehema ngenguva yokutanga kwokukukurwa kwebhare. Zvino Naomi waiya nehama yomwamuna wake, munhu waiya nesimba aneupfumi, wemhuri yaErimerekhi; nezina rake raiya Bhoazi. NaRuthe muMoabhi wakati kunaNaomi, “Nditendere zvino ndiende mumunda kuti ndinongeredze mitsonzoti yekoroni, ngesure kwouwo wendinozoona nyasha mukuona kwake.” Naye wakati kwaari, “Enda, mwanasikana wangu.” Ndizvo wakaenda, akaguma, akanongeredza mumunda sure kwevacheki. Echinongeredza kudaro wakaguma kurupande rwomunda waBhoazi, uwo waiya wemhuri yaErimerekhi. Zvino apapo Bhoazi wakaguma echibva Bhetherehema, wakati kuvacheki, “Mambo Mwari ngaa nemwi.” Navo vakamupingura kuti, “Mambo Mwari ngaakufumise.” Zvino Bhoazi wakati kumuranda wake waiya mukuru wevacheki, “Ngowani uyu mudzimai uchiri mudoko?” Muranda uwo waiya mukuru wevacheki wakapingura, akati, “Mudzimai weMoabhi uwo wakauya naNaomi kubva kunyika yaMoabhi. Wakati, ‘Ndinokupota, nditendere kuti ndinongeredze ngesure kwevacheki pakati pemwanda.’ Ndizvo wauya, naye waangirira kubvira mangwanani ano metsa kuguma zvino, kwega wagara kanguva kadodoko mudumba.” Zvino Bhoazi wakati kunaRuthe, “Zvino izwa, mwanasikana wangu. Usaenda koonongeredza kumunda umweni, zve, usabva pano, asi gara pano pasinde nevarandakadzi vangu. Madziso ako ngaaringire kumunda wevanokukura, uteere ngesure kwavo. Ndapanga majaha, kuti vasazokutambudza. Naapo wechizwa nyota, enda kuzvidziyo, umwe iyo yakacherwa ngemajaha.” Zvino wakawa ngehope yake, akakotamisa hope yake pashi, wakati kwaari, “Ngenyi ndaona nyasha mukuona kwako, kuti iwewe undiringire wechiona kuti ndiri mupara?” Asi Bhoazi wakamupingura, akati kwaari, “Kwakashumirwa kweshe kwendiri izvo zvewakaitira mazvarira ako iwewe kubvira pakufa kwemwamuna wako, nokusiya kwowakaita baba ako namai ako, nenyika yokubarwa kwako, wechiuya kuvanhu vousikazi kumbozia ngekaretu. Mambo Mwari ngaaunzidzire mushando wako, nomusharo wakazara ngaupuwe kwouri ndiMambo Mwari, Mwari waIsuraeri, uwo pashi pemaphaphiro ake iwewe wakauya koohwara kwaari.” Zvino wakati, “Ngandiangire kuona nyasha mukuona kwako, mambo wangu, ngokuti iwewe wandiembedzera, waereketa ngokuiyanisa kunemurandakadzi wako, kunyazwi ndisikazi kudai ngaumwe wevarandakadzi vako.” Ngomukuwo wokudya Bhoazi wakati kwaari, “Uya pano, udye chingwa, useye chingwa chako muvhini rinozhazha.” Ndizvo wakagara pasinde pevacheki, akamupa ngokuwanza koroni yakakochwa, wakadya, metsa aguta, nokusiya zvimweni. Naapo amiruka kunongeredza, Bhoazi wakapanga majaha ake echiti, “Ngaanongeredze nepakati pemwanda yakaemeswa, musamurambidza. Muvhomore imweni yemwanda maune kuitira iye, muisiye, kuti ainongeredze, musamukaraidza.” Ndizvo wakanongeredza mumunda uwo metsa madeekoni. Zvino wakapura izvo zvaaiya anongeredza, nazvo zvakada kuita makhirogramu gumi ebhare. Wakazvitora akaenda nazvo mudhorobha; namazvarira vake vakaona izvo zvaaiya anongeredza. Zvino wakabudisa akapa kwaari izvo zvaaiya akangwarira zvakasara adya akaguta. Mazvarira vake vakati kwaari, “Wainongeredza pari nyamashi? Newe waishanda pari? Ngaafumiswe uwo wakuringira.” Ndizvo wakaronzera mazvarira ake ngouwo waaishanda naye echiti, “Zina romwamuna wendaishanda naye nyamashi ndiBhoazi.” Zvino Naomi wakati kunomuzakazi wake, “Ngaafumiswe ndiMambo Mwari uwo usikazi kurekera nyasha dzake kunevanopona nevakafa.” Naomi wakatizve kwaari, “Uwo munhu ihama yedu, woukama hwedu hwepasinde.” Zvino Ruthe muMoabhi wakati, “Watizve kwendiri, ‘Newe unozogara uri pasinde pevaranda vangu, metsa vapedze kukukura kwangu kweshe.’ ” NaNaomi wakati kunaRuthe muzakazi wake, “Zvakanaka mwanasikana wangu, kuti iwewe ubude nevarandakadzi vake, kuti usazotambudzwa newe kumunda umweni.” Ndizvo wakabatirira kunevarandakadzi vaBhoazi kuti anongeredze metsa kumagumo kwokukukura bhare nekoroni; naye wakagara namazvarira ake. Naomi mazvarira ake vakati kwaari, “Mwanasikana wangu, andingakutsvakiri kuzorora here, kuti zvinake kwouri? Zvino Bhoazi uripano hama yedu, uwo unevarandakadzi vake vewakashanda navo? Ringira, unorudza bhari usiku uhwu pambuwa yokupurira. Ndizvo dzishambe ngokwako, udzidzodze, upfeke zvokusimira zvako zvakapindisisa kunaka, udzake kumbuwa yokupurira; asi usaita kuti uziikane kunouwo munhu metsa apedze kudya nokumwa. Naapo oata pashi, unozonasa kuona pandau paanoata, unozopotera apo, ufukure tsoka dzake, uate pashi; naye unozokuronzera chokuita.” Wakati kwaari, “Zveshe zvomunoronza kwendiri ndinozozviita.” Ndizvo wakadzaka kumbuwa, wakaita zveshe zvaakaronzerwa ndimazvarira ake. Naapo Bhoazi aiya adya nokumwa nomweya wake waidakara, wakaenda kooata kumagumo kwomurwi wekoroni. Zvino Ruthe wakauya ngokunyarara, akafukura tsoka dzake, akaata pashi. Pakati pousiku, munhu uwo wakakaruka, wakadzitsanduridza; akaona mudzimai akaata kutsoka dzake. Naye wakati kwaari, “Ndiwe ani?” Naye wakapingura, “Ndiri Ruthe murandakadzi wako; fukidza murandakadzi wako ngejira rako, ngokuti iwewe ndiwe hama yepasinde muripiri.” Naye wakati, “Mambo Mwari ngaakufumise, mwanasikana wangu; ngokuti wapangidzira nyasha kumagumisiro kupinda pakutanga, ngokuti auzi kuteera majaha, vari varombo nokuti vapfumi. Zvino mwanasikana wangu, usatya; ndinozoita kwouri zveshe zvounoda; ngokuti vanhu veshe vedhorobha rangu vanozia kuti uri mudzimai wakarurama. Asi zvino kunyazwi igwinyiso kuti inini ndiri hama youkama hwepasinde kwouri, asi zvakanyadaro iripo hama yepasinde yaamho kupinda inini. Gara usiku uhwu, mangwani mangwanani, kudai iye echizoita kudai ngechinoitwa ngouri hama, zvakanaka; ngaaite izvo zvinoitwa ngouri hama. Asi kudai asikazoiti kudai ngouri hama kwouri, zvino inini ndinozoita kudai ngouri hama kwouri, kudai ngezvaanopona Mambo Mwari. Ata pashi metsa mangwani.” Ndizvo wakaata ngokutsoka dzake metsa rechimangwani; wakamiruka kuchakasvipa vanhu vasati vakona kuziana umwe noumweni. Ngokuti wakati, “Kusazoziikanwa kuti mudzimai wakapotera kumbuwa yokupurira.” Zvino, wakati, “Unza jira rowakafuka, uribate.” Ndizvo wakaribata, wakapima zvipimo zvitanhatu zvebhare, wakazvitwikisa padera pake; naye wakaenda mudhorobha. Wakaguma kunamazvarira ake, avo vakati kwaari, “Zviro zvakaita mahambirei, mwanasikana wangu?” Zvino wakavaronzera zveshe zvaaiya aita uwo munhu kwaari echiti, “Izvi zvipimo zvitanhatu zvebhare ndiye wandipa; ngokuti wakati kwendiri, ‘Usahwirira kunamazvarira ako usina chiro.’ ” Wakapingura akati, “Garisika, mwanasikana wangu, metsa uzie magumo endaa, ngokuti uwo munhu aazogarisiki, metsa apedze ndaa iyi nyamashi.” Naapo Bhoazi wakakwira kumusiwo, akagara pashi apo, wakaona hama yaakaereketa ndiyo Bhoazi yakapindapo. Ndizvo Bhoazi wakadaidzira echiti, “Here iwe! Uya pano, hama yangu. Gara pashi pano.” Naye wakaenda, akagara pashi. Zvino Bhoazi wakatora vamuna gumi vevakuru vedhorobha, akati, “Garai pashi pano.” Navo vakagara pashi. Wakati zvino kuhama iyo, “Naomi, uwo wakauyazve kubva kunyika yeMoabhi, unotengesa chigurwa chenyika, icho chaiya chaErimerekhi hama yedu. Ndizvo ndapinimidza kuti ndierekete kwouri ndechiti, ‘Itenge, uri pamberi paava vakagara pano, nepamberi pevakuru vevanhu vangu. Kudai wechida kuiripira, iripire; asi kudai usikazoiripiri, ndironzere, kuti ndizie; ngokuti akuchina umweni ungairipira ngepabanze pako, neinini ndiri sure kwako.’ ” Ndizvo wakati, “Ndinozoiripira.” Zvino Bhoazi wakati, “Zuva rounozotenga iyo nyika kubva munyara yaNaomi, unozotora Ruthe muMoabhi, mukadzi wouwo wakafa, kuti umusire zina rouwo wakafa munhaka yake.” Pane izvi, hama yakati, “Andikoni kuiripira inini pachangu, ngokuti ndingazoshaishira nhaka yangu. Tora iwewe kutenderwa kwangu kwokuripira kuita nhaka yako, ngokuti inini andingairipiri.” Zvino uyu ndiwo mutoo ngomukuwo wekare muIsuraeri ngendaa yokuripira, nendaa yokuita matenganiswa, kuti kugwinyiswe zviro zveshe; munhu waizokhumura gwada rake, echiripa kunoumweni wake. Iyi ndiyo njira yevaiita ndiyo muIsuraeri. Ndizvo hama iyo yakati kunaBhoazi, “Itenge iwewe pachako.” Ndizvo wakakhumura gwada rake. Zvino Bhoazi wakati kuvakuru nokuvanhu veshe, “Imwimwi muri zvapupu nyamashi, kuti ndatenga izvo zveshe zvaiya zvaErimerekhi, nazveshe zvaiya zvaKhirioni nezvaiya zvaMahironi, kubva munyara dzaNaomi. Zve, Ruthe muMoabhi mukadzi waMahironi, ndamutora kuti aite mukadzi wangu, kuti rimusirwe zina rouwo wakafa munhaka yake, kuti zina rouwo wakafa risazodzimwa kubva pakati pehama dzake, nokubva pamusiwo wendau yake; imwimwi muri zvapupu ngeiri zuva.” Zvino vanhu veshe vaiya pamusiwo, nevakuru vakati, “Tiri zvapupu. Mambo Mwari ngaamuite uwo mukadzi unopotera mumhatso mwako kuti adai ndiRacheri naRea, avo vairi pamwepo vakaaka mhatso yaIsuraeri; ugare nhaka muEfratha, uite unembiri muBhetherehema. Nemhatso yako ngaidai ngemhatso yaPherezi, waakamubarira Thamari kunaJudha, ngorudzi rwaanozokupa Mambo Mwari ngouyu mudzimai mutsva.” Ndizvo Bhoazi wakatora Ruthe, naye wakaita mukadzi wake. Naapo apotera kwaari, Mambo Mwari wakaita kuti aite mimba, naye wakabereka mukororo. Zvino madzimai akati kunaNaomi, “Ngaatendwe Mambo Mwari, uwo usikazi kukusiya nyamashi usina hama, kuti zina rake riirikire muIsuraeri! Naye unozoita kwouri muunziri wokupona kwako, nomureri wousharuka hwako; ngokuti muzakazi wako, uwo unokuda, wakapinda kunaka kwouri kunevakororo vanomwe, ndiye wamubereka.” Zvino Naomi wakatora mwana uwo, akamukwambatira paditi rake, akaita mureri kwaari. Nemadzimai vaakirwana vake vakamududza zina vechiti, “Kwakaberekwa mukororo kunaNaomi.” Vakadudza zina rake kuti Obhedhi; ndiye baba aJesi, baba aDhavhidha. Zvino iyi ndiyo mibarirwana yaPherezi: Pherezi wakabara Hezironi. Hezironi wakabara Ramu, naRamu wakabara Aminadhabhi. Aminadhabhi wakabara Nashoni, naNashoni wakabara Sarimoni. Sarimoni wakabara Bhoazi, naBhoazi wakabara Obhedhi. Obhedhi wakabara Jesi, naJesi wakabara Dhavhidha. Zvino waiyapo umweni munhu weRamathaimu, muZufi waibva kunyika yemitunhu yaEfuremu, zina rake raizwi Erikana, mukororo waJerohamu, mukororo waErihu, mukororo waThohu, mukororo waZufi, muEfuremu. Waiya navakadzi vairi; zina roumwe raizwi Hana, nezina roumweni Phenina. Phenina waiya nevana, asi Hana waiya asina vana. Zvino munhu uyu waibva mudhorobha rake kuenda Shiro koodira nokupira midiro kunaMambo Mwari wehondo gore ngegore, apo vakororo vairi vaEri Hofini naFinehasi vaiya vapristi vaMambo Mwari. Ngezuva apo Erikana raaipira midiro, wakapa chikoaniswa kunaPhenina mukadzi wake, nokunevakororo nevanasikana vake; asi kunaHana waipa chikoaniswa chakahwirinzirwa kairi, ngokuti waimuda, kunyazwi Mambo Mwari waiya akaita kuti asaita mimba. Gaa rake raimutambudza kakurutu kuti asvipe mwoyo, ngokuti Mambo Mwari waiya akaita kuti asaita mimba. Ndizvo wakaita kudaro gore ngegore; ngomukuwo waaienda kumhatso yaMambo Mwari wakamutambudza. Ndizvo Hana wakachema, wakaramba kudya. Erikana mwamuna wake wakati kwaari, “Hana, unochema ngenyi? Audyi ngenyi? Mwoyo wako unotambudzwa ngenyi? Inini andipindi vakororo vari gumi kwouri here?” Ndizvo Hana wakamiruka vapedza kudya nokumwa muShiro, akadzipira pamberi paMambo Mwari. Eri mupristi waiya akagara pachigaro pasinde pomusiwo wetemperi raMambo Mwari. Hana wakarwadziwa mwoyo kakurutu, akakumbira kunaMambo Mwari, echichema kakurutu. Wakapika mhiko iyi echiti, “A Mambo Mwari wehondo, kudai ngegwinyiso mungaringira kutambudzika kwomurandakadzi wenyu, mwechindikarakadza, musikariarwi murandakadzi wenyu, asi mwechizopa kunomurandakadzi wenyu mwana womurumbwana, zvino ndinozomupira kwomuri mazuva eshe okupona kwake, nechisvo achizopari soro rake.” Zvino achaangira kukumbira pamberi paMambo Mwari, Eri wakaringira miromo yake. Hana waikumbira mumwoyo mwake; miromo yake yega ndiyo yaihambahamba, asi izwi rake risaizwika; ndizvo Eri wakapinimidza kuti wadhakwa. Ndizvo Eri wakati kwaari, “Unozodhakwa pachako mhera riini? Chirekera vhini rakoro.” Asi Hana wakapingura, akati, “Haiwa, mambo wangu, ndiri mukadzi unomwoyo unotambudzika kakurutu; andizi kumwa vhini nokuti zvinodhakwisa, asi ndaidurura mweya wangu pamberi paMambo Mwari. Usatodzanisa murandakadzi wako kudai ngomukadzi usinashwiro, ngokuti ndaiereketa ngokukura kwendaa yangu nokutambudzika kwangu metsa zvino.” Zvino Eri wakapingura, akati, “Enda mukunyarara; Mwari waIsuraeri ngaape kwouri icho chowakumbirira.” Naye wakati, “Murandakadzi wako ngaaone nyasha pamberi pako.” Ndizvo mudzimai uyu wakaenda, akadya, nehope yake aizi kuchazosururikazve. Vakamiruka mangwanani maishi, vakadira pamberi paMambo Mwari; zvino vakapetuka kumhatso yavo paRama. Erikana wakazia Hana mukadzi wake, naMambo Mwari wakamukarakadza. Mukuwo waguma Hana wakaita mimba, wakabereka mukororo. Wakadudza zina rake kuti Samueri, ngokuti wakati, “Ndakamukumbira kunaMambo Mwari.” Mwamuna Erikana nemhatso yake yeshe vakaenda koopira kunaMambo Mwari mudiro wegore ngegore, nokuita kudai ngemhiko yake. Asi Hana aazi kukwirayo; ngokuti wakati kunomwamuna wake, “Andizoendiyo metsa mwana arumurwa; ndinozomuunza kuti azoema pamberi paMambo Mwari, nokugarapo mhera nariini.” Erikana mwamuna wake wakati kwaari, “Ita icho chinokunakira; chimbogara metsa wamurumura; kwega Mambo Mwari ngaaite izwi rake.” Ndizvo mukadzi wakagara, echiamwisa mukororo wake metsa amurumura. Naapo amurumura, wakamutora, akakwira naye, nomukono unemakore matatu, nemakhirogramu gumi oufu, nenyede yevhini. Akamuunza Shiro, kumhatso yaMambo Mwari; nomwana waiya achimudoko. Zvino vakauraya mukono, vakaunza mwana kunaEri. NaHana wakati, “A mambo wangu! Kudai ngezvounopona, mambo wangu, ndiri mudzimai uwo waiya akaema pano pasinde pako, echikumbira kunaMambo Mwari. Ndakakumbira uyu mwana; naMambo Mwari wakandipa icho chendakakumbira kwaari. Ndizvo ndamupawo kunaMambo Mwari, kuti mukupona kwake kweshe unozopirwa kunaMambo Mwari.” Naye wakadirapo Mambo Mwari. Hana wakakumbira echiti, “Mwoyo wangu unodakara munaMambo Mwari, simba rangu rinokudzwa munaMwari wangu. Muromo wangu unozokuriswa padera pemagaa angu, ngokuti ndinodakara ngokunyisa kwako. Akuna naumwe wakachena kudai ndiMambo Mwari, ngokuti akunazve umweni ngokubanze kwako; akuna buwe naimwe yakadai ndiMwari wedu. Usaereketazve ngokudzikudza; usatendera kuti kudada kubude kubva pamuromo wako, ngokuti Mambo Mwari ndiMwari wokuzia, ndiye unopima zviito. Uta hwengwazi hwagurwa, asi vasina simba vatsimiswa ngesimba. Avo vaiya vakagutiswa vanoshandira kudya; asi avo vaiya nenzara vanokora ngezvakachakatwa. Ngomwa yakabereka vanomwe; asi uwo unevana vazhinji wagumirwa. Mambo Mwari unouraya, nokuponesazve; unodzasa muiba, nokumusazve. Mambo Mwari unoita varombo nemakurudza; unodzasa pashi, nokumirudzazve. Unomirudza varombo kubva mubukuta, echimirudza mupemhi kubva mumurwi mwedota, nokuita kuti vagare pakati pevazvare, vagare nhaka yedendemaro routhende. Ngokuti sika dzenyika ngedzaMambo Mwari, naye wakaemesa nyika padera padzo. Unozongwarira tsoka dzevakagondeka vake, asi vakashata vanozoparadzwa muchidima; ngokuti akuna munhu unozonyisa ngesimba. Magaa aMambo Mwari anozoparadzwa; Uripadera pezveshe unozotinhira kubva mudenga. Mambo Mwari unozotonga magumo enyika; naye unozopa simba kunamambo wake, nokukudza simba rowakadzodzwa wake.” Zvino Erikana wakaenda Rama kumhatso yake, asi mwana wakasara echishandira Mambo Mwari pamberi paEri mupristi. Zvino vakororo vaEri vaiya vakororo vakashata; avazi kuzia Mambo Mwari, nokuti mishando yevapristi kuvanhu. Naapo munhu aipira mudiro, muranda womupristi waiuya neforoko inemiromo mitatu munyara yake, apo nyama yaiya ichabikwa. Naye waizobaya ndiyo munhamba, nokuti mugapu, nokuti mubiya, nokuti muhari; yeshe nyama yaizobaiwa ngeforoko yaitorwa ngomupristi. Izvi ndizvo zvevaita muShiro kuvaIsuraeri vakauyamwo. Zve, vasati vapisha mafuta muranda womupristi waizouya echiti kunomunhu waipira mudiro, “Unza nyama yokukochera yomupristi, ngokuti aazoashiri nyama yakabikwa kubva kwouri, asi kwega mbishi.” Kudai munhu aizoti kwaari, “Ngavapishe mafuta kutanga, vapedza wechitora younoda,” iye waimupingura echiti, “Haiwa, asi ndipe zvinopano; kuti warekera, ndinozoitora ngehasha.” Ndizvo kushaisha kweava vamuna vatsva kwakakura yaamho pamberi paMambo Mwari; ngokuti vanhu vakashoora mudiro waMambo Mwari. Samueri wakashanda pamberi paMambo Mwari, achiri murumbwana akasimira efodhi rorukangaza. Mai ake vaimusonera gore ngegore kabhachi, vaichiunza kwaari apo vaizouya nomwamuna wavo koopira mudiro wegore ngegore. Zvino Eri waizofumisa Erikana nomukadzi wake echiti, “Mambo Mwari ngaakupe vana ngomukadzi uyu ngendaa yechipo chaakapa kunaMambo Mwari.” Navo vakaenda kanyi kwavo. NaMambo Mwari wakahambira Hana; wakabereka vakororo vatatu, navanasikana vairi. Nomurumbwana Samueri wakakura mukuona kwaMambo Mwari. Zvino Eri waiya aamusharuka. Wakazwa izvo zveshe zvaiitwa ngevakororo vake kuvaIsuraeri veshe, nokuatana kwevaiita navakadzi vaishanda pamusiwo wetende romushongano. Naye wakati kwevari, “Munoita zviro zvakadai izvi ngenyi? Ngokuti ndinozwa ngezviito zvenyu zvakashata kubva kuvanhu veshe ava. Haiwa, vakororo vangu, azvizi kunaka zvendinozwa vanhu vaMambo Mwari vechiereketa ndizvo kweshe. Kudai munhu umwe echishaishira umweni, Mwari ungamuemerera; asi kuti munhu echishaishira Mambo Mwari, ndiani unozomurwira?” Asi avazi kupurutana izwi rababa avo, ngokuti kwaiya kuda kwaMambo Mwari kuti vaurawe. Zvino murumbwana Samueri wakaangira kukura, echidiwa ndiMambo Mwari nevanhu. Munhu waMwari wakauya kunaEri, akati kwaari, “Ndizvo zvinoronza Mambo Mwari, ‘Ndakadzionisa yaamho pachangu kumhatso yababa ako apo vaiya hloko muEgipite mumhatso yaFaro. Inini ndakamutsanangura kubva kumadzinza eshe aIsuraeri kuti aite mupristi wangu, kuti akwire paarita rangu, kupisha mutombo unegwema rakanaka nokusimira efodhi pamberi pangu. Neni ndakapa kumhatso yababa ako midiro yangu yeshe yokupisha ngomuriro inobva kuvana vaIsuraeri. Ngenyi zvino mwechiringira ngedziso rokuboka midiro yangu yeshe neminikero yangu, izvo zvendakapanga muugaro hwangu; wechiremeredza vakororo vako kupinda inini, ngokudzikodza ngeminikero yakapinda kunaka yavanhu vangu Isuraeri?’ Ndizvo Mambo Mwari, Mwari waIsuraeri, unoti, ‘Ndakagondisa ngegwinyiso kuti vemhatso yako nevemhatso yababa ako vanozohamba pamberi pangu mhera nariini;’ asi zvino Mambo Mwari unoti, ‘Haiwa, azvizoitiki; ngokuti avo vanondiremeredza ndinozovaremeredza, naavo vanondishoora vanozonyenyeredzwa.’ Ringira, mazuva anozouya apo ndinozogura simba rako, nesimba remhatso yababa ako, kuti asazoapo naumwe unokura kuita harahwa mumhatso yako mhera nariini. Zvino mukutambudzika unozoringira ngedziso rokuboka muupfumi hweshe hwaanozopira Mwari padera paIsuraeri; akuzoapo umwe unokura kuita harahwa mumhatso yako mhera nariini. Munhu umwe ega wemhatso yako wendisikazoguri kubva kuarita rangu unozosiiwa kuti madziso ake acheme, nokutambudza mwoyo wake; navo veshe vemibarirwana yemhatso yako vanozofa ngeshoti. Neichi chinozoita chioniso kwouri cheicho chinozoitika kuvakororo vako vairi, Hofini naFinehasi; ngezuva rimwe vanozofa veshe. Neni ndinozodzimirudzira mupristi unogondeka, uwo unozoita zveshe zviri mumwoyo mwangu nomumupinimidzo wangu. Ndinozomuakira mhatso isikaperi, naye unozohamba pamberi powakadzodzwa wangu mhera nariini. Weshe uwo unozosara wemhatso yako unozouya nokugwadama kwaari kupuwa zvimare zvesirivha nekachingwa echiti, ‘Ndapota, ndiiseiwo mundau dzomupristi, kuti ndidyewo chigurwa chechingwa.’ ” Zvino murumbwana Samueri waishandira Mambo Mwari pashi paEri. Izwi raMambo Mwari raiya risikanyanyi kuzwika ngaawo mazuva, kwaiya kusina chioniso chakaoniswa. Pamukuwo uwo Eri, madziso ake aiya ootanga kuita mazweezwee, asikachanasi kuona, waiya akaata mukamera rake. Chibani chaMwari chaiya chisati chadzimwa, naSamueri waiya akaata pashi mutemperi raMambo Mwari apo peraigara bhokisi rechitenderano chaMwari. Zvino Mambo Mwari wakadaidza Samueri; naye wakapingura, akati, “Ndiri pano.” Naye wakarumba kunaEri, akati, “Ndiri pano; ngokuti wandidaidza.” Asi wakati, “Andizi kukudaidza; enda wooata.” Ndizvo wakaenda, akaata. Mambo Mwari wakadaidzazve, “Samueri.” Samueri wakamuka akaenda kunaEri, akati, “Ndiri pano; ngokuti wandidaidza.” Asi wakapingura, akati, “Mukororo wangu, andizi kukudaidza; ata hako.” Zvino Samueri waiya asati amuzia Mambo Mwari, neizwi raMambo Mwari raiya risati raziikanwa kwaari. NaMambo Mwari wakadaidzazve Samueri kwechitatu. Naye wakamuka, akaenda kunaEri, akati, “Ndiri pano; ngokuti wandidaidza.” Zvino Eri wakazia kuti Mambo Mwari ndiye waidaidza murumbwana. Ndizvo Eri wakati kunaSamueri, “Enda wooata; kudai echikudaidza unozoti, ‘Ereketa, Mambo Mwari, ngokuti muranda wako unozwa.’ ” Ndizvo Samueri wakaenda, akaata pandau yake. Zvino Mambo Mwari wakauya, akaema, akadaidza kudai ngemikuwo imweni, “Samueri, Samueri.” NaSamueri wakapingura, akati, “Ereketa, ngokuti muranda wako unozwa.” Zvino Mambo Mwari wakati kunaSamueri, “Wona, ndinozoita chiro muIsuraeri icho chinoita kuti nzee dzomunhu weshe dzinozozhararika ngokuchizwa. Ngeiro zuva ndinozoita kunaEri izvo zveshe zvendakaereketa ngendaa yemhatso yake, kubvira pakutanga metsa pakugumisira. Ngokuti ndakamuronzera kuti ndichatonga mhatso yake mhera nariini, ngendaa yokushaisha kwaanozia; ngokuti vakororo vake vaituka Mwari, naye aazi kuvarambidza. Ndizvo ndapika kumhatso yaEri kuti kushaisha kwemhatso yaEri akuzosukwi ngemidiro nokuti munikero mhera nariini.” Samueri wakaata metsa mangwanani; zvino wakabeura misiwo yemhatso yaMambo Mwari. Samueri wakatya kuronzera Eri zvaakaoniswa. Asi Eri wakadaidza Samueri, akati, “Samueri, mukororo wangu.” Wakati, “Ndiri pano.” Eri wakati, “Chiinyi icho chaakaronza Mambo Mwari kwouri? Usandifishira! Mwari ngaaite kudaro kwouri nokututsirazve, kudai wechindifishira kunyazwi chiinyi cheizvo zveshe zvaakaereketa kwouri.” Ndizvo Samueri wakamuronzera zveshe, apana chaakamufishira. Zvino wakati, “NdiMambo Mwari; ngaaite zvinomunakira.” Samueri wakakura naMambo Mwari waiya naye, asikatendi kuti izwi rake narimwe rikorere. NevaIsuraeri veshe kubvira Dhani kugumira Bheerishebha vakazia kuti Samueri waiya muprofeti wakagondeka waMambo Mwari. NaMambo Mwari wakaangira kuoneka muShiro, ngokuti Mambo Mwari wakadzionisa pachake kunaSamueri muShiro ngeizwi raMambo Mwari. Neizwi raSamueri rakauya kuvaIsuraeri veshe. VaIsuraeri vakabuda kurwa nevaFiristia, vakaemesa matende pasinde peEbhenezeri, navaFiristia vakaemesawo matende paAfeki. VaFiristia vakadzinasirira kurwa nevaIsuraeri, naapo hondo yashonganiswa, vaIsuraeri vakanyiswa ngevaFiristia; navo vakauraya vaida kukwana makumi emazana marongomuna (4,000) evanhu vehondo vaiya mundau yehondo. Naapo vanhu vehondo vauya mukamba, vakuru vaIsuraeri vakati, “Mambo Mwari waita ngenyi kuti tinyiswe nyamashi ngevaFiristia? Ngatitore bhokisi rechitenderano chaMambo Mwari kubva muShiro, kuti auye pakati pedu nokutiponesa kubva munyara dzemagaa edu.” Ndizvo vanhu vakatumirwa kuenda Shiro, kuti vatore kubveyo bhokisi rechitenderano chaMambo Mwari wehondo, uwo unogara pakati pemakherubhimu. Vakororo vairi vaEri, Hofini naFinehasi, vaiyapo nebhokisi rechitenderano chaMwari. Naapo bhokisi rechitenderano chaMambo Mwari raunzwa mukamba, vaIsuraeri veshe vakadaidzira ngeizwi gurutu, ndizvo nyika yakaita maungira. Naapo vaFiristia vazwa bope rokudaidzira, vakati, “Iri bope rokudaidzira kukuru rinoronzenyi mukamba revaHebheru?” Naapo vazwa kuti bhokisi rechitenderano chaMambo Mwari raunzwa mukamba, vaFiristia vakatya. Ngokuti vakati, “Zvimwari zvaguma mukamba.” Vakatizve, “Ihehe kwetiri! Ngokuti kwaiya kusati kwaitika chiro chakadaro metsa zvino. Ihehe kwetiri! Ndiani ungakona kutinunurira kubva munyara dzezvimwari izvi zvine simba? Ndizvo zvimwari zvakarova vaEgipite ngemadambudziko eshe mushango. Itai vakagwinya, muite kudai ngengwazi, imwimwi vaFiristia, kuti musazoita hloko kuvaHebheru kudai ngezvevakaita kwomuri; itai kudai ngengwazi murwe.” Ndizvo vaFiristia vakarwa; vaIsuraeri vakanyiswa, vakatiza munhu weshe kutende rake. Kwakaitika kuurawa kukurutu, ngokuti vakaurawa vaIsuraeri makumi matatu emakumi emazana (30,000) evaihamba ngetsoka. Bhokisi rechitenderano chaMwari rakatorwa; vakororo vaEri, Hofini naFinehasi, vakaurawa. Munhu waBhenjamini wakarumba kubva muhondo, akaguma Shiro ngeiro zuva, anemachira ake akabauka, namavhu pasoro rake. Naapo munhu paakaguma, Eri waiya akagara pachigaro panjira, echiringira, ngokuti mwoyo wake waihuta ngendaa yebhokisi rechitenderano chaMwari. Naapo munhu paakapotera mudhorobha, wakaronza zveshe, nedhorobha reshe rakachema. Naapo Eri akazwa bope rokuchema, wakati, “Rinoronzenyi bope iri?” Zvino munhuwo wakauya ngokukasira, akaronzera Eri. Zvino Eri waiya anemakore makumi mapfumbamwe namasere, nemadziso ake aiya oita mazweezwee asikachanasi kuona. Munhu wakati kunaEri, “Ndini ndabva kuhondo, ndatiza nyamashi kubva kuhondo.” Naye wakati, “Kunoizwenyi, mukororo wangu?” Nhumwa yakati, “VaIsuraeri vatiza pamberi pevaFiristia. Kwakaapozve kuurawa kukuru pakati pevanhu vehondo, nevakororo vako vairi Hofini naFinehasi vafa, nebhokisi rechitenderano chaMwari ratorwa.” Naapo aronza ngendaa yebhokisi rechitenderano chaMwari, Eri wakawa ngegotsi kubva pachigaro chake pasinde pemusiwo, nomutsipa wake wakaguka, naye wakafa; ngokuti waiya aamusharuka, akafema. Waiya atonga Isuraeri makore makumi marongomuna. Zvino muzakazi wake, mukadzi waFinehasi, waiya aanemimba aapasinde pokubereka. Naapo paakazwa mashoko okuti bhokisi rechitenderano chaMwari ratorwa, nokuti sezara ake nomwamuna wake vafa, wakakotama akabereka; ngokuti kurwadza kwokubara kwakamugumira. Naapo ooda kufa vakadzi vaimudetsera vakati kwaari, “Usatya, ngokuti wabereka mukororo.” Asi aazi kupingura, nokuti kuzvikarakadza. Wakadudza zina romwana kuti Ikhabhodhi, kuronza kuti “Uthende hwabva kunaIsuraeri,” ngendaa yokuti bhokisi rechitenderano chaMwari rakatorwa nendaa yasezara ake nomwamuna wake. Wakati, “Uthende hwabva kunaIsuraeri, ngokuti bhokisi rechitenderano chaMwari ratorwa.” Naapo vaFiristia vakatora bhokisi rechitenderano chaMwari, navo vakariunza kubva Ebhenezeri, vakariisa muAshidhodhi. Zvino vaFiristia vatora bhokisi rechitenderano chaMwari, vakariunza mumhatso yaDhagoni; vakariisa pasinde paDhagoni. Naapo vanhu veAshidhodhi vamuka nechimangwani mangwanani, vakaona Dhagoni waiya awa ngehope yake pamavhu pamberi pebhokisi rechitenderano chaMambo Mwari. Ndizvo vakatora Dhagoni, vakamuemesazve pandau yake. Naapo vamuka nechimangwani mangwanani, vakaona Dhagoni waiya awa ngehope yake pamavhu pamberi pebhokisi rechitenderano chaMambo Mwari; nesoro raDhagoni nenyara dzake zvaiya zvakaguka padimba; chaiya chasarapo muiri wega waDhagoni. Ngendaa iyi akuna vapristi vaDhagoni, nokuti veavo vanouya kumhatso yaDhagoni, unotsika padimba raDhagoni muAshidhodhi nanyamashi. Nyara yaMambo Mwari yairema padera pavanhu vomuAshidhodhi, naye wakavatyisa nokuvatambudza ngenhenda yemamota, muAshidhodhi nomunyika yaro yeshe. Naapo vanhu vomuAshidhodhi vaona kuti zvakadaro, vakati, “Bhokisi rechitenderano chaMwari waIsuraeri arisisi kugara nesu; ngokuti nyara yake inotitambudza kakurutu, naDhagoni chimwari chedu.” Ndizvo vakatuma vanhu, vakaunganidza kwevari vakuru veshe vevaFiristia, vakati, “Tinozoitenyi ngebhokisi rechitenderano chaMwari waIsuraeri?” Nevakuru vakapingura vechiti, “Bhokisi rechitenderano chaMwari waIsuraeri ngaritwarwe riuye Gathi.” Ndizvo vakatwara bhokisi rechitenderano chaMwari waIsuraeri kuuya naro Gathi. Asi vapedza kuriunza Gathi, nyara yaMambo Mwari yakarwisana neiro dhorobha, kukaita kukaruka kukurutu; naye wakatambudza vanhu vedhorobha, veshe vadoko nevakuru, vakabatwa ngemamota. Ndizvo vakatumira bhokisi rechitenderano chaMwari kuEkironi. Asi apo bhokisi rechitenderano chaMwari raguma Ekironi, vanhu veEkironi vakadaidzira vechiti, “Vatiunzira bhokisi rechitenderano chaMwari waIsuraeri, kutiuraya navanhu vedu.” Vakatuma vanhu koounganidza pamwepo vakuru veshe vevaFiristia, vakati, “Tumirai bhokisi rechitenderano chaMwari waIsuraeri, kuti rihwirire kundau yaro, kuti risazotiuraya navanhu vedu.” Ngokuti vaiya vakarudzwa ngorufu runotyisa mukati mwedhorobha reshe. Nyara yaMwari yaivatambudza kakurutu. Vanhu vasikazi kufa vakamera mamota, nokuchema kwedhorobha kwakakwira mudenga. Bhokisi rechitenderano chaMambo Mwari raiya munyika yevaFiristia mwedzi minomwe. NavaFiristia vakadaidza vapristi navafemberi vechiti, “Tinozoitenyi ngebhokisi rechitenderano chaMambo Mwari? Tironzerei kuti tingariita matumirirenyi kundau yaro.” Vakati, “Kudai mwechitumira bhokisi rechitenderano chaMwari waIsuraeri, musaritumira risina chiro, asi ritumirei rinomudiro wezvishaishi. Zvino munozotambiswa nokuripirwa; nyara yake aizoduswi here kubva kwomuri?” Navo vakati, “Unozoita mudironyi wokushaisha wetinozohwirinza kwaari?” Vakati, “Zvimburumbwa zvishanu zvemiedzaniso yemamota zvomukore, nemiedzaniso mishanu yembeya yomukore, kudai ngouwandu hwevatongi vevaFiristia; ngokuti nhenda imweyo yaiya padera penyu mweshe, nepadera pevatongi venyu. Ndizvo munozoita miedzaniso yemota dzenyu, nemiedzaniso yembeya dzenyu dzinoshaishira nyika yenyu, nemwi munozopa kukudzwa kunaMwari waIsuraeri; pamweni unozorerusa nyara yake kubva padera penyu nezvimwari zvenyu, nokubva kunyika yenyu. Ngenyi mwechikonzisa mwoyo yenyu, kudai ngevaEgipite naFaro vakakonzisa mwoyo yavo? Apo iye paakashanda ngenjira inoshamisa pakati pavo, avazi kutendera here kuti vanhu vaende, navo vakaenda? Ndizvo zvino itai ngoro itsva, mwechitora n'ombe mathokazi mairi anosengwa, asati asungwa nejoka, muasungire pangoro, mwechipetudza makonyana adzo kanyi kubva kwedziri. Mutore bhokisi rechitenderano chaMambo Mwari, mwechiriisa mungoro; mwechiisazve mukabhokisi kari parutii rwaro miedzaniso yomukore, iyo yomunohwirinza kwaari kuita mudiro wokushaisha. Mwechizvitumira, kuti zviende. Mwechiringira kuti zvinokwira ngenjira inoenda kunyika yazvo kuBhethishemeshi, zvino ndiye wakaita izvi zvakashata zvikuru kwetiri; asi kuti zvisadaro, zvino tinozozia kuti aisiri nyara yake akadi yakatitambudza; zviro zvakandoitikawo hazvo kwetiri.” Navanhu vakaita izvozvo; vakatora n'ombe mathokazi mairi anosengwa, vakaasungira pangoro, vakakonyera makonyana awo kanyi. Navo vakaisa bhokisi rechitenderano chaMambo Mwari mungoro, nekabhokisi kanembeya dzakaumbwa dzomukore nemiedzaniso yemamota avo. Mathokazi en'ombe akaenda ngenjira yakarurama inoenda Bhethishemeshi, akaenda nepato echirira apo aihamba; aazi kupauka kuenda kumudyo nokuti kumuoshwe nemadzimambo evaFiristia vakaateera metsa kumugano weBhethishemeshi. Zvino vanhu veBhethishemeshi vaiya vechicheka koroni mubani. Naapo vamirudza madziso avo, vakaona bhokisi rechitenderano, vakaenda ngokudakara kooshongana naro. Nengoro yakaguma mumunda waJoshua muBhethishemeshi, ikaemapo. Buwe guru raiyapo; ndizvo vakatema miti yengoro, vakapira mathokazi en'ombe kuita mudiro wokupisha kunaMambo Mwari. VaRevhi vakadzasa pashi bhokisi rechitenderano chaMambo Mwari nekabhokisi kaiya pasinde paro, kaiya nemiedzaniso yomukore; vakazviisa padera pebuwe guru. Zvino vanhu veBhethishemeshi vakapira midiro yokupisha, nemidiro imweni ngeiro zuva kunaMambo Mwari. Zvino madzimambo mashanu evaFiristia vazviona, vakahwirira Ekironi ngeiro zuva. Naaya ndiwo mamota omukore akahwirinzwa ngevaFiristia kuita mudiro wokushaisha kunaMambo Mwari: rimwe reAshidhodhi, rimwe reGaza, rimwe reAshikeroni, rimwe reGathi, nerimwenizve reEkironi. Nembeyawo dzakaumbwa dzomukore kudai ngouwandu hwemadhorobha eshe evaFiristia aiya emadzimambo mashanu, eshe madhorobha akashosherwa nemaguta asikazi kushosherwa. Buwe gurutu pasinde paro pevakagadzika bhokisi rechitenderano chaMambo Mwari, riripo nanyamashi kuita chapupu mumunda waJoshua weBhethishemeshi. Mambo Mwari wakauraya vanhu makumi manomwe veBhethishemeshi ngokuti vaiya varingira mubhokisi rechitenderano chaMambo Mwari; nevanhu vakachema ngokuti Mambo Mwari waiya auraya vanhu vazhinji ngokuuraya kukurutu. Zvino vanhu veBhethishemeshi vakati, “Ndiani unokona kuema pamberi paMambo Mwari, Mwari uyu Wakachena? Tinozomuendesa kunani abve kwetiri?” Ndizvo vakatuma vanhu kuvagari veKiriathijearimu vechiti, “VaFiristia vakapetudza bhokisi rechitenderano chaMambo Mwari, uyai muritore.” Nevanhu veKiriathijearimu vakauya, vakatora bhokisi rechitenderano chaMambo Mwari, vakariunza mumhatso yaAbhinadhabhi pamutunhu. Vakaemesa Ereaza, mukororo wake, kuti angwarire bhokisi rechitenderano chaMambo Mwari. Kubvira pazuva iro rakaemeswa bhokisi rechitenderano chaMambo Mwari muKiriathijearimu, nguva yakareba yapera makore makumi mairi; nemhatso yeshe yaIsuraeri yakachemera Mambo Mwari. Zvino Samueri wakaereketa kumhatso yeshe yaIsuraeri echiti, “Kuti mwechihwirira kunaMambo Mwari ngomwoyo wenyu weshe, zvino rashai zvimwari zvipara naAshitharothi kubva pakati penyu. Mwechiemesa mwoyo yenyu kunaMambo Mwari, nokumushandira iye ega, naye unozomununura kubva munyara dzevaFiristia.” Ndizvo vana vaIsuraeri vakarasha vanaBhaari naAshitharothi, vakashandira Mambo Mwari ega. Zvino Samueri wakati, “Unganidzai vaIsuraeri veshe paMizipha, neni ndinozomukumbirira kunaMambo Mwari.” Ndizvo vakaungana paMizipha, vakachera mvura, vakaidurura pamberi paMambo Mwari. Vakaera kudya ngeiro zuva, vakati, “Takashaisha kunaMambo Mwari.” Samueri wakatonga vana vaIsuraeri paMizipha. Naapo vaFiristia vakazwa kuti vana vaIsuraeri vaiya vakaungana paMizipha, madzimambo evaFiristia vakakwira koorwa nevaIsuraeri. Naapo vanhu vaIsuraeri vazvizwa, vakatya vaFiristia. Vana vaIsuraeri vakati kunaSamueri, “Usarekera kutichemera kunaMambo Mwari, Mwari wedu, nokukumbira kuti azotiponesa kubva munyara dzevaFiristia.” Ndizvo Samueri wakatora kahwai kaiamwa, akakapira keshe kuita mudiro wokupisha kunaMambo Mwari. Samueri wakachemera vaIsuraeri kunaMambo Mwari, naMambo Mwari wakamupingura. Naapo Samueri achapira mudiro wokupisha, vaFiristia vakakwedzera pasinde koorwa navaIsuraeri; asi Mambo Mwari wakatinhira ngeizwi guru kurwa nevaFiristia ngezuva iro, wakavaisa mukukangaidzwa, navo vakanyiswa pamberi pevaIsuraeri. Navanhu vaIsuraeri vakabuda kubva muMizipha; vakarumbirira vaFiristia nokuvauraya, metsa kusvika Bhethikhari. Zvino Samueri wakatora buwe, akariemesa pakati peMizipha neSheni, akadaidza zina raro kuti Ebhenezeri, ngokuti waiti, “Metsa nazvino Mambo Mwari wakatidetsera.” Ndizvo vaFiristia vakanyiswa, avazi kuchazouyazve munyika yaIsuraeri; nyara yaMambo Mwari yairwa nevaFiristia mazuva eshe aSamueri. Madhorobha aiya akatorwa kubva kuvaIsuraeri ngavaFiristia akahwirinzwazve kunaIsuraeri, kubvira Ekironi kugumira Gathi; vaIsuraeri vakabvuka nyika dzavo kubva kunyara dzavaFiristia. Kwakaapo kunyarara pakati pevaIsuraeri nevaAmori. Samueri wakatonga Isuraeri mazuva eshe okupona kwake. Wakahambira makore eshe Bhetheri, Girigari neMizipha, echitonga vaIsuraeri kundau idzo dzeshe. Wakahwirira Rama ngokuti ndipo paiya nemhatso yake; naapo wakatonga zvakanaka vaIsuraeri, naapozve wakaakira arita Mambo Mwari. Naapo Samueri aamusharuka, wakaemesa vakororo vake kuita vatongi padera paIsuraeri. Zina redangwe raiya Joeri nezina rewechipiri raiya Abhija; ava vaiya vatongi muBheerishebha. Asi vakororo vake avazi kuteera munjira dzake, asi vakapauka kutsvaka mare, vakatora zvitengero, avazi kutonga zvakanaka. Zvino veshe vakuru vaIsuraeri vakaungana pamwepo, vakauya kunaSamueri muRama. Vakati kwaari, “Ringira, iwewe waamusharuka, navakororo vako avateeri munjira dzako; ndizvo tiemesere mambo zvino, kuti atonge padera pedu kudai ngemadzinza amweni.” Asi icho achizi kudakadza Samueri, apo pavakati, “Tipei mambo wokutitonga.” Samueri wakakumbira kunaMambo Mwari, naMambo Mwari wakati kunaSamueri, “Purutana izwi revanhu nazvo zveshe zvevanoronza kwouri; ngokuti avazi kukuramba, asi vakandiramba inini, kuti ndisaita mambo padera pavo. Kudai ngezvevakaita kwendiri kubvira zuva rendakavabudisa kubva muEgipite metsa kuiri zuva, vakandisiya nokushandira zvimwari zvimweni, ndizvo vanoitazve kudaro kwouri. Ndizvo zvino, purutana kuizwi ravo; kwega vapange kakurutu, nokuvaonisa kuti ndimambo wakadini uwo unozovatonga.” Ndizvo Samueri wakaronza mazwi eshe aMambo Mwari kuneavo vakakumbira kwaari kupuwa mambo. Naye wakati, “Idzi ndidzo njira dzamambo unozotonga padera penyu: unozotora vakororo venyu nokuvaemesa kwaari kuita vanhu vengoro dzake, nevanhu vemahachi ake, nevanozorumba pamberi pengoro dzake. Naye unozodziemesera nduna padera pemakumi emazana, nenduna padera pemakumi mashanu; unozovaemesa kuvhuna munda wake, nokucheka zviyo zvake, nokupfura zvokurwisa ndizvo zvake, nezviro zvengoro dzake. Unozotora vanasikana venyu kuita vaengi vemafuta emakha, nokuita vabiki vezvingwa. Naye unozotora minda yenyu yakapindisisa kunaka, neminda yenyu yemivhini neyemiorivhi, echiipa kuvaranda vake. Naye unozotora rupande rwegumi rwembeu dzenyu, nerweminda yenyu yomuvhini, nokurupa kunenduna dzake nokuvaranda vake. Unozotora hloko dzenyu, vamuna navakadzi, n'ombe dzenyu idzo dzakapinda kunaka, nembongoro dzenyu, nokuvaemesa mumushando wake. Unozotorazve chegumi chezvifuyo zvenyu, nemwi munozoita hloko dzake. Munozochema ngeiro zuva ngendaa yamambo wenyu, uwo wemwakadzitsanangurira; asi Mambo Mwari aazomupinguri ngezuvaro.” Asi vanhu vakaramba kupurutana izwi raSamueri; navo vakati, “Haiwa! Asi isusu tinoda mambo padera pedu, kuti isusu tidai ngamadzinza amweni eshe; nokuti mambo wedu atitonge nokutitungamira, nokurwisana nevetinorwisana navo.” Naapo Samueri azwa mazwi eshe evanhu ava, wakaahwirinzira mukuzwa kwaMambo Mwari. Mambo Mwari wakati kunaSamueri, “Purutana izwi ravo, uvaemesere mambo padera pavo.” Samueri wakati kunevanhu vaIsuraeri, “Endai imwimwi, munhu weshe kudhorobha rake.” Zvino kwaiyapo munhu weBhenjamini, zina rake raizwi Kishi, mukororo waAbhieri, mukororo waZerori, mukororo waBekhorathi, mukororo waAfia, muBhenjamini, munhu gurudza raiya nembiri. Waiya nomukororo, zina rake raizwi Sauri, jaha rakanaka nokuringirika. Paiya pasina pakati pavana vaIsuraeri munhu wakanaka kuringirika kupinda Sauri; kubvira pamapfudzi ake waiya akareba kupinda munhu weshe. Zvino mbongoro dzaKishi baba aSauri dzaiya dzarashika. Ndizvo Kishi wakati kunaSauri mukororo wake, “Tora umwe wevarumbwana newe, umiruke kootsvaka mbongoro.” Wakapinda ngomunyika yemitunhu yaEfuremu, akapindazve ngomunyika yeSharisha, asi avazi kudziona. Navo vakapindazve ngomunyika yeShaarimu, asi dzaiya dzisimwozve. Zvino wakapinda ngomunyika yevaBhenjamini, asi avazi kudziona. Naapo vaguma kunyika yeZufi, Sauri wakati kumurumbwana waihamba naye, “Uya, ngatihwirire sure; pamweni baba angu avachapinimidzi ngembongoro, vopinimidza tisu.” Asi murumbwana wakati kwaari, “Ringira zvino, uripo munhu waMwari mudhorobha iri, naye uri munhu unoremeredzeka. Zveshe izvo zvaanoronza zvinoitika ngegwinyiso. Ngatiendeyo zvino; pamweni ungatironzera ngenjira yetingateera.” Zvino Sauri wakati kumurumbwana wake, “Asi, kuti techienda, tinozomuunzirenyi munhu uwo? Ngokuti chingwa chapera muzvidziyo zvedu, apanazve chipo chokupa kumunhu waMwari. Isusu tinenyi?” Murumbwana wakapingurazve Sauri, akati, “Ndinacho pano munyara yangu chigurwa chesirivha; ndinozochipa kumunhu waMwari, kuti atironzere njira yedu.” (Karetu munyika yaIsuraeri, munhu weshe waizoenda koobvunza ndiMwari, waizoti, “Uyai, ngatiende kunomufemberi;” ngokuti iye unodaidzwa zvino kuti muprofeti, waisimbodaidzwa kuti mufemberi.) Sauri wakati kunomurumbwana wake, “Waronza zvakanaka; uya, ngatiende.” Ndizvo vakaenda kudhorobha umwo mwaigara munhu waMwari. Naapo vachakwira mutunhu kuenda kudhorobha, vakaona vasikana vaibuda koochera mvura, vakati kwevari, “Mufemberi urimwo here?” Navo vakapingura, vakati, “Eya, urimwo, pamberi penyu. Kasirai, ngokuti wauya zvinopano kudhorobha iri; ngokuti uripo mudiro wavanhu nyamashi pandau yakakwirira. Naapo mwechipotera mudhorobha, munozomuona asati aenda koodya kundau yakakwirira. Ngokuti vanhu avazodyi metsa auya, ngokuti ndiye unofumisa mudiro; apedza izvo vakakokwa vanodya. Zvino kwirai, ngokuti munozomuona zvinopano.” Ndizvo vakakwira kudhorobha. Naapo vachapotera mudhorobha, vakaona Samueri echibuda kuuya kwevari, echikwira kundau yakakwirira. Zvino zuva risati raguma rokuuya kwaSauri, Mambo Mwari waiya aronzera Samueri echiti, “Mangwani ngenguva ino ndinozotumira kwouri munhu unobva kunyika yeBhenjamini, newe unozomudzodza kuita mambo padera pevanhu vangu Isuraeri. Unozoponesa vanhu vangu kubva kunyara dzevaFiristia; ngokuti ndakaona kutambudzika kwevanhu vangu, ngokuti kuchema kwavo kwaguma kwendiri.” Naapo Samueri aona Sauri, Mambo Mwari wakati kwaari, “Uyu ndiye munhu wendakaereketa ndiye kwouri! Uyu ndiye unozotonga vanhu vangu.” Zvino Sauri wakakwedzera kunaSamueri pamusiwo, akati, “Ndironzere, ndapota, iri pari mhatso yomufemberi?” Samueri wakapingura Sauri, akati, “Ndini mufemberi; kwirai pamberi pangu kundau yakakwirira, ngokuti munozodya neni nyamashi, asi mangwani ndinozomutendera kuti muende, ndinozomuronzera zveshe zviri mumwoyo mwenyu. Ngendaa yembongoro dzenyu dzaiya dzarashika mazuva matatu akapinda, musatambudzika ndidzo; ngokuti dzaoneka. Kudisisa kweshe kwevaIsuraeri kwakaiswa panaani? Akuri kwouri here, nepadera pemhatso yeshe yababa ako?” Sauri wakapingura, akati, “Andisiri muBhenjamini here, wedzinza rakapindisisa kutsonga ramadzinza aIsuraeri? Nemhuri yangu yakapindisisa kutsonga pakati pemhuri dzeshe dzedzinza raBhenjamini. Ngenyi wechiereketa kudaro kwendiri?” Zvino Samueri wakatora Sauri nomuranda wake womurumbwana, akavaunza kumhatso yevaeni, akavagarisa pandau yakapindisisa kuremeredzeka pakati paavo vakakokwa, vaida kukwana makumi matatu evanhu. NaSamueri wakati kunomubiki, “Uya norupande rwendakakupa, urwo rwendakati kwouri, ‘Rungwarire.’ ” Mubiki wakatora chitho neizvo zvechaiya nazvo, wakachiisa pamberi paSauri. Samueri wakati, “Wona, iyo yakangwarirwa yaiswa pamberi pako. Idye; ngokuti yagadzikwa pamberi pako ngomukuwo wakaemeswa kuti udye nevanhu vakakokwa.” Ndizvo Sauri wakadya naSamueri ngeiro zuva. Naapo vadzaka kudhorobha, kubva pandau yakakwirira, mubhedhi wakachingirwa Sauri padera pemhatso naye wakaatapo. Zvino vakamuka mangwanani maishi mambakwedza, Samueri wakadaidza Sauri padera pemhatso echiti, “Muka ndikuendese.” NaSauri wakamiruka, navo vakaenda veshe kubanze mupato, iye naSamueri. Naapo vachadzaka kumagumo edhorobha, Samueri wakati kunaSauri, “Ronza murumbwana kuti apinde mberi (naye wakapinda), asi iwewe chimboema kamukuwo, kuti ndikupangidzire izwi raMwari.” Ndizvo Samueri wakatora runyanga rwemafuta, akadurura padera pesoro rake, akamuchingamidza ngomuromo, akati, “Mambo Mwari aazi kukudzodza here kuita mambo padera penhaka yake? Naapo wabva kwendiri nyamashi, unozoshongana nevanhu vairi pasinde peiba raRacheri, munyika yaBhenjamini paZeriza; vanozoti kwouri, ‘Mbongoro dzowakaenda kootsvaka dzaoneka; zvino, baba ako avachapinimidzi ngembongoro dzavo, asi votambudzika, vechiti, Ndinozoitenyi ngendaa yomukororo wangu?’ Zvino unozoangira kuenda mberi kubva apo, metsa waguma pamuokhi weThabhori; naapo unozoshongana nevanhu vatatu vechikwira kuenda Bhetheri kunaMwari, umwe akatwara zvimbudzana zvitatu, umweni akatwara zvingwa zvitatu, noumweni akatwara nyede yevhini. Navo vanozokuchingamidza, nokukupa zvingwa zviiri, izvo zvounozoashira kubva kunyara dzavo. Ngesure kweizvo unozoguma kumutunhu waMwari, apo pane chiunga chevaFiristia; naapo wechiguma kudhorobha, unozoshongana nechiunga chevaprofeti vechidzaka kubva kundau yakakwirira, vanembira, gandira, munanzi, nechimatende, vechiridza pamberi pavo; navo vanozoprofeta. Zvino mweya waMambo Mwari unozouya padera pako, newe unozoprofeta navo, unozotsandudzwa kuita munhu umweni. Zvino apo zvioniso izvi zvaitika kwouri, ita kunyazwi chinosisira kuitwa, ngokuti Mwari unewe. Newe unozodzaka Girigari kunditangira; zvino ndinozouya kwouri, koopira midiro yokunyarara. Unozogarira mazuva manomwe, metsa ndauya kwouri, nokukupangidza icho chounozoita.” Naapo afuratira kubva kunaSamueri, Mwari wakamupa mwoyo umweni; nezvioniso zveshe zvakaitika ngeiro zuva. Naapo vaguma paGibhea, chiunga chevaprofeti chakashongana naye; noMweya waMwari wakauya padera pake, naye wakaprofeta pakati pavo. Naapo veshe vaimuzia karetu vaona kuprofeta kwake pakati pevaprofeti, vanhu vakati umwe kunoumweni, “Chiinyi ichi chauya kumukororo waKishi? Sauri uri umwe wevaprofeti here?” Mwamuna wepandaupo wakapingura, akati, “Baba avo ndiani?” Ndizvo chakaita chisana kuti, “Sauri uri umwe wevaprofeti here?” Naapo apedza kuprofeta, wakaenda kundau yakakwirira. Sekuru aSauri akati kwaari nokumurumbwana wake, “Mwakaenda kuri?” Naye wakati, “Kootsvaka mbongoro; naapo taona kuti adzioneki nokuti pari, takaenda kunaSamueri.” Sekuru aSauri akati, “Ndapota, ndironzere icho chaakaereketa Samueri kwouri.” Sauri wakati kunasekuru wake, “Wakatironzera pamhene kuti mbongoro dzakaoneka.” Asi ngendaa youmambo hwaakaereketa ndihwo Samueri, aazi kumuronzera. Samueri wakadaidza vanhu kuungana kunaMambo Mwari paMizipha. Wakati kunevana vaIsuraeri, “Mambo Mwari, Mwari waIsuraeri, unoronza izvi, ‘Ndakabudisa Isuraeri kubva Egipite nokumusunhura kubva munyara dzevaEgipite, nokubva kunyara youmambo hweshe hwaimusunga.’ Asi imwimwi nyamashi mwaramba Mwari wenyu, uwo wakamuponesa kubva mukutamikirwa nokutambudzika kwenyu kweshe; nemwi mwakati kwaari, ‘Haiwa! Tiemesere mambo padera pedu.’ Ndizvo zvino dziunzenyi pachenyu pamberi paMambo Mwari ngamadzinza enyu nemhatso dzenyu.” Zvino Samueri wakaita kuti madzinza aIsuraeri eshe akwedzere pasinde, dzinza raBhenjamini rakatorwa ngemabhigidha. Wakaunza dzinza raBhenjamini pasinde mhuri ngemhuri, nemhuri yaMatri yakatsanangurwa ngemabhigidha. Pakugumisira wakaunza mhuri yaMatri pasinde munhu ngomunhu naSauri mukororo waKishi wakatsanangurwa ngemabhigidha. Asi vakamutsvaka, aazi kuoneka. Ndizvo vakabvunzazve kunaMambo Mwari vechiti, “Munhu uyu wauya pano here?” NaMambo Mwari wakapingura, “Ringira, unodzifisha munhunduru.” Zvino vakarumba, vakamutora kubvamwo. Naapo aema pakati pevanhu, waiya akareba kupinda munhu weshe kubvira pamafudzi ake. Samueri wakati kunevanhu veshe, “Munomuona here uwo wakatsanangurwa ndiMambo Mwari? Apanazve wakadai ndiye pakati pavanhu veshe.” Nevanhu veshe vakadaidzira vechiti, “Mambo pona mhera nariini.” Samueri wakaronzera vanhu tsika nemishando youmambo; wakazvinyora mubhuku nokuriisa pamberi paMambo Mwari. Zvino Samueri wakaendesa vanhu veshe kumhatso dzavo. Sauri wakaendawo kanyi kwake muGibhea; chakaenda naye chiunga chevanhu chaiya nomwoyo yaakagwama Mwari. Asi vanhu vakashata vakati, “Munhu uyu unozotiponesa ngokudini?” Navo vakamushoora, vakarekera kumuunzira zvipo. Asi iye wakanyarara. Ngesure kwemwedzi Nahashi muAmoni wakakwira, wakaaka kamba pasinde peJabheshigireadhi; nevanhu veshe vaJabheshi vakati kunaNahashi, “Ita chitenderano nesu, nesu tinozokushandira.” Asi Nahashi muAmoni wakapingura, “Ngenjira iyi ndinozoita chitenderano nemwi, kuti nditochore madziso enyu eshe okumudyo, nokuzviita chitsverudzo padera pevaIsuraeri veshe.” Vakuru veJabheshi vakati kwaari, “Tipei mazuva manomwe, kuti titume vanhu kunyika yeshe yaIsuraeri. Zvino, kuti kusina munhu wokutiponesa, tinozodzipira kwouri.” Naapo vanhu vakatumwa vakaguma kuGibhea, kanyi kwaSauri, vakaronzera vanhu mashoko mukuzwa kwavo, nevanhu veshe vakamirudza mazwi avo, vakachema. Zvino Sauri waibva kumunda echitinha kabi; naSauri wakati, “Indaa yenyi yaita kuti vanhu vacheme?” Ndizvo vakamuronzera mashoko avanhu veJabheshi. Nomweya waMwari wakauya padera paSauri ngesimba apo paakazwa mashoko awo, naye wakashatirwa kakurutu. Wakauraya kabi mbiri, akadzitematema kuita zvigurwa, nokuzvitumira kunyika yeshe yaIsuraeri ngenyara dzevanhu vakatumwa vechiti, “Kunyazwi ndiani usikauyi kooteera Sauri naSamueri, izvi zvinozoitwa kukabi dzake!” Nokutyisa kwaMambo Mwari kwakauya kunevanhu, navo vakauya ngomwoyo umwe. Naapo avaerenga muBhezeki avo vaibva Isuraeri vaiya mazana matatu emakumi emazana (300,000) nevamuna vaJudha vaiya makumi matatu emakumi emazana (30,000). Navo vakati kunenhumwa avo vakauya, “Munozoronza izvi kuvagari veJabheshigireadhi, ‘Mangwani apo zuva roopisha, munozoona kudetserwa.’ ” Nenhumwa dzakahwirira dzikazvironzera vagari veJabheshi, navo vakadakara. Ndizvo vagari veJabheshi vakati, “Mangwani tinozodzipira kwomuri, nemwi munozoita kwetiri zveshe zvomunoda.” Ngezuva rechimangwani Sauri wakaisa vanhu muzvikwata zvitatu; navo vakauya pakati pekamba mumambakwedza; vakauraya vaAmoni metsa zuva rapisha; navo vakasara vakaparadzwa zvokuti apana nevairi vavo vakasara pamwepo. Vanhu vakati kunaSamueri, “Ndiani avo vakati, ‘Sauri unozotitonga here?’ Vaunze vanhuwo kwetiri kuti tivauraye.” Asi Sauri wakati, “Apana unozourawa nyamashi; ngokuti nyamashi Mambo Mwari waunza ruponeso muIsuraeri.” Samueri wakati kunevanhu, “Uyai, ngatiende Girigari, kuti timusire umambo.” Ndizvo vanhu veshe vakaenda Girigari. Naapo vakaemesa Sauri kuita mambo pamberi paMambo Mwari muGirigari, naapozve vakapira midiro yokunyarara pamberi paMambo Mwari; naapo Sauri nevanhu veshe vaIsuraeri vakadakara kakurutu. Samueri wakati kuvaIsuraeri veshe, “Ndakapurutana izwi renyu nezveshe zvemwakaronza kwendiri, ndikamuemesera mambo padera penyu. Ringirai ndimambo unomutungamirira zvino; neni ndaa musharuka nokuchena, asi vakororo vangu vanemwi. Ndakamutungamirira kubvira muudoko hwangu metsa nanyamashi. Ndiri pano; itai chapupu ndini pamberi paMambo Mwari, nepamberi pewakadzodzwa wake. Ikabi yaani yendakatora? Nokuti imbongoro yaani yendakatora? Nokuti ndiani wendakachengedzera? Ndianizve wendakatambudza? Nokuti kunyara yaani yendakaashira chitengero kubata madziso angu ndicho? Chironzenyi, neni ndinozomupetudzira.” Vakati, “Auzi kutichengedzera, nokuti kutitambudza, nokuti kutora chitengero kubva kunyara yomunhu.” Naye wakati kwevari, “Mambo Mwari unoita chapupu ndimwi, nowakadzodzwa wake uri chapupu nyamashi kuti amuzi kuona chiro munyara mwangu.” Navo vakapingura, “Ndiye uri chapupu.” Samueri wakati kuvanhu, “Mambo Mwari ndiye chapupu, uwo wakaemesa Mosi naAroni, naye wakabudisa madzibaba enyu kubva kunyika yeEgipite. Ndizvo zvino emai, kuti titongane pamberi paMambo Mwari ngezviito zveshe zvakarurama zvaMambo Mwari, zvaakaita kwomuri nokumadzibaba enyu. Naapo Jakobe paakapinda muEgipite, namadzibaba enyu vakachema kunaMambo Mwari, naMambo Mwari wakatuma Mosi naAroni, avo vakabudisa madzibaba enyu kubva Egipite, akavaita kuti vagare mundau iyi. Asi vakariyarwa Mambo Mwari, Mwari wavo, naye wakavatengesa kunyara dzaSisera, nduna yehondo yaHazori, nomunyara dzevaFiristia, nomunyara dzamambo waMoabhi, vakarwa navo. Zvino vakachema kunaMambo Mwari, vakati, ‘Takashaisha, ngokuti takasiya Mambo Mwari, takashandira vanaBhaari naAshitharothi; asi zvino tisunhure kubva munyara dzemagaa edu, nesu tinozomushandira.’ NaMambo Mwari wakatuma Jerubhaari, Bharaki, Jefetha naSamueri, akamusunhura kubva kunyara dzemagaa enyu kundau dzeshe, nemwi mwakagarisika. Asi apo pemwakaona kuti Nahashi mambo wavaAmoni wakauya koomurwisa, mwakati kwendiri, ‘Haiwa, asi mambo unozotonga padera pedu;’ kunyazwi Mambo Mwari, Mwari wenyu waiya mambo wenyu. Ringirai, uyu ndiye mambo wemwakatsanangura, uwo wamwakakumbira! Ringirai Mambo Mwari wakaemesa mambo padera penyu. Kudai mwechizotya Mambo Mwari nokumushandira, nokupurutana izwi rake, musikamukiri mipango yaMambo Mwari, kudai imwimwi namambo unotonga padera penyu mukagwinya kuteera Mambo Mwari, Mwari wenyu, zvinozonaka. Asi kudai musikazopurutani izwi raMambo Mwari, mwechirwisana nemipango yaMambo Mwari, nyara yaMambo Mwari inozomurwisa, kudai ngezveyakaita kumadzibaba enyu. Ndizvo zvino emai, muone ichi chiro chikuru, chaanozoita Mambo Mwari pamberi pemadziso enyu. Amukuwo wokukukura koroni here nyamashi? Ndinozodaidza kunaMambo Mwari, naye unozotuma mheni nemvura, kuti muzie nokuona kuti kushaisha kwenyu kwakakura kwemwakaita mukuona kwaMambo Mwari ngokudzikumbirira mambo.” Ndizvo Samueri wakadaidza kunaMambo Mwari, naMambo Mwari wakatuma mheni nemvura ngeiro zuva; navanhu veshe vakatya Mambo Mwari naSamueri kakurutu. Vanhu veshe vakati kunaSamueri, “Kumbirira varanda vako kunaMambo Mwari, Mwari wako, kuti tisafa; ngokuti takatutsira kushaisha uku kuzvishaishi zvedu zveshe, ngokudzikumbirira mambo pachedu.” NaSamueri wakati kunevanhu, “Musatya; mwakaita kushaisha kweshe uku, asi musapauka kubva mukuteera Mambo Mwari, asi shandirai Mambo Mwari ngomwoyo yenyu yeshe. Musapauka kurutii kutsvaka zviro zvisina shwiro, zvisikadetseri nokuti kusunhura; ngokuti azvina shwiro. Ngokuti Mambo Mwari aazosiyi vanhu vake ngendaa yezina rake guru; ngokuti zvakadakadza Mambo Mwari kuti amuite vanhu vake. Ndizvo neniwo, Mwari asazotenda kuti ndishaishe kunaMambo Mwari ngokurekera kumukumbirira; neni ndinozomudzidzisa njira yakanaka neyakarurama. Ityai Mambo Mwari, mwechimushandira mukugondeka ngomwoyo wenyu weshe; ngokuti pinimidzai kukura kwezviro zvaakamuitira. Asi kuti mwechizoangira kushaisha, munozopedzwa, mweshe imwimwi namambo wenyu.” Sauri waiya aane makore makumi matatu paakatanga kutonga, naye wakatonga makore makumi marongomuna namairi padera paIsuraeri. Wakadzitsanangurira vanhu vaiya makumi emazana matatu (3,000); makumi emazana mairi (2,000) vaiya naSauri muMikhimashi nomunyika yemitunhu yeBhetheri, negumi rimwe remazana (1,000) raiya naJonathani muGibhea raBhenjamini; naye wakapetudza vamweni veshe kumatende avo. Jonathani wakanyisa chikwata chehondo chevaFiristia muGebha, nevaFiristia vakazvizwa. NaSauri wakaridza gwama munyika yeshe echiti, “VaHebheru ngavazwe.” Naapo vaIsuraeri veshe vakazwa kuti Sauri waiya anyisa chikwata chehondo chevaFiristia, nokutizve vaIsuraeri vaiya vaizwa chiro chinonyangadza ngevaFiristia, vanhu vakaunganidzwa kuteera Sauri kuenda Girigari. VaFiristia vakadziunganidza kurwa nevaIsuraeri, makumi matatu emakumi emazana (30,000) engoro, makumi emazana matanhatu (6,000) evagadhi vemahachi, nevanhu vehondo vakawanda kudai ngejecha remahumbikumbi yoruandhle. Vakakwira, vakaaka matende muMikhimashi kumabvazuva kweBhethiavheni. Naapo vanhu vaIsuraeri vaona kuti vaa mungozi (ngokuti vanhu vehondo vaiya vamanikidzwa), vanhu vakadzifisha mumapako nomumakwasha, pakati pemapuwe, mundau dzakakwirira nomumirindi. Vamweni vevaHebheru vakaambuka seri kweJorodhani kunyika yaGadhi neyaGireadhi. Asi Sauri waiya achiri muGirigari, navanhu veshe vakamuteera vechihuta. Wakagarira mazuva manomwe, mukuwo wakaemeswa ndiSamueri; asi Samueri aazi kuuya Girigari, nevanhu vakaparara kubva kunaSauri. Ndizvo Sauri wakati, “Unzai kwendiri mudiro wokupisha nemidiro yokunyarara.” Naye wakapira mudiro wokupisha. Naapo achapedza kupira mudiro wokupisha, Samueri wakabva aguma; naSauri wakabuda kooshongana naye nokumuchingamidza. Samueri wakati, “Waitenyi?” Sauri wakati, “Naapo pendakaona kuti vanhu vaiparara kubva kwendiri, nokuti auzi kuuya ngamazuva awakaronza, nokutizve vaFiristia vakaungana paMikhimashi, ndakati, ‘Zvino vaFiristia vanozouya padera pangu paGirigari, neni ndisati ndakumbira Mwari kundidetsera;’ ndizvo ndakadziangiridza kupira mudiro wokupisha.” Samueri wakati kunaSauri, “Wakaita zvoupenzi; auzi kungwarira mupango waMambo Mwari, Mwari wako, waakakupanga. Ngokuti Mambo Mwari waida kuemesa umambo hwako padera paIsuraeri mhera nariini. Asi zvino umambo hwako ahuzogari. Mambo Mwari watsvaka munhu unodiwa ngomwoyo wake, naMambo Mwari wakamuemesa kuita mutungamiriri wevanhu vake, ngokuti iwewe auzi kungwarira icho chaakakupanga Mambo Mwari.” NaSamueri wakamiruka kubva Girigari kuenda Gibhea raBhenjamini. NaSauri wakaerenga vanhu vaiya naye, vaida kuita mazana matanhatu (600) evanhu. Sauri, naJonathani mukororo wake, nevanhu vaiya navo, vakagara muGibhea raBhenjamini; asi vaFiristia vakaaka kamba muMikhimashi. Nevachakati vakabuda mukamba yavaFiristia zvikwata zvitatu; chikwata chimwe chakaenda nenjira yaienda Ofira, kunyika yaShuari, nechikwata chimweni chakaenda nenjira yeBhethihoroni, nechikwata chimweni chakaenda nenjira yokumutunhu unoringirana nebani reZebhoimu pasinde nerubaya. Zvino mwaiya musina mupfuri munyika yeshe yaIsuraeri; ngokuti vaFiristia vakati, “VaHebheru ngavarekere kudzipfurira shoti nokuti mikhondo.” Ndizvo vaIsuraeri veshe vaidzaka kuvaFiristia, munhu weshe koorodzera banga rake, muromo webadza rake, sanho rake, nekasanho kake. Mutengo wokurodzera mabadza nembezo waiita zvigurwa zvemare zviiri, masanho nezvokukwengesa ndizvo n'ombe waiita chigurwa chemare chimwe. Ndizvo ngezuva rokurwa hondo, paiya pasina shoti nokuti mukhondo zvakaoneka munyara yomunhu weshe waiya naSauri naJonathani; asi Sauri naJonathani mukororo wake zvakaoneka. Zvino chikwata chokurwa hondo chevaFiristia chakabuda kuenda pamukana weMikhimashi. Ngezuva rimweni Jonathani mukororo waSauri wakati kunejaha raitwara chihlangu chake, “Uya, ngatiende kukamba yechikwata chevaFiristia, iyo iri kurutii rumweni.” Asi aazi kuronzera baba ake. Sauri waigara kumagumo eGibhea pashi pomuti womuphomegraniti waiya muMigroni; nevanhu vehondo vaiya naye vaida kukwana mazana matanhatu (600). NaAhija mukororo waAhithubhi, mukoma waIkhabhodhi, mukororo waFinehasi, mukororo waEri, mupristi waMambo Mwari muShiro wakapfeka efodhi. Zvino vanhu avazi kuzia kuti Jonathani waiya aenda. Pakati pemikana apo paakatsvaka Jonathani kuenda ndipo kuchikwata chevaFiristia, paiya nebuwe kurutii rumwe, nebuwe rakapinza kurutii rumweni; nezina rerimwe rawo raizwi Bhozezi, nezina rerimweni raizwi Sene. Muromo werimweni waiya wakaema dera pasinde peMikhimashi, nebuwe rimweni ngokubani raiya rakaema pasinde peGebha. Jonathani wakati kunejaha raitwara chihlangu chake, “Uya, ngatiende kuchikwata chaava vasikazi kuchekwa; pamweni Mambo Mwari ungatishandira; ngokuti akuna chiro chingarambidza kunaMambo Mwari kuponesa ngavazhinji nokuti ngavashomani.” Mutwari wechihlangu chake wakati kwaari, “Ita zveshe zviri mumwoyo mwako. Inini ndinewe, kudai ngomweya wako.” Zvino Jonathani wakati, “Zvino, tinozoambuka kuneavo vanhu, tinozodzionisa kwavari. Kuti avo vanhu vati kwetiri, ‘Garirai metsa tiuye kwomuri,’ ndizvo tinozoema takanyarara mundau yedu, atizoendi kwevari. Asi kuti vati, ‘Uyai kwetiri,’ ndizvo tinozoenda; ngokuti Mambo Mwari wavapira munyara dzedu. Icho chinozoita chioniso kwetiri.” Ndizvo veshe vairi vakadzionisa pachavo kuchikwata chevaFiristia; nevaFiristia vakati, “Ringirai, vaHebheru vabuda mumirindi umwo mwavaiya vakadzifisha.” Vanhu vechikwata vakapingura Jonathani nomutwari wechihlangu chake, vakati, “Uyai kwetiri, nesu tinozokupangidzira chiro.” Jonathani wakati kumutwari wechihlangu chake, “Nditeere, ngokuti Mambo Mwari wavapira munyara dzavaIsuraeri.” Zvino Jonathani wakakwira ngokutamanda ngemaoko netsoka, nomutwari wechihlangu chake echiteera sure kwake. VaFiristia vakawa pamberi paJonathani; nomutwari wechihlangu chake wakavauraya ngesure kwake. Noukwo kuuraya kwokutanga kwaakaita Jonathani nomutwari wechihlangu chake, vakauraya vanhu makumi mairi, mukati mwendau yaiya inenharauko yeekha. Kwaiyapo kuhuta mukamba murubaya, napakati pevanhu veshe; chikwata cheshe nevachakati vakahutawo, nenyika yakazungunyika; ndizvo kwaiya kuri kuzungunyika kukurutu. Varindi vaSauri muGibhea raBhenjamini vakaringira, vakaona mbungano yechingarangaka, vechienda apo naapo. Zvino Sauri wakati kuvanhu vaiya naye, “Erengai zvino, muone kuti ndiani waenda kubva kwetiri.” Naapo vaerenga, vakaona Jonathani nomutwari wechihlangu chake vaiya vasipo. Sauri wakati kuna Ahija, “Unza pano bhokisi rechitenderano chaMwari.” Ngokuti ngenguva iyo bhokisi rechitendero chaMwari raiya nevana vaIsuraeri. Naapo Sauri achaereketa kumupristi, bope raiya pakati pehondo yevaFiristia rakaangira kukura. NaSauri wakati kumupristi, “Pfinyisa muoko wako.” Zvino Sauri nevanhu veshe vaiya naye vakaungana, vakaenda koorwa; vakaona vaFiristia vechirwisana ngeshoti pachavo, kwaiyapo kukangaidzwa kukurutu. Zvino vaHebheru vaigara nevaFiristia karetu, avo vakaenda navo mukamba kubva kunyika yaitendenedza, navowo vakapetuka, vakabatana nevaIsuraeri avo vaiya naSauri naJonathani. Ndizvo vanhu veshe vaIsuraeri vaiya vakadzifisha munyika yemitunhu yaEfuremu, vakazwa kuti vaFiristia vatiza, navowo vakavarumbirira nokuvarwisa. Ndizvo Mambo Mwari wakaponesa vaIsuraeri ngeiro zuva. Kurwisana kwakapinda kuenda mberi kweBhethiavheni. Vanhu vaIsuraeri vakatambudzika ngeiro zuva ngokuti Sauri waiya apikira vanhu mhiko echiti, “Ngaatukwe munhu uwo unodya kudya kusati kwaita madeekoni, metsa ndaona kuunzidzirwa padera pemagaa angu.” Ndizvo akuna munhu wehondo naumwe wakaraira chokudya. Varwi vehondo veshe venyikayo vakaguma kugwasha; vakaona uchi pamavhu. Naapo vanhu vachapinda mugwasha, vakaona uchi hwaidonha pashi; asi apana munhu wakahudya, ngokuti vanhu vakatya mhiko. Asi Jonathani aazi kuzwa apo baba ake paakapanga vanhu vehondo ngemhiko; ndizvo wakatambanudza ndonga yaiya munyara yake, akainyika mumisoro youchi, naye wakadya; namadziso ake akabeurwa. Ndizvo umwe wevanhu vehondo wakapingura, akati, “Baba ako vakapangisisa vanhu ngemhiko vechiti, ‘Ngaatukwe munhu uwo unodya kudya nyamashi.’ Ndizvo vanhu vehondo vakademera.” Zvino Jonathani wakati, “Baba angu vakatambudza nyika; wonai, ndapota, kubeurwa kwaakaita madziso angu, ngokuti ndakaraira zvishomani uhu uchi. Akungapindi kunaka here kudai vanhu vehondo vadya nyamashi zveizvo zvakachakatwa zvavaona kubva kumagaa avo? Ngokuti zvino kwaizoapo kuurawa kwakapinda kukura pakati pevaFiristia.” Vapedza kunyisa vaFiristia ngeiro zuva kubva Mikhimashi kuguma Aijaroni, vanhu vehondo vakademera kakurutu. Ndizvo vanhu vakabvuka zvakachakatwa, vakatora makwai, n'ombe, nemakonyana, vakazviuraira pashi; vanhu vakadya zvinengazi. Ndizvo vakaronzera Sauri vechiti, “Ringira, vanhu vanoshaisha kunaMambo Mwari, ngokudya zvinengazi.” Naye wakati, “Mwapauka; mburumbudzai buwe guru pamberi pangu nyamashi.” Sauri wakati, “Dziparadzirei pachenyu pakati pevanhu vehondo, mwechiti kwevari, ‘Ndiunzirenyi munhu weshe kabi yake, nomunhu weshe gwai rake, mwechizviuraya, mwechidya; musikashaishi kunaMambo Mwari ngokudya zvinengazi.’ ” Ndizvo vanhu vehondo veshe vakaunza munhu weshe kabi yake ngouhwo usiku, vakazviurayapo. NaSauri wakaaka arita kunaMambo Mwari, raiya arita rokutanga raakaaka kunaMambo Mwari. NaSauri wakati, “Ngatiteere vaFiristia muusiku, tivachakate metsa mangwani mangwanani; tisasiya munhu naumwe wavo.” Vakati, “Ita izvo zvinokunakira.” Asi mupristi wakati, “Ngatikwedzere pasinde naMwari pano.” Ndizvo Sauri wakakumbira kupanga kwaMwari. “Ndingateera vaFiristia here? Unozovapira munyara dzevaIsuraeri here?” Asi aazi kumupingura ngeiro zuva. Sauri wakati, “Kwedzerai pano, imwimwi vakuru vevanhu; ngatitsvake tione kuti kwabva pari kushaisha uku nyamashi. Ngokuti kudai ngezvaanopona Mambo Mwari, uwo unoponesa Isuraeri, kunyazwi kuri munaJonathani mukororo wangu, ngegwinyiso unozofa.” Asi paiya pasina munhu naumwe pakati pevanhu veshe wakamupingura. Ndizvo wakati kunevaIsuraeri veshe, “Emai kurutii rumwe, inini naJonathani mukororo wangu tinozoema kurutii rumweni.” Vanhu vakati kunaSauri, “Ita icho chinokunakira.” Ndizvo Sauri wakati kunaMambo Mwari, Mwari waIsuraeri, “Pangidzira ngemabhigidha anegwinyiso.” Ndizvo mabhigidha akabata Sauri naJonathani, asi vanhu vakapembedzwa. Zvino Sauri wakati, “Itai mabhigidha pakati pangu naJonathani mukororo wangu.” NaJonathani wakabatwa. Ndizvo Sauri wakati kunaJonathani, “Ndironzere icho chowaita.” NaJonathani wakamuronzera, akati, “Ndakaraira zviuchi zvishomani kumagumo kwendonga yaiya munyara yangu. Inini ndiri pano ngandife.” Sauri wakapingura, akati, “Mwari ngaaite kudaro nokwakapindisisa kwendiri; ngokuti ngegwinyiso unozofa, Jonathani.” Zvino vanhu vakati kunaSauri, “Jonathani unozofa here, uwo wakaita ruponeso urwu rukuru muIsuraeri? Haiwa! Mwari asazotenda! Kudai ngezvaanopona Mambo Mwari, akuna nebvudzi narimwe resoro rake rinozowa pashi; ngokuti washanda naMwari nyamashi.” Ndizvo vanhu vakaponesa Jonathani naye aazi kufa. Ndizvo Sauri wakarekera kuteera vaFiristia; navaFiristia vakaenda kundau yavo. Sauri atora umambo hwaIsuraeri, wakarwa nemagaa ake kundau dzeshe, vaMoabhi, vaAmoni, vaEdhomu, nemadzimambo eZobha, navaFiristia; kundau dzeshe dzaakaenda, wakavanyisa. Wakaunganidza hondo, wakauraya vaAmareki, wakasunhura Isuraeri kubva kunyara dzavo vakavachakata. Zvino vakororo vaSauri vaiya Jonathani, Ishivhi, naMarikhishua; nemazina evanasikana vake vairi vaizwi, wokutanga Merabhi, neromudoko Mikhari. Zina romukadzi waSauri raizwi Ahinoamu, mukunda waAhimaazi. Zina renduna yehondo yake raizwi Abhina, mukororo waNeri, sekuru aSauri. Kishi waiya baba aSauri; naNeri, baba aAbhina, waiya mukororo waAbhieri. Kwaiyapo kurwa kwakakura nevaFiristia mazuva eshe aSauri. Naapo Sauri paakaona ngwazi nokuti munhu wakashinga, waimutora kugara naye muhondo yake. Samueri wakati kunaSauri, “Mambo Mwari wakandituma kuti ndikudzodze kuita mambo padera pevanhu vake, vaIsuraeri; ndizvo zvino purutana mazwi aMambo Mwari. Unoronza izvi Mambo Mwari wehondo, ‘Ndinozoorora vaAmareki ngendaa yezvevakaita kurambira vaIsuraeri njira, apo pevakabuda kubva Egipite. Enda zvino urwise Amareki, nokuparadza yaamho zveshe zvevanazvo; usakungurira naumwe, asi uraya veshe, vamuna nevakadzi, vana, chiya nevachabva kubarwa, n'ombe nemakwai, makamera nezvimbongora.’ ” Ndizvo Sauri wakaunganidza vanhu pamwepo, wakavaerenga muTheraimu, mazana mairi emakumi emazana, (200,000) evarwi vehondo vanohamba ngetsoka, negumi remakumi emazana (10,000) evanhu vaJudha. Sauri wakauya kudhorobha raAmareki, akavahwarira mubani. NaSauri wakati kuvaKheni, “Endai, ibvai! Budai kubva pakati pevaAmareki, kuti ndisazomuuraya pamwepo navo; ngokuti mwakaitira nyasha vana vaIsuraeri veshe apo pevakabuda kubva muEgipite.” Ndizvo vaKheni vakabuda kubva pakati pevaAmareki. Sauri wakanyisa vaAmareki, kubvira Havhira metsa kuguma Shuri riri kumabvazuva eEgipite. Wakatora Agagi mambo wevaAmareki echizwa asi wakauraya vanhu veshe ngeshoti. Sauri nevanhu vehondo vakaponesa Agagi, makwai akanaka, n'ombe dzakanaka nedzakakora, nevana vemakwai, neizvo zveshe zvaiya zvakanaka, vasikazi kuuraya zveshe; asi izvo zvaiya zvakaonda nokushooreka, zveshe vakazviparadza yaamho. Izwi raMambo Mwari rakauya kunaSamueri rechiti, “Ndinosvipa mwoyo kuti ndakaemesa Sauri kuita mambo; ngokuti wakapauka kubva mukunditeera, naye aazi kuteera mipango yangu.” Samueri wakashatirwa, naye wakachema kunaMambo Mwari usiku hweshe. Samueri wakamuka mangwanani kooshongana naSauri. Samueri wakaronzerwa kuti, “Sauri waenda kuKharmeri, iyo kwaakadziitira chithombi, wakapauka, akapinda kudzaka Girigari.” Naapo Samueri wakauya kunaSauri, Sauri wakati kwaari, “Mambo Mwari ngaakufumise; ndakaita mipango yaMambo Mwari.” Asi Samueri wakati, “Zvino uku kurira kwemakwai kunoronzenyi munzee dzangu? Nokurirazve kwen'ombe kwendinozwa?” Sauri wakati, “Vakabva nadzo kuvaAmareki; ngokuti vanhu vakangwarira dzakapinda kunaka dzemakwai, nedzen'ombe, kuita mudiro kunaMambo Mwari, Mwari wako; asi dzakasara takauraya dzeshe.” Zvino Samueri wakati kunaSauri, “Nyarara, neni ndinozokuronzera icho charonza Mambo Mwari kwendiri usiku huno.” Naye wakati kwaari, “Ereketa hako.” Samueri wakati, “Kunyazwi iwewe uchakatsonga mukuona kwako, auzi kuemeswa kuita mukuru wemadzinza aIsuraeri here? Mambo Mwari wakakudzodza kuita mambo padera paIsuraeri. Mambo Mwari wakakutuma, akati, ‘Enda, uparadze vashaishi vaAmareki, nokurwisana navo metsa vapedzwa.’ Ngenyi zvino usikazi kupurutana izwi raMambo Mwari? Ngenyi wakabvuka zvakachakatwa, ukaita zvakashata mukuona kwaMambo Mwari?” Sauri wakati kunaSamueri, “Eya, ndakapurutana izwi raMambo Mwari, ndikaenda ngenjira yaakandituma Mambo Mwari, ndikaunza Agagi mambo wavaAmareki nokuparadza kakurutu vaAmareki. Asi vanhu vakatora zvakachakatwa, makwai, nen'ombe, zvakapindisisa kunaka zveizvo zvakaemeserwa kuparadzwa kakurutu, kuita mudiro kunaMambo Mwari, Mwari wako muGirigari.” NaSamueri wakati, “Mambo Mwari unokudakara kumidiro yokupisha, nemidiro kupinda kupurutana izwi raMambo Mwari here? Ngegwinyiso kupurutana kwakapinda kunaka kunemidiro, nokupurutana, kunemafuta emagondohwe. Ngokuti kumukira kwakadai ngechishaishi chouroyi, nokusikazwa kwakadai ngokushaisha kwokudira miedzaniso. Ngokuti iwewe wakaramba izwi raMambo Mwari, iye wakakurambawo kuti usachaita mambo.” Sauri wakati kunaSamueri, “Ndakashaisha, ngokuti ndakapaukisa mipango yaMambo Mwari nemazwi ako; ngokuti ndakatya vanhu, ndikapurutana mazwi avo. Ndizvo zvino, ndapota, rekerera kushaisha kwangu, wechipetukazve neni, kuti ndidire Mambo Mwari.” Samueri wakati kunaSauri, “Andizopetuki newe, ngokuti iwewe wakaramba izwi raMambo Mwari, naMambo Mwari wakakuramba kuti usachaita mambo padera paIsuraeri.” Naapo Samueri atenderuka kuenda, Sauri wakabata mupendero wenguwe yake, nayo yakabauka. NaSamueri wakati kwaari, “Mambo Mwari wagura umambo hwaIsuraeri nyamashi kubva kwouri, wahupa kumuakirwana wako, uwo wakapinda kunaka kuneiwewe. Uyezve Uthende hwaIsuraeri auzonyepi nokuti kutenderuka; ngokuti aari munhupi kuti atenderuke.” Zvino Sauri wakati, “Ndashaisha; asi ndiremeredze zvino pamberi pevakuru vevanhu vangu, napamberi pevaIsuraeri, wechipetukazve neni kuti ndidire Mambo Mwari, Mwari wako.” Ndizvo Samueri wakapetuka kuenda naSauri; naSauri wakadira Mambo Mwari. Zvino Samueri wakati, “Unza kwendiri Agagi mambo wevaAmareki.” NaAgagi wakauya kwaari ngokudakara. Agagi wakati, “Ngegwinyiso kurwadziwa kwokufa kwapera.” Asi Samueri wakati, “Kudai ngeshoti yako yakaita kuti vakadzi vasaita vana, ndizvo mai ako avazoiti nemwana pakati pevakadzi.” NaSamueri wakagura Agagi kuita zvigurwa pamberi paMambo Mwari muGirigari. Zvino Samueri wakaenda Rama; naSauri wakakwira kumhatso yake kuGibhea raSauri. Samueri aazi kuchazoonazve Sauri metsa pazuva rokufa kwake, asi Samueri wakachema Sauri. Mambo Mwari wakadzishoora kuti waiya akaemesa Sauri kuita mambo padera paIsuraeri. Mambo Mwari wakati kunaSamueri, “Unozochema Sauri mukuwo wakadini? Ndakamuramba kuti asachaita mambo padera paIsuraeri. Dzadza runyanga rwako ngemafuta, uende; ndinozokutuma kunaJesi, muBhetherehema, ngokuti ndakadzionera mambo pakati pevakororo vake.” Samueri wakati, “Ndingaita maenderenyi? Kudai Sauri echizwa unozondiuraya.” NaMambo Mwari wakati, “Tora tsiru, uende naro wechiti, ‘Ndauya koopira mudiro kunaMambo Mwari.’ Wechidaidza Jesi kumudiro uyu, neni ndinozokupangidzira icho chounozoita; newe unozondidzodzera uwo wendinozokuronzera.” Samueri wakaita zvaakapangwa ndiMambo Mwari, wakauya kuBhetherehema. Vakuru vedhorobha vakauya kooshongana naye vechihuta, vakati, “Unouya mukunyarara here?” Naye wakati, “Mukunyarara; ndauya koopira mudiro kunaMambo Mwari; dzichenesei pachenyu, muuye neni kumudiro.” Naye wakachenesa Jesi nevakororo vake, wakavadaidza kumudiro. Naapo vauya, wakaringira Eriabhi, akati, “Ngegwinyiso wakadzodzwa waMambo Mwari ndiye uri pamberi paMambo Mwari.” Asi Mambo Mwari wakati kunaSamueri, “Usaringira hope yake, nokuti kureba kwomutumba wake, ngokuti ndakamuramba; ngokuti Mambo Mwari aaringiri kudai ngokuringira kwomunhu; munhu unoringira chiemo chokubanze, asi Mambo Mwari unoringira mumwoyo.” Zvino Jesi wakadaidza Abhinadhabhi, wakaita kuti apinde pamberi paSamueri. Naye wakati, “Mambo Mwari aazi kutsanangura uyu.” Zvino Jesi wakaita kuti Shama apindewo ndipo. Naye wakati, “Mambo Mwari aazi kutsanangurazve uyu.” Jesi wakaita kuti vakororo vake vanomwe vapinde pamberi paSamueri. NaSamueri wakati kunaJesi, “Mambo Mwari aazi kutsanangura naumwe weava.” NaSamueri wakati kuna Jesi, “Vana vako vari pano veshe here?” Naye wakati, “Uripo mudoko wacho yaamho, asi unousha makwai.” NaSamueri wakati kunaJesi, “Tuma munhu, umutore; ngokuti atizogari pashi metsa auye pano.” Wakatuma munhu, akamuunza mukati. Zvino waiya mutsvuku, anemadziso akanaka, naye akanaka kuringirika. Mambo Mwari wakati, “Miruka, umudzodze; ngokuti ndiye uyu.” Zvino Samueri wakatora runyanga rwemafuta, akamudzodza pamberi pevakoma vake; noMweya waMambo Mwari wakauya padera paDhavhidha kubvira ngeiro zuva kuenda mberi. Zvino Samueri wakamiruka, akaenda Rama. Zvino Mweya waMambo Mwari wakabva kunaSauri, nomweya wakashata wakabva kunaMambo Mwari wakamutambudza. Nevaranda vaSauri vakati kwaari, “Ringira zvino, mweya wakashata unobva kunaMwari unokutambudza. Mambo wedu ngaapange varanda vake vari pamberi pako, kutsvaka munhu, uwo uri ngwazi yokuridza minanzi; naapo mweya wakashata unobva kunaMwari wauya padera pako, iye unozoridza ngenyara yake, newe unozoita nane.” Ndizvo Sauri wakati kuvaranda vake, “Nditsvakirei zvino munhu ngwazi ungaridza zvakanaka, mumuunze kwendiri.” Umwe wevaranda vadoko wakapingura, akati, “Ringira, ndaona mukororo waJesi muBhetherehema, ngwazi yokuridza, munhu unesimba nokushinga, munhu wehondo, wakangwara mukuereketa, nomunhu unoringirika, naMambo Mwari unaye.” Ndizvo Sauri wakatuma nhumwa kunaJesi, akati, “Nditumire Dhavhidha mukororo wako, uwo unousha makwai.” Jesi wakatora mbongoro inomutwaro wezvingwa, nembudu yevhini, nechimbudzana, akazvitumira naDhavhidha mukororo wake kunaSauri. Dhavhidha wakauya kunaSauri, akaema pamberi pake. Sauri wakamuda kakurutu, wakamuita mutwari wechihlangu chake. Sauri wakatuma izwi kunaJesi echiti, “Tendera Dhavhidha kuema pamberi pangu, ndapota, ngokuti unodikanwa kwendiri.” Naapo mweya wakashata unobva kunaMwari waiya padera paSauri, Dhavhidha wakatora munanzi, akaridza ngenyara yake, naSauri wakadetserwa, naye waizoita nane, nomweya wakashata waibva mwaari. Zvino vaFiristia vakaunganidza hondo dzavo kurwa; vakaungana paSokho raJudha, vakaaka matende pakati peSokho naAzeka, muEfesidhamimu. NaSauri navanhu vakaungana, vakaemesa matende avo mubani raEra, vakanasirira kurwa navaFiristia. VaFiristia vakaema pamutunhu parutii rumwe, nevaIsuraeri vakaema pamutunhu parutii rumweni, pane bani pakati pavo. Naapo ngwazi yevaFiristia yakabuda kubva mukamba, zina rayo raizwi Goriathi weGathi, kureba kwayo kwaida kuita mamitha matatu. Nayo yaiya nechiqoko chethusi musoro rayo, nayo yakapfeka bhachi regangautare; nokurema kwebhachi kwaida kuita makhirogramu makumi mashanu nemanomwe ethusi. Nayo yaiya nezvihlangu zvethusi mumirenje yayo, nekachihlangu kethusi pakati pemakhadza ayo. Chibato chomukhondo wayo chaiya chakadai ngomuti womuruki, nomuromo womukhondo wayo wairema makhirogramu manomwe outare; nomutwari wayo wechihlangu wakaenda pamberi payo. Nayo yakaema yechidaidzira kuhondo dzaIsuraeri, yechiti kwevari, “Mwauya ngenyi koorwa? Ndiri muFiristia neimwimwi amuri varanda kunaSauri here? Dzitsanangurirenyi munhu wenyu kuti adzake kwendiri. Kuti echikona kurwa neni nokundiuraya, zvino tinozoita varanda venyu; asi kuti ndikamunyisa nokumuuraya, zvino imwimwi munozoita varanda vedu nokutishandira.” NomuFiristia wakati, “Ndinoshoora hondo dzaIsuraeri nyamashi! Ndipei munhu kuti tirwe.” Naapo Sauri nevaIsuraeri veshe vazwa mazwi awo omuFiristia, vakapera simba nokutya kukurutu. Zvino Dhavhidha waiya mukororo womuEfrathi weBhetherehema raJudha, zina rake raizwi Jesi, uwo waiya nevakororo vasere. Jesi waiya aamusharuka ngamazuva aSauri. Vakororo vakuru vaJesi vatatu vakateera Sauri kuhondo; mazina evakororo vatatu vakaenda kuhondo vaiya Eriabhi dangwe, nowechipiri sure kwake Abhinadhabhi, nowechitatu Shama. Dhavhidha waiya mudoko wavo veshe; vatatu vakuru vakateera Sauri. Asi Dhavhidha wakaenda nokupetuka kubva kunaSauri koousha makwai ababa ake muBhetherehema. Mazuva makumi marongomuna muFiristia wakakwedzera kutora ndau yake mangwanani nemadeekoni. Jesi wakati kunaDhavhidha mukororo wake, “Torera vakoma vako efa rekoroni yakakangwa, nezvingwa izvi gumi, nokurumba nazvo kukamba kunevakoma vako. Zve, twara idzi chizi gumi kunenduna yegumi remazana. Uringire kugara kwavakoma vako kuti kwadini, wechitora mhete yavo.” Zvino Sauri navo, navanhu veshe vaIsuraeri vaiya muBani raEra, vechirwa nevaFiristia. Dhavhidha wakafumira kumuka mangwanani maishi, wakasiya makwai nomuushi, wakatora zviro, akaenda, kudai ngezvaaiya apanga Jesi. Wakaguma pakamba, apo hondo yaiya yechienda koorwa, vechidaidzirwa hondo. VaIsuraeri nevaFiristia vaikwedzerana koorwa hondo nehondo. NaDhavhidha wakasiya mutwaro wake munyara yomungwariri wemitwaro, wakarumba kupinda muhondo, wakauya, akachingamidza vakoma vake. Naapo echiereketa navo, kwakauya ngwazi yomuFiristia weGathi kubva kuhondo dzevaFiristia, zina rake ndiGoriathi, naye wakaereketa mazwi amwewo aaimboereketa; naDhavhidha wakamuzwa. Naapo vanhu vaIsuraeri veshe pevakaona munhu uwo, vakamutiza, vakatya kakurutu. Vamuna vaIsuraeri vakati, “Mwaona here uyu munhu wauya? Ngegwinyiso wauya kooshoora hondo yaIsuraeri. Mambo unozomupfumisa kakurutu kunyazwi ndiani unomuuraya, naye unozomupa mwanasikana wake, nokusunhurika kwemhatso yababa ake muIsuraeri.” Dhavhidha wakaereketa kuvanhu vaiya vakaema pasinde pake echiti, “Chiinyi chinozoitwa kunomunhu unouraya muFiristia uyu, nokudusa kushoorwa kwaIsuraeri? Ngokuti ndiani uyu muFiristia usikazi kuchekwa, kuti ashoore hondo yaMwari unopona?” Vanhu vakamupingura ngenjira imweyo, “Ndizvo kunozoitwa kudaro kunomunhu unomuuraya.” Eriabhi mukoma wake mukuru wakazwa kuereketa kwake nevanhu; noushungu hwaEriabhi hwakabaka kunaDhavhidha. Wakati, “Wakadzakirenyi uno? Wakasiya nani makwai ako mashomani mushango? Ndinozia kudzikudza kwako nokushata kwomwoyo wako, ngokuti wadzaka uno kuona hondo.” Dhavhidha wakati, “Ndaitenyi zvino? Kwaiya kubvunza kwega.” Wakamufuratira akaringira kunoumweni, wakaereketa mazwi amwewo; nevanhu vakamupingura kudai ngokutanga. Naapo mazwi akaereketwa ndiDhavhidha azwika, vakaaronzazve pamberi paSauri; naye wakamudaidza. Dhavhidha wakati kunaSauri, “Kusazoapo naumwe mwoyo womunhu unopera simba ndiye; muranda wako unozoenda koorwa nomuFiristia uyu.” Sauri wakati kunaDhavhidha, “Iwewe aune simba rokuenda koorwa nouyu muFiristia; ngokuti uri mudoko, naye munhu wehondo kubvira muutsva hwake.” Asi Dhavhidha wakati kunaSauri, “Muranda wako waiausha makwai ababa ake; kunyazwi kwakaguma mhondoro nebheya koobata hwai kubva mumutanga, ndakaiteera, ndikaichaya ndikabvuka gwai kubva pamuromo wayo; kudai yaindirwisa, ndaibata ngomuhlathi, ndaichaya, ndaiuraya. Muranda wako wakauraya zveshe, mhondoro nebheya; uyu muFiristia usikazi kuchekwa unozodai ngechimwe chazvo, ngokuti washoora hondo dzaMwari unopona.” Dhavhidha wakatizve, “Mambo Mwari uwo wakandinunura kubva munyara dzemhondoro nokunyara dzebheya, unozondinunurazve kubva kunyara youyu muFiristia.” Ndizvo Sauri wakati kunaDhavhidha, “Enda, Mambo Mwari ngaanewe.” NaSauri wakapfekedza Dhavhidha ngezvokurwa zvake, wakaisa chiqoko chethusi pasoro pake; wakamupfekedzazve bhachi regangautare. NaDhavhidha wakapakatira shoti yaSauri padera pezvokurwa zvake, wakaedza kuhamba, akakorera, ngokuti waiya asati azvirovedzera. Zvino Dhavhidha wakati kunaSauri, “Andikoni kuhamba neizvi, ngokuti andizi kuzvirovedzera.” Ndizvo Dhavhidha wakazvikhumura. Zvino wakatora ndonga yake munyara mwake, wakadzitsanangurira mapuwe mashanu akaserera kubva mumufuya, wakaaisa mumukwama womuushi waaiya nawo, waiya wakadai ngomuteya; nechimvii chake chaiya munyara yake; naye wakakwedzera kunomuFiristia. NomuFiristia wakakwedzera kunaDhavhidha, nomunhu waiya akatwara chihlangu chake wakahamba pamberi pake. Naapo muFiristia paakaringira nokuona Dhavhidha, wakamushoora, ngokuti waiya achimudoko, mutsvuku, nehope yaiya yakanaka. MuFiristia wakati kunaDhavhidha, “Inini ndiri imbwa here hounouya kwendiri nendonga?” NomuFiristia wakatuka Dhavhidha ngezvimwari zvake. MuFiristia wakati kunaDhavhidha, “Uya pano, neni ndinozopa muiri wako kushiri dzomudenga nemhuka dzomushango.” Asi Dhavhidha wakati kunomuFiristia, “Iwewe unouya kwendiri uneshoti nomukhondo nechihlangu; asi inini ndinouya kwouri ngezina raMambo Mwari wehondo, Mwari wehondo dzaIsuraeri, uwo wewakashoora. Nyamashi Mambo Mwari unozokupira munyara dzangu, neni ndinozokuchaya nokugura soro rako; nyamashi ndinozopa miiri yevaFiristia vehondo vakafa kuneshiri dzomudenga, nokumhuka dzomushango; kuti nyika dzeshe dzizie kuti uripo Mwari muIsuraeri, nokuti chiunga cheshe ichi chizie kuti Mambo Mwari aaponesi ngeshoti nokuti ngomukhondo; ngokuti kurwa ngokwaMambo Mwari, naye unozokupira munyara dzedu.” Naapo muFiristia amiruka nokukwedzera pasinde kooshongana naDhavhidha, Dhavhidha wakakasira, wakarumba kunehondo kushongana nomuFiristia. Dhavhidha wakaisa nyara yake mumbudu yake, akatoremwo buwe, akariposhera, akafura muFiristia pahuma yake; buwe rakanzvaira muhuma yake, naye wakawa ngehope yake pamavhu. Ndizvo Dhavhidha wakanyisa muFiristia ngechimvii nebuwe, akafura muFiristia nokumuuraya; mwaiya musina shoti munyara yaDhavhidha. Zvino Dhavhidha wakarumba, akaema padera pomuFiristia, akatora shoti yake, wakaishwamura mumakara ayo, akamuuraya; zvino wakagura soro rake ndiyo. Naapo vaFiristia vaona kuti ngwazi yavo yafa, vakatiza. Vanhu vehondo yaIsuraeri nevaJudha vakamiruka, vakadaidzira, nokurumbirira vaFiristia metsa kuguma Gathi nokumisiwo yaEkironi. Naavo vakaremadzwa vevaFiristia vakawa munjira yaienda Shaaraimu, metsa kuguma Gathi naEkironi. VaIsuraeri vakapetuka kubva koorumbirira vaFiristia, vakachakata matende avo. Dhavhidha wakatora soro romuFiristia, akariunza Jerusarema; asi wakaisa zvokurwa ndizvo zvaGoriathi mutende rake. Naapo Sauri paakaona Dhavhidha echienda koorwa nomuFiristia, wakati kunaAbhina, nduna yehondo, “Abhina, iri jaha mukororo waani?” Abhina wakati, “Kudai ngezvounopona mweya wenyu, A mambo, andimuzii.” Mambo wakati, “Bvunza kuti jaha iri mukororo waani?” Naapo Dhavhidha apetuka kubva koorwa nomuFiristia, Abhina wakamuunza pamberi paSauri nesoro romuFiristia munyara yake. Sauri wakati kwaari, “Uri mukororo waani, iwewe jaha?” NaDhavhidha wakapingura, “Ndiri mukororo womuranda wako Jesi muBhetherehema.” Naapo Dhavhidha achapedza kuereketa kunaSauri, mwoyo waJonathani wakabatana nomwoyo waDhavhidha, naJonathani wakamuda kudai ngomweya wake wemene. Sauri wakamutora ngeiro zuva, aazi kumutendera kuti aende kanyi kumhatso yababa ake. Zvino Jonathani wakaita chitenderano naDhavhidha, ngokuti Jonathani wakamuda kudai ngomweya wake wemene. Jonathani wakakhumura chokufuka chaiya pamuiri wake, akachipa kunaDhavhidha, zvokufuka zvake, shoti yake, nouta hwake, nebhande rake. Dhavhidha wakabuda, akaenda, akabudirira kweshe kwaaitumwa ndiSauri; kubudikidza ndizvo Sauri wakamuemesa padera pevanhu vehondo, naye waiashirika mukuona kwevanhu veshe, nomukuona kwavaranda vaSauri. Naapo vechiuya kanyi, apo Dhavhidha akapetuka kubva koouraya vaFiristia, vakadzi vakabuda kubva mumadhorobha eshe aIsuraeri, vechiemba nokuzvina kooshongana namambo Sauri, nembira, nemakandira nenduyo dzokudakara, nezvokuridza zvokuemba. Nevakadzi vakaemba vechipingurana umwe noumweni apo vaipembera, vakati, “Sauri wakauraya makumi emazana, Dhavhidha wakauraya gumi remakumi emazana.” Sauri wakatseneka kakurutu, neichi chakaereketwa chakamunyangadza. Naye wakati, “Vaerengera Dhavhidha gumi remakumi emazana, asi kwendiri vaerenga makumi emazana; chiinyi chaanodazve chinopinda izvi, asi hwega umambo?” NaSauri wakateya Dhavhidha kubvira ngeiro zuva. Ngezuva rechimangwani, mweya wakashata wakabva kunaMwari wakauya padera paSauri, naye wakahahamuka ari mukati mwemhatso yake, naapo Dhavhidha echiridza munanzi ngenyara yake kudai ngezvaairidza zuva ngezuva. Sauri waiya nomukhondo wake munyara yake; naSauri wakaposhera mukhondo, ngokuti wakati, “Ndinozobaira Dhavhidha parukumbati.” Asi Dhavhidha wakanzvenga kairi mukuona kwake. Sauri wakatya Dhavhidha, ngokuti Mambo Mwari waiya naDhavhidha, asi waiya abuda kubva kunaSauri. Ndizvo Sauri wakamubvisa kubva pamberi pake, akamuita nduna padera pegumi remazana; naye waibuda nokupotera pamberi pevanhu vehondo. Dhavhidha waibudirira muzviro zveshe zvaaishanda, ngokuti Mambo Mwari waiya naye. Naapo Sauri aona kuti wakabudirira kakurutu, wakamutya kakurutu. Asi veshe vaIsuraeri navaJudha vakamuda Dhavhidha, ngokuti wakabuda nokupotera pamberi nokutungamira pamberi pavo. Zvino Sauri wakati kunaDhavhidha, “Ringira, dangwe rangu romusikana, Merabhi, ndinozomupa kwouri kuita mukadzi wako; kwega ita wakagwinya wangu, urwe hondo yaMambo Mwari.” Ngokuti Sauri wakati, “Nyara yangu isazomiruka padera pake kurwisana naye, asi nyara dzavaFiristia ngadzimiruke padera pake.” Dhavhidha wakati kunaSauri, “Ndiri anani inini? Nokupona kwangu kuri chiinyi, nemhuri yababa angu muIsuraeri, kuti inini ndiite mukwambo kunamambo?” Asi ngomukuwo apo Merabhi mwanasikana waSauri paaisisira kupuwa kunaDhavhidha, wakapuwa kunaAdhirieri, muMehorathi, kuita mukadzi wake. Zvino Mikhari mwanasikana waSauri wakada Dhavhidha. Navo vakaronzera Sauri, nechiro chakamudakadza. Sauri wakati, “Ndinozomupa kwaari, kuti aite murau kwaari, nokuti nyara dzavaFiristia dzimiruke padera pake.” Ndizvo Sauri wakati kunaDhavhidha kwechipiri, “Nyamashi unozoita mukwambo wangu.” Sauri wakapanga varanda vake echiti, “Ereketai naDhavhidha ngokufishika mwechiti, ‘Ringirai, mambo unodakara ndiwe, nevaranda vake veshe vanokuda; ndizvo zvino ita mukwambo wamambo.’ ” Ndizvo varanda vaSauri vakaereketa awo mazwi munzee dzaDhavhidha. NaDhavhidha wakati, “Chinooneka kwomuri chiri chiro chakareruka here kuita mukwambo wamambo, mwechiona kuti ndiri murombo usikaziikanwi hake?” Varanda vaSauri vakamuronzera vechiti, “Izvi ndizvo zvinoronza Dhavhidha.” Zvino Sauri wakati, “Munozoronza izvi kunaDhavhidha, ‘Mambo aadi kutheyerwa chuma, asi unoda zana remakanda emafumho evaFiristia, kuunzidzira magaa amambo.’ ” Zvino Sauri wakapinimidza kuita kuti Dhavhidha aurawe ngavaFiristia. Naapo varanda vake vakaronzera Dhavhidha mazwi aya, zvakadakadza Dhavhidha kuita mukwambo wamambo. Naapo mazuva asati apera, Dhavhidha wakamiruka, akaenda, iye nevanhu vake, vakauraya mazana mairi evaFiristia. NaDhavhidha wakaunza makanda emafumho evaFiristia, navo vakaaunza aerengwa aperera kunamambo, kuti iye aite mukwambo wamambo. Sauri wakamupa mwanasikana wake Mikhari kuita mukadzi wake. Asi apo Sauri wakaona nokuzia kuti Mambo Mwari waiya naDhavhidha, nokuti Mikhari mwanasikana wake wakamuda, Sauri wakapinda kutya Dhavhidha kakurutu. Ndizvo Sauri wakaangirira kuita gaa raDhavhidha. Zvino nduna dzevaFiristia dzakabuda koorwa; nenguva dzeshe dzevaibuda, Dhavhidha wakabudirira kupinda varanda veshe vaSauri; ndizvo zina rake rakaremeredzwa kakurutu. Sauri wakaereketa kunaJonathani mukororo wake, nokuvaranda vake veshe, kuti vauraye Dhavhidha. Asi Jonathani mukororo waSauri waidakara kakurutu ndiDhavhidha. Jonathani wakaronzera Dhavhidha echiti, “Sauri, baba angu, vanotsvaka kukuuraya; ndizvo zvino, ndapota, dzingwarire mangwani mangwanani; gara mundau yakafishika, wechidzifisha. Ndinozobuda ndechiema pasinde pababa angu mumunda mwouri, neni ndinozoereketa nababa angu ndiwe; neicho chendinozoona, ndinozokuronzera.” Jonathani wakaereketa zvakanaka kunababa ake Sauri ndiDhavhidha, akati kwaari, “Mambo asashaishira muranda wake Dhavhidha; ngokuti iye aazi kukushaishira, nemishando yake yakanaka kwouri; ngokuti iye wakaisa kupona kwake mungozi, apo paakauraya muFiristia, naMambo Mwari wakaita kunyisa kukurutu ndiye kwevaIsuraeri veshe. Wakazviona ukadakara; ngenyi zvino unozoshaishira ngazi isina ndaa, ngokuuraya Dhavhidha pasina ndaa?” Sauri wakapurutana izwi raJonathani; Sauri wakapika, “Kudai ngezvaanopona Mambo Mwari, aazourawi.” Ndizvo Jonathani wakadaidza Dhavhidha, wakamuronzera zveshe izvo zviro. Zvino Jonathani wakaunza Dhavhidha kunaSauri, naye waiya pamberi pake kudai ngemikuwo imweni. Kwakaapozve hondo, naDhavhidha wakabuda koorwa navaFiristia. Naye wakavauraya ngokuuraya kukurutu; navo vakamutiza kubva pamberi pake. Zvino mweya wakashata wakabva kunaMambo Mwari wakadzaka padera paSauri, apo akagara mumhatso yake nomukhondo munyara yake, apo Dhavhidha airidza chimadangari ngenyara dzake. Sauri wakatsvaka kubayira Dhavhidha parukumbati ngomukhondo; asi iye wakanzvenga Sauri, naye wakabaya rukumbati ngomukhondo. Dhavhidha wakatiza, akapona ngouhwo usiku. Sauri wakatuma nhumwa kumhatso yaDhavhidha koomurinda, echironga kumuuraya mangwani mangwanani. Mikhari mukadzi waDhavhidha wakamuronzera echiti, “Kudai usikangwariri kupona kwako usiku huno, mangwani unozourawa.” Ndizvo Mikhari wakadzasa Dhavhidha ngepafasitera; naye wakaenda, akatiza, akapona. Mikhari wakatora muedzaniso, akauisa mumubhedhi, akaisa chokutsamira chemamviri embudzi dera kwomubhedhi wake, akaufukidza ngejira. Naapo Sauri paakatuma nhumwa kutora Dhavhidha, Mikhari wakati, “Unorwara.” Zvino Sauri wakatumazve nhumwa koona Dhavhidha echiti, “Muunzei kwendiri mumubhedhi kuti ndimuuraye.” Naapo nhumwa dzapotera, penya, waiyapo muedzaniso mumubhedhi, nechokutsamira chemamviri embudzi dera kwomubhedhi wake. Sauri wakati kunaMikhari, “Wandichengedzera ngenyi kudai, wechitendera gaa rangu kuti riende?” Mikhari wakapingura Sauri echiti, “Iye wakati kwendiri, ‘Ndirekere ndiende, ndingakuurairenyi?’ ” Zvino Dhavhidha wakatiza, akapokonyoka; wakauya kunaSamueri kuRama, wakamuronzera zveshe zvakaitwa ndiSauri kwaari. Iye naSamueri vakaenda koogara muNaiothi. Sauri wakaronzerwa kuti, “Dhavhidha uri Naiothi muRama.” Zvino Sauri wakatuma nhumwa kootora Dhavhidha. Naapo vakaona chiunga chevaprofeti vechiprofeta, naSamueri akaema kuita mukuru padera pavo, Mweya waMwari wakauya padera penhumwa dzaSauri, nadzo dzakaprofetawo. Naapo paakaronzerwa Sauri, wakatuma nhumwa dzimweni, nadzo dzakaprofetawo. Sauri wakatumazve nhumwa kwechitatu, nadzo dzakaprofetawo. Zvino iye pachake wakaendawo kuRama. Wakaguma kuchinyuka chikuru chiri muSeku; wakabvunza, akati, “Samueri naDhavhidha vari pari?” Noumweni wakati, “Ringira, vari Naiothi muRama.” Wakaendayo Naiothi muRama; Mweya waMwari wakauya padera pakewo. Achaenda wakabatwa ndiMweya, akaprofeta metsa akaguma Naiothi muRama. Wakakhumurawo machira ake, akaprofeta pamberi paSamueri. Wakaata pashi ari mutitinini zuva reshe nousiku hweshe uhwo. Ndizvo vakati, “Sauri uri pakati pevaprofetiwo here?” Dhavhidha wakatiza kubva Naiothi muRama. Wakauya pamberi paJonathani, akati, “Ndakaitenyi? Kushaisha kwangu ngokwenyi? Nechishaishi changu ngechenyi kunababa ako, vanotsvaka kundiuraya?” Jonathani wakati kwaari, “Haiwa! Iwewe auzofi. Ringira, baba angu aazoiti chiro kunyazwi chikuru nokuti chidoko, asikazochironzi kwendiri; zvino baba angu vangazofisha ichi chiro kwendiri ngenyi? Achizi kudaro.” Asi Dhavhidha wakapikawo, akati, “Ngegwinyiso baba ako vanozia kuti ndakaona nyasha pamberi pako; navo vanoti, ‘Jonathani asazozia ichi, nokuti ungazotambudzika.’ Asi ngegwinyiso, kudai ngezvaanopona Mambo Mwari, newe wechipona pachako, iripo nhambwe imwe pakati pangu norufu.” Zvino Jonathani wakati kunaDhavhidha, “Kunyazwi chiinyi chinodikanwa ngomweya wako, ndinozochiita.” Dhavhidha wakati kunaJonathani, “Ringira, mangwani mwedzi mutsva wotawa, neni andisisiri kuzokorera kugara namambo pakudya; asi nditendere ndiende, kuti ndiende ndihware mushango metsa zuva rechitatu madeekoni. Kudai baba ako vanditama, unozoti, ‘Dhavhidha wakapota kwendiri kuti atenderwe kurumba kuenda Bhetherehema, dhorobha rake; ngokuti uripo mudiro wegore ngegore wemhuri yake yeshe.’ Kudai vechizoronza kuti, ‘Zvakanaka!’ Muranda wako unozoa nokunyarara; asi kuti akatseneka, zvino ziai ngegwinyiso kuti kushata kwakarongwa ndivo. Ndizvo unozoita zvakanaka kumuranda wako; ngokuti wakaunza muranda wako kuchitenderano chakachena pamberi paMambo Mwari newe. Asi kudai kuripo kushata kwendiri, ndiuraye iwewe pachako; ngenyi wechizondiunza kunababa ako?” NaJonathani wakati, “Haiwa! Ngokuti kudai ndechizia kuti kushata kwakarongwa ndibaba angu kwouri, ndisaizokuronzera here?” Zvino Dhavhidha wakati kunaJonathani, “Ndiani unozondironzera, kudai baba ako vechizopingura ngoushungu?” Jonathani wakati kunaDhavhidha, “Uya, ngatiende kumunda.” Navo vairi vakaenda kumunda. NaJonathani wakati kunaDhavhidha, “NdiMambo Mwari, Mwari waIsuraeri, ngaaite uchapupu! Naapo ndechizoereketa nababa angu ngouwo mukuwo mangwani, nokuti zuva rechitatu, kudai vanemwoyo wakanaka kunaDhavhidha, andizotumiri izwi kwouri, kukuronzera here? Asi kudai baba angu vechida kukuremadza, Mambo Mwari ngaaite kudaro nokwakapinda kuwanda kunaJonathani, kuti ndisina kukuronzera nokukutizisa kuti uende mukunyarara. Mambo Mwari ngaanewe, kudai ngezvaaiya nababa angu. Kudai ndichandopona, ndiitire nyasha dzakagondeka dzaMambo Mwari; asi kuti ndikafa, usazodusa kugondeka kwenyasha dzako kubva kumhatso yangu mhera nariini; haiwa, kunyazwi kudai Mambo Mwari aizodusa magaa eshe aDhavhidha kubva padera penyika.” Ndizvo Jonathani wakaita chitenderano nemhatso yaDhavhidha echiti, “Mambo Mwari unozochibvunza kunyara dzamagaa aDhavhidha.” Jonathani wakaita kuti Dhavhidha apike ngorudo rwake kwaari, ngokuti waimuda kudai ngokuda kwaakaita mweya wake wemene. Jonathani wakati kunaDhavhidha, “Mangwani mwedzi mutsva unotawa; newe unozotamika ngokuti chigaro chako chinonga chisina munhu. Naapo iwewe wagara mazuva matatu, unozodzaka kubani kuuya kundau yewakambodzifisha ngendaa yakaitika pakutanga, newe unozogarapo pasinde pebuwe Ezeri. Neni ndinozoposhera misee mitatu parutii rwaro, kudai ngounofura pachiro chakaiswapo. Zvino ndinozotuma murumbwana ndechiti, ‘Enda, utsvake misee.’ Kuti ndechiti kunomurumbwana, ‘Ringira, misee iri kurutii rwouno, itore,’ zvino iwewe uya, ngokuti apo Mambo Mwari achapona, kuripo kunyarara kwouri, haiwa kuremadzwa. Asi kudai ndechironza kujaha kuti, ‘Ringira, misee iri pamberi pako,’ zvino enda hako; ngokuti Mambo Mwari wakuendesa kuretu. Ngendaa yetaereketa ndiyo, ringira, Mambo Mwari ngaapakati pako iwewe neni mhera nariini.” Ndizvo Dhavhidha wakadzifisha mumunda. Naapo mwedzi mutsva watawa, mambo wakagara pashi padhiri kudya. Namambo wakagara pachigaro chake, kudai ngemikuwo imweni, pachigaro chake chepasinde porukumbati. Jonathani wakamiruka, apo Abhina akagara parutii paSauri, asi pandau yaDhavhidha paiya pasina munhu. Sauri aazi kuereketa chiro ngezuva iro; ngokuti wakapinimidza kuti, “Panechamugumira, aazi kuchena; ngegwinyiso aazi kuchena.” Asi ngezuva rechipiri sure kwezuva rokutawa kwomwedzi mutsva, pandau yaDhavhidha paiya pasina munhu. NaSauri wakati kunaJonathani mukororo wake, “Ngenyi mukororo waJesi asikazi kuuya kudhiri koodya zuro nokuti nyamashi?” Jonathani wakapingura Sauri, wakati, “Dhavhidha wakapota kwendiri kuti atenderwe kuenda Bhetherehema. Wakati, ‘Nditendere ndiende, ndapota, ngokuti mhuri yedu inoita mudiro mudhorobha, nomukoma wangu wakandipanga kuti ndiapo. Ndizvo zvino kudai ndadikanwa ndiwe, nditendere ndibve ndapota, ndione vakoma vangu.’ Ngendaa iyi aazi kuuya kutafura ramambo.” Zvino ushungu hwaSauri hwakabaka kunaJonathani. Wakati kwaari, “Iwewe mukororo womukadzi usikazwi nokumukira! Andizii here kuti iwewe wakatsanangura mukororo waJesi kuita kutsverudzwa kwako, nechitsverudzo choutitinini hwamai ako? Ngokuti kudai achapona mukororo waJesi padera penyika, iwewe nokuti umambo hwako auzogwinyiswi. Zvino tuma vanhu vamuunze kwendiri, ngokuti ngegwinyiso unozofa.” Zvino Jonathani wakapingura Sauri baba ake, akati kwaari, “Unozourawa ngenyi? Wakaitenyi?” Asi Sauri wakaposhera mukhondo kwaari, kumubaya; ndizvo Jonathani wakazia kuti ndikwo kuemesa kwababa ake kuuraya Dhavhidha. Jonathani wakamiruka kubva patafura ngokushatirwa kukurutu, aazi kudya chiro zuva rechipiri romwedzi, ngokuti waisvipo mwoyo ndiDhavhidha zvokuti baba ake vakamutsverudza. Mumangwanani Jonathani wakaenda mushango ngomukuwo waakaemeserana naDhavhidha, nomurumbwana mudoko waiya naye. Wakati kunomurumbwana wake, “Rumba, utsvake zvino misee yendinoposhera.” Naapo murumbwana acharumba, wakaposhera musee mberi kwake. Naapo murumbwana aguma pandau pakawira musee waakaposhera Jonathani, Jonathani wakadaidzira kumurumbwana, akati, “Musee ausiri mberi kwako here?” NaJonathani wakadaidzira kumurumbwana, akati, “Rumba, kasira, usaemapo.” Ndizvo murumbwana waJonathani wakaunganidza misee, akauya kunomukuru wake. Asi murumbwana aazi kuzia chiro; kwega Jonathani naDhavhidha vakazia ndaayo. Jonathani wakapa zviro zvake zvehondo kunomurumbwana, wakati kwaari, “Enda nazvo kudhorobha.” Naapo murumbwana aenda, Dhavhidha wakamiruka akabuda kubva parutii rwemurwi wemapuwe, wakawa ngehope yake pamavhu. Akadzikotamisa katatu, navo vakachingamidzana ngemiromo, vakachema umwe noumweni; Dhavhidha wakapinda kuchema. Zvino Jonathani wakati kunaDhavhidha, “Enda hako mukunyarara, ngokuti kudai ngezvetakapikirana teshe ngezina raMambo Mwari techiti, ‘Mambo Mwari ngaapo pakati pangu neiwewe, nepakati pemibarirwana yangu neyako mhera nariini.’ ” Wakamiruka, akaenda; naJonathani wakaenda mudhorobha. Dhavhidha wakauya Nobhi, kunaAhimerekhi mupristi. Ahimerekhi wakauya kooshongana naDhavhidha echihuta, akati kwaari, “Uri wega ngenyi, usina munhu?” Dhavhidha wakati kunaAhimerekhi mupristi, “Mambo wakandironzera mushando naye wakati kwendiri, ‘Kusazoapo naumwe unozozia chiro ngomushando uwo wendinokutuma, neicho chendinokupangira.’ Ndakapangana nemajaha kushongana nawo kundau imweni. Ndizvo zvino unenyi munyara yako? Ndipe zvingwa zvishanu kunyazwi chiinyi chaunacho pano.” Mupristi wakapingura Dhavhidha, akati, “Andina chingwa chimweni munyara yangu, kwega chingwa chakacheneswa; kwega kuti kudai majaha matsva akadzingwarira kubva kuvakadzi.” Dhavhidha wakapingura mupristi, akati kwaari, “Ngechokwadi vakadzi atizi kuvaona kwemazuva eshe; apo ndakabuda, nemiiri yemajaha yakacheneswa, kunyazwi apo techihamba muhambowo zvawo; kunozopinda kuchena kwakaitawani miiri yavo nyamashi.” Ndizvo mupristi wakamupa zvingwa zvakacheneswa; ngokuti paiya pasina chingwapo kwega chingwa chokuapo kwaMambo Mwari, izvo zvinoduswa kubva pamberi paMambo Mwari, kuisapo zvingwa zvinopisha ngezuva rezvinoduswa. Zvino munhu umweni wevaranda vaSauri waiya aripo ngezuva iro, wakabatwa pamberi paMambo Mwari, nezina rake raizwi Dhoegi muEdhomu, mukuru wevaushi vaSauri. Dhavhidha wakati kunaAhimerekhi, “Apana mukhondo nokuti shoti pano newe here? Andizi kuunza shoti yangu nokuti zvokurwa ndizvo, ngokuti mushando wamambo waida kuti ndikasire.” Mupristi wakati, “Shoti yaGoriathi muFiristia, uwo wewakauraya muBani raEra, iri pano yakaputirwa mujira sure kweefodhi; kuti wechida kuitora, itore, ngokuti apana imweni pano ngokubanze kweiyo.” Dhavhidha wakati, “Apana naimwe yakadaro; ndipe.” Dhavhidha wakamiruka, akatiza ngezuva iro ngokutya Sauri; wakaenda kunaAkhishi mambo weGathi. Varanda vaAkhishi vakati kwaari, “Uyu andiyepi Dhavhidha mambo wenyika here? Avazi kuemba ndiye umwe kunoumweni mukuzvina here vechiti, ‘Sauri wakauraya makumi emazana, naDhavhidha gumi remakumi emazana?’ ” Dhavhidha wakangwarira aya mazwi mumwoyo mwake, naye wakatya Akhishi mambo weGathi kakurutu. Ndizvo wakashandura zviito zvake pamberi pavo, akadziitisa kudai ngounopenga pamberi pavo. Akataratara pazvivhayo zvepamisiwo, nemasiriri ake akadzaka pamurebvu wake. Akhishi wakati kuvaranda vake, “Ringirai, munoona munhu uyu unopenga; mwamuunzirenyi kwendiri? Ndinotama vanhu vanopenga here, zvomwaunza uyu munhu kuita mupengo pamberi pangu? Munhu uyu unozopotera mumhatso mwangu here?” Dhavhidha wakabvapo, akatizira kubako rinozwi Adhuramu; naapo vakoma vake navo veshe vemhatso yababa ake vazvizwa, vakadzaka kwaari. Munhu weshe waiya mukutambudzika, weshe waiya nezvikwereti, nomunhu weshe usaigutiswa ngezvaaiya nazvo, vakaungana kwaari; naye wakaita nduna padera pavo. Vaiyapo naye vanhu vaida kukwana mazana marongomuna (400). Dhavhidha wakabvapo kuenda Miziphe reMoabhi. Wakati kunamambo weMoabhi, “Tendera baba angu namai angu, ndapota, kuti vauye koogara newe, metsa ndizie icho chaanozondiitira Mwari.” Wakavasiya pamberi pamambo weMoabhi, navo vakagara naye ngomukuwo weshe Dhavhidha waiya mubako. Zvino muprofeti Gadhi wakati kunaDhavhidha, “Usagara mubako; ibva, uende kunyika yaJudha.” Ndizvo Dhavhidha wakabuda, wakauya mugwasha reHerethi. Sauri wakazwa kuti Dhavhidha akaoneka, nevanhu avo vaiya naye; Sauri waiya akagara pashi pomuti womuthamarisiki muGibhea pakakwirira, anomukhondo wake munyara yake, nevaranda vake veshe vakaema kumutendenedza. Sauri wakati kuvaranda vake vakaema vakamutendenedza: “Izwai zvino, imwimwi vakororo vaBhenjamini; mukororo waJesi unozomupa here munhu weshe minda neminda yemivhini nokumuemesa kuita nduna dzegumi remazana, nenduna dzemazana? Ndiyo ndaa imwimwi mwandimukira here? Akuna naumwe wakandironzera apo mukororo wangu paakaita chitenderano nomukororo waJesi, akuna naumwe wenyu unondisvipira mwoyo, nokuti kundironzera kuti mukororo wangu wakaita kuti muranda wangu andimukire andihwarire kudai ngezvaanoita nyamashi?” Dhoegi muEdhomu uwo waiya akaemeswa padera pavaranda vaSauri, wakapingura akati, “Ndakaona mukororo waJesi echiuya Nobhi, kunaAhimerekhi mukororo waAhithubhi. Wakamubvunzira kunaMambo Mwari, akamupa kudya, akamupazve shoti yaGoriathi muFiristia.” Ndizvo mambo wakatuma koodaidza mupristi Ahimerekhi mukororo waAhithubhi, nemhatso yeshe yababa ake, vapristi vaiya muNobhi; navo vakauya veshe kunamambo. Sauri wakati, “Izwa zvino, iwewe mukororo waAhithubhi.” Naye wakapingura, “Ndiri pano, mambo wangu.” Sauri wakati kwaari, “Wakandimukira ngenyi, iwewe nomukororo waJesi, ngokumupa zvingwa neshoti, nokumubvunzira kunaMwari, kuti iye andimukire, kundihwarira kudai ngezvaanoita nyamashi?” Zvino Ahimerekhi wakapingura mambo, akati, “Ndiani wakagondeka pakati pevaranda vako kudai ndiDhavhidha? Mukwambo wamambo, uwo unokasira kuita apo atumwa ndiwe, naye unoremeredzwa mumhatso yako. Nyamashi inguva yokutanga kumubvunzira kunaMwari here? Haiwa! Mambo asaerenga nachimwe ngomuranda wake, nokuti kumhatso yeshe yababa angu; ngokuti muranda wako aazi kuzia chiro ngeizvi, zveshe zvakawanda nokuti zvidoko.” Mambo wakati, “Ngegwinyiso iwewe Ahimerekhi unozofa, iwewe nemhatso yeshe yababa ako.” Mambo wakati kumajoni aiya akaema naye, “Tenderukai muuraye vapristi vaMambo Mwari, ngokuti nyara dzavo dzinodetsera Dhavhidha; vakazia apo akatiza, vakarekera kundironzera.” Asi varanda vamambo vakaramba kumirudza nyara dzavo kuuraya vapristi vaMambo Mwari. Zvino mambo wakati kunaDhoegi, “Tenderuka iwewe, uuraye vapristi,” naDhoegi muEdhomu wakatenderuka, wakauraya vapristi; akauraya ngeiro zuva makumi masere navashanu avanhu vaiya vakasimira maefodhi orukangaza. Wakauraya ngeshoti muNobhi, dhorobha revapristi, veshe vamuna navakadzi, vana nechiya, n'ombe nembongoro, nemakwai. Asi umwe wevakororo vaAhimerekhi mukororo waAhithubhi, waizwi Abhiatha, wakapokonyoka, akatiza kuteera Dhavhidha. Abhiatha wakaronzera Dhavhidha kuti Sauri waiya auraya vapristi vaMambo Mwari. Dhavhidha wakati kunaAbhiatha, “Ndakazia ngeiro zuva, apo Dhoegi muEdhomu aiyapo, kuti ngegwinyiso waizoronzera Sauri. Inini ndinendaa yokufa kwavanhu veshe vemhatso yababa ako. Gara neni, usatya; ngokuti iye unotsvaka kupona kwangu, unotsvakazve kupona kwako; asi kwendiri unozongwaririka.” Zvino vakaronzera Dhavhidha vechiti, “Ringira, vaFiristia vanorwisana neKeira, navo vanoba zviyo zvembuwa.” Ndizvo Dhavhidha wakabvunza kunaMambo Mwari echiti, “Ndoenda here koorwisa ava vaFiristia?” NaMambo Mwari wakati kunaDhavhidha, “Enda, urwise vaFiristia, uponese Keira.” Asi vanhu vaDhavhidha vakati kwaari, “Ringira, tinotya muno muJudha; kungapinda kwakadini kudai techiguma Keira koorwisana nehondo yevaFiristia?” Zvino Dhavhidha wakabvunza kwechipiri kunaMambo Mwari. NaMambo Mwari wakamupingura akati, “Eya, miruka, udzake Keira; ngokuti ndinozopira vaFiristia munyara yako.” Ndizvo Dhavhidha nevanhu vake vakaenda Keira, vakarwa nevaFiristia, vakatora zvifuyo zvavo, vakavauraya vazhinji. Ndizvo Dhavhidha wakaponesa avo vaigara Keira. Naapo Abhiatha mukororo waAhimerekhi paakatiza kuenda kunaDhavhidha muKeira, wakauya neefodhi munyara yake. Zvino wakaronzerwa Sauri, kuti Dhavhidha wauya Keira. NaSauri wakati, “Mwari wamupira munyara dzangu; ngokuti wadzikonyera pachake ngokupotera mudhorobha rinemisiwo nemipingo.” Sauri wakadaidza vanhu veshe koorwa, kuenda Keira koorwa naDhavhidha nevanhu vake. Naapo Dhavhidha azia kuti Sauri wakapinimidza zvakashata ndiye, wakati kunaAbhiatha mupristi, “Unza pano efodhi.” Dhavhidha wakati, “A Mambo Mwari, Mwari waIsuraeri, muranda wako wakazwa ngegwinyiso kuti Sauri unoda kuuya Keira, kooparadza dhorobha ngendaa yangu. Zvino vanhu veKeira vanozondipira munyara dzake here? Sauri unozouya here kudai ngezvaakazwa muranda wako? A Mambo Mwari, Mwari waIsuraeri, ndapota, ronzera muranda wako.” NaMambo Mwari wakati, “Unozouya.” Zvino Dhavhidha wakatizve, “Vanhu veKeira vanozondipira nevanhu vangu munyara dzaSauri here?” Mambo Mwari wakati, “Vanozomupira.” Zvino Dhavhidha nevanhu vake, vaida kukwana mazana matanhatu (600), vakamukira vakabuda muKeira; vakaenda kwavaikona kuenda. Naapo Sauri aronzerwa, kuti Dhavhidha waiya atiza kubva Keira; naye wakarekera kuendeyo. Dhavhidha wakagara mumapako mumitunhu mushango reZifi. NaSauri wakamutsvaka mazuva eshe, asi Mwari aazi kumupira munyara dzake. Dhavhidha waiya mushango reZifi kuHoreshi apo paakazwa kuti Sauri waiya abuda kutsvaka kupona kwake. Jonathani mukororo waSauri wakamiruka, akaenda kunaDhavhidha kuHoreshi, akamugwinyisa kubudikidza ndiMwari. Naye wakati kwaari, “Usatya; ngokuti nyara yaSauri baba angu aizokuoni; newe unozoita mambo padera paIsuraeri, neni ndinozoita wechipiri kwouri; baba angu Sauri vanozviziawo.” Zvino vairi ava vakaita chitenderano pamberi paMambo Mwari; Dhavhidha wakaangira kugara paHoreshi, naJonathani wakaenda kanyi. Zvino vaZifi vamweni vakauya Gibhea kunaSauri vechiti, “Dhavhidha unodzifisha pakati pedu mumapako eHoreshi, mumutunhu weHakhira, uri ngokubani kweJeshimoni. Zvino, A mambo, uya, kudai ngokuda kwomwoyo wako weshe; nomushando wedu unozoita wokumupira munyara dzamambo.” Sauri wakati, “Mambo Mwari ngaamuitire muchena imwimwi, ngokuti munondikungurira! Endai, mwoonasa kuona, muzie pandau pake pemene paanodzifisha, nouwo wakamuonapo; ngokuti ndakaronzerwa kuti wakangwara yaamho. Ringirai peshe, muzie nendau dzeshe dzaanodzifisha, mwozouyazve kwendiri apo mwanasa kuzia. Zvino ndinozoenda nemwi; kuti arimwo munyikayo, ndinozomutsvakisisa pakati pemakumi emazana aJudha.” Ndizvo vakamiruka vakaenda Zifi pamberi paSauri. Dhavhidha nevanhu vake vaiya mushango reMaoni, murubaya ngokubani kweJeshimoni. Sauri nevanhu vakewo vakaenda koomutsvaka. Naapo Dhavhidha aronzerwa, wakadzaka kundau yebuwe, akagara mushango reMaoni. Naapo Sauri azvizwa, wakateera Dhavhidha mushango reMaoni. Sauri wakaenda ngorutii rumwe rwomutunhu, naDhavhidha nevanhu vake ngokurutii rumweni romutunhu. Dhavhidha wakakasira kuenda ngokutya Sauri; naapo Sauri nevanhu vake vakakomba Dhavhidha nevanhu vake kuvabata. Zvino nhumwa yakauya kunaSauri yechiti, “Kasira uuye; ngokuti vaFiristia vapinda munyika.” Ndizvo Sauri wakapetuka kubva koorumbirira Dhavhidha, akaenda koorwisana nevaFiristia. Ndizvo vakadudza iyo ndau kuti Serahamarekothi. Dhavhidha wakakwirapo, wakagara mubako reEngedhi. Naapo Sauri achapetuka kubva koorumbirira vaFiristia, wakaronzerwa kuti, “Ringira, Dhavhidha unogara mushango reEngedhi.” Naapo Sauri wakatora makumi matatu emazana (3,000) evanhu vakatsanangurwa kubva kuvaIsuraeri veshe, wakaenda kootsvaka Dhavhidha nevanhu vake pandau yeMapuwe eMbudzi dzomushango. Wakaguma pazvibaya zvemakwai pasinde penjira, apo paiya nebako; naSauri wakapindamwo koodzidetsera. Zvino Dhavhidha nevanhu vake vaiya mumarutii mwebako. Vanhu vaDhavhidha vakati kwaari, “Ringira, zuva iro raakaronza Mambo Mwari kwouri, ‘Ringira, ndinozopira gaa rako munyara dzako, kuti uite kwaari kudai ngezvinozokunakira.’ ” Zvino Dhavhidha wakamiruka, akacheka ngokufishika mupendero wenguwe yaSauri. Ngesure kweizvo, mwoyo waDhavhidha wakakaruka, ngokuti waiya acheka mupendero wenguwe yaSauri. Wakati kunevanhu vake, “Mambo Mwari asatenda kuti ndiite ichi kunamambo wangu, uwo wakadzodzwa waMambo Mwari, kutambanudza nyara yangu padera pake, ngokuti uri wakadzodzwa waMambo Mwari.” Ndizvo Dhavhidha wakarambidza vanhu vake ngamazwi aya, asikazi kuvatendera kuti vamukire Sauri. Zvino Sauri wakamiruka kubva mubako, akaenda hake. Dhavhidha wakamirukawo ngesure, akabudawo mubako, akadaidzira Sauri echiti, “Makosi mambo wangu!” Naapo Sauri wakaringira sure kwake, Dhavhidha wakatsikitsira hope yake pashi, akakotama. Dhavhidha wakati kunaSauri, “Unopurutana ngenyi mazwi evanhu vanoti, ‘Ringira, Dhavhidha unotsvaka kukuremadza?’ Ringira, nyamashi madziso ako aona kuti Mambo Mwari wakupira munyara dzangu mubako; vamweni vandipanga kuti ndikuuraye, asi inini ndakukungurira; neni ndakati, ‘Andizotambanudzi nyara yangu kurwa namambo wangu; ngokuti uri wakadzodzwa waMambo Mwari.’ Ringirai, baba angu, wona mupendero wenguwe yako uri munyara yangu; ngokuti kucheka kwendaita mupendero wenguwe yako, andizi kukuuraya, ungazia zvino nokuona kuti akuna kushata nokuti kupauka kwendiri. Andizi kukushaishira, kunyazwi unotsvaka mweya wangu kuuraya. Mambo Mwari ngaatonge pakati pako neni! Mambo Mwari ngaandiunzidzire kwouri; asi nyara yangu aizorwi newe. Kudai ngechisana chevakuru chinoti, ‘Kushata kunobva kunevakashata;’ asi nyara yangu aizorwi newe. Mambo waIsuraeri wakabuda kutsvaka anani? Unorumbirira anani? Imbwa yakafa nokuti nhata imwe here? Ndizvo Mambo Mwari ngaaite mutongi, atonge pakati pako neni. Ngaaone kwezviri, arwire ndaa yangu, nokundinunura kubva kunyara yako.” Naapo Dhavhidha apedza kuereketa mazwi aya kunaSauri, Sauri wakati, “Iri izwi ngerako here, mukororo wangu Dhavhidha?” Sauri wakadaidzira ngeizwi rake, wakachema. Naye wakati kunaDhavhidha, “Iwewe wakandipinda kunaka; ngokuti iwewe wakandiunzidzira ngezvakanaka, apo inini ndakakuunzidzira ngezvakashata. Nyamashi wanasa kududzira njira yewandibata zvakanaka ndiyo; ngokuti apo Mambo Mwari paakandipira munyara dzako, auzi kundiuraya. Ngokuti ndiani ungati aone gaa rake, ungarirekera rechienda zvakanaka here? Ndizvo Mambo Mwari ngaaunzidzire kwouri ngezvakanaka ngeizvo zvewaita kwendiri nyamashi. Zvino, ringira, ndinonasa kuzia kuti iwewe unozoita mambo, nokuti umambo hwaIsuraeri hunozogwinyiswa munyara yako. Ndizvo zvino pika kwendiri ndiMambo Mwari, kuti auzourayi mibarirwana yangu inouya sure kwangu, nokuti kupedza zina rangu mumhatso yababa angu.” Ndizvo Dhavhidha wakapika izvi kunaSauri. Zvino Sauri wakahwirira kanyi; asi Dhavhidha nevanhu vake vakakwira kubako. Zvino Samueri wakafa; nevaIsuraeri veshe vakaungana pamwepo, vakamuchema. Vakamuika kanyi kwake muRama. Dhavhidha wakamiruka, akaenda kushango rePharani. Waiyamwo munhu muMaoni, waiya noupfumi hwake muKharmeri. Waiya munhu gurudza guru, waiya nemakumi emazana matatu (3,000) emakwai, nemazana gumi rimwe (1,000) rembudzi. Waigunda makwai ake muKharmeri. Zvino zina romunhu uyu raizwi Nabhari, nezina romukadzi wake raizwi Abhigairi. Mukadzi waiya akangwara, akanaka, asi mwamuna wake waiya akakonza mwoyo akashata, waiya wedzinza raKharebhu. Dhavhidha wakazwa ari mushango kuti Nabhari waiagunda makwai ake. Ndizvo Dhavhidha wakatuma majaha gumi, akati kwevari, “Endai Kharmeri, muende kunaNabhari, mwechimuchingamidza ngezina rangu. Nemwi munozoti kwaari, ‘Kunyarara kwouri, kunyarara kumhatso yako nokunyarara kuneizvo zveshe zvounazvo.’ Zvino ndinozwa kuti iwewe unevagundi; zvino vaushi vako vaiya nesu, nesu atizi kuvaremadza, navo apana chakatamika kwevari mukuwo weshe wevaigara Kharmeri. Bvunza majaha ako, navo vanozokuronzera. Ndizvo majaha angu ngaaone nyasha pamberi pako; ngokuti tauya ngezuva kwaro redhiri. Ndapota, ipa kunyazwi chiinyi chounacho kuvaranda vako nokunomukororo wako Dhavhidha.” Naapo majaha aDhavhidha agumeyo, vakaereketa kunaNabhari kudai ngemazwi eshe ngezina raDhavhidha, vakanyarara. Asi Nabhari wakapingura varanda vaDhavhidha, akati, “Ndiani Dhavhidha? Mukororo waJesi ndiani? Varipo varanda vazhinji mazuva ano vanotiza kubva kumadzimambo avo. Ndotora here chingwa changu, nemvura yangu, nenyama yangu, yendauraira vagundi vangu, ndechizvipa kuvanhu vendisikazii pevanobva nepevanoenda.” Ndizvo varanda vaDhavhidha vakapetuka sure, vakahwirira, vakauya koomuronzera izvo zveshe. Dhavhidha wakati kunevanhu vake, “Munhu weshe ngaapakatire shoti yake!” Umwe ngaumwe wavo wakapakatira shoti yake naDhavhidha wakapakatirawo shoti yake; vakateera Dhavhidha vanhu vanoda kukwana mazana marongomuna (400), nemazana mairi (200) akagara nenhumbi dzavo. Asi umwe wemajaha wakaronzera Abhigairi, mukadzi waNabhari echiti, “Ringira, Dhavhidha wakatuma nhumwa kubva mushango kuchingamidza mambo wedu, naye wakavatuka. Asi vanhu ava vakaita zvakanaka kwetiri, nesu atizi kuremadzwa; atizi kutama chiro mukuwo weshe wetakagara pasinde pavo, apo taiya mushango navo. Vaiya vakadai ngerukumbati kwetiri usiku nemasikati, mukuwo weshe wetaiya navo techiusha makwai. Ndizvo zvino zia ichi nokupinimidza chounozoita; ngokuti kushata kwatorongwa kurwisana namambo wedu, nokuneveshe vemhatso yake; ngokuti uri mukororo wokushata, akuna ungaereketa naye.” Zvino Abhigairi wakakasira, akatora mazana mairi (200) ezvingwa, nembudu mbiri dzevhini, nemakwai mashanu akaurawa, nezvipimo zvishanu zvekoroni, nezana rezvikore zvemavhini akaoma, nemazana mairi (200) ezvigurwa zvemaonde akaoma. Wakazviisa padera pembongoro, naye wakati kumajaha ake, “Tungamirai pamberi; ndinomuteera.” Asi aazi kuronzera mwamuna wake Nabhari. Naapo echigadha mbongoro wakadzaka ngepagwasha pomutunhu, Dhavhidha nevanhu vake vakadzaka kuuya kwaari, naye wakashongana navo. Zvino Dhavhidha waiya akati, “Ngegwinyiso ndakangwarira pasina chiro zviro zveshe zvouyu munhu mushango, ngokuti apana chakatamika chezviro zvake; naye wakandiunzidzira ngezvakashata kunezvakanaka. Mwari ngaandiuraye ndife, kuti kukaedza ndisati ndauraya kunyazwi mwamuna wokugumisira.” Naapo Abhigairi wakaona Dhavhidha, wakakasira kudzaka pambongoro, akawa ngehope yake pamberi paDhavhidha, akatsikitsira pashi. Akawa patsoka dzake, akati, “Kushata uku ngakua padera pangu, mambo wangu; ndapota, tendera murandakadzi wako kuereketa pamberi pako, uzwe mazwi omurandakadzi wako. Mambo wangu, musazopinimidza ngouyu munhu wakashata, Nabhari, ngokuti wakadai ngezina rake. Nabhari ndiro zina rake, naye unoupenzi; asi inini murandakadzi wako andizi kuona nhumwa dzamambo wangu dzowakatuma. “Ndizvo zvino, mambo wangu, kudai ngezvaanopona Mambo Mwari, nokudai ngezvounopona iwewe, ngokuti Mambo Mwari wakakubata kubva kwokuparadza ngazi, nokubva kwokudziunzidzira ngenyara yako, magaa ako, naavo vanotsvaka kuita zvakashata kunamambo wangu, ngavadai ndiNabhari. Ndizvo zvino ichi chipo chaunzwa kunamambo wangu ngomurandakadzi wako ngachipiwe kunamajaha anoteera mambo wangu. Ndapota, rekerera kupauka kwomurandakadzi wako; ngokuti Mambo Mwari ngegwinyiso unozoitira mambo wangu mhatso yakagwinya ngokuti mambo wangu unorwa kurwa kwaMambo Mwari nokushata akuzi kuoneka kwouri ngamazuva ako eshe. Kudai munhu echimukira kukurumbirira nokutsvaka mweya wako, mweya wamambo wangu unozosungirwa pamwepo mumwanda wevanopona pashi pasimba raMambo Mwari, Mwari wako, asi mweya yamagaa ako unozoikandira kubanze kudai ngokuposhera kwechimvii. Naapo Mambo Mwari aita kunamambo wangu zveshe zvakanaka zvaakaereketa ndiwe, nokukuemesa kuita mutongi padera paIsuraeri, kuti ichi achizoiti chinotambudza, nokuti chipumhuniso chomwoyo kunamambo wangu, kuti iwewe wakaparadza ngazi isina ndaa, nokuti mambo wangu wakadziunzidzira. Naapo Mambo Mwari aita zvakanaka kunamambo wangu, zvino karakadza murandakadzi wako.” Dhavhidha wakati kuna Abhigairi, “Ngaakudzwe Mambo Mwari, Mwari waIsuraeri, uwo wakutuma nyamashi kushongana neni! Ngakukudzwe kupanga kwako, newe wandipetudza kubva kooparadza ngazi, nokubva koodziunzidzira ngenyara yangu! Ngokuti ngegwinyiso, kudai ngezvaanopona Mambo Mwari, Mwari waIsuraeri, uwo wakandibata kubva kwokumuremadza, kudai usakasira kuuya kushongana neni, ngegwinyiso akusaizosara nomwamuna kunaNabhari mangwani.” Zvino Dhavhidha wakaashira zvaaiya amuunzira kubva kunyara yake, akati kwaari, “Enda ngokunyarara kumhatso yako; wona, ndapurutana izwi rako, ndikakuashira.” NaAbhigairi wakauya kunaNabhari; waiita dhiri mumhatso yake, kudai ngedhiri ramambo. Mwoyo waNabhari waiya wechidakara, ngokuti waiya aradza; ndizvo aazi kumuronzera chiro metsa mangwani. Mangwanani apo kuradza kwapera kunaNabhari, mukadzi wake waiya amuronzera zviro izvi, nomwoyo wake wakaremba mukati mwake, naye wakaita kudai ngebuwe. Ngesure kwemazuva anoda kukwana gumi Mambo Mwari wakachaya Nabhari, naye wakafa. Naapo Dhavhidha azwa kuti Nabhari afa, wakati, “Ngaakudzwe Mambo Mwari, uwo wakaunzidzira ndaa yokutsverudzwa kwangu ndiNabhari, akangwarira muranda wake kubva munezvakashata; Mambo Mwari wakahwirinza kushata kwaNabhari padera pake.” Zvino Dhavhidha wakatuma kunyenga Abhigairi kuti aite mukadzi wake. Naapo nhumwa dzaDhavhidha dzakauya Kharmeri kunaAbhigairi, dzakaereketa kwaari dzechiti, “Dhavhidha wakatituma kwouri kukutora kuita mukadzi wake.” Naye wakamiruka akatsikitsira hope yake pashi, akati, “Ringirai, murandakadzi wenyu ngaaite muranda kugeza tsoka dzavaranda vamambo wangu.” Abhigairi wakakasira, wakamiruka, wakagadha mbongoro, nevasikana vake vashanu vaiya naye. Naye wakateera nhumwa dzaDhavhidha, wakaita mukadzi wake. Dhavhidha wakatorazve Ahinoamu weJezireeri; veshe vakaita vakadzi vake. Asi Sauri waiya apa Mikhari mwanasikana wake, mukadzi waDhavhidha, kunaPhariti mukororo waRaishi, uwo waiya weGarimu. Zvino vaZifi vakauya Gibhea kunaSauri vechiti, “Dhavhidha aadzifishi here mumutunhu weHakhira, uwo uri pamberi peJeshimoni?” Ndizvo Sauri wakamiruka, akadzaka mushango reZifi, anemakumi emazana matatu (3,000) evanhu vakatsanangurwa vaIsuraeri, kootsvaka Dhavhidha mushango reZifi. Sauri wakagara mumutunhu weHakhira uwo uri pamberi peJeshimoni parutii penjira. Asi Dhavhidha wakagara mushango. Naapo wakaona kuti Sauri waimuteera mushango, Dhavhidha wakatuma vadongoreri, akazwa ngegwinyiso kuti Sauri waguma. Zvino Dhavhidha wakamiruka, akauya apo paiya pagara Sauri; naDhavhidha wakaona pandau apo paakaata Sauri, naAbhina mukororo waNeri, nduna yehondo yake. Sauri wakaata pakati pekamba nevanhu vakamutendenedza. Zvino Dhavhidha wakati kunaAhimerekhi muHiti, nokuna Abhishai mukororo waZeruia mukoma waJoabi echiti, “Ndiani unozodzaka neni kukamba kunaSauri?” NaAbhishai wakati, “Ndinozodzaka newe.” Ndizvo Dhavhidha naAbhishai vakauya kunevanhu usiku; ringira, Sauri waiya akaata pakati pekamba, nomukhondo wake wakadzimikwa mumavhu dera kwesoro rake; naAbhina nevanhu vake vakaata vakamutendenedza. Abhishai wakati kunaDhavhidha, “Nyamashi Mwari wapira gaa rako munyara dzako. Ndizvo zvino ndapota, ngandimubaire kumavhu ngomukhondo kamwe, neni andizomubayi kairi.” Asi Dhavhidha wakati kunaAbhishai, “Usamuuraya, ngokuti ndiani ungatambanudza nyara yake padera powakadzodzwa waMwari, aite usina ndaa?” Dhavhidha wakati, “Kudai ngezvaanopona Mambo Mwari, Mambo Mwari unozomuuraya; nokuti zuva rake rokufa rinozoguma, nokuti unozoenda muhondo nokuurawa. Mambo Mwari asatenda kuti nditambanudze nyara yangu padera pouwo wakadzodzwa waMambo Mwari; asi zvino tora mukhondo uri dera kwesoro rake, nedende remvura, ngatiende.” Ndizvo Dhavhidha wakatora mukhondo nedende remvura kubva dera kwesoro raSauri; navo vakaenda. Apana munhu wakazviona nokuti kuzvizia nokuti kumuka; ngokuti veshe vaiya vakaata, ngokuti vakabatwa ngehope huru dzakabva kunaMambo Mwari. Zvino Dhavhidha wakaenda kurupande rumweni, akaema padera pomutunhu ngokuretu; pakati pavo panendau yakareba. Dhavhidha wakadaidzira kunevanhu nokunaAbhina mukororo waNeri echiti, “Aupinguri here, Abhina?” Ndizvo Abhina wakapingura akati, “Urianani unodaidzira kunamambo?” Dhavhidha wakati kunaAbhina, “Auri mwamuna wakashinga here? Ndiani wakadai ndiwe muIsuraeri? Ndizvo auzi kungwarira ngenyi makosi mambo wako? Ngokuti umwe wevanhu wakauya koouraya makosi mambo wako. Ichi chiro chowakaita achizi kunaka. Kudai ngezvaanopona Mambo Mwari, unosisira kuurawa, ngokuti auzi kungwarira mambo wako uwo wakadzodzwa ndiMambo Mwari. Wona zvino, mukhondo wamambo uri pari, nedende remvura raiya dera kwesoro rake?” Sauri wakazia izwi raDhavhidha, wakati, “Iri izwi rako here, mukororo wangu Dhavhidha?” Dhavhidha wakati, “Izwi rangu, eya makosi wangu, A mambo.” Naye wakati, “Ngenyi mambo wangu echirumbirira muranda wake? Ngokuti ndakaitenyi? Chishaishi chenyi chiri munyara dzangu? Ndizvo zvino, ndapota, makosi wangu mambo ngaazwe mazwi omuranda wake. Kuti ari Mambo Mwari wakati undimukire, ngaashire mudiro; asi kuti vari vanhu, ngavatukwe pamberi paMambo Mwari, ngokuti vandidzinga nyamashi kubva mukuashira chikoaniswa chenhaka yaMambo Mwari vechiti, ‘Enda wooshandira zvimwari.’ Ndizvo zvino ngazi yangu isazorashika pamavhu kubva pamberi pokuona kwaMambo Mwari; ngokuti mambo waIsuraeri wakabuda kutsvaka nhata, kudai ngomunhu unobuda kuvhima chikware mumitunhu.” Zvino Sauri wakati, “Ndashaisha; petuka, mukororo wangu Dhavhidha, ngokuti andichazokutambudzizve, ngokuti nyamashi mweya wangu unomutengo mukurutu mukuona kwako. Ringira, ndakaita upenzi, ndakashaisha kakurutu.” Dhavhidha wakapingura echiti, “Ringira, mukhondo wamambo! Tendera umwe wemajaha kuti auye kootora. Mambo Mwari unopa kumunhu umwe ngaumwe kudai ngokururama kwake nokugondeka kwake; ngokuti Mambo Mwari wakakupa munyara dzangu nyamashi, asi andizi kutambanudza nyara yangu kunewakadzodzwa waMambo Mwari. Penya, kudai ngokupona kwako kunomutengo mukurutu nyamashi mukuona kwangu, ngokudaro kupona kwangu ngakuano mutengo mukurutu mukuona kwaMambo Mwari, kuti andinunure mumadambudziko eshe.” Zvino Sauri wakati kunaDhavhidha, “Unomuchena, iwewe Dhavhidha, mukororo wangu! Unozoita zviro zvikuru nokunyisa.” Ndizvo Dhavhidha wakaenda kundau yake, naSauri wakahwirira kundau yake. Dhavhidha wakati mumwoyo mwake, “Ndinozofa ngezuva rimweni ngenyara yaSauri; akuna chiro chakapinda kunaka kwendiri kwega kutizira kunyika yevaFiristia; zvino Sauri unozopera simba ngokunditsvaka mumigano yeshe yaIsuraeri, neni ndinozopokonyoka kubva kunyara yake.” Ndizvo Dhavhidha wakamiruka, akadarika nevanhu mazana matanhatu (600) vaiya naye kuenda kunaAkhishi, mukororo waMaokhi, mambo weGathi. NaDhavhidha wakagara naAkhishi muGathi, iye nevanhu vake vehondo, munhu umwe ngaumwe nemhuri yake, naDhavhidha nevakadzi vake vairi, Ahinoamu muJezireeri, naAbhigairi muKharmeri shirikadzi yaNabhari. Naapo Sauri aronzerwa kuti Dhavhidha wakatizira Gathi, aazi kuchamutsvaka. Zvino Dhavhidha wakati kunaAkhishi, “Kudai zvino ndaona nyasha mukuona kwako, ngavandipe ndau munerimwe remadhorobha emunyika muno, kuti ndigaremwo; ngokuti ngenyi muranda wako echigara newe mudhorobha roumambo muno?” Ndizvo ngezuva iro Akhishi wakamupa Zikiragi; ndizvo Zikiragi rakaita remadzimambo aJudha metsa nanyamashi. Mukuwo wokugara kwaDhavhidha munyika yevaFiristia wakaita gore nemwedzi mirongomuna. Zvino Dhavhidha nevanhu vake vakakwira kuenda koochakata vaGeshuri, vaGeza navaAmareki; ngokuti awo madzinza vanhu vaigara iyo nyika kare, ngenjira inoenda Shuri, metsa kuguma kunyika yeEgipite. Dhavhidha wakachakata nyika, aazi kusiya mwamuna nokuti mukadzi echipona, asi wakatora makwai, n'ombe, zvimbongoro, makamera nezvokusimira, wakahwirira kunaAkhishi. Naapo Akhishi wakati, “Wachakata kuri nyamashi?” Dhavhidha wakati, “Ndachakata kurupande rwokubani rwaJudha, norupande rwokubani rwavaJerameeri, norupande rwokubani rwavaKheni.” Dhavhidha aazi kuponesa mwamuna nokuti mukadzi kuvaunza Gathi echiti, “Pamweni vaizoronza tisu vechiti, ‘Dhavhidha wakaita izvi neizvo.’ ” Waizoita kudaro mukuwo weshe waaigara munyika yevaFiristia. Akhishi wakagonda Dhavhidha echiti, “Wakaita kuti vanhu vake vaIsuraeri vamunyenye; ndizvo unozoita muranda wangu mhera nariini.” Ngaawo mazuva vaFiristia vakaunganidza hondo dzavo kurwa naIsuraeri. Akhishi wakati kunaDhavhidha, “Zwisisa ngegwinyiso kuti unozoenda neni koorwa, iwewe nevanhu vako.” Dhavhidha wakati kunaAkhishi, “Ngegwinyiso unozozia icho chaanokona kuita muranda wako.” NaAkhishi wakati kunaDhavhidha, “Ndizvo ndinozokuita mungwariri wesoro rangu mhera nariini.” Zvino Samueri waiya afa, nevaIsuraeri veshe vakamuchema nokumuika muRama, mudhorobha rake. Sauri waiya adzinga avo vaiya nemweya yokufembera nevaroyi kubva munyika iyo. VaFiristia vakaungana pamwepo, vakauya, vakaaka matende paShunemu. Sauri wakaunganidza vaIsuraeri veshe pamwepo, vakauya, vakaaka matende muGiribhoa. Naapo Sauri aona hondo dzevaFiristia, wakatya nomwoyo wake wakahuta kakurutu. Naapo Sauri wakabvunza kunaMambo Mwari, Mambo Mwari aazi kumupingura, haiwa ngokurota, nokuti ngoUrimu, nokuti ngevaprofeti. Zvino Sauri wakati kuvaranda vake, “Nditsvakirei mukadzi unomukirwa ngomweya wokufembera, kuti ndiende kwaari, ndibvunze kwaari.” Varanda vake vakati kwaari, “Ringirai, uripo mukadzi muEnidhori unomukirwa.” Ndizvo Sauri wakadziitisa, akasimira machira amweni, naye wakaendayo nevanhu vairi. Vakauya kunomukadzi usiku. Wakati, “Ndapota, ndibvunzire mweya, undiunzire uwo wendinozodudza kwouri.” Mukadzi wakati kwaari, “Ringira, ngegwinyiso unozia icho chaakaita Sauri, kuti wakadzinga avo vanemweya wokufembera nevaroyi kubva munyika. Ngenyi wechinditeya ngomurau, kuti ndife?” Asi Sauri wakapika kwaari ndiMambo Mwari echiti, “Kudai ngezvaanopona Mambo Mwari, akuzoapo kujeziswa kwouri ngendaa yeichi chiro.” Zvino mukadzi wakati, “Ndinozokuunzira anani?” Naye wakati, “Ndiunzire Samueri.” Naapo mukadzi paakaona Samueri, wakadaidzira ngeizwi gurutu; nomukadzi wakaereketa kunaSauri echiti, “Wandichengedzera ngenyi? Iwewe ndiwe Sauri.” Mambo wakati kwaari, “Usatya, unoonenyi?” Nomukadzi wakati kunaSauri, “Ndinoona chimwari chechibuda panyika.” Wakati kwaari, “Wakadai ndiani muemo wake?” Naye wakati, “Musharuka unobuda; akasimira nguwe.” Ndizvo Sauri wakazia kuti ndiSamueri, naye wakatsikitsira hope yake pashi, akadzikotamisa mukuremeredza. Zvino Samueri wakati kunaSauri, “Wandinesa ngenyi ngokundimusa?” Sauri wakapingura, akati, “Ndinotambudzwa kakurutu, ngokuti vaFiristia vanorwa neni, naMwari wakabva kwendiri, aachandipinguri, haiwa ngokuprofeta, nokuti ngokurota; ndizvo ndakudaidza kuti undironzere icho chendinozoita.” Samueri wakati, “Unondibvunza ngenyi, wechiona kuti Mwari wakakusiya, akaita gaa rako? Mambo Mwari wakaita emene, kudai ngezvaakaereketa kubudikidza ndini; ngokuti Mambo Mwari wakabvisa umambo munyara yako, akahupa kunomuakirwana wako Dhavhidha. Ngokuti iwewe auzi kupurutana izwi raMambo Mwari, nokuti kuita ushungu hwake padera pavaAmareki, ndizvo Mambo Mwari waita ichi chiro kwouri nyamashi. Zvino Mambo Mwari unozopira vaIsuraeri newe munyara dzavaFiristia; mangwani iwewe navakororo vako munozoa neni. Mambo Mwari unozopira hondo dzavaIsuraeri munyara dzavaFiristia.” Apapo Sauri wakawa pashi pamavhu, wakatya kakurutu, ngendaa yemazwi aSamueri; naye wakapera simba, ngokuti waiya asikazi kudya chiro zuva reshe nousiku hweshe. Mukadzi wakauya kunaSauri, wakaona kuti waiya echitya kakurutu, wakati kwaari, “Ringira, murandakadzi wako wakapurutana izwi rako, ndakaisa kupona kwangu mungozi, ndakapurutana mazwi awo ewakaereketa kwendiri. Ndizvo zvino, iwewewo, purutana izwi romurandakadzi wako, tenda kuti ndiise kachingwa pamberi pako. Idya, kuti ugwinye, apo woohamba.” Wakaramba, akati, “Andizodyi.” Asi varanda vake, pamwepo nomukadzi, vakamuangiridza; naye wakapurutana mazwi avo. Ndizvo wakamiruka kubva pamavhu, wakagara pamubhedhi. Zvino mukadzi waiya nekonyana rakanuna mumhatso. Wakakasira kuriuraya, wakatora ufu, wakahukanya, wakabika ndihwo chingwa chisina mumera. Wakachiunza pamberi paSauri nevaranda vake; navo vakadya. Zvino vakamiruka, vakaenda ngousiku uhwo. Zvino vaFiristia vakaunganidza hondo dzavo dzeshe paAfeki; naapo vaIsuraeri vaidzimika matende avo pasinde pechinyuka chiri muJezireeri. Naapo madzimambo evaFiristia aipinda ngemazana nemakumi emazana, Dhavhidha nevanhu vake naAkhishi vaiteera sure. Nduna dzevaFiristia dzakati, “VaHebheru ava vanoitenyi pano?” NaAkhishi wakati kunenduna dzevaFiristia, “Uyu andiyepi Dhavhidha here, muranda waSauri mambo waIsuraeri, uwo waiya neni mazuva nemakore? Inini andizi kuona ndaa kwaari, kubvira mukuwo waakauya kwendiri metsa nyamashi.” Asi nduna dzevaFiristia dzakashatirwa ndiye; nenduna dzevaFiristia dzakati kwaari, “Ita kuti munhu uyu apetuke sure kundau yake yowakamuemesera. Usatenda kuti adzake koorwa, ngokuti pamweni mukurwa ungaita gaa kwetiri. Ngokuti ungaita maiyaniranenyi pachake nomukuru wake? Akungaiti ngemasoro eava vanhu here? Uyu andiyepi Dhavhidha here, uwo wevakaemba ndiye umwe kunoumweni mukuzvina vechiti, “ ‘Sauri wakauraya zvake makumi emazana, naDhavhidha gumi remakumi emazana?’ ” Zvino Akhishi wakadaidza Dhavhidha, akati kwaari, “Ngegwinyiso kudai ngezvaanopona Mambo Mwari, iwewe wakaita wakarurama neni ndaizodakara kuti urwe neni mukurwa hondo, ngokuti andizi kuona zvakashata kwouri kubvira zuva rokuuya kwako kwendiri metsa nyamashi. Zvakanyadaro madzimambo aadakari ndiwe. Ndizvo zvino hwirira, uende mukunyarara; usaita chiro kushaishira madzimambo evaFiristia.” Dhavhidha wakati kunaAkhishi, “Asi ndakaitenyi? Wakaonenyi kunomuranda wako mukuwo weshe wendakagara newe metsa nyamashi, kuti ndisaenda koorwa nemagaa makosi wangu mambo?” Akhishi wakapingura, akati kunaDhavhidha, “Ndinozia kuti iwewe unodikanwa mukuona kwangu, kudai ngengirosi yaMambo Mwari; zvakanyadaro nduna dzevaFiristia dzakati, ‘Auzokwiri nesu koorwa.’ Ndizvo zvino muka mangwanani, iwewe nevaranda vamambo wako, avo vakauya newe; uende apo kwaedza.” Ndizvo Dhavhidha nevanhu vake vakakasira kuenda mangwanani maishi, kupetuka kunyika yevaFiristia. Asi vaFiristia vakakwira Jezireeri. Zvino apo Dhavhidha navanhu vake vauya Zikiragi ngezuva rechitatu, vaAmareki vaiya vachakata ngokubani nokuZikiragi. Vakarwisa Zikiragi, vakaripisha ngomuriro. Vakatora vakadzi navo veshe vaiyamwo kuita vabatwa; avazi kuuraya naumwe wavo, vakuru nokuti vadoko, asi vakavatora, vakaenda. Naapo Dhavhidha navanhu vake vakauya kudhorobha, vakariona rapishwa ngomuriro; vakadzi vavo nevakororo vavo nevanasikana vavo vakaizwa hloko. Zvino Dhavhidha nevanhu vaiya naye vakachema, metsa vaiya vasisina simba rokuchema. Vakadzi vairi vaDhavhidha vaiya vaizwe hloko, Ahinoamu muJezireeri, naAbhigairi shirikadzi yaNabhari muKarmeri. Dhavhidha waiya mudambudziko gurutu, ngokuti vanhu vakaereketa ngokumuponda ngemapuwe, ngokuti mweya yavanhu veshe yaiya yashatirwa, munhu weshe ngendaa yevakororo vake nevanasikana vake. Asi Dhavhidha wakadzigwinyisa munaMambo Mwari, Mwari wake. Dhavhidha wakati kunomupristi Abhiatha, mukororo waAhimerekhi, “Ndapota, ndiunzire efodhi.” NaAbhiatha wakaunza efodhi kunaDhavhidha. Dhavhidha wakabvunza Mambo Mwari echiti, “Ndoiteera here hondo iyi? Ndinozovabata here?” Wakamupingura, “Vateere; ngokuti ngegwinyiso unozovabata, nokuunzazve zveshe.” Ndizvo Dhavhidha wakaenda iye nevamuna vaiya naye mazana matanhatu (600). Vakaguma pamukova unozwi Bhesori, apo paiya pakagara vakasiiwa. Asi Dhavhidha nevamuna vaiya naye mazana marongomuna (400) vakateera; mazana mairi (200) akasara sure ngokuti vaiya vademera vasikachakoni kuambuka mukova Bhesori. Navo vakaona muEgipite murubaya, vakamuunza kunaDhavhidha. Vakamupa chingwa, naye wakadya; vakamupa mvura kuti amwe. Vakamupazve chingwa chemaonde akaoma, nezvikore zviiri zvemavhini akaoma. Naapo adya, mweya wake wakagwinyiswa, ngokuti waiya asikazi kudya chingwa nokuti kumwa mvura mazuva matatu usiku nemasikati. Zvino Dhavhidha wakati kwaari, “Uri waani? Unobva kuri?” Naye wakati, “Ndiri jaha reEgipite, muranda womuAmareki. Mambo wangu wakandisiya ngokuti mazuva matatu akapera ndakarwara. Takachakata kubani kwevaKherethi, nokumugano waJudha, nokubani kwaKharebhu; nesu takapisha Zikiragi ngomuriro.” Dhavhidha wakati kwaari, “Unganditora here kuicho chikwata?” Naye wakati, “Pika kwendiri ndiMwari kuti auzondiurayi nokuti kundipira munyara dzamambo wangu, neni ndinozokutora kuicho chikwata.” Naapo amutora, vaiya vapararira pandau dzeshe, vechidya nokumwa nokuzvina, ngendaa yezvakachakatwa zvizhinji zvevakatora kubva kunyika yevaFiristia nokubva kunyika yaJudha. Dhavhidha wakavarwisa kubvira madeekoni metsa madeekoni echimangwani. Apana naumwe wavo wakapokonyoka, kwega mazana marongomuna (400) emajaha awo akagadha pamakamera, akatiza. Dhavhidha wakatora zveshe izvo zvaiya zvatorwa ngevaAmareki; naDhavhidha wakaponesa vakadzi vake vairi. Apana chiro chaitamika kwevari, chidoko nokuti chikuru, vakororo nokuti vanasikana, nokuti zvakachakatwa, nokuti chiro nachimwe chakatorwa kwavari; Dhavhidha wakapetudza zveshe. Dhavhidha wakatora zvifuyo zveshe makwai nen'ombe, zvevakatinha pamberi pen'ombe dzimweni; vanhu vakati, “Izvi ngezvakachakatwa zvaDhavhidha.” Zvino Dhavhidha wakaguma kunemazana mairi (200) evanhu vaiya vademera vasikachakoni kuteera Dhavhidha, vaiya vakasiiwa pamufuya unozwi Bhesori. Vakabuda kooshongana naDhavhidha, nokooshongana nevanhu vaiya naye. Naapo Dhavhidha paakauya kunevanhu, wakavachingamidza. Naapo vakapingura vanhu veshe vakashata vasikadetseri chiro vaiya naDhavhidha vechiti, “Ngokuti avazi kuenda nesu, atizovapi chiro cheizvo zvakachakatwa zvetakatora, kwega kuti munhu weshe atore mukadzi wake nevana vake, vaende.” Asi Dhavhidha wakati, “Amuzoiti kudaro, hama dzangu, ngeizvo zvaakatipa Mambo Mwari, uwo wakatingwarira, wakapira magaa edu munyara dzedu awo akatirwisa. Ndiani ungamupurutana ngendaa iyi? Ngokuti chikoaniswa chowakaenda kuhondo chinozoedzana nechikoaniswa chowakagara nenhumbi; vanozokoanisirwa zvakaedzana.” Kubvira zuva iro kuenda mberi, wakachiita kuti chiite chironzo nomupango kuvaIsuraeri metsa nanyamashi. Naapo Dhavhidha paakaguma Zikiragi, wakatumira rupande rwezvakachakatwa kushamwari dzake vakuru vaJudha echiti, “Hecho chipo chenyu kubva panezvakachakatwa zvemagaa aMambo Mwari.” Zvaiya zvaavo vaiya vari muBheteri, vari muRamothi rekubani, vari muJatiri, vari muAroeri, vari muSifimothi, vari muEshitemoa, vari muRakhari, vari mumadhorobha evaJerameeri, vari mumadhorobha evaKheni, vari muHorma, vari muBhorashani, vari muAthakhi, vari muHebroni, nokundau dzeshe apo Dhavhidha nevanhu vake vakarovedzera kugara. Zvino vaFiristia vakarwa navaIsuraeri; nevamuna vaIsuraeri vakatiza kubva pamberi pevaFiristia, vazhinji vakawa pashi, vakaurawa paMutunhu weGiribhoa. VaFiristia vakarumbirira Sauri navakororo vake ngesimba; nevaFiristia vakauraya Jonathani naAbhinadhabhi naMarikhishua, vakororo vaSauri. Kurwa kwakakonzera Sauri; wakafurwa ngavanhu vouta, naye wakaremadzwa kakurutu ndivo. Naapo Sauri wakati kumutwari wechihlangu chake, “Shwamura shoti yako, undibaye kundipotya ndiyo, kuti vasikazi kuchekwa ava vasauya koondibaya nokundidadira.” Asi mutwari wechihlangu chake wakaramba, ngokuti waitya kakurutu. Ndizvo Sauri wakatora shoti yake, wakawira padera payo. Naapo mutwari wechihlangu chake aona kuti Sauri wafa, iye nayewo wakawira padera peshoti yake, wakafa naye. Ndizvo Sauri wakafa, nevakororo vake vatatu, nomutwari wechihlangu chake, nevanhu vake veshe, pamwepo ngezuva rimwero. Naapo vamuna vamweni vaIsuraeri vaiya ngoruseri rweJorodhani vaona kuti vamuna vaIsuraeri vatiza, nokuti Sauri nevakororo vake vaiya vafa, vakasiya madhorobha avo, vakatiza; nevaFiristia vakauya vakagaramwo. Ngezuva raiteera, apo vaFiristia vakauya koochakata zvevakafa, vakaona Sauri nevakororo vake vatatu vakafa paMutunhu Giribhoa. Navo vakagura soro rake, vakatora zvokurwa zvake, vakatuma vanhu kunyika yeshe yevaFiristia yakatendenedza, kuziisa izvi mumhatso dzezvimwari zvavo, nokuvanhu. Vakaisa zvokurwa zvake mumhatso yaAshitharothi; vakaturika muiri wake parukumbati rweBhethishani. Asi vagari veJabheshigireadhi vakazwa ngeicho chevakaita vaFiristia kunaSauri. Ngwazi dzeshe dzakamiruka, dzakahamba usiku hweshe, dzakatora muiri waSauri, nemiiri yevakororo vake kubva parukumbati rweBhethishani. Vakauya Jabheshi, vakaipishapo. Zvino vakatora magodo avo, vakaatsira pashi pomuti womuthamarisiki muJabheshi, vakaera kudya mazuva manomwe. Ngesure kwokufa kwaSauri, naapo Dhavhidha apetuka kubva koonyisa vaAmareki, Dhavhidha wakagara mazuva mairi muZikiragi. Ngezuva rechitatu, ringira, munhu wakauya kubva mukamba yaSauri, nemachira ake akabauka, nemavhu padera pesoro rake. Naapo auya kunaDhavhidha, wakawa pamavhu kuremeredza. Dhavhidha wakati kwaari, “Wabva kuri?” Wakati kwaari, “Ndatiza kubva mukamba yevaIsuraeri.” Dhavhidha wakati kwaari, “Chiinyi chakaitika? Ndapota, ndironzere!” Naye wakapingura akati, “Vanhu vehondo vakatiza kubva pahondo, asiwo vanhu vazhinji vakanyiswa, vakafa; Sauri naJonathani mukororo wake vakafawo.” Zvino Dhavhidha wakati kunejaha iro rakamuronzera, “Unozia ngenyi kuti Sauri naJonathani mukororo wake vafa?” Jaha rakamuronzera rakati, “Ndakashonganapo paMutunhu weGiribhoa; ndakaona Sauri akatseyama pamukhondo wake; naapo ngoro nevagadhi vemahachi vaguma pasinde. Naapo aringira sure kwake, wakandiona, akandidaidza. Ndakapingura, ‘Ndiri pano, makosi.’ Wakati kwendiri, ‘Ndiwe anani?’ Ndakamupingura, ‘Ndiri muAmareki.’ Wakati kwendiri, ‘Uya, ema pasinde pangu undiuraye, ngokuti kurwadziwa kukuru kwandibata, asi kupona kwangu kuchineni.’ Ndizvo ndakaema pasinde pake, ndakamuuraya, ngokuti ndakazia ngegwinyiso kuti aachaponi ngesure akawa. Ndakatora dzungudza raiya pasoro rake nebeda raiya mumuoko wake, ndakazviunza pano kunamambo wangu.” Zvino Dhavhidha wakabata, akabaura machira ake; nevanhu veshe vaiya naye vakaita kudaro. Vakatsumba, vakachema, vakarekera kudya metsa madeekoni, ngendaa yaSauri naJonathani mukororo wake, nevanhu vehondo vaMambo Mwari, nevemhatso yaIsuraeri, ngokuti vakawa veshe ngokupinza kweshoti. Dhavhidha wakati kunejaha iro rakamuronzera, “Unobva kuri?” Naro rakati, “Ndiri mukororo womunhu mupara, weAmareki.” Dhavhidha wakati kweriri, “Auzi kutya ngenyi kutambanudza nyara yako kuuraya wakadzodzwa waMambo Mwari?” Zvino Dhavhidha wakadaidza umwe wemajaha, akati, “Kwedzera pasinde umuuraye.” Ndizvo wakamubaya, akafa. Dhavhidha wakati kwaari, “Ngazi yako ngaiwe padera pesoro rako; ngokuti ngomuromo wako wakapupurira wemene wechiti, ‘Ndakauraya wakadzodzwa waMambo Mwari.’ ” Dhavhidha wakachema ngeichi chiriro padera paSauri naJonathani mukororo wake. (Wakapanga kuti vadzidzise vana vaJudha Ruyo urwu rwoUta; penya rwakanyorwa muBhuku raJasha.) Wakati: Uthende hwako, A Isuraeri, hwaurawa padera pendau dzako dzakakwirira! Ngwazi dzakaita mawirenyi! Musaereketa ndizvo muGathi, musazviparadzira mumapato eAshikeroni, kuti vanasikana vevaFiristia vasadakara, kuti vanasikana vevasikazi kuchekwa vasapembera. Imwimwi Mitunhu yeGiribhoa, kusazoapo beto nemvura padera penyu, nokuti minda inobudisa zviyo! Ngokuti apo chihlangu chengwazi chakatsvetwa ngenjira inotsverudza, chihlangu chaSauri chadai ngechisikazi kudzodzwa ngemafuta. Kubva kungazi yevakaurawa, kubva kumafuta engwazi, uta hwaJonathani auzi kupetuka, nokuti shoti yaSauri yakapetuka isina chiro. Sauri naJonathani vaidikanwa, vaiya vakanaka! Mukupona kwavo nomukufa avazi kuparadzaniswa; vaikasiririsa kupinda makodzi, vaiya nesimba kupinda mhondoro. Imwimwi vanasikana vaIsuraeri, chemerai Sauri, uwo wakamupfekisa ngeharahara, nangezvimweni zvinodakadzisa, uwo wakanemesa zvinemeso zvomukore padera pezvokufuka zvenyu. Ngwazi dzakaita mawirenyi pakati pokurwa! Jonathani wakaurawa mundau dzako dzakakwirira. Ndinotambudzika ndiwe, mukoma wangu Jonathani; waidikanwa kakurutu kwendiri; rudo rwako kwendiri rwaishamisa, kupinda rudo rwevakadzi. Ngwazi dzakaita mawirenyi, nezvokurwa zvehondo zvaparadzwa! Ngesure kweizvi Dhavhidha wakabvunza kunaMambo Mwari echiti, “Ndingakwira here kuguta nokuti ngeriri raJudha?” Mambo Mwari wakati kwaari, “Kwira.” Dhavhidha wakati, “Ndinozokwira kundau iri?” Wakati, “KuHebroni.” Ndizvo Dhavhidha wakakwirayo, nevakadzi vake vairi, Ahinoamu muJezireeri, naAbhigairi, shirikadzi yaNabhari muKharmeri. Dhavhidha wakaunza vanhu vake vaiya naye, munhu weshe nemhuri yake; navo vakagara mumaguta eHebroni. Zvino vamuna vaJudha vakauya, vakadzodzapo Dhavhidha kuita mambo padera pemhatso yaJudha. Naapo vakaronzera Dhavhidha vechiti, “Vamuna vaJabheshigireadhi ndivo vakaika Sauri,” Dhavhidha wakatuma nhumwa kuvamuna veJabheshigireadhi echiti kwevari, “Mambo Mwari ngaamufumise, ngokuti mwakaonisa nyasha iyi kunamambo wenyu, Sauri, ngokumuika! Zvino Mambo Mwari ngaaonise nyasha negwinyiso kwomuri! Neniwo ndinozoonisa nyasha kwomuri, ngokuti mwakaita ichi chiro. Ndizvo nyara dzenyu ngadzigwinyiswe, mushinge; ngokuti mambo wenyu Sauri wakafa, nemhatso yaJudha yakandidzodza kuita mambo padera pavo.” Asi Abhina mukororo waNeri, nduna yehondo yaSauri, wakatora Ishibhoshethi, mukororo waSauri, wakamuunza kuMahanaimu. Wakamuita mambo padera peGireadhi, vaAshu, vaJezireeri, vaEfuremu, vaBhenjamini, nepadera pevaIsuraeri veshe. Ishibhoshethi, mukororo waSauri waiya anemakore makumi marongomuna apo paakatanga kutonga padera paIsuraeri, naye wakatonga makore mairi. Asi mhatso yaJudha yakateera Dhavhidha. Nguva iyo Dhavhidha yaakaita mambo muHebroni padera pemhatso yaJudha yaiya makore manomwe nemwedzi mitanhatu. Abhina mukororo waNeri, nevaranda vaIshibhoshethi mukororo waSauri vakabuda kubva Mahanaimu kuenda Gibheoni. Joabhi mukororo waZeruia, nevaranda vaDhavhidha, vakabuda vakashongana navo padziya reGibheoni. Chikwata chimwe chakagara pashi parutii rumwe rwedziya, nechimweni chakagara parutii rumweni rwedziya. Abhina wakati kunaJoabhi, “Majaha ngaamiruke zvino vavhikisane pamberi pedu.” Joabhi wakati, “Ngavamiruke vauye mberi.” Ndizvo vakamiruka, vakaerengwa vechipinda, gumi navairi vaBhenjamini naIshibhoshethi mukororo waSauri, nevaranda vaDhavhidha gumi navairi. Navo vakabatana ngamasoro, vakabayana ngeshoti parutii; ndizvo vakawa pashi pamwepo. Ndizvo zina rendau iyo rakadudzwa kuti, Herikathi-hazurimu (rubaya rwengazi), ruri muGibheoni. Hondo yaityisa kakurutu ngeiro zuva; Abhina nevanhu vaIsuraeri vakanyiswa ngevaranda vaDhavhidha. Joabhi, naAbhishai, naAsaheri, vakororo vatatu vaZeruia vaiyapo. Zvino Asaheri wairumba ngokukasira kudai ngemhara yomushango. Asaheri wakarumbirira Abhina; mukurumba kwake aazi kupauka kuenda kumudyo nokuti kumuoshwe, apo aiteera Abhina. Zvino Abhina wakaringira sure kwake, akati, “Ndiwe Asaheri here?” Naye wakapingura akati, “Eya ndini.” Abhina wakati kwaari, “Paukira kumudyo nokuti kumuoshwe, ubate umwe wemajaha, utore zvakachakatwa zvake.” Asi Asaheri aazi kupauka kubva mukumuteera. Abhina wakatizve kunaAsaheri, “Pauka kubva mukunditeera; ndingakuurayirenyi? Ndingazoita maringiriranenyi naJoabhi mukoma wako?” Asi wakaramba kupauka. Ndizvo Abhina wakamubaya mundani ngechibato chomukhondo, chakamupotya ngokumushana. Wakawa apo, akafa pandauyo. Naavo veshe vakagumapo paakafira Asaheri, vakaemapo. Asi Joabhi naAbhishai vakarumbirira Abhina. Naapo zuva raakupota vakaguma kuMutunhu weAma, uwo uri pamberi peGiya, munjira yomushango reGibheoni. Vanhu vaBhenjamini vakaungana ngokwavo sure kwaAbhina, vakaita chikwata chimwe; vakaema padera pomutunhu. Zvino Abhina wakadaidzira kunaJoabhi echiti, “Shoti inoparadza mhera nariini here? Auzii here kuti magumo anozovava? Unozoita mukuwo wakaitawani usati wapanga vanhu kuti varekere kurumbirira hama dzavo?” Joabhi wakati, “Kudai ngezvaanopona Mambo Mwari, kudai usikazi kuereketa, ngegwinyiso vanhu vaizoangira kurumbirira hama dzavo, vasikarekeri metsa mangwani.” Ndizvo Joabhi wakaridza hwama, nevanhu veshe vakaema; avazi kucharumbirira Isuraeri nokuti kuangira kurwa. Abhina nevanhu vake vakahamba usiku hweshe, kupinda ngomuArabha; vakaambuka paJorodhani, vakahamba masikati eshe ngomuBhitroni, vakaguma Mahanaimu. Joabhi wakapetuka kubva koorumbirira Abhina; naapo aiya aunganidza vanhu veshe pamwepo, kwakatamika varanda vaDhavhidha, gumi nevapfumbamwe, ngepabanze paAsaheri. Asi varanda vaDhavhidha vaiya vauraya vanhu vaBhenjamini, mazana matatu nemakumi matanhatu (360) evanhu vaAbhina. Vakatora Asaheri, vakamuika muiba rababa ake, iro raiya muBhetherehema. Joabhi nevanhu vake vakahamba usiku hweshe, vakaguma Hebroni kwoedza. Kwaiyapo kurwa mukuwo wakareba pakati pemhatso yaSauri neyaDhavhidha. Dhavhidha wakaangirira kuanesimba, asi mhatso yaSauri yakaangirira kupera simba. Dhavhidha wakaberekerwa vakororo muHebroni: wedangwe waiya Amunoni, wakaberekwa ndiAhinoamu muJezireeri; wechipiri waiya Khireabhi, waAbhigairi shirikadzi yaNabhari muKharmeri; wechitatu waiya Abhusaromu mukororo waMaakha, mwanasikana waTharimai mambo weGeshuri; wechina Adhonija mukororo waHagithi; wechishanu Shefatia mukororo waAbhithari; nowechitanhatu Ithreamu waEgira mukadzi waDhavhidha. Ava vakabarirwa Dhavhidha muHebroni. Naapo kwaiyapo kurwa pakati pemhatso yaSauri neyaDhavhidha, Abhina wakadzigwinyisa kurwira mhatso yaSauri. Zvino Sauri waiya nebunha, zina raro raizwi Rizipha, mwanasikana waAia. NaIshibhoshethi wakati kunaAbhina, “Wapindirenyi kubunha rababa angu?” Ndizvo Abhina wakanyangadzwa kakurutu ngemazwi aIshibhoshethi, wakati, “Inini ndiri soro reimbwa here, inorwira Judha? Nyamashi ndinoangira kuitira nyasha mhatso yaSauri baba ako, nokunehama dzake, nokunevangani vake, ndisikazi kukupira munyara dzaDhavhidha; asi unondiitira ndaa nyamashi ngouyu mukadzi. Ndizvo Mwari ngaaite kunaAbhina nokututsirazve kwezviri! Ngokuti kudai ndisikaitiri Dhavhidha izvo zvaakapika Mambo Mwari kwaari, kudusa umambo kubva kumhatso yaSauri, nokuemesa dendemaro raDhavhidha padera paIsuraeri nepadera paJudha, kubvira Dhani kuguma Bheerishebha.” NaIshibhoshethi aazi kupingurazve izwi kunaAbhina, ngokuti waimutya. Abhina wakatuma nhumwa kunaDhavhidha muHebroni echiti, “Nyika ngeyani? Ita chitenderano chako neni; ringira, nyara yangu inozokudetsera kuunza veshe vaIsuraeri kwouri.” Naye wakati, “Zvakanaka; ndinozoita chitenderano newe. Asi chiro chimwe chendinoda kubva kwouri, ngechokuti auzooni hope yangu usati waunza Mikhari mwanasikana waSauri, apo wouya koona hope yangu.” Zvino Dhavhidha wakatuma nhumwa kunaIshibhoshethi mukororo waSauri echiti, “Ndipe mukadzi wangu Mikhari, uwo wendakadzitengera ngezana remakanda emafumho evaFiristia.”. Ishibhoshethi wakatumira, koomutora kubva kunomwamuna wake Pharitieri mukororo waRaishi. Asi mwamuna wake wakateera ngesure kwake echimuchemera metsa vaguma Bhahurimu. Zvino Abhina wakati kwaari, “Chihwirira kanyi!” Naye wakahwirira. Abhina wakatumira izwi kuvakuru vaIsuraeri echiti, “Mwakada Dhavhidha mukuwo wakapinda kuti aite mambo padera penyu. Ndizvo zvino itai; ngokuti Mambo Mwari wakagondisa ndiDhavhidha echiti, ‘Ngenyara yomuranda wangu Dhavhidha ndinozoponesa vanhu vangu Isuraeri kubva kunyara dzevaFiristia, nomunyara dzemagaa avo eshe.’ ” Abhina wakaereketazve munzee dzaBhenjamini; zvino Abhina wakaenda kooronzera Dhavhidha muHebroni izvo zveshe zvevakatenderana kuita vaIsuraeri nevemhatso yeshe yaBhenjamini. Naapo Abhina wakaguma Hebroni kunaDhavhidha, echihamba nevanhu makumi mairi. Dhavhidha wakanasirira Abhina dhiri, nevanhu vaiya naye. Abhina wakati kunaDhavhidha, “Ndomiruka ndiende ndiunganidze vaIsuraeri veshe kunamakosi wangu mambo, kuitira kuti vaite chitenderano newe, nokuti utonge padera pavo veshe kudai ngezvinodikanwa ngomwoyo wako.” Ndizvo Dhavhidha wakaendesa Abhina, naye wakaenda ngokunyarara. Zvino, varanda vaDhavhidha naJoabhi vakauya kubva koochakata, vakaunza zvakachakatwa zvizhinji navo. Asi Abhina waiya asiyana naDhavhidha muHebroni, ngokuti waiya amuendisa naye wakaenda mukunyarara. Naapo Joabhi nehondo yaiya naye yauya, vakaronzera Joabhi vechiti, “Abhina mukororo waNeri wakauya kunamambo, naye wakamuendesa, wakaenda mukunyarara.” Zvino Joabhi wakaenda kunamambo echiti, “Wakaitenyi? Ringira, Abhina wakauya kwouri; ngenyi wakamuendesa, kuti aende? Unozia kuti Abhina mukororo waNeri wakauya kookuchengedzera, nokuona kubuda kwako nokupotera kwako, nokuzia zveshe zvounoita.” Naapo Joabhi abuda kubva pamberi paDhavhidha, wakatuma nhumwa kuteera Abhina, vakamuunzazve kubva kuchinyuka cheSira; asi Dhavhidha aazi kuzvizia. Naapo Abhina apetuka Hebroni, Joabhi wakamutora kuenda naye ari ega, akaenda parutii pamusiwo wedhorobha kooereketa naye ngokufishika, naapo wakamubaya mundani. Ndizvo wakafa, ngendaa yengazi yaAsaheri hama yake. Ngesure, apo Dhavhidha azwa, wakati, “Inini noumambo hwangu atina ndaa pamberi paMambo Mwari mhera nariini ngendaa yengazi yaAbhina mukororo waNeri. Ndaa ngaiwe padera pesoro raJoabhi, nepadera pemhatso yeshe yababa ake; kusazoapo naumwe waJoabhi usikazobudisi ngazi, nokuti mapere, nokuti unotseama pamudondoro, nokuti unowa padera peshoti, nokuti unotama chingwa.” Ndizvo Joabhi naAbhishai hama yake vakauraya Abhina, ngokuti wakauraya hama yavo Asaheri mukurwa muGibheoni. Zvino Dhavhidha wakati kunaJoabhi, nokuvanhu veshe vaiya naye, “Baurai zvokusimira zvenyu, mudzipfekese ngemachira emasaka, mucheme Abhina.” Namambo Dhavhidha emene wakateera muiri wakafa. Vakaika Abhina muHebroni. Mambo wakachema yaamho ngeizwi rake gurutu paiba raAbhina; nevanhu veshe vakachema. Mambo wakachema Abhina, akati, “Wakafa Abhina kudai ngokufa kwebenzi here? Nyara dzako dzaiya dzisikazi kusungwa, netsoka dzako dzaiya dzisikazi kusungwa ngemanguri; kudai ngomunhu unowa pamberi pevanhu vakashata, newe wakafa ngokudaro.” Nevanhu veshe vakamuchemazve. Zvino vanhu veshe vakauya koonyengerera Dhavhidha kuti adye kudya, achimasikati; asi Dhavhidha wakapika echiti, “Ndizvo Mwari ngaaite kudaro kwendiri nokupinda, kudai ndechizoraira chingwa, nokuti chiro chimweni hacho zuva risati rabira!” Ndizvo vanhu veshe vakaona izvi, zvakavadakadza; kudai ngezviro zveshe zvaakaita mambo zvakadakadza vanhu veshe. Ndizvo vanhu veshe nevaIsuraeri veshe vakazia ngeiro zuva kuti kusaiya kupanga kwamambo kuuraya Abhina mukororo waNeri. Namambo wakati kuvaranda vake, “Amuzii here kuti muzvare, munhu mukuru, wafa nyamashi muIsuraeri? Nyamashi inini andina simba, kunyazwi ndinyari mambo wakadzodzwa; ava vanhu vakororo vaZeruia vakakonza kwendiri. Mambo Mwari unozounzidzira kumuiti wezvakashata kudai ngomushando wake!” Naapo mukororo waSauri azwa kuti Abhina wafa muHebroni, nyara dzake dzakapera simba, navaIsuraeri veshe vakatambudzika. Mukororo waSauri waiya nevamuna vairi avo vaiya nduna dzechikwata chokuchakata; zina roumwe raiya Bhaana nezina roumweni raiya Rekhabhi. Vaiya vakororo vaRimoni muBheerothi, vedzinza raBhenjamini, (ngokuti Bheerothi wakaerengwa kuita waBhenjamini. Zvino vanhu veBheerothi vakatizira Gitaimu, vachandogareyo metsa nanyamashi.) Jonathani mukororo waSauri waiya nomukororo waiya chirema. Waiya namakore mashanu apo shoko raSauri naJonathani rakaguma kubva Jezireeri. Mungwariri wake wakamutora, akatiza; mukukasira kwake kutiza, wakawa, naye wakaita chirema. Zina rake raiya Mefibhoshethi. Zvino vakororo vaRimoni weBheerothi, Rekhabhi naBhaana, vakaenda, vakaguma masikati kwechipisha kumhatso yaIshibhoshethi, waiya akaata pamubhedhi masikati kuzorora. Vakapotera mukati mwemhatso, vechiita kudai ngevaida kutora koroni, vakamubaya mundani; zvino Rekhabhi naBhaana hama yake vakatiza. Zvino vaiya vakapinda mumhatso apo akaata pamubhedhi wake, mukamera rake rokuata; vakamubaya, vakamuuraya, vakamugura soro rake, vakaritora, vakaenda vakahamba ngenjira yeArabha usiku hweshe. Vakaunza soro raIshibhoshethi kunaDhavhidha muHebroni, vakati kunamambo, “Ringira, soro raIshibhoshethi mukororo waSauri gaa rako, uwo wakatsvaka kupona kwako; Mambo Mwari waunzidzira mukosi wangu mambo nyamashi ngendaa yaSauri nomubarirwana wake.” Dhavhidha wakapingura Rekhabhi naBhaana hama yake, vakororo vaRimoni weBheerothi, wakati kwevari, “Kudai ngezvaanopona Mambo Mwari, uwo wakasunhura mweya wangu kubva kumadambudziko eshe, naapo umwe uwo wakandironzera echiti, ‘Ringira, Sauri wafa,’ echipinimidza kuti waunza mashoko akanaka, ndakamubata, ndikamuuraya muZikiragi; uyu ndiwo waiya muthuso wendakamupa ngendaa yemashoko ake. Kunozopinda kwakaitawani kushata, apo vanhu vakashata vakauraya munhu wakarurama pamubhedhi wake mumhatso yake! Andizounzidziri here ngazi yake munyara dzenyu, nokumuparadza kubva munyika?” Ndizvo Dhavhidha wakapanga majaha ake, vakavauraya; vakagura nyara dzavo netsoka dzavo, vakaturika miiri yavo pasinde pegandwa muHebroni. Asi vakatora soro raIshibhoshethi, vakariika muiba raAbhina muHebroni. Zvino madzinza eshe aIsuraeri akauya kunaDhavhidha muHebroni vechiti, “Ringira, tiri magodo ako nenyama yako. Ngokuti panguva yakapinda, apo Sauri ari mambo padera pedu, ndiwe wakatungamirira nokuunzazve vaIsuraeri. Mambo Mwari wakati kwouri, ‘Ndiwe unozoita muushi wevanhu vangu Isuraeri, iwewe unozoita nduna padera paIsuraeri.’ ” Ndizvo vakuru veshe vaIsuraeri vakauya kunamambo muHebroni; namambo Dhavhidha wakaita chitenderano navo muHebroni pamberi paMambo Mwari, navo vakadzodza Dhavhidha kuita mambo padera paIsuraeri. Dhavhidha waiya aanemakore makumi matatu apo paakatanga kutonga, naye wakatonga makore makumi marongomuna. MuHebroni wakatonga padera paJudha makore manomwe nemwedzi mitanhatu; nomuJerusarema wakatonga makore makumi matatu namatatu padera paIsuraeri naJudha. Mambo nevanhu vake vakaenda Jerusarema koorwa nevaJebhusi, vaigara munyikamwo, avo vakaereketa kunaDhavhidha vechiti, “Auzopindi muno, kunyazwi mapofu nezvirema vanozokupetudza sure,” vechipinimidza kuti Dhavhidha aana simba rokupindamwo. Zvakanyadaro Dhavhidha wakanyisa masvingo eZioni, iro ndiro dhorobha raDhavhidha. Dhavhidha wakati ngeiro zuva, “Kunyazwi ndiani unouraya vaJebhusi, ngaakwire ngomugero wemvura auraye zvirema nemapofu, avo vanonyenywa ndiDhavhidha.” Ndizvo vanoti, “Mapofu nezvirema avazopindi mumhatso.” Dhavhidha wakagara mumasvingo, wakaridaidza kuti dhorobha raDhavhidha. Dhavhidha wakaaka dhorobha kutendenedza kubvira paMiro kupinda mukati. NaDhavhidha wakaramba echikura, kuita mukuru, ngokuti Mambo Mwari, Mwari wehondo, waiya naye. Hiramu mambo weThire wakatuma nhumwa kunaDhavhidha nemiti yemisidhari navatsetsi nevaaki, vakaakira Dhavhidha mhatso. Dhavhidha wakazia kuti Mambo Mwari wakamuemesa kuita mambo padera paIsuraeri, nokuti wakakudza umambo hwake, ngendaa yevanhu vake Isuraeri. Dhavhidha wakadzitorerazve mabunha nevakadzi vamweni kubva Jerusarema, ngesure auya kubva Hebroni; naye wakaberekerwa vakororo nevanasikana. Naaya ndiwo mazina eavo vaakaberekerwa muJerusarema: ndiShamua, Shobhabhi, Nathani, Soromoni, Ibhari, Erishua, Nefegi, Jafia, Erishama, Eriadha naErifereti. Naapo vaFiristia vazwa kuti Dhavhidha waiya adzodzwa kuita mambo padera paIsuraeri, veshe vaFiristia vakakwira kootsvaka Dhavhidha. Asi Dhavhidha wakazvizwa, wakadzaka murusvingo. Zvino vaFiristia vakauya, vakapararira mubani reRefaimu. Dhavhidha wakabvunza Mambo Mwari echiti, “Ndinozokwira here koorwa nevaFiristia? Unozovapira munyara dzangu here?” Mambo Mwari wakati kunaDhavhidha, “Kwireyo; ngokuti ngegwinyiso ndinozopira vaFiristia munyara dzako.” Ndizvo Dhavhidha wakaguma paBhaari-pherazimu, naDhavhidha wakavanyisapo. Wakati, “Mambo Mwari wapwanya magaa angu pamberi pangu, kudai ngokupwanya kwemvura.” Ndizvo wakadudza zina rendau iyo kuti, Bhaari-pherazimu. VaFiristia vakasiyapo miedzaniso yavo yokudira, naDhavhidha navanhu vake vakaitora. VaFiristia vakakwirazve, vakapararira mubani reRefaimu. Naapo Dhavhidha wakabvunza Mambo Mwari, akati, “Auzokwiriyo. Unozotenderera ngesure kwavo, nokurwisana navo pakaringirana nemiti yemibharsamu. Naapo mwoozwa kutinhira kwokuhamba padera pemiti yemibharsamu, zvino ngwarai; ngokuti zvino Mambo Mwari watanga pamberi penyu kuuraya hondo yevaFiristia.” Dhavhidha wakaita kudai ngezvaakapangwa ndiMambo Mwari; wakabaya vaFiristia kubvira Gebha kugumira Geza. Dhavhidha wakaunganidzazve pamwepo veshe vamuna vakatsanangurwa vaIsuraeri, makumi matatu emakumi emazana (30,000). Dhavhidha wakamiruka, wakaenda, navanhu veshe vaiya naye kubva Bhaare-Judha, kuunza kubveyo bhokisi rechitenderano chaMwari, iro rinodaidzwa ngezina raMambo Mwari wehondo, uwo unogara padera pemakherubhi. Vakatwara bhokisi rechitenderano chaMwari padera pengoro itsva, vakaridusa kubva mumhatso yaAbhinadhabhi yaiya padunhu.Uza naAhio, vakororo vaAbhinadhabhi vakahambisa ngoro itsva yaiya nebhokisi rechitenderano chaMwari; naAhio waiya echitungamirira bhokisi rechitenderano. Dhavhidha nemhatso yeshe yaIsuraeri vakaridza ngesimba ravo reshe pamberi paMambo Mwari mbeu dzeshe dzokuridza, chidangari, dhimbwi, ngoma, munanzi nengoma yesimbi. Naapo vaguma kundau yokupurira yaNakhoni, Uza wakatambanudza nyara yake kuguma panebhokisi rechitenderano chaMwari, akaribata; ngokuti kabi dzakarizungunyisa. Noushungu hwaMambo Mwari hwakabakira Uza; naMwari wakamuchaya apo ngendaa yokushaisha kwake, naye wakafirapo pasinde pebhokisi rechitenderano chaMwari. Dhavhidha wakanyangadzwa ngokuti Mambo Mwari wakahonokera Uza; ndizvo wakadudza zina rendau iyo kuti Pherezuza, metsa nyamashi. Dhavhidha wakatya Mambo Mwari ngeiro zuva, akati, “Bhokisi rechitenderano chaMambo Mwari rinozoita mauyirenyi kwendiri?” Ndizvo Dhavhidha waiya asikadi kutwara bhokisi rechitenderano chaMambo Mwari, kuriisa mudhorobha raDhavhidha; asi Dhavhidha wakariisa parutii mumhatso yaObhedhedhomu muGithi. Bhokisi rechitenderano chaMambo Mwari rakagara mumhatso yaObhedhedhomu muGithi mwedzi mitatu; naMambo Mwari wakafumisa Obhedhedhomu nemhatso yake yeshe. Wakaronzerwa mambo Dhavhidha kuti, “Mambo Mwari wafumisa mhatso yaObhedhedhomu nazvo zveshe zvaanazvo ngendaa yebhokisi rechitenderano chaMambo Mwari.” Ndizvo Dhavhidha wakaenda, akaunza ngokudakara bhokisi rechitenderano chaMwari kubva kumhatso yaObhedhedhomu, kuenda kudhorobha raDhavhidha. Naapo avo vaitwara bhokisi rechitenderano chaMambo Mwari vaiya vahamba nhambwe nhanhatu, wakapira mudiro wekabi nedzakakora. Dhavhidha wakazvina pamberi paMambo Mwari ngesimba rake reshe; Dhavhidha waiya akapfekeswa ngeefodhi rorukangaza. Ndizvo Dhavhidha nemhatso yeshe yaIsuraeri vakaunza bhokisi rechitenderano chaMambo Mwari ngokudaidzira, nokuridzwa kwegwama. Naapo bhokisi rechitenderano chaMambo Mwari peraipotedzwa mudhorobha raDhavhidha, Mikhari, mwanasikana waSauri wakaringira ngepafasitera, wakaona mambo Dhavhidha echipembera nokuzvina pamberi paMambo Mwari; naye wakamushoora mumwoyo mwake. Vakaunza bhokisi rechitenderano chaMambo Mwari, vakariisa pandau yaro, mukati mwetende iro reraiya radzimikirwa ndiDhavhidha; naDhavhidha wakapira mudiro wokupisha, nomudiro wokuiyana pamberi paMambo Mwari. Naapo Dhavhidha apedza kupira mudiro wokupisha nomudiro wokuiyana, wakafumisa vanhu ngezina raMambo Mwari wehondo. Naye wakakoanisira kudya pakati pevanhu veshe, mbungano yeshe yaIsuraeri, veshe vamuna nevakadzi kunoumwe ngaumwe chingwa chimwe, nenhindi yakanaka yenyama, nekhekhe remavhini. Zvino vanhu veshe vakapararira umwe ngaumwe kumhatso yake. Dhavhidha wakahwirira koofumisa mhatso yake. Asi Mikhari mwanasikana waSauri wakabuda kooshongana naDhavhidha, naye wakati, “Kwaiya kudakaranyi kwaiya namambo waIsuraeri nyamashi, uwo waiya echidzikhumura nyamashi zvokufuka mukuona kwemadziso evarandakadzi vake, kudai ngoumwe wevanhu vasina shwiro unodzikhumura zvokupfeka asina zvidzu!” Dhavhidha wakati kunaMikhari, “Zvaiya pamberi paMambo Mwari, uwo wakanditsanangura pandau yababa ako, nemhatso yake yeshe, kundiemesa kuti ndiite mutongi padera paIsuraeri, vanhu vaMambo Mwari, ndizvo ndazvina pamberi paMambo Mwari. Ndichazviitisa usina shwiro kupinda izvi, ndinozoitwa wakapfaiswa mukuona kwangu; asi kuvarandakadzi vowaereketa ndivo, ndinozoremeredzwa.” Ndizvo Mikhari mwanasikana waSauri aazi kubereka mwana metsa zuva rokufa kwake. Zvino apo mambo paaiya akagara mumhatso yake, naMambo Mwari waiya amupa kuzorora kubva kumagaa ake eshe akamutendenedza, mambo wakati kunaNathani muprofeti, “Wona zvino, inini ndinogara mumhatso yakaakwa ngemisidhari, asi bhokisi rechitenderano chaMwari rinogara mukati mwemachira etende.” Nathani wakati kunamambo, “Enda, uite zveshe zviri mumwoyo mwako, ngokuti Mambo Mwari unewe.” Asi ngouhwo usiku izwi raMambo Mwari rakauya kunaNathani rechiti, “Enda, uronzere muranda wangu Dhavhidha, kuti unoronza izvi Mambo Mwari, ‘Ndiwe iwewe unozondiakira mhatso yokugaramwo here? Inini andizi kumbogara mumhatso kubvira pazuva rendakakwidza vana vaIsuraeri kubva Egipite metsa nanyamashi, asi ndaihamba ndiri mutende nomuthabhenakeri.’ Mundau dzeshe dzendakahamba pakati pevana veshe vaIsuraeri, ndakaereketa izwi here kunoumwe wevatungamiriri verudzi rwaIsuraeri, avo vendakapanga kuusha vanhu vangu vaIsuraeri, ndechiti, ‘Ngenyi musikandiakiri mhatso yemiti yemisidhari?’ Ndizvo zvino unozoti kumuranda wangu Dhavhidha, ‘Unoronza izvi Mambo Mwari wehondo: ndakakutora kubva kumafuro emakwai, nokubva kooteera makwai, kuita mutongi padera pevanhu vangu Isuraeri; neni ndaiya newe kundau dzeshe dzewakahamba, ndakauraya magaa ako eshe kubva pamberi pako; ndinozokuitira zina guru rakadai ngemazina evanhu vakuru vari munyika. Neni ndinozoemesa ugaro hwevanhu vangu Isuraeri, ndivasime, kuti vagare muugaro huri hwavo, kuti vasachazobvazve; nevaiti vezvakashata avachazovatambudzizve kudai ngekaretu, kubvira panguva yendakaemesa vatongi kuti vatonge padera pevanhu vangu Isuraeri; neni ndinozokupa kuzorora kubva kumagaa ako eshe. Zvakanyadaro Mambo Mwari unoronza kwouri kuti Mambo Mwari unozokuakira mhatso. Naapo mazuva ako akwana, newe unozoata namadzibaba ako, ndinozoemesa mubarirwana wako unoteera sure kwako, uwo wounozobereka, neni ndinozogwinyisa umambo hwake. Ndiye unozoakira zina rangu mhatso, neni ndinozogwinyisa dendemaro roumambo hwake mhera nariini. Ndinozoita baba ake, naye unozoita mukororo wangu. Naapo paanoita zvakashata, ndinozomujezisa ngendonga yevanhu, nemishwapu yevana vevanhu. Asi nyasha dzangu adzizobvi kwaari, kudai ngezvendakadzidusa kubva kunaSauri, uwo wendakadzinga kubva pamberi pako. Mhatso yako noumambo hwako zvinozogwinyiswa pamberi pako mhera nariini.’ ” Kudai ngemazwi aya eshe, nokudai ngeichi chioniso cheshe, Nathani wakaereketa kunaDhavhidha. Zvino mambo Dhavhidha wakapotera, akagara pamberi paMambo Mwari, naye wakati, “Ndiri anani, A Mambo Mwari, Mwari? Mhatso yangu chiinyi, kuti iwewe undiunze pano? Neichi chaiya chiro chidoko mukuona kwako, A Mambo Mwari, Mwari; wakaereketa ngemhatso yomuranda wako ngomukuwo wakareba uchauya. Ichi ngachiite kupangwa kwevanhu, A Mambo Mwari, Mwari! NaDhavhidha ungacharonzenyi kwouri? Ngokuti iwewe Mambo Mwari, Mwari unozia muranda wako. Ngendaa yechigondiso chako, nokudai ngokuda kwomwoyo wako, iwewe wakaita izvi zveshe zvikurutu, kuti muranda wako azvizie. Ndizvo uri mukuru, A Mambo Mwari, Mwari; ngokuti akunazve wakadai ndiwe, akunazve Mwari umweni ngepabanze pako, kudai ngeizvo zveshe zvetakazwa ngenzee dzedu. Ndiani wakadai ngavanhu vako Isuraeri? Riripo here dzinza rimweni panyika Mwari waro wakaenda kooriripira kuti vaite vanhu vake, nokudziitira zina pachake, nokumuitira zviro zvikuru zvinotyisa, ngokudusa kubva pamberi pavanhu vako, vewakaripira kubva Egipite, madzinza nezvimwari zvawo. Newe wakagwinyisa vanhu vako Isuraeri kuti vaite vanhu vako mhera nariini; newe, Mambo Mwari, wakaita Mwari wavo. Nazvino, A Mambo Mwari, Mwari, gwinyisa mhera narinii izwi rewakaereketa ngendaa yomuranda wako, nendaa yemhatso yake, uite kudai ngezvewakagondisa. Ndizvo zina rako rinozokuriswa mhera nariini, rinoti, ‘Mambo Mwari wehondo uri Mwari padera paIsuraeri;’ nemhatso yomuranda wako Dhavhidha, kuti igwinyiswe pamberi pako. Ngokuti iwewe, Mambo Mwari wehondo, Mwari waIsuraeri, wakadzionisa kumuranda wako, wechiti, ‘Ndinozomuakira mhatso;’ ndizvo muranda wako wakagwinyiswa mumwoyo mwake kukumbira mukumbiro uyu kwouri. Nazvino, A Mambo Mwari, Mwari, ndiwe Mwari, nemazwi ako anegwinyiso, newe wakagondisa ichi chiro chakanaka kunomuranda wako. Ndizvo zvino, ngazvikunakire kuti ufumise mhatso yomuranda wako, kuti igare iripo pamberi pako mhera nariini; ngokuti iwewe, Mambo Mwari, Mwari wakazviereketa, nemhatso yomuranda wako ngaifumiswe ngechifumiso chako mhera nariini.” Ngesure kweizvi, Dhavhidha wakarwa nevaFiristia, wakavanyisa; Dhavhidha wakatora Methegama kubva munyara dzevaFiristia. Naye wakanyisa vaMoabhi wakavaita kuti vaate pashi pamavhu, wakavapima ngetambo; wakapima hurebu huiri hwetambo avo vaida kuurawa, nourebu humwe hweavo vaiponeswa. NevaMoabhi vakaita varanda kunaDhavhidha, vakaunza muthero. Dhavhidha wakanyisa Hadhadheza, mukororo waRehobhi, mambo weZobha, echienda koochakata kumufuya weYufratesi. Dhavhidha wakatora kubva kwaari vagadhi vemahachi gumi remazana nemazana manomwe (1,700) nemakumi mairi emakumi emazana (20,000) evanhu vehondo vanohamba ngetsoka. Dhavhidha wakagura misipha yemahachi eshe engoro, asi wakasiya akakwana okukweya ngoro dziri zana. Naapo vaAramu veDhamasekusi vakaguma kudetsera Hadhadheza mambo weZobha, Dhavhidha wakauraya vanhu makumi mairi nemairi emakumi emazana namairi (22,000) evaAramu. Zvino Dhavhidha wakaisa zvikwata zvevarwi vehondo muAramu reDhamasekusi: navaAramu vakaita varanda kunaDhavhidha, vakaunza muthero. Mambo Mwari wakaita kuti Dhavhidha anyise kundau dzeshe dzaakaenda. Dhavhidha wakatora zvihlangu zvomukore zvaiya nevaranda vaHadhadheza, wakazviunza Jerusarema. Dhavhidha mambo wakatora thusi rakawanda kubva Bhetha nokubva Bherothai, madhorobha aHadhadheza. Naapo Toi mambo weHamathi azwa kuti Dhavhidha waiya anyisa yeshe hondo yaHadhadheza, Toi wakatumira Joramu mukororo wake kunamambo Dhavhidha, koomuchingamidza nokumukorokotedza, ngokuti waiya arwa naHadhadheza, akamunyisa. Zvino Hadhadheza waigara achirwa naToi. Joramu wakauya nezvidziyo zvesirivha, zvomukore nezvethusi. Izviwo mambo Dhavhidha wakazvipira kunaMambo Mwari, zveshe, sirivha nomukore, zvaakatora kubva kunyika dzeshe dzaakanyisa, kubva kuvaEdhomu, vaMoabhi, vaAmori, vaFiristia, vaAmareki, nezvakachakatwa zvaHadhadheza mukororo waRehobhi, mambo weZobha. Dhavhidha wakadziitira mbiri. Naapo paakauya, wakauraya vaEdhomu makumi emazana gumi nemasere (18,000) mubani romunyu. Wakaisa zvikwata zvevarwi vehondo muEdhomu, nokunyika yeshe yeEdhomu wakaisa zvikwata zvevarwi vehondo, navo veshe vaEdhomu vakaita varanda vaDhavhidha. Mambo Mwari wakaita kuti Dhavhidha anyise kundau dzeshe dzaakaenda. Ndizvo Dhavhidha wakatonga vaIsuraeri veshe; naDhavhidha wakaemesa kutonga kwakwo kwakarurama kuvanhu vake veshe. Joabhi mukororo waZeruia waiya mutungamiriri wevarwi vehondo; Jehoshafati mukororo waAhirudhi waiya munyori. Zadhoki mukororo waAhitubhi, naAhimerekhi mukororo waAbhiatha vaiya vapristi; Seraia waiya munyori. Bhenaia mukororo waJehoiadha waiya padera pevaKherethi navaPherethi; nevakororo vaDhavhidha vaiya vapristi. Dhavhidha wakabvunza echiti, “Uchiyo here wakasara wemhatso yaSauri, uwo wendingaonisa nyasha ngendaa yaJonathani?” Zvino waiyapo muranda wemhatso yaSauri, zina rake ndiZibha, naye wakadaidzwa kunaDhavhidha. Mambo wakati kwaari, “Ndiwe Zibha here?” Naye wakati, “Muranda wako ndiye!” Mambo wakati, “Uchipo here umweni wemhatso yaSauri wakasara uwo wendingaonisa nyasha dzaMwari?” Zibha wakati kunamambo, “Kwasara mukororo waJonathani, wakaremara tsoka dzake.” Mambo wakati kwaari, “Uri pari?” Zibha wakati kunamambo, “Ringira, uri mumhatso yaMakhiri, mukororo waAmieri muRodhebha.” Zvino mambo Dhavhidha wakatuma vanhu koomutora kubva kumhatso yaMakhiri, mukororo waAmieri paRodhebha. Mefibhoshethi, mukororo waJonathani, mukororo waSauri wakauya kunaDhavhidha, wakawa ngehope yake, mukuremeredza. Dhavhidha wakati, “Mefibhoshethi!” Wakapingura, “Ringira muranda wako ndiye.” Dhavhidha wakati kwaari, “Usatya, ngokuti ngegwinyiso ndinozoonisa nyasha kwouri ngendaa yaJonathani baba ako; ndinozopetudza kwouri nyika yeshe yaSauri baba mukuru ako, newe unozodya chingwa patafura rangu nguva dzeshe.” Naye wakagwadama pashi, akati, “Muranda wako uri chiinyi kuti uringire imbwa yakafa yakadai ndini?” Zvino mambo wakadaidza Zibha, muranda waSauri, wakati kwaari, “Ndapa kunomuzukuru wamambo wako zveshe zvaSauri nezvemhatso yake yeshe. Iwewe nevakororo vako, nevaranda vako, munozomurimira munda, unozomuunzira michero, kuti muzukuru wamambo wako aone zvokudya; asi Mefibhoshethi muzukuru wamambo wako unozodya kudya patafura rangu mukuwo weshe.” Zvino Zibha waiya nevakororo gumi navashanu navaranda makumi mairi. Zvino Zibha wakati kunamambo, “Muranda wako unozoita kudai ngezvaaronza mambo wangu kumuranda wake.” Mefibhoshethi wakadya patafura raDhavhidha kudai ngoumwe wevakororo vamambo. Mefibhoshethi waiya nomukororo mudoko, zina rake ndiMikha. Navo veshe vaigara mumhatso yaZibha vakaita varanda vaMefibhoshethi. Ndizvo Mefibhoshethi wakagara muJerusarema, ngokuti waidya nguva dzeshe patafura ramambo. Zvino waiya akaremara tsoka dzake dzeshe. Ngesure kweizvi, mambo wevaAmoni wakafa, nomukororo wake Hanuni wakatonga pandau yake. Dhavhidha wakati, “Ndinozoita zvakanaka kunaHanuni mukororo waNahashi, ngokuti baba ake vakaita zvakanaka kwendiri.” Ndizvo Dhavhidha wakatuma varanda vake kuti vamuembedzere ngendaa yababa ake. Naapo varanda vaDhavhidha pevakaguma munyika yevana vaAmoni, makota evana vaAmoni vakati kunaHanuni mambo wavo, “Unopinimidza kuti Dhavhidha unoremeredza baba ako, ngokutuma vaembedzeri kwouri here? Dhavhidha aazi kutuma here varanda vake kwouri, kuti vadongorere dhorobha, kuriringisisa, kuti arinyise?” Ndizvo Hanuni wakabata varanda vaDhavhidha, wakapara rupande rwendebvu dzavo umwe ngaumwe, wakacheka zvokusimira zvavo ngepakati panhunji dzavo, wakavaendesa. Naapo paakaronzerwa Dhavhidha, wakatuma vanhu kooshongana navo, ngokuti vanhu vakatsverudzwa kakurutu. Mambo wakati, “Garai Jerikho, metsa ndebvu dzenyu dzakura, nemwi munozopetuka uno.” Naapo vana vaAmoni vaona kuti vainuhwa pamberi paDhavhidha, vana vaAmoni vakatuma koothora kuti vavabhadhare mare vaAramu veBhethirehobhi, nevaAramu veZobha, vaiya makumi mairi emakumi emazana (20,000) evarwi vaihamba ngetsoka, nevamambo Maakha gumi rimwe remazana (1,000), nevanhu vaTobhi vaiya makumi emazana gumi namairi (12,000). Naapo Dhavhidha azwa izvi, wakatuma Joabhi nehondo yeshe yengwazi. VaAmoni vakabuda, vakaemesa hondo yavo pokupinda ndipo pamusiwo; asi vaAramu veZobha nevokwaRehobhi, nevanhu vaTobhi, nevaMaakha, vaiya ngokwavo mushango. Naapo Joabhi aona kuti hondo dzakamutendenedza mberi nesure, wakatsanangura vamuna vaIsuraeri vakagwinya, wakavaemesa kuti varwe nevaAramu; vanhu vake vamweni vakasara wakavapa munyara yaAbhishai munun'una wake kuti avaemese kurwa nevana vaAmoni. Wakati, “Kudai vana vaAramu vechizondikurira, zvino iwewe unozondidetsera; asi kudai vana vaAmoni vechizokukurira, neni ndinozouya kookudetsera. Shingai, ngatigwinye, tirwire vanhu vedu nemadhorobha aMwari wedu; naMambo Mwari ngaamuitire icho chinooneka chakanaka kwaari.” Ndizvo Joabhi nevanhu vaiya naye vakakwedzera pasinde kurwa nevaAramu; navo vakatiza kubva pamberi pake. Naapo vana vaAmoni vaona kuti vaAramu vatiza, navowo vakatiza kubva pamberi paAbhishai, vakapotera mudhorobha. Zvino Joabhi wakahwirira kubva koorwa nevana vaAmoni, wakauya Jerusarema. Asi apo vaAramu vaona kuti vanyiswa pamberi pevaIsuraeri, vakadziunganidza pamwepo. Hadhadheza wakatuma vanhu kootora vaAramu vaiya ruseri rwomufuya Yufratesi; vakauya Heramu, naShobhakhi, nduna yehondo yaHadhadheza, yakahamba pamberi pavo. Naapo pezvakaronzwa kunaDhavhidha, wakaunganidza vaIsuraeri veshe, wakaambuka Jorodhani, wakaguma Heramu. VaAramu vakadziemesa kurwa naDhavhidha, vakarwa naye. VaAramu vakatiza kubva pamberi pevaIsuraeri, naDhavhidha wakauraya vanhu vezvikwata zvengoro dzevaAramu mazana manomwe (700), vevagadhi vemahachi makumi marongomuna emakumi emazana (40,000), naye wakabaya Shobhakhi, nduna yehondo yavo, naye wakafirapo. Naapo madzimambo eshe vaiya varanda kunaHadhadheza vakaona kuti vanyiswa pamberi pevaIsuraeri, vakatenderana kunyarara nevaIsuraeri, vakavashandira. Ndizvo vaAramu vakatya kuzodetsera vana vaAmoni mhera nariini. Muchirimo, ngomukuwo waanoenda madzimambo koorwa, Dhavhidha wakatuma Joabhi, nevaranda vake naye, pamwepo navaIsuraeri veshe; vakaparadza vana vaAmoni, vakakomba Rabha. Asi Dhavhidha wakasara muJerusarema. Kwakaitika zuva roobira kuti Dhavhidha wakamiruka kubva pamubhedhi wake, wakahamba padera pedenga remhatso yamambo. Wakaona mukadzi echishamba; mukadzi waiya akanaka yaamho mukuoneka kwake. Dhavhidha wakatuma munhu koobvunza ngendaa yomukadzi. Noumweni wakati, “Uyu andiye Bhathishebha mwanasikana waEriamu, mukadzi waUria muHiti here?” Ndizvo Dhavhidha wakatuma nhumwa koomutora, naye wakauya kwaari, wakaatana naye; (ngokuti waiya acheneswa kubva pakusikasukika kwake.) Naye wakahwirira kanyi kwake. Mukadzi wakaita mimba, wakatumira izwi kooronzera Dhavhidha echiti, “Ndaanemimba.” Ndizvo Dhavhidha wakatumira izwi kunaJoabhi, echiti, “Nditumire Uria muHiti.” NaJoabhi wakatumira Uria kunaDhavhidha. Naapo Uria aguma kwaari, Dhavhidha wakabvunza kuti Joabhi wakadini nevanhu, nokuti hondo yakaitawani. Zvino Dhavhidha wakati kunaUria, “Dzaka kumhatso yako, ugeze tsoka dzako.” Uria wakabuda kubva mumhatso yamambo, wakateerwa ngechipo chakabva kunamambo. Asi Uria wakaata pamusiwo wemhatso yamambo pamwepo nevaranda vamambo wake, aazi kudzaka kumhatso yake. Naapo vakaronzera Dhavhidha vechiti, “Uria aazi kudzaka kumhatso yake,” Dhavhidha wakati kunaUria, “Iwewe wauya kubva kumuhambo. Ngenyi usikazi kudzaka kumhatso yako?” Uria wakati kunaDhavhidha, “Bhokisi rechitenderano chaMambo Mwari, Isuraeri, Judha, namambo wangu Joabhi vanogara mumatende, navaranda vamambo wangu vanogara pamhene mushango; ndingaita maenderenyi kumhatso yangu, ndidye, nokumwa, nokuata nomukadzi wangu? Kudai ngezvounopona, nomweya wako unopona, andizoiti chiro chakadaro.” Zvino Dhavhidha wakati kunaUria, “Gara panozve nyamashi, nechimangwani ndinozokurekera kuti uende.” Ndizvo Uria wakagara muJerusarema ngeiro zuva nechimangwani. Dhavhidha wakamudaidza koodya nokumwa pamberi pake, naye wakamuita kuti aradze; nomumadeekoni wakabuda kooata pamubhedhi wake, pamwepo navaranda vamambo wake, asi aazi kudzaka kumhatso yake. Mumangwanani Dhavhidha wakanyora tsamba kunaJoabhi, wakaitumira ngenyara dzaUria. Wakanyora mutsamba echiti, “Emesa Uria pandau yepamberi peinopisha hondo, zvino mupetuke sure mumurekerepo, kuti abaiwe afe.” Naapo Joabhi paaitendenedza dhorobha, wakaemesa Uria pandau yaaizia kuti pane ngwazi dzehondo. Vamuna vedhorobha vakabuda, vakarwa naJoabhi; naapo kwakawa vamweni vevaranda vaDhavhidha, Uria muHiti wakafawo. Zvino Joabhi wakatumira mushumo kunaDhavhidha wezveshe zvakaitika mukurwa. Wakapanga nhumwa echiti, “Apo wapedza kushumira mambo zvakaitika mukurwa, zvino kudai ushungu hwamambo hukabaka, naye kudai echiti kwouri, ‘Mwakakwedzera kudaro ngenyi pasinde pedhorobha koorwa? Amuzi kuzia here kuti vaizoposhera misee vari parukumbati? Ndiani wakafura Abhimerekhi mukororo waJerubheshethi? Mudzimai aazi kukandira guyo padera pake here kubva parukumbati, kuitira kuti afe muThebhezi? Mwakakwedzera ngenyi pasinde porukumbati?’ Zvino unozoti, ‘Muranda wako Uria muHiti wakafawo.’ ” Ndizvo nhumwa yakaenda, yakaguma, ikaronzera Dhavhidha izvo zveshe zvaakatumirwa ndiJoabhi kuti aronze. Nhumwa yakati kunaDhavhidha, “Ngegwinyiso vanhu vakatinyisa, vakauya kwetiri murubaya, asi nesuwo takavarumbirira metsa koopinda pamusiwo wedhorobha. Vafuri vakaposhera misee kufura varanda vako kubva parukumbati; vamweni vevaranda vamambo vakafa, nomuranda wako Uria muHiti wakafawo.” Dhavhidha wakati kunonhumwa, “Unozoronzera izvi kunaJoabhi kuti, ‘Ndaa iyi isakutambudza, ngokuti shoti zvino inouraya umwe pano naapo umweni; gwinyisa hondo yako kurwa nedhorobha, urinyise.’ Newe umugwinyise.” Naapo mukadzi waUria azwa kuti Uria mwamuna wake wafa, wakachema mwamuna wake. Naapo chiriro chapera, Dhavhidha wakatuma nhumwa koomutora nokumuunza kumhatso yake, naye wakaita mukadzi wake, wakamuberekera mukororo. Asi chiro ichi chakaitwa ndiDhavhidha achizi kunaka pamberi paMambo Mwari. Mambo Mwari wakatuma Nathani kunaDhavhidha. Wakaguma kwaari, wakati kwaari, “Kwaiyapo nevamuna vairi mudhorobha rimweni, umwe waiya mupfumi noumweni waiya murombo. Mupfumi waiya nezvifuyo zvakawanda kakurutu makwai nen'ombe; asi murombo waiya asina chiro, kwega kakwai kanobereka, ako kaakatenga nokukarera. Kakakura naye pamwepo nevana vake; kakadya kudya kwake, kakamwira mutsani yake, kakaata paditi pake, kaiya kakadai ngomwanasikana kwaari. Zvino kwakaguma muyeni kumupfumi, naye aazi kutora kubva kuzvifuyo zvake, kuti auraire muyeni wakamuhambira; asi wakatora kakwai komurombo, wakauraira uwo wakamuhambira.” Zvino ushungu hwaDhavhidha hwakabaka kunouwo munhu. Wakati kunaNathani, “Kudai ngezvaanopona Mambo Mwari, uwo munhu wakaita kudaro unosisira kufa. Unozokahwirinzira karongomuna ako kakwai, ngokuti wakaita ichi chiro, ngokuti aazi kumuitira nyasha.” Nathani wakati kunaDhavhidha, “Ndiwe uwo munhu! Unoronza izvi Mambo Mwari, Mwari waIsuraeri: Ndakakudzodza kuti uite mambo padera paIsuraeri, neni ndakakusunhura kubva munyara dzaSauri. Ndakakupa mhatso yamambo wako, navakadzi vamambo wako paditi rako, ndakakupa mhatso yaIsuraeri neyaJudha; nazvo, kudai izvo zvisikazi kukwana, ndaizokututsirazve icho neicho. Ngenyi zvino wakashoora mupango waMambo Mwari, kuti uite zvakashata kudai mukuona kwake? Wakauraya Uria muHiti ngeshoti, ukatora mukadzi wake kuti aite mukadzi wako, ukamuuraya ngeshoti yevana vaAmoni. Ndizvo zvino shoti aizobvi mumhatso mwako; ngokuti wakandishoora, wakatora mukadzi waUria muHiti, kuita mukadzi wako. Unoronza izvi Mambo Mwari: Ringira, ndinozomusa kushata kwouri kubva mumhatso yako, ndinozotora vakadzi vako pamberi pemadziso ako, ndivape kumuakirwana wako, naye unozoatana nevakadzi vako mukujeka kwezuva iri. Ngokuti iwewe wakachiita ngokufishika; asi inini ndinozoita ichi chiro pamberi pevaIsuraeri veshe, nepamberi pezuva rakajeka.” Dhavhidha wakati kunaNathani, “Ndakashaisha pamberi paMambo Mwari.” Nathani wakati kunaDhavhidha, “Zvino Mambo Mwari wakarekerera chishaishi chako; auzofi. Zvakanyadaro ngokuita kwako uku ngegwinyiso watuka Mambo Mwari, mwana wounobarirwa iwewe unozofa.” Nathani wakaenda kumhatso yake. Mambo Mwari wakaita kuti mwana wakabarirwa Dhavhidha ngomukadzi waUria arware kakurutu. Ndizvo Dhavhidha wakapota kunaMwari ngendaa yemwana; Dhavhidha wakaera kudya, wakapotera, akaata pashi usiku hweshe pamavhu. Vakuru vemhatso yake vakamiruka, vakaenda kwaari, koomumusa kubva pamavhu; asi wakaramba, zve, aazi kudya chingwa navo. Ngezuva rechinomwe mwana wakafa. Navaranda vaDhavhidha vakatya kumuronzera kuti mwana wafa; ngokuti vakati, “Ringirai, mwana achapona, takaereketa kwaari, naye aazi kupurutana izwi redu; zvino tingaita makonerenyi kumuronzera kuti mwana wafa? Pamweni ungadziremadza.” Asi apo Dhavhidha aona kuti varanda vake vaiita vherevhere pachavo, Dhavhidha wakazia kuti mwana wafa. NaDhavhidha wakati kuvaranda vake, “Mwana wafa here?” Navo vakati, “Wafa.” Zvino Dhavhidha wakamiruka kubva pamavhu, akashamba, akadzidzodza, akapfeka machira amweni. Wakapotera mumhatso yaMambo Mwari, akadira; zvino wakaenda kumhatso yake; naapo wakada chokudya, vakaisa chokudya pamberi pake, naye wakadya. Zvino varanda vake vakati kwaari, “Chiinyi ichi chiro chowaita? Wakaera kudya nokuchema mwana achazwa; asi apo mwana afa, wakamiruka, ukadya chingwa.” Wakati, “Naapo mwana achapona, ndakaera kudya nokuchema; ngokuti ndakati, ‘Ndiani ungazia? Mambo Mwari ungaita nyasha kwendiri nemwana ungapona.’ Asi zvino wafa, ndichaera kudya ngenyi? Ndingachamuunzazve here? Inini ndichaenda kwaari, asi iye aangachauyi kwendiri.” Zvino Dhavhidha wakaembedzera mukadzi wake Bhathishebha, wakapotera kwaari wakaatana naye; naye wakabereka mukororo, wakadudza zina rake kuti Soromoni. Mambo Mwari wakamuda, wakatumira izwi ndiNathani muprofeti; ndizvo wakamududza kuti Jedhidhia, ngendaa yaMambo Mwari. Zvino Joabhi wakarwa neRabha revana vaAmoni, wakatora dhorobha roumambo. Joabhi wakatumira nhumwa kunaDhavhidha echiti, “Ndarwa neRabha, neni ndatora dhorobha remvura. Ndizvo zvino unganidza pamwepo vanhu vakasara, udzimike matende pasinde nedhorobha, uritore; nokuti kudai inini ndikazoritora dhorobha, naro rinozodaidzwa ngezina rangu.” Ndizvo Dhavhidha wakaunganidza vanhu veshe pamwepo, wakaenda Rabha, wakarwa naro, wakaritora. Wakatora dzungudza ramambo wavo raiya mumusoro mwake, rairema makhirogramu makumi matatu namashanu omukore, mukati mwaro mwaiya nebuwe rinomutengo mukuru; rakaiswa musoro raDhavhidha. Wakaunzazve zvakachakatwa zvakawanda kubva mudhorobha. Wakaunza vanhu vaiyamwo, wakavaemesa kuti vashande ngesahwo, mapadza esimbi, nemasanho esimbi, nokuvatumira kuita mushando wezvidhina. Ndizvo zvaakaita kumadhorobha eshe evaAmoni. Zvino Dhavhidha nevanhu veshe vakahwirira Jerusarema. Ngesure kwomukuwo wakapinda, Abhusaromu mukororo waDhavhidha waiya nehanzvadzi yakanaka kuringirika, zina rayo ndiThamari; naAmunoni mukororo waDhavhidha wakamuda. Amunoni wakatambudzika kakurutu, akadziita kuti arware ngendaa yehanzvadzi yake Thamari; ngokuti waiya mhandara, naAmunoni wakapinimidza kuti chiro chakakonza kuti aite chiro kwaari. Asi Amunoni waiya nemungani zina rake ndiJonadhabhi, mukororo waShimea, munun'una waDhavhidha; naJonadhabhi waiya munhu unourimbwi. Wakati kwaari, “A mukororo wamambo, ngenyi wechiperezeka mangwanani eshe eshe? Aundironzeri ngenyi?” Amunoni wakati kwaari, “Ndinodisisa Thamari, hanzvadzi yomukoma wangu Abhusaromu.” Jonadhabhi wakati kwaari, “Ata pamubhedhi wako, udziitise kudai ngounorwara; naapo baba ako voouya kookuona, unozoti kwavari, ‘Ndinomupota kuti hanzvadzi yangu iuye kwendiri, indipe kudya, nokunasira chokudya mukuona kwangu, kuti ndikuone, ndikudye kubva panyara yake.’ ” Ndizvo Amunoni wakaata pashi, wakadziita kudai ngounorwara pachake. Naapo mambo paakauya koomuona, Amunoni wakati kunamambo, “Ndapota, tendera Thamari hanzvadzi yangu auye, andinasirire zvingwa zviiri pamberi pangu, kuti ndizvidyire munyara yake.” Zvino Dhavhidha wakatumira izwi kunaThamari echiti, “Enda kumhatso yaAmunoni mukoma wako, umunasirire kudya.” Ndizvo Thamari wakaenda kumhatso yomukoma wake Amunoni, apo paaiya akaata pashi. Wakatora ufu wakahukanya, wakaita zvingwa pamberi pake, wakazvibika. Zvino wakatora chidziyo, wakazvibura pamberi pake; asi iye wakaramba kuzvidya. Amunoni wakati, “Budisa vanhu veshe kubanze vabve kwendiri.” Ndizvo veshe vakabuda kubanze kubva kwaari. Zvino Amunoni wakati kunaThamari, “Unza kudya mukamera rangu rokuata kuti ndidyire panyara yako.” Ndizvo Thamari wakatora zvingwa zvaakanasira, wakazviisa mukamera rokuata raAmunoni mukoma wake. Asi apo paakazviunza kwaari kuti adye, wakamubata, wakati kwaari, “Uya, uatane neni, hanzvadzi yangu.” Naye wakamupingura akati, “Haiwa, mukoma wangu, usandiangiridza; ngokuti chiro chakadaro achiitwe muIsuraeri. Usaita chiro chakashata kudaro! Inini ndingazofisha pari kutsveruka kwangu? Newe unozoita umwe wemapenzi muIsuraeri. Ndizvo zvino, ndinokupota, ereketa kunamambo; ngokuti aazorambi neni kundipa kwouri.” Asi aazi kupurutana izwi rake; ngokuti waiya nesimba kupinda iye, wakamuangiridza, akaata naye. Zvino Amunoni wakamunyenya kakurutu; nokunyenya kwaakamunyenya ndikwo kwakapinda kukura kunorudo rwaakamuda ndirwo. Amunoni wakati kwaari, “Miruka, uende kubanze.” Asi wakati kwaari, “Haiwa, mukoma wangu; ngokuti uku kushata kwokundidzinga kunopinda kukura kunokwokutanga kwewakaita kwendiri.” Asi aazi kupurutana kwaari. Wakadaidza kwaari muranda wake uwo waimushandira echiti, “Dzinga uyu mukadzi kubva pamberi pangu, upiningidze musiwo.” Waiya nengubo inemioko yakareba, ngokuti iyo ngubo yaipfekwa ngemhandara vanasikana vamambo. Ndizvo muranda wakamubudisa kubanze, wakapiningidza musiwo. Asi Thamari wakaisa marota pasoro rake, wakabaura ngubo yake yaiya nemioko yakareba, wakaisa mioko yake pasoro rake, wakaenda echichema. Abhusaromu mukoma wake wakati kwaari, “Amunoni mukoma wako waiya newe here? Asi nyarara hako, hanzvadzi yangu, ngokuti iye mukoma wako; usapinimidza ngeicho chiro mumwoyo wako.” Ndizvo Thamari wakagara ari ega mumhatso yaAbhusaromu mukoma wake. Naapo mambo Dhavhidha azwa ngeizvi zviro zveshe, wakatseneka kakurutu. Asi Abhusaromu aazi kuereketa kunomukoma wake Amunoni chiro chakanaka nokuti chakashata; ngokuti Abhusaromu wakanyenya Amunoni, ngokuti wakamanikidza hanzvadzi yake Thamari. Ngesure kwemakore mairi akazara apera, Abhusaromu waiya nevagundi vemakwai muBhaarihazo, riri pasinde naEfuremu. NaAbhusaromu wakakoka vakororo veshe vamambo. Abhusaromu wakaguma kunamambo echiti, “Ringira, zvino muranda wako unevagundi vemakwai; ndinopota mambo navaranda vake kuti vahambe neni, muranda wako.” Asi mambo wakati kunaAbhusaromu, “Haiwa, mukororo wangu, atizoendi teshe zvino, ngokuti tinozoita mutwaro kwouri.” Wakamuangiridza, asi zvakanyadaro mambo aazi kuendeyo, asi wakamufumisa. Zvino Abhusaromu wakati, “Kudai zvisikazi kudaro, ndinokupota, tendera Amunoni mukoma wangu aende nesu.” Mambo wakati kwaari, “Ungazoenda newe ngenyi?” Asi Abhusaromu wakamuangirira metsa wakatendera Amunoni nevakororo veshe vamambo kuti vaende naye. Zvino Abhusaromu wakapanga varanda vake echiti, “Ringisisai zvino apo mwoyo waAmunoni aradza ngevhini, naapo ndinozoti kwomuri, ‘Bayai Amunoni,’ naapo muurayenyi. Musatya; ngokuti andinipi here ndamupanga? Itai vanoshinga ngwazi.” Ndizvo varanda vaAbhusaromu vakaita kunaAmunoni kudai ngokupangwa kwake. Zvino vakororo veshe vamambo vakamiruka, umwe ngaumwe wakagadha pambongoro yake, vakatiza. Vachiri munjira mashoko akaguma kunaDhavhidha okuti, “Abhusaromu wauraya vana vamambo veshe, akuna naumwe wasara.” Mambo wakamiruka wakamwesa zvokufuka zvake, akaata pashi pamavhu; nevaranda vake veshe vakaema pasinde pake, vakamwesa zvokufuka zvavo. Asi Jonadhabhi, mukororo waShimea mukoma waDhavhidha wakapingura, akati, “Mambo wangu asapinimidza kuti wauraya veshe vakororo vamambo, asi ndiAmunoni ega wafa. Mwoyo waAbhusaromu wakaemesa izvi kubvira ngeiro zuva raakaangiridza kuata hanzvadzi yake Thamari. Ndizvo zvino mambo wangu asazoita bundu mumwoyo mwake, ngokupinimidza kuti veshe vakororo vamambo vauraiwa, ngokuti ndiAmunoni ega wafa.” Asi Abhusaromu wakatiza. Naapo jaha rairinda rakamirudza madziso aro, rakaringira, rakaona vanhu vazhinji vaiuya ngenjira yaHoronaimu ngepabandanda romutunhu. Jonadhabhi wakati kunamambo, “Ringira, vakororo vamambo vauya; kudai ngokuronza kwomuranda wako, ndizvo zvakadaro.” Naapo apedza kuereketa, ringira, vakororo vamambo vakaguma, vakaboorera ngeizwi ravo, vakachema; mambo navanhu vake vakachemawo kakurutu. Asi Abhusaromu wakatiza naye wakaenda kunaTharimai, mukororo waAmihudhi, mambo weGeshuri. Dhavhidha wakachema mukororo wake mazuva eshe. Abhusaromu wakatiza kuenda Geshuri, wakagareyo makore matatu. Nomwoyo waDhavhidha wakadisisa kuenda kunaAbhusaromu; ngokuti waiya aembedzerwa ngendaa yaAmunoni, echiona kuti wakafa. Zvino Joabhi mukororo waZeruia wakaona kuti mwoyo wamambo waidisisa Abhusaromu. Joabhi wakatumira vanhu kuThekoa, vakaunza kubveyo mukadzi wakangwara. Wakati kwaari, “Ndinokupota, udziitise mutsumbi, upfeke ngubo dzechiriro, usadzidzodza ngemafuta, asi ita kudai ngomukadzi waitsumba wakafa mukuwo wakareba. Uende kunamambo nokuereketa kudai kwaari.” Ndizvo Joabhi wakamupanga mazwi. Naapo mukadzi weThekoa wakauya kunamambo, wakawa pashi ngehope yake pamavhu, wakagwadama echiti, “Detsera, A mambo!” Mambo wakati kwaari, “Chiinyi chinokutambudza?” Naye wakapingura echiti, “Ngegwinyiso ndiri shirikadzi, nemwamuna wangu wakafa. Murandakadzi wako waiya nevakororo vairi, vakarwa mushango, pasina munhu wokuvaparadzanisa. Umwe wakachaya umweni, akamuuraya. Ringira, zvino mhuri yeshe inomukira murandakadzi wako. Vanoti, ‘Tipe uwo wakauraya munun'una wake, kuti timuuraye ngendaa yokupona kwomunun'una wake waakauraya; kunyazwi tinozouraya uwo unogara nhakawo.’ Ndizvo vanozodzima simbe rangu rasara, avasiiri mwamuna wangu zina nokuti chicherechedziso munyika.” Zvino mambo wakati kunomukadzi, “Enda kumhatso yako, neni ndinozopanga ngendaa yako.” Mukadzi weThekoa wakati kunamambo, “Tenzi wangu, A mambo, kushata ngakugare padera pangu, nepemhatso yababa angu; mambo nedendemaro rake zvisazoa nendaa.” Mambo wakati, “Uwo unokutambudza muunze kwendiri, naye aazokutambudzizve.” Zvino wakati, “Ndinokupota, mambo ngaacherechedze Mambo Mwari, Mwari wako, kuti vaunzidziri vengazi vasasaurayazve nomukororo wangu asazoparadzwa.” Mambo wakati, “Kudai ngezvaanopona Mambo Mwari, akuzowi pashi norubvudzi rwomukororo wako.” Naapo mukadzi wakati, “Tendera murandakadzi wako kuti aerekete izwi rimwe kunamakosi wangu mambo.” Mambo wakati, “Ereketa.” Mukadzi wakati, “Ndizvo ngenyi zvino wechipinimidza chiro chakadai kuitira vanhu vaMwari? Ngokuti mambo unoereketa izvi kudai ngoumwe unendaa, ngokuti mambo aazi kuunza kanyizve uwo wakadzingwa wake. Tinosisira kufa teshe, takadai ngemvura inorashwa pamavhu, iyo isikachaunganidzwi. Asi Mwari aazotoreri munhu ndaramo, asi unozoronga mazano okuti wakarashwa asazogara akarashwa kubva kwaari. Zvino ndauya kooronza izvi kunamakosi wangu mambo, ngokuti vanhu vakandiita kuti nditye; nomurandakadzi wako wakapinimidza echiti, ‘Ndinozoereketa kunamambo; pamweni mambo ungazoita icho chinoronzwa ngomurandakadzi wake. Ngokuti mambo unozozwa nokusunhura murandakadzi wake kubva kunyara yomunhu unoda kundiuraya, inini nomukororo wangu kubva kunhaka yaMwari.’ Murandakadzi wako wakapinimidza akati, ‘Izwi ramakosi wangu mambo rinozondizorodza;’ ngokuti makosi wangu mambo wakadai ngengirosi yaMwari, unokona kuparadzanisa pakati pezvakanaka nezvakashata. Mambo Mwari, Mwari wako ngaagare newe.” Zvino mambo wakapingura mukadzi echiti, “Usandifishira chiro chendinobvunza kwouri.” Mukadzi wakati, “Makosi wangu mambo ngaaerekete.” Mambo wakati, “Nyara yaJoabhi inewe here mukati mweizvi zveshe?” Mukadzi wakapingura, akati, “Kudai ngezvounopona makosi wangu mambo, akuna naumwe ungapaukira kumudyo nokuti kumuoshwe kubva kuneizvo zvakaereketwa ndimakosi wangu mambo. Ngokuti ndiye muranda wako Joabhi wakandipanga, ndiye wakaisa pamuromo womurandakadzi wako aya mazwi. Joabhi muranda wako wakaita izvi kushandura zviripo. Asi mambo wangu wakangwara kudai ngokungwara kwengirosi yaMwari kuzia zviro zveshe zviri munyika.” Zvino mambo wakati kunaJoabhi, “Ringira zvino, ndatendera ichi; enda, uunzezve jaha Abhusaromu.” Joabhi wakawa ngehope pashi, wakagwadama akafumisa mambo; naJoabhi wakati, “Nyamashi muranda wako unozia kuti ndaona nyasha pamberi pako, makosi wangu mambo, ngokuti mambo wapingura chakakumbirwa ngomuranda wake.” Ndizvo Joabhi wakamiruka, wakaenda Geshuri, wakaunza Abhusaromu Jerusarema. Mambo wakati, “Ngaaende kumhatso yake, asazoona hope yangu.” Ndizvo Abhusaromu wakaenda kumhatso yake, asikazi kuona hope yamambo. Zvino muIsuraeri mweshe mwaiya musina munhu waikudzwa ngounaku hwake kudai ndiAbhusaromu; ngokuti kubvira kutsoka dzake metsa kuguma kusoro rake paiya pasina chakashata. Naapo ogunda bvudzi resoro rake (ngokuti ngokupera kwegore ngendaa yokurema kwebvudzi rake wairigunda,) wakapima bvudzi resoro rake pachipimo, rairema kupinda makhirogramu mairi, kudai ngokupima kwechipimo chamambo. Abhusaromu wakaberekerwa vakororo vatatu, nemwanasikana umwe, zina rake ndiThamari. Waiya musikana wakanaka kuringirika. Ndizvo Abhusaromu wakagara muJerusarema makore mairi akazara, asikazi kuona hope yamambo. Zvino Abhusaromu wakatumira izwi kunaJoabhi, kuti iye amugumise kunamambo; asi Joabhi aazi kutenda kuti auye kwaari. Wakamutumirazve kwechipiri, asi Joabhi aazi kuuya. Zvino wakati kuvaranda vake, “Ringirai, munda waJoabhi uri pasinde nowangu, naye unebharimwo; endai mwoupisha ngomuriro.” Ndizvo varanda vaAbhusaromu vakapisha munda wake ngomuriro. Zvino Joabhi wakamiruka, akauya kunaAbhusaromu kumhatso yake, wakati kwaari, “Ngenyi varanda vako vapisha munda wangu?” Abhusaromu wakapingura Joabhi, akati, “Ringira, ndakakudaidza ndechiti, ‘Uya kwendiri kuti ndikutume kunamambo nomubvunzo kuti ndakaunzirwenyi kubva Geshuri? Zvaiya zvakanaka kwendiri kuti ndindogareyo.’ Zvino ngandione hope yamambo; kuti kuripo kushata kwendiri, ngaandiuraye.”. Zvino Joabhi wakaenda kunamambo, akamuronzera; naapo wakadaidza Abhusaromu. Ndizvo wakauya kunamambo, akakotamisa hope yake pashi pamberi pamambo; namambo wakachingamidza Abhusaromu ngomuromo. Ngesure kweizvi Abhusaromu wakadzinasirira ngoro nemahachi, nevamuna makumi mashanu kuti varumbe pamberi pake. Abhusaromu waimuka mangwanani maishi echiema ngeparutii rwenjira pamusiwo wedhorobha; naapo pechiguma munhu unendaa kuti itongwe ndimambo, Abhusaromu waimudaidza echiti, “Wabva kudhorobha riri?” Naapo echiti, “Muranda wako uri wedzinza rakatikuti raIsuraeri,” Abhusaromu waiti kwaari, “Wona, ndaa dzako dzakanaka nokururama; asi akuna munhu wamambo wakaemeswa kukuzwa.” Abhusaromu waitizve, “A dai ndaiitwa mutongi munyika! Zvino vanhu veshe vanendaa vaizouya kwendiri, neni ndaizovaitira zvakanaka.” Kunyazwi ndiani munhu wakaguma pasinde kumuembera, waitambanudza nyara yake kumubata nokumuchingamidza ngomuromo. Ndizvo zvaakaita Abhusaromu kunomuIsuraeri weshe, uwo wakauya kunamambo kootongwa ndaa dzake; ngokudaro Abhusaromu wakaba mwoyo yevanhu vaIsuraeri. Pakapera makore marongomuna Abhusaromu wakati kunamambo, “Ndinokupota, nditendere ndiende kuti ndiripire mhiko yangu, yendakapika kunaMambo Mwari muHebroni. Ngokuti muranda wako ndakapika mhiko ndichagara Geshuri muAramu, ndechiti, ‘Kudai Mambo Mwari echizondihwirinzazve Jerusarema, ndinozodira Mambo Mwari muHebroni.’ ” Mambo wakati kwaari, “Enda ngokunyarara.” Ndizvo wakamiruka, akaenda Hebroni. Asi Abhusaromu wakatuma nhumwa ngokufishika kumadzinza eshe aIsuraeri echiti, “Apo pomunozwa kurira kwegwama, munozodaidzira mwechiti, ‘Abhusaromu ndimambo muHebroni!’ ” Abhusaromu wakaenda nevamuna mazana mairi (200) kubva Jerusarema; vakadaidzwa kuita vaeni, vakaenda vasikazii chiro. Naapo Abhusaromu paaipisha midiro, wakadaidza Ahithoferi muGiro, gota raDhavhidha, kubva kudhorobha rake Giro. Bangano rokumukira mambo rakakura, ngokuti vanhu vakaangira kuwanda kunaAbhusaromu. Nhumwa yakaguma kunaDhavhidha yechiti, “Mwoyo yevanhu vaIsuraeri yaenda kunaAbhusaromu.” Zvino Dhavhidha wakati kuvaranda vake veshe, avo vaiya naye muJerusarema, “Mirukai! Ngatitize, ngokuti apana naumwe ungapokonyoka kubva kunaAbhusaromu. Kasirai kutiza, ngokuti unozotibata ngokukasira, nokuunza kushata padera pedu, nokurwisa dhorobha ngokupinza kweshoti.” Varanda vamambo vakati kunamambo, “Ringira, varanda vako vanotenda kuita zveshe zvinogurwa ndimambo.” Ndizvo mambo wakabuda, nevemhatso yake yeshe vakamuteera, ngepabanze pemabunha ake gumi, avo vaakasiya kuti vangwarire mhatso. Mambo wakabuda, nevanhu veshe vakamuteera, vakaema pamhatso yokupedzisira. Nevaranda vake veshe vakapinda ngepasinde pake; navo veshe vaKherethi, vaPherethi veshe, nevaGithi veshe mazana matanhatu (600), avo vakamuteera kubva Gathi, vakapinda kutanga mberi kwamambo. Zvino mambo wakati kunaIthai muGithi, “Ngenyi iwewe wechihamba nesu? Hwirira kundau yako, woogara namambo; ngokuti iwewe uri mupara nouwo wakadzingwa kubva kunyika yake. Ngokuti wakaguma zuro, kwakanaka here kuti ndikutore, uhambehambe nesu nyamashi, apo ndechienda pendingakona? Chihwirira sure, utore hama dzako; nyasha negwinyiso ngazvigare newe.” Asi Ithai wakapingura mambo echiti, “Kudai ngezvaanopona Mambo Mwari namakosi wangu mambo achapona, kunyazwi ngepari paanoenda makosi wangu mambo, kunyazwi mukufa nokuti mukupona, naapo muranda wako unozoapowo.” Dhavhidha wakati kunaIthai, “Enda zvino, uhambe.” Ndizvo Ithai muGithi wakahamba nevanhu vake veshe nevana vadoko veshe vaiya naye. Nyika yeshe yakachema ngeizwi gurutu, nevanhu veshe vakaenda; mambo emene wakaambuka mufuya Kedhironi, nevanhu veshe vakaambuka ngenjira inoenda mushango. Ringira, Zadhoki, navaRevhi veshe vaiya naye, vechitwara bhokisi rechitenderano chaMwari; navo vakagadzika pashi bhokisi rechitenderano chaMwari; Abhiatha wakakwira metsa vanhu veshe vakapera kubuda kudhorobha. Zvino mambo wakati kunaZadhoki, “Hwirinzai bhokisi rechitenderano chaMwari kudhorobha. Kudai ndechiona nyasha mukuona kwaMambo Mwari, unozondiunzazve, nokurionisa kwendiri, nokundionisa pandau perinogara. Asi kudai echizoti, ‘Andizi kudakara ndiwe;’ ringira, ndiri pano, ngaaite kudai ngezvaanoda ndini.” Mambo wakatizve kunaZadhoki mupristi, “Ringira, hwirira kudhorobha ngokunyarara, iwewe naAbhiatha nevakororo vako vairi, Ahimaazi mukororo wako, naJonathani mukororo waAbhiatha. Wona, ndinozogara pazambuko reshango, metsa rigume izwi rinobva kwouri kundiziisa.” Ndizvo Zadhoki naAbhiatha vakahwirinza bhokisi rechitenderano chaMwari Jerusarema vakagarayo. Asi Dhavhidha wakakwira ngenjira inokwira Mutunhu wemaOrivhi, echichema mukukwira kwake, akafukidza soro rake, asina magwada patsoka; nevanhu veshe vaiya naye vakafukidza masoro avo, vakakwira vachichema mukuhamba kwavo. Dhavhidha wakaronzerwa kuti, “Ahithoferi uri mukati mwebangano raAbhusaromu.” NaDhavhidha wakati, “A Mambo Mwari, ndinokupota, shandurai kupanga kwaAhithoferi kuita upenzi.” Naapo Dhavhidha aguma padera pomutunhu, apo paidirwa Mwari, ringira Hushai muAkhi wakauya kooshongana naDhavhidha, anebhachi rake rakabaurwa, nemavhu pasoro rake. Dhavhidha wakati kwaari, “Kudai wechizohamba neni, ungazoita mutwaro kwendiri. Asi kudai wechipetuka kudhorobha, wechizoti kunaAbhusaromu, ‘Ndinozoita muranda wako, A mambo; kudai ngezvendaiya muranda wababa ako karetu, ngokudarozve ndinozoita muranda wako;’ ngokudaro unozorambidza kupanga kwaAhithoferi. Vapristi Zadhoki naAbhiatha vanozoapo newe. Ndizvo kunyazwi chiinyi chounozozwa kubva kumhatso yamambo, unozozvironzera Zadhoki naAbhiatha vapristi. Ringira, vanavo vakororo vavo vairi, Ahimaazi mukororo waZadhoki naJonathani mukororo waAbhiatha. Kubudikidza ndivo munozotumira kwendiri zveshe zvomunozozwa.” Ndizvo Hushai, mungani waDhavhidha wakaguma kudhorobha, naAbhusaromu wakauya Jerusarema. Naapo Dhavhidha apinda padoodoko mutunhu, ringira, Zibha muranda waMefibhoshethi wakashongana naye, anezvimbongoro zviiri zvinezvigaro padera pazvo akatwara mazana mairi (200) ezvingwa, nezana rezvikore zvemavhini, nezana remichero yezienza, nembudu imwe yevhini. Mambo wakati kunaZibha, “Ngenyi waunza izvi?” Zibha wakati, “Zvimbongoro ngezvavanhu vemhatso yamambo, kuti vagadhe; nezvingwa nemichero yezienza ngeyemajaha kuti adye; nevhini kuti avo vanopera simba mushango vamwe.” Mambo wakati, “Uri pari mukororo wamambo wako?” Zibha wakati kunamambo, “Ringira, uri muJerusarema; ngokuti wakati, ‘Nyamashi mhatso yaIsuraeri inozohwirinza kwendiri umambo hwemadzimambo angu.’ ” Zvino mambo wakati kunaZibha, “Ringira, zveshe zvaiya zvaMefibhoshethi zvinozoita zvako.” Zibha wakati, “Ndinokupota ngokupfaa pamberi pako, ngandione nyasha mukuona kwako, makosi wangu mambo.” Naapo Dhavhidha wakaguma Bhahurimu, kwakabuda munhu wemhuri yemhatso yaSauri, zina rake ndiShimei, mukororo waGera; wakahamba echituka. Wakaposhera mapuwe kunaDhavhidha navaranda vamambo Dhavhidha veshe; zvino vanhu veshe nengwazi dzehondo vaiya ngokumudyo nokumuoshwe kwake. Shimei wakadaidzira apo zvaaituka echiti, “Buda, buda, iwewe munhu wengazi, munhu wakashata! Mambo Mwari waunzidzira padera penyu mweshe ngazi yemhatso yaSauri, pandau yake pounotonga iwewe zvino; Mambo Mwari wakapa umambo munyara yaAbhusaromu mukororo wako. Wona, zvino kushaisha kwakagumira ngokuti uri munhu wengazi.” Naapo Abhishai mukororo waZeruia wakati kunamambo, “Ngenyi kuti imbwa iyi yakafa ituke makosi wangu mambo? Nditendere kuti ndiambukeyo ndimugure soro.” Asi mambo wakati, “Ndinendaa yenyi kwomuri, vakororo vaZeruia? Kudai echituka, ngokuti Mambo Mwari wakati kwaari, ‘Tuka Dhavhidha,’ ndiani zvino ungaronza kwaari kuti, ‘Waita kudaro ngenyi?’ ” Dhavhidha wakati kunaAbhishai nokuvaranda vake veshe, “Ringirai, mukororo wangu emene wakabarwa ndini unotsvaka kupona kwangu. Zvino munoshama ngenyi ngouyu muBhenjamini? Murekerenyi ngaatuke, ngokuti wakaronzerwa ndiMambo Mwari. Pamweni Mambo Mwari unozoona kutambudzika kwangu, naMambo Mwari unozondiunzidzira ngezvakanaka pandau yokutukwa uku nyamashi.” Ndizvo Dhavhidha nevanhu vake vakaenda ngenjira, apo Shimei wakahamba ngomubandanda romutunhu vakaringirana naye, echituka, apo echihamba, echiposhera mapuwe, nokukandira kwaari bukuta. Mambo nevanhu vake veshe vaiya naye vakaguma varemba paJorodhani, wakazororapo pachake. Abhusaromu nevanhu veshe vaIsuraeri vakaguma Jerusarema; Ahithoferi waiya naye. Naapo Hushai muAkhi mungani waDhavhidha aguma kunaAbhusaromu, Hushai wakati kunaAbhusaromu, “Mambo ngaapone mhera nariini. Mambo ngaapone mhera nariini.” Abhusaromu wakati kunaHushai, “Idzi ndidzo nyasha dzako here kunomungani wako? Auzi kuenda ngenyi nomungani wako?” Hushai wakati kunaAbhusaromu, “Haiwa; asi uwo waanotsanangura Mambo Mwari, naava vanhu, nevanhu veshe vaIsuraeri, ndiye wendinozoita wake, ndechigara naye. Zvakanyadaro, ndiani wendingashandira? Andizoshandiri mukuona kwomukororo wake here? Kudai ngezvendakashandira baba ako, ngokudaro ndinozoshandira iwewe.” Zvino Abhusaromu wakati kunaAhithoferi, “Tipangenyi zano, tinozoitenyi?” NaAhithoferi wakati kunaAbhusaromu, “Potera kunemabunha ababa ako, awo aakasiya kuti angwarire mhatso; nevaIsuraeri veshe vanozozwa kuti wadziita chinuhwo kunababa ako; naapo nyara dzavo veshe vanewe dzinozogwinyiswa.” Ndizvo vakaemesera Abhusaromu tende ngepadera pemhatso; naAbhusaromu wakapotera kuatana nemabunha ababa ake mukuona kwevaIsuraeri veshe. Zvino ngaawo mazuva kupanga kwaAhithoferi kwaiya kwakadai ngomunhu unobvunza mazwi aMwari; ndizvo kudaro kweshe kupanga kwaAhithoferi kunaDhavhidha nokunaAbhusaromu. Zvakanyadaro, Ahithoferi wakati kunaAbhusaromu, “Nditendere zvino nditsanangure vamuna makumi emazana gumi nemairi (12,000), ndinozomiruka ndirumbirire Dhavhidha ngouhwu usiku. Ndinozomugumira achakaremba akapera simba, nokumukarudza; nevanhu veshe vanaye vanozotiza. Inini ndinozobaya mambo ega, neni ndinozopetudza vanhu veshe kwouri kudai ngomuroorwa wapetudzwa kumwamuna wake. Iwewe unotsvaka kupona kwomunhu umwe ega; ndizvo vanhu veshe vanozoa nokunyarara.” Kupanga uku kwakadakadza Abhusaromu nevakuru veshe vaIsuraeri. Zvino Abhusaromu wakati, “Daidzawo Hushai muAkhi, tizwewo zvaanoronza.” Naapo Hushai aguma kunaAbhusaromu, Abhusaromu wakaereketa kwaari echiti, “Ahithoferi waereketa kudai; zvino toita kudai ngokuronza kwake here? Kudai zvisikazi kudaro, ereketa iwewe.” Hushai wakati kunaAbhusaromu, “Kupanga kwaAhithoferi akuzi kunaka ngeiyi nguva.” Hushai wakati, “Unozia kuti baba ako nevanhu vake ingwazi, navo vanekuvava mumwoyo yavo, kudai ngebheya rakatorerwa vana varo mushango. Ngepabanze peizvi, baba ako ingwazi yehondo; aazogari nevanhu vehondo usiku hweshe. Kunyazwi zvino wakadzifisha mune rimwe remapako, nokuti kundau imweni. Naapo kungazoitika kuti vamweni vevarwi vedu vaurawe pakutanga, kuti kunyazwi ndiani unozozwa unozoti, ‘Kuripo kuurayana pakati pevanhu vehondo vanoteera Abhusaromu.’ Zvino kunyazwi ngengwazi, mwoyo wake wakadai ngowemhondoro, unozopera simba yaamho ngokutya; ngokuti vaIsuraeri veshe vanozia kuti baba ako ingwazi muhondo naavo vanaye ingwazi muhondo. Asi kupanga kwangu kunoti vaIsuraeri veshe ngavaungane kwouri kubvira Dhani kuguma Bheerishebha, kudai ngouwandu hwejecha riri paruandhle, kuti uende wemene kuhondo. Ndizvo tinozoguma kwaari kunyazwi ngepari paari, tinozomata padera pake kudai ngebeto rinowa padera pamavhu; iye nevanhu vake veshe vaanavo akuzosari naumwe wavo. Kudai echizopetuka kuenda mudhorobha, naapo vaIsuraeri vanozounza mapote kuiro dhorobha nokurikweera kunemufuya, metsa akuzosaripo nebuwe doko narimwe.” Abhusaromu navanhu veshe vaIsuraeri vakati, “Kupanga kwaHushai muAkhi kwakapinda kunaka kunokupanga kwaAhithoferi.” Ngokuti Mambo Mwari wakaemesa kuti kupanga kwaAhithoferi kunyiswe, ngezano raMambo Mwari rokuti aunze kushata padera paAbhusaromu. Zvino Hushai wakati kunaZadhoki nokunaAbhiatha vapristi, “Uku nouku ndikwo kupanga kwaAhithoferi kunaAbhusaromu nokuvakuru vaIsuraeri, nouku ndikwo kupanga kwangu. Ndizvo zvino tumirai izwi ngokukasira, muronzere Dhavhidha kuti asagara usiku uhwu mushango romurubaya, asi ngaakasire aambuke ruseri; ngokuti mambo ungazouraiwa nevanhu veshe vaanavo.” Zvino Jonathani naAhimaazi vaiya vechigarira muEnirogeri, kuti vasazooneka apo voopotera mudhorobha; nomusikana wakaenda koovaronzera, navo vakaenda kooronzera mambo Dhavhidha. Asi murumbwana wakavaona, wakaronzera Abhusaromu; ndizvo vamuna vairi vakahamba ngokukasira metsa vakaguma kumhatso yomunhu umweni muBhahurimu, uwo waiya nomupisi wemvura muruwanze rwake; vakapoteremwo. Mukadzi wakafukidza muromo womupisi, akaanika koroni yakagaiwa padera pawo; apana chiro chakaziikanwa ndizvo. Naapo varanda vaAbhusaromu vaguma kunomukadzi uwo kumhatso, vakati, “Vari pari Ahimaazi naJonathani?” Mukadzi wakati kwevari, “Vaambuka mufuya wemvura.” Naapo vakavatsvaka avazi kuvaona, vakahwirira Jerusarema. Naapo vaiya vaenda, vamuna vakabuda kubva mumupisi, vakaenda, vakaronzera mambo Dhavhidha. Vakati kunaDhavhidha, “Miruka, uambuke zvino mufuya ngokukasira; ngokuti Ahithoferi wakapangana ndiwe kudai.” Ndizvo Dhavhidha wakamiruka nevanhu veshe vaiya naye, vakaambuka ruseri rweJorodhani; ngomukuwo wemangwanani, akuna naumwe waiya asati aambuka Jorodhani. Naapo Ahithoferi aona kuti kupanga kwake akuzi kupurutanwa, wakaisa chigaro pambongoro yake, akaenda kanyi kudhorobha rake. Wakarongedza mhatso yake zvakanaka, akadzisungira; akafa, akaikwa muiba rababa ake. Zvino Dhavhidha wakaguma Mahanaimu. Abhusaromu waiya aambuka Jorodhani, iye nevanhu veshe vaIsuraeri pamwepo naye. Zvino Abhusaromu wakaemesa Amasa kuita nduna yehondo pandau paJoabhi. Amasa waiya mukororo womunhu zina rake ndiJetha muIshumaeri, uwo wakaroora Abhigari mwanasikana waNahashi waiya hazvadzi kunaZeruia, mai aJoabhi. VaIsuraeri naAbhusaromu vakaemesa matende avo muGireadhi. Naapo Dhavhidha aguma Mahanaimu, Shobhi, mukororo waNahashi weRabha wevakororo vaAmoni, naMakhiri mukororo waAmieri weRodhebha, naBharizirai muGireadhi weRogerimu, vakaunza manhi nendiro, zvidziyo zvedongo, nekoroni, nebhari, ufu, nekoroni yakakangwa, chuchururu, nenyemba, uchi, mafuta, makwai, nechizi dzen'ombe, zvaDhavhidha nevanhu vaiya naye kuti vadye; ngokuti vakati, “Vanhu vehondo vaanenzara, vademera, vaanenyota mushango.” Zvino Dhavhidha wakaerenga vanhu vaiya naye, wakaemesa nduna padera pemakumi emazana nenduna padera pemazana. NaDhavhidha wakapaura hondo kuita zvikwata zvitatu; wakatuma rupande rwechitatu rwevanhu ngenyara yaJoabhi, norupande rwechitatu ngenyara yaAbhishai, mukororo waZeruia mukoma waJoabhi, norupande rwechitatu ngenyara yaIthai muGithi. Mambo wakati kunevanhu, “Ngegwinyiso inini pachangu ndinozoenda nemwi.” Asi vanhu vakati, “Iwewe auzoendi. Ngokuti kudai isusu tikatiza, avazopinimidzi tisu; kunyazwi rupande rwedu rwafa, avazopinimidzi tisu. Asi iwewe unoedzana negumi remakumi emazana (10,000); ndizvo zvino kwakapinda kunaka kuti iwewe utitumire kudetserwa uri mudhorobha.” Mambo wakati kwevari, “Icho chinooneka chakanaka kwomuri ndinozochiita.” Ndizvo mambo wakaema ngeparutii pemusiwo wedhorobha, apo vanhu veshe vechibuda ngemazana nemakumi emazana. Mambo wakapanga Joabhi naAbhishai naIthai echiti, “Mungwarirenyi zvakanaka ngendaa yangu mujaha uwo Abhusaromu.” Nevanhu veshe vakazwa apo mambo paakapanga nduna dzeshe ngendaa yaAbhusaromu. Ndizvo vanhu vakabuda murubaya koorwa naIsuraeri; nokurwa kwakaitika mukati mwegwasha raEfuremu. Vanhu vaIsuraeri vakanyiswa ngevanhu vaDhavhidha. Kwaiyapo kuurayana kukurutu ngeiro zuva, nevamuna makumi mairi emakumi emazana (20:000) vakafa. Hondo yakapararira padera penyika yeshe; negwasha rakapedza kuuraya vanhu vazhinji ngeiro zuva kupinda vakaurawa ngeshoti. Abhusaromu wakashongana nevanhu vaDhavhidha. Abhusaromu waiya akagadha padera penyurusi rake, nenyurusi rakapinda pakati pematai akabatana omuokhi. Soro rake rakakwikwa ngematai omuokhi, naye wakatitsudzu pakati pedenga nenyika; nenyurusi raaiya akagadha rakaenda. Munhu umweni wakazviona, wakaronzera Joabhi, akati, “Ringira, ndaona Abhusaromu akatitsudzu pamuokhi.” Joabhi wakati kunomunhu wakamuronzera, “Ringira, ndiwe wakamuona! Auzi kumubaya ngenyi kuti awe pashi pamavhu? Neni ndaizodai ndakupa zvigurwa zvesirivha gumi nebhande.” Asi munhu wakati kunaJoabhi, “Kunyazwi kudai ndikanyazwa kurema kwezvigurwa zvesirivha zviri gumi remazana munyara dzangu, ndisaizotambanudza nyara yangu kubaya mukororo wamambo; ngokuti mukuzwa kwedu mambo echikupanga iwewe naAbhishai naIthai echiti, ‘Ngwariranyi kuti kusaapo munhu unoshaishira mujaha uwo Abhusaromu.’ Ngenjira imweni, dai ndaita zvakashata ngendaramo yake, (akuna chiro chakafishika kunamambo,) zvino iwewe pachako waizodai waema parutii.” Joabhi wakati, “Andingapedzi nguva ndechiereketa newe kudaro.” Naye wakatora mikhondo mitatu munyara dzake, wakabaya Abhusaromu ngepamwoyo, apo paaiya achapona ari pamatai pomuokhi. Nemajaha gumi avo vaitwara zvokurwa zvaJoabhi vakatendenedza Abhusaromu, vakamubaya, vakamuuraya. Zvino Joabhi wakaridza gwama, nevanhu vakauya kubva koorumbirira vaIsuraeri, ngokuti Joabhi wakapetudza vanhu sure. Vakatora Abhusaromu, vakamukandira muhunza huru yaiya mugwasha, vakaunganidza murwi wemapuwe mukuru padera pake. Naapo vaIsuraeri veshe vakatiza umwe ngaumwe kuenda kutende rake. Zvino Abhusaromu achapona wakadziemesera sika huru, iyo iri mubani ramambo, ngokuti wakati, “Andina mukororo wokuti zina rangu richerechedzwe;” wakadudza sika iyo zina rake. Ndau iyo nanyamashi inodaidzwa kuti, Sika yaAbhusaromu. Zvino Ahimaazi mukororo waZadhoki wakati, “Ngandirumbe zvino, ndironzere mambo mashoko okuunzidzirwa kwake ndiMambo Mwari kubva kumagaa ake.” Joabhi wakati kwaari, “Aungaronzi mashoko nyamashi; unozoronza mashoko ngezuva rimweni, asi nyamashi auzoronzi, ngeiyi ndaa, ngokuti mukororo wamambo wafa.” Zvino Joabhi wakati kumuKhushi, “Enda iwewe, uronzere mambo izvo zvewaona.” MuKhushi wakakotama pamberi paJoabhi naye wakarumba. Zvino Ahimaazi mukororo waZadhoki wakatizve kunaJoabhi, “Zvakanyadaro, nditendere ndinokupota, kuti ndirumbe kuteera muKhushi.” NaJoabhi wakati, “Unorumbirenyi, mwana wangu, wechiona kuti aungapuwi muthuso ngamashoko?” “Zvakanyadaro,” wakati, “Ndinozorumba.” Ndizvo wakati kwaari, “Rumba.” Zvino Ahimaazi wakarumba ngenjira yomubani, wakatangira muKhushi. Zvino Dhavhidha waiya akagara ngepakati pemisiwo miiri yedhorobha. Murindi wakakwira ngeparukumbati kuenda padera pomusiwo, wakamirudza madziso ake, akaona munhu wairumba ari ega. Murindi wakadaidzira, wakaronzera mambo. Mambo wakati, “Kuti ari ega, unemashoko mumuromo mwake.” Wakaangira kuuya, naye wakakwedzera pasinde. Zvino murindi wakaona munhu umweni echirumba; nomurindi wakadaidzira kunomungwariri wepamusiwo, akati, “Wona, munhu umwenizve unorumba ari ega.” Mambo wakati, “Unounzawo mashoko naye.” Murindi wakati, “Ndinopinimidza kuti kurumba kwouwo kutanga kwadai ngekwaAhimaazi mukororo waZadhoki.” Namambo wakati, “Iye munhu wakanaka, unounzawo mashoko akanaka.” Zvino Ahimaazi wakadaidzira kunamambo echiti, “Zveshe zvakanaka hazvo.” Wakawa ngehope yake pashi pamberi pamambo, akati, “Ngaakudzwe Mambo Mwari, Mwari wako uwo wakapira vanhu vakakumukira mambo wangu.” Mambo wakati, “Mujaha Abhusaromu unopona here?” Ahimaazi wakapingura, “Apo Joabhi paakatuma muranda wamambo, neinini muranda wako ndakaona nyongana huru, asi andizi kuzia kuti chaiya chiinyi.” Mambo wakati kwaari, “Tarauka, ueme apo.” Wakatarauka, wakaema akati mwii. Zvino wakaguma muKhushi; nomuKhushi wakati, “Mashoko akanaka amakosi wangu mambo! Ngokuti Mambo Mwari wakuunzidzira nyamashi kubva kusimba veavo veshe vaikumukira.” Mambo wakati kumuKhushi, “Mujaha Abhusaromu unopona here?” MuKhushi wakati, “Magaa amakosi wangu mambo, navo veshe vanotsvaka kuremadzwa kwako, ngavadai ngouwo mujaha.” Mambo wakatambudzika kakurutu, wakakwira mukamera riri ngepadera pomusiwo, akachema apo echikwira echiti, “A mukororo wangu Abhusaromu, mukororo wangu, mukororo wangu Abhusaromu! Kudai Mwari echitenda ndaizokufira, A Abhusaromu, mukororo wangu, mukororo wangu!” Wakaronzerwa Joabhi kuti, “Ringira, mambo unochema nokutsumba Abhusaromu.” Ndizvo kunyisa kweiro zuva kwakapindurwa kukaita kuchema kuvanhu veshe; ngokuti vanhu vakazwa ngeiro zuva kutambudzika kwaakaita mambo ngendaa yomukororo wake. Vanhu ngeiro zuva vakapotera mudhorobha ngokuzvonga, kudai ngevanhu vanotsveruka apo vatiza kubva kuhondo. Mambo wakafukidza hope yake, namambo wakachema ngeizwi guru, akati, “A mukororo wangu Abhusaromu, A Abhusaromu mukororo wangu, mukororo wangu!” Zvino Joabhi wakapinda mumhatso yamambo, akati, “Watsverudza nyamashi hope dzavaranda vako veshe avo vaponesa kupona kwako nyamashi, nokupona kwevakororo vako, nokupona kwevanasikana vako, nokupona kwevakadzi vako, nokupona kwemabunha ako, ngokuda magaa ako wechizonda vanokuda. Ngokuti waronza nyamashi kuti aupinimidzi ngenduna nokuti ngevatungamiriri; ngokuti ndinoona nyamashi kuti kudai Abhusaromu aiya echipona, neisusu taiya tafa teshe, zvaizokudakadza kakurutu. Ndizvo zvino miruka, uende uerekete zvakanaka kunevaranda vako; ngokuti ndinopika ndiMambo Mwari kudai usikaendi, akuna munhu naumwe unozogara newe uhwu usiku; neizvi zvinozoita zvakashatisisa kupinda kushata kweshe kwakakugumira kubvira uchijaha metsa zvino.” Zvino mambo wakamiruka, wakagara pachigaro chake pamusiwo. Vakaronzerwa vanhu veshe vechiti, “Wonai, mambo wakagara pamusiwo;” nevanhu vehondo veshe vakaungana pamberi pamambo. Naapo vaIsuraeri veshe vaiya vatizira umwe ngaumwe kutende rake. Vanhu veshe vakaphikisana mumadzinza eshe aIsuraeri vechiti, “Mambo wakatiponesa kubva kunyara dzamagaa edu, wakatinunura kubva kunyara dzevaFiristia; nazvino watotiza kusiya nyika ngendaa yaAbhusaromu. Asi Abhusaromu wetakadzodza kuita mambo padera pedu wakafa muhondo. Ndizvo zvino amuereketi ngenyi izwi rokupetudza mambo?” Mambo Dhavhidha wakatuma nhumwa kunaZadhoki naAbhiatha vapristi echiti, “Ereketai kunevakuru vaJudha mwechiti, ‘Ngenyi imwimwi muri vokugumisira kupetudza mambo wenyu kumhatso yake? Kuereketa kwevaIsuraeri veshe kwaguma kunamambo. Imwimwi muri hama dzangu, muri godo remagodo angu nenyama yenyama yangu; ndizvo ngenyi muri vokugumisira kupetudza mambo?’ Mwechiti kunaAmasa, ‘Iwewe andiwe wemagodo angu nenyama yangu here? Ndizvo Mwari ngaaite kudaro kwendiri nokupindazve, kudai usikazoiti nduna yehondo yangu kubvira zvino nenguva dzeshe pandau yaJoabhi.’ ” Amasa wakapfaisa mwoyo yevanhu veshe vaJudha, yakaita kudai ngowomunhu umwe; ndizvo vakatumira izwi iri kuna mambo vechiti, “Petuka, iwewe navaranda vako veshe.” Ndizvo mambo wakapetuka, wakaguma Jorodhani. VaJudha vakauya Girigari kooshongana namambo, nokumuperekedza kuti aambuke Jorodhani. Shimei mukororo waGera, muBhenjamini weBhahurimu, wakakasira kudzaka nevanhu vaJudha kooshongana namambo Dhavhidha; naye waiya nevamuna gumi rimwe remazana (1,000) evanhu vaBhenjamini, naZibha muranda wemhatso yaSauri, navakororo vake gumi navashanu nevaranda vake makumi mairi; navo vakakasira, vakaambuka ruseri rweJorodhani kutangira mambo, naapo yechiambuka ngarava yokutwara zvemhatso yamambo, nokuita icho chaakapinimidza kuti chakanaka. Shimei mukororo waGera wakawa pashi pamberi pamambo, apo aiya echiambuka Jorodhani, naye wakati kunamambo, “Mambo wangu asandierengera ndaa, nokuti kukarakadzazve izvo muranda wako zvaakaita, ngokukurerusa ngezuva rowakabuda makosi wangu mambo wechibva Jerusarema; mambo asapinimidza ndizvo mumweya mwake. Ngokuti muranda wako unozia kuti ndakashaisha; ndizvo ringira ndauya nyamashi ndiri wokutanga kutangira mhatso yeshe yaJosefa kudzaka kushongana nemakosi wangu mambo.” Abhishai mukororo waZeruia wakapingura echiti, “Shimei aazourawi here ngeizvi, ngokuti wakatuka wakadzodzwa waMambo Mwari?” Asi Dhavhidha wakati, “Ndinozoitenyi kwomuri, imwimwi vakororo vaZeruia, kuti ngeiri zuva muite magaa kwendiri? Kungaurawa here munhu nyamashi muIsuraeri? Ngokuti andizii here kuti ngezuva iri inini ndini mambo padera paIsuraeri?” Mambo wakati kunaShimei, “Auzofi iwewe.” Namambo wakapika mhiko yake kwaari. Mefibhoshethi muzukuru waSauri wakadzaka kooshongana namambo, asikazi kushamba tsoka dzake nokuti kupara murebvu wake, nokuti kusuka zvokufuka zvake kubvira zuva raakabva ndiro mambo metsa zuva raakauyazve mukunyarara. Naapo aguma kubva Jerusarema kooshongana namambo, mambo wakati kwaari, “Auzikuenda neni ngenyi, Mefibhoshethi?” Naye wakapingura, “Makosi wangu, A mambo, muranda wangu wakandichengedzera; ngokuti muranda wako wakati kwaari, ‘Ndisungire mbongoro, kuti ndigadhe padera payo, ndiende namambo.’ Ngokuti muranda wako chirema. Wakatsa muranda wako kunamakosi wangu mambo. Asi makosi wangu mambo wakatodzana nengirosi yaMwari; ndizvo itai izvo zvinomunakira mukuona kwenyu. Ngokuti veshe vemhatso yababa angu vakadai ngevakafa pamberi pamakosi wangu mambo. Asi iwewe wakaisa muranda wako pamwepo naavo vanodya patafura rako. Inini ndichine simba renyi rendingachauyazve kuti ndikumbire kunamambo?” Mambo wakati kwaari, “Uchaereketa ngenyi ngendaa dzako? Ndakati, ‘Iwewe naZibha koanisiranai nyika.’ ” Mefibhoshethi wakati kunamambo, “Eya, ngaatore yeshe, ngokuti makosi wangu mambo watouya kumhatso yake ngokunyarara.” Zvino Bharizirai muGireadhi wakadzaka kubva Rogerimu, wakaenda Jorodhani namambo, kumuperekedza kuambuka Jorodhani. Bharizirai waiya amunhu musharuka, aanemakore makumi masere! Ndiye waiburira mambo kudya, achagara Mahanaimu ngokuti iye waiya gurudza gurutu. Mambo wakati kunaBharizirai, “Uya, uambuke neni, ndinozokupa kudya muJerusarema.” Asi Bharizirai wakati kunamambo, “Ndichine kupona kwakaitawani kuti ndiuye, ndikwire namambo Jerusarema? Nyamashi uno ndaane makore makumi masere; ndingachakona here kutsanangura pakati pezvakanaka nezvakashata? Muranda wako ungachakona here kuraira zvokudya nezvokumwa? Ndingacharizwa here izwi revamuna vanoemba nerevakadzi vanoemba? Ngenyi muranda wako echitutsira kuita mutwaro kunamakosi wangu mambo? Muranda wako unozoperekedza mambo padoko seri kweJorodhani. Ngenyi mambo echida kundiripira ngechiro chakanaka chakadai? Ndinokupota, tendera muranda wako kuti ahwirire, kuti ndifire mudhorobha rangu, ndiikwe pasinde neiba rababa angu neramai angu. Asi uripano muranda wako Khimhamu; ngaatenderwe kuti aambuke namakosi wangu mambo; uite kwaari zvinooneka zvakanaka kwouri.” Mambo wakapingura, “Khimhamu unozoambuka neni, ndinozoita kwaari kunyazwi chiinyi chinooneka chakanaka kwouri; nacho cheshe chounozoda kwendiri, ndinozochiita kwouri.” Zvino vanhu veshe vakaambuka Jorodhani namambo wakaambuka; mambo wakachingamidza Bharizirai ngomuromo, wakamufumisa; naye wakahwirira kanyi kwake. Mambo wakapinda kuenda Girigari, naKhimhamu wakaenda naye. Vanhu veshe vaJudha norupande rwevanhu vaIsuraeri vakaperekedza mambo. Zvino vanhu veshe vaIsuraeri vakauya kunamambo vakati kwaari, “Ngenyi hama dzedu vamuna vaJudha vakakuba, nokuunza mambo nevemhatso yake ruseri rweJorodhani nevanhu veshe vaDhavhidha naye?” Veshe vamuna vokwaJudha vakapingura vamuna vokwaIsuraeri vechiti, “Ngokuti mambo ihama yedu yaamho. Munotitsenekera ngenyi ngeiyi ndaa? Taiya takadyenyi chamambo, nokuti wakatipa chipo here?” Asi vamuna vaIsuraeri vakapingura vamuna vokwaJudha vechiti, “Isusu tine zvikoaniswa marupande gumi kunamambo, munaDhavhidha tine zvakawanda yaamho kupinda imwimwi. Zvino imwimwi ngenyi mwakatishoora? Atisupi here takatanga kuereketa ngokuunzazve mambo wedu?” Asi mazwi evamuna vokwaJudha aiya noushungu kupinda mazwi evamuna vokwaIsuraeri. Zvino waiyapo munhu wakashata, zina rake raizwi Shebha, mukororo waBhikhiri, muBhenjamini. Wakaridza gwama, echidaidzira echiti, “Atina chikoaniswa kunaDhavhidha, zve atina nhaka kunomukororo waJesi! Pararirai mweshe umwe ngaumwe kutende rake, A Isuraeri!” Ndizvo vamuna veshe vaIsuraeri vakarekera kuteera Dhavhidha, vakateera Shebha mukororo waBhikhiri; asi vamuna vaJudha vakateera mambo wavo kubvira Jorodhani metsa kuguma Jerusarema. Dhavhidha wakauya kumhatso yake Jerusarema; namambo wakatora mabunha ake gumi, avo vaakasiya kungwarira mhatso, wakavakonyera mumhatso yakangwarirwa, akavapa kudya, asi aazi kupotera kwevari. Ndizvo vakakonyerwa metsa zuva rokufa kwavo, vechigara muushirikadzi. Zvino mambo wakati kunaAmasa, “Ndiunganidzire vamuna vekwaJudha mumazuva matatu, newe unozoapowo pachako.” Ndizvo Amasa wakaenda koounganidza vamuna vekwaJudha; asi wakanonoka metsa zuva rakapinda iro raakaemeserwa. Dhavhidha wakati kunaAbhishai, “Zvino Shebha mukororo waBhikhiri unozotitambudza kakurutu kupinda kutambudza kwaakaita Abhusaromu; tora zvino varanda vamambo wako, umurumbirire ngokuti pamweni ungapinda mumaguta akashosherwa, akatitiza.” Vamuna vaJoabhi nevaKherethi, nevaPherethi, nevanhu veshe vari ngwazi vakabuda kubva Jerusarema, vakarumbirira Shebha mukororo waBhikhiri. Naapo vaiya vaguma paiya nebuwe guru muGibheoni, Amasa wakauya kooshongana navo. Joabhi waiya akafuka machira ehondo akaasunga ngebhande, rine shoti muchiunu chake mumakara aro; naapo achahamba kuenda mberi yakadonha. Joabhi wakati kunaAmasa, “Unotamba here, munun'una wangu?” NaJoabhi wakabata Amasa ngechirebvu ngenyara yokumudyo, kuti amuchingamidze ngomuromo. Asi Amasa aazi kuona shoti yaiya munyara yaJoabhi; ndizvo wakamubaya mundani, nemaura ake akawa pashi pamavhu, aazi kumubayazve; naye wakafa. Zvino Joabhi naAbhishai hama yake vakarumbirira Shebha mukororo waBhikhiri. Umwe wevanhu vaJoabhi wakaema pasinde paAmasa, akati, “Kunyazwi ndiani unoda Joabhi, kunyazwi ndiani uwo unoda Dhavhidha ngaateere Joabhi.” Amasa wakathauta mungazi yake mupato, naapo munhu aona kuti vanhu veshe vaiemapo. Wakadusa Amasa kubva mupato kumuisa mushango, akamufukidza ngejira, apo aona kuti vanhu veshe vaipinda vaiemapo. Naapo aduswa kubva mupato, vanhu veshe vakaenda kunaJoabhi kuti vateere Shebha mukororo waBhikhiri. Shebha wakahamba kupinda ngomumadzinza eshe aIsuraeri metsa kuguma Abheri reBhethimaakha, nokuneveshe veBheri; navo vakaunganidzana pamwepo vakamuteera mudhorobha. Hondo yaJoabhi yakaguma. Vakamukomba muAbheri reBhethimaakha; vakaemesa mavhu kuita dunhu padhorobha, rakaema pasinde porukumbati rwokubanze. Vanhu veshe vaiya naJoabhi vakaponda rukumbati urwo kuruputsira pashi. Zvino kwakadaidzira mudzimai wakangwara ari mudhorobha echiti, “Izwanyi! Izwanyi! Ronzai kunaJoabhi kuti akwedzere pano, ndierekete naye.” Wakakwedzera pasinde kwaari; mudzimai wakati, “Ndiwe here Joabhi?” Naye wakapingura, akati, “Ndini.” Zvino wakati kwaari, “Purutana mazwi omurandakadzi wako.” Wakapingura akati, “Ndinozwa.” Zvino wakapingura echiti, “Vanhu vekare vaiereketa vechiti, ‘Ngegwinyiso vaibvunza kupanga kwaAbheri;’ ngokudaro vaipedza ndaa. Inini ndiri umwe weavo vanoda kunyarara nokugondeka muIsuraeri; iwewe unoda kuparadza dhorobha guru raIsuraeri. Ngenyi wechida kutangurira nhaka yaMambo Mwari?” Joabhi wakapingura echiti, “Ngakuite kuretu kwendiri, ngakuite kuretu, kuti nditangurire nokuti kuparadza! Andiyopi ndaa akadi! Asi munhu unogara munyika yemitunhu yaEfuremu unozwi ndiShebha mukororo waBhikhiri, wakamukira mambo Dhavhidha. Muunzenyi kwendiri ega, ndinozorekera dhorobha.” Mudzimai wakati kunaJoabhi, “Ringira, soro rake rinozokandirwa kwouri ngepadera porukumbati.” Zvino mudzimai wakaenda kunevanhu veshe ngoungwaru hwake. Navo vakagura soro raShebha mukororo waBhikhiri, vakarikandira kunaJoabhi. Ndizvo Joabhi wakaridza gwama, veshe vakaparara kubva padhorobha, munhu umwe ngaumwe wakaenda kutende rake, naapo Joabhi wakahwirira Jerusaremu kunamambo. Zvino Joabhi waiya padera pehondo yeshe yaIsuraeri; Bhenaia mukororo waJehoiadha waiya padera pavaKherethi napadera pevaPherethi; Adhoramu waiya nduna yechibharo; Jehoshafati mukororo waAhirudhi waiya munyori; Shevha waiya munyorizve; Zadhoki naAbhiatha vaiya vapristi; Ira muJairi waiyawo mupristi waDhavhidha. Zvino kwaiyapo nzara ngomukuwo waDhavhidha makore matatu anoteererana; naDhavhidha wakabvunza kunaMambo Mwari. Mambo Mwari wakamupingura, akati, “Ngendaa yaSauri nendaa yengazi yemhatso yake, ngokuti wakauraya vaGibheoni.” Ndizvo mambo wakadaidza vaGibheoni, wakati kwevari. (Zvino vaGibheoni vaiya vasiri vevana vaIsuraeri, asi vaiya mibarirwana yavaAmoni vakasara; kunyazwi vana vaIsuraeri vaiya vakapika mhiko kuvaponesa, Sauri wakaedza kuvauraya veshe mukutsamwirira kwake kuvana vaIsuraeri nevaJudha.) NaDhavhidha wakati kuvaGibheoni, “Chiinyi chendingamuitira, nokumuripira ndicho kuti mufumise nhaka yaMambo Mwari?” VaGibheoni vakati kwaari, “Atizoashiri sirivha nokuti mukore kubva kunaSauri nokuti kunevemhatso yake; haiwa, akusikuda kwedu kuti kuuraiwe naumwe muIsuraeri.” Wakati, “Chiinyi icho chomunoronza, ndicho chendinozomuitira?” Navo vakapingura mambo vechiti, “Uwo munhu wakatiuraya, nowakaronga kutiparadza kuti isusu tisaa nendau yokugara munyika dzaIsuraeri, ngatipuwe vakororo vake vanomwe, kuti tivaturike pamberi paMambo Mwari muGibheoni pamutunhu waMambo Mwari.” Mambo wakati, “Ndinozovapira kwomuri.” Asi mambo wakaponesa Mefibhoshethi, mukororo waJonathani, mukororo waSauri, ngendaa yemhiko yevakapikirana Dhavhidha naJonathani, mukororo waSauri pamberi paMambo Mwari. Mambo wakatora vakororo vairi veRizipha mwanasikana waAia, vaakaberekera Sauri ndiArimoni naMefibhoshethi; navakororo vashanu vaMerabhi mwanasikana waSauri, vaakaberekera Adhirieri mukororo waBharizirai muMehorathi. Wakavapira munyara dzevaGibheoni, navo vakavaturika pamutunhu pamberi paMambo Mwari. Veshe vanomwe vavo vakaurawa pamwepo. Vakaurawa ngemazuva okutanga kukukura, mazuva okutanga kukukurwa kwebhari. Zvino Rizipha mukunda waAia wakatora jira resaka, wakadzichingira padera poruware kubvira pakatangira kukukura metsa vanaiwa ngemvura yakabva mudenga; aazikutendera shiri dzomudenga kuti dzimate padera pavo masikati nezvikara zvomushango usiku. Naapo Dhavhidha aronzerwa izvo zvakaitwa ndiRizipha mwanasikana waAia, bunha raSauri, Dhavhidha wakaenda, akatora magodo aSauri nemagodo omukororo wake Jonathani kubva kuvamuna vaJabheshigireadhi, avo vaiya vakaaba kubva mupato reBhethishani, apo paaiya akaturikwa ngevaFiristia, mukuurawa kwake muGiribhoa. Wakaunza kubvayo magodo aSauri naaJonathani mukororo wake; navo vakaunganidza magodo aavo vaiya vakaturikwa. Vakatsira magodo aSauri naaJonathani mukororo wake munyika yaBhenjamini muZera, muiba raKishi baba ake; vakaita zveshe zvevakapangwa ndimambo. Ngesure kweizvo Mwari wakaitira nyasha nyika. VaFiristia vakarwazve nevaIsuraeri; naDhavhidha wakadzaka navaranda vake. Vakarwa nevaFiristia, naDhavhidha wakapera simba. Ishibhibhenobhi, umwe wevakororo vemagakanyara, kurema kwomukhondo wake kwaida kuita makhirogramu ethusi matatu nehafu, akapakatira shoti itsva, wakapinimidza kuti ungauraya Dhavhidha. Asi Abhishai mukororo waZeruia wakamuponesa, akarwisa muFiristia, akamuuraya. Zvino vanhu vaDhavhidha vakapika kwaari vechiti, “Auchazobudizve kuenda nesu kuhondo, kuti kusazodzima kujeka kwaIsuraeri.” Ngesure kweizvi kwakarwiwa hondo nevaFiristia muGobhi; zvino Sibhekhai muHushathi wakauraya Safi, uwo waiya umwe wevakororo vemagakanyara. Zvino kwakaapozve hondo nevaFiristia muGobhi, naErihanani mukororo waJaareoregimu muBhetherehema wakauraya munun'una waGoriathi muGithi, uwo waiya nechibato chomukhondo wake chakadai ngomuti womuruki. Yakaapozve hondo muGathi, apo paiya nomunhu wakarebesa gakanyara, uwo waiya nezvinwe zvitanhatu munyara dzake, netsoka dzeshe dzaiya nemakunwe matanhatu, makumi mairi nazvirongomuna pamwepo; naye waiya mubarirwana wemagakanyara. Naapo ashoora vaIsuraeri, Jonathani mukororo waShimei mukoma waDhavhidha wakamuuraya. Naava varongomuna vaiya mibarirwana yemagakanyara muGathi; vakaurawa ngenyara yaDhavhidha nenyara dzavaranda vake. Dhavhidha wakaereketa kunaMambo Mwari ngamazwi eiyi nduyo ngezuva rokuponeswa kwake ndiMambo Mwari kubva kunyara dzemagaa ake eshe, nokubva kunyara dzaSauri. Wakati, “Mambo Mwari ibako rangu, norusvingo rwangu, nomusunhuri wangu. Mwari wangu ibako rangu, ndinogonda kwaari, chihlangu changu, norunyanga rworuponeso rwangu, rusvingo rwangu rwakaturama, nemagondero angu, nomuponesi wangu; unondiponesa kubva kunevanondigebenga. Ndinodaidza kunaMambo Mwari, uwo unosisira kukudzwa, neni ndinoponeswa kubva kunemagaa angu. Ngokuti mafungo okufa akanditendenedza, nendambi yokuparadza yakandityisa; madambudziko aSheori akanditendenedza nemirau yokufa yakandisunga. Mukutambudzika kwangu ndakadaidza kunaMambo Mwari; ndakachema kunaMwari wangu. Wakazwa izwi rangu ari mutemperi rake, nokuchema kwangu kwakapinda munzee mwake. Zvino nyika yakazungunyika nokuhuta; nemadzeyo edenga akatsukunuka, akazungunyika, ngokuti waiya atseneka. Chiushi chakabuda kubva kumiro dzake, nomuriro unobaka wakabuda kubva kumuromo wake; nemasimbe akabaswa ndiwo akarazvuka kubva mwaari. Wakakotamisa matenga, wakadzaka pashi; nechidima chakasvipa chaiya pashi petsoka dzake. Wakagadha padera pekherubhi, akambururuka; wakaoneka pamaphaphiro edutu. Wakaita chidima kuti chiite tende rake rokugara, makore akakora akazara ngemvura. Ngokujeka kuri pamberi pake masimbe omuriro akabaswa. Mambo Mwari wakatinhira kubva mudenga; Uripadera-pezveshe wakaereketa ngeizwi rake. Wakaposhera misee, akavatatanisa nemheni yakavaparadza. Zvino kudzama kworuandhle kwakaoneka, madzeyo enyika akaiswa pamhene, ngokukaraidza kwaMambo Mwari, ngokufuridza kwomweya wemiro dzake. Wakatuma kubva mudenga, wakanditora, akandibudisa kubva mumvura zhinji. Wakandisunhura kubva kubandu rangu rinesimba kakurutu, kubva kuneavo vanondizonda; ngokuti vaiya vanyanya kundikurira. Vakandigumira ngezuva rokutambudzika kwangu, asi Mambo Mwari waiya mugwinyisi wangu. Wakandibudisa kundau yakatarauka; akandinunura, ngokuti wakandidakarira. Mambo Mwari wakandiripira kudai ngokururama kwangu, nokudai ngokuchena kwenyara dzangu wakandikovera. Ngokuti ndakangwarira njira dzaMambo Mwari, andizi kusiya Mwari wangu ngokuita zvakashata. Ngokuti kutonga kwake kweshe kwaiya pamberi pangu, nokubva kuzviemeso zvake andizi kupauka. Ndaiya ndakarurama pamberi pake, ndakadzibata pachangu kubva mukushata. Ndizvo Mambo Mwari wakandiripira kudai ngokururama kwangu, kudai ngokuchena kwangu mukuona kwake. Kunevane nyasha unoonisa nyasha, kunevakarurama unoonisa kururama. Kunevakacheneswa unoonisa kucheneswa, nokune vakapauka unovamukira. Vanhu vanotambudzwa unovaponesa; asi madziso ako anoringira avo vanodzikudza kuvapfaisa. Ngegwinyiso uri chibani changu, iwewe Mambo Mwari. Mambo Mwari unojekisa chidima changu. Kubudikidza ndiwe ndinokona kuparadza hondo; ndiMwari wangu ndinokona kudarika rukumbati. Mwari uyu, njira yake yakaperera; izwi raMambo Mwari rakaera; uri chihlangu kwevari veshe vanogonda mwaari. Ngokuti ndiani Mwari, asi ndiye Mambo Mwari? Ndiani ruware ngepabanze paMwari wedu? Mwari ndiye rusvingo rwangu runesimba; naye unobeura njira yangu kuti iperere. Unoita tsoka dzangu kuti dzidai ngedzemhuka; unondiemesa pandau dzakanaka dzakakwirira. Unodzidzisa nyara dzangu kurwa, kuti nyara dzangu dzikone kukwanya uta hwesimbi yethusi. Wandipa chihlangu choruponeso rwako, nokupfaa kwenyu kwakaita kuti ndikuriswe. Iwewe wakapamhamisa ndau yezvitsiko zvangu pashi petsoka dzangu, ndizvo tsoka dzangu adzizi kutedzuka. Ndakarumbirira magaa angu, ndikaaparadza; andizi kupetuka ndisati ndaapedza. Ndakaaparadza nokuabaya, kuti vasachamukazve; vakawa pashi petsoka dzangu. Ngokuti iwewe wakasunga chiunu changu ngesimba mukurwa; avo vakandimukira wakavapfaisa pashi pangu. Iwewe wakaita kuti mishana yemagaa angu ifuratire kwendiri, kuti ndivaparadze avo vanondizonda. Vakaringira, asi paiya pasina wokuvaponesa; vakachema kunaMambo Mwari, asi aazi kuvapingura. Ndakavaparadza kudai ngebukuta renyika, ndikavatsikatsika kudai ngemadhaka omupato. Iwewe wakandisunhura kubva mukumukira kwevanhu vangu, newe wakandingwarira kuti ndiite mukuru wemadzinza; vanhu vendaiya ndisikazii vakandishandira. Vapara vanondipfaira; mukundizwa kwavo vanondipurutana. Vapara vanozopera simba, vanozouya vechihuta kubva mumasvingo avo. Mambo Mwari unopona! Buwe rangu ngarifumiswe; ngaakuriswe Mwari, buwe roruponeso rwangu, Mwari unondiunzidzira, nokudzasa vanhu pashi pangu, uwo wakandibudisa kubva mukati mwemagaa angu. Iwewe wakandimirudza padera pevanondirwisa, wakandisunhura kubva kumunhu unogebenga. Ndizvo ndinozomukudza, A Mambo Mwari, pakati pemadzinza; ndinozoemba kukudza zina rako. Uri rusvingo rwokuponeswa kunamambo wake, unoonisa nyasha kunowakadzodzwa wake, kunaDhavhidha nokunemibarirwana yake mhera nariini.” Zvino aya ndiwo mazwi okugumisira aDhavhidha: “Dhavhidha mukororo waJesi unoti, munhu uwo waakamirudza Mwari, wakadzodzwa waMwari waJakobe; muembi wezvakanaka waIsuraeri. Mweya waMambo Mwari unoereketa kubudikidza ndini; izwi rake riri parurumi rwangu. Mwari waIsuraeri waereketa, Buwe raIsuraeri rakaereketa kwendiri rechiti, ‘Uwo unotonga padera pevanhu ngokururamisa, echitonga ngokutya Mwari, wakadai ngokujeka kwemangwanani, kudai ngezuva rinojeka mangwanani asina makore, kudai ngemvura inomerera nduhwe yomwenje, mukujeka ngesure kwokunaya kwemvura.’ Mhatso yangu aizi kudaro kunaMwari here? Ngokuti wakaita chitenderano neni chinoti mhera nariini, chakaemeswa muzviro zveshe zvinegwinyiso. Ngokuti urwo ndirwo ruponeso rwangu nokudisisa kwangu kweshe, aazi kuita kuti zviitike here? Asi vanhu veshe vasikadi Mwari vanozodai ngeminzwa inorashwa, ngokuti aingabatwi ngenyara. Kuvabata munhuwo unosisira kushandisa simbi rechibato chomukhondo. Navo vanozopishwa yaamho ngomuriro pandaupo.” Aya ndiwo mazina engwazi dzaDhavhidha: Joshebhashebhethi muTakhemoni waiya nduna huru yenduna nhatu; wakamirudza mukhondo wake kurwa nevanhu mazana masere (800), akavauraya chikamwe. Pasinde pake pakati pevatatu waiteerwa ndiEreaza mukororo waDhodho, mukororo waAhohi. Waiya umwe wengwazi nhatu dzaiya naDhavhidha ngomukuwo wevakashoora vaFiristia avo vaiya vakaungana pandau imweyo kurwa. Vamuna vaIsuraeri vakapetuka sure, asi wakamiruka. Wakabaya vaFiristia metsa nyara yake yakapera simba, kunyazwi nyara yake yakakakatira shoti. Mambo Mwari wakavaunzira kunyisa kukuru ngeiro zuva. Zvino vanhu vakapetuka kwaari, asi kwega kuunganidza zvevakafa. Waiteera pasinde pake ndiShama mukororo waAgee muHarari. VaFiristia vakaungana pamwepo paRehi. Waiyapo munda wakazara ngenyemba; navanhu vehondo vaIsuraeri vakatiza vaFiristia. Asi Shama wakaema pakati pemunda uyo, akaurwira, akauraya vaFiristia; naMambo Mwari wakaunza kunyisa kukuru. Vatatu venduna makumi matatu vakadzaka, vakaguma koobatana naDhavhidha pabako rinozwi Adhuramu ngomukuwo wokukukura; naapo chiunga chevaFiristia chakadzimika matende acho mubani reRefaimu. Dhavhidha waiya mumarusvingo ngouwo mukuwo, nevarwi vevaFiristia vaiya muBhetherehema. Dhavhidha wakadisisa akati, “A kudai umwe angandimwisa mvura yechinyuka cheBhetherehema, chiri ngepamusiwo!” Zvino ngwazi nhatu dzakahamba ngepakati pehondo yevaFiristia, vakachera mvura pachinyuka cheBhetherehema chaiya pamusiwo, vakaitora, vakaiunza kunaDhavhidha. Asi aazi kuimwa, asi wakaidururira kunaMambo Mwari, ngokuti wakati, “Mambo Mwari, musatendera kuti ndiite ichi chiro. Ndingamwa ngazi yevanhu here, avo vakaenda koodzipinza mungozi yokupona kwavo?” Ndizvo ngokudaro aazikuimwa. Izvi zviro ndizvo zvakaitwa ngaavo vatatu vaiya ngwazi. Zvino Abhishai munun'una waJoabhi mukororo waZeruia, waiya nduna huru pakati pevatatu. Ngomukhondo wake wakarwa nemazana matatu (300) nokuvauraya, wakaita mbiri pakati pevatatu. Waiya akapindisisa kuita mbiri pakati pevatatu. Ndizvo wakaita nduna huru yavo; asi aazi kuedzana nevatatu vokutanga. Bhenaia mukororo waJehoiadha mukororo womunhu waiya ngwazi weKabhizeeri, uwo waiya muiti wezviito zvakakura; wakauraya ngwazi mbiri dzeMoabhi. Wakadzakawo akauraya mhondoro mukati mwehunza ngezuva rakawa chando. Naye wakauraya muEgipite, munhu wakanaka kuringirika. MuEgipite waiya nomukhondo munyara yake, asi Bhenaia wakaenda koorwa naye anendonga, akabvuka mukhondo kubva munyara yomuEgipite, akamuuraya ngomukhondo wakewo. Izvi ndizvo zviro zvakaitwa ndiBhenaia mukororo waJehoiadha, wakaita mbiri huru pakati pevatatu. Wakavapinda ngoungwazi pakati peavo makumi matatu, asi aazi kuedzana nengwazi nhatu. NaDhavhidha wakamuemesa kuita nduna padera pevarindi vake. Pakati pemakumi matatu vaiyapo ava: Asaheri, munun'una waJoabhi, Erihanani mukororo waDhodho weBhetherehema, Shama muHarodhi, Erika muHarodhi, Herezi muPhariti, Ira mukororo waIkeshi muThekoa, Abhieza muAnathothi, Mebhunai muHushathi, Zarimoni muAhohi, Maharai weNetofa, Herebhi mukororo waBhaana, munhu weNetofa, Ithai mukororo waRibhai, uwo wakabva Gibhea, wevana vaBhenjamini, Bhenaia muPhirathoni, Hidhai wemikova yeGaashi, Abhiaribhoni muAbhathi, Azimavhethi muBhahurimu, Eriabha muShaaribhoni, vakororo vaJasheni, naJonathani, mukororo waShama muHarari, Ahiamu mukororo waShara muHarari, Erifereti mukororo waAhasibhai muMaakhathi, Eriamu mukororo waAhithoferi muGiro, Hezro muKharmeri, Phaarai muAbha, Igari mukororo waNathani muZobha, Bhani muGadhi, Zereki muAmoni, Naharai muBheerothi, mungwariri wezvokurwa zvaJoabhi mukororo waZeruia, Ira muIthira, Garebhi muIthira, Uria muHiti, makumi matatu nevanomwe pamwepo. Noushungu hwaMambo Mwari hwakabakazve kunevaIsuraeri, wakamusa Dhavhidha kuti ati kwevari, “Endai, muerenge Isuraeri naJudha.” Ndizvo mambo wakati kunaJoabhi nduna yehondo, uwo waiya naye, “Enda zvino, uerenge vanhu kunyika dzeshe dzaIsuraeri, kubvira Dhani metsa kuguma Bheerishebha, kuti ndizie uwandu hwavo.” Asi Joabhi wakati kunamambo, “Mambo Mwari, Mwari wako ngaatutsire uwandu hwevanhu ngemazana akapetwa ngemazana, naapo madziso amakosi wangu mambo azvione! Asi ngenyi makosi wangu mambo echida kuita ichi chiro?” Asi izwi ramambo rakanyisa Joabhi nenduna dzehondo. Ndizvo Joabhi nenduna dzehondo vakabuda kubva pamberi pamambo, kuenda kooerenga vaIsuraeri. Vakaambuka Jorodhani, vakaemesa matende avo muAroeri, ngokumudyo kwedhorobha rinogara pakati pomubani reGireadhi, rinoringirana neGadhi nokuringirana naJaza. Zvino vakasvika Gireadhi, nokunyika yeThatimihodheshi; vakagumazve Dhani, nokubva Dhani vakatenderera kuenda Sidhoni. Vakaguma kumasvingo eThire, nokumadhorobha eshe evaHivhi neevaKhenani; navo vakaenda mubani raJudha metsa vakaguma Bheerishebha. Ndizvo apo vaiya vahamba kudarika nyika dzeshe, vakauyazve Jerusarema mukupera kwemwedzi mipfumbamwe nemazuva makumi mairi. Joabhi wakaronza uwandu hwevanhu veshe kunamambo avo vakanyorwa: muIsuraeri vaiyamwo ngwazi mazana masere emakumi emazana (800,000), vaikona kubaya ngeshoti, nevanhu vaJudha vaiya mazana mashanu emakumi emazana (500,000). Asi mweya waDhavhidha wakamutambudza ngesure apo aerenga vanhu. Dhavhidha wakati kunaMambo Mwari, “Ndakashaisha kakurutu ngeizvo zvendakaita. Asi zvino, ndinokupota, Mambo Mwari, dusa kushaisha kwomuranda wako; ngokuti ndakaita ngoupenzi.” Naapo Dhavhidha amuka mangwanani, izwi raMambo Mwari rakaguma kunomuprofeti Gadhi, mufemberi waDhavhidha, rechiti, “Enda, wechiti kunaDhavhidha, ‘Ndizvo zvinoronza Mambo Mwari, ndinopa kwouri zviro zvitatu kuti utsanangure chimwe chokuti ndikuitire.’ ” Ndizvo Gadhi wakauya kunaDhavhidha, akamuronzera, akati kwaari, “Kungazouya here makore matatu enzara munyika yako? Nokuti utize magaa ako mwedzi mitatu, vechikurumbirira? Nokuti kuuye nhenda inotyisa mazuva matatu munyika yako? Zvino nasa kupinimidza, uone mupinguro wendinozopa kunewakandituma.” Zvino Dhavhidha wakati kunaGadhi, “Ndakadzipwa kakurutu; ngatiwire zvino munyara yaMambo Mwari, ngokuti nyasha dzake ihurutu; haiwa kuti tiwire munyara dzevanhu.” Ndizvo Mambo Mwari wakatuma nhenda inotyisa padera pavaIsuraeri, kubvira mangwanani metsa kuguma mukuwo wakaemeswa; kwakafa vanhu makumi manomwe emakumi emazana (70,000) kubvira Dhani metsa kuguma Bheerishebha. Asi apo ngirosi yatambanudza nyara yayo padera peJerusarema kuti iriparadze, Mambo Mwari wakakunukuka kubva mukushata ukwo, wakati kungirosi yaiuraya vanhu, “Zvakwana, pfinyisa zvino nyara yako.” Ngirosi yaMambo Mwari zvino yaiya yaapandau yembuwa yaArauna muJebhusi. Naapo Dhavhidha aona ngirosi iyo yechiuraya vanhu, wakati kunaMambo Mwari, “Ndashaisha inini ndega, inini ndega ndakaita zvakashata; asi aya makwai akaitenyi? Ndinokupota kuti nyara yako ngaiwe padera pangu, nepadera pemhatso yababa angu.” Ngeiro zuva Gadhi wakauya kunaDhavhidha, akati kwaari, “Kwira, uakire Mambo Mwari arita pandau yokupurira yaArauna muJebhusi.” Dhavhidha kudai ngokuronza kwaGadhi wakakwira kudai ngezvaakapangwa ndiMambo Mwari. Naapo Arauna aringira kubani, wakaona mambo nevaranda vake vechikwedzera kwaari; Arauna wakabuda, akakotamisa hope yake pashi pamberi pamambo. Arauna wakati, “Ngenyi zvino makosi wangu mambo echiuya kunomuranda wake?” Dhavhidha wakati, “Kutenga kubva kwouri ndau yako yokupurira, kuti ndiakirepo Mambo Mwari arita ngendaa yenhenda inotyisa, kuti ibve pakati pevanhu.” Zvino Arauna wakati kunaDhavhidha, “Makosi wangu mambo ngaatore aite mudiro chinooneka chakanaka kwaari; dziripano kabi dzokuita mudiro wokupisha, nezviro zvokupura, nezviro zvimweni zvinoshandiswa ngemakabi, zviitwe huni. Zveshe izvi zviro Arauna unopa kunamambo.” NaArauna wakati kunamambo, “Mambo Mwari, Mwari wako ngaakuashire.” Asi mambo wakati kunaArauna, “Haiwa, asi ndinozozvitenga kwouri ngomutengo wazvo; ngokuti andizopiri mudiro wokupisha kunaMambo Mwari, Mwari wangu, weizvo zvisikazi kundidaidzira mutengo.” Ndizvo Dhavhidha wakatenga ndau yokupurira, nekabi ngemakumi marongomuna ezvigurwa zvesirivha. Dhavhidha wakaakirapo Mambo Mwari arita, wakapira midiro yokupisha nemidiro yokuiyanisa. Ndizvo Mambo Mwari wakapingura mikumbiro ngendaa yenyika, nenhenda inotyisa yakapera muIsuraeri. Zvino mambo Dhavhidha waiya aamusharuka, atigwedere ngouwandu hwemakore ake; kunyazwi vakamufukidza ngemachira, aazi kudziirwa. Ndizvo varanda vake vakati kwaari, “Ngaatsvakirwe mambo wangu mhandara itsva, igare nokungwarira mambo, imufungatire, kuti makosi wangu mambo adziirwe.” Ndizvo vakatsvaka mhandara yakanakisisa munyika yeshe yaIsuraeri, vakaona Abhishagi muShunami, vakamuunza kunamambo. Mhandara yaiya yakanakisisa kakurutu. Yakaita mungwariri wamambo, yakamushandira, asi mambo aazi kuatana nayo. Zvino Adhonija, mukororo waHagithi, wakadzimirudza echiti, “Inini ndinozoita mambo;” wakadzinasirira pachake ngoro nevagadhi vemahachi, nevanhu makumi mashanu kuti varumbe ngepamberi pake. Baba ake avazi kumurambidza nakamwe ngokumubvunza kuti, “Unodaro ngenyi?” Waiyawo munhu wairingirika akanaka kakurutu; namai ake akamubereka ngesure kwaAbhusaromu. Wakapangana naJoabhi mukororo waZeruia naAbhiatha mupristi; navo vakateera Adhonija, vakamudetsera. Asi Zadhoki mupristi, naBhenaia mukororo waJehoiadha, Nathani muprofeti, Shimei, Rei, nengwazi dzaDhavhidha avazi kuteera Adhonija. Adhonija wakauraya makwai, kabi, nen'ombe dzakakodzwa pasinde pebuwe rinozwi Zoherethi, iro riri pasinde peEnirogeri, naye wakakoka hama dzake dzeshe vakororo vamambo, nevamuna veshe vokwaJudha, varanda vamambo, asi aazi kudaidza Nathani muprofeti, nokuti Bhenaia, nokuti ngwazi, nokuti Soromoni hama yake. Zvino Nathani muprofeti wakaereketa kunaBhathishebha mai aSoromoni, wakati, “Auzi kuzwa here kuti Adhonija mukororo waHagithi waita mambo, asi Dhavhidha mambo wedu aazvizii? Ndizvo zvino, uya ndikupange, kuti uponese ndaramo yako, neyomukororo wako, Soromoni. Enda upotere kunamambo Dhavhidha, wechiti kwaari, ‘Auzi kupika here, mambo wangu, kunomurandakadzi wako,’ kuti, ‘Ngegwinyiso Soromoni mukororo wako unozoita mambo sure kwangu, unozogara padendemaro rangu?’ ‘Ngenyi zvino Adhonija aita mambo?’ Zvino, apo uchaereketa kunamambo, neniwo ndinozopotera ngesure kwako, ndigwinyise mazwi ako.” Ndizvo Bhathishebha wakapotera mukamera munamambo. Mambo waiya aamusharuka yaamho; Abhishagi muShunami waiya echishandira mambo. Bhathishebha wakakotama kukudza mambo, namambo wakati, “Unodenyi?” Wakati kwaari, “Mambo wangu, iwewe wakapika ndiMambo Mwari, Mwari wako, kunomurandakadzi wako wechiti, ‘Ngegwinyiso, Soromoni mukororo wako unozoita mambo sure kwako, unozogara padendemaro rako.’ Asi zvino, ringira, Adhonija waita mambo, kunyazwi makosi wangu mambo usikazvizii. Watopira kabi, n'ombe dzakakodzwa, nemakwai ngokuwanza, watodaidza vakororo veshe vamambo, Abhiatha mupristi, Joabhi nduna yehondo; asi Soromoni muranda wako, aazi kumudaidza. Asi iwewe makosi wangu mambo, madziso eshe evaIsuraeri akaringira kwouri, kuti iwewe uvaronzere kuti ndiani unozogara padendemaro ramakosi wangu mambo sure kwake. Pamweni kungazoitika apo makosi wangu mambo paanozoata nemadzibaba ake, kuti inini nomukororo wangu Soromoni tinozoerengwa kuti tiri zvipumhuniso.” Naapo achaereketa namambo, kwakapoterawo Nathani muprofeti. Vakaronzera mambo vechiti, “Ringira, waapano Nathani muprofeti.” Naapo paakapotera panamambo, wakakotamisa hope yake pamavhu kukudza mambo. Nathani wakati kunamambo, “Makosi wangu mambo, wakaronza here kuti, ‘Adhonija unozoita mambo sure kwangu, nokuti unozogara padendemaro rangu?’ Ngokuti watodzaka nyamashi wapira kabi, n'ombe dzakakodzwa, makwai ngokuwanza, wadaidza vakororo vamambo veshe, nenduna dzehondo, pamwepo naAbhiatha mupristi; avo zvino vanodya nokumwa pamberi pake vechiti, ‘Pona mhera nariini, mambo Adhonija.’ Asi aazi kudaidza, inini muranda wako, Zadokhi mupristi, Bhenaia mukororo waJehoiadha, naSoromoni muranda wako. Ichi chiro chakaitwa ndimakosi wangu mambo here, newe auzi kutendera varanda vako, kuti vazie kuti ndiani unozogara padendemaro ramakosi wangu mambo sure kwake?” Mambo Dhavhidha wakapingura echiti, “Ndidaidzire Bhathishebha.” Ndizvo wakauya munamambo, akaema pamberi pamambo. Mambo wakapika echiti, “Kudai ngezvaanopona Mambo Mwari, uwo wakandiponesa kubva mukutambudzika kwangu kweshe, kudai ngezvendakapika kwouri ndiMambo Mwari, Mwari waIsuraeri ndechiti, ‘Ngegwinyiso Soromoni mukororo wako unozoita mambo sure kwangu, naye unozogara padendemaro rangu pandau yangu;’ ndizvo ndinozochiita nyamashi.” Zvino Bhathishebha wakakotama pashi nehope, akakudza mambo echiti, “Ngaapone mambo wangu Dhavhidha mhera nariini.” Mambo Dhavhidha wakati, “Ndidaidzire Zadhoki mupristi, Nathani muprofeti, naBhenaia mukororo waJehoiadha.” Naapo veshe vauya pamberi pamambo, mambo wakati kwavari, “Torai varanda vamambo wenyu, muite kuti Soromoni mukororo wangu agadhe nyurusi rangu, mudzake naye Gihoni. Zadhoki mupristi naNathani muprofeti ngavamudzodzepo kuti aite mambo padera paIsuraeri; zvino muridze gwama mwechiti, ‘Ngaapone mhera nariini mambo Soromoni.’ Nemwi munozokwira mwechiteera ngesure kwake. Ngaapotere agare padendemaro rangu; ngokuti ndiye unozoita mambo pandau yangu; ndamuemesa kuti aite mambo padera paIsuraeri nepadera paJudha.” Bhenaia mukororo waJehoiadha wakapingura mambo echiti, “Ameni! Mambo Mwari, Mwari wamakosi wangu mambo ngaaronze kudarowo. Mambo Mwari kudai ngezvaaiya namakosi wangu mambo, ngaadarowo kunaSoromoni, aite kuti dendemaro rake rikure kupinda dendemaro ramakosi wangu mambo Dhavhidha.” Ndizvo Zadhoki mupristi, Nathani muprofeti, Bhenaia mukororo waJehoiadha, vaKherethi nevaPherethi, vakadzaka vakaita kuti Soromoni agadhe nyurusi ramambo Dhavhidha, vakauya naye Gihoni. Zadhoki mupristi wakatora runyanga rwemafuta kubva mutende, wakadzodza Soromoni. Zvino vakaridza gwama, nevanhu veshe vakati, “Pona mhera nariini, mambo Soromoni.” Naapo vanhu veshe vakakwira vechiteera sure kwake, vechiridza minanzi, vakadakara ngokudakara kukurutu, nenyika yakatinhira ngebope ravo. Adhonija nevanhu veshe vakakokwa vaiya naye, vakazwa bope apo vachapedza kudya. Naapo Joabhi azwa kurira kwegwama, wakati, “Ngerenyi iri bope mudhorobha munehohoho rokuereketa?” Naapo achaereketa, ringira, Jonathani mukororo waAbhiatha mupristi wakaguma. Adhonija wakati kwaari, “Potera iwewe; ngokuti uri munhu unogondeka, newe unouya nemashoko akanaka.” Jonathani wakapingura Adhonija echiti, “Haiwa, ngokuti makosi wedu mambo Dhavhidha waemesa Soromoni kuita mambo. Mambo wakatuma naye Zadhoki mupristi, Nathani muprofeti, naBhenaia mukororo waJehoiadha, nevaKherethi nevaPherethi, vakaita kuti agadhe padera penyurusi ramambo. Zadhoki mupristi naNathani muprofeti vakamudzodza muGihoni kuti aite mambo; navo vaiya vachabveyo vechidakara ngokudaro dhorobha raiya rechiita hohoho. Iri ndiro bope remwaiya mwechizwa. Soromoni zvino unogara padera pedendemaro roumambo. Nokupinda izvi, varanda vamambo vauya kooita makorokoto kunamakosi wedu mambo Dhavhidha vechiti, ‘Mwari ngaaite kuti zina raSoromoni rikudzwe kupinda rako, aite kuti dendemaro rake rikure kupinda rako.’ Mambo wakadzikotamisa pamubhedhi wake, wakaangira kukumbira echiti, ‘Ngaatendwe Mambo Mwari, Mwari waIsuraeri, uwo nyamashi watendera umwe wemibarirwana yangu kuti agare padendemaro rangu, madziso angu achaona.’ ” Zvino veshe vakakokwa vaiya naAdhonija, vakatya, vakamiruka, vakaenda umwe ngaumwe njira yake. Adhonija echitya Soromoni, wakamiruka, wakaenda, akabata nyanga dzearita. Wakaronzerwa Soromoni kuti, “Wona, Adhonija unotya mambo Soromoni; ringira, watobata nyanga dzearita echiti, ‘Mambo Soromoni ngaapike nyamashi kuti aazourayi muranda wake ngeshoti.’ ” Ndizvo Soromoni wakati, “Kudai echizodzionisa emene kuita munhu unosisira, akuna narimwe rebvudzi rake rinozowa pashi; asi kudai kushata kwechioneka kwaari, unozofa.” Zvino mambo Soromoni wakatuma vanhu, navo vakamudzasa kubva paarita. Wakauya akakotama kukudza pamberi pamambo Soromoni; naSoromoni wakati kwaari, “Enda kumhatso yako.” Zvino mazuva okufa kwaDhavhidha akwedzera pasinde; wakapanga Soromoni mukororo wake echiti, “Ndinoenda njira yenyika yeshe. Ndizvo ita wakagwinya, ushinge, uonise kuti uri mwamuna, ungwarire kupanga kwaMambo Mwari, Mwari wako, uhambe ngenjira dzake, ungwarire zviemeso zvake, mipango yake, zvitongero zvake, zvapupu zvake, kudai ngezvezvakanyorwa muzvironzo zvaMosi, kuti uite unobudirira kuneizvo zveshe zvounozoita, nokundau dzeshe dzounozohamba. Zvino Mambo Mwari unozogwinyisa izwi rake raakaereketa ndini echiti, ‘Kudai vana vako vechizongwarira njira dzavo, vechizohamba pamberi pangu ngegwinyiso, ngomwoyo wavo weshe, nangomweya wavo weshe, akuzotamiki naumwe wavo unozogara padendemaro raIsuraeri.’ “Zvakanyadaro unozia izvo zveshe zvaakaita Joabhi mukororo waZeruia kwendiri, zvaakaita kunenduna mbiri dzehondo dzaIsuraeri, Abhina mukororo waNeri, nokuna Amasa mukororo waJetha, uwo waakauraya, echiunzidzira ngenguva yokunyarara ngazi yengwazi dzehondo, wakaisa ngazi yehondo pabhande rake, raiya muchiunu chake, nomumagwada aiya mutsoka dzake. Ndizvo ita kwaari kudai ngoungwaru hwako, asi usatendera kuti bvudzi rake raita imvi ridzake muiba mukunyarara. Asi uitire nyasha kuvakororo vaBharizirai muGireadhi, utende kuti vawe pakati peavo vanodya patafura rako; ngokuti vakauya kwendiri ngenguva yendakatiza ngendaa yomukoma wako Abhusaromu. Apapo, munayezve Shimei, mukororo waGera muBhenjamini, weBhahurimu, uwo wakandituka ngechituko chakashata panguva yendakaenda Mahanaimu; asi apo paakauya kooshongana neni Jorodhani, ndakapika kwaari ndiMambo Mwari ndechiti, ‘Andizokuurayi ngeshoti.’ Ndizvo usamuita usina ndaa, ngokuti iwewe uri munhu wakangwara, unozozia chinosisira kuitwa kwaari; newe unosisira kuti udzase imvi dzake muiba nengazi.” Zvino Dhavhidha wakaata nemadzibaba ake, wakaikwa mudhorobha raDhavhidha. Mazuva okutonga kwaDhavhidha muIsuraeri akaita makore makumi marongomuna; makore manomwe wakatonga muHebroni, nemakore makumi matatu namatatu wakatonga muJerusarema. Ndizvo Soromoni wakagara padendemaro rababa ake Dhavhidha; noumambo hwake hwakagwinyiswa kakurutu. Zvino Adhonija, mukororo waHagithi wakauya kunaBhathishebha mai aSoromoni. Vakamubvunza vechiti, “Wauya ngokunyarara here?” Naye wakati, “Eya, ngokunyarara.” Zvino wakati, “Ndingaereketa izwi kwouri here?” Wakati, “Ereketa.” Wakati, “Unozia kuti umambo hwaiya hwangu, nevaIsuraeri veshe vaiya vakaringira hope dzavo kwendiri, kuti ndivatonge; zvakanyadaro, umambo hwakakunukudzwa kuita hwomunun'una wangu, ngokuti hwaiya hwake wakahupuwa ndiMambo Mwari. Nazvino ndinokumbira chiro chimwe kwouri, usandirambira.” Wakati kwaari, “Ronza.” Wakati, “Ndinokupota, kumbira mambo Soromoni aazokurambiri kuti andipe Abhishagi muShunami kuti aite mukadzi wangu.” Bhathishebha wakati, “Zvakanaka hazvo; ndinozokuereketera kunamambo.” Ndizvo Bhathishebha wakaenda kunamambo Soromoni, kuti aereketere Adhonija. Mambo wakamiruka kuti ashongane naye, wakakotama kwaari; wakagara padendemaro rake, wakaita kuti kuunzwe chigaro chamai amambo; naye wakagara ngokumudyo kwake. Zvino wakati kwaari, “Ndinokumbira chiro chimwe chidoko kwouri; ndinokupota, usandirambira.” Namambo wakati kwaari, “Kumbirai henyu, mai angu; ngokuti andizomurambiri.” Wakati, “Tenda kuti Abhishagi muShunami apuwe kunaAdhonija mukoma wako, kuita mukadzi wake.” Mambo Soromoni wakapingura mai ake echiti, “Ngenyi mwechikumbira Abhishagi muShunami kuita mukadzi waAdhonija? Mukumbirirei noumambo! Ngokuti iye mukoma wangu mukuru; musakumbirira iye ega, asi naAbhiathawo mupristi, naJoabhi mukororo waZeruia.” Zvino mambo Soromoni wakapika ndiMambo Mwari echiti, “Ndizvo Mwari ngaaite kudaro kwendiri nokupindazve, kudai Adhonija asikazi kuereketa izwi iri rokudziuraya ndiro. Zvino kudai ngezvaanopona Mambo Mwari, uwo wakandigwinyisa nokundiemesa padendemaro raDhavhidha baba angu, nokundinasirira mhatso, kudai ngokugondisa kwake, Adhonija unozourawa nyamashi.” Ndizvo mambo Soromoni wakatuma Bhenaia mukororo waJehoiadha, naye wakamubaya akafa. Mambo wakati kunaAbhiatha mupristi, “Miruka, uende Anathothi kunyika yako; ngokuti iwewe unosisira rufu. Asi zvino andizokuurayi, ngokuti wakatwara bhokisi rechitenderano chaMambo Mwari pamberi paDhavhidha baba angu, ngokuti wakatambudzwa ngezveshe zvaakatambudzwa ndizvo baba angu.” Ndizvo Soromoni wakadzinga Abhiatha kuti asachaita mupristi kunaMambo Mwari, kuti rizarisike izwi raMambo Mwari raakaereketa ngendaa yemhatso yaEri muShiro. Naapo mashoko paakaguma kunaJoabhi, ngokuti Joabhi waiya akateera Adhonija, kunyazwi waiya asikazi kuteera Abhusaromu, Joabhi wakatiza akaenda kutende raMambo Mwari, akabata nyanga dzearita. Naapo paakaronzerwa mambo Soromoni, kwechizwi, “Joabhi watiza, akaenda kutende raMambo Mwari; ringira, uri pasinde pearita.” Soromoni wakatuma Bhenaia, mukororo waJehoiadha, echiti, “Enda, woomuuraya.” Ndizvo Bhenaia wakauya kutende raMambo Mwari, wakati kwaari, “Mambo unopanga izvi, ‘Buda.’ ” Asi wakati, “Andibudi; ndinozofira pano.” Zvino Bhenaia wakaunzazve izwi iro kunamambo echiti, “Unoronza izvi Joabhi, wakandipingura kudaro.” Mambo wakati kwaari, “Ita kudai ngezvaanoronzazvo, muuraye, umutsire; kuti uduse ngazi isina ndaa kubva kwendiri, nokubva kumhatso yababa angu, iyo yaakaparadza Joabhi. Mambo Mwari unozohwirinzira mishando yake yengazi padera pesoro rake, ngokuti wakauraya vamuna vairi vaiya vakarurama kupinda iye, wakavauraya ngeshoti, baba angu Dhavhidha asikazii, ava ndivo Abhina mukororo waNeri, nduna yehondo yaIsuraeri, naAmasa mukororo waJetha, nduna yehondo yaJudha. Ndizvo ngazi yavo inozohwirinzirwa padera pesoro raJoabhi, nepadera pesoro remibarirwana yake mhera nariini, asi kunaDhavhidha nokunemibarirwana yake, nokunemhatso yake, nokudendemaro rake, kunozoapo kunyarara kunobva kunaMambo Mwari mhera nariini.” Zvino Bhenaia mukororo waJehoiadha wakakwira, akamubaya, akamuuraya; wakatsirwa mumhatso yake pasinde peshango. Mambo wakaemesa Bhenaia mukororo waJehoiadha pandau pake padera pehondo, naZadhoki mupristi wakaemeswa ndimambo pandau yaAbhiatha. Zvino mambo wakatuma vanhu koodaidza Shimei, akati kwaari, “Dziakire pachako mhatso muJerusarema, ugaremwo, usazobvemwo kuenda kundau imweni kunyazwi ngekuri. Ngokuti ngezuva rounozobuda kubvemwo, wechiambuka rwizi Kedhironi, zia ngegwinyiso kuti unozofa; ngazi yako inozowa padera pesoro rako.” NaShimei wakati kunamambo, “Izwi rewaronza rakanaka; muranda wako unozoita kudai ngezvaakaronza makosi wangu mambo.” Ndizvo Shimei wakagara muJerusarema mazuva mazhinji. Asi kwakaitika kuti ngesure kwapera makore matatu, hloko mbiri dzaShimei dzakatiza kuenda kunamambo Akhishi, mukororo waMaakha weGathi. Naapo pevakaronzera Shimei vechiti, “Hloko dzako dziri muGathi,” Shimei wakasungira mbongoro yake, akaenda Gathi kunaAkhishi kootsvaka hloko dzake. NaShimei wakaenda, akauya nadzo kubva Gathi. Naapo Soromoni aronzerwa kuti Shimei wakabuda kubva muJerusarema kuenda Gathi, akatopetuka, mambo wakatuma vanhu koodaidza Shimei, akati kwaari, “Andizi kuita here kuti upike ndiMambo Mwari, ndakagwinyisa kwouri ndechiti, ‘Zia ngegwinyiso kuti zuva rounozobva pano wechienda kundau dzimweni, unozofa?’ Newe wakati kwendiri, ‘Izwi rakanaka, ndinoritenda.’ Ngenyi zvino usikazi kungwarira mhiko yako kunaMambo Mwari, nomupango wendakakupanga ndiwo?” Mambo wakatizve kunaShimei, “Unozia kushata kweshe kuri mumwoyo mwako, kwewakaita kunaDhavhidha baba angu; ndizvo Mambo Mwari unozounzidzira kushata kwako padera pesoro rako. Asi mambo Soromoni unozofumiswa nedendemaro raDhavhidha rinozogwinyiswa pamberi paMambo Mwari mhera nariini.” Zvino mambo wakapanga Bhenaia mukororo waJehoiadha, naye wakabuda, akamubaya, wakamuuraya. Ndizvo umambo hwakagwinyiswa munyara dzaSoromoni. Soromoni wakaiyana naFaro, mambo weEgipite; akatora mwanasikana waFaro, akamuunza mudhorobha raDhavhidha, metsa apedza kuaka mhatso yake, nemhatso yaMambo Mwari, norukumbati rwaitendenedza Jerusarema. Vanhu vaipira midiro pandau dzakakwirira, ngokuti paiya pasina mhatso yaiya yakaakirwa zina raMambo Mwari, metsa kumazuva awo. Soromoni wakamuda Mambo Mwari, echihamba ngezviemeso zvaDhavhidha baba ake; kwega kuti wakapira midiro yokupisha zvinonuhwira pandau dzakakwirira. Mambo wakaenda Gibheoni koopirayo mudiro, ngokuti ndiyo yaiya ndau huru yakakwirira. Soromoni wakapira paarita iro midiro gumi remazana. MuGibheoni Mambo Mwari wakaoneka kunaSoromoni usiku mukurota; Mwari wakati kwaari, “Kumbira chounoda ndinozokupa.” NaSoromoni wakati, “Iwewe wakaonisa nyasha huru kunomuranda wako Dhavhidha baba angu, ngokuti wakahamba pamberi pako mukugondeka nomukururama kwomwoyo wake kwouri; newe wakamungwaririra urwu rudo rukurutu newe wakamupa mukororo kuti agare padendemaro rake nyamashi. Nazvino, A Mambo Mwari, Mwari wangu, wakaita kuti muranda wako aite mambo padendemaro raDhavhidha baba angu, kunyazwi inini ndiri mwana mudoko; andizii kubuda kubanze nokuti kupotera. Muranda wako uri pakati pevanhu vako, avo vowakatsanangura, vanhu vazhinji, vasikaerengeki ngouwandu. Ndizvo ipa kunomuranda wako mwoyo unokuzwisisa kuti nditonge vanhu vako, kuti ndikone kutsanangura pakati pezvakanaka nezvakashata; ngokuti ndiani ungakona kutonga vanhu vako ava vakadai kuwanda?” Zvakadakadza Mambo Mwari kuti Soromoni wakakumbira chiro ichi. Mwari wakati kwaari, “Ngokuti wakumbira ichi chiro, usikazi kudzikumbirira kupona kwakareba, nokuti auzi kudzikumbirira upfumi, nokuti kukumbira kufa kwamagaa ako, asi wadzikumbirira ngokwako kungwara kuti uzie kutonga kwakarurama, ringira zvino, ndaita kudai ngokuronza kweizwi rako. Ngegwinyiso ndinokupa mwoyo unokuzia nokuzwisisa; ngokudaro kwaiya kusina naumwe wakadai ndiwe nakamwe, kunyazwi unoteera sure kwako akuna unozodai ndiwe. Zve, ndakakupa icho chiro chousikazi kukumbira, zveshe upfumi nokuremeredzwa; akuna naumwe unozoedzana newe pakati pemadzimambo mazuva eshe okupona kwako. Kudai wechizohamba ngenjira dzangu, wechingwarira zvironzo zvangu nezviemeso zvangu, kudai ngezvaakazvingwarira baba ako Dhavhidha, zvino ndinozowanza mazuva okupona kwako.” Zvino Soromoni wakamuka; ringira, kwaiya kurota. Wakauya Jerusarema, apo paakaema pamberi pebhokisi rechitenderano chaMambo Mwari. Wakapa midiro yokupisha, akapazve midiro yokuiyanisa, akaitira varanda vake veshe dhiri. Zvino vakauya vakadzi vairi, vaiya mahure, kunamambo, vakaema pamberi pake. Mukadzi umwe wakati, “Ndapota mambo wangu, inini nouyu mukadzi tinogara mumhatso imweyo; neni ndakabereka mwana, arimwowo mumhatso. Zvino ngesure kwemazuva matatu okubereka kwangu, uyu mukadzi wakaberekawo. Taiya pamwepo; paiya pasina umweni mumhatsomwo, taiya tiri vairi tega mumhatso. Zvino mwana wouyu mukadzi wakafa usiku, ngokuti wakamutsikirira. Wakamuka pakati pousiku, naye wakatora mwana wangu kubva paditi pangu, apo muranda wako akaata. Wakamuisa paditi pake, akaisa mwana wake wakafa paditi pangu. Naapo ndamuka mangwanani kuamwisa mwana wangu, ndakaona kuti waiya afa; asi apo ndamuringisisa, ndakaona kuti aasiri mwana wangu akadi, wendakabereka.” Asi mukadzi umweni wakati, “Haiwa, uwo unopona ngowangu, nouwo wakafa ngowake.” Noumweni wakati, “Haiwa, uwo wakafa ngowake, nouwo unopona ngowangu.” Ukwo ndikwo kuereketa kwevakaita pamberi pamambo. Zvino mambo wakati, “Umwe unoti, ‘Uwo uchapona ngowangu, wako ngowafa;’ noumweni unoti, ‘Azvizi kudaro, wakafa ngowako, wangu ngouchapona.’ ” Ndizvo mambo wakati, “Ndiunzire shoti.” Navo vakaunza shoti pamberi pamambo. Mambo wakati, “Badzura mwana unopona ngepakati, upe rupande kunoumwe norupande rumweni kunoumweni.” Asi mudzimai uwo waiya nomwana uchapona, ngokuti mwoyo wake wakapisha ngendaa yomwana wake, wakati kunamambo, “Ndapota, A mambo wangu, mupei mwana uchaponawo, ngegwinyiso musamuuraya!” Umweni wakati, “Eya, asaita wangu nokuti wako, asi ngaabadzurwe.” Zvino mambo wakapingura echiti, “Ipa mwana uchapona kumukadzi wokutanga, usamuuraya. Ndiye mai vomwanawo.” VaIsuraeri veshe vakazwa kutonga kwamambo; navo vakatya mambo, ngokuti vakaona kuti ungwaru hwaMwari hwaiya mwaari mukutonga kwakarurama. Mambo Soromoni wakaita mambo padera paIsuraeri peshe, naava ndivo nduna dzake huru: Azaria mukororo waZadhoki waiya mupristi; Erihorefi, naAhija, vakororo vaShisha, vaiya vanyori; Jehoshafati mukororo waAhirudhi, mungwariri wezvakanyorwa; Bhenaia mukororo waJehoiadha waiya nduna yehondo; Zadhoki naAbhiatha vaiya vapristi; Azaria mukororo waNathani waiya mukuru wenduna; Zabhudhi mukororo waNathani waiya mupristi nomungani wamambo; Ahisha waiya mukuru wengome; naAdhoniramu mukororo waAbhidha waiya mukuru wechibharo. Soromoni waiya nenduna gumi nambiri padera pevaIsuraeri veshe, idzo dzaiunza kudya kunamambo nevemhatso yake yeshe; mugore munhu umwe waiemeserwa kuunza kudya kwemwedzi umwe. Aya ndiwo mazina avo: Bhenihuri, waigara munyika yemitunhu yaEfuremu; Bhenidheka, uwo waigara muMakazi, Shaaribhimu, nomuBhethishemeshi, nomuEronibhethihanani; Bhenihesedhi, muArubhothi (kwaari kwakaemeswa Sokho, nenyika yeshe yaHeferi;) Bhenabhinadhabhi muNafathidho mweshe (waiya naThafathi mukadzi wake, mwanasikana waSoromoni;) Bhaana mukororo waAhirudhi, muTaanakhi naMegidho, nayo yeshe Bhethisheani riri pasinde neZarethani ngokubani kweJezireeri, kubvira Bhethisheani metsa kuguma Abherimehora, metsa kuguma ruseri rweJokimeamu; Bhenigebha muRamothigireadhi (waiya nemaguta aJairi mukororo waManase ari muGireadhi, waiya nenyika yake yeArigobhi, iri muBhashani, inemadhorobha makuru makumi matanhatu, anemarukumbati nemigogo yethusi;) Ahinadhabhi mukororo waIdho, muMahanaimu; Ahimaazi muNafitari (wakatora Bhasemathi mwanasikana waSoromoni kuita mukadzi wake;) Bhaana mukororo waHushai muAsha nomuBhearothi; Jehoshafati mukororo waPharua muIsakha; Shimei mukororo waEra muBhenjamini; Gebha mukororo waUri munyika yeGireadhi, munyika yaSihoni mambo wevaAmori, neyaOgi mambo waBhashani. Kwaiya nenduna imwe yega munyika mwaJudha. Judha naIsuraeri vaiya vawandisa kudai ngejecha riri paruandhle; vakadya, vakamwa vakadakara. Soromoni wakatonga muumambo hwake hweshe kubvira kurwizi Yufratesi metsa kuguma kunyika yevaFiristia nokuguma kumugano weEgipite; vechiunza muthero, vechishandira Soromoni mazuva eshe okupona kwake. Nokudya kwaSoromoni kwemazuva eshe kwaiya maritha makumi emazana mashanu (5,000) oufu hwakamotseka, nemaritha gumi remakumi emazana (10,000) oufu, kabi dzakanuna gumi, n'ombe dzakakodzwa makumi mairi dzokumbusho, makwai zana, kubanze kwemhara, mahlangu, maphivha, nehuku dzakakodzwa. Ngokuti iye wakatonga nyika yeshe ngokumabirirazuva kweYufratesi, kubvira Tifisa kuguma paGaza, padera pemadzimambo eshe aiya ngokumabirirazuva kweYufratesi; naye waiya nokuiyana namadzimambo eshe akamutendenedza. Judha naIsuraeri vakagara ngokugwaririka, munhu weshe pashi pomuvhini wake, nepashi pomuonde wake, mazuva eshe aSoromoni, kubvira Dhani kuguma Bheerishebha. Soromoni waiya nezvibaya zvemahachi engoro makumi marongomuna emakumi emazana (40,000), nevagadhi vemahachi gumi navairi emakumi emazana (12,000). Idzo nduna dzaiunza, munhu umwe ngaumwe waiunza ngomwedzi waakaemeserwa, kudya kwamambo Soromoni, nokwevari vaidya patafura ramambo Soromoni; paiya pasikatamiki chiro. Vaiunzazve bhari nezvokudya kwemahachi nemanyurusi; vakazviunza kundau dzaigara nduna, munhu weshe kudai ngokupangwa kwake. Mwari wakapa Soromoni ungwaru nokuzwisisa kakurutu, nomwoyo wokuzia zvakarurama, zvakawanda kudai ngejecha riri paruandhle. Ndizvo ungwaru hwaSoromoni hwakapinda ungwaru hwevanhu veshe vokumabvazuva, noungwaru hweshe hwevanhu veEgipite. Waiya akangwara kupinda vanhu veshe; kungwara kupinda Ethani muEzura, Hemani, Kharikhori naDhardha, vakororo vaMahori. Mbiri yake yakapararira kumadzinza eshe akatendenedza. Wakaita zvisana makumi emazana matatu (3,000), nenduyo dzake gumi remazana neshanu (1,005). Wakaereketa ngemiti, kubvira ngomuti womusedhari iri muRebhanoni, nokupfiba rehisopi, rinomera parukumbati; wakaereketa ngemhuka, shiri, zvinotamanda nehove. Vanhu vakauya venyika dzeshe koozwa ungwaru hwaSoromoni; vakabva kumadzimambo eshe enyika, avo vaiya vakazwa ngoungwaru hwake. Zvino Hiramu mambo weThire wakatuma varanda vake kunaSoromoni, naapo paakazwa kuti vaiya vakamudzodza kuita mambo pandau yababa ake; ngokuti Hiramu waiya mungani waDhavhidha nguva dzeshe. Soromoni wakatumira izwi kunaHiramu echiti, “Iwewe unozia kuti Dhavhidha baba angu avazi kukona kuakira mhatso zina raMambo Mwari, Mwari wake, ngendaa yokurwisana nemagaa ake akamutendenedza, metsa Mambo Mwari aaisa pashi petsoka dzake. Asi zvino Mambo Mwari, Mwari wangu, wakandipa kuzorora kumarutii eshe; apana gaa nokuti kushata. Ndizvo ndaemesa kuakira zina raMambo Mwari, Mwari wangu, mhatso, kudai ngezvaakaereketa Mambo Mwari kunababa angu Dhavhidha echiti, ‘Mukororo wako wendinozoemesa padendemaro rako, muugaro hwako, iye unozoakira zina rangu mhatso.’ Ndizvo zvino, vapange kuti vanditemere miti yomusedhari muRebhanoni. Varanda vangu vanozobatana pamwepo nevaranda vako, neni ndinozokupa kunyazwi mutengonyi kudai ndizvo zveshe zvounozoemesera varanda vako; ngokuti unozia kuti akuna kwetiri ngwazi yokutsetsa miti kudai ngevaSidhoni.” Naapo Hiramu azwa mazwi aSoromoni, wakadakara kakurutu, akati, “Ngaakudzwe Mambo Mwari nyamashi, uwo wakapa kunaDhavhidha mukororo wakangwara wokutonga ava vanhu vazhinji.” Hiramu wakatumira izwi kunaSoromoni echiti, “Ndakazwa mashoko owakatumira kwendiri; neni ndinozoita chidisiso chako ngendaa yemiti yemisidhari, nendaa yemiti yemisiprasi. Varanda vangu vanozoiunza kubva Rebhanoni vaiise kuruandhle; ndinozoita kuti isungwe, iuyeyo ngomuruandhle ngokuerera kuguma pandau younoronza. Ndinozoita kuti isunhurirwepo uitorerepo. Newe unozoita kudai ngezvinodiwa ngomwoyo wangu ngokupa kudya kunevaranda vemhatso yangu.” Ndizvo Hiramu wakaunzira Soromoni miti yemisidhari nemiti yemisiprasi iyo yaaida. Soromoni wakapa Hiramu mametrikhi thanisi makumi emazana mairi (2,000) ekoroni, kuita kudya kwevanhu vake, nemabiya emafuta maritha mazana marongomuna emakumi emazana (400,000) akaengiwa. Soromoni wakapa izvi kunaHiramu gore ngegore. Ndizvo Mambo Mwari wakapa Soromoni ungwaru, kudai ngezvaakamugondisa. Kwaiyapo kunyarara pakati paHiramu naSoromoni; navo vairi vakaita chitenderano. Mambo Soromoni wakaemesa chikomondera kuvaIsuraeri veshe; neiyo zheti yaiya vamuna makumi matatu emakumi emazana (30,000). Wakavatumira Rebhanoni gumi remakumi emazana (10,000) evanhu jana ngejana; vaipedza mwedzi vari Rebhanoni, nokupedza mwedzi miiri kanyi. Adhoniramu waiya nduna yezheti. Soromoni waiya nevanhu makumi manomwe emakumi emazana (70,000) vaitwara mitwaro, nemakumi masere emakumi emazana (80,000) evaitsetsa mapuwe munyika yemitunhu, ngepabanze penduna huru dzaSoromoni, idzo dzaibata mushando, vaiya makumi emazana matatu nemazana matatu (3,300), vaitonga padera pevanhu veshe vaishanda. Ngokupanga kwamambo vakaunza mapuwe makuru anomutengo mukuru, kuti vaite madzeyo emhatso ngemapuwe akatsetswa. Ndizvo vaaki vaSoromoni nevaHiramu, pamwepo nevaGebhari, vakanasira miti nemapuwe kuti vaake mhatso. Mugore remazana marongomuna nemakumi masere (480) ngesure kwokubuda kwevana vaIsuraeri kubva Egipite, ngegore rechirongomuna rokutonga kwaSoromoni padera paIsuraeri, mumwedzi unozwi Zivhi ndiwo mwedzi wechipiri, waakatanga kuaka mhatso yaMambo Mwari. Mhatso yaakaakira Mambo Mwari mambo Soromoni, kureba kwayo kwaiya mamitha makumi mairi nemanomwe, kupamhama kwayo kwaiya mamitha mapfumbamwe, nourebu hwayo kukwira mudenga hwaiya mamitha gumi namatatu nehafu. Berere ngepamberi petemperi remhatso, kureba kwaro kwaiya mamitha marongomuna nehafu, kupamhama kwaro mamitha mapfumbamwe pamberi pemhatso. Wakaitira mhatso mafasitera akapamhama kubanze, mukati akatetepa. Wakaakazve ngepamarukumbati emhatso makamera kuitendenedza, zveshe temperi nendau yakachenesesa; wakaaka makamera kuitendenedza. Nekamera raiya ngepashi, kupamhama kwaro kwaiya mamitha mairi nezvidoko zviiri, nekamera romuturika wepakati, kupamhama kwaro kwaiya mamitha mairi nezvidoko zvinomwe, nomuturika wepadera wechitatu waiya mamitha matatu nechidoko chimwe kupamhama kwaro; ngokuti kutenderera ngokubanze kwemhatso wakaaka sika dzokutendenedza kumarutii eshe kuti mwamba isungirwe pamarukumbati emhatso. Mhatso yakaakwa ngemapuwe akanasirirwa ngepamberi asati aunzwa; ngokudaro akuzi kuzwika bope rehamera nokuti redemo nokuti rechokushanda ndicho chesimbi, apo mhatso yechiakwa. Musiwo womuturika wepakati waiya ngokurupande rwokubani kwemhatso; rakakwira danho raitendenedza kuenda kumuturika wepakati, nokubva mumuturika wepakati yaikwira ngokudaro kuenda kumuturika wechitatu. Ndizvo wakaaka mhatso, akaipedza; wakapfumba mhatso ngemwamba yemapuranga omusidhari. Wakaaka makamera ngomumarutii eshe emhatso, kukura kwawo kwaiya mamitha mairi nezvidoko zviiri kuenda mudenga, akabatanidzwa nemhatso ngepadera ngemiti yemisidhari. Zvino izwi raMambo Mwari rakaguma kunaSoromoni rechiti, “Ngendaa yemhatso iyi younoaka, kudai wechizohamba muzviemeso zvangu, kupurutana mipango yangu, nokungwarira zvironzo zvangu zveshe ngokuhamba mukati mwazvo, zvino ndinozogwinyisa chigondiso changu newe, chendakaereketa kunaDhavhidha baba ako. Ndinozogara pakati pevana vaIsuraeri, andizovasiyi vanhu vangu Isuraeri.” Ndizvo Soromoni wakaaka mhatso, akaipedza. Wakanemesa marukumbati emhatso ngomukati ngemapuranga omusidhari; kubvira ngepashi pemhatso, metsa kumwamba yomudenga mwayo, wakaafukidza ngomukati mwayo ngemapuranga; akafukidza pashi pemhatso ngemapuranga omusiprasi. Wakaaka mamitha mapfumbamwe okureba kwekamera ngesure kwemhatso ngemapuranga emisidhari, kubvira pashi kukwira kuguma pamwamba, naye wakaaka iyi ngomukati mwakachena kuita ndau yakapindisisa kuchena. Mhatso, ndiro temperi, iri pamberi pendau yakapindisisa kuchena, yaiya mamitha gumi nemasere kureba. Misidhari yaiya mumhatso yakanemeswa ngemafundo nemaruwa akabeuka; zveshe zvakaitwa ngomusidhari, pasina buwe raioneka. Ndau yakachenesesa wakainasira mukati mwemhatso, kuti agadzikemwo bhokisi rechitenderano chaMambo Mwari. Ndau yakachenesesa yomukati yaiya mamitha mapfumbamwe kureba kwayo mamitha mapfumbamwe kupamhama kwayo, nemamitha mapfumbamwe kukwira mudenga; naye wakaiseta ngomukore wakaera. Wakasetawo arita raiya romusidhari. Soromoni wakaseta mhatso ngomukore mukati mwayo; zvino wakaisa maketani omukore kuchinjika pamberi pendau yakachenesesa, akaiseta ngomukore. Wakaseta mhatso yeshe ngomukore, kuti mhatso iite yakaperera; kunyazwi arita reshe romukati mwakachena wakariseta ngomukore. Mundau yakachenesesa wakaita makherubhi mairi ngomuti womuorivhi, rimwe ngarimwe raiya mamitha marongomuna nezvidoko zvirongomuna kureba kuenda kudenga. Phaphiro rimwe rekherubhi raiya mamitha mairi nezvidoko zviiri kureba, nerimweni raiya nemamitha mairi nezvidoko zviiri; kubvira kumagumo kwephaphiro rimwe kuguma pamagumo kunerimweni kwaiya mamitha marongomuna nezvidoko zvirongomuna. Kherubhi rimweni raiya mamitha marongomuna nezvidoko zvirongomuna; makherubhi eshe aiya nechipimo chimwecho nechiemo chimwecho. Urebu hwekherubhi rimwe hwaiya mamitha marongomuna nezvidoko zvirongomuna, nerimweni racho ngokudaro. Wakagadzika makherubhi mumhatso yomukati iri pakati; namakherubhi akatambanudza maphaphiro kuti phaphiro rimwe rigwame rukumbati rumwe, nephaphiro rerimweni rigwame rukumbati rumweni, nemaphaphiro epakati pemhatso agwamane phaphiro paphaphiro. Wakasetawo makherubhi ngomukore. Wakanemesa marukumbati eshe emhatso ngemiedzaniso yakatsetswa yemakherubhi, neyemiti yomubvumo, namaruva akabeuka, mukati mwayo nokubanze kwemakamera. Pashi mumhatso wakaseta ngomukore mukati nokubanze mwemakamera. Pamusiwo pendau yakachenesesa wakaita zvivhayo ngomuti womuorivhi; nechigogiso nesika dzokurutii dzaiya nemarupande mashanu omukati. Wakaseta zvivharo zviiri zvomuti womuorivhi ngezvinemeso zvemiedzaniso yemakherubhi, miti yemibvumo nemaruwa akabeuka, wakaiseta ngomukore, akaparadzira mukore padera pemakherubhi, nepemiti yemibvumo. Ndizvo wakaitazve sika dzomusiwo wetemperi ngomuti womuorivhi dzinoita marupande marongomuna imwe ngaimwe. Zvivhayo zviiri zvaiya zvemiti yomusiprasi; marupande mairi echivhayo chimwe aipetwa pamwepo, nemarupande echivhayo chimweni aipetwawo. Wakanangurapo miedzaniso yemakherubhi, miti yemibvumo nemaruva akabeuka; wakazviseta ngomukore wakanasa kuiswa, padera pezvakanangurwa. Wakaaka makamera omukati anemisara mitatu yemapuwe akatsetswa, nomusara wemwamba yemisidhari. Mugore rechirongomuna mumwedzi unozwi Zivhi, madzeyo emhatso yaMambo Mwari akaiswa. Mugore regumi narimwe mumwedzi unozwi Bhuri, ndiwo mwedzi wechisere, mhatso yakapera, marupande ayo eshe, kudai ngechiemo cheyaisisira kuakwa ndicho.Wakaiaka ngemakore manomwe. Soromoni wakapedza makore gumi namatatu echiaka mhatso yake, naye wakaipedza yeshe mhatso yake. Wakaaka mhatso mugwasha reRebhanoni; urebu hwayo hwaiya mamitha makumi marongomuna nemarongomuna, kupamhama mamitha makumi mairi nemairi, kukwira mudenga mamitha gumi namatatu nezvidoko zvishanu, yakaakwa padera pemisara mirongomuna yesika yemisidhari, nemwamba yemisidhari yaiya padera pesika idzo. Yaiya yakapfumbiwa ngemisidhari padera pemwamba makumi marongomuna nemishanu, dzaiya gumi nashanu mumusara umwe, yaiya padera pesika. Aiyapo mafasitera mumisara mitatu, rimwe rakaringirana nerimweni mumisara mitatu. Yeshe misiwo nesika dzepamusiwo dzaiya nemarupande marongomuna akaringirana, rimwe rakaringirana nerimweni mumisara mitatu. Wakaita ngome ngesika; urebu hwayo hwaiya mamitha makumi mairi namairi, kupamhama kwayo kwaiya mamitha gumi namatatu nezvidoko zvishanu. Paiya neberere pamberi raiya nesika neimweni mwamba yakafema yaiya pamberi padzo. Wakaita ngome yedendemaro rokutongerapo, inozwi ngome yokutongera ndaa, yaiya yakafukidzwa ngemapuranga emisidhari kumarutii eshe. Mhatso yake yaaigara yaiya kuneruwanze rumweni sure kwengome, kwaiya nokuakwa kwakatodzana. Soromoni wakaakirawo mwanasikana waFaro mhatso yakatodzana neyaaigara, uwo waakatora kuita mukadzi. Kweshe uku kuakiwa kwakaitwa ngemapuwe anomutengo mukuru, akanasirwa kudai ngokupimwa kwemapuwe akatsetswa, akasahiwa ngemasaho, sure nemberi, kubvira patsikiro kuguma pamaruriro, nokubvira ngokubanze metsa kuguma paberere guru. Madzeyo aiya emapuwe anomutengo mukuru, mapuwe makuru, mapuwe amweni aiita mamitha matatu nehafu kureba, neamweni aiita mamitha marongomuna kureba. Padera paiya nemapuwe anomutengo mukuru, akapimwa kudai ngokupimwa kwemapuwe akatsetswa, nemwamba yemisidhari. Berere guru rakaakiwa ngemisara mitatu yemapuwe akanasirwa, nomusara wemwamba womusidhari kutenderera, kudai ngendau yomukati yemhatso yaMambo Mwari, neberere remhatso iyo. Zvino mambo Soromoni wakatuma vanhu kutora Hiramu kubva Thire. Waiya mukororo weshirikadzi, wedzinza raNafitari, uwo baba ake vaiya munhu weThire, mupfuri wethusi; waiya akangwara nokuzwisisa, noungwazi, kushanda mishando yeshe yethusi. Wakauya kunamambo Soromoni, akaita mishando yake yeshe. Wakaumba sika mbiri dzethusi. Imwe ngaimwe yaiya mamitha masere kureba kuenda mudenga; kutendenedza imwe ngaimwe yaiya mamitha mashanu nezvidoko zvitatu. Wakaumba zvipanda zviiri zvethusi rakanyunguruswa, zvokugadzika sika padera pazvo; kuturama kwechimwe ngachimwe kwaiya mamitha mairi nezvidoko zviiri. Wakaita mambure anematyabi esimbi nemaketani okuisa pazvipanda zvaiya padera pesika; manomwe pachipanda chimwe, nemanomwe pachipanda chimweni. Wakaita sika nemisara miiri yakatenderera padera pomushando wechipanda chimwe, kufukidzira zvipanda zvaiya padera pemiedzaniso yemaphomegraniti. Wakaitazve kudaro kuchipanda chimweni. Zvino zvipanda zvaiya padera pesika, izvo zvaiya padera pesika muberere zvakaitwa zvakadai ngemiedzaniso yemaruva egofa, zvaiya mitha rimwe nezvidoko zvisere kureba kuenda mudenga. Zvipanda zviiri zvaiya padera pesika mbiri, nepaderawo pebundu rakatenderera raiya pasinde pomushando wakanaka; panemaphomegraniti mazana mairi emisara yakatendenedza padera pechipanda chimwe. Wakaemesa sika muberere retemperi; wakaemesa sika yokubani, akaidudza zina rokuti Jakhini; wakaemesa sika yedera, akaidudza zina rokuti Bhoazi. Nepadera pesika wakanemesa ngemiedzaniso yemaruva egofa. Ndizvo mushando wesika wakapera. Zvino wakaaka gandwa rakatenderera ngethusi rakanyunguruswa, raiya mamitha mairi nezvidoko zviiri kudzama kubva kurutii rumwe kuguma kurutii rumweni, nokupamhama kwaro kwaiya mamitha marongomuna nezvidoko zvirongomuna; nokutenderera kwaro kwaiya mamitha gumi namatatu nezvidoko zviiri. Pashi paro pakanemeswa ngemafundo aiya gumi pamitha rimwe, akatendenedza gandwa reshe; mafundo akanyunguruswa anemisara miiri akaumbwa apo perakanyunguruswa. Rakaemeswa padera pemiedzaniso yekabi gumi nembiri, nhatu dzakaringira dera, nhatu dzakaringira kumabirirazuva, nhatu dzakaringira kubani, nhatu dzakaringira kumabvazuva; negandwa raigara padera padzo. Marupande adzo esure aiya mukati. Kutimba kwaro kwaiya kwakadai ngechanza chenyara yomunhu, nomuromo waro waiya wakaumbwa kudai ngomuromo wekomechi, unemiedzaniso yemaruva raikwana maritha makumi marongomuna emakumi emazana (40,000). Naye wakaita matsikiro gumi ethusi; urebu hwawo rimwe ngarimwe hwaiya mitha rimwe nezvidoko zvisere kureba, mitha rimwe nezvidoko zvisere kupamhama, nemitha rimwe nezvidoko zvitatu kureba kukwira mudenga. Uyu ndiwo mushando wematsikiro; aiya nemipendero; mipendero yaiya pakati pemushando wetsikiro; pamipendero yaiya pakati pakaemeswa miedzaniso yemhondoro, yekabi, nemakherubhi. Pamushando wetsikiro, peshe padera nepashi mhondoro nekabi, paiya nezvimweni zvakatutsirwa, zvakaitwa ngokutetepesa. Matsikiro eshe aiya nemavhiri marongomuna ethusi, nemwamba yemavhiri yethusi; pamakhona marongomuna paiya nezvitsimiso zvakaumbwa kumarutii eshe. Muromo wacho pakati pechipanda ngepadera kwaiya masendimitha makumi marongomuna namashanu kubvira padera pengoro, nemasendimitha gumi namasere kudzama. Muromo wacho waiya wakatenderera, kudai ngetsikiro, muromo wacho waiya wakabiribidwa, nemipendero yacho yaiya nemakhona marongomuna, haiwa akatenderera. Mavhiri marongomuna aiya ngepashi pematsikiro, mwamba wemavhiri waiya muzvitsimiso; kuturama kwevhiri kwaiya masendimitha makumi matanhatu nematanhatu kukwira mudenga. Kunasirwa kwemavhiri kwaiya kwakatodzana nokunasirwa kwevhiri rengoro; mwamba wemavhiri, simbi dzemavhiri nemasipokisi awo, zveshe zvaiya zvethusi rakanyunguruswa. Kwaiyapozve zvitsimiso zvirongomuna kumakhona etsikiro rimwe ngarimwe; nezvitsimiso zvaro zvaiya zvorupande rwetsikiro. Nepadera petsikiro paiya nedendenedzwa raiya masendimitha makumi mairi namairi kutenderera; padera petsikiro, mafundo aro nemipendero yaro zvaiya zvimwezvo. Padera pakaterama nepazvitsimiso zvaro, nepamipendero yaro, wakarinangurira miedzaniso yemakherubhi, yemhondoro, neyemibvumo, kudai ngomuemo hwazvo, nezvimweni kuatendenedza. Munjira iyi wakaitazve matsikiro gumi, eshe pamwepo kunyunguruswa kwawo kwakaitwa ngenjira imweyo, nechipimo chimwecho, nokuedzana kumwekwo. Wakaita zvidziyo gumi zvethusi; chidziyo chimwe ngachimwe chaiya nemitha rimwe nezvidoko zvisere kukura kwacho, chechitwara maritha mazana masere (800); paiya nechidziyo chimwe patsikiro rimwe ngarimwe rematsikiro gumi. Wakaisa matsikiro mashanu ngokubani kwemhatso, nemashanu ngedera kwemhatso, akaemesa gandwa ngorutii rwokubani kwemhatso ngokumabvazuva. Hiramu wakaitawo mapoto, mafoshoro, nemabhasini. Ndizvo Hiramu wakapedza mishando yeshe yaakaitira Soromoni mumhatso yaMambo Mwari: sika mbiri, nezvigadzikiro zviiri zvezvipanda zvaiya padera pesika mbiri, nemambure mairi aiya nematyabi okufukidzira zvigadzikiro zvezvipanda padera pesika; nemiedzaniso yemaphomegraniti mazana marongomuna emambure mairi, misara miiri yemaphomegraniti omumbure umwe, kufukidza zvigadzikiro zviiri zvezvipanda zvaiya padera pesika; matsikiro gumi, nezvidziyo gumi zvokushambiramwo zvaiya padera pematsikiro; gandwa rimwe, nemiedzaniso yekabi gumi namiiri ngepashi pegandwa. Hari, mafoshoro, nemabhasini, zveshe izvi zvidziyo zvakaitirwa mhatso yaMambo Mwari ndiHiramu kunamambo Soromoni, zvaiya zvethusi rinon'anikira. Murubaya rweJorodhani mambo wakazviumba, ngemavhu edongo ngepakati peSukothi neZarethani. Soromoni wakasiya asikazi kupima zvidziyo zveshe, ngokuti zvaiya zvakanyanya kuwanda; nokurema kwethusi akuzi kuziikanwa. Ndizvo Soromoni wakaita zvidziyo zveshe zvaiya mumhatso yaMambo Mwari: arita romukore, tafura romukore, apo paiiswa zvingwa zvisina mumera, zvigadzikiro zvezvibani zvomukore wakaera, zvishanu ngokubani, zvishanu ngedera, pamberi pendau yakachenesesa, pamwepo nemiedzaniso yemaruva, zvibani, nembato dzomukore; mikheyo, zvifuridzo, mabhasini, ndiro dzokuisa mutombo unegwema rakanaka, ndiro dzomuriro dzomukore wakaera; nemahinjisi omukore, eshe emisiwo yepakati, nendau yakapindisisa kuchena, neyemisiwo yemhatso yomukati yetemperi. Ndizvo wakapera weshe mushando wamambo Soromoni waakaitira mhatso yaMambo Mwari. Soromoni wakaunza mukati zviro zvaakapira Dhavhidha baba ake kunaMwari, sirivha, mukore, nezvidziyo, wakazvingwarira pakati poupfumi hwemhatso yaMambo Mwari. Zvino Soromoni wakaunganidza vakuru vaIsuraeri, nenduna dzeshe dzemadzinza avo, vatungamiriri vemhatso dzemadzibaba evana vaIsuraeri, pamberi pamambo Soromoni muJerusarema, kuti vaunze bhokisi rechitenderano chaMambo Mwari kubva mudhorobha raDhavhidha, rinozwi Zioni. Vamuna veshe vaIsuraeri vakadziunganidza kunamambo Soromoni kumushongano wokudya ngomwedzi unozwi Ethanimu, uwo uri mwedzi wechinomwe. Nevakuru veshe vaIsuraeri vakauya, nevapristi vakatwara bhokisi rechitenderano. Ndizvo vakakwidza bhokisi rechitenderano chaMambo Mwari, tende romushongano nezvidziyo zveshe zvakachena zvaiya mutende; vapristi nevaRevhi ndivo vakazvikwidza. Mambo Soromoni nembungano yeshe yaIsuraeri, avo vaiya vakaungana pamberi pake, vaiya naye pamberi pebhokisi rechitenderano, vechipira midiro yemakwai neyekabi, idzo dzaiya dzisingaerengeki ngouwandu hwadzo. Zvino vapristi vakapotedza bhokisi rechitenderano chaMambo Mwari pandau yaro, mundau yomukati yakachenesesa yemhatso, mundau yakapindisisa kuchena, ndau iri pashi pemaphaphiro emakherubhi. Ngokuti makherubhi akatambanudza maphaphiro awo mairi padera pendau yebhokisi rechitenderano, kuti makherubhi afukidze bhokisi rechitenderano nemipingo yaro. Mipingo yaiya yakarebesa kuti magumo emipingo aioneka ngomukati mwendau yakachena, nayo isikaoneki ngokubanze; ndipo peiri nanyamashi. Mwaiya musina chiro mubhokisi rechitenderano kwega marusamba mairi emapuwe, akaiswamwo ndiMosi muHorebhi, apo Mambo Mwari paakaita chitenderano nevana vaIsuraeri, apo pevakabuda kubva munyika yeEgipite. Naapo vapristi vabuda kubva mundau yakachenesesa, gore rakadzadza mhatso yaMambo Mwari, ndizvo vapristi avazi kuchakona kuema kuti vaite mushando ngendaa yegore; ngokuti uthende hwaMambo Mwari hwakadzadza mhatso yaMambo Mwari. Zvino Soromoni wakati, “Mambo Mwari wakaronza kuti unozogara mukudzama kwechidima. Ndakuakira mhatso yakanaka, ndau yako yokuti ugare mhera nariini.” Zvino mambo wakakunukuka, akafumisa mbungano yeshe yaIsuraeri, apo mbungano yeshe yaIsuraeri yakaema. Wakati, “Ngaabongwe Mambo Mwari, Mwari waIsuraeri, uwo ngenyara yake wakadzadzisa izvo zvaakagondisa ngomuromo wake kunaDhavhidha baba angu, echiti, ‘Kubvira pazuva rendakabudisa vanhu vangu Isuraeri kubva kunyika yeEgipite, andisati ndatsanangura dhorobha munyika dzeshe dzaIsuraeri, umwo mwendingaaka mhatso, kuti zina rangu rigaremwo; asi ndakatsanangura Dhavhidha kuti atonge padera pevanhu vangu Isuraeri.’ Zvino zvaiya mumwoyo mwaDhavhidha baba angu kuti aakire zina raMambo Mwari, Mwari waIsuraeri mhatso. Asi Mambo Mwari wakati kunaDhavhidha baba angu: ‘Wakaita zvakanaka ngokuda mumwoyo mwako kuakira zina rangu mhatso. Zvakanyadaro, auzoaki mhatso; asi mukororo wako unozobuda kubva muchiunu chako, ndiye unozoakira zina rangu mhatso.’ Zvino Mambo Mwari wadzadzisa izwi rake raakaereketa; ngokuti inini ndamiruka pandau yaDhavhidha baba angu, ndinogara padendemaro raIsuraeri, kudai ngezvaakagondisa Mambo Mwari, ndaakira zina raMambo Mwari, Mwari waIsuraeri mhatso. Umwo ndanasiramwo ndau yebhokisi rechitenderano, umwo munechitenderano chaMambo Mwari, icho chaakaita namadzibaba edu apo paakavabudisa kubva munyika yeEgipite.” Zvino Soromoni wakaema pamberi paarita raMambo Mwari, mukuona kwembungano yeshe yaIsuraeri, akatambanudza nyara dzake mudenga. Wakati, “Mambo Mwari, Mwari waIsuraeri, akunazve Mwari umweni wakadai ndiwe mudenga padera nokuti munyika pashi, uwo unongwarira chitenderano norudo kuvaranda vako, avo vanohamba pamberi pako ngomwoyo wavo weshe. Iwewe wakangwarira kunomuranda wako Dhavhidha baba angu izvozvo zvowakamugondisa; wakagondisa ngomuromo wako, nazvo zvadzadzisika ngenyara yako nyamashi. Ndizvo zvino Mambo Mwari, Mwari waIsuraeri, ngwaririra muranda wako Dhavhidha baba angu icho chowakagondisa wechiti, ‘Akuzotamiki munhu mukuona kwangu wokuti agare padendemaro raIsuraeri, kudai vana vako vechizongwarira njira yavo, vahambe pamberi pangu kudai ngezvowakahamba iwewe pamberi pangu.’ Ndizvo zvino, A Mwari waIsuraeri, ndinokupota kuti izwi rako riitike, rowakaereketa kunomuranda wako Dhavhidha baba angu. “Asi ngegwinyiso Mwari ungagara here munyika? Kunyazwi denga nedenga rematenga aakukwani iwewe; hino kunozoita kwakaitawani kutsonga kuneiyi mhatso yendakaaka! Mambo Mwari, Mwari wangu, remeredza mukumbiro womuranda wako nokupota kwake, kwaakumbira muranda wako pamberi pako nyamashi, kuti madziso ako abeukire kuneiyi mhatso usiku nemasikati, eya, nokuringira kundau iyo yowakaronza ndiyo kuti, ‘Zina rangu rinozoapo,’ kuti uzwe mukumbiro waanokumbira muranda wako ngeiyi ndau. Izwa mukumbiro womuranda wako nowevanhu vako Isuraeri, apo vanozokumbira vechiringira kuneiyi ndau; uzwe, uri mudenga mundau yako younogara; izwa, ukungurire. “Kudai aripo munhu nokuti ngouri unendaa nomuakirwana wake, akapikiswa mhiko naye akauya akapika mhiko iyo pamberi pearita rako mumhatso iyi, zvino izwa uri mudenga, uite, utonge varanda vako, uitire ndaa uwo wakashata, kuti uunzidzire kushata kwake padera pesoro rake, wechipembedza uwo wakarurama, umupe kudai ngokururama kwake. “Naapo vanhu vako Isuraeri vashaisha pamberi pako, vakanyiswa pamberi pemagaa avo, asi vechitenderukazve kwouri, vechitenda zina rako, vechikumbira, nokupota kwouri mumhatso iyi, zvino izwa uri mudenga, ukungurire kushaisha kwevanhu vako Isuraeri, nokuvaunzazve kunyika yowakapa kunemadzibaba avo. “Naapo denga rinokonywa, nemvura isikanayi, ngokuti vakashaisha kwouri, navo vechizokumbira vechiringira kuneiyi ndau, nokutenda zina rako, vechitenderuka kubva kuzvishaishi zvavo, ngokuti iwewe unovatambudza, zvino izwa uri mudenga, ukungurire kushaisha kwevaranda vako, vanhu vako Isuraeri, apo woovadzidzisa njira yakanaka inosisira kuti vahambe ndiyo, unayise mvura padera penyika yako yowakapa kuvanhu vako kuita nhaka yavo. “Kudai ikaapo nzara munyika, nhenda, chimbarara, chirotarota, ndongwe, makonye kudai magaa avo echizovakomba munyika yemadhorobha avo; kunyazwi nhenda yakaitawani, kunyazwi kurwa kwakaitawani; kunyazwi ngouri mukumbiro nokuti kupota kunozokumbirwa ngomunhu kunyazwi ngouri, nokuti ngevanhu vako veshe Isuraeri, weshe uwo unozia nhenda yomwoyo wake, nokutambanudzira nyara dzake kumhatso iyi, zvino izwa uri mudenga muugaro hwako, ukungurire, ita, ipa kuneweshe uwo wounozia mwoyo wake kudai ngezviito zvake, iwewe, ndiwe wega, unozia zviri mumwoyo womunhu weshe, kuti vakutye mazuva eshe evanopona munyika yowakapa kunemadzibaba avo. “Naapo vapara, avo vasiri vevanhu vako Isuraeri, avo vanobva kunyika iri kuretu ngendaa yezina rako, (ngokuti vanozozwa mbiri yezina rako guru, ngenyara yako inesimba nomuoko wako wakatambanudzwa) naapo mupara kuti akauya nokukumbira echiringira mhatso iyi, zvino izwa uri mudenga muugaro hwako, ita kudai ngeizvo zveshe zvaanokumbira mupara, kuitira kuti vanhu veshe vomunyika vazie zina rako, vakutye, kudai ngezvevanoita vanhu vako Isuraeri; kuti vazie kuti iyi mhatso yendakaaka inodaidzwa ngezina rako. “Kudai vanhu vako vechienda koorwa nemagaa avo, kunyazwi ngeiri njira younozovatuma ndivo, navo vechikumbira kunaMambo Mwari, vechiringira kuneiri dhorobha rowakatsanangura, nokumhatso iyo yendakaakira zina rako, zvino izwa uri mudenga kukumbira kwavo nokupota kwavo, urwire ndaa yavo. “Kudai vechishaisha kwouri, ngokuti akuna munhu usikashaishi, newe wechivatsenekera, nokuvapira kumagaa avo, kuti vatorwe ndivo kuita hloko kunyika yemagaa, kuretu nokuti pasinde; asi, kudai vechizokarakadza vari munyikeyo yevakatorwa kuitwa hloko nokutenderuka, vechipota kwouri vari munyika yeavo vakavatora kuita hloko vechiti, ‘Takashaisha takaita zvokupauka; takaita zvakashata;’ kudai vechitenderuka kudaro kwouri ngomwoyo yavo yeshe nemweya yavo yeshe, vari munyika yemagaa avo, avo akavatora kuita hloko, vechikumbira kwouri vechiringira kuneiyi nyika, iyo yowakapa kunemadzibaba avo, dhorobha iro rowakatsanangura, nokumhatso yendakaakira zina rako, zvino izwa kukumbira kwavo nokupota kwavo, uri mudenga riri ugaro hwako, urwire ndaa yavo, ukungurire vanhu vako vakashaisha kwouri, nokupauka kweshe kwevakapauka kubva kwouri, uite kuti vaone nyasha mukuona kwaavo vakavatora kuita hloko, kuti ivo vavaitire nyasha; ngokuti ava vanhu vako, venhaka yako, avo vowakabudisa kubva kunyika yeEgipite, kubva pakati pechoto chesimbi. Madziso ako abeukire kunekupota kwomuranda wako, nokupota kwevanhu vako Isuraeri, upurutane kwevari nguva dzeshe dzevanozokumbira kwouri. Ngokuti iwewe wakavapaura kubva pakati pevanhu veshe venyika, kuti vaite nhaka yako, kudai ngezvewakagondisa kubudikidza ngomuranda wako Mosi, apo pewakabudisa madzibaba edu kubva munyika yeEgipite, A Mambo Mwari, Mwari.” Zvino apo Soromoni apedza kukumbira weshe uyu mukumbiro, nokupota kweshe kunaMambo Mwari, wakamiruka kubva pamberi pearita raMambo Mwari, paaiya akagwadama ngemabvi ake, nenyara dzake dzakatambanudzirwa mudenga; wakaema, akafumisa mbungano yeshe yaIsuraeri ngokudaidzira kukuru echiti. “Ngaabongwe Mambo Mwari, uwo wakapa kuzorora kuvanhu vake Isuraeri kudai ndizvo zveshe zvaakagondisa; apana izwi narimwe rakakorera rezvigondiso zvake zvakanaka, raakaereketa kubudikidza ngomuranda wake Mosi. Mambo Mwari, Mwari wedu, ngaagare nesu kudai ngezvaaigara namadzibaba edu; haiwa kuti atisiye, nokuti kutirekera, asi akweye mwoyo yedu kuti iringire kwaari, kuti tihambe ngenjira dzake dzeshe, nokungwarira mipango yake, zviemeso zvake nezvitongero zvake, zvaakapanga madzibaba edu. Tendera aya mazwi angu endakapota ndiwo pamberi paMambo Mwari kuti agare pasinde paMambo Mwari, Mwari wedu, masikati nousiku, naye arwire ndaa yomuranda wake, nendaa dzevanhu vake Isuraeri, kudai ngezvinodiwa ngezuva rimwe ngarimwe, kuitira kuti vanhu veshe venyika vazie kuti Mambo Mwari ndiMwari, akunazve umweni. Ndizvo mwoyo yenyu ngaigare isina ndaa pamberi paMambo Mwari, Mwari wedu, kuhamba mumipango yake, nokungwarira zviemeso zvake, kudai ngezvomunoita nyamashi.” Zvino mambo nevaIsuraeri veshe naye vakapira midiro pamberi paMambo Mwari. Soromoni wakapira kuita mudiro wokuiyanisa kunaMambo Mwari, makabi makumi mairi nemairi emakumi emazana (22,000) nezana nemakumi mairi emakumi emazana (120,000) emakwai. Ndizvo mambo nevaIsuraeri vakapira mhatso yaMambo Mwari. Ngezuva ririro mambo wakachenesa mupanda waiya pakati pemhatso, uwo waiya pamberi pemhatso yaMambo Mwari; ngokuti apo ndipo paakapira midiro yokupisha, nemidiro yezviyo, zvigurwa zvemafuta emidiro yokuiyanisa, ngokuti arita rethusi iro raiya pamberi paMambo Mwari, raiya doko risikakwani kupishirapo midiro, nemidiro yezviyo, nezvigurwa zvemafuta emidiro yokuiyanisa. Ngouwo mukuwo Soromoni wakaita dhiri, pamwepo nevaIsuraeri veshe naye, mushongano mukuru, vanhu vakabva Rebhohamathi, metsa kuguma kurwizi rweEgipite, pamberi paMambo Mwari, Mwari wedu, kupedza mazuva manomwe, eya namanomwezve, mazuva gumi namarongomuna. Ngezuva rechisere wakaparadza vanhu; navo vakakudza mambo, vakaenda kumatende avo, vechidakara nokudakadzwa mumwoyo yavo ngendaa yokunaka kweshe kwaakaita Mambo Mwari kunaDhavhidha muranda wake, nevaIsuraeri vanhu vake. Naapo Soromoni apedza kuaka mhatso yaMambo Mwari, pamwepo nemhatso yamambo, nazvo zveshe izvo zvaaidisisa Soromoni kuaka, Mambo Mwari wakaoneka kunaSoromoni ngokwechipiri, kudai ngezvaaiya akaoneka kwaari paGibheoni. Mambo Mwari wakati kwaari, “Ndazwa kukumbira kwako nokupota kwako kwewakaita pamberi pangu; ndachenesa iyi mhatso yewakaaka, ukaisa zina rangu kuti rigaremwo mhera nariini; madziso angu nomwoyo wangu zvinozoapo nguva dzeshe. Newe, kudai wechizohamba pamberi pangu kudai ngezvaakahamba Dhavhidha baba ako, ngomwoyo wakanaka nokururama, kuita zveshe zvendakakupanga, wechingwarira zviemeso zvangu nezvitongero zvangu, zvino ndinozogwinyisa dendemaro roumambo hwako padera paIsuraeri metsa nariini, kudai ngezvendakagondisa kunaDhavhidha baba ako ndechiti, ‘Akuzotamiki munhu wokugara padera pedendemaro raIsuraeri.’ “Kudai wechizopauka kubva mukunditeera, iwewe nokuti vana vako, musikangwariri mipango yangu nezviemeso zvangu, izvo zvendakaisa pamberi penyu, asi wechizoenda kooshandira zvimwari zvimweni nokuzvidira, zvino ndinozodzinga Isuraeri kubva munyika yendakapa kwevari, nemhatso yendakachenesera zina rangu, ndinozoirasha kubva pamberi pehope yangu; naIsuraeri unozoitwa chisana nechinai pakati pevanhu veshe. Mhatso iyi inozoita murwi wematongo; kunyazwi ndiani unozopinda ngepasinde payo, unozoshamiswa nokurwadziwa; navo vanozoti, ‘Mambo Mwari wakaita zvakadai ngenyi kunyika iyi, nokunemhatso iyi?’ Navo vanozoti, ‘Ngokuti vakasiya Mambo Mwari, Mwari wavo, uwo wakabudisa madzibaba avo kubva kunyika yeEgipite, vechibatirira kuzvimwari zvimweni, vechizvidira nokuzvishandira; ndizvo Mambo Mwari wakaunza padera pavo uku kushata kweshe.’ ” Pakapera makore makumi mairi, umwo Soromoni mwaakaaka mhatso mbiri, mhatso yaMambo Mwari nemhatso yamambo, Hiramu mambo weThire waiya akapa Soromoni miti yemisidhari, nemiti yemisaiprasi, nomukore, kudai ngokuemurira kwake, mambo Soromoni wakapa Hiramu madhorobha makumi mairi munyika yeGarire. Asi apo Hiramu paakauya kubva Thire koona aya madhorobha aakapuwa ndiSoromoni, aazi kumudakadza. Ndizvo wakati, “Aya madhorobhanyi owakandipa, mukoma wangu?” Ndizvo wakaadudza kuti inyika yeKabhuri metsa nanyamashi. Asi Hiramu wakatumira kunamambo matarenta omukore makhirogramu makumi emazana marongomuna (4,000). Uyu ndiwo urongwa hwaakaita mambo Soromoni hwechibaro, kuti vauye kooaka mhatso yaMambo Mwari, nemhatso yake, Miro, norukumbati rweJerusarema, Hazori, Megidho, neGeza (Faro mambo weEgipite waiya akakwira koochakata Geza, akaripisha ngomuriro, akauraya vaKhenani, avo vaigara mudhorobha iro, akaripa kuita chipo kunomwanasikana wake, mukadzi waSoromoni; ndizvo Soromoni wakaakisa Geza), neBhethihoroni rokubani, naBhaarathi, naThamari riri mushango, munyikemwo, nemadhorobha eshe okungwaririramwo upfumi, aiya aSoromoni, madhorobha engoro dzake, madhorobha evagadhi vake vemahachi nazvo zveshe zvaaiya echida Soromoni kuti zviakiwe, muJerusarema, muRebhanoni, nomunyika dzeshe dzoumambo hwake. Vanhu veshe vakasara vevaAmori, vaHiti, vaPherizi, vaHivhi nevaJebhusi, ava vaiya vasiri vevanhu vaIsuraeri, mibarirwana yavo iyo yaiya yakasara munyika iyo, avo vana vaIsuraeri vaiya vasikakoni kuvapedza, ava Soromoni wakavaita hloko metsa nanyamashi. Asi kuvana vaIsuraeri Soromoni aazi kuvaita hloko, ngokuti vaiya vanhu vehondo, nevashandi vake, vazvare vake, nduna dzake, nevagadhi vemahachi ake. Ava ndivo vaiya vakuru venduna dzemishando yaSoromoni, mazana mashanu nemakumi mashanu, (550) avo vaiya varingiri vevashandi. Asi mwanasikana waFaro wakakwira kubva mudhorobha raDhavhidha kuuya kumhatso yake yaakaakirwa ndiSoromoni; zvino wakaaka Miro. Katatu ngegore Soromoni wakapira midiro yokupisha nemidiro yokuiyanisa paarita raakaakira Mambo Mwari, akapishazve mitombo inegwema rakanaka padera pearita raiya pamberi paMambo Mwari. Ndizvo wakapedza mhatso. Mambo Soromoni wakaaka ngarava muEzionigebha, riri pasinde naErothi, pahumbikumbi yoRuandhle Rwakatsvuka, munyika yeEdhomu. Hiramu wakatuma varanda vake muidzo ngarava, vaiya vamuna vengarava vaizia ruandhle, pamwepo nevaranda vaSoromoni. Vakaenda Ofiri, vakaunza kubveyo mukore, matarenta mazana marongomuna nemakumi mairi, (420) vakauunza kunamambo Soromoni. Naapo mambo womukadzi weShebha wakazwa ngembiri yaSoromoni ngendaa yezina raMambo Mwari, wakauya koomuedza ngemibvunzo yakakonza. Wakauya Jerusarema nembungano huru, makamera aitwara makha, nomukore wakawanda kakurutu, nemapuwe anomutengo mukuru; naapo aguma kunaSoromoni, wakaereketa naye ngeizvo zveshe zvaiya mumwoyo mwake. Soromoni wakapingura mibvunzo yake yeshe; paiya pasina chakafishika kunamambo, chaaiya asikakoni kumuronzera. Naapo mambo womukadzi weShebha aona kungwara kweshe kwaSoromoni, nemhatso yaakaaka, kudya kwepahwarasanza pake, kugara kwevakaita vanhu vakuru vake, nokuapo kwevaranda vake, nezvokusimira zvavo, nevanounza kudya kwake, nemidiro yake yokupisha yaakapira kumhatso yaMambo Mwari, zvakapedza simba rake. Ndizvo wakati kunamambo, “Zvaiya negwinyiso zvendakazwa ndiri munyika yangu, ngezviito zvako noungwaru hwako, asi andizi kugonda awo mazwi metsa ndauya, nemadziso angu aona. Haiwa, andizi kuronzerwa norupande rwazvo; ungwaru hwako noupfumi hwako zvinopinda mbiri yendakazwa. Vanomuchena vakadzi vako! Vanomuchena varanda vako, vanoema pamberi pako nguva dzeshe, vechizwa ungwaru hwako! Ngaabongwe Mambo Mwari, Mwari wako, uwo unodakara ndiwe, nokukugadza padendemaro raIsuraeri! Ngokuti Mambo Mwari wakada Isuraeri mhera nariini, ndizvo wakakuemesa kuita mambo, kuti uite kutonga kwakanaka nokwakarurama.” Zvino wakapa mambo matarenta omukore zana nemakumi mairi (120), nemakha akawanda, nemapuwe anomutengo mukuru; akuzi kuzoapozve makha akapinda kuwanda kuneaya akapuwa kunamambo Soromoni ndimambo womukadzi weShebha. Zvakanyadaro ngarava dzaHiramu dzaiunza mukore kubva Ofiri, dzakaunza miti yemiarimugi, nemapuwe anomutengo mukuru. Kubva kumiti iyi yemiarimugi mambo wakaita sika dzemhatso yaMambo Mwari, nedzemhatso yamambo, nembira nechidangari zvevaembi; aizi kuchaunzwazve miti yemiarimugi yakadai ngeiyi, metsa nanyamashi. Mambo Soromoni wakapa kunamambo womukadzi weShebha izvo zveshe zvaaida, kunyazwi chiinyi chaakakumbira, ngokubanze kweizvo zveshe zvaakapuwa ndiSoromoni zvoupfumi hwoumambo hwake. Zvino wakapetuka, akaenda kunyika yake, nevaranda vake. Zvino kurema kwomukore wakaunzwa kunaSoromoni ngegore rimwe hwaiya matarenta omukore mazana matanhatu nemakumi matanhatu nezvitanhatu (666), ngepabanze pouwo wakabva kuvatengesi, wakabva kuvatengesi vemakha, wakabva kumadzimambo eArabhia, nowakabva kuvatongi venyika. Mambo Soromoni wakaita zvihlangu mazana mairi zvomukore wakapfurwa; chimwe ngachimwe chakaitwa ngemakhirogramu manomwe omukore. Wakanasira zvihlangu zvomukore wakapfurwa mazana matatu; kurema kwacho kwaiya makhirogramu mairi omukore kuchihlangu chimwe ngachimwe; namambo wakazviisa mumhatso iri mugwasha reRebhanoni. Mambo wakaitazve dendemaro guru renyanga dzenzou, akariseta ngomukore wakapindisisa kunaka. Dendemaro iro raiya nemadanho matanhatu. Padera pedendemaro ngesure raiya rakatenderera; ngokumarutii mairi aro kwaiya nezvitsimiso zvemioko, nemiedzaniso miiri yemhondoro mbiri dzakaema pasinde pezvitsimiso zvemioko. Mhondoro gumi nambiri dzaiema, imwe ngaimwe kumagumo emadanho matanhatu. Kwaiya kusinazve narimwe rakambonasirwa rakadaro mukati mwoumambo hwenyika dzeshe. Zvidziyo zveshe zvokumwira zvamambo Soromoni zvaiya zvomukore, nezvidziyo zveshe zvemhatso yemugwasha reRebhanoni zvaiya zvomukore wakaera; paiya pasina zvesirivha, ngokuti zvaiya zvisina shwiro ngamazuva aSoromoni. Ngokuti mambo waiya nengarava dzakawanda muruandhle rweTharshishi, pamwepo nengarava dzaHiramu. Kamwe pamakore matatu dzaiuya ngarava dzeTharshishi, dzechiunza mukore, sirivha, nyanga dzenzou, matede, neshiri dzinozwi phikhoki. Ndizvo mambo Soromoni wakapinda madzimambo eshe enyika ngoupfumi noungwaru. Vanhu venyika dzeshe vakatsvaka Soromoni, kuzwa ngoungwaru hwake uhwo hwakaiswa ndiMwari mumwoyo mwake. Munhu weshe wakaunza chipo chake, zvidziyo zvesirivha nezvomukore, zvokufuka, zvokurwa ndizvo, mitombo inegwema rakanaka, mahachi, nemanyurusi, gore ngegore. Soromoni wakaunganidza pamwepo ngoro nevagadhi vemahachi; naye waiya nengoro mazana gumi namarongomuna (1,400), nevagadhi vemahachi makumi emazana gumi namairi (12,000), avo vakaunganidzwa mumadhorobha engoro, nokuna mambo muJerusarema. Mambo wakaita kuti sirivha ridai ngemapuwe asina shwiro muJerusarema, nokuita miti yemisidhari kuti iwande idai ngemiti yemisikhamori iri mubani ngouwandu. Soromoni wakaunza mahachi kubva Egipite noKue, vatengesi vamambo vakaaashira ngomutengo. Ngoro dzaibva Egipite dzaikona kutengeswa ngezvigurwa zvesirivha mazana matanhatu (600), nehachi raitengeswa ngezana nemakumi mashanu (150); ngokudaro vakazviunza ngenyara dzavo kumadzimambo evaHiti nevaAramu. Mambo Soromoni wakada vakadzi vazhinji vapara, pamwepo nomwanasikana waFaro: vakadzi vaiya veMoabhi, veAmoni, veEdhomu, veSidhoni, neveHiti, kubva kumadzinza awo Mambo Mwari aakavapanga ndiwo vana vaIsuraeri echiti, “Musazoroodzana navo, navowo vasazoroodzana nemwi; ngokuti ngegwinyiso vanozopaukisa mwoyo yenyu kuti muteere zvimwari zvavo;” Soromoni wakanamatira kwevari ngorudo. Pakati pevakadzi vake paiya nevakadzi mazana manomwe (700), nemabunha mazana matatu (300); nevakadzi vake vakapaukisa mwoyo wake. Ngokuti apo Soromoni aamusharuka, vakadzi vake vakapaukisa mwoyo wake kuti ade zvimwari zvavo; mwoyo wake usikachazi kururama kunaMambo Mwari, Mwari wake, kudai ngomwoyo wababa ake Dhavhidha. Ngokuti Soromoni wakateera Ashithorethi, chimwari chevaSidhoni, naMirikhomu, chinyangadzo chavaAmoni. Ndizvo Soromoni wakaita zvakashata mukuona kwaMambo Mwari, naye aazi kuteera Mambo Mwari kwakaperera, kudai ngezvaakaita Dhavhidha baba ake. Zvino Soromoni wakaaka ndau yakakwirira yokudira Khemoshi, chinyangadzo cheMoabhi, neyaMorekhi chinyangadzo chevana vaAmoni, pamutunhu uri ngokumabvazuva kweJerusarema. Ngenjira iriyo wakaitira vakadzi vake veshe vapara, avo vakapisha mitombo inegwema rakanaka kunezvimwari zvavo. Zvino Mambo Mwari wakatsenekera Soromoni ngokuti mwoyo wake wakapaukiswa kubva kunaMambo Mwari, Mwari waIsuraeri, uwo wakaoneka kwaari kairi, naye waiya akamupanga ngendaa iyi, kuti asazoteera zvimwari zvimweni; asi aazi kungwarira izvo zvaakapangwa ndiMambo Mwari. Ndizvo Mambo Mwari wakati kunaSoromoni, “Ngokuti wakaita zvewaida, usikadi kungwarira chitenderano changu nezviemeso zvangu zvendakakupanga, ngegwinyiso ndinozodusa umambo kubva kwouri, ndinozohupa kunemuranda wako. Zvakanyadaro, andizozviiti ngemazuva ako, ngendaa yaDhavhidha baba ako; asi ndinozohudusa kubva kunyara yomukororo wako. Andizoiti, zvakanyadaro, kubvisa umambo hweshe; ndinozopa dzinza rimwe kumukororo wako, ngendaa yomuranda wangu Dhavhidha, nendaa yeJerusarema rendakatsanangura.” Zvino Mambo Mwari wakamusira Soromoni gaa, Hadhadhi muEdhomu; waiya worudzi rwoumambo munyika yeEdhomu. Ngokuti apo Dhavhidha paaigara muEdhomu, naJoabhi, nduna yehondo, wakakwira kootsira vakaurawa, wakauraya vamuna veshe veEdhomu (ngokuti Joabhi wakagaramwo mwedzi mitanhatu nevaIsuraeri veshe, metsa auraya vamuna veshe veEdhomu); asi Hadhadhi wakatizira Egipite, nevaEdhomu vamweni, vaiya varanda vababa ake. Waiya achiri murumbwana mudoko panguvayo. Vakamiruka kubva Midhiani vakauya Pharani; vakatora vamuna kubva Pharani, vakauya Egipite, kunaFaro, mambo weEgipite, uwo wakamupa mhatso, akamupa chikoaniswa chezvokudya, akamupa nyika. Hadhadhi wakaona nyasha huru mukuona kwaFaro, wakamupa mwaramu ake kuita mukadzi, munun'una waThapenesi mambokadzi. Munun'una waThapenesi wakamuberekera Genubhathi mukororo wake, uwo Thapanesi waakarumurira mumhatso yaFaro; Genubhathi waigara mumhatso yaFaro pamwepo nevakororo vaFaro. Naapo Hadhadhi azwa ari muEgipite kuti Dhavhidha waata namadzibaba ake, nokuti Joabhi, nduna yehondo, waiya afa, Hadhadhi wakati kunaFaro, “Nditendere kuti ndibve, ndiende kunyika yangu.” Asi Faro wakati kwaari, “Chiinyi chowatama kwendiri, chaita kuti utsvake kuenda kunyika yako?” Naye wakapingura echiti, “Andizi kutama chiro kwouri; asi nditendere kuti ndiende.” Mwari wakamusazve gaa rimweni rokurwisana naSoromoni, ndiRezoni mukororo waEriadha, uwo wakatiza kubva kunamambo wake Hadhadheza mambo weZobha. Wakaunganidza vanhu kwaari, wakaita nduna padera pechikwata icho, ngomukuwo uwo Dhavhidha waakauraya vanhu veZobha; vakatizira Dhamasekusi, vakagareyo, vakamuita mambo akatonga muDhamasekusi. Wakaita bandu revaIsuraeri veshe mazuva eshe aSoromoni, echiita zvakashata kudai ngezvaakaita Hadhadhi; wakanyenya vaIsuraeri, akatonga padera peAramu. Jerobhoamu mukororo waNebhati, muEfuremu weZeredha, muranda waSoromoni, zina ramai ake raiya Zerua, shirikadzi, wakamukira mambo Soromoni. Iyi ndiyo ndaa yaakamukira mambo ndiyo. Soromoni wakaaka Miro, akaakisa mauri edhorobha rababa ake Dhavhidha. Zvino munhu uyu Jerobhoamu waiya ngwazi inesimba, naapo Soromoni aona kuti jaha iri raigwinyisira kushanda, wakariemesa padera pomushando wouhloko wemhatso yaJosefa. Pasinde pouwo mukuwo, apo Jerobhoamu paaibuda kubva muJerusarema, muprofeti Ahija muShiro wakamuona munjira. Ahija waiya adzipfekesa chokupfeka chitsva. Vairi ava vaiya vega mushango, apo Ahija paakabata chokupfeka chitsva chaaiya akapfeka, wakachibaura kuita zvigurwa gumi nazviiri. Zvino wakati kunaJerobhoamu, “Tora iwewe pachako zvigurwa gumi; ngokuti ndizvo zvinoronza Mambo Mwari, Mwari waIsuraeri, ‘Wona, ndichadusa umambo kubva munyara yaSoromoni, ndinozokupa madzinza gumi. Soromoni unozosara norudzi rumwe ngendaa yomuranda wangu Dhavhidha, nendaa yeJerusarema, dhorobha rendakatsanangura pakati pemadzinza eshe aIsuraeri. Ngokuti wakandisiya, akadira Ashithorethi chimwari chevaSidhoni, neKhemoshi, chimwari chevaMoabhi, naMirikhomu, chimwari chevana vaAmoni, aazi kuhamba ngenjira dzangu, echiita izvo zvakarurama mukuona kwangu, nokungwarira zviemeso zvangu nemipango yangu, kudai ngezvaakaita Dhavhidha baba ake. Asi zvakanyadaro andizobvisi umambo hweshe kubva munyara yake, asi ndinozomuita mutongi mazuva eshe okupona kwake, ngendaa yaDhavhidha muranda wangu uwo wendakatsanangura, naye wakangwarira mipango yangu nezviemeso zvangu; asi ndinozodusa umambo kubva kunyara yomukororo wake, ndinozohupa kwouri, madzinza gumi. Asi kunomukororo wake ndinozopa dzinza rimwe, kuti Dhavhidha muranda wangu aane kujeka nguva dzeshe pamberi pangu muJerusarema, dhorobha rendakatsanangura kuisa zina rangumwo. Ndinozokutora iwewe kuti utonge peshe kudai ngokuda kwomwoyo wako, unozoita mambo padera paIsuraeri. Kudai wechizopurutana zveshe zvendinokupanga, kuhamba ngenjira dzangu, wechiita izvo zvakarurama mukuona kwangu, wechingwarira zviemeso zvangu nemipango yangu, kudai ngezvaakaita Dhavhidha muranda wangu; ndinozoa newe, ndikuakire mhatso yakagwinya, kudai ngezvendakaakira Dhavhidha, ndinozopa Isuraeri kwouri. Ngendaa yeizvi ndinozoorora rudzi rwaDhavhidha, asi haiwa kwemhera nariini.’ ” Ndizvo Soromoni wakatsvaka kuuraya Jerobhoamu; asi Jerobhoamu wakamiruka, akatizira Egipite, kunaShishaki mambo weEgipite, akagara Egipite metsa kufa kwaSoromoni. Zvino mishando imweni yaSoromoni, neizvo zvaakaita zveshe, noungwaru hwake, azvizi kunyorwa here muBhuku reZviito zvaSoromoni? Makore aakatonga Soromoni muJerusarema padera pevaIsuraeri veshe aiya makore makumi marongomuna. Soromoni wakaata nemadzibaba ake, naye wakatsirwa mudhorobha rababa ake Dhavhidha; naRehobhoamu mukororo wake wakatonga pandau yake. Rehobhoamu wakaenda Shekhemu, ngokuti vaIsuraeri veshe vaiya vauya Shekhemu kuti vamuite mambo. Naapo Jerobhoamu mukororo waNebhati azwa ndizvo, (uwo waiya achindori muEgipite, ngokuti waiya akatiza kubva pamberi pehope yamambo Soromoni,) zvino Jerobhoamu wakagara Egipite. Navo vakatuma vanhu koomudaidza; naJerobhoamu nembungano yeshe yevaIsuraeri vakauya, kuereketa naRehobhoamu vechiti, “Baba ako vakaita kuti joka redu rireme padera pedu. Zvino iwewe ita kuti mushando wababa ako wairema, nejoka rake rairema, raakaisa padera pedu, rireruke, nesu tinozokushandira.” Naye wakati kwevari, “Ibvai muende mazuva matatu, ngesure kwawo muuyezve kwendiri.” Nevanhu vakaenda. Zvino mambo Rehobhoamu wakaereketa nevamuna vasharuka, avo vaiema pamberi pababa ake Soromoni achapona, wakati, “Imwimwi munondiita mapangirenyi kuti ndipingure ava vanhu?” Vakapingura kwaari vechiti, “Kudai wechizoita muranda weava vanhu nyamashi nokuvashandira, uvapingure, uerekete mazwi akanaka kwavari, naapo vanozokushandira mhera nariini.” Asi iye wakaramba kupanga kwevamuna vasharuka kwevakamupa, wakapangana nemajaha awo aiya ndanga dzake aiema pamberi pake. Naye wakati kwevari, “Munondipangenyi imwimwi chokuti tipingure kuvanhu ava vakaereketa kwendiri vechiti, ‘Ita kuti joka ravakaisa baba ako padera pedu rireruke?’ ” Majaha aiya ndanga dzake akaereketa kwaari echiti, “Unozoronza izvi kuvanhu vakaereketa kwouri vechiti, ‘Baba ako akaita kuti joka redu rireme, asi iwewe ita kuti rireruke;’ ichi ndicho chounozoereketa kwevari kuti, ‘Chinwe changu chidoko chakafema kupinda chiunu chababa angu. Zvino baba angu pevakamutwarisa joka rinorema, inini ndinozotutsira kujoka renyu. Baba angu vakamuorora ngethabusi, asi inini ndinozomuorora ngezvinyaada.’ ” Ndizvo Jerobhoamu nevanhu veshe vakauya kunaRehobhoamu ngezuva rechitatu, kudai ngezvaakaronza mambo echiti, “Uyaizve kwendiri ngezuva rechitatu.” Mambo wakapingura vanhu ngoushungu. Wakarekera kupanga kwevamuna vasharuka kwevakamupanga, naye wakaereketa kwevari kudai ngokupanga kwemajaha echiti, “Baba angu vakaremesa joka renyu, asi inini ndinozotutsira kuriremeresa; baba angu vakamuorora ngethabusi, asi inini ndinozomuorora ngezvinyaada.” Ndizvo mambo aazi kupurutana vanhu; ngokuti ichi chakabva kunaMambo Mwari, kuti azarise mazwi ake aakaereketa ndiAhija muShiro kunaJerobhoamu mukororo waNebhati. Naapo vaIsuraeri veshe vaona kuti mambo aazi kupurutana kwevari, vanhu vakapingura mambo vechiti, “Tine chikoaniswa chenyi kunaDhavhidha? Atina nhaka kumukororo waJesi. Endai kumatende enyu, imwimwi vaIsuraeri! Ringira zvino kumhatso yako, iwewe Dhavhidha.” Ndizvo vaIsuraeri vakapararira kuenda kumatende avo. Asi Rehobhoamu wakatonga padera pevana vaIsuraeri vaigara mumadhorobha aJudha. Naapo mambo Rehobhoamu paakatuma Adhoramu, uwo waiya mukuru wechibaro, vaIsuraeri veshe vakamuponda ngemapuwe, wakafa. Ndizvo mambo Rehobhoamu wakakasira kukwira ngoro yake, echitiza kuenda Jerusarema. Ndizvo vaIsuraeri vakamukira mhatso yaDhavhidha metsa nanyamashi. Naapo vaIsuraeri vazwa kuti Jerobhoamu waiya auyazve, vakatuma vanhu kuti vamudaidze auye pakati pembungano, vakamuita mambo padera pevaIsuraeri veshe. Paiya pasina naumwe wakateera mhatso yaDhavhidha, asi dzinza raJudha rega. Naapo Rehobhoamu aguma muJerusarema, wakaunganidza veshe vemhatso yaJudha neverudzi rwaBhenjamini, vaiya zana nemakumi masere emakumi emazana (180,000) evamuna vakatsanangurwa, vaikona kurwa, kurwa nevemhatso yaIsuraeri, nokuunzazve umambo kunaRehobhoamu mukororo waSoromoni. Asi izwi raMwari rakauya kunaShemaia munhu waMwari rechiti, “Ereketa wechiti kunaRehobhoamu mukororo waSoromoni, mambo waJudha, nokumhatso yeshe yaJudha neyaBhenjamini, nokuneavo vakasara vevanhu, ‘Unoronza izvi Mambo Mwari: Amuzokwiri nokuti kurwa nehama dzenyu vana vaIsuraeri. Munhu weshe ngaapetuke kumhatso yake; ngokuti chiro ichi chakaitwa ndini.’ ” Ndizvo vakapurutana izwi raMambo Mwari, vakahwirira kuenda kudai ngezverakaronza izwi raMambo Mwari. Zvino Jerobhoamu wakaaka Shekhemu mumutunhu waEfuremu, akagaremwo, nokubva arimwo wakaaka Phenueri. Zvino Jerobhoamu wakati mumwoyo mwake, “Zvino umambo hungazohwirira kumhatso yaDhavhidha. Kudai ava vanhu vechizoangira kukwira kuenda koopira midiro kumhatso yaMambo Mwari Jerusarema, mwoyo yaava vanhu ingazotenderukira kunamambo wavo, mambo Rehobhoamu waJudha; navo vanozondiuraya, vechihwirira kunaRehobhoamu mambo waJudha.” Ndizvo mambo wakatsvaka zano, akaita makonyana mairi omukore. Wakati kuvanhu, “Kukwira kwenyu Jerusarema kwanyanya zvakwana. Zviripano zvimwari zvenyu, imwimwi Isuraeri, izvo zvakamubudisa kubva munyika yeEgipite.” Wakaisa chimwe muBhetheri, nechimweni wakachiisa muDhani. Neichi chiro chakaita chishaishi, ngokuti vanhu vakaenda koodira pamberi pechimwari, nepamberi peicho chaiya muDhani. Wakaakazve mhatso kundau dzakakwirira, akaemesa vapristi vevanhu vaiya pashi, avo vaiya vasiri vevakororo vaRevhi. Jerobhoamu wakakoka mushongano wokudya ngomwedzi wechisere, ngezuva rechigumi namashanu romwedziwo, kudai ngomushongano wokudya waiya nevaJudha, naye wakapira midiro padera pearita; ndizvo wakaitazve kudaro muBhetheri, echipira midiro kunemakonyana aakaita. Naye wakaemesa muBhetheri vapristi vendau dzakakwirira dzaakaaka. Wakaenda koopira midiro paarita raakaita muBhetheri ngezuva regumi namashanu romwedzi wechisere, ngomwedzi uwo waakaronga mumwoyo mwake; wakakoka mushongano wokudya wevaIsuraeri, naye wakapira midiro paarita, akapisha mitombo inegwema rakanaka. Ringira, wakauya munhu waMwari echibva kwaJudha apangirwa izwi raMambo Mwari kuenda Bhetheri; naJerobhoamu waiya akaema paarita echipisha mutombo unegwema rakanaka. Naye wakadaidzira kuarita ngeizwi raMambo Mwari echiti, “Iwewe arita, arita, unoronza izvi Mambo Mwari: ‘Ringira, kunozoberekwa mukororo kumhatso yaDhavhidha, Josia ndiro zina rake; nepadera pako unozopira vapristi vendau dzakakwirira, avo vanopisha mitombo inegwema rakanaka padera pako, nemagodo evanhu anozopishwa padera pako.’ ” Wakapa chioniso ngezuva ririro echiti, “Ichi ndicho chioniso chaakaereketa ndicho Mambo Mwari: ‘Ringirai, arita rinozomweka, nemarota ari padera paro anozodururirwa pashi.’ ” Naapo mambo Jerobhoamu azwa chakadaidzirwa ngomunhu waMwari, uwo wakadaidzira ngendaa yearita raiya muBhetheri, Jerobhoamu wakatambanudza nyara yake kubva paarita echiti, “Mubatenyi!” Asi nyara yake yaakatambanudza yakaoma, aazi kuchakona kuipfinyisa. Aritawo rakamweka, nemarota akadururirwa pashi kubva paarita, kudai ngechioniso icho chaakapa munhu waMwari ngeizwi raMambo Mwari. Mambo wakapingura, akati kunomunhu waMwari, “Pota zvino pamberi pehope yaMambo Mwari, Mwari wako, undikumbirire, kuti nyara yangu itambiswe.” Ndizvo munhu waMwari wakapota kunaMambo Mwari, nenyara yamambo yakatambiswa, ikadai ngekaretu. Zvino mambo wakati kunomunhu waMwari, “Uya kanyi, udye neni, neni ndinozokupa musharo.” Asi munhu waMwari wakati kunamambo, “Kudai wechizondipa hafu youmambo hwako, andizopindi newe, nokuti kuzodya kudya nokuti kuzomwa mvura kuneiyi ndau. Ngokuti ndizvo zvakapangwa kwendiri kudaro ngeizwi raMambo Mwari rechiti, ‘Usazodya kudya, nokuti kumwa mvura, nokuti kuhwirira ngenjira yowakauya ndiyo.’ ” Ndizvo wakahamba ngenjira imweni, aazi kupetuka ngenjira yaakauya ndiyo Bhetheri. Zvino kwaigaremwo muBhetheri muprofeti musharuka. Vakororo vake vakauya, vakamuronzera ngemishando yeshe yakaitwa ngomunhu waMwari muBhetheri ngeiro zuva; mazwiwo aakaereketa kunamambo, vakaaronza kunababa avo. Baba avo vakati kwevari, “Ngeiri njira yaakakwira ndiyo?” Vakororo vake vakamupangidzira njira ngokuti vaiya vaona njira yaakakwira ndiyo munhu waMwari wakabva kwaJudha. Zvino wakati kunevakororo vake, “Ndisungirei mbongoro.” Navo vakamusungira mbongoro, wakaigadha. Wakateera munhu waMwari, akamuona akagara pashi pomuti womuokhi. Wakati kwaari, “Ndiwe here munhu waMwari wakabva kwaJudha?” Naye wakati, “Ndini.” Zvino wakati kwaari, “Uya neni kanyi, udye kudya.” Asi wakati, “Andingahwiriri newe, nokuti kupotera newe, nokuti kudya kudya nokuti kumwa mvura newe kundau iyi. Ngokuti kwakaronzwa kwendiri ngeizwi raMambo Mwari rechiti, ‘Auzodyi kudya nokuti kumwa mvura apo, nokuti kuhwirira ngenjira yewakauya ndiyo.’ ” Zvino wakati kwaari, “Neniwo ndiri muprofeti kudai ndiwe; nengirosi yaMambo Mwari yakaereketa kwendiri ngeizwi raMambo Mwari yechiti, ‘Mupetudze sure newe kumhatso yako kuti adye kudya nokumwa mvura.’ ” Asi waimunyepera. Zvino munhu waMwari wakapetuka naye, wakadya kudya nokumwa mvura mumhatso yake. Naapo vachakagara patafura, izwi raMambo Mwari rakauya ngokunomuprofeti uwo wakamupetudza sure. Wakadaidzira kunomunhu waMwari, uwo wakabva kwaJudha echiti, “Unoronza izvi Mambo Mwari: Ngokuti auzi kupurutana zvinobva kumuromo waMambo Mwari, usikazi kuita icho chaakakupanga Mambo Mwari, Mwari wako, asi wapetuka sure, nokudya nokumwa mvura mundau yaakaronza Mambo Mwari kwouri kuti, ‘Usadyeyo kudya, nokuti kumwa mvura;’ muiri wako auzoikwi muiba remadzibaba ako.” Ngesure munhu waMwari apedza kudya nokuti kumwa, wakamusungira mbongoro yake yomuprofeti uwo waakapetudza sure. Naapo echienda, mhondoro yakashongana naye munjira, yakamuuraya. Muiri wake wakakandirwa munjira, nembongoro yakaema pasinde pawo; mhondoro yakaemawo pasinde pawo. Vanhu vakapinda ngaapo, vakaona muiri wakakandirwa munjira, nemhondoro yakaema pasinde pomuiri. Navo vakauya, vakaronzera vanhu mudhorobha paaigara muprofeti musharuka. Naapo azwa, uwo muprofeti wakamupetudza sure kubva munjira yake, wakati, “Ndiye munhu waMwari, uwo usikazi kupurutana izwi raMambo Mwari. Ndizvo Mambo Mwari wakamupira kumhondoro, yakamubaura nokumuuraya, kudai ngezvakaronza izwi raakaereketa kwaari Mambo Mwari.” Naye wakaereketa kuvakororo vake echiti, “Ndisungirei mbongoro.” Ndizvo vakaisunga. Wakaenda, akaona muiri wakakandirwa munjira, mbongoro nemhondoro zvakaema pasinde pomuiri. Mhondoro aizi kudya muiri uwo, nokuti kuruma mbongoro. Muprofeti musharuka wakatora muiri womunhu waMwari, akauisa padera pembongoro, akaupetudza kudhorobha romuprofeti musharuka koomuchema nokumutsira. Wakaika muiri muiba rake; vakamuchema vechiti, “Ihehe, hama yangu!” Apedza kumuika, wakaereketa kunevakororo vake echiti, “Apo ndoofa, ndiikenyi muiba raakaikwa munhu waMwari; muradzike magodo angu pasinde pemagodo ake. Ngendaa yeizwi raMambo Mwari raakaereketa kunearita riri muBhetheri, nokumhatso dzeshe dzendau dzakakwirira mumadhorobha eSamaria, ngegwinyiso zvinozoitika.” Ngesure kweizvi Jerobhoamu aazi kutenderuka kubva kunjira dzake dzakashata, asi wakaangira kuemesa vanhu vari pashi kuita vapristi vendau dzakakwirira; kunyazwi ngouri uwo waida kuita mupristi, waimuemesa kuita mupristi wendau dzakakwirira. Ichi chiro chakaita chishaishi kumhatso yaJerobhoamu, kuti iparadzwe, nokupedzwa padera penyika. Ngouwo mukuwo Abhija mukororo waJerobhoamu wakarwara. Jerobhoamu wakati kunomukadzi wake, “Miruka, ndapota, udziitise kuti usaziikanwa kuti uri mukadzi waJerobhoamu, uende Shiro; ringira uripo Ahija muprofeti uwo wakandironzera kuti ndinozoita mambo padera peava vanhu. Utore zvingwa gumi nemakhekhe, nejomeya rouchi, uende kwaari; naye unozokuronzera icho chinozoitika kunemwana.” Mukadzi waJerobhoamu wakaita kudaro, akamiruka, akaenda Shiro kumhatso yaAhija. Zvino Ahija waiya asikachaoni, ngokuti madziso ake aiya oita rubuma ngendaa yousharuka hwake. Asi Mambo Mwari wakati kunaAhija, “Ringira, mukadzi waJerobhoamu unouya kookubvunza ngendaa yomukororo wake; ngokuti unorwara. Unozoereketa ichi neichi kwaari. Naapo aguma unozodziitisa kuti aringirike kudai ngomukadzi umweni.” Asi apo Ahija azwa musindo wetsoka dzake, achipotera pamusiwo, wakati, “Pinda, iwewe mukadzi waJerobhoamu; unodziitisa ngenyi kuti uringirike kudai ngomunhu umweni? Ngokuti ndatumwa kwouri nemashoko akakonza. Enda, wooronzera Jerobhoamu wechiti, ‘Unoronza izvi Mambo Mwari, Mwari waIsuraeri: Ngokuti ndakakukudza pakati pevanhu, ndikakuita mutungamiriri padera pevanhu vangu Isuraeri, ndikadusa umambo kubva kumhatso yaDhavhidha, ndikahupa kwouri; asi auzi kuita kudai ngomuranda wangu Dhavhidha, uwo wakangwarira mipango yangu, wakanditeerazve ngomwoyo wake weshe, kuita izvo zvega zvainaka mukuona kwangu. Asi iwewe wakaita zvakashata kupinda avo veshe vakatanga pamberi pako, newe wakaenda ukadziitira zvimwari zvimweni, nemiedzaniso yakanyunguruswa, kundimusa kuti nditseneke, newe wakandirasha sure kwomushana wako. Ndizvo, ringira, ndinozounza kushata padera pemhatso yaJerobhoamu. Ndinozouraya kubva kumhatso yaJerobhoamu mwana weshe wemwamuna, veshe vakasungwa naavo vakasunhurwa muIsuraeri, nokudusa avo vakasara vemhatso yaJerobhoamu, kudai ngomunhu unopisha disa metsa ripere reshe. Weshe munhu waJerobhoamu unozofira mudhorobha, unozodyiwa ngembwa; nouwo unozofira mushango, unozodyiwa ngeshiri dzomudenga; ngokuti Mambo Mwari wakazviereketa.’ Ndizvo miruka, uende kumhatso yako. Naapo tsoka dzako dzoopotera mudhorobha, mwana unozofa. VaIsuraeri veshe vanozomuchema nokumuika; ngokuti ndiye ega wemhuri yaJerobhoamu unozoikwa, ngokuti mwaari mwakaoneka zviro zvimweni zvakanaka mukuona kwaMambo Mwari, Mwari waIsuraeri, mumhatso yeshe yaJerobhoamu. Zvakanyadaro Mambo Mwari unozodziemesera mambo padera paIsuraeri, uwo unozouraya vemhatso yaJerobhoamu nyamashi, kunyazwi zvinopano. “Mambo Mwari unozochaya Isuraeri, kudai ngorutsanga runozungunyiswa mumvura; unozobvita Isuraeri kubva kuneiyi nyika yakanaka, yaakapa kumadzibaba avo, nokuvaparadzira seri kworwizi Yufratesi, ngokuti vakaita miedzaniso yavo yokudira Ashithorethi, vechimusa ushungu hwaMambo Mwari. Unozosiya vaIsuraeri ngendaa yezvishaishi zvaJerobhoamu, uwo wakashaisha emene, nokuita kuti vaIsuraeri vashaishe.” Zvino mukadzi waJerobhoamu wakamiruka akaenda, akauya Thiriza. Naapo aguma padimba romusiwo, mwana wakafa. Navo vakamutsira, nevaIsuraeri veshe vakamuchema, kudai ngeizwi raMambo Mwari, raakaereketa ngomuranda wake Ahija muprofeti. Zvino mishando yeshe yaJerobhoamu, kurwa kwake nokutonga kwake, ringirai zvakanyorwa muBhuku reMishando yeZuva ngeZuva yeMadzimambo aIsuraeri. Mazuva okutonga kwaJerobhoamu kwaiya makore makumi mairi namairi; zvino wakaata nemadzibaba ake, naNadhabhi mukororo wake wakatonga pandau yake. Zvino Rehobhoamu mukororo waSoromoni wakatonga muJudha. Rehobhoamu waiya nemakore makumi marongomuna narimwe apo wakatanga kutonga, naye wakatonga makore gumi nemanomwe muJerusarema, dhorobha raakatsanangura Mambo Mwari pakati pemadzinza eshe aIsuraeri, kuti aisemwo zina rake. Zina ramai ake raizwi Naama muAmoni. Judha wakaita zvakashata mukuona kwaMambo Mwari; vakamumusira ndurumwa ngezvishaishi zvavo zvevakaita, kupinda zveshe zvakaitwa ngemadzibaba avo. Ngokuti avozve vakadziakira pachavo ndau dzakakwirira, nokudziitira miedzaniso, nemakwasha okudira, padera pemitunhu nepashi pemiti yeshe yakasvipirika; kwaiyapo munyika avo vakaita kushaisha ukwo kweSodhoma. Vakaita kushata kweshe kwemadzinza aakadzinga Mambo Mwari kubva pamberi pevana vaIsuraeri. Mugore rechishanu rokutonga kwamambo Rehobhoamu, Shishaki mambo weEgipite wakakwira koochakata Jerusarema. Wakatora upfumi hweshe hwemhatso yaMambo Mwari, noupfumi hweshe hwemhatso yamambo; wakatora zviro zveshe. Wakatorawo zvihlangu zvomukore zvakanasirwa ndiSoromoni; ndizvo mambo Rehobhoamu wakaita zvihlangu zvethusi pandau peizvo, akazvipa munyara dzenduna dzaiya padera pevarindi, vairinda misiwo yamambo. Naapo mambo paaipotera mumhatso yaMambo Mwari varindi vaizvitwara, nokuzviunzazve mukamera rairindwa. Zvino mishando imweni yaRehobhoamu, nazvo zveshe zvaakaita azvizikunyorwa here muBhuku reMishando yeZuva ngeZuva yeMadzimambo aJudha? Kwaiyapo kurwa pakati peRehobhoamu naJerobhoamu mazuva eshe okupona kwavo. Rehobhoamu wakaata nemadzibaba ake, naye wakatsirwa nemadzibaba ake mudhorobha raDhavhidha. Zina ramai ake raizwi Naama muAmoni. Abhijamu mukororo wake wakatonga pandau yake. Zvino ngegore regumi nemasere okutonga kwamambo Jerobhoamu mukororo waNebhati, Abhijamu wakatonga Judha. Wakatonga makore matatu muJerusarema. Zina ramai ake raizwi Maakha, mwanasikana waAbhisharomu. Wakaita zvishaishi zveshe zvababa ake, zvevakaita kumutangira; mwoyo wake waiya usikazi kuperera pamberi paMambo Mwari, Mwari wake, kudai ngomwoyo waDhavhidha baba ake. Zvakanyadaro, ngendaa yaDhavhidha, Mambo Mwari, Mwari wake wakamupa chibani muJerusarema ngokuemesa mukororo wake sure kwake, nokugwinyisa Jerusarema; ngokuti Dhavhidha wakaita izvo zvaiya zvakanaka mukuona kwaMambo Mwari, aazi kupauka kubva kuchiro kunyazwi ngechiri chaakamupanga, eshe mazuva okupona kwake, kwega ngendaa yaUria muHiti. Hondo yakatanga pakati paRehobhoamu naJerobhoamu yakaangira eshe mazuva okupona kwake. Mishando imweni yaAbhijamu, nazvo zveshe zvaakaita, azvizi kunyorwa here muBhuku reMishando yeZuva ngeZuva yeMadzimambo aJudha? Kwaiyapo hondo pakati paAbhijamu naJerobhoamu. Abhijamu wakaata nemadzibaba ake, vakamutsira mudhorobha raDhavhidha. Zvino Asa mukororo wake wakatonga pandau yake. Asa wakatonga padera paJudha ngegore remakumi mairi raJerobhoamu. Wakatonga muJerusarema makore makumi marongomuna narimwe. Zina rambuya ake raizwi Maakha, mwanasikana waAbhisharomu. Asa wakaita izvo zvakanaka mukuona kwaMambo Mwari, kudai ngezvaakaita Dhavhidha baba ake. Wakadzinga avo vaiita chishaishi cheSodhoma, nokudusa miedzaniso yavakaita madzibaba ake. Wakadusawo Maakha mbuya ake kuti vasachaita vahosi, ngokuti vaiya vakaita muedzaniso wokudira mugwasha; Asa wakaputsa muedzaniso wamai ake, akaupisha pasinde pomukova Kedhironi. Asi ndau dzakakwirira adzizi kuduswa. Zvakanyadaro mwoyo waAsa waiya wakaperera pamberi paMambo Mwari mazuva eshe okupona kwake. Wakaunza mumhatso yaMambo Mwari zvipo zvakapirwa ndibaba ake, neizvo zvaakapira emene kunaMambo Mwari, sirivha, mukore nezvidziyo. Kwaiyapo hondo pakati paAsa naBhaasha mambo waIsuraeri mazuva eshe okupona kwavo. Bhaasha mambo waIsuraeri wakakwira koochakata Judha, wakaaka Rama, kupinga vanhu kuti vasabuda kubanze nokuti vasapinda mukati kunaAsa mambo waJudha. Zvino Asa wakatora sirivha yeshe nomukore zvakasara mumhatso youpfumi hwaMambo Mwari, noupfumi hwemhatso yamambo, wakazviisa munyara dzevaranda vake. Mambo Asa wakazvitumira kunaBhenihadhadhi mukororo waTabhirimoni, mukororo waHezioni, mambo weAramu waigara Dhamasekusi, echiti, “Ngachiwepo chitenderano pakati pangu inini newe kudai ngechaiyapo pakati pababa angu nababa enyu. Ringira, ndinotumira kwouri chipo chesirivha nomukore; enda ugure chitenderano chako naBhaasha mambo waIsuraeri, kuti abve kwendiri.” Bhenihadhadhi wakapurutana kunamambo Asa, akatuma nduna dzehondo yake koorwa nemadhorobha aIsuraeri. Wakanyisa Ijoni, Dhani, Abheribhethimaakha, neKhinerothi reshe, nenyika yeNafitari. Naapo Bhaasha azwa ndizvo, wakarekera kuaka Rama, wakagara Thiriza. Zvino mambo Asa wakapanga vaJudha veshe; pasina munhu wakatenderwa kuti asare; navo vakatwara mapuwe eRama nematanda aro, zvaiakiwa ndizvo ndiBhaasha; naavo mambo Asa wakaaka Gebha raBhenjamini neMizipha. Mishando imweni yeshe yaAsa, nesimba rake reshe, nazvo zveshe zvaakaita, nemadhorobha aakaaka, azvizi kunyorwa here muBhuku reMishando yeZuva ngeZuva yeMadzimambo aJudha? Asi ngomukuwo wousharuka hwake, wakabatwa ngenhenda mutsoka dzake. Zvino Asa wakaata namadzibaba ake, wakatsirwa namadzibaba ake mudhorobha raDhavhidha baba ake; mukororo wake Jehoshafati wakatonga pandau yake. Nadhabhi mukororo waJerobhoamu wakatanga kutonga Isuraeri ngegore rechipiri raAsa mambo waJudha, naye wakatonga padera paIsuraeri makore mairi. Wakaita zvakashata mukuona kwaMambo Mwari, wakahamba ngenjira dzababa ake, nomuchishaishi chaakaita kuti Isuraeri ashaishe ndicho. Bhaasha mukororo waAhija munhu wemhatso yaIsakha, wakamupandukira; naBhaasha wakamubaya muGibhethoni, mudhorobha revaFiristia; ngokuti Nadhabhi navaIsuraeri veshe vakakomba Gibhethoni. Ndizvo Bhaasha wakamuuraya ngegore rechitatu raAsa mambo waJudha, wakatonga pandau yake. Naapo aitwa mambo, wakauraya veshe vemhatso yaJerobhoamu; aazi kusiya naumwe kumhatso yaJerobhoamu waifema, metsa aiparadza, kudai ngeizwi raMambo Mwari, raakaereketa kubudikidza ngomuranda wake Ahija muShiro, ngendaa yezvishaishi zvaakashaisha Jerobhoamu, nezvaakaita kuti Isuraeri ashaishe, nokutambudza kwake kwaakamusa ndikwo ushungu hwaMwari waIsuraeri. Zvino mishando imweni yaNadhabhi, nazvo zveshe zvaakaita, azvizi kunyorwa here muBhuku reMishando yeZuva ngeZuva yeMadzimambo aIsuraeri? Kwaiyapo hondo pakati paAsa naBhaasha mambo waIsuraeri ngemazuva avo eshe. Ngegore rechitatu raAsa mambo waJudha, Bhaasha mukororo waAhija wakatanga kutonga padera paIsuraeri reshe muThiriza, naye wakatonga makore makumi mairi nemarongomuna. Wakaita zvakashata mukuona kwaMambo Mwari, echihamba ngenjira yaJerobhoamu, nomuchishaishi ichi aakaita kuti Isuraeri ashaishe. Izwi raMambo Mwari rakauya kunaJehu mukororo waHanani kurwisana naBhaasha rechiti, “Ngokuti ndakakumirudza kubva kubukuta, ndikakuita mutungamiriri padera pevanhu vangu Isuraeri; newe wakahamba ngenjira dzaJerobhoamu, newe wakaita kuti vanhu vangu Isuraeri vashaishe, vakamusa ushungu hwangu ngezvishaishi zvavo, ringira, ndinozoparadza Bhaasha nemibarirwana yemhatso yake; ndinozoitazve kuti mhatso yako idai ngemhatso yaJerobhoamu mukororo waNebhati. Weshe waBhaasha unozofira mudhorobha unozodyiwa ngembwa, weshe waBhaasha unozofira mushango unozodyiwa ngeshiri dzomudenga.” Zvino mishando imweni yaBhaasha, nazvo zveshe zvaakaita, nesimba rake, azvizi kunyorwa here muBhuku reMishando yeZuva ngeZuva yeMadzimambo aIsuraeri? Bhaasha wakaata namadzibaba ake, wakatsirwa muThiriza; naEra mukororo wake wakatonga pandau yake. Zvakanyadaro rakagumazve izwi raMambo Mwari kubudikidza ngomuprofeti Jehu mukororo waHanani, rechirwisana naBhaasha nevemhatso yake veshe, ngendaa yokushata kweshe kwaakaita mukuona kwaMambo Mwari, akamusa ushungu hwake ngemishando yenyara dzake, ngokuita kwakadai ngekwemhatso yaJerobhoamu, ngokutizve wakaiparadza. Mugore remakumi mairi nematanhatu raAsa mambo waJudha, Era mukororo waBhaasha wakatanga kutonga padera paIsuraeri muThiriza, wakatonga makore mairi. Asi muranda wake Zimuri, nduna yorupande rwengoro dzake wakamumukira. Naapo paaiya ari muThiriza, echimwa echiradza mumhatso yaArza, uwo waiya nduna yengome yake muThiriza, Zimuri wakapoteremwo akamubaya akafa, ngegore remakumi mairi nemanomwe rokutonga kwaAsa mambo waJudha, naye wakatonga pandau yake. Naapo paakatanga kutonga, ngokukasira apo akagara padendemaro rake, wakauraya veshe vemhatso yaBhaasha; aazi kumusiira mukororo naumwe, kunyazwi kuhama dzake, nokuti wevangani vake. Ndizvo Zimuri wakauraya veshe vemhatso yaBhaasha, kudai ngokuronza kweizwi raMambo Mwari, raakaereketa kubudikidza ngomuprofeti Jehu kurwisana naBhaasha, ngendaa yezvishaishi zveshe zvaBhaasha, nezvishaishi zvaEra mukororo wake, zvevakashaisha, neizvo zvevakaita ndizvo kuti vaIsuraeri vashaishe, kumusa ushungu hwaMambo Mwari, Mwari waIsuraeri ngezvimwari zvavo zvisina shwiro. Zvino mishando imweni yaEra, neizvo zveshe zvaakaita, azvizi kunyorwa here muBhuku reMishando yeZuva ngeZuva yeMadzimambo aIsuraeri? Mugore remakumi mairi nemanomwe rokutonga kwaAsa mambo waJudha, Zimuri wakatonga padera paIsuraeri mazuva manomwe muThiriza. Zvino vamuna vehondo vaiya vakadzimika matende vakaringirana neGibhethoni, raiya dhorobha revaFiristia, nevanhu vehondo vaiya mumatende vazwa kuti Zimuri wakamukira mambo, wakauraya mambo; ndizvo vaIsuraeri veshe vakaemesa Omuri, nduna yehondo kuita mambo padera paIsuraeri ngeiro zuva mukamba. Ndizvo Omuri wakakwira Gibhethoni nevaIsuraeri veshe naye, vakakomba Thiriza. Naapo Zimuri aona kuti dhorobha ratorwa, wakapotera mungome yamambo; wakapisha ngome yamambo, akadzipishiremwo pachake, akafa ngomuriro, ngendaa yezvishaishi zvake zvaakashaisha mukuona kwaMambo Mwari, ngokuhamba kudai ngenjira yaJerobhoamu, nomuchishaishi chaakaita kuti vana vaIsuraeri vashaishe ndicho. Zvino mishando yeshe imweni yaZimuri, nokumukira kwake kwaakaita, azvizi kunyorwa here muBhuku reMishando yeZuva ngeZuva yeMadzimambo aIsuraeri? Zvino vanhu vaIsuraeri vakaparadzana kuita zvikwata zviiri; chikwata chimwe chakateera Thibhini mukororo waGinathi, kuti vamuemese kuita mambo; nechikwata chimweni chakateera Omuri. Asi vanhu vakateera Omuri vakanyisa padera pevanhu vakateera Thibhini mukororo waGinathi; ndizvo Thibhini wakafa, naOmuri wakatonga. Mugore remakumi matatu narimwe raAsa mambo waJudha, Omuri wakatanga kutonga padera paIsuraeri; wakatonga makore gumi namairi, matanhatu awo wakatonga muThiriza. Zvino wakatenga mutunhu weSamaria ngemakumi emazana matanhatu (6,000) ezvigurwa zvesirivha kubva kunaShema, wakaaka padera pomutunhu, akadudza zina redhorobha raakaaka kuti Samaria, zina raShema, mune womutunhu. Omuri wakaita zvakashata mukuona kwaMambo Mwari; wakaita zvakashata kupinda avo vakatanga pamberi pake. Ngokuti wakahamba ngenjira dzeshe dzaJerobhoamu mukororo waNebhati, nomuzvishaishi zvake zvaakaita kuti Isuraeri ashaishe, kumusa ushungu hwaMambo Mwari, Mwari waIsuraeri, ngezvimwari zvavo zvisina shwiro. Zvino mishando imweni yaOmuri, iyo yaakaita, nesimba rake raakaonisa, azvizi kunyorwa here muBhuku reMishando yeZuva ngeZuva yeMadzimambo aIsuraeri? Omuri wakaata nemadzibaba ake, akatsirwa muSamaria; Ahabhi mukororo wake wakatonga pandau yake. Mugore remakumi matatu nemasere raAsa mambo waJudha, Ahabhi mukororo waOmuri wakatanga kutonga Isuraeri; Ahabhi mukororo waOmuri wakatonga Isuraeri makore makumi mairi nemairi muSamaria. Ahabhi mukororo waOmuri wakaita zvakashata mukuona kwaMambo Mwari kupinda avo veshe vakatanga pamberi pake. Chakaringirika chakada kudai ngechiro chidoko kwaari kuhamba muzvishaishi zvaJerobhoamu mukororo waNebhati, kuti wakatora Jezebheri mwanasikana waEthibhaari mambo weSidhoni, kuti aite mukadzi wake, naye wakaenda akashandira Bhaari, akamudira. Wakaakira Bhaari arita mumhatso yaBhaari, iyo yaakamuakira muSamaria. NaAhabhi wakaita sika yokudira. Ahabhi wakaita zviro zvakawanda zvokumusa ushungu hwaMambo Mwari, Mwari waIsuraeri, kupinda madzimambo eshe aIsuraeri akatanga pamberi pake. Mumazuva ake Hieri muBhetheri wakaaka Jerikho. Wakaisa madzeyo aro ngorufu rwedangwe rake Abhiramu. Wakaemesa misiwo yaro ngorufu rwomukororo wake wokugumisira Segubhi, kudai ngezvakaronza izwi raMambo Mwari, kubudikidza ndiJoshua mukororo waNuni. Zvino Erija muThishibhe uwo waiya weThishibhe muGireadhi wakati kunaAhabhi, “Kudai ngezvaanopona Mambo Mwari, Mwari waIsuraeri, wendinoema pamberi pake, akuzoapo beto nokuti mvura makore aya, ngepabanze peizwi rangu.” Izwi raMambo Mwari rakauya kwaari rechiti, “Miruka, ubve pano, uende ngokumabvazuva, udzifishe pasinde pechinyuka chinozwi Kherithi, chiri pamberi paJorodhani. Unozomwa kubva kuchinyuka, neni ndapanga makungu kuti akupepo kudya.” Ndizvo wakaenda, wakaita kudai ngokuronza kwaMambo Mwari; wakaenda, akagara pachinyuka chinozwi Kherithi, pamberi paJorodhani. Makungu akamuunzira chingwa nenyama mangwanani, nechingwa nenyama madeekoni; naye wakamwa pachinyuka. Asi ngesure kwemazuva chinyuka chakaoma, ngokuti kwaiya kusina mvura yainaya munyika. Zvino izwi raMambo Mwari rakauya kwaari rechiti, “Miruka, uende Zarefathi, dhorobha raSidhoni, ugarepo; ringira, ndakapanga shirikadzi yeapo kuti ikuburire.” Ndizvo wakamiruka, wakaenda Zarefathi. Naapo apotera pamusiwo wedhorobha, wakaona shirikadzi yaiyapo yechitheza huni; naye wakadaidza kweiri echiti, “Ndichererewo mvura, ndapota, shomani muchidziyo, kuti ndimwe.” Naapo ichaenda kooichera, wakadaidzira kweiri echiti, “Undiunzire kachingwa munyara yako, ndapota.” Asi yakati, “Kudai ngezvaanopona Mambo Mwari, Mwari wako, andina chingwa, asi tsimba youfu muhari, nezvimafuta zvidoko mujomeya; ringira, ndinotheza zvihuni zvishomani kuti ndiende kanyi, ndidzibikire inini nomukororo wangu, kuti tidye, techitofa.” Erija wakati kweiri, “Usatya; enda, uite kudai ngezvowaronza; asi ndibikire inini kutanga ndihwo kachingwa, uchiunze kwendiri, ngesure wechidzibikira iwewe nomukororo wako. Ngokuti unoronza izvi Mambo Mwari, Mwari waIsuraeri, hari youfu aizoperi, nokuti jomeya remafuta arizoperi, metsa rigume zuva raanonaisa mvura Mwari padera penyika.” Wakaenda, akaita kudai ngezvaakaronza Erija; iye naErija navo veshe mumhatso yake vakadya mazuva akawanda. Hari youfu aizi kupera, zve, nejomeya remafuta arizi kupera, kudai ngezvakaronza izwi raMambo Mwari, raakaereketa kubudikidza ndiErija. Ngesure kweizvo zviro, mukororo weshirikadzi mune wemhatso wakarwara; nokurwara kwake kwakanyanyisa metsa akuna nomweya wakasara mwaari. Naye zvino wakati kunaErija, “Ndinenyi newe, iwewe munhu waMwari? Wakauya pano here kundicherechedzisa zvishaishi zvangu, nokuuraya mukororo wangu?” Asi wakati kweiri, “Ndipe mwana wako.” Wakamutora kubva paditi rake, wakakwira naye mukamera repadera, apo paaigara, akamuradzika pamubhedhi wake. Wakakumbira kunaMambo Mwari echiti, “A, Mambo Mwari, Mwari wangu, ngegwinyiso wakaunza here kushata kuneiyi shirikadzi yendinogara kweiri, ngokumuuraira mukororo wake?” Naye wakadzitambanudza katatu padera pomwana, wakakumbira kunaMambo Mwari echiti, “A, Mambo Mwari, Mwari wangu, ndinokupota, mweya wouyu mwana ngauuyezve kwaari.” Mambo Mwari wakazwa izwi raErija, nomweya womwana wakauyazve kwaari, naye wakamuka. Erija wakatora mwana, wakadzaka naye kubva mukamera repadera kumuisa mumhatso, wakamupa kunamai ake; zvino Erija wakati, “Wona, mukororo wako unopona.” Ndizvo mukadzi wakati kunaErija, “Zvino ngeizvi ndinozia kuti iwewe uri munhu waMwari, nokuti izwi raMwari riri mumuromo wako ngegwinyiso.” Ngesure kwemazuva mazhinji, izwi raMambo Mwari rakauya kunaErija mugore rechitatu rokuoma, rakati, “Enda, udzipangidzire kunaAhabhi; neni ndinozonaisa mvura padera penyika.” Ndizvo Erija wakaenda koodzipangidza pachake kunaAhabhi. Yaiyapo nzara huru muSamaria. Ahabhi wakadaidza Obhadhia, uwo waiya mutongi wengome yake. (Zvino Obhadhia waitya Mambo Mwari kakurutu. Naapo Jezebheri echiuraya vaprofeti vaMambo Mwari, Obhadhia wakatora vaprofeti zana, akavafisha ngezvikwata zviiri, makumi mashanu mubako rimwe, akavaburira chingwa nemvura.) Zvino Ahabhi wakati kunaObhadhia, “Enda, uhambe ngomunyika kuzvinyuka zveshe zvemvura, nokumikova yeshe; pamweni tingaona mwenje wokuponesa mahachi nemanyurusi, kuti tisarashikirwa ngezvifuyo zvimweni.” Ndizvo wakakoanisirana nyika pakati pavo, kuti vahambe ngomukati mwayo. Ahabhi wakaenda ngenjira imweni pachake, naObhadhia wakaenda ngenjira imweni pachake. Naapo Obhadhia ari munjira, wakashongana naErija, naye wakamuzia, wakawa pashi ngehope yake echiti, “Ndiwe here, mambo wangu Erija?” Naye wakati, “Ndini! Enda, uronzere mambo wako wechiti, ‘Erija waapano.’ ” Naye wakati, “Ndakaita mashaishirenyi inini, kuti kupire muranda wako munyara dzaAhabhi, kuti andiuraye? Kudai ngezvaanopona Mambo Mwari, Mwari wako, akuna dzinza nokuti umambo apo paasikazi kutuma munhu mambo wangu kukutsvaka; naapo vakati, ‘Aari pano akadi;’ waipikisa mhiko iro dzinza noumambo uhwo kuti avazi kukuona. Asi zvino iwewe unoti, ‘Enda, uronzere mambo wako’ kuti, ‘Ringira, Erija uri pano.’ Naapo ndaenda kubva kwouri, Mweya waMambo Mwari unozokutwara nokukuisa kundau yendisikazii; ndizvo apo ndoouya ndamuronzera Ahabhi, naye aazokuoni, unozondiuraya, kunyazwi inini muranda wako ndinotya Mambo Mwari kubvira kuutsva hwangu. Mambo wangu aazi kuronzerwa here ngeizvo zvendakaita ngemazuva apo Jezebheri paakauraya vaprofeti vaMambo Mwari, ngenjira yendakavafisha ndiyo mubako, ndechivaburira chingwa nemvura? Asi zvino unoti, ‘Enda uronzere mambo wako kuti, ringira Erija waa pano;’ ngegwinyiso unozondiuraya.” Erija wakati, “Kudai ngezvaanopona Mambo Mwari wehondo, uwo wendinoema pamberi pake, ngegwinyiso ndinodzionisa kwaari nyamashi.” Ndizvo Obhadhia wakaenda kooshongana naAhabhi, akamuronzera; naAhabhi wakaenda kooshongana naErija. Naapo Ahabhi aona Erija, Ahabhi wakati kwaari, “Ndiwe here, mutambudzi waIsuraeri?” Wakapingura echiti, “Andizi kutambudza Isuraeri, asi ndiwe nevemhatso yababa ako, ngokuti mwakasiya mipango yaMambo Mwari, kuteera miedzaniso yaBhaari. Ndizvo zvino, ndiunganidzire veshe vaIsuraeri paMutunhu Kharmeri, vaprofeti veshe vaBhaari mazana marongomuna namakumi mashanu (450), nevaprofeti vemakwasha mazana marongomuna (400), avo vanodya patafura raJezebheri.” Ndizvo Ahabhi wakatuma vanhu kuvana vaIsuraeri veshe, akavaunganidza pamwepo vaprofeti padera poMutunhu Kharmeri. Erija zvino wakauya kunevanhu veshe, wakati, “Munozogara mukuwo wakaitawani pakati pemipinimidzo miiri? Kuti Mambo Mwari ari Mwari, muteerenyi; asi kuti ari Bhaari, zvino muteererenyi.” Vanhu avazi kumupingura neizwi. Zvino Erija wakati kunevanhu veshe, “Inini, eya, inini ndega ndasara ndiri muprofeti waMambo Mwari; asi vaprofeti vaBhaari vamuna mazana marongomuna nemakumi mashanu (450). Ngavatipe mikono miiri; ngavadzitsanangurire mukono umwe, vautematema kuita zvigurwa, vauise padera pehuni, vasaisa muriro pashi padzo; neniwo ndinozonasira mukono umweni, ndechiuisa padera pehuni, ndisikaisiwo muriro. Zvino mukumbire ngezina rechimwari chenyu, neni ndinozokumbira ngezina raMambo Mwari; naMwari uwo unozopingura ngomuriro, ngegwinyiso ndiye Mwari.” Vanhu veshe vakapingura vechiti, “Zvanasa kuronzwa!” Zvino Erija wakati kunevaprofeti vaBhaari, “Tsanangurai pachenyu mukono umwe, muunasirire kutanga, ngokuti muri vazhinji; zvino mukumbire ngezina rechimwari chenyu, asi musaisa muriro pashi pawo.” Ndizvo vakatora mukono wakapuwa kwevari, vakaunasirira, vakakumbira ngezina raBhaari kubvira mangwanani metsa masikati vechiti, “A Bhaari, tipingure!” Asi kwaiya kusina izwi haro, nokuti mupinguro. Vakanyandukira padera pearita rakaakwa. Masikati Erija wakavaitira jee echiti, “Zhambararai! Ngegwinyiso chimwari; pamweni chinopinimidza, nokuti chakabatika, nokuti chiri murwendo, nokuti pamweni chakaata, chinotama kumuswa.” Zvino vakazhambarara kakurutu, vechidzicheka ngemapanga nemikhondo kudai ngemishuma yavo, metsa ngazi yabuda padera pavo. Masikati makuru apera, vakaprofeta metsa mukuwo wokupisha mudiro wemadeekoni, asi kwaiya kusina neizwi haro, nokuti mupinguro, nokuti unopurutana. Zvino Erija wakati kunevanhu veshe, “Kwedzerai kwendiri,” nevanhu veshe vakakwedzera kwaari. Kutanga wakanasirira arita raMambo Mwari, raiya rakaputsirwa pashi. Erija wakatora mapuwe gumi namairi, kudai ngouwandu hwevana vaJakobe, rakauya kwaari izwi raMambo Mwari rechiti, “Isuraeri ndiro rinozoita zina rako.” Ngemapuwe awo wakaaka arita ngezina raMambo Mwari. Zvino wakatsa mugero unotendenedza arita, unokwanisa kutwara maritha emvura gumi nemarongomuna. Zvino wakaronga huni, akatematema mukono, akauisa padera pehuni. Wakati, “Dzadzai mabiya marongomuna emvura, muidururire padera pomudiro wokupisha, nepadera pehuni.” Zvino wakati, “Itai izvi kairi,” vakazviita ngokwechipiri. Akatizve, “Itai ngokwechitatu;” navo vakazviita kwechitatu. Ndizvo mvura yakaerera kutendenedza arita, yakadzadzawo mugero ngemvura. Ngomukuwo wokupira mudiro wemadeekoni, Erija muprofeti wakakwedzera pasinde, wakati, “A Mambo Mwari, Mwari waAbrahama, waIsaka nowaIsuraeri, ngaakuziikanwe nyamashi kuti iwewe uri Mwari waIsuraeri, nokuti inini ndiri muranda wako, nokuti ndaita izvi zveshe ngeizwi rako. Ndipingure, A Mambo Mwari, ndipingure kuti ava vanhu vazie kuti iwewe Mwari uri Mambo Mwari, nokuti watenderudzazve mwoyo yavo kwouri.” Zvino muriro waMambo Mwari wakadzaka, wakapedza mudiro wokupisha, huni, mapuwe, bukuta nemvura yaiya mumugero. Naapo vanhu veshe vazviona, vakawa pashi ngehope dzavo, vakati, “Mambo Mwari ngegwinyiso ndiye Mwari; Mambo Mwari ngegwinyiso ndiye Mwari.” Erija wakati kwevari, “Batai vaprofeti vaBhaari, musarekera naumwe wavo kuti apone.” Zvino vakavabata; naErija wakavaunza kurwizi rinozwi Kishoni, wakavaurayapo. Erija wakati kunaAhabhi, “Zvino kwira, idya nokumwa; ngokuti chiripo chaungu chemvura yakawanda inoerera.” Ndizvo Ahabhi wakakwira koodya nokumwa. Erija wakakwira padera poMutunhu Kharmeri, wakadzigwadamisa pashi pamavhu, wakatsikitsira hope yake pakati pemabvi ake. Wakati kunomuranda wake, “Kwira zvino, uringire kuruandhle.” Wakakwira, wakaringira, akati, “Akuna chiro.” Zvino wakati, “Hwirirazve, metsa wakwira mikuwo minomwe.” Ngomukuwo wechinomwe wakati, “Ringira, gore doko risikazi kukura kupinda nyara yomunhu rinokwira kubva kuruandhle.” Zvino wakati, “Kwira, uronzere Ahabhi kuti, ‘Sungira ngoro yako udzake, kuti usazobatwa ngemvura.’ ” Ngomukuwo mudoko denga rakasvipa ngemakore nedutu; kwaiyapo mvura yakakura. Ahabhi wakahamba ari mungoro yake, wakaguma Jezireeri. Asi nyara yaMambo Mwari yaiya padera paErija, naye wakasungisa chiunu chake, wakarumba kupindira Ahabhi, wakaguma pamusiwo waJezireeri. Ahabhi wakaronzera Jezebheri izvo zveshe zvaakaita Erija, nokuuraya kwaakaita vaprofeti ngeshoti. Zvino Jezebheri wakatuma nhumwa kunaErija echiti, “Ndizvo zvimwari ngazviite kudaro kwendiri nokupinda, kuti ndisikazoiti kuti kupona kwako kudai ngoumwe waavo, usati waguma mukuwo uno mangwani.” Zvino wakatyiswa; wakamiruka, akatiza kuti adziponese, akaguma Bheerishebha raJudha, wakasiyapo muranda wake. Asi iye pachake wakahamba muhambo wezuva rimwe mushango, wakaguma, akagara pashi pomuti unoitwa mutsvairo. Wakadzikumbirira kuti afe echiti, “Zvakwana; zvino, A Mwari, dusa kupona kwangu, ngokuti andizi kururama kupinda madzibaba angu.” Zvino wakaata pashi pomuti unoitwa mutsvairo. Ngokukasira, ngirosi yakamugwama, yakati kwaari, “Muka, udye.” Wakaringira, naapo raiyapo khekhe rakabikwa pamasimbe, nejomeya remvura dera kwesoro rake. Wakadya nokumwa, wakauya kuatazve. Ngirosi yaMambo Mwari yakauyazve ngokwechipiri, yakamugwamazve yechiti, “Muka, udye, ngokuti muhambo wako mukuru.” Wakamuka, akadya nokumwa; wakahamba ngesimba roukwo kudya mazuva makumi marongomuna, nousiku makumi marongomuna, kuenda kumutunhu waMwari unozwi Horebhi. Wakaguma pandaupo paiya nebako, wakagaremwo usiku hweshe. Zvino, izwi raMambo Mwari rakauya kwaari rechiti, “Unoitenyi pano, Erija?” Wakati, “Ndaiya ndechishandira yaamho Mambo Mwari, Mwari wehondo; ngokuti vana vaIsuraeri vakarasha chitenderano chako, vakaputsira pashi maarita ako, vakauraya vaprofeti vako ngeshoti. Inini, inini ndega ndini ndasara; navo vanotsvaka kundiuraya.” Wakati, “Buda, ueme padera pomutunhu pamberi paMambo Mwari; ringira, Mambo Mwari uchapinda ngeapapo.” Dutu guru rinesimba rakamwesa mitunhu, rechiputsa mapuwe kuita zvigurwa pamberi paMambo Mwari; asi Mambo Mwari waiya asirimwo mudutu. Ngesure kwedutu kwaiyapo kuzungunyika kwenyika; asi Mambo Mwari waiya asirimwo mukuzungunyika kwenyika. Ngesure kwokuzungunyika kwenyika, kwakauya muriro; asi Mambo Mwari waiya asirimwo mumuriro. Ngesure kwomuriro kwakauya maungira ekaizwi kadoko. Naapo Erija azwa, wakafukidza hope yake ngechokufuka chake, wakabuda, akaema pamusiwo webako. Zvino rakauya izwi kwaari rechiti, “Unoitenyi pano, Erija?” Wakati, “Ndaiya ndechishandira yaamho Mambo Mwari, Mwari wehondo; ngokuti vana vaIsuraeri vakarasha chitenderano chako, vakaputsira pashi maarita ako, vakauraya vaprofeti vako. Inini, inini ndega ndini ndasara; navo vanotsvaka kupona kwangu, kundiuraya.” Zvino Mambo Mwari wakati kwaari, “Enda, uhwirire ngenjira yako inoenda ngomushango reDhamasekusi; naapo wagumayo, unodzodza Hazaeri kuita mambo weAramu. Zve Jehu mukororo waNimishi unozomudzodza kuita mambo waIsuraeri; naErisha mukororo waShafati weAbherimehora unozomudzodza kuita muprofeti pandau yako. Kunyazwi ndiani uwo unopokonyoka kubva kushoti yaHazaeri, unozourawa ndiJehu; nayezve unopokonyoka kubva kushoti yaJehu, unozourawa ndiErisha. Asi ndichasiya vakasara vari kwendiri muIsuraeri makumi emazana manomwe (7,000), avo vasikazi kugwadama ngemabvi avo kunaBhaari, nemiromo yavo yeshe isikazi kumuchingamidza ngomuromo.” Ndizvo ngokudaro wakabvapo, wakaona Erisha mukororo waShafati, echirima ngen'ombe dzemajoka gumi namairi pamberi pake, iye waiya nedzegumi nambiri. Erija wakapinda ngepasinde pake, wakakandira bhachi rake padera pake. Wakasiya kabi dzake, wakarumba kuteera Erija, akati, “Nditendere, ndinokupota, kuti ndiende ndivhaise baba angu namai, naapo ndinozokuteera.” Zvino Erija wakati kwaari, “Hwirirazve; ndaitenyi kwouri?” Wakahwirira sure kubva kwaari, wakatora kabi mbiri, wakadziuraya; akabika nyama ngezviro zvinoshandiswa ngen'ombe, wakapa kuvanhu navo vakadya. Naapo wakateera Erija, akamushandira. Bhenihadhadhi mambo weAramu wakaunganidza hondo yake yeshe; waidetserwa ngemadzimambo amweni makumi matatu namairi, pamwepo nemahachi nengoro. Wakakwira akakomba Samaria, akarwisana naro. Zvino wakatuma nhumwa kudhorobha kunaAhabhi mambo waIsuraeri echiti, “Unoronza izvi Bhenihadhadhi: Sirivha yako nomukore wako ngezvangu; vakadzi vakozve nevana vakanaka ngevangu.” Mambo waIsuraeri wakapingura echiti, “Kudai ngokuronza kwako, makosi wangu mambo, ndiri wako nazvo zveshe zvendinazvo.” Nhumwa dzakauyazve dzechiti, “Unoronza izvi Bhenihadhadhi: Kunyazwi ndatuma kwouri ndechiti, ‘Unozondipa sirivha yako nomukore wako, nevakadzi vako nevana vako;’ zvakanyadaro ndinozotuma varanda vangu kwouri mangwani ngouyu mukuwo, navo vanozotsvakisisa mumhatso yako nemhatso dzevaranda vako; kunozoitika kuti zveshe zvinozodakadza madziso avo, vanozozvibata munyara dzavo, vazvitore.” Zvino mambo waIsuraeri wakadaidza vakuru veshe venyika echiti, “Ringirai zvino! Wonai munhu uyu kuti unoita matsvakirenyi kushata; ngokuti wakatuma vanhu kwendiri kutora vakadzi vangu, vana vangu, sirivha yangu nomukore wangu; neni andizi kumurambira.” Zvino veshe vakuru nevanhu vakati kwaari, “Usamupurutana, nokuti kumutendera.” Ndizvo wakapingura nhumwa dzaBhenihadhadhi, “Ronzerai makosi wangu mambo kuti zveshe zvowakaronza kutanga kunomuranda wako, eya, ndinozozviita, asi ichi chiro andizochiiti.” Nhumwa dzakaenda dzakamuronzera mazwi aya. Bhenihadhadhi wakatumazve nhumwa kwaari echiti, “Zvimwari ngazviite kwendiri nokupinda uku, kudai bukuta reSamaria rechizokwana tsimba dzevanhu veshe vanonditeera.” Mambo waIsuraeri wakapingura echiti, “Muronzerenyi, uwo unopfeka zvokurwa ndizvo asadziganzisa kudai ngouwo unozvikhumura.” Naapo Bhenihadhadhi azwa aya mashoko, zvino waiya echimwa, iye namadzimambo mumatende, wakati kuvaranda vake, “Pakatirai zvokurwa.” Navo vakazvipakatira kurwisana namadhorobha. Zvino muprofeti umweni wakauya kunaAhabhi mambo waIsuraeri echiti, “Unoronza izvi Mambo Mwari: Waimboona here hondo yakakura kudai? Ringira, ndinozoipira munyara dzako nyamashi; newe unozozia kuti ndini Mambo Mwari.” Ahabhi wakati, “Ndianani?” Naye wakati, “Unoronza izvi Mambo Mwari, ngevamuna vatsva nduna dzemitunhu yenyika.” Zvino wakati, “Ndiani unozotanga kurwa?” Naye wakapingura, “Ndiwe.” Zvino wakaerenga vamuna vatsva nduna dzemitunhu yenyika, vaiya mazana mairi nemakumi matatu navairi (232), ngesure kwavo wakaerenga vanhu veshe, vaIsuraeri, makumi emazana manomwe (7,000). Vakabuda masikati makuru, apo Bhenihadhadhi waiya echimwa aradza mumatende, iye namadzimambo makumi matatu namairi vaimudetsera. Vamuna vatsva nduna dzemitunhu yenyika vakatanga kuenda. Bhenihadhadhi wakatuma vanhu vakamuronzera vechiti, “Varipo vanhu vabuda kubva Samaria.” Wakati, “Kudai vechiuya ngokunyarara, vabatei vechipona; kudai vechiuya koorwa, vabatei vechipona.” Asi vamuna vatsva nduna dzemitunhu yenyika vakabuda kubva mudhorobha, nehondo iyo yakavateera. Umwe ngaumwe wakauraya munhu wake; nevaAramu vakatiza; nevaIsuraeri vakavarumbirira, asi Bhenihadhadhi mambo weAramu wakapokonyoka akagadha hachi, pamwepo nevagadhi vemahachi. Mambo waIsuraeri wakaenda, akabaya mahachi nengoro, akauraya vaAramu ngokuuraya kukuru. Zvino muprofeti wakauya kunamambo waIsuraeri, akati kwaari, “Uya, udzigwinyise, ungwarire izvo zvounoita; ngokuti pachirimo chinouya, mambo weAramu unozouya koomuchakata.” Varanda vamambo weAramu vakati kwaari, “Zvimwari zvavo zviri zvimwari zvemitunhu; ndizvo vanesimba kupinda isusu. Asi ngatirwe navo pakaterama, ngegwinyiso tinozovanyisa. Itawo ichi chiro, dusa madzimambo eshe, munhu weshe kubva kundau yake, uise nduna kundau dzavo. Uerenge hondo kudai ngehondo yowakarashikirwa ndiyo, hachi ngehachi, ngoro ngengoro; zvino tinozorwa navo mwakaterama, ngegwinyiso tinozovanyisa.” Wakapurutana izwi ravo, wakaita kudaro. Muchirimo, Bhenihadhadhi wakaerenga vaAramu, wakakwira Afeki koorwa nevaIsuraeri. Nevana vaIsuraeri vakaerengwa nokupuwa zvokudya, vakabuda koorwa navo; navana vaIsuraeri vakaemesa matende vakaringirana pamberi pavo kudai ngemitanga miiri yezvimbudzi; asi vaAramu vakadzadza nyika. Munhu waMwari wakauya, akaereketa namambo waIsuraeri, akati, “Unoronza izvi Mambo Mwari: Ngokuti vaAramu vakati, ‘Mambo Mwari ndiMwari wemitunhu, asi aari Mwari akadi wemabani,’ ndizvo ndinozopira iyi hondo huru yeshe munyara dzako, nemwi munozozia kuti ndini Mambo Mwari.” Vakaemesa matende avo akaringirana mazuva manomwe. Zvino ngezuva rechinomwe vakarwisana; vaIsuraeri vakauraya vanhu veAramu zana remakumi emazana (100,000) evanhu varwi vehondo vaihamba ngetsoka, ngezuva rimwe. Avo vakasara vakatizira Afeki mudhorobha, naapo rukumbati rwakawira padera pevanhu makumi mairi nemanomwe emakumi emazana (27,000), veavo vakasara. Bhenihadhadhi wakatiza, akapotera mudhorobha kukamera repakati koohwara. Varanda vake vakati kwaari, “Ringira, zvino takazwa kuti madzimambo aIsuraeri madzimambo anenyasha. Titendere, tapota, kuti tisimire machira emasaka muzviunu zvedu, nemapote padera pemasoro edu, tibude kuenda kunamambo waIsuraeri; pamweni unozoponesa kupona kwako.” Ndizvo vakasimira machira emasaka muzviunu zvavo, vakaisa mapote mumasoro avo, vakauya kunamambo waIsuraeri vechiti, “Muranda wako Bhenihadhadhi unoronza izvi, ‘Ndinokupota, kuti ndipone.’ ” Naye wakati, “Uchapona here? Mukoma wangu.” Zvino vamuna ava vakanasa kungwara kuti chiripo chinobva kwaari, navo vachibata ngokukasira, vakati, “Eya, mukoma wako Bhenihadhadhi.” Zvino wakati, “Endai mumuunze pano.” Ndizvo Bhenihadhadhi wakabuda kuuya kwaari, iye wakaita kuti akwire naye mungoro. Bhenihadhadhi wakati kwaari, “Madhorobha akatorwa ndibaba angu kubva kunababa ako, ndinozoahwirinza; newe unozodziitira mapato muDhamasekusi, kudai ngezvaakaita baba angu muSamaria.” Ahabhi wakati kwaari, “Ndinozokuendesa ngezvitendero izvi.” Ndizvo wakaita chitenderano naye, wakamuendesa. Ngokupanga kwaMambo Mwari nhengo yechikwata chevaprofeti yakati kunoumweni wake, “Ndichaye, ndinokupota!” Asi munhu wakaramba kumuchaya. Zvino wakati kwaari, “Ngokuti auzi kupurutana izwi raMambo Mwari, ringira, ngomukuwo wounozobva kwendiri, mhondoro inozokuuraya.” Ngokukasira apo abva kwaari, mhondoro yakamuuraya. Zvino wakaona munhu umweni, wakati kwaari, “Ndichaye, ndinokupota!” Nomunhuwo wakamuchaya, naye wakamuremadza. Zvino muprofeti wakaenda, akaemera mambo munjira, akadzifisha ngokusunga mucheka muhope yake. Naapo mambo echipinda, wakadaidzira kunamambo echiti, “Muranda wako wakaenda koorwa; ringira, munhu wakapauka parutii wakaunza munhu kwendiri echiti, ‘Ngwarira uyu munhu, kudai echizotamika, naapo kupona kwako kunozodai ngokwake, nokuti unozoripa ngetarenta resirivha.’ Naapo inini muranda wako ndaiya ndechibatika apo naapo, wakaenda.” Mambo waIsuraeri wakati kwaari, “Ndizvo kutongwa kwako kunozodaro, ngokuti iwewe wemene wakachigura.” Zvino wakakasira kudusa mucheka muhope mwake. Mambo waIsuraeri wakamuzia kuti waiya umwe wevaprofeti. Zvino wakati kwaari, “Unoronza izvi Mambo Mwari: Ngokuti iwewe wakarekera munhu kubva munyara dzako, wendakaemesera kuti aurawe, ndizvo kupona kwako kunozowa pandau yake, nevanhu vako vanozowa pandau yavanhu vake.” Mambo waIsuraeri wakaenda kumhatso yake echiremerwa nokusikadakara, wakaguma Samaria. Ngesure kweizvi zviro, zvinoteera zvakaitika: Nabhothi muJezireeri waiya nomunda wemivhini waiya muJezireeri, pasinde nengome yaAhabhi mambo weSamaria. NaAhabhi wakati kunaNabhothi, “Ndipe munda wako wemivhini, kuti uite wangu ndisime muriwo, ngokuti uri pasinde pemhatso yangu; ndinozokupa munda wemivhini wakapinda kunaka pandau pouwo, nokuti dai zvechioneka zvakanaka kwouri, ndinozokupa mutengo wawo wemare.” Asi Nabhothi wakati kunaAhabhi, “Mwari ngaarambidze kuti ndisapa nhaka yemadzibaba angu kwouri.” Ahabhi wakapotera mumhatso yake echiremerwa, asikadakari ngendaa yeizwi raakaereketa Nabhothi muJezireeri kwaari; ngokuti waiya akati kwaari, “Andizokupi nhaka yemadzibaba angu.” Ndizvo wakaata pashi pamubhedhi wake, wakafuratira hope yake, aazi kudya nechokudya. Jezebheri mukadzi wake wakauya kwaari, akati kwaari, “Mwoyo wako unotambudzika kudai ngenyi, kuti audi kudya?” Naye wakati kwaari, “Ngokuti ndakaereketa kunaNabhothi muJezireeri, ndikati kwaari, ‘Ndipe munda wako wemivhini, nditenge ngemare; nokuti wechida ndinozokupa munda umweni wemivhini pandau pawo;’ asi wakapingura echiti, ‘Andizokupi munda wangu wemivhini.’ ” Mukadzi wake Jezebheri wakati kwaari, “Andiwepi here mutongi, mambo waIsuraeri? Miruka, udye kudya, kuti mwoyo wako udakare; inini ndinozopa munda wemivhini waNabhothi muJezireeri kwouri.” Ndizvo wakanyora tsamba ngezina raAhabhi, wakaisa chinamatiso chaAhabi padera padzo, wakatumira tsamba idzo kuvakuru, nokunevakuru vaigara mudhorobha rake raaigara Nabhothi. Wakanyora mutsamba echiti, “Emesa kuera kudya, mwechikudza Nabhothi pakati pendau iri padera mukati mwevanhu veshe. Muemese vanhu vairi madzongoni pamberi pake, vechiita zvapupu ndiye kuti, ‘Iwewe wakatuka Mwari namambozve.’ Naapo munozomutora, mumuponde ngemapuwe kuti afe.” Vanhu veguta iro, vakuru nevatungamiriri, vagari vedhorobha rake vakaita kudai ngezvaakatuma kwevari Jezebheri, nokudai ngezvaiya zvakanyorwa mutsamba dzakatumirwa kwevari. Vakaemesa kuera kudya, vakaemesa Nabhothi pandau iri padera mukati mwevanhu. Vakauya vanhu vairi, madzongoni, vakagara pamberi pake; nevanhu ava madzongoni vakaitira ndaa Nabhothi pamberi pevanhu vechiti, “Nabhothi wakatuka Mwari namambo.” Ndizvo vakamubudisa kubanze kwedhorobha, vakamuponda ngemapuwe, wakafa. Navo vakatumira izwi kunaJezebheri vechiti, “Nabhothi wapondwa ngemapuwe, wafa.” Ngokukasira apo Jezebheri azwa kuti Nabhothi waiya apondwa ngemapuwe, nokuti wafa, Jezebheri wakati kunaAhabhi, “Miruka, uende utore munda wemivhini waNabhotti muJezireeri, uwo waairamba nawo kutengesa kwouri ngemare; ngokuti Nabhothi aachaponi, asi wafa.” Naapo Ahabhi azwa kuti Nabhothi waiya afa, Ahabhi wakamiruka kudzaka kumunda wemivhini waNabhothi muJezireeri kooutora. Zvino izwi raMambo Mwari rakauya kunaErija muThishibhe rechiti, “Miruka, udzake kooshongana naAhabhi mambo waIsuraeri, uri muSamaria; ringira, uri mumunda wemivhini waNabhoti iyo kwaakadzaka kooutora. Unozoereketa kwaari wechiti, ‘Unoronza izvi Mambo Mwari: Wakauraya here, nokutorazve?’ Newe unozoereketa kwaari wechiti, ‘Unoronza izvi Mambo Mwari: Pandau yedzakanambura imbwa ngazi yaNabhothi, naapo imbwa dzinozonamburawo ngazi yako.’ ” Ahabhi wakapingura Erija echiti, “Wazondiona, iwewe gaa rangu here?” Naye wakapingura, “Eya, ndakuona, ngokuti iwewe wakadzitengesa kuita zvakashata mukuona kwaMambo Mwari. Ringira, ndinozounza kushata padera pako, ndinozopedza mibarirwana yako, ndechiuraya kubva kunaAhabhi vamuna veshe, vakasungwa nevakasunhurika, vakasara muIsuraeri. Ndinozoita kuti mhatso yako idai ngemhatso yaJerobhoamu mukororo waNebhati, nokudaizve ngemhatso yaBhaasha, mukororo waAhija, ngendaa yokumusa kwewakamusa ushungu hwangu ndikwo, nokuita kuti vaIsuraeri vashaishe. Zve, ngendaa yaJezebheri, Mambo Mwari wakaereketa ndiye echiti, ‘Imbwa dzinozodya Jezebheri parukumbati rweJezireeri.’ Nouwo weshe uri waAhabhi unozofa mudhorobha unozodyiwa ngembwa, nouwo unozofa mumashango unozodyiwa ngeshiri dzomudenga.” Ngegwinyiso paiya pasina munhu wakadai ndiAhabhi, uwo wakadzitengesa kushanda zvakashata mukuona kwaMambo Mwari, uwo wakamuswa ngomukadzi wake Jezebheri. Wakaita zvinonyangadza ngokuteera miedzaniso yokudira, kudai ngokuita kweshe kwavaAmori, vaakadzinga Mambo Mwari kubva pamberi pevana vaIsuraeri. Naapo Ahabhi azwa mazwi aya, wakabaura zvokufuka zvake, akadzipfekesa machira emasaka, akaera kudya, akaata mumasaka, echidzipfaisa. Zvino izwi raMambo Mwari rakaguma kunaErija muThishibhe rechiti, “Waona here njira yaadzipfaisa ndiyo Ahabhi pamberi pangu? Ngokuti wadzipfaisa pamberi pangu, andizounzi kushata ukwo ngemazuva ake; asi ngemazuva omukororo wake ndinozounza kushata ukwo padera pemhatso yake.” Kwakapera makore matatu kusina kurwa pakati pevaAramu navaIsuraeri. Asi ngegore rechitatu Jehoshafati mambo waJudha wakadzaka kunamambo waIsuraeri. Mambo waIsuraeri wakati kunevaranda vake, “Amuzii here kuti Ramothigireadhi ngeredu, asi isusu takanyarara, atizi kuritora kubva munyara yamambo waAramu?” Wakati kunaJehoshafati, “Unotenda here kuenda neni koorwa hondo paRamothigireadhi?” Jehoshafati wakati kunamambo waIsuraeri, “Inini ndakadaiwo ndiwe, vanhu vangu vakadai ngevako, nemahachi angu akadai ngaako.” Asi Jehoshafati wakati kunamambo waIsuraeri, “Bvunza, ndapota, kuzwa izwi raMambo Mwari nyamashi.” Zvino mambo waIsuraeri wakaunganidza vaprofeti pamwepo, vaida kukwana mazana marongomuna (400), wakati kwevari, “Ndingaenda here koorwa neRamothigireadhi, nokuti ndirekere?” Vakati, “Kwirayo, ngokuti Mambo Mwari unozoripira munyara yamambo.” Asi Jehoshafati wakati, “Akuna here muprofeti umweni waMambo Mwari ngokubanze kwaava, tibvunze kwaari?” Mambo waIsuraeri wakati kunaJehoshafati, “Uchiripo munhu umwe, Mikhaia mukororo waImira, uwo wetingabvunza ndiye kunaMambo Mwari; asi ndinomuzonda, ngokuti aaprofeti zviro zvakanaka ndini, asi zvakashata.” Jehoshafati wakati, “Mambo asaronza chiro kudaro.” Zvino mambo waIsuraeri wakadaidza muranda wake, akati, “Ngaakasire kuuya pano Mikhaia mukororo waImira.” Zvino mambo waIsuraeri naJehoshafati mambo waJudha vaiya vakagara veshe pamadendemaro avo, vakapfeka zvokufuka zvavo, vari pambuwa pamusiwo weSamaria. Vaprofeti veshe vakaprofeta pamberi pavo. Zedhekia mukororo waKhenaana wakadzinasirira nyanga dzesimbi; naye wakati, “Unoronza izvi Mambo Mwari: Ngeidzi unozotunga vaAramu metsa vapedzwa.” Veshe vaprofeti vakaprofeta zvimwezvo vechiti, “Kwira uende Ramothigireadhi unyise; ngokuti Mambo Mwari unozoripa munyara yamambo.” Nhumwa iyo yakatumwa koodaidza Mikhaia yakaereketa naye yechiti, “Ringira zvino, mazwi evaprofeti akapangidzira zvakanaka kunamambo ngokuereketa kunotodzana; mazwi ako, ndapota, ngaadai ngoumwe wavo, uerekete izvo zvakanaka.” Asi Mikhaia wakati, “Kudai ngezvaanopona Mambo Mwari, izvo zvaanoronza Mambo Mwari kwendiri, ndizvo zvendinozoereketa.” Naapo paakauya kunamambo, mambo wakati kwaari, “Mikhaia, kwakanaka here kuti tikwire koorwa Ramothigireadhi, nokuti tisaenda?” Naye wakamupingura kuti, “Eya, enda, unonyisa; ngokuti Mambo Mwari unozoripa munyara yamambo.” Asi mambo wakati kwaari, “Kunozoita mikuwo minganai yendinozokupanga kuti undironzere zvinegwinyiso zvega ngezina raMambo Mwari?” Naye wakati, “Ndakaona vaIsuraeri veshe vakapararira pamitunhu kudai ngemakwai asina muushi; naMambo Mwari wakati, ‘Avana mungwariri, ngavapetuke munhu weshe kumhatso yake.’ ” Mambo waIsuraeri wakati kunaJehoshafati, “Andizvopi zvendakaronza here kuti aazoprofeti zvakanaka ndini, asi zvakashata?” Zvino Mikhaia wakati, “Ndizvo izwai izwi raMambo Mwari: Ndakaona Mambo Mwari akagara padendemaro rake roumambo, nehondo yeshe yomudenga yakaema pasinde pake ngokumudyo kwake nokumuoshwe. NaMambo Mwari wakati, ‘Ndiani unozonyengerera Ahabhi kuti akwire Ramothigireadhi aurawe?’ Zvino umwe wakamupingura ngenjira iyi, noumweni wakamupingura ngenjira imweni, metsa kwakabudapo mweya, wakaema pamberi paMambo Mwari, ukati, ‘Inini ndinozomunyengerera.’ Mambo Mwari wakati kwaari, ‘Ngenjiranyi?’ Wakati, ‘Ndinozobuda, ndiite mweya wokunyepa pamiromo yeshe yevaprofeti vake.’ Zvino Mambo Mwari wakati, ‘Iwewe unozomunyengera, unozobudirira; buda, uite kudaro.’ Ndizvo ringira, Mambo Mwari waisa mweya wokunyepa pamiromo yeava vaprofeti vako veshe; Mambo Mwari wakaereketa zvakashata ndiwe.” Zvino Zedhekia mukororo waKhenaana wakakwira pasinde paMikhaia, wakamuchaya parutsaya echiti, “Mweya waMambo Mwari wakaenda ngenjiranyi kubva kwendiri kooereketa newe?” Mikhaia wakati, “Ringira, unozoona ngezuva rounozoenda koodzifisha mukamera romukati.” Mambo waIsuraeri zvino wakapanga, wakati, “Bata Mikhaia, uhwirire naye kunaAmoni mungwariri wedhorobha, nokunaJoashi mukororo wamambo. Uronze kuti, ‘Izvi ndizvo zvinoronza mambo: Isai uyu munhu mutirongo, umugutise ngokudya nemvura zvakatsonzwa, metsa ndauya mukunyarara.’ ” Mikhaia wakati, “Kudai ukapetuka mukunyarara, Mambo Mwari aazi kuereketa kubudikidza ndini.” Naye wakati, “Izwai imwimwi vanhu mweshe!” Ndizvo mambo waIsuraeri naJehoshafati mambo waJudha vakakwira Ramothigireadhi. Mambo waIsuraeri wakati kunaJehoshafati, “Ndinozoita kuti ndisaziikanwa kuti ndipinde mukurwa; asi iwewe pfeka zvoumambo zvako.” Ndizvo mambo waIsuraeri wakadziitisa kudai ngomunhu nhando, wakapinda mukurwa. Zvino mambo weAramu wakapanga nduna dzake dzengoro dzaiya makumi matatu nembiri echiti, “Musarwa nomunhu mudoko nokuti mukuru, asi irwai namambo waIsuraeri.” Naapo nduna dzengoro dzaona Jehoshafati, dzakati, “Ngegwinyiso ndiye mambo waIsuraeri!” Ndizvo vakapauka kwaari kurwa naye; naJehoshafati wakaboorera. Naapo nduna dzaona kuti waiya asiri mambo waIsuraeri, vakarekera kumurumbirira. Asi munhu umweni wakatera kuposheramwo musee wake, wakafura mambo waIsuraeri ngepaditi rake, ngepanosungirwa ganga utari rake; ndizvo wakati kunomutinhi wengoro yake, “Petudza ngoro sure, unditware kubva kuhondo; ngokuti ndaremadzwa.” Hondo yakarwiwa kakurutu ngeiro zuva, namambo waiya akagara mungoro yake akaringirana navaAramu, wakafa kwabira; nengazi yakaerera kubva kumaronda ake kuenda mukati mwengoro. Zvino zuva rooda kubira kwakazwika kudaidzira mukati mwehondo kwechizwi, “Munhu weshe ngaapararire kuenda kudhorobha rake, nomunhu weshe ngaaende kunyika yake!” Ndizvo mambo wakafa, naye wakaunzwa Samaria. Vakamutsira mambo muSamaria. Vakageza ngoro mugandwa reSamaria; nembwa dzakanambura ngazi yake, mahure akashambamwo mungazi, kudai ngemazwi aakaereketa Mambo Mwari. Zvino mishando imweni yaAhabhi, nazvo zveshe zvaakaita, nemhatso yenyanga dzenzou yaakaaka, nemadhorobha eshe aakaaka, azvizi kunyorwa here muBhuku reMishando yeZuva ngeZuva yeMadzimambo aIsuraeri? Ndizvo Ahabhi wakaata nemadzibaba ake; naAhazia mukororo wake wakatonga pandau yake. Jehoshafati mukororo waAsa wakatanga kutonga padera paJudha mugore rechirongomuna raAhabhi mambo waIsuraeri. Jehoshafati waiya nemakore makumi matatu namashanu apo paakatanga kutonga, naye wakatonga makore makumi mairi namashanu muJerusarema. Zina ramai ake raizwi Azubha, mwanasikana waShirihi. Wakahamba ngenjira dzeshe dzaAsa baba ake; aazi kupauka kubva kwedziri, echiita izvo zvakanaka mukuona kwaMambo Mwari; asi zvakanyadaro, ndau dzakakwirira adzizi kuduswa, nevanhu vakaangira kupira nokupisha mitombo inegwema rakanaka pandau dzakakwirira. Jehoshafati wakaiyana namambo waIsuraeri. Zvino mishando imweni yaJehoshafati, nesimba rake raakapangidzira, nokurwa kwake, azvizi kunyorwa here muBhuku reMishando yeZuva ngeZuva yeMadzimambo aJudha? Naavo vaiita chishaishi cheSodhoma vakasara ngemazuva ababa ake Asa, wakavabvisa munyika. Kwaiya kusina mambo munyika yeEdhomu ngouwo mukuwo; asi nduna ndiyo yaitonga. Jehoshafati wakaita ngarava dzakadai ngedzeTharshishi kuti dziende Ofiri kootora mukore; asi adzizi kuenda, ngokuti ngarava dzakaputsika paEzionigebha. Zvino Ahazia mukororo waAhabhi wakati kunaJehoshafati, “Tendera varanda vangu ngavaende nevaranda vako mungarava,” asi Jehoshafati aazi kutenda. Jehoshafati wakaata nemadzibaba ake mudhorobha raDhavhidha baba ake; Jehoramu mukororo wake wakatonga pandau yake. Ahazia mukororo waAhabhi wakatanga kutonga Isuraeri muSamaria ngegore regumi nemanomwe raJehoshafati mambo waJudha; wakatonga makore mairi padera paIsuraeri. Wakaita zvakashata mukuona kwaMambo Mwari, akahamba ngenjira yababa ake nomunjira yamai ake, nomunjira yaJerobhoamu mukororo waNebhati, uwo wakaita kuti Isuraeri ashaishe. Wakashandira Bhaari, akamudira; akamusira ushungu hwaMambo Mwari, Mwari waIsuraeri, kudai ndizvo zveshe zvaakaita baba ake. Ngesure kwokufa kwaAhabhi, Moabhi wakamukira Isuraeri. Ahazia wakawa pashi ngepafasitera kubva mukamera rake repadera muSamaria, akaata pashi ngokukuwara; wakatuma nhumwa akati kwedziri, “Endai, mubvunze kunaBhaarizebhubhi chimwari cheEkironi kuti, ‘Ndinozopona here kukuwara uku?’ ” Asi ngirosi yaMambo Mwari yakati kunaErija muThishibhe, “Miruka ukwire, ushongane nenhumwa dzamambo weSamaria, uti kwedziri, ‘Ngokuti akuna Mwari muIsuraeri here, hemwoenda koobvunza kunaBhaarizebhubhi chimwari chevaEkironi?’ Ndizvo zvino zvaanoronza Mambo Mwari, ‘Iwewe auzobvi pamubhedhi wako wewakakwira kwouri, asi ngegwinyiso unozofa.’ ” Ndizvo Erija wakaenda. Nhumwa dzakapetuka kunamambo, uwo wakati kwedziri, “Mwapetuka ngenyi?” Dzakati kwaari, “Kwakauya munhu kushongana nesu, akati kwetiri, ‘Endai muhwirire kunamambo uwo wakamutuma, muti kwaari, unoronza izvi Mambo Mwari: Ngokuti akuna Mwari muIsuraeri here, hemunotuma koobvunza kunaBhaarizebhubhi chimwari cheEkironi? Ndizvo auzodzaki kubva pamubhedhi wewakakwira kwouri, asi ngegwinyiso unozofa.’ ” Wakati kwedziri, “Waiya munhu wakaitawani wakauya kooshongana nemwi nokumuronzera zviro izvi?” Navo vakamupingura vechiti, “Waiya munhu unechokufuka chinemviri, akasunga bhande reganda muchiunu chake.” Naye wakati, “NdiErija muThishibhe.” Zvino mambo wakatuma nduna yemakumi mashanu, nevanhu vake makumi mashanu. Yakakwira kuenda kunaErija, uwo waiya akagara padera pomutunhu. Yakaereketa kwaari, “Iwewe munhu waMwari, mambo unoti, ‘Dzaka.’ ” Asi Erija wakapingura, echiti kunenduna yemakumi mashanu, “Kudai ndiri munhu waMwari, ngaudzake muriro kubva mudenga ukuuraye iwewe nevanhu vako makumi mashanu.” Zvino muriro wakadzaka wechibva mudenga, ukauraya nduna nevanhu vayo makumi mashanu. Zve, mambo wakatuma kwaari nduna imweni nevanhu vayo makumi mashanu. Yakakwira nayo ikati kwaari, “A, munhu waMwari, unopanga izvi mambo, ‘Kasira udzake.’ ” Asi Erija wakavapingura, akati kwevari, “Kudai ndiri munhu waMwari, muriro ngaudzake kubva mudenga ukuuraye iwewe nevanhu vako makumi mashanu.” Zvino muriro waMwari wakadzaka wechibva mudenga, ukauraya nduna nevanhu vayo makumi mashanu. Mambo wakatumazve ngokwechitatu nduna nevanhu vayo makumi mashanu. Ndizvo nduna yechitatu yemakumi mashanu yakakwira, yakawa ngemabvi ayo pamberi paErija, yakakumbira kwaari yechiti, “A, munhu waMwari, ndinokupota kuti kupona kwangu, nokweava makumi mashanu kuoneke kunemutengo mukuru mukuona kwako. Ringira, muriro wakadzaka wechibva mudenga, ukauraya nduna mbiri nevanhu vadzo nemakumi mashanu avo vokutanga; asi zvino kupona kwangu ngakuoneke kwouri kunomutengo mukuru mukuona kwako.” Ngirosi yaMambo Mwari yakati kunaErija, “Dzaka naye; usamutya.” Ndizvo wakamiruka, wakadzaka naye kunamambo, naye wakati kwaari, “Unoronza izvi Mambo Mwari: Ngokuti wakatuma nhumwa koobvunza kunaBhaarizebhubhi chimwari chaEkironi, ngokuti akuna Mwari muIsuraeri here wokuti ubvunze izwi rake? Ndizvo auzodzaki kubva pamubhedhi wewakakwira kwouri, asi ngegwinyiso unozofa.” Ndizvo wakafa kudai ngezvarakaronza izwi raMambo Mwari raakaereketa Erija. Jehoramu wakatonga pandau yake ngegore rechipiri raJehoramu mukororo waJehoshafati mambo waJudha, ngokuti Ahazia waiya asina mukororo. Zvino mishando imweni yaAhazia yaakaita, aizi kunyorwa here muBhuku reMishando yeZuva ngeZuva yeMadzimambo aIsuraeri? Zvino apo Mambo Mwari ooda kutora Erija kuenda mudenga ngechipupuri, Erija naErisha vaiya munjira kubva Girigari. Erija wakati kunaErisha, “Gara pano, ndinokupota; ngokuti Mambo Mwari wakandituma kuenda Bhetheri.” Asi Erisha wakati kwaari, “Kudai ngezvaanopona Mambo Mwari, newe wechipona pachako, andizokusii.” Ndizvo vakadzaka kuenda Bhetheri. Vakororo vevaprofeti vaiya muBhetheri vakabuda kooshongana naErisha, vakati kwaari, “Unozia here kuti Mambo Mwari unozotora mambo wako kubva kwouri nyamashi?” Naye wakati, “Eya, ndinozia; nyararai.” Erija wakati kwaari, “Erisha, gara pano, ndinokupota; ngokuti Mambo Mwari wakandituma Jerikho.” Asi wakati, “Kudai ngezvaanopona Mambo Mwari, newe wechipona pachako, andizokusii.” Ndizvo vakauya Jerikho. Vakororo vevaprofeti vaiya muJerikho vakauya kooshongana naErisha, vakati kwaari, “Unozia here kuti Mambo Mwari unozotora mambo wako kubva kwouri nyamashi?” Naye wakati, “Eya, ndinozia; nyararai.” Zvino Erija wakati kwaari, “Gara pano, ndinokupota; ngokuti Mambo Mwari wandituma Jorodhani.” Asi wakati, “Kudai ngezvaanopona Mambo Mwari, newe wechipona pachako, andizokusii.” Ndizvo vairi ava vakaenda mberi. Vanhu makumi mashanu vevakororo vevaprofeti vakaendawo, vakaema kuretu kubva kwevari; veshe vaiya vakaema pasinde peJorodhani. Zvino Erija wakatora bhachi rake, akaripeta, wakachaya mvura, nayo yakaparadzana ngepakati; ndizvo avo vairi vakaambuka pamavhu akaoma. Naapo vaambuka, Erija wakati kunaErisha, “Kumbira icho chendingakuitira ndisati ndatorwa kubva kwouri.” Erisha wakati, “Ndinokupota, nditendere ndigare nhaka yechikoaniswa chomweya wako chiitwe kairi kwendiri.” Wakapingura akati, “Wakumbira chiro chakakonza; asi kuti ukandiona apo ndootorwa kubva kwouri, kunozoitika kuda ngezvewakumbira; asi kuti ukasaandioni, azvizoitiki.” Zvino vachaangira kuhamba vechiereketa, ringira ngoro yomuriro nemahachi omuriro zvakavapaura ava vairi, zvikavaparadzanisa; Erija wakatorwa ngechipupuri kuenda mudenga. Erisha wakazviona, akaboorera echiti, “Baba angu, baba angu! Ngoro dzaIsuraeri nemahachi ayo.” Asi apo asikachamuoni, wakabata zvokufuka zvake, akazvibaura kuita zvigurwa zviiri. Wakatora bhachi raErija rakawa kubva kwaari, wakapetuka, akaema pahumbikumbi yeJorodhani. Wakatora bhachi raErija rakawa kubva kwaari, akachaya ndiro mvura echiti, “Uri pari Mambo Mwari, Mwari waErija?” Naapo achaya mvura, yakapaurana ngepakati kumarutii mairi, naErisha wakaambuka. Naapo vakororo vevaprofeti avo vaiya Jerikho vakamuona ari kuretu, vakati, “Mweya waErija unogara padera paErisha.” Vakauya kooshongana naye, vakakotamira pashi pamberi pake. Vakati kwaari, “Wona zvino, varipo varanda vako makumi mashanu vamuna vakagwinya; ngavaende, tinokupota, kuti vatsvake mambo wako; pamweni mweya waMambo Mwari wamutora, ukamurashira padera pomutunhu umweni, nokuti mubani rimweni.” Wakati, “Haiwa, musavatuma.” Asi apo vakamupota metsa akaita zvidzu, wakati, “Vatumei.” Ndizvo vakatuma vamuna makumi mashanu; avo vakamutsvaka mazuva matatu, asi avazi kumuona. Naapo vakapetuka kwaari (ngokuti waiya achagara muJerikho), wakati kwevari, “Andizi kumuronzera here kuti, ‘Musaenda?’ ” Zvino vamuna vedhorobha vakati kunaErisha, “Ringira ndau yedhorobha yakanaka, kudai ngezvaanoona mambo wangu; asi mvura yakashata, nenyika aibereki zvakanaka.” Wakati, “Ndiunzirenyi chidziyo chitsva, muise munyu mukati mwacho.” Ndizvo vakachiunza kwaari. Zvino wakabuda, akaenda kuchinyuka chemvura, akadururamwo munyu uwo, akati, “Unoronza izvi Mambo Mwari, ‘Ndanakisa iyi mvura; kubvira zvinopano akuchazobudimwozve kufa nokuti kusikabereka.’ ” Ndizvo mvura yakanakiswa metsa nanyamashi, kudai ngeizwi raakaereketa Erisha. Wakakwira kubvapo kuenda Bhetheri; naapo achakwira ngenjira iyo, kwakabuda mudhorobha zvirumbwana zvimweni zvidoko, zvakamusheka zvechiti, “Hamba, nyamhanza! Hamba, nyamhanza!” Naapo wakakunukuka, akaringira kwevari, wakavatuka ngezina raMambo Mwari. Kwakabuda kubva mugwasha mabheya mairi echikadzi, akauraya zvirumbwana zvimweni makumi marongomuna nezviiri zvavo. Wakabva apo, akaenda kuMutunhu weKharmeri, zvino wakabvapo, akahwirira Samaria. Mugore regumi namasere rokutonga kwaJehoshafati mambo waJudha, Jehoramu mukororo waAhabhi wakaamba kutonga padera paIsuraeri muSamaria, naye wakatonga makore gumi namairi. Wakaita zvakashata mukuona kwaMambo Mwari, asi haiwa kudai ndibaba ake nokuti mai ake, ngokuti wakadusa muedzaniso waBhaari uwo wakaitwa ndibaba ake. Kunyazwi zvakanyadaro wakabatirira kuzvishaishi zvaJerobhoamu mukororo waNebhati, uwo wakaita kuti vaIsuraeri vashaishe; aazi kutenderuka kubva kwezviri. Zvino Mesha mambo waMoabhi waiya nepfuma yemakwai mazhinji, waiunza kunamambo waIsuraeri makwai zana rimwe remakumi emazana, (100,000), nemamviri emagondohwe zana rimwe remakumi emazana (100,000). Asi apo Ahabhi afa, mambo weMoabhi wakamukira mambo weIsuraeri. Ndizvo mambo Jehoramu wakabuda kubva Samaria ngouwo mukuwo, akaerenga veshe vaIsuraeri. Naapo echienda wakatumira izwi kunaJehoshafati mambo waJudha echiti, “Mambo waMoabhi wakandimukira; aungaendi neni here kuti tirwe nevaMoabhi?” Iye wakati, “Ndinozoenda; inini ndinewe, vanhu vangu ngevako, mahachi angu ngeako.” Zvino wakati, “Tinozohamba ngenjira iri?” Jehoramu wakapingura, “Ngenjira inohamba ngomushango reEdhomu.” Ndizvo mambo waIsuraeri, mambo waJudha namambo weEdhomu vakaenda; naapo vatenderera muhambo wemazuva manomwe, kwaiya kusina mvura yokuti vanhu vokurwa vamwe nokuti mhuka dzevaihamba nadzo. Zvino mambo waIsuraeri wakati, “Ihehe! Mambo Mwari watidaidza isusu madzimambo matatu pamwepo, kwega kutipira munyara dzevaMoabhi!” Asi Jehoshafati wakati, “Akuna here muprofeti waMambo Mwari uno, kuti tibvunze kunaMambo Mwari kubudikidza ndiye?” Zvino umwe wevaranda vamambo waIsuraeri wakapingura echiti, “Uriyo Erisha mukororo waShafati, uwo waisidurura mvura panyara dzaErija.” Jehoshafati wakati, “Izwi raMambo Mwari riri kwaari.” Ndizvo mambo waIsuraeri, Jehoshafati namambo weEdhomu vakadzaka vechienda kwaari. Erisha wakati kunamambo waIsuraeri, “Ndinenyi newe? Enda kunevaprofeti vababa ako, nokuvaprofeti vamai ako.” Asi mambo waIsuraeri wakati kwaari, “Haiwa; ndiMambo Mwari wakatidaidza madzimambo matatu, kwega kutipira munyara dzevaMoabhi.” Erisha wakati, “Kudai ngezvaanopona Mambo Mwari wehondo, uwo wendinoema pamberi pake, ngegwinyiso, kudai ndisaiya kuti ndinoremeredza Jehoshafati mambo waJudha, ndisaizokuringira, nokuti kupinimidza ndimwi. Asi ndiunzirenyi muridzi weminanzi.” Zvino apo muridzi acharidza, kwakauya nyara yaMambo Mwari padera pake. Naye wakati, “Mambo Mwari unoronza izvi, ‘Ndinozoita kuti bani iri rizare ngemakandwa.’ Ngokuti unoronza izvi Mambo Mwari, ‘Amuzooni dutu, nokuti mvura yechinaya; asi bani rinozodzadzwa ngemvura, yokuti mumwe, imwimwi n'ombe, dzenyu nezvifuyo zvenyu zveshe.’ Ichi chiro chidoko mukuona kwaMambo Mwari; unozopira vaMoabhi munyara dzenyu. Munozoparadza madhorobha eshe akashosherwa, nemadhorobha eshe akanaka; munozotemera pashi miti yeshe yakanaka, nokutsiira zvinyuka zveshe zvemvura, mushaishire minda yeshe yakanaka ngemapuwe.” Pazuva raiteera, mangwanani kuchapirwa mudiro, ringira, mvura yakatanga kuerera yechibva ngorutii rweEdhomu, metsa nyika yakadzadzwa ngemvura. Naapo vaMoabhi veshe pevakazwa kuti madzimambo aiya auya koorwa navo, vakaunganidza veshe vaikona kurwa ngezvokurwa ndizvo, vakuru nevadoko, vakaema mumigano. Naapo vakamuka mangwanani maishi, nezuva rakajeka padera pemvura, vaMoabhi vakaona mvura yokurutii urwo rwakaringirana navo yakatsvuka kudai ngengazi. Vakati, “Iyi ingazi; ngegwinyiso madzimambo akaurayana, vakabayana umwe noumweni. Ndizvo zvino, vaMoabhi, endai kunezvakachakatwa.” Asi apo vaiya vaguma kukamba yaIsuraeri, vaIsuraeri vakamiruka, vakabaya vaMoabhi, avo vakatiza pamberi pavo; naapo vakarumbirira vaMoabhi vechivabaya metsa kuguma kunyika yavo. Vakaparadza madhorobha avo, nendau dzeshe dzaiya dzakanaka, munhu weshe wakakandira buwe rake, metsa vakadzadza idzo ndau, vakatsiira zvinyuka zveshe zvemvura, vakatemera pashi miti yeshe yakanaka. Kwega muKirharesethi vakasia marukumbati aro, asi vanokandira ngechimvii vakaritendenedza, vakarifura. Naapo mambo weMoabhi aona kuti kurwa kwamukurira, wakatora vanhu mazana manomwe vakapakatira shoti, akaenda navo kuedza kupwanya pakaringisana namambo weEdhomu; asi wakakorera. Zvino wakatora mukororo wake wedangwe uwo waizogara nhaka yake, akamupira kuita mudiro wokupisha padera porukumbati. Ushungu hukuru hwakauya padera pevaIsuraeri; ndizvo vakabva kwaari, vakahwirira kunyika yavo. Zvino mukadzi woumwe wevakororo vevaprofeti wakadaidzira kunaErisha echiti, “Muranda wako, mwamuna wangu wakafa; newe unozia kuti muranda wako waimutya Mambo Mwari, asi uwo waaiya nechikwerete naye wauya kootora vakororo vangu vairi kuti vaite hloko.” Erisha wakati kwaari, “Ndinozoitenyi kwouri? Ndironzere kuti chiinyi chounacho mumhatso mwako?” Wakati, “Murandakadzi wako aana chiro mumhatso yake, ngokubanze kwejomeya remafuta.” Erisha wakati, “Enda kubanze, ucheneke zvidziyo kuvaakirwana vako veshe, zvidziyo zvisina chiro; usacheneke zvishomani. Zvino pinda mumhatso, udzikonyere mukati iwewe nevakororo vako, wechidurura mafuta muzvidziyo zveshe; naapo chimwe ngachimwe chazara, unozochiemesa parutii.” Ndizvo ngokudaro wakaenda kubva kwaari, akadzikonyera mumhatso nevakororo vake; vakaangira kuunza zvidziyo kwaari, naye wakaangira kudurura. Naapo zvidziyo zvazara, wakati kunomukororo wake, “Ndiunzirezve chidziyo chimweni.” Asi wakati kwaari, “Zvidziyo zvapera.” Naapo mafuta akakhauka. Wakauya, akaronzera munhu waMwari, naye wakati, “Enda, wootengesa mafuta, uripe chikwereti chako, wechidzirera iwewe nevana vako ngaawo asara.” Zuva rimweni Erisha wakaenda Shunemu, mwaigara mukadzi gurudza; naye wakamunyengerera kuti adye kudya. Ndizvo mukuwo weshe waaipinda ngeiyo njira, waipaukapo kuti adye kudya. Wakati kunomwamuna wake, “Ringira, ngegwinyiso ndinoona kuti munhu wakachena waMwari, uwo unopinda ngepano mukuwo weshe. Ngatimunasirire, ndinokupota, kamera doko rinemarukumbati; techiisamwo mubhedhi, tafura, chigaro nechibani, kuti azogaramwo apo aguma kwetiri.” Zuva rimweni apo agumapo, wakakwira mukamera iro, akaatamwo. Wakati kunaGehazi muranda wake, “Daidza mukadzi uwo muShunami.” Naapo amudaidza, wakauya akaema pamberi pake. Wakati kwaari, “Ereketa kwaari zvino wechiti, ‘Ringira, iwewe wakatidetsera ngourwu rudetso rukurutu; chiinyi chingaitwa kwouri? Unoda here kuereketerwa izwi kunamambo, nokuti kunenduna yehondo?’ ” Wakapingura, akati, “Ndinogara pakati pevanhu vangu.” Erisha wakati, “Chiinyi zvino chingaitwa kwaari?” Gehazi wakapingura akati, “Ngegwinyiso aana mukororo, nomwamuna wake waa musharuka.” Erisha wakati, “Mudaidze.” Naapo amudaidza, wakaema ngepamusiwo. Wakati, “Panguva iyi gore rouya, mukuwo wakwana wakaemeswa iwewe unozotengura mukororo.” Wakati, “Haiwa, mambo wangu, iwewe munhu waMwari, usanyepera murandakadzi wako.” Mudzimai wakaita mimba, akabereka mukororo panguvayo, kudai ngenguva yakaemeswa, kudai ngezveakaereketa Erisha kwaari. Naapo mwana akura, zuva rimweni wakaenda kunababa ake pakati pevaikukura. Naye wakati kunababa ake, “Soro rangu, soro rangu!” Baba vakati kunomuranda wavo, “Mutore, uende naye kunamai ake.” Wakamutora, akamuisa kunamai ake, vakamutengura metsa masikati makuru, naye wakafa. Wakakwira, akamuradzika pamubhedhi womunhu waMwari, akamukonyera mukati, akabuda kubanze. Zvino wakadaidzira kumwamuna wake echiti, “Nditumire, ndinokupota, umwe wevaranda, neimwe yembongoro, kuti ndirumbe kuenda kunomunhu waMwari nokupetukazve.” Wakati, “Unoenda kwaari nyamashi ngenyi? Ngokuti akusiri kutawa kwomwedzi nokuti Sabatha.” Wakati, “Zvinozonaka.” Zvino wakasungira mbongoro, akati kunomuranda wake, “Tinha mbongoro, uende mberi; usaema kuhamba asi kuti ndakuronzera.” Ndizvo wakaenda, akaguma kunomunhu waMwari kuMutunhu Kharmeri. Naapo munhu waMwari amuona achikuretu, wakati kunaGehazi muranda wake, “Ringira, uwo mukadzi muShunami. Rumba kasira, ndapota, ushongane naye, uti kwaari, ‘Zvakanaka here kwouri? Zvakanaka here kunemwamuna wako? Zvakanaka here kunemwana wako?’ ” Wakapingura echiti, “Zvakanaka hazvo.” Naapo aguma kunomunhu waMwari pamutunhu, wakamubata tsoka dzake. Asi Gehazi wakakwedzera pasinde kuti amusukumidze. Asi munhu waMwari wakati, “Murekere, ngokuti mweya wake unotambudzika; Mambo Mwari wazvifisha kubva kwendiri, aazi kundironzera.” Naapo wakati, “Ndakakumbira mukororo here kubva kunamambo wangu? Andizi kukuronzera here kuti, ‘Usandichengedzera?’ ” Wakati kunaGehazi, “Sungisa chiunu chako, utore mudondoro wangu munyara mwako, uende. Kuti ukashongana nomunhu usamuchingamidza, kuti munhu akakuchingamidza, usadaira; wooisa mudondoro wangu pahope yemwana.” Zvino mai vomwana vakati, “Kudai ngezvaanopona Mambo Mwari, nokudai ngezvounopona iwewe, andizokusii.” Ndizvo wakamiruka, akamuteera. Gehazi wakapinda mberi kwavo, akaradzika mudondoro pahope yemwana, asi paiya pasina kufema nokuti chaionisa kupona. Wakapetuka, akashongana naErisha, akamuronzera echiti, “Mwana aazi kumuka.” Naapo Erisha apotera mumhatso, wakaona mwana akaata afa, akaradzikwa pamubhedhi wake. Ndizvo wakapotera mukati, akadzikonyera nomwana, akakumbira kunaMambo Mwari. Zvino wakakwira pamubhedhi, akaata padera pemwana, akaisa muromo wake paiya nowake, namadziso ake paiya neake, nenyara dzake paiya nedzake; nomuiri womwana wakadziirwa. Wakadzaka pashi, akahamba kamwe mberi nesure mukamera, zvino wakakwirazve akakotama padera pake; mwana wakaotsira kanomwe, akabeura madziso ake. Erisha wakadaidza Gehazi, akati, “Daidza mukadzi muShunami.” Ndizvo wakamudaidza. Naapo auya kwaari, wakati, “Tora mukororo wako.” Wakauya, akawa patsoka dzake, akakotamira pashi; zvino wakatora mukororo wake, akabuda kubanze. Naapo Erisha paakapetuka Girigari, kwaiya nenzara munyika. Vakororo vevaprofeti vaiya vakagara pamberi pake, wakati kunomuranda wake, “Tereka hari huru, ubikire vakororo vevaprofeti kudya.” Umwe wavo wakabuda kuenda mushango kookaya muriwo; wakaona muvhini womushango, wakakayapo matanga omushango akaita butwa, akauya akaachekera muhari yezvokudya, asikazii kuti chiinyi. Ndizvo vakaburira vanhu kuti vadye. Asi apo vachadya zvokudya vakaboorera vechiti, “A munhu waMwari, munorufu muhari!” Avazi kuchakona kuadya. Wakati, “Zvino unzai ufu.” Naye wakakandira muhari iyo; akati, “Burira vanhu vadye.” Mwaiya musichina chiro chaiuraya muhari. Kwakauya munhu wakabva Bhaarisharisha, wakaunzira munhu waMwari michero yomutanguro, zvingwa zvebhari makumi mairi, nemitsonzoti yomushosho wekoroni musaka rake. Erisha. wakati, “Ipai vanhu kuti vadye.” Asi muranda wake wakati, “Ndingaisa ngenjiranyi izvi pamberi pevanhu zana?” Ndizvo wakatizve, “Ipai vanhu kuti vadye, ngokuti izvi ndizvo zvinoronza Mambo Mwari, ‘Vanozodya nokuzvisiya.’ ” Ndizvo wakazviisa pamberi pavo, vakadya, vakasiya zvimweni, kudai ngezverakaronza izwi raMambo Mwari. Zvino Naamani nduna yehondo yamambo weAramu, waiya munhu mukuru kunamambo wake, wairemeredzeka kunamambo wake, ngokuti kubudikidza ndiye Mambo Mwari waiya akapa kunyisa kwevaAramu. Kunyazwi waiya munhu waiya ngwazi yakashinga, asi waiya nemapere. Zvino vaAramu mukuchakata kwavo kumwe, vakabuda ngezvikwata, vakauya kubva kunyika yaIsuraeri nekamusikana kadoko, nako kakashandira mukadzi waNaamani. Kakati kunavahosi vake, “Kudai kwega mambo wangu aiona muprofeti uri munyika yeSamaria! Waizomuporesa mapere ake.” Ndizvo Naamani wakapotera kunamambo wake, akamuronzera echiti, “Musikana wakabva kunyika yaIsuraeri unoronza izvi.” Namambo weAramu wakati, “Endayo, ndinozotumira tsamba kunamambo waIsuraeri.” Wakaenda, wakatora naye matarenta gumi esirivha, nemakumi emazana matanhatu (6,000) ezvigurwa zvomukore, nezvokupfeka zvipani gumi. Wakaunza tsamba kunamambo waIsuraeri yechiti, “Naapo tsamba iyi yaguma kwouri, ringira ndinotuma nayo Naamani muranda wangu, kuti uporese mapere ake.” Naapo mambo waIsuraeri adzidza tsamba, wakamwesa zvokufuka zvake echiti, “Ndiri Mwari here inini, unopa rufu noruponeso, kuti munhu uyu atume izwi kwendiri kuti ndiporese munhu mapere ake? Ndizvo wonai kutsvaka kwaanoita ndaa kwendiri.” Asi apo Erisha munhu waMwari azwa kuti mambo waIsuraeri wamwesa zvokufuka zvake, wakatuma kunamambo echiti, “Wabaurirenyi zvokufuka zvako? Murekere auye kwendiri, naye unozozia kuti uripo muprofeti muIsuraeri.” Ndizvo Naamani wakauya nemahachi ake nengoro dzake, wakaema ngepamusiwo wemhatso yaErisha. NaErisha wakatuma nhumwa kwaari echiti, “Enda, ushambe muJorodhani mikuwo minomwe, nenyama yako inozotambiswa, newe unozosukika.” Asi Naamani wakatseneka, akaenda echiti, “Ringira, ndaipinimidza kuti ngegwinyiso unozobuda kuuya kwendiri, echiema, echikumbira ngezina raMambo Mwari, Mwari wake, echiisa nyara yake pandaupo, aporese mapere. Abhana naFapha ndwizi yeDhamasekusi airi ndwizi yakapinda kunaka here kunemvura yeshe yomuIsuraeri? Andisaizoshamba kweiri here ndisukike?” Ndizvo wakakunukuka, akaenda ngokutseneka. Asi varanda vake vakakwedzera pasinde, vakaereketa naye vechiti, “Baba angu, kudai muprofeti amuronzera kuita chiro chikuru musaizochiita here? Kunopinda kwakaitawani kuneicho chaaronza kwouri, apo ati, ‘Shamba usukike?’ ” Ndizvo wakadzaka, akatupira mikuwo minomwe muJorodhani, kudai ngokuronza kwomunhu waMwari; nenyama yake yakatambiswa ikadai ngeyomwana mudoko, naye wakasukika. Wakahwirira kunomunhu waMwari, iye nevanhu vake; wakaguma, akaema pamberi pake echiti, “Ringira, zvino ndinozia kuti akuna Mwari umweni munyika dzeshe, asi muIsuraeri mwega; ndizvo zvino ndinokupota kuti uashire chipo chomuranda wako.” Asi Erisha wakati, “Kudai ngezvaanopona Mambo Mwari, uwo wendinoema pamberi pake, andizoashiri chiro!” Asi wakamupota kuti achiashire, asi iye wakaramba. Zvino Naamani wakati, “Kuti musikatori, ndinokupota, tendera kuti mitwaro yemavhu ingatwarwa ngemaasera mairi ipuwe kunomuranda wako; ngokuti muranda wako aachazopirizve midiro yokupisha nokuti minikero imweni kunezvimwari, asi kwega kunaMambo Mwari. Asi ngeiyi ndaa Mambo Mwari kungurirai muranda wenyu pandaa imwe; naapo mambo wangu echipinda mumhatso yaRimoni koomudiramwo, akatseama paruoko rwangu, neni ndakakotama mumhatso yaRimoni, naapo pendinokotama pashi mumhatso yaRimoni, Mambo Mwari kungurirai muranda wenyu pandaa imwe iyi.” Erisha wakati kwaari, “Enda ngokunyarara.” Asi Naamani apo abuda kubva kwaari kamuhambo kadoko, Gehazi, muranda waErisha munhu waMwari, wakati, “Ringirai, mambo wangu warekera yaamho Naamani muAramu uyu, ngokusikaashira kubva kunyara dzake izvo zvaakaunza. Asi kudai ngezvaanopona Mambo Mwari, inini ndinozorumba kumuteera, nditore chiro kubva kwaari.” Ndizvo Gehazi wakateera Naamani. Naapo Naamani aona munhu echirumba sure kwake, wakatomuka kubva mungoro yake kuti ashongane naye echiti, “Kwakanaka here?” Naye wakati, “Eya kwakanaka hakwo, asi mambo wangu wandituma echiti, ‘Ringira, zvinopano uno kwaguma kwendiri majaha mairi evakororo vevaprofeti vabva kunyika yemitunhu yeEfuremu; ndapota, vape tarenta rimwe resirivha, nezvipani zviiri zvokupfeka.’ ” Naamani wakati, “Ndapota, ashira matarenta mairi.” Wakamupota, akasunga matarenta mairi esirivha mukati mwemikwama miiri, nezvipani zviiri zvokupfeka, akazvipa kuvaranda vake vairi, avo vakazvitwara pamberi pake. Naapo aguma kumutunhu, wakazvitora kubva kunyara dzavo, akazvifisha mumhatso; wakaendesa vanhu, navo vakaenda. Wakapotera, akaema pamberi pamambo wake; naErisha wakati kwaari, “Wabva kuri, Gehazi?” Naye wakati, “Muranda wako akuna kwaakamboenda.” Asi wakati kwaari, “Mwoyo wangu auzi kuenda newe here, apo munhu wakatomuka kubva mungoro yake kooshongana newe? Iyi ndiyo nguva here yokuashira mare, nokuashira zvokupfeka, nokuashira minda yemiorivhi, neminda yemivhini, makwai nekabi, nehloko dzevamuna nevakadzi? Ndizvo mapere aNaamani anozoambukira kwouri, nokumibarirwana yako mhera nariini.” Wakabuda kubva pamberi pake aane mapere achena kuti mbembee kudai ngechando. Zvino vakororo vevaprofeti vakati kunaErisha, “Ringira zvino, ndau yetinogara pashi pesimba renyu idoko kwetiri. Titendere tiende Jorodhani, titore kubveyo munhu weshe sika, tidziakirepo ndau yokugara.” Wakapingura echiti, “Endai.” Zvino umwe wavo wakati, “Tenda, ndinokupota, kuti uende nevaranda vako.” Naye wakapingura echiti, “Ndinozoenda.” Ndizvo wakaenda navo. Naapo vakaguma Jorodhani, vakatema miti. Asi apo umwe achatema muti, simbi yesanho yakawira mumvura; wakadaidzira echiti, “Yoowe, makosi wangu! Raiya rakachenekwa.” Zvino munhu waMwari wakati, “Rawira ngepari?” Naapo wakamupangidza ndau yacho. Erisha wakatema muti, akaukandiramwo ukaita kuti simbi yesanho iangararike. Wakati, “Itore.” Ndizvo wakatambanudza nyara yake, akaritora. Kamwe apo mambo weAramu wakaambana naIsuraeri, wakapangana nevaranda vake. Wakati, “Kundau iyo neiyo kunozoiswa matende angu.” Asi munhu waMwari wakatumira izwi kunamambo waIsuraeri echiti, “Ngwarai kuti musazopinda ngepandau iyo neiyo, ngokuti vaAramu vanodzaka ndipo.” Mambo waIsuraeri wakatumira izwi kundau yaakaronzerwa ngomunhu waMwari. Wakavangwadza kanopinda kamwe nokuti kairi ngendaa yakadaro, kuti vagare vakangwara. Mwoyo wamambo weAramu wakatambudzika ngeiyo ndaa; wakadaidza varanda vake, akati kwevari, “Zvino ndironzerei kuti ndiani pakati pedu unoiyana namambo waIsuraeri?” Zvino umwe wevaranda vake wakati, “Apana naumwe, makosi wangu mambo. NdiErisha muprofeti uri muIsuraeri, ndiye unoronzera mambo waIsuraeri mazwi ounoereketa uri mukamera rako rokuata.” Wakati, “Endai mwootsvakisisa mumuone paari; ndinozotuma vanhu, vamubate.” Wakaronzerwa kwechizwi, “Ringira, uri muDhothani.” Ndizvo wakatumirayo mahachi, nengoro, nehondo huru; vakaguma usiku, vakatendenedza dhorobha reshe. Naapo muranda womunhu waMwari paakamuka mangwanani maishi nokubuda kubanze, ringira, hondo yaiya yatendenedza dhorobha inemahachi nengoro. Muranda wake wakati kwaari, “Yoowe, mambo wangu! Tinozoitenyi?” Wakapingura, akati, “Usatya, ngokuti avo vari kwetiri vakapinda kuwanda kuneavo vari kwevari.” Zvino Erisha wakakumbira echiti, “Ndinokupota, Mambo Mwari, pembenudza madziso ake kuti aone.” Ndizvo Mambo Mwari wakapembenudza madziso ejaha iro, naro rakaona; ringira, mutunhu waiya wakazara ngemahachi nengoro dzomuriro, zvaiya zvakatendenedza Erisha. Naapo vaAramu vakadzaka koorwa naye, Erisha wakakumbira kunaMambo Mwari echiti, “Itai kuti ava vanhu vawirwe ngoupofu, ndinokupota.” Naye wakavachaya ngoupofu kudai ngokukumbira kwaErisha. Erisha wakati kwevari, “Iyi andiyopi njira, neiri andiropi dhorobha; asi nditeerenyi neni ndinozopangidzira munhu womunotsvaka.” Naye wakavatungamirira kuenda Samaria. Naapo vachandopotera muSamaria, Erisha wakati, “Mambo Mwari, pembenudza madziso eava vanhu, kuti vechiona.” Mambo Mwari wakapembenudza madziso avo, navo vakaona kuti vaiya vaapakati peSamaria. Naapo mambo waIsuraeri avaona, wakati kunaErisha, “Baba angu, ndivauraye here? Ndivauraye here?” Wakapingura akati, “Haiwa, usavauraya. Ungauraya avo here vewakatora kuita hloko vewanyisa ngeshoti yako nouta hwako? Vape kudya nemvura kuti vadye nokumwa, vahwirinze kunamambo wavo.” Ndizvo wakavanasirira dhiri gurutu; naapo vapedza kudya nokumwa, wakavaendesa, navo vakaenda kunamambo wavo. Ndizvo zvikwata zvavaAramu azvizi kuchazouyazve koochakata munyika yaIsuraeri. Ngesure kwenguva Bhenihadhadhi mambo weAramu wakaunganidza hondo yake yeshe, akakwira koorwa neSamaria akaritendenedza. Kwakaitika nzara huru muSamaria, apo vakaangira kuritendenedza, metsa nesoro rembongoro rakatengwa ngezvigurwa makumi masere zvesirivha, nemagramu mazana mairi edoto renjia aitengwa ngezvigurwa zvishanu zvesirivha. Zvino mambo waIsuraeri apo echihamba ngepadera porukumbati rwedhorobha, mudzimai wakadaidzira kwaari, echiti, “Detsera, makosi wangu mambo!” Wakati, “Haiwa! Mambo Mwari ngaakudetsere. Kudai Mambo Mwari asikakudetseri, inini ndingakudetsera ngenjiranyi? Kubva kumbuwa yokupurira here, nokuti pandau yokukamurira vhini?” Asi zvino mambo wakamubvunza echiti, “Chiinyi chinokutambudza?” Wakapingura echiti, “Uyu mukadzi wakati kwendiri, ‘Ipa mukororo wako kuti timudye nyamashi, mangwani tinozodyawo wangu.’ Ndizvo takabika mukororo wangu, tikamudya. Neni ndakati kwaari nechimangwani, ‘Chipa mukororo wako kuti timudye.’ Asi waiya afisha mukororo wake.” Naapo mambo azwa mazwi omudzimai, wakabaura zvokufuka zvake; zvino ngokuti waihamba ngepadera porukumbati rwedhorobha, vanhu vakamuringira, vakaona mambo akasimira masaka ngepashi pamuiri wake. Naye wakati, “Mwari ngaaite kudaro kwendiri nokupinda, kudai soro raErisha mukororo waShafati rechizogara pamakhadza ake nyamashi.” Ndizvo wakaendisa munhu kubva pamberi pake. Zvino Erisha akagara mumhatso yake, nevakuru vakagara naye. Nhumwa isati yaguma, Erisha wakati kuvakuru, “Munozia here kuti muurayi uyu wakatuma munhu kuti agure soro rangu? Naapo nhumwa yechiguma, wonai kuti mwakonya musiwo, muibate kuti isapinda. Muzwe kuti mwangira wetsoka dzamambo wake adzizwike here ngesure kwake?” Naapo aiya achaereketa navo, ringira, mambo wakadzaka kwaari, wakati, “Ringira, uku kushata kunobva kunaMambo Mwari; ndingachagonderenyi munaMambo Mwari?” Asi Erisha wakati, “Izwai imwimwi izwi raMambo Mwari: unoronza izvi Mambo Mwari, ‘Mangwani ngouyu mukuwo chipimo choufu hwakamotseka chinozotengeswa ngechigurwa chimwe chesirivha, nezvipimo zviiri zvebhare zvinozotengeswa ngechigurwa chimwe chesirivha, pamusiwo weSamaria.’ ” Zvino nduna iyo yaitseamwa ndimambo panyara yayo yakapingura munhu waMwari yechiti, “Ringira, kunyazwi Mambo Mwari waizoita mafasitera mudenga, kungaitika chiro chakadaro here?” Asi Erisha wakati kwaari, “Ringira, unozozviona ngemadziso ako, asi auzozvidyi.” Zvino kwaiyapo vanhu varongomuna vaiya nemapere ngokubanze kwomusiwo wedhorobha, avo vakati umwe kunoumweni, “Tinogarirenyi pano metsa kufa? Kudai techiti, ‘Ngatipinde mudhorobha,’ nzara irimwo mudhorobha, nesu tinozofamwo; asi tikanyandogara pano, tinozofawo. Ndizvo zvino, uyai, ngatipotere mukamba yevaAramu; kuti vasatiuraya, tinozopona, asi kuti vatiuraya, tinozofa.” Ndizvo vakamiruka kwooita mambakwedza, kuenda mukamba yevaAramu; asi apo vaguma kumugano wekamba yevaAramu, ringira, mwaiya musina vanhu. Ngokuti Mambo Mwari waiya akaita kuti hondo yevaAramu izwe bope rengoro neremahachi, nebope rehondo huru; kwakaita kuti vakaereketa umwe kunoumweni vechiti, “Wonai, mambo waIsuraeri watora madzimambo evaHiti, nemadzimambo evaEgipite, kuti varwe nesu.” Ndizvo vakamiruka, vakatiza apo kwooita mambakwedza, vakasiya matende avo, mahachi avo, zvimbongoro zvavo, kamba yakandosara kudai ngezveyaiya yakandodaro, vakatiza kuti vadziponese. Naapo ava vanhu vaiya nemapere vaguma kumagumo ekamba, vakapotera mutende, vakadya nokumwa, vakatoramwo sirivha, mukore nezvokufuka, navo vakaenda koozvifisha. Zvino vakapetuka, vakapinda mutende rimweni, vakatorazve kubvamwo zviro zvimweni, vakaendazve koozvifisha. Zvino vakati umwe kunoumweni, “Zvetinoita zvakashata. Iri izuva remashoko akanaka; kudai isusu tikanyarara, techigarira metsa kujeka kwemambakwedza, tinozooneka tinendaa; ndizvo zvino, uyai, kuti tiende tironzere vemhatso yamambo.” Ndizvo vakaenda, vakaronzera varindi vomusiwo wedhorobha, vakavaronzera vechiti, “Takaguma kukamba yevaAramu, asi atizi kuonamwo munhu, nokuti izwi romunhu, musina chiro asi mahachi akasungwa, zvimbongoro zvakasungwa, nematende akandodai ngezvakandodaro.” Zvino varindi vomusiwo vakazvidaidzira; vakaronzera kunevemhatso yamambo. Mambo wakamiruka usiku, akati kunevaranda vake, “Zvino ndinomuronzera izvo zvetaitirwa ngevaAramu. Vanozia kuti tinenzara; ndizvo vamiruka kubva mukamba, vaenda koodzifisha murubaya vechiti, ‘Naapo vobuda kubva mudhorobha, tinozovabata vechizwa, topinda mudhorobha.’ ” Umwe wevaranda vake wakapingura, akati, “Tendera vanhu vamweni vatore mahachi mashanu, eawo akasara mudhorobha, ngokuti avo vakasara vanozotambudzikira mbungano yeshe yaIsuraeri, iyo yaparadzwa; ngatitume tione.” Ndizvo vakatora vanhu vairi, ngoro mbiri nemahachi; namambo wakavatuma kuteera hondo yevaAramu echiti, “Endai, muone.” Ndizvo vakavateera metsa paJorodhani; ringira, njira yeshe yaiya yakazara ngezvokufuka nezvidziyo, zvevaiya vechirasha vaAramu mukutiza kwavo. Ndizvo nhumwa dzakapetuka sure, dzikaronzera mambo. Zvino vanhu vakabuda, vakachakata matende evaAramu. Ndizvo chipimo choufu hwakamotseka chakatengeswa ngechigurwa chimwe chesirivha, nezvipimo zviiri zvebhare chigurwa chimwe chesirivha, kudai ngezverakaronza izwi raMambo Mwari. Zvino mambo wakaemesa nduna iyo yaaitseama panyara yayo kuti irinde musiwo; vanhu vakamutsikatsika pamusiwo, akafa, kudai ngezvaakaronza munhu waMwari, apo mambo paakadzaka kwaari. Ngokuti apo munhu waMwari paakaereketa kunamambo echiti, “Zvipimo zviiri zvebhare zvinozotengwa ngechigurwa chimwe chesirivha, nechipimo choufu hwakamotseka chinozotengwa ngechigurwa chimwe chesirivha, zvinozoitika kudaro pooda kuita mukuwo wakadai mangwani pamusiwo weSamaria.” Nduna huru yakapingura munhu waMwari yechiti, “Kunyazwi kudai Mambo Mwari aizoita mafasitera mudenga, kungaitika chiro chakadaro here?” Naye wakapingura akati, “Ringira, unozozviona ngemadziso ako, asi auzozvidyi?” Ndizvo ngegwinyiso zvakaitika kudaro kwaari; vanhu vakamutsikatsika pashi, akafa pamusiwo. Zvino Erisha wakaereketa kunomudzimai waakamusira mukororo wake kubva mukufa echiti, “Miruka, uende nemhatso yako, woogara kunyazwi ngepari poungakona; ngokuti Mambo Mwari wakadaidza nzara, nayo inozouya panyika makore manomwe.” Ndizvo mudzimai wakamiruka, akaita kudai ngeizwi romunhu waMwari; wakaenda nevemhatso yake, vakagara munyika yevaFiristia makore manomwe. Pakupera kwemakore manomwe, apo mudzimai paakapetuka kubva kunyika yevaFiristia, wakaenda kunamambo kookumbira kuti apuwe mhatso yake nomunda wake. Zvino mambo waiereketa naGehazi muranda womunhu waMwari echiti, “Ndironzere, ndinokupota, zviro zvikuru zveshe zvaakaita Erisha.” Naapo acharonzera mambo ngenjira yaakamusa ndiyo muiri womunhu wakafa, ringira, mudzimai waakamusira mukororo wake kubva mukufa, wakakumbira kunamambo kuti apuwe mhatso yake nemunda wake. Gehazi wakati, “A, makosi wangu mambo, ndiye mukadzi, nouyu ndiye mukororo wake, umwe wakamuswa kwevakafa ndiErisha.” Naapo mambo abvunza mudzimai, ndizvo wakamuronzera. Ndizvo mambo wakamuemesera nduna huru echiti, “Mupetudzirei zveshe zvaiya zvake, pamwepo nazvo zveshe zvakakukurwa mumunda wake kubvira zuva raakasiya munda wake, metsa kuguma nyamashi.” Erisha wakaenda Dhamasekusi, apo Bhenihadhadhi mambo weAramu echirwara. Naapo aronzerwa kuti, “Munhu waMwari waguma muno,” mambo wakati kunaHazaeri, “Tora chipo munyara yako, uende kooshongana nomunhu waMwari. Ubvunze kunaMambo Mwari kubudikidza ndiye wechiti, ‘Ndinozopona here iyi nhenda?’ ” Ndizvo Hazaeri wakaenda kooshongana naye, akatora chipo kuenda nacho, cheizvo zveshe zvakanaka zveDhamasekusi, mitwaro inokwana makamera makumi marongomuna. Naapo apotera akaema pamberi paErisha, akati, “Mukororo wako, Bhenihadhadhi mambo weAramu, wandituma kuuya kwouri echiti, ‘Ndinozopona here kubva kuneiyi nhenda?’ ” Erisha wakati kwaari, “Enda wechiti kwaari, ‘Ngegwinyiso unozopona hako,’ asi Mambo Mwari wandionisa kuti ngegwinyiso unozofa.” Erisha wakamuringisisa muhope mwake, metsa iye wakatsveruka. Zvino munhu waMwari wakachema. Hazaeri wakati, “Mambo wangu unochema ngenyi?” Wakapingura, “Ngokuti ndinozia kushata ukwo kwounozoitira vana vaIsuraeri; ngokuti unozopisha marukumbati avo ngomuriro, unozouraya majaha avo ngeshoti, nevana vavo unozovapwanyira pashi kuita zvigurwa, nevakadzi vavo vanemimba unozovatumbura.” Hazaeri wakati, “Muranda wako chiinyi, imbwa hayo, kuti aite chiro chakakura kudai?” Erisha wakapingura akati, “Mambo Mwari wandionisa kuti iwewe unozoita mambo padera peAramu.” Zvino wakamiruka kubva kunaErisha, akaenda kunamambo wake, uwo wakati kwaari, “Erisha watinyi kwouri?” Naye wakapingura akati, “Wandironzera kuti ngegwinyiso unozopona.” Asi ngechimangwani wakatora jira rinoutindi, akarinyika mumvura, akambonya ndiro mambo muhope yake, metsa afa. Hazaeri wakatonga pandau yake. Ngegore rechishanu rokutonga kwaJoramu mukororo waAhabhi mambo waIsuraeri, Jehoramu mukororo waJehoshafati mambo waJudha wakaamba kutonga. Waiya aane makore makumi matatu namairi apo paakatanga kutonga; wakatonga makore masere muJerusarema. Wakahamba munjira dzemadzimambo aIsuraeri, kudai ngezvakaitwa ngevemhatso yaAhabhi, ngokuti mukadzi wake waiya mwanasikana waAhabhi. Wakaita zvakashata mukuona kwaMambo Mwari. Asi Mambo Mwari waiya asikadi kuparadza Judha ngendaa yaDhavhidha muranda wake, kudai ngezvaakagondisa kwaari kuti unozomupa chibani kwaari nokune mibarirwana yake mhera nariini. Mumazuva ake vaEdhomu vakamukira Judha, vakadziitira mambo wavo. Zvino Joramu wakaambuka kuenda Zairi, nengoro dzake dzeshe naye. Wakamiruka usiku, wakarwisa vaEdhomu nenduna dzengoro dzavo, avo vaiya vamutendenedza; asi vanhu vake vehondo vakatizira kumatende avo. Ndizvo vaEdhomu vaimukira utongi hwaJudha metsa nanyamashi. Naapo vaRibhina vakavamukirawo ngouwo mukuwo. Zvino mishando imweni yaJoramu nazvo zveshe zvaakaita, azvizi kunyorwa here muBhuku reMishando yeZuva ngeZuva yeMadzimambo aJudha? Ndizvo Joramu wakaata nemadzibaba ake, naye wakaikwa navo mudhorobha raDhavhidha. Ahazia mukororo wake wakaita mambo pandau yake. Mugore regumi namairi rokutonga kwaJoramu mukororo waAhabhi, mambo waIsuraeri, Ahazia mukororo waJehoramu mambo waJudha wakaamba kutonga. Ahazia waiya nemakore makumi mairi namairi apo paakatanga kutonga; wakatonga gore rimwe muJerusarema. Zina ramai ake raizwi Atharia, muzukurusikana waOmuri mambo waIsuraeri. Wakahambawo ngenjira yemhatso yaAhabhi, wakaita zvakashata mukuona kwaMambo Mwari, kudai ngezvevakaita vemhatso yaAhabhi, ngokuti waiya mukwambo wevemhatso yaAhabhi. Wakaenda naJoramu mukororo waAhabhi koorwa hondo naHazaeri mambo weAramu muRamothigireadhi, apo vaAramu pevakaremadza Joramu. Mambo Joramu wakahwirira Jezireeri koorapwa maronda ake aakaremadzwa ngevaAramu muRama, panguva yaakarwa naHazaeri mambo weAramu. Ahazia mukororo waJehoramu mambo waJudha wakadzaka koona Joramu mukororo waAhabhi muJezireeri, ngokuti waiya echirwara. Zvino Erisha muprofeti wakadaidza umwe wevakororo vevaprofeti, wakati kwaari, “Sungisa chiunu chako, utore runyanga rwemafuta munyara yako, uende Ramothigireadhi. Naapo wagumayo, tsvakapo Jehu mukororo waJehoshafati mukororo waNimishi; upotere mukati, umudaidze kubva pakati pehama dzake, uende naye mukamera riri pakati. Zvino tora runyanga rwemafuta, udurure pasoro rake wechiti, ‘Unoronza izvi Mambo Mwari: Ndakudzodza kuita mambo padera paIsuraeri.’ Zvino ubeure musiwo nokutiza kuenda, usagarapo.” Ndizvo jaha muprofeti mudoko wakaenda Ramothigireadhi. Wakagumeyo nduna dzehondo dzaiya dzakashongana pamwepo, akati, “Ndine mashoko kwouri, nduna huru.” Jehu wakati, “Kunaani pakati pedu?” Naye wakati, “Kwouri, nduna huru.” Ndizvo Jehu wakamiruka, akapinda mumhatso; mujaha wakadurura mafuta pasoro rake, wakati kwaari, “Unoronza izvi Mambo Mwari, Mwari waIsuraeri, ‘Ndakudzodza kuti uite mambo padera pevanhu vaMambo Mwari, padera paIsuraeri. Unozoparadza mhatso yaAhabhi mambo wako, kuti ndiunzidzire panaJezebheri ngazi yevaranda vangu vaprofeti, nengazi yevaranda veshe vaMambo Mwari. Ngokuti mhatso yeshe yaAhabhi inozoparadzwa; ndinozouraya vamuna veshe kubva kunaAhabhi, hloko nokuti vakasunhurika, muIsuraeri. Ndinozoita kuti vemhatso yaAhabhi vadai ngevemhatso yaJerobhoamu mukororo waNebhati, nokudai ngevemhatso yaBhaasha mukororo waAhija. Imbwa dzinozodya Jezebheri mundau yaJezireeri, akuna naumwe unozomutsira.’ ” Zvino wakabeura musiwo, akatiza kuenda. Naapo Jehu apetuka kunduna dzamambo wake, dzakati kwaari, “Zviro zveshe zvakanaka here? Ngenyi uwo munhu unopenga auya kwouri?” Wakavapingura akati kwevari, “Imwimwi munozia munhu uyu nokuereketa kwake.” Vakati, “Kunyepa! Uya, tironzere.” Ndizvo wakati, “Izvi ndizvo zvaakaereketa kwendiri echiti, ‘Unoronza izvi Mambo Mwari: Ndakudzodza kuita mambo padera paIsuraeri.’ ” Zvino vakakasira munhu weshe, akatora chokufuka chake, akachiisa pashi pake padera pemakwiro; vakaridza gwama, vechidaidzira vechiti, “Jehu waamambo.” Ndizvo Jehu mukororo waJehoshafati, mukororo waNimishi wakamukira Joramu. Joramu nevaIsuraeri veshe vaiya vakarinda paRamothigireadhi, ngendaa yaHazaeri mambo weAramu. Asi mambo Joramu waiya apetuka koorapwa maronda ake muJezireeri, awo aakaremadzwa ngevaAramu, apo paakarwa naHazaeri mambo weAramu. Ndizvo Jehu wakati, “Kudai kuri kuda kwenyu, musarekera naumwe echipokonyoka kubva mudhorobha kuti aende kooronza mashoko muJezireeri.” Zvino Jehu wakakwira mungoro yake, akaenda Jezireeri, mwaiya mwakaatamwo Joramu echirwara. Ahazia mambo waJudha waiya adzakeyo echihamba koona Joramu. Murindi akaema padera porusvingo muJezireeri, wakaona chiunga chaJehu chechiguma, akati, “Ndinoona chiunga chevanhu chinouya.” Joramu wakati, “Daidza mugadhi wehachi, umutume kuenda kooshongana navo, ngaati, ‘Kuripo kunyarara here?’ ” Ndizvo mugadhi wehachi wakaenda kooshongana naye echiti, “Unoronza izvi mambo, ‘Kuripo kunyarara here?’ ” Jehu wakati, “Kunyarara kunomushando wenyi kwouri? Enda sure kwangu.” Murindi wakamuronzera echiti, “Nhumwa yakaguma kwevari, asi aiyipetuki sure.” Zvino wakatumazve wechipiri mugadhi wehachi, uwo wakaguma kwevari echiti, “Unoronza izvi mambo, ‘Kuripo kunyarara here?’ ” Jehu wakapingura, “Kunyarara kunomushando wenyi kwouri? Enda sure kwangu.” Murindi wakamuronzerazve echiti, “Nhumwa yakaguma kwevari, asi aiyipetuki sure. Kuchaira kwengoro kwaanoita kwakadai ngokuchaira kwaJehu mukororo waNimishi; ngokuti unochaira ngesimba kudai ngounopenga.” Joramu wakati, “Nasirirai.” Navo vakanasirira ngoro yake. Zvino Joramu mambo waIsuraeri naAhazia mambo waJudha vakabuda, umwe ngaumwe mungoro yake, vakaenda kooshongana naJehu; vakashongana naye pamunda waNabhothi muJezireeri. Naapo Joramu aona Jehu, wakati, “Kuripo kunyarara here, Jehu?” Wakapingura, akati, “Kunyarara kwakadini apo kuomba kwamai ako, Jezebheri, nokurowa kwake kunoangira kudai?” Zvino Joramu wakatenderudza ngoro akatiza, echiti kunaAhazia, “Kuripo kuchengedzera, A Ahazia!” Jehu wakakwanya uta hwake ngesimba rake reshe, wakafura Joramu ngepakati pemapfudzi ake, nomusee wakapotya mwoyo wake, naye wakati gwadara mungoro yake. Jehu wakati kunaBhidhika nduna yake, “Tora muiri wake, uukandire mumunda waNabhothi muJezireeri; karakadza kuti apo inini neiwewe taihamba pamwepo sure kwaAhabhi baba ake, Mambo Mwari wakaisa mutwaro uyu padera pake. ‘Ngokuti ngazi yaNabhothi, nengazi yevakororo vake yendakaona zuro, unoronza Mambo Mwari, ndinozomuunzidzira paiyi ndau.’ Ndizvo zvino mutore, umukandire kundau yemunda, kudai ngezverakaronza izwi raMambo Mwari.” Naapo Ahazia mambo waJudha aona izvi, wakatiza ngenjira yeBhethihagani. Jehu wakamuteera echiti, “Mufurenyiwo.” Navo vakamufura ari mungoro pandau inokwira kuenda Guri, iri pasinde peIbhireamu. Zvino wakatiza kuenda Megidho, naye akafirayo. Nduna dzake dzakamutwara mungoro kuenda Jerusarema, vakamutsira muiba rake, pamwepo nemadzibaba ake mudhorobha raDhavhidha. Mugore regumi narimwe rokutonga kwaJoramu mukororo waAhabhi, Ahazia wakatanga kutonga padera paJudha. Naapo Jehu aguma Jezireeri, Jezebheri wakazwa ndizvo; wakadzodza hope yake ngomutombo, akafukidza soro rake, akaringira kubanze ngepafasitera. Naapo Jehu echipinda pamusiwo, wakati kwaari, “Kuripo kunyarara here, Zimuri, muurayi wamambo wenyu?” Iye wakaringira mudenga pafasitera echiti, “Ndiani vari vangu? Ngevanaani?” Vakaringira kwaari ngepafasitera vathenwa vairi nokuti vatatu. Wakati, “Mukandirenyi pashi.” Ndizvo vakamukandira pashi; ngazi yake imweni yakapfachaikira padera perukumbati nepadera pemahachi, awo akamutsikatsika pashi. Zvino apotera, wakadya nokumwa, akati, “Endai zvino muone ngouwo mudzimai wakatukwa, mumutsire; ngokuti mwanasikana wamambo.” Asi apo vaenda koomutsira, apana chevakazoona chake asi dehenya resoro, tsoka, nezvanza zvenyara dzake zvega. Naapo vapetuka, vakamuronzera, wakati, “Iri ndiro izwi raMambo Mwari, iro raakaereketa ngomuranda wake Erija muThishibhe echiti, ‘Mundau yaJezireeri imbwa dzinozodya nyama yaJezebheri.’ Muiri waJezebheri unozodai ngemadisa padera pehope yomunda weJezireeri, kuitira kuti kusazoapo naumwe unozoti, ‘Uyu ndiJezebheri.’ ” Zvino Ahabhi waiya nevakororo makumi manomwe muSamaria. Ndizvo Jehu wakanyora tsamba, akadzitumira Samaria, kuvatongi veJezireeri, kuvakuru, nokuneavo vakarera vana vaAhabhi echiti, “Zvino ngokukasira apo tsamba iyi yaguma kwomuri, kudai ngezvomunoona kuti vakororo vamambo vanemwi, nemwi munengoro nemahachi, nedhorobha rakashosherwa, nezvokurwa ndizvo, tsanangurai pakati pevakororo vamambo wako uwo wakapinda kunaka, mumuemese padendemaro rababa ake, murwire mhatso yamambo wenyu.” Asi vakatya kakurutu, vakati, “Ringira, madzimambo mairi vasaikona kuemesedzana naye; zvino isusu tingazoemesedzana ngenjiranyi naye?” Ndizvo mungwariri wengome, nouwo waitonga dhorobha, vakuru, nevareri vevana, vakatumira izwi kunaJehu vechiti, “Isusu tiri varanda vako; zveshe zvounozoronza tinozozviita. Atizoemesi munhu naumwe kuita mambo; ita icho chounoona chakanaka mukuona kwako.” Zvino wakavanyorera tsamba ngokwechipiri echiti, “Kudai muri vangu, nokudai mwechizopurutana izwi rangu, torai masoro evakororo vamambo wenyu, muuye kwendiri uno Jezireeri ngenguva iyi mangwani.” Zvino vakororo vamambo, vanhu makumi manomwe, vaigara nevakuru vedhorobha, avo vakavarera. Naapo tsamba yaguma kwevari, vakatora vakororo vamambo, vakavauraya vanhu makumi manomwe; vakaisa masoro avo muzvitundu, vakaatumira kwaari muJezireeri. Naapo nhumwa yakauya kwaari yechiti, “Vaunza masoro evakororo vamambo,” wakati kwevari, “Aunganidzenyi kuti aite mirwi miiri apo pokupinda pamusiwo wedhorobha metsa mangwani mangwanani.” Zvino mangwani mangwanani apo paakabuda, wakaema, akati kuvanhu veshe, “Imwimwi amuna ndaa. Ringirai, ndini inini ndakamukira mambo wangu, ndikamuuraya; asi ndiani wakauraya ava veshe? Zvino ziai kuti arizowi pashi narimwe reizwi raMambo Mwari raakaereketa ngendaa yemhatso yaAhabhi; ngokuti Mambo Mwari waita icho chaakaereketa kubudikidza ngomuranda wake Erija.” Ndizvo Jehu wakauraya veshe vakasara vemhatso yaAhabhi muJezireeri, vakuru vake veshe, vangani vake, nevapristi vake, metsa pasisina naumwe unopona. Zvino wakamiruka akaenda, akaguma Samaria. Munjira, apo aguma paBhethiekedhi reVaushi, Jehu wakashongana nehama dzaAhazia mambo waJudha, akati, “Ndimwi vanaani imwimwi?” Vakapingura, vakati, “Tiri hama dzaAhazia; nesu tinodzaka koochingamidza vakororo vamambo nevakororo vamai amambokadzi.” Wakati, “Vatorenyi vechipona.” Vakavatora vechipona, vakavauraira parindi reBhethiekedhi, vamuna makumi marongomuna nevairi veshe pamwepo; apana naumwe wavo waakasiya echipona. Naapo abva apo, wakashongana naJehonadhabhi mukororo waRekhabhi, echiuya kooshongana naye; wakamuchingamidza, echiti kwaari, “Mwoyo wako wakanaka here kunewangu kudai ngomwoyo wangu wakanaka kunomwoyo wako?” Jehonadhabhi wakapingura echiti, “Eya, wakanaka.” Jehu wakati, “Kuti zvakadaro, ngatibatane nyara.” Ndizvo wakatambanudza nyara yake, vakabatana; Jehu wakamukwidza mungoro. Wakati, “Uya kwendiri, uone kutsamwirira kwangu ngendaa yaMambo Mwari.” Ndizvo wakamuita kuti ahambe naye mungoro yake. Naapo aguma Samaria, wakauraya veshe vakasara vaAhabhi vaiya muSamaria, metsa apedza veshe, kudai ngokuronza kweizwi raMambo Mwari raakaereketa kubudikidza ndiErija. Zvino Jehu wakaunganidza vanhu veshe pamwepo, akati kwevari, “Ahabhi wakashandira Bhaari padoko; asi Jehu unozomushandira kakurutu kumupinda. Ndizvo zvino, ndidaidzirenyi vaprofeti veshe vaBhaari, vadiri vake veshe, nevapristi vake veshe; kusasara naumwe, ngokuti ndinomudiro mukuru wokupira kunaBhaari; kunyazwi ndiani unotamikapo aazoponi.” Asi Jehu wakazviita ngourimbwi, kuti auraye vaidira Bhaari. Jehu wakati, “Emesai mushongano mukuru waBhaari.” Ndizvo vakaudaidzira. Jehu wakatumira izwi kunyika dzeshe dzaIsuraeri; vadiri veshe vaBhaari vakauya, akuna naumwe wakasara usikazi kuuya. Navo vakapotera mumhatso yaBhaari; nemhatso yakazara kubva kurutii kuguma kurutii ikati penu. Wakati kunowaingwarira kamera remachira okusimira, “Unza machira okusimira kuvadiri veshe vaBhaari.” Ndizvo wakavaunzira zvokusimira. Zvino Jehu wakapotera mumhatso yokudira Bhaari naJehonadhabhi mukororo waRekhabhi; wakati kuvadiri vaBhaari, “Tsvakisisai muone kuti akuna here vadiri vaMambo Mwari muno pakati penyu, asi vadiri vaBhaari vega.” Zvino vakapotera mukati kuti vapire minikero nemidiro yokupisha. Zvino Jehu wakaemesa ngokubanze vamuna makumi masere, akati, “Kunyazwi ndiani unozorekera umwe weava vanhu vendakaisa munyara dzenyu echipokonyoka, uwo unomupokonyosa, kupona kwake kunozoparadzwa pandau youwo wakapokonyoka.” Paakandopedzapo kupira mudiro wokupisha, Jehu wakati kuvarindi nokunduna, “Pindaimwo muvauraye; musarekera naumwe echipokonyoka.” Navo vakavauraya ngokupinza kweshoti; nevarindi nenduna dzakavakandira kubanze, navo vakaenda mudhorobha remhatso yaBhaari. Vakabudisa sika kubva kumhatso yaBhaari, vakaipisha. Navo vakaputsaputsa sika yaBhaari, vakapwanyira pashi mhatso yaBhaari, vakaiita chimbuzi metsa nanyamashi. Ndiyo njira iyi Jehu yaakaparadza ndiyo Bhaari kubva munyika yeshe yaIsuraeri. Asi Jehu aazi kupauka kubva kuzvishaishi zvaJerobhoamu mukororo waNebhati, uwo wakaita kuti vaIsuraeri vashaishe, ngokudira miedzaniso yemakonyana omukore yaiya muBhetheri nomuDhani. Mambo Mwari wakati kunaJehu, “Ngokuti wakaita izvi zvakanaka mukuona kwangu, izvo zveshe zvaiya mumwoyo mwangu, zvewakaitira mhatso yaAhabhi, vakororo vako metsa kumubarirwana wechirongomuna vanozogara padendemaro raIsuraeri.” Asi Jehu aazi kuita wakangwara mukuteera muzvironzo zvaMambo Mwari, Mwari waIsuraeri, ngomwoyo wake weshe. Aazi kusiya zvishaishi zvaJerobhoamu, uwo wakaita kuti vaIsuraeri vashaishe. Ngaawo mazuva Mambo Mwari wakaamba kugura kutsonza nyika yaIsuraeri. Hazaeri wakavanyisa munyika yeshe yaIsuraeri, kubvira Jorodhani ngokumabvazuva nenyika yeshe yeGireadhi, vaGadhi, vaRubheni, vaManase, kubvira Aroeri, riri pasinde perwizi unozwi Arinoni, ndiro Gireadhi naBhashani. Zvino mishando imweni yaJehu, nazvo zveshe zvaakaita, nesimba rake reshe, azvizi kunyorwa here muBhuku reMishando yeZuva ngeZuva yeMadzimambo aIsuraeri? Ndizvo Jehu wakaata nemadzibaba ake, navo vakamuika muSamaria. Jehoahazi mukororo wake wakatonga pandau yake. Nguva yaakatonga Jehu padera peIsuraeri muSamaria yakaita makore makumi mairi namasere. Zvino Atharia mai aAhazia aona kuti mukororo wake wafa, wakamiruka akaparadza veshe vemhuri youmambo. Asi Jehoshebha, mwanasikana wamambo Joramu nehanzvadzi yaAhazia, akamutora Joashi mukororo waAhazia, wakamutora kubva pakati pevakororo vamambo avo vaiya vechida kuurawa; wakamufisha iye nomungwariri wake mukamera rokuata. Ndizvo wakamufisha kubva kunaAtharia, ndizvo aazi kuurawa. Wakagara naye akafishwa mumhatso yaMambo Mwari makore matanhatu, naapo Atharia echitonga padera penyika. Asi mugore rechinomwe, Jehoiadha wakatuma akadaidza nduna dzemazana, pamwepo nenduna dzevarindi, wakavaunza kwaari mumhatso yaMambo Mwari. Akaita chitenderano navo, akavapikisa mhiko mumhatso yaMambo Mwari; zvino akavapangidzira mukororo wamambo. Wakavapanga echiti, “Izvi ndizvo zvomunozoita: Rupande rwenyu rumwe rwechitatu, avo vanopinda mushando ngezuva reSabatha, vanozoita vangwariri vemhatso yamambo; rupande rwenyu rumweni rwechitatu runozongwarira pamusiwo unozwi Suri; norupande rwenyu rumweni rwechitatu runozongwarira pamusiwo uri ngesure kwevangwariri, munozongwarira ngome; nemarupande mairi enyu eavo vanopinda pamushando ngezuva reSabatha, avo navo vanozongwarira mhatso yaMambo Mwari apo panamambo. Munozotendenedza mambo, munhu weshe anechokurwa ndicho chake munyara yake; kunyazwi ndiani unozokwedzera pasinde ngaaurawe. Munozoapo panamambo mukubuda kwake nokuti kupotera kwake.” Nduna dzemazana dzakaita zveshe zvevakapangwa ndiJehoiadha mupristi; umwe ngaumwe wakaunza vanhu vake vamuna avo vakaemeserwa kubuda ngeSabatha, neavo vakaemeserwa kupotera pamushando ngezuva reSabatha, vakauya kunaJehoiadha mupristi. Mupristi wakapa kunenduna dzemazana mikhondo nezvihlangu zvaDhavhidha mambo zvaiya mutemperi raMambo Mwari. Vangwariri vakaema munhu weshe anezvokurwa ndizvo munyara yake, vakatendenedza mambo, kubvira ngokubani kwemhatso metsa ngedera kwemhatso, kutendenedza arita nemhatso, kungwarira mambo kumarupande eshe. Zvino wakabudisa mukororo wamambo, akaisa dzungudza pasoro rake, akamupa chitenderano; vakadaidzira vechiti ndiye mambo, vakamudzodza; vakaembera nyara dzavo, vakadaidzira vechiti, “Mambo ngaapone mhera nariini!” Naapo Atharia azwa bope revangwariri nerevanhu, wakauya kunevanhu mumhatso yaMambo Mwari; naapo paakaringira, wakaona mambo akaema pasinde pesika, kudai ngomuitiro wavo, nenduna nevaridzi vemagwama vaiya pasinde pamambo, nevanhu veshe venyika vechidakara, vechiridza hwama. Atharia wakabaura zvokufuka zvake, akadaidzira echiti, “Ndamukirwa! Ndamukirwa!” Zvino Jehoiadha mupristi wakapanga vatongi vezana nenduna dzehondo, echiti kwevari, “Mubudisenyi kubanze kubva pakati pemisara yevarindi, muuraye ngeshoti weshe uwo unomuteera.” Ngokuti mupristi wakaronza kuti, “Musatendera kuti aurairwe mumhatso yaMambo Mwari.” Navo vakamubata ngenyara dzavo; wakaenda ngenjira yaanopinda ndiyo mahachi echiuya kumhatso yamambo, naapo wakaurawapo. Jehoiadha wakaita chitenderano pakati paMambo Mwari namambo nevanhu, kuti vanosisira kuita vanhu vaMambo Mwari; nepakatizve pamambo nevanhu. Zvino veshe vanhu venyika vakaenda mumhatso yaBhaari, vakaipwanyira pashi; maarita ake nemiedzaniso yake vakazviputsa kuita zvigurwa, vakauraya Mathani mupristi waBhaari pamberi pamaarita. Mupristi wakaemesa vangwariri padera pemhatso yaMambo Mwari. Wakatora nduna huru dzemazana, nenduna dzeshe, vangwariri, nevanhu veshe venyika; zvino vakadzasa mambo kubva kumhatso yaMambo Mwari, vechihamba ngenjira yepamusiwo wevangwariri kuguma kumhatso yamambo. Mambo wakagara padendemaro remadzimambo. Ndizvo vanhu veshe venyika vakadakara, nedhorobha raiya nokunyarara, ngesure kwokuurayiwa kwaAtharia ngeshoti pasinde pemhatso yamambo. Jehoashi waiya nemakore manomwe apo akaamba kutonga. Mugore rechinomwe raJehu, Jehoashi wakatanga kutonga; wakatonga makore makumi marongomuna muJerusarema. Zina ramai ake raizwi Zibhia weBheerishebha. NaJehoashi wakaita izvo zvakanaka mukuona kwaMambo Mwari mazuva eshe okupona kwake, ngokuti Jehoiadha mupristi wakamudzidzisa. Zvakanyadaro ndau dzakakwirira adzizi kuduswa; vanhu vakaangira kupirapo munikero nokupishazve mitombo inegwema rakanaka. Jehoashi wakati kuvapristi, “Ashirai mare yeshe yeizvo zvakacheneswa zvinounzwa kumhatso yaMambo Mwari, mare yeshe yomunhu weshe unoerengwa, kudai ngeyaakaemeserwa munhu kuti aduse, nemare yeshe yaakadziemesera munhu mumwoyo mwake kuti aunze kumhatso yaMambo Mwari. Vapristi ngavaashire kubva kwevari vanopa, ngavanasirise mhatso, peshe panoda kunasiriswa murukumbati, kunyazwi ngepari panoda kunasiriswa.” Asi ngegore remakumi mairi namatatu rokutonga kwamambo Jehoashi vapristi vaiya vasati vanasirisa pamhatso. Ndizvo mambo Jehoashi wakadaidza Jehoiadha mupristi nevamweni vapristi, akati kwevari, “Ngenyi musikanasirisi mhatso? Ndizvo zvino musachaashirazve nakamwe mare kubva kunevanopa, asi mwechiipa kunevanonasirisa mhatso.” Ndizvo vapristi vakatenda kuti avachazoashirizve mare kubva kunevanhu nokutizve kunasirisa mhatso. Zvino Jehoiadha mupristi wakatora bhokisi, akadura buri pachidumaidzo charo, akariemesa pasinde pearita, ngokumudyo kwevanhu apo vechipotera mumhatso yaMambo Mwari; vapristi vaingwarira musiwo vakaisemwo mare yeshe yakaunzwa kumhatso yaMambo Mwari. Naapo vaona kuti mare yaiya yawanda yaiya mubhokisi munyori wamambo nomupristi mukuru vakakwireyo, vakaerenga mare yakaoneka mumhatso yaMambo Mwari, vakaisungira mumikwama. Vaizopa mare yakaerengwa munyara yaavo vaishanda kubata mushando wemhatso yaMambo Mwari; zvino vakabhadhara ndiyo vatsetsi nevaaki avo vainasirisa mhatso yaMambo Mwari, kuneavo vaiaka ngemapuwe, nevatsetsi vemapuwe, nokutenga matanda nemapuwe akatsetswa kuti vanasirise mhatso yaMambo Mwari, neizvo zveshe zvakaemeserwa zvayo kuti zvinasirirwe. Asi avazi kuitira mhatso yaMambo Mwari ngeiyo mare yakaunzwa mumhatso yaMambo Mwari, ndiro dzesirivha, nokuti zvigadzikiro zvezvibani, ndiro, magwama, nokuti zvidziyo zvomukore, nokuti zvidziyo zvesirivha, ngokuti vakaipa kunevashandi, vainasirisa ndiyo mhatso yaMambo Mwari. Avazi kubvunza mushumo kubva kuneavo vevakapa mare munyara dzavo, kuti vabhadhare vashandi, ngokuti vaishanda ngokugondeka. Mare yomunikero wokupauka neyomunikero wokushaisha isaiunzwa mumhatso yaMambo Mwari; asi yaiya yevapristi. Panguvayo Hazaeri mambo weAramu wakakwira koorwa neGathi, naye akarinyisa. Asi apo Hazaeri paakaemesa hope yake kukwira koorwisa Jerusarema, Jehoashi mambo waJudha wakatora zvipo zveshe zvakacheneswa, zvakapirwa ndimambo Jehoshafati, Jehoramu naAhazia, madzibaba ake, madzimambo aJudha, pamwepo nezvipo zvake zvakacheneswa, nomukore weshe wakaoneka mukati mwoupfumi hwemhatso yaMambo Mwari, nomukati mwemhatso yamambo, wakazvitumira izvi kunaHazaeri mambo weAramu. Zvino Hazaeri wakapetuka kubva Jerusarema. Zvino mishando imweni yaJoashi, nazvo zveshe zvaakaita, azvizi kunyorwa here muBhuku reMishando yeZuva ngeZuva yeMadzimambo aJudha? Varanda vake vakamiruka, vakapangana mazano, vakauraya Joashi mumhatso yaMiro, panjira yokudzaka kuenda Sira. NdiJozakha mukororo waShimeathi, naJehozabhadhi mukororo waShoma varanda vake, vakamubaya kuti afe. Vakamuika pamwepo nemadzibaba ake mudhorobha raDhavhidha; zvino Amazia mukororo wake wakatonga pandau yake. Mugore remakumi mairi namatatu okutonga kwaJoashi mukororo waAhazia mambo waJudha, Jehoahazi mukororo waJehu wakatanga kutonga padera paIsuraeri muSamaria, naye wakatonga makore gumi nemanomwe. Wakaita zvakashata mukuona kwaMambo Mwari, akateera zvishaishi zvaJerobhoamu mukororo waNebhati, izvo zvaakaita ndizvo kuti vaIsuraeri vashaishe; aazi kupauka kubva kwezviri. Noushungu hwaMambo Mwari hwakabaka kunevaIsuraeri, ndizvo wakavapira kakawanda munyara dzaHazaeri mambo weAramu, nomunyara dzaBhenihadhadhi mukororo waHazaeri. Asi Jehoahazi wakapota Mambo Mwari, naMambo Mwari wakamuzwa; ngokuti wakaona kutambudzwa kwaIsuraeri, ngenjira iyo mambo weAramu yaakavatambudza ndiyo. Ndizvo Mambo Mwari wakapa vaIsuraeri muponesi, ndizvo vakapokonyoka kubva munyara dzevaAramu; nevana vaIsuraeri vakagara mumatende avo kudai ngekaretu. Zvakanyadaro avazi kusiya zvishaishi zvemhatso yaJerobhoamu, uwo wakaita kuti vaIsuraeri vashaishe, asi vakahamba mukati mwazvo; asi sika yokudira miedzaniso yakaramba irimwo muSamaria. Ndizvo Jehoahazi wakasiiwa nehondo yevanhu vasikapindi makumi mashanu vagadhi vemahachi, nengoro gumi nevanohamba ngetsoka gumi remakumi emazana (10,000); ngokuti mambo weAramu waiya avaparadza, nokuvaita kudai ngemazungu epambuwa. Zvino mishando imweni yaJehoahazi, nazvo zveshe zvaakaita, nesimba rake, azvizi kunyorwa here muBhuku reMishando yeZuva ngeZuva yeMadzimambo aIsuraeri? Ndizvo Jehoahazi wakaata nemadzibaba ake, navo vakamuika muSamaria; zvino Joashi mukororo wake wakatonga pandau yake. Mugore remakumi matatu nemanomwe rokutonga kwaJoashi mambo waJudha, Jehoashi mukororo waJehoahazi wakatanga kutonga padera paIsuraeri muSamaria; wakatonga makore gumi nematanhatu. Naye wakaita zvakashata mukuona kwaMambo Mwari; aazi kupauka kubva muzvishaishi zvaJerobhoamu mukororo waNebhati, izvo zvaakaita ndizvo kuti vaIsuraeri vashaishe, asi wakahamba mukati mwazvo. Zvino mishando imweni yaJoashi, nazvo zveshe zvaakaita, nesimba rake, raakarwa ndiro naAmazia mambo waJudha, azvizi kunyorwa here muBhuku reMishando yeZuva ngeZuva yeMadzimambo aIsuraeri? Ndizvo Joashi wakaata nemadzibaba ake, naJerobhoamu wakagara padendemaro rake; Joashi wakaikwa muSamaria pamwepo nemadzimambo aIsuraeri. Zvino apo Erisha arwara ngenhenda iyo yaakafa ndiyo, Joashi mambo waIsuraeri wakadzaka kuuya kwaari, akachemera muhope mwake echiti, “A baba angu, baba angu! Ngoro dzeIsuraeri, nevagadhi vemahachi adzo.” Erisha wakati kwaari, “Tora uta nemisee;” ndizvo wakatora uta nemisee. Zvino wakati kunamambo waIsuraeri, “Kwanya uta;” naye wakahukwanya. Erisha wakaisa nyara dzake padera penyara dzamambo. Zvino wakati, “Beura fasitera rokumabvazuva;” naye wakaribeura. Erisha wakati, “Fura.” Naye wakafura. Zvino wakati, “Musee waMambo Mwari wokunyisa, musee wokunyisa vaAramu! Ngokuti iwewe unozorwa nevaAramu muAfeki metsa uvapedze.” Wakaangira echiti, “Tonhera misee iyo.” Naye wakaitonhera. Wakati kunamambo waIsuraeri, “Fura pamavhu ndiyo.” Wakafura katatu, akarekera. Zvino munhu waMwari wakamutsenekera, akati, “Waisisira kudai wafura kashanu nokuti katanhatu; zvino waizodai wafura vaAramu metsa uvapedze; asi zvino unozofura vaAramu katatu kega.” Ndizvo Erisha wakafa, navo vakamuika. Zvino zvikwata zvevaMoabhi zvaiuya koochakata nyika gore ngegore pachirimo. Naapo munhu echiikwa, vakaona chikwata chevanhu; navo vakakandira muiri womunhu uwo muiba raErisha. Naapo uwo munhu akandirwa paakagwama magodo aErisha, wakamukazve akaema ngetsoka dzake. Zvino Hazaeri mambo weAramu wakatambudza Isuraeri mazuva eshe okupona kwaJehoahazi. Asi Mambo Mwari wakavaitira nyasha, wakavazwira urombo; akakunukukira kwevari, ngendaa yechitenderano chake naAbrahama, Isaka naJakobe, naye aazi kuvaparadza, nokuti kuvarasha ngouwo mukuwo kubva kuhope yake metsa nyamashi. Naapo Hazaeri mambo weAramu afa, Bhenihadhadhi mukororo wake wakatonga pandau yake. Zvino Jehoashi mukororo waJehoahazi wakatorazve madhorobha kubva kunaBhenihadhadhi mukororo waHazaeri, awo aakatora kubva kunaJehoahazi baba ake muhondo. Katatu Joashi wakamunyisa, akatorazve madhorobha aIsuraeri. Mugore rechipiri rokutonga kwaJoashi mukororo waJehoahazi mambo waIsuraeri, mambo Amazia mukororo waJoashi wakatonga padera paJudha. Wakatanga kutonga aane makore makumi mairi nemashanu, naye wakatonga makore makumi mairi nemapfumbamwe muJerusarema. Zina ramai ake raizwi Jehoadhini weJerusarema. Wakaita zvakanaka mukuona kwaMambo Mwari, asi haiwa kudai ndibaba ake Dhavhidha; muzviro zveshe wakaita kudai ngezvakaita baba ake Joashi. Asi ndau dzakakwirira adzizi kuduswa; vanhu vaiya vachandopirapo midiro nokupishapo mitombo inegwema rakanaka. Naapo umambo hwagwinyiswa munyara yake, wakauraya varanda vake avo vakauraya mambo baba ake. Asi aazi kuuraya vana vevaurayi; kudai ngezvakanyorwa mubhuku romupango waMosi, apo Mambo Mwari paakapanga echiti, “Madzibaba aazouraiwi ngendaa yokushaisha kwevana, nevana avazouraiwi ngendaa yokushaisha kwemadzibaba; asi munhu weshe unozouraiwa ngendaa yechishaishi chake.” Wakauraya vanhu gumi remakumi emazana (10,000) evaEdhomu mubani romunyu, akatora Sera ngokurwa, akadudza zina raro kuti Jokitheeri metsa nanyamashi. Zvino Amazia wakatuma nhumwa kunamambo Jehoashi, mukororo waJehoahazi mukororo waJehu mambo waIsuraeri, echiti, “Uya, tiringirane muhope.” Jehoashi mambo waIsuraeri wakatumira izwi kunaAmazia mambo waJudha echiti, “Pfiba romunzwa riri muRebhanoni rakatumira izwi kunomusidhari uri muRebhanoni rechiti, ‘Ipa mwanasikana wako kunomukororo wangu kuti aite mukadzi wake;’ asi chikara chomushango chaiya muRebhanoni chakatsikira pashi pfiba romunzwa. Ngechakwadi iwewe wakanyisa Edhomu, ngokudaro mwoyo wako wodzikudza. Wechidzigutsa ngouthende hwako, ugare kanyi; ngokuti ngenyi wechidzimusira madambudziko kuti uwiremwo, iwewe nevaJudha?” Asi Amazia wakaramba kupurutana. Ndizvo Jehoashi mambo waIsuraeri wakakwira; iye naAmazia mambo waJudha vakaringirana muhope paBhethishemeshi raJudha. VaJudha vakanyiswa ngevaIsuraeri; veshe vakatiza, vakaenda kumatende avo. Jehoashi mambo waIsuraeri wakabata Amazia mambo waJudha, mukororo waJehoashi, mukororo waAhazia, ari muBhethishemeshi. Wakauya Jerusarema, wakapwanyira pashi rukumbati rweJerusarema kubvira pamusiwo weEfuremu metsa kuguma pamusiwo wechipiri pakhona, panoda kukwana mamitha mazana mairi. Wakatora zveshe mukore, sirivha nezvidziyo zveshe zvaakaona mumhatso yaMambo Mwari, noupfumi hwemhatso yamambo, nemabhanditi; naye wakahwirira Samaria. Zvino mishando imweni yaJehoashi yaakaita, simba rake, nokurwa kwaakaita naAmazia mambo waJudha, azvizi kunyorwa here muBhuku reMishando yeZuva ngeZuva yeMadzimambo aIsuraeri? NaJehoashi wakaata nemadzibaba ake, wakaikwa muSamaria pamwepo nemadzimambo aIsuraeri; zvino Jerobhoamu mukororo wake wakatonga pandau yake. Amazia mukororo waJoashi mambo waJudha wakapona makore gumi namashanu sure kwokufa kwaJehoashi mukororo waJehoahazi mambo waIsuraeri. Zvino mishando imweni yaAmazia aizi kunyorwa here muBhuku reMishando yeZuva ngeZuva yeMadzimambo aJudha? Navo vakapangana zano rokurwa naye muJerusarema, naye wakatizira Rakhishi. Asi vakateera Rakhishi, vakamuurayapo. Vakamuunza ari padera pemahachi; wakatsirwa muJerusarema pamwepo nemadzibaba ake mudhorobha raDhavhidha. Nevanhu veshe vaJudha vakatora Azaria, uwo waiya nemakore gumi namatanhatu okubarwa, vakamuemesa kuita mambo muugaro hwababa ake Amazia. Wakaakisa Erathi, akaripetudza kunaJudha, ngesure apo mambo aata nemadzibaba ake. Mugore regumi nemashanu ramambo Amazia, mukororo waJoashi mambo waJudha, Jerobhoamu mukororo waJoashi mambo waIsuraeri wakatanga kutonga muSamaria; wakatonga makore makumi marongomuna narimwe. Naye wakaita zvakashata mukuona kwaMambo Mwari; aazi kutongopauka kubva muzvishaishi zveshe zvaJerobhoamu mukororo waNebhati, izvo zvaakaita kuti Isuraeri ashaishe. Wakamusirirazve mugano waIsuraeri kubva paRebhohamathi kuruandhle rweArabha, kudai ngeizwi raMambo Mwari, Mwari waIsuraeri, iro raakaereketa kubudikidza ngomuranda wake Jona mukororo waAmithai, muprofeti, uwo weGathiheferi. Ngokuti Mambo Mwari wakaona kutambudzika kwaIsuraeri, kuti kwaiya kwakashata kakurutu; ngokuti paiya pasina naumwe wakakonyerwa nokuti wakasara akasunhurika, pasina naumwe wokudetsera Isuraeri. Asi Mambo Mwari aazi kuronza kuti unozotsukutidza zina raIsuraeri kubva pashi pomudenga; ndizvo wakavaponesa ngenyara yaJerobhoamu mukororo waJoashi. Zvino mishando imweni yaJerobhoamu nazvo zveshe zvaakaita, simba rake, nokurwa kwake, nenjira yaakaunzirazve Dhamasekusi naHamathi kuvaIsuraeri, awo aiya akaita evaJudha, azvizi kunyorwa here muBhuku reMishando yeZuva ngeZuva yeMadzimambo aIsuraeri? Jerobhoamu wakaata nemadzibaba ake, madzimambo aIsuraeri; naZekharia mukororo wake wakatonga pandau yake. Mugore remakumi mairi nemanomwe raJerobhoamu mambo waIsuraeri, Azaria mukororo waAmazia mambo waJudha wakatanga kutonga. Waiya nemakore gumi namatanhatu apo paakatanga kutonga, naye wakatonga makore makumi mashanu namairi muJerusarema. Zina ramai ake raizwi Jekhoria weJerusarema. Wakaita zvakanaka mukuona kwaMambo Mwari, kudai ndizvo zveshe zvakaitwa ndibaba ake Amazia. Zvakanyadaro ndau dzakakwirira adzizi kuduswa; vanhu vakaangira kupishapo mutombo unegwema rakanaka nokupira midiro. Mambo Mwari wakachaya mambo ngemapere metsa zuva rokufa kwake, naye wakagara mumhatso ari ega. Jothamu mukororo wamambo waingwarira mungome, echitonga vanhu venyika. Zvino mishando imweni yaAzaria nazvo zveshe zvaakaita, azvizi kunyorwa here muBhuku reMishando yeZuva ngeZuva yeMadzimambo aJudha? NaAzaria wakaata nemadzibaba ake; navo vakamuika pamwepo nemadzibaba ake mudhorobha raDhavhidha; naJothamu mukororo wake wakatonga pandau yake. Mugore remakumi matatu namasere rokutonga kwaAzaria mambo waJudha, Zekharia mukororo waJerobhoamu wakatonga Isuraeri muSamaria mwedzi mitanhatu. Wakaita zvakashata mukuona kwaMambo Mwari kudai ngezvaakaita madzibaba ake. Aazi kupauka kubva kuzvishaishi zvababa ake Jerobhoamu mukororo waNebhati, izvo zvaakaita ndizvo kuti vaIsuraeri vashaishe. Sharumu mukororo waJabheshi wakamuitira zano, akamubaya pamberi pevanhu, akamuuraya, naye wakatonga pandau yake. Zvino mishando imweni yaZekharia, ringira, aizi kunyorwa here muBhuku reMishando yeZuva ngeZuva yeMadzimambo aIsuraeri? Ichi ndicho chigondiso chaMambo Mwari chaakagondisa kunaJehu echiti, “Vakororo vako vanozogara padendemaro raIsuraeri metsa vaite mibarirwana mirongomuna.” Ndizvo zvakaitika. Sharumu mukororo waJabheshi wakatanga kutonga mugore remakumi matatu nemapfumbamwe okutonga kwaUzia mambo waJudha, naye wakatonga mwedzi umwe muSamaria. Zvino Menahemu mukororo waGadhi wakakwira kubva Thiriza, naye wakaguma Samaria; wakabaya Sharumu mukororo waJabheshi muSamaria, akamuuraya, wakatonga pandau yake. Zvino mishando imweni yaSharumu, nokuita zano kwake, ringira, zvakanyorwa muBhuku reMishando yeZuva ngeZuva yeMadzimambo aIsuraeri. Panguva iyo Menahemu wakaparadza Tifisa, navo veshe vaiya mukati mwaro, nenyika yaro kubvira Thiriza; ngokuti avazi kumubeurira, ndizvo wakariparadza. Wakatumbura vakadzi veshe vaiya nemimba vaigaramwo. Mugore remakumi matatu namasere rokutonga kwaAzaria mambo waJudha, Menahemu mukororo waGadhi wakatanga kutonga Isuraeri; wakatonga makore gumi muSamaria. Wakaita zvakashata mukuona kwaMambo Mwari; aazi kupauka mazuva eshe kubva kunechimwe chezvishaishi zvaJerobhoamu mukororo waNebhati, izvo zvakaita ndizvo kuti vaIsuraeri vashaishe. Phuri mambo waAsiria wakauya koorwa nevanhu venyika iyo; naMenahemu wakapa Phuri matarenta esirivha gumi remazana (1,000), kuti amudetsere ngokugwinyisisa umambo munyara dzake. Menahemu wakabharisa vaIsuraeri mare, ndikwo kuti, vanhu veshe vaiya noupfumi, vaidusa zvigurwa zvesirivha makumi mashanu umwe ngaumwe, kuti ipuwe mambo weAsiria. Ndizvo mambo weAsiria wakahwirira sure, aazi kugaramwo munyika iyo. Zvino mishando imweni yaMenahemu nazvo zveshe zvaakaita, azvizi kunyorwa here muBhuku reMishando yeZuva ngeZuva yeMadzimambo aIsuraeri? Menahemu wakaata nemadzibaba ake; Phekahia mukororo wake wakatonga paugaro hwake. Mugore remakumi mashanu rokutonga kwaAzaria mambo waJudha, Phekahia mukororo waMenahemu wakatanga kutonga Isuraeri muSamaria; wakatongamwo makore mairi. Wakaita zvakashata mukuona kwaMambo Mwari; aazi kupauka kubva kuzvishaishi zvaJerobhoamu mukororo waNebhati, izvo zvakaita ndizvo kuti vaIsuraeri vashaishe. Pheka mukororo waRemaria nduna yake huru, wakamuitira zano, nevanhu makumi mashanu veGireadhi wakamubaya ari muSamaria, mundau yomukati mungome yamambo, pamwepo naArigobhi naArie. Wakamuuraya, akatonga pandau yake. Zvino mishando imweni yaPhekahia, nazvo zveshe zvaakaita, ringira, zvakanyorwa muBhuku reMishando yeZuva ngeZuva yeMadzimambo aIsuraeri. Mugore remakumi mashanu namairi rokutonga kwaAzaria mambo waJudha, Pheka mukororo waRemaria wakatanga kutonga Isuraeri muSamaria. Wakatonga makore makumi mairi. Wakaita zvakashata mukuona kwaMambo Mwari; aazi kupauka kubva kuzvishaishi zvaJerobhoamu mukororo waNebhati, izvo zvaakaita ndizvo kuti vaIsuraeri vashaishe. Mumazuva aPheka mambo waIsuraeri, Thigirathiphiresa mambo weAsiria wakauya akanyisa Ijoni, Abheribhethimaakha, Janoa, Kedheshi, Hazori, Gireadhi neGarire, nenyika dzeshe dzaNafitari; wakatora vanhu kuita hloko muAsiria. Zvino Hoshea mukororo waEra wakaita zano rokurwisa Pheka mukororo waRemaria, akamubaya, akamuuraya; wakatonga paugaro pake, mugore remakumi mairi okutonga kwaJothamu mukororo waUzia. Zvino mishando imweni yaPheka, nazvo zeshe zvaakaita, ringira, zvakanyorwa muBhuku reMishando yeZuva ngeZuva yeMadzimambo aIsuraeri. Mugore rechipiri raPheka mukororo waRemaria, mambo waIsuraeri, Jothamu mukororo waUzia mambo waJudha wakatanga kutonga. Waiya aane makore makumi mairi namashanu apo paakatanga kutonga, naye wakatonga makore gumi namatanhatu muJerusarema. Zina ramai ake raizwi Jerusha, mwanasikana waZadhoki. Wakaita zvakanaka mukuona kwaMambo Mwari, kudai ngezvakaitwa ndiUzia baba ake. Zvakanyadaro ndau dzakakwirira adzizi kuduswa; vanhu vakaramba vechipirapo minikero nokupishirapo mitombo inegwema rakanaka pandau dzakakwirira. Wakaaka musiwo wepadera wemhatso yaMambo Mwari. Zvino mishando imweni yaJothamu, nazvo zveshe zvaakaita, azvizi kunyorwa here muBhuku reMishando yeZuva ngeZuva yeMadzimambo aJudha? Mumazuva awo Mambo Mwari wakatanga kutuma Rezini, mambo weAramu, naPheka mukororo waRemaria kuti varwe naJudha. Jothamu wakaata nemadzibaba ake mudhorobha raDhavhidha baba ake; Ahazi mukororo wake wakatonga pandau yake. Mugore regumi nemanomwe raPheka mukororo waRemaria, Ahazi mukororo waJothamu mambo waJudha wakatanga kutonga. Ahazi waiya anemakore makumi mairi apo paakatanga kutonga; wakatonga makore gumi nematanhatu muJerusarema. Aazi kuita zvakanaka mukuona kwaMambo Mwari, Mwari wake, kudai ngezvakaitwa ndiDhavhidha baba ake, asi wakahamba ngenjira yemadzimambo aIsuraeri. Wakatoitawo kuti mukororo wake apinde ngepakati pomuriro, kudai ngechinyangadzo chevasikatendi Mwari, avo vaakadzinga Mambo Mwari kubva pamberi pevana vaIsuraeri. Wakapira minikero nokupisha mitombo inegwema rakanaka pandau dzakakwirira, nepadera pezvimitunhu, nepashi pemiti yeshe yakasvipira. Zvino Rezini mambo weAramu, naPheka mukororo waRemaria mambo waIsuraeri vakakwira koorwa hondo neJerusarema; vakakomba Ahazi asi vakakorera kumunyisa. Ngouwo mukuwo Rezini mambo weAramu wakatorazve Erathi ngokurwa nokuripetudza kuvaAramu, nokudzinga vaJudha kubva Erathi; nevaEdhomu vakauya koogara Erathi metsa nanyamashi. Ahazi wakatuma nhumwa kunaThigirathiphiresa mambo weAsiria echiti, “Inini ndiri muranda wako nomukororo wako. Kwira undiponese kubva kunyara yamambo weAramu, nokunyara yamambo waIsuraeri, avo vanondirwisa.” Ahazi wakatorawo sirivha nomukore zvakaoneka mumhatso yaMambo Mwari, noupfumi hwemhatso yamambo, wakazvitumira kuita chipo chamambo weAsiria. Mambo weAsiria wakapurutana kwaari; mambo weAsiria wakaenda koorwisa Dhamasekusi, akarinyisa, akatora vanhu varo kooita hloko kudhorobha reKiri, akauraya Rezini. Naapo mambo Ahazi paakaenda Dhamasekusi kooshongana naThigirathiphiresa mambo waAsiria, wakaona arita raiya muDhamasekusi. Mambo Ahazi wakatumira kunaUria mupristi chiemo chearita iro nechionero charo kudai ngomuakirwe waro. Uria mupristi wakaaka arita, echiteera zveshe zvakatumirwa ndimambo Ahazi kubva Dhamasekusi; ndizvo Uria mupristi wakapedza kuriaka kudaro, asati auya mambo Ahazi kubva Dhamasekusi. Naapo mambo auya kubva Dhamasekusi, wakaona arita. Zvino mambo wakakwedzera paarita, akakwira koopira midiro padera paro. Naye wakapira mudiro wake wokupisha, nomudiro wezviyo, akadurura mudiro wokumwa, nokufafaza mudiro wengazi yokuiyanisa padera pearita. Wakadusa arita rethusi, raiya pamberi paMambo Mwari, kubva pamberi pemhatso, kubva pandau iri pakati pearita rake nemhatso yaMambo Mwari, akariisa ngorutii rwedera rwearita rake. Mambo Ahazi wakapanga Uria mupristi echiti, “Paarita guru unozopira mudiro wokupisha wemangwanani, nomudiro wokupisha wezviyo wemadeekoni, nomudiro wokupisha wamambo, nomudiro wake wezviyo, mudiro wokupisha wevanhu veshe vomunyika, nomudiro wavo wezviyo, nemidiro yavo yokumwa; nokufafaza padera paro yeshe ngazi yemidiro yokupisha, nengazi yeshe yemidiro inopirwa; asi arita rethusi rinozoita rangu rokubvunza ndiro.” Uria mupristi wakaita zveshe zvaakapangwa ndimambo Ahazi. Zvino mambo Ahazi wakagura sika kubva patsikiro, akadusa chidziyo chokushambiromwo; akadusa bhavhu kubva padera pekabi dzethusi, dzaiya pashi paro, akariisa padera petsikiro remapuwe. Musiwo unedenga rakafukidzwa weSabatha, wevaiya vakaaka mungome, nomusiwo wokubanze wokupinda kwamambo, wakazvidusa kubva mumhatso yaMambo Mwari. Wakaita izvi ngendaa yamambo weAsiria. Zvino mishando imweni yaAhazi yaakaita, aizi kunyorwa here muBhuku reMishando yeZuva ngeZuva yeMadzimambo aJudha? Ahazi wakaata nemadzibaba ake, naye wakaikwa nemadzibaba ake mudhorobha raDhavhidha. Hezekia mukororo wake wakatonga pandau yake. Mugore regumi namairi rokutonga kwaAhazi mambo waJudha, Hoshea mukororo waEra wakatanga kutonga Isuraeri muSamaria; wakatonga makore mapfumbamwe. Wakaita zvakashata mukuona kwaMambo Mwari, asi haiwa kudai ngemadzimambo aIsuraeri vaiyapo vakamutangira. Sharimanesa mambo waAsiria wakakwira koorwa naye; Hoshea wakaita muranda wake, akamutherera muthero. Asi mambo waAsiria wakaona kuti Hoshea waiya aita zano rakashata kwaari; ngokuti waiya atuma nhumwa kunaSo, mambo weEgipite, wakarekera kuunza muthero kunamambo weAsiria, kudai ngezvaakaita gore ngegore; ndizvo mambo weAsiria wakamuisa mutirongo, akamukonyeremwo. Zvino mambo weAsiria wakakwira, akapamba nyika yeshe, akaenda Samaria, akarikomba makore matatu. Mugore rechipfumbamwe rokutonga kwaHoshea, mambo weAsiria wakanyisa Samaria, akatora vaIsuraeri kuenda navo Asiria. Wakavaisa muHara paHabhori pasinde pomufuya weGozani, nomumadhorobha evaMedhia. Izvi zvakaitika ngokuti vanhu vaIsuraeri vaiya vakashaisha kunaMambo Mwari, Mwari wavo, uwo wakavakwidza kubva kunyika yeEgipite, kubva kunyara yaFaro mambo weEgipite. Vaiya vadira zvimweni zvimwari, vaiya vakahamba ngetsika dzevasikatendi Mwari, avo vaakadzinga Mambo Mwari kubva pamberi pevana vaIsuraeri, nedzemadzimambo aIsuraeri, idzo dzevakaemesa ngokwavo. Vanhu vaIsuraeri vakaita ngokufishika zviro zvisikazi kunaka kunaMambo Mwari, Mwari wavo. Vakadziakira ndau dzakakwirira mumadhorobha avo eshe, kubvira kurusvingo rwevarindi metsa kuguma kumadhorobha akashosherwa ngorukumbati. Vakadziemesera pachavo miedzaniso yokudira nemakwasha padera pemitunhu yeshe yakakwirira nepashi pemiti yeshe yakasvipira. Naapo vakapishirapo mitombo inegwema rakanaka kundau dzeshe dzakakwirira, kudai ngezvevaiita vasikatendi Mwari, vaakadzinga Mambo Mwari kubva pamberi pavo; vakaita zviro zvakashata zvinomusa ushungu hwaMambo Mwari. Vakadira miedzaniso, yaakaronza Mambo Mwari kuti, “Musazoita chiro chakadaro.” Asi Mambo Mwari wakapanga vaIsuraeri nevaJudha, kubudikidza ngevaprofeti veshe neavo veshe vaifembera echiti, “Tenderukai imwimwi kubva kunjira dzenyu dzakashata, mungwarire mipango yangu nezviemeso zvangu, kudai ngemipango yeshe yendakapanga ndiyo madzibaba enyu, neiyo yendakatumira kwomuri ngevaranda vangu vaprofeti.” Avazi kupurutana, asi vakaomesa mitsipa yavo, kudai ngemitsipa yamadzibaba avo, avo vasikazi kutenda kunaMambo Mwari, Mwari wavo. Vakaramba zviemeso zvake, nechitenderano chake chaakaita nemadzibaba avo, nokungwadza kwake kwaakavapa. Vakateera zvisina shwiro, vakaita vasina shwiro; vakateera vasikatendi Mwari, avo vakavatendenedza, vaakavapanga ndivo Mambo Mwari, kuti vasazoita kudai ndivo. Vakaramba mipango yeshe yaMambo Mwari, Mwari wavo, vakadziitira miedzaniso yakanyunguruswa yemakonyana mairi; vakaita gwasha, vakadira hondo yeshe yomudenga, vakadira Bhaari. Vakaita kuti vakororo vavo nevanasikana vavo vapinde ngepakati pomuriro; vakaringidza, vakaita un'anga, vakadzitengesa pachavo kuita zvakashata mukuona kwaMambo Mwari, kumumusira ushungu. Ndizvo Mambo Mwari wakanyangadzirwa vaIsuraeri, akavadusa kubva pamberi pehope yake; akuna wakasara, kwega dzinza raJudha. VaJudhawo avazi kungwarira mipango yaMambo Mwari, Mwari wavo, asi vakahamba ngetsika dzevaIsuraeri dzevakaemesa. Mambo Mwari wakaramba mibarirwana yeshe yaIsuraeri; wakavatambudza, akavapa munyara dzevachakati, metsa avarasha kubva pamberi pehope yake. Naapo aparadzanisa vaIsuraeri kubva kumhatso yaDhavhidha, vakaemesa Jerobhoamu mukororo waNebhati kuti aite mambo wavo. Jerobhoamu wakapausa vaIsuraeri kubva mukuteera Mambo Mwari, akavaita kuti vaite chishaishi chikuru. Vanhu veshe vaIsuraeri vakaangira kuhamba muzvishaishi zveshe zvaJerobhoamu zvaakaita; avazi kupauka kubva kwezviri metsa Mambo Mwari adusa vaIsuraeri kubva pamberi pake, kudai ngezvaakaronza kubudikidza ngevaranda vake veshe vaprofeti. Ndizvo vaIsuraeri vakaitwa vatorwa kubva kunyika yavo kuenda Asiria metsa nyamashi. Mambo waAsiria wakaunza vanhu kubva Bhabhuroni, Khutha, Avha, Hamathi neSefarvhaimu, nokuvaisa mumadhorobha eSamaria, pandau yevana vaIsuraeri; vakatora Samaria rikaita ravo, vakagara mumadhorobha aro. Naapo pevakatanga kugaramwo, avazi kudira Mambo Mwari; ndizvo Mambo Mwari wakatumira mhondoro pakati pavo, dzakauraya vamweni vavo. Ndizvo mambo weAsiria wakaronzerwa kuti, “Madzinza ewakadusa nokuvagarisa mumadhorobha eSamaria, avana chevanozia ngetsika dzamwari wenyika iyo; ndizvo wakatuma mhondoro pakati pavo, ringira, dzinovauraya, ngokuti avazii tsika dzamwari wenyika iyo.” Zvino mambo weAsiria wakapanga echiti, “Tumiraiyo umwe wevapristi avo vemwakatora kubvayo; ngaaende agareyo, ngaavadzidzise tsika dzamwari wenyikayo.” Ndizvo umwe wevapristi, avo vevakatora kubva Samaria, wakauya, akagara Bhetheri; wakavadzidzisa tsika yevanosisira kudira Mambo Mwari ndiyo. Asi madzinza eshe akadziitira zvimwari zvawo, vakazviisa mumhatso dzendau dzakakwirira, idzo dzakaitwa ngevaSamaria, madzinza eshe mumadhorobha mwevaigaramwo. Vanhu veBhabhuroni vakaaka Sukhothibhenothi, vanhu veKhutha vakaaka Negari, nevanhu veHamathi vakaaka Ashima; vanhu veAvha vakaaka Nibhazi naThartaki, nevaSefarvhaimu vakapisha vana vavo mumuriro kunaAdramerekhi naAnamerekhi, zvimwari zvevaSefarvhaimu. Ndizvo vakadira Mambo Mwari, vakaemesa kubva pakati pavo vanhu vakasiyana kuita vapristi vendau dzakakwirira, avo vakapira midiro yavo kumhatso dziri kundau dzakakwira. Ndizvo vakadira Mambo Mwari, asi vakadira zvimwari zvavo, kudai ngetsika dzemadzinza ekwevakatorwa. Metsa nanyamashi vanoangira kuita tsika dzavo dzekaretu. Avadiri Mambo Mwari, avaiti kudai ngechironzo chake, nokuti zviemeso zvake, nokuti ngezvironzo nokuti mipango zvaakapanga Mambo Mwari kuvana vaJakobe, uwo waakadudza kuti Isuraeri. Mambo Mwari wakaita chitenderano navo, akavapanga echiti, “Musazodira zvimwari zvimweni, nokuti kuzvigwadamira pachenyu, nokuti kuzvishandira, nokuti kupira midiro kwezviri. Asi munozodira Mambo Mwari, uwo wakamubudisa kubva kunyika yeEgipite ngesimba guru nomuoko wakatambanudzwa; munozodzikotamisa pachenyu kwaari, nokwaari munozopira midiro. Tsika, zviemeso, zvironzo nomupango zvaakamunyorera, munozongwarira kuzviita mhera nariini. Musazodira zvimwari zvimweni; musazoriarwa chitenderano chendakaita nemwi. Musazodira zvimwari zvimweni; asi munozodira Mambo Mwari, Mwari wenyu; unozomununura kubva kunyara dzemagaa enyu eshe.” Zvakanyadaro avazi kupurutana, asi vakaangira kuita tsika dzavo dzekaretu. Ndizvo madzinza aya akadira Mambo Mwari, akadirazve miedzaniso yavo yakatsetswa; metsa nanyamashi vana vavo nevana vevana vavo vanoangira kuita kudai ngezvakaitwa ngemadzibaba avo. Mugore rechitatu raHoshea mukororo waEra mambo waIsuraeri, Hezekia mukororo waAhazi mambo waJudha wakatanga kutonga. Wakatanga kutonga anemakore makumi mairi namashanu; wakatonga makore makumi mairi nemapfumbamwe muJerusarema. Zina ramai ake raizwi Abhi, mwanasikana waZekharia. Wakaita izvo zvakanaka mukuona kwaMambo Mwari, kudai ngezvakaitwa ndibaba ake Dhavhidha. Wakadusa ndau dzakakwirira, akaputsira pashi miedzaniso yokudira, nokutemera pashi gwasha. Wakaputsa kuita zvigurwa nyoka yethusi, yakanasirwa ndiMosi, ngokuti metsa pamazuva awo vana vaIsuraeri vaiya vechipishira mutombo unegwema rakanaka kweiri; wakaidudza kuti Nehushitani. Hezekia wakagonda munaMambo Mwari, Mwari waIsuraeri; ndizvo kwaiya kusina naumwe ngesure wakadai ndiye pakati pemadzimambo eshe aJudha akateera sure kwake, nokuti pakati paavo veshe vakatanga pamberi pake. Ngokuti wakabatirira kakurutu panaMambo Mwari; aazi kupauka kubva mukumuteera, asi wakangwarira mipango iyo yaakapanga Mambo Mwari kunaMosi. Mambo Mwari waiya naye; wakabudirira kundau dzeshe dzaakaenda. Wakamukira mambo weAsiria, aazi kuchazomushandira. Wakarwisa vaFiristia, metsa kuguma Gaza nenharaunda yaro, kubvira kurusvingo rwevarindi metsa kuguma kudhorobha rakashosherwa ngorukumbati. Mugore rechirongomuna ramambo Hezekia, iro raiya gore rechinomwe raHoshea mukororo waEra mambo waIsuraeri, Sharimanesa mambo weAsiria wakauya koorwa neSamaria, akarikomba. Pakupera kwemakore matatu vakarinyisa. Mugore rechitanhatu raHezekia, iro raiya raagore rechipfumbamwe raHoshea mambo waIsuraeri, Samaria rakatorwa. Mambo waAsiria wakatora vaIsuraeri kuenda navo Asiria, akavagarisa muHara, muHabhori pasinde perwizi runozwi Gozani, nomumadhorobha evaMedhia, ngokuti avazi kupurutana izwi raMambo Mwari, Mwari wavo, asi vakagura chitenderano chake, nazvo zveshe izvo zvaakapanga Mosi muranda waMambo Mwari; avazi kuzvipurutana nokuti kuzviita. Mugore regumi nemarongomuna okutonga kwamambo Hezekia, Senakheribhi mambo weAsiria wakauya koorwa nemadhorobha eshe akashosherwa ngemarukumbati aJudha, naye akaanyisa. Hezekia mambo waJudha wakatumira izwi kunamambo weAsiria muRakhishi echiti, “Ndakashaisha; ibva kwendiri; kunyazwi chiinyi chounozoronza kwendiri, ndinozochibhadhara.” Mambo weAsiria wakabhadharisa Hezekia mambo waJudha makhirogramu gumi rimwe emakumi emana (10,000) ezvigurwa zvesirivha negumi rimwe remazana (1,000) ezvigurwa zvomukore. Hezekia wakamupa sirivha yeshe yakaoneka mumhatso yaMambo Mwari nomuupfumi hwemhatso yamambo. Ngouwo mukuwo Hezekia wakadusa mukore weshe kubva kumisiwo yemhatso yaMambo Mwari, nokubva musika dzemisiwo dzaakaseta Hezekia mambo waJudha, akaupa kunamambo weAsiria. Mambo weAsiria wakatuma Thartani, Rabhisarisi naRabhishake nehondo huru kubva Rakhishi kuenda kunamambo Hezekia koorwa muJerusarema. Naapo vaguma vakakwira, vakaema pasinde pemugero wedziya redera, mupato guru, rinoenda kumunda womusuki wezvokusimira. Naapo vadaidza mambo, kwakabuda kwavari Eriakimu mukororo waHirikia, uwo waiya nduna yengome naShebhina munyori, naJoa mukororo waAsafi mungwariri wezvakanyorwa. Rabhishake wakati kwevari, “Ronzai zvino kunaHezekia, kuti mambo mukuru, mambo weAsiria unoronza kudai, ‘Magondero ako ari pari ounogonda ndiwo? Iwewe unopinimidza kuti mazwi ega ndiwo mazano nesimba rokurwa hondo here? Zvino iwewe unogonda anani, zvewandimukira?’ ” Ringira, unogonda Egipite mudondoro worutsanga rwakaguka, urwo runozobaya nyara yomunhu weshe unotseama kweruri. Ndizvo wakadaro Faro mambo weEgipite kwevari veshe vanomugonda. Asi kuti mwechiti kwendiri, “Tinogonda kunaMambo Mwari, Mwari wedu, andiyepi here uwo waiya nendau dzakakwirira dzokudira nemaarita akaparadzwa ndiHezekia, echiti kunaJudha neJerusarema, ‘Munozodira pamberi pearita iri muJerusarema?’ Uyai zvino, pikai mhiko kunamambo wangu weAsiria: Ndinozomupa makumi emazana mairi (2,000) emahachi kudai iwewe wechikona kupa vagadhi kwaari. Ungaita maitirenyi kuti unyise mukuru umwe wenduna pakati pevaranda vamambo wangu, wechigonda vaEgipite kukupa ngoro nevagadhi vemahachi? Inini ndauya here ndisina Mambo Mwari kooparadza iyi nyika? Mambo Mwari wakati kwendiri, ‘Kwira koorwa neiyi nyika, uiparadze.’ ” Zvino Eriakimu mukororo waHirikia, Shebhina naJoa vakati kunaRabhishake, “Ereketa kunevaranda vako ngorurumi rwechiAsiria, tinomupota, ngokuti tinoruzwa; musaereketa kwetiri ngorurumi rwevaJudha kuti vasazwa avo vanoema parukumbati.” Asi Rabhishake wakati kwevari, “Mambo wangu wakandituma here kuti ndierekete mazwi aya kunamambo wako nokwomuri? Aazi kundituma here kuneavo vanhu vanogara parukumbati, avo vakaemeserwa kuparadzwa pamwepo nemwi kuti vadye madisa avo nokumwa matundo avo?” Zvino Rabhishake wakaema, akadaidzira ngeizwi guru, ngorurumi rwevaJudha, akati, “Izwanyi imwimwi mazwi amambo mukuru, mambo weAsiria! Mambo unoronza izvi, musatendera Hezekia kuti amuchengedzere, ngokuti aana simba rokumununura kubva kunyara yangu. Musatendera Hezekia kuti amuite kuti mugonde Mambo Mwari, echiti, ‘Mambo Mwari ngegwinyiso unozotinunura nedhorobha iri arizowi munyara dzamambo waAsiria. Musazopurutana kunaHezekia; ngokuti mambo weAsiria unoronza izvi, itai chitenderano neni, mubude kuuya kwendiri zvino umwe ngaumwe wenyu unozodya kubva kumuvhini wake, nomunhu weshe adye kumuonde wake, munhu weshe amwe mvura yechinyuka chake, metsa ndiuye ndimutore kuenda kunyika imweni yakadai ngeyenyu, nyika inezviyo nevhini, nyika inechingwa neminda yemivhini, nyika yemafuta omuorivhi, neyeuchi, kuti mupone musafa.’ Musapurutana Hezekia apo echimupausa echiti, ‘Mambo Mwari unozotinunura. Chiripo here chimwe chezvimwari pakati pamadzinza chakanunura nyika yacho kubva kunamambo weAsiria? Zviri pari zvimwari zveHamathi nezveAriphadhi? Zviripari zvimwari zveSefarvhaimu, zveHena nezveIvha? Zvakanunura Samaria kubva kunyara yangu here? Ndiani pakati pezvimwari zveidzi nyika zvakanunura nyika dzazvo kubva kunyara yangu, zvomunopinimidza kuti Mambo Mwari unganunura Jerusarema kubva munyara yangu?’ ” Asi vanhu vakanyarara, avazi kupingura neizwi, ngokuti mupango wamambo wakati, “Musamupingura.” Zvino Eriakimu mukororo waHirikia, waiya mukuru wengome, naShebhina munyori, naJoa mukororo waAsafi mungwariri wezvakanyorwa, vakauya kunaHezekia vane machira avo akabaurwa, navo vakamuronzera mazwi aRabhishake. Naapo mambo Hezekia azwa izvi, wakamwesa machira ake, akadzifukidza ngejira remasaka, akaenda mumhatso yaMambo Mwari. Naye wakatumira izwi naEriakimu uwo waiya nduna yengome, naShebhina munyori, nevapristi vakuru, vakafuka machira emasaka kumuprofeti Isaya mukororo waAmozi. Vakati kwaari, “Unoronza izvi Hezekia, ‘Zuva iri izuva rokutambudzika, nerokukaraidzwa, nerokutsverudzwa; ngokuti mukuwo wokubereka vana waguma, asi apana simba rokuvabereka. Pamweni Mambo Mwari, Mwari wako, wakazwa mazwi eshe aRabhishake, uwo wakatumwa ndimambo wake, mambo weAsiria kuti atsverudze Mwari unopona, nokurambidza mazwi aakazwa Mambo Mwari, Mwari wako; ndizvo mirudza izwi rako rokukumbira ngendaa yeavo vakasara.’ ” Naapo varanda vamambo Hezekia vakaguma kunaIsaya, Isaya wakati kwevari, “Munozoronza izvi kunamambo wenyu kuti, ‘Mambo Mwari unoronza izvi: Usatya mazwi owakazwa, evaranda vamambo weAsiria aakandituka ndiwo. Inini pachangu ndinozoisa mweya mwaari, ndizvo unozozwa makuhwa, naye unozopetuka kunyika yake; ndinozoita kuti awe ngeshoti munyika yake.’ ” Rabhishake wakapetuka, akaona mambo weAsiria echirwa naRibhina; ngokuti wakazwa kuti mambo wakabva Rakhishi. Naapo mambo azwa kuereketa vechiti, Thirihaka mambo weEthiopia, “Wona, wamiruka kuuya koorwa newe,” wakatumazve nhumwa kunaHezekia echiti, “Unozoereketa kudai kunaHezekia mambo waJudha kuti, ‘Usatendera Mwari wako uwo wounogonda kuti akuchengedzere, ngokukugondisa kuti Jerusarema arizopirwi munyara yamambo weAsiria. Wona, wakazwa izvo zvaakaita madzimambo aAsiria kunyika dzeshe, ngokudzipedza yaamho. Imwimwi munozonunurwa here? Zvimwari zvemadzinza zvakanunura here nyika dzaakaparadza madzibaba angu, Gozani, Harani, Rezefi, nevana vaEdheni vaiya muTherasa? Uri pari mambo weHamathi, mambo weAriphadhi, mambo wedhorobha raSefarvhaimu, mambo weHena, nokuti mambo weIvha?’ ” Hezekia wakaashira tsamba kubva munyara dzenhumwa akaidzidza; zvino Hezekia wakakwira kumhatso yaMambo Mwari, akaibeura pamberi paMambo Mwari. NaHezekia wakakumbira kunaMambo Mwari echiti, “A Mambo Mwari, Mwari waIsuraeri, uwo unogara pakati pemakherubhimu, iwewe ndiwe Mwari, iwewe wega, woumambo hweshe hwenyika, iwewe wakaita denga nenyika. Kotamisa nzee yako, A Mambo Mwari, uzwe; beura madziso ako, Mambo Mwari, uone; izwai mazwi aSenakheribhi, awo aakatumira kuti atsverudze Mwari unopona. Ngegwinyiso, A Mambo Mwari, madzimambo eAsiria akachakata madzinza eshe nenyika dzavo, navo vakakandira zvimwari zvavo mumuriro, kunyazwi zvaiya zvisiri zvimwari, asi mishando yenyara dzevanhu, matanda nokuti mapuwe; ndizvo vakazviparadza. Ndizvo zvino, A Mambo Mwari, Mwari wedu, ndinokupota, tiponese kubva kunyara yake, kuti umambo hweshe huzie kuti iwewe, A Mambo Mwari, ndiwe Mwari wega.” Zvino Isaya mukororo waAmozi wakatumira izwi kunaHezekia echiti, “Mambo Mwari, Mwari waIsuraeri unoronza izvi, ndazvizwa zvewakakumbira kwendiri ngendaa yaSenakheribhi mambo weAsiria. Iri ndiro izwi raakaereketa Mambo Mwari ndiye: “Mhandwe, mwanasikana weZioni, unokushoora nokukusheka; mwanasikana weJerusarema unokudzungudzira soro rake. Ndiani uwo wewakatsverudza nokutuka zina rake? Nokunaanizve uwo wewakamukira ngokuganya ngeizwi rako? Nokumirudza madziso ako padera? Eya, wakamukira Wakachena waIsuraeri. Ngenhumwa dzako wakatsverudza Mambo Mwari, newe wakati, ngokuwanda kwengoro dzangu ndakaguma kuurebu hwemitunhu, kumabandanda eRebhanoni; ndazotemera pashi misedhari yakareba yawo, miti yavo yakapindisisa kunaka yemisaipresi; neni ndakapinda muugaro hwemigano yake, nomugwasha romunda wake unobereka michero yakawanda. Ndakatsa zvinyuka, ndikamwa mvura yomupara, ngepashi petsoka dzangu ndakaomesa yeshe mifuya yaEgipite.” Amuzi kuzwa here njira yendakazviita ndiyo karetu? Ndakazvironga ngemikuwo yekaretu? Zvino ndazviita kuti zviitike, kuti iwewe uite uwo unozoparadza madhorobha akashosherwa kuti aite mirwi yematongo. Ndizvo vagari vawo vaiya vasina simba, vakakakaseka nokukangaidzwa; vakaita kudai ngomwenje womushango, nokudai ngepfiba rakasvipirika, nokudai ngomwenje uri padera pemhatso, nokudai ngekoroni inofa isati yakura. Asi ndinozia kumiruka kwako nokugara kwako, kubuda kwako nokupotera kwako, noushungu hwako kwendiri. Ngokuti ushungu hwako kwendiri, nehohoho yako zvakazwika munzee dzangu, ndizvo ndinozoisa chitebo changu mumiro yako, netomu rangu mumuromo wako; ndinozokupetudza sure ngenjira yewakabva ndiyo. “Neichi chinozoita chioniso kwouri: Gore rino munozodya matauyazve gore iri nerechipiri makhikhizeyazve; zvino mugore rechitatu simai, chekai, simai mivhini, mwechidya michero yayo. Vakasara avo vakapokonyoka vemhatso yaJudha vachaita nzinde kudzaka pashi, nokubereka michero padera, ngokuti kubva Jerusarema vanozobuda avo vakasara, vakapokonyoka navo vakapona kubva kumutunhu weZioni. Kugwinyisira kwaMambo Mwari kunozoita izvi. “Ndizvo unoronza izvi Mambo Mwari ngendaa yamambo weAsiria: Aazogumi mudhorobha iri, kuposhera musee umwo, kuuya pamberi paro anechihlangu, nokuti kuaka rusvingo kweriri. Ngenjira yaakauya ndiyo unozohwirira ndiyo; aazogumi mudhorobha iri, unoronza Mambo Mwari. Ngokuti ndinozorirwira dhorobha iri, kuriponesa, ngendaa yangu nendaa yomuranda wangu Dhavhidha.” Usiku uhwo ngirosi yaMambo Mwari yakabuda, ikauraya mukamba ravaAsiria zana nemakumi masere nemashanu emakumi emazana (185,000); naapo vakamuka mangwanani maishi, ringira, veshe vaiya vafa. Zvino Senakheribhi mambo weAsiria wakabvapo, akaenda kanyi, akagara Ninevhe. Naapo aiya echidira mumhatso yechimwari chake, Nisirokhi, vakororo vake Adramerekhi naShareza vakamuuraya ngeshoti; navo vakatiza, vakaponera munyika yeArarati. Esarihadhoni mukororo wake wakatonga pandau yake. Mumazuva awo Hezekia wakarwara ari pasinde pokufa. Muprofeti Isaya mukororo waAmozi wakauya kwaari, akati kwaari, “Mambo Mwari unoronza izvi: Rongedza zvakanaka zvemhatso yako, ngokuti unozofa, auzoponi.” Zvino Hezekia wakatenderukira hope yake kurukumbati, akakumbira kunaMambo Mwari, echiti, “Karakadza zvino, A Mambo Mwari, ndinokupota, kuhamba kwendakaita pamberi pako, mugwinyiso ngomwoyo wakaperera, ndakaita zvakanaka mukuona kwako.” NaHezekia wakachema kakurutu. Naapo asati abuda Isaya kuenda kuruwanze ruri pakati, izwi raMambo Mwari rakauya kwaari rechiti, “Hwirirazve, uronzere Hezekia nduna yevanhu vangu wechiti, ‘Unoronza izvi Mambo Mwari, Mwari wababa ako Dhavhidha: Ndakazwa kukumbira kwako, ndaona masodzi ako; ngegwinyiso ndinozokuponesa; ngezuva rechitatu unozokwira kumhatso yaMambo Mwari. Neni ndinozotutsira kumazuva okupona kwako gumi remakore nemashanu; ndinozokununura dhorobha iri kubva munyara yamambo weAsiria; ndinozorwira dhorobha iri ngendaa yangu, nendaa yomuranda wangu Dhavhidha.’ ” Zvino Isaya wakati, “Tora chikanywa chemaonde.” Navo vakachitora vakachiisa paiya nemota, naye wakaponeswa. Hezekia wakati kunaIsaya, “Chiinyi chinozoita chioniso kwendiri kuti Mambo Mwari unozondiponesa, nechokuti ndinozokwira kumhatso yaMambo Mwari ngezuva rechitatu?” NaIsaya wakati, “Ichi ndicho chioniso chinobva kunaMambo Mwari, kuti Mambo Mwari unozoita ichi chaakagondisa: bvuri raendemberi zvipimo gumi, rinozohwirira sure zvipimo gumi here?” NaHezekia wakapingura echiti, “Zvakareruka kuti bvuri rirebe kuenda zvipimo gumi; haiwa kuti bvuri rihwirire sure zvipimo gumi.” Isaya muprofeti wakakumbira kunaMambo Mwari; naye wakahwirinza bvuri sure ngezvipimo gumi, apapo raiya radzaka pashi pachipimo chaAhazi. Panguvayo Merodhakhibharadhani mukororo waBharadhani, mambo weBhabhuroni, wakatumira tsamba nechipo kunaHezekia, ngokuti waiya azwa kuti Hezekia waiya echirwara. NaHezekia wakavaashira; wakavakhombisa mhatso youpfumi hwake hweshe, sirivha, mukore, makha, mafuta akapindisisa kunaka, mhatso yake yeshe yezvokurwa ndizvo, nazvo zveshe zvakaoneka mumhatso youpfumi hwake. Kwaiya kusina chiro mumhatso yake nokuti muumambo hwake hweshe, chaasikazi kuvakhombisa. Zvino wakauya Isaya muprofeti kunamambo Hezekia, akati kwaari, “Vanhu ava vakatinyi? Vakauya kwouri, vechibva kuri?” Hezekia wakati, “Vakabva kunyika iri kuretu, Bhabhuroni.” Wakati, “Vaonenyi mumhatso mwako?” Hezekia wakapingura, akati, “Zviro zveshe zviri mumhatso mwangu vazviona; apana chiro pakati poupfumi hwangu chendisikazi kuvakhombisa.” Zvino Isaya wakati kunaHezekia, “Izwa izwi raMambo Mwari. Ringira, mazuva anouya, apo zviro zveshe zviri mumhatso yako, neizvo zvakaunganidzwa ngemadzibaba ako metsa nyamashi, zvinozotorwa kuenda Bhabhuroni. Akuna chinozosara, unoronza Mambo Mwari. Vamweni vevakororo vako, avo vanoberekwa ndiwe, vanozotorwa; vanozoitwa mitenwa mungome yamambo weBhabhuroni.” Zvino Hezekia wakati kunaIsaya, “Rakanaka izwi raMambo Mwari, iro rewaereketa.” Ngokuti wakapinimidza, akati, “Akuzonaki ngenyi, kudai kuripo kunyarara nokungwaririka mumazuva angu?” Mishando imweni yaHezekia, simba rake reshe, njira yaakanasira ndiyo dziya, nomugero, uwo waiunza mvura mudhorobha, azvizi kunyorwa here muBhuku reMishando yeZuva ngeZuva yeMadzimambo aJudha? Hezekia wakaata nemadzibaba ake; naManase mukororo wake wakatonga pandau yake. Manase waiya aane makore gumi namairi apo paakatanga kutonga; wakatonga makore makumi mashanu namashanu muJerusarema. Zina ramai ake raizwi Hefizibha. Naye wakaita zvakashata mukuona kwaMambo Mwari, echiteera zvinonyangadza zvinoitwa ngemadzinza awo aakadzinga Mambo Mwari kubva pamberi pevana vaIsuraeri. Ngokuti wakaakazve ndau dzakakwirira dzakapwanyiwa ndibaba ake Hezekia; wakaakira Bhaari maarita, akaita sika yokudira, kudai ngezvaakaita Ahabhi mambo waIsuraeri; naye wakadira hondo dzeshe dzomudenga, akadzishandira. Wakaaka maarita mumhatso yaMambo Mwari, iyo yaakaronza Mambo Mwari echiti, “MuJerusarema ndinozoisamwo zina rangu.” Mumaruwanze mairi emhatso yaMambo Mwari wakaaka maarita ehondo dzeshe dzomudenga. Wakaita kuti mukororo wake apotye ngomumuriro, echigonda maninji nokuringidza; akamusira vanemweya yokufembera nevaroyi. Wakaita kushata kwakawanda mukuona kwaMambo Mwari kumusira ushungu hwake. Wakaisa muedzaniso wakatsetswa weAshera mumhatso yaakaronza Mambo Mwari kunaDhavhidha nokunomukororo wake Soromoni echiti, “Mumhatso iyi nomuJerusarema rendakatsanangura pakati pemadzinza eshe aIsuraeri, kuti ndiise zina rangumwo, mhera nariini. Andizonzereresi vanhu vaIsuraeri kubva munyika yendakapa kumadzibaba avo, kudai vechizongwarira kwega kuita izvo zveshe zvendakavapanga, nokudai ngomupango weshe waakavapanga muranda wangu Mosi.” Asi avazi kupurutana; Manase wakavapaukisa kakurutu kuti vaite zvakashata kupinda zvaakaita madzinza awo aakaparadza Mambo Mwari kubva pamberi pevana vaIsuraeri. Mambo Mwari wakaereketa kubudikidza ngevaranda vake vaprofeti echiti, “Ngokuti Manase mambo waJudha wakaita izvi zvinonyangadza, akaita zvakashatisisa kupinda zveshe zvevakaita vaAmori, avo vaiya pamberi pake, naye wakaita kuti vaJudha vashaishe ngemiedzaniso yake; ndizvo unoronza izvi Mambo Mwari, Mwari waIsuraeri, ‘Ringira, ndinounza kushata padera peJerusarema nepadera paJudha, kushata kunoita kuti kunyazwi ndiani unozokuzwa, nzee dzake dzinozozhararika. Ndinozotambanudza padera peJerusarema chipimo chetambo yendakapima ndiyo Samaria, nechipimo chendakaruramisa ndicho mhatso yaAhabhi; ndinozopukuta Jerusarema kudai ngomunhu unopukuta chidziyo, echichipinduridza. Ndinozorasha vakasara venhaka yangu, ndinozovapira munyara dzemagaa avo; vanozoita vakachakatwa nevakapambwa kumagaa avo eshe, ngokuti vakaita zvakashata mukuona kwangu, vakamusa ushungu hwangu kubvira zuva revakabuda madzibaba avo kubva muEgipite, metsa nanyamashi.’ ” Manase wakaparadza ngazi isina ndaa kakurutu, metsa azadza Jerusarema ndiyo kubvira kurutii rumwe kuguma kurutii rumweni, ngokubanze kwezvishaishi zvake zvaakaita kuti vaJudha vashaishe ngokuita zvakashata mukuona kwaMambo Mwari. Zvino mishando imweni yaManase nazvo zveshe zvaakaita, nokushaisha kwake kwaakashaisha ndikwo, azvizi kunyorwa here muBhuku reMishando yeZuva ngeZuva yeMadzimambo aJudha? NaManase wakaata nemadzibaba ake, akaikwa mumunda wemhatso yake, munda waUza. Amoni mukororo wake wakatonga pandau pake. Amoni waiya aane makore makumi mairi namairi apo paakatanga kutonga; wakatonga makore mairi muJerusarema. Zina ramai ake raizwi Meshuremethi, mwanasikana waHaruzi weJotibha. Wakaita zvakashata mukuona kwaMambo Mwari, kudai ngezvaakaita Manase, baba ake. Wakahamba ngenjira dzeshe dzakahamba ndidzo baba ake, akashandira miedzaniso yokudira yakadirwa ndibaba ake, akaidira; wakasiya Mambo Mwari, Mwari wemadzibaba ake, aazi kuhamba ngenjira yaMambo Mwari. Varanda vaAmoni vakapangana zano, vakamurwisa vakauraya mambo ari mumhatso yake. Asi vanhu venyika vakauraya vanhu veshe vakapangana zano rokurwisa mambo Amoni; nevanhu venyika vakaemesa Josia mukororo wake kuita mambo pandau yake. Zvino mishando imweni yaAmoni yaakaita, aizi kunyorwa here muBhuku reMishando yeZuva ngeZuva yeMadzimambo aJudha? Wakaikwa muiba rake mumunda waUza; zvino Josia mukororo wake wakatonga pandau yake. Josia waiya aane makore masere apo paakatanga kutonga; wakatonga makore makumi matatu narimwe muJerusarema. Zina ramai ake raizwi Jedhidha, mwanasikana waAdhaia weBhozikathi. Wakaita zvakanaka mukuona kwaMambo Mwari, akahamba ngenjira dzeshe dzababa ake Dhavhidha, asikazi kupaukira kuenda kumudyo nokuti kumuoshwe. Mugore regumi nemasere rokutonga kwamambo Josia, mambo wakatuma Shafani mukororo waAzaria, mukororo waMeshuramu, munyori, kuenda kumhatso yaMambo Mwari echiti, “Kwira kuenda kunaHirikia mupristi mukuru, kuti aerenge mare yakaunzwa kumhatso yaMambo Mwari, yakaunganidzwa ngevangwariri vomusiwo kubva kunevanhu. Ngavaipe munyara dzaavo vanoita mushando, avo vanoringira mushando wemhatso yaMambo Mwari; ngavaipe avo vaiti vomushando, vari mumhatso yaMambo Mwari, kuti vanasirise mhatso, kuvatsetsi, kuvaaki, kunevanoaka ngemapuwe, nokutenga miti nemapuwe akatsetswa kunasirisa mhatso. Asi akuna kubvunzwa kwomushumo wemare yakapirwa munyara dzavo, ngokuti vakaita ngokugondeka.” Hirikia mupristi mukuru wakati kunaShafani munyori, “Ndaona bhuku remipango mumhatso yaMambo Mwari.” Naapo Hirikia paakapa bhuku kunaShafani, wakaridzidza. Zvino Shafani munyori wakauya kunamambo, akaziisa mambo echiti, “Varanda vako vakaunganidza mare yakaoneka mumhatso, vakaipa munyara dzevanoshanda, avo vanoshanda kungwarira mushando wemhatso yaMambo Mwari.” Shafani munyori wakaronzera mambo echiti, “Hirikia mupristi wandipa bhuku.” Zvino Shafani wakaridzidza pamberi pamambo. Naapo mambo azwa mazwi ebhuku remipango, wakamwesa machira ake. Zvino mambo wakapanga Hirikia mupristi, Ahikamu mukororo waShafani, Akhebhori mukororo waMikhaia, Shafani munyori naAsaia muranda wamambo echiti, “Endai mundibvunzire kunaMambo Mwari, inini, vanhu, nevaJudha veshe, ngendaa yemazwi ebhuku iri rakaoneka; ngokuti hukuru ushungu hwaMambo Mwari hunobaka kwetiri, ngokuti madzibaba edu aazi kupurutana kumazwi ebhuku iri, kuti vaite zveshe zvakanyorwa zvakaemeserwa isusu.” Ndizvo Hirikia mupristi, Ahikamu, Akhebhori, Shafani naAsaia, vakaenda kunaHuridha muprofeti womukadzi, mukadzi waSharumu mukororo waThikivha, mukororo waHahasi, mungwariri wezvokusimira; iye waigara muJerusarema muguta rechipiri, umwo mwevakaereketa naye. Naye wakati kwevari, “Unoronza izvi Mambo Mwari, Mwari waIsuraeri: Ronzeranyi munhu uwo wamutuma kwendiri: Unoronza izvi Mambo Mwari, ‘Ringira, ndinozounza kutambudzika padera peiyi ndau, nepadera pevagari vayo, mazwi eshe ebhuku iri awoadzidzwa ndimambo waJudha. Ngokuti vandisiya, vapisha mitombo inegwema rakanaka kunezvimwari zvimweni, ndizvo vandimusira ushungu ngemishando yenyara dzavo; ndizvo ushungu hwangu hunozobaka kuneiyi ndau, auzodzimwi.’ Asi munozoti kunamambo waJudha uwo wamutuma kubvunza Mambo Mwari, izvi ndizvo zvomunozoronza kwaari mwechiti, ‘Unoronza izvi Mambo Mwari, Mwari waIsuraeri, ngendaa yemazwi ewazwa: Ngokuti mwoyo wako wakapfaa, newe wakadzipfaisa pamberi paMambo Mwari, apo wazwa ngeizvo zvendakaereketa ngeiyi ndau, nendaa yevanhu vanogara kweiri, kuti vanozoita vakaparadzwa nevanotukwa, ngokuti wakamwesa machira ako nokuchema pamberi pangu, inini ndakuzwawo, unoronza Mambo Mwari. Ndizvo ringira, ndinozokuunganidza kunemadzibaba ako, newe unozounganidzwa muiba rako mukunyarara; madziso ako aazooni kutambudzika kweshe kwendinozounza padera pendau iyi.’ ” Ndizvo vakaunzazve kunamambo mazwi aya. Zvino mambo wakatuma vanhu, vakaunganidza kwaari vakuru veshe vaJudha neveJerusarema. Mambo wakakwira kumhatso yaMambo Mwari, pamwepo nevanhu veshe vaJudha neveJerusarema, vapristi, vaprofeti, nevanhu veshe vadoko nevakuru. Naye wakavadziidzira munzee dzavo eshe mazwi ebhuku rechitenderano iro rakaoneka mumhatso yaMambo Mwari. Mambo wakaema pasinde pesika, akaita chitenderano pamberi paMambo Mwari, kuteera Mambo Mwari, nokungwarira mipango yake, zviemeso zvake, zvitongero zvake, ngomwoyo wake weshe, nomweya wake weshe, kuti aite mazwi echitenderano awo akanyorwa mubhuku iri. Vanhu veshe vakaema kugwinyisa chitenderano. Mambo wakapanga Hirikia mupristi mukuru, nevapristi vechikwata chechipiri, nevanorinda misiwo, kuti vabudise kubva mutemperi raMambo Mwari zveshe zvidziyo zvakaitirwa Bhaari, zveAshera, nezvehondo yeshe yomudenga; wakazvipisha pabanze peJerusarema murubaya rweKedhironi, wakatora marota azvo kuenda Bhetheri. Wakadusa vapristi vemiedzaniso, avo vakaemeswa ngemadzimambo aJudha kuti vapishe mitombo inegwema rakanaka mundau dzakakwirira dzemadhorobha aJudha, nendau dzaitendenedza Jerusarema; avozve vaipisha mitombo inegwema rakanaka kunaBhaari, kunezuva, kunomwedzi, kunyeredzi, nokuhondo yeshe yomudenga. Vakadusa muedzaniso wokudira Ashera kubva mumhatso yaMambo Mwari, kuenda kubanze kweJerusarema kurwizi runozwi Kedhironi, akaupishapo parwizi Kedhironi, akaupwanya metsa waita bukuta, akakandira bukuta iri padera pemaiba evanhutu. Wakapwanyira pashi mhatso dzevamuna mahure emutemperi, dzaiya mumhatso yaMambo Mwari, apo vakadzi pevairukira Ashera. Wakabudisa vapristi veshe kubva kumadhorobha aJudha, akasvipisa ndau dzakakwirira, apo vapristi pavaiya vechipishira mitombo inegwema rakanaka, kubva Gebha metsa Bheerishebha; wakaputsira pashi ndau dzeshe dzakakwirira dzaiya pamisiwo yaiya pevaipotera ndipo pamusiwo waJoshua mutongi wedhorobha, iyo yaiya ngokumuoshwe mwechipotera pamusiwo wedhorobha. Vapristi vendau dzakakwirira kunyazwi vaiya vasikakwiri kuarita raMambo Mwari muJerusarema, asi vaidya chingwa chisina mumera pakati pehama dzavo. Wakasvipisa Thofethi riri mubani reBhenihinomu, kuti kusazoapo naumwe ungazoita kuti mukororo wake nokuti mwanasikana wake apinde kupotya muriro kuita mudiro kunaMorekhi. Wakadusa mahachi akapirwa ngemadzimambo aJudha kunezuva, pamusiwo wokupinda mumhatso yaMambo Mwari, pasinde pekamera raNathanimerekhi muranda, raiya ngokubanze kwedhorobha. Wakapisha ngoro dzaiya dzezuva ngomuriro. Maarita awo aiya padera pedenga rekamera repadera raAhazi, awo akaitwa ngemadzimambo aJudha, nemaarita mairi akaitwa ndiManase mumaruwanze mairi emhatso yaMambo Mwari, wakaapwanyira pashi kubvapo, akagura kuita zvigurwa, bukuta racho akarikandira murwizi Kedhironi. Zvino mambo wakasvipisa ndau dzakakwirira dzaiya kumabvazuva kweJerusarema, idzo dzaiya ngokubani kwoMutunhu woKuparadzwa, idzo mambo Soromoni weIsuraeri dzaakaakira Ashithorethi chinyangadzo chevana vaSidhoni, Khemoshi chinyangadzo chevaMoabhi, naMirikhomu chinyangadzo chevana vaAmoni. Wakaputsa sika dzemapuwe kuita zvigurwa, akatemera pashi miedzaniso yokudira Ashera, akadzadza ndau idzo ngemagodo evanhu. Zve, arita raiya muBhetheri, nendau yakakwirira, zvaakaita Jerobhoamu mukororo waNebhati, uwo wakaita kuti vaIsuraeri vashaishe, wakapwanyira pashi iro arita nendau yakakwirira. Wakapisha ndau dzakakwirira, akaikuya ikaita bukuta, akapishawo Ashera. Naapo Josia wakakunukuka kuringira, akaonapo maiba pamutunhu; wakatuma vanhu kootora magodo kubva mumaiba, akaapisha paarita, akarisvipisa, kudai ngeizwi raMambo Mwari raakaereketa kubudikidza ngomunhu waMwari, uwo wakadaidzira mazwi aya. Zvino wakati, “Sika iyi ngeyenyi yendinoona?” Vanhu vedhorobha vakamuronzera, vechiti, “Ndiro iba romunhu waMwari, uwo wakabva kwaJudha, wakadaidzira izvi zviro zvewaita iwewe kunearita reBhetheri.” Wakati, “Ngaarekerwe azorore; pasina naumwe unodusa magodo ake.” Ndizvo vakarekera magodo ake, pamwepo nemagodo omuprofeti wakabva Samaria. Zve Josia wakadusa mhatso dzeshe dzendau dzakakwirira dzaiya mumadhorobha eSamaria, dzakaitwa ngemadzimambo aIsuraeri kumusira ushungu hwaMambo Mwari; wakaita kwedziri kudai ngezvaakaita muBhetheri. Wakauraya vapristi veshe padera pemaarita endau dzakakwirira avo vaiyapo, wakapishira magodo evanhu padera pavo, wakahwirira Jerusarema. Mambo wakapanga vanhu veshe echiti, “Itirai Mambo Mwari, Mwari wenyu, Phasika, kudai ngezvakanyorwa mubhuku rechitenderano ichi.” Ngegwinyiso akuna kumboitwa Phasika rakadaro kubvira kumazuva evatongi avo vakatonga Isuraeri, nokuti kumazuva eshe emadzimambo aIsuraeri naaJudha. Asi mugore regumi nemasere rokutonga kwamambo Josia, Phasika iri rakaitirwa kunaMambo Mwari muJerusarema. Zve Josia wakabvisa zveshe mweya yokubudirwa, n'anga, miedzaniso, zvithombe, nokushata kweshe ukwo kwakaoneka munyika yaJudha nomuJerusarema, kuti agwinyise mazwi omupango wakanyorwa mubhuku raakaona Hirikia mumhatso yaMambo Mwari. Paiya pasina mambo wakadai ndiye kunevakatanga pamberi pake, uwo wakatenderukira kunaMambo Mwari ngomwoyo wake weshe, nomweya wake weshe, nesimba rake reshe, echingwarira mupango weshe waMosi; zve, ngesure kwake akuzi kubuda naumwe wakadai ndiye. Zvakanyadaro Mambo Mwari aazi kutongokunukudza kutsamwa kwake kwaibaka kukurutu, kwakabaka kurwisana naJudha, ngendaa yokutsamwiswa kwaakatsamwiswa ndikwo ndiManase. Mambo Mwari wakati, “Ndinozobvisawo Judha kubva pamberi pangu, kudai ngezvendakabvisa Isuraeri; ndinozorasha dhorobha iri rendakatsanangura Jerusarema, nemhatso yendakati ndiyo, ‘Zina rangu rinozogaramwo.’ ” Zvino mishando imweni yaJosia, nazvo zveshe zvaakaita, azvizi kunyorwa here muBhuku reMishando yeZuva ngeZuva yeMadzimambo aJudha? Mumazuva ake Faro Nekho mambo weEgipite wakaenda koorwa namambo weAsiria parwizi Yufratesi. Mambo Josia wakaenda kooshongana naye; asi apo Faro Nekho paakashongana naye paMegidho, wakamuuraya. Varanda vake vakamutwara mungoro afa kubva Megidho, vakamuunza Jerusarema, vakamuika muiba rake. Vanhu venyika vakatora Jehoahazi mukororo waJosia, vakamudzodza, vakamuita mambo pandau yababa ake. Jehoahazi waiya nemakore makumi mairi nematatu apo paakatanga kutonga; wakatonga mwedzi mitatu muJerusarema. Zina ramai ake raizwi Hamutari mwanasikana waJeremia weRibhina. Wakaita zvakashata mukuona kwaMambo Mwari, kudai ngezvakaita madzibaba ake. Faro Nekho wakamusunga ngemanguri muRibra munyika yaHamathi, kuti asazotonga muJerusarema; naye wakavabharisa chibharo, akaita kuti Judha abhadhare makhirogramu makumi emazana matatu nemazana marongomuna (3,400) esirivha nemakhirogramu makumi matatu nemarongomuna omukore. Faro Nekho wakaemesa Eriakimu mukororo waJosia, kuita mambo pandau yababa ake Josia naye wakatsandura zina rake kuita Jehoiakimu. Asi wakatora Jehoahazi; wakauya Egipite, wakafirayo. Jehoiakimu wakapa sirivha nomukore kunaFaro; asi wakabharisa chibharo munyika kuti aone mare yokupa kudai ngechironzo chaFaro. Wakatherisa chibharo chesirivha nomukore kuvanhu venyika, umwe ngaumwe kudai ngechibharo chake chaakaemeserwa, kuti achibhadhare kunaFaro Nekho. Jehoiakimu waiya nemakore makumi mairi nemashanu apo paakatanga kutonga; naye wakatonga makore gumi narimwe muJerusarema. Zina ramai ake raizwi Zebhidha, mwanasikana waPhedhaia weRuma. Wakaita zvakashata mukuona kwaMambo Mwari, kudai ngezveshe zvakaita madzibaba ake. Mumazuva ake Nebhukhadhineza mambo weBhabhuroni, wakakwirapo naJehoiakimu wakaita muranda wake makore matatu; zvino wakakunukuka akamurwisa. Mambo Mwari wakatumira kwaari zvikwata zvehondo zvevaKharadhea, zvikwata zvevaAramu, zvikwata zvevaMoabhhi, nezvikwata zvevana vaAmoni, naye wakazvituma kurwisana naJudha kuti aiparadze, kudai ngeizwi raMambo Mwari raakaereketa kubudikidza ngevaranda vake vaprofeti. Ngegwinyiso izvi zvakagumira Judha, kudai ngezvaakapanga Mambo Mwari, kuti avabvise kubva mukuona kwake, ngendaa yezvishaishi zvaManase, zveshe izvo zvaakaita, ngendaawo yengazi isina ndaa, yaakaparadza; ngokuti wakadzadza Jerusarema ngengazi isina ndaa naMambo Mwari waiya asikatendi kuvakungurira. Zvino mishando imweni yaJehoiakimu nazvo zveshe zvaakaita, azvizi kunyorwa here muBhuku reMishando yeZuva ngeZuva yeMadzimambo aJudha? Ndizvo Jehoiakimu wakaata nemadzibaba ake; naJehoiakhini mukororo wake wakatonga pandau yake. Mambo weEgipite aazi kuchazouyazve nakamwe kubva munyika yake, ngokuti mambo weBhabhuroni wakatora zveshe zvaiya zvamambo weEgipite kubvira pamufuya weEgipite metsa kuguma kumufuya Yufratesi. Jehoiakhini waiya aane makore gumi nemasere apo paakatanga kutonga; wakatonga mwedzi mitatu muJerusarema. Zina ramai ake raizwi Nehushita, mwanasikana waErinathani weJerusarema. Wakaita zvakashata mukuona kwaMambo Mwari, kudai ngezvaakaita baba ake. Ngouwo mukuwo varanda vaNebhukhadhineza mambo weBhabhuroni vakakwira, vakauya Jerusarema, vakakomba dhorobha. Nebhukhadhineza mambo weBhabhuroni wakauya kurwisana nedhorobha, varanda vake vakarikomba. Jehoiakhini mambo waJudha wakabuda kuenda kunamambo weBhabhuroni, wakadzipira kunamambo weBhabhuroni iye pachake, mai ake, varanda vake, makota ake, nenduna dzake. Mambo weBhabhuroni wakamutora kuita musungwa ngegore rechisere rokutonga kwake. Wakatora kubva kumhatso yaMambo Mwari zveshe upfumi hwayo, noupfumi hwemhatso yamambo; wakagura kuita zvigurwa zveshe zvidziyo zvomukore zvakaitwa ndiSoromoni mambo waIsuraeri mutemperi raMambo Mwari, kudai ndizvo zveshe zvaakaronza Mambo Mwari. Wakatwara veshe veJerusarema, makota eshe, varwi vehondo nengwazi dzeshe dzinesimba nokushinga, vaiya gumi remakumi emazana (10,000), vakaitwa hloko, veshe vari ngwazi dzemishando nevapfuri; akuna naumwe wakasiiwa asi vega varombo venyika. Wakatora Jehoiakhini kuenda Bhabhuroni; mai amambo, vakadzi vamambo nduna dzake, nemakota enyika, wakatora ava kubva Jerusarema kuenda Bhabhuroni kuti vaite hloko. Mambo weBhabhuroni wakaunza vasungwa Bhabhuroni vanhu veshe ngwazi makumi emazana manomwe (7,000), ngwazi dzemishando nokuita zviro ngesimbi gumi rimwe remazana (1,000), veshe pamwepo avo vaiya nesimba rokurwa hondo. Mambo weBhabhuroni wakaemesa Mathania baba munini ake Jehoiakhini kuti atonge pandau yake, akatsandura zina rake kuita Zedhekia. Zedhekia waiya aane makore makumi mairi narimwe apo paakatanga kutonga; wakatonga makore gumi narimwe muJerusarema. Zina ramai ake raizwi Hamutari, mwanasikana waJeremia weRibhina. Wakaita zvakashata mukuona kwaMambo Mwari, kudai ngezvaakaita Jehoiakimu. Ngegwinyiso Jerusarema naJudha vakanyangadza Mambo Mwari, metsa wakavadzinga kubva pamberi pake. Zedhekia wakamukira mambo weBhabhuroni. Mugore rechipfumbamwe rokutonga kwake, ngomwedzi wegumi, ngezuva regumi romwedzi, Nebhukhadhineza mambo weBhabhuroni wakauya nehondo dzake dzeshe, koorwa neJerusarema, vakaaka rusvingo kuritendenedza reshe. Ndizvo dhorobha rakakombwa metsa gore regumi narimwe rokutonga kwamambo Zedhekia. Ngezuva rechipfumbamwe romwedzi wechirongomuna nzara yakakura mudhorobha, mwaiya musina kudya kwevanhu venyika. Zvino vakaputsa rusvingo rwedhorobha; mambo nevanhu veshe vokurwa hondo vakatiza usiku ngenjira yepamusiwo waiya pakati pemarukumbati mairi, waiya pasinde pomunda wamambo, kunyazwi vaKharadhea vaiya vakatendenedza dhorobha. Vakatiza ngenjira inoenda Arabha. Asi hondo yevaKharadhea yakarumbirira mambo, ikamubata murubaya rweJerikho; hondo yake yeshe yakapararira kumutiza. Zvino vakabata mambo, vakamuunza kunamambo weBhabhuroni muRibra; navo vakamutonga. Vakauraya vakororo vaZedhekia mukuona kwake, vakatochora madziso aZedhekia; vakamusunga manguri ethusi, vakamutora kuenda Bhabhuroni. Mumwedzi wechishanu ngezuva rechinomwe romwedzi, raiya gore regumi nemapfumbamwe rokutonga kwaNebhukhadhineza mambo weBhabhuroni, wakauya Nebhuzaradhani, nduna yevarindi, muranda wamambo weBhabhuroni, wakauya Jerusarema. Wakapisha mhatso yaMambo Mwari, mhatso yamambo, nemhatso dzeshe dzeJerusarema, mhatso huru dzeshe, wakadzipisha ngomuriro. Dzeshe hondo dzevaKharedhea, idzo dzaiyapo nenduna yevarindi, vakaputsira pashi marukumbati aitendenedza Jerusarema. Nebhuzaradhani nduna yevarindi wakavatora kuenda navo vanhu avo vakasara mudhorobha, nevaiya vatiza vakadzitura kunamambo weBhabhuroni, veshe vakasara vembungano. Asi nduna yevarindi yakasiya vevarombo kakurutu venyika kuti vaite vanasiriri vemavhini nevarimi veivhu. Sika dzethusi dzaiya mumhatso yaMambo Mwari, nezvipanda nebhavhu rethusi, zvaiya mumhatso yaMambo Mwari, vaKharedhea vakazviputsa kuita zvigurwa, vakatora thusi kuenda naro Bhabhuroni. Vakatora hari, mafoshoro, zvigadzikiro zvezvibani, majomeya, nezvidziyo zveshe zvethusi zvevaishanda ndizvo, nezviwenda zvokutorera muriro, nendiro. Nduna yevarindi yakatora zveshe zvakaitwa ngomukore, mukore, nezviro zvakaitwa ngesirivha, sirivha yemene, kuenda nazvo. Sika mbiri, bhavhu, matsikiro, zvaakaitira mhatso yaMambo Mwari Soromoni, thusi reizvi zvidziyo zveshe, raiya risikapimiki ngokurema. Urebu hwesika imwe kukwira mudenga hwaiya mamitha masere, nechipanda chethusi chaiya padera payo; urebu hwechipanda icho hwaiya mitha rimwe nezvidoko zvitatu; nenyora dzakaita magadegade, nemaphomegraniti, zveshe zvaiya zvethusi zvaiya padera pechipanda kuchitendenedza. Sika yechipiri yaiya yakatodzana neiyo yakanemeswa nemagadegade. Nduna yevarindi yakatora Seraia mupristi mukuru, naZefania mupristi wechipiri, nevarindi vemisiwo vatatu. Kubva mudhorobha yakatora nduna iyo yaiya yakaiswa padera pevanhu vehondo, nevanhu vashanu veavo vaigara pamberi pamambo, avo vakaoneka vari mudhorobha, munyori wenduna yehondo, uwo waierenga vanhu venyika, nevanhu makumi matanhatu veavo venyika vakaoneka mudhorobha. Nebhuzaradhani nduna yevarindi yakavatora, yakavaunza kunamambo weBhabhuroni muRibra. Mambo weBhabhuroni wakavabaya, akavauraya muRibra munyika yeHamathi. Ndizvo vaJudha vakatorwa kubva munyika yavo. Wakaemesa Gedharia mukororo waAhikamu, mukororo waShafani, kuita mutongi padera pevanhu vakasara munyika yaJudha, avo vakasiiwa ndiNebhukhadhineza mambo weBhabhuroni. Zvino nduna dzeshe dzehondo nevanhu vadzo vazwa kuti mambo weBhabhuroni wakaemesa Gedharia kuita mutongi, vakauya nevanhu vavo kunaGedharia muMizipha, Ishumaeri mukororo waNethania, Johanani mukororo waKarea, Seraia mukororo waThanhumethi muNetofa, naJaazania mukororo weMaakhathi. Gedharia wakapika kwevari nevanhu vavo, akati kwevari, “Musatya ngendaa yenduna dzevaKharedhea; garai munyika, mushandire mambo weBhabhuroni; zvinozomunakira.” Asi mumwedzi wechinomwe, Ishumaeri mukororo waNethania, mukororo waErishama, wemhatso youmambo, wakauya nevanhu gumi, vakabaya Gedharia, akafa, pamwepo nevaJudha nevaKharedhea avo vaiya naye muMizipha. Zvino vanhu veshe, vadoko nevakuru, nenduna dzehondo, vakamiruka vakaenda Egipite, ngokuti vaitya vaKharedhea. Mugore remakumi matatu nemanomwe rouhloko hwaJehoiakhini mambo waJudha, ngomwedzi wegumi nemiiri, ngezuva romwedzi remakumi mairi nemanomwe Evhirimerodhaki mambo weBhabhuroni, mugore iro raakatanga kuita mambo, wakasunhura Jehoiakhini mambo waJudha kubva mutirongo. Wakaereketa zvakanaka kwaari, wakamupa dendemaro riri padera pemadendemaro amweni emadzimambo vaiya naye muBhabhuroni. Ndizvo Jehoiakhini wakadusa zvokusimira zvake zvomutirongo. Pazuva reshe rokupona kwake wakadya kudya pamberi pamambo. Ngokuti chikoaniswa chake chaaikoanisirwa ndimambo mukuwo weshe, chikoaniswa chezuva ngezuva, mazuva okupona kwake. Adhamu, Sethi, Enoshi, Khenani, Maharareri, Jaredhi, Enokhi, Methusera, Ramekhi, Noa, Shemu, Hamu, Jafethi. Mibarirwana yaJafethi: Goma, Magogi, Madhai, Javhani, Thubhari, Meshekhi naTirasi. Mibarirwana yaGoma: Ashikenazi, Dhifati naTogarma. Mibarirwana yaJavhani: Erisha, Tharshishi, Kitimu naRodhanimu. Mibarirwana yaHamu: Khushi, Miziraimu, Puti naKhenani. Mibarirwana yaKhushi: Sebha, Havhira, Sabhita, Raama Sabhitekha. Mibarirwana yaRaama: Shebha naDhedhani. Khushi wakabara Nimirodhi: ndiye wokutanga kuita munhu unesimba munyika. NaMiziraimu wakabara Rudhimu, Anamimu, Rehabhimu, Nafithuhimu, Phathirusimu, Khasiruhimu naKafithorimu (ndiye wakaamba dzinza revaFiristia.) Khenani wakabara Sidhoni dangwe rake, naHethi, nevaJebhusi, vaAmori, vaGirigashi, vaHivhi, vaArki, vaSini, vaArivhadhi, vaZemari nevaHamathi. Mibarirwana yaShemu: Eramu, Ashuri, Aphakhishadhi, Rudhi, Aramu, Uzi, Huri, Getha naMeshekhi. Aphakhishadhi wakabereka Shera, naShera wakabara Ebha. Nokuna Ebha kwakabarwa vakororo vairi: zina roumwe ndiPheregi, ngokuti mumazuva ake nyika dzakaparadzaniswa, nezina romunun'una wake ndiJokithani. Jokithani wakabara Arimodhadhi, Sherefi, Hazamavhethi, Jera, Hadhoramu, Uzari, Dhikira, Ebhari, Abhimaeri, Shebha, Ofiri, Havhira naJobhabhi. Veshe ava vaiya mibarirwana yaJokithani. Shemu, Aphakhishadhi, Shera, Ebha, Pheregi, Reu, Serugi, Nahori, Thera naAbrama, (ndikwo kuti Abrahama.) Vakororo vaAbrahama: Isaka naIshumaeri. Iyi ndiyo mibarirwana yavo: dangwe raIshumaeri ndiNebhaiothi, achiteerwa ndiKhedha, Adhibheeri, Mibhisamu, Mishima, Dhuma, Masa, Hadhadhi, Thema, Jeturi, Nafishi naKedhema. Ava ndivo vakororo vaIshumaeri. Vakororo vaKetura, bunha raAbrahama: wakabereka Zimirani, naJokishani, Medhani, Midhiani, Ishibhaki naShua. Vakororo vaJokishani: Shebha naDhedhani. Vakororo vaMidhiani: Efa, Eferi, Hanokhi, Abhidha naEridhaa. Veshe ava vaiya mibarirwana yaKetura. Abrahama wakabereka Isaka. Vakororo vaIsaka: Esau naIsuraeri. Vakororo vaEsau: Erifazi, Reueri, Jeushi, Jaramu naKhora. Vakororo vaErifazi: Themani, Oma, Zefi, Gatamu, Khenazi, Thimina naAmareki. Vakororo vaReueri: Nahathi, Zera, Shama naMiza. Vakororo vaSeira: Rothani, Shobhari, Zibheoni, Ana, Dhishoni, Eza naDhishani. Vakororo vaRothani: Hori naHomamu; Timina waiya hanzvadzi yaRothani. Vakororo vaShobhari: Ariani, Manahathi, Ebhari, Shefi naOnamu. Vakororo vaZibheoni: Aia naAna. Vakororo vaAna: Dhishoni. Vakororo vaDhishoni: Hamurani, Eshibhani, Ithirani naKherani. Vakororo vaEza: Bhirihani, Zaavhani naJaakani. Vakororo vaDhishani: Uzi naArani. Ava ndivo madzimambo aitonga munyika yeEdhomu kutanga vana vaIsuraeri vasati vapuwa mambo: Bhera mukororo waBheo, zina redhorobha rake raizwi Dhinhabha. Naapo Bhera afa, Jobhabhi mukororo waZera weBhozra wakatonga pandau yake. Naapo Jobhabhi afa, Hushamu wenyika yevaThemani wakatonga pandau yake. Naapo Hushamu afa, Hadhadhi mukororo waBhedhadhi, uwo wakanyisa vaMidhiani munyika yevaMoabhi, wakatonga pandau yake; nezina redhorobha rake raizwi Avhithi. Naapo Hadhadhi afa, Samra weMasireka wakatonga pandau yake. Naapo Samra afa, Shauri weRehobhothi riri parwizi Yufratesi, wakatonga pandau yake. Naapo Shauri afa, Bhaarihanani mukororo waAkhibho wakatonga pandau yake. Naapo Bhaarihanani afa, Hadhadhi wakatonga pandau yake; zina redhorobha rake raizwi Pai, nezina romukadzi wake raizwi Mehetabheri, mwanasikana waMatiredhi, mwanasikana waMezahabhi. NaHadhadhi wakafa. Madzimambo aEdhomu ndivo ava: mambo Thimina, Aria, Jethethi, Ohoribhama, Era, Pinoni, Khenazi, Themani, Mibhiza, Magidhieri naIramu. Ava ndivo madzimambo eEdhomu. Ava ndivo vakororo vaIsuraeri: Rubheni, Simeoni, Revhi, Judha, Isakha, Zebhuruni, Dhani, Josefa, Bhenjamini, Nafitari, Gadhi naAsha. Vakororo vaJudha: Eri, Onani naShera; ava vatatu vaakabarirwa ngomukadzi waizwi Bhathishua muKhenani. Zvino Eri dangwe raJudha waiya akashata mukuona kwaMambo Mwari, naye wakamuuraya. Thamari muzakazi wake wakamuberekera Pherezi naZera. Veshe vakororo vaJudha vaiya vashanu. Vakororo vaPherezi: Hezironi naHamuri. Vakororo vaZera: Zimuri, Ethani, Hemani, Kharikhori naDhara; veshe vaiya vashanu. Vakororo vaKhami: Akha, mutambudzi waIsuraeri, uwo wakashaisha pachiro chaiya chakapirwa kunaMwari. Mukororo waEthani: Azaria. Vakororo vaHezironi, avo vaakaberekerwa: Jerahimeeri, Ramu naKherubhai. Ramu wakabara Aminadhabhi, naAminadhabhi wakabara Nashoni, muzvare wevana vaJudha. Nashoni wakabara Sarima, naSarima wakabara Bhoazi, naBhoazi wakabara Obhedhi, naObhedhi wakabara Jesi, naJesi wakabara Eriabhi, dangwe rake, naAbhinadhabhi wechipiri, naShimea wechitatu, Nethaneri wechirongomuna, Radhai wechishanu, Ozemu wechitanhatu naDhavhidha wechinomwe; nehanzvadzi dzavo dzaiya Zeruia naAbhigairi. Vakororo vaZeruia: Abhishai, Joabhi naAsaheri, vaiya vatatu. Abhigairi wakabereka Amasa: nababa vaAmasa ndiJetha muIshumaeri. Kharebhu mukororo waHezironi wakabarirwa vana ndiAzubha, mukadzi wake, nokubudikidza ndiJeriothi: ava ndivo vakororo vake: Jesha, Shobhabhi naAridhoni. Naapo Azubha afa, Kharebhu wakaroora Efurathi, uwo wakamuberekera Huri. Huri wakabara Uri naUri wakabara Bhezareri. Ngesure kwazvo Hezironi wakapotera kumwanasikana waMakhiri baba aGireadhi, uwo waakaroora, anemakore makumi matanhatu; naye wakamuberekera Segubhi. Segubhi wakabara Jairi, uwo waiya nemadhorobha makumi mairi nematatu munyika yeGireadhi. Asi Geshuri naAramu vakatora kubva kwevari Havhothijairi, Khenathi nemaguta awo, makumi matanhatu emadhorobha. Veshe ava vaiya mibarirwana yaMakhiri, baba aGireadhi. Ngesure Hezironi afa, muKharebhiefuratha, Abhija mukadzi waHezironi wakamuberekera Ashu baba aThekoa. Vakororo vaJerahimeeri dangwe raHezironi: Ramu dangwe, Bhuna, Oreni, Ozemu naAhija. Jerahimeeri waiyawo nomukadzi umweni, zina rake ndiAtara; ndiye waiya mai vaOnamu. Vakororo vaRamu, dangwe raJerahimeeri: Maazi, Jamini naEkeri. Vakororo vaOnamu: Shamai naJadha. Vakororo vaShamai: Nadhabhi naAbhishu. Zina romukadzi waAbhishu ndiAbhihairi, naye wakamuberekera Ahibhani naMoridhi. Vakororo vaNadhabhi: Seredhi naAphaimu; naSeredhi wakafa asina mwana. Mukororo waAphaimu: Ishi. Mukororo waIshi: Sheshani. Mukororo waSheshani: Ahirai. Vakororo vaJadha mukoma waShamai: Jetha naJonathani; naJetha wakafa asina mwana. Vakororo vaJonathani: Pherethi naZaza. Ava ndivo mibarirwana yaJerahimeeri. Zvino Sheshani waiya asina vakororo, asi vanasikana vega. Sheshani waiya nehloko yomuEgipite, zina rake ndiJarha. Ndizvo Sheshani wakapa mwanasikana wake kunaJarha hloko yake kuti aite mukadzi; naye wakamuberekera Atai. Atai wakabara Nathani, naNathani wakabara Zabhadhi. Zabhadhi wakabara Efurari, naEfurari wakabara Obhedhi. Obhedhi wakabara Jehu, naJehu wakabara Azaria. Azaria wakabara Herezi, naHerezi wakabara Ereasa. Ereasa wakabara Sisimai, naSisimai wakabara Sharumu. Sharumu wakabara Jekamia, naJekamia wakabara Erishama. Vakororo vaKharebhu munun'una waJerahimeeri: Mesha dangwe rake, baba aZifi. Vakororo vaMaresha baba aHebroni. Vakororo vaHebroni: Khora, Tapua, Rekemu naShema. Shema wakabara Rahamu, baba vaJorikeamu; naRekemu wakabara Shamai. Mukororo waShamai: Maoni; naMaoni wakabara Bhethizuri. Efawo bunha raKharebhu wakabereka Harani, Moza naGazezi; naHarani wakabara Gazezi. Vakororo vaJadhai: Regemu, Jothamu, Geshani, Pherethi, Efa naShaafi. Makha bunha raKharebhu wakabara Shebha naTirihana. Wakaberekawo Shaafi baba waMadhimana, Shevha baba waMakhibhena, nababa waGibhea; mwanasikana waKharebhu ndiAkhisa. Ava ndivo mibarirwana yaKharebhu. Vakororo vaHuri, dangwe raEfuratha: Shobhari baba waKiriathijearimu, Sarima baba aBhetherehema, Harefi baba aBhethigadha. Shobhari baba aKiriathijearimu, vaiya nevakororo vamweni: Haroe, norupande rwaMenuhothi. Nemhuri yaKiriathijearimu: vaIthiri, vaPuthi, vaShumathi nevaMishara; kwevari ndikwo kwakabva vaZorathi nevaEshitaori. Vakororo vaSarima: Bhetherehema, vaNetofathi, Atirothibhethijoabhi, nevorupande rwaManahathi, vaZori. Mhuriwo dzevanyori vaigara Jabhezi: vaTirathi, vaShimeathi nevaSukhathi. Ava ndivo vaKheni avo vakabva Hamathi, baba vemhuri dzaRekhabhi. Ava ndivo vakororo vaDhavhidha vakabarwa ndiye muHebroni: wedangwe Amunoni, ndiAhinoamu muJezireeri; wechipiri Dhanieri, ndiAbhigairi muKharmeri; wechitatu ndiAbhusaromu, mukororo waMaakha, mwanasikana waTharimai mambo weGeshuri; wechirongomuna Adhonija, mukororo waHagithi; wechishanu Shefatia, ndiAbhithari; wechitanhatu Ithreamu, ndiEgira mukadzi wake. Avo vatanhatu vakabarirwa kwaari muHebroni, umwo mwaakatonga makore manomwe nemwedzi mitanhatu. MuJerusarema wakatongemwo makore makumi matatu namatatu. Ava ndivo vaakaberekerwa muJerusarema: Shimea, Shobhabhi, Nathani naSoromoni, varongomuna ndiBhathishua, mwanasikana waAmieri; zvino Ibhari, Erishama, Erifereti, Noga, Nefegi, Jafia, Erishama, Eriadha naErifereti, vapfumbamwe. Ava veshe vaiya vakororo vaDhavhidha ngepabanze pevakororo vemabunha; Tamari hanzvadzi yavo. Mibarirwana yaSoromoni: Rehobhoamu, Abhija mukororo wake, Asa mukororo wake, Jehoshafati mukororo wake, Joramu mukororo wake, Ahazia mukororo wake, Joashi mukororo wake, Amazia mukororo wake, Azaria mukororo wake, Jothamu mukororo wake, Ahazi mukororo wake, Hezekia mukororo wake, Manase mukororo wake, Amoni mukororo wake, Josia mukororo wake. Vakororo vaJosia: Johanani dangwe rake, wechipiri Jehoiakimu, wechitatu Zedhekia, wechirongomuna Sharumu. Mibarirwana yaJehoiakimu: Jekhonia mukororo wake naZedhekia mukororo wake. Vakororo vaJekhonia musungwa: Shearitieri mukororo wake, Marikhiramu, Phedhaia, Shenaza, Jekamia, Hoshama naNedhabhia. Vakororo vaPhedhaia: Zerubhabheri naShimei; nevakororo vaZerubhabheri: Meshuramu naHanania, naSheromithi hanzvadzi yavo; naHashuba, Oheri, Bherekhia, Hasadhia naJushabhisehedhi, vashanu. Vakororo vaHanania: Pheratia naJeshaia, mukororo wake Refaia, mukororo wake Arinani, mukororo wake Obhadhia, mukororo wake Shekhania. Mukororo waShekhania: Shemaia. Nevakororo vaShemaia: Hatushi, Igari, Bharia, Nearia naShafati, vatanhatu. Vakororo vaNearia: Erioenai, Hizikia naAzirikamu, vatatu. Vakororo vaErioenai: Hodhavhia, Eriashibhi, Pheraia, Akubhi, Johanani, Dheraia naAnani, vanomwe. Vakororo vaJudha: Pherezi, Hezironi, Khami, Huri naShobhari. Reaia mukororo waShobhari wakabara Jahathi; naJahathi wakabara Ahumai naRahadhi. Ava ndivo madzinza evaZorathi. Ava ndivo vakororo vaEtamu: Jezireeri, Ishima naIdhabhashi; nezina rehanzvadzi yavo raiya Hazereriphoni. Penueri waiya baba vaGedhori, naEza baba vaHusha. Ava ndivo vakororo vaHuri, dangwe raEfuratha, baba vaBhetherehema. Ashu baba vaThekoa vaiya nevakadzi vairi, Hera naNaara. Naara wakamuberekera Ahuzamu, Heferi, Themeni naHaahashitari. Ava ndivo vakororo vaNaara. Vakororo vaHera: Zerethi, Izihari naEthinani. Kozi wakabara Anubhi, Zobhebha, nemadzinza aAhaheri mukororo waHarumu. Jabhezi waipinda kuremeredzeka kunevana vamweni mumhuri yake; namai ake akamududza zina rake kuti Jabhezi echiti, “Ngokuti ndakamubereka ngokurwadziwa.” Jabhezi wakakumbira ngezina raMwari waIsuraeri echiti, “A, kudai wechindifumisa yaamho, nokukurisa migano yangu, nokuti nyara yako igare neni, nokuti undingwarire kubva mukuremadzwa nokurwadziwa!” NaMwari wakamupa izvo zvaakakumbira. Kherubhi munun'una waShuha wakabara Mehiri, uwo waiya baba vaEshitoni. Eshitoni wakabara Bhethirafa, Phasea naTehina baba aIrinahashi. Ava ndivo vanhu vaRekha. Vakororo vaKhenazi: Othinieri naSeraia; vakororo vaOthinieri: Hathathi naMeonothai. Meonothai wakabara Ofira; naSeraia wakabara Joabhi, baba vaGeharashimu, ngokuti vaiya ngwazi dzomushando. Vakororo vaKharebhu mukororo waJefune: Iru, Era naNaamu; mukororo waEra: Khenazi. Vakororo vaJeharereri: Zifi, Zifa, Tiria naAsareri. Vakororo vaEzura: Jetha, Meredhi, Eferi naJaroni. Ava ndivo vakororo vaBhithia, mwanasikana waFaro, wakaroorwa ndiMeredhi; naye wakabara Miriamu, Shamai naIshibha baba vaEshitemoa. Nomukadzi wake wechiJudha wakabereka Jeredhi baba vaGedhori, Hebheri baba vaSokho naJekuthieri baba vaZanoa. Vakororo vomukadzi waHodhia hanzvadzi yaNahamu vaiya madzibaba aKeira muGarimu naEshitemoa muMaakhathi. Vakororo vaShimoni: Amunoni, Rina, Bhenihanani naTironi. Vakororo vaIshi: Zohethi naBhenizohethi. Vakororo vaShera mukororo waJudha: Eri baba vaReka, naRaadha baba vaMaresha, nemadzinza aavo vanoruka machira orukangaza rwakanaka paBhethashibhea; naJokimu, navanhu vaKhozebha, Joashi naSarafi, avo vakaroora muMoabhi, asi wakapetuka Rehemu. Izvi zvaiya zvomukuwo wekaretu. Ava vaiya vaumbi naavo vaigara Netaimu neGedhera; vaigarapo namambo kuti vaite mushando wake. Vakororo vaSimeoni: Nemueri, Jamini, Jaribhi, Zera naShauri. Sharumu waiya mukororo wake, Mibhisamu mukororo wake, Mishima mukororo wake. Vakororo vaMishima: Hamueri mukororo wake, Zakuri mukororo wake, Shimei mukororo wake. Shimei waiya nevakororo gumi nevatanhatu, nevanasikana vatanhatu; asi vakoma vake vaiya vasina vana vakawanda, nevana vavo avazi kuwanda kudai ngevana vaJudha. Vaigara muBheerishebha, Moradha, Hazarishuari, Bhiriha, Ezemu, Thoradhi, Bhethueri, Horma, Zikiragi, Bhethimarikhabhothi, Hazarisusimu, Bhethibhiri naShaaraimu. Aya ndiwo madhorobha avo, metsa Dhavhidha aita mambo. Nemaguta avo aiya Etamu, Aini, Rimoni, Tokheni naAshani, maguta mashanu, pamwepo nawo eshe maguta akatendenedza madhorobha avo, metsa kuguma Bhaari. Aya ndiwo aiya ugaro hwavo nemibarirwana yavo. Vakangwarira mazina emibarirwana yavo yakanyorwa. Meshobhabhi, Jamurekhi, Josha, mukororo waAmazia, Joeri, Jehu mukororo waJoshibhia, mukororo waSeraia, mukororo waAsieri, Erioenai, Jaakobha, Jeshohaia, Asaia, Adhieri, Jesimieri, Bhenaia, Ziza mukororo waShifi, mukororo waAroni, mukororo waJedhaia, mukororo waShimri, mukororo waShemaia. Ava vadudzwa ngemazina avo vaiya vatungamiriri vemhatso dzemadzibaba avo, nemadzinza avo akawandiswa kakurutu. Vakahamba kuenda kumusiwo weGedhori, ngokurupande rwomubani rwokumabvazuva, vechitsvaka mafuro ezvifuyo zvavo, apo pevakaona mafuro emwenje wakanaka, nenyika yakapamhama, yakanyarara, yakati teratera; ngokuti vaigaremwo karetu vaiya vaHamu. Ava vakanyorwa mazina avo vakaguma ngemazuva aHezekia mambo waJudha, vakaparadza matende avo, nevaMeunimu vaiya mukati mwawo, vakavapedza metsa nanyamashi, vakagara mundau dzavodzo, ngokuti aiya mafuro akanaka ezvifuyo zvavo. Vamweni vavo, mazana mashanu (500) evakororo vaSimeoni, vakaenda kuMutunhu Seira, vanenduna dzavo Pheratia, Nearia, Refaia naUzieri, vakororo vaIshi. Vakaparadza vakasara vaAmareki, avo vakapokonyoka, vakagaremwo metsa nanyamashi. Zvino ava ndivo vakororo vaRubheni, dangwe raIsuraeri, (ngokuti ndiye waiya dangwe; asi ngokuti wakasvipisa mubhedhi wababa ake, nhaka youtangwe hwake yakapuwa kunevakororo vaJosefa mukororo waIsuraeri; ndizvo Rubheni aazi kunyorwa munonyorwa mazina oudangwe kudai ngounogara nhaka. Kunyazwi Judha wakaita mukuru pakati pevana vababa ake, nomutongi wakabva kwaari, asi nhaka youtangwe yaiya yaJosefa.) Vakororo vaRubheni dangwe raIsuraeri: Hanokhi, Paru, Hezironi naKhami. Vakororo vaJoeri: Shemaia mukororo wake, Gogi mukororo wake, Shimei mukororo wake, Mikha mukororo wake, Reaia mukororo wake, Bhaari mukororo wake, Bheera mukororo wake, uwo wakatorwa kuitwa hloko, waiya mambo wevaRubheni, ndiTirigathiphirinesa mambo weAsiria. Nehama dzake ngemarudzi adzo, apo mazina emadzibaba avo akanyorwa paakaerengwa ngemibarirwana yavo vakaziikanwa: mambo, Jeieri naZekharia, naBhera mukororo waAzazi, mukororo waShema, mukororo waJoeri, uwo waigara muAroeri, metsa kuguma Nebho naBhaarimeoni. Vakagarazve ngokumabvazuva, panotangira rubaya nerwizi Yufratesi, ngokuti ng'ombe dzavo dzakawandiswa munyika yeGireadhi. Ngemazuva aSauri ava vakarwa nevaHagiri, vakavanyisa ngenyara yavo. Vakagara mumatende avo munyika yeshe yokumabvazuva kweGireadhi. Vakororo vaGadhi vaigara pasinde pavo vakaita maringwa navo, munyika yaBhashani metsa kuguma Sarekha: Joeri nduna, Shafamu wechipiri, Janai naShafati muBhashani. Nehama dzavo kudai ngemadzinza avo: Mikhaeri, Meshuramu, Shebha, Jorai, Jakhani, Zia naEbha, vanomwe. Ava ndivo vakororo vaAbhihairi mukororo waHuri, mukororo waJaroa, mukororo waGireadhi, mukororo waMikhaeri, mukororo waJeshishai, mukororo waJadho, mukororo waBhuzi. Ahi mukororo waAbhidhieri, mukororo waGuni, mukuru wedzinza remadzibaba avo. Navo vakagara Gireadhi, muBhashani, nomumadhorobha ayo, nomunyika yembusho yeshe yeSharoni, metsa kuguma kumigano yayo. Veshe ava vakaerengwa ngemadzinza emibarirwana yavo ngemazuva aJothamu mambo waJudha, mumazuva aJerobhoamu mambo waIsuraeri. Vakororo vaRubheni, vakororo vaGadhi, norupande rwaManase avo vaiya ngwazi dzehondo, vaikona kubata zvihlangu neshoti, nokufura ngouta, vaiya ngwazi mukurwa hondo, vaiya makumi emazana makumi marongomuna nemarongomuna, nemazana manomwe nemakumi matanhatu (44,760), vakanasirira kuenda koorwa. Vakarwa hondo nevaHagiri, Jeturi, Nafishi naNodhabhi. Naapo vakadetserwa mukurwa navo, vaHagiri naavo veshe vaiya navo vakapirwa munyara dzavo, ngokuti vakakumbira kunaMwari vari mukurwa hondo, naye wakavazwa, ngokuti vakagonda kwaari. Vakatora zvifuyo zvavo: makamera avo makumi emazana makumi mashanu (50,000), makwai mazana mairi nemakumi mashanu emazana (250,000), mbongoro makumi emazana mairi (2,000), vasungwa vanhu zana rimwe remakumi emazana (100,000). Kwakawa vazhinji vakafa, ngokuti yaiya hondo yaMwari. Navo vakagara kundau dzavo metsa nguva yokuita hloko. Vana vorupande rwedzinza rwaManase vakagara munyikamwo; vakawandisa kakurutu kubvira Bhashani metsa kuguma Bhaariherimoni, Seniri, nokuguma kuMutunhu Hermoni. Ava ndivo vaiya vakuru vemadzinza emadzibaba avo: Efa, Ishi, Erieri, Azirieri, Jeremia, Hodhavhia naJahidhieri, ngwazi dzehondo vanhu vanembiri, vakuru vemadzinza emadzibaba avo. Asi vakapauka kubva kunaMwari wemadzibaba avo, vakada kuteera zvimwari zvevanhu venyika iyo, avo vakaparadzwa ndiMwari kubva pamberi pavo. Ndizvo Mwari waIsuraeri wakamusa mweya waPhuri mambo weAsiria, nomweya waTirigathiphirinesa mambo weAsiria, naye wakavatora kuenda navo, vaRubheni, vaGadhi, norupande rwedzinza raManase, wakavaunza Hara, Habhori, Hara, nerwizi Gozani, metsa nanyamashi. Vakororo vaRevhi: Gershoni, Kohathi naMerari. Vakororo vaKohathi: Amiramu, Izihari, Hebroni naUzieri. Vana vaAmiramu: Aroni, Mosi naMiriamu. Vakororo vaAroni: Nadhabhi, Abhihu, Ereaza naIthama. Ereaza wakabara Finehasi, Finehasi wakabara Abhishua, Abhishua wakabara Bhuki, Bhuki wakabara Uzi, Uzi wakabara Zerahia, Zerahia wakabara Meraiothi, Meraiothi wakabara Amaria, Amaria wakabara Ahithubhi, Ahithubhi wakabara Zadhoki, Zadhoki wakabara Ahimaazi, Ahimaazi wakabara Azaria, Azaria wakabara Johanani, naJohanani wakabara Azaria, (ndiye uwo wakaita mushando woupristi mutemperi rakaakiwa ndiSoromoni muJerusarema.) Azaria wakabara Amaria, Amaria wakabara Ahithubhi, Ahithubhi wakabara Zadhoki, Zadhoki wakabara Sharumu, Sharumu wakabara Hirikia, Hirikia wakabara Azaria, Azaria wakabara Seraia, Seraia wakabara Jehozadhaki, naJehozadhaki wakatorwa kuita hloko, apo Mambo Mwari paakaendesa muusungwa Judha neJerusarema ngenyara yaNebhukhadhineza. Vakororo vaRevhi: Gershoni, Kohathi naMerari. Aya ndiwo mazina evakororo vaGershoni: Ribhini naShimei. Vakororo vaKohathi: Amiramu, Izihari, Hebroni, naUzieri. Vakororo vaMerari: Mahiri naMushi. Naava ndivo mibarirwana yaRevhi kudai ngokuerengwa kwemadzibaba avo. VaGershoni: Ribhini mukororo wake, Jahathi mukororo wake, Zima mukororo wake, Joa mukororo wake, Idho mukororo wake, Zera mukororo wake, naJeatherai mukororo wake. Vakororo vaKohathi: Aminadhabhi mukororo wake, Khora mukororo wake, Asiri mukororo wake, Erikana mukororo wake, Ebhiasafi mukororo wake, Asiri mukororo wake, Tahathi mukororo wake, Urieri mukororo wake, Uzia mukororo wake, naShauri mukororo wake. Vakororo vaErikana: Amasai naAhimothi, Erikana mukororo wake, Zofai mukororo wake, Nahathi mukororo wake, Eriabhi mukororo wake, Jerohamu mukororo wake, naErikana mukororo wake. Vakororo vaSamueri: Joeri dangwe rake, wechipiri Abhija. Vakororo vaMerari: Mahiri, Ribhini mukororo wake, Shimei mukororo wake, Uza mukororo wake, Shimea mukororo wake, Hagia mukororo wake, naAsaia mukororo wake. Ava ndivo vanhu vaakaemesa Dhavhidha kutungamirira mishando yokuemba mumhatso yaMambo Mwari, apo bhokisi rechitenderano chaMambo Mwari ragarisikamwo. Vakashanda pamberi pethabhenakeri retende romushongano ngokuemba, metsa mukuwo waakaaka Soromoni mhatso yaMambo Mwari muJerusarema; navo vakaita mushando wavo kudai ngokuemeswa kwavo. Ava ndivo vanhu vaishandira; nevana vavo vaiya: Vakororo vaKohathi: Hemani muembi, mukororo waJoeri, mukororo waSamueri, mukororo waErikana, mukororo waJerohamu, mukororo waErieri, mukororo waToa, mukororo waZufi, mukororo waErikana, mukororo waMahathi, mukororo waAmasai, mukororo waErikana, mukororo waJoeri, mukororo waAzaria, mukororo waZefania, mukororo waTahathi, mukororo waAsiri, mukororo waEbhiasafi, mukororo waKhora, mukororo waIzihari, mukororo waKohathi, mukororo waRevhi, mukororo waIsuraeri; nehama yake Asafi, uwo waiema ngokumudyo kwake, zina rake ndiAsafi mukororo waBherekhia, mukororo waShimea, mukororo waMikhaeri, mukororo waBhaaseia, mukororo waMarikhija, mukororo waEthini, mukororo waZera, mukororo waAdhaia, mukororo waEthani, mukororo waZima, mukororo waShimei, mukororo waJahathi, mukororo waGershoni, mukororo waRevhi. Ngokumuoshwe kwaiya nehama dzavo vakororo vaMerari: Ethani mukororo waKishi, mukororo waAbhidhi, mukororo waMarukhi, mukororo waHashabhia, mukororo waAmazia, mukororo waHirikia, mukororo waAmizi, mukororo waBhani, mukororo waShema, mukororo waMahiri, mukororo waMushi, mukororo waMerari, mukororo waRevhi; nehama dzavo vaRevhi vakaemeswa kuita mushando weshe wethabhenakeri remhatso yaMambo Mwari. Asi Aroni nevakororo vake vaipira midiro padera pearita remidiro yokupisha, nepadera pearita rokupisha mitombo inegwema rakanaka, vechiita mushando weshe wendau yakapindisisa kuchena, nokupira midiro yokuti Isuraeri aripirwe, kudai ndizvo zveshe zvaakapanga Mosi muranda waMwari. Ava ndivo vakororo vaAroni: Ereaza mukororo wake, Finehasi mukororo wake, Abhishua mukororo wake, Bhuki mukororo wake, Uzi mukororo wake, Zerahia mukororo wake, Meraiothi mukororo wake, Amaria mukororo wake, Ahithubhi mukororo wake, Zadhoki mukororo wake, Ahimaazi mukororo wake. Idzi ndidzo ndau dzavo dzokugara, kudai ngemigano yavo: kuvakororo vaAroni vemhuri dzaKohathi (ngokuti ndivo vakatanga kutsanangurwa ngemabhigidha) vakapuwa Hebroni munyika yaJudha, nenyika yemafuro inotendenedza. Asi minda yemadhorobha nemaguta ayo, vakazvipa kunaKharebhu mukororo waJefune. Kuvakororo vaAroni vakapa madhorobha outiziro: Hebroni, Ribhina nenyika yayo yemafuro, Jatiri, Eshitemoa nenyika yayo yemafuro, Hireni nenyika yayo yemafuro, Dhebhiri nenyika yayo yemafuro, Ashani nenyika yayo yemafuro, naBhethishemeshi nenyika yayo yemafuro. Kubva kudzinza raBhenjamini, Gebha nenyika yayo yemafuro, Aremethi nenyika yayo yemafuro, neAnathothi nenyika yayo yemafuro. Madhorobha avo eshe mukati mwemadzinza avo aiya madhorobha gumi namatatu. Vakororo vamweni vaKohathi vakapuwa ngemabhigidha madhorobha gumi kubva kurupande rwemhatso yedzinza raManase. Vakororo vaGershoni kudai ngokuteererana kwemhuri dzavo vakapuwa madhorobha gumi namatatu kubva kudzinza raIsakha, Asha, Nafitari naManase, muBhashani. Vakororo vaMerari vakapuwa ngemabhigidha kudai ngemhatso dzavo, madhorobha gumi namairi kubva kudzinza raRubheni, Gadhi naZebhuruni. Ndizvo vanhu vaIsuraeri vakapa kuvaRevhi madhorobha nenyika yemafuro awo. Vakapawo ngemabhigidha aya madhorobha kubva kumadzinza evana vaJudha, Simeoni naBhenjamini, aya madhorobha anodaidzwa ngemazina. Mhatso dzimweni dzevakororo vaKohathi vaiya nemadhorobha omunyika yavo kubva kudzinza raEfruremu. Vakapuwa madhorobha okutiziramwo: Shekhemu nenyika yemafuro ayo, munyika yemitunhu yaEfuremu, Geza nenyika yemafuro ayo, Jokimeamu nenyika yemafuro ayo, Bhethihoroni nenyika yemafuro ayo, Aijaroni nenyika yemafuro ayo, Gathirimoni nenyika yemafuro ayo; nokubva kurupande rwedzinza raManase, Ana nenyika yemafuro ayo, naBhireamu nenyika yemafuro ayo kuvamweni vakasara vemhatso dzevakororo vaKohathi. Kunevakororo vaGershoni: kubva kurupande rwedzinza raManase: Gorani muBhashani nenyika yemafuro ayo, naAshitharothi nenyika yemafuro ayo; nokubva kudzinza raIsakha vakapuwa Kedheshi nenyika yemafuro ayo, Dhabherathi nenyika yemafuro ayo, Ramothi nenyika yemafuro ayo, neAnemu nenyika yemafuro ayo; kubva kudzinza raAsha: Mashari nenyika yemafuro ayo, Abhidhoni nenyika yemafuro ayo, Hukoki nenyika yemafuro ayo, neRehobhi nenyika yemafuro ayo; nokubva kudzinza raNafitari: Kedheshi riri muGarire nenyika yemafuro ayo, Hamoni nenyika yemafuro ayo neKiriathaimu nenyika yemafuro ayo. Kunavamweni vevana vaMerari vakapuwa kubva kudzinza raZebhuruni: Rimono nenyika yemafuro ayo, Thabhori nenyika yemafuro ayo; ngoruseri rweJorodhani kubva Jerikho ngokumabvazuva kweJorodhani, vakapuwa kubva kudzinza raRubheni: Bheza riri mushango nenyika yemafuro ayo, Jahiza nenyika yemafuro ayo, Kedhemothi nenyika yemafuro ayo, neMefaathi nenyika yemafuro ayo; nokubva kudzinza raGadhi: Ramothi muGireadhi nenyika yemafuro ayo, Mahanaimu nenyika yemafuro ayo, Heshibhoni nenyika yemafuro ayo, neJaza nenyika yemafuro ayo. Vakororo vaIsakha: Tora, Pua, Jashubhi naShimuroni, vaiya varongomuna. Vakororo vaTora: Uzi, Refaia, Jerieri, Jahimai, Ibhisamu naShemueri, vakuru vemhatso dzemadzibaba avo, ngemazina avo vaTora, ngwazi dzinesimba mumibarirwana yavo; avo mukuerengwa kwavo ngemazuva aDhavhidha vaiya makumi mairi namairi emakumi emazana nemazana matanhatu (22,600). Mukororo waUzi: Izirahia. Nevakororo vaIsirahia: Mikhaeri, Obhadhia, Joeri naIshia vaiya vashanu; veshe vavo vaiya madzimambo. Pamwepo navo, ngemibarirwana yavo kudai ngemhatso dzemadzibaba avo, vaiyapo zvikwata zvevarwi vehondo, makumi matatu nematanhatu emakumi emazana (36,000), ngokuti vaiya nevakadzi vazhinji nevakororo vakawanda. Hama dzavo dzaiya mumibarirwana yeshe yaIsakha vaiya vanhu vari ngwazi vanoshinga, navo vakaerengwa veshe kudai ngemibarirwana yavo, vaiya makumi masere nemanomwe emakumi emazana (87,000). Vakororo vaBhenjamini: Bhera, Bhekheri naJedhiaeri, vaiya vatatu. Vakororo vaBhera: Ezibhoni, Uzi, Uzieri, Jerimothi naIri, vaiya vashanu, vakuru vemhatso dzemadzibaba avo, ngwazi dzinesimba; vakaerengwa kudai ngemadzinza avo makumi mairi namairi emakumi emazana nemakumi matatu nemarongomuna (22,034). Vakororo vaBhekheri: Zemira, Joashi, Erieza, Erioenai, Omuri, Jeremothi, Abhija, Anathothi naAremethi. Veshe ava vakororo vaBhekheri. Nouwandu hwokunyorwa mazina avo, kudai ngemibarirwana yavo, avo vaiya vakuru vemhatso dzemadzibaba avo, ngwazi dzakashinga, makumi mairi emakumi emazana nemazana mairi (20,200). Mukororo waJedhiaeri: Bhirihani. Vakororo vaBhirihani: Jeushi, Bhenjamini, Ehudhi, Khenaana, Zethani, Tharshishi naAhishaha. Veshe ava vakororo vaJedhiaeri, kudai ngevakuru vemhatso dzemadzibaba avo, ngwazi dzakashinga, gumi nemanomwe emakumi emazana nemazana mairi (17,200), vakanasirira kuenda koorwa hondo. Shuphimu naHuphimu vaiya vakororo vaIri, Hushimu mukororo waAheri. Mibarirwana yaNafitari: Jahizieri, Guni, Jeza naSharumu, mibarirwana yaBhiriha. Vakororo vaManase: Asirieri, uwo waakabereka nebunha rake muAramu; wakabereka Makhiri baba aGireadhi. NaMakhiri wakaroorera Huphimu mukadzi naShuphimu. Zina romukunda wake raizwi Maakha. Zina rowechipiri raizwi Zerofehadhi, naZerofehadhi waiya nevanasikana. Maakha mukadzi waMakhiri wakamuberekera mukororo, wakadudza zina rake kuti Phereshi; zina romunun'una wake raiya Shereshi; nevakororo vake vaiya Uramu naRekemu. Mukororo waUramu: Bhedhani. Ava vaiya vakororo vaGireadhi, mukororo waMakhiri, mukororo waManase. Nehanzvadzi yake Hamorekhethi wakabereka Ishihodhi, Abhieza naMahla. Vakororo vaShemidha vaiya Ahiani, Shekhemu, Rikhi naAniamu. Vakororo vaEfuremu: Shuthera, naBheredhi mukororo wake, Thahathi mukororo wake, Ereadha mukororo wake, Thahathi mukororo wake, Zabhadhi mukororo wake, Shuthera mukororo wake, naEza naEreadhi. Zvino vanhu veGathi, vakabarirwa munyikayo, vakavauraya, ngokuti vakadzaka koopamba n'ombe dzavo. NaEfuremu baba avo vakachema mazuva mazhinji, nehama dzake dzakauya kumuembedzera. Naapo wakapotera kumukadzi wake, wakaita mimba, akabereka mukororo; wakadudza zina rake kuti Bheria, ngendaa yokutambudzika kwemhatso yake. Mwanasikana wake waizwi Sheera, wakaaka Bhethihoroni rokubani nedera, neUzenisheera. Refa waiya mukororo wake, Reshefi mukororo wake, Thera mukororo wake, Thahani mukororo wake, Radhani mukororo wake, Amihudhi mukororo wake, Erishama mukororo wake, Nuni mukororo wake, Joshua mukororo wake. Upfumi hwavo nendau yavo yokugara zvaiya Bhetheri nemadhorobha ayo, kumabvazuva Naarani, nokumabirirazuva Geza nemadhorobha ayo, Shekhemu nemadhorobha ayo, metsa kuguma Aya nemadhorobha ayo. Nokumigano yevana vaManase, Bhethisheani namadhorobha ayo, Taanakhi nemadhorobha ayo, Megidho nemadhorobha ayo, Dhori nemadhorobha ayo. Umu ndimwo mwaigara vana vaJosefa mukororo waIsuraeri. Vakororo vaAsha: Imina, Ishivhi, Ishivha, Bheria naSera hanzvadzi yavo. Vakororo vaBheria: Hebha naMarikhieri, baba aBhirizaithi. Hebha wakabara Jafureti, Shoma, Hothamu naShua hanzvadzi yavo. Vakororo vaJafureti: Phasakha, Bhimhari naAshivhathi. Ava vana vaJafureti. Vakororo vaShema: Ahi, Roga, Hubha naAramu. Vakororo vaHeremu hama yake: Zofa, Imina, Shereshi naAmari. Vakororo vaZofa: Sua, Harinefa, Shuari, Bheri, Imira, Bheza, Hodhi, Shama, Shirisha, Ithirani naBheera. Vakororo vaJetha: Jefune, Phisipha naAra. Vakororo vaUra: Ara, Hanieri naRizia. Veshe ava vaiya mibarirwana yaAsha, vakuru vemhatso dzemadzibaba avo, vanhu vakatsanangurwa, ngwazi dzakashinga, vakuru vevazvare. Uwandu hwavo hwakaerengwa ngemazina avo vaikona kuita mushando muhondo vaiya makumi mairi nematanhatu emakumi emazana (26,000). Bhenjamini wakabara Bhera dangwe rake, Ashibheri wechipiri, Ahara wechitatu, Noha wechirongomuna naRafa wechishanu. Nevakororo vaBhera: Adhari, Gera, Abhihudhi, Abhishua, Naamani, Ahoa, Gera, Shefufani naHuramu. Ava ndivo vakororo vaEhudhi, vaiya vakuru vemhatso dzemadzibaba eavo vaigara Gebha, navo vakavathuthisa kuenda Manahathi: Naamani, Ahija naGera, ndiye Hegiramu, baba vaUza naAhihudhi. NaShaharaimu wakabara vakororo munyika yaMoabhi, ngesure kwokudzinga vakadzi vake Hushimu naBhaara. Naye wakabarirwa vakororo ndiHodheshi mukadzi wake: Jobhabhi, Zibhia, Mesha, Marikhamu, Jeuzi, Sakhia naMirima. Ava ndivo vaiya vakororo vake, vakuru vemhatso dzemadzibaba. Wakabarazve vakororo ndiHushimu: Abhithubhi naEriphaari. Vakororo vaEriphaari: Ebha, Mishamu naShemedhi, uwo wakaaka madhorobha Ono neRodhi, nemaguta awo. NaBheria naShema, vaiya vakuru vemhatso dzemadzibaba awo vaigara muAijaroni, vakadzinga vagari veGathi; naAhio, naShashaki naJeremothi. Zebhadhia, Aradhi, Edheri, Mikhaeri, Ishipha naJoha vaiya vakororo vaBheria. Zebhadhia, Meshuramu, Hiziki, Hebha, Ishimerai, Iziria naJobhabhi vaiya vakororo vaEriphaari: Jakimu, Zikhiri, Zabhudhi, Erienai, Zirethai, Erieri, Adhaia, Bheraia naShimirathi vaiya vakororo vaShimei. Ishiphani, Ebha, Erieri, Abhidhoni, Zikhiri, Hanani, Hanania, Eramu, Anithothija, Ifidheia naPhenueri vaiya vakororo vaShashaki. Shamusherai, Sheharia, Atharia, Jaareshia, Erija naZikhiri vaiya vakororo vaJerohamu. Ava vaiya vakuru vemhatso yemadzibaba avo, mumibarirwana yavo, vaiya madzimambo. Ava vaigara muJerusarema. Jeieri baba vaGibheoni vaigara muGibheoni; zina romukadzi wake raizwi Maakha. Mukororo wake wedangwe: Abhidhoni, kwoteera Zuri, Kishi, Bhaari, Nadhabhi, Gedhori, Ahio, Zekha naMikirothi uwo wakabara Shimea. Zvino naavowo vaigara vakaringirana nehama dzavo muJerusarema, vari pasinde pamwepo. Neri wakabara Kishi, Kishi wakabara Sauri, Sauri wakabara Jonathani, Marikhishua, Abhinadhabhi naEshibhaari; nomukororo waJonathani Meribhaari; Meribhaari wakabara Mikha. Vakororo vaMikha: Phithoni, Merekhi, Tharea naAhazi. Ahazi wakabara Jehoadha; naJehoadha wakabara Aremethi, Azimavheti naZimuri; Zimuri wakabara Moza, Moza wakabara Bhinea; Rafa waiya mukororo wake, Ereasa mukororo wake, Azeri mukororo wake. Azeri waiya nevakororo vatanhatu, mazina avo ndiwo aya: Azirikamu, Bhokheru, Ishumaeri, Shearia, Obhadhia naHanani. Ava veshe vaiya vakororo vaAzeri. Vakororo vaEsheki hama yake: Uramu dangwe rake, Jeushi wechipiri naErifereti wechitatu. Vakororo vaUramu vaiya ngwazi dzehondo dzakashinga, vaikona kufura ngeuta nemisee, vaiya nevana vazhinji, nevana vevana, zana nemakumi mashanu (150). Veshe ava mibarirwana yaBhenjamini. Ndizvo veshe vaIsuraeri vakaerengwa ngemazina avo; naaya akanyorwa muBhuku reMadzimambo aIsuraeri. NaJudha wakatorwa kooitwa hloko Bhabhuroni ngendaa yezvishaishi zvavo. Zvino vakatanga kugara mundau dzavo mumadhorobha avo vaiya vaIsuraeri, vapristi, vaRevhi nevashandi vomumhatso yokudira. Vanhu vamweni vana vaJudha, vana vaBhenjamini, vana vaEfuremu nevaManase vaigara muJerusarema: Uthai mukororo waAmihudhi, mukororo waOmuri, mukororo waImuri, mukororo waBhani, vanobva kuvana vaPherezi mukororo waJudha. NeveShiro: Asaia dangwe, nevakororo vake. Vakororo vaZera: Jeueri, nehama dzavo, vaiya mazana matanhatu nemakumi mapfumbamwe (690). Vakororo vaBhenjamini: Saru mukororo waMeshuramu, mukororo waHodhavhia, mukororo waHasenua, Ibhineia mukororo waJerohamu, Era mukororo waUzi, mukororo waMikhiri, naMeshuramu mukororo waShefatia, mukororo waReueri, mukororo waIbhinija: nehama dzavo kudai ngemibarirwana yavo, mazana mapfumbamwe nemakumi mashanu nevatanhatu (956). Veshe ava vaiya vakuru padera pemhatso kudai ngokuteererana kwemhatso dzemadzibaba avo. Vevapristi: Jedhaia, Jehoiaribhi, Jakhini naAzaria mukororo waHirikia, mukororo waMeshuramu, mukororo waZadhoki, mukororo waMeraiothi, mukororo waAhithubhi, nduna huru yemhatso yaMambo Mwari; naAdaia mukororo waJerohamu, mukororo waPhashuri, mukororo waMarikhija, naMaasai mukororo waAdhieri, mukororo waJahizera, mukororo waMeshuramu, mukororo waMeshiremithi, mukororo waIma; ngepabanze pehama dzavo, vakuru vemhatso dzemadzibaba avo, gumi remazana nemazana manomwe nemakumi matanhatu (1,760), vamuna vakanasirirwa kuita mushando wemhatso yaMwari. VevaRevhi: Shemaia mukororo waHashubhi, mukororo waAzirikamu, mukororo waHashabhia, wevakororo vaMerari; naBhakibhaka, Hereshi, Garari, naMathania mukororo waMikha, mukororo waZikhiri, mukororo waAsafi; naObhadhia mukororo waShemaia, mukororo waGarari, mukororo waJedhuthuni, naBherekhia mukororo waAsa, mukororo waErikana, uwo waigara mumaguta aNetofathi. Varindi vemisiwo vaiya: Sharumu, Akubhi, Tharimoni, Ahimani, nehama dzavo. Sharumu waiya mukuru, uwo waimbongwarira pamusiwo wamambo ngokumabvazuva. Ava ndivo vangwariri vemisiwo mumakamba evana vaRevhi. Sharumu mukororo waKore, mukororo waEbhiasafi, mukororo waKhora, nehama dzake dzemhatso yababa ake, vaKhora, ndivo vaiya padera pomushando wokungwarira misiwo yetende romushongano, kudai ngemadzibaba avo vaiya padera pekamba yaMambo Mwari, vaingwarira pamusiwo. Finehasi mukororo waEreaza waiya mukuru padera pavo karetu; Mambo Mwari waiya naye. Zekharia mukororo waMesheremia waiya mungwariri womusiwo wetende romushongano. Naava veshe vakatsanangurwa kuti vaite vangwariri vemisiwo paruwanze vaiya mazana mairi negumi navairi (212). Vakaerengwa ngokunyorwa kwemazina avo, mumaguta avo. Dhavhidha naSamueri mufemberi vakavaemesa mumushando wavo wokugondeka. Ndizvo ivo nemibarirwana yavo vairinda pamisiwo yemhatso yaMambo Mwari, ndiyo mhatso yetende romushongano, kuti vaite varindi. Varindi vaiya kumarutii marongomuna, kumabvazuva, kumabirirazuva, kubani nedera; nehama dzavo dzaiya mumaguta avo vaiuya nguva dzeshe kumabingo avo mazuva manomwe kuzogara navo; ngokuti ava vaRevhi varongomuna vaiya varindi vakuru, vaiya nemishando yavo, vaingwarira makamera noupfumi hwemhatso yaMwari. Navo vaipedza usiku hweshe vakatendenedza mhatso yaMwari, ngokuti kuingwarira kwaiya kwavo, nomushando wokuibeura mangwanani eshe waiya wavo. Vamweni vavo vaiya vakaemeswa kungwarira zvidziyo zvokushanda ndizvo, kuti vazvibudise nokuzvipinzazve vechizvierenga. Vamweni vavo vakaemeserwa kuti vangwarire zvidziyo nezviro zveshe zvetende romushongano, ufu hwakamotseka, vhini, mafuta, mutombo unegwema rakanaka nemaka. Vamweni vevakororo vevapristi vainasira kuvhengedzwa pamwepo zvinonuhwira, naMatithia, umwe wevaRevhi, dangwe raSharumu muKhora, wakaemeswa kuita mukuru padera pomushando wokubikwa kwezvingwa zvokupira. Vamweniwo vehama dzavo, vevakororo vaKohathi, vaiya vakaemeswa padera pomushando wemisara yezvingwa, nokuzvinasirira maSabatha rimwe ngarimwe. Zvino ava ndivo vaembi, vakuru vemhatso dzemadzibaba evaRevhi, vaigara mumakamera emhatso yokudira vakasunhurika kubva kunemishando imweni, ngokuti vaiya pamushando usiku nemasikati. Ava vaiya vakuru vemhatso dzemadzibaba evaRevhi, kudai ngokuteererana kunoita mibarirwana yavo; vakuru ava vaigara muJerusarema. MuGibheoni mwaigara baba vaGibheoni, Jeieri, nezina romukadzi wake raizwi Maakha. Dangwe rake romukororo raizwi Abhidhoni, kwoteera Zuri, Kishi, Bhaari, Neri, Nadhabhi, Gedhori, Ahio, Zekharia naMikirothi; naMikirothi wakabara Shimeamu; naavazve vaigara vakaringirana nehama dzavo muJerusarema, pasinde nehama dzavo. Neri wakabara Kishi; Kishi wakabara Sauri, Sauri wakabara Jonathani, Marikhishua, Abhinadhabhi naEshibhaari; nomukororo waJonathani waiya Meribhaari; naMeribhabhaarii wakabara Mikha. Vakororo vaMikha: Phithoni, Merekhi, Tahirea naAhazi; naAhazi wakabara Jara, naJara wakabara Aremethi, Azimavhethi naZimuri; naZimuri wakabara Moza. Moza wakabara Bhinea; naRefaia waiya mukororo wake, Ereasa mukororo wake, Azeri mukororo wake. Azeri waiya nevakororo vatanhatu, mazina avo ndiwo aya: Azirikamu, Bhokheru, Ishumaeri, Shearia, Obhadhia naHanani; ava ndivo vakororo vaAzeri. Zvino vaFiristia vakarwa naIsuraeri; nevanhu vaIsuraeri vakatiza kubva pamberi pevaFiristia; vakawa vaurawa muMutunhu weGiribhoa. VaFiristia vakateera Sauri nevakororo vake ngesimba; nevaFiristia vakauraya Jonathani, Abhinadhabhi, naMarikhishua, vakororo vaSauri. Kurwa kwakashatira Sauri, nevanoposhera misee vakamuona, wakaremadzwa ngeavo vaposheri vemisee. Zvino Sauri wakati kumutwari wezvokurwa ndizvo zvake, “Shwamura shoti yako, undiuraise ndiyo, kuti ava vasikazi kuchekwa vasauya nokunditsereketesa.” Asi mutwari wezvokurwa ndizvo zvake wakaramba, ngokuti wakatya kakurutu. Ndizvo Sauri wakatora shoti yake akawira padera payo. Naapo mutwari wezvokurwa ndizvo zvake aona kuti Sauri wafa, iye nayewo wakawira padera peshoti yake, wakafa. Ndizvo Sauri wakafa, iye nevakororo vake vatatu, nevemhatso yake veshe vakafa pamwepo. Naapo vanhu veshe vaIsuraeri vaigara mubani pevakaona kuti vatiza, naSauri waiya afa, nevakororo vake, naapo vakasiya madhorobha avo, vakatiza; nevaFiristia vakauya, vakagaramwo. Ngezuva raiteera, apo vaFiristia pevakauya kootora zviro zvevaiya vafa, vakaona Sauri nevakororo vake vakafa muMutunhu weGiribhoa. Vakamukhumura, vakatora soro rake nechihlangu chake, vakazvitumira nhumwa kunyika dzinotendenedza dzevaFiristia, kuti vadaidzire mashoko akanaka kunezvimwari zvavo nokuvanhu. Vakaisa zvokurwa ndizvo zvake mumhatso yezvimwari zvavo, vakaturika soro rake mumhatso yechimwari chavo Dhagoni. Asi apo veshe veJabheshigireadhi vazwa zviro zveshe zvakaitwa ngevaFiristia kunaSauri, vakamiruka, veshe vamuna ngwazi dzokurwa, vakatora muiri waSauri nemiiri yevakororo vake, vakaiunza Jabheshi. Zvino vakatsira magodo avo pashi pomuokhi muJabheshi, navo vakaera kudya mazuva manomwe. Ndizvo Sauri wakafa ngendaa yokupauka kwake, ukwo kwaakashaisha ngokupauka kubva kunaMambo Mwari; wakapauka ngokuti aazi kungwarira izwi raMambo Mwari, ngokudarozve, wakabvunza kunen'anga inomweya wokufembera, echitsvaka mazano, naye aazi kubvunza mazano kubva kunaMambo Mwari. Ndizvo Mambo Mwari wakamuuraya, akakunukudza umambo kuuisa kunaDhavhidha mukororo waJesi. Zvino vaIsuraeri veshe vakaungana pamwepo kunaDhavhidha paHebroni vechiti, “Wona, isusu tiri magodo ako nenyama yako. Munguva yakapinda, kunyazwi apo Sauri paaiya mambo, iwewe ndiwe wakatungamirira Isuraeri mukubuda kwake nomukupotera kwake. Mambo Mwari, Mwari wako, wakati kwouri, ‘Ndiwe unozousha vanhu vangu Isuraeri, iwewe ndiwe unozoita mutongi wevanhu vangu Isuraeri.’ ” Ndizvo vakauya veshe vakuru vaIsuraeri kunamambo muHebroni; naDhavhidha wakaita chitenderano navo pamberi paMambo Mwari paHebroni; navo vakadzodza Dhavhidha kuita mambo padera paIsuraeri, kudai ngezvakaronza izwi raMambo Mwari kubudikidza ndiSamueri. Dhavhidha nevaIsuraeri veshe vakahamba kuenda Jerusarema, ndiro Jebhusi, nyika yevaJebhusi ndimwo mwevaigara. Vagari veJebhusi vakati kunaDhavhidha, “Auzopindi muno.” Zvakanyadaro Dhavhidha wakatora masvingo eZioni, zvino ndiro dhorobha raDhavhidha. Dhavhidha wakati, “Kunyazwi ndiani unotanga kurwisa vaJebhusi unozoita mutungamiriri nenduna huru yehondo.” NaJoabhi, mukororo waZeruia, wakakwira kutanga, ndizvo wakaita mutungamiriri. Dhavhidha wakagara mumarusvingo; ndizvo vakaridaidza kuti Dhorobha raDhavhidha. Wakaaka dhorobha kumarutii eshe, kubvira Miro nokuritendenedza; norupande rwakasara rwakanasiriswa ndiJoabhi. NaDhavhidha wakakura nokuangira kukura, ngokuti Mambo Mwari wehondo waiya naye. Zvino ava ndivo vakuru vengwazi dzehondo dzaiya naDhavhidha, avo vakamugwinyisa muumambo hwake, pamwepo nevaIsuraeri veshe, kuti vamuite mambo, kudai ngezvakaronza izwi raMambo Mwari ngendaa yaIsuraeri. Uhwu ndihwo uwandu hwevanhu ngwazi dzaiya naDhavhidha: Jashobheamu mukororo waHakhimoni, waiya mukuru wenduna nhatu; wakamirudza mukhondo wake kurwa nevanhu mazana matatu (300), avo vaakauraya panguva imwe. Waiteera sure kwake pakati penduna nhatu ndiEreaza, mukororo waDhodho, muAhohi. Waiya naDhavhidha muPhasidhamimu, apo vaFiristia pevakadziunganidza kurwa hondo. Paiya nemunda wakazara ngebhari. Zvino vanhu vaiya vatiza kubva kuvaFiristia, asi iye naDhavhidha vakaema pakati pomunda, vakaurwira, vakauraya vaFiristia; naMambo Mwari wakavaponesa ngokunyisa kukuru. Vatatu venduna huru dzehondo makumi matatu dzakadzaka kunaDhavhidha waiya pabuwe mubako reAdhuramu; naapo hondo yevaFiristia yaiya mubani reRefaimu. Dhavhidha waiya mumasvingo, nehondo yevaFiristia yaiya muBhetherehema. Dhavhidha wakati ngokudisisa kukuru, “A, kudai umwe angandipawo mvura yokumwa kubva muchinyuka cheBhetherehema, chiri pasinde pemusiwo!” Zvino vatatu vakahamba ngomukati mwehondo yavaFiristia, vakachera mvura kubva muchinyuka chaBhetherehema, chiri pamusiwo, navo vakaiunza kunaDhavhidha. Asi Dhavhidha aazi kuimwa, wakaidururira kunaMambo Mwari, wakati, “Mwari wangu asazotenda kuti ndiite ichi chiro. Ndingamwa here ngazi yaava vanhu? Ngokuti ngokudzipira kupona kwavo mungozi vaiunza.” Ndizvo aazi kuimwa. Ngwazi huru nhatu dzakaita izvi zviro. Abhishai hama yaJoabhi, ndiye waiya mukuru pakati peava makumi matatu. Ngomukhondo wake wakarwa nemazana matatu (300) evanhu, akavauraya, zina rake rakaita mbiri pakati pevatatu. Ndiye wakapinda kuremeredzwa pamakumi matatu, naye wakaita nduna yavo; asi aazi kutongohanira kunevatatu vokutanga. Bhenaia mukororo waJehoiadha mukororo womunhu waiya ngwazi weKabhizeeri, muiti wezviito zvikuru, wakauraya vakororo vairi vaArieri weMoabhi. Wakadzakawo akauraya mhondoro yaiya muhunza ngezuva rakawa chando chakaita makohoto. Naye wakauraya muEgipite, munhu waiya gakanyara, waipinda mamitha mairi kureba. Munyara yomuEgipite mwaiya nomukhondo wakadai ngomuti womuruki; asi Bhenaia wakadzaka kwaari anendonga, wakabvuka mukhondo waiya munyara yomuEgipite, wakamubaya ngomukhondo wake. Ndizvo zviro zvakaitwa ndiBhenaia mukororo waJehoiadha, wakaane zina rake rakaita mbiri pakati pengwazi huru nhatu. Wakapinda kuremeredzeka pakati pengwazi makumi matatu, asi aazi kuhanira kunenhatu dzokutanga. NaDhavhidha wakamuemesa kuita nduna padera pevangwariri vake. Ngwazi dzehondo dzaiya Asaheri munun'una waJoabhi, Erihanani mukororo waDhodho weBhetherehema, Shamothi muHarodhi, Herezi muPheroni, Ira mukororo waIkeshi muThekoa, Abhieza muAnathothi, Sibhekhai muHushathi, Irai muAhohi, Maharai muNetofa, Heredhi mukororo waBhaana muNetofa, Ithai mukororo waRibhai weGibhea, iro rakaemera kuvakororo vaBhenjamini, Bhenaia muPhirathoni, Hurai wemikova yeGaashi, Abhieri muAribathi, Azimavhethi muBhaharumu, Eriabha muShaaribhoni, vakororo vaHashemu muGizoni, Jonathani mukororo waShagee muHarari, Ahiamu mukororo waSakha muHarari, Erifari mukororo waUri, Heferi muMekherathi, Ahija muPheroni, Hezro muKharmeri, Naarai mukororo waEzibhai, Joeri hama yaNathani, Mibha mukororo waHagiri, Zereki muAmoni, Naharai muBheerothi, mutwari wezvokurwa zvaJoabhi mukororo waZeruia, Ira muIthira, Garebhi muIthira, Uria muHiti, Zabhadhi mukororo waAhirai, Adhina mukororo waShiza muRubheni, nduna yevaRubheni, vaiya naye makumi matatu, Hanani mukororo waMaakha, naJoshafati mukororo waMithini, Uzia muAshiterathi, Shama naJeieri vakororo vaHothamu muAroeri, Jedhiaeri mukororo waShimuri nehama yake Joha muTizi, Erieri muMahavhi, naJeribhai naJoshavhia vakororo vaErinaamu, naIthima muJoabhi, Erieri, naObhedhi, naJaasieri muMezobha. Ava ndivo vakauya kunaDhavhidha muZikiragi, achadzihwarisa ngendaa yaSauri, mukororo waKishi; vaiya pakati pengwazi, vadetseri vake muhondo. Vaiya vafuri vouta, vaikona kufura ngemisee nokufura ngechimvii ngenyara yokumudyo nokuti yokumuoshwe; vaiya vaBhenjamini, hama dzaSauri. Mukuru wavo ndiAhieza echiteerwa ndiJoashi, veshe vakororo vaShemaa muGibhea; naJezieri, naPhereti, vakororo vaAzimavhethi; Bherakha, Jehu muAnathothi, Ishimaia muGibheoni, ngwazi pakati pemakumi matatu nomutungamiriri padera pemakumi matatu; Jeremia, Jahazieri, Johanani, Jozabhadhi, muGedhera, Eruzai, Jerimothi, Bhearia, Shemaria, Shefatia muHarufi, Erikana, Ishia, Azareri, Joeza naJashobheamu, vaKhora; Joera naZebhadhia, vakororo vaJerohamu weGedhori. Kubva kunaGadhi vakadzipaura kuti vaende kunaDhavhidha murusvingo ruri mushango, vamuna vari ngwazi vanesimba, vanhu vehondo vanokona kurwa, vaikona kubata zvihlangu nemikhondo, nehope dzavo dzaiya dzakadai ngedzemhondoro, vaikasira kurumba kudai ngemhara mumitunhu: Eza nduna yokutanga, Obhadhia wechipiri, Eriabhi wechitatu, Mishimana wechirongomuna, Jeremia wechishanu, Atai wechitanhatu, Erieri wechinomwe, Johanani wechisere, Erizabhadhi wechipfumbamwe, Jeremia wechigumi, naMakhibhanai wegumi naumwe. Ava vaGadhi vaiya nduna dzehondo; vadoko vavo vaiya padera pezana, nomukuru wavo waiya padera pegumi remazana. Ava ndivo vanhu vakaambuka Jorodhani ngomwedzi wokutanga, apo wakazara kuti penu nokubanze; navo vakadzinga veshe vaigara mumabani, ngokumabvazuva nokumabirirazuva. Vamweni vana vaBhenjamini nevaJudha vakauya kumarusvingo kwaiya naDhavhidha. Dhavhidha wakabuda kooshongana navo, akati kwevari, “Kudai mwauya ngokunyarara kwendiri kundidetsera, zvino mwoyo wangu unozosungwa pamwepo nowenyu; asi kudai mwauya koondipira kumagaa angu, kunyazwi apana chakashata munyara dzangu, zvino Mwari wemadzibaba edu ngaazvione, atonge.” Naapo mweya wakauya kunaAmasai, mukuru wenduna makumi matatu, naye wakati, “Tiri vako, iwewe Dhavhidha; tiri vorutii rwako, iwewe mukororo waJesi! Kunyarara, kunyarara ngakugare kwouri; nokunyararawo kunavadetseri vako! Ngokuti Mwari wako ndiye unokudetsera.” Naapo Dhavhidha wakavaashira, akavaita nduna dzezvikwata zvake. Vamwe vokwaManase vakatizira kunaDhavhidha, apo paakauya nevaFiristia koorwa naSauri. (Asi aazi kuvadetsera ngokuti vatongi vevaFiristia vakapangana, vakamupetudza vechiti, “Unotizira kunamambo wake Sauri, kwetiri inozoita ngozi padera pemasoro edu.”) Naapo echienda Zikiragi, vakatiza, vakauya kwaari vaibva kwaManase: Adhina, Jozabhadhi, Jedhiaeri, Mikhaeri, Jozabhadhi, Erihu naZirethai, nduna huru dzemakumi emazana dzaibva mwaManase. Vakadetsera Dhavhidha kurwa nezvikwata zvemagororo, ngokuti veshe vaiya ngwazi nenduna dzehondo. Vaiuya zuva ngezuva kunaDhavhidha kumudetsera, metsa kwakaita hondo huru, kudai ngehondo yaMwari. Uku ndikwo kuwanda kwezvikwata zvevarwi vanezvokurwa, vakauya kunaDhavhidha Hebroni, kookunukudza umambo hwaSauri kwaari, kudai ngezverakaronza izwi raMambo Mwari. Vanhu vaJudha vakatwara zvihlangu nemikhondo zvokurwa ndizvo vaiya makumi emazana matanhatu nemazana masere (6,800). Vanhu vaSimeoni, varwi vanesimba ngwazi dzokurwa, makumi emazana manomwe nezana rimwe (7,100). Vanhu vaRevhi makumi emazana marongomuna nemazana matanhatu (4,600). Jehoiadha mutungamiriri wemhatso yaAroni, waiya nemakumi emazana matatu nemazana manomwe (3,700). Zadhoki, jaha ngwazi yehondo, nenduna makumi mairi navairi vemhatso yemadzibaba ake. Vanhu vaBhenjamini, hama dzaSauri, makumi emazana matatu (3,000); vazhinji vavo ngouwo mukuwo vakaangira kuramba vakabatirira kumhatso yaSauri. Vanhu vaEfuremu makumi emazana makumi mairi nemazana masere (20,800), vaiya vamuna ngwazi dzehondo, dzinembiri mukati mwemhatso dzemadzibaba avo. Vanhu vorupande rwedzinza raManase makumi emazana gumi namasere (18,000), avo vakadaidzwa ngemazina avo kuti vauye kooemesa Dhavhidha kuti aite mambo. Vanhu vaIsakha, avo vamuna vanokuzwisisa ngenguva, kuzia zvinosisira kuti vaIsuraeri vaite; vakuru vavo vaiya mazana mairi (200), nehama dzavo dzeshe dzaiita kudai ngokupanga kwavo. Vanhu vaZebhuruni avo vanokona kurwa, vanazvo zveshe zvokurwa ndizvo, makumi emazana makumi mashanu (50,000), vaikona kudetsera Dhavhidha ngomwoyo umwe. Vanhu vaNafitari nduna dziri gumi remazana (1,000), avo vaiya nemakumi emazana makumi matatu nevanomwe (37,000), varwi vaiya nezvihlangu nemikhondo. Vanhu vaDhani makumi emazana makumi mairi namasere nemazana matanhatu (28,600) vakanasirirwa hondo. Vanhu vaAsha makumi emazana makumi marongomuna (40,000) vakanasirirwa kuenda koorwa hondo. Vanhu vaRubheni, nevaGadhi, nevorupande rwedzinza raManase, kubva ruseri rweJorodhani, makumi emazana zana nemakumi mairi (120,000), vanazvo zveshe zvokurwa hondo ndizvo. Veshe ava vanhu ngwazi, dzakadzironga ngenjira yokurwa hondo, vakauya nomwoyo wakaperera Hebroni, kuti vaemese Dhavhidha kuita mambo padera paIsuraeri peshe; nevamweni veshe vaIsuraeri vaiya nomwoyo umwewo wokuemesa Dhavhidha kuti aite mambo. Vaiyapo naDhavhidha mazuva matatu vechidya nokumwa, ngokuti hama dzavo dzaiya dzakavanasirira. Naavowo vaigara pasinde pavo kubvira Isakha, Zebhuruni, Nafitari, vakauya vechiunza zvokudya, padera pembongoro, makamera, manyurusi, kabi, zvokudya zvakawanda, zvoufu, makhekhe emaonde, zvikore zvemavhini, vhini, mafuta, kabi, nemakwai, ngokuti kwaiyapo kudakara muIsuraeri. Dhavhidha wakapangana nenduna dzegumi remazana nedzemazana nevatungamiriri veshe. Dhavhidha wakati kumbungano yeshe yaIsuraeri, “Kudai kwechioneka kwakanaka kwomuri, nokuti kudai kuri kuda kwaMambo Mwari, Mwari wedu, ngatitumire kunehama dzedu dziri kundau dzeshe, dzakasara munyika yaIsuraeri, pamwepo nevapristi nevaRevhi, vari mumadhorobha awo anenyika yemafuro, kuti vauye vabatane pamwepo nesu. Zvino ngatiunze bhokisi rechitenderano chaMwari wedu kwetiri; ngokuti atizi kupinimidza ngekweriri ngamazuva aSauri.” Mbungano yeshe yakatenda kuchiita, ngokuti chaiya chiro chakanaka mukuona kwavanhu veshe. Ndizvo Dhavhidha wakaunganidza vaIsuraeri veshe pamwepo kubvira Shihori reEgipite metsa kuguma Rebhohamathi, koounza bhokisi rechitenderano chaMwari kubva Kiriathijearimu. NaDhavhidha navo veshe vaIsuraeri vakakwira kuenda Bhaara, ndikwo kuti Kiriathijearimu raJudha, kuti vaunze kubvapo bhokisi rechitenderano chaMwari, Mambo Mwari, uwo unogara pakati pemakherubhi, rinodaidzwa ngezina rake. Vakatwara bhokisi rechitenderano chaMwari mungoro itsva kubva mumhatso yaAbhinadhabhi; naUza naAhio ndivo vakahambisa ngoro. Dhavhidha nevaIsuraeri veshe vakazvina pamberi paMambo Mwari ngesimba ravo reshe, ngokuemba nokuridza zvidangari, magitari, mbira, ngoma dzesimbi nemagwama. Naapo vaguma kumbuwa yokupurira yeKhidhoni, Uza wakatambanudza nyara yake kubata bhokisi rechitenderano, ngokuti raizunguzwa ngekabi. Noushungu hwaMambo Mwari hwakabaka kunaUza; wakamuchaira pashi ngokuti wakatambanudza nyara yake kubata bhokisi rechitenderano; naye wakafapo pamberi paMambo Mwari. NaDhavhidha wakashishwa ngokuti Mambo Mwari waiya ahonokera Uza; ndizvo ndau iyo inodaidzwa kuti Pherezuza metsa nanyamashi. Dhavhidha wakatya Mambo Mwari ngeiro zuva echiti, “Ndinozoita maunzirenyi bhokisi rechitenderano chaMwari kanyi kwendiri?” Ndizvo Dhavhidha aazi kuunza bhokisi rechitenderano kwaari mudhorobha raDhavhidha, asi wakapauka kuriisa mumhatso yaObhedhedhomu muGithi. Bhokisi rechitenderano chaMwari rakagara mwedzi mitatu mumhatso yaObhedhedhomu naMambo Mwari wakafumisa mhatso yaObhedhedhomu nazvo zveshe zvaaiya nazvo. Hiramu mambo weThire akatuma nhumwa kunaDhavhidha, nematanda emisedhari, navaaki nevatsetsi, kuti vamuakire mhatso. NaDhavhidha aona kuti Mambo Mwari wakamugwinyisa kuita mambo padera paIsuraeri, nokuti umambo hwake hwakakuriswa, ngendaa yevanhu vake Isuraeri. Dhavhidha wakadzitorera vakadzi vamwenizve ari muJerusarema, naDhavhidha wakabara vakororo nevanasikana vamweni. Aya ndiwo mazina evana vake vaaiya navo muJerusarema: Shamua, Shobhabhi, Nathani, Soromoni, Ibha, Erishua, Eriphereti, Noga, Nefegi, Jafia, Erishama, Bheeriadha naErifereti. Naapo vaFiristia vazwa kuti Dhavhidha wadzodzwa kuita mambo padera paIsuraeri yeshe, vaFiristia veshe vakakwira kootsvaka Dhavhidha; naDhavhidha wakazvizwa, wakabuda koorwa navo. Zvino vaFiristia vakauya, vakarwisa muBani reRefaimu. Dhavhidha wakabvunza kunaMwari echiti, “Ndikwire koorwa nevaFiristia here? Unozovapira munyara dzangu here?” Mambo Mwari wakati kwaari, “Kwira, neni ndinozovapira munyara dzako.” Ndizvo vakakwira kuguma Bhaaripherazimu, naDhavhidha wakavanyisapo. Dhavhidha wakati, “Ushungu hwaMwari hwakaputikira magaa angu, ngenyara yangu, kudai ngokuphumura kwemvura.” Ndizvo vakadudza zina rendau iyo kuti Bhaaripherazimu. Vakasiya zvimwari zvavopo, Dhavhidha wakapanga, vakazvipisha ngomuriro. Kamwezve, vaFiristia vakarwisa mubani. Naapo Dhavhidha abvunzazve kunaMwari, Mwari wakati kwaari, “Usakwireyo kuvateera; tenderera ngokurutii, uwire padera pavo uri ngepasinde pemiti yemibharisamu. Naapo woozwa bope rokufora padera pemiti yemibharisamu, zvino buda kuenda koorwa; ngokuti Mwari wabudira pamberi pako kuti auraye hondo yevaFiristia.” Dhavhidha wakaita kudai ngezvaakapangwa ndiMwari, navo vakauraya hondo yevaFiristia kubvira ngeGibheoni metsa kuguma Geza. Nembiri yaDhavhidha yakazwika kunyika dzeshe, naMambo Mwari wakaunza nheruso yake padera penyika dzeshe. Dhavhidha wakadziakira mhatso mudhorobha raDhavhidha, akanasira ndau yebhokisi rechitenderano chaMwari, akariemesera tende. Zvino Dhavhidha wakati, “Akuna naumwe asi vaRevhi ndivo vanosisira kutwara bhokisi rechitenderano chaMwari ngokuti ndivo vaakatsanangura Mambo Mwari kuti vatware bhokisi rechitenderano chaMambo Mwari, nokumushandira mhera nariini.” Dhavhidha wakaunganidza pamwepo vaIsuraeri veshe muJerusarema, kuti vakwidze bhokisi rechitenderano chaMambo Mwari kundau yaro, yaakarinasirira. Zvino Dhavhidha wakaunganidza mibarirwana yaAroni nevaRevhi: Pavakororo vaKohathi, Urieri mukuru, nehama dzake zana nemakumi mairi (120). Pavakororo vaMerari, Asaia mukuru, nehama dzake mazana mairi nemakumi mairi (220). Pavakororo vaGershoni, Joeri mukuru, nehama dzake zana nemakumi matatu (130). Pavakororo vaErizafani, Shemaia mukuru, nehama dzake mazana mairi (200). Pavakororo vaHebroni, Erieri mukuru, nehama dzake makumi masere (80). Pavakororo vaUzieri, Aminadhabhi mukuru, nehama dzake zana negumi nevairi (112). Dhavhidha wakadaidza Zadhoki naAbhiatha vapristi, nevaRevhi, Urieri, Asaia, Joeri, Shemaia, Erieri naAminadhabhi. Wakati kwevari, “Imwimwi muri vakuru vemhatso dzemadzibaba evaRevhi; dzichenesenyi imwimwi nehama dzenyu, kuti mukwidze bhokisi rechitenderano chaMambo Mwari, Mwari waIsuraeri, kundau yaro yendakarinasirira. Ngokuti amuzi kuritwara pakutanga, Mambo Mwari, Mwari wedu wakatihonokera, ngokuti atizi kuringwarira kudai ngezvakaemeswa.” Ndizvo vapristi nevaRevhi vakadzichenesa pachavo kuti vakwidze bhokisi rechitenderano chaMambo Mwari, Mwari waIsuraeri. NevaRevhi vakatwara bhokisi rechitenderano chaMwari pamapfudzi avo ngemipingo, kudai ngezvaakapanga Mosi ngeizwi raMambo Mwari. Dhavhidha wakapangawo vakuru vevaRevhi kuti vaemese hama dzavo kuita vaembi kuridza mbeu dzeshe dzezviro zvokuemba ndizvo, magitari, zvidangari, nengoma dzesimbi, varidze vechidaidzira, vechimirudza mazwi ngokudakara. Ndizvo vaRevhi vakaemesa Hemani mukororo waJoeri; nevehama dzake, Asafi, mukororo waBerekhia; nevakororo vaMerari, hama dzavo, Ethani, mukororo waKushaia; pamwepo navo hama dzavo dzechikwata chechipiri, Zekharia, Jaazieri, Shemiramothi, Jehieri, Uni, Eriabhi, Bhenaia, Maaseia, Matithia, Eriferehu naMikineia, nevangwariri vemisiwo Obhedhedhomu naJeieri. Vaembi Hemani, Asafi naEthani vakaemeswa kuti varidze ngoma dzethusi; Zekharia, Azieri, Shemiramothi, Jehieri, Uni, Eriabhi, Maaseia naBhenaia vairidza katare kudai ngechigure chevasikana; Mathitia, Eriferehu, Mikineia, Obhedhedhomu, Jeieri naAzazia, vairidza zvidangari kudai ngemaembera evamuna. Khenania, mukuru wevaRevhi mukuemba, wakaemeswa kuita muembesi wokuemba, ngokuti waizia kuemba. Bherekhia naErikana vaiya vangwariri vemisiwo yebhokisi rechitenderano. Shebhania, Joshafati, Nethaneri, Amasai, Zekharia, Bhenaia naErieza vapristi vairidza magwama pamberi pebhokisi rechitenderano chaMwari. Obhedhedhomu naJehia vaizoitawo vangwariri vepamisiwo pebhokisi rechitenderano. Ndizvo Dhavhidha nevakuru vaIsuraeri, nenduna dzemakumi emazana, vakaenda kookwidza bhokisi rechitenderano chaMambo Mwari kubva kumhatso yaObhedhedhomu ngokudakara. Ngokuti Mwari wakadetsera vaRevhi vaitwara bhokisi rechitenderano chaMambo Mwari, vakapira kuita midiro mikono minomwe nemagondohwe manomwe. Dhavhidha waiya akapfekeswa bhachi rorukangaza rakanaka, kudaiwo ngevaRevhi veshe vaitwara bhokisi rechitenderano nevaembi, naKhenania mukuru wengoma dzevaembi; naDhavhidha wakapfeka efodhi rorukangaza rakanemeswa. Ndizvo vaIsuraeri veshe vakakwidza bhokisi rechitenderano chaMambo Mwari ngokudaidzira, nokuridzwa kwepayapaya, kwemagwama, kwengoma dzesimbi, nokuridzwa kwegitari, nokuridzwa kwezvidangari. Naapo bhokisi rechitenderano chaMambo Mwari rooguma mudhorobha raDhavhidha, Mikhari mwanasikana waSauri wakaringira ngepafasitera, wakaona mambo Dhavhidha echizvina nokutomuka; naye wakamushoora mumwoyo mwake. Vakaunza bhokisi rechitenderano chaMwari, vakarigadzika mukati mwetende, raakariakira Dhavhidha; vakapira midiro yokupisha nemidiro yokuiyanisa pamberi paMwari. Naapo Dhavhidha apedza kupira midiro yokupisha nemidiro yokuiyanisa, wakafumisa vanhu ngezina raMambo Mwari; naye wakakovera kumunhu weshe muIsuraeri, vamuna nevakadzi ngokuedzanisa kuneumwe ngaumwe, mumhu wechingwa, nhindi yakanaka yenyama, nekhekhe rinemavhini akaomeswa. Wakaemesa vamweni vevaRevhi kuti vashande pamberi pebhokisi rechitenderano chaMambo Mwari, kuti vakumbire vechidaidzira, kubonga nokukudza Mambo Mwari, Mwari waIsuraeri. Asafi waiya mukuru, nedeedzeri rake ndiZekharia, Jeieri, Shemiramothi, Jehieri, Matithia, Eriabhi, Bhenaia, Obhedhedhomu naJeieri, vairidza magitari nezvidangari; Asafi wairidza ngoma yesimbi; Bhenaia naJahazieri vapristi vairidza magwama pamberi pebhokisi rechitenderano chaMwari nguva dzeshe. Zvino ngeiro zuva Dhavhidha wakaemesa kutanga Asafi nehama dzake kuembwa kwokukudza Mambo Mwari Asafi nehama dzake. Bongai Mambo Mwari, daidzai zina rake, ziisai zviito zvake pakati pevanhu. Embai kwaari, muembe nduyo dzokukudza kwaari, ronzai ngemishando yake yeshe inoshamisa. Dakarai imwimwi ngezina rake rakachena; ngaidakare mwoyo yaavo vanotsvaka Mambo Mwari. Tsvakai Mambo Mwari nesimba rake, mutsvake hope yake nguva dzeshe. Karakadzai ngemishando inoshamisa yaakaita, minana yake nokutonga kwomuromo wake, Imwimwi rudzi rwomuranda wake Isuraeri, imwimwi vana vaJakobe, vakatsanangurwa vake. Ndiye Mambo Mwari, Mwari wedu; kutonga kwake kuri munyika yeshe. Karakadzai ngechitenderano chake mhera nariini; izwi raakapanga kumibarirwana iri gumi remazana, chitenderano icho chaakaita naAbrahama, nemhiko yechitenderano chaakagondisa kunaIsaka, chaakagwinyisa kunaJakobe kuita chironzo, kunaIsuraeri kuita chitenderano chemhera nariini, echiti, “Kwouri ndinozopa nyika yeKhenani, iri chikoaniswa chenhaka yenyu.” Naapo vaiya vashomani, eya vashomanani vasikaerengwi mukati mwenyika nevapara munyika, vakapepesheka kubva kudzinza rimwe kuenda kudzinza rimweni, kubva kunamambo umwe kuenda kuvanhu vamweni. Aazi kutendera naumwe kuvaitira zvakashata; eya, wakakaraidza madzimambo ngendaa yavo, echiti, “Musagwama vakadzodzwa vangu, musaita zvakashata kuvaprofeti vangu.” Embai kunaMambo Mwari, imwimwi nyika yeshe. Chumairai ruponeso rwake zuva ngezuva. Teketesai mbiri yake pakati pemadzinza, mishando yake inoshamisa pakati pevanhu veshe. Ngokuti Mambo Mwari mukuru, naye unosisira kukudzwa kakurutu; ndiye unosisira kutyiwa padera pezvimwari zveshe. Ngokuti zvimwari zveshe zvevanhu miedzaniso, asi Mambo Mwari ndiye wakarura matenga. Uthende nokuremeredzwa zviri pamberi pake; simba nokudakara zviri pandau yake. Ipai kunaMambo Mwari, imwimwi mhuri dzeshe dzevanhu, ipai kunaMambo Mwari uthende nesimba. Ipai kunaMambo Mwari uthende hunosisira zina rake; unzai mudiro, muuye pamberi pake. Dirai Mambo Mwari muunaku hwokuchena kwake. Hutai pamberi pake, imwimwi nyika yeshe. Nyika yakanasa kugwinyiswa, aizotsukunuswi. Matenga ngaadakare, nenyika ngaidakare; vanhu ngavaronze pakati pemadzinza kuti, “Mambo Mwari ndiMambo!” Ruandhle ngaruungumire, nazvo zveshe zvirimwo; minda ngaikudze, nazvo zveshe zvirimwo. Zvino miti yegwasha inozoemba ngokudakara pamberi paMambo Mwari, ngokuti unouya kootonga nyika. Bongai Mambo Mwari, ngokuti wakanaka; ngokuti rudo rwake runogara mhera nariini. Ronzaiwo kuti, “Tiponese, iwewe Mwari woruponeso rwedu, utiunganidze pamwepo, utinunure kubva pakati pemadzinza, kuti tibonge zina rako rakachena, tidakare mukuirikidzwa kwako.” Ngaakudzwe Mambo Mwari, Mwari waIsuraeri, kubva kusingaperi kuenda kusingaperi. Zvino veshe vakati, “Ameni!” Navo vakakudza Mambo Mwari. Dhavhidha wakasiyapo Asafi nehama dzake pamberi pebhokisi rechitenderano chaMambo Mwari, kuti vashande pamberi pebhokisi rechitenderano nguva dzeshe, kudai ngezvinosisira mishando yezuva ngezuva, naObhedhedhomu nehama dzake, makumi matanhatu nemasere; naapo Obhedhedhomu mukororo waJedhuthuni naHosa vaizoita varindi vemisiwo. Naye wakasiya Zadhoki mupristi nehama dzake vapristi pamberi pethabhenakeri raMambo Mwari mundau yakakwirira yaiya muGibheoni, kuti vapire midiro yokupisha kunaMambo Mwari paarita remidiro yokupisha nguva dzeshe, mangwanani nemadeekoni, kudai ngeizvo zveshe zvakanyorwa mumipango yaMambo Mwari kudai ngezvaakapanga vaIsuraeri. Vaiya naye ndiHemani naJedhuthuni, nevamweni vakatsanangurwa avo vakadudzwa ngemazina kuti vabonge kunaMambo Mwari, ngokuti rudo rwake runogara mhera nariini. Hemani naJedhuthuni vaiya nemagwama nengoma dzesimbi dzevairidza, nezviro zvokuemba ndwiyo dzaMwari. Vakororo vaJedhuthuni vakaemeswa kurinda misiwo. Zvino veshe vanhu vakapararira munhu weshe kumhatso yake, naDhavhidha wakapetuka koofumisa mhatso yake. Zvino apo Dhavhidha agara mumhatso yake, Dhavhidha wakati kunomuprofeti Nathani, “Ringira, inini ndinogara mumhatso yemisedhari, asi bhokisi rechitenderano chaMambo Mwari rinogara pashi petende.” Nathani wakati kunaDhavhidha, “Ita zveshe zviri mumwoyo wako, ngokuti Mwari unewe.” Asi ngousiku uhwo izwi raMambo Mwari rakaguma kunaNathani rechiti, “Enda, wooronzera Dhavhidha muranda wangu kuti, ‘Unoronza izvi Mambo Mwari: Auzondiakiri mhatso yokuti ndigaremwo. Ngokuti andizi kutongogara mumhatso kubvira zuva rendakabudisa Isuraeri metsa nanyamashi; asi ndakagara mutende, nomuthabhenakeri.’ Kundau dzeshe dzendakahamba pakati pevaIsuraeri ndakamboereketa izwi here kuneumwe wevatongi vaIsuraeri, avo vendakapanga kuti vaushe vanhu vangu ndechiti, ‘Amuzi kundiakira mhatso yemisedhari ngenyi?’ ” Ndizvo zvino unozoronza kudai kunomuranda wangu Dhavhidha, “Mambo Mwari wehondo unoronza izvi: Ndakakutora kubva kumbusho dzemakwai, kubva kooteera makwai, kuti uite mutongi padera pevanhu vangu Isuraeri; neni ndaiya ndinewe peshe pewakahamba, ndikauraya magaa ako eshe kubva pamberi pako; neni ndinozokuitira zina guru kudai ngezina revakakura vari munyika. Ndinozoemesa ndau yevanhu vangu Isuraeri, ndinozovasima, kuti vagare mundau yavo, avachazotsukunuswizve; vaiti vezvakashata avachazovaparadzi, kudai ngokutanga, kubvira panguva yendakaemesa vatongi padera pevanhu vangu Isuraeri; neni ndinozonyisa magaa ako eshe. “Zve, ndinoronzera kwouri kuti Mambo Mwari unozokuakira mhatso. Naapo mazuva ako akwana kuti uende kunemadzibaba ako, ndinozomirudza mibarirwana yako inoteera sure kwako, umwe wevakororo vako, neni ndinozogwinyisa umambo hwake. Unozondiakira mhatso, neni ndinozogwinyisa dendemaro rake mhera nariini. Ndinozoita baba kwaari, naye unozoita mukororo kwendiri. Andizodusi rudo rwangu kubva kwaari, kudai ngezvendakarudusa kuneuwo waiya pamberi pako, asi ndinozomugwinyisa mumhatso yangu nomuumambo hwangu mhera nariini, nedendemaro rake rinozogwinyiswa mhera nariini.” Kudai ngemazwi eshe aya, nechioniso ichi, ndicho Nathani wakaereketa kunaDhavhidha. Zvino mambo Dhavhidha wakapinda, akagara pamberi paMambo Mwari, akati, “Ndiri anani inini, A Mambo Mwari, Mwari, mhatso yangu chiinyi kuti undigumise kwakadai? Kunyazwi neichi chaiya chiro chidoko mukuona kwako, A Mwari; ngokuti waereketawo ngendaa yemhatso yomuranda wako ngomukuwo wakareba uchauya. Newe wandierenga kudai ngomunhu unoremeredzeka, A Mambo Mwari, Mwari. NaDhavhidha ungachaereketenyi kwouri kuti muranda wako aremeredzwe? Ngokuti iwewe unozia muranda wako. Ngendaa yomuranda wako, A Mambo Mwari, nokudai ngendaa yomwoyo wako, wakaita izvi zveshe zviito zvakakura, kuita kuti izvi zviro zveshe zvikuru zviziikanwe. Akuna naumwe wakadai ndiwe, Mambo Mwari, akunazve Mwari umweni ngepabanze pako, kudai ndizvo zveshe zvetakazwa ngenzee dzedu. Ngeriri dzinza rimweni munyika rinotodzana nevanhu vako Isuraeri, dzinza rimwe munyika iro Mwari raakaenda koosunhura kuti vaite vanhu vake, kuti udziitire zina pachako ngezviro zvikuru nezvinotyisa, ngokudzinga madzinza kubva pamberi pevanhu vako, avo vewakasunhura kubva Egipite? Newe wakaita vanhu vako Isuraeri kuti vaite vako mhera nariini; newe, Mambo Mwari, ukaita Mwari wavo. “Zvino, Mambo Mwari, kudai ngeizwi rowakaereketa ngendaa yomuranda wako, nendaa yemhatso yake, ngazvigwinyiswe mhera nariini, uite kudai ngokugondisa kwako. Ndizvo zvino zina rako rinozogwinyiswa nokukudzwa mhera nariini, wechiti, ‘Mambo Mwari wehondo, Mwari waIsuraeri, ndiMwari waIsuraeri, nemhatso yomuranda wako Dhavhidha inozogwinyiswa pamberi pako.’ Ngokuti iwewe, Mwari wangu, wakaonisa kumuranda wako kuti unozomuakira mhatso; ndizvo muranda wako wakatsunga kukumbira pamberi pako. Zvino, Mambo Mwari, iwewe uri Mwari, newe wakagondisa ichi chiro chakanaka kunomuranda wako; ndizvo ngachikudakadze kuti iwewe ufumise mhatso yomuranda wako, kuti iangire kugara pamberi pako mhera nariini. Ngokuti iwewe, Mambo Mwari, chounofumisa, chinofumiswa mhera nariini.” Ngesure kweizvi Dhavhidha wakarwisa vaFiristia, naye akavanyisa; wakatora Gathi nemaguta aro kubva munyara dzevaFiristia. Wakanyisa vaMoabhi; nevaMoabhi vakaita varanda vaDhavhidha, vakamubhadhara muthero. Dhavhidha wakanyisa Hadhadheza mambo waZobha metsa kuguma Hamathi, apo paaienda koogwinyisa umambo hwake kurwizi Yufratesi. Dhavhidha wakatora kubva kwaari ngoro mazana gumi (1,000), nemakumi emazana manomwe (7,000) evagadhi vemahachi, nevanohamba ngetsoka vari makumi emazana makumi mairi (20,000). Dhavhidha wakagura mirunda yemahachi eshe engoro, asi wakangwarira anokwana ngoro zana (100). Naapo vaAramu veDhamasekusi vakauya koodetsera Hadhadheza mambo waZobha, Dhavhidha wakauraya vaAramu makumi mairi namairi emakumi emazana (22,000). Zvino Dhavhidha wakaisa zvikwata zvevarwi vehondo muAramu reDhamasekusi; nevaAramu vakaita varanda vaDhavhidha, vakabhadhara muthero. Mambo Mwari wakaita kuti Dhavhidha anyise kweshe kwaakaenda. Dhavhidha wakatora zvihlangu zvomukore zvaitwarwa ngevaranda vaHadhadheza, akazviunza Jerusarema. Kubva Tibhathi nokubva Khuni, madhorobha aHadhadheza, Dhavhidha wakatora thusi rakawanda, raakanasirira ndiro Soromoni bhavhu rethusi, sika nezvidziyo zvethusi. Naapo Thou mambo weHamathi azwa kuti Dhavhidha waiya anyisa yeshe hondo yaHadhadheza mambo weZobha, wakatumira Hadhoramu mukororo wake kunamambo Dhavhidha, koomuchingamidza nokumukorokotedza, ngendaa yokuti wakarwa naHadhadheza, akamunyisa. Zvino Hadhadheza wairwa hondo naThou. Wakatumira zvidziyo zvembeu dzeshe zvomukore, zvesirivha nezvethusi. Izviwo Dhavhidha mambo wakapira kunaMambo Mwari, pamwepo sirivha nomukore zvaakaunza kubva kumadzinza aya eshe kubva Edhomu, kubva Moabhi, kubva kuvana vaAmoni, kubva kuvaFiristia nokubva kuvaAmareki. Abhishai mukororo waZeruia wakauraya gumi nemasere emakumi emazana (18,000) vevaEdhomu mubani romunyu. Wakaisa zvikwata zvevarwi vehondo muEdhomu, nevaEdhomu veshe vakaita varanda vaDhavhidha. NaMambo Mwari wakaita kuti Dhavhidha anyise kweshe kwaakaenda. Ndizvo Dhavhidha wakatonga padera pevaIsuraeri veshe, naye wakatonga zvakanaka nokururama kuvanhu vake veshe. Joabhi mukororo waZeruia ndiye waiya padera pehondo; Jehoshafati mukororo waAhirudhi waiya munyori; Zadhoki mukororo waAhithubhi, naAhimerekhi mukororo waAbhiatha, vaiya vapristi; Shavisha waiya munyori; Bhenaia mukororo waJehoiadha waiya padera pevaKherethi nepadera pevaPherethi, nevakororo vaDhavhidha vaiya vakuru mumushando wamambo. Zvino ngesure kweizvi Nahashi mambo wevaAmoni wakafa, nomukororo wake akatonga pandau yake. Dhavhidha wakati, “Ndinozoita nyasha kunaHanuni mukororo waNahashi, ngokuti baba ake vakaita nyasha kwendiri.” Ndizvo Dhavhidha wakatuma varanda koomuembedzera ngendaa yababa ake. Naapo varanda vaDhavhidha pevakaguma munyika yevana vaAmoni kunaHanuni koomuembedzera, vakuru vevana vaAmoni vakati kunaHanuni, “Unopinimidza kuti Dhavhidha unoremeredza baba ako, ngokutumira vaembedzeri kwouri here? Varanda vake avazi kuuya kuti vatsvakisise nyika, kuiparadza nokuidongorera here?” Ndizvo Hanuni wakatora varanda vaDhavhidha, akavapara, akacheka zvokupfeka zvavo ngepakati kuguma pasinde pemagaro avo, akavaendesa; navo vakaenda. Naapo Dhavhidha aronzerwa ngendaa yevamuna, wakatuma nhumwa kwevari, kooshongana navo; ngokuti vamuna vakatsveruka kakurutu. Namambo wakati, “Garai muJerikho metsa ndebvu dzenyu dzamera, naapo munozopetuka.” Naapo vaAmoni vaona kuti vakadziita chinuhwo kunaDhavhidha, Hanuni navana vaAmoni vakatumira matarenta esirivha gumi remazana (1,000), kuti vabhadharire ngoro nevagadhi vemahachi kubva Mesopotamia, Aramaakha naZobha. Vakabhadhara ngoro makumi matatu namairi emakumi emazana (32,000), namambo weMaakha nevanhu vake vehondo; vakauya, vakaemesa matende avo pamberi paMedhebha. NevaAmoni vakadziunganidza pamwepo kubva kumadhorobha avo, vakauya koorwa. Naapo Dhavhidha azwa ndizvo, wakatuma Joabhi nehondo yeshe yengwazi dzinoshinga. NevaAmoni vakabuda, vakaronga hondo yavo pamberi pamusiwo wedhorobha; nemadzimambo aiya auya aiya ari pachavo ega mushango. Naapo Joabhi aona kuti hondo yaiya yarongwa mberi kwake nesure kwake, wakatsanangura avo vakatsanangurwa vaIsuraeri, akavaronga kuti varwe nevaAramu. Vakasara vehondo yake wakavapa munyara dzaAbhishai hama yake, navo vakarongwa kurwa nevana vaAmoni. Wakati, “Kudai vaAramu vechizondikurira, zvino iwewe unozondidetsera; asi kudai vakororo vaAmoni vechizokukurira, neni ndinozokudetsera. Shingai, ngatiite vakagwinya ngendaa yevanhu vedu, nendaa yemadhorobha aMwari wedu; naMambo Mwari ngaaite icho chakanaka mukuona kwake.” Ndizvo Joabhi nehondo yaiya naye vakakwedzera pasinde pevaAramu kuti varwe hondo; navo vakatiza kubva pamberi pake. Naapo vaAmoni vaona kuti vaAramu vatiza, navo vakatizawo kubva pamberi paAbhishai hama yake, vakapotera mudhorobha. Naapo Joabhi wakauya Jerusarema. Asi apo vaAramu vaona kuti vanyiswa ngevaIsuraeri, vakatuma nhumwa, vakaunza vaAramu vaiya ruseri rwerwizi Yufratesi; naShofakhi, nduna yehondo yaHadhadheza, wakavatungamirira. Naapo Dhavhidha aronzerwa, wakaunganidza vaIsuraeri veshe pamwepo, akaambuka Jorodhani, akaguma kwevari, akaronga hondo yake kurwa navo. Naapo Dhavhidha aronga hondo yake kurwa nevaAramu, vakarwa naye. VaAramu vakatiza kubva pamberi pevaIsuraeri; Dhavhidha wakauraya vaAramu vamuna makumi emazana manomwe (7,000) vaihamba ngengoro nemakumi marongomuna emakumi emazana (40,000) vaihamba ngetsoka, wakaurayawo Shofakhi nduna yehondo yavo. Naapo varanda vaHadhadheza vaona kuti vanyiswa ngevaIsuraeri, vakaiyaniswa naDhavhidha, vakaita varanda vake. Ndizvo vaAramu vaiya vasikachadi kuchadetsera vana vaAmoni nakamwe. Muchirimo chegore, panguva yokubuda kwamadzimambo kuenda koorwa hondo, Joabhi wakatungamirira hondo yengwazi, akaparadza nyika yevanhu vaAmoni, akauya akakomba Rabha. Asi Dhavhidha wakasara, akagara muJerusarema. NaJoabhi wakarwisa Rabha, akariparadza. NaDhavhidha wakatora dzungudza raMirikhomu kubva pasoro rake; wakaona kuti rinouremu hwemakhirogramu makumi matatu omukore, naro raiya nebuwe rinomutengo mukuru mukati mwaro; naro rakaiswa musoro raDhavhidha. Wakaunzawo zvakachakatwa zvizhinji kubva mudhorobha. Wakaunza vanhu vaiya mukati mwaro, wakavaemesa kuti vashande ngemasaho, piki dzesimbi, namasanho. Ndizvo Dhavhidha wakaita kudaro kumadhorobha eshe evana vaAmoni. Zvino Dhavhidha wakahwirira nevanhu veshe Jerusarema. Ngesure kweizvi kwakabuda kurwa nevaFiristia paGeza; ngouwo mukuwo Sibhekhai muHushathi wakauraya Siphai, uwo waiya umwe wemibarirwana yemagakanyara; nevaFiristia vakanyiswa. Vakarwazve hondo nevaFiristia; naErihanani mukororo waJairi wakauraya Rami hama yaGoriathi muGithi, uwo chibato chomukhondo wake chaiya chakadai ngomuti womuruki. Vakarwazve hondo muGathi, apo paiya nomunhu waiya gakanyara, uwo waiya nezvinwe zvitanhatu panyara imwe ngaimwe, nemakunwe matanhatu patsoka imwe ngaimwe, zveshe pamwepo zvaiya makumi mairi nezvirongomuna; nayewo waiya mubarirwana wemagakanyara. Naapo paaishoora vaIsuraeri, Jonathani mukororo waShimea hama yaDhavhidha yakamuuraya. Ava vaiya mibarirwana yemagakanyara muGathi; navo vakaurawa ngenyara yaDhavhidha nenyara yevaranda vake. Sathani wakamukira Isuraeri, akamusa Dhavhidha kuti aerenge vanhu vaIsuraeri. Ndizvo Dhavhidha wakati kunaJoabhi nokunduna dzehondo, “Endai mwooerenga vaIsuraeri, mubvire ngeBheerishebha metsa mugume Dhani; muunze mushumo kwendiri kuti ndizie uwandu hwavo.” Asi Joabhi wakapingura, akati, “Mambo Mwari ngaawandise uwandu hwevanhu vake ngezana rakapetwa kupinda zvino! Andivopi, makosi wangu mambo, veshe pamwepo varanda vamambo wangu? Ngenyi zvino mambo wangu unodirenyi kuti abvunze ichi? Ngenyi echida kuunza kushaisha padera paIsuraeri?” Asi izwi ramambo rakakurira Joabhi. Ndizvo Joabhi wakaenda, wakapinda ngomukati mwenyika dzeshe dzaIsuraeri, wakapetuka Jerusarema. Joabhi wakaronzera Dhavhidha uwandu hwevanhu. MuIsuraeri mweshe vaiya miriyoni rimwe nezana rimwe remakumi emazana (1,100,000) avo vaikona kurwa ngeshoti, nomuJudha mwaiya nemazana marongomuna nemakumi manomwe emakumi emazana (470,000) vaikona kurwa ngeshoti. Asi aazi kuerenga vaRevhi nevaBhenjamini mukuerenga uku, ngokuti izwi ramambo kunaJoabhi raiya chinyangadzo. Asi Mwari wakanyangadzwa ngeichi chiro; ndizvo wakachaya vaIsuraeri. Dhavhidha wakati kunaMwari, “Ndashaisha kakurutu, ngokuti ndaita ichi chiro. Asi zvino, ndinokupota, dusa kushaisha kwomuranda wako; ngokuti ndaita ngoupenzi.” Mambo Mwari wakaereketa kunaGadhi, mufemberi waDhavhidha echiti, “Enda, wooronzera Dhavhidha wechiti, ‘Unoronza izvi Mambo Mwari: Ndinozokupa zviro zvitatu; tsanangura chimwe chazvo kuti ndichiite kwouri.’ ” Ndizvo Gadhi wakauya kunaDhavhidha, akati kwaari, “Mambo Mwari unoronza izvi, ‘Tsanangura iwewe: Kuti kuapo makore matatu enzara; nokuti mwedzi mitatu yokutambudzwa ngemagaa ako, ngenguvayo shoti yemagaa ako inozomubaya; nokuti mazuva matatu inemwi shoti yaMambo Mwari, kuronza, nhenda inotyisa munyika, nengirosi yaMambo Mwari iuraye mukati mwenyika yaIsuraeri yeshe.’ Zvino nasa kupinimidza kuti izwinyi rendinozopingura uwo wandituma.” Zvino Dhavhidha wakati kunaGadhi, “Ndahahairwa kakurutu: ngandiwire munyara dzaMambo Mwari, ngokuti nyasha dzake ihurutu yaamho; asi ndisawira munyara dzavanhu.” Ndizvo Mambo Mwari wakatumira nhenda inotyisa padera pevaIsuraeri; navo vakafapo vanhu vaIsuraeri makumi manomwe emakumi emazana (70,000). NaMwari wakatuma ngirosi muJerusarema kooriparadza; asi apo ooda kuriparadza, Mambo Mwari wakaringira, wakakunukuka kubva kunokushata ukwo; wakati kunengirosi yokuparadza, “Zvakwana! Pfinyisa nyara yako.” Ngirosi yaMambo Mwari zvino yaiya yakaema pambuwa yokupurira yaOrinani muJebhusi. Dhavhidha wakaringira, akaona ngirosi yaMambo Mwari yakaema pakati pedenga nenyika, ineshoti yakashwamurwa munyara yayo, yakatambanudzirwa padera peJerusarema. Zvino Dhavhidha nevakuru vakapfeka masaka, vakawa pashi ngehope dzavo. NaDhavhidha wakati kunaMwari, “Andinipi here ndakapanga kuti vanhu vaerengwe? Ndini ndakashaisha, ndakaita zvakashata ngegwinyiso. Asi aya makwai akashaishenyi? Ndinokupota, A Mambo Mwari, Mwari wangu, nyara yako ngaigare padera pangu nepadera pemhatso yababa angu; asi haiwa kuti nhenda igare padera peava vanhu.” Zvino ngirosi yaMambo Mwari yakapanga Gadhi kuti aronzere Dhavhidha, kuti akwire kooakira Mambo Mwari arita pandau yembuwa yaOrinani muJebhusi. Ndizvo Dhavhidha wakakwira kudai ngokuronza kwaGadhi, ukwo kwaakaereketa ngezina raMambo Mwari. Orinani wakaringira sure, akaona ngirosi; naapo vakororo vake varongomuna vaiya naye vakadzihwarisa ngokwavo, Orinani wakaangira kupura koroni. Naapo Dhavhidha aguma kunaOrinani, Orinani wakaringira, akaona Dhavhidha; wakabuda kubva pambuwa, akakotamira pashi hope yake kuremeredza Dhavhidha. Dhavhidha wakati kunaOrinani, “Ndipe iyi ndau yembuwa, kuti ndiakirepo arita kunaMambo Mwari; ipe kwendiri ngomutengo wayo wakakwana, kuti nhenda inotyisa ibve pakati pevanhu.” Zvino Orinani wakati kunaDhavhidha, “Itore, namambo wangu ngaaite icho chinooneka chakanaka mukuona kwake; wona, ndinozokupa kabi kuita mudiro wokupisha, nezviro zvokupura ndizvo kuita huni, nekoroni yokuita mudiro wezviyo; ndinopa zveshe.” Asi mambo Dhavhidha wakati kunaOrinani, “Haiwa; asi ngegwinyiso ndinozozvitenga ngomutengo wazvo wakakwana. Andizotoreri Mambo Mwari icho chiri chako, nokuti kupira mudiro wokupisha ndisikazi kudusa mutengo wawo.” Ndizvo Dhavhidha wakapa kunaOrinani zvigurwa zvomukore mazana matanhatu (600) mutengo wendauyo. NaDhavhidha wakaakirapo Mambo Mwari arita, akapira midiro yokupisha nemidiro yokuiyanisa. Wakakumbira kunaMambo Mwari, naye wakamupingura ngomuriro wakabva mudenga ukadzaka padera pearita romudiro wokupisha. Zvino Mambo Mwari wakapanga ngirosi, nayo yakahwirinza shoti yayo mumakara ayo. Ngouwo mukuwo, zvino Dhavhidha aona kuti Mambo Mwari waiya amupingura pandau yembuwa yaOrinani muJebhusi, wakaitapo midiro. Ngokuti thabhenakeri raMambo Mwari, iro raakanasira Mosi mushango, nearita remidiro yokupisha, ngeiyo nguva raiya kundau dzakakwirira muGibheoni; asi Dhavhidha waiya asikachakoni kuenda pamberi paro koobvunza kunaMwari, ngendaa yokuti waiya echitya shoti yengirosi yaMambo Mwari. Zvino Dhavhidha wakati, “Panapa ndipo pachazoita mhatso yaMambo Mwari, Mwari, neiri ndiro arita remidiro yokupisha yaIsuraeri.” Dhavhidha wakapanga kuti kuunganidzwe pamwepo vapara vaigara munyika yaIsuraeri, kuti vatsetse mapuwe okuaka ndiwo mhatso yaMwari. Dhavhidhawo wakaunza simbi dzakawanda dzokuita zvipikiri zvezvivhayo zvemisiwo, nezvokuvharisa ndizvo, nethusi rakawanda risikapimiki, nematanda emisidhari akawanda; ngokuti vaSidhoni nevaThire vakaunza matanda akawanda emisidhari kunaDhavhidha. Ngokuti Dhavhidha wakati, “Soromoni mukororo wangu uchimudoko aasati abva muzero, nemhatso inozoakirwa Mambo Mwari inozoita yakapindisisa kunaka, inembiri nouthende pakati pemadzinza eshe; ndizvo zvino ndinozoinasirira.” Ndizvo Dhavhidha wakanasirira zvakawanda asati afa. Zvino wakadaidza Soromoni mukororo wake, wakamupanga kuti aakire mhatso Mambo Mwari, Mwari waIsuraeri. Dhavhidha wakati kunaSoromoni, “Mukororo wangu, inini ndaiya ndaronga mumwoyo wangu kuti ndiakire zina raMambo Mwari, Mwari waIsuraeri, mhatso. Asi izwi raMambo Mwari rakaguma kwendiri rechiti, ‘Iwewe wakaparadza ngazi yakawanda, wakarwa hondo kakurutu; auzoakiri zina rangu mhatso, ngokuti wakaparadza ngazi yakawanda munyika pamberi pangu. Wona, mukororo unozobarwa kwouri; unozoita munhu wokunyarara. Ndinozomupa kunyarara kubva kumagaa ake akamutendenedza; ngokuti zina rake rinozozwi Soromoni, neni ndinozopa kunyarara nokugarisika kuvaIsuraeri mumazuva ake. Ndiye unozoakira zina rangu mhatso. Unozoita mukororo kwendiri, neni ndinozoita baba kwaari; ndinozogwinyisisa dendemaro roumambo hwake padera paIsuraeri mhera nariini.’ Zvino, mukororo wangu, Mambo Mwari ngaanewe, kuti ubudirire, mukuaka mhatso yaMambo Mwari, Mwari wako, kudai ngezvaakaereketa ndiwe. Kwega Mambo Mwari ngaakupe kungwara nokuzwisisa, kuti apo paanokupa simba padera paIsuraeri, ungwarire mipango yaMambo Mwari, Mwari wako. Zvino unozobudirira kudai wechizongwarira kuita zviemeso nemipango izvo zvaakapanga Mambo Mwari kunaMosi, ngendaa yevana vaIsuraeri. Ita wakagwinya, ushinge. Usatya; usapera simba. Ngokurwadziwa kukurutu ndakanasirira mhatso yaMambo Mwari, mametriki thanisi makumi emazana matatu nemazana marongomuna (3,400) omukore, nemakumi emazana makumi matatu nemarongomuna (34,000) esirivha, thusi nesimbi zvisikabviri kupimwa ngouwandu; ndakanasirirazve matanda nemapuwe. Kune izvi iwewe unozotutsira zvimweni. Iwewe une vashandi vakawanda: vatsetsi vemapuwe, vanoaka ngemapuwe, vatsetsi vematanda, nevanhu veshe vanobheja kuita mbeu dzeshe dzemishando vasikaerengeki, ngwazi dzemishando yomukore, sirivha, thusi nesimbi. Zvino miruka, utange mushando, naMambo Mwari aanewe.” Dhavhidha wakapangawo vatungamiriri veshe vaIsuraeri, kuti vadetsere Soromoni mukororo wake echiti, “Mambo Mwari, Mwari wenyu aanemwipi here? Aazi kumupa kunyarara here kundau dzeshe? Ngokuti wakapa munyara dzangu avo veshe vanogara munyika; nenyika yakanyiswa pamberi paMambo Mwari nepamberi pevanhu vake. Zvino emesai mwoyo yenyu nomweya yenyu kutsvaka Mambo Mwari, Mwari wenyu. Endai muake mhatso yakachena yaMambo Mwari, Mwari, kuti muunzemwo bhokisi rechitenderano chaMambo Mwari, nezvidziyo zvakachena zvaMwari, mumhatso inozoakirwa zina raMambo Mwari.” Naapo Dhavhidha aamusharuka aanemakore mazhinji, wakaemesa Soromoni mukororo wake kuti aite mambo padera paIsuraeri. Dhavhidha wakaunganidza pamwepo veshe vatungamiriri vaIsuraeri, vapristi nevaRevhi. VaRevhi vakaerengwa kubvira ngevaane makore makumi matatu nokuenda mberi: nouwandu hwevakaerengwa vaiya makumi matatu nemasere emakumi emazana (38,000). Dhavhidha wakati, “Makumi mairi namarongomuna emakumi emazana, (24,000) eavo vaiyapo ava vakaemeserwa kuita mushando wemhatso yaMambo Mwari; nemakumi emazana matanhatu (6,000) kuita nduna nevatongi, makumi emazana marongomuna (4,000) kuita vangwariri vemisiwo, nemakumi emazana marongomuna (4,000) vaikudza Mambo Mwari ngezviro zvokuridza izvo zvendakanasira kukudza Mambo Mwari ndizvo.” NaDhavhidha wakavaronga kuita zvikwata zvakaedzana pakati pevakororo vaRevhi, Gershoni, Kohathi naMerari. Vakororo vaGershoni vaiya Radhani naShimei. Vakororo vaRadhani: Jehieri waiya mukuru, Zethamu naJoeri, vatatu. Vakororo vaShimei: Sheromothi, Hazieri naHarani, vatatu. Ava vaiya vakuru vemhatso dzemadzibaba avo Radhani. Nevakororo vaShimei: Jahathi, Zina, Jeushi naBheria. Ava varongomuna vaiya vakororo vaShimei. Jahathi waiya mukuru, naZiza waiya wechipiri; asi Jeushi naBheria vaiya vasina vakororo vakawanda; ndizvo vakaerengwa pamwepo kuita vemhatso imwe yababa avo. Vakororo vaKohathi: Amiramu, Izihari, Hebroni naUzieri, veshe varongomuna. Vakororo vaAmiramu: Aroni naMosi. Aroni wakaemeserwa kunasira zviro zvakanyanyisa kuchena, kuti iye nevakororo vake mhera nariini vapishe mitombo inegwema rakanaka pamberi paMambo Mwari, kuti vamushandire, nokufumisa vanhu ngezina rake mhera nariini. Asi ngendaa yaMosi munhu waMwari, vakororo vake vakaerengwa pamwepo nedzinza raRevhi. Vakororo vaMosi: Gershoni naErieza. Vakororo vaGershoni: Shebhueri waiya mukuru. Vakororo vaErieza: Rehabhia waiya mukuru. Erieza waiya asina vakororo vamweni, asi vakororo vaRehabhia vaiya vazhinji kakurutu. Vakororo vaIzihari: Sheromithi waiya mukuru. Vakororo vaHebroni: Jeria waiya mukuru, Amaria wechipiri, Jahazieri wechitatu naJekameamu wechirongomuna. Vevakororo vaUzieri: Mikha waiya mukuru naIshia waiya wechipiri. Vakororo vaMerari: Mahiri naMushi. Vakororo vaMahiri: Ereaza naKishi. Ereaza wakafa, asina vakororo, asi vanasikana vega; hama dzavo, vakororo vaKishi vakavaroora. Vakororo vaMushi: Mahiri, Edheri naJeremothi, vaiya vatatu. Ava ndivo vakororo vaRevhi kudai ngemhatso dzamadzibaba avo, vakuru vemhatso dzemadzibaba avo, kudai ngokuerengwa kwemazina eavo vakaerengwa, avo vaiita mushando wemhatso yaMambo Mwari, kubvira ngeavo vaiya nemakore makumi mairi nokuenda mberi. Ngokuti Dhavhidha wakati, “Mambo Mwari, Mwari waIsuraeri, wakapa vanhu vake kunyarara, naye unogara muJerusarema mhera nariini. Ndizvo vaRevhi avachazotwari thabhenakeri, nokuti zvidziyo zvaro, zvinoshandiswa kweriri.” Ngokuti kudai ngemazwi okugumisira aDhavhidha, vaRevhi vakaerengwa kubvira ngeavo vaiya nemakore makumi mairi nokuenda mberi. Asi mushando wavo waiya wokudetsera mibarirwana yaAroni, yokuita mushando wemhatso yaMambo Mwari, mumaruwanze, nomumakamera, kusukisisa zveshe zviro zvaiya zvakacheneswa, nomushando wake wemhatso yokudira yaMwari; nokudetserazve mumisara yezvingwa zvinopirwa kunaMwari, nowoufu hwakamotseka, mudiro wezviyo, wezvingwa zvisina mumera, wezvakabikwa munhamba, mudiro wakakanywa nemafuta, wezvakakangiwa, nowezvipimo zveshe zvinembeu dzakaparadzana. Navo vanozoema mangwanani eshe kubonga nokukudza Mambo Mwari, nokudarozve mumadeekoni; kunyazwi naapo panopirwa yeshe midiro yokupisha kunaMambo Mwari ngemaSabatha, nomukutawa kwomwedzi, nomumadhiri akaemeserwa, kudai ngouwandu hunodiwa ngokuangirira pamberi paMambo Mwari. Ndizvo vanozongwarira tende romushongano, nokungwarira ndau yakachena, nokudetsera vakororo vaAroni hama dzavo, mumushando wemhatso yaMambo Mwari. Zvino izvi ndizvo zvikwata zvevakororo vaAroni. Vakororo vaAroni: Nadhabhi, Abhihu, Ereaza naIthama. Asi Nadhabhi naAbhihu vakafa kutangira baba avo, vaiya vasina vana; ndizvo Ereaza naIthama vakaita mushando woupristi. Dhavhidha pamwepo naZadhoki wevakororo vaEreaza, naAhimerekhi wevakororo vaIthama, vakavaronga kudai ngemabingo emishando yevakaemeserwa. Ngokuti vakuru vakaoneka kuti vaiya vakawanda pakati pevakororo vaEreaza kupinda vakororo vaIthama, vakavaronga muzvikwata zvaikwana gumi nezvitanhatu vakuru vemhatso dzemadzibaba avo vevakororo vaEreaza, nezvisere pakati pevakororo vaIthama. Vakavaronga ngokuita mabhigidha ngokuedzanisa, ngokuti vaiyapo vakuru vendau yakachena, nevakuru vemhatso yaMwari, pakati pavo veshe vakororo vaEreaza, nevevakororo vaIthama. Shemaia munyori mukororo waNethaneri, muRevhi, wakavanyora pamberi pamambo, nevakuru, naZadhoki mupristi, naAhimerekhi mukororo waAbhiatha, nepamberi pevakuru vemhatso dzemadzibaba evapristi neevaRevhi; imwe mhatso yemadzibaba yakatsanangurirwa Ereaza, neimwenizve yakatsanangurirwa Ithama. Mabhigidha okutanga akabata Jehoiaribhi, echipiri akabata Jedhaia, echitatu akabata Harimu, echirongomuna akabata Seorimu, echishanu akabata Marikhija, echitanhatu akabata Mijamini, echinomwe akabata Hakozi, echisere akabata Abhija, echipfumbamwe akabata Jeshua, egumi akabata Shekania, egumi narimwe akabata Eriashibhi, egumi namairi akabata Jakimu, egumi namatatu akabata Hupha, egumi nemarongomuna akabata Jeshebhiabhi, egumi nemashanu akabata Bhiriga, egumi nematanhatu akabata Ima, egumi nemanomwe akabata Heziri, egumi nemasere akabata Hapizezi, egumi nemapfumbamwe akabata Phethahia, emakumi mairi akabata Jehezekeri, emakumi mairi narimwe akabata Jakhini, emakumi mairi namairi akabata Gamuri, emakumi mairi nematatu akabata Dheraia, emakumi mairi nemarongomuna akabata Maazia. Uku ndikwo kurongwa kwemabingo emishando yavo, kuti vapotere mumhatso yaMambo Mwari, kudai ngomuitiro wavo wevakaemeserwa ndiAroni baba avo, kudai ngezvaakamupanga Mambo Mwari, Mwari waIsuraeri. Naavo vakasara vamweni vevakororo vevaRevhi: vakororo vaAmiramu, Shubhaeri; vevakororo vaShubhaeri, Jehidheia. VaRehabhia: vevakororo vaRehabhia, Ishia waiya mukuru. VeIzihari, Sheromothi; nevevakororo vaSheromothi, Jahathi. Vakororo vaHebroni: Jeria waiya mukuru, Amaria wechipiri, Jahazieri wechitatu, Jekameamu wechirongomuna. Vakororo vaUzieri, Mikha; vevakororo vaMikha, Shamiri. Hama yaMikha, Ishia; vevakororo vaIshia, Zekharia. Vakororo vaMerari: Mahiri naMushi. Vakororo vaJaazia: Bheno. Vakororo vaMerari vakaberekwa ndiJaazia: Bheno, Shohamu, Zakuri naIbri. VeMahiri: Ereaza, uwo waiya asina vakororo. VaKishi, vakororo vaKishi: Jerameeri. Vakororo vaMushi: Mahiri, Edheri naJerimothi. Ava ndivo vakororo vevaRevhi kudai ngokuteererana kwemhatso dzemadzibaba avo. Ava vakaitawo mabhigidha kudai ngehama dzavo, mibarirwana yaAroni, mukuona kwaDhavhidha mambo, Zadhoki, Ahimerekhi, nevakuru vemhatso dzemadzibaba evapristi nevaRevhi, vakaitira vakuru, kudai ngezvevakaitira vadoko vavo. Dhavhidha nenduna dzehondo vakakowera mushando pakati pevakororo vaAsafi, vaHemani nevaJedhuthuni, avo vanosisira kuti vaprofete ngembira, zvimadangari nemakandira. Uwandu hweavo vakaita mushando, kudai ngokuteererana kwemabingo emishando evaiya nawo: Vevakororo vaAsafi: Zakuri, Josefa, Nethania naAsarera, vakororo vaAsafi, vaiya pashi peutungamiriri hwaAsafi, avo vaiprofeta kudai ngokuemesa kwamambo. VaJedhuthuni, vakororo vaJedhuthuni: Gedharia, Zeri, Jeshaia, Shimei, Hashabhia naMatithia, vari vatanhatu vaiya pashi peutungamiriri hwababa avo Jedhuthuni, avo vaiemba ngezvimadangari kubonga nokukudza Mambo Mwari. VaHemani, vakororo vaHemani: Bhukia, Matania, Uzieri, Shebhueri, Jerimothi, Hanania, Hanani, Eriatha, Gidhariti, Romamitieza, Joshibhekasha, Marothi, Hothiri naMahaziothi. Veshe ava vaiya vakororo vaHemani muonesi wamambo, kudai ngechigondiso chaMwari chokumumirudza; ngokuti Mwari wakapa Hemani vakororo gumi nevarongomuna nevanasikana vatatu. Veshe ava vaiya pashi peutungamiriri hwababa avo mukuemba mumhatso yaMambo Mwari ngengoma dzesimbi, magitari, nezvidangari, mumushando wemhatso yaMwari. Asafi, Jedhuthuni naHemani vaiya muurongwa hwamambo. Uwandu hwavo, pamwepo nehama dzavo avo vakadzidziswa kuembera kunaMambo Mwari, veshe vaiya ngwazi mazana mairi nemakumi masere nemasere (288). Navo vakaita mabhigidha emabingo avo, ngokuedzanisa kuvadoko nokuvakuru, kumudzidzisi nokumudzidzi. Mabhigidha okutanga akabata Asafi kubata Josefa; echipiri akabata Gedharia vakororo vake nehama dzake, gumi nevairi; echitatu akabata Zakuri, vakororo vake nehama dzake, vaiya gumi nevairi; echirongomuna akabata Iziri, vakororo vake nehama dzake, gumi nevairi; echishanu akabata Nethania, vakororo vake nehama dzake, gumi nevairi; echitanhatu akabata Bhukia, vakororo vake nehama dzake, gumi nevairi; echinomwe akabata Jesarera, vakororo vake nehama dzake, gumi nevairi; echisere akabata Jeshaia, vakororo vake nehama dzake, gumi nevairi; echipfumbamwe akabata Matania, vakororo vake nehama dzake, gumi nevairi; egumi akabata Shimei, vakororo vake nehama dzake, gumi nevairi; egumi narimwe akabata Azareri, vakororo vake nehama dzake, gumi nevairi; egumi namairi akabata Hashabhia, vakororo vake nehama dzake, gumi nevairi; egumi namatatu akabata Shubhaeri, vakororo vake nehama dzake, gumi nevairi; egumi nemarongomuna akabata Matithia, vakororo vake nehama dzake, gumi nevairi; egumi nemashanu akabata Jeremothi, vakororo vake nehama dzake, gumi nevairi; egumi nematanhatu akabata Hanania, vakororo vake nehama dzake, gumi nevairi; egumi nemanomwe akabata Joshibhekasha, vakororo vake nehama dzake, gumi nevairi; egumi nemasere akabata Hanani, vakororo vake nehama dzake, gumi nevairi; egumi nemapfumbamwe akabata Marothi, vakororo vake nehama dzake, gumi nevairi; emakumi mairi akabata Eriatha, vakororo vake nehama dzake, gumi nevairi; emakumi mairi narimwe akabata Hothiri, vakororo vake nehama dzake, gumi nevairi; emakumi mairi nemairi akabata Gidhariti, vakororo vake nehama dzake, gumi nevairi; emakumi mairi nematatu akabata Mahaziothi, vakororo vake nehama dzake, gumi nevairi; emakumi mairi nemarongomuna akabata Romamitieza, vakororo vake nehama dzake, gumi nevairi. Zvikwata zvevangwariri vemisiwo: vaKhora, Mesheremia mukororo waKore, wevakororo vaAsafi. Mesheremia waiya nevakororo: dangwe rake Zekharia, wechipiri Jedhieri, wechitatu Zebhadhia, wechirongomuna Jathinieri, wechishanu Eramu, wechitanhatu Jehohanani nowechinomwe Eriehoenai. Obhedhedhomu waiya nevakororo: wedangwe Shemaia, wechipiri Jehozabhadhi, wechitatu Joa, wechirongomuna Sakha, wechishanu Nethaneri, wechitanhatu Amieri, wechinomwe Isakha, nowechisere Pheurethai; ngokuti Mwari wakamufumisa. Kumukororo wakewo Shamaia vakororo vakabarwa kwaari, avo vaitonga mhatso dzemadzibaba avo, ngokuti vaiya vanhu ngwazi dzinoshinga. Vakororo vaShemaia: Othini, Refaeri, Obhedhi naErizabhadhi, nehama dzavo vaiya vamuna vanesimba, Erihu naSemakhia. Veshe ava vakororo vaObhedhedhomu, vakororo vavo nehama dzavo vaiya vamuna vakagwinya vanokona kuita mushando; makumi matanhatu nevairi vaiya vaObhedhedhomu. Mesheremia waiya nevakororo nehama, vakagwinya, vaiya gumi nevasere. Hosa, wevana vaMerari, waiya nevakororo: mukuru Shimuri, (kunyazwi waiya asiri dangwe, asi baba ake akamuita mukuru), Hirikia wechipiri, Thebharia wechitatu naZekharia wechirongomuna; veshe vakororo nehama dzaHosa gumi nevatatu. Zvikwata izvi zvevangwariri vemisiwo, kudai ngevatungamiriri vavo, vaiya nemabingo okurinda kudai ngehama dzavo, kushanda mumhatso yaMambo Mwari. Vakaita mabhigidha ngokuedzanisa, kudai ngemhatso dzemadzibaba avo, vadoko nevakuru, kumisiwo yeshe. Mabhigidha okumabvazuva akabata Sheremia. Vakaitirawo mabhigidha Zekharia mukororo wake, mupangi mukuru, nemabhigidha ake akamubatira rutii rwedera. Obhedhedhomu wakabatirwa ngemabhigidha kurutii rwokubani nevakororo vake vakaemeswa kuti varinde mhatso yezvidziyo. Shuphimu naHosa vakabatirwa ngemabhigidha kumabirirazuva, pamusiwo weSharekhethi, ngepanjira inokwira. Chikwata chakaringirana nechikwata. Ngokumabvazuva kwaiya nevaRevhi vatanhatu pazuva, ngedera kwaiya nevarongomuna pazuva, ngokubani kwaiya nevarongomuna pazuva, nokumhatso yezvidziyo kwaiya nevairi vairi. Paruwanze ngokumabirirazuva kwaiya nevarongomuna kunjira yokukwira, paiya nevairi paruwanze pacharwo. Aya ndiwo mabingo evarindi vemisiwo pakati pevaKhora nepakati pevana vaMerari. NokuvaRevhi, Ahija ndiye waiya mungwariri woupfumi hwemhatso yaMambo Mwari, nepadera poupfumi hwezviro zvakapirwa kunaMwari. Vakororo vaRadhani, vakororo vaGershoni vemhatso yaRadhani muGershoni, vakuru vemhatso dzaRadhani muGershoni: Jehieri. Vakororo vaJehieri, Zetamu naJoeri hama yake, vaiya vangwariri voupfumi hwemhatso yaMambo Mwari. VevaAmiramu, vaIzihari, vaHebroni, vaUzieri: Shebhueri mukororo waGershoni, mukororo waMosi, waiya mukuru wevangwariri voupfumi. Hama dzake: kubva ndiErieza vaiya mukororo wake Rehabhia, mukororo wake Jeshaia, mukororo wake Joramu mukororo wake Zikhiri, mukororo wake Sheromothi. Sheromothi uyu nehama dzake vaiya vangwariri vakuru voupfumi hweizvo zveshe zvakapirwa kunaMwari, izvo zvakapirwa ndiDhavhidha, nevakuru vemhatso dzemadzibaba nenduna dzaiya padera pemakumi emazana nepadera pemazana nenduna dzehondo. Kubva kunezvakachakatwa mukurwa zvakapirwa kudetsera mushando wemhatso yaMambo Mwari. Zveshe zvakapirwawo ndiSamueri muonisi, naSauri mukororo waKishi, naAbhina mukororo waNeri, naJoabhi mukororo waZeruia, zveshe zvakapirwa zvaiya pashi penyara yaSheromothi nehama dzake. KuvaIzihari, Khenania nevana vake vakaemeserwa kuita mushando wokubanze pakati pevaIsuraeri, kuita vatungamiriri nevatongi. KuvaHebroni, Hashabhia nehama dzake, avo vaiya ngwazi dzinoshinga, gumi rimwe remazana nemazana manomwe (1,700), vaiya nduna dzaIsuraeri ngoruseri rweJorodhani, ngokumabirirazuva kuita mushando weshe waMambo Mwari, nomumushando wamambo. Kubva kuvaHebroni, Jerija waiya mukuru pakati pevaHebroni, kudai ngemibarirwana yamadzibaba ake. (Mugore remakumi, marongomuna okutonga kwamambo Dhavhidha, kutsvakisisa kwakaitwa kwemibarirwana nemhuri kwakaoneka pakati pavo vamuna vari ngwazi vanoshinga muJazagireadhi.) Mambo Dhavhidha wakamuemesa nehama dzake, ngwazi dzinoshinga vaiya makumi emazana mairi nemazana manomwe (2,700), vakuru vemhatso dzemadzibaba, kuita vatongi padera pevaRubheni, vaGadhi norupande rwedzinza raManase, kuita mishando yeshe yezviro zvaMwari nezvemishando yamambo. Uhu ndihwo urongwa hwevana vaIsuraeri, vakuru vemhatso dzemadzibaba avo, nduna huru dzemakumi emazana, dzemazana, nenduna dzaishandira mambo mumbeu dzeshe dzemishando yezvikwata zvemabingo akauya nokubuda, mwedzi ngomwedzi mumwedzi yeshe yegore; chikwata chimwe ngachimwe chaiya nemakumi mairi nemarongomuna emakumi emazana (24,000). Jashobheamu mukororo waZabhidhieri waiya nduna huru muchikwata chake chokutanga chomwedzi wokutanga; chaiya nemakumi mairi nemarongomuna emakumi emazana (24,000). Waiya mubarirwana waPherezi, waiya nduna huru yenduna dzeshe dzehondo yomwedzi wokutanga. Dhodhai mubarirwana waAhohi waiya nduna yechikwata chomwedzi wechipiri; Mikirothi waiya nduna huru yechikwata chake; muchikwata chake mwaiya nemakumi mairi nemarongomuna emakumi emazana (24,000). Nduna yechitatu yehondo yomwedzi wechitatu waiya Bhenaia mukororo waJehoiadha, mupristi; muchikwata chake mwaiya nemakumi mairi nemarongomuna emakumi emazana (24,000). Uyu ndiye Bhenaia waiya ngwazi pakati pengwazi makumi matatu, nduna yemakumi matatu; mukororo wake Amizabhadhi ndiye mukuru muchikwata chake. Asaheri hama yaJoabhi waiya nduna yechirongomuna mumwedzi wechirongomuna, nomukororo wake Zebhadhia waiya sure kwake; muchikwata chake mwaiya nemakumi mairi nemarongomuna emakumi emazana (24,000). Nduna yechishanu mumwedzi wechishanu waiya Shamhuthi muIziri; muchikwata chake mwaiya nemakumi mairi nemarongomuna emakumi emazana (24,000). Nduna yechitanhatu mumwedzi wechitanhatu waiya Ira mukororo waIkeshi, muThekoa; muchikwata chake mwaiya nemakumi mairi nemarongomuna emakumi emazana (24,000). Nduna yechinomwe mumwedzi wechinomwe waiya Herezi muPheroni, mubarirwana waEfuremu; muchikwata chake mwaiya nemakumi mairi nemarongomuna emakumi emazana (24,000). Nduna yechisere mumwedzi wechisere waiya Sibhekhai muHushathi, mubarirwana wevaZera; muchikwata chake mwaiya nemakumi mairi nemarongomuna emakumi emazana (24,000). Nduna yechipfumbamwe mumwedzi wechipfumbamwe waiya Abhieza weAnathothi, mubarirwana waBhenjamini; muchikwata chake mwaiya nemakumi mairi nemarongomuna emakumi emazana (24,000). Nduna yegumi mumwedzi wegumi waiya Maharai weNetofa, mubarirwana weZara; muchikwata chake mwaiya nemakumi mairi nemarongomuna emakumi emazana (24,000). Nduna yegumi naimwe mumwedzi wegumi naumwe waiya Bhenaia wePhirathoni, mubarirwana waEfuremu; muchikwata chake mwaiya nemakumi mairi nemarongomuna emakumi emazana (24,000). Nduna yegumi nembiri mumwedzi wegumi nemiiri waiya Heridhai muNetofa, mubarirwana waOthinieri; muchikwata chake mwaiya nemakumi mairi nemarongomuna emakumi emazana (24,000). Padera pemadzinza aIsuraeri: mutongi wedzinza raRubheni, Erieza mukororo waZikhiri waiya mutongi mukuru; mutongi wevaSimeoni, Shefatia mukororo waMaakha; mutongi wevaRevhi Hashabhia mukororo waKemueri; mutongi wevaAroni, Zadhoki; mutongi waJudha, Erihu umwe wehama dzaDhavhidha; mutongi wevaIsakha, Omuri mukororo waMikhaeri; mutongi weZebhuruni, Ishimaia mukororo waObhadhia; mutongi weNafitari, Jerimothi mukororo waAzirieri; mutongi waEfuremu, Hoshea mukororo waAzazia; mutongi worupande rwedzinza raManase, Joeri mukororo waPhedhaia; mutongi worupande rwedzinza raManase muGireadhi, Idho mukororo waZekharia; mutongi wevaBhenjamini, Jaasieri mukororo waAbhina; mutongi wevaDhani, Azareri mukororo waJerohamu. Ava ndivo vatungamiriri vemadzinza aIsuraeri. Dhavhidha aazi kuerenga vaiya pashi pemakore makumi mairi kudzaka pashi, ngokuti Mambo Mwari wakagondisa kuti unozowanza vaIsuraeri kudai ngenyeredzi dzomudenga. Joabhi mukororo waZeruia wakatanga kuvaerenga, asi aazi kupedza; ushungu hwaMambo Mwari hwakadzaka padera paIsuraeri ngendaa iyi, nouwandu hwavo ahuzi kunyorwa mumabhuku amambo Dhavhidha. Padera poupfumi hwamambo paiya naAzimavhethi mukororo waAdhieri. Padera poupfumi hwomunyika, mumadhorobha, mumaguta, nomungome, paiya naJonathani mukororo waUzia. Padera peavo vaiita mushando womumunda wokurima paiya naEziri mukororo waKherubhi. Padera peminda yemivhini paiya naShimei muRama. Zabhudhi muShifi waiya padera pomushando wokungwarira michero yeminda yemivhini yaiiswa mumadura evhini. Padera pemiti yemiorivhi neyemionde muShefera paiya naBhaarihanani muGedha. Padera pevaingwarira mafuta paiya naJoashi. Padera pevaingwarira zvifuyo zvaiushirwa muSharoni paiya naShitirai muSharoni. Padera pezvifuyo zvaiushirwa mubani paiya naShafati mukororo waAdhirai. Padera pevaingwarira makamera paiya naObhiri muIshumaeri. Padera pevaingwarira zvimbongoro paiya naJehidheia muMeronothi. Padera pevaingwarira makwai nembudzi paiya naJazizi muHagiri. Veshe ava vaiya vangwariri vepfuma yaDhavhidha mambo. Jonathani hama yaDhavhidha waiya gota, waiya munhu wakangwara, nomunyori; Jehieri mukororo waHakhimoni waigara nevakororo vamambo. Ahithoferi waiya gota ramambo, naHushai muAkhi waiya mungani wamambo. Sure kwaAhithoferi kwakauya Jehoiadha mukororo waBhenaia, naAbhiatha. Joabhi waiya nduna yehondo yamambo. Dhavhidha wakaunganidza muJerusarema vatungamiriri veshe vaIsuraeri, vatungamiriri vemadzinza, nduna dzezvikwata dzaishandira mambo, nduna dzaiya padera pemakumi emazana, nduna dzaiya padera pemazana, vangwariri vepfuma yeshe, nepadera pezvifuyo zveshe zvamambo nevakororo vake, pamwepo nevakuru vengome, ngwazi dzehondo nevarwi vehondo veshe. Zvino mambo Dhavhidha wakamiruka, akaema ngetsoka dzake echiti, “Ndizwenyi, hama dzangu nevanhu vangu. Ndaiya nazvo mumwoyo mwangu kuti ndiakire bhokisi rechitenderano chaMambo Mwari mhatso yokuzorora, nechitambarariro chetsoka dzaMwari wedu, neni ndakanasirira zviro zveshe zvokuaka ndizvo. Asi Mwari wakati kwendiri, ‘Iwewe auzoakiri zina rangu mhatso, ngokuti uri murwi wehondo, wakaparadza ngazi zhinji.’ Asi Mambo Mwari, Mwari waIsuraeri, wakanditsanangura pamberi pemhatso yababa angu yeshe kuti ndiite mambo padera paIsuraeri mhera nariini; ngokuti wakatsanangura Judha kuita mutungamiriri, nomumhatso yaJudha, mhatso yababa angu; nepakati pevakororo vababa angu wakandida kuti ndiite mambo padera paIsuraeri peshe. Pavakororo vangu veshe, (ngokuti Mambo Mwari wakandipa vakororo vakawanda,) wakatsanangura Soromoni mukororo wangu kuti agare padendemaro roumambo hwaMambo Mwari padera paIsuraeri. Wakati kwendiri, ‘Ndi Soromoni mukororo wako unozoaka mhatso yangu nemaruwanze angu, ngokuti ndamutsanangura kuita mukororo wangu, neni ndinozoita baba kwaari. Ndinozogwinyisa umambo hwake mhera nariini, kudai echizogwinyisira kungwarira mipango yangu nezvitongero zvangu, kudai ngezvaakadaro nyamashi.’ Ndizvo zvino mukuona kwevaIsuraeri veshe, mbungano yaMambo Mwari, nomukuzwa kwaMwari wedu, ngwarirai mutsvake yeshe mipango yaMambo Mwari, Mwari wenyu, kuti mugare nhaka yenyika iyi yakanaka, nokuisiya kuita nhaka yevana venyu vanoteera sure kwenyu mhera nariini. “Neiwewe Soromoni mukororo wangu, zia Mwari wababa ako, umushandire ngomupinimidzo umwe nomwoyo unoda; ngokuti Mambo Mwari unotsvakisisa mwoyo yeshe, nokuzwisisa kupinimidza kwemipinimidzo. Kudai wechizomutsvaka unozooneka ndiwe; asi kudai wechizomusiya, unozokurasha mhera nariini. Ngwara zvinopano, ngokuti Mambo Mwari wakatsanangura iwewe kuti umuakire mhatso ndau yakachena; gwinya, uite.” Zvino Dhavhidha wakapa kunaSoromoni mukororo wake urongwa hweruwanze nehwemhatso yarwo, noupfumi hwayo, nemakamera epadera, neomukati, nehwendau yechigaro chenyasha; nourongwa hwechionero weizvo zveshe zvaiya mumwoyo mwake: hwemaruwanze emhatso yaMambo Mwari, nehwemakamera eshe aitendenedza, nehweupfumi hwemhatso yaMambo Mwari, noweupfumi hweizvo zvaakapa kunaMwari; zvikwata zvevapristi, zvevaRevhi, nezvemushando weshe wokushandira mhatso yaMambo Mwari; zvidziyo zveshe zvokushandisa mumhatso yaMambo Mwari, uremu hwemukore wezvidziyo zveshe zvomukore, zvomushando umwe ngaumwe, uremu hwezvidziyo zvesirivha zvomushando umwe ngaumwe, uremu hwemukore wezvigadzikiro zvezvibani nezvibani zvazvo, uremu hwemukore wechigadzikiro chechibani chimwe ngachimwe nezvibani zvazvo, uremu hwesirivha yechigadzikiro chechibani nezvibani zvazvo, kudai ngokushandiswa kwechimwe ngachimwe kunoitwa mumushando, uremu hwemukore wetafura rimwe ngarimwe remisara yezvingwa sirivha yematafura esirivha, nomukore wakaereswa wokunasira foroko, mabhasini, tsani; nemikheyo yomukore nouremu hwechimwe ngachimwe; mikheyo yesirivha nouremu hweumwe ngaumwe; nearita rokupishira mitombo inegwema rakanaka rakaitwa ngomukore wakaereswa nouremu hwaro; urongwa hwake hwengoro yomukore yemakherubhi awo akatambanudza maphaphiro awo, nokufukidza bhokisi rechitenderano chaMambo Mwari. “Zveshe izvi, zvakanyorwa ngokupanga kwaMambo Mwari, wakaita kuti ndinase kuzwisisa urongwa hweshe hwemishando.” Dhavhidha wakatizve kunaSoromoni mukororo wake, “Gwinya, ushinge, uite. Usatya, usapera simba; ngokuti Mambo Mwari, Mwari wangu, unewe. Iye aazokukoreresi, nokuti kukusiya, metsa upedze mushando weshe wokushandira mhatso yaMambo Mwari. Ringira, zvikwata zvevapristi nevaRevhi vanozoa newe kuita mishando yeshe yemhatso yaMwari; vanozoa newe mumushando weshe vanodzipira, ngwazi dzinokona kuita mbeu dzeshe dzemishando; vatungamiririwo nevanhu veshe vanozoita zveshe zvounopanga.” Dhavhidha mambo wakati kunembungano yeshe, “Soromoni mukororo wangu, uwo ega waakatsanangura Mwari, uchiri mudoko, aasati azia chiro, nomushando mukuru; ngokuti temperi arisiri romunhupi, asi ngeraMambo Mwari, Mwari. Ndizvo ndakanasirira mhatso yaMwari wangu, kudai ngezvendaikona, mukore, kunasira zviro zvinoitwa ngomukore, sirivha zviro zvinonasirwa ngesirivha, thusi zviro zvinozonasirwa ngethusi, simbi zviro zvinonasirwa ngesimbi, matanda zviro zvinonasirwa ngematanda, mapuwe eonekisi, nemapuwe okuiswa, nemapuwe anon'anikira, nemapuwe anemiara akaparadzana, nembeu dzeshe dzemapuwe anomutengo mukuru, nemapuwe emiara akawanda. Zve, ngokuti ndinodisisa mhatso yaMwari wangu, ndakapa zvoupfumi hwangu, mukore nesirivha, kututsira padera peizvo zveshe zvendakanasira zvemhatso yakachena. Ndakapa mukore unopinda zana remametrikhi thanisi, womukore weOfiri, nemakumi marongomuna esirivha yakaereswa, zvokuseta ndizvo marukumbati emhatso, nomushando weshe wokunasira zviro zvinonasirwa ngomukore, sirivha yokunasira zviro zvinonasirwa ngesirivha, nezvokuita mishando yeshe inonasirwa ngenyara dzengwazi. Ndiani zvino unotenda nyamashi kudzipira pachake ngokuda kunaMambo Mwari?” Zvino vakuru vemhatso dzemadzibaba nevatungamiriri vemadzinza aIsuraeri, nenduna dzemakumi emazana, nedzemazana, pamwepo nevatongi vomushando wamambo, vakapa ngokuda. Vakapa kumushando wemhatso yaMambo Mwari mametriki thanisi aida kupinda zana nemakumi manomwe (170) omukore, mametriki thanisi esirivha anodarika mazana matatu nemakumi marongomuna (340), mametriki thanisi ethusi aiguma mazana matanhatu nemakumi mairi (620), nemametriki thanisi esimbi aipinda makumi emazana matatu nemazana marongomuna (3,400). Kunyazwi ndiani waiya nemapuwe anomutengo mukuru, vakaapira kuupfumi hwemhatso yaMambo Mwari, ngenyara yaJehieri muGershoni. Zvino vanhu vakadakara ngokuti ava vaiya vapa ngokuda ngokuti vakapa ngomwoyo weshe kunaMambo Mwari; Dhavhidha mambo wakadakarawo kakurutu. Zvino Dhavhidha wakakudza Mambo Mwari pamberi pembungano yeshe; Dhavhidha wakati, “Ngaakudzwe Mambo Mwari, Mwari waIsuraeri baba edu, mhera nariini. Ukuru ngohwako, A Mambo Mwari, simba, uthende, kunyisa noumambo; ngokuti zveshe zviri mudenga nomunyika ngezvako; umambo ngohwako, A Mambo Mwari, iwewe wakamirudzwa kuita soro padera pezviro zveshe. Upfumi nokukudzwa zveshe zvinobva kwouri, newe unotonga padera pazvo zveshe. Munyara yako munesimba nokugwinya; zviri munyara yako kukurisa, nokupa veshe simba. Nazvino, Mwari wedu, tinokubonga nokukudza zina rako rinouthende. “Asi inini ndiri chiinyi, nevanhu vangu vari chiinyi, kuti isusu tikone kupa ngokuda? Ngokuti zviro zveshe zvinobva kwouri, nesu takupa izvo zviri zvako. Ngokuti isusu tiri vapara pamberi pako nevahambi, kudai ngemadzibaba edu eshe; mazuva edu padera penyika akadai ngebvute, akuna gonda. A Mambo Mwari, Mwari wedu, zveshe izvi zvakawanda zvetakanasirira kuakira zina rako rakachena mhatso, zvinobva munyara yako, zveshe ngezvako. Ndinozia, Mwari wangu, kuti iwewe unoedza mwoyo, unodakarira kururama; mukururama kwomwoyo wangu ndakapa zviro zveshe izvi ngokuda; zvino ndaona vanhu vako vari pano, vechipa kwouri ngokuda nokudakara. A Mambo Mwari, Mwari waAbrahama, waIsaka nowaIsuraeri, madzibaba edu, ita kuti kudisisa nemipinimidzo zvigare mumwoyo yevanhu vako mhera nariini, kweerai mwoyo yavo kwouri. Ipa kunaSoromoni mukororo wangu mwoyo wakaperera, wokungwarira mipango yako, zvitongero nezviemeso zvako nokuita izvi zveshe, nokuaka temperi rendakanasirira.” Zvino Dhavhidha wakati kunembungano yeshe, “Kudzai Mambo Mwari, Mwari wenyu.” Nembungano yeshe yakakudza Mambo Mwari, Mwari wemadzibaba avo, vakakotamisa masoro avo pashi, vakakudza Mambo Mwari, namambo wakakudzwawo. Ngezuva raiteera vakapira midiro kunaMambo Mwari, vakapira midiro yokupisha kunaMambo Mwari, mikono gumi remazana (1,000), nemagondohwe gumi remazana (1,000), nemakwai gumi remazana, (1,000), pamwepo nemidiro yavo yokumwa, nemidiro mizhinji yevaIsuraeri veshe; navo vakadya nokumwa pamberi paMambo Mwari ngeiro zuva vanokudakara kukurutu. Navo ngokwechipiri vakaita Soromoni mambo mukororo waDhavhidha; vakamudzodza pamberi paMambo Mwari kuita mutongi waMambo Mwari, naZadhoki kuita mupristi. Zvino Soromoni wakagara padendemaro raMambo Mwari kuita mambo pandau yababa ake Dhavhidha; wakabudirira, nevaIsuraeri veshe vakamupurutana. Vatungamiriri veshe nengwazi, nevakororo veshe vamambo Dhavhidha, vakadzipfaisa kunaSoromoni mambo. NaMambo Mwari wakakwidzidza Soromoni kakurutu mukuona kwavaIsuraeri veshe, akamupa uthende hwoumambo hwakadai husikazi kumboapozve kunamambo umweni waIsuraeri wakatanga pamberi pake. Ndikwo kutonga kwaakaita Dhavhidha mukororo waJesi padera paIsuraeri weshe. Mukuwo waakatonga padera paIsuraeri waiya makore makumi marongomuna; muHebroni wakatonga makore manomwe, nemakore makumi matatu nematatu wakatonga muJerusarema. Zvino wakafa, aamusharuka kakurutu, aane makore mazhinji, aneupfumi nokuremeredzwa; naSoromoni mukororo wake wakatonga pandau yake. Zvino mishando yaDhavhidha mambo, kubvira pakutanga nokugumisira, zvakanyorwa mubhuku raSamueri muprofeti, nomubhuku raNathani muprofeti, nomubhuku yaGadhi muprofeti, pamwepo nemishando yokutonga kwake, nesimba rake, nezvakaitika kwaari nevaIsuraeri, noumambo hweshe hwenyika. Soromoni mukororo waDhavhidha wakadzigwinyisa muumambo hwake; Mambo Mwari, Mwari wake waiya naye, naye wakamukudza kakurutu. Soromoni wakadaidza vaIsuraeri veshe, nduna dzemakumi emazana nedzemazana, vatongi veshe, nevatungamiriri veshe vaIsuraeri nevakuru vemhatso dzemadzibaba. Zvino Soromoni nembungano yeshe yaiya naye, vakakwira kuenda kundau yakakwirira paGibheoni; ngokuti tende romushongano raMwari, iro rakaitwamwo ndiMosi, muranda waMambo Mwari, mushango raiyapo. Asi Dhavhidha waiya akakwidza bhokisi rechitenderano chaMwari kubva Kiriathijearimu, akariisa kundau iyo Dhavhidha yaakarinasirira, ngokuti waiya akaridzimikira tende muJerusarema. Zve arita rethusi iro rakanasirwa ndiBhezareri mukororo waUri, mukororo waHuri, raiyapo pamberi pethabhenakeri raMambo Mwari. NaSoromoni nembungano yeshe vakabvunzapo kunaMwari. Soromoni wakakwirapo kuarita rethusi pamberi paMambo Mwari, iro raiya patende romushongano, akapira midiro gumi remazana (1,000) yokupisha padera paro. Ngouhwo usiku Mwari wakadzionisa kunaSoromoni, akati kwaari, “Kumbira icho chendingakupa.” Soromoni wakati kunaMwari, “Iwewe wakaonisa nyasha dzakakura kunababa angu Dhavhidha, akandiita mambo pandau pake. A Mambo Mwari, Mwari, ita kuti chigondiso chako kunaDhavhidha, baba angu chizadzisike; ngokuti wandiemesa kuti ndiite mambo padera pevanhu vakawanda kudai ngebukuta renyika. Ndipe zvino ungwaru nokuzia, kuti ndikone kubuda nokupotera pamberi pevanhu ava; ngokuti ndiani ungakona kutonga ava vanhu vako vakawanda kudai?” Mwari wakapingura Soromoni echiti, “Ngokuti ichi chaiya chiri mumwoyo mwako, newe auzi kukumbira zviro zvakawanda, upfumi, kuremeredzwa, nokuti kufa kwemagaa ako, nokuti kupona kwako kuti kurebe; asi wakumbira ungwaru nokuzia pachako, kuti utonge vanhu vangu, vendakakuita mambo padera pavo, ungwaru nokuzia zvinozopuwa kwouri. Ndinozokupawo upfumi, zviro zvakawanda, nokuremeredzwa, izvo zvisikazi kumbopuwa kunamambo naumwe wakadaro wakatanga pamberi pako, nokuti unozoteera sure kwako unozopuwa zvakadaro.” Ndizvo Soromoni wakabuda kubva kundau yakakwirira paGibheoni, kubva pamberi petende romushongano kuenda Jerusarema. Naye wakatonga padera paIsuraeri. Soromoni wakaunganidza pamwepo ngoro nemahachi; naye waiya nemazana gumi nemarongomuna (1,400) engoro, nemahachi gumi nemairi emakumi emazana (1,200), awo aakaisa mumadhorobha engoro, namambo muJerusarema. Mambo wakaita sirivha nomukore kuti zviwande muJerusarema kudai ngemapuwe, nemiti yemisidhari wakaiita kuti iwande kudai ngemionde yaiya muShefera. Soromoni waiya nemahachi akaunzwa kubva Egipite neKuei vatengesi vamambo vakaaashira kubva Kue ngomutengo wao. Vakaunza kubva Egipite ngoro, vaitengesa ngezvigurwa zvesirivha mazana matanhatu (600), nehachi rakaunzwa kubveyo rakatengeswa ngezvigurwa zvesirivha zana nemakumi mashanu (150). Ndizvo kubudikidza ndivo izvi zvakaunzirwa madzimambo eshe evaHiti, nemadzimambo evaAramu. Zvino Soromoni wakadziemesera kuti aakire zina raMambo Mwari mhatso nengome youmambo hwake. Soromoni wakatsanangura vamuna makumi manomwe emakumi emazana, (70,000) kuti vatware mitwaro, makumi masere emakumi emazana (80,000) evamuna vokutsetsa mapuwe munyika yemitunhu, nemakumi emazana matatu nemazana matanhatu (3,600) kuvaringira. Soromoni wakatumira izwi kunaHiramu mambo weThire echiti, “Kudai ngezvewakamboita kunababa angu Dhavhidha, kuvatumira misidhari kuti vadziakire mhatso pachavo yokugaramwo, itawo kudaro kwendiri. Ringira, ndaakuda kuakira mhatso zina raMambo Mwari, Mwari wangu, nokuipira kwaari, kuti ndipishe pamberi pake mitombo inegwema rakanaka, nokuisapo misara yezvingwa zvakacheneswa zvinopirwa nguva dzeshe nemidiro yokupisha mangwanani nemadeekoni, ngemaSabatha, ngokutawa kwomwedzi, nemazuva emadhiri akaemeswa ndiMambo Mwari, Mwari wedu, kudai ngezvakaemeserwa vaIsuraeri mhera nariini. Mhatso yendooda kuaka inozoita hurutu, ngokuti Mwari wedu mukurutu kupinda zvimwari zvimweni. Asi ndiani ungakona kumuakira mhatso, kwechioneka kuti denga nematenga azvikoni kumukwana? Inini ndiri anani ungakona kumuakira mhatso, kwega ndau yokupishira midiro pamberi pake? Ndizvo nditumire zvino munhu ngwazi yokushanda ngomukore, sirivha, thusi, simbi, machira akatsvukuruka, machira akatsvuka, machira akasvipirika, ngwazi yokunangura ibatane pamwepo nevamuna ngwazi vaneni muJudha nomuJerusarema, avo vakaemeswa ndibaba angu Dhavhidha. Nditumirewo miti yemisidhari, miti yemisaipresi, nematanda emigumu kubva Rebhanoni, ngokuti ndinozia kuti varanda vako ingwazi dzokutema miti yomuRebhanoni. Varanda vangu vanozoshanda nevaranda vako, kundinasirira matanda akawanda, ngokuti mhatso yendooda kuaka inozoita yakakura inoshamisa. Ndinozopa kuvaranda vako, avo vanotema matanda, zvipimo zvekoroni yakapurwa mametiriki thanisi makumi emazana mairi (2,000), nezvipimo zvebari mametiriki thanisi makumi emazana mairi (2,000), zvevhini maritha mazana marongomuna emakumi emazana (400,000) nezvipimo zvemafuta emiorivhi maritha mazana marongomuna emakumi emazana” (400,000). Zvino Hiramu mambo weThire wakapingura ngokunyora tsamba, yaakatumira kunaSoromoni echiti, “Ngokuti Mambo Mwari unoda vanhu vake, wakakuita mambo padera pavo.” Hiramu wakatiwo, “Ngaakudzwe Mambo Mwari, Mwari waIsuraeri, uwo wakaita denga nenyika, uwo wakapa mambo Dhavhidha mukororo wakangwara, unokuzwisisa nokuzia, uwo unozoakira Mambo Mwari temperi, nengome youmambo hwake. “Zvino ndinokutumira munhu ngwazi, yakazara ngokuzwisisa Huramabhi, mukororo womukadzi wedzinza raDhani, nababa ake waiya munhu weThire. Ngwazi yokushanda mishando yomukore, yesirivha, yethusi, yesimbi, yemapuwe, yematanda, yemachira akatsvukuruka, yemachira akasvipirika, machira orukangaza akanaka, machira akatsvuka, nembeu dzeshe dzokunangura, nokuteera kuronga kweshe kunounzwa kwaari, pamwepo nevanhu vako ngwazi, ngwazi dzamambo wangu Dhavhidha, baba ako. Zvino mambo wangu ngaatumire varanda vake koroni, nebari, nemafuta nevhini, zvaakaereketa ndizvo. Nesu tinozotema matanda eshe eunoda kubva muRebhanoni, akawanda kudai ngezvounoda; tinozoaunza kwouri akaita mwamba Jopa ngomuruandhle; newe unozoatwara kukwira nawo Jerusarema.” Zvino Soromoni wakaerenga vapara veshe vaigara munyika yaIsuraeri, ngesure kwokuerenga kwevakaerengwa ndiDhavhidha baba ake; vakaonekapo zana nemakumi mashanu namatatu emakumi emazana, nemazana matanhatu (153,600). Wakaemesa makumi manomwe emakumi emazana (70,000), kuti vaite vatwari vemitwaro, nemakumi masere emakumi emazana (80,000) kuti vaite vatsetsi vemapuwe mumitunhu, nokuemesa makumi emazana matatu nemazana matanhatu (3,600) vangwariri vomushando, nokuemesa vanhu kuita mushando. Zvino Soromoni wakatanga kuaka mhatso yaMambo Mwari muJerusarema, paMutunhu Moria, pandau yaakaoneka Mambo Mwari kunababa ake Dhavhidha, kundau yaakaemesa Dhavhidha pambuwa yokupurira yaOrinani muJebhusi. Wakatanga kuaka ngezuva rechipiri romwedzi wechipiri, ngegore rechirongomuna rokutonga kwake. Izvi ndizvo zvipimo zvaSoromoni mukuaka mhatso yaMwari: Kureba kwayo kudai ngokupima kwokutanga mamitha makumi mairi nemanomwe, kupamhama kwayo mamitha mapfumbamwe. Berere remberi kwemhatso kureba kwaro kwaiedzana nokupamhamha kwemhatso, mamitha mapfumbamwe, nokuturama kwaro mudenga mamitha makumi mashanu nemarongomuna. Mukati mwekamera wakariseta ngomukore wakaera. Rupande rukuru rwemhatso wakarukwakwatidza ngematanda omusaipresi, akaseta ngomukore wakaera, akanangura padera payo miedzaniso yemiti yemibvumo neyemaketani. Wakanemesa mhatso ngemapuwe anomutengo mukuru. Mukore uwo waiya mukore wakabva Pharavhaimu. Ndizvo wakaseta mhatso, mwamba, sika, marukumbati nemisiwo, zveshe ngomukore; wakanangura makherubhi padera pemarukumbati. Wakaaka ndau yakachenesesa; kureba kwayo kwaiya kwakadai ngokupamhamha kwemhatso, mamitha mapfumbamwe, kupamhama kwayo kwaiya mamitha mapfumbamwe; wakaiseta ngomukore wakaereswa, kuwanda kwawo kwaiya mametiriki thanisi aida kuita makumi mairi omukore. Nouremu hwezvipikiri hwaiya magramu omukore mazana mashanu nemakumi manomwe (570). Naye wakaseta makamera omuturika ngomukore. Mukati mwemhatso yakachenesesa wakanangura miedzaniso miiri yemakherubhi, akaiseta ngomukore. Maphapiro emakherubhi aida kuita mamitha mapfumbamwe: phaphiro rimwe nekherubhi raiya mamitha mairi nezvidoko zviiri rechibata rukumbati rwemhatso, nephaphiro raro rimweni raiya mamitha mairi nezvidoko zviiri kureba kwaro, awo akatambanudzwa kumarutii, rimwe rakabatana nephaphiro rekherubhi rimweni pakati pekamera, echiguma parukumbati kumarutii eshe ekamera, akanasa kutambanudzwa kupamhama kweshe echida kuita mamitha mapfumbamwe. Nekherubhi iri, phaphiro rimwe raiita mamitha mairi nezvidoko zviiri kureba, nephaphiro rimweni raiya mamitha mairi nezvidoko zviiri, rechigwamana nephaphiro rekherubhi rokutanga. Maphaphiro emakherubhi aya akatambanudzwa aiita mamitha anoda kuita mapfumbamwe; nawo aiema ngetsoka dzawo, nehope dzawo dzairingira pakati pemhatso. NaSoromoni wakanasira jira retemperi ngemiara yakasvipirika, yakatsvukuruka, yakatsvuka, nejira rorukangaza rakanaka, wakarukirapo miedzaniso yemakherubhi. Pamberi pemhatso wakaita sika mbiri, imwe ngaimwe mamitha gumi namashanu nehafu kureba, nezvipanda zvaiya padera padzo, sika imwe ngaimwe mamitha mairi nezvidoko zviiri kureba. Wakaita hata dzemaketani, akadziisa padera pesika; wakaita zana remaphomegraniti, akaaisa padera pehata dzemaketani. Wakaemesa sika pamberi petemperi, imwe ngokumudyo, neimweni ngokumuoshwe; wakadudza zina reimwe yokumudyo kuti Jakhini, nezina reyokumuoshwe kuti Bhoazi. Wakanasira arita rethusi, mamitha mapfumbamwe kureba nokupamhama, nemamitha marongomuna nehafu kukwira mudenga. Zvino wakanasira gandwa raiya rakatenderera remvura ngethusi yakanyunguruswa, raiya mamitha mairi nezvidoko zviiri kudzama kwaro, kuchinjika kwaro mamitha marongomuna nezvidoko zvirongomuna, kutenderera kwaro mamitha gumi nematatu nezvidoko zviiri. Ngepashi paro paiya nemiedzaniso yekabi yakaritendenedza, yaiya gumi mukati mwemamitha marongomuna nehafu kutendenedza gandwa reshe; paiya nemisara miiri yemiedzaniso yekabi yakanangurwa, apo parakanyunguruswa. Raiya rakagadzikwa padera pemiedzaniso gumi nemiiri yekabi, mitatu yakaringira dera, mitatu yakaringira kumabirirazuva, mitatu yakaringira kubani nemitatu yakaringira kumabvazuva; negandwa rakagadzikwa kudaro padera padzo. Marupande adzo eshe esure akafuratira mukati. Noutindi hwaro hwaiya hwakadai ngokupamhama kwechanza chenyara, nomuromo waro waiya wakadai ngomuromo wekomechi, wakadai ngeruva regofa; raikwana maritha makumi matanhatu emakumi emazana (60,000) emvura. Wakaitazve mabhasini madoko gumi okushambiramwo, akaisa mashanu ngokumudyo, nemashanu ngokumuoshwe. Mukati mwawo mwaisukirwamwo zviro zveshe zvevaishandisa kuita midiro yokupisha. Gandwa raiya revapristi kuti vagezeremwo. Naye wakaita zvigadzikiro zvezvibani gumi zvomukore kudai ngomuemo wazvo, akazviisa mutemperi, zvishanu ngokubani nezvishanu ngedera. Wakaitazve matafura gumi, akaaisa mutemperi, mashanu ngokumudyo nemashanu ngokumuoshwe. Wakaitazve mabhasini omukore zana. Wakaita ruwanze rwevapristi, noruwanze rukuru, nemisiwo yoruwanze; wakaseta misiwo yawo ngethusi. Wakaisa gandwa guru kurupande rwokubani ngokumabvazuva kwekhona remhatso. Huramu wakaita hari, mafoshoro, nemabhasini. Ndizvo Huramu wakapedza mushando waakaitira mambo Soromoni pamhatso yaMwari: sika mbiri, mikheyo, nezvipanda zviiri zvaiya padera pesika mbiri, mambure mairi okufukidzira mikheyo miiri yezvipanda, zvaiya padera pesika; mazana marongomuna emaphomegraniti aiya emambure mairi; misara miiri yemaphomegraniti yemumbure umwe ngaumwe, kufukidzira mikheyo miiri yezvipanda iyo yaiya padera pesika. Wakanasira zvigadzikiro, nemabhasini padera pezvigadzikiro, gandwa rimwe nemiedzaniso yekabi gumi nembiri pashi paro. Hari, mafoshoro, foroko nezvidziyo zveshe zvayo, Huramabhi wakazviitira mambo Soromoni zvemhatso yaMambo Mwari, zvethusi rinon'anikira. Murubaya rwebani reJorodhani mambo wakazviumba, mumavhu edongo riri pakati peSukothi neZeredhatha. Soromoni wakaita zvidziyo zvaiya zvakawanda kakurutu, kuti kurema kwokupimwa kwethusi akuzi kuziikanwa. Ndizvo Soromoni wakaita zvidziyo zveshe zvaiya mumhatso yaMwari: arita romukore, matafura okuisa zvingwa zvinopirwa kunaMwari, zvigadzikiro zvezvibani, nezvibani zvazvo zvomukore wakaereswa kuti zvibake pamberi pendau yomukati yakachena kudai ngezvevakapangwa; miedzaniso yemaruwa, zvibani, nembato, dzomukore wakaereswa; zvidzimiso zvezvibani, mabhasini, mikheyo, zviwenda zvomuriro zvomukore wakaereswa. Pamusiwo pokupinda ndipo mutemperi: misiwo yokupinda mundau yakachenesesa, nemisiwo yoruwanze rwetemperi, yaiya yomukore. Ndizvo mushando weshe wemhatso yaMambo Mwari waakaita Soromoni wakapera. Soromoni wakaunza zveshe zviro mukati, zvakapirwa kunaMwari ndibaba ake Dhavhidha; nesirivha yaiya yakangwarirwa, mukore, nezvidziyo zveshe zvokushandisa, wakazviisa pamwepo muupfumi hwemhatso yaMwari. Zvino Soromoni wakaunganidza vakuru veshe vaIsuraeri, pamwepo nevakuru vemadzinza, nevatungamiriri vemhatso dzemadzibaba evanhu vaIsuraeri muJerusarema, kuti vakwidze bhokisi rechitenderano chaMambo Mwari kubva mudhorobha raDhavhidha, iro ndiro Zioni. Nevamuna veshe vaIsuraeri vakaungana pamberi pamambo padhiri raiyapo ngomwedzi wechinomwe. Nevakuru veshe vaIsuraeri vakauya, nevaRevhi vakatwara bhokisi rechitenderano. Ndizvo vakakwidza bhokisi rechitenderano, tende romushongano, nezvidziyo zveshe zvakachena, zvaiya mutende; zvakakwidzwa ngevapristi nevaRevhi. Mambo Soromoni nembungano yeshe yaIsuraeri, avo vaiya vaungana pamberi pake, vaiya pamberi pebhokisi rechitenderano, vakapira midiro yemakwai akawanda nekabi zvevaiya vasikakoni kuerenga ngokuwandisa. Zvino vapristi vakapotedza bhokisi rechitenderano chaMambo Mwari pandau yaro, kundau yomukati yakachenesesa yemhatso, mundau yakachenesesa kakurutu, pashi pemaphaphiro emakherubhi. Ngokuti makherubhi akatambanudza maphaphiro awo padera pendau yebhokisi rechitenderano, ndizvo makherubhi akarifukidza, nemipingo yaro yaiya padera paro. Mipingo yaiya yakarebesa, kuti magumo emipingo aioneka mundau yakachenesesa, pamberi pendau yomukati yakachenesesa; asi yaiya isikakoni kuoneka kubva ngokubanze; aripo metsa nanyamashi. Mwaiya musina chiro mubhokisi rechitenderano kwega marusamba emapuwe mairi aakaisamwo Mosi paMutunhu weHorebhi, apo Mambo Mwari paakaita chitenderano nevana vaIsuraeri ngomukuwo wevakabuda kubva Egipite. Zvino apo vapristi vabuda kubva kundau yakachena (ngokuti vapristi veshe vaiya varipo vaiya vakadzichenesa, vasina ndaa kuti ngewechikwata chipi), vaembi vevaRevhi veshe, Asafi, Hemani, Jedhuthuni, nevakororo vavo nehama dzavo, vakapfeka machira orukangaza akanaka, vanengoma dzesimbi, magitari, zvidangari, vakaema ngokumabvazuva kwearita, nevapristi zana nemakumi mairi (120), vaiya varidzi vemagwama. Raiya bingo revaridzi vemagwama nevaembi kuita pachavo kuti vazwike, mukuridza nokuemba mukukudza nokubonga Mambo Mwari; naapo vakamirudza izwi ravo rengoma ngemagwama nengoma dzesimbi nezvimweni zveshe zvokuridza, mukukudza Mambo Mwari vechiti, “Ngokuti wakanaka, nenyasha dzake dzinogara mhera nariini”, mhatso, mhatso yaMambo Mwari yakadzadzwa ngegore. Ndizvo vapristi avazi kukona kuema kushandira ngendaa yegore; ngokuti uthende hwaMambo Mwari hwakazadza mhatso yaMwari. Zvino Soromoni wakati, “Mambo Mwari wakaronza kuti unozogara mukati mwechidima chikurutu. Inini ndakuakira mhatso inembiri yokugara kwako, ndau yokuti ugare mhera nariini.” Zvino mambo wakatenderukira kuvanhu akafumisa mbungano yeshe yaIsuraeri; apo mbungano yeshe yaIsuraeri yakaema. Naye wakati, “Ngaabongwe Mambo Mwari, Mwari waIsuraeri, uwo ngenyara dzake wakazadzisa izvo zvaakagondisa ngomuromo wake kunaDhavhidha baba angu echiti, ‘Kubvira pazuva rendakabudisa vanhu vangu kubva munyika yeEgipite, andizi kutsanangura dhorobha kubva pakati pemadzinza eshe aIsuraeri mwokuti ndiakiremwo mhatso, kuti zina rangu rigaremwo; neni andizi kutsanangura naumwe kuita mutongi padera pevanhu vangu Isuraeri. Asi ndatsanangura Jerusarema, kuti zina rangu rigaremwo, neni ndatsanangura Dhavhidha kuti aapadera pevanhu vangu Isuraeri.’ Zvino zvaiya mumwoyo waDhavhidha baba angu kuti vaakire mhatso zina raMambo Mwari, Mwari waIsuraeri. Asi Mambo Mwari wakati kunaDhavhidha baba angu, ‘Wakaita zvakanaka mumwoyo wako kuti wakada kuakira zina rangu mhatso; zvakanyadaro iwewe auzoaki mhatso, asi mukororo wako, uwo unozobuda kubva muchiunu chako, ndiye unozoakira zina rangu mhatso.’ Zvino Mambo Mwari wazadzisa chigondiso chake icho chaakaita; ngokuti inini ndakamirudzwa pandau yababa angu Dhavhidha, ndinogara padendemaro raIsuraeri, kudai ngezvaakagondisa Mambo Mwari, neni ndakaakira zina raMambo Mwari mhatso, Mwari waIsuraeri. Mukati mwayo ndakaisamwo bhokisi rechitenderano, umwo mukati mwaro ndimwo munechitenderano chaMambo Mwari, chaakaita nevana vaIsuraeri.” Zvino Soromoni wakaema pamberi pearita raMambo Mwari mukuona kwembungano yeshe yaIsuraeri, akatambanudza nyara dzake. Soromoni waiya akanasira pokuemapo ngethusi, kureba kwaro, mamitha mairi nezvidoko zviiri, kupamhama kwaro, mamitha mairi nezvidoko zviiri, kukwira mudenga mitha rimwe nezvidoko zvitatu, naye waiya akariemesa ngepakati poruwanze rwemhatso; naye wakaema padera paro. Zvino wakagwadama ngemabvi ake pamberi pembungano yeshe yevaIsuraeri, akatambanudzira nyara dzake mudenga. Wakati, “A Mambo Mwari, Mwari waIsuraeri, akuna Mwari umweni wakadai ndiwe mudenga nokuti munyika, unongwarira chitenderano, mwechionisa rudo rwakagwinya kuvaranda vako, vanohamba pamberi pako ngomwoyo weshe. Iwewe wakangwaririra muranda wako Dhavhidha baba angu izvo zvowakagondisa kwaari. Ngegwinyiso wakagondisa ngomuromo wako, nyamashi wazadzisa ngenyara yako. Ndizvo zvino, A Mambo Mwari, Mwari waIsuraeri, ngwaririra muranda wako Dhavhidha, baba angu, izvo zvowakamugondisa wechiti, akuzotamiki naumwe mukuona kwangu unozogara padendemaro raIsuraeri, kudai vana vako vechizongwarira njira yavo kuti vahambe mumipango yangu, kudai ngezvewakahamba iwewe pamberi pangu. Ndizvo zvino, A Mambo Mwari, Mwari waIsuraeri, izwi rako ngarizadziswe, iro rowakagondisa kunomuranda wako Dhavhidha. “Ngegwinyiso Mwari ungagara nevanhu here munyika? Kunyazwi denga nedenga rematenga aakukwani iwewe; zvino kunozopinda kwakaitawani kutsonga kuneiyi mhatso yendakaaka! A Mambo Mwari, Mwari wangu, remeredza mukumbiro womuranda wako, nokupota kwake, uzwe kuchema nokukumbira kwaanokumbira muranda wako pamberi pako. Madziso ako abeukire kuneiyi mhatso masikati nousiku, eya nokuringira pandau apo pewakagondisa kuemesa zina rako; newe uzwe mukumbiro uwo waanokumbira muranda wako akaringira kuneiyi ndau. Newe uzwe mukumbiro womuranda wako, nowevanhu vako Isuraeri, naapo vanokumbira vakaringira kuneiyi ndau; uzwe uri mudenga, ndau yako yokugara, uzwe, ukungurire. “Kudai munhu echishaishira muakirwana wake, naye echiitiswa mhiko, naye unouya, nokupika mhiko pamberi pearita rako mumhatso iyi, uzwe uri mudenga muugaro hwako, uite, utonge varanda vako, uunzidzire wakashata, uunzidzire kushata kwake padera pesoro rake; nokupembedza avo vakarurama, ngokuvapa kudai ngokururama kwavo. “Naapo vanhu vako Isuraeri vashaisha pamberi pako, vakanyiswa ngemagaa avo, asi vakapetukazve kwouri, vakatenderukira kuzina rako, vakakumbira nokupota kwouri mumhatso iyi, izwa uri mudenga nokurekerera kushaisha kwevanhu vako Isuraeri, nokuvaunzazve kunyika iyi yowakavapa nokumadzibaba avo. “Naapo denga rakonywa nemvura isikanayi, ngokuti vakashaisha kwouri; navo zvino vakakumbira vechiringira kuneiyi ndau, nokutenda zina rako, vatenderuke kubva kuzvishaishi zvavo ngokuti unovaorora, zvino izwa uri mudenga nokurekerera kushaisha kwevaranda vako, vanhu vako Isuraeri, naapo woovadzidzisa njira kwayo inosisira kuti vahambe ndiyo; unayise mvura padera penyika yako, yowakapa vanhu vako kuita nhaka yavo. “Kuti kwaita nzara munyika, nhenda, chimbarara, chirotarota, ndongwe, mvimvana; kudai magaa avo echivakomba mumadhorobha avo; kunyazwi ngekuri kutambudzika kunyazwi nhenda iripo; kunyazwi ngouri mukumbiro, kunyazwi kupota, kunozokumbirwa ngomunhu kunyazwi ngouri, nokutizve ngevanhu vako veshe vaIsuraeri, apo vanozozia munhu weshe nhenda yake nokuti kurwadziwa kwake, kuti atambanudza nyara dzake kumhatso iyi, izwa uri mudenga, muugaro hwako, kwounogara, rekerera, upe kumunhu weshe kudai ngezviito zvake, uwo mwoyo wake iwewe unouzia, (ngokuti iwewe wega unozia mwoyo wevakororo vevanhu.) Ndizvo ngavakutye, vahambe ngenjira dzako mumazuva eshe evanopona munyika yowakapa kumadzibaba edu. “Naapo vapara avo vasiri vevanhu vako Isuraeri, vechibva kunyika iri kuretu ngendaa yezina rako guru, ngendaa yenyara yako inesimba, nomuoko wako wakatambanudzwa; naapo vechiuya vechikumbira vakaringira kumhatso iyi, izwa iwewe uri mudenga muugaro hwako, uite kunyazwi ngechiri chevanozokumbira kwouri vapara kuitira, kuti vanhu veshe vomunyika vazie zina rako, vakutye, kudai ngezvevanoita vanhu vako Isuraeri, kuti ivozve vazie kuti iyi mhatso yendakaaka inodaidzwa ngezina rako. “Kudai vanhu vako vechibuda kuenda koorwa hondo nemagaa avo, kunyazwi ngenjira iri younozovatuma ndiyo, navo vechikumbira kwouri vakaringira kudhorobha iri, rewakatsanangura, nokumhatso yendakaakira zina rako, Zvino izwa uri mudenga kukumbira kwavo nokupota kwavo, urwire ndaa yavo. “Kudai vechizoshaisha kwouri, (ngokuti akuna munhu usikashaishi akadi), newe wechizovatsenekera, nokuvapira kugaa, navo vanovatora kuvaita hloko kunyika iri kuretu, nokuti iri pasinde; zvino kudai vechizokarakadza vari munyika yevakatorwa kuitwa hloko, nokutenderuka, nokupota kwouri vari munyika youhloko hwavo vechiti, takashaisha, takaita zvakashata, takaita zvisikazi kururama; kuti vakatenderuka ngomwoyo yavo yeshe nomweya yavo yeshe munyika youbatwa hwavo, iyo kwevakatorwa kuitwa vabatwa, nokukumbira kwouri, vakaringira kunyika yavo, iyo yewakapa kumadzibaba avo, dhorobha rewakatsanangura, nemhatso yendakaakira zina rako, zvino izwa mukumbiro wavo nokupota kwavo, uri mudenga muugaro hwako, urwire ndaa yavo, nokurekerera vanhu vako vakashaisha kwouri. Zvino Mwari wangu, madziso ako ngaabeuke, nenzee dzako dzipurutane kumikumbiro inozokumbirwa kubva kuneiyi ndau. “Zvino, miruka, A Mambo Mwari, Mwari, nokuenda kundau yako yokuzorora, iwewe nebhokisi rechitenderano chesimba rako. Vapristi vako, A Mambo Mwari, Mwari, ngavapfekedzwe ngoruponeso, nevakagondeka vako ngavadakare ngounaku hwako. A Mambo Mwari, Mwari, usafuratira hope yako kunowakadzodzwa wako. Cherechedza rudo rwako kunomuranda wako Dhavhidha.” Naapo Soromoni apedza kukumbira kwake, muriro wakadzaka wechibva mudenga, ukapedza mudiro wokupisha nemidiro imweni; nouthende hwaMambo Mwari hwakazadza temperi. Vapristi avazi kukona kupinda mumhatso yaMambo Mwari, ngokuti uthende hwaMambo Mwari hwakazadza mhatso yaMambo Mwari. Naapo vana veshe vaIsuraeri vaona kudzaka kwowakaita muriro kubva mudenga, nouthende hwaMambo Mwari padera petemperi, vakadzikotamisa pashi hope dzavo pamavhu, vakadira nokukudza Mambo Mwari vechiti, “Ngokuti wakanaka, ngokuti rudo rwake runogara mhera nariini.” Zvino mambo nevanhu veshe vakapira midiro pamberi paMambo Mwari. Mambo Soromoni wakapira mudiro wekabi makumi mairi nemairi emakumi emazana (22,000), nezana nemakumi mairi emakumi emazana (120,000) emakwai. Ndizvo mambo nevanhu veshe vakapira mhatso yaMwari. Vapristi vakaema mundau dzavo; nevaRevhiwo vanezviro zvokuemba ndizvo kunaMambo Mwari, izvo zvaakanasira mambo Dhavhidha kubonga Mambo Mwari ndizvo, ngokuti rudo rwake runogara mhera nariini, peshe apo Dhavhidha paaikudza ngemishando yavo. Ngepaseri pavo vapristi vakaridza magwama, nevaIsuraeri veshe vakaema. Soromoni wakachenesa ndau yepakati poruwanze, yaiya pamberi pemhatso yaMambo Mwari; ngokuti apo wakapira midiro yokupisha, nemafuta omudiro wokuiyanisa, ngokuti arita rethusi raakaita Soromoni raiya risikakwani kupishirapo midiro yezviyo nemarupande emafuta. Panguva iyo Soromoni wakangwarira dhiri mazuva manomwe, nevaIsuraeri veshe vanaye, mbungano hurutu, kubvira Rebho Hamathi metsa kuguma parwizi rweEgipite. Ngezuva rechisere vakaita mushongano mukuru; ngokuti vakangwarira mudiro wokupira arita mazuva manomwe, nedhiri mazuva manomwe. Ngezuva remakumi mairi nematatu romwedzi wechinomwe wakaendesa vanhu kumakanyi avo, vechidakara nokudakadzwa mumwoyo yavo ngounaku hwaMambo Mwari hwaakaonisa kunaDhavhidha nokunaSoromoni nokuvaIsuraeri, vanhu vake. Ndizvo Soromoni wakapedza mhatso yaMambo Mwari nemhatso yamambo; zveshe zvaakaronga Soromoni mumwoyo mwake kuti aite zvemhatso yaMambo Mwari nezvemhatso yake, wakabudirira kuzviita. Zvino Mambo Mwari wakadzionisa kunaSoromoni usiku, akati kwaari, “Ndazwa mukumbiro wako, neni ndadzitsanangurira iyi ndau kuita mhatso yokupira midiro. Naapo ndakonya matenga kuti mvura isanaya, nokuti ndapanga ndongwe kuti dzichakate nyika, nokuti ndatumira nhenda pakati pevanhu vangu, kudai vanhu vangu vanodaidzwa ngezina rangu vechizodzipfaisa ngokwavo, vakumbire, vatsvake hope yangu, vechitenderuka kubva kunjira dzavo dzakashata; zvino ndinozozwa ndiri mudenga, ndinozorekerera kushaisha kwavo, ndiponese nyika yavo. Zvino madziso angu anozobeuka nenzee dzangu dzinozopurutana mikumbiro inozokumbirwa kundau iyi. Ngokuti zvino ndakatsanangura nokuchenesa iyi mhatso, kuti zina rangu rigaremwo mhera nariini; madziso angu nomwoyo wangu zvinozoapo nguva dzeshe. Neiwewe, kudai wechihamba pamberi pangu, kudai ngezvaakahamba Dhavhidha baba ako, wechiita zveshe kudai ngezvendakakupanga, ukangwarira zviemeso zvangu nezvitongero zvangu, zvino ndinozogwinyisa dendemaro roumambo hwako, kudai ngezvendakaita chitenderano naDhavhidha baba ako, chinoti, ‘Auzotami munhu wokuita mutongi muIsuraeri.’ “Asi kudai mwechizopauka, nokusiya zviemeso zvangu nemipango yangu, zvendakaisa pamberi penyu, mwechienda kooshandira zvimwari zvimweni nokuzvidira, zvino ndinozomubvita ngenzinde kubva kunyika yangu, yendakamupa; nemhatso iyi yendakachenesa ngendaa yezina rangu, ndinozoirasha kubva mukuona kwangu, ndinozoiita chisana nechinayi pakati pemadzinza eshe. Ngendaa yeiyi mhatso zvino inoremeredzwa kakurutu, inozoita chishamiso kuneavo veshe vanopinda ngepeiri; ndizvo umwe ngaumwe waavo unozoti, ‘Ngenyi Mambo Mwari akaita ichi chiro kuneiyi nyika nokuneiyi mhatso?’ Zvino vanozoti, ‘Ngokuti vakasiya Mambo Mwari, Mwari wemadzibaba avo, uwo wakavabudisa kubva munyika yeEgipite, navo vakatora zvimwari zvimweni, vakazvidira nokuzvishandira; ndizvo wakavaunzira uku kushata kweshe padera pavo.’ ” Pamagumo emakore makumi mairi, umwo Soromoni mwaakaaka mhatso yaMambo Mwari nemhatso yake, Soromoni wakaakisa madhorobha awo akahwirinzirwa kwaari ndiHiramu, akaita kuti vana vaIsuraeri vagaremwo. Soromoni wakaenda Hamathi-zobha, akarinyisa. Wakaaka Thadhimori mushango, nawo madhorobha eshe okungwarira zviro, aakaaka muHamathi. Wakaakazve Bhethihoroni redera naBhethihoroni rokubani, madhorobha akashosherwa, anemarukumbati, nemisiwo, nemipiningidzo, neBhaarathi, nemadhorobha eshe okungwarira zviro aiya aSoromoni, nemadhorobha eshe engoro, nemadhorobha evagadhi vemahachi, nazvo zveshe zvaiya nedanha nazvo Soromoni kuti azviake muJerusarema, muRebhanoni, nomukati mwenyika dzeshe dzoumambo hwake. Vanhu veshe vakasara vevaHiti, vaAmori, vaPherizi, vaHivhi nevaJebhusi, avo veshe vaiya vasiri vaIsuraeri, vakabva kumibarirwana yavo vakasiiwa munyika, avo vasikazi kuparadzwa ngevana vaIsuraeri, avo Soromoni wakaita kuti vabhare chibharo metsa nanyamashi. Asi kuvana vaIsuraeri Soromoni aazi kuvaita hloko dzomushando wake; vaiya vanhu vokurwa hondo, nduna huru, nenduna dzengoro dzake, nedzevagadhi vemahachi. Naava ndivo vaiya vakuru venduna dzaSoromoni, vaiya mazana mairi nemakumi mashanu (250), avo vaitonga padera pevanhu. Soromoni wakaunza mwanasikana waFaro kubva mudhorobha raDhavhidha kumuisa mumhatso yaakamuakira, ngokuti wakati, “Mukadzi wangu aazogari mumhatso yaDhavhidha mambo waIsuraeri, ngokuti ndau idzo dzakaguma bhokisi rechitenderano chaMambo Mwari dzakachena.” Zvino Soromoni wakapira midiro yokupisha kunaMambo Mwari padera pearita raMambo Mwari iro raakaaka pamberi poruwanze, kudai ngemabingo akaemeserwa zuva rimwe ngarimwe, anoda kuti apirwe kudai ngokupanga kwaakaita Mosi, ngemazuva eSabatha, ngemazuva okutawa kwomwedzi, nemazuva emadhiri matatu egore, dhiri rezvingwa zvisina mumera, dhiri remavhiki nedhiri remichacha. Wakaemesa mabingo emishando yevapristi, neemishando yevaRevhi, kudai ngokupanga kwaDhavhidha baba ake, kuti vaite mishando yokukudza nemishando yavo yokushanda pamwepo nevapristi, kudai ngezvaidiwa pabingo rezuva ngezuva, nevangwariri vemisiwo mumabingo avo emisiwo yakawanda, ngokuti Dhavhidha munhu waMwari wakapanga kudaro. Avazi kupauka kubva kunezvakapanga mambo kwevari vapristi nevaRevhi ngendaa yechiro cheshe nendaa yezviro zvoupfumi. Ndizvo mushando weshe waSoromoni wakapera kubvira pazuva rokuamba rakaemeswa tsikiro remhatso yaMambo Mwari, metsa ipere. Ndizvo mhatso yaMambo Mwari yakapera zvakaperera. Zvino Soromoni wakaenda Ezionigebha nokuErothi, nyika yevaEdhomu murutii rworuandhle. Hiramu wakatumira kwaari ngarava ngenyara dzevaranda vake, varanda vaiya noruziyo ngendaa yoruandhle. Vakaenda Ofiri pamwepo nevaranda vaSoromoni, vakatora kubvapo makhirogramu omukore aida kupinda makumi emazana gumi nemashanu (15,000), vakaaunza kunamambo Soromoni. Naapo mambokadzi weShebha akazwa ngembiri yaSoromoni, wakauya Jerusarema kooedza Soromoni ngemibvunzo yaiya yakakonza, anembungano huru, nemakamera aitwara makha, nomukore wakawanda kakurutu, nemapuwe anomutengo mukuru. Naapo aguma kunaSoromoni, wakaereketa naye ngeizvo zveshe zvaiya mumwoyo mwake. Soromoni wakapingura yeshe mibvunzo yake; paiya pasina chaiya chakafishika kunaSoromoni chaasikazi kumuronzera. Naapo mambokadzi weShebha aona kungwara kwaSoromoni, nemhatso iyo yaakaaka, kudya kwaiya patafura rake, kugara kwevakaita vatungamiriri vake, kuema kwevashandi vake, nezvokupfeka zvavo, vatwari vake vezvidziyo, nezvokupfeka zvavo, nemidiro yake yokupisha iyo yaakapira mumhatso yaMambo Mwari, mweya wake weshe wakaomerwa. Ndizvo wakati kunamambo, “Mushumo waiya negwinyiso wendakazwa ndiri munyika yangu ngezviito zvako, nokungwara kwako. Asi andizi kutenda mushumo wavo, metsa ndaguma ndemene, ndazvionera ngemadziso angu. Andizi kumboronzerwa norupande rwoukuru hwako noungwaru hwako; ngokuti unopinda kakurutu kukura kunembiri yendakazwa. Vanomuchena vanhu vako! Vanomuchena ava varanda vako, vanoangira kuema pamberi pako, vechizwa ungwaru hwako! Ngaakudzwe Mambo Mwari, Mwari wako, uwo wakadakara ndiwe, akakugadzika padendemaro rake, kuti uite mambo waMambo Mwari, Mwari wako. Ngokuti Mwari wako wakada Isuraeri, kuti amugwinyise mhera nariini, ndizvo wakakuita mambo padera pake, kuti uite kutonga kwakwo nokururama.” Zvino wakapa mambo Soromoni mukore waipinda makhirogramu makumi emazana marongomuna (4,000), nemitombo inegwema rakanaka kakurutu, nemapuwe anomutengo mukuru; kwaiya kusinazve makha akadaro aakapuwa Soromoni ndimambokadzi weShebha. Nevaranda vaHiramu, nevaranda vaSoromoni vakaunza mukore kubva Ofiri, matanda earigumu, nemapuwe anomutengo mukuru. Namambo wakanasira kubva kumatanda earigumu zvikwiriso zvokukwira ndizvo kumhatso yaMambo Mwari, nokungome yamambo, nezvidangari nemagitari evaembi. Akuzi kumbooneka zvakadai ndizvo karetu munyika yaJudha. Naapo mambo Soromoni wakapa kunamambokadzi weShebha zveshe zvaaiya nedanha nazvo, zvakapinda zveshe zvaakauya nazvo kunamambo. Ndizvo wakahwirira kunyika yake, iye navaranda vake. Uremu hwomukore wakaunzwa kunaSoromoni ngegore rimwe waipinda makhirogramu makumi mairi nematatu emakumi emazana (23,000), ngepabanze pouwo wakaunzwa ngevatengi nevatengesi; nemadzimambo eshe eArabhia, nevatongi venyika vakaunza mukore nesirivha kunaSoromoni. Mambo Soromoni wakaita zvihlangu mazana mairi (200) ngomukore wakapfurwa; chihlangu chimwe ngachimwe chaiya chakasetwa ngomukore wakaereswa waiya makhirogramu manomwe. Wakaitazve zvihlangu zvidoko mazana matatu (300) zvakasetwa ngomukore wakapfurwa unoda kuita makhirogramu matatu chimwe ngachimwe; namambo wakazviisa mumhatso yomuGwasha yeRebhanoni. Mambo wakaitazve dendemaro guru ngenyanga dzenzou, naye akariseta ngomukore wakaereswa. Dendemaro raiya nezvikwiriso zvitanhatu zvokukwira padendemaro, nechitambariro chetsoka chomukore, icho chaiya chakasungirwa padendemaro, nokurutii rumwe ngerumwe rwechigaro paiya nezvitsimiso zvemioko, nemiedzaniso miiri yemhondoro dzakaema pasinde pezvitsimiso, nemiedzaniso irigumi nemiiri yemhondoro yaiya yakaema umwe pamagumo echikwiriso chimwe ngachimwe pazvikwiriso zvitanhatu. Kwaiya kusinazve yakatodzana neiyo mukati mwoumambo hweshe humweni. Zvidziyo zveshe zvokumwira zvamambo Soromoni zvaiya zvomukore, nezvidziyo zveshe zvemhatso yomuGwasha reRebhanoni zvaiya zvomukore wakaereswa; sirivha yaiya isikaerengwi ngemazuva aSoromoni. Ngokuti ngarava dzamambo dzakaenda Tharshishi nevaranda vaHiramu; kamwe kega pamakore matatu eshe dzaiuya ngarava dzeTharshishi dzaiya dzechiunza mukore, sirivha, nyanga dzenzou, matede, neshiri dzinozwi maphikhoki. Ndizvo mambo Soromoni wakapinda eshe madzimambo omunyika ngepfuma noungwaru. Madzimambo eshe omunyika akatsvaka kuti aonane naSoromoni, kuti vazwisise ngoungwaru hwake hwaakaisa Mwari mumwoyo mwake. Umwe ngaumwe wavo wakauya nechipo chake, zvidziyo zvesirivha, zvidziyo zvomukore, zvokupfeka, zvokurwa ndizvo, makha, mahachi, nemanyurusi, rupande rwevakaemeserwa gore ngegore. NaSoromoni waiya nezvibaya zvemahachi nengoro makumi emazana marongomuna (4,000) nemahachi makumi emazana gumi namairi (12,000), awo aakaisa mumadhorobha engoro nokunamambo muJerusarema. Naye wakatonga padera pemadzimambo eshe kubvira kuRwizi Yufratesi metsa kuguma kunyika yevaFiristia nokumigano yeEgipite. Mambo wakaita kuti sirivha iwande kakurutu muJerusarema kudai ngemapuwe, nemiti yemisedhari wakaiita kuti iwande kudai ngemiti yemionde iri mumabani. Navo vakaunzira Soromoni mahachi kubva Egipite nokubva kunyika dzeshe. Zvino mishando imweni yaSoromoni, kubvira yokutanga neyokugumisira, aizi kunyorwa here muBhuku raNathani muprofeti, nokuprofeta kwaAhija muShiroi nomuzvioniso zvaIdho mufemberi ngendaa yaJerobhoamu mukororo waNebhati? Soromoni wakatonga muJerusarema padera paIsuraeri makore makumi marongomuna. Soromoni wakaata nemadzibaba ake, naye wakatsirwa mudhorobha raDhavhidha baba ake; naRehobhoamu mukororo wake wakatonga pandau yake. Rehoboamu wakaenda Shekhemu, ngokuti vaIsuraeri veshe vaiya vauya Shekemu kuti vamuite mambo. Naapo Jerobhoamu mukororo waNebhati azwa ndizvo, (ngokuti waiya muEgipite, apo paakatizira kubva kunaSoromoni mambo,) zvino Jerobhoamu wakapetuka kubva Egipite. Navo vakatumira vanhu koomudaidza. Ndizvo Jerobhoamu nevaIsuraeri veshe vakauya, vakaereketa kunaRehobhoamu vechiti, “Baba ako vakaita kuti joka redu rireme padera pedu. Ndizvo zvino ita kuti mushando wababa ako wairema nejoka rake raakaisa padera pedu zvireruke, nesu tinozokushandira.” Wakati kwevari, “Uyaizve kwendiri ngesure kwemazuva matatu.” Ndizvo vanhu vakapararira kuenda. Zvino mambo Rehobhoamu wakapangana nevanhu vasharuka avo vaiema pamberi pababa ake Soromoni ngenguva yaaiya achapona echiti, “Kupanganyi kwomunozopanga kwendiri kuti ndipingure ava vanhu?” Navo vakati kwaari, “Newe kudai wechizoitira nyasha kuneava vanhu, nokuvadakadzisa, nokuereketa mazwi akanaka kwevari, zvino vanozoita varanda vako mhera nariini.” Asi wakaramba kupanga kwevasharuka kwevakamupanga, wakaita bangano nevanhu vatsva vakakura naye, vechiema pamberi pake. Naye wakati kwavari, “Kupanganyi kwomunozondipanga imwimwi, kuti ndipingure ava vanhu vakaereketa kwendiri vechiti, ‘Ita kuti joka rababa ako raakaisa padera pedu rireruke?’ ” Vamuna vatsva vakakura naye vakati kwaari, “Iwewe unozopingura avo vanhu vakati kwouri, ‘Baba ako vakaita joka redu kuti rireme, asi iwewe ita kuti ritirerukire;’ izvi ndizvo zvounozoronza kwevari, ‘Chinwe changu chidoko chakafema kupinda chiunu chababa angu. Zvino apo baba angu pevaimutwarisa joka rinorema padera penyu, inini ndinozotutsira kweriri. Baba angu vakamuorora ngethabusi, asi inini ndinozomuorora ngezvinyaada.’ ” Ndizvo Jerobhoamu nevanhu veshe vakauya kunaRehobhoamu ngezuva rechitatu, kudai ngezvaakaronza mambo echiti, “Uyaizve kwendiri ngezuva rechitatu.” Mambo wakavapingura ngenjira yakakonza. Mambo Rehobhoamu wakaramba kupurutana kupanga kwevamuna vasharuka; wakavapingura kudai ngokupanga kwevamuna vatsva echiti, “Baba angu vakaita joka renyu kuti rireme, asi inini ndinozoritutsira; baba angu vakamuorora ngethabusi, asi inini ndinozomuorora ngezvinyaada.” Ndizvo mambo aazi kupurutana kuvanhu; ngokuti kwaiya kuemesa kwaMwari, kuti Mambo Mwari azadzise izwi rake, raakaereketa ndiAhija muShiro kunaJerobhoamu mukororo waNebhati. Naapo vaIsuraeri veshe vaona kuti mambo aazi kuvapurutana, vanhu vakapingura mambo vechiti, “Tinechikoaniswa chenyi kunaDhavhidha? Atina nhaka kunomukororo waJesi. Munhu weshe ngaapararire kuenda kutende rake, imwimwi vaIsuraeri! Zvino iwewe, Dhavhidha dzipenyere zvemhatso yako.” Ndizvo vaIsuraeri veshe vakapararira kuenda kumatende avo. Asi Rehobhoamu wakatonga padera pevanhu vaIsuraeri vaigara mumadhorobha aJudha. Naapo mambo Rehobhoamu paakatuma Hadhoramu, uwo waiya mutungamiriri wemishando yevasungwa, vaIsuraeri vakamuponda ngemapuwe, naye wakafa. Asi mambo Rehoboamu wakakasira kukwira mungoro yake, akatiza kuenda Jerusarema. Ndizvo vaIsuraeri vakamukira mhatso yaDhavhidha metsa nanyamashi. Naapo Rehobhoamu aguma Jerusarema, wakaunganidza vemhatso yaJudha neyaBhenjamini vamuna zana nemakumi masere emakumi emazana (180,000) vakatsanangurwa vari ngwazi dzokurwa, kuti varwe nevaIsuraeri, kuunzazve umambo kunaRehobhoamu. Asi izwi raMambo Mwari rakauya kunaShemaia munhu waMwari rechiti, “Ronza kunaRehobhoamu mukororo waSoromoni, mambo waJudha, nokuvaIsuraeri veshe vari muJudha neBhenjamini wechiti, ‘Unoronza izvi Mambo Mwari: Amuzokwiri nokuti kurwa nehama dzenyu. Hwirirai munhu weshe kumhatso yake, ngokuti ichi chiro chakaitwa ndini.’ ” Ndizvo vakapurutana mazwi aMambo Mwari, vakapetuka kubva koorwa naJerobhoamu. Rehobhoamu wakagara muJerusarema. Wakaaka ukona muJudha. Wakaaka Bhetherehema, Etamu, Thekoa, Bhethizuri, Sokho, Adhuramu, Gathi, Maresha, Zifi, Adhoraimu, Rakhishi, Azeka, Zora, Aijaroni naHebroni, madhorobha akashosherwa awo ari muJudha nomuBhenjamini. Wakagwinyisa marukumbati, akaisamwo nduna huru, madura ezvokudya, mafuta nevhini. Wakaisawomwo zvihlangu zvikuru nemikhondo mumadhorobha eshe, wakaita kuti agwinyiswe kakurutu. Ndizvo wairwirwa ndiJudha naBhenjamini. Vapristi nevaRevhi vaiya muIsuraeri reshe vakauya kwaari vechibva kunyika dzavo dzeshe. VaRevhi vakasiya nharaunda dzavo nezvifuyo zvavo, vakauya kwaJudha neJerusarema, ngokuti Jerobhoamu nevakororo vake vaiya vakavadzinga kubva kumishando yavo youpristi kunaMambo Mwari, naye wakaemesa vapristi vake kundau dzakakwirira, nepadera pezvimwari zvembudzi, nezvemakonyana zvaakaita. Naavo veshe vaiya vaemesa mwoyo yavo kutsvaka Mambo Mwari waIsuraeri, vakauya kubva kumadzinza eshe aIsuraeri kuenda Jerusarema, koopira midiro kunaMambo Mwari, Mwari wemadzibaba avo. Vakagwinyisa umambo hwaJudha, vakaita Rehobhoamu mukororo waSoromoni kuti aane simba makore matatu, ngokuti vakahamba makore matatu ngenjira dzaDhavhidha nedzaSoromoni. Rehobhoamu wakatora kuita mukadzi Maharathi, mwanasikana waJerimothi mukororo waDhavhidha, naAbhihairi mwanasikana waEriabhi mukororo waJesi. Wakamuberekera vakororo: Jeushi, Shemaria naZahamu. Ngesure kwake wakatora Maakha mwanasikana waAbhusaromu, uwo wakamuberekera Abhija, Atai, Ziza naSheromithi. Rehobhoamu wakada Maakha mwanasikana waAbhusaromu kupinda vakadzi vake veshe nemabunha (wakatora vakadzi gumi nevasere nemabunha makumi matanhatu; naye wakaita baba wevakororo makumi mairi navasere, nevanasikana makumi matanhatu.) Rehobhoamu wakaemesa Abhija mukororo waMaakha kuita mukuru, kuti aite mutongi pakati pehama dzake, ngokuti waida kumuita mambo. Naye wakaita ngokungwara, akaparadzira vamweni vevakororo vake munyika dzeshe dzaJudha nedzaBhenjamini, kumadhorobha eshe akashosherwa; wakavapa kudya kwakawanda, naye akavatsvakira vakadzi vakawanda. Naapo utongi hwaRehobhoamu hwagwinyiswa, simba rake rakura, akarekera mipango yaMambo Mwari, nevaIsuraeri veshe naye. Mugore rechishanu rokutonga kwamambo Rehobhoamu, ngokuti vakapauka kubva kunaMambo Mwari Shishaki mambo weEgipite wakarwisa Jerusarema, nengoro mazana gumi namairi (1,200), nevagadhi vemahachi makumi matanhatu emakumi emazana, (60,000) nevanhu vasikaerengeki vakauya naye kubva Egipite, vaRibhia, vaSukiimu, nevaEthiopia. Wakanyisa, akatora madhorobha akashosherwa aJudha, akaguma Jerusarema. Zvino Shemaia muprofeti wakauya kunaRehobhoamu nokuvakuru vaJudha, avo vaiya vaungana Jerusarema ngendaa yaShishaki, naye wakati kwevari, “Unoronza izvi Mambo Mwari: Imwimwi mwakandisiya, ndizvo neniwo ndamusiya munyara yaShishaki.” Ndizvo vakuru vaIsuraeri namambo vakadzipfaisa vechiti, “Mambo Mwari uri wakarurama.” Naapo Mambo Mwari aona kuti vakadzipfaisa, izwi raMambo Mwari rakauya kunaShemaia rechiti, “Vadzipfaisa ngokwavo, ndizvo andichazovapedzi, asi ndinozovarwira, noushungu hwangu ahuzodururwi padera peJerusarema ngenyara yaShishaki. Zvakanyadaro vanozoita varanda vake, kuti vazie muparadzaniso uripo pakati pemushando wangu nomushando wemadzimambo enyika.” Ndizvo Shishaki mambo weEgipite wakauya koorwisana neJerusarema; wakatora upfumi hwemhatso yaMambo Mwari noupfumi hwemhatso yamambo; wakatora zviro zveshe. Wakatorazve zvihlangu zvomukore zvakaitwa ndiSoromoni; asi mambo Rehobhoamu wakanasira pandau yazvo zvihlangu zvethusi, wakazvipira munyara dzenduna dzevarindi, vaingwarira musiwo wemhatso yamambo. Nguva dzeshe apo mambo aipinda mumhatso yaMambo Mwari, murindi waiuya akazvitwara echizviunzazve mukamera romurindi. Ngokuti wakadzipfaisa, ushungu hwaMambo Mwari hwakabva kwaari, ndizvo aazi kuvaparadza yaamho; zve munyika yaJudha zviro zveshe zvakahamba zvakanaka. Ndizvo mambo Rehobhoamu wakadzigwinyisa muJerusarema, naye akatonga. Rehobhoamu waiya nemakore makumi marongomuna narimwe apo paakatanga kutonga, wakatonga makore gumi namanomwe, muJerusarema dhorobha raakatsanangura Mambo Mwari kubva mukati mwemadzinza eshe aIsuraeri, kuti aise zina rakemwo. Zina ramai ake raizwi Naama muAmoni. Wakaita zvakashata ngokuti aazi kuemesa mwoyo wake kutsvaka Mambo Mwari. Zvino mishando yaRehobhoamu, kubvira ngeyokutanga neyokugumisira, aizi kunyorwa here muBhuku raShemaia muprofeti, neyaIdho mufemberi, kudai ngokunyorwa kwemibarirwana yavo? Zvino kurwa kwakaangira pakati paRehobhoamu naJerobhoamu. Rehobhoamu wakaata nemadzibaba ake, akaikwa mudhorobha raDhavhidha; naAbhija mukororo wake wakatonga pandau yake. Mugore regumi nemasere rokutonga kwaJerobhoamu, Abhija wakatanga kutonga padera paJudha. Wakatonga makore matatu muJerusarema. Zina ramai ake raizwi Mikhaia mwanasikana waUrieri weGibhea. Zvino kwaiyapo kurwa pakati paAbhija naJerobhoamu. Abhija wakaronga hondo yake yevanhu vari ngwazi vanoshinga, mazana marongomuna emakumi emazana (400,000) evamuna vakatsanangurwa; naJerobhoamu wakaronga hondo yake kurwa naye yevamuna vakatsanangurwa mazana masere emakumi emazana (800,000), vaiya ngwazi dzinoshinga. Zvino Abhija wakaema padera pomutunhu unozwi Zemaraimu, uri mukati mwenyika yemitunhu yaEfuremu, echiti, “Ndizwenyi, iwewe Jerobhoamu nevaIsuraeri veshe! Amuzii here kuti Mambo Mwari, Mwari waIsuraeri, wakapa kunaDhavhidha umambo kuti atonge padera paIsuraeri kunoti mhera nariini, kwaari nokunevana vake ngechitenderano chomunyu? Asi Jerobhoamu mukororo waNebhati muranda waSoromoni mukororo waDhavhidha wakamiruka, akarwisa mambo wake; nevamweni vamuna vasina shwiro vakaungana, kuti varwe naRehobhoamu mukororo waSoromoni, naapo Rehobhoamu achimutsva nomwoyo wake waitya, asikakoni kudzirwira. “Nazvino munoda kurwira kudusa umambo hwaMambo Mwari kubva kunyara yomukororo waDhavhidha, ngokuti muri mbungano huru, munemakonyana omukore, emwakaitirwa ndiJerobhoamu kuti aite zvimwari zvenyu. Amuzi kudzinga here vapristi vaMambo Mwari, mibarirwana yaAroni, nevaRevhi, mukadziitira vapristi venyu kudai ngevanhu venyika dzimweni? Kunyazwi ndiani unouya kuti adzipire anomukono mutsva nemagondohwe manomwe, unozoita mupristi weizvo zvimwari zvisiri Mwari wegwinyiso. Asi kwetiri, Mambo Mwari ndiMwari wedu, nesu atizi kumusiya. Tinavo vapristi vanoshandira Mambo Mwari, avo vari mibarirwana yaAroni, nevaRevhi ndivo vanoita mishando yavo. Vanopira kunaMambo Mwari mangwanani eshe nemadeekoni midiro yokupisha nemitombo inegwema rakanaka, vanoisa misara yezvingwa zvinopirwa, patafura romukore wakaereswa rakachena; nezvigadzikiro zvezvibani pamwepo nezvivheneko zvayo, kuti zvibake madeekoni eshe; ngokuti isusu tinongwarira kupanga kwaMambo Mwari, Mwari wedu, asi imwimwi mwakamurasha. Ringirai, Mwari unesu kuti atitungamirire, nevapristi vakabata magwama kuti varidzire nyandayeyo yehondo kurwa nemwi. A vaIsuraeri, musarwa naMambo Mwari, Mwari wemadzibaba enyu; ngokuti amuzobudiriri akadi.” Asi Jerobhoamu wakazvongesa vanhu vamweni ngesure kwavo; ndizvo varwi vake vaiya pamberi paJudha, naavo vakazvongeswa vaiya sure kwavo. Naapo vaJudha varingira sure, ringira, hondo yaiya yavatendenedza mberi nesure. Vakadaidzira kunaMambo Mwari, nevapristi vakaridza magwama. Zvino vamuna vaJudha vakadaidzira mhere yehondo. Naapo vanhu vaJudha vachadaidzira, Mwari wakanyisa Jerobhoamu nevaIsuraeri veshe pamberi paAbhija nevaJudha. Vamuna vaIsuraeri vakatiza kubva pamberi paJudha, naMwari wakavapira munyara dzavo. Abhija nevanhu vake vehondo vakavauraya vakawanda kakurutu; ndizvo kwakawa vamuna vakafa vaIsuraeri mazana mashanu emakumi emazana (500,000) vakatsanangurwa. Ndikwo kunyiswa kwevakaitwa vana vaIsuraeri ngouwo mukuwo, nevana vaJudha vakanyisa, ngokuti vakagonda kunaMambo Mwari, Mwari wemadzibaba avo. Abhija wakarumbirira Jerobhoamu, akatora madhorobha kubva kwaari: Bhetheri nemaguta aro, Jeshana nemaguta aro, naEfroni nemaguta aro. Jerobhoamu aazi kuchaane simbazve ngemazuva aAbhija; Mambo Mwari wakamuchaya, akafa. Asi Abhija wakakura musimba. Wakadzitorera vakadzi gumi nevarongomuna, akaita baba wevakororo makumi mairi navairi nevanasikana gumi navatanhatu. Mishando imweni yaAbhija, nenjira dzake, nezviito zvake, zvakanyorwa muBhuku yomuprofeti Idho. Ndizvo Abhija wakaata nemadzibaba ake, navo vakamuika mudhorobha raDhavhidha. Asa mukororo wake wakatonga pandau yake. Mumazuva ake nyika yaiya nokunyarara makore gumi. Asa wakaita zvakanaka nezvakarurama mukuona kwaMambo Mwari, Mwari wake. Wakadusa maarita ezvimwari zvipara, nendau dzakakwirira, akaputsa sika, akaputsira pashi sika dzokudira. Wakapanga Judha kuti atsvake Mambo Mwari, Mwari wemadzibaba avo, nokungwarira mupango nezvironzo. Wakadusazve kubva mumadhorobha eshe aJudha ndau dzakakwirira nemaarita okupishirapo mitombo inegwema rakanaka. Noumambo hwaiya nokunyarara pashi pake. Wakaaka madhorobha akashosherwa muJudha, ngendaa yokuti nyika yaiya nokunyarara. Kwaiya kusina hondo mumakore awo, ngokuti Mambo Mwari wakamupa kunyarara. Wakati kunaJudha, “Ngatiake aya madhorobha, tiatendenedze ngemarukumbati, tiise thawa, misiwo nemipiningidzo; nyika ichiri yedu, ngokuti takatsvaka Mambo Mwari, Mwari wedu; takamutsvaka naye wakatipa kunyarara kumarutii eshe.” Ndizvo vakaaka, vakabudirira. Asa waiya nehondo yevamuna vaJudha mazana matatu emakumi emazana (300,000) vaitwara zvihlangu nemikhondo, nevaBhenjamini vaitwara zvihlangu nevanofura ngemisee, vaiya mazana mairi nemakumi masere emakumi emazana (280,000); veshe ava vaiya ngwazi dzinoshinga. Zera weEthiopia wakabuda koorwa navo anehondo yevarwi vaiya mirioni (10,000,000) nengoro mazana matatu (300); vakaguma Maresha. Asa wakabuda kooshongana naye, navo vakaronga hondo dzavo mubani reZefatha muMaresha. Asa wakachema kunaMambo Mwari, Mwari wake, akati, “A Mambo Mwari, apana muparadzaniso kwouri pakudetsera vanesimba nevasina simba. Tidetsere, iwewe Mambo Mwari, Mwari wedu, ngokuti tinogonda kwouri, nomuzina rako tauya koorwa neiyi mbungano. A Mambo Mwari, ndiwe Mwari wedu; usatendera munhu kuti anyise padera pako.” Ndizvo Mambo Mwari wakanyisa vaEthiopia pamberi paAsa nepamberi paJudha; nevaEthiopia vakatiza. Asa nehondo yaiya naye vakavarumbirira metsa Gera, nevaEthiopia vakaurawa metsa pasisina naumwe wakasara; ngokuti vakapedzwa pamberi paMambo Mwari nepamberi pehondo yake. Vanhu vaJudha vakatora zvakachakatwa zvizhinji. Vakanyisa madhorobha eshe akatendenedza Gera, ngokuti kutyisa kwaMambo Mwari kwakaguma padera pavo. Vakaputsira pashi madhorobha eshe; ngokuti zvaiyapo zvakachakatwa zvakawanda kakurutu. Vakarwisazve matende aavo vaiya nezvibaya zvezvifuyo, vakatora makwai nembudzi zvakawanda nemakamera. Zvino vakahwirira Jerusarema. Mweya waMwari wakauya padera paAzaria mukororo waOdhedhi. Wakabuda kuenda kooshongana naAsa, wakati kwaari, “Ndizwe, iwewe Asa, nemwi mweshe vaJudha nevaBhenjamini; Mambo Mwari unemwi, apo muchiri naye. Kudai mwechimutsvaka, munozomuona; asi kudai mwechimurasha, naye unozomurasha. Panguva yakareba vaIsuraeri vakagara vasina Mwari wegwinyiso, vasina nomupristi wokudzidzisa, vasina nomupango. Asi apo mukutambudzika kwavo vakatenderukira kunaMambo Mwari, Mwari waIsuraeri, vakamutsvaka, wakaoneka kwevari. Munguvadzo zvaiya zvisikazi kuita nyore kwaari unobuda nokwaari unopotera, ngokuti kutambudzika kukuru kwakabata veshe vagari venyika. Vakaparadzwa kuita zvigurwa, dzinza rakaparadza dzinza, nedhorobha rakaparadza dhorobha, ngokuti Mwari wakavatambudza ngematambudziko eshe. Asi imwimwi, itai vakagwinya! Nyara dzenyu dzisapera simba, ngokuti mishando yenyu inozoripirwa.” Naapo Asa azwa mazwi aya, nezvakaprofetwa ndiAzaria mukororo waOdhedhi, wakashingiswa, akadusa miedzaniso inonyangadza kubva munyika yeshe yaJudha neyaBhenjamini, nokubva kumadhorobha eshe aakatora kubva kunyika yemitunhu yaEfuremu. Wakamusira arita raMambo Mwari iro raiya pamberi peruwanze rwemhatso yaMambo Mwari. Naye wakaunganidza veshe vaJudha nevaBhenjamini, naavo vakabva kunyika yaEfuremu, yaManase, neyokwaSimeoni, avo vaigara navo kudai ngevapara, ngokuti vakatizira kwaari ngokuwanda kubva kunyika yaIsuraeri, apo vaona kuti Mambo Mwari, Mwari wake unaye. Vakaungana pamwepo pachavo muJerusarema ngomwedzi wechitatu, ngegore regumi nemashanu rokutonga kwaAsa. Vakapira mudiro kunaMambo Mwari muzuva iro weizvo zvevakachakata, kabi mazana manomwe (700) nemakwai makumi emazana manomwe (7,000). Navo vakaita chitenderano chokutsvaka Mambo Mwari, Mwari wemadzibaba avo, ngomwoyo wavo weshe, nomweya wavo weshe. Kunyazwi ndiani usikatsvaki Mambo Mwari, Mwari waIsuraeri waizourawa, mudoko nokuti mukuru, mwamuna nokuti mukadzi. Vakapika mhiko kunaMambo Mwari ngeizwi guru nokudaidzira, nokuridza minanzi nemagwama. VaJudha veshe vakadakara ngemhiko; ngokuti vaiya vakapika ngomwoyo yavo yeshe, vakamutsvaka ngokudisisa kweshe kwavo; naye wakaoneka ndivo, naMambo Mwari wakavapa kuzorora kundau dzeshe dzinovatendenedza. Mambo Asa wakadusa Maakha mai ake kuti vasaita vahosi, ngendaa yokuti vakaita muedzaniso wokudira unonyangadza mugwasha. Asa wakaputsa muedzaniso wavo, wakaukuya akaupisha kuRwizi Kedhironi. Asi ndau dzakakwirira adzizi kuduswa kubva muIsuraeri. Zvakanyadaro mwoyo waAsa waiya wakaperera mazuva ake eshe. Naye wakaunza kumhatso yaMwari izvo zvipo zvemhiko zvababa ake nezvake, sirivha, mukore nezvidziyo. Kwaiya kusina hondo metsa ngegore remakumi matatu nemashanu rokutonga kwaAsa. Mugore remakumi matatu nematanhatu rokutonga kwaAsa, Bhaasha mambo waIsuraeri wakauya koorwa naJudha, naye wakaaka Rama, kuitira kuti asaapo unobuda nokuti kupotera kunaAsa mambo waJudha. Zvino Asa wakabudisa sirivha nomukore kubva kumhatso youpfumi hweshe hwaMambo Mwari, nohwemhatso yamambo, wakazvitumira kunaBhenihadhadhi mambo weAramu, waigara Dhamasekusi echiti, “Ngachiapo chitenderano pakati pedu iwewe neni, kudai ngezvechaiyapo pakati pababa ako nababa angu; ringira, ndinokutumira sirivha nomukore; enda woogura chitenderano chako naBhaasha mambo waIsuraeri, kuti iye abve kwendiri.” Bhenihadhadhi wakapurutana kunamambo Asa, wakatuma nduna dzehondo dzake kuti dzirwise madhorobha aIsuraeri. Vakanyisa Ijoni, Dhani, Abherimaimu nemadhorobha eshe okungwariremwo zviro eNafitari. Naapo Bhaasha azwa ndizvo, wakarekera kuaka Rama, wakarekera mushando wake. Zvino mambo Asa wakaunza vaJudha veshe, navo vakadusa mapuwe eshe eRama, nematanda aro, izvo zveshe zvaaiaka ndizvo Bhaasha; naye wakaaka ndizvo Gebha neMizipha. Ngenguvayo Hanani muprofeti wakauya kunaAsa mambo waJudha, wakati kwaari, “Ngokuti wakagonda kunamambo weAramu, usikagondi kunaMambo Mwari, Mwari wako, ndizvo hondo yamambo weAramu yakapokonyoka kubva munyara yako. Dzisaiyapo hondo huru here dzevaEthiopia nedzevaRibhia, vanengoro nevagadhi vemahachi vakawanda? Asi ngokuti wakagonda kunaMambo Mwari, iye wakavapira munyara dzako. Ngokuti madziso aMambo Mwari anoringira apo naapo kupotya nyika yeshe, kugwinyisa avo vanemwoyo yakaperera kwaari. Ndizvo muizvi waita ngoupenzi; ngokuti kubvira zvino munozorwa hondo.” Zvino Asa wakanyangadzwa ngomuprofeti, naye wakamuisa mumanguri mutirongo, ngokuti wakamunyangadza ngeiyi ndaa. NaAsa wakatambudza vamweni vevanhu ngomukuwo umwewo. Ringirai, mishando yaAsa kubvira yokutanga neyokugumisira, yakanyorwa muBhuku reMadzimambo aJudha naIsuraeri. Asa mugore remakumi matatu nemapfumbamwe rokutonga kwake wakabatwa ngenhenda mutsoka dzake, nenhenda yake yakaangirira kukura; kunyazwi mukurwara kwake aazi kutsvaka Mambo Mwari, asi wakatsvaka kudetserwa kubva kunyanga. Zvino Asa wakaata nemadzibaba ake, wakafa ngegore remakumi marongomuna narimwe rokutonga kwake. Vakamutsira muiba rake, raakadziitira emene mudhorobha raDhavhidha. Vakamuradzika mumubhedhi uwo waiya unemakha anegwema rakanaka, nembeu dzakaparadzana dzemitombo inegwema rakanaka yakanasirwa ngenyanga inozia mitombo; navo vakamuitira muriro mukurutu kumuremeredza. Jehoshafati mukororo wake wakatonga pandau yake, naye wakadzigwinyisa kuti arwe naIsuraeri. Wakaemesa varwi vake vehondo koorwa mumadhorobha eshe akashosherwa aJudha, wakaisa zvikwata zvehondo munyika yaJudha, nomumadhorobha aEfuremu, awo akatorwa ndibaba ake Asa. Mambo Mwari waiya naJehoshafati, ngokuti wakahamba ngenjira dzokutanga dzababa ake Dhavhidha. Aazi kutsvaka vanaBhaari, asi wakatsvaka Mwari wababa ake, akahamba ngemipango yake, haiwa kudai ngezviito zvaIsuraeri. Ndizvo Mambo Mwari wakagwinyisa umambo munyara mwake. VaJudha veshe vakaunza muthero kunaJehoshafati, naye waiya noupfumi hwakawanda nokuremeredzwa kukurutu. Mwoyo wake waiya wakashinga mukuteera njira dzaMambo Mwari; naye wakadusa ndau dzakakwirira nemagwasha kubva mukati mwaJudha. Mugore rechitatu rokutonga kwake wakatuma nduna dzake, Bhenihairi, Obhadhia, Zekharia, Nethaneri naMikhaia, kuti vadzidzise mumadhorobha aJudha. Vaiya pamwepo nevaRevhi, Shemaia, Nethania, Zebhadhia, Asaheri, Shemiramothi, Jehonathani, Adhonija, Thobhija naThobhadhonija; neava vaRevhi Erishama naJehoramu, vapristi. Vakadzidzisa muJudha, vanebhuku remipango yaMambo Mwari; vakahamba mumadhorobha eshe aJudha, vechidzidzisa pakati pevanhu. Kutyisa kwaMambo Mwari kwakauya padera poumambo hweshe hwomunyika yeshe yakatendenedza Judha, ndizvo avazi kurwa hondo naJehoshafati. Vamweni vevaFiristia vakaunza zvipo kunaJehoshafati, nesirivha kuita muthero; nevaArabhia vakamuunzira magondohwe makumi emazana manomwe nemazana manomwe (7,700), nemagotokoto makumi emazana manomwe nemazana manomwe (7,700). Jehoshafati wakakura kakurutu. Wakaaka muJudha masvingo nemadhorobha okungwariremwo upfumi. Wakaita mishando mikuru yakawanda mumadhorobha aJudha. Waiya nevarwi vehondo ngwazi dzakashinga muJerusarema. Uku ndikwo kuerengwa kwavo kudai ngokuteererana kwemhatso dzemadzibaba avo: vaJudha, nduna dzemakumi emazana: Adhina nduna huru, yaiya nengwazi dzakashinga mazana matatu emakumi emazana (300,000). Waiteera pasinde pake ndiJehohanani nduna yevarwi mazana mairi nemakumi masere emakumi emazana (280,000), nowaiteera pasinde pake ndiAmasia mukororo waZikhiri, uwo wakadzipira kumushando waMambo Mwari ngokuda, anavo varwi ngwazi mazana mairi emakumi emazana (200,000). VaBhenjamini: Eriadha ngwazi inoshinga, yaiya nevamuna mazana mairi emakumi emazana (200,000) vaitwara zvokurwa vaneuta nezvihlangu, nowaiteera pasinde pake ndiJehozabhadhi, nezana nemakumi masere emakumi emazana (180,000) vakanasirwa kurwa. Ava vaishandira mambo, ngepabanze peavo vaakaisa mambo kuti varwire madhorobha akashosherwa mukati mwaJudha weshe. Zvino Jehoshafati waiya noupfumi hwakawanda, nokuremeredzwa kukurutu; ngokuroodzana wakaita chitenderano pamwepo naAhabhi. Ngesure kwemakore akatikuti wakadzaka Samaria kunaAhabhi. Ahabhi wakamuuraira makwai nekabi zvakawanda, nevanhu vaiya naye, wakamunyengerera kuti akwire koorwa naRamothigireadhi. Ahabhi mambo waIsuraeri wakati kunaJehoshafati mambo waJudha, “Ungakwira neni here Ramothigireadhi?” Wakamupingura, “Inini ndakadai ndiwe, nevanhu vangu vakadai ngevako; nesu tinozoa newe mukurwa.” Asi Jehoshafati wakatiwo kunamambo waIsuraeri, “Bvunza kutanga, ndinokupota, kuzwa zvinoronza izwi raMambo Mwari.” Zvino mambo waIsuraeri wakaunganidza vaprofeti pamwepo mazana marongomuna (400), wakati kwevari, “Tinozokwira here Ramothigireadhi koorwa, nokuti tisakwirayo?” Navo vakati, “Kwirayo, ngokuti Mwari unozoripira munyara dzamambo.” Asi Jehoshafati wakati, “Apana here pano muprofeti umweni waMambo Mwari wokuti tibvunze ndiye?” Mambo waIsuraeri wakati kunaJehoshafati, “Uchiripo hake munhu umwe, wetingabvunza ndiye kunaMambo Mwari, Mikhaia mukororo waImira; asi inini ndinomuzonda, ngokuti aatongoprofeti kwendiri zvakanaka, asi zvakashata nguva dzeshe.” Jehoshafati wakati, “Mambo asaereketa kudaro.” Zvino mambo waIsuraeri wakadaidza nduna yake echiti, “Daidza ngokukasira Mikhaia mukororo waImira.” Zvino mambo waIsuraeri naJehoshafati mambo waJudha vaiya vakagara umwe ngaumwe padendemaro rake, vakapfekeswa zvipfeko zvavo, navo vaiya vakagara pambuwa pamhene pokupotera pamusiwo weSamaria; nevaprofeti veshe vaiprofeta pamberi pavo. Zedhekia mukororo waKhenaana wakadzinasirira nyanga dzesimbi, naye wakati, “Unoronza izvi Mambo Mwari: Ngenyanga idzi unozotunga vaAramu metsa vapedzwa.” Veshe vaprofeti vaiprofeta zvakatodzana vechiti, “Kwira Ramothigireadhi, unyise; ngokuti Mambo Mwari unozoripira munyara dzamambo.” Nhumwa iyo yakaenda koodaidza Mikhaia yakaereketa kwaari yechiti, “Ringira, mazwi evaprofeti anoereketa zvakanaka kunamambo, veshe umwe ngaumwe; ndizvo ngokudaro, ndinokupota, neako ngaaite kudai ngaavo, uerekete zvakanaka.” Asi Mikhaia wakati, “Kudai ngezvaanopona Mambo Mwari, kunyazwi ngechiri chaanozoronza Mwari wangu, ndicho chendinozoereketa.” Naapo aiya auya kunamambo, mambo wakati kwaari, “Mikhaia, tingaenda here Ramothigireadhi koorwa, nokuti tisaendayo?” Naye wakati kwaari, “Endai, mwoonyisa; vanozopirwa munyara dzako.” Asi mambo wakati kwaari, “Ndinozokupanga kanganai kuti uerekete gwinyiso rega kwendiri ngezina raMambo Mwari?” Zvino wakati kwaari, “Ndaona vaIsuraeri veshe vakapararira padera pemitunhu, kudai ngemakwai asina muushi; naMambo Mwari wakati, ‘Ava avana tenzi wavo; munhu weshe ngaaende kumhatso yake ngokunyarara.’ ” Mambo waIsuraeri wakati kunaJehoshafati, “Andizi kukuronzera here kuti aazoprofeti zviro zvakanaka kwendiri, asi zvakashata zvega?” Zvino Mikhaia wakati, “Ndizvo izwai izwi raMambo Mwari: Ndakamuona Mambo Mwari akagara padera pedendemaro rake, nehondo yeshe yomudenga yakaema ngokumudyo nokumuoshwe kwake. Mambo Mwari wakati, ‘Ndiani unozonyengerera Ahabhi mambo waIsuraeri, kuti akwire Ramothigireadhi, afe?’ Zvino umwe wakaereketa chiro chimwe noumweni chimweniwo, metsa mweya wakauya, ukaema pamberi paMambo Mwari, ukati, ‘Inini ndinozomunyengerera,’ Mambo Mwari wakati kwaari, ‘Unozomunyengerera ngenjiranyi?’ Wakati, ‘Ndinozobuda ndiite mweya wokunyepa mumiromo yevaprofeti vake veshe.’ Zvino Mambo Mwari wakati, ‘Iwewe unozomunyengerera, unozomunyisazve; endayo uite kudaro.’ Ndizvo, wona, Mambo Mwari waisa mweya wemanyepo mumiromo yeava vaprofeti vako; Mambo Mwari wakuemesera zvakashata.” Zvino Zedhekia mukororo waKhenaana wakakwedzera, wakamupamhadza padama rake, akati, “Ngeiri njira yowakahamba ndiyo mweya waMambo Mwari wechibva kwendiri kuereketa kwouri?” Mikhaia wakati, “Ringira, uchazoona ngeiro zuva rounozoenda koodzihwarisa mukamera riri ngomukati.” Mambo waIsuraeri zvino wakati, “Torai Mikhaia, mumupetudze kunaAmoni mutongi wedhorobha nokuna Joashi mukororo wamambo; mwechiti, ‘Unoronza izvi mambo: Isai munhu uyu mutirongo, mumupe chingwa chakatsonga nemvura, metsa ndapetuka mukunyarara.’ ” Mikhaia wakati, “Kudai wechizopetuka mukunyarara, Mambo Mwari aazi kuereketa kubudikidza ndini.” Naye wakati, “Izwanyi, imwimwi mweshe vanhu!” Ndizvo mambo waIsuraeri naJehoshafati, mambo waJudha, vakakwira Ramothigireadhi. Mambo waIsuraeri wakati kunaJehoshafati, “Inini ndinozodziitisa kuita kudai ngomunhu umweni, kuti ndiende koorwa hondo; asi iwewe pfeka zvokufuka zvako.” Ndizvo mambo waIsuraeri wakadziitisa kudai ngomunhu umweni; ndizvo vakaenda koorwa. Zvino mambo weAramu akapanga nduna dzengoro dzaiya naye echiti, “Musarwa nevadoko nokuti vakuru, kwega irwai namambo waIsuraeri.” Naapo nduna dzengoro dzaona Jehoshafati, dzakati, “Ndiye mambo waIsuraeri.” Ndizvo vakakunukuka kuti varwe naye; asi Jehoshafati wakadaidzira, naMambo Mwari wakamudetsera. Mwari wakaita kuti vabve kwaari, ngokuti apo nduna dzengoro dzaona kuti andiyepi mambo waIsuraeri, vakapetuka sure kubva koomurumbirira. Asi munhu wakatikuti wakakwamura uta wake mambundikidzira, akafura mambo waIsuraeri ngepamarimbanidziro pezvokupfeka zvokurwa zvake; ndizvo wakati kunomunhu wake wengoro, “Petuka, undibvise kubva muhondo, ngokuti ndaremadzwa.” Hondo yakapisha ngeiro zuva, namambo waIsuraeri wakatseyama kudzigwinyisa mungoro yake akaringirana navaAramu metsa madeekoni; zuva rodokupota wakafa. Jehoshafati mambo waJudha wakahwirira Jerusarema kumhatso yake zvakanaka. Jehu mukororo waHanani mufemberi wakabuda kooshongana naye, akati kunamambo Jehoshafati, “Unosisisa here kuti udetsere vasikadiri Mwari, wechivada avo vanonyenya Mambo Mwari? Ngendaa yeizvi ushungu hwaMambo Mwari huri padera pako. Zvakanyadaro zviripo zvakanaka zvinooneka mwouri, ngokuti wakaparadza sika dzaAshera dzokudira kubva munyika, newe wakanasirira mwoyo wako kutsvaka Mwari.” Jehoshafati wakagara muJerusarema; zvino wakabudazve wakaenda pakati pevanhu kubva Bheerishebha kunyika yemitunhu yaEfuremu, wakavaunzazve kunaMambo Mwari, Mwari wamadzibaba avo. Wakaemesa vatongi munyika, mumadhorobha eshe akashosherwa aJudha, dhorobha ngedhorobha. Wakati kunevatongi, “Pinimidzai chomunoita, ngokuti amutongi mwakaemera vanhu, asi mwakaemera Mambo Mwari; unemwi mukutonga. Ndizvo zvino kutyisa kwaMambo Mwari ngakugare padera penyu; ngwarai ngezvomunoita, ngokuti akuna kutonga kwakashata kunaMambo Mwari, Mwari wedu, nokuti kutsara vanhu, nokuti kuashira zvitengero.” Zve, Jehoshafati wakaemesawo muJerusarema vaRevhi vamweni nevapristi nenduna dzemhatso dzemadzibaba aIsuraeri, kuti vatongere Mambo Mwari, nokugura ndaa apo panophikisanwa. Vaiya nezvigaro zvavo Jerusarema. Wakavapanga echiti, “Iyi ndiyo njira yomunozoita ndiyo, mukutya Mambo Mwari, mukugondeka, nomwoyo weshe wakaperera. Naapo ndaa yaunzwa kwomuri yehama dzenyu avo vanogara mumadhorobha avo, ngendaa yokuparadza ngazi, nendaa yezvironzo, mipango, zviemeso nezvapupu, nemwi munozovapanga kuti vasazoshaisha kupauka pamberi paMambo Mwari, noushungu usauya padera penyu, nepadera pehama dzenyu. Itai izvi, nemwi amuzopauki. Ringirai, Amaria mupristi mukuru uri padera penyu mundaa dzeshe dzaMambo Mwari; naZebhadhia mukororo waIshumaeri mutongi wemhatso yaJudha mundaa dzeshe dzamambo; nevaRevhi vanozomushandira kudai ngevakuru pamberi penyu. Itai ngokushinga naMambo Mwari ngaave nevakarurama!” Ngesure kweizvi vaMoabhi nevaAmoni nevamweni vevaMeuni vakaguma kunaJehoshafati koorwa hondo. Vanhu vamweni vakauya kunaJehoshafati, vakamuronzera vechiti, “Kunouya mbungano huru yehondo koorwa newe inobva Edhomu noruseri rworuandhle; vatoapo paHazazoni-thama,” (iro rinozwi Engedhi.) Jehoshafati wakatya, wakadziemesera pachake kutsvaka Mambo Mwari, wakaita kuti vanhu vaere kudya munyika yeshe yaJudha. VaJudha vakaungana kukumbira kuti vadetserwe ndiMambo Mwari; vakabva kumadhorobha eshe aJudha kootsvaka Mambo Mwari. Jehoshafati wakaema pakati pomushongano waJudha neJerusarema, mumhatso yaMambo Mwari, pamberi poruwanze rutsva, naye wakati, “A Mambo Mwari, Mwari wemadzibaba edu, andiwepi here Mwari womudenga? Andiwepi here unotonga umambo hweshe hwemadzinza? Munyara dzako ririmwo simba nokugwinya, kuitira kuti kusazoapo naumwe ungaemesedzana newe. Auzi here, A Mwari wedu, kudzinga vanhu venyika iyi kubva pamberi pevanhu vako Isuraeri, newe ukaipa kumibarirwana yeshamwari yako Abrahama mhera nariini? Navo vakagaremwo, vakamuakiramwo mhatso yezina renyu vechiti, ‘Kudai kushata kwechizotigumira, shoti, kutongwa, denda rinotyisa nokuti nzara, tinozoema pamberi pemhatso iyi, nepamberi pako, ngokuti zina rako riri mumhatso iyi, techichema kwouri mukutambudzika kwedu, naapo unozozwa nokudetsera.’ Ndizvo zvino, ringira vanhu vaAmoni, nevanhu vaMoabhi, nevoMutunhu Seira, avo vousikazi kutendera Isuraeri kuti avachakate mukubuda kwavo kubva munyika yeEgipite, avo vevakarekera vakakunukuka vevasikazi kuparadza. Ringira njira yevanotiunzidzira ndiyo, vauya kootidzinga, kuti tibve munhaka yako, yowakatipa kuita nhaka yedu. A Mwari wedu, auzotongi padera pavo here? Ngokuti isusu atina simba rokurwa nembungano huru yakadai ngeiyi yauya koorwa nesu. Atizii nechokuita, asi madziso edu anoringira kwouri.” Vanhu veshe vaJudha vakaema pamberi paMambo Mwari, nevadoko vavo, vakadzi vavo, nevana vavo. Zvino Mweya waMambo Mwari wakauya padera paJahazieri mukororo waZekharia mukororo waBhenaia, mukororo waJeieri, mukororo waMatania, muRevhi wevakororo vaAsafi, ari pakati pembungano. Wakati, “Izwanyi, imwimwi mweshe vaJudha nevagari veJerusarema, newe mambo Jehoshafati: Unoronza izvi Mambo Mwari kwomuri, ‘Musatya nokuti kupera simba ngendaa yembungano huru iyi; ngokuti kurwa akusikwenyu, asi ngokwaMwari. Mangwani dzakai koorwa navo; vanozokwira ngokumawere eZizi; munozovaona kumagumo kwebani, ngepamberi peshango raJerueri. Hondo iyi aisi yenyu kurwa kuti muirwe; torai ndau dzenyu, mueme mwakanyarara, muone kunyisa kwaMambo Mwari kwaanomuitira, imwimwi vaJudha neJerusarema. Musatya, nokuti kupera simba; mangwani budai koorwa navo, ngokuti Mambo Mwari unozoa nemwi.’ ” Zvino Jehoshafati wakakotamisa hope yake pashi pamavhu, navo veshe vokwaJudha nevagari vemuJerusarema vakawa pashi pamberi paMambo Mwari, vechidira Mambo Mwari. NevaRevhi, vana vaKohathi nevana vaKhora, vakaema kukudza Mambo Mwari, Mwari waIsuraeri, ngeizwi gurutu. Navo vakamiruka mangwanani maishi, vakabuda kuenda mushango reTekoa; naapo vachabuda Jehoshafati wakaema akati, “Ndizwenyi, imwimwi vaJudha nevagari veJerusarema; tendai kunaMambo Mwari, Mwari wenyu, ngokudaro munozogwinyiswa; mugonde vaprofeti vake, nemwi munozobudirira.” Naapo paakapangana nevanhu, wakaemesa avo vaizoembera Mambo Mwari, kuti vamukudze muunaku hwokuchena kwake, apo vechienda pamberi pehondo vechiti, “Ngaabongwe Mambo Mwari, ngokuti rudo rwake runogara mhera nariini.” Naapo vechitanga kuemba nokukudza, Mambo Mwari wakaemesa varwi ngokufishika koorwisa vaAmoni, nevaMoabhi, nevoMutunhu Seira, avo vaiya vauya koorwisa vaJudha, ndizvo vakavauraya. Ngokuti vana vaAmoni nevaMoabhi vakamiruka koorwa nevagari voMutunhu Seira, kuvaparadza yaamho; naapo vaiya vapedza kuparadza vagari voMutunhu Seira, veshe vakadetserana kuurayana pachavo umwe ngaumwe. Naapo vaJudha vokwedzera kuthawa rokurindira romushango, vakaringira kumbungano; ringira, vaiya vaa miiri yakafa pamavhu; akuna naumwe wakapokonyoka. Naapo Jehoshafati nevanhu vake vaguma kuti vatore izvo zvakachakatwa kubva kwevari, vakaona pakati pavo zvifuyo zvakawanda, zviro zvakawanda, machira, zvinemeso zvinomutengo mukuru, izvo zvevakadzitorera pachavo, zvakawandisa kupinda izvo zvevaikona kutwara. Vakapedza mazuva matatu vechiunganidza zvakachakatwa, ngendaa youwandu hwazvo. Ngezuva rechirongomuna vakaungana pamwepo muBani reBherakha, ngokuti vakakudzapo Mambo Mwari; ndizvo zina rendau iyo yakadaidzwa kuti Bani reBherakha metsa nanyamashi. Zvino vanhu veshe vokwaJudha neveJerusarema, naJehoshafati ari pamberi pavo, vakapetuka Jerusarema ngokudakara, ngokuti Mambo Mwari wakavaita kuti vadakare padera pemagaa avo. Vakaguma Jerusarema kumhatso yaMambo Mwari, vane magitari, zvidangari nemagwama. Nokutyisa kwaMwari kwaiya padera poumambo hweshe hwenyika, apo pevakazwa kuti Mambo Mwari wakarwa namagaa aIsuraeri. Ndizvo umambo hwaJehoshafati hwaiya nokunyarara, ngokuti Mwari wake wakamupa kuzorora kundau dzeshe dzakamutendenedza. Ndizvo Jehoshafati wakatonga padera paJudha. Waiya anemakore makumi matatu namashanu apo paakaamba kutonga; wakatonga makore makumi mairi namashanu muJerusarema. Zina ramai ake raizwi Azubha mwanasikana waShirihi. Wakahamba munjira yaAsa baba ake, aazi kupauka kubva kweiri, echiita izvo zvakanaka mukuona kwaMambo Mwari. Asi ndau dzakakwirira adzizi kuduswa; ngokuti vanhu vaiya vasati vaemesa mwoyo yavo kunaMwari wemadzibaba avo. Zvino mishando imweni yaJehoshafati kubvira yokutanga neyokupedzisira, yakanyorwa muUrongwa yaJehu mukororo waHanani, uwo wakanyorwa ndiye muBhuku reMadzimambo aIsuraeri. Ngesure kweizvi Jehoshafati mambo waJudha wakaita ukama naAhazia mambo waIsuraeri, uwo wakaita zvakashata kakurutu. Wakadzibatanidza pamwepo naye mukunasira ngarava dzokuenda Tharshishi; navo vakanasira ngarava muEzionigebha. Naapo Erieza mukororo waDhodhavhahu weMaresha wakaprofetira Jehoshafati echiti, “Ngokuti wakadzibatanidza naAhazia, Mambo Mwari unozoparadza mishando yako.” Nengarava dzakapwanyika dzikakorera kuenda Tharshishi. Jehoshafati wakaata nemadzibaba ake, wakaikwa nemadzibaba ake mudhorobha raDhavhidha. Jehoramu mukororo wake wakatonga pandau yake. Waiya nehama, vakororo vaJehoshafati: Azaria, Jehieri, Zekharia, Azaria, Mikhaeri naShefatia; veshe ava vaiya vakororo vaJehoshafati mambo waJudha. Baba avo vakavapa zvipo zvikurutu zvesirivha, mukore, nezviro zvimweni zvinomutengo mukuru, nemadhorobha akashosherwa aJudha; asi wakapa umambo kunaJehoramu, ngokuti ndiye waiya dangwe. Naapo Jehoramu akwira padendemaro rababa ake, wakagwinyiswa, wakauraya hama dzake dzeshe ngeshoti, nevamweniwo vevakuru vaIsuraeri. Jehoramu waiya nemakore makumi matatu nemairi apo paakatanga kutonga, naye wakatonga makore masere muJerusarema. Wakahamba ngenjira dzemadzimambo aIsuraeri, kudai ngezvevakaita vemhatso yaAhabhi; ngokuti wakaroora mwanasikana waAhabhi. Naye wakaita izvo zvakashata mukuona kwaMambo Mwari. Asi zvakanyadaro Mambo Mwari aazi kuparadza mhatso yaDhavhidha, ngendaa yechitenderano chaakaita naDhavhidha, nokudai ngezvaakagondisa kuti unozopa kujeka kwaari nokumibarirwana yake mhera nariini. Mumazuva ake vaEdhomu vakamukira utongi hwaJudha, navo vakadziemesera mambo wavo. Ndizvo Jehoramu wakabuda nenduna huru dzake, nengoro dzake dzeshe. Wakamiruka usiku, akarwisa vaEdhomu avo vaiya vakamutendenedza nenduna dzake dzengoro. Ndizvo vaEdhomu vanondomukira utongi hwaJudha metsa nanyamashi. Panguvayo veRibhinawo vakamukira kubva pashi penyara yake; ngokuti iye waiya akasiya Mambo Mwari, Mwari wemadzibaba ake. Zve, wakaemesa ndau dzakakwirira munyika yemitunhu yaJudha, naye wakatungamirira vagari veJerusarema kuita zvifebi, wakaita kuti vaJudha vapauke. Tsamba yakauya kwaari yakabva kunaErija muprofeti yechiti, “Unoronza izvi Mambo Mwari, Mwari waDhavhidha baba ako: Ngokuti auzi kuhamba ngenjira dzaJehoshafati baba ako, nokuti ngenjira yaAsa mambo waJudha, asi wakahamba kudai ngenjira dzemadzimambo aIsuraeri, wakatungamirira Judha nevagari veJerusarema kuita zvifebi, kudai ngemhatso yaAhabhi yakatungamirira vaIsuraeri kuita zvifebi, ngokuti wakaurayawo hama dzako, nhengo dzemhatso yababa ako, avo vaiya vakanaka kupinda iwewe, ringira, Mambo Mwari unozounza padera pevanhu vako denda rakashata, vana vako, vakadzi vako, nepezviro zvako zveshe. Newe pachako unozorwara nhenda yakashata kakurutu nhenda yomundani mwako, metsa noura hwako hwabuda kubanze zuva ngezuva ngendaa yenhenda.” Mambo Mwari wakamusira Jehoramu ushungu hwevaFiristia nowevaArabhia, avo vanogara pasinde neEthiopia. Navo vakakwira koorwa naJudha, vakarirwisa, vakapinda mukati mwaro, vakatora zviro zveshe zvevakaona zvomumhatso yamambo, pamwepo nevakororo vake nevakadzi vake; ndizvo akuna mukororo naumwe wakasara kwaari ngepabanze paJehoahazi mukororo wake mudoko. Zvino ngesure kweizvi Mambo Mwari wakaunza mumaura ake nhenda isikarapiwi. Munguva iyo, pakaperera makore mairi, maura ake akabuda kubanze, ngendaa yenhenda, naye wakafa mukurwadziwa kukurutu. Vanhu vake mukumuremeredza avana chevakapishira kwaari, kudai ngokupishira kwavakaita kunemadzibaba ake. Waiya nemakore makumi matatu namairi apo paakatanga kutonga, naye wakatonga muJerusarema makore masere. Wakafa, pasina naumwe waimutsumba. Vakamuika mudhorobha raDhavhidha, asi haiwa mumaiba emadzimambo. Vagari veJerusarema vakaita Ahazia mukororo wake mudoko mambo pandau yake; ngokuti zvikwata zvevanhu zvakauya nevaArabhia kukamba zvaiya zvauraya vakororo vakuru veshe. Ndizvo Ahazia mukororo waJehoramu wakatonga kuita mambo waJudha. Ahazia waiya anemakore makumi marongomuna nemairi apo paakatanga kutonga, naye wakatonga gore rimwe muJerusarema. Zina ramai ake raizwi Atharia muzukurukadzi waOmuri. Wakahambawo ngenjira dzemhatso yaAhabhi, ngokuti mai ake ndivo vaiya mupangi mukuita zvakashata. Wakaita zvakashata mukuona kwaMambo Mwari, kudai ngezvakaitwa ngemhatso yaAhabhi; ngokuti ngesure kwokufa kwababa ake ndivo vakaita vapangi vake, mukuparadzwa kwake. Wakatoteera nokupanga kwavo, akaenda naJoramu mukororo waAhabhi mambo waIsuraeri kuti vandorwa hondo naHazaeri mambo weAramu muRamothigireadhi. VaAramu vakaremadza Joramu, naye wakahwirira kuti arapwe muJezireeri maronda aakaremadzwa muRama, apo paakarwa naHazaeri mambo weAramu. NaAhazia mukororo waJehoramu mambo waJudha wakadzaka koona Joramu mukororo waAhabhi muJezireeri, ngokuti wairwara. Asi kunyiswa kwaAhazia kwaiya kwakaemeswa ndiMwari kuti kuitike ngendaa yokuenda kwaakaita kunaJoramu. Ngokuti apo agumapo, wakabuda naJoramu koorwa naJehu mukororo waNimishi, uwo waakadzodza Mambo Mwari kuti aparadze mhatso yaAhabhi. Naapo Jehu echiunza kutongwa padera pemhatso yaAhabhi, wakashongana nevakuru vaJudha, nevakororo vehama dzaAhazia, avo vaishandira Ahazia, naye wakavauraya. Wakatsvaka Ahazia, uwo wakabatwa echidzifisha muSamaria, naye wakaunzwa kunaJehu, navo vakamuuraya. Vakamuika, ngokuti vakati, “Muzukuru waJehoshafati, uwo wakatsvaka Mambo Mwari ngomwoyo wake weshe.” Nemhatso yaAhazia yaiya isina naumwe waikona kutonga umambo. Zvino apo Atharia mai aAhazia vaona kuti mukororo wavo wafa, wakamiruka kooparadza veshe vorudzi rwoumambo hwemhatso yaJudha. Asi Jehoshabheathi, mwanasikana wamambo, wakatora Joashi mukororo waAhazia, wakamunyongorosa kubva pakati pevakororo vamambo, avo vaiya vechida kuurawa, wakamuisa pamwepo nomungwariri wake mukamera rokuata. Ndizvo Jehoshabheathi mwanasikana wamambo Jehoramu, mukadzi waJehoiadha mupristi (ngokuti waiya hanzvadzi yaAhazia,) wakamufisha kubva kunaAtharia, ndizvo aazi kumuuraya. Wakagara navo akafishwa mumhatso yaMambo Mwari makore matanhatu, naapo Atharia wakatonga panyika. Asi mugore rechinomwe Jehoiadha wakadzigwinyisa, wakatora nduna dzemazana kuita bangano nadzo, Azaria mukororo waJerohamu, Ishumaeri mukororo waJehohanani, Azaria mukororo waObhedhi, Maaseia mukororo waAdhaia, naErishafati mukororo waZikhiri. Navo vakaenda ngomuJudha mweshe, vakaunganidza vaRevhi kubva kumadhorobha eshe aJudha, nevakuru vemhatso vemadzibaba aIsuraeri, navo vakauya Jerusarema. Zvino mbungano yeshe yakaita chitenderano namambo mumhatso yaMwari. Jehoiadha wakati kwevari, “Ringirai, uripano mukororo wamambo! Ngaatonge, kudai ngezvaakagondisa Mambo Mwari ngendaa yevakororo vaDhavhidha. Izvi ndizvo zviro zvomunozoita: rupande rumwe rwenyu rwechitatu rwevapristi nevaRevhi vanouya pabingo ngeSabatha munozoita varindi vemisiwo, rupande rumweni rwechitatu runozoapo kumhatso yamambo, norupande rumweni rwechitatu runozoa patsikiro romusiwo; nevanhu veshe vanozoa pamaruwanze emhatso yaMambo Mwari. Musatendera naumwe kuti apotere mumhatso yaMambo Mwari, kwega vapristi, naavo vanoshandamwo vevaRevhi; ndivo vanozopotera, ngokuti vakacheneswa, asi vanhu vamweni veshe vanozongwarira kupanga kwaMambo Mwari. VaRevhi vanozotendenedza mambo, umwe ngaumwe anezvokurwa zvake munyara yake; kunyazwi ndiani unozopotera mumhatso unozourawa. Garai namambo apo echipinda mukati naapo echibuda.” VaRevhi nevaJudha veshe vakaita kudai ngezvaakavapanga zveshe Jehoiadha mupristi; umwe ngaumwe wakaunza vanhu vake avo vaizopinda pabingo ngezuva reSabatha, naavo vaibuda ngezuva reSabatha; ngokuti Jehoiadha mupristi aazi kuparadza zvikwata. Jehoiadha mupristi wakapa kunduna dzezana mikhondo, nezvihlangu zvikuru nezvidoko zvaiya zvamambo Dhavhidha, zvaiya mumhatso yaMwari; naye wakaemesa vanhu veshe kuita varindi vamambo, munhu weshe anechokurwa ndicho munyara, kubvira ngokubani kwemhatso nokuenda dera kwemhatso kutendenedza arita nemhatso. Zvino wakabudisa mukororo wamambo, vakaisa dzungudza padera pake, vakamupa bhuku rechitenderano; vakamuita mambo. Jehoiadha nevakororo vake vakamudzodza vechiti, “Mambo pona mhera nariini!” Naapo Atharia azwa bope revanhu vairumba nokukudza mambo, wakapinda mumhatso yaMambo Mwari mune vanhu; naapo aringira, akaona mambo akaema pasinde pesika yake pokupotera mukati, nenduna huru nevaridzi vemagwama pasinde pamambo, nevanhu veshe venyika vechidakara, vechiridza magwama, nevaembi vanezviro zvokuemba ndizvo, vechitungamira mukudakara. Atharia wakabaura zvokufuka zvake, akachema echiti, “Kumukira! Kumukira!” Zvino Jehoiadha mupristi wakabudisa nduna huru dzaiya dzaakaemeswa padera pehondo, echiti kwevari, “Mubudisenyi kubanze, pakati pemisara yavarindi; kunyazwi ndiani unomuteera ngaaurawe ngeshoti.” Ngokuti mupristi wakati, “Musamuuraira mumhatso yaMambo Mwari.” Ndizvo vakamubata; naye waipinda pamusiwo wemahachi wemhatso yamambo, vakamuurairapo. NaJehoiadha wakaita chitenderano pakati pake nevanhu veshe namambo, kuti vanosisira kuita vanhu vaMambo Mwari. Zvino vanhu veshe vakaenda kumhatso yaBhaari, vakaipwanyira pashi; vakaputsa maarita ake nemiedzaniso yake kuita zvigurwa, vakauraya Mathani mupristi waBhaari pamberi pemaarita. Jehoiadha wakaemesa mishando yokurindwa kwemhatso yaMambo Mwari munyara dzevapristi vevaRevhi, avo vaakaronga Dhavhidha mumhatso yaMambo Mwari kuti vapire midiro yokupisha yaMambo Mwari, kudai ngezvakanyorwa mumipango yaMosi, ngokudakara nokuemba, kudai ngezvaakaemesa Dhavhidha. Wakaemesa varindi pamisiwo yemhatso yaMambo Mwari, kuti kusaapo naumwe unopinda wakasvipiswa ngechiro kunyazwi ngechiri. Naye wakatora nduna huru, vakuru, vatongi vevanhu, nevanhu veshe venyika, vakadzaka namambo kubva kumhatso yaMambo Mwari; vakahamba ngepamusiwo wedera kupotera mumhatso yamambo. Vakagadzika mambo padendemaro rake roumambo. Ndizvo vanhu veshe venyika vakadakara, nedhorobha raiya nokunyarara, ngesure kwokuurawa kwaAtharia ngeshoti. Joashi waiya nemakore manomwe apo paakaamba kutonga, naye wakatonga makumi marongomuna emakore muJerusarema. Zina ramai ake raizwi Zibhia weBheerishebha. Joashi wakaita zvakanaka mukuona kwaMambo Mwari mazuva eshe okupona kwaJehoiadha mupristi. Jehoiadha wakamutsvakira vakadzi vairi, naye wakabara vakororo nevanasikana. Ngesure kweizvi Joashi wakadziemesera kunasirisa mhatso yaMambo Mwari. Naye wakaunganidza pamwepo vapristi nevaRevhi, akati kwevari, “Budai muende mumadhorobha eshe aJudha, muunganidze mare kubva kuvaIsuraeri veshe kuti munasirise mhatso yaMwari wenyu gore ngegore, muone kuti mwazviita ngokukasira.” Asi zvakanyadaro vaRevhi avazi kukasira. Ndizvo mambo wakadaidza Jehoiadha mukuru, akati kwaari, “Auzi kuita ngenyi kuti vaRevhi vaunze mare yemuthero kubva Judha neJerusarema, kudai ngechironzo chaMosi muranda waMambo Mwari, newomushongano waIsuraeri, newetende rechitenderano?” Ngokuti vakororo vaAtharia, iro dzimai rakashata, vakaputsa kupinda mumhatso yaMwari nokushandisa zviro zvaiya zvakapirwa kumhatso yaMambo Mwari, vakazvipira kunaBhaari. Ndizvo mambo wakavapanga, vakanasira bhokisi, vakarigadzika ngepabanze pemusiwo wemhatso yaMambo Mwari. Vakadaidzira mukati mwaJudha nomukati mweJerusarema reshe kuti vaunze mare yomuthero yakaemeserwa vaIsuraeri ndiMosi muranda waMwari mushango. Vatungamiriri veshe nevanhu veshe vakadakara, vakaunza mithero yavo, vakaiisa mubhokisi, metsa razara. Mukuwo weshe werakaunzwa bhokisi kunduna dzamambo ngenyara dzevaRevhi, naapo vaona kuti mare yaiya yakawanda mukati mwaro, munyori wamambo nenduna yomupristi mukuru vaizouya nokudurura bhokisi nokuritora, nokuripetudza nokurigadzika pandau yaro. Ndizvo vakaita kudaro zuva ngezuva, vakaunganidza mare ngokuwandisa. Mambo naJehoiadha vakaipa kuneavo vaiya vakuru mumushando wemhatso yaMambo Mwari, navo vakatora vaaki nevatsetsi kuti vanasirise mhatso yaMambo Mwari, naavo vaikona kushanda ngesimbi nethusi kuti vaakise mhatso yaMambo Mwari. Ndizvo avo vakaemeswa mumushando vakashanda vakanasirisa ngenyara dzavo, vakaupedza, navo vakanasirisa mhatso yaMwari kudai ngechiemo chayo, vakaigwinyisisa. Naapo vaiya vapedza, vakaunza mare yakasara kunamambo nokunaJehoiadha, vakanasira ndiyo zvidziyo zvemhatso yaMambo Mwari, zvidziyo zvokushandisa, zvokupira midiro yokupisha, zvikwaku, zvidziyo zvomukore nezvesirivha. Vakapira midiro yokupisha nguva dzeshe mumhatso yaMambo Mwari mumazuva eshe okupona kwaJehoiadha. Asi Jehoiadha wakakura kuita musharuka naye wakafa; wakafa aane makore zana nemakumi matatu (130). Navo vakamuika mudhorobha raDhavhidha pakati pemadzimambo, ngokuti waiya akaita zvakanaka muIsuraeri mweshe, kunaMwari nokumhatso yake. Zvino ngesure kwokufa kwaJehoiadha kwakauya vakuru vekwaJudha, akakudza mambo; zvino mambo wakavapurutana. Navo vakasiya mhatso yaMambo Mwari, Mwari wemadzibaba avo, vakadira sika dzokudira nemiedzaniso. Noushungu hwakaguma padera paJudha neJerusarema ngendaa yokupauka kwevakaita. Asi wakatuma vaprofeti pakati pavo, kuti vavapetudze kunaMambo Mwari; navo vakaita chapupu kwevari, asi avazi kupurutana. Zvino Mweya waMwari wakabata Zekharia mukororo waJehoiadha mupristi, naye wakaema pakaturama pamberi pevanhu, wakati kwevari, “Unoronza izvi Mwari, ‘Munopauka ngenyi kubva mumipango yaMambo Mwari, kuti musabudirira? Ngokuti imwimwi mwasiya Mambo Mwari, wamusiyawo imwimwi.’ ” Asi vakapangana kumumukira, ngokupanga kwamambo vakamuponda ngemapuwe muruwanze rwemhatso yaMambo Mwari. Joashi mambo aazi kukarakadza nyasha dzaJehoiadha baba vaZekharia dzaakaita kwaari, asi wakauraya mukororo wake. Naapo echifa, wakati, “Mambo Mwari ngaaone ichi, achiunzidzire!” Kumagumo egore, hondo yevaAramu yakauya koorwa naJoashi. Vakaguma Judha neJerusarema, vakauraya vakuru veshe vevanhu kubva pakati pavo, vakatumira zveshe zvakachakatwa zvevakatora kunamambo weDhamasekusi. Kunyazwi hondo yevaAramu yakauya iri zvikwata zvishomani zvevanhu, Mambo Mwari wakapira hondo huru munyara dzavo, ngendaa yokuti vaiya vakasiya Mambo Mwari, Mwari wemadzibaba avo. Ndizvo vakatonga Joashi. Naapo vaiya vabva kwaari, vechimusiya aremadzwa kakurutu, varanda vake vakamumukira ngendaa yengazi yevakororo vaJehoiadha mupristi, vakamuuraya ari mumubhedhi wake. Ndizvo wakafa; vakamutsira mudhorobha raDhavhidha, asi avazi kumuika mumaiba emadzimambo. Avo vakamumukira ndiZabhadhi mukororo waShimeathi muAmoni, naJehozabhadhi mukororo waShimirithi wevaMoabhi. Zvino ngendaa yevakororo vake, nemazwi makuru echiprofeti akaereketwa ngendaa yake, nokuakiswa kwemhatso yaMambo Mwari, ringira zvakanyorwa mududziro rebhuku rendaa dzemadzimambo. NaAmazia mukororo wake wakatonga pandau yake. Amazia wakatanga kutonga anemakore makumi mairi nemashanu, naye wakatonga muJerusarema makore makumi mairi nemapfumbamwe. Zina ramai ake raizwi Jehoadhani weJerusarema. Naye wakaita zvakarurama mukuona kwaMambo Mwari, asi haiwa ngomwoyo wakaperera. Ngokukasira apo umambo hwagwinyiswa munyara dzake, wakauraya varanda vake, avo vaiya vakauraya mambo baba ake. Asi aazi kuuraya vana vavo, asi wakaita kudai ngezvakanyorwa mumipango, mubhuku raMosi, apo paakapanga Mambo Mwari echiti, “Madzibaba avazourawi ngendaa dzevana vavo, nevana avazourawi ngendaa dzemadzibaba avo, asi munhu weshe unozofa ngendaa yokushaisha kwake.” Amazia wakaunganidza vanhu vaJudha pamwepo, wakavaemesa ngemhatso dzemadzibaba pashi penduna dzemakumi emazana nedzemazana, veshe vaJudha nevaBhenjamini. Wakaerenga veshe kubvira kunevane makore makumi mairi kuenda mberi, wakaona kuti mazana matatu emakumi emazana (300,000) evamuna vakatsanangurwa, vaikona kubuda koorwa hondo, vaikona kutwara mukhondo nechihlangu. Wakathorazve ngwazi kubva muIsuraeri, zana remakumi emazana (100,000), wakadzibhadhara makhirogramu esirivha aida kukwana makumi emazana matatu nemazana marongomuna (3,400). Asi munhu waMwari wakauya kwaari echiti, “A mambo, usatendera kuti hondo yaIsuraeri iende newe, ngokuti Mambo Mwari aari kuvaIsuraeri akadi, nokuvana vaEfuremu veshe. Asi kudai wechida kuenda, enda hako wega woorwa; ita unogwinya mukurwa, nokuti Mwari unozoita kuti uwe pamberi pegaa rako; ngokuti Mwari unesimba rokudetsera nokuti kudzasa pashi.” Amazia wakati kunomunhu waMwari, “Asi tinozoitenyi ngemakhirogramu esirivha makumi emazana matatu nemazana marongomuna (3,400) etakabhadhara hondo yaIsuraeri ndiwo?” Munhu waMwari wakapingura, akati, “Mambo Mwari unokona kukupa zvakawanda kupinda izvo.” Zvino Amazia wakapetudza hondo iyo yakauya kwaari yechibva kwaEfuremu, kuti ihwirirezve kanyi. Asi ushungu hwavo hwakabaka kakurutu kuvaJudha, navo vakahwirira kanyi kwavo vakatseneka kakurutu. Amazia wakadzigwinyisa, wakatungamirira vanhu vake; wakaenda navo mubani romunyu, akauraya vanhu veSeira gumi remakumi emazana (10,000). Vanhu vaJudha vakabata vamweni vakasara vechipona gumi remakumi emazana (10,000), vakavaunza padera pebuwe, rakaita ruware, vakavakandira pashi kubvapo, ndizvo vakagukaguka veshe kuita zvigurwa. Asi vanhu vehondo vaakapetudza kanyi Amazia, kuti vasaenda koorwa naye, vakauya vakaparadza madhorobha aJudha, kubvira Samaria metsa kuguma Bhethihoroni; vakaurayamwo makumi emazana matatu (3,000) navo vakatora zvakachakatwa zvizhinji. Zvino ngesure Amazia apetuka kubva koouraya vaEdhomu, wakaunza zvimwari zvevanhu vaSeira, wakazvigadzika kuti zviite zvimwari zvake, naye wakazvidira, wakapisha mutombo unegwema rakanaka kwezviri. Ndizvo ushungu hwaMambo Mwari hwakabaka kunaAmazia, wakatuma muprofeti kwaari, uwo wakati kwaari, “Wakatsvaka ngenyi zvimwari zvevanhu, zvisikazi kukona kurwira vanhu vazvo kubva kunyara yako?” Asi apo achaereketa mambo wakati kwaari, “Takakuita mupangi wamambo here iwewe? Rekera! Ungaurairwenyi iwewe?” Ndizvo muprofeti wakanyarara, asi wakati, “Ndinozia kuti Mwari waemesa kukuparadza, ngendaa yokuti waita izvi, newe auzi kupurutana kupanga kwangu.” Zvino Amazia mambo waJudha wakatsvaka zano, akatuma kunaJoashi, mukororo waJehoahazi, mukororo waJehu, mambo waIsuraeri, wakati, “Uya, tiringirane hope kuhope.” NaJoashi mambo waIsuraeri wakatumira izwi kunaAmazia mambo waJudha echiti, “Rukato rwaiya muRebhanoni rwakatumira kumusedhari waiya muRebhanoni, rwechiti, ‘Ipa mwanasikana wako kunomukororo wangu kuita mukadzi wake;’ asi chikara chomushango reRebhanoni chakapindapo, chakatsikira pashi rukato. Iwewe unoti, ‘Ringira, ndanyisa vaEdhomu;’ nomwoyo wako unodzikudza mukuganza. Zvino gara kanyi; ngenyi wechidzitsvakira madambudziko kuita kuremadzwa kwako, kuti umiremwo, iwewe pamwepo nevaJudha vanewe?” Asi Amazia aazi kupurutana; ngokuti zvakabva kunaMwari, kuti avapire munyara dzemagaa avo, ngokuti vaiya vatsvaka zvimwari zveEdhomu. Ndizvo Joashi mambo waIsuraeri wakakwira; vakaonana hope kuhope mukurwa, iye naAmazia mambo waJudha, kuBhetishemeshi, iro riri raJudha. VaJudha vakanyiswa ngevaIsuraeri; veshe vakatiza munhu umwe ngaumwe kuenda kanyi kwake. Joashi mambo waIsuraeri wakabata Amazia mambo waJudha, mukororo waJoashi, mukororo waAhazia, paBhethishemeshi; wakamuunza Jerusarema, naye wakaputsira pashi rukumbati rweJerusarema kubvira paMusiwo waEfuremu metsa kuMusiwo wokuKhona, nharauko yacho yaida kuita mamitha mazana mairi (200). Naye wakatora zveshe mukore nesirivha, nezvidziyo zveshe zvaiya naObhedhedhomu mumhatso yaMwari; wakatorazve upfumi hwemhatso yamambo, neavo vanhu vaiya vakaitwa chibatiso, naye wakahwirira Samaria. Amazia mukororo waJoashi mambo waJudha wakapona makore gumi nemashanu ngesure kwokufa kwaJoashi mukororo waJehoahazi mambo waIsuraeri. Zvino mishando imweni yaAmazia, yokutanga neyokugumisira, aizi kunyorwa here muBhuku reMadzimambo aJudha neaIsuraeri? Kubvira panguva yaakapauka Amazia kubva kunaMambo Mwari, vakapangana zano rokumumukira muJerusarema; naye wakatizira Rakhishi. Asi vakatuma vanhu, vakamuteera Rakhishi, vakamuuraireyo. Vakamutwara ngemahachi; wakaikwa pamwepo nemadzibaba ake mudhorobha raDhavhidha. Zvino vanhu veshe vaJudha vakatora Uzia, uwo waiya nemakore gumi nematanhatu, vakamuemesa kuita mambo pandau yababa ake Amazia. Wakaakisa Erothi, akarihwirinza kunaJudha, ngesure apo mambo aata nemadzibaba ake. Uzia wakatanga kutonga anemakore gumi nematanhatu, naye wakatonga makore makumi mashanu nemairi muJerusarema. Zina ramai ake raizwi Jekhoria weJerusarema. Naye wakaita zvakanaka mukuona kwaMambo Mwari, kudai ndizvo zveshe zvakaitwa ndiAmazia baba ake. Wakadziemesera pachake kutsvaka Mwari ngemazuva aZekharia, uwo wakamupanga ngokutya Mwari; nomukuwo weshe waakamutsvaka Mambo Mwari, Mwari wakamufumisa. Wakabuda koorwa hondo nevaFiristia, wakapwanyira pashi rukumbati rweGathi, nerukumbati rweJabhine, norukumbati rweAshidhodhi; wakaaka madhorobha panyika yeAshidhodhi, naapo peshe pakati pevaFiristia. Mwari wakamudetsera kurwa nevaFiristia, nokurwa nevaArabhia, avo vaigara muGuribhaari, nokurwa nevaMeuni. VaAmoni vakabhadhara muthero kunaUzia, nembiri yake yakapararira metsa kuguma kumigano yeEgipite, ngokuti wakadzigwinyisa kakurutu. Zve, Uzia wakaaka mathawa muJerusarema ngepaMusiwo wepaKhona nePamusiwo wokuBani, nepakumonerera porukumbati, wakaagwinyisa. Wakaaka mathawa mushango, wakatsa zvinyuka zvakawanda, ngokuti waiya nezvifuyo zvakawanda, mweshe munyika dzemubani nedzakaterama; waiya nevarimi nevatongori vevhini mumitunhu nomunyika dzakavhundira, ngokuti waida kurima. Zve, Uzia waiya nezvikwata zvevamuna vakanasirirwa koorwa, avo vaienda koorwa ngezvikwata zvikwata, kudai ngokuteererana kwouwandu hwokuerengwa kwavo ndiJeieri munyori naMaaseia mutongi, avo vaiya pashi penyara yaHanania, umwe wenduna dzamambo. Uwandu hwevakuru vemhatso dzemadzibaba vaiya ngwazi dzinesimba nokushinga vaiya makumi emazana mairi nemazana matanhatu (2,600). Pashi penyara dzavo paiya nehondo, yaiya mazana matatu nemanomwe emakumi emazana nemazana mashanu, (307,500) avo vairwa hondo ngesimba guru kudetsera mambo kurwa nemagaa. Uzia wakavanasirira veshe vehondo zvihlangu, mikhondo, zviqoko, magangautare mbita, nemapuwe ezvimvii. MuJerusarema wakanasira michini, yakanasirwa ngevamuna ngwazi, kuti iiswe padera pemathawa, nepamakhona erukumbati, kuitira misee yaiposherwa nemapuwe makuru. Nembiri yake yakapararira kundau dziri kuretu, ngokuti wakadetserwa ngenjira inoshamisa kakurutu metsa agwinya. Asi apo aiya agwinya mwoyo wake wakadzikudza zvakaunza kuurawa kwake. Ngokuti wakashaisha kunaMambo Mwari, Mwari wake, wakapotera mutemperi raMambo Mwari kooita mudiro wokupisha padera pearita rokupishira mitombo inegwema rakanaka. Asi Azaria mupristi wakapoteramwo ngesure kwake, ane vapristi vaMambo Mwari makumi masere, vaiya vanhu voungwazi; Vakarambidza Uzia mambo, vakati kwaari, “Andiwepi unosisira kuti upishire mitombo inegwema rakanaka kunaMambo Mwari, asi ngezvevapristi, mibarirwana yaAroni, avo vakaemeserwa kuti vapishe mitombo inegwema rakanaka. Buda kubva kundau yakachena; ngokuti iwewe wakaita zvakashata; akuzokuunziri kuremeredzwa kubva kunaMambo Mwari, Mwari.” Zvino Uzia wakanyangadzwa. Waiya nechidziyo munyara yake chokupishira mitombo inegwema rakanaka, naapo achakanyangadzirwa vapristi, nhenda yemapere yakabuda pahuma yake pamberi pevapristi mumhatso yaMambo Mwari, pasinde pearita rokupishira mitombo inegwema rakanaka. Naapo Azaria mupristi mukuru navo veshe vapristi vakamuringira, vakaona kuti waiya aane mapere pahuma yake. Vakakasira kumubudisa kubvapo, naye emene wakakasira kubudamwo, ngokuti Mambo Mwari waiya amuorora. Uzia mambo wakaita mapere metsa zuva rokufa kwake, aane mapere wakagara ega mumhatso yakaparadzana, ngokuti wakaparadzaniswa kubva kumhatso yaMambo Mwari. Jothamu mukororo wake waiya mukuru padera pemhatso yamambo, echitonga padera pevanhu venyika. Zvino mishando imweni yaUzia, yokutanga neyokupedzisira, yakanyorwa ndiIsaya muprofeti, mukororo waAmozi. Uzia wakaata nemadzibaba ake; vakamuika pamwepo nemadzibaba ake mumunda wemaiba emadzimambo, ngokuti vakati, “Une mapere.” Jothamu mukororo wake wakatonga pandau yake. Jothamu waiya nemakore makumi mairi nemashanu apo paakaamba kutonga; wakatonga makore gumi nematanhatu muJerusarema. Zina ramai ake raizwi Jerusha, mwanasikana waZadhoki. Wakatonga wakaita zvaiya zvakanaka mukuona kwaMambo Mwari, kudai ngezvakaitwa ndiUzia baba ake, kwega kuti aazi kupotera mumhatso yaMambo Mwari. Asi vanhu vakaangira kuteera kuita zvakashata kakurutu. Wakaaka musiwo wepadera wemhatso yaMambo Mwari, wakaaka kakurutu padera porukumbati rwaOferi. Zve, wakaaka madhorobha munyika yemitunhu yaJudha, nomumakwasha wakaaka kamba nemathawa. Wakarwa namambo wevana vaAmoni, naye wakavanyisa. VaAmoni vakathera gorero makhirogramu esirivha makumi emazana matatu nemazana marongomuna (3,400), nezvipimo zvekoroni mametrikhi thanisi gumi rimwe remazana (1,000) negumi rimwe remazana (1,000) ebhari. Uku ndikwo kuwanda kwezviro zvevakathera vaAmoni, vakabhadhara zvakatodzana gore rechipiri nerechitatu. Ndizvo Jothamu wakaita wakagwinya, ngokuti wakanasirira njira dzake pamberi paMambo Mwari, Mwari wake. Zvino mishando imweni yaJothamu, nehondo dzake dzeshe, nenjira dzake, ringira, zvakanyorwa muBhuku reMadzimambo aIsuraeri naaJudha. Wakaamba kutonga aane makore makumi mairi nemashanu, naye wakatonga makore gumi nematanhatu muJerusarema. Jothamu wakaata nemadzibaba ake, navo vakamuika mudhorobha raDhavhidha; naAhazi mukororo wake wakatonga pandau yake. Ahazi wakatanga kutonga ane makore makumi mairi; wakatonga makore gumi nematanhatu muJerusarema. Aazi kuita zvakanaka mukuona kwaMambo Mwari, kudai ndiDhavhidha baba ake, asi wakahamba ngenjira dzeshe dzemadzimambo aIsuraeri. Wakaita miedzaniso yakanyunguruswa yaBhaari; wakapira midiro mubani romukororo waHinomu, wakaita kuti vakororo vake vaphotye muriro, kudai ngezvainyangadza zvaiitwa ngevemadzinza avo vaakadzinga Mambo Mwari kubva pamberi pevanhu vaIsuraeri. Wakapira midiro nokupisha mitombo inegwema rakanaka mundau dzakakwirira, padera pemitunhu, nepashi pomuti weshe wakasvipira. Ndizvo Mambo Mwari, Mwari wake, wakamupira munyara dzamambo weAramu, uwo wakamunyisa, akatora hloko dzakawanda, akadziunza Dhamasekusi. Wakapirwawo munyara dzamambo waIsuraeri, uwo wakamunyisa ngokuuraya kukurutu. Pheka, mukororo waRemaria, wakauraya mwaJudha vanhu zana nemakumi mairi emakumi emazana (120,000) ngezuva rimwe, avo veshe vaiya ngwazi dzakashinga, ngokuti vaiya vasiya Mambo Mwari, Mwari wemadzibaba avo. NaZikhiri ngwazi inesimba yokwaEfuremu wakauraya Maaseia mukororo wamambo, naAzirikamu nduna yengome, naErikana muteeri mukuru wamambo. Vanhu vaIsuraeri vakatora hloko kubva kuhama dzavo mazana mairi emakumi emazana (200,000), vakadzi, vakororo nevanasikana; vakatorazve zvizhinji zvevakachakata kubva kwevari, vakaunza zvakachakatwa Samaria. Asi muprofeti waMambo Mwari waiyamwo, zina rake ndiOdhedhi; naye wakabuda kooshongana nehondo yakaguma Samaria, wakati kwevari, “Ringirai, ngokuti Mambo Mwari, Mwari wemadzibaba enyu wakamunyangadzirwa Judha, akavapira munyara dzenyu, nemwi mwakavauraya mukunyangadzwa kukurutu ukwo kwakaguma mudenga. Zvino munoda kutora vana vaJudha neveJerusarema, kuti vaite hloko dzenyu, vamuna nevakadzi. Asi imwimwi munenyi ngepanze pezvishaishi kunaMambo Mwari, Mwari wenyu here? Zvino izwai kwendiri, muhwirinze hloko, dzemwakatora kubva kuhama dzenyu, ngokuti ushungu hunotyisa hwaMambo Mwari huri padera penyu.” Vamweni vakuru vokwaEfuremu, Azaria mukororo waJohanani, Bherekhia mukororo waMeshiremothi, Jehizikia mukororo waSharumu, naAmasa mukororo waHadhirai, vakaema kurambidza avo vaibva kuhondo, navo vakati kwevari, “Musatiunzira hloko muno, ngokuti munoda kuunza padera pedu izvo zviro zvinotiita vashaishi kunaMambo Mwari, kututsira zvishaishi zvetinazvo nendaa. Ngokuti ndaa yedu yakatokura, pane ushungu hunotyisa hunorwisana naIsuraeri.” Ndizvo vanhu vaiya nezvokurwa ndizvo vakasiya hloko nezvevakachakata pamberi pevakuru nepamberi pembungano yeshe. Zvino avo vakadudzwa ngemazina avo vakamiruka, vakatora hloko, vakatora zvakachakatwa, vakavasimidza avo vaiya vari mutitinini pakati pavo, vakavapa magwada, vakavapa zvokudya nezvokumwa, vakavadzodza ngemafuta; vakatwara vaiya vasina simba pazvimbongoro, vakavaunza kuhama dzavo Jerikho, kudhorobha remiti yemichindwi. Zvino vakahwirira Samaria. Panguva iyo mambo Ahazi wakatuma vanhu koodaidza madzimambo eAsiria kuti vamudetsere. Ngokuti vaEdhomu vaiya vakauya koorwisa nokunyisa Judha, vakatora hloko. NevaFiristia vaiya vakachakatawo madhorobha enyika dziri muShefera, nemadhorobha aiya okubani aJudha, navo vaiya vakatora Bhethishemeshi, Aijaroni, Gederothi, Sokho nemaguta aro, Thimina nemaguta aro, neGimizo nemaguta aro; navo vakagaramwo. Ngokuti Mambo Mwari wakadzasa Judha pashi ngendaa yaAhazi mambo waIsuraeri, ngokuti wakaita zvakashata muJudha, naye wakapauka akaita usikagondeki kunaMambo Mwari. Ndizvo mambo Tirigathiphirinesa mambo weAsiria wakauya koorwa naye, naye wakamutambudza, aazi kumugwinyisa. Ngokuti Ahazi wakatora rupande rwepfuma yemhatso yaMambo Mwari, neyemhatso yamambo, neyenduna, naye wakazvipa kuita muthero kunamambo weAsiria; asi azvizi kumudetsera. Munguva yokutambudzika kwake wakaangira kupauka kubva kunaMambo Mwari, uyu mambo Ahazi. Ngokuti wakapira midiro kunezvimwari zveDhamasekusi, iro rakamunyisa, naye wakati, “Ngokuti zvimwari zvevaAramu zvakavadetsera, ndizvo ndinozopira midiro kwezviri, kuti zvizondidetserawo.” Asi zvakaita kuparadzwa kwake, nekwevaIsuraeri veshe. NaAhazi wakaunganidza zvidziyo zvemhatso yaMwari, wakazvipwanya kuita zvigurwa zvidziyo zvemhatso yaMwari. Wakakonya misiwo yemhatso yaMambo Mwari, wakadziitira maarita kundau dzeshe muJerusarema. Mudhorobha reshe raJudha wakaita ndau dzakakwirira dzokupishirepo mitombo inegwema rakanaka kuzvimwari zvimweni, wakamusira ushungu hwaMambo Mwari, Mwari wemadzibaba ake. Zvino mishando yake imweni, nenjira dzake dzeshe, kubvira pakutanga metsa pakugumisira, ringira, zvakanyorwa muBhuku reMadzimambo aJudha neaIsuraeri. NaAhazi wakaata nemadzibaba ake, navo vakamutsira mudhorobha, muJerusarema; asi avazi kumuunza mumaiba emadzimambo aIsuraeri. Hezekia mukororo wake wakatonga pandau yake. Hezekia wakatanga kutonga apo aanemakore makumi mairi nemashanu; wakatonga makore makumi mairi nemapfumbamwe muJerusarema. Zina ramai ake raizwi Abhija, mwanasikana waZekharia. Wakaita zvakanaka mukuona kwaMambo Mwari, kudai ngezvaakaita Dhavhidha baba ake. Mugore rokutanga rokutonga kwake, mumwedzi wokutanga wakabeura misiwo yemhatso yaMambo Mwari, wakainasirira. Wakapinzamwo vapristi nevaRevhi, wakavaunganidza pamwepo mundau yakapamhama ngokumabvazuva. Wakati kwevari, “Purutanai kwendiri, imwimwi vaRevhi! Dzichenesei pachenyu, muchenese mhatso yaMambo Mwari, Mwari wemadzibaba enyu, mubudise kubanze zvinetsvina kubva mundau yakachena. Ngokuti madzibaba edu vakapauka, vakaita zvakashata mukuona kwaMambo Mwari, Mwari wedu; vakamusiya, vakafuratira hope dzavo kubva kuugaro hwaMambo Mwari, vakafuratira mishana yavo. Vakakonyawo misiwo yeparuwanze, vakadzima zvibani, avazi kupisha mutombo unegwema rakanaka nokuti kupira midiro yokupisha mundau yakachena kunaMwari waIsuraeri. Ndizvo ushungu hwaMambo Mwari hwakadzaka padera paJudha neJerusarema, naye wakavaita chiro chinotyisa, chinoshamisa nechinoridzirwa murudzi, kudai ngezvomunoona ngemadziso enyu. Ngokuti, ringira, madzibaba edu vakawa ngokupinza kweshoti, vakororo vedu, vanasikana vedu nevakadzi vedu vari muuhloko ngendaa yeizvi. Zvino zvirimwo mumwoyo mwangu kuti ndiite chitenderano naMambo Mwari, Mwari waIsuraeri, kuti ushungu hwake hunotyisa hukunukuke kubva kwetiri. Vakororo vangu, zvino musaita vanorekeredza, ngokuti Mambo Mwari wakamutsanangura kuti mueme pamberi pake kumushandira, kuti muite vashandiri vake nokupira midiro.” Zvino vaRevhi vakamiruka, Mahathi mukororo waAmasai, naJoeri mukororo waAzaria, vevakororo vaKohathi; nevevakororo vaMerari, Kishi mukororo waAbhidhi, naAzaria mukororo waJeharereri; nevevaGershoni, Joa mukororo waZima, naEdheni mukororo waJoa; nevevakororo vaErizafani, Shimuri naJeueri; nevevakororo vaAsafi, Zekharia naMatania; nevevakororo vaHemani, Jehueri naShimei; nevevakororo vaJedhuthuni, Shemaia naUzieri. Vakaunganidza hama dzavo, vakadzichenesa pachavo, vakapotera kudai ngokupanga kwamambo, ngemazwi aMambo Mwari, kuti vachenese mhatso yaMambo Mwari. Vapristi vakapotera mukati mwemhatso yaMambo Mwari, kuti vaichenese, navo vakabudisa kubanze zviro zvinetsvina zveshe zvevakaona kubva mutemperi raMambo Mwari, vakazviunza muruwanze rwemhatso yaMambo Mwari; nevaRevhi vakazvitora kuti vazvirashe kubanze kuRwizi Kedhironi. Vakaamba kuchenesa ngezuva rokutanga romwedzi wokutanga, nezuva rechisere rwomwedzi vakaguma kuruwanze rwaMambo Mwari. Zvino vakachenesa mhatso yaMambo Mwari ngemazuva masere; ngezuva regumi namatanhatu romwedzi wokutanga vakapedza. Zvino vakapotera kunamambo Hezekia, vakati, “Tapedza kuchenesa yeshe mhatso yaMambo Mwari, nearita rokupishira midiro, nezvidziyo zvaro zveshe, netafura remisara yezvingwa, nezvidziyo zvaro zveshe. Zvidziyo zveshe zvaakarasha mambo Ahazi ngokupauka kwake, mukutonga kwake apo paakapauka, takazvinasira, tikazvichenesa; wona, zvino zviri pamberi pearita raMambo Mwari.” Zvino mambo Hezekia wakamuka mangwanani maishi, akaunganidza vatongi veshe vemadhorobha, navo vakakwira kumhatso yaMambo Mwari. Navo vakaunza mikono minomwe, magondohwe manomwe, zvimakwai zvinomwe, nemagotokoto manomwe, kuitira umambo mudiro wokushaisha nendau yakachena, nevaJudha. Naye wakapanga vapristi vakororo vaAroni kuti vazvipire padera pearita raMambo Mwari. Ndizvo vakauraya mikono, nevapristi vakaashira ngazi, vakaifafazira paarita; vakauraya magondohwe, vakafafazira ngazi yawo padera pearita; zve, vakauraya zvimakwai vakafafazirazve ngazi yazvo paarita. Zvino vakaunza magotokoto kuita mudiro wokushaisha pamberi pamambo nepomushongano weshe; navo vakaisa nyara dzavo padera pawo, nevapristi vakaauraya, vakaita mudiro wokushaisha ngengazi yawo padera pearita, kuita kuripirwa kwevaIsuraeri veshe. Ngokuti mambo wakapanga kuti mudiro wokupisha nomudiro wokushaisha upirwe ngendaa yevaIsuraeri veshe. Wakaemesa vaRevhi mumhatso yaMambo Mwari vanengoma dzesimbi, magitari nezvidangari, kudai ngokupanga kwaDhavhidha, nokwaGadhi muonesi wamambo, naNathani muprofeti, ngokuti mupango waibva kunaMambo Mwari kubudikidza ngevaprofeti vake. VaRevhi vakaema, vakabata zveshe zvokushandisa mukuemba ndizvo zvaDhavhidha, nevapristi vanemagwama. Zvino Hezekia wakapanga kuti vapire midiro yokupisha paarita. Naapo mudiro wokupisha pewakatangwa, noruyo rwaMambo Mwari rwakatangwa kuembwawo nehwamanda pamwepo nezvokuridza zvaDhavhidha, mambo waIsuraeri. Mbungano yeshe yakadira, vaembi vakaemba, nevapristi vemagwama vakaridza; neizvi zveshe zvakaangira metsa mudiro wokupisha wapera. Naapo vapedza midiro, mambo naavo veshe vaiyapo vakakotama, vakadira. Mambo Hezekia nevakuru vakapanga vaRevhi kuti vaembe kukudza Mambo Mwari ngemazwi aDhavhidha naaAsafi muprofeti. Vakaemba kukudza ngokudakadzwa, vakakotamisa masoro avo vakadira. Zvino Hezekia wakapingura, akati, “Zvino mwadzipira kunaMambo Mwari; kwedzerai pasinde mupire midiro nemidiro yokubonga mumhatso yaMambo Mwari.” Ndizvo mbungano yakaunza midiro yokupisha neyokubonga; naavo veshe vaiya nomwoyo inoda vakaunza midiro yokupisha. Nouwandu hwemidiro yokupisha yakaunzwa ngembungano yaiya mikono makumi manomwe, nemagondohwe zana (100), nezvimakwai mazana mairi (200); zveshe izvi zvaiya midiro yokupisha kunaMambo Mwari. Nemhuka dzakapirwa kunaMwari dzaiya mikono mazana matanhatu (600), nemakwai makumi emazana matatu (3,000). Asi vapristi vaiya vashomani yaamho, navo avazi kukona kudzinasira dzeshe kuita midiro yokupisha; ndizvo metsa vapristi vamweni vadzichenesa pachavo, hama dzavo vaRevhi vakavadetsera, metsa wakapera; ngokuti vaRevhi vaiya nomwoyo wakapinda kunaka kuti vadzichenese kupinda vapristi. Ngepabanze pemidiro yokupisha yaiya yakawanda, nemafuta emidiro yokunyarara, nemidiro yokumwa, yaipirwa pamwepo nemidiro yokupisha. Ndizvo mishando yemhatso yaMambo Mwari yakaemeswazve. Hezekia nevanhu veshe vakadakara, ngendaa yezvaakaitira vanhu Mwari; ngokuti chiro ichi chakaitwa ngokukasira. Hezekia wakatumira izwi kuvaIsuraeri veshe nokuvaJudha, wakanyorazve tsamba kunaEfuremu naManase, kuti vauye kumhatso yaMambo Mwari muJerusarema, kuti vangwarire Phasika kunaMambo Mwari, Mwari waIsuraeri. Ngokuti mambo nevakuru vake, nembungano yeshe muJerusarema vaiya vapangana kuti vangwarire Phasika ngomwedzi wechipiri (ngokuti vaiya vasikakoni kuringwarira panguva yaro yemene, ngokuti vapristi vaiya vasikazi kudzichenesa pachavo vakakwana nokuti vanhu vaiya vasati vaungana muJerusarema.) Urongwa uhu hwaiya hwakanaka mukuona kwamambo nokumbungano yeshe. Ndizvo vakaemesa chironzo kuti kudaidzirwe kuvaIsuraeri veshe, kubvira Bherishebha metsa Dhani, kuti vanhu vauye vangwarire Phasika kunaMambo Mwari, Mwari waIsuraeri, paJerusarema; ngokuti vaiya vasati variita ngokuwandisa kudai ngezvakanyorwa. Ndizvo vatwari vakaenda muIsuraeri mweshe nemwaJudha, netsamba dzakabva kunamambo nevakuru vake, kudai ngezvaakapanga mambo echiti, “Imwimwi vana vaIsuraeri, petukaizve kunaMambo Mwari, Mwari waAbrahama, waIsaka nowaIsuraeri, kuti naye apetuke kunevakasara venyu, vakapokonyoka kubva kunyara yemadzimambo evaAsiria. Musadai ngemadzibaba enyu nehama dzenyu, avo vaiya vasina gonda kunaMambo Mwari, Mwari wemadzibaba avo, ndizvo wakavaita kuti vaparadzwe, kudai ngezvomunoona. Zvino musaita vanemitsipa yakaoma, kudai ngezvevaiya vakaita madzibaba enyu, asi imwimwi dzipirenyi kunaMambo Mwari, mupotere mumhatso yake yakachena, iyo yaakachenesa mhera nariini, mushandire Mambo Mwari, Mwari wenyu, kuti kutyisa kwoushungu hwake kuduswe kubva kwomuri. Ngokuti imwimwi mukapetuka kunaMambo Mwari, hama dzenyu nevana venyu vanozoona nyasha kubva kunevakavatora kuvaita hloko, nokupetuka kunyika iyi. Ngokuti Mambo Mwari, Mwari wenyu, wakanaka unenyasha, naye aazofuratiri hope yake kubva kwomuri, kudai mwechipetuka kwaari.” Ndizvo vatwari vakahamba kubva kudhorobha rimwe kuenda kunerimweni, vakahamba mukati mwenyika yokwaEfuremu neyokwaManase, metsa kuguma Zebhuruni; asi vakavasheka kuvashoora, vakavaitira jee. Kwega vashomani vakabva kwaAsha, vakabva kwaManase, nevakabva kwaZebhuruni vakadzipfaisa pachavo, vakauya Jerusarema. Nyara yaMwari yaiyawo padera paJudha, kuvapa mwoyo umwe kuti vaite izvo zvaakavapanga mambo nevakuru vake, ngeizwi raMambo Mwari. Vanhu vakawanda vakaungana muJerusarema kuti vangwarire dhiri rokudya chingwa chisina mumera ngomwedzi wechipiri, yaiya mbungano hurutu yaamho. Vakamiruka kushanda, vakadusa maarita aiya muJerusarema, nemaarita eshe okupishira mutombo unegwema rakanaka vakaadusa, vakaakandira muRwizi weKedhironi. Navo vakauraya gwaiyana rePhasika ngezuva regumi nemarongomuna omwedzi wechipiri. Vapristi nevaRevhi vaitsveruka, navo vakadzichenesa, vakaunza midiro yokupisha mumhatso yaMambo Mwari. Vakatora ndau dzavo kudai ngomuitiro wavo, kudai ngomupango waMosi munhu waMwari; vapristi vakafafaza ngazi, yevakaashira kubva kunyara dzevaRevhi. Ngokuti vaiyapo vakawanda mukati mwembungano vaiya vasikazi kudzichenesa pachavo; ndizvo vaRevhi ndivo vakabata mushando wokuuraira zvePhasika zveavo veshe vaiya vasikazi kusukika, kuti zvicheneswe kunaMambo Mwari. Ngokuti uzhinji hwevanhu, vazhinji vavo vaibva kwaEfuremu, kwaManase, kwaIsakha, nekwaZebhuruni, vaiya vasikazi kudzichenesa pachavo, asi zvakanyadaro vakadya Phasika, asi haiwa kudai ngezvakanyorwa. Asi Hezekia wakavakumbirira echiti, “Mambo Mwari wakanaka varekerere umwe ngaumwe, weshe waemesa mwoyo wake kuti atsvake Mwari, Mambo Mwari, Mwari wemadzibaba ake, kunyazwi aazi kusukika kudai ngokusukika kwenjira yemhatso yakachena.” Mambo Mwari wakazwa Hezekia, wakaponesa vanhu. Nevana vaIsuraeri vaiya muJerusarema vakangwarira dhiri rokudya chingwa chisina mumera mazuva manomwe ngokudakara kukurutu; vaRevhi nevapristi vakakudza Mambo Mwari zuva ngezuva, vechiemba ndizvo zvinoita bope guru kunaMambo Mwari. Hezekia wakaereketa ngenjira inoembedzera kunevaRevhi veshe vakaonesa kuzia kwakanaka mumushando waMambo Mwari. Ndizvo vanhu vakadya kudya kwedhiri ukwo mazuva manomwe, vechipira midiro yokunyarara, vechibonga kunaMambo Mwari, Mwari wemadzibaba avo. Zvino mbungano yeshe yakatenderana kuti ingwarirezve dhiri mazuva manomwe amweni; ndizvo vakaringwarira mazuva manomwe amweni ngokudakara. Ngokuti Hezekia mambo waJudha wakapa mbungano mikono gumi rimwe remazana (1,000) nemakwai makumi emazana manomwe (7,000) kuita mudiro, nevakuru vakapa mbungano mikono gumi remazana (1,000) nemakwai makumi emazana gumi (10,000). Vapristi vazhinji vakadzichenesa pachavo. Mbungano yeshe yokwaJudha, vapristi nevaRevhi, nembungano yeshe yeavo vakabva munyika dzaIsuraeri, nevapara vakabva munyika dzaIsuraeri, nevapara vaigara muJudha, vakadakara. Kwaiyapo kudakara kukurutu muJerusarema, ngokuti kubvira kumukuwo waSoromoni mukororo waDhavhidha mambo waIsuraeri, akuzi kumboapo chiro chakadaro muJerusarema. Zvino vapristi nevaRevhi vakamiruka, vakafumisa vanhu; nemazwi avo akazwika, nokukumbira kwavo kwakakwira kundau yake yokugara yakachena mudenga. Zvino apo izvi zveshe zvapera, veshe vaIsuraeri vaiyapo vakabuda, vakaenda kumadhorobha aJudha, vakaputsa sika dzokudira kuita zvigurwa, vakatemera pashi matanda okudira, vakaputsira pashi ndau dzakakwirira nemaarita, muJudha mweshe, muBhenjamini, muEfuremu nomwaManase, metsa vaiya vapedza kuparadza zveshe. Zvino vana vaIsuraeri veshe vakahwirira kumadhorobha avo munhu weshe kuzviro zvake. Hezekia wakaemesa vapristi nevaRevhi muzvikwata zvavo, munhu weshe kudai ngomushando wake, vapristi nevaRevhi vakaemeserwa kupira midiro yokupisha nemidiro yokunyarara, kuti vashandire pamisiwo yekamba yaMambo Mwari nokubonga nokukudza. Wakaunza rupande rwechikoaniswa chamambo kubva kuzviro zvake chemidiro yokupisha: midiro yokupisha yemangwanani neyemadeekoni, midiro yokupisha yemaSabatha, yokutawa kwomwedzi, neyemadhiri akaemeswa, kudai ngezvakanyorwa mumupango waMambo Mwari. Wakapanga vanhu avo vaigara muJerusarema kuti vape chikoaniswa chevapristi nevaRevhi, kuti vadzipire mumupango waMambo Mwari. Ngokukasira apo izwi rapararira, vanhu vaIsuraeri vakaunza ngokuwanza zviyo zvokutanga zvekoroni, vhini, mafuta, uchi, nazvo zveshe zvinomera muminda; neminikero yechegumi yezviro zveshe vakazviunza ngokuwanza. Vana vaIsuraeri nevaJudha, avo vaigara mumadhorobha aJudha, vakaunzawo chegumi chen'ombe, nechemakwai, nechegumi chezviro zvakapirwa kunaMambo Mwari, Mwari wavo, navo vakazviunganidza kuita mirwi. Mumwedzi wechitatu vakaamba kuunganidza zviro mumirwi, navo vakazvipedza ngomwedzi wechinomwe. Naapo Hezekia nevakuru vakaguma vauya vakaona mirwi, vakakudza Mambo Mwari nevanhu vake Isuraeri. Hezekia wakabvunza vapristi nevaRevhi ngendaa yemirwi iyo. Azaria mupristi mukuru wemhatso yaZadhoki wakamupingura echiti, “Kubvira apo vanhu pevakaamba kuunza zvipo kumhatso yaMambo Mwari, tinazvo zvakakwana zvokudya, techisiya zvakawanda; ngokuti Mambo Mwari wakafumisa vanhu vake; ndizvo tinazvo zvakasara ndiyo mirwi iyi mikuru.” Zvino Hezekia wakavapanga kuti kunasirirwe makamera okungwarira zviro mumhatso yaMambo Mwari, navo vakaanasirira, Ngokugondeka vakapinzemwo zvipo, zvegumi, nezviro zvakapirwa kunaMambo Mwari. Khonania muRevhi ndiye waiya mutongi padera pazvo, naShimei hama yake ndiye waiya muteeri wake. Naapo Jehieri, Azazia, Nahathi, Asaheri, Jerimothi, Jozabhadhi, Erieri, Isimakhia, Mahathi naBhenaia, ava ndivo vaiya varingiri vezviro pashi penyara yaKhonania naShimei hama yake, vakaemeswa ndiHezekia mambo naAzaria mutongi mukuru wemhatso yaMwari. NaKore mukororo waImina muRevhi, uwo waiya murindi womusiwo wokumabvazuva, waiya mukuru padera pezvipo zvakapirwa ngokuda kunaMwari, kuti akoanisire zvipo zvaMambo Mwari neizvo zvakachenesesa. Edheni, Miniamini, Jeshua, Shemaia, Amaria naShekania, vaimudetsera ngokugondeka kukurutu mumadhorobha evapristi, kuti vape zvikoaniswa kunehama dzavo, vakuru nevadoko zvakatodzana kudai ngezvikwata zvavo, ngepabanzi peavo vakaerengwa ngemazina emadzibaba avo, vamuna kubvira vaane makore matatu nokuenda mberi, veshe vaipotera mumhatso yaMambo Mwari, kudai ngemabingo avo omushando aidiwa ezuva ngezuva ngemishando yavo kudai ngendau dzavo nezvikwata zvavo. Kuerengwa kwevapristi kwakaitwa kudai ngokuteererana kwemhatso dzemadzibaba avo; idzo dzevaRevhi kubvira ngevaiya nemakore makumi mairi nokuenda mberi, kudai ngemishando yavo kudai ngokuteerana kwezvikwata zvavo. Vapristi vakaerengwa pamwepo nevana vavo veshe vadoko, vakadzi vavo, vakororo vavo, nevanasikana vavo veshe, mbungano yeshe; ngokuti vaiya vakagondeka vakadzingwarira pachavo kuti vaite vakacheneswa. Mibarirwanawo yaAroni vapristi avo vaiya muminda kunharaunda dzemadhorobha avo, dhorobha ngedhorobha vanhu vakadudzwa ngemazina vaizopa zvikoaniswa kuvamuna veshe pakati pevapristi, nokwevari veshe vakaerengwa pakati pevaRevhi. Hezekia wakazviita izvi munyika yeshe yaJudha; wakaita izvo zvaiya zvakanaka, zvakarurama, nezvakagondeka pamberi paMambo Mwari, Mwari wake. Nomushando weshe waakaamba mumushando wemhatso yaMwari, nokudai ngechironzo nemipango, kutsvaka Mwari wake, wakaita zveshe ngomwoyo wake weshe; naye wakabudirira. Ngesure kweizvi zviro, nemishando yokugondeka, Senakheribhi mambo weAsiria wakauya, akapotera munyika yaJudha, akakomba madhorobha akashosherwa, echikarakadza kuti aatore kuita ake. Naapo Hezekia aona kuti Senakheribhi waiya aguma, nokuti waiya akadziemesera kurwa neJerusarema, wakapangana nevakuru nevarwi vake kuti vatsiire zvinyuka zveshe zvemvura zvaiya kubanze kwedhorobha; navo vakamudetsera. Vakaunganidzana vanhu vakawanda pamwepo, navo vakatsiira zvinyuka zveshe nerwizi urwo rwaierera kuphotya pakati penyika vechiti, “Zvingaita ngenyi kuti madzimambo veAsiria vagume vaone mvura yakawanda?” Hezekia wakadzigwinyisa kuti aakise marukumbati akaputsirwa pashi, wakakwidza mathawa padera pemarukumbati; wakaaka rukumbati rumweni ngokubanze; wakaakisa Miro, mudhorobha raDhavhidha, wakanasira shoti nezvihlangu zvakawanda. Naye wakaemesa nduna dzehondo padera pevanhu, wakavaunganidza pamwepo kwaari paruwanze pamusiwo wedhorobha, wakaereketa kwevari mazwi okugwinyisa echiti, “Itai vakagwinya nevakashinga. Musatya nokuti kupera simba ngendaa yamambo weAsiria nehondo yeshe yaanayo; ngokuti unesu wakapinda kukura kunewe vanaye. Kwaari kunemuoko wenyama, asi kwetiri kunaMambo Mwari, Mwari wedu, kutidetsera nokutirwira hondo dzedu.” Vanhu vakadzigwinyisa padera pemazwi aHezekia mambo waJudha. Ngesure kweizvi Senakheribhi mambo weAsiria waiya paRakhishi nehondo dzake dzeshe, wakatuma varanda vake Jerusarema, kunaHezekia mambo waJudha nokuvanhu vaJudha veshe avo vaiya muJerusarema echiti, “Unoronza izvi Senakheribhi mambo weAsiria: Magondero enyu ari kunaani kuti mugare muugaro hweJerusarema hwakakombwa? Hezekia aamupausi here kuti mufe ngenzara nenyota, apo paanomuronzera echiti, ‘Mambo Mwari, Mwari wedu, unozotirwira kubva kunyara yamambo weAsiria?’ Hezekia andiyepi here wakadusa ndau dzake dzeshe dzakakwirira nemaarita ake, akapanga Judha nevari muJerusarema kuti, ‘Munozodira pamberi pearita rimwe, mupishe mutombo unegwema rakanaka kweriri?’ Amuzii here izvo zvakaitwa ndini nemadzibaba angu kunevanhu veshe venyika dzimweni? Zvimwari zveidzo nyika zvaiya zvinesimba here kuti zvisunhure nyika dzavo kubva kunyara yangu? Ndiani waiyapo pakati pezvimwari zveshe zvenyika idzo dzaakaparadza madzibaba angu, uwo waiya nesimba rokurwira vanhu vake kubva munyara dzangu, kuti Mwari wenyu ungakona here kumurwira kubva munyara dzangu? Ndizvo zvino musachengedzerwa ndiHezekia, nokuti kupauswa ngenjira yakadai, musamugonda, ngokuti akuna chimwari chedzinza reshe noumambo hweshe chaiya nesimba rokurwira vanhu vacho kubva kunyara dzangu, nokubva kunyara dzemadzibaba angu. Kutsonga kwakaitawani kuti Mwari wenyu ungamurwira kubva munyara dzangu!” Nevaranda vake vakaereketa zvakawanda ndiMambo Mwari, Mwari, nokurwisana nomuranda wake Hezekia. Zve, wakanyora tsamba dzokutuka Mambo Mwari, Mwari waIsuraeri, nokuereketa zvokurwisana naye echiti, “Kudai ngezvimwari zvemadzinza munyika dzimweni zvisikazi kurwira vanhu vazvo kubva munyara mwangu, ngokudarozve Mwari waHezekia aangarwiri vanhu vake kubva munyara dzangu.” Vakadaidzira ngeizwi guru ngendimi yevaJudha kunevanhu veJerusarema vaiya padera porukumbati, kuvatyisidzira nokuvakarudza, kuita kuti vangakona kutora dhorobha. Vakaereketa ndiMwari weJerusarema vechimuedzanisa nezvimwari zvevanhu venyika, izvo zviri mishando yenyara dzevanhu. Zvino Hezekia mambo nomuprofeti Isaya mukororo waAmozi vakakumbira ngendaa iyi vechichema kuneWedenga. Mambo Mwari wakatuma ngirosi iyo yakauraya ngwazi dzeshe dzakashinga, vatungamiriri nenduna dzaiya mukamba yamambo weAsiria. Ndizvo wakahwirira kunyika yake echitsveruka. Naapo akaguma mumhatso yechimwari chake, vamweni vevana vakabarwa ndiye vakamuurayapo ngeshoti. Ndizvo Mambo Mwari wakaponesa Hezekia nevagari veJerusarema, kubva kunyara yaSenakheribhi mambo weAsiria, nokubva kunyara dzemagaa ake eshe; wakavapa kuzorora kumarutii eshe. Nevazhinji vakaunza zvipo kunaMambo Mwari muJerusarema, nezvipo zvakapinda kunaka kunaHezekia mambo waJudha, kuitira kuti akudzwe mukuona kwemadzinza eshe, kubvira ngouwo mukuwo kuenda mberi. Mumazuva awo Hezekia wakarwara kwokuda kufa. Wakakumbira kunaMambo Mwari, wakamupingura, akamupa chioniso. Asi Hezekia aazi kupetudzira ngenjira yakanaka kudai ngeizvo zvaakaitirwawo, ngokuti mwoyo wake wakadzikudza. Ndizvo ushungu hwakauya padera pake, nepadera paJudha neJerusarema. Zvino Hezekia wakadzipfaisa pachake kubva mukudzikudza kwomwoyo wake, veshe iye nevagari veJerusarema, ndizvo ngokudaro ushungu hwaMambo Mwari ahuzi kuchauyazve padera pavo, mazuva eshe okupona kwaHezekia. NaHezekia waiya noupfumi huzhinji, nokuremeredzwa kukurutu; naye wakadziitira mhatso dzoupfumi yesirivha, yomukore, yemapuwe akanaka, yemakha, yezvihlangu, neyembeu dzeshe dzezviro zvinomutengo mukuru; matura okuisa zviyo, vhini, mafuta; nezvibaya zvembeu dzeshe dzezvifuyo, nezvibaya zvemakwai. Wakadzinasirira madhorobha, noupfumi hwezviyo zvakawanda; ngokuti Mwari waiya amupa upfumi hwakawanda kakurutu. Ndiyezve Hezekia wakakonya muromo wechinyuka wedera wemvura Gihoni, wakaidzasa ngokumabirirazuva kwedhorobha raDhavhidha. Hezekia wakabudirira kumishando yake yeshe. Ndizvo ngendaa yenhumwa dzamambo weBhabhuroni avo vakatumwa kuuya kwaari, kuti vabvunze ngechishamiso chakaitwa munyika, Mwari wakamusiya ega pachake, kuti amuedze, kuti azie ngeizvo zveshe zvaiya mumwoyo mwake. Zvino mishando imweni yaHezekia, nokururama kwake, ringira yakanyorwa muchioniso chaIsaya muprofeti mukororo waAmozi, muBhuku reMadzimambo aJudha naaIsuraeri. Hezekia wakaata nemadzibaba ake, vakamuika muiba rerupande rwedera rwemaiba emibarirwana yaDhavhidha. Navo veshe vaJudha, nevagari veJerusarema vakaita chiriro chokumuremeredza pakufa kwake. Manase mukororo wake wakatonga pandau yake. Manase waiya anemakore gumi nemairi apo paakatanga kutonga; naye wakatonga makore makumi mashanu nemashanu muJerusarema. Wakaita izvo zvaiya zvakashata mukuona kwaMambo Mwari, kudai ngezvinyangadzo zvevasikadiri Mwari, avo vaakadzinga Mambo Mwari kubva pamberi pevana vaIsuraeri. Ngokuti wakaakisazve ndau dzakakwirira dzaakaputsa Hezekia baba ake, wakaemesa maarita aanaBhaari, wakaita sika dzokudira, akadira hondo yeshe yomudenga, akaishandira. Naye wakaaka maarita mumhatso yaMambo Mwari, iyo yaakaronza Mambo Mwari echiti, “Zina rangu rinozogara muJerusarema mhera nariini.” Wakaakira maarita hondo yeshe yomudenga mumaruwanze mairi emhatso yaMambo Mwari. Wakaita kuti vakororo vake vapotye mumuriro mubani romukororo waHinomu; zve, wakagonda vafemberi nemaninji, akashandisa un'anga, akashandisa masaramuso, akashandisa vanomukirwa, nevaroyi. Wakaita zvakashata kakurutu mukuona kwaMambo Mwari, kumusira ushungu hwake. Wakaemesa muedzaniso wakatsetswa, muedzaniso wechimwari, mumhatso yaMwari, iyo Mwari yaakati kunaDhavhidha nokunemukororo wake Soromoni, “Mumhatso iyi, nomuJerusarema, iro rendakatsanangura kubva pakati pemadzinza eshe aIsuraeri, kuti ndiisemwo zina rangu mhera nariini. Andizodusi nakamwe rutsoka rwaIsuraeri kubva kunyika iyo yendakaemesera madzibaba enyu, kudai kwega vechizongwarira zveshe zvendakavapanga ndizvo, mipango yeshe, zvironzo nezviemeso, zvakaunzwa kubudikidza ndiMosi.” Manase wakaita kuti Judha nevagari vemuJerusarema vapauke, ndizvo vakaita kushata kwakapindisisa kupinda vasikadiri Mwari, avo vaakauraya Mambo Mwari kubva pamberi pevana vaIsuraeri. Mambo Mwari wakaereketa kunaManase nokunevanhu vake, asi avazi kupurutana. Ndizvo Mambo Mwari wakaunza padera pavo nduna dzehondo dzamambo weAsiria, avo vakabata Manase, vakamuisa makato eminzwa, vakamusunga ngemanguri esimbi, vakamutora kuenda naye Bhabhuroni. Naapo aamukutambudzika, wakatsvaka Mambo Mwari, Mwari wake, naye wakadzipfaisa kakurutu pamberi paMwari wamadzibaba ake. Wakakumbira kwaari, naMwari wakaashira kukumbira kwake, wakazwa kupota kwake, wakamuunzazve Jerusarema nokuumambo hwake. Zvino Manase wakazozia kuti Mambo Mwari ndiye Mwari. Ngesure kweizvi wakaaka rukumbati rwokubanze kwedhorobha raDhavhidha, ngokumabirirazuva kweGihoni mubani, metsa pakupinda paMusiwo Hove, wakaenda narwo mberi rwakatendenedza Oferi, wakarukwidza kakurutu. Wakaisa nduna dzokurwa hondo mumadhorobha eshe akashosherwa muJudha. Wakadusa zvimwari zvipara, nomuedzaniso kubva mumhatso yaMambo Mwari, nemaarita eshe aaiya akaaka mumutunhu wemhatso yaMambo Mwari, nomuJerusarema, naye wakairasha kubanze kwedhorobha. Wakaakisawo arita raMambo Mwari, wakapirapo midiro yokuiyanisa neyokubonga; akapanga Judha kuti adire Mambo Mwari, Mwari waIsuraeri. Vanhu zvakanyadaro vakaangirira kupira midiro kundau dzakakwirira, asi kwega kunaMambo Mwari, Mwari wavo. Zvino mishando imweni yaManase, nomukumbiro wake kunaMwari wake, nemazwi evaonisi avo vakaereketa kwaari ngezina raMambo Mwari, Mwari waIsuraeri, ringirai zvakanyorwa muBhuku reMadzimambo aIsuraeri. Mukumbiro wake, nenjira iyo Mwari yaakaashira ndiyo kupota kwake, kushaisha kwake kweshe nokusikagondeka kwake, ndau dzakakwirira dzaakaaka, paakaita sika dzokudira nemiedzaniso yakatsetswa apo asati adzipfaisa, izvi zvakanyorwa mubhuku revafemberi. Ndizvo Manase wakaata nemadzibaba ake, vakamuika mumhatso yake. Amoni mukororo wake wakatonga pandau yake. Amoni waiya nemakore makumi mairi nemairi apo paakatanga kutonga; wakatonga makore mairi muJerusarema. Wakaita zvakashata mukuona kwaMambo Mwari, kudaiwo ndiManase baba ake. Amoni wakapira midiro kunemiedzaniso yakatsetswa iyo yakaitwa ndibaba ake Manase, wakaidira. Aazi kudzipfaisa kunaMambo Mwari, kudai ndibaba ake Manase wakadzipfaisa, asi uyu Amoni wakapauka kakurutu nokupinda kushata. Varanda vake vakapangana zano, vakamuuraya ari mumhatso yake. Asi vanhu venyika vakauraya veshe avo vakapangana zano ndimambo Amoni; nevanhu venyika vakaita Josia mukororo wake mambo pandau yake. Josia waiya nemakore masere apo paakatanga kutonga; wakatonga muJerusarema makore makumi matatu narimwe. Wakaita zvakanaka mukuona kwaMambo Mwari, wakahamba ngenjira dzaDhavhidha baba ake; aazi kutongopauka kuenda kumudyo nokuti kumuoshwe. Ngokuti mugore rechisere rokutonga kwake, achiri mutsva, wakatanga kutsvaka Mwari wababa ake Dhavhidha, nomugore regumi nemairi wakatanga kudusa ndau dzakakwirira, nesika dzokudira, miedzaniso yakatsetswa nemiedzaniso yakanyunguruswa, kubva munaJudha nomuJerusarema. Mukuona kwake vakaputsa maarita aanaBhaari; wakaputsira pashi maarita okupishira mitombo inegwema rakanaka aiya padera pavo. Wakaputsira pashi sika dzokudira, nemiedzaniso yakatsetswa neyakanyunguruswa, kuita zvigurwa, akaikuya kuita bukuta, wakafafaza bukuta iro padera pemaiba eavo vaiya vakapira midiro kweiri. Naye wakapisha magodo evapristi padera pemaarita avo, wakachenesa Judha neJerusarema. Mumadhorobha aManase, aEfuremu, aSimeoni metsa kugumira aNafitari, mundau dzawo dzematongo dzaiya dzakatendenedza, wakaputsira pashi maarita nesika dzokudira, nokukuya miedzaniso yakatsetswa kuita bukuta, nokutemera pashi maarita eshe okupishira mitombo inegwema rakanaka munyika yeshe yaIsuraeri. Zvino wakahwirira Jerusarema. Mugore regumi nemasere okutonga kwake, apo achenesa nyika nemhatso, wakatuma Shafani mukororo waAzaria, Maaseia mutongi wedhorobha, naJoa mukororo waJoahazi munyori, kuti vaakise mhatso yaMambo Mwari, Mwari wake. Vakaguma kunaHirikia mupristi mukuru, vakamupa mare yaiya yakaunzwa mumhatso yaMwari iyo vaRevhi, vairinda ruwanze, vaiya vaunganidza kubva kunaManase, Efuremu nokubva kunevakasara vaIsuraeri nokubva kwaJudha, Bhenjamini nokuvagari veJerusarema veshe. Navo vakaiisa munyara dzeavo vairingira mushando wemhatso yaMambo Mwari, nevashandi vaishanda mishando yemhatso yaMambo Mwari, vakaipa kuakisa nokunakisa mhatso. Vakaipa kuvatsetsi nokuvaaki, kutenga mapuwe akatsetswa, nematanda okurimbanidza pamwepo, nokuisa mawaro mumhatso dzakaputswa ngemadzimambo aJudha. Vanhu vakashanda ngokugondeka. Padera pavo pakaemeswa vaRevhi, Jahathi naObhadhia, vevakororo vaMerari, pamwepo naZekharia naMeshuramu, vevakororo vaKohathi, kuti varingire mushando. Vamweni vevaRevhi, veshe vaizia kuridza zviro zvokuemba ndizvo, vaingwarira avo vaitwara mitwaro, zve nokutungamira avo veshe vaiita mishando yembeu dzeshe; nevamweni vevaRevhi vaiya vanyori, nduna, nevarindi vemisiwo. Naapo vaibudisa mare yakaiswa mumhatso yaMambo Mwari, Hirikia mupristi wakaona bhuku remipango yaMambo Mwari iyo yakapuwa kubudikidza ndiMosi. Hirikia wakati kunaShafani munyori, “Ndaona bhuku remipango mumhatso yaMambo Mwari.” NaHirikia wakapa bhuku kunaShafani. Shafani wakaenda nebhuku kunamambo, wakaunzazve izwi kunamambo, echiti, “Zveshe izvo zvakapangwa varanda vako, vanozviita. Vabudisa yeshe mare yakaoneka mumhatso yaMambo Mwari, vakaipa munyara dzevangwariri vomushando nedzevashandi.” Zvino Shafani munyori wakaronzera mambo echiti, “Hirikia mupristi wakandipa bhuku.” NaShafani wakaridzidza pamberi pamambo. Naapo mambo azwa mazwi emipango, wakabaura zvokufuka zvake. Namambo wakapanga Hirikia, Ahikamu mukororo waShafani, Abhidhoni mukororo waMikha, Shafani munyori, naAsaia muranda wamambo echiti, “Endai, mubvunze kunaMambo Mwari ngendaa yangu, neyeavo vakasara muIsuraeri nevomuJudha, ngendaa yemazwi ebhuku rakaoneka; ngokuti ushungu hwaMambo Mwari hwakakura uhwo hunodururwa padera pedu, ngokuti madzibaba edu avazi kungwarira izwi raMambo Mwari, kuita zveshe kudai ngeizvo zvakanyorwa mubhuku iri.” Ndizvo Hirikia naavo veshe vakatumwa ndimambo vakaenda kunaHuridha muprofeti womukadzi, mukadzi waSharumu mukororo waTokhathi, mukororo waHasira, mungwariri wezvokufuka, uwo waigara muJerusarema munharaunda yokubani; navo vakaereketa ngamazwi awo kwaari. Wakavapingura echiti, “Unoronza izvi Mambo Mwari, Mwari waIsuraeri: Muronzerenyi munhu uwo wamutuma kwendiri, ‘Ndizvo zvinoronza Mambo Mwari: Ringira, ndinozounza dambudziko padera peiyi ndau, nepadera pevagari vayo, eya, kudai ndizvo zvituko zveshe zvakanyorwa mubhuku iri rakadzidzwa pamberi pamambo wevaJudha. Ngokuti vakandisiya vakapishira mitombo inegwema rakanaka kunezvimwari zvimweni, ndizvo vandimusira ushungu ngemishando yeshe yenyara dzavo; ndizvo ushungu hwangu hunozodururwa padera pendau iyi, nahwo ahuzodzimwi.’ Asi ngendaa yamambo waJudha, uwo wakamutuma kuuya koobvunza kunaMambo Mwari, ndizvo munozoti kwaari, ‘Ndizvo zvinoronza Mambo Mwari Mwari waIsuraeri, ngendaa yemazwi awo ewakazwa: Ngendaa yokuti mwoyo wako waiya wakapfaa, newe wakadzipfaisa pamberi paMwari, apo pewakazwa mazwi ake ngendaa yendau iyi, nendaa yevagari vayo, newe wakadzipfaisa pamberi pangu, ukabaura zvokufuka zvako, ukachema pamberi pangu, neni ndakakuzwawo, unoronza Mambo Mwari. Ringira, ndinozokuunganidza kunemadzibaba ako, newe unozoikwa muiba rako mukunyarara; madziso ako aazooni iri dambudziko reshe rendinozounza padera peiyi ndau, nepadera pevagari vayo.’ ” Ndizvo vakapetuka neizwi kunamambo. Zvino mambo wakatumira izwi nokuunganidza vakuru veshe vaJudha neveJerusarema. Mambo wakakwira kupotera mumhatso yaMambo Mwari, nevanhu veshe vaJudha, vagari veshe veJerusarema, vapristi, vaRevhi, nevanhu veshe, vakuru nevadoko; wakadzidza mukuzwa kwavo eshe mazwi ebhuku rechitenderano rakaonwa mumhatso yaMambo Mwari. Mambo wakaema pandau yake, wakaita chitenderano pamberi paMambo Mwari, kuteera Mambo Mwari, kungwarira mipango yake, zvapupu zvake nezviemeso zvake, ngomwoyo wake weshe nomweya wake weshe, nokuita mazwi echitenderano akanyorwa mubhuku iri. Zvino wakaita kuti veshe avo vaiyapo muJerusarema nomuBhenjamini kuti vagondise pachavo kwechiri. Nevagari veJerusarema vakaita kudai ngechitenderano chaMwari wemadzibaba avo. Josia wakadusa zveshe zvinyangadzo kubva munyika dzeshe dzevana vaIsuraeri, naye wakaita veshe vaiya muIsuraeri kuti vadire Mambo Mwari, Mwari wavo. Mumazuva ake eshe okupona kwake avazi kupauka kubva mukuteera Mambo Mwari, Mwari wemadzibaba avo. Josia wakaita dhiri rePhasika kunaMambo Mwari muJerusarema; vakauraira Phasika gwayana ngezuva regumi nemarongomuna romwedzi wokutanga. Wakaemesa vapristi mundau dzavo, wakavashingisa kumishando yemhatso yaMambo Mwari. Wakati kunevaRevhi, avo vaidzidzisa vaIsuraeri veshe, vaiya vakachena kunaMambo Mwari, echiti, “Isai bhokisi rakachena rechitenderano mumhatso yerakaakirwa ndiSoromoni mukororo waDhavhidha mambo waIsuraeri; amuchasisiri kuritwara pamafudzi enyu. Zvino shandirai Mambo Mwari, Mwari wenyu, nevanhu vake Isuraeri. Mudzinasirire kudai ngokuteererana kwemhatso dzemadzibaba enyu, kudai ngezvikwata zvemishando yenyu, kudai ngokunyora kwaDhavhidha mambo waIsuraeri, nokudai ngokunyora kwomukororo wake Soromoni. Mueme mundau yakachena kudai ngezvikwata zvemhatso dzemadzibaba ehama dzenyu vanhutu, ngavawepo vaRevhi muchikwata chimwe ngachimwe chemhatso dzemadzibaba. Bairai gwayana rePhasika, mudzichenese pachenyu, munasirirewo hama dzenyu, kuti vaite kudai ngeizwi raMambo Mwari raakaunza ngenyara yaMosi.” Zvino Josia wakapa kuvanhu zvifuyo zvimweni, makwayana nezvimbudzana, zveshe kuita midiro yePhasika, kwevari veshe vaiyapo, makumi matatu emakumi emazana (30,000), nemikono makumi emazana matatu (3,000); izvi zvaibva pazvifuyo zvamambo. Nduna dzake dzakapa ngokuda kuvanhu, kuvapristi, nokuvaRevhi. Hirikia, Zekharia naJehieri, vakuru vemhatso yaMwari, vakapa kuvapristi kuita midiro yePhasika makumi emazana mairi nemazana matanhatu (2,600) emakwayana nembudzana, nemikono mazana matatu (300). Khonaniawo, Shemaia naNethaneri, hama dzake, naHashabhia naJeieri, naJozabhadhi, vakuru vevaRehvi, vakapa kuvaRevhi midiro yePhasika zvimakwayana nembudzana makumi emazana mashanu (5,000), nemikono mazana mashanu (500). Naapo mushando wanasirirwa, vapristi vakaema pandau dzavo, nevaRevhi vakaema muzvikwata zvavo, kudai ngokupanga kwamambo. Navo vakauraya gwayana rePhasika, nevapristi vakaashira ngazi kubva munyara dzavo, vakaifafaza, naapo vaRevhi vechivhiya. Vakadusa midiro yokupisha kuti vapire kudai ngezvikwata zvemhatso dzemadzibaba evanhu, kuti vapire kunaMambo Mwari, kudai ngezvakanyorwa mubhuku raMosi. Vakaitazve kudaro nemikono. Vakakocha gwayana rePhasika ngomuriro kudai ngechiemeso; navo vakabika zvakapirwa zvakacheneswa muhari, mumabiya, nomumaruwenda, vakazvikoanisa ngokukasira pakati pevanhu veshe. Ngesure kweizvo vakadzinasirira pachavo nevapristi, ngokuti vapristi mibarirwana yaAroni vaiya vakabatika kakurutu ngokupira midiro yokupisha nemafuta metsa usiku; ndizvo vaRevhi vakadzinasirira, pamwepo nevapristi mibarirwana yaAroni. Vaembi, mibarirwana yaAsafi, vaiya mundau dzavo, kudai ngokupanga kwaDhavhidha, Asafi, Hemani naJedhuthuni muonesi wamambo. Varindi vaingwarira misiwo yeshe; avazi kuda kuti vasiye mushando wavo, ngokuti hama dzavo vaRevhi vakavanasirira. Ndizvo mushando weshe waMambo Mwari wakapera kunasirwa ngezuvaro, kuti vangwarire Phasika, nokupira midiro yokupisha padera pearita raMambo Mwari, kudai ngokupanga kwamambo Josia. Nevana vaIsuraeri vaiyapo vakangwarira Phasika ngouwo mukuwo, nedhiri rechingwa chisina mumera mazuva manomwe. Akuna Phasika rakadai ngeiro rakambongwarirwa muIsuraeri kubvira kumazuva aSamueri muprofeti; akuna nemadzimambo aIsuraeri akambongwarira Phasika rakadaro kudai ngerakangwarirwa ndiJosia, ngevapristi, vaRevhi, vaJudha veshe, vaIsuraeri veshe vaiyapo, nevagari veJerusarema. Mugore regumi nemasere rokutonga kwaJosia Phasika iri rakangwarirwa. Ngesure kweizvi zveshe, apo Josia aiya anasirira temperi, Nekho mambo weEgipite wakakwira koorwa naKharkhemishi ngepasinde peRwizi Yufratesi; naJosia wakabuda kuenda koorwa naye. Asi Nekho wakatuma nduna dzake kwaari echiti, “Ndinendaa yenyi newe, iwewe mambo waJudha? Andizi kuuyira koorwa newe nyamashi, asi koorwa nemhatso yendinehondo nayo; naMwari wakandipanga kuti ndiite kudaro ngokukasira. Rekera iwewe kurwisana naMwari uwo uneni, kuti asazokuparadza.” Asi zvakanyadaro Josia aazi kukunukudza hope yake kubva kwaari, asi wakadziitisa akaita kudai ngomunhu umweni, kuitira kuti arwe naye. Aazi kupurutana mazwi aNekho akabva kumuromo waMwari, asi wakauya abatana kurwa hondo mubani reMegidho. Nevaposheri vemisee vakafura mambo Josia; namambo wakati kunevaranda vake, “Ndiendesenyi, ngokuti ndaremadzwa kakurutu.” Ndizvo varanda vake vakamutora kubva mungoro, vakamuisa mungoro imweni yechipiri navo vakamuunza Jerusarema. Naye wakafiramwo, akaikwa mumaiba emadzibaba ake. Veshe vaJudha neveJerusarema vakachema Josia. Jeremia wakaitawo chiriro kuchema Josia, navo veshe vaembi, vamuna nevakadzi, vakaereketa ndiJosia, mukumuchema kwavo ngenduyo dzechiriro chavo metsa nanyamashi. Vakaita izvi kuti zviite tsika yavo muIsuraeri; ringira, zvakanyorwa mubhuku rezviriro. Zvino mishando imweni yaJosia, nezvakarurama zvaakaita, kudai ngeizvo zveshe zvaiya zvakanyorwa mumupango waMambo Mwari, nezviito zvake, zvokutanga nezvokupedzisira, ringirai zvakanyorwa muBhuku reMadzimambo aIsuraeri naaJudha. Vanhu venyika vakatora Jehoahazi mukororo waJosia, vakamuita mambo muJerusarema pachigaro chababa ake. Jehoahazi waiya nemakore makumi mairi nematatu apo paakatanga kutonga; wakatonga muJerusarema mwedzi mitatu. Mambo weEgipite wakamudusa umambo hwake ari muJerusarema, wakabharisa vanhu venyika yaJudha chibharo makhirogramu esirivha makumi emazana matatu nemazana marongomuna (3,400) nemakhirogramu makumi matatu nemarongomuna omukore. Mambo weEgipite wakaisa hama yake Eriakimu kuita mambo padera paJudha neJerusarema, naye wakakunukudza zina rake kuti Jehoiakimu; asi Nekho wakatora Jehoahazi hama yake akamuisa Egipite. Jehoiakimu wakatanga kutonga anemakore makumi mairi nemashanu; wakatonga makore gumi narimwe muJerusarema. Wakaita zvakashata mukuona kwaMambo Mwari, Mwari wake. Nebhukhadhineza mambo weBhabhuroni wakauya koorwa naye, wakamusunga ngemanguri esimbi, wakamutora kuenda naye Bhabhuroni. Nebhukhadhineza wakatorawo zvidziyo zvemhatso yaMambo Mwari kuenda nazvo Bhabhuroni, wakazviisa mungome yake muBhabhuroni. Zvino mishando imweni yaJehoiakimu, nezvinonyangadza zvaakaita, neizvo zvakaoneka kwaari, ringirai zvakanyorwa muBhuku reMadzimambo aIsuraeri naaJudha; naJehoiakhini mukororo wake wakatonga pachigaro chake. Jehoiakhini wakatanga kutonga ane makore masere; wakatonga muJerusarema mwedzi mitatu nemazuva gumi. Wakaita zvakashata mukuona kwaMambo Mwari. Naapo chirimo chapera, mambo Nebhukhadhineza wakatumira vanhu koomutora kuuya naye Bhabhuroni, nezvidziyo zvakanaka zvomumhatso yaMambo Mwari, naye wakaita Zedhekia hama yake mambo waJudha neJerusarema. Zedhekia wakatanga kutonga anemakore makumi mairi narimwe, naye wakatonga makore gumi narimwe muJerusarema. Wakaita zvakashata mukuona kwaMambo Mwari, Mwari wake. Aazi kudzipfaisa pamberi paJeremia muprofeti, uwo wakaereketa izvo zvakabva kumuromo waMambo Mwari. Nayezve wakamukira mambo Nebhukhadhineza, uwo wakamupikisa mhiko ndiMwari; asi wakakukutarisa mutsipa wake, akakonzisa mwoyo wake kuti asatenderukira kunaMambo Mwari, Mwari waIsuraeri. Veshe vapristi vakuru, nevanhuwo vaiya vasikagondeki kakurutu ngokuteera zveshe zvinyangadzo zvemadzinza asikadiri Mwari; navo vakasvipisa mhatso yaMambo Mwari iyo yaaiya akachenesa muJerusarema. Mambo Mwari, Mwari wemadzibaba avo, wakaangira kutumira izwi kwevari ngavaranda vake nguva dzeshe, ngokuti waiya nenyasha kuvanhu vake nendau yake yokugara. Asi vakaangira kuitira jee varanda vaMwari, vakashoora izwi rake, vakatuka vaprofeti vake, metsa ushungu hwaMambo Mwari hwabaka kunavanhu vake kakurutu, apana naumwe wakapokonyoka. Ndizvo iye wakaunza mambo wevaKharadhea koorwa navo, uwo wakauraya vadoko vavo ngeshoti mumhatso yavo yakachena, waiya asina nyasha kunemajaha nokuti kunevasikana, vakuru nokuti harahwa. Iye wakavapira veshe munyara dzake. Zvidziyo zveshe zvemhatso yaMambo Mwari, zveshe zvikuru nezvidoko, nezvoupfumi hwemhatso yaMambo Mwari, nezvoupfumi hwamambo, nohwevakuru vake, zveshe izvi wakazviunza Bhabhuroni. Vakapisha mhatso yaMwari, vakaputsira pashi rukumbati rweJerusarema, vakapisha ngome dzaro dzeshe ngomuriro, vakaparadza zvidziyo zvaro zveshe zvaiya zvakanaka. Wakatora kuita hloko veshe muBhabhuroni vakapokonyoka kubva mukuurawa ngeshoti; naapo vakaita varanda vake nevevakororo vake metsa kutonga kwemadzimambo ePhesia, kuti rizadzisike izwi iro raakaereketa Mambo Mwari ngomuromo waJeremia, metsa nyika yaita maSabatha ayo. Mazuwa eshe eyakagara iri matongo yakangwarira maSabatha, kuzadzisa makore makumi manomwe. Mugore rokutanga kwaSairusi mambo wePhesia, mukuzadzisa izwi raMambo Mwari rakaereketwa ngomuromo waJeremia, Mambo Mwari wakamusa mweya waSairusi mambo wePhesia, kuti atumire izwi muumambo hwake hweshe, naye wakanyora kuti adzidzwe, echiti, “Unoronza izvi Sairusi mambo wePhesia: ‘Mambo Mwari, Mwari womudenga, wakandipa umambo hweshe hwenyika, naye wakandipanga kuti ndimuakire mhatso muJerusarema, riri muJudha. Kunyazwi ndiani uri pakati penyu wevanhu vake veshe, Mambo Mwari, Mwari wake, ngaagare naye! Ngaakwireyo.’ ” Mugore rokutanga rokutonga kwaSairusi mambo wePhesia, kuti izwi raMambo Mwari raakaereketa ngomuromo waJeremia rizadzisike, Mambo Mwari wakamusa mweya waSairusi mambo wePhesia, kuti adaidzire chiziiso mukati mwoumambo hwake hweshe, nokuchinyora kuti chidzidzwe. “Unoronza izvi Sairusi mambo wePhesia: Mambo Mwari, Mwari womudenga, wandipa umambo hweshe hwomunyika, naye wandipanga kuti ndimuakire mhatso muJerusarema muJudha. Kunyazwi ndiani weavo vari pakati penyu wevanhu vake, Mwari wake ngaagare naye! Zvino unotenderwa kukwira Jerusarema muJudha, nokuakisa mhatso yaMambo Mwari, Mwari waIsuraeri, ndiye Mwari uwo uri muJerusarema. Avo vakasara kunyazwi ngepari pandau pevanogara, ngavadetserwe ngevanhu vendau yavo veshe ngesirivha nomukore, nenhumbi nezvifuyo, ngepabanze peminikero yokupa ngokuda yemhatso yaMwari iri muJerusarema.” Zvino vakamiruka vakuru vemhatso dzemadzibaba aJudha naaBhenjamini, vapristi nevaRevhi, pamwepo naavo veshe vaakamusa Mwari mweya yavo, vakadzinasirira kuti vakwire kooaka mhatso yaMambo Mwari muJerusarema. Vaakirwana vavo veshe vakavadetsera ngezvidziyo zvesirivha, zvomukore, nhumbi, zvifuyo, nezviro zvinomutengo mukuru, ngepabanze peizvo zvakapuwa ngomwoyo unoda. Sairusi mambo pachake wakaunza zvidziyo zvemhatso yaMambo Mwari, zvaakatora Nebhukhadhineza kubva Jerusarema, echizviisa mumhatso yezvimwari zvake. Mambo Sairusi wePhesia wakaita kuti zviunzwe munyara yaMithiredhathi mungwariri woupfumi, uwo wakazvierenga akapa Sheshibhaza mutongi waJudha. Uhwu ndihwo uwandu hwazvo: zvidziyo zvomukore zvaiya makumi matatu, zvidziyo zvesirivha zvaiya gumi remazana (1,000), mapanga aiya makumi mairi nemapfumbamwe; mikheyo yomukore makumi matatu, imweni mikheyo yesirivha mazana marongomuna negumi (410), zvimweni zvidziyo gumi remazana (1,000). Zveshe zvidziyo zvomukore nezvesirivha zvaiya makumi emazana mashanu nemazana marongomuna (5,400). Zveshe izvi zvakaunzwa Jerusarema ndiSheshibhaza, pamwepo naavo vaiya hloko vechibva Bhabhuroni. Zvino ava ndivo vana vomunyikeyo vakakwira kubva muuhloko, avo vaiya vakatorwa ndiNebhukhadhineza mambo weBhabhuroni, kuenda navo Bhabhuroni; vakapetuka Jerusarema neJudha, munhu weshe kuenda kudhorobha rake. Vakauya naZerubhabheri, Jeshua, Nehemia, Seraia, Reeraia, Mordhekhai, Bhirishani, Misipha, Bhigivhai, Rehumu naBhaana. Uwandu hwevanhu vaIsuraeri: mibarirwana yaPharoshi, makumi emazana mairi nezana rimwe nemakumi manomwe nevairi (2,172). Mibarirwana yaShefatia, mazana matatu nemakumi manomwe nevairi (372). Mibarirwana yaAra, mazana manomwe nemakumi manomwe nevashanu (775). Mibarirwana yaPhahathimoabhi ngemazina emibarirwana yaJeshua naJoabhi, makumi emazana mairi nemazana masere negumi nevairi (2,812). Mibarirwana yaEramu, gumi rimwe remazana nemazana mairi nemakumi mashanu nevarongomuna (1,254). Mibarirwana yaZatu, mazana mapfumbamwe nemakumi marongomuna nevashanu (945). Mibarirwana yaZakhai, mazana manomwe nemakumi matanhatu (760). Mibarirwana yaBhani, mazana matanhatu nemakumi marongomuna nevairi (642). Mibarirwana yaBhebhai, mazana matanhatu nemakumi mairi nevatatu (623). Mibarirwana yaAzigadhi, gumi remazana nemazana mairi nemakumi mairi nevairi (1,222). Mibarirwana yaAdhonikamu, mazana matanhatu nemakumi matanhatu nevatanhatu (666). Mibarirwana yaBhigivhai, makumi emazana mairi nemakumi mashanu nevatanhatu (2,056). Mibarirwana yaAdhini, mazana marongomuna nemakumi mashanu nevarongomuna (454). Mibarirwana yaAteri ngemazina avo vaHezekia, makumi mapfumbamwe nevasere (98). Mibarirwana yaBhezai, mazana matatu nemakumi mairi nevatatu (323). Mibarirwana yaJora, zana negumi nevairi (112). Mibarirwana yaHashumu, mazana mairi nemakumi mairi nevatatu (223). Mibarirwana yaGibha, makumi mapfumbamwe nevashanu (95). Mibarirwana yaBhetherehema, zana nemakumi mairi nevatatu (123). Vanhu veNetofa, makumi mashanu nevatanhatu (56). Vanhu vaAnathothi, zana nemakumi mairi nevasere (128). Mibarirwana yaAzimavhethi, makumi marongomuna nevairi (42). Mibarirwana yaKiriathi-jearimu, Khefira naBheerothi, mazana manomwe nemakumi marongomuna nevatatu (743). Mibarirwana yaRama neyaGebha, mazana matanhatu nemakumi mairi naumwe (621). Vanhu vaMikhimashi, zana nemakumi mairi nevairi (122). Vanhu veBhetheri naAi, mazana mairi nemakumi mairi nevatatu (223). Mibarirwana yaNebho, makumi mashanu nevairi (52). Mibarirwana yaMagibhishi, zana nemakumi mashanu nevatanhatu (156). Mibarirwana yaEramu umweni, gumi remazana nemazana mairi nemakumi mashanu nevarongomuna (1,254). Mibarirwana yaHarimu, mazana matatu nemakumi mairi (320). Mibarirwana yaRodhi, yaHadhidhi neyaOno, mazana manomwe nemakumi mairi nevashanu (725). Mibariwana yaJerikho, mazana matatu nemakumi marongomuna nevashanu (345). Mibarirwana yaSenaa, makumi emazana matatu nemazana matanhatu nemakumi matatu (3,630). Vapristi mibarirwana yaJedhaia, vemhatso yaJeshua, mazana mapfumbamwe nemakumi manomwe nevatatu (973). Mibarirwana yaIma, gumi remazana nemakumi mashanu nevairi (1,052). Mibarirwana yaPhashuri, gumi remazana nemazana mairi nemakumi marongomuna nevanomwe (1,247). Mibarirwana yaHarimu, gumi remazana negumi nevanomwe (1,017). VaRevhi mibarirwana yaJeshua naKadhimieri, vemibarirwana yaHodhavhia, makumi manomwe nevarongomuna (74). Vaembi mibarirwana yaAsafi, zana nemakumi mairi nevasere (128). Mibarirwana yevarindi vemisiwo: mibarirwana yaSharumu, yaAteri, yaTarimoni, yaAkubhi, yaHatita neyaShobhai, veshe pamwepo zana nemakumi matatu nevapfumbamwe (139). Vashandi vomutemperi: mibarirwana yaZiha, yaHasufa, yaTabhaothi, yaKerosi, yaSiaha, yaPhadhoni, yaRebhana, yaHagabha, yaAkubhi, yaHagabhi, yaShrimai, yaHanani, yaGidheri, yaGaha, yaReaia, yaRezini, yaNekodha, yaGazamu, yaUza, yaPhasea, yaBhesai, yaAsina, yaMeunimu, yaNefisimu, yaBhakibhuki, yaHakufa, yaHahuri, yaBhaziruthi, yaMehidha, yaHasha, yaBhakosi, yaSisera, yaThema, yaNezia neyaHatifa. Mibarirwana yevaranda vaSoromoni: yaSotai, yaHasoferethi, yaPherudha, yaJaara, yaDhakoni, yaGidheri, yaShefatia, yaHatiri, yaPhokherethihazebhaimu neyaAmi. Veshe vashandiri vomutemperi nemibarirwana yevaranda vaSoromoni, mazana matatu nemakumi mapfumbamwe nevairi (392). Naava ndivo vakakwira kubva Therimera, Theriharsha, Kherubhi, Adhani naIma, kunyazwi vasaikona kududzira mibarirwana yemhatso yemadzibaba avo, nokubarwa kwavo kuti vaiya vevaIsuraeri here: mibarirwana yaDheraia, yaThobhia neyaNekodha, mazana matanhatu nemakumi mashanu nevairi (652). Mibarirwanawo yevapristi: mibarirwana yaHabhaia, yaHakozi neyaBharizirai, (uwo wakaroora umwe wevanasikana vaBharizirai muGireadhi, naye wakadaidzwa ngezina ravo). Ava vakatsvaka kunyorwa kwemazina avo pakati peavo vakaerengwa ngemazina emibarirwana yavo, asi avazi kuonekapo; ndizvo vakaduswa kubva kuupristi, kudai ngeavo vakasvipiswa; mutongi wakavaronzera kuti vasachazodya zviro zvakapindisisa kuchena, metsa kwauya mupristi unoshandisa Urimu neThumimu. Uwandu hwembungano yeshe hwaiya makumi marongomuna nemairi emakumi emazana nemazana matatu nemakumi matanhatu (42,360), ngepabanze pevaranda vavo vevamuna nevevakadzi, avo vaiyapo veshe makumi emazana manomwe nemazana matatu nemakumi matatu nevanomwe (7,337); vaiya nevaembi pakati pavo mazana mairi (200), vamuna nevakadzi. Vaiya nemahachi avo mazana manomwe nemakumi matatu nematanhatu (736), nemanyurusi avo mazana mairi nemakumi marongomuna nemashanu (245), makamera avo mazana marongomuna nemakumi matatu namashanu (435), nezvimbongoro zvavo makumi emazana matanhatu nemazana manomwe namakumi mairi (6,720). Apo pevakaguma pamhatso yaMambo Mwari muJerusarema, vamweni vevakuru vemhatso dzemadzibaba avo vakapa ngokuda zvipo zvemhatso yaMambo Mwari, kuti vaiake pandau yayo. Vakapa kudai ngokuwanda kwoupfumi hwavo mare yokuaka, mukore makhirogramu mazana mashanu (500), sirivha makhirogramu makumi emazana mairi nemazana masere (2,800) nezvokusimira zvevapristi zana (100). Vapristi, vaRevhi nevanhu vamweni vaigara muJerusarema nomunharaunda yaro; nevaembi, varindi vemisiwo nevaranda vomutemperi vaigara mumadhorobha avo, nevaIsuraeri veshe mumadhorobha avo. Naapo mwedzi wechinomwe waguma vana vaIsuraeri vaiya vaa mumadhorobha, vanhu vakaungana pamwepo muJerusarema. Zvino Jeshua mukororo waJozadhaki, nehama dzake vapristi, naZerubhabheri mukororo waShearitieri, nehama dzake vakamiruka kuaka arita raMwari waIsuraeri, kuti vapirepo midiro yokupisha, kudai ngezvakanyorwa mumupango waMosi munhu waMwari. Navo vakaemesa arita padera petsikiro raro, ngokuti vaiya mukutya ngendaa yevanhu venyika idzo dzevaigurirana nadzo; navo vakapira midiro yokupisha kunaMambo Mwari padera paro, mangwanani nemadeekoni. Navo vakangwarira dhiri rematumba, kudai ngezvakanyorwa, navo vakapira midiro yokupisha zuva ngezuva, kudai ngouwandu wazvo, kudai ngezvakaemeswa zvinodikanwa zvezuva ngezuva, nangesure kweizvi vakapira midiro yokupisha yenguva dzeshe, yokutawa kwomwedzi, nemadhiri eshe akaemeswa ndiMambo Mwari, iyo yakacheneswa, neyeavo veshe vakapa kunaMambo Mwari ngokuda. Kubvira ngezuva rokutanga romwedzi wechinomwe vakatanga kupira midiro yokupisha kunaMambo Mwari. Asi tsikiro retemperi raMambo Mwari raiya risati raradzikwa. Ndizvo vakapa mare kuneavo vaitsetsa mapuwe, naavo vaitsetsa matanda, nezvokudya, zvokumwa, nemafuta, kuvaSidhoni nevaThire kuti vaunze matanda emisidhari kubva Rebhanoni kuaendesa kuruandhle kuti aende Jopa, kudai ngokutenderwa kwevakatenderwa ndiSairusi mambo wePhesia. Mugore rechipiri ngesure kwokuuya kwavo kumhatso yaMwari paJerusarema, ngomwedzi wechipiri, Zerubhabheri mukororo waShearitieri naJeshua mukororo waJozadhaki, vakaita maambo pamwepo nevamweni vevanhu vavo, vapristi nevaRevhi, naavo veshe vaiya vapetuka kuJerusarema vechibva kuusungwa. Vakaemesa vaRevhi vaibvira pamakore makumi mairi nevari padera, kuti varingire mushando wemhatso yaMambo Mwari. NaJeshua anevakororo vake nehama dzake, naKadhimieri nevakororo vake, vemibarirwana yaHodhavhia pamwepo nevakororo vaHenadhadhi, vaRevhi, vakororo vavo nehama dzavo pamwepo vakatora mushando wokuringira vashandi mumhatso yaMwari. Naapo vaaki varadzika tsikiro retemperi raMambo Mwari, vapristi vakaemeswa vanezvokusimira zvavo zvezvipani vanemagwama, nevaRevhi vakororo vaAsafi vanengome dzavo dzesimbi, kuti vakudze Mambo Mwari kudai ngokuemesa kwaDhavhidha mambo waIsuraeri; navo vakaemba vechidairana, vechikudza nokubonga kunaMambo Mwari, “Ngokuti wakanaka, ngokuti nyasha dzake dzinogara mhera nariini kunaIsuraeri.” Nevanhu veshe vakadaira ngokudaidzira kukurutu, apo pevakakudza Mambo Mwari, ngendaa yokuti tsikiro remhatso yaMambo Mwari rakaradzikwa. Asi vazhinji vevapristi nevaRevhi nevakuru vemhatso dzemadzibaba, avo vanhu vakurisa, avo vakaona mhatso yokutanga pamadzeyo ayo, vakachema ngeizwi guru, apo pevakaona mhatso iyi, kunyazwi vazhinji vakadaidzira kakurutu ngokudakara. Ndizvo vanhu avazi kukona kuparadzanisa pakati pebope rokudakara nerokuchema kwevanhu, ngokuti vanhu vakadaidzira ngokudaidzira kukuru nebope rakazwika kuretu. Naapo magaa avaJudha naaBhenjamini azwa kuti avo vakapetuka kubva kuuhloko vaiakira Mambo Mwari, Mwari waIsuraeri, temperi, vakauya kunaZerubhabheri, nokuvakuru vemhatso dzemadzibaba, vakati kwevari, “Ngatiake nemwi, ngokuti tinodira Mwari wenyu, kudai ngezvomunoita; nesu taipira midiro kwaari kubvira pamazuva aEsarihadhoni mambo weAsiria, uwo wakatikwidza uno.” Asi Zerubhabheri, Jeshua nevamweni vevakuru vemhatso dzemadzibaba aIsuraeri vakati kwevari, “Imwimwi amuna chikoaniswa nesu mukuakira Mwari wedu mhatso; asi isusu tega tinozoakira Mambo Mwari, Mwari waIsuraeri, kudai ngokupanga kwaSairusi mambo wePhesia.” Zvino vanhu venyika iyo vakarembesa nyara dzevanhu vaJudha, vakavaita kuti vatye kuaka, navo vakatengera vanhu vakuru kuti vashaishire urongwa hwavo, mazuva eshe okutonga aSairusi mambo wePhesia metsa mukuwo wokutonga kwaDhariusi mambo wePhesia. Mukutonga kwaAhasuerusi, mugore rake rokuamba kutonga, vakanyora tsamba yokumangarira vagari veJudha neveJerusarema. Nomumazuva aArthazekizesi, Bhishiramu, Mithiredhathi, Tabheeri, nevamweni vaiya naye vakanyora kunaArthazekizesi mambo wePhesia; netsamba yakanyorwa ngorurumi rwevaAramu, narwo rwakakhumuchwa. Rehumu muteeri wamambo mukuru naShimishai munyori vakanyora tsamba kunaArthazekizesi mambo yokuitira ndaa Jerusarema. Zvino vakanyora Rehumu muteeri wamambo mukuru, Shimishai munyori pamwepo nevamweni vavo, vatongi, nhumwa, vakuru, vaPhesia, vanhu veErekhi, vaBhabhuroni, vanhu veSusa, ndivo vaEramu, nemadzinza amweni awo aakadzinga Osinapha, munhu mukuru unembiri, akavagarisa mumadhorobha eSamaria, nomundau dzimweni dzenyika kuguma mberi kwerwizi. Uku ndikwo kunyorwa kwetsamba yakatumirwa. “KunaArthazekizesi mambo: Varanda vako avo vanhu vari mberi kwerwizi, vanomuchingamidza. Nazvino ngazviziikanwe kunamambo kuti vaJudha avo vakakwira kubva kwouri vakauya kwetiri vakapetuka Jerusarema. Vanoakisa dhorobha iro rinomukira rakashata; vaakupedza marukumbati nokuakisa matsikiro. Ngazviziikanwe zvino kunamambo kuti, kudai dhorobha iri rikaakiswa nemarukumbati aro akapera, avachazobhadhari chibharo, nomuthero wezviro zvokutengesa, nomuthero wepato, ngokudaro vanozotsonza pfuma yamadzimambo. Zvino ngokuti tinokowana munyu womungome yamambo, nazvo azvichanakiri isusu kuona mambo echitserudzwa, ndizvo tinotumira izwi rokuziisa mambo, kuti kutsvakisiswe kubva mubhuku rendaa dzemadzibaba ako. Munozoona mubhuku rendaa dzemadzibaba enyu kuti iri dhorobha idhorobha rokumukira, rinoshaishira madzimambo nenyika, nokumusa kumukira mukati mwaro kubvira ngemazuva ekaretu. Ngendaa yeizvi dhorobha iri rakaparadzwa. Tinoziisa mambo kuti dhorobha iri rikaakiswa, nemarukumbati aro akapedzwa, zvino iwewe auzoane chikoaniswa munyika ngeseri kworwizi.” Mambo wakatumira mupinguro: “KunaRehumu muteeri wamambo mukuru, nokunaShimishai munyori, nokunevamweni vavo, vanogara muSamaria nokundau dzeshe dzenyika seri kworwizi, ndinochingamidza. Nazvino tsamba yemwakatumira kwetiri yakanasa kudzidzwa nokukhumuchwa pamberi pangu. Ndizvo ndakapanga noumweni wakatsvakisisa, naye wakaona kuti iri dhorobha karetu raimukira madzimambo, kuti kumukira nokugebenga zvakaitwa mukati mwaro. Jerusarema raiya nemadzimambo padera paro vaiya nesimba, vaitonga nyika dzeshe seri kworwizi; kwevaitorayo zvibharo nemithero yokutengesa neyepato. Ndizvo panga zvino kuti ava vanhu varekere, kuti iri dhorobha risaakiswa, metsa ndaita mupango umweni. Ngwarai zvino kuti musanonoka pandaa iyi; kushaishirwa kungakura ngenyi kunamambo?” Zvino apo tsamba yaArthazekizesi mambo yadzidzwa pamberi paRehumu naShimishai munyori naavo vamweni vavo, vakakasira kukwira Jerusarema kuvaJudha, vakavarambidza ngesimba kuti varekere. Panguvayo mushando wemhatso yaMwari wakarekerwa muJerusarema, nawo auzi kuzoangira metsa gore rechipiri rokutonga kwaDhariusi mambo wePhesia. Zvino vaprofeti, Hagai naZekharia mukororo waIdho, vakaprofeta kuvaJudha vaiya muJudha nomuJerusarema muzina raMwari waIsuraeri, waiya padera pavo. Zvino Zerubhabheri mukororo waShearitieri, naJeshua mukororo waJozadhaki vakamiruka, vakaamba kuakisa mhatso yaMwari muJerusarema, pamwepo nevaprofeti vaMwari vechivadetsera. Ngouwo mukuwo Tatenai mutongi wenyika yeseri kworwizi, naShethabhozenai nevamweni vavo, vakauya kwevari, vakaereketa kwevari vechiti, “Ndiani wakamupanga kuti muake iyi mhatso nokuparadza urwu rukumbati?” Vakavabvunzawo izvi, “Ndiani mazina eavo vanhu vanoaka mhatso iyi?” Asi madziso aMwari wavo airingira padera pevakuru vevaJudha, navo avazi kuvarambidza, metsa ndaa yakaiswa kunaDhariusi, naapo vakapingurwa ngetsamba ndaa iyo. Imwe yetsambayo yevakatumira kunaDhariusi mambo Tatenai, mutongi wenyika yeseri kworwizi, naShethabhozenai nevamweni vavo nhumwa, avo vaiya munyika yemberi kworwizi. Vakatumira mushumo kwaari, wakanyorwa kudai: “KunaDhariusi mambo, kunyarara kweshe! Ngakuziikanwe kunamambo kuti takaenda kunyika yaJudha, kumhatso yaMwari mukuru. Iyo irikuakwa ngemapuwe makuru, nematanda anoiswa padera mumarukumbati; mushando uyu unoenda mberi zvakanaka, unobudirira munyara dzavo. Zvino takabvunza vakuru avo, techiti kwevari, ‘Ndiani wakamupanga kuaka iyi mhatso, nokupedza marukumbati aya?’ Takabvunzawo mazina avo, kuti tikuronzere, kuti tinyore mazina evamuna vaiya vakuru pakati pavo. Vakatipingura vechiti, ‘Tiri varanda vaMwari womudenga nowomunyika, tinoakisa mhatso yakaakiwa ikapera makore mazhinji akapinda ndimambo mukuru waIsuraeri. Asi ngokuti madzibaba edu akamusa ushungu hwaMwari womudenga, wakavapira munyara dzaNebhukhadhineza mambo weBhabhuroni, muKharadhea, uwo wakaparadza iyi mhatso, akatora vanhu akaenda navo Bhabhuroni. Zvakanyadaro mugore rokutanga rokutonga kwaSairusi mambo weBhabhuroni, wakapanga kuti mhatso yaMwari iakiswe. Zve, zvidziyo zvomukore nezvesirivha zvemhatso yaMwari, izvo zvaakatora Nebhukhadhineza kubva mutemperi muJerusarema, nokuzviunza mutemperi romuBhabhuroni, izvi Sairusi mambo wakazvitora kubva mutemperi reBhabhuroni, nazvo zvakapuwa kunemunhu waizwi Sheshibhaza, uwo waakaemesa kuita mutongi.’ Wakati kwaari, ‘Tora izvi zvidziyo, enda uzviise mutemperi muJerusarema, nemhatso yaMwari ngaiakiwe pandau yayo.’ ” Zvino uwo Sheshibhaza wakauya, akaisa tsikiro remhatso yaMwari muJerusarema; kubvira ngouwo mukuwo metsa zvino ichandoakiwa, nayo aisati yapera. Ndizvo zvino, kudai kwechioneka kwakanaka kunamambo, ngakutsvakisiswe mumhatso yemabhuku ekaretu hwamambo muBhabhuroni kuti kuoneke kuti zvinegwinyiso here kuti Sairusi mambo wakapanga kuti mhatso yaMwari iakiswe muJerusarema. Mambo ngaatumire kwetiri chiri kuda kwake ngeiyi ndaa. Zvino Dhariusi mambo wakapanga izwi navo vakatsvakisisa mumhatso umwo mwaingwarirwa mabhuku ekaretu muBhabhuroni. Asi mwaiya muEkhibhathana dhorobha guru munyika yeMedhia umwo mweyakaoneka tsamba yakapetwa, mwaiya mwakanyorwa izvi, “Chinyorwa. Mugore rokutanga rokutonga kwake, Sairusi mambo wakaita mupango: Ngendaa yemhatso yaMwari muJerusarema, ngaiakiswe, mhatso ndau yevanopira midiro, nemidiro yokupisha peinounzwa urebu hwayo hwepadera huite mamitha makumi mairi nemanomwe nokupamhama mamitha makumi mairi nemanomwe, nemisara mitatu yemapuwe makuru, nomusara umwe wematanda; mutengo ngaubhadharwe kubva kuupfumi hwoumambo. Zve, zvidziyo zvomukore nezvesirivha zvemhatso yaMwari zvaakatora Nebhukhadhineza kubva mutemperi muJerusarema, akazviunza Bhabhuroni, ngazvihwirinzwewo zvipetudzwe mutemperi muJerusarema, chimwe ngachimwe kundau yacho; unozozviisa mumhatso yaMwari.” “Zvino, iwewe Tatenai, mutongi wenyika yoruseri rworwizi, Shethabhozenai, nemwi vamweni vavo, vatumwa vari munyika yoruseri kworwizi, garai kuretu; rekerai mushando wemhatso yaMwari uangire; tenderanyi mutongi wevaJudha nevakuru vevaJudha kuti vaakise mhatso iyi yaMwari pandau payo. Zve, ndaisa mupango ngendaa yeizvo zvomunosisira kuitira ava vakuru vevaJudha kuti iakiswe iyi mhatso yaMwari; mubhadharo ubhadharwe kuneava vanhu, wakaperera ngokukasira; mare ngaitorwe kubva muupfumi hwoumambo, hwechibaro chenyika yoruseri rworwizi. Kunyazwi chiinyi chevanotama, mikono mitsva, magondohwe, nemakwai, okuita midiro yokupisha kunaMwari womudenga, koroni, munyu, vhini, nokuti mafuta, kudai ngokuronza kwevapristi vari muJerusarema, ngazvipuwe kwevari zuva ngezuva; musakorera, kuti vapire midiro inegwema rakanaka kunaMwari womudenga, nokukumbirira ndaramo yamambo neyevana vake. Zve, ndaemesa mupango, kuti kunyazwi ndiani unozoshandura iri izwi, ngakuduswe sika kubva kumhatso yake, naye ngaaturikwe padera payo; nemhatso yake ngaiite murwi wemadisa ngendaa yeichi. Mwari uwo wakaita kuti zina rake rigaremwo, ngaauraye madzimambo eshe nevanhu veshe avo vanozoisa nyara yavo kushandura nokuiparadza iyi mhatso yaMwari iri muJerusarema. Inini Dhariusi ndaemesa mupango: ngauitwe ngokunaka kweshe.” Zvino kudai ngeizwi rakatumirwa ndiDhariusi mambo kunaTatenai, mutongi wenyika yeseri kworwizi, naShethabhozenai, nevamweni vavo, vakaita ngokunaka kweshe kudai ngezvaakapanga Dhariusi mambo. Ndizvo vakuru vevaJudha vakaaka, navo vakabudirira kubudikidza ngokuprofeta kwomuprofeti Hagai naZekharia mukororo waIdho. Vakaaka, vakaipedza, kudai ngokupanga kwaMwari waIsuraeri, nokupanga kwaSairusi, Dhariusi, naArthazekizesi mambo wePhesia. Nemhatso iyi yakapera kuakwa ngezuva rechitatu romwedzi unozwi Adha, mugore rechitanhatu rokutonga kwaDhariusi mambo. Vana vaIsuraeri, vapristi nevaRevhi, nevamweni vakapetuka kubva kuuhloko, vakaita dhiri rokupirwa kweiyi mhatso yaMwari ngokudakara. Vakapira ngomukuwo wokupirwa kweiyi mhatso yaMwari, mikono zana (100), magondohwe mazana mairi (200), zvimakwai mazana marongomuna (400); nokuita mudiro wokushaisha wevaIsuraeri veshe, vakapira magotokoto gumi namairi, kudai ngokuwanda kwemadzinza aIsuraeri. Zvino vakaemesa vapristi kudai ngezvikwata zvavo, nevaRevhi kudai ngemabingo avo, kuti vaite mushando waMwari muJerusarema, kudai ngezvakanyorwa mubhuku raMosi. Ngezuva regumi nemarongomuna romwedzi wokutanga vakapetuka kuuhloko vakangwarira Phasika. Ngokuti veshe vapristi nevaRevhi pamwepo, vaiya vadzichenesa pachavo; veshe pamwepo vaiya vacheneswa. Ndizvo vakauraira gwayana rePhasika reveshe vouhloko vakapetuka, nerevakoma vavo vapristi, neravo pachavo. Rakadyiwa ngevana vaIsuraeri, avo vaiya vapetuka kubva kuuhloko, naavo veshe vaiya vabatana pamwepo navo nokudziparadzanisa pachavo kubva kutsvina yemadzinza enyika, kuti vadire Mambo Mwari, Mwari waIsuraeri. Ngokudakara vakaita dhiri rechingwa chisina mumera mazuva manomwe; ngokuti Mambo Mwari wakavaita kuti vadakare, naye wakatenderudzira mwoyo wamambo weAsiria kwevari, kuti agwinyise nyara dzavo kumushando wemhatso yaMwari, Mwari waIsuraeri. Ngesure kweizvi, mukutonga kwaArthazekizesi mambo wePhesia, Ezura mukororo waSeraia, mukororo waAzaria, mukororo waHirikia, mukororo waSharumu, mukororo waZadhoki, mukororo waAhithubi, mukororo waAmaria, mukororo waAzaria, mukororo waMeraiothi, mukororo waZerahia, mukororo waUzi, mukororo waBhuki, mukororo waAbhishua, mukororo waFinehasi, mukororo waEreaza, mukororo waAroni mupristi mukuru, uyu Ezura wakakwira kubva Bhabhuroni. Waiya munyori ngwazi mumipango yaMosi, iyo yakapuwa ndiMambo Mwari, Mwari waIsuraeri; namambo wakamupa zveshe zvaakakumbira, ngendaa yokuti nyara yaMambo Mwari, Mwari wake, yaiya padera pake. Vamweni vevana vaIsuraeri, vamweni vevapristi nevaRevhi, vaembi, nevangwariri vemisiwo, nevashandi vomutemperi, vakakwirawo Jerusarema, mugore rechinomwe rokutonga kwaArthazekizesi mambo. Vakauya Jerusarema ngomwedzi wechishanu, mugore rechinomwe rokutonga kwamambo. Ngezuva rokutanga romwedzi wokutanga, wakaamba kukwira kubva Bhabhuroni, ngezuva rokutanga romwedzi wechishanu wakaguma Jerusarema, ngokuti nyara yenyasha yaMwari wake yaiya padera pake. Ngokuti Ezura waiya aemesa mwoyo wake kuti anase kufundira mupango waMambo Mwari, nokuuita nokudzidzisa zviemeso nezvitongero muIsuraeri. Iyi ndiyo imwe yetsambayo yaakapa mambo Arthazekizesi kunaEzura mupristi, munyori, mudzidzi wemazwi emipango yaMambo Mwari, nowezviemeso zvake kunaIsuraeri: “Arthazekizesi mambo wemadzimambo, kunaEzura mupristi, munyori wemipango yaMwari womudenga: Kunyarara. Nazvino ndinoemesa chironzo, kuti kunyazwi ndiani wevanhu vaIsuraeri, nokuti vapristi vavo, nokuti vaRevhi, vari muumambo hwangu, vanodzipira ngokwavo kukwira Jerusarema, vaende newe. Ngokuti watumwa ndimambo, nemakota ake manomwe, koobvunzisa ngendaa yaJudha neJerusarema, kudai ngomupango waMwari wako uri munyara yako, nokuenda nesirivha nomukore uwo wakapirwa ndimambo nemakota ake ngomwoyo unoda kunaMwari waIsuraeri, uwo ugaro hwake huri muJerusarema. Nesirivha nomukore zveshe zvoungaona munyika yeshe yeBhabhuroni, pamwepo nezvipo zvinoduswa zvevanhu vanopa ngomwoyo unoda, nevapristi zvinopirwa ngokuda zvemhatso yaMwari wavo muJerusarema. Ngemare iyi zvino ukone kunasa kutenga mikono, magondohwe, zvimakwai, nemidiro yavo yezviyo nemidiro yavo yokumwa, uzvipire padera pearita remhatso yaMwari wako muJerusarema. Kunyazwi ngechiri chinooneka chakanaka kwouri, nokuhama dzako chokuita, ngesirivha nomukore zvinosara mungazviita, kudai ngokuda kwaMwari wenyu. Nezvidziyo zvakapirwa kwouri zvemushando wemhatso yaMwari wako, unozozviunza pamberi paMwari muJerusarema. Kunyazwi chiinyizve chinodiwa chemhatso yaMwari wako, icho chinosisira kuti iwewe uchiunze, unozochipa kubva kuupfumi hwemhatso yamambo. “Inini Arthazekizesi mambo, ndinopanga kwevari vangwariri veshe vepfuma vari ruseri rworwizi, kuti kunyazwi chiinyi chaanoda kubva kwomuri Ezura mupristi nomunyori womupango waMwari womudenga, chiitenyi, ngokunasa kunaka, metsa makhirogramu makumi emazana matatu nemazana marongomuna (3,400) esirivha, chipimo chekoroni makhirogramu gumi remakumi emazana (10,000), maritha evhini makumi emazana mairi (2,000), maritha emafuta makumi emazana mairi (2,000) nezvipimo zvomunyu zvakawandisa. Kunyazwi chiinyi chinopangwa ndiMwari womudenga, ngachiitwe ngokuda kumhatso yaMwari womudenga, ngokuti ushungu ungazouya padera poumambo hwamambo nevagari venhaka yake. Tinomuziisawo kuti akuzotenderwi kubhadharisa muthero wokutengesa nowepato, kunyazwi ngouri zvawo, kuvapristi, vaRevhi, vaembi, vangwariri vemisiwo, vashandi vomutemperi, nokuti vashandiri vamweni vemhatso iyi yaMwari. “Iwewe Ezura, kudai ngoungwaru hwakapuwa kwouri ndiMwari hwounahwo, emesa vatongi nevaguri vendaa, vatonge vanhu veshe vari ruseri rworwizi, avo veshe vanozia mipango yaMwari wako; newe unozodzidzisa avo vasikazii. Veshe avo vasikazopurutani mupango waMwari wako, nemupango wamambo, kutongwa kunozouya padera pavo ngokukasira, kuurawa, nokuti kudzingwa, nokuti kutorerwa upfumi, nokuti kuiswa mutirongo.” Ngaakudzwe Mambo Mwari, Mwari wemadzibaba edu, uwo wakaisa chiro chakadaro mumwoyo mwamambo, kunemesa mhatso yaMambo Mwari muJerusarema, uwo wakandiitira nyasha pamberi pamambo nemakota ake, nepamberi pevakuru vake vanesimba. Ndakagwinyiswa ngokuti nyara yaMambo Mwari, Mwari wangu, yaiya padera pangu, neni ndakaunganidza pamwepo vatungamiriri vaIsuraeri kuti vakwire neni. Ava ndivo vakuru vemhatso dzemadzibaba avo, nouku ndikwo kuerengwa kwemazina emibarirwana yavo, aavo vakakwira neni kubva Bhabhuroni, mukutonga kwaArthazekizesi mambo: Vemibarirwana yaFinehasi, Gershomu; vemibarirwana vaIthama, Dhanieri; vemibarirwana yaDhavhidha, Hatushi, vemibarirwana yaShekania; vemibarirwana yaPharoshi, Zekharia, pamwepo naye vakaerengwa nokunyorwa mazana emibarirwana yevamuna zana nemakumi mashanu (150); vemibarirwana yaPhahathimoabhi, Eriehoenai mukororo waZerahia, pamwepo naye vamuna mazana mairi (200); vemibarirwana yaZatu, Shekhania mukororo waJahazieri, pamwepo naye vamuna mazana matatu (300); vemibarirwana yaAdhini, Ebhedhi mukororo waJonathani, pamwepo naye vamuna makumi mashanu (50); vemibarirwana yaEramu, Jeshaia mukororo waAtharia, pamwepo naye vamuna makumi manomwe (70); vemibarirwana yaShefatia, Zebhadhia mukororo waMikhaeri, pamwepo naye vamuna makumi masere (80); vemibarirwana yaJoabhi, Obhadhia mukororo waJehieri, pamwepo naye vamuna mazana mairi negumi nevasere (218); vemibarirwana yaBhani, Sheromithi mukororo waJosifia, pamwepo naye vamuna zana nemakumi matanhatu (160); vemibarirwana yaBhebhai, Zekharia mukororo waBhebhai, pamwepo naye vamuna makumi mairi nevasere (28); vemibarirwana yaAzigadhi, Johanani mukororo waHakathani, pamwepo naye vamuna zana negumi (110); vemibarirwana yaAdhonikamu, avo vakapedzisira kuuya, mazina avo ngaaya, Erifereti, Jeeri naShemaia, pamwepo navo vamuna makumi matanhatu (60); vemibarirwana yaBhigivhai, Uthai naZakuri, pamwepo navo vamuna makumi manomwe (70). Ndakavaunganidza pamwepo kurwizi urwo runoenda Ahavha; naapo takagarapo mazuva matatu mumatende. Naapo ndaringira vanhu nevapristi, andizi kuonapo naumwe hake wemibarirwana yaRevhi. Zvino ndakatuma nhumwa koodaidza Erieza, Arieri, Shemaia, Erinathani, Jaribhi, Erinathani, Nathani, Zekharia naMeshuramu, avo vaiya vatungamiriri, naJoiaribhi naErinathani, vamuna vaiya vakangwara, nokuvatuma kunaIdho, mutungamiriri pandau inozwi Khasifia, ndakavaronzera zvokuti vaerekete kunaIdho, nokunehama dzake vashandi vomutemperi, kundau inozwi Khasifia ndikwo kuti vatumire kwetiri vashandi vemhatso yaMwari wedu. Ngendaa yokuti nyara yakanaka yaMwari yaiya padera pedu, vakatiunzira munhu unozwisisa wemibarirwana yaMahiri, mukororo waRevhi, mukororo waIsuraeri, ngemazina avo Sherebhia, pamwepo nevakororo vake nehama dzake gumi nevasere (18); Hashabhiawo pamwepo naJeshaia wemibarirwana yaMerari, nehama dzake nevakororo vavo, makumi mairi (20); ngepabanze pemazana mairi nemakumi mairi (220), vashandi vomutemperi, avo vaakaemesa Dhavhidha nenduna dzake kuita mushando wevaRevhi. Ava veshe vakadudzwa ngemazina. Zvino ndakaemesapo kuti kuerwe kudya, paRwizi Ahavha, kuti tidzipfaise pamberi paMwari wedu, kuti titsvake kubva kwaari njira yakarurama kwetiri, nokunevana vedu, neyepfuma yedu yeshe. Ngokuti ndakatsveruka kukumbira kunamambo chikwata chevarwi vehondo nevagadhi vemahachi kuti vatingwarire kubva kunemagaa edu munjira, ngokuti taiya takaronza kunamambo kuti, “Nyara yaMwari wedu iri padera pavo veshe kuita zvakanaka kwevari veshe vanomutsvaka; asi simba rake noushungu hwake hunobaka kwevari veshe vanomusiya.” Ndizvo takaera kudya, tikakumbira kunaMwari ngeizvi, naye wakapurutana kupota kwedu. Zvino ndakaemesa vapristi vakuru gumi navairi, Sherebhia, Hashabhia, nehama dzavo gumi vevaiya navo. Ndakavapimira sirivha, mukore, nezvidziyo, munikero wemhatso yaMwari wedu, izvo mambo, makota ake, vakuru vake, nevaIsuraeri veshe vaiyapo zvevakanikera. Ndakapimira munyara dzavo mametrikhi thanisi makumi mairi nemairi ezvigurwa zvesirivha, nezvidziyo zvesirivha zana zvinorema makhirogramu makumi manomwe, nezvomukore zvinorema makhirogramu makumi emazana matatu nemazana marongomuna (3,400), mikheyo makumi mairi yomukore, inorema makhirogramu masere nezvidoko zvirongomuna, nezvidziyo zviiri zvethusi rakaeriswa, zvinomutengo wakadai ngowemukore. Neni ndakati kwevari, “Imwimwi muri vakacheneswa kunaMambo Mwari, nezvidziyo zvakacheneswa; sirivha nomukore zviripo zvinopuwa ngomwoyo unoda kunaMambo Mwari, Mwari wemadzibaba enyu. Zvirindenyi, muzvingwarire, metsa muzvipime pamberi pevapristi vakuru nevaRevhi, nevakuru vemhatso dzemadzibaba muIsuraeri, muJerusarema, mumakamera emhatso yaMambo Mwari.” Ndizvo vapristi nevaRevhi vakatora sirivha, mukore nezvidziyo, apo zvapimwa kuti vazviunze Jerusarema kumhatso yaMwari wedu. Zvino takabva paRwizi Ahavha ngezuva regumi nemairi romwedzi wokutanga, kuenda Jerusarema; nyara yaMambo Mwari wedu yaiya padera pedu, naye wakatirwira kubva munyara dzamagaa nedzeavo vaitihwarira munjira. Takaguma Jerusarema, takagaramwo mazuva matatu. Ngezuva rechina mumhatso yaMwari wedu sirivha, mukore nezvidziyo zvakapimwa zviri munyara yomupristi Meremothi mukororo waUria; waiya naye Ereaza mukororo waFinehasi; vaiya navo vaRevhi Jozabhadhi mukororo waJeshua naNoadhia mukororo waBhinui. Zveshe pamwepo zvakaerengwa nokupimwa nouremu wezviro zveshe hwakanyorwa ngouwo mukuwo. Panguva iyo avo vakauya kubva kuusungwa, vakapetuka kubva kuuhloko, vakapira midiro yokupisha kunaMwari waIsuraeri, mikono gumi namairi, kuitira vaIsuraeri veshe, magondohwe makumi mapfumbamwe namatanhatu, makwayana makumi manomwe nemanomwe, nemagotokoto gumi namairi kuita mudiro wezvishaishi; zveshe izvi zvakaita mudiro wokupisha kunaMambo Mwari. Vakapazve mipango yakanyorwa yamambo kunevatungamiriri vehondo vamambo, nokuvatongi venyika yoruseri rworwizi; vakadetsera vanhu nemhatso yaMwari. Ngesure izvi zviro zveshe zvaitwa, vakuru vakauya kwendiri vechiti, “Vanhu vaIsuraeri, vapristi, nevaRevhi, avazi kudzipaura pachavo kubva kuvanhu venyika nezvinyangadzo zvavo, kubva kuvaKhenani, vaHiti, vaPherizi, vaJebhusi, vaAmoni, vaMoabhi, vaEgipite nevaAmori. Ngokuti vakadzitorera vamweni vevanasikana veavo kuita vakadzi vavo nevevakororo vavo. Ndizvo dzinza rakacheneswa rakadzikumanidza pamwepo nevanhu venyika idzo nomukusikagondeka uku vakuru nevatungamiriri ndivo vakatanga kuita uku kupauka.” Naapo ndazwa izvi, ndakabaura zvokufuka zvangu nejira rangu, ndikabvita bvudzi rangu resoro nomurebvu wangu, ndikagara pashi ndechishamiswa. Zvino vakaungana veshe vaihuta ngeizwi raMwari waIsuraeri, ngendaa yokusikagondeka kweavo vakapetuka kubva kooitwa hloko, kunditendenedza apo ndakagara ndechishamiswa metsa mukuwo wokupisha mudiro wemadeekoni. Panguva yomudiro wemadeekoni ndakamiruka kubva mukuera kudya kwangu, nemachira angu nechokufuka changu zvakabauka, ndakagwadama ngemabvi angu, ndikatambanudzira nyara dzangu kunaMambo Mwari, Mwari wangu. Ndakati, “A Mwari wangu, ndatsveruka kakurutu nokutsveruka kuti ndimirudze hope yangu kwouri, Mwari wangu, ngokuti zvishaishi zvedu zvakwira kudarika padera pemasoro edu, nokushaisha kwedu kwakura kuguma kumatenga. Kubvira kumazuva emadzibaba edu metsa nyamashi tanyanya kudzaka mukushaisha; ngendaa yezvinyangadzo zvedu isusu, madzimambo edu nevapristi vedu, takapirwa munyara dzemadzimambo enyika, koourawa ngeshoti, kuitwa hloko, kuchakatwa, nokutsverudzwa kudai ngezvezvakaita nyamashi. Asi zvino kwomukuwo mudoodoko takaitirwa nyasha ndiMambo Mwari, Mwari wedu, wakatisiira vakasara avo vakapona, nokutipa ndau isikakutukuswi kudai ngechipikiri kuti tigare mundau yake yakachena, kuti Mwari wedu ajekise madziso edu, atipe zvinotiringana zvidoko pakati pouhloko hwedu. Ngokuti isusu tiri hloko; asi Mwari wedu aazi kutirasha muuhloko hwedu, asi wakatambanudzira kwetiri rudo rwake mukuona kwemadzimambo ePhesia, kuti atipe ndaramo itsva, kuti tiakise mhatso yaMwari wedu, nokuakisazve matongo ayo, nokutipa rukumbati muJudha nomuJerusarema. “Nazvino, A Mwari wedu, chiinyi chetingacharonza ngesure kweizvi? Ngokuti takarasha mipango yako, iyo yewakapanga ngevaranda vako vaprofeti wechiti, ‘Nyika iyi yomunopotera kooita yenyu inyika yakasvipiswa ngokushaisha kwevanhu venyika, nezvinyangadzo zvavo. Vakaizadza kubvira kumagumo amwe kuenda kumagumo amweni ngezvinyangadzo zvavo. Ndizvo zvino musazoroodza vanasikana venyu kuvakororo vavo, nokuti kutora vanasikana vavo kuroodza vakororo venyu, nokuti kutsvaka kunyarara kwavo nokuti pfuma yavo, kuti muite vanesimba, mudye kunaka kwenyika, muisiire vana venyu kuita nhaka yavo mhera nariini.’ Ngesure kweizvi zveshe zvakatigumira ngendaa yemishando yedu yakashata nendaa yokushaisha kwedu kukuru, techiona kuti iwewe, Mwari wedu, auzi kutiorora kudai ngezvinosisira zvishaishi zvedu, newe wakatipa vakasiiwa vakadai, tingachagurazve here mipango yako, nokuroodzana nevanhu vanoita zvinyangadzo zvakadai? Aungazotinyangadzirwi here metsa utipedze, metsa pasisina naumwe unosara nounopokonyoka? A Mambo Mwari, Mwari waIsuraeri, iwewe wakarurama; asi isusu takasara tiri takapokonyoka kuita vakasara, kudai ngezvetiriazvo nyamashi. Ringira, tiri pamberi pako mukushaisha kwedu, ngokuti apana naumwe ungakona kuema pamberi pako ngendaa iyi.” Naapo Ezura paaikumbira nokutenderuka, echichema nokudzikandira pashi pamberi pemhatso yaMwari, vakaungana kwaari mbungano huru kubva kuvaIsuraeri yevamuna, vakadzi nevana; vanhu vakachemawo kakurutu. Shekania mukororo waJehieri, umwe wemibarirwana yaEramu, wakapingura Ezura echiti, “Takashaisha kunaMwari wedu, takadzitorera vakadzi vapara kubva kuvanhu venyika iyi; asi richiripo gonda kuIsuraeri ngeiyi ndaa. Ndizvo zvino ngatiite chitenderano naMwari wedu kuti tipetudze ava vakadzi veshe nevana vavo, kudai ngokupanga kwamambo wangu, nokweavo vanohuta ngemipango yaMwari wedu; ngakuitwe kudai ngezvinodiwa ngomupango. Miruka uite, ngokuti ibingo rako; isusu tinozoema newe; ita wakagwinya, uzviite.” Zvino Ezura wakamiruka, akaita kuti vakuru vevapristi, vaRevhi, nevaIsuraeri veshe vapike mhiko kuti vachaita kudai ngeizwi iri. Ndizvo vakapika. Zvino Ezura wakamiruka kubva pamberi pemhatso yaMwari, akapotera mukamera raJehohanani mukororo waEriashibhi, apo paakaata. Aazi kudya chokudya nokuti kumwa mvura, ngokuti waichema ngokusikagonda kwaavo vaiya vakatorwa kuitwa hloko. Navo vakadaidzira chiziiso mukati mwaJudha neJerusarema kwevari veshe vakapetuka vaiya vakatorwa kuitwa hloko, kuti vaungane Jerusarema, nokuti kudai aripo umwe usikauyi mumazuva matatu, kudai ngokupanga kwenduna nevakuru, pfuma yake yeshe inozotorwa, naye emene unozoduswa kubva pakati pembungano yeavo vakatorwa kuitwa hloko. Zvino vamuna veshe vaJudha nevaBhenjamini vakaungana muJerusarema mumazuva matatu; waiya mwedzi wechipfumbamwe, ngezuva remakumi mairi romwedzi. Vanhu veshe vakagara paruwanze rwemhatso yaMwari, vechihuta ngeiyi ndaa nendaa yemvura yainaya kakurutu. Zvino Ezura mupristi wakamiruka echiti kwevari, “Mwakapauka ngokuroora vakadzi vapara, ndizvo mwakatutsira kushaisha kwavaIsuraeri. Zvino, tendai kushaisha kwenyu kunaMambo Mwari, Mwari wemadzibaba enyu, muite kuda kwake; mudziparadzanise kunevanhu venyika nokubva kuvakadzi vapara.” Zvino mbungano yeshe yakapingura ngeizwi guru yechiti, “Ndizvo; tinosisira kuita kudai ngezvemwakapanga. Asi vanhu vakawanda, neiyi inguva yokunaya kwemvura zhinji; atikoni kuema pabanze. Uyu mushando aungapedzwi ngezuva rimwe nokuti mairi, ngokuti vazhinji vedu takashaisha mundaa iyi. Vakuru vedu ngavaemerere mbungano yeshe, naavo veshe mumadhorobha edu vakatora vakadzi vapara ngavauye ngenguva dzakaemeswa, vauye navo vakuru nevatongi vedhorobha rimwe ngarimwe, metsa ushungu hunotyisa hwaMwari wedu pandaa iyi hwaduswa kubva kwetiri.” Ega Jonathani mukororo waAsaheri, naJahizeia mukororo waTikivha vakaramba izvi, naMeshuramu naShabhethai muRevhi vakavadetsera. Zvino vakapetuka vouhloko vakaita kudaro. Ezura mupristi wakatsanangura vanhu vakuru vemhatso dzemadzibaba, kudai ngemhatso dzemadzibaba avo, imwe ngaimwe yadzo yakaemeswa ngezina. Ngezuva rokutanga romwedzi wegumi vakagara pashi kuringisisa iyi ndaa. Pazuva rokutanga romwedzi wokutanga vakaguma pamagumo evamuna veshe vaiya vakaroora vakadzi vapara. Vakaonekapo mibarirwana yevapristi avo vaiya vakaroora vakadzi vapara: Vemibarirwana yaJeshua mukororo waJozadhaki nehama dzake: Maaseia, Erieza, Jaribhi naGedharia. Navo vakadzipikira pachavo kuti vanozopetudza vakadzi vavo nomudiro wavo nendaa yokushaisha kwavo, umwe ngaumwe wavo wakapira gondohwe kubva kumutanga kuita mudiro wokushaisha kwavo. Vemibarirwana yaIma: Hanani naZebhadhia. Vemibarirwana yaHarimu: Maaseia, Erija, Shemaia, Jehieri naUzia. Vemibarirwana yaPhashuri: Erioenai, Maaseia, Ishumaeri, Nethaneri, Jozabhadhi naErasa. Vemibarirwana yevaRevhi: Jozabhadhi, Shimei, Keraia, (uwo ndiKerita,) Phethahia, Judha naErieza. Vemibarirwana yevaembi: Eriashibhi.Vemibarirwana yevangwariri vemisiwo: Sharumu, Teremu naUri. Vemibarirwana yaIsuraeri: Vemibarirwana yaPharoshi: Ramia, Izia, Marikhija, Mijamini, Ereaza, Hashabhia naBhenaia. Vemibarirwana vaEramu: Matania, Zekharia, Jehieri, Abhidhi, Jeremothi naErija. Vemibarirwana yaZatu: Erioenai, Eriashibhi, Matania, Jeremothi, Zabhadhi naAziza. Vemibarirwana yaBhebhai: Jehohanani, Hanania, Zabhai naAthirai. Vemibarirwana yaBhani: Meshuramu, Marukhi, Adhaia, Jashubhi, Sheari naJeremothi. Vemibarirwana yaPhahathimoabhi: Adhina, Kherari, Bhenaia, Maaseia, Matania, Bhezareri, Bhinui naManase. Vemibarirwana yaHarimu: Erieza, Ishija, Marikhija, Shemaia, Shimeoni, Bhenjamini, Marukhi naShemaria. Vemibarirwana yaHashumu: Matenai, Matata, Zabhadhi, Erifereti, Jeremai, Manase naShimei. Vemibarirwana yaBhani: Maadhai, Amiramu, Ueri, Bhenaia, Bhedheia, Kheruhi, Vhania, Meremothi, Eriashibhi, Matania, Matenai naJaasu. Vemibarirwana yaBhinui: Shimei, Sheremia, Nathani, Adhaia, Makhinadhebhai, Shashai, Sharai, Azareri, Sheremia, Shemaria, Sharumu, Amaria naJosefa. Vemibarirwana yaNebho: Jeieri, Matithia, Zabhadhi, Zebhina, Jadhai, Joeri naBhenaia. Veshe ava vaiya vakaroora vakadzi vapara; vakavapetudza nevana vavo. Mazwi aNehemia mukororo waHakharia. Mumwedzi unozwi Khisirevhi, mugore remakumi mairi, apo ndaiya muSusa mudhorobha guru, umwe wehama dzangu, Hanani, wakauya nevanhu vaibva kwaJudha; neni ndakavabvunza ngendaa yevaJudha vakapokonyoka, avo vakatiza uhloko, nendaa yeJerusarema. Vakapingura vechiti, “Vakasara munyikemwo vari mukutambudzika kakurutu nokutsverudzwa; rukumbati rweJerusarema rwakaputsikira pashi, nemisiwo yarwo yakapishwa ngomuriro.” Naapo pendakazwa mazwi aya, ndakagara pashi ndikachema nokutsumba kwemazuva, ndikaera kudya, ndikakumbira pamberi paMwari womudenga. Ndakati, “A Mambo Mwari, Mwari womudenga, Mwari mukuru nounotyisa, uwo unongwarira chitenderano nenyasha kwevari vanomuda nokungwarira mipango yake; nzee yako ngaipurutane nemadziso ako ngaabeuke kuzwa mukumbiro womuranda wako, wendinokumbira pamberi pako masikati nousiku, ngendaa yevaranda vako vana vaIsuraeri, ndechitenda zvishaishi zvavo vana vaIsuraeri, zvetakashaisha kwouri. Teshe, inini pamwepo nevemhatso yababa angu, takashaisha. Takaita zvakashata kakurutu kwouri; atizi kungwarira mipango, zviemeso nezvitongero zvewakapanga muranda wako Mosi. Cherechedza izwi rewakapanga muranda wako Mosi wechiti, ‘Kudai mwechizopauka, ndinozomuparadzira pakati pemadzinza; asi kudai mwechizotenderukira kwendiri nokungwarira mipango yangu, mwechiita; kunyazwi varipo vari venyu vakapararira kumagumo enyika, ndinozovaunganidza kubvayo, ndinozovaunza kundau yendakatsanangura kuisa zina rangupo.’ Ava varanda vako nevanhu vako, vewakasunhura ngesimba rako guru nenyara yako yakagwinya. A Mambo Mwari, ndinokupota, nzee yako ngaipurutane kukumbira kwomuranda wako, nemikumbiro yevaranda vako, vanemwoyo inechidisiso chokutya zina rako. Budiririsa muranda wako nyamashi, umuitiire nyasha mukuona kwouyu munhu!” Panguvayo ndaiya mutwari wetsani yamambo. Mumwedzi unozwi Nisani, mugore remakumi mairi rokutonga kwaArthazekizesi mambo, apo vhini raiswa pamberi pake, ndakatora vhini ndikaripa kunamambo. Zvino ndaiya ndisikazi kumbosvipa mwoyo nguva dzeshe ndiri pamberi pake. Ndizvo mambo wakati kwendiri, “Hope yako inotambudzika ngenyi, unoringirika kuti aurwari? Apana chimweni kwega kusvipa mwoyo.” Zvino ndakatya kakurutu. Ndakati kunamambo, “Mambo ngaapone mhera nariini! Hope yangu ingarekera kutambudzika ngenyi, apo dhorobha, ndau yemaiba emadzibaba angu, riri dongo, nemisiwo yaro yaparadzwa ngomuriro?” Zvino mambo wakati kwendiri, “Chiinyi chounokumbira?” Ndizvo ndakakumbira kunaMwari womudenga. Zvino ndakati kunamambo, “Kudai zvingadakadza mambo, nokudai muranda wako aona nyasha mukuona kwako, ndinokumbira kuti unditume Judha, kudhorobha remaiba emadzibaba angu, kuti ndiriakise.” Mambo wakati kwendiri, (vahosi vaiya vakagarazve ngepasinde pamambo,) “Rwendo rwako runozoita rwenguva yakadini? Unozopetuka riini?” Ndizvo zvakamudakadza mambo kuti anditume; neni ndakamuemesera nguva. Zvino ndakati kunamambo, “Kudai zvechimudakadza mambo, ngandipuwe tsamba dzinoenda kuvatongi vari ngoruseri kworwizi, kuti vandiendese mberi metsa ndaguma Judha; netsamba inoenda kunaAsafi mungwariri wegwasha ramambo, kuti iye andipe matanda okunasira ndiwo misiwo yetemperi, yorukumbati rwedhorobha, neyemhatso yendinozogaramwo.” Namambo wakanditendera zvendakakumbira, ngokuti nyara yenyasha yaMwari wangu yaiya padera pangu. Zvino ndakaguma kuvatongi voruseri rworwizi, ndakavapa tsamba dzakanyorwa ndimambo. Zvino mambo waiya atuma nduna dzehondo nevagadhi vemahachi kundiperekedza. Naapo Sanibharati muHoroni, naThobhia muAmoni mukuru, azwa izvi, zvakavasvipidza mwoyo kakurutu kuti kwauya munhu unotsvaka kudetsera vana vaIsuraeri. Ndizvo ndakaguma Jerusarema, ndaiyamwo mazuva matatu. Zvino ndakamiruka usiku, inini pamwepo nevanhu vashomani; andizi kuronzera munhu naumwe izvo zviro zvaaiya akaisa Mwari mumwoyo mwangu kuti ndiitire Jerusarema. Chifuyo chega chendakatora ndicho icho chendaigadha. Ndakabuda usiku ngepaMusiwo woMubani, ndikapinda paChinyuka cheDragoni, metsa kuMusiwo weMadisa, ndikanasa kuringira marukumbati eJerusarema, akapwanyikira pashi, nemisiwo yaro yakaparadzwa ngomuriro. Zvino ndakapinda kuenda paMusiwo weChinyuka, nokuGandwa raMambo; asi paiya pasina ndau yechifuyo chendakagadha kuti chipinde. Ndizvo ndakakwira ngenjira yomubani usiku, ndakaringisisa rukumbati. Zvino ndakapetuka sure, ndikapinda ngepaMusiwo woMubani ndikapetuka. Vatongi avazi kuzia pendakaenda, nokuti icho chendaiita; ndaiya ndisati ndaronzera vaJudha, vapristi, vakuru, vatongi, nevamweni veshe vaishanda mushando. Zvino ndakati kwevari, “Munoona dambudziko retapinda, nokuparadzwa kweJerusarema kuita matongo, nemisiwo yaro yakapishwa ngomuriro. Uyai ngatiakise rukumbati rweJerusarema, kuti tisachazoita vanotsverudzwa.” Ndakavaronzera kuti nyara yaMwari wangu yakaita zvakanaka padera pangu, nemazwi amambo aakaereketawo kwendiri. Zvino vakati, “Ngatimiruke, titange kuaka!” Ndizvo vakagwinyisa nyara dzavo kuita mushando uyu wakanaka. Asi apo Sanibharati muHoroni, naThobhia muAmoni mukuru, naGeshemu muArabhia, vazwa izvi, vakatisheka nokutishoora vechiti, “Chiinyi ichi chomunoita? Munomukira mambo here?” Zvino ndakavapingura ndechiti kwevari, “Mwari womudenga ndiye unoita kuti tibudirire; neisusu varanda vake tinozomiruka titange kuaka; asi imwimwi amuna chikoaniswa, nokuti chichemo, nokuti chicherechedziso muJerusarema.” Zvino Eriashibhi mupristi mukuru wakamiruka nehama dzake dzevapristi, navo vakaakisa Musiwo weMakwai. Vakaupira nokuemesa zvivhayo zvawo; vakaakisa metsa kuguma Thawa reZana metsa kuguma kuThawa reHananeri. Nevamuna veJerikho vaiaka pasinde pake. Nepasinde pavo Zakuri, mukororo waImuri, waiakapo. Vakororo vaHasenaa vaiakisa Musiwo weHove; vakaradzika mwamba yawo, vakaemesa zvivhayo zvawo, zvihuri zvawo, nemigogo yawo. Pasinde pavo Meremothi mukororo waUria, mukororo waHakozi waiakisapo. Pasinde pavo paiakiswa ndiMeshuramu mukororo waBherekhia, mukororo waMeshezabheri. Pasinde pavo paiakiswa ndiZadhoki mukororo waBhaana. Pasinde pavo paiakiswa ngevaThekoa; asi vakuru vavo avazi kuisa makhadza avo kumushando waMambo wavo. Joiadha mukororo waPhasea, naMeshuramu mukororo waBhesodheia vaiakisa Musiwo Mudhaya; ndivo vakaradzika mwamba wawo, vakaemesa zvivhayo zvawo, zvihuri zvawo, nemigogo yawo. Pasinde pavo paiakiswa ndiMeratia muGibheoni, naJadhoni muMeronothi, vamuna veGibheoni neveMizipha, vaiya pashi penyara yomutongi wenyika yoruseri rworwizi. Pasinde pavo paiakiswa ndiUzieri mukororo waHarihaia, umwe wevapfuri vomukore. Pasinde pake paiakiswa ndiHanania, umwe wevanasiri vemitombo inonuhwira; navo vakagwinyisa Jerusarema metsa kuguma kuRukumbati Rwakapamhama. Pasinde pavo paiakiswa ndiRefaia mukororo waHuri, mutongi worupande rwenyika yeJerusarema. Pasinde pavo paiakiswa ndiJedhaia mukororo waHarumafi, apo pakaringirana nemhatso yake; nepasinde pake paiakiswa ndiHatushi mukororo waHashabhineia. Marikhija mukororo waHarimu, pamwepo naHashubhi mukororo waPhahathimoabhi, vaiakisa rupande rumweni, neThawa reZvoto. Pasinde pavo paiakiswa ndiSharumu mukororo waHaroheshi, mutongi worupande rwenyika yeJerusarema, iye nevanasikana vake. Hanuni nevagari vemuZanoa vaiakisa Musiwo woMubani; vakauakisa nokuisa zvivhayo zvawo, zvihuri zvawo, nemigogo yawo, vakaakisa rukumbati mamitha mazana marongomuna nemakumi marongomuna (440) metsa kuguma paMusiwo weMadisa. Marikhija mukororo weRekhabhi, mutongi wenyika yeBhethihakheremu waiakisa Musiwo weMadisa; wakauakisa, akaisa zvivhayo zvawo, zvihuri zvawo, nemigogo yawo. NaSharumu mukororo waKhorihoze, mutongi wenyika yeMizipha, waiakisa Musiwo wepaChinyuka; wakauakisa, nokuuseta, wakaemesa zvivhayo zvawo, zvihuri zvawo, nemupiningidzo yawo, naye waiakisa rukumbati rweGandwa reShera repamunda wamambo, metsa kuguma kumakwiro anodzaka kubva kudhorobha raDhavhidha. Pasure pake Nehemia mukororo waAzabhuki, mutongi worupande rwenyika yaBhethizuri, waiakisa kubvira pandau yakaringirana nemaiba aDhavhidha, metsa kuguma kugandwa rakatsiwa, nokuguma kumhatso yevakuru vehondo. Pasure pake paiakiswa ngevaRevhi: Rehumu mukororo waBhani; pamberi pake Hashabhia, mutongi worupande rwenyika yeKeira, waiakisa mundau yake. Pasure pake hama dzake dzaiakisa: Bhinui mukororo waHenadhadhi mutongi worupande rwenyika yeKeira; pasinde pake Eza mukororo waJeshua, mutongi weMizipha, waiakisa rupande rumweni ndau yakaringirana nendau inokwira kumhatso inongwaririrwa zvokurwa ndizvo hondo pakhona rorukumbati. Pasinde pake Bharukhi mukororo waZabhai waiakisa rupande rumweni, kubvira pakhona rorukumbati metsa kuguma kumusiwo wemhatso yeEriashibhi mupristi mukuru. Pasinde pake Meremothi mukororo waUria, mukororo waHakozi, waiakisa ndau imweni kubvira pamusiwo wemhatso yaEriashibhi metsa kuguma kumagumo emhatso yaEriashibhi. Pasinde pake paiakiswa ngevapristi, vamuna vepanharaundapo. Pasinde pavo Bhenjamini naHashubhi vaiakisa pakaringirana nemhatso yavo. Pasinde pavo Azaria mukororo waMaaseia, mukororo waAnania, waiakisa pasinde pemhatso yake. Pasinde pake Bhinui mukororo waHenadhadhi, waiakisa ndau imweni, kubvira pamhatso yaAzaria metsa pakhona rorukumbati, metsa kugumazve pakhona. Pharari mukororo waUzai waiakisa pakaringirana nepakhona porukumbati, nethawa iro rakabuda kubva padera pemhatso huru yomuturika yamambo, paruwanze rwevarindi. Pasinde pake Phedhaia mukororo waPharoshi, nevashandi vomutemperi vaigara Oferi, vaiakisa metsa kuguma kundau yakaringirana nepaMusiwo weMvura ngokumabvazuva, nethawa rinobuda kubanze. Pasinde pake vaThekoa vaiakisa rupande rumweni, rwakaringirana nethawa gurutu raibuda kubanze, metsa kuguma kurukumbati rweOferi. Padera peMusiwo weMahachi paiakiswa ngevapristi, umwe ngaumwe pakaringirana nemhatso yake. Pasinde pavo Zadhoki mukororo waIma waiakisa pakaringirana nemhatso yake. Pasinde pake Shemaia mukororo waShekania mungwariri weMusiwo wokuMabvazuva waiakisapo. Pasinde pake Hanania mukororo waSheremia, naHanuni mukororo wechitanhatu waZarafi vaiakisa rupande rumweni. Pasinde pake Meshuramu mukororo waBherekhia waiakisa pakaringirana nemhatso yake. Pasinde pake Marikhija, umwe wevapfuri vomukore, waiakaisa metsa kuguma kumhatso yevaranda vomutemperi, nendau yevatengesi, iyo yakaringirana nepaMusiwo Mifikadhi, metsa kuguma mukamera remhatso yomuturika iri wepakhona. Nepakati pekamera romuturika remhatso yepakhona paiakiswa metsa kuguma paMusiwo weMakwai ngevapfuri vomukore nevatengesi. Zvino apo Sanibharati azwa kuti taiakisa rukumbati, wakatseneka nokunyangadzwa kakurutu, akasheka vaJudha. Naye wakaereketa pamberi pehama dzake, nepamberi pehondo yevaSamaria, echiti, “Ava vaJudha vakarembedzeka vanoitenyi? Vanozomusira zviro here? Vanozopira midiro here? Vanozopedza ngezuva rimwe here? Vanozotekateka mapuwe here kubva kumirwi yemahundi akapishwa?” Zvino Thobhia muAmoni waiya pasinde pake, naye wakati, “Urwo rukumbati rwemapuwe rwevanoaka, kudai hava ingakwira padera parwo, runoputsikira pashi rukumbati rwavo!” “Izwa, A Mwari wedu, ngokuti tinoshoorwa; kunukudzira kutuka kwavo padera pemasoro avo, uvapire kuti vaite vakachakatwa munyika youhloko. Usafisha kushaisha kwavo nokuti kutendera kuti zvishaishi zvavo zvitsukutidzwe kubva pamberi pako; ngokuti vakadaidzira zvituko pamberi pevaaki.” Ndizvo takaakisa rukumbati, norukumbati rweshe rwakashonganiswa pamwepo rwakapera rupande rumwe rwokureba kwarwo; ngokuti vanhu vaiya nomwoyo wokuda kushanda. Asi apo Sanibharati naThobhia, vaArabhia, vaAmoni nevaAshidhodhi vazwa kuti marukumbati eJerusarema aakiswa, nemaburi arwo otanga kutsiirwa, vakanyangadzwa kakurutu, navo veshe vakapangana zano pamwepo kuti vakwire koorwa neJerusarema nokurikangaidza. Ndizvo takakumbira kunaMwari wedu, nesu takaemesa varindi vokuvarinda usiku nemasikati. Asi vaJudha vakati, “Simba raavo vanotwara mitwaro rapera, naapo achipo mahundi akawanda; ndizvo atichakoni kushanda parukumbati.” Nemagaa edu akati, “Avazozii nokuti kuona chiro pakati pavo, tivauraye, nokuita kuti mushando wavo ueme.” Naapo vaJudha vaigara pasinde navo pevakauya vechiti kwetiri mikuwo gumi, “Kubvira kundau dzeshe kwevaigara, vanozokwira kutirwisa.” Ndizvo ndakaemesa marupande ari pashi pashi endau dziri sure kworukumbati, mundau dziripamhene, ndakaemesa vanhu kudai ngokuteererana kwemhuri dzavo, vaneshoti dzavo, mikhondo yavo, neuta yavo. Ndapedza kuringira izvi zviro, ndakamiruka ndikati kunevakuru, vatongi nevanhu vamweni, “Musavatya. Karakadza Mambo Mwari, mukuru nounotyisa, murwire hama dzenyu, vakororo venyu, vanasikana venyu, vakadzi venyu nemhatso dzenyu.” Naapo magaa edu azwa kuti kupangana kwavo kwaiya kwaziikanwa kwetiri, nokuti Mwari waiya aita kuti bangano ravo riite risina shwiro, teshe takahwirira kurukumbati, munhu umwe ngaumwe weshe kumushando wake. Kubvira ngeiro zuva kuenda mberi, rupande rwevaranda vangu vakashanda mukuaka, rupande rumweni rwakamirudza mikhondo, zvihlangu, mbita, nemagangautare; vatungamiriri vaiya vakaema ngesure kweveshe vemhatso yaJudha, avo vaiakisa rukumbati. Vatwari vemitwaro vakatwara mitwaro yavo ngenjira yaiita kuti umwe ngaumwe ashande pamushando ngenyara imwe, nenyara imweni akabata chokurwa ndicho. Naumwe ngaumwe wevaaki waiya akasungira shoti yake muchiunu chake, apo echiaka. Munhu wairidza gwama waiya akaema pasinde pangu. Neni ndakati kuvakuru, kuvatongi nokunevamweni veshe vevanhu, “Mushando wakakura, nokupararira kweshe, nesu takaita chimwe chimwe umwe kubva pane umweni, padera porukumbati. Unganai petiri kunyazwi ngepari pomunozwa kurira kwegwama. Mwari wedu unozotirwira.” Ndizvo takashanda pamushando; norupande rwavo rwakabata mikhondo kubvira pakuedza kwezuva metsa kubuda kwenyeredzi. Ndakatizve kunavanhu panguvayo, “Munhu weshe nomuranda wake ngavagare muJerusarema usiku, kuti usiku vaite varindi vedu, nokushanda masikati.” Ndizvo akuna naumwe inini nokuti hama yangu, nokuti varanda vangu, nokuti vamuna vairinda vakanditeera, wakakhumura zvokusimira zvake; umwe ngaumwe waibata mukhondo wake munyara yake yokumudyo. Zvino kwakabuda kuchema kukurutu kwevanhu nekwevakadzi vavo vechiitira ndaa hama dzavo vaJudha. Ngokuti vaiyapo avo vaiti, “Isusu nevakororo vedu, nevanasikana vedu, tiri vazhinji; tinosisira kuona zviyo kuti tidye tipone.” Vaiyapo vamweni avo vaiti, “Tinozogondisa ngeminda yedu, mivhini yedu nemhatso dzedu, kuti tikone kuona zviyo panguva yenzara.” Vaiyapo avo vaiti, “Takacheneka mare kuti tibhadhare muthero kunamambo weminda yedu neminda yedu yemivhini. Zvino muiri wedu wakadai ngewehama dzedu, vana vedu vakadai ngevana vavo; asi tiri kuangiridza vakororo vedu nevanasikana vedu kuti vaite hloko, nevamweni vevanasikana vedu vakatopirwa vaa muuhloko; atichina simba rokuchavaripira, ngokuti minda yedu neminda yemivhini yakatorwa ngevamuna vamweni.” Ndakanyangadzwa kakurutu apo pendakazwa kuchema kwavo nezvichemo izvi. Ndapedza kupinimidza ndizvo, ndakaitira ndaa vakuru nevatongi; ndakati kwevari, “Imwimwi mweshe munotora mare yokuuyirwa kubva kuvanhu venyu.” Ndakadaidza mbungano huru kuti ivaitire ndaa. Ndakati kwevari, “Kudai ngezvetaikona, takaripira hama dzedu vaJudha, avo vakatengeswa kunevemadzinza amweni; asi zvino imwimwi mwaa kutengesa hama dzenyu, avo zvino vangatengwazve tisu!” Vaiya vakanyarara, avazi kukona kuona izwi rokupingura. Ndizvo ndakati, “Chiro icho chomunoita achizi kunaka. Amusisiri here kuti muhambe ngokumutya Mwari wedu, kuti tisazoshoorwa ngevemadzinza, magaa edu? Zve, inini nehama dzangu, nevaranda vangu takavakweretesawo mare nezviyo. Ngatirekere kutora mare yokuuyirwa yakadaro. Hwirinzai kwevari nyamashi minda yavo, minda yavo yemivhini, minda yavo yemiti yemiorivhi, mhatso dzavo, kuuirwa kwemare yavo, kwezviyo, kwevhini nokwemafuta, zvemwakatora kwevari.” Zvino vakati, “Tinozohwirinza chiro cheshe, atizodaidzizve chiro kubva kwevari. Tinozoita kudai ngezvewaronza.” Zvino ndakadaidza vapristi, ndikaita kuti vapike mhiko kuti vaite kudai ngokugondisa kwavo. Ndakazuwazve kuonyana kwechokusimira changu, ndikati, “Ndizvo Mwari ngaazuwe munhu weshe kubva kumhatso nokubva kupfuma, uwo usikazadzisi ichi chigondiso. Ndizvo ngaazuiwe, asare asina chiro.” Nembungano yeshe yakati, “Ameni,” vakakudza Mambo Mwari. Nevanhu vakaita kudai ngezvevakagondisa. Zve, kubvira panguva yendakaemeswa kuita mutongi munyika yaJudha, kubvira gore remakumi mairi metsa kuguma kugore remakumi matatu nemairi rokutonga kwaArthazekizesi mambo, makore gumi nemairi, inini nokuti hama dzangu atizi kudya kudya kwaipuwa mutongi. Asi vakatanga pamberi pangu vakaita mutwaro unorema kuvanhu, vakatora kubva kwevari zvokudya nevhini, ngapabanze pezvigurwa zvesirivha makumi marongomuna. Kunyazwi nevaranda vavo vakatwarisa padera pevanhu avo mitwaro inorema. Asi inini andizi kuita kudaro ngokuti ndinomutya Mwari. Ngegwinyiso ndakadzipira pachangu mumushando wokuaka urwu rukumbati, atizi nokutenga nyika; varanda vangu veshe vaiunganapo kuita mushando. Zve, vaiyapo nepatafura rangu vaJudha nevatongi zana nemakumi mashanu (150), ngepabanze peavo vaiuya kwetiri vechibva kuvanhu vemadzinza vaititendenedza. Zvino izvo zvakanasirirwa zuva rimwe zvaiya kabi imwe nemakwai akatsanangurwa matanhatu; huku dzakanasirirwawo inini, nomumazuva gumi eshe nyede dzevhini dzakaunzwa ngokuwanzisa; asi neizvi zveshe andizi kuda kupuwa kudya kwomutwaro womutongi, ngendaa yokurema kwomutwaro womushando padera pevanhu. Karakadza ngezvakarurama zvangu, A Mwari wangu, zveshe zvendakaitira ava vanhu. Zvino apo zvaronzwa kunaSanibharati naThobhia naGeshemu muArabhia, nokunevamweni vemagaa edu, kuti ndaiya ndaakisa rukumbati nokuti paiya pasina neburi rakasara peruri (kunyazwi kugumira panguva iyi ndaiya ndisati ndaemesa zvivhayo mumisiwo), Sanibharati naGeshemu vakatumira izwi kwendiri vechiti, “Uyai tishongane pamwepo murimwe remaguta ari muRubaya rweOno.” Asi vakapinimidza kundiitira zvakashata. Ndizvo ndakatuma nhumwa kwevari ndechiti, “Ndinoshanda mushando mukurutu, neni andingakoni kudzakeyo. Mushando ungarekererwenyi pendinousiya kudzaka kwomuri?” Vakatumira kwendiri karongomuna ngenjira yakadai, neni ndakavapingura ngenjira ndiyo ndiyo. Munjira imweyo Sanibharati wakatumira muranda wake kwendiri kashanu anetsamba yakabeuka munyara mwake. Mukati mwakanyorwa kuti, “Kwakaronzwa pakati pevemadzinza, naGeshemu unoronzawo kudaro, kuti iwewe nevaJudha munopinimidza kumukira; ndiyo ndaa mwechiakisa rukumbati, nokudai ngemazwi aya iwewe unodisa kuita mambo wavo. Iwewe wakaemesazve vaprofeti kuti vachumaire ndiwe muJerusarema vechiti, ‘Uriyo mambo muJudha!’ Nazvino kunozoronzwa kunamambo kudai ngemazwi aya. Ndizvo zvino, uya, kuti tipangane pamwepo.” Zvino ndakatumira izwi kwaari ndechiti, “Akuna zviro zvakadaro zvakaitwa kudai ngokuronza kwako, asi iwewe unozvironga mumusoro mwakomwo.” Ngokuti veshe vaida kutityisidzira, vechipinimidza kuti, “Nyara dzavo dzinozopera simba mumushando, kuti usachazoshandwa.” Asi zvino, A Mwari wangu, gwinyisa nyara dzangu. Zuva rimweni apo pendakapotera mumhatso yaShemaia mukororo waDheraia mukororo waMehetabheri, uwo waiya akadzikonyera mumhatso yake, wakati, “Ngatishongane pamwepo mumhatso yaMwari, mukati mwetemperi, tikonye misiwo yetemperi, ngokuti vanouya kuti vakuuraye; ngegwinyiso, vanozoguma usiku uhwu kookuuraya.” Asi ndakati, “Munhu wakadai ndini ungasisira kuti atize here? Munhu wakadai ndini ungatenda kupotera mutemperi kuti adziponese umwo here? Andipoterimwo!” Zvino ndakaringira, ndakaona kuti Mwari waiya asikazi kumutuma; asi kuti wakaereketa kuprofeta uku ndini, ngokuti Thobhia naSanibharati vaiya vakamubhadhara ngemare. Ndizvo wakabhadharirwa kuita iri biningidzo kundityisidzira nokundiita kuti ndishaishe, ngokuita kudaro, vanozondiitira ndaa yokuereketa zvakashata ndini, kuti vanditsverudze. Mwari wangu, pinimidzai ndiThobhia naSanibharati kudai ngezviito zvavo izvi, zve nokumuprofeti womukadzi Noadhia, nevamweni vevaprofeti, avo vaiya nechidisiso chokundityisidzira. Ndizvo rukumbati rwakapera ngezuva remakumi mairi nemashanu romwedzi unozwi Eruri, muzuva remakumi mashanu nemairi. Naapo magaa edu eshe azwa ndizvo, madzinza eshe akatitendenedza vakatyiswa, vakapera simba kakurutu mukuona kwavo; ngokuti vakaona kuti uyu mushando wakaitwa ngokudetserwa ndiMwari wedu. Zve, ngemazuva awo vakuru vaJudha vakatumira tsamba dzakawanda kunaThobhia, netsamba dzaThobhia dzakauyawo kwevari. Ngokuti vakawanda muJudha vaiya vakasungwa ngemhiko kwaari, ngokuti iye waiya mukwambo waShekania mukororo waAra; nomukororo wake Jehohanani waiya aroora mwanasikana waMeshuramu mukororo waBherekhia. Vakaereketawo ngezviito zvake zvakanaka pamberi pangu, vakashuma mazwi angu kwaari. NaThobhia wakatumira tsamba dzokundityisidzira. Zvino apo rukumbati rwaakiwa, neni ndaiya ndaemesa zvivhayo, nevarindi vemisiwo, vaembi nevaRevhi vaiya vaemeswa, ndakaemesa Hanani hama yangu kuita mutongi padera peJerusarema, pamwepo naHanania mutongi wengome ngokuti iye waiya munhu unogondeka, unomutya Mwari kupinda vazhinji. Ndakati kwevari, “Misiwo yeJerusarema isabeurwa metsa zuva rapisha; naapo varindi vemisiwo vachakaemapo, ngavakonye misiwo, ngavakonye vagoge zvivhayo. Vaemese varindi kubva pakati pevagari veJerusarema, vamweni kundau dzavavo dzokurindira nevamweni pamberi pemhatso dzavowo.” Zvino dhorobha raiya rakapamhama nokukura, asi vanhu vaigaremwo vaiya vashomani, akuna mhatso yaiya yakaakwa. Zvino Mwari wangu wakaisa mweya mumwoyo wangu kuti ndiunganidze vakuru, vatongi nevanhu pamwepo kuti vaerengwe ngemazina kudai ngokuteererana kwemibarirwana yavo. Neni ndakaona bhuku remazina okubarwa kwavo, eavo vakatanga kupetuka, neni ndakaona izvi zvakanyorwamwo. Ava ndivo vanhu venyika vakakwira kubva kuusungwa hwouhloko, avo vakatorwa ndiNebhukhadhineza mambo weBhabhuroni; vakapetuka Jerusarema nomuJudha, munhu weshe kudhorobha rake. Avo vakauya naZerubhabheri, Jeshua, Nehemia, Azaria, Raamia, Nahamani, Mordhekhai, Bhirishani, Misiperethi, Bhigivhai, Nehumu naBhaana. Uwandu hwevanhu vaIsuraeri ndihwo uhu: Mibarirwana yaPharoshi, makumi emazana mairi zana nemakumi manomwe nevairi (2,172). Mibarirwana yaShefatia, mazana matatu nemakumi manomwe nevairi (372). Mibarirwana yaAra, mazana matanhatu nemakumi mashanu nevairi (652). Mibarirwana yaPhahathimoabhi, ngemazina mibarirwana yaJeshua naJoabhi, makumi emazana mairi nemazana masere negumi nevasere (2,818). Mibarirwana yaEramu, gumi remazana nemazana mairi nemakumi mashanu nevarongomuna (1,254). Mibarirwana yaZatu, mazana masere nemakumi marongomuna nevashanu (845). Mibarirwana yaZakhai, mazana manomwe nemakumi matanhatu (760). Mibarirwana yaBhinui, mazana matanhatu nemakumi marongomuna nevasere (648). Mibarirwana yaBhebhai, mazana matanhatu nemakumi mairi nevasere (628). Mibarirwana yaAzigadhi, makumi emazana mairi namazana matatu nemakumi mairi nevairi (2,322). Mibarirwana yaAdhonikamu, mazana matanhatu nemakumi matanhatu nevanomwe (667). Mibarirwana yaBhigivhai, makumi emazana mairi nemakumi matanhatu nevanomwe (2,067). Mibarirwana yaAdhini, mazana matanhatu nemakumi mashanu nevashanu (665). Mibarirwana yaAteri, ngezina raHezekia, makumi mapfumbamwe nevasere (98). Mibarirwna yaHashumu, mazana matatu nemakumi mairi nevasere (328). Mibarirwana yaBhezai, mazana matatu nemakumi mairi nevarongomuna (324). Mibarirwana yaHarifi, zana negumi nevairi (112). Mibarirwana yaGibheoni, makumi mapfumbamwe navashanu (95). Vanhu veBhetherehema neveNetofa, zana nemakumi masere nevasere (188). Vanhu veAnathothi, zana nemakumi mairi nevasere (128). Vanhu veBhethiazimavhethi, makumi marongomuna nevairi (42). Vanhu vaKiriathijearimu, Khefira naBheerothi, mazana manomwe nemakumi marongomuna nevatatu (743). Vanhu vaRama naGebha, mazana matanhatu nemakumi mairi naumwe (621). Vanhu vaMikhimashi, zana nemakumi mairi nevairi (122). Vanhu vaBhetheri naAi, zana nemakumi mairi navatatu (123). Vanhu vaNebho umweni, makumi mashanu nevairi (52). Mibarirwana yaEramu umweni, gumi remazana nemazana mairi nemakumi mashanu nevarongomuna (1,254). Mibarirwana yaHarimu, mazana matatu nemakumi mairi (320). Mibarirwana yaJerikho, mazana matatu nemakumi marongomuna nevashanu (345). Mibarirwana yaRodhi, Hadhidhi naOno, mazana manomwe nemakumi mairi naumwe (721). Mibarirwana yaSenaa, makumi emazana matatu nemazana mapfumbamwe nemakumi matatu (3,930). Vapristi: Mibarirwana yaJedhaia, vezina remhatso yaJeshua, mazana mapfumbamwe nemakumi manomwe nevatatu (973). Mibarirwana yaIma, gumi remazana nemakumi mashanu nevairi (1,052). Mibarirwana yaPhashuri, gumi remazana nemazana mairi nemakumi marongomuna nevanomwe (1,247). Mibarirwana yaHarimu, gumi remazana negumi nevanomwe (1,017). VaRevhi: Mibarirwana yaJeshua, ngezina raKadhimieri, vemibarirwana yaHodhavhia, makumi manomwe nevarongomuna (74). Vaembi: Mibarirwana yaAsafi, zana nemakumi marongomuna nevasere (148). Varindi vemisiwo: Mibarirwana yaSharumu, yaAteri, yaTarimoni, yaAkubhi, yaHatita, yaShobhai, zana nemakumi matatu nevasere (138). Vashandi vomutemperi: Mibarirwana yaZiha, yaHasufa, yaTabhaothi, yaKerosi, yaSia, yaPhadhoni, yaRebhana, yaHagabha, yaSharimai, yaHanani, yaGidheri, yaGaha, yaReaia, yaRezini, yaNekodha, yaGazamu, yaUza, yaPhasea, yaBhesai, yaMeunimu, yaNefushesimu, yaBhakibhuki, yaHakufa, yaHahuri, yaBhazirithi, yaMehidha, yaHasha, yaBhakosi, yaSisera, yaThema, yaNezia, yaHatifa. Mibarirwana yevaranda vaSoromoni: yaSotai, yaSoferethi, yaPheridha, yaJaara, yaDhakoni, yaGidheri, yaShefatia, yaHatiri, yaPhokherethihazebhaimu, yaAmoni. Veshe varanda vomutemperi, pamwepo nemibarirwana yevaranda vaSoromoni, vaiya mazana matatu nemakumi mapfumbamwe nevairi (392). Ava ndivo vakakwira kubva Therimera, Theriharsha, Kherubhi, Adhoni naIma, asi avazi kukona kunasa kuronza mhatso dzemadzibaba avo, nokuti dzinza ravo, kuti vaiya vaIsuraeri: Mibarirwana yaDheraia, yaThobhia, yaNekodha, mazana matanhatu nemakumi marongomuna nevairi (642). Nevevapristiwo: Mibarirwana yaHobhaia, yaHakozi, yaBharizirai, (uwo waiya aroora umwe wevanasikana vaBharizirai muGireadhi, naye wakadaidzwa ngezina ravo). Ava vakatsvaka mazina avo pakati peawo akanyorwa emadzibaba avo, asi aazi kuonekapo; ndizvo vakabviswa kubva paupristi kudai ngevakasvipiswa. Mutongi wakavaronzera kuti vasazodya izvo zvakachenesesa, metsa kwauya mupristi uneUrimu neThumimu. Uwandu hwembungano yeshe hwaiya makumi marongomuna nemairi emakumi emazana, nemazana matatu nemakumi matanhatu (42,360), ngepabanze pehloko dzavo vamuna nevakadzi, pamwepo vaiya makumi emazana manomwe nemazana matatu nemakumi matatu nevanomwe (7,337); navo vaiya nemazana mairi nemakumi marongomuna nevashanu (245) evaembi, vamuna nevakadzi. Vaiya nemahachi avo mazana manomwe nemakumi matatu nematanhatu (736), manyurusi mazana mairi nemakumi marongomuna nemashanu (245), nemakamera avo aiya mazana marongomuna nemakumi matatu nemashanu (435), nemakumi emazana matanhatu nemazana manomwe nemakumi mairi (6,720) ezvimbongoro. Zvino vamweni vakuru vemhatso dzemadzibaba vakanikera kumushando. Mutongi wakapa kuupfumi makhirogramu masere omukore, mabhasini makumi mashanu, nezvokusimira zvevapristi mazana mashanu nemakumi matatu (530). Nevamweni vevakuru vemhatso dzemadzibaba vakapa kuupfumi hwokuaka makhirogramu zana nemakumi matanhatu nemasere (168) omukore, nezvipimo zvesirivha makhirogramu gumi remazana nemazana mairi nemakumi mashanu (1,250). Neizvo zvakapuwa ngevamweni vanhu zvaiya makhirogramu zana nemakumi matanhatu nemasere (168) omukore, nezvipimo zvesirivha makhirogramu zana nemakumi marongomuna (140), nezvokusimira zvevapristi makumi matanhatu nezvinomwe (67). Ndizvo vapristi, vaRevhi, varindi vemisiwo, vaembi, vamweni vanhu, varanda vomutemperi nevaIsuraeri veshe, vaiya vakagara mumadhorobha avo. Naapo mwedzi wechinomwe watawa, vana vaIsuraeri vaiya vakagara mumadhorobha avo. Vanhu veshe vakaungana pamwepo ngomwoyo umwe pamberi peMusiwo weMvura pakapamhama. Vakaronzera munyori Ezura kuti aunze bhuku remipango yaMosi, yaaiya akapa Mambo Mwari kuvaIsuraeri. Ndizvo Ezura mupristi wakaunza bhuku remipango pamberi pembungano yevamuna, vakadzi, neavo veshe vaikona kuzwa nokuzwisisa. Iri raiya zuva rokutanga romwedzi wechinomwe. Wakadzidza kubva kweriri akaringira paruwanze pamberi peMusiwo weMvura, kubvira mangwanani metsa pakati pemasikati, pamberi pevamuna, vakadzi, neavo veshe vaikona kunasa kuzwisisa; nenzee dzevanhu veshe dzakanasa kupurutana kumazwi ebhuku remipango. Ezura munyori wakaema pandau yakaturama yakanasirirwa mushandowo; pasinde pake pakaema ngokumudyo kwake Matithia, Shema, Anaia, Uria, Hirikia naMaaseia; nokumuoshwe kwake kwaiya naPhedhaia, Mishaeri, Marikhija, Hashumu, Hashibhadhana, Zekharia naMeshuramu. NaEzura wakabeura bhuku mukuona kwevanhu veshe, ngokuti iye waiya akaema pakakwirira panoona vanhu veshe; naapo paakaribeura, vanhu veshe vakaema. Zvino Ezura wakakudza Mambo Mwari, Mwari mukuru, nevanhu veshe vakapingura vechiti, “Ameni, Ameni,” vechimirudza nyara dzavo. Zvino vakakotamisa masoro avo, vakadira Mambo Mwari, hope dzavo dzakatsikitsira pashi pamavhu. Zve, Jeshua, Bhani, Sherebhia, Jamini, Akubhi, Shabhethai, Hodhia, Maaseia, Kerita, Azaria, Jozabhadhi, Hanani, Pheraia nevaRevhi vakadetsera kuti vanhu vanase kuzwisisa mipango, naapo vanhu vakaramba vakaema mundau dzavo. Ndizvo vakadzidza kubva mubhuku, kubva kumupango waMwari, ngenjira inonasa kuzwisisika. Vakadudzira mupinimidzo kuti vanhu vakone kuzwisisa chaidzidzwa. NaNehemia, mutongi, naEzura mupristi nomunyori, pamwepo nevaRevhi, vaidzidzisa vanhu, vakati kunevanhu veshe, “Zuva iri rakachena kunaMambo Mwari, Mwari wenyu; musatsumba nokuti kuchema.” Ngokuti vanhu veshe vakachema apo pevakazwa mazwi omupango. Zvino wakati kwevari, “Endai, mudye zvakakora, nokumwa vhini rinotapira, mutumire zvikoaniswa kwevari vasina zvakanasirirwa, ngokuti zuva iri rakachena kunaMambo Mwari wedu; musatambudzika, ngokuti kudakara kwaMambo Mwari ndiro simba renyu.” Ndizvo vaRevhi vakanyaradza vanhu veshe vechiti, “Nyararai, ngokuti zuva iri rakachena; musatambudzika.” Nevanhu veshe vakapararira kuenda koodya nokumwa, nokutumira zvikoaniswa kunevamweni vavo, nokudakara kakurutu, ngokuti vaiya vakanasa kuzwisisa mazwi akadaidzirwa kwevari. Ngezuva rechipiri vakuru vemhatso dzemadzibaba vevanhu veshe, nevapristi nevaRevhi, vakauya pamwepo kunaEzura munyori, kuti vadzidziswe mazwi emipango. Navo vakaaona paakanyorwa mumupango, uwo waakapanga Mambo Mwari kubudikidza ndiMosi, kuti vana vaIsuraeri vanosisira kugara mumatumba panguva yedhiri romwedzi wechinomwe, navo vanosisira kuti vaziise nokudaidzira mumadhorobha avo eshe nomuJerusarema vechiti, “Budai muende kumatunhu, muunze matai omuorivhi, matai omuorivhi omushango, matai omumirtire, matai omubvumo, nematai emiti inemashakani akatsikana, kuti muite matumba, kudai ngezvakanyorwa.” Ndizvo vanhu vakabuda, vakaaunza, vakadziitira pachavo matumba, umwe ngaumwe padera pedenga remhatso yake, nomumaruwanze avo, nomumaruwanze emhatso yaMwari, nomumaruwanze eMusiwo weMvura nomumaruwanze eMusiwo waEfuremu. Nembungano yeshe yeavo vakapetuka kuusungwa vakadziitira matumba, vakagara mukati mwawo; ngokuti kubvira kumazuva aJoshua mukororo waNuni, metsa kuguma iro zuva, vana vaIsuraeri vaiya vasikazi kumboita kudaro. Kwakaapo kudakara kukurutu. Nezuva ngezuva, kubvira zuva rokutanga metsa pazuva rokugumisira, wakadzidza kubva mubhuku romupango waMwari. Navo vakangwarira dhiri mazuva manomwe; nezuva rechisere kwaiyapo mushongano mukuru, kudai ngemishuma yavo. Zvino ngezuva remakumi mairi nemarongomuna romwedzi uyu, vanhu vaIsuraeri vakaungana vechiera kudya, vechisimira machira emasaka, vechiisa mavhu padera pemasoro avo. Zvino avo vedzinza raIsuraeri vakadziparadzanisa pachavo kubva kunevapara veshe, navo vakaema vechitenderuka zvishaishi zvavo, nezvinyangadzo zvemadzibaba avo. Navo vakamiruka vakaema mundau yavo, vakadzidza kubva mubhuku romupango waMambo Mwari, Mwari wavo, kupedza rupande rwechirongomuna rwezuva; norupande rumweni rwechirongomuna vakatenderuka, vakadira Mambo Mwari, Mwari wavo. Zvino Jeshua, Bhani, Kadhimieri, Shebhania, Bhuni, Sherebhia, Bhani naKhenani vakaema pakaturama pevaRevhi, vakadaidzira ngeizwi guru kunaMambo Mwari, Mwari wavo. Zvino vaRevhi, Jeshua, Kadhimieri, Bhani, Hashabhineia, Sherebhia, Hodhia, Shebhania naPhethahia vakati, “Mirukai, mukudze Mambo Mwari, Mwari wenyu, mhera nariini kumhera nariini. Ngarikudzwe zina rake rinouthende, rakamirudzwa padera pezvifumiso zveshe nokukudzwa kweshe.” NaEzura wakati, “Iwewe, ndiwe Mambo Mwari, iwewe wega; wakasika denga, denga rematenga, nehondo dzawo dzeshe, nyika nazvo zveshe zviri padera payo, noruandhle nazvo zveshe zvirimwo. Kwezviri zveshe munozvipa kupona, nehondo dzomudenga dzinodira iwewe. Iwewe ndiwe Mambo Mwari, Mwari uwo wakatsanangura Abrama, wakamubudisa kubva kunyika yaUri yevaKharadhea, wakamududza zina rokuti Abrahama; newe wakaona mwoyo wake kuti unogondeka pamberi pako, ukaita chitenderano naye kuti uchapa mibarirwana yake nyika yevaKhenani, yevaHiti, yevaAmori, yevaPherizi, yevaJebhusi neyevaGirigashi; newe wakazadzisa chigondiso chako, ngokuti wakarurama. “Newe wakaona kutambudzika kwemadzibaba edu munyika yeEgipite, wakazwa kuchema kwavo paRuandhle Rwakatsvuka. Wakaita zvioniso nemishamiso kurwisana naFaro nevaranda vake veshe, nevanhu venyika yake, ngokuti wakazia kuti avo vakaita ngokudzikudza kunemadzibaba edu. Wakadziitira zina rinembiri pachako, iro rinogara rakadaro metsa nanyamashi. Newe wakaparadzanisa ruandhle pamberi pavo, ndizvo vakahamba pakati parwo pamavhu akaoma; asi wakakandira vaivarumbirira vavo muruandhle rwakadzama, kudai ngebuwe mumvura inesimba. Zve, wakavatungamirira masikati ngemvumi yegore, nousiku ngemvumi yomuriro, kuvajekisira njira yevanosisira kuhamba ndiyo. Wakadzakazve pashi paMutunhu weSinai, ukaereketa navo kubva ngomudenga, ukavapa zvitongero zvakanaka, nezvironzo zvegwinyiso, nezviemeso zvakanaka, nemipango yakanaka. Wakavaziisa ngeSabatha rako rakachena, ukavapa mipango, zviemeso, nomutemo, kubudikidza ndiMosi muranda wako. Wakavapa chingwa chinobva mudenga kuvagutisa panzara yavo, wakavabudisira mvura kubva pabuwe kupedza nyota yavo, newe wakavaronzera kuti vanozopotera kuti vagare nhaka yenyika iyo yewakagondisa kuvapa. “Asi ivo nemadzibaba edu vakaita ngokudzikudza nokuomesa mitsipa yavo, navo avazi kupurutana kumipango yako. Vakaramba kupurutana, navo avazi kukarakadza ngemishamiso yowakaita pakati pavo; asi vakaomesa mitsipa yavo, vakadziemesera kuti vahwirire kuuhloko hwavo muEgipite. Asi iwewe uri Mwari wakanasirira kurekerera, unenyasha norudo, usikakasiri kutseneka, wakazara ngorudo rwakakura, newe auzi kuvasiya. Kunyazwi naapo pevakadziitira muedzaniso wakanyunguruswa wekonyana, vakati, ‘Uyu ndiye Mwari wenyu wakamubudisa kubva kunyika yeEgipite,’ navo vakaita kushata kwakakura, iwewe ngenyasha dzako huru auzi kuvarasha mushango; mvumi yegore aizi kuvasiya yaivatungamirira munjira masikati, nokuti mvumi yomuriro usiku, yaivajekisira nokuvaonesa njira yevaisisira kuti vahambe ndiyo. Wakavapa Mweya wako wakanaka kuvadzidzisa, auzi kuvanyima mana yako kubva kumiromo yavo, wakavapa mvura yokudzima nyota yavo. Makore makumi marongomuna wakavaponesa mushango, kwokuti avazi kutama chiro nachimwe; zvokusimira zvavo azvizi kutsakara, netsoka dzavo adzizi kuzvimba. Wakavapa umambo nevanhu, wakavakoanisira ndau dzavo; ndizvo vakagara nhaka yenyika yamambo Sihoni weHeshibhoni, nenyika yaOgi mambo weBhashani. Wakawandisa mibarirwana yavo ikawanda kudai ngenyeredzi dzomudenga, wakavapotedza munyika yowakaronzera madzibaba avo, kuti vapoteremwo vagare nhaka yayo. Ndizvo mibarirwana yakapoteramwo ikagara nhaka yenyika, newe wakanyisa vagari vomunyika iyo pamberi pavo, vaKhenani, wakavapira munyara dzavo, pamwepo nemadzimambo avo nevanhu venyika, kuti vaite kwevari kudai ngezvevaida. Navo vakatora madhorobha akashosherwa nenyika yakavhundira, vakatora nhaka yemhatso dzaiya noupfumi hweshe, nezvinyuka zvemvura yakatsiwa, minda yemivhini, yemiorivhi, nemiti yemichero yakawanda; ndizvo vakadya vakaguta vakakora, vakadakara ngounaku hwako hukuru. “Zvakanyadaro avazi kupurutana, vakakumukira, vakafuratira mishana yavo kumipango yako, vakauraya vaprofeti vako, avo vaivanyowedza, kuti vavatenderudzire kwouri, navo vakaita zvinyangadzo zvakakura. Ndizvo wakavapira munyara dzemagaa avo, avo akavatambudza. Zvino ngomukuwo wokutambudzika kwavo, vakachema kwouri newe wakavazwa uri mudenga; kudai ngenyasha dzako dzakawanda wakavapa vaponesi, avo vakavaponesa kubva munyara dzemagaa avo. Asi apo vaiya vazorodzwa, vakaitazve zvakashata pamberi pako, newe wakavasiya munyara dzemagaa avo, kuti atonge padera pavo; asi apo pevakatenderuka, vakachema kwouri, iwewe ukazwa uri mudenga; wakavasunhura mikuwo yakawanda kudai ngenyasha dzako. Newe wakavanyowedza kuitira kuti vapetuke kumipango yako. Asi ivo vakaita manyau vakadzikudza, avazi kupurutana mipango yako, asi vakashaisha ngokugura zvitongero zvako izvo zvinoita kuti munhu akazviita uchapona ndizvo. Vakafuratira makhadza avo akaoma, vakaomesa mitsipa yavo, vakaramba kupurutana. Makore mazhinji wakavaitira nyasha, ukavanyowedza ngoMweya wako kubudikidza ngevaprofeti vako; asi vakaramba kupurutana. Ndizvo wakavapira munyara dzevanhu venyika idzo. Zvakanyadaro munyasha dzako huru auzi kuvapedza yaamho, nokuti kuvasiya, ngokuti iwewe uri Mwari unorudo rwakakura nenyasha. “Ndizvo zvino, Mwari wedu, mukuru, unesimba, naMwari unotyisa, unongwarira chitenderano norudo rukuru, usikaringiri kutambudzika kweshe kudai ngechiro chidoodoko mukuona kwako, ukwo kwauya padera pedu, padera pemadzimambo edu, pevakuru vedu, padera pevapristi vedu, padera pevaprofeti vedu, pemadzibaba edu nepevanhu veshe vako, kubvira ngomukuwo wemadzimambo eAsiria metsa nyamashi. Wakaita wakarurama munazvo zveshe zvakatigumira, ngokuti iwewe wakaita ngokugondeka nesu takaita ngokushata. Madzimambo edu, vakuru vedu, vapristi vedu, madzibaba edu, avazi kungwarira nokuti kupurutana mipango yako, nenyowedzo dzako, dzewakaita kwevari. Kunyazwi nomukati mwoumambo hwavo, nomuunaku hukuru hwewakaisa padera pavo, nomunyika huru yakavhundira yewakaemesa pamberi pavo, avazi kukushandira navo avazi kutenderuka kubva kumishando yavo yakashata. Ringirai isusu, tiri hloko metsa nyamashi, hloko munyika yowakapa madzibaba edu kuti vadye michero yayo nezvipo zvayo zvakanaka. Michero yeinobara yakapinda kunaka inoenda kumadzimambo owakaisa padera pedu ngendaa yezvishaishi zvedu; vanotongazve nepadera pemiiri yedu, nepadera pezvifuyo zvedu, kudai ngokuda kwavo, nesu tiri munhamo huru.” Ngendaa yeizvi zveshe tinoita chitenderano chakagwinya, ngokunyora patsamba iyo ineruphau pakanyorwa mazina evakuru vedu, evaRevhi vedu, neevapristi vedu. Padera pechinyorwa chineruphau pane aya mazina: Nehemia mutongi, mukororo waHakharia, naZedhekia; Seraia, Azaria, Jeremia, Phashuri, Amaria, Marikhija, Hatushi, Shebhania, Marukhi, Harimu, Meremothi, Obhadhia, Dhanieri, Ginethoni, Bharukhi, Meshuramu, Abhija, Mijamini, Maazia, Bhirigai naShemaia. Ava ndivo vapristi. NevaRevhi: Jeshua mukororo waAzania, Bhinui wevakororo vaHenadhadhi, naKadhimieri; nehama dzavo, Shebhania, Hodhia, Kerita, Pheraia, Hanani, Mikha, Rehobhi, Hashabhia, Zakuri, Sherebhia, Shebhania, Hodhia, Bhani naBheninu. Nevatungamiriri vevanhu: Pharoshi, Phahathimoabhi, Eramu, Zatu, Bhani, Bhuni, Azigadhi, Bhebhai, Adonija, Bhigivhai, Adhini, Ateri, Hezekia, Azuri, Hodhia, Hashumu, Bhezai, Harifi, Anathothi, Nebhai, Magipiashi, Meshuramu, Heziri, Meshezabheri, Zadhoki, Jadhua, Pheratia, Hanani, Anaia, Hoshea, Hanania, Hashubhi, Haroheshi, Phiriha, Shobheki, Rehumu, Hashabhina, Maaseia, Ahia, Hanani, Anani, Marukhi, Harimu naBhaana. Vamweni vevanhu, vapristi, vaRevhi, vangwariri vemisiwo, vaembi, vashandi vomutemperi, naavo veshe vaiya vakadziparadzanisa pachavo kubva kuvanhu venyika, vakabatirira kuita mipango yaMwari, vakadzi vavo, vakororo vavo nevanasikana vavo, avo veshe vaiya noruziyo, nokuzwisisa, vakabatana nehama dzavo, vakuru vavo, vakapinda muchituko nemhiko yokuhamba mumipango yaMwari, iyo yakapuwa kubudikidza ndiMosi muranda waMwari, nokungwarira nokuita mipango yeshe yaMambo Mwari, Mambo wedu, zvitongero zvake nezviemeso zvake. Atizoroodzi vanasikana vedu kuvanhu vomunyika nokuti kuroora vanasikana vavo kuita vakadzi vevakororo vedu; nokudai vanhu venyika vechiunza zviro zvokutengesa nokuti zviyo ngezuva reSabatha kuti vazvitengese, atizozvitengi kubva kwevari ngezuva reSabatha, nokuti ngezuva rakacheneswa; nesu tinozorekera kusima zviyo mugore rechinomwe, nokurekera kudaidza kuripirwa chikwerete kunyazwi ngechiri. Isusu takadziitirawo mitemo, kuti tibhadhare gore ngegore magramu mashanu esirivha kuripira mushando wemhatso yaMwari wedu: Misara yezvingwa, midiro yezviyo inoangirwa zuva ngezuva, midiro yokupisha inoangirwa, maSabatha, kutawa kwomwedzi mutsva, madhiri akaemeswa, zvipo zvakachena, nemidiro yezvishaishi kuripira vaIsuraeri, nomushando weshe wemhatso yaMwari wedu. Nesu takaitawo mabhigidha pakati pevapristi, vaRevhi, nevanhu, kuti tione kuti ndiani unozopa munikero wehuni, kudziunza mumhatso yaMwari wedu, kudai ngokuteererana kwemhatso dzemadzibaba edu, panguva yakaemeswa, gore ngegore, kupishira paarita Mambo Mwari, Mwari wedu, kudai ngezvakanyorwa mumupango. Tinodziemesera pachedu kuti tiunze michero yokutanga yevhu redu, nemichero yokutanga yemiti yeshe yemichero, gore ngegore kumhatso yaMambo Mwari; tiunzewo kumhatso yaMwari wedu, kuvapristi vanoshanda mumhatso yaMwari wedu, matangwe evakororo vedu, neezvifuyo zvedu, kudai ngezvezvakanyorwa mumipango, nezvokutanga kubarwa zven'ombe dzedu nemakwai edu; nokuti tiunze hlama youfu hwomutanguro wedu, neminikero yedu, michero yembeu dzeshe dzemiti, vhini nemafuta, kuvapristi, kumakamera emhatso yaMwari wedu; nokuunza kuvaRevhi zvegumi kubva kuivhu redu, ngokuti ndivo vaRevhi vanounganidza zvegumi zveshe zvemadhorobha edu. Nomupristi mubarirwana waAroni unozoapo pamwepo nevaRevhi, apo vaRevhi pavanoashira zvegumi; nevaRevhi vanozounza chegumi chezvegumi kumhatso yaMwari wedu, kumakamera emhatso yokungwarira upfumi. Ngokuti vanhu vaIsuraeri nevana vevaRevhi vanozounza munikero wezviyo, wevhini idzva, nowemafuta kumakamera emhatso yokungwarira zvidziyo zvakacheneswa, naapo vapristi vanoshanda, vangwariri vemisiwo, nevaembi. Isusu atizosii mhatso yaMwari wedu. Zvino vatungamiriri vevanhu vaigara muJerusarema; nevamweni vevanhu vakaita mabhigidha, kuti vatsanangure munhu umwe kubva pakati pegumi rimwe ngarimwe kuti agare muJerusarema dhorobha rakachena, naapo vapfumbamwe vepamakumi varambe vakagara kumadhorobha amweni. Nevanhu vakafumisa vanhu veshe, avo vakatenda ngomwoyo weshe kugara muJerusarema. Zvino ava ndivo vatungamiriri venyika avo vakagara muJerusarema; asi kumadhorobha aJudha veshe vakagara umwe ngaumwe panhaka yake mumadhorobha avo, vaIsuraeri, vapristi vaRevhi, vashandi vomutemperi, nemibarirwana yevaranda vaSoromoni. NomuJerusarema mwakagara vamweni vevana vaJudha, nevamweni vevana vaBhenjamini. Vevana vaJudha: Athaia, mukororo waUzia, mukororo waZekharia, mukororo waAmaria, mukororo waShefatia, mukororo waMaharareri, vemibarirwana yaPherezi; naMaaseia, mukororo waBharukhi, mukororo waKhorihoze, mukororo waHazaia, mukororo waAdhaia, mukororo waJoiaribhi, mukororo waZekharia, mukororo womuShiro. Yeshe mibarirwana yaPherezi iyo yaigara muJerusarema vaiya mazana marongomuna nemakumi matanhatu nevasere (468) ngwazi dzehondo. Naava ndivo vakororo vaBhenjamini: Saru, mukororo waMeshuramu, mukororo waJoedhi, mukororo waPhedhaia, mukororo waKoraia, mukororo waMaaseia, mukororo waIthieri, mukororo waJeshaia. Nangesure kwake kwakateera Gabhai naSarai, mazana mapfumbamwe nemakumi mairi nevasere (928). Joeri mukororo waZikhiri waiya mukuru wavo; naJudha mukororo waHasenua waiya mukuru wechipiri padera pedhorobha. Vevapristi: Jedhaia, mukororo waJoiaribhi, Jakhini, Seraia, mukororo waHirikia, mukororo waMeshuramu, mukororo waZadhoki, mukororo waMeraiothi, mukororo waAhithubhi, mukuru padera pemhatso yaMwari, nehama dzavo, avo vaishanda mushando wemhatso, vaiya mazana masere nemakumi mairi nevairi (822); naAdhaia, mukororo waJerohamu, mukororo waPheraria, mukororo waAmizi, mukororo waZekharia, mukororo waPhashuri, mukororo waMarikhija, nehama dzake, vakuru vemhatso dzemadzibaba, mazana mairi nemakumi marongomuna nevairi (242); naAmashisai, mukororo waAzareri, mukororo waAhizai, mukororo waMeshiremothi, mukororo waIma, nehama dzavo, ngwazi dzehondo, zana nemakumi mairi nevasere (128); nomukuru wavo waiya Zabhidhieri, mukororo waHagedhorimu. NevevaRevhi: Shemaia, mukororo waHashubhi, mukororo waAzirikamu, mukororo waHashabhia, mukororo waBhuni; naShabhethai naJozabhadhi, vevatungamiriri vevaRevhi, avo vaiya varingiri vemhishando yokubanze kwemhatso; naMatania, mukororo waMikha, mukororo waZabhudhi, mukororo waAsafi, uyo waiya mutungamiriri wakatanga kuita munamato wokubonga, naBhakibhukia, mutongi waimuteera pakati pehama dzake; naAbhidha, mukororo waShamua, mukororo waGarari, mukororo waJedhuthuni. Veshe vaRevhi mudhorobha rakachena vaiya mazana mairi nemakumi masere nevarongomuna (284). Vangwariri vemisiwo, Akubhi, Tarimoni, nehama dzavo, avo vaiya vangwariri vemisiwo, vaiya zana nemakumi manomwe nevairi (172). Nevamweni vevaIsuraeri, nevamweni vevapristi, nevamweni vevaRevhi, vaiya mumadhorobha eshe aJudha, umwe ngaumwe akagara panhaka yake. Asi vashandi vomutemperi vakagara paOferi; naZiha naGishipha ndivo vaiya padera pevashandi vomutemperi. Mukuru wevaRevhi muJerusarema waiya Uzi, mukororo waBhani, mukororo waHashabhia, mukororo waMatania, mukororo waMikha, wemibarirwana yaAsafi, vaembi ndivo vaiya padera pomushando wemhatso yaMwari. Ngokuti waiyapo mupango wamambo ngendaa yavo, nechikoaniswa chakaemeserwa vaembi, kudai ngezvaidiwa zuva ngezuva. NaPhethahia, mukororo waMeshezabheri, wemibarirwana yaZera, mukororo waJudha, waiya panyara yamambo mundaa dzeshe dzevanhu. Ngendaa yemaguta, neminda yawo, vamweni vevanhu vaJudha vakagara muKiriathiabha nomumaguta aro, nomuDhibhoni nomumaguta aro, nomuJekabhizeeri nomumaguta aro, nomuJeshua, nomuMoradha, nomuBhethiphereti, muHazarishuari, muBheerishebha nomumaguta awo, muZikiragi, muMekhona nomumaguta awo, muEnirimoni, muZora, muJarimuthi, Zanoa, Adhuramu nemaguta awo, Rakhishi neminda yawo, naAzeka nemaguta awo. Ndizvo vakagara kubvira Bheerishebha metsa kuguma mubani reHinomu. Vana vaBhenjamini vakagarawo kubvira Gebha kuenda mberi metsa kuguma Mikhimashi, Aija, Bhetheri, nomumaguta awo, Anathothi, Nobhi, Anania, Hazori, Rama, Gitaimu, Hadhidhi, Zebhoimu, Nebharati, Rodhi naOno, bani rengwazi dzemishando. Nezvikwata zvimweni zvevaRevhi muJudha zvakabatana pamwepo kuBhenjamini. Ava ndivo vapristi nevaRevhi vakakwira naZerubhabheri mukororo waShearitieri, naJeshua: Seraia, Jeremia, Ezura, Amaria, Marukhi, Hatushi, Shekania, Rehumu, Meremothi, Ido, Ginethoi, Abhija, Mijamini, Maadhia, Bhiriga, Shemaia, Joiaribhi, Jedhaia, Saru, Amoki, Hirikia naJedhaia. Ava ndivo vaiya vatungamiriri vevapristi nevehama dzavo mumazuva aJeshua. NevaRevhi: Jeshua, Bhinui, Kadhimieri, Sherebhia, Judha naMatania, uwo nehama dzake waiya mutungamiriri wengoma dzokupa kubonga. NaBhakibhukia naUno, hama dzavo, vakaema vakaringirana navo mumudiro. Jeshua ndiye baba vaJoiakimu, Joiakimu baba vaEriashibhi, Eriashibhi baba vaJoiadha, Joiadha baba vaJonathani, naJonathani baba vaJadhua. Mumazuva aJoiakimu, vapristi, vakuru vemhatso dzemadzibaba: vaSeraia, Meraia; vaJeremia, Hanania; vaEzura, Meshuramu; vaAmaria, Jehohanani; vaMarukhi, Jonathani; vaShebhania, Josefa; vaHarimu, Adhina; vaMeraiothi, Herikai; vaIdho, Zekharia; vaGinethoni, Meshuramu; vaAbhija, Zikhiri; vaMiniamini nevaMoadhia, Phiritai; vaBhiriga, Shamua; vaShemaia, Jehonathani; vaJoiaribhi, Matenai; vaJedhaia, Uzi; vaSarai, Karai; vaAmoki, Ebha; vaHirikia, Hashabhia; vaJedhaia, Nethaneri. VaRevhi mumazuva aEriashibhi, Joiadha, Johanani naJadhua, kwakanyorwapo mazina evakuru vemhatso dzemadzibaba; neevapristiwo ngokudaro, metsa pakutonga kwaDhariusi muPhesia. VaRevhi, vakuru vemhatso dzemadzibaba avo, vakanyorwa mazina mubhuku remishando yezuva ngezuva, metsa mazuva aJohanani mukororo waEriashibhi. Nevatungamiriri vevaRevhi: Hashabhia, Sherebhia naJeshua mukororo waKadhimieri, nehama dzavo vakaema vakaringirana navo, vechiemba kukudza nokubonga, kudai ngokupanga kwaDhavhidha munhu waMwari, chikwata chakaringirana nechikwata. Matania, Bhakibhukia, Obhadhia, Meshuramu, Tarimoni naAkubhi vakaema vechingwarira misiwo yemhatso yokungwarira upfumi. Ava ndivo vaiyapo mumazuva aJoiakimu mukororo waJeshua, mukororo waJozadhaki, nomumazuva aNehemia mutongi, nomumazuva aEzura mupristi nomunyori. Zvino pakupirwa kwerukumbati rweJerusarema, vakatsvaka vaRevhi mundau dzavo dzeshe, kuti vavaunze Jerusarema, kuita dhiri rokupirwa ngokudakara, ngokubonga, ngokuemba, nengoma dzesimbi, magitari nezvidangari. Zvikwata zvevaembi zvakaungana pamwepo, zvechibva kunharaunda dzinotendenedza Jerusarema, nokubva kumaguta evaNetofa; nokubvawo Bhethigirigari, nokubva kunharaunda yeGebha neyeAzimavhethi; ngokuti vaembi vaiya vakadziakira maguta aitendenedza Jerusarema. Naapo vapristi nevaRevhi vakadzichenesa pachavo; navo vakachenesa vanhu, misiwo norukumbati. Zvino ndakakwidza vatungamiriri vaJudha padera perukumbati, ndikaemesa zvikwata zvikuru zviiri zveavo vaibonga, vechihamba mumusara. Chikwata chimwe chazvo chakakwira padera porukumbati rwokumudyo, urwo rwakaringira paMusiwo weMadisa; ngesure kwavo kwakaenda Hoshaia, norupande rwevakuru vaJudha, naAzaria, Ezura, Meshuramu, Judha, Bhenjamini, Shemaia, Jeremia, nevamweni vevapristi vatsva vanemagwama: Zekharia mukororo waJonathani, mukororo waShemaia, mukororo waMatania, mukororo waMikhaia, mukororo waZakuri, mukororo waAsafi; nehama dzake, Shemaia, Azareri, Mirarai, Girarai, Maai, Nethaneri, Judha naHanani, vane zvokuemba ndizvo zvokuridza zvaDhavhidha munhu waMwari; naEzura munyori waiya pamberi pavo. PaMusiwo weChinyuka pamberi pavo, vakakwira vakarurama pamakwiro omudhorobha raDhavhidha, pamukwidzwa worukumbati, padera pemhatso yaDhavhidha, metsa kuguma paMusiwo weMvura wokumabvazuva. Chikwata chimweni cheavo vaibonga chakaenda kumuoshwe, neni ndakateera sure kwavo, norupande rwevanhu padera porukumbati, padera peThawa reZvoto, metsa kuguma kuRukumbati Rwakapamhama, nepadera poMusiwo waEfuremu, nepasinde poMusiwo weKare, nepasinde poMusiwo weHove, nokuThawa raHananeri, neThwa reZana, metsa kuguma kuMusiwo weMakwai; navo vakaema paMusiwo weVarindi. Ndizvo zvikwata zviiri zveavo vaibonga vakaema mumhatso yaMwari, neni norupande rwevakuru vaiya neni; nevapristi Eriakimu, Maaseia, Miniamini, Mikhaia, Erioenai, Zekharia naHanania, nemagwama; naMaaseia, Shemaia, Ereaza, Uzi, Jehohanani, Marikhija, Eramu naEza. Nevaembi vakaemba, naJezirahia echiita mutungamiriri wavo. Ngeiro zuva vakapira midiro yakakura, navo vakadakara, ngokuti Mwari wakavaita kuti vadakare ngokudakara kukurutu; vakadzi nevana vakadakarawo. Bope rokudakara muJerusarema rakazwika kuretu. Pairo zuva vamuna vakaemeswa kuti vangwarire makamera okungwaririra upfumi, nepadera pezvipo zvemidiro, padera pemichero yokutanga, nepadera pezvegumi, kuti vaunganidze pamwepo mukati mwazvo zvikoaniswa zvinodiwa ngemipango, zvakaemeserwa vapristi nevaRevhi zvechibva muminda yemadhorobha; ngokuti vaJudha vakadakara ngendaa yevapristi nevaRevhi vaishanda. Vakaita mushando waMwari wavo nomushando wokuchenesa, kudaiwo ngevaembi nevangwariri vemisiwo, kudai ngokupanga kwaDhavhidha naSoromoni mukororo wake. Ngokuti mumazuva aDhavhidha naaAsafi vekaretu waiyapo mutungamiriri wevaembi vokuemba nduyo dzokukudza nokubonga kunaMwari. Mumazuva aZerubhabheri nomumazuva aNehemia, vaIsuraeri veshe vakapa zvikoaniswa kuvaembi nokuvarindi zvezuva ngezuva. Vakapaura izvo zvakacheneswa zvevaRevhi; nevaRevhi vakapaura izvo zvaiya zvemibarirwana yaAroni. Pairo zuva vakadzidza kubva mubhuku raMosi mukuzwa kwevanhu; mwakaoneka pakanyorwa kuti apana naumwe wevaAmoni nevaMoabhi unozopotera mumushongano waMwari mhera nariini, ngokuti avazi kushongana nevaIsuraeri nechingwa nemvura, asi vakabhadhara Bharamu kuti avatuke; asi Mwari wedu wakashandura chituko kuita chifumiso. Naapo vanhu vazwa mazwi omupango, vakapaura kubva kuvaIsuraeri veshe avo vaiya mibarirwana yevapara. Zvino izvi zvisati zvaitwa, Eriashibhi mupristi, uwo waiya akaemeswa padera pemakamera emhatso yaMwari wedu, uwo waiya hama yaThobhia, wakanasirira Thobhia kamera guru, apo pevaisimbongwaririrapo midiro yezviyo, yemitombo inegwema rakanaka, zvidziyo, chegumi chezviyo, chevhini idzva, nechemafuta, izvo zvaiya zvakapangwa kuti zvipuwe vaRevhi, vaembi, varindi vemisiwo, nezvipo zvevapristi. Naapo izvi zvechiitika ndaiya ndisirimwo muJerusarema, ngokuti mugore remakumi matatu nemairi rokutonga kwaArthazekizesi mambo weBhabhuroni ndakaenda kunamambo. Ngesure kwenguva ndakakumbira mambo kuti ndiende, ndakapetuka Jerusarema. Zvino inini ndakanasa kuzwisisa ndaa yokushata iyo yakaitwa ndiEriashibhi, yokunasirira Thobhia kamera muruwanze rwemhatso yaMwari. Nazvo zvakandisvipisa mwoyo kakurutu; ndizvo ndakakandira kubanze zviro zveshe zvomumhatso zvaiya zvaThobhia kubva mukamera. Zvino ndakapanga navo vaichenesa makamera, ndikahwirinzamwo zvidziyo zvemhatso yaMwari, pamwepo nemidiro yezviyo nemitombo inegwema rakanaka. Ndakaonazve kuti zvikoaniswa zvevaRevhi zvaiya zvisikazi kupuwa kwevari; ndizvo vaRevhi nevaembi, vaishanda mushando, vaiya vapetuka umwe ngaumwe kumunda wake. Naapo ndakaganyira vatongi ndechiti, “Ngenyi mhatso yaMwari yakasiiwa?” Ndakavaunganidza pamwepo ndakavaemesa mundau dzavo. Zvino vaJudha veshe vakaunza chegumi chezviyo, chevhini idzva nechemafuta mumhatso yokungwaririra upfumi. Ndakaemesa vangwariri voupfumi padera pemhatso yokungwaririra upfumi, Sheremia mupristi, Zadhoki munyori, naPhedhaia wevaRevhi, nomudetseri wavo Hanani mukororo waZakuri, mukororo waMatania; ngokuti vakaerengerwa kuita vaigondeka, nomushando wavo waiya wokukovera hama dzavo. Ndicherechedzei, A Mwari wangu, ngendaa yeichi, usadzima zviito zvangu zvakanaka zvendakaitira mhatso yaMwari wangu nemishando yake. Mumazuva awo ndakaona muJudha vanhu vechikamura vhini ngezuva reSabatha, vechiunza mwanda yezviyo, nokuitwarisa padera pezvimbongoro; nevhini rakakamurwa, mavhini, maonde, nembeu yeshe yemitwaro yaiunzwa muJerusarema ngezuva reSabatha; neni ndakavanyowedza ngokuvaitira ndaa ngeiro zuva revaitengesa ndiro zvokudya. VaThirewo, vaigara mudhorobha, vakaunzamwo hove nembeu dzeshe dzezviro zvokutengesa nokuzvitengesa ngezuva reSabatha kuvanhu vaJudha, nomuJerusarema. Zvino ndakaganyira vakuru vaJudha, ndikati kwevari, “Chiinyi ichi chiro chakashata chomunoita, mwechisvipisa zuva reSabatha? Madzibaba enyu avazi kuita izvi here, naMwari wedu aazi kutiunzira uku kushata kweshe padera pedu, nepadera pedhorobha iri here? Asi imwimwi munounza ushungu hwakakura padera paIsuraeri ngokusvipisa zuva reSabatha.” Kwootanga kusvipa pamisiwo yeJerusarema Sabatha risati ratanga, ndakapanga kuti misiwo ikonywe, ndikapanga kuti isabeurwa metsa Sabatha ripere. Ndakaemesa vamweni vevaranda vangu pamisiwo, kuti kusaapo mutwaro unopotedzwamwo ngezuva reSabatha. Ndizvo vatengesi vaitengesa mbeu dzeshe dzezviro vakagara usiku ngokubanze kwedhorobha reJerusarema kamwe nokuti kairi. Asi ndakavanyowedza, ndechiti kwevari, “Munoatirenyi usiku hweshe pamberi porukumbati? Kuti mukaitazve kudaro, ndinozomubata.” Kubvira panguva iyo avazi kuzouya ngezuva reSabatha. Neni ndakapanga vaRevhi kuti vadzichenese, kuti vauye, varinde zvimana, kuti vangwarire zuva reSabatha rakachena. Ndicherechedze, A Mwari wangu, ndiitire nyasha, undiponese kudai ngouwandu hworudo rwako. Mumazuva awo ndakaonazve vaJudha vaiya vakaroora vakadzi veAshidhodhi, veAmoni neveMoabhi; norupande rwevana vavo vaiereketawo ndimi yeAshidhodhi, navo vasikakoni kuereketa ndimi yevaJudha, asi vechiereketa ngendimi dzevanhu vakasiyana. Ndakavaganyira, ndikavatuka, ndikavachaya vamweni vavo, ndikabvita bvudzi ravo, ndikavapikisa mhiko ngezina raMwari ndechiti, “Imwimwi musazoroodza vanasikana venyu kunevakororo vavo, nokuti kutora vanasikana vavo kuroodza vakororo venyu, nokuti muvaroore imwimwi pachenyu. Soromoni mambo weIsuraeri aazi kushaisha here ngokuita zvakadaro? Pakati pemadzinza akawanda paiya pasina mambo wakadai ndiye, naye waidiwa ndiMwari wake, naMwari wakamuita mambo padera paIsuraeri reshe; zvakanyadaro vakadzi vapara vakamuita kuti ashaishe. Ndizvo zvino isusu tinozopurutana kwouri nokuita uku kushata kukuru, kupauka ngourimbwi kubva kunaMwari wedu ngokutora vakadzi vapara here?” Naumwe wevakororo vaJoiadha, mukororo waEriashibhi mupristi mukuru, waiya mukwambo waSanibharati muHoroni; ndizvo ndakamudzinga kubva kwendiri. Vacherechedze, A Mwari wangu, ngokuti vakasvipisa upristi, chitenderano chevapristi nechevaRevhi. Ndizvo ndakavachenesa kubva kuchiro cheshe chipara, ndakaemesa mabingo evapristi neevaRevhi, umwe ngaumwe mumushando wake; neni ndakapira huni, ngemikuwo yakaemeswa, neyokupira michero yokutanga. Ndicherechedze, A Mwari wangu, ngokundiitira zvakanaka. Izvi zvakaitika mumazuva aAhasuerusi, uwo Ahasuerusi ndiye wakatonga padera penyika zana nemakumi mairi nemanomwe (127) kubvira India metsa kuguma Ethiopia. Mumazuva awo apo mambo Ahasuerusi paakagara padendemaro roumambo hwake, raiya mungome yeSusa, mugore rechitatu rokutonga kwake, wakaitira dhiri kuneveshe vakuru vake nevaranda vake. Hondo yePhesia neMedhia, vakuru nevatongi venyika, vaiyapo pamberi pake, apo paaionisa upfumi hukuru hwoumambo hwake nouthende hwake, nembiri youkuru hwake mazuva akawanda, zana nemakumi masere (180) eshe pamwepo. Naapo mazuva aya apera, mambo wakaita dhiri mazuva manomwe reavo vanhu vaiyapo mungome yeSusa, veshe vakuru nevadoko, muruwanze rwengome yamambo. Aiyamwo machira akaturikwa akachena akasvipirika, nematema, akasungwa ngetambo dzorukangaza dzakanaka nedzakatsvukuruka pandandazi dzesirivha dzakasungirwa kusika dzemapuwe. Paiya nezvigaro zvaiya zvomukore nezvesirivha, padera peruwanze rwakaakirwa ngemapuwe emaara akatsvuka, matema, akachena neakasvipa. Zvokumwa zvakamwirwa muzvidziyo zvomukore, zvidziyo zvembeu dzakaparadzana nevhini roumambo rakawanda, kudai ngoukuru hwoumambo hwamambo. Kumwa kwaimwiwa kudai ngechironzo; akuna wakaangiridzwa; ngokuti mambo waiya akaemesa chironzo kunevakuru veshe vengome yake, kuti vaite kudai ngokuda kwomunhu weshe. Zve, Vhashiti vahosi wakaitira vakadzi dhiri mungome yamambo Ahasuerusi. Ngezuva rechinomwe apo mwoyo wamambo wechidakara ngevhini, wakapanga Mehumani, Bhizitha, Habhona, Bhigitha, Abhagitha, Zetha naKharkasi, mithenwa minomwe yaishanda pamberi pamambo Ahasuerusi, kuti vaunze Vhashiti vahosi pamberi pamambo, akapfeka dzungudza roumambo, kuitira kuonisa vanhu nevakuru unaku hwake; ngokuti waiya akanaka mukuringirika. Asi vahosi Vhashiti vakaramba kuuya kudai ngokupanga kwamambo kwakaunzwa ngemithenwa. Ndizvo mambo wakanyangadzwa kakurutu, noushungu hwake hwakabaka mukati mwake. Zvino mambo wakabvunza vanhu vakangwara, vaizia ngemipango (ngokuti ndiwo mushuma waaiita mambo kuneavo vaizia mipango netsika, naavo vaigara pasinde pake Kharshena, Shetha, Adhimatha, Tharshishi, Meresi, Marsena naMemukhani, vakuru vanomwe vePhesia naMedhia, vaiona hope yamambo, nevaigara kutanga muumambo), “Kudai ngomupango tinozoitenyi kunavahosi Vhashiti, ngokuti aazi kuita kudai ngokupanga kwamambo Ahasuerusi kwakaronzwa ngemithenwa?” Zvino Memukhani wakapingura pamberi pamambo nepamberi pevakuru vake, “Vhashiti vahosi aazi kushaisha kunamambo ega, asi nokuvakuru vake veshe, nokuvanhu veshe vari munyika dzeshe dzaAhasuerusi mambo. Ngokuti ichi chiito chavahosi chinozozwika kuvakadzi veshe, zvinozoita kuti vakadzi vatange kushoora vamuna vavo vanozoti, ‘Mambo Ahasuerusi wakapanga vahosi Vhashiti kuti aunzwe pamberi pake, asi iye wakaramba kuuya.’ Ngezuva iri vakadzi vakuru vePhesia neMedhia vaiya vazwa ngokuita kwavahosi vanozoshoora vakuru vamambo, nakwo akuzoperi kushoorwa kwakakura noushungu! Kudai zvechidakadza mambo, ngaaemese mupango woumambo unobva kwaari, nawo ngaunyorwe pakati pemipango yevaPhesia nevaMedhia, kuti usazoshandurwa, kuti Vhashiti vasachazouyazve pamberi pamambo Ahasuerusi; namambo ngaape ndau yake youhosi kunoumweni wakanaka kupinda iye. Ndizvo mupango wamambo waanozoemesa unozodaidzirwa muumambo hwake hweshe (ngokuti huri hukuru,) vakadzi veshe vanozoremeredza vamuna vavo, zvakaedzana vakuru nevadoko.” Izwi iri rokupanga rakadakadza mambo nevakuru, namambo wakaita kudai ngeizwi raMemukhani. Wakatumira tsamba kunyika dzeshe dzoumambo hwake, kunyika yeshe kudai ngokunyora kwayo, kumunhu weshe kudai ngendimi yake, kudaidzira kuti mwamuna weshe atonge mumhatso yake. Ngaaerekete ngendimi yevanhu vake. Ngesure kweizvi zviro, apo ushungu hwamambo Ahasuerusi hwapora, wakakarakadza Vhashiti, nezvaakaita, neizvo zvakaemeswa kumuitira ndaa. Zvino varanda vamambo vaimushandira vakati kwaari, “Ngakutsvakirwe mambo mhandara itsva dzakanaka. Mambo ngaaemese nduna munyika dzeshe dzoumambo hwake, kuti dziunganidze pamwepo dzeshe mhandara dzakanaka muSusa mungome, kumhatso yevakadzi, muungwariri hwaHegai muthenwa wamambo, mungwariri wevakadzi; ngavapuwe mafuta okucheneswa kwavo. Nomusikana wakanaka uwo unodakadza mambo ngaaite vahosi pandau yaVhashiti.” Izwi iri rakadakadza mambo, naye wakaita kudaro. Zvino waiyapo muJudha mungome yomuSusa, zina rake raizwi Mordhekhai, mukororo waJairi, mukororo waShimei, mukororo waKishi, muBhenjamini. Kishi wakatorwa kubva Jerusarema ngomukuwo woubatwa, uwo wakatorwa naJekhonia mambo waJudha, uwo wakatorwa ndiNebhukhadhineza mambo waBhabhuroni. Mordhekhai wakarera Hadhasa, ndikwo kuti Esita, mwanasikana wababamunini ake; ngokuti waiya asina baba nokuti mai, musikana waiya akanaka chimiro chake nokuringirika, uwo waakatora Mordhekhai apo baba ake namai vafa, kuti amungwarire kudai ngemwanasikana wake. Ndizvo apo mupango wamambo nezviemeso zvadaidzirwa, naapo vasikana vazhinji vaunganidzwa pamwepo mungome yeSusa, vechingwarirwa ndiHegai, Esita wakaunzwawo mungome yamambo, kuti angwarirwe ndiHegai, mungwariri wevakadzi. Musikana uyu wakamudakadza, naye wakaona nyasha dzake; naye wakakasira kumupa mafuta okunakisa ganda rake, pamwepo nezvikoaniswa zvezvokudya zvake, nevasikana vakatsanangurwa vanomwe kubva mungome yamambo; naye wakamuthutisa nevasikana vake kuvaisa mundau yakapindisisa kunaka yevakadzi muharemu. Esita waiya asati aronza rudzi rwake nokuti hama dzake, ngokuti Mordhekhai wakamupanga kuti asazoronza. NaMordhekhai waihamba zuva rimwe ngarimwe pamberi poruwanze rwemhatso yevakadzi yeharemu, kuti azie ngokugara kwaEsita, nokuti chiinyi chinoitika kwaari. Zvino yakaguma nguva yokuti musikana umwe ngaumwe apotere kunamambo Ahasuerusi, ngesure apo aiya apedza mwedzi gumi nemiiri yokunasirira, kudai ngemishuma yevakadzi, (ngokuti ndiyo nguva yavo yokudzinasirira kwavo ngemafuta, mwedzi mitanhatu vechizora mafuta emhura, nemwedzi mitanhatuzve vechizora zvinonuhwira nezviro zvimweni zvinonakisa ganda revakadzi.) Naapo musikana paaipotera kunamambo, kunyazwi chiinyi chaaidisisa chaipuwa kwaari kuti aende nacho kubva kumhatso yevakadzi kuenda mungome yamambo. Madeekoni waipoteramwo, echibudamwo mangwanani, echipetuka kumhatso yechipiri yevakadzi, yaingwarirwa ndiShaashigazi, muthenwa wamambo, waingwarira mapunha amambo; asaizopetukazve kunamambo, asi kuti mambo akadakadzwa ndiye, naye waizodaidzwa ngezina. Naapo jana raEsita raguma, mwanasikana waAbhihairi, babamunini vaMordhekhai, uwo waiya akamurera kuita mwanasikana wake, kuti apotere kunamambo, aazi kukumbira chiro ngepabanze peizvo zvaakaemesa Hegai muthenwa wamambo mungwariri wevakadzi. Zvino Esita wakaona nyasha mukuona kwaavo veshe vakamuringira. Naapo Esita paakatorwa kuenda kunamambo Ahasuerusi mungome yamambo ngomwedzi wegumi unozwi Thebhethi, mugore rechinomwe rokutonga kwake, mambo wakamuda Esita kupinda vakadzi vamweni veshe, naye wakaona nyasha norudo mukuona kwake kupinda mhandara dzeshe; ndizvo wakamupfekesa dzungudza roumambo musoro rake, naye wakamuita vahosi pandau yaVhashiti. Zvino mambo wakaitira vakuru vake dhiri veshe nevaranda vake, “Dhiri raEsita.” Wakaita kuti nyika dzizorore, wakapa zvipo zvizhinji kudai ngoukuru hwoumambo. Naapo mhandara dzaunganidzwa pamwepo ngokwechipiri, Mordhekhai waiya akagara pamusiwo wamambo. Zvino Esita waiya asati aronza hama dzake nokuti dzinza rake, kudai ngezvaakapangwa ndiMordhekhai; ngokuti Esita wakapurutana kupanga kwaMordhekhai kudai ngezvaaiita acharerwa ndiye. Mumazuvawo, apo Mordhekhai akagara pamusiwo wamambo, vairi vemithenwa yamambo, Bhigithana naThereshi, avo vaingwarira misiwo, vakashishwa vakapangana kuuraya mambo Ahasuerusi. Asi bangano rakazwika kunaMordhekhai, naye wakaronzera Esita vahosi; naEsita wakaronzera mambo ngezina raMordhekhai. Naapo ndaa iyi yatsvakisiswa, yakaoneka kuti igwinyiso, veshe vairi vakaturikwa pamuti. Zvakanyorwa mubhuku remishando yemadzimambo yezuva ngezuva pamberi pamambo. Ngesure kweizvi zviro mambo Ahasuerusi wakakudza Hamani mukororo waHamedhatha muAgagi, akamukurisa kakurutu, akaemesa chigaro chake padera pevakuru veshe avo vaiya naye. Nevaranda veshe vamambo, vaigara pamusiwo wamambo, vakadzikotamisa pashi, kuremeredza Hamani; ngokuti mambo waiya akapanga kudaro ndiye. Asi Mordhekhai aazi kudzikotamisa, nokuti kumuremeredza. Zvino varanda vamambo vaiya pamusiwo vakati kunaMordhekhai, “Ngenyi usikapurutani kupanga kwamambo? ” Naapo vaiereketa kwaari zuva ngezuva, naye aazi kupurutana kwevari, vakaronzera Hamani, kuitira kuti vaone kuti mazwi aMordhekhai anodetsera here; ngokuti iye waiya akavaronzera kuti muJudha. Naapo Hamani aona kuti Mordhekhai aazi kudzikotamisa, nokuti kumuremeredza, Hamani wakazara ngoushungu. Asi wakapinimidza kuchiita chiro chisina shwiro kuuraya Mordhekhai ega. Ndizvo aiya aronzerwa dzinza raMordhekhai, Hamani wakaronga kuuraya vaJudha veshe, dzinza raMordhekhai, mukati mwoumambo hweshe hwaAhasuerusi. Mumwedzi wokutanga unozwi mwedzi waNisani, mugore regumi nemairi rokutonga kwamambo Ahasuerusi, vakakandira Puri, ukwo kunoronza kuti mabhigidha, pamberi paHamani, kukheta zuva nomwedzi, nemabhigidha akabata zuva regumi nematatu emwedzi wegumi nemiiri, uwo unozwi Adha. Zvino Hamani wakati kunamambo Ahasuerusi, “Varipo vanhu vamweni vakapararira vanopepesheka pakati pevanhu veshe voumambo hwako; mitemo yavo yakasiyana neiyo yevanhu vamweni veshe, avangwariri mitemo yamambo; ndizvo avasisiri kuti mambo avatendere. Kudai zvechidakadza mambo, ngakuemeswe mutemo wokuurawa kwavo: neni ndinozobhadhara makhirogramu mazana matatu nemakumi marongomuna emakumi emazana (340,000) esirivha munyara dzaavo vanoita uwo mushando, kuti vaaise muupfumi hwamambo.” Ndizvo mambo wakadusa ndandazi yake kubva munyara yake, wakapa kunaHamani mukororo waHamedhatha muAgagi, gaa revaJudha. Mambo wakati kunaHamani, “Mare inopuwa kwouri, nevanhu, kuita kwevari kudai ngezvinooneka kwouri zvakanaka.” Zvino vanyori vamambo vakadaidzwa ngomwedzi wokutanga ngezuva regumi nematatu rawo, mutemo wakaemeswa kudai ndizvo zveshe zvaakapanga Hamani, ukanyorwa kumadzimambo, vatongi, nokunduna dzaiya padera penyika dzeshe kudai ngokunyora kwavo, nokuvanhu veshe kudai ngendimi dzavo; ukanyorwa muzina ramambo Ahasuerusi dzakanyorwa tsamba, dzakanamiswa ngendandazi yamambo. Tsamba dzakatumirwa nenhumwa kunyika dzeshe dzamambo kuti vaparadze nokuuraya, nokuita kuti vapere, veshe vaJudha, veshe vadoko navakuru, madzimai nevana ngezuva rimwe, pazuva regumi nematatu romwedzi wegumi nemiiri, uwo mwedzi unozwi Adha, nokuchakata upfumi hwavo. Imwe yezvakanyorwa zvaiya mutemo yakapuwa kunyika dzeshe ukadaidzirwa kuvanhu veshe, kuti vaite vakanasirirwa metsa iro zuva. Nhumwa dzakaenda ngokukasira kudai ngomupango wamambo, mutemo waunzwa mungome yeSusa. Mambo naHamani vakagara pashi kumwa; asi dhorobha reSusa raiya mukukangaidzwa. Naapo Mordhekhai azia zveshe zvakaitwa, Mordhekhai wakabaura zvokusimira zvake, akapfeka masaka akadziisa marota, naye akabuda akaenda pakati pedhorobha, akaboorera ngeizwi guru rinenheruso. Wakakwira metsa pamusiwo wamambo, ngokuti paiya pasina naumwe waitenderwa kuti apotere pamusiwo wamambo akapfeka machira emasaka. Munyika dzeshe apo pewakaguma mupango nomutemo, kwaiyapo kuchema kukurutu pakati pevaJudha, kuera kudya, kutsumba nokuboorera; nevazhinji vavo vakaata pashi vakapfeka machira emasaka nokudziisa marota. Naapo varandakadzi vaEsita nemithenwa yake vakauya vakamuronzera, vahosi vakasvipa mwoyo kakurutu; naye wakatumira Mordhekhai zvokusimira, kuti aduse machira ake emasaka kubva kwaari; asi aazi kuzviashira. Zvino Esita wakadaidza Hathakhi, umwe wemithenwa yamambo, uwo wakaemeswa kuti amushandire, naye wakamupanga kuti aende kunaMordhekhai, azwe kuti chiinyi chiri kuitika, nokuti ngenyi. Hathakhi wakabuda kuenda kunaMordhekhai paruwanze rwedhorobha pamberi pemusiwo wamambo, naMordhekhai wakamuronzera zveshe zvakaitika kwaari, nouwandu hwemare yaakagondisa Hamani kuti unozoibhadhara kuupfumi hwamambo yokuparadzwa kwevaJudha. Mordhekhai wakamupawo tsamba yomutemo wakanyorwa, wakabudiswa muSusa kuti vaparadzwe, kuti aionise kunaEsita, nokududzira kwaari, nokumupanga kuti aende kunamambo kuti aite mukumbiro kwaari, nokuti amupote ngendaa yevanhu vake. Hathakhi wakauya, akaronzera Esita mazwi aMordhekhai. Zvino Esita wakaereketa kunaHathakhi, naye wakapa kwaari izwi raienda kunaMordhekhai echiti, “Varanda veshe vamambo, nevanhu veshe venharaunda dzenyika dzamambo, vanozia kuti kunyazwi ndiani mwamuna nokuti mukadzi unozopotera kunamambo mukamera repakati, asikazi kudaidzwa, pane chironzo chimwe kuti aurawe. Kwega uwo waanomirudzira mambo ndonga yomukore, kuti apone. Inini pachangu andizi kudaidzwa kuti ndipotere kunamambo aya mazuva makumi matatu.” Naapo pevakaronzera Mordhekhai mazwi aEsita, Mordhekhai wakavaronzera kuti vapingure Esita echiti, “Usapinimidza pachako kuti unozopokonyoka mungome yamambo, kupinda vamweni vaJudha veshe. Ngokuti kudai wechiramba wakanyarara panguva iyi, kusunhurwa nokuponeswa kunozouya kuvaJudha kubva kundau imweni, asi iwewe nemhatso yababa ako munozourawa. Ndiani ungazia kuti pamweni iwewe wakaunzwa muumambo ngendaa yenguva yakadai?” Zvino Esita wakapanga kuti vapingure Mordhekhai vechiti, “Endai, muunganidze pamwepo vaJudha veshe vomunoona muSusa, muere kudya ngendaa yangu, musikadyi nokuti kumwa mazuva matatu, usiku nemasikati. Inini nevarandakadzi vangu tinozoerawo kudya kudai ndimwi. Ngesure kweizvo ndinozopotera kunamambo, kunyazwi kurwisana nechironzo kudaro; kudai ndechifa, ndafa.” Zvino Mordhekhai wakaenda, akaita kudai ndizvo zveshe zvaakamupanga Esita. Pazuva rechitatu Esita wakapfeka zvipfeko zvake zvoumambo, naye wakaema muruwanze rwomukati rwengome yamambo, urwo rwakaringirana nemhatso huru yamambo. Mambo waiya akagara padendemaro rake roumambo mungome youmambo, iyo yakaringirana nepamusiwo wengome. Naapo mambo aona Esita vahosi akaema muruwanze, wakaona nyasha mukuona kwake, namambo wakamirudzira Esita ndonga yomukore yaiya munyara yake. Ndizvo Esita wakakwedzera pasinde, wakagwama soro rendonga. Mambo wakati kwaari, “Chiinyi chounoda, vahosi Esita? Chiinyi chikumbiro chako? Chinopuwa kwouri kunyazwi rupande rwoumambo hwangu.” Zvino Esita wakapingura echiti, “Kudai chechimudakadza mambo, mambo naHamani ngavauye nyamashi kudhiri rendakakunasirira.” Zvino mambo wakati, “Unzai Hamani ngokukasira, kuti tiite kudai ngezvaanoda Esita.” Ndizvo mambo naHamani vakauya kudhiri raakanasira Esita. Naapo vechimwa vhini, mambo wakati kunaEsita, “Chiinyi chichemo chako? Chinozoitwa kwouri. Nechikumbiro chako chiinyi? Kunyazwi chiri rupande rwoumambo chinozoitwa.” Zvino Esita wakapingura echiti, “Ichi ndicho chichemo changu nechikumbiro changu: Kudai ndaona nyasha mukuona kwamambo, nokudai zvechidakadza mambo kuti andipe chichemo changu, nokuita kudai ngechikumbiro changu, ngaauye mambo naHamani mangwani kudhiri rendinozovanasirira, neni zvino ndinozoita kudai ngezvaakaronza mambo.” Hamani wakabuda ngeiro zuva echidakara anomweya wakanaka. Asi apo Hamani paakaona Mordhekhai ari pamusiwo wamambo, wakamuringira akaona kuti aazi kumumirukira, nokuti kuhuta pamberi pake, akanyangadzwa ndiye Mordhekhai; zvakanyadaro Hamani wakadzibata, akaenda kanyi. Zvino wakadaidza shamwari dzake, naZereshi mukadzi wake, naHamani wakaronza kwevari ngouthende hwoupfumi hwake, nouwandu hwevakororo vake, nezviro zveshe zvaakapinda kukudzwa ndizvo ndimambo, nenjira yaakamuemesa ndiyo mambo padera pevakuru nenduna dzeshe dzamambo. NaHamani wakaangira kuronza kuti, “Kunyazwi Esita vahosi aazi kutendera naumwe munhu kuti apotere pamwepo namambo kudhiri raakanasira asi inini pachangu. Mangwanizve inini ndinokokwa ndiye pamwepo namambo. Asi izvi zveshe azvingandidetseri chiro, nguva yeshe yendinoona Mordhekhai muJudha echigara pamusiwo wamambo.” Zvino Zereshi mukadzi wake neshamwari dzake dzeshe dzakati kwaari, “Ngakunasirwe muti urebu hwawo huri mamitha makumi mairi nemairi, newe uronzere mambo mangwani kuti Mordhekhai asungirwe padera pawo; zvino potera iwewe ngokudakara pamwepo namambo mudhiri.” Kupanga uku kwakadakadza Hamani, naye wakaita kuti muti uwo unasirwe. Pausiku uhwo hope dzamambo adzizi kukweya, naye wakapanga kuti bhuku rokucherechedzisa mishando yezuva ngezuva riunzwe, nayo yakadzidzwa pamberi pamambo. Pakaoneka pakanyorwa ngenjira yaakaronza ndiyo Mordhekhai ndaa yaBhigithana naThereshi, mithenwa miiri yamambo vaingwarira ruwanze nokuronga kuuraya mambo Ahasuerusi. Zvino mambo wakati, “Kuremeredzwa nokukudzwa kwakaitawani kwakaitwa kunaMordhekhai ngendaa iyi?” Varanda vamambo avo vanomushandira vakati, “Akuna chiro chakaitwa kwaari.” Namambo wakati, “Ndiani uri muruwanze?” Zvino Hamani waiya achandopotera muruwanze rwokubanze kwengome yamambo, kuti aerekete kunamambo kuti Mordhekhai asungirwe pamuti uwo waaiya amunasirira. Ndizvo varanda vamambo vakati kwaari, “Ringirai, Hamani wakaema paruwanze.” Mambo wakati, “Ngaapotere.” Ndizvo Hamani wakapotera mukati, namambo wakati kwaari, “Chiinyi chinozoitwa kunomunhu uwo waanoda mambo kuremeredza?” Hamani wakapinimidza mumwoyo mwake echiti, “Ndiani munhu waangadazve mambo kuti aremeredze kakurutu kupinda inini?” Ndizvo Hamani wakapingura mambo echiti, “Uwo munhu waanoda mambo kuremeredza, ngazviunzwe zvokusimira zvoumambo izvo zvinopfekwa ndimambo, nehachi rinogadhwa ndimambo, nedzungudza roumambo pasoro pake. Zvokupfeka zvoumambo nehachi ngazvipuwe munyara dzenduna imwe huru yamambo; ngaapfekese uwo munhu waanoda mambo kuremeredza, nokumuunza mukati mwepato redhorobha, akagadha pahachi, echidaidzira pamberi pake, ‘Izvi ndizvo zvinozoitwa kunomunhu uwo waanoda mambo kuremeredza.’ ” Zvino mambo wakati kunaHamani, “Kasira, utore zvokupfeka zvoumambo nehachi, kudai ngezvewaronza, uite kudaro kunaMordhekhai muJudha, uwo unogara pamusiwo wamambo. Usasiya nechiro nachimwe cheizvo zvewaereketa.” Ndizvo Hamani wakatora zvokupfeka zvoumambo nehachi, akapfekesa Mordhekhai, akamuunza akagadha pahachi muruwanze rwakapamhama rwomudhorobha, echidaidzira pamberi pake kuti, “Izvi ndizvo zvinozoitwa kunomunhu waanoda mambo kuremeredza.” Zvino Mordhekhai wakapetuka kumusiwo wamambo, asi Hamani wakakasira kuenda kumhatso yake echitsumba, akaita mukutukutu musoro rake. Naapo Hamani aronzera Zereshi mukadzi wake neshamwari dzake dzeshe zviro zveshe zvakaitika kwaari, vapangi vake vakangwara, naZereshi mukadzi wake vakati kwaari, “Kudai Mordhekhai ari worudzi rwevaJudha, uwo pamberi pake iwewe unotanga kuwa, auchazomunyisi, asi ngegwinyiso unozowa pamberi pake.” Naapo vachaereketa naye, mithenwa yamambo yakaguma, yakakasirisa Hamani kumuunza kudhiri iro rakanasirwa ndiEsita. Ndizvo mambo naHamani vakapotera mudhiri naEsita vahosi. Pazuva rechipiri vechimwa vhini, mambo wakatizve kunaEsita “Chiinyi chichemo chako, vahosi Esita? Chinozopuwa kwouri. Chiinyi chikumbiro chako? Chinozoitwa kwouri kunyazwi rupande rwoumambo hwangu.” Zvino Esita vahosi wakapingura, akati, “Kudai ndaona nyasha mukuona kwamambo, A mambo, nokudaizve zvechidakadza mambo, ngandipuwe kupona kwangu, ndicho chichemo changu, nokupona kwevanhu vangu, ndicho chikumbiro changu. Ngokuti isusu takatengeswa, inini nevanhu vangu, kuti tiparadzwe, tiurawe, kuti tipedzwe. Dai taiya takatengeswa kuita hloko, vamuna nevakadzi, ndaizodai ndakanyarara; asi akuna gaa ringakona kuripira kushata ukwo kwakaitwa kunamambo.” Zvino mambo Ahasuerusi wakati kunaEsita vahosi, “Ndiani uwo, umboripari, uwo unokushinga mumwoyo mwake kuita izvi?” NaEsita wakati, “Gaa nebandu, ndiye uyu Hamani wakashata.” Zvino Hamani wakatyiswa pamberi pamambo navahosi. Mambo wakamiruka kubva padhiri muushungu hwake, akaenda mumunda wengome, asi Hamani wakagara kuti adzikumbirire kupona kwake kunaEsita vahosi; ngokuti waiya aona kuti mambo waiya adziemesera kumuparadza. Naapo mambo apetuka sure kubva mumunda wengome kuuya kundau yedhiri, Hamani waiya adzikandira pamubhedhi apo paaigara Esita; namambo wakati, “Unozoangiridza vahosi here pamberi pangu mumhatso yangu?” Naapo mazwi achabuda kubva kumuromo wamambo, vakafukidza hope yaHamani. Zvino Habhona, umwe wemithenwa yamambo, wakati pamberi pamambo, “Ringirai, muti umwewo, waakanasira Hamani kusungira Mordhekhai, uwo izwi rake rakaponesa mambo, nawo wakaema mamitha makumi mairi nemairi kureba pamhatso yaHamani.” Namambo wakati, “Musungirenyi padera pawo.” Ndizvo vakasungira Hamani padera pomuti uwo waakanasira kusungirapo Mordhekhai. Naapo ushungu hwamambo hwakapora. Pazuva iro mambo Ahasuerusi wakapa Esita vahosi mhatso yaHamani gaa revaJudha; naMordhekhai wakauya pamberi pamambo, ngokuti Esita waiya aronza kuti iye waiya anani kwaari. Zvino mambo wakatora ndandazi yake yaakadusa kubva kunaHamani, akaipa kunaMordhekhai. Ndizvo Esita wakaemesa Mordhekhai padera pemhatso yaHamani. Zvino Esita wakaereketazve kunamambo; wakadzikandira pashi petsoka dzake, wakamupota ngemasodzi kuti aduse zano rakashata raHamani muAgagi, nezano raakaronga kurongera vaJudha. Mambo wakamirudzira Esita ndonga yomukore, naEsita wakamiruka, akaema pamberi pamambo. Wakati, “Kudai zvechimudakadza mambo, nokudai ndaona nyasha mukuona kwake, nokudai ichi chiro chechioneka chakarurama pamberi pamambo, neni ndikaita unoashirika mukuona kwake, ngaunyorwe mupango unokunukudza tsamba idzo dzakarongwa zano ndiHamani mukororo waHamedhatha muAgagi, idzo dzaakanyora echipanga kuti vaJudha vaparadzwe, avo vari munyika dzeshe dzamambo. Ngokuti ndingaita maemerenyi kuona kushata ukwo kwechiuya padera pevanhu vangu? Nokuti ndingaita mashingirenyi kuona kuparadzwa kwehama dzangu?” Zvino mambo Ahasuerusi wakati kunaEsita vahosi nokunaMordhekhai muJudha, “Ringira, ndapa Esita mhatso yaHamani, navo vamusungira pamuti, ngokuti wakaronga kuisa nyara yake padera pevaJudha. Nyorai kudai ngezvomunoda ngendaa yevaJudha muzina ramambo, uise chidhindo chendandazi yamambo; ngokuti kunyorwa ukwo kwakanyorwa ngezina ramambo nokuiswa chidhindo chendandazi yamambo, akuna munhu ungachikunukudza.” Vanyori vamambo vakadaidzwa ngouwo mukuwo womwedzi wechitatu, unozwi Sivhani, ngezuva remakumi mairi nematatu rawo; nomupango wakanyorwa, kudai ndizvo zveshe zvaakapanga Mordhekhai, kuvaJudha, kuvatongi, kunduna nokuvangwariri venyika kubvira India metsa kuguma Ethiopia, nyika dzaiya zana nemakumi mairi nenomwe (127), kunyika imwe ngaimwe kudai ngokunyora kwayo, nokuvanhu veshe kudai ngendimi dzavo, nokuvaJudha kudai ngokunyora kwavo nendimi yavo. Wakanyora tsamba muzina ramambo Ahasuerusi, akadziisa chidhindo chendandazi yamambo, wakatumira tsamba ngenyara dzevakatumwa vaigadha mahachi, airumbisa, akaberekwa ngezvifuyo zvamambo. Ngeidzi tsamba mambo wakatendera vaJudha vaiya mumadhorobha eshe kuti vaungane varwire kupona kwavo, kuparadza, kuuraya, nokupedza reshe simba rokurwa revanhu nokuti nyika yaizovarwisa, veshe nevana vavo nevakadzi, nokuchakata upfumi hwavo, pazuva rimwe munyika dzeshe dzamambo Ahasuerusi, pazuva regumi nematatu romwedzi wegumi nemiiri unozwi Adha. Tsamba imweni yetsambayo yakanyorwa kuti ibudiswe kuita mupango munyika dzeshe, nokudaidzirwa kuvanhu veshe, nevaJudha kuti vadzinasirire ngeiro zuva kuunzidzira magaa avo. Ndizvo vatumwa avo vakagadha mahachi airumbisa oumambo vakabuda vechikasirisiswa nokusundwa ngomupango wamambo. Mupango wakabudiswa kubva mungome yeSusa. Zvino Mordhekhai wakabuda kubva pamberi pamambo akapfeka zvokusimira zvoumambo, zvakasvipirika nezvakachena, nedzungudza guru romukore nechokusimira chorukangaza rwakanaka rwakatsvukuruka; naapo vedhorobha reSusa vakadaidzira nokudakadzwa. VaJudha vaiya nokujeka, nokudakadzwa, nokudakara, nokuremeredzwa. Munyika imwe ngaimwe nomudhorobha rimwe ngarimwe, apo peshe perakaguma izwi romupango wamambo, vaJudha vaiya nokudakara nokudakadzwa, nedhiri, nokuane zuva rokuzorora. Ndizvo vazhinji vevanhu venyika vakadziita vaJudha, ngokuti kutyisa kwevaJudha kwakavagumira. Zvino mumwedzi wegumi nemiiri, romwedzi waAdha, ngezuva regumi nematatu rawo, apo mupango wamambo nechironzo chake zvakwedzera kuti zviitike, ngeiro zuva apo magaa evaJudha aiya negonda kuti vanozoa nesimba padera pavo, asi zvakashandurwa ngezuva rimwe, apo vaJudha pevakaita simba padera paavo vaivanyenya, vaJudha vakaungana pamwepo mumadhorobha avo mukati mwenyika dzeshe dzamambo Ahasuerusi, kuti vaise nyara dzavo padera paavo veshe vaitsvaka kuvaparadza; apana naumwe waishinga kuemesedzana navo, ngokuti kutyisa kwavo kwaiya kwaguma padera pevanhu veshe. Vatongi veshe venyika, madzimambo avo, nduna dzavo nevakuru vamambo, vakarwira vaJudha, ngokuti kutyisa kwaMordhekhai kwakawira padera pavo. Ngokuti Mordhekhai waiya nesimba guru mumhatso yamambo, nembiri yake yakazwika munyika dzeshe, apo mwamuna uyu Mordhekhai paakaangira kukura kuita simba. Ndizvo vaJudha vakauraya magaa avo eshe ngokubaya ngeshoti, nokuuraya nokuvaparadza, vakaita kudai ngezvaivadakadza kwevari avo vaivanyenya. Mungome yomuSusa vaJudha vakauraya nokuparadza vamuna mazana mashanu (500). Vakauraya Pharshandhatha, Dharifoni, Aspatha, Phoratha, Adharia, Aridhatha, Pharmashita, Arisai, Aridhai naVhaizatha, vakororo gumi vaHamani mukororo waHamedhatha, gaa revaJudha; vakavauraya, asi avazi kubata zvakachakatwa zvavo. Ngeiro zuva uwandu hweavo vakaurawa mungome yomuSusa hwakaziiswa kunamambo. Namambo wakati kunaEsita vahosi, “Mungome yomuSusa vaJudha vakauraya vamuna mazana mashanu (500), nevakororo vaHamani gumi. Chiinyi chevaita kunyika dzimweni dzamambo? Zvino chiinyi chichemo chako? Chinozoitwa kwouri. Chiinyizve chikumbiro chako? Chinozoitwa.” Esita wakati, “Kudai zvechimudakadza mambo, ngavatenderwe vaJudha vari muSusa, kuti vaitezve mangwani kudai ngechironzo chanyamashi, tenderazve kuti vakororo vaHamani gumi vasungirwe pamuti.” Ndizvo mambo wakapanga kuti izvi zviitike; nechironzo chakabuda muSusa, nevakororo vaHamani gumi vakasungirwa. VaJudha vaiya muSusa vakaunganazve ngezuva regumi nemarongomuna romwedzi unozwi Adha, navo vakauraya vamuna mazana matatu (300) muSusa, asi avazi kubata pfuma yavo. Zvino vaJudha vamweni vaiya kumarutii enyika yamambo vakaunganawo pamwepo, kurwira kupona kwavo, navo vakaona kuzorora kubva kumagaa avo, vakauraya magaa avo makumi manomwe nemashanu emakumi emazana (75,000), asi avazi kubata pfuma yavo. Iri raiya zuva regumi nematatu romwedzi unozwi Adha; ngezuva regumi nemarongomuna rawo vakazorora, vakariita zuva redhiri nerokudakara. Asi vaJudha vaiya muSusa vakaungana ngezuva regumi nematatu rawo, nangezuva regumi nemarongomuna, navo vakazorora ngezuva regumi nemashanu, vakariita zuva redhiri nokudakara. Ndizvo vaJudha vaigara mumaguta asikazi kushosherwa ngorukumbati rwemapuwe, vakaemesa zuva regumi nemarongomuna romwedzi unozwi Adha kuti riite zuva rokudakadara nokudya, zuva rokuzorora revaipana zvipo zvokudya umwe kunoumweni. NaMordhekhai wakanyora izvi zviro, wakatumira tsamba kuvaJudha veshe, vaiya kumarutii enyika dzeshe dzamambo Ahasuerusi, veshe vaiya pasinde nevaiya kuretu, echipanga kuti vagwinyisise ichi pakati pavo, kuti varingwarire zuva regumi nemarongomuna romwedzi unozwi Adha, neregumi nemashanu romwedzi umwewo, gore ngegore, kudai ngaawo mazuva evakazorora ndiwo vaJudha kubva kumagaa avo, nokudai ngomwedzi uwo wakatsandudzwa kwevari, kubva mukutambudzika kuenda mukudakara, nokubva mukutsumba kuita zuva rokuzorora; kuti vaaite mazuva okudya nokudakara, mazuva okutumirana zvipo zvokudya umwe kunoumweni, nokupa zvipo kunevarombo. Ndizvo vaJudha vakatenda kuita kudai ngomuitiro izvo zvevakatanga kuita, kudai ngezvaakanyora Mordhekhai kwevari. Hamani mukororo waHamedhatha muAgagi, gaa revaJudha veshe, waiya aronga zano rokuparadza vaJudha, naye waiya akaita Phurimu ndiwo mabhigidha, kuti avapedze nokuvaparadza. Asi apo Esita auya pamberi pamambo, wakapanga ngetsamba kuti zano rake rakashata raakapanganirana vaJudha riwire padera pesoro rake, kuti iye nevakororo vake vasungirwe pamuti. Ndizvo mazuva aya akadudzwa kuti Phurimu, kuteera zina rinozwi Phuri. Ndizvo ngendaa yemazwi eshe akanyorwa mutsamba iyi, nendaa yeizvo zvevakaona muiyi ndaa, neizvo zvakaitika kwevari, vaJudha vakaemesa, nokuashira kuita muitiro wavo, nokumibarirwana yavo, navo veshe vakabatana pamwepo navo, kuti pasina kukorera, vaangire kungwarira mazuva awo mairi ngegore gore, kudai ngezvezvakanyorwa, nokudai ngenguva yakaemeswa pagore ngegore. Aya mazuva anosisira kucherechedzwa nokungwarirwa kumibarirwana yeshe, mumhuri yeshe, munyika yeshe, nomudhorobha reshe; nemazuva aya ePhurimu asazokorera kungwarirwa pakati pevaJudha, nokuti kucherechedzwa kwawo mazuva aya kusazopera pakati pemibarirwana yavo. Esita vahosi mwanasikana waAbhihairi, pamwepo naMordhekhai muJudha, vakanyora ngokutenderwa kweshe, nokugwinyisisa tsamba iyi yechipiri yePhurimu. Wakatumira tsamba idzi kuvaJudha veshe, kunyika dziri zana nemakumi mairi nenomwe (127) dzoumambo hwaAhasuerusi, dzinemazwi okunyarara neokungwaririka, nokupanga mazuva aya ePhurimu kuti ngaangwarirwe ngenguva dzawo dzakaemeswa, kudai ngezvevakapangwa vaJudha ndiMordhekhai naEsita vahosi, kudai ngezvevakadziemesera pachavo nemibarirwana yavo mipango ngendaa yokuera kudya nokutsumba kwavo. Mupango waEsita wakagwinyisisa idzi ndaa dzePhurimu, nazvo zvakanyorwa mutsamba. Mambo Ahasuerusi wakabharisa chibharo padera penyika, nepadera paavo vaigara muzviwi zvoruandhle. Yeshe mishando yesimba rake nokugwinya, nendaa yeshe yakaperera youkuru nokuremeredzwa kwaMordhekhai kwaakamukudza ndikwo mambo, azvizi kunyorwa here mubhuku remishando yezuva ngezuva yemadzimambo eMedhia nePhesia? Ngokuti Mordhekhai muJudha ndiye waiya muteeri wamambo muumambo hwamambo Ahasuerusi, waiya mukuru pakati pevaJudha, anembiri pakati pevazhinji vehama dzake, echitsvakira vanhu vake zviro zvakanaka, echiereketa zvokunyarara kudzinza rake reshe. Kwaiya nomunhu munyika yeUzi, zina rake ndiJobe. Nouwo munhu waiya akaperera nokururama, naye waimutya Mwari, echitenderuka kubva kunezvakashata. Kwakaberekwa kwaari vakororo vanomwe nevanasikana vatatu. Waiya nemakwai makumi emazana manomwe (7,000), makamera makumi emazana matatu (3,000), kabi dzemajoka mazana mashanu (500), zvimbongoro zvehadzi mazana mashanu (500), nevaranda vakawanda kakurutu; ndizvo uyu munhu waiya munhu mukuru kupinda veshe vanhu vokumabvazuva. Vakororo vake vaigara vechiita madhiri kumhatso youmwe ngaumwe wavo ngokuteererana kwezuva rake; vaizotuma nokukoka hanzvadzi dzavo nhatu kuti vadye nokumwa nadzo pamwepo. Naapo mazuva edhiri apera, Jobe waizotuma kuti avachenese, naye waizomiruka mangwanani maishi nokupira midiro yokupisha kudai ngouwandu hwavo veshe; ngokuti Jobe wakati, “Pamweni vakororo vangu vangadai vakashaisha nokutuka Mwari mumwoyo mwavo.” Jobe waiita izvi nguva dzeshe. Zuva rimwe ngirosi dzaMwari dzakauya koodzionisa pamberi paMambo Mwari, naSathani wakauyawo pakati padzo. Mambo Mwari wakati kunaSathani, “Wabva kuri?” Naapo Sathani wakapingura Mambo Mwari, akati, “Kubva kuenda mberi nesure panyika, nokubva mukukwira nokudzaka padera payo.” Mambo Mwari wakati kunaSathani, “Wakambokarakadza here ngomuranda wangu Jobe, kuti akuna naumwe wakadai ndiye panyika, munhu wakaperera nokururama, unotya Mwari, nokufuratira kubva kunezvakashata?” Zvino Sathani wakapingura Mambo Mwari, akati, “Jobe ungatya Mwari pasina chiro here? Auzi kumuitira rushosha kumutendenedza nemhatso yake, nazvo zveshe zvaanazvo, kumarutii eshe here? Iwewe wakafumisa mishando yenyara dzake, nepfuma yake yakawanzwa munyika. Asi zvino tambanudza nyara yako, ugwame izvo zveshe zvaanazvo, naye unozokutuka pamberi pehope yako.” Mambo Mwari wakati kunaSathani, “Zvakanaka, zveshe zvaanazvo zviri pashi pesimba rako; kwega usaisa nyara yako padera pake.” Ndizvo Sathani wakabuda kubva pamberi paMambo Mwari. Rimwe zuva apo vakororo vake nevanasikana vechidya nokumwa vhini mumhatso yomukoma wavo mukuru, yakauya nhumwa kunaJobe, yakati, “Kabi dzairima, nezvimbongoro zvechifura ngepasinde padzo, nevaSabheani vakaguma kwedziri, vakadzibvuka; vakauraya varanda ngokupinza kweshoti; inini ndega ndapokonyoka kuuya kookuronzera.” Naapo achaereketa kudaro, kwakaguma umweni, akati, “Muriro waMambo Mwari wakadzaka kubva mudenga, wapisha makwai nevaranda, ukazvipedza; inini ndega ndapokonyoka kuuya kookuronzera.” Naapo achaereketa kudaro, kwakagumazve umweni echiti, “VaKharadhea vakaita zvikwata zvitatu, vakauya vakabvuka makamera, vakaenda nawo, vauraya varanda ngokupinza kweshoti; inini ndega ndapokonyoka kuuya kookuronzera.” Naapo achaereketa kudaro, kwakaguma umweni echiti, “Vakororo vako nevanasikana vaiya vechidya nokumwa vhini mumhatso yomukoma wavo mukuru, paripo pakavhuvhuta dutu guru rechibva mushango, naro rakasukumidza makhona marongomuna emhatso, yakawa padera pevana vatsva, navo vafa; inini ndega ndapokonyoka kuuya kookuronzera.” Zvino Jobe wakamiruka, akabaura zvokufuka zvake, akapara soro rake, akati dhuma pashi, akadira. Akati, “Ndakabuda kubva mundani yamai angu ndiri mutitinini, neni ndinozohwirira ndiri mutitinini; Mambo Mwari wakapa, naMambo Mwari watora; ngarikudzwe zina raMambo Mwari.” Muneizvi zveshe Jobe aazi kushaisha, nokuti kuitira Mwari ndaa dzokushaisha. Zuva rimweni ngirosi dzaMwari dzakauya koodzionisa kunaMambo Mwari, naSathani wakauyawo pakati padzo koodzionisawo kunaMambo Mwari. Mambo Mwari wakati kunaSathani, “Wabva kuri?” Sathani wakapingura Mambo Mwari, akati, “Kubva kuenda mberi nesure panyika, nokubva mukukwira nokudzaka padera payo.” Mambo Mwari wakati kunaSathani, “Wakambokarakadza here ngomuranda wangu Jobe, kuti akuna naumwe wakadai ndiye panyika, munhu wakaperera nokururama, uwo unotya Mwari, nokufuratira kubva kunezvakashata? Uchabatisisa unaku hwake, kunyazwi iwewe wakandimusa kuti ndimuitire ndaa, kumuparadza pasina ndaa.” Zvino Sathani wakapingura Mambo Mwari echiti, “Doo ngedoo! Munhu unozopa zveshe zvaanazvo ngendaa yendaramo yake. Asi tambanudza nyara yako zvino ugwame magodo ake nenyama yake, naye unozokutuka pamberi pehope yako.” Mambo Mwari wakati kunaSathani, “Zvakanaka, uri pashi pesimba rako; kwega ponesa ndaramo yake.” Ndizvo Sathani wakabuda kubva pamberi paMambo Mwari, wakachaya Jobe ngezvironda zvemamota akashata kakurutu kubva pashi petsoka dzake metsa kunhobvuma yake. Jobe wakatora chiwenda kuti adzikwene ndicho; naye wakagara pashi pakati pemarota. Zvino mukadzi wake wakati kwaari, “Uchaangira kugwinyisira mukururama kwako here? Tuka Mwari, ufe.” Asi iye wakati kwaari, “Iwewe unoereketa kudai ngoumwe wevakadzi vari mapenzi. Tinozoashira zvakanaka zvega kubva panyara yaMwari, tisikaashiri zvakashata here?” Muneizvi zveshe Jobe aazi kushaisha ngomuromo wake. Zvino apo vangani vatatu vaJobe vaiya vazwa ngemadambudziko aya eshe akamugumira, vakauya umwe ngaumwe wavo kubva kundau yake, Erifazi muThemani, Bhiridhadhi muShuhi naZofa muNaamathi. Vakashongana pamwepo kuti vaende vatsumbe naye nokumuembedzera. Naapo vamuona vachikuretu, avazi kumuzia, vakaboorera, vakachema; vakabaura umwe ngaumwe chokusimira chake, vakakandira bukuta mudenga padera pemasoro avo. Vakagara pashi naye mazuva manomwe nousiku hunomwe; akuna naumwe wakaereketa izwi kwaari, ngokuti vakaona kuti kutambudzika kwake kwaiya kukurutu. Ngesure kweizvi Jobe wakabeura muromo wake, akatuka zuva rokubarwa kwake. Jobe wakaereketa akati, “Ngaripere zuva rendakabarwa ndiro, nousiku uhwo hwakazwi, Kwaano ukosha hwomwana womurumbwana. Zuva iro ngariite chidima! Mwari wokudenga asaritsvaka nokuti kujeka kusajeka padera paro. Chidima chakadzama nebvute rakasvipa ngazvirifukidze. Gore ngarigare padera paro; kusvipiswa kwezuva ngakurityise. Usiku uhwo, chidima chakakora ngachiribate! Risadakara pakati pemazuva egore, risaerengwa pakati pemazuva omwedzi. Eya, usiku uhwo ngahuite husina chiro, kusabuda izwi rokudakara kwohuri. Ngavahutuke avo vanotuka ruandhle, avo vari ngwazi dzokumusa chikara chinozwi Revhiathani. Nyeredzi dzemadeekoni ahwo ngadziitwe chidima; ngahutsvake kujeka husikakuoni; husatongoona kuedza kwemangwanani. Ngokuti ahuzi kukonya misiwo yendani yamai angu, nokuti kufisha kutambudzika kubva kumadziso angu. “Ngenyi ndisikazi kufa pakubarwa, kufa ndabarwa? Ngenyi akaapo mabvi kundiashira nokuti mazamo okuti ndiamwe? Ngokuti zvino ndaizoata pashi ndinyarare, ndaizodai ndakazorora pamwepo nemadzimambo nevatongi venyika, avo vakadziakisira matongo pachavo, nokuti vatongi vanomukore, avo vakazadza mhatso dzavo ngesirivha. Nokuti ngenyi ndisikazi kutsirwa kudai ngevakabarwa vakafa, chiya dzisikazi kuona kujeka? Apo vakashata vanorekera kutambudza kwavo; naapo vakaremba vanozorora. Apo mabhanditi anozorora pamwepo; avazwi izwi romutambudzi. Vadoko nevakuru variyo, nehloko yasunhurika kubva kunamambo wayo. “Ngenyi kujeka kwechipuwa kunouwo unotambudzika, nokupona kwechipuwa kuneunomwoyo unotambudzika, uwo unechidisiso chokufa, asi akuuyi; echikutsvaka kupinda upfumi hwakafishwa, uwo unodakara kakurutu, unodakadzwa apo aguma kuiba? Kujeka kunopirwenyi kunomunhu uwo usikakoni kuona njira uwo Mwari waakashoshera mukati? Ngokuti kugomera kwangu kunouya kudai ngechingwa changu, nokuboorera kwangu kwadururwa kudai ngemvura. Ngegwinyiso icho chendakatya kakurutu chinouya padera pangu, nechendakatya chinondisvikira. Andizi kusunhurika nokuti kunyarara; andina kuzorora; asi kutambudzika kunouya.” Zvino Erifazi muThemani wakapingura echiti, “Kudai umwe echiedza kuereketa newe, unozokurudzwa ndizvo here? Asi ndiani ungakona unganyarara kuereketa? Wona, iwewe wakapanga vazhinji, wakagwinyisa nyara dzakarembedzeka. Mazwi ako akagwinyisa avo vaitetereka, newe wakagwinyisa mabvi aiya asina simba. Asi zvino zvaguma peuri, newe auchakoni kutsengerera; zvakugwama, newe unotambudzika. Kutya kwako Mwari akusiri gonda rako here, nokururama kwenjira dzako andiropi gonda rako here? Karakadza zvino, ndiani wakaparadzwa, asina ndaa? Nokuti ngepari pavakagurwa vakarurama? Kudai ngezvendaona, avo vanorima kushata, vechikusha zvakashata, vanokukura izvozvo. Ngokufuridza kwaMwari vanopera, nokuvhuvhuta kwoushungu hwake vanopedzwa. Kukwanga kwemhondoro, neizwi remhondoro rinotyisa, nemazino evana vemhondoro anoguka. Mhondoro yakagwinya inofa ngokutama zvokudya zvinobatwa, nematuhwa emhondoro yehadzi huru anoparara. Zvino izwi razwika kwendiri ngokufishika, nenzee dzangu dzakazwa vherevhere raro doko. Pakati pezvioniso mukurota kwousiku, apo vanhu vakaata hope, kutya kwakandigumira, nokuhuta kwakaita kuti magodo angu eshe agwedagwede. Mweya wakauya pamberi pehope yangu; nebvudzi romuiri wangu rakanyangararika. Wakaema apo, asi andizi kukona kuzia muemo wawo. Muemo waiya pamberi pemadziso angu; kwaiyapo kunyarara, zvino ndakazwa izwi rechiti, ‘Munhu unofa unozoita wakarurama kupinda Mwari here? Munhu ungaita wakachena pamberi poMusiki wake here? Kunyazwi nomuvaranda vake aavagondi; nengirosi dzake unodziitira ndaa, kunozopinda kwakaitawani kwevari avo vanogara mumhatso dzedongo, idzo madzeyo adzo ibukuta, anopwanywa kudai ngezvitseketsu. Vanopedzwa pakati pemangwanani nemadeekoni; vanopera mhera nariini pasina naumwe unopinimidza ndizvo. Bote retende ravo radamburwa mukati mwavo, vanofa vasina kungwara.’” Daidzira zvino, uripo umwe unozokupingura here? Ngokuri kunoumwe waavo vakacheneswa kwounozokunukukira? Ngegwinyiso shungu dzinouraya benzi, nendurumwa dzinobaya usina ruziyo. Ndaona benzi rechitsira nzinde, asi ngokukasira ndakatuka ugaro hwaro. Vana vake vari kuretu kubva mukungwaririka, vanopwanywa pamusiwo, apana naumwe unovanunura. Vanenzara vanodya hukuro yavo, navo vanozvitora, kunyazwi kubva muminzwa; unenyota unotangurira upfumi hwavo. Ngokuti kutambudzika akubudi kubva mumavhu, nokuti madambudziko aabudi kubva mumavhu; asi munhu unobarirwa kutambudzika, kudai ngetsatsi dzinokwira. Asi kudai ndirini, ndaizotsvaka Mwari, nokunaMwari ndaizoisa ndaa yangu. Uwo unoita zviro zvikuru zvisikatsvakiki, zviro zvinoshamisa zvisikaerengeki ngokuwanda. Uwo unonaisa mvura padera penyika, nokunaisa mvura padera peminda; unomirudza avo vari pashi, naavo vanotsumba vakwidzwe mukungwaririka. Unokangaidza avo vakangwara vanoronga mazano, kuti nyara dzavo dzisakona kubudisa kuronga kwavo. Unobata vakangwara muurimbwi hwavo; nokupanga kwevaradzikidzi kunozopera. Vanogumirwa ngechidima achimasikati, nokuambamira masikati kudai ngousiku. Asi unoponesa varombo kubva kushoti yemiromo yavo, nokubva kunyara younesimba. Ndizvo varombo vanegonda, nokushata kunokonya muromo wakwo. Unomuchena uwo munhu waanoorora Mwari; ndizvo usashoora kuorora kwoUne-simba-reshe. Ngokuti unokuwadza, asi unosunga; unoremadza, asi nyara dzake dzinoponesa. Unozokununura kubva kumadambudziko matanhatu; mumadambudziko manomwe akuna nechakashata chinozokugumira. Ngomukuwo wenzara unozokununura kubva mukufa, nomuhondo unozokununura kubva kusimba reshoti. Iwewe unozofishwa kubva mukuchaiwa ngorurumi; usazotya kuparadzwa apo kunokugumira. Unozosheka kuparadza nenzara; newe usazotya zvikara zvomunyika. Ngokuti unozoita chitenderano nemapuwe omushango nezvikara zvomushango zvichagara mukunyarara newe. Newe unozozia kuti tende rako rakangwaririka; unozoringira zvifuyo zvako auzorashikirwi ngechiro. Unozozia kuti mibarirwana yako inozowanda, dzinza rako rinozodai ngomwenje womunyika. Unozoguma kuiba rako waane makore akakwana, kudai ngemwonzora yekoroni yaguma nguva yayo yokupurwa. Ringira, izvi takazvitsvakisisa, igwinyiso. Zvizwe, uzvizie pachako. Zvino Jobe wakapingura akati, “Kudai kutambudzika kwangu kweshe kwaipimwa, nokurwadziwa kwangu kweshe kwaiiswa pazvipimo pamwepo! Ngokuti zvino kwaizorema kupinda jecha roruandhle; ndizvo mazwi angu aiya okukasira. Ngokuti misee yoUwo Une-simba-reshe iri mukati mwangu; mweya wangu unomwa ukaira hwayo; zvinotyisa zvaMwari zvinodzironga kunditendenedza kurwa neni. Mbongoro yomushango inopheza here apo inemwenje nokuti kabi inokuma here pakudya kwayo? Icho chisikanaki chingadyiwa here chisina munyu nokuti huripo here hunaku murupande rwakachena rwezanda? Mwoyo wangu unoramba kuzvigwama, zvakadai ngokudya kunonyenyisa kwendiri. A, kudai ndaipuwa zvendinokumbira; kudai Mwari aindipa chidisiso changu, kuti kudai chaidakadza Mwari kuti andipwanye, kuti arekere nyara yake nokundiuraya! Uku kungaita kuembedzerwa kwangu; ndaizodakara kakurutu mukurwadziwa kusina nyasha; ngokuti andizi kuramba mazwi oUwo Wakachena. Simba rangu chiinyi, kuti ndiemere? Nemagumo angu chiinyi, kuti nditsungirire? Simba rangu isimba remapuwe here? Nokuti nyama yangu ithusi here? Mugwinyiso andina rudetsero mukati mwangu nesimba radzingwa kubva kwendiri. Uwo usikaitiri nyasha mungani wake aatyi Uwo Une-simba-reshe. Hama dzangu dzinoshanda ngourimbwi kudai ngomukova, kudai ngokuerera kwemikova inooma, iyo yakasvipa ngendaa yechando, yakakora ngechando chinonyunguruka. Ngomukuwo wokudzia, inongarangaka; apo kwoopisha, inopwa kubva mundau yayo. Vahambi vanopauka kubva munjira yavo kuenda kurutii; vanokwira kusina chiro nokufa. Zviunga zvaThema zvikaringira, zvikwata zvevahambi veShebha zvinogonda. Vakurudzwa ngokuti vaigonda; vakagumapo navo vakakangaidzwa. Zvino imwimwiwo mwaonesa kuti amudetseri chiro; munoona dambudziko rangu, nemwi munotya. Ndakati here, ‘Ndipei chipo?’ Nokuti, ‘Ndipei chitengero chinobva kupfuma yenyu?’ Nokuti, ‘Ndiponese kubva munyara dzegaa?’ Nokuti, ‘Ndiripirenyi kubva munyara dzevatsikiriri?’ Ndidzidzisenyi, neni ndinozonyarara; muite kuti ndinase kuzwisisa apo pendakashaisha. A, mazwi akarurama anesimba! Asi kutuka kwenyu kunoonesenyi? Munopinimidza here kuti mungatuka mazwi, kudai ngedutu ngokuereketa kwomunhu wagumirwa anodai ngedutu? Mungada kunyazwi kuita mabhigidha ngendaa yenherera, nemwi munotengesa mungani wenyu. Asi zvino dakarai kuringira padera pangu; ngokuti andizonyepi pamberi pehope dzenyu. Kunukukai, ndinomupota, musatendera kuti kushaisha kuitwe. Kunukukai zvino, kururama kwangu kuri mukati mweiyi ndaa. Kuripo here kushata parurumi rwangu? Kuraira kwangu akukoni kuzwa zviro zvakashata here? ” Munhu aatambudziki ngomushando wakakonza padera penyika, nemazuva ake aazi kudai ngemazuva omunhu unobhadharwa here? Kudai ngehloko inodisisa mumvuri, nokudai ngounobhadharwa unoringira muthuso wake, ndizvo inini ndinopuwa mwedzi isina shwiro, nousiku hunorembesa hwakaemeserwa kwendiri. Apo ndechiata pashi, ndinoti, “Ndinozomuka riini?” Asi usiku hwakareba, neni ndinotambudzwa ngokutsanduridza mberi nesure metsa kuedze. Nyama yangu yafukidzwa ngehonye netsvina yebukuta; ganda rangu rinooma nokugagazve. Mazuva angu anokasira kupinda chirukiso chomuruki, nawo anopera pasina gonda. A, karakadza kuti mazuva angu akadai ngefemero; madziso angu aachazombooni chakanaka. Dziso iro rinondiona arichazondionizve; naapo madziso ako anondiringira, andichazoapopi. Kudai ngegore rinotsakatika nokupera, ndizvo uwo unodzaka muSheori aachazouyizve. Aachazopetuki kumhatso yake, nokuti ndau yake aichazomuzii. Ndizvo andizonyaradzi muromo wangu; ndinozoereketa mukurwadziwa kwomweya wangu; ndinozogunun'una mukushononwa kwomweya wangu. Ndiri ruandhle here nokuti chikara chomumvura, kuti iwewe unoemesa murindi padera pangu? Naapo ndechiti, “Mubhedhi wangu unozondiembedzera, paugaro hwangu hunozoporesa kurwadziwa kwangu,” zvino iwewe unondityisa ngokurota, nokundikarudza ngezvioniso. Ndizvo mweya wangu unotsanangura kudzipwa nokufa kupinda muiri uyu. Ndinonyenya kupona kwangu; andizoponi mhera nariini. Ndirekere ndiri ndega, ngokuti mazuva angu akadai ngokufema. “Munhu chiinyi, kuti iwewe umukurise, kuti upinimidze ndiye, nokuti umuhambire mangwanani eshe, nokumuedza mikuwo yeshe? Unozoita mukuwo wakaitawani usikabvi kwendiri, nokuti kundirekera ndiri ndega metsa ndamedza mate angu? Kudai ndashaisha chiinyi chendinoita kwouri, A iwewe mungwariri wevanhu? Wakandiemesa ngenyi kuti ndiite chiro chokuitirwa ndaa ndiwe? Ndaita mutwaro kweuri ngenjiranyi? Aurekereri ngenyi kupauka kwangu, uduse kushata kwangu? Ngokuti zvino ndinozoata mubukuta; newe unozonditsvaka, asi andizoapopi.” Zvino Bhiridhadhi muShuhi wakapingura echiti, “Unozoereketa zviro izvi mukuwo wakaitawani, nemazwi omuromo wako anozoita kudai ngedutu gurutu? Mwari unopaukisa kutonga kwakarurama here? Nokuti Uwo Une-simba-reshe unokunukudza here kururama? Kudai vana vako vakamushaishira wakavapira musimba rokupauka kwavo. Kudai iwewe wechizotsvaka Mwari kakurutu, nokupota kunoUwo Une-simba-reshe, kudai iwewe wakachena nokururama, ngegwinyiso zvino unozomiruka ngendaa yako, nokuita kuti ugaro hwako hwakarurama hubudirire. Kunyazwi kutanga kwako kwaiya kudokodoko, kupedzisira kwako kuchaita kukurutu. Ngokuti zvino bvunza kunomubarirwana wekare, upinimidze ngezvevakatsvakisisa madzibaba avo, ngokuti isusu tichiri vezuro, atina chetinozia; ngokuti mazuva edu padera penyika akadai ngebvute. Avazokudzidzisi here, nokukuronzera, nokuereketa mazwi kubva mukuzwisisa kwavo? Jekacheka ringakura here pasina madhaka? Rutsanga rungakura here pasina mvura? Naapo richiri mukusvipirika kwaro, risati ratemerwa pashi, rinofota ngokukasira kupinda zvisimwa zvimweni. Ndizvo zvakaita njira dzeshe dzeavo vanoriyarwa Mwari; gonda revasikadiri Mwari rinozopera. Gonda rake richadambuka, nemagondero ake anozodai ngemhatso yemadandemutande. Kudai umwe echizotseama pamhatso yaro aizotsimi, kudai umwe echiibata aizotsimi. Wakashata unoburukira pamberi pezuva, nematai ake anopararira padera pemunda. Nzinde dzake dzinozotandira murwi wemapuwe, unogara mundutwe yemapuwe. Nokudai echiparadzwa kubva pandau yake, zvino ndau yake inozomuramba yechiti, ‘Andizi kumbokuona.’ Ringira, uku ndikwo kudakara kwenjira yake, nevamweni vanozobuda kubva munyika. Ringira, Mwari aazorashi munhu wakaperera, nokuti kudetsera vaiti vezvakashata. Unozozadza muromo wako ngokusheka, nemiromo yako ngokudaidzira kwokudakara. Avo vanokuzonda vanozopfekeswa ngokutsveruka, nougaro hwevakashata ahuchazoapo.” Zvino Jobe wakapingura echiti, “Ngegwinyiso ndinozia kuti izvi ndizvo; asi munhu ungaita maruramirenyi pamberi paMwari? Kudai umwe echida kuphikisana naye, akuna naumwe ungakona kumupingura munguva gumi remazana. Wakangwara mumwoyo, nokugwinya musimba guru. Ndiani wakamboomesa mwoyo kumumukira, akabudirira? Uwo unothutisa mitunhu nayo isikazvizii, naapo paanoipinduridza muushungu hwake; uwo unozungunyisa nyika kubva pandau yayo, nesika dzayo dzinohuta. Unopanga zuva naro aribudi; unositira nyeredzi; uwo ega unotambanudza matenga, echihamba padera pemafungu oruandhle, unoita nyeredzi dzinozwi Bheya, naOrioni, maPreiadhesi, norupande rwematenga okubani, uwo unoita zviro zvikuru zvisikazwisisiki nezviro zvinoshamisa zvisikaerengeki ngouwandu. Ringira, unopinda ngependiri, neni andimuoni; unoangirira kupinda, asi andimuzwi. Unotora, ndiani ungamupinga? Ndiani ungaronza kwaari kuti, ‘Unoitenyi?’ Mwari aazopetudzi ushungu hwake, vadetseri vaRahabhi vanokotama pashi pake. Zvino ndingamupingura ngenjiranyi, nditsanangure mazwi angu kupingurana naye? Kunyazwi ndakanyarurama, andikoni kumupingura; ndinosisira kupota kuitirwa nyasha kunomutongi wangu. Kudai ndakamudaidza, naye akandipingura, anditendi kuti waizopurutana izwi rangu. Ngokuti unondipwanya ngomubvumo, nokuwanza maponje angu pasina ndaa. Aazonditenderi kuti ndifeme, asi unondizadza ngokushononwa. Kudai kuri kuphikisana ngesimba, ringira, iye unaro! Kuti iri ndaa yokutonga kwakarurama, ndiani unozomudaidza? Kunyazwi andina ndaa, muromo wangu wemene unozondiitira ndaa; kunyazwi ndakaperera, iye unokona kundionesa kupauka. Ndakaperera; andidzizii inini pachangu; ndinoshoora kupona kwangu. Ichi chiri chiro chimwe; ndizvo ndinoti, ‘Unoparadza veshe vakarurama nevakashata.’ Naapo dambudziko rechiuraya ngokukasira, iye unozosheka mukutambudzika kwevasina ndaa. Nyika inopuwa munyara dzevakashata; unofukidza madziso evatongi vayo; kudai asiriye, ndiani zvino unodaro? Mazuva angu anokasira kupinda murumbi; anotiza, aaoni chakanaka. Anokasira kupinda kudai ngengarava dzetsanga, kudai ngedorambudzi rinokasira koobata nyama yaro. Kudai ndechiti, ‘Ndinozoriyarwa kugunun'una kwangu, ndinozorekera kudzimbirwa kwangu, ndidziembedzere,’ ndinotya madambudziko angu eshe, ngokuti ndinozia kuti auzoerengi kuti ndiri usina ndaa. Ndinozoitirwa ndaa; ngenyi zvino ndechishandira zvisina shwiro? Kudai ndechishamba pachangu ngesipho, ndechichenesa nyara dzangu ngechando, asi unozondinzvaidza mumatope, nemachira angu anozondinyenyesa. Ngokuti iye aasiri munhupi kudai ndini, kuti ndipingurane naye, kuti tiunzwe pamwepo mukutongwa ndaa. Akuna muedzanisi ungagura ndaa pakati pedu, uwo ungaisa nyara dzake padera pedu teshe. Kudai adusa ndonga yake kwendiri, nokutyisa kwake kusandikarudza, zvino ndingazoereketa, ndisikamutyi; ngokuti ndinozia kuti andizi kudai ngezvendinopinimidzirwa.” Mweya wangu waremba ngokupona kwangu; ndinozoronza pamhene ngedambudziko rangu; ndinozoereketa ngokushononwa kwomweya wangu. “Ndinozoronza kuna Mwari kuti, Usandirasha; ndionese kuti ngenyi wechiphikisana neni.” Unoona chakanaka here kutambudza, kushoora mushando wenyara dzako, nokuda mazano evakashata? Unemadziso enyama here? Unoona here kudai ngezvaanoona munhu? Mazuva ako akadai ngemazuva omunhu here nokuti makore ako akadai ngemakore omunhu here, kuti iwewe unobvunzisisa kushata kwangu, nokutsvakisisa chishaishi changu, kunyazwi wechizia kuti andina kushaisha, akuna naumwe ungandinunura kubva munyara yako? Nyara dzako dzakandiumba nokundiita; nazvino unokunukuka iwewe kundiparadza. Karakadza kuti iwewe wakandiumba kudai ngedongo; newe unozondihwirinzazve here mubukuta? Auzi kundidurura here kudai ngomukaka nokundikoresa kudai ngomukaka wechiizi? Iwe wakandipfekesa ngeganda nenyama, wakandiruka ngemagodo nemidzira. Wakandipa kupona nenyasha dzinorudo, nokungwarira kwako kwakaponesa mweya wangu. Izvi zviro wakazvifisha mumwoyo mwako; ndinozia kuti izvi zviri kuda kwako. Kudai ndechishaisha, unondiona, newe auzondirekeri kubva mukushaisha kwangu. Kudai ndiri wakashata, hezvo kwendiri! Kudai ndiri wakarurama, andingakoni kumirudza soro rangu, ngokuti ndakazara ngokutsverudzwa nokuringira padera pekutambudzika kwangu. Kushinga kudai ngemhondoro iwewe unondivhima; unophindazve kuita mishamiso kundirwisa. Newe unomusirira zvapupu zvako kundiitira ndaa, unowanza ushungu hwako kwendiri; unounza hondo itsva kundirwisa. Ngenyi iwewe wakandibudisa kubva mundani? Ndingadai ndakafamwo, pasina nedziso raiya randiona, ndaizodai ngouwo usikazi kutongoapo, wakatwarwa kubva mundani kuenda kuiba. Mazuva okupona kwangu aasiri mashomani here? Ndisiye ndega, kuti ndione kuembedzerwa kadoodoko ndisati ndaenda apo pendisikazopetuki, kunyika yechidima neyebvute rokufa, kunyika yechidima chakaita musheyareya, kusina zvakarongedzwa, apo kujeka kwakadai ngechidima. Zvino Zofa muNaamathi wakapingura echiti, “Mazwi akawanda angapinda asikazi kupingurwa, noumwe unoereketesa ungapembedzwa here? Maganzakatwa ako angaita here kuti vanhu vanyarare, naapo unosheka, akuna munhu ungaita kuti utsveruke here? Ngokuti iwewe unoti, ‘Kuita kwangu kwakachena, neni ndakasukika mukuona kwaMwari.’ Asi A, dai Mwari aizoereketa, nokubeura miromo yake kwouri, nokuti akuronzere zvakafishika zvoungwaru! Ngokuti ungwaru hunemarutii mazhinji. Zia zvino kuti Mwari unokukungurira kakurutu kupinda zvinosisira kushata kwako. Unokona here kutsvakisisa ngezviro zvakadzama zvaMwari? Unokona here kuzwisisa ndiye Uwo Une-simba-reshe? Kwakaturama kupinda matenga; ungakona kuitenyi? Kwakadzama kupinda Sheori; ungakona kuzienyi? Chipimo chacho chakareba kupinda nyika, nokupamhama kupinda ruandhle. Kudai echizopinda ndimwo nokukonyera mutirongo, naye unozounganidza kutonga pamwepo, ndiani ungamurambidza? Ngokuti unozia vanhu vasina shwiro; naapo paanoona kushata, aazopinimidzi ndikwo here? Asi munhu benzi unozozwisisa, apo mbongoro yomushango yabarwa iri munhu. Kudai wechinasirira mwoyo wako kuti unake, unozotambanudza nyara dzako kwaari. Kudai kushata kuri munyara dzako, kurashe kuretu kubva kwouri, usatenda kuti kushata kugare muugaro hwako. Ngegwinyiso zvino unozomirudza hope yako isina chipodyo; iwewe unozoita wakatsima, auzotyi. Unozoriyarwa kutambudzika kwako; unozokukarakadza kudai ngemvura yapinda. Nokupona kwako kunozojeka kupinda masikati; nechidima chakwo chinozodai ngemangwanani. Newe unozongwaririka, ngokuti gonda riripo; unozongwarirwa, unozoona kuzorora mukungwaririka. Unozoata pashi, akuna naumwe unozokutyisidzira; vazhinji vanozotsvaka kuzwanana newe. Asi madziso evakashata anozopera, navo avazopokonyoki, negonda ravo kufema kwokupedzisira.” Zvino Jobe wakapingura akati, “Ngegwinyiso imwimwi muri vanhu, noungwaru hunozofa nemwi.” Asi inini ndinokuzwisisa kudai ndimwi; andisiri pashi penyu akadi. Ndiani uwo usikazii zviro zvakadai ngeizvi? Ini ndiri chishekedzo kuvangani vangu; inini, uwo unodaidza kunaMwari, naye unondipingura, munhu wakarurama newakanaka ndiri chishekedzo. Avo vanogara vakadakara vanoshoora avo vari mukutambudzika, asi chakagarira avo vanetsoka dzinotedzuka. Ugaro hwemadzongoni hunokunyarara, naavo vanomutsenesa Mwari vari vakangwaririka, avo vanozounza zvimwari zvavo munyara dzavo. Asi bvunza zvikara, nazvo zvinozokudzidzisa; neshiri dzomudenga dzinozokuronzera; bvunza zvisimwa panyika, zvinozokudzidzisa; nehove dzomuruandhle dzinozoronza kwouri. Ndiani usikazii mukati mweizvi zveshe kuti nyara yaMambo Mwari yaita izvi? Munyara dzake munendaramo yezviro zveshe zvinopona, nokufema kwevanhu veshe. Nzee aiedzi mazwi kudai ngomuromo aurairi kudya here? Ungwaru unevasharuka, nokuti kuzwisisa muuwandu hwemazuva here? PanaMwari paneungwaru nesimba, unakwo kupanga nokuzwisisa. Kudai echipwanyira pashi, akuna naumwe ungazviakisa kudai echikonyera munhu, akuna naumwe ungamubeurira. Kudai echirambidza mvura, nayo inopwa; kudai echiituma, nayo inoondomora nyika. Paari panesimba noungwaru; unochengedzwa nomuchengedzi veshe ngevake. Unotungamira makota kuenda asina chiro, unoita kuti vatongi vaite mapenzi. Unosunhura zvisungo zvemadzimambo, nokusimidza zviunu zvavo ngebhande. Unotungamira vapristi kuenda vasina chiro, nokunyisa vanesimba. Unonyaradza kuereketa kwevanogondeka, nokutora ungwaru hwevanhu vakuru. Unodurura kushoorwa padera pevatongi, nokudusa bhande nevane simba revakagwinya. Unobudisa zvakadzama kubva muchidima, echiunzazve chidima chakakura mukujeka. Unoita kuti madzinza awande, zvino unoaparadza; unowanza madzinza, unoaendesa kure. Unodusa kuzwisisa kubva kuvatungamiriri vevanhu venyika, nokuvaita kuti vanzerereke mushango apo pasina njira. Vanoambamira muchidima vasina kujeka; unovaita kuti vathethereke kudai ngechiradza. Ringirai, madziso angu aona izvi zveshe, nzee dzangu dzazvizwa nokuzvizwisisa. Izvo zvomunozia, neniwo ndinozvizia; andisiri pashi penyu akadi. Asi ndingada kuereketa kunouwo Une-simba-reshe, neni ndinodisisa kuphikisana naMwari. Asi imwimwi munofukidza ngemanyepo; imwimwi mweshe muri n'anga dzisina shwiro. A, kudai mungatonyarara kwega, ndikwo kungaita ungwaru hwenyu! Izwai zvino kupinimidza kwangu, mupurutane kupota kwemiromo yangu. Munozoereketera Mwari manyepo here, nokumuereketera kuchengedza? Munozomuremeredza here? Munozopota mwakaemera ndaa yaMwari here? Zvinozomunakira here apo echimutsvakisisa? Nokuti mungakona kumuchengedzera here, kudai ngoumwe unochengedzera umweni? Ngegwinyiso unozomurambidza kudai imwimwi mukufishika mwechiita mukheto kuvanhu. Ukuru hwake ahumutyisi, nokutyisa kwake akuwiri padera penyu here? Mazwi enyu akangwara zvisana zvemarota, kudzirwira kwenyu kwakadai ngokudzirwira kwedongo. Nyararai, mundirekere kuti ndierekete, ngachiitike kwendiri icho chinozoitika. Ndinozohwijura nyama yangu ngemazino angu, ndechiisa kupona kwangu munyara dzangu here? Ringirai, unozondiuraya, andichina gonda; asi ndinozorwisa njira dzangu pamberi pake. Izvi zvinozoita ruponeso rwangu; kuti usikatendi Mwari asazouya pamberi pake. Nasai kupurutana kuereketa kwangu, nokudaidzira kwangu ngakuzwike munzee dzenyu. Ringirai zvino, ndarongedza ndaa yangu; ndinozia kuti ndinozopembedzwa. Ndiani uwo unozophikisana neni? Ngokuti zvino ndinozonyarara ndife. Kwega ndiitirenyi zviro zviiri, zvino andizodzifishi kubva pamberi pako: Dusa nyara yako kubva kwendiri, usaita kuti kutyisa kwako kundikarudze. Zvino daidza, ndinozodaira; nokuti tenda kuti ndierekete, undipingure. Zvinganai zvakashata zvangu nezvishaishi zvangu? Ita kuti ndizie zvakashata zvangu nezvishaishi zvangu. Ngenyi wechifisha hope yako, wechindierenga kudai ngegaa rako? Unozotyisidzira shakani rinopepetwa ngedutu nokurumbirira mazungu akaoma here? Ngokuti iwewe unonyora zviro zvinondishatira, wechiita kuti ndigare nhaka yezvishaishi zvoutsva hwangu. Iwewe unoisa tsoka dzangu mumanguri, wechiringisisa njira dzangu dzeshe; unotara muganu kutendenedza tsoka dzangu. Umwe unopera kudai ngechiro chinoora, chinopera kudai ngechokufuka chinodyiwa ngounundu. “Munhu unoberekwa ngomudzimai mazuva ake mashomani, nawo akazara ngemadambudziko. Unobuda kudai ngeruva nokufota; unotiza kudai ngebvute, aagari. Newe unobeura here madziso ako kuringira kunowakadai? Unondiunza mukutongwa newe? Ndiani ungakona kubudisa chiro chakasukika kubva kunechiro chisikazi kusukika? Akuna naumwe ungakona. Kwechioneka kuti mazuva ake akapimwa, uwandu hwemwedzi yake hunoziikanwa kwouri, iwewe wakaemesa migano yaasikakoni kudarika, usaringira kwaari, muregere ari ega, metsa apedze zuva rake rokudakara kudai ngounobhadharwa. Ngokuti riripo gonda kumuti kuti kudai wechitemerwa pashi, unozoburukirazve, kuti matai awo matsva aazorekeri kuapo. Kunyazwi nzinde dzawo dzaasharuka mumavhu, neguri rawo rechifa mumavhu, kudai wechizwa munuhwi wemvura unozoburukirazve, nokubudisa matai kudai ngechisimwa chitsva. Asi munhu unofa, echiora; munhu unoparara, naye uri pari? Kudai ngezveinooma mvura kubva mugandwa, nemikova inooma nokupwa, ndizvo munhu unoata pashi, asikachamukizve; metsa matenga asisipo, avatongozomuki nokuti kumirudzwa kubva mukuata kwavo. A, kudai iwewe waizondifisha muSheori, dai waizondiisa mundau yakafishika, metsa ushungu hwako hwapinda, kuti undiemesere mukuwo wakaemeserwa nokundikarakadza! Kudai munhu echifa, uchazoraramazve here? Mazuva eshe okushanda kwangu ndinozogarira metsa ugume mukuwo wokusunhurwa kwangu. Unozodaidza, neni ndinozokudaira; unozoshuwira mushando wenyara dzako. Ngokuti zvino auzoerengi zvitsiko zvangu, auzoringiri kushaisha kwangu. Kushaisha kwangu kunonamirwa musaka, newe unofukidza kushaisha kwangu. Asi mutunhu unowa kuti mwarakata, nebuwe rinoduswa pandau yaro. Mvura inotsa mapuwe; kupopoma kwayo kunotora ivhu renyika; ndizvo unoparadza gonda revanhu. Munomunyisa mhera nariini, naye unopinda; unoshandura hope yake, nokumuendesa kuretu. Vana vake vanopotera mukuremeredzwa, asikazvizii; vanodzaswa pashi, asikazvioni. unozwa kurwadzwa kwega kwomuiri wake, nomweya wake uri mukati nokudzichemera pachake.” Zvino Erifazi muThemani wakapingura echiti, “Munhu wakangwara ungasisira kupingura ngemazwi asina shwiro here, nokuzadza ndani yake ngedutu rokumabvazuva? Ungasisira kuphikisana mumazwi asikadetseri here, nokuti mukuereketa mazwi asikakoni kuita zvakanaka? Asi iwewe unorasha kutya Mwari, nokushaishira kukumbira pamberi paMwari. Ngokuti kushaisha kwako kunodzidzisa muromo wako, newe unotsanangura rurumi rwourimbwi. Muromo wako wemene unokutonga, haiwa inini; miromo yako yemene inopupura kukuitira ndaa. Ndiwe here munhu wakatangira veshe kubarwa? Ndiwe here wakatanga kusikwa kutangira mitunhu? Iwewe wapurutana mazano akafishika aMwari here? Unodzipimira ungwaru pachako here? Chiinyi chounozia chetisikazii isusu? Chiinyi chounozwisisa chetisikazwisisi isisu? Isusu taa nevanemvi nevaa harahwa, vanotokurira baba ako yaamho. Kuembedzera kwaMwari kwakatsonga here kwouri nokuti izwi rakapfaa rinoereketa newe? Ngenyi mwoyo wako wechikurasha? Nemadziso ako anophiphira ngenyi, kuti mweya wako ukunukuke kuitira ndaa Mwari, wechitendera kuti mazwi akadaro abude kubva mumuromo wako? Munhu chiinyi kuti aite wakasukika? Nokuti uwo wakabarwa ngomudzimai kuti aite wakarurama? Ringira, Mwari aaisi gonda rake kunyazwi nokunevakacheneswa vake, nematenga aazi kusukika mukuona kwake. Kunozopinda kwakaitawani kutsonga kunouwo unonyangadza nokusvipiswa, munhu unomwa kushata kudai ngemvura! Ndinozokupangidzira, purutana kwendiri; izvo zvendaona ndinozozvironza, izvo vakangwara vakazvizwa kubva kunemadzibaba avo, avazi kuzvifisha, kwaari wakapuwa nyika ega, pasina nomupara wakapinda ngepakati pavo. Munhu wakashata unotambudzika ngokurwadziwa eshe mazuva okupona kwake, mumakore eshe akaisirwa kunomutambudzi. Bope rinotyisa riri munzee dzake; mukubudirira kwake unozogumirwa ngomuurayi. Aagondi kuti unozopetuka kubva muchidima, neshoti ndiyo magumo ake. Unohamba hamba apo naapo echitsvaka kudya echiti, ‘Kuri pari?’ Unozia kuti zuva rechidima ranasirirwa raapasinde. Kutambudzika nokurwadziwa kunomutyisa; vanomunyisa kudai ndimambo wakadzinasirira kurwa. Ngokuti unotambanudza nyara yake kurwa naMwari, unodzikudza kunoUwo Une-simba-reshe, unorumba nomutsipa wakaoma kurwisana nezvihlangu zvake zvakatimbara. Ngokuti wakafukidza hope yake ngemafuta, nemikenyo yokukora iri muzviunu zvake, unozogara mumadhorobha aita matongo, nomumhatso dzisina munhu unogaremwo, idzo dzanakira kuita mirwi yematongo. Aaiti gurudza, nepfuma yake aizogari, nokuti aizoiti nzinde munyika. Aazobudi kubva muchidima; mirazvu inozopisha matai ake, naye unozoenda ngokufuridza kwedutu. Asagonda kunezvisina shwiro nokudzichengedzera pachake; ngokuti zvisina shwiro zvinozoita muthuso wake. Unozogurwa usati waamukuwo wake, nematai ake aazosvipiri. Uchazuwira pashi mavhini ake asati aibva kudai ngomuvhini, nokuzuwika maruva kudai ngomuorivhi. Ngokuti mbungano yevasikatyi Mwari inozoita isina shwiro nomuriro unopisha matende evatengerwi. Vanoita mimba dzokushata nokubereka kushata, nomwoyo yavo inonasirira kuchengedzera.” Zvino Jobe wakapingura echiti, “Ndazwa zviro zvizhinji zvakadai ngeizvi; mweshe muri vaembedzeri vasikadetseri.” Mazwi asina shwiro anechipimo here? Nokuti chiinyi chinokunyangadza kuti urambe wechiereketa? Neniwo ndingakona kuereketa kudai ngezvomunoita, kudai mwaiya pandau pangu; ndingakona kubatanidza mazwi okumuitira ndaa, ndikakudzungudzira kwomuri soro rangu. Ndaizomugwinyisa ngemazwi angu, nokuembedzera kwomuromo wangu kwaizoembedzera kusvipo mwoyo kwenyu. Kudai ndechiereketa, kutambudzika kwangu akutsongi; kunyazwi ndechinyarara, kunondidetserenyi? Ngegwinyiso zvino Mwari wandirembesa; waparadza veshe vemhatso yangu. Naye wakaita kuti ndipute, ukwo kuri chapupu chokundiitire ndaa; kuonda kwangu kunomiruka kundiitira ndaa, kunoita chapupu muhope yangu. Wandibaura muushungu hwake nokundinyenya; wandikwesera mazino ake; gaa rangu rinondidzvuturira madziso aro. Vandishamira miromo yavo; vandipamhadza padama rangu; vanodziunganidza pamwepo pachavo kundimukira. Mwari unondipira kunevasina Mwari, unondikandira munyara dzevakashata. Ndaigarisika, naye wakandigura ngepakati; wakandibata ngomutsipa, akandiputsa kuita zvigurwa, wakandiemesa kuita chipimo chake chokufurwa. Vafuri vake vakandikomba. Unobaura itsvo dzangu, asikaiti nyasha; unodurura chanduru changu pamavhu. Unoramba echiputikira padera pangu, unonditsotokera kudai ngengwazi. Ndasonera machira emasaka padera peganda rangu, nokuradzika simba rangu mubukuta. Hope yangu yatsvukuruka ngokuchema, nomutsiyo dzangu riripo bvute rokufa, kunyazwi amuna kuparadza munyara dzangu, nomukumbiro wangu wakachena. A mavhu, usafushira ngazi yangu; kuchema kwangu kusaona ndau yokuzorora. Kunyazwi zvino, mupupuri wangu uri mudenga, nounondiemerera wangu uri mudenga. Hama dzangu dzinondishoora; madziso angu anoerera masodzi kunaMwari kuti angwarire maruramiro omunhu kunaMwari, kudai ngezvaanoita munhu kunemuakirwana. Ngokuti apo makore mashomani apera, ndinozoenda ngenjira yendisikazopetuki ndiyo. Mweya wangu wapera, mazuva angu aguma, neiba randigarira. Ngegwinyiso varipo vaiti vejee vanonditendenedza, nemadziso angu anogara echiona kumukira kwavo. Ndiitirenyi chigondiso nemwi pachenyu; ndiani uripo unozoita chibatiso changu? Ngokuti iwewe wakafisha mwoyo yavo kubva mukuzwisisa; ndizvo auzovatenderi kuti vanyise. Uwo unoramba hama dzake ngokuda kupuwa muthuso, madziso evana vake anozokorera. Wakandiita chinai chevanhu, neni ndakaita uwo uri chinyangadzo pamberi peavo vanondipfira. Madziso anguzve anoita mazweezwee ngendaa yokutambudzika, nenhengo dzangu dzeshe dzadai ngebvute. Vanhu vakarurama vanoshamiswa ngeichi, nouwo usina ndaa unodzimusa kuitira ndaa vasikazii Mwari. Asi vakarurama vanobatirira njira yavo, nouwo unenyara dzakachena unoangirira kugwinyiswa nokugwinyiswa. Asi imwimwi, petukai mweshe, muuye zvino, neni andizooni munhu naumwe wakangwara pakati penyu. Mazuva angu apinda, nourongwa hwangu hwakangaidzwa, nezvidisiso zvomwoyo wangu. Vanoshandura usiku kuita masikati; “Kujeka,” vanoti, “Kuri pasinde pechidima.” Kudai ndechitsvaka iba kuita mhatso yangu, kudai ndechichinga mubhedhi wangu muchidima, dai ndechironza kunohunza kuti, “Iwewe uri baba angu,” nokune honye kuti, “Uri mai angu,” nokuti, “Hanzvadzi yangu,” zvino gonda rangu riri pari? Ndiani unozoona gonda rangu? Rinozodzaka pashi here pamatanda eiba? Tinozodzaka teshe pamwepo mubukuta here? Zvino Bhiridhadhi muShuhi wakapingura echiti, “Unozotsvaka mazwi metsa riini? Pinimidza, zvino tozobhuirana. Ngenyi techierengwa kudai ngen'ombe? Ngenyi tiri mapenzi mukuona kwako? Iwewe unodzibaura muushungu hwako, nyika inozoita matongo here ngendaa yako, nokuti buwe rinozobviswa here mundau yaro? Ngegwinyiso kujeka kwevakashata kunodzima, nomurazvu womuriro wake aujeki. Kujeka kunodzima mutende rake, nechibani chiri padera pake chinodzima. Nhambwe dzake dzakagwinya dzinofupiswa, nokuronga kwake kunomurigira pashi. Ngokuti unokandirwa mumambure ngetsoka dzake, naye unohamba padera pehunza. Murau unomubata ngechisisinho, nomurau ucharamba wakamubata. Negangiro romurau rakafishirwa iye mumavhu, nechirimbana chakaisirwa iye munjira. Zvinotyisa zvichamukarudza kumarutii eshe, nokuteera patsoka dzake. Nesimba rake rinopedzwa ngenzara, nokuparadzwa kunomugarira parutii rwake. Ngenhenda nhengo dzomuiri wake dzichapera; dangwe rorufu rinopedza nhengo dzake. Uchabvitwa kubva muutende umwo mwaanogondera, naye unounzwa kunamambo wezvinotyisa. Mutende rake amuna chinosaramwo; surifu rinokushwa padera pougaro hwake. Nzinde dzake dzinooma pashi, nematai ake anooma padera. Mukarakadzo wake unopera kubva munyika, naye aana zina mumapato. Unokandirwa kubva mukujeka kuenda muchidima, nokudzingwa kubva munyika. Aana vana nokuti mibarirwana pakati pevanhu vake, apana naumwe hake unopona apo paiya ugaro hwake. Avo vokumabirirazuva vanoshamiswa ngedambudziko rake; kutyisa kunobata vokumabvazuva. Ngegwinyiso ndizvo zvakaita ugaro hwevasikadi Mwari, izvi ndizvo zvakaita ndau youwo usikamuzii Mwari.” Zvino Jobe wakapingura echiti, “Unozotambudza mweya wangu kwomukuwo wakadini, mwechindigura kuita zvigurwa ngemazwi? Iyi mikuwo gumi mwakakandira zvituko padera pangu; amutsveruki kundiitira zvakashata here? Kunyazwi igwinyiso kuti ndakashaisha, kushaisha kwangu kuchagara kwendiri. Kudai ngegwinyiso mwechidzikudza kuambana neni, nokuangirira kuphikisana neni ngokutsverudzwa kwangu, zvino ziai kuti Mwari wakandiriga pashi, akandikomba ngomumbure wake. Kunyazwi apo ndinodaidzira, ‘Kushata,’ andipingurwi; ndinodaidzira kakurutu, asi akuna kutongwa kwakarurama. Washoshera njira yangu kuti ndisakona kupinda, waisa chidima munjira dzangu. Wadusa uthende hwangu kubva kwendiri, nokutora dzungudza rangu kubva pasoro rangu. Unondipwanyira pashi kumarutii eshe, neni ndapedzwa; wabvita gonda rangu kudai ngomuti. Wandibasirira ushungu hwake, wandierenga kudai ngoumwe wemagaa ake. Hondo yake inoungana pamwepo; yadzinasirira kurwa neni nokutendenedza tende rangu. Waisa hama dzangu kuretu kubva kwendiri, nevangani vangu ngegwinyiso vandifuratira. Hama dzangu dzandisiya, nevangani vangu vendakarovedzera vandishaishira. Vaeni vanogara mumhatso mwangu vandiriyarwa, nevarandakadzi vangu vanondierenga kuti ndiri mupara; ndaita wenyika mukanza mukuona kwavo. Ndadaidzira muranda wangu, asi aazi kundipingura; ndinosisira kumupota ngomuromo wangu. Kufema kwangu chaa chinuho kunomukadzi wangu; ndaa chinyangadzo kumhuri yangu. Kunyazwi vana vadoko vanondishoora; pendinomiruka, vanoereketa kundiitira ndaa. Dzeshe shamwari dzangu dzepamwoyo dzinondinyenya naavo vendaidisa vandifuratira kundiitira ndaa. Magodo angu anonamira kuganda rangu nokunyama yangu, neni ndapokonyoka ngeganda remazino angu. Ndiitirenyiwo nyasha, ndizwirenyi nyasha, A hama dzangu, ngokuti nyara yaMwari yakandigwama! Ngenyi imwimwi, kudai ndiMwari, mwechinditeera musikagutiswi ngenyama yangu? A, kudai mazwi angu ainyorwa! A, dai ainyorwa mubhuku! Kudai ainyorwa ngechinyoro chesimbi nechomuthovhi, ainyorwa pabuwe mhera nariini. Ngokuti ndinozia kuti muripiri wangu unopona, naye pakugumisira unozoema padera penyika. Ngesure ganda rangu raparadzwa, zvino ndiri munyama yangu ndinozoona Mwari, uwo wendinozoona ngokurutii rwangu, nemadziso angu anozoringira, haiwa umweni. Mwoyo wangu wapera simba mukati mwangu! Kudai mwechiti, ‘Tinozomutambudza ngenjiranyi! Nenzinde yendaa inooneka mwaari;’ ityai shoti, ngokuti ushungu hunounza kuorora ngeshoti, kuti muzie kuti kuripo kutongwa.” Zvino Zofa muNaamathi wakapingura echiti, “Purutanai! Mipinimidzo yangu inondiita kuti ndipingure, ngendaa yokurwadziwa mukati mwangu. Ndakazwa kutukwa kwakanditsverudza, nomweya unopinda kuzwisisa kwangu unondipingura. Auzii izvi here kubvira karetu, kubvira karetu vanhu vakaiswa pashi munyika, kuti kunyisa kwevanhu vakashata kufupi, nokudakara kwevasikadi Mwari ngokwomukuwo mudoko? Kunyazwi kubudirira kwake kunokwira kuguma mudenga, nesoro rake rechikwira kuguma kumakore, unozopera mhera nariini kudai ngemadisa ake; naavo vaimuona vanozoti, uri pari? Unozombururuka kudai ngokurota, naye aachazooneki; unozodzingwa kudai ngechioniso chinorotwa usiku. Dziso iro rakamuona arichazomuonizve, nendau yake aichazomuoni. Vana vake vanozotsvaka kudetserwa ngevarombo, nenyara dzake dzinozohwirinza upfumi hwake. Magodo ake, akazara ngesimba routsva hwake, anozoikwa naye mubukuta. Kunyazwi kushata kunotapira pamuromo wake, kunyazwi echikufisha pashi porurumi rwake, kunyazwi echikungwarira, asikatendi kuti kuende, nokugara nakwo pamuromo wake, asi kudya kwake kunoshandurwa mususu rake, kuita ukaira hwebuura mukati mwake. Unotangurira upfumi, unozohurutsazve; Mwari unohukandira kubanze kubva mundani yake. Unozosvuta ukaira hwebuura; rurumi rweroambira ruchamuuraya. Aazoringiri kundwizi, nemikova inoerera ngouchi namafuta en'ombe. Unozohwirinza muchero wokushanda kwake, naye aazoutanguriri; kubva mukuuyirwa ngepfuma yake aazodakari mukati mwake. Ngokuti wakatambudza nokurasha varombo; wapamba mhatso yaasikazi kuaka. Aazi kuzia kunyarara mundani yake; mukukara kwake aazi kupokonyosa nachimwe. Apana nachimwe chakasara apedza kudya; ndizvo upfumi hwake ahuzogari. Muupfumi hwakawandisa unozopinda mudambudziko; masimba eshe okushata anozodzaka padera pake. Kugutisa ndani yake, Mwari unozodurura ushungu hwake hunotyisa padera pake, nokuhunaisa padera pake kuita kudya kwake. Unozotiza kubva kunechokurwa ndicho chesimbi, nomusee wethusi unozomufura kuphotya. Unoshwamurwa kubva mumuiri wake, noupanga hunon'anikira hunozophotya chanduru chake; zvinotyisa zvinozouya padera pake. Chidima cheshe chakaunganidzirwa upfumi hwake; muriro usikazi kubasirwa ngomunhu unozomupedza; icho chakasara mutende rake chichapedzwa. Matenga anozoonesa pamhene kushata kwake, nenyika inozomiruka kumuitira ndaa. Upfumi hwemhatso yake huchatorwa, hunozoparadzwa ngezuva roushungu hwaMwari. Ichi ndicho chikoaniswa chomunhu wakashata chinobva kunaMwari, nenhaka yakaemeserwa kwaari ndiMwari.” Zvino Jobe wakapingura echiti, purutanai zvakanaka mazwi angu, nouku ngakuite kuembedzerwa kwako. Nditenderei neni ndizoereketa; zvino ndapedza kuereketa, mungaita jee. Asi inini, ndaa yangu iri kunomunhu here? Inini ndingarekera kupera simba ngenyi? Ndiringirei, mushamiswe, muise nyara dzenyu pamiromo yenyu. Naapo ndechipinimidza ndizvo ndinokangaidzwa, kuhuta kukurutu kunobata nyama yangu. Vakashata vanoangira kupona ngenyi, kuita vasharuka, nokuita vakagwinya nevane simba? Vana vavo vanogwinyiswa mukuona kwavo, nemibarirwana yavo pamberi pemadziso avo. Mhatso dzavo dzakangwaririka kubva mukutya, apana ndonga yaMwari iri padera pavo. Mikono yavo inobarisa isikakoreri; matsiru avo anobereka, aasvodzi makonyana awo. Vanobudisa vana vadoko vavo kudai ngomutanga, nevana vavo vanozvinapo. Vanoemba ngengoma yesimbi nembira, vechidakara ngokuridzwa kwomunanzi. Vanopedza mazuva avo mukubudirira, mukunyarara vanodzaka muiba. Ndizvo vanoti kunaMwari, tisiye tega! Atina chidisiso chokuzia njira dzako. Ndiani Une-simba-reshe kuti timushandire? Chiinyi chetinouyirwa ndicho kudai techizokumbira kwaari? Ringirai, kubudirira kwavo akuri munyara dzavopi here? Kupangana kwevakashata kuri kuretu kubva kwendiri. Mikuwo minganai chibani chevakashata chechidzima? Mikuwo minganai kuparadzwa kwechivagumira? Mikuwo minganai Mwari yaanovakovera madambudziko muushungu hwake? Mikuwo minganai yevanodai ngetsengwe pamberi pemhepo, nokudai ngemakoto anotorwa ngedutu? Imwimwi munoti, Mwari unongwaririra kushata kunevana vavo. Ngachiunzidzirwe kwevari vemene, kuti vachizie. Madziso avo ngaaone kuparadzwa kwavo, ngavamwe kuushungu hwoUwo Une-simba-reshe. Ngokuti unokudakara kwakaitawani mumhatso yake ngesure kwake, apo uwandu hwemwedzi yake yagurwa? Uripo here ungadzidzisa Mwari kuzia, kwechioneka kuti unotonga avo vakakwirira? Umwe unofa mukati mwesimba rake achakagwinya, wakagarisika nokunyarara, mazamo ake akazara ngomukaka, nemwongo wemagodo ake uchinemwando. Umweni unofa mukurwadziwa kwomweya, asikazi kuraira chakanaka. Vanoata pashi mubukuta zvakatodzana, nehonye dzinovaumbira. Ringirai, ndinozia mipinimidzo yenyu, nokuronga kwenyu kundiitira zvakashata. “Ngokuti imwimwi munoti, Iri pari mhatso yomutongi?” Huri pari ugaro hwevaigara vakashata? Amuzi kuvabvunza here avo vanopinda ngenjira? Amuzi kuashira here uchapupu hwavo, kuti vakashata vanoponeswa zuva rokuparadzwa, nokuti vanopokonyoswa zuva roushungu? Ndiani unoronza njira dzavo pamberi pehope dzavo? Ndianizve unovaripira izvo zvevakaita? Naapo pevanotwarwa kuenda kuiba, vanorinda paneiba ravo. Maondo omubani anotapira kwevari, nomunhu weshe unozoteera sure kwavo, naavo vakaenda pamberi pavo avaerengeki. Zvino munondiembedzera ngenjiranyi ngezvisina shwiro? Amuna chiro mukupingura kwenyu asi manyepo. Zvino Erifazi muThemani wakapingura echiti, Munhu ungaita rudetso rwenyi kunaMwari? Kunyazwi uwo wakangwarisisa unorudetso rwenyi kwaari? Kuripo here kudakadzwa kunoUwo Une-simba-reshe ngokuti iwewe uri wakarurama, nokuti kuripo kuuyirwa here kwaari kuti ukaita njira dzako kuti dziperere? Indaa yokumutya kwako here kunoita kuti iye akurambidze, kuti apotere newe kukutonga? Kushata kwako akuzi kukura here? Kushata kwako akuna magumo. Ngokuti iwewe wakatora chibatiso kubva kunehama yako ngezvisina shwiro, wakakhumura machira avo vakaita mutitinini. Auzi kupa mvura yokumwa kuneavo vakarembedzeka, newe wakanyima chokudya kune vanenzara. Munhu unesimba reshe, ndiye unenyika; munhu unodiwa ndiye unogara mukati mwayo. Iwewe wakaendisa shirikadzi dzisina chiro, nemioko yenherera waigura. Ndizvo mirau yakakutendenedza, kukarudzwa ngokukasira kunokutyisa, nokuti chidima, kwokuti aungakoni kuona; nemvura yakawanda inokunzvaidza. Mwari aari pakakwirira mudenga here? Ringira nyeredzi dzakapindisisa kukwiriranyi kwedzakaita! Ndizvo unoti, “Mwari unozienyi? Ungakona here kutonga ngepakati pechidima chakakora?” Makore akakora anomufukidza kuti asakona kuona, naye unohamba mukutenderera kwematenga. Unozongwarira here njira yekare yakahambwa ngevanhu vakashata? Avo vakabvukwa usati waguma mukuwo wavo, madzeyo avo akakukurwa ngendambi. Vakati kunaMwari, tisiye tega; chiinyi chaangaita kwetiri Uwo Une-simba-reshe? Asi wakazadza mhatso dzavo ngezviro zvakanaka; asi kupangana kwevakashata kuri kuretu kubva kwendiri. Vakarurama vanochiona, navo vanodakara; vasina ndaa vanozosheka kuvasvororedza vechiti, ngegwinyiso magaa edu aparadzwa nezvevakasiya zvakaparadzwa ngomuriro. Tenderana naMwari kuti uone kunyarara; ngokudaro kunaka kunozouya kwouri. Ashira kupangwa kubva kumuromo wake, ungwarire mazwi ake mumwoyo wako. Kudai wechipetuka kunoUwo Une-simba-reshe, unozongwaririka; kudai wechidusa kusikarurama kubva mutende rako, kudai wechiisa mukore mubukuta, nomukore weOfiri pakati pemapuwe ezvimikova, nokudai Uwo Une-simba-reshe echizoita mukore wako, nesirivha yako inomutengo mukuru, zvino unozodzidakadza pachako munoUwo Une-simba-reshe, nokumirudza hope yako kunaMwari. Unozokumbira kwaari, naye unozokuzwa, unozoripa mhiko dzako. Chounogura chinozogwinyiswa kweuri, nokujeka kunozojeka munjira dzako. Naapo vamweni vanodzaswa pashi, unoti kudadirwa; ngokuti unoponesa wakapfaa. Unozomusunhura, kunyazwi nouwo unendaa; unozopokonyoka ngendaa yokuchena kwenyara dzako. Zvino Jobe wakapingura echiti, “Nyamashiwo kugunun'una kwangu kukuru; nyara yake inorema kunyazwi ndechigomera. A, dai ndaizia apo pendingamuona kuti ndingauya kunyazwi paugaro pake. Ndingaedzanisa ndaa yangu pamberi pake, ndizadze muromo wangu ngezvizatho. Ndingada kuzia zvaanondipingura, nokunzwisisa izvo zvaangazoereketa kwendiri. Ungazophikisana neni here ngesimba rake guru? Haiwa; asi unozopurutana kwendiri. Apo wakarurama ungakona kupingurana naye; neni ndinosisira kuti ndisunhurwe mhera nariini kubva mukutongwa kwangu. “Kudai ndechiendamberi, asi iye apana pano. “Nokuti sure, asi andingakoni kumuona; kumuoshwe unodzifisha, neni andikoni kumuona; ndinokunukukira ngokumudyo asi andikoni kumuona. Asi iye unozia njira yendinohamba ndiyo; naapo andiedza, ndinozobuda ndakadai ngomukore. Tsoka dzangu dzarambira muzvitsiko zvake; ndangwarira njira yake, andizi kupauka kubva kweiri. Andizi kupauka kubva kumipango yemiromo yake; ndangwarira muditi rangu mazwi omuromo wake. Asi iye unomupinimidzo umwe, ndiani ungamukunukudza? Chaanodisisa, ndicho chaanoita. Ngokuti unozopedzisa icho chaanondiemesera; nezvizhinji zvakadai zviri mumwoyo wake. Ndizvo ndinotyiswa ngokuapo kwake; apo ndechipinimidza, ndinomutya kakurutu. Mwari wakaita kuti mwoyo wangu upere simba; Uwo Une-simba-reshe wandityisa. Kudai zvega ndaingarangakira muchidima, nechidima chakakora chafukidza kuhope yangu.” Ngenyi mikuwo yokutonga isikazi kuemeswa ngoUwo Une-simba-reshe, ngenyi avo vanomuzia vasikaoni mazuva ake? Vakashata vanodusa hoko dzemigano yenyika; vanobvuka zvifuyo ngokugebenga, nokuzviusha. Vanobvuka zvimbongoro zvenherera, vanotora kabi yeshirikadzi kuita chibatiso. Vanopaukisa vanotama kubva munjira; varombo venyika veshe vanodzifisha pachavo. Ringira, kudai ngembongoro dzomushango vanobuda kuenda kumishando yavo vechitsvakisisa kakurutu mushango rinovaberekera zvokudya zvevana vavo. Vanocheka muminda isiri yavo, nokuunganidza mavhini muminda yevakashata. Vanoata usiku hweshe vari mutitinini, vasina chokupfeka muchando. Vanonyakatiswa ngokupfunha kwemvura yemitunhu, vechimbundira buwe ngokutama ndau yokudzama. Vanobvuka nherera kubva pamazamo, nokutora vana vevarombo kuita chibatiso. Vanohamba vari mutitinini vasina chokufuka; vanotwara mwanda yezviyo kunyazwi vanenzara; pakati pemaorivhi vanosvina mafuta, vechikamura vhini, asi vechizwa nyota. Kugomera kwevanofa kunozwika kwechibva mudhorobha, nomweya wevakaremadzwa inochemera kudetserwa; asi Mwari aapurutani mikumbiro yavo. Varipo avo vanomukira kujeka, vasikazii njira dzakwo, nokuti kugara munjira dzakwo. Muurayi unomiruka mambakwedza kuenda koouraya murombo nomutami, nomuusiku unodai ngembavha. Dziso romuombi rinogarira kusvipa kwokubanze echiti, “Akuna dziso richandiona;” unoisa chiphameso pahope yake. Muchidima vanotsa kuphotya mhatso, masikati vanodzikonyera mumhatso, avazii kujeka. Ngokuti chidima chakakora mangwanani kwavari veshe; ngokuti vanozwanana nokutyisa kwechidima chakakora. Vanokasira kudai ngokuerera kwemvura; nechikoaniswa chavo munyika chakatukwa; akuna mutengesi unokunukuka kuenda ngenjira yeminda yemivhini. Kuoma nokupisha zvinopedza mvura yechando; ndizvo zvinoitwa ngeiba kwevari vashaishi. Ndani inovariyarwa; honye dzinotapirirwa ndivo; avachakarakadzwi; ndizvo kusikarurama kunoguka kudai ngomuti. Vanoremadza mukadzi usikabereki, asikaiti zvakanaka kuneshirikadzi. Asi Mwari unorebesa kupona kwevakagwinya ngesimba rake: vanomiruka apo vapera gonda rokupona. Mwari unovapa kugarisika nokungwaririka; madziso ake anoringira njira dzavo. Vanokudzwa kwenguva doko, ngenguva doko apachina; vanofota nokuoma kudai ngevamweni veshe; vanochekwa kudai ngemwonzora wezviyo. Kudai zvisikazi kudaro, ndiani ungazondiita munyepi, nokuita kuti kuereketa kwangu kuite kusina shwiro? Zvino Bhiridhadhi muShuhi wakapingura echiti, “Kutonga nokutya zvinaMwari; unoita kuti kunyarara kuapo mudenga rake rakakwirira. Hondo dzake dzingaerengeka here? Ndiani usikajekeserwi ngokujeka kwake? Zvino munhu ungaita wakarurama ngenjiranyi pamberi paMwari? Ungaita macheneserwenyi uwo wakaberekwa ngomukadzi? Kunyazwi mwedzi auna kujeka nenyeredzi adzizi kuchena mukuona kwake, kunozopinda kwakaitawani kutsonga kumunhu, uri honye, nomunhu, uwo uri honye.” Zvino Jobe wakapingura echiti, “Wamuita madetserenyi iwewe uwo usina simba! Waita maponeserenyi iwewe muoko usina simba! Iwewe waita mapangirenyi uwo waiya asina ungwaru nokumupanga zvakanaka! Wakaereketa mazwi ngorudetso rwaani nomweya ngowani wakabuda kubva kwouri? Vakafa vanohuta vari pashi, mvura nezvinogaremwo. Sheori riri mutitinini pamberi paMwari; Abhadhoni akuna chifukidzo. Unotambanudza denga redera padera pepasina chiro, unoturika nyika pasina chitsimiso. Unosunga mvura yake mumakore akakora, negore aribauki kubeuka ndivo. Unofisha hope yeshe yemwedzi, unotambanudza gore rake padera pawo. Watara dendenedzwa mvura padera pemvura, pamugano pakati pokujeka nechidima. Sika dzedenga dzinohuta nokukaruka ngokukaraidza kwake. Wakanyaradza ruandhle ngesimba rake; ngokuzwisisa kwake wakachaya Rahabhi. Ngefemero rake wakanemesa matenga; nyara yake yakabaya nyoka yaitiza. Ringira, ndizvo asi micheto yenjira dzake; kutsonganyi kwevherevhere retinozwa ndiye! Asi kutinhira kwesimba rake ndiani unokona kukuzwisisa?” Jobe wakaangirira kuereketa muedzaniso wake echiti, “Kudai ngezvaanopona Mwari, uwo watora maruramiro angu, noUwo Une-simba-reshe, uwo wakatambudza mweya wangu, kuti kufema kwangu kuchimukati mwangu, nomweya waMwari uchimumiro mwangu, miromo yangu aizoereketi zvakashata, norurumi rwangu aruzoereketi kuchengedza. Asazonditendera kuti ndimupembedze; metsa ndife andizorashi kururama kwangu kubva kwendiri. Ndinobatisisa kururama kwangu, andizokurekeri kwechibva kwendiri; mwoyo wangu auzondiitiri ndaa mukuwo weshe wendinopona. Magaa angu ngaadai ngevakashata, nouwo unondirwisa ngaadai ngevasikazi kururama. Ngokuti chiinyi chiri magondero ousikadi Mwari, apo Mwari paanogura mweya wake naapo Mwari paanotora ndaramo yake? Mwari unozwa here kuchema kwake apo echigumirwa ngemadambudziko? Unozodakara here ngoUwo Une-simba-reshe? Unozodaidza kunaMwari mikuwo yeshe here? Ndinozomudzidzisa ngendaa yenyara yaMwari; izvo zviri kunoUwo Une-simba-reshe, andizozvifishi akadi. Ringirai, imwimwi mweshe mwakazviona pachenyu; ngenyi zvino mwaita vasina shwiro mweshe? Ichi ndicho chikoaniswa chomunhu wakashata chinobva kunaMwari, nenhaka yevatambudzi, yevanozoashira kubva kunoUwo Une-simba-reshe. Kudai vana vake vechiwanziswa, vanopera kuurawa ngeshoti; nemibarirwana yake aizogutiswi ngechingwa. Naavo vanosara vake vanozofa ngenhenda, neshirikadzi dzavo adzizovachemi. Kunyazwi echiunganidza sirivha kudai ngebukuta kuwanda, nokudzinasirira zvokufuka kudai ngedongo, unounganidza, asi vakarurama vanozozvipfeka, vasina ndaa vanozokoanisirana sirivha iyo. Unoaka mhatso yake kudai ngechisaki chedandemutande, kudai ngomuchacha unonasirwa ngomurindi. Unoenda kooata ari gurudza, asi aachaitizve; unobeura madziso ake, asi upfumi apachina. Zvinotyisa zvinomugumira kudai ngendambi; mubvumo mukuru unomutwara usiku. Dutu rokumabvazuva rinomutora, naye unoenda; rinomutsvaira kubva pandau yake. Rinomuvhuvhuta risikamuitiri nyasha; unotiza kubva kusimba raro. Rinoembera nyara dzaro kwaari, nokumuridzira murudzi kubva pandau yaro.” Ngegwinyiso uripo mugodhi wesirivha, nendau pounoereswa mukore. Simbi inotsiwa mumavhu, nethusi rinonyunguruswa kubva kumapuwe. Vanhu vanoita kuti chidima chigume kumagumo, vechitsvakisisa kuguma kumugano uri kuretu mapuwe ari muchidima chakakura, neari mubvute gurutu. Vanotsa mugodhi mubani kuretu kubva kunogara vanhu; vanoriyarikanwa ngevahambi, vakatiruzu kuretu kubva kunevanhu. Munyika munobuda zvokudya, asi pashi payo panoshandurwa kudai ngezvaitwa ngomuriro. Mapuwe ayo indau inogara safire, nebukuta rayo rinemukore. Njira iyo aiziikanwi ngemakodzi, nedziso rengwanga arizi kuchiona. Zvikara zvinodzikudza zvomushango apana chatsikapo; mhondoro aizi kuhambapo. Munhu unotambanudza nyara yake kuputsa mapuwe, nokushandura mitunhu ngenzinde dzayo. Unotsa migero pakati pemapuwe, nemadziso ake anoona chiro cheshe chinomutengo mukuru. Unotsiira zvinyuka zverwizi kuti mvura isaerera; zviro zvakafishika unozvibudisa mukujeka. Asi ungwaru hunooneka pari? Nendau yokuzwisisa iri pari? Vanhu avazii mutengo wazvo nawo auoneki munyika yevanopona. Kudzama kunoti, “Ahusiri mwendiripi.” Ruandhle runoti, “Ahuri mwendiri.” Ahungatengwi ngomukore, nesirivha aingapimwi kuti ipuwe kuita mutengo wahwo. Ahungaedzaniswi nomukore weOfiri, mumapuwe eonikisi anomutengo mukuru, nokuti esafire. Mukore nemagirazi azvingaedzaniswi nahwo, nokuti ahungatenganiswi nezvinemeso zvomukore wakaereswa. Akuna chinoronzwa ngebuwe rekhorari nokuti rekristari; mutengo woungwaru unopinda mapherere. Thopazi yeEthiopia aingaedzaniswi nahwo, nokuti ahungaedzaniswi nomukore wakaera. Ngekuri zvino kunobva ungwaru? Ngekuri kunendau yokuzwisisa? Hwakafishika kubva kumadziso eveshe vanopona, nahwo hwakasitirwa kubva kuneshiri dzomudenga. Kuparadzwa noRufu zvinoti, “Takazwa ngembiri yahwo ngenzee dzedu.” Mwari unozwisisa ngenjira yahwo, naye unozia ndau yahwo. Ngokuti unoringira kumagumo enyika, echiona zveshe zviri pashi pedenga. Naapo paakapima dutu uremu hwaro, nokupima mvura ngechipimo; naapo paakaemesera mvura inonaya mutemo, nenjira yemheni inotinhira; zvino wakauona, akaudaidzira; wakauemesa, akautsvakisisa. Naye wakati kunevanhu, “Ngegwinyiso, kutya Mambo Mwari ndihwo ungwaru, nokuparadzana nezvakashata ndikwo kuzwisisa.” Jobe wakaangirira kuereketazve ndaa yake echiti, “A, kudai ndaiita hangu zvendaiya ndakaita mumwedzi yekare, kudai ngemazuva aakandingwarira Mwari; apo chibani chake chaijeka padera pesoro rangu, ngokujeka kwake ndakahamba kuphotya muchidima; naapo ndaiya muutsva hwangu, apo ushamwari hwaMwari hwaiya padera petende rangu; apo Uwo Une-simba-reshe aiya achineni, apo vana vangu vachanditendenedza; apo zvitsiko zvangu zvaisukwa ngomukaka, nebuwe rakandidururira ndwizi dzemafuta. “Naapo ndakabuda kuenda pamusiwo wedhorobha, apo pendakanasirira chigaro changu paruwanze, majaha akandiona, vakapetuka sure, nevasharuka vakandimirukira, vakaema; vatongi vakarekera kuereketa, vakaisa nyara dzavo pamiromo yavo; vakuru vakanyarara, nemarurumi avo akanamira dera mukanwa mwavo. Naapo vakandizwa, vakaereketa mazwi akanaka ndini; naapo dziso perakandiona rakandikudza; ngokuti ndakaanunura varombo vaichema, nenherera dzisina wokudetswa ndiye. Chifumiso chouwo waiya pasinde pokufa chakauya padera pangu, neni ndakaita kuti mwoyo weshirikadzi uembe ngokudakara. Ndakafuka kururama nakwo kwakandifukidza; kutonga kwangu kwakanaka kwakaita kudai ngechokusimira nedzungudza. Ndaiya madziso kunemapofu, netsoka kunezvirema. Ndaiya baba kunevarombo, ndaitsvakisisa ngendaa yomupara. Ndakagura mazino evakashata, ndikaita kuti varige pashi zvavauraya kubva pamazino avo. “Zvino ndakapinimidza kuti, ‘Ndinozofira ndiri muchisaki changu, ndinozowanza mazuva angu kudai ngejecha. Nzinde dzangu dzinotambarara kuenda panemvura, nebeto raigara padera pematai angu usiku hweshe. Uthende hwangu hunoramba huri hutsva mukati mwangu, nouta hwangu hunogara hwechimusirirwa munyara dzangu.’ “Vanhu vaipurutana kwendiri, vechigarira, vechinyarara mukupanga kwangu! Ndapedza kuereketa mazwi angu avazi kuereketazve; nokuereketa kwangu kwakadonhera padera pavo kudai ngebeto. Navo vakandigarira kudai ngokugarira mvura yokunaya; vakabeura miromo yavo kudai ngemvura yokunaya kwokupedzisira. Ndakavashekera, apo pevaiya vasina gonda; nokujeka kwehope yangu avazi kukudzima. Ndakatsanangura njira dzavo, ndikagara kudai ndimambo, ndakagara kudai ndimambo uri pakati pehondo yake, kudai ngoumwe uwo unoembedzera vanotsumba. “Asi zvino vanondiitira jee avo vari vadoko kwendiri, madzibaba avo endaizoshoora kuvaemesa nembwa dzangu kuusha zvifuyo zvangu. Ndingauyirwa ngenyi kubva kudimba renyara dzavo? Simba ravo reshe rapera. Ngendaa yokutama nenzara yakashata, vanotetena zvakaoma munyika isina chiro. Vanotonhera zvinovava nenzinde dzemapfiba, nokudzigutisa pachavo ngenzinde dzomuchindwi. Vanodzingwa kubva pakati pevanhu, vanhu vechidaidzira sure kwavo kudai ngezvinoitwa mbavha. Vanosisira kugara mumakwenga mumapani, mumarindi pashi penyika, nomumapuwe. Vanokuma vari mumapfiba; vanoungana pamwepo pashi perukato. Mibarirwana yemapenzi, isina zina yakachayiwa kudzingwa kubva munyika. Nazvino vanoemba ngoma kundiitira jee; ndiri chinai chavo. Vanondinyenya, vanoema kuretu kubva pendiri, vasikaumiri kupfira muhope mwangu. Ngokuti Mwari wasunhura rusinga rwangu, akandipfaisa, varasha matomu mukuona kwangu. Vanhu vakashata vanomuka kumudyo kwangu; vanosundira tsoka dzangu kurutii, vanonasira njira dzavo dzokundiparadza. Vanoparadza njira yangu, vanotutsira dambudziko rangu; apana naumwe unovadetsera. Vanouya kudai ngevanopinda ngepaburi rakapamhama; ngepakati pakapwanyiwa vanodziwisa padera pangu. Zvinotyisa zvatenderukira padera pangu; kukudzwa kwangu kunorumbirirwa kudai ngounorumbirirwa ngedutu, nokugarisika kwangu kunopinda kuenda kudai ngegore. Zvino mweya wangu wadururwa kubva mukati mwangu; mazuva okutambudzika kwangu andibatisisa. Usiku magodo angu anotetena, nokurwadza kunondiruma akuzorori. Ngoushungu unobvambura chokufuka changu; unondibatisa ngehuro yechokufuka changu. Wakandikandira mumadhaka, neni ndaita kudai ngebukuta nemarota. Ndinochemera kwouri, asi iwewe aundipinguri; ndinomiruka, newe unondiringira kwega. Iwewe wakakunukuka kuita runya kwendiri; ngesimba renyara yako unonditambudza. Unondimirudza mudenga mudutu; unoita kuti ndigadhe padera paro, unondinzereresa mubope redutu. Ndinozia kuti unozondiunza murufu, nokumhatso yakaemeserwa veshe vanopona. Ngegwinyiso akuna naumwe ungakunukuka kurwisana nomurombo, apo mumadambudziko echichemera kuedetserwa. Andizi kuchemera here uwo waiya mukutambudzika? Mwoyo wangu auzi kutambudzikira here varombo? Asi apo ndakaringira kuona zvakanaka, kushata kwakandigumira; naapo ndakagarira kujeka, kwakauya chidima. Kukangaidzwa nokutambudzwa kuri mukati mwangu akunyarari; mazuva okutambudzika anouya kooshongana neni. Ndinohamba ndechitsumba ndisina kujeka; ndinoema mukati mwembungano, ndechichemera kudetserwa. Ndiri hama yehava, nomungani wemhowani. Ganda rangu rasvipa, naro rinowa pashi kubva pendiri, nemagodo angu anobaka ngokupisha. Mbira dzangu dzakunukudzwa kuita dzokutsumba, nomunanzi wangu wakunukudzwa kuita wokuchema.” Ndaita chitenderano nemadziso angu; zvino ndingaita maemurirenyi mhandara? Chiinyi chinozoita chikoaniswa changu chinobva kunaMwari mudenga, nenhaka yangu inobva mudenga kunoUwo Une-simba-reshe? Kuparadzwa akuwiri vakashata, nokuparadzwa kuneavo vanoshanda zvinonyangadza here? Aaoni njira dzangu, nokuerenga zvitsiko zvangu zveshe here? Kudai ndakahamba mukunyepa, nokuti tsoka dzangu dzakakasira kuhamba mukuchengedza, ngandipimwe pachipimo chakanaka, kuti Mwari azie ugondeki hwangu; kudai zvitsiko zvangu zvakapauka kubva munjira, nokuti mwoyo wangu wateera zvinooneka ngemadziso angu, nokudai chiripo chinosvipisa chanamira panyara dzangu, zvino ngandikushe inini, noumweni ngaadye; nezvirimwa zveminda yangu ngazvibvitwe. Kudai mwoyo wangu wapaukiswa ngomudzimai, neni ndakahwarira pamusiwo womuakirwana wangu; zvino mukadzi wangu ngaakuire mwamuna umweni, nevamweni ngavagwadame padera pake. Ngokuti uku kushaisha kukuru; iyi indaa yakashata inosisira kuororwa ngevatongi; ngokuti icho chakadai ngomuriro unopisha kupedza, nawo unozopisha metsa panzinde pezviyo zveshe zvangu. Kudai ndaramba ndaa yehloko yangu mwamuna nokuti mukadzi, apo vaunza chichemo pamberi pangu; zvino ndinozoitenyi apo Mwari akamiruka? Naapo echindibvunza, ndinozopingurenyi kwaari? Uwo wakandiumba mundani yamai, andiyepi here wakavaumba? Andiyepi umwewo wakatiumba mundani here? Kudai ndanyima varombo zvevanodisisa, nokuti kudai ndaita kuti madziso eshirikadzi agumirwe, nokudai ndadya chingwa changu ndega, nenherera dzisikazi kuchidya, ngokuti kubvira muutsva hwangu ndakarera nherera kudai ndibaba, kubvira mundani yamai angu ndakaitungamirira; kudai ndaona umwe echifa ngokutama zvokufuka, nokuti munhu murombo usina chokupfeka, uwo chiunu chake achizi kundibonga, nouwo usikazi kudziirwa ngemamviri ehwai dzangu; kudai ndamirudza nyara yangu kurwisa nherera, ngokuti ndaiona kuti ndine vadetseri pamusiwo; zvino godo repfudzi rangu ngariphazuke kubva papfudzi rangu, nomuoko wangu ngauguke ngepachikokora chawo. Ngokuti ndaiya mukutyiswa ngokuparadzwa kunobva kunaMwari, neni andizi kukona kuringirana noumambo hwake. Kudai ndakaita kuti mukore uite gonda rangu, nokuti kudai ndakati kunomukore wakaeriswa, iwewe ndiwe magondero angu; kudai ndadakara ngokuti upfumi hwangu hwakawanda, nokuti ngendaa yokuti nyara yangu ineupfumi hwakawanda; kudai ndaringira pazuva apo rajeka, nokuti mwedzi apo wechihamba mukujeka, nomwoyo wangu wakaongwa ngokufishika, nomuromo wangu ukachingamidza nyara yangu ngomuromo; ichiwo chaita chishaishi chinosisira kuororwa ngevatongi, ngokuti ndaizoita usikazi kugondeka kunaMwari uri mudenga. Kudai ndadakara ngokuparadzwa kwouwo unondinyenya, nokuti kudzikudza apo akagumirwa ngezvakashata, (andizi kutendera muromo wangu kuti ushaishe ngokudisisa kuti chituko chiapo padera pomweya wake,) kudai avo vanogara mutende rangu vasikazi kuti, “A, ndiani, uwo usikazi kugutiswa ngenyama yake?” Muhambi aazi kuata mupato; ndabeura misiwo yangu kumuhambi. Kudai ndafisha kupauka kwangu kudai ngezvakaita Adhamu, ngokufisha kushata kwangu muditi rangu, ngokuti ndakaema ndechityiswa kakurutu ngembungano huru, ngokushoorwa kwemhuri kwakandityisa, ndizvo ndakanyarara, andizi kubuda kubanze. A, kudai ndaiya naumwe waindizwa! Kuripano kunyora kwangu! Uwo Une-simba-reshe ngaandipingure! A, dai ndaiya nechinyorwa chokutongwa chakanyorwa ngegaa rangu! Ngegwinyiso ndaizochitwara papfudzi rangu, ndaizochisungira padera pangu kudai ngedzungudza. Ndaizomuronzera ngendaa youwandu hwezviito zvangu zveshe; kudai ngomutongi ndaizoenda pasinde pake. Kudai nyika yangu yachema kundiitire ndaa, nemigero yayo yechichemawo pamwepo; kudai ndakadya michero yayo, ndisikazi kuibhadhara ngemare, nokuita kuti vanikazi vayo vaurawe; minzwa ngaikure pandau yekoroni, neshakura pandau yebhari. Mazwi aJobe apera. Ndizvo ava vanhu vatatu vakarekera kupingura Jobe ngokuti waiya akarurama mukuona kwake. Zvino Erihu mukororo waBharakheri muBhuzi, wedzinza raRamu, ushungu hwake hwakabaka. Wakanyangadzwa ndiJobe ngokuti wakadzipembedza pachake, panekupembedza Mwari. Ushungu hwake hwakabakawo kunevangani vaJobe vatatu, ngokuti avazi kuona mupinguro, kunyazwi vaiya varonza kuti Jobe unendaa. Zvino Erihu waiya agarira kuereketa naJobe, ngokuti avo vaiya vasharuka kupinda iye. Asi apo Erihu aona kuti paiya pasina mupinguro kumiromo yaava vanhu vatatu, ushungu hwake hwakabaka. Erihu mukororo waBharakheri muBhuzi wakapingura echiti, “Inini ndichiri mudoko, nemwi mwaavasharuka; ndizvo ndaitya, andizi kushinga kuronza kupinimidza kwangu. Ndakati, ‘Mazuva anosisira kuereketa, nemakore mazhinji anosisira kudzidzisa ungwaru.’ Asi ngegwinyiso mweya uri mumunhu, femero roUwo Une-simba-reshe unovapa kuzwisisa. Avasiri vakurupi vakangwara, nokuti vakuru vanozwisisa zvakarurama. Ndizvo ndinoti, ‘Purutanai kwendiri; ngandimuronzere mupinimidzo wangu.’ Wonai, ndaigarira mazwi enyu, ndapurutana kuzvizatho zvenyu, apo muchatsvaka chokuereketa. Ndapurutana kwomuri, asi apana naumwe wenyu wanyisa Jobe ngezvizatho, apana naumwe pakati penyu wapingura mazwi ake. Asi ngwarai kuti musazoronza kuti, ‘Takaona ungwaru; Mwari unomudzasa pashi, haiwa munhu.’ Aazi kuereketa mazwi ake kundiitira ndaa inini; neni andizomupinguri ngokuereketa kwenyu. Vakashama avazi kupingurazve; vaiya vasina izwi rokuronza. Ndinogarira here ngokuti avaereketi, ngokuti vaemapo vakanyarara vasikachapinguri? Ininiwo ndinozopingura mupinguro wangu, neniwo ndinozoronza kupinimidza kwangu. Ngokuti ndakazara ngamazwi; mweya uri mukati mwangu unondiangiridza. Ringira, mwoyo wangu wakadai ngevhini risina ndau yokupupira; iri pasinde pokuputika kudai ngenyede itsva. Ndinosisira kuereketa kuti ndipipirirwe; ndinosisira kubeura miromo yangu nokupingura. Inini andizoiti mukheto kumunhu, andizoereketi mazwi okusereresa kunomunhu nokuti ngouri. Ngokuti andizii mazwi okusereresa; nokuti Musiki wangu unganditora ngokukasira!” Asi zvino Jobe, ndapota, izwa kuereketa kwangu, upurutane mazwi angu eshe. Ringira zvino, ndinobeura muromo wangu, rurumi rwangu runoereketa mumuromo wangu. Mazwi angu anodaidzira kururama kwomwoyo wangu; izvo zvinozia miromo yangu inoereketa pamhene. Mweya waMwari wakandiita, nefemero roUwo Une-simba-reshe rinondipa ndaramo. Ndipingure, kudai wechikona; rongedza mazwi ako zvakanaka pamberi pangu; miruka. Wona, inini ndakadai ndiwe mukuona kwaMwari; ininiwo ndakasikwa kubva kudongo. Ringira, apana kutyisa kwangu kunosisira kukukarudza; nyara yangu aizoremi padera pako. “Ngegwinyiso iwewe waereketa mukuzwa kwangu, neni ndazwa mwangira wemazwi ako. Wati, ‘Ndakasukika andina kupauka; ndakaperera, nomukati mwangu amuna kushata. Ringira, unoona ndaa neni, unondierenga kudai ngegaa rake. Unoisa tsoka dzangu mumanguri, unoringisisa njira dzangu dzeshe.’ Asi muneizvi auzi kururama. Ndinozokupingura: Mwari mukuru kupinda vanhu. Ngenyi wechiphikisana naye wechiti, ‘Apana nachimwe chemazwi angu chaanozopingura?’ Ngokuti Mwari unoereketa ngenjira imwe, neyechipiri, kunyazwi munhu aachizwisisi. Mukurota hope, nokuti muchioniso chousiku, apo vanhu vanobatwa ngehope dzemadzikirira padera pemibhedhi yavo, zvino unobeura nzee dzevanhu, nokuvatyisidzira ngokupangwa, kuti akweye vanhu kubva kumishando yavo, nokufisha vanhu kubva mukudzikudza, kungwarira mweya yavo kubva muhunza, ndaramo dzavo kubva kwokuurawa ngeshoti. Munhu unoororwawo ngokurwadziwa ari pamubhedhi wake, nokuwanziswa kwokurwadza kukuru mumagodo ake. Ndizvo ndaramo yake inonyenya chingwa, nomweya wake unonyenya kudya kunodisiswa. Muiri wake wapera kutsakatika, kwokuti auchaoneki; nemagodo ake aiya asikaoneki abuda kubanze. Mweya wake unokwedzera kuiba, nendaramo yake kuvaparadzi vanounza rufu. Kudai zvino iripo kurutii rwake, ngirosi inoemerera imwe pakati pegumi remazana (1,000), kuronzera munhu icho chakamunakira, nayo inomuitira nyasha yechiti, ‘Mumusunhure kubva mukudzaka muiba; ndaona muripiri; nyama yomuiri wake ngaiite itsva kupinda yoruchiya; ngaahwirirezve kumazuva outsva hwake.’ Zvino unokumbira kunaMwari, naye unomuitira nyasha; unouya pamberi pake ngokudakara, naMwari unounzidzira munhu kudai ngokururama kwake. Munhu uwo unoembera vamweni naye echiti, ‘Ndakashaisha, ndikapauka kubva kunezvakanaka, nakwo akuzi kuunzidzirwa kwendiri. Wasunhura mweya wangu kuti usadzaka muiba, nokupona kwangu kunozoona kujeka.’ Ringira, Mwari ngegwinyiso unoita zveshe izvi zviro, kairi nokuti katatu, kunevanhu, kuti apetudze mweya yavo kubva muiba, kuti vaone kujeka kwokupona. Nasa kuzwisisa, A Jobe, purutana kwendiri; nyarara, neni ndinozoereketa. Kudai unechiro chounoda kuereketa, ndipingure; ereketa, ngokuti ndinodisisa kukupembedza. Kuti usina, purutana kwendiri; nyarara, neni ndinozokudzidzisa ungwaru.” Zvino Erihu wakaangira echiti, “Izwai mazwi angu, imwimwi vanhu vakangwara; mupurutane kwendiri, imwimwi munokuzia, ngokuti nzee dzinoedza mazwi, kudai ngomuromo unoraira kudya. Ngatidzitsanangure zvakanaka; ngatizie kuti chiinyi chakanaka pakati pedu. Ngokuti Jobe wati, ‘Ndakarurama, naMwari wadusa kururama kwangu; kunyazwi ndakarurama ndinoerengwa kuita munyepi; kuremadzwa kwangu akurapiki, kunyazwi ndisina kushaisha.’ Ndiani uripo wakadai ndiJobe, unomwa kushoorwa kudai ngemvura; uwo unohamba pamwepo nevashandi vezvakashata, nokuiyana nevanhu vakashata? Ngokuti wati, ‘Akudetseri chiro kunomunhu kuti adakare munaMwari.’ Ndizvo ndizwei, imwimwi vanhu vanozwisisa; ngakuite kuretu kubva kunaMwari kuti iye aite zvakashata, nokubva kunoUwo Une-simba-reshe kuti aite zvakashata. Ngokuti unozounzidzira kumunhu kudai ngemishando yake, nokuita kuti munhu weshe aashire kudai ngenjira dzake. Ngegwinyiso Mwari aazoiti zvakashata, noUwo Une-simba-reshe aazokunukudzi kutonga kwakanaka. Ndiani wakamuita mutongi panyika? Ndiani wakaisa padera pake nyika yeshe? Kudai echitora mweya wake pachake, nokudziunganidzira pachake femero rake kwaari, nyama yeshe ingapera kufa pamwepo, nomunhu unozohwirirazve kuita bukuta. Kudai unokuzwisisa, izwa ichi; purutana kumazwi angu. Uwo unonyenya zvakarurama unozotonga here? Ungazomurasha here uwo wakarurama nounesimba, uwo unoronza kunamambo kuti, ‘Iwewe wakashata!’ Nokumutongi kuti, ‘Iwewe munhu wakashata!’ Uwo usikaitiri mukheto vakuru, nokuti kuremeredza mupfumi kupinda murombo, ngokuti veshe mushando wenyara dzake? Ngomukuwo mufupi vanofa, pakati pousiku vanhu vanozungunyiswa nokufa; nevanesimba vanotorwa ngenyara isiri yomunhu. Ngokuti madziso ake anoringira padera penjira dzevanhu, naye unoona kuhamba kwavo kweshe. Apana chidima nokuti bvute rokufa, apo pavangahwara vashandi vezvakashata. Ngokuti aazi kuemesera naumwe nguva yokupinda mukutongwa ndiMwari. Unoparadza vanhu vanesimba pasina kutsvakisisa, nokuemesa vamweni pandau yavo. Ndizvo unozia mishando yavo, unovaparadza usiku, navo vapwanyika. Unovachaya ngendaa yokushata kwavo, mukuona kwevamweni; ngokuti vakapauka kubva mukumuteera, avazi kupinimidza naimwe yenjira dzake, ndizvo vakaita kuti kuchema kwevarombo kugume kwaari, naye wakazwa kuchema kwevanotambudzwa. Naapo akanyarara, ndiani ungatonga? Naapo afisha hope yake, ndiani ungamuringira, kunyazi unoifishira kudzinza nokuti kumunhu, kuti wemadzinza asatonga, kuti asabata vanhu ngomurau? Ngokuti uripo umwe wakati kunaMwari here, ‘Ndashingirira kuororwa, andichazoshaishizve; ndidzidzise izvo zvendisikaoni; kudai ndaita zvakashata, andichazozviitizve?’ Unozokuunzidzira kudai ngezvounoda here, ngokuti iwewe unozviramba? Ngokuti unosisira kutsanangura, haiwa inini; ndizvo daidzira zvounozia. Vanhu vanokuzwisisa vanozoti kwendiri, newakangwara unondizwa unozoti, ‘Jobe unoereketa asina kuzia, mazwi ake aana ungwaru.’ Kudai Jobe aiedzwa metsa kumagumo, ngendaa yokupingura kwake kwakadai ngokwevanhu vakashata. Ngokuti unotutsira kumukira kunezvishaishi zvake; unoembera nyara dzake pakati pedu, nokuwanzisa mazwi ake okurwisana naMwari.” Erihu wakaangira echiti, “Unopinimidza kuti izvi kururama here? Unoti, ‘Ndakarurama pamberi paMwari.’ Kudai wechibvunza kuti, ‘Ndinouyirwa ngenyi? Inini ndingapinda kunaka ngenyi kuti ndashaisha hangu?’ Ndinozokupingura iwewe, nevangani vako vounavo. Ringira mudenga, uone; uringire makore akakwirira kupinda iwewe. Kudai washaisha, chiinyi choungamushaishira ndicho? Nokudai zvishaishi zvako zvechiwandiswa, chiinyi chounoita kwaari? Kudai wakarurama, chiinyi chounopa kwaari; nokuti unoashirenyi kubva kunyara yako? Kushata kwako kungaremadza vamweni vakadai ndiwe; nokururama kwako kungadetsera mukororo womunhu. Ngendaa yokuwanda kwemadambudziko, vanhu vanochema; vanochemera kudetserwa ngendaa yomuoko wounesimba. Asi akuna naumwe unoti, ‘Uri pari Mwari Musiki wangu, uwo unopa kugwinya usiku, uwo unotidzidzisa kakurutu kupinda mhuka dzomunyika, nokutiita kuti tingware kupinda shiri dzomudenga?’ Apo vanochema, asi aapinguri ngendaa yokudzikudza kwevanhu vakashata. Ngegwinyiso Mwari aazwi kuchema kusina shwiro, nokuti Uwo Unesimba-reshe aapinimidzi ndizvo. Kwakapinda kutsonga kwakadini peunoti, ‘Andimuoni, kuti ndaa iri pamberi pake; newe unomugarira.’ Nazvino, ngokuti ushungu hwake ahuorori nokuti aana ndaa kakurutu ngokushaisha, ndizvo Jobe unobeura muromo wake kuereketa zvisina shwiro; unowanza mazwi asina ruziyo.” Erihu wakaangirira echiti, “Nditenderei kadodoko, neni ndinozomuonisa, ngokuti ndichine zvokuronza ndechiemera Mwari. Ndinozotora ruziyo rwangu kubva kuretu, nokuonisa kururama kunoMusiki wangu. Ngokuti ngegwinyiso mazwi angu aazoiti okunyepa; umwe wakaperera mukuzia unewe. Ngegwinyiso Mwari unesimba, aashoori munhu naumwe; unesimba mukugwinya nomukuzwisisa. Aangwariri akadi ndaramo yowakashata, asi unopa kuvarombo zvinovasisira. Aatswatiri madziso ake kubva kunevakarurama, asi unogarisa madzimambo pamadendemaro mhera nariini, navo vanokudzwa. Nokudai vasungwa ngemanguri nokubatwa ngemapote okutambudzika, zvino unovaronzera mishando yavo nokupauka kwavo, kuti vanodzikudza. Unobeura nzee dzavo kudzidziso, nokuvapanga kuti vapetuke kubva mukushata. Kudai vechipurutana nokumushandira, vanozopedza mazuva avo mukubudirira, nemakore avo muzvifumiso. Asi kudai vasikapurutani, vanozopera kufa ngeshoti, vanozofa vasina ruziyo. Asi avo vasikadi Mwari mumwoyo vanozodziunganidzira ushungu: avachemi kudetserwa apo echivasunga. Vanofa vachiri vatsva, nendaramo yavo inemagumo anotsverudza. Unonunura vanotambudzwa ngemadambudziko avo, nokubeura nzee dzavo mukutambudzika. Waikubudisa kubva mundau yokumanikidzwa, kupinda mundau yakapamhama, apo pasina kumanikwa; neizvo zvakagadzikwa patafura rako zvakazara mafuta. Asi iwewe wakazadzwa ngokutonga vakashata; kutonga kwakanaka nokururama zvinokubata. Ngwara kuti ushungu husakupaukisa ngokudisisa upfumi; usatenda kuti kukura kwefumha muromo kukupaukise. Kuchema kwako kunozodetsera kukungwarira kubva mumadambudziko here, nokuti kukura kwesimba rako? Usadisisa usiku, apo vanhu vanoparadzwa kubva pandau dzavo. Ngwara! Usakunukukira kunezvishaishi; ngendaa yeicho iwewe wakaedzwa ngokutambudzika. Wona, Mwari unokudzwa musimba rake; ndiani mudzidzisi wakadai ndiye? Ndiani wakamuemesera njira yake, nokuti ndiani ungaronza kwaari kuti, iwewe waita zvisikazi kururama? Karakadza kukudza mushando wake, wakaembwa ngevanhu. Vanhu veshe vanouringira; munhu weshe unouringira ari kuretu. Ngegwinyiso Mwari mukuru, nesu atimuzii, nouwandu hwemakore ake ahungaronzwi. Ngokuti unokweya madonhwe emvura; unonaisa mvura kubva kumhute yake, iyo inodururwa ngemakore nemadonhwe anodonhera padera pevanhu ngokuwandisa. Uripo here unganasa kuzwisisa kuparadzirwa kwemakore, kutinhira kwougaro hwake? Wona, unoparadzira mheni dzake dzinomutendenedza nokufukidza udzamu hworuandhle. Ngokuti ngeizvi unotonga vanhu; unopa vanhu zvokudya ngokuwandisa. Unofukidza nyara dzake ngemheni, unodzipanga kuti dzichaye paanoda. Kutinhira kwadzo kunoronza ndiye, nen'ombewo dzinozia kuuya kwadzo.” Paichiwo mwoyo wangu unohuta, nokutomuka kubva pandau yawo. Purutana, purutana kutinhira kweizwi rake, nechaunga chinobuda pamuromo wake. Unotumira mheni pashi pedenga reshe, nemheni dzake nokumagumo enyika. Ngesure kwadzo izwi rake rinotinhira; unotinhira ngeizwi roukuru hwake; aadzipingi apo izwi rake razwika. Mwari unotinhira ngenjira inoshamisa ngeizwi rake; unoita zviro zvikuru zvetisikakoni kuzwisisa. Ngokuti kuchando unoti, “Iwa iwewe padera penyika; unoronza kudaro kumvura yokupumha, nokumvura yokunaya ngesimba rake. Unoshanda kuita chioniso kunyara yomunhu weshe kuti veshe vewakasika vachizie. Zvino mhuka dzinoenda mumapako adzo, dzechigara dzirimwo mundau yadzo. Chipupuri chinobva kundau yacho nokutonhora kunobva kudutu rakapararira. Chando chinounzwa ngefemero raMwari nokupamhama kwemvura kunokoreswa yaamho. Unozadza makore akakora ngemwando; unoparadzira makore emheni dzake. Anotenderera kweshe ngokuda kwake, kuti aite kudai ngezvaanoapanga padera pehope yenyika inogarwa ngevanhu. Echinyaita kuorora, nokuti kudetsera nyika dzake, nokuti kuonisa rudo rwake unoita kuti zviitike. Izwa ichi, iwewe Jobe; ema, upinimidze ngemishando inoshamisa yaMwari.” Unoizia here njira yaakaisa ndiyo Mwari mupango, nokuita kuti mheni yegore rake ijeke? Unozia here kutsimiswa kwokuangararika kwemakore, mishando inoshamisa youwo wakaperera mukuzia, iwewe unezvokufuka zvinopisha, apo nyika yanyaradzwa ngokuvhuvhuta kwedutu rokubani? Iwewe ungakona here kudai ndiye kutambanudza denga, rakaoma kudai ngechibuko chakanyunguruswa? Tidzidzise zvetinozoronza kwaari; ngokuti atikoni kurongedza kuereketa kwedu ngendaa yechidima. Unosisira kuronzerwa here kuti ndinoda kuereketa? Uripo umwe here ungadisa kumedzwa? Zvino apana naumwe unokona kuringira kujeka kunon'anikira kuri mumakore, apo dutu rinovhuvhuta rasuka. Kubva dera unouya ari muunaku hwomukore; Mwari unouya muuthende hunotyisa. Une-simba-reshe, atikoni kumuona; mukuru musimba, nomukutonga kwakarurama, nokururama kukuru aazotambudzi. Ndizvo vanhu vanomutya; aana ndaa nomunhu kunyazwi ngouri ngendaa youngwaru hwomwoyo wake. Zvino Mambo Mwari wakamupingura Jobe ari muchamupupuri echiti, Ndiani uyu unokangaidza kupanga ngemazwi asina kuzia? Sunga chiunu chako kudai ngomwamuna; ndichakubvunza, newe uchandironzera. Iwewe waiya pari apo pendakaradzika tsikiro renyika? Ndironzere, kudai unokuzwisisa. Ndiani wakapima kukura kwayo? Ngegwinyiso unozia! Nokuti uwo wakatambanudza tambo padera payo? Madzeyo ayo akagwinyiswa ngenyi? Nokuti ndiani wakaemesa buwe repakhona payo, apo nyeredzi dzemangwanani dzakaemba pamwepo, nevakororo veshe vaMwari vakadaidzira ngokudakara? Nokuti ndiani wakakonya misiwo yoruandhle, apo rwechiputika kubva mundani? Apo ndakasika makore kuita chokufuka charwo, nokuruputira ngechidima chakakora, nokuruemesera migano yarwo, ndikaruisira migogo yezvivhayo, ndikati, “Ndizvo unogumira pano, haiwa kudarika mberi; nemafungo ako anodzikudza anozogumirapo?” Iwewe wakambopanga here mangwanani kubvira pakatangira mazuva ako, nokuita kuti mambakwedza azie ndau yawo, kuti kungabata kumagumo enyika, nevakashata vazuwirwe kubva kweriri? Inoshandurwa kudai ngedongo pashi pechinamatiso; chinopendwa kudai ngejira. Kujeka kunopingwa kubva kunevakashata, nomuoko wavo wakamirudzwa unogurwa. Wakambopotera here muzvinyuka zvoruandhe, nokuti kuhamba mukudzama kworuandhle? Misiwo yorufu wakamboiona here, nokuti kumboona misiwo yechidima chikurutu? Wakambozwisisa here ngoupamhu hwenyika? Ronza, kudai wechizvizia zveshe izvi. Iri pari njira inoenda mukujeka nokuti iri pari ndau yechidima, kuti ungachitora kuenda kunyika yacho, kuti uzie njira inoenda kumhatso yacho? Ngegwinyiso unozia, ngokuti wakaberekwa ngouwo mukuwo, nouwandu hwemazuva ako mazhinji! Wakapinda here mundau dzechinounganidzwa chando, nokuti wakaona here ndau dzaanounganidzwa matsanza, awo endakaunganidzira zuva rokutambudzika, zuva rehondo nokurwa? Ngeiri njira inoenda kundau kunobva kujeka, nokuti dutu rokumabvazuva rinoita maparadzirwenyi padera penyika? Ndiani wakatsa mugero weinopopoma ndiwo mvura, nenjira yokutinhira kwemheni, kuti mvura inaye panyika isikagarwi ngevanhu, murubaya rusina vanhu, kugutisa nyika isikagarwi isina chiro; nokuita kuti ivhu rimere mwenje? Uripo here baba emvura? Nokuti ndiani wakabara madonhwe ebeto? Indani yaani yakabereka chando? Ndiani wakabara chando chakachena chinobva mudenga? Mvura inoomiswa ndicho kudai ngebuwe, nepadera pemikova yakadzama panoomeswa ndicho. Unokona here kusunga mwanda wenyeredzi dzeZvinyarutanhatu, nokuti kusunhura mapote enyeredzi inozwi Orioni? Ungabudisa here Mazarothi ngenguva yadzo? Nokuti ungatungamirira here Bheya nevana varo? Unozia here zviemeso zvomudenga? Ungaemesa here kutonga kwazvo munyika? Unokona here kudaidzira ngeizwi rako kumakore, kuti mvura yakawanda ikumbonye? Unokona here kutumira mheni kuti dziende, dzechiti kwouri, taapano? Ndiani wakaisa ungwaru mundau dzomukati? Nokuti ndiani wakapa kuzwisisa kunomwoyo? Ndiani unoungwaru ungaerenga uwandu hwemakore? Nokuti ndiani ungadurura nyede dzemvura dzomudenga, apo bukuta raumbana kuita maondo, nemaondo makuru abatana pamwepo? Ungakona here kuvhimira mhondoro mhuka? Nokuti kugutisa danha remhondoro itsva, apo dzinotonona mumapako adzo, nokuata pashi mundau dzakafishika kuhwarira? Ndiani unotsvakira gungu zvokudya zvaro, apo vana varo vechichema kunaMwari, vechinzerereka ngokutama zvokudya? “Unozia here mukuwo wedzinobereka ngururu dzinogara mumapuwe, nokuti kuona mhara yechibereka? Ungakona here kuerenga mwedzi yedzinopedza dzinezamu, nokuti unozia here mikuwo yedzinobereka? Dzinodzitononesa, dzechibereka vana vadzo, dzinobudisa kubanze vana vadzo. Vana vadzo vanokura vakagwinya, vanokurira mushango, vanobuda kuenda vasikachazopetuki kwedziri. Ndiani wakabudisa mbongoro yomushango kuti iende yakasunhurika? Ndiani wakasunhura zvisungo zvembongoro yomushango, iyo yendakapa mhatso yayo yeshango, ndau yebare inoita ndau yayo yokugara? Inozonda hohoho yomudhorobha; aizwi kudaidzira kweizwi romuchairi. Mumawenje emitunhu ndimwo mumbusho mwayo, nayo inotsvaka zveshe zvakasvipirira. Nyati ingatenda here kukushandira, nokuti kugara muchibaya chako usiku? Unokona here kusunga nyati ngetambo muhuro? Nokuti inotenda here kuputsaputsa maondo mubani sure kwako? Ungaigonda here ngokuti simba rayo iguru, nokuti ungasiira kweiri mushando wako here? Ungaigonda here kuti inozopetuka nokuunza kanyi zviyo zvako pambuwa yako? Maphaphiro emhowani inoahambisa ngokudakara, asi apana mhowani inokona kumbururuka. Ngokuti inosiya mazanda ayo pamavhu, kuti adziirwe mubukuta, yechiriyarwa kuti angapwanywa ngetsoka, nokuti chikara chomushango chingaatsika. Ayina nyasha kuzvitiyo zvayo, kudai ngezvisiri zvayopi; kunyazwi mushando wayo unoita usina shwiro, asi aityi ndiwo, ngokuti Mwari wakaita kuti iriyarwe ungwaru, aazi kupa chikoaniswa mukuzwisisa. Naapo peinomirudza manhenga ayo kurumba, inosheka hachi nomugadhi waro. Ndiwe here unopa hachi simba raro? Ndiwe here wakapfekesa mutsipa waro ngezenzere? Unoita here kuti ritomuke kudai ngendongwe? Kutinhira kwemiro yaro kunotyisa. Rinokwara pashi ngesimba mubani, rechidakara musimba raro; rinoenda kooshongana nevamuna vakapakatira zvokurwa. Rinosheka kutya, arityi; aripetuki sure kubva kushoti. Padera paro pane chikomwe chinorira, mukhondo unon'anikira nechimukhondo chokuposhera. Ngokutyisa noushungu rinomedza mavhu; arigari rakaema ngokuridzwa kwegwama. Mukuwo weshe werinoridzwa gwama rinoti, ‘Ha, ha!’ Rinofema mwema wehondo iri kuretu, kutinhira kwenduna, nokudaidzira. Chikodzi chinombururuka ngoungwaru hwako here, chechitambanudzira maphaphiro acho kubani? Dorambudzi rinombururuka kukwira mudenga ngokupanga kwako here, rechiaka chisaki charo mudengadenga? Rinogara padera pebuwe, naro rinoita muzi waro padera paruware rwebuwe mubako. Kubvira periripo rinodongorera zvokubata; madziso aro anoona zviri kuretu. Vana varo vanosvuta ngazi; naapo pane chakaurawa ndipo periri.” Mambo Mwari wakati kunaJobe, “Uwo unotsvaka ndaa unophikisana noUwo Une-simba-reshe here? Weshe unoita hasha naMwari, ngaapingure.” Zvino Jobe wakapingura Mambo Mwari echiti, “Ringira, inini ndiri mudoko; chiinyi chendingakupingura? Ndinofumbata muromo wangu. Ndaereketa kamwe, neni andichapinguri; kairi, asi andichazoangiri.” Zvino Mambo Mwari wakamupingura Jobe kubva ari muchamupupuri echiti, “Sunga chiunu chako kudai ngomwamuna; ndinozobvunza kwouri, newe undipingure.” Unozondiisawo mukushata here? Unozondiitira ndaa here, kuti iwewe uite wakarurama? Unomuoko here wakadai ngowaMwari? Newe ungakona kutinhira here ngeizwi rakadai ngerake? Dzisimidze zvino ngoumambo nembiri; udzifukidze ngouthende nounaku. Durura ushungu hwako huzhinji hunofashukira, uringire veshe vanodzikudza uvapfaise. ringira kwevari veshe vanodzikudza, uvadzase pashi; paradza vakashata apo pevakaema. Vafushire pamwepo mubukuta; usunge hope dzavo mundau dzakafishika. Zvino ininiwo ndinozotenda kuti nyara yako yokumudyo inokona kukupa kunyisa. Ringira zvino chikara chendakaita kudai ngezvendakakuita iwewe; chinodya mwenje kudai ngekabi. Simba racho riri muchiunu chacho, nokugwinya kwacho kuri mumidzira yomukumvu wendani yacho. Chinoemesa mumwe wacho kudai ngomuti womusidhare; midzira yenhunji dzacho yakarukwa pamwepo. Magodo acho akadai ngethumbu rethusi, nenhii dzacho dzakadai ngemigogo yesimbi. Ndiwo wokutanga mushando mukuru waMwari; musiki wacho ndiye ega ungaita kuti shoti yake ichiuraye. Ngokuti mitunhu inochibudisira zvokudya, apo mhuka dzeshe dzomushango dzinotamba. Chinoata pashi pemiti yerothusi, mukufukidzwa ngetsanga nenhokwe. Miti yerothusi inochifukidza ngemabvute ayo; misambagwena yomumukova inochitendenedza. Kunyazwi rwizi rwechierera padera pacho, achityiswi; chinoshinga kunyazwi Jorodhani rukazara kuguma kumuromo wacho. Uripo here ungachibata ngechiedzo nokuti ungadura miro yacho ngechiedzo? Ungakona here kubata Revhiathani ngechiedzo, nokuti kutsikirira rurumi rwacho ngokudzasa tambo? Ungaisa here tambo mumiro yacho, nokuti kubaya matama acho ngechiedzo? Chinozokupota kakurutu here? Chinozoereketa mazwi akapfaa kwouri here? Chinozoita chitenderano newe here? Unozochitora here kuchiita muranda wako mhera nariini? Unozotamba nacho kudai ngeshiri, nokuti kuzochisungira kuti vasikana vako vatambise here? Vatengesi vangabhuirana mutengo here? Vangaikoanisa here pakati pevatengesi? Ungakona here kuzadza ganda racho ngemipome, nokuti soro racho ngemikondo yehove? Isa nyara padera pacho; pinimidza ngokurwa, auzozviitizve. Ringira, gonda rokuchibata rinosvipisa mwoyo; munhu aazokandirwi pashi here ngokutyiswa ngokuchiona kwega? Akuna naumwe ungashinga kuchikarudza. Ndiani ungashinga kuema pamberi pacho? Ndiani ungaambana neni akapona? Izvo zveshe zviri pashi pedenga ngezvangu. “Andizonyarari kuronza nhengo dzacho, nokuti simba racho guru, nokuti chiemo chacho chakanaka. Ndiani ungakona kudusa chokufuka chacho chokubanze, nokuti ndiani ungaisa matomu mumuromo mwacho? Ndiani ungakona kubeura misiwo yehope yacho? Mazino acho akatendenedzwa ngokutyisa. Chinodzikudza ngemagwamba acho arimumusara, akanamatira pamwepo kudai ngeakanamirwa ngechinamiso. Rimwe rakatsikana nerimweni, akarimbana pamwepo kuti nemweya aungapoteri pakati pawo. Akarundana rimwe panerimweni, akarimbana pamwepo, aangakoni kubadzurwa. Kuotsira kwacho kunobudisa kujeka, nemadziso acho anojeka kudai ngetsiyo dzemwaringa yemangwanani. Kubva kumuromo wacho kunobuda masasi anobaka, netsatsi dzomuriro dzinotomuka. Chiushi chinobuda kubva mumiro mwacho, kudai ngechinobuda muhari inoira netsanga dzinobaka. Femero racho rinobasira masimbe, nomurazvu unobuda kubva kumuromo wacho. Mumutsipa mwacho munogara simba, nokutyisa kunotamba pamberi pacho. Maonya enyama yacho akaumbana pamwepo; yakaumbwa ngokugwinyisa; aingatsukunuswi. Mwoyo wacho wakaoma kudai ngebuwe; wakaoma kudai ngeguyo. Apo chechidzimirudza pachacho, vanesimba vanotya; pakuparadzwa vari pasinde pachavo. Kunyazwi shoti yechigumira kuchibaya, aingachikoni, nokuti mukhondo, nokuti mukhondo wokuposhera. Chinoerenga simbi kuti yakadai ngetsengwe, nethusi kuti yakadai ngomuti wakaora. Musee aungaiti kuti chitize; mapuwe anoposherwa ngechimvii kwechiri, anodai ngezungu. Nduku inoerengwa kuti yakadai ngemakoto; chinosheka kurira kwomukhondo wokuposhera. Pashi pacho pakadai ngezviwenda zvinopinza; chinodziparadzira kudai ngechirei chepambuwa. Chinoita kuti ruandhle rwakadzama ruire kudai ngehari; chinoita kuti ruandhle rudai ngenhera yemafuta. Chinosiya musara wemvura unopenya sure kwacho; munhu ungapinimidza kuti ruandhle rwakadzama rwakachena bvudzi. Padera penyika apana chakatodzana nacho, chisikwa chisina kutya. Chinoringira zveshe zvakakwirira; ndimambo padera pazvo zveshe zvinodzikudza.” Zvino Jobe wakapingura Mambo Mwari akati, “Ndinozia kuti iwewe unokona kuita chiro cheshe, nokuti akuna chiro chounoemesa iwewe chingarambidzwa. ‘Ndiani uwo unofisha kupanga asina kuzia?’ Ndizvo ndaereketa izvo zvendisikazi kuzwisisa, zviro zvinonyanya kushamisa kwendiri, zvendisikazi kuzia. ‘Izwa, ndichaereketa; ndichakubvunza, newe uchandironzera.’ Ndakazwa ndiwe ngokuzwa kwenzee, asi zvino madziso angu anokuona. Ndizvo ndinodzishoora pachangu, ndinotenderuka mubukuta nomumarota.” Ngesureni Mambo Mwari aereketa aya mazwi kunaJobe, Mambo Mwari wakati kunaErifazi muThemani, “Ushungu hwangu hunobaka kwouri, nokunevangani vako vairi; ngokuti amuzi kuereketa ndini chiro chakanaka, kudai ngezvaakaita muranda wangu Jobe. Ndizvo zvino, torai mikono minomwe nemagondohwe manomwe, muende kunomuranda wangu Jobe, mupire pachenyu mudiro wokupisha; nomuranda wangu Jobe unozomukumbirira, ngokuti ndinozoashira mukumbiro wake kuti ndisazoita kwomuri kudai ngoupenzi hwenyu; ngokuti imwimwi amuzi kuereketa ndini zvakarurama, kudai ngezvaitwa ngomuranda wangu Jobe.” Ndizvo Erifazi muThemani, naBhiridhadhi muShuhi, naZofa muNaamathi, vakaenda, vakaita kudai ngezvaakapanga Mambo Mwari kwevari; naMambo Mwari wakaashira mukumbiro waJobe. Mambo Mwari wakahwirinza upfumi hwaJobe, apo akakumbirira vangani vake; naMambo Mwari wakapa kunaJobe zvakahwirinzirwa kairi kupinda izvo zvaaiya nazvo pakutanga. Zvino kwakauya kwaari dzeshe hama dzake, vamuna nevakadzi, naavo veshe vaiziyana naye karetu, vakadya kudya naye mumhatso mwake; vakatsumba naye, vakamuembedzera ngendaa yokushata kweshe kwaiya kwaunzwa padera pake ndiMambo Mwari; nomunhu weshe wavo wakamupa chigurwa chemare nendandazi yomukore. Ndizvo Mambo Mwari wakafumisa mazuva okugumisira aJobe kupinda maambo ake; naye waiya anegumi nemarongomuna emakumi emazana (14,000) emakwai, makamera makumi emazana matanhatu (6,000), kabi gumi remazana (1,000) nembongoro gumi remazana (1,000) zvinobereka. Wakaazve nevakororo vanomwe nevasikana vatatu. Naye wakadudza zina redangwe kuti Jemima, rewaiteera Kezia, nezina rowechitatu Kereni-hapukhi. Munyika yeshe akuzikuoneka mudzimai naumwe waiya akanaka kudai ngevanasikana vaJobe; nababa avo vakavapa mhaka pamwepo nevakoma vavo. Ngesure kweizvi Jobe wakapona makore zana nemakumi marongomuna (140), wakaona vana vake, nevana vavo, metsa kuguma kumubarirwana wechirongomuna. Ndizvo Jobe wakafa, aamusharuka wazara ngamazuva. Unomuchena munhuwo usikahambi ngokupanga kwevakashata, usikaemi munjira yevashaishi, usikagari pachigaro chevaangarari; asi kudakara kwake kuri mumupango waMambo Mwari, unopinimidza ngomupango wake masikati nousiku. Naye unozodai ngomuti wakasimwa pasinde pemigero yemvura, unobara michero yawo ngenguva yawo, mashakani awo aazofoti. Zveshe zvaanoita, unozobudirira. Vakashata avazi kudaropi, asi vakadai ngezungu rinotorwa ngedutu. Ndizvo vakashata avazoemi mukutongwa, nokuti vashaishi mumushongano wevakarurama; ngokuti Mambo Mwari unozia njira yevakarurama, asi njira yevakashata inozopera. Ngenyi madzinza echironga kumukira nevanhu vechipinimidza chiro chisina shwiro? Madzimambo enyika anodziemesera pachawo, nevatongi vechipangana pamwepo, kurwa naMambo Mwari nowakadzodzwa wake vechiti, “Ngatidambure zvisungo zvavo, tirashe mapote avo, abve kwetiri.” Iye unogara mumatenga unosheka; Mambo Mwari unozovatsverudza. Zvino unozoereketa kwevari muushungu hwake, nokuvakarudza mukushishwa kwake kukuru echiti, “Ndagadza mambo wangu paZioni, pamutunhu wangu wakachena.” Ndinozoronza chiemeso chaMambo Mwari: Wakati kwendiri, “Iwewe uri mukororo wangu; nyamashi ndakubara. Kumbira kwendiri, neni ndinozokupa madzinza kuita nhaka yako, nemagumo enyika kuita pfuma yako. Unozovaputsa ngendonga yesimbi, unozovaputsa kuita zvigurwa kudai ngehari yomuumbi.” Ndizvo zvino ngwarai, imwimwi madzimambo; munyowedzwe, imwimwi vatongi venyika. Shandirai Mambo Mwari ngokutya, mwechihuta. Muchingamidzei mukororo ngomuromo, kuti asazonyangadzwa nemwi mupere munjira; ngokuti ushungu hwake hunokasira kubaka. Vanomuchena veshe vanoponera mwaari. Nduyo yaDhavhidha apo paakatiza mukororo wake Abhusaromu. Mambo Mwari, kuwandanyi kwaakaita magaa angu! Vazhinji vanondimukira. Vazhinji vanoti kwendiri, “Amuna kudetserwa kweuri munaMwari.” Selah. Asi iwewe, Mambo Mwari, uri chihlangu chinonditendenedza, uthende hwangu, nounomirudza soro rangu. Ndinochema ndechidaidzira kunaMambo Mwari, naye unondipingura ari padunhu rake rakachena. Selah. Ndinoata pashi ndiate hope; ndinomukazve, ngokuti Mambo Mwari unondigwinyisa. Andityi vanhu makumi gumi emazana, avo vadziemesera kundimukira vanditendenedza. Miruka, Mambo Mwari! Ndiponese, Mwari wangu! Ngokuti unomakaya magaa angu eshe parutsaya; unogura mazino evakashata. Ruponeso runobva kunaMambo Mwari; rufumiso rwako ngarugare padera pevanhu vako. Selah. KuneMutungamiriri woKuemba, neZvidangari. Nduyo yaDhavhidha. Ndipingure apo ndoodaidza, A Mwari wokururama kwangu! Wakandisunhura apo pendaitambudzika. Ndiitire nyasha, uzwe mukumbiro wangu. Imwimwi vakororo vevanhu, kukudzwa kwangu kunozopindurwa kuita chimene mukuwo wakaitawani? Munozoda mazwi asina shwiro mukuwo wakaitawani, nokutsvaka manyepo? Selah. Asi ziai kuti Mambo Mwari wakadzipaurira pachake vakagondeka; Mambo Mwari unozozwa apo pendinomudaidza. Tsenekai, musashaisha; pinimidzai ndizvo muri mumibhedhi yenyu, munyarare. Selah. Ipai midiro yakarurama, mugonde munaMambo Mwari. Varipo vazhinji avo vanoti, “A, kuti tione zvakanaka! Mambo Mwari, mirudza kujeke kwehope yako kujeka padera pedu!” Wakaisa kudakara mumwoyo mwangu, kupinda nguva apo zviyo zvavo nevhini ravo zvaiwanzwa. Ndinozoata pashi ndechiata hope mukunyarara; ngokuti iwewe wega, Mambo Mwari, unoita kuti ndiate pashi mukungwaririka. KuneMutungamiriri woKuemba, neMinanzi. Nduyo yaDhavhidha. Izwa mazwi angu, A Mambo Mwari; purutana kugwimba kwangu. Purutana izwi rokuchema kwangu, Mambo wangu naMwari wangu, ngokuti ndinokumbira kwouri. Mambo Mwari, unozwa izwi rangu mumangwanani; mumangwanani ndinounza mukumbiro wangu kwouri, nokurinda. Ngokuti iwewe ausiri Mwari unodakara ngezvakashata; kushata akuzogari newe. Vanodzikudza avazoemi pamberi pemadziso ako; unozonda veshe vanoita zvakashata. Unoparadza avo vanoereketa manyepo. Mambo Mwari unonyangadzwa ngounenyota yokuparadza ngazi, nounochengedza. Asi inini ndinozopotera mumhatso mwako ngouwandu hwenyasha dzako dzinorudo. Ndinozogwadama ndakaringira kutemperi rako rakachena mukukutya. Nditungamirire, Mambo Mwari, mukurururama kwako ngendaa yemagaa angu; njira yako ngairurame pamberi pehope yangu. Ngokuti amuna gwinyiso mumiromo yavo; mwoyo yavo inoparadza; huro dzavo makuva akabeuka; vanoradzikidza ngorurumi rwavo. Ita kuti vatware ndaa dzavo, A Mwari; ngavawe ngebangano ravo; vasukumidzire kubanze ngendaa youwandu hwokupauka kwavo, ngokuti vakakumukira. Asi ngavadakare veshe vanogonda mweuri; ngavagare vechiemba ngokudakara. Tambanudza kungwarira kwako padera pavo, kuti avo vanoda zina rako vadakare mweuri. Ngokuti iwewe unozofumisa vakarurama, Mambo Mwari; unozovafukidza ngenyasha kudai ngechihlangu. KuneMutungamiriri woKuemba, neZvidangari. Nduyo yeMazembera yaDhavhidha. Mambo Mwari, usandikaraidza muushungu hwako, nokuti kundiorora mukunyangadzwa kwako. Ndiitire nyasha, A, Mambo Mwari; ngokuti ndapererwa; A Mambo Mwari, ndiponese, ngokuti magodo angu anohuta ngokutya. Mweya wangu unobatwazve ngokutya, apo iwewe, A Mambo Mwari, unozononoka metsa riini? Petuka, A Mambo Mwari, ununure mweya wangu; ndiponese ngendaa yenyasha dzako dzinorudo. Ngokuti murufu amuchina unomukarakadza; muSheori ndiani ungakona kumukudza? Ndaremba ngokugwimba kwangu; ndinonyakatisa mubhedhi wangu ngemasodzi usiku hweshe; ndinochururisa mubhedhi wangu ngemasodzi angu. Madziso angu anotsakara ngokutambudzika; anopera simba ngendaa yemagaa angu eshe. Ibvai kwendiri, imwimwi mweshe vashandi vezvakashata, ngokuti Mambo Mwari wazwa izwi rokuchema kwangu. Mambo Mwari wazwa kupota kwangu; Mambo Mwari unoashira mukumbiro wangu. Magaa angu eshe anozotsverudzwa nokubatwa ngokutya; anozohwirira sure nokutsverudzwa ngokukasira. Nduyo yaDhavhidha iyo yaakaemba kunaMambo Mwari ngendaa yaKhushi muBhenjamini. A Mambo Mwari, Mwari wangu, ndinohwara mwouri; ndiponese kubva kuneavo veshe vanondirumbirira, undinunure, nokuti kudai ngemhondoro vanozonditatura, vechindikweya, pasina wokununura. A Mambo Mwari, Mwari wangu, kudai ndaita ichi, kudai kuripo kushata munyara dzangu, kudai ndaunzidzira ngezvakashata kuneuwo waigarisana neni, nokuti kuchakata gaa rangu pasina ndaa, zvino gaa ngarindirumbirire rindibate, ngaritsikatsike ndaramo yangu mumavhu, riise mweya wangu mubukuta. Selah. Miruka, Mambo Mwari, muushungu hwako; dzimirudze pachako kurwisana noushungu hwemagaa angu; muka, A Mwari wangu; wakaemesa kutonga. Mushongano wevanhu ngaukuunganire, nepadera pavo gara padendemaro rako. Mambo Mwari unotonga vanhu; nditonge, A Mambo Mwari, kudai ngokururama kwangu, nokudai ngegwinyiso riri mukati mwangu. A kushata kwevakashata ngakupere, asi iwewe gwinyisa vakarurama, A Mwari wakarurama, iwewe uwo unoedza mipinimidzo nomwoyo. Mwari chihlangu changu uwo unoponesa vakarurama mumwoyo. Mwari mutongi wakarurama, naMwari unotsenekera vakashata mazuva eshe. Kudai munhu asikatenderuki, Mwari unozorodzera shoti yake; wakakotamisa uta hwake, akahukunga. Wakadzinasirirawo mapfumo anouraya; unoitira misee yake tsanga dzomuriro. Ringirai, vanokarakadza ngezvakashata, nokuita mimba yezvakashata, vakabara manyepo. Vakatsa hunza, vakaivhera mavhu, nokuwira muhunza yevakatsa. Kuangarara kwavo kunozopetuka pamasoro avo, nokugebenga kwavo kunozodzaka pamasoro avo. Ndinozobonga Mambo Mwari kudai ngokurururama kwake, ndinozoemba kukudza Mambo Mwari uri padera pezveshe. KuneMutungamiriri woKuemba. Nduyo yaDhavhidha. A Mambo Mwari, Mambo wedu, kukudzwanyi kunoitwa zina rako munyika dzeshe! Wakaemesa uthende hwako padera pematenga. Kubuda kumiromo yevana neyechiya wakadziemesera kuirikidzwa ngendaa yemagaa ako, kunyaradza gaa nomuunzidziri. Naapo ndechiringira kumatenga ako, mishando yezvinwe zvako, mwedzi nenyeredzi zvowakaemesa; munhu uri chiinyi kuti ukarakadze ndiye, mukororo womunhu kuti upinimidze ndiye? Asi wakamuita mudoko ari pashi kunaMwari, wakamupfekedza ngedzungudza routhende nokuremeredzwa. Wakamuita kuti atonge padera pemishando yenyara dzako; ukapfaisa zviro zveshe pashi petsoka dzake, makwai eshe nen'ombe dzeshe, nezvikarawo zvomushango, shiri dzomudenga nehove dzomuruandhle, cheshe chinohamba ngomunjira dzomuruandhle. A Mambo Mwari, Mambo wedu, kukudzwanyi kunoitwa zina rako munyika dzeshe! KuneMutungamiriri woKuemba, ngendaa yoRufu rwoMukororo. Nduyo yaDhavhidha. Ndinozobonga Mambo Mwari ngomwoyo wangu weshe; ndinozoronza ngemishando yako yeshe inoshamisa. Ndinozodakara nokudakadzwa mweuri; ndinozoemba kukudza zina rako, iwewe Uri-padera-pezviro zveshe. Naapo magaa angu apetuka, anozopumhunwa echipera kufa ngokuapo kwako. Ngokuti wakaemerera kururamisa ndaa yangu; wakagara padendemaro wechitonga ngokururama. Wakakaraidza madzinza, ukaparadza vakashata; wakatsukutidza zina ravo mhera nariini. Magaa aparara mhera nariini; wakabvita madhorobha avo, nokukarakadzwa kwavo kwakapera. Asi Mambo Mwari unogara ari Mambo mhera nariini, wakaemesa dendemaro rake kutonga. Unotonga nyika ngokururama, unotonga vanhu ngokururamisa. Mambo Mwari rusvingo rwakagwinya kunevanotambudzwa, rusvingo rwakagwinya panguva yokutambudzika. Naavo vanozia zina rako vanozogonda mwouri, ngokuti iwewe, Mambo Mwari, auzi kuvasiya avo vanokutsvaka. Embai nduyo kukudza Mambo Mwari, uwo unogara muZioni. Teketesai zviito zvake pakati pevanhu. Uwo unounzidzira ngazi unovakarakadza; aariyarwi kuchema kwevanotambudzwa. Ndiitire nyasha, A Mambo Mwari; ringira dambudzo rangu rendinotambudzwa ndivo vanondizonda; ndiwe umwe unondimirudza kubva pamisiwo yorufu, kuti ndironze kukudzwa kwako kweshe, nokudakara muruponeso rwako mumisiwo yemwanasikana weZioni. Madzinza akanzvaira muhunza yaakatsa; tsoka dzavo dzakabatwa mumumbure waakafisha. Mambo Mwari wakadziziisa pachake, ngokutonga kwake kwakarurama; vakashata vanoteiwa ngemishando yenyara dzavo. Selah. Vakashata vanozoenda kuSheori, madzinza eshe anoriyarwa Mwari. Ngokuti vatami avazogari vechiriarikanwa, negondero revarombo arizoperi mhera nariini. Miruka, A Mambo Mwari! Usatenda kuti munhu akunyise; madzinza ngaatongwe pamberi pako. Vatyise, A Mambo Mwari; madzinza ngaazie kuti vanhutu kwega. Selah. Unoemerenyi kuretu, A Mambo Mwari? Unodzifishirenyi ngenguva yokutambudzika? Wakashata mukudzikudza kwake unotambudza varombo; ngaabatwe ngemazano aakaronga. Ngokuti wakashata unoganza ngokuemura kwomwoyo wake, nomuemuri unoramba, unosvisva Mambo Mwari. Wakashata ngokudzikudza kwehope yake unoti, “Mwari aazondibvunzi.” Mikarakadzo yake yeshe inoti, “Akuna Mwari.” Njira dzake dzinobudirira nguva dzeshe; zvitongero zvake zvakaturama kwakadai, madziso ake aazvioni; magaa ake eshe anomunjenamira. Unopinimidza mumwoyo mwake, “Andizotsukunuswi; mumibarirwana yeshe andizooni dambudziko.” Muromo wake wakazara ngokutuka, kuchengedza nokutambudza; pashi porurumi rwake pano kuangarara nokushaisha. Unogara mundau dzokuhwarira dzomumaguta; mundau dzakafishika unouraya vasina ndaa. Madziso ake anozvaura vasina simba ngokufishika. Unohwarira pakasitika kudai ngemhondoro iri muchikwasha chayo. Unohwarira kubata varombo; unobata varombo echivakweya ngomumbure wake. Unondondera, unokotama, kuti usina simba arigwe ngevanesimba vake. Unoti mumwoyo mwake, “Mwari wariyarwa; wafisha hope yake, aazozvioni mhera nariini.” Miruka, A Mambo Mwari; A Mwari, mirudza nyara yako; usariyarwa vakatsikirirwa. Chiinyi kuti wakashata ashoore Mwari, unoti mumwoyo mwake, “Aazotibvunzi?” Asi iwewe unoona! Ngegwinyiso unoona dambudziko nokuchema, kuti ukutore munyara dzako; usina simba unodzipira kwouri; iwewe waiya mudetseri wenherera. Gura maoko owakashata nounoita zvakashata; tsvakisisa kushata kwake metsa ukutame. Mambo Mwari ndiMambo mhera nariini; madzinza anozopera kubva munyika yake. Mambo Mwari, unozozwa chidisiso chevakapfaa; unozogwinyisa mwoyo yavo, unozoita kuti nzee yako izwe kuti mutongere nherera nevanotambudzwa, kuti munhu uri munyika asachatyisa. KunaMutungamiriri woKuemba. Nduyo yaDhavhidha. Ndinohwara munaMambo Mwari; munozoita maronzerenyi kwendiri, kuti, “Tizira kumatunhu kudai ngeshiri. Ngokuti ringira, vakashata vakunga uta, vakhoka misee yavo parusinga, kuti vafure vakarurama mumwoyo muchidima. Kuti madzeyo aputswa, vakarurama vangachaitenyi?” Mambo Mwari uri mutemperi rake rakachena; Mambo Mwari, chigaro chake choumambo chiri mudenga. Madziso ake anoringira, tsiyo dzake dzinoedza vana vevanhu. Mambo Mwari unoedza vakarurama nevakashata; nomweya wake unozonda avo vanoda kugebenga. Unozonaisa masimbe omuriro nesorufu padera pevakashata; nedutu rinopisha rinozoita chikoaniswa chetsani yavo. Ngokuti Mambo Mwari wakarurama; unoda zviito zvakarurama; vakarurama vanozoringira hope yake. KuneMutungamiriri woKuemba. Nduyo yaDhavhidha. Detsera, Mambo Mwari, ngokuti apachina naumwe unoda Mwari; vakagondeka vanyangarika kubva pakati pevana vevanhu. Vanoereketa manyepo umwe kuneumweni; ngemiromo inochengedzera, nomwoyo miiri vanoereketa. Mambo Mwari ngaagure miromo yeshe inochengedzera, nendimi dzinoereketa kudzikudza kwakakura, avo vanoti, “Ngorurumi rwedu tinozonyisa; miromo yedu ngeyedu; ndiani uri mambo wedu?” “Ngendaa yokutambudzwa kwevarombo, nokufemurika kwevatami, ndomiruka zvinopano,” unoronza Mambo Mwari. “Ndinozovaisa mukungwaririka ukwo kwevanodisisa.” Zvigondiso zvaMambo Mwari zvigondiso zvakaperera; zvakadai ngesirivha yakanyunguruswa pachoto panyika, yakaereswa kanomwe. Iwewe, Mambo Mwari, unozotingwarira, unozotirwira kubva muzero iro metsa nariini. Parupande rweshe vakashata vanonyangwira, apo kugebenga kwechikudzwa pakati pevakororo vevanhu. KuneMutungamiriri woKuemba. Nduyo yaDhavhidha. A Mambo Mwari, unozondiriyarwa nguva yakadini? Metsa nariini here? Unozofisha hope yako kubva kwendiri nguva yakaitawani? Ndinozorwadziwa mumweya mwangu nguva yakadini, nokutambudzika mumwoyo wangu zuva reshe here? Gaa rangu rinozomirudzwa padera pangu nguva yakadini? Karakadza undipingure, Mambo Mwari, Mwari wangu! Jekisa madziso angu nokuti ndinozoata hope dzokufa, negaa rangu rinozoti, “Ndamunyisa,” nemagaa angu anozodakara apo ndatsukunuswa. Asi ndakagonda murudo rwako rwakagwinya; mwoyo wangu unozodakara muruponeso rwako. Ndinozoemba kunaMambo Mwari, ngokuti wakandiitira zvakawanda. KuneMutungamiriri woKuemba. Nduyo yaDhavhidha. Benzi rinoti mumwoyo mwaro, “Akuna Mwari.” Vakaora, vakaita mishando inonyangadza; akuna naumwe unoita zvakanaka. Mambo Mwari unoringira pashi kubva mugore padera pevana vevanhu, kuona kuti uripo here wakangwara, unotsvaka Mwari. Veshe vakapauka, veshe vanetsvina; akuna naumwe unoita zvakanaka, haiwa, akuna naumwe hake. Veshe vashandi vezvakashata avana kuzia here, avo vanodya vanhu vangu kudai ngevanodya chingwa, navo avakumbiri kunaMambo Mwari? Apo vanozoa mukutya kukurutu, ngokuti Mwari uri muchikwata chevakarurama. Munotsverudzisa bangano romurombo, asi Mambo Mwari uri bako rake. A, kudai ruponeso rwaIsuraeri rwaiuya kubva Zioni! Apo Mambo Mwari oopetudza upfumi hwevanhu vake, Jakobe unozodakara, Isuraeri unozodakadzwa. Nduyo yaDhavhidha. Mambo Mwari, ndiani ungagara mutende rako? Ndiani ungagara mudunhu rako rakachena? Uyo unohamba ngokururamisa, nokuita zvakarurama, echiereketa gwinyiso mumwoyo mwake, usikareyi ngorurumi rwake, usikaitiri shamwari yake zvakashata, nousikatsverudzi muakirwana wake, uwo mukuona kwake wakashata unoshoorwa, asi uwo unoremeredza avo vanomutya Mambo Mwari, uwo unoti anyapika ngechinomuremadza, aakunukuki, usikakweretesi mare yake kuti auyirwe, nousikaashiri chitengero chokurwisa usina ndaa. Uwo unoita izvi aazotsukunuswi nariini. Nduyo yaDhavhidha. Ndingwarire, A Mwari, ngokuti ndinohwara mwouri. Ndinoti kunaMambo Mwari, “Iwewe ndiwe Mambo wangu; andina chakanaka ngepabanze pako.” Ngendaa yevakacheneswa vari munyika, ndivo vakuru, kudakara kwangu kweshe kuri mwevari. Avo vanotsara mwari umweni vanowandisa madambudziko avo. Midiro yavo yokumwa yengazi andizoidururi, nokuti kuronza mazina avo ngemiromo yangu. Mambo Mwari uri chikoaniswa chenhaka yangu, nechetsani yangu; unogwinyisa nhaka yangu. Bote rokupimisa randipimira ndau dzakanaka; ndinayo nhaka yakanaka. Ndinokudza Mambo Mwari unondipanga; nepanguva dzousiku mwoyo wangu unondidzidzisa. Ndinotungamidza Mambo Mwari pamberi pangu nguva dzeshe. Ngokuti uri ngokumudyo kwangu, andizotsukunuswi. Ndizvo mwoyo wangu unodakara nomweya wangu unodakara; muiri wanguzve unozogara muugaro hwakangwaririka, ngokuti iwewe auzosiyi mweya wangu muSheori, auzotenderizve Wakachena wako kuti awore. Unondionisa njira yokupona; mukuapo kwako kwakazara ngokudakara kweshe. Mumuoko wako wokumudyo muno kudakara kunoti mhera nariini. Mukumbiro waDhavhidha. Izwa ndaa yakarurama, A Mambo Mwari, purutana kuchema kwangu. Izwa mukumbiro wangu usikabudi ngomuromo unochengedzera. Kutongwa kwangu ngakubve kwouri; madziso ako ngaaone kururama. Kudai wechiedza mwoyo wangu, kudai ukandihambira usiku, kudai wechindiedza, auzooni kushata kwendiri; ndakagura kuti muromo wangu usashaisha. Ngendaa yemishando inoitwa ngevamweni, ngeizwi remiromo yako ndakadzingwarira kubva munjira yezvigebenga. Zvitsiko zvangu zvakarambira munjira dzako, tsoka dzangu adzizi kutedzuka. Ndinodaidzira kwouri, ngokuti unozondipingura, A Mwari; ungamisira nzee yako kwendiri, uzwe mazwi angu. Onisa nyasha dzako dzinoshamisa dzinorudo, iwewe muponesi wevanotsvaka kuhwara kubva kumagaa avo ngenyara yako yokumudyo. Ndingwarire kudai ngemboni yedziso; ndifishe pashi pomumvuri wemaphaphiro ako, kubva kunevakashata avo vanonditambudza, nokumagaa angu anouraya, anonditendenedza. Vanokonya mwoyo yavo kuti vasaita nyasha, vanoereketa kudzikudza ngemiromo yavo. Vanondirumbirira, vanondikomba; vanobeura madziso avo kutirigira pashi pamavhu. Vakadai ngemhondoro inokarira nyama yayo, kudai ngemhondoro itsva inohwarira muugaro hwakafishika. Miruka, A Mambo Mwari, uemesedzane navo, uvarige pashi. Nunura mweya wangu kubva kunevakashata ngeshoti yako, kubva kunevanhu ngenyara yako, A Mambo Mwari, kubva kunevanhu vomunyika, avo chikoaniswa chokupona kwavo chiri chomunyika ino. Ndani dzavo ngadzizadzwe ngoupfumi hwako hwewakavangwaririra. Vana vavo ngavapuwe zvakawandisa; ngavasiire vana vavo vadoko zvakasara. Asi pachangu ndinozoona hope yako mukururama; ndinozokwaniswa apo ndoomuka ndechiona chiemo chako. KuneMutungamiriri woKuemba. Nduyo yaDhavhidha, Muranda waMambo Mwari. Wakaemba KunaMambo Mwari mazwi enduyo iyi, apo Mambo Mwari wakamununura kubva kunyara dzemagaa ake eshe nokubva kunyara yaSauri. Ndinokuda, A Mambo Mwari, simba rangu. Mambo Mwari ibuwe rangu, norusvingo rwangu, nomununuri wangu, Mwari wangu, buwe rangu umwo mwendinohwara, chihlangu changu, norunyanga rworuponeso rwangu, rusvingo rwangu rwakagwinya. Ndinodaidza kunaMambo Mwari uwo unosisira kukudzwa; ndizvo ndinozoponeswa kubva kumagaa angu. Mapote orufu akandikomba; maguwe okushata akandimbonya. Mapote eSheori akandipombera; mirau yorufu yandiringira. Mukutambudzika kwangu ndakadaidzira kunaMambo Mwari; ndakachemera rudetso kunaMwari wangu. Wakazwa izwi rangu ari mutemperi rake, nokuchema kwangu pamberi pake kwakazwika munzee dzake. Zvino nyika yakazungunyika, ikatengendeka; nemadzeyo emitunhu akatengendekawo akangundangunda, ngokuti waiya anyangadzwa. Chiushi chapwititika kubva mumiro dzake, nomuriro unoparadza kubva mukanwa mwake, masimbe akabaka kubva kwaari. Wakabaura matenga, akadzaka pashi; chidima chakapetwa chakaa pashi petsoka dzake. Wakagadha padera pekherubhi, akambururuka; wakambururuka ngokukasira ari padera pemaphaphiro edutu. Wadzifukidza ngechidima chakamutendenedza, chokufuka chake makore akakora akasvipa ngechidima chemvura. Kubva mukujeka kwaiya pamberi pake kwakabuda kubva pakati pemakore ake matsanza nemasimbe omuriro. Mambo Mwari wakatinhirawo ari mugore, noUri-padera-pazveshe wakaereketa izwi rake, matsanza nemasimbe omuriro. Wakaposhera misee yake akavaparadza; ngokupenya kwemheni dzakawanda, wakavanyisa. Zvino migero yemvura yakaoneka, nemadzeyo enyika akabudiswa pamhene ngokukaraidza kwako, Mambo Mwari, ngokuotsirwa kwomweya wemiro dzako. Wakaguma pashi kubva mudenga, akanditora; akandinyura kubva mumvura inesimba. Wakandinunura kubva kugaa rangu rinesimba, nokubva kuneavo vaindizonda, ngokuti vaindikurira yaamho. Vakandigumira ngezuva rokukakaseka kwangu; asi Mambo Mwari wakaita mugwinyisi wangu. Wakandiunza muugaro hwakafara; wakandinunurira ngokuti wakadakara ndini. Mambo Mwari wakandiitira kudai ngokururama kwangu; wakandipa musharo kudai ngokuchena kwenyara dzangu. Ngokuti ndakangwarira njira dzaMambo Mwari, andizi kupauka kuita zvakashata kubva kunaMwari wangu. Ngokuti zvitongero zvake zveshe zvaiya pamberi pangu, andizi kurasha zviemeso zvake kubva kwendiri. Ndaiya ndakaperera pamberi pake, ndakadzingwarira pachangu kubva mukushata. Ndizvo Mambo Mwari wakandipa musharo kudai ngokururama kwangu, kudai ngokuchena kwenyara dzangu mukuona kwake. Kunouwo wakagondeka, iwewe unozodzionesa uri wakagondeka; kunomunhu wakaperera, unozodzionesa pachako uri wakaperera. Kunouwo wakacheneswa unozodzionesa pachako uri wakashata. kunomupauki unozodzionesa uri unopesana. Ngokuti unoponesa vanhu vakapfaa; asi unodzasa pashi madziso anodzikudza. Ndiwe unobasira chibani changu; Mambo Mwari, Mwari wangu, unojekisa chidima changu. Kubudikidza ndiwe ndinoparadza hondo; nokubudikidza ndiMwari wangu ndinodarika rukumbati. Uyu Mwari, njira yake yakaperera; chigondiso chaMambo Mwari chiri gwinyiso; uri chihlangu kwevari veshe vanohwara mwaari. Ngokuti ndiani Mwari ngokubanze kwaMambo Mwari? Ndiani uri buwe ngokubanze kwaMwari wedu? Mwari unondisimidza ngesimba, nokuita kuti njira yangu iperere. Unoita kuti tsoka dzangu dzidai ngedzengururu, nokundiemesa pakangwaririka pakaturama. Unodzidzisa nyara dzangu kurwa hondo, kuti mioko yangu ikwamure uta hwethusi. Iwewe wakandipa chihlangu choruponeso rwako, nenyara yako yokumudyo yakanditsimisa; kudetsera kwako kwakanditunhumadza. Wakapamhamisa zvitsiko zvangu pashi pangu, tsoka dzangu adzizi kutedzuka. Ndakarumbirira magaa angu, ndikaabata; andizi kupetuka metsa apere. Ndakaabaira pashi, kuti asakona kumiruka; vakawira pashi petsoka dzangu. Ngokuti wakandisimidza ngesimba rokurwa; wakanzvairisa kwendiri avo vakandimukira. Wakaita kuti magaa angu andifuratire, naavo vanondizonda ndakavaparadza. Vakadaidzira kudetserwa, asi paiya pasina wokuvaponesa; vakadaidzira kunaMambo Mwari, asi aazi kuvapingura. Naapo ndakavakuya kuti vadai ngebukuta pamberi pedutu; ndakavarasha kudai ngematope epato. Wakandinunura kubva muhasha nevanhu; wakandiita soro remadzinza; vanhu vendisaizia vakandishandira. Apo vozwa ndini, vakandipurutana; venyika mukanza vakauya vechidzipfaisa kwendiri. Vapara vakagumirwa, vakabuda vechitetemara kubva mumapako avo. Mambo Mwari unopona! Ngarikudzwe buwe rangu; ngaakudzwe Mwari woruponeso rwangu, Mwari unondiunzidzira, unondinyisira vanhu vari pashi pangu; uwo unondinunura kubva kumagaa angu; ngegwinyiso unondimirudza padera paavo vanondimukira; unondinunura kubva kuzvigebenga. Ngeizvi ndinozokukudza, Mambo Mwari, pakati pemadzinza, ndinozoemba kukudza zina rako. Unopa kunyisa kukuru kunamambo wake, nokuonisa nyasha dzinorudo kunewakadzodzwa wake, kunaDhavhidha nokumibarirwana yake mhera nariini. KuneMutungamiriri woKuemba. Nduyo yaDhavhidha. Matenga anoteketesa uthende hwaMwari; nomudenga munoonisa mishando yenyara dzake. Zuva rimwe ngarimwe rinoereketa, nousiku humwe ngahumwe hunoonisa ruziyo. Akuna kuereketa nokuti mazwi; izwi ravo arizwiki; asi izwi ravo rinoenda kunyika yeshe, nemazwi avo anoguma kumagumo enyika. Mukati mwematenga wakaemesa ugaro hwezuva, rinobuda kudai ngomukwambo unobuda mukamera rake romuchadho, kudai ngetsvisi rinorumba mujaho waro rechidakara. Kubuda kwaro kunobva kwakagumira matenga, nokutenderera kwaro kunoguma kumagumo aro; akuna chakafishika mukupisha kwaro. Mupango waMambo Mwari wakaperera, unounzira mweya; mitemo yaMambo Mwari yakagwinya, inongwadza vasina mazano; zvidzidziso zvaMambo Mwari zvakarurama, zvinodakadza mwoyo; mipango yaMambo Mwari yakachena, inojekisira madziso; kutyisa kwaMambo Mwari kwakaperera, kunogara mhera nariini; zvitongero zvaMambo Mwari zviri gwinyiso, zvakarurama zveshe pamwepo. Zvinopinda kuemurwa kunomukore, kunyazwi kunomukore wakapinda kuengurwa kakurutu; zvinopinda kutapira kuneuchi, nokubomha kwemisoro. Ndizvozve muranda wako unonyowedzwa; mukuzvingwarira zvino musharo mukuru. Asi ndiani ungaonesesa zvishaishi zvake? Ndipembedze kuzvishaishi zvakafishika. Pinga muranda wako kuzvishaishi zvokudzikudza; ita kuti zvisatonga padera pangu. Zvino ndinozoita wakaperera, ndinozoita wakapembedzwa kunezvishaishi zvikuru. Mazwi omuromo wangu nokupinimidza kwomwoyo wangu ngazviashirike mukuona kwako, A Mambo Mwari, buwe rangu nomuripiri wangu. KuneMutungamiriri woKuemba. Nduyo yaDhavhidha. Mambo Mwari ngaakupingure ngezuva rokutambudzika! Zina raMwari waJakobe ngarikungwarire! Ngaakutumire kudetswa kunobva kuugaro hwakachena, ngaakupe kugwinyiswa kunobva muZioni. Ngaakarakadze midiro yako yeshe, aashire ngokuda mubairo yako yokupisha. Selah. Ngaakupe zvidisiso zvomwoyo wako, azadzise urongwa hwako hweshe. Tinozodaidzira ngokudakara ngokunyisa kwako nomuzina raMwari wedu tinozoemesa mijeki yedu. Mambo Mwari ngaazarise mikumbiro yako yeshe. Zvino ndinozia kuti Mambo Mwari unoponesa wakadzodzwa wake; unozomupingura kubva mugore rakachena nokunyisa kwesimba romuoko wake wokumudyo. Vamweni vanoganza ngengoro, nevamweni vanoganza ngemahachi, asi isusu kuganza kwedu kuri muzina raMambo Mwari, Mwari wedu. Vanozopumhunwa, vechiwa pashi; asi isusu tinozomirudzwa nokuema takatendemara. Ipai kunyisa kunamambo, Mambo Mwari; tipingurenyi apo toodaidza. KuneMutungamiriri woKuemba. Nduyo yaDhavhidha. Mambo unodakara musimba rako, A Mambo Mwari, nomurudetso rwako unozodakara kwakadini! Wakamupa chidisiso chomwoyo wake, auzi kuramba mukumbiro wemiromo yake. Selah. Unomutendenedza ngezvifumiso zvakanaka; nokuisa dzungudza romukore wakaera pasoro rake. Wakakumbira kwouri kupona, newe wakamupa, uwandu hwemazuva mhera nariini. Ukuru hwake hukuru kubudikidza ngorudetso rwako; unoisa padera pake mbiri noumambo. Waisa padera pake zvifumiso mhera nariini; wamuita kuti adakare ngokuapo kwako. Ngokuti mambo unogonda munaMambo Mwari; kubudikidza ngenyasha dzinorudo dzeUri-padera-pazveshe aazotsukunuswi. Nyara yako inozoona eshe magaa ako; nyara yako yokumudyo inozoona avo vanokuzonda. Unozovaita kuti vadai ngomuriro wechoto chikuru apo pounozooneka. Mambo Mwari unozovamedza muushungu hwake, nomuriro unozovapedza. Unozoparadza mibarirwana yavo panyika, norusinga rwavo kubva pakati pevana vevanhu. Kudai vechironga kukuitira zvakashata, kudai vechironga zano rakashata, avazobudiriri. Ngokuti unozovaita kuti vatize; ngokuti iwewe unozokwanya uta hwako kufura hope dzavo. Kudzwai, A Mambo Mwari, musimba rako! Tinozoemba kukudza simba rako. KuneMutungamiriri woKuemba. Nduyo yaDhavhidha. Mwari wangu, Mwari wangu, wandisiirenyi? Uri kuretu kwakadai ngenyi kubva pakundidetsera, kubva kumazwi okugwimba kwangu? A Mwari wangu, ndinokudaidza masikati, asi aundipinguri; nenguva yousiku andizorori. Asi iwewe wakachena, unogara mukukudzwa kwaIsuraeri. Madzibaba edu akagonda mwouri; vakagonda, newe wakavanunura. Vakadaidzira kwouri navo vakanunurwa; vakagonda mwouri, navo avazi kutsverudzwa. Asi inini ndiri honye, andiri munhupi; ndiri chitsverudzo kunevamweni, nounoshoorwa ngevanhu. Veshe vanondiona, vanondisheka kundiitira jee; vanochenya miromo, vanodzungudza masoro vechiti, “Wakagonda munaMambo Mwari, ngaamusunhure; ngaamununure, uwo waanodakara ndiye.” Asi ndiwe wakandibudisa kubva mundani, wakandingwarira zvakanaka paditi ramai angu. Ndakakandirwa padera pako, kubvira mundani pakubarwa kwangu; nokubvira pevakandibara mai angu, iwewe ndiwe Mwari wangu. Usatarauka kwendiri, ngokuti dambudziko riri pasinde, ngokuti akuna naumwe wokundidetsera. Mikono mizhinji inonditendenedza, mikono yakagwinya yeBhashani inonditendenedza; inondishamira miromo yayo, kudai ngemhondoro inokara nokubhonga. Ndinodururwa kudai ngemvura, nemagodo angu eshe arungunuka; mwoyo wangu wakadai ngemhura; unonyunguruka mukati mwangu. Muromo wangu waoma kudai ngechiwenda, norurumi rwangu rwanamira mutsaya dzangu. Wandiradzika mubukuta rorufu. Ngokuti imbwa dzandiunganira; chikwata chevaiti vezvakashata chandiunganira. Vakabvajura nyara dzangu netsoka dzangu. Ndingaerenga magodo angu eshe. Vanondiringira vechindidzvuturira; vanopaurirana zvokusimira zvangu pakati pavo, vanoitira mabhigidha zvokusimira zvangu. Asi iwewe, Mambo Mwari, usanditaraukira! Iwewe simba rangu, kasira kundidetsera! Nunura mweya wangu kubva kushoti, kupona kwangu kubva kusimba rembwa! Ndiponese kubva pamuromo wemhondoro! Kubva panyanga dzenyati wakandinunura. Ndinozoteketesa zina rako kuhama dzangu; mukati mwembungano ndinozokukudza. Imwimwi munotya Mambo Mwari, mukudzenyi! Mweshe imwimwi mibarirwana yaJakobe, muirikidzenyi; mumutye, imwimwi mweshe mibarirwana yaIsuraeri! Ngokuti aazi kushoora nokuti kunyenya dambudziko rounotambudzika; aazi kufisha hope yake kubva kwaari; asi wakamuzwa apo pewakachema kwaari. Kukudza kwangu kunobva kwouri mumbungano huru; ndinozoripa mhiko dzangu pamberi pavo vanomutya. Varombo vanozodya, vagutiswe; avo vanomutsvaka vanozokudza Mambo Mwari. Mwoyo yenyu ngaipone mhera nariini! Veshe vokumagumo enyika vanozokarakadza, vahwirire kunaMambo Mwari. Mhuri dzeshe dzemadzinza dzinozodira pamberi pake. Ngokuti umambo ngohwaMambo Mwari, naye unotonga padera pemadzinza. Eshe makurudza omunyika anozodya echidira; veshe vanodzaka mubukuta vanozokotama pamberi pake, nouwo usikakoni kuponesa ndaramo yake. Mibarirwana ichauya inozomushandira; mibarirwana ichauya inozoronzerwa ngendaa yaMambo Mwari, nayo inozoteketesa kururama kwake kuvanhu vasati vabarwa, vechiti ndiye wazviita. Nduyo yaDhavhidha. Mambo Mwari muushi wangu, andizotami. Unondiatisa mumbusho dzinomwenje muishi. Unonditungamirira pasinde pemvura yakanyarara. Unounzira mweya wangu. Unonditungamirira munjira dzokururama ngendaa yezina rake. Kunyazwi ndechinyahamba mubani rebvute rokufa, andizotyi zvakashata, ngokuti iwewe uneni. Ndonga yako nomundondoro wako zvinondiembedzera. Iwewe unondinasirira hwarasanza pamberi pangu mukuona kwemagaa angu; unodzodza soro rangu ngemafuta; tsani yangu inomwaraka. Ngegwinyiso kunaka nenyasha zvinozonditeera mazuva eshe okurarama kwangu, neni ndinozogara mumhatso yaMambo Mwari mhera nariini. Nduyo yaDhavhidha. Nyika ngeyaMambo Mwari, nazvo zveshe zvirimwo, nyika naavo vanogara mukati mwayo; ngokuti wakaiemesa padera peruandhle, akaigwinyisa padera perwizi. Ndiani unozokwira mudunhu raMambo Mwari? Ndiani unozoema muugaro hwake hwakachena? Uwo unenyara dzakasukwa, nomwoyo wakachena, uwo usikamirudzi mweya wake kunezvisina shwiro, usikapiki ngokuchengedza. Unozoashira chifumiso chinobva kunaMambo Mwari, nokupembedzwa kunobva kunaMwari woruponeso rwake. Uyu ndiwo mubarirwana weavo vanomutsvaka, avo vanotsvaka hope yaMwari waJakobe. Selah. Mirudzanyi misoro yenyu, imwimwi misiwo! Mirudzwanyi, imwimwi misiwo yekaretu, kuti mambo wouthende apotere. Ndiani uyu mambo wouthende? NdiMambo Mwari unesimba uri ngwazi, Mambo Mwari uritsvisi mukurwa. Mirudzanyi masoro enyu, imwimwi misiwo! Mirudzwanyi, imwimwi misiwo yekaretu, kuti mambo wouthende apotere. Ndiani uyu mambo wouthende? NdiMambo Mwari wehondo, ndiye mambo wouthende. Selah. Nduyo yaDhavhidha. Ndinomirudzira mweya wangu kwouri, Mambo Mwari. A Mwari wangu, ndinogonda mwouri; usatendera kuti nditsverudzwe; usatendera kuti magaa angu andinyise. Usatendera avo vanokugarira kuti vatsverudzwe; ngavatsverudzwe avo vanoita ngokuchengedza pasina ndaa. Ndiite kuti ndizie njira dzako, A Mambo Mwari; ndidzidzise njira dzako. Nditungamirire mugwinyiso rako, undidzidzise, ngokuti iwewe uri Mwari woruponeso rwangu, ndinokugarira zuva reshe. Karakadza ngenyasha dzako, A Mambo Mwari, nenyasha dzako dzinorudo rwakakura, ngokuti zvaindoiyapo kare nekare. Usakarakadza zvishaishi zvoutsva hwangu, nokuti zvipauko zvangu; kudai ngouwandu hwenyasha dzako dzinorudo rukurutu, ndikarakadze, ngendaa yokunaka kwako, A Mambo Mwari! Mambo Mwari wakanaka, wakarurama; ndizvo unodzidzisa vashaishi njira. Unotungamirira vakapfaa mune zvakarurama, nokudzidzisa njira yake kunevakapfaa. Dzeshe njira dzaMambo Mwari ngedzenyasha huru norudo nokugondeka, naavo vanongwarira chitenderano chake nouchapupu hwake. Ngendaa yezina rako, A Mambo Mwari, kungurira kushaisha kwangu, ngokuti kwakakura. Ngouri munhuwo unomutya Mambo Mwari? Unozomudzidzisa njira yaanozotsanangura. Unozogara mukubudirira; vana vake vanozogara nhaka yenyika. Ukama hwaMambo Mwari uri kwevari vanomutya; unoita kuti chiziikanwe kwevari chitenderano chake. Madziso angu anoringira kunaMambo Mwari nguva dzeshe, ngokuti unozobudisa tsoka dzangu kubva mumambure. Kunukukira kwendiri, undiitire nyasha, ngokuti ndine chishuwo nedambudziko. Dusa madambudziko omwoyo wangu, nokundibvisa mukukakaseka kwangu. Rangarira dambudziko rangu nokurwadziwa kwangu, nokukungurira zvishaishi zvangu zveshe. Rangarira magaa angu manganai, noushungu hwakadini hwevanondizonda ndihwo. Ngwarira mweya wangu, undinunure; usatenda kuti nditsverudzwe, ngokuti ndinohwara mwouri. Kugondeka nokururama ngazvindingwarire, ngokuti ndinogarira iwewe. Ripira Isuraeri, A Mwari, kubva mumadambudziko ake eshe. Nduyo yaDhavhidha. Ndipembedze, Mambo Mwari, ngokuti ndakahamba mukururama kwangu; ndakagonda munaMambo Mwari, ndisikatsvedzuki. Ndiringisise, Mambo Mwari, undiedze; edza mweya wangu nomwoyo wangu. Ngokuti nyasha dzako dzinorudo dziri pamberi pokuona kwangu; ndinohamba mugwinyiso rako. Andigarisani nevanhu vasina shwiro, nokuti kupotera nevadziitisi. Ndinozonda mushongano wevaiti vezvakashata, andizogarisani nevakashata. Ndinoshamba nyara dzangu ndisina ndaa; ndinotenderera arita rako, A Mambo Mwari. Ndinoemba ngokudaidzira ngoma yokubonga, ndipupure ngemishando yako yeshe inoshamisa. Mambo Mwari, ndinoda mhatso iyo younogara, nendau inogara uthende hwako. Usaunganidza mweya wangu pamwepo nevashaishi, nokuti ndaramo yangu nevanhu vengazi, avo, munyara dzavo munokushaisha, nemioko yavo yokumudyo yakazara ngezvitengero. Asi inini ndinohamba mukururama kwangu; ndiripire, undiitire nyasha. Tsoka dzangu dzinoema mundau yakaterama; mumishongano mikuru ndinozokudza Mambo Mwari. Nduyo yaDhavhidha. Mambo Mwari ndiye kujeka kwangu noruponeso rwangu; ndiani wendingazotya? Mambo Mwari isimba rokupona kwangu; ndiani wendingazotya? Apo vaiti vezvakashata vanondigumira kuti vadye nyama yangu, eya, magaa angu nevanondizonda, vanozopumhunwa nokuwa. Kunyazwi hondo yanyandikomba, mwoyo wangu auzotyi; kunyazwi hondo yanyandimukira, zvakanyadaro ndinozogonda. Chiro chimwe chendakakumbira kunaMambo Mwari, ndicho chendinozotsvaka: kuti ndigare mumhatso yaMambo Mwari mazuva eshe okurarama kwangu, kuti ndiringire unaku hwaMambo Mwari, nokubvunza mutemperi rake. Ngokuti ngezuva rokutambudzika unozondifisha pakasitika muugaro hwake; unozondifisha pakasitika mutende rake; unozondimirudza padera pebuwe. Zvino soro rangu rinomirudzwa padera pamagaa angu anonditendenedza, neni ndinozopira mutende rake midiro yokudakara; ndinozoemba zvakanaka kukudza Mambo Mwari. Izwai, Mambo Mwari, apo ndodaidza ngeizwi rangu; ndiitire nyasha, undipingure! Mwoyo wangu unoti, “Uya, tsvaka hope yake!” Ndinotsvaka hope yako, Mambo Mwari. Usafisha hope yako kubva kwendiri. Usapetudza muranda wako muushungu, iwewe waiya mudetseri wangu. Usandirasha nokuti kundisiya, Mwari woruponeso rwangu! Kudai baba angu namai angu vandisiya, Mambo Mwari unozonditora. Ndidzidzise njira yako, A Mambo Mwari; unditungamirire munjira yakarurama, ngendaa yemagaa angu. Usandipira mukuda kwemagaa angu, ngokuti zvapupu zvemanyepo zvandimukira, naavo vanofemurika hasha. Ndinotenda kuti ndinozoona kunaka kwaMambo Mwari munyika yevanopona. Garira Mambo Mwari; uite wakagwinya, nomwoyo wako ngaushinge; garira Mambo Mwari. Nduyo yaDhavhidha. Ndinodaidza kwouri, Mambo Mwari; buwe rangu, usandinyararira, ngokuti kudai wechindinyararira, ndingazodai ndivo vanonzvaira muhunza. Izwa izwi rokupota kwangu apo ndoodaidza kwouri kuti undidetsere, apo ndoomirudzira nyara dzangu kuugaro hwako hwakachena. Usandikweya pamwepo nevakashata, nevashandi vezvakashata, avo vanoereketa ngokunyarara kuvaakirwana vavo, asi kushata kuri mumwoyo yavo. Vaunzidzire kudai ngemishando yavo, nokudai ngokushata kwezviito zvavo; vaunzidzire kudai ngemishando yenyara dzavo; upetudzire kwevari kudai ngezvinovasisira. Ngokuti avanyeri ngemishando yaMambo Mwari, nokuti mishando yenyara dzake, unozovapwanyira pashi, asikazovaakizve. Ngaabongwe Mambo Mwari, ngokuti wakazwa izwi rokupota kwangu. Mambo Mwari ndiye simba rangu nechihlangu changu; mwoyo wangu unogonda mwaari; ndizvo ndinodetserwa, nomwoyo wangu unodakara kakurutu; nengoma yangu ndinozomubonga. Mambo Mwari ndiye simba revanhu vake; ndiye bako roruponeso kunewakadzodzwa wake. Ponesa vanhu vako, ufumise nhaka yako; ita muushi wavo, uvatware mhera nariini. Nduyo yaDhavidha. Ipai kunaMambo Mwari, imwimwi vana vounesimba reshe, ipai kunaMambo Mwari uthende nesimba. Ipai kunaMambo Mwari uthende hunosisira zina rake; dirai Mambo Mwari muunaku hwokucheneswa. Izwi raMambo Mwari riri padera pemvura; Mwari wouthende unotinhira, Mambo Mwari, padera pemvura inesimba. Izwi raMambo Mwari rinesimba; izwi raMambo Mwari rakazara ngoumambo. Izwi raMambo Mwari rinovhuna misedhare. Mambo Mwari unovhuna kuita zvigurwa misedhare yeRebhanoni. Unoita Rhebhanoni kuti ritomukire mudenga kudai ngekonyana, naSirioni kutomukira mudenga kudai ngekonyana renyati. Izwi raMambo Mwari rinobaka mirazvu yomuriro. Izwi raMambo Mwari rinozungunyisa shango; Mambo Mwari unozungunyisa shango reKadheshi. Izwi raMambo Mwari rinozungunyisa miokhi, rinorakatisa mashakani egwasha; mutemperi rake zviro zveshe zvinoti, “Ngaakudzwe.” Mambo Mwari unogara padendemaro roumambo padera pendambi; Mambo Mwari unogara padendemaro roumambo mhera nariini. Mambo Mwari ngaape simba kunevanhu vake! Mambo Mwari ngaafumise vanhu vake ngokunyarara! Nduyo yaDhavhidha yoKupirwa kweTemperi. Ndinozokukudza, A Mambo Mwari, ngokuti wakanditunhumadza; auzi kuita kuti magaa angu adakare padera pangu. A Mambo Mwari, Mwari wangu, ndakadaidzira kwouri kuti undidetsere, ukandirapa. A Mambo Mwari, wakabudisa mweya wangu kubva muSheori, wakandiponesa kuti ndipone pakati peavo vanonzvaira muhunza. Embai kukudza kunaMambo Mwari, imwimwi vakagondeka vake, mubonge zina rake rakachena. Ngokuti ushungu hwake ngohwekamukuwo; nyasha dzake ngedzenguva yokurarama. Kuchema kungaapo usiku hweshe, asi kudakara kunosvika mangwanani. Asi inini ndakati mukupfuma kwangu, “Andizotsukunuswi nariini.” Iwewe, Mambo Mwari, ngenyasha dzako wakanditsimisa kudai ngedunhu rakagwinya; wakafisha hope yako, neni ndakatambudzika. Ndakachema kwouri, A Mambo Mwari, nokunaMambo Mwari ndakapota: “Ndingazouyirwa ngenyi ngorufu rwangu, kuti ndadzaka muiba? Bukuta rinozokukudza here? Rinozoteketesa gwinyiso rako here? Izwa, Mambo Mwari, undiitire nyasha! Mambo Mwari, ita mudetseri wangu!” Wakakunukudza kutsumba kwangu kukaita kuzvina; wakakhumura jira rangu remasaka, ukandisimidza ngokudakara, kuti mweya wangu uembe kukudza, usanyarara; Mambo Mwari, Mwari wangu, ndinozokubonga mhera nariini. KuneMutungamiriri woKuemba. Nduyo yaDhavhidha. Ndinohwara mwouri, Mambo Mwari; usatenda kuti nditsverudzwe mhera nariini; ndinunure mukururama kwako. Ungamisira nzee yako kwendiri; undinunure ngokukasira. Ita buwe rokuhwara rakagwinya kwendiri, mhatso yorusvingo yoruponeso. Iwewe ngegwinyiso ndiwe buwe rangu norusvingo rwangu; ngendaa yezina rako, nditungamire undihambise; ndibvise mumambure evakanditeya ndiwo pakasitika, ngokuti iwewe ndiwe bako rangu rokuhwara. Munyara yako ndinopira mweya wangu; wakandiripira, Mambo Mwari, Mwari wakagondeka. Ndinovazonda avo vanopinimidza zviro zvisina shwiro, asi inini ndinogonda munaMambo Mwari. Ndinozokudza nokudakara munyasha dzako, ngokuti iwewe wakaona kutambudzika kwangu; wakazia mweya wangu mumatambudziko. Auzi kundipira munyara mwegaa; wakaemesa tsoka dzangu mundau yakatarauka. Ndiitire nyasha, Mambo Mwari, ngokuti ndiri mudambudziko; madziso angu anoperezeka ngokutambudzika, mweya wangu nomuiri wanguwo. Ngokuti ndaramo yangu inopera ngokusvipa mwoyo, nemakore angu ngokugwimba; simba rangu ropera ngendaa yokushaisha kwangu, nemagodo angu apera simba. Ndaa chitsverudzo kumagaa angu eshe, kakurutu kunevaakirwana vangu, ndiri chiro chityiso kuneavo vanondizia; avo vanondiona munjira vanonditiza. Ndariyarikanwa kudai ngomunhu wakafa, ndadai ngechidziyo chakapwanyika. Ngokuti ndinozwa kuvherevhedza kwevazhinji, kukaruka kuri kumarupande eshe! Vachapangana pamwepo ndini, apo vanopangana ngokundiuraya. Asi ndinogonda mwouri, A Mambo Mwari; ndinoti, “Iwewe ndiwe Mwari wangu.” Nguva dzangu dziri munyara mwako; ndinunure kubva munyara mwemagaa angu, nokuneavo vanonditambudza. Hope yako ngaijeke padera pomuranda wako; ndiponese munyasha dzako dzinorudo. Usatenda kuti nditsverudzwe, A Mambo Mwari, ngokuti ndinodaidza kwouri; vakashata ngavatsverudzwe; ngavanyaradzwe muSheori. Miromo inonyepa ngainyaradzwe, inoereketa kurwisana nevakarurama, ngokudzikudza nokunyenyeredza. A, kukuranyi kwounaku hwako hwowakangwaririra avo vanokutya, hwowakaitira avo vanohwara mwouri, pamberi pevakororo vevanhu! Mukufishika kwehope yako unozovafisha kubva kumazano evanhu; unozovangwarira pakasitika mutende rako kubva kuhasha dzendimi. Ngaakudzwe Mambo Mwari, ngokuti wakandionisa nyasha dzake dzinorudo dzinoshamisa, apo pendaemeswa ndakadai ngeguta rakakombwa. Inini ndakati mukukaruka kwangu, “Ndagurwa kubva pamberi pemadziso ako.” Asi wakazwa iwewe izwi rokupota kwangu apo pendakachema kwouri kuti undidetsere. Idai Mambo Mwari, imwimwi mweshe vakacheneswa vake. Mambo Mwari unongwarira vanogondeka, asi unounzidzira kakurutu uwo unoita ngokudzikudza. Gwinyai, mwoyo yenyu ngaishinge, mweshe imwimwi munogonda munaMambo Mwari. Nduyo yaDhavhidha. Unomuchena uwo unekupauka kwake kwakungurirwa, unechishaishi chake chafishwa. Unomuchena munhuwo uwo Mambo Mwari waasikaerengeri zvakashata, nouwo mumweya mwake amuna kuchengedza. Naapo pendakanyarara, muiri wangu wakatsakara, ngokugwimba kwangu mutakatiro wezuva reshe. Ngokuti masikati nousiku nyara yako yairema padera pangu; kugwinya kwangu kwakaomeswa kudai ngokuomeswa kwokupisha kwezienza. Selah. Zvino ndakatenderuka chishaishi changu kwouri, neni andizi kufisha kushaisha kwangu; ndakati, “Ndinozotenderuka kupauka kwangu kunaMambo Mwari,” newe wakakungurira kushata kwechishaishi changu. Selah. Ndizvo veshe avo vakarurama ngavakumbire kwouri panguva yokutambudzika; apo yokwira ndambi inesimba, aizovagumiri. Iwewe uri ugaro hwangu hwokuhwara; unondingwarira kubva mukutambudzika; unozonditendenedza ngenduyo dzokusunhurwa. Selah. Ndinozokuonisa nokukudzidzisa njira younozohamba ndiyo; ndinozokupanga ngedziso rangu. Musadai ngehachi nenyurusi, zvisina kuzwisisa; kuita kwawo anosisira kuti asungwe mikhayo nematomu, kuti akwedzere kwouri. Madambudzo mazhinji ngeeuwo wakashata, asi uwo unogonda munaMambo Mwari, nyasha dzinozomutendenedza. Dakarai munaMambo Mwari, mudakadzwe, imwimwi mwakarurama; mudaidzire ngokudakara, mweshe imwimwi mwakarurama mumwoyo. Dakarai munaMambo Mwari, imwimwi mwakarurama; kukudza kunosisira vanhu vakarurama. Kudzai Mambo Mwari ngembira; muembe kumukudza ngechidangari chinetambo gumi. Embai kwaari ngoma itsva; ridzai ngokungwara patambo ngeizwi guru. Ngokuti izwi raMambo Mwari rakarurama, nemishando yake yeshe inoitwa ngokugondeka. Unoda kururama nokutonga kwakanaka; nyika yakazara ngenyasha dzinorudo dzaMambo Mwari. Ngeizwi raMambo Mwari matenga akasikwa, nehondo dzawo dzeshe ngomweya womuromo wake. Wakaunganidza mvura yoruandhle pamwepo kudai ngeiri mujomeya; unotutira ruandhle mukudzama kwemirindi. Nyika yeshe ngaitye Mambo Mwari; veshe vagari vomunyika ngavaeme vechihuta ndiye. Ngokuti wakaereketa, nazvo zvakaitika; wakapanga, zvikatsimiswa. Mambo Mwari unoparadza mazano emadzinza kuita asina shwiro; unoita kuti urongwa hwevanhu usaita shwiro. Zano raMambo Mwari rinotsima mhera nariini, mirangariro yomwoyo wake iri kumazero eshe. Rinomuchena dzinza iro rinoti Mwari waro ndiMambo Mwari, vanhu vaakadzitsanangurira kuvaita nhaka yake. Mambo Mwari unoringira pashi kubva mugore; unoona vakororo veshe vevanhu. Unoringira ari muugaro hwoumambo hwake veshe vagari venyika, aye unoumba mwoyo yeshe, unoringira mishando yavo yeshe. Mambo aaponeswi ngouwandu hwehondo yake; murwi wehondo aaponeswi ngesimba rake guru. Hachi rehondo magondero asina shwiro okunyisa, nesimba raro guru arikoni kuponesa. Ngegwinyiso dziso raMambo Mwari riri padera peavo vanomutya, padera peavo vanogonda nyasha dzake dzinorudo, kununura mweya yavo kubva murufu, nokuvaponesa panguva yenzara. Mweya yedu yakagarira Mambo Mwari; ndiye mudetseri wedu nechihlangu chedu. Mwoyo yedu inodakara mwaari, ngokuti tinogonda muzina rake rakachena. Rudo rwako rwakagwinya, A Mambo Mwari, ngarugare padera pedu, kudai ngezvetinogonda mwouri. Nduyo yaDhavhidha, apo paakanyepera kupenga pamberi paAbhimerekhi, uwo wakamurumbirira, naye wakaenda. Ndinozokudza Mambo Mwari nguva dzeshe kukudzwa kwake kunozogara kuri mumuromo mwangu. Mweya wangu unoganza ndiMambo Mwari; vakapfaa ngavazwe, vadakare. Kurisai Mambo Mwari neni, ngatikudze zina rake pamwepo. Ndakatsvaka Mambo Mwari, naye wakandipingura, akandinunura kubva mukutya kwangu kweshe. Ringirai kwaari mujekiswe; ndizvo hope dzavo adzizotsverudzwi mhera nariini. Uyu munhu murombo wakachema, Mambo Mwari wakamuzwa, wakamuponesa mumadambudziko eshe. Ngirosi yaMambo Mwari inogara yakatendenedza avo vanomutya nokuvanunura. Edzai, muone kuti Mambo Mwari wakanaka; unomuchena munhuwo unohwara mwaari. Ityai Mambo Mwari, imwimwi vakacheneswa vake, ngokuti avo vanomutya avana chevanotama Mhondoro itsva dzinotama, dzechifa ngenzara, asi avo vanomutsvaka Mambo Mwari avatami nachimwe chiro chakanaka. Uyai, imwimwi vana, mupurutane kwendiri; ndinozomudzidzisa kutya Mambo Mwari. Ndiani munhu unodisa ndaramo, unodisa mazuva akawanda okuona zvakanaka? Ngwarira rurumi rwako kubva kunezvakashata, nemiromo yako kuti isaereketa kuchengedza. Ibva mukushata, uite zvakanaka; tsvaka kunyarara ukuteere. Madziso aMambo Mwari anoringira vakarurama, nenzee dzake dzakabeukira kuchema kwavo. Hope yaMambo Mwari inotsenekera avo vanoita zvakashata, kugura kukarakadzwa kwavo panyika. Naapo vakarurama vachema, Mambo Mwari unovazwa, nokuvanunura kubva mumadambudziko avo eshe. Mambo Mwari uri pasinde peavo vakasvipa mwoyo, unoponesa avo vanomwoyo yakapwanyika. Madambudziko owakarurama mazhinji, asi Mambo Mwari unomununura kubva kwaari eshe. Unongwarira magodo ake eshe; akuna narimwe rawo rinozoguka. Kushata kunozouraya vakashata, navo vanozonda vakarurama vanozoitirwa ndaa. Mambo Mwari unoripira mweya yevaranda vake; akuna naumwe wavo vanohwara mwaari unozoitirwa ndaa. Nduyo yaDhavhidha. Phikisana navo, Mambo Mwari, avo vanophikisana neni; irwa navo iwewe, avo vanorwa neni! Bata chihlangu nomuvhiko, ueme kundidetsera! Shwamura mukhondo nechihlangu, utsiire njira yavo vanonditeera; ronza kunomweya wangu kuti, “Inini ndiri ruponeso rwako.” Ngavatsverudzwe vashoorwe avo vanotsvaka mweya wangu. Ngavapetudzwe sure, vakangaidzwe, avo vanopangana ngokuremadzwa kwangu. Ngavadai ngezungu rinotorwa ngedutu, nengirosi yaMambo Mwari yechivadzinga. Njira yavo ngaiite chidima noutedzi, nengirosi yaMambo Mwari yechivarumbirira. Ngokuti pasina ndaa vakandifishira mambure avo; pasina ndaa vakatsira mweya wangu hunza. Kuurawa ngakugume kwevari vasikazii; nomumbure waakafisha ngauvabate; ngavawiremwo mukati mwawo, kuita kuparadzwa kwavo. Zvino mweya wangu unozodakara munaMambo Mwari, nokukudza muruponeso rwake. Magodo angu eshe anozoti, “Mambo Mwari, ndiani wakadai ndiwe? Unonunura murombo kubva kuneavo vanesimba rinopinda ravo, unonunura murombo nomutami kubva kunouwo unomuchakata.” Zvapupu zvisikazi kururama zvinomiruka; zvinondibvunza zviro zvendisikazii. Vanondithusa ngezvakashata pandau yezvakanaka; mweya wangu unopera simba. Asi ini, mukurwara kwavo ndakasimira masaka; ndakatambudza mweya wangu ngokuera kudya; ndakakumbira ndakakotamisa soro rangu paditi. Ndakamutambudzikira kudai ngemungani wangu nokuti hama yangu. Ndakaputaputa ndechitsumba, kudai ngounochema mai ake, ndakakotama pashi nomukuchema. Asi mukupererwa kwangu vakaungana vakadakara, vakadziunganidza pachavo pamwepo kurwisana neni; vanehasha vendisikazii vakandibweshura, avazi kurekera. Kudai ngevaiti vejee vanonyanya kundiitira jee kwakawanda, vakandikwetsera mazino avo. Mambo Mwari, unozoringira metsa mukuwo wakaitawani? Nunura mweya wangu kubva mukuparadza kwavo, nunura ndaramo yangu kubva mumhondoro! Zvino ndinozokubonga mumushongano mukuru; ndinozokukudza pakati pevanhu vazhinji. Usatendera avo vari magaa angu pasina ndaa, kuti vadakare padera pangu; usatendera kuti vachonyane ngemadziso avo, avo vanondizonda ndisina ndaa. Ngokuti avaereketi kunyarara, asi vanopangana mazwi okuchengedzera, kuneavo vanogara ngokunyarara munyika. Vanondishamira kakurutu miromo yavo kurwisana neni; vanoti, “A, A, madziso edu azviona.” Iwewe wazviona, A Mambo Mwari; usanyarara! A Mambo Mwari, usaita uri kuretu kubva kwendiri! Muka! Umiruke kunditongera zvakarurama, uemerere ndaa yangu, Mwari wangu naMambo Mwari wangu! Ndipembedze, Mambo Mwari, Mwari wangu, kudai ngokururama kwako; usavatendera kuti vadakare padera pangu. Usavatendera mumwoyo mwavo kuti vati pachavo, “A, ndizvo zvaida mwoyo yedu.” Usavatendera kuti varonze kuti, “Tamumedza.” Ngavatsverudzwe nokukangaidzwa veshe avo vanokarira kuremadzwa kwangu; avo vanodzikudza pachavo kurwisana neni, ngavafukidzwe nokutsverudzwa nokushoorwa. Ngavadaidzire ngokudakara vadakadzwe, avo vanodakarira kururamisirwa kwangu, ngavagare vechiti, “Mambo Mwari mukuru, uwo unodakara mukugarisika kwomuranda wake.” Zvino rurumi rwangu runozoereketa ngokururama kwako nokwokukudzwa kwako zuva reshe. KuneMutungamiriri woKuemba. Nduyo yaDhavhidha, Muranda waMambo Mwari. Chishaishi chinoereketa kunewakashata mukati mumwoyo mwake; akuna kumutya Mwari mukuona kwake. Ngokuti unodzichengedzera pachake mukuona kwake, echiti kushata kwake akuoneki nokunyenywa. Mazwi omuromo wake ndikwo kushata nokuchengedza; wakarekera kungwara nokuita zvakanaka. Unoronga kushata ari pamubhedhi wake; unodziemesa munjira isikazi kunaka; aarambi zvakashata. Nyasha dzako dzinorudo, Mambo Mwari, dzinoguma mumatenga; ugondeki hwako hunoguma mumakore. Kururama kwako kwakadai ngemitunhu yakakurisisa; kutonga kwako kwakadai ngoruandhle rwakadzamisisa; A Mambo Mwari, unongwarira vanhu nemhuka zvakatodzana. A, kunakanyi kwenyasha dzako dzinorudo, A Mambo Mwari! Vanhu veshe vanohwara pashi pomumvuri wemaphaphiro ako. Vanogutswa kakurutu ngouwandu hwezvemhatso yako, newe unovamwisa rwizi rwokudakara kwako. Ngokuti mwomuri ndimwo mune chinyuka chokupona; mukujeka kwako tinoona kujeka. Angirira kuitira nyasha dzako dzinorudo kuneavo vanokuzia, noruponeso rwako kunevakarurama mumwoyo. Usatendera rutsoka rwounodzikudza kuti rundipunhure, usatendera nyara yowakashata kuti indidzinge. Apo ndipo pevanoti kwati kuwa vashandi vezvakashata; vasukumidzirwa pashi, avachakoni kumuka. Nduyo yaDhavhidha. Usadzinesa ngendaa yevaiti vezvakashata; usavaitira ndurumwa vanoshanda zvakashata, ngokuti vanozofota kudai ngomwenje, vechifota kudai ngenduhwe. Gonda munaMambo Mwari, uite zvakanaka; ndizvo unozogara munyika, ungwaririke ugondeke. Dakara munaMambo Mwari, naye unozokupa zvidisiso zvomwoyo wako. Pira njira yako kunaMambo Mwari; gonda mwaari, iye unozozviita. Unozoita kuti kururama kwako kujeke kudai ngechiveneko, nokururamisirwa ndaa yako kudai ngemasikati. Nyarara pamberi paMambo Mwari, umugarire ngokutsengerera; usadzinesa ngendaa youwo unogarisika munjira yake, ngendaa yomunhu unoronga kuita mazano akashata. Rekera kutseneka, ubve muushungu. Usadzinesa, zvinokweera kushanda zvakashata zvega. Ngokuti vashandi vezvakashata vanozopedzwa, asi avo vanomugarira Mambo Mwari vanozogara nhaka yenyika. Asi sure kwomukuwo mudoko vakashata vachaparadzwa; kunyazwi unozonasa kuringira ugaro hwavo, aachazoapo akadi. Asi vakapfaa vanozogara nhaka yenyika; vanozodzidakadza ngouwandu hwokunyarara. Wakashata unorongera wakarurama zano rakashata, echimukwesera mazino ake. Asi Mambo Mwari unosheka vakashata, ngokuti unoona kuti zuva ravo roguma. Vakashata vanoshwamura shoti dzavo, nokukwanya uta hwavo, kuti varige pashi varombo nevatami, kuti vauraye avo vakarurama munjira. Shoti dzavo dzinozopotya mumwoyo yavo, nembita yavo inozovhunika. Zvirinani zvishomani zvino uwo wakarurama, kupinda zvizhinji zvine vazhinji vakashata. Ngokuti mioko yevakashata inozogurwa, asi Mambo Mwari unozogwinyisa vakarurama. Mambo Mwari unozia mazuva evanhu vakaperera, nenhaka yavo inozogara mhera nariini. Avazotsverudzwi munguva yokutambudzika; mumazuva enzara vanozogutiswa. Asi vakashata vanopera, nemagaa aMambo Mwari anozodai ngouthende hwemafuro; vanozongarangaka kudai ngechiushi. Vakashata vanokwereta vasikahwirinzi, asi vakarurama vanoita zvakanaka, vanogara vechipa. Ngokuti avo vanofumiswa ndiMambo Mwari vanozogara nhaka yenyika; asi avo vanotukwa ndiye vanozopedzwa. Zvitsiko zvomunhu zvinogwinyiswa ndiMambo Mwari, apo paanodakara munjira yake. Kunyazwi echiwa, aazowi pashi yaamho, ngokuti Mambo Mwari unomugwinyisa ngenyara yake. Ndaiya mudoko, asi zvino ndachena; asi andisati ndaona wakarurama echisiiwa, nokuti vana vake vechipemha chokudya. Mazuva eshe unogara echipa, echikweretesa, nevana vake vanoitwa zvifumiso. Ibvai kunezvakashata, muite zvakanaka; mugare mhera nariini. Ngokuti Mambo Mwari unoda kururama; aazosii vakagondeka vake. Vakarurama vanongwarirwa mhera nariini, asi vana vevakashata vanozopedzwa. Vakarurama vanozogara nhaka yenyika, vagaremwo mhera nariini. Muromo wewakarurama unoereketa ungwaru, norurumi rwake runoereketa zvakarurama. Mupango waMwari wake uri mumwoyo mwake; zvitsiko zvake azvitedzuki. Wakashata unohwarira wakarurama, echitsvaka kumuuraya. Mambo Mwari aazomusii munyara yake, nokuti kumurasha apo ootongwa. Garira Mambo Mwari, uteedze njira yake, naye unozokutunhumadza kuti ugare nhaka yenyika; unozoringira kuparadzwa kwevakashata. Ndakaona wakashata unesimba guru, echikura kudai ngomusidhari weRebhanoni. Zve ndakapindapo, paiya pasisina; kunyazwi ndakamutsvaka, asi aazi kuoneka. Ringisisa munhu wakaperera, muringire munhu wakarurama, ngokuti kumagumisiro kwomunhu uwo kuno kunyarara. Asi vapauki vanozoparadzwa pamwepo; mibarirwana yevakashata inozourawa. Ruponeso rwevakarurama runobva kunaMambo Mwari; ndiye bako ravo panguva yokutambudzika. Mambo Mwari unovadetsera, nokuvanunura; unovanunura kubva kunevakashata, avaponese, ngokuti vanohwara mwaari. Nduyo yaDhavhidha Mukumbiro. A Mambo Mwari, usandikaraidza muushungu hwako; usandiorora mukushishwa kwako kukuru. Ngokuti misee yako yandibaya mukati, nenyara yako inonditsikirira kakurutu. Akuna kupona mumuiri wangu ngendaa youshungu hwako; akuna kugwinya mumagodo angu ngendaa yokushaisha kwangu. Ngokuti zvishaishi zvangu zvafushira soro rangu; kudai ngomutwaro unorema, zvinonyanya kundiremera. Maronda angu anonyangadza awora ngendaa youpenzi hwangu. Ndinorwadziwa, ndinokotamiswa kuti kwati pashi; ndinohamba ndechitsumba zuva reshe. Ngokuti zviunu zvangu zvakazara ngokupisha; akuna kupora mumuiri wangu. Ndademera ndakuvadzwa kakurutu; ndinogomera ngendaa yokusikanyarara kwomwoyo wangu. Mambo Mwari, zviemuriro zvangu zveshe zviri pamberi pako, nokugomera kwangu akufishiki kwouri. Mwoyo wangu unopanda, simba rangu rinopera; nokujeka kwemadziso angu kwapera kubva kwendiri. Vadikani vangu nevangani vangu vanoema kuretu kubva kwendiri pakurwadziwa kwangu; vaakirwana vangu vanoema vari kuretu. Avo vanotsvaka kundiuraya vanonditeya ngemirau; naavo vanotsvaka kundiremadza vanoereketa zvokuparadza, vanopinimidza ngezvokuchengedzera zuva reshe. Asi inini ndakadai ngedziiranzee, andizwi; kudai ngechimbungumbungu chisikakoni kuereketa. Ngegwinyiso, ndakadai ngomunhu usikazwi, nomumuromo mwake amuna kupingura. Asi mwouri, A Mambo Mwari, ndinogarira; ndiwe unozondipingura, A Mambo Mwari, Mwari wangu. Ngokuti ndinokumbira kuti, “Vasadakara ndini, apo rutsoka rwangu rwootedzuka, avo vanodzikurisa kurwisana neni.” Ngokuti ndatogarira kuwira pashi, nokurwadziwa kwangu kundori neni. Ndinozoronza kushata kwangu; ndinosvipa mwoyo ngendaa yokushaisha kwangu. Avo vari magaa angu anopona anesimba; naavo vanondizonda, pasina ndaa vanowanzwa. Avo vanondiunzidzira zvakashata ngezvakanaka ndivo magaa angu, ngokuti ndinoteera chiro chakanaka. Usandirasha, Mambo Mwari; A Mwari wangu, usagara uri kuretu kubva kwendiri. Kasira kundidetsera, A Mambo Mwari, ruponeso rwangu. KuneMutungamiriri woKuemba. Nduyo yaDhavhidha Yakanyorerwa Jedhuthuni. Ndakati, “Ndinozongwarira njira dzangu kuti ndisashaisha ngorurumi rwangu; ndinozongwarira muromo wangu ngemukhayo, apo wakashata ari pamberi pangu.” Ndaiya chimbungumbungu ndisikaereketi; ndakanyarara, azvizi kundidetsera; kurwadziwa kwangu kwakanyanya, mwoyo wangu wakapisha ngomukati mwangu; naapo ndechipinimidza, muriro wakabaka. Zvino ndakaereketa ngorurumi rwangu: “Mambo Mwari, ndiitei kuti ndizie magumo angu, nouwandu hwemazuva angu; ndiitenyi kuti ndizie kukasira kuguma kwokupona kwangu. Ringira, wakaita kuti mazuva angu atsonge kudai ngoupamhu hwenyara, nenguva yokupona kwangu iri chiro chisina shwiro pamberi pako. Ngegwinyiso munhu weshe muchiemo chake chakanaka uri usina shwiro. Selah. Ngegwinyiso munhu weshe unohamba kudai ngebvuri. Ngegwinyiso vanotsinzwa ngepasina chiro; unounganidza upfumi, asikazii kuti ndiani unozohutora. Nazvino, Mambo Mwari, ndichagarirenyi? Gonda rangu riri mwouri. Ndinunure kubva mukupauka kwangu kweshe; usandiita kuti ndiite chitsverudzo chemapenzi. Ndiri chimbungumbungu, andizi kushama muromo wangu; ngokuti ndiwe wazviita. Dusa mushwapu wako kwendiri; ndinopera kuchaiwa ngenyara yako. Unoorora munhu ngomushwapu ngendaa yokushaisha, unopedza unaku hwake kudai ngounundu; ngegwinyiso munhu weshe uri usina shwiro. Selah. Izwa mukumbiro wangu, Mambo Mwari, upurutane kuchema kwangu; usanyararira misodzi yangu. Ngokuti ndiri mupfumba wako unopinda kwouri, mupara, kudai ngemadzibaba angu eshe. Bvisai kuringira kwenyu kwendiri, kuti ndinyemwerere, ndisati ndabva pano, ndisachazoapo.” Ndakagarira Mambo Mwari ngokutsengerera; wakakotamira kwendiri nokuzwa kuchema kwangu. Wakandibvisa muhunza inotyisa, nomuchiteetee; wakaemesa tsoka dzangu paruware, akagwinyisa kuhamba kwangu. Wakaisa nduyo itsva pamuromo wangu, nduyo yokukudza kunaMwari wedu. Vazhinji vanozozviona, vatye, nokuisa gonda ravo munaMambo Mwari. Unomuchena munhuwo unoita kuti Mwari aite gonda rake, usikakunukukiri kunevanodzikudza, avo vanopaukira kuzvimwari zvemanyepo. A Mambo Mwari, Mwari wangu, mishando yako yowakaita mizhinji inoshamisa, nemirangariro yako kwetiri; akuna ungaedzaniswa newe. Kudai ndaizvironza nokuereketa ndizvo, zvakawanda, azvierengeki. Mubairo nomudiro audakari ndizvo; asi wabeura nzee dzangu. Mudiro wokupisha nomudiro wokushaisha auzi kuzvibvunza. Zvino ndakati, “Ringira, ndiripano; mubhuku rakapetwa mwakanyorwa ngendaa yangu. Ndinodakara kuita kuda kwako, Mwari wangu; mupango wako uri mumwoyo mwangu.” Ndateketesa mashoko akanaka okuponeswa mumushongano mukuru; wona, andizi kupinga miromo yangu, Mambo Mwari, unozvizia. Andizi kufisha kururama kwako kunoponesa mumwoyo mwangu, ndakateketesa ugondeki hwako noruponeso rwako; andizi kufisha nyasha dzako dzinorudo nokugondeka kwako mumushongano mukuru. Usanditsiirira nyasha dzako dzinorudo kubva kwendiri, Mambo Mwari; tendera nyasha dzako dzinorudo nokugondeka kwako kuti zvindingwarire mhera nariini. Ngokuti zvakashata zvisikaerengeki zvakanditendenedza; zvishaishi zvangu zvandibata, metsa andichakoni kuringira mudenga; zvawanda kupinda bvudzi resoro rangu, nomwoyo wangu unopera simba. Dakarai, Mambo Mwari, kundinunura; kasira kundidetsera, A Mambo Mwari. Ngavatsverudzwe nokukangaidzwa veshe pamwepo, avo vanotsvaka kuuraya mweya wangu; ngavapetudzwe sure, vatsverudzwe, avo vanodakarira kuremadzwa kwangu. Ngavakarudzwe ngendaa yokutsveruka kwavo, avo vanoti kwendiri, “Aha Aha!” Asi veshe vanokutsvaka ngavadakare, vadakadzwe mwouri; veshe vanoda ruponeso rwako, ngavagare vechiti, “Mambo Mwari mukurutu!” Asi inini ndiri murombo nomutami; asi Mambo Mwari unopinimidza ndini. Iwewe uri mudetseri wangu nomununuri wangu; usanonoka, A Mwari wangu. KuneMutungamiriri woKuemba. Nduyo yaDhavhidha. Unomuchena munhuwo unokarakadza varombo; Mambo Mwari unozomununura ngezuva rezvakashata. Mambo Mwari unomungwarira nokumuponesa; unodaidzwa kuti unomuchena munyika. Usamupira mukuda kwemagaa ake. Mambo Mwari unozomutsimisa pamubhedhi wokurwarira; muurwere hwake hweshe unozomuponesa. Ndakati inini, “Mambo Mwari, ndiitire nyasha; rapa mweya wangu, ngokuti ndakashaisha kwouri.” Magaa angu anoereketa zvakashata ndini echiti, “Unozofa riini, nezina rake rinozopera riini?” Naapo vechiuya kuzondiona, vanoereketa manyepo; mwoyo yavo inodziunganidzira kushata; apo vanobuda kubanze, vanozoereketa ndizvo kweshe. Veshe vanondizonda vanoita vherevhere pamwepo ngendaa yangu; vanopangana kundiitira zvakanyanya kushata. Vanopinimidza kuti chiro chinouraya chakandinamira, kuti ndikaata pashi, andichamukizve. Kunyazwi hama yangu yepamwoyo yendaigonda mweiri, uwo wakadya chingwa changu, wandimirudzira chisisino chake kurwisana neni. Asi iwewe, Mambo Mwari, ndiitire nyasha, undimirudze, kuti ndivaunzidzire. Ngeizvi ndinozia kuti iwewe unodakara ndini, ngokuti gaa rangu arizi kundinyisa. Asi iwewe, unonditsimisa ngendaa yokururama kwangu, nokundiemesa pamberi pehope yako mhera nariini. Ngaakudzwe Mambo Mwari, Mwari waIsuraeri, kubvira riini nariini. Ameni naAmeni. Kudai ngemhara inohasaira kutsvaka ndwizi dzemvura dzinoerera, ndizvo mweya wangu unohasairira iwewe, Mwari. Mweya wangu unenyota yokuda Mwari, Mwari unopona. Ndinozouya riini ndione hope yaMwari? Misodzi yangu yaiya kudya kwangu masikati nousiku, naapo vanhu vechiti kwendiri nguva dzeshe, “Uri kuri Mwari wako?” Ndinokarakadza izvi zviro, ndechidurura mweya wangu mukati mwangu: ngenjira yendakaenda ndiyo nembungano, ndikaitungamirira kumhatso yaMwari, ngeizwi rokudakara nenduyo dzokubonga, mbungano yechingwarira dhiri. Unokandirwa pashi ngenyi, mweya wangu? Unotambudzika ngenyi mukati mwangu? Gonda munaMwari; ngokuti ndichazomukudzazve, mudetseri wangu naMwari wangu. Mweya wangu unokandirwa pashi mukati mwangu; ndizvo ndinokukarakadza kubvira ndiri munyika yeJorodhani neyeHermoni, nokubvira pachitunhu cheMiza. Udzamu hunodaidza udzamu pakutinhira kwemapopomo ako; eshe mafungu ako nemavimbi ako akandifukidza. Masikati Mambo Mwari unozopanga rudo runenyasha dzake, nomuusiku nduyo yake ichaa neni, mukumbiro kunaMwari wokurarama kwangu. Ndinoti kunaMwari, buwe rangu, “Ngenyi wandiriyarwa? Ndinohambirenyi ndechitsumba ngendaa yokutambudzwa ngemagaa?” Kudai ngoune bandwa rinouraya pamuiri wangu, magaa angu anondisheka, apo anogara echiti kwendiri, “Uri pari Mwari wako?” Unokandirwa pashi ngenyi, mweya wangu? Unotambudzika ngenyi mukati mwangu? Gonda munaMwari; ngokuti ndichazomukudzazve, mudetseri wangu naMwari wangu. Ndipembedze, A Mwari, undivhikire ndaa yangu kunedzinza rakashata; kubva pamunhu unochengedzera nousikazi kururama ndirwirenyi! Ngokuti iwewe uri Mwari wendinohwara mwaari; wandirasha ngenyi? Ndinohambirenyi ndechitsumba ngendaa yokutambudzwa ngemagaa? Tuma kujeka kwako negwinyiso rako; ngazvinditungamirire; ngazvindiunze kuchitunhu chako chakachena nokuugaro hwako. Zvino ndinozoenda kuarita raMwari, kunaMwari uri kudakara kwangu kukurutu. Ndinozokukudza ngembira, A Mwari, Mwari wangu. Unokandirwa pashi ngenyi, mweya wangu? Unotambudzika ngenyi mukati mwangu? Gonda munaMwari; ngokuti ndichazomukudzazve, mudetseri wangu naMwari wangu. KuneMutungamiriri woKuemba. Nduyo yeVakororo vaKhora. Takazwa ngenzee dzedu, A Mwari, madzibaba edu akatironzera, mishando yewakaita ngamazuva okurarama kwavo, ngemazuva ekaretu: iwewe ngenyara yako wakadzinga madzinza, asi avo wakavasima; wakatambudza mbeu dzevanhu, wakavaparadza, asi avo wakavasunhura; ngokuti avazi kutora nyika ngeshoti yavo, nemioko yavo aizi kuvapa kunyisa; asi nyara yako yokumudyo, nomuoko wako, nokujeka kwehope yako, ngokuti wakadakara ndivo. Iwewe uri Mambo wangu naMwari wangu; iwewe unopanga kunyisa kwaJakobe. Kubudikidza ndiwe tinorigira pashi magaa edu; ngezina rako tinozotsikirira pashi avo vanotimukira. Ngokuti andizogondi uta hwangu, neshoti yangu aizokoni kundiponesa. Asi iwewe watiponesa kubva kumagaa edu, waisa mukukangaidzwa avo vanotizonda. MunaMwari taganza mutakatiro wezuva reshe, tinozobonga zina rako mhera nariini. Selah. Asi zvino watirasha, ukatitsverudzisa, usikahambi nehondo dzedu. Watiita kuti titize kubva kumagaa edu, nemagaa edu anopamba zviro zvedu. Watiita kudai ngemakwai akatsanangurirwa kuurawa; watiparadzira pakati pemadzinza. Watengesa vanhu vako pasina mutengo, auzi kudzitemera mutengo wazvo wakakwira. Watiita chishekedzo chevaakirwana vedu. Tinoshoorwa nokushekwa ngaavo vakatitendenedza. Watiita chinai pakati pemadzinza, nokudzungudzirwa masoro pakati pemadzinza. Kutsverudzwa kwangu kuri pamberi pangu zuva reshe, nezvidzu zvafukidza hope yangu pamazwi omuiti wejee nomutuki, nepakuona kwegaa nomuunzidziri. Izvi zveshe zvakauya padera pedu, asi atisati takuriyarwa, nokuti kugura chitenderano chako. Mwoyo yedu aizikuhwirira sure, nokuti tsoka dzedu adzizi kupauka kubva munjira yako; asi wakatidzengenesa kakurutu mundau yehava, wakatifukidza ngebvuri rokufa. Kudai takariyarwa zina raMwari wedu, nokuti kutambanudzira nyara dzedu kunezvimwari zvipara, Mwari aazozvioni izvi here? Ngokuti unozia zvakafishika zvomwoyo. Ngendaa yako tinourawa mutakatiro wezuva weshe, tinoerengwa kudai ngemakwai akaemeserwa kuurawa. Dzimusei! Unoatirenyi, Mambo Mwari? Miruka, usatirasha mhera nariini! Ngenyi wechifisha hope yako? Ngenyi wechiriyarwa kurwadziwa nokutambudzwa kwedu? Ngokuti mweya wedu unonzvaira mubukuta; miiri yedu inonamira pamavhu. Miruka, uya utidetsere. Utisunhure ngendaa yenyasha dzako dzinorudo. KuneMutungamiriri woKuemba. Ngoma yoMuchadho yeVakororo vaKhora. Mwoyo wangu unomwaraka ngendaa yakanaka; ndinoereketa zviro zvendakaitira mambo; rurumi rwangu chinyoreso munyara yomunyori unokona. Iwewe wakanaka kupinda vamuna veshe; nyasha dzadururwa pamiromo yako; ndizvo Mwari wakakufumisa mhera nariini. Sungira shoti yako pachiunu chako, iwewe tsvisi, muuthende hwako noumambo hwako. Muumambo hwako gadha kudai ngomunyisi, ngendaa yegwinyiso nokupfaa nokururama; nyara yako yokumudyo ngaikudzidzise zviro zvinotyisa. Misee yako yakapinza mumwoyo yemagaa amambo, vanhu vanowa pashi pako. Dendemaro rako roumambo, A Mwari, ngeremhera nariini nariini. Ndonga youmambo hwako indonga yokururama; iwewe unoda kururama, unozonda zvakashata. Ndizvo Mwari, Mwari wako, wakudzodza ngemafuta okudakara kunopinda shamwari dzako; zveshe zvokufuka zvako zvinonuhwira mure, aroesi nekhasia. Kubva mungome dzenyanga dzenzou zvokuridza zvinetambo zvinokudakadza. Vanasikana vemadzimambo vari pakati pevakadzi vako vanoremeredzwa; panyara yako yokumudyo kunoema vahosi vakapfeka zvomukore weOfiri. Purutana, mwanasikana, upinimidze, ukotamise nzee yako; riyarwa vanhu vako nemhatso yababa ako, namambo unozodisisa unaku hwako. Ngokuti ndiye mambo wako, mudirenyi. Mwanasikana weThire unozotsvaka nyasha dzako anezvipo, makurudza evanhu anopinda veshe vanembeu dzeshe dzoupfumi. Mwanasikana wamambo unoitwa uthende mungome yake nezvokufuka zvake zvakarukwa zvomukore; muzvokupfeka zvinemaara akawanda, unotungamirirwa kuenda kunamambo; sure kwake mhandwe, shamwari dzake, dzinomuteera. Ngokudakadzwa nokudakarisa vanotungamirirwa apo pevanopotera mungome yamambo. Paugaro hwemadzibaba vakororo venyu vanozogarapo; unozovaita vazvare munyika mweshe. Ndinozoita kuti zina rako rikudzwe mumazero eshe; ndizvo mbeu dzevanhu dzinozokukudza mhera nariini nariini. KuneMutungamiriri woKuemba. Nduyo yeVakororo vaKhora. Mwari ndiye bako redu nesimba redu, ndiye mudetseri uri pasinde mukutambudzika. Ndizvo atizotyi kunyazwi nyika yanyazopinduka, kunyazwi matunhu anozozungunyiswa mukati mweruandhle; kunyazwi mvura yawo yanyatinhiira, ikakupakupa, kunyazwi matunhu anyazungunyiswa nokututuma kwayo. Selah. Ruripo rwizi urwo mvura yarwo inodakadza dhorobha raMwari, ugaro hwakachena hwouwo Uripadera-pazveshe. Mwari uri mukati mwedhorobha, arizozungunyiswi; Mwari unozoridetsera mumambakwedza. Madzinza ari mubope gurutu, umambo hwazungunyiswa; unoereketa izwi rake, nyika yakanyunguruka. Mambo Mwari wehondo unesu; Mwari waJakobe ibako redu. Selah. Uyai, muringire mishando yaMambo Mwari, kuparadza kwakakura kwakadai kwaakaunza munyika. Unoita kuti kurwa kunyarare metsa kumagumo enyika; unogura uta, unoguragura mukhondo kuita zvigurwa; unopisha zvihlangu ngomuriro. “Nyararai muzie kuti inini ndini Mwari! Ndinokudzwa pakati pamadzinza, ndinokudzwa munyika.” Mambo Mwari wehondo unesu; Mwari waJakobe ibako redu. Selah. KuneMutungamiriri woKuemba. Nduyo yeVakororo vaKhora. Emberai nyara dzenyu, mweshe imwimwi mbeu dzevanhu; daidzirai kunaMwari ngenduyo dzokudakara. Ngokuti Mambo Mwari, Uwo uri padera pezviro zveshe, unotyisa, mambo mukuru padera penyika yeshe. Wakapfaisa vanhu pashi pedu, nemadzinza pashi petsoka dzedu. Wakatitsanangurira nhaka yedu, unaku hwaJakobe uwo waanoda. Mwari wakwira ngokudaidzira, Mambo Mwari wakwira ngokurira kwehwama. Embai kukudza Mwari, embai kukudza; embai kukudza Mambo wedu, embai kukudza. Ngokuti Mwari ndiye mambo wenyika yeshe; embai kukudza ngenduyo. Mwari ndiye mambo padera pemadzinza; Mwari unogara padendemaro rake rakachena. Vatongi vemadzinza vanoshongana pamwepo kudai ngezvinoita vanhu vaMwari waAbrahama. Ngokuti zvihlangu zvenyika ngezvaMwari; iye unokudzwa kakurutu. Nduyo yeVakororo vaKhora. Mambo Mwari mukuru, unosisira kukudzwa kakurutu, mudhorobha raMwari wedu. Mutunhu wake wakachena, wakanaka kutunhumara kwaro, kudakara kwenyika yeshe, Mutunhu Zioni kurupande rwedera, dhorobha ramambo mukuru rinounza kudakara kunyika yeshe. Mwari wakadzionisa pachake mungome dzake kuti uri bako rokuhwara. Zvino madzimambo akashongana pachawo, akapinda pamwepo. Apo variona, vakashamiswa; vakakaruka, vakakasira kutiza; kuhuta kwakavagumirapo, nokurwadziwa kudai ngomukadzi wopotwa ngokubereka, kudai ngedutu rokumabvazuva rinopwanya ngarava dzeTarshishi. Kudai ngezvetazwa, ndizvo taona mudhorobha raMambo Mwari wehondo, mudhorobha raMwari wedu, Mwari unoritsimisa mhera nariini. Selah. Tinokarakadza ngenyasha dzako dzinorudo, Mwari, tiri mukati mwetemperi rako. Zina rako, A Mwari, rakadaro nokukudzwa kwako, rinoguma kumagumo enyika. Nyara yako yokumudyo yakazara ngokunyisa. Mutunhu Zioni ngaudakare, vanasikana vaJudha ngavadakare ngendaa yokutonga kwako. Hambai kutenderera Zioni, muritenderere reshe, muerenge mathawa aro, nasai kuringisisa marukumbati; pindai ngomungome dzaro, kuti muzvironzere kumibarirwana inouya kuti uyu ndiMwari, Mwari wedu, wemhera nariini nariini. Unozoita mutungamiri wedu metsa mukufa. KuneMutungamiriri woKuemba. Nduyo yeVakororo vaKhora. Izwai ichi, imwimwi mweshe mbeu dzevanhu; purutanai, imwimwi mweshe vagari venyika, veshe vadoko nevakuru, vapfumi nevarombo pamwepo. Muromo wangu unozoereketa ungwaru; nokupinimidza kwomwoyo wangu kunozozwisisa. Ndinozoungamisa nzee yangu kuzwa madimikira; ndinozodudzira chinai changu ngokuemba ngechimadangare. Ndinozotya ngenyi ngemazuva okutambudzika, apo kushata kwevatambudzi vangu kwechinditendenedza, avo vanogonda pfuma yavo, vechiganza ngouwandu hwepfuma yavo? Ngegwinyiso akuna naumwe wavo ungaripira hama yake kunyazwi ngeiri njira, nokuti kupa kunaMwari muripo. Ngokuti muripo womweya wavo unoita mutengo wakakurisa akuna ungaukona, kuti agare echipona mhera nariini, kuti asazoona iba. Naapo petinoringira tinoona vanhu vakangwara vanofa; benzi nebungumupee vanopera veshe, vechisiya upfumi hwavo kunevamweni. Maiba avo ndiwo makanyi avo mhera nariini, ugaro hwavo hunozoa kumibarirwana yeshe; kunyazwi vakadudza nyika ngemazina avo. Asi munhu unembiri aazogari; unodai ngemhuka dzinopera. Aya ndiwo magumo emapenzi, magumo aavo vanodakara ngezvevanazvo. Selah. Vakaemeserwa kudai ngemakwai anoenda muSheori; rufu runozoita muushi wavo; vanozorurama kudzaka muiba, nounaku hwavo hunozopedzwa; Sheori ndimwo munozoita ugaro hwavo. Asi Mwari unozoripira mweya wangu kubva musimba reSheori, ngokuti unozondiashira. Selah. Usatya apo umweni apfuma, apo upfumi hwemhatso yake hwawandiswa. Ngokuti apo paanofa, apana chiro chaanotwara kuenda nacho; upfumi hwake ahuzodzaki naye kumuteera. Kunyazwi achararama, akanyadakadzisa mweya wake, (nevanhu vanokukudza ngenguva younodziitire zvakanaka,) unozoenda kuzero remadzibaba ake; avachazooni kujeka mhera nariini. Munhu aakoni kugara mumbiri yake, unotodzana nemhuka dzinopera. Nduyo yaAsafi. Umwe unesimba reshe, Mwari Mambo Mwari unoereketa, nokudaidza nyika kubvira ngokumabvazuva metsa kumabirirazuva. Kubva muZioni, kuperera kwounaku, Mwari unojeka. Mwari wedu unouya, aanyarari; pamberi pake pane muriro unoparadza, dutu guru rinomutendenedza. Unodaidza kumatenga padera nokunyika kuti atonge vanhu vake: “Unganidzai kwendiri vakacheneswa vangu, avo vakaita chitenderano neni ngomudiro.” Matenga anoteketesa kururama kwake, ngokuti Mwari pachake ndiye mutongi. Selah. “Izwanyi, imwimwi vanhu vangu, neni ndinozoereketa; A Isuraeri, ndinozopupura kurwisana newe. Inini ndiri Mwari, Mwari wako. Andikukaraidzi ngendaa yemidiro yako; nemidiro yako yokupisha iri pamberi pangu nguva dzeshe. Andizoashiri mukono kubva mumhatso mwako, nokuti magotokoto pamuhlambi wako. Ngokuti mhuka yeshe yomugwasha ngeyangu, nen'ombe dziri padera pemitunhu gumi remazana (1,000.) Ndinozia yeshe shiri yomumitunhu, nechiro cheshe chinohamba ngechangu. Kudai ndaiya nenzara, andisaizokuronzerapi, ngokuti nyika nazo zveshe zvirimwo ngezvangu. Ndingadya nyama yemikono here, nokuti kumwa ngazi yembudzi? Ipa kunaMambo Mwari mudiro wokubonga; uripe mhiko dzako kunoUripadera-pazveshe. Daidza kwendiri ngezuva rokutambudzika; ndinozokununura, newe unozondikudza.” Asi kunewakashata, Mwari unoti, “Unenyi chokuteketesa zviemeso zvangu, nokuti kutora chitenderano changu pamuromo wako? Ngokuti iwewe unozonda kupangwa, wechirasha mazwi angu sure kwako. Unoita ukama nembavha apo unoiona, unozwanana nevaombi. Unopa muromo wako kunezvakashata, norurumi rwako runoereketa kuchengedzera. Unogara wechiereketa ngehama yako; unoreya mwana wamai ako. Izvi zviro wakazviita, ndikanyarara hangu; wakapinimidza kuti ndakadai ndiwe wemene. Asi ndinokukaraidza, nokuisa ndaa pamberi pemadziso ako. Pinimidzai izvi zvino, imwimwi munoriyarwa Mwari, kuti ndisamubweshura, akuzoapo naumwe kumununura. Uwo unopira mudiro wokubonga, unondiremeredza; kunouwo unonasa kungwarira njira yake, ndinozomuonisa ruponeso rwaMwari.” KuneMutungamiriri woKuemba. Nduyo yaDhavhidha, apo muprofeti Nathani paakauya kwaari, paiya Dhavhidha apomba naBhathishebha. Ndiitire nyasha, A Mambo Mwari, kudai ngenyasha dzako dzinorudo; kudai ngouwandu hwenyasha dzako dzinokungurira tsukutidza zvishaishi zvangu. Ndisukenyi kakurutu kubva mukushata kwangu, nokundichenesa kubva muchishaishi changu. Ngokuti ndinozia zvishaishi zvangu, nechishaishi changu chinogara chiri pamberi pangu. Kwouri, iwewe wega, ndakashaisha, nokuita chakashata mukuona kwako, kuti upembedzwe mukutonga nokuita usina ndaa apo pomunogura ndaa. Ngegwinyiso ndakabarwa mukushata, mushaishi apo mai angu vakatonha mimba yangu. Ringira, unodisisa gwinyiso ngomukati; ndizvo ndidzidzise ungwaru mumwoyo wangu mwakafishika. Ndisuke ngehisopi, neni ndinozochena; ndisuke, neni ndinozochena kupinda chando. Ndiite kuti ndizwe kudakara nokudakadzwa; magodo owakapwanya adakare. Fisha hope yako kubva kuzvishaishi zvangu, utsukutidze kweshe kushata kwangu. Sika mwoyo wakachena mukati mwangu, A Mwari, nokuisa mweya mutsva wakarurama mukati mwangu. Usandirasha kubva mukuapo kwako, usadusa mweya wako wakachena kubva mwendiri. Hwirinza mwendiri kudakadza kworuponeso rwako, unditsimise ngomweya wako unotenda. Zvino ndinozodzidzisa vapauki ngenjira dzako, nevashaishi vanozotenderukira kwouri. Ndinunure kubva mundaa yengazi, A Mwari, iwewe Mwari woruponeso rwangu, norurumi rwangu runozonasa kuemba ngokununura kwako. A Mambo Mwari, beura miromo yangu, nomuromo wangu unozodaidzira kukudzwa kwako. Ngokuti iwewe audakariri mibairo; kudai ndaizokupa mudiro wokupisha, usaizodakara ndiwo. Mubairo unoashirika kunaMwari mweya wokutambudzika; mwoyo unotambudzika nowakapfaa, A Mwari, auzoushoori. Ita zvakanaka kuZioni mukudakara kwako kwakanaka; akisa marukumbati eJerusarema. Zvino unozodakarira mibairo yokururama, mumidiro inopishwa nemidiro inopishwa yeshe; zvino mikono inozopirwa padera pearita rako. KuneMutungamiriri woKuemba. Nduyo yaDhavhidha, apo Dhoegi muEdhomu aenda kunaSauri nokumuronzera, “Dhavhidha waenda kumhatso yaAhimerekhi.” Ngenyi wechidziganzisa, iwewe ngwazi, ngezvakashata zvinoitirwa vasikadi Mwari? Zuva reshe iwewe unoronga kuparadza. Rurumi rwako rwakadai ngechisvo chinopinza, iwewe mushandi wourimbwi. Iwewe unopinda kuda zvakashata kunezvakanaka, kunyepa kupinda kuereketa gwinyiso. Selah. Iwewe unoda mazwi eshe anouraya, A rurumi runochengedzera. Asi Mwari unozokuuraya mhera nariini; unozokubvuka, akutature kubva mutende rako; unozokubvita kubva munyika yevanopona. Selah. Vakarurama vanozozviona, vatye, vanozosheka vaiti vezvakashata vechiti, “Ringirai uyu ndiye munhu usikazi kuita Mwari bako rake, asi wakagonda muuwandu hwepfuma yake. Wakatsvaka kuhwara muupfumi mukushata kwake.” Asi inini ndakadai ngomuti muishi womuorivhi mumhatso yaMwari. Ndinogonda nyasha dzinorudo dzaMwari mhera nariini. Ndinozokubonga mhera nariini, ngendaa yezvewakaita. Pamberi pevakagondeka ndinozoteketesa zina rako ngokuti rakanaka. KuneMutungamiriri woKuemba. Kudai ngokuMaharathi. Nduyo yaDhavhidha. Benzi rinoti mumwoyo mwaro, “Akuna Mwari.” Vakashata, vanoita zvakashata zvinonyangadza; akuna naumwe unoita zvakanaka. Mwari ari mudenga unoringira pashi padera pevana vevanhu, kuona kuti varipo here vakangwara, vanotsvaka Mwari. Veshe vapetuka sure, veshe vasvipiswa; akuna naumwe unoita zvakanaka, haiwa, akuna naumwe. “Veshe vashandi vezvakashata avana kuzia here, avo vanodya vanhu vangu kudai ngezvevanodya chingwa, navo avakumbiri kunaMwari?” Apo vanozoa mukutya kukuru, kusikazi kumboapo. Ngokuti Mwari unozoparadza magodo ouwo usikatendi Mwari; vanozotsverudzwa, ngokuti Mwari wakavaramba. A, dai ruponeso rwaIsuraeri rwaibva Zioni! Naapo Mwari oohwirinza upfumi hwevanhu vake, Jakobe unozodakara, Isuraeri unozodakadzwa. KuneMutungamiriri woKuemba nezvimadangari. Nduyo yaDhavhidha apo vaZifi vakaenda vakaronzera Sauri, “Dhavhidha unohwara pakati pedu.” Ndiponese, A Mwari, ngezina rako, undipembedze ngesimba rako. Izwai mukumbiro wangu, A Mwari; purutana mazwi omuromo wangu. Ngokuti venyika mukanza vandimukira, vanhu vanogebenga vanotsvaka mweya wangu; avazi kuemesa Mwari pamberi pavo. Ngegwinyiso, Mwari ndiye mudetseri wangu; Mambo Mwari ndiye mubati wendaramo yangu. Unozounzidzira magaa angu ngendaa yokushata kwavo. Muugondeki hwako vaparadze. Ngezvipo zvokuda ndinozokuitira mudiro; ndinozobonga zina rako, A Mambo Mwari, ngokuti rakanaka. Ngokuti wandinunura mukutambudzika kwangu kweshe, nemadziso angu aona kunyiswa kwemagaa angu. KuneMutungamiriri woKuemba nechimadangari. Nduyo yaDhavhidha. Izwa mukumbiro wangu, A Mwari; usadzifisha kubva mukupota kwangu. Purutana kwendiri, undipingure; ndinotambudzwa mukugunun'una kwangu. Ndinokangaidzwa ngebope regaa, ngendaa yokutambudzwa ngevakashata. Ngokuti vanoposhera kushata padera pangu, muushungu vanodakara ngeugaa neni. Mwoyo wangu unorwadziwa kakurutu mukati mwangu, nemaharura orufu awira padera pangu. Kutya nokuhuta zvauya padera pangu, nokutyisa kukurutu kwandimbonya. Neni ndinoti, “A, kudai ndaiya nemaphaphiro kudai ngenjia! Ndaizombururuka, kuti ndoozorora. Ngegwinyiso ndaizomburukira kuretu; ndaizoita ugaro hwangu mushango. Selah. Ndaizokasira kutsvakira dumba rokuhwara kubva kudutu romubvumo mukuru.” Kangaidza, A Mambo Mwari, musiyanise ndimi dzavo; ngokuti ndinoona kugebenga nehasha mudhorobha. Masikati nousiku vanotenderera padera pemarukumbati aro, kushata nokuangarara zviri mukati mwaro. Kuparadzwa kuri mukati mwaro; kutambudza nokuchengedzera azvibvi mumusika waro. Andiropi gaa rakanditsverudza; ndaizodai ndakatsunga; andinyepi waindizonda wakadzikudza padera pangu; ndaizodai ndakadzifisha kubva kwaari. Asi ndiwe munhu uri ndanga yangu, mungani wangu, neshamwari yangu yepamwoyo, naye takaita bangano rakanaka; takahamba kupotera mumhatso yaMwari pamwepo nembungano. Rufu ngaruuye padera pavo; ngavanzvaire muSheori vechizwa; ngokuti kushata kuri muugaro hwavo nomumwoyo mwavo. Asi inini ndinodaidza Mwari, naMambo Mwari unozondiponesa. Madeekoni nemangwanani nemasikati ndinozogunun'una, ndechitsumba, naye unozozwa izwi rangu. Unozondinunura ndisina kuremadzwa kubva muhondo yendinorwa, ngokuti vazhinji vanorwa neni. Mwari uwo wakagara padendamero kubvira karetu, unozozwa, avapfaise, ngokuti avapinduki, avamutyi Mwari. Mungani wangu wakatambanudza nyara dzake padera peshamwari; wakagura chitenderano chake, ngokuereketa kwakapfaa kupinda mafuta omukaka, asi anemwoyo wakazara ngokurwa hondo; nemazwi akapfaa kupinda mafuta, asi akadai ngeshoti dzakashwamurwa. Poshera mutwaro wako padera paMambo Mwari, naye unozokutsimisa; aazotendi kuti vakarurama vazungunyiswe. Asi iwewe, Mwari, unozovarigira pashi muhunza; vanhu vanenyota yengazi nevanochengedzera avazorarami rupande rwemazuva okupona kwavo. Asi inini ndinozogonda mwouri. KuneMutungamiriri woKuemba. Nduyo yaDhavhidha, apo vaFiristia vamubata muGathi. Ndiitire nyasha, A Mwari, ngokuti vanhu vanotsikatsika padera pangu; mutakatiro wezuva reshe magaa anonditambudza; magaa angu anonditsikatsika zuva reshe, ngokuti vazhinji vanorwa neni. A, Uripadera Pezveshe, apo pendinotya, ndinogonda mwouri. MunaMwari, uwo wendinokudza izwi rake, munaMwari ndinogonda; andityi; nyama ingaitenyi kwendiri? Zuva reshe vanotsvaka kundiremadza; mikarakadzo yavo yeshe ngeyokundiitira zvakashata. Vanomirudza mweya wokurwa, vanondihwarira, vanoringisisa tsoka dzangu, vechikarira kundiuraya. Ndizvo vaunzidzirenyi mukushata kwavo; muushungu kandirai pashi vanhu, A Mwari! Iwewe waramba wechierenga kupepesheka kwangu; isa misodzi yangu mubhodhleya. Aisirimwopi mubhuku rako here? Zvino magaa angu anozohwirira sure ngezuva rendinozodaidza ndiro. Ndinozia izvi, ngokuti Mwari ngowangu. MunaMwari, uwo wendinokudza izwi rake, munaMambo Mwari, uwo wendinokudza izwi rake, muna Mwari ndinogonda; andityi. Munhu ungaitenyi kwendiri? Mhiko dzangu kweuri ndinosisira kuita, A Mwari; ndinozopira midiro yokubonga kwouri. Ngokuti iwewe wakanunura mweya wangu kubva murufu, netsoka dzangu kubva mukuwa, kuti ndihambe pamberi paMwari mukujeka kwokupona. KuneMutungamiriri woKuemba. Nduyo yaDhavhidha, apo atiza Sauri mubako. Ndiitire nyasha, A Mwari, ndiitire nyasha, ngokuti mweya wangu unohwara mwouri; mubvuri remaphaphiro ako ndinozohwara, metsa dutu rinoparadza rapinda. Ndinozochemera kunaMwari Uri-padera-pezveshe, kunaMwari unozadzisa zviro zveshe zvaanoda kwendiri. Unozotumira kubva mudenga, andiponese; unozotsverudza avo vanotsikatsika padera pangu; Selah. Mwari unozotumira nyasha dzake dzinorudo nokugondeka kwake. Ndinoata pashi pakati pemhondoro dzinoboka kudya nyama yomunhu; mazino avo mikhondo nemisee, rurumi rwavo ishoti dzinopinza. Kudzwai, A Mwari, padera pematenga. Uthende hwako ngahuwepo padera penyika yeshe. Vakateya tsoka dzangu ngemambure kundibata; mweya wangu unokotamiswa pashi. Vakatsa hunza munjira yangu, asi vawira mukati mwayo pachavo. Selah. Mwoyo wangu wakatsima, A Mwari, mwoyo wangu wakatsima. Ndinozoemba, ndinozoemba zvakanaka kukukudza. Muka, mweya wangu! Muka, A chidangari nembira! Inini ndinozomusa mambakwedza. Ndinozokubonga, A Mambo Mwari, pakati pembeu dzevanhu; ndinozoemba kukukudza pakati pemadzinza. Ngokuti nyasha dzako dzinorudo ihuru, dzinoguma mumatenga, nokugondeka kwako kunoguma mumakore. Kudzwai, A Mwari, padera pematenga. Uthende hwako ngahuwepo padera penyika yeshe. KuneMutungamiriri woKuemba. Nduyo yaDhavhidha. Ngegwinyiso munogura zvakarurama here, imwimwi zvimwari? Munotonga vanhu ngenjira yakarurama here? Haiwa, munoronga zvakashata mumwoyo yenyu; nyara dzenyu dzinoshanda kugebenga munyika. Vakashata vanopauka kubva vachiri mundani; vanopauka vachaamba kubarwa, vechiereketa manyepo. Vaneukaira hwakadai ngoukaira hwenyoka; vakadai ngebuura risikazwi rinotsiira nzee dzaro, ndizvo aripurutani izwi revaringidzi, nokuti avo vasikabviri ngourimbwi hwokuringidza. A Mwari, gurai mazino ari mukanwa mwavo; gura mbangura dzemazino evana vemhondoro, A Mambo Mwari! Ngavapwe kudai ngemvura inopopoma; kudai ngemwenje ngavatsikwetsikwe pashi vaome. Ngavadai ngehozhwe inohamba yechipororozeka; kudai ngewapfupfudzika usikazi kuona kujeka kwezuva. Ngokukasirisa kupinda hari dzenyu dzisati dzazwa kupisha kwemuriro weminzwa, kunyazwi kusvipirika nokuti kutsva, ngaatsvaire zveshe kuretu! Vakarurama vanozodakara apo vaona kuunzidzirwa kwechiitwa; vanozoshamba tsoka dzavo mungazi yevakashata. Vanhu vanozoti, “Ngegwinyiso uriyo musharo wevakarurama. Ngegwinyiso uriyo Mwari unotonga panyika.” KuneMutungamiriri woKuemba. Nduyo yaDhavhidha apo Sauri atumira vanhu koorinda mhatso yaDhavhidha kuti amuuraye. Ndinunure kubva kumagaa angu, A Mwari wangu; ndingwarirenyi kubva kuneavo vanondimukira. Ndinunure kubva kuneavo vanoshanda zvakashata; undiponese kubva kuvanhu vanenyota yengazi. Kunyazwi zvino, vanohwarira ndaramo yangu; vanesimba vanomusa mweya wokurwa neni, pasina ndaa yokupauka kwangu, nokuti yokushaisha kwangu, A Mambo Mwari. Pasina ndaa yangu vanorumba vechidzinasirira. Muka iwewe pachako, uya kundidetsera, uringire. Iwewe, Mambo Mwari, Mwari wehondo, Mwari waIsuraeri. Miruka, uorore madzinza eshe; usaponesa naumwe wavo vanopauka kuita zvakashata. Selah. Vanouya madeekoni eshe vechiukura kudai ngembwa, vechitenderera dhorobha. Apo, vanofemurika ngemiromo yavo, nemazwi akapinza kudai ngeshoti pamiromo yavo, ngokuti vanoti, “Ndiani unozotizwa?” Asi iwewe, Mambo Mwari, unozovasheka; unozoasvereredza madzinza eshe. A simba rangu, ndinozokugarira; ngokuti iwewe, Mwari ndiwe rusvingo rwangu. Mwari wangu munyasha dzake dzinorudo unozoshongana neni; Mwari wangu unozondiita kuti ndione kunyiswa kwemagaa angu. Usavauraya, ngokuti vanhu vangu vangariyarwa; vaparadze ngesimba rako, uvadzase pashi, A Mambo Mwari, chihlangu chedu. Ngendaa yechishaishi chemiromo yavo, mazwi emiromo yavo, ngavabatwe mukudzikudza kwavo. Ngendaa yokutuka nemanyepo zvevanoereketa, vapedze muushungu; vapedze kuti vasachazoapo. Zvino zvinozoziikanwa metsa kumagumo enyika kuti Mwari unotonga padera paJakobe. Selah. Mumadeekoni eshe vanopetuka, vechiukura kudai ngembwa, vechitenderera dhorobha. Vanopepesheka peshe vechitsvaka kudya, navo vanobhonga kuti vasaguta. Asi inini ndinozoemba ngendaa yesimba rako; ndinozoemba kudaidzisa ngendaa yenyasha dzako dzinorudo mumagwanani. Ngokuti iwewe waiya rusvingo rwangu nebako rokuhwara ngezuva rokutambudzika kwangu. A simba rangu, ndinozoemba kukukudza, ngokuti iwewe, A Mwari, uri rusvingo rwangu, Mwari unondionisa nyasha dzinorudo. KuneMutungamiriri woKuemba. Nduyo yaDhavhidha apo akarwa naAramu Naharaimu naAramu Zobha naapo Joabhi apetuka nokuuraya makumi emazana gumi nemairi evaEdhomu muBani reMunyu. A Mwari, watirasha, wapwanyira pashi marukumbati edu; waiya wanyangadzwa; tipetudzenyi! Waita kuti nyika izungunyike; waitatura; nasirisa ndutwe dzayo, ngokuti inongundangunda. Waita kuti vanhu vako vatambudzike ngezviro zvakakonza; watimwisa vhini ratiita kuti titandadzike. Waemesera mujeki avo vanokutya, kuti vavhikirwe kubva kumisee youta. Selah. Ipa kunyisa ngenyara yako yomudyo nokutipingura, kuti avo vounoda vapokonyorwe. Mwari wakagondisa mukuchena kwake: “Mukudakara ndinozopaura Shekhemu, ndiedzanisire Bani reSukothi. Gireadhi ngerangu, Manase ngerangu; Efuremu chiquoko changu; Judha indonga yangu youmambo. Moabhi chidziyo changu chokushambiramwo; padera peEdhomu ndinozokandirapo gwada rangu; padera peFiristia ndinodaidzira mukunyisa.” Ndiani unozondiunza mudhorobha rakashosherwa? Ndiani unozonditungamirira kuenda Edhomu? Auzi kutiramba isusu here, A Mwari? Aubudi nehondo dzedu, A Mwari. A, tidetsere kurwa negaa, ngokuti kudetsera kwevanhu akuna shwiro. NaMwari tinozoita ngoungwazi; ndiye unozotsikirira pashi magaa edu. KuneMutungamiriri woKuemba nezvoKuridza. Nduyo yaDhavhidha. Izwa kuchema kwangu, A Mwari; purutana mukumbiro wangu. Kubvira kumagumo enyika ndinodaidza kwouri, apo mwoyo wangu wapera simba. Nditungamirire kubuwe rakareba kupinda inini; ngokuti uri bako rangu rokuhwara, thawa rakagwinya rokuhwara kubva kumagaa anondirwisa. Ngandigare mutende rako mhera nariini, ndihware mubvute pashi pemaphaphiro ako. Selah. Ngokuti iwewe, A Mwari, wakazwa mhiko dzangu, iwewe wandipa nhaka yeavo vanotya zina rako. Rebesa ndaramo yamambo; makore ake ngaawande kumibarirwana yeshe. Ngaagadzwe padendemaro pamberi paMwari mhera nariini; A, mumuemesere nyasha dzinorudo nokugondeka, kuti dzimungwarire. Ndizvo ndinozoemba kukudza zina rako mhera nariini, ndiripe mhiko dzangu zuva ngezuva. KuneMutungamiriri woKuemba, kunaJedhuthuni. Nduyo yaDhavhidha. Mweya wangu unogarira Mwari ega mukunyarara; ruponeso rwangu runobva mwaari. Aye ega ndiye buwe rangu noruponeso rwangu, ndiye rusvingo rwangu rwakaturama; andizombozungunyiswi. Mukuwo wakaitawani womunozorwisa munhu, kuti mumuuraye, imwimwi mweshe, kudai ngorukumbati rwoda kuwa, kudai ngorushosha rwaungama? Urongwa hwavo hwega ngehwokuti varigire pashi munhu kubva kuugaro hwake hwakanaka. Vanodakara ngemanyepo; vanobonga ngomuromo yavo, asi vanotuka ngomumwoyo. Selah. Mweya wangu unogarira Mwari ega mukunyarara, ngokuti gonda rangu rinobva kwaari. Aye ega ibuwe rangu noruponeso rwangu, rusvingo rwangu; andizombotsukunuswi. Pana Mwari ruponeso rwangu nembiri yangu zvinogara; ibuwe rangu rakagwinya, bako rangu riri munaMwari. Gondai mwaari nguva dzeshe, imwimwi vanhu; dururai mwoyo yenyu pamberi pake; Mwari ibako redu. Selah. Vanhutu vasina shwiro mweya wega, naavo vakuru avana shwiro; mukupimwa vanoreruka; vanoreruka veshe pamwepo kupinda mweya. Musagonda kuangiridza, musaemesa gonda renyu risina shwiro mukuba; kudai upfumi hwechiwanzwa, musaemesa mwoyo yenyu kwohuri. Kamwe Mwari wakaereketa, kwechipiri ndakazwa ichi: kuti simba ngeraMwari, nenyasha dzinorudo dziri kwouri, A Mambo Mwari. Ngokuti unounzidzira kumunhu weshe kudai ngemishando yake. Nduyo yaDhavhidha apo aiya mushango raJudha. A Mwari, iwewe ndiwe Mwari wangu, ndinonasa kukutsvaka, mweya wangu unenyota yokuda iwewe; nyama yangu inodisisa iwewe munyika yakaoma neinorembesa, isina mvura. Ndizvo ndaringira kwouri mundau yakachena, ndechiona simba rako nouthende hwako. Ngokuti nyasha dzako dzinorudo dzakanaka kupinda kupona, miromo yangu inozokukudza. Ndizvo ndinozokukudza ndichararama; ndinozomirudza nyara dzangu ndidaidze zina rako. Mweya wangu unogutiswa ngedhiri rakakora, nomuromo wangu unokukudza ngemiromo inodakara. Naapo ndechikukarakadza ndiri pamubhedhi wangu, ndechipinimidza ndiwe ngenguva dzemirindo yousiku, ngokuti iwewe waiya kudetswa kwangu, ndinozodakara ndiri mumumvuri wemaphaphiro ako, ndinoemba ngokudakara. Mweya wangu unobatira kweuri; nyara yako yokumudyo inonditsimisa. Asi avo vanotsvaka kuparadza mweya wangu vanozonzvaira muugaro huri pashi penyika. Vanozopirwa kusimba reshoti, vanozoita chikoaniswa chehava. Asi mambo unozodakara munaMwari; munhu weshe unopika ndiye unozokudza, ngokuti miromo yaavo vanoereketa manyepo inozonyaradzwa. KuneMutungamiriri woKuemba. Nduyo yaDhavhidha. Izwa izwi rangu, A Mwari, mukugunun'una kwangu; ngwarira ndaramo yangu kubva mukutya gaa. Ndifishe kubva mubangano rakafishika, revaiti vezvakashata, kubva muurongwa hwevashandi vezvakashata, avo varodzera rurumi rwavo kudai ngeshoti, vakakhokha mazwi avo anovava kudai ngemisee, vechifura vanhu vakaperera vari mundau dzakafishika; vanovafura ngokukasira, vasikatongotyi. Vanodzishingisa muzano ravo rakashata; vanopangana ngokuteya mirau mwakafishika, vechiti, “Ndiani ungationa? Ndiani ungatsvakisisa ndaa dzedu? Tapinimidza kutsvakisisa urongwa hwourimbwi hwokuuraya.” Ngokuti mwoyo womunhu nomupinimidzo zvakadzama. Asi Mwari unozoposhera musee wake kwevari; vanozokuwadzwa ngokukasira. Ngendaa yorurumi rwavo unozovaparadza; veshe vanovaona vanozodzungudza masoro mukutya. Zvino vanhu veshe vanozotya; vechizoteketesa mushando waMwari, vanozopinimidza ndizvo zvaakaita. Vakarurama ngavadakare munaMambo Mwari, nokuhwara mwaari. Veshe vakarurama mumwoyo ngavakudze. KuneMutungamiriri woKuemba. Nduyo yaDhavhidha. Ngoma. Kukudzwa kunokusisira, A Mwari, muZioni; kwouri mhiko dzinozoitwa. Iwewe unopingura mikumbiro, mbeu dzeshe dzavanhu dzinozouya kwouri. Apo zviito zvakashata pezvinotinyisa, unokungurira kushaisha kwedu. Unomuchena munhuwo wounotsanangura, wechimukwedzedza kwouri, kuti agare mungome dzako. Tinozogutiswa ngokunaka kwemhatso yako, iri temperi rako rakachena. Ngezviito zvinotyisa unotipingura ngoruponeso, A Mwari woruponeso rwedu; iwewe uri gonda remagumo eshe enyika neeruandhle ruri kuretu yaamho. Ngesimba rako wakatsimisa matunhu; iwewe wakasungwa chiunu chako ngesimba. Unonyaradza kuungumira kworuandhle, nokuungumira kwemafungo nebope revanhu. Avo vanogara kumigano yenyika iri kuretu yaamho vanozotya ngezvioniso zvako. Unoita kuti misiwo yemangwanani neyemadeekoni idaidzire kudakara. Unohambira nyika, wechidiridzira, unoivhundirisa kakurutu; rwizi rwaMwari rwakazara ngemvura; unovapa vanhu zviyo, ngokuti ndizvo zvewainasirira. Unodiridzira migero wayo ngokuwanzisa kakurutu; unoemesa nhoro dzayo; unoipfaisa ngebumhakamwe; unofumisa ngezvinomera zvayo. Unopfekedza gore ngouwandu hwoupfumi hwako; njira dzengoro dzako dzinofashukira mafuta. Mafuro akazarisa mumbusho dzomushango, zvimitunhu zvinodzisimidza ngokudakara. Mbusho dzakazara ngemapwizhi, nemapani akapfukidzwa ngezviyo; anodaidzira nokuemba pamwepo ngokudakara. KuneMutungamiriri woKuemba. Ngoma. Nduyo. Embai ngokudakara kunaMwari, nyika yeshe. Embai mbiri yezina rake; mukudzenyi ngembiri ineuthende. Ronzai kunaMwari kuti, “A, kutyisanyi kwemishando yako! Ngendaa youkuru hwesimba rako, magaa ako anozodzipfaisa pamberi pako. Nyika yeshe inokudira; vanoemba kukukudza, vanoembera kukudzwa kwezina rako.” Selah. Uyai muone mishando yaMwari; unotyisa mumishando yaanoita pakati pevanhu. Wakapindura ruandhle kuti ruite mavhu akaoma; vakaambuka rwizi ngetsoka. Naapo takadakara mwaari, uwo unotonga ngesimba rake mhera nariini, uwo madziso ake anorinda padera pemadzinza; vamukiri vasazodzikudza. Selah. Kudzai Mwari wedu, imwimwi vanhu, muite kuti izwi rokukudzwa kwake rizwike, uwo wakatingwarira pakati pevanopona, naye aazi kutendera tsoka dzedu kuti dzitedzuke. Ngokuti iwewe, Mwari, wakatiedza; wakatiedza kudai ngokuedzwa kwesirivha. Wakatipotedza mumambure; wakatitindikira mutwaro usikabviri pamishana yedu; wakaita kuti vanhu vagadhe padera pemasoro edu; takapotya mumuriro nomumvura; asi wakatipotedza muugaro hwakapamhama. Ndinozopotera mumhatso yako ndine midiro yokupisha; ndinozokuripira mhiko dzangu, idzo dzakaereketwa ngemiromo yangu, nemiromo yangu yakadzipika ngenguva yendaiya mukutambudzika. Ndinozopira kwouri midiro yokupisha yedzakanuna, pamwepo negwema remafuta emagondohwe; ndinozoita mudiro wemikono nembudzi. Selah. Uyai muzwe, imwimwi mweshe munotya Mwari, neni ndinozoronza izvo zvaakaitira mweya wangu. Ndakachema kudaidzira kwaari ngomuromo wangu, naye wakakudzwa ngorurumi rwangu. Kudai ndakangwarira kushata mumwoyo mwangu, Mambo Mwari waizodai asikazi kundizwa. Asi ngegwinyiso Mwari wakazwa; wakapurutana mazwi okukumbira kwangu. Ngaakudzwe Mwari, uwo usikazi kuramba mukumbiro wangu, nokuti kubvisa nyasha dzake dzinorudo kubva kwendiri. KuneMutungamiriri woKuemba nezvimadangari. Nduyo. Ngoma. Mwari ngaatiitire nyasha, atifumise, aite kuti hope yake ijeke padera pedu, Selah. kuti njira yako iziikanwe panyika, simba roruponeso rwako riziikanwe mukati mwemadzinza eshe. Vanhu ngavakukudze, A Mwari; vanhu veshe ngavakukudze. Madzinza ngaadakare nokuemba ngokudakara, ngokuti iwewe unotonga vanhu ngokururama, nokutungamirira madzinza panyika. Selah. Vanhu ngavakukudze, A Mwari; vanhu veshe ngavakukudze. Nyika yabereka michero yayo yakawandisa; Mwari, Mwari wedu, watifumisa. Mwari ngaangire kutifumisa; magumo eshe enyika ngaamukudze. KuneMutungamiriri woKuemba. Nduyo yaDhavhidha. Mwari ngaamiruke, magaa ake ngaaparadzwe; avo vanomuzonda ngavatize kubva pamberi pake. Kudai ngokudzingwa kwechiushi, ndizvo vadzinge; kudai ngokunyunguruka kwenamo pamberi pomuriro, ndizvo vakashata ngavapere kufa mukuona kwaMwari. Asi vakarurama ngavadakare; ngavakudzwe pamberi paMwari; ngavazare ngokudakara. Embai kunaMwari, embai kukudza zina rake; daidzira ngoma kwaari uwo unogadha makore, zina rake ndiMambo Mwari, dakarai imwimwi pamberi pake. Baba enherera nomungwariri weshirikadzi, ndiye Mwari muugaro hwake hwakachena. Mwari unopa muzi avo vari vega kuti vagaremwo; unoita kuti mabhanditi agarisike, asi vamukiri vanogara munyika yakaoma. A Mwari, ngenguva yowakahamba pamberi pevanhu vako, apo wakahamba kupinda ngomushango, nyika yakatengenda, matenga akadurura mvura ngokuapo kwaMwari, Mwari weMutunhu weSinai, ngokuapo kwaMwari, Mwari waIsuraeri. Iwewe, Mwari, wakanayisa mvura yakawanda, wakanayisa kundau dzeshe; wakagwinyisa nhaka yako apo peyakapera simba. Mutanga wako wakaona ndau yokugara mweiri; muunaku hwako, A Mwari, wakanasirira varombo zvakanaka. Mambo Mwari unopa izwi; chikurutu chiunga cheavo vanoteketesa mashoko akanaka: “Madzimambo ehondo anotiza, anotiza!” Vakadzi vari kanyi vanokoanisirana zvakachakatwa, kunyazwi vanogara pakati pematanga emapwizhi, kwakadai ngemaphaphiro enjia akafukidzwa ngesirivha, nemanhenga ayo akafukidzwa ngomukore wakasvipirika. Naapo uwo unesimba reshe paakaparadzirapo madzimambo, chando chakawa padera peZarimoni. Dunhu rinesimba, Dunhu reBhashani; A mitunhu mizhinji yakaturama, Dunhu reBhashani! Imwimwi mitunhu yakaturama, munongadzaira ngenyi kumutunhu uwo waanoda Mwari kuti uite ugaro hwake, Mambo Mwari unozogara mukati mwawo mhera nariini? Ngoro dzaMambo dziri makumi mairi emakumi emazana (20,000), makumi emazana padera pemakumi emazana, Mambo Mwari wakauya kubva Sinai, kupotera mundau yakachena. Iwewe wakakwira mutunhu wakareba, wechitungamirira vasungwa mumutungwe wako, nokuashira zvipo kubva kuvanhu, kunyazwi kubva kuneavo vanomukira kugarapo kwaMambo Mwari. Ngaabongwe Mambo Mwari uwo unotitwarira mitwaro yedu zuva ngezuva; Mwari ndiye ruponeso rwedu. Selah. Mwari wedu ndiMwari woruponeso rwedu; kunaMwari, Mambo Mwari, uriyo utiziro kubva kurufu. Asi Mwari unozopwanya masoro emagaa ake, dzungudza remamviri reavo vanohamba munjira dzavo dzokushata. Mambo Mwari wakati, “Ndinozovapetudza kubva Bhashani, ndinozovapetudza kubva muudzamu hworuandhle, kuti ushambe rutsoka rwako mungazi, kuti rurumi rwembwa dzako dziane chikoaniswa kubva kumagaa ako.” Vanoona kupotera kwako, A Mwari, kupotera kwaMwari wangu, Mambo wangu, muugaro hwakachena, vaembi pamberi, varidzi vembira ngesure, pakati pavo vasikana vechiridza makandira. “Kudzai Mwari mumushongano mukuru, Mambo Mwari, imwimwi muri vechinyuka chaIsuraeri!” Uripo Bhenjamini, mudoko wavo, mutungamiriri, vatongi vaJudha nemakota avo, vatongi veZebhuruni, vatongi veNafitari. Daidza simba rako, A Mwari; wonesa kugwinya kwako, kudai ngeizvo zvewakatiitira. Ngendaa yetemperi rako riri muJerusarema, madzimambo anounza zvipo kwouri. Karaidza zvikara zvinogara pakati petsanga, mutanga wemikono, pamwepo nemakonyana evanhu. Tsikatsika pashi petsoka avo vanodisisa mare yomuthero; paradzira vanhu vanodakarira kurwa hondo. Thusi ngariunzwe kubva Egipite; vaEthiopia ngavakasire kutambanudza nyara dzavo kunaMwari. Embai kunaMwari, imwimwi umambo hwomunyika; embai kukudza kunaMambo Mwari, Selah. Iwewe mugadhi wepadera pematenga matenga ekare kare. Purutana, unodaidzira ngeizwi rake, izwi rake rinesimba. Teketesai kuti Mwari unesimba, ukuru hwake huri padera paIsuraeri, nouwo simba rake riri mumatenga. Unotyisa, A Mwari, muugaro hwako hwakachena, Mwari waIsuraeri; unopa simba nokugwinya kuvanhu vake. Ngaakudzwe Mwari! KuneMutungamiriri woKuemba. Nduyo yaDhavhidha. Ndiponese, A Mwari, ngokuti mvura yaguma pahuro pangu. Ndinonzvaira mumachobve akadzama, musikabviri kuema; ndapotera mumvura yakadzama, guwe rinopopoma ngepadera pangu. Ndaremba ngokuchema kwangu; mukuro wangu waomerwa. Madziso angu adzima ngokugarira Mwari wangu. Avo vanondizonda ndisina ndaa vawandisa kupinda bvudzi resoro rangu; vazhinji avo vanoda kundiparadza, magaa angu anondiitira ndaa dzokunyepa. Ndinoangiridzwa kupetudza chendisikazi kuba. A Mwari, unohuzia upenzi hwangu; zvishaishi zvangu zvendakaita azvizi kufishika kubva kwouri. Usatendera kuti avo vanokugonda vatsverudzwe ngendaa yangu, A Mambo Mwari, Mwari wehondo; usatendera kuti avo vanokutsvaka vasakudzwa ngendaa yangu, A Mwari waIsuraeri. Indaa yako yakaita kuti nditware kutsverudzwa, kutsverudzwa ukwo kwakafukidza hope yangu. Ndaita mupara kunehama dzangu, nowenyika mukanza kunevana vamai angu. Kutsamwirira kwemhatso yako kwandipedza; zvituko zveavo vanokutuka zvawira padera pangu. Apo pendakapfaisa mweya wangu ngokuera kudya, vakandituka ngokuita kudaro. Apo ndakaita saka kuti riite chokusimira changu, ndakaita chishekedzo kwevari. Ndini wevanoreya avo vanogara pamusiwo wedhorobha, nezvidhakwa zvinoemba ngoma ndini. Asi inini, mukumbiro wangu uri kwouri, A Mambo Mwari. Ngenguva inoashirika, A Mwari, muuwandu hwenyasha dzako dzinorudo, ndipingure ngokugondeka kworuponeso rwako. Ndibudise mumachobve, kuti ndisanzvaira; ngandinunurwe kubva kumagaa angu, nokubva mumvura yakadzama. Usatendera kuti ndambi igume padera pangu, nokuti kudzama kundimedze; nokuti hunza ikonye muromo wayo padera pangu. Ndipingure, Mambo Mwari, ngokuti nyasha dzako dzinorudo dzakanaka; kudai ngouwandu hwenyasha dzako dzinokungurira, kunukukira kwendiri. Usafisha hope yako kubva kunemuranda wako, ngokuti ndiri mukutambudzika; kasira kundipingura. Kwedzera pasinde pangu, ndiripire. Ndinunure ngendaa yemagaa angu. Iwewe unozia kutukwa kwendinoashira nokutsverudzwa, nokusikakudzwa; magaa angu eshe anoziikanwa pamberi pako. Zvituko zvasvipisa mwoyo wangu; ndizvo ndirikupera simba. Ndakatsvaka vokundiitira nyasha, asi paiya pasina naumwe. Ndakatsvaka vaembedzeri, asi andizi kuona naumwe. Vakandipa chahwahwa kuti chiite kudya kwangu, nokupera kwangu ngenyota vakandimwisa dangapwizhi. Tafura ravo ngariite chirimbana chinovabata, murau wokubata vangani vavo. Madziso avo ngaapofomadzwe, kuitira kuti vasakona kuona, zviunu zvavo ngazvigare zvechihuta. Durura ushungu hwako padera pavo, ushungu hwako hunobaka ngauvabate. Ugaro hwavo ngahuite matongo; usatendera naumwe kugara mumatende avo. Ngokuti vanotambudza avo vowakachaya, naavo vowakaremadza vachandorwisa kakurutu. Tutsira kushata padera pokushata kwavo; usavatendera kuti vapotere mukururama kwako. Ngavatsukutidzwe kubva mubhuku revanopona; vasanyorwa pakati pevakarurama. Asi inini ndiri murombo nouri mukurwadziwa; ruponeso rwako, A Mwari, ngarundingwarire pakaturama. Ndinozokudza zina raMwari ngenduyo; ndinozomukurisa ngokubonga. Izvi zvinozodakadza Mambo Mwari kupinda mudiro wekabi nokuti mukono unenyanga nemadondova. Tenderai vakatsikirirwa vazvione, vadakare; imwimwi munotsvaka Mwari, mwoyo yenyu ngaimusirirwe. Ngokuti Mambo Mwari unozwa vatami, naye aashoori vake avo vakasungwa. Denga nenyika ngazvimukudze, ruandhle nazvo zveshe zvinohambamwo. Ngokuti Mwari unozoponesa Zioni, nokuakisa maguta aJudha; nevaranda vake vanozogaramwo, vaagare nhaka; Vana vevaranda vake vanozogara nhaka, naavo vanoda zina rake vanozogara mukati mwaro. KuneMutungamiriri woKuemba. Nduyo yaDhavhidha yokupota. Dakadzwai, A Mwari, kundinunura. A Mambo Mwari, kasira kundidetsera! Ngavatsverudzwe nokukangaidzwa avo vanotsvaka mweya wangu. Avo ngavapetudzwe sure, vatsverudzwe, avo vanodakara ngokuremadzwa kwangu. Ngavapetudzwe kuita musharo wokutsveruka kwavo, avo vanoti, “A, A!” Veshe vanokutsvaka ngavadakare nokudakadzwa mweuri. Avo vanoda ruponeso rwako ngavagare vechiti, “Mwari mukuru!” Asi inini ndiri murombo nomutami; kasira kuuya kwendiri, A Mwari! Iwewe uri mudetseri wangu nomununuri wangu; A Mambo Mwari, usanonoka. Mambo Mwari, ndinohwara mwouri; usatenda kuti nditsverudzwe mhera nariini. Ndisunhure mukururama kwako undinunure: ungamisira nzee yako kwendiri, undiponese. Ita buwe rokuhwara kwendiri, rusvingo rwakagwinya, kundiponesa; ngokuti iwewe uri buwe rangu norusvingo rwangu. Mwari wangu, ndinunure kubva munyara yowakashata, kubva munyara yousikazi kururama, nousina nyasha. Ngokuti iwewe, Mambo Mwari, uri gonda rangu, nemagondero angu, A Mambo Mwari, kubvira muutsva hwangu. Ndakatseyama padera pako kubvira mukubarwa kwangu; ndiwe wakandibudisa kubva mundani yamai angu. Kukudza kwangu kunozogara kuri kwako. Ndagara ndakadai ngechishamiso kunevazhinji, asi iwewe uri bako rangu rokuhwara rakagwinya. Muromo wangu wakazadzwa ngokukudzwa kwako, noukuru hwako, zuva reshe. Usandirasha ngenguva yousharuka; usandisiya apo simba rangu rapera. Ngokuti magaa angu anoereketa ndini, naavo vanohwarira mweya wangu vanoita bangano vari pamwepo. Vanoti, “Mwari wamusiya; murumbirirei mumubate, ngokuti akuna wokumununura.” A Mwari, usanditaraukira; A Mwari wangu, kasira kundidetsera. Ngavatsverudzwe vapetudzwe, avo vanoitira ndaa mweya wangu; avo vanotsvaka kundiremadza ngavafukidzwe ngechituko nokutsverudzwa. Asi inini ndinozogara ndechigonda, ndinozokukudza nokukukudza. Muromo wangu unozoereketa ngokururama kwemishando yako, nemishando yako yoruponeso zuva reshe, kunyazwi uwandu hwavo hwakawanda kupinda ruziyo rwangu. Ndinozouya ndechikudza kugwinya kwemishando yaMambo Mwari, Mwari; ndinozokudza kururama kwako, kwako kwega. A Mwari, wakandidzidzisa kubvira muutsva hwangu, nanyamashi ndinoteketesa mishando yako inoshamisa. Ndizvo kunyazwi nomuusharuka, nokuchena imvi, A Mwari, usandisiya, metsa ndateketesa simba rako kunemibarirwana ichauya. Simba rako nokururama kwako, A Mwari, kunogumira matenga akaturama. Iwewe wakaita zviro zvikuru, A Mwari, ndiani wakadai ndiwe? Iwewe wakandiita kuti ndione madambudziko akawanda anorwadza, unozondimusazve; kubva muudzamu hwenyika unozondipetudzazve. Unozowandisa ukuru hwangu, nokundiembedzerazve. Ndinozokukudzawo ngechimadangari, ngendaa yougondeki hwako, A Mwari wangu. Ndinozoemba kukukudza ngembira, iwewe Wakachena Umwe waIsuraeri. Miromo yangu inozodaidzira ngokudakara, apo pendinoemba kukukudza; mweya wanguwo uwo wewakanunura. Rurumi rwanguzve runozoereketa ngorudetso rwokururama kwako mutakatiro wezuva reshe, ngokuti avo vanotsvaka kundiremadza, vatsverudzwa nokukangaidzwa. Nduyo yaSoromoni. A Mwari, ipa kutonga kwako kwakarurama kunamambo, nokururama kwako kunomukororo wamambo. Ngaatonge vanhu vako ngokururama, nevarombo vako ngokutonga kwakanaka. Matunhu ngaaunze kubudirira kwevanhu, nezvimitunhu, mukururama. Ngaarwire ndaa dzevanhu varombo, ape kununurwa kunevatami, nokuparadza mutambudzi. Ngavakutye zuva richipo, nomwedzi uchipo, mukati mwemibarirwana yeshe. Ngaadai ngemvura inonaya padera pemwenje wakakumwa, kudai ngebumhakamwe rinonyorovesa nyika. Mumazuva ake kururama ngakuwande, nouwandu hwokunyarara ngahuapo metsa mwedzi usisipo. Ngaatonge kubvira kuruandhle kuenda kuruandhle, nokubvira kurwizi metsa kuguma kumigano yenyika. Magaa ake ngaakotame pamberi pake, nemagaa ake anambure bukuta. Madzimambo eTharshishi neezviwi ngavamubhadhare chibharo, madzimambo eShebha neeSebha ngavaunze zvipo. Madzimambo eshe ngaawire pashi pamberi pake, eshe madzinza amushandire. Ngokuti unonunura mutami apo oochema, murombo nouwo usina mudetsi. Unokungurira wakaremba nomutami, unoponesa mweya womutami. Unonunura mweya wavo kubva mukutambudzwa nomukugebengwa; nengazi yavo inomutengo mukurutu mukuona kwake. Ngaapone mhera nariini! Mukore weShebha ngaupuwe kwaari. Ngavaangire kumukumbirira nezvifumiso ngazvidururwe kwaari zuva reshe. Ngazviwepo zviyo zvakawandisa munyika; ngazvizungunyike padera pemitunhu; michero yayo ngaidai ngeyeRebhanoni; vanhu vari muguta ngavamerere kudai ngomwenje womunyika. Zina rake ngarigare mhera nariini; mbiri yake ngaiangire kugara kuti zuva richindoripo. Madzinza eshe ngaafumiswe mwaari; madzinza eshe ngaaronze kuti, “Unodakara.” Ngaakudzwe Mambo Mwari, Mwari waIsuraeri, uwo ega unoita zviro zvinoshamisa. Ngarikudzwe zina rake rinouthende mhera nariini; uthende hwake ngahuzadze nyika yeshe. Ameni naAmeni. Mikumbiro yaDavhidha mukororo waJesi yapera. Ngegwinyiso Mwari wakanaka kunaIsuraeri, kwavari avo vakacheneswa mumwoyo. Asi inini, tsoka dzangu dzaiya dzooda kupumhunwa; zvitsiko zvangu zvaiya zvooda kutedzuka. Ngokuti ndaiya nendurumwa ngevanodzikudza; ndakaona kugarisika kwevakashata. Ngokuti avana kurwadziwa miiri yavo; yakagwinya inesimba. Avatambudziki kudai ngevamweni; avatambudzwi kudai ngevanhu vamweni. Ndizvo kudzikudza iketani yemuhuro mwavo; ugebenga hunovafukidza kudai ngechokufuka. Madziso avo anozvimba ngokukora; mwoyo yavo inofashukira ngezvoupenzi. Vanoita jee, vanoereketa ngezviro zvakashata; vanoereketa kudzitunhumadza nokuronga kutsikirira. Vanotununisa miro yavo kurwa nedenga, norurumi rwavo runohamba munyika. Ndizvo vanhu vanopetuka vechivakudza, vasikaoni kushata mwevari. Navo vanoti, “Mwari ungakona kuzia ngenjiranyi? Kuriyo kuzia kwaari Uri muDenga Denga here?” Ringira, ava ndivo vakashata; ngokuti vanogara vechigarisika, vanowandisa upfumi hwavo. Pasina shwiro ndakachenesa mwoyo wangu, ndikashamba nyara dzangu ngokuti ndaiya ndisina ndaa. Ngokuti mutakatiro wezuva reshe ndaitambudzwa, ndaiororwa mangwanani eshe. Kudai ndakati, “Ndinozoereketesa kudaro ngenjira iyi,” ndaizoita munyepi kumibarirwana yevana vako. Asi apo ndakakarakadza kuti ndingaita maziirenyi izvi, wakaoneka kwendiri uri mushando wakakonza, metsa ndakapotera mumhatso yaMwari yakachena; naapo ndakazwisisa kupera kwavo. Ngegwinyiso wakavaemesa muugaro hunotedza; unovasukumidzira pashi kuti vapere. I! Vaparadzwa ngekamukuwo kadoko, vanopedzwa yaamho ngemaharura. Kudai ngokurota apo munhu amuka; ngokudaro, A Mambo Mwari, pakumuka, unoshoora muemo wavo. Naapo mweya wangu waitambudzika, ndakabaiwa mumwoyo wangu, ndaiya benzi ndisikazii chiro; ndaiya ndakadai ngechikara pamberi pako. Zvakanyadaro ndinoangira kugara ndinewe; unondibata ngenyara yangu yokumudyo. Unonditungamira ngemipango yako, ngesure kweizvi unozondiashira muuthende. Ndinaani mudenga, asi iwewe? Nepashi apana chiro chendinodisisa ngokubanze kwako. Nyama yangu nomwoyo wangu zvinokorera, asi Mwari uri simba romwoyo wangu, nechikoaniswa changu mhera nariini. Ngegwinyiso avo vari kuretu newe vanozopera; unoparadza veshe vasikagondeki kwouri. Asi kwendiri kwakanaka kuti ndigare pasinde naMwari; ndaita Mambo Mwari, Mwari, bako rangu rokuhwara, kuti nditeketese mishando yako yeshe. Nduyo yaAsafi. A Mwari, ngenyi wechitirasha mhera nariini? Ngenyi ushungu hwako hwechipwititika kuita chiushi kurwisana nemapwizhi embusho yako? Karakadza mbungano yako yowakatenga kare kare, yowakaripira kuita dzinza renhaka yako. Karakadza Mutunhu weZioni mwowakagara. Mirudza tsoka dzako kuhamba mumatongo anogara akadaro; gaa raparadza zviro zveshe zviri mundau yakachena. Magaa ako akabhonga mukati mwendau yako yakachena; vakaemesa mijeki yavo kuita zvioniso. Pamusiwo wedera vakatema miti yakatsikana ngemasanho. Nazvino vanopwanyira pashi ngesanho nehamera mushando weshe wayo wakatsetswa. Vakapisha mhatso yako yakachena ngomuriro; vakasvipisa ndau yougaro hwezina rako ngokuuriga pashi. Vakati mumwoyo yavo, “Tinozovapedza yaamho.” Vakapisha ndau dzeshe dzokushongana dzaMwari dziri munyika. Atichaoni zvioniso zvedu; akuchina muprofeti; apachina naumwe pakati pedu unozia kuti inguva yakadini. Mukuwo wakareba zvakadini, A Mwari, gaa rechimushoora? Gaa rinozotuka zina rako mhera nariini here? Ngenyi wechifisha nyara yako? Ngenyi wechiisa nyara yako yokumudyo paditi rako? Asi Mwari ndiye Mambo wangu kubvira karetu, unoshanda ruponeso mukati mwenyika. Iwewe wakapaura ruandhle ngesimba rako guru; wakapwanya masoro ezvikara zvomurandhle. Wakapwanya masoro ezvikara kuita zvigurwa, wakapa kuita kudya kwezvisikwa zvomushango. Wakabeura miromo yezvinyuka neguwe; wakaomesa ndwizi huru. Masikati ngaako, nousiku ngohwakozve; iwewe wakaita kujeka nezuva. Wakaemesa migano yeshe yenyika; wakaita zienza nechando. Karakadza ichi, Mambo Mwari, kuti gaa rinotsverudza, rinokusheka, nokuti vanhu vanoupenzi vanotuka zina rako. Usakovera mweya wegora rako kumhuka dzomushango; usariyarwa ndaramo yevarombo vako mhera nariini. Karakadza chitenderano chako, ngokuti ndau dzechidima dzenyika dzakazara ngougaro hwokugebenga. Usatendera kuti unotambudzwa atsverudzwe; tendera murombo nomutami vakudze zina rako. Miruka, A Mwari, urwire ndaa yako; karakadza njira yaanokutsverudza ndiyo zuva reshe munhu uri benzi. Usariyarwa hohoho yemagaa ako, bope revanokumukira rinogara rechikwira. KuneMutungamiriri woKuemba: Usaparadza. Nduyo yaAsafi. Tinokubonga, A Mwari; tinobonga; zina rako riri pasinde. Vanhu vanoteketesa mishando yako inoshamisa. Panguva yakasisira iyo yendaemesa, ndinozotonga ngokururama. Naapo nyika nevagari vayo veshe ikazungunyika, ndini ndinozoemesa zvitsimiso zvayo. Selah. Ndinoti kunevanodzikudza, “Musadzikudza;” nokune vakashata, “Musamirudza runyanga; musamirudzira mudenga runyanga rwenyu, nokuti kuereketa munemitsipa yakakukutara.” Ngokuti akubvi kumabvazuva nokuti kumabirirazuva, haiwa kubva mushango andikwopi kunobva kumirudzwa. Asi Mwari ndiye mutongi; unodzasa umwe pashi, echimirudza umweni. Ngokuti munyara mwaMambo Mwari munetsani, inevhini rinopupira, yakazara yakanasa kukumanidzwa, naye unoidurura. Ngegwinyiso vanhu veshe vakashata venyika vanozokamura masese aro, vamwe. Asi inini ndinozodakara mhera nariini; ndinozoemba kukudza Mwari waJakobe. Ndinozotema dzeshe nyanga dzevakashata, asi nyanga dzevakarurama dzinozomirudzwa. KuneMutungamiriri woKuemba nezvimadangari. Nduyo yaAsafi. Mwari unoziikanwa muJudha, zina rake iguru muIsuraeri. Tende rake rakaemeswa muSaremu, nougaro hwake huri muZioni. Naapo wakagura misee youta yaibaka, chihlangu, shoti nezvokurwisa hondo. Selah. Iwewe unouthende, hwakapinda kunaka kunemitunhu yemhera nariini. Vakatsunga mwoyo vakatorerwa zvakachakatwa zvavo; vakaata hope; akuna naumwe wevarwi wakakona kumirudza nyara. Pakukaraidza kwako, A Mwari waJakobe, veshe mugadhi nehachi zvagumirwa ngehope dzorufu. Asi, iwewe ngegwinyiso unotyisa! Ndiani ungaema pamberi pako apo ushungu hwako hwabaka? Wakaita kuti kutonga kuzwike kwechibva mudenga; nyika yakatya ikanyarara, apo Mwari paakamiruka kutonga, kuponesa veshe vakatsikirirwa vomunyika. Selah. Ngegwinyiso ushungu hwevanhu hunoshanda kukukudza kwega, naapo woosunga zvokugumisira zvoushungu hwako kudzitendenedza. Pikai mhiko kunaMambo Mwari, Mwari wenyu mudziripe; veshe vanomutendenedza ngavaunze zvipo kunouwo unotyiwa, uwo unotema mweya yevatongi, uwo unofemera kutya kunemadzimambo enyika. KuneMutungamiriri Wokuemba. KunaJedhuthuni. Nduyo yaAsafi. Ndinochema kudaidzira kunaMwari, kudaidzira kunaMwari, kuti andizwe. Muzuva rokutambudzika kwangu, ndinotsvaka Mambo Mwari. Nyara yangu inotambanudzwa usiku isikarembi; mweya wangu unoramba kuembedzerwa. Ndinokarakadza ndiMwari, neni ndinotsumba; ndinopinimidza nomweya wangu unopera simba. Selah. Iwewe unobata madziso angu kuti asatswatira; ndinotambudzika kakurutu kwokuti andikoni kuereketa. Ndinopinimidza ngemazuva ekaretu nokukarakadza makore enguva dzekaretu. Ndinokarakadza ngoma yangu muusiku; ndinopinimidza nokutsvakisisa mweya wangu; “Mambo Mwari unozorasha mhera nariini here? Aachazokunguririzve here? Nyasha dzake dzinorudo dzaenda mhera nariini here? Zvigondiso zvake zvaguma mhera nariini here? Mwari wariyarwa kuitira nyasha here? Muushungu hwake watsiira nyasha dzake here?” Selah. Neni ndinoti, “Uku kutama simba kwangu kuti nyara yokumudyo youwo Uripadera-pazveshe yapinduka.” Ndinozokarakadza mishando yaMambo Mwari; ndinozokarakadza mishamiso yako yekaretu. Ndinozonyera ngomushando wako weshe, nokupinimidza ngezviito zvako zvinesimba. Njira yako, A Mwari, yakachena. Ndiani mwari wakakura kudai ndiMwari wedu? Iwewe uri Mwari unoita zvishamiso; wakaonisa simba rako pakati pevanhu. Ngenyara yako inesimba wakanunura vanhu vako, mibarirwana yaJakobe neyaJosefa. Selah. Apo mvura yakakuona, A Mwari, apo mvura yakakuona, yakatya; noudzamu hwakatetemarazve. Makore akadurura mvura; matenga akatinhira; misee yako yakapararira kumarutii eshe. Izwi rokutinhira kwako raiya muchipupuri; mheni dzako dzakajekisa nyika; nyika yakatengenda, ikazungunyika. Njira yako yaipinda ngomuruandhle, njira yako yaipinda ngomumvura yakawanda; asi zvitsiko zvako zvaiya zvisikaoneki. Iwewe wakatungamirira vanhu vako kudai ngomutanga ngenyara yaMosi neyaAroni. Nduyo yaAsafi. Purutanai, vanhu vangu, kudzidzisa kwangu; ungamisai nzee dzenyu kumazwi omuromo wangu. Ndinozoshama muromo wangu kuereketa miedzaniso; ndinozoereketa zvisana zvakafishika zvekaretu, zviro zvetakazwa nezvetakazia, izvo madzibaba edu akatironzera. Atizofishiri vana vavo; tinozoronzera mibarirwana inoteera kukura kwemishando yaMambo Mwari, nesimba rake nezviito zvake zvinoshamisa zvaakaita. Wakagwinyisa mutemo munaJakobe, akaemesa mupango muIsuraeri, uwo waakapanga madzibaba edu, kuti vadzidzise vana vavo; kuti mibarirwana inoteera izvizie, vana vasati vabarwa, nokumiruka, nokuronzera vana vavo, kuti vaise gonda ravo munaMwari, kuti vasariyarwa mishando yaMwari, asi kuti vangwarire mipango yake; kuti vasadai ngemadzibaba avo, mubarirwana usikazwi nounomukira, mubarirwana usikazii kururama mumwoyo yawo, uwo mweya wawo usikazi kugondeka kunaMwari. Vana vaEfuremu, vanezvokurwa ndizvo, vanembita, vakakunukuka kupetuka ngezuva rokurwa. Avazi kungwarira chitenderano chaMwari, asi vakaramba kuhamba mumipango yake. Vakariyarwa mishando yake, nezviito zvake zvinoshamisa zvaaiya avaonesa. Wakaita zviro zvinoshamisa mukuona kwemadzibaba avo, munyika yeEgipite, murubaya rweZoani. Wakapaura ruandhle, akavapindisa ruseri; wakaita kuti mvura ieme kuita murwi. Masikati wakavatungamirira ngegore, nousiku hweshe wakavatungamirira ngokujeka kwomuriro. Wakamwesa mapuwe mushango, akavapa kumwa kwakawandisa kudai ngemvura inobva mwakadzama. Wakanyusa ndwizi kubva mubuwe, akaita kuti mvura ipopome kudai ngendwizi. Asi vakaangirazve kumushaishira, kumukira Uwo-Uripadera-pezveshe, vari mushango. Vakaedza Mwari mumwoyo yavo ngokukumbira kudya kwevaidisa. Vakaereketa kutuka Mwari, vakati, “Mwari unganasira hwarasanza mushango here? Kunyazwi wakachaya buwe, kuti mvura ibude, nendwizi dzakapopoma, ungapazve chingwa here, nokuti kupa vanhu vake nyama here?” Ndizvo apo Mambo Mwari paakazwa, wakazara ngoushungu; nomuriro wakabasirirwa Jakobe, ushungu hwake hwakamukira Isuraeri, ngokuti vaiya vasina gonda munaMwari, avazi kugondazve simba roruponeso rwake. Asi wakapanga makore omudenga, akabeura misiwo yomudenga; wakavarigira mana yokudya, akavapa kudya kwomudenga. Vanhu veshe vakadya chingwa chengirosi; wakavatumira kudya ngokuwanzisa. Wakaita kuti dutu rokumabvazuva ripepete mumatenga; ngesimba rake wakatungamirira dutu rokubani; wakanaisa nyama yakawanda kudai ngebukuta, neshiri dzakawanda dzinemaphaphiro, kudai ngejecha roruandhle. Wakadzinaisa mukati mwekamba ravo, dzechitendenedza ugaro hwavo. Navo vakadya vakaguta yaamho, ngokuti wakavapa chidisiso chavo. Asi vasati vagutisa chidisiso chavo, nyama ichimwo mumiromo yavo, ushungu hwaMwari hwakabaka padera pavo, hukauraya vakapinda kugwinya pakati pavo, nokuparadza vanhu vatsva vaIsuraeri. Kunyazwi zvakadaro, vakaangira kushaisha, avazi kutenda mishando yake inoshamisa. Ndizvo wakaita kuti mazuva avo apere ngokukasira, nemakore avo mukutya. Naapo paakavauraya, vakamutsvaka; vakatenderuka, vakatsvaka Mwari ngokugwinyisira. Vakakarakadza kuti Mwari ndiye buwe ravo, Mwari Uripadera-pezveshe muripiri wavo. Asi vakamutunhumadza ngemiromo yavo; vakamunyepera ngorurumi rwavo. Mwoyo yavo aizi kutseyama paari; vaiya vasikazi kugondeka kuchitenderano chake. Asi waiya nenyasha, wakarekerera kushaisha kwavo, aazi kuvauraya; wakakunukudza ushungu hwake nguva zhinji, aazi kumusa ushungu hwake hweshe. Wakakarakadza kuti vaiya nyama, dutu rinopinda, risikachauyizve. Nguva dzakawanda vakamumukira mushango, vakamutambudza mushango musina mvura. Vakaedzazve Mwari, vakanyangadza Wakachena waIsuraeri. Avazi kukarakadza simba rake nokuti zuva apo paakavaripira kubva kugaa; apo paakaonesa zvioniso zvake muEgipite, nemishamiso yake mushango reZoani. Wakapindura ndwizi dzavo dzikaita ngazi, kuti vasakona kumwa kubva mumarwizi avo. Wakatumira nhunzi pakati pavo dzakawanda, dzakavadya, nemachedye, akavaparadza. Zvisimwa zvavo zvakapuwa mbunga, nezvevakashandira wakazvipa ndongwe. Wakaparadza mivhini yavo ngematsanza, nemionde yavo ngechando. Wakaparadza zvifuyo zvavo ngematsanza, nemitanga yavo yakaparadzwa kakurutu ngemheni. Wakaisa padera pavo kutyisa kwoushungu hwake, ushungu, kushishwa, nedambudzo, chikwata chengirosi dzokuparadza. Wakanasirira ushungu hwake njira; aazi kuponesa mweya yavo kubva mukufa, asi wakakovera ndaramo yavo mudenda guru. Wakauraya matangwe eshe muEgipite, vokuamba kwesimba ravo mumatende aHamu. Zvino wakatungamirira vanhu vake kudai ngemapwizhi, akavausha mushango kudai ngezvifuyo. Wakavatungamirira ngokungwaririka, ndizvo avazi kutya; asi ruandhle rwakambonya magaa avo. Wakavaunza kumutunhu wake wakachena, kudunhu iri raakatora ngenyara yake yokumudyo. Wakadzinga madzinza pamberi pavo; akavakoanisira kuita nhaka nokugarisa madzinza aIsuraeri mumatende awo. Asi vakaedza Mwari Uripadera-pezveshe, vakamumukira. Avazi kungwarira mitemo yake, asi vakakunukukira sure, vakaita vasikagondi kudai ngemadzibaba avo; vakapauka vakaita kudai ngouta wakagoba. Ngokuti vakamuita kuti anyangadzwe ngendau dzavo dzakakwirira; vakamuita kuti aite ndurumwa ngemiedzaniso yakatsetswa. Naapo Mwari azvizwa, wakazara ngoushungu, wakaramba Isuraeri kakurutu. Wakasiya ugaro hwake paShiro, tende iro raaigara pakati pevanhu, naye wakakovera simba rake kuubatwa, uthende hwake kunyara yegaa. Wakakovera vanhu vake kushoti, nokubeurira ushungu hwake kunhaka yake. Muriro wakapedza majaha avo, nemhandwe dzavo dzaiya dzisina ngoma yokuroorwa. Vapristi vavo vakawa ngeshoti, neshirikadzi dzavo adzizi kuchema. Zvino Mambo Mwari wakamuka kudai ngomunhu wamuka muhope, kudai ngetsvisi rinodaidzira ngendaa yevhini. Wakaita kuti magaa ake atize; wakaaisa mukutsverudzwa kusikaperi. Wakaramba tende raJosefa, aazi kutsanangura rusinga rwaEfuremu; asi wakatsanangura rusinga rwaJudha, Dunhu reZioni raakada. Wakaaka ndau yake yakachena, kudai ngematenga akakwirira, kudai ngenyika yaakatsimisa mhera nariini. Wakatsanangura Dhavhidha muranda wake, akamutora kubva mudanga remapwizhi; wakamuunza kubva mukuusha mapwizhi anevana vawo, kuita muushi wevanhu vake Jakobe, waIsuraeri nhaka yake. Ngomwoyo wakarurama wakavausha; akavatungamirira ngoungwazi hwenyara dzake. Nduyo yaAsafi. A Mwari, vemadzinza vapotera munhaka yako; vasvipisa temperi rako rakachena; vakaparadza Jerusarema kuita matongo. Vakapa miiri yevaranda vako kuti iite kudya kweshiri dzomudenga, vakapa miiri yavakacheneswa vako kuzvikara zvomunyika. Vakadurura ngazi yavo kudai ngemvura kutendenedza Jerusarema reshe; kwaiya kusina naumwe wokuvaika. Taita chitsverudzo kunevaakirwana vedu, kushoorwa nokushekwa ngeavo vanotitendenedza. Metsa riini, A Mambo Mwari? Unozotseneka mhera nariini here? Ushungu hwako hunendurumwa hunozopisha kudai ngomuriro here? Durura ushungu hwako padera pemadzinza asikakuzii, nepadera poumambo husikadaidzi zina rako; ngokuti vakaparadza Jakobe, vakaita matongo ugaro hwake. Usatishungurira ngezvishaishi zvemadzibaba makuru edu; nyasha dzako dzinorudo ngadzikasire kushongana nesu, ngokuti tadzaswa pashi kakurutu. Tidetsere, A Mwari woruponeso rwedu, ngendaa yembiri yezina rako; tinunure, utisuke zvishaishi zvedu, ngendaa yezina rako. Ngenyi madzinza echironza kuti, “Mwari wavo uri pari?” Kuunzidzirwa kwengazi yevaranda vako yakaparadzwa ngakuziikanwe pakati pevemadzinza mukuona kwedu. Kugomera kwemabhanditi ngakugume pamberi pako; kudai ngoukuru hwesimba rako, ponesa avo vaemeserwa kufa. Unzidzira kuvaakirwana vedu mikuwo minomwe paditi pavo kutsverudza kwavo kwevakakutsverudza ndikwo, A Mambo Mwari. Zvino isusu vanhu vako, mapwizhi embusho yako, tinozokubonga mhera nariini; kubvira pamubarirwana kuguma pamubarirwana tinozoonesa kukudzwa kwako. KuneMutungamiriri woKuemba. Nduyo yaAsafi. Izwa, A muushi waIsuraeri, iwewe unotungamirira Josefa kudai ngomutanga! Iwewe wakagadzikwa padendemaro padera pemakherubhi, jeka pamberi paEfuremu, Bhenjamini naManase. Musa ukuru hwako, uuye kooponesa. Tiunzezve, A Mwari; hope yako ngaijeke, kuti isusu tiponeswe. A Mambo Mwari wehondo, unozotsenekera mukumbiro wevanhu vako nguva yakadini? Wavagutisa ngechingwa chemisodzi, wavapa misodzi yakawanda kuti vamwe. Unotiita chituko kunevaakirwana vedu; nemagaa edu anosheka pakati pawo. Tiunzezve, A Mwari wehondo; hope yako ngaijeke, kuti isusu tiponeswe. Iwewe wakaunza muvhini kubva Egipite; wakadzinga madzinza, ukausima. Wakaurimira munda, wakatsira nzinde ukazadze nyika. Mitunhu yakatibikirwa ngebvute rawo, misidhare yakagwinya nematai awo. Wakatambararira matai awo kuruandhle, nemharikirwa dzawo dzakaguma kuRwizi. Wakaputsira pashi ngenyi marushosha awo, kuti veshe vanopinda ngenjira vakaye michero yawo? Nguruve inobva mugwasha inouvhuruvhurudza, nemhuka dzomushango dzinoudya. Uyazve, tapota, A Mwari wehondo; ringira pashi, uri mudenga, newe uone; uhambire uyu muvhini, ungwarire guri rawo rakasimwa ngenyara yako yokumudyo. Vakaupisha ngomuriro, vakautemera pashi; vanopera ngokukaraidza kwehope yako. Asi nyara yako ngaiyapo padera pomunhu uri kunyara yako yokumudyo, padera pomukororo womunhu wowakagwinyisa kuita wako. Zvino isusu atizohwiriri sure kubva kwouri; tipe kupona, nesu tinozodaidza zina rako. Tiunzezve, A Mambo Mwari, Mwari wehondo; hope yako ngaijeke, kuti isusu tiponeswe. KuneMutungamiriri woKuemba. Nduyo yaAsafi. Embai ngokudaidzisa kunaMwari wesimba redu; mudaidzire ngokudakara kunaMwari waJakobe. Embai nduyo, muridze ngoma yesimbi, mbira dzinodakadza, nechidangari. Ridza hwama ngenguva yokutawa kwomwedzi mutsva, nepakuchena kwomwedzi, pazuva redhiri redu. Ngokuti ichi chiemeso chaIsuraeri, chitongero chaMwari waJakobe. Wakachiemesa kunaJosefa kuita chapupu, apo paakabuda koorwa neEgipite. Ndinozwa izwi rendisikazi kumbozia: “Ndakadusa mutwaro kubva papfudzi rake; nyara dzake dzakasunhurwa kubva kuchitundu. Mukutambudzika wakadaidza neni ndakakununura; ndakakupingura ndiri muugaro hwakasitika hwokutinhira; ndakakuedza pamvura yeMeribha. Selah. Izwai, imwimwi vanhu vangu, apo pendinomupanga; A Isuraeri, kudai waizotenda kupurutana kwendiri! Akuzoapo chimwari chipara pakati penyu; amuzogwadami pashi kunechimwari chipara. Inini ndini Mambo Mwari, Mwari wenyu, uwo wakamubudisa kubva munyika yeEgipite. Nasa kushama muromo wako neni ndinozouzadza. Asi vanhu vangu avazi kupurutana izwi rangu; Isuraeri aazi kuda kudzipfaisa kwendiri. Ndizvo ndakavatendera kuti vahambe kudai ngokutindiara kwemwoyo yavo, kuti vahambe kudai ngokuda kwavo. A, kudai vanhu vangu vaizopurutana kwendiri, kudai Isuraeri aizohamba munjira dzangu! Zvino ndaizokasira kunyisa magaa avo, ndikunukudze nyara yangu kurwa nemagaa avo. Avo vanozonda Mambo Mwari vanozodzipfaisa kwaari, nokuororwa kwavo kunozogara mhera nariini. Ndingadai ndaimuburira ngekoroni yakapindisisa kunaka, neuchi hunobva mubuwe ndinozomugutisa.” Nduyo yaAsafi. Mwari unogara pandau yake mumbungano yakachena; unotonga pakati pezvimwari. “Metsa riini mwechitonga ngokusikarurama, mwechiita mukheto kunevakashata? Selah. Tongai zvakanaka varombo nenherera; itai zvakarurama kunevanotambudzika neavo vasina chiro. Nunurai vasina simba nevasina chiro; varwirenyi kubva munyara yewakashata.” Avana ruziyo nokuti kuzwisisa; vanopumaira muchidima; zvitsimiso zveshe zvenyika zvinozungunyika. Ndinoti, “Imwimwi muri zvimwari, vana voUripadera-pezveshe, imwimwi mweshe; zvakanyadaro munozofa kudai ngevanhu, mwechiwira pashi kudai ngoumwe wevatongi.” Miruka, A Mwari, tonga nyika; ngokuti madzinza eshe inhaka yako. Ngoma. Nduyo yaAsafi. A Mwari, usanyarara; usarekera kuereketa nokuti usanyarara, A Mwari. Kunyazwi zvino ringirai, magaa ako anoita bope; avo vanokuzonda vamirudza masoro avo. Vanoronga ngourimbwi kuita zvakashata kunevanhu vako; vanopangana pamwepo kurwisa avo vounongwarira. Vanoti, “Uyai, tivapedze, kuti vasachaita dzinza; kuti zina raIsuraeri risachazocherechedzwa.” Vanopangana ngomwoyo umwewo; vanoita chitenderano chokurwisana newe, matende eEdhomu naaIshumaeri, vaMoabhi nevaHagiri; vaGebhari, vaAmoni, vaAmareki, vaFiristia, nevagari vomuThire; Asiriawo yakabatana navo; ndivo muoko wakagwinya wevana vaRoti. Selah. Ita kwevari kudai ngezvowakaita kunevaMidhiani, nokunaSisera naJabhini, paRwizi Kishoni, avo vakaparadzwa paEnidhori, vakaita kudai ngemadisa enyika. Ita kuti vakuru vavo vadai ndiOrebhi naZeebhi, vatongi vavo veshe kuti vadai ndiZebha naZarimuna, avo vakati, “Ngatidzitorere nyika yemafuro yaMwari kuita nhaka yedu.” A Mwari wangu, ita kuti vadai ngechapupuri, kudai ngamazungu pamberi pedutu. Kudai ngomuriro unopisha gwasha, nokudai ngomurazvu unopisha matunhu, ndizvo varumbirire ngomubvumo wako mukuru, uvakarudze ngechamupupuri chako. Zadze hope dzavo ngezvitsverudzo, kuitira kuti vatsvake zina rako, A Mambo Mwari. Ngavatsverudzwe, vatyiswe mhera nariini; ngavaparadzwe mukutsveruka. Ngavazie kuti iwewe wega, zina rako ndiMambo Mwari, Uripadera-pezveshe munyika yeshe. KuneMutungamiriri woKuemba. Nduyo yevakororo vaKhora. Kunakanyi kwendau yougaro hwako, A Mambo Mwari wehondo! Mweya wangu unodisisa ngegwinyiso unopera simba ngoruwanze rwengome dzaMambo Mwari; mwoyo wangu nenyama yangu zvinoemba ngokudakara kunaMambo Mwari unopona. Kunyazwi chiwanzaburi chinodzionera mhatso, nemherepere inodzionera chisaki chokuberekera vana vayo, pamaarita ako, A Mambo Mwari wehondo, Mambo wangu naMwari wangu. Vanomuchena avo vanogara mumhatso mwako; vanozogara vechiemba kukukudza. Selah. Vanomuchena vanhu avo simba ravo riri mwouri, avo mumwoyo mwavo munemapato anoenda Zioni. Vechipinda kuhamba ngomubani rakaoma, vanoriita ndau dzezvinyuka; mvura yokutanga inorifukidza ngemakandwa. Vanoenda kubva pasimba kuenda pasimba; Mwari wezvimwari unozooneka muZioni. A Mambo Mwari, Mwari wehondo, izwa mukumbiro wangu; purutana, A Mwari waJakobe. Selah. Ringira, A Mwari, chihlangu chedu; wona hope yowakadzodzwa wako. Ngokuti zuva rimwe mungome dzako rakapinda kunaka kunegumi remazana (1,000) amweni. Ndingada kuita murindi wepamusiwo wemhatso yaMwari wangu, panekugara mumatende okushaisha. Ngokuti Mambo Mwari, Mwari izuva nechihlangu; Mambo Mwari unoita nyasha nouthende. Mambo Mwari aanyimi chiro chakanaka kuneavo vanohamba ngokururama. A Mambo Mwari wehondo, unomuchena munhu uwo unogonda mwouri. KuneMutungamiriri woKuemba. Nduyo yevakororo vaKhora. Mambo Mwari, wakaitira nyasha nyika yako; iwewe wakahwirinza upfumi hwaJakobe. Wakakungurira kushata kwevanhu vako; wakarekera kushaisha kwavo kweshe. Selah. Wakadusa ushungu hwako hweshe; wakadzikunukudza kubva muushungu hwako hunopisha. Tipetudzeizve, A Mwari woruponeso rwedu, dusa ushungu hwako huri kwetiri. Unozotitsenekera mhera nariini? Unozogumisa ushungu hwako kumibarirwana yeshe here? Auzotimusiririzve here, kuti vanhu vako vadakare mweuri? Tionise nyasha dzako dzinorudo, A Mambo Mwari, tipei ruponeso rwako. Ngandizwe zvaanoereketa Mwari, Mambo Mwari, ngokuti unozoereketa kunyarara kunevanhu vake, kunevakagondeka vake, kwevari vanokunukukira kwaari mumwoyo yavo. Ngegwinyiso ruponeso rwake ruri pasinde kwevari vanomutya, kuti uthende hwake hugare munyika yedu. Nyasha dzinorudo negwinyiso zvinozoshongana; kururama nokunyarara zvichachingamidzana ngomuromo. Kugondeka kunozomera kubva pashi, nokururama kunozoringira pashi kubva mudenga. Mambo Mwari unozopa izvo zvakanaka, nenyika yedu inozowanza zviyo zvayo. Kururama kuchamutungamirira; kunozonasira njira yezvitsiko zvake. Mukumbiro waDhavhidha. Ungamisira nzee yako, A Mambo Mwari, undipingure, ngokuti ndiri murombo nomutami. Ngwarira mweya wangu, ngokuti ndakaemeserwa iwewe; ponesa muranda wako unogondeka mwouri. Iwewe ndiwe Mwari wangu; ndiitire nyasha, A Mambo Mwari, ngokuti ndinochema kwouri zuva reshe. Dakadza mweya womuranda wako, ngokuti ndinomirudzira mweya wangu kwouri, A Mambo Mwari. Ngokuti iwewe, Mambo Mwari, wakanaka unokukungurira, unowanzisa nyasha dzinorudo kuneavo veshe vanokumbira kwouri. Izwa mukumbiro wangu, A Mambo Mwari; upurutane izwi rokupota kwangu. Ngezuva rokutambudzika kwangu ndinozokumbira kwouri, ngokuti iwewe unozondipingura. Akuna wakadai ndiwe, A Mambo Mwari, pakati pezvimwari, nokuti akuna mishando yakadai ngemishando yako. Madzinza eshe owakasika anozouya agwadame pamberi pako, A Mambo Mwari. Anozokudza zina rako. Ngokuti iwewe uri mukuru, unoita zviro zvinoshamisa; ndiwe Mwari wega. Ndidzidzise njira yako, A Mambo Mwari, kuti ndihambe mugwinyiso rako; ndipe mwoyo usikazi kupaurwa kuti nditye zina rako. Ndinokubonga, A Mambo Mwari, Mwari wangu, ngomwoyo wangu weshe. Ndinozokudza zina rako mhera nariini. Ngokuti nyasha dzako dzinorudo ihuru kwendiri; iwewe wakanunura mweya wangu kubva muudzamu hweSheori. A Mwari, vanodzikudza vanondimukira, nembungano yemadzongoni inotsvaka mweya wangu, avazi kukuisa pamberi pavo. Asi iwewe, A Mambo Mwari, ndiwe Mwari unenyasha dzakawanda nokukungurira, aukasiri kunyangadzwa, unowanza nyasha dzinorudo nokugondeka. Kunukukira kwendiri, undiitire nyasha; ipa simba rako kumuranda wako; ponesa mukororo womurandakadzi wako. Ndionise chioniso chokunaka kwako, kuti avo vanondizonda vachione, vatsveruke, ngokuti iwewe, Mambo Mwari, wakandidetsera, ukandiembedzera. Nduyo yeVakororo vaKhora. Ngoma. Padera pomutunhu wakachena pakaema dhorobha raakatanga; Mambo Mwari unoda misiwo yeZioni kupinda ugaro hweshe hwaJakobe. Zviro zvakanakisisa zvinoereketwa ngendaa yako, iwewe guta raMwari. Selah. “Pakati peavo vanondizia ndinozoereketa ndiRahabhi neBhabhuroni; ringira Firistia, Thire, neEthiopia; vanoti, ‘Uyu munhu wakabarirweyo.’ ” Ngendaa yeZioni rinozozwi, “Uyu nouwo vakabarirwa mukati mwaro; ngokuti uwo Uri-padera-pezveshe unozorigwinyisa emene.” Mambo Mwari unozoerenga, apo oonyoresa madzinza evanhu, “Uyu wakabarirweyo.” Selah. Vaembi nevazvini veshe vanoti, “Zvinyuka zvangu zveshe zviri mwouri.” Ngoma. Nduyo yevakororo vaKhora. KuneMutungamiriri woKuemba Kudai ngokunaMahalathi Reanothi. Nduyo yeHemani muEzura. A Mambo Mwari, Mwari woruponeso rwangu, naapo usiku ndinochema pamberi pako, mukumbiro wangu ngaugume pamberi pako; kotamisa nzee yako uzwe kuchema kwangu. Ngokuti mweya wangu wazara ngematambudziko, nendaramo yangu inokwedzera kuSheori. Ndinoerengerwa pakati peavo vanonzvaira muhunza; ndakadai ngomunhu usina kudetswa, kudai ngevarashwa pakati pevakafa, kudai ngevaurawa vari muguva, kudai ngeavo vousikachakarakadzi, ngokuti vagurwa kubva munyara yako. Wandiradzika muhunza isikabviri kudzama, mundau dzechidima, dzakadzama. Ushungu hwako padera pangu hunondiremera, iwewe wandimbonya ngemafungo ako eshe. Selah. Watarausa vangani vangu kuretu neni; wandiita chiro chinonyangadza kwevari. Ndakonyerwa, andichakoni kubuda; madziso angu anoperezeka ngendaa yokutambudzika. Mazuva eshe ndinodaidza kweuri, A Mambo Mwari, ndinotambanudza nyara dzangu kwouri. Ungaitira vakafa zvishamiso here? Vakafa vangamuka kukukudza here? Selah. Nyasha dzako dzinorudo dzinozoteketeswa muiba nokuti ugondeki hwako mundau yokuparadzwa here? Mishamiso yako inoziikanwa muchidima nokuti kururama kwako munyika yokukanganwa here? Asi inini ndinochema kwouri, A Mambo Mwari; mumangwanani mukumbiro wangu unoguma pamberi pako. Mambo Mwari, unondirashirenyi? Unofishirenyi hope yako kubva kwendiri? Ndatambudzika, ndaa pasinde pokufa kubvira muutsva hwangu metsa zvino; ndinorwadziwa ngokutyisa kwako, ndinokangaidzwa. Ushungu hwako hunotyisa hwawira padera pangu; kukarudza kwako kunotyisa kwandiparadza. Zvinonditendenedza zuva reshe kudai ngemvura yendambi; kubva kumarutii eshe zvinondimbonya pamwepo. Wanditarausira mudikani nehama kuretu neni; chidima ndiye mungani wangu uri pasinde. Nduyo yaEthani muEzura. Ndinozoemba ngenyasha dzinorudo dzaMambo Mwari mhera nariini; ndinozoteketesa ngomuromo wangu kugondeka kwako kumibarirwana yeshe. Ndinodaidzira kuti nyasha dzako dzinorudo dzakazotsimiswa mhera nariini; kugondeka kwako kwakagwinya kudai ngematenga. Wakati, “Ndaita chitenderano nowakatsanangurwa wangu, ndapika kunaDhavhidha muranda wangu: ‘Ndinozogwinyisa rusinga rwako mhera nariini, nokuaka dendemaro rako kumibarirwana yeshe.’ ” Selah. Matenga ngaakudze mishamiso yako, A Mambo Mwari, ugondeki hwako mumbungano yevakacheneswa. Ngokuti ndiani uri mudenga ungatodzaniswa naMambo Mwari? Ndiani pakati pevakororo vomudenga unotodzana naMambo Mwari, Mwari unotyisa mumbungano yevakacheneswa, mukuru unotyiwa kupinda veshe vanomutendenedza? A Mambo Mwari, Mwari wehondo, ndiani unesimba wakadai ndiwe, A Mambo Mwari? Ugondeki hwako hunokutendenedza. Iwewe unotonga simba roruandhle; apo mafungu arwo avheruka, unoanyaradza. Iwewe wakavhunavhuna Rahabhi, kudai ngowaurawa; wakaparadza magaa ako ngomuoko wako unesimba. Matenga ngaako, nenyika ngeyakozve; nyika nazvo zveshe zvirimwo, ndiwe wakazvitanga. Dera nokubani ndiwe wakazvisika; Thabho naHermoni inodakara ngokukudza zina rako. Iwewe unemuoko unesimba; nyara yako yakagwinya, nenyara yako yokumudyo yakaturama. Kururama nokutonga kwakanaka zviri zvitsimiso zvedendemaro rako; nyasha dzinorudo nokugondeka zviri pamberi pako. Vanomuchena vanhu avo vanozia kudaidzira kwepadhiri, vanohamba, A Mambo Mwari, mukujeka kwehope yako. Vanokudza zina rako zuva reshe; vanotunhumadza kururama kwako. Ngokuti iwewe uri uthende hwesimba ravo; ngenyasha dzako runyanga rwedu runotunhumadzwa. Ngokuti chihlangu chedu ngechaMambo Mwari; mambo wedu kuneWakachena waIsuraeri. Zvino iwewe wakaereketa ngechioniso kunewakagondeka wako, newe ukati, “Ndaisa dzungudza padera pouwo-unesimba; ndatunhumadza umwe wakatsanangurwa kubva pakati pevanhu. Ndaona muranda wangu Dhavhidha; ndamudzodza ngemafuta angu akachena. Nyara yangu inozogara naye; nomuoko wangu unozomugwinyisawo. Gaa arizomubvukiri, wakashata aazomutambudzi. Ndinozopwanyira magaa ake pamberi pake, nokuputsira pashi avo vanomuzonda. Ugondeki hwangu nenyasha dzangu dzinorudo dzinozogara naye; nomuzina rangu runyanga rwake runozotunhumadzwa Ndinozoemesa nyara yake padera poruandhle, nenyara yake yokumudyo padera perwizi. Aye unozodaidzira kwendiri kuti, ‘Iwewe ndiwe baba angu, Mwari wangu webuwe roruponeso rwangu.’ Ndinozomuita dangwe, mukuru wemadzimambo eshe omunyika. Mhera nariini ndinozomungwaririra nyasha dzangu dzinorudo, nechitenderano changu kwaari chinozoema chakagwinya. Ndinozoemesa mibarirwana yake mhera nariini, nedendemaro rake kuti rigare riripo kudai ngematenga. Kudai vana vake vechizorekera mipango yangu, vasikahambi muzvitongero zvangu, kudai vechizogura zviemeso zvangu, vasikangwariri mipango yangu, zvino ndinozoorora kushaisha kwavo ngendonga, nokushata kwavo ngemboma. Asi andizodusi kubva kwaari nyasha dzangu dzinorudo, nokuti kukorera mukugondeka kwangu. Andizoguri chitenderano changu, nokuti kupindura izwi iro rendakaereketa ngomuromo wangu. Kamwe kega ndakapika ngokuchena kwangu; andizonyepi kunaDhavhidha. Mibarirwana yake inozogara mhera nariini, nedendemaro rake rinozogara kudai ngezuva pamberi pangu. Rinozogwinyiswa mhera nariini kudai ngomwedzi, chapupu chinogondeka chiri mugore.” Selah. Asi zvino wamudzinga nokumuramba, wazara ngoushungu wokurwa newakadzodzwa wako. Wagura chitenderano nomuranda wako; wasvipisa dzungudza rake mubukuta. Wapwanyira pashi marukumbati ake eshe; waparadza rusvingo rwake kuita matongo. Veshe vanopinda vanomuchakata; waita chitsverudzo kuvaakirwana vake. Iwewe wamirudza nyara yokumudyo yemagaa ake; waita kuti magaa ake eshe adakare. Zve, wafondora muromo weshoti yake, auzi kumugwinyisa mukurwa hondo. Wadusa ndonga kubva munyara yake, nokuputsira pashi dendemaro rake. Wafupisa mazuva outsva hwake; wamufukidza ngokutsveruka. Selah. A Mambo Mwari, metsa riini? Unozodzifisha mhera nariini? Ushungu hwako hunozobaka kudai ngomuriro mukuwo wakaitawani? A, karakadza ufupi hwomukuwo wangu. Chironyi chisina shwiro chowakasikira vakororo vevanhu! Ndiani munhu ungakona kupona usikazooni kufa? Ndiani ungakona kutiza simba reSheori? Selah. Mambo Mwari, dziri pari nyasha dzako dzinorudo dzekaretu, idzo ngokugondeka kwako wakapika kunaDhavhidha? Karakadza, Mambo Mwari, kutsverudzwa kwomuranda wako; kuti matwarirenyi endinoita paditi pangu zvituko zveshe zvevanhu vazhinji. Icho magaa ako akashoora ndicho, A Mambo Mwari, chaakashoora ndicho tsoka dzowakadzodzwa wako. Ngaabongwe Mambo Mwari mhera nariini. Ameni naAmeni. Mambo Mwari, iwewe waindoiya ugaro hwedu mumibarirwana yeshe. Mitunhu isati yasikwa, nokuti usati wasika ivhu nenyika, iwewe ndiwe Mwari kubvira mhera nariini metsa mhera nariini. Unohwirinza munhu mubukuta, wechiti, “Hwirirai, imwimwi vana vevanhu.” Ngokuti mukuona kwako gumi remazana remakore anodai ngezuro apo apinda, nokuti kudai ngomurindo wousiku. Unovatora kuenda kudai ngeguwe; vakadai ngokurota hope, mumangwanani vakadai ngomwenje unomusirirwa; mumangwanani unosvipira, wechikura; madeekoni unofota nokuoma. Ngokuti tinopedzwa ngoushungu hwako, tinotyiswa kakurutu ngoushungu hwako. Iwewe wakaisa kushata kwedu pamberi pako, zvishaishi zvedu zvakafishika zviri mukujeka kwehope yako. Ngokuti mazuva edu eshe anopinda ngomuushungu hwako; tinopedza makore edu kudai ngokufema. Mazuva okupona kwedu makumi manomwe emakore, nokuti pamweni makumi masere emakore kuti takagwinya; kunyazwi echiwanda anotiunzira kushanda nokutambudzika; anokasira kupera nesu tinombururuka kuenda. Ndiani unozia simba roushungu hwako? Ushungu hwako hwakakura kudai ngokutyisa kunokusisira. Ndizvo tidzidzise kuerenga mazuva edu, kuti tiuyirwe ngomwoyo woungwaru. Petuka, A Mambo Mwari! Metsa riini? Itira nyasha varanda vako. Tigutise mumangwanani ngenyasha dzako dzinorudo, kuti tidakadzwe nokudakara mazuva edu eshe. Tiite kuti tidakare kudai ngouwandu hwemazuva ewakatitambudza, nokudai ngouwandu hwemakore etakaona zvakashata. Ita kuti mishando yako ioneke kunevaranda vako, nesimba routhende hwako kunevana vavo. Unaku hwaMambo Mwari ngahugare padera pedu; ubudirise mushando wenyara dzedu; A, budiririsa mushando wenyara dzedu! Uwo unogara mutende roUri-padera-pezveshe, uwo unogara pashi pebvute roUne-simba-reshe, unozoti kunaMambo Mwari, “Bako rangu norusvingo rwangu, Mwari wangu wendinogonda mwaari.” Ngokuti iye unozokununura kubva mumurau womuteyi, nokubva mudenda rinouraya. Unozokufukidza ngemaphaphiro ake, newe unozohwara pashi pemaphaphiro ake; ugondeki hwake chihlangu nechokudzivhikira ndicho. Auzotyi kutyisa kwousiku, nokuti musee unoposhwa masikati, nokuti denda rinohamba muchidima, nokuti kuparadza kunouraya masikati. Gumi remazana vanozowa ngokurutii rwako, negumi remakumi emazana vanozowa ngokumudyo kwako; asi achizogumi pasinde pako akadi. Unozoringira ngemadziso ako kwega, uone kuororwa kwevakashata. Ngokuti iwewe wakaita Mambo Mwari bako rako, Uri-padera-pezveshe ugaro hwako, akuna zvakashata zvinozokugumira, akuna denda narimwe rinozokwedzera patende rako. Ngokuti unozopanga ngirosi dzake ngendaa yako, kuti dzikungwarire munjira dzako dzeshe. Dzinozokumirudza panyara dzadzo, kuitira kuti tsoka yako isazopumhunwa pabuwe. Unozotsika padera pemhondoro nepebvumbi; unozotsika padera pemhondoro itsva nenyoka ngetsoka. Ngokuti uwo unondida, ndinozomununura; ndinozomungwarira uwo unozia zina rangu. Naapo anodaidza kwendiri, ndinozomupingura; ndinozoa naye mukutambudzika, ndinozomununura, ndimuremeredze. Ndinozomugutisa ngendaramo yakareba, ndimuonise ruponeso rwangu. Nduyo. Ngoma yezuva reSabatha. Zvakanaka kubonga Mambo Mwari, kuemba kukudza zina rako, iwewe Uri-padera-pezveshe; kudaidzira nyasha dzako dzinorudo mumangwanani, nougondeki hwako usiku, kuemba ngechidangari ngembira, ngokuridza kwakanaka kwechidangari. Ngokuti iwewe, Mambo Mwari, wakandiita kuti ndidakare ngomushando wako; pamishando yenyara dzako ndinoemba ngokudakara. A, kukuranyi kwemishando yako, A Mambo Mwari! Mipinimidzo yako yakadzama kakurutu. Bungumupee arikoni kuzia, benzi arikoni kuzwisisa izvi, kunyazwi vakashata vanomerera kudai ngomwenje, nevashandi veshe vezvakashata vanobudirira, vakaemeserwa kuparadzwa mhera nariini; asi iwewe Mambo Mwari uri padera pezveshe mhera nariini. Ngokuti, ringira, magaa ako, A Mambo Mwari, ngokuti, ringira, magaa ako anozopera kufa; veshe vashandi vezvakashata vanozoparadzwa. Asi iwewe watunhumadza runyanga rwangu, rukadai ngorunyanga rwenyati; wadurura padera pangu mafuta matsva. Madziso angu aona kuwa kwemagaa angu; nzee dzangu dzazwa kuparadzwa kwevaiti vezvakashata. Vakarurama vanozokura kudai ngomuti womungwarara, nokukura kudai ngomusedhare uri muRebhanoni. Vakasimwa mumhatso yaMambo Mwari; vanokura mumaruwanze aMwari wedu. Muusharuka vacharamba vachibereka michero; vanozoramba vakasvipira nokuita vatsva, vechionisa kuti Mambo Mwari wakarurama; ndiye buwe rangu, akuna kusikarurama kwaari. Mambo Mwari ndimambo, wakapfeka umambo; Mambo Mwari wakafuka, wakadzisunga ngesimba. Wakaemesa nyika, aizozungunyiswi. Dendemaro rako rakaemeswa kubvira karetu; iwewe waindoiyapo kubvira karetu. Ndambi yatutuma, A Mambo Mwari, ndambi dzamirudza izwi radzo; ndambi dzamirudza kuungumira kwadzo. Kunopinda kutinhira kwemvura zhinji, kupinda mafungo makuru oruandhle, Mambo Mwari uri padera ndiye unesimba. Uchapupu hwako hunegwinyiso kakurutu; kuchena kunosisira mhatso yako, A Mambo Mwari, mhera nariini. A Mambo Mwari, iwewe Mwari wokuunzidzira, iwewe Mwari wokuunzidzira, jeka! Miruka, iwewe mutongi wenyika; unzidzira kunevanodzikudza zvinovasisira. Mambo Mwari, metsa riini vakashata, metsa riini vakashata vechikudzwa? Vanoereketa mazwi okudzikudza; veshe vashandi vezvakashata vanodziganzisa. Vanopwanya vanhu vako, A Mambo Mwari, nokutambudza nhaka yako. Vanouraya shirikadzi nevapara, vanoshumba nherera, navo vanoti, “Mambo Mwari aazvioni, Mwari waJakobe aakarakadzi ndizvo.” Zwisisai, imwimwi mabungumupee evanhu; mapenzi, munozongwara riini? Uwo wakaisa nzee, aazwi here? Uwo wakaita dziso, aaoni here? Uwo unopanga madzinza, uwo unodzidzisa vanhu ruziyo, aazojezisi here? Mambo Mwari unozia mikarakadzo yomunhu kuti ayina shwiro. Unomuchena munhuwo wounoorora, A Mambo Mwari, nouwo wounodzidzisa mipango yako. Muzorodze kubva mumazuva akashata, metsa kutsiwe hunza yevakashata. Ngokuti Mambo Mwari aazorashi vanhu vake, aazosii nhaka yake. Ngokuti kutonga kwakarurama kunozohwirira kunevakarurama, navo veshe vakarurama mumwoyo vanozokuteera. Ndiani unozondimirukira kurwisana nevakashata? Ndiani unozondiemerera kurwisana nevashandi vezvakashata? Kudai Mambo Mwari asaiya mudetsi wangu, mweya wangu waizodai wakasira kugara mundau yokunyarara. Naapo ndakati, “Rutsoka rwangu rwotedzuka;” nyasha dzako dzinorudo, A Mambo Mwari, dzakandidetsera. Muuwandu hwemikararakadzo yangu mukati mwangu, zviembedzero zvako zvinodakadza mwoyo wangu. Vatongi vakashata vangakona kuiyana newe here, avo vanoronga kushata ngokuemesa zvironzo? Vanounganidzana pamwepo kurwisana nomweya wowakarurama, vechiitira ndaa ngazi isina ndaa. Asi Mambo Mwari waita rusvingo rwangu rwakaturama, naMwari wangu wakaita buwe nebako rangu rokuhwara. Unozovaunzidzira padera pavo ngendaa yokushaisha kwavo, nokuvapedza ngendaa yokushaisha kwavo; Mambo Mwari, Mwari wedu, unozovaparadza. Uyai, tiembe kunaMambo Mwari; ngatiembe ngokudakara kubuwe roruponeso rwedu! Ngatiuye pamberi pake techibonga; ngatiembe ngokudakara kwaari nduyo dzokukudza. Ngokuti Mambo Mwari, ndiMwari mukurutu, namambo mukuru kupinda zvimwari zveshe. Munyara dzake muneudzamu hwomunyika; kuturama kwemitunhu ngokwakezve. Ruandhle ngorwake, ngokuti ndiye wakaruita, nenyara dzake dzakaumba nyika yakaoma. A uyai, tidire, tigwadame; ngatigwadame pamberi paMambo Mwari, muiti wedu. Ngokuti ndiye Mwari wedu, isusu tiri vanhu vembusho yake, nemapwizhi enyara dzake. A nyamashi dai mwechipurutana izwi rake! Musakonzesa mwoyo yenyu, kudai ngepaMeribha, kudai ngezuva repaMasa mushango, apo madzibaba enyu akandiedza, nokundiedza kunyazwi vaiya vaona mushando wangu. Ndakasvipa mwoyo ngendaa youwo mubarirwana kwemakore makumi marongomuna, ndakati, “Ava vanhu vanopauka mumwoyo mwavo, avazii njira dzangu.” Ndizvo ndakapika muushungu hwangu kuti, “Avazopoteri mukuzorora kwangu.” Embai nduyo itsva kunaMambo Mwari; nyika yeshe ngaiembere Mambo Mwari. Emberai Mambo Mwari, mukudze zina rake; teketesai ruponeso rwake zuva ngezuva. Daidziraii mbiri yake pakati pemadzinza, mishando yake inoshamisa pakati pemadzinza eshe evanhu. Ngokuti Mambo Mwari mukuru, unosisira kukudzwa kakurutu; unosisira kutyiwa kupinda zvimwari zveshe. Ngokuti zvimwari zvevanhu zveshe miedzaniso, asi Mambo Mwari wakaita matenga. Kuremeredzwa noumambo zviri pamberi pake; simba nounaku zviri mundau yake yakachena. Ipai Mambo Mwari, imwimwi mhuri dzevanhu, ipai Mambo Mwari kukudzwa nesimba. Ipai Mambo Mwari kukudzwa kunosisira zina rake; unzai mudiro, mupotere mungome dzake. Dirai Mambo Mwari muunaku hwokucheneswa; nyika yeshe ngaihute pamberi pake. Ronzai pakati pemadzinza kuti, “Mambo Mwari ndiye mambo! Nyika yakagwinyiswa yaamho, aizotsukunuswi. Unozotonga vanhu ngokururama.” Matenga ngaadakare, nenyika ngaidakadzwe; ruandhle ngaruungumire, nazvo zveshe zvirimwo; minda ngaidakare, nazvo zveshe zvirimwo. Zvino miti yeshe yegwasha inozoemba ngokudakara pamberi paMambo Mwari; ngokuti unouya, ngokuti unouya kootonga nyika. Unozotonga nyika ngokururama, nevanhu ngegwinyiso rake. Mambo Mwari ndimambo! Nyika ngaidakare. Zviwi zvizhinji ngazvidakare. Makore nechidima zveshe zvinomutendenedza; kururama nokutonga kwakanaka zviri chitsimiso chedendemaro rake. Muriro unobaka pamberi pake, wechipisha magaa ake anomutendenedza. Mhene dzake dzinojekisa nyika; nyika inoona, nokuhuta. Mitunhu inonyunguruka kudai ngenamo pamberi paMambo Mwari, pamberi paMambo Mwari wenyika yeshe. Matenga anoteketesa kururama kwake, nevanhu veshe vanoona uthende hwake. Veshe vanodira miedzaniso yakatsetswa vanotsverudzwa avo vanodziganzisa ngemiedzaniso; zvimwari zveshe zvinogwadama pamberi pake. Zioni rinozwa, naro rinodakadzwa, nemadhorobha aJudha anodakadzwa, ngendaa yokutonga kwako, A Mambo Mwari. Ngokuti iwewe, Mambo Mwari, uri mukuru padera penyika yeshe; iwewe unokudzwa kupinda zvimwari zveshe. Imwimwi munoda Mambo Mwari zondai zvakashata; unongwarira mweya wevakacheneswa vake; unovanunura kubva munyara dzevakashata. Kujeka kunobudira vakarurama, nokudakara kunobudira vakarurama mumwoyo. Dakarai munaMambo Mwari, imwimwi vakarurama, mubonge zina rake rakachena. Nduyo. Embai nduyo itsva kunaMambo Mwari; ngokuti waita zviro zvinoshamisa. Nyara yake yokumudyo nomuoko wake wakachena zvamuunzira kunyisa. Mambo Mwari waziisa kunyisa kwake; waonesa pamhene kururama kwake mukuona kwemadzinza eshe. Wakarakadza nyasha dzake dzinorudo nougondeki hwake kumhatso yaIsuraeri. Magumo eshe enyika aona kunyisa kwaMwari wedu. Embai ngokudakara kakurutu kunaMambo Mwari, imwimwi nyika yeshe; daidzirai, muembe ngokudakara, embai nduyo dzokukudza. Embai nduyo dzokukudza Mambo Mwari ngembira, ngembira neizwi rokutetemba. Ngokurira kwehwama nokurira kwepayapaya ridzai ngokudakara pamberi paMambo, Mambo Mwari. Ruandhle ngaruungumire, nazvo zveshe zvirimwo; nyika, navo vanogaramwo. Ndambi ngadziembere nyara dzadzo; mitunhu ngaiembere pamwepo ngokudakara pamberi paMambo Mwari, ngokuti unouya kootonga nyika. Unozotonga nyika ngokururama, nevanhu ngokutonga kwakanaka. Mambo Mwari ndimambo; vanhu ngavahute! Unogara padera pemakherubhi; nyika ngaizungunyike! Mambo Mwari mukuru muZioni; unokudzwa padera pevanhu veshe. Ngavakudze zina rako guru rinotyisa. Iye wakachena! Mambo unesimba, unoda kutonga kwakarurama; iwewe unogwinyisa kunaka, unoita kutonga kwakanaka nokururama kunaJakobe. Kudzai Mambo Mwari, Mwari wedu, mudire muri pachitambariro chake. Iye wakachena! Mosi naAroni vaiya pakati pevapristi vake, Samueriwo waiya pakati pevanokumbira ngezina rake. Vakadaidzira kunaMambo Mwari, naye wakavapingura. Wakaereketa kwevari ari mumvumi yegore; vakangwarira zvapupu zvake nezviemeso zvaakavapa. A Mambo Mwari, Mwari wedu, wakavapingura; iwewe waiya Mwari waivakungurira, asi muunzidziri wezviito zvavo zvakashata. Kudzai Mambo Mwari, Mwari wedu, mudirei pamutunhu wake wakachena; ngokuti Mambo Mwari, Mwari wedu, wakachena. Nduyo yoKubonga. Embai kunaMambo Mwari ngokudakara, imwimwi nyika dzeshe. Dirai Mambo Mwari ngokudakara; uyai pamberi pake mwechiemba. Ziai imwimwi kuti Mambo Mwari ndiye Mwari. Ndiye wakatisika, nesu tiri vake; tiri vanhu vake, nemapwizhi emubusho yake. Poterai mumisiwo yake mwechibonga, mupotere maruwanze ake mwechikudza. Mumubonge, mukudze zina rake. Ngokuti Mambo Mwari wakanaka; nyasha dzake dzinorudo dzinogara mhera nariini, nougondeki hwake huri kumibarirwana yeshe. Ndinozoemba ngenyasha nokutonga kwakanaka; kwouri, A Mambo Mwari, ndinozoemba kukudza. Ndinozodzibata ngoungwaru munjira yakaperera. Unozouya riini kwendiri? Ndinozohamba mumhatso mwangu ngomwoyo wakanaka. Andizoisi chiro chakashata pamberi pemadziso angu. Ndinozonda mushando waavo vanopauka; auzondinamiri. Mwoyo unochengedza unozobva kwendiri; andidi kuzia chiro chakashata. Unoreya muakirwana wake ngokufishika, ndinozomuparadza. Aye unoringira ngokuzvaura, nounomwoyo unodzikudza, andizomutenderi. Madziso angu anozoringira ngokuda vanhu vanogondeka vari munyika, kuti vagare neni; kunyazwi ndiani unohamba munjira yakaperera, unozondishandira. Iye unoita ngokuchengedza aazogari mumhatso mwangu; naye unoereketa manyepo aazoangiri kugara pamberi pangu. Mangwanani eshe ndinozoparadza veshe vakashata munyika, kuti ndipedze veshe vashandi vezvakashata kubva mudhorobha raMambo Mwari. Mukumbiro womunhu waremba ngemadambudziko, uwo unodurura kuchema kwake kunaMambo Mwari. Izwa mukumbiro wangu, A Mambo Mwari; kuchema kwangu ngakugume kwouri. Usafisha hope yako kubva kwendiri ngezuva rokutambudzika kwangu. Ungamisira nzee yako kwendiri; ngokukasira ndipingure ngezuva rendinodaidza kwouri. Ngokuti mazuva angu anopwititika kudai ngechiushi, nemagodo angu anopisha kudai ngechoto. Mwoyo wangu watemwa nokufota kudai ngomwenje; ndinoriyarwa kudya chingwa changu. Ngendaa yeizwi rokugwimba kwangu, magodo angu anobatira munyama yangu. Ndinotodzana nezizi romushango; ndadai ngekazizi komumatongo. Andiati; ndinodai ngechiwanzaburi chiri chega pachachungu chemhatso. Magaa angu anonditsverudza zuva reshe; avo vanoushungu kwendiri vanoshandisa zina rangu kuita chituko. Ngokuti ndinodya marota kudai ngechingwa, nokubvengedza misodzi nemvura yangu yokumwa, ngendaa youshungu hwako hunorunya; ngokuti iwewe wandimirudza ukandirasha. Mazuva angu akadai ngebvuri remadeekoni; ndinofota kudai ngomwenje. Asi iwewe Mambo Mwari unogara padendemaro mhera nariini; zina rako rinozokarakadzwa kumibarirwana yeshe. Iwewe unozomiruka nokuitira nyasha Zioni, ngokuti yaanguva yokurikungurira; nguva yakaemeswa yasvika. Ngokuti varanda vako vanodakara ngemapuwe aro, vanozwira urombo bukuta raro. Madzinza anozotya zina raMambo Mwari, nemadzimambo eshe enyika anozotya mbiri yako. Ngokuti Mambo Mwari unozoaka Zioni; unozooneka muuthende hwake. Unozopurutana mukumbiro wevasina chiro, naye aazoshoori mukumbiro wavo. Izvi ngazvinyorerwe mibarirwana inoteera, nevanhu vanozosikwa vanozokudza Mambo Mwari: kuti wakaringira pashi ari muugaro hwake hwakaturama, hwakachena; Mambo Mwari wakaringira munyika ari mudenga, kuzwa kugwimba kwemabhanditi, nokusunhura avo vakaemeserwa rufu; kuti vanhu vateketese zina raMambo Mwari muZioni, nokukudzwa kwake muJerusarema, apo vanhu vashongana pamwepo, noumambo, kudira Mambo Mwari. Watsonza simba rangu munjira; wafupisa mazuva okupona kwangu. “A Mwari wangu,” ndinoti, “Usanditora zvinopano asati apera mazuva okupona kwangu, iwewe makore ako anogara aripo kumibarirwana yeshe. Iwewe wakagadzika madzeyo enyika kare kare, nematenga mushando wenyara dzako. Zvinozopera, asi iwewe unozogara; zveshe zvinozotsakara kudai ngejira. Unozoapindura kudai ngechokufuka, nazvo zvinozopera; asi iwewe unozogara wakadaro, nemakore ako aatongozoperi. Vana vevaranda vako vanozogara vakangwaririka; mibarirwana yavo inozoemeswa pamberi pako.” Nduyo yaDhavhidha. Kudza Mambo Mwari, A mweya wangu, nazvo zveshe zviri mukati mwangu, ngazvikudze zina rake rakachena. Kudza Mambo Mwari, A mweya wangu, usariyarwa zvifumiso zvake zveshe, uwo unorekerera zvishaishi zvako zveshe, unorapa matenda ako eshe, uwo unoripira ndaramo yako kubva muhunza, unokugadza ngenyasha dzinorudo nedzinokungurira, uwo unokugutisa ngezviro zvakanaka apo uchapona, kuitira kuti utsva hwako humusirirwe kudai ngegodzi. Mambo Mwari unoita mishando yakarurama, echitongera zvakanaka veshe vanotambudzwa. Wakaita kuti Mosi azie njira dzake, nemishando yake kunevana vaIsuraeri. Mambo Mwari wakazara ngenyasha nokuzwira urombo, unononoka kutseneka, unowanza kuitira nyasha dzinorudo. Aazogari echiitira ndaa, nokuti kugara akatseneka mhera nariini. Aatiitiri kudai ngezvishaishi zvedu, nokuti kutiunzidzira kudai ngokushata kwedu. Ngokuti kudai ngokuturama kwedenga padera penyika, ngokudaro nyasha dzake dzinorudo dzakakura kuneavo vanomutya; kudai ngokutaraukirana kwemabvazuva nemabirirazuva, ndizvo unotarausa zvishaishi zvedu kubva kwetiri. Kudai ndibaba vanokungurira vana vavo, ngokudaro Mambo Mwari unokungurira avo vanomutya. Ngokuti unozia kururwa kwedu; unokarakadza kuti tiri bukuta. Ngendaa yomunhu, mazuva ake akadai ngomwenje; unomerera kudai ngeruwa romushango; Ngokuti dutu rinofuridza ngepadera paro, naro rinopera, nendau yaro aichazoriziizve. Asi nyasha dzinorudo dzaMambo Mwari dzinogara dzakadaro kubvira mhera nariini metsa mhera nariini kuneavo vanomutya, nokururama kwake kunogara kuripo kunevana vevana, kwevari avo vanongwarira chitenderano chake nokukarakadza kuita mipango yake. Mambo Mwari wakaemesa dendemaro rake mudenga, noumambo hwake hunotonga padera pazvo zveshe. Kudzai Mambo Mwari, imwimwi ngirosi dzake, imwimwi ngwazi munoita zvinoronzwa ndiye, mwechipurutana izwi rake raakaereketa. Kudzai Mambo Mwari, imwimwi mweshe hondo dzake, imwimwi varanda vake munoita kuda kwake. Kudzai Mambo Mwari, imwimwi mishando yake yeshe, mundau dzeshe dzaanotonga. Kudza Mambo Mwari, A mweya wangu. Kudza Mambo Mwari, A mweya wangu. A Mambo Mwari, Mwari wangu, wakakurisa! Wakafuka mbiri noumambo. Unofuka kujeka kudai ngechokupfeka; unotambanudza matenga akadai ngetende; unoemesa sika dzemhatso yake mumvura; unoita makore ngoro yake; unogadha padera pemaphaphiro edutu. Unoita dutu kuti riite vatumwa vake; unoita varanda vake mirazvu yomuriro. Wakaemesa nyika padera pemadzeyo ayo, kuti isazombotsukunuswi. Unoifukidza ngoruandhle kudai ngechokufuka; mvura yakaterama padera pemitunhu. Ngokukaraidza kwako yakatiza; ngokuzwika kwokutinhira kwako, yakakasira kuenda. Yakakwira kumatunhu, yakadzaka mumapani, kundau yowakaiemesera. Wakaemesa mugano kuti isadarika, kuti isachauyazve kumbonya nyika. Unonyusa zvinyuka mumapani; zvinopopoma pakati pemitunhu. Zvinomwisa mhuka yeshe yomushango; mbongoro dzomushango dzinodzima nyota yadzo. Shiri dzomudenga dzinoaka zvisaki zvadzo pasinde pazvo, dzinoemba pakati pematai. Unodiridzira mitunhu kubva mukamera rako; nyika yagutiswa ngemichero yemishando yako. Unoita kuti mwenje ukure wen'ombe, nezvisimwa kuita kudya kwevanhu, kuti amerise kudya munyika, nevhini rinodakadza mwoyo yomunhu, nemafuta anoita kuti hope in'anikire, nechingwa chinogwinyisa mwoyo womunhu. Miti yaMambo Mwari inodiridzirwa kakurutu, misedhare yeRebhanoni yaakasima. Mukati mwayo shiri dzinoaka zvisaki zvadzo; usore unemhatso yawo mumiti yemisaipurasi. Mitunhu yakaturama ngeyembudzi dzomushango; mapuwe mapako okuhwara embira. Wakaemesa mwedzi kuti ugure nguva; zuva rinozia kupota kwaro. Iwewe unoita chidima kuti uapo usiku, apo mhuka dzeshe dzomugwasha dzinobuda dzechigwezva. Mhondoro itsva dzinokwanga dzechirumbirira zvokudya, dzechitsvaka kudya kwadzo kubva kunaMwari. Naapo zuva perinobuda dzinopetuka, dzorodzoata mumapako adzo. Munhu unobuda kuenda kumushando wake nokushanda metsa madeekoni. A Mambo Mwari, mishando yako aibviri ngokuwanda! Wakaita yeshe ngoungwaru; nyika yakazara ngezvisikwa zvako. Pamberi pano ruandhle rwakakura nokupamhama, mukati mwaro munohamba zviro zvinotamanda zvisikaerengeki, zviro zvinopona zvidoko nezvikuru. Umwo munohamba ngarava; umwo muneLevhiathani yowakaita kuti itambe mukati mwarwo. Zveshe izvi zvinogarira kweuri, kuti uzvipe kudya kwazvo ngenguva kwayo; naapo wazvipa, zvinozviunganidza pamwepo; naapo wabeura nyara yako, zvinogutiswa ngezvakanaka. Naapo unofisha hope yako, zvinotambudzika; naapo unotora mweya wazvo, zvinofa, nokuhwirirazve kuita bukuta. Naapo peunotuma mweya wako, zvinosikwa; nokumusirira utsva hwehope yenyika. Mbiri yaMambo Mwari ngaigare mhera nariini; Mambo Mwari ngaadakare ngemishando yake, uwo unoringira panyika, nayo inotengenda, uwo unogwama mitunhu yoroyopwititika chiushi. Ndinozoembera Mambo Mwari apo ndichapona; ndinozoemba kukudza Mwari wangu ndichazwa. Murangariro wangu kwaari ngauite wakanaka ngokuti ndinodakara munaMambo Mwari. Vashaishi ngavapedzwe munyika, nevakashata vasachaapo. Kudza Mambo Mwari, A mweya wangu. Kudza Mambo Mwari. Bongai Mambo Mwari, mudaidze zina rake, ziisai zviito zvake pakati pevanhu. Embai kwaari, embai kukudza kwaari; ereketai imwimwi ngemishando yake yeshe inoshamisa. Ganzai imwimwi ngezina rake rakachena; mwoyo yaavo vanotsvaka Mambo Mwari ngaidakare. Tsvakai Mambo Mwari nesimba rake; tsvakai hope yake ngokusikareki. Karakadzai mishando inoshamisa yaakaita, mishamiso yake, nezvitongero zvomuromo wake, imwimwi mibarirwana yaAbrahama muranda wake, imwimwi vana vaJakobe vakatsanangurwa vake. NdiMambo Mwari, Mwari wedu; kutonga kwake kuri munyika yeshe. Unokarakadza ngechitenderano chake mhera nariini, izwi raakapanga kunemibarirwana gumi remazana, chitenderano chaakaita naAbrahama, nemhiko yake yaakapika kunaIsaka, iyo yaakagwinyisa kunaJakobe kuita chiemeso, kunaIsuraeri kuita chitenderano chemhera nariini echiti, “Kwouri ndinozopa nyika yeKhenani, kuita chikoaniswa chenhaka yako.” Naapo vaiya vashomani pauwandu, vashomani yaamho, vari zvigarandimo mukati mwayo, vakanzerereka kubva kudzinza kuenda kudzinza, kubva kuumambo umwe kuenda kuvanhu vamweni, aazi kutendera naumwe kuti avatambudze; wakakaraidza madzimambo ngendaa yavo echiti, “Musagwama vakadzodzwa vangu; musaita zvakashata kunevaprofeti vangu.” Naapo paakadaidza nzara kuti iuye panyika, nokugura ndonga yeshe yezvingwa, waiya atuma munhu pamberi pavo, Josefa uwo wakatengeswa kuita hloko. Vakasvonhora tsoka dzake ngemanguri, mutsipa wake wakaiswa mugangiro resimbi; metsa yakaguma nguva yerakaitika ndiro izwi rake, izwi raMambo Mwari rakaramba rechimuedza. Mambo wakatumira vanhu koomusunhura; mutongi wembeu dzevanhu wakamusunhura. Wakamuita mambo wemhatso yake, nomutongi wepfuma yake yeshe, kudzidzisa vatongi vake kudai ngokuda kwake, nokudzidzisa vakuru vake ungwaru. Zvino Isuraeri wakaguma Egipite; Jakobe wakaita chigarandimo munyika yaHamu. NaMambo Mwari wakawandisa vanhu vake kakurutu, akavaita kuti vagwinye kupinda magaa avo, avo vaakakunukudza mwoyo yavo kuti izonde vanhu vake, kuti vabate varanda vake ngourimbwi. Wakatuma muranda wake Mosi naAroni avo vaaiya atsanangura. Vakaita zvioniso zvake pakati pavo, nemishamiso munyika yaHamu. Wakatuma chidima, akaita kuti nyika isvipe; navo vakamukira mazwi ake. Wakapindura mvura yavo ikaita ngazi, akaita kuti hove dzavo dzife. Nyika yavo yakazara ngemachedye, kunyazwi nomumhatso dzemadzimambo avo. Wakaereketa, kukabuda mitanda yenhunzi, nenhata dzakazadza nyika yavo yeshe. Wakavapa matsanza paugaro pemvura, nemheni yakaita mirazvu munyika yavo. Wakavhuna mivhini yavo nemionde yavo, akagura miti yenyika yavo. Wakaereketa, nendongwe dzakaguma, negwata rakawandisa; zvakadya miriwo yeshe yaiya munyika yavo, zvakadya michero yenyika yavo. Wakauraya matangwe eshe munyika yavo, matangwe esimba ravo reshe. Zvino wakabudisa Isuraeri nesirivha nomukore, paiya pasina naumwe pakati pedzinza ravo wakapumhunwa. VaEgipite vakadakara apo pevakabudamwo, ngokuti kutyisa kwavo kwakaguma padera pavo. Wakatambanudza gore kuita chifukidzo, nomuriro wakavajekisira usiku. Vakakumbira, naye wakavaunzira zvimataata, akavagutisa ngokudya kunobva mudenga kwakawandisa. Wakabeura buwe, nemvura yakatsvotsvoma; yakaerera mundau dzakaoma kudai ngorwizi. Ngokuti wakakarakadza chigondiso chake chakachena naAbrahama muranda wake. Ndizvo wakabudisa vanhu vake vechidakara, vakatsanangurwa vake vechiemba. Wakavapa nyika dzemadzinza, navo vakatora kuita nhaka yavo upfumi wevanhu, kuti vangwarire zviemeso zvake, vapurutanezve mipango yake. Kudzai Mambo Mwari! Kudzai Mambo Mwari! A, bongai Mambo Mwari, ngokuti wakanaka; ngokuti nyasha dzake dzinorudo dzinogara mhera nariini. Ndiani ungaronza mishando inesimba yaMambo Mwari, noungadaidzira kukudzwa kwake kweshe? Vanomuchena avo vanongwarira kutonga kwakanaka, avo vanoita zvakarurama nguva dzeshe. Ndikarakadzei, A Mambo Mwari, apo woitira nyasha vanhu vako; ndidetsere apo woovaponesa; kuti ndione kugarisika kwevakatsanangurwa vako, kuti ndidakare mukudakadzwa kwedzinza rako, kuti ndikukudze munhaka yako. Takashaisha isusu nemadzibaba edu; takaita zvakashata, takashaisha. Madzibaba edu apo aiya muEgipite aazi kupinimidza ngemishando yako inoshamisa; avazi kukarakadza uwandu hwenyasha dzako dzinorudo, asi vakamukira Uwo Uripadera-pezveshe, vari paruandhle, paRuandhle Rwakatsvuka. Asi wakavaponesa ngendaa yezina rake, kuti aziise simba rake guru. Wakakaraidza Ruandhle Rwakatsvuka, rukaoma; wakavatungamirira mukati mwoRuandhle kudai ngokuhamba mushango. Ndizvo wakavaponesa kubva munyara yegaa, nokuvasunhura kubva munyara dzegaa. Mvura yakanzvaidza magaa avo; akuzi kusara naumwe wavo. Zvino vakagonda mazwi ake; vakaemba kumukudza. Asi vakakasira kuriyarwa mishando yake; avazi kuemera kupanga kwake. Asi vakaemura kakurutu vari mushango, vakaedza Mwari vari mushango; wakavapa zvevakakumbira, asi wakatumira nhenda yakapinda kushata pakati pavo. Vakaitira Mosi ndurumwa mukamba naAroni, wakacheneswa waMambo Mwari. Ivhu rakabeuka, rikamedza Dhathani, rikadzemedza chiunga chaAbhiramu. Nomuriro wakabaka pakati pechiunga chavo; murazvu wakapisha vakashata. Vakaumba muedzaniso wekonyana rakanyunguruswa muHorebhi, navo vakadira muedzaniso wakanyunguruswa. Vakatenganisa mbiri yaMwari nomuedzaniso wen'ombe inodya mwenje. Vakariyarwa Mwari Muponesi wavo, uwo wakaita zviro zvikuru muEgipite, mishando inoshamisa munyika yaHamu, nezviro zvinotyisa paRuandhle Rwakatsvuka. Ndizvo wakati waizovaparadza, kudai Mosi, wakatsanangurwa wake, asikazi kuema pamberi pake mukupauka, kupodza ushungu hwake, kuti asavaparadza. Zvino vakashoora nyika yakanaka, avazi kugonda chigondiso chake. Vakagunun'una vari mumatende avo, avazi kupurutana izwi raMambo Mwari. Ndizvo wakamirudza nyara yake nokupika kwevari kuti unozovauraya mushango, nokuti unozoparadzira mibarirwana yavo pakati pemadzinza, nokuvatatanisa padera penyika. Zvino vakadzibatanidza naBhaaripeori, vakadya midiro inobairwa vakafa. Vakamusa ushungu hwaMambo Mwari ngezviito zvavo, nedenda rakavagumira. Zvino pakaema Finehasi, akaita kutonga kwakanaka, ndizvo denda rakaguma. Icho chakaerengerwa kwaari kuti kuri kururama, kubvira kumubarirwana kuenda kumubarirwana mhera nariini. Vakanyangadza Mambo Mwari pamvura yeMeribha, zvakashatira Mosi ngendaa yavo; ngokuti vakanyangadza mweya wake, naye wakaereketa mazwi ngokukasira. Avazikuparadza madzinza evanhu, kudai ngezvaakavapanga Mambo Mwari, asi vakadzikumanidza nevemadzinza, vakadzidzira mishando yavo. Vakadira miedzaniso yavo, iyo yakaita murau kwevari. Vakapira vakororo nevanasikana vavo kumadhimoni. Vakaparadza ngazi isina ndaa, ngazi yevakororo vavo neyevanasikana vavo, avo vevakapira kuita mudiro wemiedzaniso yeKhenani; nenyika yakasvipiswa ngengazi. Ndizvo vakaita vakasvipiswa ngemishando yavo, vakaita chidengu muzviito zvavo. Zvino ushungu hwaMambo Mwari hwakabaka kuvanhu vake, naye wakanyangadzwa ngenhaka yake. Wakavapira munyara dzevemadzinza, kuti avo vaivazonda vatonge padera pavo. Magaa avo akavatambudza, navo vakanyiswa, vakaunzwa pashi pesimba ravo. Wakavanunura nguva zhinji, asi vaimukira mukupinimidza kwavo, vakadzaswa pashi ngokushata kwavo. Zvakanyadaro wakanyera kutambudzika kwavo, apo paakazwa kuchema kwavo. Ngendaa yavo wakakarakadza chitenderano chake, akaonisa nyasha kudai ngouwandu hwenyasha dzake dzinorudo. Wakaita kuti vakungurirwe ngaavo veshe vakavatora kuita hloko. Tiponese, A Mambo Mwari, Mwari wedu, utiunganidze kubva pakati pevemadzinza, kuti tibonge zina rako rakachena, tinyise mukukudzwa kwako. Ngaabongwe Mambo Mwari, Mwari waIsuraeri, kubvira mhera nariini metsa mhera nariini. Vanhu veshe ngavati, “Ameni.” Kudzai Mambo Mwari! A, bongai Mambo Mwari, ngokuti wakanaka; ngokuti nyasha dzake dzinorudo dzinogara mhera nariini. Vakatengwa ndiMambo Mwari ngavaronze kudaro, avo vaakatenga kubva mumadambudziko nokuvaunganidza kubva munyika, kubva kumabvazuva nokumabirirazuva, kubva dera nokubani. Vamweni vakanzerereka mushango ngenjira yakadai ngomurubaya, vasikaoni guta rokugara; vanenzara nenyota, mweya yavo yakafukama mukati mwavo. Zvino vakachema kunaMambo Mwari mukutambudzika kwavo, naye wakavanunura kubva mumadambudziko avo; wakavatungamirira ngenjira yakarurama, metsa vaguma mudhorobha rokugara. Ngavabonge Mambo Mwari ngenyasha dzake dzinorudo, ngemishando yake inoshamisa yaanoitira vana vevanhu. Ngokuti unogutisa mweya inenyota, nomweya inofa ngenzara unoigutisa ngezvakanaka. Vamweni vakagara muchidima nomubvute rokufa, vechisungwa mumadambudziko nomusimbi, ngokuti vaiya vamukira mazwi aMwari, vakarasha kupanga kwoUripadera-pezveshe. Mwoyo yavo yakapfaiswa ngokushanda; vakawa pashi, pasina noumwe wokudetsera. Zvino vakachema kunaMambo Mwari vari mumadambudziko avo, naye wakavaponesa kubva mumadambudziko avo. Wakavabudisa kubva muchidima nomubvute rokufa, akadambura zvisungo zvavo. Ngavabonge Mambo Mwari ngenyasha dzake dzinorudo, ngemishando yake inoshamisa yaanoitira vana vevanhu. Ngokuti wakagura misiwo yethusi, akatematema migogo yesimbi. Vamweni vakaita mapenzi ngendaa yokupauka kwavo, ngendaa yezvishaishi zvavo vakashingirira kutambudzwa. Mweya yavo yakanyenya mbeu dzeshe dzezvokudya; nayo inokwedzera pasinde pemisiwo yokufa. Zvino vakachema kunaMambo Mwari mukutambudzika kwavo, naye wakavanunura kubva mumadambudziko avo. Wakatumira izwi rake nokuvarapa, echivanunura kubva mukuparadzwa. Ngavabonge Mambo Mwari ngenyasha dzake dzinorudo, ngemishando yake inoshamisa yaanoitira vana vevanhu. Ngavape midiro yokubonga, vateketese mishando yake ngokuemba ngokudakara. Vamweni vakadzaka muruandhle vari mungarava, vechiita mushando mumvura zhinji; vakaona mishando yaMambo Mwari, mishando yake inoshamisa muruandhle rwakadzama. Ngokuti wakapanga, echivherudza dutu guru, rakamirudza mafungu oruandhle. Vakakwidzwa mudenga, vakadzaswazve muudzamu; mweya yavo yakakakaseka ngendaa yokutambudzwa; vakapeyamapeyama vechitandadzika kudai ngechiradza, navo avazi kuzia chokuita. Zvino vakachema kunaMambo Mwari mukutambudzika kwavo, naye wakavabudisa kubva mumadambudziko avo. Wakanyaradza dutu guru, nemafungu oruandhle akaterama. Zvino vakadakara ngokuti aterama; naye wakavakweera pandau yakanaka inodisiswa ndivo. Ngavabonge Mambo Mwari ngenyasha dzake dzinorudo, ngemishando yake inoshamisa yaanoitira vana vevanhu. Ngavamutunhumadze mumbungano yevanhu, vamukudze vari mumushongano wevakuru. Unopindura ndwizi kuita shango, nezvinyuka zvemvura kuita mavhu akaoma, nenyika yakavhundira kuita bare, ngendaa yokushata kwaavo vanogaremwo. Unopindura rubaya kuita makandwa emvura, nemavhu akaoma kuita zvinyuka zvemvura. Naapo unovagarisa vakafukama, kuti vanasirire dhorobha rokugaramwo. Vanokusha minda, vasime minda yemivhini, vanodzikaira michero yakawanda. Ngenyasha dzake unoita kuti vawande kakurutu; aatendi kuti n'ombe dzavo dzisvodze. Naapo vatsonzwa nokudzaswa pashi, ngendaa yokutambudzwa, madambudziko nokusvipa mwoyo, unodurura kushoorwa padera pevatongi, nokuvaita kuti vanzerereke mushango, umwo musina njira; asi unomirudza vatami pakaturama kubva mukutambudzika, nokuwandisa vana vavo kudai ngomutanga wemapwizhi. Vakarurama vanozviona, vanodakara; nokushata kweshe kunotsiira muromo wakwo. Uwo wakangwara ngaangwarire izvo zviro, naye ngaapinimidze ngenyasha dzinorudo dzaMambo Mwari. Ngoma. Nduyo yaDhavhidha. Mwoyo wangu wakatsima, A Mwari, mwoyo wangu wakatsima; ndinozoemba, ndinozoemba zvakanaka kukukudza. Muka, mweya wangu! Muka, A chidangari nembira! Inini ndinozomusa mambakwedza. Ndinozokubonga, A Mambo Mwari, pakati pembeu dzevanhu; ndinozoemba kukukudza pakati pemadzinza. Ngokuti nyasha dzako dzinorudo ihuru kupinda matenga, nokugondeka kwako kunoguma mumakore. Kudzwai, A Mwari, padera pematenga, nouthende hwako ngahuwepo padera penyika yeshe. Ipa kunyisa ngenyara yako yomudyo nokundipingura, kuti avo vounoda vapokonyorwe. Mwari wagondisa mukuchena kwake: “Mukudakara ndinozopaura Shekhemu, ndiedzanisire Bani reSukothi. Gireadhi ngerangu; Manase ngerangu; Efuremu chiquoko changu; Judha indonga yangu youmambo. Moabhi chidziyo changu chokushambiramwo; padera peEdhomu ndinozokandirapo gwada rangu. Padera peFiristia ndinodaidzira mukunyisa.” Ndiani unozondiunza mudhorobha rakashosherwa? Ndiani unozonditungamirira kuenda Edhomu? Auzi kutiramba isusu here, A Mwari? Aubudi nehondo dzedu, A Mwari. A, tidetsere kurwa negaa, ngokuti kudetsera kwevanhu akuna shwiro. NaMwari tinozoita ngoungwazi, ndiye unozotsikirira pashi magaa edu. KuneMutungamiriri woKuemba. Nduyo yaDhavhidha. Usanyarara, iwewe Mwari wendinokudza. Ngokuti muromo wowakashata nomuromo wounochengedza yakandishamira; vanoereketa ndini ngorurumi runonyepa. Vanondiunganira ngemazwi okuzonda, nokurwa neni pasina ndaa. Vanounzidzira rudo rwangu ngokundiitira ndaa, kunyazwi inini ndinovakumbirira. Ndizvo vanondiunzidzira ngokushata ndavaitira zvakanaka, nokundizonda apo ndavada. Vanoti, “Emesa munhu wakashata kuti arwe naye; gaa ngarieme ngokumudyo kwake. Naapo atongwa, ngaaoneke anendaa; mukumbiro wake ngaupindurwe kuita chishaishi. Mazuva ake ngaaite mashomani; umweni ngaatore mushando wake. Vana vake ngavaite nherera, mukadzi wake ngaaite shirikadzi. Vana vake ngavaite mipepeshekwa, vapemhe; ngavadzingwe kubva mumatongo mwevanogara. Mukweretesi ngaatore zveshe zvaanazvo; nevapara ngavachakate michero yokushanda kwake. Kusaapo naumwe unomuitira nyasha, nokuti umwe wokukungurira nherera dzake. Mibarirwana yake ngaipedzwe; zina rake ngaridzimwe nokumubarirwana wechipiri. Kushata kwemadzibaba ake ngakukarakadzwe pamberi paMambo Mwari; usatendera kuti chishaishi chamai ake chitsukutidzwe. Ngazvigare zviripo pamberi paMambo Mwari, kuti adzime kukarakadzwa kwake munyika. Ngokuti aazi kukarakadza ngokuonisa nyasha, asi wakatambudza munhu murombo nomutami, nowakasvipa mwoyo metsa pakufa kwavo. Wakada kutuka, zvituko ngazvimugumire; Aazi kudakarira kufumisa, ngakuite kuretu kubva kwaari. Wakadzifukidza ngezvituko kudai ngechokufuka chake, ngazvipotere mukati mwake kudai ngemvura, nokudai ngemafuta mumagodo ake. Ngazvidai ngejira iro raanodzifukidza ndiro, kudai ngebhande raanodzisunga ndiro mazuva eshe.” Ngauite musharo wemagaa angu unobva kunaMambo Mwari, nowaavo vanoereketa zvakashata ngomweya wangu. Asi iwewe, A Mambo Mwari, Mambo wangu, ndiitire ngendaa yezina rako; ngokuti nyasha dzako dzinorudo dzakanaka, ndinunure. Ngokuti ndiri murombo nomutami, nomwoyo wangu unoremadzwa mukati mwangu. Ndapera kudai ngebvuri rinodzerera madeekoni, ndapepereswa kudai ngendongwe. Mabvi angu apera simba ngokuera kudya; nyama yangu yaonda nokutama mafuta Ndaa chiro chokutukwa kumagaa angu; apo voondiona, vanodzungudza masoro avo. Ndidetsere, A Mambo Mwari, Mwari wangu! Ndiponese kudai ngouwandu hwenyasha dzako dzinorudo. Ngavazie kuti iyi inyara yako; iwewe, Mambo Mwari, ndiwe wazviita. Ngavatuke, asi iwewe unozofumisa. Magaa angu ngaatsverudzwe; muranda wako ngaadakare. Magaa angu ngaapfekeswe ngokureruswa; ngavadziputire mukutsveruka kwavo kudai ngechokufuka. Ngomuromo wangu ndinozobonga Mambo Mwari kakurutu; ndinozomukurisa pakati pembungano. Ngokuti unoema ngokumudyo kwomutami, kumuponesa kubva kuneavo vanotongera mweya wake rufu. Nduyo yaDhavhidha. Mambo Mwari wakati kunamambo wangu, “Gara apa ngokumudyo kwangu, metsa ndaita magaa ako chitambarariro chetsoka dzako.” Mambo Mwari unozotumira mudondoro wesimba rako unobva muZioni. Tonga iwewe pakati pemagaa ako. Vanhu vako vanozodzipira ngokuda pazuva rounozotungamirira hondo yako pamutunhu wakacheneswa. Kubva muchibereko chemangwanani, kudai ngebeto, utsva hwako hunozouya kweuri. Mambo Mwari wakapika, aazokunukudzi mupinimidzo wake, kuti, “Iwewe uri mupristi mhera nariini, kudai ngourongwa hworudzi rwaMerekhizedheki.” Mambo Mwari uri ngokumudyo kwako unozoparadza madzimambo ngezuva rokutseneka kwake. Unozotonga pakati pemadzinza, unozozadza ndau ngemiiri yakafa; unozoparadza masoro padera penyika zhinji. Unozomwa mvura yorwizi munjira; ndizvo unozomirudza soro rake. Kudzai Mambo Mwari! Ndinozobonga Mambo Mwari ngomwoyo wangu weshe, muchikwata chevakarurama nomumushongano. Mishando yaMambo Mwari mikuru, inotsvakwa ndivo veshe vanoidakarira. Mushando wake wakazara ngokuremeredzwa, unouthende, nokururama kwake kunogara mhera nariini. Wakaona mbiri ngemishando yake inoshamisa; Mambo Mwari unenyasha nokukungurira. Unopa kudya kwevari vanomutya; unogara echikarakadza chitenderano chake. Waonesa vanhu vake simba remishando yake, ngokuvapa nhaka yemadzinza. Mishando yenyara dzake yakagondeka nokutonga kwakanaka; yeshe mipango yake ngeyegwinyiso. Yakaemeswa mhera nariini nariini, kuti iitwe mukugondeka nomukururama. Wakatumira kusunhurwa kuvanhu vake; wakapanga chitenderano chake mhera nariini. Zina rake rakachena nokutyisa. Kutya Mambo Mwari ndikwo kutanga kwoungwaru; veshe avo vanoita mipango yake vanokuzwisisa kwakanaka. Kukudzwa kwake kunogara mhera nariini. Kudzai Mambo Mwari! Unomuchena munhuwo unomutya Mambo Mwari, uwo unodakara kakurutu ngemipango yake. Mibarirwana yake inozoita simba padera penyika; mibarirwana yevakarurama inozofumiswa. Zvakawanda noupfumi zviri mumhatso mwake, nokururama kwake kunogara mhera nariini. Kunowakarurama kunobuda kujeka muchidima; unenyasha, unokungurira, wakarurama. Kwakanaka kunomunhu unenyasha, unopa chikwereti vanhu vanomupombera; unobata ndaa yake mukutonga kwakanaka. Ngokuti wakarurama aambozotsukunuswi; unozogara echicherechedzwa. Aazotyi mashoko akashata; mwoyo wake wakatsima, unogonda munaMambo Mwari. Mwoyo wake wakagwinyiswa, aazotyi; pamagumo unozoona kunyisa padera pemagaa ake. Wakakoanisa ngokuda, akapa vatami; kururama kwake kunogara mhera nariini; runyanga rwake runozokuriswa mukuremeredzwa. Wakashata unozozviona, anyangadzwe; unozomukwetsera mazino ake, anyunguruke; kudisisa kwevakashata kunozopera. Kudzai Mambo Mwari! Kudzai, imwimwi varanda vaMambo Mwari, kudzai zina raMambo Mwari. Ngarikudzwe zina raMambo Mwari kubvira zvino mhera nariini. Kubvira pakubuda kwezuva metsa kubira kwezuva zina raMambo Mwari rinosisira kukudzwa. Mambo Mwari uri mukuru kupinda madzinza eshe, nembiri yake inopinda matenga. Ndiani wakadai ndiMambo Mwari, Mwari wedu, uwo unechigaro chake chakaturama, uwo unoringira kuretu pashi mudenga nezviri munyika? Unomirudza murombo kubva mubukuta, nokumirudza mutami kubva mudurunhuru remadota, kuti amugadzike pamwepo nevatongi, pamwepo nevatongi vevanhu vake. Unopa mukadzi ngomwa mhatso, nokumuita mai vanodakara ngevana. Kudzai Mambo Mwari! Naapo vanhu vaIsuraeri vabva Egipite, mhatso yaJakobe yakabuda kubva kuvanhu vanoereketa ndimi yevapara, Judha wakaita ugaro hwaMwari hwakachena, Isuraeri wakaita umambo hwake. Ruandhle rwakazviona, rukatiza; Jorodhani rakapetuka sure. Mitunhu yakanyanduka kudai ngemagondohwe, nezvimitunhu zvakatomukatomuka kudai ngemakwayana. Ngenyi, iwewe ruandhle, kuti utize? Iwewe Jorodhani, kuti upetuke sure? A mitunhu, kuti munyanduke kudai ngemagondohwe? Nemwi zvimitunhu kuti murinyarinye kudai ngemakwayana? Huta, iwewe nyika, ngokuapo kwaMambo Mwari, ngokuapo kwaMwari waJakobe, uwo wakapindura buwe rikaita dziya remvura, nebuwe rakakonza kuriita chinyuka chemvura. Haiwa kwetiri, A Mambo Mwari, haiwa kwetiri, asi ipa kunezina rako kuirikidzwa, ngendaa yenyasha dzako dzinorudo nokugondeka kwako. Ngenyi madzinza echiti, “Uri pari Mwari wavo?” Mwari wedu uri mumatenga; unoita zveshe zvaanoda. Miedzaniso yavo isirivha nomukore, mushando wenyara dzevanhu. Inemiromo, asi aiereketi; inemadziso, asi aioni. Inenzee, asi aizwi; inemiro, asi aizwi kunuhwa. Inenyara, asi aibati; inetsoka, asi aihambi; aiereketi ngemikuro yayo. Avo vanoinasira vakadai ndiyo; ndizvo munhu weshe unoigonda. A Isuraeri, gonda iwewe munaMambo Mwari! Ndiye kudetswa kwavo nechihlangu chavo. Imwimwi mhatso yaAroni, gondai munaMambo Mwari! Ndiye kudetswa kwavo nechihlangu chavo. Imwimwi munomutya Mambo Mwari, gondai munaMambo Mwari! Ndiye kudetswa kwavo nechihlangu chavo. Mambo Mwari waikarakadza tisu; unozotifumisa; unozofumisa vemhatso yaIsuraeri; unozofumisa vemhatso yaAroni; unozofumisa avo vanomutya Mambo Mwari, veshe vakuru nevadoko. Mambo Mwari ngaagare echimuwandisa, imwimwi nevana venyu. Imwimwi fumiswai ndiMambo Mwari, uwo wakaita denga nenyika. Matenga matenga aMambo Mwari, asi nyika wakapa vana vevanhu. Vakafa avakudzi Mambo Mwari, nokuti avo vanodzaka mukunyarara. Asi isusu tinozokudza Mambo Mwari kubvira zvino metsa mhera nariini. Kudzai Mambo Mwari! Ndinoda Mambo Mwari, ngokuti wakazwa izwi rangu nokupota kwangu. Ngokuti wakaungamisira nzee yake kwendiri, ndizvo ndinozokumbira kwaari ngenguva yeshe yokurarama kwangu. Mirau yorufu yakanditendenedza, nokurwadza kweSheori kwakandigumira; ndakaona dambudziko nokusvipa mwoyo. Zvino ndakakumbira ngezina raMambo Mwari, ndikati, “Ndapota, A Mambo Mwari, ponesa mweya wangu.” Mambo Mwari unenyasha newakarurama; Mwari wedu unoitira nyasha. Mambo Mwari unongwarira vasina ruziyo; naapo pendakadzaswa pashi, wakandiponesa. Petuka, A mweya wangu, kunokuzorora kwako, ngokuti Mambo Mwari wakakuitira zvakapinda kunaka. Ngokuti iwewe wanunura mweya wangu kubva mukufa, madziso angu kubva mumasodzi, netsoka dzangu kubva mukupunhuwa. Ndinohamba pamberi paMambo Mwari munyika yevanorarama. Ndinongwarira kugonda kwangu, kunyazwi apo pendinozoti: “Ndakatambudzwa kakurutu.” Ndakati mukutyiswa kwangu, “Munhu weshe munyepi.” Ndingapetudzenyi kunaMambo Mwari ngezviro zvake zveshe zvakanaka zvaanonditira? Ndinozomirudza tsani yoruponeso, ndikumbire ngezina raMambo Mwari. Ndinozoripa mhiko dzangu kunaMambo Mwari mukuona kwevanhu vake veshe. Kufa kwavakacheneswa vake kuri chiro chinodikanwa kakurutu mukuona kwaMambo Mwari. A Mambo Mwari, ndiri muranda wako; ndiri muranda wako, mukororo womurandakadzi wako; wakasunhura zvisungo zvangu. Ndinozopa kwouri mudiro wokubonga, ndinozokumbira ngezina raMambo Mwari. Ndinozoripa mhiko dzangu kunaMambo Mwari mukuona kwevanhu vake veshe, mumaruwanze emhatso yaMambo Mwari, mukati mwako, iwewe Jerusarema. Kudzai Mambo Mwari! Kudzai Mambo Mwari, imwimwi madzinza eshe! Muganzisenyi, imwimwi vanhu mweshe! Ngokuti nyasha dzake dzinorudo ihuru kwetiri, nokugondeka kwaMambo Mwari kunogara mhera nariini. Kudzai Mambo Mwari! Bongai Mambo Mwari, ngokuti wakanaka; nyasha dzake dzinorudo dzinogara mhera nariini. Isuraeri ngaaronze kuti, “Nyasha dzake dzinorudo dzinogara mhera nariini.” Mhatso yaAaroni ngaironze kuti, “Nyasha dzake dzinorudo dzinogara mhera nariini.” Avo vanotya Mambo Mwari, ngavaronze vechiti, “Nyasha dzake dzinorudo dzinogara mhera nariini.” Ndakadaidza kunaMambo Mwari ndiri mukutambudzika kwangu; Mambo Mwari wakandipingura, akandigadzika muugaro hwakapamhama. Mambo Mwari uri parutii rwangu, andizotyi. Munhu ungaitenyi kwendiri? Mambo Mwari uri parutii rwangu kundidetsera; ndinozoringira mukunyiswa kweavo vanondizonda. Kwakapinda kunaka kuhwara munaMambo Mwari kune kugonda vanhu. Kwakapinda kunaka kuhwara munaMambo Mwari kune kugonda vatongi. Madzinza eshe akanditendenedza; muzina raMambo Mwari ndakaauraya. Akanditendenedza, akanditendenedza kumarutii eshe; muzina raMambo Mwari ndakaauraya. Akanditendenedza kudai ngenyuchi; akadzimwa kudai ngomuriro weminzwa; muzina raMambo Mwari ndakaauraya. Ndakasukumidzwa ngesimba kuti ndiwe, asi Mambo Mwari wakandidetsera. Mambo Mwari ndiye simba rangu noruyo rwangu; ndiye ruponeso rwangu. Pane nduyo dzinodakadza dzokunyisa mumatende evakarurama: “Nyara yokumudyo yaMambo Mwari inonyisa ngesimba; Nyara yokumudyo yaMambo Mwari yakamirudzwa; nyara yokumudyo yaMambo Mwari inonyisa ngesimba.” Andizofi akadi, asi ndinozorarama, nokuteketesa mishando yaMambo Mwari. Mambo Mwari wakandiorora kakurutu, asi aazi kundipira murufu. Ndibeurire misiwo yokururama, kuti ndipotere mukati kubudikidza ndiyo, ndibonge Mambo Mwari. Uyu ndiwo musiwo waMambo Mwari; vakarurama vanozopotera ndiwo. Ndinokubonga, ngokuti iwewe wakandipingura, ukaita muponesi wangu. Buwe rakarambwa ngevaaki ndiro rakaita soro repakhona. Uku ndikwo kuita kwaMambo Mwari; kunoshamisa mukuona kwedu. Iri ndiro zuva raaita Mambo Mwari; ngatidakare tidakadzwe mweriri. Tiponese, tinokupota, A Mambo Mwari! A Mambo Mwari, tinokupota, tipei kubudirira! Unomuchena uwo unouya ngezina raMambo Mwari. Tinokukudza tiri mumhatso yaMambo Mwari. Mambo Mwari ndiye Mwari, naye wakatipa kujeka. Nematai munyara dzenyu, tangai kuforera dhiri, mwechitenderera arita. Iwewe ndiwe Mwari wangu, ndinozokubonga; ndiwe Mwari wangu, ndinozokutunhumadza. Bongai Mambo Mwari, ngokuti wakanaka, ngokuti nyasha dzake dzinorudo dzinogara mhera nariini. Vanomuchena avo vanenjira yakaperera, avo vanohamba mumupango waMambo Mwari. Vanomuchena avo vanongwarira uchapupu hwake, avo vanomutsvaka ngomwoyo yavo yeshe, avo vasikaitiwo chiro chisina kururama, asi vanohamba munjira dzake. Iwewe wakatipanga mipango yako kuti tiingwarire zvakanaka. A, kudai njira dzangu dzatsima mukungwarira zviemeso zvako! Zvino andizotsverudzwi, apo ndine madziso angu akaringira mipango yako yeshe. Ndinozokukudza ngomwoyo unokururama, apo pendinozodzidza zvitongero zvako zvakarurama. Ndinozongwarira zviemeso zvako; A, usandirasha yaamho. Jaha ringangwarira ngenjiranyi njira yaro kuti igare yakasukika? Ngokuingwarira kudai ngezvinoronzwa ngeizwi rako. Ndinokutsvaka ngomwoyo wangu weshe; usanditendera kuti ndipauke kubva kumipango yako. Ndafisha izwi rako mumwoyo mwangu, kuti ndisakushaishira. Kudzwai Mambo Mwari; ndidzidzise zviemeso zvako. Ngomuromo wangu ndinoteketesa zveshe zvitongero zvomuromo wako. Ndinodakara munjira yezvapupu zvako, kudai ngezvendinodakara muupfumi hweshe. Ndinozopinimidza ngemipango yako, madziso angu aringisise njira dzako. Ndinozodakara muzviemeso zvako; andizoriyarwi izwi rako. Itira muranda wako zvakanaka kuti ndipone nokungwarira izwi rako. Beura madziso angu, kuti ndione zviro zvinoshamisa mumupango wako. Ndinogara kudai ngomupara munyika; usandifishira mipango yako. Mweya wangu unokakaseka ngokuda zvitongero zvako nguva dzeshe. Iwewe unokaraidza vanodzikudza ngechituko, avo vanonzerereka kubva mumipango yako. Dusa kubva kwendiri kutsverudza nokuyeyisa kwavo, ngokuti ndakangwarira zvapupu zvako. Kunyazwi vatongi vanogara kupangana kurwa neni, muranda wako unozopinimidza ngezviemeso zvako. Zviemeso zvako zviri kudakara kwangu, ndizvo zvinondipanga. Mweya wangu unobatirira kubukuta; ndimusirire kudai ngeizwi rako. Apo pendakakuronzera ngenjira dzangu, iwewe wakandipingura; ndidzidzise zviemeso zvako. Ndiite kuti ndizwisise njira yemipango yako, neni ndinozopinimidza ngemishando yako inoshamisa. Mweya wangu unonyunguruka ngokuremerwa; ndigwinyise kudai ngeizwi rako. Bvisa kubva kwendiri njira yemanyepo; undidzidzise mupango wako ngenyasha. Ndatsanangura njira yokugondeka; ndakaemesa zvitongero zvako pamberi pangu. Ndinobatirira kuzvapupu zvako, A Mambo Mwari; usanditsverudza. Ndinorumba munjira yemipango yako, ngokuti unokudza kuzwisisa kwangu. Ndidzidzise, A Mambo Mwari, njira yezviemeso zvako, neni ndinozoingwarira metsa kumagumo. Ndipe kuzwisisa, kuti ndingwarire mupango wako, ndiungwarire ngomwoyo wangu weshe. Ndiite kuti ndihambe munjira yemipango yako, ngokuti ndinodakara ndiyo. Kunukudzira mwoyo wangu kumitemo yako, haiwa mukuemura. Kunukudzira madziso angu kubva mukuringira zvisina shwiro; ndipe kupona munjira dzako. Gwinyisa chigondiso chako kumuranda wako, uwo unokutya. Kunukudzira kutsverudzwa kwangu kwendinotya, ngokuti zvitongero zvako zvakanaka. Ringira, ndinodisisa mipango yako; mukururama kwako ndipe kupona. Nyasha dzako dzinorudo ngadziuye kwendiri, A Mambo Mwari, ruponeso rwako kudai ngechigondiso chako. Zvino ndinozoona mupinguro kwevari vanondituka, ngokuti ndinogonda izwi rako. Usadusa reshe izwi regwinyiso kubva mumuromo wangu, ngokuti kugonda kwangu kuri muzvitongero zvako. Ndinozogara ndechingwarira mupango wako mhera nariini nariini. Ndinozohamba ndakasunhurika, ngokuti ndakatsvaka mipango yako. Ndinozoereketazve ngezvapupu zvako pamberi pemadzimambo, andizotsveruki. Ndinoona kudakara kwangu mumipango yako, ngokuti ndinoida. Ndinoremeredza mipango yako iyo yendinoda; ndinozokarakadza ngezviemeso zvako. Karakadza izwi rako kunomuranda wako, umwo mwewakaita kuti ndigonde. Uku ndikwo kuembedzerwa kwangu mukutambudzika kwangu, chigondiso chako chinondipa kupona. Vanodzikudza vanondisheka kakurutu, asi andipauki kubva kumupango wako. Naapo ndechipinimidza ngezvitongero zvako kubvira karetu, ndinozwa kuembedzerwa, A Mambo Mwari. Ushungu hunobaka hwandibata ngendaa yevakashata, avo vanoramba mupango wako. Zviemeso zvako zvaiya nduyo dzangu kweshe kwendinoita ugaro hwangu. Ndinokarakadza zina rako muusiku, A Mambo Mwari, nokungwarira mupango wako. Ichi chifumiso chawira padera pangu, ngokuti ndangwarira mipango yako. Mambo Mwari uri chikoaniswa changu; ndinozogondisa kungwarira mazwi ako. Ndinokumbira nyasha dzako ngomwoyo wangu weshe; ndiitire nyasha, kudai ngechigondiso chako. Naapo ndechipinimidza njira dzako, ndinokunukudzira tsoka dzangu kuzvapupu zvako. Ndinokasira, andinonoki kungwarira mipango yako. Kunyazwi mapote evakashata akandipombera; andiriyarwi mipango yako. Ndinomuka pakati pousiku kukukudza, ngendaa yezvitongero zvako zvakarurama. Ndiri shamwari yeavo veshe vanokutya, yeavo vanongwarira mipango yako. Nyika yakazara ngenyasha dzako dzinorudo, A Mambo Mwari; ndidzidzise zviemeso zvako. Wakaita zvakanaka kunomuranda wako, A Mambo Mwari, kudai ngeizwi rako. Ndidzidzise kutonga kwakanaka nokuzia, ngokuti ndinogonda mipango yako. Ndisati ndatambudzwa ndakapauka, asi zvino ndinongwarira izwi rako. Iwewe wakanaka, unoita zvakanaka; ndidzidzise zviemeso zvako. Vanodzikudza vakandirongera gumbu, asi ngomwoyo wangu weshe ndinongwarira mipango yako. Mwoyo yavo yakakora inemafuta, asi ndinodakara ngomupango wako. Zvakandinakira kuti ndakatambudzwa, kuitira kuti ndidzidze zviemeso zvako. Mupango womuromo wako wakandinakira kupinda zvigurwa zvomukore nesirivha makumi emazana. Nyara dzako dzakandisika, dzikandiumba; ndipe kuzwisisa, kuti ndidzidze mipango yako. Avo vanokutya vanozondiona, vadakare, ngokuti ndaiya ndagonda izwi rako. Ndinozia, A Mambo Mwari, kuti kutonga kwako kwakarurama, nokuti muugondeki iwewe wakanditambudza. Nyasha dzako dzinorudo ngadziite kuembedzerwa kwangu, kudai ngechigondiso chako kumuranda wako. Nyasha dzako dzinokungurira ngadziuye kwendiri, kuti ndirarame; ngokuti mupango wako ndikwo kudakara kwangu. Vanodzikudza ngavatsverudzwe, ngokuti vakandipaukisa pasina ndaa; asi inini ndinozopinimidza ngemipango yako. Avo vanokutya ngavakunukukire kwendiri, kuitira kuti vazie zvapupu zvako. Mwoyo wangu ngauperere muzviemeso zvako, kuitira kuti ndisatsverudzwa. Mweya wangu unodemerera ruponeso rwako; ndinogonda muizwi rako. Madziso angu odzerera ngokugarira izwi rako, ndechiti, “Unozondiembedzera riini?” Ngokuti ndinodai ngembudu yedoo iri pachiushi, asi andiriyarwi zviemeso zvako. Muranda wako unoshingirira metsa riini? Unozovatonga riini avo vanonditambudza? Vanodzikudza vanditsira hunza, avo vasikangwariri mupango wako. Mipango yako yeshe inogondeka; vanonditambudza pasina ndaa; ndidetsere iwewe! Vakatodo kundiuraya munyika; asi andizi kurekera mipango yako. Ndiponese kudai ngouwandu hwenyasha dzako dzinorudo, kuitira kuti ndingwarire uchapupu hwomuromo wako. Izwi rako rakatsima mudenga mhera nariini, A Mambo Mwari. Ugondeki hwako hunogara kumibarirwana yeshe; iwewe wakatsimisa nyika, nayo inogara iripo. Ngokuemesa kwako zvinogara nanyamashi, ngokuti zviro zveshe varanda vako. Kudai mupango wako usaiita kudakara kwangu, ndaizodai ndakaparara mukutambudzika kwangu. Andimbozokanganwi mipango yako, ngokuti kubudikidza ndiyo wakandiponesa. Ndiri wako, ndiponese; ngokuti ndatsvaka mipango yako. Vakashata vanondihwarira kuti vandiuraye, asi ndinopinimidza ngezvapupu zvako. Ndakaona magumo okuperera kweshe, asi mupango wako wakapamhama kakurutu. A, kudanyi kwendinoita mupango wako! Uri mumupinimidzo wangu zuva reshe. Mipango yako inondiita wakangwara kupinda magaa angu, ngokuti ineni nguva dzeshe. Ndinokuzwisisa kunopinda vadzidzisi vangu veshe, ngokuti zvapupu zvako ndikwo kupinimidza kwangu. Ndinozwisisa kupinda vasharuka, ngokuti ndinongwarira mipango yako. Ndarambidza tsoka dzangu kuhamba ngenjira dzeshe dzakashata, kuitira kuti ndingwarire izwi rako. Andipauki kubva kuzvitongero zvako, ngokuti iwewe wandidzidzisa. Kutapiranyi kunoita mazwi ako kumaraira, anotapira kupinda uchi mukanwa mwangu! Ndinoona kuzwisisa kubudikidza ngemipango yako; ndizvo ndinozonda njira dzeshe dzemagumbu. Izwi rako ndirwo rumvenu rwetsoka dzangu, nokujeka kwenjira yangu. Ndapika mhiko, ndikaigwinyisa, kuti ndinozongwarira zvitongero zvako zvakarurama. Ndinotambudzika kakurutu; ndiponese, A Mambo Mwari, kudai ngokuronza kweizwi rako. Ashira mudiro wangu wokukudza, A Mambo Mwari, undidzidzise zvitongero zvako. Mweya wangu unogara uri munyara yangu; asi andikanganwi mupango wako. Vakashata vanditeya ngomurau, asi andipauki kubva kumipango yako. Zvapupu zvako inhaka yangu mhera nariini; ngokuti zviri kudakara kwomwoyo wangu. Ndakaungamisira mwoyo wangu kuti uite zviemeso zvako mhera nariini, metsa kumagumo. Ndinozonda vanemipinimidzo miiri, asi ndinoda mupango wako. Iwewe uri bako rangu nechihlangu changu; ndinogonda muizwi rako. Ibvai kwendiri, imwimwi vaiti vezvakashata, kuti ndingwarire mipango yaMwari wangu. Nditsimise kudai ngokuronza kweizwi rako, kuti ndirarame; usatenda kuti nditsveruke ngegonda rangu. Ndibate, kuti ndingwaririke, ndigare ndechiremeredza zviemeso zvako. Iwewe unoramba avo veshe vanopauka kubva kuzviemeso zvako; ngokuti kuchengedzera kwavo akuna shwiro. Unovarasha veshe vakashata vomunyika kudai ngemahundi; ndizvo ndinoda zvapupu zvako. Muiri wangu unohuta ngokukutya; ndinotya zvitongero zvako. Ndaita kutonga kwakanaka nokururama; usandisiya kunevatambudzi vangu. Ita chigondiso kunemuranda wako chokundiitira zvakanaka; usatenda kuti vasikatendi Mwari vanditambudze. Madziso angu anodzerera ngokutsvaka ruponeso rwako, nokuzadzisika kwechigondiso chako chakarurama. Ita kunomuranda wako kudai ngouwandu hwenyasha dzako dzinorudo, undidzidzise zviemeso zvako. Ndiri muranda wako; ndipe kuzwisisa, kuti ndizie zvapupu zvako. Yaanguva yokuti Mambo Mwari ashande, ngokuti vakagura mupango wako. Ngegwinyiso ndinoda mipango yako kupinda mukore, kupinda mukore wakanyunguruswa. Ngegwinyiso ndinohambisa zvitsiko zvangu mumipango yako yeshe; ndinozonda njira dzeshe dzokunyepa. Mitemo yako inoshamisa; ndizvo mweya wangu unoingwarira. Kubeurwa kwemazwi ako kunojekisa; kunopa kuzwisisa kunevasina ruziyo. Ndashama muromo wangu ndikahasaira, ngokuti ndinodisisa mipango yako. Kunukukira kwendiri, undiitire nyasha, kudai ngomuitiro wako kuneavo vanoda zina rako. Gwinyisai tsoka dzangu kudai ngechigondiso chako; usatendera kushata nakamwe kuti kunditonge. Ndisunhure kubva mukutambudzwa ngevanhu, kuti ndingwarire mipango yako. Ita kuti hope yako ijeke padera pomuranda wako; undidzidzise zviemeso zvako. Madziso angu anoerera ndwizi dzemasodzi, ngokuti vanhu avangwariri mipango yako. Iwewe wakarurama, A Mambo Mwari, nezvitongero zvako zvakarurama. Waemesa mitemo yako ngokururama nomuugondeki hweshe. Kutsamwirira kwangu kwandipedza, ngokuti magaa angu akanganwa mazwi ako. Chigondiso chako chakaedzwa yaamho, nomuranda wako unochida. Ndiri mudoko nounoshoorwa, asi andikanganwi mipango yako. Kururama kwako kuri kururama kwemhera nariini, nemipango yako ngeyegwinyiso. Dambudziko nokurwadziwa zvandigumira, asi mipango yako iri kudakara kwangu. Mitemo yako yakarurama mhera nariini; ndipe kuzwisisa, kuti ndirarame. Ndinodaidzira ngomwoyo wangu weshe; ndidaire, A Mambo Mwari. Ndinozongwarira zviemeso zvako. Ndinodaidza kwouri; ndiponese, kuti ndingwarire mitemo yako. Ndinomuka kutangira mambakwedza, nokuchemera kudetserwa; ndinoisa gonda rangu mumazwi ako. Madziso angu anobeuka kutangira mirindo yousiku yeshe, kuti ndipinimidze ngechigondiso chako. Munyasha dzako dzinorudo izwa izwi rangu; A Mambo Mwari, mukutonga kwako kwakanaka ndiponese. Avo vanonditambudza vanoteera kushata vanokwedzera pasinde; vari kuretu kwemipango yako. Asi iwewe uri pasinde, A Mambo Mwari, nemipango yako yeshe ngeyegwinyiso. Karetu ndakadzidza kubva kumitemo yako, kuti iwewe wakatsimisa mhera nariini. Ringira kutambudzika kwangu, undinunure, ngokuti andikanganwi mipango yako. Rwira ndaa yangu, undiripire; ndiponese kudai ngokugondisa kwako. Ruponeso ruri kuretu kwevakashata, ngokuti avatsvaki zviemeso zvako. Nyasha dzako dzinokungurira ihuru, A Mambo Mwari; ndiponese kudai ngezvitongero zvako. Vatambudzi vangu nemagaa angu vazhinji; asi andizi kupauka kubva mumitemo yako. Ndakaringira vanoshanda ngokuchengedzera, ndakatambudzika, ngokuti avangwariri mipango yako. Pinimidza madire endinoita mipango yako; ndiponese, A Mambo Mwari, kudai ngenyasha dzako dzinorudo. Zveshe zveizwi rako ngezvegwinyiso; nemipango yako yeshe yakarurama inondogara mhera nariini. Vatongi vanonditambudza pasina ndaa, asi mwoyo wangu unotya mazwi ako. Ndinodakara ngeizwi rako, kudai ngouwo waona zvakachakatwa zvizhinji. Ndinozonda nokunyangadzwa ngemagumbu, asi ndinoda mupango wako. Kanomwe pazuva ndinokukudza ngendaa yezvitongero zvako zvakarurama. Vanokunyarara kukurutu avo vanoda mipango yako; avana chinovapumhunisa. Ndinogonda ruponeso rwako, A Mambo Mwari, ndinoita mipango yako. Mweya wangu unongwarira mitemo yako; ndinoida kakurutu. Ndinongwarira mipango yako nemitemo yako, ngokuti njira dzangu dzeshe dziri pamberi pako. Kuchema kwangu ngakugume pamberi pako, A Mambo Mwari; ndipe kuzwisisa kudai ngezvinoronza izwi rako. Kupota kwangu ngakugume pamberi pako; ndinunure kudai ngokugondisa kwako. Miromo yangu inozodurura kukudza, ngokuti iwewe unondidzidzisa zviemeso zvako. Rurumi rwangu runozoemba ngechigondiso chako, ngokuti mipango yako yeshe yakarurama. Nyara yako ngainasirirwe kundidetsera, ngokuti ndatsanangura nemipango yako. Ndinodisisa ruponeso rwako, A Mambo Mwari, mipango yako ndikwo kudakara kwangu. Mweya wangu ngaurarame, kuti uzokukudza; zvitongero zvako ngazvindidetsere. Ndapauka kudai ngegwai rakarashika; tsvaka muranda wako, ngokuti andikanganwi mipango yako. Nduyo yokukwira. Mukutambudzika kwangu ndinochemera kunaMambo Mwari, kuti andipingure. Nunurira mweya wangu, A Mambo Mwari, kubva pamiromo inonyepa, nokubva parurumi runochengedza. Chiinyi chinozopuwa kweuri? Chiinyizve chinozoitwa kweuri, iwewe rurumi runochengedza? Uri misee inopinza yengwazi, nemasimbe anobaka omujunipa. Ihehe kwendiri, ngokuti ndiri chigarandimo muMeshekhi, kuti ndinosisira kugara mumatende eKhedha! Mweya wangu wakagara mukuwo wakareba nouwo unozonda kunyarara. Inini ndinoda kunyarara; asi apo ndoereketa, vanoda kurwa. Nduyo yokukwira. Ndinomirudzira madziso angu kumitunhu; kudetserwa kwangu kunozobva kuri? Kudetserwa kwangu kunobva kunaMambo Mwari, uwo wakasika denga nenyika. Aazotenderi kuti rutsoka rwako rutherurwe; iye unokungwarira aakutsiri. Uwo unongwarira Isuraeri aakutsiri nokuti kuata. Mambo Mwari ndiye mungwariri wako; Mambo Mwari ndiye mumvuri wako ngokumudyo kwako. Zuva arizokupishi masikati, nokuti mwedzi usiku. Mambo Mwari unozokungwarira kubva mukushata kweshe; unozongwarira kupona kwako. Mambo Mwari unozongwarira kubuda kwako nokupotera kwako, kubvira zvinopano mhera nariini. Nduyo yokukwira. Nduyo yaDhavhidha. Ndakadakara apo vakati kwendiri, “Ngatikwire kuenda kumhatso yaMambo Mwari!” Tsoka dzedu dzinoema mukati mwemisiwo yako, A Jerusarema. Jerusarema iwewe wakaakiwa kudai ngeguta rakatsikana pamwepo. Kweriri madzinza anokwirayo, madzinza aMambo Mwari, kudai ngezvakapangwa Isuraeri, kuti vabonge zina raMambo Mwari. Ngokuti apo madendemaro okutonga akaemeswapo, madendemaro emhatso yaDhavhidha. Kumbirirai kunyarara kweJerusarema: “Avo vanokuda ngavabudirire. Kunyarara ngakua pakati pemarukumbati ako, nokugarisika ngakua mungome dzako.” Ngendaa yehama dzangu neyeshamwari dzangu, ndinozoti, “Kunyarara ngakugare mwemuri.” Ngendaa yemhatso yaMambo Mwari, Mwari wedu, ndichatsvaka kubudirira kwako. Nduyo yokukwira. Ndinomirudzira madziso angu kwouri, iwewe unogara mumatenga. Ringira, kudai ngemadziso evaranda anoringira kunyara yatenzi wavo, kudai ngemadziso omurandakadzi anoringira kunyara yatenzikadzi wake, ndizvo madziso edu anoringira kunaMambo Mwari, Mwari wedu, metsa atiitira nyasha. Tiitire nyasha, A Mambo Mwari, tiitire nyasha, ngokuti tazadzwa kakurutu ngokushoorwa. Mweya yedu yazara kakurutu ngokuitirwa jee ndivo vakapfuma nokushoorwa ngavanodzikudza. Nduyo yokukwira. Nduyo yaDhavhidha. Kudai asiri Mambo Mwari waitirwira, Isuraeri zvino ngaati, kudai asiri Mambo Mwari waitirwira, apo magaa edu akatirwisa, zvino vangadai vakatimedza techipona, naapo ushungu hwavo hwakabaka kurwisana nesu; zvino ndambi yaizodai yakatimbonya, nendwizi dzaipopomera padera pemweya yedu; zvino mvura yakaturama yaizopopomera padera pomweya yedu. Ngaabongwe Mambo Mwari, uwo usikazi kutikovera kumazino avo. Mweya yedu yakapokonyoka kudai ngeshiri kubva mumurau wevateyi; murau wavhunika, nesu tapokonyoka. Kudetserwa kwedu kuri muzina raMambo Mwari, uwo wakasika denga nenyika. Nduyo yokukwira. Avo vanogonda munaMambo Mwari vakadai ngeDunhu reZioni, risikakoni kutsukunuswa, asi rinogara mhera nariini. Kudai ngematunhu anotendenedza Jerusarema, ndizvo Mambo Mwari unotendenedza vanhu vake, kubvira zvino mhera nariini. Ngokuti ndonga youmambo hwevakashata aizotsimiswi padera penhaka yevakarurama, kuti vakarurama vasatambanudzira nyara dzavo kunezvakashata. Ita zvakanaka, A Mambo Mwari, kuneavo vakanaka, nokuneavo vakarurama mumwoyo yavo. Asi ngendaa yeavo vanopauka kuenda munjira dzavo dzakashongoroka, Mambo Mwari unozovabudisa kuvadzinga pamwepo nevashandi vezvakashata. Kunyarara ngakugare naIsuraeri! Nduyo yokukwira. Naapo Mambo Mwari akapetudza voubatwa hweZioni, taiya takadai ngevanorota. Zvino miromo yedu yakazara ngokusheka, nendimi dzedu ngokuemba ngokudakara; zvino zvakaronzwa pakati pemadzinza, “Mambo Mwari wakavaitira zviro zvikuru.” Mambo Mwari wakatiitira zviro zvikuru, nesu tinodakara ndizvo. Tibvisire uhloko hwedu, A Mambo Mwari, kudai ngendwizi dzinounza mvura mubani. Avo vanokusha mumisodzi vanozovhuna ngokudakara. Uwo unobuda echichema, akatwara mbeu dzokusima, ngegwinyiso unozouyazve echidaidzira ngokudakara, echitwara mwanda yake. Nduyo yokukwira. Nduyo yaSoromoni. Kudai Mambo Mwari asikaaki mhatso, avo vanoiaka, vanoshanda pasina. Kudai Mambo Mwari asikangwariri guta, murindi unotera kupira pasina. Azvidetseri chiro kumuka mumambakwedza, nokuzorora kwasvipa usiku, nokudya chingwa chokutambudzikira; ngokuti unopa mudikani wake kuata. Ringira, vana inhaka inobva kunaMambo Mwari, nomuchero wendani uri musharo wake. Kudai ngemisee iri munyara mwengwazi, vakadaro nevana voutsva. Unodakara munhuwo unechikomwe chake chakazara ndivo. Avazotsverudzwi ngenguva yevanozoereketa nemagaa avo pamusiwo. Nduyo yokukwira. Unomuchena munhu weshe unomutya Mambo Mwari, unohamba munjira dzake. Unozodya michero yomushando wenyara dzako; unozodakara, zvinozonaka kwouri. Mukadzi wako unozodai ngevhini rinobereka michero mukati mwemhatso yako; vana vako vanozodai ngezvisimwa zvemiorivhi, vechitendenedza tafura rako. Ringira, munhu unomutya Mambo Mwari unozofumiswa kudaro. Mambo Mwari ngaamufumise, ari muZioni. Uone kunaka kweJerusarema mazuva eshe okurarama kwako. Uone vana vevana vako. Kunyarara ngakugare padera paIsuraeri! Nduyo yokukwira. “Mikuwo mizhinji vakanditambudza kubvira muutsva hwangu,” zvino Isuraeri ngaaronze kuti, “Mikuwo mizhinji vakanditambudza kubvira muutsva hwangu, asi avasati vandinyisa. Varimi vakarima pamushana pangu; vakarebesa misara yavo. Mambo Mwari wakarurama; watematema mapote evakashata.” Ngavatsverudzwe, vapetudzwe sure veshe avo vanozonda Zioni. Ngavadai ngomwenje uri padera pemhatso, unofota usati wakura; mucheki wezviyo aazadzi ndizvo nyara yake, nounosunga mwanda aazadzi ndizvo mioko yake. Avo vanopinda apo avaronzi kuti, “Zvifumiso zvaMambo Mwari ngazvigare padera penyu; tinomufumisa ngezina raMambo Mwari.” Nduyo yokukwira. Ndinochemera kwouri, A Mambo Mwari, ndiri muudzamu. Mambo Mwari, izwa izwi rangu! Nzee dzako ngadzipurutane izwi rokupota kwangu! Kudai iwewe, Mambo Mwari, ungaerenga zvishaishi, A Mambo Mwari, ndiani ungaema? Asi kuripo kurekererwa kwouri, kuti uremeredzwe. Ndinogarira Mambo Mwari, mweya wangu unogarira, ndinogonda muizwi rake. Mweya wangu unogarira Mambo Mwari, kupinda avo vanogarira mambakwedza, kupinda avo vanogarira mambakwedza. A Isuraeri, gonda munaMambo Mwari; ngokuti nyasha dzinorudo dziri munaMambo Mwari, kwaarizve riripo simba rokuripira kukurutu. Ndiye unozoripira Isuraeri kubva mukushata kweshe. Nduyo yokukwira. Nduyo yaDhavhidha. A Mambo Mwari, mwoyo wangu audzikudzi, madziso angu aadzitunhumadzi; andiiti chidairirwa zviro zvikuru, nokuti muzviro zvendisikahaniri. Asi ndanyarara ndikanyaradza mweya wangu, kudai ngomwana warumurwa unoembedzerwa ndimai ake paditi; mweya wangu wakadai ngomwana warumurwa mukati mwangu. A Isuraeri, gonda munaMambo Mwari kubvira zvinopano mhera nariini. Nduyo yokukwira. Mambo Mwari, karakadzai Dhavhidha mumadambudziko ake eshe; njira yaakapika ndiyo kunaMambo Mwari, nokugondisa kwaakaita kunoUne-simba-waJakobe echiti, “Andizopoteri muugaro hwemhatso yangu, nokuti kukwira pamubhedhi wangu; andizotswatiri madziso angu kuti ndiate, nokuti tsiyo dzangu adzizokutsiri, metsa ndatsvakira Mambo Mwari ugaro, ndau yokugara youwoUne-simba-waJakobe.” Ringira, takazvizwira muEfratha; takazvionera mushango reJaari. “Ngatipotere mundau yougaro hwake; ngatidire pachitambariro chetsoka dzake.” Miruka, A Mambo Mwari, upotere muugaro hwako hwokuzorora, iwewe nebhokisi rechitenderano resimba rako. Vapristi vako ngavafukidzwe ngokururama, nevakacheneswa vako ngavadaidzire ngokudakara. Ngendaa yomuranda wako Dhavhidha, usafuratira hope yowakadzodzwa wako. Mambo Mwari wakapika kunaDhavhidha mhiko yegwinyiso, aachazokunukuki kubva kweiri: “Umwe wevakororo vendani yako ndinozomugadzika padendemaro rako. Kudai vakororo vako vechizongwarira chitenderano changu nemitemo yangu yendinozovadzidzisa, vakororo vavowo vanozogara padendemaro rako mhera nariini.” Ngokuti Mambo Mwari wakatsanangura Zioni; wakaridisisa kuita ugaro hwake: “Uhwu ndihwo ugaro hwangu hwokuzorora mhera nariini; ndinozogara pano ngokuti ndakapada. Ngegwinyiso ndinozofumisa ngokuwanzisa kudya kwavo; ndinozogutisa varombo varo ngechingwa. Vapristi varo ndinozovapfekesa ngoruponeso, nevakacheneswa varo vanozodaidzira ngokudakara. Naapo ndinozomeresa runyanga rwaDhavhidha; ndanasirira wakadzodzwa wangu chibani. Ndinozofukidza magaa ake ngokutsveruka, asi paari dzungudza rake rinozopenya.” Nduyo yokukwira. Nduyo yaDhavhidha. Ringira, kunaka kwazvo nokudakadza kwazvo apo vakoma vechigara pamwepo mukuiyana! Zvakadai ngemafuta anokosha ari musoro, anoerera kudzaka pamurebvu, pamurebvu waAroni, awo anoerera kudzaka pamupendero wechokusimira chake. Kudai ngebeto reHermoni, rinowira pamatunhu eZioni. Ngokuti apo Mambo Mwari wakagondisa kufumisa kwake, kurarama kwemhera nariini. Nduyo yokukwira. Uyai, kudzai Mambo Mwari, imwimwi mweshe varanda vaMambo Mwari, munoema usiku mumhatso yaMambo Mwari! Mirudzirai nyara dzenyu kuugaro hwakachena, mukudze Mambo Mwari. Mambo Mwari, musiki wedenga nenyika, ngaamufumise ari muZioni. Kudzai Mambo Mwari! Kudzai zina raMambo Mwari; mukudzei, imwimwi varanda vaMambo Mwari, imwimwi munoema mumhatso yaMambo Mwari, mumaruwanze emhatso yaMwari wedu. Kudzai Mambo Mwari, ngokuti Mambo Mwari wakanaka; embai kukudza zina rake, ngokuti zvinodakadza. Ngokuti Mambo Mwari wadzitsanangurira Jakobe kuita wake, naIsuraeri kuita pfuma yake. Ngokuti ndinozia kuti Mambo Mwari mukuru; Mambo Mwari wedu uri mukuru kunezvimwari zveshe. Zveshe zvaanodakarira Mambo Mwari, unozviita, mudenga nomunyika, nomuruandhle nomuudzamu hweshe. Ndiye unopwititisa makore kubva kumigano yenyika; unoita kuti mvura inaye nemheni; unobudisa dutu kubva muugaro hwoupfumi hwake. Ndiye wakauraya matangwe eEgipite, eshe evanhu neemhuka. Wakatuma zvioniso nemishamiso pakati pako, iwewe Egipite, padera paFaro nepadera pevaranda vake veshe. Wakauraya madzinza mazhinji, akauraya madzimambo anesimba, Sihoni mambo wevaAmori, naOgi mambo weBhashani, noumambo hweshe hweKhenani. Wakapa nyika yavo kuita nhaka, nhaka kunaIsuraeri vanhu vake. Zina rako, A Mambo Mwari, rinogara mhera nariini; rinokarakadzwa, A Mambo Mwari, kumibarirwana yeshe. Ngokuti Mambo Mwari unozopembedza vanhu vake, nokukungurira varanda vake. Miedzaniso yemadzinza ngeyesirivha neyomukore, mushando wenyara dzevanhu. Inemiromo, asi aiereketi; inemadziso, asi aioni; inenzee, asi aizwi; nayo aifemi mumiromo yayo. Avo vanoinasira neavo veshe vanoigonda vanozotodzana nayo. A mhatso yaIsuraeri, mukudzenyi Mambo Mwari! A mhatso yaAroni, mukudzenyi Mambo Mwari! A mhatso yaRevhi, mukudzenyi Mambo Mwari! Imwimwi munomutya Mambo Mwari, mukudzenyi Mambo Mwari! Ngaakudzwe Mambo Mwari muZioni, uwo unogara muJerusarema. Mukudzenyi Mambo Mwari! Bongai Mambo Mwari, ngokuti wakanaka; ngokuti nyasha dzake dzinogara mhera nariini. Bongai Mwari wezvimwari, ngokuti nyasha dzake dzinogara mhera nariini. Bongai Mambo wemadzimambo, ngokuti nyasha dzake dzinogara mhera nariini. Ndiye ega unoita mishamiso mikuru, ngokuti nyasha dzake dzinogara mhera nariini. Ndiye wakasika matenga ngokuzwisisa, ngokuti nyasha dzake dzinogara mhera nariini. Ndiye wakatambanudza nyika padera pemvura, ngokuti nyasha dzake dzinogara mhera nariini. Ndiye wakaita zvijekiso zvikuru, ngokuti nyasha dzake dzinogara mhera nariini; zuva kutonga masikati, ngokuti nyasha dzake dzinogara mhera nariini; mwedzi nenyeredzi kuti dzitonge usiku, ngokuti nyasha dzake dzinogara mhera nariini. Ndiye wakachaya veEgipite ngokuvauraira matangwe avo, ngokuti nyasha dzake dzinogara mhera nariini; nokubudisa Isuraeri kubva pakati pavo, ngokuti nyasha dzake dzinogara mhera nariini; ngenyara yakagwinya, nomuoko wakatambanudzwa, ngokuti nyasha dzake dzinogara mhera nariini. Ndiye wakaparadzanisa ngepakati Ruandhle Rwakatsvuka kuita ruiri, ngokuti nyasha dzake dzinogara mhera nariini; akaita kuti Isuraeri ahambe mukati mwarwo, ngokuti nyasha dzake dzinogara mhera nariini; asi wakasukumidzira Faro nehondo yake muRuandhle Rwakatsvuka, ngokuti nyasha dzake dzinogara mhera nariini. Ndiye wakatungamirira vanhu vake kuhamba mushango, ngokuti nyasha dzake dzinogara mhera nariini. Ndiye wakauraya madzimambo makuru, ngokuti nyasha dzake dzinogara mhera nariini; nokuuraya madzimambo anembiri, ngokuti nyasha dzake dzinogara mhera nariini; Sihoni, mambo wevaAmori, ngokuti nyasha dzake dzinogara mhera nariini; naOgi, mambo weBhashani, ngokuti nyasha dzake dzinogara mhera nariini; nokupa nyika yavo kuita nhaka, ngokuti nyasha dzake dzinogara mhera nariini; kuita nhaka kunaIsuraeri muranda wake, ngokuti nyasha dzake dzinogara mhera nariini. Ndiye wakatikarakadza muupashi hwedu, ngokuti nyasha dzake dzinogara mhera nariini; nokutinunura kubva kumagaa edu, ngokuti nyasha dzake dzinogara mhera nariini; uwo unopa kudya kunyama yeshe, ngokuti nyasha dzake dzinogara mhera nariini. Bongai Mwari womudenga, ngokuti nyasha dzake dzinogara mhera nariini. Pasinde pendwizi dzeBhabhuroni, apo takagara pashi, naapo takachema, apo petakakarakadza ngeZioni. Takaturika zvidangari zvedu mumishambangwena. Ngokuti apo avo vakatibata kuita hloko vakatiangiridza kuti tiembe nduyo, navo vakatitambudza vakatiangiridza kuti tidakare, vechiti, “Tiemberei rumwe rwenduyo dzeZioni.” Tingaita maemberenyi ruyo rwaMambo Mwari tiri munyika mukanza? Kudai ndechikuriyarwa, A Jerusarema, nyara yangu yokumudyo ngairiyarwe ungwazi hwayo! Rurumi rwangu ngarunamire dera kwemukanwa mwangu, kudai ndisikakukarakadzi, kudai ndisikadi Jerusarema kupinda kudakara kwangu kukuru. Karakadza, A Mambo Mwari, kurwa nevaEdhomu ngezuva rokuwa kweJerusarema; ngenjira yevakaronza ndiyo vechiti, “Riparadzenyi, riparadzeyi, metsa kuguma pashi kuzvitsimiso zvaro.” A, mwanasikana weBhabhuroni, iwewe waemeserwa kuurawa, unozodakara aye unozokuunzidzira iwewe kudai ngezvewakatiitira! Unozodakara aye unozotora vadoko vako kuvapwamhwatisa paruware! Nduyo yaDhavhidha. Ndinozokubonga, A Mambo Mwari, ngomwoyo wangu weshe; ndinozoemba kukukudza pamberi pezvimwari. Ndinozodira ndakaringira kutemperi rako rakachena, nokubonga zina rako ngendaa yenyasha dzako dzinorudo negwinyiso rako; ngokuti wakakurisa zina rako neizwi rako padera pezviro zveshe. Pazuva rendakakudaidza, wakandipingura; wakatutsira simba rangu mumweya mwangu. Madzimambo eshe enyika anozokukudza, A Mambo Mwari, ngokuti vakazwa mazwi omuromo wako. Vanozoemba ngenjira dzaMambo Mwari, ngokuti uthende hwaMambo Mwari ukuru. Ngokuti kunyazwi Mambo Mwari wakaturama, unokarakadza ngevari pashi; asi unomuzia unodzikudza ari kuretu. Kunyazwi ndechihamba mukati mwedambudziko, iwewe unondimusidzira; unotambanudza nyara yako kurwa noushungu hwemagaa angu, nenyara yako yokumudyo inondiponesa. Mambo Mwari unozopereresa izvo zvaanoda kwendiri; nyasha dzako dzinorudo, A Mambo Mwari, dzinogara mhera nariini. Usarekera mishando yenyara dzako. KuneMutungamiriri woKuemba. Nduyo yaDhavhidha. A Mambo Mwari, iwewe wakandiedza, ukandizia. Unozia kugara kwangu nokumiruka kwangu; iwewe unozwisisa mukarakadzo wangu uri kuretu. Unoringisisa kuhamba kwangu nokuata kwangu, unozia njira dzangu dzeshe. Kunyazwi izwi risati raapo parurumi rwangu, A Mambo Mwari, unorizia kwakaperera. Wakanditsiira mberi nesure, ukaisa nyara yako padera pangu. Kuzia kwakadai kunondishamisa kakurutu; kwakaturama mudenga, andingakuhaniri. Ndinozoenda kuri kubva kumweya wako? Nokuti ndingatizira kuri kubva mukuona kwako? Kudai ndechikwira mudenga, iwewe urimwo; kudai ndechichinga manhi angu muSheori, ringira, iwewe urimwo. Kudai ndechimbururuka ngemaphaphiro emambakwedza, ndikagara kumigano yoruandhle, kunyazwi apo nyara yako inozonditungamirira, nenyara yako yokumudyo inozondibata yaamho. Kudai ndechiti, “Ngegwinyiso chidima chinozondimbonya, nokujeka kwakanditendenedza kunozoita usiku,” kunyazwi nechidima achingadzifishi kubva kwouri; usiku hunojeka kudai ngemasikati, chidima nokujeka zvakatodzana kwouri. Ngokuti ndiwe wakaita zveshe zviri mukati mwangu; wakandifukidza ndiri mundani yamai angu. Ndinokukudza, ngokuti ndakasikwa ngenjira inotyisa neinoshamisa. Mishando yako inoshamisa; izvo mweya wangu unonasa kuzia yaamho. Chiemo changu achizi kufishika kwouri, apo pendairurwa pakasitika, ndakarurwa ngenjira inoshamisa kuudzamu wepashi penyika. Madziso ako akaona muiri wangu usati wanasa kuumbwa. Mubhuku rako akanyorwa eshe mazuva endakaemeserwa apo kusati kwaapo narimwe rawo. A, kuremanyi kwemikarakadzo yako kwendiri, A Mwari! A, kuwandanyi kwayo! Ndinoedza kuierenga, yakapinda jecha ngokuwanda; ndechimuka, ndindori newe. A kudai ungauraya vakashata, A Mwari, nokuti avo vanenyota yokuparadza ngazi vabve kwendiri, avo vanoereketa zvakashata ndiwe, nemagaa ako anoshandisa zina rako pasina shwiro. Andivazondi avo vanokuzonda here, A Mambo Mwari? Neni andinyangadzwi here ngaavo vanokumukira? Ndinovazonda ngezondo gurutu; ndinovaerenga kuti magaa angu. Nditsvakisisei, A Mwari, uzie mwoyo wangu; ndiedze, uzie mikarakadzo yangu. Wona kuti iripo here njira yakashata mukati mwangu, undikweere munjira yemhera nariini. KuneMutungamiriri woKuemba. Nduyo yaDhavhidha. Ndinunure, A Mambo Mwari, kubva kunevaiti vezvakashata; ndingwarire kubva kuvanhu vari zvigebenga, avo vanoronga zvakashata mumwoyo yavo; vanogara vechimusa kurwa hondo. Vakarodzera rurumi rwavo kudai ngenyoka; ukaira hwemabuura huri pashi pemiromo yavo. Selah. Ndingwarire, A Mambo Mwari, kubva munyara dzevakashata; ndingwarire kubva kuvanhu vari zvigebenga, varonga kuwa kwangu. Vanodzikudza vanditeya ngomurau nemapote; vatambanudza mambure pamhiri penjira, vanditeya ngomukuni. Selah. Ndati kunaMambo Mwari, “Iwewe ndiwe Mwari wangu.” Izwa izwi rokupota kwangu, A Mambo Mwari. A Mambo Mwari, mununuri wangu wakagwinya, iwewe wakafukidza soro rangu pazuva rokurwa. Usapa, A Mambo Mwari, kunevakashata zviemuriro zvavo; usakukumidza mazano avo akashata, kuti vasadzikudza. Selah. Avo vanonditendenedza vanomirudza masoro avo mudenga; kushata kwemiromo yavo ngakuvambonye! Masimbe anobaka ngaawire padera pavo! Ngavakandirwe mumarindi omuriro, muhunza dzakadzama, mwevasikazobudimwo! Musatendera munyepi kuti atsimiswe munyika; kushata ngakukasire kuwira padera pechigebenga nokuchiparadza. Ndinozia kuti Mambo Mwari unorwira ndaa yevanotambudzwa, nokutongera varombo ngokururamisa. Ngegwinyiso vakarurama vanozobonga zina rako; vakarurama vanozogara mukuona kwako. Nduyo yaDhavhidha. Mambo Mwari, ndinodaidza kweuri; kasira kuuya kwendiri; purutana izwi rangu, apo pendinodaidza kweuri. Mukumbiro wangu ngauzwike pamberi pako kudai ngomutombo wokupisha. Kumirudzwa kwenyara dzangu ngakudai ngomubairo wemadeekoni. Emesa murindi padera pemiromo yangu, A Mambo Mwari; ngwarira ruvhi rwemiromo yangu. Usaungamisira mwoyo wangu kunechiro chakashata, ndisabatana nevanhu vanoshanda zvakashata; ndisadya zvakanaka zvavo. Wakarurama ngaandiorore, wakagondeka ngaandipange. Usatenda kuti ndidzodzwe soro rangu ngemafuta ewakashata, ngokuti mukumbiro wangu unoangira kurwisana nezviito zvavo zvakashata. Naapo pevanozopirwa kuneavo vanozovatonga, zvino vanozozia kuti mazwi angu akanaka. Kudai ngebuwe rinoputswa nokupararira padera pemavhu, ndizvo magodo avo anozotatanikira pamuromo weiba. Asi madziso angu ari kwouri, A Mwari, Mambo Mwari wangu; mweuri ndinotsvaka pokuhwara; usandisiya ndisikazi kuvhikirwa. Ndingwarire kubva kumurau wevakanditeya ndiwo, nokubva kumikuni yevashandi vezvakashata. Vakashata ngavawire mumambure avo, apo inini ndega ndichapokonyoka. Nduyo yaDhavhidha ari mubako. Ndinochema kunaMambo Mwari ngeizwi rangu; ndinopota kunaMambo Mwari ngeizwi rangu. Ndinodurura pamberi pake zvichemo zvangu; ndinoronza kwaari kutambudzika kwangu. Apo mweya wangu wapera simba mukati mwangu, iwewe unoizia njira yangu. Vakanditeya ngemirau munjira yendinohamba ndiyo. Ringira kunyara yangu yokumudyo, uone, ngokuti akuna munhu unondionawo; akuna bako rokuhwara rasarira inini; apana munhu unongwarira mweya wangu. Ndinochemera kwouri, A Mambo Mwari; ndinoti, “Iwewe ndiwe bako rangu; ndiwe chikoaniswa changu munyika yevanopona.” Purutana kuchema kwangu, ngokuti ndinodzaswa pashi kakurutu. Ndinunure kubva kuvatambudzi vangu ngokuti vanondipinda ngesimba. Budisa mweya wangu kubva mutirongo, kuti ndibonge zina rako. Vakarurama vanozonditendenedza, ngokuti iwewe unozondiitira zvakapinda kunaka. Nduyo yaDhavhidha. Izwai mukumbiro wangu, A Mambo Mwari; purutana kupota kwangu mukugondeka kwako; ndipingure mukururama kwako. Usapotera mukutongwa nomuranda wako, ngokuti mukuona kwako apana naumwe unopona ungapembedzwa. Ngokuti gaa randirumbirira, raparadza ndaramo yangu pashi pamavhu, randiita kuti ndigare muugaro hwakasvipa kudai ndivo vakafa karetu. Ndizvo mweya wangu unodzerera mukati mwangu; mwoyo wangu mukati mwangu unekutyiswa kakurutu. Ndinokarakadza mazuva ekaretu, ndinorangarira ngemishando yako yeshe, ndinopinimidza ngomushando wenyara dzako. Ndinotambanudzira nyara dzangu kwouri; mweya wangu unoomerwa ngokuda iwewe kudai ngemavhu akaoma. Selah. Kasira kundipingura, A Mambo Mwari; Mweya wangu unodzerera. Usafisha hope yako kubva kwendiri, kuti ndisadai ngaavo vanonzvaira muhunza. Ita kuti ndizwe nyasha dzako dzinorudo mumangwanani, ngokuti ndinogonda mwouri. Ndidzidzise kuti ndizie njira yendingahamba ndiyo, ngokuti ndinomirudzira mweya wangu kwouri. Ndinunure, A Mambo Mwari, kubva kumagaa angu; ndinotizira kwouri kuti ndidzifishe. Ndidzidzise kuita kuda kwako, ngokuti iwewe ndiwe Mwari wangu. Mweya wako wakanaka unditungamirire munjira yakarurama. Ngendaa yezina rako, A Mambo Mwari, ponesa ndaramo yangu. Mukururama kwako budisa mweya wangu kubva mukutambudzika. Munyasha dzako dzinorudo uraya magaa angu, paradza veshe vanotambudza mweya wangu, ngokuti ndiri muranda wako. Nduyo yaDhavhidha. Ngaabongwe Mambo Mwari, buwe rangu, uwo unodzidzisa nyara dzangu kurwa, nezvinwe zvangu kurwa. Uri nyasha dzangu dzinorudo, bako rangu, rusvingo rwangu rwakaturama, rutiziro rwangu nomununuri wangu, chihlangu changu mwaari ndinohwara, uwo unopfaisa vanhu pashi pangu. Mambo Mwari, munhu uri chiinyi kuti upinimidze ndiye, nokuti mukororo womunhu kuti ukarakadze ndiye? Munhu wakadai ngefemero; mazuva ake akadai ngebvute rinopinda. Kotamisa matenga ako, A Mambo Mwari, udzake pashi; gwama matunhu, kuti apwititike chiushi. Ita kuti mheni ipenye, nokuvatatanisa; posha misee yako, uvakarudze vatize. Tambanudza nyara yako kubva mudenga; ndiponese, undinunure kubva mumvura zhinji inesimba, nokubva munyara dzevapara, avo vanemiromo inoereketa manyepo, nenyara yavo yokumudyo ngeyemanyepo. Ndinozoemba kwouri nduyo itsva, A Mwari; ndinozoemba ngechimatende chine gumi retambo. Ndiwe unopa kunyisa kumadzimambo, unorwira Dhavhidha muranda wake. Ndirwire, undinunure kubva munyara dzevapara, avo vanemiromo inoereketa manyepo, nenyara yavo yokumudyo ngeyemanyepo. Vakororo vedu vanozodai ngezvisimwa zvinokura muutsva hwazvo, nevanasikana vedu vakadai ngesika dzepakhona, dzakatsetswa kuakisa ngome. Matura edu ngaazare, ngembeu dzeshe dzinongwarirwa; nemakwai edu ngaabereke makumi emazana, ngegumi remakumi emazana mumbusho dzedu, nen'ombe dzedu ngadziremerwe ngokubara vana vazhinji; kusina kuphunza nokuti kubuda kunyika mukanza, kusina mhere yemadambudziko mumapato edu. Vanomuchena vanhu vakadaro avo vanowirwa ngezvifumiso zvakadaro; vanomuchena vanhu avo Mwari wavo ndiMambo Mwari. Nduyo yokukudza yaDhavhidha. Ndinozokutunhumadza, Mwari wangu naMambo wangu; ndinozokudza zina rako mhera nariini. Ndinozokukudza mazuva eshe; ndinozokudza zina rako mhera nariini. Mambo Mwari mukuru, unosisira kuti akudzwe kakurutu; ukuru hwake ahungatsvakwi. Mubarirwana umwe unozotunhumadza mishando yako kunomubarirwana umweni, nokuteketesa mishando yako inesimba. Ndinozorangarira ngokuremeredzwa kwako kunoumambo hunouthende, nemishando yako inoshamisa. Vanhu vanozoereketa ngesimba ngemishando yako inotyisa, neni ndinozoteketesa ukuru hwako. Vanozoereketa ngembiri yokuwanda kwokunaka kwako kukuru, vanozoemba kudaidzira ngokururama kwako. Mambo Mwari unenyasha, wakazara ngokukungurira; unononoka kunyangadzwa unenyasha huru dzinorudo. Mambo Mwari wakanaka kwevari veshe; nyasha dzake dzinogara padera pavo veshe vaakasika. Mishando yako yeshe inozobonga kweuri, A Mambo Mwari, nevakacheneswa vako vanozokukudza. Vanozoereketa ngouthende hwoumambo hwako, nokuereketa ngesimba rako, kuziisa kuvanhu veshe mishando yako inesimba, nouthende hwoukuru hwoumambo hwako. Umambo hwako umambo hwemhera nariini, nokutonga kwako kuchagara kumibarirwana yeshe. Mambo Mwari unogondeka mumazwi ake eshe, nenyasha mumishando yake yeshe. Mambo Mwari unotsimisa veshe vanowa, unomirudza avo veshe vanokotamira pashi. Madziso eveshe anoringira kweuri, newe unovapa kudya kwavo ngenguva kwayo. Unobeura nyara yako, unogutisa chidisiso chechiro cheshe chinorarama. Mambo Mwari wakarurama munjira dzake dzeshe, unenyasha mumishando yake yeshe. Mambo Mwari uri pasinde pavo veshe vanodaidza kwaari, kwevari veshe vanodaidza kwaari mugwinyiso. Unogutisa chidisiso cheweshe unomutya; unozwazve kuchema kwavo nokuvaponesa. Mambo Mwari unongwarira veshe avo vanomuda, asi unozoparadza veshe vakashata. Muromo wangu unozoereketa kukudzwa kwaMambo Mwari, nenyama yeshe inozokudza zina rake rakachena mhera nariini. Kudzai Mambo Mwari! kudza Mambo Mwari, A mweya wangu! Ndinozokudza Mambo Mwari apo ndichararama; ndinozoemba kukudza Mwari wangu ndichapona. Musagonda vatongi, ngokuti vanofa, mwaari amuna rudetso. Naapo mweya wavo peunobuda, unohwirira mumavhu; pazuva ririro, urongwa hwavo hunopera. Unomuchena uwo kudetswa kwake ndiMwari waJakobe, uwo gonda rake riri munaMambo Mwari, Mwari wake, uwo wakasika denga nenyika, ruandhle, nazvo zveshe zvirimwo; unongwarira gonda mhera nariini. Unotongera ngokururamisa vanotambudzwa, uwo unopa kudya kunevane nzara. Mambo Mwari unosunhura mabhanditi. Mambo Mwari unobeura madziso emapofu; Mambo Mwari unomirudza avo vakakotamiswa pashi; Mambo Mwari unoda vakarurama. Mambo Mwari unongwarira vapara; unotsimisa nherera neshirikadzi, asi njira yavakashata unoiparadza. Mambo Mwari unozotonga mhera nariini, Mwari wako, A Zioni, wemibarirwana yeshe. Kudzai Mambo Mwari! Kudzai Mambo Mwari! Kunakanyi kwazvo kuemba kukudza Mwari wedu; ngokuti unenyasha, nenduyo yokukudza inosisira. Mambo Mwari unoaka Jerusarema; unounganidza vakadzingwa vaIsuraeri. Unorapa vakapwanyika mumwoyo, unosunga maronda avo. Unoerenga uwandu hwenyeredzi; unodzidudza dzeshe mazina adzo. Mwari wedu mukuru, unesimba rakawandisa; kuzwisisa kwake akuna magumo. Mambo Mwari unomirudza vakatsikirirwa pashi; unokandira vakashata pashi pamavhu. Embai kunaMambo Mwari mwechibonga; ridzai kukudza Mwari wedu ngedimbwi. Uwo unofukidza matenga ngemakore, unonasirira nyika mvura yokunaya, unomerisa mwenje padera pemitunhu. Unopa mhuka kudya kwadzo, nokunemabwipwi emakungu apo paanorira. Aadakari ngesimba rehachi, nokuti kudakara ngokurumba kwomurumbi; asi Mambo Mwari unodakara ndivo vanomutya, muneavo vanogonda munyasha dzake dzinorudo. Kudza Mambo Mwari, A Jerusarema! Kudza Mwari wako, A Zioni! Ngokuti unogwinyisa migogo yemisiwo yako; unofumisa vana vako vari mukati mwako. Unoisa kunyarara mumigano yako; unokugutisa ngekoroni yakapindisisa kunaka. Unotuma mupango wake munyika; izwi rake rinorumba ngokukasira. Unonaisa chando chakadai ngemamviri egwai; unoparadzira chando chakachena kudai ngemarota. Unokandira makohoto echando akadai ngemishuva; ndiani ungakona kuema pamberi pokutonhora kwake? Unotumira izwi rake kuzvinyungurusa; unoita kuti dutu rake rivhuvhute, nemvura inoerera. Unodaidzira izwi rake kunaJakobe, zviemeso zvake nemipango kunaIsuraeri. Aazi kumboita zvakadaro kunedzinza rimweni; avazii zvitongero zvake. Kudzai Mambo Mwari! Kudzai Mambo Mwari! Kudzai Mambo Mwari muri mudenga; mukudzenyi mudenga denga. Mukudzei, imwimwi mweshe ngirosi dzake; mukudzei, imwimwi hondo yake yeshe. Mukudzei, iwewe zuva nomwedzi; mukudzei, imwimwi nyeredzi dzeshe dzinojeka. Mukudzei, imwimwi matenga ematenga, newewo mvura iri padera pematenga. Ngazvikudze zina raMambo Mwari, ngokuti wakapanga, nazvo zvikasikwa. Wakazvitsimisa mhera nariini; wakaemesa mupango usikazopinduki. Kudzai Mambo Mwari kubva munyika, imwimwi madragoni noudzamu hweshe, muriro nematsanza, chando nemhute, mubvumo unoita zvaakapanga. Mitunhu nezvimitunhu zveshe, miti inobereka michero, nemisedhare yeshe, mhuka nezvifuyo zveshe, zviro zvinotamanda, neshiri dzinombururuka. Madzimambo enyika, nembeu dzeshe dzevanhu, vakuru nevatongi veshe vomunyika, veshe majaha nemhandara, harahwa nevadoko pamwepo. Ngavakudze zina raMambo Mwari, ngokuti zina rake rega ndiro rakatunhumadzwa; uthende hwake huri padera penyika nedenga. Wamirudzira runyanga vanhu vake, kukudzwa kwevakacheneswa vake veshe, ngendaa yevaIsuraeri, avo vari pasinde pake. Kudzai Mambo Mwari! Kudzai Mambo Mwari! Embai kunaMambo Mwari nduyo itsva, kukudzwa kwake mumushongano wevakagondeka. Isuraeri ngaadakare ngowakamusika; vana veZioni ngavadakare munaMambo wavo. Ngavakudze zina rake ngokuzvina; ngavaembe kumukudza ngengoma yesimbi nechimadangari. Ngokuti Mambo Mwari unodakara ngevanhu vake; unonemesa vakapfaa ngoruponeso. Vakagondeka ngavadakare kakurutu muuthende; ngavaembe ngokudakara vari pamibhedhi yavo. Kukudzwa kukuru kwaMwari ngakua mumiromo yavo, neshoti dzineupanga huiri munyara dzavo, kuunzidzira madzinza, nokuorora padera pembeu dzevanhu, kusunga madzimambo avo ngemaketani, nevakuru avo ngemanguri esimbi, kuunzidzira padera pavo kutonga kwakanyorwa. Uku kuremeredzwa kwevakagondeka vake veshe. Kudzai Mambo Mwari! Kudzai Mambo Mwari! Kudzai Mwari muugaro hwake hwakachena; mukudzei ari mumukana mwesimba rake. Mukudzei ngemishando yake inesimba; mukudzei kudai ngoukuru hwake husikabviri. Mukudzei ngokurira kwehwama; mukudzei ngokurira kwemunanzi nechimadangari. Mukudzei ngengoma yesimbi nokuzvina; mukudzei ngechimadangari nomunanzi. Mukudzei ngengoma dzesimbi dzinorira; mukudzei ngengoma dzesimbi dzinorira kakurutu. Zveshe zvinofema ngazvikudze Mambo Mwari. Kudzai Mambo Mwari! Mazwi akangwara aSoromoni mukororo waDhavhidha, mambo waIsuraeri: Kudzidzisa ungwaru nokudzidziswa, kuzwisisa mazwi oungwaru, Kuuyirwa ngokudzidziswa kuita muungwaru, kururama, kutonga kwakanaka nekwakarurama; kudzidzisa ungwaru kuneavo vasina ruziyo noungwaru kuvatsva. Munhu wakangwara ngaazwewo, auyirwe mukudzidza, newakangwara atsvake ungwaru, kuzwisisa mazwi akangwara nemadimikira, mazwi evakangwara nezvisana zvavo. Kumutya Mambo Mwari ndikwo kuamba kwokuzia; mapenzi anoshoora kungwara nokudzidziswa. Izwa, mwana wangu, kudzidzisa kwababa ako, usaramba kudzidzisa kwamai ako; ngokuti zviri chinemeso chakanaka chesoro rako, neketani mumutsipa wako. Mwana wangu, kuti vashaishi vechikuonga, usatenda. Kuti vechiti, “Hamba nesu, ngatigare tiparadze ngazi, ngatihwarire avo vasina ndaa; ngativatangurire vechizwa, kudai ngeiba, vari mimhu kudai ngaavo vanodzaka muhunza. Tinozotsvaka zveshe zviro zvinomutengo mukuru, tinozozadza mhatso dzedu ngezvakachakatwa. Itai mabhigidha enyu pakati pedu; tinozoita chikhwama chimwecho teshe.” Mwana wangu, usahamba navo munjira yavo; dusa tsoka yako munjira yavo; ngokuti tsoka dzavo dzinorumbirira kunezvakashata, navo vanokasira kuparadza ngazi. Ngokuti akudetseri chiro kuteya murau mukuona kweshiri, asi vanohwarira kudziuraya pachavo! Vanohwarira kupona kwavo! Ndizvo zvakaita njira yomunhu weshe unokarira kuuyirwa; kunodusa kupona kwevane vakwo. Ungwaru hunodaidzira mupato; hunodaidzira neizwi guru mumaruwanze. Hunodaidzira mundau huru yomusika, pamisiwo yedhorobha hunoereketa. “Munozoda zvoupenzi mukuwo wakadini, imwimwi musina ungwaru? Nevanoshoora vanozodakara mukuwo wakadini mukushoora kwavo nemapenzi enonyenya kuzia? Purutanai kudzidzisa kwangu. Ringirai, ndinozodurura kwomuri mweya wangu, ndinozoita kuti mazwi angu aziikanwe kwomuri. Ngokuti ndadaidzira, nemwi mwaramba; ndatambanudza muoko wangu, apana munhu wabatika ndicho; nangendaa yokuti mwaramba kupanga kwangu kweshe, nemwi amuna kuashira kurambidza kwangu, neniwo ndinozosheka madambudziko enyu, ndinozoita jee apo kutya kwamubata; naapo kutya kwamubata kudai ngomubvumo, nokutambudzika kwenyu kwauya kudai ngechipupuri; apo kutambudzika nokurwadziwa kwauya padera penyu. Zvino vanozodaidzira kwendiri, asi andizopinguri; vanozonditsvakisisa, asi avazondioni. Ngokuti vakazonda ruziyo, vasikazi kutsanangura kutya Mambo Mwari, avazi kutendera kupanga kwangu, vakashoora kurambidza kwangu, ndizvo vanozodya michero yenjira yavo, nokuzadzwa ngokuronga mazano avo. Ngokuti kupauka kwaavo vasina ungwaru kunozovauraya, nokugarisika kwemapenzi kunozovapedza. Asi kunyazwi ndiani uwo unopurutana kwendiri unozogarisika, naye unozogara asikatyi zvakashata.” Mwana wangu, dai wechiashira mazwi angu, wechingwarira mipango yangu mweuri, wechiita kuti nzee yako ipurutane kuungwaru, wechiemesa mwoyo wako pakuzwisisa; kudai ngegwinyiso wechichemera kuzia, nokudaidzira kuzwisisa; kuti wechikutsvaka kudai ngesirivha, wechikutsvakisisa kudai ngokutsvaka upfumi hwakafishika, zvino unozozwisisa kutyisa kwaMambo Mwari, nokuona ruziyo rwaMwari. Ngokuti Mambo Mwari ndiye unopa ungwaru; kubva pamuromo wake panobuda ruziyo nokuzwisisa. Unounganidzira vakarurama ungwaru kwahwo; ndiye chihlangu kwevari vanohamba ngokururama. Unongwarira njira dzokutonga kwakarurama nokungwarira njira yevakacheneswa vake. Zvino uchazwisisa kururama, nokutonga kwakarurama nokunaka, njira dzeshe dzakanaka; ngokuti ungwaru huchapinda mumwoyo mwako, noruziyo runodakadza mweya wako; kungwara kuchakurinda nokuzwisisa kuchakungwarira. Kunozokuponesa kubva munjira yokushata, kubva kumunhu unoereketa zvinopaukisa, uwo unosiya njira dzokururama, kuhamba munjira dzechidima; unodakara mukuita zvakashata, echidakara mukupaukisa kwevakashata, avo vanenjira dzakashongoroka, dzinopaukisa. Unozoponeswa kubva kumukadzi unoomba, kubva kumhombo inochengedza ngemazwi ayo akaserera; unoramba mwamuna woutsva hwake, nokuriyarwa chitenderano chakaitwa pamberi paMwari wake. Ngokuti mhatso yake inokweera murufu, nenjira dzake kunevakafa. Akuna unoenda kwaari unopetuka, nokuti kuuyirwazve ngenjira dzokupona. Ndizvo iwewe hamba munjira dzavanhu vakanaka, nokungwarira njira dzevakarurama. Ngokuti vakarurama vanozogara munyika, nevakaperera vanozogara mukati mwayo; asi vakashata vanozourawa kubva munyika, nevanopaukisa vanozobvitwa kubva kweiri. Mwana wangu, usariyarwa kudzidzisa kwangu, asi mwoyo wako ngaungwarire mipango yangu; ngokuti inotutsira kuwanda kwamazuva, nendaramo yakareba, nokugarisika. Usatenda kuti rudo negwinyiso zvikusiye; zvisungire pamutsipa wako, zvinyore parusamba rwemwoyo wako. Ndizvo unozoona kudiwa nokuzwisisa kwakwo mukuona kwaMwari nevanhu. Gonda munaMambo Mwari ngomwoyo wako weshe, usikatseyami muungwaru hwako. Munjira dzako dzeshe mutende, naye unozoruramisa njira dzako. Usaita wakangwara mukuona kwako, itya Mambo Mwari, usiye zvakashata. Zvinozoita mutombo kumuiri wako, zvinozoita kumusirirwa kwomuiri wako. Remeredza Mambo Mwari ngoupfumi hwako, mitanguro yemichero yako yeshe; zvino matura ako anozozariswa ngezvakawanda, nezvokukamurira vhini zvako zvinozopopoma ngevhini idzva. Mwana wangu, usashoora kuorora kwaMambo Mwari nokuti kupera simba ngendaa yokukaraidza kwake, ngokuti uwo waanoda Mambo Mwari, unomukaraidza kudai ndibaba kunomwana waanodakara ndiye. Unomuchena uwo munhu unoona ungwaru, nomunhu unoona kuzwisisa, ngokuti muthuso wake unopinda sirivha, nokuuyirwa kwake kwakapinda mukore wakaeriswa. Unomutengo mukuru kupinda mapuwe erubhi, nezviro zveshe zvoungada azvingaedzaniswi naye. Kupona kwemazuva akawanda kuri munyara yake yokumudyo; munyara yake yokumuoshwe mune upfumi nokuremeredzwa. Njira dzake injira dzokudakadzwa, nenjira dzake dzeshe ngedzokunyarara. Ndiwo muti wokupona kuneavo vanobatirira kwouri; vanozwi vanomuchena veshe vanoramba vakabatirana kwouri. Ngoungwaru Mambo Mwari wakasika nyika; ngokuzwisisa wakaemesa matenga. Ngokuzia kwake wakabeura zvinyuka zvoruandhle zvinoerera, nemakore anodonhesa beto. Mwana wangu, usatendera kuti izvi zvibve mukuona kwako. Ngwarira ungwaru nokuzia. Ndizvo zvinozoita kupona kumweya wako, nounaku kumutsipa wako. Zvino unozohamba munjira yako ngokungwaririka, netsoka dzako adzizopumhunwi. Apo wooata pashi, auzotyi apo pounoata pashi, hope dzako dzinozonaka. Usatya kukarudzwa kunouya ngokukasira, nokuti ngokuchakatwa kwevakashata apo kwauya; ngokuti Mambo Mwari unozoita gonda rako, unozongwarira tsoka dzako kuti dzisabatwa. Usanyima zvakanaka kuneavo vanozvisisira, apo simba rokuzviita riri munyara yako. Usati kunomuakirwana wako, “Enda, uuyezve, mangwani ndinozokupa,” apo utori nacho. Usaronga zvakashata kunomuakirwana wako, uwo unogarisana newe ngokugondeka. Usaita hasha nomunhu pasina ndaa, apo pasina chakashata chaitwa kweuri. Usaane ndurumwa nomunhu dzongoni, usatsanangura naimwe yenjira dzake; ngokuti uwo unopaukisa uri chinyangadzo kunaMambo Mwari, asi wakarurama uri mukugonda kwake. Chituko chaMambo Mwari chiri mumhatso yevakashata, asi unofumisa ugaro hwevakarurama. Unoshoora avo vanoshoora, asi unoitira nyasha vakapfaa. Vakangwara vanozogara nhaka yokukudzwa, asi mapenzi asikazwi kutsverudzwa. Purutanai, imwimwi vana, kupanga kwababa, nasai kuzwisisa, kuti muzie ungwaru; ngokuti ndinomupa kupanga kwakanaka; musaramba kudzidzisa kwangu. Naapo ndaiya murumbwana mudoko wababa angu, chiya nowaidikanwa ndimai angu, wakandidzidzisa, akati kwendiri, “Mwoyo wako ngaubatisise mazwi angu; ngwarira mipango yangu, newe upone. Tsvaka kungwara, tsvaka kuzwisisa; usariyarwa nokuti kukunukuka kubva kumazwi omuromo wangu. Usakusiya, nakwo kunozokungwarira; kude, nakwo kunozokurinda. Kuamba kwoungwaru ndikwo uku: Tora ungwaru, kunyazwi ngechirizve chounozotora, tora kuzwisisa. Hukudze, nahwo hunozokukudza; hunozokuremeredza kuti ukahumbundira. Hunozoisa chinemeso chounaku musoro rako; hunozoisa padera pako dzungudza rakanaka.” Izwa, iwewe mwana wangu, newe uashire mazwi angu, kuti makore okupona kwako awande. Ndakudzidzisa njira youngwaru, ndakutungamirira munjira dzakarurama. Naapo wechihamba, tsoka yako aizopiyiwi; kudai wechirumba, auzopumhunwi. Batisisa kupangwa; usakurekera; kungwarire, ngokuti ndikwo kupona kwako. Usapinda munjira yevakashata, usahamba munjira yevaiti vezvakashata. Irekere, usahamba ndiyo; ibva kweiri, upinde mberi. Ngokuti avaati vasati vaita chakashata, nehope dzavo dzinoti ngarwi kuti vasati vaita kuti umwe awe. Ngokuti vanodya chingwa chokushata, vechimwa vhini rokupamba. Asi njira yavakarurama yakadai ngokujeka kwemambakwedza; kunoramba kwechitutsira kujeka metsa zuva rakaperera. Njira yevakashata yakadai ngechidima chakadzama; avazii kuti vanopumhunenyi. Mwana wangu, purutana mazwi angu; ukotamise nzee dzako kumazwi angu. Usatenda kuti abve mukuona kwako; uangwarire mukati mwemwoyo wako. Ngokuti ari kupona kuneavo vanoaona, nokuponeswa kunyama yavo yeshe. Ngwarira yaamho mwoyo wako, ngokuti kwouri kunobuda zvinyuka zvokupona. Dusa kubva kwouri kuereketa kusikazi kururama, nokuereketa kwakashata kuduse kwouri. Madziso ako ngaaringire mberi, nokuringira kwako kururame pamberi pako. Ruramisa njira yetsoka dzako, nenjira dzako dzeshe dzinozoita dzegwinyiso. Usakunukukira kumudyo nokuti kumuoshwe; dusa tsoka dzako kubva mukushata. Mwana wangu, purutana kuungwaru hwangu, kotamisa nzee dzako kunokuzwisisa kwangu, kuti ubatirire kungwara, nemiromo yako ingwarire kuzia. Ngokuti miromo yomukadzi uri mhombo inobomha uchi, nokuereketa kwake kwakaserera kupinda mafuta; asi magumo ake anovava kudai ngomukhondo, echipinza kudai ngeshoti inoupanga huiri. Tsoka dzake dzinodzaka mukufa; nezvitsiko zvake zvinoenda muSheori. Aangwariri njira yakarurama yokupona; njira dzake dzinopauka, naye asikadzizii. Zvino, mwana wangu, purutana kwendiri, usasiya mazwi omuromo wangu. Ngwarira njira yako kuretu kubva kwaari, usaenda pasinde pomusiwo wemhatso yake; nokuti ungazopa kuremeredzwa kwako kunevamweni, nemakore ako kunevasina nyasha, nevapara vanozotora chikoaniswa choupfumi hwako; nemishando yako inozoenda mumhatso yomupara, nepamagumo okupona kwako unozogwimba, apo nyama yako nomuiri wako zvapedzwa; newe wechiti, “Kuzondanyi kwendakaita kupangwa, nomwoyo wangu wakashoora kupangwa. Andizi kupurutana izwi ravadzidzisi vangu, nokuti kukotamisa nzee dzangu kuvapangi vangu. Zvino ndaguma pandau pokuparadzwa kweshe pakati pechiunga chakaungana.” Imwa mvura yechinyuka chako, mvura inoerera kubva muchinyuka chako. Zvinyuka zvako zvinosisira kupararira kweshe here, ndwizi dzemvura mumapato? Ngazviite zvako iwewe wega, haiwa kukowana nevapara. Chinyuka chako ngachifumiswe, wechidakara ngomukadzi woutsva hwako, hadzi yenondo yakanaka, hadzi inenyasha. Mazamu ake ngaakugutise mikuwo yeshe, ugare wechidhakwa ngorudo rwake. Ngenyi wechidhakwa, mukororo wangu, ngomukadzi umweni nokumbundira diti romukadzi uri mhombo? Ngokuti njira dzomunhu dziri pashi pemadziso aMambo Mwari, nenjira dzake dzeshe dzinoringisiswa ndiye. Zvishaishi zvewakashata zvinozomubata, naye unozobatwa ngezvisungo zvokushaisha kwake. Unozofa ngokukorera kudzibata; ngendaa youpenzi hwake hwakakura unozorashika. Mwana wangu, kuti wagondisa muakirwana wako, kuti wadzisungira kunoumweni, wateiwa ngokuereketa kwemiromo yako, wabatwa ngemazwi omuromo wako. Ndizvo ita ichi, mwana wangu, udziponese pachako ngokuti wawira munyara yomuakirwana wako; enda, udzipfaise, nokupota muakirwana wako. Usaata hope netsiyo dzako dzisakutsira; dziponese kudai ngenondo inotiza kubva munyara yomuvhimi, kudai ngeshiri inotiza kubva munyara yomutei. Enda kudzunzi, iwewe unenungo; wechikarakadza njira dzaro, ungware. Iro risina mambo, mutungamiriri, nokuti mutongi, rinonasirira kudya kwaro muzienza, rechiunganidza kudya kwaro ngenguva yokukukura. Unozoata apo mukuwo wakadini, iwewe zinyanungo? Unozomuka riini muhope dzako? Kuata padoko, nokukutsira kudoko, nokupeta kudoko mioko mukuzorora, nourombo hunozouya kudai ngembavha, nokutama kwako kudai ngomunhu unezvokurwa. Munhu usina shwiro unoshaisha, unohamba nomuromo unopaukisa. Unochonya ngemadziso ake, unoereketa ngetsoka dzake, echikhomba ngezvinwe zvake; nomwoyo wakashata, unoronga kushata; unoangira kusima hasha. Pane uwo wakadaro kushata kunozouya ngokukasira; ngokukasira unozogurwa pasina chinodetsera. Panezviro zvitanhatu zvinozondwa ndiMambo Mwari, zvinomwe zviri chinyangadzo kwaari: madziso ounodzikudza, rurumi runonyepa, nyara dzinoparadza ngazi isina ndaa, mwoyo unoronga mazano akashata, tsoka dzinokasa kurumba mukushaisha, chapupu chokunyepa chinoereketa manyepo, nouwozve unokusha hasha pakati pemhuri. Mwana wangu, ngwarira mipango yababa ako, usasiya kudzidzisa kwamai ako. Zvisungire pamwoyo wako mukuwo weshe, zvisungire pamutsipa wako. Apo woohamba, zvinozokutungamirira; apo wooata, zvinozokungwarira; naapo woomuka, zvinozoereketa newe. Ngokuti mupango chibani, nokudzidziswa kujeka; kurambidzwa kwokupangwa injira yokupona, kukungwarira kubva kunomukadzi wakashata, kubva kururumi rwakaserera rwemhombo. Usaemura unaku hwake mumwoyo mwako; usatenda kuti iye akuemudze ngokuringira kwemadziso ake; ngokuti mubhadharo womukadzi unoomba, mutengo wechingwa, asi mukadzi woumweni unotsvaka kupona kwemwamuna kwemene. Munhu ungakona kufungatira muriro paditi, usikapishi zvokufuka zvake here? Nokuti umwe ungahamba padera pemasimbe anopisha, tsoka dzake dzisikatsvi here? Ndizvo zvinoita uwo unoenda kumukadzi womuakirwana wake; nouwo unomugwama aazoiti usina ndaa. Vanhu avashoori mbavha, kuti yechiba kuti idye apo yoofa ngenzara. Asi kuti ikabatwa, inozohwirinzira kanomwe; inozopa pfuma yeshe yemhatso yayo. Asi iye unoomba nomukadzi aana kuzia; iye unoita kudaro unodziparadza pachake. Unozoane zvironda nokushoorwa; nokutsveruka kwake akuzoduswi. Ngokuti ndurumwa inomusa ushungu hwemwamuna; ndizvo aazokunguriri ngezuva rokuunzidza. Aazotendi kuashira muripo, nokuti kufumhwa muromo, kunyazwi ngezvipo zvakawanda. Mwana wangu, ngwarira mazwi angu, ufishe mipango yangu mweuri Ngwarira mipango yangu, upone; ungwarire kudzidzisa kwangu kudai ngemboni yedziso rako; zvisungire pazvikunwe zvako, zvinyore parusamba rwomwoyo wako. Ronza kuungwaru kuti, “Iwewe uri hanzvadzi yangu,” nokudaidza kuzwisisa kuti, “Iwewe uri mungani wangu wepamwoyo;” kuti zvikungwarire kubva kunomukadzi uri mhombo nemazwi ake akaserera. Ngokuti ngepafasitera remhatso yangu ndakaringira kubanze ngepadimba rangu, neni ndakaona pakati pevasina kungwara, ndikaringisisa pakati pevatsva, jaha risina kuzwisisa, rechipinda ngenjira pasinde pekhona pake, echitora njira inoenda kumhatso yomukadziwo kwasvipa, madeekoni, mukuwo wousiku nechidima. Zvino mukadzi unouya kwaari akadzinemesa kudai ngemhombo, anomwoyo unochengedzera. Unodaidzira, echiita kudai ngezvaanoda; tsoka dzake adzigari mumhatso yake; zvino uri mumapato, nguva imweni uri pamusika, unogarira mumakhona eshe. Ndizvo unomumbundira nokumuchingamidza ngomuromo, anehope isikatsveruki, unoti kwaari, “Ndinosisira kupira midiro, nyamashi ndaripa mhiko dzangu. Ndizvo zvino ndabuda kooshongana newe, kukutsvakisisa, nazvino ndakuona! Ndanemesa mubhedhi wangu ngezvokufukidza ndizvo, zvakarukwa ngorukangaza rweEgipite zvinemaara. Ndafafaza mubhedhi wangu ngemitombo inonuhwira yemura, makha, khinamoni. Uya, ngatigutiswe ngorudo metsa kuedze; ngatidakare pachedu murudo. Ngokuti mwamuna wangu akuna kanyi, wahamba rwendo kuenda kuretu. Watora chikwama chemare kuenda nacho, unozouya kanyi mukutawa kwomwedzi.” Ngemazwi ake mazhinji akanaka, unomunyengerera kuti atende; ngokuserera kwokuereketa kwake unomuangiridza. Ngokukasira unoteera sure kwake, kudai ngekabi inoenda koourawa, nokudai ngebenzi rinoenda koororwa mumanguri metsa musee ubaye mumatumbu ake, kudai ngeshiri inokasira kuenda kumurau, isikazii kuti zvinoronza kupona kwayo. Nazvino, vana vangu, ndizwei imwimwi, mupurutane mazwi omuromo wangu. Usatendera mwoyo wako kunjira dzake; musarashikiswa ngenjira dzake. Ngokuti vazhinji ndivo avo vaaradzikidza pashi, nevazhinji vakaurawa ndiye. Mhatso yake injira inodzaka kuenda Sheori, mumakamera orufu. Ungwaru ahudaidziri here nokuzwisisa akudaidziri here? Pakakwirira, pasinde penjira, pamhararano unoemapo; pasinde pemisiwo pamberi pedhorobha, pokupinda ndipo pamusiwo unodaidzira: “Ndinodaidzira kwomuri, imwimwi vanhu, ndinodaidzira kwevari veshe vanopona. A, imwimwi vasina kungwara, dzidzai ungwaru; neimwimwi mapenzi, dzidzai kuzwisisa. Izwai, ngokuti ndinozoereketa ngezviro zvakanaka, nokubva kumiromo yangu kunozobuda zviro zvakarurama; ngokuti muromo wangu unozoereketa gwinyiso; kushata kuri chiro chinonyangadza kumiromo yangu. Mazwi eshe omuromo wangu akarurama; apana chakashongoroka nokuti chakagoba kwaari. Eshe akarurama kwaari unozwisisa, nokururama kwevari avo vanotsvaka kuzia. Ashirai kudzidzisa kwangu, pane kuashira sirivha, nokuzia kupinda mukore wakaereswa; ngokuti ungwaru hwakanaka kupinda zvinemeso zvinomutengo mukuru; zveshe zvinodisiswa azvingaedzaniswi nahwo. Inini, ungwaru, ndinogara nokuzwisisa, ndine ungwaru nokuzwisisa. Kumutya Mambo Mwari kuri kuzonda zvakashata. Kudzikudza, kudada, njira yakashata, nomuromo unopaukisa, ndinozvizonda. Ndine kupanga kwakanaka noungwaru hwakanaka; ndinokuzwisisa, ndinesimba. Kubudikidza ndini madzimambo anotonga, nevatongi vanoemesa kutonga kwakanaka; kubudikidza ndini vatongi vanotonga, nevakuru veshe vanotonga padera penyika. Ndinovada avo vanondida; naavo vanonditsvaka ngomwoyo weshe vanondiona. Upfumi nokuremeredzwa zvineni, upfumi husikaperi nokubudirira. Michero yangu yakanaka kupinda mukore, kunyazwi kupinda mukore wakaera; muthuso wangu wakapinda sirivha yakanaka. Ndinohamba munjira yokururama, pakati penjira dzokutonga kwakanaka, ndechipa vanondida nhaka nokuwanza upfumi hwavo. Mambo Mwari wakandisika mukuamba kwenjira yake, kutangira mishando yake yekaretu. Ndakaemeswa kubvira mhera nariini nariini, kubvira pakutanga, nyika isati yaapo. Apo kusati kwaapo ndau dzakadzama, ndakabarwa, apo kusati kwaapo zvinyuka zvinopopoma mvura. Mitunhu isati yasikwa, zvimitunhu zvisati zvaapo, inini ndakabarwa, apo asati asika ivhu, nokuti nyika, nokuti bukuta rokutanga renyika. Naapo paakaemesa matenga, ndaiyapo, apo paakatara dendenedzwa pahope yoruandhle, apo paakagwinyisa makore mudenga, apo paakaemesa zvinyuka zvoruadhle, apo paakaemesera ruandhle magumo arwo, kuti mvura isadarika kupanga kwake, apo paakaemesa madzeyo enyika, zvino ndaiya pasinde pake, kudai ngengwazi yomushando; neni ndaiya kudakara kwake mazuva eshe, ndechidakara pamberi pake nguva dzeshe, kudakara munyika yake inogarwa ngevanhu, nokudakara mudzinza revanhu. Ndizvo zvino, vana vangu, purutanai kwendiri; vanomuchena avo vanongwarira njira dzangu. Izwai kudzidziswa, muite vakangwara, musikakurambi. Unomuchena uwo munhu unondipurutana, echirinda pamisiwo yangu mazuva eshe, echigarira pasinde pemisiwo yangu. Ngokuti uwo unondiona unoona kupona, naye unozoona kudikanwa kubva kunaMambo Mwari. Asi uwo unonditama unodzikuadza pachake; veshe avo vanondizonda vanoda rufu.” Ungwaru hwaaka mhatso yahwo, hwatsetsa sika dzahwo nomwe. Hwauraya mhuka dzahwo; hwakumanidza vhini rahwo; hwanasirira tafura rahwo. Hwatuma varandasikana vahwo, hunodaidzira pandau dzakapindisisa kukwira dzedhorobha. “Uwo usina chaanozia, ngaapaukiremuno!” Kwaari uwo usina kuzwisisa hunoti, “Uya, udye chingwa changu, umwe vhini rendakakumanidza. Siya upenzi, upone; uhambe munjira yokuzwisisa.” Kunyazwi ndiani unokaraidza mudadi, unoona kutsverudzwa; nouwo unorambidza munhu wakashata unokuwadzwa. Usarambidza mudadi unozokuzonda; wakangwara, apo arambidzwa, unozokuda. Dzidzisa munhu wakangwara, naye unozopinda kungwara; dzidzisa wakarurama, naye unozouyirwa ngokudzidza. Kutya Mambo Mwari ndikwo kuamba kwoungwaru, nokuzia kwoWakachena kuzwisisa. Ngokuti kubudikidza ndini mazuva ako anozowanzwa, nemakore okupona kwako anozotutsirwa. Kuti wakangwara, unodzingwarira iwewe pachako; kuti wechidada, unozokutwara wega. Dzimai benzi rinobwaza; ibenzi, arizii chiro. Rinogara pamusiwo wemhatso yaro, pachigaro chepandau yakakwirira yomudhorobha, kudaidzira kuneavo vanopinda ndipo, vahambi vari munjira dzavo, “Kunyazwi ndiani usina ungwaru, ngaapindemuno!” Nokwaari usina kuzwisisa, unoti, “Mvura yabiwa inotapira, nechingwa chinodyiwa mukufishika chinonaka.” Asi aazii kuti vakafa variyo, nevaeni vake vari muudzamu hweSheori. Mwana wakangwara unodakadza baba ake, asi mwana benzi idambudzo kunamai ake. Upfumi hwokushata ahudetseri chiro, asi kururama kunozonunura kubva murufu. Mambo Mwari aatenderi vakarurama kuti vafukame, asi unopaukisa kudisisa kwevakashata. Nyara inenungo inounza urombo, asi nyara youwo unogwinyisira inounza upfumi. Mwana unounganidza muzienza wakangwara, asi mwana unoata ngomukuwo wokukukura unotsverudza. Zvifumiso zviri padera pesoro rewakarurama, asi muromo wewakashata unofisha ugebengwa. Kukarakadzwa kwewakarurama chifumiso, asi zina rewakashata rinozoora. Wakangwara mumwoyo unozopurutana mipango, asi benzi rinobwaza rinozouya mukuparadzwa. Kunyazwi ndiani unohamba mukururama, unohamba mukungwaririka; asi kunyazwi ndiani unoteera njira dzinopaukisa unozooneka. Kunyazwi ndiani unochonya ngedziso rake unozounza madambudziko, asi benzi rinobwaza rinozouya mukuparadzwa. Muromo wowakarurama chinyuka chokupona, asi muromo wowakashata unofisha ugebenga. Kuzonda kunomusa hasha, asi rudo runofukidza zvishaishi zveshe. Pamiromo youwo unokuzwisisa panooneka ungwaru, asi ndonga ngeyokuchaya mushana wouwo usikazwisisi. Vanhu vakangwara vanounganidza ruziyo, asi kubwaza kwebenzi kunounza pasinde kuparadzwa. Upfumi hwegurudza ndiro dhorobha raro rakagwinya; kuparadzwa kwevarombo ndihwo urombo hwavo. Musharo wevakarurama unotungamirira mukupona, asi kuuyirwa kwevakashata kunotungamirira mukushaisha. Kunyazwi ndiani unongwarira kudzidziswa uri munjira yokupona, asi iye unoramba kurambidzwa unopauka. Miromo inonyepa inofisha kuzonda, kunyazwi ndiani unoreya vamweni ibenzi. Naapo mazwi awanda kushaisha akutamiki, asi iye unobata muromo wake wakangwara. Rurumi rwowakarurama rwakadai ngesirivha yakapinda kunaka; mupinimidzo wewakashata auna shwiro. Miromo yevakarurama inogutisa vazhinji, asi mapenzi anofa ngendaa yokutama kuzwisisa. Kufumisa kwaMambo Mwari ndikwo kunounza upfumi, naye aatutsiri kusvipo mwoyo ndikwo. Kuita zvakashata kwakadai ngokutamba kunebenzi, asi kuita ngoungwaru kudakadzwa kunomunhu unozwisisa. Icho chaanotya wakashata chinozouya padera pake, asi chidisiso chowakarurama chinozopuwa kwaari. Naapo chipupuri chapinda, vakashata avachazoapo; asi vakarurama vakagwinyiswa mhera nariini. Kudai ngevhini rinozhazha mumazino, nokudai ngechiushi mumadziso, ndizvowo zvinoita unenungo kuneavo vanomutuma. Kutya Mambo Mwari kunorebesa ndaramo; asi makore evakashata anozofupiswa. Kugonda kwavakarurama kunogumira mukudakara; asi magondero ewakashata anozopera. Njira yaMambo Mwari ibako kunevakarurama asi kuparadzwa kunevaiti vezvakashata. Vakarurama avazotsukunuswi; asi vakashata avazogari munyika. Muromo wewakarurama unobudisa ungwaru, asi rurumi runopaukisa runozogurwa. Miromo yewakarurama inozia izvo zvinoashirika, asi miromo yewakashata inozia izvo zvinopaukisa. Chipimo chokunyepera chinyangadzo kunaMambo Mwari, asi chipimo chakanaka chiri kudakara kwake. Apo kudzikudza kwouya, zvino kutsveruka kunouya; asi ungwaru huri kunevakapfaa. Kugondeka kwavakarurama kunovatungamira, asi kusikarurama kwevapauki kunovaparadza. Upfumi ahudetseri ngezuva roushungu, asi kururama kunonunura kubva murufu. Kururama kwewakaperera kunongwarira njira yake yakarurama, asi wakashata unowiswa ngokushaisha kwake. Kururama kwevakaperera kunovanunura, asi vapaukisi vanobatwa muusungwa ngokuronga kwavo. Naapo munhu wakashata paanofa, kugonda kwake kunopera, nemagondero evasikadiri Mwari anoita asina shwiro. Wakarurama unonunurwa kubva mukutambudzika, newakashata unotowiramwo. Usikadiri Mwari unoparadza muakirwana wake ngomuromo wake, asi ngokuzia vakarurama vanonunurwa. Naapo vakarurama vechibudirira, dhorobha rinodakara; naapo vakashata vechipera, kunopururidzwa. Dhorobha rinokudzwa ngezvifumiso zvevakarurama, asi rinoparadzwa ngemiromo yevakashata. Kunyazwi ndiani unoshoora muakirwana wake aazi kungwara, asi munhu wakangwara unonyarara. Mureyi unohamba echibudisa zvakafishika, asi uwo unogondeka mumweya unonyarara nazvo. Apo pasina kupangwa vanhu vanowa, asi muchiunga chevapangi muno kungwaririka. Uwo unoita chibatiso kumupara unozodziunzira dambudziko, asi kuripo kungwaririka kunouwo unoramba kuita kudaro. Mukadzi unomwoyo wakanaka unoremeredzwa; asi mwamuna unoushungu unouyirwa ngoupfumi hwega. Munhu unenyasha unoitira zvakanaka kumweya wake, asi uwo wakashata unodzitambudza pachake. Munhu wakashata apana chaanouyirwa ndicho, asi uwo unokusha kururama unoona musharo kwawo. Kunyazwi ndiani wakagwinya mukururama unozopona, asi kunyazwi ndiani unorumbirira kushata unozofa. Mipinimidzo yakashongoroka chinyangadzo kunaMambo Mwari, asi avo vakarurama munjira dzavo vari kudakara kwake. Gondiswai, wakashata aazorekeri kuororwa; asi avo vakarurama vanozopokonyoka. Kudai ngechinemeso chomukore pamiro penguruve, ngezvakaita mukadzi wakanaka usina ungwaru. Kudisisa kwewakarurama kunoperera mukunaka kwega; kudisisa kwevakashata kunoperera muushungu. Vamweni vanopa ngokuda, asi vechiangira kuita vapfumi; vamweni vanobatirira zvevanosisira kupa, navo vanoangira kutama. Munhu unopa unozoitwa gurudza, nouwo unopa mvura unozoona mvura. Vanhu vanotuka uwo unonyima zviyo, asi chifumiso chiri padera pesoro rouwo unozvitengesa. Kunyazwi ndiani unogwinyisira kutsvaka zvakanaka, unotsvaka nyasha; asi kushata kunouya kwaari unokutsvaka. Uwo unogonda muupfumi hwake unozowa, asi vakarurama vanozobudirira kudai ngemashakani akasvipira. Uwo unotambudza mhatso yake unozogara nhaka yedutu, nebenzi rinozoita muranda kunevakangwara. Michero yewakarurama muti wokupona; nouwo unotenderudza mweya wakangwara. Kuti vakarurama vechipuwa musharo munyika, kunozopinda kwakaitawani kukura kunevakashata nevashaishi! Kunyazwi ndiani unoda kupangwa unoda kuzia, asi uwo unozonda kupangwa ibenzi. Munhu wakanaka unoona nyasha kubva kunaMambo Mwari, asi uwo unoronga zvakashata Mambo Mwari unomurasha. Apana unoona kungwaririka ngokushata, asi runzinde rwewakarurama aruzokutukuswi. Mukadzi wakanaka idzungudza kumwamuna wake; asi uwo unounza kutsverudzwa wakadai ngezvakaora mumagodo ake. Mipinimidzo yewakarurama yakanaka; kupanga kwevakashata ngekwokuchengedzera. Mazwi ewakashata ngeokuhwarira kuparadza ngazi, asi kuereketa kwewakarurama kunomununura. Vakashata vanoparadzwa, navo avachaapopi; asi mhatso yewakarurama inozoema. Munhu unokuriswa ngendaa youngwaru hwake hwakanaka, asi mupinimidzo unopauka unoshoorwa. Kwakapinda kunaka kushoorwa nokua nemuranda, kune uwo unodziita usikabviri asina chokudya. Munhu wakarurama unozia zvinodiwa mukupona kwechifuyo chake, asi nyasha dzewakashata kushata. Uwo unorima munda wake unozogutiswa ngokudya kwakawanda, asi uwo unoteera vanhu vasina shwiro aana kuzwisisa. Vakashata vanoemura kupamba kwevanhu vakashata, asi runzinde rwevakarurama runobara michero. Vakashata vanobatwa ngokubvotomoka kwemiromo yavo, asi vakarurama vanopokonyoka kubva mudambudziko. Kubva kumichero yomuromo munhu unogutiswa ngezviro zvakanaka, nomushando wenyara unemusharo wawo. Benzi rinopinimidza kuti njira yaro yakanaka mukuona kwaro, asi wakangwara unopurutana kupangwa. Benzi rinokasira kuonisa ushungu hwaro, asi munhu wakangwara aadairi kutukwa. Kunyazwi ndiani unoereketa gwinyiso, unoonisa kururama kwezvakaitika; asi chapupu chokunyepa chinoereketa kuchengedzera. Mazwi okukasira kuereketa akadai ngokubaya kweshoti, asi rurumi rwowakangwara runounza kuporeswa. Miromo yegwinyiso inogara mhera nariini, asi rurumi runonyepa runogara mukuwo mufupi. Kuchengedzera kuri mumwoyo yaavo vanoronga zvakashata, asi avo vanopanga zvokunyarara vanekudakara. Apana kuremadzwa kunoitika kunevakarurama; asi vakashata vachazadzwa ngokutambudzika. Miromo inonyepa chinyangadzo kunaMambo Mwari, asi avo vanoita ngokugondeka vari kudakara kwake. Munhu uwo wakangwara unofisha ruziyo, asi mwoyo yemapenzi inopopota zvoupenzi. Nyara youwo unogwinyisira inozotonga, apo unenungo unozoitwa hloko. Kunyunyuta mumwoyo womunhu kunopedza simba, asi izwi rakanaka rinoita kuti udakare. Wakarurama unopanga vangani vake zvakanaka, asi njira yevakashata inopaukisa. Unenungo aakochi chaakabata ngokuvhima, asi unogwinyisira unoona upfumi unomutengo mukuru. Munjira yokururama muno kupona; mukuhamba munjira yakwo amuna rufu. Mwana wakangwara unoda kupanga kwababa ake, asi muangarari aapurutani kurambidzwa. Kubva kumichero yemazwi avo vanhu vakanaka vanodya zviro zvakanaka, asi chidisiso chounopaukisa ngechokuita zvakashata. Uwo unobata muromo wake unongwarira kupona kwake; uwo unobeura yaamho muromo wake unopinda mukuparadzwa. Kudisisa kwoune nungo kunokurisa, naye aaoni chiro; asi kudisisa kwounogwinyisira kushanda kunogutisa yaamho. Munhu wakarurama unonyenya manyepo, asi munhu wakashata unoshooreka, unotsverudzwa. Kururama kunongwarira uwo wakarurama munjira, asi kushata kunowisa mushaishi. Umwe unodziita mupfumi, asi asina chiro; umweni unodziita murombo, asi unoupfumi hwakawanda. Muripo wokupona kwomunhu upfumi hwake, asi murombo aazwi kurambidzwa. Kujeka kwewakarurama kunojeka zvinodakadza, asi chibani chewakashata chinodzimwa. Kudzikudza kunobara hasha kwega, asi ungwaru hune uwo unopurutana kupangwa. Upfumi hunooneka ngokukasira hunokasira kupera, asi iye unounganidza padoko-padoko uchahuwanza. Gonda rinononoka kuitika rinorwarisa mwoyo, asi chidisiso chaitika muti wokupona. Uwo unoshoora izwi unodziunzira kuparadzwa padera pake, asi uwo unotya mupango unozothuswa. Kudzidzisa kwewakangwara chinyuka chokupona, kuti munhu apokonyoke pamurau worufu. Kuzwisisa kwakanaka kunounza kudikanwa, asi njira yevasikagondeki kuparadzwa. Wakangwara unoita zviro zveshe ngokuzia; asi benzi rinobudisa pamhene upenzi hwaro. Nhumwa yakashata inounza dambudziko, asi nhumwa inogondeka inounza kupona. Urombo nokutsverudzwa ndiwo muthuso wouwo unoramba kudzidziswa, asi uwo unongwarira kupangwa unoremeredzwa. Chidisiso chaitika chinotapira mumweya, asi kukunukuka kubva kuchishaishi chinyangadzo kunemapenzi. Kunyazwi ndiani unohamba nevanhu vakangwara unongwara, asi unozwanana nemapenzi unoremadzwa. Kushata kunorumbirira vashaishi, asi kubudirira kunopuwa kunevakarurama. Munhu wakanaka unosiira nhaka kunevana vevana vake, asi upfumi hwomushaishi unozongwaririrwa vakarurama. Munda womurombo ungakukurwa zvokudya zvakawanda, asi zvinoparadzwa kubudikidza ngokutamika kwokururama. Uwo usikashandisi ndonga unozonda mwana wake, asi iye unomuda unomuorora kazhinji. Vakarurama vanazvo zvakakwana zvokugutisa mweya yavo; asi ndani yewakashata ayina chiro. Mukadzi wakangwara unoaka mhatso yake, asi benzi rinoipwanyira pashi ngenyara dzaro. Uwo unohamba mukururama unotya Mambo Mwari; asi uwo unopauka munjira dzake unomushoora. Kuereketa kwebenzi indonga inochaya mushana waro; asi miromo yevakangwara inovangwarira. Apo pasina kabi, apana zviyo; zviyo zvakawanda zvinounzwa ngesimba rekabi. Chapupu chinogondeka achinyepi; asi chapupu chinonyepa chinofemurika manyepo. Muangarari unotsvaka ungwaru, asingahuoni; asi kuzia kwakarerukira kwaari uwo unozwisisa. Ibva pamberi pebenzi ngokuti apo auonipo mazwi okuzia. Ungwaru hwewakangwara kuzwisisa kwaanoenda, asi upenzi hwemapenzi kupausa. Mapenzi anoitira jee mudiro wokushaisha; asi vakarurama vanodakadzwa ngenyasha dzaMwari. Mwoyo unozia kurwadziwa kwawo, akuna mupara ungakoanisirana kudakara kwawo. Mhatso yewakashata yaparadzwa, asi tende rewakarurama rinoema zvakanaka. Iripo njira inooneka yakarurama kumunhu, asi magumo ayo injira yorufu. Kunyazwi mukusheka mwoyo unotambudzika, nemagumo okudakara kudzimbirwa. Mupauki unozoashira musharo unosisira njira dzake, nomunhu wakanaka unosisirana nokuita kwake. Benzi rinogonda zviro zveshe, asi munhu wakangwara unonasa kuringira kuhamba kwake. Munhu wakangwara unotya, nokutenderuka kubva kunezvakashata, asi benzi rinorasha kudzibata arina ndaa yezviro. Uwo unoshatirwa ngokukasira unoita zvoupenzi, nomunhu uneurimbwi unozondwa. Mapenzi anogara nhaka youpenzi, asi vakangwara vanedzungudza rokuzia. Vakashata vanogwadama pamberi pevakarurama, vakashata vanogwadama pamisiwo yevakarurama. Varombo avadiwi ngevaakirwana vavo, asi makurudza anevangani vakawanda. Uwo unoshoora muakirwana wake mushaishi, asi unomuchena uwo unenyasha kuvarombo. Avashaishi here avo vanoronga zvakashata? Avo vanoronga zvakanaka vanoona nyasha nokugondeka. Mumishando yeshe yesimba munokuuyirwa, asi kuereketa kwega kunounza urombo. Dzungudza revakangwara upfumi hwavo; asi upenzi ndiro dzungudza remapenzi. Chapupu chegwinyiso chinoponesa ndaramo, asi chapupu chinoereketa manyepo muparadzi. Mukutya Mambo Mwari muno kugonda kwakagwinya, nevana vake vanozoona pokutizira. Kutya Mambo Mwari chinyuka chokupona, kuitira kuti munhu akone kukunukuka kubva kumirau yorufu. Uthende hwamambo huri mukuwanda kwevanhu; pasina vanhu uzvare hwaparara. Kunyazwi ndiani unononoka kunyangadzwa unokuzwisisa kukurutu, asi uwo unokasira kushishwa unowanza upenzi. Mwoyo wakaterama unopa kupona kwenyama, asi ndurumwa inoita kuora kwemagodo. Uwo unotambudza murombo unotuka Musiki wake, asi uwo unoitira nyasha varombo unomuremeredza. Munhu wakashata unoparadzwa kubudikidza ngokuita kwake kwakashata, asi wakarurama unegonda mukufa kwake. Ungwaru hunogara mumwoyo mwounokuzwisisa, asi icho chiri mukati mwemapenzi achiziikanwi. Kururama kunokudza dzinza, asi kushaisha kunotsverudza dzinza kumyazwi ngeriri. Muranda unoita ngokungwara unoona nyasha dzaMambo, asi ushungu hwake huri padera pouwo unoita zvinotsverudza. Mupinguro wakapfaa unodzinga ushungu, asi izwi rokugogodora rinomusa ushungu. Rurumi rwewakangwara runobudisa ruziyo, asi miromo yemapenzi inodurura upenzi. Madziso aMambo Mwari ari kundau dzeshe, anoramba echiringira vakashata nevakanaka. Rurumi rwakapfaa muti wokupona; asi kupaukisa kurimwo kunogura mweya. Benzi rinoshoora kudzidzisa kwevabereki, asi uwo unongwarira kupangwa wakangwara. Mumhatso yewakarurama muno upfumi hwakawanda, asi dambudziko rinowira mumisharo yewakashata. Miromo yewakangwara inoteketesa kuzia; haiwa mumwoyo webenzi. Mudiro wewakashata chinyangadzo kunaMambo Mwari, asi mukumbiro wewakarurama kudakara kwake. Njira yewakashata chinyangadzo kunaMambo Mwari, asi unoda uwo unoteera kururama. Kuripo kuororwa kukurutu kwaari uwo unosiya njira, asi uwo unozonda kurambidzwa unozofa. Sheori naAbhadhoni zvakabeuka pamberi paMambo Mwari, kwakapinda kwakadini kubeuka kwemwoyo yevanhu! Muangarari aadi kurambidzwa; aazoendi kunevakangwara. Mwoyo unodakara unoita hope inodakara, asi ngokutambudzika kwomwoyo mweya unogurwa. Mwoyo wouwo unokuzwisisa unotsvaka kuzia, asi muromo yemapenzi inodya zvoupenzi. Mazuva eshe omurombo akashata, asi mwoyo unodakara unedhiri risikaperi. Zvishomani pamwepo nokutya Mambo Mwari zvakapinda kunaka kunoupfumi hwakawanda hunemadambudziko. Kwakapinda kunaka kudya muriwo panerudo, kuno kudya kabi yakakodzwa pano kuzondana. Munhu unoushungu unomusa hasha, asi uwo unononoka kushishwa unonyaradza hasha. Njira younenungo yakazara minzwa, asi njira yewakarurama yakaserera iri pamhene. Mwana wakangwara unodakadza baba ake, asi benzi rinoshoora mai aro. Upenzi kudakara kwaari uwo usina ungwaru, asi munhu unokuzwisisa unohamba mukururama. Pasina kupangana, urongwa hunokorera, asi pane vapangi vazhinji hunobudirira. Munhu unodakara ngokupingura kwakanaka, kunakanyi kweizwi rinoereketwa ngomukuwo kwawo! Kunewakangwara njira yokupona inokwira, kuitira kuti apokonyoke kubva pashi muSheori. Mambo Mwari unoputsira pashi mhatso younodzikudza, asi unotsimisa migano yeshirikadzi. Urongwa hwakashata chinyangadzo kunaMambo Mwari, asi mazwi enyasha akaperera. Uwo unokara ngokuda kuuyirwa kusina shwiro unounza dambudziko kumhatso yake, asi uwo unozonda zvitengero unozorarama. Mwoyo wewakarurama unopinimidza ngenjira yakanaka yokupingura, asi muromo wewakashata unorukura zvakashata. Mambo Mwari uri kuretu kubva kunewakashata, asi unozwa mikumbiro yevakarurama. Kujeka kwamadziso kunodakadza mwoyo, nemashoko akanaka anokodza magodo. Nzee inopurutana kupangwa kwokupona inogara pakati pavakangwara. Uwo unoramba kudzidziswa unoshoora mweya wake, asi uwo unopurutana kupangwa unouyirwa ngokuzwisisa. Kutya Mambo Mwari kudzidziswa muungwaru, nokupfaa kunotanga pamberi pokuremeredzwa. Urongwa hwomwoyo ngohwomunhu, asi kupingura kworurumi kunobva kunaMambo Mwari. Njira dzeshe dzomunhu dzakasukika mukuona kwake, asi Mambo Mwari unopima mweya. Pira mushando wako kunaMambo Mwari, nourongwa hwako hunozogwinyiswa. Mambo Mwari wakanasira chiro cheshe kuti chiite zvechakaemeserwa, kunyazwi vashaishi kuzuva rokutambudzika. Weshe unodzikudza chinyangadzo kunaMambo Mwari; ngegwinyiso aazokoreri kuororwa. Ngorudo nokugondeka kushata kunoripirwa, nokumutya Mambo Mwari munhu unotiza kushata. Naapo njira dzomunhu dzechidakadza Mambo Mwari, unoita kuti kunyazwi nemagaa ake ayiyane naye. Zvishomani pamwepo nokururama zvakapinda kunaka kuno upfumi hwakawanda husina kururama. Mwoyo womunhu unoronga njira yake, asi Mambo Mwari unotungamira zvitsiko zvake. Kugura ndaa kwakafemerwa kuri mumiromo yamambo; muromo wake aushaishi mukutonga. Zviedzaniso nezvipimo zvakagondeka ngezvaMambo Mwari; zvipimo zveshe zviri mumukhwama mushando wake. Chinyangadzo kumadzimambo kuti vaite zvakashata, ngokuti dendemaro rinogwinyiswa ngokururama. Miromo yakarurama kudakara kwamambo, naye unoda uwo unoereketa zvakarurama. Ushungu hwamambo inhumwa yorufu; kunyazwi ndiani wakangwara unozouporesa. Mukujeka kwehope yamambo muno kupona, nenyasha dzake dzakadai ngegore rinounza mvura yokugumisira. Kwakapinda kwakadini kunaka kuona ungwaru kuno mukore! Nokutsanangura kuzwisisa kunopinda sirivha. Pato revakarurama ndikwo kubva kunezvakashata; uwo unongwarira njira yake unoponesa mweya wake. Kudzikudza kunonyusa kuparadzwa, nomweya wokunengama unonyusa kuwa. Kwakapinda kunaka kuita unemweya wakapfaa pakati pevarombo, pane kukoanisana zvakachakatwa navanodzikudza. Uyo unopurutana ndaa ngokungwara unozobudirira zvakanaka, naye unogonda munaMambo Mwari unodakara. Wakangwara mumwoyo unozodaidzwa kuti unozwisisa, nokuereketa zvakanaka kunotutsira kuzia. Ungwaru chinyuka chokupona kwaari unahwo, asi upenzi kuororwa kwemapenzi. Mwoyo wewakangwara unodzidzisa muromo wake kuereketa kwakanaka, nokututsira kuzia kumiromo yake. Mazwi akanaka akadai ngemisoro youchi, anotapira kumweya, anogwinyisa magodo. Iripo njira inooneka yakanaka kunomunhu, asi magumo ayo injira yorufu. Kuda kudya kwemunhu unoshanda kunomuita kuti ashande ngesimba; nzara yake inomuonga kudaro. Munhu wakashata unoronga zvakashata, nokuereketa kwake kwakadai ngomuriro unopisha. Munhu unopauka unokusha hasha, nomunhu unoreya unoparadzanisa shamwari kwadzo. Munhu unogebenga unonyengerera muakirwana wake, nokumutungamirira munjira isikazi kunaka. Uwo unochonya madziso ake unoronga zviro zvinopaukisa; uwo unopwerudza miromo yake unoita kuti kushata kuitike. Soro rachena mvi idzungudza routhende, kuuyirwa munjira yokupona mukururama. Uwo unononoka kutseneka urinane kupinda ngwazi; nouwo unotonga mweya wake unopinda uwo unonyisa dhorobha. Mabhagidha anoitwa kuda kuzia; asi kuitika kwazvo zveshe ngokwaMambo Mwari ega. Zvakapinda kunaka kudya nzvuyu yaoma panokunyarara, kune mhatso yakazara ngokudya kwakanaka, pane hasha. Hloko yakangwara inozotonga padera pemwana uwo unotsverudza, nayo inozokoanisirwawo nhaka kudai ngoumwe wevemhuri. Hari yokuerisa ngeyesirivha, nechoto ngechomukore, asi Mambo Mwari unoedza mwoyo. Uwo unoita zvakashata unopurutana kumiromo yakashata; nomunyepi unopurutana kunorurumi rwakashata. Uwo unoitira jee murombo unotuka Musiki wake; naye unodakara papfumvu aazokoreri kuororwa. Vana vevana idzungudza revasharuka, nouthende hwevana vabereki vavo. Kuereketa kwakanaka akusisiri benzi; kunopinda kwakaitawani kushata miromo inonyepa pamutongi. Chitengero chakadai ngebuwe rinomutengo mukuru mukuona kwouwo unochipira; kunyazwi ngepari paanoenda, unozobudirira. Uwo unokungurira kushaisha unotsvaka rudo, asi uwo unomusa ndaa unoparadzanisa shamwari kwadzo. Kurambidza kunodetsera munhu wakangwara kupinda zana remizvimbiri pabenzi. Munhu wakashata unotsvaka kumukira kwega; asi nhumwa yakashata inozotumwa koorwisana naye. Kwakapinda kunaka kushongana nebheya rabirwa vana varo pane kushongana nebenzi muupenzi hwaro. Uwo unounzidzira chakanaka ngechakashata, kushata akuzobvi pamhatso pake. Kuamba kwehasha kwakadai ngomunhu unobeurira mvura; ndizvo rekerai hasha kusati kwashata. Uwo unopembedza vakashata nounoitira ndaa vakarurama, ava veshe vari chinyangadzo kunaMambo Mwari. Ngenyi benzi rinomutengo munyara wokutenga ungwaru, apo asina ungwaru hwokudzidza? Mungani unorudo mukuwo weshe, nehama inoberekwa kuti idetsere mukutambudzika. Munhu usina kuzwisisa unodzisunga nyara, echigondisa kuita chibatiso kumuakirwana wake. Uwo unoda kupaukisa unoda hasha; uwo unomirudza mudenga musiwo wake unotsvaka kuparadzwa. Uwo unomukarakadzo wakashongoroka aabudiriri, naye unorurumi runopumhunisa unowira mukushata. Uwo unobereka benzi unoona kutambudzika; vabereki vebenzi avana kudakara. Mwoyo unodakara mutombo wakanaka, asi mweya wakaguka unoomesa magodo. Munhu wakashata unoashira chitengero chakafishika kupaukisa njira dzokutonga kwakanaka. Munhu unozwisisa unoringira kuungwaru; asi madziso ebenzi anoringira kumagumo enyika. Mukororo benzi unotambudza baba ake, nokutsinza mai ake vakamubereka. Kuripisa munhu wakarurama azvizi kunaka, nokuti kuchaya vanhu vakuru ngendaa yokururama. Uwo unotsonza mazwi ake wakazara ngokuzia; uwo wakanyarara mumweya unokuzwisisa. Kunyazwi benzi apo rakanyarara rinoerengwa kuti rakangwara; naapo rakonya miromo yaro, rinoerengwa kuti munhu wokuzwisisa. Uwo unodzipaura unotsvaka kuda kwake, echionisa kukanyangidza kuneavo veshe vanokutonga kwakanaka. Benzi aridakariri mukuzwisisa, asi kwega kudziereketera zverinopinimidza. Naapo panouya kushata, kushoora kunouyawo; nokusikaremeredzwa kunouya kutsverudzwa. Mazwi omuromo womunhu imvura yakadzama, nechinyuka choungwaru mukova unoerera. Azvizi kunaka kuita mukheto kumunhu wakashata, nokuti kurasha wakarurama mukutonga. Miromo yebenzi inounza hasha, nomuromo waro unodaidza kuchaiwa. Muromo webenzi ndikwo kuparadzwa kwaro, nemiromo yaro murau waro pacharo. Mazwi omunhu unoita gunyengu akadai ngemishuva inonaka, inopinda mukati kumarupande eshe omuiri. Uwo unenungo mukushanda ihama yepasinde yomuparadzi. Zina raMambo Mwari ithawa rakagwinya; vakarurama vanotiziremwo, navo vanopona. Upfumi hwegurudza idhorobha raro rakagwinya, kudai ngorusvingo rwakareba mukupinimidza kwaro. Kusati kwaguma pakuparadzwa, mwoyo womunhu unodzikudza, asi kudzipfaisa kunotangira kuremeredzwa. Kudai uwo unopingura ndaa asati aizwa, zvinoita upenzi nokutsverudzwa kwaari. Mweya womunhu unozomugwinyisa mukurwara kwake, asi mweya wakaguka ndiani ungaukona? Mupinimidzo wakangwara unoona kuzia, nenzee yowakangwara inotsvaka kuzia. Chipo chomunhu chinomubeurira musiwo, nokumuunza pamberi pevanhu vakuru. Uwo unotanga kupira ndaa yake unooneka akarurama, metsa muakirwana wake auya nokumutsvakisisa. Kuita mabhigidha kunopedza hasha, anoparadzanisa pakati pevanesimba vanophikisana. Mukoma wakapumhuniswa unokonza kuiyaniswa kupinda dhorobha; nehasha dzakadaro dzakadai ngemipiningidzo yepangome. Ndani yomunhu inogutiswa ngemichero yomuromo wake; unogutiswa ngezvinowanzwa ngemiromo yake. Rufu nokupona zviri musimba rorurumi, navo vanoruda vanozodya michero yarwo. Uwo waona mukadzi waona chiro chakanaka, nokuona nyasha kubva kunaMambo Mwari. Murombo unokumbira echipota, asi gurudza rinopingura ngehasha. Shamwari dzimweni dzinoedzerera kuita shamwari, asi iripo shamwari inouya pasinde kupinda hama. Wakapinda kunaka murombo unohamba mukururama kwake kuno uwo unopauka mukuereketa kwake, naye ibenzi. Kudisisa kusina kuzia akuzi kunaka, naye unokasira kuhamba unorasha njira. Upenzi hwake munhu hunomutungamirira mukuparadzwa, asi mwoyo unonyangadzirwa Mambo Mwari. Upfumi hunounza shamwari dzakawanda, asi murombo unosara asina shamwari. Chapupu chokunyepa achizoendi chisikaororwi, nomunyepi aazopokonyoki. Vazhinji vanotsvaka kuitirwa nyasha ngevanopa zvipo; nomunhu weshe ishamwari kwaari mupi wezvipo. Kuti varombo vechizondwa kunyazwi ngehama dzavo, kunopinda kuita kuretu kwakaitawani kuneshamwari dzake kumusiya! Unovateera ngemazwi ake, asi vanoenda. Uwo unoona ungwaru unodzida pachake; uwo unongwarira kuzwisisa unobudirira. Chapupu chokunyepa achizoendi chisikaororwi, nomunyepi unozoparadzwa. Azvizi kunaka kuti benzi rigare zvakanaka; kunopinda kushata kwakadini kuti hloko itonge padera pemadzimambo. Uwo unokuzwisisa unononoka kunyangadzwa, nokuremeredzwa kwake kunoita kuti asapinimidza ngokushaisha. Kunyangadzwa kwamambo kunotyisa kwakadai ngokubhonga kwemhondoro, asi nyasha dzake dzakadai ngebeto riri pamwenje. Mukororo benzi uri pfumvu isikabviri kunababa ake, nokupopota kwomukadzi kwakadai ngemadonhwe asikaperi. Mhatso noupfumi inhaka inobva kuvabereki, asi mukadzi wakangwara unobva kunaMambo Mwari. Unungo hunopara hope zhinji; nomunhu unenungo unozotambudzika ngenzara. Uwo unongwarira mipango unongwarira kupona kwake; asi iye unorekeredza njira dzake unozofa. Kunyazwi ndiani unoitira varombo nyasha, unokweretesa kunaMambo Mwari, naye unozomuhwirinzira ngokuwandisa. Orora mwana wako pachine gonda, nomweya wako usamukungurira ngendaa yokuparadzwa kwake. Munhu unoushungu hukuru unozoripiswa; kuti ukamununura unozozviitazve. Izwa kupangwa, uashire kudzidziswa, kuti uite wakangwara pakugumisira kwako. Arimwo mazano akawanda mumwoyo womunhu, asi kuda kwaMambo Mwari ndikwo kunozotsimiswa. Chinodisiswa mumunhu kugondeka, nomurombo urinane kupinda munyepi. Kutya Mambo Mwari kunotungamirira muruponeso yaamho; wakazadzwa ndikwo unogara akagutiswa, naye aagumirwi ngokutambudzika. Munhu unenungo unotsira nyara yake muchidziyo, naye aazoiunzizve kumuromo wake. Chaya muangarari, nevasina kuzia vanozoona ungwaru; rambidza uwo unokuzwisisa, naye unozouyirwa ngokuzia. Uwo unoita ushungu kunababa ake, nokudzinga mai ake, mukororo unotsverudza nokuunza kushoorwa. Rekera kupauka, mwana wangu, kubva kumazwi oungwaru, kuitira kuti uzwe kudzidziswa. Chapupu chisina shwiro chinoshoora kutonga kwakanaka, nomuromo wewakashata unotangurira kushata. Kutongwa kwakanasirirwa vaangarari, nemboma pamishana yemapenzi. Vhini mutsvinyi, nokumwa kunoradzisa kunopara bopoto; kunyazwi ndiani unobatwa ndizvo aazi kungwara. Kunyangadzwa kunotyisa kwamambo kwakadai ngokubhonga kwemhondoro; uwo unomunyangadza unoshaishira ndaramo pachayo. Unoremeredzwa uwo unotiza kubva panoitwa hasha, asi benzi reshe rinokasira kuita hasha. Munhu unenungo aarimi panguva yechando; kukukura kwaguma, naapo apana chiro chaanoonapo. Biningidzo riri mumupinimidzo womunhu rakadai ngemvura yakadzama, asi munhu unokuzwisisa unozoichera. Vanhu vazhinji vanodziteketesa pachavo kuita vanogondeka, asi ndiani ungaona munhu unogondeka? Munhu wakarurama unohamba muugondeki hwake; vanomuchema vana vake vanoteera sure kwake. Mambo unogara padendemaro rokutonga unorudza kushata kweshe ngemadziso ake. Ndiani ungati, “Ndaita kuti mwoyo wangu ucheneswe; ndakachena kubva mukushaisha kwangu?” Zvipimo zvakaparadzana nokupima kwakaparadzana, zveshe izvi zviri zvinonyangadza kunaMambo Mwari. Kunyazwi nomwana unodziita pachake kuti aziikanwe ngezviito zvake, kuti mushando wake wakaperera nokunaka. Nzee inozwa nedziso rinoona, Mambo Mwari wakasika zveshe. Usade hope, kuti usaita murombo; beura madziso ako, newe unozogutiswa ngokudya kwakawanda. “Chakashata, chakashata,” unoronza mutengi; zvino aenda, unoganza. Uripo mukore, nemapuwe anomutengo mukuru; asi miromo yokuzia iri chinemeso chinomutengo mukuru. Tora jira rake uwo wakagondisa mupara, utore chigondiso chakapuwa kuita chibatiso chomupara. Chingwa chaoneka ngokuchengedzera chinotapira kunomunhu, asi ngesure muromo wake unozozara ngetsanza. Mazano eshe anogwinyiswa ngokupangwa; urwe hondo ngokuteera kupangwa kwakangwara. Uwo unoreya unobudisa zvakafishika; ndizvo usaiyana nouwo unonyanya kuereketa. Uwo unotuka baba ake nokuti mai ake, chibani chake chinozodzimwa muchidima chikuru. Upfumi hunooneka ngokukasira pakutanga hauzofumiswi pamagumo awo. Usati iwewe, “Ndinozounzidzira kushata;” garira Mambo Mwari, naye unozokudetsera. Zvipimo zvisikazi kuedzana zvinonyangadza kunaMambo Mwari, nechipimo chokunyepera achizi kunaka. Zvitsiko zvomunhu zvinotungamirirwa ndiMambo Mwari; zvino munhu ungaita mazwisisirenyi njira yake? Murau kunomunhu unopika ngokukasira echiti, “Chakachena,” nokutanga kupinimidza ngemhiko ngesure kwokupika mhiko. Mambo wakangwara unorudza vakashata nokuvatsika ngevhiri. Mweya womunhu chibani chaMambo Mwari chinotsvakisisa ngomukati mweshe. Nyasha nokugondeka zvinozongwarira mambo, nedendemaro rake rinozogwinyiswa ngenyasha. Uthende hwemajaha isimba ravo, asi unaku hwevasharuka imvi dzavo. Kuponda kunoremadza kunosuka kushata; kuponda kunochenesa marupande eshe omukati. Mwoyo wamambo rwizi rwemvura munyara yaMambo Mwari; unoutenderedza kweshe kwaanoda. Njira yeshe yomunhu yakarurama mukuona kwake; asi Mambo Mwari unopima mwoyo. Kuita kururama nokutonga kwakanaka kunoashirika pamberi paMambo Mwari kupinda mudiro. Madziso anoringira ngokudzikudza nomwoyo unodzikudza, chibani chevakashata, kushaisha. Urongwa hwouwo unogwinyisira hunounza zvakawanda, asi weshe unokasira unounza kutama. Kuona upfumi ngorurumi runonyepa imhute inohamba-hamba nomurau worufu. Kugebenga kwavakashata kunozovapedza, ngokuti vanoramba kuita zvakarurama. Njira yomushaishi yakashongoroka kakurutu; asi kuita kwewakaperera kwakanaka. Zvirinane kugara pachikhona chemhatso yepadera, pano kugara mumhatso yakafara nomukadzi unehasha. Mweya wewakashata unodisisa zvakashata; muakirwana wake aaoni nyasha mumadziso ake. Apo muangarari aororwa, usina kuzia unongwara; naapo wakangwara echidzidziswa, unoashira kuzia. Uwo Wakarurama unonasa kuringisa mhatso yowakashata; unokandira vakashata mukuparadzwa. Uwo unotsiira nzee dzake kuvarombo vechichema, nayewo unozochema aazozwiki. Chipo chakafishika chinopedza ushungu; nechitengero chiri muditi chinonyaradza ushungu hunotyisa. Naapo kutonga kwakanaka kwaitwa, kunodakadza kunevakarurama, asi kuparadzwa kwevashandi vezvakashata. Kunyazwi ndiani unopepesheka kubva munjira yokuzwisisa unozozorora muchiunga chevakafa. Kunyazwi ndiani unoda kutamba unozoita murombo; kunyazwi ndiani unoda vhini nemafuta aazoiti mupfumi. Wakashata muripo wewakarurama, nouwo usikagondeki muripo wewakarurama. Zvirinane kugara murubaya, kuno kugara nomukadzi unehasha noushungu. Upfumi hunomutengo mukuru nemafuta zvinogara mumhatso yewakangwara, asi benzi rinozozvipedza. Kunyazwi ndiani unoteera kururama nenyasha unoona kupona, kururama nokuremeredzwa. Munhu umwe wakangwara unokwira koorwisa dhorobha rengwazi, nokupwanyira pashi rusvingo rwevanogonda. Uwo unongwarira muromo wake norurumi rwake, unongwarira mweya wake kubva mumadambudziko. Munhu unodzikudza nokudzitunhumadza, zina rake “Mudadi,” unoshanda ngemanyau mukudzikudza. Kudisisa kwomunhu unenungo kunomuuraya, ngokuti nyara dzake adzidi kushanda. Unoemura kakurutu zuva reshe, asi vakarurama avareki kupa. Mudiro wewakashata chinyangadzo; kunopinda kwakadini kunyangadza apo unounzwa nomupinimidzo wakashata! Chapupu chokunyepa chinozoparadzwa, asi munhu unopurutana zvakanaka unozoereketa zvakaperera. Munhu wakashata unokonzisa hope yake, asi wakarurama unokarakadza njira dzake. Apana ungwaru, apana kuzwisisa, apana kupanga kwakwo kunomukira Mambo Mwari. Hachi ranasirirwa zuva rokurwa, asi kunyisa ngokwaMambo Mwari. Zina rakanaka rinotsanangurika kupinda pfuma zhinji, nokudiwa kwakapinda, kunaka kunesirivha nomukore. Mupfumi nomurombo vanoshongana pamwepo: Mambo Mwari ndiye musiki wavo veshe. Munhu wakangwara unoona chiro chakashata ngepamberi nokuhwara; asi vasina kuzia vanoenda pamberi nokutambudzwa. Musharo wokupfaa nokutya Mambo Mwari upfumi nokuremeredzwa nokupona. Minzwa nemirau zviri munjira yevapauki; uwo unongwarira mweya wake unozogara kuretu kubva kwevari. Dzidzisa mwana munjira yaanosisira kuhamba, naapo akura, aazopauki kubva kweiri. Mupfumi unotonga padera pevarombo, nouwo unokwereta muranda kuneuwo unokweretesa. Kunyazwi ndiani unokusha kushata unozovhuna madambudziko, nendonga youshungu hwake inozoparara. Uwo unenyasha unozofumiswa, ngokuti unopa chingwa chake kunevarombo. Dzingai mudadi, nehasha dzinopera; hasha nokutuka zvinozopera. Uyo unoda kuchena kwomwoyo nokuereketa kunenyasha, mambo unozoita mungani wake. Madziso aMambo Mwari anogara akarinda kuzia, asi unoparadza mazwi ouwo usikagondeki. Munhu unenungo unoti, “Kunemhondoro kubanze! Ndinozourawa mumapato!” Muromo womukadzi unoomba ihunza yakadzama; iye unonyangadza Mambo Mwari unozowiramwo. Upenzi hunosungirwa mumwoyo wejaha, asi ndonga yokuorora inohudzingira kuretu kubva kwaari. Uwo unotambudza varombo kuti adziwanzire upfumi hwake, nokupa kumupfumi, zvinotungamirira mukurashikirwa. Mazwi ewakangwara: Kotamisa nzee dzako nokuzwa mazwi ewakangwara, uemese mwoyo wako mukudzidzisa kwangu; ngokuti chiro chinodakadza kudai wechiangwarira mumwoyo mwako, nawo anozogwinyisa miromo yako. Kuti kugonda kwako kugare munaMambo Mwari, ndaita kuti aziikanwe kwouri nyamashi eya, kwouri. Andizi kunyora kwouri here zvinyorwa makumi matatu zvakanaka zvokupanga kwakanaka, nokuzia, kukuonisa icho chakarurama negwinyiso, kuti woopa mupinguro unegwinyiso kwevari avo vakutuma? Musabira varombo, ngokuti varombo, nokuti kutambudza avo vanokutambudzika pamusiwo; ngokuti Mambo Mwari unoemerera ndaa dzavo, nokuchakata ndaramo yeavo vanovachakata. Musaiyana nomunhu unogara mukunyangadzwa, nokuhambidzana nounehasha, nokuti kudzidzira njira dzake, nokudzibata pachako ngomurau. Usaita umwe weavo vanodzisungira muchigondiso, avo vanoita chibatiso chezvikwereti. Kuti usina chiro chokuripira ndicho, unokutorera ngenyi mubhedhi wako kubva kwouri? Usadusa mijeki yekaretu, iyo yakaemeswa ngamadzibaba enyu. Unoona here uwo uri ngwazi mumushando wake? Unozoshandira madzimambo; aazoshandiri vanhu vasina shwiro. Naapo wechigara pakudya nomutongi, nasa kuringira kakurutu uwo uri pamberi pako. Uise banga pahuro pako kuti uri munhu unodyisa. Usaemura kudya kwake kwakanaka, ngokuti kudya kunochengedzera. Usadzinesa pachako ngokuda kuita mupfumi; ita wakangwara, ubve kwezviri. Naapo madziso ako aringira padera pahwo apachina; ngokuti ngokukasira upfumi hunozodziitisa maphaphiro; hunombururuka kuenda mudenga kudai ngegodzi. Usadya chingwa chomunyimi; usaemura kudya kwake kwakanaka. Ngokuti icho chaanopinimidza mumwoyo mwake ndizvo zvaari. Unoti kwouri, “Idya, wechimwa!” Asi mwoyo wake auronzi kudaro. Unozorutsa zvidoko zvewadya newe unozorashikirwa ngemazwi ako akanaka. Usaereketa mukuzwa kwebenzi, ngokuti rinozoshoora ungwaru hwemazwi ako. Usadusa mujeki wekaretu; usapamba munda wenherera, ngokuti Muripiri wavo unesimba; unozoemerera ndaa yavo kwouri. Isa mwoyo wako mukudzidziswa nenzee dzako mumazwi oruziyo. Usarekera kuorora mwana; kudai wechimuchaya ngendonga, aazofi. Kudai wechimuchaya ngendonga, unozoponesa mweya wake kubva muSheori. Mwana wangu, kudai mwoyo wako wakangwara, mwoyo wanguwo unozodakara. Mweya wangu unozodakara, apo miromo yako inoereketa zvakarurama. Usatendera mwoyo wako kuemura vakashata, asi angira mukutya Mambo Mwari mazuva eshe. Ngegwinyiso zviripo zvichauya, nemagondero ako aazogurwi. Izwa, mwana wangu, ungware, utungamirire mwoyo wako munjira. Usaapo pakati pevanokarira vhini, nokuti pakati pevanokarira kudya nyama; ngokuti muraradzi nomudyisi vanozogumirwa ngourombo, nokukutsira kunozovasimidza mitsoto. Purutana baba ako vakakubereka, usashoora mai ako apo vaamusharuka. Tenga gwinyiso, usaritengesa; tenga ungwaru, nokudzidziswa, nokuzwisisa. Baba vewakarurama vanozodakara kakurutu; nouwo unobara mwana wakangwara unodakara ndiye. Baba ako namai ako ngavadakare, uwo wakakubereka ngaadakare. Mwana wangu, ndipe mwoyo wako, namadziso ako anase kuringira njira dzangu. Ngokuti hure ihunza yakadzama; nomukadzi mupara mugodhi wakatetepa. Unohwarira kudai ngembavha, nokuwanza kusikagondeka pakati pevanhu. Ndiani unedambudziko? Ndiani unekusvipa mwoyo? Ndiani unehasha? Ndiani unoereketa zvisina shwiro? Ndiani unemaronda pasina ndaa? Ndiani unemadziso akatsvuka? Ndivo vanogara pavhini mukuwo wakareba, avo vanoenda kootsvaka vhini rakakumanidzwa. Usaringira vhini apo ratsvuka, apo rechivhaira mutsani, nokudzerera pashi zvakanakisa. Pakugumisira rinoruma kudai ngenyoka, nokuruma kudai ngebuura. Madziso ako anozoona zviro zvinoshamisa, nomwoyo wako unozoereketa zviro zvinopaukisa. Unozodai ngouwo unoata mukati mworuandhle, kudai ngounoata padera pomuti wengarava. Unozoti, “Vakandichaya, asi andizi kuremadzwa; vakandichaya, asi andizi kuzvizwa. Ndinozomuka riini? Ndinozotsvakazve kumwa rimweni.” Usaemura vanhu vakashata, nokuti kudisisa kugara navo; ngokuti mwoyo yavo inoronga kuita zvakashata nemiromo yavo inoereketa zvakashata. Mhatso inoakiwa ngoungwaru, nayo inogwinyiswa ngokuzwisisa; ngokuzia mhatso yeshe inozadzwa ngoupfumi hwakanaka hunomutengo mukuru. Murwi wehondo wakangwara wakagwinya kupinda unesimba; nouwo unokuzia unopinda uwo unesimba; ngokuti ngokutungamirira kwakangwara unokona kurwa hondo yako; muuwandu hwevapangi munokunyisa. Ungwaru auzwiki ngebenzi; pamusiwo aribeuri muromo waro. Kunyazwi ndiani unotanda kuita zvakashata unozodaidzwa kuti muiti wezvakashata. Mukarakadzo woupenzi kushaisha, nomuangarari uri chinyangadzo kwevari veshe. Kudai wechidemera ngezuva rokutambudzika, simba rako idoko; kudai wechirekera kununura avo vanokweyiwa kupinda murufu, naavo vanothethereka kuenda mukuurawa; kudai wechiti, “Ringira, atizi kuchizia ichi;” uwo unopima mwoyo, aachizii here? Nouwo unongwarira mweya wako aachizii here? Aazounzidziri here kunomunhu weshe kudai ngemishando yake? Mwana wangu, idya uchi, ngokuti hwakanaka, nemisoro youchi iyo inotapira mukuraira kwako. Ziya kuti ungwaru hunotapira hwakadaro kumweya wako; kudai wechihuona, unozoona zvichauya, negonda rako arizoperi. Usahwarira ugaro hwevakarurama, kudai ngedzongoni; usashaishira pandau apo panogara vakarurama; ngokuti kunyazwi munhu wakarurama unowa kanomwe, unozomirukazve; asi vakashata vanozorigirwa pashi ngemadambudziko. Usadakara apo gaa rako rechiwa, nomwoyo wako usadakara apo rapumhunwa, ngokuti Mambo Mwari unozozviona nokunyangadzwa, naye unozodusa ushungu hwake kubva kweriri. Usadzinesa ngendaa yevanhu vakashata. Usaemura vakashata; ngokuti wakashata aazooni musharo; chibani chewakashata chinozodzima. Mwana wangu, itya Mambo Mwari namambo, usaiyana naavo vasikagarisiki; ngokuti dambudziko rinouya ngokukasira kubva kwevari; ndiani unozia kupera kwavo veshe? Ayawo mazwi evakangwara: Mukheto mukutonga auzi kunaka. Kunyazwi ndiani unoti kunewakashata, “Iwewe wakarurama,” uwo unozotukwa ngavanhu, madzinza anozomunyenya, asi avo vanorambidza wakashata vanozoa nokudakara, nechifumiso chakanaka chinozouya padera pavo. Uwo unopingura zvakanaka unozochingamidzwa ngomuromo. Nasirira mushando wako kubanze, udzinasirire zviro zveshe zvemunda; ngesure kwazvo aka mhatso yako. Usaita chapupu chokuitira ndaa muakirwana wako pasina ndaa; usachengedzera ngemiromo yako. Usaronza kuti, “Ndinozoita kwaari kudai ngezvaakaita kwendiri; ndinozohwirinzira kumunhu kudai ngomushando wake.” Ndakapinda ngepasinde pomunda wounenungo, nepasinde pomunda wemivhini womunhu usikazii; ringira, waiya wamera minzwa, neshakura raiya rafukidza munda weshe, norushosha rwawo rwemapuwe rwaiya rwapwanyika. Zvino ndakaona, ndakanasa kukarakadza; ndakaringira, ndikaashira kudzidziswa. Kuata kudoodoko, nokukutsira kudoodoko, nokupeta maoko kudoodoko kuata, nourombo unozouya padera pako kudai ngembavha, nokutama, kudai ngowakapfeka zvokurwa. Aya ndiwo mazwi amweni akangwara aSoromoni, akateerwa ngavanhu vakuru vaHezekia mambo waJudha. Ndikwo kukudzwa kwaMwari kufisha zviro, asi kukudzwa kwemadzimambo ndikwo kutsvakisisa ndaa. Kudai ngematenga paurebu, nenyika paudzamu, ndizvo mwoyo yemadzimambo aitsvakisiswi. Dusa zvakashata kubva pasirivha, nomupfuri unozoanayo yokunasira chidziyo chakanaka. Dusa vakashata kubva pamberi pamambo, nedendemaro rake rinozogwinyiswa mukururama. Usadzikudza pamberi pamambo, nokuti kuema mundau dzevakuru; ngokuti zvirinane kuronzerwa kuti, “Uya pano,” pane kuti udzaswe pashi mukuona kwomutongi. Wewaona ngemadziso ako, usakasira kuenda kumutongi, ngokuti pamweni auzozii chokuita pakugumisira, apo muakirwana wako akutsverudza. Nasira ndaa yako nomuakirwana wako, usikaronzi chakafishika choumweni; ngokuti pamweni umweni unokuzwa unozounza kutsverudzwa padera pako nembiri yako yakashata aizoperi. Izwi raereketwa ngezvinosisira rakadai ngemichero inemiara yomukore mumitani yesirivha. Kudai ngendandazi yomukore, nokuti chinemeso chomukore ndizvo zvinoita mupangi wakangwara kunomunhu unopurutana. Kudai ngokutonhora kwechando ngomukuwo wokucheka, ndizvo zvinoita nhumwa yakagondeka kwaari uwo unoituma; unomusirira mweya wemadzimambo ake. Kudai ngemakore nedutu asina mvura inonaya ndizvo zvinoita umwe unodziganzisa ngechipo chaasikazi kupa. Kubudikidza ngomwoyo wakapfaa mutongi unonyengererwa, norurumi rwakapfaa runogura magodo. Kuti waona uchi, idya uhwo hwakakukwanira, nokuti pamweni ukadyisa, unozohurutsa. Rutsoka rwako rusagara rwechipotera mumhatso yomuakirwana wako, kuti asazoneswa ndiwe nokukuzonda. Kudai ngenduku yehondo, shoti, nokuti musee wakapinza ndizvo zvinoita uwo unoita chapupu chokunyepa kunomuakirwana wake. Kudai ngezino rakaora, nokuti tsoka yakaremara, ndizvo zvinoita kugonda munhu usikagondeki ngomukuwo wokutambudzika. Kudai ngevhiniga yaiswa pachironda, wakadai ngouwo unokhumura bhachi ngomukuwo wechando ndizvo zvinoita uwo unoemba ngoma kunomwoyo unotambudzika. Kuti gaa rako rapera ngenzara, ripe chingwa kuti ridye; nokuti rapera ngenyota, ripe mvura kuti rimwe; ngokuti unozounganidza masimbe omuriro pasoro raro, naMambo Mwari unozokupa musharo. Dutu redera rinounza mvura yokunaya, norurumi runoreya runounza hope yakanyangadzwa. Kwakapinda kunaka kugara pakhona remhatso yepadera, kuno kugara mumhatso yakakura nomukadzi unoruzha. Kudai ngemvura inotonhorera kumweya unenyota, ndizvo zvinoita mashoko akanaka anobva kunyika iri kuretu. Kudai ngechinyuka chavhundurwa, nokuti rwizi rwasvipiswa, ndizvo zvinoita wakarurama unonyiswa pamberi pewakashata. Akuzi kunaka kudya uchi hwakawanda, nokuti kutsvaka kuremeredzwa padera pokuremeredzwa. Iye usikabati mweya wake wakadai ngedhorobha rakapwanyirwa pashi risina marukumbati. Kudai ngechando muzienza nokudai ngemvura pakucheka, ndizvo kuremeredzwa akusisiri benzi. Kudai ngekonjana mukumbururuka kwayo, kudai ngokumbururuka kwemherepere, kutuka akusisiri pasina ndaa. Mushwapu ngowemahachi, matomu ngeembongoro, nendonga ngeyomushana webenzi. Usapingura benzi kudai ngoupenzi hwaro, kuti usazodai ndiro iwewe pachako. Pingura benzi kudai ngoupenzi hwaro, nokuti ringadziita rakangwara mukuona kwaro. Kwakadai ngokudzigura tsoka nokumwa kutambudzika, kutumira shoko ngenyara yebenzi. Mirenje yechirema yakaremara; ndizvo zvinoita mazwi akangwara mumuromo webenzi. Kudai ngokusungira buwe muchimvii, ndizvo zvinoita kuremeredza benzi. Kudai ngomunzwa uri munyara yechiradza, ndizvo zvinoita mazwi akangwara ari mumuromo webenzi. Kudai ngomufuri wouta unoremadza weshe, ndizvo zvinoita uwo unothora benzi rinopinda ndipo nokuti chidhakwa. Kudai ngembwa inopetuka kumarutsi ayo, ndizvo zvinoita benzi rinohwirira kuupenzi hwaro. Unoona munhu wakangwara mumadziso ake here? Riripo gonda kune benzi kupinda iye. Munhu unenungo unoti, “Mune mhondoro munjira! Mune mhondoro mumapato!” Kudai ngoruvhi runotenderera pazvibato zvarwo, ndizvo zvinoita unenungo pamubhedhi wake. Unenungo unotsira nyara yake muchidziyo, wakaremba kakurutu kuti aipetudze pamuromo wake. Munhu unenungo wakangwara mukuona kwake kupinda vanhu vanomwe vanokona kubudisa chizatho. Kudai ngomunhu uwo unotora imbwa ngenzee dzayo inopindawo hayo ngepaari, ndizvo zvinoita uwo unodzipinza muhasha dzisiri dzake. Kudai ngomunhu unopenga unokandira zvinouraya zvitsa zvomuriro nemisee, ndizvo zvinoita uwo unochengedzera muakirwana wake, echiti, “Ndinotamba hangu!” Ngokuti pasina huni muriro unodzima, naapo pasina mureyi, hasha dzinopera. Kudai ngezvinoita masimbe pazvitsiki zvinobaka nehuni kumuriro, ndizvo zvinoita munhu wehasha unomusira hasha. Mazwi omureyi akadai ngemishuwa inonaka; inodzaka mukati mwendani. Miromo inopisha nomwoyo wakashata zvakadai ngechidziyo chedongo chakangwiringwidzwa ngesirivha. Gaa rinochengedzera ngemiromo yaro mukuereketa, rechiunganidza kuchengedzera mumwoyo mwaro. Naapo gaa rechiereketa zvakanaka, usarigonda; ngokuti zvirimwo zvinyangadzo zvinomwe mumwoyo mwaro. Kunyazwi kuzonda kwakafukidzwa ngokudziitisa, kushata kwake kunozooniswa pamberi pembungano. Uwo unotsa rindi, unozowiremwo, nebuwe rinozopetuka kuneuwo unotanga kurimburumbudza. Rurumi runonyepa runozonda avo verunotambudza, nomuromo unochengedzera unoparadza. Usadziganzisa ndimangwani ngokuti auzii kuti kunozoitikenyi ngezuvaro. Munhu umweni ngaakukudze, haiwa muromo wako; mupara, haiwa miromo yako. Buwe rinorema, nejecha rinorema, asi ushungu hwebenzi hunorema kupinda zveshe. Ushungu hunoremadza nokunyangadzwa kwakanyanya kushata, asi ndiani ungakona kuema pamberi pendurumwa? Kurambidza kuri pamhene kwakapinda kunaka kunorudo rwakafishika. Kuremadza kweshamwari kunogondeka; asi kuchingamidza kwemiromo yegaa kunowanda. Munhu wakaguta unoshoora misoro yeuchi, asi unenzara zveshe zvinovava zvinotapira. Kudai ngeshiri inopepesheka kubva pachisaki chayo, ndizvo zvinoita munhu unopepesheka kubva pandau yake. Mafuta nomutombo unegwema rakanaka zvinodakadza mwoyo; ndizvo zvinoita kudakadza kwoushamwari hwomunhu kunopinda kunaka kunokudzipanga pachako. Usasiya shamwari yako neshamwari yababa ako; usaenda mumhatso yehama yako ngezuva repfumvu yako. Muakirwana uri pasinde wakanaka kupinda hama iri kuretu. Ngwara, mwana wangu, ita kuti mwoyo wangu udakare, kuti ndikone kupingura kunyazwi ndiani unondishoora. Munhu wakangwara aona zvakashata unodzifisha; asi avo vasina chevanozia vanoenda mberi nokupinda mudambudziko razvo. Tora chokufuka chouwo wadzipira kuita chibatiso kumupara; utore chibatiso chomukadzi mupara. Uwo unofumisa muakirwana wake ngeizwi guru, echimuka mumambakwedza, kunozoerengerwa kuita chituko. Kudonha kunoangirira ngezuva rokunaya zvinoedzana nomukadzi unehasha, kumurambidza kwakadai ngokurambidza dutu, nokuti kubata mafuta munyara yake yokumudyo. Simbi inorodzera simbi; ndizvo munhu unorodzera hope youmweni wake. Uwo unongwarira muonde ndiye unozodya michero yawo; nouwo unongwarira mambo wake unozoremeredzwa. Kudai ngomumvura hope inoringirana nehope, ndizvo mwoyo womunhu unoringirana nomunhu. Sheori neAbhadhoni azvigutiswi, nemadziso omunhu aagutiswi. Hari ngeyokunyungurusa sirivha nechoto ngechokunyungurusa mukore, ndizvo nomunhu unoziikanwa ngokukudzwa kwaanoitwa. Kunyazwi ungatwa benzi nekoroni muduri ngomutwo, asi upenzi hwaro ahuzobudi. Nasa kuzia kugara kwezvifuyo zvako, nokunasa kuona kugara kwemakwai nen'ombe dzako; ngokuti upfumi haugari mhera nariini, nokuti dzungudza arigariri mibarirwana yeshe. Naapo mwenje wapera, nomwenje muishi unokura, nemiriwo yemitunhu inounganidzwa, zvimakwai zvinounza zvokufuka zvako, nembudzi mutengo womunda; unozoapo mukaka wakakwana wembudzi, kuita kudya kwemhatso yako nokwendaramo yevarandakadzi vako. Wakashata unotiza pasina wamurumbirira, asi vakarurama vanoshinga kudai ngemhondoro. Naapo nyika yaane kumukira, yaane vatongi vazhinji; asi inomutongi wakangwara, inogara mukunyarara mhera nariini. Munhu mutongi unotambudza varombo wakadai ngemvura inokukuzva isikasiyi zvokudya. Avo vanosiya mupango vanokudza vakashata, asi avo vanongwarira mupango vanorwisana navo. Vanhu vakashata avazwisisi kutonga kwakanaka, asi avo vanotsvaka Mambo Mwari vanokuzwisisa kweshe. Kwakapinda kunaka kuita murombo nokuhamba mukururama pane kuita mupfumi unopauka munjira dzake. Uwo unongwarira mupango mwana wakangwara, asi uwo unoshamwaridzana nevanhu vanokara unotsverudza baba ake. Uwo unowanza upfumi ngemare yokunyepera, nokuwanza ngenjira yakashata unozohuunganidzira uwo unoitira nyasha varombo. Kudai umwe echifuratira nzee yake kuti asazwa mupango, nomukumbiro wake unoita chinyangadzo. Uwo unoita kuti vakarurama vapauke kuenda munjira yakashata, unozowira muhunza yake yaakadziitira, asi vakarurama vanozogara nhaka yezvakanaka. Mupfumi wakangwara mukuona kwake, asi murombo wakangwara unomuona nemukati Apo vanhu vakarurama vechinyisa, huripo uthende hwakakura, asi apo vakashata vechiita simba, vanhu vanodzifisha. Uwo unofisha zvishaishi zvake aazobudiriri, asi uwo unozvitenda nokuzvisiya unozoona nyasha. Unomuchena munhu uwo unotya mukuwo weshe, asi uwo unokonzesa mwoyo wake unozowira mukushata. Kudai ngemhondoro inorira nebheya rinokhura, ndizvo zvinoita mutongi wakashata padera pevarombo. Mutongi unotama kuzwisisa mutambudzi mukuru; asi uwo unonyenya kuuyirwa ngenjira yakashata unozowanza mazuva ake. Kudai munhu echidzimbirwa ngengazi yomunhu umweni, muurayi ngaagare echizungaira metsa afe, pasina naumwe unomudetsera. Uwo unohamba mukururama unozoponeswa; asi uwo unoteera njira dzakashongoroka unozowira muhunza. Weshe unorima munda wake unozoona kudya kwakawanda, asi iye unoteera zvisina shwiro unozoita murombo mukurutu. Munhu unogondeka unozoona zvifumiso zvakawanda, asi iye unokasira kuita mupfumi aazoiti usina ndaa. Kuita mukheto akuzi kunaka, asi chigurwa chechingwa chingaita kuti munhu ashaishe. Mukari unokasira kuti aone upfumi, aapinimidzi kuti urombo hunozomugumira. Uwo unokaraidza unozoona kudikanwa ngesure, kupinda uwo unosereresa ngorurumi rwake. Uwo unobira baba ake nokuti mai ake echiti, “Achisiri chishaishi,” ngeumwe wevaurayi. Munhu unokara unomusa hasha, asi kunyazwi ndiani unoisa kugonda kwake munaMambo Mwari unozoitwa mupfumi. Uwo unogonda mwoyo wake ibenzi, asi uwo unohamba ngokungwara wakangwaririka. Kunyazwi ndiani unopa varombo aazotami, asi uwo unokonya madziso ake unozoashira kutukwa kwakawanda. Apo vakashata vechiita simba, vanhu vanodzifisha; asi apo vechiparara, vakarurama vanowanda. Munhu unogara echirambidzwa, asi echiangira kukonzesa mutsipa wake, unozoparadzwa ngokukasira, pasina kudetserwa. Apo vakarurama vari mukutonga, vanhu vanodakara; asi apo vakashata vechitonga, vanhu vanogwimba. Mwana unoda ungwaru unodakadza mubereki wake, asi uwo unogara nehure unopedza upfumi hwake. Ngokutonga kwakanaka mambo unogwinyisa nyika yake, asi uwo unoashira mare yokutengerwa unoiputsa. Kunyazwi ndiani unoradzikidza muakirwana wake unoisa mambure mutsoka dzomuakirwana. Mukupauka kwewakashata munomurau, asi wakarurama unoemba nokudakara. Vakarurama vanozia kutonga kwakanakira varombo; vakashata avana kuzwisisa kwakadaro. Vaangarari vanopisha dhorobha ngomurazvu, asi vakangwara vanodzinga ushungu. Kuti munhu wakangwara anendaa nebenzi, kunozoapo kunyangadzwa nokusheka pasina kunyarara. Vanenyota yokuparadza ngazi vanozonda uwo wakarurama, navo vanotsvakisisa kuparadza mweya wewakarurama. Benzi rinobudisa pamhene kushata kwoushungu hwaro, asi wakangwara unodzibata. Kudai mutongi echipurutana manyepo, nduna dzake dzeshe dzinoita dzakashata. Murombo nomutambudzi vanoshongana pamwepo: Mambo Mwari unojekisa madziso avo veshe. Kudai mambo echitonga varombo ngokururamisa, dendemaro rake rinozogwinyiswa mhera nariini. Ndonga nokupanga zvinopa ungwaru, asi mai vanotsverudzwa ngemwana usikazi kupangwa. Apo vakashata vari mukutonga, kupauka kunowanda, asi vakarurama vanozoona kuwa kwavo. Panga mwana wako, naye unozokupa kuzorora; unozounza kudakara kumwoyo wako. Apo pasina chioniso, vanhu vanorasha kudzibata; asi uwo unongwarira mupango unodakara. Muranda aazopangwi ngemazwi ega, ngokuti kunyazwi echizwa, aazopurutani. Unoona here munhu unokasira mukuereketa kwake? Kune kugonda kune benzi kupinda weshe wakadai ndiye. Hloko yakarerwa kubvira pauhwana, inozoita magumisiro akashata. Munhu wakanyangadzwa unomusa hasha, nomunhu unoushungu unowanza kupauka. Kudzikudza kwomunhu kunozomudzasa pashi, asi uwo unomweya wakapfaa unozoremeredzwa. Uwo unoiyana nembavha unonyenya ndaramo yake yemene; unozwa kutuka asikakuronzi. Kutya kwomunhu kunoteya murau; asi uwo unoisa kugonda kwake kunaMambo Mwari unozongwaririka. Vazhinji vanotsvaka kudiwa ngomutongi; asi kutongwa kwakanaka kunobva kunaMambo Mwari. Munhu wakashata chinyangadzo kunevakarurama, asi wakarurama chinyangadzo kunevakashata. Mazwi aAguri mukororo waJake, kunoti kuprofeta. Ndizvo zvinoronza munhu kunaIthieri, eya, kunaIthieri naUkhari: “Ngegwinyiso ndakadai ngemhuka kupinda vanhu veshe; andina kuzwisisa kwomunhu. Andizi kudzidza ungwaru, zve, andina kuzia kwoUwo Wakachena. Ndiani wakakwira mudenga, nokuti kudzaka kubveyo? Ndiani wakaunganidza mhepo pakati penyara? Ndiani wakaputira mvura mujira? Ndiani wakaemesa magumo eshe enyika? Ndiani zina rake, nezina remwana wake? Ngegwinyiso unozia! “Izwi reshe raMwari igwinyiso; ndiye chihlangu kwevari veshe vanohwara mwaari. Usatutsira kumazwi ake, kuti asakukaraidza, newe uoneke uri munyepi.” “Zviro zviiri zvendinokukumbira; usandirambira nazvo ndisati ndafa: Bvisira kuretu kubva kwendiri zvisina shwiro nokunyepa; usandipa urombo, nokuti upfumi; ndigutise ngokudya kwakandikwanira, nokuti ndigutiswe ndikurambe, ndironze kuti, ‘Ndiani Mambo Mwari?’ Nokuti ndinozoita murombo, nokuba, ndishandise zina raMwari wangu ngenjira isina shwiro. “Usamangara muranda kunatenzi wake, nokuti muranda unozokutuka, newe uoneke unendaa. “Varipo avo vanotuka madzibaba avo, vasikafumisi vanamai vavo. Varipo avo vanodziona vakacheneswa mukuona kwemadziso avo, asi avazi kusukwa kubva kutsvina yavo. Varipo avo, A kudzikudza kwakaitawani madziso avo! Kurebanyi kwakaita tsiyo dzavo! Varipo avo mazino avo akadai ngeshoti, nemadungambwa avo akadai ngemapanga, kuuraya varombo kubva panyika, vatami kubva pakati pevanhu. “Chiamwa-ngazi chaiya nevanasikana vairi, vaidaidzira vechiti, ‘Tipei tipei.’ Zviripo zviro zvitatu zvisingagutiswi, zvirongomuna zvisingamboronzi kuti, ‘Zvakwana’: Sheori, ndani isikabereki, nyika isikaperi nyota yemvura, nomuriro, usikazomboronzi kuti, ‘Zvakwana.’ “Dziso rinotsvinyira baba, nokushoora kupurutana mai, makungu omubani anozoritsoura, nokudyiwa ngemakodzi. “Zviro zvitatu zvinonyanya kundishamisa, zvirongomuna zvendisikazwisisi: Njira yegodzi mudenga, njira yenyoka padera peruware, njira yengarava pakati poruandhle, nenjira yemwamuna nemhandwe. “Iyi ndiyo njira yomukadzi unoomba: unodya, nokupukuta muromo wake echiti, ‘Andizi kushaisha.’ “Pashi pezviro zvitatu nyika inohuta, pashi pezvirongomuna inozvinyenya: Hloko apo inotonga, benzi apo ragutiswa ngokudya, mukadzi usikadiwi apo aroorwa, nomurandakadzi apo anogara nhaka yomurongo wamambo wake. “Zviripo zviro zvirongomuna padera penyika zvakatsonga, asi zvakangwara kakurutu: Matsunzi vanhu vasikazi kugwinya, asi anounganidza kudya kwawo ngomukuwo wezienza; mbira imhuka dzisikazi kugwinya, asi dzinonasira ugaro hwadzo mumapuwe; ndongwe adzina mambo, asi dzinohamba zvakanaka mumitanda; dandemutande ungaribata munyara, asi rinooneka mungome dzemadzimambo. “Zviripo zviro zvitatu zvinohamba ngenjira kwayo, zvirongomuna zvinohamba zvakanaka: Mhondoro iyo yakagwinya pakati pezvikara zveshe zvomushango, aifuratiri imweni, kuhamba kwejongwe, gotokoto, namambo pamberi pehondo yake. “Kuti waita ngoupenzi mukudzikudza, nokuti kudai waironga zvakashata, isa nyara yako pamuromo wako. Ngokuti kukurungwa kwomukaka kunobudisa mafuta, nokushongororwa kwemiro kunobudisa ngazi; ndizvo kuangiridzwa kwoushungu kunobudisa hasha.” Mazwi amambo Remueri; kuprofeta kwaakadzidziswa ndimai ake: “Haiwa, mukororo wangu! Haiwa, mukororo wendani yangu! Haiwa, mukororo wemhiko dzangu! Usapa simba rako kunevakadzi, njira dzako kuneavo vanoparadza madzimambo. “Azvizi kunaka kunemadzimambo, A Remueri, azvizi kunaka kunemadzimambo kumwa vhini, nokuti vatongi kudisisa zvinoradzisa; nokuti pamweni vanozomwa, nokuriyarwa mitemo, nokupaukisa kutonga kwakanaka kweavo vanotambudzwa. Ipa zvinoradzisa kwaari uwo wodo kufa, nevhini kuneavo vanotambudzika. Ngavamwe nokuriyarwa urombo hwavo, vasikakarakadzi kutambudzika kwavo. “Beura muromo wako, uereketere mbeveve navo veshe kuti vaitirwe zvakanaka avo vanotambudzika. Beura muromo wako, nasa kutonga, urwire kutongwa kwakarurama kwevarombo nevatami.” Ndiani ungaona mukadzi unozwisisa? Mutengo wake wakakura kupinda mapuwe anomutengo mukurutu. Mwoyo womwamuna wake unogonda mwaari, ndizvo aazotami zvokuuyirwa ndizvo. Unomuitira zvakanaka, haiwa zvakashata, mazuva eshe okupona kwake. Unotsvaka mamviri norukangaza, nokushanda ngokuda ngenyara dzake. Wakadai ngengarava dzevatengesi, unounza kudya kwake kubva kuretu. Unomuka uchiusiku, echipa zvokudya kunevemhatso yake nokupa mishando kunevarandakadzi vake. Unokarakadza ngomunda, nokuutenga: unosima munda wemivhini ngemichero yenyara dzake. Unosunga chiunu chake ngesimba, nokugwinyisa maoko ake. Unozia kuti zvaanotengesa zvakanaka. Chibani chake achidzimi usiku. Unoisa nyara dzake kubata chinokosha tambo, nenyara dzake dzinobata chokurukisa. Unotambanudza nyara dzake kunevarombo, nokugumisa nyara dzake kuneavo vanotama. Aatyi chando ngepamusoro pevemhatso yake, ngokuti vemhatso yake veshe vanofukidzwa ngemachira anodziya neakatsvuka. Unodzinasirira zvokufuka zvakarukwa; machira ake ngoorukangaza neakatsvukuruka. Mwamuna wake unoziikanwa pamisiwo yedhorobha, apo echigara pakati pevakuru venyika. Unoruka rukangaza rwakanaka nokurutengesa, echipa mabhande kunevatengesi. Simba nokuremeredzwa ndikwo kusimira kwake; naye unosheka mukuwo unouya. Unobeura muromo wake ngoungwaru neparurumi pake pano kudzidzisa kwenyasha. Unonasa kuringira njira dzemhuri yake; aadyi chingwa chenungo. Vana vake vanomiruka vechiti, “Unomuchena;” mwamuna wake naye unomukudzawo, “Vakadzi vazhinji vakashanda zvakanaka, asi iwewe unovapinda veshe.” Chiyemo chinochengedzera, nounaku ahuna shwiro; asi mukadzi unotya Mambo Mwari unozokudzwa. Ipa kwaari chikoaniswa chemichero yenyara dzake, nemishando yake ngaimukudze pamisiwo yedhorobha. Mazwi omuchumairi, mukororo waDhavhidha, mambo muJerusarema. Hazvina shwiro, hazvina shwiro, unoronza muchumairi, hazvina shwiro, hazvina shwiro! Zveshe azvina shwiro. Unodetserwa ngenyi munhu ngemishando yake yeshe yaanoshanda pashi pezuva? Mubarirwana unopinda, kwechiuya mubarirwana umweni, asi nyika inogara iripo. Zuva rinobuda nezuva rinopota, rechikasira kuenda kundau yerinobudira. Dutu rinovhuvhuta kuenda kubani, rechiuya kutenderera kuenda dera; rinotenderera nokutenderera rechienda, dutu rinohwirirazve kudai ngokutenderera kwaro. Ndwizi dzeshe dzinoerera kupotera muruandhle, asi ruandhle arutongozari; kundau yedzinoerera dzechibva ndwizi dzinopetukazve. Zviro zveshe zvinogomera kakurutu; munhu aakoni kuzvironza; dziso arigutiswi ngokuona, nenzee aizari ngokuzwa. Icho chaiyapo chinondozoapozve; neicho chaitwa ndicho chinondozoitwa; akuna chiro chitsva pashi pezuva. Chiripo here chiro chingaronzwa ndicho kuti, “Wona, ichi chiro chitsva?” Chaiya chindoripo mukuwo wekare, chakatitangira tisati taapo. Vanhu vekaretu avakarakadzwi nokuti kunozoapo kukarakadzwa kwevanhu vachauya ngaavo vachauya sure kwavo. Inini muchumairi ndaiya mambo padera peIsuraeri muJerusarema. Ndakazvipira mwoyo wangu kutsvaka nokutsvakisisa ngokungwara shwiro yeizvo zveshe zvinoitwa pashi pedenga; uyu mushando unosvipidza mwoyo waakapa Mwari kuvanhu kuti vatambudzike ndiwo. Ndakaona mishando yeshe inoitwa pashi pezuva; ringirai, yeshe ayina shwiro kurumbirira mhepo. Icho chakashongoroka achingaitwi kuti chirurame, neizvo zvisipo azvingaerengwi. Ndakati kumweya wangu, “Ringira, ndaona ungwaru hwakakura, kupinda avo veshe vaiya pamberi pangu muJerusarema; mwoyo wangu waiya wakaona kungwara nokuzwisisa kukurutu.” Neni ndakapira mwoyo wangu kuti ndizie ungwaru, nokuzia zvoupengo nezvoupenzi. Ndakaonazve kuti izvi kurumbirirana nemhepo. Ngokuti muungwaru hwakawanda kusvipa mwoyo kukurutu kurimwo, nouwo unowanza ungwaru unodziwanzira kutambudzika. Ndakati kumwoyo wangu, “Uya, ndinozoita kuti ndiedze kudakara, ndidakadzwe pachangu.” Asizve, izviwo azvina shwiro. Ndakati ngendaa yokusheka, “Kupenga,” ngokudakara, “Kunodetserenyi?” Ndakatsvaka mumwoyo mwangu njira yokudzidakadzisa ndiyo ngevhini, mwoyo wangu wechinditungamirira ngoungwaru; nenjira yokubata ndiyo upenzi, metsa ndaona kuti chiinyi chakanakira vanhu, kuti vaite pashi pomudenga pamazuva avo mashomani okupona kwavo. Ndakaita mishando mikuru; ndakadziakira mhatso; ndakadzisimira minda yemivhini. Ndakadzinasirira minda neminda yemiti yemichero, ndakasimemwo miti yembeu dzeshe dzemichero. Ndakadziitira makandwa emvura, okudiridzira makwasha anokura miti. Ndakatenga hloko vamuna nevakadzi, ndine hloko dzakabarwa mumhatso mwangu; ndaiyawo noupfumi hwakawanda hwezvifuyo zvakawanda zven'ombe nezvemakwai, kupinda munhu weshe waiya pamberi pangu muJerusarema. Ndakadziunganidzirawo sirivha nomukore, noupfumi hwemadzimambo nehwenyika; ndakadzitorera vaembi, vamuna nevakadzi, neizvo zvinodakadza vanhu, nemabunha akawanda. Ndizvo ndakaita mukuru, ndakaita mukuru kupinda veshe vakatanga pamberi pangu muJerusarema; noungwaru hwanguwo hwakandogara neni. Kunyazwi ngechiri chaakadisisa madziso angu, andizi kupinga mwoyo wangu kubva kwechiri; andizi kurambidza mwoyo wangu kubva mukudakara kwangu kweshe, ngokuti mwoyo wangu wakaona kudakara mumishando yangu yeshe, neizvi zvaiya chikoaniswa changu kunemishando yangu yeshe. Zvino ndakapinimidza ngemishando yeshe yaiya yaitwa ngenyara dzangu, nemishando yeshe yendakaita ngokutambudzika, ringira, zveshe zvaiya zvisina shwiro, nokurumbirirana nemhepo, akuna kuuyirwa pashi pezuva. Ndizvo ndakadzikunukudza kupinimidza ngoungwaru, upengo noupenzi; ngokuti chiinyi chingaitwa ngouwo unoteera mambo? Kwega izvo zvakaitwa ngepamberi. Zvino ndakaona kuti kungwara kunopinda upenzi kudai ngokujeka kunopinda chidima. Munhu wakangwara une madziso musoro rake; asi benzi rinohamba muchidima. Asi ndakaonazve kuti ngozi imweyo inovagumira veshe. Zvino ndakati mumwoyo mwangu, “Icho chinoitika kunebenzi, chinozoitikawo kwendiri; ndizvo ndakapinda kungwara ngokuitawani?” Ndakati mumwoyo mwangu, “Izviwo azvina shwiro.” Ngokuti akuna kucherechedzwa kunogara mhera nariini, kwowakangwara nokuti kwebenzi, kwechioneka kuti mumazuva anouya veshe variyarikanwa. Munhu wakangwara unokona kufawo ngenyi kudaiwo ngebenzi? Ndizvo ndakazonda kupona, ngokuti mushando unoitwa pashi pezuva unondisvipidza mwoyo; ngokuti zveshe azvina shwiro, kurumbirirana nemhepo. Ndakazonda mushando wangu weshe wendakashanda pashi pezuva, ngokuti ndinosisira kuusiira munhu unozoteera sure kwangu. Ndiani unozia kuti pamweni unozoita munhu wakangwara nokuti benzi? Asi unozotonga padera pomushando wangu weshe wendakaita nokushandisa ungwaru hwangu pashi pezuva. Neizviwo azvina shwiro. Ndizvo ndakakunukuka ndikaita kuti mweya wangu upere simba ngendaa yomushando weshe wendakashanda pashi pezuva, ngokuti nguva dzimweni munhu uwo wakashanda mushando wake ngesimba mukungwara nomukuzia, nomuungwazi, unosisira kusiya zveshe kuti zvidyiwe ngoumweni munhu usikazi kuzvishandira. Izviwo azvina shwiro, nokushata kukuru. Munhu unozouyirwa ngenyi kubva mukushanda kweshe nokurembeswa ngokushanda kwaanoshanda pashi pezuva? Ngokuti mazuva ake eshe akazara ngokurwadziwa, nomushando wake unotambudzisa; kunyazwi nousiku mwoyo wake auzorori. Izviwo azvina shwiro. Akuna chiro chakanaka kunomunhu kupinda kudya nokumwa, nokuti mweya wake udakare mukunaka kwomushando wake. Ichiwo ndakaona kuti chakabva munyara yaMwari, ngokuti ngepabanze pake ndiani ungadya nokuti kudakara? Ngokuti kwaari uwo unomudakadza Mwari unopa ungwaru, kuzia nokudakara; asi kumushaishi unopa mushando wokuunganidza, nokuita murwi, unopa kwega kunouwo unomudakadza Mwari. Izviwo azvina shwiro, kurumbirirana nemhepo. Chiro cheshe chinenguva, nomukuwo kumishando yeshe iri pashi pedenga: Mukuwo wokubarwa, nomukuwo wokufa; mukuwo wokusima, nomukuwo wokukukura izvo zvakasimwa; mukuwo wokuuraya, nomukuwo wokurapa; mukuwo wokupwanyira pashi, nomukuwo wokuaka; mukuwo wokuchema, nomukuwo wokusheka; mukuwo wokutsumba, nomukuwo wokuzvina; mukuwo wokuposhera mapuwe, nomukuwo wokuunganidza pamwepo mapuwe; mukuwo wokufungatira, nomukuwo wokureka kufungatira; mukuwo wokutsvaka, nomukuwo wokurashikirwa; mukuwo wokungwarira, nomukuwo wokukwitikwidza; mukuwo wokubaura, nomukuwo wokusona; mukuwo wokuti mwii, nomukuwo wokuereketa; mukuwo wokuda, nomukuwo wokuzonda; mukuwo wehondo, nomukuwo wokunyarara. Unouyirwa ngenyi unoshanda kubva kuneizvo zvaanoshanda? Ndaona mishando yaakapa Mwari kumunhu weshe kuti ashande kweiri. Wakaita kuti chiro cheshe chiite chinonakira nguva yacho; zve, wakaisa mupinimidzo wokuzia zvekaretu nezvichauya mumwoyo mwake, asi apana munhu ungakona kuzwisisa mushando waakaita Mwari kubvira mukutanga metsa kumagumo. Ndinozia kuti akuna chiro chakanaka kwevari chingapinda kuti vadakare nokuita zvakanaka mukupona kwavo. Zve, ichi chipo chaMwari kuti munhu weshe adye nokumwa, nokudakara mumushando wake weshe. Ndinozia kuti kunyazwi chiinyi chaanoita Mwari chinogara mhera nariini; apana chingatutsirwa kwechiri, nokuti chiro chingaduswa kubva kwechiri; Mwari wachiita ichi kuti veshe vaeme vechitya pamberi pake. Chindoripo chaiyapo; neicho chinozoapo chindoripo; naMwari unotsvaka icho chapinda. Padera pezviro zveshe, ndakaona pashi pezuva kuti mundau yokutonga kwakarurama kushata kwaiyapo, nokundau yokururama kushaisha kwaiyapowo. Ndakati mumwoyo mwangu, “Mwari unozotonga vakarurama nevakashata, ngokuti wakaemesa mukuwo wechiro cheshe newomushando weshe.” Ndakati mumwoyo mwangu ngendaa yevanhu, kuti Mwari unovaedza kuti vaone kuti ivo vemene imhuka. Ngokuti icho chinoitika kuvanhu nechinoitikawo kumhuka chakatodzana; kufa kwechimwe ndikwo kufa kunoita chimweni. Eya, zveshe zvinofema mweya umwewo; nomunhu aana chaanopinda mhuka ndicho; ngokuti zveshe azvina shwiro. Zveshe zvinoenda kundau imweyo; zveshe zvinobva mubukuta, zveshe zvinohwirirazve kuita bukuta. Ndiani unozia kuti mweya womunhu unokwira mudenga, nomweya wemhuka unodzaka pashi mumavhu? Ndizvo ndakaona kuti akuna chiro chakapinda kunaka kuno kuti munhu adakare ngomushando wake, ngokuti icho ndicho chikoaniswa chake. Ndiani ungakona kumuunza kuti azie zvinozoitika sure kwake. Zve, ndakaona kutambudzwa kweshe kunoitwa pashi pezuva. Ringira masodzi eavo vanotambudzwa, navo vasina muembedzeri; kurutii rwevatambudzi vavo raiyapo simba; navo vasina muembedzeri. Neni ndakapinimidza vakafa, avo vakatofa kuti varinane kupinda vanopona vachazwa; asi urinane kupinda veshe, uwo usikazi kumboapo, neusikazi kuona mushando wakashata unoitwa pashi pezuva. Zvino, ndakaona kushanda kweshe, noungwazi hweshe mumushando unobva kumunhu umwe ngokuemura kwake munhu umweni. Izviwo azvina shwiro, ndikwo kurumbirirana nemhepo. Benzi rinofumbata nyara dzaro, nokudya nyama yaro yemene. Tsimba imwe pane kunyarara yakapinda kunaka pane kuwa netsimba mbiri panokurwadziwa nokurumbirira mhepo. Zve, ndakaona azvina shwiro pashi pezuva. Uripo umwe unogara ega, usina wechipiri; aana mwana nokuti hama; asi mushando wake auna magumo, nemadziso ake aagutiswi ngepfuma. “Ndiani wendinofira kushandira,” wakabvunza, “Ndechinyima mweya wangu zvinodakadza?” Izviwo azvina shwiro, nomushando usikadakadzi. Vairi varinane kupinda umwe, ngokuti vanomuthuso wakanaka womushando wavo. Ngokuti kudai vechiwa, umwe unomirudza mungani wake; asi ihehe kwaari uri ega apo echiwa, ngokuti aana umweni unomumirudza. Zve, kudai vairi vechiata pamwepo, vanodziisana; asi umwe ungaita madziirwenyi ega? Kunyazwi umwe anganyisa umweni, vairi vanozonyisa umwe. Tambo nhatu dzakakoshwa pamwepo adzikasiri kudambuka. Mudoko murombo wakangwara urinane kupinda mambo musharuka uri benzi usikachatendi kupangwa. Umwe ngegwinyiso ungakona kubuda kubva mutirongo kupinda muumambo, kunyazwi muumambo hwake wakabarwa ari murombo. Ndakaona veshe vanopona avo vanohamba pashi pezuva, vechiteera mudoko wechipiri uwo unozogara pandau yamambo. Kwaiya kusina magumo kuvanhu veshe, avo vaakatungamirira. Asi avo vanozoteera sure kwake avazodakari ndiye. Ngegwinyiso izviwo azvina shwiro, ndikwo kurumbirirana nemhepo. Ngwarira tsoka dzako apo wooenda kumhatso yaMwari; kukwedzera pasinde kuti uzwe kunopinda mudiro wapirwa ngemapenzi; ngokuti avazii kuti vanoita zvakashata. Usakasira kuereketa ngomuromo wako, usatenderazve mwoyo wako kuti ukasire kuereketa izwi pamberi paMwari, ngokuti Mwari uri mudenga, newe uri padera penyika; ndizvo mazwi ako ngaaite mashomani. Ngokuti kurota hope kunouya ngokuwanda kwemishando; ngokudaro izwi rebenzi rinoziikanwa ngouwandu kwemazwi aro. Naapo wechipika mhiko kunaMwari, usanonoka kuripa; ngokuti aadakari ngemapenzi: Ripa icho chowakapika. Zvakapinda kunaka kuti usapika mhiko, kuno kuti upike usikazoiripi. Usatendera muromo wako kuti ukutungamirire mukushaisha; usaronzazve pamberi penhumwa kuti aiya maposheso; ngenyi Mwari echisisira kunyangadzwa ngemazwi ako, nokuparadza mushando wenyara dzako? Ngokuti kurota nemazwi akawanda azvina shwiro; asi iwewe itya Mwari. Kudai wechiona munyika kutambudzwa kwevarombo nokushaisha kakurutu kwokutonga kwakanaka nekwakarurama, usashamiswa ngeiyo ndaa; ngokuti nduna huru inoringirwa ngowakapinda kukura, asi varipo vakakurisa kuvapinda vanoringirawo padera pavo. Ngokuti kuuyirwa kwenyika ngokwavo veshe: mambo emene unorarama ngezveminda. Mudisi wemare aatongozogutiswi ngemare; nokuti mudisi wepfuma aazogutiswi ngezvaanouyirwa ndizvo. Izviwo azvina shwiro. Apo pfuma yawandiswa, vanowandiswawo vanoidya; nevane vayo vanozodetserwa ngenyi asi kuiona ngemadziso avo? Hope dzouwo unoshanda dzinotapira, kunyazwi echidya zvishomani nokuti zvakawanda; asi uwandu hwepfuma yemakurudza ahuvatenderi kuti vaate hope. Kuripo kushata kukuru kwendaona pashi pezuva, kuti pfuma inongwaririrwa vane vayo kuita kuremadzwa kwavo, noupfumi uhwo hunoparadzwa ngomushando wakashata; kunyazwi abara mwana, aana chiro munyara yake. Kudai ngezvaakabuda kubva mundani yamai ake, ndizvo unozohwirirazve ari mutitinini, kudai ngezvaakauya, aazotori chiro kubva kumushando wake, icho chaangatwara munyara mwake. Ichiwo chiri kushata kukuru, kudai ngezvaakauya ndizvo, unozohwirira akadaro naye unouyirwa ngenyi unoshandira dutu? Eshe mazuva akezve unodya ari muchidima, naye unokusvipa mwoyo kukurutu, urwere nokutambudzika. Ichi ndicho chendakaona, kuti chakanaka nokusisira kuti munhu adye nokumwa nokuona kudakara mumushando wake weshe waanoshanda pashi pezuva mazuva eshe okupona kwake, aanopuwa ndiMwari; ngokuti ichi ndicho chikoaniswa chake. Kumunhu weshe uwo wakapuwa ndiMwari upfumi nezvakawanda, wakamupazve simba rokuti ahudye, nokuashira chikoaniswa chake, nokudakara mumushando wake; ichi ndicho chipo chaMwari. Ngokuti aazonyanyi kupinimidza ngemazuva okupona kwake, ngokuti Mwari unomuita kuti abatike ngokudakara kwomwoyo wake. Kuripo kushata kwendakaona pashi pezuva, kunorema padera pevanhu. Munhu uwo unopuwa ndiMwari upfumi, nezvakawanda nokuremeredzwa, kuti asatama nachimwe cheizvo zveshe zvaane danha nazvo, asi Mwari aatenderi kuti adye izvi zviro, asi zvinodyiwa ngomupara. Izvi azvina shwiro; idenda guru rakashata. Kudai munhu echibara vana zana, nokupona makore akawanda, asi azvina ndaa kunyazwi mazuva emakore ake akawanda, kudai mweya wake usikagutiswi ngezvakanaka, nokuti asikatsirwi, ndinoti kuti uwo wakabarwa nguva isati yaguma unopinda kuitanane pane iye. Ngokuti wakabarwa asina shwiro, naye unoendazve muchidima, nomuchidima zina rake rinofukidzwa. Zve, aazi kumboriona zuva, nokuti kuzia chiro; asi unoona kuzorora kwakanaka kupinda uwo. Kunyazwi unopona makore gumi remazana (1,000) akapetwa kairi, asikazi kumbodakara kumboona zvakanaka, avaendi veshe kundau imweyo here? Weshe mushando womunhu ngowomuromo wake, asi danha rake arigutiswi. Ngokuti wakangwara unenyi kupinda benzi? Nomurombo unenyi uwo unozia kuhamba zvakanaka pamberi pevanopona? Kwakanaka kuona ngemadziso kupinda kupepesheka kwokudisisa; izviwo azvina shwiro, kurumbirirana nemhepo. Chiro cheshe chiripo chakadudzwa zina karetu, nacho chinoziikanwa kuti munhu chiro chakadini, aakoni kuphikisana nouwo unomupinda ngesimba. Mazwi akawandisa kuwandisa kwezvisina shwiro, ndizvo umweni ungapinda kunaka ngenyi? Ngokuti ndiani unozia chinonakira munhu apo echipona mazuva mashomani okupona kwake kusina shwiro, aanopedza kudai ngebvuri? Ndiani ungamuronzera munhu izvo zvinozoapo ngesure kwake pashi pezuva? Zina rakanaka rinopinda kunaka kune mafuta anomutengo mukuru, nezuva rokufa rakanaka kupinda zuva rokubarwa. Kwakapinda kunaka kuenda kumhatso yechiriro kuno kuenda kumhatso yedhiri; ngokuti aya ndiwo magumo omunhu weshe, nounopona unozochiisa mumwoyo mwake. Kutsumba kwakapinda kunaka kuno kusheka, ngokuti ngokutambudzika kwehope mwoyo unoitwa unodakara. Mwoyo wewakangwara uri mumhatso yechiriro; asi mwoyo webenzi uri mumhatso yokudakara. Kwakapinda kunaka kuti munhu azwe kukaraidza kwowakangwara kuno kuti azwe kuemba kwemapenzi. Ngokuti kudai ngokuputika kweminzwa mumuriro pashi pehari, ndizvo zvakaitawo kusheka kwebenzi; neichiwo achina shwiro. Ngegwinyiso kuangiridzwa kunoitisa munhu wakangwara benzi, nokutengera kunoshaishira mwoyo. Magumo echiro akapinda kunaka kuno kuamba kwacho; nouwo unotsengerera mumweya wakapinda kunaka kuno uwo unodzikudza mumweya. Usakasira kunyangadzwa mumweya, ngokuti ushungu hunogara muditi rebenzi. Usaronza kuti, “Ngenyi mazuva ekare aiya akapinda kunaka kune mazuva aya?” Ngokuti kubvunza uku akubvi mukungwara. Ungwaru hwakanaka kudai ngenhaka, ndikwo kuuyirwa kweavo vanoona zuva. Ngokuti kungwaririka kwoungwaru kwakadai ngokungwaririka kwemare, nokuuyirwa kwokuzia ndikwo kuti ungwaru hunopa kupona kwaari unakwo. Pinimidza ngomushando waMwari; ndiani ungakona kururamisa icho chaakashongorosa? Pazuva rokubudirira dakara, nomuzuva rokutambudzika nasa kupinimidza. Mwari ndiye wakaita zuva iro nerimweni, kuti munhu asakona kuzia chiro chinozouya sure kwake. Zveshe izvi ndakazviona mumazuva angu ezvisina shwiro; uripo munhu wakarurama unofa mukururama kwake, uripozve munhu wakashata, naye unorebesa mazuva okupona kwake mukushata kwake. Usaita wakarurama kakurutu; usaita wakangwara kakurutu; unodziuraya ngenyi? Usaita wakashata kakurutu; usaita benzi; ngenyi wechifa isati yaanguva yako? Zvakanaka kuti ubatisise chimwe, usatendera kuti chibve ngendaa yechimweni; ngokuti uwo unomutya Mwari ndiye unozopokonyoka kubva kwezviri zveshe. Ungwaru hunogwinyisa vakangwara kupinda vatongi gumi vari mudhorobha. Ngegwinyiso akuna munhu naumwe wakarurama munyika unoita zvakanaka usikashaishi. Usapurutana kumazwi eshe anoereketwa, nokuti ungazozwa muranda wako echikutuka. Mwoyo wako unozia kuti nguva zhinji iwewe wakambotuka vamweni. Zveshe izvi ndakazviedza ngoungwaru; ndakati, “Ndinozoita wakangwara,” asi kwaiya kuretu kubva kwendiri. Icho chiripo chiri kuretu nechakadzama, chakadzama kakurutu; ndiani ungachitsvakisisa pamhene? Ndakakunukudza mwoyo wangu kuti ndizie nokutsvaka nokutsvakisisa kungwara nemazano, kuti ndizie kuti kushata upenzi, noupenzi upengo. Ndakaona chiro chinovava kupinda rufu, ndiye mukadzi uwo uri chirimbana, uwo mwoyo wake murau nemambure, nyara dzake dzakadai ngemanguri; uwo unodakadza Mwari unozopokonyoka kubva kwaari; asi uwo wakashata unozobatwa ndiye. Ringira, ichi ndicho chendakaona, unoronza muchumairi, echitutsira chimwe ngachimwe kuti ndinase kuona gwinyiso razvo, icho mweya wangu wakatsvakisisa ngokuangira, asi andisati ndaona. Ndakaona munhu umwe ega pakati pegumi remazana, asi andizi kuona mukadzi pakati peava veshe. Ringira, ndakaona ichi chega, kuti Mwari wakasika munhu akarurama; asi ivo vakadzirongera mazano akawanda. Ndiani wakadai ngowakangwara? Ndiani unozia kududzirwa kwechiro? Ungwaru hunoita kuti hope yake ijeke, nokukonza kwehope yake kunoshandurwa. Inini ndinoti, “Ngwarira mipango yamambo, ngokuti Mwari wakapika mhiko kwaari. Usatyiswa; ibva pamberi pake, usanonoka kwaitika ndaa yakashata; ngokuti unoita cheshe chaanoda.” Ngokuti izwi ramambo rinesimba; ndiani ungakona kuronza kwaari kuti, “Unoitenyi?” Uwo unongwarira mipango aazoshongani nechakashata; nomwoyo wowakangwara unozozia nguva nenjira. Ngokuti chiro cheshe chine nguva yacho nenjira, kunyazwi kutambudzika kwomunhu kukuru padera pake. Ngokuti aazii izvo zvinozoapo, ndiani ungamuronzera kuti zvinozoita maitikirenyi? Ngokuti akuna munhu unesimba padera pomweya kuti aubate mweya nokuti kuane simba padera pezuva rokufa; akuna kurekererwa kubva mukurwa hondo, nokuti kushata akuzonunuri uwo unokuita. Zveshe izvi ndakazviona, ndakaemesa mwoyo wangu kumishando yeshe inoitwa pashi pezuva, apo munhu unotonga padera poumweni kuita kuremadzwa kwoumweni. Zvino ndakaona vakashata vechiikwa, avo vaigara vechipinda nokubuda kubva mundau yakachena, navo vakakudzwa mudhorobha umwo mwevakaita izvi zviro. Izviwo azvina shwiro. Ngokuti kuororwa ngendaa yemishando yakashata akuitwi ngokukasira, mwoyo womunhu unonasa kuemeswa kuita zvakashata. Kunyazwi mushaishi unoshaisha mikuwo iri zana, nokurebesa mazuva ake okupona asi ndinozia kuti zvinozonakira avo vanomutya Mwari, ngokuti vanoema mukutya pamberi pake. Asi azvizonakiri wakashata, nokuti aazodziwanziri mazuva ake akadai ngebvuri, ngokuti aaemi mukutya pamberi paMwari. Chiripo chiro chisina shwiro chinoitwa munyika, kuti varipo vakarurama avo vanoitirwa kudai ngezvinoitirwa vakashata; zve, varipo vakashata vanoitirwa kudai ngezvinoitirwa vakarurama. Ndakati neizviwo azvina shwiro. Ndizvo ndakairikidza kudakara, ngokuti apana chiro chakapinda kunaka pashi pezuva chinopinda kudya nokumwa, nokudzikudza pachake, ngokuti ichi chinozoenda naye mukushanda kwake mumazuva eshe okupona kwake kwaanopuwa ndiMwari pashi pezuva. Naapo pendakaemesa mwoyo wangu kuti uzie ungwaru, nokuona mishando inoitwa munyika nenjira iyo anoona ndiyo kuata hope madziso ake masikati nokuti usiku, zvino ndakaona yeshe mishando yaMwari, kuti kusaapo naumwe ungakona kuona kuti chiinyi chinoitwa pashi pezuva. Kunyazwi munhu unoedza kutsvakisisa, aazochioni; kunyazwi munhu wakangwara echipinimidza kuti unozia, aakoni kuchiona. Zveshe izvi ndakapinimidza ndizvo mumwoyo mwangu, ndechitsvakisisa izvi zveshe, kuti vakarurama nevakangwara nemishando yavo zviri munyara yaMwari; akuna munhu unozia kuti rudo nokuti kuzonda. Zveshe zviri pamberi pake azvina shwiro, zvinoitika zvakatodzana kwevari veshe, vakarurama nevakashata; kune wakanaka nowakashata, wakasukika nousikazi kusukika, kwaari unopira midiro, nokwaari usikapiri midiro. Kudai ngezvinoitika kunowakanaka, ndizvo zvinoitika kunomushaishi; uwo unopika mhiko wakadai ngouwo unotya kupika mhiko. Uku ndikwo kushata kuri pakati pezviro zveshe zvinoitwa pashi pezuva, kuti chipo chakatodzana chinoitika kwevari veshe! Zvakanyadaro, mwoyo yevanhu yakazara ngokushata; upengo huri mumwoyo mwavo apo vachapona, ngesure kweizvo vanoenda kunevakafa. Asi kunyazwi ndiani unobatanidzwa nevanopona vanakwo kugonda, ngokuti imbwa inopona yakapinda kunaka kupinda mhondoro yakafa. Ngokuti vanopona vanozia kuti vachazofa, asi vakafa avana chevanozia; avachaashiri muthuso, kunyazwi nokucherechedzwa kwavo apachina. Rudo rwavo, nokuzonda kwavo, nokuemura kwavo kwakatopera; zve, avachazooni chikoaniswa munecheshe chinoitwa pashi pezuva. Enda hako, udye kudya kwako ngokudakara, wechimwa vhini rako unomwoyo unodakara; ngokuti Mwari unoashira mishando yako. Zvokusimira zvako ngazvigare zvakachena; nesoro rako ngarigare rechidzodzwa mafuta. Gara ngokudakara nomukadzi wounoda mazuva eshe okupona kwako kusina shwiro, owakapuwa pashi pezuva, ngokuti ndicho chikoaniswa chako mukupona kwako uku, nomushando wako wounoshanda pashi pezuva. Kunyazwi chiinyi cheinoona nyara yako kuita, chiite ngesimba rako reshe; ngokuti akuna mushando, nokuti kupinimidza, nokuti ruziyo, nokuti ungwaru, muiba, apo pounoenda. Zve ndakaona kuti pashi pezuva mujaho aubudirirwi ngendaa yokukasira kurumba, nokuti kurwa hondo akunyiswi ngendaa yokuane simba, nokuti zvokudya azvionwi ngoungwaru, zve nokuti upfumi ahuoneki kuvanhu ngendaa yokuzwisisa kwavo, nokuti nyasha adzipuwi kuvanhu ngendaa yokuti ingwazi; asi zveshe zvinoitika kudai ngomukuwo nokuitika. Ngokuti munhu aazii nguva yake yedambudziko. Kudai ngehove dzinobatwa muchitaa chakashata, nokudai ngeshiri dzinobatwa mumurau, ndizvo vanhu vanobatwa pamukuwo wakashata, apo perinowira padera pavo chiriporipo. Ndaonazve ichi chionero choungwaru pashi pezuva, nacho chakaoneka chakakura kwendiri. Raiyapo dhorobha doko, nevanhu vashomani mukati mwaro. Mambo mukuru wakauya koorwa naro, naye wakarikomba, akaaka marukumbati makuru kurirwisa. Zvino kwakaoneka mukati mwaro munhu murombo wakangwara, nouyu munhu ngoungwaru hwake wakaponesa dhorobha. Asi akuna naumwe wakazokarakadza uwo munhu murombo. Ndizvo ndinoti, “Ungwaru hwakapinda kunaka kupinda simba; asi zvakanyadaro ungwaru hwomurombo hunoshoorwa, nemazwi ake aapurutanwi.” Mazwi akanyarara omunhu wakangwara anopinda kunasa kuzwika kupinda kudaidzira kwouwo unotonga pakati pemapenzi. Ungwaru hwakanaka kupinda zvokurwa ndizvo hondo, asi mushaishi umwe unoparadza zvakanaka zvakawanda. Nhunzi dzakafa dzinoita kuti mafuta okudzora omunasiri anuhwe; ndizvo upenzi hudoko hunorema kupinda ungwaru nokuremeredzwa. Mwoyo womunhu wakangwara unotseyama kunyara yake yokumudyo, asi mwoyo webenzi unotseyama kunyara yake yokumuoshwe. Kunyazwi apo benzi rechihamba munjira, rinotama ungwaru nokuonisa vanhu veshe kuti ibenzi. Kudai ushungu hwomutongi hwechikumukira, usasiya ndau yako, ngokuti kudzipfaisa kunonyaradza ndaa hurutu. Kuripo kushata kukuru kwendakaona pashi pezuva, kupauka kwakakura kudai ngokunobuda kubva kumutongi: Upenzi hunogadzikwa mundau zhinji dzakakwirira, negurudza rinogara kundau dziri pashi. Ndaona hloko dzechigadha mahachi, nevazvare vechihamba pashi ngetsoka kudai ngezvinoita hloko. Kunyazwi ndiani unotsa hunza unozowira mukati mwayo; nouwo unoputsa rukumbati, unozorumwa ngenyoka. Kunyazwi ndiani unoputsa mapuwe unozokuvadzwa ndiwo; nokunyazwi ndiani unoadza huni unozoona nyatwa ndidzo. Kudai simbi yokushanda ndiyo isikapinzi, nomunhu asikairodzeri upanga hwayo, zvino kunosisira kuti aishandise ngesimba rakapinda kukura; asi ungwaru hunomudetsera kuti abudirire. Kuti nyoka ikaruma isati yafumhwa, apana kuuyirwa kunemufumhi. Mazwi anoereketwa ngewakangwara anounza kuremeredzwa, asi miromo yebenzi inoritangurira. Mazwi omuromo waro anoambira muupenzi nokuereketa kwaro kunogumira mukupenga kwakashata; asi benzi rinowanza mazwi. Akuna naumwe ungazia zvinoda kuitika; ndiani ungakona kuronzera umweni zvichazoapo? Kushanda kwebenzi kunorirembesa, ngokuti arizii nenjira yokuenda kudhorobha. Ihehe iwewe, A nyika, apo mambo wako achiri mwana, nenduna dzako dzechidya dhiri mangwanani! Unomuchena, iwewe nyika, kudai mambo wako ari mukororo wevanembiri, nenduna dzako dzechidya ngomukuwo wakasisira, kuti vaone simba, haiwa kuti varadze. Kubudikidza nenungo denga remhatso rinotsakara, kubudikidza ngenungo mhatso inodonha. Dhiri rinoitirwa kudakara, nevhini rinoitirwa kudakadzwa, nemare inokwanisa izvo zveshe zvinodiwa. Usatuka mambo, kunyazwi nomupinimidzo wako, nokuti kutuka makurudza kunyazwi uri mukamera rako rokuata: ngokuti shiri yomudenga inozotwara mazwi ako, nokuti icho chinemaphaphiro chinozoteketesa ndaa. Kandira chingwa chako mumvura, ngokuti ngesure kwemazuva mazhinji unozochionazve. Ipa chikoaniswa kuvanomwe, nokuti kuvasere, ngokuti auzii kushata kungaapo padera penyika. Naapo makore azara ngemvura anoidurura padera penyika; nokudai muti wechiwa wakaringira kubani, nokuti wechiwira dera, pandau powawira muti ndipo pounoata. Kunyazwi ndiani unorinda mhepo aazokushi; nokunyazwi ndiani unoringisisa makore aazokukuri. Kudai ngezveusikazii njira younouya ndiyo mweya kumagodo mundani yamai vaane mimba, ndizvo auzii mushando waMwari uwo unoita zveshe. Kusha mbeu dzako mangwanani, nemadeekoni usarekera nyara yako yakagara; ngokuti auzii kuti ngechiri chinozobudirira, ichi nokuti icho, nokuti zveshe zvakatodzana zvinozonaka. Kujeka kunotapira, zvinodakadza madziso kuona zuva. Kunyazwi avo vanorarama makore mazhinji, vanosisira kudakara mwaari eshe; asi ngavakarakadze kuti mazuva echidima anozowanda. Zveshe izvo zvinouya azvina shwiro. Dakara iwewe jaha, muutsva hwako; mwoyo wako ngaukudakadze ngamazuva outsva hwako. Hamba ngenjira yomwoyo wako, nomukuona kwemadziso ako, asi zia kuti ngendaa yeizvi zviro zveshe Mwari unozokuunza mukutongwa. Bvisa kukakaseka kubva mumwoyo mwako, ubvise kurwadziwa kubva mumuiri wako; ngokuti uhwana noutsva azvina shwiro. Karakadza Musiki wako ngemazuva outsva hwako, mazuva akashata asati aguma, nemakore akwedzera pasinde apo pounozoti, “Andina kudakara mwaari;” apo zuva, kujeka, mwedzi nenyeredzi, zvisati zvadzimwa, nemakore apetuka ngesure kwokunaya kwemvura; muzuva apo vangwariri vemhatso vanohuta, nevamuna vanesimba vanokotamiswa, nezvigayo zvinorekera kushanda ngokuti zvaa zvishomani, naavo vanoringira ngepamafasitera vanoona mazweezwee; naapo misiwo yemupato yakonywa, nokurira kwechigayo kwatsonga, noumweni unomiruka ngokurira kweshiri, nevanasikana veshe vokuemba vanonyaradzwa; naapo echityiswa ngendau dzakakwirira, nokutyisa kurimwo munjira; muti wearimondi unozoburukira, nendongwe inodzikweyapo, nemadanha anopera; ngokuti munhu weshe unosisira kuenda kanyi kwake mhera nariini, nevachemi vanozopararira mupato; isati yadambuka tambo yesirivha, nendiro yomukore isati yaputswa, nejomeya risati raputswa pachinyuka, nevhiri risati raguka pamupisi, nebukuta rinohwirira kubukuta kudai ngezveraiya rakaita, nomweya unozohwirira kunaMwari uwo wakaupa. Hazvina shwiro, hazvina shwiro, unoronza muchumairi, zveshe azvina shwiro. Ngepabanze pokungwara, muchumairi wakadzidzisa vanhu kuzia, kupima, kudzidzira nokuronga zvisana zvakawanda. muchumairi wakaedza kutsvaka kuona mazwi anodakadza, naye wakanyora zvakarurama mazwi egwinyiso. Mazwi evakangwara akadai ngehoko dzinopinza, nokudai ngezvipikiri zvakagwinyiswa ngevaunganidzi vemazwi, anopuwa ngomuushi umwe. Panezveshe kupinda izvi, mwana wangu, ngwara. Kuita mabhuku mazhinji akuna magumo, nokudzidzira kwakawanda kunorembesa muiri. Kupera kwendaa; kuzwika kwayo yeshe: Itya Mwari, ungwarire zvironzo zvake; ngokuti uyu ndiwo mushando weshe womunhu. Ngokuti Mwari unozounza mishando yeshe mukutongwa, nechiro cheshe chakafishika, chakanaka nokuti chakashata. Nduyo yaSoromoni. Ngaandichingamidze ngokuchingamidza kwomuromo wake! Ngokuti rudo rwako rwakanaka kupinda vhini, mafuta ako okuzora anegwema rakanaka, zina rako rinoita kudai ngemafuta adururwa; ndizvo mhandara dzinokuda. Ndikwee sure kwako, tinozokuteera ngokukasira. Mambo wandiunza mumakamera ake. Tinozokudza nokudakara mweuri; tinozokudza rudo rwako kupinda vhini; ngokururama vanokuda. Inini ndakasvipa asi ndinoringirika, A imwimwi vanasikana veJerusarema, kudai ngematende eKhedha, kudai ngemachira akatandirwa aSoromoni. Musandiringira ngokuti ndakasvipa, ngokuti zuva rakandipisha; vakororo vamai vangu vakandinyangadzirwa; vakandiita mungwariri weminda yemivhini, asi munda wangu wemivhini andizi kuungwarira. Ndironzere, iwewe unodikanwa ngomweya wangu, kuti unoushira pari, unozorodzera pari zvifuyo zvako masikati makuru; ngokuti ndinozoita kudai ngewapauka ngenyi pakati pezvifuyo zvevangani vako? Kudai usikazii, iwewe wakapindisisa kunaka pakati pevakadzi, teera zvitsiko zvezvifuyo, uushe zvimbudzana zvemakwai ako pasinde pematende evaushi. Ndinokuedzanisa, mudikani wangu, nehachi regadzi pangoro dzaFaro. Matama ako anoringirika akanaka ane zvinemeso, mutsipa wako unoringirika uneusanga wezvinemeso. Tinozokunasirira chinemeso chomukore chinemboni yesirivha. Naapo mambo akagara pasofa rake, mafuta angu emaka akabudisa gwema rawo rakanaka. Mudikani wangu wakadai ngenyede yemafuta emhura kwendiri, iyo inogara pakati pemazamo angu. Mudikani wangu kwendiri wakadai ngechikore chemaruva anozwi chamfiri, chiri muminda yemivhini yeEngedhi. A, wakanaka, mudikani wangu; A, wakanaka; madziso ako akadai ngeenjiya. A, wakanaka, mudikani wangu, unodikana yaamho. Sofa redu rakasvipirika; mwamba yemhatso yedu ngeyemisedhare, nhungo dzedu ngedzemiphaini. Ndiri ruva romuSharoni, neruva regofa rebani. Kudai ngeruva riri pakati peminzwa, ndizvo zvakaita mudikani wangu pakati pevanasikana varanda. Kudai ngomuti wemaapura uri pakati pemiti yegwasha, ndizvo zvakaita mudikani wangu pakati pemajaha. Ndakagara pashi pemumvuri wake ngokudakara kukuru, muchero wake waitapira mukuraira kwangu. Wakandiunza kumhatso yedhiri, chidisiso chake kwendiri chaiya rudo. Ndigutisenyi ngemavhini akaoma, ndiembedzere ngemaapura; ngokuti ndapera simba ngorudo. Nyara yake yokumuoshwe iri pashi pesoro rangu, nenyara yake yokumudyo yakandifungatira. Ndinomupanga, imwimwi vanasikana veJerusarema, ngezvinyamutai nemhara dzomushango, kuti musatsungudza nokuti kumusa rudo metsa rwooda. Izwi romudikani wangu! Ringira, unouya echipembera padera pemitunhu, echitomuka padera pezvimitunhu. Mudikani wangu wakadai ngechinyamutai nokuti kudai ngemhara itsva. Ringira, unoema apo sure kwerukumbati rwedu, unoringira mukati ngepamafasitera, echiringira ngepaburi. Mudikani wangu unoereketa nokuti kwendiri, muka, mudikani wangu, iwewe unoringirika, uuye. Ngokuti, ringira, nguva yechando yapinda, mvura yapera aichanayi. Maruva omera munyika; nguva yokuemba yaguma; neizwi regora rinozwika munyika yedu. Muti womuonde unobereka maonde awo akasvipirika, nemivhini inemaruva, inobudisa gwema rakanaka. Muka, mudikani wangu, uuye. A gora rangu, unogara mumarutwe emapuwe, mundau yakafishika yakaita zvikofiro ngandione hope yako, ngandizwe izwi rako, ngokuti izwi rako rinotapira nehope yako yakanaka. Tibatire hava, zvihava zvidoko, zvinoshaishira mivhini: ngokuti mivhini yedu inemavhini achimatete. Mudikani wangu ngowangu, neni ndiri wake; mutanga wake unofura pakati pemaruva egofa. Metsa zuva ribude, nemabvute atize, kunukuka, mudikani wangu, udai ngechinyamutai, nokudai ngechiunga chemhara itsva padera pemitunhu yeBhetheri. Usiku pamubhedhi wangu ndakatsvaka uwo unodikanwa ngomweya wangu; ndakamutsvaka, asi andizi kumuona. Ndinozomuka zvino ndihambe mumapato omudhorobha, munjira dzakafara; ndinozotsvaka uwo unodikanwa ngomweya wangu. Ndakamutsvaka, asi andizi kumuona. Varindi vakandiona apo vaihamba mudhorobha. Ndakati kwevari, “Mwamboona here uwo unodikanwa ngomweya wangu?” Apo ndapinda padoodoko kubva kwevari, ndakamuona uwo unodikanwa ngomweya wangu. Ndakamubata, andizi kumutendera kuti aende, metsa ndamugumisa kumhatso yamai angu, nokukamera rouwo wakandibereka. Ndinomupanga, imwimwi vanasikana veJerusarema, ngezvinyamutai nemhara dzomushango, kuti musatsungudza nokuti kumusa rudo metsa rwooda kumuka. Ndiani vanouya kubva mushango vakadai ngesika dzechiushi, vakadzodzwa ngemafuta emure neemakha nembeu dzeshe dzemitombo inonuhwira yakaita uswa yevatengesi? Ringira, musengere waSoromoni, unotendenedzwa ngengwazi makumi matanhatu vengwazi dzaIsuraeri, veshe vakabata shoti, ngwazi dzokurwa, veshe vaneshoti dzavo panhunji dzavo ngendaa yokutya usiku. Mambo Soromoni wakadziitira ngoro ngemiti yeRebhanoni. Wakaita sika dzayo ngesirivha, sure kwayo ngomukore, zvigaro zvayo zvakatsvukuruka, mukati mwayo mwakanasirwa ngorudo rwevanasikana veJerusarema. Budai, imwimwi vanasikana veZioni, muringire kunamambo Soromoni kudzungudza rakaiswa ndimai ake ngezuva rokuchadhiswa kwake, ngezuva rokudakara kwomwoyo wake. Ringira, kunakanyi kwewakaita mudikani wangu; wakanyanya kunaka! Madziso ako akadai ngeemagora pashi penyunzu dzako. Bvudzi rako rakadai ngomutanga wembudzi idzo dzinooneka dziri pamutunhu weGireadhi. Mazino ako akadai ngomutanga wemakwai agundwa awo abuda kubva mukugezwa; anobereka rimwe ngarimwe manyambiri, akuna narimwe pakati pawo risina mwana. Miromo yako yakadai ngetambo yakatsvuka, kuringirika kwomuromo wako kwakanaka. Matama ako akadai ngezvigurwa zviiri zvephomegraniti ngepashi pemambure ako. Mutsipa wako wakadai ngorusvingo rwaDhavhidha rwakaakwa ngemisara; padera parwo pakaturikwa zvokurwa ndizvo gumi remazana, zveshe zvihlangu zvengwazi. Mazamu ako mairi akadai ngemanyambiri emhara, anofura pakati pemaruva egofa. Metsa zuva ribude, nemabvute atize, ndinozoenda kumutunhu wemure nokumutunhu wemakha. Iwewe wakaperera kunaka, mudikani wangu; auna pakaremara. Uya neni kubva Rebhanoni, muroorwa wangu, uya neni kubva Rebhanoni. Ibva pamutunhu Amana, kubva pamutunhu Seniri neHermoni, kubva kumapako emhondoro, kubva pamitunhu yemakamba. Iwewe wakatora mwoyo wangu, hanzvadzi yangu, muroorwa wangu; iwewe wakatora mwoyo wangu ngerimwe remadziso ako, ngechinemeso chimwe chomutsipa wako. A kutapiranyi kworudo rwako, hanzvadzi yangu, muroorwa wangu! Kunakanyi kworudo rwako kupinda vhini, negwema remafuta ako kupinda makha eshe okuzora! Miromo yako, A muroorwa wangu, inobomha udosvi unotapira; uchi nomukaka zviri pashi porurumi rwako; negwema rezvokusimira zvako rakadai ngegwema reRebhanoni. Munda wakashosherwa hanzvadzi yangu, muroorwa wangu munda wakashosherwa, chinyuka chakadumaidzwa. Zvisimwa zvako munda wemiti yemaphomegraniti, munemichero yakanaka, hena nenardhi, nardhi nesafironi, kharamusi nekhinamoni, nemiti yeshe yegwema rakanaka; mure, nemagavakava, nazvo zveshe zvinonuhwira zvinomutengo mukuru. Rwizi rwemumunda, chinyuka chemvura yokupona, nendwizi dzinopopoma dzinobva Rebhanoni. Muka, iwewe dutu redera; uuye, A dutu rokubani! Vhuvhuta padera pomunda wangu, kuti gwema ririmwo ripwititikire kweshe. Mudikani wangu ngaapotere mumunda wake, adye michero yake yakanaka. Ndapinda mumunda wangu, hanzvadzi yangu, muroorwa wangu; ndaunganidza mafuta angu emure, nemakha angu; ndadya misoro youchi hwangu nouchi; ndamwa vhini rangu nomukaka wangu. Idyai, vangani vangu; imwai, mudhakwe ngorudo. Ndakaata, asi mwoyo wangu waiya wakamuka. Purutana! Izwi romudikani wangu unodododza. “Ndibeurire, hanzvadzi yangu, mudikani wangu, gora rangu, wakaperera wangu; ngokuti soro rangu rakanyakatika ngebeto, nenyunzu dzangu dzabomherwa ngemadonhwe ousiku.” Ndakhumura bhachi rangu, ndoriita mapfekerenyizve? Ndageza tsoka dzangu, ndingadziita masvipisirenyi? Mudikani wangu wakaisa nyara yake ngepaburi romusiwo, nomwoyo wangu wakamutambudzikira. Ndakamiruka kubeurira mudikani wangu; nenyara dzangu dzakadonha mafuta emure, nezvinwe zvangu zvakadhonha mafuta emure anegwema rakanaka padera pechibato chechivhayo. Ndakabeurira mudikani wangu, asi mudikani wangu waiya atiza kuenda. Mweya wangu wakadzaka pashi apo paakaereketa. Ndakamutsvaka, asi andizi kumuona; ndakamudaidza asi aazi kundidaira. Varindi vaihambahamba mudhorobha vakandiona; vakandichaya, vakandiremadza; vangwariri vorukumbati vakabvuka jazi rangu kubva kwendiri. Ndinomupanga, imwimwi vanasikana veJerusarema, kudai mwechiona mudikani wangu, mumuronzere kuti ndinorwara ngorudo. Mudikani wako unopinda ngenyi mudikani woumweni, iwewe wakapinda kunaka pakati pevakadzi? Mudikani wako unopinda ngenyi mudikani woumweni, kuti utipange ndiye kudai? Mudikani wangu wakachena mushaa, mukuru pakati pegumi remakumi emazana. Soro rake rakadai ngomukore wakaereswa kakurutu; bvudzi rake rakakoshana, rakasvipa kudai ngegunguwo. Madziso ake akadai ngemagora ari pasinde pendwizi dzemvura, akasukwa ngomukaka akanasa kurongedzwa. Matama ake akadai ngomunda wemakha, unobudisa gwema rakanaka. Miromo yake yakadai ngemaruva egofa, yechidonha mafuta emure. Nyara dzake dzakadai ngesika dzomukore dzinemboni dzemapuwe anomutengo mukuru. Muiri wake wakadai ngorunyanga rwenzou rwakangwizira runemboni dzemapuwe esafire. Mirenje yake yakadai ngesika dzebuwe romutsaratsara, rakanemeswa padera pezvigadzikiro zvomukore wakaereswa. Kuringirika kwake kwakadai ngeRebhanoni, rakanakisisa kudai ngemiti yemisedhare. Muromo wake unotapira kakurutu, unonasa kudikana kakurutu. Uyu ndiye mudikani wangu, uyu ndiye mungani wangu, A vanasikana veJerusarema. Waenda kuri mudikani wako, A wakapinda kunaka pakati pevakadzi? Watora njira iri mudikani wako, kuti isusu timutsvake pamwepo newe? Mudikani wangu wadzaka kumunda wake, kuminda yemakha, koousha zvifuyo zvake muminda, nokukaya maruwa egofa. Ndiri womudikani wangu, nomudikani wangu ngewangu; unodziushira pakati pemaruva egofa. Wakanaka, mudikani wangu, kudai ndiThiriza, wakanaka kudai ngeJerusarema, unotyisa kudai ngevarwi vehondo vanemijeki. Kunukudza madziso ako kubva kwendiri, ngokuti andinyisa! Bvudzi rako rakadai ngomutanga wembudzi dzinodzaka kubva muGireadhi. Mazino ako akadai ngomutanga wemakwai makadzi anobva kooshambidzwa; eshe anobereka manyambiri, apana narimwe rawo risina mwana. Matama ako akadai ngezvigurwa zviiri zvephomegraniti pashi pemambure ako. Varipo vanahosi makumi matanhatu, nemabunha makumi masere, nemhandara dzisikaperi kuerengwa ngouwandu. Gora rangu, wakaperera wangu, uri zinyarimwe rega, mudikani wamai ake, mutsanangurwa wouwo wakamubereka. Mhandara dzakamuona dzikamuti unomuchena; vanahosi nemabunha vakamukudza. Ndiani uyu unoringirika kudai ngokujeka kwemangwanani, kunaka kudai ngomwedzi, kujeka kudai ngezuva, nokutyisa kudai ngevarwi vehondo vanemijeki. Ndakadzaka kumunda wenzungu kuti ndione michero yebani, nokuona kuti muvhini waburukira here, nokuti maphomegraniti anemaruwa. Ndisati ndazia chiro, mweya wangu wakandigadzika mungoro pasinde namambo wangu. Petuka, petuka, iwewe muShurami! Petuka, petuka, kuti tikuringire. Ngenyi mwechiringira pamuShurami kudai ngevanoringira vanozvina pakati pezvikwata zviiri zvevarwi vehondo? I, kunakanyi kwetsoka dzako dzinemagwada, A mukunda wamambo! Zvizva zvako zvakaita zvimburumbwa kudai ngezvinemeso zvinomutengo mukuru, mushando wenyara dzouwo uri ngwazi. Mukumvu wako wakadai ngechidziyo chakatenderera chisikatami zvokumwa. Ndani yako yakadai ngomurwi wekoroni, yakatendenedzwa ngemaruva egofa. Mazamu ako mairi akadai ngemanyambiri emhara. Mutsipa wako wakadai ngorusvingo rwenyanga dzenzou. Madziso ako akadai ngemakandwa muHeshibhoni, ngepamusuwo waBhathirabhimu. Miro yako yakadai ngorusvingo rweRebhanoni panooneka Dhamasekhusi. Soro rako padera pako rakadai ngeKharmeri, nebvudzi resoro rako rinodzaka rakadai ngejira rakatsvukuruka; mambo wabatwa ngebvudzi rake. Kunakanyi nokuringirika kwako, iwewe mudikani mukudakara! Chiemo chako chakadai ngomuti womubvumo, nemazamo ako akadai ngezvikore zvemavhini. Ndati, ndinozokwira muti womubvumo, ndinozobata matai awo. A, mazamo ako ngaadai ngezvikore zvemavhini, negwema refemero rako rakadai ngeremaapura, nokuchingamidza kwemiromo yako kwakadai ngevhini rakapinda kunaka, iro rinomedzwa rechitapira, rechidonha pamiromo nepamazino. Ndiri womudikani wangu, nedanha rake riri kwendiri. Uya, mudikani wangu, ngatibude tiende kumunda, nokuata mumaguta. Ngatifumire kumuka tiende kuminda yemivhini, tione kuti mivhini yatunga here, nokuti mavhini abeuka, nemaphomegraniti atunga. Naapo ndinozokupa rudo rwangu. Mamandrekisi anobudisa gwema rakanaka, nepadera pemisiwo yedu dziripo mbeu dzeshe dzemichero yakanaka, mitsva nemisharuka yendakaunganidzira iwewe, mudikani wangu. A, kudai iwewe waiya wakadai ngehama yangu, iyo yakaamwa mazamo amai angu! Dai ndakuona kubanze, ndaizokuchingamidza ngomuromo; akuna naumwe ungandishoora. Ndaizokutungamirira nokukuunza kumhatso yamai angu, nomukamera roumwe uwo wakandibara. Ndaizokupa kuti umwe vhini rakakurungwa ngemakha oudosvi womuphomegraniti wangu. A, kuti nyara yake yokumuoshwe iwe pashi pesoro rangu, nenyara yake yokumudyo inozondifungatira. Ndinomupanga, imwimwi vanasikana veJerusarema, musatsungudza nokuti kumusa rudo metsa rwooda kumuka. Ndiani uyu unokwira echibva mushango, akatseyama pamudikani wake? Ndakakumusa uri pashi pomuti womuapura. Apo mai ako aiya mukupotwa ngenyoka yokukubara; apo uwo wakamubereka waiya mukupotwa. Ndiise kudai ngechioniso mumwoyo wako, kudai ngechioniso pamuoko wako; ngokuti rudo runesimba kudai ngorufu, ndurumwa dzinotyisa kudai ngeiba. Mirazvu yarwo yadai ngemirazvu yomuriro, mirazvu inobaka kakurutu. Mvura zhinji aikoni kudzima rudo, kunyazwi ndambi aingarumwisi hotwe. Kudai munhu akanyapa zveshe zvemhatso yake ngendaa yorudo, zvingarambwa kakurutu. Tine mukunda wedu mudoko, asi aana mazamo. Tinozoitenyi ngendaa yomukunda wedu ngezuva raanoroorwa? Kudai ari rukumbati, tinozoaka padera pake ngome yesirivha; asi kuti ari musiwo, tinozomukwakwatidzira ngemapuranga omusedhare. Ndiri rukumbati, nemazamo angu akadai ngorusvingo; zvino ndaiya mumadziso ake kudai ngaumwe unounza kunyarara. Soromoni waiya nomunda wemivhini paBhaarihamoni; wakapa munda wake wemivhini kuvangwariri; umwe ngaumwe wavo waisisira kuunza gumi remazana ezvigurwa zvesirivha zvemichero. Munda wangu wemivhini wangu wemene, ngewangu pachangu; iwewe, A Soromoni, gumi remazana ngerako, naavo vangwariri vemichero mazana mairi. A, iwewe unogara muminda, vangani vangu vanopurutana izwi rako; ita kuti neniwo ndirizwe. Kasira, mudikani wangu, udai ngemhara nokuti kudai ngemhara itsva padera pemitunhu yemakha rakanaka. Chioniso chaIsaya mukororo waAmozi chaakaona ngendaa yaJudha neJerusarema, mumazuva aUzia, Jothamu, Ahazi naHezekia, madzimambo aJudha. Izwai, A matenga, upurutane, A nyika, ngokuti Mambo Mwari waereketa: “Ndakakudza nokurera vana, asi vandimukira. Kabi inozia mune wayo, nembongoro chidziyo chatenzi wayo; asi Isuraeri aazii, vanhu vangu avazwisisi.” A, dzinza rokushaisha, vanhu vanoremerwa ngokushata, mubarirwana unoita zvakashata, vana vanoita zvakaora, avo vakasiya Mambo Mwari, avo vakashoora Umwe Wakachena waIsuraeri, vakadziita vapara, vakahwirira sure. Ngenyi mwechitsvaka kuchayiwazve? Ngenyi mwechiangira kumukira? Soro reshe rinorwara, nomwoyo weshe unodemera. Kubvira pashi petsoka kuguma kusoro, apana chakagwinya mukati mwawo; asi makwengwa, maronda nezvironda zvinobuda ngazi; azvizi kusvinwa, nokuti kusungwa, nokuti kupfaiswa ngemafuta. Nyika yenyu yaita matongo, madhorobha enyu apishwa ngomuriro; pamberi penyu vapara vanodya nyika yenyu; yaita matongo, yabvukwa ngavapara. Nomukunda weZioni wasara kudai ngomuchacha mumunda wemivhini, kudai ngedumba riri mumunda wemakaka, kudai ngedhorobha ratendenedzwa ngehondo. Dai Mambo Mwari wehondo asikazi kutisiira vashomani vakapona, taizodai ngeSodhoma neGomora. Izwai izwi raMambo Mwari, imwimwi vatongi veSodhoma! Mupurutane kuchironzo chaMwari wedu, imwimwi vanhu veGomora! “Mibairo yenyu mizhinji inodetserenyi kwendiri?” Mambo Mwari unoronza. “Ndaremba ngeminikero yemagondohwe anopishwa, nemafuta emhuka dzakakodzwa; andidakari ngengazi yemikono, nokuti yezvikwai neyemagotokoto. Apo munouya kuoneka pamberi pangu, ndiani wakakumbira ichi kubva kunyara yenyu? Musachatsikatsika maruwanze angu; musachaunza minikero isina shwiro; mutombo unegwema unopishwa unondinyangadza. Andidi kutawa kwomwedzi, maSabatha, kudaidza mishongano, nemishongano yokudira yakashata. Kutawa kwomwedzi kwenyu nemadhiri enyu akaemeswa mweya wangu unozvinyenya; zvaita mutwaro kwendiri, ndaremba ndizvo. “Naapo pomunotambanudza nyara dzenyu, ndinozofisha madziso angu kubva kwomuri; kunyazwi mukaita mikumbiro yakawanda, andizopurutani; nyara dzenyu dzakazara ngengazi. Dzishambidzenyi, mudzichenese pachenyu; rashai kushata kwezviito zvenyu kubva pamberi pemadziso angu; rekai kuita zvakashata. Dzidzai kuita zvakanaka; tsvakai kutonga kwakanaka, detserai avo vanotambudzwa, rwirayi ndaa dzevasina baba, potai ngendaa yeshirikadzi. “Uyai zvino, ngatipangane,” unoronza Mambo Mwari. “Kunyazwi zvishaishi zvenyu zvakanyatsvuka, zvinozochena kudai ngechando; kunyazwi zvakanyatsvuka kudai ngejira rakatsvuka, zvinozodai ngemamviri egwai. Kudai mwechida nokupurutana, munozodya zvakanaka zvenyika; asi kudai mwechiramba nokuita mbengo, munozodyiwa ngeshoti.” Ngokuti muromo waMambo Mwari wakazviereketa. A, dhorobha raigondeka rakaita hure ngenyi! Iro raizara ngokutonga kwakanaka, kururama kwakagara mukati mwaro, asi zvino vaurayi. Sirivha yenyu yaita marara, vhini renyu rakumanidzwa nemvura. Vatongi venyu vanoita mbengo nokuita vangani vemambavha. Veshe vanoda bata muromo, vanoteera kuthuswa. Avatongi zvakanaka ndaa dzenherera, nendaa dzeshirikadzi adziuyi pamberi pavo. Ndizvo Mambo Mwari, Mambo Mwari wehondo, uwo Unesimba waIsuraeri, unoti, “A, ndinozodurura ushungu hwangu padera pemagaa angu nokudziunzidzira pamapandu angu. Ndichapetudza nyara yangu kurwa nemwi; ndinozonyungurusa marara enyu, ndichabvisa kweshe kusikasukika kwenyu. Ndichaunzazve vatongi venyu kudai ngokutanga, nemakota enyu kudai ngokuamba. Ngesure munozodaidzwa kuti, ‘Dhorobha rokururama, dhorobha rinongondeka.’ ” Zioni rinozoripirwa ngokutonga kwakanaka, naavo vari mukati mwaro avo vanotenderuka ngokururama. Asi vamukiri nevashaishi vanozoparadzwa pamwepo, naavo vanosiya Mambo Mwari vanozopera. Ngokuti munozotsveruka ngemiokhi yemwakadakara ndiyo, nemwi munozokangaidzwa ngeminda yemwakatsanangura. Ngokuti munozodai ngomuokhi uwo shakani rawo rinofota, nokudai ngomunda usina mvura. Wakagwinya unozodai ngemwenje wakaoma, nomushando wake unozodai ngetsatsi; iye nemishando yake zvinozobaka pamwepo, akuna unozozvidzima. Izwi raakaona Isaya mukororo waAmozi ngendaa yaJudha neJerusarema: Mumazuva achauya, mutunhu wemhatso yaMambo Mwari unozoemeswa kuita wakarebesa kupinda mitunhu yeshe, nawo unozomirudzwa padera pezvimitunhu; madzinza eshe anozoerera kuuya kwouri. Vanhu vazhinji vanozouya vechiti, “Uyai, ngatikwire kumutunhu waMambo Mwari, kumhatso yaMwari waJakobe, kuti atifundise njira dzake, nesu tihambe mumakwara ake. Ngokuti mupango unozobuda kubva muZioni, neizwi raMambo Mwari kubva Jerusarema.” Unozotonga pakati pemadzinza, unozokaraidza vanhu vazhinji; navo vanozopfura mashoti avo kuita miromo yemapadza, nemikhondo yavo kuita mapanga okutongora; dzinza arizomirudziri dzinza shoti, avachazofundiswi hondo nariini. A mhatso yaJakobe, uyai, ngatihambe mukujeka kwaMambo Mwari! Ngokuti wasiya njira yevanhu vako, O mhatso yaJakobe. Ngokuti vakazara ngemishuma inobva kumabvazuva, vafemberi kudai ngevaFiristia, navo vanobatana nyara nevana vevapara. Nyika yavo yakazara ngesirivha nomukore, upfumi hwavo auperi; nyika yavo yakazara ngemahachi, ngoro dzavozve adzina magumo. Nyika yavo yakazara ngemiedzaniso yokudira; vanogwadama pashi kudira mishando yenyara dzavo, kune chakaitwa ngezvinwe zvavo. Ndizvo munhu unopfaiswa, nevanhu vanodzaswa pashi; ndizvo usavarekerera. Potera mubuwe, uhware mubukuta, kubva mukutyisa kwaMambo Mwari, kubva muuthende hwoumambo hwake. Kuringirika kwokudzikudza kwevanhu kunozoiswa pashi, nokudzikudza kwevanhu kunozopfaiswa, naMambo Mwari ega unozokuriswa ngeiro zuva. Ngokuti rinozoapo zuva raMambo Mwari wehondo padera pavo veshe vanodzikudza, naavo vanehasha, nepadera pavo veshe vanodzimirudza; navo vanozoiswa pashi, nepadera pemisidhari yeshe yeRebhanoni, iyo yakareba nokukwirira, nepadera pemiokhi yeshe yeBhashani; nepadera pemitunhu yeshe mirebu, nepadera pezvimitunhu zveshe zvakakwirira; nepadera pamarusvingo eshe marebu, nepadera pemarukumbati eshe akashosherwa; nepadera pengarava dzeshe dzeTharshishi, nepadera pemikhumbi yeshe inodakadza. Nokudzikudza kwavanhu kunozopfaiswa, nokudzikudza kwevanhu kunozodzaswa pashi; naMambo Mwari ega unozokuriswa ngeiro zuva. Nemiedzaniso yokudira inozopera yaamho. Vanhu vanozopinda mumapako emapuwe, nomumirindi yemavhu, kubva pakutyisa kwaMambo Mwari, kubva muuthende hwoumambo hwake, naapo paanomiruka kutyisa nyika kakurutu. Ngeiro zuva vanhu vanozorasha kunhuta nokuzviremwaremwa miedzaniso yavo yokudira yesirivha, nemiedzaniso yavo yokudira yomukore, yevakadziitira pachavo kudira, kupinda mumapako emapuwe, nokuti mundutwe dzemawere, kubva pakutyisa kwaMambo Mwari, kubva muuthende hwoumambo hwake, apo paanomiruka kutyisa nyika kakurutu. Kunukuka kubva kuvanhu avo vane kufema kwavo kuri mukati mwemiro dzavo, ngokuti vanozoerengwa kuitenyi? Ngokuti, ringira, Mambo Mwari, Mambo Mwari wehondo, unotora sika nomudondoro kubva Jerusarema neJudha: zveshe zvinopa ndaramo, chingwa nemvura, ngwazi, murwi wehondo; mutongi, muprofeti, mufemberi nevakuru, nduna yemakumi mashanu, munhu unoremeredzwa, gota, ngwazi yokuita masaramuso nomuereketi unemazano. Neni ndichaita kuti varumbwana vadoko vaite vatongi vavo, nechiya dzichatonga padera pavo. Vanhu vachatambudzana, umwe noumweni, munhu weshe ngomuakirwana wake; mudoko uchashoora mukuru, usina shwiro uchashoora vanoremeredzwa. Umweni unozobata hama yake yemhatso yababa ake echiti, “Unezvokusimira, unozoita mutungamiriri wedu, nomurwi uyu wematongo unozoa pashi penyara yako.” Asi umweni ngeiro zuva unozodaidzira echiti, “Andizoiti murapi; mumhatso mwangu amuna chingwa nokuti zvokusimira; amuzondiiti mutungamiriri wevanhu.” Ngokuti Jerusarema rapumhunwa, Judha rawa, ngokuti kuereketa kwavo nezviito zvavo zvinorwisana naMambo Mwari, zvechiphikisana nouthende hwokuwapo kwake. Kuoneka kwehope dzavo kunopupura ndivo; navo vanoronza pamhene zvishaishi zvavo kudai ngeSodhoma, avazvifishi. Ihehe kwevari, kumweya yavo! Ngokuti vadziunzira pachavo zvakashata. Ronzai kunevakarurama, kuti zvinozovanakira, ngokuti vanozodya michero yezviito zvavo. Ihehe kwevari vakashata! Kushata kuchauya padera pavo, ngokuti muthuso wenyara dzavo unozopuwa kwevari. Vanhu vangu, vana ndivo vatambudzi vavo, nevakadzi vanotonga padera pavo. A vanhu vangu, vatungamiriri venyu vanomupausa, vanomurasha kubva munjira yemwaisisira kuhamba ndiyo. Mambo Mwari unomiruka kuereketa ndaa yake; unoema kutonga vanhu. Mambo Mwari unopotera mukutonga nevakuru vevanhu vake, nevatongi vavo: “Ndimwi mwakadya munda wemivhini; zvakachakatwa zvevarombo zviri mumhatso mwenyu. Munoda kuitenyi mwechiponda vanhu vangu kuita zvigurwa, nokudzengenesa hope dzevarombo?” unoronza Mambo Mwari, Mwari wehondo. Mambo Mwari wakati, “Ngokuti vakunda veZioni vanodzikudza, vanohamba nemitsipa yakarebeswa mberi, nemadziso anoemura, vanohamba vechinengama mukuhamba, vechigwinjirika ngetsoka dzavo, ndizvo Mambo Mwari unozochaya ngemhezi padera pemasoro evakunda veZioni, naMambo Mwari unozofukura pamhene utitinini hwavo.” Ngeiro zuva Mambo Mwari unozodusa mathuza kubva kutsoka dzavo, nemindanyara mumasoro avo, nendoro yakadai ngomwedzi; zvinemeso mathivhera, mabhengere, nemachira okusunga pahuro; madhuku akapombwa, mathuza omutsoka, mabhande, mabhokisi emitombo inegwema rakanaka, nousenga; ndandazi, nendandazi dzemiro; zvokusimira zvemadhiri, mikapeko, machari, nezvikwama zvokubata panyara; machira evherevheti, machira orukangaza akanaka, maduku, nemavheri. Kunozoitika kuti pandau yemitombo yakanaka kunozoapo kuora; pandau yebhande, pachaenda bote; pandau pebvudzi rakanasa kurukwa, mhanza; pandau yechokufuka chakanaka, chokufuka chesaka; pandau yokuringirika kwakanaka, madukuswa. Vamuna venyu vanozowa ngeshoti, nengwazi dzenyu muhondo. Nemisiwo yake inozochema nokubonda; mukuparadzwa, unozogara pashi pamavhu. Vakadzi vanomwe vanozobatira kumwamuna umwe ngeiro zuva vechiti, “Tinozodya kudya kwedu, nokusimira zvokusimira zvedu; titendere kuti tidaidzwe ngezina rako, kudusa chimene chedu.” Ngeiro zuva nhai yaMambo Mwari inozonaka kuringirika, inouthende, nemichero yenyika inozonakisisa, nokunaka kuringirika kwevakapokonyoka vaIsuraeri. Kunyazwi ndiani uwo unosara muZioni, nokugara muJerusarema, unozozwi wakacheneswa, weshe uwo wakanyorwa pakati paavo vanopona muJerusarema, kamwe apo Mambo Mwari asuka tsvina yevakunda veZioni, nokushamba madonhwe engazi kubva pakati peJerusarema ngomweya wokutonga nomweya wokupisha. Zvino Mambo Mwari unozosika padera pougaro hweshe hwoMutunhu weZioni nepadera pendau dzemishongano gore masikati, chiushi nokujeka kwomurazvu womuriro usiku. Ndizvo padera peshe pouthende panozoita chithibikiro. Rinozoapo tende rokuita bvute masikati kubva mukupisha, nokuita pokutizira, nokuita pokudzama mubvumo nokunaya kwemvura. Ndinozoembera mudikani wangu ngoma yomudikani wangu ngomunda wake wemivhini: Mudikani wangu waiya nomunda wemivhini pamutunhu unendimo kwayo. Wakaurima, akadusa mapuwe, akausima mavhini akanakisisa, wakaaka thawa pakati pawo, wakaita pokukamira vhini pakati pawo; wakaugarira echida kuti ubereke mavhini, asi wakabereka mavhini omushango. Zvino, imwimwi vagari vomuJerusarema nevanhu vaJudha, tongai, ndapota, pakati pangu nomunda wangu wemivhini. Chiinyi chendaisisira kuitirazve munda wangu wemivhini, chendisikazi kuita mukati mwawo? Ndizvo, apo ndakaringira kuti ubare mavhini, wakabara mavhini omushango ngenyi? Zvino izwai, ndinozomuronzera chendinozoita kumunda wangu wemivhini. Ndinozodusa rushosha rwawo, nawo uzodyiwa; ndinozoputsa rukumbati rwawo, nawo unozotsikwatsikwa pashi. Ndinozouparadza, auzotonongorwi nokuti kushakurwa; asi unozomera makato neminzwa; ndinozopangazve makore kuti asanayisa mvura padera pawo. Ngokuti munda wemivhini waMambo wehondo imhatso yaIsuraeri, nevanhu vaJudha muti wake unodakadza; naye wakakarira kuona kutonga kwakanaka, asi wakaona kuparadza ngazi; kuona kururama, asi wakaona kuchema. A imwimwi munotutsira mhatso nemhatso, munobatanidza munda nomunda metsa pasisina ugaro hwomunhu, asi imwimwi munogara mwega pakati penyika. Mambo Mwari wehondo unopika mukuzwa kwenzee dzangu, “Ngegwinyiso mhatso dzakawanda dzinozoita matongo, dzakakura nokunaka, dzisina vanhu. Mahekitha gumi omunda wemivhini anozobudisa maritha masere ega evhini. Zana nemakumi masere emaritha embeu anozobudisa maritha gumi nemasere ega ezviyo.” A, imwimwi munofumira kumiruka ngokukasira mangwanani, kuteera zvokumwa zvinoradzisa; munonzerereka pakati pousiku, metsa vhini ramuradzisa; kumadhiri enyu munoridzwa gitari, chidangari, ngoma yesimbi, munanzi nevhini, asi amupinimidzi ngomushando waMambo Mwari, amuzi kuringira mushando wenyara dzake. Ndizvo vanhu vangu vanoenda muubatwa ngokutama kuzia, nevanhu vavo vanoremeredzwa vanofa ngenzara, nechiunga chavo chinopera ngenyota. Ndizvo Sheori rakakudza kudisisa kwaro, nokushama muromo waro zvisina chipimo; vakuru vomuJerusarema nevazhinji vavo vanodzakamwo, chiunga charo naavo veshe vanodzikudza mukati mwaro. Munhu unokotamiswa pashi, nomunhu weshe unozodzaswa pashi; nemadziso evanodzikudza anozopfaiswa. Asi Mambo Mwari wehondo unokudzwa mukutonga kwakanaka, naMwari Wakachena unozodzionisa kuti wakachena ngokururama. Zvino vana vemakwai vanozodya kudai ngepambusho pawo, akakodzwa nevana vemakwai anozodya ari pakati pematongo. A, imwimwi munokweya kushata ngemapote ezvisina shwiro, munokweya zvishaishi kudai ngevanokweya ngebote rengoro, avo vanoti, “Ngaakasire, ngaakasire nomushando wake, kuti tiuone; nourongwa hwoUwo Wakachena waIsuraeri ngahukasire kuzadzisika, kuti tihuzie!” A, imwimwi munodaidza kushata kuti kunaka, nokunaka kuti kushata; munoisa chidima pandau yokujeka, nokujeka pandau yechidima; munoisa chinovava pandau yechinotapira, nechinotapira pandau yechinovava! A, imwimwi vakangwara mumadziso enyu, munokona mukuona kwenyu! A, imwimwi munoita ngwazi dzokumwa vhini, vamuna vanesimba mukukumanidza zvokumwa zvinoradzisa, imwimwi munopembedza vakashata ngendaa yokutengerwa, munodusa maruramiro ewakarurama! Ndizvo zvino, kudai ngomurazvu womuriro unodya matsotso, nokudai ngomurazvu unopisha matsengwe akaoma, ndizvo nzinde dzawo dzinoita dzakaora neruwa ravo rinozopwititika kudai ngebukuta; ngokuti varamba kupanga kwaMambo Mwari wehondo, nokushoora izwi roUwo Wakachena waIsuraeri. Ndizvo ushungu hwaMambo Mwari hunobaswa kuvanhu vake, naye unotambanudza nyara yake kwevari kuvachaya; mitunhu inozungunyika, nemiiri yaavo yakafa inoita kudai ngemarara mukati mwemapato. Ngeizvi zveshe ushungu hwake ahuzi kupera, nenyara yake ichakatambanudzwa nazvino. Unozomirudza mujeki kumadzinza ari kuretu, unozoridza kweya kwevari vari kumagumo enyika; ringira, vaapano vanorumba nokukasira. Apana naumwe wavo unoremba nokuti umwe unopumhunwa; apana naumwe unokutsira nokuti kuata; apana bhande remuchiunu rakasunhurika, apana rusinga rwemagwada runodambuka. Misee yavo yakapinza, nembita dzavo dzeshe dzakakungwa; makumbo emahachi avo anoringirika akadai ngebuwe rinokonza rinemiara, nemavhiri awo akadai ngechipupuri. Kurira kwawo kunodai ngemhondoro, vanorira kudai ngemhondoro itsva; vanobhonga nokubata mhuka, vanoitwara kuenda nayo, pasina naumwe unonunura. Vanozoiririra ngeiro zuva kudai ngokuungumira kworuandhe. Nokudai umwe echiringira kunyika, uchaona chidima nokutambudzika, nokujeka kunosvipiswa ngemakore. Mugore raakafa mambo Uzia, ndakaona Mambo Mwari akagara padendemaro, rakareba nokukwirira, nemipendero yemachira ake yakazadza temperi. Padera pake pakaema maserafimu; rimwe ngarimwe rawo raiya nemaphaphiro matanhatu: ngemairi rakafukidza hope yaro, ngemairi rakafukidza tsoka dzaro, ngemairi rakambururuka. Nerimwe rakadaidzira kunerimweni rechiti, “Wakachena, wakachena, wakachena, Mambo Mwari wehondo; nyika yeshe yakazara ngouthende hwake.” Nemadzeyo emadimba akazungunyiswa ngeizwi reawo akadaidzira, nemhatso yakazara ngechiushi. Apo ndakati, “Ihehe kwendiri! Ngokuti ndofa; ngokuti ndiri munhu unemiromo isikazi kusukika, ndinogara pakati pevanhu vanemiromo isikazi kusukika; ngokuti madziso angu aona Mambo, Mambo Mwari wehondo.” Zvino rimwe remaserafimu rakamburukira kwendiri, rinesimbe rinobaka munyara mwaro rerakatora ngembato kubva padera pearita. Naro rakagwama muromo wangu ndiro rechiti, “Ringira zvino, iri ragwama miromo yako; nokushata kwako kwabviswa, nokushaisha kwako kwaripirwa.” Zvino ndakazwa izwi raMambo Mwari rechiti, “Ndiani wendinozotuma, ndiani unozotihambira?” Neni ndakati, “Ndiri pano, nditumei.” Naye wakati, “Enda, uronzere vanhu ava: ‘Angirai kupurutana, asi amuzwisisi; angirai kuringira, asi amuonisisi.’ Kodza mwoyo yevanhu ava, utsiire nzee dzavo, upofomadze madziso avo; kuti vasaona ngemadziso avo, nokupurutana ngenzee dzavo, nokuzwisisa ngomwoyo yavo, vatenderuke, vatambiswe.” Zvino ndakati, “Mambo Mwari, mukuwo wakadini?” Naye wakati, “Metsa madhorobha aita matongo asina unogaremwo, nemhatso dzisina vanhu, nenyika iite shango yaamho; metsa Mambo Mwari abvisa vanhu kuvaisa kuretu, kuti kusare ndau isina chiro mukati mwenyika. Kunyazwi rupande rumwe rwegumi rwechisara mukati mwayo runozopishwazve, kudai ngomutherebhinti nokudai ngomuokhi, uwo guri rawo rinosara rakaema apo unowisirwa pashi. Mbeu yakachena ndiyo guri rawo.” Mumazuva aAhazi, mukororo waJothamu, mukororo waUzia, mambo waJudha, Rezini, mambo weAramu, naPheka, mukororo waRemaria, mambo waIsuraeri, vakakwira koorwa neJerusarema, asi vakakorera kurinyisa. Naapo mhatso yaDhavhidha yazwa kuti Aramu inobatana naEfuremu, mwoyo waAhazi wakazungunyiswa, pamwepo nomwoyo yevanhu vake, kudai ngemiti yegwasha inozungunyiswa ngedutu. Zvino Mambo Mwari wakati kunaIsaya, “Buda wooshongana naAhazi, iwewe naShearijashubhi mukororo wako, kumagumo omugero wegandwa redera, mupato romunda womusuki wezvokusimira, wechiti kwaari, ‘Ngwara, unyarare; usatya, usaita kuti mwoyo wako udemere ngendaa yezvitsiki izvi zviiri zvinopwititika, ngendaa youshungu hunotyisa hwaRezini neAramu nomukororo waRemaria.’ Ngokuti Aramu naEfuremu nomukororo waRemaria vakapangana zvakashata ndiwe vechiti, ‘Ngatikwire koorwa naJudha, tirigure ngepakati, tirinyise riite redu, tiite mukororo waTabheeri mambo mukati mwaro.’ ” Ndizvo izvi zvinoronza Mambo Mwari, “Azvizoemi, azvizoitiki. Ngokuti soro reAramu Dhamasekusi, nesoro iDhamasekusi iRezini. Mukati mwemakore makumi matanhatu nemashanu, Efuremu rinozogurwa kuita zvigurwa, kuti risazoita dzinza. Soro raEfuremu iSamaria, nesoro raSamaria mukororo waRemaria. Kudai musikaemi mwakagwinya mukugonda, ngegwinyiso amuzotsimiswi.” Mambo Mwari wakaereketazve kunaAhazi echiti, “Kumbira chioniso chaMambo Mwari, Mwari wako; ngachidzame kudai ngeSheori, nokuti kukwirira kudai ngedenga.” Asi Ahazi wakati, “Andizokumbiri, andizoedzi Mambo Mwari.” Zvino Isaya wakati, “Izwai zvino, O mhatso yaDhavhidha! Chakanyanya kuita chiro chidoko here kwomuri kurembesa vanhu, kuti murembesewo Mwari wangu? Ndizvo Mambo Mwari emene unozokupa chioniso. Ringira, mhandwe inozoita mimba, inozobereka mukororo, inozodudza zina rake kuti Imanueri. Unozodya mafuta omukaka nouchi, panguva yaanozia kuramba zvakashata nokutsanangura zvakanaka. Ngokuti mwana asati azia kuramba zvakashata nokutsanangura zvakanaka, nyika iyo iri pamberi pako, iyo madzimambo mairi ounotya, inozosiiwa. Mambo Mwari unozounza mazuva asikazi kumboapo padera pako, nepadera pevanhu vako, nepadera pemhatso yababa ako, kubvira pazuva raakabva ndiro Efuremu kunaJudha, mambo weAsiria.” Ngeiro zuva Mambo Mwari unozoridzira murudzi nhunzi iri kurupande rwokugumisira rwendwizi dzeEgipite, nenyuchi iri munyika yeAsiria. Nadzo dzinozouya, dzinozomata dzeshe mumapani omushango, nomumapako, nepadera peminzwa yeshe, nepadera pemapfiba eshe. Ngeiro zuva Mambo Mwari unozopara ngechisvo chinobhadharwa, chakatorwa kubva seri kwoRwizi, ndiye mambo weAsiria soro nebvunzi retsoka, chinozoparazve ndebvu. Ngeiro zuva munhu unozorera konyana idzva nemakwai mairi. Unozodya mafuta omukaka ngendaa yokuwanda kwomukaka wedzinobudisa, ngokuti weshe unosara munyika unozodya mafuta omukaka nouchi. Ngeiro zuva ndau dzeshe apo paisiita mivhini gumi remazana, yaitengwa ngezvigurwa zvesirivha gumi remazana, inozoita makato neminzwa. Vanhu vachaendayo nembita nemisee, ngokuti nyika yeshe inozoita makato neminzwa. Zvimitunhu zveshe zvairimwa ngemapadza, avazogumipo vanotya makato neminzwa, asi zvinozoita ndau yokuushira kabi, nokutsikwa tsikwa ngemakwai. Zvino Mambo Mwari wakati kwendiri, “Tora rusamba rukuru, unyore padera parwo ngepheni romunhu, ‘RaMaheri-sharari-hashibhazi,’ ruite zvapupu ndini zvinogondeka mukunyora, Uria mupristi, naZekharia mukororo waJebherekhia.” Neni ndakaenda kumuprofeti womukadzi; naye wakaita mimba, akabereka mukororo. Zvino Mambo Mwari wakati kwendiri, “Dudza zina rake kuti, ‘Maheri-sharari-hashibhazi;’ ngokuti mwana asati azia kuchema kuti, ‘Baba angu,’ nokuti, ‘Mai angu,’ upfumi hweDhamasekusi nezvakachakatwa zveSamaria zvinozotorwa ndimambo weAsiria.” Mambo Mwari wakaereketazve kwendiri echiti, “Ngokuti vanhu ava vakaramba mvura yeShiroa, iyo inoerera padoko padoko, navo vanodakara ndiRezini nomukororo weRemaria, ndizvo zvino, ringira, Mambo Mwari unounza padera pavo mvura yorwizi inesimba kuvaparadza, yakawanda, mambo weAsiria, nouthende hwake hweshe; inozomiruka padera pemigero yayo yeshe, nokukukuzva mahumbikumbi arwo eshe; inozokukukuzva kupinda ngomuJudha, kudai ngendambi nokudururwa kubva padera; inozoguma nokumutsipa; nokutambanudzwa kwemaphaphiro ake kunozozadza kupamhama kwenyika yako, iwewe Imanueri.” Batanai pamwepo, imwimwi vanhu, mupere simba; purutanai, imwimwi mweshe mwenyika dziri kuretu; mudzisunge pachenyu, nemwi mupere simba; dzisungenyi pachenyu nemwi mupere simba! Panganai pamwepo, asi kunozoizwa kusina shwiro; ereketai izwi, asi arizoemi, ngokuti Mwari unesu. Ngokuti Mambo Mwari wakaereketa kudaro kwendiri apo nyara yake inesimba yaiya padera pangu, akandidzidzisa kuti ndisazohamba munjira mwevanhu ava echiti, “Musati idumba, zveshe zvavanozoronza vanhu ava kuti idumba; musatya zvevanotya, nokuti kukaruka. Asi Mambo Mwari wehondo, ndiye womunozoronza kuti wakachena; ityai iye ega, ngaaitezve womunokaruka ndiye. Ndiye unozoita ndau yokudira yakachena, buwe rokuvafura ndiro; noruware runopumhunisa kumhatso dzeshe dzaIsuraeri, murau nechindondo kwevari vanogara Jerusarema. Nevazhinji pakati pavo vanozopumhunwa; vanozowa nokugurwa; vanozoteiwa nokubatwa.” Sunga chapupu, namera chironzo nedzidziso pakati pevadzidzi vangu. Neni ndinozogarira Mambo Mwari, uwo unofisha hope yake kubva kumhatso yaJakobe, neni ndinozogonda mwaari. Ringira, inini nevana vowakandipa Mambo Mwari tiri zvioniso nemishamiso mukati mwaIsuraeri zvinobva kunaMambo Mwari wehondo, uwo unogara muMutunhu weZioni. Naapo vanhu vanozoti kwomuri, “Tsvakai kwevari vanemweya yokufembera, nokuman'anga anomukirwa, naavo vanovhuruvhuta; akudikani here kuti vanhu vabvunze zvimwari zvavo, vakafa ngendaa yevanopona?” Kumupango nokuchapupu! Kudai vasikaereketi kudai ngeizwi iri, indaa yokuti akuna kujeka mukati mwavo. Navo vanozohamba kupinda ndimwo, vechitambudzika, vanenzara, naapo vaanenzara; vanozonyangadzwa, vanozotuka mambo wavo, nezvimwari zvavo. Vanozoringira mudenga, nokuti vanozoringira pashi; asi vanozoona kwega madambudziko nechidima, kusvipa kwokurwadziwa; vanozodzingwa muchidima chakakora. Asi akuzoapo chidima kwevari avo vaiya mukurwadziwa. Munguva yokutanga wakaunza kutambudzika kunyika yeZebhuruni nenyika yeNafitari, asi munguva ichauya unozoikudza kakurutu ngenjira yeparuandhle seri kweJorodhani, muGarire remadzinza. Vanhu avo vakahamba muchidima vakaona kujeka kukuru; avo vakagara munyika yebvute rokufa, kujeka kwakajeka padera pavo. Wakawanza dzinza, wakawanza kudakara kwaro; vanodakara pamberi pako kudai ngokudakara kwepakucheka, kudai ngokudakara kwevanhu avo vanopaurirana zvakachakatwa. Ngokuti wagura joka raivaremera, nemwamba wairemera makhadza avo, ndonga yomutambudzi wavo, iwewe wagura kudai ngezuva raMidhiani. Ngokuti magwada eshe evanorwa hondo akatsikatsika, nezvokusimira zvakamwirira ngengazi zvichapishwa kudai ngehuni dzomuriro. Ngokuti tabarirwa mwana, mukororo wapuwa kwetiri; noumambo unozogara pamapfudzi ake; nezina rake rinozodudzwa rechiziwi Gota rinoshamisa, Mwari Une-simba, Baba emhera nariini, Muzvare wokunyarara. Umambo hwake unozoramba wechikura, kuchaapo kunyarara kusina magumo padendemaro raDhavhidha nepaumambo hwake. Unozouemesa nokuugwinyisa ngokutonga kwakanaka nokururama, kubvira zvinopano mhera nariini. Kugwinyisisa kwaMambo Mwari wehondo kunozoita izvi. Mambo Mwari wakatumira izwi rokutonga Jakobe, naro rakawira padera paIsuraeri; nevanhu veshe vanozozvizia, Efuremu naavo vanogara muSamaria, asi vanoronza ngokudzikudza nemanyau mumwoyo vechiti, “Zvidhina zvawa, asi tinozoaka ngamapuwe akatsetswa; mionde yatemerwa pashi, asi tinozoisa misedhare pandau yayo.” Ndizvo Mambo Mwari wamirudzira magaa kuvarwisa, nokumusa magaa avo, vaAramu ngokumabvazuva, vaFiristia ngokumabirirazuva, navo vamedza Isuraeri ngomuromo wakashama. Ngeizvi zveshe ushungu hwake ahuzi kupetuka, asi nyara yake ichakatambanudzwa nazvinopano. Vanhu avazi kutenderukira kwaari uwo wakavachaya, nokuti kutsvaka Mambo Mwari wehondo. Ndizvo Mambo Mwari unozogura soro raIsuraeri nomuswe, dai romuchindwi netsanga, ngezuva rimwe. Musharuka nounoremeredzwa ndiye soro, muprofeti unodzidzisa manyepo ndiye muswe. Ngokuti avo vanovatungamirira vanoita kuti vapauke, naavo vanotungamirirwa ndivo vanosiyiwa mukukangaidzwa. Ndiyo ndaa Mambo Mwari aazodakariri majaha avo, aazokunguririzve nherera neshirikadzi; ngokuti veshe vasikadi Mwari nevaiti vezvakashata, nemiromo yeshe inoereketa upenzi. Ngeizvi zveshe ushungu hwake ahuzi kupetuka, asi nyara yake ichakatambanudzwa nazvinopano. Ngokuti kushata kunopisha kudai ngomuriro; kunopedza makato neminzwa, kunopisha matenhere omugwasha, nazvo zvinokwira mumakore kudai ngegore rechiushi. Kubudikidza ngoushungu hwaMambo Mwari wehondo nyika yakatsva, nevanhu vakaita kudai ngehuni dzomuriro; akuna munhu unozokungurira hama yake. Vanobvuka ngokumudyo, asi vanoita nzara, vanodya ngomuoshwe, asi avaguti; umwe ngaumwe unodya nyama yomuoko wake. Manase unodya Efuremu, Efuremu unodya Manase, navo pamwepo vanorwisa Judha. Ngeizvi zveshe ushungu hwake ahuzi kupetuka, asi nyara yake ichakatambanudzwa nazvinopano. A, imwimwi munoita mitemo isina kururama, avo vanonyora zviemeso zvinotsikirira, kupaukisa parutii vatami kubva mukutonga kwakanaka, nokudusa zvakarurama zvevarombo vevanhu vangu, kuti shirikadzi dziite dzachakatwa dzavo, vechibira nherera. Munozoitenyi ngezuva rokuororwa, mukati mwokuparadzwa kunozobva kuretu? Munozotizira kunaani koodetserwa? Munozosiya pari upfumi hwenyu? Apana chiro chinosara asi vanozokotama pashi pakati pemabhanditi, nokuti kuwira pashi pakati pevaurawa. Ngeizvi zveshe ushungu hwake ahuzi kupetuka, asi nyara yake ichakatambanudzwa nazvinopano. A Asiria, ndonga youshungu hwangu nenduku iri munyara mwavo ushungu hwangu. Ndinomutuma koorwisa dzinza risikadi Mwari nokuvanhu voushungu hwangu ndinomupanga, kutora zvinochakatwa nokutora zvakabvukwa nokuvatsika tsika pashi kudai ngematope omumapato. Asi izvi andizvopi zvaaipinimidza kuita kudaro, nokuti kuwa nazvo mumwoyo wake; asi kuripo mumwoyo mwake kuda kuuraya nokugura madzinza mazhinji. Ngokuti unoti, “Nduna huru dzangu dzehondo dzeshe adzisiri madzimambo here? Kharino arizi kudai ngeKharkhemishi here? Hamathi arizi kudai ngeAriphadhi here? Samaria arizi kudai ngeDhamasekusi here? Kudai ngenyara yangu yakagumira umambo hwemiedzaniso yokudira, iyo miedzaniso yayo yakatsetswa yaiya yakakura kupinda iyo yeJerusarema neyeSamaria, andizoiti here kuneJerusarema nemiedzaniso yaro yokudira kudai ngezvendakaita kuSamaria nemiedzaniso yaro yokudira?” Naapo Mambo Mwari apedza mushando wake weshe padera poMutunhu weZioni nepadera peJerusarema, unoti, “Ndinozojezisa zvinobva mumwoyo unodzikudza wamambo weAsiria, nemanyau okudzikudza mumadziso ake. Ngokuti unoti, ‘Ngesimba renyara yangu ndakazviita, zvengoungwaru hwangu ngokuti ndinokuzwisisa; neni ndakadusa migano yevanhu, ndakabvuka upfumi hwavo; kudai ngomukono ndakadzasa pashi vanhu vanogara pamadendemaro. Nyara yangu yakaona upfumi hwevanhu, kudai ngechisaki; nokudai ngounounganidza mazanda akasiiwa, ndizvo ndakaunganidzazve nyika yeshe; apana naumwe waizungunyisa phaphiro, nokuti waishama muromo, nokuti kurira.’ ” Demo rinoganzira unotema ndiro here nokuti saho inozodzikudza kupinda unoihambisa here? Kudai ngendonga ingazungunyisa avo vanoimirudza, nokuti mudondoro unodzimirudza ausiri muti! Ndizvo Mambo Mwari, Mambo Mwari wehondo unozotumira nhenda inoondesa pakati pevakafema vake vehondo; nepashi pouthende hwake unozobasa kupisha kwakadai ngokwomuriro. Kujeka kwaIsuraeri kunozoita muriro, noWakachena wake unozoita murazvu; unozobaka nokupedza minzwa nemakato ake ngezuva rimwe. Uthende hwegwasha rake nohwomunda wake hunobara zvakawanda Mambo Mwari unozopedza, zveshe mweya nomuiri, kudai ngomunhu murwere unoramba echipera muiri. Nemiti inosara yegwasha rake inozoita mishomani nomwana mudoko ungakona kuinyora pashi. Ngeiro zuva, vanosara vaIsuraeri, naavo vanopona vemhatso yaJakobe, avachazotseyami padera pouwo wakavaponda; asi vanozotseyama padera paMambo Mwari, Uwo Wakachena waIsuraeri, mugwinyiso. Unosara, eya, unosara waJakobe unozohwirira kunaMwari unesimba. Kunyazwi vanhu vako vaIsuraeri vakadai ngejecha roruandhle, asi unosara wavo unozohwirira. Kuparadzwa kwakaemeswa, kunoerera kururama. Ngokuti Mambo Mwari, Mwari wehondo, unozoita magumo akaperera, kudai ngeakaemeswa. Ndizvo Mambo Mwari, Mwari wehondo, unoronza izvi, “A vanhu vangu vanogara muZioni, musatyiswa ngevaAsiria apo voomuponda ngendonga, nokumirudza midondoro yavo kwemuri, kudai ngezvakaita vaEgipite. Ngokuti mumukuwo mudodoko yaamho ushungu hwangu huchapera, nokunyangadzwa kwangu kuchatungamirirwa mukuparadzwa kwavo. Mambo Mwari wehondo unozovamirudzira mboma, kudai ngezvaakaponda vaMidhiani pabuwe reOrebhi; unozomirudza ndonga yake padera poruandhle, unozoimirudza kudai ngezvaakaita muEgipite. Ngeiro zuva mutwaro wake unozobviswa kubva papfudzi rako, nejoka rake rinozoparadzwa kubva pamutsipa wako.” Wauya kuAiathi, wahamba ngemuMigroni; paMikhimashi unongwaririsa mutwaro wake; vadarika mukana wakamanikana, paGebha vakaatapo usiku; Rama rinohuta; Gibhea raSauri ratiza. Boorera, iwewe mwanasikana waGarimu! Purutana, iwewe Raisha! Mupingure, Anathothi! Madhimena riri mukutiza; vanogara Gebhimu vanotiza kuti vapone. Nyamashi unoema muNobhi; unozomirudza chibhakera chake kumutunhu wemwanasikana weZioni, chimutunhu cheJerusarema. Ringira, Mambo Mwari, Mambo Mwari wehondo, unozotema matai ngesimba rinotyisa; vakareba mumuemo vanozotemerwa pashi, vanodzikudza vanozopfaiswa. Unozotemera pashi matenhere egwasha ngesanho, Rebhanoni nemiti yaro inozorigwa ngoUmwe Unesimba. Nhuu inozobuda kubva paguri raJesi, nenhai inozokura kubva kunzinde dzake. Mweya waMambo Mwari unozogara padera pake, mweya woungwaru nokuzwisisa, mweya wokupanga nesimba, mweya wokuzia nowokutya Mambo Mwari. Kudakara kwake kuri mukutya Mambo Mwari. Aazotongi ngokuona kwemadziso ake, nokuti kugura ngokuzwa kwenzee dzake. Asi ngokururama unozotonga varombo, nokutongera vakapfaa venyika ngokuedzanisa; unozoponda nyika ngendonga yomuromo wake, ngefemero remiromo yake unozouraya vakashata. Kururama kunozoita bhande rechiunu chake, nokugondeka kunozoita bhande romuzvizva zvake. Gava rinozogara nekakwai, nekhamba rinozoata pashi nekambudzi; konyana nemhondoro itsva nen'ombe yakakora zvinozogara pamwepo; nomwana mudoko unozozviusha. N'ombe nebere zvinozofura, vana vazvo vanozoata pashi pamwepo; mhondoro inozofura mwenje kudai ngekabi. Noruchiya runozotamba padera pomurindi wemhakure, nomwana warumurwa unozoisa nyara yake padera pebako rerovambira. Azvizoremadzi nokuti kuparadza pamutunhu wangu weshe wakachena; ngokuti nyika inozozara ngokuzia Mambo Mwari, kudai ngemvura inofukidza ruandhle. Ngeiro zuva runzinde rwaJesi runozoema kuita mujeki wevanhu; madzinza anozomutsvaka, nendau yougaro hwake inozozara ngouthende. Ngeiro zuva Mambo Mwari unozotambanudza nyara yakezve kwechipiri kutora avo vakasara vevanhu vake, kubva Asiria, Egipite, Phathrosi, Khushi, Eramu, Shina, Hamathi nezviwi zvoruandhle. Unozomirudzira marudzi mujeki, naye unozoshonganisa vakarashwa vaIsuraeri, nokuunganidza pamwepo vakaparadzirwa vaJudha kubva kumagumo marongomuna enyika. Godo raEfuremu rinozopera, ugaa hwaJudha hunozoparadzwa; Efuremu aachazoitiri Judha godo, naJudha aachazotambudzi Efuremu. Asi vanozojatira padera pevaFiristia ngokumabirirazuva; pamwepo vanozovachakata vanhu vokumabvazuva. Vanozotambanudza nyara yavo padera peEdhomu neMoabhi, nevanhu veAmoni vanozovapurutana. NaMambo Mwari unozoparadza yaamho rurumi rworuandhle rweEgipite; naye unozozungunyisa nyara yake padera porwizi nemhepo yake inopisha; unozoparadza kuita mironga minomwe, nokuita kuti vanhu vaambuke vasikatsiki mvura; ndizvo rinozoapo pato guru rinobva Asiria revakasara vevanhu vake, kudai ngezveraiyapo kuvaIsuraeri apo pevakakwira kubva munyika yeEgipite. Pairo zuva unozoti, “A, Mambo Mwari, ndinozokubonga, ngokuti kunyazwi waiya wakanditsenekera, kutseneka kwako kwakapera, newe ukandiembedzera. Ngegwinyiso, Mwari ruponeso rwangu; ndinozogonda, andizotyi, ngokuti Mambo Mwari, Mwari isimba rangu, nokugwinya kwangu; naye waita ruponeso rwangu.” Ngokudakara munozochera mvura kubva kuzvinyuka zvoruponeso. Nemwi munozoti ngeiro zuva, “Bongai Mambo Mwari, daidzai zina rake, teketesai zviito zvake pakati pemadzinza, ronzai kuti zina rake rinokudzwa. Embai kukudza Mambo Mwari, ngokuti waita zvakanakisisa; izvi zviziikanwe munyika mweshe. Daidzirai nokuemba ngokudakara, imwimwi munogara muZioni, ngokuti Wakachena waIsuraeri mukuru pakati penyu.” Izwi guru ngendaa yeBhabhuroni raakaona Isaya mukororo waAmozi. Emesai mujeki padera pomutunhu usina chiro, daidzirai kwevari, koperai ngenyara kuti vapotere kumisiwo yevakuru. Inini pachangu ndapanga vakacheneswa vangu, ndadaidza ngwazi dzangu dzendinodada ndidzo kuti dziunzidzire ngendaa yokutseneka kwangu. Purutanai, bope rechiunga riri pamitunhu, rakadai ngerevanhu vazhinji! Purutanai bope renyongano youmambo hwemadzinza akaungana pamwepo! Mambo Mwari wehondo unounganidza hondo yokurwa. Vanobva kunyika iri kuretu, kubva kumagumo ematenga, Mambo Mwari nezvokurwa ndizvo zvoushungu hwake, kuparadza nyika yeshe. Chemai, ngokuti zuva raMambo Mwari raapasinde; rinozouya kudai ngokuparadzwa kunobva kunoUwo Unesimba-reshe. Ndizvo nyara dzeshe dzinozotama simba, nomwoyo weshe womunhu unozonyunguruka. Navo vanozohuta, kurumiwa nokugomera kunozovabata; vanozorumiwa kudai ngomukadzi unobereka. Vanozoringirana vechishamiswa umwe noumweni; hope dzavo dzinozodai ngemirazvu yomuriro. Ringira, zuva raMambo Mwari rinouya, rinazvo zveshe kushata, ushungu hunotyisa, kuita kuti nyika iparadzwe, nokuparadza vashaishi vayo kubva mukati mwayo. Ngokuti nyeredzi dzomudenga nezviunga zvadzo adzizojeki; zuva rinozosvipiswa mukubuda mwaro, nomwedzi auzobudisi kujeka kwawo. Ndinozoorora nyika ngokushata kwayo, nevashaishi ngokushata kwavo; neni ndinozopedza kudzida kwevanodzikudza, nokuisa pashi kudada kwevanotyisa. Ndinozoita kuti munhu apinde kutsonga kunomukore wakaera, munhu kupinda mukore weOfiri. Ndizvo ndinozoita kuti matenga ahute, nenyika inozozungunyiswa kubva pandau yayo, ngoushungu hwaMambo Mwari wehondo, muzuva roushungu hwake hunotyisa. Kudai ngeshoma inorumbirirwa, nokuti kudai ngemakwai asina unoaunganidza, veshe vanozohwirira kuvanhu vavo, veshe vanozotizira kunyika dzavo. Kunyazwi ndiani unooneka unozobaiwa; kunyazwi ndiani unobatwa unozowa ngeshoti. Vana vavo vanozopwanyiwa kuitwa zvigurwa pamberi pemadziso avo; mhatso dzavo dzinozochakatwa, nevakadzi vavo vanozobhinywa. Ringira, ndinozomusa vaMedhe kuvarwisa, avo vasikapinimidzi ngesirivha nokudakarira mukore. Misee yavo inozofura majaha; avazoitiri nyasha vanoberekwa; madziso avo aazokunguriri vana. NeBhabhuroni, uthende hwoumambo, unaku nokudada zvevaKharadhea, rinozodai ngeSodhoma neGomora apo Mwari paakaparadza. Arizotongogarwi, nokuti kugarwa ngemibarirwana yeshe; muArabhia aazodzimiki tende rakepo; vaushi avazoiti kuti zvifuyo zvavo zviatepo pashi. Asi mhuka dzomushango dzinozoatapo pashi, nemhatso dzavo dzinozozara ngezvisikwa zvinorira; apo mhowani dzinozogarapo, mbudzi dzomushango dzinozotomukapo. Mapere anozorira mumapako aBhabhuroni, nemakava mungome dzawo dzakanaka; nguva yaro yaa pasinde, nemazuva aro anozofupiswa. Asi Mambo Mwari unozoitira Jakobe nyasha, uchazotsanangurazve Isuraeri, nokuvaisa munyika mwavo; nevapara vanozobatana navo, vanozodzibatanidza pachavo kumhatso yaJakobe. Madzinza anozovatora nokuvaunza kundau dzavo; nemhatso yaIsuraeri inozogara navo kuvaita hloko vamuna nevakadzi munyika mwaMambo Mwari; vanozobata avo vaiya vakavabata nokuvaita hloko; navo vanozotonga padera paavo vakavanesa. Naapo Mambo Mwari amupa kuzorora kubva mukusvipa mwoyo kwenyu, nokubva mukutya kwenyu, nokubva mukushanda kwakakonza kwemwakamanikidzwa kuita, munozotora uku kusvereredzwa kunamambo weBhabhuroni mwechiti, “Mutambudzi waita mapererenyi! Kutambudzwa kwaita mapererenyi! Mambo Mwari wakagura mudondoro wavakashata, nendonga yevatongi, iyo yakaponda vanhu ngoushungu ngokuponda kusikagumi, uwo wakatonga madzinza muushungu nokutambudza, kusina unomununurira. Nyika yeshe iyazorora, yanyarara; vanotanga kuemba. Misayiprusi inodakara ndiwe, misidhari yeRebhanoni yechiti, ‘Kubvira apo pewakarigwa pashi, akuna mutemi naumwe unokwira kutitemera pashi.’ “Sheori ngapashi rinomuswa, kushongana newe apo pounouya; rinokumusira vakafa kukuchingamidza veshe vaiya vakuru venyika; rinomirudza madzimambo eshe emadzinza kubva pamadendemaro avo. Veshe vavo vanozomupingura, vanozoti kweuri, ‘Newewo wakatama simba kudai tisu! Iwewe wadai tisu! Kudzikudza kwako kwadzaswa pashi muSheori, nebope rechimadangira chako; honye ndiwo mubhedhi uri pashi pako, nehonye ndicho chokufuka chako.’ ” O, kuwanyi kwewakaita kubva mudenga, iwewe nyeredzi yemasikati, mukororo wemambakwedza! Kutemerwanyi kwako pashi pamavhu, iwewe wakarigira pashi madzinza! Iwewe wakaronza mumwoyo mwako wechiti, “Ndinozokwira mudenga, ndinozokwidzidza dendemaro rangu padera penyeredzi dzaMwari; ndinozogara padera pomutunhu womushongano, kuretu kumarupande emagumo edera. Ndinozokwira padera pemakore; ndinozodziita pachangu wakadai ngoUwo-uri-padera-pazveshe.” Asi wadzaswa pashi muSheori, muudzamu hwokugumisira hwerindi. Avo vanokuona vanozokuringisisa, nokupinimidza ndiwe vechiti, “Uyu ndiye here munhu wakaita kuti nyika ihute, uwo wakazungunyisa umambo, uwo wakaita nyika kuti idai ngerubaya, wakaparadza maguta ayo, usikazi kuda kusunhura mabhanditi ake kuti vaende kanyi?” Eshe madzimambo emadzinza anoata muuthende, umwe ngaumwe muiba mwake. Asi warashwa kubanze kubva muiba rako, kudai ngenhai inonyangadza, yakafukidzwa ngevakaurawa, avo vakabaiwa ngeshoti, avo vanodzaka pashi pamapuwe omurindi, kudai ngomuiri wakafa watsikwatsikwa pashi petsoka. Auzoshonganiswi navo mukuikwa, ngokuti waparadza nyika yako, wauraya vanhu vako. Mibarirwana yevanoita zvakashata aizokarakadzwi mhera nariini. Nasirirai kuurawa kwevakororo vake ngendaa yokushaisha kwemadzibaba avo. Usavatendera kuti vamuke, vagare nhaka yenyika, nokuti vazadze hope yenyika ngemadhorobha. “Ndinozomiruka, ndirwisane navo,” unoronza Mambo Mwari wehondo. “Ndinozogura kubva Bhabhuroni zina raro, nevakasara, dzinza nemibarirwanwa,” unoronza Mambo Mwari. “Ndinozoriita ndau inogara mazizi, nemakandwa emvura; neni ndinozoritsvaira ngomutsvairo unouraya,” unoronza Mambo Mwari wehondo. Mambo Mwari wehondo wapika echiti, “Ngegwinyiso kudai ngezvendapinimidza, ngokudaro zvinozoitika; nokudai ngezvendaemesa, ndizvo zvinozoitika. Ndinozogura vaAsiria munyika mwangu, napadera pemitunhu yangu ndinozomutsikatsika pashi petsoka; joka rake rinozobviswa kubva kwevari, nomutwaro wake kubva pamakhadza avo. Uhu ndihwo urongwa hwakarongwa ngendaa yenyika yeshe; neiyi ndiyo nyara yakatambanudzwa padera pemadzinza eshe.” Ngokuti Mambo Mwari wehondo wakazvironga, ndiani ungazvikunukudza? Nyara yake inotambanudzwa, ndiani ungaipfinyisa? Mugore raakafa mambo Ahazi, izwi iri guru rakauya. Musadakara, imwimwi mweshe vaFiristia, kuti ndonga yakamuponda yaguka, ngokuti kubva kunzinde yenyoka kunozobuda buura, nechinoberekwa ndiro chinozoita nyoka yomuriro inombururuka. Dangwe romurombo rinozodya, nouwo unotama unozoata pashi mukungwaririka; asi ndinozoita kuti nzinde dzako dzife ngenzara, nevanosara vako ndinozovauraya. Boorera, O iwewe musiwo; chema, iwewe dhorobha; nyunguruka mukutya, iwewe nyika yeshe yeFiristia. Ngokuti chiushi chinobva dera; akuna unozopauka kubva pandau yake yaakaemeserwa. “Umwe unozopingurenyi kwevari vatumwa vedzinza? Mambo Mwari wakaemesa Zioni, nevarombo pakati pevanhu vake vanozohwaramwo.” Izwi guru ngendaa yevaMoabhi. Ngokuti Ari rakaparadzwa usiku, Moabhi rakaparadzwa; ngokuti Kiri rakaparadzwa usiku, Moabhi rakaparadzwa. Dhibhoni wakwira kumhatso yezvimwari, kundau dzakakwirira koochema; Moabhi unochemera Nebho naMedhebha. Soro reshe rine mhanza, nendebvu dzeshe dzinoparwa. Mumapato vanozodzisimidza ngemachira emasaka; padera pematenga emhatso nomundau dzemitambo, weshe unoboorera nokunyunguruka mumisodzi. Heshibhoni naEreare anoboorera; mazwi awo anozwika metsa kuJahazi; ndizvo vamuna vanezvokurwa veMoabhi vanochema kakurutu; mweya wake unohuta. Mwoyo wangu unochemera Moabhi; vanotiza varo vanotizira Zoa, Egirathisherishiya. Ngokuti pakukwidzwa Ruhithi, vanokwira vechichema; mupato rinoenda Horonaimu vanoboorera kuchemera kuparadzwa. Mvura yaNimirimu inooma; mwenje wafota, zvitsva zvakorera kukura, akuna chiro chakasvipira. Ndizvo uwandu hweizvo zvevakauyirwa ndizvo, neizvo zvevakaunganidza, vanozvitwara kuenda nazvo kuambuka seri kwerwizi rwemishambagwena. Ngokuti kuchema kwatendenedza migano yeMoabhi; kuboorera kwacho kwakaguma Egiraimu, nokuboorera kunoguma Bheerierimu. Ngokuti mvura yeDhibhoni yakazara ngengazi; asi ndichaunza zvimweni zvakawanda padera peDhibhoni, mhondoro padera pouwo wakapokonyoka weMoabhi, nepadera paavo vakasara venyika. Tumirai makwai kumutongi wenyika kubva Sera, ngenjira yomushango, kuguma kumutunhu wemwanasikana weZioni. Kudai ngeshiri yabviswa musaki inozungaira, ndizvo zvinoita vanasikana veMoabhi pamazambuko eArinoni. “Pangai, ita kutonga kwakanaka; mumvuri wako ngauite kudai ngousiku pakati pemasikati; fishai avo vakadzingwa; musapira vanotiza. Vakadzingwa veMoabhi ngavagare pakati penyu, ita bako kwevari kubva kumuparadzi.” Naapo mutambudzi pasisina, nokuparadzwa kwapera, nevaurayi vapedzwa munyika, zvino dendemaro rinozoemeswa munyasha dzinorudo mutende raDhavhidha, naye unozogara padera paro mukugondeka mutongi unotsvaka kutonga kwakanaka, naye echikasira kuunza kururama. Takazwa ngokudzikudza kweMoabhi, unodzikudza kakurutu! Kudzitunhumadza kwake, kudzikudza kwake, noushungu hwake, kuganza kwake, akuna shwiro. Ndizvo Moabhi ngaacheme, veshe umwe ngaumwe ngaachemere Moabhi. Muchatsumba kakurutu makhekhe emavhini eKirharesethi. Ngokuti minda yeHeshibhoni inozofuhuka, nemivhini weSibhima; madzimambo emadzinza akagura miti yakapinda kunaka yayo; akaguma Jaza, akapauka kuenda murubaya; matai ayo akatambarara, akaambuka ruandhle. Ndizvo ndinochema kudai ngokuchema kweJaza ngendaa yemivhini yeSibhima; ndinokunyakatisa ngemasodzi angu, iwewe Heshibhoni naEreare; ngokuti kudakara kwemichero yenyu yezienza nokuvhuna kwenyu kwapera. Kudakara nokudakadzwa kwabviswa kubva kumunda unendimo; nomuminda yemivhini akuna ngoma dzichaembwa, nokuti bope rokudakara; vasvini avazosvini vhini muzvisviniro zvavo; ndanyaradza bope ravo. Ndizvo mwoyo wangu unozorira kudai ngembira ngendaa yeMoabhi, nemarupande angu omukati ngendaa yeKirheresi. Naapo Moabhi paanodzionisa pachake, apo paanodzitambudza pachake padera pendau yakakwirira, apo paanouya kundau yake yakacheneswa kookumbira, aazonyisi akadi. Iri ndiro izwi raakaereketa Mambo Mwari ngendaa yeMoabhi karetu. Asi zvino Mambo Mwari unoti, “Mumakore matatu, kudai ngokuerengwa kwemakore ewakathorwa kushanda, uthende hweMoabhi hunozodzaswa mukushoorwa, kunyazwi inechiunga chikuru; nevanosara vanozoita vashomani yaamho, vasina simba.” Izwi guru ngendaa yeDhamasekusi. “Ringirai, Dhamasekusi rinozoemeswa kuti risachaita dhorobha, naro rinozoita murwi wematongo. Madhorobha aAroeri anozotizwa mhera nariini; anozoita ndau dzemafuro ezvifuyo, awo anozoata pashi, akuna naumwe unozoita kuti atye. Bako richabviswa kubva muEfuremu, noumambo kubva Dhamasekusi; nevanosara veAramu vanozodai ngouthende hwevana vaIsuraeri,” unoronza Mambo Mwari wehondo. “Ngeiro zuva uthende hwaJakobe hunozotsonzwa, nokukora kwenyama yake kunozoonda. Nokudai ngaapo mucheki paanounganidza zviyo zvakaema, nomuoko wake unocheka mitsonzoti, nokudai ngaapo umwe echiunganidza zviyo mubani reRefaimu. Hwarakwatwa dzemaorivhi dzinozosiyiwamwo apo miti yemaorivhi yazungunyiswa, michero miiri nokuti mitatu inozosara kumagumo edai redera, mirongomuna nokuti mishanu kumagumo ematai anobereka kakurutu,” unoronza Mambo Mwari, Mwari waIsuraeri. Ngeiro zuva vanhu vanozoringira kunoMuiti wavo, nemadziso avo anozoringira Wakachena waIsuraeri. Avazoringiri kumaarita, mushando wenyara dzavo, navo avazoringiri izvo zvakaitwa ngezvinwe zvavo, nokuti kuchimwari Ashera, nokuti maarita okupisha mitombo inegwema rakanaka. Ngeiro zuva madhorobha avo akagwinya anozodai ngendau dzakatizwa dzevaHivhi nevaAmori, idzo dzevakatiza ngendaa yevana vaIsuraeri; kunozoapo kuparadzwa. Ngokuti wariyarwa Mwari woruponeso rwako, auzi kupinimidza ngeBuwe rokuhwara kwako; ndizvo kunyazwi unosima zvisimwa zvinodakadza, unosima zvisimwa zvezvimwari zvisikaziikanwi, kunyazwi unganyazviita kuti zvikure, ngezuva rounozvisima ndiro, nokuita kuti mbeu yako itumbuke mumangwanani ewasima; asi kucheka kunozotiza ngezuva rokutsumba nokusvipo mwoyo kusikabviri. A, kutinhira kwevanhu vakawanda, vanotinhira kudai ngokutinhira kunoita ruandhle! A, kurira kwemadzinza, anorira kudai ngokurira kwemvura inesimba! Madzinza anorira kudai ngokurira kwemvura zhinji, asi Mwari unozoakaraidza, nawo anozotizira kuretu, nokutorwa ngedutu, kudai ngamazungu padera pemitunhu, pamberi pedutu nebukuta rechamupupuri pamberi pedutu guru. Madeekoni, ringira, kuripo kutyiswa! Kusati kwaedza apachina. Ndicho chikoaniswa chaavo vanotishaishira, nokuthuswa kwaavo vanotichakata. A, nyika iyo inozwika kurira kwemaphaphiro, iri mberi kwendwizi dzeEthiopia, iyo inotuma vaemereri ngomuNaire, mukati mwemikhumbi yemajekacheka, padera pemvura! Endai, imwimwi vaemereri vanokasira, kudzinza rakareba nokuserera, kuvanhu vaityiwa pasinde nokuretu, dzinza rinesimba nokunyisa, nyika yawo inogurwa miganu ngendwizi! Imwimwi mweshe vagari vomunyika, imwimwi munogara padera penyika, apo mujeki wamirudzwa padera pemitunhu, ringirai! Naapo gwama perinoridzwa, izwai! Ngokuti izvi ndizvo zvaakaronza kwendiri Mambo Mwari echiti, “Ndinozoringira ngokunyarara ndiri mundau yangu yokugara; kudai ngokupishwa kwezvakasimwa ngezuva rakatijee kujeka, kudai ngegore rebeto mukupisha kwokucheka. Ngokuti kusati kwachekwa, apo kutumbuka kwapinda, nemaruva oita mavhini anoibva, unozotema nhuu ngemapanga okutongora, nematai anotambarara unozoadusa nokuatema. Anozosiiwa pamwepo kushiri dzemitunhu, nokuzvikara zvenyika. Neshiri dzinozoadya ngomukuwo wezienza, nemhuka dzeshe dzenyika dzinozoadya ngomukuwo wechando.” Ngomukuwo uwo zvipo zvinozounzwa kunaMambo Mwari wehondo kubva kune vanhu vakareba nokuserera, kubva kuvanhu vanotyisa vari pasinde nevari kuretu, dzinza rinesimba nokunyisa, nyika yavo inogurwa migano ngendwizi, kuMutunhu Zioni, kundau yezina raMambo Mwari wehondo. Izwi guru ngendaa yeEgipite. Ringirai, Mambo Mwari unogadha padera pegore rinohambisa, naye unouya Egipite; miedzaniso yokudira yeEgipite inozohuta ngokuapo kwake, nemwoyo yevaEgipite inozonyunguruka mukati mwavo. “Neni ndinozomusa vaEgipite kumukira vaEgipite; navo vanozorwisana umwe neumweni, muakirwana nomuakirwana wake, dhorobha nedhorobha, umambo noumambo. Mweya wevaEgipite unozopera mukati mwavo, neni ndinozoparadza urongwa hwavo; navo vanozobvunza kumiedzaniso yokudira nokumweya yevakafa nezvipoko naavo vanobudirwa nomweya inoziikanwa. Ndinozopira vaEgipite munyara yamambo unoushungu; mambo unotyisa unozotonga padera pavo,” unoronza Mambo Mwari wehondo. Mvura yeNaire ichapwa, norwizi runozoita makandwa nokuoma; migero yarwo inozonuhwa, matai erwizi Naire anozopwa nokuoma, tsanga nenhokwe zvinozofota. Kuchaapo ndau dzisina chiro pasinde peNaire pamahumbikumbi eNaire; nazvo zveshe zvinosimwa pasinde peNaire zvinozooma, zvechitorwa, azvichazoapopi. Avo vanobata hove vanozotsumba, navo veshe vanokandira zviyedzo muNaire vanozochema, naavo vanotambanudza zvitaa padera pemvura vanozopera simba. Vashandi vanoshanda murukangaza runofenurwa vanozopera simba, varuki nevanoruka tambo yakanakisa vanozotsverudzwa. Varuki vawo vanozopera simba, naavo veshe vanoshandira muthuso vanozosvipiswa mwoyo. Vatongi veZoani mapenzi emene; vapangi vakangwara vaFaro vanopa kupanga kwoupenzi. Mungaita maronzerenyi kunaFaro kuti, “Ndiri umwe weavo vakangwara, mubarirwana wemadzimambo ekare?” Vari pari zvino vanhu vako vakangwara? Ngavakuronzere nokuita kuti zviziikanwe kweuri icho Mambo Mwari wehondo chaakaronga ngendaa yeEgipite. Vatongi veZoani vaita mapenzi, nevatongi veNofi vakachengedzerwa; avo vari buwe repakhona remadzinza ayo vakapaukisa Egipite. Mambo Mwari wakadurura mweya wokukangaidza mukati mwavo; navo vaita kuti Egipite ithethereke kumishando yeshe yayo, kudai ngomunhu unoraradza unopeyama peyama mumarutsi ake. Auzoapo mushando weEgipite ungaitwa ngesoro nokuti muswe, dai romubvumo nokuti tsanga ringakona kuitira Egipite chiro. Ngeiro zuva vaEgipite vanozodai ngavakadzi, nokuhuta ngokutya pamberi penyara yaMambo Mwari wehondo, yaanomirudza kurwa navo. Nenyika yaJudha inozoita inotyisa kuvaEgipite; weshe kwaari uwo unochironzerwa unozotya mukati mwake ngendaa yourongwa hwaMambo Mwari wehondo, waanoronga ndivo. Ngeiro zuva anozoapo madhorobha mashanu munyika yeEgipite anoereketa ndimi yevaKhenani, nokupika kunaMambo Mwari wehondo. Rimwe reaya rinozodudzwa kuti Dhorobha reZuva. Ngeiro zuva rinozoapo arita raMambo Mwari pakati penyika yeEgipite nesika kunaMambo Mwari kumiganu yayo. Nayo inozoita chioniso nechapupu kunaMambo Mwari wehondo munyika yeEgipite; apo pevanochemera kunaMambo Mwari ngendaa yevatambudzi, naye unozovatumira muponesi nomuvikiri; naye unozovanunura. Mambo Mwari unozoita pachake kuti aziikanwe kuvaEgipite, navaEgipite vanozozia Mambo Mwari ngeiro zuva, vanozoita mubairo nomudiro; navo vanozopika mhiko kunaMambo Mwari nokudziita. Mambo Mwari unozochaya Egipite, kuchaya nokuponesa; vanozopetuka kunaMambo Mwari, naye unozopurutana mikumbiro yavo, nokuvaponesa. Ngeiro zuva pato rinozoapo rinobva Egipite kuenda Asiria, nevaAsiria vanozouya kuEgipite, nevaEgipite kuenda Asiria; nevaEgipite vanozodira nevaAsiria. Ngeiro zuva Isuraeri rinozoita rechitatu; pamwepo Egipite neAsiria, nechifumiso pakati penyika, avo vaafumisa Mambo Mwari wehondo echiti, “Ngavafumiswe vaEgipite vanhu vangu, nevaAsiria mushando wenyara dzangu, nevaIsuraeri nhaka yangu.” Mugore iro nduna huru iyo yakatumwa ndimambo Sarigoni, mambo weAsiria, yakauya Ashidhodhi, akarwa naro, akaritora, ngouwo mukuwo Mambo Mwari waiya aereketa kunaIsaya mukororo waAmozi echiti, “Enda, usunhure machira emasaka kubva muchiunu chako, ubvise magwada patsoka dzako.” Naye wakaita kudaro, echihamba mutitinini asina magwada patsoka. Zvino Mambo Mwari wakati, “Kudai ngomuranda wangu Isaya wahamba mutitinini asina magwada patsoka makore matatu kuita chioniso nechishamiso kuEgipite nokuEthiopia, ndizvo mambo weAsiria uchatungamirira vaEgipite vakaitwa vabatwa, nevaEthiopia kuvaita hloko, vatsva nevasharuka vari mititinini vasina magwada patsoka, vane magaro asikazi kufukidzwa, kutsverudza Egipite. Navo vanozopera simba nokutsveruka ngeEthiopia gonda ravo, neEgipite uthende hwavo. Muzuva iro vagari vomurutii rwerwizi vanozoti, ‘Ringirai, izvi ndizvo zvaitika mwevari avo vetaigonda nemwevari kwetakatizira, kudetserwa nokununurwa kubva kunamambo weAsiria! Neisusu tinozoita mapokonyokerenyi?’ ” Izwi guru ngendaa yorubaya rworuandhle. Kudai ngezvipupuri zvokubani zvinotsvaira, zvinouya zvechibva murubaya kubva kunyika inotyisa. Chioniso chinosvipisa mwoyo chinoronzwa kwendiri; mupiri unopira, muparadzi unoparadza. Kwira, O Eramu, tendenedza ngehondo, O Medhia; kweshe kufemerika kwaakaunza ndinokupedzisa. Ndizvo chiunu changu chazara ngokutambudzika; kurwadza kwandibata kudai ngokurwadziwa kwomukadzi unobereka; ndakotamiswa pashi andikoni nokuzwa; ndakangaidzwa ndizvo andikoni nokuona. Mwoyo wangu unoita maharura, kutyisa kwandikarudza; kujeka kwemangwanani kwendinodisisa kwatsandurwa kwendiri kuita kutyisa kunohutisa. Vanonasirira tafura, vanochinga magudza, vanodya, vanomwa. Mirukai, imwimwi nduna, mudzodze chihlangu mafuta. Ngokuti izvi ndizvo zvaronza Mambo Mwari kwendiri, “Enda, uemese murindi; ngaadaidzire chaanoona. Naapo echiona vagadhi, vanhu vemahachi vairi vairi, vagadhi vembongoro, vagadhi vemangamera, ngaanase kupurutana ngokuzwisisa kukurutu.” Zvino murindi wakadaidzira kudai ngemhondoro; “O Mambo Mwari, ndinogara ndakaema padera porusvingo rwokurinda ngomukuwo wemasikati, neni ndinoemeswa pandau yangu yokurinda usiku hweshe. Ringira, apo vanouya, vagadhi vanhu vemahachi vakaita vairi vairi.” Zvino wakapingura akati, “Rawa, rawa Bhabhuroni; nemiedzaniso yakatsetswa yaro yeshe yezvimwari zvaro yaputsirwa pamavhu.” O vakapurwa vangu, nezviyo zvembuwa yangu; izvo zvendakazwa kubva kunaMambo Mwari wehondo, Mwari waIsuraeri, ndinozvironza kwomuri. Izwi guru ngendaa yeDuma. Umwe unondidaidza kubva Seira, “Murindi, usiku hwakadini? Murindi, usiku hwakadini?” Murindi unoti, “Kuedza kunouya, nousiku nahwo. Kudai mwechida kubvunza, bvunzai; petukaizve.” Izwi guru ngendaa yeArabhia. Munozogara mugwasha reArabhia, imwimwi zviunga zvinohamba zvevaDhedhani. Unzirai mvura kune vanenyota, shonganai nevanotiza nechingwa, O vagari vomunyika yeThema. Ngokuti vatiza kubva kushoti, kushoti dzakashwamurwa, nouta hwakakungwa, nokutyisa kwehondo. Ngokuti izvi ndizvo zvaaronza Mambo Mwari kwendiri, “Gore risati rapera, kudai ngemakore ouwo wakathorwa kushanda, uthende hweshe kweKhedha hunozopera. Nevakasara veavo vevanorwa ngouta, ngwazi dzevana veKhedha, vanozoita vashomani;” ngokuti Mambo Mwari, Mwari waIsuraeri, wazviereketa. Izwi guru ngendaa yebani rechioniso. Unoronzenyi ngokukwira kwemwaita mweshe padera pemhatso, imwimwi mwakazara ngokudaidzira, dhorobha rinenyongano, guta rinokudakara kukurutu? Vakaurawa vako avazi kuurawa ngeshoti, nokuti kufira mukurwa. Vatongi vako veshe vatiza pamwepo, vakasungwa vasina kushandisa uta. Veshe venyu vakaoneka vakasungwa, kunyazwi vakatizira kuretu. Ndizvo ndakati, “Ringirai kuretu kubva kwendiri, ngandicheme ngesimba; musaedza kundiembedzera, ngendaa yokuparadzwa kwevanhu vangu vanodiwa.” Ngokuti Mambo Mwari, Mwari wehondo, unaro zuva rokutambudzika nokutsikwa tsikwa pashi nokukangaidzwa mubani rechioniso; zuva rokuputswa kwemarukumbati, nerokuchemera kudetserwa kumitunhu. VaEramu vakatwara chikomwe, nengoro dzokurwa dzinevamuna vanogadha mahachi; nevaKiri vakabudisa zvihlangu. Mabani ako akapinda kunaka akazara ngengoro dzokurwa, nevamuna vanogadha mahachi vakaema pamisiwo. Wadusa chakafukidza Judha. Ngezuva iro wakaringira kune zvokurwa ndizvo zvomumhatso yomugwasha, nemwi mwakaona ndau zhinji dzakapwanyika mudhorobha raDhavhidha, mwakaunganidza pamwepo mvura yegandwa rokubani. Mwakaerenga mhatso dzeJerusarema, mwakaputsa mhatso kuti mugwinyise marukumbati. Mwakaita gandwa pakati pemarukumbati mairi kutora mvura yegandwa rekaretu. Asi amuzi kuringira kwaari uwo wakaita izvi, nokuti kuremeredza uwo wakazvironga karetu. Muiro zuva Mambo Mwari wehondo wakadaidza kuchema nokutsumba, nokuita mhanza nokusimira machira emasaka. Asi kwaiyapo kudakara nemadhiri, kuuraya kabi, kuuraya makwai, kudya nyama nokumwa vhini vechiti, “Ngatidye nokumwa, ngokuti mangwani tinozofa.” Mambo Mwari wehondo wakazviziisa pachake munzee dzangu. “Chokwadi uku kushata akuzoduswi kubva kwomuri metsa mufe,” unoronza Mambo Mwari, Mwari wehondo. Izvi ndizvo zvinoronza MamboMwari, Mwari wehondo, “Uya, enda kumungwariri wemare uyu, kunaShebhina, uwo unobata mhatso, wechiti, ‘Maruramiro ako ari pari? Unani pano hama yako, kuti udzitsetsere iba pachako, kudai ngouwo unodzitsetsera iba pakakwirira, nokudzitsira pokugara muruware? Ringira, Mambo Mwari uchakukandira kuretu kubva kundau yako ngesimba, hama yangu. Ucharamba akakubata ngesimba, unozokutenderedza ngesimba, nokukukandira kudai ngebhora kunyika yakapamhama; naapo unozofirapo nengoro dzokurwa dzouthende hwako dzinozoita kutsveruka kwemhatso yamambo wako. Neni ndinozokuthuthumidza kubva pamushando wako, newe unozodzaswa pashi kubva kundau yako.’ “Ngeiro zuva ndinozodaidza muranda wangu Eriakimu mukororo waHirikia. Ndinozomupfekesa ngezvokufuka zvako nokumugwinyisa ngebhande rako, ndinozopa kutonga kwako munyara mwake; naye unozoita baba kwevari vagari vomuJerusarema nokumhatso yaJudha. Ndinozoisa pamapfudzi ake kiyi yemhatso yaDhavhidha; unozobeura, akuna naumwe unozokonya; unozokonya, akuna naumwe unozobeura. Ndinozomukohomera kudai ngehoko pandau yakagwinya; naye unozoita dendemaro routhende kumhatso yababa ake. Navo vanozoturika padera pake kurema kweshe kwemhatso yababa ake, mibarirwana yake, nezvidziyo zveshe zvakatsonga kubvira kuzvidziyo zvetsani, kuguma kuzvidziyo zveshe zvemabiya. Ngeiro zuva,” unoronza Mambo Mwari, Mwari wehondo, “Hoko yakakohomerwa pandau pakagwinya inozobviswa; nayo inozogurwa yechiwa pashi, nomutwaro uwo waiya padera payo unozopera,” ngokuti Mambo Mwari wazviereketa. Izwi guru ngendaa yeThire. Boorerai, imwimwi ngarava dzeTharshishi, ngokuti mhatso yezambuko yaparadzwa, apachina nemhatso. Naapo vechiuya kubva Saipurasi vakazwa ndizvo. Nyararai, O imwimwi vagari vepachiwi, O imwimwi vatengesi veSidhoni, vatumwa venyu vakaambuka ruandhle, navo vaiya padera pemvura inesimba; chibharo chenyu chaiya zviyo zveShihori, kucheka kwebani kweNaire; mwaitengesera madzinza. Tsveruka, O Sidhoni, ngokuti ruandhle rwakaereketa, mhatso yezambuko roruandhle rwechiti, “Andizi kurwadziwa ngokubara, andizi kubara, andizi kurera majaha, nokuti kurera mhwandwe.” Naapo mashoko aguma Egipite, vanozotambudzika kakurutu ngendaa yemashoko eThire. Ambukai Tharshishi; boorerai, O imwimwi vagari vepachiwi. Iri ndiro dhorobha renyu raigara ngokudakara here, maambo aro ngeemazuva ekaretu, tsoka dzaro dzakaritwara kuti rigare kuretu? Ndiani waronga izvi kurwisa Thire, dhorobha raikowera madzungudza, vatengesi varo vaiya vatongi, vashambadzi varo vaiya vanoremeredzwa venyika? Mambo Mwari wehondo ndiye wakazvironga, kusvipisa kudzikudza kwouthende hweshe nokuunza kutsverudzwa kwavo veshe avo vanoremeredzwa venyika. Ambuka kuenda munyika mwako, O mwanasikana weTharshishi; akuchina simba rinokusunga. Watambanudza nyara yake padera poruandhle, wazungunyisa umambo; Mambo Mwari wapa mupango ngendaa yeKhenani, kuparadza marusvingo aro. Wakati, “Auchazodakari, iwewe mhandwe inotambudzwa, mwanasikana weSidhoni; miruka, ambuka kuenda Saipurasi; kunyazwi apo auzooni kuzorora.” Ringira nyika yevaKharadhea! Vanhu ava, haiwa vaAsiria. Vakaemesera Thire kuita ndau yezvikara zvomushango. Vakaemesa marusvingo ayo kuitendenedza, vakarigira pashi ngome dzayo; vakaiita matongo. Boorerai, O ngarava dzeTharshishi, ngokuti rusvingo rwenyu rwaparadzwa. Kubvira ngeiro zuva Thire aizoziikanwe kwemakore makumi manomwe, kudai ngenguva yokupona kwamambo umwe. Ngesure kwemakore makumi manomwe zvinozoitika kuThire kudai ngezviri mungoma ngendaa yehure. Torai mbira, uhambe mudhorobha, iwewe hure rariyarikanwa! Nasa kuridza, uembe nduyo dzakawanda, kuitira kuti ukarakadzwe. Panoperera makore makumi manomwe, Mambo Mwari unozohambira Thire, naro rinozohwirira kooshambadza kwaro, rinozohura pacharo noumambo hweshe hwenyika padera pehope yenyika. Zvokutengesa zvaro nokuthuswa kwaro zvinozopirwa kunaMambo Mwari; kuuyirwa kwaro akuzongwarirwi nokuti kuunganidzwa; asi zvokutengesa zvaro zvinozobudisa kudya kwakawandisa nezvokusimira zvakanaka zvaavo vanogara pamberi paMambo Mwari. Ringira, Mambo Mwari waakuda kuparadza zveshe zviri munyika nokuisiya isina chiro, naye unozopeta padera payo, nokuparadzira vanhu vanogara mukati mwayo. Zvino kudai ngezvinoitirwa vanhu, ndizvo zvinozoitirwa vapristi; kudai ngezvinoitirwa hloko, ndizvo zvinozoitirwa mambo; kudai ngezvinoitirwa murandakadzi, ndizvo zvinozoitirwa vahosi; kudai ngezvinoitirwa mutengi, ndizvo zvinozoitirwa mutengesi; kudai ngezvinoitirwa mukwereti, ndizvo zvinozoitirwa mukweretesi; kudai ngezvinoitirwa unobhara chibharo, ndizvo zvinozoitirwa mubharisi. Nyika inobvisirwa zveshe nokusiyiwa isina chiro, ngokuti Mambo Mwari wakaereketa izwi iri. Nyika inooma nokuzeketera, nyika inopera simba nokuzeketera; vanhu vakuru venyika vanopera simba: Nyika inosvipiswa pashi paavo vanogara mukati mwayo; ngokuti vadarika mipango, vashaishira zviemeso, vagura chitenderano chemhera nariini. Ndizvo kutukwa kwapedza nyika, naavo vanogara mukati mwayo vanotambudzika ngokushaisha kwavo; ndizvo vagari vomunyika vanopera, vashomani ndivo vasaramwo. Vhini idzva rinooma, muvhini unopera simba, veshe vanemwoyo inodakara vanogomera. Kudakara kwembira kunopera, bope raavo vanodakara rinopera, kudakara kwechidangari kunopera. Avachamwi vhini vechiemba; kumwa kunoradzisa kunovava kwevari vanokumwa. Dhorobha renyongano rinoputsirwa pashi; mhatso yeshe inokonywa kuti munhu asazopotera. Kuripo kuchemera vhini kukurutu mumapato ngokuti akuna vhini; kweshe kudakara kwaguma kumagumo, kudakara kwenyika kwapera. Dhorobha rasara raita dongo, misiwo yedhorobha yaputsirwa mumatongo. Ngokuti izvi zvinozodaro panyika, nepakati pemadzinza evanhu, kudai ngeapo panozungunyiswa mukukukurwa kwomuorivhi, kudai ngezvimavhini zvinosarira apo kukukura kwapera. Vanomirudza mazwi avo, vanoemba ngendaa yokudakara; vanodaidzira kubvira kumabirirazuva ngendaa youmambo hwaMambo Mwari. Ndizvo mumabvazuva kudzai Mambo Mwari; muzviwi zvoruandhle kudzai zina raMambo Mwari, Mwari waIsuraeri. Kubvira kumagumo enyika tinozwa nduyo dzokukudzwa kweWakarurama. Asi ndinoti, “Ndinopera simba, ndinopera simba. Ihehe kwendiri!” Ngokuti vachengedzi vaita ngokuchengedza; vachengedzi vanochengedzera kakurutu. Kutya, hunza nomurau, zviri padera pako, iwewe unogara panyika. Kunyazwi ndiani uwo unotiza bope rokutya unozowira muhunza; kunyazwi ndiani unokwira kubva muhunza unozobatwa ngomurau. Ngokuti mafasitera edenga akabeuka, nemadzeyo enyika anozungunyika. Nyika yagurwa yaamho, nyika yatatuka ngepakati, nyika yazungunyiswa ngokushata kukurutu. Nyika inothethereka kudai ngomunhu wararadza, inozungunyikazve kudai ngechitumba; nokupauka kwayo kunozorema padera payo, nayo inowa, isikachamukizve. Ngeiro zuva Mambo Mwari unozoorora hondo yomudenga mudenga, nemadzimambo enyika ari padera penyika. Vanozounganidzwa pamwepo, kudai ngemabhanditi anounganidzwa muhunza; vanozokonyerwa mutirongo, ngesure kwemazuva akawanda vanozoororwa. Zvino mwedzi unozokangaidzwa, nezuva rinozotsverudzwa, ngokuti Mambo Mwari wehondo unozotonga paMutunhu weZioni nomuJerusarema, nepamberi pevasharuka vake uchaonisa uthende hwake. O, Mambo Mwari, ndiwe Mwari wangu; ndinozokukudza, ndinozoirikidza zina rako; ngokuti waita zviro zvinoshamisa; urongwa hwakarongwa wekaretu wakagondeka negwinyiso. Ngokuti waita dhorobha kuti riite murwi, dhorobha rinorusvingo riite matongo; ngome yevapara arisisiri dhorobha; arizoakwizve. Ndizvo vanhu vakagwinya vanozokuirikidza, madhorobha emadzinza anotyisa anozokutya. Ngokuti iwewe wakaita bako kwevari varombo, bako kwevanotama mukutambudzika kwavo; wakaita utiziro hwavo kubva kumubvumo, bvute kubva mukupisha. Naapo kufuridza kwevanotyisa kwaputika kunodai ngomubvumo wepachando parukumbati, bope revapara kudai ngokupisha kwendau yakaoma, munodzima kupisha ngebvute regore; nduyo yevapara vanotyisa inozonyaradzwa. Pamutunhu uyu Mambo Mwari wehondo unozoitira vanhu veshe dhiri gurutu, nokudya kwakanaka, dhiri revhini sharuka, zvakakora zvakazara ngemwongo, vhini sharuka rakanasa kusefiwa. Naye unozoparadza pamutunhu uyu chifukidziro chakafukidza padera pevanhu veshe, nejira iro rakatambanudzwa padera pemadzinza eshe. Unozomedza kufa mhera nariini. Zvino Mambo Mwari unozopukuta masodzi kubva kuhope dzeshe, naye unozodusa kushoorwa kwevanhu vake kubva padera penyika yeshe; ngokuti Mambo Mwari waereketa. Zvichazozwi pairo zuva, “Ringirai, uyu ndiye Mwari wedu; takamugarira, kuitira kuti atiponese. Uyu ndiye Mambo Mwari uyo wetaigarira; ngatidakare nokudakadzwa muruponeso rwake.” Ngokuti nyara yaMambo Mwari inozozorora pamutunhu uyu. VaMoabhi vanozotsikwatsikwa pashi pandau yavo kudai ngemahlanga anotsikwa tsikwa pashi murindi remadisa. Kunyazwi akanyatambanudza nyara dzake pakati pavo, kudai ngomuhlambiri unotambanudza nyara dzake kuhlambira, kudzikudza kwake kunozodzaswa pashi, kunyazwi echiedza ngenyara dzake. Ukwiriri hwemarukumbati ake huchaputsirwa pashi, kuukandira pashi pamavhu, kunyazwi nokubukuta. Ngeiro zuva nduyo iyi inozoembiwa munyika yaJudha: Tine dhorobha rakagwinya; Mwari unozoemesa kunyisa kudai ngemarukumbati nemarusvingo. Beurai misiwo kuti dzinza rakarurama iro rinongwarira kugondeka ripoteremwo. Uwo unemwoyo wakagwinya unomungwarira mukunyarara kwakaperera, mukunyarara, ngokuti unogonda mweuri. Gonda munaMambo Mwari mhera nariini, ngokuti munaMambo Mwari, Mwari, unebuwe remhera nariini. Ngokuti unodzasa pashi avo vanogara pakakwirira; dhorobha rakakwirira unoriputsira pashi pamavhu. Unoridzasa pakadzaka pamavhu, unorikandira pabukuta. Tsoka dzinoritsikatsika, tsoka dzevarombo nezvitsiko zvevanotama. Njira yevakarurama yakaserera; O Wakarurama, munosereresa njira yevakarurama. Munjira yokutonga kwako, O Mambo Mwari, tinokugarira; zina rako nokukarakadzwa kwako ndikwo kudisisa kwomweya yedu. Mweya wangu unokushuwira usiku; mweya wangu mukati mwangu unokutsvakisisa yaamho. Ngokuti apo kutonga kwako kuri munyika, vanogara munyika vanodzidza zvakarurama. Kudai nyasha dzanyaitirwa vakashata, avadzidzi kururama; munyika mwezvakarurama vanoita zvakashata, navo avaoni umambo hwaMambo Mwari. O Mambo Mwari, nyara yako yakamirudzwa mudenga, asi avaioni. Ita kuti vaone kugwinyisira kwako ngendaa yevanhu vako, vatsveruke. Muriro wewakanasirira magaa ako ngauapedze. O Mambo Mwari, muchatiemesera kunyarara, ngokuti ngegwinyiso zveshe zvetakaita, ndiwe wakatiitira. O Mambo Mwari, Mwari wedu, madzimambo amweni ngokubanze kwako akatonga padera pedu, asi isusu tinoremeredza zina rako rega. Vakafa avaponi; vakafa avamiruki, ngokuti wakavaorora nokuvaparadza, wakatsukutidza kukarakadzwa kwavo. Asi wawanza dzinza, OMambo Mwari, wawanza dzinza, unoirikidzwa; wakudza miganu yeshe metsa kumagumo enyika. O Mambo Mwari, mukutambudzika vakakutsvaka, vakadurura mukumbiro apo kuorora kwako kwaiya padera pavo. Kudai ngomukadzi unemimba, unobinyauka nokuchema mukurwadziwa kwake, apo mukuwo wake waapasinde, ndizvo zvetaiya taita pamberi pako, O Mambo Mwari. Isusu taiya taanemimba, takabinyauka nokurwadziwa, asi takabereka kwega dutu. Atizi kunyisa panyika; napo apana naumwe wakabarwa kugara munyika. Vakafa vako vanozopona, miiri yavo inozomuka. Mukai muembe ngokudakara, imwimwi munogara mubukuta! Ngokuti beto renyu rakadai ngebeto remangwanani, nenyika inozobudisa vakafa. Uyai, vanhu vangu, poterai mumakamera enyu, mukonye misiwo yenyu, mudzifishe mukuwo mudoko metsa kutseneka kwapinda. Ngokuti, ringira, Mambo Mwari unobuda kubva kundau yake kuorora avo vanogara munyika ngendaa yokushaisha kwavo; nyika inozoduhumura ngazi yakaparadzirwa padera payo, aichazofukidzizve vakaurawa vayo. Ngeiro zuva Mambo Mwari ngeshoti yake yakashata, yakakura, yakagwinya, unozoorora Levhiathani nyoka inotiza, Levhiathani nyoka yakashongoroka, naye unozouraya dragoni iro riri muruandhle. Ngeiro zuva embai ngendaa yomunda wakanaka wemivhini. Inini Mambo Mwari ndini mungwariri wawo; ndinoudiridzira mikuwo yeshe. Ndinourinda masikati nousiku kuti kusaapo naumwe ungaushaishira. Andina ushungu. Kudai yechindipa minzwa nemakato, ndinozofora kurwa hondo nayo. Inini, ndinozoipisha yeshe ngomuriro. Nokuti zve ibatire pendiri, kuti ingwaririke, ngaiite kunyarara neni, eya, ngaiite kunyarara neni. Mumazuva awo achauya Jakobe unozoita nzinde, Isuraeri unozotumbuka maruva nokutungira matai matsva; naye unozozadza nyika ngemichero. Wavapondera pashi here kudai ngezvaakaponda avo vakavaponda? Nokuti vaurawa here kudai ngevaurayi vavo vakaurawa? Ngokudzingwa kwakavapinza muuhloko, wakarwisana navo; wakavafuridza kuvabvisa ngomubvumo wake mukuru ngezuva redutu rokumabvazuva. Ndizvo ngendaa iyi kushata kwaJakobe kunozoripirwa; neiyi ndiyo michero yakazara yokuduswa kushaisha kwake; apo paanoita mapuwe eshe earita kuti adai ngemapuwe akapfaa anoputswa kuita zvigurwa, apana sika yokudira nemitombo inonuhwira yepaarita zvinozosara zvakaemapo. Ngokuti dhorobha rinerusvingo raita matongo, ugaro hwakatizwa nokurambwa kudai ngomurubaya; makonyana anofuramwo, naapo anoata pashi, nokudya mashakani ematai. Naapo matai aoma, anogurwa; vakadzi vanouya nokubasa muriro ndiwo. Ngokuti ava vanhu vasina kuzwisisa; ndizvo uwo wakavaita aazovazwiri urombo, nouwo wakavasika aazovaitiri nyasha. Ngeiro zuva, Mambo Mwari unozopura zviyo, kubvira pamugero werwizi Yufratesi metsa mubani reEgipite, nemwi munozounganidzwa umwe ngaumwe, imwimwi vanhu vaIsuraeri. Ngeiro zuva gwama guru rinozoridzwa, naavo vaiya varashika munyika yeAsiria naavo vakadzingirwa munyika yeEgipite vanozouya koodira Mambo Mwari padera pomutunhu wakacheneswa muJerusarema. A dzungudza rokudzikudza rezviradza zvaEfuremu, nokufota kwounaku hwouthende hweruva, riri pasoro peavo vanogutiswa ngokudya kwakawanda, avo vanonyiswa ngevhini! Ringira, Mambo Mwari unaye umwe wakagwinya, unesimba; unozoriga pashi ngenyara yake kudai ngomubvumo unematsanza, mubvumo unoparadza kudai ngomubvumbi wemvura inesimba, inokukuza. Dzungudza rokudzikudza rezviradza zvaEfuremu rinozotsikwa tsikwa pashi petsoka. Kufota kwouthende kwounaku hweruva riri padera pesoro reavo vanogutiswa ngokudya kwakawanda kunodai ngomuchero womuonde wokutanga kuibva risati raguma zienza; kunyazwi ndiani uwo unouona unoudya ngokukasira, apo waguma munyara mwake. Ngeiro zuva Mambo Mwari wehondo unozoita dzungudza routhende, nodzungudza rounaku, kunevanhu vake vakasara; nokuita mweya wokutonga kwakanaka kwaari unogara pakutonga, nokugwinyisa avo vanopetudza hondo pamisiwo. Avowo vanokweiwa ngokumwa vhini, vanothethereka ngezvokumwa zvinoradzisa; mupristi nomuprofeti vanokweiwa ngokumwa zvinoradzisa, vanokangaidzwa ngevhini, vanothethereka ngokumwa zvinoradzisa; vanokorera muchioniso, vanopumhunwa mukugura ndaa. Matafura eshe akazara ngemarutsi anonyenyesa; apana ndau yakasukika. Ndiani waanozodzidzisa ruziyo, nokunaani kwaanozonasa kududzira izwi? Avo vakarumurwa kubva pamukaka, naavo vakaduswa kubva pamazamo? Ngokuti mupango padera pomupango, nomupango padera pomupango; musara padera pomusara, nomusara padera pomusara; pano pane kadoodoko, naapo pane kadoodoko. Ngegwinyiso ngomuromo unokakama norurumi rwomupara unozoereketa kuvanhu ava, kwevari kwaakati, “Ndikwo kuzorora; ipa kuzorora kuneavo vakaremba; nouku ndikwo kuzorora;” asi vakaramba kuzwa. Ndizvo izwi raMambo Mwari rinozoita kwevari mupango padera pomupango, nomupango padera pomupango; musara padera pomusara, nomusara padera pomusara; pano pane kadoodoko, naapo pane kadoodoko, kuitira kuti vaende, vawe ngegotsi, vaguke, vabatwe ngomurau, vatorwe. Ndizvo izwai izwi raMambo Mwari, imwimwi vadadi avo vanotonga ava vanhu muJerusarema. Ngokuti mwati, “Taita chitenderano norufu, neSheori tinechitenderano; naapo kupondwa kwakakurisa kwapinda, akuchazouyi kwetiri; ngokuti takaita kuti manyepo aite ndau yedu yokutizira, nomukunyepa takahwaramwo.” Ndizvo izvi zvinoronza Mambo Mwari, “Ringira, ndinoradzika muZioni buwe rokuita dzeyo, buwe rakaedzwa, buwe rinomutengo mukurutu repakhona, dzeyo rakagwinya; uwo unorigonda aazokaruki. Neni ndinozoita kutonga kwakanaka musara, nokururama kuti kuite chipimo; matsanza anozotsvaira utiziro hwemanyepo, nemvura inozokukuza ndau yokuhwara. Zvino kutenderana kwenyu norufu kunozodzimwa, nokutenderana kwenyu neSheori akuzoemi; naapo kupondwa kwakakurisa kwapinda, munozoponderwa pashi ndikwo. Mukuwo weshe wekunopinda, kunozomutora, ngokuti mangwanani ngemangwanani kunozopinda, masikati nousiku; kuzwisisa mashoko aya kunozouya kutya kwega.” Ngokuti mubhedhi wakanyanya kufupika kuti munhu atambarare padera pawo, nechokufuka chakanyanya kutsonga kuti adzifukidze ndicho. Ngokuti Mambo Mwari unozomiruka kudai ngepaMutunhu wePherazimu, unozonyangadzwa kudai ngomubani reGibheoni, kuita mushando wake, kushamisa ndikwo kuita kwake! Nokushanda mushando wake, mupara ndiwo mushando wake! Ndizvo zvino musaita vadadi, kuti zvisungo zvenyu zvisazogwinyiswa; ngokuti ndazwa mutemo wokuparadzwa kwakaemeswa padera penyika yeshe, kunobva kunaMambo Mwari, Mwari wehondo. Purutanai, muzwe izwi rangu; purutanai, muzwe kuereketa kwangu. Murimi unogara echirima here? Unogara echirima nokuputsa maondo omunda wake here? Naapo paanosereresa ivhu, aakushi madhiri here, nokuparadza khumini, nokukusha koroni mumisara nebhare kundau dzaro dzakaemeswa, nembeu dzimweni ngokumucheto wawo? Ngokuti wakanasa kudzidziswa, Mwari wake unomudzidzisa. Ngokuti madhiri aapurwi ngechireyi, nevhiri rengoro aritenderudzwi padera pekhumini; asi madhiri anopurwa ngomupuro, nekhumini ngendonga. Zviyo zvezvingwa zvinokuiwa, asi aazopedzi mukuwo echizvipura; unozvipura ngevhiri rengoro yake, nemahachi padera pazvo; asi aazvikuyi. Ichiwo chinobva kunaMambo Mwari wehondo; unoshamisa mukupanga, wakapindisisa kunaka muungwaru. A Arieri, Arieri, dhorobha umwo mwaakagara Dhavhidha! Tutsirai gore kugore; madhiri ngaateere njira dzawo. Asi ndinozotambudza Arieri, kunozoapo kutsumba nokuchema. Jerusarema rinozoita kudai ngeArieri kwendiri. Nokudai ndiDhavhidha neni ndinozokutendenedza, ndinozokutsiira ngemarukumbati, nokukuemesera rukumbati. Zvino unozoereketa kubva muudzamu hwevanhu pashi, unozoereketa kubva muudzamu pashi mubukuta; izwi rako rinozouya rechibva pamavhu rakadai ngeizwi rechipoko rechivherevhedza kubva pabukuta. Asi, kuwanda kwemapandu ako kunozodai ngebukuta rakamotseka, nokuwanda kwevanotyisa kunozodai ngemazungu anopwititika. Kunozoitika ngokukasira paripo paripo unozohambirwa ndiMambo Mwari wehondo nokutinhira nokuzungunyika kwenyika, nebope gurutu nomubvumo, neguwe nomurazvu womuriro unopisha kakurutu. Nouwandu hwemadzinza eshe awo anorwisa Arieri, eshe anorwisana naye nemasvingo ake naavo vanomutambudza, anozodai ngehope dzinorotwa usiku. Kunodai ngomunhu unenzara unorota hope echidya, nokumuka achindori nenzara, nokuti munhu unenyota unorota hope, echimwa, nokumuka achine nyota, ndizvo zvinoita zvikwata zvemadzinza eshe awo anorwisana noMutunhu Zioni. Emai, mushame mudzipofomadze pachenyu, muite mapofu! Radzai, asi haiwa ngevhini; thetherekai thetherekai, asi haiwa ngezvinoradzisa! Ngokuti Mambo Mwari wakadurura padera penyu mweya wehope dzemadzikirira; wakonya madziso enyu, imwimwi vaprofeti, nokufukidza masoro enyu, imwimwi vaoni. Chioniso cheizvi zveshe kwomuri chaita kudai ngemazwi etsamba yakanamirwa. Kudai yechipuwa kunomunhu unokona kufunda ngokupangwa, “Funda ichi, ndapota,” unoti, “Andikoni, ngokuti yakanamirwa.” Nokuti kudai yechipuwa kwaari usikakoni kufunda vechiti, “Funda ichi, ndapota,” unoti, “Andikoni kufunda.” Mambo Mwari wakati, “Ngokuti vanhu ava vanokwedzera kwendiri ngemiromo yavo, nemiromo yavo vanondiremeredza, naapo mwoyo yavo iri kuretu kubva kwendiri, nokundidira kwavo chaita chironzo chomunhu chakadzidziswa kwevari; ndizvo, ringirai, ndinozoitazve zviro zvinoshamisa pakati paava vanhu, zvinohutisa nokushamisa. Noungwaru hwevanhu vavo vakangwara hunozopera, noungwaru hweavo vakangwara hunozofishika.” Ihehe kwevari vanotsvakisisa kufishira Mambo Mwari urongwa hwavo mundau dzakadzama, avo mishando yavo iri muchidima, neavo vanoti, “Ndiani unotiona?” Nokuti, “Ndiani unotizia?” Munokunukudza zviro kuti zviringire kudenga! Muumbi ungaedzaniswa nedongo here? Chiro chakaitwa chingaereketa here kumuiti wacho kuti, “Auzi kundiita akadi;” nokuti chiro chakaumbwa chingaereketa here kunomuumbi wacho kuti, “Aana kuzwisisa?” Rebhanoni pamukuwo mudoko arizoiti munda unendimo, nomunda unendimo unozoerengwa kuita gwasha here? Ngeiro zuva madziiranzee anozozwa mazwi ebhuku, madziso emapofu anozoona kubva muudzamu hwechidima. Vakapfaa vanozoona kudakara kutsva munaMambo Mwari, nevarombo pakati pevanhu vanozodakara muneUwo Wakachena waIsuraeri. Ngokuti uwo unotyisa aachazoapo akadi, nomudadi unozoparadzwa, navo veshe vanogarira kuita zvakashata vachabviswa, avo vanoita kuti munhu ashaishe ngeizwi ravo, vanomuteya ngomurau, uwo unokaraidza pamusiwo, nokupaukisa wakanaka ngechiro chisina shwiro. Ndizvo izvi zvinoronza Mambo Mwari, uwo wakaripira Abrahama, ngendaa yemhatso yaJakobe, “Jakobe aazotsverudzwi, hope yake aizocheneruki. Ngokuti apo echiona vana vake, mushando wenyara dzangu, pakati pake, vanozochenesa zina rangu; vanozochenesa Uwo Wakachena waJakobe, vanozoema mukutya Mwari waIsuraeri. Naavo vanoshaisha mumweya vanozouya mukuzwisisa, navo vanogunun'una vanozoashira zvidzidziso.” “O vana vanoita mbengo,” unoronza Mambo Mwari, “Avo vanoita urongwa, asi haiwa hwangu; avo vanoita chitenderano, asi vanorwisana nomweya wangu, kututsira chishaishi padera pechishaishi; avo vanohamba kudzaka Egipite, vasikazi kukumbira kupanga kwangu, kuti vahware mukungwaririka kwaFaro, nokutsvaka kuhwara mubvute reEgipite! Ndizvo kungwarira kwaFaro kunozoita kutsveruka kwenyu, nokuhwara kwenyu mubvute reEgipite kukangaidzwa kwenyu. Ngokuti kunyazwi vakuru vake vari muZoani, nevaemereri vake vanoguma Hanesi, weshe unopinda mukutsverudzwa kubudikidza ngevanhu vasikakoni kuvadetsera, avo vasikakoni kuvadetsera nokuti kuvapa chiro, asi kutsverudzwa nokushoorwa.” Izwi guru rinoereketa ngendaa yezvikara zvomubani. “Kubudikidza ngenyika yokutambudzika nokurwadziwa, panobva mhondoro nemhondoro hadzi, rowambira, nenyoka inoukaira kakurutu inombururuka, vanotwara upfumi hwavo pamishana yembongoro hadzi, nemare yavo padera penunda dzemangamera kuenda kunevanhu vasikavapi chiro. Ngokuti rudetso rwevaEgipite arudetseri narwo aruna chiro; ndizvo ndaidudza kuti, ‘Rahabhi uwo unogara aripo.’ ” Zvino enda, zvinyore pamberi pavo, padera porusamba, uzvinyore mubhuku, kuti zviite zvomukuwo unouya kudai ngechapupu chemhera nariini. Ngokuti vanhu vanembengo, vana vasikagondeki, vana vanoramba kuzwa kudzidzisa kwaMambo Mwari; avo vanoronza kuvaoni kuti, “Musaona;” nokuvaprofeti kuti, “Musaprofeta kwetiri zvegwinyiso, ereketai kwetiri zviro zvakaserera, profetai zvokuchengedzera. Ibvai munjira, paukai kubva mugwara, itai kuti tisachazwa zvakawanda ngendaa yoUwo Wakachena waIsuraeri.” Ndizvo izvi ndizvo zvinoronza Uwo Wakachena waIsuraeri, “Ngokuti munoramba izwi iri, mwechigonda mukutambudza nomukuchengedzera, mwechitseama pezviri; ndizvo uku kushata kunozoitika kwomuri kudai ngendutwe huru iri parukumbati rwakareba, yamweka kudzaka rwoda kuwa, kupwanyika kwarwo kunouya ngokukasira ngomukuwo mudoko. Kuputsika kwarwo kwakadai ngokuputsika kwehari yomuumbi, iyo inoputswa ngehasha kuita zvigurwa, ndizvo akuzooneki pakati pezvigurwa zvayo chiwenda chokudusa ndicho muriro kubva pachoto, nokuti chokuchera ndicho mvura kubva muchinyuka.” Ngokuti izvi ndizvo zvinoronza Mambo Mwari, Uwo Wakachena waIsuraeri, “Ngokuhwirira nomukuzorora munozoponeswa; mukunyarara nomukugonda munozoita simba renyu. Asi mwaramba mwechiti, ‘Haiwa; tinozotiza tiri padera pemahachi.’ Ndizvo munozotiza! Nemwi mwati, ‘Tinozogadha zvinohambisa.’ ” Ndizvo avo vanomurumbirira vanozorumbisisa! Gumi remazana rinozotiza ngokukaraidzwa ngoumwe, ngokukaraidzwa ngavashanu munozotiza, metsa musiiwe mwadai ngomujeki padera pemagumo omutunhu, kudai ngomujeki padera pechimutunhu. Ndizvo Mambo Mwari unozogarira kuti amuitire nyasha, ndizvo unozomiruka kuti amukungurire. Ngokuti Mambo Mwari ndiMwari unotonga zvakanaka; vanomuchena veshe avo vanomugarira. Ngegwinyiso vanhu vomuZioni, vagari vomuJerusarema, amuchazochemi. Ngegwinyiso unozomuitira nyasha azwa kuchema kwenyu; apo paanokuzwa unozomupingura. Kunyazwi Mambo Mwari akanyamupa chingwa chokukakaseka, nemvura yokutambudzika, asi mudzidzisi wenyu aachazodzifishi nakamwe, asi madziso enyu anozoona mudzidzisi wenyu. Naapo munokunukukira kumudyo nokuti kumuoshwe nzee dzenyu dzinozozwa izwi ngesure kwenyu rechiti, “Iyi ndiyo njira, hambai ndiyo.” Zvino, munozosvipisa izvo zvinofukidzira miedzaniso yenyu yakatsetswa yesirivha, nezvinemeso zviri pamiedzaniso yenyu yakanyunguruswa yomukore. Munozoirasha kudai ngenjira risikazi kusukika; munozoti kweiri, “Ibva pano.” Naapo unozounza mvura kumbeu dzenyu dzemwasima pamavhu; nezviyo zviri michero inobva mumavhu, izvo zvinozonaka nokuwanda. Ngeiro zuva n'ombe dzenyu dzinozofura kumafuro akapamhama. Kabi nembongoro dzinorima mavhu dzinozodya zviro zvakanasirirwa nokuunganidzwa ngefoshoro neforoko. Nepadera pomutunhu weshe wakareba nepadera pechimutunhu cheshe dzinozoapo ndwizi nezvimikova zvinoerera mvura, ngezuva rokuurawa kukurutu, apo panowa marusvingo. Zve, kujeka kwomwedzi kunozodai ngokujeka kwezuva, nokujeka kwezuva kunozopetwa kanomwe, kudai ngokujeka kwamazuva manomwe pamwepo, pazuva iro Mambo Mwari paanosunga maronda evanhu vake, nokuporesa zvironda zvaakavaponda. Ringira, zina raMambo Mwari rinouya rechibva kuretu, rechibaka ngoushungu hwake nomuchiushi chakakora chinokwira kudenga; miromo yake yakazara ngoushungu, norurumi rwake rwakadai ngomuriro unopisha zveshe; femero rake rakadai ngerwizi runofashukira ngemvura inoguma kumutsipa, kusefa madzinza ngesefu yokuparadza, nokuisa matomu mutsaya dzemadzinza evanhu, anoita kuti apauke. Munozoemba nduyo kudai ngezvinoitika usiku apo perinoitwa dhiri rakacheneswa; nokudakara kwomwoyo, kudai ngaapo umwe anoenda nomunanzi kuguma kumutunhu waMambo Mwari, kuBuwe raIsuraeri. NaMambo Mwari unozoita kuti izwi rake rinoumambo rizwike, nokudzaka pashi kwesimba romuoko wake, kuti rioneke mukunyangadzwa kwakashata, nomurazvu womuriro unopedza, nokuputika kwemakore, chamupupuri nematsanza. VaAsiria vachakarudzwa ngeizwi raMambo Mwari apo paanoponda ngendonga yake. Kuponda kweshe kwendonga yokuorora kwaanoponda Mambo Mwari padera pake, kunozoita kudai ngokurira kwengoma yesimbi nembira; ngomuoko wakamirudzwa unozorwa naye. Ngokuti Tofethi yakanasirirwa kare; ngegwinyiso yakanasirirwa mambo; wakaita ndau yakadzama nokupamhama; muriro nehuni dzakawanda; femero raMambo Mwari rakadai ngerwizi rwesorufa rinobaka kuita muriro. Ihehe kwevari vanodzaka Egipite koodetserwa, avo vanogonda mahachi; avo vanogonda ngoro dzokurwa, ngokuti dzakawanda, nomuvagadhi vemahachi, ngokuti vakagwinya kukurutu; asi avaringiri kunoUwo Wakachena waIsuraeri, nokuti kubvunza Mambo Mwari! Asi nayewo wakangwara unounza zvakashata; aapetudzi sure mazwi ake, asi unozomiruka kurwisa mhatso yevanoita zvakashata, nokurwisa vadetseri veavo vanoita kushaisha. VaEgipite vanhu, haiwa Mwari akadi; mahachi avo inyama, aasiri mweya akadi. Naapo Mambo Mwari paanotambanudza nyara yake, mudetseri unozopumhunwa nouwo unodetserwa unozowa, navo vanozoparadzwa pamwepo. Ngokuti izvi ndizvo zvakaronza Mambo Mwari kwendiri, “Kudai ngemhondoro nokuti mhondoro itsva inobhongera nyama yayo, naapo chiunga chevaushi chingadaidzwa kuirwisa, aizokarudzwi ngokudaidzira kwavo, nokuti kupfaiswa ngendaa yebope ravo, ndizvo Mambo Mwari wehondo unozodzaka koorwa padera poMutunhu Zioni, nepadera pechimutunhu charo. Kudai ngeshiri dzinombururuka padera pemasoro, ngokudaro Mambo Mwari wehondo unozovhikira Jerusarema; unozorivhikira nokurinunura, kuriponesa nokuringwarira.” Petukai kwaari uwo wemwakamukira, imwimwi vana vaIsuraeri. Ngokuti ngeiro zuva mweshe munozorasha miedzaniso yenyu yokudira yesirivha, nemiedzaniso yenyu yokudira yomukore, yomwakadziitira mukushaisha ngenyara dzenyu. “Zvino muAsiria unozowa ngeshoti, haiwa yomunhu; neshoti, haiwa yomunhu, inozomupedza; unozotiza kubva kushoti, nemajaha ake anozoitwa hloko. Buwe rake rinozotiza ngendaa yokutya, nenduna dzake dzinozotiza mukukarudzwa ngomujeki,” unoronza Mambo Mwari, uwo muriro wake uri muZioni, nechoto chake chiri muJerusarema. Ringira, mambo unozotonga mukururama, nevatongi vanozotonga ngokururama. Umwe unozodai ngendau yokuhwara dutu, pokudzama mubvumo nechamupupuri, kudai ngendwizi dzemvura kundau yakaoma, kudai ngebvute rebuwe guru munyika inorembesa. Zvino madziso aavo vanoona aazotswatiri, nenzee dzaavo vanozwa dzinozopurutana. Mwoyo wouwo unechara unozotonga zvakanaka, norurumi rwaavo vanokakamira runozoereketa zvakanaka pamhene. Benzi arizombodaidzwi kuti munhu unoremeredzeka, nokuti wakashata kuti adaidzwe kuti munhu unoremeredzwa. Ngokuti benzi rinoereketa upenzi, nomwoyo waro unoronga zvakashata, kuita zvinorwisana naMwari, kuereketa zvokunyepa ndiMambo Mwari, kusiya kudisisa kwevanenzara vasina kuguta, nokunyima zvokumwa kunevanozwa nyota. Kushata kwevakashata kwakashata: unoronga mazano akashata kuuraya varombo ngamazwi okunyepa, kunyazwi apo kupota kwounotama kwakanaka. Asi uwo wakakura unoronga zviro zvakakura; naye unoema ngezviro zvikuru. Mirukai, imwimwi vakadzi vakagarisika, izwai izwi rangu; imwimwi vanasikana vasina nhamo, purutanai kuereketa kwangu. Mumazuva anopinda gore munozohuta, imwimwi musina nhamo; ngokuti mavhini anozokorera kubereka, kukukurwa kwemichero akuzoitiki. Hutai, imwimwi vakadzi vasina nhamo; hutai, imwimwi musina nhamo; mudziite mititinini, musimire machira emasaka pazviunu zvenyu. Chayayi maditi enyu ngendaa yeminda inodakadza, ngendaa yomuvhini unobereka, ngendaa yeivhu ravanhu vangu munomera minzwa nemakato, eya, ngendaa yemhatso dzeshe dzokudakara mudhorobha rokudakara. Ngokuti ngome inozosiiwa, dhorobha rinevanhu vazhinji rinozotizwa; mutunhu nemarusvingo okurinda zvinozoita mapako mhera nariini, kudakara kwedhuba, kumafuro ezvifuyo, metsa mweya udururwe padera pedu kubva mudenga, neshango riite munda unobereka zvakanaka, nomunda unobereka unoringirika wakadai ngegwasha. Zvino kutonga zvakanaka kunozogara mushango, nokururama kunozogara mumunda unobereka. Mushando wokururama unozoita kunyarara, nemagumo okururama anozoita kunyarara nokugonda mhera nariini. Vanhu vangu vanozogara muugaro hwokunyarara, nomumhatso dzakagwinya, nomundau dzokuzorora dzinokunyarara. Naapo matsanza anozowa padera pegwasha, nedhorobha rinozoparadzwa pashi yaamho, munomuchena imwimwi munozokusha pasinde pemvura yeshe, munozotendera kabi nembongoro kuti dzitsikepo. A, iwewe muparadzi, iwewe pachako auzi kuparadzwa; iwewe muchengedzeri, uwo usina naumwe wakakuchengedzera! Apo unopedza kuparadza, unozoparadzwa; naapo unozoreka kuchengedzera, unozochengedzerwa. O Mambo Mwari, tiitire nyasha; tinogarira iwewe. Ita muoko wedu mangwanani eshe, ruponeso rwedu munguva yokutambudzika. Ngebope rehohoho vanhu vakatiza; ngokumiruka kwako madzinza akaparadzirwa. Zvakachakatwa zvenyu zvinounganidzwa kudai ngokuungana kwegwata; kudai ngokutomuka kwendongwe unotomuka padera pazvo. Mambo Mwari unokuriswa, unogara mudengadenga. Wakazadza Zioni ngokutonga kwakanaka nokururama. Unozoita kugwinya kwenguva dzenyu, kuwanda kworuponeso, ungwaru noruziyo; kutya Mambo Mwari ndihwo upfumi hwake. Purutanai, kuchema kwevakashinga kuri mumapato. Vatumwa vokunyarara vanochema kakurutu. Mapato asiiwa, apana uchahambamwo. Chitenderano chagurwa; mhiko dzaro dzashoorwa; aacharemeredzi munhu naumwe. Nyika inochema, inopera simba. Rebhanoni ratsveruka, ratemerwa rafota pashi. Sharoni radai ngomurubaya, Bhashani naKharmeri azuwira pashi mashakani ayo. “Zvino ndinozomiruka,” unoronza Mambo Mwari. “Zvino ndinozodzimirudza pachangu, zvino ndinozokuriswa. Mimba yenyu ngeyemakoto; munozobereka matsengwe; femero renyu muriro unozomupisha. Vanhu vanozopishwa kudai ngokupishwa kwemapuwe eraemu. Vanozopishwa mumuriro kudai ngeminzwa yakatemwa kuti ipishwe.” Izwai chendaita, imwimwi muri kuretu, nemwi muri pasinde, tendai simba rangu. Vashaishi vari muZioni vanotya; kuhuta kwavabata vasikadi Mwari. “Ndiani pakati pedu ungakona kugara nomuriro unopisha kusikaperi? Ndiani pakati pedu ungakona kugara nomuriro unobaka mhera nariini?” Uwo unohamba ngokururama nokuereketa gwinyiso; uwo unoshoora kuuyirwa ngoupfumi ngokuangiridza; unozuwa nyara dzake kuti asaashira zviro zvokutengerwa; unotsiira nzee dzake kuti asazwa ngezviro zvokuparadzwa kwengazi; unotswatira madziso ake kuti asaona zvakashata. Unozogara pandau dzakakwirira; bako rake rinozoita remapuwe; unozopuwa chingwa, nemvura yake aizoperi. Madziso ako anozoona mambo muuthende hwake; anozoona nyika inopararira kuretu. Mwoyo wako unozopinimidza ngokutyisa wechiti, “Uri pari munyori? Uri pari mupimi womuthero? Uri pari unoerenga marusvingo?” Auchazooni vanhu vanodada, vanhu vanendimi dzokuereketa kwomusikakoni kuzwa, vanhu vanokakamira ndimi dzomusikazwi. Ringirai Zioni, dhorobha rakaemeserwa madhiri edu akachena. Madziso enyu anozoona Jerusarema, ugaro hwakanyarara, tende risikaputswi; apana dziro narimwe raro rinozobviswa, apana narimwe rebote rinozodamburwa. Asi apapo Mambo Mwari muumambo unozoita wedu ndau yendwizi dzakapamhama nemikova. Apana mukumbi, nengarava huru dzine zvokuhambisa dzinokona kuendamwo. Ngokuti Mambo Mwari ndiye mutongi wedu, Mambo Mwari ndiye muemesi wemitemo yenyika yeshe, Mambo Mwari ndimambo wedu; unozotiponesa. Mapote enyu arembedzeka. Aachina simba rokugwinyisa sika pandau payo. Aachina simba rokutambanudza matende okuhluza. Zvino mhuka nezvakachakatwa zvakawanda zvichakoaniswa; kunyazwi nezvirema zvinozotora zvakachakatwa. Akuna mugari unozoronza kuti, “Inini ndinorwara.” Vanhu vanogaremwo vanozorekererwa zvishaishi zvavo. Kwedzerai pasinde, O madzinza, muzwe. Purutanai, O vanhu. Nyika ngaizwe, nazvo zveshe zviri mukati mwayo; nyika, nazvo zveshe zvinobuda kubva mweiri. Ngokuti ushungu hwaMambo Mwari uri padera pemadzinza eshe, noushungu hwake hukuru huri padera pehondo dzavo. Wakavashakera yaamho, akavapira mukuurawa. Vakaurawa vavo vanozokandirwa kubanze. Kunuhwa kwemiiri yavo kunozobuda. Mitunhu inozonyakatiswa ngengazi yavo. Hondo dzeshe dzomudenga dzinozoora, nedenga rinozopetwa kudai ngetsamba. Hondo dzavo dzeshe dzinozofota kudai ngokufota kweshakani romuvhini, nokuti muchero unofota pamuonde. Naapo shoti yangu yamwa yagutisa mumatenga, ringira, inozodzaka padera peEdhomu, padera pevanhu vendakatuka, kuita kutongwa kwavo. Mambo Mwari uneshoti; yagutiswa ngengazi, yakoriswa ngemafuta, ngengazi yemakwai nembudzi, ngemafuta etsvo dzemagondohwe. Ngokuti Mambo Mwari unemubairo muBhozira, nokuurawa kukurutu munyika yeEdhomu. Nyati dzinozowa, nemikono midoko nemikuru inozowa. Nyika yadzo inozomwirira ngazi, nevhu ravo rinozokora ngemafuta. Ngokuti Mambo Mwari unaro zuva rokuunzidzira, gore rokuhwirinzira kwake ngendaa yezvakaitirwa Zioni. Nemikova yeEdhomu inozoita namo, nebukuta rayo rinozoita sorufa. Nenyika inozodai ngenamo inobaka ngomuriro. Auzodzimwi usiku nemasikati, chiushi chawo chinozopwititika mhera nariini. Kubva kumubarirwana kuenda kumubarirwana inozoita mafusi. Apana unozohamba ndimwo mhera nariini. Asi ngwanga nenungu zvinozogaremwo; zizi negunguwe zvinozogaremwo; naye unozoisa musara wokukangaidza padera payo, nemapuwe okuparadza. Vanozodaidza vakuru vayo kuumambo, asi apana unozoapo; nevatongi vavo vanozoita vasina shwiro. Minzwa inozomera mungome yayo, makato nengwenanguruve zvinozomera mungome nomumarukumbati avo. Inozoita bako rehava, nougaro hwemhowani. Zvikara zvomushango zvinozoshongana nemapere, gotokoto romushango rinozorira kunomungani waro, nezizi rinozogarapo, nokudzionera ndau yokuzorora. Zizi rinozodziakira chisaki charo, rinozoika nokutsotsonya mazanda nokufungatira vana varo; naapozve ngwanga dzinozoungana imwe ngaimwe nomukadzi wayo. Tsvakai, mufunde kubva mubhuku raMambo Mwari; akuna nachimwe cheizvi chinozotamika; akuna nachimwe chinozotama mungani wacho. Ngokuti muromo waMambo Mwari wakapanga kudaro, nomweya wake wakazviunganidza pamwepo. Wavaitira mabhigidha, nyara yake yagura mugano ngetambo; inozoita yavo mhera nariini, kubva kumubarirwana kuenda kumubarirwana vanozogaramwo. Rubaya nenyika yakaoma zvinozodakara, shango rinozodakara nokutumbuka maruwa; kudai ngeruva rakanaka rinozotumbuka maruva kakurutu, nokudakadzwa kwokudakara nokuemba. Uthende hweRebhanoni hunozopuwa kweiri, umambo hweKharmeri neSharoni hunozopuwa kweiri. Vanozoona uthende hwaMambo Mwari nounaku hwaMwari wedu. Gwinyisai nyara dzisina simba, mwechigwinyisa mabvi akapera simba. Ronzai kuneavo vanomwoyo wokutya, “Gwinyai, musatya! Ringirai Mwari wenyu. Unozouya nokuunzidzira, nokuhwirinzira kunotyisa. Unozouya nokumuponesa.” Zvino madziso emapofu anozosvinurwa, nenzee dzemadziiranzee dzinozobeurwa; ngouwo mukuwo chirema chinozonyanduka kudai ngeshoma, norurumi rwechimbungumbungu runozoemba ngokudakara. Ngokuti mvura inozonyuka mushango, nendwizi dzinozoerera murubaya; jecha rinopisha rinozoita gandwa remvura, nenyika yakaomerwa inozoita zvinyuka zvemvura; bako rehava rinozoita murove, mwenje unozoita tsanga nemajekacheka. Inozoapo njira yakapamhama, nayo inozodaidzwa kuti, “Njira yakachena;” vakasvipiswa avazohambi ndiyo, asi inozoita yevanhu vaMwari; haiwa vahambi nokuti mapenzi, avazorashikiswi ndiyo. Mhondoro nokuti mhuka inokara azvizokwirimwo, azvizoonekimwo, asi vakaripirwa vanozohamba ndimwo. Vakaripirwa vaMambo Mwari vanozohwirira nokuuya Zioni vechiemba ngoma; nokudakara kusikaperi kunozowa padera pemasoro avo; vanozoona kudakara nokudakadzwa, kusvipo mwoyo nokuti mahwema zvinozotiza. Mugore regumi nemarongomuna ramambo Hezekia, mambo Senakheribhi weAsiria wakauya kurwisana nemadhorobha eshe akaakirwa marukumbati aJudha, wakaatora. Mambo weAsiria wakatuma Rabhishake kubva Rakhishi kuenda Jerusarema kunamambo Hezekia nehondo hurutu. Wakaema kumagumo omugero wegandwa redera, mupato guru romunda womusuki wezvokusimira. Ndizvo wakauya kwaari Eriakimu, mukororo waHirikia, uwo waiya mukuru wengome, Shebhina munyori, naJoa mukororo waAsafi, mungwariri wezvakanyorwa. Rabhishake wakati kwevari, “Ronzai kunaHezekia muti, ‘Mambo mukuru, mambo weAsiria, unoronza kuti, magondero ako ari pari ounogonda ndiwo?’ Unopinimidza kuti mazwi ega ndiyo njira nesimba rokurwa hondo here? Unogonda anani, kuti urwisane neni? Ringira, unogonda Egipite, urwo rutsanga ndonga yakaguka, urwo kudai munhu echitseyama ndirwo runozomubaya munyara yake. Ndizvo wakadaro Faro mambo weEgipite kwevari veshe vanomugonda.” Asi kuti mwechiti kwendiri, “Tinogonda kunaMambo Mwari, Mwari wedu,” andiyepi here uwo ndau dzake dzakakwirira dzokudira nemaarita dzaakadusa Hezekia, echiti kunaJudha neJerusarema, “Munozodira pamberi pearita iri?” Zvino, uya, upikirane namambo wangu, mambo weAsiria, neni ndinozokupa mahachi makumi emazana mairi (2,000), kuti wechikona kurupande rwako kuisa vagadhi padera pawo. Ungaita maitirenyi kuti ufuratire hope yenduna imwe doko pakati pevaranda vamambo wangu, apo wechigonda vaEgipite kukupa ngoro nevagadhi vemahachi? Zvakanyadaro ndakauya ndisina simba raMambo Mwari here kurwa neiyi nyika nokuiparadza? Mambo Mwari wakati kwendiri, “Kwira, urwe nenyika iyi uiparadze.” Zvino Eriakimu naShebhina naJoa vakati kunaRabhishake, “Tapota, ereketa kunevaranda vako ngorurumi rwechiAramu; ngokuti tinoruzwa isusu; musaereketa kwetiri ngorurumi rwevaJudha mukuzwa kwevanhu vari pamarukumbati.” Asi Rabhishake wakati, “Mambo wangu wakandituma kuti ndierekete mazwi aya kunamambo wako nekweuri, naye aazi kunditumira kuvanhu vanogara parukumbati, avo vakaemeserwa kuti vadye madisa avo nokumwa mvura yavo vari pamwepo nemwi here?” Zvino Rabhishake wakaema akadaidzira ngeizwi guru ngorurumi rwavaJudha, wakati, “Izwai imwimwi mazwi amambo mukuru, mambo weAsiria. Ndizvo zvinoronza mambo kuti, ‘Musachengedzerwa ndiHezekia, ngokuti aana simba rokumusunhura. Musatendera Hezekia kuti amuite kuti mugonde Mambo Mwari ngokuronza kuti, Mambo Mwari unozotinunura; dhorobha iri arizopuwi munyara dzamambo weAsiria.’ Musapurutana kunaHezekia, ngokuti ndizvo zvinoronza mambo weAsiria. Itai chitenderano neni, muuye kwendiri, zvino weshe unozodya kubva kumuvhini wake, kubva kumuonde wake, kumwa mvura kubva pachinyuka chake, metsa ndiuye ndimutore kuenda kunyika imweni yakadai ngeyenyu, nyika inekoroni nevhini, nyika inechingwa neminda yemivhini. Musatendera kuti Hezekia amupause, echironza kuti, ‘Mambo Mwari unozotinunura.’ Uripo here umwe wezvimwari pakati pemadzinza wakanunura nyika yake kubva munyara yamambo weAsiria? Zviri pari zvimwari zvaHamathi naAriphadhi? Zviripari zvimwari zvaSefarvhaimu? Zvakasunhura vaSamaria kubva munyara yangu here? Ngechiri pakati pezvimwari zveshe zveidzi nyika zvakanunura nyika dzazvo kubva munyara yangu, kuti Mambo Mwari anunure Jerusarema kubva munyara yangu?” Asi vakanyarara, avazi kupingura neizwi, ngokuti mupango wamambo wakati, “Musamupingura.” Zvino Eriakimu mukororo waHirikia, uwo waiya mukuru wengome, naShebhini munyori, naJoa mukororo waAsafi mungwariri wezvakanyorwa, vakauya kunaHezekia nemachira avo akabaurwa, vechimuronzera mazwi aRabhishake. Naapo mambo Hezekia azwa izvi, wakatatura machira ake, akadzifukidza ngejira resaka, naye wakaenda mumhatso yaMambo Mwari. Naye wakatuma Eriakimu uwo waiya mukuru wengome naShebhina munyori nevapristi vakuru, vakafuka machira emasaka kumuprofeti Isaya mukororo waAmozi. Vakati kwaari, “Izvi ndizvo zvinoronza Hezekia, ‘Zuva iri izuva rokutambudzika nerokukaraidza nokutuka; vana vaguma mukuwo wokuberekwa, asi apana simba rokuvabereka. Pamweni Mambo Mwari, Mwari wako, wazwa mazwi aRabhishake, uwo mambo wake, mambo weAsiria wakatumira kuti atsverudze Mwari wokupona, nokurambidza mazwi awo Mambo Mwari, Mwari wako, aakazwa; ndizvo mirudza izwi rako rokukumbira ngendaa yevakasara vakasiiwa.’ ” Naapo varanda vamambo Hezikia vauya kunaIsaya, Isaya wakati kwevari, “Ronzai kunamambo wenyu kuti, ‘Izvi ndizvo zvinoronza Mambo Mwari,’ ‘Usatya ngendaa yemazwi ewazwa, awo varanda vamambo weAsiria evakandituka ndiwo. Ringirai, inini pachangu ndinozoisa mweya mwaari, kuitira kuti azozwa makuhwa, nokupetuka kunyika yake; neni ndinozoita kuti awe ngeshoti munyika yake.’ ” Rabhishake wakapetuka, akaona mambo weAsiria echirwa naRibhina; ngokuti waiya azwa kuti mambo waiya abva Rakhishi. Zvino mambo wakazwa ngendaa yaThirihaka, mambo weEthiophia echiti, “Unouya koorwa newe.” Naapo azvizwa, wakatuma vatumwa neizwi kunaHezekia echiti, “Izvi ndizvo zvomunozoereketa kunaHezekia, mambo wevaJudha mwechiti, ‘Usatendera Mwari wako uwo wounogonda kukuchengedzera, ngokukugondisa echiti Jerusarema arizopuwi munyara dzamambo weAsiria. Ringira, mwakazwa zvakaitwa ngemadzimambo eAsiria kunenyika dzeshe kudziparadza yaamho. Imwimwi munozosunhurwa here? Zvimwari zvemadzinza zvakavanunura here madzinza aparadzwa ngemadzibaba angu, Gozani, Harani, Rezefi, nevanhu veEdheni avo vaiya muTherasa? Uri pari mambo weHamathi, mambo weAriphadhi, mambo wedhorobha reSefavhaimu, mambo weHena, nokuti mambo weIvha?’ ” Hezekia wakaashira tsamba kubva munyara yevatumwa, akaidzidza; zvino Hezekia wakakwira kumhatso yaMambo Mwari, akaibeura pamberi paMambo Mwari. NaHezekia wakakumbira kunaMambo Mwari echiti, “A Mambo Mwari wehondo, Mwari waIsuraeri, uwo wakagara padera pemakherubi, iwe uri Mwari, iwewe wega, muumambo hwenyika dzeshe; iwe wakasika denga nenyika. Kotamisa nzee yako, O Mambo Mwari, uzwe; beura madziso ako, O Mambo Mwari, uone; izwa mazwi eshe aSenakheribhi, awo aakatumira kuti atsverudze Mwari Unopona. Ngegwinyiso, O Mambo Mwari, madzimambo eAsiria akaparadza madzinza eshe nenyika dzawo, nokukandira zvimwari zvavo mumuriro, ngokuti zvaiya zvisiri Mwari, asi mishando yenyara dzevanhu, miti nokuti mapuwe, ndizvo vakazviparadza. Ndizvo zvino, O Mambo Mwari, Mwari wedu, tiponese kubva munyara yake, kuti umambo hweshe hwenyika huzie kuti iwewe wega ndiwe Mambo Mwari.” Zvino Isaya mukororo waAmozi wakatumira kunaHezekia echiti, izvi ndizvo zvinoronza Mambo Mwari, Mwari waIsuraeri, ngokuti wakakumbira kwendiri ngendaa yeSenakheribhi mambo weAsiria, iri ndiro izwi raaereketa Mambo Mwari ngendaa yake; “Mhandwe mwanasikana weZioni unokushoora nokukusheka; mwanasikana weJerusarema unodzungudza soro rake sure kwako. Ndiani wewakasheka nokutuka? Uwo wewakamirudzira izwi rako, nokumirudzira madziso ako padera? Unorwisana noUwo Wakachena waIsuraeri! Ngevaranda vako watuka Mambo Mwari, newe wati, ‘Ngokuwanda kwengoro dzangu ndakwira kuurebu hwemitunhu, kwakakwirisisa kweRebhanoni; ndakatemera pashi misedhare yawo yakarebesa, nemiti yomusaiprusi yakapindisisa kunaka; ndakaguma kumagumo ourebu hwaro, negwasha rakakurisa. Ndakatsa zvinyuka, ndikamwa mvura, pashi petsoka dzangu pakaomesa ndwizi dzeshe dzendau dzeEgipite.’ Amuzi kuzwa here karetu njira yendakazviita ndiyo? Ndakazvironga kubvira mazuva ekaretu izvo zvendakaita kuti zviitike kuti iwewe uite unoparadza madhorobha anemarukumbati, kuti aite mirwi yematongo, apo vagari vawo vaiya nesimba rakatsonga, vakashamiswa nokukangaidzwa; vakaita kudai ngechisimwa chomumunda, nokudai ngomwenje mutsva, kudai ngemwenje unokura padera pemhatso, unofuhurwa usati wakura. “Asi ndinozia ugaro hwako, nokubuda kwako nokupotera kwako, noushungu hwako kwendiri. Ngokuti ushungu hwako kwendiri, nehohoho yako zvakazwika munzee dzangu, ndinozoisa chiedzo changu mumiro yako, nematomu angu mumuromo wako, neni ndinozokupetudza sure ngenjira yowakabva ndiyo.” “ ‘Neichi chinozoita chioniso kwouri, gore rino munozodya maburukirwa, negore rechipiri maburikirwa; ngegore rechitatu simai, chekai, simai mavhini, mwechidya michero yayo. Vakasara vechipona vemhatso yaJudha vanozotsira pashi nzinde, nokubereka michero padera. Ngokuti kubva muJerusarema kunozobuda vakasara, kubva kuMutunhu weZioni kunozobuda chikwata chevanopona. Kugwinyisira kwaMambo Mwari wehondo kunozoita ichi.’ “Ndizvo izvi zvinoronza Mambo Mwari ngendaa yamambo waAsiria, ‘Aazouyi mudhorobha iri, nokuti kuposhera musee umwo, kuuya pamberi paro nechihlangu, nokuti kuaka rusvingo kweriri. Ngenjira yaakauya ndiyo unozohwirirazve ndiyo; aazouyi mudhorobha iri’ unoronza Mambo Mwari. ‘Ngokuti ndinozorwira dhorobha iri, ndiriponese inini pachangu, nangendaa yomuranda wangu Dhavhidha.’ ” Zvino ngirosi yaMambo Mwari yakabuda ikavauraya mukampa revaAsiria zana nemakumi masere namashanu emakumi emazana; (185,000) naapo vakamuka mangwanani maishi, vakaona, veshe vakaata vafa. Zvino Senakheribhi mambo weAsiria wakabva, akapetuka Ninevhe. Zuva rimweni echidira mumhatso yaNisirokhi, chimwari chake, vakororo vake Adramerekhi naShareza vakamubaya ngeshoti; navo vakatizira kunyika yeArarati. Esarihadhoni mukororo wake wakatonga pandau yake. Mazuva awo Hezekia wakarwara ari pasinde pokufa. Isaya muprofeti mukororo waAmozi wakauya kwaari, akati kwaari, “Izvi ndizvo zvinoronza Mambo Mwari, ‘Rongedza zvakanaka mhatso yako, ngokuti unozofa, auzoponi akadi.’ ” Zvino Hezekia wakatenderudza hope yake kurukumbati, akakumbira kunaMambo Mwari. Akati, “Karakadza zvino, O Mambo Mwari, ndinokupota, kuhamba kwendakaita pamberi pako mugwinyiso nomwoyo wakaperera, ndakaita zvakanaka mukuona kwako.” NaHezekia wakachema kakurutu. Zvino izwi raMambo Mwari rakauya kunaIsaya rechiti, “Enda, wooti kunaHezekia, izvi ndizvo zvinoronza Mambo Mwari, Mwari wababa ako Dhavhidha, ‘Ndazwa kukumbira kwako; ndaona masodzi ako; ringira, ndinozotutsira makore gumi namashanu okupona kwako. Ndinozokununura nedhorobha iri kubva munyara yamambo weAsiria, ndinozorwira dhorobha iri. Ichi chinozoita chioniso kwouri chinobva kunaMambo Mwari, kuti Mambo Mwari unozoita ichi chiro chaakagondisa. Ringira, ndinozoita kuti bvute rinoiswa ngezuva roobira pachipimo chaAhazi ripetuke sure ngezvipimo gumi.’ ” Ndizvo zuva rakahwirira sure ngezvipimo gumi kubva peraiya radzaka. Kunyora kwaHezekia, mambo wevaJudha, ngesure kwokurwara naapo apona kubva mukurwara kwake. Ndakati, “Pakati pemazuva okupona kwangu, ndinosisira kuenda; ndakaemeserwa kumisiwo yeSheori eshe makore okupona kwangu. Ndakati, andichazooni Mambo Mwari munyika yevanopona; andichazooni munhu nakamwe pakati pevagari vomunyika. Ugaro hwangu hwakabvitwa nokuduswa kubva kwendiri, kudai ngetende romuushi. Kudai ngomuruki ndapeta kupona kwangu, unondigura kubva kuchirukiso; kubvira mangwanani kusvikira usiku unondiunza kumagumo. Ndinochemera kudetserwa metsa mangwanani; kudai ngemhondoro unopwanya magodo angu eshe; kubvira mangwanani kusvikira usiku unondiunza kumagumo. Kudai ngemherepere nokuti usore ndinodaidzira, ndinorira kudai ngejuba. Madziso angu akaremba ngokuringira mudenga. O Mambo Mwari, ndinodzimbirwa, ita mungwariri wangu! Asi ndingatinyi? Ngokuti iye emene waereketa kwendiri, naye pachake wazviita; ndinozohamba ngokudzipfaisa makore angu eshe, ngendaa yokurwadziwa kwomwoyo wangu. O Mambo Mwari, kubudikidza ngeizvi zviro vanhu vanopona, mukati mweizvi zveshe kuripo kupona kwomweya wangu. O iwewe, ndipetudze mukupona, undiite kuti ndipone. Ngegwinyiso kwaiya kuitira kuti zvindinakire, izvo zvakaita kuti ndiwe nokurwadziwa kukuru; asi iwewe ngokuda mweya wangu ngorudo wakaununura kubva muhunza yokuparadzwa, ngokuti wakakandira zvishaishi zvangu zveshe sure kwomushana wako. Ngokuti Sheori aringakubongi, rufu arungakuirikidzi; avo vanoenda pashi muhunza avana gonda regwinyiso rako. Unopona, unopona, ndiye unokubonga, kudai ngezvendinoita ngeiri zuva. Baba vanozoita kuti vana vazie kugondeka kwenyu. Mambo Mwari unozondiponesa, ndizvo tinozoemba ngoma dzedu ngezvimatende, mukupona kwedu kweshe mumhatso yaMambo Mwari.” Zvino Isaya waiya ati, “Ngavatore chikanywa chemaonde, vanamire padera pemota, naye kuti apone.” Hezekia waiya atiwo, “Chiinyi chioniso chendinozoona ndicho kuti ndizie kuti ndizokwira kumhatso yaMambo Mwari?” Panguva iyo mambo Merodhakhi-bharadhani, mukororo waBharadhani mambo weBhabhuroni wakatuma vatumwa netsamba nechipo kunaHezekia, ngokuti waiya azwa kuti wairwara, nokuti zvino waiya apona. Hezekia wakavaashira, akavaonisa mhatso inogara upfumi hwake, sirivha, mukore, makha, nemafuta anomutengo mukuru, nezvokurwa ndizvo zvake zveshe, nazvo zveshe zvakaoneka mukati mwedura rake. Apana nachimwe mukati mwemhatso yake nomukati mwoumambo hwake chaasikazi kuvaonisa Hezekia. Zvino muprofeti Isaya wakauya kunamambo Hezekia, akati kwaari, “Ava vanhu vatinyi? Vauya kwouri vechibva kuri?” Hezekia wakati, “Vauya kwendiri vechibva kunyika iri kuretu, nyika yeBhabhuroni.” Muprofeti wakati, “Vaonenyi mumhatso yako?” Hezekia wakapingura akati, “Vaona zveshe zviri mumhatso yangu; apana nachimwe chiri mudura rangu chendisikazi kuvaonisa.” Zvino Isaya wakati kunaHezekia, “Izwa izwi raMambo Mwari wehondo. Ringira, mazuva anouya, apo zveshe zviri mumhatso yako, neizvo zveshe zvakaunganidzwa ngemadzibaba ako metsa nyamashi, zvinozotorwa kuenda Bhabhuroni; apana nachimwe chinozosara, unoronza MamboMwari. Vamweni vevakororo vako vanobarwa ndiwe, vanozotorwa ndivo; vanozoita mithenwa mungome yamambo weBhabhuroni.” Zvino Hezekia wakati kunaIsaya, “Izwi raMambo Mwari rewaereketa rakanaka.” Ngokuti wakapinimidza kuti, “Kunozoapo kunyarara nokungwaririka pamazuva angu.” “Embedzerai, embedzerai vanhu vangu,” unoronza Mwari wenyu. “Ereketai ngokuembedzera kuneJerusarema, daidzirai kweriri, kuti kushanda kwaro kwakakonza kwapera, nokushaisha kwaro kwaripirwa, iro raashira kubva kunyara yaMambo Mwari kwakahwirinzirwa kwokushaisha kwaro kweshe.” Izwi rounodaidzira rechiti, “Nasirirai mushango njira yaMambo Mwari, ruramisai murubaya pato raMwari wedu. Mapani eshe anozomirudzwa, nemitunhu yeshe nezvitunhu zvinozodzaswa pashi, nezvakashongoroka zvinozoruramiswa, nendau dzakashata dzinozoserereswa. Zvino uthende hwaMambo Mwari hunozooniswa, nomunhu weshe unozozviona pamwepo, ngokuti muromo waMambo Mwari wazviereketa.” Izwi rinoti, “Daidzira.” Neni ndakati, “Ndinozodaidzirenyi?” “Munhu weshe wakadai ngemwenje; nokunaka kwake kweshe kwakadai ngoruwa romushango. Mwenje unozeketera, noruwa rinofota, apo mweya waMambo Mwari unofemera padera pazvo; ngegwinyiso vanhu mwenje. Mwenje unozeketera, noruwa rinofota; asi izwi raMwari wedu rinozoema mhera narini.” Kwira padera pemutunhu wakareba, muteketesi wemashoko akanaka, O Zioni; A, iwewe muteketesi wemashoko akanaka, O Jerusarema, mirudza izwi rako ngesimba; rimirudze, usatya; uti kumadhorobha aJudha, “Uripano Mwari wenyu!” Ringirai, Mambo Mwari, Mwari, unouya nesimba, nenyara yake inomutongera; ringirai, muthuso wake unawo, vanoripirwa vake vari pamberi pake. Unozogutisa zvifuyo zvake kudai ngomuushi, unozounganidza zvimakwai zvake mumaoko ake nokuzvitwara paditi rake, unozotungamirira ngokupfaa vanamai vemakwai. Ndiani wakapima mvura zhinji mukati mwenyara yake, nokupima denga ngechipimo, nokuunganidza bukuta renyika muchipimo, nokupima mitunhu nezvimitunhu ngezvipimo? Ndiani wakatungamirira Mweya waMambo Mwari, nokuti mupangi wake wakamudzidzisa? Ndiani wakabvunza kuti azwisise, ndiani wakamudzidzisa njira yokutonga kwakanaka? Ndiani wakamudzidzisa ruziyo, nokumuonisa njira yokuzwisisa? Ringirai, madzinza akadai ngedonhwe muchidziyo, anoerengwa kudai ngebukuta shomani pachipimo; ringirai, unotora zviwi kudai ngebukuta rakamotseka. Rebhanoni arizobudisi huni dzinokwana, nemhuka dzirimwo adzikwani kuita mudiro wokupisha. Eshe madzinza ari pamberi pake akadai ngepasina chiro, akaerengwa kwaari kudai ngechisina shwiro. Ndizvo ndiani womungaedzanisa naMwari? Chiedzanisonyi chomungaedzanisa naye? Muedzaniso? Mupfuri unoumba muedzaniso, nomupfuri womukore unoudzodza ngomukore wakanyunguruswa, nokunasira maketani esirivha. Kudai ngechipo, unotsanangura muti, muti usikazoori; zvino unotsvaka mutsetsi wakangwara, kunasira muedzaniso wakagwinya usikazotsukunuswi. Amuzi kuzia here? Amuzi kuzwa here? Azvizi kuronzwa kwomuri kubvira pakutanga here? Amuzi kuzwisisa here, kubvira pakusikwa kwenyika? Ndiye unogara padera mukutenderera kwenyika, nevagari vemwo vakadai ngegwata rendongwe; ndiye unotambanudza matenga kudai ngejira, nokuakaka kudai ngetende rokugaremwo. Unoita kuti vakuru vaite vasina shwiro, nevatongi venyika vaite vasina shwiro. Eya, avazi kusimwa, avazi kukushwa, avameri nzinde mumavhu, naapo paanofuridza padera pavo, navo vanozeketera, nechipupuri chinovatora kudai ngamakoto. “Ndiani womunozondiedzanisa naye, nokuti ndiani wakadai ndini?” Unoronza Uwo Wakachena. Mirudzai madziso enyu mudenga, muone: Ndiani wakasika izvi? Uwo unounza hondo dzavo dzakawanda, nokudzidaidza dzeshe ngemazina adzo; ngokuti wakakura musimba rake, wakagwinya musimba, akuna naumwe unotamika. Ngenyi wechiti, O Jakobe, nokuereketa O Isuraeri, “Njira yangu yakafishika kunaMambo Mwari, nemaruramiro angu aaerengwi ndiMwari wangu?” Amuzi kuzia here? Amuzi kuzwa here? Kuti Mambo Mwari ndiMwari wemhera nariini, Musiki wemagumo enyika yeshe. Aatongodemeri, aarembi, akuna kutsvakisisa kwokuzwisisa kwake. Unopa simba kunevanodemera, unogwinyisa vasina simba. Kunyazwi majaha anozodemera nokuremba, nevamuna vatsva vanozowa pashi ngokuremba. Asi avo vanogarira Mambo Mwari vanozomusirirwa simba ravo, vanozombururuka ngemaphaphiro kudai ngemakodzi; vanozorumba vasikarembi, vanozohamba vasikademeri. Nyararai, mupurutane pamberi pangu, imwimwi zviwi; vanhu ngavamusirire simba ravo, ngavakwedzere pasinde, ngavaerekete; ngatikwedzere pamwepo mukutongwa. Ndiani wakamusa munyisi kubva kumabvazuva, wakamudaidza kumushando wake? Unounza madzinza pamberi pake, unoisa madzimambo pashi petsoka; unovaita kudai ngobukuta ngeshoti yake, kudai ngematsengwe anorashwa ngouta hwake. Unovarumbirira nokupinda ngokungwaririka, asikachagwami pashi ngetsoka dzake. Ndiani wachiita nokupedza ichi, echidaidza mibarirwana kubvira pakutanga? Inini, Mambo Mwari, wokutanga, ndinozoapo nowokugumisira; ndini. Zviwi zvachiona, nazvo zvinotya; magumo enyika anohuta, akwedzera pasinde, auya. Umwe unodetsera umweni echiti, umwe kunoumweni, “Shinga.” Mutsetsi unoshingisa mupfuri womukore, nouwo unopfura ngehamera unoshingisa uwo unokohomera patafura resimbi, echiti ngendaa yokunamira, “Zvakanaka;” vanobatanidza ngezvipikiri kuti chisakona kutsukunuswa. Asi iwewe, Isuraeri, muranda wangu, Jakobe, uwo wendakatsanangura, mubarirwana waAbrahama, mungani wangu; iwewe wendakatsanangura kubva kumagumo enyika, ndikakudaidza kubva kumarupande ayo ari kuretu, ndikati kwouri, “Iwewe uri muranda wangu,” ndakutsanangura, andizi kukurasha akadi; usatya, ngokuti ndinewe; usaita maharura, ngokuti ndiri Mwari wako; ndinozokugwinyisa, ndinozokudetsera, ndinozokubata ngenyara yangu inonyisa yokumudyo. Ringira, avo veshe vakakutsenekera vanozotsverudzwa nokukangaidzwa; vanozodai ngepasina chiro, naavo vanoambana newe vanozopera. Unozovatsvaka avo vanoita hasha newe, asi auzovaoni; avo vanorwa hondo newe vanozoita vasina shwiro. Ngokuti inini Mambo Mwari, Mwari wako, ndinokubata ngenyara yako yokumudyo, ndini uwo unoti kwouri, “Usatya, ndinozokudetsera.” “Usatya, iwewe honye Jakobe, neimwimwi vanhu vaIsuraeri! Ndinozomudetsera, unoronza Mambo Mwari, Muripiri wenyu ndiye Wakachena waIsuraeri. Ringira, ndinozomuitira mupuro mutsva wakapinza, unemazino; munozopura mitunhu nokuiputsa kuiparadza, newe unozoita zvimitunhu kuti zvidai ngamakoto. Munozozvipepeta, nedutu rinozozvitora, nechipupuri chinozozviparadza. Zvino munozodakara munaMambo Mwari; mune Wakachena waIsuraeri munozokudza. Apo varombo nevatami vanotsvaka mvura, vasikaioni, rurumi rwavo runoomerwa ngenyota, Inini Mambo Mwari ndinozovapingura, Inini Mwari waIsuraeri andizovasii. Ndinozonyusa ndwizi dzemvura mumatunhu asina chiro, nezvinyuka mukati mwemapani; ndinozoita rubaya gandwa remvura, nenyika yakaoma zvinyuka zvemvura. Ndinozosima mushango miti yemisedhare, miakhasia, mimithe nemiorivhi; ndinozosima murubaya miti yemisaipresi, mipraini, mipaini, ndichameresa yeshe pamwepo, kuti veshe vaone, vazie, vapinimidze, vazwisise pamwepo, kuti nyara yaMambo Mwari yakaita izvi, Wakachena waIsuraeri wakazvisika.” Budisai ndaa yenyu, unoronza Mambo Mwari. Budisai zvizatho zvenyu zvinesimba, unoronza Mambo waJakobe. Ngavazvironze nokutironzera zvinozoitika. Ngavatironzere ngezviro zvekare kuti zviinyi, kuti tipinimidze ndizvo, nesu tizie magumo azvo; nokuti vatironzere zviro zvinozouya. Tironzere zviro zvinozoitika ngesure kweizvi, kuti tizie kuti muri zvimwari; itai zvakanaka nokuti zvakashata, kuti titye nokutyiswa. Ringira, iwewe ngegwinyiso auna shwiro, nomushando wako auna shwiro; kunyazwi ndiani unomutsanangura uri chinyangadzo. Ndamirudza umwe wedera, naye wauya; umwe kubva kumabvazuva, unodaidza ngezina rangu. Unozotsika padera pevatongi kudai ngokutsika dhaka, kudai ngomuumbi unokanya dongo. Ndiani wakazvironza kubvira pakutanga, kuti tizvizie zvisati zvaitika, kuti tironze kuti, wakarurama? Akuna naumwe wakatironzera, akuna naumwe wakazvichumaira, akuna naumwe wakazwa mazwi enyu. Ndini wokutanga wakazvironzera kuZioni, ringirai, varingirei; neni ndinozopa kuJerusarema umwe unounza mashoko akanaka. Asi apo ndakaringira apana naumwe; pakati pavo apana mupangi, uwo apo ndabvunza unopingura. Ringirai, avana shwiro veshe; mishando yavo aidetseri chiro; miedzaniso yavo yakanyunguruswa yakadai ngedutu risina chiro. “Ringirai muranda wangu, uwo wendinogwinyisa; wakatsanangurwa wangu, uwo mweya wangu unodakara mwaari; ndaisa mweya wangu padera pake; unozounza kutonga kwakanaka kumadzinza. Aazodaidziri nokuti kumirudza izwi rake kuti rizwike mumapato; rutsanga rwakapwanyiwa aazoruvhuni, chibani chinopwititika aazochidzimi; unozounza kutonga kwakanaka mugwinyiso. Aazoperi simba nokuti kuparadzwa metsa aemese kutonga kwakanaka munyika; nezviwi zvinogarira kudzidzisa kwake.” Unoronza izvi Mwari, Mambo Mwari, uwo wakasika matenga akaatambanudza, uwo wakatambanudza nyika, neizvo zvinobuda kubva mukati mwayo; uwo unopa vanhu vanogara padera penyika mweya wokufema, nomweya kuneavo vanohamba mukati mwayo, “Inini ndini Mambo Mwari, ndakudaidza mukururama, ndakutora ngenyara nokukungwarira; ndakupira kuti uite chitenderano chevanhu, kuita kujeka kwemadzinza, kuti ubeure madziso akapofomadzwa, nokusunhura mabhanditi kubva mutirongo, nokubudisa kubva mutirongo avo vanogara muchidima. Inini ndini Mambo Mwari, ndiro zina rangu; uthende hwangu andipi kunoumweni, nokuirikidzwa kwangu andipi kunemiedzaniso yakatsetswa. Ringirai, zviro zvokutanga zvaitika, nezviro zvitsva zvino ndinozvidaidzira; ndinomuronzera zvisati zvaitika.” Embai kunaMambo Mwari ruyo rutsva, nokuirikidzwa kwake kubvira kumiganu yenyika, imwimwi munodzaka kuruandhle, nazvo zveshe zviri mukati marwo, zviwi nevanogara mukati mwazvo. Rubaya nemadhorobha arwo ngaamirudze izwi razvo, maguta awo anogarwa ngavaKhedha; vagari veSera ngavaembe ngokudakara, ngavadaidzire kubva padera pemitunhu. Ngavakudze Mambo Mwari, ngavadaidzire kuirikidzwa kwake kuzviwi. Mambo Mwari unozobuda kudai ngomurwi wehondo; kudai ngengwazi unozomusira ndurumwa dzake; unochema, unodaidzira kakurutu; unodzionisa anesimba kumagaa ake. “Ndakanyarara mukuwo wakareba, ndakatimwii nokudzibata pachangu; zvino ndinozochema kudai ngomudzimai wodo kubereka, ndinozofemuruka nokugwimba. Ndinozoparadza matunhu nezvimitunhu, nokuomesa zveshe zvakamerapo; ndinozoita kuti ndwizi dziite zviwi; ndinozoomesa makandwa. Ndinozohambisa mapofu ngepato revasikazii; ndinozovatungamirira ngenjira dzevasikazi kuzia. Ndinozoita kuti chidima chiite kujeka pamberi pavo, ndau dzisikazi kuserera kuti dziserere. Ndinozoita izvi zviro kwevari, andizovasii akadi. Vanozohwirinzwa sure, vanozotsveruka kakurutu, avo vanogonda miedzaniso yakatsetswa, navo vanoti kumiedzaniso yakanyunguruswa, muri zvimwari zvedu.” “Izwai, imwimwi madziiranzee; muringire, neimwimwi mapofu, ringirai, muone. Ndiani bofu, asi muranda wangu, nokuti dziiranzee kudai ngomutumwa wangu, uwo wendinotuma? Ndiani uri bofu kudai ndiye wakadzipira wangu, nokuti bofu kudai ngomuranda waMambo Mwari? Waona zviro zvizhinji, asi auzviringisisi; nzee dzako dzakabeuka, asi auzwi.” Mambo Mwari wakadakadzwa ngendaa yokururama kwake, kuti akurise mipango yake nokuiremeredza. Asi ava vanhu vakabirwa nokuchakatwa; veshe vavo vakabatwa muhunza, vakafishwa mumhatso dzetirongo; vari vokuchakatwa, apana unovasunhura; vakapambwa, apana unoti, “Petudzai.” Ndiani pakati penyu unozopurutana izvi? Ndiani unozopurutana nokuzwa panguva inouya? Ndiani wakapira Jakobe kuvachakati, naIsuraeri kumambavha? Andiye Mambo Mwari here, wetakashaishira? Avazi kuteera nzira dzake, avazi kupurutana mipango yake. Ndizvo wakadurura padera pake kupisha kwoushungu hwokutseneka kwake, nokutyisa kwehondo; zvakamuisa mumuriro unobaka kumarutii eshe, asi aazi kuzwisisa; nawo wakamupisha, asi aazi kuzviisa mumwoyo mwake. Asi zvino, izvi ndizvo zvinoronza Mambo Mwari uwo wakakusika, O Jakobe, uwo wakakurura, O Isuraeri: “Usatya, ngokuti ndakuripira; ndakudaidza ngezina, uri wangu. Naapo wechiambuka ngomumvura, ndinozoapo newe; peunopinda mundwizi adzizokunzvaidzi; naapo peunopotya mumuriro, auzopishwi, nomurazvu auzokupedzi. Ngokuti inini ndini Mambo Mwari, Mwari wako, Wakachena waIsuraeri, Muponesi wako. Ndinopa Egipite kuita muripiro wako, Ethiopia neSebha. Ngokuti iwewe unomutengo mukuru mukuona kwangu, unoremeredzeka, neni ndinokuda; ndizvo ndinozoisa vanhu ndau yako, nemadzinza pandau yokupona kwako. Usatya, ngokuti ndinewe; ndinozounza mibarirwana yako kubva kumabvazuva, nokubva kumabirirazuva ndinozomuunganidza. Ndinozoti dera, ‘Varekere;’ nokubani, ‘Usavarambidza;’ unzai vakororo vangu kubva kuretu, nevanasikana vangu kubva kumagumo enyika, kunyazwi ndiani unodaidzwa ngezina rangu, uwo wendakasikira uthende hwangu, uwo wendakasika nokuita.” Unzai vanhu mapofu, asi vane madziso, madziiranzee, asi vane nzee. Madzinza eshe ngaaungane pamwepo, nevanhu vashongane. Ndiani pakati pavo wakatironzera izvi nokutionisa zviro zvekare? Ngavaunze zvapupu zvavo kuti zvivapembedze; ngavazwe, varonze kuti, “Igwinyiso.” “Imwimwi muri zvapupu zvangu,” unoronza Mambo Mwari, “Nomuranda wangu wendakatsanangura, kuitira kuti muzie, munditende, muzwisise kuti ndini aye. Pamberi pangu apana mwari umweni wakaumbwa, akunazve unozoapo ngesure kwangu. Inini, inini ndini Mambo Mwari, ngepabanze pangu apana muponesi. Ndakadaidzira, ndakaponesa, ndakachumaira, apo paiya pasina chimwari chipara pakati penyu; nemwi muri zvapupu zvangu,” unoronza Mambo Mwari. “Ndini Mwari nokubvira nyamashi ndinogara ndiri aye; akuna naumwe ungamusunhura kubva munyara yangu; ndinoshanda, ndiani ungandirambidza?” Izvi ndizvo zvinoronza Mambo Mwari, Muripiri wenyu, Wakachena waIsuraeri, “Ngendaa yenyu ndinozotumira kuBhabhuroni, nokupwanyira pashi migogo yeshe, nokudaidzira kwevaKharadhea kunozopinduka kuita kuchema. Ndini Mambo Mwari, Wakachena wenyu, Musiki waIsuraeri, Mambo wenyu.” Izvi ndizvo zvinoronza Mambo Mwari, uwo unoita njira muruandhle, negwara mukati mwemvura inesimba, uwo unounza ngoro nemahachi, ngwazi yehondo; vanowa pashi pamwepo, avakoni kumuka; vaparadzwa, vadzimwa kudai ngethonje. “Musapinimidza zviro zvokutanga, nokuti kupinimidza ngezviro zvekaretu. Ringirai, ndinozoita chiro chitsva; zvino chinobuda, amuchizii here? Ndinozoita njira mushango, nendwizi murubaya. Zvikara zvomurubaya zvinozondiremeredza, makava nemhowani, ngokuti ndinopa mvura mushango, ndwizi murubaya, kupa kumwa kuvanhu vangu vakatsanangura, vanhu vendakadzisikira kuti vadaidzire kukudzwa kwangu.” “Asi auzi kudaidza kwendiri, iwewe Jakobe, asi wakarembeswa ndini, iwewe Isuraeri. Auzi kuunza kwendiri makwai omudiro wako wokupisha; auzi kundiremeredza ngemidiro yako. Andizi kukutambudza ngezvipo zvemidiro, nokuti kukurembesa ngomutombo unegwema rakanaka. Auzi kunditengera muhwarungu ngemare, nokuti kundigutisa ngemafuta emidiro yako. Asi wakaita kuti ndiremerwe ngezvishaishi zvako, wandirembesa ngokushata kwako. Inini, ndini aye uwo unotsukutidza zvishaishi zvako ngokuda kwangu, neni andichazokarakadzi ngezvishaishi zvako. Ndikarakadzise; ngatiphikisane, isa ndaa yako pamberi kuti upembedzwe. Baba ako vokutanga vakashaisha, navadudziri vako vakashaisha pamberi pangu. Ndizvo ndakatuka vakuru vendau iyo yakachena, ndakaita kuti Jakobe aparadzwe, naIsuraeri kuti atsverudzwe.” “Asi zvino, izwai O Jakobe muranda wangu, Isuraeri uwo wendatsanangura. Izvi ndizvo zvinoronza Mambo Mwari uwo wakakusika, uwo wakakuumba mundani, naye unozokudetsera: Usatya, O Jakobe muranda wangu, Jeshuruni uwo wendatsanangura. Ngokuti ndinozodurura mvura padera penyika inenyota, nezvinyuka padera pemavhu akaoma; ndinozodurura mweya wangu padera pemibarirwana yako, nezvifumiso zvangu padera porudzi rwako. Vanozomera pakati pomwenje wakasvipira, kudai ngemiti yemichindwi iri pasinde pendwizi dzemvura. Umwe uyu unozoti, ‘Inini ndiri waMambo Mwari;’ umweni unozodzidaidza pachake ngezina raJakobe; asi umweni unozonyora panyara yake kuti, ‘Ndiri waMambo Mwari,’ nokudzidudza zina raIsuraeri.” Unoronza izvi Mambo Mwari, Mambo waIsuraeri, noMuripiri wake, Mambo Mwari wehondo: “Ndiri wokutanga neni ndiri wokugumisira; ngepabanze pangu apana mwari umweni. Ndiani wakadai ndini? Ngavazvidaidzire, ngavazvironze nokuzviemesa pamberi pangu. Ndiani wadaidzira kubvira mukuwo wendakaemesa vanhu vekaretu nezviro zvinouya? Ngavatironzere zvichazouya. Musatya nokuti kutyiswa; andizi kumuronzera here kubvira pamukuwo wendakazvidaidzira? Imwimwi muri zvapupu zvangu. Uripo here mwari umweni ngepabanze pangu? Haiwa, akuna buwe rimweni; andizii narimwe.” Veshe avo vanoita miedzaniso yezvimwari yakanyunguruswa avana shwiro nezviro zvevanodakarira zviro zvisina shwiro; zvapupu zvavo azvioni nokuti kuzia. Ndizvo vanotsverudzwa. Ndiani ungaumba chimwari, nokuti kuumba muedzaniso usikaiti zvakanaka? Ringirai, veshe vanomudira vanozotsverudzwa; ngwazi vanhutuwo. Ngavaunganidzwe veshe pamwepo, ngavaeme; vanozotyiswa, vanozotsverudzwa veshe. Mupfuri unonasira sanho, echirishandira mumasimbe, unorinasira ngehamera, unorinasira ngenyara yake inesimba; unozwa nzara, nokupera simba rake; aamwi mvura, unodemera. Mutsetsi unotambanudza chipimo, unotara muedzaniso ngechinyoreso, unoutsetsa ngembezo, unoupima ngechipimo chokutendenedza; unouita kudai ngomuemo womunhu, nounaku hwomunhu, kuti ugare mumhatso yokudira. Unotemera pashi miti yemisedhare, nokuti kutsanangura miti yemuhorimu, nokuti yemiokhi, nokuita kuti ikure pakati pemiti yegwasha. Unosima muti womusedhare, nemvura yomudenga inougutisa. Zvino unozoshandiswa kuitwa huni ngomunhu; unotora rupande rwawo kurugota pachake; unobasa rupande rumweni kuti abike chingwa ndirwo. Zvino unotora rupande rumweni kuita chimwari nokuchidira; unoita muedzaniso wakatsetswa nokuugwadamira. Unopisha rupande rwawo mumuriro; padera porupande rwawo unokocha nyama, unoidya, naye unogutiswa. Unougotawo pachake echiti, “A, ndadziirwa, ndinokona kuuzwa muriro.” Ngorupande rwawo rwasara unoita chimwari, chimuedzaniso chake; unochigwadamira nokuchidira, unokumbira kwechiri echiti, “Ndisunhure, ngokuti ndiwe mwari wangu.” Avazii nokuti kuzwisisa; ngokuti vakapofomadza madziso avo kuti vasaona, nokuti vasakona kuzwisisa. Apana naumwe unopiminidza, apana unokuzia nokuti kuzwisisa kuronza kuti, “Ndakapisha rupande rwawo mumuriro, ndikabikawo chingwa ngemasimbe awo, ndakakocha nyama ndikadya. Zvino ndinozoita rupande rwawo rwasara kuti chinyangadzo here? Ndinozogwadamira here chiro chakabva kumuti?” Unodya marota, mwoyo wakachengedzerwa wakamuhedhusa, naye aachakoni kudzisunhura pachake nokuronza kuti, “Chiro ichi chiri munyara yangu yomudyo aasiri manyepo here?” Karakadza izvi, O Jakobe, naIsuraeri, ngokuti uri muranda wangu; ndakakurura uri muranda wangu; O Isuraeri, auzoriyarikanwi ndini. Ndatsvairira zvipauko zvako kuretu kudai ngegore, nezvishaishi zvako kudai ngemhute; petuka kwendiri, ngokuti ndakuripira. Embai, imwimwi matenga, ngokuti Mambo Mwari wazviita; daidzirai, A imwimwi udzamu wenyika; embai, O imwimwi mitunhu, O imwimwi makwasha, nomuti weshe uri mukati mwawo! Ngokuti Mambo Mwari waripira Jakobe, naye unozokudzwa mukati mwaIsuraeri. Izvi ndizvo zvinoronza Mambo Mwari, Muripiri wako, uwo wakakurura mundani: “Ndini Mambo Mwari, wakasika zviro zveshe, uwo ega wakatambanudza matenga, uwo pachake wakatambanudza nyika; uwo unokanyangidza zvioniso zvevanyepi, nokuita kuti manyanga aite mapenzi; uwo unohwirinza sure vamuna vakangwara, nokuita kuti ungwaru hwavo huite upenzi; uwo unogwinyisa izwi romuranda wake, nokuzadzisa kupanga kwenhumwa dzake; uwo unoti ngeJerusarema, rinozogarwa, nemadhorbha aJudha kuti, anozoakiswa, ndinozoakisa ndau dzavo dzakaputsika; uwo unoti kuudzamu, ‘Oma, neni ndinozoomesa ndwizi dzenyu;’ uwo unoti kuSairusi, ‘Muushi wangu, unozoita zveshe zvendinoda;’ uwo unoti ngeJerusarema, ‘Rinozoakiswa,’ nokutemperi kuti, ‘Madzeyo ako anozoiswa.’ ” Izvi ndizvo zvinoronza Mambo Mwari kunaSairusi, wakadzodzwa wake, uwo wendabata nyara yake yokumudyo, kuti anyise madzinza pamberi pake, nokusunhura zvokusimira zvoumambo, kubeura misiwo iri pamberi pake, nemisiwo yokupinda mudhorobha aizokonywi. “Ndinozoenda pamberi pako, ndechisereresa ndau dzakatunhumara; ndinozopwanya misiwo yethusi kuita zvigurwa nokubadzura ngepakati mipiningidzo yesimbi. Ndinozokupa upfumi hwechidima, noupfumi hwendau dzakafishika, kuti uzie kuti ndini, Mambo Mwari, Mwari waIsuraeri, uwo unokudaidza ngezina rako. Ngendaa yaJakobe muranda wangu, naIsuraeri wakatsanangurwa wangu, ndinokudaidza ngezina rako, ndinokupa mutupo wakanaka, kunyazwi aundizii. Inini ndini Mambo Mwari, akuna umwenizve; ngepabanze pangu akuna mwari. Ndinokusimidza ngezvokurwa ndizvo, kunyazwi aundizii, kuti vazie kubvira kumabvazuva nokubvira kumabirirazuva, kuti akuna umweni ngepabanze pangu. Ndini Mambo Mwari, akuna umweni. Ndinoita kujeka nokusika chidima; ndinoita kunyarara nokusika kushata; ndini Mambo Mwari, uwo unoita izvi zveshe. Nayai, O matenga kubva mudenga, nemakore ngaadurure pashi kururama; nyika ngaibeuke, kuunza ruponeso, ngaiite kuti kururama kubudewo; inini Mambo Mwari ndakazvisika.” Ihehe kwaari unorwisana nomusiki wake, chiwenda nomuumbi! Dongo rinoronza here kune unoriumba kuti, “Unoumbenyi?” Nokuti, “Mushando wako auna zvibato?” Ihehe kwaari unoti kunababa, “Unoberekenyi?” Nokuti kumudzimai, “Unorwadziwa ngokuberekenyi?” Izvi ndizvo zvinoronza Mambo Mwari, Wakachena waIsuraeri, noMusiki wake; “Unozondibvunza here ngendaa yevana vangu, nokuti kundipanga ngendaa yomushando wenyara dzangu? Ndakaita nyika, ndikasika munhu padera payo; inyara dzangu dzakatambanudza matenga, neni ndakapanga hondo dzawo dzeshe. Ndamirudza Sairusi mukururama, ndinozoruramisa njira dzake dzeshe; naye unozoaka dhorobha rangu, unozosunhura vabatwa vangu kuti vaende, pasina muripo nokuti mutengo,” unoronza Mambo Mwari wehondo. Izvi ndizvo zvinoronza Mambo Mwari, “Upfumi weEgipite, nezvinotengeswa zveEthiopia, nezvevaSabheani, vamuna vakareba, vanozouya kwouri, navo anozoita vako; vanozoteera sure kwako, vanozouya vakasungwa ngemaketani, vanozokugwadamira. Vanozopota kwouri vechiti, ‘Mwari unewe iwewe wega, akuna umwenizve; akuna mwari ngepabanze pake.’ ” Ngegwinyiso iwewe uri Mwari unodzifisha pachake, O Mwari weaIsuraeri, Muponesi. Veshe vavo vanozotsverudzwa nokukangaidzwa, vaiti vemiedzaniso yokudira vanopinda mukukangaidzwa pamwepo. Asi vaIsuraeri vanoponeswa ndiMambo Mwari ngoruponeso rwemhera nariini; amuzotsverudzwi nokuti kukangaidzwa mhera nariini. Ngokuti ndizvo izvi zvinoronza Mambo Mwari, uwo wakasika matenga (Mwari emene!) Wakaumba nyika nokuiita, (wakaigwinyisa, aazi kuisikira madambudziko, asi wakaisikira kuti igariwe ngavanhu!) Inini ndini Mambo Mwari, akuna umweni. Andizi kuereketa mukufishika, munyika yechidima; andizi kuronza kurudzi rwaJakobe kuti, mukukangaidzwa nditsvakenyi. Inini Mambo Mwari ndinoereketa gwinyiso, ndinodaidzira zvakarurama. “Unganidzanai pachenyu muuye pamwepo, kwedzeranayi pasinde, imwimwi mwakapokonyoka kubva mumadzinza! Avana ruziyo avo vanotwara peshe miedzaniso yavo yemiti, vechiangira kukumbira kunechimwari chisikakoni kuponesa. Daidzira, ubudise ndaa yako; ngavapangane pamwepo! Ndiani wakaronza izvi karetu? Ndiani wakazvibudisa karetu? Andinipi Mambo Mwari here? Akuna mwari umweni ngepabanze pangu, Mwari wakarurama noMuponesi; akuna umweni ngepabanze pangu. Kunukukirai kwendiri muponeswe, magumo eshe enyika; ngokuti ndini Mwari, akuna umweni. Inini pachangu ndakapika, pamuromo pangu pakabuda zvakarurama, izwi iro risikazopetuki, kwendiri mabvi eshe anozogwadama, nendimi dzeshe dzinozopika ndini. “Kwega munaMambo Mwari,” zvinozoronzwa ngendaa yangu kuti, “Mune kururama nesimba.” Vanozouya veshe vaimutsenekera vanozotsverudzwa. MunaMambo Mwari rudzi rweshe rwaIsuraeri runozopembedzwa nokuirikidzwa. “Bheri naNebho vanokotama pashi; miedzaniso yavo yokudira inoita mutwaro padera pemhuka nen'ombe; zviro zvomunotwara zvakarongedzwa kudai ngomutwaro padera pemhuka dzakaremba. Vanokotama, vechigwadama pashi pamwepo; avakoni kugumisa mutwaro, asi ivo vemene vanopinda muubatwa. Purutanai kwendiri, O vemhatso yaJakobe, veshe vakasara vemhatso yaIsuraeri, vakabarwa ndini kubvira pakuberekwa, kutwarwa kubvira mundani. Kunyazwi muusharuka hwenyu ndiri aye, kunyazwi bvudzi renyu rachena, ndinozomutwara. Ndaita, ndinozotwara; ndinozotwara neni ndinozoponesa. Munozonditodzanisa nani, munozondiedzanisa nenyi nokundiita ingateyi takatodzana?” Vanomwaradza mukore kubvisa muchikhwama, nokupima sirivha pachipimo, vanotsvaka munyungurusi womukore, uwo unouita chimwari; zvino vanowira pashi, vechiudira. Vanochimirudza papfudzi, vanochitwara, vanochiemesa pandau yacho, nacho chinoemapo; achikoni kuhamba kubva pandau pacho. Kudai umwe echidaidzira kwechiri, achikoni kupingura, nokuti kumuponesa kubva mukutambudzika kwake. Karakadzai ichi, mupinimidze ndicho, mupinimidzezve ndicho mumwoyo yenyu, imwimwi vapauki, Karakadzai zviro zvokutanga zvekaretu; ngokuti ndini Mwari, akuna umweni; ndini Mwari, akuna umweni wakadai ndini, kudaidzira magumisiro, kubvira pakutangisa nokubvira panguva dzekaretu zviro zvisati zvaitwa ndechiti, chidisiso changu chinozogara chakaema, neni ndinozoita zveshe zvinondidakadzisa, ndechidaidza shiri inokara kubva kumabvazuva, munhu wendakapanga kudisisa kwangu kubva kunyika iri kuretu. Ndaereketa, ndinozochiita; ndaronga, neni ndinozozviita. “Purutanai kwendiri, imwimwi munemwoyo wakaoma, imwimwi muri kuretu kubva mukununurwa. Ndinounza pasinde kununura kwangu, akusiri kuretu, noruponeso rwangu aruzononoki; ndinozoisa ruponeso rwangu muZioni, ngendaa yaIsuraeri uthende hwangu.” Dzaka pashi, ugare mubukuta, iwewe mhandwe, mwanasikana weBhabhuroni! Gara pashi pamavhu pasina dendemaro, mwanasikana wevaKharadhea! Ngokuti auchazodaidzwi kuti wakapfaa nousikabatiki. Tora makuyo, ukuye zviyo, dusa vheri rako, dusa jira rako, fukura mirenje yako, ambuka ndwizi. Utitinini hwako hunozooneka, kutsverudzwa kwako kunozooneka. Ndinozounzidzira, andizotsari munhu. Muripiri wedu, Mambo Mwari wehondo ndiro zina rake, uwo Wakachena waIsuraeri. Gara mukunyarara, uende muchidima, mwanasikana wevaKharadhea! Ngokuti auchazodaidzwizve kuti uri vahosi voumambo. Ndakatsenekera vanhu vangu, ndakasvipisa nhaka yangu; ndakavapira munyara yako, auzi kuvaitira nyasha; wakaisa joka rako rinorema padera pevasharuka. Wakati, “Ndinozoita vahosi mhera nariini;” ndizvo auzi kuisa izvi zviro mumwoyo mwako, nokuti auzi kupinimidza magumisiro azvo. Ndizvo zvino izwa izvi, iwewe wakadzipira mukudisisa kudakara, uwo unogara mukungwaririka, iwe unoti mumwoyo mwako, “Ndini inini, akuna umwenizve ngepabanze pangu; andizogari kudai ngeshirikadzi, nokuti andizozii kurashikirwa ngevana.” Zveshe izvi zviro zviiri zvichauya padera pako ngomukuwo mudoko ngezuva rimwe, kurashikirwa ngevana noushirikadzi; mukuzara kwazvo zvinozouya padera pako, kunyazwi huripo uwandu hweman'anga ako, nesimba guru revasaramusi vako. Iwewe wakazwa wakangwaririka mukushata kwako; wakaronza kuti, “Apana unondiona.” Ungwaru hwako noruziyo rwako zvakurashikisa, newe wati mumwoyo mwako, “Ndini ndega, akuna umweni ngepabanze pangu.” Asi kushata kunozouya padera pako, ukwo kwousikakoni kubvisa peuri ngemasaramuso; nokushata kunozokugumira, newe auzokoni kukudusa; nokuparadzwa kunozokugumira ngokukasira, ukwo kwousikazi kuzia chiro. Ema zvino mumasaramuso ako neman'anga ako akawanda, awo ewakashandira kubvira muutsva hwako; pamweni zvingaitika kuti ubudirire, pamweni zvingaitika kubudisa kutyisa. Unorembeswa ngouwandu hwekubvunzisa kwako; tendera avo vanofunda ngezvomudenga vaeme vakuponese, avo vanoringira nyeredzi, nepamwedzi mutsva vakuronzere ngezvinozokugumira. Ringira, vanozodai ngemahundi; muriro unozovapisha, avazodzinunuri pachavo kubva kusimba romurazvu. Akuzoiti masimbe okugota, nokuti muriro unogara pamberi! Ava vanhu vakadai kwouri ngevewakashanda navo, avo vewakatengerana navo kubvira muutsva hwako; vanonzerereka umwe ngaumwe munjira mwake; apana naumwe unozokuponesa. Izwai izvi, O mhatso yaJakobe, avo vanodaidzwa ngezina raIsuraeri, neavo vanobva kuchinyuka chaJudha, avo vanopika ngezina raMambo Mwari, vechipupura ndiMwari waIsuraeri, asi haiwa ngegwinyiso nokuti ngokururama. Ngokuti vanodzidaidza pachavo kuita vagari vedhorobha rakachena, nokudzigwinyisa ndiMwari waIsuraeri; Mambo Mwari wehondo ndiro zina rake. Zviro zvekaretu ndakazvidaidzira karetu, zvakabuda kubva kumuromo wangu, neni ndakaita kuti zviziikanwe; zvino ndakazviita ngokukasira, nazvo zvakaitika. Ngokuti ndinozia kuti uri wakakonza, nomutsipa wako unemurunda wakagwinya kudai ngesimbi, nehuma yako yakadai ngethusi, ndizvo ndakazvironza kwouri izvi kubvira karetu; zvisati zvaitika ndakazvidaidzira kweuri, kuti usazoronza kuti, “Muedzaniso wangu wokudira wakazviita, miedzaniso yangu wakatsetswa newakaumbwa ndiyo yakazvipanga.” Mwazwa, onai izvi zveshe zvino; nemwi amuzozvidaidziri here? Kubvira panguva ino kuenda mberi ndinokuita kuti uzwe zviro zvitsva, zvakafishika zviro zvomusikazi kuzia. Zvakasikwa zvinopano, haiwa karetu; amuzi kuzvizwa zuro nyamashi asati aguma, kuitira kuti usazoronza kuti, “Ringirai, ndaizvizia.” Ausati wazwa, ausati wazia; kubvira pamukuwo wekaretu nzee dzako adzizi kubeurwa. Ngokuti ndakazia kuti waizoita ngokuchengedzera kakurutu, nokuti kubvira pakubarwa wakadaidzwa kuzwi mupanduki. Ngendaa yezina rangu ndanonosa ushungu hwangu, ngendaa yokukudzwa kwangu, ndinoubatira iwewe kuti ndisakurasha. Ringira, ndakupereresa, asi haiwa kudai ngesirivha, ndakuedza mukati mwechoto chokutambudzika. Ngendaa yangu, ngendaa yangu, ndinozviita, ngokuti zina rangu ringasvipiswa ngenyi? Uthende hwangu andizohupi umweni. Purutana kwendiri, O Jakobe, naIsuraeri wendakadaidza: “Ndini aye; ndini wokutanga, neni ndiri wokugumisira. Nyara yangu yakaisa tsikiro renyika, nenyara yangu yokumudyo yakatambanudza matenga; apo ndechizvidaidza, zvinomiruka kuema kutidzi. Unganai, imwimwi mweshe muzwe. Ndiani pakati pavo wakadaidzira zviro izvi? Mambo Mwari unomuda. Unozoita kuda kwake padera peBhabhuroni, nomuoko wake unozorwisa vaKharadhea. Inini, kunyazwi inini, ndaereketa nokumudaidza. Ndamuunza, naye unozoita kuti njira yake ibudirire. Kwedzerai kwendiri, muzwe izvi. Kubvira pakutanga andizi kuereketa mukufishika, kubvira pamukuwo wechakaemeswa, ndaiyapo.” Nazvino Mambo Mwari, Mwari wandituma nomweya wake. Izvi ndizvo zvinoronza Mambo Mwari, Muripiri wenyu, Wakachena waIsuraeri: “Ndini Mambo Mwari, Mwari wenyu, uwo unomudzidzisa kuti muuyirwe; uwo unomutungamirira munjira inosisa kuti muhambe ndiyo. O kudai mwaipurutana mipango yangu! Zvino kunyarara kwenyu kwaizodai ngerwizi, nokururama kwenyu kwaizodai ngemafungo oruandhle. Mibarirwana yako yaizodai ngejecha, nevana vako vaizodai ngomicheche yaro; zina ravo arizobviswi, nokuti kuparadzwa kubva pamberi pangu.” Budai kubva Bhabhuroni, tizai kubva kuvaKharadhea, daidzirai izvi ngeizwi rokudakara, daidzirai, tumirai nokumagumo enyika; ronzai kuti, “Mambo Mwari waripira muranda wake Jakobe.” Avazi kuzwa nyota apo paakavatungamirira murubaya; wakavaitira kuti mvura ierere kubva mubuwe; wakamwesa buwe, nemvura yakapopoma. “Akuna kunyarara kunowakashata,” unoronza Mambo Mwari. Purutani kwendiri, O zviwi; nasai kupurutana, imwimwi madzinza anobva kuretu! Mambo Mwari wakandidaidza ndisati ndabarwa, apo ndiri mundani yamai angu wakadudza zina rangu. Wakaita muromo wangu kuti udai ngeshoti yakapinza, wakandifisha mubvute renyara yake; wakandiita kuti ndidai ngomusee unongaikira, akandingwarira muchikomwe chake. Naye wakati kwendiri, “Uri muranda wangu, iwewe Isuraeri, uwo mwaari ndinozokudzwa.” Asi ndakati, “Ndashanda pasina shwiro, ndapedza simba rangu pasina chiro nepasina shwiro; asi ngegwinyiso kutongwa kwangu kuri munaMambo Mwari, nomusharo wangu uri munaMwari wangu.” Nazvino Mambo Mwari unoti, uwo wakandisika mundani kuti ndiite muranda wake, kuti ndipetudze Jakobe kwaari, nokuita kuti Isuraeri aunganidzwe kwaari, ngokuti ndinoremeredzwa mukuona kwaMambo Mwari, naMwari wangu waita simba rangu. Unoti, “Chiri chiro chakareruka kakurutu kuti uite muranda wangu kumirudza madzinza aJakobe, nokupetudza vakasara vaIsuraeri; ndinozokupira kuti uite kujeka kwemadzinza, kuti ruponeso rwangu rugume kumagumo enyika.” Ndizvo izvi zvinoronza Mambo Mwari, Muripiri waIsuraeri neWakachena wake, kune umwe unoshoorwa kakurutu, unonyenywa ngamadzinza, hloko yevatongi: “Madzimambo anozoona, amiruke, vatongi, navo vanozodziradzika pashi pachavo, ngendaa yaMambo Mwari uwo unogondeka, Wakachena waIsuraeri, uwo wakakutsanangura.” Ndizvo izvi zvinoronza Mambo Mwari, “Ngomukuwo unoashirika ndakupingura, ngezuva roruponeso ndakudetsera; neni ndaikungwarira, nokukupira kuita chitenderano nevanhu, kumirudza nyika, kuita kuti vagare nhaka youpfumi hwakachakatwa, wechiti kune vakasungwa, ‘Budai muende,’ nokune vari muchidima, ‘Dzioneseyi.’ Vachadya munjira, nepadera pendau dzakakwirira dzisikagarwi dzinozoita mbusho dzavo. Avazozwi nzara nokuti nyota; zuva nokuti kupisha azvizovawisiri pashi, ngokuti iye unovaitira nyasha unozovatungamirira, nepasinde pezvinyuka zvemvura unozovatungamirira. Neni ndinozoita kuti mitunhu yangu yeshe iite njira, nemapato angu anozoremeredzwa. Ringira, ava vanozouya vechibva kuretu; ringira, avo vanozobva dera nokumabirirazuva, naavo vanozobva kunyika yaSinimu.” Embai ngokudakara, O matenga, udakare, O nyika; muambe kuemba, O mitunhu, mupinde mukuemba! Ngokuti Mambo Mwari unoembedzera vanhu vake, naye unozoitira nyasha vanotambudzwa vake. Asi Zioni rakati, “Mambo Mwari wandisiya, Mambo Mwari wangu wandiriyarwa.” “Mudzimai ungariyarwa ruchiya rwake runoamwa here mwoyo mwana wendani yake nokusikasvipira? Kunyazwi ava vangariyarwa, asi inini andizokuriyarwi. Ringira, ndakakunyora pazvanza zvenyara dzangu; marukumbati ako andoripo pamberi pangu. Vana vako vanokasira kuuya; vaparadzi vako avo vanokuchakata vanozobuda kubva pamberi pako. Mirudza madziso ako, uringire kweshe, uone; veshe vanodziunganidza, vanouya kwouri. Kudai ngezvendinopona,” unoronza Mambo Mwari, “Ngegwinyiso unozodzisimidza ndizvo zveshe kudai ngechinemeso, nokudai ndimakhoti unozozvinemesa ndizvo.” “Ngegwinyiso zvakachakatwa zvako nendau dzako dzakasiyiwa nenyika yako yakaparadzwa, ngegwinyiso zvino unozotsikirirana paugaro hwako, naavo vakakumedza vanozoiswa kuretu. Vana vakaberekwa sure kwokufirwa kwako vanozoti munzee dzako, ‘Ndau yakanyanya kutitsongera, tipei ndau yokuti tigare.’ Zvino unozoti mumwoyo mwako, ‘Ndiani wandibarira ava? Andizi kufirwa ngevana vangu here, ndisaiya hloko here, ndechithutha apo naapo? Ndiani wakarera ava, ringira, ndakasiyiwa ndega, ava vabva kuri?’ ” Izvi ndizvo zvinoronza Mambo Mwari, Mwari, “Ringira, ndinozomirudza nyara yangu kunemadzinza, ndiemese mujeki wangu kumadzinza; navo vanozounza vana vako vakavaisa pamaditi avo, nevanasikana vako vanozodzvarwa pamafudzi avo. Madzimambo anozoita madzibaba okukurera, vahosi vawo vanozoita madzimai okukurera. Vanozokotamisa hope dzavo pashi, vanozokotama pashi pamberi pako, vanambure bukuta retsoka dzako. Zvino unozozia kuti ndini Mambo Mwari, naavo vanondigarira avazotsverudzwi.” Zvakachakatwa zvingatorwa here kubva kuneavo vanesimba? Nokuti hloko yevanotyisa ingarwirwa here? Asi unoronza izvi Mambo Mwari, “Kunyazwi hloko dzevane simba dzinozotorwa, nezvakachakatwa zvevanotyisa zvinozorwirwa; ngokuti ndinozorwisana navo vanorwisana newe, neni ndinozoponesa vana vako. Ndinozoita kuti vatambudzi vako vadye nyama yemiiri yavo, navo vanozoraradza ngengazi yavo, kudai ngevhini. Zvino vanhu veshe vanozozia kuti inini Mambo Mwari ndini Muponesi wako noMuripiri wako, uneSimba waJakobe.” Izvi ndizvo zvinoronza Mambo Mwari, “Iri pari tsamba yamai ako yokugura muchado, iyo yendakavarasha ndiyo? Nokuti kunaani wevakweretesi vangu wendakakutengesa kwaari iwewe? Haiwa, ngendaa yezvishaishi zvako wakatengeswa, ngendaa yokupauka kwako mai ako akarambwa. Ngenyi paiya pasina naumwe apo pendakagumapo? Ngenyi paiya pasina naumwe wokundipingura apo pendakadaidza? Nyara yangu yakafupiswa kuti aingakoni kuripira here? Nokuti andina simba rokusunhura here? Ringira, ngokukaraidza kwangu ndinoomesa ruandhle, ndinoita kuti ndwizi dziite rubaya; hove dzadzo dzinonuhwa, ngokuti apana mvura, nadzo dzinofa ngendaa yenyota. Ndinopfekesa matenga ngokusvipa, neni ndinoita kuti zvokusimira zvawo zviite machira emasaka.” Mambo Mwari, Mwari wandipa rurumi rwomudzidzisi, kuti ndizie kugwinyisa ngokuereketa izwi kwaari unoremba. Unondimusa mangwanani ngemangwanani, unomusira nzee dzangu kuti ndipurutane kudai ngevakadzidziswa. Mambo Mwari, Mwari wakabeura nzee dzangu, neni andizi kuita unomukira, nokuti kupetuka sure. Ndakafuratira mushana wangu kunevakandichaya, netsaya dzangu kuneavo vakabvita ndebvu; andizi kufisha hope yangu kubva mukutsverudzwa nokupfirwa mata. Mambo Mwari, Mwari unondidetsera; ndizvo andizi kutsverudzwa; ndizvo ndaemesa hope yangu kuti idai ngebuwe rakakonza, neni ndinozia kuti andizotsverudzwi. Uri pasinde uwo unondipembedza. Ndiani unozophikisana neni? Ngatieme pamwepo. Ndiani gaa rangu? Ngaakwedzere kwendiri. Ringirai, Mambo Mwari, Mwari unondidetsera; ndiani uwo unozondiitira ndaa? Veshe vanozotsakara kudai ngezvokufuka; unundu hunozovadya. Ndiani pakati penyu unotya Mambo Mwari, unopurutana izwi romuranda wake, uwo unohamba muchidima, naye asina kujeka, asi unogonda zina raMambo Mwari, nokutseyama panaMwari wake? Ringirai, imwimwi mweshe murivabasi vomuriro, munodzitendenedza ngetsatsi. Hambai mukujeka kwomuriro wenyu, nomukati mwetsatsi dzemwakabasa. Ichi ndicho chomunozoashira kubva kunyara yangu: munozoata pashi mukutambudzika. “Purutanai kwendiri, imwimwi munoteerera kururama, imwimwi munotsvaka Mambo Mwari. Ringirai kuruware iyo kwemwakatemwa, nokumurindi wehunza kwemwakatsiwa. Ringirai kunaAbrahama baba enyu, nokunaSara uwo wakamubara; ngokuti waiya umwe wega apo pendakamudaidza, asi ndakamufumisa nokumuwanza. Ngokuti Mambo Mwari unozoembedzera Zioni; unozoembedzera ndau dzaro dzeshe dzakaparadzwa, unozoita kuti shango raro ridai ngomunda weEdheni, rubaya rwaro kudai ngomunda waMambo Mwari; kudakara nokudakadzwa zvinozooneka mukati mwaro, kubonga neizwi rokuemba. Purutanai kwendiri, imwimwi vanhu vangu; ndizwei, imwimwi dzinza rangu; ngokuti mupango unozobuda kubva kwendiri, nokutonga kwakanaka kwangu kueme kuita kujeka kwevanhu. Kururama kwangu kunokwedzera pasinde, noruponeso rwangu ruri munjira, nemioko yangu inounza kutonga kwakanaka kumadzinza. Zviwi zvinozoringira kwendiri, zvinozogondera kumioko yangu. Mirudzai madziso enyu kumatenga, muringire pashi panyika; ngokuti matenga anozongarangaka kudai ngechiushi, nenyika inozotsakara kudai ngejira, naavo vanogaramwo vanozofa ngenjira inotodzana; asi ruponeso rwangu runozogara mhera nariini, nokururama kwangu akuzopedzwi. Purutanai kwendiri, imwimwi munozia kururama, imwimwi vanhu vane mupango wangu mumwoyo yenyu; musatya kutsverudzwa ngavanhu vamweni, musatya kusvororedza kwavo. Ngokuti unundu hunozovadya kudai ngejira, nehonye dzinozovadya kudai ngemamviri; asi kururama kwangu kunozogara mhera narini, noruponeso rwangu kumibarirwana yeshe.” Muka, muka, upfeke simba, O muoko waMambo Mwari! Muka, kudai ngemumazuva ekaretu, mibarirwana yakapinda. Andiwepi uwo wakatematema Rahabhi kuita zvigurwa here, uwo wakabaya chikara chinotyisa? Andiwepi wakaomesa ruandhle, mvura yakawanda yoruandhle rwakadzama; wakaita njira muruandhle rwakadzama, kuti vakaripirwa vaambuke? Ndizvo vakaripirwa vaMambo Mwari vanozohwirira, navo vanozouya Zioni, vechiemba; nokudakara kusikaperi kunozogara padera pemasoro avo; vanozoona kudakadzwa nokudakara, kusvipo mwoyo nokutsumba zvinozovatiza. “Inini, ndini aye unokuembedzera; ngenyi zvino wechitya munhu unosisira kufa, munhu unofota kudai ngomwenje? Wariyarwa Mambo Mwari, Musiki wako, uwo wakatambanudza matenga, nowakaaka matsikiro enyika. Munoangirira kutya zuva reshe ngendaa youshungu hwomutambudzi, uwo unokotamira kuparadza. Asi huripari ushungu hwomutambudzi? Mubhanditi unokasira kusunhurwa; aazofi nokudzaka muhunza, nokuti kutama chingwa. Ngokuti inini ndini Mambo Mwari, Mwari wako, uwo unovhundura ruandhle maungu akaungumira; Mambo Mwari wehondo ndiro zina rake. Ndaisa mazwi angu mumuromo wako, nokukufisha mubvute renyara yangu, ndechitambanudza matenga, nokuaka matsikiro enyika, nokuti kuneZioni, ‘Muri vanhu vangu.’ ” Mukai, mukai! Miruka, O Jerusarema, iwewe wakamwa panyara yaMambo Mwari tsani youshungu hwake, uwo wamwa masese mujomeya rokuthethereka. Akuna naumwe wokumutungamirira pakati pevana veshe vaakabereka; apana naumwe unomubata nyara pakati pevana veshe vaakarera. Izvi zviro zviiri zvakakuwira; ndiani unozokusvipiro mwoyo? Kuchakatwa nokuparadzwa, nzara neshoti; ndinozokuita maembedzerenyi? Vana vako vademera, vanoata ngedera kwemapato eshe, kudai ngeshoma yabatwa mumambure; vakazadzwa ngoushungu hwaMambo Mwari, kukaraidza kwaMwari wako. Ndizvo izwa izvi zvino, iwewe unotambudzwa, uwo wararadza, asi haiwa ngevhini. Izvi ndizvo zvinoronza Mambo wako, Mambo Mwari, Mwari wako uwo unoemerera ndaa dzevanhu vake, “Ringira, ndakutorera tsani yokuthethereka kubva munyara yako; auchazomwi masese ejomeya roushungu hwangu. Asi ndinozoiisa munyara yaavo vanokutambudza, avo vakati kwouri, ‘Gwadama pashi, kuti tihambe padera pako; newe wakaradzika pashi mushana wako kuti udai ngamavhu nokudai ngepato, kuneavo vanohamba padera paro.’ ” Muka, muka, pfeka simba rako, O Zioni! Pfeka machira ako akanaka, O Jerusarema, dhorobha rakachena; ngokuti kubvira zvinopano akuchazouyi kwouri usikazi kuchekwa nousikazi kusukika. Dziguwe kubva kubukuta; miruka ugare, O Jerusarema: dzisunhure kubva kuzvisungo zvomutsipa wako, O mwanasikana weZioni mubatwa. Ngokuti izvi ndizvo zvinoronza Mambo Mwari, “Mwakatengeswa ngezvisina shwiro, nemwi munozoripirwa ngepasina mare.” Ngokuti izvi ndizvo zvinoronza Mambo Mwari, Mwari: “Karetu vanhu vangu vakadzaka muEgipite koogaramwo vari vanhu vapara; vaAsiriawo vakavatambudza pasina ndaa. Ndizvo zvino, ndinoitenyi pano,” unoronza Mambo Mwari, “Ndechiona kuti vanhu vangu vanotorwa pasina ndaa? Vatongi vavo vanovapopotera,” unoronza Mambo Mwari, “Nezina rangu rinoangira kutukwa mazuva eshe. Ndizvo vanhu vangu vanozozia zina rangu; ndizvo vanozozia ngeiro zuva kuti ndini unoereketa, ringirai, ndini.” A kunakanyi padera pomutunhu kwetsoka dzouwo unodaidzira kunyarara, uwo unouya nemashoko akanaka, uwo unoteketesa ruponeso, uwo unoti kuZioni, “Mwari wako unotonga!” Purutana! Varindi vako vanodaidzira; vanoemba veshe pamwepo ngokudarakara; ngokuti pamhene vanoona kupetuka kwaMambo Mwari kuenda Zioni. Embai pamwepo kuemba, imwimwi matongo eJerusarema; ngokuti Mambo Mwari waembedzera vanhu vake, waripira Jerusarema. Mambo Mwari wafukura muoko wake wakachena pamberi pemadziso emadzinza eshe, nemagumo eshe enyika anozoona ruponeso rwaMwari wedu. Ibvai imwimwi, ibvai, budai kubanze kubvapo! Musagwama chiro chinosvipisa; budai kubva pakati paro; mudzichenese, imwimwi munotwara zvidziyo zvaMambo Mwari. Ngokuti amuzobudi ngokukasira nokuti ngokutiza; ngokuti Mambo Mwari unozoenda pamberi penyu, naMwari waIsuraeri unozoita mungwariri ngesure kwenyu. Ringirai, muranda wangu unozobudirira, unozokudzwa nokukuriswa, naye unozokudzwa kakurutu. Vazhinji vakashamiswa ndiye, (hope yake yakashaishirwa kupinda kunyazwi ngouri munhu, nomuemo wake kupinda womunhu). Ndizvo anozofafazira madzinza akawanda; madzimambo anozokonya miromo yavo ngendaa yake; ngokuti izvo zvisikazi kumboronzwa kwevari vanozozviona; neicho chevasikazi kumbozwa, vanozochizwisisa. Ndiani watenda mushumo wedu? Nomuoko waMambo Mwari waoniswa kunaani? Ngokuti wakakura pamberi pake kudai ngomuningwi wechisimwa, nokudai ngenzinde inobuda mumavhu akaoma; aana muemo wakanaka nokuti umambo, naapo tinozomuona akuna unaku hwetingamuda ndihwo. Wakashoorwa nokurambwa ngevamweni; munhu wamadambudziko, nowokurovedzera kusvipo mwoyo; kudai ngeumwe uwo vanhu vakafisha hope dzavo kubva kwaari; wakashoorwa, nesu atizi kumuremeredza. Ngegwinyiso wakatwara kusvipo mwoyo kwedu, akatwara nhenda dzedu; asi isusu takamuerenga ari wakatambudzwa, wakachaiwa ndiMwari, nokutambudzwa. Asi wakaremadzwa ngendaa yezvishaishi zvedu, wakaitwa mizvimbiri ngendaa yokushata kwedu; kuororwa kwokunyarara kwedu kwakaa padera pake, ngemizvimbo yake tinoponeswa. Isusu teshe takarashika kudai ngemakwai, takapauka umwe ngaumwe kunjira yake; naMambo Mwari wakaisa padera pake kushaisha kwedu kweshe. Wakashononeswa, akatambudzwa, asi aazi kubeura muromo wake; wakaunzwa kudai ngegwai mukuurawa, nokudai ngegwai rinonyarara pamberi pomugundi waro, ndizvo aazi kubeura muromo wake. Ngokuangiridzwa kutongwa wakatorwa. Ndiani uwo unozoereketa ngemibarirwana yake? Ngokuti iye wakagurwa kubva munyika yevanopona, wakatambudzwa ngendaa yokupauka kwavanhu vangu. Vakaita iba rake nevakashata, nomukufa kwake nomupfumi; kunyazwi asikazi kuita zvakashata, paiya pasina kuchengedza mumuromo wake. Asi kwaiya kuda kwaMambo Mwari kumuparadza ngokurwadziwa apo unoita kupona kwake mudiro wokushaisha, unozoona mubarirwana wake, unozorebesa mazuva ake; kubudikidza ndiye kuda kwaMambo Mwari kunozobudirira munyara yake. Ngesure kwokurwadziwa unozoona michero yokutambudzika kwomweya wake, naye unozogutiswa; kubudikidza ngokuzia kwake muranda wangu wakarurama unozopembedza vazhinji; naye unozotwara zvishaishi zvavo. Ndizvo ndinozomupa chikoaniswa chake pakati pevakuru, naye unozokoanisirana zvakachakatwa nevanesimba; ngokuti wakadurura mweya wake metsa pakufa, akaerengwa pamwepo nevashaishi; asi wakatwara kushaisha kwevazhinji, wakakumbirira kukungurirwa kwevapauki. “Emba, O ngomwa iwewe usikazi kubereka; putika kuemba, unase kudaidzira, iwewe usikazi kurwadziwa! Ngokuti vana vomukadzi wakarambwa vakapinda kuwanda kunevana vomukadzi wakaroorwa,” unoronza Mambo Mwari. “Kudza ndau yetende rako, machira ougaro hwako ngaatambanudzwe; usatsonza; rebesa tambo dzematende ako, ugwinyise mbambo dzako. Ngokuti unozowandira kumudyo nokumuoshwe; nemibarirwana yako inozogara nhaka yemadzinza, nokuita kuti madhorobha akaita matongo agarwe. Usatya, ngokuti auzotsverudzwi; usapera simba, ngokuti auzopindi mukutsverudzwa; ngokuti unozoriyarwa kutsverudzwa kwoutsva hwako, auchazokarakadzizve kushoorwa kwoushirikadzi hwako. Ngokuti Musiki wako ndiye mwamuna wako, Mambo Mwari wehondo ndiro zina rake; Wakachena waIsuraeri ndiye Muripiri wako; unozodaidzwa kuzwi, Mwari wenyika dzeshe. Ngokuti Mambo Mwari wakakudaidza kudai ngomukadzi uwo wakarekerwa unotambudzika mumweya, kudai ngomukadzi uwo wakaroorwa ari mutsva, apo arambiwa,” unoronza Mwari wako. “Kwomukuwo mudoko ndakakusiya, asi ngenyasha huru ndinozokuunganidza. Ngoushungu hunofashukira ndakafisha hope yangu kubva kwouri mukuwo mudoko; asi ngenyasha dzangu dzisikaperi ndinozokukungurira,” unoronza Mambo Mwari, Muripiri wako. “Ngokuti ichi chakadai ngemazuva aNoa kwendiri; kudai ngezvendakapika kuti, ‘Ndambi yaNoa aichazoapozve padera penyika;’ ndizvo ndapika kuti andizokutsenekeri nokuti kukutuka. Ngokuti mitunhu inozobva nezvimitunhu zvechiduswa; asi nyasha dzangu dzinorudo adzizoperi kwouri, nechitenderano changu chokunyarara achizoduswi,” unoronza Mambo Mwari, uwo unenyasha kwouri. “O unotambudzwa nokukandirwa apo naapo ngomubvumo.” “Usikaembedzerwi, ringira, ndinotsimisa mapuwe ako ngemiara yakanaka, nokuisa matsikiro ako ngemapuwe esafire. Ndinozoita zvatsungu zvako ngemarubhi, misiwo yako ngemapuwe anongaikira, eshe marukumbati ako ndinozoaisa mapuwe anomutengo mukurutu. Vana vako veshe vanozodzidziswa ndiMambo Mwari; nokubudirira kwevana vako kunozoita kukurutu. Mukururama unozoemeswa; nokutambudzwa kunozoita kuretu kubva kwouri; auzotyi; kutyisa kunozoita kuretuzve, ngokuti akuzouyi pasinde pako. Kudai aripo unomusa bope, aribvi kwendiri; kunyazwi ndiani unozomusa bope newe, unozowa ngendaa yako. Ringira, ndini ndakasika mupfuri uwo unovhutira masimbe omuriro, naye unoita chikhayo chinonakira mushando wacho; ndakasika muparadzi kuti aparadze. Apana chokurwa ndicho chakanasirirwa kurwa newe chinozobudirira, ndii dzeshe dzinozokumukira mukutongwa unozodzinyisa. Iyi ndiyo nhaka yevaranda vaMambo Mwari, nokururamiswa kwavo kunozobva kwendiri,” unoronza Mambo Mwari. Izwai! Mweshe munenyota, “Uyai kumvura; nouwo usina mare, uya, utenge udye! Uya, utenge vhini nomukaka musina mare nokuti mutengo. Ngenyi wechipedza mare yako ngeizvo zvisiri kudya, nomushando wako weizvo zvisikagutsi? Nasa kupurutana kwendiri, udye izvo zvakanaka, nemweya yako ngaudakadzwe ngezvakakora. Kotamisira nzee yako, uuye kwendiri; purutana, kuti mweya wako upone. Ndinozoita chitenderano newe chemhera nariini, nyasha dzangu dzinorudo, rudo rwegwinyiso rwakagondiswa Dhavhidha. Ringira, ndakamuita kuti aite chapupu kuvanhu, mutungamiri nomupangi wevanhu. Ringira, unozodaidza madzinza ousikazii, nemadzinza asikakuzii anozorumba echiuya kwouri ngendaa yaMambo Mwari, Mwari wako, Wakachena waIsuraeri, ngokuti wakukurisa.” Tsvaka Mambo Mwari achaoneka, mudaidze achipasinde. Wakashata ngaasiye njira yake, nomunhu usikazi kururama mipinimidzo yake; ngaatenderukire kunaMambo Mwari, naye unozomuitira nyasha, nokunaMwari wedu, ngokuti unozomukungurira yaamho. “Ngokuti ndangariro dzangu adzisiri ndangariro dzenyu, nokuti njira dzenyu njira dzangu,” unoronza Mambo Mwari. “Ngokuti kudai ngematenga akanyanya kukwirira kupinda nyika, ndizvo njira dzangu dzakakwirira kupinda dzenyu, nendangariro dzangu dzakakwirira kupinda ndangariro dzenyu. Ngokuti kudai ngemvura inonaya nechando zvinobva mudenga, zvisikahwiriremwo metsa zvanyakatisa nyika, kuti imerese zviyo, kuti izvipe mbeu kumukushi nokudya kuvadyi, ndizvo zvinoita izwi rangu iro rinobuda kubva pamuromo wangu; arizopetuki kwendiri risina chiro, asi rinozopedza icho chendinoda, nokubudirira kwendinorituma. Ngokuti munozobuda ngokudakara, mwechitungamirwa kupetuka mukunyarara; mitunhu nezvimitunhu pamberi penyu inozoputika mukuemba, nemiti yeshe yeshango inozoembera nyara dzayo. Pandau yomuti weminzwa panozomera muti womusaiprasi, pandau pegwananguruwe panozomera mumitiri; neichi chinozoita chikarakadziso kunaMambo Mwari, nechioniso chisikaperi chisikazogurwi.” Izvi ndizvo zvinoronza Mambo Mwari, “Ngwarirai kutonga kwakarurama nokuita zvakarurama, ngokuti ruponeso rwangu ruri pasinde pokuuya, nokuripira kwangu kunozooniswa. Unomuchena munhu unoita izvi, nouwo unozvingwarira, nouwo unongwarira Sabatha kuti asarisvipisa, nokungwarira nyara yake kuti isaita zvakashata.” Musatendera mupara, uwo wakashonganiswa kunaMambo Mwari, kuti aerekete echiti, “Mambo Mwari ngegwinyiso unozondiparadzanisa kubva kuvanhu vake:” nokusikatendera mutenwa kuti ati, “Ringira, ndiri muti wakaoma.” Ngokuti izvi ndizvo zvinoronza Mambo Mwari, “Kumitenwa inongwarira maSabatha angu, avo vanotsanangura zviro zvinondidakadza nokungwarira chitenderano changu, ndinozopa mumhatso yangu, nomukati mwemarukumbati rwangu, muedzaniso nezina rakanaka kupinda vakororo nevanasikana; ndinozovapa zina risikaperi risikazogurwi. Nevapara vanodzibatanidza kunaMambo Mwari, kuti vamushandire, kuda zina raMambo Mwari, nokuita varanda vake, veshe avo vanongwarira Sabatha kuti vasarisvipisa, nokungwarira chitenderano changu, ava ndinozovaunza kumutunhu wangu wakachena, nokuvaita kuti vadakare mumhatso mwangu mwokukumbira; midiro yavo yokupisha nemibairo yavo inozoashirwa padera pearita rangu; ngokuti mhatso yangu inozodaidzwa kuti imhatso yokudira yevanhu veshe.” Izvi ndizvo zvinoronza Mambo Mwari, Mwari uwo unounganidza vakarashwa vaIsuraeri, unoti, “Ndichazounganidza vamweni kwevari, ngapabanze paavo vakaunganidzwa.” Imwimwi mweshe zvikara zvomushango, imwimwi mweshe zvikara zviri mugwasha uyai mudye. Varindi vake mapofu, veshe avana ruziyo, imbwa dziri zvimbungumbungu, dzisikaukuri; dzinorota hope, nokuata pashi dzechidisa kukutsira. Imbwa dzinokara kudya, dzisikagutswi. Vaushi vasikakoni kuzwisisa; veshe vatokunukukira kunjira dzavo, umwe ngaumwe unotsvaka kuuyirwa kwake. Vanoti, “Uyai, ndinomuunzira vhini, ngatidzigutise ngokumwa kunoradzisa. Namangwani unozodai ndinyamashi, kunyazwi kupinda kuwanda.” Vakarurama vanopera, apana naumwe unopinimidza ndizvo; vanhu vanoda Mwari vanotorwa, pasina naumwe unozwisisa. Ngokuti vakarurama vanotorwa kubva mukushata, vanopinda mukunyarara avo vanohamba mukururama kwavo. Vanozozorora mumibhedhi yavo. Asi imwimwi, kwedzerai pasinde pano, imwimwi vana vomukadzi unokamba, imwimwi mibarirwana yehure nemhombo. Ndiani womunoita chishekedzo? Ndiani womunoshamira miromo yenyu, mwechibudisa rurumi? Andimwipi here vana vedzinza rokupauka, rudzi rwokunyepa? Imwimwi munotsva ngokuemura pashi pemiti yomuokhi, pashi pomuti weshe wakasvipirika, imwimwi munouraya vana venyu mumapani pashi pemawere emapuwe. Chikoaniswa chenyu chiri pakati pemapuwe akaserera omubani; awo, awo, ndiwo chikoaniswa chenyu; kwaari mwadurura midiro yenyu yokumwa, mwaunza mudiro wezviyo. Ndingaashira kuembedzerwa ngeizvi here? Padera pakakwirira, nepadera pomutunhu wakareba mwanasira mibhedhi yenyu, mwakakwireyo koopira mibairo. Sure kwechivhayo nesika dzomusiwo mwakaemesa miedzaniso yenyu; ngokuti mukunditiza kwenyu, mwafukura mibhedhi yenyu, mwakwira mweiri, mwaipamhamisa; mwaita chitenderano navo pachenyu; mwada mibhedhi yavo, maringira utitinini wavo. Mwakaenda kunamambo nemafuta, mwakawanza mafuta enyu emakha; mwakatuma vatumwa venyu kuretu, nokudzidzasa pashi kunyazwi kuguma muSheori. Mwakarembeswa ngokureba kwerwendo rwenyu, asi amuzi kuronza kuti, “Azvidetseri.” Ngokuti mwakaona kudisisa kwenyu kwechimusirirwa, ndizvo auzi kupera simba. Ndiani vemwakatya nokukaruka zvakaita kuti munyepe, nokurekera kundikarakadza nokuti kupinimidza ndini mumwoyo mwenyu? Andizi kunyarara kwenguva yakareba, nemwi amundityi here? Ndinozoteketesa kururama kwenyu nemishando yenyu, asi azvizomudetseri. Naapo pomunodaidzira, miedzaniso yenyu yemwakaunganidza ngaimusunhure! Dutu rinozoitora, femero rinozoitora kuenda kuretu. Asi iye unoisa kugonda kwake mwendiri unozogara nhaka yenyika, naye unozogara nhaka yomutunhu wangu wakachena. Zvinozozwi, “Akai, akai, nasirirai njira, muduse zvinopumhuna kubva munjira yevanhu vangu.” Ngokuti izvi ndizvo zvinoronza uwo uri padera newakakwirira, uwo unogara mumhera nariini, uwo zina rake Rakachena: “Ndinogara mundau yakakwirira neyakachena, nouwo unomweya unotambudzika, wakapfaa mumweya, kumusirira mumweya wouwo wakapfaa, nokumusira mwoyo yaavo vanotenda ngomwoyo. Ngokuti andingaangiri kuitira ndaa nokuti kuangira kunyaradzwa, ngokuti zvino mweya ungazopera simba pamberi pangu, kunyazwi nemweya yendakasika. Ngendaa yokushaisha kwokuemura kwake ndakamutsenekera; ndikamuchaya, ndakahwara ndakatseneka; asi wakaangira kupetuka sure munjira yokuda kwomwoyo wake. “Ndaona njira dzake, asi ndinozomurapa; ndinozomutungamira nokumuunzidzira ngokuembedzera. Ndinosika michero yemiromo yevachemi muIsuraeri; kunyarara, kunyarara kunouwo uri kuretu, nokunouwo uri pasinde,” unoronza Mambo Mwari; “Neni ndinozomurapa. Asi vakashata vakadai ngoruandhle rusikakoni kuterama, urwo mvura yarwo inobudisa matope nemavhundu. Akuna kunyarara kunevakashata,” unoronza Mwari wangu. “Daidza ngeizwi guru, usarekera! Daidza ngeizwi rako guru kudai ngegwama! Teketesa kuvanhu vangu kumukira kwavo, kumhatso yaJakobe zvishaishi zvavo. Asi vanonditsvaka mazuva eshe nokudakarira kuzia njira dzangu, kudai ngedzinza rinoita zvakarurama, nokudai ngevasikazi kusiya mipango yaMwari wavo; vanokumbira kwendiri kutonga kwakarurama, vanodakara ngokukwedzera pasinde naMwari. Vanoti, ‘Ngenyi techiera kudya, asi auoni? Ngenyi techidzipfaisa pachedu, asi auringiri ndizvo?’ ‘Ringira, ngemazuva okuera kwenyu kudya munodzidakadza pachenyu, mwechitambudza vashandi venyu.’ Ringira, munoera kudya, kuti muite hasha nokurwisana, nokuchaya ngechibhakera chokushata. Kuera kudya kwakadai ngezvomunoita nyamashi, kunoita kuti izwi renyu risazwika mudenga. Uku ndikwo here kuera kudya kwendakatsanangura, zuva rokuti munhu adzipfaise pachake? Ndiko kukotamisa pashi soro rake kudai ngejekacheka, nokuchinga pashi jira resaka nemarota here? Mungadaidza uku kuti kuera kudya, zuva rinoashirika kunaMambo Mwari here? “Uku andikwopi kuera kudya kwendatsanangura: kusunungura zvisungo zvokutonga kusikazi kururama, kusunhura mitwaro inorema, kuita kuti vanotambudzwa vasunhurike, nokuti kugura majoka eshe? Andikwopi kukowerana kudya kwenyu nevane nzara, nokuunza varombo, vasina pokugara, mumhatso yenyu; apo munoona uri mutitinini kumufukidze, nokudzifisha pachenyu kubva kune vemhuri yenyu here? Zvino kujeka kwenyu kunozobuda kudai ngamambakwedza, nokurapwa kwenyu kunozokwira ngokukasira; nokupembedzwa kwenyu kunozomutangira, uthende hwaMambo Mwari hunozoita mungwariri wenyu wesure. Zvino munozodaidza, naMambo Mwari unozomupingura; munozodaidzira kuti mudetserwe naye unozoti, ‘Ndiri pano.’ Kudai mwechidusa joka kubva pakati penyu, nokukhomba kwechinwe, kuereketa ngezvakashata, dai mwechipa kudya kwenyu kunevanenzara, nokugutisa mweya wouwo unotambudzika, zvino kujeka kwenyu kunozobuda pandau inechidima, nechidima chenyu chinozodai ngemasikati. Mambo Mwari unozomutungamirira nguva dzeshe, echigutisa zvidisiso zvomweya mundau dzakaoma, nokugwinyisa magodo enyu; nemwi munozodai ngomunda wakadiridzirwa, kudai ngechinyuka chemvura, icho mvura yacho isikazopwi. Matongo enyu ekaretu anozoakiswa; munozoaka matsikiro emibarirwana mizhinji; nemwi munozodudzwa kuti, ‘Vaakisi verukumbati rwakapwanyika, Vanasiri venjira dzendau dzavo dzokugara.’ “Kudai mwechidusa tsoka dzenyu kubva mukutsikatsika zuva reSabatha, kubva mukuita zvomunoda ngezuva rangu rakacheneswa; kudai mwechidaidza zuva reSabatha kuti izuva rokudakara, rakacheneswa raMambo Mwari, rinoremeredzeka; kudai mwechiriremeredza, usikahambi munjira dzenyu, mwechiita zvidisiso zvomwoyo yenyu, nokuti kuereketa mazwi enyu, zvino munozodzidakadzisa munaMambo Mwari; neni ndinozomuita kuti mukwire kundau dzakakwirira padera penyika, ndinozomugutisa ngenhaka yaJakobe baba enyu,” ngokuti muromo waMambo Mwari wakazviereketa. Ringira, nyara yaMambo Mwari aizi kunyanya kufupiswa, kuti iponese, nokuti nzee yake aizi kunyanya kuita dziiranzee, kuti izwe. Asi zvishaishi zvenyu ndizvo zvakamuparadzanisa imwimwi kubva kunaMwari wenyu, nezvishaishi zvenyu zvafisha hope yake kubva kwomuri, kuitira kuti asazozwa. Ngokuti nyara dzenyu dzakasvipiswa ngengazi, nezvinwe zvenyu ngokushaisha; miromo yenyu yaereketa manyepo, norurumi rwenyu rwaereketa kushata. Apana naumwe unomangarira umweni ngokururama, apanazve unopota ngepamusoro pegwinyiso; vanogonda zvisina shwiro, vechiereketa manyepo; vanoronga kuangarara, vechibereka kushaisha. Vanotsotsonya mazanda ebuura, nokuruka dande redande-mutande; kunyazwi ndiani unodya mazanda awo unofa, neiro rinopwanyika rinobuda roambira. Madande awo aazoiti zvokufuka, avazodzifukidzi ngezvevanoita. Mishando yavo mishando yokushaisha, nomunyara dzavo munekuparadza. Tsoka dzavo dzinorumbirira zvakashata, navo vanokasira kuparadza ngazi isina ndaa; mipinimidzo yavo mipinimidzo yokushaisha; kushakera nokuparadza zviri munjira dzavo. Njira yokunyarara avaizii; nokururama akuna munjira dzavo. Vakadziitira njira dzakashongoroka; akuna naumwe unohamba ndidzo unozia kunyarara. Ndizvo kutonga kwakanaka kuri kuretu kubva kwetiri, nokururama akutigumiri; tinogarira kujeka, nemwi ringirai! Kunechidima; tinotsvaka kujeka, asi tinohamba muchidima. Tinoambamira kutsvaka rukumbati kudai ngebofu, nesu tinoambamira kudai ngouwo usina madziso; tinopumhunwa masikati kudai ngousiku; tiri pakati pevakagwinya tinodai ngavanhu vakafa. Teshe tinorira kudai ngemabheya, nokuchema kakurutu kudai ngemagora: tinogarira kutonga kwakanaka, asi akuna; tinogarira ruponeso, asi ruri kuretu nesu. Ngokuti zvishaishi zvedu zvawanda pamberi pako, nezvishaishi zvedu zvinotiitira ndaa. Zvishaishi zvedu ngegwinyiso zvinesu, nesu tinozia zvishaishi zvedu: kupauka nokuramba Mambo Mwari, nokupauka kubva mukuteera Mwari wedu, kuereketa zvinodzasa pashi nezvokumukira, nokuronga kuereketa mazwi okunyepa nokuareketa kubva mumwoyo. Kutonga kwakanaka kunopetudzwa sure, nokururama kunoema kuretu; ngokuti gwinyiso rapumhunwa mupato redhorobha, nokururama akungapoterimwo. Gwinyiso rinotamika; nouwo unosiyana nokushata unoitwa wakachakatwa. Mambo Mwari wakazviona; nazvo zvakamusvipidza mwoyo, ngokuti inga pasina kutonga kwakanaka. Wakaona kuti paiya pasina naumwe, akashama kuti paiya pasina wakapindira; ndizvo muoko wake wakaunza kwaari ruponeso, nokururama kwake kwakamugwinyisa. Wakapfeka kururama kudai ngechihlangu chepaditi, chiqoko choruponeso pasoro rake; wakapfeka machira okuunzidzira nokudziputira ngokugwinyisira kudai ngebhachi. Kudai ngezviito zvavo, unozohwirinzira kwevari, ushungu kunemagaa ake, kuunzidza kunemagaa ake; kuzviwi unozohwirinzira kuthuswa. Ndizvo avo vari kumabirirazuva vanozotya zina raMambo Mwari, neavo vari kumabvazuva uthende hwake; ngokuti unozouya kudai ngerwizi rwazarisa, runosundwa ngomweya waMambo Mwari. “Naye unozouya kuZioni kudai ngoMuripiri, kwevari avo vari munaJakobe vanotenderuka kubva kuzvishaishi,” unoronza Mambo Mwari. “Kudai ndini,” unoronza Mambo Mwari, “Ichi ndicho chitenderano changu navo: mweya wangu uwo uri padera pako, nemazwi angu endakaisa mumuromo wako, azvizobvi kumuromo wako, nokuti kubva kumiromo yevana vako, nokuti kubva kumiromo yevana vevana vako, kubvira zvinopano mhera nariini,” unoronza Mambo Mwari. Miruka, ujeke, ngokuti kujeka kwako kwaguma, nouthende hwaMambo Mwari hwakakwira padera pako. Ngokuti, ringira, chidima chinozofukidza nyika, nechidima chikuru chakakora chinozofukidza vanhu; asi Mambo Mwari unozomiruka padera pako, nouthende hwake hunozooneka padera pako. Madzinza anozouya mukujeka kwako, nemadzimambo mukujekisisa kwemambakwedza. Mirudza madziso ako apo naapo, uone; avo veshe vanodziunganidza pamwepo, vanouya kwouri; vakororo vako vanozobva kuretu, nevanasikana vako vanozobatwa parutii mumaoko. Zvino unozoona nokujeka; mwoyo wako unozodzara ngokudakara, ngokuti uwandu hwezvoruandhle zvinozounzwa kweuri, upfumi hwemadzinza hunozouya kweuri. Marumbu emangamera anozozadza nyika yako, mangamera madoko akabva Midhiani neEfa; awo eshe anobva Shebha anozouya. Vanozounza mukore nomutombo unegwema rakanaka unopishwa; navo vanozoteketesa kukudzwa kwaMambo Mwari. Zveshe zvifuyo zveKhedha zvinozounganidzwa pamwepo kweuri, magondohwe eNebhaiothi achakushandira, midiro inozoashirika paarita rangu, neni ndinozoirikidza mhatso youthende hwangu. Ndiani avo vanombururuka kudai ngegore, nokudai ngegora kumafasitera adzo? Chokwadi zviwi zvinozondigarira, ngarava dzeTharshishi dzinozoita dzokutanga kuunza vana vako kubva kuretu; vanazvo zveshe zvavo, sirivha nomukore kuisira zina raMambo Mwari, Mwari wako, noUwo Wakachena waIsuraeri, ngokuti ndiwe wakakukurisa. “Vapara vanozoakisa marukumbati ako, nemadzimambo avo achakushandira; ndakakuchaya muushungu hwangu, asi munyasha dzangu ndakakuitira nyasha. Misiwo yako inozogara yakabeuka; ayizokonyiwi masikati nokuti usiku, kuti madzinza aunze kweuri upfumi hwawo, nemadzimambo avo vaunzwe vechitungamirirwa mukufora. Ngokuti dzinza nokuti umambo husikazokushandiri hunozopera; madzinza awo anozoparadzwa yaamho. Uthende hweRebhanoni hunozouya kweuri; muti womusaiprusi, mupraini nomuti womupayini, kuti izonakisa ndau yetemperi rangu; neni ndinozoita kuti ndau yetsoka dzangu iite ndau inouthende. Mibarirwana yeavo vakakutambudza vanozouya kweuri vechikugwadamira; naavo veshe vakakushoora vanozogwadama pashi patsoka dzako, vechikududza kuti, ‘Dhorobha raMambo Mwari, Zioni roUwo Wakachena waIsuraeri.’ Ngokuti wakasiiwa, wakanyenywa, pasina naumwe waihamba pakati pako, zvino ndinozokuita unokudzwa mhera nariini, kudakarirwa kunobva kumazero mazhinji. Unozoamwa mukaka wevemadzinza, unozoamwazve pamaditi emadzimambo; newe unozozia kuti inini Mambo Mwari ndini Muponesi wako, noMuripiri wako, Uwo Unesimba waJakobe. Pandau yethusi ndinozounza mukore, pandau yesimbi ndinozounza sirivha, nepandau yematanda ndinozounza thusi, pandau yemapuwe simbi. Ndinozoemesa kunyarara kuita mutungamiriri, kururama kuita nduna yomushando. Kugebenga akuchazozwiki munyika mwako, kurashwa nokuparadzwa, nokuti kushakera mukati mwemigano yako; unozodaidza marukumbati ako kuti, ‘Ruponeso,’ nemisiwo yako kuti, ‘Kukudza.’ Zuva arichazoiti kujeka kwako masikati, nomwedzi auchazojekiswi kweuri usiku; asi Mambo Mwari ndiye unozoita kujeka kweuri mhera nariini, naMwari wako ndiye uthende hwako. Zuva rako arizobiri, nomwedzi wako auzofi; ngokuti Mambo Mwari ndiye unozoita kujeka kwako kwemhera nariini, nemazuva okutsumba kwako anozopera. Vanhu vako vanozoita vakarurama veshe; vanozogara nhaka yenyika mhera nariini, miningwi yomunda wangu wendakasima, mushando wenyara dzangu, kuti ndiirikidzwe. Umwe mudoko unozoita gumi remazana (1,000), nomudoko wokupedzisira unozoita dzinza rinesimba. Inini ndini Mambo Mwari; munguva yacho ndinozochiita ngokukasira.” Mweya waMambo Mwari, Mwari, uri padera pangu, ngokuti Mambo Mwari wakandidzodza; wakandituma kuteketesa mashoko akanaka kunevakatsikirirwa; wakandituma kuti ndirape avo vanokutambudzika mumwoyo, kuteketesa kusunhurwa kwemabhanditi, kusunhurwa kuneavo vakasungwa; kuteketesa gore rinoashirika raMambo Mwari nezuva rokuunzidza kwaMambo Mwari wedu; kuembedzera veshe vanotsumba; kunasirira izvi avo vanotsumba muZioni; kuvapa dzungudza pandau yemarota, mafuta okudakara pandau yokuchema, jira rokukudza pandau yomweya wokusvipo mwoyo. Vanozodaidzwa kuzwi miokhi yokururama, zvisimwa zvaMambo Mwari, zvinoonisa kuirikidzwa kwake. Vanozoakisa matongo ekaretu, vanozoakisazve matongo akaparadzwa okutanga, vanozoakisa madhorobha akaputswa, emibarirwana yakawanda. Vapara vanozoema nokuusha zvifuyo zvenyu, vapara vanozoita varimi venyu, nevanasiriri vemivhini yenyu. Asi imwimi munozoduzwa kuti vapristi vaMambo Mwari, munozodaidzwa kuti vashandi vaMwari wedu; munozodya upfumi hwemadzinza, mwechidziganzisa ngouthende hwavo. Pandau yokutsverudzwa kwavo vanhu vangu vanozoashira chikoaniswa chakapetwa; nepandau yokushoorwa vanozodakara ngenhaka yavo; ndizvo vanozogara nhaka yakapetwa munyika yavo; nokudakara kusikaperi kunozoita kwavo. “Ngokuti inini Mambo Mwari ndinoda kutonga kwakanaka, ndinonyenya mibairo yakabvukwa nokuita kwakashata; ngokugondeka ndinozovapa kuripirwa kwavo, ndinozoitazve chitenderano navo chemhera nariini. Mibarirwana yavo inozoziikanwa pakati pemadzinza, nemibarirwana yavo pakati pevanhu; naavo veshe vanozovaona, vanozopupura kuti rudzi rwakafumiswa ndiMambo Mwari.” Ndinozodakara kakurutu munaMambo Mwari, mweya wangu unozodakara ndiMwari wangu; ngokuti wandifukidza ngejira roruponeso, wandifukidza ngejira rokururama, kudai ngomukwambo unodzinemesa ngezvinemeso, kudai ndimakhoti unonema zvinemeso zvake. Ngokuti kudai ngenyika inomerisa mhurikirwa dzayo, nokudai ngomunda unomerisa izvo zvakasimwa kwouri, ngokudaro Mambo Mwari unozoita kuti kururama nokukudzwa zvibude mukuona kwemadzinza eshe. Ngendaa yeZioni andizonyarari, nendaa yeJerusarema andizozorori, metsa kururama kwaro kubude kudai ngokujeka kwemambakwedza, noruponeso rwaro kudai ngechivheneko chinobaka. Madzinza anozoona kururama kwako, nemadzimambo eshe uthende hwako; newe unozodaidzwa ngezina idzva, iro rinozodudzwa ngomuromo waMambo Mwari. Unozoita dzungudza rounaku munyara yaMambo Mwari, neroumambo munyara yaMwari wako. Auchazodaidzwizve kuti “Wakasiiwa,” nenyika yako aichazoronzwizve kuti, “Matongo,” asi unozodaidzwa kuti “Hefizibha,” nenyika yako inoroorwa. Ngokuti Mambo Mwari unodakara mweuri nenyika yako inozoroorwa. Ngokuti kudai ngejaha rinoroora mhandwe, ngokudaro vakororo vako vanozokuroora: nokudai ngomukwambo unodakara ndimakhoti wake, ndizvo zvinozoita Mwari unozodakara ndiwe. Ndakaemesa varindi padera pemarukumbati ako, O Jerusarema; vasikanyarari masikati nousiku; imwimwi munokumbira kunaMambo Mwari, musanyarara. Musatendazve kuti azorore metsa aemesa Jerusarema, nokuita kuti rikudzwe kweshe munyika. Mambo Mwari wapika ngenyara yake yokumudyo nomuoko wake wesimba: “Chokwadi andichazopi zviyo zvako kuita kudya kwemagaa ako, nevapara avachazomwi vhini idzva, rewakadzishandira. Asi vakazviunganidza ndivo vanozozvidya, navo vechikudza Mambo Mwari; naavo vakariunganidza ndivo vanozorimwa mumaruwanze emhatso yangu yakacheneswa.” Pindai, pindai ngomumisiwo, nasirirai njira yevanhu; itsai, itsai pato guru, dusai mapuwe; emeserai vanhu mujeki. Ringirai, Mambo Mwari waziisa kumagumo enyika; ronzai kumwanasikana weZioni kuti, “Ringira, ruponeso rwako runouya; wona, muthuso wake unawo, nomuripo wake uri pamberi pake.” Vanozodaidzwa kuti, “Vanhu vakacheneswa, vakaripirwa vaMambo Mwari:” nemwi munozodaidzwa kuti, “Rakatsvakwa,” “Dhorobha risikazi kusiiwa.” “Ndiani uyu unobva Edhomu, unobva Bhozira uri mumachira akatsvuka? Ndiani uyu unouthende muzvokufuka zvake, unohamba muukuru hwesimba rake?” “Ndini, uwo unoereketa zvakarurama, unesimba rokuponesa.” “Ngenyi zvokufuka zvako zvakatsvuka, nemachira ako akadai ngouwo unokamura vhini mundau yokukamurira?” “Ndatsikatsika chokukamura vhini ndega, paiya pasina naumwe kubva kuvanhu waiya neni; ndakatsikatsika mukutseneka kwangu, ndakaaputisa muushungu hwangu; muto wawo ukatsenenekera machira angu, ukasvipisa machira angu eshe. Ngokuti zuva rokuunzidzira raiya mumwoyo mwangu, negore romushando wangu wokuripira raguma. Ndakaringira, asi paiya pasina naumwe wokundidetsera; ndakashama ngokuti paiya pasina wokundigwinyisa; ndizvo muoko wangu wemene wakandiunzira kunyisa, noushungu hwangu hwakandigwinyisa. Ndakatsikatsika pashi vanhu muushungu hwangu, nokuita kuti varadze ngoushungu hwangu; ndakadurura pashi ngazi yokupona kwavo panyika.” Ndinozopupura ngemishando yenyasha yaMambo Mwari, nokukudzwa kwaMambo Mwari ngeizvo zveshe zvaakatiitira Mambo Mwari, nokunaka kwakakura kwaakaita kunevemhatso yaIsuraeri kwaakavaonisa kudai ngenyasha dzake dzakawanda dzinorudo. Ngokuti wakati, “Chokwadi vanhu vangu, vana vasikazonyepi;” ndizvo wakaita Muponesi wavo, mukutambudzika kwavo. Haiwa mutumwa nokuti ngirosi, asi ngokuapo kwake kwakavaponesa; murudo rwake nokukungurira kwake wakavaripira; wakavamirudza, akavatwara kumazuva eshe ekaretu. Asi vakamumukira, vakatsenesa Mweya wake Wakachena; ndizvo wakavapandukira kuita gaa ravo, iye pachake wakarwisana navo. Zvino wakakarakadza mazuva ekaretu, aMosi, nevanhu vake; “Uri pari uwo wakavabudisa kubva muruandhle nomuushi wezvifuyo zvake? Uri pari uwo wakaisa Mweya wake Wakachena pakati pavo, uwo wakaita kuti nyara yake inouthende igwinyise nyara yokumudyo yaMosi, uwo wakaparadzanisa mvura pamberi pavo, kuti adziitire zina rinogara mhera nariini, uwo wakatungamira mukati mwakadzama mworuandhle?” Kudai ngehachi murubya, avazi kupumhunwa. Kudai ngen'ombe dzinodzaka mubani, Mweya waMambo Mwari wakavapa kuzorora. Ngokudaro wakatungamira vanhu vako, kuti udziitire wemene zina rinoremeredzwa. Ringira pashi uri mudenga, uone, kubva muugaro hwako hwakacheneswa nohwouthende hwako. Kuripari kugwinyisira kwako nesimba rako? Kuangirira kwomwoyo wako nenyasha dzako zviri kuri? Zvatsiirwa kubva kwendiri. Chokwadi uri baba edu, kunyazwi Abrahama asingatizii, naIsuraeri aatizii; iwewe, O Mambo Mwari, uri baba edu; Muripiri wedu kubvira karetu zina rako rindoripo. Ngenyi, O Mambo Mwari, unotiita kuti tipauke kubva munjira dzako, nokukonzisa mwoyo yedu, kuitira kuti tisakutya? Petuka sure ngendaa yevaranda vako, ngendaa yemadzinza awo ari nhaka yako. Vanhu vako vakacheneswa vakagara kwekamukuwo kadoko, asi zvino magaa edu atsikatsika ndau yako yakacheneswa. Taiya takadai ngeavo mukuwo wakareba avo vomusaitonga, kudai ngeavo vasikadaidzwi ngezina rako. O, kudai ungabaura matenga, udzake pashi, kuti mitunhu izungunyike ngokuapo kwako. Kudai ngomuriro unopisha tsotso, nomuriro unoita kuti mvura yiire, kuitira kuti zina rako riziikanwe kumagaa ako, kuitira kuti madzinza ahute ngokuapo kwako! Apo wakaita zviro zvinoshamisa zvetisikazi kukarira, iwewe wakadzaka pashi, mitunhu iakazungunyika ngokuapo kwako! Kubvira karetu apana ngeumwe wakazwa, apana nzee yakazwisisa, apana dziso rakaona Mwari umweni ngepabanze pako, uwo unoshandira avo vanomugarira. Unoshongana navo avo vanodakara ngokuita zvakarurama, avo vanokukarakadza munjira dzako. Asi iwewe waiya wakatseneka, nesu takashaisha; ngokuti wakafisha hope yako, tingaita maponeserwenyi? Isusu teshe taita kudai ngaumwe usikazi kusukika, nokuita kwedu kwakarurama kweshe kwakadai ngemitsoto inonyangadza. Teshe tinofota kudai ngeshakani; nezvishaishi zvedu zvatirashira kuretu kudai ngedutu. Akuna naumwe unodaidza zina rako, nokudzimusirira mukati mwake kuti akubate; ngokuti wafisha hope yako kubva kwetiri nokutipedza ngendaa yezvishaishi zvedu. Asi O Mambo Mwari, ndiwe baba edu; isusu tiri dongo, newe uri muumbi wedu; teshe tiri mushando wenyara dzako. Usanyanya kutseneka, O Mambo Mwari, zve, usachakarakadza ngokushaisha mhera nariini. Ringira, uone, tinokupota; teshe tiri vanhu vako. Madhorobha ako akachena aita rubaya, Zioni raarubaya, Jerusarema raadongo. Mhatso yedu yakachena yakanaka, apo pevakakuirikidza madzibaba edu, yapishwa ngomuriro, nendau dzedu dzeshe dzinodakadza dzaita matongo. Ngesure kweizvi zveshe unozodzibata here, A Mambo Mwari? Unozonyarara here nokutiorora kakurutu? “Ndinotsvakwa ndivo vasikazi kubvunza ndini; ndinooneka ndivo vasikazi kunditsvaka. Ndakati, ‘Ndiringirei ndini ndiri pano, ndiringirei ndini ndiri pano,’ kudzinza risikazi kudaidza zina rangu. Ndakatambanudza nyara yangu zuva reshe kunevanhu vokumukira, avo vanohamba munjira isikazi kunaka, kuteera mipinimidzo yavo; vanhu vanondiambira pamberi pehope yangu mikuwo yeshe kuti nditseneke; vanopira mudiro muminda, nokupisha mutombo unegwema rakanaka padera pemaarita ezvidhina; avo vanogara pakati pemaiba, vanoata mundau dzakafishika dzemitunhu; avo vanodya nyama yenguruwe, nomuto wezviro zvinonyangadza uri muzvidziyo zvavo; avo vanoti, ‘Gara wega, usakwedzera kwendiri; ngokuti ndakachena kupinda iwewe.’ Ava chiushi mumiro mwangu, muriro unobaka zuva reshe. “Ringira zvakanyorwa pamberi pangu: Andizonyarari, asi ndinozounzidzira; ngegwinyiso ndinozounzidzira pazvizva zvavo, zvishaishi zvenyu, nezvishaishi zvemadzibaba enyu pamwepo,” unoronza Mambo Mwari. “Ngokuti avo vakapisha mutombo unegwema pamutunhu, nokundituka padera pezvimitunhu, ndinozopima muzvizva zvavo muthuso wakaperera wemishando yavo.” Unoronza izvi Mambo Mwari, “Kudai ngevhini idzva rinooneka pachikore, noumweni unoti, ‘Usachiparadza, ngokuti chifumiso chiri mukati mwacho;’ ndizvo ndinozoita kudaro ngendaa yevaranda vangu kuti ndisavaparadza veshe. Ndinozobudisa dzinza kubva kunaJakobe nokubva kunaJudha, mugari wenhaka yemitunhu yangu; nevakatsanangurwa vangu vanozoigara nhaka, nevaranda vangu vanozogaremwo. Sharoni rinozoita mafuro emakwai neBani reAkho rinozoita ndau yokutiza zvifuyo, zvevanhu vangu avo vanonditsvaka. Asi imwimwi munosiya Mambo Mwari, munoriyarwa mutunhu wangu wakachena, munonasirira matafura kuti muuyirwe, nokuzadza tsani ngevhini rakabvengedzerwa magumo; ndinozomugumisira pashoti, nemwi mweshe munozogwadama pashi kuurawa; ngokuti, apo pendakadaidza, amuzi kupingura, naapo pendakaereketa, amuzi kupurutana; asi mwakaita zvakashata pamberi pemadziso angu, mwakatsanangura izvo zvendisikazi kudakara ndizvo.” Ndizvo izvi zvinoronza Mambo Mwari, Mwari, “Ringira, varanda vangu vanozodya, asi imwimwi munozopera ngenzara; ringira, varanda vangu vanozomwa, asi imwimwi munozofa ngenyota; ringira, varanda vangu vanozodakara, asi imwimwi munozotsverudzwa. Ringira, varanda vangu vanozoemba ngokudakara kwomwoyo, asi imwimwi munozochema ngokurwadziwa kwomwoyo, nokugwimba ngokutambudzika kwomweya. Munozosiya zina renyu kunevakatsanangurwa vangu kuti riite chituko, naMambo Mwari, Mwari, unozomuuraya, asi varanda vake vanozodaidzwa ngezina rimweni. Zvino kunyazwi ndiani uwo unokumbira kufumiswa munyika unozofumiswa ndiMwari wokugondeka; kunyazwi ndiani unopika munyika, unozopika ndiMwari wokugondeka; ngokuti madambudziko ekare ariyarikanwa, nawo afishwa kubva kumadziso angu.” “Ngokuti, ringirai, ndinosika matenga matsva nenyika itsva; zviro zvokutanga azvichazokarakadzwi nokuti kupinimidzwa. Asi imwimwi dakarai, mudakadzwe mhera nariini ngeizvo zvendinosika; ngokuti, ringira, ndaa kuda kusika Jerusarema kuita kudakara nokudakadzwa kwevanhu varo. Ndinozodakara muJerusarema, nokudakara muvanhu vangu: neizwi rokuchema arichazozwiki mukati mwaro nokuti izwi rokubonda. Akuchazoapozve ruchiya runopona mazuva mashomani, nokuti harahwa isikazozarisi mazuva ayo; ngokuti ruchiya aruzofi metsa rwaa nezana remakore; asi uwo unokorera kuguma zana remakore unozoerengwa kuita wakatukwa. Vanozoaka mhatso nokugaremwo; vanozosima minda yemivhini nokudya michero yayo. Avazoaki kuti umweni agaremwo; avazosimi kuti umweni adye; ngokuti kudai ngemazuva omuti, ndizvo zvinozoitawo mazuva evanhu vangu, nevakatsanangurwa vangu vanozogara mukuwo wakareba vechidakara ngomushando wenyara dzavo. Avazoshandi pasina chiro, nokuti kubereka vana vanokasira kuparadzwa; ngokuti vari rudzi rwevakafumiswa ndiMambo Mwari, nemibarirwana yavo nayo. Vasati vakumbira ndinozopingura; vasati vaereketa ndinozozwa. Thika nekakwai zvinozofura pamwepo, mhondoro inozodya mwenje kudai ngekabi; asi bukuta rinozoita kudya kwenyoka. Azvizoremadzi nokuti kuparadza pamutunhu wangu weshe wakachena,” unoronza Mambo Mwari. Izvi ndizvo zvinoronza Mambo Mwari, “Denga idendemaro rangu, nenyika chitambarariro chetsoka dzangu; imhatso yakadini zvino yomunondiakira? Indau yakadini yokuzorora kwangu? Inini pachangu ndakasika izvi zveshe ngenyara dzangu, ndizvo zviro izvi zveshe ngezvangu,” unoronza Mambo Mwari. “Asi uyu ndiye umwe wendinozoringira, kuneuwo unomweya wakapfaa, unohuta ngeizwi rangu. “Kunyazwi ndiani unouraya kabi wakadai ngouwo unouraya munhu; kunyazwi ndiani unopira kakwai kuita mudiro wakadai ngewagura mutsipa wembwa; kunyazwi ndiani unopira mudiro wezviyo, wakadai ngouwo unopira ngazi yenguruwe kuita mudiro; kunyazwi ndiani unopisha mutombo unegwema rakanaka wakadai ngouwo unopira mudiro wokukarakadza muedzaniso. Ava vakatsanangura njira dzavo, avo mweya yavo inodakara munezvinonyangadza zvavo. Ininiwo ndinozotsanangura kuvatambudza, nokuunza zvevanotya padera pavo; ngokuti, naapo pendakadaidza, apana wakapingura, naapo pendakaereketa, avazi kupurutana; asi vakaita izvo zvakashata pamberi pemadziso angu, vakatsanangura chisikazi kundidakadza.” Izwai izwi raMambo Mwari, imwimwi munohuta ngeizwi rake: “Hama dzenyu idzo dzinomuzonda, nokumuramba ngendaa yezina yangu, vakati, ‘Ngaakudzwe Mambo Mwari, kuitira kuti tione kudakara kwenyu,’ asi ndivo vanozotsverudzwa. Purutana, uzwe bope rinobva mudhorobha, izwi rinobuda mutemperi! Izwi raMambo Mwari, uwo unounzidzira magaa ake. Asati arwadziwa, wakabereka; kurwadziwa kwake kusati kwaguma padera pake, wakabereka mwana womurumbwana. Ndiani wambozwa chiro chakadai? Ndiani wamboona zviro zvakadai? Nyika ingaberekwa ngezuva rimwe here? Dzinza ringabarwa chiriporipo here? Ngokuti apo Zioni rarwadziwa ngokubereka, rakabereka vana varo.” Ndizvo Mambo Mwari unoti, “Ndinozobeura ndani pakubereka, ndisikazoberekesi here? Ndinozoita here inini, uwo unoberekesa, kutsiira ndani?” Unoronza Mwari wako. “Dakarai imwimwi pamwepo neJerusarema, mudakare naro, imwimwi mweshe munorida; mudakare yaamho naro, imwimwi mweshe munorichemera, kuti muamwe, mugutiswe kubva pamazamo okuembedzerwa kwaro; kuti muamwe yaamho, nokudakara ngouwandu hwouthende hwepaditi raro.” Ngokuti izvi ndizvo zvinoronza Mambo Mwari, “Ringira, ndinozotutsira kunyarara kweriri kudai ngorwizi, noupfumi hwemadzinza hunozoerera kudai ngorwizi; naapo munozoamwa, munozotengurwa pamioko yaro, nokutengurwa pamabvi aro. Kudai ndimai vanoembedzera mwana wavo, ndizvo ndinozomuembedzera; nemwi munozoembedzerwa muJerusarema. Naapo mwaona, mwoyo yenyu inozodakara; magodo enyu anozokura kudai ngezvisimwa zvakasvipira; zvinozoziikanwa kuti nyara yaMambo Mwari iri kuvaranda vake, noushungu hwake kumagaa ake.” Ngokuti, ringira, Mambo Mwari unozouya ari mumuriro, anemakarichi ake akatodzana nechimupupuri, echiunza kutseneka kwake kunoushungu, nokukaraidza kwake kunemirazvu yomuriro. Ngokuti ngomuriro Mambo Mwari unozotonga, neshoti yake padera pevanhu veshe, nevakaurawa ndiMambo Mwari vanozoita vazhinji. “Avo vanodzichenesa nokudzinasa pachavo, kuti vaende kuminda, vechiteera umwe uri pakati pavo, vechidya nyama yenguruwe, yechinyangadzo, yembeya, vanozopera pamwepo,” unoronza Mambo Mwari. “Ngokuti ndinozia mishando yavo nemirangariro yavo, ndinouya koounganidza madzinza eshe nendimi dzeshe; navo vanozouya, vaone uthende hwangu, neni ndinozoemesa chioniso pakati pavo. Kubva kwevari ndinozotumira avo vakapokonyoka kumadzinza, kuTharshishi, Phuti, nokuRudhi, avo vanofura ngeuta; kuTubhari neJavhani, kuzviwi zviri kuretu, izvo zvisati zvambozwa ngembiri yangu, nokuti kuona uthende hwangu; navo vanozoteketesa uthende hwangu pakati pemadzinza. Vanozounza hama dzenyu dzeshe kubva kumadzinza eshe kuita chipo chomudiro kunaMambo Mwari, padera pemahachi, mumakarichi mungoro, padera pemanurusi, napadera pemangamera, kuvaunza kumutunhu wangu wakachena Jerusarema,” unoronza Mambo Mwari, “Kudai ngevana vaIsuraeri vanounza zviyo kuita munikero wavo muzvidziyo zvakasukika kumhatso yaMambo Mwari. Neniwo ndinozotora vamweni vavo, kudai ngevapristi nevaRevhi,” unoronza Mambo Mwari. “Ngokuti kudai ngematenga matsva nenyika itsva, zvendinozoita, zvinozogara pamberi pangu,” unoronza Mambo Mwari; “Ndizvo zvinozoita mibarirwana yenyu nezina renyu zvinozogara. Kubva kumwedzi mutsva, kuenda kumwedzi mutsva, nokubva kuneSabatha rimwe kuguma kuneSabatha rimweni, vanhu veshe vanozouya koodira pamberi pangu,” unoronza Mambo Mwari. “Navo vanozobuda kuringira padera pemiiri yevanhu vakafa, avo vakandimukira; ngokuti honye yavo aizofi, nomuriro wavo auzodzimwi; navo vanozoita chinyangadzo kuvanhu veshe.” Mazwi aJeremia, mukororo waHirikia, wevapristi vaiya muAnathothi, munyika yaBhenjamini. Kwaari izwi raMambo Mwari rakauya ngemazuva amambo Josia, mukororo waAmoni weJudha, ngegore regumi nematatu okutonga kwake. Rakauyazve ngamazuva amambo Jehoiakimu, mukororo waJosia weJudha, metsa kuguma gore regumi narimwe ramambo Zedhekia mukororo waJosia weJudha, metsa mukuwo wokutorwa kweJerusarema kuitwa hloko ngomwedzi wechishanu. Zvino izwi raMambo Mwari rakauya kwendiri rechiti, “Ndisati ndakuumba mundani, ndaikuzia; usati wabarwa, ndakakuchenesa, ndikakuemesa kuti uite muprofeti kumadzinza.” Zvino ndakati, “A, Mambo Mwari, Mwari! Ringira, ngegwinyiso andikoni kuereketa, ngokuti ndiri mwana mudoko.” Asi Mambo Mwari wakati kwendiri, “Usaronza kuti, ndiri mwana mudoko; ngokuti unozoenda kuneavo veshe vendinozokutuma kwevari, newe unozoereketa cheshe chendinozokupanga. Usatye hope dzavo, ngokuti inini ndinewe kukununura,” unoronza Mambo Mwari. Zvino Mambo Mwari wakatambanudza nyara yake, akagwama muromo wangu. NaMambo Mwari wakati kwendiri, “Ringira, ndaisa mazwi angu mumuromo wako. Wona, nyamashi ndakuemesa padera pemadzinza nepadera poumambo, kubvita nokuputsa, kuparadza nokudzasa pashi, kuaka nokusima.” Izwi raMambo Mwari rakauya kwendiri rechiti, “Jeremia, unoonenyi?” Neni ndakati, “Ndinoona dai romuti womuarimondi.” Zvino Mambo Mwari wakati kwendiri, “Wanasa kuona; ngokuti ndinozoringisisa izwi rangu kuriita.” Izwi raMambo Mwari rakauya kwendiri ngokwechipiri rechiti, “Unoonenyi?” Ndakati, “Ndinoona hari inoira, nomuromo wayo wechibva kuringira dera.” Zvino Mambo Mwari wakati kwendiri, “Kushata kunozobva ngedera kuguma padera pevanhu veshe venyika. Ngokuti, ringira, ndinodaidza marudzi eshe oumambo hwedera,” unoronza Mambo Mwari; “Navo vanozouya, vanozoemesa umwe ngaumwe dendemaro rake pamisiwo yeJerusarema, nepamarukumbati eshe aro anoritendenedza, nokumadhorobha eshe aJudha. Ndinozoronza kutonga kwangu kwevari ngendaa yokushata kwavo kweshe, avo vakandisiya, vakapisha mutombo unegwema rakanaka pamberi pezvimwari zvimweni, nokudira mishando yenyara dzavo. Asi iwewe, sunga chiunu chako, umiruke, uerekete kwevari zveshe zvendinokupanga. Usakaruka pamberi pavo, nokuti ndinozokukarudza pamberi pavo. Ngokuti, ringira, ngeiri zuva ndakakuita kuti udai ngedhorobha rakashosherwa, nokudai ngesika yesimbi, nokudai ngerukumbati rwethusi kunyika yeshe, kumadzimambo aJudha nokuvatongi vayo, nokuvapristi vayo, nokuvanhu venyika. Vanozorwa newe; asi avazokunyisi akadi, ngokuti ndinewe kukununura,” unoronza Mambo Mwari. Izwi raMambo Mwari rakauya kwendiri rechiti, “Enda, udaidzire mukuzwa kwevanhu veJerusarema wechiti, unoronza izvi Mambo Mwari: Ndinokarakadza, ngenyasha dzoutsva hwako, norudo rwako petakatanga kuroorana, apo wainditeera mushango, munyika yaiya isikazi kusimwa. Isuraeri waiya akachena kunaMambo Mwari, mitanguro yemichero yake. Veshe avo vakaidya vakaitwa vanendaa; kushata kwakauya padera pavo,” unoronza Mambo Mwari. Izwai izwi raMambo Mwari, O mhatso yaJakobe, nemhuri yeshe yemhatso yaIsuraeri. Ndizvo izvi zvinoronza Mambo Mwari, “Kushatanyi kwevakaona madzibaba enyu mwendiri, kwakaita kuti vaende kuretu kubva kwendiri, nokuteera zviro zvoupenzi, nokudziita pachavo vasina shwiro? Avazi kuronza kuti, uri pari Mambo Mwari uwo wakatikwidza kubva kunyika yeEgipite, wakatitungamira mushango, mukati mwenyika yakaomerwa nemarindi, munyika yakaoma, nechidima chikurutu, mukati mwenyika isikazi kuhambwa ngomunhu naumwe, isikagarwi ngomunhu? Ndakamuunza kunyika yezvakawanda, kuti mudye michero yayo nezviro zvayo zvakanaka. Asi apo mwapindamwo, mwakasvipisa nyika yangu, nokuita kuti nhaka yangu iite chinyangadzo. Vapristi avazikubvunza kuti, ‘Uri pari Mambo Mwari?’ Naavo vanobata mipango avazi kundizia; vaushi vakapauka kubva kwendiri, vaprofeti vakaprofeta ndiBhaari, vakateera zviro zvisikadetseri chiro. Ndizvozve ndinomuitira ndaa, unoronza Mambo Mwari, nokuitira ndaa vana vevana venyu. Ambukai kuzviwi zveSaipurasi, muone; tumai kuKedha, munase kuringira zvakanaka, muone kuti chakambowayo here chiro chakadaro. Riripo here dzinza rakachicha zvimwari zvaro kunyazwi akuna zvimwari? Asi vanhu vangu vakachicha uthende hwavo kuti vatore icho chisikadetseri chiro. Shamiswai ngeichi, imwimwi matenga, mutye kakurutu, mukaruke kakurutu, unoronza Mambo Mwari. Ngokuti vanhu vangu vaita kushata kuiri: vandisiya inini chinyuka chemvura yokupona, vadzitsira zvinyuka zvinerutwe, zvisikagari nemvura. Isuraeri ihloko here? Wakabarwa ngehloko here? Unopambwa ngenyi zvino? Mhondoro dzamubhongera, dzabhonga kakurutu. Vakachakata nyika yake; madhorobha ake aamatongo, asina unogaramwo. Padera pazvo zveshe vanhu veMempfisi, neveThafanehesi vakagura dzungudza resoro rako. Auzi kudziunzira izvi padera pako here, ngokusiya Mambo Mwari, Mwari wako, apo akakutungamirira munjira? Zvino unouyirwa ngenyi ngokuenda Egipite, koomwa mvura yeNaire? Nokuti unouyirwa ngenyi ngokuenda Asiria, koomwa mvura yeYufratesi? Kushata kwako kwemene kunozokuorora, nokupetuka sure kwako kunozokuitira ndaa. Zia nokuona kuti chiro chakashata nechinovava kweuri kusiya Mambo Mwari, Mwari wako; kutyisa kwangu akurimwopi mukati mwako,” unoronza Mambo Mwari wehondo. Ngokuti ngomukuwo wekare wakagura joka rako, muzvisungo zvako; newe wakati, “Andidi kukushandira! Padera pezvitunhu zveshe, nepashi pemiti yeshe yakasvipirika wakaatapo, wechiita uhure. Asi ndakakusima uri muvhini wakanaka; waiya mbeu yakanaka. Ndizvo wakaita mashandukirenyi kuita muvhini weshango? Kunyazwi unodzishamba ngesoda, wechishandisa sipo yakawanda, asi muara wokushata kwako kundoripo pamberi pangu, unoronza Mambo Mwari. Ungaita maronzerenyi kuti, andizi kusvipiswa, andizi kuteera vanaBhaari? Ringira njira yako mubani, uzie icho chowaita; wakadai ngengamera doko rinorumbisa apo neapo munjira dzaro, mbongoro yomushango isikazi kupetwa, inofemba kudutu ngokuda kwayo; ngomukuwo wayo wokudisisa mwamuna ndiani ungairambidza? Idzo dzeshe dzinoitsvaka adzizodzirembesi; ngenguva yomwedzi wayo dzinozoiona. Rambidza rutsoka rwako kuti rusahamba rusina gwada, nemukuro wako kubva kunenyota; asi unoti, ‘Azvidetseri, ngokuti ndakada vapara, neni ndinozovateera.’ ” “Kudai ngembavha inotsverudzwa apo yabatwa, ndizvo mhatso yaIsuraeri inotsverudzwa; ivo, madzimambo avo, vatongi vavo, vapristi vavo nevaprofeti vavo, vechiti kumuti, ndiwe baba angu, nokubuwe, ndiwe wakandibereka. Ngokuti vakandifuratira mishana yavo, haiwa hope dzavo. Asi ngomukuwo wokutambudzika kwavo vanoti, uya utiponese! Asi zviri pari zvimwari zvenyu zvemwakadziitira? Ngazviuye kuti zvechikona kumuponesa ngomukuwo wokutambudzika kwenyu; ngokuti unazvo zvakawanda zvimwari kudai ngokuwanda kwemadhorobha ako, iwewe Judha. Ngenyi mwechindigunun'unira? Imwimwi mweshe mwakandimukira, unoronza Mambo Mwari. Ndakachayira pasina chiro vana venyu; avazi kuashira kupangwa. Shoti yenyu yemene ndiyo yakauraya vaprofeti venyu kudai ngemhondoro inokara. Nemwi, O mubarirwana, wonai izwi raMambo Mwari. Ndaita rubaya kunaIsuraeri here nokuti ndaita nyika yechidima? Ngenyi zvino vanhu vangu vechironza kuti, takasunhurika, atizouyizve kwouri? Mhandwe ingariyarwa here zvinemeso zvayo nokuti makhoti zvokufuka zvake? Asi vanhu vangu vakandiriyarwa mazuva asikaerengeki. Kunakanyi kwakaita utungamiriri hwako hwokutsvaka vadikani! Ndizvo kunyazwi nokuvakadzi vakashata wakadzidzisa njira dzako. Ngazi yevarombo vasina ndaa inooneka pazvokufuka zvako, kunyazwi auzi kuvabata vechipwanya kupinda mukati. Asi padera peizvi zveshe, unoti, ‘Andina ndaa, ngegwinyiso ushungu hwake hwabva kwendiri!’ Zvino ndinokupinza mukutongwa ngokuti unoti, andizi kushaisha. Unohambahamba kakurutu ngenyi kutsvaka njira imweni? Iwewe unozotsverudzwa ngeEgipite, kudai ngezvewakatsverudzwa ngeAsiria. Kubvira apo unozobudawo nenyara dzako wakadziisa padera pesoro rako, ngokuti Mambo Mwari waramba avo vounogonda, newe auzobudiriri kubudikidza ndivo.” “Kudai munhu echiramba mukadzi wake, naye akaenda kubva kwaari nokuita mukadzi woumweni munhu, unozohwirira kwaari here? Iyo nyika aizosvipiswi kakurutu here? Iwewe wakaita uhure nevadikani vazhinji, newe ungapetuka kwendiri here? Unoronza Mambo Mwari. Mirudza madziso ako kundau dzakakwirira dzisina chiro, uone! Iripo here ndau pousikazi kuatwa newe? Pasinde penjira wakavagarira vadiwa kudai ngavaArabia mushango. Newe wasvipisa nyika ngouhure hwako nokushata kwako. Ndizvo mvura yarambidzwa kunaya, akuzi kuapo mvura yokupedzisira; asi waiya nehope yehure, wakaramba kutsverudzwa. “Auzi zvino kudaidza kwendiri kuti, ‘Baba angu, mungani woutsva hwangu? Unozogara anoushungu hwake mhera nariini here? Unozogara akatseneka metsa kumagumo here?’ Aya ndiwo maereketere ewaita, asi waita kushata kweshe kudai ngezvewaikona.” Mambo Mwari wakati kwendiri ngamazuva aJosia mambo, “Wakaona here izvo zvaakaita uwo usikagondeki Isuraeri, kukwira kwaakaita padera pemitunhu yeshe napashi pemiti yeshe yakasvipirika, apo paakaita uhure? Neni ndakapinimidza, apo aita izvi zveshe, kuti unozopetuka kwendiri. Asi aazi kupetuka, naJudha munun'una wake unochengedzera wakazviona. Inini ndakaona, apo ndakamurasha nokumupa tsamba yokuparadzana, ngendaa dzeshe dzokuomba dzaakaita Isuraeri echipetuka sure; asi Judha munun'una wake unochengedzera aazi kutya, asi wakaenda kooita hure. Ngendaa yokurerusa kuhura kwake wakasvipisa nyika, wakahura nebuwe nomiti. Asi ngeizvi zveshe munun'una wake unochengedzera aazi kupetuka kwendiri ngomwoyo wake weshe, asi ngokudziitisa,” unoronza Mambo Mwari. Zvino Mambo Mwari wakati kwendiri, “Isuraeri usikagondeki wakadzionesa kuitanane kupinda Judha unochengedzera. Enda udaidzire dera mazwi aya wechiti, petukai, imwimwi vaIsuraeri vasikagondi unoronza Mambo Mwari; andizoringiri kwemuri muushungu ngokuti ndine nyasha, unoronza Mambo Mwari, andizogari ndakanyangadzwa mhera nariini. Tendai kwega kushaisha kwenyu, kuti mwamukira Mambo Mwari, Mwari wenyu, kuti nemwi mwaparadzira rudo rwenyu pakati pevapara pashi pemiti yeshe yakasvipirika, amuzi kupurutana izwi rangu, unoronza Mambo Mwari. “Petukai, imwimwi vana vasikagondi, unoronza Mambo Mwari, ngokuti ndini mambo wenyu; ndizomutora, umwe kubva mudhorobha, nevairi kubva mumhuri, neni ndinozomuunza Zioni. Ndinozomupa vaushi vanodakadza mwoyo wangu, vanozogutisa ngokuzia nokuzwisisa. Naapo mwawanda nokuzadza nyika, mumazuva awo, unoronza Mambo Mwari, avachazoronzi kuti, ‘Bhokisi reChitenderano chaMambo Mwari!’ Arichazopinimidzwizve; avachazorikarakadzi nokuti kuritama, avachazoitizve rimweni. Ngouwo mukuwo vanozodudza Jerusarema kuti, ‘Dendemaro raMambo Mwari’ nemadzinza eshe anozounganidzwa kweriri, mukuapo kwaMambo Mwari muJerusarema; avachazohambi kuteera mikarakadzo yomwoyo yavo yakashata. Mumazuva awo vemhatso yaJudha vanozobatana pamwepo nevemhatso yaIsuraeri, navo vanozobuda pamwepo kubva munyika yedera kuenda kunyika yendakapa madzibaba enyu kuita nhaka yavo.” Ndakapinimidza ngenjira yendaizokuemesa. “Ndiyo pakati pevana vangu, nokukupa nyika yakanaka, nhaka yakanaka kakurutu yemadzinza eshe. Neni ndapinimidza, kuti unozondidaidza kuti, Baba angu, nokusikakunukuka kubva kwendiri. Asi, kudai ngomukadzi usikagondeki unosiya mwamuna wake, ndizvo wakaita usikagondeki kwendiri, iwewe mhatso yaIsuraeri,” unoronza Mambo Mwari. Izwi rinozwika pandau dzakakwirira dzisina chiro, kuchema nokupota kwevana veIsuraeri, ngokuti vakapauka kubva munjira yavo, vakariyarwa Mambo Mwari, Mwari wavo. Petukai, imwimwi vana vasikagondeki, ndinozorapa kusikagondeka kwenyu. “Ringira, tinouya kwouri; ngokuti iwewe uri Mambo Mwari, Mwari wedu. “Ngegwinyiso akudetseri kugonda ruponeso kuti runobva kumitunhu, madhiri epamitunhu. Ngegwinyiso ruponeso rwaIsuraeri ruri munaMambo Mwari, Mwari wedu. Asi kubvira pautsva hwedu kutsveruka kwakapedza mushando wemadzibaba edu, zvifuyo zvavo, n'ombe nemakwai, vakororo vavo nevanasikana vavo. Ngatiate pashi mukutsveruka kwedu, nokutsveruka kwedu kutifukidze; ngokuti takashaisha kunaMambo Mwari, Mwari wedu, isusu nemadzibaba edu, kubvira muutsva hwedu metsa nanyamashi; atizikupurutana izwi raMambo Mwari, Mwari wedu.” “Kudai wechipetuka, O Isuraeri,” unoronza Mambo Mwari, “Kudai wechipetuka kwendiri, kudai wechirasha zvinyangadzo zvako kubva mukuona kwangu, ndizvo auzokutukuswi, nokudai wechipika, ‘Kudai ngezvaanopona Mambo Mwari,’ mugwinyiso, mukutonga kwakanaka, nomukururama, zvino madzinza anozofumiswa ndiye mwaari, vanozoganza kwaari.” Ngokuti izvi ndizvo zvinoronza Mambo Mwari kunevanhu vaJudha nokune vagari veJerusarema, “Rimai minda yenyu, musakusha pakati peminzwa. Dzichekerenyi pachenyu kunaMambo Mwari, muduse ganda romwoyo yenyu, O vanhu vaJudha nevagari vomuJerusarema, nokuti ushungu hwangu hungabuda kudai ngomuriro, unopisha pasina naumwe ungaudzima ngendaa yezvakashata zvomunoita.” Daidzira muJudha, uziise vari muJerusarema wechiti, “Ridzai gwama munyika; mudaidzire ngeizwi guru mwechiti, unganai pamwepo, tipotere mumadhorobha akashosherwa. Emesai mujeki muringire Zioni; tizai kuti mupone, musanonoka, ngokuti ndinounza kushata kunobva ngedera nokuparadzwa kukurutu.” Mhondoro yabuda kubva mugwasha; muparadzi wemadzinza wabuda munjira kuuya; wabuda kubva kundau yake kuti aparadze nyika yenyu; madhorobha enyu anozoita matongo asina unogaramwo. Ngendaa yeizvi dzisimidzei ngemachira emasaka, mucheme muboorere: ushungu hunotyisa hwaMambo Mwari ahuzi kupera kubva kwetiri. “Ngeiro zuva,” unoronza Mambo Mwari, “Mwoyo wamambo unozopera simba, nemwoyo yevatongi; vapristi vanozokangaidzwa nevaprofeti vanozoshama.” Zvino ndakati, “A Mambo Mwari, Mwari! Ngechokwadi kuchengedzeranyi kwakakura kudai kwewakaitira vanhu ava neJerusarema wechiti, ‘Zvinozomunakira’ kunyazwi shoti apo yaiswa pahuro.” Ngouwo mukuwo kunozoronzwa kunevanhu ava nokuneJerusarema, kuti dutu rinopisha rinouya rechibva kwendiri kubuda ngomundau dzomushango dzakakwirira dzisina chiro rinoguma kuvanhu vangu varombo, haiwa kurudza nokuti kupepeta, dutu rinesimba kuzvikurira. Zvino ndini uwo unoereketa mukutongwa kwavo. Ringira, unouya kudai ngemakore, nengoro dzake dzinodai ngechipupuri; mahachi ake anorumbisa kupinda madorambudzi. Ihehe kwetiri, ngokuti taparadzwa. O Jerusarema, shambidza mwoyo wako uchene kubva kunezvakashata, kuti uponeswe. Mipinimidzo yako youpenzi inozogara mukati mwako mukuwo wakadini? Ngokuti izwi rinodaidzira rinobva Dhani, nerinodaidzira kutambudzika kunobva kuMutunhu Efuremu. “Ronzerai madzinza, ‘Aya ari pano!’ Ringirai, daidzirai kuneJerusarema kuti magaa anouya anobva munyika irikuretu, anoridza mhere kurwisana nemadhorobha aJudha. Avakomberedza mukati kudai ngevarindi vemunda, ngokuti wakandimukira,” unoronza Mambo Mwari. “Njira yako nemishando yako zvakuunzira izvi padera pako; uku kuri kushata kwako, kuvavanyi kwekunoita! Zvabaya mumwoyo mwako.” Ndarwadziwa, mwoyo wangu! Ndarwadziwa, mwoyo wangu! Ndinorwadziwa mumwoyo wangu; mwoyo wangu unochema mukati mwangu; andikoni kunyarara, ngokuti mweya wangu wazwa kuridzwa kwegwama, nokurira kwemhere yehondo. Kuparadzwa kunoteera kuparadzwa, nyika yeshe yaparadzwa. Matende angu anoparadzwa ngokukasira, machira angu omukati mwematende ngomukuwo mudoko. Ndinozoona chioniso, ndizwe kurira kwegwama mukuwo wakadini kureba? Ngokuti vanhu vangu mapenzi, avazi kundizia; vakadai ngevana vane upenzi, avazwisisi. Ingwazi mukuita zvakashata, avazii kuita zvakanaka. Ndakaringira nyika, ringira, yaiya isina muemo wakanaka, isina chiro, nokumatenga nawo aiya asina kujeka. Ndakaringira mitunhu, wona, yaihuta, nezvitunhu zvaizungunyika kakurutu kuenda mberi nesure. Ndakaringira, wona, paiya pasina munhu, neshiri dzeshe dzomudenga dzaiya dzatiza. Ndakaringira, wona, ndau yakavundira yakaita rubaya nemadhorobha ayo eshe akapwanyirwa pashi pamberi paMambo Mwari, pamberi peushungu hwake hunotyisa. Ngokuti izvi ndizvo zvinoronza Mambo Mwari, nyika yeshe inozoparadzwa, asi andizoipedzi yaamho. Ngendaa yeizvi nyika inozotsumba nematenga anozosvipa; ngokuti ndakazviereketa, ndakazviemesa, andizopinduki akadi, andizokunukuki kubva kwezviri. Pakuzwa ngebope revagadhi vemahachi nevaposhi vemisee dhorobha reshe rinotiza; vanopotera mumakwasha, nokukwira padera pemapuwe; madhorobha eshe anosiiwa, asina munhu unogaramwo. Newe, O wakaparadzwa, unoitenyi kuti udzipfekedze ngamachira akatsvuka, kuti udzinemese ngezvinemeso zvomukore, kuti ukurise madziso ako ngepende? Unodzinemesa kuti unake kusina shwiro. Vadikani vako vanokushoora, vanotsvaka kukuuraya. Ngokuti ndakazwa izwi rakadai ngeromukadzi unorwadziwa ngokubereka, unorwadziwa kwakadai ngouwo unobereka mwana wedangwe, kuchema kwemwanasikana weZioni, unofemurika echitambanudza nyara dzake echiti, “Ihehe kwendiri zvino! Inini mweya wangu unopera simba pamberi pevaurayi.” “Rumbai imwimwi mberi nesure mumapato eJerusarema, ringirai peshe zvino, muzie! Mutsvake mundau dzaro dzakapamhama, kuti mungaona munhu umwe here unoita zvakanaka, echitsvaka gwinyiso, kuti ndirirekerere. Kunyazwi vanoti, ‘Kudai ngezvaanopona Mambo Mwari,’ asi vanopika ngokunyepa.” O Mambo Mwari, madziso ako aatsvaki gwinyiso here? Wavachaya, asi avazi kuzwa kurwadziwa; iwewe wavapedza, asi vakaramba kupangwa. Vakaita kuti hope dzavo dzikonze kupinda buwe; varamba kupetuka sure. Zvino ndakati, “Ava ndivo vega varombo, mapenzi; ngokuti avazii njira yaMambo Mwari, mupango waMwari wavo. Ngandiende kuvakuru, ndierekete navo; ngegwinyiso vanozia njira yaMambo Mwari, mupango waMwari wavo.” Asi ava veshe vakatodzana vakagura joka, vakadambura zvisungo. Ndiyo ndaa mhondoro inobva mugwasha inozovauraya, negava romushango rinozovaparadza. Khamba rinohwarira madhorobha avo; weshe unobudamwo unozobaurwa kuita zvigurwa, ngokuti zvishaishi zvavo zvakawanda, nokuhwirira kwavo sure kwakanyanya. “Ndingakuita marekererenyi? Vana vako vandisiya, vechipika ndivo vasiri Mwari akadi. Naapo ndavagutisa yaamho, vakaomba, vechidziunganidza ngezvikwata mumhatso dzeuhure. Vakanasa kugutiswa yaamho kudai ngemadhuna emahachi akakodzwa, umwe ngaumwe wavo echivevedza sure kwomukadzi womuakirwana wake. Andizovaorori ngeizvi here?” Unoronza Mambo Mwari. “Mweya wangu auzounzidziri here kudzinza rakadai ngeiri? Kwirai ngomumisara yemivhini mwechiriparadza yaamho asi musapedza reshe; dusai matai aro, ngokuti aasiri aMambo Mwari akadi. Ngokuti mhatso yaIsuraeri nemhatso yaJudha vakaita ngokusikagondeka kwendiri,” unoronza Mambo Mwari. Vakaereketa manyepo ndiMambo Mwari vechiti, “Aazoiti chiro. Kushata akuzouyi padera pedu, atizooni shoti nokuti nzara.” Vaprofeti vanozodai ngedutu, ngokuti izwi ariri mwevari akadi. Izvi ndizvo zvinozoitika kwevari. Ndizvo izvi zvinoronza Mambo Mwari wehondo, “Ngokuti vaereketa iri izwi, ringira, ndinoita zvino kuti mazwi angu ari mumuromo wako aite kudai ngomuriro, nevanhu ava kuti vadai ngehuni nomuriro unozovapisha.” “Ringira, ndinounza padera pako dzinza rinobva kuretu, O mhatso yaIsuraeri” unoronza Mambo Mwari. “Idzinza rinogara, riri dzinza rekaretu, dzinza rousikazii rurumi rwaro, auzwi cherinoereketa. Chikomwe chavo chakadai ngeiba rakabeuka; veshe ingwazi dzehondo. Vanozodya zvakakukurwa zvako nechingwa chako, vanozodya vakororo vako nevanasikana vako; navo vanozodya makwai ako nen'ombe dzako; vanozodya mavhini ako nemaonde ako; vanozoparadza ngeshoti madhorobha ako akashosherwa, ounogonda ndiwo. Asi kunyazwi mumazuva awo, andizomupedzi mweshe,” unoronza Mambo Mwari. “Naapo vanhu vako vanozoti, ‘Ngenyi Mambo Mwari, Mwari wedu, echiita zviro zveshe izvi kwetiri?’ Ngouwo mukuwo unozoti kwevari, ‘Kudai ngezvemwakandisiya nokudira zvimwari zvipara munyika yenyu, ngokudaro munozoshandira vapara munyika isiri yenyu akadi.’ ” Ronza izvi mumhatso yaJakobe, udaidzire muJudha wechiti, “Izwai izvi, O vanhu mapenzi, musina kuzwisisa, munemadziso, asi amuoni, munenzee, asi amuzwi. Amundityi here?” Unoronza Mambo Mwari; “Amuhuti here pamberi pangu? Ndakaisa jecha kuti riite muganu woruandhle, ngechironzo chemhera nariini, kuti rusazoudarika; kunyazwi mafungu arwo anorichaya aanyisi, kunyazwi anotinhira, aakoni kudarika. Asi ava vanhu vanomwoyo wakaoma nokumukira; vakapauka, vaenda. Avaronzi mumwoyo mwavo kuti, ‘Ngatitye Mambo Mwari, Mwari wedu, uwo unonaisa mvura, yeshe yokutanga neyokuteerera ngenguva yayo; unotiemesera mavhiki okukukura.’ Kushata kwenyu kwapetudza izvi kuretu, nezvishaishi zvenyu zvamurambidzira zviro zvakanaka. Ngokuti vakashata vanooneka pakati pevanhu vangu; vanotora zviro zvevamweni, vanoteya chirimbana vechibata vanhu. Kudai ngesekete rakazara ngeshiri, ngokudaro mhatso dzavo dzakazara ngokuchengedzera; ndizvo vaita vakuru, nokuita makurudza. Vaita vakakora, vanon'anikira, vanokurira vakawanda, avazii chipimo chemishando yakashata; avatongi ngokururamisa ndaa yenherera, kuti ibudirire, avarwiri maruramiro evarombo. “Andizovaorori ngeizvi here?” Unoronza Mambo Mwari. “Mweya wangu auzoshunguriri here dzinza rakadai? Chiro chinoshamisa nechinotyisa chaitwa munyika: Vaprofeti vanoprofeta manyepo nevapristi vanotonga vechipangwa ngevaprofeti; navanhu vangu vanoda kuti zvidaro; asi munozoitenyi kumagumo azvo?” Tizai kuti mupone, O vana vaBhenjamini, kubva pakati peJerusarema! Muridze gwama muThekoa, mwechiemesa mujeki muBhethi-hakheremu; ngokuti kushata kunouya kubva dera, nokuparadzwa kukuru. Ndaedzanisa mwanasikana weZioni nemafuro akanaka nokupfaa. Vaushi vanozouya nezvifuyo zvavo kurwisana naro; vanozoemesa matende avo kumutendenedza; vanozousha umwe ngaumwe zvifuyo zvake kundau yake. “Nasirirai kurwa hondo naye; mirukai ngatikwireyo masikati. Ihehe kwetiri! Ngokuti zuva rinobira, mabvute emadeekoni anoreba. Mirukai ngatirwise usiku, ngatiparadze ngome dzake.” Ngokuti izvi ndizvo zvinoronza Mambo Mwari wehondo, “Temerai pashi miti yaro; mushoshere Jerusarema. Ndiro dhorobha; rinosisira kuororwa; amuna chiro chirimwo, asi kuripo kutambudza kukurutu pakati paro. Kudai ngechinyuka chinongwarira mvura yacho yakachena, ndizvo rinongwarira kushata kwaro kutsva; ugebenga nokuparadza zvinozwika mukati mwaro; kurwara, maonje zviri pamberi pangu mukuwo weshe. Tenda kupangiwa, O Jerusarema, kuti mweya wangu urekere kupetuka kubva kweuri, ndikuite matongo, nyika isikagarwi ngevanhu.” Izvi ndizvo zvinoronza Mambo Mwari wehondo, “Kwarakwatai yaamho kudai ngemavhini vakasara veIsuraeri, hwirinzai nyara yenyu kumatai kudai ngomuunganidzi wemavhini.” “Ndingazoereketa nokunyowedza kunaani, kuti vangazwa? Ringira, nzee dzavo dzakatsiira, avakoni kupurutana. Izwi raMambo Mwari riri chitsverudzo kwevari; avadakari ndiro. Asi ndakazara ngoushungu hwaMambo Mwari; ndaremba ngokunyararira.” “Udurure padera pevana vari mumapato omudhorobha, nepadera pembungano yemajaha, ari pamwepo; veshe mwamuna nomukadzi vanozotorwa, musharuka pamwepo neharahwa. Mhatso dzavo dzinozopuwa kunevamweni, minda yavo nevakadzi vavo pamwepo; ngokuti ndinozotambanudza nyara yangu padera pevanogara munyika,” unoronza Mambo Mwari. “Ngokuti kubvira pamudoko kuguma pane wakakurisa wavo, veshe vanokarira kuuyirwa ngezvisina shwiro; nokubvira pamuprofeti nepamupristi, umwe ngaumwe unoita ngokuchengedzera. Vakaporesa ronda revanhu vangu vasikapinimidzi vechiti, ‘Kunyarara, kunyarara,’ apo pasina kunyarara. Vakaita ngenjira inotsverudza, apo vakaita zvinonyangadza; asi vaiya vasikatsveruki, avazi kuzia kutsveruka. Ndizvo vanozowa pakati peavo vanowa; ngomukuwo wendinovaorora, vanozorigwa pashi,” unoronza Mambo Mwari. Izvi ndizvo zvinoronza Mambo Mwari, “Emai pamhararano penjira, muringire, mubvunzise ngenjira dzekare, paiya nenjira yakanaka, muhambe mweiri, nemwi muone zororo kumweya yenyu.” Asi vakati, “Atizohambi mweiri.” Ndakamuemeserawo varindi padera penyu ndechiti, “Purutanai kurira kwegwama.” Asi vakati, “Atizopurutani.” “Ndizvo izwanyi, O madzinza, muzie, O mbungano, chiinyi chinozoitika kwevari. Izwa, O nyika; ringira, ndinozounza kuparadzwa padera paava vanhu, michero yemipinimidzo yavo, ngokuti avazi kupurutana mazwi angu, nokuti mipango yangu vairamba. Zvinodetserenyi kwendiri mutombo unegwema rakanaka unobva Shebha, nemhwarungu dzinotapira dzinobva kunyika iri kuretu? Mibairo yenyu yokupisha aiashiriki, nokuti midiro yenyu aidakadzi kwendiri.” Izvi ndizvo zvinoronza Mambo Mwari, “Ringira, ndinoisa pamberi peava vanhu zvinopumhuna, izvo zvevanopumhunwa ndizvo; vabereki nevana pamwepo, muakirwana nomungani wake vanozopera.” Izvi ndizvo zvinoronza Mambo Mwari, “Ringira, vanhu vanouya kubva kunyika yedera, dzinza guru rinomuswa kubva kumarupande arikure enyika. Vakabata uta nomukhondo; vanorunya, avana nyasha; bope ravo rinotinhira kudai ngoruandhle; vanogadha mahachi, vakapfeka kudai ngevanhu vokurwa hondo kurwisana newe, O mwanasikana weZioni.” “Tazwa mbiri yavo; nyara dzedu dzapera simba; maharura okutyiswa atibata, kurwadziwa kwakadai ngekwomukadzi unobereka. Musaenda kumunda, nokuti kuhamba munjira; ngokuti gaa rine shoti, kutyisa kuri kumarupande eshe.” “O vanhu vangu varombo, fukai masaka, dzimburumbudzei mumarota; mucheme kudai ngounochemera mwana zinyarimwe, mucheme kakurutu, ngokuti muparadzi unozouya padera pedu ngokukasira. Ndakakuemesa kuti uite muedzi nokuti rukumbati pakati pevanhu vangu kuti uzie nokuedza njira dzavo. Veshe vanemwoyo yakaoma vamukiri vakuru, vanohamba hamba nevanoreya; vakadai ngethusi nesimbi, veshe vanoita ngenjira youwori. Mvuto inovhutirwa zvinotyisa kakurutu; muthovhi unopera ngomuriro; munyungurusi unonyungurusa pasina chiro, ngokuti vashaishi avaparadzwi. Vanodaidzwa kuti sirivha yakarambwa, ngokuti Mambo Mwari wakavaramba.” Izwi rakauya kunaJeremia rechibva kunaMambo Mwari rechiti, “Ema pamusiwo wemhatso yaMambo Mwari, udaidzire uripo izwi iri wechiti, ‘Izwai izwi raMambo Mwari, mweshe imwimwi vanhu vaJudha, imwimwi munopinda ngepamisiwo iyi koodira Mambo Mwari.’ Mambo Mwari wehondo, Mwari waIsuraeri, unoronza izvi, ‘Nasirisai njira dzenyu nezviito zvenyu, neni ndinozomuita kuti mugare pandau iyi.’ Musagonda aya mazwi okunyepa, anoti, ‘Iri ndiro temperi raMambo Mwari, temperi raMambo Mwari, temperi raMambo Mwari.’ Ngokuti kudai mwechinasira yaamho njira dzenyu nezviito zvenyu, ngegwinyiso kudai mwechiitirana zvakanaka umwe kuneumweni, kudai musikatambudzi mupara, nherera neshirikadzi, nokuti kuparadza ngazi isina ndaa kundau iyi, nokuti kudai musikaateeri zvimwari zvimweni kudzikuwadza, zvino ndinozogara nemwi mundau iyi, munyika yendakapa kumadzibaba enyu mhera nariini nariini. Ringirai, munogonda mazwi okunyepa asikadetseri chiro. Munozoba, kuuraya, kuomba, nokupika ngemanyepo, nokupishira midiro kunaBhaari mutombo unegwema rakanaka, nokuteera zvimwari zvimweni zvomusikazi kuzia, nazvino munouya kooema pamberi pangu mumhatso iyi inodudzwa ngezina rangu mwechiti, ‘Takasunhurika’ kuti tiite izvi zveshe zvinonyangadza here? Iyi mhatso inodudzwa ngezina rangu yaita bako rembavha mukuona kwenyu here? Ringira, inini ndemene ndakazviona.” Unoronza Mambo Mwari. “Endai zvino kundau yangu yaiya muShiro, apo pendakaemesa zina rangu kuti rigare pakutanga, muone zvendakaita kweiri ngendaa yokushata kwevanhu vangu Isuraeri. Zvino,” Mambo Mwari unoronza, “Ngokuti mwakaita izvi zviro zveshe, naapo pendakaereketa kwomuri ngokusikarekera, amuzi kundipurutana, naapo pendakamudaidza amuzi kupingura, ndizvo ndinozoita kuiyi mhatso inodudzwa ngezina rangu, yomunogonda ndiyo, ndau yendakapa kwemuri nokumadzibaba enyu, kudai ngezvendakaita kuneShiro. Neni ndinozomurasha kubva mukuona kwangu, kudai ngezvendakarasha hama dzenyu dzeshe, kunoti, mibarirwana yeshe yeEfuremu. “Asi iwewe, usakumbirira ava vanhu, usavachemera nokuti kuvakumbirira, usapota kwendiri, ngokuti andizokuzwi. Auoni here izvo zvevanoita mumadhorobha aJudha nomumapato eJerusarema? Vana vanotheza huni, madzibaba anobasa muriro nevakadzi vanokanya hlama kuita zvingwa kunavahosi vomudenga; navo vanodurura midiro yokumwa kunezvimwari zvimweni, kumusa ushungu hwangu. Ndini here wevanomusira ushungu? Avadziitiri here kukangaidzwa kwavo?” Unoronza Mambo Mwari. Ndizvo izvi zvinoronza Mambo Mwari, Mwari kuti, “Ringirirai, kunyangadzwa kwangu noushungu hwangu zvinozodururwa padera peiyi ndau, padera pevanhu nepadera pemhuka, padera pemiti yomushango napadera pemichero yemavhu; hunozobaka, auzodzimwi.” Unoronza izvi Mambo Mwari wehondo, Mwari weIsuraeri: “Tutsirai midiro yenyu yokupisha kumibairo yenyu, mudye nyama. Ngokuti muzuva iro rendakaunza madzibaba enyu kubva munyika yeEgipite andizi kuereketa kwevari nokuti kuvapanga ngendaa yemidiro yokupisha nokuti yemibairo. Asi mupango uyu ndakavapanga ndechiti, ‘Purutanai izwi rangu, neni ndinozoita Mwari wenyu, nemwi munozoita vanhu vangu; muhambe kwega munjira yendinomupanga ndiyo, kuti zvimunakire.’ Asi avazi kupurutana nokuti kukotamisa nzee dzavo, asi vakahamba mukuona kwemipinimidzo yemwoyo yavo yakashata, vakahwirira sure, avazi kuenda mberi. Kubvira zuva revakabuda madzibaba enyu kubva munyika yeEgipite metsa nyamashi, ndakatumira ngokuangira varanda vangu veshe, vaprofeti, kwevari mazuva eshe; asi avazi kupurutana nokuti kukotamisa nzee kwendiri, asi vakakonzisa mitsipa yavo. Vakaita zvakashata kupinda madzibaba avo. “Ndizvo unozoereketa aya mazwi eshe kwevari, asi avazopurutani kwouri. Unozodaidza kwevari asi avazokudairi. Unozoti kwevari, ‘Iri ndiro dzinza risikazikupurutana izwi raMambo Mwari, Mwari waro, naro arizi kuashira kupangirwa; gwinyiso rapera, ragurwa kubva kumiromo yaro.’ “Para bvudzi rako, urirashe kuretu; udzichemere uri pandau dziri padera, ngokuti Mambo Mwari wakaramba nokusiya mubarirwana unomusa ushungu hwake. Ngokuti vana vaJudha vakaita zvakashata mukuona kwangu,” unoronza Mambo Mwari; “Vakaemesa zvinyangadzo zvavo mumhatso yakadudzwa zina rangu, kuti vaisvipise. Navo vanoangira kuaka ndau dzakakwirira dzeThofethi, iri mubani romukororo waHinomu, kuti vapishe vakororo nevanasikana vavo mumuriro; icho chendisikazi kupanga nokuti kupotera mumwoyo mwangu. Ndizvo, ringirai, ngegwinyiso mazuva anozouya,” unoronza Mambo Mwari, “Apo peisikachazodudzwi kuti Thofethi, nokuti bani romukororo waHinomu, asi Bani roKuuraya, ngokuti vanozoikwa muThofethi, metsa kutamike nendau. Nemiiri yaava vanhu inozoita kudya kweshiri dzomudenga nekwezvikara zvomushango; pasina munhu unozodzityisa. Apapo ndizoita kuti izwi rokudakara neizwi rokudakadzwa, neizwi romukwambo, neizwi ramakhoti, zvipere mumadhorobha aJudha nomumapato eJerusarema, ngokuti nyika inozoita matongo. “Ngouwo mukuwo,” unoronza Mambo Mwari, “Vanozobudisa mumaiba magodo emadzimambo aJudha, magodo evatongi, evapristi, evaprofeti, neeavo vamweni vanogara Jerusarema. Anozoparadzirwa pamberi pezuva, nepemwedzi nepehondo yeshe yomudenga, izvo zvevakada nokushandira, zvevakateera, zvevakatsvaka, nezvevakadira; avazounganidzwi, nokuti kutsirwa; anozoita kudai ngemadisa padera pehope yenyika. Rufu runozopinda kudikanwa kuno kupona ngaavo veshe vakasara, avo veiyi mhuri yakashata, varipo kundau dzeshe kwendakavadzingira kwedziri,” uronza Mambo Mwari wehondo. “Unozoti kwevari, unoronza izvi Mambo Mwari: Naapo vanhu vechiwa, avamiruki here? Kudai vechipauka, avapetuki here? Zvino ngenyi ava vanhu veJerusarema vechihwirira sure mikuwo yeshe? Vanobatisisa kuchengedzera, vanoramba kupetuka. Ndakapurutana ndikazwa, avaereketi zvakarurama; apana watenderuka kubva mukushata kwake echiti, ‘Ndakaitenyi?’ Umwe ngaumwe waenda kunjira yake kudai ngehachi rinorumba kupinda muhondo. Kunyazwi usore unozia mukuwo wawo wakaemeswa; nenjia, konjana nemherepere dzinozia mukuwo wokuuya kwadzo; asi vanhu vangu avazii chiemeso chaMambo Mwari. Munoita maronzerenyi kuti, ‘Takangwara, nomupango waMambo Mwari unesu?’ Ringira, apo chokwadi peni rokunyepera revanyori rakanyora manyepo. Vanhu vakangwara vanozotsverudzwa, vanozopera simba nokutorwa; ringira vakaramba izwi raMambo Mwari; kungwaranyi kuri mukati mwavo? Ndizvo ndinozopa vakadzi vavo kunevamweni, neminda yavo kune vanyisi, ngokuti umwe ngaumwe kubvira kumudoko metsa kunomukuru vakadzipira mukuemura; kubvira kumuprofeti metsa kumupristi, umwe ngaumwe unoita ngokuchengedzera. Ngokuti varapa ronda revanhu vangu ngokurekeredza vechiti, ‘Kunyarara, kunyarara,’ apo pasina kunyarara. Vakatseruka here, apo vakaita zvinyangadzo? Haiwa, avazi kutsveruka napadoko, avana kuzia kutsveruka. Ndizvo vanozowa pakati peavo vanowa; ngomukuwo wokuhambirwa kwavo vanozorigwa pashi,” unoronza Mambo Mwari. “Naapo ndechida kuvaunganidza pamwepo,” unoronza Mambo Mwari: “Akuzoapo mavhini pamuvhini, nokuti maonde pamuonde, shakani rinozofota; neizvo zvendakavapa zvinozoparara kubva kwevari.” “Tinogara takanyarara ngenyi? Unganidzanai pamwepo, ngatipotere mumadhorobha akashosherwa, tipereremwo; ngokuti Mambo Mwari, Mwari wedu, wakatitongera rufu, wakatipa mvura inoukaira kuti timwe, ngokuti takashaishira Mambo Mwari. Takaringirira kunyarara, asi akuna chakanaka chakauya; mukuwo wokuporeswa, asi ringira, kutyisa kukurutu. Kupheza kwemahachi kunozwika kubva Dhani; nyika yeshe inozungunyika ngebope rokupheza kwemikono yemahachi awo anesimba. Anouya kooparadza nyika nezveshe zviri mukati mwayo, dhorobha naavo vanogaramwo.” “Ringira, ndinozotumira nyoka dzinoukaira pakati penyu, mabuura asikapeteki, dzinozomuruma,” Mambo Mwari unoronza. Kudakara kwangu kwapera, kutambudzika kwaa padera pangu, mwoyo wangu unodemera mukati mwangu. Izwai, kuchema kwevanhu vangu varombo kubva munyika yakapamhama iri kuretu: “Mambo Mwari urimwo here mukati mweZioni? Mambo wake aarimwopi mukati mwake here?” “Vakanditsenesa ngenyi ngemiedzaniso yavo yakatsetswa, nezvimwari zvazvo zvipara zvisina shwiro?” “Kukukura kwapinda, zienza rapera, nesu atizi kuponeswa.” Ngendaa yokuremadzwa kwevanhu vangu varombo, neni ndaremadzwa; ndinosvipa mwoyo; kushamiswa kwandibata. Akuna mutombo wokuporesa here muGireadhi? Akuna murapi here apo? Ndizvo zvino vanhu vangu varombo avazi kutambiswa ngenyi? O kudai soro rangu raiya chinyuka chemvura, nemadziso angu aiya chinyuka chemasodzi, kuti ndichemere masikati nousiku vakaurawa vevanhu vangu varombo! O kudai ndaiya nendau yokugara yevahambi murubaya, kuti ndisiye vanhu vangu, ndibve kwevari! Ngokuti veshe vaombi nembungano yevachengedzeri. “Vanokunga rurumi rwavo kudai ngouta kufura manyepo: haiwa ngegwinyiso revanonyisa ndiro munyika. Ngokuti vanobva mukushata kuenda mukushata, navo avandizii,” unoronza Mambo Mwari. “Ngwarai, umwe ngaumwe, muakirwana wake, musagonda kunyazwi ngouri mukoma; ngokuti vakoma veshe vanozopambirana, nomuakirwana weshe unozohamba kudai ngomureyi. Umwe ngaumwe unochengedzera muakirwana wake, apana naumwe unoereketa gwinyiso; vakadzidzisa ndimi dzavo kuereketa manyepo; vanoita zvakashata navo vakaremba yaamho kuti vatenderuke. Ugaro hwenyu huri pakati pokuangiridzwa padera pokuangiridzwa, kuchengedzerwa padera pokuchengedzerwa. Vanoramba kundizia,” unoronza Mambo Mwari. Ndizvo izvi zvinoronza, Mambo Mwari wehondo, “Ringira, ndinozovanyungurusa nokuvaedza, ngokuti ndingaitenyi ngendaa yevanhu vangu? Rurumi rwavo rwakadai ngomusee unouraya; runoereketa manyepo kubudikidza ngomuromo. Umwe ngaumwe unoereketa mazwi akanaka kumuakirwana wake, asi mumwoyo mwake unoronga kumuhwarira. Andizovaorori here ngendaa yeizvi zviro?” Unoronza Mambo Mwari. “Andizounzidziri here dzinza rakadai ngeiri?” “Ndinozochema nokubonda ngendaa yemitunhu, nokutsumba ngendaa yemafuro omushango, ngokuti aparadzwa kuti pasaanomunhu ungahamba ndimwo, nokurira kwen'ombe akuzwiki; zveshe shiri dzomudenga nemhuka zvakatiza, zvaenda.” “Ndinozoita kuti Jerusarema riite murwi wematongo, nebako rezvikara zvinotyisa; ndinozoita kuti madhorobha aJudha aite rubaya, pasina unogaremwo.” “Ndiani wakangwara, ungazwisisa ichi? Ndiani zve uwo kwaari muromo waMambo Mwari wakaereketa kuti azvidaidzire? Ngenyi nyika yechipedzwa yechiitwa matongo kudai ngerubaya, kuti kusaapo naumwe unopinda ngoumwo?” Mambo Mwari unoronza kuti, “Ngokuti vakasiya mipango yangu yendakavapa, avazi kupurutana izwi rangu; avazi kuhamba kudai ngokupanga kwangu. Asi vakateera kukonza kwomwoyo yavo; vakateera vanaBhaari, izvo zvevakadzidziswa ngemadzibaba avo.” Ndizvo izvi zvinoronza Mambo Mwari wehondo, Mwari waIsuraeri: “Ringira, ndinopa ava vanhu kudya kwechisimwa chinovava, ndechivapa mvura inoukaira kuti vamwe. Ndinozovaparadzira pakati pemadzinza, awo asikazi kuziikanwa kwevari nokuti kumadzibaba avo; ndinozotumira shoti kuvateera metsa ndivapedze.” Ndizvo izvi zvinoronza Mambo Mwari wehondo, “Pinimidzai, mudaidze madzimai okuchema kuti auye; daidzai madzimai ngwazi dzokubonda kuti auye.” “Ngavakasire kuuya kuti vatiitire chiriro, kuti masodzi awe kubva kumadziso edu, netsiyo dzedu dzipopome mvura.” Ngokuti izwi rokuchema rinozwika richibva Zioni, “Kuparadzwa kwetaitirwa! Tatsverudzwa kakurutu, ngokuti takasiya nyika, ngokuti vapwanyira pashi ugaro hwedu.” “Izwai, O madzimai, izwi raMambo Mwari, nzee dzenyu ngadzizwe izwi romuromo wake; mudzidzise vanasikana venyu kubonda, neumwe ngaumwe ngaadzidzise muakirwana wake chiriro. Rufu rwauya kumafasitera edu, kwapinda mungome dzedu, kugura vana kubva mumapato, nemajaha kubva kumadariro. Ereketa! Izvi ndizvo zvinoronza Mambo Mwari kuti, ‘Miiri yevanhu inozowa yechifa kudai ngedisa murubaya, kudai ngemitsonzoti inosara sure kwomucheki, akuna unozoiunganidza.’ ” Izvi ndizvo zvinoronza Mambo Mwari, “Munhu wakangwara asadziganzisa ngoungwaru hwake, munhu unesimba asadziganzisa ngesimba rake, munhu mupfumi asadziganzisa ngoupfumi hwake. Asi iye unodziganzisa ngaadziganzise ngeizvi, kuti unozwisisa nokundizia, kuti ndini Mambo Mwari; ndinoita ngenyasha dzinorudo, kutonga kwakanaka nokururama munyika; ngokuti ndinodakara muneizvi zviro,” unoronza Mambo Mwari. “Ringirai, mazuva ngegwinyiso anouya,” unoronza Mambo Mwari, “Apo pendinozoorora avo veshe vakachekwa kwega ganda repamberi: Egipite, Judha, Edhomu, vana vaAmoni, Moabhi, naavo veshe vanoparwa masoro avo, naavo vanogara murubaya. Ngokuti madzinza aya eshe aazi kuchekwa, nemhatso yeshe yaIsuraeri aizi kuchekwa mumwoyo.” Izwai izwi raanoereketa Mambo Mwari kwemuri, O mhatso yaIsuraeri. Izvi ndizvo zvinoronza Mambo Mwari, “Musadzidzira njira yevemadzinza, nokuti kupera simba ngezvioniso zvomudenga; ngokuti madzinza anopera simba ndizvo. Ngokuti mitoo yevanhu inonyepa; muti unotemwa kubva mugwasha, unotsetswa ngesanho, mushando wenyara dzomutsetsi. Vanhu vanounemesa ngesirivha nomukore; vanoukohomera ngezvipikiri nehamera kuti isatsukunuka. Miedzaniso yakadai ngezungazunga rokudzinga makunguwo mumunda wemagaka, aikoni kuereketa; inotwarwa, ngokuti aikoni kuhamba. Musaitya, ngokuti aikoni kuita zvakashata, nokuti kuita zvakanaka.” Akuna naumwe wakadai ndiwe, O Mambo Mwari; uri mukuru, nezina rako iguru musimba. Ndiani usikakutyi, O mambo wemadzinza? Ngokuti kutyiwa ngokwako; pakati pavo veshe vakangwara vemadzinza, nomukati mwoumambo hwavo hweshe, akuna naumwe wakadai ndiwe. Asi veshe mabungumupee nemapenzi. Chidzidzo chinoitwa ngemiedzaniso achinaki kupinda chemuti. Sirivha yakapfurwa yakaunzwa kubva Tharshishi, nomukore kubva Ufazi. Mushando womupfuri nowenyara dzomuumbi; zvinopfekeswa ngezvakasvipirika nezvakatsvukuruka; zveshe zviri mushando wevamuna ngwazi. Asi Mambo Mwari ndiye Mwari wegwinyiso, ndiMwari unopona, naMambo wemhera nariini. Paushungu hwake nyika inohuta, madzinza aakoni kuemerera ushungu hwake. Izvi ndizvo zvounoronza kwevari, “Zvimwari zvisikazi kusika matenga nenyika zvinozopera munyika nokubva pashi pematenga.” Ndiye wakasika nyika ngesimba rake, wakaemesa nyika ngoungwaru hwake, ngokuzwisisa kwake wakatambanudza matenga. Naapo anoereketa izwi rake, kuripo kutinhira kwemvura mudenga, naye unoita kuti mhute ipwititike kubva kumagumo enyika. Unoita mheni nemvura nokubudisa dutu kubva mudura rake. Munhu weshe uri bungumupee mukuzia kwake; mupfuri weshe unotsverudzwa ngemiedzaniso yake, ngokuti miedzaniso yake ngeyokunyepera, amuna mweya wokufema mukati mwayo. Aina shwiro, mishando yokuchengedzera; ngomukuwo wokuororwa kwayo inozopera. Chikoaniswa chaJakobe achizi kudai ndiyo akadi, ngokuti ndiye Mururi wezviro zveshe, naIsuraeri idzinza renhaka yake; Mambo Mwari wehondo ndiro zina rake. Unganidzai mitwaro yenyu kubva pashi, O imwimwi munogara pashi pokukombwa! Ngokuti ndizvo izvi zvinoronza Mambo Mwari: “Ringirai, ndinozorasha kubanze avo vanogara munyika iyi ngouyu mukuwo, ndichaunza dambudziko padera pavo, kuti vazvione.” “Ihehe kwendiri ngendaa yokuremadzwa kwangu! Ronda rangu rakakura. Asi ndakati, ‘Chokwadi uku kuororwa kwangu, kunotamika kuti ndikutware.’ Tende rangu raparadzwa, nemapote angu eshe adamburwa; vana vangu vandisiya, apachina; apachina naumwe wokutambanudzazve tende rangu, nokuemesa machira angu omukati mwetende.” “Ngokuti vaushi mabungumupee, avabvunzi Mambo Mwari; ndizvo avazi kubudirira nezvifuyo zvavo zveshe zvapararira kweshe. Izwai, bope! Purutana, rinouya, bope guru rinobva kunyika yedera, kuita kuti madhorobha aJudha aite matongo, bako remakava anotyisa.” Ndinozia, O Mambo Mwari, kuti njira yomunhu aisiri musimba rakepi; munhu paanohamba aangatungamiriri zvitsiko zvake. O Mambo Mwari, nditonge, asi munditonge ngechipimo chokururamisa; haiwa muushungu hwako, ngokuti ungandiparadza. Durura ushungu hwako padera pemadzinza asikakuzii, nepadera vanhu vasikadaidzi zina rako; ngokuti vakaparadza Jakobe, vakamuparadza nokumupedza, vakaita kuti ugaro hwake huite matongo. Izwi rakauya kunaJeremia rechibva kunaMambo Mwari rechiti, “Izwa mazwi echitenderano ichi, uerekete kuvanhu vaJudha, nokuvagari vomuJerusarema. Unozoti kwevari, izvi ndizvo zvinoronza Mambo Mwari, Mwari waIsuraeri: Ngaatukwe munhu uwo usikapurutani mazwi echitenderano ichi, ichi chendakapanga madzibaba enyu ngeiro zuva rendakavabudisa kubva munyika yeEgipite, kubva muchoto chesimbi ndechiti, ‘Purutanai izwi rangu nokuita kudai ndizvo zveshe zvandakamupanga. Ndizvo munozoita vanhu vangu, neni ndinozoita Mwari wenyu, kuti ndizarise kupika kwendakaita kumadzibaba enyu, kuvapa nyika inoerera mukaka nouchi, kudai ngezvinoitika nyamashi.’ ” Zvino ndakapingura, ndikati, “Ngazviitike, Mambo Mwari.” Mambo Mwari wakati kwendiri, “Daidzira mazwi aya eshe mumadhorobha aJudha nomumapato eJerusarema wechiti, ‘Izwai mazwi echitenderano ichi nokuaita.’ Ngokuti ndakangwadza yaamho madzibaba enyu ngeiro zuva randakavabudisa kubva munyika yeEgipite, ndechivangwadza ngokuangira kunyazwi metsa nanyamashi ndechiti, ‘Purutanai izwi rangu.’ Asi avazi kupurutana nokuti kuteya nzee dzavo, asi vakahamba umwe ngaumwe mumupinimidzo womwoyo wake wakashata. Ndizvo ndakaunza padera pavo mazwi eshe echitenderano endakavapa kuti vaite, asi avazi kuaita.” Zvino Mambo Mwari wakati kwendiri, “Mweya wokumukirana unooneka pakati pevanhu vaJudha nepakati pevagari veJerusarema. Vahwirira mukushata kwemadzibaba avo ekaretu, avo vakaramba kupurutana mazwi angu; vakateera zvimwari zvimweni kuzvidira; vemhatso yaIsuraeri nevemhatso yaJudha vagura chitenderano changu chendakasunga nemadzibaba avo. Ndizvo izvi, ndizvo zvinoronza Mambo Mwari, ‘Ringira, ndinozounza kushata padera pavo ukwo kwevasikazokoni kutiza; kunyazwi vanozodaidzira kwendiri, andizovapurutani. Zvino madhorobha aJudha nevagari veJerusarema vanozoenda, vanozodaidzira kuzvimwari zvevanopira midiro yomutombo wokupisha unegwema rakanaka, asi azvizovaponesi akadi ngomukuwo wokutambudzika. Ngokuti kudai ngouwandu hwemadhorobha enyu zvakawandawo kudaro zvimwari zvenyu, O Judha; kudai ngouwandu hwemapato eJerusarema akawandawo kudaro emwakaemesa anotsverudza maarita okupishira mutombo kunaBhaari.’ Asi iwewe, usakumbirira ava vanhu, nokuti kudaidzira, nokuti kupota ngendaa yavo, ngokuti andizopurutani ngomukuwo wevanodaidzira kwendiri ngendaa yokutambudzika kwavo.” “Mudikani wangu chiinyi chaachinacho mumhatso yangu, apo akaomba nevazhinji? Mhiko zhinji nenyama yokupira zvingadusa kuparadzwa kwako here? Apo unoita zvakashata unodakara here? Mambo Mwari wakakudaidza kuti muorivhi wakasvipira, wakanaka, noune michero yakanaka; asi ngokutinhira kukurutu kwechimupupuri unozobasa muriro padera pawo, nematai awo anozopedzwa. Mambo Mwari wehondo, uwo wakakusima, wakaronza zvakashata ndiwe, ngendaa yokushaisha kwemhatso yaIsuraeri neyaJudha kwevakaita, vakamusa ushungu hwangu ngokupisha mutombo kunaBhaari.” NdiMambo Mwari wakandiziisa, neni ndikazvizia; zvino wakandionisa zviito zvavo zvakashata. Asi ndaiya ndakadai ngekakwai kakapfaa kanounzwa koourawa; neni ndaiya ndisikazii kuti vanoda kundimukira, vakaita urongwa vechiti, “Ngatiparadze muti uyu nemichero yawo, ngatimuuraye kuti abve munyika yevanopona, kuti zina rake risachazokarakadzwa ndiro.” “Asi, O Mambo Mwari wehondo, uwo unotonga ngokururama, unoedza mukarakadzo nomwoyo, ngandione kuunzidzira kwako padera pavo ngokuti kwouri ndakaisa ndaa yangu.” Ndizvo izvi zvinoronza Mambo Mwari ngevanhu veAnathothi, avo vanotsvaka kukuuraya vechiti, “Usazoprofeta ngezina raMambo Mwari kuti usafa ngenyara dzedu.” Ndizvo izvi zvinoronza Mambo Mwari wehondo, “Ringira, ndinozovaorora; majaha anozofa ngeshoti; vakororo vavo nevanasikana vavo vanozofa ngenzara; apana naumwe wavo unozosara. Ngokuti ndinozounza kuparadzwa padera pevanhu vaAnathothi, gore rokuororwa kwavo.” “Wakarurama, O Mambo Mwari, apo ndinounza ndaa yangu pamberi pako; asi nditendere kuereketa newe ngendaa yangu. Ngenyi njira yevakashata yechibudirira? Ngenyi veshe vanoshanda ngokuchengedzera vechigarisika? Iwewe wakavasima, navo vakatsira nzinde, vanokura, nokubereka michero; uri pasinde pemiromo yavo, asi uri kuretu kubva kumwoyo yavo. Asi iwewe, O Mambo Mwari, unondizia; unondiona, unoedza mwoyo wangu, mwoyo wangu uri kwouri. Kweya uvabudise kubanze kudai ngemakwai koourawa. Uvanasirire zuva rokuurawa. Nyika inozobonda mukuwo wakadini nezvinokura zvakasvipira zvemarubaya zveshe zvinozofota mukuwo wakadini? Ngendaa yokushata kweavo vanogaremwo mhuka neshiri zvapedzwa, ngokuti vanoti, ‘Aazooni magumo edu.’ Kudai waremba ngokurumba nevanorumba ngetsoka, ndizvo ungaita marumbirenyi nemahachi? Nokudai wechiwa munyika yokunyarara younogonda kweiri, ndizvo unozoitenyi apo wechihamba mugwasha reJorodhani? Ngokuti kunyazwi hama dzako, nevemhatso yababa ako, kunyazwi vakaita ngokuchengedzera kwouri; vanokudaidzira; usavagonda, kunyazwi vechiereketa mazwi akanaka kwouri.” Ndasiya mhatso yangu, ndarasha nhaka yangu; ndakapa mudikani womwoyo wangu munyara dzemagaa ake. Nhaka yangu kwendiri yakadai ngemhondoro iri mugwasha, inondibhongera; ndizvo ndakainyenya. Nhaka yangu yaita kwendiri kudai ngegodzi rinokara here? Makodzi akaitendenedza kumarutii eshe here? Endai muunganidze mhuka dzeshe dzomushango, ngadziuye dzimudye. Vaushi vakawanda vaparadza munda wangu wemivhini, vatsikatsika pashi petsoka chikoaniswa changu, vaita kuti chikoaniswa changu chinodakadza chiite shango risina chiro. Vachiita dongo, dongo rinobonda kwendiri. Nyika yeshe yaizwe dongo, asi apana naumwe unopinimidza ndiyo. Vaparadzi vakwira padera pendau dzeshe dzakakwirira dzeshango; ngokuti shoti yaMambo Mwari inovapedza kubvira kumagumo amwe enyika kuenda kuneamweni; apana naumwe unozoane kunyarara. Vakakusha koroni, asi vakakukura minzwa; vakadzipira mukurembesa, asi avazi kuuyirwa ngechiro. Vanozotsverudzwa ngezviyo zvavo ngendaa youshungu hunotyisa hwaMambo Mwari. Izvi ndizvo zvinoronza Mambo Mwari ngevaakirwana vangu veshe vakashata, avo vanogwama nhaka yendakaita kuti vanhu vangu Isuraeri vaigare: “Ringira, ndinozovabvita kubva munyika yavo, nokubvita mhatso yaJudha kubva pakati pavo. Naapo ndapedza kubvita ndinozovaitirazve nyasha nokuvaunzazve, umwe ngaumwe kunhaka yake nokunyika yake. Nazvino, kudai vechizodzidzira njira dzevanhu vangu ngomwoyo yavo yeshe, kupika ngezina rangu kuti, ‘Kudai ngezvaanopona Mambo Mwari,’ kudai ngezvevakadzidzisa vanhu vangu kupika ndiBhaari, zvino vanozogarisika pakati pevanhu vangu. Asi kudai dzinza reshe risikazopurutani, ndinozoribvita yaamho nokuparadza dzinza iro,” unoronza Mambo Mwari. Ndizvo izvi zvakaronza Mambo Mwari kwendiri, “Enda, utenge bhande rejira rorukangaza, urisungire pachiunu chako, asi usariisa mumvura.” Ndizvo ndakatenga bhande kudai ngeizwi raMambo Mwari, ndikariisa pachiunu changu. Neizwi raMambo Mwari rakauya kwendiri ngokwechipiri rechiti, “Tora bhande rounaro, riri pachiunu chako, umiruke, uende kurwizi runozwi Phara, urifishe apapo mubako rebuwe.” Ndizvo ndakaenda, ndikarifisha paPhara, kudai ngezvaakandipanga Mambo Mwari. Ngesure kwemazuva akawanda, Mambo Mwari akati kwendiri, “Miruka, uende Phara, ubvisepo bhande, rendakakupanga kufishapo.” Ndizvo ndakaenda Phara, ndikatsa, ndikatora bhande kubva pandau pandakarifisha. Ringira, bhande raiya raora, risikachadetseri chiro. Zvino izwi raMambo Mwari rakauya kwendiri rechiti, “Ndizvo izvi zvinoronza Mambo Mwari, ‘Ngenjira iyi, ndinozooresa kudzikudza kwaJudha nokudzikudza kukuru kweJerusarema. Ava vanhu vakashata vanoramba kuzwa mazwi angu, vanohamba ngemisikazwa mumipinimidzo yomwoyo yavo, vechiteera zvimwari zvimweni kuzvishandira nokuzvidira, ndivo vanozodai ngebhande iri risikachadetseri chiro. Ngokuti kudai ngebhande rinobatira pachiunu chomunhu, ngokudaro ndakaita kuti mhatso yeshe yaIsuraeri nemhatso yeshe yaJudha dzibatire kwendiri,’ unoronza Mambo Mwari, ‘kuti vaite vanhu vangu nokuita mbiri, kukudzwa, nokuirikidzwa. Asi avazi kupurutana.’ “Ndizvo iwewe unozoereketa izwi iri kwevari kuti, ‘Izvi ndizvo zvinoronza Mambo Mwari, Mwari waIsuraeri: jomeya reshe rinozozadzwa ngevhini.’ Navo vanozoti kwouri, ‘Unopinimidza kuti atizii here ngechokwadi kuti jomeya reshe rinozadzwa ngevhini?’ Zvino unozoti kwevari, ‘Izvi ndizvo zvinoronza Mambo Mwari: Ringira, ndichazadza ngokudhakwa veshe vanogara munyika ino, madzimambo anogara padendemaro raDhavhidha, vapristi, vaprofeti, navo veshe vanogara muJerusarema. Ndinozovadhumanisa umwe neumweni, vabereki nevana pamwepo,’ unoronza Mambo Mwari. ‘Andizokunguriri nokuti kuponesa nokuti kuitira nyasha asi kuvaparadza.’ ” Purutanai muzwe; musadzikudza, ngokuti Mambo Mwari waereketa. Irikidzai Mambo Mwari, Mwari wenyu, asati aunza chidima, dzisati dzapumhunwa tsoka dzenyu padera pemitunhu inechidima; apo muchatsvaka kujeka, unokupindura kuita bvute rokufa, nokuita chidima chakasvipa. Asi kudai musikazopurutani, mweya wangu unozochema kundau dzakafishika ngendaa yokudzikudza kwenyu; madziso angu anozochema kakurutu, nemasodzi angu anozoerera, ngokuti zvifuyo zvaMambo Mwari zvatorwa kuitwa hloko. Ronzai kunamambo nokuna mai ake, “Dzipfaisei, mugare pashi; ngokuti dzungudza renyu rakanaka rawa pashi kubva pasoro renyu.” Madhorobha okubani akonywa, apana naumwe unoabeura; Judha weshe unotorwa kuitwa hloko, unotorwa yaamho kuitwa hloko. Mirudza madziso ako uone avo vanobva dera Zviri pari zvifuyo zvewakapuwa, zvifuyo zvako zvaiya zvakanaka? Unozotinyi apo vaemesa kuita mukuru padera pako uwo wewakadzidzisa kuita mungani wako, kuti atonge padera pako? Auzorwadziwi here kudai ngomudzimai wobereka? Nokudai wechiti mumwoyo mwako, “Ngenyi izvi zviro zvauya padera pangu?” Indaa youwandu hwezvishaishi zvako zvokusimira zvako zvafukurwa nezvisisinho zvako zvaremadzwa. MuEthiopia ungatsandura here ganda rake, nokuti khamba ringatsandura here maara aro? Zvino iwewewo ungakona kuita zvakanaka, wakarovedzera kuita zvakashata. Ndizvo ndinozokuparadza kudai ngemakoto anotorwa ngedutu rinobva murubaya. Ichi ndicho chikoaniswa chako, chewakapimirwa ndini, unoronza Mambo Mwari, ngokuti wandiriyarwa, ukagonda manyepo. Inini ndemene ndinozofukura chokusimira chako padera pehope yako, nokutsveruka kwako kunozooneka. Ndaona zvinyangadzo zvako nokuomba kwako, nebope rokuomba, nouhure hwako hunotsverudza pazvimitunhu mushango. Ihehe kwouri, O Jerusarema! Metsa riini iwewe usati wacheneswa? Izwi raMambo Mwari rakauya kunaJeremia ngendaa yokuomerwa kwenyika. “Judha rinochema nemisiwo yaro inongwendangwenda; vanoata pashi muchidima chakasvipa kakurutu, nokuchema kweJerusarema kunokwira. Vakuru varo vanotuma varanda vavo koochera mvura; vanoguma kuzvinyuka, asi avaoni mvura; vanohwirira nezvidziyo zvisina mvura. Vanotsveruka nokukangaidzwa nokufukidza masoro avo. Mavhu akamweka ngokuti kwaiya kusina mvura panyika. Varimi vakangaidzwa, vafukidza masoro avo. Kunyazwi shoma yakabereka mwana murubaya inomusiya ngokuti akuna mwenje. Mbongoro dzomushango dzinoema pandau dzakakwirira, pasina chiro, dzechifema dutu kudai ngemakava; madziso adzo anokorera kuona ngokuti apana mwenje.” O Mambo Mwari, kunyazwi zvishaishi zvedu zvinopupura tisu kutiitire ndaa, chiita ngendaa yezina rako; ngokuti takahwirira sure kazhinji, takashaisha kwouri. O Gonda raIsuraeri, muponesi wavo ngomukuwo wokutambudzika, ngenyi wechiita kudai ngomupara munyika iyi, nokudai ngomuhambi unopauka kuata usiku humwe? Ngenyi wechidai ngomunhu wakangaidzwa, nokudai ngomunhu unesimba usikaponesi? Asi iwewe, O Mambo Mwari, uri mukati mwedu, nesu tinodaidzwa ngezina rako; usatisiya. Izvi ndizvo zvinoronza Mambo Mwari ngendaa yevanhu vake, “Ngegwinyiso vakada kuhambahamba, avazi kubata tsoka dzavo; ndizvo Mambo Mwari aavaashiri; zvino unokarakadza zvishaishi zvavo echiorora kushaisha kwavo.” Mambo Mwari wakati kwendiri, “Usakumbirira ava vanhu, kuti vaone zvakanaka. Kunyazwi vanoera kudya, andizwi kuchema kwavo; kunyazwi vanopira mudiro wokupisha nomunikero, andizviashiri; asi ndinovapedza ngeshoti, ngenzara nenhenda.” Zvino ndakati, “A Mambo Mwari, Mwari! Ringira, vaprofeti vanoti kwevari, ‘Amuzooni shoti, nokuti nzara; asi ndinozomupa kunyarara kwegwinyiso kundau iyi.’ ” Zvino Mambo Mwari wakati kwendiri, “Vaprofeti vanoprofeta zvokunyepa ngezina rangu. Andizi kuvatuma, nokuti kuvapanga nokuti kuereketa kwevari. Vanoprofeta kwomuri chioniso nokufembera zvokunyepa, nechisina shwiro, nokuchengedzera kwemwoyo yavo. Izvi ndizvo zvinoronza Mambo Mwari ngevaprofeti, vanoprofeta ngezina rangu, vasikazi kutumwa ndini, asi vanoti, ‘Akuzoapo shoti nokuti nzara kunyika iyi.’ Ngeshoti nenzara vaprofeti ava vanozopedzwa. Nevanhu vevanoprofetera kwevari vanozokandirwa mumapato eJerusarema ngendaa yenzara neshoti. Akuzoapo naumwe kuvatsira, ivo pachavo, vakadzi vavo, vakororo vavo, nevanasikana vavo. Ngokuti ndinozodururira padera pavo kushata kwavo.” Unozoronza kwevari iri izwi: “Madziso angu ngaaerere masodzi usiku nemasikati, usatendera kuti arekere, ngokuti mhandara, vanhu vangu, waremadzwa kakurutu, ngokuchaiwa kunotyisa vane chironda chakakura. Dai ndechibuda kuenda kurubaya, ringira, varipo vaya vakaurawa ngeshoti! Dai ndechipotera mudhorobha, ringira, varipo vaya vanorwara ngenzara! Ngokuti veshe vaprofeti nevapristi vanohambahamba munyika vasikazii.” Mwarasha yaamho vaJudha here? Mweya wako unonyenya Zioni here? Ngenyi watichaira pashi, pasina kurapwa kwedu? Tinotsvaka kunyarara asi akuna chakanaka, tinoringira mukuwo wokutambiswa, asi ringira kutyiswa! O Mambo Mwari, tinotenda kushata kwedu nokushaisha kwemadzibaba edu, ngokuti takakushaishira. Usatinyenya ngendaa yezina rako; usatsverudza chigaro chako choumambo chinouthende; karakadza, usagura chitenderano nesu. Chiripo here chimwari chemadzinza pakati pezvimwari zvisina shwiro chingakona kunaisa mvura? Nokuti matenga angadzasa mvura here? Andiwepi here, Mambo Mwari, Mwari wedu? Taisa gonda redu peuri, ngokuti ndiwe unoita izvi zveshe. Zvino Mambo Mwari wakati kwendiri, “Kunyazwi Mosi naSamueri vakaema pamberi pangu, asi mwoyo wangu aungakunukukiri kunevanhu ava. Vabvise pamberi pehope yangu, ngavaende. Naapo vanoti kweuri, ‘Tinozoenda kuri?’ Naapo unozovaronzera kuti, ‘Izvi ndizvo zvinoronza Mambo Mwari: Avo vakaemeserwa kufa ngenhenda ngavaende mukufa ngenhenda, naavo vakaemeserwa kufa ngeshoti ngavafe ngeshoti; naavo vakaemeserwa kufa ngenzara ngavafe ngenzara; naavo vakaemeserwa uhloko ngavaende muuhloko.’ Neni ndinozoemesa padera pavo mbeu murongomuna dzezvinoparadza,” unoronza Mambo Mwari: “Shoti yokuuraya, imbgwa dzokubaura, shiri dzomudenga, nezvikara zvomushango, kudya nokuparadza. Ndinozoita kuti vanyenywe kuumambo hweshe hwenyika ngendaa yaManase mukororo waHezekia mambo waJudha,” ngendaa yaakaita muJerusarema. Ndiani unozokuitira nyasha, O Jerusarema? “Nokuti ndiani unozokuchemera? Nokuti ndiani unozokupaukira kubvunza kuti wakadini?” Mambo Mwari wakati, “Iwewe wandirasha, uri kuhwirira sure; ndizvo ndatambanudza nyara yangu kwouri nokukuparadza; ndaremba ngokumukungurira. Ndavatsera ngorutsero pamisiwo yenyika; ndaita kuti vafirwe ngevanhu, ndaparadza vanhu vangu; avazi kutenderuka kubva kunjira dzavo. Shirikadzi dzavo dzawandisa kupinda jecha romuruandhle; ndaunzira vanamai vemajaha muparadzi masikati machena; ndaita kuti kurwadziwa nokutyiswa kuwire padera pavo ngokukasira, nokutyisa kudzake padera pedhorobha. Iye wakabereka vana vanomwe wapera simba; wabudisa mweya wake; zuva rake rapota achimasikati; wakatsverudzwa nokukangaidzwa. Nevasara vavo ndinozovapira kushoti pamberi pemagaa avo,” unoronza Mambo Mwari. Ihehe kwendiri, mai angu, mwakandibara kuita munhu wokuambana nokuita hasha munyika yeshe! Andizi kumbokweretesa munhu kuti ndiuyirwe, nevanhu avazi kundikweretesa kuti vauyirwe; asi veshe vanondituka. Mambo Mwari wakati, “Chokwadi ndapindira kukugwinyisa mukupona kwako, kuti uite zvakanaka; ngegwinyiso ndapanga magaa padera pako ngomukuwo wezvakashata, nomukuwo wokutambudzika. Uripo ungagura simbi nethusi, simbi inobva dera here? Upfumi hwako nemare yako ndinozozvipa kudai ngezvakachakatwa pasina mutengo, ngendaa yezvishaishi zvako zveshe, munyika yako yeshe. Ndinozokuita kuti ushandire magaa ako kunyika yousikazii, ngokuti muushungu hwangu muriro wabaswa, unozopisha mhera nariini.” “O Mambo Mwari, ndiwe unozia; ndikarakadze, ndihambire, undiunzidzire vanonditambudza. Mukusengerera kwako usandirasha kuretu; zia kuti ngendaa yako ndinotukwa. Mazwi ako akaonwa, neni ndakaadya; nemazwi ako akaita kwendiri kudakara nokudakadzwa kwomwoyo wangu; ngokuti ndinodaidzwa ngezina rako, O Mambo Mwari, Mwari wehondo. Andizi kugara pakati nokuti kudakara mumushongano wevanosheka; ndakagara ndega pashi peuremu wenyara yako, ngokuti waiya wandizadza ngoushungu. Kurwadziwa kwangu kunoangira ngenyi, bonje rangu aripori, rinoramba kuporeswa? Ngegwinyiso iwewe wakadai ngechinyuka chokunyepera, nokudai ngemvura inopwa?” Izvi ndizvo zvinoronza Mambo Mwari, “Kudai wechitenderuka, ndinozokupetudza, newe unozoema pamberi pangu. Kudai wechiteketesa zvakanaka, haiwa zvakashata, unozoita kudai ngomuromo wangu. Ndivo vanozopetuka kwouri, haiwa iwewe kupetuka kwevari. Neni ndinozokuita kunevanhu ava kudai ngorukumbati rwethusi; vanozorwa newe, asi avazokunyisi akadi, ngokuti ndinewe kukuponesa nokukununura,” unoronza Mambo Mwari. “Ndinozokununura kubva kunyara yewakashata, nokukuripira kuti ubve munyara yevanotyisa.” Izwi raMambo Mwari rakauya kwendiri rechiti, “Usazoroora mukadzi nokuti kubara vakororo nokuti vanasikana mundau iyi. Ngokuti izvi ndizvo zvinoronza Mambo Mwari, ngendaa yevakororo nevasikana vanobarwa mundau iyi, nendaa yemadzimai akavabereka, nemadzibaba akavabara munyika iyi: vanozofa ngenhenda dzinotyisa. Avazochemwi nokuti kuikwa; asi vanozodai ngemadisa padera penyika. Vanozopedzwa ngeshoti nenzara, nemiiri yavo yakafa inozoita kudya kweshiri dzomudenga, nokwezvikara zvomunyika. “Ngokuti izvi ndizvo zvinoronza Mambo Mwari, usaenda mumhatso yokubonda, nokuti kuenda koochema nokuti kugomera ngendaa yavo, ngokuti ndatora kunyarara kwangu kubva kuvanhu ava, unoronza Mambo Mwari, rudo rwangu runenyasha nokukungurira. Vakuru nevadoko veshe vanozofa munyika iyi; avazoikwi, apana naumwe unozovachema, akuna kuchekwa, nokuti kuparwa kwesoro kwevari. Vanhu avazovaguriri chingwa mukuchema kwavo, kuvaembedzera ngendaa yevakafa; nokuti umwe ungavapa tsani yokumwa kuvaembedzera ngendaa yababa avo nokuti mai avo. Auzopoteri mumhatso yedhiri, kugara navo kudya nokumwa. Ngokuti izvi ndizvo zvinoronza Mambo Mwari wehondo, Mwari waIsuraeri: ringira, ndinozoita kuti izwi rokusheka, izwi rokudakara, izwi romukwambo neizwi romuroorwa rinyarare mundau iyi mumazuva enyu nomukuona kwenyu. Naapo wooronzera vanhu ava mazwi aya eshe, navo vanoti kwouri, ‘Ngenyi Mambo Mwari aronza uku kushata kukuru kweshe tisu? Chiinyi kushata kwedu? Chiinyi chishaishi chedu chetashaisha kunaMambo Mwari, Mwari wedu?’ Zvino unozoti kwevari, ‘Indaa yokuti madzibaba enyu akandisiya, unoronza Mambo Mwari, akateera zvimwari zvimweni, nokuzvishandira nokuzvidira; vandisiya nokusikangwarira mipango yangu; nendaa yokuti mwakaita kushata kukuru kwakapinda kwemadzibaba enyu; ngokuti, ringira, munohamba umwe ngaumwe, kuteera kukonza kwomwoyo wake wakashata, nokuramba kupurutana kwendiri. Ndizvo ndinozomubvisa kuneiyi nyika kuenda kunyika yomusikazi kuizia, imwimwi nokuti madzibaba enyu; iyoyo munozodira zvimwari zvimweni masikati nousiku, apo pendisikazomuitiri nyasha.’ “Ndizvo, ringirai, ngegwinyiso mazuva anouya, unoronza mambo Mwari, apo pasikachazoronzwi kuti, ‘Kudai ngezvaanopona Mambo Mwari, uwo wakabudisa vana vaIsuraeri kubva munyika yeEgipite,’ asi, Kudai ngezvaanopona Mambo Mwari, uwo wakabudisa vana vaIsuraeri kubva munyika yedera, nokubva kunyika dzeshe dzaakavadzingira. Ngokuti ndinozovapetudza kunyika yavo yendakapa kumadzibaba avo. “Zvino ndinodaidza vabati vehove vazhinji, unoronza Mambo Mwari, navo vanozodzibata; navo vapedza ndinozodaidza vavhimi vazhinji, navo vanozovhima kubva pamutunhu umwe ngaumwe nepachimutunhu chimwe ngachimwe nomumapako emapuwe. Ngokuti madziso angu anoringira njira dzavo dzeshe; adzizi kufishika kubva kuhope yangu, nokuti kushata kwavo hakuzi kudzimwa kubva kumadziso angu. Kutanga ndinozohwirinzira kairi kushata kwavo nokushaisha kwavo; ngokuti vasvipisa nyika yangu ngemiiri yakafa yezviro zvinonyenyisa nezvinonyangadza zvemiedzaniso yavo, nokuzadza nhaka yangu ngezvinonyangadza zvavo.” O Mambo Mwari, simba rangu, nebako rangu, utiziro hwangu ngezuva rokutambudzika, madzinza anozouya kwouri, echibva kumagumo enyika echiti, “Ngegwinyiso madzibaba edu akagara nhaka yemanyepo, nezvisina shwiro, nezvisikadetseri chiro. Munhu ungakona kudziitira zvimwari here, izvo zvisitori zvimwari? Ndizvo, ringira, ngegwinyiso ndinozovadzidzisa, panguva ino ndichavadzidzisa simba rangu nokugwinya kwangu; navo vanozozia kuti zina rangu ndiMambo Mwari.” Chishaishi chaJudha chakanyorwa ngepeni resimbi, rinemuromo wedhaimondi, chakanangurwa parusamba rwomwoyo yavo, nepadera penyanga dzemaarita avo, naapo vana vavo vechikarakadza ngemaarita avo nesika dzavo dzokudira dziri pasinde pemiti yakasvipira iri padera pezvimitunhu zvakareba, pamitunhu iri munyika yorubaya. Upfumi hwako hweshe nemare yako ndinozozvipira kuti zvichakatwe, nendau dzako dzakakwirira ngendaa yokushaisha kwako kuri munyika yako yeshe. Ngendaa yokuita kwako unozotorerwa nhaka yako yendakakupa; ndinozoita kuti ushandire magaa ako munyika yousikazii; ngokuti muushungu hwangu wakabaka muriro uwo unozobaka mhera nariini. Izvi ndizvo zvinoronza Mambo Mwari: “Ngaatukwe uwo unogonda munhu, unoita nyama kugwinya kwake, mwoyo wake unofuratira Mambo Mwari. Unozodai ngepfiba riri murubaya, aazooni apo chakanaka choouya, unozogara kundau dzakaoma murubaya, munyika inemunyu, isina vanhu. Unomuchena uwo unogonda munaMambo Mwari, uwo kugonda kwake ndiMambo Mwari. Unozodai ngomuti wakasimwa pasinde pemvura, uwo unotambaradza nzinde dzawo pasinde porwizi. Usikazotyi kupisha apo kwauya, nemashakani awo anogara akasvipira; usikazotyi ngegore rokuoma, usikarekeri kubereka michero. Mwoyo unochengedza kupinda zveshe, wakashata yaamho; ndiani ungauzia? Inini Mambo Mwari ndinoringisisa mwoyo, ndinoedza zviri mukati kuti ndipe kumunhu umwe ngaumwe kudai ngenjira dzake nokudai ngemichero yezviito zvake. ” Kudai ngechikware chinofungatira mazanda echisikazi kubara ndizvo zvakaita uwo unounganidza upfumi ngenjira isikazi kururama, unozohusiya achipakati pemazuva ake nepakupera kwake unozoita benzi. O dendemaro rinouthende rakakwidzwa kubvira pakutanga, ndau yedu yokudirira yakachena! O gonda raIsuraeri, O Mambo Mwari! Veshe vanokuramba vanozotsverudzwa, avo vanokusiya vanozonyorwa mumavhu, ngokuti vakasiya Mambo Mwari, chinyuka chemvura yokupona. Ndirape, O Mambo Mwari, neni ndinozorapwa; ndiponese neni ndinozoponeswa; ngokuti iwewe uri kukudza kwangu. Ringira zvevanoti kwendiri, “Riri pari izwi raMambo Mwari? Ngariuye.” Asi inini andizi kutiza kubva mukuita muushi mumushando wako, nokuti kuemurira zuva rokutambudzika. Iwewe unozia izvo zvakabuda kubva pamiromo yangu, zvaiya pamberi pehope yako. Usandityisidzira; iwewe uri utiziro hwangu ngezuva rezvakashata. Ngavatsverudzwe avo vanonditambudza, asi usaita kuti inini nditsverudzwe; ngavapere simba; ngokutya, asi inini ndisapera simba vaunzire zuva rokuparadzwa, vaparadze ngokuparadzwa kwakapetwa. Izvi ndizvo zvinoronza Mambo Mwari kwendiri: “Enda wooema paMusiwo weVanhu, apo pevanopinda ndipo madzimambo aJudha, neapo pevanobuda ndipo, nepamisiwo yeshe yeJerusarema. Uti kwevari, ‘Izwai izwi raMambo Mwari, imwimwi madzimambo aJudha, navo veshe vaJudha, navo veshe vagari vomuJerusarema, avo vanopinda ngepamisiwo iyi. Izvi ndizvo zvinoronza Mambo Mwari: ngendaa yokupona kwenyu ngwarai kuti musatwara mutwaro ngezuva reSabatha, nokuti kuupinza ngepamusiwo weJerusarema. Nemwi musatwara mutwaro kubva nawo mumhatso dzenyu ngezuva reSabatha, nokuti kuita mushando weshe, asi remeredzai zuva rakachena reSabatha, kudai ngezvendakapanga madzibaba enyu. Asi avazi kupurutana, nokuti kukotamisa nzee dzavo, vakaomesa mitsipa yavo, kuti vasazwa, nokuti kuashira kudzidziswa. Asi kudai mwechinasa kupurutana kwendiri, unoronza Mambo Mwari, nemwi musapotera nomutwaro ngezuva reSabatha ngepamisiwo yedhorobha iri, asi muriremeredze zuva reSabatha rakachena, nemwi musaita mushando naumwe ngeiro zuva, zvino vanozopotera ngepamisiwo yedhorobha iri madzimambo nevakuru, vanogara padendemaro raDhavhidha, vakakwira mungoro nokugadha mahachi, nevakuru vavo, ivo nevakuru vamuna vaJudha, nevagari vomuJerusarema; nedhorobha iri rinozogarwa mhera nariini. Vanhu vanozouya kubva kumadhorobha aJudha, nokundau dzinotendenedza Jerusarema, kubva kunyika yaBhenjamini, kubva Shefera, kubva kunyika yezvimitunhu nokubani, vechiuya nemidiro yokupisha nemibairo nemidiro yezviyo nomutombo unegwema rakanaka, vechizviunza kumhatso yaMambo Mwari midiro yokubonga. Asi kuti musikapurutani kwendiri, musikaremeredzi zuva reSabatha rakachena nokusikatwara mutwaro mwechipinda ngepamisiwo yeJerusarema ngezuva reSabatha, zvino ndinozobasa muriro pamisiwo yaro, nawo unozopedza ngome dzeJerusarema usikazodzimwi.’ ” Izwi rakauya kunaJeremia rechibva kunaMambo Mwari rechiti, “Miruka udzake kumhatso yomuumbi, naapo ndinozokuita kuti uzwe mazwi angu.” Ndizvo ndakadzaka kumhatso yomuumbi, naapo waiya echishanda mushando wake pavhiri. Chidziyo chaaiumba ngedongo chakashaishirwa munyara yomuumbi, naye wakaumba chimweni chidziyo, kudai ngezvaakaona zvakanaka kwaari. Zvino izwi raMambo Mwari rakauya kwendiri rechiti, “Inini andingakoni kuita ndiwe here, O mhatso yaIsuraeri, kudai ngezvaaita muumbi? Unoronza Mambo Mwari. ‘Ringira, kudai ngedongo riri munyara yomuumbi, ndizvo zvewakaitawo munyara mwangu, O mhatso yaIsuraeri. Panguva yendinozoereketa ngendaa yedzinza, nokuti ngendaa youmambo, ndicharibvita nokuripwanyira pashi, nokuriparadza, asi kudai iro dzinza, rendakaereketa ndiro rikatenderuka kubva mukushata kwaro, ndinozorekera kuita kushata kwendakapinimidza kuita padera paro. Nepamukuwo umweni ndinozoereketa ngendaa yedzinza, nokuti ngendaa youmambo, iro rendinozoaka nokuriemesa, asi kuti rechiita zvakashata mukuona kwangu, risikapurutani izwi rangu, zvino ndinozorekera kuita zvakanaka zvendakaemesa kuti ndiite kweriri. Ndizvo zvino, erekete kuvanhu vaJudha nokune vagari veJerusarema wechiti, Izvi ndizvo zvinoronza Mambo Mwari: Ringira, inini ndiri muumbi wehari, ndinonasira kushata kunowira padera penyu, nokuronga mazano okumurwisa. Zvino tenderukai umwe ngaumwe wenyu kubva kunjira yake yakashata, munasirise njira dzenyu nezviito zvenyu.’ Asi vanoti, ‘Azvidetseri chiro! Isusu tinozoteera urongwa hwedu, nesu umwe ngaumwe wedu unozoita kudai ngokukonza kwomwoyo wake wakashata.’ ” Izvi ndizvo zvinoronza Mambo Mwari: “Bvunzai pakati pemadzinza kuti, ‘Ndiani wazwa zviro zvakadai ngeizvi? Mhandwe Isuraeri yaita chiro chakashata yaamho. Chando cheRebhanoni chingagara chechierera kubva paruware mushango here? Mvura yayo inotonhora inoerera inobva kundau imweni iri kuretu ingapwa here? Asi vanhu vangu vandiriyarwa, vanopisha mutombo unegwema rakanaka kuzvimwari zvokunyepa, vapumhunwa munjira dzavo, mumapato ekare nokuhamba munjira dzimweni, haiwa mumapato makuru, vechiita kuti nyika yavo ityise chiro chinoridzirwa murudzi mhera nariini. Veshe vanopinda ngepasinde payo vanotyiswa vechidzungudza masoro avo. Kudai ngedutu rinobva kumabvazuva ndinozovaparadza pamberi pemagaa. Ndinozovaonisa mushana wangu haiwa hope yangu, muzuva rokutambudzika kwavo kukuru.’ ” Zvino vakati, “Uyai, ngatiite urongwa hwokurwisa Jeremia; ngokuti mipango aizoperi kubva kuvapristi nokuti kupangwa kunobva kunevakangwara, nokuti izwi kubva kunevaprofeti. Uyai, ngatimurwise ngemazwi, tisapurutana kunyazwi ngaari mazwi ake.” “Purutana kwendiri, O Mambo Mwari, uzwe izwi raavo vanorwisana neni. Kushata kunounzidzirwa ngezvakanaka here? Asi vatsira ndaramo yangu hunza. Karakadza kuema kwangu pamberi pako kuereketa zvakanaka ndivo, nokupetudza ushungu hwako kubva kwevari. Ndizvo pinzai vana vavo munzara, vapirenyi kusimba reshoti; vakadzi vavo ngavafirwe ngavana vavo nevamuna vavo. Vamuna vavo ngavaurawe ngenhenda; majaha avo ngavaurawe ngeshoti muhondo. Kuchema ngakuzwike kubva kumhatso dzavo, apo woounza genge padera pavo ngokukasira! Ngokuti vakatsa hunza kuti indibate, vakateya tsoka dzangu ngemirau. Asi iwewe, O Mambo Mwari, unozia bangano ravo reshe rokuda kundiuraya. Usakungurira kushata kwavo, usadzima zvishaishi zvavo kubva kuhope yako. Ngavarigwe pashi pamberi pako; ita izvi kwevari ngomukuwo wokunyangadzwa kwako.” Izvi ndizvo zvinoronza Mambo Mwari, “Enda, wootenga jomeya romuumbi. Uunze vakuru vevanhu nevakuru vevapristi, enda mubani romukororo waHinomu, pasinde poMusiwo wePotisherdhi, apapo uteketese mazwi endinokuronzera. Unozoti, ‘Izwai izwi raMambo Mwari, O madzimambo aJudha neimwimwi vagari veJerusarema. Izvi ndizvo zvinoronza Mambo Mwari wehondo, Mwari waIsuraeri: Ringira, ndinounza kushata padera pendau iyi, ukwo kunoti, kunyazwi ndiani unokuzwa, nzee dzake dzinozozhararika. Ngokuti vanhu vakandiramba, vasvipisa ndau iyi, vakapisha mutombo mukati mwayo kuzvimwari zvimweni, zvisikazi kumboziikanwa ndivo, nokuti madzibaba avo, nokuti madzimambo aJudha; navo vakazarisa ndau iyi ngengazi yevasina ndaa, vakaakira Bhaari maarita, kupisha vakororo vavo ngomuriro kuita mudiro wokupisha kunaBhaari, izvo zvendisikazi kupanga nokuti kuemesa, azvizi kumboguma kumukarakadzo wangu. Ndizvo, ringira ngegwinyiso, mazuva anouya, unoronza Mambo Mwari, apo iyi ndau isikachazodaidzwi kuti, Thofethi, nokuti bani romukororo waHinomu, asi Bani roKuuraira. Nomundau iyi ndinozoita kuti bangano raJudha nereJerusarema riite risina shwiro; ndinozoita kuti vawe ngeshoti pamberi pemagaa avo, ngenyara dzaavo vanotsvaka kuvauraya. Ndinozopa miiri yavo yakafa kuita kudya kweshiri dzomudenga nokwezvikara zvomunyika. Ndinozoita kuti iri dhorobha riite matongo, chiro chinoridzirwa murudzi; weshe unopinda ndipo unozoshamiswa, naye unozoridza murudzi ngendaa yokuparadzwa kwaro kweshe. Ndinozoita kuti vadye nyama yevakororo vavo neyevanasikana vavo, navo veshe umwe ngaumwe unozodya nyama yomuakirwana wake ngomukuwo wokukombiwa newokutyiswa, ukwo magaa avo neavo vanotsvaka kuvauraya vanozovatyisa ndikwo.’ “Zvino unozopwanya jomeya mukuona kwevanhu vanoenda newe, unozoti kwevari, ‘Izvi ndizvo zvinoronza Mambo Mwari wehondo: Ndizvo ndinozopwanya vanhu ava nedhorobha iri, kudai ngouwo unopwanya chidziyo chomuumbi, kuitira kuti chisazogwamanidzikazve. MuThofethi vanozotsira metsa kutamike nendau yokutsira. Izvi ndizvo zvendinozoita kundau iyi, nokuneavo vanogaremwo, nokuita kuti iro dhorobha ridai ngeThofethi, unoronza kudaro Mambo Mwari. Mhatso dzeJerusarema nemhatso dzemadzimambo aJudha dzinozosvipiswa, kudai ngendau yeThofethi, mhatso dzeshe dzevakapishira padera padzo mutombo kuhondo dzeshe dzomudenga, vakadurura midiro yavo yokumwa kunezvimwari zvimweni.’ ” Naapo Jeremia auya kubva Tofethi, kwaakatumwa ndiMambo Mwari kuti aprofete, wakaema paruwanze rwemhatso yaMambo Mwari; akati kuvanhu veshe: “Izvi ndizvo zvinoronza Mambo Mwari wehondo, Mwari waIsuraeri: Ringira, ndinounza padera pedhorobha iri, nepadera pemaguta aro eshe, kushata kweshe kwendakaronza kweriri, ngokuti vakakonzisa mitsipa yavo, kuramba kuti vasazwa mazwi angu.” Zvino Phashuri mupristi, mukororo waIma, uwo waiya nduna huru mumhatso yaMambo Mwari, wakazwa Jeremia echiprofeta izvi zviro. Zvino Phashuri wakachaya Jeremia muprofeti, wakamuisa mumanguri aiya paBhenjamini wepadera, Musiwo wemhatso yaMambo Mwari. Ngechimangwanani, apo Phashuri abudisa Jeremia mumanguri, Jeremia wakati kwaari, “Mambo Mwari aazi kukududza kuti Phashuri, asi ‘Kutyisa kwakatendenedza kweshe.’ Ngokuti izvi ndizvo zvinoronza Mambo Mwari: ‘Ringira, ndinozokuita unodzityisa iwewe pachako nokuvangani vako veshe; navo vanozourawa ngeshoti yemagaa avo, iwewe wakaringira. Neni ndinozopa Judha weshe munyara yamambo weBhabhuroni; unozovatora vari vabatwa kuenda Bhabhuroni, unozovauraya ngeshoti. Ndinozopa pfuma yeshe yedhorobha iri, zveshe zverinouyirwa ndizvo, zveshe zvaro zvinomutengo mukuru, noupfumi hweshe hwemadzimambo aJudha, kunyara dzemagaa avo, avo vanozozvichakata, nokuzvitora kuenda nazvo Bhabhuroni. Newe Phashuri, navo veshe vanogara mumhatso mwako, munozoenda muubatwa, nemwi munozoguma Bhabhuroni; naapo munozofa, nokuikwa apo, iwewe nehama dzako dzeshe, idzo dzewaprofetera manyepo.’ ” O Mambo Mwari, wandichengedzera, neni ndakachengedzerwa; iwewe wakagwinya kupinda inini, ukandinyisa. Ndinoshekwa mazuva eshe; veshe vanondiitira jee. Ngokuti apo pendinoereketa, ndinodaidzira; ndinosisira kudaidzira ndechiti, “Hohoho nokuparadzwa;” ngokuti izwi raMambo Mwari raita kuti nditukwe nokushoorwa muzuva reshe. Kuti ndikati, “Andichazoereketi ndiye, nokuti kuereketa ngezina rake mhera nariini,” zvino mukati mwangu chirimwo chinopisha kudai ngomuriro unobaka, wakakonyerwa mumagodo angu, neni ndaremba ngokushingirira, ndakorera. Ngokuti ndinozwa vazhinji vanovherevhenza vechiti, “Kutyisa kuri kumarupande eshe.” Vakati, “Muronzenyi! Ngatimuronze.” Vangani vangu veshe vakagarira kukorera kwangu vechiti, “Pamweni ungakona kunyengererwa, nesu tingakona kumunyisa nesu tinozokona kuunzidzira padera pake.” Asi Mambo Mwari uneni, wakadai ngomurwi wehondo unotyisa; ndizvo vanonditambudza vanozopumhunwa, navo avazonyisi akadi. Vanozotsveruka kakurutu, ngokuti avazobudiriri. Kutsverudzwa kwavo kwemhera nariini akuzoriyarikanwi. O Mambo Mwari wehondo, unoedza vakarurama, unoona mwoyo nomukarakadzo; ngandione kuunzidzira kwako padera pavo, ngokuti kwouri ndaisa ndaa yangu. Embai kunaMambo Mwari, kudzai Mambo Mwari! Ngokuti wakanunura mweya womurombo kubva munyara yevaiti vezvakashata. Ngaritukwe zuva rendakabarwa ndiro! Zuva apo mai angu akandibereka risaano kufumiswa! Ngaatukwe munhu uwo wakauya neshoko kunababa angu echiti, “Mwana waberekwa kweuri murumbwana,” kuvaita kuti vadakare kakurutu. Munhuwo ngaadai ngemadhorobha akaparadzwa ndiMambo Mwari, asikaakunguriri; ngaazwe kuchema mumangwanani, nokudaidzira mumasikati, ngokuti aazi kundiuraya ndichiri mundani; ndizvo mai angu vaizodai vakaita iba rangu, nendani yavo igare yakakura. Ndakabvirenyi mundani kuti ndione mushando nokusvipo mwoyo, kuti ndipedze mazuva angu mukutsverudzwa? Iri ndiro izwi rakauya kunaJeremia rechibva kunaMambo Mwari, apo mambo Zedhekia atumira kwaari Phashuri mukororo waMarikhia, naZefania mupristi mukororo waMaaseia echiti, “Tibvunzirei kunaMambo Mwari, ndapota; ngokuti mambo Nebhukhadhineza weBhabhuroni unoita hondo nesu; pamweni Mambo Mwari ungatiitira mushando unoshamisa, kudai ngezvaanosiita, naye ungazomuita kuti apetuke kubva kwetiri.” Zvino Jeremia wakati kwevari, “Izvi ndizvo zvomunozoronza kunaZedhekia: ‘Izvi ndizvo zvinoronza Mambo Mwari, Mwari waIsuraeri: Ringira ndinozopetudza ndonga dzokurwa ndidzo hondo, dziri munyara dzenyu, dzomunoshandisa kurwa ndidzo namambo weBhabhuroni, nokurwisa vaKharadhea vanomukomba ngokubanze kworusvingo, neni ndinozovaunganidza pakati pedhorobha iri. Inini pachangu ndinozorwa nemwi, ngenyara yakatambanudzwa nomuoko unesimba, muushungu mukunyangadzwa, nomuushungu hukurutu. Ndinozochaya vagari veiri dhorobha, zveshe vanhu nemhuka; zvinozofa ngenhenda huru.’ Mambo Mwari unoti, ‘Ngesure kwazvo ndinozopa Zedhekia mambo waJudha, nevaranda vake, nevanhu vedhorobha iri, avo vakapona nhenda, kushoti nenzara, munyara yaNebhukhadhineza mambo weBhabhuroni, munyara yemagaa avo, munyara yaavo vanotsvaka kuvauraya. Unozovabaya ngokupinza kweshoti; aazovakunguriri, nokuti kuvaponesa, nokuti kuvaitira nyasha.’ ” Unozoti kuvanhu ava, “Unoronza izvi Mambo Mwari: Ringira, ndinoisa pamberi penyu njira yokupona nenjira yokufa. Uwo unogara mudhorobha iri unozofa ngeshoti, ngenzara, nenhenda; asi iye unozobuda, nokuwira kuvaKharadhea avo vari kumukomberedza, unozopona, unozoita kuti kupona kwake kuitwe mutengo wehondo. Ngokuti ndakaemesa hope yangu kurwisa iri dhorobha ngendaa yokushata, haiwa ngendaa yokunaka,” unoronza Mambo Mwari. “Rinozopirwa munyara yamambo weBhabhuroni, naye unozoripisha ngomuriro.” Kumhatso yamambo waJudha, ronza izvi: “Izwai izwi raMambo Mwari, O mhatso yaDhavhidha. Izvi ndizvo zvinoronza Mambo Mwari: Tongai kutonga kwakanaka mangwanani, mumusunhure kubva kunyara yomutambudzi weshe wakabirwa, kuti ushungu hwangu husabuda kudai ngomuriro nokupisha, pasina naumwe ungaudzima, ngendaa yokushata kwezviito zvenyu. Ringira, ndinorwisana nemwi, O imwimwi vagari vomubani, O buwe romurubaya, unoronza Mambo Mwari; imwimwi munoti, ‘Ndiani ungakona kudzaka kurwa nesu, nokuti ndiani ungakona kupotera muugaro hwedu?’ Asi ndinozomuorora kudai ngemichero yezviito zvenyu, unoronza Mambo Mwari. Ndinozobasa muriro mugwasha mwaro, nawo unozopisha izvo zveshe zvinoritendenedza.” Izvi ndizvo zvinoronza Mambo Mwari: “Dzaka kumhatso yamambo waJudha, uerekete apo izwi iri wechiti, ‘Izwa izwi raMambo Mwari, O mambo waJudha, unogara padendemaro raDhavhidha, iwewe, nevaranda vako, nevanhu vako avo vanopotera ngepamisiwo iyi.’ Izvi ndizvo zvinoronza Mambo Mwari: Tongai kutonga kwakanaka, muite zvakarurama, musunhure kubva munyara yomutambudzi weshe wakabirwa. Musaita zvakashata, musaremadza mupara, nherera, nokuti shirikadzi, nokuti kuparadza ngazi isina ndaa mundau iyi. Ngokuti kudai mwechipurutana izwi iri ngegwinyiso, zvino madzimambo anozopotera ngepamisiwo yeiyi mhatso kugara padendemaro raDhavhidha, vechigara mungoro nepamahachi, ivo nevaranda vavo, nevanhu vavo. Asi kudai musikapurutani mazwi aya, ndinopika ndini pachangu, unoronza Mambo Mwari, kuti mhatso iyi inozoita dongo. Ngokuti izvi ndizvo zvinoronza Mambo Mwari ngendaa yemhatso yamambo waJudha: Iwewe wakadai ngeGireadhi kwendiri, nokudai ngesoro reRebhanoni; asi ndinopika ndinozokuita kuti udai ngorubaya, kudai ngedhorobha risikagarwi. Ndinozokunasirira vaparadzi kukuparadza, umwe naumwe wavo nezvokurwa ndizvo zvake; vanozotemera pashi misidhare yakanaka, nokuikandira mumuriro. Nemadzinza mazhinji anozopinda ngepasinde pedhorobha iri, vanozoti umwe kuneumweni ‘Ngenyi Mambo Mwari akaita zvakadai kudhorobha guru iri?’ Navo vanozopingura vechiti, ‘Ngokuti vakasiya chitenderano chaMambo Mwari, Mwari wavo, navo vakadira nokushandira zvimwari zvimweni.’ ” Musachemera uwo wafa, nokuti kumutsumba; asi chemera uwo unoenda kure, ngokuti aachazopetukizve, kuona nyika yechibarirwe chake. Ngokuti izvi ndizvo zvinoronza Mambo Mwari ngendaa yaSharumu mukororo waJosia mambo waJudha, uwo wakatonga pandau yababa ake Josia, uwo wakaenda kubva kundau iyi: Aachazopetukizve pano, asi unozofireyo kundau yaakatorwa kuitwa mubatwa, aachazoonizve nyika iyi. Ihehe kwaari unoaka mhatso yake mukusikarurama, nemakamera ake epadera mukushata; uwo unoshandisa vaakirwana vake asikavapi muthuso, asikavabhadhari ngomushando wavo; uwo unoti, “Ndinozodziakira mhatso huru, inemakamera epadera makuru, ndechinasira mafasitera, nokunasira padenga ngemisidhari, nokuiseta ngomuara wakatsvuka.” Zvino kuita mambo here ngokuita misidhari yakawanda? Baba ako avazi kudya nokumwa here, nokutonga kwakanaka, nokuita zvakarurama? Zvino zvakanaka kwaari. Wakatonga ndaa dzevarombo nedzevatami, zvino zvakanaka kwaari. Uku andikwopi kundizia here? Unoronza Mambo Mwari. Asi madziso ako nomwoyo wako azvioni chimweni kwega kuemura nokuparadza ngazi isina ndaa, nokuita kutambudza nokupamba. Izvi ndizvo zvinoronza Mambo Mwari ngendaa yaJehoiakimu, mukororo waJosia mambo waJudha: “Avazomuchemi vechiti, ‘Yoowe, hama yangu!’ Nokuti, ‘Yoowe, hanzvadzi yangu!’ Avazomuchemi vechiti, ‘Yoowe, mambo!’ Nokuti, ‘Yoowe, ukuru hwake!’ Unozoikwa ngokuikwa kwembongoro, iyo inokweiwa nokurashwa kubanze kwemisiwo yeJerusarema.” Kwireyo Rebhanoni, ucheme; nokuboorera muBhashani, boorera kubva paAbharimu, ngokuti vadikani vako veshe vaparadzwa. Ndakaereketa kwouri ngomukuwo wokubudirira kwako, asi iwewe wakati, “Andizopurutani.” Uyu ndiwo muitiro wako wokusikapurutana izwi rangu, kubvira muudoko hwako. Dutu rinozoparadza vaushi vako veshe, nevadikani vako vanozoenda muubatwa; ngegwinyiso ngouwo mukuwo munozotsverudzwa nokukangaidzwa ngendaa yokushata kwako kweshe. O iwewe unogara muRebhanoni, unonasira chisaki chako pakati pemisidhari, kukungurirwa kwakaitawani, apo kurwadziwa kunozouya padera pako, kwakadai ngokurwadziwa kwomukadzi apo oobereka! “Kudai ngezvendinopona, unoronza Mambo Mwari, kunyazwi kudai mambo Konia mukororo waJehoiakimu waJudha waiya ndandazi yakanangurwa yepanyara yangu yokumudyo, kunyazwi ndaizokubvisapo nokukupira munyara yaavo vanotsvaka kukuuraya, nomunyara yaavo vaunotya, kunyazwi munyara yaNebhukhadhineza, mambo weBhabhuroni, nomunyara yavaKharadhea. Ndinozokurasha namai akakubara munyika imweni kwomusikazi kubarirwa, nemwi munozofiremwo.” Asi avachazohwiriri kunyika yevaidisa kuhwirira. Uyu munhu Khonia hari yakaputsika inoshoorwa here, chidziyo chisikadikanwi ngomunhu weshe? Vanorashwa ngenyi, iye nomubarirwana wake, navo vanorashirwa munyika yevasikazii? O nyika, nyika, nyika, izwai izwi raMambo Mwari. Izvi ndizvo zvinoronza Mambo Mwari, “Nyora, ‘Munhu uyu kudai ngeusina mwana, munhu usikazobudiriri mumazuva ake; ngokuti akuna naumwe worudzi rwake unozobudirira, kugara padendemaro raDhavhidha, nokutonga munyika yaJudha.’ ” “Ihehe kuvaushi vanouraya nokuparadza makwai embusho yangu!” Unoronza Mambo Mwari. Izvi ndizvo zvinoronza Mambo Mwari, Mwari waIsuraeri, ngendaa yevaushi vanousha vanhu vangu, “Ndimwi mwakaparadza zvifuyo zvangu nokuzvidzinga; amuzi kuzviringira. Ndizvo ndinozoringira padera penyu ngendaa yokushata kwezviito zvenyu,” unoronza Mambo Mwari. “Zvino ndinozounganidza pachangu akasara emakwai angu kubva kunyika dzeshe kwendakaatatanisira, nokuaunzazve kumatanga awo; nawo anozobereka nokuwandisa. Ndinozomirudza vaushi padera pawo, avo vanozoausha; nawo aachazotyi nokuti kuvhunduswa, apana narimwe rawo rinozorashika,” unoronza Mambo Mwari. “Ringira, mazuva anouya chokwadi,” unoronza Mambo Mwari, “Apo ndinozomirudzira Dhavhidha Dai rakarurama, naye unozotonga paumambo ngokungwara; unozotonga ngokutonga kwakanaka, nokuita zvakarurama munyika. Mumazuva ake Judha unozoponeswa, naIsuraeri unozogara ngokungwaririka. Neiri ndiro zina rake raanozodaidzwa ndiro kuti, ‘MAMBO MWARI KURURAMA KWEDU.’ “Ndizvo, ringira, mazuva anouya,” unoronza Mambo Mwari, “Apo vasikachazoti, ‘Kudai ngezvaanopona Mambo Mwari, uwo wakabudisa vana vaIsuraeri kubva munyika yeEgipite,’ asi, ‘Kudai ngezvaanopona. Mambo Mwari, uwo wakabudisa nokutungamira rudzi rwemhatso yaIsuraeri kubva munyika yedera, nokubva munyika dzeshe kwendakavadzingira.’ Zvino vanozogara munyika yavo yemene.” Mwoyo wangu wapwanyika mukati mwangu ngendaa yevaprofeti, magodo angu eshe anohuta; ndadai ngechiradza, nokudai ngomunhu wanyiswa ngevhini, ngendaa yaMambo Mwari, nendaa yokuchena kwemazwi ake. Ngokuti nyika yazara ngavaombi; ngendaa yechituko, nyika inobonda, mafuro akanaka omushango aoma. Kuhamba kwavo kwakashata, nesimba ravo arizi kunaka. “Veshe vaprofeti nevapristi avadi Mwari; kunyazwi mumhatso mwangu, ndaona kushata kwavo,” unoronza Mambo Mwari. “Ndizvo njira dzavo dzinozoita kwevari njira dzinotedza muchidima, umwo vanozosundirwamwo nokuwiramwo; ngokuti ndinozounza kushata padera pavo ngegore rokuororwa kwavo,” unoronza Mambo Mwari. Mukati mwevaprofeti veSamaria ndakaona zviro zvinonyangadza; vakaprofeta ndiBhaari nokuita kuti vanhu vangu Isuraeri vapauke. Asi muvaprofeti veJerusarema ndaona chiro chine tsvina: vanoomba, nokuhamba mumanyepo; vanogwinyisa nyara dzevaiti vezvakashata, kuti kutamike naumwe unopetuka kubva mukushata; veshe vakadai ngeSodhoma kwendiri, nevanogaremwo vakadai ngeGomora. Ndizvo izvi zvinoronza Mambo Mwari wehondo ngendaa yevaprofeti: “Ringira, ndinozovadyisa muti unovava, nokuvaita kuti vamwe mvura inechanduru; ngokuti kutukisa Mwari kwevaprofeti veJerusarema kwapararira munyika yeshe.” Izvi ndizvo zvinoronza Mambo Mwari, “Musapurutana kumazwi evaprofeti, avo vanoprofeta kwomuri, vanomunyepera. Vanoereketa zvioniso zvomwoyo yavo, haiwa zvinobva kumuromo waMambo Mwari. Vanoangira vechiti kwevari vanoshoora izwi raMambo Mwari, ‘Zvinozomunakira;’ vanoti kunoumwe ngaumwe unohamba mukukarakadza kwomwoyo wake wemene, ‘Apana chakashata chinozokugumira.’ “Ngokuti ndiani wakaema mukupangana naMambo Mwari, kuti aone nokuzwa izwi rake? Ndiani wakapurutana izwi rake nokuriteketesa? Ringira, dutu raMambo Mwari! Rinoushungu, rabuda, chamupupuri chinovhuvhuta; chinozoputika padera pevakashata. Ushungu hwaMambo Mwari ahuzopetuki, metsa aita nokupedza zvaakapinimidza mumwoyo mwake. Mumazuva okugumisira munozonasa kuzvizwisisa. Andizi kutuma vaprofeti, asi vakarumba kuenda; andizi kuereketa kwevari, asi vakaprofeta. Asi kudai vakaema mumipango yangu, vaizodai vakateketesa mazwi angu kune vanhu vangu, vangadai vakavatenderudza kubva kunjira dzavo dzakashata, nokubva kuzviito zvavo zvakashata. Ndiri Mwari wepasinde here, ndisiri Mwari wokuretu?” Unoronza Mambo Mwari. “Uripo here ungahwara mundau dzakafishika, kuti ndisakona kumuona?” Unoronza Mambo Mwari. “Andizadzi denga nenyika here?” Unoronza Mambo Mwari. “Ndazwa zvakaronza vaprofeti avo vanoprofeta manyepo ngezina rangu vechiti, ‘Ndarota, ndarota.’ Izvi zvinozogara mukuwo wakaitawani? Mwoyo yevaprofeti inozombopetuka sure, avo vanoprofeta manyepo, avo vanoprofeta kuchengedzera kwemwoyo yavo? Vanoronga kuti vanhu vangu variyarwe zina rangu ngehope dzavo dzevanoronzerana umwe kunoumweni, kudai ngemadzibaba avo vakariyarwa zina rangu ngendaa yaBhaari. Muprofeti unehope dzaakarota, ngaadzironze, asi nouwo unemazwi angu, ngaaerekete mazwi angu ngokugondeka. Kuri pari kuedzana kwezungu nezviyo?” Unoronza Mambo Mwari. “Mazwi angu aazi kudai ngomuriro here,” unoronza Mambo Mwari, “Nokudai ngehamera inoputsa buwe kuti riite chimwe chimwe? Ringirai, ndinozorwisana nevaprofeti, avo vanobirana mazwi angu, umwe noumweni,” unoronza Mambo Mwari. “Ringira, ndinorwisana navaprofeti,” unoronza Mambo Mwari, avo vanoshandisa rurumi rwavo vechiti, “Mambo Mwari unoti, ‘Ringirai, ndinorwisana navo vanoprofeta hope dzokunyepa,’ unoronza Mambo Mwari, nokudzironza, nokuita kuti vanhu vangu vapauke ngemanyepo avo nezvisina shwiro, apo ndisikazi kuvatuma, nokuti kuvapanga kudaro; ndizvo avazodetseri vanhu ava nepadoko, unoronza Mambo Mwari.” “Naapo ava vanhu, vaprofeti, nokuti vapristi, vanozokubvunza vechiti, ‘Ngowenyi mutwaro waMambo Mwari?’ Ndizvo unozoti kwevari, ‘Imwimwi ndimwi mutwaro. Ndinozomurasha kuretu, unoronza Mambo Mwari.’ Asi ngendaa yomuprofeti, mupristi, nokuti vanhu veshe, vanoti, ‘Mutwaro waMambo Mwari,’ ndinozoorora uwo munhu nemhatso yake. Ndizvo izvi zvomunozoronza umwe kunoumwe pakati penyu, kuti, ‘Mambo Mwari wakapingura kutinyi?’ Nokuti, ‘Mambo Mwari wakaereketa kutinyi?’ Asi amuchazoereketizve ngomutwaro waMambo Mwari, ngokuti izwi romunhu umwe ngaumwe rinozoita mutwaro wake, ngokuti mwakapindura mazwi aMwari unopona, Mambo Mwari wehondo, Mwari wedu. Izvi ndizvo zvomunozobvunza kumuprofeti, ‘Mambo Mwari wakupingura kutinyi?’ Nokuti, ‘Waereketa kutinyi Mambo Mwari?’ Asi kudai mwechiti, ‘Mutwaro waMambo Mwari,’ izvi ndizvo zvinoronza Mambo Mwari: Ngokuti mwaereketa mazwi aya okuti, ‘Mutwaro waMambo Mwari,’ ndizvo, ringira, inini ndemene ndinozomuriyarwa yaamho, ndinozomurasha kubva mukuona kwangu, imwimwi nedhorobha, rendakamupa nemadzibaba enyu. Ndinozounza padera penyu chituko chemhera nariini, nokutsverudzwa kusikaperi, izvo zvisikazoriyarikanwi.” Mambo Mwari wakandionisa zvitundu zviiri zvemaonde zvakaiswa pamberi petemperi raMambo Mwari. Izvi zvakaitika ngesure apo mambo Nebhukhadhineza weBhabhuroni atora kuvaita vabatwa kubva Jerusarema mambo Jekhonia, mukororo waJehoiakimu mambo waJudha, pamwepo nevatongi vaJudha, vatsetsi, nevapfuri, kuenda navo Bhabhuroni. Chitundu chimwe chaiya nemaonde akanaka yaamho, kudai ngemaonde okutanga kuibva, asi chitundu chimweni chaiya nemaonde akashata yaamho, asaidyika ngokuti aiya akanyanya kushata. NaMambo Mwari wakati kwendiri, “Unoonenyi, Jeremia?” Ndakati, “Maonde, maonde akanaka akanaka yaamho; maonde akashata akashata yaamho, aangadyiki, ngokuti akanyanya kushata.” Zvino izwi raMambo Mwari rakauya kwendiri rechiti, “Izvi ndizvo zvinoronza Mambo Mwari, Mwari waIsuraeri: Kudai ngaaya maonde akanaka, ngokudaro ndinozovaerenga kuti vakanaka avo vakatorwa kubva kuvaJudha kuita vabatwa, avo vendakabudisa mundau iyi kuenda munyika yevaKharadhea. Ndinozoisa madziso angu padera pavo kuti vagarisike, ndinozovapetudza kunyika iyi. Ndinozovaaka, andichazovaputsi; ndinozovasima, haiwa kuvabvita. Ndinozovapa mwoyo wokundizia, kuti ndini Mambo Mwari; navo vanozoita vanhu vangu, neni ndinozoita Mwari wavo, ngokuti vanozopetuka kwendiri ngomwoyo wavo weshe. “Asi izvi ndizvo zvinoronza Mambo Mwari, ‘Kudai ngemaonde akashata, akashata asikadyiki, ndizvo zvendinozoitira Zedhekia, mambo waJudha, vatongi vake, vakasara veJerusarema, avo vakasara munyika iyi, naavo vanogara munyika yeEgipite. Ndinozovaita chiro chinotyisa nechakashata kuumambo hwenyika dzeshe kuti vatsverudzwe, kuita chishekedzo, nokutsvinyirwa, nokutukwa kundau dzeshe kwendinozovaisa. Ndinozotumira shoti, nzara nenhenda pakati pavo, metsa vapedzwe kubva kunyika yendakavapa namadzibaba avo.’ ” Izwi rakauya kunaJeremia ngendaa yevanhu veshe vaJudha, mugore rechirongomuna rokutonga kwaJehoiakimu, mukororo waJosia, mambo waJudha, (ndiro raiya gore rokutanga kutonga raNebhukhadhineza mambo weBhabhuroni,) iro raakaereketa Jeremia kuvanhu veshe vaJudha, nokuvagari veshe veJerusarema echiti, “Ngokuti pagore remakumi mairi nematatu kubvira pagore regumi nematatu rokutonga kwaJosia mukororo waAmoni, mambo waJudha, metsa pazuva iri, izwi raMambo Mwari raiuya kwendiri, neni ndaindoriereketa kwomuri ngokusikareki, asi imwimwi amuzi kupurutana. Kunyazwi Mambo Mwari wakaangira kutumira varanda vake veshe vaprofeti, imwimwi amuzi kupurutana nokuti kuteya nzee dzenyu kuti muzwe naapo vechiti, ‘Tenderukai zvino, imwimwi mweshe, umwe ngaumwe wenyu kubva kunjira yake yakashata nokubva kuzviito zvake zvakashata, mugare munyika yaakamupa Mambo Mwari nemadzibaba enyu, kubvira karetu mhera nariini; musateera zvimwari zvimweni kuzvishandira nokuzvidira, musanditsenesa kuti ndinyangadzwe ngemishando yenyara dzenyu. Zvino andizomuremadzi.’ Asi amuzi kundipurutana,” unoronza Mambo Mwari; “Ndizvo mwamusira ushungu hwangu ngemishando yenyara dzenyu yomunodziremadza ndiyo. “Izvi ndizvo zvinoronza Mambo Mwari wehondo: Ngokuti amuzi kupurutana mazwi angu, ringira, ndinozotumira kumadzinza eshe edera, kunyazwi naNebhukhadhineza mambo weBhabhuroni, muranda wangu, neni ndinozovaunza kuti varwise iyi nyika, nevagari vayo, nemadzinza eshe aya akaitendenedza; ndinozovaparadza yaamho nokuvaita chishamiso chinotyisa, chinoridzirwa murudzi nokuita matongo mhera nariini,” unoronza Mambo Mwari. “Neni ndinozovadusira kubva kwevari izwi rokusheka nerokudakara, izwi romukwambo neizwi ramakhoti, kurira kwemakuyo nokujeka kwechibani. Nyika yeshe iyi inozoita matongo nechishamiso; naaya madzinza anozoshandira mambo waBhabhuroni makore makumi manomwe. Zvino apo makore makumi manomwe apera, ndinozoorora mambo weBhabhuroni, neiro dzinza, nyika yevaKharadhea, ngendaa yokushata kwavo,” unoronza Mambo Mwari, “Ndinozoita kuti nyika igare yakaita matongo mhera nariini. Neni ndinozoita kuti mazwi angu eshe endakaereketa ngeiyi nyika aitike, zveshe zvakanyorwa muiri bhuku, zvaakaprofeta Jeremia ngaaya madzinza eshe. Ngokuti madzinza akawanda nemadzimambo makuru anozovasunga muuhloko, neni ndinozovaunzidzira kudai ngezviito zvavo, nokudai ngemishando yenyara dzavo.” Ngokuti izvi ndizvo zvinoronza Mambo Mwari, Mwari waIsuraeri, kwendiri: “Tora tsani yevhini roushungu uhwu kubva munyara mwangu, uite kuti madzinza eshe endinokutuma kwaari aimwe. Vanozomwa nokuthethereka nokupenga, ngendaa yeshoti yendinozotumira pakati pavo.” Ndizvo ndakatora tsani kubva munyara yaMambo Mwari, ndikaita kuti madzinza eshe aimwe, endakatumirwa kwaari ndiMambo Mwari: Jerusarema nemadhorobha aJudha, madzimambo awo nevatongi vawo, kuvaparadza nokuvaita chishamiso, chinoridzirwa marudzi, nokutukwa, kudai ngezvezviri azvo nyamashi; Faro mambo weEgipite, varanda vake, nevatongi vake, nevanhu vake veshe; vanhu veshe vakabvengedzana, madzimambo eshe enyika yeUzi, madzimambo eshe enyika yeFiristia, Ashikeroni, Gaza, Ekironi, nevakasara veAshidhodhi; Edhomu, Moabhi, nevaAmoni, madzimambo eshe eThire, madzimambo eshe eSidhoni, nemadzimambo ezviwi zvoruseri kworuandhle, Dhedhani, Thema, Bhuzi, naavo veshe vanogunda masoro avo kumarutii, namadzimambo eshe eArabhia, nemadzimambo eshe evanhu vakabvengedzana vanogara munyika yakaoma, madzimambo eshe eZimuri, namadzimambo eshe eEramu, nemadzimambo eshe eMedhia, madzimambo eshe enyika dzedera, dzokuretu nedzepasinde, imweni neimweni, noumambo hweshe hwenyika huri padera pehope yenyika. Nesure kwavo mambo weSheshakhi unozomwa. Zvino unozoti kwevari, “Izvi ndizvo zvinoronza Mambo Mwari wehondo, Mwari waIsuraeri: Imwai, muradze, murutse, nokuwa musikachazomuki, ngendaa yeshoti yendinotuma pakati penyu. Nokudai vechiramba kutora tsani kubva kunyara yako, kuimwa, zvino unozoti kwevari, ‘Izvi ndizvo zvinoronza Mambo Mwari wehondo: Munosisira kuimwa. Wona, ndinotanga kuunza kushata padera pedhorobha rinodaidzwa ngezina rangu, nemwi mungaita matizirenyi kuororwa? Amuzoreki kuororwa akadi, ngokuti ndinodaidza shoti padera pavo veshe vanogara munyika, unoronza Mambo Mwari wehondo.’ “Ndizvo iwewe unozoprofeta kwevari mazwi aya eshe, wechiti kwevari, ‘Mambo Mwari unozodaidzira kubva mudenga, nokuereketa ngeizwi rake kubva muugaro hwake hwakachena; unozodaidzira ngesimba kumutanga wake; unozozhambarara kudai ngaavo vanotsikatsika mavhini, kurwisana neavo veshe vanogara munyika. Nebope rinozoguma kumagumo enyika; ngokuti Mambo Mwari unendaa huru nemadzinza; unotonga vanhu veshe, unozopa vakashata kushoti, unoronza Mambo Mwari.’ ” Izvi ndizvo zvinoronza Mambo Mwari wehondo: “Ringira, kushata kunopararira kubva kudzinza kuenda kudzinza, nechapupuri chikuru chinomirudzwa kubva kumiganu yenyika.” Avo vanourawa ndiMambo Mwari ngezuva iro vanozobvira kumagumo enyika metsa kumagumo amweni enyika. Avazochemwi, nokuti kuunganidzwa kuti vaikwe; vanozodai ngemadisa padera pemavhu. Zhambararai, imwimwi vaushi, mucheme; dzimburumbudzei mumarota, imwimwi vakuru vomutanga, ngokuti mazuva okuurawa kwenyu aguma; nemwi munozowa kudai ngechidziyo chakanakisisa. Vaushi avazooni nenjira yokutiza, nokuti vakuru vomutanga kuti vapone. Izwa izwi rokuchema revaushi nerokuboorera revakuru vomutanga! Ngokuti Mambo Mwari wakaparadza mbusho yavo, nougaro hwokunyarara hwakaparadzwa ngendaa yokutyisa kwoushungu hwaMambo Mwari. Kudai ngemhondoro wakasiya ndau yake yokuhwara; ngokuti nyika yavo yaamatongo ngendaa yokutyisa kweshoti, nendaa yokutyisa kwoushungu hwake. Mukutanga kwokutonga kwaJehoiakimu, mukororo waJosia mambo waJudha, izwi iri rakauya kubva kunaMambo Mwari rechiti, “Izvi ndizvo zvinoronza Mambo Mwari: Ema muruwanze rwemhatso yaMambo Mwari, uerekete kumadhorobha eshe aJudha, anouya koodira kumhatso yaMambo Mwari, uerekete kwevari mazwi eshe endinokupanga; usasiya narimwe izwi. Pamweni vanozopurutana veshe, nokutenderuka umwe ngaumwe kubva kunjira yake yakashata, kuti ndirekere kushata kwendinoronga kuunza padera pavo ngendaa yezviito zvavo zvakashata. Unozoti kwevari, ‘Izvi ndizvo zvinoronza Mambo Mwari: Kudai musikazopurutani kwendiri, nokuhamba mumipango yangu yendakaisa pamberi penyu, nokupurutana kumazwi evaranda vangu vaprofeti, vendinotuma kwomuri ngokukasira, kunyazwi imwimwi amuzi kupurutana, zvino ndinozoita kuti mhatso iyi idai ngeShiro, neni ndinozoita kuti dhorobha iri riite chituko kumadzinza eshe enyika.’ ” Vapristi nevaprofeti nevanhu veshe vakazwa Jeremia echiereketa aya mazwi mumhatso mwaMambo Mwari. Naapo Jeremia apedza kuereketa zveshe izvo zvaakapangwa ndiMambo Mwari kuereketa kuvanhu veshe, zvino vapristi nevaprofeti nevanhu veshe vakamubata vechiti, “Ngegwinyiso unozofa. Waprofeta ngenyi ngezina raMambo Mwari wechiti, ‘Mhatso iyi inozodai ngeShiro, nedhorobha iri rinozoita dongo risikazogarwi?’ ” Nevanhu veshe vakaungana kurwisa Jeremia mumhatso yaMambo Mwari. Naapo vatongi vaJudha vazwa izvi, vakauya kubva kumhatso yamambo kuenda kumhatso yaMambo Mwari, vakagara pashi pokupinda ndipo paMusiwo Mutsva wemhatso yaMambo Mwari. Zvino vapristi nevaprofeti vakaereketa kuvatongi nokuvanhu veshe vechiti, “Uyu munhu unosisa kufa, ngokuti waprofeta zvinorwisana nedhorobha iri, kudai ngezvamwadzizwira ngenzee dzenyu.” Zvino Jeremia wakaereketa kuvatongi veshe nokuvanhu veshe echiti, “NdiMambo Mwari wakandituma kuprofeta ngendaa yemhatso iyi nendaa yedhorobha iri mazwi eshe emwazwa. Ndizvo zvino nasirirai njira dzenyu nezviito zvenyu, mupurutane izwi raMambo Mwari, Mwari wenyu; naMambo Mwari unozorekera kushata ukwo kwaakamurongera. Asi inini, ringirai, ndiri pano munyara mwenyu. Itai zvomunoda ndini zvinomunakira. Kwega ziai ngegwinyiso, kuti mukandiuraya kuti ngechakwadi munozodziunzira ngazi isina ndaa padera penyu, nepadera peiri dhorobha, nepadera paavo vanogaremwo; ngokuti ngegwinyiso Mambo Mwari wakandituma kwomuri kuereketa mazwi aya eshe munzee dzenyu.” Zvino vatongi nevanhu veshe vakati kuvapristi nokuvaprofeti: “Uyu munhu aazi kusisira kutongerwa rufu, ngokuti waereketa kwetiri ngezina raMambo Mwari, Mwari wedu.” Nevamweni vevakuru venyika vakamiruka, vakaereketa kumbungano yeshe yevanhu vechiti, “Mikha weMoreshethi wakaprofeta ngamazuva aHezekia mambo waJudha, akati kuvanhu veshe vaJudha, ‘Izvi ndizvo zvinoronzaMambo Mwari wehondo: Zioni rinozorimwa kudai ngomunda, neJerusarema rinozoita mirwi yematongo, nomutunhu wemhatso unozodai ngendau dzakakwirira dzegwasha.’ Hezekia mambo waJudha nevanhu veshe vaJudha vakamuuraya here? Aazi kutya Mambo Mwari here nokupota nyasha dzaMambo Mwari, naMambo Mwari aazi kurekera here kushata kwaaiya aronga kuunza padera pavo? Asi taa kudziunzira kushata kwakura padera pedu.” Waiyapozve munhu umweni waiprofeta ngezina raMambo Mwari, Uria mukororo waShemaia weKiriathi-jearimu. Wakaprofeta zvakashata ngeiri dhorobha neiyi nyika kudai ngamazwi eshe akadai ngaawo aJeremia. Naapo Jehoiakimu mambo nengwazi dzake dzeshe nevatongi veshe vazwa mazwi ake, mambo wakatsvaka kumuuraya; asi apo Uria azwa ichi, wakatya, akatiza, akaenda Egipite. Zvino Jehoiakimu mambo wakatuma vanhu Egipite, Erinathani mukororo waAkhebhori, nevamuna vamweni kuenda naye Egipite. Vakaunza Uria kubva Egipite, vakamuunza kunamambo Jehoiakimu, uwo wakamuuraya ngeshoti, akakandira muiri wake mumaiba evanhu vasina mbiri. Asi nyara yaAhikamu mukororo waShafani yaiya naJeremia, kuti vasamupira munyara dzevanhu kuti vamuuraye. Mukutanga kwokutonga kwaZedhekia mukororo waJosia mambo waJudha, rakauya izwi iri kunaJeremia, rechibva kunaMambo Mwari rechiti, “Izvi ndizvo zvinoronza Mambo Mwari kwendiri: Dzinasirire tambo nejoka, uzvisungire pamutsipa wako. Utumire izwi kunamambo weEdhomu, kunamambo weMoabhi, kunamambo wevaAmoni, kunamambo weThire, nokunamambo weSidhoni, ngenyara dzevatumwa vauya Jerusarema kunaZedhekia mambo waJudha. Wechivapanga izwi iri kuti varonzere madzimambo avo kuti, ‘Izvi ndizvo zvinoronza Mambo Mwari wehondo, Mwari waIsuraeri, ndizvo zvomunozoereketa kunemadzimambo enyu. Ndakasika nyika, nevanhu nemhuka dziri padera penyika, ngesimba rangu guru, nokutambanudzwa kwenyara yangu, neni ndinoipa kunyazwi kunaani wendinodakara ndiye. Zvino ndapa nyika idzi dzeshe munyara yaNebhukhadhineza mambo weBhabhuroni, muranda wangu; kunyazwi nemhuka dzomushango ndakamupa kuti dzimushandire. Madzinza eshe anozomushandira nomukororo wake, nomukororo womukororo wake, metsa mukuwo wenyika yake ugume; zvino madzinza akawanda nemadzimambo makuru anozomuita hloko yavo.’ “Asi, kuti kunyazwi ngeriri dzinza, nokuti umambo vasikazoshandiri uyu mambo Nebhukhadhineza weBhabhuroni, vasikazoisi mitsipa yavo pashi pejoka ramambo weBhabhuroni, zvino ndinozoriorora iro dzinza ngeshoti nzara, nenhenda, unoronza Mambo Mwari, metsa ndapedza kuparadzwa kwavo ngenyara yake. Ndizvo imwimwi musapurutana kuvaprofeti venyu, vafemberi venyu, varoti venyu, nevaroyi venyu, nokuti kuman'anga enyu, avo vanoereketa kwomuri vechiti, ‘Amuzoshandiri mambo weBhabhuroni.’ Ngokuti vanoprofeta manyepo kwomuri nokugumisira kwazvo munozobviswa munyika yenyu; ndinozomudzinga kubvemwo, nemwi munozoparadzwa. Asi kunyazwi ngeriri dzinza rinoisa mutsipa waro pashi pejoka ramambo weBhabhuroni nokumushandira, ndiro ndinozotendera kuti risare munyika yaro, unoronza Mambo Mwari; naro rinozoirima nokugara mweiri.” Ndakaereketa kunaZedhekia mambo waJudha ngenjira imweyo ndechiti, “Unzai mitsipa yenyu pashi pejoka ramambo weBhabhuroni, mumushandire nevanhu vake kuti mupone. Ngenyi iwewe navanhu vako mwechisisira kufa ngeshoti, ngenzara, ngenhenda, kudai ngezvaakaereketa Mambo Mwari ngendaa yedzinza risikazoshandiri mambo weBhabhuroni? Musapurutana kumazwi evaprofeti vanoereketa kwomuri, vechimuronzera kuti, amusashandira mambo weBhabhuroni, ngokuti vanoprofeta manyepo kwomuri. ‘Andizi kuvatuma,’ unoronza Mambo Mwari, ‘Asi vanoprofeta manyepo ngezina rangu; nokugumisira kwazvo ndinozomudzingamwo, nemwi munozoparadzwa, imwimwi nevaprofeti vanoprofeta kwomuri.’ ” Zvino ndakaereketa kuvapristi nokuvanhu ava veshe ndechiti, “Izvi ndizvo zvinoronza Mambo Mwari: Musapurutana kumazwi evaprofeti venyu vanoprofeta kwomuri vechiti, ‘Ringira, zvidziyo zvemhatso yaMambo Mwari zvinozopetudzwa zvinopano kubva Bhabhuroni,’ ngokuti vanoprofeta manyepo kwomuri. Musavapurutana; shandirai mambo weBhabhuroni, kuti mupone. Ngenyi dhorobha iri rechisisira kuita matongo? Kudai ngegwinyiso vari vaprofeti, nokuti kudai izwi raMambo Mwari rinavo, ngavapote zvino kunaMambo Mwari wehondo, kuti zvidziyo zvakasiiwa mumhatso yaMambo Mwari, nomumhatso yamambo waJudha, nomuJerusarema, zvisaenda Bhabhuroni. Ngokuti izvi ndizvo zvinoronza Mambo Mwari wehondo ngendaa yesika, nendaa yoruandhle, ngendaa yezvigadzikiro, nendaa yezvidziyo zvakasara mudhorobha iri, izvo zvisikazi kutorwa ndiNebhukhadhineza mambo weBhabhuroni, apo paakatora Jekhonia mukororo waJehoiakimu mambo waJudha nevakuru vaJudha neveJerusarema, kubva Jerusarema kuenda Bhabhuroni kuvaita vabatwa. Izvi ndizvo zvinoronza Mambo Mwari wehondo, Mwari waIsuraeri, ngendaa yezvidziyo zvakasara mumhatso yaMambo Mwari, nomumhatso mwamambo waJudha, nomuJerusarema: ‘Zvinozotwarwa kuenda Bhabhuroni, zvinozogara apo metsa zuva rendinozovahambira,’ unoronza Mambo Mwari. ‘Zvino ndinozozviunza ndechizvihwirinza kundau iyi.’ ” Mugore rimwero, mukutanga kutonga kwaZedhekia mambo waJudha, ngegore rechirongomuna, ngomwedzi wechishanu waro, Hanania mukororo waAzuri muprofeti uwo waibva Gibheoni, wakaereketa kwendiri mumhatso yaMambo Mwari pamberi pevapristi nevanhu veshe echiti, “Izvi ndizvo zvinoronza Mambo Mwari wehondo, Mwari waIsuraeri echiti, ‘Ndagura joka ramambo weBhabhuroni. Mumakore mairi ndinozopetudza kundau iyi zvidziyo zveshe zvemhatso yaMambo Mwari, zvaakatora Nebhukhadhineza mambo weBhabhuroni, aakaenda nazvo Bhabhuroni kubva kundau iyi. Ndinozopetudza kundau iyi Jekhonia mukororo waJehoiakimu mambo waJudha, pamwepo nevabatwa veshe vaJudha, avo vakatorwa kuenda Bhabhuroni, ngokuti ndinozogura joka ramambo weBhabhuroni,’ unoronza Mambo Mwari.” Zvino muprofeti Jeremia wakati kunomuprofeti Hanania pamberi pevapristi nepamberi pavanhu veshe, avo vaiya vakaema mumhatso yaMambo Mwari. Nomuprofeti Jeremia wakati, “Ameni, Mambo Mwari ngaadaro; Mambo Mwari ngaaite kudai ngamazwi ewaprofeta, nokupetudza kubva Bhabhuroni zvidziyo zvemhatso yaMambo Mwari, nevabatwa veshe, kuzviunza kundau iyi. Asi purutana izwi iri zvino iwewe, rendinoereketa mukuzwa kwako, nomukuzwa kwevanhu veshe. Vaprofeti vekare vaiya pamberi pangu nepamberi pako, vakaprofetera kunyika dzakawanda nokuumambo hukuru, ngendaa yokurwa hondo, nzara, nenhenda. Asi ngendaa yomuprofeti uwo unoprofeta ngendaa yokunyarara, apo izwi rouwo muprofeti raitika, muprofeti uwo unozoziikanwa, kuti ngegwinyiso Mambo Mwari wakamutuma.” Zvino Hanania muprofeti wakadusa joka kubva pamutsipa womuprofeti Jeremia, akarigura. NaHanania wakaereketa pamberi pevanhu veshe echiti, “Izvi ndizvo zvinoronza Mambo Mwari: Iyi ndiyo njira yendinozogura ndiyo joka raNebhukhadhineza mambo weBhabhuroni kubva kumitsipa yemadzinza eshe, mumakore mairi.” Nomuprofeti Jeremia wakaenda. Pasure penguva muprofeti Hanania agura joka kubva pamutsipa waJeremia muprofeti, izwi raMambo Mwari rakauya kunaJeremia rechiti, “Enda, uronzere Hanania kuti, ‘Izvi ndizvo zvinoronza Mambo Mwari: Wagura majoka emiti kwega, kuti uvanasirire majoka esimbi pandau yawo. Ngokuti izvi ndizvo zvinoronza Mambo Mwari wehondo, Mwari waIsuraeri: Ndaisa joka resimbi pamitsipa yemadzinza aya eshe, kuti ashandire Nebhukhadhineza mambo weBhabhuroni,’ navo vanozomushandira yaamho; neni ndatomupazve mhuka dzomushango.” Zvino muprofeti Jeremia wakati kunaHanania muprofeti, “Purutana, Hanania, Mambo Mwari aazi kukutuma, newe waita kuti vanhu ava vagonde manyepo. Ndizvo izvi zvinoronza Mambo Mwari: Ringira, ndinozokurasha kubva kuhope yenyika. Mugore iri unozofa, ngokuti waereketa kurwisa Mambo Mwari.” Mugore rimwero, mumwedzi wechinomwe Hanania muprofeti wakafa. Aya ndiwo mazwi etsamba yaakatumira Jeremia muprofeti kubva Jerusarema kunevakasara vevakuru pakati pevakatorwa kuitwa vabatwa, kuvapristi, kuvaprofeti, nokuvanhu veshe vaiya vatorwa kuitwa vabatwa ndiNebhukhadhineza, kubva Jerusarema kuenda Bhabhuroni, ngesure kwokubva kwavo Jerusarema, Jekhonia mambo, namai ake, vakuru voruwanze, vatungamiriri vaJudha neveJerusarema, vatsetsi nevapfuri. Tsamba yakatumirwa ngenyara yaErasa mukororo waShafani, naGemaria mukororo waHirikia vaakatuma Zedekia mambo waJudha, kunyika yeBhabhuroni kunaNebhukhadhineza mambo weBhabhuroni yechiti, “Izvi ndizvo zvinoronza Mambo Mwari wehondo, Mwari waIsuraeri, kuneveshe vakatorwa kuitwa vabatwa, vendakaita kuti vatorwe kubva Jerusarema kuenda Bhabhuroni; Dziakirei mhatso, mugaremwo; musime minda mwechidya michero yayo. Roorai vakadzi, mubare vakororo nevanasikana; roodzai vakororo venyu, muchadhise vanasikana venyu, kuti vabare vanasikana nevakororo, kuti muwande, musaita vashomani. Asi tsvakai kunyarara kweiro dhorobha, umwo mwendakaita kuti mutorwe kuenda kooitwa vabatwa, murikumbirire kunaMambo Mwari, ngokuti mukunyarara kwaro munozoona kunyarara kwenyu. Ngokuti izvi ndizvo zvinoronza Mambo Mwari wehondo, Mwari waIsuraeri: ‘Musatenda kuchengedzerwa ngavaprofeti venyu neman'anga enyu ari pakati penyu, musapurutana kurota kwenyu kwomunoda kuti murote. Ngokuti vanoprofeta kunyepa kwomuri ngezina rangu; andizi kuvatuma,’ Mambo Mwari unoronza. “Ngokuti izvi ndizvo zvinoronza Mambo Mwari: ‘Kwega apo Bhabhuroni rapedza makore aro makumi manomwe ndinozouya kwemuri, ndechizadzisa chigondiso changu kwemuri, ngokumupetudza kundau iyi. Ngokuti ngegwinyiso ndinozia urongwa hwendinahwo ndimwi,’ unoronza Mambo Mwari, ‘Urongwa hwokugara kwenyu mukunyarara, haiwa wokuremadzwa, kumupa gonda rezvichauya kumagumisiro enyu. Zvino apo munozodaidza kwendiri, munozouya nokukumbira kwendiri, neni ndinozomuzwa. Naapo pemunozonditsvaka munozondiona, kudai mwechizonditsvaka ngomwoyo wenyu weshe. Ndinozoonekwa ndimwi,’ unoronza Mambo Mwari; ‘Ndinozobvisa ubatwa hwenyu nokumuunganidza kubva kumadzinza eshe, nokubva kundau dzeshe kwendakamudzingira,’ unoronza Mambo Mwari, ‘Neni ndinozomupetudza kundau kwandakaita kuti mutorwe kuitwa vabatwa.’ “Ngokuti mwakati, ‘Mambo Mwari wakatimirudzira vaprofeti muBhabhuroni,’ izvi ndizvo ndizvo zvinoronza Mambo Mwari ngendaa yamambo uwo unogara padendemaro raDhavhidha, nendaa yevanhu veshe vanogara mudhorobha iri, nendaa yehama dzenyu dzisikazi kuenda nemwi muubatwa: Izvi ndizvo zvinoronza Mambo Mwari wehondo: ‘Ringira, ndinozovatumira shoti, nzara, nhenda, nokuvaita kudai nemaonde awora ashata yaamho, asikachadyiki. Ndinozovateera ngeshoti, ngenzara nenhenda, nokuvaita chiro chinotyisa kuumambo hweshe hwenyika, kuti vaite vakatukwa, nechishamiso, nevanoridzirwa murudzi, nevanotsverudzwa, pakati pemadzinza eshe endakavadzingira kwaari, ngokuti avazi kupurutana mazwi angu,’ unoronza Mambo Mwari, ‘Apo pendakaangira kutumira kwemuri varanda vangu vaprofeti, asi amuzi kupurutana,’ unoronza Mambo Mwari. “Asi zvino, imwimwi mweshe voubatwa, avo vendakadzinga kubva Jerusarema kuenda Bhabhuroni, izwai izwi raMambo Mwari. Izvi ndizvo zvinoronza Mambo Mwari wehondo, Mwari waIsuraeri, ngendaa yaAhabhi mukororo waKoraia, naZedhekia mukororo waMaaseia, avo vanoprofeta manyepo kwomuri ngezina rangu: Ringira, ndinozovapira munyara yaNebhukhadhineza mambo weBhabhuroni, naye unozovauraya mukuona kwenyu. Ngendaa yavo izwi rechituko rinozoamba kushandiswa ngevoubatwa veshe vanobva kwaJudha, vari muBhabhuroni, rokuti, ‘Mambo Mwari ngaakuite kudai ndiZedhekia naAhabhi, avo vaakapisha ngomuriro mambo weBhabhuroni,’ ngokuti vakaita zvakashata muIsuraeri, vakaomba navakadzi vevaakirwana vavo, nokuereketa mazwi okunyepa ngezina rangu, endisikazi kuvapanga; ndini ndinozvizia, ndiri chapupu cheizvi,” unoronza Mambo Mwari. Unozoronza kunaShemaia muNeheramu wechiti, “Izvi ndizvo zvinoronza Mambo Mwari wehondo, Mwari waIsuraeri, echiti: Muzina rako wakatumira tsamba kuvanhu veshe avo vari muJerusarema, nokumupristi Zefania mukororo waMaaseia, nokuvapristi veshe wechiti, ‘Mambo Mwari emene wakakuita mupristi pandau yeJehoiadha mupristi, kuitira kuti uite mutongi mumhatso yaMambo Mwari, kuti uise mutirongo nomumanguri munhu weshe unopenga, echidziita muprofeti. Ndizvo zvino amuzi kurambidza ngenyi Jeremia weAnathothi, uwo unodziita muprofeti kwomuri?’ Ngokuti wakatumira izwi kwetiri muBhabhuroni echiti, Uhwu ubatwa ngohwemukuwo wakareba; akai mhatso, mugaremwo; simai minda mudye michero yayo.” Zefania mupristi wakadzidza tsamba iyi munzee dzaJeremia muprofeti. Zvino izwi raMambo Mwari rakauya kunaJeremia rechiti, “Tumira izwi kwevari veshe voubatwa wechiti, ‘Izvi ndizvo zvinoronza Mambo Mwari ngendaa yaShemaia muNeheramu: Ngokuti Shemaia wakaprofeta kwomuri kunyazwi ndisikazi kumutuma, naye wakaita kuti mugonde manyepo, ndizvo izvi ndizvo zvinoronza Mambo Mwari: Ringira, ndinozoorora Shemaia muNeheramu, nevorudzi rwake; aazowipo munhu wokugara pakati peava vanhu; aazooni zvakanaka zvendinozoitira vanhu vangu,’ unoronza Mambo Mwari, ‘Ngokuti wakaereketa kumukira Mambo Mwari.’ ” Izwi iro rakauya kunaJeremia kubva kunaMambo Mwari rechiti, “Izvi ndizvo zvinoronza Mambo Mwari, Mwari waIsuraeri: ‘Nyora mazwi eshe endakaereketa kwomuri mubhuku. Ngokuti, ringira, ngegwinyiso mazuva anouya,’ Mambo Mwari unoronza, ‘Apo pendinozopetudza voubatwa vevanhu vangu, Isuraeri naJudha; ndinozovapetudza kunyika yendakapa madzibaba avo, navo vanozoigara nhaka,’ unoronza Mambo Mwari.” Naaya ndiwo mazwi aakaereketa Mambo Mwari ngendaa yaIsuraeri naJudha. “Izvi ndizvo zvinoronza Mambo Mwari: ‘Tazwa izwi rinokarudza, rokutyisa, risiri rokunyarara. Bvunzai zvino, muone kuti uripo munhu womwamuna unorwadziwa ngokubereka mwana here? Ngenyi zvino ndechiona vamuna veshe vechibata zviunu zvavo, kudai ngomukadzi uri mukurwadziwa kwokubereka? Ngenyi hope yeshe yatsandudzwa kucheneruka? Ihehe! Zuva iro iguru, akunazve rakadai ndiro; inguva yokutambudzika kwaJakobe, asi unozonunurwa kubva kweriri.’ “Pazuva iro, unoronza Mambo Mwari wehondo, ‘Ndinozogura joka rake kubva pamutsipa wako, nokudambura zvisungo zvako, nevapara avachazoshandirwi ndiye. Asi vanozoshandira Mambo Mwari, Mwari wavo, naDhavhidha mambo wavo, uwo wendinozovamirudzira.’ ” “Asi ngendaa yako usatya, iwewe muranda wangu Jakobe, unoronza Mambo Mwari, usapera simba, O Isuraeri; ngokuti, ringira ndinozokuponesa kubva kuretu, nevorudzi rwako kubva kunyika youbatwa hwavo. Jakobe unozopetuka mukuzorora, echigarisika, apana naumwe unozomutyisa. Ngokuti ndinemwi, unoronza Mambo Mwari, kumuponesa; ndinozoita magumo emadzinza eshe endakamuparadzira pakati pawo, asi imwimwi andizomuparadzi. Asi ndinozomuorora ngechipimo chakanaka, andizoreki kumuorora.” Ngokuti izvi ndizvo zvinoronza Mambo Mwari, “Kuremadzwa kwako akurapiki, nebonje rako rakashata. Apana wokurwira ndaa yako, kuti urapiwe, amuna mutombo wokukuporesa. Vadikani vako veshe vakuriyarwa; avakutsvaki; ngokuti ndakakuremadza ngebonje regaa, kuororwa kwouwo usina nyasha, ngendaa youwandu hwokushata kwako, ngokuti zvishaishi zvako zvakawandisa. Unochema ngenyi ngendaa yokuremadzwa kwako? Kurwadziwa kwako akurapiki. Ngokuti kushaisha kwako kwakakura, ngokuti zvishaishi zvako zvanyanya kuwanda, ndizvo ndaita izvi kwouri. Ndizvo avo veshe vanokudya vachadyiwawo, nemagaa ako eshe, rimwe ngarimwe anozopinda muubatwa; naavo vanokuchakata vanozochakatwawo, naavo vanokuparadza vanozoparadzwawo. Ngokuti ndinozomutambisa, ndinozorapa maonje enyu, unoronza MamboMwari, ‘Ngokuti vakamududza kuti varashwa’ vechiti, ‘Ndiro Zioni; akuna naumwe unendaa naro.’ ” “Izvi ndizvo zvinoronza Mambo Mwari, ‘Ringira, ndinozopetudza vakabatwa vematende aJakobe, ndechionisa nyasha kundau dzake dzokugara; dhorobha rinozoakiswa padera pematongo aro, nengome yaro inozoapozve pandau payo pemene. Kubva mukati mwaro munozobuda kubonga neizwi rokudakara. Ndinozovawanza, avazoiti vashomani akadi; ndinozovakurisazve, navo avazoiti vadoko. Vana vavo vanozodai ngevekaretu, mushongano wavo unozoemeswa pamberi pangu, neni ndinozovaorora veshe avo vanovatambudza. Mutongi wavo unozoita umwe wevanhu vavo emene, mambo wavo unozoita umwe unobva pakati pavo; ndinozomuunza pasinde, naye unozokwedzera kwendiri, ngokuti ndiani uwo wakaemesa mumwoyo mwake kukwedzera kwendiri?’ Unoronza Mambo Mwari. ‘Nemwi munozoita vanhu vangu, neni ndinozoita Mwari wenyu.’ ” Ringira, chipupuri chaMambo Mwari! Ushungu hwabuda, chipupuri chisikaperi; chinozoputikira padera pemasoro evakashata. Ushungu hwaMambo Mwari hunotyisa ahuzopetuki sure, metsa azviita nokuzvipedza zvaakaemesa mumwoyo mwake. Mumazuva okugumisira munozozvizwisisa. Mambo Mwari unoronza, “Panguva iyo ndinozoita Mwari wamarudzi eshe aIsuraeri, navo vanozoita vanhu vangu. Izvi ndizvo zvinoronza Mambo Mwari: Vanhu vakasiiwa ngeshoti vakaona nyasha mushango; apo vaIsuraeri pevakatsvaka kuti vazorore, Mambo Mwari wakaoneka kwendiri ngomukuwo wekaretu. Ndakuda ngorudo rwemhera nariini; ndizvo ndaangira kuita kugondeka kwangu kwouri. Ndinozokuakazve, newe unozoakwa, O mhandwe Isuraeri! Unozonemeswazve ngemakandira, wechizoenda mukuzvina kwaavo vanodakara. Unozosimirazve minda yemivhini padera pemitunhu yeSamaria; vasimi vanozosima, navo vanozodya michero. Ngokuti rinozoapo zuva apo varindi pevanozodaidza vari munyika yezvimitunhu yaEfuremu vechiti, ‘Uyai, tikwire Zioni, kunaMambo Mwari, Mwari wedu.’ ” Ngokuti izvi ndizvo zvinoronza Mambo Mwari: “Emberai Jakobe ngokudakara, mudaidzire mazwi mukuru wemadzinza; teketesai, kudzai, mwechiti, ‘O Mambo Mwari, ponesa vanhu vako vakasara vaIsuraeri!’ Ringira, ndinozovaunza kubva kunyika yedera, nokuvaunganidza kubva kumiganu yenyika iri kuretu yaamho, pakati pavo pane mapofu nezvirema, madzimai anemimba, naavo vanorwadziwa ngokuda kubereka, veshe pamwepo; vanhu vazhinji vanozopetuka pano. Vanozouya vechichema, vechikumbira ndinozovatungamira kupetuka sure; ndinozoita kuti vahambe ngepasinde pendwizi dzemvura, munjira yakarurama, umwo mwevasikazopumhunwi; ngokuti ndaita baba kunaIsuraeri, naEfuremu idangwe rangu. Izwai izwi raMambo Mwari, O madzinza, muridaidzire kuzviwi zviri kuretu mwechiti, ‘Iye wakaparadzira Isuraeri unozomuunganidza, nokumungwarira, kudai ngezvinoita muushi womutanga wake.’ Ngokuti Mambo Mwari wakaripira Jakobe, akamusunhura kubva kunyara youwo waiya akagwinya kumupinda. Vanozouya nokuemba vechidaidzira muurebu hweZioni, navo vanozojeka padera pounaku hwaMambo Mwari, padera pekoroni, pevhini, nemafuta, nepadera pemakonyana emitanga yen'ombe nemakwai; kupona kwavo kunozodai ngomunda wakadiridzirwa, avazoperizve simba. Naapo mhandwe dzinozodakara mukuzvina, veshe majaha nevasharuka vanozodakara. Ndinozopindura kubonda kwavo kuita kudakara, ndinozovaembedzera, ndechiita kuti vadakare pandau pokusvipa mwoyo. Ndinozogutisa mweya yevapristi ngamafuta, nevanhu vangu vanozogutiswa ngokunaka kwangu,” unoronza Mambo Mwari. Izvi ndizvo zvinoronza Mambo Mwari: “Izwi rinozwika muRama, kuchema nokutsumba kukurutu. Racheri unochemera vana vake; unoramba kuemberedzerwa ngendaa yevana vake, ngokuti apachina. Izvi ndizvo zvinoronza Mambo Mwari: Nyarara izwi rako kubva mukuchema, nemadziso ako asachema masodzi; ngokuti mushando wako unozoripirwa, unoronza Mambo Mwari. Vanozopetuka kubva kunyika yemagaa. Riripo gonda kumagumo ako, unoronza Mambo Mwari, vana vako vanozopetuka kunyika yavo. Ngegwinyiso ndakazwa Efuremu echidzichemera: ‘Wakandiorora, neni ndakaashira kuororwa, ndakadai ngekonyana risina kudzidziswa risati razia joka. Ndipetudze sure ngandipetuke, ngokuti iwewe uri Mambo Mwari, Mwari wangu. Ngesure apo ndapauka, ndakatenderuka; ngesure apo ndaonwa, ndakachaya chizva changu; ndakatsveruka, ndakapera simba ngokuti ndakatwara kutsverudzwa kwoutsva hwangu.’ Efuremu mukororo wangu unodikanwa here? Mwana wendinodakara mwaari ndiye here? Nguva dzeshe dzendinoereketa kumuitira ndaa, ndinomukarakadza. Ndizvo mwoyo wangu unomutambudzikira; ngegwinyiso ndinozomuitira nyasha, unoronza Mambo Mwari. Emesa zvioniso zvepato pachako, udziitire pachako sika dzechioniso mupato; ukarakadze zvakanaka mapato makuru, pato iro rowakahamba ndiro. Petuka, O mhandwe Isuraeri, petuka kumadhorobha ako aya. Unozohamba hamba mukuwo wakadini, O mwanasikana usina gonda? Ngokuti Mambo Mwari wakasika chiro chitsva munyika, mukadzi unozofungatira mwamuna.” Izvi ndizvo zvinoronza Mambo Mwari wehondo, Mwari waIsuraeri: Vachazoereketazve mazwi aya munyika yaJudha, nomumadhorobha ayo, apo ndinozovapetudza kubva muubatwa hwavo, “Mambo Mwari ngaakufumise, O ugaro hwokururama, O mutunhu wakacheneswa. Judha nemadhorobha aro anozogara apo pamwepo, varimi neavo vaushi vanozohamba kweshe nezvifuyo zvavo. Ndinozogutisa mweya yakaremba, naavo veshe vanodemera ndinozovagutisa.” Apapo ndakamuka, ndikaringira, hope dzangu dzainaka kwendiri. “Ringira, ngegwinyiso mazuva anouya,” unoronza Mambo Mwari, “Apo pendinozosima mhatso yaIsuraeri nemhatso yaJudha ngembeu yevanhu nembeu yemhuka. Kudai ngezvendakaringira padera pavo, kubvita, nokuvaputsira pashi, kubvisa, kuparadza, nokuunza kushata, ndizvo ndinozovaringira kuaka nokusima,” unoronza Mambo Mwari. “Mumazuva awo avachazoronzi kuti, ‘Vabari vakadya mavhini anozhazha, nemazino evana vavo akaita hwadzira.’ Asi veshe umwe ngaumwe unozofa ngendaa yezvishaishi zvake; weshe munhu unodya mavhini anozhazha, mazino ake anozoita hwadzira.” “Ringira, ngegwinyiso mazuva anouya,” unoronza Mambo Mwari, “Apo pendinozoita chitenderano chitsva nemhatso yaIsuraeri, nemhatso yaJudha, chisikazi kudai ngechitenderano chendakaita nemadzibaba avo, pendakavatora ngenyara kuvabudisa kubva munyika yeEgipite; chitenderano icho changu chevakagura, kunyazwi ndaiya mwamuna wavo,” unoronza Mambo Mwari. “Asi ichi ndicho chitenderano chendinozoita nemhatso yaIsuraeri, ngesure kweawo mazuva, unoronza Mambo Mwari; ‘Ndinozoisa mupango wangu mukati mwavo, nokuunyora mumwoyo mwavo; neni ndinozoita Mwari wavo, navo vanozoita vanhu vangu.’ Avachazodzidzisani umwe neumweni muakirwana wake, nehama yake, echiti, ‘Zia Mambo Mwari, ngokuti veshe vanozondizia, kubvira kumudoko wavo kuguma kumukuru wavo,’ unoronza Mambo Mwari; ‘Ngokuti ndinozokungurira kushata kwavo, nezvishaishi zvavo andichazozvikarakadzi nakamwe.’ ” Izvi ndizvo zvinoronza Mambo Mwari, uwo unopa zuva kuti riite kujeka kwemasikati, nokuemesa mwedzi nenyeredzi kuita kujeka kwousiku, uwo unomusa ruandhle apo mafungu arwo anoungumira; Mambo Mwari wehondo, ndiro zina rake: “Kudai urongwa hwakaemeswa hukarekera kubva mukuona kwangu,” unoronza Mambo Mwari, “Ndizvo rudzi rwaIsuraeri runozorekera kuita dzinza kwendiri mhera nariini.” Izvi ndizvo zvinoronza Mambo Mwari: “Kudai matenga ari padera angapimwa, nematsikiro enyika angatsvakisiswa ngepashi, zvino ndinozoramba veshe vorudzi rwaIsuraeri ngendaa yezveshe zvevakaita,” unoronza Mambo Mwari. “Ringira, mazuva anouya,” unoronza Mambo Mwari, “Apo dhorobha rinozoakirwa Mambo Mwari kubva paRusvingo rwaHananeri kuguma paMusiwo wepaKhona. Netambo yokupima ichazotambanudzwa kubva apo kuguma kuretu yakarurama kuenda kumutunhu Garebhi, nayo inozotenderukira kuenda Goa. Bani reshe remiiri yakafa neremarota, neminda yeshe metsa kuguma kuRwizi rweKidroni, kuguma pakhona reMusiwo Mahachi, wakaringira kumabvazuva, zvichaita zvakacheneswa kunaMambo Mwari. Aizobvitwizve nokuti kuparadzwa mhera nariini.” Izwi rakauya kunaJeremia kubva kunaMambo Mwari mugore rechigumi raZedhekia mambo waJudha, iro raiya gore regumi nemasere raNebhukhadhineza. Ngouwo mukuwo hondo yamambo weBhabhuroni yaitendenedza Jerusarema, naJeremia muprofeti wakakonyerwa muruwanze rwevarindi, rwaiya mungome yamambo waJudha, apo Zedhekia mambo waJudha paaiya amukonyera. Zedhekia waiya ati, “Unoprofeterenyi wechiti, ‘Izvi ndizvo zvinoronza Mambo Mwari Mwari: Ringira, ndinozopa iri dhorobha munyara yamambo weBhabhuroni, naye unozoritora. Zedhekia mambo waJudha aazopokonyoki kubva kunyara yevaKharadhea, asi ngegwinyiso unozopirwa munyara yamambo weBhabhuroni, echizoereketa naye hope kuhope, nokumuona dziso kudziso; naye unozotora Zedhekia kuenda Bhabhuroni, unozogara apo metsa ndamuhambira, unoronza Mambo Mwari. Kunyazwi wechirwisana nevaKharadhea amuzobudiriri?’ ” NaJeremia wakati, “Izwi raMambo Mwari rakauya kwendiri rechiti: Ringira, Hanameri mukororo waSharumu sekuru ako unozouya kwouri echiti, ‘Tenga munda wangu uri muAnathothi, ngokuti ndiwe unemaruramiro okuutenga.’ ” Ndizvo Hanameri mukororo wasekuru angu wakauya kwendiri muruwanze rwevarindi, kudai ngezverakatonga izwi raMambo Mwari, akati kwendiri, “Tenga munda wangu uri muAnathothi munyika yaBhenjamini, ngokuti maruramiro okugara nhaka nokuusunhura ngezvako; dzitengere pachako.” Zvino ndakazia kuti izwi raMambo Mwari. Ndakatenga munda waHanameri mukororo wasekuru angu waiya muAnathothi, ndikamupimira mare yaiya zvigurwa zvesirivha gumi nazvinomwe. Ndakanyora zina rangu mutsamba, ndikaikonya ngechidhindo; ndakadaidza zvapupu, ndikamupimira mare pazvipimo. Zvino ndakatora tsamba yakanamwa yechitenderano chokutanga yaiya nechitenderano nenjira yokutenga ndiyo netsamba yakabeuka; neni ndakapa tsamba yomutengo kunaBharukhi mukororo waNeria, mukororo waMahiseia, mukuona kwomuzukuru wangu Hanameri, mukuona kwezvapupu zvakanyora mazina mutsamba yechitenderano chomutengo, pamberi pevaJudha veshe vaiya vakagara muruwanze rwevarindi. Mukuona kwavo ndakapangisisa Bharukhi pamberi pavo ndechiti, “Izvi ndizvo zvinoronza Mambo Mwari wehondo, Mwari waIsuraeri, ‘Tora tsamba idzi dzeshe, iyo yakanamirwa ngechidhindo neiyo yakabeuka; udziise mujomeya redongo, kuti dzigare mukuwo wakareba.’ Ngokuti izvi ndizvo zvinoronza Mambo wehondo, Mwari waIsuraeri, ‘Mhatso neminda, neminda yemivhini ichazotengwazve munyika iyi.’ ” Naapo ndapedza kupa tsamba dzomutengo kunaBharukhi mukororo waNeria, ndakakumbira kunaMambo Mwari ndechiti, “A Mambo Mwari! Ndiwe wakaita denga nenyika ngesimba rako guru, ngomuoko wako wakatambanudzwa. Akuna chakanyanya kukonza kwouri. Unoonisa rudo runenyasha kumakumi emazana emibarirwana, nokuunzidzira kushata kwemadzibaba padera pevana vavo vanoteera sure kwavo, O mukuru nounesimba Mwari, uwo zina rake ndiMambo Mwari wehondo, mukuru mukupanga, nesimba mukushanda, uwo madziso ake akabeuka kunjira dzeshe dzevakororo vevanhu; kupa veshe umwe ngaumwe kudai ngenjira dzake nokudai ngemichero yezviito zvake. Iwewe wakaonesa zvioniso nemishamiso munyika yeEgipite, metsa nanyamashi muIsuraeri nepakati pevanhu vemarudzi amweni; newe wakadziitira zina rinoangira kugara riripo metsa nyamashi. Ukabudisa vanhu vako Isuraeri kubva munyika yeEgipite ngezvioniso nemishamiso ngenyara inesimba, nomuoko wakatambanudzwa nokutyisa kukurutu; newe wakavapa iyi nyika yowakapika kumadzibaba avo kuvapa, nyika inoerera mukaka nouchi, navo vakapotera, vakaigara nhaka. Asi avazi kupurutana izwi rako, nokuti kuteera mipango yako; pane zveshe zvewakavapanga kuti vaite apana nachimwe chevakaita. Ndizvo wakaita uku kushata kweshe kuti kuuye padera pavo. Ringira, mirwi yamavhu yakandirwa kutendenedza kurwisa dhorobha, kuti varinyise; nedhorobha raringirana neshoti, nzara nenhenda, naro rapirwa kunyara yevaKharadhea, avo vanorwa naro. Izvo zvowakaereketa zvaitika kudai ngezveungaona iwewe pachako. Asi iwewe, O Mambo Mwari, Mwari, wakati kwendiri, ‘Tenga uyu munda ngemare, wechitora zvapupu;’ kunyazwi dhorobha rapirwa munyara dzevaKharadhea.” Izwi raMambo Mwari rakaunya kunaJeremia rechiti, “Ringira, ndini Mambo Mwari, Mwari wenyama yeshe; pane chakanyanya kundikonzera here?” Ndizvo izvi zvinoronza Mambo Mwari: “Ringira, ndinopa iri dhorobha munyara dzevaKharadhea, nomunyara yaNebhukhadhineza naye unozoritora. VaKharadhea vanorwa nedhorobha iri vanozouya, vabase muriro padera paro nokuripisha, nemhatso idzo dzevakapishira mutombo unegwema padera pamatenga adzo kunaBhaari, vakadurura midiro yokumwa kunezvimwari zvimweni kunditsenesa. Ngokuti vanhu vaIsuraeri nevanhu vaJudha avana chevakaita, asi vakaita zvakashata zvega pamberi pangu kubvira muutsva hwavo; vanhu vaIsuraeri avana chevakaita, asi vakanditsenesa kwega ngemishando yenyara dzavo, unoronza Mambo Mwari. Dhorobha iri rakamusa kutsamwa kwangu noushungu hwangu kubvira pazuva revakaamba kuriaka metsa nyamashi, zvinoita kuti ndiribvise kubva pamberi pehope yangu, ngendaa yokushata kweshe kwevanhu vaIsuraeri nekwevanhu vaJudha, kwevakaita kumusa kutseneka kwangu, ivo namadzibaba avo, vatongi vavo, vapristi vavo nevaprofeti vavo, vanhu vaJudha, naavo vanogara muJerusarema. Vakandifuratira, avazi kundiringira; kunyazwi ndakaangira kuvadzidzisa, asi avazi kupurutana nokuashira kudzidziswa. Vakaisa zvinyangadzo zvavo mumhatso inodaidzwa ngezina rangu kuisvipisa. Vakaaka ndau dzakakwirira dzaBhaari mubani romukororo waHinomu, pekupira vakororo nevanasikana vavo kuita mudiro kunaMorekhi, kunyazwi andizi kuvapanga, nokuti kutongopinimidza kuti vaite kunyangadza uku, kuita kuti Judha ashaishe. “Ndizvo zvino izvi ndizvo zvinoronza Mambo Mwari, Mwari waIsuraeri ngendaa yeiri dhorobha, romunoti ndiro, ‘Rinozopirwa munyara yamambo weBhabhuroni, ngeshoti, nzara, nenhenda.’ Ringira, ndinozovaunganidza kubva kunyika dzeshe dzendakavadzingira mukutseneka kwangu nomuushungu hwangu nomukushishwa kwangu kunotyisa; ndinozovaunzazve kuiyi ndau, nokuita kuti vagare vakangwaririka. Vanozoita vanhu vangu, neni ndinozoita Mwari wavo. Ndinozovapa mwoyo umwe nenjira imwe, kuti vanditye mhera nariini, kuti zvivanakire nemibarirwana yavo inoteera sure kwavo. Ndinozoita chitenderano chemhera nariini navo, kuvaitira zvakanaka, andichazovafuratiri, asi ndinozoisa kutyisa kwangu mumwoyo mwavo kuti vasazobva kwendiri. Ndinozodakara ndivo kuvaitira zvakanaka, mukugondeka ndinozovasima munyika iyi, ngomwoyo wangu weshe nomweya wangu weshe.” Ngokuti izvi ndizvo zvinoronza Mambo Mwari: “Kudai ngezvendakaunza uku kushata kweshe padera paava vanhu, ngokudarozve ndinozounza uku kunaka kweshe padera paava vanhu, kwendinovagondisa zvino. Minda inozotengwa munyika iyi, iyo yomunoti, ‘Iri matongo isina munhu nokuti mhuka; yapirwa munyara dzavaKharadhea.’ Vanhu vanozotenga minda ngemare, nokunyora mutsamba, nokuinama ngechidhindo, nokutora zvapupu munyika yaBhenjamini, nomundau dzinotendenedza Jerusarema, nomumadhorobha aJudha, neenyika yezvimitunhu, neeShefera neokubani; ngokuti ndinozopetudza vakabatwa vavo,” unoronza Mambo Mwari. Izwi raMambo Mwari rakauya kunaJeremia ngokwechipiri, achakakonyerwa muruwanze rwevarindi rechiti, “Izvi ndizvo zvinoronza Mambo Mwari muiti wenyika, Mambo Mwari, uwo wakaiita nokugwinyisa; Mambo Mwari ndiro zina rake: Daidzai kwendiri, neni ndinozomupingura, nokumuronzera zviro zvikuru nezvakafishika zvomusaizia. Ngokuti izvi ndizvo zvinoronza Mambo Mwari, Mwari waIsuraeri, ngendaa yemhatso dzedhorobha iri, nemhatso dzemadzimambo aJudha, idzo dzakaputsirwa pashi kudzirwira naavo vakaaka mirwi yamavhu, pamberi peshoti. VaKharadhea vanouya koorwa nokuazadza ngemiiri yakafa, yeavo vendichauraya mukutseneka kwangu nomuushungu hwangu, ngokuti ndafisha hope yangu kubva kudhorobha iri, ngendaa yokushata kwavo kweshe. Ringira, ndinozoriponesa nokurirapa, ndinozovarapa nokuvaonisa kukura kwokunyarara nokwokungwaririka. Ndinozopetudza vakabatwa vaJudha, nevaIsuraeri, nokuvaaka kudai ngezvevaiya vakaita pakutanga. Ndinozovachenesa kubva mukusvipiswa kwavo kweshe kwevakaitwa ngokushaisha nokumukira kwavo neni ndinozovakungurira kushata kweshe kwezvishaishi zvavo nokumukira kwevakaita kwendiri. Dhorobha iri rinozoita kwendiri zina rokudakara, kukudzwa nokuremeredzwa mukuona kwemadzinza eshe enyika, awo anozozwa ngezvakanaka zveshe zvendinovaitira; anozotya nokuhuta ngendaa yokunaka uku kweshe, kubudirira nokunyarara kweshe kwendinozoriunzira.” Izvi ndizvo zvinoronza Mambo Mwari; “Mundau iyi yomunoronza kuti, yaita matongo, isina munhu nokuti mhuka, mumadhorobha aJudha, nomumapato eJerusarema, awo aita matongo, asina munhu unogaremwo nokuti mhuka kunozozwikazve, izwi rokudakara, nerokudakadzwa, izwi romukwambo, neramakhoti, nemazwi eavo vanoemba, apo vanounza mudiro wokubonga kumhatso yaMambo Mwari, “ ‘Kubonga Mambo Mwari wehondo, ngokuti Mambo Mwari wakanaka; ngokuti nyasha dzake dzinorudo dzinogara mhera nariini!’ Ngokuti ndinozounza avo vakabatwa venyika iyi kuti vaite kudai ngepakutanga,” unoronza Mambo Mwari. Izvi ndizvo zvinoronza Mambo Mwari wehondo: “Mundau iyi yaita matongo isina munhu nokuti mhuka, nomumadhorobha ayo eshe, kunozoapo nemafuro vaushi, vechiita kuti zvifuyo zvavo zvizorore pashi. Mumadhorobha omunyika yezvimitunhu, neemubani, nomumadhorobha okubani, nomunyika yaBhenjamini, nomundau dzinotendenedza Jerusarema, nomumadhorobha aJudha, zvifuyo zvinozopinda ngepashi penyara youwo unodzierenga,” unoronza Mambo Mwari. “Ringira, ngegwinyiso mazuva anouya, unoronza Mambo Mwari, apo pendinozozadzisa chigondiso chendakagondisa mhatso yaIsuraeri nemhatso yaJudha. Mumazuva awo, nouwo mukuwo ndinozoita kuti Dai rokururama rikure kunaDhavhidha; naye unozotonga zvakanaka, nokururamisa munyika iyi. Mumazuva awo Judha unozoponeswa neJerusarema rinozogarisika mukungwaririka. Neiri ndiro zina raanozodaidzwa ndiro rokuti, ‘Mambo Mwari Ndiye Kururama kwedu.’ Ngokuti izvi ndizvo zvinoronza Mambo Mwari: Dhavhidha aatongozotami munhu wokugara padendemaro remhatso yaIsuraeri, nevapristi vaRevhi avatongozotami munhu wokuema pamberi pangu kupira midiro yokupira, nokupisha midiro yezviyo, nokupira midiro yokubaira nguva dzeshe.” Izwi raMambo Mwari rakauya kunaJeremia rechiti, “Izvi ndizvo zvinoronza Mambo Mwari: Kudai mwechikona kugura chitenderano changu chemasikati nechousiku, nokuita kuti kusaapo masikati nousiku ngomukuwo wazvo, zvino ndipo pega apo chitenderano changu nomuranda wangu Dhavhidha, chingaguka kuti asaano mukororo wokutonga padendemaro rake nechitenderano changu nevaRevhi, vevapristi, avo vanondishandira. Kudai ngehondo dzomudenga dzisikaerengeki, nejecha romuruandhle risikapimiki, ndizvo ndinozowanza mibarirwana yaDhavhidha muranda wangu neyevaRevhi avo vanondishandira.” Izwi raMambo Mwari rakauya kunaJeremia rechiti, “Auzi kunasa kuringira here zvevanoronza ava vanhu, apo pevanoti, ‘Madzinza mairi akatsanangurwa ndiMambo Mwari akarambwa ndiye,’ ndizvo vanoshoora vanhu vangu ngenjiranyi kuti vasachaita dzinza mukuona kwavo? Izvi ndizvo zvinoronza Mambo Mwari: Kwega kudai ndisikazi kuemesa chitenderano changu chemasikati nechousiku nezviemeso zvomudenga nezvomunyika, ndingazoramba mibarirwana yaJakobe, neyeDhavhidha muranda wangu, ndisatsanangura naumwe wemibarirwana yake kutonga padera pemibarirwana yaAbrahama, Isaka, naJakobe. Ngokuti ndinozopetudza vabatwa vavo nokuvaitira nyasha.” Izwi rakauya kunaJeremia kubva kunaMambo Mwari, apo Nebhukhadhineza mambo weBhabhuroni, nehondo yake yeshe, noumambo hweshe hwenyika nevanhu veshe pashi poumambo hwake, vairwisana neJerusarema namadhorobha aro eshe. “Izvi ndizvo zvinoronza Mambo Mwari, Mwari waIsuraeri echiti, ‘Enda uerekete kunaZedhekia mambo waJudha, wechimuronzera kuti, izvi ndizvo zvinoronza Mambo Mwari: Ringira, ndinozopa iri dhorobha munyara yamambo weBhabhuroni, naye unozoripisha ngomuriro.’ Newe pachako auzopokonyoki kubva munyara yake, asi ngegwinyiso unozobatwa nokupirwa munyara yake; unozoona mambo weBhabhuroni dziso kudziso, nokuereketa naye hope kuhope; newe unozoenda Bhabhuroni. Asi izwa izwi raMambo Mwari, O Zedhekia mambo waJudha; izvi ndizvo zvinoronza Mambo Mwari ngendaa yako: Auzofi ngeshoti, unozofa mukunyarara. Kudai ngezvekwaiya nokupishwa kwomutombo unegwema rakanaka kupishira madzibaba ako, madzimambo okutanga pamberi pako, ndizvo vanozoupishira iwewe; navo vanozokuchema vechiti, ‘Yoowe! Mambowee!’ Ngokuti ndaereketa izwi, unoronza Mambo Mwari.” Zvino Jeremia muprofeti wakaereketa mazwi aya eshe kunaZedhekia mambo waJudha muJerusarema, naapo hondo yamambo weBhabhuroni yechirwa neJerusarema, nemadhorobha eshe aJudha akasara, Rakhishi naAzeka; ngokuti aya ndiwo madhorobha aJudha akasara akashosherwa. Izwi iro rakauya kunaJeremia rechibva kunaMambo Mwari ngesure apo mambo Zedhekia aita chitenderano nevanhu veshe vomuJerusarema, kuronza kwevari ngokusunhurika, kuti munhu weshe asunhure hloko dzake vamuna nevakadzi vecheHebheru, kuti kusazoapo naumwe unozobatazve hama yake muJudha kumuita hloko. Navo vakapurutana vakuru veshe nevanhu veshe avo vakatenda chitenderano kuti munhu weshe umwe ngaumwe kuti vasunhure hloko dzavo, mwamuna nokuti mukadzi, kuti vachazoitazve hloko; vakapurutana, vakavasunhura. Asi ngesureni vakakunukuka, vakavatorazve vamuna nevakadzi kuvaita hloko avo vevaiya vasunhura nokuvaunzazve muuhloko. Izwi raMambo Mwari rakaguma kunaJeremia kubva kunaMambo Mwari: Izvi ndizvo zvinoronza Mambo Mwari, Mwari waIsuraeri: “Inini pachangu ndakaita chitenderano nemadzibaba enyu apo pendakavabudisa kubva munyika yeEgipite, kubva mumhatso youhloko ndecheti, ‘Reshe gore rechinomwe umwe ngaumwe wenyu unosisira kusunhura kunyazwi ngeuri muHebheru, uwo wakatengeswa kwomuri, naye akushandira makore matanhatu; unosisira kumusunhura kubva kumishando yako.’ Asi madzibaba enyu aazi kundipurutana nokuti kundizwa. Imwimwi pachenyu mwakatenderuka zvinopano, nemwi mwakaita zvakarurama mukuona kwangu, ngokudaidzira kusunhurika umwe kuneumweni wake; mwakaita chitenderano pamberi pangu mumhatso inodaidzwa ngezina rangu; asi zvino mwakapetuka sure nokusvipisa zina rangu, apo umwe ngaumwe wenyu paakatorazve mwamuna nomukadzi kuvaita hloko, avo vemwaiya mwasunhura kudai ngokudisisa kwavo, mukavaunzazve pashi pouhloko. Ndizvo izvi ndizvo zvinoronza Mambo Mwari: Amuzi kundipurutana ngokuisa kusunhurwa, umwe ngaumwe kuhama yake nokumungani wake; ringira, ndinozoisa kusunhurwa kwomuri, unoronza Mambo Mwari, kusunhurwa kweshoti, kwedenda, nokwenzara. Ndinozomuita chiro chinotyisa kuumambo hweshe hwenyika. Naavo vanhu vakagura chitenderano changu, avo vasikazi kuita mazwi echitenderano chevakaita pamberi pangu, ndinozovaita kudai ngekonyana apo pevakariita zvigurwa zviiri, nokuhamba ngepakati pezvigurwa zvaro. Vakuru vaJudha, vakuru veJerusarema, vathenwa, vapristi, nevanhu veshe venyika, avo vakapinda ngepakati pezvigurwa zvekonyana, ndinozovapira munyara dzemagaa avo, nomunyara yaavo vanotsvaka kuvauraya. Miiri yavo yakafa inozodyiwa ngeshiri dzomudenga nezvikara zvenyika. Ndinozopira Zedhekia mambo waJudha nevatongi vake munyara dzemagaa avo nomunyara dzaavo vanotsvaka kuvauraya, nomunyara dzehondo yamambo weBhabhuroni, avo vabva kwomuri. Ringira, ndinozopanga, unoronza Mambo Mwari, naye unozovapetudza kuiri dhorobha; navo vanozorirwisa nokuritora, nokuripisha ngomuriro. Madhorobha aJudha ndinozoaita matongo, asina unogaremwo.” Izwi raMambo Mwari rakauya kunaJeremia rechibva kunaMambo Mwari, ngemazuva amambo Jehoiakimu mukororo waJosia waJudha rechiti, “Enda kumhatso yevaRekhabhi, uerekete navo nokuvaunza kumhatso yaMambo Mwari, kunerimwe remakamera, uvape vhini kuti vamwe.” Ndizvo ndakatora Jaazania mukororo waJeremia, mukororo waHabhazinia, nehama dzake nevakororo vake veshe, navo veshe vemhatso yevaRekhabhi. Ndakavaunza mumhatso yaMambo Mwari, mukamera revakororo vaHanani, mukororo waIgidharia, munhu waMwari, iro raiya pasinde pekamera revatongi, padera pekamera raMaaseia mukororo waSharumu, mungwariri womusiwo. Zvino ndakaisa pamberi pevakororo vevaRekhabhi hari dzakazara ngevhini, netsani, ndikati kwevari, “Imwai vhini.” Asi vakati, “Atimwi vhini, ngokuti madzibaba edu Jonadhabhi mukororo waRekhabhi, wakatipanga echiti, ‘Amuzomwi vhini, imwimwi nokuti vana venyu mhera nariini; nokuti amuzoaki mhatso nokuti kukusha mbeu, nokuti kunyazwi kusima munda wemivhini, nokuti kunyazwi kuwa nachimwe chazvo; asi munozogara mumatende mazuva enyu eshe, kuti mupone mazuva akawanda munyika yomunogara.’ Tapurutana kupanga kwezibaba redu Jonadhabhi mukororo waRekhabhi mune izvo zveshe zvaakatipanga, kuti tisamwa vhini mumazuva edu eshe, isusu, nokuti vakadzi vedu, vakororo nokuti vanasikana vedu, nokuti kuaka mhatso dzokugaramwo. Atina munda wemivhini, nokuti munda, nokuti mbeu; asi tagara mumatende, nokupurutana nokuita zveshe zvaakatipanga Jonadhabhi baba edu. Asi apo Nebhukhadhineza mambo weBhabhuroni paakauya koorwisa nyika, takati, ‘Uyai, ngatiende Jerusarema, ngokuti tinotya hondo yevaKharadhea nehondo yevaAramu.’ Ndiyo ndaa techigara muJerusarema.” Zvino izwi raMambo Mwari rakauya kunaJeremia rechiti, “Izvi ndizvo zvinoronza Mambo Mwari wehondo, Mwari waIsuraeri: Enda, wooronza kuvanhu vaJudha nevagari vomuJerusarema kuti, ‘Amukoni kudzidza here chidzidzo nokupurutana mazwi angu?’ Unoronza Mambo Mwari. ‘Mupango wakazadzisika uwo Jonadhabhi mukororo waRekhabhi waakapanga kumibarirwana yake kuti vasamwa vhini; navo avazi kumwa narimwe metsa nyamashi, ngokuti vakapurutana mupango wababa avo. Asi inini pachangu ndakaangira kuereketa kwomuri, neimwimwi amuzi kupurutana kwendiri. Ndatumira kwomuri veshe varanda vangu vaprofeti, ndechiangira kuvatumira ndechiti, tenderukai zvino munhu weshe kubva kunjira yake yakashata, munasirise zviito zvenyu, murekere kuteera zvimwari zvimweni kuzvidira, nemwi zvino munozogara muiyi nyika yendakamupa, imwimwi nemadzibaba enyu.’ ” Asi amuzi kutenda kuzwa nokuti kundipurutana. Mibarirwana yaJonadhabhi mukororo waRekhabhi vakapurutana mupango uwo wevakapuwa ndibaba avo; asi vanhu ava avazi kupurutana kwendiri. “Ndizvo izvi zvinoronza Mambo Mwari, Mwari wehondo, Mwari waIsuraeri: Ringirai, ndinozounza padera paJudha, nepadera paavo veshe vagari veJerusarema kushata kweshe kwendakaronza kwevari; ngokuti ndakaereketa kwevari, navo avazi kupurutana, ndakadaidza kwevari, navo avazi kupingura.” Asi kumhatso yevaRekhabhi Jeremia wakati, “Izvi ndizvo zvinoronza Mambo Mwari wehondo, Mwari waIsuraeri: ‘Ngokuti mwakapurutana mupango waJonadhabhi baba enyu, nokungwarira zviemeso zvake zveshe, mukaita zveshe zvaakamupanga,’ Izvi ndizvo zvinoronza Mambo Mwari wehondo, Mwari waIsuraeri: ‘Jonadhabhi mukororo waRekhabhi aazotami mubarirwana wokuema pamberi pangu mhera nariini.’ ” Mugore rechirongomuna Jehoiakimu mukororo waJosia raaiya mambo waJudha, izwi iri rakauya kunaJeremia rechibva kunaMambo Mwari rechiti, “Tora bhuku rinopetwa, unyore mukati mwaro eshe mazwi endakaereketa kwouri ndiIsuraeri naJudha, nemadzinza eshe kubvira pazuva rendakaereketa kwouri, kubvira pamazuva aJosia metsa nyamashi. Pamweni vemhatso yaJudha pevanozwa kweshe kushata kwendakaronga kuita kwevari, veshe umwe ngaumwe wavo ungatenderuka kubva kunjira yake yakashata, kuti ndikone kurekerera kushata kwavo nezvishaishi zvavo.” Zvino Jeremia wakadaidza Bharukhi mukororo waNeria, naBharukhi wakanyora pabhuku rinopetwa mazwi eshe aMambo Mwari kubva kumuromo waJeremia. NaJeremia wakapanga Bharukhi echiti, “Ndakakonyerwa, kuti ndisakona kupotera mumhatso yaMambo Mwari. Ndizvo iwewe pachako enda, nepazuva rokuyera kudya, udaidzire mazwi aMambo Mwari munzee dzavanhu, mumhatso yaMambo Mwari, kubva pabhuku rinopetwa pewanyora, mazwi anobva pamuromo wangu. Unozoadzidza mukuzwa kwevanhu veshe vaJudha, avo vakwira kubva kumadhorobha avo. Pamweni vanozouya koopota kunaMambo Mwari nokutenderuka, umwe ngaumwe kubva kunjira yake yakashata, ngokuti kutseneka noushungu hwakashata zvaakaronza Mambo Mwari kunevanhu ava zvikuru.” NaBharukhi mukororo waNeria wakaita zveshe izvo zvaakamupanga Jeremia muprofeti, kudzidza kubva mubhuku rinopetwa mazwi aMambo Mwari mumhatso yaMambo Mwari. Mugore rechishanu ramambo Jehoiakimu, mukororo waJosia, mambo waJudha, mumwedzi wechipfumbamwe, vanhu veshe vomuJerusarema nevevanhu veshe avo vakauya kubva kumadhorobha aJudha vechiuya Jerusarema vakadaidzira zuva rokuera kudya pamberi paMambo Mwari. Zvino mukuzwa kwevanhu veshe, Bharukhi wakafunda mazwi aJeremia kubva mubhuku rinopetwa, mumhatso yaMambo Mwari, mukamera raGemaria mukororo waShafani munyori, iro raiya paruwanze rwepadera pokupinda ndipo paMusiwo Mutsva wemhatso yaMambo Mwari. Naapo Mikhaia mukororo waGemaria, mukororo waShafani, azwa mazwi eshe aMambo Mwari kubva mubhuku rinopetwa, wakadzaka kumhatso yamambo mukamera romunyori; ringira, vatongi veshe vaiya vakagaramwo, Erishama munyori, naDheraia mukororo waShemaia, naErinathani mukororo waAkhebhori, Gemaria mukororo waShafani, Zedhekia mukororo waHanania, nevatongi veshe. NaMikhaia wakavaronzera mazwi eshe awo aakazwa, apo Bharukhi paakafunda bhuku rinopetwa mukuzwa kwevanhu veshe. Zvino vatongi veshe vakatuma Jehudhi mukororo waNethania, mukororo waSheremia, mukororo waKhushi kunaBharukhi vechiti, “Tora munyara yako iri bhuku rinopetwa iro rewakafunda mukuzwa kwevanhu veshe, uuye.” Ndizvo Bharukhi mukororo waNeria wakatora bhuku iro munyara yake, akauya kwevari. Navo vakati kwaari, “Gara pashi, urifunde kwetiri tizwe.” Ndizvo Bharukhi wakarifunda kwevari. Naapo vazwa mazwi eshe, vakakunukira umwe kunoumweni vechikaruka, vorovoti kunaBharukhi, “Ngegwinyiso tinozoronzera mambo ngaaya mazwi eshe.” Zvino vakabvunza Bharukhi kuti, “Tironzere zvino, wakaita manyorerenyi mazwi aya eshe? Kubva kumuromo wake here?” Bharukhi wakavapingura echiti, “Iye wakaereketa mazwi aya eshe kwendiri, neni ndakaanyora ngeinki mubhuku rinopetwa.” Zvino vatongi vakati kunaBharukhi, “Enda, woohwara, iwewe naJeremia; musazoronzera nomunhu ngepomuri.” Vatongi vakaisa bhuku rinopetwa mukamera raErishama munyori, vakapotera muruwanze rwamambo; vakaronza mazwi eshe munzee dzamambo. Zvino mambo wakatuma Jehudhi kootora bhuku rinopetwa, naye wakaritora kubva mukamera raErishama munyori; naJehudhi wakarifunda munzee dzamambo, nomunzee dzevatongi veshe vaiya vakaema namambo. Zvino mambo waiya akagara mumhatso yepachando ngomwedzi wechipfumbamwe, nomuriro waiya wechibaka pachoto pamberi pake. Naapo Jehudhi afunda marupande matatu nokuti marongomuna, mambo wairicheka ngechipanga, echikandira mumuriro pachoto, metsa bhuku reshe rakatsva ngomuriro waiya muchiwenda. Asi apana naumwe wavo, mambo nokuti umwe wevaranda vake wakazwa mazwi aya eshe wakashamiswa nokuti wakatatura zvokusimira zvake. Kunyazwi Erinathani, Dheraia, naGemaria vakapota mambo, kuti asapisha bhuku, asaizoda kuvapurutana. Namambo wakapanga Jerameeri mukororo wamambo, Seraia mukororo waAzirieri, naSheremia mukororo waAbhidheeri, kubata Bharukhi munyori nomuprofeti Jeremia. Asi Mambo Mwari wakavafisha. Zvino Mambo apedza kupisha bhuku, nemazwi akanyorwa ndiBharukhi kubva pamuromo waJeremia, izwi raMambo Mwari rakauya kunaJeremia rechiti, “Torazve bhuku rinopetwa, unyore mukati mwaro mazwi eshe okutanga aiya mubhuku rinopetwa rokutanga, raakapisha Jehoiakimu mambo waJudha. Newe unozoti kunaJehoiakimu, ‘Mambo Mwari unoronza izvi: Washinga kupisha bhuku iri wechiti, wainyora ngenyi, kuti mambo weBhabhuroni ngegwinyiso unozouya nokuparadza nyika iyi, unozoita kuti iteme munhu nemhuka?’ Ndizvo izvi ndizvo zvinoronza Mambo Mwari ngendaa yaJehoiakimu mambo waJudha: Aazowi naumwe unozogara padendemaro raDhavhidha, nomuiri wake wakafa unozokandirwa kubanze mukupisha kwemasikati nomuchando usiku. Neni ndinozomuorora, nemibarirwana yake nevaranda vake ngendaa yokushata kwavo; ndinozounza padera pavo, nepadera pevagari vomuJerusarema, nepadera pevanhu vaJudha, kushata kweshe kwendakaronza kwevari; asi avazi kupurutana.” Zvino Jeremia wakatora bhuku rinopetwa rimweni akaripa kunaBharukhi munyori, mukororo waNeria; uwo wakanyora mukati mwaro, kubva kumuromo waJeremia, mazwi eshe ebhuku iro rakapishwa mumuriro ndiJehoiakimu mambo waJudha; kwakatutsirwa kwaari mazwi amweni mazhinji akadai ngokutanga. Zedhekia mukororo waJosia wakaitwa mambo munyika yaJudha ndimamboNebhukadhineza mambo weBhabhuroni pandau yaKhonia mukororo waJehoiakimu. Asi kunyazwi iye nokuti varanda vake, nokuti vanhu venyika iyi avazi kupurutana mazwi aMambo Mwari, aakaereketa ngomuromo womuprofeti Jeremia. Zedhekia mambo wakatuma Jehukari mukororo waSheremia, nomupristi Zefania mukororo waMaaseia, kunaJeremia muprofeti echiti, “Tapota tikumbirire kunaMambo Mwari, Mwari wedu.” Zvino Jeremia waiya achapinda nokubuda pakati pevanhu, ngokuti waiya asati aiswa mutirongo. Panguva iyo hondo yaFaro yaiya yabuda kubva Egipite; naapo vaKharadhea vaiya vakomba Jerusarema vazwa mashoko ndivo, vakaenda kubva Jerusarema. Zvino izwi raMambo Mwari rakauya kunomuprofeti Jeremia rechiti, “Izvi ndizvo zvinoronza Mambo Mwari, Mwari waIsuraeri: Izvi ndizvo zvomunozoronza imwimwi vairi kuna mambo waJudha uwo wakamutuma kwendiri kundibvunza; ringirai, hondo yaFaro iyo yakabuda kumudetsera inozopetuka kunyika yayo Egipite. NevaKharadhea vanozopetuka nokurwisa iri dhorobha; vanozorinyisa nokuripisha ngomuriro. Izvi ndizvo zvinoronza Mambo Mwari: Musadzichengedzera mwechiti, ‘VaKharadhea vanozobva kwetiri ngegwinyiso,’ ngokuti avazobvi akadi. Kunyazwi mukanyisa hondo yeshe yevaKharadhea, iyo inorwa nemwi, apo panozosara vamweni vavo vakaremadzwa mumatende avo, vanozomiruka umwe ngaumwe kubva kutende rake, nokupisha dhorobha iri ngomuriro.” Zvino apo hondo yevaKharadhea yaduswa kubva Jerusarema, pakuguma kwehondo yaFaro, Jeremia wakabuda kubva Jerusarema, akaenda kunyika yaBhenjamini, kuti aashire chikoaniswa chake kubva pakati pevanhu. Naapo aguma paMusiwo Bhenjamini, nduna yokurinda yaiyapo, zina rake ndiIrija, mukororo waSheremia, mukororo waHanania, wakabata Jeremia muprofeti echiti, “Iwewe unotizira kuvaKharadhea.” Ndizvo Jeremia wakati, “Awo manyepo, andiendi kooiyana nevaKharadhea.” Asi Irija aazi kumupurutana, naye wakabata Jeremia, akamuunza kuvatongi. Vatongi vakamutsenekera Jeremia, vakamuchaya, vakamukonyera mutirongo mumhatso yaJonathani munyori; ngokuti vaiya vaiita tirongo. Ndizvo Jeremia wakapinzwa mutirongo mukamera rakatsiwa pashi, wakagaramwo mazuva mazhinji. Zvino Zedhekia mambo wakatumira izwi kuti abudiswe nokumuashira. Mambo wakamubvunza ngokufishika mumhatso echiti, “Riripo here izwi rabva kunaMambo Mwari?” Jeremia wakati, “Riripo.” Zvino wakati, “Unozopirwa munyara yamambo weBhabhuroni.” Jeremia wakatiwo kunamambo Zedhekia, “Chiinyi chendakakushaishira iwewe nokuti varanda vako, nokuti ava vanhu kuti undikonyere mutirongo? Vari pari zvino vaprofeti venyu vakaprofeta kwomuri vechiti, ‘Mambo weBhabhuroni aazouyi koorwa nemwi, nokuti kurwa neiyi nyika?’ Zvino, ndapota, ndizwei, O mambo wangu; kupota kwangu ngakuashirike pamberi penyu, ndapota, kuti musaita kuti ndihwirire kumhatso yaJonathani munyori, kuti ndifireyo.” Ndizvo Zedhekia mambo wakapanga kuti vaunze Jeremia muruwanze rwevarindi, nokumupa mazuva eshe chingwa kubva kumhatso dzevabiki, metsa zvingwa zveshe zvomudhorobha zvapera. Ndizvo Jeremia wakagara muruwanze rwevarindi. Zvino Shefatia mukororo waMatani, naGedharia mukororo waPhashuri, Jukari mukororo waSheremia, naPhashuri mukororo waMarikhia vakazwa mazwi eshe aakaereketa Jeremia kuvanhu veshe vechiti, “Izvi ndizvo zvinoronza Mambo Mwari: Avo vanogara mudhorobha iri vanozofa ngeshoti, ngenzara, nedenda: asi avo vanobuda kuenda kuvaKharadhea vanozopona; nokupona kwavo kunozoitwa kudai ngechakapambwa kuhondo, navo vanozopona. Izvi ndizvo zvinoronza Mambo Mwari: ‘Ngechokwadi dhorobha iri rinozopuwa munyara yehondo yamambo weBhabhuroni, nayo inozorinyisa.’ ” Zvino vatongi vakati kunamambo, “Munhu uyu unosisira kuti aurawe, ngokuti unopedza simba renyara dzevamuna vokurwa vanosiyiwa mudhorobha iri, nenyara dzavanhu veshe, ngokuereketa mazwi akadai kwevari. Ngokuti munhu uyu aatsvaki kugarisika kwavanhu ava, asi kuremadzwa kwavo.” Mambo Zedhekia wakati, “Ringirai, uri munyara dzenyu; ngokuti mambo aana simba rokuphikisana nemwi.” Ndizvo vakatora Jeremia, vakamukandira murindi rakaoma raMarikhia mukororo wamambo, raiya muruwanze rwevarindi; navo vakadzasa Jeremia ngetambo. Murindi mwaiya musina mvura, asi matope ega; ndizvo Jeremia wakanzvaira mumatope. Ebhedhimerekhi muEthiopia, mutenwa mumhatso yamambo, azwa kuti Jeremia waiswa murindi. Mambo ngouwo mukuwo waiya akagara paMusiwo Bhenjamini. Ndizvo Ebhedhimerekhi wakabuda kubva kumhatso yamambo, akaereketa kunamambo echiti, “Mambo wangu, mambo, vanhu ava vaita zveshe zvakashata kunaJeremia muprofeti ngokumukandira murindi, kuti afiremwo ngenzara, ngokuti akuchina kudya mudhorobha.” Zvino mambo wakapanga Ebhedhimerekhi muEthiopia echiti, “Tora vamuna vatatu kubva panapa, uende navo mubudise muprofeti Jeremia kubva murindi, asati afa.” Ndizvo Ebhedhimerekhi wakatora vamuna kuenda navo, vakaenda kumhatso yamambo pashi pendau youpfumi, vakatorapo matembwe nematsoto, akaadzasa ngetambo murindi munaJeremia. Zvino Ebhedhimerekhi muEthiopia wakati kunaJeremia, “Isa matembwe nematsoto pakati pemagwapa ako netambo.” NaJeremia wakaita kudaro. Zvino vakakweya Jeremia ngetambo, vakamubudisa kubva murindi. Jeremia wakagara muruwanze rwevarindi. Mambo Zedhekia wakatumira kootora Jeremia muprofeti naye wakamuashira pamusiwo wechitatu, uwo uri mumhatso yaMambo Mwari. Mambo wakati kunaJeremia, “Ndine chiro chokubvunza; usandifishira chiro nachimwe.” Jeremia wakati kunaZedhekia, “Kuti ndikakuronzera, unozondiuraya, andizvopi here? Nokuti ndikakupanga, auzondipurutani.” Ndizvo mambo Zedhekia wakapika ngokufishika kunaJeremia echiti, “Kudai ngezvaanopona Mambo Mwari, uwo wakatisika unotipa kupona kwedu, andizokuurayi nokuti kukupa munyara mwevanhu avo vanotsvaka kukuuraya.” Zvino Jeremia wakati kunaZedhekia, “Izvi ndizvo zvinoronza Mambo Mwari, Mwari wehondo, Mwari waIsuraeri: Kudai wechizodzipira kwega kuvatongi vamambo weBhabhuroni, unozopona, nedhorobha iri arizopishwi ngomuriro; iwewe unozopona nevemhatso yako. Asi kudai usikazodzipiri kuvatongi vamambo weBhabhuroni, dhorobha iri rinozopirwa munyara yevaKharadhea, navo vanozoripisha ngomuriro, newe auzopokonyoki kubva munyara yavo.” Mambo Zedhekia wakati kunaJeremia, “Ndinotya vaJudha avo vakadzipira kuvaKharadhea, kuti vanozondipira munyara dzavo, navo vanozondiitira zvakashata.” Jeremia wakati, “Izvo azvizoitiki. Purutana izwi raMambo Mwari muneizvo zvendinokuronzera, nazvo zvinozokunakira, newe unozopona. Asi kudai wechiramba kudzipira, izvi ndizvo zvaakandionisa Mambo Mwari: Ringira, chioniso chevakadzi veshe vakasara mumhatso yamambo waJudha vanozotorwa kuenda kuvatongi vamambo weBhabhuroni, vanozoti, ‘Vangani vako vakagondeka vakuchengedzera, vakunyisa; ndizvo tsoka dzako dzanzvaira mumatope, navo vakufuratira.’ Vakadzi vako veshe navana vako vanozotungamirirwa kuenda kuvaKharadhea, newe auzobudi kubva munyara dzavo, asi unozobatwa ngenyara dzamambo weBhabhuroni, nedhorobha iri rinozopishwa ngomuriro.” Zvino Zedhekia wakati kunaJeremia, “Usaronzera munhu naumwe mazwi aya, newe auzofi. Kuti vatongi vakazwa kuti ndaereketa newe, vakauya kwouri vechiti, ‘Tiziise zvewaronza kunamambo, nezvaakuronzera mambo; usatifishira, nesu atizokuurayi,’ zvino unozoti kwevari, ‘Ndapota kunamambo kuti asandihwirinza kumhasto yaJonathani, kuti ndifireyo.’ ” Vatongi veshe vakauya kunaJeremia, vakamubvunza; naye wakavapingura kudai ngamazwi eshe aakapangwa ndimambo. Ndizvo vakanyarara kumubvunza, ngokuti indaa isaiziikanwa. NaJeremia wakagara muruwanze rwevarindi metsa zuva rerakatorwa Jerusarema. Mugore rechipfumbamwe rokutonga kwaZedhekia mambo waJudha, mumwedzi wegumi, Nebhukhadhineza mambo weBhabhuroni nehondo yake yeshe wakauya koorwisana neJerusarema nokurikomba. Mugore regumi narimwe rokutonga kwaZedhekia, mumwedzi wechirongomuna, ngezuva rechipfumbamwe romwedziwo, rusvingo rwedhorobha rwakapwanyirwa pashi. Apo perakatorwa Jerusarema, vatongi veshe vamambo weBhabhuroni vakapotera, vakagara pamusiwo uri pakati: Negarisharezeri, Samugarinebho, Sarisekhimu muRabhisarisi, Negarisharezeri muRabhimagi, nevamweni veshe vevatongi vamambo weBhabhuroni. Naapo Zedhekia mambo waJudha nevarwi veshe vakavaona, vakatiza kubuda kubanze kwedhorobha usiku ngenjira yomumunda wamambo, ngepamusiwo waiya pakati pemarukumbati mairi; navo vakaenda ngenjira yeArabha. Asi hondo yevaKharadhea yakavarumbirira, ikabata Zedhekia murubaya rweJerikho; naapo vamubata vakamuunza kunaNebhukhadhineza mambo weBhabhuroni paRibra, munyika yeHamathi, naye wakamutonga. Mambo weBhabhuroni wakauraya vakororo vaZedhekia paRibra mukuona kwake; mambo weBhabhuroni wakaurayawo veshe vakuru vaJudha. Wakatumbura madziso aZedhekia, akamusunga ngemanguri, akamutwara kuenda naye Bhabhuroni. VaKharadhea vakapisha mhatso yamambo nemhatso dzevanhu ngomuriro; vakaputsira pashi marukumbati eJerusarema. Zvino Nebhuzaradhani nduna yevarindi wakatora kuenda Bhabhuroni veshe vevanhu, avo vakasiyiwa mudhorobha, kuvaita vabatwa, naavozve vakatiza kuenda kwaari, pamwepo nevanhu vakasaramwo. Nebhuzaradhani nduna yevarindi wakasiya munyika yaJudha vamweni vevanhu varombo vasina chiro, naye wakavapa minda yemivhini neminda imweni ngomukuwo umwewo. Mambo Nebhukhadhineza weBhabhuroni wakapanga Nebhuzaradhani nduna yevarindi ngendaa yaJeremia echiti, “Mutore, umungwarire, usamuremadza; asi ita kwaari zvaanozokumbira kwouri.” Ndizvo Nebhuzaradhani nduna yevarindi, naNebhushazibhani muRabhisarisi, naNegarisharezeri muRabhimagi, nevakuru veshe vamambo weBhabhuroni, vakatuma, vakabudisa Jeremia kubva muruwanze rwevarindi. Vakamupira kunaGedharia mukororo waAhikamu mukororo waShafani kuti aunzwe kanyi. Ndizvo wakagara nevanhu vake. Izwi raMambo Mwari rakauya kunaJeremia, apo achakakonyerwa muruwanze rwevarindi rechiti, “Enda, uerekete kunaEbhedhimerekhi muEthiopia wechiti, ‘Izvi ndizvo zvinoronza Mambo Mwari wehondo, Mwari waIsuraeri: Ringira, ndichaitira dhorobha iri kudai ngemazwi angu, ndinozounza kushata padera paro, haiwa kunaka, nazvo zvinozoitika pamberi pako ngeiro zuva. Asi ndinozokuponesa ngeiro zuva, unoronza Mambo Mwari, auzopirwi munyara dzavanhu vounotya. Ngokuti ngegwinyiso ndinozokuponesa, newe auzofi ngeshoti; asi kupona kwako kunozoitwa kudai ngechakapambwa kuhondo, ngokuti wakagonda mwendiri,’ ” unoronza Mambo Mwari. Izwi rakauya kunaJeremia rechibva kunaMambo Mwari, ngesure kwokusunungurwa kwake kuti aende kubva Rama ndiNebhuzaradhani nduna yevarindi, apo akamutora akasungwa ngemanguri pakati paavo veshe vakatorwa kuitwa vabatwa veJerusarema neveJudha, avo vakatorwa kuenda Bhabhuroni kooizwa vabatwa. Nduna yevarindi yakatora Jeremia, ikati kwaari, “Mambo Mwari, Mwari wako, wakaronza uku kushata ngendau iyi; nazvino Mambo Mwari wakuunza pano, naye waita kudai ngezvaakaronza, ngokuti imwimwi mweshe mwakashaisha kunaMambo Mwari, nemwi amuzi kupurutana izwi rake. Ndizvo izvi zviro zvawira padera penyu. Zvino ringirai, ndakusunhura nyamashi maketani aiya panyara dzako. Kudai wechida kuenda neni kuBhabhuroni, uya, neni ndinozokungwarira; asi kuti usikadi kuenda neni Bhabhuroni, usauya. Ringira, nyika yeshe iripo pamberi pako, enda kunyazwi ngokuri kwounoona kwakanaka nokururama, endeyo. Kuti wasara, zvino petuka kunaGedharia mukororo waAhikamu mukororo waShafani, uwo wakaizwa mutongi padera pemadhorobha aJudha ndimambo weBhabhuroni, ugare naye pakati pevanhu; nokuti uende kwounopinimidza kuti kwakakunakira kuti uende.” Ndizvo nduna yevarindi yakamupa chikoaniswa chezvokudya nechipo, ikamutendera kuti aende. Zvino Jeremia wakaenda kunaGedharia mukororo waAhikamu paMizipha, akagara naye pakati paavo vanhu vakasiiwa munyikamwo. Naapo nduna dzeshe dzehondo dzaiya murubaya, nezvikwata zvadzo, dzazwa kuti mambo weBhabhuroni waiya aemesa Gedharia mukororo waAhikamu kuti aite mutongi munyika, naye wakaemesa kwaari vamuna, vakadzi nevana, varombo venyikeyo, avo vasikazi kutorwa kuitwa vabatwa kuBhabhuroni, vakaenda kunaGedharia paMizipha, ndivo ava: Ishumaeri mukororo waNethania, naJohanani mukororo waKarea, Seraia mukororo waThanhumethi, vakororo vaEfai muNetofa, naJezania mukororo wamuMaakathi, ivo nezvikwata zvavo. Gedharia mukororo waAhikamu mukororo waShafani wakapika kwevari nokune zvikwata zvavo echiti, “Musatya kushandira vaKharadhea. Garai munyika muno, mwechishandira mambo weBhabhuroni, nemwi munozogarisika. Asi inini, ringira, ndinozogara Mizipha kuemerera imwimwi pamberi pevaKharadhea avo vanouya kwetiri; asi imwimwi unganidzai mavhini nemichero yezienza nemafuta, mwechizvingwarira muzvidziyo zvenyu, mwechigara mumadhorobha enyu emwakatora.” Zvakadarawo, apo vaJudha veshe vaiya muMoabhi nepakati pevaAmoni, naavo vaiya muEdhomu nomunyika dzimweni, vazwa kuti mambo weBhabhuroni wakasiya rupande rwevanhu vaJudha, nokuti waiya aemesa padera pavo Gedharia mukororo waAhikamu mukororo waShafani kuita mutongi wavo, zvino vaJudha veshe vakahwirira kubva kundau dzeshe dzevakadzingirwa, vakauya kunyika yaJudha, kunaGedaria, paMizipha, navo vakaunganidza mavhini nemichero yezienza zvakawanda. Zvino Johanani mukororo waKarea nenduna dzeshe dzehondo dzaiya murubaya dzakauya kunaGedharia paMizipha, dzikati kwaari, “Ngegwinyiso munonasa kuzia here kuti Bhaarisi mambo wevaAmoni wakatuma Ishumaeri mukororo waNethania kukuuraya?” Asi Gedharia mukororo waAhikamu aazi kuvagonda. Zvino Johanani mukororo waKarea wakaereketa ngokufishika kunaGedharia paMizipha echiti, “Nditendere ndiende, ndapota, kuti ndiuraye Ishumaeri mukororo waNethania, apana naumwe unozozvizia. Ngenyi echida kukuuraya, kuti vaJudha veshe vakaungana kwouri vaparadzwe, naavo vakasara vevaJudha vapere?” Asi Gedharia mukororo waAhikamu wakati kunaJohanani mukororo waKarea, “Usaita ichi chiro, ngokuti unoereketa manyepo ndiIshumaeri.” Mumwedzi wechinomwe Ishumaeri mukororo waNethania mukororo waErishama worudzi rwoumambo, umwe wenduna huru dzamambo, wakauya pamwepo nevamuna gumi, paMizipha kunaGedharia mukororo waAhikamu. Apo vechidya kudya pamwepo paMizipha, Ishumaeri mukororo waNethania navanhu gumi vaiya naye vakamiruka, navo vakabaya Gedharia mukororo waAhikamu mukororo waShafani ngeshoti, vakamuuraya, ngokuti mambo weBhabhuroni wakamuemesa kuti aite mutongi munyika. Ishumaeri wakaurayawo nevaJudha veshe vaiya naGedharia paMizipha, nevaKharadhea ava vaiyapo, vaiya varwi vehondo. Ngezuva rechipiri, ngesure kwokuurawa kwaGedharia, pasina waichizia vanhu makumi masere vakauya vechibva Shekhemu, Shiro neSamaria, nezvirebvu zvavo zvakaparwa nezvokufuka zvavo zvakabaurwa, miiri yavo yakachekwa, vanemidiro yezviyo nemitombo inegwema munyara dzavo, kuti vazviunze kumhatso yaMambo Mwari. NaIshumaeri mukororo waNethania wakabuda kubva Mizipha kooshongana navo, echichema apo paaiuya. Naapo ashongana navo, wakati kwevari, “Uyai kunaGedharia mukororo waAhikamu.” Naapo vaguma pakati pedhorobha, Ishumaeri mukororo waNethania naavo vaiya naye vakavauraya, vakavakandira murindi. Asi vaiyapo vamuna gumi vakati kunaIshumaeri, “Usatiuraya, ngokuti tine upfumi hwekoroni, hwebhare, mafuta, nehwouchi hwakafishwa muminda.” Ndizvo wakavarekerera, aazi kuvauraya pamwepo nevangani vavo. Murindi umwo Ishumaeri waakakandira miiri yevanhu veshe vaakauraya, pamwepo nomuiri waGedharia, ndiwo wakanasirwa ndimambo Asa ngekutya Bhaasha mambo weIsuraeri; Ishumaeri mukororo waNethania wakauzadza ngemiiri yevaakauraya. Zvino Ishumaeri wakatora vanhu veshe vakasara muMizipha, wakavaita vabatwa, vanasikana vamambo nevanhu veshe vakasara muMizipha, avo vaakapa Nebhuzaradhani nduna yevarindi kunaGedharia mukororo waAhikamu. Ishumaeri mukororo waNethania wakavatora kuenda navo kuvaAmoni vari vabatwa. Asi apo Johanani mukororo waKarea nenduna dzeshe dzehondo dzaiya naye vakazwa kushata kweshe kwakaitwa ndiIshumaeri mukororo waNethania, vakatora vanhu veshe vavo, vakaenda koorwa naIshumaeri mukororo waNethania, navo vakamuona ari pagandwa gurutu iro riri muGibheoni. Naapo vanhu veshe vaiya naIshumaeri vakaona Johanani mukororo waKarea nenduna dzeshe dzehondo dzaiya naye, vakadakara. Ndizvo vanhu veshe vaakatora Ishumaeri kubva Mizipha kuita vabatwa vakatenderuka, vakahwirira kuenda kunaJohanani mukororo waKarea. Asi Ishumaeri mukororo waNethania wakapokonyoka kubva kunaJohanani, anevamuna vasere, akaenda kuvaAmoni. Zvino Johanani mukororo waKarea nenduna dzeshe dzehondo dzaiya naye vakatora vanhu veshe avo vaiya vakabatwa (varwi vehondo, vakadzi, vana, nemithenwa, avo vaakapetudza Johanani kubva Gibheoni, nokutorwa ndiIshumaeri mukororo waNethania, kuitwa vabatwa kubva Mizipha, apo apedza kuuraya Gedharia mukororo waAhikamu.) Navo vakaenda, vakaema pandau yaizwi Geruthikhimhamu iri pasinde peBhetherehema, vechida kuenda Egipite ngendaa yevaKharadhea; ngokuti vaivatya, ngendaa yaIshumaeri mukororo waNethania waiya auraya Gedharia mukororo waAhikamu, uwo wakaemeswa kuita mutongi munyika iyi ndimambo weBhabhuroni. Zvino nduna dzeshe dzehondo, naJohanani mukororo waKarea, naJezania mukororo waHoshaia, nevanhu veshe kubvira pamudoko kuguma kumukuru, vakauya pasinde, vakati kunaJeremia muprofeti, “Ita wakanaka, upurutane kupota kwedu, newe utikumbirire kunaMambo Mwari, Mwari wako, kukumbirira veshe vakasara. Ngokuti takasiiwa tiri vashomani pavazhinji vedu, kudai ngezvinoona madziso ako. Mambo Mwari, Mwari wako, ngaationese kwetinosisira kuenda nezvetinosisira kuita.” Jeremia muprofeti wakati kwevari, “Ndamuzwa; ringirai, ndinozokumbira kunaMambo Mwari, Mwari wenyu, kudai ngamazwi enyu; kunyazwi chiinyi chaanozomupingura Mambo Mwari, ndinozochironza kwomuri; andizomufishiri chiro.” Naapo mukupingura kwavo vakati kunaJeremia, “Mambo Mwari ngaaite chapupu chegwinyiso nechinogondeka pakati pedu, kuti tikarekera kuita kudai ndizvo zveshe izvo zvaanozotitumira kubudikidza ndiwe Mambo Mwari, Mwari wako. Kunyazwi zvakanaka nokuti zvakashata, tinozopurutana izwi raMambo Mwari, Mwari wedu, uwo wetinokutuma kwaari, kuti zvitinakire, apo petinozopurutana izwi raMambo Mwari, Mwari wedu.” Pamagumo emazuva gumi, izwi raMambo Mwari rakauya kunaJeremia. Zvino wakadaidza Johanani mukororo waKarea, nenduna dzeshe dzehondo dzaiya naye, nevanhu veshe kubvira kumudoko metsa kumukuru, naye wakati kwevari, “Izvi ndizvo zvinoronza Mambo Mwari, Mwari waIsuraeri, uwo wemwakandituma kwaari kuisa mikumbiro yenyu pamberi pake. ‘Kuti mwechizoangirira kwega kugara munyika iyi, zvino ndinozomuaka, andizomupwanyiri pashi; ndinozomusima, andizomubviti; ngokuti ndineurombo ngedambudziko rendakaunza padera penyu. Musatya mambo weBhabhuroni kudai ngezvemwaimutya; musamutya, unoronza Mambo Mwari, ngokuti ndinemwi kumuponesa nokumusunhura kubva kunyara yake. Ndinozomuitira nyasha, naye unozomuitira nyasha, nokuita kuti muhwirire kunyika yenyu.’ Asi kuti mwechiangira kuti, ‘Atizogari munyika iyi,’ ndikwo kusikapurutana izwi raMambo Mwari, Mwari wenyu, mwechiti, ‘Haiwa; tinozoenda munyika yeEgipite, umwo mwetisikazooni hondo, nokuti kuzwa kurira kwegwama nokuti nzara yechokudya; neumwo tinozogaramwo,’ zvino izwai izwi raMambo Mwari, O vakasara vaJudha. Izvi ndizvo zvinoronza Mambo Mwari wehondo, Mwari waIsuraeri: ‘Kuti mwechidziemesera kupinda Egipite nokugaremwo, zvino shoti iyo yomunotya inozomugumira muri munyika yeEgipite; nenzara yomunotya inozomuteera iri pasinde kupinda muEgipite, naapo munozofa. Vanhu veshe vadziemesera kuenda muEgipite koogaremwo vanozofa ngeshoti, ngenzara, ngedenda; akuna naumwe wavo unozosara nokuti kupona kubva kudambudziko rendinozounza padera pavo.’ “Ngokuti izvi ndizvo zvinoronza Mambo Mwari wehondo, Mwari waIsuraeri: ‘Kudai ngokutseneka kwangu noushungu hwangu zvakadururwa padera pevagari veJerusarema, ndizvo ushungu hwangu hunozodururwa padera penyu, apo pomunozoenda Egipite. Munozoita chiro chakadai ngemahundi nechishamiso, nokuita vakatukwa nevanoshoorwa. Amuchazoonizve ndau iyi.’ ” “Mambo Mwari wati kwemuri, O vakasara vaJudha, ‘Musaenda Egipite.’ Nasai kuzia kuti ndamupanga nyamashi kuti mwakakorera kakurutu. Ngokuti imwimwi pachenyu mwakandituma kunaMambo Mwari, Mwari wenyu, mwechiti, Tikumbirire kunaMambo Mwari, Mwari wedu. Kunyazwi chiinyi chaanoronza Mambo Mwari wedu tironzere, nesu tinozochiita. Ndizvo ndamuronzera nyamashi, asi amuzi kupurutana izwi raMambo Mwari, Mwari wenyu, kunyazwi ngechiri chaanonditumira kuti ndironze kwomuri. Nasai kuzia zvino kuti munozofa ngeshoti, ngenzara, ngedenda, kundau iyo yomunoda kuenda.” Naapo Jeremia apedza kuereketa kunevanhu veshe mazwi aya eshe aMambo Mwari, Mwari wavo, awo Mambo Mwari, Mwari wavo aakamutuma nawo kwevari, Azaria mukororo waHoshaia naJohanani mukororo waKarea, nevanhu veshe vamweni vokudzikudza, vakati kunaJeremia, “Unotironzera manyepo. Mambo Mwari wedu aazi kukutuma kutironzera kuti, ‘Musaenda koogarayo Egipite,’ Asi Bharukhi mukororo waNeria ndiye unokuchengedzera kurwisana nesu kuti tipirwe munyara dzevaKharadhea, kuti vatiuraye nokuti kutitora kuenda Bhabhuroni kooitwa vabatwa.” Ndizvo Johanani mukororo waKarea nadzo dzeshe nduna dzehondo nevanhu veshe avazi kupurutana izwi raMambo Mwari, rokuti vagare munyika yaJudha. Asi Johanani mukororo waKarea nadzo dzeshe nduna dzehondo vakatora veshe vakasara vaJudha, avo vakapetudzwa kubva kumadzinza eshe kwevaiya vadzingirwa, kuti vagare munyika yaJudha, vamuna, vakadzi, vana, vanasikana vamambo, nomunhu weshe waakaisa Nebhuzaradhani nduna yevarindi, vaakasiya naGedharia mukororo waAhikamu mukororo waShafani; Jeremiawo muprofeti naBharukhi mukororo waNeria. Navo vakapotera munyika yeEgipite; avazi kupurutana izwi raMambo Mwari. Ndizvo vakaguma Thafanehesi. Zvino izwi raMambo Mwari rakauya kunaJeremia ari muThafanehesi rechiti, “Tora mapuwe makuru ngenyara dzako, uatsire mumatope pandau yezvidhina, iri pokupotera mungome yaFaro muThafanehesi mukuona kwevanhu vaJudha. Unozoti kwevari, ‘Izvi ndizvo zvinoronza Mambo Mwari wehondo, Mwari waIsuraeri: Ringira, ndinozotumira vanhu kootora muranda wangu Nebhukhadhineza, mambo weBhabhuroni, ndinozoemesa dendemaro rake padera pemapuwe aya endatsira; naye unozoemesa tende rake roumambo padera pawo. Unozouya, echiparadza nyika yeEgipite, echipa avo vakaemeserwa kufa ngenhenda, kuti vafe ngenhenda; naavo vakaemeserwa ubatwa, kuti vapotere muubatwa; naavo vakaemeserwa kuurawa ngeshoti, kushoti. Ndinozobasira muriro mumhatso dzezvimwari zveEgipite; naye unozozvipisha nokuzvitora muubatwa; naye unozochenesa nyika yeEgipite, kudai ngomuushi unotora bhachi rake rakachena risina inda, unozobvapo zvakanaka. Unozopwanya miedzaniso yeHerioporisi, iri munyika yeEgipite; nemhatso dzezvimwari zvevaEgipite unozopisha ngomuriro.’ ” Izwi iro rakaguma kunaJeremia revaJudha veshe vaigara munyika yeEgipite, paMigidhori, paThafanehesi, paMempfisi, nomunyika yePhathrosi rechiti, “Izvi ndizvo zvinoronza Mambo Mwari wehondo, Mwari waIsuraeri: Imwimwi pachenyu mwakaona kushata kweshe kwendakaunza padera peJerusarema nepadera pemadhorobha eshe aJudha. Ringira kwaari; nyamashi aa matongo, akuna munhu unogaremwo, ngendaa yokushata kwavo kwevakaita kunditsenesa, ngokuti vakaenda koopisha mutombo unegwema nokudira zvimwari zvimweni zvevasikazii, ivo nokuti imwimwi, nokuti madzibaba enyu. Asi ndakaangira kumutumira varanda vangu veshe vaprofeti ndechiti, ‘Ndinomupota kuti musaita ichi chiro chinonyangadza chendinonyenya.’ Asi avazi kupurutana nokuti kukotamisa nzee dzavo, kuti vatenderuke kubva mukushata kwavo nokurekera kupisha mutombo unegwema kunezvimwari zvimweni. Ndizvo ushungu hwangu nokunyangadzwa kwangu zvakadururwa, zvikabaka mumadhorobha aJudha nomumapato eJerusarema; nawo akaparadzwa akaita matongo, kudai ngezvaakaita nyamashi. “Neizvi ndizvo zvinoronza Mambo Mwari, Mwari wehondo, Mwari waIsuraeri: ‘Ngenyi mwechidziitira kuremadzwa kwakakura kudaro pachenyu, kugura vamuna, vakadzi, vana nechiya, kubva pakati paJudha mwechisara pachenyu musina naumwe unosara? Ngenyi mwechindinyangadza kumusa ushungu hwangu ngemishando yenyara dzenyu, ngokupisha mutombo unegwema kunezvimwari zvimweni munyika yeEgipite, iyo kwemwakaenda koogara? Munozogurwa nokuitwa chiro chinotukwa nokushoorwa pakati pemadzinza eshe enyika here? Mwariyarwa kushata kwemadzibaba enyu here, kushata kwemadzimambo aJudha, kushata kwevakadzi vavo, nokushata kwenyu nokwevakadzi venyu, kwevakaita munyika yaJudha, nomumapato eJerusarema? Avazi kuonisa kupfaiswa nokuti kutya metsa nanyamashi, nokuti kupurutana mipango yangu nokuti zviemeso zvangu, zvendakaisa pamberi penyu nepamberi pemadzibaba enyu.’ “Ndizvo izvi zvinoronza Mambo Mwari, Mwari waIsuraeri: Ringirai, ndadziemesera kuunza kushata padera penyu, kuuraya veshe Judha. Ndinozotora veshe vakasara vaJudha, avo vakadziemesera kuenda kunyika yeEgipite koogareyo, navo vanozourawa veshe, nokuwa munyika yeEgipite; vanozowa ngeshoti, ngenzara; vanozofa kubvira pamudoko metsa pamukuru, vanozofa ngeshoti nenzara; vanozoita chiro chinotukwa, chinoshamisa, chinoshoorwa, nechinotsverudza. Ndinozoorora avo vanogara munyika yeEgipite, kudai ngezvendakaorora Jerusarema, ngeshoti, ngenzara, nedenda, kuitira kuti pasaa naumwe wevakasara waJudha, waavo vakauya munyika yeEgipite koogaremwo, unozopona nokuti kusara, nokuti kupetuka munyika yaJudha. Kunyazwi vanodisisa kupetuka koogarayo, apana unozopetuka ngokubanze kwaavo vanozopokonyoka.” Zvino vamuna veshe vaizia kuti vakadzi vavo vaipisha mutombo unegwema kuzvimwari zvimweni, nevakadzi veshe vaiema pasinde, mbungano huru, vanhu veshe vakagara munyika yeEgipite muPhathrosi, vakapingura Jeremia vechiti, “Ngendaa yeizwi iro rewaereketa kwetiri muzina raMambo Mwari, atizokupurutani. Asi ngegwinyiso tinozoita chiro cheshe chetakapika kuita, kupisha mutombo unegwema kunavahosi vomudenga nokudurura kwaari mudiro wokumwa, kudai ngezvatakaita, isusu nemadzibaba edu, nemadzimambo edu nevatongi vedu, mumadhorobha aJudha nomumapato eJerusarema. Taigara tinokudya kwakawanda, techigara zvakanaka, atizi kuona chakashata. Asi kubvira mukuwo wetakarekera kupisha mutombo unegwema kunavahosi vomudenga, nokurekera kudurura mudiro wokumwa kwaari, tinondotama zviro zveshe, tinopedzwa ngeshoti nenzara.” Nevakadzi vakati, “Ngegwinyiso tinozoangira kupisha mutombo kunavahosi vomudenga nokudurura mudiro wokumwa kwaari. Munopinimidza kuti takavanasirira zvingwa zvine muedzaniso wavo kuvadira nokudurura mudiro wokumwa kwevari, taiya tisina vamuna vedu here?” Zvino Jeremia wakati kuvanhu veshe, vamuna nevakadzi, vanhu veshe avo vaimupingura kudaro echiti, “Asi ngendaa yomitombo yemwakapishira mumadhorobha aJudha nomumapato eJerusarema, imwimwi nemadzibaba enyu, madzimambo enyu nevatongi venyu, nevanhu venyika, Mambo Mwari aazi kuikarakadza here? Azvizi kupinda mumukarakadzo wake here? Naapo Mambo Mwari asikachakoni kuringira kushata kwezviito zvenyu, zvinyangadzo zvemwakaita; ndizvo nyika yenyu yakaita dongo nokuparadzwa neyakatukwa, isina unogaramwo, kudai ngezveyakaita nyamashi. Indaa yokuti mwakapisha mutombo unegwema, nendaa yokuti mwakashaisha kunaMambo Mwari, amuzi kupurutana izwi raMambo Mwari nokuti kuhamba mumipango yake nomuzviemeso zvake nokuti mumitemo yake; ndizvo kushata uku kwawira padera penyu kudai ngezvezvakaita nyamashi.” Jeremia wakati kuvanhu veshe nokuvakadzi veshe, “Izwai izwi raMambo Mwari, imwimwi mweshe vokwaJudha vari munyika yeEgipite. Izvi ndizvo zvinoronza Mambo Mwari wehondo, Mwari waIsuraeri: Imwimwi nevakadzi venyu mwapedzera mukuita izvo zvemwakaereketa mumazwi mwechiti, ‘Ngegwinyiso tinozozarisa mhiko dzedu dzetakapika, kupisha mutombo unegwema kunavahosi vomudenga nokudurura midiro yokumwa kwevari. Ngepomunokona peshe zarisai mhiko dzenyu, mudurure mudiro wokumwa.’ Ndizvo izwai izwi raMambo Mwari, imwimwi mweshe vaJudha vanogara munyika yeEgipite: Ringirai, ndinopika ngezina rangu guru, unoronza Mambo Mwari, kuti zina rangu arichazodaidzwi pamiromo yomunhu naumwe waJudha uri munyika yeshe yeEgipite echiti, ‘Kudai ngezvaanopona Mambo Mwari, Mwari.’ Ringira, ndinozovarinda kuvaitira zvakashata, haiwa zvakanaka; vanhu veshe vaJudha vari munyika yeEgipite vanozopera ngeshoti nenzara, metsa kutamike naumwe wavo unosara. Naavo vanopokonyoka shoti, nokupetuka kunyika yaJudha kubva munyika yeEgipite, vanozoita vashomani; zvino veshe vakasara vaJudha avo vakauya koogara munyika yeEgipite vanozozia kuti mazwi anesimba ngaani, angu nokuti avo. Neichi chinozoita chioniso kwomuri, unoronza Mambo Mwari, chokuti ndinozomuorora mundau iyi, kuitira kuti muzie kuti mazwi angu anorwisana nemwi kumuitira zvakashata ngegwinyiso anozoitika. Izvi ndizvo zvinoronza Mambo Mwari: ‘Ringirai, ndinozopira Faro-Hofura mambo weEgipite munyara yemagaa ake, yaavo vanotsvaka kumuuraya; kudai ngezvendakapira Zedhekia mambo waJudha munyara dzaNebhukhadhineza mambo weBhabhuroni, gaa rake uwo waitsvaka kumuuraya.’ ” Izwi raakaereketa Jeremia muprofeti kunaBharukhi mukororo waNeria, apo aiya apedza kunyora mazwi aya mubhuku rinopetwa kubva kumuromo waJeremia, mugore rechirongomuna rokutonga kwaJehoiakimu mukororo waJosia mambo waJudha rechiti, “Izvi ndizvo zvinoronza Mambo Mwari, Mwari waIsuraeri, kunewe, O Bharukhi. Wakati, ‘Ihehe kwendiri! Mambo Mwari wakatutsira kusvipa mwoyo kunekurwadziwa kwangu; ndaremba ngokugwimba kwangu, neni andioni kuzorora.’ “Izvi ndizvo zvounozoronza kwaari kuti, ‘Izvi ndizvo zvinoronza Mambo Mwari: Ringira, ndinozoputsira pashi icho chendakaaka, kubvita icho chendakasima, ndiyo nyika yeshe. Newe unotsvaka zviro zvikuru kudziitira here? Usazvitsvaka; ngokuti, ringira, ndinounza kushata padera pevanhu veshe, unoronza Mambo Mwari; asi ndinozokupa kupona kwako kuti kuite kudai ngechiro chakachakatwa muhondo kundau dzeshe dzounoenda.’ ” Izwi raMambo Mwari rakauya kunaJeremia muprofeti ngendaa yemadzinza. Ngendaa yeEgipite, nendaa yehondo yaFaro-Nekho mambo weEgipite, yaiya parwizi runozwi Yufratesi muKharkhemishi, yaakanyisa mambo Nebhukhadhineza mambo weBhabhuroni, mugore rechirongomuna rokutonga kwaJehoiakimu mukororo waJosia mambo waJudha: “Nasirirai zvihlangu zvikuru nezvidoko, mukwedzere kuenda koorwa hondo! Sungirai mahachi, muakwire! Emai mundau dzenyu munezviqoko zvenyu; pukutai mikhondo mwechipfeka mabhachi esimbi. Ngenyi ndechivaona vechitya? Vawira sure. Ngwazi dzavo dzapwanyirwa pashi, dzatiza ngokukasira. Avaringiri sure; ngokuti kutya kwakavatendenedza,” unoronza Mambo Mwari. “Vanokasira avakoni kutizira kuretu, nokuti ngwazi kukona kupokonyoka; dera pasinde porwizi Yufratesi vapumhunwa nokuwa. Ndiani uyu unokwira akadai ngerwizi Naire, urwo mvura yarwo inopopoma kudai ngendambi? Egipite rinokwira kudai ngeNaire, nemvura yaro inomiruka kudai ngendambi. Unoti, ‘Ngandikwire ngandizadze nyika; ngandiparadze madhorobha nevagari vawo. Kwedzerai, O mahachi, mburumbukai, O ngoro! Ngwazi ngadzibude mberi: vaEthiopia nevaRibhia avo vanokona kubata chihlangu, navaRidhia ngwazi dzokukandira misee ngeuta.’ ” Zuva iro izuva raMambo Mwari, Mwari wehondo, zuva rokuunzidzira, rokuti adziunzidzire magaa ake. Shoti inozodya, inozoguta nokuradza ngengazi yavo. Ngokuti Mambo Mwari, Mwari wehondo, unemudiro wokubaira ngedera parwizi runozwi Yufratesi. Kwira uende Gireadhi, utore mutombo webharimu, O mhandwe mwanasikana weEgipite! Washandisa mitombo yakawanda inokorera; apana kuponeswa kwako. Madzinza akazwa ngokutsverudzwa kwako, nokuchema kwako kwakazadza nyika; ngokuti ngwazi dzapumhunwa ngengwazi, nadzo dzeshe dzawa pamwepo. Izwi iro raakaereketa Mambo Mwari kunaJeremia muprofeti, ngendaa yokuuya kwaNebhukhadhineza mambo weBhabhuroni, koorwisa nyika yeEgipite: “Daidzirai muEgipite, teketesai muMigidhori, teketesai muMempfisi, nomuThafanehesi, muti, ‘Emai mundau dzenyu mwakanasirira, ngokuti shoti inozouraya avo vakamutendenedza. Ngwazi dzako dzakapera ngenyi? Mikono yako aizi kuema ngenyi? Ngokuti Mambo Mwari wakaidzinga.’ Wakaita kuti vazhinji vako vapumhunwe vawe, umwe wakawira padera poumweni; navo vakati, ‘Uyai, ngatipetuke kuvanhu vedu, nokunyika yedu yechibarirwe, ngendaa yeshoti inoparadza.’ Ipai Faro mambo weEgipite zina ‘Bopoto uwo wakatamikirwa ngomukuwo wake.’ Kudai ngezvendinopona,” unoronza Mambo, uwo zina rake rinozwi Mambo Mwari wehondo, Umwe unouya akadai ngeThabhori riri pakati pemitunhu, nokudai ngeKharmeri riri pasinde poruandhle. Rongedza mitwaro yako kuenda muusungwa, mwanasikana unogara muEgipite, ngokuti Mempfisi richaparadzwa nokuitwa dongo, risina unogaramwo. Egipite rakadai ngetsiru rakanaka, asi mazimha anobva dera anomata padera paro. Kunyazwi varwiri varo vari pakati paro vakadai ngamakonyana akakodzwa muchibaya; navowo vakapetuka, vakatiza veshe pamwepo; avazi kuema, ngokuti zuva rokuororwa kwavo kukuru ravagumira; mukuwo wokuororwa kwavo. Rinoita bope rakadai ngerenyoka inotiza; ngokuti magaa anofora, echiuya kurwa naro, anouya koorwa navo ngematemo, kudai ngevatemi vemiti. Vanozotemera pashi gwasha raro, unoronza Mambo Mwari, “Kunyazwi aripindiki; ngokuti vakapinda kuwanda kune ndongwe, avaerengeki. Mwanasikana weEgipite unozotsverudzwa; unozopirwa munyara yavanhu vedera.” Mambo Mwari wehondo, Mwari waIsuraeri, unoti, “Ringirai, ndinounza kuororwa padera paAmoni weThebhesi, naFaro, neEgipite, pamwepo nezvimwari zvayo nemadzimambo ayo; nepadera paFaro navo veshe vanogonda mwaari. Ndinozovapira munyara dzaavo vanotsvaka kuvauraya, kunamambo Nebhukhadhineza weBhabhuroni nevatongi vake. Ngesure kweizvi Egipite inozogarwa kudai ngekaretu,” unoronza Mambo Mwari. “Asi iwewe, usatya, muranda wangu Jakobe, newe usapera simba, O Isuraeri; ngokuti, ringira, ndinozomuponesa kubva kuretu, nemibarirwana yenyu kubva munyika youbatwa hwavo. Jakobe unozopetuka, echizorora nokugarisika; akuna naumwe unozoita kuti atye. Asi iwewe, usatya, O Jakobe muranda wangu,” unoronza Mambo Mwari “Ngokuti ndinewe. Ndinozopedza yaamho madzinza eshe pakati peavo vendakamudzingira kwevari, asi andizomupedzi yaamho imwimwi! Ndinozomuorora kwakapimwa; asi andizomusii musikazi kuororwa.” Izwi raMambo Mwari rakauya kunaJeremia muprofeti ngendaa yevaFiristia, apo Faro asati arwisa Gaza. Izvi ndizvo zvinoronza Mambo Mwari, “Ringira, mvura inokwira yechibva dera, nayo inozoita ndambi inopopoma, inozokukuza nyika nazvo zveshe zviri mukati mwayo, dhorobha, naavo vanogara mukati mwaro. Vanhu vanozochema yaamho, nevagari venyika vanozoboorera. Pabope retsoka rokuhamba kwemahachi ake akagwinya, pakurira kwokuhambiswa kwengoro dzake, nepakutinhira kwemavhiri, madzibaba aazoringiri sure kunevana vavo, ngendaa yokupera simba kwenyara dzavo, ngendaa yezuva iro rinouya rokuparadza vaFiristia veshe, kugura kubva Thire neSidhoni weshe mudetseri unosara. Ngokuti Mambo Mwari uchaparadza vaFiristia, vakasara vomuhumbikumbi venyika yeKafithori. Mhanza yauya padera peGaza, Ashikeroni yanyaradzwa. O vakasara vebani raro! Munozodzipara mhanza kwomukuwo wakadini? A shoti yaMambo Mwari! Unozonyarara metsa riini? Hwirira mumakara ako; zorora unyarare. Ungaita manyararirenyi, apo Mambo Mwari akupanga kurwisa Ashikeroni, nemahumbikumbi oruandhle? Apo paakakuemesera.” Izvi ndizvo zvinoronza Mambo Mwari wehondo, Mwari waIsuraeri, ngendaa yaMoabhi: “Ihehe kuneNebho, raparadzwa! VaKiriathiaimu vatsverudzwa, vatorwa; marukumbati akagwinya atsverudzwa nokuputsirwa pashi. Kukudzwa kweMoabhi akuchazoapopi; muHeshibhoni vakaronga zvakashata kweriri vechiti, ‘Uyai, ngatiriparadze kuti risachaita dzinza.’ Newewo, O Madhimeni, uchaunzwa mukunyaradzwa; shoti ichakurumbirira. Izwai! Kuchema kubva Horonaimu, ‘Hohoho nokuparadzwa kukuru.’ ‘Moabhi yaparadzwa!’ ‘Vana varo vadoko vanozwika kuchema.’ Ngokuti pamukwidzwa weRuhithi, vachapakwira vechichema kakurutu; ngokuti pakudzaka kwavo kuenda Horonaimu vazwa chiriro chokuparadzwa kukurutu. ‘Tizai! Mudziponese; mudai ngepfiba riri murubaya.’ Ngegwinyiso ngokuti mwakagonda kumishando yenyu nokupfuma yenyu, nemwi muchabatwa; Khemoshi unozoenda muubatwa, nevapristi vake, pamwepo nevatongi vake. Muparadzi unozouya padera pemadhorobha eshe, akuna dhorobha rinozopokonyoka; bani rinozopera norubaya runozoparadzwa, kudai ngezvaaereketa Mambo Mwari. Ipai maphaphiro Moabhi kuti amburuke; ngokuti madhorobha ake anozoita matongo, asina unogaramwo.” Ngaatukwe uwo unorekeredza mushando waMambo Mwari, ngaatukwe uwo unokonyera shoti kubva kungazi. Moabhi rakagarisika kubvira muudoko hwaro, rakagara padera pemasese aro, arizi kumbodururwa kubva kuchidziyo kuiswa muchidziyo chimweni, arizi kumbopindazve muubatwa; ndizvo kunuhwira kwaro kuchakandodaro, negwema raro arizi kupinduka. “Ndizvo, ngegwinyiso nguva inouya,” unoronza Mambo Mwari, “Apo ndinozotuma kweriri vanodurura navo vanozodurura zvidziyo zvaro, nokuputsa kuita zvigurwa majomeya. Zvino Moabhi rinozotsveruka ngendaa yeKhemoshi, kudai ngevemhatso yaIsuraeri vakatsveruka ngendaa yeBhetheri gonda ravo. Munoronza ngenyi kuti, ‘Tiri ngwazi nevarwi vanesimba?’ Muparadzi weMoabhi nemadhorobha wauya, nemajaha akatsanangurwa adzaka koourawa,” unoronza Mambo, uwo zina rake ndiMambo Mwari wehondo. “Kutambudzika kukuru kwevaMoabhi kuri pasinde kuguma, nokuparadzwa kwaro kunouya pasinde ngokukasira. Imwimwi mweshe vaakirwana varo, chemai; nemwi mweshe munozia zina rake, muti, ‘Wakaita magukirenyi mudondoro wakagwinya, ndonga yakanaka!’ Dzaka kubva muutende, ugare pashi pakaoma, O vagari vemwanasikana weDhibhoni, ngokuti uwo muparadzi weMoabhi waguma kurwa newe, wapwanya bako rako. Ema pasinde pepato, uringire, iwewe mugari weAroeri. Bvunza mwamuna unotiza, nomukadzi unopokonyoka, wechiti, ‘Kwaitikenyi?’ Moabhi rinotsverudzwa, ngokuti raputsirwa pashi; boorera wechichema! Zvironze muArinoni kuti Moabhi raitwa dongo. “Kutongwa kwaguma munyika yorubaya; padera peHoroni, nepaJahiza, Mefaathi, Dhibhoni, Nebho, Bhethidhibhurathaimu, Kiriathaimu, Bhethigamuri, Bhethi-meoni, Keriothi, Bhozira, nokumadhorobha eshe aMoabhi, ari kuretu naari pasinde. Runyanga rwaMoabhi rwagurwa, nomuoko warozve wagurwa,” unoronza Mambo Mwari. “Muitei kuti aradze, ngokuti wakadzikurisa pamberi paMambo Mwari; Moabhi ngariumburuke mumarutso aro, narowo richashekwa. Isuraeri aazi kuita chishekedzo kweuri here kunyazwi asikazi kubatwa pakati pembavha? Asi peshe pounoereketa ndiye unodzungudza soro rako. Budai mumadhorobha, mugare mumawere emapuwe, O vagari veMoabhi. Mudai ngenjia inoaka chisaki chayo kumarutii emawere. Tazwa ngokudzikudza kweMoabhi, rinodzikudza kakurutu, manyau aro, nokudzikurisa kwaro nokudada kwaro, nemanyau omwoyo waro. Inini pachangu ndinozia hasha dzaro, unoronza Mambo Mwari,” kuganza kwaro akuzodetseri, zviito zvaro azvidetseri chiro. Ndizvo ndinoboorera ngendaa yeMoabhi, ndicharidza chiriro ngendaa yeMoabhi reshe; mwoyo wangu unotsumba ngendaa yevanhu veKirheresi. Ndinokuchema iwewe kupinda Jaza, O muvhini weSibhima. Matai ako akaambuka ruandhle, metsa kuguma kuruandhle rweJaza. Muparadzi wawira padera pemichero yako yezienza, nepadera pemavhini ako. Kudakara nokudakadzwa kwabviswa kubva muminda inobereka zvakawanda munyika yeMoabhi; ndarambidza kuti pokukamura vhini pasabuda vhini; apana naumwe unozoatsikatsika echipururidza; kupururidza kwavo akuchaiti kupururidza kwokudakara. “Kuchema kwakabva Heshibhoni, kukaguma Ereare, kwakazwika kuguma Jahazi, vaidaidzira mazwi avo kubvira Zoa kuguma Horonaimu, nokuEgirathisherishiya. Ngokuti kunyazwi nemvura dzeNimirimu dzinozoomeswa. Ndinozounza magumo muMoabhi,” unoronza Mambo Mwari, “Kuneavo vanopira mudiro pandau dzakakwirira, nokupisha mutombo unegwema kunezvimwari zvavo. Ndizvo mwoyo wangu unorira kudai ngomunanzi ngendaa yeMoabhi, nomwoyo wangu unorira kudai ngomunanzi ngendaa yevanhu veKirheresi; ngokuti upfumi uhwo hwevakawona hwapera. Ngokuti soro reshe rinoparwa, nomurebvu weshe unoparwa; nepadera penyara dzeshe panozochekwa nyora, nepadera pezviunu panopfekeswa machira emasaka. Padera pemhatso dzeshe dzeMoabhi, nomundau dzokuungana amuna chiro asi kuchema; ngokuti ndaputsa Moabhi kudai ngechidziyo chisina naumwe unochida,” unoronza Mambo Mwari. “Raputswa ngenjiranyi! Raita maboorerenyi! Moabhi raita makunukukirenyi mushana waro mukutsverudzwa! Ndizvo Moabhi raitwa chishekedzo nechinotyisa kuvaakirwana varo.” Ngokuti izvi ndizvo zvinoronza Mambo Mwari: “Ringira, unozombururuka kudai ngegodzi, nokutambanudza maphaphiro ake kurwa neMoabhi. Madhorobha anozotorwa, nekamba dzinozobatwa. Mwoyo yengwazi dzeMoabhi ngezuvaro inozodai ngomwoyo womukadzi uri mukurwadziwa kwake kwokubereka. Moabhi rinozoparadzwa kuti risachazoita dzinza, ngokuti rakadzikudza pacharo pamberi paMambo Mwari. Kutyisa, hunza, nomurau zviri pamberi penyu, O vagari veMoabhi,” unoronza Mambo Mwari. “Weshe unotiza kutyisa unozowira muhunza; nouwo unokwira kubuda muhunza unozobatwa mumurau. Ngokuti ndinozounza zviro izvi padera paro Moabhi, mugore rokuororwa kwaro,” unoronza Mambo Mwari. “Mubvute reHeshibhoni vanotiza vanoemamwo varemba, ngokuti muriro wabaka wechibva muHeshibhoni, murazvu wechibva mumhatso yaSihoni; waparadza huma yeMoabhi, nemisoro yevanhu vanoda kurwa. Hezvo kwouri, O Moabhi! Vanhu veKhemoshi vapera, ngokuti vakororo vako vabatwa muuhloko nevanasikana vako vaizwa hloko. Asi ngamazuva okugumisira ndinozopetudzazve vakabatwa veMoabhi,” unoronza Mambo Mwari. Uku ndikwo kutongwa kweMoabhi. Izvi ndizvo zvinoronza Mambo Mwari ngendaa yaAmoni: “Isuraeri aana vakororo here? Aana vanogara nhaka yake here? Ngenyi zvino Mirikhomu echigara nhaka yaGadhi, nevanhu vake vechigara nhaka mumadhorobha ake? Ndizvo, ringira, mazuva anouya,” unoronza Mambo Mwari, “Apo pendinozoridza kuti mhere yokurwa hondo nedhorobha reRabha revaAmoni; rinozoita murwi wezvakaparadzwa, nemaguta aro anozopishwa ngomuriro; naapo Isuraeri unozotora nhaka kubva kuneavo vakamutorera nhaka,” unoronza Mambo Mwari. “Boorera, O Heshibhoni, ngokuti Ai raparadzwa. Chemai yaamho, O maguta aRabha! Pfekai machira emasaka; chemai, nokudzichaya ngemboma pachenyu! Ngokuti Mirikhomu unozopinda muubatwa, pamwepo nevapristi navatongi vake. Ngenyi wechiganza mukugwinya kwako? Kugwinya kwako kunokorera, O mwanasikana usina gonda. Iwewe wakagonda upfumi hwako wechiti, ‘Ndiani unozondirwisa?’ Ringira, ndichaunza kutyisa padera penyu,” unoronza Mambo Mwari, Mwari wehondo, “Kubva kune veshe vanomutendenedza; nemwi muchaparadzwa mweshe umwe ngaumwe; akuna naumwe unozounganidza avo vanopepesheka. “Asi ngesure kweizvi ndinozopetudzazve vakabatwa veAmoni,” unoronza Mambo Mwari. Izvi ndizvo zvinoronza Mambo Mwari wehondo “Amuchina ungwaru here muThemani? Kupanga kwapera kubva kunevanemazano here? Ungwaru hwaro hwapera here? Tizai, petukai, dzakai pashi, imwimwi vagari veDhedhani! Ngokuti ndinozounza kutambudzika kukuru kwaEsau padera pake, pamukuwo apo pendichamuorora. Kudai vaunganidzi vemavhini vechiuya kwouri, avazosii hwarakwatwa here? Nokuti dai mbavha dzechiuya usiku, adzizotori zvakadzikwanira here? Asi inini ndakaita kuti Esau ati buzu, ndakaduhumura ndau dzake dzakafishika, naye aakoni kudzihwadza pachake. Mibarirwana yake yaparadzwa, hama dzake nevaakirwana vake, naye emene apachina. Siya nherera dzako, ndinozodzirera; shirikadzi dzako ngadziise gonda radzo mwendiri.” Ngokuti izvi ndizvo zvinoronza Mambo Mwari: “Ringira, kudai avo vasikasisiri kumwa kutsani vechiimwa, newe ndiwe wega usikazoororwi here? Auzorekeri kuororwa, unosisira kuimwa. Ngokuti inini pachangu ndakapika,” unoronza Mambo Mwari. “Kuti Bhozira rinozoita chishamiso, chishekedzo, nokuita matongo, nokutukwa; nemadhorobha aro eshe anozoangira kuita matongo.” Ndakazwa mashoko akabva kunaMambo Mwari, nomutumwa watumwa pakati pemadzinza, echiti, “Unganai pamwepo pachenyu, muuye murwe navo; mirukai, murwe hondo.” “Ngokuti, ringira, ndinozokuita mudoko pakati pemadzinza, unoshoorwa pakati pavanhu. Kutyisa kwewakafemera, nokudzikudza kwomwoyo wako kwakuchengedzera, iwewe unogara mumawere emapuwe, wechigara padera pechimutunhu. Kunyazwi ukanyaaka chisaki chako pakakwirira kudai ngepegodzi, ndinozokudzasa kubvapo,” unoronza Mambo Mwari. “Edhomu rinozoita chiro chinotyisa; munhu weshe unopinda ngepasinde paro unozotyiswa, nokuridza murudzi ngendaa yemadambudziko aro eshe. Kudai ngokuparadzwa kweSodhoma neGomora namadhorobha ari pasinde paro,” unoronza Mambo Mwari, “Apana naumwe unozogarayo, haiwa naumwe unozogarisikamwo. Ringira, unozokwira echiuya kudai ngemhondoro yechibva mugwasha reJorodhani kuuya koorwisa nyika yakasvipira; ndinozokasira kudzinga Edhomu kuenda kuretu kubva kweriri; neni ndinozoemesa padera payo kunyazwi ndiani uwo wendinotsanangura. Ngokuti ndiani wakadai ndini? Ndiani ungaphikisana neni? Ndiani muushi ungakona kuema pamberi pangu? Ndizvo izwai urongwa waMambo Mwari, waaronga kurwisa Edhomu, nemabiningidzo ake aaita ngendaa yevagari veThemani: Ngegwinyiso vadoko vomutanga vanozokweerwa kuretu; ngegwinyiso unozoita kuti ugaro hwavo huizwe hunotyisa ngendaa yavo. Pakutinhira kwokuwa kwavo nyika inozohuta; bope rokuchema kwavo rinozozwika kuRuandhle Rwakatsvuka. Ringira, unozokwira echimbururuka kudai ngegodzi, nokutambanudza maphaphiro ake padera peBhozira, nomwoyo yengwazi dzeEdhomu inozodai ngomwoyo womukadzi uri mukurwadziwa kwake ngokubereka ngeiro zuva.” “Ngendaa yeDhamasekusi: Hamathi neAriphadhi akangaidzwa, ngokuti vazwa mashoko akashata; vanyunguruka mukutya, vanotambudzika kudai ngeruandhle rusikakoni kunyarara. Dhamasekusi rapera simba, ratenderuka kutiza, kutyisa kwaribata; kurwadziwa kukuru nemadambudziko zvaribata, kudai ngomukadzi unorwadziwa mukubereka. Haiwa, dhorobha rinembiri rasiiwa ngenjiranyi, dhorobha rokudakara kwangu! Ndizvo majaha aro anozowa mumadariro, varwi varo veshe vehondo vanozoparadzwa ngeiro zuva,” unoronza Mambo Mwari wehondo. “Neni ndinozobasa muriro kumarukumbati eDhamasekusi, nawo unozopedza ngome dzeBhenihadhadhi.” Ngendaa yeKhedha noumambo hweHazori, uwo wakanyiswa ndiNebhukhadhineza mambo weBhabhuroni, izvi ndizvo zvinoronza Mambo Mwari: “Mirukai, mukwedzere kurwa naKhedha. Paradzai vanhu vokumabvazuva. Torai matende avo, zvifuyo zvavo, machira omukati mwematende, nezvidziyo zvavo zveshe, mangamera avo; nokuchema kunozodaidzirwa kwevari, vechiti, ‘Kutyisa kuri kumarutii eshe.’ Tizai, muende kuretu, muhware mundau dzakadzama, O vagari vomuHazori,” unoronza Mambo Mwari; “Ngokuti Nebhukhadhineza mambo weBhabhuroni waita bangano rokurwa nemwi nokumurongera mazano akashata. Mirukai mukwedzere kurwa nedzinza rakazorora, rakagarisika,” unoronza Mambo Mwari, “Iro risina zvivhayo nokuti mipiningidzo, iro rinogara rega. “Mangamera avo anozochakatwa, nen'ombe dzavo dzakawanda dzinozopambiwa. Inini ndinozovaparadzira kudutu reshe avo vakaparwa bvudzi pamarutii ehuma dzavo, neni ndinozounza kutambudzika kukuru kubva kumarupande eshe,” unoronza Mambo Mwari. “Hazori rinozoita ugaro hwemakava nokuita matongo mhera nariini; akuna munhu unozogaramwo, nokuti umwe ungaakamwo.” Izwi raMambo Mwari iro rakauya kunaJeremia muprofeti, ngendaa yeEramu, pakutanga kwokutonga kwaZedhekia mambo waJudha rechiti, “Izvi ndizvo zvinoronza Mambo Mwari wehondo: Ringira, ndichavhuna uta waEramu, uwo uri sika huru yokugwinya kwavo; neni ndichaunza padera paEramu madutu marongomuna kubva kumarupande marongomuna omudenga; neni ndinozovaparadzira kumadutu aya eshe; akuzoapo dzinza narimwe pevasikazogumi avo vakarashwa veEramu. Ndinozokarudza vaEramu pamberi pemagaa avo, nepamberi paavo vanotsvaka kuvauraya; ndinozounza kushata padera pavo, ushungu hwangu hunotyisa,” unoronza Mambo Mwari. “Ndinozotumira shoti kuvarumbirira metsa ndivapedze; neni ndinozoemesa dendemaro rangu muEramu, nokuparadza mambo wavo nevatongi,” unoronza Mambo Mwari. “Asi mumazuva okugumisira ndinozohwirinza vakabatwa vaEramu,” unoronza Mambo Mwari. Izwi raakaereketa Mambo Mwari ngendaa yeBhabhuroni, ngendaa yenyika yevaKharadhea kubudikidza ndiJeremia muprofeti: “Daidzirai pakati pevemadzinza, muteketese muemese mujeki; muteketese, musafisha. Ronzai kuti Bhabhuroni ratorwa, Bheri watsverudzwa, Merodhakhi wapedzwa simba. Miedzaniso yaro yokudira yatserudzwa; zvimwari zvaro zvapedzwa simba. “Ngokuti dera kunouya dzinza koorwa naro, rinozoita kuti nyika yaro iite matongo, akuna naumwe unozogaramwo; zveshe vanhu nemhuka zvinozotizira kuretu.” “Mumazuva awo nomunguva iyo,” unoronza Mambo Mwari, “Vanhu vaIsuraeri vanozouya, ivo nevanhu vaJudha pamwepo, vanozouya vechichema, apo vechitsvaka Mambo Mwari, Mwari wavo. Vanozobvunza njira yeZioni nehope dzakaringireyo, vanozouya vechidzibatanidza pachavo munaMambo Mwari ngechitenderano chemhera nariini chisikazoriyarikanwi. Vanhu vangu vaiya makwai akarashika; vaushi vawo vakaapausa, vakaatinhira kumitunhu, kuhamba kubva kudunhu kuenda kuchitunhu; variyarwa ndau yavo yokuzorora. Veshe vakavaona vakavadya; nemagaa avo akati, ‘Atina ndaa, ngokuti vakashaishira Mambo Mwari, mafuro egwinyiso, Mambo Mwari, gonda remadzibaba avo.’ Tizai kubva muBhabhuroni, mubude kubva munyika yevaKharadhea, mudai ngemagotokoto anotungamirira mitanga. Ngokuti, ringira, ndinozomirudza hondo, nokuiunza kuti irwise neBhabhuroni, chikwata chemadzinza makurutu anobva kunyika yedera; navo vanozofora pachavo kurwisa, kubva apo rinozotorwa. Misee yavo yakadai ngemisee yengwazi iyo isikapetuki isikazi kufura. Kharadhea inozochakatwa; avo veshe vanoichakata vanozogutiswa,” unoronza Mambo Mwari. “Kunyazwi munodakara, kunyazwi munodakadzwa, O vachakati venhaka yangu, kunyazwi munotomukira mudenga kudai ngetsiru rakora ngomwenje, nemwi munorira kudai ngemahachi akagwinya, mai venyu vanotsverudzwa kakurutu; iye wakamubara unozopera simba. Ringira, rinozoiita dzinza rokugumisira remadzinza, shango, nyika yakaoma, norubaya. Ngendaa youshungu hwaMambo Mwari aizogarwi, asi inozoita matongo yeshe; weshe unozopinda ngepasinde peBhabhuroni unozoshamiswa, nokuridza murudzi ngemaronda aro eshe. “Emai mundau dzenyu kutendenedza Bhabhuroni kurwa naro, imwimwi mweshe vakwanyi vouta; rifurei, musaposha, ngokuti rakashaishira Mambo Mwari. Daidzirai kurwa naro kubva kumarutii eshe kuti, ‘Radzipira; matsikiro aro awa, marukumbati aro apwanyirwa pashi.’ Ngokuti uku ndikwo kuunzidzira kwaMambo Mwari: riunzidzirenyi; kudai ngezverakaita itai kudaro kweriri. Gurai mukushi kubva muBhabhuroni, nouwo unoshandisa sikeyo panguva yokucheka; ngendaa yokutya shoti inoparadza veshe umwe ngaumwe unozopetuka kuvanhu vake, umwe ngaumwe unozotizira kunyika yake. “VaIsuraeri vakadai ngegwai rinovhimwa rinorumbirirwa ngemhondoro. Pakutanga mambo weAsiria wakavadya, nepakugumisira Nebhukhadhineza mambo weBhabhuroni wakatsenga magodo avo.” Ndizvo izvi zvinoronza Mambo Mwari wehondo, Mwari waIsuraeri: “Ringira, ndinozoorora mambo weBhabhuroni nenyika yake, kudai ngezvendakaorora mambo weAsiria. Ndinozounzazve Isuraeri kumafuro ake, naye unozofura paKharmeri nomuBhashani, nomweya wake unozogutiswa padera pezvimitunhu zvaEfuremu nomuGireadhi. Mumazuva awo, nepamukuwo uwo,” unoronza Mambo Mwari, “Kushaisha kwaIsuraeri kunozotsvakiwa, napo apazooneki chiro, nezvishaishi zvaJudha, apana chiro chinozoonekapo; ngokuti ndinozovarekerera avo vendakasiya. “Endai munyika yeMerathaimu, murwe nayo, murwise vagari vomuPhekodhi; muparadze, muuraye nowokugumisira wavo; muite zveshe kudai ngezvendakamupanga. Bope rokurwa rinozwika munyika nokuparadzwa kukuru. Hamera yenyika yeshe yaita magurirwenyi nokuputswa! Bhabhuroni raita matongo ngenjiranyi pakati pemadzinza! Ndakakuteya ngomurau, newe watobatwa usati wazvizia, O Bhabhuroni; wakaoneka nokubatwa, ngokuti wakarwisana naMambo Mwari. Mambo Mwari wabeura ugaro hwendonga dzake dzokurwa, wabudisa ndonga dzoushungu hwake; ngokuti Mambo Mwari, Mwari wehondo, unawo mushando wokuita munyika yevaKharadhea. Uyai murwe naro kubva kumarutii aro eshe, beurai matura aro; muriunganidze kudai ngemirwi yezviyo, muparadze yaamho; musarisiira nachimwe charo. Urayai mikono yaro yeshe; ngaidzake koourawa. Ihehe kwevari! Zuva ravo raguma, mukuwo wokuunzidzirwa kwavo. “Izwai! Vanotiza nokupokonyoka kubva munyika yeBhabhuroni, kuuya koodaidzira mhere muZioni, yokuunzidzira kwaMambo Mwari, Mwari wedu, kuunzidzira temperi rake. “Unganidzai vanofura ngeuta kurwa neBhabhuroni, veshe vanokwanya. Akai matende kuritendenedza; musatendera naumwe kuti apokonyoke. Riunzidzirei kudai ngomushando waro; kudai ngezverakaita, itaiwo kudaro kweriri, ngokuti rakadzikudza pamberi paMambo Mwari, Wakachena waIsuraeri. Ndizvo majaha aro anozowa mumadariro, nevarwi vehondo varo veshe vanozoparadzwa ngeiro zuva,” unoronza Mambo Mwari. “Ringirai, ndinorwisana newe, O unodzikudza,” unoronza Mambo Mwari, Mwari wehondo; “Ngokuti zuva rako raguma, nguva yendinozokuorora. Unodzikudza unozopumhunwa nokuwa, akuna naumwe unozomumirudza; neni ndinozobasa muriro mumadhorobha ake, nawo unozopisha zveshe zvinomutendenedza.” Izvi ndizvo zvinoronza Mambo Mwari wehondo: “Vanhu vaIsuraeri nevanhu vaJudha vakatsikirirwa pamwepo; veshe vakavatora kuita hloko vakavabatisisa; vakaramba kuvasunhura. Muripiri wavo wakagwinya; Mambo Mwari wehondo ndiro zina rake. Unozonasa kupota ngendaa yavo, kuti azorodze nyika, asi kutambudza vanogara Bhabhuroni.” Shoti yaguma kurwisana nevaKharadhea, nokunaavo vanogara Bhabhuroni, nokumakota aro, nokuvanhu varo vakangwara, unoronza Mambo Mwari. Shoti kurwisa vanyepi, kuti vaite mapenzi! Shoti kurwisa ngwazi dzaro, kuitira kuti vaparadzwe! Shoti kurwisa mahachi aro, nokungoro dzaro, nokurwisa veshe varwi vevapara vanogara pakati paro; navo vanoita kudai ngavakadzi! Shoti kurwisa upfumi hwaro hweshe, kuitira kuti uchakatwe nokubiwa! Kuoma kurwisa ndwizi dzaro, kuitira kuti dziomeswe! Ngokuti inyika yemiedzaniso yakatsetswa, navo vanopenga ngendaa yemiedzaniso. “Ndizvo mhuka dzomushango dzinozogaramwo nemathika, nemhowani dzinozogaramwo; arichazogarwi mhera nariini, nokuti kugarwa ngemibarirwana yeshe. Kudai ngeapo Mwari paakapwanya Sodhoma neGomora nemadhorobha akatendenedza pasinde,” unoronza Mambo Mwari; “Ndizvo apana naumwe unozogaramwo, nokuti umwe ungauya kooakamwo. Ringira, dzinza revanhu rinouya kubva dera, dzinza guru, nemadzimambo akawanda anomuswa kubva kumarupande enyika ari kuretu. Vanofura ngeuta nemikhondo, vanoushungu, avana nyasha. Bope ravo rinoungumira kudai ngoruandhle, vanogadha mahachi, veshe vakadzinasirira umwe ngaumwe, kudai ngengwazi dzinoenda koorwa, kurwa newe, O mwanasikana weBhabhuroni. Mambo weBhabhuroni wakazwa mashoko ndivo nenyara dzake dzakapera simba; kurwadziwa kwakakura kwakamubata, kurwadziwa kwakadai ngekwomukadzi uri mukubereka. “Kudai ngemhondoro inouya yechibva mugwasha reJorodhani kuuya kumafuro akasvipira, ndinozokasira kuvadzinga kubva kweriri; neni ndinozoemesa padera paro kunyazwi ndiani wendingatsanangura. Ngokuti ndiani wakadai ndini? Ndiani ungandigurira mukuwo? Ndiani muushi uwo ungakona kuema pamberi pangu? Ndizvo izwai urongwa hwaMambo Mwari, uhwo hwaarongera Bhabhuroni, nemabiningidzo akaita kuti arongere nyika yevaKharadhea: Ngegwinyiso vadoko vomutanga vanozokweerwa kuretu; ngegwinyiso mafuro avo anozotyisa ngendaa yavo. Ngebope rokubatwa kweBhabhuroni nyika inozohuta, nokuchema kunozozwika pakati pemadzinza.” Mambo Mwari unoronza izvi: “Ringirai, ndinozomirudzira mweya womuparadzi kurwisa Bhabhuroni, nevanogara muKharadhea, neni ndinozotumira varudzi kuBhabhuroni navo vanozorirudza. Navo vanozobudisa zveshe kubva munyika yaro apo pevanouya koorirwisa, kubva kumarutii eshe; ngezuva rokutambudzika. Unofura ngeuta asatenderwa kukwanya uta hwake nokuti, kupfeka bhachi rake resimbi. Musaponesa majaha aro; urayai yeshe hondo yaro. Vanozowa pashi vaurawa munyika yevaKharadhea, nokubaiwa mumapato aro. Ngokuti Isuraeri naJudha avazi kusiiwa ndiMwari wavo, Mambo Mwari wehondo, kunyazwi nyika yavo yakazadzwa ngokushaisha pamberi peUmwe Wakachena waIsuraeri. Tizai mubude kubva pakati peBhabhuroni, nomunhu weshe ngaadziponese! Musaparadzwa ngendaa yokushata kwaro, ngokuti uyu mukuwo wokuunzidzira waMambo Mwari; unoriunzidzira zverakaita. Bhabhuroni raiya tsani yomukore munyara yaMambo Mwari, yakaita kuti nyika yeshe iraradze; madzinza akamwa vhini raro, ndizvo madzinza anopenga. Bhabhuroni rawa nokuparadzwa ngokukasira; boorerai ngendaa yaro! Unzai mutombo wokurapa maronda aro, pamweni ringaponeswa. Takaedza kuponesa Bhabhuroni, asi aripori. Rirekerenyi, mutiendere umwe ngaumwe wedu aende kunenyika yake; ngokuti kutongwa kwaro kunoguma mudenga, nakwo kwamirudzwa kuguma mudenga mumakore. “Mambo Mwari wabudisa kururama kwedu; uyai, ngatidaidzire muZioni mushando waMambo Mwari, Mwari wedu. “Rodzerai misee! Zadzai chikomwe! Mambo Mwari wamusa mweya wemadzimambo evaMedhe, ngokuti biningidzo rezano rake ngeBhabhuroni kuriparadza; ngokuti ndikwo kuunzidzira kwaMambo Mwari kuunzidzira ngendaa yetemperi rake. Emesai mujeki pamarukumbati eBhabhuroni, gwinyisai kurinda, emesai varindi, emesai vahwariri; ngokuti Mambo Mwari wakaita zveshe kuronga nokuita zvaakaereketa ngevanogara Bhabhuroni. Iwewe unogara pamvura yakawanda, noupfumi hwakawanda, magumo ako aguma, tambo yokupona kwako yadamburwa. Mambo Mwari wehondo wakadzipikira pachake echiti, ‘Ngegwinyiso ndinozokuzadza ngavarwi vehondo vakadai ngemutanda wendongwe, navo vanozomirudza kudaidzira kwokunyisa padera penyu.’ Ndiye wakasika nyika ngesimba rake, uwo wakaemesa nyika ngoungwaru hwake, nokuzwisisa kwake wakatambanudza matenga. Naapo paanoereketa izwi rake, riripo bope rakadai ngeremvura mumatenga, naye unoita kuti mhute ipwititike kukwira kubva kumagumo enyika. Unonasira mheni dzemvura, echiunza dutu kubva mudura rake. Munhu weshe ibenzi naye aana ruziyo; mupfuri womukore weshe unotsverudzwa ngomuedzaniso wake; ngokuti miedzaniso yake yakanyunguruswa ngeyokunyepera, nayo aifemi mukati mwayo. Aina shwiro, mishando yokuchengedzera; pamukuwo wokuororwa kwayo inozoparadzwa. Chikoaniswa chaJakobe achizi kudai ndiyo; ngokuti uwo ndiye muiti wezviro zveshe, naIsuraeri ndiro dzinza renhaka yake; Mambo Mwari wehondo ndiro zina rake.” Iwewe uri hamera yangu yokurwa ndiyo, nendonga yangu yehondo: ndiwe ndinoputsa madzinza kuita zvigurwa; ndiwe ndinoparadza umambo; ndiwe ndinopwanya hachi nomugadhi waro; ndiwe ndinopwanya ngoro nomuhambisi wayo; ndiwe ndinopwanya mwamuna nomukadzi; ndiwe ndinopwanya musharuka nomurumbwana; ndiwe ndinopwanya jaha nomusikana; ndiwe ndinopwanya muushi nomutanga wake; ndiwe ndinopwanya murimi nejoka rake ren'ombe; ndiwe ndinopwanya vatongi nevanoteera sure kwavo. “Ndinozohwirinzira Bhabhuroni navo veshe vagari veKharadhea, pamberi pemadziso ako emene ngokushata kwavo kweshe kwevakaita muZioni,” unoronza Mambo Mwari. “Ringira, ndinorwisana newe, O dunhu rinoparadza,” unoronza Mambo Mwari; “Iro rinoparadza nyika yeshe; ndinozotambanudza nyara kurwisana newe, ndikumburumbudze kubva kumapuwe, nokukuita kuti udai ngomutunhu wakapishwa. Apana buwe rinozotorwa kubva kwouri repakhona, apana buwe retsikiro; unozoita dongo mhera nariini,” unoronza Mambo Mwari. “Emesai mujeki munyika, ridzai gwama pakati pemadzinza; nasirirai madzinza kurwa naro, ridaidzirei umambo kurwa naro, Ararati, Mini, neAshikenazi; emesai nduna kurwa naro, unzai mahachi akwire akadai ngendongwe dzinoparadza. Nasirirai madzinza kurwa hondo naro, madzimambo eMedhe, nevanoteera sure kwavo, nenyika dzeshe dzoumambo hwavo. Nyika inohuta nokundengendeka, ngokuti biningidzo raMambo Mwari rokurwisa Bhabhuroni zvinozoitika, kuti nyika yeBhabhuroni iite matongo isina unogaramwo. Ngwazi dzeBhabhuroni dzarekera kurwa, dzagara mumarusvingo adzo; simba radzo rakapera; dzaita kudai ngevakadzi; mhatso dzaro dzapishwa ngomuriro, mipiningidzo yaro yaguka. Murumbi umwe unorumba kooshongana noumweni, nomutumwa umwe kooshongana noumweni, kuziisa mambo weBhabhuroni kuti dhorobha rake ratorwa kubva kumagumo kuenda kumagumo: mazambuko atorwa, tsanga vadzipisha ngomuriro, varwi vehondo vakarudzwa.” Ngokuti izvi ndizvo zvinoronza Mambo Mwari wehondo, Mwari waIsuraeri kuti, “Mwanasikana weBhabhuroni wadai ngembuwa ngomukuwo wokupura weinotsikwatsikwa, asi mukuwo mudoko nomukuwo wokucheka unozomugumira.” “Nebhukhadhineza mambo weBhabhuroni wandidya, wakandipwanya, wandiita kuti ndidai ngechidziyo chisina chiro, wandimedza kudai ngewamedzwa ngemhuka inotyisa kakurutu; wazadza ndani yake ngezvakanaka zvangu, wandirutsa.” Vagari veZioni vanozoti, “Kuremadzwa kwakaitwa kunyama yangu ngakuwe padera peBhabhuroni;” neveJerusarema vanozoti, “Ngazi yedu ngaiwe padera paavo vagari veKharadhea.” Ndizvo izvi zvinoronza Mambo Mwari: “Ringira, ndichakuereketera ndaa yako, nokukuunzidzira. Ndinozoomesa ruandhle rwake, nokuita kuti zvinyuka zvake zviome. NeBhabhuroni rinozoita murwi wematongo, nebako remakava, nokuita chiro chinoshamisa, nokushoorwa, nokuridzirwa murudzi risina unogaramwo. Veshe pamwepo vanorira kudai ngemhondoro; vanobhonga kudai ngevana vemhondoro. Naapo vamusirirwa ndinozovanasirira dhiri, nokuita kuti vararadze, kuti vadakare, vaate hope dzisikagumi, navo vasikamuki,” unoronza Mambo Mwari. “Ndinozovadzasa pashi kudai ngevana vemakwai, vanodzaswa koourawa, kudai ngemagondohwe nemagotokoto. “Sheshakhi raita matorerwenyi! Kukudzwa kwenyika dzeshe kwaita magumirenyi! Bhabhuroni raita chiro chinotyisa pakati pemadzinza ngenjiranyi! Ruandhle rwafashukira padera peBhabhuroni; rwafukidzwa ngamafungo arwo akawanda. Madhorobha aro aita chiro chinotyisa, nyika yokuoma norubaya, nyika isikagarwi ngomunhu, akunazve naumwe wevakororo vevanhu unopindamwo. Ndinozoorora Bheri muBhabhuroni, ndechiita kuti abudise pamuromo wake izvo zvaakatangurira. Madzinza aachazounganizve pamwepo kwaari; rukumbati rweBhabhuroni rwawa. Budai kubva mukati mwaro, vanhu vangu. Mudziponese kubva kuushungu hunotyisa hwaMambo Mwari umwe ngaumwe wenyu. Mwoyo yenyu isademera, nokuti kutyiswa ngeshoko rinozwika munyika; gore rimwe shoko rimwe rinouya, gore rinoteera shoko rimweni, shoko rokugebenga munyika, neromutongi echirwa nomutongi. Ndizvo, ringira, mazuva anouya, apo pendinozoorora miedzaniso yakatsetswa yeBhabhuroni; nenyika yaro yeshe inozotsverudzwa, veshe vakaurawa varo vanozowa pakati paro. Zvino denga nenyika nazvo zveshe zviri mukati mwazvo zvinozoemba ngokudakara padera peBhabhuroni; ngokuti vaparadzi vanozouya koorirwisa vechibva dera,” unoronza Mambo Mwari. “Bhabhuroni rinosisira kuwa ngendaa yevakaurawa vaIsuraeri, kudai ngevakaurawa venyika yeshe vawa ngendaa yeBhabhuroni. “Imwimwi mwakapona shoti, endai, musazungaira! Karakadzai Mambo Mwari muri munyika kuretu, Jerusarema ngariuye kumikarakadzo yenyu. Tatsveruka, ngokuti tazwa zvituko; kutsverudzwa kwafukidza hope dzedu, ngokuti vapara vaguma kundau dzakacheneswa dzemhatso yaMambo Mwari. Ndizvo, ringira, mazuva anouya,” unoronza Mambo Mwari, “Apo ndinozoorora miedzaniso yaro; vakaremadzwa vanozogomera munyika mwaro mweshe. Kunyazwi Bhabhuroni rikanyakwira mudenga, nokunyazwi rikanyagwinyisa urebu hwepanesimba raro, kubva kwendiri vaparadzi vachauya kweriri,” unoronza Mambo Mwari. “Purutanai kuchema kunobva Bhabhuroni! Kuparadzwa kukuru kunobva kunyika yevaKharadhea! Ngokuti Mambo Mwari unoparadza Bhabhuroni, nokunyaradza izwi rokupota kwaro. Mafungo ayo anoungumira kudai ngemvura yakawanda nebope rokupota kwavo rinozwika. Ngokuti muparadzi waguma kurwa naro, kurwa neBhabhuroni; ngwazi dzaro dzatorwa, uta hwadzo hweshe hwagurwa; ngokuti Mambo Mwari ndiMwari wokuunzidzira, ngegwinyiso unozounzidzira. Ndinozoita kuti makota aro araradze, nevakangwara varo, vatongi varo, nduna dzaro, nengwazi dzaro; vanozoata hope dzisikagumi, avamuki,” unoronza Mambo, uwo zina rake ndiMambo Mwari wehondo. Izvi ndizvo zvinoronza Mambo Mwari wehondo: “Marukumbati akapamhama eBhabhuroni anozoputsirwa pashi, nemisiwo yaro yakareba inozopishwa ngomuriro. Vanhu vanozodzirembesa pachavo pasina chiro, nemadzinza anozodzirembesa pachawo kushandira muriro.” Izwi iro raakapanga Jeremia muprofeti kunaSeraia mukororo waNeria mukororo waMahiseia, apo paakaenda Bhabhuroni naZedhekia mambo waJudha mugore rechirongomuna rokutonga kwake. Seraia waiya nduna huru. Jeremia wakanyora mubhuku rinopetwa kweshe kushata kwaizouya padera peBhabhuroni, mazwi aya eshe akanyorwa ngendaa yeBhabhuroni. NaJeremia wakati kunaSeraia, “Apo waguma Bhabhuroni, ona kuti wadzidza aya mazwi eshe, newe unozoti, ‘O Mambo Mwari, iwewe pachako wakaereketa ngendaa yeiyi ndau, kuti uchaiparadza, kuti kusazoapo naumwe unosara kweiri, munhu nokuti mhuka, asi kuti inozoita matongo mhera nariini.’ Naapo wapedza kudzidza iri bhuku unozosungira buwe kweiri nokuikandira pakati porwizi runozwi Yufratesi. Newe unozoti, ‘Izvi ndizvo zvinozoita Bhabhuroni rinozonzvaira kudai, arizomiruki, ngendaa yokushata kwendinounza padera paro. Vanozopera simba.’ ” Pano ndipo panogumira mazwi aJeremia. Zedhekia waiya nemakore makumi mairi narimwe apo paakatanga kutonga, wakatonga makore gumi narimwe muJerusarema. Zina ramai ake raizwi Hamutari mwanasikana waJeremia weRibhina. Wakaita zvakashata mukuona kwaMambo Mwari, kudai ngezvakaitwa ndiJehoiakimu. Ngegwinyiso Jerusarema naJudha vakanyangadza Mambo Mwari, ndizvo zvakaita kuti avadzinge kubva pamberi pake. Zedhekia wakamukira mambo weBhabhuroni. Mugore rechipfumbamwe rokutonga kwake, mumwedzi wegumi, pazuva regumi romwedziwo, Nebhukhadhineza mambo weBhabhuroni wakauya, nehondo yake yeshe koorwa neJerusarema, akadzimika matende, akaaka rukumbati kuritendenedza. Ndizvo dhorobha rakakombwa metsa mugore regumi narimwe rokutonga kwaMambo Zedhekia. Pazuva rechipfumbamwe romwedzi wechirongomuna nzara yakashata yakauya mudhorobha, ndizvo mwaiya musichina kudya kwevanhu veiyi nyika. Zvino rukumbati rwedhorobha rwakaputswa, nevanhu veshe vokurwa hondo vakatiza, vakabuda kubanze kubva mudhorobha usiku ngenjira yepamusiwo, ngepakati pemarukumbati mairi, pasinde pemunda wamambo, kunyazwi vaKharadhea vaiya vechitendenedza dhorobha. Vakaenda ngenjira yeArabha. Asi hondo yevaKharadhea yakarumbirira mambo, ikabata Zedhekia murubaya rweJerikho; nehondo yake yeshe yakaparadzwa ikamutiza kubva kwaari. Zvino vakabata mambo, vakaenda naye kunamambo weBhabhuroni paRibra munyika yeHamathi, naye wakamutonga. Mambo weBhabhuroni wakauraya vakororo vaZedhekia pamberi pokuona kwake, wakaurayazve eshe makota aJudha muRibra. Wakatumbura madziso aZedhekia, akamusunga ngemanguri, namambo weBhabhuroni wakaenda naye Bhabhuroni, akamuisa mutirongo metsa pazuva rokufa kwake. Mumwedzi wechishanu, pazuva regumi romwedzi, mugore regumi nemapfumbamwe okutonga kwaNebhukhadhineza mambo weBhabhuroni, Nebhuzaradhani, nduna huru yevarindi vaishandira mambo weBhabhuroni wakapinda muJerusarema. Wakapisha mhatso yaMambo Mwari, mhatso yamambo, nemhatso dzeshe dzeJerusarema; nemhatso dzeshe dzavakuru wakadzipisha. Hondo yeshe yevaKharadhea, yaiya nenduna huru yevarindi, yakaputsira pashi marukumbati eshe eJerusarema akaritendenedza. Nebhuzaradhani nduna huru yevarindi wakatora vamweni vevarombo akavaita hloko, nevakasara vevanhu avo vakasara mudhorobha, naavo vakatiza kuenda kunamambo weBhabhuroni, pamwepo nevakasara veshe vengwazi. Asi Nebhuzaradhani nduna huru yevarindi wakasiya vamweni vakapinda veshe kuita varombo venyika kuti vangwarire mivhini nokuita varimi. Sika dzethusi dzaiya mumhatso yaMambo Mwari, nemwamba, nedziya rethusi raiya mumhatso yaMambo Mwari, vaKharadhea vakariputsa kuita zvigurwa, vakatwara reshe thusi kuenda naro Bhabhuroni. Vakatora kuenda nazvo hari, mafoshoro, zvigero zvezvibani, ndiro huru, zvipunu zvikuru, nezvidziyo zvethusi zveshe zvaishandiswa mumhatso yaMambo Mwari. Nduna huru yevarindi yakatora mikheyo, mbaura dzomuriro, ndiro huru, hari, zvigadzikiro zvezvibani, zvipunu, nemikheyo yokudurura ndiyo midiro yokumwa, zveshe zvomukore wemene, neizvo zvesirivha yemene. Sika mbiri, imwe yedziya, mikono gumi nemiiri yethusi yaiya pashi pedziya nemwamba, izvo mambo Soromoni zvaakaitira mhatso yaMambo Mwari, thusi rezvidziyo zveshe izvi zvaiya zvisikapimiki kuwanda. Sika imwe ngaimwe urebu hwayo hwaiita mamitha masere; nemamitha mashanu nezvidoko zvitatu kutenderera. Yaiya nemwina pakati, kutimbara kwayo kwaiita mamirimitha makumi manomwe nemashanu. Padera payo imwe ngaimwe paiya nechatsungu chethusi, kureba kwacho kukwira mudenga mamitha mairi nezvidoko zviiri, yakanemeswa ngemaphomegraniti akanangurwa, kuitendenedza eshe akaitwa ngethusi padera padzo. Sika yechipiri yaiya yakadarowo inemaphomegraniti. Kumarutii kwaiya nenyora dzemaphomegraniti makumi mapfumbamwe nematanhatu; eshe maphomegraniti aitendenedza pakanemeswa aiya zana rimwe. Nenduna huru yevarindi yakatora Seraia mupristi mukuru, naZefania mupristi waiteera sure kwake, nevangwariri vomusiwo vatatu. Wakatora kubva mudhorobha uwo waiya nduna padera pevarwi vehondo; nevamuna vanomwe vaitonga namambo, vakaoneka mudhorobha; munyori wenduna huru yehondo, uwo waiunganidza vanhu venyika; nevamuna makumi matanhatu vevanhu venyika avo vakaoneka pakati pedhorobha. Zvino Nebhuzaradhani nduna huru yevarindi wakavatora, akavaunza Ribra kunamambo weBhabhuroni. Namambo weBhabhuroni wakavachaya, akavauraya paRibra munyika yeHamathi. Ndizvo Judha wakapinda muusungwa kuitwa hloko kubanze kwenyika yake. Avo ndivo vanhu vaakatora Nebhukhadhineza kuita hloko: mugore rechinomwe rokutonga kwake wakatora vaJudha makumi emazana matatu, nemakumi mairi nevatatu (3,023). Mugore regumi nemasere okutonga kwaNebhukhadhineza wakatora kubva Jerusarema hloko mazana masere nemakumi matatu nevairi (832). Mugore remakumi mairi nematatu rokutonga kwaNebhukhadhineza, Nebhuzaradhani nduna huru yevarindi wakatora vaJudha mazana manomwe nemakumi marongomuna nevashanu (745), kuvaita hloko: vanhu ava veshe vakaita makumi emazana marongomuna nemazana matanhatu (4,600). Mugore remakumi matatu nemanomwe oubatwa hwaJehoiakhini mambo waJudha, mumwedzi wegumi nemiiri, ngezuva remakumi mairi nemashanu romwedziwo, Evhirimerodhakhi mambo weBhabhuroni, mugore rokutanga rokutonga kwake, wakaitira nyasha Jehoiakhini mambo waJudha, akamubudisa mutirongo. Wakaereketa ngenyasha kwaari, akamupa dendemaro riri padera pemadendemaro emadzimambo aiya naye muBhabhuroni. Ndizvo Jehoiakhini wakaisa machira ake omutirongo parutii, naye wakadya kudya patafura ramambo mazuva eshe okupona kwake. Kudai ngezvaaitama, waindozvipuwa zuva ngezuva ndimambo weBhabhuroni, kudai ngezvaaipona metsa kuguma pazuva rokufa kwake. Ushomanyi hwakadai dhorobha ragara rega, iro raiya rakazara ngevanhu! Ngenjiranyi raita kudai ngeshirikadzi, iro raiya rakakura pakati pemadzinza! Iro raiya mwanasikana wamambo, pakati penyika raita hloko! Rinochema kakurutu usiku, nemasodzi aro anomozoka pamatama aro; pakati pevadikani varo arina naumwe wokuriembedzera; vangani varo veshe vakashanda naro ngokuchengedzera, navo vakaita magaa kweriri. Judha rapinda muuhloko munokutambudzika nouhloko hukuru; rinogara zvinopano pakati pemadzinza; arioni ndau yokuzororera; varumbiriri varo vakaribatira pakamanikana. Njira dzinoenda Zioni dzinochema, ngokuti akuna naumwe unouya kumadhiri akaemeswa; misiwo yaro yeshe yaparadzwa, vapristi varo vanogwimba; mhandwe dzaro dzinotambudzika, iro pacharo riri mukutambudzika. Magaa aro aita vatongi varo, mapandu aro anobudirira, ngokuti Mambo Mwari wakariita kuti ritambudzike ngendaa youwandu hwezvishaishi zvaro; vana varo vapinda muubatwa pamberi pemagaa. Unaku hweshe hwemwanasikana Zioni hwapera. Vatongi varo vadai ngeshoma dzisikaoni mafuro, vakatiza vasina simba pamberi pevarumbiriri vavo. Jerusarema rinokarakadza, ngemazuva okutambudzika nokunzerereka kwaro, zviro zvaro zveshe zvinomutengo mukuru, izvo zvaiya zvaro mazuva ekare. Naapo vanhu varo vakawira munyara dzemagaa, pasina naumwe wakaridetsera, magaa akariona akaita chishekedzo ngokuparadzwa kwaro. Jerusarema rakashaisha kakurutu, ndizvo raita chishekedzo; avo veshe vairiremeredza vorishoora, ngokuti vaona utitinini hwaro; iro pacharo rinogwimba nokufuratira. Tsvina yaro iri munezvokufuka zvaro; aripinimidzi ngemagumisiro aro; kuwa kwaro pashi kunoshamisa, pasina naumwe muembedzeri. “O Mambo Mwari, ringira kutambudzika kwangu, ngokuti gaa ranyisa.” Gaa rakatambanudza nyara dzaro padera pezviro zvaro zveshe zvinomutengo mukurutu; ratoona madzinza echipotera mundau dzaro dzakacheneswa, avo vewakaereketa ndivo kuti vasapotera mumishongano yako. Vanhu varo veshe vanogwimba, apo vanotsvaka chokudya; vanotengesa zviro zvavo zvinomutengo mukurutu kutenga kudya kuti vapone. “Ringira, O Mambo Mwari, uone kushoorwa kwendinoitwa.” Azvironzi chiro kwomuri here, imwimwi mweshe munopinda ngenjira? Ringirai, muone kuti kuripo here kutambudzika kukuru kwakadai ngokutambudzika kwangu, ukwo kwakaitwa kwendiri, kwaakanditambudza ndikwo Mambo Mwari ngezuva roushungu hwake hukuru. Kubva mudenga wakatuma muriro, ukapinda kudzama mumagodo angu; wakatambanudzira tsoka dzangu mumbure, akandihwirinza sure; wakandiparadza nokundipedza simba zuva reshe. Zvishaishi zvangu zvakasungirwa mujoka; ngenyara yake zvaiya zvakasungirwa pamwepo, zvikaiswa pamutsipa wangu, zvechimwa simba rangu; Mambo Mwari wakandipira munyara dzaavo vendisikakoni kurwa navo. Mambo Mwari waramba dzeshe ngwazi dzangu dziri mukati mwangu; wakandidaidzira nguva yokurwa neni kuuraya majaha angu; Mambo Mwari watsikatsika pashi kudai ngounosvina mavhini mhandwe mwanasikana Judha. Ngendaa yeizvi ndinochema; madziso angu anoerera masodzi; ngokuti muembedzeri uri kuretu kubva kwendiri, umwe kumusira simba rangu; vana vangu vaparadzwa, ngokuti gaa ranyisa. Zioni rinotambanudza nyara dzaro, asi akuna naumwe wokuriembedzera; Mambo Mwari wapanga ngendaa yaJakobe kuti vaakirwana vake ndivo vaita magaa ake; Jerusarema raita chiro chakasvipiswa pakati pavo. Mambo Mwari wakarurama; ngokuti ndamukira mipango yake. Asi izwai, imwimwi vanhu mweshe, muringire kutambudzika kwangu; mhandwe dzangu nemajaha angu vapinda muuhloko. Ndadaidzira kuvadikani vangu, asi vandichengedzera; vapristi vangu nevasharuka vangu vafira mudhorobha, vechitsvaka kudya kuti vamusirire simba ravo. Ringira, O Mambo Mwari, kutambudzika kwangu; ndinotambudzika mukati mwangu, mwoyo wangu unotambudzika mukati mwangu, ngokuti ndakamukira kakurutu. Mumapato shoti inouraya, mumhatso mune rufu rwega. Vakazwa kugwimba kwangu, pasina naumwe wokundiembedzera. Magaa angu eshe akazwa ngokutambudzika kwangu; anodakara ngokuti wazviita. Unza zuva rowaemesa, vaite kuti vadai ndini. “Kushata kwavo kweshe ngakuuye pamberi pako; uvaitire kudai ngezvewaita kwendiri ngendaa yezvishaishi zvangu zveshe; ngokuti kugwimba kwangu kwakawanda, nomwoyo wangu unodemera.” Mambo Mwari ngenjiranyi wafukidza mwanasikana Zioni ngegore roushungu hwake! Wakandira pashi panyika kubva mudenga unaku hwaIsuraeri; aazi kukarakadza ngechitambarariro chetsoka dzake muzuva roushungu hwake! Mambo Mwari wakaparadza asikakunguriri ugaro hweshe hwaJakobe, muushungu hwake wakandira pashi marukumbati emwanasikana waJudha; wadzasa pashi pamavhu mukutsverudza umambo nevatongi vahwo. Wagura runyanga rwaIsuraeri muushungu hunotyisa; wakapfinyisa nyara yake yokumudyo kubva kwevari pamberi pemagaa; wapisha munaJakobe kudai ngomuriro unemirazvu, uwo unopisha zveshe zvakatendenedza. Wakwanya uta hwake kudai ngegaa, nenyara yake yokumudyo yakamirudzwa kudai ngegaa; wauraya veshe avo vadakadzi vemadziso edu mutende remwanasikana weZioni; wadurura ushungu hwake kudai ngomuriro. Mambo Mwari waita kudai ngegaa; waparadza Isuraeri, waparadza ngome dzake dzeshe, wapwanya kuita matongo marukumbati ake, akawanza kubonda nechiriro mumwanasikana waJudha. Waputsira pashi matumba ake kudai ngomunda; waparadza ndau yake yemishongano; Mambo Mwari waparadza muZioni mishongano yemadhiri nemaSabatha nomuushungu hwake hunotyisa washoora mambo nevapristi. Mambo Mwari waramba arita rake, akanyenya ndau yake yakachena; wapira munyara dzemagaa marukumbati engome dzaro; vaita bope mumhatso yaMambo Mwari, kudai ngezuva redhiri rakaemeswa. Mambo Mwari waemesa kuti aparadze nokuita matongo rukumbati rwemwanasikana weZioni; watambanudza tambo, aazi kupfinyisa nyara yake kubva mukuparadza; waita kuti thawa norukumbati zvicheme; zvapera simba pamwepo. Misiwo yaro yanzvaira mumavhu; waparadza nokugura mipiningidzo yaro; mambo waro nevatongi varo vaapakati pevemadzinza; akuchina mipango; vaprofeti varo avachaoni chioniso chinobva kunaMambo Mwari. Vakuru vomwanasikana weZioni vanogara pamavhu mukunyarara; vakandira bukuta pamasoro avo nokupfeka machira emasaka; mhandwe dzeJerusarema dzinokotamisa masoro adzo pamavhu. Madziso angu apera ngendaa yemasodzi; mweya wangu unotambudzika; mwoyo wangu unodururwa pamavhu, ngendaa yokuparadzwa kwevanhu vangu, ngokuti vana nechiya vanodemera mumapato edhorobha. Vanochema kumadzimai avo vechiti, “Zviripari zvokudya nevhini?” Apo vanodemera kudai ngevakaremadzwa mumapato edhorobha, apo mweya yavo yaidururwa pamaditi paanamai vavo. Chiinyi chendingakona kupupura ndiwe? Chiinyi chendingakutodzanisa nacho, O mwanasikana weJerusarema? Ndingakona kukuedzanisa nenyi, kuti ndikuembedzere mhandwe, mwanasikana weZioni? Ngokuti rutwe rwako rwakakura kudai ngoruandhle; ndiani uwo ungakona kukuporesa? Vaprofeti vako vakuonera zvioniso zvokunyepa nezvinopaukisa zvisina shwiro nezvoupenzi; avazi kubudisa kushaisha kwako, kuti vabvise uhloko hwako; asi vakuonera zvioniso zvokunyepa nezvokupaukisa. Veshe avo vanopinda ngenjira vanoembera nyara dzavo kwouri; vanoridza murudzi nokudzungudza masoro avo kumwanasikana weJerusarema vechiti, “Iri ndiro here dhorobha revakadudza vechiti, ‘Kuperera kwounaku, kudakara kwenyika dzeshe?’ ” Magaa ako eshe akushamira miromo yawo kurwisana newe; vanoridza murudzi nokukwetsanisa mazino avo; vanoti, “Tamumedza! A, iri ndiro zuva retaigarira; zvino tariona.” Mambo Mwari waita izvo zvaakaronga, wakazadzisa izwi rake raakapanga; kudai ngezvaakaemesa karetu, waputsira pashi, asina nyasha; waita kuti magaa adakare padera pako, nokumirudza runyanga rwemagaa ako. Mwoyo yavo yakachema kudaidzira kunaMambo Mwari, O rukumbati rwemwanasikana weZioni. Masodzi ngaaerere kudai ngorwizi masikati nousiku! Usazorora, madziso ako asaremba. Miruka, ucheme yaamho usiku, pakutanga kwomurindo! Durura mwoyo wako kudai ngemvura pamberi pehope yaMambo Mwari. Mirudza nyara dzako kwaari ngendaa yendaramo yevana vako, avo vanodemera ngenzara ngedera kwepato rimwe ngarimwe. Ringira, O Mambo Mwari, ukarakadze. Ngokunaani kwewaita izvi? Madzimai vangadya mibarirwana yavo here, vana vevabara? Mupristi nomuprofeti vangaurawa here mundau yakacheneswa yaMambo Mwari? Vadoko nevakuru vanoata pamavhu mumapato; mhandwe dzangu nemajaha angu awa ngeshoti; pazuva roushungu hwako wavauraya, kuuraya usikakunguriri. Wadaidza magaa angu kubva kweshe kwakanditendenedza kudai ngezuva redhiri; ngezuva roushungu hwaMambo Mwari akuna wakapokonyoka nokuti kusara; avo vendakatengura nokurera, gaa rangu ravapedza. Ndini munhu wakaona dambudziko pashi pendonga youshungu hwake. Wanditungamira, akandiunza muchidima, musina kujeka. Ngegwinyiso wafuratidza nyara yake kurwa neni ndega, zuva ngezuva reshe. Waita kuti nyama yangu neganda rangu zvichembere, akagura magodo angu. Wandiakira rushosha, akanditendenedza ngechanduru nokurwadziwa. Wakandiita kuti ndigare muchidima, kudai ngaavo vakafa karetu. Wanditendenedza ngorushosha, kuti ndisakona kutiza; wandisunga ngemaketani anorema. Kunyazwi ndikadaidzira nokuchema kuti ndidetserwe, unokonyera kubanze mukumbiro wangu. Watsiira njira dzangu ngamapuwe akatsetswa, washongorosa njira dzangu. Kwendiri wakadai ngebheya, iro rinohwarira inini, kudai ngemhondoro yakahwarira, wandipausa kubva munjira yangu, akandidambura kuita zvigurwa; akandiita murombo. Wakwamura uta hwake, akandiemesa kudai ngechipimo chokufura kwemusee wake. Wafura misee yechikomwe chake mutsvo dzangu. Ndaizwa chishekedzo kuvanhu vangu veshe, nokuizwa ruyo rwavo zuva reshe. Wandizadza ngokuvava, wandirairisa mvura yomuti unovava. Waita kuti mazino angu akuyike ngetsanza; wanditononesa mumadota. Mweya wangu uri kuretu kubva murunyararo; ndariyarwa kuti kugarisika kudini. Ndizvo ndinoti, “Simba rangu rapera nazvo zveshe zvendaigondera kubva kunaMambo Mwari.” Ndinokarakadza kurwadziwa kwangu nokunzerereka kwangu, muto womuti unovava nechanduru. Mweya wangu unoangira kupinimidza ndizvo, unokotamiswa pashi mukati mwangu. Asi ndichakarakadza ichi, ndizvo ndichine gonda: Nyasha dzinorudo dzaMambo Mwari dzinoita kuti tisapedzwa, ngokuti kuzwiro urombo kwake akuperi. Itsva mangwanani eshe; kugonda kwako kukuru. “Mambo Mwari uri chikoaniswa changu,” unoronza mweya wangu; “Ndizvo ndinozoisa gonda rangu mwaari.” Mambo Mwari wakanaka kwevari vanomugarira, kumweya unomutsvaka. Zvakanaka kuti munhu agarire mukunyarara ruponeso rwaMambo Mwari. Zvakanaka kuti munhu atware joka achi muutsva hwake. Ngaagare ega mukunyarara apo Mambo Mwari amutwarisa, ngaaise muromo wake mubukuta, kuti pamweni kungaapo gonda, ngaapire tsaya kwaari unomuchaya; azadzwe ngokutukwa. Ngokuti Mambo Mwari aazorashi mhera nariini. Kunyazwi anyaunza kusvipo mwoyo, unozoitira nyasha kudai ngouwandu hwenyasha dzake dzinorudo. Ngokuti aatambudzi nokuti kusvipisa mwoyo vana vevanhu ngokuda. Naapo mabanditi eshe munyika apwanyirwa pashi petsoka, apo maruramiro omunhu abviswa kwaari pamberi pehope yoUwo-Uri-padera-pezveshe, apo ndaa yomunhu yapauswa, aazvioni here Mambo Mwari? Ndiani ungapanga, nazvo zvechiitika, kuti Mambo Mwari asikazi kuzvipanga? Zvakanaka nezvakashata azvibvi pamuromo woUwo-Uri-padera-pezveshe here? Munhu unopona unovhuruvhuta ngenyi ngokuororwa ngendaa yezvishaishi zvake? Ngatiringisise nokuedza njira dzedu, tihwirire kunaMambo Mwari. Ngatimirudze mwoyo yedu pamwepo nenyara dzedu kunaMwari wedu uri mudenga. Takapauka nokumukira; auzi kutirekerera. Wadziputira ngoushungu ukatirumbirira; wechiuraya usikakunguriri. Wadziputira ngegore, kuti kusaapo nomukumbiro ungapindamwo. Watiita kuti tidai ngemarara nezvinorashwa pakati pevanhu. Magaa edu eshe atishamira miromo yawo kurwa nesu. Kukaruka nehunza zvatigumira, urombo nokuparadzwa. Madziso angu anoerera ndwizi dzemasodzi, ngendaa yokuparadzwa kwevanhu vangu. Madziso angu anozoerera asikarekeri asikagumi, metsa Mambo Mwari aringira pashi, kubva mudenga aone. Madziso angu anotambudza mwoyo wangu ngendaa yevanasikana veshe vedhorobha rangu. Avo vaiya magaa angu ndisina ndaa vakandirumbirira kakurutu, kudai ngeshiri. Vakandikandira murindi ndechipona, vakakandira mapuwe padera pangu. Mvura yakafukidza padera pesoro rangu; ndakati, “Ndafa.” Ndakadaidza zina rako, O Mambo Mwari, kubva muudzamu hwerindi. Wakazwa kupota kwangu: “Usatsiira nzee dzako, kunokuchema kwangu, kwokuda kudetserwa.” Wakakwedzera pasinde apo pendakadaidza kwouri; wakati, “Usatya.” Waereketa ndaa dzomwoyo wangu, O Mambo Mwari; waripira kupona kwangu. Waona kushata kwaitwa kwendiri; O Mambo Mwari, tonga ndaa yangu. Waona kuunzidzira kwavo kweshe, nezvevakaronga ndini. Wazwa kushoora kwavo, O Mambo Mwari, nokuronga kwavo ndini. Zvinovherevhedzwa nokugunun'una ngemagaa angu zvinonditambudza zuva reshe. Kunyazwi kugara pashi nokuti kumiruka ringira, ndiri ruyo rwavo. Vaunzidzire, O Mambo Mwari, kudai ngomushando wenyara dzavo! Vape mwoyo yakakonza; kutuka kwako ngakuapo padera pavo. Varumbirirenyi muushungu, muvaparadze kubva pashi pematenga aMambo Mwari. Zvaita zvokudini kuti mukore usajeka! Zvaita zvokudini kuti mukore wakaera utsandudzwe! Mapuwe akacheneswa adururwa dera kwemapato eshe. Vana vanodikanwa veZioni, vanoedzaniswa nomukore wakaera muuremu, vanoerengwa vakadai ngehari dzedongo, mushando wenyara dzomuumbi! Kunyazwi makechani anoamwisa nokurera vana vawo, asi vanhu vangu vaita mwoyo wakashata, kudai ngemhowani dziri mushango. Rurumi rwechiya runonamira kumuromo wedera ngendaa yenyota; ndumure dzinopemha chokudya, asi akuna naumwe unodzipa chiro. Avo vakadya zvakanaka vanoparara mumapato; avo vakakura vechipfeka zvakatsvuka vanoata mumirwi yemadota. Ngokuti kuororwa kwokushaisha kwevanhu vangu kwakapinda kukura kunokuororwa kwokushaisha kweSodhoma, iro rakaparadzwa ngomukuwo mudoko, kunyazwi akuna nyara yakaiswa padera paro. Vatongi varo vaiya vakachenesa kupinda chando, vakachena kupinda mukaka; muiri wavo wakatsvukira kupinda mapuwe anomutengo mukurutu, kun'anikira kwavo kwaiya kwakadai ngokwesafire. Zvino hope dzavo dzakasvipa kupinda masimbe; avaziikani mumapato. Ganda ravo raomera kumagodo avo; raoma kudai ngomuti. Vanomuchena avo vakaurawa ngeshoti kupinda avo vakaurawa ngenzara, ngokuti ava voperezeka, voda kufa ngokutama michero yomunda. Nyara dzemadzimai vanenyasha dzabika vana vavo; vakaita kudya kwavo mukuparadzwa kwevanhu vangu. Mambo Mwari wakapedza mushando woushungu hwake; wakadurura ushungu hwake hunotyisa, akabasira muriro muZioni, uwo wakapedza matsikiro aro. Madzimambo enyika aazi kugonda, nokuti naumwe wevagari venyika, kuti magaa nemapandu vaizopinda pamisiwo yeJerusarema. Indaa yezvishaishi zvavaprofeti varo, nokushata kwevapristi varo, vakaparadza ngazi yevakarurama mukati mwaro. Vakazungaira kudai ngemapofu mumapato, vakadzisvipisa ngengazi, kwokuti apana naumwe waikona kugwama zvokupfuka zvavo. Vanhu vakadaidzira kwevari vechiti, “Ibvai, mwakasvipiswa! Endai! Endai! Musatigwama.” Ndizvo vakaita minzererekwa nevapepeshekwa; vemadzinza vakati pakati pavo, “Avachazogarimwo nariini.” Mambo Mwari pachake wavaparadzanisa; aachazopinimidzi ndivo; avazi kuremeredza vapristi, avazi kuda vakuru. Madziso edu akadzerera ngokuangira kuringira kudetserwa kuneavo vasikadetseri; tairingirira dzinza risikakoni kutiponesa. Vakateera tsoka dzedu, nesu atizi kukona kuhamba mumapato edu; magumo edu akwedzera pasinde; mazuva edu akaerengwa, ngokuti kupera kwedu kwaguma. Varumbiriri vedu vaikasira kupinda makodzi omudenga; vakatirumbirira padera pemitunhu, vakatihwarira mushango. Wakadzodzwa waMambo Mwari, femero rokupona kwedu, wakabatwa ngehunza dzavo, umwe uwo wetakati ndiye, “Pashi pebvute rake tinozopona pakati pemadzinza.” Dakara nokudakadzwa, O mwanasikana weEdhomu, iwewe unogara munyika yeUzi; asi kweuriwo tsani iyo inozopinda; unozoradza nokudziita mutitinini. Kuororwa kwokushaisha kwako, O mwanasikana weZioni, kwapera, aachazomurekeri muri muuhloko; asi kushata kwako, O mwanasikana weEdhomu, unozoorora; unozofukura zvishaishi zvako. Karakadza, O Mambo Mwari, izvo zvatigumira; ringira, uone kutsveruka kwedu. Nhaka yedu yapuwa kuvapara, nemhatso dzedu kuvanhutu. Taa nherera nevasina baba, madzimai edu adai ngeshirikadzi. Tomwa mvura ngokutenga; huni dzedu toita zvokutengeserwa. Mitsipa yedu yaapashi pokuangiridzwa; tinoshanda tisikazorori. Tatambanudza nyara dzedu kuvaEgipite nokuvaAsiria kuti tipuwe kudya kwakakwana. Madzibaba edu akashaisha, apachina; nesu tatwara zvishaishi zvavo. Hloko dzinotonga padera pedu; apana naumwe unotinunura kubva kunyara dzavo. Tinoona kudya kwedu ngokupinza kupona kwedu mungozi, ngendaa yeshoti iri mushango. Ganda redu rasvipiswa kudai ngechiwenda ngendaa yenzara huru. Vakadzi vanobhinywa muZioni, mhandara mumadhorobha aJudha. Vatongi vanoturikwa ngenyara dzavo; vakuru avazi kuremeredzwa. Majaha anoangiridzwa kuti akuye, varumbwana vanothethereka nehuni. Vakuru vabva pamisiwo yedhorobha, majaha avacharidzi munanzi. Kudakara kwomwoyo yedu kwapera; kuzvina kwedu kwapinduka kuita kuchema. Dzungudza rawa kubva pasoro redu; ihehe kwetiri ngokuti tashaisha! Ngendaa yeichi mwoyo yedu inodemera; ngendaa yeizvi madziso edu anodzerera, aachanasi kuona, ngendaa yoMutunhu Zioni uwo waita dongo, hava dzinohamba padera pawo. Asi iwewe, O Mambo Mwari, unotonga mhera nariini; dendemaro rako rinogara kubva kumubarirwana kuenda kumubarirwana. Ngenyi wechitiriyarwa mhera nariini? Ngenyi wechitisiya mazuva mazhinji aya? Tipetudze kwouri, O Mambo Mwari, kuti nesu tipetudzwe; musirira mazuva edu kuti adai ngeekare. Asi kuti watiramba yaamho, newe wakanyadzwa tisu kupinda chipimo. Mugore remakumi matatu, mumwedzi wechirongomuna, pazuva rechishanu, ndaiya pakati pehloko, pasinde porwizi Khebhari, matenga akabeuka, neni ndakaona zvioniso zvaMwari. Pazuva rechishanu remwedzi, wegore rechishanu rouhloko hwamambo Jehoiakhini, izwi raMambo Mwari rakauya kunaEzekieri mupristi, mukororo waBhuzi, munyika yevaKharadhea pasinde porwizi Khebhari; nenyara yaMambo Mwari yaiya padera pake apo. Pendakaringira, ndakaona chipupuri chakabva ngedera, gore guru rinokujeka kwakaritendenedza, nomuriro unoramba wechipenya, nepakati pemuriro pane chiro chakadai ngethusi rinon'anikira. Mukati, pakati paro paiya nemiemo yakadai ngezvisikwa zvirongomuna zvinopona. Uku ndikwo kuringirika kwazvo: Zvaiya nechiemo chakadai ngechomunhu. Chimwe ngachimwe chaiya nehope murongomuna, nachimwe ngachimwe chazvo chaiya nemaphaphiro marongomuna. Mirenje yazvo yaiya yakatitwasa, nepashi petsoka dzazvo paiya pakadai ngepashi petsoka dzekonyana; nadzo dzain'anikira kudai ngethusi rakangwizirwa. Pashi pemaphaphiro azvo kumarutii azvo marongomuna zvaiya nenyara dzakadai ngedzomunhu. Nazvo zveshe zvirongomuna zvaiya nehope dzazvo nemaphaphiro azvo ndizvo: Maphaphiro azvo airimbana rimwe kunerimweni, chimwe ngachimwe chakahamba kururamisa kuenda mberi, azvizi kukunukuka apo zvaihamba. Ngendaa yomuemo wehope dzazvo, zveshe zvirongomuna zvaiya nehope yomunhu, hope yemhondoro ngokurutii rwokumudyo, hope yekabi ngorutii rwokumuoshwe, nehope yegodzi. Izvi ndizvo zvaiya muemo wehope dzazvo. Maphaphiro azvo aiya akaparadzirwa padera, chisikwa chimwe chaiya nemaphaphiro mairi, rimwe ngarimwe rakarimbana nephaphiro rechimweni, apo mairi akafukidza muiri wacho. Chimwe ngachimwe chakahamba kururamisa kuenda mberi; peshe pewaizoda kuenda mweya, zvakaenda, zvisina kukunukuka apo zvaihamba. Muemo wezvisikwa zvinopona waiya wakadai ngemasimbe anobaka ngomuriro, nokudai ngemasasi anohamba kuenda mberi ngesure pakati pezvisikwa zvinopona; muriro waijeka, kwakabuda mheni kubva pakati pomuriro. Zvisikwa zvinopona zvairumba kuenda mberi nesure kudai ngokupenya kwemheni. Naapo ndaringira kuzvisikwa zvinopona, ndakaona vhiri pashi pasinde pezvisikwa zvinopona, rimwe pachimwe ngechimwe pazvirongomuna. Kuoneka kwemavhiri nokunasirwa kwawo kwaiya kwakadai ngokun'anikira kwemapuwe anomutengo mukuru; eshe marongomuna aiya nomuemo umwewo, kunasirwa kwawo kwaiya kwakadai ngechiro chakadai ngevhiri riri mukati mwevhiri. Naapo ayihamba, ayikona kuhamba ngemarutii awo marongomuna, asikakunukuki apo ayihamba. Magango awo aiya akareba nokutyisa, ngokuti magango awo eshe marongomuna aiya akazara ngemadziso kuatendenedza eshe. Naapo zvisikwa zvinopona zvoohamba nemavhiri aihamba pasinde pazvo; naapo zvisikwa zvinopona zvakamiruka kubva panyika, nemavhiri aimirukawo. Kunyazwi ngepari pewaizoenda mweya, aizoenda powakaenda mweya, nemavhiri aizomirudzwa pamwepo nazvo; ngokuti mweya wezvisikwa zvinopona waiya mumavhiri. Naapo zvahamba, aihambawo; naapo zvaema, aiemawo; naapo zvamiruka kubva pashi, mavhiri aimiruka pamwepo nazvo; ngokuti mweya wezvisikwa zvinopona waiya mumavhiri. Padera pemasoro ezvisikwa zvinopona paiya nechiro chakadai ngedenga rinon'anikira kudai ngebuwe rinomutengo mukuru, chakatambanudzwa padera pemasoro azvo. Pashi pedenga maphaphiro azvo aiya akatambanudzwa, rimwe kunerimweni; chimwe ngachimwe chazvo chaiya nemaphaphiro mairi, aifukidzira muiri wacho. Naapo zvoohamba, ndakazwa bope remaphaphiro azvo, rakadai ngokuerera kwemvura inesimba, kudai ngokutinhira kweizwi roUne-simba-reshe, bope rehohoho kudai ngebope rehondo; apo zvaema, zvaipfinya maphaphiro azvo. Apo pakazwika izwi rakabva padera mudenga, padera pemasoro azvo; apo zvaema, zvaipfinya maphaphiro azvo. Nepadera pedenga raiya padera pemasoro azvo, paiya nechiro chakadai ngedendemaro, rinomuemo wakadai ngebuwe resafire; newaigara padera pomuemo wedendemaro chiro chairingirika chakadai ngomunhu. Padera kubva pane icho chairingirika chakadai ngechiunu chake ndakaona chiro chakadai ngesimbe raibaka, chiro chairingirika chakadai ngomuriro chaitendenedza mweshe; ngepashi kubva pane icho chairingirika chakadai nechiunu ndakaona chiro chairingirika chakadai ngomuriro, nawo wakajeka kumutendenedza. Kudai ngouta hwadandemutande huri mugore ngezuva rokunaya, uku ndikwo kujeka kwomuemo kwouthende hwaMambo Mwari. Naapo ndakuona, ndakawa pashi ngehope yangu, neni ndakazwa izwi roumwe echiereketa. Wakati kwendiri, “O mukororo womunhu, ema ngetsoka dzako, neni ndinozoereketa newe.” Naapo aereketa kwendiri, mweya wakapotera mukati mwangu, wakandiemesa ngetsoka dzangu, neni ndakamuzwa echiereketa kwendiri. Wakati kwendiri, “Mukororo womunhu, ndinokutuma kuvanhu vaIsuraeri, kudzinza revamukiri, avo vandimukira; ivo nemadzibaba avo vakapauka kundimukira metsa nanyamashi uno. Mibarirwana inemusikazwa inemwoyo yakaoma. Ndinokutuma kwevari, newe unozoti kwevari, ‘Izvi ndizvo zvinoronza Mambo Mwari, Mwari.’ Kunyazwi vanozopurutana, nokuti kuramba kupurutana (ngokuti imhatso inomukira), vanozozia kuti waiyapo muprofeti pakati pavo. “Neiwewe, O mukororo womunhu, usavatya, newe usatya mazwi avo, kunyazwi vakadai ngemakato neminzwa zvakakutendenedza, newe unogara pakati pezvinyaada; usatya mazwi avo, nokuti kupera simba ngokuringirika kwavo, ngokuti imhatso inomukira. Unozoereketa mazwi angu kwevari, kunyazwi vanopurutana nokuti kuramba kupurutana, ngokuti imhatso inomukira. “Asi iwewe, mukororo womunhu, izwa chendinoronza kwouri; usaita unomukira kudai ngemhatso iyo yokumukira; beura muromo wako, udye icho chendinokupa.” Naapo ndakaringira, ringira, nyara yakatambanudzwa kwendiri, ringira, bhuku rinopetwa rakanyorwa raiya mukati mwayo. Wakaritambanudza pamberi pangu; raiya rakanyorwa pamberi paro nesure kwaro, zvaiya zvakanyorwa padera paro mazwi echiriro, kuchema nokutambudzika. Wakati kwendiri, “O mukororo womunhu, idya icho chapuwa kweuri; idya iri bhuku rinopetwa, uende uerekete kumhatso yaIsuraeri.” Ndizvo ndakabeura muromo wangu, naye wakandipa bhuku rinopetwa kuti ndidye. Wakati kwendiri, “Mukororo womunhu, idya bhuku rinopetwa rendinokupa, uzadze ndani yako ndiro.” Zvino ndakaridya; nomukanwa mwangu raitapira kudai ngouchi. Wakati kwendiri, “Mukororo womunhu, enda kumhatso yaIsuraeri, uerekete kwevari mazwi angu emene. Ngokuti auzi kutumwa kudzinza rinokuereketa kusikaziikanwi nendimi yakakonza, asi kumhatso yaIsuraeri, haiwa kuvanhu vazhinji vanokuereketa kusikaziikanwi nevanendimi dzakakonza, avo mazwi avo ousikakoni kuzwa. Ngegwinyiso kudai ndakutuma kwevari vaizokupurutana. Asi mhatso yaIsuraeri aizokupurutani, ngokuti avadi kundipurutana; ngokuti mhatso yeshe yaIsuraeri inehuma yakaoma nomwoyo wakakukutara. Ringira, ndakaita hope yako kuti ikonze imukire hope dzavo, nehuma yako kuti ikonze imukire huma dzavo. Kudai ngebuwe rakaomesesa kupinda eshe, rakaoma kupinda frinti, ndizvo zvendaita huma yako; usavatya nokuti kupera simba ngokuringirika kwavo, ngokuti imhatso inomukira.” Wakati kwendiri, “Mukororo womunhu, mazwi angu eshe endinozoereketa kwouri aashire mumwoyo mwako, uazwe ngenzee dzako. Zvino, enda kuuhloko, kuvanhu vako, uerekete kwevari uti, ‘Izvi ndizvo zvinoronza Mambo Mwari, Mwari;’ kunyazwi vanozopurutana nokuti kuramba kupurutana.” Zvino Mweya wakandimirudza padera, naapo uthende hwaMambo Mwari hwamirudzwa kubva pandau pahwo, ndakazwa sure kwangu gwechekweche rokutinhira. Kwaiya kutinhira kwemaphaphiro ezvisikwa zvinopona aigwamana rimwe kunerimweni, nokutinhira kwemavhiri pasinde pazvo, nokutinhira kukuru kwemavhiri. Mweya wakandimirudza padera, ukanditwara, ukaenda neni ndakanyangadzwa; ndakaenda ndiri mukupisha mumweya wangu, nyara yaMambo Mwari yaiya nesimba padera pangu. Ndakaguma kwevari vouhloko muTherabhibhu, avo vaigara ngepasinde perwizi Khebhari. Neni ndakagara apo pevaigara, ndechishamiswa pakati pavo mazuva manomwe. Mukupera kwemazuva manomwe, izwi raMambo Mwari rakauya kwendiri rechiti, “Mukororo womunhu, ndakuita murindi wemhatso yaIsuraeri; nguva dzeshe dzounozwa izwi rinobva mumuromo wangu, unozovapa kupangwa kunobva kwendiri. Dai ndechiti kunewakashata, ‘Ngegwinyiso unozofa,’ newe auzi kumungwadza, nokuti kuereketa kungwadza wakashata kuti abve munjira yake yakashata, kuti aponese ndaramo yake; nouwo munhu wakashata unozofa mukushata kwake; asi ngazi yake ndinozoibvunza panyara yako. Asi kudai wechimupanga uwo wakashata, naye asikatenderuki kubva mukushata kwake, nokuti kubva munjira yake yakashata, iye unozofa mukushata kwake; asi iwewe waponesa mweya wako. “Zve, kudai munhu wakarurama echikunukuka kubva mukururama kwake nokuita zvinonyangadza, neni ndikaisa chipumhuniso pamberi pake, iye unozofa; ngokuti iwewe wakarekera kumupanga, unozofa mukushaisha kwake, nokururama kwake kwaakaita akuchazokarakadzwi; asi ndinozobvunza ngazi yake panyara yako. Kudai zvakanyadaro wapanga munhu wakarurama, kuti uwo munhu wakarurama asashaisha, naye asikashaishi, ngegwinyiso unozopona, ngokuti wakatenda kupangwa; newe unozoponesa mweya wako.” Zvino nyara yaMambo Mwari yaiya padera pangu; naye wakati kwendiri, “Miruka, ubude, uende mubani, umwo ndinozoereketa newe.” Ndizvo ndakamiruka, ndikaenda mubani; ringira, uthende hwaMambo Mwari hwaiyapo, kudai ngouthende hwendakaona ndiri pasinde porwizi Khebhari, neni ndakawa ngehope yangu. Mweya wakapotera mwendiri, nawo wakandiemesa ngetsoka dzangu; naye wakaereketa neni, akati kwendiri, “Enda, udzikonyere mumhatso mwako. Asi iwewe, O mukororo womunhu, mapote anozoiswa padera pako, vanozokusunga ndiwo, newe auzokoni kubuda kuenda pakati pevanhu, neni ndinozoita kuti rurumi rwako runamire dera kwomukanwa mwako, kuti uite chimbungumbungu, newe auzokoni kuvapangira; ngokuti imhatso inomukira. Asi apo ndooereketa newe, ndinozobeura muromo wako, newe unozoti kwevari, ‘Izvi ndizvo zvinoronza Mambo Mwari, Mwari;’ uwo unozozwa, ngaazwe, nouwo unoramba ngaarambe kuzwa; ngokuti imhatso inomukira.” “Neiwewe, O mukororo womunhu, dzitorere chidhina uchiemese pamberi pako, unyore padera pacho dhorobha, Jerusarema; urikombe ngorukumbati, uake rukumbati rwokurwa naro, uemese kweriri murwi wokurwa naro; uemese matende okurwa naro, udzimike matanda okuputsa rukumbati ndiwo kuritendendza. Zvino dzitorere ndiro yesimbi, uemese kudai ngorukumbati rwesimbi pakati pako nedhorobha; uemese hope yako kweriri, naro ngariwe nechiemo chokukombwa, iwewe rikombe. Ichi chinozoita chioniso kunevemhatso yaIsuraeri. “Zvino, ata ngorutii rwako rwokumuoshwe, uise kushata kwemhatso yaIsuraeri padera pako; unozotwara kushata kwavo kudai ngouwandu hwemazuva ounozoatapo. Ngokuti ndakaisa padera pako uwandu hwemazuva, mazana matatu nemakumi mapfumbamwe (390) emazuva, kunoedzana nouwandu hwemakore okuororwa kwavo; ndizvo unozotwara kuororwa kwemhatso yaIsuraeri. Naapo wapedza aya, unozoata kwechipiri, asi ngorutii rwako rwokumudyo, nokutwara kuororwa kwemhatso yaJudha; makumi marongomuna emazuva ndinokuemesera, zuva rimwe ngarimwe riite gore. Unozoemesa hope yako kuringira kukombwa kweJerusarema, nomuoko wako wakunyirwa, newe unozoprofeta kuriitira ndaa. Ringira, ndinoisa mapote padera pako, kuti usazokona kukunukuka kubva kurutii rumwe kuenda kunorumweni, metsa wapedza mazuva okukombwa kwako. “Newe tora koroni, bhare, nyimo, nyemba, mafunde nesipereti; uzviise muchidziyo chimwe, udzinasirire chingwa ndizvo. Muuwandu hwemazuva ounozoata ndiwo ngorutii rwako, mazana matatu nemakumi mapfumbamwe (390) emazuva, unozochidya. Kudya kwako kwounodya unozopimirwa magramu ezvingwa anoita mazana mairi nemakumi matatu (230) ngezuva; ngemikuwo yakaemeswa unozochidya. Newe unozomwa mvura yakapimwa, tsani mbiri ngezuva rimwe; ngemikuwo yakaemeswa unozoimwa. Unozochidya kudai ngemakhekhe ebhare, unozochibika mukuona kwavo padera pemadisa omunhu.” Mambo Mwari wakati, “Ndizvo, vanhu vaIsuraeri vanozodya chingwa chavo chakasvipiswa pakati pevemadzinza, apo pendinozovadzingira.” Zvino ndakati, “A Mambo Mwari! Ringira, andizi kumbodzisvipisa; kubvira muutsva hwangu metsa zvino andizi kutongombodya icho chadzifira, nokuti icho chakarumwa ngezvikara; amuzi kutongopinda mumuromo wangu nyama inonuhwa.” Zvino wakati kwendiri, “Wona, ndakupa disa ren'ombe pandau pedisa romunhu, newe unozonasira chingwa chako ndiro.” Zvino wakati kwendiri, “Mukororo womunhu, ringira, ndinozogura mudondoro wechingwa muJerusarema; vanozodya chingwa chinopimwa nokutyiswa kukurutu; vanozomwa mvura yakapimwa nomukupera simba. Vatama chingwa nemvura, vazoringirana umwe noumweni nomukupera simba, vanozoperezeka mukushaisha kwavo.” “Neiwewe, O mukororo womunhu, tora shoti yakapinza, ishandise kudai ngechisvo chomugundi, para ndiro bvudzi resoro rako nendebvu dzako; zvino tora zvipimo zvokupima, uparadzanise bvudzi. Unozopisha rupande rwaro rwechitatu ngomuriro mukati mwedhorobha, apo mazuva okukombiwa apera; unozotora rupande rumweni rwechitatu rwaro, nokuruchaya ngeshoti kutendenedza dhorobha; norupande rwechitatu rumweni unozoparadzira mudutu, neni ndinozoshwamura shoti sure kwaro. Zvino unozotora shomani raro kubva kweriri, unozorisungira muzvokusimira zvako. Kubva kuneiri unozoritora, urikandire mukati mwomuriro nokuripishapo mumuriro; ngokuti kubva kweriri muriro unozobuda kurwisana nemhatso yeshe yaIsuraeri.” Izvi ndizvo zvinoronza Mambo Mwari, Mwari: “Iri ndiro Jerusarema; ndariemesa pakati pemadzinza nenyika dzeshe dzakaritendenedza. Asi ramukira mitemo nezvitongero zvangu rechiita zvakashata kupinda madzinza nenyika dzeshe dzakaritendenedza, kuramba mitemo yangu risikadi kuteera kuhamba muzviemeso zvangu. Izvi ndizvo zvinoronza Mambo Mwari, Mwari: Ngokuti imwimwi munomukira kupinda madzinza akamutendenedza, nemwi amuzi kuhamba muzviemeso zvangu nokuti kungwarira zvitongero zvangu, asi mwakaita kudai ngezviemeso zvemadzinza akamutendenedza, izvi ndizvo zvinoronza Mambo Mwari, Mwari: Ringira, inini, inini pachangu ndinouya kurwa nemwi, neni ndinozotonga pakati penyu mukuona kwemadzinza. Ngendaa yezvinonyangadza zvenyu zveshe ndinozoita kwomuri icho chendisati ndaita, chendisikachazoitazve chakadaro. Ndizvo vabereki vanozodya vana vavo pakati penyu, nevana vanozodya vabereki vavo, neni ndinozotonga padera penyu, nevanosara venyu ndinozovaparadzira kumadutu eshe. “Ndizvo kudai ngezvendinopona, unoronza Mambo Mwari, Mwari, ngegwinyiso ngokuti imwimwi mwakasvipisa ndau yangu yakachena ngezviro zvenyu zveshe zvinonyenyisa nezvinonyangadza, ndizvo inini ndinozomutemera pashi; dziso rangu arizomukunguriri, neni andizomusvipiri mwoyo. Rupande rumwe rwechitatu rwenyu runozofa ngenhenda nokuti kupedzwa ngenzara pakati penyu; norupande rumweni rwechitatu runozourawa ngokupinza kweshoti kumutendenedza, norumweni rupande rwechitatu ndinozoruparadzira kumadutu eshe, nokurumbirira ngeshoti yakashwamurwa sure kwavo. “Ngokudaro ushungu hwangu hunozodzipedza pachawo, noushungu hwangu ndichahugumisa padera pavo, ndinozoembedzerwa; navo vanozozia kuti inini Mambo Mwari ndazviereketa mundurumwa dzangu, apo pendinopedzera ushungu hwangu padera pavo. Zve, ndinozokuita dongo nechiro chinoshekedza pakati pemadzinza anomutendenedza, mukuona kwavo veshe vanopindapo. “Chichaita chiro chinoshoorwa nechinoshekwa, nyowedzo nechinotyisa kunemadzinza anomutendenedza, apo ndinotonga kutonga kwangu padera penyu muushungu hwangu nomukushishwa kwangu, nokuorora kunoushungu. Inini Mambo Mwari ndazviereketa. Apo ndinoposhera padera pavo misee yangu inouraya yenzara, misee yokuparadza, iyo yendinozoposhera kuti imupedze, naapo ndinoangira kuunza nzara padera penyu, ndinogura mudondoro wechingwa chenyu. Ndinozotumira nzara nemhuka dzomushango padera penyu, nazvo zvinozomubira vana venyu; nhenda nokuparadzwa kwengazi zvinozopinda ngepakati penyu; ndinozounza shoti padera penyu. Inini Mambo Mwari ndazviereketa.” Izwi raMambo Mwari rakaguma kwendiri rechiti, “O mukororo womunhu, ringirisa hope yako kumitunhu yaIsuraeri, uprofete kuvaitira ndaa wechiti, ‘O imwimwi mitunhu yaIsuraeri, izwai izwi raMambo Mwari, Mwari: Izvi ndizvo zvinoronza Mambo Mwari, Mwari kumitunhu, nokuzvimitunhu, kumakwenga, nokumabani; ringira, inini, inini ndemene, ndinozounza shoti padera penyu, ndinozoparadza ndau dzenyu dzakakwirira. Maarita enyu anozoita matongo, midziyo yemitombo yokupishira midiro inozoputswa; ndinozokandira pashi vanhu venyu vakaurawa pamberi pemiedzaniso yenyu yokudira. Ndinozoradzika pashi miiri yakafa yevanhu vaIsuraeri pamberi pemiedzaniso yavo yokudira neni ndinozotatanisa magodo enyu kutendenedza maarita enyu. Peshe pomunogara, madhorobha enyu anozoparadzwa, nendau dzenyu dzakakwirira dzinozoita matongo, kuitira kuti maarita enyu aite akaparadzwa nokuita matongo, miedzaniso yenyu yokudira kuti iputswe nokuparadzwa nemaarita enyu okupishira mitombo inegwema rakanaka aputsirwe pashi, nemishando yenyu idzimwe. Vakaurawa vanozowa pakati penyu; zvino munozozia kuti inini ndini Mambo Mwari.’ “Asi ndinozoponesa vamweni vevanosara. Vamweni venyu vanozopokonyoka kushoti pakati pemadzinza nokuparadzirwa mukati mwenyika dzeshe. Avo venyu vanopokonyoka vanozondikarakadza vari pakati pemadzinza, apo pevanotorwa kuitwa hloko; ndakapwanyiwa ngomwoyo yavo inodisisa umhombo, iyo yakapauka kubva kwendiri, nemadziso avo akaita mhombo ngokutenderukira kumiedzaniso yavo yokudira. Navo vanozodzinyenya pachavo mukuona kwavo ngokushata ukwo kwevakaita muzvinyangadzo zvavo zveshe. Navo vanozozia kuti inini ndini Mambo Mwari. Andizi kutyisidzira pasina shwiro, kuti ndiunze uku kushata padera pavo.” “Izvi ndizvo zvinoronza Mambo Mwari, Mwari: Chaya ngenyara yako, utsike ngetsoka yako wechiti, ‘Ihehe ngendaa yezveshe zvakashata zvinonyangadza zvemhatso yaIsuraeri!’ Ngokuti vanozowa ngeshoti, ngenzara nenhenda. Uwo uri kuretu unozofa ngenhenda, nouwo uri pasinde unozourawa ngeshoti, nouwo unosara nokukombwa unozofa ngenzara. Ngokudaro ndinozopedza ushungu hwangu hunotyisa padera pavo. Naapo munozozia kuti inini ndini Mambo Mwari, naapo vakafa vavo vanozoata pakati pemiedzaniso yavo yokudira kutendenedza maarita avo, padera pezvimitunhu zveshe zvakakwirira, nepadera pemitunhu yeshe, nepashi pemiti yeshe yakasvipirika, nepashi pemiti yeshe yemiokhi inemashakani, kundau dzeshe dzevakapira mitombo inegwema rakanaka kumiedzaniso yavo yeshe yokudira. Ndinozotambanudza nyara yangu padera pavo, ndiite nyika matongo, nokuparadzwa muugaro hwavo hweshe kubvira mushango kuenda Dhibhira. Zvino vanozozia kuti inini ndini Mambo Mwari.” Izwi raMambo Mwari rakauya kwendiri rechiti, “Iwewe mukororo womunhu, izvi ndizvo zvinoronza Mambo Mwari, Mwari kunyika yaIsuraeri: Magumo! Magumo aguma padera pemakhona marongomuna enyika. Zvino magumo aguma padera pako, neni ndinozorekeredza ushungu hwangu padera pako; ndinozokutonga kudai ngezviito zvako, ndinozokuorora ngendaa yezvinonyangadza zvako zveshe. Dziso rangu arizokukunguriri, andizokusvipiri mwoyo. Ndinozokuorora ngendaa yenjira dzako, naapo zvinonyangadza zvako zvichagara pakati pako. Zvino unozozia kuti inini ndini Mambo Mwari.” “Izvi ndizvo zvinoronza Mambo Mwari, Mwari: Kushata kunoteera kushata! Ringira, kunoguma. Magumo aguma, magumo aguma. Kunokumukira; ringira, aguma. Rufu rwako rwaguma kweuri, O iwewe mugari wenyika. Mukuwo waguma, zuva rokutambudzika riri pasinde, akuchina kudakara kumitunhu. “Ngokukasira ndinozodurura ushungu hwangu padera pako, ndinozopedzera ushungu hwangu padera pako. Ndinozokutonga kudai ngenjira dzako, nokukuorora kudai ngezvinyangadzo zvako zveshe. Dziso rangu arizokukunguriri, andizokusvipiri mwoyo. Ndinozokuorora kudai ngenjira dzako, naapo zvinyangadzo zvako zvichagara mukati mwako. Zvino munozozia kuti inini ndini Mambo Mwari uwo unochaya. “Ringirai zuva! Ringirai, rinouya! Rufu rwako rwabuda. Ndonga yatsenenekera, kudzikudza kwaburuikira. Bopoto ramuka kuita ndonga yokushata. Akuna naumwe wavo unozosara, haiwa muuwandu hwayo, haiwa muupfumi hwavo; apana chakanaka pakati pavo. Nguva yaguma, zuva rinokwedzera pasinde; musatendera kuti mutengi adakare, nokuti mutengesi acheme, ngokuti ushungu huri padera pembungano yavo yeshe. Ngokuti mutengesi aazohwiriri kuneizvo zvaakatengesa, kunyazwi vachapona. Ngokuti chioniso chiri kwevari veshe vazhinji, achichazopetuki; ngendaa yokushata kwavo, akuna unokona kungwarira kupona kwake. Varidza gwama nokunasirira zveshe; asi akuna naumwe wavo unobuda kuenda kwoorwa, ngokuti ushungu hwangu huri padera pembungano yavo yeshe. “Shoti iri kubanze, nhenda nenzara zviri ngomukati; nouwo uri mushango unozofa ngeshoti; nouwo uri mudhorobha, nzara nenhenda zvinomupedza. Kudai varipo vanopona vanopokonyoka, vanozooneka padera pemitunhu, vakadai ngemagora omumapani, veshe vechibonda, umwe ngaumwe ngendaa yokushata kwake. Nyara dzeshe dzinozorungunuka, mabvi eshe anozonyunguruka kupera simba kudai ngemvura. Vanozodzisimidza ngemachira emasaka, kutyisa kukuru kunozovafukidza. Kutsveruka kunozoa padera pehope dzeshe, mhanza dzinozoa padera pemasoro eshe. Vanozokandira sirivha yavo mumapato, nomukore wavo unozoita chiro chakasvipiswa. Sirivha yavo nomukore wavo azvizoa nesimba rokuvanunura ngezuva roushungu hwaMambo Mwari. Avazogutisi mweya yavo nokuti kuzadza maura avo. Ngokuti ndicho chaiya chipumhuniso chokushaisha kwavo. Kubva kuunaku hwechinemeso chavo, vakaita manyau ndicho, ivo vakanasira miedzaniso yavo yainyangadza, zviro zvavo zvinoshooreka; ndizvo ndinozonasira ndicho chiro chakasvipiswa kwevari. “Ndinozochipira munyara dzevapara kuita chiro chokuchakatwa, kunevakashata venyika kuita chakapambwa; vanozochisvipisa. Ndinozofuratira hope yangu kubva kwevari, vanozosvipisa ndau yangu yakafishika, ngokuti vabvuki vanozopotera mukati mwayo, vanozoisvipisa. “Nasira ketani! Ngokuti nyika yazara ngendaa dzengazi, dhorobha razara ngokugebenga. Ndinozounza madzinza akapinda kushata kuti vatore nhaka yemhatso dzavo. Ndinozogumisa manyau evakagwinya, nendau dzavo dzakachena dzinozosvipiswa. Naapo kuurawa kwaguma, vanozotsvaka kunyarara, asi avazokuoni. Kutambudzika kunozouya padera pokutambudzika, guhwa rinozoteera sure kweguhwa; vanozoramba vechitsvaka chioniso kubva kumuprofeti; dzidziso dzinozopera kubva kumupristi nokupangwa kubva kuvasharuka. Mambo unozochema, vatongi vanozopera simba, nenyara dzevanhu venyika dzinozohuta. Ndinozoita kwevari kudai ngenjira dzavo, kudai ngokutonga kwavo ndinozovatonga, navo vanozozia kuti inini ndini Mambo Mwari.” Mugore rechitanhatu, mumwedzi wechitanhatu, ngezuva rechishanu romwedziwo, apo ndakagara mumhatso yangu, nevakuru vaJudha vakagara pamberi pangu, nyara yaMambo Mwari, Mwari yakawirapo padera pangu. Ndakaringira, ndikaona muemo wakaringirika wakadai ngomuemo womunhu; pashi pakadai ngepachiunu chake, waiya akadai ngomuriro; padera pechiunu paiya pakadai ngokuringirika kwokujeka kudai ngethusi rinon'anikira. Wakatambanudza chiemo chairingirika chakadai ngenyara nokunditora ngebvudzi resoro rangu; noMweya wakandimirudza padera pakati penyika nedenga, nawo wakandiunza muzvioniso zvaMwari muJerusarema, kumusiwo wokupinda muruwanze rwomukati wakaringira dera, kuchigaro chomuedzaniso wendurumwa, icho chaimusira ndurumwa. Ringira, uthende hwaMwari waIsuraeri waiyapo, hwakadai ngechioniso icho chendaiya ndaona mushango. Zvino wakati kwendiri, “O mukororo womunhu, mirudza madziso ako zvino uringire dera.” Ndizvo ndakamirudza madziso angu kuringira dera, naapo ringira, ngedera kwomusiwo wearita waiyapo uyu muedzaniso wendurumwa. Naye wakati kwendiri, “Mukororo womunhu, unoona here izvo zvevanoita, zvinonyangadza zvinopinda kukura izvo zvinoitwa ngevemhatso yaIsuraeri pano, kundidzinga kuti ndiende kuretu kubva pandau yangu yakachena? Asi unozoangira kuona zvinyangadzo zvikurutu.” Naye wakandiunza kumusiwo woruwanze; naapo ndaringira, ringira, ndakaona murindi parukumbati. Zvino wakati kwendiri, “Mukororo womunhu, itsa udure rukumbati.” Naapo ndadura rukumbati, ringira, ndakaona musiwo. Naye wakati kwendiri, “Poteremwo, uone zvinonyangadza zvakashata zvevanoita pano.” Ndizvo ndakapoteremwo, ndikaringira; ndakaonapo zvakanyorwa parukumbati kurutendenedza miemo yeshe yezviro zvinotamanda neyemhuka dzinonyangadza, nemiedzaniso yeshe yokudira yemhatso yaIsuraeri. Pamberi pazvo pakaema vakuru makumi manomwe vemhatso yaIsuraeri, naJaazania mukororo waShafani akaema pakati pavo. Umwe ngaumwe waiya nechidziyo chake munyara yake chokupishira mutombo unegwema rakanaka, negore rechiushi rakakura raipwititika. Zvino wakati kwendiri, “Mukororo womunhu, waona here icho chinoitwa ngevakuru vemhatso yaIsuraeri muchidima, munhu weshe mukamera romuedzaniso wake? Ngokuti vanoti, ‘Mambo Mwari aationi, Mambo Mwari wasiya nyika.’ ” Wakatiwo kwendiri, “Unozoona kunyangadza kwakapinda kukura kwevanoita.” Zvino wakandiunza pokupinda ndipo pamusiwo wedera wemhatso yaMambo Mwari; ringira, madzimai aiya akagara echichemera Thamuzi. Zvino wakati kwendiri, “Waona izvi here, O mukororo womunhu? Unozoonazve zvinonyangadza zvikuru kupinda izvi.” Naye wakandiunza muruwanze rwomukati rwemhatso yaMambo Mwari; ringira, pamusiwo wemhatso yaMambo Mwari, apo pokupinda ndipo mutemperi raMambo Mwari, pakati peberere nearita, vaiyapo vamuna vaida kukwana makumi mairi navashanu, nemishana yavo yakafuratira temperi raMambo Mwari, nehope dzavo dzairingira kumabvazuva, vaiata pashi kudira zuva, vechiringira kumabvazuva. Zvino iye wakati kwendiri, “Waona izvi here, O mukororo womunhu? Chiro chakareruka here kunevemhatso yaJudha kuti vaite izvi zvinonyangadza zvevanoita pano? Vanosisira here kuzadza nyika ngougebengwa, nokuangira kumusa ushungu hwangu? Ringira, vanoisa dai kumiro dzavo. Ndizvo ininiwo ndinozovaitira ngoushungu; dziso rangu arizokunguriri, andizovasvipiri mwoyo; kunyazwi vanozochema munzee dzangu ngeizwi gurutu, andizovapurutani.” Zvino wakachema mukuzwa kwangu ngeizwi guru echiti, “Ita kuti vaurayi vedhorobha vakwedzere pasinde, munhu weshe anendonga yake yokuuraya ndiyo munyara yake.” Ringira, kwakabuda vamuna vatanhatu vechibva ngenjira yomusiwo wedera, wakaringira dera, munhu weshe anendonga yokuuraya ndiyo munyara yake; pakati pavo paiya nomunhu wakafuka jira rorukangaza, anegonanyanga reikhi romunyori parutii rwake. Vakapoteramwo vakaema ngepasinde pearita rethusi. Zvino uthende hwaMwari waIsuraeri hwakabuda kubva pakherubhi apo pohwaiya kuenda kudimba remhatso. Mambo Mwari wakadaidzira kunomunhu wakafuka jira rorukangaza, uwo waiya negonanyanga reikhi parutii pake; naye wakati kwaari, “Enda ngomukati mwedhorobha, nomukati mweJerusarema, uise chioniso pahuma dzevanhu vanofemurika nokugwimba ngendaa yezvinyangadzo zveshe zvinoitwa pakati paro.” Kunevamweni wakati mukuzwa kwangu, “Endai mukati mwedhorobha ngesure kwake, muuraye; madziso enyu asikaitiri nyasha, musasvipira mwoyo. Muuraye vanhu vakuru nevadoko, veshe vasikana nevana vadoko, nevakadzi, asi musakwedzera pasinde pomunhu nokuti ngouri waiswa chioniso. Mutangire pandau yangu yakachena.” Ndizvo vakatanga ngevasharuka vaiya pamberi pemhatso. Zvino wakati kwevari, “Svipisai mhatso yaMwari, muzadze muruwanze ngevakaurawa. Endai!” Ndizvo vakabuda kuenda, vakauraya mudhorobha. Naapo vachauraya, neni ndasiiwa ndiri ndega, ndakawa pashi ngehope yangu, ndikachema ndechiti, “A Mambo Mwari, Mwari! Unozoparadza here veshe vakasara vaIsuraeri ngokudurura ushungu hwako hukuru padera peJerusarema?” Wakati kwendiri, “Kushata kwemhatso yaIsuraeri neyokwaJudha kwakakura yaamho; nyika yakazara ngokuparadzwa kwengazi nedhorobha rakazara ngokusikarurama, ngokuti vanoti, ‘Mambo Mwari wasiya nyika, naMambo Mwari aaoni akadi.’ Asi inini dziso rangu arizokunguriri, nokuti kusvipira mwoyo, asi ndinozounza zviito zvavo padera pemasoro avo.” Ringira, munhu wakafuka jira rorukangaza negonanyanga reikhi parutii rwake, wakashuma ndaa echiti, “Ndaita kudai ngezvewandipanga.” Zvino ndakaringira, nepadera pomukana waiya padera pemasoro emakherubhi pakaoneka padera pawo chiro chinemuemo webuwe resafire, chakadai ngokuringirika kunoita muemo wedendemaro. Wakaereketa kunomunhu uwo waiya akafuka jira rorukangaza echiti, “Potera pakati pemavhiri pashi pemakherubhi, uzadze nyara dzako ngemasimbe omuriro anobaka kubva pakati pemakherubhi, uaparadzire padera pedhorobha.” Wakapoteramwo mukuona kwangu. Zvino makherubhi akaema ngokurutii rwokubani rwemhatso, apo munhu uwo pakapotera mukati, negore rakazadza ruwanze rwomukati. Zvino uthende hwaMambo Mwari hwakakwira kubva pakherubhi, rwakaema padera pedimba remhatso, nemhatso yakazara ngegore, noruwanze rwakazara ngokun'anikira kwouthende hwaMambo Mwari. Bope remaphaphiro emakherubhi rakazwika metsa kuruwanze rwokubanze, rakadai ngeizwi raMwari Une-simba-reshe, apo echiereketa. Naapo apanga munhu wakafuka jira rorukangaza echiti, “Tora muriro kubva pakati pemavhiri, kubva pakati pemakherubhi,” wakapotera mukati, akaema pasinde pevhiri. Nekherubhi rimwe rakatambanudza nyara yaro kubva pakati pamakherubhi, kumuriro uwo waiya pakati pemakherubhi rakautora, rakauisa munyara dzouwo waiya akafuka jira rorukangaza, uwo wakautora kubuda kubanze. Makherubhi akaoneka anenyara inechiemo chenyara yomunhu iri pashi pemaphaphiro awo. Ndakaringira, ringira, ndakaonapo mavhiri marongomuna pasinde pemakherubhi, vhiri rimwe raiya pasinde pakherubhi rimwe ngarimwe; nokuringirika kwemavhiri kwaiya kwakadai ngomuara webuwe rethopazi rinon'anikira. Ngendaa yokuringirika kwawo marongomuna aiya nomuemo wairingirika wakadai ngechiro chakadai ngevhiri riri pakati pevhiri rimweni. Naapo oohamba, aikona kuhamba kumarutii eshe marongomuna, asikakunukuki apo echihamba; kunyazwi murutii rwakadini kwakaringira vhiri remberi, amweni eshe aiteera asikakunukuki apo echihamba. Muiri wawo weshe, magomo awo, simbi dzepakati pegomo, maphaphiro awo nemavhiri, mavhiri emarongomuna awo aiya akazara ngemadziso kweshe kweshe. Ngendaa yemavhiri, akadaidzirwa mukuzwa kwangu, kuti, “A mavhiri.” Rimwe ngarimwe rawo raiya nehope murongomuna: hope yokutanga yaiya hope yekherubhi, hope yechipiri yaiya hope yomunhu, hope yechitatu yaiya hope yemhondoro, nehope yechirongomuna yaiya hope yegodzi. Makherubhi akamiruka. Aya ndiwo zvisikwa zvinopona zvendakaona ndiri parwizi Khebhari. Naapo makherubhi akaenda, nemavhiri akaenda ari pasinde pawo; naapo makherubhi akatambanudza maphaphiro awo kumiruka kubva panyika, nemavhiri aazi kupauka kubva parutii pawo. Naapo makherubhi aema, nawo aiema; naapo awo amiruka, nemavhiri aimirukawo; ngokuti mweya wezvisikwa zvinopona waiya mukati mwawo. Zvino uthende hwaMambo Mwari hwakabva padera pedimba remhatso, ukaema padera pemakherubhi. Makherubhi akatambanudza maphaphiro awo, akamiruka kubva panyika mukuona kwangu, apo aibuda, nemavhiri parutii pawo. Akaema akamata pokupotera pamusiwo wokumabvazuva wemhatso yaMambo Mwari; nouthende hwaMwari waIsuraeri hwaiya padera pawo. Izvi ndizvo zvisikwa zvinopona zvendakaona zviri pashi paMwari waIsuraeri ndiri pasinde perwizi Khebhari; neni ndakazia kuti ndiwo makherubhi. Rimwe ngarimwe rawo raiya nehope murongomuna, rimwe ngarimwe raiya nemaphaphiro marongomuna; nepashi pemaphaphiro awo paiya nechiro chaiya nechiemo chenyara dzomunhu. Miemo yehope dzawo yaiya yehope dzakatodzana kuringirika kwadzo, kudai ngedzendakaona ndiri pasinde porwizi Khebhari. Rimwe ngarimwe rakahamba rakatitwasa mberi. Mweya wakandimirudza padera, ukandiunza kumusiwo wokumabvazuva kwemhatso yaMambo Mwari, unoringira kumabvazuva. Apo panopindwa ndipo pamusiwo vaiyapo vamuna makumi mairi nevashanu; pakati pavo ndakaona Jaazania mukororo waAzuri, naPheratia mukororo waBhenaia, vatongi vevanhu. Wakati kwendiri, “Mukororo womunhu, ava ndivo vanhu vanoronga zvakashata naavo vanopanga zvakashata mudhorobha iri. Vanoti, ‘Nguva aisati yaapasinde yokuaka mhatso; dhorobha iri ihari, isusu tiri nyama.’ Ndizvo profeta kuvaitira ndaa, profeta, O mukororo womunhu.” Zvino Mweya waMambo Mwari wakadzaka padera pangu, wakati kwendiri, “Ronza, kuti izvi ndizvo zvinoronza Mambo Mwari: Izvi ndizvo zvounopinimidza, O mhatso yaIsuraeri; ndinozia zviro zvinouya mumupinimidzo wako. Wauraya vakawanda mudhorobha iri, nokuzadza mapato aro ngevakaurawa. “Ndizvo izvi zvinoronza Mambo Mwari, Mwari: Avo vakaurawa vewakaradzika mukati mwaro inyama, neiri dhorobha ihari; asi uchabudiswa kubva mukati mwaro. Watya shoti, neni ndichaunza shoti padera pako, unoronza Mambo Mwari, Mwari. Ndichakubudisa kubva mukati mwaro, nokukupira munyara dzevapara, ndiite zvitongero zvangu padera pako. Uchaurawa ngeshoti; ndichakutonga mumigano yaIsuraeri; uchazia kuti inini ndini Mambo Mwari. Iri dhorobha arizoiti hari yako akadi, newe akuzoiti nyama mukati mwaro. Ndichakutonga mumigano yaIsuraeri. Zvino unozozia kuti ndini Mambo Mwari, uwo wousikazi kuhamba muzviemeso zvake, uwo wousikazi kungwarira zvitongero zvake, asi wakaita kudai ngemiitiro yamadzinza awo anomutendenedza.” Zvino, apo ndechiprofeta, Pheratia mukororo waBhenaia wakafa. Zvino ndakawa pashi ngehope yangu, ndikachema ngeizwi guru ndikati, “A, Mambo Mwari Mwari! Unozopedzisa yaamho here vakasara vaIsuraeri?” Zvino izwi raMambo Mwari rakauya kwendiri rechiti, “Mukororo womunhu, hama dzako, hama dzako dzemene, vanhu vedzinza rako, avo veshe vemhatso yaIsuraeri, veshe vavo, ndivo avo vevakazwi ngevagari veJerusarema, ‘Vakaenda kuretu kubva kunaMambo Mwari; iyi nyika yakapuwa kwetiri kuita nhaka.’ Ndizvo ronza kuti: Izvi ndizvo zvinoronza Mambo Mwari, Mwari: Kunyazwi ndakavatarausira kuretu pakati pevamadzinza, kunyazwi ndakavaparadzira pakati penyika, asi ndakaita kwevari ugaro hwakachena kwenguva doko munyika dzevakaguma. Ndizvo ronza kuti: Izvi ndizvo zvinoronza Mambo Mwari, Mwari: Ndinozomuunganidza kubva kuvanhu vemadzinza, nokumuunganidza kubanze kwenyika dzemwakaparadzirwa, neni ndinozomupa nyika yaIsuraeri. Naapo vagumapo, vanozodusa kubva kweriri zviro izvo zveshe zvinonyenyesa, nazvo zveshe zvinonyangadza zvayo. Ndinozovapa mwoyo umwe, nokuisa mweya mutsva mukati mwavo; ndinozodusa mwoyo webuwe kubva munyama yavo, ndivape mwoyo wenyama, kuitira kuti vahambe muzviemeso zvangu, nokungwarira zvitongero zvangu, vazvipurutane. Zvino vanozoita vanhu vangu, neni ndinozoita Mwari wavo. Asi ngendaa yaavo, avo mwoyo yavo inoteera zviro zvavo zvinonyenyesa nezvinonyangadza zvavo, ndinozounza zviito zvavo padera pemasoro avo,” unoronza Mambo Mwari, Mwari. Zvino makherubhi akamirudza maphaphiro awo, nemavhiri parutii pawo; nouthende hwaMwari waIsuraeri hwaiya padera pawo. Nouthende hwaMambo Mwari hwakakwira kubva pakati pedhorobha, hwakaema padera pomutunhu uri ngokumabvazuva kwedhorobha. Mweya wakandikwidza padera, ukandiunza muchioniso choMweya waMwari muKharadhea kunevabatwa. Zvino chioniso chendakaona chakakwira kubva kwendiri. Neni ndakaronzera vabatwa zviro zveshe izvo zvaakandionisa Mambo Mwari. Izwi raMambo Mwari rakauya kwendiri rechiti, “Mukororo womunhu, unogara pakati pemhatso inomukira, avo vanemadziso okuona, asi avaoni, vanenzee dzokuzwa, asi avazwi, ngokuti imhatso inomukira. Ndizvo, mukororo womunhu, dzirongedzere nhunduru dzoubatwa, uende muubatwa masikati mukuona kwavo; unozoenda kudai ngomubatwa kubva kundau yako uende kundau imweni mukuona kwavo. Pamweni vangazozwisisa, kunyazwi imhatso inomukira. Unozobudisa nhunduru dzako masikati mukuona kwavo, kudai ngenhunduru dzousungwa; unozobuda pachako madeekoni mukuona kwavo, kudai ngavanhu vanoenda kuusungwa. Utse kupotya rukumbati mukuona kwavo, utware kubudisa nhunduru dzako ndipo. Mukuona kwavo unozomirudza nhunduru papfudzi rako nokuitwara muchidima; unozofukidza hope yako, kuti usaona nyika; ngokuti ndakakuita chioniso kunevemhatso yaIsuraeri.” Ndakaita kudai ngezvendakapangwa. Ndakabudisa nhunduru dzangu masikati, kudai ngenhunduru dzoubatwa, nomumadeekoni ndakatsa kupotya rukumbati ngenyara dzangu; ndakadzibudisa kwasvipa, ndakadzitwara pafudzi rangu mukuona kwavo. Mumangwanani izwi raMambo Mwari rakauya kwendiri rechiti, “Mukororo womunhu, mhatso yaIsuraeri, mhatso inomukira, aizi kuronza here, kuti, ‘Unoitenyi?’ Ronza kwevari kuti, ‘Izvi ndizvo zvinoronza Mambo Mwari, Mwari: Chiprofeti ichi chinoereketa ngendaa yomutongi uri muJerusarema, nevemhatso yeshe yaIsuraeri iri mukati mwaro.’ Ronza kuti, ‘Inini ndiri chioniso chenyu.’ Kudai ngezvendaita, ndizvo zvinozoitwa kwevari; vanozoenda muubatwa. Nomutongi uri pakati pavo unozotwara mutwaro pamapfudzi ake kwootitsvaa, unozobuda kuenda; unozotsa kupotya rukumbati kuti autware kubuda ndipo, unozofukidza hope yake kuti asazoona pashi ngamadziso ake. Ndinozotambanudza padera pake mumbure wangu, naye unozobatwa mumurau wangu; ndinozomuunza Bhabhuroni, nyika yevaKharadhea; asi aazoioni, naye unozofireyo. Ndinozoparadzira kumadutu eshe avo vanomutendenedza, vadetseri nevangwariri vake veshe; ndinozovhomora shoti sure kwavo. Navo vanozozia kuti inini ndini Mambo Mwari, apo pendichavaparadzira pakati pemadzinza, nokuvadzingira pakati penyika. Asi ndinozoita kuti vashomani vavo vapokonyoke kubva kushoti, kubva kunzara, nokunhenda, kuti vazoronza kunyangadza kwavo kweshe pakati pemadzinza kweshe kwevanoenda; zvino vanozozia kuti inini ndini Mambo Mwari.” Izwi raMambo Mwari rakauya kwendiri rechiti, “Mukororo womunhu, idya chingwa chako wechihuta, umwe mvura yako wechitetemera nokutyiswa, uti kunevanhu venyika, ‘Izvi ndizvo zvinoronza Mambo Mwari, Mwari ngendaa yevagari veJerusarema munyika yaIsuraeri: Vanozodya chingwa chavo mukutyiswa, nokumwa mvura yavo mukupera simba, ngokuti nyika yavo inozotorerwa zveshe zviri mukati mwayo, ngendaa yokugebenga kwavo veshe vanogara mukati mwayo. Madhorobha anogarwa anozoparadzwa nenyika inozoita matongo, nemwi munozozia kuti inini ndini Mambo Mwari.’ ” Izwi raMambo Mwari rakauya kwendiri rechiti, “Mukororo womunhu, chinoronzenyi chinai chako ngendaa yenyika yaIsuraeri chinoti, ‘Mazuva anorebeswa, nechioniso cheshe chinoita chisina shwiro?’ Ndizvo varonzere, ‘Izvi ndizvo zvinoronza Mambo Mwari, Mwari: Ndinozoita kuti ichi chinai chipere, navo avachazochishandisizve kudai ngechinai muIsuraeri,’ Asi ronza kwevari uti, ‘Mazuva aa pasinde, nokuitika kwezvioniso zveshe. Ngokuti akuchazoapo zvioniso zvisina shwiro nokuti kubudirwa kwokunyepera mukati mwemhatso yaIsuraeri. Asi inini Mambo Mwari ndinozoereketa izwi rendinoereketa, naro rinozoitika. Arichazononoswi, asi mumazuva enyu, O mhatso inomukira, ndinozoereketa izwi nokuriita,’ ” unoronza Mambo Mwari, Mwari. Izwi raMambo Mwari rakauya kwendiri rechiti, “Mukororo womunhu, ringira, mhatso yaIsuraeri inoti, ‘Chioniso icho chaanoona ngechemakore mazhinji arimberi; unoprofeta ngemikuwo ichindori kuretu.’ Ndizvo ronza kwevari uti, ‘Izvi ndizvo zvinoronza Mambo Mwari, Mwari: Akuna narimwe remazwi angu richazononoswa, asi izwi rendinoereketa rinozoitika,’ ” unoronza Mambo Mwari, Mwari. Izwi raMambo Mwari rakauya kwendiri rechiti, “Mukororo womunhu, profeta kuitira ndaa vaprofeti vemhatso yaIsuraeri, avo vanoprofeta, uronze kwevari avo vanoprofeta zvinobva mumwoyo yavo, ‘Izwai izwi raMambo Mwari.’ Izvi ndizvo zvinoronza Mambo Mwari, Mwari: Ihehe kwevari vaprofeti mapenzi, avo vanoteera mweya yavo, navo avazi kuona chiro! Vaprofeti vako, O Isuraeri, vakadai ngehava pakati pematongo. Amuzi kukwira pakaondomoka nokuti kunasirisa rukumbati rwemhatso yaIsuraeri kuti ikone kuema mukurwa ngezuva raMambo Mwari. Vaona zvinochengedzera nokuprofeta manyepo, vechironza kuti, ‘Mambo Mwari unoronza izvi,’ apo Mambo Mwari asikazi kuvatuma; asi vanogarira kuitika kweizwi ravo. Amuzi kuona zvioniso zvokunyepa here, nokuti kuereketa kwokunyepa, apo waronza kuti, ‘Mambo Mwari wazvironza;’ kunyazwi andizi kuzviereketa? “Ndizvo izvi zvinoronza Mambo Mwari, Mwari: Ngokuti mwakaereketa manyepo, mwechiona manyepo, ndizvo ringirai, ndinorwisana nemwi, unoronza Mambo Mwari, Mwari. Nyara yangu inozorwa nevaprofeti vanoona zvinochengedzera, nokuereketa manyepo; avazopindi mumbungano yevanhu vangu, avazonyorwi mubhuku remazina evemhatso yaIsuraeri, nokuti kupinda munyika yaIsuraeri; nemwi munozozia kuti inini ndini Mambo Mwari, Mwari. Ngokuti, mugwinyiso vakapaukisa vanhu vangu vechiti, ‘Kunyarara,’ apo paiya pasina kunyarara; ngokuti apo vanhu vaaka rukumbati rusikazi kugwinya ava vaprofeti vanoruseta ngesuko, ronza kwevari avo vanoruseta ngesuko kuti runozoondomoka.Kuchauya ndambi yokunaya, matsanza makuru anozowa, nedutu rinomubvumo rinozoruputsa. Naapo rukumbati rwawa, akuzoronzwi here kwomuri kuti, ‘Suko remwakaseta ndiro riri pari?’ ” “Izvi ndizvo zvinoronza Mambo Mwari, Mwari: Muushungu hwangu ndinozoruputsa ngomubvumo wedutu, nomuushungu hwangu kuchauya ndambi nematsanza makuru kurupedza muushungu hwangu kuruparadza. Ndinozopwanyira pashi rukumbati rwomwakaseta ngemasuko, nokuruputsira pashi, kuti matsikiro arwo aoneke; apo perunowa, munozopereramwo nemwi munozozia kuti inini ndini Mambo Mwari. Ngokudaro ndinozopedza ushungu hwangu padera porukumbati, nepadera paavo vakaruseta ngesuko, neni ndinozoti kwomuri, ‘Rukumbati apachina, nokuti avo vakaruseta, vaprofeti vaIsuraeri avo vakaprofeta ngendaa yeJerusarema, nokuona zvioniso zvokunyarara kwaro, apo paiya pasina kunyarara,’ ” unoronza Mambo Mwari, Mwari. “Asi iwewe, mukororo womunhu, emesa hope yako kuti irwe nevanasikana vevanhu vako, avo vanoprofeta zvinobva mumwoyo yavo; uprofete kuvaitira ndaa wechiti, ‘Izvi ndizvo zvinoronza Mambo Mwari, Mwari: Ihehe kwevari vakadzi vanosona mazango omumioko, vanoita mavheri masoro evanhu vourebu hweshe mukuvhima mweya yevanhu! Munozovhima mweya yevanhu vangu here, nokuponesa mweya yenyu? Mwandisvipisa pakati pevanhu vangu kuti muone tsimba yebhare nezvigurwa zvezvingwa, kuuraya mweya isakasisiri kuti ife, nokuponesa mweya isikasisiri kuti ipone, ngokunyepa kwenyu kunevanhu vangu vanopurutana manyepo enyu.’ “Ndizvo izvi zvinoronza Mambo Mwari, Mwari: Ringirai, andidakariri mazango enyu, yomunovhima ndiyo kupona kwevanhu vangu, neni ndinozoibaura kubva kumioko yenyu, ndinozoita kuti mweya isunhurike iende, mweya yomunovhima kudai ngeshiri. Ndinozobaura mavheri enyu, ndinunure vanhu vangu kubva munyara dzenyu; avachazotambudzwizve munyara dzenyu; nemwi muchazia kuti inini ndini Mambo Mwari. Ngokuti mwatsamwisa mwoyo wewakarurama ngemanyepo enyu, kunyazwi andizi kumutsamwisa; nemwi mwagwinyisa nyara dzewakashata, kuti asakunukuka kubva kunjira yake yakashata nokuponeswa, ndizvo amuchazoonizve zvioniso zvokunyepa, nokuti kubudirwa ngezvokubudirwa; ngokuti ndinozonunura vanhu vangu kubva munyara dzenyu. Zvino munozozia kuti inini ndini Mambo Mwari.” Vakuru vamweni vevaIsuraeri vakauya kwendiri, vakagara pamberi pangu. Neizwi raMambo Mwari rakauya kwendiri rechiti, “Mukororo womunhu, vanhu ava vatora miedzaniso yavo mumwoyo yavo, nokuisa kushata kwavo kuita chipumhuniso pamberi pehope dzavo; ndingadzitendera kubvunzwa ndivo here? Ndizvo ereketa kwevari wechiti, ‘Izvi ndizvo zvinoronza Mambo Mwari, Mwari: Munhu weshe waIsuraeri unotora miedzaniso yake mumwoyo mwake, nokuisa kushata kwake pamberi pake kuita chipumhuniso pamberi pehope yake, asi echiuya kunomuprofeti, inini Mambo Mwari ndinozopingura uwo unouya kudai ngouwandu hwemiedzaniso yake, kuitira kuti ndibate mwoyo yemhatso yaIsuraeri, veshe avo vakaparadzaniswa kubva kwendiri kubudikidza ngemiedzaniso yavo yokudira.’ “Ndizvo ronza kunevemhatso yaIsuraeri kuti, ‘Izvi ndizvo zvinoronza Mambo Mwari, Mwari: Tenderukai imwimwi, mukunukuke mwemene kubva kumiedzaniso yenyu yokudira; mutenderudze hope dzenyu kubva kunezvinonyangadza zvenyu.’ Ngokuti munhu weshe wemhatso yaIsuraeri, nokuti mupara unogara muIsuraeri, unodziparadzanisa kubva kwendiri, echiemesa miedzaniso yokudira mumwoyo mwake, nokuisa kushata kwake kuita chinopumhunisa pamberi pehope yake, asi echiuya kunomuprofeti kuti abvunze kwaari ndini, inini Mambo Mwari ndinozomupingura pachangu. Ndinozoemesa hope yangu kurwa nomunhu uwo, ndimuite chioniso nechinai, ndinozomugura kubva pakati pevanhu vangu; nemwi munozozia kuti inini ndini Mambo Mwari. “Kudai muprofeti echizochengedzerwa nokuereketa izwi, inini Mambo Mwari ndini ndachengedzera uwo muprofeti, neni ndinozotambanudza nyara yangu kurwa naye, ndinozomuparadza kubva pakati pevanhu vangu Isuraeri. Navo vanozotwara kuororwa kwokushata kwavo, kuororwa kwounobvunza nokuororwa kwomuprofeti uwo kunozotodzana, kuti mhatso yaIsuraeri isachazopauka nakamwe kubva kwendiri, nokuti isachazodzisvipisa ngezvishaishi zvayo. Asi kuti izoita vanhu vangu, neni ndinozoita Mwari wayo,” unoronza Mambo Mwari, Mwari. Izwi raMambo Mwari rakauyazve kwendiri rechiti, “Mukororo womunhu, apo nyika yechishaisha kwendiri ngokusikagondeka kukurutu, neni ndinozotambanudza nyara yangu kurwa nayo, ndigure mudondoro wechingwa chayo, ndiunze nzara padera payo, nokuuraya vanhu nemhuka kubva kweiri, kunyazwi ava vanhu vatatu, Noa, Dhanieri naJobe, vaiya mukati mwayo, vaizoponesa mweya yavo yega ngokururama kwavo, unoronza Mambo Mwari, Mwari. “Kudai ndechitumira zvikara zvinotyisa kuiparadza nyika, kuita matongo, pasina naumwe ungahamba ndimwo ngendaa yezvikara, kunyazwi vamuna vatatu ava vaiya mukati mwayo, kudai ngezvendinopona, unoronza Mambo Mwari, Mwari, vasaizokona kuponesa vakororo nokuti vanasikana; ivo vega vaizoponeswa, asi nyika yaizoita matongo. “Nokuti kudai ndechiunza shoti padera penyika iyo ndechiti, ‘Shoti ngaihambe kupinda ngomunyika;’ nokuuraya vanhu nemhuka kubva kweiri, kunyazwi ava vamuna vatatu vaiya mukati mwayo, kudai ngezvendinopona, unoronza Mambo Mwari, Mwari, vasaizokona kuponesa vakororo nokuti vanasikana, asi ivo pachavo vega vaizoponeswa. Nokuti kudai ndechitumira nhenda munyikemwo, nokudurura ushungu hwangu padera payo ngokuparadza ngazi, ngokuuraya kubva kweiri vanhu nemhuka, kunyazwi kudai Noa, Dhanieri naJobe, vaiya mukati mwayo, kudai ngezvendinopona, unoronza Mambo Mwari, Mwari, vasaizokona kuponesa mukororo nokuti mwanasikana; kwega vaizokona kuponesa mweya yavo ngokururama kwavo. “Ngokuti izvi ndizvo zvinoronza Mambo Mwari: Kunozopinda kwakaitawani kukura apo ndinozotumira kuita kwangu kunouraya kwokutonga kwangu kurongomuna kunotyisa padera peJerusarema, shoti, nzara, zvikara zvinotyisa, nenhenda, kuuraya kubva kweiri vanhu nemhuka! Asi, ringirai, mukati mwaro kunozosara avo vanopona, vakororo nevanasikana avo vanozobudiswa; vanozobuda kweuri. Naapo waona njira dzavo nezviito zvavo, munozoembedzerwa ngendaa yokushata kwendakaunza padera peJerusarema, ngeizvo zveshe zvendakaunza padera paro. Vanozomuembedzera, apo munoona njira dzavo nezviito zvavo; nemwi munozozia kuti andizi kuzviita pasina ndaa izvo zveshe zvendakaita mweriri,” unoronza Mambo Mwari, Mwari. Izwi raMambo Mwari rakauya kwendiri rechiti, “O mukororo womunhu, muti womuvhini unopinda ngechiinyi kune miti imweni, dai romuvhini riri pakati pemiti yegwasha? Kungatorwa here muti kubva kweuri kunasira ndiwo chiro kunyazwi ngechiri? Pane unganasira hoko kubva kweuri here yokuturika chidziyo kunyazwi ngechiri? Ringira, unokandirwa mumuriro kuita huni; muriro unopisha eshe magumo awo nepakati pawo, unechiro choungadetsera here? Ringira, apo uchipo weshe waiya usikashandiswi chiro; kunozopinda kwakaitawani kutsonga apo muriro wapedza kuupisha, nawo watsva, ungachasisira kudetsera chiro here? “Ndizvo izvi ndizvo zvinoronza Mambo Mwari, Mwari: Kudai ngomuti womuvhini uri pakati pemiti yomugwasha, uwo wendakaisa kumuriro kuita huni, ndizvo ndinozoisa vagari veJerusarema. Ndinozoemesa hope yangu kurwa navo; kunyazwi vanobuda kubva kumuriro, muriro unozovapedza; nemwi munozozia kuti inini ndini Mambo Mwari, apo pendinozoemesa hope yangu kurwa navo. Ndinozoita nyika matongo, ngokuti vakaita ngokusikagondeka,” unoronza Mambo Mwari, Mwari. Izwi raMambo Mwari rakauya kwendiri rechiti, “Mukororo womunhu, ita kuti Jerusarema rizie zvinonyangadza zvaro wechiti, ‘Izvi ndizvo zvinoronza Mambo Mwari, Mwari kuneJerusarema: Kuamba kwako nokubarwa kwako kwaiya munyika yeKhenani; baba ako vaiya muAmori, namai ako vaiya muHiti. Ngendaa yokubarwa kwako, pazuva rewakaberekwa, mukumvu wako auzi kuchekwa, auzi kuhambwa ngemvura kukuchenesa nokuti kukukutwa munyu, nokuti kuputirwa mumachira. Akuna nedziso rakakuzwira urombo, kukuitira chimwe cheizvi zviro, kuti akuitire nyasha; asi iwewe wakarashwa kubanze murubaya, ngokuti wakanyenywa ngezuva rewakaberekwa.’ “Inini ndakapinda ngepouri, ndakakuona wechiburukuta mungazi yako. Uri mungazi yako ndakati kwouri, ‘Pona!’ Ndakaita kuti ukure kudai ngechisimwa chomumunda.Ukakura, ukareba; ukaguma kuita mukadzi wakaperera; mazamo ako akanasa kuturikwa, nebvudzi rako rakakura, asi waiya mupunu nomutitinini. “Ndakapindazve ngepowaiya, ndikakuringira padera pako, ringira, mukuwo wako waiya mukuwo worudo. Ndakatambanudza magumo echokufuka changu padera pako, nokufukidzira upunu hwako: ndakapika kwouri, ndikapinda mukuita chitenderano newe, unoronza Mambo Mwari, Mwari, newe wakaita wangu. “Zvino ndakakushamba ngemvura; ndakanasa kukushambidza kubva mungazi yako, ndikakudzodza ngemafuta. Ndakakusimidza ngezvokusimira zvakanemeswa, ndikakupfekesa magwada ematoo akanakisa; ndakakusimidza ngemachira akanaka orukangaza, ndikakufukidza ngejira resirika. Ndakakunemesawo ngezvinemeso, ndikaisa mabhengera munyara dzako, neketani muhuro mwako. Ndakaisa ndandazi mumiro yako, nemativhera munzee dzako, nedzungudza rakanaka padera pesoro rako. Waiya wakanemeswa ngomukore nesirivha; nezvokusimira zvako zvaiya zvorukangaza rwakanaka, nesirika, nemachira akanemeswa. Newe wakadya ufu hwakamotseka, nouchi, nemafuta. Waiya nounaku kakurutu, wakaita wakabudirira kuita umambokadzi. Mbiri yako yakateketeswa pakati pemadzinza ngendaa younaku hwako, ngokuti hwaiya hwakaperera ngendaa youthende hwangu hwendakaisa padera pako,” unoronza Mambo Mwari, Mwari. “Asi wakagonda muunaku hwako, wakaita uhure ngendaa yembiri yako, newe wakadurura uhure hwako kuneumwe ngaumwe waipinda ndipo. Wakatora zvimweni zvokusimira zvako, ukadziitira ndau dzako dzakakwirira ukadzinemesa ngemiara yakaparadzana, ukaita uhure hwako padera padzo; akuzi kumboapo chiro chakadaro, nokuti zvichazodaro. Wakatorazve zvinemeso zvako zvakapinda kunaka zvomukore wangu nezvesirivha yangu zvendakakupa, wakadzinasirira miedzaniso yevamuna, wakaita uhure nayo; newe wakatora zvokusimira zvako zvakanemeswa kuifukidzira, ukaisa mafuta angu nemitombo yangu inegwema rakanaka pamberi payo. Zve, kudya kwangu kwendakakupa, ndakakugutisa ngoufu hwakamotseka, mafuta, nouchi, iwewe wakazviisa pamberi payo kuita gwema rakanaka; ndizvo zvezvakaita,” unoronza Mambo Mwari, Mwari. “Wakatora vakororo vako nevanasikana vako, vewakabarira inini, naavo wakavatora kuvapira kweiri kuita mubairo kuti vapedzwe. Ingatei uhure hwako huri chiro chidoko! Wakauraya vana vangu, nokuvapira kuti vaite mudiro wokupisha kweiri. Nomukati mwezvinonyangadza zvako zveshe nezvouhure hwako auzi kukarakadza mazuva outsva hwako, apo waiya mupunu nomutitinini, wechibinyauka mungazi yako. “Ngesure kwokushata kwako kweshe (ihehe, ihehe kwouri! Unoronza Mambo Mwari, Mwari,) wakadziakira ndau yokuhurira, nokudziitira pachako ndau yakakwirira mundau dzokushongana dzeshe. Wakadziakira ndau yako yakakwirira dera kwepato reshe, ukasvipisa unaku hwako, ukafukurira mahasva ako kuneavo veshe vaipinda ndipo, nokuwandisa uhure hwako. Wakaita uhure nevaEgipite, kuemura kwenyama kwevaakirwana vako, ukawanzisa uhure hwako, kundimusira ushungu. Ringira, ndizvo ndakatambanudza nyara yangu kurwa newe, ndakatsonza zvokudya kwako kwezuva ngezuva, ndakakupira mukuda kwemagaa ako, vanasikana vevaFiristia, avo vakatsveruka ndiwe, ngendaa yenjira yako yokuemura kwenyama. Wakaita uhure nevaAsiria, ngokuti waiya usikagutiswi; wakaita uhure navo, asi auzi kugutiswa. Wakawanzisa uhure hwako nevaKharadhea, nyika yevatengesi; kunyazwi neizvi auzi kugutiswa. “Ngenjiranyi mwoyo wako unopera simba, unoronza Mambo Mwari, Mwari, wechiita izvi zviro zveshe, zviito zvinoitwa ngehure risikatsveruki ngouhure. Unoaka ndau yako youhure dera kwemapato eshe, nokuita ndau dzako dzakakwirira mundau dzokushongana. Asi auzi kudai ngehure ngokuti iwewe unoshoora kuthuswa. Mukadzi unoomba, uwo unoashira vapara pandau yemwamuna wake! Zvipo zvinopuwa kumahure eshe; asi iwewe wakapa zvipo zvako kunevadikani vako, nokuvabhadhara kuti vauye kwouri kubva kumarutii eshe ngendaa youhure hwako. Ndizvo iwewe wakasiyana nevakadzi vamweni mukuhura kwako, ngokuti akuna naumwe wakakukumbira kuti uhure; iwewe wakavabhadhara pasina chakabhadharwa kweuri; wakasiyana navo. “Ndizvo, O hure, izwa izwi raMambo Mwari: Izvi ndizvo zvinoronza Mambo Mwari, Mwari: Ngokuti kuemura kwako kwakadururwa, noutitinini hwako hwakaoneka mukuhura kwako nevadikani vako; ngendaa yezveshe zvemiedzaniso zvako zvinonyangadza, nendaa yengazi yevana vako, yowakapa kwevari, ndizvo, ringira, ndinozounganidza veshe vadikani vako, avo vewakadakara ndivo, veshe vewakada, naavo veshe vewakazonda; ndinozovaunganidza kurwa newe kubva kumarutii eshe, ndinozofukura utitinini hwako kwevari, kuti vaone utitinini hwako hweshe. Inini ndinozokutonga kudai ngokutongwa kunoitwa vakadzi vanoomba, nevanoparadza ngazi, nokuunza ngazi padera pako muushungu hwangu hukuru nomundurumwa. Ndinozokupira munyara dzavo, navo vanozoparadza ndau yako yokukurira, nokuputsira pashi ndau dzako dzakakwirira; vanozokhumurazve machira ako, nokudusa zvinemeso zvako zvakanaka, nokukusiya uri mupunu nomutitinini. Vanozounza mbungano kurwa newe, nokukuponda ngemapuwe, nokukutematema kuita zvigurwa ngeshoti dzavo. Vanozopisha mhatso dzako ngomuriro, nokukutonga mukuona kwevakadzi vazhinji; ndinozokuita kuti urekere uhure hwako, newe auchazobhadhari chiro nakamwe. Ndizvo ndinozogutisa ushungu hwangu hukuru hunyarare kwouri, nendurumwa yangu inozobva kwouri; ndinozonyarara, andichazonyangadzwi. Ngokuti iwewe auzi kukarakadza ngamazuva outsva hwako, asi wandinesa ngeizvi zviro zveshe; ndizvo ndapetudza zviito zvako padera pesoro rako, unoronza Mambo Mwari, Mwari. Auzi kuita uku kuemura kwenyama kututsira padera pezvinyangadzo zvako zveshe here? “Ringira, weshe unoshandisa zvinai unozoereketa ichi chinai ndiwe echiti, ‘Mwanasikana wakadaiwo ndimai ake.’ Iwewe uri mwanasikana wamai ako, uwo wakanyenya mwamuna wake nevana vake; newe uri hurwani wevanun'una vako, avo vakanyenya vamuna vavo nevana vavo. Mai ako vaiya muHiti nababa ako vaiya muAmori. Hurwani ako vakuru vaiya Samaria, avo vaigara nevanasikana vavo ngedera kwako; nomunun'una wako mudoko waigara ngokubani kwako Sodhoma nevanasikana vake. Iwewe auzi kuhamba ngenjira dzavo kwega, nokuita kudai ngezvinyangadzo zvavo; mukamukuwo kadoko, iwewe waiya wapinda kushata kupinda ivo ngenjira dzako dzeshe. Kudai ngezvendinopona, unoronza Mambo Mwari, Mwari, Sodhoma munun'una wako nevanasikana vake avazi kuita kudai ngezvewaita iwewe nevanasikana vako. Ringira, uku ndikwo kushata kwomunun'una wako Sodhoma: Iye nevanasikana vake vaiya nokudzikudza, nokushadaya ngokudya, nokuwanda kwokugarisika, asi avazi kudetsera varombo nevanotama. Vaidzitunhumadza vechiita zvinonyangadza pamberi pangu; ndizvo ndakavadusa kudai ngezvendakaona. Samaria arizi kushaisha norupande rwezvishaishi zvako; iwewe wakawanzisa zvinonyangadza zvako kupinda ivo, wakapembedza vanun'una vako mukati mwezvinonyangadza zvako zveshe zvewakaita. Twara kutsveruka kwako, iwewewo wakatonga vanun'una vako ngenjira yakanaka; ngendaa yezvishaishi zvako zvewakaita zvinonyangadza kupinda zvavo, vakarurama kupinda iwewe. Ndizvo iwewe ita unotsverudzwa; iwewewo udzitwarire kutsveruka kwako, ngokuti wakapembedza vaunun'una vako. “Ndinozovapetudza kubva muuhloko hwavo, uhloko hweSodhoma nevanasikana vake, nouhloko hweSamaria nevanasikana vake, naapo ndinozopetudzazve uhloko hwehloko dzako pakati pavo, kuitira kuti iwewe udzitwarire kutsveruka kwako, nokutsverudzwa ngendaa yeizvo zveshe zvewakaita, ngeiyi ndaa iwewe uri muembedzeri kwevari. Ngendaa yevanun'una vako, Sodhoma nevanasikana vake vanozopetuka kuugaro hwavo hwokutanga. Samaria nevanasikana vake vanozopetuka kuugaro hwavo hwokutanga, naapo iwewe nevanasikana vako munozopetuka kuugaro hwenyu hwokutanga. Munun'una wako Sodhoma aazi kureiwa ngomuromo wako muzuva rokudzikudza kwako, kushata kwako kusati kwaoneka here? Zvino waa chishekedzo kuvanasikana veEdhomu, nevaakirwana vake veshe, nokuvanasikana vevaFiristia veshe vanokutendenedza avo vanokushoora. Iwewe unosisira kutwara kuororwa kwokuemura kwenyama yako nezvinonyangadza zvako, unoronza Mambo Mwari. “Eya, izvi ndizvo zvinoronza Mambo Mwari, Mwari: Inini ndinozoita kweuri kudai ngezvewakaita, iwewe wakashoora mhiko wechigura chitenderano; asi ndinozokarakadza chitenderano changu newe mumazuva outsva hwako, neni ndinozoemesa newe chitenderano chemhera nariini. Zvino iwewe unozokarakadza ngenjira dzako, utsveruke apo unozoashira vanun'una vako, veshe pamwepo vakuru vako, nevadoko vako, nokuvapa kwouri kuita vanasikana, asi haiwa ngendaa yechitenderano chendakaita newe. Ndinozoita chitenderano changu newe; newe unozozia kuti inini ndini Mambo Mwari, kuitira kuti iwewe ukarakadze nokutsveruka, kuti usachazobeura muromo wako nakamwe ngendaa yokutsveruka kwako, apo pendinokukungurira zveshe zvowakaita,” unoronza Mambo Mwari. Izwi raMambo Mwari rakauya kwendiri rechiti, “O Mukororo womunhu, ereketa chinai, uerekete muedzaniso kunevemhatso yaIsuraeri wechiti, ‘Izvi ndizvo zvinoronza Mambo Mwari: Godzi guru rinemaphaphiro makuru, akareba, akazara ngemanhenga, rinemaara akawanda, rakaguma Rhebanoni. Rakatora padera pemusedhare, rakagura mwoyo ngedera kwawo, rakatora kuenda nawo kunyika yokutengesera, rakauemesa mudhorobha revatengesi. Zvino, rakatora mbeu kubva panyika, rakaisima mumunda unendimo; rakaiisa pasinde pemvura yakawanda, rakaiemesa kuti iite kudai ngomuti womusambangwena. Yakakura, ikaita muvhini unotambarara wechiemo chiri pashi; matai awo akakotamira pashi kwaari, nzinde dzawo dzakaramba dziri pashi pawo. Ndizvo wakaita muvhini, ukamerera matai, ukabudisa mharikirwa.’ “Raiyapo godzi rimweni guru raiya nemaphaphiro makuru, anemanhenga akawanda. Ringira! Uyu muvhini wakakotamisa nzinde dzawo kweriri; wakatungira matai awo kweriri, kuti rinaise mvura pandau yokusimwa kwawo. Wakaduswa ukasimirwa mumavhu akanaka panemvura zhinji, kuti ubudise matai, ubereke michero yakawanda, uite muvhini wakanaka. Ronza, ‘Izvi ndizvo zvinoronza Mambo Mwari, Mwari: Unozobudirira here? Arizobviti here ngenzinde dzawo, nokugura michero yawo, kuti ifote, kuti mashakani awo eshe matsva afote? Haiwa muoko unesimba guru, nokuti vanhu vakawanda vanozodiwa kuubvita ngenzinde dzavo. Naapo wasimirwa, unozobudirira here? Naapo dutu rokumabvazuva rauvhuvhuta auzofoti yaamho here, kufota uri pandima pounokurira?’ ” Zvino izwi raMambo Mwari rakauya kwendiri rechiti, “Ronza zvino kunemhatso inomukira wechiti, ‘Amuzii here kuti izvi zviro zvinoronzenyi?’ Varonzere: Ringira, mambo weBhabhuroni wakaguma Jerusarema, wakatora mambo waro nevatongi varo, wakavatora kupetuka navo Bhabhuroni. Wakatora umwe wemibarirwana youmambo, akaita chitenderano naye, wakaita kuti apike mhiko; waiya atora vanesimba venyika, kuti umambo hupfaiswe pashi, kuti hurekere kudzikudza ngokwawo, asi hueme ngokungwarira chitenderano icho. Asi wakamumukira ngokutumira vaemereri vake kunyika yeEgipite, kuitira kuti vamupe mahachi nevanhu vehondo vakawanda. Unozobudirira here? Unozopokonyoka here, uwo unoita zviro zvakadai? Unozopokonyoka here apo echigura chitenderano? “Kudai ngezvendinopona,” unoronza Mambo Mwari, Mwari, “Ngegwinyiso mundau yaanogara mambo, uwo wakamuita mambo, uwo mhiko yake yaakashoora, nechitenderano chake naye chaakagura, muBhabhuroni unozofa. Faro nehondo yake inesimba, nechiunga chake chikuru achizomudetseri mukurwa, apo vechitutira mirwi yemavhu nokuaka masvingo makuru, nokuaka marukumbati kuuraya vanhu vazhinji. Ngokuti wakashoora mhiko nokugura chitenderano, ngokuti wakapa nyara yake, asi wakaita izvi zviro zveshe aatongozopokonyoki.” Ndizvo izvi ndizvo zvinozoronza Mambo Mwari, Mwari: “Kudai ngezvendinopona, ngegwinyiso ndinozopetudza padera pesoro rake mhiko yangu iyo yaakashoora, nechitenderano changu icho chaakagura. Ndinozotambanudza mambure angu padera pake, naye unozobatwa mumurau wangu; ndinozomuunza Bhabhuroni, ndinozotongana naye apo ngendaa yokushaisha kwake mukurwa neni. Veshe vanotiza vehondo yake vanozowa ngeshoti, naavo vanozosara vanozoparadzirwa kudutu reshe; nemwi munozozia kuti ndini Mambo Mwari, wakachiereketa.” Izvi ndizvo zvinoronza Mambo Mwari, Mwari: “Inini pachangu ndinozotora mwoyo wedai romusedhare kubva padera pawo, ndinozousima. Ndinozoripazura kubva kumatai achaburukira riri dai mbishi kubva padera pawo pemene; inini pachangu ndinozousima padera pomutunhu wakareba, wakaturama. Padera pemutunhu wakareba waIsuraeri, ndinozousima, nawo unozobudisa matai, kuitira kuti ubereke michero, nokuita musedhare wakakura wakanaka. Pashi pawo panozogara shiri dzembeu dzeshe; mumabvute ematai dzinozoaka zvisaki, zvisikwa zvinemaphaphiro zvembeu dzeshe. Miti yeshe yomushango inozozia kuti inini ndini Mambo Mwari. Ndinofupisa pashi muti uwo wakareba, nokurebesa muti uri pashi; ndinozoomesa muti muushi wakasvipira, ndinoita kuti muti wakaoma uburukire. Inini Mambo Mwari ndachiereketa, ndichachiita.” Izwi raMambo Mwari rakauya kwendiri rechiti, “Munoronzenyi imwimwi mwechiereketa chinai ichi ngendaa yenyika yaIsuraeri mwechiti, ‘Vabereki vadya mavhini anozhazha, nemazino evana aita hwadzira?’ Kudai ngezvendinopona, unoronza Mambo Mwari, Mwari, chinai ichi achichazoereketwi ndimwi muIsuraeri. Ringira, mweya yeshe ngeyangu; mweya womubereki ngewangu, nomweya wemwana ngewangu; mweya uwo wega unoshaisha unozofa. “Kudai munhu akarurama, echiita zvinotenderwa ngomutemo nokururama, kudai asikadyi padera pemitunhu, nokuti kumirudza madziso ake kuringira miedzaniso yokudira yemhatso yaIsuraeri, nokuti kusvipisa mukadzi womuakirwana wake, nokuti kukwedzera kumukadzi ari kumwedzi, usikaangiridzi munhu, asi unohwirinza chibatiso kunounokwereta, usikabiri, unopa kudya kwake kunevanenzara, nokufukidza vari mititinini ngechokufuka, usikakweretesi kuti auyirwe, nokuti kuashira kuuyirwa kunowanziswa, unopfinyisa nyara yake kubva kunezvakashata, unotonga ngokururamisa pakati pomunhu nomunhu umweni, unoteera muzviemeso zvangu nokunasa kungwarira zvitongero zvangu, unoita ngokugondeka, uwo wakadaro wakarurama, ngegwinyiso unozorarama,” unoronza Mambo Mwari, Mwari. “Kudai anemukororo uri dzongoni nomuparadzi wengazi, unoita zvakadai ngechimwe cheizvi zviro, (kunyazwi aaiti nachimwe chazvo) unodya padera pemitunhu, unosvipisa mukadzi womuakirwana wake, unotambudza varombo nevatami, unoita mbavha, aapetudzira chibatiso, unomirudza madziso ake kuringira kunemiedzaniso yokudira, unoita zvinonyangadza, unokweretesa kuti auyirwe ngezvakawanda, unozopona here? Aazoponi. Waita zviro izvi zveshe zvinonyangadza; ngegwinyiso unozofa; ngazi yake inozogara padera pake. “Asi kudai munhu uyu anemukororo uwo unoona zvishaishi zveshe zvaitwa ndibaba ake, unozvipinimidza naye aaiti zvakadaro, uwo usikadyi padera pemitunhu, nokuti kumirudza madziso ake kuringira kunemiedzaniso yokudira yemhatso yaIsuraeri, usikasvipisi mukadzi womuakirwana wake, usikashaishiri munhu, usikatori chibatiso, usikabiri, asi unopa kudya kwake kunevanenzara, nokufukidza vari mutitinini ngechokufuka, unopfinyisa nyara yake kubva kunezvakashata, usikakweretesi kuti auyirwe ngezvakawanda, unongwarira zvitongero zvangu, nokuteera muzviemeso zvangu, iye aazofi ngendaa yokushata kwababa ake, ngegwinyiso unozorarama. Ngendaa yababa ake, ngokuti wakachengedzera, akabira hama yake, akaita izvi zvisikazi kunaka pakati pevanhu vake, ringirai, unofa ngokushaisha kwake. “Asi munoti, ‘Ngenyi mukororo asikaororwi ngokushaisha kwababa?’ Apo mukororo aita zvinotenderwa nokururama, wanasa kungwarira zviemeso zvangu zveshe nokuzviita, ngegwinyiso unozorarama. Mweya uwo unoshaisha unozofa. Mwana aazotwari kushaisha kwomubereki, mubereki aazotwari kushaisha kwemwana; kururama kwewakarurama kunozoita kwake, nokushata kwewakashata kunozoita kwake. “Asi kudai wakashata echizotenderuka kubva kunezvishaishi zvake zveshe zvaakaita, nokungwarira zviemeso zvangu zveshe, nokuita izvo zvinotenderwa nezvakarurama, ngegwinyiso unozorarama, aazofi akadi. Apana nachimwe chezvishaishi zvaakaita, chinozokarakadzwa kumuitira ndaa; ngendaa yezvakarurama zvaakaita unozorarama. Ndine kudakara here mukufa kwouwo wakashata, ” unoronza Mambo Mwari, Mwari: “Haiwa kuti atenderuke kubva munjira dzake, apone? Asi apo wakarurama echitenderuka kubva mukururama kwake nokuita zvakashata, nokuita zvakatodzana zvinonyangadza zviro, zvinoitwa ngomunhu wakashata, ungazopona here? Apana nachimwe chezviito zvakanaka zvaakaita zvichakarakadzwa; ngendaa yokupauka kwake kwaakapauka nokushaisha kwake kwaakashaisha, unozofa. “Asi imwimwi munoti, ‘Njira yaMambo Mwari aizi kururama.’ Izwai zvino, O mhatso yaIsuraeri: Njira yangu aizi kururama here? Adzisiri njira dzenyu dzisikazi kururama here? Naapo wakarurama echikunukuka kubva mukururama kwake, echiita kushata, unozofa ndikwo; ngendaa yokushata kwaaita unozofa. Zve, apo wakashata echizotenderuka kubva mukushata kwake kwaakaita, nokuita izvo zvinotenderwa ngomutemo nezvakarurama, unozoponesa mweya wake. Ngokuti wakakarakadza akakunukuka kubva mukupauka kwake kweshe kwaakaita, ngegwinyiso unozorarama, aazofi. Asi mhatso yaIsuraeri inoti, ‘Njira yaMambo Mwari aizi kururama.’ O mhatso yaIsuraeri, njira dzangu adzizi kururama here? Adzisiri njira dzenyu dzisikazi kururama here? “Ndizvo ndinozokutonga, O mhatso yaIsuraeri, weshe kudai ngenjira dzake, unoronza Mambo Mwari, Mwari. Tenderuka, ukunukuke pachako kubva muzvishaishi zvako zveshe; pamweni kushata kunozoita kupedzwa kwako. Rasha kubva kwouri kweshe kushaisha kwako, kwewakandishaishira; udziitire mwoyo mutsva nomweya mutsva. Ngenyi wechizofa, O mhatso yaIsuraeri? Ngokuti andina kudakara ngorufu rweweshe,” unoronza Mambo Mwari, Mwari. “Ndizvo tenderukai mupone.” Asi iwewe, ita chiriro ngendaa yevatongi vaIsuraeri, newe uti, mai enyu vaiya mhondoro yehadzi pakati pemhondoro! Wakaata pashi pakati pemhondoro itsva yechirera matuhwa ayo pakati pemhondoro itsva. Yakakudza rimwe rematuhwa ayo; naro rakaita mhondoro itsva, yakadzidza kubata zvokudya; ikadya vanhu. Madzinza akaridza mhere ngendaa yayo, nayo yakabatwa muhunza yavo; vakaibudisa ngezviquiko kuiunza kunyika yeEgipite. Naapo yaona kuti kugonda kwayo akuzi kuitika, yakatora duhwa rayo rimweni ikariita mhondoro itsva. Yakahamba hamba pakati pemhondoro; yakaita mhondoro itsva, yakadzidza kubata zvokudya, ikadya vanhu. Yakaputsira pashi ngome dzavo, ikaparadza madhorobha avo; nyika yakatyiswa, navo veshe vaiya mukati mwayo, ngokubhonga kwayo. Madzinza akaema kurwa nayo kubva kumarutii eshe enyika, akatambanudza mambure padera payo; yakabatwa muhunza yavo. Ngezviquiko vakaiisa muchizarira, nokuiunza kunamambo weBhabhuroni; vakaiunza muchizarira chakagwinya, kuti izwi rayo risachazozwika nakamwe padera pemitunhu yaIsuraeri. “Mai vako vaiya vakatodzana nomuvhini mumunda womuvhini, wakasimirwa pasinde pemvura; wakabereka zvakawanda nematai mazhinji ngendaa yemvura zhinji. Guri rawo rakagwinya rinoita ndonga dzaavo vanotonga; nechiemo chake chakakuriswa pakati pematai akatsikana; wakaoneka muurebu hwake nouzhinji hwematai ake. Asi wakabvitwa muushungu hukuru, ukakandirwa pashi pamavhu, nedutu rokumabvazuva rakauomesa; michero yawo yakakaiwa kubvapo, guri rawo rakagwinya rakafota; nomuriro wakaupedza. Zvino wasimirwa mushango, munyika yakaoma neinenyota. Nomuriro wabuda kubva paguri rawo, wapedza matai nemichero yawo, ndizvo aachina guri rakagwinya rokuita ndonga yokutonga. Ichi chiriro, chinozoshandiswa kuitwa chiriro.” Mugore rechinomwe mumwedzi wechishanu, ngezuva regumi remwedzi, vakuru vamweni vaIsuraeri vakauya koobvunza Mambo Mwari, vakagara pamberi pangu. Neizwi raMambo Mwari rakauya kwendiri rechiti, “Mukororo womunhu, ereketa kuvakuru veIsuraeri, wechiti kwevari, ‘Izvi ndizvo zvinoronza Mambo Mwari, Mwari: Ngenyi mwauya? Koobvunza here? Kudai ngezvendinopona, unoronza Mambo Mwari, Mwari, andizobvunzwi ndimwi.’ “Unozovatonga here, mukororo womunhu? Unozovatonga here? Zvino ita kuti vazie zvinyangadzo zvemadzibaba avo, newe uti kwevari, ‘Izvi ndizvo zvinoronza Mambo Mwari, Mwari: Pazuva apo pendakatsanangura Isuraeri, ndakapika mhiko kumibarirwana yorudzi rwemhatso yaJakobe, ndikadziita kuti ndiziikanwe kwevari vari munyika yeEgipite,’ ndakapika mhiko kwevari ndechiti, ‘Inini ndini Mambo Mwari, Mwari wenyu.’ Pazuva iro ndakapika kwevari kuti ndinozovabudisa kubva munyika yeEgipite, kuti vapotere munyika yendakavatsvakira, nyika inoerera mukaka nouchi, nyika iri uthende hwenyika dzeshe. Neni ndakati kwevari, ‘Rashai munhu weshe kubva kwaari zvinyangadzo zvinodakadzisa madziso ake, musadzisvipisa pachenyu ngemiedzaniso yokudira yeEgipite; inini ndini Mambo Mwari, Mwari wenyu.’ Asi vakamukira kurwa neni, nokusikapurutana kwendiri; haiwa naumwe wavo wakarasha zvinyangadzo zvinodakadza madziso ake, nokuti kurekera miedzaniso yokudira yeEgipite. Zvino ndakapinimidza kuti ndaizodurura ushungu hwangu padera pavo, kuti ndipedze ushungu hwangu kwevari mukati mwenyika yeEgipite. Asi ndakaita izvi ngendaa yezina rangu, kuti risasvipiswa mukuona kwemadzinza pakati peavo vevaigara navo, mukuona kwavo ndakadziita kuti ndiziikanwe kwevari mukuvabudisa kubva munyika yeEgipite. “Ndizvo ndakavaita kuti vabude kubva munyika yeEgipite, ndikavaunza mukati mweshango. Ndakavapa zviemeso zvangu, ndikavaonisa zvitongero zvangu, ndizvo kudai munhu echizviita, unozopona ndizvo. Zve, ndakavapa maSabatha angu, kuti aite chioniso pakati pangu navo, kuti vazie kuti inini ndini Mambo Mwari unovachenesa. Asi mhatso yaIsuraeri yakamukira kurwa neni mushango; avazi kuhamba muzviemeso zvangu, asi vakaramba zvitongero zvangu, izvi kudai munhu echizviita, unozopona ndizvo; nemaSabatha angu vakaasvipisa kakurutu. Zvino ndakapinimidza kuti ndaizodurura ushungu hwangu padera pavo mushango, kuti ndivapedze. Asi ndakaita izvi ngendaa yezina rangu, kuti risasvipiswa mukuona kwemadzinza, mukuona kwavo ndakavabudisa. Zve, ndakapika kwevari mushango, kuti andizovagumisi munyika yendakavapa, inoerera mukaka nouchi, iyo iri uthende hwenyika dzeshe, ngokuti vakaramba zvitongero zvangu, vasikazi kuhamba ngezviemeso zvangu, vakasvipisa maSabatha angu; ngokuti mwoyo yavo yakateera miedzaniso yavo yokudira. “Zvakanyadaro madziso angu akavakungurira neni andizi kuvaparadza nokuti kuvapedza yaamho mushango. Ndakati kunevana vavo mushango, ‘Musateera muzviemeso zvevabereki venyu, nokuti kungwarira zvitongero zvavo, nokuti kudzisvipisa pachenyu ngemiedzaniso yavo yokudira. Inini Mambo Mwari, ndini Mwari wenyu; teerai muzviemeso zvangu, munase kungwarira zvitongero zvangu, muzviite, muchenese maSabatha angu, kuti aite chioniso pakati pangu nemwi, kuti muzie kuti inini ndini Mambo Mwari, Mwari wenyu.’ Asi vana vakamukira kurwa neni; avazi kuteera muzviemeso zvangu, navo avazi kunasa kungwarira zvitongero zvangu, kudai munhu echizviita, unozopona ndizvo; vakasvipisa maSabatha angu. Zvino ndakapinimidza kuti ndaizodurura ushungu hwangu padera pavo, kurwa navo kuti ndipedze ushungu hwangu kwevari mushango. Asi ndakapfinyisa nyara yangu, ndikaita ngendaa yezina rangu, kuti risasvipiswa mukuona kwemadzinza, avo mukuona kwavo ndakavabudisa. Zve, ndakapika mhiko kwevari mushango, kuti ndinozovaparadzira pakati pemadzinza, ndivatatanise mukati mwenyika dzeshe, ngokuti avazi kuita zvitongero zvangu, asi vakaramba zviemeso zvangu nokusvipisa maSabatha angu, nemadziso avo airingira kumiedzaniso yokudira yemadzibaba avo. Ndizvo ndakavapa zviemeso zvaiya zvisikazi kunaka nezvitongero zvevasaikona kupona ndizvo. Ndakavasvipisa kubudikidza ngezvipo zvavo zvemene, mukupira mudiro womuriro avo veshe vari matangwe avo, kuitira kuti ndivazadze ngokutyiswa, kuti vazie kuti inini ndini Mambo Mwari. “Ndizvo, mukororo womunhu, ereketa kunevemhatso yaIsuraeri wechiti kwevari, ‘Izvi ndizvo zvinoronza Mambo Mwari, Mwari: Muizvizve madzibaba enyu akandituka, vakaita ngourimbwi kwendiri.’ Ngokuti apo ndaiya ndavaunza munyika, yendakapika kuti ndiipe kwevari, zvino kunyazwi ngepari pevakaona zvimitunhu zvakakwirira nemimbiti yeshe yakatsikana mashakani, vakapira mibairo yavopo, vakapira midiro yavo yokundinyangadza; naapozve vakapisha mitombo yavo inegwema rakanaka, vakadururapo midiro yavo yokumwa. Ndakati kwevari, ‘Munoronzenyi ngeiyo ndau yakawirira kwomunoenda imwimwi?’ Ndizvo zina reiyo ndau inozodaidzwa kuti, ‘Bhama,’ metsa nanyamashi. Ndizvo ronza kumhatso yaIsuraeri kuti, ‘Izvi ndizvo zvinoronza Mambo Mwari, Mwari: Munozodzisvipisa kudai ngemiitiro yemadzibaba enyu here? Nokupauka kuteera zviro zvavo zvinonyangadza here? Naapo mwoopira zvipo zvenyu, nokuita kuti vana venyu vapotye mumuriro, munodzisvipisa pachenyu ngemiedzaniso yenyu yeshe metsa nanyamashi. Neni ndingazobvunzwa ndimwi here, O mhatso yaIsuraeri? Kudai ngezvendinopona, unoronza Mambo Mwari, Mwari, inini andizobvunzwi ndimwi.’ Izvo zviri mumipinimidzo yenyu azvizoitiki akadi, mupinimidzo, munoti, ‘Ngatidai ngemadzinza, kudai ngemadzinza enyika, kudira matanda nemapuwe.’ ” “Kudai ngezvendinopona, unoronza Mambo Mwari, Mwari, ngegwinyiso ngenyara inesimba, nomuoko wakatambanudzwa, noushungu hwakadururwa, ndinozoita mambo padera penyu. Ndinozomubudisa kubva kumadzinza, nokumuunganidza kubva kunyika dzeshe kwemwakaparadzirwa, ngenyara inesimba, nomuoko wakatambanudzwa, noushungu hwakadururwa; neni ndinozomuunza mushango revanhu, naapo ndinozomutonga hope kuhope. Kudai ngezvendakatonga madzibaba enyu mushango renyika yeEgipite, ndizvo ndinozomutonga, unoronza Mambo Mwari. Ndinozomuita kuti mupinde ngepashi pendonga, nokuzomuunza muchisungo chechitenderano. Ndinozoparadzanisa kubva pakati penyu vamukiri, naavo vanondishaishira; ndinozovabudisa kubva munyika yevanogara kudai ngevanhu, vapara asi avazopindi munyika yaIsuraeri. Zvino muchazia kuti inini ndini Mambo Mwari. “Asi imwimwi, O mhatso yaIsuraeri, izvi ndizvo zvinoronza Mambo Mwari, Mwari: Endai, mudire miedzaniso yenyu yokudira, zvinopano umwe ngaumwe wenyu, zvinopano nesure kweizvo, kudai musikazondipurutani; asi zina rangu rakachena amuchazorisvipisi ngezvipo zvenyu nemiedzaniso yenyu yokudira. Ngokuti pamutunhu wangu wakachena, mutunhu wakareba waIsuraeri, unoronza Mambo Mwari, Mwari, apo veshe vemhatso yaIsuraeri veshe avo vanozodira inini munyika; apo ndinozovaashira, naapo ndipo pendinozoda michero yenyu nezvipo zvenyu zvakapinda kunaka nezvakachena. Kudai ngegwema rakanaka ndinozomuashira, pendinozomubudisa kubva pakati pemadzinza, nokumuunganidza kubva kunyika dzemwakaparadzirwa; ndinozoonisa kucheneswa kwangu pakati penyu mukuona kwemadzinza. Munozozia kuti inini ndini Mambo Mwari, apo pendinomuunza mukati mwenyika yaIsuraeri, munyika yendakapika mhiko kuipa kumadzibaba enyu. Naapo munozokarakadza njira dzenyu, nezviito zveshe zvemwadzisvipisa ndizvo pachenyu; munozodzinyenya pachenyu ngendaa yokushata kwenyu kweshe kwemwakaita. Nemwi munozozia kuti inini ndini Mambo Mwari, apo pendinoita nemwi ngendaa yezina rangu, haiwa kudai ngokushata kwenjira dzenyu, nokuti kudai ngokushata kwezviito zvenyu, O mhatso yaIsuraeri, unoronza Mambo Mwari, Mwari.” Izwi raMambo Mwari rakauya kwendiri rechiti, “Mukororo womunhu, emesa hope yako kuringira kubani, chumaira mazwi ako kubaniyo, uprofete kuitira ndaa nyika yegwasha yokubani; wechiti kugwasha rokubani, ‘Izwa izwi raMambo Mwari: Izvi ndizvo zvinoronza Mambo Mwari, Mwari: Ndinozobasa muriro mwouri, nawo unozopedza miti yeshe yakasvipirika mukati mwako, nemiti yeshe yakaoma; mirazvu inobaka aizodzimwi, nehope dzeshe kubvira kubani metsa dera dzinozopishwamwo ndiwo. Nenyama yeshe inozoona kuti inini Mambo Mwari ndini ndaubasa; auzodzimwi.’ ” Naapo ndakati, “A Mambo Mwari, Mwari! Vanoereketa ndini, kuti, ‘Aasiri muereketi wemiedzaniso here?’ ” Izwi raMambo Mwari rakauya kwendiri rechiti, “Mukororo womunhu, emesa hope yako kuringira Jerusarema, uchumaire mazwi ako kunendau dzakachena, uprofete kuitira ndaa nyika yaIsuraeri, uronze kunyika yaIsuraeri, ‘Izvi ndizvo zvinoronza Mambo Mwari: Ringira, ndinouya koorwa newe, ndinozoshwamura shoti yangu kubva mumakara ayo, neni ndinozouraya kubva kweuri vakarurama nevakashata. Ngokuti ndinozouraya kubva kweuri vakarurama nevakashata, ndizvo shoti yangu inozobuda mumakara ayo, kurwa nenyama yeshe kubvira kubani metsa dera; nenyama yeshe inozozia kuti inini Mambo Mwari ndashwamura shoti yangu kubva mumakara ayo, aichazohwirinzwizve.’ “Ndizvo gomera, iwewe mukororo womunhu, gomera ngokuguka kwemwoyo nokuzangandwa ngokutambudzika pamberi pemadziso avo. Naapo vechiti kwouri, ‘Ngenyi wechigomera?’ Unozoti, ‘Ngendaa yemashoko aguma. Mwoyo weshe unozonyunguruka, nyara dzeshe dzinozopera simba, mweya weshe unozodemera, nemabvi eshe anozorembedzeka kudai ngemvura.’ Ringirai, zvinoguma, zvinozoitika,” unoronza Mambo Mwari, Mwari. Neizwi raMambo Mwari rakauya kwendiri rechiti, “Mukororo womunhu, profeta wechiti, ‘Izvi ndizvo zvinoronza Mambo Mwari, Mwari; uti: Shoti, shoti yarodzerwa, yangwizirwa. Yarodzerwa kuti iuraye kakurutu, yangwizirwa kuti ipenye kudai ngemheni! Ndizvo tingadakara ngenjiranyi? Washoora ndonga nokupangwa kweshe. Shoti yapirwa kuti ingwizirwe, kuti ibatwe munyara; yarodzerwa, shoti yangwizirwa, kuti ipuwe munyara yomuurayi. Chema, uboorere, O mukororo womunhu, ngokuti inorwa nevanhu vangu, inorwa nevatongi veshe vaIsuraeri, vanokandirwa pamwepo kushoti nevanhu vangu. A! Chaya chizva! Ngegwinyiso kuedzwa kunouya. Ngenyi iwewe washoora ndonga? Aizobudiriri, unoronza Mambo Mwari, Mwari.’ “Ndizvo iwewe, mukororo womunhu, profeta, uchaye nyara dzako pamwepo. Shoti ngaiwe kairi, katatu, ishoti yokuuraya; shoti yokuuraya kukuru, yakavatendenedza. Ndizvo mwoyo inonyunguruka nevazhinji vanopumhunwa. Pamisiwo yavo yeshe ndaemesa ndau yeshoti. A! Yakaitirwa kupenya kudai ngemheni, yakangwizirwa kuti iuraye. Rwisa ngokumudyo! Batika ngokumuoshwe! Kweshe kunoenda shoti yako. Ininiwo ndinozochaya pamwepo nyara dzangu, ndinozogutisa ushungu hwangu; inini Mambo Mwari ndaereketa.” Izwi raMambo Mwari rakauya kwendiri rechiti, “Mukororo womunhu, tora mapato mairi eingauya ndiyo shoti yamambo weBhabhuroni; eshe mairi anozobuda kubva kunyika imweyo. Newe uise chioniso, peinoita mhararano yokupinda mudhorobha. Tara pato reshoti kuti igume Rabha revaAmoni, nokuti Judha nomuJerusarema rakashosherwa. Ngokuti mambo weBhabhuroni unoema ngepamhararano yepato, ngepakati pemupato mairi, kuti ashandise mabhigidha; unozungunyisa misee, unobvunza kumiedzaniso, unoringisisa muchiropa. Munyara yake yokumudyo munebhighidha reJerusarema, apo paanoemesa zvokuputsisa, kubeura muromo kudaidzira mukuuraya, kumirudza izwi kudaidzira, kuemesa miti yokuputsa marukumbati pamisiwo, kuaka marukumbati, nokuaka thawa. Asi kwevari zvinooneka zvakadai ngokuringidza kusina shwiro mukuona kwavo; kwavari avo vapika mhiko dzakagwinya; asi unozounza kushata kwavo mumukarakadzo, kuunza pasinde kubatwa kwavo. “Ndizvo izvi ndizvo zvinoronza Mambo Mwari, Mwari: Ngokuti mwakaunza kushata kwenyu mukukarakadzwa, ngenjira iyi zvipauko zvenyu zvaoneka, kuitira kuti zviito zvenyu zveshe nezvishaishi zvioneke; ngokuti mwauya mukukarakadzwa nemwi munozobatwa ngenyara. Asi iwewe O wakashata mambo waIsuraeri uwo zuva rako raguma, nguva yokuororwa kwokupedzisira, izvi ndizvo zvinoronza Mambo Mwari, Mwari echiti, ‘Dusa ngututu, bvisa dzungudza, uriise pashi. Zviro azvizogari zvakaita zvezvakaita. Kwidza icho chakadzaka pashi, udzase icho chakakwirira. Matongo, matongo, matongo ndinozozviita! Zvakadaro azvizikumboitika! Metsa agume uwo unozvisisira; neni ndinozozvipa kwaari.’ “Asi iwewe, mukororo womunhu, profeta wechiti, ‘Izvi ndizvo zvinoronza Mambo Mwari, Mwari ngendaa yevaAmoni, nendaa yokutuka kwavo, ronza iwewe, uti: Shoti, shoti, yakashwamurwa kuuraya, yangwizwa kuti ipedze, ipenye kudai ngemheni. Kuonisa zvioniso zvokunyepa, vechiita mabhigidha emanyepo kweuri vanokuisa pamitsipa yevakashata, vakashata avo zuva ravo raguma, nguva yokuororwa kwokupedzisira. Ihwirinze mumakara ayo. Mundau yowakasikirwa, munyika yokubarwa kwako ndinozokutonga. Ndinozodurura padera pako ushungu hwangu nomuriro woushungu hwangu ndinozofuridzira padera pako. Ndinozokuisa munyara dzevanhu vakashata, ngwazi dzokuuraya. Iwewe unozoitwa huni dzomuriro; ngazi yako inozopinda mukati mwemavhu; iwewe auchazokarakadzwi nakamwe, ngokuti inini Mambo Mwari ndaereketa.’ ” Izwi raMambo Mwari rakauya kwendiri rechiti, “Iwewe, mukororo womunhu, unozotonga, unozotonga here dhorobha rengazi? Rironzera zviito zvaro zveshe zvinonyangadza. Unozoti, ‘Izvi ndizvo zvinoronza Mambo Mwari, Mwari: O dhorobha! Rinoparadza ngazi mukati mwaro, nguva yaro yaguma, kunasira miedzaniso yokudzisvipisa. Iwewe waita ndaa yengazi iyo yewaparadza, nokudzisvipisa ngemiedzaniso yako yewaita; waita kuti zuva rako rikwedzere pasinde, nguva yakaemeswa yemakore ako yaguma. Ndizvo ndakuita chitsverudzo pamberi pemadzinza, nokuita chishekedzo kunyika dzeshe. Avo vari pasinde kwouri, nevari kuretu kubva kwouri, vanozokusheka, iwewe unezina rasvipiswa kuzara ngoudzongoni. Ringira, vatongi vaIsuraeri vari mweuri, weshe kudai ngesimba rake, waiya akakotama kuparadza ngazi. Baba namai vanoitwa chishekedzo mukati mwako; vapara vanogara mukati mwako vakaangiridzwa; nherera neshirikadzi vanoshaishirwa mukati mwako. Iwewe washoora zviro zvangu zvakachena nokusvipisa maSabata angu. Mukati mwako varimwo vanegunyengu kuti vaparadze ngazi, avo mukati mwako varipo vanodya padera pemitunhu, avo vanoita kuemura kwenyama mukati mwako. Mukati mwako vanofukura utitinini hwemadzibaba avo; mukati mwako vanoangiridza vakadzi vari kumwedzi. Umwe unoita zvinonyangadza nomukadzi womuakirwana wake, umweni unosvipiswa ngokuemura kwenyama muzakazi wake, umweni mukati mwako unosvipisa mukunda wake, mwanasikana wababa ake. Mukati mwako vanoashira zvitengero kuti vaparadze ngazi; iwewe unoashira zveshe kuuyirwa kuchazouya nezvinowanziswa, wakaashira kuuyirwa kusikazi kunaka kubva kumuakirwana wako, newe wandiriyarwa, unoronza Mambo Mwari, Mwari.’ “Ringira, ndachaya nyara dzangu pamwepo ngendaa yokuuyirwa kwako kwekusikagondeka kwewaita, nendaa yengazi yakaparadzwa pakati pako. Kutsunga kwako kunogara kuripo here, nokuti nyara dzako dzingagwinya here, mumazuva endinozoshanda kwouri? Inini Mambo Mwari ndaereketa, neni ndinozochiita. Ndinozokuparadzira pakati pemadzinza, nokukutatanisa munyika, ndinozopedza tsvina yako kubva kwouri. Naapo wasvipiswa mukuona kwevemadzinza, unozozia kuti inini ndini Mambo Mwari.” Izwi raMambo Mwari rakauya kwendiri rechiti, “Mukororo womunhu, mhatso yaIsuraeri yaita mahundi kwendiri; veshe vavo vakadai ngethusi, thini, simbi nomuthovhi, mukati mwechoto, vaita mahundi esirivha. Ndizvo izvi zvinoronza Mambo Mwari, Mwari! ‘Ngokuti imwimwi mweshe mwaita mahundi, ndizvo, ringira, ndinozomuunganidza mukati mweJerusarema. Kudai ngevanounganidza sirivha, thusi, simbi, muthovhi nethini, mukati mwechoto, kuti vabasire muriro padera pazvo, kuti vazvinyunguruse; ndizvo ndinozomuunganidza mukunyangadzwa kwangu nomuushungu hwangu, ndinozomuisa nokumunyungurusa. Ndinozomuunganidza nokufuridza muriro padera penyu muushungu hwangu, nemwi munozonyunguruka mukati mwaro. Kudai ngesirivha inonyunguruka mukati mwechoto, ngokudaro imwimwi munozonyunguruswa mukati mwacho; nemwi munozozia kuti inini Mambo Mwari ndadurura ushungu hwangu padera penyu.’ ” Izwi raMambo Mwari rakauya kwendiri rechiti, “Mukororo womunhu, ronza kweiri, ‘Uri nyika isikazi kusukika, isikazi kunaiwa padera ngezuva roushungu.’ Vaprofeti varo mukati mwaro vakadai ngemhondoro inokwanga yechibvajura chokudya; vakapedza vanhu, vakatora upfumi nezvinomutengo mukuru; vakaita kuti shirikadzi dziwande mukati mwaro. Vapristi varo vakagura mutemo wangu, vakasvipisa zviro zvangu zvakachena; avazi kuparadzanisa pakati pezvakachena nezvakasvipiswa, avazi kudzidzisa muparadzaniso pakati pezvisikazi kusukika nezvakasukika. Vakatswatira madziso avo kubva kumaSabatha angu, kuti ndisvipiswe pakati pavo. Vatongi varo vari mukati mwaro vakadai ngemakava anobvajura zvokudya, kuparadza ngazi nokuuraya vanhu kuti vaone kuuyirwa kusikagondeki. Vaprofeti varo vakavasetera ngemasuko asikagwinyi, vechiona zvioniso zvisina shwiro; vanofembera manyepo kwevari vechiti, ‘Izvi ndizvo zvinoronza Mambo Mwari, Mwari,’ apo Mambo Mwari asikazi kuzviereketa. Vanhu venyika vakabvuka pfuma nokuita umbavha; vakatambudza varombo nevatami, vakabvukira vapara upfumi hwavo pasina ndaa. Neni ndakatsvaka munhu pakati pavo, kuti aakise rukumbati, nokuema paburi pamberi pangu ngendaa yenyika, kuti ndisaiparadza; asi andizi kuona naumwe. Ndizvo ndadurura ushungu hwangu padera pavo, ndavapedza ngomuriro woushungu hwangu; ndaunzidzira padera pemasoro avo kudai ngezviito zvenjira dzavo,” unoronza Mambo Mwari, Mwari. Izwi raMambo Mwari rakauya kwendiri rechiti, “Mukororo womunhu, vaiyapo vakadzi vairi, vanasikana vamai umwewo, vakaita uhure muEgipite; vakaita uhure vachimuutsva hwavo; mazamo avo akabatwa batwa, vakapukutwa tsungu dzoumhandara hwavo. Mazina avo aiya Ohora taita, naOhoribha munun'una wake. Vakaita vangu, vakabereka vakororo navanasikana. Ndaa yemazina avo, Ohora ndiye Samaria, naOhoribha ndiye Jerusarema. Ohora wakaita uhure apo ari wangu; naye wakaemura vadikani vake, vaAsiria varwi vehondo vaipfekeswa zvakasvipirika, vaiya vatongi nenduna dzehondo, veshe vavo vaiya majaha akanaka anoemurika, vagadhi vemahachi. Wakaita uhure hwake padera pavo, veshe vavo vamuna vakatsanangurwa veAsiria; naye wakadzisvipisa ngemiedzaniso yeshe yewakaemura. Aazi kurekera uhure hwake hwaakaita kubvira Egipite; ngokuti muutsva hwake vamuna vakaata naye, vakapukuta tsungu dzoumhandara hwake, navo vakadururira kuemura kwavo padera pake. Ndizvo ndakamupira munyara dzevadikani vake, munyara dzevaAsiria, avo vaakaemura. Ava vakafukura utitinini hwake: vakatora vakororo vake nevanasikana vake, vakamuuraya ngeshoti. Kutonga kwakatongwa padera pake, naye wakaita chishekedzo pakati pemadzimai. “Munun'una wake Ohoribha aona ichi, asi iye waiya akashata kupinda kwake mukuemura, nomuuhure hwake, kwaiya kwakashata kupinda kwataita wake. Iye wakaemura vaAsiria vatongi, nduna nevarwi vehondo, vaipfeka zvehondo, vagadhi vemahachi, veshe majaha akanaka anoemurika. Neni ndakaona kuti iye waiya asvipiswa, veshe vevairi vakatora njira imweyo. Asi wakaangira kuenda mberi neuhure hwake; wakaona miemo yevamuna yakanangurwa parukumbati, miedzaniso yevaKharadhea yakanyorwa mukutsvuka, vanemabhande muzviunu zvavo, vanemaduku akanaka anemiara akasungwa mumasoro avo, veshe avo vairingirika vakadai ngevatongi vanechiemo chevamuna veBhabhuroni reKharadhea, nyika yokubarwa kwavo. Ngokukasira apo avaona ngemadziso ake, wakavaemura, naye wakatuma nhumwa kwevari muKharadhea. NevaBhabhuroni vakauya kwaari mumubhedhi worudo, navo vakamusvipisa ngokuemura kwavo; apedza kudzisvipisa pachake ndivo, wakapetuka kubva kwevari mukurambana. Naapo aangira uhure hwake pamhene, wakaonisa utitinini hwake, ndapetuka kwaari kumuramba, kudai ngezvendakapetuka kuramba taita ake. Asi wakaangira kuwanzisa uhure hwake, echikarakadza ngemazuva outsva hwake, paakaita uhure navo munyika yeEgipite. Wakaemurapo vadikani vake, avo vaneumwamuna hwakareba kudai ngehwembongoro, awo anobudisa uhwamuna hwawo hwakadai ngouhwamuna hwemahachi. Ngokudaro iwewe waidisisa kuemura kwenyama kwoutsva hwako, apo vaEgipite vaiphuzura tsungu dzemazamo outsva hwako. “Ndizvo, O Ohoribha, izvi ndizvo zvinoronza Mambo Mwari, Mwari: Ringira, ndinozomusa vadikani vako kuti varwe newe, avo vewakapetukira kurambwa ngomweya wako, neni ndinozovaunza kuti varwe newe vechibva kumarutii eshe: vaBhabhuroni, nevaKharadhea veshe, vaPhekodhi, vaShoa, nevaKoa, nevaAsiria veshe pamwepo, majaha akanaka anoemurika, vatongi nenduna, veshe pamwepo, vakuru nevarwi ngwazi, vanogadha mahachi. Vanozouya kurwa newe, vanendonga dzokurwa, ngoro dzehondo, nengoro dzokutwara zviro nehondo yevanhu; vanozodziemesa kurwa newe, kubva kumarutii eshe vanezvokuvhika ndizvo, zvihlangu, nezviquoko, neni ndinozoemesa kutonga kwevari, navo vanozokutonga kudai ngezvitongero zvavo. Ndinozoemesa ushungu hwangu kurwa newe, kuitira kuti vakuitire muushungu. Vanozodusa miro yako nenzee dzako, nevanosara vako vanozowa ngeshoti. Vanozotora vakororo vako nevanasikana vako, nevanosara vako vanozopedzwa ngomuriro. Vanozokhumura zvokusimira zvako, vanozotora zvinemeso zvako zvakanakisa. Ndizvo ndinozoita kuti kuemura kwako kwenyama kupere kwouri, nouhure hwako hwakabva munyika yeEgipite; auchazoringiri kwevari ngemadziso ako nokuvaemura, nokuti kukarakadzazve Egipite.” Ngokuti izvi ndizvo zvinoronza Mambo Mwari, Mwari: “Ringira, ndinozokupira munyara dzaavo vounozonda, munyara dzaavo vakarambwa ngomweya wako; navo vanozoita kwouri mukuzonda, vanozotora yeshe michero yokushanda kwako, vanozokusiya uri mutitinini nomupunu, noutitinini hwouhure hwako hunozobudiswa, pamhene. Kuemura kwako kwenyama nouhure hwako zvaunza izvi padera pako, ngokuti iwewe wakaita uhure nemadzinza evanhu, ukadzisvipisa pachako ngemiedzaniso yavo yokudira. Wahamba munjira yataita ako; ndizvo ndinozopa tsani yake munyara yako.” Izvi ndizvo zvinoronza Mambo Mwari, Mwari: “Iwewe unozomwa tsani yataita ako yakadzama nokupamhama; newe unozoshekwa nokudadirwa; inezvakawanda. Unozozadzwa ngokuradziswa nemadambudziko. Tsani yokushamiswa neyokuparadzwa itsani yataita ako Samaria; unozoimwa nokuisvisvina, unozoinyedura mushuna wayo, nokubvita mazamo ako; ngokuti inini ndazviereketa,” unoronza Mambo Mwari, Mwari. Ndizvo izvi zvinoronza Mambo Mwari, Mwari: “Ngokuti iwewe wandiriyarwa ukandirasha sure kwomushana wako, ndizvo twara kushata kwokuemura kwako kwenyama nouhure hwako.” Mambo Mwari wakati kwendiri: “Mukororo womunhu, unozotonga here Ohora naOhoribha? Zvino varonzere zvinyangadzo zvezviito zvavo. Ngokuti vakaita uhure, nengazi iri munyara dzavo, vakahura nemiedzaniso yavo, vakaita kuti vakororo vavo, avo vevakandiberekera, vapotye mumuriro kuti vaite mudiro wezvokudya. Zve, ichi ndicho chevakaita kwendiri: vasvipisa ugaro hwangu hwakachena ngezuva rimwero nokusvipisa maSabatha angu. Ngokuti apo vaiya vauraira miedzaniso yavo yokudira vana vavo, ngezuva rimwero vakauya muugaro hwangu hwakachena kuhusvipisa. Ringira, izvi ndizvo zvevakaita mukati mwemhatso yangu. “Vakatumawo nhumwa koodaidza vanhu kuti vabve kuretu, kwevari nhumwa yakatumirwa; ringira, vakauya. Ngendaa yavo iwewe wakadzishamba, ukaisa muara pamadziso ako, ukadzinemesa ngokwako ngezvinemeso. Wakadzigadzika pamubhedhi wakanaka, unehwarasanza yakachingwa pamberi pawo, padera payo wakagadzika mutombo wangu unegwema rakanaka nemafuta angu. Nebope rembungano reavo vaidakara rakamutendenedza, nemadzongoni mazhinji akaunzwa kubva mushango, avo vakaisa mabhengera mumioko yevakadzi, nemadzungudza anoringirika zvakanaka padera pamasoro avo. Zvino ndakati, ‘A wapera ngokuhura,’ asi vanoangira kuhura kwavo naye. Ngokuti vapotera kwaari, kudai ngeumwe unopotera munehure. Ndizvo vakapotera munaOhora nomunaOhoribha, kuvakadzi vanoemura zvenyama. Asi vamuna vakarurama vanozovatonga kudai ngokutongwa kwevakadzi vanohura nokuparadza ngazi; ngokuti vari mahure nengazi iri munyara dzavo. “Ngokuti izvi ndizvo zvinoronza Mambo Mwari, Mwari: Unza chikwata padera pavo kurwa navo, vaite kuti vatyiswe nokuchakatwa. Chikwata chinozovaponda ngemapuwe, ngeshoti dzavo vanozovatemera pashi; vanozouraya vakororo vavo nevanasikana vavo, nokupisha mhatso dzavo ngomuriro. Ngokudaro ndinozopedza kuemura kwenyama munyika, kuitira kuti vakadzi veshe vadzidziswe, kuti vasazoteera kuemura kwenyu kwenyama kudai ndimwi. Vanozomuunzidzira ngendaa yokuemura kwenyu kwenyama, nemwi munozotwara kuororwa kwezvishaishi zvemiedzaniso yenyu yokudira; nemwi munozozia kuti inini ndini Mambo Mwari, Mwari.” Mugore rechipfumbamwe, ngomwedzi wegumi, ngezuva regumi romwedzi, izwi raMambo Mwari rakauya kwendiri rechiti, “Mukororo womunhu, nyora zina rezuva iri, nyamashi uno.” Mambo weBhabhuroni wadziemesera kurwisa Jerusarema ngezuva iri. Uerekete muedzaniso kunemhatso inomukira, wechiti kweiri, “Izvi ndizvo zvinoronza Mambo Mwari, Mwari: Terekai hari, itereke, udurure mvura mukati mwayowo; isa zvigurwa mukati mwayo, zvigurwa zveshe zvakanaka, chizva nebandauko; uizadze ngemagodo akatsanangurwa. Tora dzakatsanangurwa dzezvifuyo, uronge matanda pashi pemagodo, nasa kuabika, zvigurwa zvayo, magodo ngaabikwe mukati mwayo.” Ndizvo izvi ndizvo zvinoronza Mambo Mwari, Mwari: “Ihehe kunedhorobha rengazi, hari inengura mukati mwayo, ngura yayo aizi kubuda kubva kweiri! Budisai kubva kweiri chigurwa ngechigurwa; usatendera kuti zviitirwe mabhigidha. Ngokuti ngazi yerakaparadza iri mukati mwaro; rakaigadzika padera poruware; arizi kuidurura padera pamavhu, kuti aifushire ngemavhu. Kumusira ushungu hwangu kuti huunzidzire, ndagadzika ngazi yerakaparadza padera poruware kuti isafushirika.” Ndizvo izvi ndizvo zvinoronza Mambo Mwari, Mwari: “Ihehe kudhorobha rengazi! Ndinozoita kuti murwi ukure. Unganidza murwi wehuni, basa muriro, unase kubika nyama, ita muto wakakora, ubvengedze nezvinonuhwira, magodo ngaapishwe. Zvino igadzike isina chiro padera pemasimbe kuti ipishe, thusi rayo ritsvuke, ritsve, kuti tsvina yayo inyunguruke mukati mwayo, kuti ngura yaro ipedzwe. Ndadzirembesa pachangu ngokushanda zvisina shwiro; ngura yaro yakabatira aibvi. Kumuriro nengura rayo! Asi apo pendakakuchenesa mutsvina yokuemura kwenyama, auzi kusukika kubva mutsvina yako; auchazosukwizve nakamwe, metsa ndapedza ushungu hwangu padera pako. Inini Mambo Mwari ndakaereketa; nguva iri kuuya, ndinozochiita. Andizorekeri, andizokunguriri, andizokunukuki. Kudai ngenjira dzako nezviito zvako, ndinozokutonga,” unoronza Mambo Mwari, Mwari. Izwi raMambo Mwari rakauya kwendiri rechiti, “Mukororo womunhu, ringira, ngendonga imwe ndinozodusa kubva kwouri chidakadziso chemadziso ako; asi auzotsumbi nokuti kuchema, masodzi ako aazoereri kudzaka. Gomera, asi usadaidzira, usazoita chiriro chowafa. Sunga dhuku musoro mwako, upfeke magwada ako mutsoka dzako, usazofukidzira muromo wako wedera nokuti kudya chingwa chevachemi.” Ndizvo ndakaereketa kunevanhu mumangwanani, nomumadeekoni mukadzi wangu wakafa. Nomumangwanani aiteera ndakaita kudai ngezvendakapangwa. Zvino vanhu vakati kwendiri, “Auzotironzeri here kuti izvi zviro zvounoita zvinoronzenyi kwetiri?” Zvino ndakati kwevari, “Izwi raMambo Mwari rakauya kwendiri rechiti, ‘Ereketa kunemhatso yaIsuraeri, izvi ndizvo zvinoronza Mambo Mwari, Mwari: Ringira, ndinozosvipisa ugaro hwangu hwakachena, kudzikudza kwesimba renyu, chidakadziso chemadziso enyu, nechidisiso chomweya yenyu; vakororo venyu nevanasikana venyu vemwakasiya sure vanozourawa ngeshoti. Nemwi munozoita kudai ngezvendaita inini; amuzofukidzi muromo wenyu wedera, nokuti kudya chingwa chevachemi. Maduku enyu anozosungwa padera pemasoro enyu, nemagwada enyu anozopfekwa patsoka dzenyu; amuzotsumbi nokuti kuchema; asi munozoperezeka muzvishaishi zvenyu, mwechidemberana umwe kunoumweni. Ngokudaro Ezekieri unozoita chioniso kwomuri; munozoita kudai ndizvo zveshe zvaaita. Naapo izvi zvoitika, zvino munozozia kuti inini ndini Mambo Mwari, Mwari.’ “Newe, mukororo womunhu, ngezuva iro rendinozodusa simba ravo kubva kwevari, kudakara kwavo nouthende hwavo, nechidakadziso chemadziso, nomwoyo yavo, vakororo vavo nevanasikana vavo, pazuva iro, umwe unopokonyoka, unozouya kwouri kooshuma kuti uzwe ngenzee dzako. Ngeiro zuva muromo wako unozobeukira kwaari uwo wakapokonyoka, newe unozoereketa, auchazonyarari. Ndizvo unozoita chioniso kwevari; navo vanozozia kuti inini ndini Mambo Mwari.” Izwi raMambo Mwari rakauya kwendiri rechiti, “Mukororo womunhu, ringirisa hope yako kuvaAmoni, nokuprofeta kuvaitira ndaa, wechiti kuvaAmoni, ‘Izwai izwi raMambo Mwari, Mwari: Izvi ndizvo zvinoronza Mambo Mwari, Mwari:’ Ngokuti mwakati, ‘Aha!’ kuitira ugaro hwangu hwakachena, apo hwakasvipiswa, nepadera penyika yaIsuraeri, apapo yakaitwa matongo, nepadera pemhatso yaJudha, apo peyakatorwa kuenda muuhloko, ndizvo, ringira, ndinozomupira munyara dzevanhu vokumabvazuva kuita nhaka kwevari.Vanozoaka ngome dzavo pakati penyika yenyu, nokudzimika matende avo mukati mwenyu; vanozodya michero yenyu nokumwa mukaka wenyu. Ndinozoita kuti Rabha riite mafuro emangamera, nendau yevaAmoni kuita chibaya chezvifuyo. Zvino munozozia kuti inini ndini Mambo Mwari. Ngokuti izvi ndizvo zvinoronza Mambo Mwari, Mwari: Ngokuti imwimwi mwaembera nyara dzenyu, nokutsikatsika ngetsoka dzenyu mukudakara ngendaa yokunyenya kwenyu kweshe kuri mukati mwenyu kuitira ndaa nyika yaIsuraeri, ndizvo, ringira, ndinozotambanudza nyara yangu kurwa nemwi, ndinozomupira kumadzinza kudai ngevapambi. Ndinozomugura kubva pakati pevanhu, ndinozoita kuti mupedzwe kubva mukati mwenyika; ndinozomuparadza. Zvino munozozia kuti inini ndini Mambo Mwari.” “Izvi ndizvo zvinoronza Mambo Mwari, Mwari: Ngokuti Moabhi neSeira vakati, ‘Ringirai mhatso yaJudha yakadai ngemadzinza amweni veshe,’ ndizvo, ringirai, ndinozobeura rutii rweMoabi kubvira mumadhorobha ari kumigano yayo, uthende hwenyika, ndiBhethijeshimothi, naBhaarimeoni, naKiriathiaimu. Ndinozoipa pamwepo nevaAmoni kuvanhu vokumabvazuva, kuti vaite nhaka. Ndizvo Amoni aachazokarakadzwi pakati pemadzinza, neni ndinozotonga padera paMoabhi. Zvino vanozozia kuti inini ndini Mambo Mwari.” “Izvi ndizvo zvinoronza Mambo Mwari, Mwari; ‘Ngokuti Edhomu wakashanda ngokuunzidzira kuitira ndaa mhatso yaJudha, ngokudziunzidzira kwevari, wakashaisha kakurutu mukuunzidzira padera pavo, ndizvo izvi ndizvo zvinoronza Mambo Mwari, Mwari: Ndinozotambanudza nyara yangu kurwa nevaEdhomu, ndinozouraya kubva kweiri vanhu nemhuka, ndinozoiita matongo; kubvira Themani metsa Dhedhani vanozowa ngeshoti. Ndinozoisa kuunzidzira kwangu padera peEdhomu ngenyara yevanhu vangu Isuraeri; navo vanozoita muEdhomu kudai ngokunyangadzwa kwangu nokudai ngoushungu hwangu; navo vanozozia kuunzidzira kwangu, unoronza Mambo Mwari, Mwari.’ ” “Izvi ndizvo zvinoronza Mambo Mwari, Mwari: ‘Ngokuti vaFiristia vaangira kuita kuunzidzira, vakaunzidzira ngomwoyo unegodo, mukuparadza, ndizvo izvi ndizvo zvinoronza Mambo Mwari, Mwari: Ringira ndinozotambanudza nyara yangu kurwa nevaFiristia, kuuraya vaKherethi nokuparadza eshe mahumbikumbi oruandhle. Ndinozounzidzira kuunzidzira kukuru padera pavo ngokuorora kwoushungu hunotyisa. Zvino vanozozia kuti inini ndini Mambo Mwari, apo pendinozotura padera pavo kuunzidzira kwangu.’ ” Mugore regumi narimwe, ngezuva rokutanga romwezi, izwi raMambo Mwari rakauya kwendiri rechiti, “Mukororo womunhu, ngokuti Thire rakaereketa ngendaa yeJerusarema rechiti, ‘Aha, wapwanywa musiwo wevanhu; wabeurirwa kwendiri; ndinozozadzwa, zvino raitwa matongo,’ ndizvo izvi ndizvo zvinoronza Mambo Mwari, Mwari: Ringira ndinorwisana newe, O Thire! Ndinozokwidza madzinza mazhinji kurwa newe, kudai ngoruandhle runokwidza mafungu arwo. Anozopwanya marukumbati eThire nokuputsira pashi marusvingo aro. Ndinozokoropa bukuta raro kubva kweriri, ndiriite kudai ngepadera poruware. Rinozoita ndau yokuanikira zvitaa pakati poruandhle. Ndaereketa, unoronza Mambo Mwari, Mwari. Rinozoita zvakachakatwa kunemadzinza, nevanasikana varo, madhorobha ari munyika, vanozourawa ngeshoti. Zvino vanozozia kuti inini ndini Mambo Mwari. “Ngokuti izvi ndizvo zvinoronza Mambo Mwari, Mwari; ‘Ringira, ndinozounza padera peThire kubva dera Nebhukhadhineza mambo weBhabhuroni, mambo wemadzimambo, pamwepo nemahachi, ngoro, vagadhi vemahachi, nehondo yakakura yakagwinya. Vanasikana vako, madhorobha ari munyika, unozouraya ngeshoti. Unozokuemesera rusvingo rwokurwa newe, unozoemesa mirwi yemavhu kurwa newe, nokumirudza denga rezvihlangu kurwa newe. Unozomirudza matanda okuputsa ndiwo marukumbati ako unozoputsira pashi marusvingo ako, ngematemo ake. Mahachi ake anozowanda kakurutu, bukuta rawo rinozomufukidza. Marukumbati ako emene anozozungunyika pakutinhira kwevagadhi vemahachi, mavhiri, nengoro, apo echipotera pamisiwo yako, kudai ngezvevanopotera vanhu mudhorobha rakadurwa uri parukumbati. Unozotsikatsika pashi eshe mapato ako ngetsoka dzemahachi ake. Unozouraya vanhu vako ngeshoti, nesika dzako dzakagwinya dzinozowira pashi pamavhu. Vanozopamba upfumi hwako, nokuchakata zvinotengeswa zvako; vanozoputsira pashi marukumbati ako, nokuparadza mhatso dzako dzakanaka. Mapuwe ako, mapuranga, nemavhu vanozokandira mumvura. Ndinozoita kuti bope rengoma dzako dzokuemba rinyarare; nebope rezvitende zvako arichazozwiki. Ndinozokuita ruware rusina chiro; iwewe unozoita ndau yokutambanudzira zvitaa. Auchazoakiwizve, ngokuti inini Mambo Mwari ndaereketa, unoronza Mambo Mwari, Mwari.’ “Izvi ndizvo zvinoronza Mambo Mwari, Mwari kuneThire: ‘Zviwi azvizohuti here ngebope rokuwa kwako, apo vakaremadzwa vechizogomera, apo kuurayiwa kunozoitwa pakati pako? Zvino vatongi veshe voruandhle vanozodzaka pashi kubva kumadendemaro avo, vanozodusa zvokusimira zvavo zvoumambo, nokukhumura zvokusimira zvavo zvakarukwa ngezvinemeso. Vanozodzipfekesa ngokuhuta; vanozobondokota pashi pamavhu, vechihuta mikuwo yeshe, vechishamiswa ndiwe.’ Vanozoita chiriro ngendaa yako, vechiti kwouri, “Wakaita maparadzirwenyi kubva paruandhle, O dhorobha rinembiri, raiya rakagwinya paruandhle, iwewe nevagari varo avo vakaisa kutyisa kwavo padera pevagari varo veshe! Zvino zviwi zvinohuta ngezuva rokuwa kwako; zviwi zviri muruandhle zvinopera simba ngezuva rokuparadzwa kwako.” “Ngokuti izvi ndizvo zvinoronza Mambo Mwari, Mwari: ‘Apo pendinokuita dhorobha dongo, kudai ngemadhorobha asikachagarwi, apo pendinokwidza padera pako ruandhle rwakadzama, nemvura yakawanda inokufukidza, zvino ndinozokudzasa pashi pamwepo naavo vanodzaka murindi, kuvanhu vomukuwo wekare, ndinozokuita kuti ugare munyika iri pashi, kundau dzakaita matongo dzekare, pamwepo naavo vanodzaka murindi, kuti usachazogarwa; nokuti kuwane ndau munyika yevanopona. Ndinozokuunza kumagumo anotyisa, newe auchazoapopi; kunyazwi iwewe wechizotsvakwa, auchazoonekizve,’ unoronza Mambo Mwari, Mwari.” Izwi raMambo Mwari rakauya kwendiri rechiti, “Zvino, iwewe mukororo womunhu, ita chiriro ngendaa yeThire, uti kuneThire, iro rinogara pamusiwo wokupinda muruandhle, iwewe unotengeserana nevanhu vezviwi zvizhinji. Izvi ndizvo zvinoronza Mambo Mwari, Mwari: O Thire, wati, “Inini ndakaperera mukuringirika kwangu. Migano yako iri pakati pemaruandhle, vaaki vako vakapererisa unaku hwako. Vakaita eshe mapuranga ako emiti yemifiri inobva Seniri; vakatora misedhare kubva Rebhanoni kuti vaake sika yako. Vakanasira zvokuhambisa ngarava ngemiti yemiokhi inobva Bhashani; vakanasira pashi pengarava ngemapuranga emiphaini akabva Saipurasi akafukidzwa ngenyanga dzenzou. Jira iro rewakatambanudza kuita rokuhluza ndiro raiya rorukangaza rwakanaka rwakarukwa ngezvinemeso rwakabva Egipite; jira retende rako rokukufukidzira raiya rakasvipirika nokutsvukuruka rakabva kuzviwi zvaErisha. Vagari veSidhoni nevaArivhadhi vaiya vahluzi vako; vanhu vako ngwazi, O Thire, avo vaiya mukati mwako, ndivo vaiya vahambisi vako vengarava. Vasharuka veGebhari nevanhu ngwazi dzaro vaiya mukati mwako, vechitsiira ndutwe dzako; ngarava dzeshe dzomuruandhle pamwepo nevahluzi vadzo vaiya mwouri, kuti vatenge zvokutengesa zvako. “Phesia, Ridhia nevePhuti vaiya muhondo yako, vanhu vako vokurwa vanesimba; vaturika zvihlangu nezviquoko mwouri; vakakupa unaku hwako. Vamuna veArivhadhi neHerekhi vaiya padera pemarukumbati ako akakutendenedza; vamuna veGamadhi vaiya mumarusvingo ako. Vakaturika zvihlangu zvavo padera pemarukumbati ako akakutendenedza; vakaita kuti unaku hwako huite hwakaperera. “Tharshishi rakatengeserana newe ngendaa youwandu hwoupfumi hwako hweshe; vakatenga midziyo ngesirivha, simbi, thini, nomuthovhi. Javhani, Thubhari naMeshekhi vakatengeserana newe; vakatengesa ngevanhu nezvidziyo zvethusi. Bhethitogarma vakatenga midziyo yako ngemahachi, mahachi ehondo nemanyurusi. Vamuna veDhedhani vakatengeserana newe; zviwi zvizhinji zvaiya ndau huru dzako dzokutengesera; vaiunza kwouri kuita mutenganiso nyanga dzenzou nomurwiti. Aramu yaitengeserana newe ngendaa youwandu hwemidziyo yewakanasira; vakatenga midziyo yako ngemapuwe akanakisa, nezvakatsvukuruka, nemachira akarukwa ngezvinemeso, nemachira orukangaza rwakanaka, nemapuwe ekhorari nemarubhi. Judha nenyika yaIsuraeri vakatengeserana newe; vakatenga koroni yako yaibva Minithi, nezvinotapira, uchi, mafuta, nenamo. Dhamasekusi rakatenganiserana newe ngendaa youwandu hwezvidziyo zvako, ngendaa youwandu hwoupfumi hwako hweshe hwembeu dzeshe; vhini reHeribhoni, nemambviri akachena. Vhedhani naJavhani kubva Uzari vakapinda mukutenga midziyo yako, vechiunza simbi, khasia nemitombo inonuhwira, izvo zvaiya pakati pokutengesa kwako. Dhedhani rakatenganisana newe machira ezvigaro zvokugadhisa mahachi. Arabhia nevatongi veshe veKhedha vaiya vatengeserani vako mumakwayana, magondohwe, nembudzi muizvi vaitengeserana newe; vatengi veShebha neRaama vaiya vatengeserana newe; vaitengeserana muupfumi hwako hwakanakisa hwembeu dzeshe, wemitombo inonuhwira, mapuwe eshe anomutengo mukuru, nomukore. Harani, Khane, neEdheni, vatengesi veShebha, Ashuri, naKhirimadhi, vakatengeserana newe. Ava vakatengeserana newe mumachira eshe akanakisa akatsanangurwa, mumachira akasvipirika, nezvakarukwa ngezvinemeso, mumaragi okutsikapo akaitwa ngezvinemiara, anoringirika akanaka, akasungwa ngemapote, kuti zvingwaririke; muneizvi vakatengeserana newe. Ngarava dzeTharshishi dzaitwara zvokutengesa zvako. “Ndizvo waigara wakazadzwa ngomutwaro, wairema kakurutu pamwoyo poruandhle. Vahluzi vako vakuunza mukati mwemaruandhle. Dutu rokumabvazuva rakupwanya pakati pemwoyo pemaruandhle. Upfumi hwako, zvidziyo zvako, nezvokutengesa zvako, vahluzi vako vengarava, nevahambisi vengarava dzako, nevatsiiri vedutwe vako, vangwariri vemidziyo yako, nevamuna vako veshe vehondo, vari mukati mwako, nechikwata cheshe icho chinewe, zveshe zvichanzvaira pakati pemwoyo pemaruandhle ngezuva rokuparadzwa kwako. Ngeizwi rokuchema kwevahambisi vengarava dzako, mahumbikumbi anozondengendeka ngemwangira wao. Veshe vanoshandisa zvokuhambisa ngarava vanozodzaka pashi kubva pangarava dzavo; vahluzi nevahambisi vanozoema pamavhu pahumbikumbi, nokuboorera kuti mazwi avo azwike kwouri, nokuchema kakurutu. Vanozobvuchira bukuta pamasoro avo, kuburukuta mumarota; vanodziita mhanza vechidzisimidza masaka, vanokuchema ngokuzangandwa kumweya nokutsumba kunorwadza. Mukubonda kwavo vanoita chiriro, kukuchema, nokuchema padera pako: ‘Ndiani wakadai ngeThire, waiparadzwa nguva dzeshe pakati poruandhle?’ Naapo midziyo yako yakabuda kubva mumaruandhle, wakagutisa vanhu vazhinji; ngouwandu hwoupfumi hwako nezvokutengesa zvako iwewe wakapfumisa madzimambo epanyika. Zvino unopwanywa ngemaruandhle muudzamu hwemvura; zvokutengesa zvako nechikwata zvanzaira newe. “Veshe vagari vezviwi vanoshamiswa ndiwe; madzimambo avo anotyiswa kakurutu, hope dzavo dzinohuta. Vatengesi pakati pevanhu vanokuridzira murudzi; iwewe waguma kumagumo anotyisa, newe auchazoapozve mhera nariini.” Izwi raMambo Mwari rakauya kwendiri rechiti, “Mukororo womunhu, ereketa kunamambo weThire: uti, ‘Izvi ndizvo zvinoronza Mambo Mwari, Mwari: Ngokuti mwoyo wako unodzikurisa,’ newe wati, ‘Inini ndiri chimwari, ndinogara pachigaro chezvimwari, pakati pamwoyo pamaruandhle; zvakanyadaro asi iwewe uri munhu, haiwa Mwari akadi, kunyazwi unoemesa mwoyo wako kudai ngowaMwari. Iwewe ngegwinyiso uri muungwaru kupinda Dhanieri; akuna chakafishika chingafishwa kubva kwouri. Ngoungwaru hwako nokuzwisisa kwako wakadzionera upfumi pachako, wakadziunganidzira mukore nesirivha mukati mwoupfumi hwako. Ngoungwaru hwako hukuru mukutengesa kwako wakawandisa upfumi hwako, nomwoyo wako wakadzikudza ngendaa youpfumi hwako.’ “Ndizvo izvi ndizvo zvinoronza Mambo Mwari, Mwari: Ngokuti wakaedzanisa mwoyo wako nomwoyo waMwari, ndizvo, ringira, ndinozounza vapara padera pako, vanozotyisa vemadzinza; vanozoshwamura shoti dzavo kurwa nounaku hwoungwaru hwako, vanozosvipisa kun'anikira kwako. Vanozokukandira pashi murindi, newe unozofa kudai ngokufa kweavo vanourawa mukati mwemaruandhle. Unozoangira kuronza here pamberi pouwo unokuuraya, kuti, ‘Inini ndiri mwari,’ kunyazwi iwewe uri munhu, haiwa mwari akadi, mukati mwenyara dzouwo unokuremadza? Iwewe unozofa kufa kweavo vasikazi kuchekwa ngenyara dzevapara; ngokuti inini ndaereketa, unoronza Mambo Mwari.” Zve, izwi raMambo Mwari rakauya kwendiri rechiti, “Mukororo womunhu, ita chiriro ngendaa yamambo weThire, wechiti kwaari, ‘Izvi ndizvo zvinoronza Mambo Mwari, Mwari: Iwewe waiya chionero chezvakaperera, wakazara ngoungwaru, newakaperera muunaku. Iwewe waiya muEdheni, mumunda waMwari; buwe reshe rinomutengo mukuru ndiro raiya kufukidzwa kwako, kharneriani, khrisorite, buwe remwedzi, bheriri, onikisi, jasipa, safire, thukwoise, neemeraridhi; mapuwe aya eshe akabatwa nomukore, nokunangura kwako. Pazuva iro rewakasikwa, aiya akatonasirwa. Nekherubhi rakadzodzwa, kudai ngomurindi, ndakakuemesa; iwewe waiya padera pomutunhu wakachena waMwari; waihamba pakati pemapuwe omuriro. Iwewe waiya wakaperera munjira dzako kubvira pazuva rewakasikwa, metsa kushata kwaoneka mwouri. Ngouwandu hwezvokutengesa zvako, wakazadzwa ngokugebenga, newe wakashaisha; ndizvo ndakakurasha kubanze kudai ngechiro chakasvipiswa kubva kumutunhu waMwari; nekherubhi rokurinda rakakudzinga kubva pakati pemapuwe omuriro. Mwoyo wako waidzikudza ngendaa younaku hwako; iwewe wakaorisa ungwaru hwako ngendaa yokun'anikira kwako. Ndakakukandira pashi pamavhu, ndakakubudisa pamberi pemadzimambo, kuti vadakadze madziso avo ndiwe. Ngouwandu hwokushaisha kwako, ngokusikarurama kwezvokutengesa zvako, wakasvipisa ndau dzako dzakachena. Ndizvo ndakakubudisira muriro kubva pakati pako, nawo wakakupedza; ndakakupetudza kuita marota padera penyika mukuona kwavo veshe vakakuona. Veshe vanokuzia pakati pevanhu vanoshamiswa ndiwe; waguma kumagumo anotyisa newe auchazoapopi mhera nariini.’ ” Izwi raMambo Mwari rakauya kwendiri rechiti, “Mukororo womunhu, ringisa hope yako kuSidhoni, uprofete kweriri kuriitira ndaa, wechiti, ‘Izvi ndizvo zvinoronza Mambo Mwari, Mwari: Ringira ndinorwa newe, O Sidhoni; ndinozoirikidzwa pakati pako. Vanozozia kuti inini ndini Mambo Mwari, apo ndazopedza kuita kutonga kwangu mukati mwaro, nokuonesa kucheneswa kwangu mukati mwaro; ngokuti ndinozotumira nhenda mweriri nokuparadzwa kwengazi mumapato aro; nevakabaiwa vanozowa mukati mwaro ngeshoti, iyo inorwa padera pavo kumarupande eshe. Navo vanozozia kuti inini ndini Mambo Mwari.’ “Mhatso yaIsuraeri aichazoonizve rukato runobaya, nokuti munzwa unokuvadza pakati pavo veshe vakavatendenedza, avo vakavanyenya. Navo vanozozia kuti inini ndini Mambo Mwari. “Izvi ndizvo zvinoronza Mambo Mwari, Mwari: Apo pendinounganidza mhatso yaIsuraeri kubva pakati pevanhu pevakaparadzirwa, nokuonisa kucheneswa kwangu mukati mwavo mukuona kwemadzinza, zvino vanozogara munyika yavo yendakagondisa kunomuranda wangu Jakobe. Vanozogara mukungwaririka mukati mwayo; vanozoaka mhatso nokusima minda yemivhini. Vanozogaramwo mukungwaririka, apo ndazopedza kuita kutonga kwangu padera pavo veshe vaakirwana vavo vanovanyenya vakavatendenedza. Navo vanozozia kuti ndini Mambo Mwari, Mwari wavo.” Mugore regumi, mumwedzi wegumi, pazuva regumi nemairi romwedzi, izwi raMambo Mwari rakauya kwendiri rechiti, “Mukororo womunhu, ringisa hope yako padera paFaro mambo weEgipite, uprofete kumuitira ndaa, nokuitira ndaa Egipite reshe, uerekete wechiti, ‘Izvi ndizvo zvinoronza Mambo Mwari, Mwari: Ringira, ndinorwa newe, iwewe Faro mambo weEgipite, iwewe goko guru, rinoata pakati pendwizi dzaro,’ rechiti, ‘Naire ngerwangu, ndakadziitira pachaangu.’ Ndinozoisa zviedzo mutsaya dzako, ndinozoita kuti hove dzendwizi dzako dzinamire pamapande ako. Ndinozokukweya kukubudisa kubva mundwizi yako, nehove dzeshe dzomundwizi dzako dzikakatire kumarakasha ako. Ndinozokukandira mushango, iwewe nehove dzeshe dzendwizi dzako; newe unozowira murubaya pamhene, newe auzounganidzwi pamwepo nokutsirwa. Ndakakupira kuti uite chokudya chemhuka dzomushango neshiri dzomudenga. Zvino vagari veshe veEgipite vanozozia kuti inini ndini Mambo Mwari, ngokuti vakaita mudondoro worutsanga kumhatso yaIsuraeri. Apo pevakakubata ngenyara, iwewe wakavhunika, nokuphazuka pamapfudzi avo eshe; naapo vakatseyama kwouri, iwewe wakaguka nokuita kuti mirenje yavo yeshe ieme. “Ndizvo izvi ndizvo zvinoronza Mambo Mwari, Mwari: Ringira, ndinozounza shoti padera pako, nokuuraya kubva kwouri vanhu nemhuka; nenyika yeEgipite inozoita matongo nokuparadzwa. Zvino vanozozia kuti inini ndini Mambo Mwari. Ngokuti iye wakati, ‘Rwizi Naire ngerwangu, ndini ndakaruita,’ ndizvo, ringira, ndinorwa newe nendwizi dzako, ndinozoita kuti nyika yeEgipite iparadzwe nokuita matongo, kubvira Migidhori kuenda Siene metsa kuguma kumugano weEthiopia. Akuna rutsoka rwomunhu runozohamba ndimwo, nokuti rutsoka rwemhuka runozohamba ndimwo, aitongozogarwizve makore makumi marongomuna. Ndinozoita nyika yeEgipite matongo pakati penyika dzakaitwa matongo; nemadhorobha ayo pakati pemadhorobha akaparadzwa anozoita matongo makore makumi marongomuna. Ndinozoparadzira vaEgipite pakati pemadzinza, ndinozovatatanisa mukati mwenyika dzeshe. “Asi izvi ndizvo zvinoronza Mambo Mwari, Mwari: Kumagumo emakore makumi marongomuna ndinozounganidza vaEgipite kubva pakati pevanhu apo pevakaparadzirwa. Ndinozounza avo vakatorwa kuita hloko veEgipite, ndinozovaunza kunyika yePhathrosi, munyika yokubarwa kwavo; unozoapo umambo uri pashi. Unozoita umambo huri pashi kupinda umambo hweshe, ahuchazodzimirudzizve padera pemadzinza; ngokuti ndinozovatsonza, kuti vasazotonga padera pemadzinza. Avachazoiti magondero emhatso yaIsuraeri, avo vanozoita kuti kushata kwavo kukarakadzwe, apo vakakunukuka kutsvaka kudetserwa kubva kwevari. Zvino vanozozia kuti inini ndini Mambo Mwari, Mwari.” Mugore remakumi mairi nemanomwe, mumwedzi wokutanga, ngezuva rokutanga romwedzi, izwi raMambo Mwari rakaguma kwendiri rechiti, “Mukororo womunhu, Nebhukhadhineza mambo weBhabhuroni wakaita kuti hondo yake ishande ngesimba guru mukurwa neThire; masoro eshe akaitwa mhanza, nemapfudzi eshe akaphazurwa; asi kunyazwi iye nokuti hondo yake apana chiro chevakaashira kubva Thire, kuripira mishando yaakashandisa kurwa naro. Ndizvo izvi ndizvo zvinoronza Mambo Mwari, Mwari: Ringira, ndinozopa nyika yeEgipite kunaNebhukhadhineza mambo weBhabhuroni, naye unozotwara upfumi hwaro, kuenda nahwo nokutora zvakachakatwa zvaro; zvinozoita muthuso wehondo yake. Ndamupa nyika yeEgipite kuita muthuso wake waakashandira, ngokuti vakandishandira, unoronza Mambo Mwari, Mwari. “Ngeiro zuva ndinozoita kuti runyanga rumerere mhatso yaIsuraeri, ndinozobeura miromo yako pakati pavo.Zvino vanozozia kuti inini ndini Mambo Mwari.” Izwi raMambo Mwari rakaguma kwendiri rechiti, “Mukororo womunhu, profeta, uti, ‘Izvi ndizvo zvinoronza Mambo Mwari, Mwari: Boorerai imwimwi,’ “Ihehe ngeiro zuva! Ngokuti zuva iro raapasinde, zuva raMambo Mwari raapasinde; rinozoita zuva remakore, nguva yokutambudzika kwemadzinza. “Shoti inozouya padera peEgipite, nokurwadziwa kukuru kunozopinda padera peEthiopia, apo vanobayiwa vanowa muEgipite, noupfumi wayo unotorwa, madzeyo ayo anoputsirwa pashi. Ethiopia, Phuti, Rudhi, neArabhia reshe, Ribhia, nevanhu venyika yakaita chitenderano nayo, vanozowa pamwepo navo ngeshoti. “Izvi ndizvo zvinoronza Mambo Mwari: Avo vanotseya Egipite vanozowa nokudzikudza kwesimba rayo kunozodzaswa pashi; kubvira Migidhori metsa paSiene vanozowira mukati mwayo ngeshoti, unoronza Mambo Mwari. Vanozoita matongo mukati mwenyika dzimweni dziri matongo, nemadhorobha ayo anozowa pakati pemadhorobha akaitwa matongo. Zvino vanozozia kuti inini ndini Mambo Mwari, apo ndabasa muriro muEgipite, naavo veshe vanoidetsera vaparadzwa. vanozoparadzwa. Pairo zuva vanotumwa vanozobuda kubva pamberi pangu, kuenda vari mungarava kootyisa vaEthiopia vanodzirekeredza, nokurwadziwa kukuru kunozouya padera pavo pazuva reEgipite; ngokuti, ringirai, rinouya. “Izvi ndizvo zvinoronza Mambo Mwari, Mwari: Ndinozoitawo kuti mbungano yeEgipite ipere ngenyara yaNebhukhadhineza mambo weBhabhuroni. Iye nevanhu vake vanaye, vanotyisa yaamho kumadzinza, vanozounzwa kuti vaparadze nyika; vanozoshwamura shoti dzavo kurwa neEgipite, nokuzadza nyika ngevakaurawa. Ndinozoomesa ndwizi, nokutengesa nyika munyara dzevanhu vakashata; neni ndinozoita nyika matongo, nazvo zveshe zviri mukati mwayo, ngenyara dzevapara. Inini Mambo Mwari ndaereketa. “Izvi ndizvo zvinoronza Mambo Mwari, Mwari: Ndinozoparadza miedzaniso yokudira, ndinozoita kuti miedzaniso yavo yokudira ipere kubva Mempfisi; akuchazoapo mutongi munyika yeEgipite; ndinozoisa kutya munyika yeEgipite. Ndinozoita Phathrosi matongo, nokubasa muriro muZoani, ndinozoita kutonga padera peThebhesi. Ndinozodurura ushungu hwangu padera pePherusiumu, rusvingo rweEgipite; ndinozouraya mbungano yeThebhesi. Ndinozobasa muriro padera peEgipite; Pherusiumu rinozowa mukurwadziwa kukuru, Thebhesi rinozopwanywa, Mempfisi rinozopinda mumadambudziko pazuva. Vamuna vatsva veOni nevePhibhesethi vanozowa ngeshoti; nemadhorobha pachawo anozoenda muuhloko. PaThafanehesi zuva rinozoita chidima, apo pendinozogurapo majoka eEgipite, nokudzikudza kwesimba rayo kunozopera kweriri; gore rinozorifukidza, nevanasikana varo madhorobha vanozoenda muuhloko. Ngokudaro ndinozoita kutonga padera peEgipite. Zvino vanozozia kuti inini ndini Mambo Mwari.” Mugore regumi narimwe, mumwedzi wokutanga waro, ngezuva rechinomwe romwedzi, izwi raMambo Mwari rakaguma kwendiri rechiti, “Mukororo womunhu, ndagura muoko waFaro mambo weEgipite; ringira, auzi kupombwa kuti urapwe, upombwe ngebhandichi, kuti ugwinyiswe kubata shoti. Ndizvo izvi ndizvo zvinoronza Mambo Mwari, Mwari: Ringira, ndinorwa naFaro mambo weEgipite; neni ndinozogura mioko yake, yeshe uwo wakagwinya nouwo wakagurwa; ndinozoita kuti shoti ipodzonyoke munyara yake. Ndinozotatanisa vaEgipite pakati pamadzinza, nokuvaparadzira mukati mwenyika dzeshe. Ndinozogwinyisa mioko yamambo weBhabhuroni, ndiise shoti yangu munyara dzake; asi ndinozogura mioko yaFaro, naye unozogomera ari pamberi pake ngokugomera kwomunhu wakaremadzwa. Ndinozogwinyisa mioko yamambo weBhabhuroni nemioko yaFaro inozorungunuka. Navo vanozozia kuti inini ndini Mambo Mwari, apo pendinozoisa shoti yangu munyara yamambo weBhabhuroni. Unozoitambanudzira padera penyika yeEgipite, neni ndinozoparadzira vaEgipite pakati pemadzinza, nokuvatatanisa pakati penyika. Zvino vanozozia kuti inini ndini Mambo Mwari.” Mugore regumi narimwe, mumwedzi wechitatu, pazuva rokutanga romwedzi, izwi raMambo Mwari rakaguma kwendiri rechiti, “Mukororo womunhu,” ereketa kunaFaro mambo weEgipite, nokumbungano yake. “Ndiani ungaedzaniswa newe ngoukuru hwako? Ringira muAsiria waiya akadai ngomusedhare womuRebhanoni unematai akanaka, negwasha rinemabvute, nechiemo chakareba; nomwoyo wawo unopinda mumakore akakora. Mvura yakawanda yakaugutisa, noruandhle rwakauita kuti ukure kureba nendwizi dzawo dzakaerera kutendenedza pandau powakasimwa, rwechitumira migero yarwo kumiti yeshe yomushango. Ndizvo wakakura kureba kuenda mudenga padera pemiti yeshe yomushango; matai awo akakura akapasha, nematai awo akarebeswa ngendaa youwandu hwemvura. Dzeshe shiri dzomudenga dzakaita zvisaki zvadzo mumatai awo; pashi pematai awo mhuka dzeshe dzomushango dzakaberekera vana vadzo, nepashi pebvute rawo pakagarwa ngemadzinza eshe makuru. Waiya wakanaka mukukura kwawo, mukureba kwematai awo; ngokuti nzinde dzawo dzaidzama pashi pamvura zhinji. Misedhare mumunda waMwari aizi kukona kuufisha, nokuti miti yemifiri matai awo aiya asikazi kutodzana nematai awo, nemiti yemiprani yaiya isikakoni kuedzaniswa namatai awo; mwaiya musina nomuti naumwe mumunda waMwari waitodzana nawo ngounaku hwawo. Ndakauita kuti unake ngendaa youwandu hwematai awo, kuemura kwemiti yeshe yaiya muEdheni mumunda waMwari. “Izvi ndizvo zvinoronza Mambo Mwari, Mwari: Ngokuti wakakura kureba kuenda kudenga, nawo wakaemesa mwoyo wawo pakati pemakore, nomwoyo wawo wakadzikudza ngendaa yourebu hwawo, ndakaupira munyara yomutongi wemadzinza; washanda nawo kudai ngezvinosisira kushata kwake. Ndaurasha. Vapara vanobva pakati pemadzinza anopinda kutyisa vautemera pashi nokuusiya. Pamitunhu nomumabani eshe matai awo awa, nematai awo agukira mumvura dzendwizi dzeshe dzomunyika; nevanhu veshe venyika vaenda kubva mubvute rawo, nokuusiya. Padera pedanda rawa dzeshe shiri dzomudenga dzinozogarapo, mhuka dzeshe dzomushango dzinogara pakati pematai awo. Zveshe izvi kuitira kuti isaapo miti iri pasinde pemvura ingakura kurebesa mudenga nokuti kuguma mwoyo wawo mumakore kuti isaapo miti inomwa mvura ingakwira kugumapo kweiri muurebu, kunyika iri pashi nevakororo vevanhu veshe, pamwepo naavo vanodzaka murindi. “Izvi ndizvo zvinoronza Mambo Mwari, Mwari: Pazuva rewakadzaka pashi muSheori ndakakonya kudzama ngepadera pake, ndakaifukidza; ndakapinga ndwizi yayo, nemvura yayo zhinji yakaringirwa. Ndakafukidza Rebhanoni mukutsumba, nemiti yeshe yomushango yakademera ngendaa yake. Ndakaita kuti madzinza ahute ngebope rokuwa kwaro, apo pendakarikandira pashi muSheori pamwepo naavo vanodzaka murindi; nemiti yeshe yomuEdheni, yakatsanangurwa neyakapinda kunaka yeRebhanoni, yeshe yaimwa mvura, yaiembedzerwa munyika yepashi. Vakadzakawo pashi muSheori pamwepo nawo, kuneavo vakaurawa ngeshoti, pamwepo nehondo yayo, avo vaigara pashi mubvute rawo pakati pemadzinza. “Ngouri pakati pemiti yeEdheni ungaedzaniswa newe muuthende nomuukuru? Zvino unozodzaswa pashi pamwepo nemiti yomuEdheni kunyika iri pashi; unozoata pakati pevasikazi kuchekwa, pamwepo naavo vakaurawa ngeshoti. Uyu ndiFaro nembungano yake yeshe, unoronza Mambo Mwari.” Mugore regumi nemairi, mumwedzi wegumi nemiiri, pazuva rokutanga remwedzi, izwi raMambo Mwari rakaguma kwendiri rechiti, “Mukororo womunhu, ita chiriro ngendaa yaFaro mambo weEgipite, newe uronze kwaari kuti, ‘Iwewe unodziedzanisa pachako nemhondoro itsva pakati pemadzinza, asi wakadai ngengwena muruandhle; unobinyauka mundwizi dzako, unovhundura mvura ngetsoka dzako, nokuvhundura ndwizi dzavo. Izvi ndizvo zvinoronza Mambo Mwari, Mwari: Mumbungano yevanhu vazhinji ndinozokandira chitaa changu padera pako; vanozokukwidza kukubudisa muchitaa changu. Ndinozokukandira pashi pamavhu, pamhene panyika yakaoma ndinozokurasha, ndechiita kuti shiri dzeshe dzomudenga dzimate padera pako, ndinozoita kuti zvikara zveshe zvomunyika zvidzigutise ndiwe. Ndinozotatanisa nyama yako padera pemitunhu, nokuzadza mabani nemiiri yakafa yako. Ndinozodiridzira nyika ngengazi yako inoerera yechiguma metsa kumitunhu, nendwizi dzinozozadzwa ndiwe. Naapo ndinokudzima, ndinozofukidzira matenga, nokuita nyeredzi dzawo chidima; ndinozofukidzira zuva ngegore, nomwedzi auzojeki. Zveshe zvinojeka zvomumatenga ndinozozvidzima padera pako, nokuisa chidima padera penyika yako, unoronza Mambo Mwari, Mwari.’ “Ndinozotambudza mwoyo yevanhu vazhinji, apo pendinozounza kuparadzwa kwako pakati pemadzinza, mukati mwenyika dzousikazi kuzia iwewe. Ndinozoita kuti vanhu vazhinji vashamiswe ndiwe, madzimambo avo anozotyiswa kakurutu ndiwe. Apo pendinoemesa shoti yangu pamberi pavo, vanozohuta nguva yeshe, munhu weshe ngendaa yokupona kwake, ngezuva rokuwa kwako. “Ngokuti izvi ndizvo zvinoronza Mambo Mwari, Mwari: Shoti yamambo weBhabhuroni inozoguma padera pako kurwa newe. Ndinozoita kuti mbungano yako iwe ngeshoti dzevanesimba, veshe vavo vanopinda kutyisa pakati pemadzinza. Vanozoparadza kudzikudza kweEgipite kuita matongo, mbungano yavo yeshe inozoparadzwa. Ndinozoparadza mhuka dzayo dzeshe kubva pasinde pemvura zhinji; apana rutsoka rwomunhu runozoivhundurazve, nokuti madondova emhuka aazoivhunduri. Zvino ndinozoita kuti mvura yavo iere, nokuita kuti ndwizi dzavo dzierere kudai ngemafuta, unoronza Mambo Mwari, Mwari. Apo pendinoita nyika yaEgipite matongo, naapo nyika peinobvisirwa zveshe izvo zvinoizadza, apo pendinochaya veshe avo vanogara mweiri, zvino vanozozia kuti inini ndini Mambo Mwari. Ichi ndicho chiriro chevanozochema ndicho. Madzimai emadzinza anozochiemba. Padera peEgipite nembungano dzayo, dzeshe dzichachiemba dzechiichema, unoronza Mambo Mwari.” Mugore regumi nemairi, mumwedzi wokutonga, ngezuva regumi nemashanu romwedzi, izwi raMambo Mwari rakauya kwendiri rechiti, “Mukororo womunhu, bonda ngendaa yembungano yeEgipite, nokuitumira pashi, nevanasikana vemadzinza anembirikira, kuti vadzake kunyika iri pashi, pamwepo naavo vanodzaka murindi. ‘Ndiani uwo wounopinda ngounaku? Dzaka pashi! Radzikwa kuzorora pamwepo nevasikazi kuchekwa!’ Vanozozwa pakati paavo vanourawa ngeshoti. Iyo yapirwa kushoti; twarai zveshe iyo nembungano yayo. Madzimambo akagwinya anozoereketa ndivo, nevadetseri vavo, vari pakati peSheori: ‘Vadzaka pashi, vanoata kuti mwii, vasikazi kuchekwa, vakaurawa ngeshoti.’ Asiria iripo nechikwata chayo cheshe, maiba ayo akaitendenedza, veshe vavo vakaurawa, vakawiswa ngeshoti. Maiba avo akaiswa kumarutii eshe erindi. Chikwata chayo chinotendenedza marupande eshe eiba rayo, veshe vavo vakaurawa, vakawiswa ngeshoti, vanoparadzira kutyisa munyika yevanopona. Eramu iripo nembungano yayo yeshe yakatendenedza iba rayo, veshe vavo vakaurawa, vakawiswa ngeshoti, avo vakadzaka pashi, vasikazi kuchekwa, kuenda munyika iri pashi, vanoparadzira kutyisa munyika yevanopona. Vanotwara kutsveruka kwavo pamwepo naavo vanodzaka pashi murindi. Vakamunasirira mubhedhi pakati pevakaurawa pamwepo nembungano yake yeshe; maiba avo eshe anomutendenedza; veshe vavo avazi kuchekwa, vakaurawa ngeshoti; ngokuti kutyisa kwavo kwaiya kwapararira munyika yevanopona, vanotwara kutsveruka kwavo pamwepo naavo vanodzaka murindi; vakaiswa pakati paavo vakaurawa. “Meshekhi naThubhari varipo nembungano yavo yeshe, maiba avo anovatendenedza, veshe vavo avazi kuchekwa, vakaurawa ngeshoti, ngokuti vakaparadzira kutyisa munyika yevanopona. Navo avazoati pamwepo nevanesimba, vakawiswa vasikazi kuchekwa, avo vakadzaka muSheori vane zvokurwa ndizvo zvavo; navo vakatsamira shoti dzavo pashi pemasoro avo, asi kushata kwavo kunozoa padera pemagodo avo, ngokuti kutyisa kwevanesimba kwaiya munyika yevanopona. Ndizvo iwewe unozogurwa nokuata pakati pevasikazi kuchekwa, naavo vanourawa ngeshoti. Edhomu uripo, madzimambo ayo nevatongi vayo veshe, avo musimba ravo reshe vanoradzikwa pamwepo naavo vakaurawa ngeshoti; vanoata pamwepo nevasikazi kuchekwa, pamwepo naavo vanodzaka murindi. Vatongi vedera varipo, veshe vavo nevaSidhoni veshe avo vadzaka pashi mukutsveruka nevakaurawa, mukutyisa kweshe kwakaitwa ngesimba ravo; vanoata vasikazi kuchekwa pamwepo naavo vakaurawa ngeshoti, vanotwara kutsveruka kwavo pamwepo naavo vanodzaka murindi. “Naapo Faro paanovaona, unozoembedzerwa ngendaa yembungano yake yeshe, Faro nehondo yake yeshe vakaurawa ngeshoti, unoronza Mambo Mwari. Ngokuti ndakaparadzira kutyisa munyika yevanopona; ndizvo unozoradzikwa kuzorora pakati pevasikazi kuchekwa, pamwepo naavo vakaurawa ngeshoti, Faro nembungano yake yeshe, unoronza Mambo Mwari, Mwari.” Izwi raMambo Mwari rakauya kwendiri rechiti, “O mukororo womunhu, ereketa kuvanhu vako, wechiti kwevari, ‘Kudai ndechiunza shoti padera penyika, nevanhu venyikayo vechitora munhu umwe kubva pakati pavo nokumuemesa kuita murindi wavo; nokudai murindi echiona shoti yechiuya padera penyika, echiridza gwama, nokunyowedza vanhu; zvino kunyazwi ndiani unozozwa bope regwama, asikanyowedzwi ndiro, neshoti yechiguma nokumuuraya, ngazi yake inozogara padera pesoro rake. Wakazwa bope regwama, naye aazi kuashira kunyowedzwa; ngazi yake inozogara padera pake. Asi kudai akaashira kunyowedzwa, waizoponesa mweya wake. Asi kudai murindi echiona shoti yechiuya, akarekera kuridza gwama, nevanhu vasikanyowedzwi, kudai shoti yechiguma, yechiuraya munhu kunyazwi ngouri pakati pavo, uwo waurawa mukushata kwake, asi ngazi yake ndinozoibvunza kunyara youwo murindi.’ “Ndizvo iwewe, mukororo womunhu, ndakuemesa kuita murindi wemhatso yaIsuraeri; kunyazwi ngeiri nguva younozwa izwi rinobva kumuromo wangu, unozovapa nyowedzo inobva kwendiri. Kuti ndikati kunouwo wakashata, ‘O munhu wakashata, ngegwinyiso unozofa,’ newe usikaereketi kumunyowedza uwo wakashata kuti atenderuke abve munjira yake, wakashata unozofa mukushata kwake, asi ngazi yake ndinozoibvunza kubva kunyara dzako. Asi kudai wechinyowedza uwo wakashata kuti atenderuke kubva kunjira yake, naye asikatenderuki kubva munjira yake, wakashata unozofira mukushata kwake, asi iwewe unozoponesa mweya wako. “Zvino iwewe, mukororo womunhu, ereketa kumhatso yaIsuraeri wechiti, ‘Izvi ndizvo zvounoereketa: Kupauka kwedu nezvishaishi zvedu zviri padera pedu, nesu tinoperezeka ngendaa yazvo; tinozoita maponerenyi zvino?’ Ereketa kwevari uti, ‘Kudai ngezvendinopona, unoronza Mambo Mwari, Mwari, andina kudakara ngorufu rwowakashata, asi kuti wakashata atenderuke kubva munjira yake, apone; tenderuka, tenderuka kubva munjira yako yakashata; ngokuti unoda kufa ngenyi, O mhatso yaIsuraeri?’ “Newe, mukororo womunhu, ereketa kuvanhu vako, ‘Kururama kwowakarurama akuzomununuri apo apauka; asingendaa yokushaisha kwowakashata, iye aazowiswi ndikwo ngeiro zuva raanotenderuka kubva mukushaisha; wakarurama aazokoni kupona ngokururama kwake ngeiro zuva raanoshaisha.’ Kunyazwi ndinoti kunouwo wakarurama kuti, ‘Ngegwinyiso unozopona; asi kudai iye echigonda kururama kwake kwemene, kuti akaita zvakashata, apana nachimwe chezviito zvakarurama zvinokarakadzwa; asi mukushaisha ukwo kwaakaita, unozofiramwo.’ Zve, kunyazwi ndikati kunowakashata kuti, ‘Ngegwinyiso iwewe unozofa,’ asi kudai iye echitenderuka kubva mukushaisha kwake, akahamba ngomutemo nokuita zvakarurama; kudai wakashata echipetudza chibatiso, nokupetudza izvo zvakatorwa ngokubira, nokuhamba muzviemeso zvokupona, asikaiti zvakashata, ngegwinyiso unozorarama, aazofi. Akuna nachimwe chezvishaishi zvaakaita chinokarakadzwa kumuitira ndaa; wakaita izvo zvinotenderwa nezvakarurama; ngegwinyiso unozorarama. “Asi vanhu vako vanoti, ‘Njira yaMambo Mwari aizi kururama,’ apo iri njira yavo isikazi kururama. Naapo wakarurama echikunukuka kubva mukururama kwake, echiita zvishaishi, unozofa ndizvo. Naapo wakashata echitenderuka kubva mukushata kwake, echiita izvo zvinotenderwa nezvakarurama, unozopona ndizvo. Asi munoti, ‘Njira yaMambo Mwari aizi kururama.’ O mhatso yaIsuraeri, ndinozotonga munhu weshe kudai ngenjira dzake.” Mugore regumi nemairi ouhloko hwedu, mumwedzi wegumi, ngezuva rechishanu romwedziwo, umwe wakapokonyoka kubva Jerusarema, wakauya kwendiri echiti, “Dhorobha ranyiswa.” Zvino nyara yaMambo Mwari yaiya padera pangu mumadeekoni, uwo wakapokonyoka asati aguma; asi waiya abeura muromo wangu panguva iyo yaakaguma ndiyo kwendiri mumangwanani; nomuromo wangu wakabeurwa, neni andizi kuchazoita uwo usikakoni kuereketa. Izwi raMambo Mwari rakaguma kwendiri rechiti, “Mukororo womunhu, vagari vomundau idzi dzakaparadzwa munyika yaIsuraeri vanoangira kuereketa vechiti, ‘Abrahama waiya munhu umwe, asi wakagara nhaka yenyika; asi isusu tiri vazhinji; nyika yakapuwa kwetiri kuti tigare nhaka.’ Ndizvo ereketa kwevari kuti, ‘Izvi ndizvo zvinoronza Mambo Mwari, Mwari: Munodya nyama inengazi, nokumirudza madziso enyu kuringira miedzaniso yenyu yokudira, nokuparadza ngazi; zvino munozogara nhaka yenyika here? Munogonda shoti dzenyu, munoshanda zvinonyangadza, neumwe ngaumwe wenyu unosvipisa mukadzi womuakirwana wake; munozogara nhaka yenyika here?’ “Ronza izvi kwevari, uti, ‘Izvi ndizvo zvinoronza Mambo Mwari, Mwari: Kudai ngezvendinopona, ngegwinyiso avo vari mundau dzakaparadzwa vanozowa ngeshoti, naavo vari murubaya, ndinozovapira kuti vadyiwe ngezvikara, naavo vari mumakamba nomumapako vanozofa ngenhenda. Ndinozoita kuti nyika iite matongo nokuparadzwa, nokudzikudza kwesimba rayo kunozopera; nemitunhu yaIsuraeri inozoita matongo, kuti akuna naumwe unozohamba ndimwo. Zvino vanozozia kuti inini ndini Mambo Mwari, apo pendinozoita matongo ngendaa yezvinyangadzo zvavo zveshe zvevakaita.’ “Ngendaa yako, iwewe mukororo womunhu, vanhu vako vanoereketa pamwepo ndiwe kukuitira ndaa mumarukumbati, nomumisiwo yemhatso, vanoereketa umwe kunoumweni, munhu weshe kunomuakirwana wake echiti, ‘Uya, uzwe izwi iro rinobuda kubva kumuromo waMambo Mwari.’ Vanouya kwouri kudai ngokuuya kunoita vanhu, navo vanogara pamberi pako kudai ngezvinoita vanhu vangu, vanozwa mazwi ako, asi avazoapurutani. Ngokuti ngomuromo wavo vanoonisa rudo, asi mwoyo wavo unokara ngokuda kuuyirwa ngezvakawanda. Kwevari iwewe wakadai ngomuembi woruyo rwerudo runoembwa ngoune izwi rakanaka, unokona kunasa kuridza mbira; vanozwa mazwi ako zvaanoronza, asi avaaiti. Naapo izvi zvinouya (ngegwinyiso zvinozouya), zvino vanozozia kuti muprofeti waiya aripo pakati pavo.” Izwi raMambo Mwari rakauya kwendiri rechiti, “Mukororo womunhu, profeta kuitira ndaa vaushi vaIsuraeri, profeta wechiti kwevari, ‘Izvi ndizvo zvinoronza Mambo Mwari, Mwari: A, imwimwi vaushi, vaushi vaIsuraeri vanodzigutisa pachavo! Vaushi avasisiri kugutisa makwai here? Imwimwi munodya mafuta, munodzisimidza machira emamviri, munouraya dzakakora, asi amugutisi makwai. Amuzi kugwinyisa akarembedzeka, amuzi kurapa anenhenda, amuzi kusunga akaguka, amuzi kupetudza awo akapepesheka, nokuti kutsvaka akarashika, asi mwakaatonga ngokumanikidza ngorunya. Ndizvo akapararira, ngokuti paiya pasina muushi; nokupararirwa akaita kudya kwezvikara zveshe zvomushango. Makwai angu akapepesheka padera pemitunhu yeshe, nepadera pezvimitunhu zveshe; makwai angu akapararira padera penyika yeshe, pasina naumwe unoaringira nokuti kuatsvaka.’ “Ndizvo, imwimwi vaushi, izwanyi izwi raMambo Mwari, Mwari. Kudai ngezvendinopona, unoronza Mambo Mwari, Mwari, ngokuti makwai angu aita kudya kwezvikara, nemakwai angu aita kudya kwezvikara zveshe zvomushango, ngokuti paiya pasina muushi, ngokuti nevaushi vangu avazi kutsvaka makwai angu, asi vaushi vakadzigutisa pachavo, vasikazi kugutisa makwai angu; ndizvo, imwimwi vaushi, izwai izwi raMambo Mwari. Izvi ndizvo zvinoronza Mambo Mwari, Mwari: Ringira, ndinorwa nevaushi; ndinozobvunza makwai angu panyara dzavo, nokuvarambidza kugutisa makwai kwavo; vaushi avachazodzigutisi. Ndinozonunura makwai angu kubva kumiromo yavo, kuti asachazoita kudya kwevari. “Ngokuti izvi ndizvo zvinoronza Mambo Mwari, Mwari: Ringira, inini pachangu ndinozotsvaka makwai angu nokuaona. Kudai ngomuushi unotsvaka zvifuyo zvake, apo ari pakati pemakwai ake akapararira, ndizvo ndinozotsvaka makwai angu. Ndinozoabvisa kundau dzeshe paakapararira ngezuva remakore nechidima chakakora. Ndinozoaunza kubva pakati pevanhu nokuaunganidza kubva kunyika, ndinozoaunza munyika yawo; ndinozoagutisa padera pemitunhu yaIsuraeri pasinde pendwizi, nokundau dzeshe dzinogarwa ngevanhu venyika. Ndinozoagutisa ngemafuro akanaka, nepadera pemitunhu yakaturama yaIsuraeri ndipo panemafuro awo; naapo anozoata pashi mukati mwemafuro akanaka, anozodya mafuro akasvipira padera pemitunhu yaIsuraeri. Inini pachangu ndinozoita muushi wemakwai angu, ndinozoita kuti aate pashi, unoronza Mambo Mwari, Mwari. Ndinozotsvaka akarashika, ndinozopetudza awo akapauka, ndechisunga awo akaguka, ndechigwinyisa akarembedzeka, asi ndinozouraya akakora neanesimba. Ndinozoagutisa ngokutonga kwakanaka. “Asi imwimwi, zvifuyo zvangu, izvi ndizvo zvinoronza Mambo Mwari, Mwari: Ringirai, ndinotonga pakati pemakwai nemakwai, pakati pemagondohwe nemagotokoto. Azvizi kumuringana here kuti mugutiswe ngemafuro akanaka, asi munosisira kutsikira pashi ngetsoka dzenyu mafuro enyu eshe? Naapo pomunomwa mvura yakachena, munosisira kutsikatsika akasara ngetsoka dzenyu here? Nemakwai angu anosisira kudya zvemwatsikatsika ngetsoka dzenyu here, nokumwa iyo yemwakavhundura ngetsoka dzenyu? “Ndizvo izvi ndizvo zvinoronza Mambo Mwari, Mwari kwevari: Ringirai, inini ndemene ndinozotonga padera pemakwai akakora nemakwai akaonda. Ngokuti imwimwi mwatunga ngeparutii nepafudzi, mwechithuthumidza dzeshe mhuka dzinenhenda ngenyanga dzenyu, metsa mwadziparadzira kuretu nokupamhama, ndinozoponesa mutanga wangu, nawo auchazopambwi neni; ndinozotonga pakati pemakwai nemakwai. Ndinozoemesa muushi umwe padera pawo, muranda wangu Dhavhidha, naye unozoagutisa; unozoausha, unozoita muushi wawo. Neni inini, Mambo Mwari, ndinozoita Mwari wawo, nomuranda wangu Dhavhidha unozoita mutongi pakati pawo; inini Mambo Mwari ndaereketa. Neni ndinozoita chitenderano chokunyarara nawo, ndinozoita kuti zvikara zvomushango zvipere munyika, kuti agare mushango, nemakwai mumakwasha ngokungwaririka. “Ndinozoaita nendau yakatendenedza chimutunhu changu chifumiso; ndinozotumira pashi bumhakamwe ngenguva yaro; rinozoapo bumhakamwe rezvifumiso. Miti yomushango inozobereka michero yayo, nenyika inozobudisa zvakawanda zvayo. Anozongwaririka munyika yawo, anozozia kuti inini ndini Mambo Mwari, apo pendinozogura mipiningidzo yemajoka awo, nokuanunura kubva munyara dzaavo avo vakavaita hloko. Aachazopambwizve ngemadzinza, nokuti zvikara zvomunyika azvizoadyi; anozogara ngokungwaririka; akuna naumwe unozoatyisidzira. Ndinozoasimira zvisimwa zvinembiri, nawo aachazopedzwi ngenzara munyika, nawo aachazotwari kutukwa ngemadzinza. Anozozia kuti inini Mambo Mwari, Mwari wawo ndinawo, nokuti iwo, mhatso yaIsuraeri, vanhu vangu, unoronza Mambo Mwari, Mwari. Imwimwi muri makwai angu, mutanga wembusho wangu, muri vanhu vangu, neinini ndiri Mwari wenyu, unoronza Mambo Mwari, Mwari.” Izwi raMambo Mwari rakaguma kwendiri rechiti, “Mukororo womunhu, emesa hope yako kuitira ndaa mutunhu weSeira, uprofete kuuitira ndaa, uti kwouri, ‘Izvi ndizvo zvinoronza Mambo Mwari, Mwari: Ringira, ndinorwisana newe, mutunhu Seira; ndinotambanudza nyara yangu kurwa newe, ndinokuita matongo nokukuparadza. Ndinoparadza madhorobha ako, unozoita matongo, newe unozozia kuti inini ndini Mambo Mwari.’ “Ngokuti iwewe unokunyenya kusikagumi, wakaparadza ngazi yevanhu vaIsuraeri ngesimba reshoti ngomukuwo wokutambudzika kwavo, ngomukuwo apo wokuororwa kwavo kwokugumisira; ndizvo, kudai ngezvendinopona, unoronza Mambo Mwari, Mwari, ndinozokunasirira kuti uparadze ngazi, nengazi inozokurumbirira; ngokuti auzi kunyenya kuparadza ngazi, ndizvo ngazi inozokurumbirira. Ndinozoita kuti mutunhu Seira uparadzwe nokuita matongo, neni ndinozouraya kubva mweriri veshe vanouyamwo nevanoenda. Ndinozozadza mitunhu yako ngevakaurawa; muzvimitunhu zvako, nomumapani ako, nomumikova yako yeshe, avo vanourawa ngeshoti vanozowa. Ndinozokuita kuti ugare uri matongo, nemadhorobha ako aachazogarwi. Zvino munozozia kuti inini ndini Mambo Mwari. “Ngokuti iwewe wakati, ‘Aya madzinza mairi, neidzi nyika mbiri dzinozoita dzangu, nesu tinozodzigara nhaka;’ kunyazwi Mambo Mwari waiyapo, ndizvo kudai ngezvendinopona, unoronza Mambo Mwari, Mwari, ndinozokuitira kudai ngoushungu nendurumwa zvewakaonesa ngendaa yokuvanyenya kwako; neni ndinozoita kuti ndiziikanwe pakati pavo, apo pendinozokutonga. Unozozia kuti inini, Mambo Mwari, ndazwa kweshe kutuka kwako kwewakaereketa kuitira ndaa mitunhu yaIsuraeri wechiti, ‘Yaitwa matongo, yakapuwa kwetiri kuti tiipedze. Nemwi mwakadziganzisa kurwa neni ngemiromo yenyu, nemwi mwakawanza mazwi enyu kundiitira ndaa, ndakaazwa. Izvi ndizvo zvinoronza Mambo Mwari: Kudai ngezveinodakara nyika yeshe, ndinozokuita matongo. Kudai ngezvewakadakara ngendaa yenhaka yemhatso yaIsuraeri, ngokuti yakaita matongo, ndizvo ndinozokuitira; iwewe unozoita matongo, mutunhu weSeira, neEdhomu reshe, reshe pamwepo. Zvino vanozozia kuti inini ndini Mambo Mwari.’ ” “Newe, mukororo womunhu, profeta kumitunhu yaIsuraeri wechiti, ‘O mitunhu yaIsuraeri, izwanyi izwi raMambo Mwari.’ Izvi ndizvo zvinoronza Mambo Mwari, Mwari: Ngokuti gaa rakaereketa rechimuitira ndaa kuti, ‘Aha,’ ‘Ndau dzekare dzakwirira dzaita dzedu, kudzigara nhaka.’ “Ndizvo, profeta wechiti, ‘Izvi ndizvo zvinoronza Mambo Mwari, Mwari: Ngokuti vakamuita matongo yaamho, nokumupwanya kundau dzeshe, kuti muite nhaka yemadzinza evakasara, nemwi mwakareiwa mumiromo yevaereketi, mukaitwa vanyepi pakati pevanhu; ndizvo, O mitunhu yaIsuraeri, izwanyi izwi raMambo Mwari, Mwari: Izvi ndizvo zvinoronza Mambo Mwari kumitunhu nokuzvimitunhu, nokumikova nokumapani, nokundau dzakaita matongo akaparadzwa, nokumadhorobha akasiiwa, akaita kuti apambwe nokuita chishekedzo kumadzinza awo akasara akatendenedza; ndizvo izvi ndizvo zvinoronza Mambo Mwari, Mwari: Ndinoereketa mukupisha kwendurumwa dzangu kuitira ndaa avo vakasara vemadzinza, nokuitira ndaa Edhomu reshe, avo vakadzitorera nyika yangu kuita nhaka yavo, ngokudakara kwomwoyo yavo yeshe, nokugutiswa kweshe, kuti vairashe kuti ipambwe.’ Ndizvo, profeta ngendaa yenyika yaIsuraeri, newe uti kumitunhu, nokuzvimitunhu, nokumikova, nokumapani, uti, ‘Izvi ndizvo zvinoronza Mambo Mwari, Mwari: Ringira, ndinoereketa muushungu hwomundurumwa dzangu, ngokuti imwimwi mwakatwara kutukwa ngemadzinza. Ndizvo izvi ndizvo zvinoronza Mambo Mwari, Mwari: Ndinopika kuti madzinza akakutendenedza kweshe iwo pachawo anozotwara kutukwa.’ “Asi imwimwi, O mitunhu yaIsuraeri, munozomerera matai enyu, mwechibereka michero yenyu kunevanhu vangu Isuraeri; ngokuti vachakasira kuuya kanyi. Zvino, ringira, ndiri wenyu; ndinozokunukukira kwomuri, nemwi munozorimwa nokukushwa; ndinozowanza vanhu kwomuri, mhatso yeshe yaIsuraeri, yeshe yayo; madhorobha anozogarwa, nendau dzakaparadzwa dzinozoakiswa; ndinozowanza kwomuri vanhu nezvifuyo. Zvinozowanziswa nokubereka; neni ndinozoita kuti mugare kudai ngekare, ndiite kwomuri zvakapinda kunaka pane zvokutanga kwenyu. Zvino munozozia kuti inini ndini Mambo Mwari. Ndinozoita kuti vanhu vahambe padera penyu, vanhu vangu Isuraeri; navo vanozokugara nhaka, newe unozoita nhaka yavo. Auchazoiti kuti vafirwe ngevana. “Izvi ndizvo zvinoronza Mambo Mwari, Mwari: Ngokuti vanoti kwouri, ‘Nyika iyo inopedza vanhu, nayo yakaita kuti madzinza ako afirwe ngevana,’ ndizvo auchazopedzi vanhu, madzinza ako aachazofirwi ngevana, unoronza Mambo Mwaro, Mwari. Andichazoiti kuti vanhu vazwe kutuka kwemadzinza, auchazotwari kutsverudzwa kwevanhu nakamwe; auchazoiti kuti madzinza ako apumhunwe, unoronza Mambo Mwari, Mwari.” Izwi raMambo Mwari rakagumazve kwendiri rechiti, “Mukororo womunhu, apo vemhatso yaIsuraeri vaigara munyika yavo, vakaisvipisa ngenjira yavo nezviito zvavo; kuita kwavo pamberi pangu kwaiya kwakadai ngokusvipiswa kwomukadzi uri mukusikasukika kwake uri kumwedzi. Ndizvo ndakadurura ushungu hwangu padera pavo ngendaa yengazi yevaiya vaparadza padera penyika, nendaa yemiedzaniso yavo yokudira yevaiya vakasvipisa ndiyo. Ndakavaparadzira pakati pemadzinza, vakatataniswa mukati mwenyika; kudai ngenjira dzavo nokudai ngezviito zvavo ndakavatonga. Asi apo pevakaguma mumadzinza, peshe pevakaenda, vakasvipisa zina rangu rakachena, apo pevakaereketwa ndivo kuti, ‘Ava ndivo vanhu vaMambo Mwari, asi vaiya vabuda kubva munyika yake.’ Asi ndakakurudzwa ngendaa yezina rangu rakachena, iro raiya rasvipiswa ngevemhatso yaIsuraeri pakati pemadzinza kwevakabva. “Ndizvo ereketa kumhatso yaIsuraeri, uti, ‘Izvi ndizvo zvinoronza Mambo Mwari, Mwari: Andiiti izvi ngendaa yako, O mhatso yaIsuraeri, asi ngendaa yezina rangu rakachena, remwakasvipisa pakati pemadzinza apo pemwakabva. Ndinozochenesa zina rangu guru iro rakasvipiswa pakati pemadzinza, neiro remwakasvipisa imwimwi pakati pavo; nemadzinza anozozia kuti inini ndini Mambo Mwari, unoronza Mambo Mwari, Mwari, apo kubudikidza ndiwe ndinobudisa kucheneswa kwangu mukuona kwemadziso avo. Ngokuti ndinozomutora kubva pakati pemadzinza, ndimuunganidze kubva kunyika dzeshe, ndimuunze munyika yenyu. Ndinozofafaza mvura yakaera padera penyu, nemwi munozoita vakasukika kubva mukusikasukika kwenyu kweshe, nokubva mukudira miedzaniso yenyu yeshe ndinozomusuka. Ndinozomupa mwoyo mutsva, ndinozoisa mweya mutsva mukati mwenyu; ndinozodusa mwoyo webuwe kubva munyama yenyu, ndimupe mwoyo wenyama. Ndinozoisa mweya wangu mukati mwenyu, ndinozoita kuti muhambe muzviemeso zvangu, nemwi munozonasa kungwarira zvitongero zvangu nokuzviita. Zvino munozogara munyika yendakapa madzibaba enyu; imwimwi munozoita vanhu vangu, neni ndinozoita Mwari wenyu. Ndinozomuponesa kubva mukusikasukika kwenyu kweshe; ndinozodaidza koroni, nokuiita kuti iwandise, andizounzi nzara padera penyu. Ndinozowandisa michero yemiti nokuwandisa zvinomeriswa mumunda, kuti muchatambudzwazve mukutsverudzwa ngendaa yenzara pakati pemadzinza. Zvino munozokarakadza kushata kwenjira dzenyu, nezviito zvenyu zvaiya zvisikazi kunaka; munozoita vanodzinyenya mukuona kwenyu ngendaa yokushata kwenyu nezviito zvenyu zvinonyangadza. Andiiti izvi ngendaa yenyu, unoronza Mambo Mwari, Mwari; izvo ngazviziikanwe kwomuri. Itai vanotsverudzwa nokukangaidzwa ngendaa yenjira dzenyu, O mhatso yaIsuraeri.’ “Izvi ndizvo zvinoronza Mambo Mwari, Mwari: Pazuva rendinomusuka kubva kuzvishaishi zvenyu zveshe, ndinozoita kuti madhorobha agarwe nendau dzakaparadzwa dzinozoakiswa. Nyika dzakaita matongo dzinozorimwa, idzo dzaiya matongo mukuona kwaavo veshe vaipinda ndimwo. Navo vanozoti, ‘Iyi nyika yaiya matongo yaita kudai ngomunda weEdheni, nemadhorobha ayo aiya akaparadzwa, aiya matongo, neaiya akaondomoka, anoita ashosherwa nokugarwa.’ Zvino madzinza akasara anomutendenedza anozozia kuti inini Mambo Mwari ndakaakisa ndau dzakaondomoka, nokusima ndau dzaiya matongo; inini Mambo Mwari ndaereketa, neni ndinozochiita.” “Izvi ndizvo zvinoronza Mambo Mwari, Mwari: Ngendaa yeichizve ndinozotendera mhatso yaIsuraeri, kuti indikumbire kuti ndivaitire ichi, kuvawanza kudai ngezvifuyo. Kudai ngezvifuyo zvokuita mubairo, kudai ngezvifuyo zvomuJerusarema ngenguva yemishongano yaro yemadhiri, ndizvo madhorobha akaparadzwa anozozadzwa ngezvikwata zvevanhu. Zvino vanozozia kuti inini ndini Mambo Mwari.” Nyara yaMambo Mwari yakauya padera pangu, yakanditwara muMweya waMambo Mwari, ikandigadzika pashi mukati mwebani raiya rakazara ngemagodo. Wakanditungamirira kuti ndihambe hambe kuatendenedza; ringira, aiya akawanda yaamho mubani mwaiya mumhene; ringira, aiya akaoma kakurutu. Wakati kwendiri, “Mukororo womunhu, aya magodo angakona kurarama here?” Neni ndakapingura, “O Mambo Mwari, Mwari, iwewe ndiwe unozia.” Zvino wakati kwendiri, “Profeta kuneaya magodo wechiti kwaari, ‘O magodo akaoma, izwanyi izwi raMambo Mwari. Izvi ndizvo zvinoronza Mambo Mwari, Mwari kuneaya magodo: Ringira, ndinozoita kuti mweya wokufema upotere mukati mwenyu, nemwi munozorarama. Ndinozoita kuti midzira ibude padera penyu, nokuita kuti nyama ibude padera penyu, nokumufukidza ngeganda, nokuisa mweya wokufema mukati mwenyu, nemwi munozorarama; nemwi munozozia kuti inini ndini Mambo Mwari.’ ” Ndizvo ndakaprofeta kudai ngezvendakapangwa; naapo ndichaprofeta, rakaapo bope ngokukasira, kwaiyapo kuzungunyika, nemagodo akarimbanidzwa pamwepo, godo rakarimbanidzwa kunegodo raro. Naapo ndicharingira, ringira, pakabuda midzira padera pawo, nenyama yakauya padera pawo, neganda rakazvifukidza ngokubanze; asi paiya pasina mweya wokufema mukati mwawo. Zvino wakati kwendiri, “Profeta kunemweya wokufema, profeta, iwewe mukororo womunhu, uronze kumweya kuti, ‘Izvi ndizvo zvinoronza Mambo Mwari, Mwari: Uya kubva kumadutu marongomuna, O mweya, ufemere padera peava vakaurawa, kuti vararame.’ ” Ndizvo ndakaprofeta kudai ngezvaakandipanga, nomweya wokufema wakapotera mukati mwawo, nawo akararama, akaema ngetsoka dzawo, akaita mbungano huru. Zvino wakati kwendiri, “Mukororo womunhu, aya magodo imhatso yeshe yaIsuraeri. Ringira, vanoti, ‘Magodo edu awoma, negonda redu rapera; takapera yaamho.’ Ndizvo profeta, uronze kwevari kuti, ‘Izvi ndizvo zvinoronza Mambo Mwari, Mwari: Ringira, O vanhu vangu, ndinozobeura maiba enyu, ndiite kuti mubude kubva mumaiba enyu, neni ndinozomupetudza munyika yaIsuraeri. Nemwi munozozia kuti inini ndini Mambo Mwari, apo pendinobeura maiba enyu, nokumubudisa kubva mumaiba enyu, O vanhu vangu. Ndinozoisa mweya wangu mukati mwenyu, nemwi munozorarama, ndinozomugadzika munyika yenyu; zvino munozozia kuti inini Mambo Mwari ndaereketa, nokuzviita, unoronza Mambo Mwari.’ ” Izwi raMambo Mwari rakauya kwendiri rechiti, “Mukororo womunhu, dzitorere ndonga yomuti imwe, unyore padera payo kuti, ‘NgeyaJudha, neyevanhu vaIsuraeri hama dzake:’ dzitorere ndonga imweni, unyore padera payo kuti, ‘NgeyaJosefa, ndonga yaEfuremu neyemhatso yeshe yaIsuraeri hama dzake.’ Udzirimbanidze pamwepo imwe kuneimweni kuita ndonga imwe, nadzo dzinozoita imwe munyara yako. Naapo vanhu vako vanozoereketa kwouri vechiti, ‘Autionesi here icho chounoita ngeidzi ndonga?’ Ronza kwevari kuti, ‘Izvi ndizvo zvinoronza Mambo Mwari, Mwari: Ringira, ndaakuda kutora ndonga yaJosefa iyo munyara yaEfuremu, nemadzinza aIsuraeri hama dzake, ndinozoisa ndonga yaJudha padera payo, ndivaite ndonga imwe, kuitira kuti vaite ndonga imwe munyara yangu.’ “Naapo dzewanyora padera padzo dziri munyara yako mukuona kwemadziso avo, zvino ronza kwevari, ‘Izvi ndizvo zvinoronza Mambo Mwari, Mwari: Ringira, ndinozotora vanhu vaIsuraeri kubva pakati pemadzinza, apo pevakaenda, ndivaunganidze kubva kumarupande eshe, ndivaunze munyika yavo. Ndinozovaita dzinza rimwe munyika padera pemitunhu yaIsuraeri; namambo umwe ndiye unozoita mambo wavo veshe. Avachazoiti madzinza mairi, avachazoparadzaniswi kuita umambo huiri nariini. Avachazodzisvipisizve nariini ngemiedzaniso yavo yokudira nezviro zvavo zvinonyangadza nokuti ngezvishaishi zvavo. Asi ndinozovaponesa vari kundau dzavo dzeshe dzokugara, umwo mwevakashaisha vari, ndinozovachenesa. Zvino vanozoita vanhu vangu, neni ndinozoita Mwari wavo. Muranda wangu Dhavhidha unozoita mambo padera pavo; navo veshe vanozoa nomuushi umwe. Vanozohamba mukati mwezvitongero zvangu nokungwarira zviemeso zvangu nokuzviita. Vanozogara munyika yendakapa kumuranda wangu Jakobe, umwo mwaigarwa ngemadzibaba enyu; navo vanozogaramwo, ivo nevana vavo, nevana vevana vavo vanozogaramwo mhera nariini; nomuranda wangu Dhavhidha unozoita mutongi wavo mhera nariini. Ndinozoita chitenderano chokunyarara navo; chinozoita chitenderano chemhera nariini navo; neni ndinozovafumisa nokuvawanza, ndiise ugaro hwangu hwakachena pakati pavo mhera nariini. Tende rangu rinozogara pakati pavo; ndinozoita Mwari wavo, navo vanozoita vanhu vangu. Zvino madzinza anozozia kuti ndini Mambo Mwari unochenesa Isuraeri, naapo ugaro hwangu hunogara mukati mwavo mhera nariini.’ ” Izwi raMambo Mwari rakauya kwendiri rechiti, “Mukororo womunhu, emesa hope yako kuringira Gogi, kunyika yaMagogi, mutongi mukuru waMeshekhi naThubhari, uprofete kumuitira ndaa wechiti, ‘Izvi ndizvo zvinoronza Mambo Mwari, Mwari: Ringira, ndinorwa newe, O Gogi, mutongi mukuru waMeshekhi naThubhari. Ndinozokupetudza sure, ndiise zviyedzo mutsaya dzako, ndinozokubudisa nehondo yako yeshe, nemahachi ako nevagadhi vemahachi, veshe avo vakapakatira mbeu dzeshe dzezvokurwa ndizvo, chikwata chikurutu vanezvihlangu zvikuru nezvidoko, veshe vavo vechibata shoti. Phesia, Ethiopia naPhuti vanavo pamwepo, veshe vavo vanezvihlangu zvikuru nezvidoko nezviqoko; Goma nehondo yake yeshe; Bhethitogarma kubva mushango renyika dzedera nehondo dzake dzeshe, nevanhu vazhinji pamwepo vanewe. Ita wakanasirira, gara wakanasirira, iwewe nezvikwata zveshe zvinoungana kukutendenedza, uite mutungamiri kwevari. Ngesure kwemazuva mazhinji unozokokwa; mumakore mazhinji anouya uchapamba nyika yakasunhurwa kubva muhondo, nyika apo paiungana vanhu vaibva kumadzinza mazhinji pamitunhu yaIsuraeri, iyo yaiya yakatoparadzwa; vanhu vayo vakabudiswa kubva kumadzinza nazvino vanogara mukungwaririka, pamwepo veshe. Unozokwira kuuya kudai ngomubvumo; unozodai ngemakore kufukidza nyika yeshe, iwewe nehondo dzako dzeshe, iwewe nevanhu vazhinji.’ “Izvi ndizvo zvinoronza Mambo Mwari, Mwari: Ngeiro zuva mikarakadzo inozouya mukupinimidza kwako, newe unozoronga zano rakashata. Unozoti, ‘Inini ndinozokwira kurwisa munyika inemaguta asikazi kushosherwa, ndinozowira padera pevanhu vakanyarara, avo vanogara mukungwaririka, veshe vavo vanogara vasina marukumbati akashosherwa, vasina mipiningidzo nokuti misiwo;’ ” kuti utore zvokupamba, nokutwara zvakachakatwa, nokukunukudza nyara yako kuambana nendau dzakaparadzwa dzinogarwa zvino, nevanhu vakaunganidzwa kubva pakati pemadzinza, avo vakaona n'ombe nemidziyo, vanogara mukati mwenyika. Shebha naDhedhani, nevatengesi veTharshishi, pamwepo nemhondoro itsva dzayo dzeshe, vanozoti kwouri, “Wauya here kootora zvakapambwa? Iwewe wakaunganidza hondo dzako kuuya kootwara zvokupambwa, kutora sirivha nomukore, kutora n'ombe nemidziyo, kutora zvakachakatwa zvakawanda here?” “Ndizvo, mukororo womunhu, profeta, uronze kunaGogi, kuti, ‘Izvi ndizvo zvinoronza Mambo Mwari, Mwari: Ngeiro zuva apo vanhu vangu vaIsuraeri vanogara ngokungwaririka, auzozii ndizvo here? Unozouya kubva kundau yako yomushango yenyika dzedera, iwewe nevanhu vazhinji vanewe, veshe avo vechigadha mahachi, chikwata chikuru, hondo inesimba. Unozokwira kurwa nevanhu vangu Isuraeri, kudai ngegore rinofukidzira nyika. Mumazuva okupedzisira, ndinozokuunza wechirwa nenyika yangu, kuitira kuti vemadzinza vandizie, apo kubudikidza ndiwe, O Gogi, ndinozoonisa kucheneswa kwangu pamberi pemadziso avo.’ “Izvi ndizvo zvinoronza Mambo Mwari, Mwari: Iwewe andiwe here wendakaereketa ndiye ngemikuwo yekare kubudikidza ngevaranda vangu vaprofeti vaIsuraeri, avo vakaprofeta ngamazuva awo makore mazhinji, kuti ndinozokuunza kuti urwe navo? Pazuva iro apo Gogi anouya koorwisana nenyika yaIsuraeri, unoronza Mambo Mwari, Mwari, ushungu hwangu hunozomuswa. Ngokuti mundurumwa dzangu nomuushungu hwangu hunobaka ndinoronza izvi: ‘Ngegwinyiso ngeiro zuva kunozoapo kuzungunyika kukurutu munyika yaIsuraeri; hove dzoruandhle, shiri dzomudenga, zvikara zvomushango, nazvo zveshe zvinotamanda padera penyika, nevanhu veshe vari pahope yenyika, vanozohuta pamberi pangu, nemitunhu inozokandirwa pashi, nendau dzakaita mawere dzinozowira pashi, nemarukumbati eshe anozowira pashi. Ndinozodaidza shoti kuti irwe naye kumitunhu yangu yeshe, unoronza Mambo Mwari, Mwari; shoti yomunhu weshe inozorwa nehama yake. Ngenhenda nokuparadza ngazi ndinozomutonga; neni ndichadurura mvura zhinji nematsanza, muriro nesorufa, padera pake, nehondo yake nevanhu vazhinji avo vanaye. Ndizvo ndinozoonisa ukuru hwangu nokucheneswa kwangu, nokuita kuti inini ndiziikanwe mukuona kwemadzinza mazhinji. Zvino anozozia kuti inini ndini Mambo Mwari.’ “Iwewe, mukororo womunhu, profeta kuitira ndaa Gogi wechiti, ‘Izvi ndizvo zvinoronza Mambo Mwari, Mwari: Ringira, ndinorwa newe, O Gogi, mutongi mukuru waMeshekhi naThubhari. Ndinozokupetudza sure, ndikukweye, ndinozoita kuti ukwidzwe kubva kundau dzenyika dzedera, ndinozokuunza padera pemitunhu yaIsuraeri. Ndinozochaya uta wako kubva munyara yako yokumuoshwe, ndiite kuti misee yako iwe pashi kubva munyara yako yokumudyo. Iwewe unozowira padera pemitunhu yaIsuraeri, iwewe nehondo dzako dzeshe, nevanhu avo vanewe; ndinozokupira kuneshiri dzinokara dzembeu dzeshe nokuzvikara zvomushango, kuti udyiwe. Unozowa murubaya pamhene; ngokuti inini ndaereketa, unoronza Mambo Mwari, Mwari. Ndinozotumira muriro padera paMagogi, nepadera paavo vanogara ngokungwaririka muzviwi, navo vanozozia kuti inini ndini Mambo Mwari.’ “Ndinozoita kuti zina rangu riziikanwe pakati pevanhu vangu Isuraeri; andizotendi kuti zina rangu rakachena ritsverudzwezve; nemadzinza anozozia kuti inini ndini Mambo Mwari, Wakachena waIsuraeri. Ringira, chauya! Chaitika, unoronza Mambo Mwari, Mwari. Iri ndiro zuva rendaereketa ndiro. Zvino avo vanogara mumadhorobha aIsuraeri vanozobuda nokubasa muriro nokupisha zveshe zvokurwa ndizvo, zveshe zvihlangu zvikuru nezvidoko, nouta nemisee, nemikhondo mikuru nemidoko, navo vanozozvipisha ngomuriro makore manomwe. Ndizvo avazotezi huni kubva mushango, nokuti kutema muti nokuti ngouri mugwasha, ngokuti vanozobasa muriro ngezvokurwa ndizvo; navo vanozochakata avo vakavachakata, nokupamba avo vakavapamba, unoronza Mambo Mwari, Mwari. “Pazuva iro ndinozopa kunaGogi ndau yokutsira vakafa muIsuraeri, muBani reVahambi vanobva ngokumabvazuva kworuandhle; inozorambidza kupinda avo vahambi vanohamba, ngokuti apo Gogi nehondo yake yeshe vanozotsirwapo rinozodudzwa kuti, ‘Bani reHamonigogi.’ Nevemhatso yaIsuraeri vanozopedza mwedzi minomwe vechivatsira, kuitira kuti vachenese nyika. Vanhu veshe venyika vanozovatsira; nacho chinozoita mbiri kwevari ngeiro zuva rendinozoonisa ukuru hwangu, unoronza Mambo Mwari, Mwari. Vanozoemesa vanhu vanozohambamwo munyika vechitsira vapambi vanosara padera penyika, kuti vaichenese; kwemwedzi minomwe vanozotsvakisisa. Apo vatsvakisisi vechihamba munyika iyi, kunyazwi ndiani unoona godo romunhu, unozoemesa chioniso periri, metsa vatsiri varitsira muBani reHamonigogi. Dhorobha iro rinozodudzwa kuti Hamona riripowo. Ngokudaro vanozochenesa nyika. “Newe, mukororo womunhu, izvi ndizvo zvinoronza Mambo Mwari, Mwari: Ereketa kunembeu dzeshe dzeshiri nokuzvikara zveshe zvomushango: Dziunganidzei, muuye, unganidzanai kubva kumarutii eshe kudhiri rendinomunasirira, dhiri gurutu padera pemitunhu yaIsuraeri, mudye nyama nokumwa ngazi. Munozodya nyama yevanesimba, nokumwa ngazi yevatongi venyika, yemagondohwe neyemakwayana, yembudzi neyemikono, zveshe zvakanuna zveBhashani. Munozodya mafuta metsa mugute, nokumwa ngazi metsa muraradze, padhiri iro rendinomunasirira. Munozogutiswa patafura rangu, ngemahachi nengoro, nevarwi vanesimba, nevarwi vehondo vembeu dzeshe, unoronza Mambo Mwari. “Ndinozoonesa uthende hwangu pakati pemadzinza, nemadzinza eshe anozoona kutonga kwangu kwendakaita, nenyara yangu yendakaisa padera pavo. Mhatso yaIsuraeri inozozia kuti inini ndini Mambo Mwari, Mwari wavo, kubvira pazuva iro kuende mberi. Nemadzinza anozozia kuti mhatso yaIsuraeri yakaenda muuhloko ngendaa yezvishaishi zvavo, ngokuti vakaita ngokuchengedzera kwendiri. Ndizvo ndakafisha hope yangu kubva kwevari, ndikavapa munyara dzemagaa avo; ndizvo vakawa veshe ngeshoti. Ndakaita kwevari kudai ngokusikasukiki kwavo, nokudai ngokupauka kwavo nokufisha hope yangu kubva kwevari. “Ndizvo izvi ndizvo zvinoronza Mambo Mwari, Mwari: Zvino ndinozopetudza upfumi hwaJakobe, nokuitira nyasha vemhatso yeshe yaIsuraeri; ndinozoita ndurumwa ngendaa yezina rangu rakachena. Vanozoriyarwa kutsveruka kwavo, nezvipauko zvavo zveshe zvevakapauka ndizvo kurwa neni, apo vakagara ngokungwaririka munyika yavo, pasina naumwe unovatyisidzira, apo ndavaunzazve sure kubva pakati pemadzinza, nokuvaunganidza kubva munyika dzemagaa avo, kubudikidza ndizvo ndaonesa kucheneswa kwangu mukati mwavo mukuona kwemadzinza mazhinji. Zvino vanozozia kuti inini ndini Mambo Mwari, Mwari wavo, ngokuti ndakavatumira kuenda muuhloko pakati pemadzinza; zvino ndakavaunganidza kuvaunza kunyika yavo yemene. Andizosiyi naumwe wavo sure; neni andichazofishizve hope yangu kubva kwevari, apo pendinodurura mweya wangu padera pevemhatso yaIsuraeri, unoronza Mambo Mwari.” Mugore remakumi mairi nemashanu ouhloko hwedu, mukuamba kwegore, ngezuva regumi romwedzi, mugore regumi nemarongomuna ngesure kwokuputswa kwedhorobha, ngezuva ririro, nyara yaMambo Mwari yaiya padera pangu, yakandiunza kweriri. Wakandiunza muzvioniso zvaMwari kunyika yaIsuraeri, naye wakandigadzika pashi padera pomutunhu wakakwira yaamho, apo paiya nomuemo wakadai ngedhorobha ngokubani. Naapo andiunza apo, ringira, paiyapo nomunhu, uwo kuoneka kwake kwaiya kwakadai ngokun'anikira kwethusi, anebote rejira nechipimo chorutsanga munyara yake; naye waiya akaema pamusiwo. Munhu wakati kwendiri, “Mukororo womunhu, nasa kuringira ngemadziso ako, unase kupurutana ngenzee dzako, uise mwoyo wako padera pazvo zveshe zvendinozokuonisa; ngokuti wakaunzwa pano ngeiyi ndaa, kuitira kuti ndichionise kwouri; ronza zveshe zvounoona kunevemhatso yaIsuraeri.” Ringira rwaiyapo rukumbati rwakatendenedza ngokubanze kwemhatso yaMwari. Kureba kwechipimo chetsanga chaiya munyara yomunhu, chaiya mamitha matatu kureba, naye wakapima rukumbati. Rwaiya mamitha matatu kukwira mudenga nemamitha matatu kutimbara. Zvino wakapinda pamusiwo wakaringira kumabvazuva, wakakwira pamakwiro awo, akapima dimba romusiwo, raiya mamitha matatu kudzama. Aiyapo makamera, kamera rimwe ngarimwe raiya nemarupande akaedzana, kamera rimwe ngarimwe raiita mamitha matatu kupamhama nokudzama, nepandau yepakati pemarukumbati yaiita mamitha mairi nehafu kutimbara. Zvino wakapima berere romusiwo ngomukati, naro raiya mamitha marongomuna kudzama. Zvino wakapima berere romusiwo, rakaita mitha rimwe kutimbara. Aiyapo makamera matatu madoko kumarutii eshe okumusiwo wokumabvazuva; matatu aiya nokupimwa kumwekwo; nesika dzaiya nokupimwa kumwekwo. Zvino wakapima kupamhama kwopokupinda pamusiwo, pakaita mamitha matanhatu nehafu, nourebu pamusiwo mamitha mashanu. Waiyapo mukana pamberi pemakamera madoko, masendimitha makumi mashanu kumarutii eshe; nemakamera madoko aiya nemarutii akaedzana, echiita mamitha matatu rutii rumwe ngarumwe. Zvino wakapima musiwo kubva ngepadenga pekamera rimweni, kuguma padenga pekamera rimweni, kupamhama kwaiita mamitha gumi nemairi nehafu, kubva pamusiwo kuguma pamusiwo. Wakaipima sika dzinemamitha gumi kupamhamha, noruwanze rwakagumira pasika dzaitendenedza musiwo. Kubvira pamberi pemusiwo pokupotera ndipo metsa kumagumo eberere romukati pamusiwo paiita mamitha makumi mairi nemashanu. Makamera nesika dzawo aiya nemafasitera, nezvikonyiso ngomukati mwemusiwo kutendenedza mweshe, nemaruwanzewo aiya nemafasitera ngomukati akatendenedza mweshe; nepadera pesika imwe ngaimwe paiya nemiti yemijindwi. Zvino wakandiunza kuruwanze rwokubanze; ringira, aiyapo makamera, nezvakaakirwa mumarutii kutendenedza ruwanze; makamera makumi matatu akaringiriswa pakaakirwa mapuwe. Nokuakirwa ukwo kwaiteera murutii rwemusiwo, rakaedzaniswa nokureba kwemisiwo; uku kwaiya kuakirwa kwaiya ngepashi. Zvino wakapima urebu kubvira pamberi pemusiwo wepashi metsa kuguma kumapedzisiro pamberi poruwanze rwomukati ngokubanze, mamitha makumi mashanu, kweshe kumabvazuva nedera. Zvino wakapima musiwo woruwanze rwokubanze, uwo wakaringira dera, kudzama kwawo nokupamhama. Makamera madoko matatu kurutii urwu, nematatu kurutii urwo; nesika dzawo nemaberere awo aiya akaedzana kudai ngaawo omusiwo wokutanga; urebu hwawo hwaiya mamitha makumi mairi nemashanu, nokupamhama kwaiya mamitha gumi nemairi nehafu. Mafasitera awo, nemaberere awo, nemiedzaniso yemiti yemijindwi yawo zvaiya nechipimo chimwecho, kudai ngechomusiwo wakaringira kumabvazuva. Madanho manomwe aikwira kugumapo; nemaruwanze awo aiya pamberi pazvo. Pakaringirana nomusiwo wedera, kudai ngokumabvazuva, paiya nomusiwo waipinda muruwanze rwomukati; wakapima kubva pamusiwo kuenda pamusiwo, pakaita mamitha makumi mashanu. Zvino wakanditungamirira kuenda neni kubani, ringira, waiyapo musiwo wakaringira kubani; naye wakapima sika dzawo nemaberere awo, kudai ngezvipimo zvimweni. Aiyamwo mafasitera kutendenedza mukati mwawo, nomumaberere awo, kudai ngemafasitera amweni; urebu hwawo hwaiya mamitha makumi mairi nemashanu, kupamhama kwawo kwaiya mamitha gumi nemairi nehafu. Aiyapo madanho manomwe okukwira kuguma peuri, nemaberere awo aiya pamberi pawo; waiya nemiedzaniso yemiti yomujindwi pasika dzawo, umwe ngorutii urwu, noumweni ngorutii urwo. Waiyapo musiwo ngokubani kweruwanze rwomukati, naye wakapima kubva pamusiwo kuenda kumusiwo wakaringira kubani, mamitha makumi mashanu. Zvino wakandiunza muruwanze rwomukati ngepamusiwo wokubani; wakapima musiwo wokubani, waiya wakatodzana nezvimweni zvipimo. Makamera awo madoko, nesika dzawo, nemaberere awo, aiya akatodzana nezvimweni zvipimo; nawo aiyamwo mafasitera kutendenedza mweshe nomuberere marwo; urebu hwawo mamitha makumi mairi nemashanu, kupamhama mamitha gumi nemairi nehafu. Aiyamwo maberere aitendenedza mamitha gumi nemairi nehafu kureba, mamitha mairi nehafu kupamhama. Maberere arwo akaringira kuruwanze rwokubanze; nemiedzaniso yemijindwi yaiya padera pesika dzawo, nokukwira kwapo kuenda mudenga madanho masere. Zvino wakandiunza muruwanze rwomukati rwakaringira kumabvazuva; wakapima musiwo, wakaedzana neimweni. Makamera awo madoko, sika dzawo, nemaberere awo, aiya akaedzana nezvimweni zvipimo; mwaiya nemafasitera mukati mweshe, nomumaberere akachitendenedza; urebu hwawo mamitha makumi mairi nemashanu, kupamhama mamitha gumi nemairi nehafu. Maberere arwo akaringira kuruwanze rwokubanze; nemiedzaniso yemiti yemijindwi padera pesika dzarwo, kumarutii eshe; nokukwira kwapo kuenda mudenga, madanho masere. Zvino wakandiunza kumusiwo wedera, wakaupima; waiya wakaedzana nezvimweni zvipimo. Makamera madoko arwo, sika dzarwo, maberere arwo, nemafasitera arwo akatendenedza kweshe. Urebu hwawo hwaiya mamitha makumi mairi nemashanu, kupamhama kwawo mamitha gumi nemairi nehafu. Nesika dzawo dzaiya dzakaringira kuruwanze rwokubanze; nemiedzaniso yemiti yemijindwi yaiya padera pesika dzarwo kurutii urwu nokurutii urwo; nokukwirapo kuenda mudenga madanho masere. Paiya nekamera musiwo waro wairingira pasika dzemisiwo, apo pevaisukira midiro yokupisha. Nomuberere romusiwo aiyapo matafura mairi, kurutii rumwe nematafura amweni mairi kurutii rumweni, pokuurairapo midiro yokupisha, midiro yokushaisha, nemidiro yokupauka. Kurutii rwokubanze, pakukwira kuenda pokupotera pamusiwo wedera, aiyapo matafura mairi; kurutii rumweni rweberere aiyapo matafura mairi. Matafura marongomuna aiya mukati, nematafura marongomuna aiya ngokurutii rwokubanze, ngeparutii rwomusiwo, matafura masere, padera pawo okuurairapo mibairo yavo. Aiyapowo matafura marongomuna emapuwe akatsetswa, emidiro yokupisha, urebu hwawo hwaiya masendimitha makumi mashanu, nokupamhama kwawo kwaiya masendimitha makumi manomwe nemashanu akaedzana; padera pawozve vairadzika zvokushanda ndizvo kuuraya midiro yokupisha neyemibairo. Mwaiya nezvikoreko, kureba kwazvo kwaiya kwakadai ngenyara imwe, zvakasungirwa kuatendenedza mukati mweshe. Nepadera pematafura paiiswa nyama yemidiro. Kubanze kwemusiwo womukati kwaiya nemakamera evaembi muruwanze rwomukati, urwo rwaiya kurutii rwomusiwo wedera wairingira kubani, rimwe raiya kurutii rwomusiwo wokumabvazuva wairingira dera. Wakati kwendiri, “Iri kamera rakaringira kubani ngerevapristi, vangwariri vemishando yemhatso. Nekamera rakaringira dera ngerevapristi, vangwariri vomushando wearita; ava mibarirwana yaZadoki ivo vega pakati pemibarirwana yaRevhi, avo vangakwedzera pasinde paMambo Mwari kumushandira.” Zvino wakapima ruwanze, urebu hwarwo mamitha makumi mashanu, marutii marongomuna akaedzana; nearita raiya pamberi pemhatso. Zvino wakandiunza kuberere remhatso, akapima sika dzeberere imwe ngaimwe, mamitha mairi nehafu kureba; kupamhama mamitha manomwe, nemarukumbati mitha rimwe nehafu kutimbara kumarutii eshe. Urebu hweberere hwaiya mamitha gumi, kupamhama mamitha matanhatu; ngepamadanho anokwira kuenda mudenga kweriri; dzaiapo sika pasinde pesika dzimweni kumarutii eshe. Zvino wakandiunza mutemperi, naye wakapima sika dzaiya kurutii rumwe ngarumwe, mamitha matatu kupamhama. Kupamhama kwomusiwo kwaiya mamitha mashanu; nemarukumbati mamitha mairi nehafu kutimbara kurutii rumwe ngarumwe. Wakapima urebu hwayo mamitha makumi mairi kureba, kupamhama kwayo mamitha gumi. Zvino wakapotera mukati, akapima sika dzomusiwo, mitha rimwe kureba nemamitha matatu kupamhama, nemarukumbati kumarutii eshe mamitha matatu nehafu kutimbara. Wakapima urebu hwekamera hwaiya mamitha gumi akaedzana kweshe kumarutii; nokupamhama kwaro raiya pamberi petemperi. Naye wakati kwendiri, “Iyi indau yakachenesesa.” Zvino wakapima rukumbati rwemhatso, mamitha matatu kutimbara, nokupamhama kwemakamera eshe orutii kwaiya mamitha mairi, kutendenedza mhatso kumarutii eshe. Nemakamera orutii aiya muutatu, akaita miturika rimwe padera perimweni, akarongwa kuita makumi matatu pamuturika umwe. Aiyapo akarimbanidzwa kutendenedza kurukumbati rwemhatso kugwinyisa makamera orutii akatendenedza kuitira kuti asatsimiswa ngorukumbati rwemhatso. Makamera ekumarutii akapinda kupamhamiswa kubva pamuturika kuenda pamuturika, ngokuti chiemo chemhatso chakaitwa chinepokukwira nokudzaka ndipo, kukwira kutendenedza mhatso. Ngendaa iyi chiemo chakaangira kupamhama kubvira pamuturika kuenda pamuturika. Munhu waikwira kubva kukamera repashi kuenda kunerepadera ngenjira yekamera repakati. Ndakaonawo kuti mhatso yaiya nepakakwirira kumarutii eshe kuitendenedza; madzeyo emakamera orutii akapimwa ngorutsanga rwakazara rwemamitha matatu. Utindi hworukumbati rwokubanze kwemakamera okurutii hwaiya mamitha mairi nehafu; ndau yakasara pakati pemakamera orutii etemperi, nemakamera oruwanze kupamhama kwawo kwaiya mamitha gumi kutenderera temperi kumarutii eshe. Misiwo yemakamera okurutii yaibeukira kundau yakasara isina chiro, musiwo umwe wakaringira dera, noumweni musiwo wakaringira kubani; kupamhama kwendau iyo yakasara isina chiro mamitha mairi nehafu kutenderera. Mhatso iyo yakaringirana noruwanze ngokumabirirazuva raiya mamitha makumi marongomuna nemashanu kureba; norukumbati rwetemperi rwaiya mamitha makumi matatu nemashanu kupamhama kutenderera kweshe, nokutimbara kworukumbati kwaiya mamitha mairi nehafu. Zvino wakapima mhatso, urebu hwayo hwaiya mamitha makumi mashanu; ruwanze nemhatso nemarukumbati ayo aiya mamitha makumi mashanu. Zve, kupamhama kwemberi kwemhatso kwairingira kumabvazuva noruwanze aiya mamitha makumi mashanu. Zvino wakapima urebu hwemhatso hwairingira muruwanze rwokumabirirazuva, nendau dzayo dzakakwirira kurutii rumwe nokurutii rumweni, aiya mamitha makumi mashanu. Temperi romukati nekamera romukati nemaberere oruwanze nesika dzemisiwo, nemafasitera akakonywa, nokutendenedza kweshe miturika mitatu yeshe yaiya nemafasitera nesika. Akaringirana nomusiwo wetemperi, akawarwa ngemapuranga kuatendenedza, kubvira ngepashi metsa kuguma kumafasitera, nemafasitera akafukidzirwa, kuguma kundau iri padera pomusiwo, kunyazwi kuguma mukamera repakati nokubanze. Nomumarukumbati eshe kutendenedza kamera romukati nokubanze zvaiyapo zvipimo. Zvakanasirwa ngemakherubhi nemiti yemijindwi, muti womujindwi pakati pekherubhi nekherubhi. Kherubhi rimwe ngarimwe raiya nehope mbiri: hope yomunhu yakaringira kumuti womujindwi kurutii rumwe, nehope yemhondoro itsva yakaringira kumuti womujindwi kurutii rumweni. Zvaiya zvakanangurwa kudaro kutendenedza temperi reshe. Kubva pashi metsa kuguma padera pomusiwo paiya pakanangurwa makherubhi nemiti yemijindwi, uku ndiko kunasirwa kworukumbati rwetemperi. Sika dzomusiwo wetemperi dzaiya nemarupande marongomuna akaedzana. Pamberi pendau yakachena paiya nechiro chaitodzana nearita remiti rinemitha rimwe nehafu kureba, kupamhama kwaro mitha rimwe. Makhona aro, urebu hwaro, nemarukumbati aro zvakaakiwa ngemiti. Wakati kwendiri, “Iri ndiro tafura rinoema pamberi paMambo Mwari.” Temperi nendau yakachena zvaiya nemisiwo miiri yakapetwa. Nomusiwo umwe ngaumwe waiya nemaruvhi mairi, maruvhi mairi anotsudzuka; maruvhi mairi aiya omusiwo umwe, nemaruvhi mairi aiya omusiwo umweni. Padera pemisiwo yetemperi neyendau yakachena paiya pakanangurwa makherubhi nemiti yemijindwi yakadai ngeiyo yakaitwa pamarukumbati; paiyapo nemwamba inoutindi pamberi peberere ngokubanze. Aiyapo mafasitera akakonywa nemiti yemijindwi kurutii rumwe nokurutii rumweni, kumarutii eshe eberere nokumakamera orutii rwemhatso, nematanda anoutindi. Zvino wakanditungamirira kubuda kuenda muruwanze rwokubanze kwakaringira dera, naye wakandiunza kumakamera akaringirana noruwanze rwetemperi, nokuringirana nemhatso kurutii rwedera. Urebu hwemhatso yaiya kumusiwo wedera mamitha makumi mashanu, kupamhama mamitha makumi mairi nemashanu. Pakaringisana nendau yemamitha gumi kupamhama ngeparuwanze rwomukati, pakaringirana nepakakwirira ngeparuwanze rwokubanze kwaiyapo maberere akaturikidzana kuita miturika mitatu. Pamberi pemakamera paiya nepokuhamba ndipo mamitha mashanu mukupamhama ngomukati, njira inemamitha makumi mashanu muurebu; nemisiwo yawo yakaringira dera. Zvino makamera edera aiya madoko, ngokuti maberere epadera aiya makuru kupinda epashi, nokupinda epakati mumhatso. Ngokuti aiya mumiturika mitatu, asi aiya asina sika kudai ngesika dzemaruwanze okubanze; ngendaa iyi makamera epadera aiya akatsonzwa kupinda epashi, neepakati kubva pashi. Paiya norukumbati kubanze, rwaienda kumweyo nemakamera, kuenda kuruwanze rwokubanze, ngepamberi pemakamera, urebu hwarwo mamitha makumi mairi nemashanu. Ngokuti urebu hwemakamera ari ngokubanze kworuwanze aiya mamitha makumi mairi nemashanu, naawo ari pamberi petemperi aiya mamitha makumi mashanu. Pashi peaya makamera paiya nepokuhamba ndipo kupinda kurutii rwokumabvazuva, kuitira kuti munhu apotere mwaari kubva muruwanze rwokubanze. Mukupamhama kworukumbati rworuwanze kwakagwinyiswa ngokurutii rwokumabvazuva pamberi pendau isina chiro, nepamberi pemhatso paiyapo makamera, nenjira yaiya pamberi pawo; aiya akatodzana nemakamera aiya kurutii rwedera, aiya nourebu nokupamhama kwakatodzana, nemisiwo yawo yeshe nokuemeswa kwawo nemisiwo. Ndizvo misiwo yemakamera akaringira kubani aipoterwa ngepamusiwo pakuamba kwenjira, kubva ngokumabvazuva, kuteera rukumbati. Zvino wakati kwendiri, “Makamera edera neokubani akaringirana nepandau pasina chiro makamera akachena, apo vapristi vanokwedzera kunaMambo Mwari vanozodyisa zviro zvakachenesesa; umwo vanozoisa zviro zvakachenesesa, midiro yezviyo, midiro yokushaisha, nemidiro yokupauka, ngokuti ndau iyo yakachena. Naapo vapristi vechipotera mundau yakachena, avazobudi kubva kundau yakachena kuenda kundau yoruwanze rwokubanze, asi umwo vanozoisa zvokusimira zvavo zvevanoshandisa, ngokuti izvi zvakachena; vanozopfeka zvokusimira zvimweni, vasati vakwedzera kundau dzevanhu.” Naapo apedza kupima mhatso yomukati, wakandibudisa kubanze ngenjira yokumusiwo wakaringira kumabvazuva, nokupima temperi kuritendenedza. Wakapima rutii rwokumabvazuva ngorutsanga rwokupima, ndirwo mamitha mazana mairi nemakumi mashanu. Zvino wakapetuka kupima rutii rwedera, rwaiya mamitha mazana mairi nemakumi mashanu ngorutsanga rwokupima ndirwo, kurutendenedza. Zvino wakapetuka, akapima rutii rwokubani, rwaiya mamitha mazana mairi nemakumi mashanu ngetsanga yokupima ndiyo. Zvino wakapetukira kurutii rwokumabirirazuva, wakapima ngorutsanga mamitha mazana mairi nemakumi mashanu. Wakaipima kumarutii marongomuna. Yaiya norukumbati rwakaitendenedza, mamitha mazana mairi nemakumi mashanu kureba, nokupamhama kwarwo mamitha mazana mairi nemakumi mashanu, kuti ruite muparadzaniso pakati pendau yakachena neiyo isikazi kucheneswa. Zvino wakandiunza kumusiwo, musiwo wakaringira kumabvazuva. Ringira, uthende hwaMwari waIsuraeri hwaiuya kubva ngenjira yokumabvazuva; kutinhira kwokuuya kwake kwaiya kwakadai ngokutinhira kwemvura zhinji inesimba, nenyika yakan'anikira ngouthende hwake. Chioniso chendakaona chakadai ngechioniso chendakaona apo akauya kooparadza dhorobha, nechioniso chakadai ngechioniso chendakaona ndiri parwizi Khebhari; neni ndakawa ngehope yangu. Naapo uthende hwaMambo Mwari hwakapotera mumhatso ngenjira yomusiwo wakaringira kumabvazuva, Mweya wakandimirudza, ukandiunza muruwanze rwomukati; ringira, uthende hwaMambo Mwari hwakazadza temperi. Apo munhu akaema pasinde pangu, ndakazwa umwe echiereketa kwendiri kubva mutemperi. Wakati kwendiri, “Mukororo womunhu, iyi ndiyo ndau yedendemaro rangu, nendau yokutambararira tsoka dzangu, apo pendinozogara pakati pevanhu vaIsuraeri mhera nariini. Mhatso yaIsuraeri aichazosvipisi zina rangu rakachena, kunyazwi iyo nokuti madzimambo ayo, ngouhure hwayo, nokuti ngemiiri yakafa yemadzimambo ayo mundau dzayo dzakakwirira. Naapo vakagadzika dimba ravo pasinde pedimba rangu, nesika dzavo pasinde pesika dzangu, norukumbati rwega pakati pangu navo, vaisvipisa zina rangu rakachena ngezvinyangadzo zvavo zvevakaita; ndizvo ndavapedza muushungu hwangu. Zvino ngavarashe uhure hwavo, nemiiri yemadzimambo avo yakafa, kuretu kubva kwendiri, neni ndinozogara pakati pavo mhera nariini. “Asi iwewe, mukororo womunhu, nasa kududzira ngetemperi kunevemhatso yaIsuraeri, ngavapime chiemo chayo, kuti vatsveruke ngendaa yezvinonyangadza zvavo. Naapo vanotsveruka ngeizvo zveshe zvevakaita, ita kuti vazie urongwa hwetemperi, nokurongedzwa kwaro, njira yokubuda kubva kweriri, nedzokupotera kweriri, nechiemo charo cheshe, zviemeso zvaro nourongwa hwaro hweshe, nemipango yaro yeshe; uzvinyore mukuona kwavo, kuti vangwarire nokuteera urongwa hweshe nemitemo yaro yeshe. Ichi ndiwo mupango wetemperi; nyika yeshe padera pomutunhu nokuitendenedza inozoita yakachenesesa. Ringira, uyu ndiwo mupango wetemperi.” Izvi ndizvo zvipimo zvearita ngokupima kwemasendimitha; (hafu yemitha nechipimo chenyara) kutenderera kwaro kunozoita masendimitha makumi mashanu kureba, nokupamhama kwaro masendimitha makumi mashanu, nokumagumo kwaro ngokurutii rwokubanze raiya negomo rimwe kuritendenedza. Ichi chinozoita urebu wearita kubva pashi kuenda mudenga: Kubvira pachigadzikiro pamavhu metsa kuguma pamusara wepashi, mitha rimwe kureba, nokupamhama kwaro masendimitha makumi mashanu; nokubva pamusara mudoko kuenda pamusara mukuru mamitha mairi, nokupamhama kwaro kutenderera kweshe masendimitha makumi mashanu; nechoto chearita mamitha mairi kureba mudenga; nokubva pachoto chearita kukwira, nyanga murongomuna. Choto chearita chinozoita chipimo chimwe chakaedzana, mamitha matanhatu kurutii rumwe ngarumwe. Musarawo unozoita marutii akatodzana mamitha manomwe rutii rumwe ngarumwe, marutii marongomuna akaedzana; negomo ngokumuchoto kwaro, masendimitha makumi mairi nemashanu kureba, chigadzikiro charo masendimitha makumi mashanu kupamhama. Madanho aro anoringira kumabvazuva. Zvino wakati kwendiri, “Mukororo womunhu, izvi ndizvo zvinoronza Mambo Mwari, Mwari: Iyi ndiyo mitemo yearita: Pazuva apo perinozoitwa, kuti vapirepo midiro yokupisha, nokufafaza ngazi padera paro, unozopa kuvapristi vaRevhi vemhuri yaZadhoki, avo vanokwedzera kwendiri kundishandira, unoronza Mambo Mwari, Mwari, mukono mutsva kuita mudiro wokushaisha. Unozotora ngazi yawo imweni, nokuiisa panyanga murongomuna dzaro, nokumakhona marongomuna omusara, nepadera pegomo reshe kuritendenedza; ngokudaro unozorisuka nokurichenesa nokuita kupirwa kwaro. Unozotorazve mukono wokuita mudiro wokushaisha, nawo unozopishwa mundau yakaemeswa yetemperi, kubanze kwendau yakachena. Pazuva rechipiri unozopira gotokoto risina gotsa kuita mudiro wokushaisha, navo vanozochenesa arita, kudai ngezvevakarichenesa ngomukono. Naapo wapedza kurichenesa, unozopira mukono mutsva usina gotsa, negondohwe risina gotsa pakati pomutanga. Unozozviunza pamberi paMambo Mwari, nevapristi vanozokandira munyu padera pazvo, vanozozvipira kuita mudiro wokupisha kunaMambo Mwari. Mumazuva manomwe unozopira mbudzi imwe zuva rimwe ngarimwe yokuita mudiro wokushaisha; zve, mukono mutsva negondohwe kubva pakati pomutanga zvisina gotsa. Mumazuva manomwe vanozosukisa arita kurichenesa nokuripira kunaMambo Mwari. Naapo aya mazuva apera, zvino kubvira pazuva rechisere kuendemberi, vapristi vanozoita midiro yokupisha padera pearita, nemidiro yenyu yokunyarara, neni ndinozomuashira, unoronza Mambo Mwari.” Zvino wakandipetudza ngenjira yomusiwo wokubanze wendau yakachena, wakaringira kumabvazuva; nawo waiya wakakonywa. Mambo Mwari wakati kwendiri, “Uyu musiwo unozogara wakakonywa; auzobeurwi, apanazve munhu unozopotera ndiwo; ngokuti Mambo Mwari, Mwari waIsuraeri, wapotera mukati ndiwo, ndizvo unozogara wakakonywa. Mutongi ega, ngokuti mutongi, unogara umwo, kudya chingwa pamberi paMambo Mwari; unozopinda ngenjira yeberere romusiwo, naye unozobuda ngenjira imweyo.” Zvino wakandiunza ngenjira yomusiwo wedera pamberi petemperi; neni ndakaringira, ringira, uthende hwaMambo Mwari hwakazadza temperi raMambo Mwari; neni ndakawa pashi ngehope yangu. Mambo Mwari wakati kwendiri, “Mukororo womunhu, nasa kuzwisisa, unase kuringira ngemadziso ako, unase kuzwisisa ngenzee dzako izvo zveshe zvendinoronza kwouri ngendaa yezviemeso zveshe zvemutemperi raMambo Mwari, nendaa yemipango yaro yeshe; unase kuringira avo vanotenderwa kupinda mutemperi, naavo veshe vanozosiiwa kubanze kwendau yakachena. Uti kunemhatso inomukira, kumhatso yaIsuraeri, ‘Izvi ndizvo zvinoronza Mambo Mwari, Mwari: O mhatso yaIsuraeri, ngaapo magumo ezvinyangadzo zvenyu zveshe mukutendera vapara, vasikazi kuchekwa mumwoyo nomunyama, kupinda mundau yangu yakachena, kuti vaitsverudze, mutemperi mwangu, apo imwimwi munopira kwendiri chingwa changu, mafuta nengazi. Vagura chitenderano changu ngezvinyangadzo zvavo zveshe. Nemwi amuzi kungwarira mupango wemidiro yangu yakachena; asi mwakaemesa vapara kumushandira kuita vangwariri vemipango yangu mundau yangu yakachena ngokwenyu.’ “Izvi ndizvo zvinoronza Mambo Mwari, Mwari, ‘Akuna mupara usikazi kuchekwa mumwoyo nomunyama, kunyazwi ngouri mupara weavo vari pakati pevanhu vaIsuraeri, unozopotera mundau yangu yakachena.’ “Asi vaRevhi avo vakaenda kuretu kubva kwendiri, vechipauka kubva kwendiri kuteera miedzaniso yavo yokudira apo Isuraeri akapauka kubva kwendiri, vanozotwara koororwa kwavo. Vanozoshandira mundau yangu yakachena, vechirinda pamisiwo yetemperi rangu, vechishandira mumhatso; vanozouraya midiro yokupisha nemibairo yevanhu, navo vanozoema pamberi pavo kuvashandira. Ngokuti vakavashandira pamberi pemiedzaniso yavo yokudira, vakaita kuti mhatso yaIsuraeri iwe mukushata kwayo; ndizvo ngokudaro ndakamirudza nyara yangu kurwa navo, unoronza Mambo Mwari, navo vanozotwara kushata kwavo. Avazokwedzeri pasinde kwendiri kuti vaite mushando woupristi kwendiri, nokuti kukwedzera pasinde pemidiro yangu yakachena, zviro zvakapindisisa kuchena; asi vanozotwara kutsveruka kwavo, ngendaa yezvinyangadzo zvavo zvevakaita. Asi ndinozovaemesa kuti vaite vangwariri vetemperi, kuita mushando weshe waro, zveshe zvinoshandwa mukati mwaro. “Asi vapristi vevaRevhi, vakororo vaZadhoki, avo vakangwarira mushando wendau yangu yakachena apo vanhu vaIsuraeri vapauka kubva kwendiri, vanozokwedzera kwendiri kuti vandishandire; vanozoema pamberi pangu, kuti vandipe mafuta nengazi, unoronza Mambo Mwari, Mwari. Ndivo vanozopotera mundau yangu yakachena, ndivo avo vanozokwedzera patafura rangu kuti vandishandire; vanozongwarira mushando wangu. Naapo vapinda ngepamisiwo yoruwanze rwomukati, vanozopfeka machira orukangaza; avazopfeki zvine mamviri padera pavo, apo vechishanda pamisiwo yoruwanze rwomukati, nomukati. Vanozosunga madhuku orukangaza musoro mwavo, nemabhuruku orukanganza mizviunu zvavo; vasazodzisimidza ngechiro nokuti ngechiri chinobudisa ziya. Naapo vechibuda kuenda kuruwanze rwokubanze kunevanhu, vanozokhumura zvokupfeka zvavo zvevaishanda ndizvo, nokuzviisa mumakamera akachena; vanozopfeka zvokusimira zvimweni, kuti vasazochenesa vanhu vanezvokufuka zvavo. Avazopari masoro avo, nokuti kutendera nyunzu kuti dzikure; kwega vanozogunda bvudzi padera pemasoro avo. Apana mupristi unozomwa vhini, apo paanopinda muruwanze rwomukati. Avazoroori shirikadzi nokuti uwo wakarambwa; asi vanozoroora mhandara dzorudzi rwemhatso yaIsuraeri, nokuti shirikadzi yaiya yakaroorwa ngomupristi. Vanozodzidzisa vanhu vangu muparadzaniso pakati pezvakachena nezvisikazi kuchena, nokuvaonisa muparadzaniso pakati pezvisikazi kusukika nezvakasukika. Mukuphikisana mundaa vanozoema kudai ngevatongi, navo vanozoigura kudai ngezvitongero zvangu.Vanozongwarira mipango yangu nezviemeso zvangu mumishongano yangu yeshe yokudya yendakaemesa, vanozongwarira maSabatha angu akachena. “Vasazokwedzera kunomunhu wakafa, kuti vasadzisvipisa; asi baba nokuti mai, eya, nokuti mukororo nokuti mwanasikana, nokuti mukoma nokuti mukunda usina kuroorwa, vangadzisvipisa. Ngesure apo asukika, vanozomuerengera mazuva manomwe. Pazuva raanozopinda mundau yakachena, muruwanze rwomukati, kuti ashandire mundau yakachena, unozopira mudiro wake wokushaisha, unoronza Mambo Mwari, Mwari. Ichi chinozoita nhaka yavo: Inini ndiri nhaka yavo, nemwi amuzovapi nhaka muIsuraeri, inini ndini nhaka yavo. Vanozodya midiro yezviyo, midiro yokushaisha, midiro yokupauka; zveshe zvakapirwa muIsuraeri zvinozoita zvavo. Mitanguro yemichero yeshe, yembeu dzeshe, nomudiro weshe wembeu yeshe, nokubva kumidiro yenyu yeshe, zvinozoita zvevapristi; imwimwiwo munozopa vapristi chikanya chimwe chokutanga, kuitira kuti zvifumiso zviuye mumhatso yenyu. Vapristi avazodyi nokuti ngechiri chakadzifira, nokuti icho chakabvajurwa, kunyazwi iri shiri nokuti mhuka.” Naapo munokoanisa nyika ngemabhigidha kuita nhaka, munozoemesa parutii kuita chipo kunaMambo Mwari chikoaniswa chakachena chenyika, kureba kwayo makhiromitha gumi nemairi nehafu, nokupamhama kwayo makhiromitha gumi. Ichi chinozoita chakachena kumigano yacho yeshe yakatendenedza. Kubva kuneichi ndau yakaedzana marutii eshe, mamitha mazana mairi nemakumi mashanu kureba nokupamhama, inozoita ndau yakachena, noruwanze ngemarutii; eshe mamitha makumi mairi nemashanu kupamhama kuitendenedza. Mundau yakachena unozopima kurutii makhiromitha gumi nemairi nehafu kureba, kupamhama makhiromitha mashanu, mukati mwayo munozoita ndau yakachena nendau yakapindisisa kuchena. Runozoita rupande rwakachena rwenyika; inozoita yevapristi, avo vanoshandira mundau yakachena, nokukwedzera pasinde naMambo Mwari kumushandira; nayo inozoita ndau yemhatso dzavo, nendau yakachena yougaro hwakachena. Ndau imweni, makhiromitha gumi nemairi nehafu kureba, nemakhiromitha mashanu kupamhama, inozoitwa yavaRevhi, avo vanoshandira mutemperi kuita nhaka yavo madhorobha makumi mairi. Pasinde pendau yakachena ndau imweni, makhiromitha gumi nemairi nehafu kureba, nemakhiromitha mairi nehafu kupamhama, inozoemeswa parutii kuita dhorobha; rinozoita remhatso yeshe yaIsuraeri. Mutongi unozowa nechikoaniswa chenyika kumarutii eshe enyika yakacheneswa, neyenhaka yedhorobha, ngepamberi pechipo chakachena, nepamberi penhaka yomudhorobha, ngorupande rwokumabirirazuva nokurupande rwokumabvazuva kuenda kumabvazuva; zvechiedzana muurebu kunechime chezvikoaniswa zvemadzinza, kubvira kumugano wokumabirirazuva kuenda kumugano umwe wokumabvazuva enyika. Iyi inozoita nhaka yake muIsuraeri. Nevatongi vangu avachazotambudzi nakamwe vanhu vangu, asi vanozoita kuti vemhatso yaIsuraeri ipuwe nyika kudai ngokuteererana kwemadzinza avo. Izvi ndizvo zvinoronza Mambo Mwari, Mwari: “Zvakwana, O vatongi vaIsuraeri! Dusai kugebenga nokutambudza, muite kutonga kwakanaka, nokururama. Rekerai kuangiridzwa kwenyu vanhu vangu, unoronza Mambo Mwari, Mwari. Munozoa nezvipimo zvakarurama, nechipimo cheefa chakarurama, nechipimo chebhathi chakarurama. Chipimo cheefa nechebhathi zvinozoita zvipimo zvimwezvo, kuti bhathi riano rupande rumwe rwechegumi rwehoma, neefa riano rupande rumwe rwechegumi rwehoma; homa ndicho chipimo chinozoshandiswa. Nechipimo cheshekeri chinozoita magera makumi mairi. Mashekeri makumi mairi, nemashekeri makumi mairi namashanu, nemashekeri gumi nemashanu, eshe anozoita chipimo chemina chimwe kwomuri. Ichi ndicho chipo chomunozopa: rupande rwechitanhatu rweefa kubva kunehoma yekoroni, nemwi munozopa rupande rwechitanhatu rweefa kubva kunehoma yebhare, nokudai ngechiemeso chechikoaniswa chamafuta, chimwe chegumi chebhathi remafuta, kubva kuhoma imwe, kudai ngehoma imwe inemabhathi gumi; hwai rimwe kubva mumutanga wemazana mairi, kubva kumufuro wakanasa kusvipira waIsuraeri.Uyu mudiro wezviyo nomudiro wokupisha nemidiro yokunyarara, kuita kuiyaniswa kwevari, unoronza Mambo Mwari, Mwari. Vanhu veshe venyika vanozobatana pamwepo nomutongi muIsuraeri mukupa chipo ichi. Asi izvi zvinosisira kuita mushando womutongi, kuti apire midiro yokupisha neyezviyo neyokumwa, ngemikuwo yemadhiri, mwedzi mitsva, nemaSabatha, eshe madhiri akaemeswa emhatso yaIsuraeri: unozonasirira midiro yokushaisha, midiro yezviyo, midiro yokupisha, nemidiro yokunyarara, kuita kuiyaniswa kwevemhatso yaIsuraeri. “Izvi ndizvo zvinoronza Mambo Mwari, Mwari: Mumwedzi wokutanga, pazuva rokutanga romwedzi, unozotora mukono mutsva usina gotsa, nokuchenesa ndau yakachena. Mupristi unozotora imweni yengazi yomudiro wokushaisha, nokuiisa padera pesika dzomusiwo wetemperi, nepadera pemakhona marongomuna egomo rearita, nepadera pesika dzomusiwo woruwanze rwomukati. Unozoita zvakatodzana kudaro ngezuva rechinomwe romwedzi ngendaa yomunhu weshe unoshaisha, ngokuphambekwa nokuti unoshaisha ngokusikazia; ndizvo munozoita muripo wetemperi. “Mumwedzi wokutanga, pazuva regumi nemarongomuna romwedzi, munozongwarira Phasika, nedhiri remazuva manomwe rechingwa chisina mumera munozoridya. Pazuva iro mutongi unozodzinasirira pachake nevanhu veshe venyika mukono kuita mudiro wokushaisha. Mumazuva manomwe ehdiri unozonasirira mudiro wokupisha kunaMambo Mwari, mikono minomwe mitsva nemagondohwe manomwe zvisina gotsa; unozozvipira zuva rimwe ngarimwe remazuva manomwe, negotokoto rinozopirwa zuva ngezuva kuita mudiro wokushaisha. Unozonasira mudiro wezviyo efa rimwe roufu kumukono umwe ngaumwe, neefa roufu kugondohwe rimwe ngarimwe, nehini ramafuta kuefa rimwe ngarimwe. Mumwedzi wechinomwe, pazuva regumi nemashanu romwedzi nomumazuva manomwe edhiri, unozonasirira zvakatodzana, kudai ngomudiro wokushaisha, ngomudiro wokupisha, ngomudiro wezviyo, nokudai ngomudiro wemafuta. “Izvi ndizvo zvinoronza Mambo Mwari, Mwari: Musiwo woruwanze rwomukati uwo wakaringira kumabvazuva unozogara wakakonywa mazuva matanhatu okushanda evhiki; asi ngezuva reSabatha unozobeurwa, nezuva romwedzi mutsva unozobeurwa. Mutongi unozopotera ngenjira yomuberere romusiwo wokubanze, naye unozoema pasika dzomusiwo. Vapristi vanozopira mudiro wake wokupisha, nemidiro yake yokunyarara, naye unozodira akagwadama padimba romusiwo. Zvino unozobuda kubanze, asi musiwo uwo auzokonywi metsa madeekoni. Vanhu venyika vanozodira vari pokupinda ndipo pamusiwo pamberi paMambo Mwari ngemaSabatha neyokutawa kwomwedzi mitsva. Mudiro wokupisha waanozopira mutongi kunaMambo Mwari ngezuva reSabatha unozoita zvimakwai zvitanhatu zvisina ndemo negondohwe risina ndemo. Nomudiro wezviyo negondohwe unozoita efa rimwe nomudiro wezviyo nezvimakwai unozoita kudai ngezvaanokona kupa, pamwepo nehini remafuta kuefa rimwe ngarimwe roufu. Pazuva rokutawa kwomwedzi unozopira mukono mutsva usina ndemo, nezvimwakwai zvitanhatu negondohwe, zvinozoita zvisina ndemo. Kudai ngomudiro wezviyo unozonasirira efa nomukono, kugondohwe rimwe, nokune zvimakwai unozopa kudai ngezvaanokona kupa, pamwepo nehini ramafuta rinozopirwa kuefa rimwe ngarimwe. Naapo mutongi echipotera, unozopotera mukati ngenjira yomuberere romusiwo, naye unozobuda ngenjira imweyo. “Naapo vanhu venyika vechiuya pamberi paMambo Mwari kumadhiri akaemeswa, kunyazwi ndiani unopinda ngenjira yomusiwo wedera koodira, unozobuda ngenjira yomusiwo wokubani; kunyazwi ndiani unopinda ngenjira yomusiwo wokubani, unozobuda ngenjira yomusiwo wedera; aazopetuki ngenjira iyo yaapinda ndiyo, asi unozobuda ngouwo musiwo wakaringirana newaapinda ndiwo. Naapo vapinda mukati, mutongi unozopotera navo; naapo voobuda, unozobudawo. Pamadhiri nepanguva dzakaemeswa, mudiro wezviyo efa pamukono mutsva umwe, neefa pagondohwe rimwe, pane kakwai unozopa kudai ngezvaanokona kupa, pamwepo nehini remafuta paefa rimwe. “Naapo mutongi anasirira mudiro wokupa ngokuda, kunyazvi mudiro wokupisha nokuti midiro yokunyarara, mudiro unopirwa ngokuda kunaMambo Mwari, musiwo wakaringira kumabvazuva unozobeurwa iye; naye unozopira mudiro wake wokupisha nemidiro yake yokunyarara, kudai ngezvaanoita ngezuva reSabatha. Zvino unozobuda kuenda; naapo abuda kubanze, musiwo unozokonywa. “Unozonasirira kakwai kanegore rimwe kasina ndemo, kuita mudiro wokupisha kunaMambo Mwari zuva ngezuva; mangwanani eshe unozoinasirira. Naye unozonasirira mudiro wezviyo pamwepo nawo mangwanani eshe, rupande rwechitanhatu rweefa, norupande rwechitatu rwehini remafuta, kukanya ufu hwakamotseka, kuita mudiro wezviyo kunaMambo Mwari; ichi chiemeso chisina magumo. Ndiko kakwai nomudiro wezviyo nemafuta anozonasirirwa mangwanani eshe, kuita mudiro wokupisha nguva dzeshe. “Izvi ndizvo zvinoronza Mambo Mwari, Mwari: Kudai mutongi echipa chipo kuneumwe wevakororo vake, chinozoita nhaka yake; chinozoita chevakororo vake, chinozoita chavo ngokuchigara nhaka. Asi kudai iye echizopa chipo kubva panhaka yake kuneumwe wevaranda vake, chinozoita chake metsa kuguma kugore rokusunhurwa; zvino chinozohwirinzwa kumutongi; vakororo vake vega ndivo vanongwarira chipo kubva kunhaka yake. Mutongi aazotori nhaka yevanhu kuvadzinga kubva kunhaka yavo; unozopa kuvana vake nhaka inobva kunhaka yake, kuitira kuti pasaa naumwe wevanhu vangu unozoduswa kubva kunhaka yake.” Wakandiunza ngepokupotera ndipo mukati, apo paiya ngokurutii rwemusiwo wakaringira dera, kupotera mukati mwemakamera akachena evapristi; naapo ndakaonapo ndau ngesure kworutii rwawo rwokumabirirazuva. Wakati kwendiri, “Iyi ndiyo ndau pevanozobikira vapristi midiro yokupauka nemidiro yokushaisha, nepevanozokocha mudiro wezviyo, kuti vasazoibudisa kuruwanze rwokubanze, apo pevanochenesa vanhu.” Zvino wakandibudisa kuruwanze rwokubanze, wakaita kuti ndipinde ngepamakhona marongomuna oruwanze; ringira, kumakhona eshe oruwanze kwaiyapo ruwanze, mumakhona marongomuna oruwanze mwaiya nemaruwanze madoko mamitha makumi mairi kureba, nemamitha gumi nemashanu kupamhama; makhona marongomuna aiya nechipimo chakatodzana. Mukati, kutenderera maruwanze marongomuna paiya nomusara, wakaakiwa ngemapuwe, paiya nezvichoto zvokubikira pashi pemisara yakatendenedza. Zvino wakati kwendiri, “Aya ndiwo makamera okubikira, apo panobikirwa mibairo yevanhu ngeavo vanoshandira mutemperi.” Zvino wakandipetudzazve sure kumusiwo wetemperi; ringira, mvura yaivheruka kubuda pashi pedimba kuerera kuenda kumabvazuva (ngokuti temperi raiya rakaringira kumabvazuva;) nemvura yakaerera kudzaka kubva kurutii rwokubani rwedimba retemperi, ngokurutii rwokubani rwearita. Zvino wakandiunza kubanze ngenjira yomusiwo wedera, naye wakanditungamirira ngokubanze kumusiwo wokubanze wakaringira kumabvazuva; ringira, kwaierera mvura ngokurutii rwokubani. Echienda kumabvazuva nebote munyara mwake, munhu wakapima mamitha mazana mashanu, echidzaka nechinyuka kuenda neni ngomumvura, nemvura yakagumira mumadziso etsoka. Zve, wakapima mamitha mazana mashanu amweni, akandipinza ngomumvura; mvura yakagumira mumabvi. Zve, wakapimazve mamitha mazana mashanu, akandipinza pamberi ngomumvura kudzaka; mvura yakagumira muzviunu. Zve, wakapima mamitha mazana mashanu kupinda pokutanga; nayo yakaita rwizi rwendisikazi kukona kuambuka, ngokuti mvura yaiya yakwirira; yaiya yadzama kuti mungashambira mukati mwayo, rwizi rusikaambukiki. Wakati kwendiri, “Mukororo womunhu, waona izvi here?” Naapo wakandipetudza sure kumahumbikumbi orwizi. Naapo ndapetuka, ringira, pamahumbikumbi paiya nemiti yakawanda kurutii rumwe rwehumbikumbi nokurutii rumweni rwehumbikumbi. Wakati kwendiri, “Iyi mvura inovheruka kuerera kuenda kunyika dzokumabvazuva, inodzaka kuenda Arabha, naapo peinopinda muruandhle rwemvura isikahambi, mvura inozonakiswa. Kunyazwi ngepari panoguma ndwizi mbiri, chisikwa cheshe chinohambamwo chinozopona; kunozoapo hove dzakawanda kakurutu, kamwe iyi mvura inogumapo.Inozoitwa yakanaka nezviro zveshe zvinozorarama kundau dzeshe kweinoguma. Vanhu vanozoemapo vechibata hove, kubvira Engedhi metsa kuguma Enegiraimu; inozoita ndau dzokuanikira zvitaa; hove dzarwo dzinozoita dzembeu dzakawanda, kudai ngehove dzoRuandhle Rukuru. Asi ndau dzine madhaka dzarwo, nendau dzezviteetee adzizonaswi, dzinozosiiwa kuita dzomunyu. Pamahumbikumbi, kumarutii eshe endwizi, kunozokura miti yembeu yeshe yemichero inodyiwa. Mashakani ayo aazofoti, nokuti michero yayo aizokoreri; asi inozobereka michero yakanaka mwedzi yeshe, ngokuti mvura yayo inovheruka kuerera kubva kundau yakachena. Michero yayo inozoita yokudya, nemashakani ayo anozoita mutombo.” “Izvi ndizvo zvinoronza Mambo Mwari, Mwari: Iyo ndiyo migano, yomunozogura ndiyo nyika, kuita nhaka pakati pemadzinza gumi nemairi aIsuraeri. Josefa unozoita zvikoaniswa zviiri. Munozoigura ngokuedzanisa; ndakapika kuipa kunemadzibaba enyu, nenyika iyi inozowira kwomuri kuita nhaka yenyu. “Nouyu unozoita mugano wenyika: Kurutii rwedera, kubva kuRuandhle Rukuru, ngenjira inoenda Hethironi, metsa kuguma Rebhohamathi, nokuenda Zedhadhi; Bherotha, Sibhiraimu, iro riri pakati pomugano weDhamasekusi nepomugano weHamathi, neHazerihatikoni, riri mumigano yeHaurani. Ndizvo mugano kubvira kuruandhle kuenda Hazarenoni, pamugano weDhamasekusi ngedera, unozodarika nomugano weHamathi ngedera. Urwo ndirwo rutii rwedera. “Norutii rwokumabvazuva, munozopima kubvira pakati peHaurani neDhamasekusi, kuteera Jorodhani pakati peGireadhi nenyika yaIsuraeri, munozopima metsa kuguma kuruandhle rwokumabvazuva metsa kuguma Thamari. Urwu ndirwo rutii rwokumabvazuva. Norutii rwokubani runozodarika kubvira Thamari metsa kuguma kumvura yeMeribhathikadheshi, metsa kuguma kuRwizi rweEgipite, kudarika kuguma kuRuandhle Rukuru. Urwu ndirwo rutii rwokubani. Kurutii rwokumabirirazuva Ruandhle Rukuru runozoita mugano kubvira pakaringirana neRebhohamathi. Urwu ndirwo rutii rwokumabirirazuva. “Ndizvo munozogurirana nokukoanisa iyi nyika pakati penyu kudai ngokuteererana kwemadzinza aIsuraeri. Munozoita mabhigidha kuikoanisa pakati penyu kuita nhaka yenyu, nokuvapara vanogara pakati penyu, vane vana vari pakati penyu. Vanozoita kwomuri kudai ngeavo vakabarwa munyika ngevanhu vaIsuraeri; nemwi vanozoita mabhigidha enhaka pakati pedzinza raIsuraeri. Kunyazwi ngeriri dzinza raanogara mupara, munozomupa nhaka yake,” unoronza Mambo Mwari. Aya ndiwo mazina emadzinza: Kubvira kumugano wedera ngepanjira inoenda Hethironi, kubva Rebhohamathi metsa kuguma Hazarenoni, iro riri pamugano weDhamasekusi neHamathi ngedera, wechienda kubvira ngokumabvazuva nokumabirirazuva, Dhani chikoaniswa chimwe. Pasinde penyika yaDhani, kubvira kurutii rwokumabvazuva metsa kuguma kurutii rwokumabirirazuva, Asha chikoaniswa chimwe. Pasinde penyika yaAsha, kubvira ngokurutii rwokumabvazuva metsa kuguma kurutii rwokumabirirazuva, Nafitari chikoaniswa chimwe. Pasinde penyika yaNafitari, kubvira ngokurutii rwokumabvazuva metsa kuguma kurutii rwokumabirirazuva, Manase chikoaniswa chimwe. Pasinde penyika yaManase, kubvira kurutii rwokumabvazuva metsa kuguma kurutii rwokumabirirazuva, Efuremu chikoaniswa chimwe. Pasinde penyika yaEfuremu, kubvira kurutii rwokumabvazuva kuguma kurutiii rwokumabirirazuva, Rubheni chikoaniswa chimwe. Pasinde penyika yaRubheni, kubvira kurutii rwokumabvazuva metsa kuguma kurutii rwokumabirirazuva, Judha chikoaniswa chimwe. Pasinde penyika yaJudha, kubvira kurutii rwokumabvazuva metsa kuguma kurutii rwokumabirirazuva, chinozoita chikoaniswa chomunozoemesa parutii makhiromitha gumi nemairi nehafu kupamhama, nomuurebu chakaedzana nechikoaniswa chimwe chemadzinza kubvira kumabvazuva kuguma kumabirirazuva, nendau yakachena inozoita pakati payo. Chikoaniswa icho chomunozopa kunaMambo Mwari chinozoita kupimwa ngetsanga makhiromitha gumi nemairi nahafu kureba, nemakhiromitha gumi kupamhama. Izvi zvikoanisiro zvakachena chinozoita chipo chevapristi, chinopimwa ngetsanga makhiromitha gumi nemairi nehafu kureba ngedera kuguma kubani, tsanga inoita makhiromitha mashanu kupamhama ngokumabirirazuva, nemakhiromitha gumi kupamhama ngokumabvazuva nemakhiromitha gumi nemairi nehafu kureba ngokubani, nendau yakachena yaMambo Mwari ngomukati mwacho. Iyi inozoita yevapristi vakacheneswa, mibarirwana yaZadhoki, avo vakangwarira zviemeso zvangu, vasikazi kupauka apo vanhu vaIsuraeri vakapauka, kudai ngezvevakaphuka vaRevhi. Chinozoita chavo kuita chikoaniswa chakanaka chinobva pachikoaniswa chakachena chenyika, ndau yakapindisisa kuchena, panoguma panyika yevaRevhi. Pasinde penyika yevapristi, vaRevhi vanozoita chikoaniswa chinoita makhiromitha gumi nemairi nehafu kureba, nemakhiromitha mashanu kupamhama. Urebu hweshe hunozoita makhiromitha gumi nemairi nehafu, kupamhama makhiromitha gumi. Avachazotengesi nokuti kutenganisa chimwe chacho, avazobvisi ichi chakanakisisa chikoaniswa chenyika, ngokuti yakachena kunaMambo Mwari. Ndau yakasara inetsanga inoita makhiromitha gumi nemairi nehafu kureba nemakhiromitha mairi nehafu kupamhama, inozoita ndau inokushandiswa kuiswa zviro zvisina shwiro zvomudhorobha, kuita ndau yokugara neyenharaunda. Pakati payo panozoita dhorobha; neizvi ndizvo zvipimo zvayo: marutii marongomuna akaedzana, mamitha makumi emazana mairi namazana mairi nemakumi mashanu (2,250) kumarutii eshe. Dhorobha rinozoa nenharaunda: Kubvira kurutii rwedera mamitha zana nemakumi mairi nemashanu (125), rutii rwokubani mamitha zana nemakumi mairi nemashanu (125), rutii rwokumabvazuva mamitha zana nemakumi mairi nemashanu (125), norutii rwokumabirirazuva zana nemakumi mairi nemashanu (125). Rupande rwakasara mukureba urwo rwakaemesedzana nechipo chakachena runoita makhiromitha mashanu kureba kumabvazuva, nemakhiromitha mashanu kumabirirazuva, narwo runozoemesedzana nechipo chakachena. Zvinozobudamwo zvinozoita kudya kwevari vanoshanda mudhorobha. Vashandi vomudhorobha vanobva kumadzinza eshe aIsuraeri vanozoirima. Chikoaniswa cheshe chounozoemesa parutii chinozoita marupande akaedzana, makhiromitha gumi nemairi nehafu kumarutii eshe, chikoaniswa chakachena, pamwepo nenhaka yedhorobha. Zvinosara kumarutii eshe echikoaniswa chakachena, nenhaka yedhorobha zvinozoita zvomutongi. Chinozoangira kupararira kubvira kumabvazuva makhiromitha gumi nemairi nehafu yechikoaniswa chakachena ngokumugano kuenda kumabirirazuva kubvira pamakhiromitha gumi nemairi nehafu kuguma kumugano wokumabirirazuva, yakaemesedzana nezvikoaniswa zvemadzinza, inozoita chikoaniswa chakachena chomutongi; nendau yakachena yetemperi inozoa pakati payo. Nhaka yevaRevhi neyedhorobha inozoita pakati peicho chiri nhaka yomutongi. Chikoaniswa chomutongi chinozoita pakati pomugano waJudha nowaBhenjamini. Ngendaa yemadzinza asara: Kubvira kurutii rwokumabvazuva metsa kuguma kurutii rwokumabirirazuva, Bhenjamini chikoaniswa chimwe. Pasinde penyika yaBhenjamini, kubvira kurutii rwokumabvazuva, metsa kuguma kurutii rwokumabirirazuva Simeoni chikoaniswa chimwe. Pasinde penyika yaSimeoni, kubvira kurutii rwokumabvazuva metsa kuguma kurutii rwokumabirirazuva, Isakha chikoaniswa chimwe. Pasinde penyika yaIsakha, kubvira kurutii rwokumabvazuva metsa kuguma kurutii rwokumabirirazuva, Zebhuruni chikoaniswa chimwe. Pasinde penyika yaZebhuruni, kubvira kurutii rwokumabvazuva metsa kuguma kurutii rwokumabirirazuva, Gadhi chikoaniswa chimwe. Pasinde penyika yaGadhi, ngokurutii rwokubani, nokudarika kuenda kubani, mugano unobvira Thamari metsa kuguma kumvura yeMeribhathikadheshi, nokuguma kuRwizi rweEgipite, kupinda kuenda kuRuandhle Rukuru. “Iyi ndiyo nyika yomunozokoanisirana ngokuita mabhigidha kuita nhaka pakati pemadzinza aIsuraeri, neizvi ndizvo zvikoaniswa zvawo,” unoronza Mambo Mwari. Iyi ndiyo misiwo yokubuda ndiyo yedhorobha: Kurutii rwedera zvipimo zvetsanga zvinoita mamitha makumi emazana mairi nemazana mairi nemakumi mashanu (2,250), misiwo mitatu, musiwo waRubheni, musiwo waJudha nomusiwo waRevhi, misiwo yedhorobha inozodudzwa ngemazina emadzinza aIsuraeri. Kurutii rwokumabvazuva zvipimo zvetsanga zvinoita mamitha makumi emazana mairi nemazana mairi nemakumi mashanu (2,250), misiwo mitatu, musiwo waJosefa, musiwo waBhenjamini nomusiwo waDhani. Kurutii rwokubani zvipimo zvetsanga zvinoita mamitha makumi emazana mairi nemazana mairi nemakumi mashanu (2,250), misiwo mitatu, musiwo waSimeoni, musiwo waIsikha nomusiwo waZebhuruni. Kurutii rwokumabirirazuva zvipimo zvetsanga zvinoita mamitha makumi emazana mairi nemazana mairi nemakumi mashanu (2,250), misiwo mitatu, musiwo waGadhi, musiwo waAsha nomusiwo waNafitari. Kupimwa kweshe kwedhorobha kunozoita mamitha makumi emazana mapfumbamwe (9,000). Zina redhorobha kubvira ngeiro zuva rinozozwi, “Mambo Mwari Urimwo.” Mugore rechitatu rokutonga kwaJehoiakimu mambo waJudha, Nebhukhadhineza mambo weBhabhuroni wakauya Jerusarema, akarikomba. Mambo Mwari wakaita kuti Jehoiakimu mambo waJudha awire munyara mwake, pamwepo nezvidziyo zvimweni zvemhatso yaMwari. Izvi wakazvitwara kuenda kunyika yeShina, kumhatso yechimwari chake. Wakaunza zvidziyo kumhatso youpfumi hwechimwari chake. Zvino mambo wakapanga nduna yengome yake Ashipenazi, kuti apotedze vamweni vevana vaIsuraeri, vaiya voumambo nevatongi majaha, vasina chakashata kwevari, vakanaka, ngwazi muungwaru hweshe, vakazara ngokuzia nokuzwisisa zvinouya, ngwazi dzokuema mungome yamambo, kuti vadzidziswe dzidziso nendimi yevaKharadhea. Mambo wakavaemesera chikoaniswa chokudya kwemazuva eshe kwamambo, zvokudya nevhini zvaidya mambo. Vaizodzidziswa makore matatu, kuitira kuti ngokupera kwawo vakone kuema mungome pamberi pamambo. Pakati pavo paiya naDhanieri, Hanania, Mishaeri naAzaria kubva kudzinza raJudha. Nduna yengome yamambo yakavadudza mazina amweni: Dhanieri wakadudzwa kuti Bheriteshaza; Hanania, Shadhirakhi; Mishaeri, Meshakhi; Azaria, Abhedhinego. Asi Dhanieri wakaemesa mumwoyo mwake kuti aazodzisvipisi ngokudya nokumwa kwamambo; ndizvo wakakumbira kunenduna huru kuti asazodzisvipisa. Zvino Mwari wakaita kuti Dhanieri aone nyasha norudo kukungurirwa pamberi penduna yengome. Nduna yengome yakati kunaDhanieri, “Ndinotya mambo wangu mambo, uwo waemesa kudya kwenyu nokumwa kwenyu. Kudai echizoona hope dzenyu dzakapinda kuonda kunedzevana vamweni vari ndanga dzenyu, ngokudaro mwandiisa mungozi yokugurwa soro rangu ndimambo.” Zvino Dhanieri wakakumbira mungwariri, uwo wakaemeserwa ngenduna yengome padera paDhanieri, Hanania, Mishaeri, naAzaria, “Ndapota, edza varanda vako mazuva gumi. Ngatipuwe miriwo yokudya nemvura yokumwa. Ungazokona kuedzanisa hope dzedu kuringirika kwadzo nokuringirika kwehope dzemajaha awo vanodya kudya kwamambo; newe uitire varanda vako kudai ngezvounoona.” Ndizvo wakatenderana nokukumbira uku, akavaedza mazuva gumi. Pakupera kwemazuva gumi, hope dzavo dzakaoneka dzakapinda kunaka, nokupinda kukora kune dzemajaha awo aidya kudya kwamambo. Ndizvo mungwariri wakaangira kubvisa kudya kwavo kwoumambo nevhini revaizomwa, akavapa miriwo. Kune aya majaha marongomuna, Mwari wakavapa kuzia ungwazi mukudzidza kweshe nomuungwaru; Dhanieri wakazwisisa zvioniso zveshe nehope dzairotwa. Pakupera kwenguva yakaemeswa ndimambo kuti vapotedzwe mukati, nduna yengome yakavapotedza pamberi paNebhukhadhineza, namambo wakaereketa navo. Nepakati pavo veshe akuna naumwe wakaoneka akadai ndiDhanieri, Hanania, Mishaeri naAzaria; ndizvo vakaemeswa pamberi pamambo. Nomundaa dzeshe dzoungwaru dzokuzwisisa nokuzia zvaakavabvunza ndizvo mambo, wakaona kuti vaipinda kunaka kagumi kuneman'anga eshe nevanomukirwa vaiya muumambo hwake hweshe. NaDhanieri wakaangira kugarapo metsa gore rokutanga ramambo Sairusi. Mugore rechipiri rokutonga kwaNebhukhadhineza, Nebhukhadhineza wakarota hope; mweya wake wakatambudzwa nehope dzake dzakatiza. Ndizvo mambo wakapanga kuti kudaidzwe man'anga, vanomukirwa, vakambi, nevaKkaradhea, kuti varonzere mambo hope dzake. Naapo pevakauya, vakaema pamberi pamambo, wakati kwevari, “Ndakarota hope, nomweya wangu unotambudzika ngokuda kuzwisisa hopedzo.” VaKharadhea vakati kunamambo ngechiAramu vechiti, “O mambo, pona mhera nariini! Ronzerai varanda venyu hope, nesu tinozoonisa kududzirwa kwadzo.” Mambo wakapingura vaKharadhea, akati, “Ndaemesa mwoyo wangu kuti, mwakorera kundironzera zveshe, hope nokududzirwa kwadzo, munozotemwa kuita zvigurwa, nemhatso dzenyu dzinozoita matongo. Asi kuti mukandironzera hope nokududzirwa kwadzo, munozoashira zvipo nemithuso, nokuremeredzwa kwakakura. Ndizvo ndironzerenyi hope nokududzirwa kwadzo.” Vakapingura kwechipiri, vakati, “Mambo ngavatange kuronzera varanda vake hope, zvino tinozoronza kududzirwa kwadzo.” Mambo wakapingura, akati, “Ndinozia ngegwinyiso kuti munoda kuona mukuwo, ngokuti munoona kuti mutemo uyu waemeswa ndini. Asi kuti musikandironzeri hope, chiripo chironzo chimwe kwomuri. Imwimwi mwatenda kuereketa mazwi okunyepa neanopaukisa pamberi pangu, metsa mukuwo upinde. Ndizvo ndironzerei hope, neni ndinozozia kuti munokona kundironzera nokududzirwa kwadzo.” VaKharadhea vakapingura pamberi pamambo vechiti, “Akuna munhu naumwe padera penyika ungakona kuronza ndaa yamambo! Ngegwinyiso akuna mambo, kunyazwi mukuru nounesimba, wakambobvunza chiro chakadaro kubva kun'anga, nokuti uwo unomukirwa, nokuti muKharadhea. Chiro chaanobvunza mambo chakakonza kakurutu, akuna naumwe ungakona kuchironza pamberi pamambo, kwega zvimwari izvo ugaro hwazvo husiri pakati pevanhu.” Ngeiyi ndaa mambo wakanyangadzwa, akazadzwa ngoushungu hukurutu, akapanga kuti vanhu veshe vakangwara veBhabhuroni vaurawe. Ndizvo mutemo wakabudiswa kuti vanhu vakangwara vaurawe, navo vakatsvaka Dhanieri nevangani vake kuvauraya. Zvino Dhanieri wakapingura ngokuzia nokungwara kunaAriokhi, nduna yevangwariri vamambo, iyo yakabuda koouraya vanhu vakangwara veBhabhuroni. Wakabvunza Ariokhi nduna yamambo echiti, “Ngenyi mutemo wamambo wechida kuitika ngokukasira kudaro?” Zvino Ariokhi wakaziisa Dhanieri ndaa. Ndizvo Dhanieri wakapotera, akakumbira kunamambo kuti amuemesere mukuwo, nokuti waizoronzera mambo dudziro. Zvino Dhanieri wakaenda kumhatso yake, akaziisa vangani vake Hanania, Mishaeri naAzaria, nokuvaronzera kuti vakumbire nyasha kubva kunaMwari womudenga ngendaa yeichi chakafishika, kuti Dhanieri nevangani vake, pamwepo nevamweni vangwaru veBhabhuroni vasafa. Zvino chakafishika chakaoniswa kunaDhanieri muchioniso chousiku, naDhanieri wakakudza Mwari womudenga. Dhanieri wakati, “Ngarikudzwe zina raMwari mhera nariini nariini, ngokuti ungwaru nesimba ngezvake. Unotsandudza mikuwo nenguva, unobvisa madzimambo, nokuemesa madzimambo; unopa ungwaru kunevakangwara nokuzia kwevari vanokuzwisisa. Unobudisa zviro zvakadzama nezvakafishika; unozia zviri muchidima, nokujeka kunogara naye. O kweuri, Mwari wemadzibaba angu, ndinokubonga nokukukudza, ngokuti wandipa ungwaru nesimba, nazvino waonisa kwendiri icho chetakakumbira kwouri, ngokuti wakazvionisa kwetiri ndaa yezvaakapanga mambo.” Ndizvo Dhanieri wakapotera kunaAriokhi, uwo waakaemesa mambo kuuraya vanhu vakangwara veBhabhuroni, akaronza izvi kwaari kuti, “Usauraya vanhu vakangwara veBhabhuroni; ndiunze pamberi pamambo, neni ndinozodudzira kunamambo zvedzinoronza.” Zvino Ariokhi wakapotedza Dhanieri pamberi pamambo ngokukasira, akati kwaari, “Ndaona munhu pakati pevakabatwa vanobva kwaJudha, munhu unokona kuronzera mambo kududzirwa kwehope.” Mambo wakati kunaDhanieri, uwo zina rake raizwi Bheriteshaza, akati, “Unokona here kundironzera hope dzendakarota, nodudziro yadzo?” Dhanieri wakapingura mambo akati, “Akuna munhu wakangwara, n'anga, mufemberi, unomukirwa ungakona kuonisa mambo zvakafishika zvaanobvunza mambo, asi uripo Mwari mudenga uwo unoonisa zvakafishika, naye wazvionisa kunamambo Nebhukhadhineza chinozoitika kumazuva okugumisira. Hope dzako, nezvioniso zvesoro rako pamubhedhi wako, ndizvo izvi. “Kweuri, O mambo, mipinimidzo yako yakauya uri pamubhedhi wako ngechaizoitika ngesure kwouku, nouwo unoonisa zvakafishika wakaziisa kwouri chinozoitika. Asi kudai ndini, ichi chakafishika achizi kuoniswa kwendiri ngoungwaru hwendinahwo kupinda veshe vanopona, asi kuti kududzirwa kuziikanwe kunamambo, nokuti uzwisise mipinimidzo yomwoyo wako. “Iwewe wairingira, O mambo, ringira, muedzaniso mukuru. Uyu muedzaniso waiya wakakura, nokun'anikira kwawo kwaiya kwakanakisisa; wakaema pamberi pako, nokuringirika kwawo kwaityisa. Soro rouyu muedzaniso raiya romukore wakaera, diti rawo nemioko yawo zvaiya zvesirivha, ndani yawo nezvizva zvawo zvaiya zvethusi, mirenje yawo yaiya yesimbi, tsoka dzawo rupande rumwe rwaiya rwesimbi, rumweni rwedongo. Apo wakaringira, buwe rakagurwa, haiwa ngenyara yomunhu, rakawira pamuedzaniso patsoka dzawo dzesimbi nedongo, rikadziputsa kuita zvigurwa. Zvino simbi, dongo, thusi, sirivha nomukore, zvakaputswa zveshe kuita zvigurwa, zvikadai ngemazungu embuwa yepachirimo; nedutu rakazvitora, nepezvakaenda azvizi kuoneka. Asi buwe iro rakawira muedzaniso rakakura kuita dunhu guru, rikazadza nyika yeshe. “Idzi ndidzo hope dzacho; zvino tinozoronza dudziro radzo pamberi pamambo. Iwewe, O mambo, mambo wemadzimambo, kwouri Mwari womudenga wakapa umambo, kugwinya, simba, nouthende; munyara yako wakapa vanhu kunyazwi ngepari pevanogara, zvikara zvomushango neshiri dzomudenga, nouwo waakaemesa kuita, mutongi padera pazvo zveshe; ndiwe soro romukore. Ngesure kwako hunozobuda umambo humweni huri pashi kunehwako; umambo humweni hwechitatu hwakadai ngethusi hunozotonga padera penyika yeshe. Hunozoapo umambo hwechirongomuna hunozogwinya kudai ngesimbi; kudai ngesimbi inopwanya nokukuya zveshe, hunozopwanya nokukuya zveshe izvi. Kudai ngezvewakaona tsoka nezvikunwe, rupande rwazvo dongo romuumbi, norumweni simbi, unozoita umambo hwakaparadzana; asi kugwinya kumweni kwesimbi kunozoa mukati mwawo, kudai ngezvewakaona simbi yakakumanidzwa nedongo Kudai ngezvikunwe zvetsoka zvaiya rupande rwesimbi, norupande rwedongo, ngokudaro umambohwo hunozoita rupande rwakagwinya, norumweni runokasa kuguka. Kudai ngezvewakaona simbi yakakumanidzwa nedongo, ndizvo vanozodzikumanidza umwe neumweni ngokuroodzana nevanhu vamweni; asi avazobatani pamwepo umwe neumweni, kudai ngesimbi risikakumanidziki nedongo. Nomumazuva emadzimambo awo, Mwari womudenga unozoemesa umambo husikazoparadzwi, noumambo uhwu ahuzosiirwi vanhu vamweni. Hunozopwanya hweshe uhu umambo, nokuunza kumagumo, nahwo hunozoema mhera nariini; kudai ngezvewakaona kuti buwe rakagurwa kubva kumutunhu haiwa ngenyara, naro rakapwanya simbi, thusi, dongo, sirivha nomukore. Mwari mukuru wakaziisa mambo chinozoitika ngesure kweizvi. Hope dzinegwinyiso, nokududzirwa kwadzo kunegwinyiso.” Zvino mambo Nebhukhadhineza wakawa ngehope, akadira Dhanieri, akapanga kuti mudiro wezviyo upirwe newezvinegwema rakanaka uitwe kwaari. Mambo wakati kunaDhanieri, “Ngegwinyiso Mwari wako ndiMwari wezvimwari, naMambo wemadzimambo, nomuonisi wezvakafishika, ngokuti wakona kududzira ichi chakafishika.” Zvino mambo wakakudza Dhanieri, wakamupa zvipo zvakawanda zvakakura, akaita kuti atonge padera penyika yeshe yeBhabhuroni, nokumuita mukuru wevatongi vaiya padera pevanhu veshe vakangwara veBhabhuroni. Dhanieri wakakumbira kunamambo, naye wakaemesa Shadhirakhi, Meshakhi naAbhedhinego, padera pendaa dzenyika yeBhabhuroni. Asi Dhanieri waiya padzimbahwe pamambo. Nebhukhadhineza mambo wakaita muedzaniso womukore, kureba kwawo kwaiita mamitha makumi mairi nemanomwe nemamitha matatu kupamhama; wakauemesa murubaya rweDhura, munyika yeBhabhuroni. Zvino Nebhukhadhineza mambo wakatuma kuunganidza pamwepo nduna, vakuru voumambo, vatongi venharaunda, vapangi, vangwariri vepfuma, vaiyanisi vendaa, vatongi vendaa, nevatongi veshe venyika, kuti vauye pakugadzikwa kwomuedzaniso waakaemesa mambo Nebhukhadhineza. Ndizvo nduna, vakuru voumambo, vatongi venharaunda, vapangi, vangwariri vepfuma, vaiyanisi vendaa, vatongi vendaa, nevatongi veshe venyika, vakaunganidzwa pamwepo pakugadzikwa kwomuedzaniso waakaemesa mambo Nebhukadhineza. Naapo vakaema pamberi pomuedzaniso uwo waakaemesa Nebhukhadhineza, mudaidziri akadaidzira ngesimba, “Munopangwa, O vanhu, madzinza nendimi, kuti ngomukuwo womunozozwa kuridzwa kwegwama, munanzi, dimbwi, mbira, chimazambi, ngoma nembeu dzeshe dzokuridza, muwe pashi, mudire muedzaniso womukore waakaemesa mambo Nebhukhadhineza. Kunyazwi ndiani usikawi pashi nokudira, ngokukasira unozokandirwa mukati mwechoto chikuru chinobaka ngomuriro.” Ndizvo ngokukasira, apo vanhu veshe vakazwa kuridzwa kwegwama, munanzi, dimbwi, mbira, chimazambi, ngoma, nembeu dzeshe dzokuridza, vanhu veshe, madzinza nendimi, vakawa pashi, vakadira muedzaniso womukore waakaemesa mambo Nebhukhadhineza. Ndizvo ngouwo mukuwo vaKharadhea vamweni vakauya mberi, vakaitira ndaa vaJudha. Vakati kunamambo Nebhukhadhineza, “O mambo, pona mhera nariini! Iwewe, O mambo, wakaita mutemo, kuti vanhu veshe vechizozwa kuridzwa kwegwama, munanzi, dimbwi, mbira, chimazambi, ngoma, nembeu dzeshe dzokuridza, vanozowa pashi nokudira muedzaniso womukore. Kunyazwi ndiani usikawi pashi echidira, unozokandirwa mukati mwechoto chikuru chinobaka ngomuriro. Varipo vaJudha vamweni vowakaemesa padera pendaa dzenyika yeBhabhuroni, Shadhirakhi, Meshakhi naAbhedhinego; ava vamuna, O mambo, avazi kukupurutana. Avadiri zvimwari zvako, nokuti kudira muedzaniso womukore wowakaemesa.” Zvino Nebhukhadhineza muushungu hwakashata wakapanga kuti vaunzwe, Shadhirakhi, Meshakhi naAbhedhinego; ndizvo vakaunza avo vanhu pamberi pamambo. Nebhukhadhineza wakati kwevari, “Igwinyiso here, O Shadhirakhi, Meshakhi naAbhedhinego, kuti amutendi kushandira chimwari changu, nokuti kudira muedzaniso womukore wendakaemesa? Zvino kuti mwakanasirira apo pomunozozwa kuridzwa kwegwama, munanzi, dimbwi, mbira, chimazambi, ngoma, nembeu dzeshe dzokuridza, mukawa pashi nokudira muedzaniso wendakaita, zvakanaka. Asi musikadiri, munozokandirwa ngokukasira mukati mwechoto chinobaka ngomuriro. Ndiani chimwari chinozomununura kubva munyara dzangu?” Shadhirakhi, Meshakhi naAbhedhinego vakapingura mambo, “O Nebhukhadhineza, atitami kudzirwira muiyi ndaa. Kuti zvikaitika, Mwari wedu wetinodira unesimba rokutinunura kubva muchoto chikuru chinobaka ngomuriro, naye unozotinunura munyara yako, mambo. Asi kuti zvikakorera, ngakuziikanwe kwouri, O mambo, kuti atizotendi zvimwari zvako, nokuti kudira muedzaniso womukore wowakaemesa.” Zvino Nebhukhadhineza wakazara ngoushungu, nomuemo wehope yake wakatsanduka kunaShadhirakhi, Meshakhi naAbhedhinego. Wakapanga kuti vabasire choto chikuru kanomwe kupinda kupisha kwechaisigara chechiita, wakapanga ngwazi dzimweni dzaiya muhondo yake kuti dzisunge Shadhirakhi, Meshakhi naAbhedhinego, nokuvakandira muchoto chikuru chinobaka ngomuriro. Ndizvo vamuna avo vakasungwa vanemabhachi avo, nemabhuruku avo, nemachira avo amweni, vakakandirwa mukati mwechoto chikuru chaibaka ngomuriro. Ngokuti kupanga kwamambo kwaida kukasa kuitika, nechoto chikuru chechibaka kakurutu, murazvu womuriro waikwira wakauraya vamuna avo vakabata Shadhirakhi, Meshakhi naAbhedhinego. Asi vamuna vatatu, Shadhirakhi, Meshakhi naAbhedhinego, vakawa pashi vakasungwa pakati pechoto chikuru chinobaka ngomuriro. Zvino Nebhukadhineza mambo wakashama, wakamiruka ngokukasira. Wakati kumakota ake, “Atizi kukandira vanhu vatatu vakasungwa pakati pomuriro here?” Vakapingura vechiti, “Igwinyiso, O mambo.” Wakaereketa akati, “Ringira, ndinoona vanhu varongomuna vakasunhurika, vanohamba pakati pomuriro, navo avaremadzwi; kuringirika kwowechirongomuna kwakadai ngomukororo wamwari?” Naapo Nebhukhadhineza wakakwedzera pamusiwo wechoto chikuru chinobaka ngomuriro; wakaereketa akati, “Shadhirakhi, Meshakhi naAbhedhinego, imwimwi varanda vaMwari Uri padera pazveshe, budai kubva mumuriro, muuye pano!” Naapo Shadhirakhi, Meshakhi naAbhedhinego vakabuda kubva pakati pomuriro. Nenduna, vakuru voumambo, vatongi venharaunda, vapangi voumambo, vakaungana pamwepo, vakaona vamuna ava, kuti muriro waiya usina simba pamiiri yavo, nebvudzi resoro ravo arizi kubvurauka, nemabhachi avo aazi kutsanduka muemo wawo, negwema romuriro arizi kuapo kwevari. Nebhukhadhineza wakati, “Ngaakudzwe Mwari waShadhirakhi, Meshakhi naAbhedhinego, uwo wakatuma ngirosi yake, akanunura varanda vake avo vakagonda kwaari. Vakatsandudza izwi ramambo, vakapira miiri yavo, kuti vasazoshandira nokuti kudira zvimwari, asi ega Mwari wavo. Ndizvo ndinoemesa mutemo, kuti vanhu veshe, nemadzinza nendimi, avo vanoshaisha kuereketa ndiMwari waShadhiraki, Meshakhi naAbhedhinego, vanozotemwa kuita zvigurwa, nemhatso dzavo dzinozoita mirwi yematongo; ngokuti akuna Mwari umweni unesimba rokununura kudai.” Zvino mambo wakapinda kukudza vanaShadhirakhi, Meshaki naAbhedhinego, munyika yeBhabhuroni. Nebhukhadhineza mambo, kwevari vanhu veshe, madzinza, nendimi vanogara munyika dzeshe: “Kunyarara ngakuwanzwe kwomuri. Zvioniso nemishamiso zvaakaita kwendiri Mwari Uri padera pazvo zveshe, ndinodakara kumuronzera. “Kukuranyi kwezvioniso zvake! A, kugwinya kwemishamiso yake! Umambo hwake umambo hwemhera nariini, nokutonga kwake kunobvira kumubarirwana kuenda kumubarirwana. “Inini Nebhukhadhineza ndaiya ndakazorora mumhatso yangu, ndechidakara ngokubudirira mungome yangu. Ndakarota hope idzo dzakandityisa; mipinimidzo yangu pamubhedhi wangu nezvioniso zvesoro rangu zvakanditambudza. Ndizvo ndakaemesa mutemo kuti vaunzwe veshe vanhu vakangwara veBhabhuroni pamberi pangu, kuti vandidudzire zvinoronza hope. Zvino man'anga, vanomukirwa, vaKharadhea, nevafemberi vakapotera, neni ndakavaronzera hope pamberi pavo, asi avazi kundironzera zvedzaironza. Pakupedzisira Dhanieri wakapotera pamberi pangu, uwo zina rake raizwi Bheriteshaza, wakadudzwa zina rechimwari changu nouwo unomweya wezvimwari zvakacheneswa; neni ndakamuronzera hope pamberi pake: O Bheriteshaza, mukuru weman'anga, ndinozia kuti wakagarwa ngomweya wezvimwari zvakacheneswa mukati mwako, akunazve chakafishika chinokukonzera. Izwa hope dzangu dzendakarota, ndironzere zvedzinoronza. “Ndiri pamubhedhi wangu izvi ndizvo zvendakaona: Ringira paiya nomuti pakati penyika, nourebu hwawo hwaiya hwakakura. Muti wakakura kuita mukuru nokugwinya, nourebu hwawo hwakaguma mudenga, nokuoneka kwawo kumagumo enyika dzeshe. Mashakani awo aiya akanaka, nemichero yawo yakawanda, wakabudisa kudya kweveshe. Mhuka dzeshango dzakaona bvute pashi pawo, shiri dzomudenga dzakagara mumatai awo, nezvinopona zveshe zvakadya kwouri. “Ndakaangira kuringira muzvioniso zvesoro rangu padera pomubhedhi wangu, ringira, uwo unorinda nowakacheneswa wakadzaka kubva mudenga. Wakadaidzira, akati, ‘Tema muti, ugure matai awo, zuwa mashakani awo, uparadze michero yawo. Mhuka ngadzibve pashi pawo, neshiri ngadzibve pamatai awo. Asi siya guri nenzinde dzawo mumavhu, rinebhande resimbi nethusi, munduhwe yomushango. Ngaanyakatiswe ngebeto romudenga, nechikoaniswa chake ngachiapo nemhuka dzomushango mumwenje wenyika. Mwoyo wake ngautsandudzwe kubva kwowomunhu, upuwe kwaari mwoyo wemhuka. Mikuwo minomwe ngaipinde padera pake. Kugura uku kwaitwa ngomutemo wevarindi, nendaa yagurwa ngeizwi raavo vakacheneswa, kuitira kuti avo vanopona vazie kuti Uri-padera-pazveshe unotonga muumambo hwavanhu nokuupa kunouwo waanotsanangura, nokuemesera padera pahwo uwo uri pashi pavanhu.’ “Idzi ndidzo hope dzendakarota, inini mambo Nebhukhadhineza. Zvino iwewe, Bheriteshaza, dudzira zvedzinoronza, ngokuti vanhu veshe vakangwara voumambo hwangu avakoni kundidudzira zvedzinoronza. Iwewe unokona, ngokuti mweya wezvimwari zvakachena unogara mukati mwako.” Zvino Dhanieri, uwo zina rake raizwi Bheriteshaza, wakashamiswa kwekamukuwo, nemipinimidzo yake yakamutyisa. Mambo wakati, “Bheriteshaza, hope nokuti kududzirwa kwadzo zvisakutyisa.” Bheriteshaza wakapingura, akati, “Mambo wangu, hope ngadziitike kwevari avo vanokunyenya, nokududzirwa kwadzo kumagaa ako. Muti wowakaona, uwo wakakura, wakagwinya, urebu hwawo hwakaguma mudenga, nokuoneka kwawo kumagumo enyika dzeshe, uwo mashakani awo aiya akanaka, nemichero yawo yakawanda, nomukati mwawo munokudya kwaavo veshe; pashi pawo mhuka dzomushango dzakagara, nepadera pematai awo shiri dzomudenga dzaiya nendau dzadzo dzokugara, iwewe, O mambo! Wakakura kuita mukuru nokugwinya. Ukuru hwako hwakakura, nahwo hwakaguma mudenga, nokutonga kwako kunoguma kunyika dzeshe. Naapo mambo echiona uwo unorinda wakachena echidzaka kubva mudenga echiti, ‘Tema muti uyu, uuparadze, asi usiye guri nenzinde dzawo mumavhu, rinebhande resimbi nethusi, munduhwe yeshango; ngaanyakatiswe ngebeto romudenga, nechikoaniswa chake ngachiyapo nemhuka dzomushango, metsa mikuwo minomwe ipinde padera pake.’ “Uku ndikwo kududzirwa, O mambo, nacho chiri mutemo woUri-padera-pazveshe unoguma padera pamambo, tenzi wangu. Vanozokudzinga kubva kuvanhu, nougaro hwako hunozoita nemhuka dzomushango, newe unozopuwa mwenje kudya, kudai ngen'ombe, unozonyakatika ngebeto romudenga, nemikuwo minomwe inozopinda padera pako, metsa uzie kuti Uri-padera-pazveshe unotonga muumambo hwevanhu, nokuupa kunouwo waanotsanangura. Kudai ngezvekwakapangwa kusiya guri nenzinde dzomuti, umambo hwako hunozogwinyiswazve kwouri, kubvira pamukuwo pounozozia kuti denga rinotonga. Ndizvo, O mambo, tendera kupanga kwangu kuti kuashirike kwouri, urekere zvishaishi zvako ngokuita zvakarurama, nokushata kwako ngokuitira nyasha varombo; pamweni kungaapo kurebeswa kwokugarisika kwako.” Zveshe izvi zvakaitika kunamambo Nebhukhadhineza. Pakupera kwemwedzi gumi nemiiri iye echihamba padera pengome youmambo hweBhabhuroni, mambo wakati, “Iri andiro here Bhabhuroni guru rendakaaka kuita ugaro hwoumambo ngokugwinya kwesimba rangu, nokuita uthende hwoumambo hwangu?” Apo mazwi achiri mumuromo wamambo, kwakazwika izwi rechibva mudenga rechiti, “O mambo Nebhukhadhineza, kunoronzwa kwouri kuti: Umambo hwabva kwouri. Vanozokudzinga kubva kuvanhu, nougaro hwako hunozowa nemhuka dzomushango. Unozoitwa kuti udye mwenje kudai ngen'ombe, nemikuwo minomwe inozopinda padera pako, metsa uzie kuti Uri-padera-pazveshe unotonga muumambo hwevanhu, nokuupa kunouwo waanotsanangura.” Ngokukasira mazwi akazadzisika kunaNebhukhadhineza. Wakadzingwa kubva kuvanhu, akadya mwenje kudai ngen'ombe, nomuiri wake wakanyakatiswa ngebeto romudenga, metsa bvudzi rake rakakura kudai ngenhenga dzegodzi, nendwara dzake kudai ngendwara dzeshiri. Naapo mukuwo uwo wapera, inini Nebhukhadhineza ndakamirudza madziso angu mudenga, nokupinimidza kwangu kwakauyazve kwendiri. Ndakakudza Uri-padera-pazveshe, ndikairikidza nokuremeredza Umwe unopona mhera nariini, uwo kutonga kwake kuri kutonga kusikaperi, noumambo hwake hunobvira kumubarirwana kuenda kumubarirwana. Veshe vanogara munyika vanoerengwa kudai ngezvisipo, naye unoita kudai ngokuda kwake ngehondo yomudenga, napakati pavo vanogara munyika. Akuna naumwe ungarambidza nyara yake, nokuti kuronza kwaari kuti, “Unoitenyi?” Ngomukuwo uriwo kuzwisisa kwangu kwakauyazve kwendiri, kuirikidzwa kwoumambo hwangu, ukuru hwangu nouthende hwangu zvakauyazve kwendiri. Vapangi vangu, vakuru vangu vakanditsvaka; ndakaemeswazve muumambo hwangu, nokukura kwakanakisisa kwakatutsirwa kwendiri. Zvino, inini Nebhukhadhineza ndinoirikidza nokukurisa nokuremeredza Mambo womudenga, uwo mishando yake yeshe inegwinyiso, nenjira dzake ngedzokutonga kwakanaka; naavo vanohamba ngokudzikudza iye unesimba rokuvadzasa pashi. Bherishaza mambo wakanasira dhiri rakakura revakuru vake gumi remazana (1,000), naye waimwa vhini pamberi pegumi remazana (1,000). Naapo akabatwa ngevhini, Bherishaza wakapanga kuti vaunze zvidziyo zvomukore nezvesirivha, izvo zvaakatora Nebhukhadhineza baba ake kubva mutemperi raiya muJerusarema, kuitira kuti mambo nevakuru vake, vakadzi vake nemabunha ake, vamwe ndizvo. Ndizvo vakaunza zvidziyo zvomukore nesirivha zvakabva mutemperi, mhatso yaMwari muJerusarema; namambo nevakuru vake, vakadzi vake nemabunha ake, vakamwa ndizvo. Vakamwa vhini, vakakudza zvimwari zvomukore, zvesirivha, zvethusi, zvesimbi, zvemiti nezvemapuwe. Ngokukasira kwakabuda zvinwe zvenyara yomunhu, zvikanyora pakasetwa parukumbati rwengome youmambo pasinde nechigadzikiro chechibani; Mambo wakaringisisa nyara apo yechinyora. Zvino hope yamambo yakatsanduka, nemipinimidzo yake yakamutyisa. Nhengo dzechiunu chake dzakarungunuka, nemabvi ake akachayana. Mambo wakadaidzira ngeizwi guru kuti kuunzwe vanomukirwa, vaKharadhea nevafemberi. Mambo wakati kuvanhu vakangwara veBhabhuroni, “Kunyazwi ndiani unozodzidza izvi zvakanyorwa, nokundidudzira zvezvinoronza, unozopfekeswa ngezvakatsvukuruka, neketani yomukore muhuro mwake, naye unozoita mutongi wechitatu muumambo.” Zvino vakapotera vanhu veshe vakangwara vamambo, asi avazi kukona kudzidza zvakanyorwa, nokuti kududzira mambo kuti zvinoronzenyi. Zvino mambo Bherishaza wakatyiswa kakurutu, nehope yake yakatsanduka, nevakuru vake vakakangaidzwa. Vahosi, apo vazwa ngendaa yemazwi amambo nevakuru vake, vakapotera mumhatso yokudya. Vahosi vakati, “O mambo, pona mhera nariini! Mipinimidzo yako isakutyisa, nehope yako isatsanduka. Uripo munhu muumambo hwako, unogarwa ngomweya wezvimwari zvakachena mukati mwake. Mumazuva ababa ako kujeka nokuzwisisa noungwaru kudai ngoungwaru hwezvimwari zvakaoneka mwaari. Mambo Nebhukhadhineza, baba ako, vakamuita mukuru weman'anga, wevanomukirwa, nevaKharadhea, nevafemberi, ngokuti mweya wakanakisisa, nokuzia, nokuzwisisa, kududzira hope, nokuonisa ndaa dzakafishika, nokuparadza zvinopingaidza wakaoneka mwaari Dhanieri, uwo waakadudza mambo kuti Bheriteshaza. Zvino Dhanieri ngaadaidzwe, naye unozoonisa kududzirwa.” Zvino Dhanieri wakaunzwa pamberi pamambo. Namambo wakati kunaDhanieri, “Ndiwe here Dhanieri, umwe wevana vakachakatwa vaJudha, vaakaunza mambo baba angu kubva kwaJudha? Ndakazwa ndiwe kuti mweya wezvimwari uri mukati mwako, nokuti kujeka nokuzwisisa noungwaru zvakanakisisa zvinooneka mwouri. Zvino vanhu vakangwara, vanomukirwa, vakaunzwa mukati pamberi pangu, kuti vadzidze zvakanyorwa izvi, vadudzire kwendiri zvezvinoronza; asi vakakorera kududzira zvezvinoronza. Asi ndazwa ndiwe, kuti unokona kududzira, nokuparadza zvinopingaidza. Zvino kudai wechikona kudzidza zvakanyorwa nokundiziisa zvezvinoronza, unozopfekeswa ngezvakatsvukuruka, unozoisa ketani yomukore muhuro mwako, unozoita mutongi wechitatu muumambo.” Zvino Dhanieri wakapingura, akati pamberi pamambo, “Zvipo zvako ngazvigare newe, nemithuso yako ipuwe kunoumweni; asi ndinozodzidza zvakanyorwa kunamambo, nokududzira zvezvinoronza. O mambo, Mwari Uri-padera-pezveshe wakapa Nebhukhadhineza, baba ako, umambo, kukura, uthende nokuremeredzwa. Ngendaa yokukura kwaakamupa, vanhu veshe, madzinza nendimi vakahuta nokutya pamberi pake. Wakauraya uwo waaida kuuraya, nokuponesa uwo waaida kuponesa; nouwo waaida kumirudza waimumirudza, nouwo waaida kudzasa pashi waimudzasa pashi. Asi apo mwoyo wake wadzikudza, nomweya wake wakonzeswa ngokudzikudza, wakabviswa padendemaro roumambo hwake, navo vakamutorera uthende hwake. Wakadzingwa kubva pakati pevanhu, nomwoyo wake wakaitwa kudai ngewemhuka, nougaro hwake hwakaa pamwepo nembizi; wakapuwa mwenje wokudya kudai ngen'ombe, nomuiri wake wakanyakatiswa ngebeto romudenga, metsa paakazia kuti Mwari Uri-padera-pazveshe unotonga muumambo hwavanhu, nokuuemesa padera peuwo waanoda. “Newe mukororo wake, A Bherishaza, auzi kupfaisa mwoyo wako, kunyazwi wakazia izvi zveshe! Wakadzimirudza kurwisana naMambo womudenga. Navo vakaunza zvidziyo zvetemperi rake pamberi pako, newe nemakurukota ako, vakadzi vako nemabunha ako, mwakamwa ndizvo vhini; ukakudza zvimwari zvesirivha, zvomukore, zvethusi, zvesimbi, zvemiti nezvemapuwe, zvisikaoni nokuti kuzwa nokuti kuzia; asi Mwari uwo unomweya wako munyara mwake, nouwo unenjira dzako dzeshe, auzi kumukudza. Ndizvo kubva pamberi pake nyara yakatumwa, nokunyora uku kwakanyorwa. Neizvi ndizvo zvakanyorwa: ‘MENE, MENE, TEKELI, UFASINI.’ Uku ndikwo kududzirwa kwazvo: MENE, Mwari wakaerenga mazuva oumambo hwako, akahupedza, TEKELI, iwewe wapimwa muchipimo, waoneka wakareruka; PHERESI, umambo hwako hwagurwa ngepakati, hukapuwa kuvaMedhe nevaPhesia.” Zvino Bherishaza wakapanga, navo vakapfekesa Dhanieri ngemachira akatsvukuruka, vakaisa ketani yomukore muhuro mwake, vakateketesa ndiye kuti aite mutongi wechitatu muumambo. Ngouhwo usiku Bherishaza mambo wevaKharadhea wakaurawa. NaDhariusi muMedhe wakatora umambo, aane makore anoda kuita makumi matanhatu nemairi ousharuka. Zvakadakadza Dhariusi kuemesa padera poumambo nduna dziri zana nemakumi mairi (120), kuti dzitonge padera poumambo hweshe, nepadera paava, nduna huru nhatu, umwe wadzo waiya Dhanieri; kuti idzo nduna dzipinze ndaa dzeshe kwevari, kuti mambo asazoneswa. Ngokukasira Dhanieri uyu wakaremeredzwa kupinda nduna huru nenduna doko, ngokuti mweya wakanakisisa waiya mukati mwake, namambo wakapinimidza kumuemesa padera poumambo hweshe. Ndizvo nduna huru nenduna doko dzakatsvaka kuti dzaone ndaa kunaDhanieri ngezvoumambo. Asi adzizi kuona ndaa nokuti chaakashaisha, ngokuti waiya unogondeka, kwaiya kusikazi kuoneka kushaisha nokuti ndaa kwaari. Vamuna vakati, “Atizooni ndaa munaDhanieri uyu, kwega kuti tiione kwaari ngomupango waMwari wake.” Ndizvo idzi nduna huru nedoko dzaungana kunamambo, dzakaronza izvi kwaari, “Mambo Dhariusi, pona mhera nariini! Dzeshe nduna huru nedoko dzoumambo, nhumwa, makota, nevakuru, vakapangana kuemesa mutemo wamambo nokuita mupango wakagwinya, kuti kunyazwi ndiani uwo unozokumbira mukumbiro kunaMwari nokuti chimwari, nokuti kumunhu, mumazuva makumi matatu, kwega kwouri mambo, unozokandirwa murindi remhondoro. Zvino, O mambo, emesa mupango, uise zina rako pezvakanyorwa, kuti zvisazotsandurwa, kudai ngomupango wevaMedhe navaPhesia, uwo usikatsandurwi.” Ndizvo mambo Dhariusi wakaisa zina rake pewakanyorwa mutemo. Kunyazwi Dhanieri azia kuti zvakanyorwa zvakaiswa zina, wakaangira kupotera mumhatso mwake, iyo yaiya nemafasitera akabeuka mukamera rake romuturika, akaringirana neJerusarema; naye wakagwadama ngemabvi ake katatu ngezuva kukumbira kuna Mwari wake nokumukudza, kudai ngezvaaiita nguva dzeshe. Zvino vamuna ava vakauya, vakaona Dhanieri echikumbira nokupota pamberi paMwari wake. Zvino vakakwedzera kuuya pamberi pamambo, vakati ngendaa yomupango wamambo, “O mambo, auzi kuisa zina rako here kumutemo, kuti vanhu veshe vanozoita mukumbiro kunaMwari nokuti chimwari, nokuti munhu mumazuva makumi matatu, kwega kwouri, mambo, vanozokandirwa murindi remhondoro?” Mambo wakapingura, akati, “Zvine gwinyiso, ngomutemo wevaMedhe nevaPhesia, usikapinduki.” Zvino vakaereketa, vakati pamberi pamambo, “Uwo Dhanieri, umwe wevana voubatwa hwaJudha, aapinimidzi ndiwe, O mambo, nokuti ngomutemo wowakaisa zina, asi unoita mikumbiro yake katatu ngezuva.” Naapo mambo azwa aya mazwi, wakaneswa kakurutu, akaemesa mwoyo wake kunaDhanieri kumununura; akashanda metsa pakupota kwezuva kumurwira. Zvino vamuna ava vakaungana kunamambo, vakati kwaari, “Zia, O mambo, kuti mutemo wevaMedhe navaPhesia kuti akuna mutemo nokuti chiemeso chaanogwinyisa mambo chingatsandurwa.” Zvino mambo wakapanga, navo vakaunza Dhanieri, vakamukandira murindi remhondoro. Zvino mambo wakaereketa, akati kunaDhanieri, “Mwari wako wounogara wechidira ngokugondeka ngaakununure.” Nebuwe rakaunzwa, rikaradzikwa pamuromo werindi; namambo wakarinamira echipfanya ngendandazi yake, nendandazi yemakurukota ake, kuti chakaemeswa ngendaa yaDhanieri chisazotsandurwa. Zvino mambo wakaenda kungome yake, usikuhwo aazi kudya; akuna kudya kwakaunzwa kwaari, nehope dzake dzakamutiza. Naapo kwoedza mambo wakafumira, akaenda ngokukasira kurindi remhondoro. Naapo aguma pasinde perindi, wakadaidzira kunaDhanieri ngeizwi rokusvipo mwoyo; namambo wakaereketa, akati kunaDhanieri, “O Dhanieri, muranda waMwari unopona, Mwari wako, wounogara wechidira, unesimba here rokukununura kumhondoro?” Dhanieri zvino wakati kunamambo, “O mambo, pona mhera nariini! Mwari wangu wakatuma ngirosi yake, nokukonya miromo yemhondoro, nadzo adzizi kundiremadza, ngokuti ndakaoneka ndisina ndaa pamberi pake; nepamberi pakowo, O mambo, andizi kuita chakashata.” Zvino mambo wakadakara kakurutu, akapanga kuti vakwidze Dhanieri kubva murindi. Ndizvo Dhanieri wakakwidzwa kubva murindi, akuna nokuremadzwa kwakaoneka kwaari, ngokuti wakagonda munaMwari wake. Mambo wakapanga, naavo vamuna vakaitira ndaa Dhanieri, vakaunzwa vakavakandira murindi remhondoro, ivo, vana vavo nevakadzi vavo. Vasati vaguma pashi murindi, mhondoro dzakavanyisa, dzikapwanya eshe magodo avo kuita zvigurwa. Zvino mambo Dhariusi wakanyora kuvanhu veshe, kumadzinza nendimi, avo vakagara munyika mweshe, kuti. “Kunyarara ngakuwanzwe kwomuri! Ndinoemesa chiemeso, kuti mukutonga kweshe kwoumambo hwangu vanhu ngavahute nokutya pamberi paMwari waDhanieri: “Ngokuti ndiMwari unopona, naye wakagwinya mhera nariini. Umambo hwake ndihwo husikaparadzwi, nokutonga kwake akuna magumo. Unonunura nokurwira, naye unoita zvioniso nemishamiso mudenga nomunyika; ngokuti wanunura Dhanieri kubva kusimba remhondoro.” Ndizvo uyu Dhanieri wakabudirira mukutonga kwaDhariusi nomukutonga kwaSairusi muPhesia. Mugore rokutanga raBherishaza mambo weBhabhuroni, Dhanieri wakarota hope, nezvioniso zvesoro rake padera pomubhedhi wake. Zvino wakanyora hope, akaronza ndaa yeshe. Dhanieri wakaereketa akati: “Ndakaona muchioniso changu usiku, ringira, madutu marongomuna omudenga echivhuvhuta paruandhle rukuru. Zvikara zvirongomuna zvikuru zvakabuda kubva muruandhle, zvakasiyana chimwe kunechimweni. Chokutanga chaiya chakadai ngemhondoro, chinemaphaphiro egodzi. Zvino ndakaringira, maphaphiro acho akatapurwa, nacho chakamirudzwa kubva pamavhu, chakaemeswa ngetsoka mbiri kudai ngomunhu, nomwoyo womunhu wakapuwa kwechiri. Ringira, chikara chimweni, chechipiri, chakadai ngebere, chakamirudzwa ngorutii rumwe, nenhii nhatu dzaiya mumuromo wacho pakati pemazino acho; navo vakaereketa ichi kwechiri vechiti, ‘Miruka, udye nyama yakawanda.’ “Ngesure kweizvi, apo ndakaringira, ringira, chimweni chakadai ngekhamba, chinemaphaphiro marongomuna eshiri pamushana wacho, nechikara chaiya nemasoro marongomuna; nokutonga kwakapuwa kwechiri. Ngesure kweizvi ndakaona muzvioniso zvousiku, ringira, chikara chechirongomuna, chinotyisa, chakagwinya kakurutu. Chaiya nemazino makuru esimbi; chakadya kupwanya kuita zvigurwa, nokutsikatsika zvakasara ngetsoka dzacho. Nacho chaiya chakasiyana nezvikara zveshe zvakatanga pamberi pacho; chaiya nenyanga gumi. Ndakaringisisa nyanga, ringira, rwakabuda pakati padzo runyanga rumwe rudoko; pamberi parwo nhatu dzeidzo nyanga dzokutanga dzakabviswa ngenzinde. Ringira, mukati mworunyanga urwu mwaiya nemadziso akadai ngemadziso omunhu, nomuromo unoereketa kudzikudza. “Naapo ndakaringira metsa madendemaro akaiswa mundau dzawo pashi, noumwe Uwo waiya Musharuka wekaretu wakagara padendemaro rake. Zvokusimira zvake zvaiya zvakachena kudai ngechando, nebvudzi resoro rake raiya rakadai ngemamviri akachena; dendemaro rake raiya rakadai ngemirazvu yomuriro, nemavhiri aro akadai ngomuriro unobaka. Chinyuka chomuriro chakabuda chechibva pamberi pake. Makumi emazana emakumi emazana akamushandira, makumi emazana gumi akapetwa kagumi akaema pamberi pake. Kutongwa kwakatanga, nemabhuku akabeurwa. “Ndakaringira zvino ngendaa yebope remazwi makuru okudzikudza aiereketwa ngorunyanga. Naapo ndakaringira, chikara chakaurawa, nomuiri wacho wakaparadzwa, nacho chakapirwa kupishwa ngomuriro unobaka. Asi zvimweni zvikara, kutonga kwazvo kwakaduswa, asi kupona kwazvo kwakarebeswa nguva yakatikuti. Naapo ndakaringira muzvioniso zvousiku, ringira, wakauya nemakore omudenga umwe wakadai ngomukororo womunhu, naye wakauya kuMusharuka weMazuva, vakamukwedzedza pamberi pake. Kwakapuwa kwaari kutonga, nouthende, noumambo, kuti vanhu veshe, madzinza nendimi vamushandire. Kutonga kwake kutonga mhera nariini, akuzopindi, noumambo hwake huri husikazoparadzwi. “Asi inini Dhanieri, mweya wangu waitambudzika mukati mwomuiri wangu, nezvioniso zvesoro rangu zvakandityisa kakurutu. Ndakakwedzera paneumwe waavo vakaema pasinde, ndikamubvunza gwinyiso reizvi zveshe. Ndizvo wakati, unozondiziisa dudziro yazvo: ‘Izvi zvikara zvikuru zvirongomuna, zviri madzimambo marongomuna, anozomiruka kubva kunyika. Asi vakacheneswa voUwo-Uri-padera-pazveshe vanozoashira umambo, vagare nahwo mhera nariini nariini.’ Zvino ndakada kuzia gwinyiso ngechikara chechirongomuna, chaiya chakasiyana nezvimweni zveshe, chinotyisa kakurutu, ngemazino acho esimbi nendwara dzacho dzethusi; icho chakadya nokupwanya kuita zvigurwa, nokutsikatsika zvakasara ngetsoka dzacho; nangendaa yenyanga gumi, idzo dzaiya pasoro racho, nendaa yenyanga imweni iyo yakabuda, kupa ndau iyo yedzakawa ndiyo nhatu; runyanga urwo rwaiya nemadziso, nomuromo uwo wakaereketa zvikuru kudzikudza, urwo kuringirika kwarwo kwaiya kwakapinda kukura kunevangani varwo. Ndakaringira, runyanga rurirwo rwakarwa nevakacheneswa, rukavanyisa, metsa Musharuka weMazuva wakauya; zvino kutonga kwakapuwa kwevari vakacheneswa voUwo-Uri-padera-pazveshe, nomukuwo wakauya kuti vakacheneswa vatore nhaka. “Izvi ndizvo zvaakaronza kuti, ‘Ngendaa yechikara chechirongomuna, hunozoapo umambo hwechirongomuna padera penyika, uhwo hunozosiyana noumambo hweshe, nahwo hunozopedza nyika yeshe, nokuitsikatsika pashi, nokuipwanya kuita zvigurwa. Ngendaa yenyanga gumi, kubva kuumambo uhwu anozomiruka madzimambo gumi, noumweni unozomiruka ngesure kwavo. Uyu unozoita wakasiyana nevokutanga, unozonyisa madzimambo matatu. Unozoereketa mazwi akakura okurwisa uwo Uri-padera-pazveshe, unozopedza vakacheneswa voUri-padera-pazveshe, unozopinimidza kutsandudza mikuwo yakachena nemipango; navo vanozopuwa munyara mwake kwomukuwo, nemikuwo miiri, norupande rwomukuwo. Zvino kutonga kunozogara kugura ndaa, kutonga kwake kunozoduswa, kupedza nokuhuparadza, metsa pakupera. Umambo noutongi noukuru hwoumambo pashi pedenga reshe zvinozopuwa kuvanhu vakacheneswa voUri-padera-pazveshe, uwo umambo hwavo huri umambo hwemhera nariini, noutongi hweshe hunozovashandira nokuvapurutana.’ “Pano ndipo panoperera ndaa. Asi inini Dhanieri, mipinimidzo yangu yakandityisa kakurutu, nehope yangu yakatsanduka; asi ndakangwarira ndaa yeshe mumwoyo mwangu.” Mugore rechitatu rokutonga kwamambo Bherishaza, chioniso chakaoneka kwendiri, inini Dhanieri, ngesure kwechimwe chakaoneka kwendiri pakutanga. Muchioniso ndairingira, ndikadziona pachangu muSusa dhorobha guru, munyika yaEramu; ndaiya parwizi runozwi Urai. Naapo ndakaringira, neni ndakaona gondohwe rakaema pasinde porwizi raiya nenyanga mbiri. Nyanga dzeshe dzaiya dzakareba, imwe yaiya yakapinda kureba kune imweni, neiyo yaiya yakapinda kureba yakagumisira kubuda. Ndakaona gondohwe rechihamba kuenda kumabirirazuva nedera nokubani. Zvikara zveshe zvaiya zvisina simba rokuriemera, apana naumwe waiya nesimba rokununura kubva kusimba raro; rakaita kudai ngokuda kwaro, naro rakakura. Naapo ndichapinimidza, ringira, gotokoto rakauya kubva kumabirirazuva padera pehope yenyika yeshe, risikazi kugwama mavhu. Gotokoto raiya nenyanga pakati pemadziso aro. Rakauya kunegondohwe raiya nenyanga mbiri, rendakaona rechiema pamberi porwizi, rakarumba kweriri ngoushungu hwesimba raro. Ndakariona rechikwedzera kunegondohwe. Rakanyangadzwa ndiro, rakatunga gondohwe, rikagura nyanga dzaro mbiri. Gondohwe raiya risina simba rokuemesedzana negotokoto; rakakandira gondohwe pashi pamavhu, rikaritsikatsika; akuna naumwe waiya nesimba rokununura gondohwe kubva kusimba raro. Zvino gotokoto rakaangirira kukura kakurutu kuita gurutu; asi paurebu hwesimba raro, runyanga rukuru rwakagurwa; pandau yarwo dzakabuda nyanga murongomuna dzinembiri kumadutu marongomuna omudenga. Kubva kuneimwe yadzo murongomuna rwakabuda runyanga rudoko, urwo rwakaita rukuru kakurutu kubani, nokumabvazuva, nokunyika inouthende. Rwakakura kureba metsa kuguma kunehondo yomudenga. Rwakakandira pashi pamavhu zvimweni zvehondo yomudenga nenyeredzi dzimweni, rukazvitsikatsika. Kunyazwi rakadzikudza kupinda mutongi wehondo yomudenga; nomubairo wokupisha wezuva rimwe ngarimwe wakabviswa ndiro kubva kwaari, nendau yake yakachena yakakandirwa pashi. N gendaa yokushaisha hondo yomudenga yakapirwa kweiri pamwepo nomubairo unopishwa zuva ngezuva; naro rakakandira pashi pamavhu gwinyiso, rikaangira kubudirira munezverakaita. Zvino ndakazwa umwe wakacheneswa echiereketa, noumweni wakacheneswa wakati kwaari uwo wakaereketa, “Chioniso ichi chendaa yomubairo unopishwa zuva ngezuva, chinozogara mukuwo wakadini, nokushaisha kunoparadza, nokupira kwendau yakacheneswa nehondo kuti zvitsikwetsikwe pashi ngetsoka?” Naye wakandipingura, “Chinozogara mazuva makumi emazana mairi nemazana matatu (2,300) mangwanani nemadeekoni; naapo ndau yakacheneswa inozopetudzwa pandau yayo yakasukika.” Naapo inini, Dhanieri, ndaona chioniso, ndakaedza kuzwisisa. Ringira, wakaema pamberi pangu muemo wakadai ngowomunhu, neni ndakazwa izwi romunhu pakati pemahumbikumbi aUrai, rakadaidza rechiti, “Gabhurieri, ita kuti munhu uyu azwisise chioniso.” Ndizvo wakakwedzera apo pendakaema; naapo akwedzera, ndakatya, ndikawa ngehope pashi. Asi wakati kwendiri, “Zwisisa, O mukororo womunhu, kuti chioniso chiri chomukuwo wokugumisira.” Naapo achaereketa neni, ndaiya ndakaata hope dzemadzikirira, hope yangu iri pamavhu; zvino wakandigwama, akandimirudza akandiemesa ngetsoka dzangu. Naye wakati, “Purutana, ndinozokuronzera zvinozoitika ngomukuwo wokugumisira woushungu; ngokuti zvinoronza mukuwo wakaemeswa wokugumisira. Gondohwe rowakaona rinenyanga mbiri, aya madzimambo eMedhe neePhesia. Gotokoto rinemviri ndimambo weGirisi, norunyanga rukuru ruri pakati pemadziso aro, ndimambo wokutanga. Ngendaa yenyanga rakagurwa, pandau yarwo apo pakabuda amweni marongomuna, umambo hurongomuna hunozobuda mudzinza iro, asi husina simba rake akadi. “Pamagumo outongi hwavo, apo kushaisha kwavo kwawanda, mambo unehope inotyisa, nounozwisisa zvakafishika, unozoema. Unozokura akagwinya musimba, unozoita kuparadzwa kunotyisa, unozobudirira munezvaanoita. Naye unozouraya vanesimba, nevanhu vakacheneswa. Ngourimbwi hwake unozoita kuti kuchengedzera kunyise munyara mwake; mukupinimidza kwake unozodzikudza. Pasina nyowedzo unozoparadza vakawanda, nokurwisa Mutongi wevatongi. Asi unozogurwa, haiwa ngenyara yomunhu. Chioniso chemadeekoni nechemangwanani, icho chakaronzwa, igwinyiso. Asi iwewe, fisha chioniso; ngokuti ngechemazuva mazhinji achauya.” Ndizvo inini, Dhanieri, ndakademera, ndakarwara mazuva akatikuti; ndorondomiruka, ndikaita mushando wamambo. Asi ndakashamiswa ngechioniso, andizi kuchizwisisa. Mugore rokutanga raDhariusi mukororo waAhasuerusi, weverudzi rwevaMedhe, uwo wakaitwa mambo padera poumambo hwevaKharadhea; mugore rokutanga rokutonga kwake, inini Dhanieri ndakazwisisa kubva mubhuku uwandu hwemakore, kuti kudai ngeizwi raMambo Mwari rakauya kunaJeremia muprofeti, rinosisira kuti rizadzisike kuparadzwa kweJerusarema, anozoita makore makumi manomwe. Zvino ndaringirisa hope yangu kwaari Mambo Mwari, Mwari, kutsvaka mupinguro ngokukumbira nokupota, pamwepo nokuera kudya nokupfeka machira emasaka nemarota. Ndakakumbira kunaMambo Mwari, Mwari wangu, ndikatenda zvishaishi, ndikati, “A Mambo Mwari, Mwari mukuru unotyisa, uwo unongwarira chitenderano norudo runenyasha kwevari vanomuda, nokwevari vanongwarira mipango yake, takashaisha, takapauka, tikaita zvakashata, takamukira, ngokusiya mipango yako nokubva kuzvitongero zvako. Atizi kupurutana kuvaranda vako vaprofeti, avo vakaereketa ngezina rako kumadzimambo edu, vatongi vedu, nemadzibaba edu, nokwevari vanhu veshe venyika. O Mambo Mwari, kururama kuri kwouri, asi kwetiri kutsveruka kwehope, kudai ngezviripo nyamashi, kwevari vanhu vaJudha nevagari vemuJerusarema, nokwevari vaIsuraeri veshe, avo vari pasinde, naavo vari kuretu, kunyika dzeshe kwowakavadzingira, ngendaa yokushaisha kwevakaita kwouri. O Mambo Mwari, kutsveruka kwehope kuripo pamhene kunowira padera pedu, kumadzimambo edu, kuvatongi vedu, nokumadzibaba edu, ngokuti takashaisha kwouri. KunaMambo Mwari, Mwari wedu, dziripo nyasha nokurekererwa, kunyazwi takamumukira; nesu, atizi kupurutana izwi raMambo Mwari, Mwari wedu, ngokuhamba ngemipango yake yaakaisa pamberi pedu ngevaranda vake vaprofeti. VaIsuraeri veshe vakagura mupango wako, ngokupauka, vakaramba kuti vasazopurutana izwi rako. Ndizvo chituko chakadururwa padera pedu, nokupika ukwo kwakanyorwa mumipango yaMosi, muranda waMwari, ngokuti takamushaishira. Wakagwinyisa mazwi ake, aakatiereketera, nokuvatongi vedu, avo vakatitonga, ngokuunza padera pedu kushata kukurutu, kwaitirwa Jerusarema akuzi kumboitika nakamwe pashi pedenga reshe. Kudai ngezvezvakanyorwa mumipango yaMosi, kweshe kushata uku kwauya padera pedu. Atizi kukumbira nyasha kunaMambo Mwari, Mwari wedu, kuti titenderuke kubva mukushata kwedu, tizwisise gwinyiso rako. Ndizvo Mambo Mwari wakaramba akarinda zvakashata, metsa azviunza padera pedu. Ngegwinyiso Mambo Mwari, Mwari wedu, uri wakarurama mumishando yake yeshe yaanoita; ngokuti atizi kupurutana izwi rake. “Nazvino, O Mambo Mwari, Mwari wedu, iwewe wakabudisa vanhu vako kubva munyika yeEgipite ngenyara inesimba, ukadzionera mbiri metsa nyamashi; takashaisha, tikaita zvakashata. O Mambo Mwari, kudai ngokururama kwokuita kwako kweshe, kunyangadzwa kwako noushungu hwako, tinokumbira, ngazvipetudzwe kubva kudhorobha rako Jerusarema, mutunhu wako wakacheneswa; ngendaa yezvishaishi zvedu nokushata kwemadzibaba edu, Jerusarema nevanhu vako vaitwa chitsverudzo ndivo veshe vaakirwana vedu. Zvino, O Mwari wedu, purutana mukumbiro womuranda wako nokupota kwake, ngendaa yako ita kuti hope yako ijeke padera pendau yako yakacheneswa iyo yakaita matongo. O Mwari wangu, kotamisa nzee yako, uzwe. Beura madziso ako, uone matongo edu, nedhorobha rinodaidzwa ngezina rako. Atiunzi kupota kwedu pamberi pako ngendaa yokururama kwedu, asi ngendaa yenyasha dzako huru. O Mambo Mwari, izwa; O Mambo Mwari, kungurira; O Mambo Mwari, purutana, uite, usanonoka! Ngendaa yako, O Mwari wangu, ngokuti dhorobha rako nevanhu vako vanodaidzwa ngezina rako.” Naapo ndichaereketa nokukumbira, nokutenda kushaisha kwangu nokushaisha kwevanhu vangu Isuraeri, nokuisa kupota kwangu pamberi paMambo Mwari, Mwari wangu, ngendaa yomutunhu wakacheneswa waMwari wangu, naapo, ndichaereketa mukukumbira, Gabhurieri emene, uwo wendakaona muchioniso chokutanga, echitumwa kumbururuka ngokukasira, wakandigwama kudai ngomukuwo wokupira mudiro wemadeekoni. Wakauya akati kwendiri, “O Dhanieri, ndabuda zvino kukupa ungwaru nokuzwisisa. Pakutanga kwokupota kwako izwi rakabuda, neni ndauya kukuronzera, ngokuti unodikanwa kakurutu. Ndizvo pinimidza ngeizwi, uzwisise chioniso. “Mavhiki makumi manomwe akaemeswa ngomupango padera pevanhu vako nepadera pedhorobha rako rakacheneswa, kupedza ndaa, nokupedza zvishaishi, nokuunza kuiyanisa ngendaa yokushata, nokuunza kururama kusikaperi, nokukonya ngechinamiro zvioniso nokuprofeta, nokudzodza Uwo wakapindisisa kuchena. Ndizvo zia uzwisise: Kubvira pakubuda kwomupango wokunasira nokuaka Jerusarema, kuguma kumukuwo woWakadzodzwa, mutongi, kunozoita mavhiki manomwe; nemavhiki makumi matanhatu nemairi rinozoakwazve rinepato norukumbati, ngemikuwo yokutambudzika. Ngesure kwemavhiki makumi matanhatu nemairi Wakadzodzwa unozogurwa, aazoapo kwevari; nevanhu vomutongi uwo unozouya, vanozoparadza dhorobha nendau yakacheneswa. Nokupera kwazvo kunozodai ngendambi, nokurwisana kunozoapo metsa pakupera, nokuparadzwa kwakaemeswa. Unogwinyisa chitenderano nevazhinji vhiki rimwe, nepakati pevhiki unozoita kuti mubairo nomudiro zvirekwe; nomukuwo wouwandu hwezvinonyangadza kunozouya uwo unoparadza, metsa kugume zvakaperera, neizvo zvakaemeserwa, ushungu hunozodururwa padera pomuparadzi.” Mugore rechitatu raSairusi mambo wePhesia, izwi rakaoniswa kunaDhanieri, uwo zina rake rakadudzwa kuti Bheriteshaza. Izwi rayia negwinyiso, raiya rokurwa kukuru. Wakarizwisisa, akaa nokuzwisisa muchioniso. Panguva iyo inini Dhanieri ndaiya ndechibonda mavhiki matatu eshe. Andizi kudya chingwa chakanaka, nokuti nyama, nokuti kumwa vhini, zve, andizi kudzora mafuta nepadoodoko, metsa mavhiki matatu eshe apera. Ngezuva remakumi mairi nemarongomuna emazuva omwedzi wokutanga, ndichi pamhiri porwizi rukuru, urwo runozwi Thigrisi, ndakaringira mudenga, ringira, munhu wakasimira jira rorukangaza, chiunu chake chakasungwa ngebhande romukore wakaera waibva Ufazi. Muiri wake waiya wakadai ngebheriri, nehope yake yakadai ngokuoneka kwemheni, madziso ake akadai ngezviveneko zvomuriro, mioko yake netsoka dzake zvakadai ngethusi rakapukutwa, neizwi rake rakadai ngerembungano. Inini Dhanieri ndega ndakaona chioniso; vanhu vaiya neni avazi kuona chioniso; kunyazwi kuhuta kukurutu kwakavagumira, navo vakatiza koohwara. Ndizvo ndakasara ndega, kuti ndione ichi chioniso chikuru. Simba rangu rakabuda kubva mukati mwangu, kuringirika kwangu kwakashanduka kuita kudai ngokuora, neni andizi kusara nesimba. Zvino ndakazwa bope remazwi ake; naapo ndazwa bope remazwi ake, ndakabatwa ngehope dzemadzikirira, nehope yangu iri pamavhu yakatiduma. Asi zvino nyara yakandigwama, yakandiemesa ngenyara nemabvi angu. Wakati kwendiri, “O Dhanieri, iwewe munhu unodikanwa kakurutu, zwisisa mazwi endinoereketa kwouri. Ema ngetsoka dzako, ngokuti ndatumwa zvino kwouri.” Naapo achaereketa izwi iri kwendiri, ndakaema ndechihuta. Wakati kwendiri, “Usatya, Dhanieri; ngokuti kubvira pazuva rokutanga rowakaemesa mwoyo wako kutsvaka kuzwisisa, nokudzipfaisa pamberi paMwari wako, mazwi ako akazwika, neni ndauya ngendaa yemazwi ako. Asi mutongi woumambo hwePhesia wakandiphikisa mumazuva makumi mairi narimwe. Ndizvo Mikhaeri, umwe wevatongi vakuru, wakauya koondidetsera, neni ndakamusiyapo nomutongi woumambo hwePhesia. Zvino ndauyira kukudetsera kuti uzwisise zvinozoitika kuvanhu vako ngamazuva okugumisira. Ngokuti chiripo ngepamberi chioniso chemazuva awo.” Naapo echiereketa mazwi aya kwendiri, ndakatsikitsira hope yangu pamavhu ndisikachakoni kuereketa. Zvino umwe wakadai ngomuemo womunhu wakagwama miromo yangu; naapo ndakashama muromo wangu, kuti ndierekete, ndikati kwaari uwo wakaema pamberi pangu, “O mambo wangu, ngendaa yechioniso kurwadziwa kwakadaro kwandigumira, neni andichina simba. Muranda wamambo wangu ungaita maereketerenyi namambo wangu? Ngokuti inini ndinohuta, apana simba rasara mwendiri, nomweya wokufema auzi kusara mukati mwangu.” Zve wakauyazve akandigwama umwe unechiemo chakadai ngechomunhu, wakandigwama akandigwinyisa. Wakati, “O munhu unodikanwa kakurutu, usatya; kunyarara ngakua kwouri. Ita wakagwinya nounesimba.” Naapo aereketa kwendiri, ndakagwinyiswa, ndikati, “Mambo wangu ngaaerekete; ngokuti wandigwinyisa.” Zvino wakati, “Unozia here chendauyira kwouri? Zvino ndinosisira kuhwirira koorwa nomutongi wePhesia, naapo ndapedza, ringira, mutongi weGirisi unozouya. Asi ndinozokuronzera icho chakanyorwa mukati mwebhuku regwinyiso. Akunazve unobatirana neni ngeizvi, asi Mikhaeri ega mutongi wenyu. “Asi inini, mugore rokutanga raDhariusi muMedhe, inini ndemene ndakaema kumudetsera nokumugwinyisa. Zvino ndinozokuonisa gwinyiso. “Ringira, achazomiruka madzimambo matatu muPhesia; nowechirongomuna unozopinda kakurutu kuita gurudza kuneavo veshe; naapo agwinya ngoupfumi hwake, unozomusa veshe kurwisa umambo hweGirisi. Zvino mambo unesimba unozomiruka, uwo unozotonga ngokutonga kukuru nokuita kudai ngokuda kwake. Naapo achakwira musimba, umambo hwake hunozogurwa, nahwo hunozokoaniswa kumadutu marongomuna omudenga; asi andikwo kwevanobarwa ndiwe akadi, nokuti kudai ngokutonga kwaakatonga; ngokuti umambo hwake hunozobvitwa, huite hwevamweni kubanze kweava. “Zvino mambo wokubani unozokura akagwinya, asi umweni wevatongi vake unozomupinda kugwinya, unozotonga umambo hwakapinda kukura kunehwake. Ngesure kwemakore akatikuti vanozodzishonganisa pamwepo; nemwanasikana wamambo wokubani unozouya kunamambo wedera kuemesa chitenderano. Asi aazosari nesimba romuoko wake nemibarirwana yake aizogari. Unozopirwa, iye nevaranda vake nemwana wake, nouwo wakamudetsera ngemikuwo iyi. Asi nhai inobva kunzinde dzake umwe unozotora pandau yake, uwo unozouya koorwisana nehondo, naye unozopotera mumasvingo amambo wedera, echirwa navo; unozonyisa. Kunyazwi nezvimwari zvavo nemiedzaniso yavo, nezvidziyo zvavo zvinodikanwa zvesirivha nezvomukore, unozozvichakata kuenda nazvo Egipite; naye unozogara makore akawanda asikarwisi mambo wedera. Zvino mambo wedera unozorwisa umambo hwokubani, asi unozohwirira munyika mwake. “Vakororo vake vacharwa hondo, vanozounganidza hondo dzakawanda, iyo inozoenda mberi kudai ngendambi yechipinda kuenda mberi, nokuhamba ndimwo nokutwara hondo, metsa pamasvingo ake. Namambo wokubani unozonyangadzwa, unozobuda koorwa hondo namambo wedera, unozotungamirira chikwata chikuru; asi chikwata chinozopuwa munyara mwake. Naapo chikwata chatorwa kuenda, mwoyo wake unozodzikudza; unozoriga pashi makumi egumi remazana, asi aazonyisi. Ngokuti mambo wedera unozomirudzazve chikwata chakapinda kukura kuneicho chokutanga, ngesure kwemakore unozomiruka nehondo huru noupfumi hwakawanda. Mumikuwo iyo vazhinji vanozomukira mambo wokubani. Madzongoni anogebenga pakati pevanhu vako vanozodzimirudza kugwinyisa chioniso, asi vanozowa. Zvino mambo wedera unozouya, unozotsa rukumbati, unozotora dhorobha rakanasa kushosherwa; nezvokurwa zvokubani azvizoemi, nokuti vanhu vake vakatsanangurwa, zve, arizoapo simba rokuema. Asi uwo unouya koorwa naye unozoita kudai ngokuda kwake, akuna naumwe unozoemesedzana naye.Unozotora nhaka yendau yakanaka munyika yeshe inowa pashi pesimba rake. “Unozoemesa hope yake kupotera, anesimba roumambo hwake hweshe, unozounza chitenderano chokunyarara nokuchiita. Kuitira kuti aparadze umambo, unozomupa mukadzi mukuroora; asi achizobudiriri, nokuti kuuyirwa kwake. Ngesure kweizvi unozopetuka kuzviwi, unozotora zvakawanda. Asi nduna huru inozoita kuti kushoorwa ukwo kwakaapo ndiyo kupere; eya, unozoita kuti kushoorwa kwake kumupetukire. Zvino unozoemesa hope yake kumasvingo enyika yake, asi unozopumhunwa nokuwa, aazooneki. Zvino umwe unozotonga pandau yake unozopinza mubharisi muuthende hwoumambo; asi pakati pemazuva mashomani unozourawa, pasina kutseneka nokuti hondo. “Pandau yake panozotonga munhu unoshooreka, uwo wevasikazopi kwaari kuremeredzwa kwoumambo; asi unozouya ngokunyarara, nokuona umambo ngokunyengerera kwokuchengedzera. Hondo dzinozokhukhuzwa yaamho nokugurwa pamberi pake, nomutongi wechitenderano naye. Apedza kuita chitenderano naye, unozoshanda ngokuchengedzera; ngokuti unozokwira, nokuita wakagwinya ngechikwata chidoko. Unozopinda ngokunyarara, nokundau dzinendimo dzakapindisisa kunaka dzenyika iyi; naye unozoita izvo zvevasikazi kuita madzibaba ake; unozoparadzira pakati pavo zvakapambwa nezvakachakatwa, noupfumi padera pavo. Unozoita mazano ake kurwisa mundau dzakagwinya kwomukuwo mudoko. “Unozomusa simba rake nokushinga kwake kurwisa mambo wokubani, anehondo huru; namambo wokubani unozomusa hondo anehondo yakapinda kukura nokugwinya. Asi aazobudiriri, ngokuti vanozomuitira mazano. Avo vanodya chikoaniswa chokudya kwake vanozomuuraya, nehondo yake inozokukuza, nevazhinji vanozowa pashi ngokuurawa. Madzimambo mairi, mwoyo yavo inokotamira kuita zvakashata, vanozogara patafura vechiereketa manyepo. Asi akuzobudiriri, ngokuti kupera kunozoapo ngomukuwo wakaemeswa. Unozohwirira kunyika yake, anoupfumi hwakawanda; nomwoyo wake unozotsvatsvana nechitenderano chakacheneswa. Unozoshanda kudai ngezveanoda, nokuhwirira kunyika yake. “Pamukuwo wakaemeswa unozohwirira, nokuenda kubani; asi panguva iyi azvidai ngomukuwo wokutanga. Ngokuti ngarava dzeKitimu dzinozouya kurwa naye, unozosvipidzwa mwoyo, unozohwirira. Unozonyangadzwa nokuparadza chitenderano chakacheneswa. Unozohwirira nokuzwana naavo vanosiya chitenderano chakachena. Hondo inotumwa ndiye inozogara nokuzosvipisa ndau yakacheneswa norusvingo. Vanozodusa mibairo yokupishwa yezuva rimwe ngarimwe, vanozoemesa chinyangadzo chinoparadzanisa. Naavo vakadai ndivo vanoshaishira chitenderano unozovapaukisa ngokunyengerera kwokuchengedzera; asi vanhu vanozia Mwari wavo vanozogwinya, nokuita mishando yakakura. Vakangwara pakati pevanhu vanozopa kuzwisisa kuvazhinji; vanozowa ngeshoti, nomurazvu womuriro, ngouhloko, nokuchakatwa, mazuva akawanda. Naapo vanozowa, vanozodetserwa ngokudetserwa kudodoko, asi vazhinji vanozonamatira kwevari ngokunyengerera kwokuchengedzera. Nevamweni vavo vanokuzwisisa vanozowa, kuvaedza, nokuvasukisisa, nokuvachenesa, metsa kumukuwo wokupera, ngokuti chichiri chomukuwo wakaemeswa. “Mambo unozoita kudai ngokuda kwake. Unozodzikudza, nokudzipinimidza pachake kuita mukuru kupinda zvimwari zveshe, unozoereketa zvinoshamisa zvokurwisa Mwari wezvimwari. Unozobudirira metsa panguva youshungu yazarisika, ngokuti icho chakaemeswa chinozoitika. Aazoremeredzi zvimwari zvemadzibaba ake, nokuti kudisisa vakadzi, nokuti kupinimidzazve ngechimwari nokuti ngechiri, ngokuti unozodzikurisa padera pazveshe. Asi pandau peizvo unozoremeredza chimwari chemarusvingo; chimwari chevasikazi kuzia madzibaba ake unozochiremeredza ngomukore nesirivha, nemapuwe anomutengo mukuru, nezvinodakadza. Unozoita izvi mumarusvingo akapindisisa kugwinya echidetserwa ngechimwari chisikaziikanwi. Avo vanomutenda unozovaremeredza kakurutu; unozovaemesa kuita vatongi padera pevazhinji, unozokoanisa nyika kuti aone kuuyirwa. “Ngomukuwo wokupedzisira mambo wokubani unozomurwisa. Asi mambo wedera unozokasira kurwa naye, unozouya kudai ngechipupuri, anengoro nevagadhi vemahachi, nengarava dzakawanda. Unozopotera munyika idzi, nokurwa nadzo nokuenda ndimwo kudai ngendambi. Unozopotera munyika inouthende, nemakumi emakumi emazana anozoparadzwa; asi idzi dzinozopona kubva kunyara yake, Edhomu, Moabhi, norupande rukuru rwevaAmoni. Unozotambanudza nyara yakezve padera penyika idzi, nenyika yeEgipite aizopokonyoki. Unozoita mutongi padera poupfumi hwomukore nohwesirivha, nepadera pezviro zveshe zvinomutengo mukuru zveEgipite; nevaRibhia nevaEthiopia vanozoapo patsoka dzake. Asi mashoko anobva kumabvazuva nedera anozomukarudza, naye unozobuda anoushungu hukurutu kuparadza nokupedza kakurutu vazhinji. Unozoemesa matende engome yake panyika iri pakati poruandhle nomutunhu unouthende, wakacheneswa. Asi uchaguma pamagumo ake, pasina naumwe unozomudetsera.” Pamukuwo uwo Mikhaeri, mutongi mukuru, uwo unoema kungwarira vanhu vako unozomiruka.Unozoapo mukuwo wokutambudzika, usikazi kumboapo kubvira apo pakatanga kuuya madzinza munyika. Asi pamukuwo uwo vanhu vako vanozonunurwa, weshe unozooneka akanyorwa mubhuku. Vazhinji veavo vanoata mubukuta renyika vanozomuka, vamweni mukupona kusikaperi, nevamweni mukutsveruka nokushoorwa kusikaperi. Naavo vakangwara vanozojeka kudai ngokun'anikira kwomudenga; naavo vanotenderudzira vazhinji mukururama vanozojeka kudai ngenyeredzi mhera nariini. “Asi iwewe, Dhanieri, ngwarira mazwi akafishika, ukonye bhuku ngokunamira metsa kumukuwo wokupera.Vazhinji vanozorumba apa naapo nokuzia kunozowanzwa.” Zvino inini Dhanieri ndakaringira, ringira, kwakaema vamweni vairi, umwe pamhiri porwizi ngouno, noumweni pamhiri porwizi ngeiyo. Umweni wavo wakati kumunhu waisimira machira orukangaza waiya padera pemvura yorwizi, “Unozoita mukuwo wakaitawani metsa kupera kweiyi mishamiso?” Neni ndakazwa munhu uwo waiya akasimira machira orukangaza, uwo waiya padera pemvura yorwizi, amirudza nyara yake yokumudyo nenyara yake yokumuoshwe mudenga, echipika ndiye unopona mhera nariini kuti unozoita mukuwo, nemikuwo miiri, norupande rwomukuwo; naapo apedza kuparadza simba revanhu vakacheneswa, zveshe izvi zvinozopera. Ndakazwa, asi andizi kuzwisisa; ndizvo ndakati, “O mambo wangu, anozoita magumonyi ezviro izvi?” Wakati, “Enda hako, Dhanieri, ngokuti mazwi akonyiwa nokunamirwa metsa kumukuwo wokugumisira. Vazhinji vanozosukisiswa, nokucheneswa, nokuedzwa, asi vakashata vanozoita zvakashata. Akuna naumwe wevakashata unozozwisisa, asi avo vakangwara vanozozwisisa. Kubvira pamukuwo wokuduswa kwomubairo wokupishwa wezuva rimwe ngarimwe, nechinyangadzo chinoparadza chechiemeswa, kunozoapo gumi remazana rimwe nemazana mairi nemakumi mapfumbamwe emazuva (1,290). Unomuchena uwo unoemera nokuguma kumazuva gumi rimwe remazana nemazana matatu nemakumi matatu nemashanu (1,335). Asi iwewe, enda hako kumagumo, uzorore, nokuema muchikoaniswa chako pakupera kwemazuva.” Izwi raMambo Mwari rakauya kunaHosea mukororo waBheeri, mumazuva amambo Uzia, Jothamu, Ahazi naHezekia, madzimambo aJudha, nomumazuva amambo Jerobhoamu mukororo waJoashi weIsuraeri. Naapo paakatanga kuereketa Mambo Mwari kubudikidza ndiHosea, Mambo Mwari wakati kunaHosea, “Enda, udzitorere mukadzi hure, ubare vana vokuhura, ngokuti nyika inohura kakurutu ngokubva kunaMambo Mwari.” Ndizvo wakaenda, akatora Goma mwanasikana waDhibraimu; naye wakatonha mimba, akamuberekera mukororo. NaMambo Mwari wakati kwaari, “Dudza zina rake kuti Jezireeri; ngokuti mukamukuwo kadoko, ndinozoorora mhatso yaJehu ngendaa yengazi yaJezireeri, neni ndizoita kuti umambo hwemhatso yaIsuraeri hupere. Pazuva iro ndinozogura uta hwaIsuraeri muBani raJezireeri.” Wakatonhazve mimba, akabereka mwanasikana. Zvino Mambo Mwari wakati kwaari, “Dudza zina rake kuti Ro-ruhama, ngokuti andichazoitiri nyasha mhatso yaIsuraeri nokuti kuvakungurira. Asi ndinozoitira nyasha mhatso yaJudha, ndinozovaponesa kubudikidza ndiMambo Mwari, Mwari wavo; andizovaponesi ngouta, nokuti ngeshoti, nokuti ngehondo, nokuti ngemahachi, nokuti ngevagadhi vemahachi.” Naapo arumura Ro-ruhama, wakatonha mimba, akabereka mukororo. Zvino Mwari wakati, “Dudza zina rake kuti Ro-Ami, ngokuti amuri vanhu vangu akadi, neni andiiti Mwari wenyu.” Asi uwandu hwevanhu vaIsuraeri hunozodai ngejecha reparuandhle, risikapimwi nokuti kuerengwa; kunozoitika kuti ndau apo pakaronzwa kwevari kuti, “Amuri vanhu vangu akadi,” apapo kunozoronzwa kwevari kuti, “Muri vakororo vaMwari unopona.” Vanhu vaJudha nevanhu vaIsuraeri vanozounganidzwa pamwepo, navo vanozodziemesera soro rimwe; vanozokwira kubva kunyika iyi, ngokuti zuva raJezireeri rinozoita guru. Ronzai kuvakoma venyu kuti, “Ami,” nokuvakunda venyu kuti, “Ruhama.” Potai mai enyu, potai; ngokuti aari mukadzi wangupi, neni andiri mwamuna wakepi. Ndizvo ngaarashe uhure hwake kubva pamberi pehope yake, nokuomba kwake kubva pakati pemazamo ake, nokuti ndinozomukhumura kuti aite mutitinini, ndimuemese kudai ngezvaakaita ngezuva rokuberekwa kwake, ndimuite kudai ngeshango, ndimuemese kudai ngenyika yakaoma, ndimuuraye ngenyota. Neni andizoitiri nyasha vana vake, ngokuti vana vokuhurwa. Ngokuti mai avo vakaita uhure; iye wakavabereka wakaita zvinotsverudza. Ngokuti wakati, “Ndinozoteera zvigango zvangu, zvinondipa chingwa changu nemvura yangu, nemamviri angu emakwai, rukangaza rwangu, mafuta angu, nokumwa kwangu.” Ndizvo, ringira, ndinozoshosha njira yako ngeminzwa, ndinozoaka rushosha kwaari, kuti asazoona njira dzake. Unozoteera zvigango zvake, asi aazozvibati; naye unozozvitsvaka, asi aazozvioni. Zvino unozoti, “Ndinozoenda, ndihwirire kumwamuna wangu wokutanga, ngokuti zvaiya zvakapinda kunaka kwendiri kune zvino.” Ngokuti aazi kuzia kuti ndini ndakamupa koroni nevhini nemafuta, nokuwanza kwaari sirivha nomukore, zvevakanasirira Bhaari. Ndizvo ndinozohwirira nokutora koroni yangu ngomukuwo wayo, nevhini rangu ngenguva yaro, ndinozomutorera mamviri angu emakwai norukangaza rwangu, zvaakapuwa kufukidza utitinini hwake. Zvino ndinozoonisa kutsveruka kwake mukuona kwezvigango zvake, akuna unozomununura kubva kunyara yangu. Ndinozoita kuti kweshe kudakara kwake kupere, mishongano yake yemadhiri, neyepakutawa kwomwedzi, nemaSabatha ake, nemishongano yake yeshe yakaemeswa yemadhiri. Ndinozohwanda mivhini yake nemionde yake, yaakaereketa ndiyo kuti, “Iyi mithuso yangu yendakapuwa ngezvigango zvangu.” Ndinozoiita gwasha, nemhuka dzomushango dzinozoidya. Ndinozomuorora ngendaa yemazuva emadhiri aBhaari, apo akapisha mitombo kwaari, naye akadzinemesa ngendandazi dzake dzomunzee nezvinemeso zvake, akateera zvigango zvake, akandiriyarwa inini, Mambo Mwari unoronza. Ndizvo, ringira, ndinozomunyengerera, ndimuunze mushango, ndechiereketa kumwoyo wake. Kubvira apo ndinozomupa minda yake yemivhini, nokuita Bani reAkho musiwo wokugonda. Naapo unozopingura, kudai ngemazuva outsva hwake, nokudai ngezuva raakabuda kubva munyika yeEgipite. Pazuva iro, unoronza Mambo Mwari, unozondidaidza kuti, “Mwamuna wangu;” auchazondidaidzi kuti, “Bhaari wangu.” Ngokuti ndinozodusa mazina aBhaari kubva kumuromo wake, nakamwe aachazombodaidzwi ngemazina awo. Ndinozokuitira chitenderano ngeiro zuva nemhuka dzomushango, shiri dzomudenga, nezvinotamanda pamavhu; ndinozogura uta, shoti nehondo kubva munyika, ndechizoita kuti vaate pashi ngokungwaririka. Ndinozokutora kuti uite mukadzi wangu mhera nariini, mukururama, nomukutonga kwakanaka, ngorudo runenyasha. Ndinozokutora kuti uite mukadzi wangu mukugondeka; newe unozozia Mambo Mwari. Pazuva iro ndinozopingura, Mambo Mwari unoronza, ndinozopingura matenga, nawo anozopingura nyika; nenyika inozopingura koroni, vhini, nemafuta; neizvo zvinozopingura Jezireeri. Neni ndinozomukusha ndemene mumavhu. Ndinozomuitira nyasha uwo usikazi kuitirwa nyasha; ndinozoti kwevari vasiri vangu, “Muri vanhu vangu;” navo vanozoti, “Ndiwe Mwari wangu.” Mambo Mwari wakati kwendirizve, “Enda, ida mukadzi unodiwa ngemudiwa wake naye ihure, kudai ndiMambo Mwari unoda vaIsuraeri, kunyazwi vanoringira kunezvimwari zvimweni, vanodazve makheke anemarizeni.” Ndizvo ndakamutenga ngezvigurwa zvesirivha gumi nezvishanu, nedengu rebare, nechipimo chevhini. Neni ndakati kwaari, “Unosisira kugara neni uri wangu mazuva akawanda; usazoita hure, usazoita mukadzi womunhu umweni; ngokudaro ndinozoitawo kwouri.” Ngokuti vaIsuraeri vanozogara mazuva akawanda vasina mambo, vasina mutongi, vasina mubairo, vasina muedzaniso wokudira, vasina efodi nokuti terafimu. Ngesure kweizvi vaIsuraeri vanozohwirira nokutsvaka Mambo Mwari, Mwari wavo, naDhavhidha mambo wavo; vanozomutya Mambo Mwari nokunaka kwake ngemazuva okugumisira. Izwai izwi raMambo Mwari, O vanhu vaIsuraeri; ngokuti Mambo Mwari unehasha naavo vanogara munyika. Amuna ugondeki nokuti nyasha, nokuti kuzia Mwari munyika. Kupika, kunyepa, kuuraya, kuba, kuhura zvaitwa; ngazi inoteera ngazi. Ndizvo nyika inozobonda, navo veshe vanogaramwo vanozopera simba, pamwepo nemhuka dzomushango neshiri dzomudenga; kunyazwi nehove dzoruandhle dzinopera. Asi munhu asazoita hasha, usaitira umweni ndaa, ngokuti ndine hasha kweuri, O mupristi. Unozopumhunwa masikati, muprofeti naye unozopumhunwa anewe usiku; neni ndinozoparadza mai ako. Vanhu vangu vanoparadzwa ngendaa yokutama kuzia; ngokuti waramba kuzia, ndizvo ndinokuramba, kuti usaita mupristi kwendiri. Newe wariyarwa mipango yaMwari wako, neniwo ndinozoriyarwa vana vako. Pevanopinda kuwanda, ndipo pevanopinda kushaisha kwendiri; ndinozotsandura uthende hwavo kuita kutsverudzwa. Vanodya kushaisha kwevanhu vangu, vanokarisa mwoyo yavo padera pokushata kwavo. Kunozodai ngevanhu, kudai ngomupristi; ndinozovaorora ngendaa yenjira dzavo, ndechizovapa misharo yezviito zvavo. Vanozodya, vasikaguti; vanozohura, vasikawandi; ngokuti vakarekera kupurutana kunaMambo Mwari. Kuhura, vhini nevhini idzva zvinotora kuzwisisa. Vanhu vangu vanotsvaka kupangwa mazano ngeguri redanda, nendonga yavo inovapa kufembera. Ngokuti mweya wokuhura wakavaita kuti vapauke, navo vakaenda koohura vechisiya Mwari wavo. Vanopira midiro padera pemitunhu, nokupisha mutombo unegwema padera pezvimitunhu, pashi pemiti yemiokhi, miphopura, nemiterebhinethi, ngokuti bvute rayo rakanaka. Ndizvo vanasikana venyu vanozohura nevazakazi venyu vanozoomba. Andizoorori vanasikana venyu apo voohura, nokuti vazakazi venyu apo voomba; ngokuti vamuna pachavo vanoomba vega nemahure, vanopira midiro pamwepo nevahuri vemutemperi; ndizvo vanhu vasikazwisisi vanozowa. Kunyazwi wechihura, O Isuraeri, usatendera kuti Judha ashaishe. Usapotera Girigari, nokuti usakwira Bhethiavheni, nokuti kupika kuti, “Kudai ngezvaanopona Mambo Mwari.” Kudai ngetsiru risikazwi, Isuraeri aazwi; zvino Mambo Mwari ungavausha kudai ngekakwai kumafuro akapamhama here? Efuraimu washonganiswa nemiedzaniso yokudira, murekerei ega. Naapo kumwa kwavo kunozhazha kwapera, vanogara vechihura; vatongi vake vanodisisa zvinotsverudza kupinda uthende hwavo. Dutu ramuputira mumaphaphiro aro; navo vanozotsverudzwa ngendaa yemibairo yavo. “Izwai ichi, O vapristi! Purutana, O mhatso yaIsuraeri! Purutana, O mhatso yamambo! Ngokuti kutongwa kuri kwomuri, ngokuti mwakaita murau muri Mizipha, nomumbure wakatambanudzwa padera paThabho, nehunza yakatsiwa kudzama muShitimu, asi ndinozoorora veshe pamwepo. Ndinozia Efuremu, naIsuraeri aazi kufishika kubva kwendiri; ngokuti zvino, O Efuremu, wakahura, Isuraeri wakasvipiswa.” Mishando yavo aivatenderi kuti vatenderukire kunaMwari wavo. Ngokuti mweya wokuhura uri mukati mwavo, navo avamuzii Mambo Mwari. Kudzikudza kwaIsuraeri kunopupura muhope yake kumuitira ndaa; Efuremu unopumhunwa mukushaisha kwake; Judha naye unopumhunwa pamwepo navo. Vanozoenda nemitanga nemakwai avo nen'ombe dzavo kootsvaka Mambo Mwari, asi avazomuoni; wabva kwevari. Vakaita zvokuchengedzera kunaMambo Mwari; ngokuti vakabara vana vari vapara. Zvino mwedzi mutsva unovapedza pamwepo neminda yavo. Ridzai runyanga muGibhea, negwama muRama. Ridzai mhere kuBhethiavheni, ringira sure kwako, Bhenjamini. Efuremu unozoitwa matongo ngezuva rokuororwa; pakati pemadzinza aIsuraeri ndakaziisa ngechokwadi chinozoapo. Vatongi vaJudha vaita kudai ngeavo vanobvisa mujeki womugano; ndizvo ndinozodurura ushungu hwangu padera pavo kudai ngemvura. Efuremu unotambudzwa, unopwanyiwa mukutongwa; ngokuti wakatenda kuteera pasina chiro. Ndizvo ndadai ngehonye kunaEfuremu nokudai ngokuora kumhatso yaJudha. Naapo Efuremu aona nhenda yake, naJudha aona bonje rake, zvino Efuremu wakaenda Asiria, akatuma kunamambo mukuru. Asi aazi kukona kukurapa, nokuti kuporesa bonje rako. Ngokuti ndinozodai ngemhondoro kunaEfuremu, nokudai ngemhondoro itsva kumhatso yaJudha. Inini ndemene, ndinozobaura nokuenda; ndinozotwara kuenda, akuna unozomuponesa. Ndinozopetukazve kundau yangu, metsa vazia ndaa yavo, nokutsvaka hope yangu. Mukutambudzika kwavo vanozopota nyasha dzangu. “Uyai, ngatihwirire kunaMambo Mwari; ngokuti ndiye wakabaura, ndiyezve unozotirapa; wakachaya, ndiye unozotisunga. Ngesure kwemazuva mairi unozotimusirira; ngezuva rechitatu unozotimirudza, kuti tipone mukuona kwake. Ngatizie, ngatiangire kukwedzera kuti timuzie Mambo Mwari; kubuda kwake kwakagwinya kudai ngokuedza; unozouya kwetiri kudai ngemvura yokutanga inonaya, kudai ngemvura inodiridzira panyika. “O Efuremu, ndinozoitenyi kwouri? O Judha, ndinozoitenyi kwouri? Rudo rwako rwakadai ngegore remangwanani, nokudai ngebeto rinokasira kuparara. Ndizvo ndavatema ngevaprofeti; ndavauraya ngemazwi omuromo wangu, nokutonga kwangu kwakadai ngokubuda kwokujeka. Ngokuti ndinodisisa rudo runenyasha, haiwa mubairo, nokuzia Mwari kupinda midiro inopishwa. Asi avo kudai ndiAdhamu vakagura chitenderano; apo vakaita zvokuchengedzera kwendiri. Gireadhi idhorobha raavo vanoshanda zvakashata, rinematotomba engazi. Kudai ngezvikwata zvembavha zvinohwarira munhu, ngokudaro chikwata chevapristi chinouraya munjira yeShekhemu, vanoita zvinonyangadza zvakakura. Mumhatso yaIsuraeri ndaona chiro chakashata yaamho; kuripo kuhura kunaEfuremu, Isuraeri wasvipiswa. Newewo, O Judha, kukukura kwaemeserwa kwouri. “Apo ndakahwirinza ubatwa hwavanhu vangu. “apo ndaida kuponesa Isuraeri, kushata kwaEfuremu kwakaoneka, nokushata kweSamaria; ngokuti vanoita manyepo, mbavha inopotera, nechikwata chembavha chinochakata ngokubanze. Asi avapinimidzi mumwoyo mwavo kuti ndinokarakadza kweshe kushata kwavo. Zvino zviito zvavo zvinovatendenedza, zviripo pamberi pehope yangu. “Ngokushata kwavo vanoita kuti mambo adakare, nevatongi ngemanyepo avo. Veshe vaombi; vakadai ngechoto chinobaswa ngomubiki, uwo unorekera kukhundidzira, apo apedza kukanya hlama, imetse ifeme. Ngezuva ramambo wedu vatongi vakarwara ngokupupira kwevhini; wakatambanudza nyara yake nevashoori. Kudai ngechoto mwoyo yavo inobaka ngokuchengedzera; ushungu hwavo hunobaka usiku hweshe; mangwanani hunobaka kudai ngomuriro unemirazvu. “Veshe vanopisha kudai ngechoto, vanopedza vatongi vavo. Eshe madzimambo avo awa; akuna naumwe pakati pavo unodaidza kwendiri. “Efuremu unodzikumanidza nevanhu; Efuremu chingwa chisikazi kutsanduridzwa. Vapara vanodya simba rake, asi aazvizii; bvudzi raanemvi riripo kwaari apo naapo, asi aazvizii. Kudzikudza kwaIsuraeri kunopupura kumuitira ndaa; asi avahwiriri kunaMambo Mwari, Mwari wavo, nokuti kumutsvaka, ngendaa yeizvi zveshe. Efuremu waita kudai ngenjiya, benzi, risina mwoyo; vanodaidza Egipite, vanoenda kuAsiria. Apo vanoenda, ndinozokandira mumbure wangu padera pavo; ndinozovadzasa pashi kudai ngeshiri dzomudenga; ndinozovaorora, kudai ngokushaisha kwavo. “Ihehe kwevari, ngokuti vakatiza kubva kwendiri! Kuparadzwa ngakua kwevari, ngokuti vakamukira kurwa neni! Ndaizovanunura, asi vanoereketa manyepo ndini. Avachemi kwendiri kubva mumwoyo yavo, asi vanoboorera vari pamibhedhi yavo; vanodziunganidzira koroni nevhini, vanondimukira. Ndini ndakadzidzisa nokugwinyisa mioko yavo, asi vanoronga zvakashata ndini. Vanohwirira asi haiwa kuno UwoUripadera-pazveshe; vakadai ngouta hwakashata; vatongi vavo vanozowa ngeshoti ngendaa youshungu hworurumi rwavo. Ichi chinozoita kushoorwa kwavo munyika mweEgipite.” “Isa gwama pamuromo wako! Umwe wakadai ngegodzi uri padera pemhatso yaMambo Mwari, ngokuti vagura chitenderano changu nokupauka kubva kumupango wangu. Isuraeri unochemera kwendiri echiti, ‘Mwari wangu, isusu vaIsuraeri tinokuzia.’ Isuraeri wakarasha zvakanaka; gaa rinozomurumbirira. “Vakaemesa madzimambo, asi haiwa ngokubudikidza ndini; vakaemesa vatongi, asi andizi kuzia ndizvo. Ngesirivha yavo nomukore wavo vakadziitira miedzaniso yokudira, yokuparadzwa kwavo. Konyana rako rinorambwa, O Samaria.Ushungu hwangu hunobaka kurwa navo. Unozoita mukuwo wakadini vasati vaita vasina ndaa? Ngokuti unobva muIsuraeri, mushandi wakariumba; andi Mwari akadi. Konyana reSamaria rinozoputswa kuita zvigurwa. Ngokuti vanokusha dutu, vanozokukura chipupuri. Zviyo zvakaema azvina mitsonzoti, aizobari zviyo; yanyabara, vapara vanozozvidya. Isuraeri wamedzwa; zvino vari pakati pemadzinza vanozodai ngechidziyo chisikadetseri. Ngokuti vakwira Asiria, kudai ngembizi inohamba yega; Efuremu wadzitengesa kuzvigango. Kunyazwi vadzitengesa pakati pemadzinza, zvino ndinozovaunganidza. Vanozotambudzika zvino pashi pomutwaro wamambo nevatongi. “Naapo Efuremu paakawanza maarita okushaisha, maarita akaita kuti ashaishe. Kunyazwi ndikamunyorera zviro zvikuru zvezvironzo zvangu, asi zvakaerengwa kuita chiro chipara. Kunyazwi vanopira midiro yangu yakapinda kunaka, kunyazwi vanodya nyama, Mambo Mwari aavaashiri akadi. Zvino unozokarakadza kushata kwavo, nokuunzidzira kushaisha kwavo; vanozohwirira Egipite. Isuraeri wariyarwa Muiti wake, akaaka ngome; naJudha wawanza madhorobha akashosherwa; asi ndinozotumira muriro padera pemadhorobha ake, nawo unozopedza ngome dzake.” Usadakara, O Isuraeri! Usadakara kudai ngemadzinza amweni, ngokuti wakaenda koohura kubva kunaMwari wako. Wada muthuso wokuhora pambuwa dzeshe. Mbuwa nopokukamura vhini azvizovapi kudya, nevhini idzva rinozovakoreresa. Avazogari vari munyika yaMambo Mwari; asi Efuremu unozohwirira Egipite, vanozodya kudya kusikazi kusukika muAsiria. Avazodururi midiro yokumwa vhini kunaMambo Mwari, midiro yavo yevanopira aiyizodakadzi kwaari. Mibairo yakadaro inozodai ngechingwa chevabondi; veshe vanochidya vanozosvipiswa; ngokuti chingwa chavo chokupona kwavo kwega; achizouyi mumhatso mwaMambo Mwari. Munozoitenyi ngezuva redhiri rakaemeswa, nezuva redhiri raMambo Mwari? Ngokuti, kunyazwi kudai vatiza ngendaa yokuparadzwa, Egipite rinozovaunganidza, Mempfisi rinozovaika. Rukato ruchavatorera zviro zvavo zvinomutengo mukurutu zvesirivha; minzwa inozoapo mumatende avo. Mazuva okuororwa aguma, mazuva okuunzidzirwa aguma; Isuraeri unochema, “Muprofeti raabenzi, munhu womweya wapenga!” Ngendaa youwandu hwokushata kwako, kunyenya kwako kwakura. Muprofeti murindi waMwari wangu padera paEfuremu, asi murau womuteyi weshiri uri munjira dzake dzeshe, nokunyenya mumhatso yaMwari wake. Vakadzisvipisa kakurutu pachavo, kudai ngemazuva eGibhea; unozokarakadza kushata kwavo, unozoorora kushaisha kwavo. Ndakaona Isuraeri akadai ngemavhini mushango. Kudai ngemitanguro yomuonde yenguva yawo yokutanga ndakaona madzibaba enyu. Asi vakaenda kuBhaaripeori, vakadzipira kunechiro chinotsverudza, nokuita zvinonyangadza kudai ngechiro chevaida. Uthende hwaEfuremu hunozombururuka kuenda kure kudai ngeshiri: akuna kubara, akuna unemimba, akuna unoita mimba. Kunyazwi vanozorera vana vavo, asi ndinozoita kuti vafirwe, kuti pasazosara naumwe. Ihehe kwevari yaamho apo pendinobva kwavari! Efuremu wakasimwa pandau inodakarisa, kudai ngezvendakaona Thire, asi Efuremu unozobudisira vana vake kumuurayi. Vape, O Mambo Mwari, unozopenyi? Vape mimba inopfupfudzika, nemazamo akaoma. Kweshe kushata kwavo kwakatangira muGirigari; ndipo pendakavanyenya. Ngendaa yokushata kwezviito zvavo ndinozovadzinga kubva kumhatso yangu. Andichazovadi; veshe vatongi vavo vamukiri. Efuremu wachayiwa, runzinde rwavo rwaoma, avazobari michero. Kunyazwi vanobereka, ndinozouraya nemichero inodikanwa inobarwa yendani yavo. Ngokuti avazi kupurutana kwaari, Mwari wangu unozovaramba; vanozoita vapepesheki pakati pemadzinza. Isuraeri wakadai ngomuvhini wakanakisisa, unodziberekera michero yawo. Kuwanda kwemichero yake kunowanza maarita aanoaka; kudai ngokunaka kwenyika yake, wakaita sika dzokudira dzakanasa kunasirwa. Mwoyo wavo unonyepera; zvino vanosisira kutwara kushata kwavo. Unozoputsa maarita avo, nokuparadza sika dzavo. Ngokuti zvino vanozoti, “Atina mambo, ngokuti atityi Mambo Mwari; namambo ungatiitirenyi?” Vanoereketa mazwi akawanda, vechipika kunyepa, vechiita zvitenderano; ndizvo kutonga kunomera kudai ngomuti unoukaira unouraya munhoro dzomunda. Vagari vomuSamaria vanohuta ngendaa yemakonyana eBhethiavheni. Vanhu varo vanozobonda ngendaa yaro, nevapristi vemiedzaniso vanozochema, avo vakadakara ngendaa youthende hwaro, hwakabva kweriri. Rinozotorwa kuenda Asiria, kuita chipo chamambo mukuru. Efuremu uchaiswa muchitsverudzo, naIsuraeri unozotsverudzwa ngomupangi wake. Mambo weSamaria unozoparadzwa, kudai ngechipande chiri padera pemvura. Ndau dzakakwirira dzeAvheni, kushaisha kwaIsuraeri, dzinozoparadzwa. Minzwa nemakato zvinozomera padera pemaarita avo. Vanozoronza kuti kumitunhu, “Tifukidzei;” nokuzvimitunhu kuti, “Tiwirei.” Kubvira pamazuva aGibhea wakashaisha, O Isuraeri; apo vakaangira. Hondo aizovanyisi here muGibhea? Muchidisiso changu ndichavaorora; nemadzinza anozounganidzwa kurwa navo apo vanosungwa ngendaa yezvishaishi zvavo zvakapetwa. NaEfuremu waiya akadai ngetsiru rakadzidziswa, rinoda kupura; neni ndakasiya mutsipa waro wakanaka; asi ndinozoita kuti paEfuremu atse pashi; Judha unosisira kurima, Jakobe unozoputsa maondo pachake. Dzikushirenyi kururama, chekai nyasha dzinorudo; rimai makura enyu; ngokuti waamukuwo wokutsvaka Mambo Mwari, kuti auye, anaise kururama padera penyu. Mwakarima kushata, mwakacheka zvinonyangadza, mwadya michero yemanyepo. Ngokuti mwagonda simba renyu, nouwandu hwengwazi dzenyu, ndizvo bope rehondo rinozoapo padera pevanhu venyu, nemasvingo enyu eshe anozoparadzwa, kudai ndiSharimani wakaparadza Bhethiaribheri ngezuva rehondo, apo anamai pevakaputswa kuita zvigurwa pamwepo nevana vavo. Izvi ndizvo zvinozoitwa kwouri, O Bhetheri, ngendaa yokushata kwako kukuru. Mumambakwedza mambo waIsuraeri unozogurwa yaamho. “Apo Isuraeri achimwana, ndakamuda, ndakadaidza mukororo wangu kubva muEgipite. Kuvadaidza kazhinji kwendakaita, vakapinda kuenda kuretu kubva kwendiri; vakaangira kupira mibairo kumaBhaari, vakapisha mitombo inegwema rakanaka kumiedzaniso yakatsetswa. Asi ndini ndakadzidzisa Efuremu kuhamba, ndechivabata munyara dzangu; asi avazi kuzia kuti ndakavaponesa. Ndakavakweya ngemapote enyasha dzomunhu, ngezvisungo zvorudo. Kwevari ndaiya ndakadai ngeavo vanobvisa joka patsaya dzavo. Ndakakotama pashi kwevari, ndikaisa kudya pamberi pavo. “Vanozohwirira munyika mweEgipite, nomuAsiria unozoita mambo wavo, ngokuti vakaramba kupetuka kwendiri. Shoti inowira padera pemadhorobha avo, inopedza sika dzemisiwo yavo, vechidya ngendaa yokuronga kwavo vemene. Vanhu vangu vanoemesa kuhwirira sure kubva kwendiri. Kune Uri-padera-pazveshe vanodaidza, asi aavamirudzi. “Ndingakuita marekererenyi, Efuremu? Ndingakupira ngenjiranyi, O Isuraeri? Ndingakuita maitirenyi kuti udai ndiAdhima? Ndingakuita mabatirenyi kudai ndiZebhoimu? Mwoyo wangu unotenderudzwa mukati mwangu; nyasha dzangu dzinokura mukati mwangu. Andizoiti ushungu hwangu hunotyisa, andizohwiririzve kooparadza Efuremu; ngokuti ndiri Mwari, haiwa mukororo womunhu, Umwe Wakachena uri pakati pako, neni andizouyi muushungu. “Vanozoteera Mambo Mwari, uwo unobhonga kudai ngemhondoro; apo yechibhonga, vana vake vanozouya vechihuta vechibva kumabirirazuva. Vanozouya vechihuta kudai ngeshiri dzechibva muEgipite, nokudai ngenjiya yechibva munyika mweAsiria; neni ndinozovahwirinza kumhatso dzavo, unoronza Mambo Mwari.” Efuremu wanditendenedza ngemanyepo, nemhatso yaIsuraeri ngokuchengedzera; asi Judha uchatonga naMwari, unogondeka kuneUmwe Wakacheneswa. “Efuremu unoguta ngedutu, unoteera dutu rokumabvazuva zuva reshe; unowanza manyepo nokuparadza; unoita chitenderano naAsiria, nemafuta anotwara kuenda Egipite.” Mambo Mwari unehasha naJudha, unozoorora Jakobe kudai ngenjira dzake, nokumuunzidzira kudai ngezviito zvake. Mundani wakabata chisisinho chomukoma wake; nomuutsva hwake wakadzipana naMwari. Wakadzipana nengirosi, akanyisa; wakachema, nokupota nyasha dzake; wakashongana naye muBhetheri, naapo wakaereketa naye. Mambo Mwari, Mwari wehondo, Mambo Mwari, ndiro zina rake. Asi iwewe, petuka kunaMwari wako; ungwarire rudo nokutonga kwakanaka, newe uangire kugarira Mwari wako nguva dzeshe. “Mutengesi, unezvipimo zvokuchengedzera munyara mwake, unodisa kutambudza. Efuremu wakati, ‘A, ndaita gurudza, ndadzionera upfumi; mukuuyirwa kwangu kweshe akuna kushata kwakaoneka mwendiri kungandiitira ndaa.’ Ndini Mambo Mwari, Mwari wako, kubvira munyika yeEgipite; ndichazoita kuti ugarezve mumatende, kudai ngemazuva emadhiri akaemeswa. Ndakaereketa kuvaprofeti, ndini ndakawanza zvioniso, nokubudikidza ngevaprofeti ndinozounza kuparadzwa. MuGireadhi kurimwo kushata, ngegwinyiso vanozoita vasina shwiro. MuGirigari vanopira midiro yemikono, ndizvo maarita avo anozodai ngemirwi yemapuwe munhoro dzomunda.” Jakobe wakatizira kunyika yeAramu, iyo Isuraeri wakashandira kupuwa mukadzi; kuti apuwe mukadzi, wakausha makwai. Kubudikidza ngomuprofeti Mambo Mwari wakabudisa Isuraeri kubva muEgipite, kubudikidza ngomuprofeti wakangwarirwa. Efuremu wakamunyangadza kakurutu, ndizvo Mambo Mwari wake unozounza ndaa dzake padera pake, unozomuhwirinzira ngendaa yezvituko zvake. Naapo Efuremu akaereketa, vanhu vakahuta; wakakudzwa muIsuraeri; asi wakashaisha kubudikidza ndiBhaari, naye wakafa. Nazvino vanoangira kushaisha, vanodziitira miedzaniso yavo, miedzaniso yokudira yesirivha yakanyunguruswa, kudai ngokuzwisisa kwavo, yeshe mishando yengwazi. Vanoereketa ndiyo kuti, “Vanhu vanopira midiro ngavachingamidze makonyana ngomuromo.” Ndizvo vanozodai ngemhute yemangwanani nokudai ngebeto rinokasira kuparara, kudai ngemazungu anotorwa ngechipupuri kubva pambuwa, nokudai ngechiushi chinobuda paburi. “Asi ndaiya Mambo Mwari, Mwari wako, kubvira munyika yeEgipite; auzii Mwari asi inini; ngepabanzi pangu akuna muponesi. Ndini ndakakuzia mushango, munyika yakaoma kakurutu. Apo pendakavapa kudya, vakagutiswa; naapo vagutiswa, mwoyo wavo wakadzikudza, ndizvo vakandiriyarwa. Ndizvo ndinozoita kudai ngemhondoro kwevari; kudai ngekhamba panjira ndinozovahwarira. Ndinozowira padera pavo kudai ngebheya rakabirwa vana varo, ndinozobaura ruzarira rwomwoyo wavo; naapo ndinozovadya kudai ngemhondoro, kudai ngezvingaitwa kwevari ngechikara chomushango. “Ndinozokuparadza, O Isuraeri, ngokuti kudetserwa kwako kuri mwendiri. Uri pari zvino mambo wako uwo ungakuponesa? Ngokuri mumadhorobha ako eshe kunevatongi vako, avo vowakati ndivo, ‘Ndipei mambo nevatongi?’ Ndakamupa mambo mukunyangadzwa kwangu, ndikamubvisa muushungu hwangu. Kushata kwaEfuremu kwakasungwa; kushaisha kwake kwakangwarirwa. Kurwadziwa kwokubereka mwana kunouya padera pake, asi mukororo usikazi kungwara; ngokuti ngenguva kwayo aadziunzi pamuromo wendani. Ndinozovatenga kubva kusimba reiba here? Ndinozovaripira kubva mukufa here? O kufa, uri pari ukaira hwako? O iba, kuri pari kuparadza kwako? Nyasha dzakafishika kubva kumadziso angu. Kunyazwi anobereka vana pakati pehama dzake, dutu rokumabvazuva rinozouya, kuputika kubva kunaMambo Mwari rechimiruka kubva mushango, nechinyuka chake chinozopwa, nesaa rinozoita makandwa. Rinozobvisa upfumi hwake hwechidziyo cheshe chinomutengo mukuru. Samaria rinozoororwa, ngokuti rakamukira Mwari waro; vanozowa ngeshoti; chiya dzavo dzinozoputswa kuita zvigurwa, nevakadzi vaane mimba vanozotumburwa.” O Isuraeri, hwirira kunaMambo Mwari, Mwari wako, ngokuti wakawa ngokushata kwako. Tora mazwi, uhwirire nawo kunaMambo Mwari, wechiti kwaari, “Bvisa kushata kweshe, ashira icho chakanaka; nesu tinozopira michero yemiromo yedu. Asiria aazotiponesi; atizogadhi mahachi; atichazoronzizve kuti, ‘Mwari wedu,’ kumushando wenyara dzedu. Mweuri nherera dzinoona nyasha.” “Ndinozoporesa kusikagondeka kwavo; ndinozovada pasina mutengo, ngokuti ushungu hwangu hwakunukuka kubva kwevari. Ndinozodai ngebeto kunaIsuraeri; unozotumbuka kudai ngegofa, nokubudisa nzinde dzake kudai ngegwasha reRebhanoni. Nhai dzake dzinozotambarara; unaku hwake hunozodai ngomuti womuorivhi, negwema rake rinozodai ngeRebhanoni. Vanozogarazve pashi pebvuri rangu, vanozorima zviyo, nokutumbuka kudai ngomuvhini; gwema rake rinozodai ngevhini reRebhanoni. O Efuremu, ndichineyi miedzaniso yokudira? Ndini ndinopingura nokumungwarira. Ndakadai ngomuti muishi womusaiprusi; michero yako inobva kwendiri.” Uwo wakangwara, unozwisisa izvi zviro; uwo wakangwara unozvizia. Ngokuti njira dzaMambo Mwari dzakarurama, nevakarurama vanohamba mukati mwadzo; asi vashaishi vanowa mukati mwadzo. Izwi raMambo Mwari rakauya kunaJoeri mukororo waPhethueri. Izwanyi ichi, O harahwa, mupurutane, mweshe vagari venyika! Chiro chakadaro chakamboitika kumazuva enyu here, nokuti kumazuva emadzibaba enyu? Ronzerai vana venyu ndicho, nevana venyu ngavaronzere vana vavo, nevana vavo kumubarirwana umweni. Icho chakasiiwa ngemakonye, ndongwe dzakadya. Chakasiiwa ngendongwe, gwata rakadya; neicho chakasiiwa ngegwata, mbunga dzakadya. Mukai, imwimwi zviradza, mucheme; mwechiboorera, mweshe imwimwi vamwi vevhini, ngendaa yevhini idzva, ngokuti rabviswa pamiromo yenyu. Ngokuti dzinza rapamba nyika yangu, rakagwinya, risikaerengeki; mazino aro mazino emhondoro, naro rinemazino emhondoro hadzi. Rakahwanda mivhini yangu, rakamwesa ngepakati mionde yangu; rakakwamura mapande ayo nokukandira pashi; nematai ayo aita akachena. Chemai kudai ngemhandwe yasimira jira remasaka ngendaa yokufirwa ngomwamuna woutsva hwayo. Munikero wezviyo nomunikero wokumwa yabviswa kubva kumhatso yaMambo Mwari. Vapristi, vashandi vaMambo Mwari, vanobonda. Minda yaparadzwa, nyika inochema; ngokuti zviyo zvaparadzwa, vhini idzva raomeswa, mafuta anopera. Perai simba, imwimwi varimi, boorerai, imwimwi vatonongori vemivhini, ngendaa yekoroni, nendaa yebhare; ngokuti zvisimwa zvomunda zvaparadzwa. Muvhini unozeketera, muonde unofota; muphomegraniti, mubvumo, muapura, nemiti yeshe yomumunda yaoma, ngegwinyiso kudakara kunofota pakati pevanhu. Simirai machira emasaka, mucheme, imwimwi vapristi; boorerai, imwimwi vashandi vearita. Uyai, atai usiku hweshe muri mumachira emasaka, imwimwi vashandi vaMwari wangu! Munikero wezviyo nomunikero wokumwa azvichaunzwi kumhatso yaMwari wenyu. Chenesai zuva rokuera kudya, mudaidzire mushongano wokudira. Unganidzai vakuru navo veshe vagari vomunyika kumhatso yaMambo Mwari, Mwari wenyu, mucheme kakurutu kunaMambo Mwari. Ihehe ngezuva iro! Ngokuti zuva raMambo Mwari raa pasinde, rinouya kudai ngokuparadzwa kunobva kune Une-simba-reshe. Kudya akuzi kubviswa mukuona kwedu here, kudakara nokudakadzwa kubva kumhatso yaMwari wedu? Mbeu dzaora dziri pashi pamaondo adzo, matura aita matongo; tsapi dzaputswa, ngokuti zviyo zvakorera. A kugomera kunoita mhuka! Mitanga yen'ombe inonzerereka ngokuti ayina mafuro; kunyazwi mitanga yemakwai yaparadzwa. Kweuri, O Mambo Mwari, ndinozochema, ngokuti muriro wakapedza mafuro omushango, nomurazvu wapisha miti yeshe yomushango. Kunyazwi nemhuka dzomushango dzinochemawo kwouri, ngokuti ndwizi dzemvura dzaoma, nomuriro wapedza mafuro omushango. Ridzai gwama muZioni, muridze mhere pamutunhu wangu wakacheneswa! Veshe vanogara munyika ngavahute, ngokuti zuva raMambo Mwari rinouya, nazvino raa pasinde, zuva rechidima nokusvipa, zuva remakore nechidima chakakora! Kudai ngechidima chakasvipa chinoparadzirwa padera pemitunhu, hondo yakakura inesimba inouya; akuzikumboapo hondo yakadaro, nokuti akuzoapozve ngesure kwavo mumakore emibarirwana ichauya. Muriro unopedza pamberi pavo; ngesure kwavo murazvu unopisha. Pamberi pavo nyika inodai ngomunda weEdheni, asi ngesure kwavo shango risikagarwi; akuna chinovatiza. Chiemo chavo chakadai ngechiemo chemahachi; kudai ngevagadhi vemahachi ehondo vanorumba kudaro. Kudai ngebope rengoro, vanonyanduka padera pemagumo emitunhu, kudai ngebope romurazvu womuriro unopedza tsotso, kudai ngevanhu vakagwinya vakaemeswa kurwa hondo. Pamberi pavo vanhu vanotambudzika kakurutu, hope dzeshe dzichatsvukuruka. Kudai ngevanhu vehondo vanorumba, kudai ngevarwi vehondo vanokwira rusvingo. Umwe ngaumwe unofora munjira yake, avapauki kumisara yavo. Avathuthumidzani nevamweni; vanofora veshe umwe ngaumwe munjira yake; vanopwanya ngepakati peshoti, apana unovabata. Vanotomukira padera pedhorobha, vanorumba padera porusvingo; vanokwira padera kupinda mumhatso ngepamafasitera kudai ngembavha. Nyika inozungunyika pamberi pavo, matenga anohuta. Zuva nomwedzi zvinosvipiswa, nyeredzi dzinofisha kujeka kwadzo. Mambo Mwari unoereketa izwi rake pamberi pehondo yake; kukuranyi kwakaita hondo yake! Vakawandisa avo vanopurutana mupango wake. Ngegwinyiso zuva raMambo Mwari iguru, rinotyisa kakurutu; ndiani ungariemera? “Asi kunyazwi nazvino,” unoronza Mambo Mwari, “Petukai kwendiri ngomwoyo wenyu weshe, ngokuera kudya, ngokuchema nokubonda.” Baurai mwoyo wenyu, haiwa zvokusimira zvenyu. Petukai kunaMambo Mwari, Mwari wenyu, ngokuti unenyasha, akazara ngokukungurira, unononoka kunyangadzwa, wakazara ngenyasha dzinorudo, naye unodzibata mwoyo kubva mukuorora. Ndiani unozia pamweni unozohwirira, echitenderuka, nokusiya zvifumiso sure kwake, mudiro wezviyo nomudiro wokumwa kunaMambo Mwari, Mwari wenyu? Ridzai gwama muZioni, chenesai mukuwo wokuera kudya, mudaidzire mushongano wokudira. Unganidzai vanhu, chenesai mbungano, unganidzai vakuru, unganidzai vana, kunyazwi nechiya. Mukwambo ngaabude kubva mukamera rake, namakhoti kubva mukamera rake. Pakati peberere nearita vapristi, vashandi vaMambo Mwari, ngavacheme. Ngavaronze kuti, “Kungurira vanhu vako, O Mambo Mwari, usaita nhaka yako mukushoorwa, kuita chisverudzo pakati pemadzinza. Chingazoronzenyi pakati pevanhu kuti, ‘Uri pari Mwari wavo?’ ” Zvino Mambo Mwari wakaita ndurumwa ngenyika yake, nokukungurira vanhu vake. Mukupingura vanhu vake Mambo Mwari unoti, “Ringira, ndinomutumira zviyo, vhini, mafuta, nemwi munozogutiswa ndizvo; andichazomuiti chishekedzo pakati pemadzinza. Ndinozodusa hondo yedera kubva kwomuri kuenda kuretu nokuidzingira kunyika yakaoma isina chiro, isikagarwi, hope yayo yakaringira kuruandhle rwokumabvazuva, norupande rwayo rwesure rwakaringira kuruandhle rwokumabirirazuva; nokunuhwa kwayo negwema rayo rakashata kunozokwira. Ngegwinyiso wakaita zvakakura. Usatya, O nyika; dakara nokudakadzwa, ngokuti Mambo Mwari waita zviro zvikuru. Musatya, imwimwi mhuka dzomushango, ngokuti mafuro omushango akasvipira; muti unobara michero yawo, muonde nomuvhini zvinopa hukuro yakazara. O vana veZioni, dakarai, mudakadzwe munaMambo Mwari, Mwari wenyu; ngokuti wapa mvura yokutanga ngendaa yenyu, wadurura pashi mvura yakawandisa ngendaa yenyu, mvura yokutanga nemvura yokuteera, kudai ngekaretu. Mbuwa dzinozozara ngekoroni, zvisviniro zvichamwaraka ngevhini nemafuta. Ndinozohwirinzira kwomuri makore edzakadya ndongwe, gwata, makonye nembunga, hondo yangu huru yendakatuma kurwa pakati penyu. Munozodya zvinokwana, mwechiguta, nokukudza zina raMambo Mwari, Mwari wenyu, uwo wakamuitira zvinoshamisa. Nevanhu vangu avazombotsverudzwizve. Munozozia kuti ndiri pakati paIsuraeri, nokuti inini Mambo Mwari, ndini Mwari wenyu, akuna umweni. Vanhu vangu avazombotsverudzwizve. Zvino ngesure kweizvi ndinozodurura Mweya wangu padera pevanhu veshe; vakororo venyu nevanasikana venyu vanozoprofeta, harahwa dzenyu dzinozorota hope, nemajaha enyu anozoona zvioniso. Kunyazwi nepadera pevamuna nepevakadzi hloko, mumazuva awo ndinozodurura mweya wangu. Ndinozoonisa mishamiso mudenga nomunyika, ngazi nomuriro, nemvumi dzechiushi. Zuva rinozotsandurwa kuita chidima, nomwedzi kuita ngazi, risati raguma zuva guru rinotyisa raMambo Mwari. Zvino weshe uwo unokumbira ngezina raMambo Mwari unozoponeswa; ngokuti kuMutunhu Zioni nomukati mweJerusarema vachazoamwo avo vakapokonyoka, kudai ngezvaaereketa Mambo Mwari, nepakati pevakasara vanozoapo avo vaanodaidza Mambo Mwari.” “Ngokuti zvino, ngaawo mazuva nepamukuwo uwo, apo ndinozopetudzazve vakachakatwa vaJudha neJerusarema, ndinozounganidza madzinza eshe nokuaunza muBani raJehoshafati; ndinozopinda mukutonga navo apo ngendaa yevanhu vangu nendaa yenhaka yangu Isuraeri, avo vevakaparadzira pakati pemadzinza. Vakagurirana nyika yangu, nokuita mabhigidha ngevanhu vangu; vakatengesa varumbwana kuti vatenge mahure, nokutengesa vasikana kuti vapuwe vhini kuti vamwe. “Muri chiinyi kwendiri, imwimwi Thire neSidhoni, nenharaunda dzeshe dzevaFiristia? Munozondiunzidzira ngechiro here? Mukandiunzidzira, ndinozopetudza zviito zvenyu padera pamasoro enyu zvinozvi ngokukasira. Ngokuti mwatora sirivha yangu nomukore wangu, mwatwarazve zviro zvangu zvakanasa kunaka kuisa mumatemperi enyu. Mwatengesa vanhu vaJudha neveJerusarema kuvaGiriki, kuti muvabvise kuvaisa kuretu kubva kumugano wavo. Asi zvino ndinozovamusa kuti vabude kubva kundau yemwakavatengesa, neni ndinozopetudza zviito zvenyu padera pemasoro enyu. Ndinozotengesa vakororo venyu nevanasikana venyu munyara yevanhu vaJudha, navo vanozovatengesa kuvaSabheani, kudzinza riri kuretu; ngokuti Mambo Mwari waereketa. Teketesai ichi pakati pemadzinza; nasirirai kurwa hondo, musai ngwazi. Varwi veshe ngavakwedzere, ngavakwire. Pfurai miromo yemapadza enyu kuita shoti, nemapanga enyu okutongora kuita mikhondo; usina simba ngaaronze kuti, ‘Ndiri ngwazi.’ Uyai ngokukasira, imwimwi madzinza eshe kundau dzeshe, mudziunganidzepo. Dzasa pashi ngwazi dzako, O Mambo Mwari. Madzinza ngaadzimuse, auye kuBani raJehoshafati; ngokuti ndinozogarapo kutonga madzinza eshe anovatendenedza. Unzai sikeyo, ngokuti zvokucheka zvaibva. Pindai, mutengese; ngokuti chisviniro chevhini chazara. Mabiya anofashukira, ngokuti kushata kwavo kwakakura.” Mbungano, mbungano mubani rokugura! Ngokuti zuva raMambo Mwari riri pasinde mubani rokugura. Zuva nomwedzi zvinosvipiswa, nenyeredzi dzinodzima kujeka kwadzo. Mambo Mwari unozotinhira kubva Zioni, nokuereketa ngeizwi rake kubva Jerusarema; matenga nenyika zvinozozungunyika. Asi Mambo Mwari unozoita bako revanhu vake, norusvingo rwakagwinya rwavanhu vaIsuraeri. “Ndizvo munozozia kuti inini Mambo Mwari, Mwari wenyu, ndinogara muZioni mutunhu wangu wakacheneswa. NeJerusarema rinozocheneswa, nevapara avachazombohambi kupinda ndimwo. Muzuva iro, mitunhu inozodonha vhini idzva, zvimitunhu zvinozoerera ngomukaka, nendwizi dzeshe dzaJudha dzinozoerera ngemvura, nechinyuka chinozobuda mumhatso yaMambo Mwari, nokudiridzira Bani reShitimu. Egipite rinozoita matongo, neEdhomu rinozoita shango risikagarwi, ngendaa yokugebenga kwakaitwa kuvanhu vaJudha, ngokuti vakaparadza ngazi isina ndaa munyika mwavo. Asi Judha unozogarwa mhera nariini, neJerusarema kumibarirwana yeshe. Ndinozochenesa ngazi yavo yendisikazi kuchenesa, ngokuti Mambo Mwari unogara muZioni.” Mazwi aAmosi, uwo waiya pakati pevaushi veThekoa, awo aakaona ngendaa yaIsuraeri mumazuva aUzia mambo waJudha, nomumazuva aJerobhoamu mukororo waJoashi mambo waIsuraeri, makore mairi kuzungunyika kwenyika kusati kwaitika. Naye wakati, “Mambo Mwari unotinhira kubva muZioni, nokuereketa izwi rake kubva Jerusarema; mafuro evaushi anooma, nepadera peKharmeri panooma.” Kutonga kwaMwari padera peVaakirwana vaIsuraeri. Izvi ndizvo zvinoronza Mambo Mwari: “Ngezvipauko zvitatu zveDhamasekusi nezvirongomuna, andizopetudzi kuororwa; ngokuti vakapura Gireadhi ngemipuro yesimbi. Ndizvo ndinozotumira muriro kumhatso yaHazaeri, nawo unozopedza ngome dzaBhenihadhadhi. Ndinozogura mipiningidzo yomusiwo weDhamasekusi, nokuparadza vagari vomuBani reAvheni, nouwo unobata ndonga youmambo weBhethiedheni; nevanhu veSiria vanozoita vasungwa kuenda Kiri,” unoronza Mambo Mwari. Izvi ndizvo zvinoronza Mambo Mwari: “Ngezvipauko zvitatu zveGaza nezvirongomuna, andizopetudzi kuororwa; ngokuti vakatwara vanhu veshe kuvaita vasungwa, koovapira kuEdhomu. Ndizvo ndinozotumira muriro padera perukumbati rweGaza, nawo unozopedza ngome dzaro. Ndinozoparadza vagari vanobva Ashidhodhi, nouwo unobata ndonga youmambo muAshikeroni; ndinozotenderudza nyara yangu kurwisa Ekironi, nevanosara vevaFiristia vanozofa,” unoronza Mambo Mwari. Izvi ndizvo zvinoronza Mambo Mwari: “Ngezvipauko zvitatu zveThire nezvirongomuna, andizopetudzi kuororwa; ngokuti vakapa vabatwa veshe kuEdhomu, navo avazi kukarakadza chitenderano choukama. Ndizvo ndinozotumira muriro padera perukumbati rweThire, uwo unozopedza ngome dzaro.” Izvi ndizvo zvinoronza Mambo Mwari: “Ngezvipauko zvitatu zveEdhomu nezvirongomuna, andizopetudzi kuororwa; ngokuti wakarumbirira hama yake ngeshoti, akarasha kukungurira kweshe; wakangwarira ushungu hwake hwakagara hwechiparadza nguva dzeshe, nokungwarira ushungu hwake mhera nariini. Ndizvo ndinozotumira muriro padera peThemani, nawo unozopedza ngome dzeBhozira.” Izvi ndizvo zvinoronza Mambo Mwari: “Ngezvipauko zvitatu zvevaAmoni nezvirongomuna, andizopetudzi kuororwa; ngokuti vakatumbura vakadzi vanemimba muGireadhi, kuitira kuti vakudze nyika yavo. Ndizvo ndinozobasa muriro padera perukumbati rweRabha, nawo unozopedza ngome dzaro, ngokudaidzira ngezuva rehondo, ngedutu guru ngezuva rechipupuri. Zvino mambo wavo unozoenda muubatwa, iye nevatongi vake pamwepo,” unoronza Mambo Mwari. Izvi ndizvo zvinoronza Mambo Mwari: “Ngezvipauko zvitatu zveMoabhi nezvirongomuna, andizopetudzi kuororwa; ngokuti wakapisha magodo amambo weEdhomu kuita dota. Ndizvo ndinozotumira muriro padera peMoabhi, nawo unozopedza ngome dzeKeriothi; Moabhi rinozofa mubope, mukudaidzira, mukurira kwegwama. Ndinozogura mutongi kubva pakati payo, ndinozouraya vatongi veshe vayo pamwepo naye,” unoronza Mambo Mwari. Izvi ndizvo zvinoronza Mambo Mwari: “Ngezvipauko zvitatu zvaJudha nezvirongomuna, andizopetudzi kuororwa; ngokuti vakaramba mipango yaMambo Mwari, navo avazi kungwarira zviemeso zvake, asi vakapauswa ngemanyepo amwewo, awo akateerwa ngemadzibaba avo. Ndizvo ndinozotumira muriro padera paJudha, nawo unozopedza ngome dzeJerusarema.” Izvi ndizvo zvinoronza Mambo Mwari: “Ngezvipauko zvitatu zvaIsuraeri nezvirongomuna, andizopetudzi kuororwa; ngokuti vanotengesa vakarurama ngesirivha, nevarombo ngemagwada mairi, avo vanotsikatsika soro romurombo mubukuta remavhu nokusukumidza vakapfaa kubva munjira; baba nomukororo vanoenda mumhandwe imweyo, kuti zina rangu rakachena risvipiswe. Vanodziradzika pashi pasinde pemaarita eshe padera pemachira akatorwa kuita chibatiso, nomumhatso yaMwari wavo vanomwa vhini raavo vakaripiswa. Asi ndakaparadza muAmori pamberi pavo, uwo kureba kwake kwaiya kwakadai ngourebu hwemisidhari, uwo waiya akagwinya kudai ngemiokhi; ndakaparadza michero yake padera, nenzinde dzake pashi. Zve ndakamukwidzazve kubva munyika yeEgipite, ndikamutungamirira makore makumi marongomuna mushango, kutora nyika yevaAmori. Ndakamirudza vamweni vevakororo venyu kuita vaprofeti, nevamweni vemajaha enyu kuita vaNaziriti. Andizvopi here, O vanhu vaIsuraeri? unoronza Mambo Mwari. Asi mwakaita kuti vaNaziriti vamwe vhini; mwakapanga vaprofeti mwechiti, ‘Musazoprofeta.’ Ndizvo ndinozokutsikirira pashi mundau yako, kudai ngengoro inotsikirirwa apo yakazara ngemwanda yezviyo. Ndizvo kutiza kwavanokasira kunozopera, nouwo wakagwinya aazokoni kugwinyisa simba rake, nengwazi aizokoni kudziponesa; nouwo unobata uta aazoemi, nouwo unokona kukasira kurumba aazodziponesi, nouwo unogadha hachi aazodziponesi, nouwo unomwoyo mukuru pakati pengwazi unozotiza ari mutitinini ngezuva iro,” unoronza Mambo Mwari. Izwai izwi iri raaereketa Mambo Mwari kurwisana nemwi, O vanhu vaIsuraeri, nemhuri yeshe yendakakwidza kubva kunyika yeEgipite: “Ndakazia imwimwi mwega pamhuri dzeshe dzenyika; ndizvo ndinozomuorora ngendaa yokushata kwenyu kweshe.” Vairi vangahamba pamwepo, vasikazi kutenderana here? Mhondoro ingarira here mugwasha, apo isina cheyaruma? Mhondoro itsva ingachema here mubako rayo, dai isikazi kubata chiro? Shiri ingawa mumurau here pamavhu, apo peisikazi kuteyiwa? Murau ungabwizuka here usina chowabata? Gwama ringaridzwa here mudhorobha, nevanhu vakarekera kutya? Zvakashata zvingagumira dhorobha here asi kuti Mambo Mwari azviita? Ngegwinyiso Mambo Mwari, Mwari aaiti chiro, asikazi kuonisa chakafishika chake kuvaranda vake vaprofeti. Mhondoro yarira, ndiani usikazotyi? Mambo Mwari, Mwari waereketa, ndiani ungareka kuprofeta? Teketesai mungome dzeAshidhodhi, nomungome dzomunyika yeEgipite mwechiti, “Unganai pachenyu padera pemitunhu yeSamaria, muringire nyongano huru irimwo mukati mwayo, kutambudzwanyi kuri mukati mwaro. Avazii kuita zvakarurama, unoronza Mambo Mwari, avo vanounganidza kugebenga nokuba mungome dzavo. Ndizvo izvi ndizvo zvinoronza Mambo Mwari, Mwari: Gaa rinozotendenedza nyika, nokudzasa pashi simba rako, nengome dzako dzinozochakatwa.” Mambo Mwari unoti: “Kudai ngomuushi unobvuka mirenje miiri kubva kumuromo wemhondoro, nokuti chigurwa chenzee; ndizvo vanhu vaIsuraeri vanogara muSamaria vanozobvukwa pakhona repamusheyareya neparupande rwomubhedhi.” Izwai, mupupure ngemhatso yaJakobe, unoronza Mambo Mwari, Mwari wehondo: “Pazuva rendinoorora Isuraeri padera pokushaisha kwake, ndinozoorora maarita eBhetheri; nenyanga dzearita dzinozogurwa, dzechiwa pamavhu. Ndinozoputsira pashi mhatso yepachando pamwepo nemhatso yepachirimo; nemhatso dzenyanga dzenzou dzinozoparadzwa, nemhatso dzakakura dzinozopera,” unoronza Mambo Mwari. Izwai izwi iri, imwimwi n'ombe dzeBhashani, muri padera poMutunhu weSamaria, avo vanotambudza varombo, vanopwanya vanotama, vanoti kuvamuna vavo, “Unzai chiro, timwe!” Mambo Mwari, Mwari wapika ngokuchena kwake, “Ringira, mazuva anouya padera penyu, apo vanozomudusa ngehoko, nevanosara venyu ngezviyedzo. Kubudikidza ngemaburi erukumbati munozobuda ngepakapwanyiwa, mweshe umwe ngaumwe ngeapo paari pamberi pake, nemwi munozokandirwa muHarmoni,” unoronza Mambo Mwari. “Uyai Bhetheri, mupauke; kuGirigari, muwanze zvipauko; unzai mibairo yenyu mangwanani eshe, nechimwe chegumi chenyu mikuwo yeshe yemazuva matatu. Mupishe mudiro wokubonga wechingwa chinomumera, nokuteketesa minikero yokuda kwenyu nokuiziisa; ngokuti munoda kuita, O vanhu vaIsuraeri, unoronza Mambo Mwari, Mwari. Ndakamupa kusukika kwemazino mumadhorobha enyu eshe, nokutamika kwechingwa kundau dzenyu dzeshe, asi amuzi kupetuka kwendiri, unoronza Mambo Mwari. Neni ndakabata mvura kubva kwemuri, apo kuchine mwedzi mitatu yokucheka; ndakaita kuti inaye padera pedhorobha rimwe, ndikaita kuti isanaya padera pedhorobha rimweni; yakanaya padera pemunda umwe, nepamunda apo peisikazi kunaya wakazeketera. Ndizvo madhorobha mairi nokuti matatu akahamba kuenda kudhorobha rimwe koomwa mvura, nawo aazi kuguta; asi amuzi kupetuka kwendiri, unoronza Mambo Mwari. Ndakamuchaya ngokufota nechirotarota: apo minda yenyu neminda yenyu yemivhini, nemionde yenyu, nemiorivhi yenyu yakabereka kakurutu, machonja akaidya; asi amuzi kupetuka kwendiri, unoronza Mambo Mwari. “Ndakatumira nhenda pakati penyu kudai ngezvakaitika muEgipite; majaha enyu ndakaauraya ngeshoti, ndikamutorera mahachi enyu; ndakaita kuti kunuhwa kwemakamba enyu kugume kumiro dzenyu; asi amuzi kupetuka kwendiri, unoronza Mambo Mwari. Ndakariga pashi vamweni venyu, kudai ngeapo Mwari paakarigira pashi Sodhoma neGomora, nemwi mwaiya mwakadai ngechitsa chinobviswa pachoto chomuriro; asi amuzi kupetuka kwendiri, unoronza Mambo Mwari. Ndizvo izvi zvendinozoita kwouri, O Isuraeri; ngokuti ndinozoita ichi kwouri, nasirira kushongana naMwari wako, O Isuraeri!” Ngokuti, ringira, uwo unoumba mitunhu, unosika dutu, unoonisa kupinimidza kwake kuvakororo vevanhu, uwo unoita kuti mangwanani aite chidima, nokutsikatsika padera pendau dzakakwirira dzenyika, Mambo Mwari, Mwari wehondo, ndiro zina rake. Izwai izwi iri rendinodaidzira kumuchemera, O mhatso yaIsuraeri. Mhandwe yaIsuraeri yakawa; aichazomiruki; yakasiiwa munyika yayo, pasina wokuimirudza. Ngokuti izvi ndizvo zvinoronza Mambo Mwari, Mwari: “Dhorobha raibuda gumi remazana rinozosara nezana, neiro raibuda zana rinozosara negumi, kumhatso yaIsuraeri.” Ngokuti izvi ndizvo zvinoronza Mambo Mwari kumhatso yaIsuraeri: “Nditsvakenyi, mupone. Asi musatsvaka Bhetheri, nokuti kupotera muGirigari, zve, musaparura kuenda Bheerishebha; ngokuti Girigari ngegwinyiso rinozoenda muusungwa, neBhetheri rinozoita risina shwiro.” Tsvakai Mambo Mwari, mupone, kuti asazoambura kuparadza kudai ngomuriro mumhatso yaJosefa, nokuparadza Bhetheri pasina naumwe unoudzima. A, imwimwi munotsandura kunaka kuita kuvava, nokuunza kururama pashi. Umwe uwo wakasika Zvinyarutanhatu neOrioni, echitsandura bvute rokufa kuita kuedza, nokuita kuti zuva riite chidima usiku; uwo unodaidza mvura yoruandhle, echiidurura padera pehope yenyika, Mambo Mwari ndiro zina rake; uwo unounza kuparadzwa kunobaka padera pevakagwinya, kuti kuparadzwa kuuye padera pengome. Vanomunyenya uwo unokaraidza pamusiwo, vanonyangadzwa ndiye unoereketa gwinyiso. Ndizvo ngokuti munotsikatsika murombo, nokutora mihengo yekoroni kubva kwaari, mwaaka mhatso dzemapuwe akatsetswa, asi amuzogari mukati mwadzo; mwakasima minda inodakadza yemivhini, asi amuzomwi vhini rayo. Ngokuti ndinozia uwandu hwokupauka kwenyu, nokukura kwezvishaishi zvenyu, imwimwi munotambudza vakarurama, munotora chitengero, munopaukisa varombo pamusiwo. Ndizvo uwo unokuzia unozonyarara ngomukuwowo, ngokuti mukuwo wakashata. Tsvakai zvakanaka, haiwa zvakashata, kuti mupone; ngokudaro Mambo Mwari, Mwari wehondo, unozoapo nemwi, kudai ngezvemwaronza. Nyenyai zvakashata, mude zvakanaka, muemese kutonga kwakanaka pamusiwo; pamweni Mambo Mwari, Mwari wehondo, unozoitira nyasha avo vanosara vaJosefa. Ndizvo izvi ndizvo zvinoronza Mambo Mwari, Mwari wehondo, Mambo: “Mumakhona eshe kunozoamwo kuchema; nomumapato mweshe vanozoti, ‘Ihehe! Ihehe!’ Vanozodaidza varimi koobonda, naavo ngwazi dzokuchema kuti vacheme. Muminda yeshe yemivhini kunozoapo kuchema, ngokuti ndinozohamba ngepakati penyu,” unoronza Mambo Mwari. Ihehe kwomuri munodisisa zuva raMambo Mwari! Ngenyi mwechidisisa zuva raMambo Mwari? Chidima, haiwa kujeka; kudai ngomunhu watiza kubva kumhondoro, nouwo wakashongana nebheya; nokuti apotera mumhatso akatsamira nyara yake parukumbati, nenyoka yoroyomuruma. Zuva raMambo Mwari ariiti chidima here, haiwa kujeka, nechidima kakurutu, chisina kun'anikira mukati mwacho? “Ndinonyenya, ndinoshoora mishongano yenyu yemadhiri, andidakariri mishongano yenyu yokudira. Kunyazwi munondipira midiro yenyu inopishwa nemidiro yenyu yezviyo, andizoiashiri; andizopinimidzi ngemidiro yokubonga yezvifuyo zvenyu zvakakora. Bvisai kwendiri bope rendwiyo dzenyu; andizozwi kuridzwa kwembira dzenyu. Asi kutonga kwakanaka ngakuerere kudai ngemvura, nokururama kudai ngorwizi runesimba. Mwakandiunzira mibairo nemidiro mushango makore makumi marongomuna here, O mhatso yaIsuraeri? Munozotora kukwira naSakuthi mambo wenyu, naKaiwani, chimwari chenyu chenyeredzi, miedzaniso yenyu yemwakadziitira. Ndizvo ndinozoita kuti muende muusungwa mberi kweDhamasekusi,” unoronza Mambo Mwari, uwo zina rake ndiMwari wehondo. Ihehe kwevari vanogarisika muZioni, neavo vanozwa kungwaririka paMutunhu weSamaria, vakuru vokutanga vemadzinza avo kwevari vanoenda vemhatso yaIsuraeri! Ambukai kuenda Kharine, muone; kubvapo endai Hamathi gurutu; zvino mworomwodzaka kuGathi revaFiristia. Vakapinda kunaka here kuno uhwu umambo? Nenyika yavo yakapinda kukura here kunenyika yenyu, O imwimwi munoisa kuretu zuva rakashata, nokuunza pasinde kutonga kwokugebenga? Ihehe vanoata pamibhedhi yenyanga dzenzou, nokutambarara pamisheyareya yavo, vechidya vana vemakwai nemakonyana kubva muzvibaya; avo vanoemba ndwiyo dzisina shwiro pamwepo nokurira kwembira; vanodziitira zviro zvokuridza, kudai ndiDhavhidha; avo vanomwa vhini ngemajomeya, nokudzidzodza ngezvokuzora zvakapinda kunaka, asi avasvipi mwoyo ngokutambudzika kwaJosefa! Ndizvo zvino vanozoita vokutanga kuenda muusungwa pamwepo naavo vanotanga kusungwa, nokushadaya kwavo vaitambarara kunozopera. Mambo Mwari, Mwari wapika ngokwake, unoronza Mambo Mwari, Mwari wehondo: “Ndinonyangadzwa ngodzikudza kwaJakobe, ndinonyenya ngome dzake; ndizvo ndinozopira dhorobha nezveshe zvirimwo.” Kudai vanhu gumi vechisara mumhatso imwe, vanozofa. Kudai hama imwe iyo inozopisha vakafa, inozotora muiri kuunza kubanze kwemhatso, naye unozoti kwaari, uwo uri mumarupande omukatikati emhatso, “Uchipo umweni newe here?” Naye unozoti, “Haiwa;” zvino hama inozoti, “Nyarara! Ngokuti atisisiri kuereketa ngezina raMambo Mwari.” Ringira, Mambo Mwari unopanga, mhatso huru inozoondomoka, nemhatso doko kuita maondo. Mahachi anorumba here padera poruware? Uripo here ungarima ruandhle ngen'ombe? Asi mwatsandura kutonga kwakanaka kuita chanduru, nomuchero wokururama kuita kuvava. Imwimwi munodakara ngechiro chisina shwiro, vanoti, “Atizi kudzitorera nyanga ngesimba redu here?” “Ngegwinyiso, ndinozomumirudzira dzinza kurwa nemwi, O mhatso yaIsuraeri, unoronza Mambo Mwari, Mwari wehondo; vanozomutambudza kubvira Rebhohamathi kuguma kumukova weArabha.” Izvi ndizvo zvaakandionisa Mambo Mwari, Mwari: Ringira, waiita ndongwe mukutanga kwokumera kwemwenje unokura; ringira, waiya mwenje waitseneneka ngesure kwokucheka kwamambo. Naapo dzakapedza kudya mwenje wenyika, ndakati, “O Mambo Mwari, Mwari, rekerera, ndapota! Jakobe ungaita maemerenyi? Mudoko yaamho.” Mambo Mwari wakakungurira ngendaa iyi; “Achizoitiki,” wakaronza Mambo Mwari. Izvi ndizvo zvaakandionisa Mambo Mwari, Mwari: Mambo Mwari, Mwari wakadaidzira kutonga kwomuriro; nawo wakaomisa ruandhle, nawo waipedza nyika. Zvino ndakati, “O Mambo Mwari, Mwari, rekera, ndapota! Jakobe ungaita maemerenyi? Mudoko yaamho.” Mambo Mwari wakakungurira ngendaa iyi; “Ichiwo achizoitiki,” wakaronza Mambo Mwari, Mwari. Izvi ndizvo zvaakandionisa: Ringira, Mambo Mwari waiya akaema pasinde porukumbati rwakaitwa panebote rokururamisa, anebote rokururamisa munyara mwake. NaMambo Mwari wakati kwendiri, “Amosi, unoonenyi?” Neni ndakati, “Bote rokururamisa.” Zvino Mambo Mwari wakati, “Ringira, ndinoemesa bote rokururamisa ndiro pakati pevanhu vangu Isuraeri; andichazovapindizve. Ndau dzakakwirira dzaIsaka dzinozoita shango, nendau dzakacheneswa dzaIsuraeri dzinozoparadzwa; neni ndinozomiruka kurwa nemhatso yaJerobhoamu ngeshoti.” Zvino Amazia mupristi weBhetheri wakatumira kunaJerobhoamu mambo waIsuraeri echiti, “Amosi wakaita bangano ndiwe pakati pemhatso yaIsuraeri; nyika aikoni kutwara mazwi ake eshe. Izvi ndizvo zvinoronza Amosi, ‘Jerobhoamu unozofa ngeshoti, naIsuraeri unosisira kupinda kuita hloko kuretu kubva kunyika yake.’ ” Amazia wakati kunaAmosi, “O muoni, enda, utizire kuretu kunyika yaJudha, udye chingwa chakoyo, uprofetepo. Asi usaprofetazve muBhetheri; ngokuti indau yamambo yakacheneswa, nayo itemperi roumambo.” Zvino Amosi wakapingura Amazia, “Inini ndaiya ndisiri muprofeti, nokuti mukororo womuprofeti; asi ndaiya muushi nomukayi wamaonde. NaMambo Mwari wakanditora apo pendaiteera zvifuyo, Mambo Mwari wakati kwendiri, ‘Enda, uprofete kuvanhu vangu Isuraeri.’ Ndizvo zvino izwa izwi raMambo Mwari: Iwewe unoti, ‘Usaprofeta kurwisa Isuraeri, usachumaira kurwisa mhatso yaIsaka.’ Ndizvo izvi ndizvo zvinoronza Mambo Mwari: ‘Mukadzi wako unozoita hure mudhorobha, vakororo vako nevanasikana vako vanozourawa ngeshoti, nenyika yako inozokoaniswa ngebote, newe wemene unozofira munyika isikazi kusukika, naIsuraeri ngegwinyiso unozopinda muusungwa kuretu kubva kunyika yake.’ ” Izvi ndizvo zvaakandionisa Mambo Mwari, Mwari: Ringira, chitundu chemichero yepazienza. Wakati, “Amosi, unoonenyi?” Neni ndakati, “Chitundu chemichero yepazienza.” Zvino Mambo Mwari wakati kwendiri, “Kupera kwaguma padera pevanhu vangu Isuraeri; andichazovapindizve. Ndwiyo dzetemperi dzinozoita kuboorera ngeiro zuva, unoronza Mambo Mwari, Mwari; miiri mizhinji yakafa inozokandirwa kundau dzeshe. Nyarara.” Izwai ichi, imwimwi munotsikatsika mutami, mwechiunza mukuparadzwa varombo venyika mwechiti, “Mwedzi mutsva unotawa unozopera riini, kuti titengese zviyo, neSabatha, kuti tipire koroni yokutengesa? Tinoita kuti efa riite doko nechipimo chikuru, nokubira ngezvipimo zvokuchengedzera, kuti titenganisane varombo ngesirivha, nomutami ngemagwada mairi, kutengesa makoto ekoroni?” Mambo Mwari wakapika ngokudzikudza kwaJakobe, “Ngegwinyiso anditongozoriyarwi nachimwe chezviito zvavo. Nyika aizohuti here ngendaa iyi, weshe unozochema unogaramwo, nayo inozokwira yeshe kudai ngendambi Naire, inozorashwa nokunzvaidzwa, kudai ngoRwizi Naire rweEgipite? Pazuva iro, unoronza Mambo Mwari, Mwari, ndinozoita kuti zuva ripote masikati, ndinozosvipisa nyika masikati zuva rakaara. Ndinozotsandura madhiri enyu kuita kubonda, nendwiyo dzenyu dzeshe kuita kuchema; ndinozounza machira emasaka pazviunu zveshe, nemhanza padera pesoro reshe; ndinozozviita kuti zvidai ngokubonda ngendaa yomukororo umwe ega, nokupera kwazvo kudai ngezuva rinovava. “Ngegwinyiso nguva iri kuuya, unoronza Mambo Mwari, Mwari, apo pendinozounza nzara panyika, haiwa nzara yokudya, nokuti nyota yokuda mvura, asi yokuzwa mazwi aMambo Mwari. Vanozonzerereka kubva kuruandhle kuenda kuruandhle, nokubva dera kuenda kumabvazuva; vanozorumba kuenda mberi nesure, kootsvaka izwi raMambo Mwari, asi avazorioni. Muzuva iro mhandwe dzakanaka nemajaha vanozodemera ngenyota. Avo vanopika ngechishaishi cheSamaria vechiti, ‘Kudai ngezvechinopona chimwari chako, O Dhani;’ ‘Kudai ngezveinopona njira yeBheerishebha;’ vanozowa, navo avazomirukizve.” Ndakaona Mambo Mwari akaema pasinde pearita, naye wakati, “Chaya sika dzepamusiwo, kuti madimba azungunyike, uzviputsire pamasoro avo veshe; naavo vanosara ndinozouraya ngeshoti; akuna naumwe wavo unozotiza, haiwa naumwe wavo unozotiza kupokonyoka. Kunyazwi vechitsa muSheori, kubva apo nyara yangu inozovatora; kunyazwi vanokwira mudenga, kubva apo ndinozovadzasa pashi. Kunyazwi vanohwara padera peKharmeri, kubvapo ndinozovatsvaka nokuvabvisa; kunyazwi vanodzifisha kubva kumadziso angu pashi poruandhle, kubvapo ndinozopanga nyoka yomuruandhle, nayo inozovaruma. Kunyazwi vanoenda muusungwa pamberi pemagaa avo, kubvapo ndinozopanga shoti, nayo inozovauraya; neni ndinozoisa madziso angu padera pavo kuvaitira zvakashata, haiwa zvakanaka.” Mambo Mwari, Mwari wehondo, uwo unogwama nyika, nayo inonyunguruka, navo veshe vanogaramwo vanobonda, nayo yeshe inokwira kudai ngeRwizi Naire, nokupwa kudai ngeNdwizi Naire yeEgipite, ndiye unoaka makamera ake mudenga, nokuemesa matsikiro ake padera penyika; uwo unodaidza mvura yoruandhle echiidurura padera penyika, Mambo Mwari ndiro zina rake. “Amuzi kudai ngevaEthiopia kwendiri here, O vanhu vaIsuraeri? Unoronza Mambo Mwari. Andizi kukwidza Isuraeri here kubva kunyika yeEgipite, nevaFiristia kubva Kafithori, nevaAramu kubva Kiri? Ringira, madziso aMambo Mwari, Mwari ari padera poumambo hunokushaisha, ndinozohuparadza kubva padera penyika; kwega kuti andizoparadzi yeshe mhatso yaJakobe, unoronza Mambo Mwari. Ngokuti, ringira, ndinozopanga, nokuzungunyisa mhatso yaIsuraeri pakati pemadzinza eshe, kudai ngounopepeta zviyo ngorutsero, asi akuna naimwe yembeu inozowa pashi pamavhu. Veshe vashaishi vevanhu vangu vanozofa ngeshoti, avo vanoti, ‘Kushata akuzotinyisi, nokuti kushongana nesu.’ ” Pairo zuva ndinozomirudza tende raDhavhidha iro rakawa, ndinozotsiira ndau dzaro dzakapwanyika; ndinozoakisa matongo ake, ndechizoriakisa kudai ngemazuva ekare, kuti vatore vakasara veEdhomu, nevemadzinza eshe avo vanodaidzwa ngezina rangu, unoronza Mambo Mwari uwo unoita ichi, “Ringira, nguva iri kuuya ngegwinyiso,” unoronza Mambo Mwari, “Apo murimi unozopinda mucheki, nouwo unokamura mavhini unozopinda unokusha mbeu; mitunhu inozodonhesa vhini idzva, nezvimitunhu zveshe zvinozoerera ndiro. Ndinozopetudza ubatwa hwevanhu vangu Isuraeri, navo vanozoakisa madhorobha akaputsika nokuagara; vanozosima minda yemivhini nokumwa vhini rayo; vanozorima minda nokudya michero yayo. Ndinozovasima munyika yavo, navo avachazobvitwizve kubva munyika yavo yendakavapa,” unoronza Mambo Mwari, Mwari wako. Chioniso chaObhadhia. Izvi ndizvo zvinoronza Mambo Mwari, Mwari ngendaa yeEdhomu. Takazwa mashoko anobva kunaMambo Mwari, mutumwa watumwa pakati pemadzinza, “Mirukai, ngatimiruke tivarwise ngehondo.” “Ringirai, ngegwinyiso ndinozomuita vadoko pakati pemadzinza; munozoshoorwa kakurutu. Kudzikudza kwomwoyo wako kwakakuchengedzera, iwewe unogara mumarutwe oruware, ugaro hwako hwakakwirira. Unoronza mumwoyo mwako kuti, ‘Ndiani unozondidzasa pashi pamavhu?’ Kunyazwi wechidzikwidza kudai ngegodzi, kunyazwi chisaki chako chinoemeswa pakati penyeredzi, ndinozokudzasa kubvapo, unoronza Mambo Mwari. Dai mbavha dzauya kwouri, dai, vabvuki usiku, kuparadzwa kwako kwaizokura kwakaitawani! Vasaizoba zvevaida zvega here? Dai vakayi vemavhini vakaguma kwouri, vasaizosiya madaranganwa here? A kutsvakwa kwezvaIsau! A kutsvakisiswa kwoupfumi hwake hwakafishika! Vanhu vaizwanana newe vakakuchengedzera, vakakudzingira kumugano; vanhu vakaiyana newe vakakuchengedzera, vakakunyisa; vanodya kudya kwako vakuteya ngechirimbana, akuna kuzwisisa kwacho. Ngeiro zuva, unoronza Mambo Mwari, ndinozoparadza vakangwara kubanze kweEdhomu, nevanozwisisa kubanze kweMutunhu waIsau. Ngwazi dzako dzinozokangaidzwa, O Themani, kuitira kuti weshe agurwe kubva kuMutunhu waIsau. Ngokuuraya nokugebenga hama yako Jakobe, kutsveruka kunozokufukidza, newe unozogurwa mhera nariini. Ngezuva iro rowakaema parutii, ngezuva iro vapara revakamutorera pfuma yake, nevapara vakapotera pamisiwo yake, vakaita mabhigidha ngendaa yeJerusarema, iwewewo waiya wakadai ngoumwe wavo. Asi iwewe usaisisira kuringira padera pehama yako ngezuva rokutambudzika kwake; usaisisira kudakara ngendaa yevanhu vaJudha ngezuva rokuurawa kwavo, nokuti kuereketa ngokudzikudza ngezuva rokutambudzika kwavo. Usaisisira kuti upotere pamusiwo wevanhu vangu ngezuva rokutambudzika kwavo; usaisisira kuti udakare ngezuva rokutambudzika kwavo, nokuti kutora upfumi hwavo ngezuva rokutambudzika kwavo kukurutu. Usaisisira kuti ueme pamhararano, kudziirira avo vakapona vake, nokuti kupira avo vakasara vake ngezuva rokutambudzika. Ngokuti zuva raMambo Mwari riri pasinde kurwa nemadzinza eshe. Kudai ngezvowaita, kunozoitwa kudaro kwouri; kuita kwako kunozopetuka padera pesoro rako. Ngokuti kudai ngezvemwakamwa padera pomutunhu wangu wakachena, madzinza eshe akamutendenedza anozomwa; anozomwa, echitangurira nawo anozodai ndiwo asikazi kumboapo. Asi paMutunhu weZioni kunozoapo avo vakapokonyoka, nawo unozoita wakacheneswa; mhatso yaJakobe inozogara nhaka youpfumi hwayo. Mhatso yaJakobe inozoita muriro, mhatso yaJosefa murazvu, mhatso yaIsau mahlanga; vachavapisha nokuvapedza; akuzoapo unosara wemhatso yaIsau; ngokuti Mambo Mwari waereketa. Avo vokubani vanozotora Mutunhu waIsau, naavo vomubani Shefera nyika yevaFiristia; vanozotora nyika yaEfuremu nenyika yeSamaria; Bhenjamini unozotora Gireadhi. Vasungwa vehondo iyi yevaIsuraeri vanozotora nyika yevaKhenani, kuguma Zarefathi; nevasungwa veJerusarema, avo vari muSefaradhi, vanozotora madhorobha okubani. Avo vakaponeswa vanozouya padera poMutunhu weZioni kutonga Mutunhu Isau; noumambo hunozoita hwaMambo Mwari.” Zvino izwi raMambo Mwari rakauya kunaJona mukororo waAmithai rechiti: “Miruka, uende Ninevhe, iro dhorobha guru, udaidzire kweriri kuriitira ndaa; ngokuti kushata kwavo kwaguma pamberi pangu.” Asi Jona wakamiruka kutizira Tharshishi kubva pamberi paMambo Mwari. Wakadzaka Jopa, akaona ngarava yaienda Tharshishi; ndizvo wakabhadhara mare yokuhamba ndiyo, akakwira mukati mwayo, kuenda navo Tharshishi kubva pamberi paMambo Mwari. Asi Mambo Mwari wakatuma dutu guru muruandhle, mubvumo mukuru wakabuda padera peruandhle, ngarava yaiya yooda kupwanyika. Zvino vahluzi vakatya, vakadaidzira veshe umwe ngaumwe kunechimwari chake. Vakarasha muruandhle mitwaro yaiya mungarava kuirerusa. Asi Jona waiya adzaka kumarupande omukati engarava, naye waiya aata pashi, akabatwa ngehope. Mukuru wengarava wakauya, akati kwaari, “Unoitenyi, iwewe muati? Miruka, udaidze kunamwari wako! Pamweni mwari unozopinimidza tisu, kuti tisazofa.” Vakati umwe kuneumweni wake, “Uyai, ngatiite mabhigidha, kuti tizie kuti ndaa ngeyani yaita kuti uku kushata kwauya padera pedu.” Ndizvo vakaita mabhigidha, akabata Jona. Zvino vakati kwaari, “Tironzere, tapota, ndaa ngeyani yaita kuti uku kushata kwauya padera pedu. Mushando wako ngowenyi? Unobva kuri? Nyika yako ngeyokuri? Unobva kuvanhu vakadini?” Wakati kwevari, “Ndiri muHebheru; ndinodira Mambo Mwari, Mwari womudenga, uwo wakasika ruandhle nenyika yakaoma.” Zvino vanhu vakatya kakurutu, vakati kwaari, “Wakaitirenyi ichi?” Ngokuti vanhu vakazia kuti waitiza kubva pamberi paMambo Mwari, ngokuti wakavaronzera. Zvino vakati kwaari, “Tinozoitenyi kwouri, kuti ruandhle runyarare kwetiri?” Ngokuti ruandhle rwakaangirira kukwira nokukwira. Wakati kwevari, “Nditorei, mundikandire muruandhle; mwadaro ruandhle runozonyarara kwomuri; ngokuti ndinozia kuti indaa yangu yaita kuti mubvumo mukuru uyu ugume padera penyu.” Zvakanyadaro vanhu vakahluza ngesimba kuhwirira kunyika; asi vakakorera, ngokuti ruandhle rwakaangirira kukwira kurwisana navo. Zvino vakadaidzira kunaMambo Mwari, vakati, “Tapota, Mambo Mwari, tapota, tisazofa ngendaa yokupona kwomunhu uyu. Usatiitira ndaa ngengazi isina ndaa; ngokuti ndiwe, O Mambo Mwari, waita kudai ngezvaisisira kwouri.” Ndizvo vakatora Jona, vakamukandira muruandhle; noruandhle rwakanyarara. Zvino vanhu vakatya Mambo Mwari kakurutu, vakapira mubairo kunaMambo Mwari nokupika mhiko. Zvino Mambo Mwari wakanasirira hove huru kuti imedze Jona; naJona waiya mundani mwehove mazuva matatu nousiku hutatu. Zvino Jona wakakumbira kunaMambo Mwari, Mwari wake, ari mundani mwehove, wakati, “Ndakadaidzira kunaMambo Mwari ngendaa yokutambudzika kwangu, naye wakandipingura; ndakachema ndiri mundani yeSheori, newe wakazwa izwi rangu. Ngokuti wakandikandira muudzamu, mumwoyo woruandhle, nendambi yakanditendenedza; mafungo ako eshe nemavimbi ako akandifukidza. Zvino ndakati, ‘Ndarashwa kubva pamberi pemadziso ako; ndinozoringirazve ngenjiranyi kutemperi rako rakachena?’ Mvura yakandimbonya; kudzama kwakanditendenedza; majekajeka akaputira soro rangu. Panzinde dzemitunhu ndakadzaka pashi panyika nemipiningidzo yayo yakakonyeka padera pangu mhera nariini; asi wakabudisa kupona kwangu kubva murindi, O Mambo Mwari, Mwari wangu. Apo mweya wangu wakademera mukati mwangu, ndakakarakadza Mambo Mwari; nomukumbiro wangu wakapotera kwouri, mutemperi rako rakachena. Avo vanotenda miedzaniso isina shwiro vanoramba gwinyiso rokuitirwa kwavo nyasha. Asi inini neizwi rokubonga ndinopira mudiro kwouri; ndinozoripa icho chendakapika. Ruponeso runobva kunaMambo Mwari.” Zvino Mambo Mwari wakaereketa kuhove, nayo yakarutsira Jona pamavhu akaoma. Izwi raMambo rakauya kunaJona ngokwechipiri rechiti, “Miruka, uende Ninevhe, iro dhorobha guru, uchumaire kweriri izwi rendinokuronzera.” Ndizvo Jona wakamiruka, akaenda Ninevhe, kudai ngeizwi raMambo Mwari. Zvino Ninevhe raiya dhorobha guru yaamho, romuhambo wemazuva matatu. Jona wakatanga kupotera mudhorobha muhambo wezuva rimwe. Naye wakadaidzira akati, “Achipo mazuva makumi marongomuna, Ninevhe rinozoparadzwa!” Vanhu veNinevhe vakagonda Mwari; vakadaidzira kuera kudya, munhu weshe mukuru nomudoko wakapfeka machira emasaka. Naapo mashoko akaguma kunamambo weNinevhe, wakamiruka kubva pedendemaro rake, akabvisa chokufuka chake, akapfeka machira emasaka, akagara mumarota. Zvino wakaita kuti kuteketeswe muNinevhe mweshe: “Ngechironzo chamambo nevakuru vake, chokuti, ‘Akuna munhu nokuti mhuka, n'ombe nokuti makwai, zvinozoraira chiro. Zvisazodya nokuti kumwa mvura. Asi vanhu nemhuka ngazvifukidzwe ngemachira emasaka, nazvo ngazvicheme ngesimba kunaMwari. Zveshe ngazvitenderuke kubva kunjira yazvo yakashata, nokubva mukugebenga kuri munyara dzazvo. Ndiani unozia? Pamweni Mwari unozotenderuka nokukungurira, nokupauka kubva mukunyangadzwa kwake kunotyisa, kuti tisazofa.’ ” Naapo Mwari aona mishando yavo, kuti vakatenderuka kubva kunjira dzavo dzakashata, Mwari wakafuratira kushata kwaakaronza kuti waizoita kwevari; naye aazi kukuita. Asi zvakashisha Jona kakurutu, akanyangadzwa. Wakakumbira kunaMambo Mwari, akati, “Ndapota, O Mambo Mwari! Izvi andizvopi here zvendakaereketa, apo pendaiya munyika mwangu? Ndizvo zvakaita kuti nditizire Tharshishi kutanga; ngokuti ndakazia kuti uri Mwari unenyasha, wakazara ngokukungurira, unononoka kunyangadzwa, unowanza nyasha dzinorudo, unokunukuka kubva mukuorora. Nazvino, O Mambo Mwari, ndapota, dusa kupona kwangu kubva kwendiri, ngokuti kwakapinda kunaka kwendiri kufa kuno kupona.” NaMambo Mwari wakati, “Zvakanaka here kuti unyangadzwe?” Zvino Jona wakabuda kubva mudhorobha, akagara kurupande rwokumabvazuva kwedhorobha, naye wakadziitirapo muchacha. Wakagara pashi pawo mubvute, echigarira kuti aone zvaizoitika kudhorobha. Mambo Mwari, Mwari wakanasirira mupfuta, akaita kuti ukure padera paJona, kuti uite bvute padera pesoro rake, kumuembedzera mukutambudzika kwake. Ndizvo Jona wakadakara kakurutu ngomupfuta. Asi apo mumambakwedza ezuva raiteera Mwari wakanasirira gonye, naro rakatema mupfuta, worowozeketera. Naapo zuva rabuda, Mwari wakanasirira dutu rinopisha rokumabvazuva; nezuva rakapisha pasoro raJona, oroodemera, wakakumbira mukati mwake kuti afe. Wakati, “Kwakapinda kunaka kwendiri kufa kuno kupona.” Asi Mwari wakati kunaJona, “Zvakanaka here kuti unyangadzwe ngendaa yomupfuta?” Naye wakati, “Eya, ndinonasa kunyangadzwa metsa kufa.” Zvino Mambo Mwari wakati, “Wapinda kutambudzika ngendaa yomupfuta, wousikazi kushandira nokuti kuita kuti ukure; uwo wakamera usiku, ukafazve usiku. Akusisiri here kuti nditambudzikire Ninevhe, iro dhorobha guru, umwo munevanhu vanopinda zana nemakumi mairi emakumi emazana (120,000), avo vasikakoni kuparadzanisa pakati penyara yavo yokumudyo neyokumuoshwe, nezvifuyo zvakawanda?” Izwi raMambo Mwari iro rakauya kunaMikha weMoreshethi mumazuva aJothamu, Ahazi, naHezekia, madzimambo aJudha, raakaona ngendaa yeSamaria neJerusarema. Izwai, imwimwi vanhu mweshe; purutanai, O nyika, nazvo zveshe zvirimwo; Mambo Mwari, Mwari ngaapupure ndimwi. Ngokuti, ringira, Mambo Mwari unobuda kubva kundau yake, naye unozodzaka pashi nokutsikatsika padera pendau dzakakwirira dzenyika. Zvino mitunhu inozonyunguruka pashi pake nemapani anozoputika, kudai ngenamo pasinde pomuriro, nokudai ngemvura inodururwa pabiriiri. Zveshe izvi indaa yokushaisha kwaJakobe, nezvishaishi zvemhatso yaIsuraeri. Ndaa yaJakobe ngeiri? Andiyo here Samaria? Nendau dzakakwirira dzaJudha ngedziri? Andidzopi Jerusarema here? Ndizvo ndinozoita kuti Samaria ridai ngomurwi panyika, pandau panosimwa minda yemivhini.Ndinozodurura pashi mapuwe aro mubani, nokubudisa pamhene madzeyo aro. Miedzaniso yaro yeshe yakatsetswa inozopwanyiwa kuita zvigurwa, yeshe mithuso yaro inozopishwa ngomuriro, nayo yeshe miedzaniso yaro yokudira ndinozoiparadza; ngokuita muthuso wouhure rakaiunganidza, nokudai ngomuthuso wouhure inozoshandiswazve. Ngeizvi ndinozochema nokuboorera; ndinozoenda ndakakhumurwa magwada ndiri mutitinini; ndinozoita kuchema kwakadai ngekwehava, nokuchema kudai ngemhowani. Ngokuti bonje rake arirapiki. Rauya kunaJudha; raguma pamusiwo wevanhu vangu, kuJerusarema. Musazvironza muGathi, musachema nepadoodoko; muBhethireafura mburumbukai mubukuta. Pindai henyu munjira yenyu, vagari veShafiri muutitinini nomukutsveruka; vagari veZaanani avauyi pamberi; Bhethiezeri unoboorera naye unozodusa rudetso rwake kubva kweuri. Ngokuti vagari veMarothi vanonasa kugarira izvo zvakanaka, asi kushata kwadzaka kubva kunaMambo Mwari kuenda pamusiwo weJerusarema. Sungai mahachi anohambisa pangoro, vagari veRakhishi; kwaiya kuamba kwokushaisha kumwanasikana Zioni, ngokuti mukati mwako mwakaoneka zvipauko zvaIsuraeri. Ndizvo unozopa zvipo zvokuvhaisa kuMoreshethigathi; mhatso dzaAkhizibhi dzinoita dzokuchengedzera kumadzimambo aIsuraeri. Ndinozounzazve munyisi padera penyu, vagari veMaresha; uthende hwaIsuraeri hunozouya kuAdhuramu. Dziite mhanza, upare bvudzi rako ngendaa yevana vako vanodikanwa; udziise mhanza kudai ngengwanga, ngokuti vakatorwa kubva kweuri kuitwa hloko. Ihehe kwevari vanoronga zvakashata nokushanda zvakashata pamibhedhi yavo! Apo mangwanani oojeka, vanozviita, ngokuti zviri pashi pesimba renyara dzavo. Vanoemura minda, nokuibvuka; mhatso, vechidzitora; vanotambudza munhu nemhatso yake, munhu nenhaka yake. Ndizvo izvi ndizvo zvinoronza Mambo Mwari: “Zvino ringira, ndiri kurongera zvakashata mhatso iyi zveisikazokoni kudusa mitsipa yenyu; amuzohambi ngokudzikudza, ngokuti uyu unozoita mukuwo wakashata. Ngeiro zuva umwe unozotora muedzaniso ndiwe, nokuchema ngokuchema kwakakura echiti, ‘Taparadzwa yaamho; wakatsandudza chikoaniswa chevanhu vangu; wakachiita mabvisirenyi kubva kwendiri! Pakati pevamukiri vedu akakoanisa minda yedu!’ ” Ndizvo akuzoapo naumwe unokandira bote rokupima ngokuita mabhigidha mumushongano waMambo Mwari. “Musachumaira” ndizvo izvo zvevanochumaira. “Apana unosisira kuchumaira zviro zvakadaro; zvitsverudzo azvizotinyisi.” Izvi zvinosisira kududzwa here, O mhatso yaJakobe? Nyasha dzaMambo Mwari dzafupiswa here? Izvi zviito zvake here? Mazwi angu aaiti zvakanaka here kwaari unohamba ngokururama? Asi zuro vanhu vangu vakamiruka kurwisana neni kudai ngegaa: munokhumura jazi pamwepo nechokupfeka chepashi mukunyarara kubva kuneavo vanopinda ndipo mukugonda vasikapinimidzi ngehondo. Vakadzi vevanhu vangu munovadzinga kubva mumhatso dzavo dzakanakisa; kubva kuvana vavo vadoko munobvisa uthende hwangu mhera nariini. Mirukai, muende; ngokuti iyi andiyopi ndau yokuzorora, ngendaa yokusvipiswa kunoparadza ngokuparadza kunotyisa. Kudai munhu aizohambahamba echiereketa manyepo asina shwiro echiti, “Ndinozochumaira kwomuri ngevhini nezvokumwa zvinoradzisa;” ndiye unozoita muchumairi wevanhu ava. Ngegwinyiso ndinozomuunganidza mweshe pamwepo, O Jakobe, ndinozounganidza veshe vakasara vaIsuraeri; ndinozovaisa pamwepo kudai ngemakwai ari muchibaya, nokudai ngezvifuyo zvemakwai pakati pemafuro awo; vanozoita bope guru ngouwandu hwevanhu. Umwe uwo unopwanya unozokwira pamberi pavo; vanozopwanya nokupinda ngepamusiwo, nokubuda ndipo. Mambo wavo unozohamba pamberi pavo, Mambo Mwari echivatungamirira. Neni ndakati, “Izwai, imwimwi vakuru vaJakobe, nevatongi vemhatso yaIsuraeri! Amusisiri kuzia kutonga kwakanaka here? Imwimwi munonyenya kunaka, mwechida kushata; munokwamura ganda revanhu vangu, nenyama kubva kumagodo avo; munodya nyama yevanhu vangu, nokuvhiya ganda ravo kubva kwevari; munogura magodo avo kuita zvigurwa, nokuvatemera kudai ngenyama yaiswa muhari, nokudai ngenyama mukati mwebhodha.” Zvino vanozochema kunaMambo Mwari, asi aazovapinguri; unozofisha hope yake kubva kwevari ngouwo mukuwo, ngokuti vakaita zvakashata muzviito zvavo. Izvi ndizvo zvinoronza Mambo Mwari ngendaa yevaprofeti vanopausa vanhu vangu avo vanodaidzira kuti, “Kunyarara,” apo vanacho chokudya, asi vanonasirira kurwa hondo naavo vasina chevanoisa pamiromo yavo. “Ndizvo usiku hunozouya kwomuri, musina chioniso; nechidima kwomuri, musina kuoneswa. Zuva rinozodzaka pashi padera pevaprofeti, zuva rinozosvipa padera pavo. Vaoni vanozopedzwa simba, nevafemberi vanozotsverudzwa; veshe vanozofukidza miromo yavo, ngokuti akuna mupinguro wabva kunaMwari.” Asi ndini ndakazara ngesimba noMweya waMambo Mwari, nokutonga kwakanaka nokugwinya, kuziisa kunaJakobe kupauka kwake, nokunaIsuraeri kushaisha kwake. Izwai ichi, imwimwi vakuru vemhatso yaJakobe nevatongi vemhatso yaIsuraeri, vanonyenya kutonga kwakanaka, vanopaukisa kururama kweshe; vanoaka Zioni ngengazi neJerusarema ngokushata. Vakuru varo vanotonga ngokutengerwa, vapristi varo vanodzidzisa ngomusharo, vaprofeti varo vanoprofeta ngokuona mare; asi vanotseama kunaMambo Mwari vechiti, “Ngegwinyiso Mambo Mwari unesu! Akuna kushata kungatigumira.” Ndizvo ngendaa yenyu Zioni rinozorimwa kudai ngomunda, neJerusarema rinozoita mirwi yematongo, nomutunhu wetemperi kudai ngendau dzakakwirira dzegwasha. Mumazuva achauya mutunhu wemhatso yaMambo Mwari unozoemeswa padera pemitunhu, unozokwidzwa padera pezvimitunhu. Vanhu vanozopitipidzana kuenda kweriri, nemadzinza akawanda anozouya echizoti, “Uyai, ngatikwire kumutunhu waMambo Mwari, kumhatso yaMwari waJakobe; kuti atidzidzise njira dzake, nokuti tihambe ngenjira dzake.” Ngokuti kubva kuZioni kunozobuda kudzidziswa, neizwi raMambo Mwari rinozobuda kubva muJerusarema. Unozotonga pakati pevanhu vakawanda, nokukaraidza madzinza akagwinya ari kuretu; vanozopfura shoti dzavo kuita miromo yemapadza, nemikhondo yavo kuita mapanga okutongora; dzinza arichazomirudziri shoti kurwa nedzinza, nemadzinza aachazombodzidziri hondo; asi vanozogara veshe uwo nouwo pashi pomuvhini wake nepashi pomuonde wake; akuna naumwe unozovatyisidzira; ngokuti muromo waMambo Mwari wehondo waereketa. Ngokuti vanhu veshe vanohamba, veshe uwo nouwo ngezina rechimwari chake, asi isusu tinozohamba ngezina raMambo Mwari, Mwari wedu, mhera nariini. “Muzuva iro,” unoronza Mambo Mwari, “Ndinozounganidza avo vakaremadzwa, naavo vakadzingwa, naavo vendakatambudza. Wakaremara ndinozomuita wakasara, nouwo wakadzingirwa kuretu aite dzinza rakagwinya; naMambo Mwari unozotonga padera pavo muMutunhu Zioni, kubvira zvino metsa mhera nariini. Newe, O rusvingo rwemakwai, mutunhu wemwanasikana Zioni, kwouri unozouya umambo hwokutanga hunozouya, umambo hwemwanasikana Jerusarema.” Zvino unoboorera ngenyi? Akuna mambo here mukati mwako? Mupangi wako afa here, ngokuti kurumwa kwakubata kudai ngomukadzi wobereka? Ita unorumwa mukubereka, O mwanasikana Zioni, kudai ngomukadzi wobereka; ngokuti zvino unozobuda kubva mudhorobha, newe unozogara murubaya; unozoenda Bhabhuroni. Apapo unozoponeswa; apapo Mambo Mwari unozokuripira kubva munyara yemagaa ako. Zvino madzinza akawanda aungana kurwa newe echiti, “Ngaasvipiswe, nemadziso edu ngaaringire padera peZioni.” Asi avazii mipinimidzo yaMambo Mwari; avazwisisi urongwa hwake, kuti wavaunganidza kudai ngemwanda yezviyo pambuwa. “Miruka, upure, O mwanasikana Zioni, ngokuti ndinozoita kuti runyanga rwako rudai ngesimbi, ndinozoita kuti masondo ako adai ngethusi; unozoputsa vanhu vakawanda kuita zvigurwa; unozopira kunaMambo Mwari kuuyirwa kwavo, upfumi hwavo kunaMambo Mwari wenyika yeshe.” “Zvino watendenedzwa ngorukumbati; rukumbati rwaemeswa kurwa nesu; ngendonga vanochaya mutongi waIsuraeri padama. “Asi iwewe, Bhetherehema Efratha, umwe wemadzinza madoko aJudha, kubva kwouri unozondibudira umwe unozoita mutongi muIsuraeri, uwo maambo ake ngeekaretu, kubva kumazuva ekaretu.” Ndizvo unozovarekera, metsa mukuwo apo uwo unobereka abereka; naapo hama dzake dzakasara dzinozohwirira kuvanhu vaIsuraeri. Naye unozoema kugutisa makwai ake ngesimba raMambo Mwari, muuthende hwezina raMambo Mwari, Mwari wake. Navo vanozogara ngokungwaririka, ngokuti zvino unozoita mukuru metsa kumagumo enyika; naye unozoita umwe wokunyarara. Kudai vaAsiria vechipotera munyika mwedu nokuzotsika mungome dzedu, tinozovamusira vaushi vanomwe kurwa navo, nevanhu vasere vakaemeswa kuita vatongi. Vanozotonga nyika yeAsiria ngeshoti, nenyika yaNimirodhi ngeshoti yakabeurwa kumisiwo yayo; unozotinunura kubva kuvaAsiria, kudai vechiuya munyika mwedu, nokuti kutsika pakati pemigano yedu. Zvino vakasara vaJakobe vakatendenedzwa ngevanhu vakawanda vanozodai ngebeto rinobva kunaMambo Mwari, kudai ngegukura mbuwa padera pomwenje, risikaemeri munhu, nokuti kugarira vakororo vevanhu. Nepakati pemadzinza vakasara vaJakobe vakatendenedzwa ngevanhu vakawanda, vanozodai ngemhondoro iri pakati pemhuka dzomugwasha, kudai ngemhondoro itsva iri pakati pemitanga yemakwai, iyo, apo yechihamba ngepakati, inotsikatsika pashi nokubaura kuita zvigurwa, pasina naumwe unganunura. Nyara yenyu inozomirudzwa padera pemagaa enyu, nemagaa enyu eshe anozogurwa. “Muzuva iro,” unoronza Mambo Mwari, “Ndinozouraya mahachi enyu kubva pakati penyu, neni ndinozoputsa ngoro dzenyu; neni ndinozoparadza madhorobha enyika yenyu, nokuriga pashi ngome dzenyu dzeshe dzakagwinya. Ndinozobvisa kukamba kubva munyara yenyu, nemwi amuchazowi neman'anga; neni ndinozogura miedzaniso yenyu yakatsetswa nesika dzenyu kubva pakati penyu; nemwi amuchazodiri mushando wenyara dzenyu; neni ndinozobvita sika dzenyu dzokudira kubva pakati penyu nokuparadza madhorobha enyu. Nomukunyangadzwa nomuushungu ndinozounzidzira padera pemadzinza, awo asikazi kupurutana.” Izwai zvinoronza Mambo Mwari: “Mirukai, mupote ndaa yenyu pamberi pemitunhu, nezvimitunhu ngazvizwe izwi renyu. Izwai, imwimwi mitunhu, ndaa yaMambo Mwari, neimwimwi madzeyo akagwinya enyika; ngokuti Mambo Mwari unendaa nevanhu vake, unozophikisana naIsuraeri. O vanhu vangu, ndaitenyi kwomuri? Ndamurembesa ngokudini? Ndipingure! Ngokuti ndakamukwidza kubuda munyika yeEgipite, ndakamuripira kubva kumhatso youhloko; ndakatuma pamberi penyu Mosi, Aroni naMiriamu. O vanhu vangu, karakadzai zvino chaakaronga Bharaki mambo weMoabhi, chiinyi chaakapingura kwaari Bharamu mukororo waBheo, chiinyi chakaitika kubva Shitimu kuguma Girigari, kuti muzie zviito zvinoponesa zvaMambo Mwari.” Ndinozouya nenyi pamberi paMambo Mwari, nokudzikotamisa pamberi paMwari Uri-padera-pazveshe? Ndinozouya pamberi pake nemibairo inopishwa here, ndine makonyana aane gore? Mambo Mwari unozodakara ngemakumi emazana emagondohwe here, nokuti ngendwizi dziri gumi remakumi emazana dzemafuta? Ndinozopira dangwe rangu here ngendaa yezvipauko zvangu, muchero wokutanga womuiri wangu ngendaa yokushaisha kwomwoyo wangu? Wakuronzera iwewe, O mukororo womunhu, icho chakanaka; Mambo Mwari unodenyi kwouri, kwega kuita zvakarurama, nokuda nyasha, nokuhamba ngokudzipfaisa naMwari wako? Izwi raMambo Mwari rinodaidzira kudhorobha, (Ungwaru hwakanaka kutya zina rako): “Izwai, O dzinza, nembungano yedhorobha! Ndingakona kuriyarwa upfumi hwokushata huchimwo mumhatso mwevakashata, nechipimo chinobira, icho chakatukwa here? Ndinozotendera zvipimo zvakashata, nyede dzinesimbi dzokupima dzinochengedzera here? Makurudza enyu akazara ngokugebenga, vanogaramwo vakaereketa manyepo, norurumi runochengedzera mumiromo yavo. Ndizvo ndatanga kukuchaira pashi kuti uite dongo ngendaa yezvishaishi zvako. Unozodya, asi auzoguti; kunozoapo kun'en'enwa ngenzara mukati mwako; newe unozotutira, asi azvizongwaririki; neicho chounongwarira ndinozochipira kushoti. Unozokusha, asi auzocheki; unozotsikatsika maorivhi, asi auzodzidzodzi ngemafuta; unozotsikatsika mavhini matsva, asi auzomwi vhini. Ngokuti wakangwarira zviemeso zvaOmuri, nemishando yeshe yemhatso yaAhabhi, newe wateera mipango yavo. Ndizvo ndinozokuita matongo, nevagari vemwo kuti vaite vashoorwi; ndizvo unozotwara chimene chevanhu vangu.” Ihehe kwendiri! Ngokuti ndakadai ndivo vanotsvaka michero yepazienza apo yapera kuunganidzwa, naapo zvimavhini zvinosara zvapera kukaiwa, akuna chikore chokudya; apana maonde aibva okutanga endinodisisa. Munhu wakagondeka wakafa kubva panyika, akuna wakarurama naumwe wakasara; veshe vanogarira kuparadza ngazi, vanovhimana umwe noumweni wake ngemambure. Nyara dzavo ingwazi kuita zvakashata; mukuru nomutongi vanokumbira fumha muromo; nounesimba unoronza zvaanokarira mumwoyo wake; ndizvo vanofukidza kutonga kwakanaka. Uwo wakapinda kunaka kwevari wakadai ngorukato, nouwo wakapinda kururama wavo rushosha rweminzwa. Zuva rokurinda kwavo nerokuororwa ravo rauya; zvino kwaapasinde kukangaidzwa kwavo. Musagonda mungani, musaisa gonda renyu kune unodikanwa; ngwarira misiwo yomuromo wako kubva kunouwo unoata paditi rako. Ngokuti mukororo aaremeredzi baba, mwanasikana unomukira mai ake, muzakazi mazvarira ake; magaa omunhu ndivo avo vemhatso yake yemene. Asi inini, ndinozoringira kunaMambo Mwari, ndinozogarira Mwari woruponeso rwangu; Mwari wangu unozondizwa. Usadakara ndini, O gaa rangu; apo pendinowa pashi, ndinozomiruka; apo ndechigara muchidima, Mambo Mwari unozoita kujeka kwendiri. Ndinozotwara ushungu hwaMambo Mwari, ngokuti ndakashaisha kwaari, metsa andirwira ndaa yangu nokundiunzidzira. Unozondiunza mukujeka, neni ndinozoona kururama kwake. Zvino gaa rangu rinozoona, nokutsveruka kunozomufukidza uwo wakati kwendiri, “Uripari Mambo Mwari, Mwari wako?” Madziso angu anozomuona pakuwa kwake; zvino unozotsikwatsikwa pashi kudai ngemadhaka emapato. Zuva rokuaka marukumbati ako! Muzuva iro mugano unozobviswa kuiswa kuretu. Muzuva iro vanozouya kwouri kubva Asiria, nokubva kumadhorobha eEgipite, metsa kuRwizi, kubva kuruandhle kuguma kuruandhle, nokubva kumutunhu kuguma kumutunhu. Asi nyika inozoita dongo ngendaa yevagari vayo, ngendaa yemichero yezviito zvavo. Usha vanhu vako ngendonga yako, mutanga uwo uri nhaka yako, uwo unogara uri wega mugwasha, pakati pemunda wenyika; ngavadye muBhashani nomuGireadhi, kudai ngemazuva ekaretu. Kudai ngemumazuva okubuda kwako munyika yeEgipite ndichavaonisa zviro zvinoshamisa. Madzinza anozoona nokutsveruka ngesimba ravo reshe; vanozoisa nyara dzavo pamiromo yavo, nzee dzavo dzinozoita madziiranzee. Vanozonambura bukuta kudai ngenyoka, kudai ngezviro zvinotamanda zvenyika; vanozouya vechihuta kubva mumasvingo avo; vachapetuka mukutya Mambo Mwari, Mwari wedu, vanozoema mukutya iwewe. Ndiani Mwari wakadai ndiwe, unokungurira kushata, echidarika padera pendaa yevakasara venhaka yake? Aagari noushungu hwake mhera nariini, ngokuti unodakara ngokuitira nyasha. Uchatiitirazve nyasha; unozotsikatsika zvishaishi zvedu pashi petsoka.Unozokandira zvishaishi zvedu zveshe mukudzama kworuandhle. Unozoonisa gwinyiso kunaJakobe nenyasha dzinorudo kunaAbrahama, kudai ngezvewakapikira madzibaba edu kubvira kumazuva ekare. Chiprofeti ngendaa yeNinevhe. Bhuku rechioniso chaNahume muErikoshi. Mwari unendurumwa, nounounzidzira ndiye Mambo Mwari; Mambo Mwari unounzidzira noushungu; Mambo Mwari unozounzidzira padera pemagaa ake, unongwarira ushungu hwake padera pemagaa ake. Mambo Mwari unononoka kunyangadzwa, asi wakakura musimba guru, aazopembedzi vakashata. Mambo Mwari unenjira yake iri muchipupuri nomumubvumo, nemakore ibukuta retsoka dzake. Unokaraidza ruandhle nokuruomesa, naye unoomesa ndwizi dzeshe; Bhashani neKharmeri zvinofota, neruva reRebhanoni rinozeketera. Mitunhu inozungunyika pamberi pake, nezvimitunhu zvinonyunguruka; nyika inohuta pamberi pake, nyika nazvo zveshe zvinogaramwo. Ndiani ungakona kuema pamberi poushungu hwake? Ndiani ungakona kugara mukupisha kwoushungu hwake? Ushungu hwake hunodururwa kudai ngomuriro, nokubudikidza ndiye mapuwe anopwanyika kuita zvigurwa. Mambo Mwari wakanaka, ndiye bako ngezuva rokutambudzika; naye unongwarira avo vanohwara mwaari. Kunyazwi mundambi inopopoma, unozopedza ndau yaro yaamho, naye unozorumbirira magaa ake muchidima. Ngenyi mwechimukira Mambo Mwari? Unozonasira magumo; akuna gaa rinozomiruka. Kudai ngeminzwa yakakodyana, kudai ngezviradza zvaradziswa ngokumwa kwavo, vanozopishwa kudai ngematsotso akaoma. Kubva kweuri kwabuda umwe unoronga zvakashata ndiMambo Mwari, uwo unopanga zvakashata. Izvi ndizvo zvinoronza Mambo Mwari: “Kunyazwi vanokugwinya kweshe nokuwanda, vanozotemerwa pashi nokuparara. Kunyazwi ndakakutambudza, andichazokutambudzizve. Nazvino ndinozogura joka rake kubva kwouri, nokudambura zvisungo zvakakusunga.” Mambo Mwari wakapa mupango ngendaa yako, kuti zina rako risachazokushwa: kubva kumhatso yezvimwari zvako ndinozogura muedzaniso wakatsetswa, nomuedzaniso wakanyunguruswa. Ndinozonasira iba rako, ngokuti iwewe aunashwiro. Ringira! Padera pemitunhu tsoka dzouwo unounza mashoko akanaka, unoteketesa kunyarara! Ngwarira mishongano yako yokudya, O Judha, ita zvowakapika, ngokuti akuchazoitikizve kuti wakashata akupambe, ngokuti waparadzwa yaamho. Muparidzi wakwira kurwa newe. Ngwarira marukumbati, rinda njira, sungisa zviunu zvako, unganidza simba rako reshe. (Ngokuti Mambo Mwari unopetudza runako rwaJakobe, pamwepo norunako rwaIsuraeri, kunyazwi vapambi vakavapamba, nokuparadza matai avo.) Zvihlangu zvengwazi dzake zvakatsvukiswa, varwi vake vakasimira zvakatsvukuruka. Simbi dzengoro dzinopenya kudai ngemirazvu ngezuva raanodzinasirira, mikhondo inozungunyiswa ngenjira inotyisa. Mujaho wengoro unorumbiswa mumapato, dzinorumba mberi nesure ngemumapato akapamhama; kuoneka kwadzo kwakadai ngemasasi, dzinozokasira kudai ngemheni. Unodaidza vakuru vake; vanopumhunwa mukufora kwavo, vanokasira kuenda kurukumbati, nokuemesa chivhariso. Misiwo yendwizi inobeurwa, ngome inohuta. Kwaemeswa kuti dhorobha riiswe muusungwa, hloko dzaro dzevakadzi vanotungamirirwa kuenda vechibonda kudai ngenjiya, vechichaya maditi avo. Ninevhe rakadai ngegandwa remvura, iro mvura yaro inoerera kuenda kuretu. Vanodaidzira kuti, “Emai, emai;” asi akuna naumwe unoringira sure. Pambai sirivha, pambai mukore! Akuna magumo oupfumi! Uwandu hwechiro cheshe chinomutengo mukuru. Arichina chiro, rapererwa, raitwa dongo raparadzwa! Mwoyo inonyunguruka nemabvi anohuta, zviunu zveshe zvinogedageda, hope dzeveshe dzarwarwauka. Chiinyi chakaitika ngerindi remhondoro, bako rokudyira remhondoro itsva, apo peinoenda mhondoro, nevana vemhondoro, kusina naumwe unodzityisidzira? Mhondoro yabaura kuita zvigurwa zvakakwanira zvana zvayo, nokushongorora zvokupa vakadzi vayo; yazadza mapako ayo ngezvakarumwa, nemirindi yayo ngezvigurwa zvenyama. “Ringira, ndinorwisana newe,” unoronza Mambo Mwari wehondo, “Neni ndinozopisha ngoro dzaro muchiushi, neshoti inozopedza mhondoro itsva dzaro; ndinozodusa zvewakapamba kubva munyika, neizwi revatumwa vako arichazombozwiki.” Ihehe dhorobha rinoparadza ngazi! Rakazara reshe ngemanyepo nokuba; aritongorekeri kupamba. Bope rechiswepu ririmwo, bope rokukwesana kwemavhiri, nerokutomuka kwemahachi, nerokunyanduka kwengoro. Vanogadha mahachi vanomirudza shoti inon'anikira nomukhondo unon'anikira; vazhinji vakaurawa, mirwi yevakafa; miiri yakafa isina magumo; vanopumhunwa padera pemiiri yevakafa. Ngendaa youwandu hwokuhura kwehure, rinonasa kuringirika, mai wokurowa, uwo unotengesa madzinza ngokuhura kwake, nevanhu kubudikidza ngokurowa kwake. Ringira, ndinorwisana newe, unoronza Mambo Mwari wehondo; “Neni ndinozofukura zvokusimira zvako metsa kuhope yako; ndinozoita kuti madzinza aringire utitinini hwako, noumambo huringire kutsveruka kwako. Ndinozokandira tsvina padera pako, ndikuite unonyangadzwa, ndikuemese kuti uite unodzvuturirwa. Zvino veshe vanokuona vanozotiza kubva kwouri, vechiti, ‘Ninevhe raparadzwa; ndiani unozorichema? Ndinozotsvaka pari vaembedzeri vako?’ ” Wakanaka kupinda Noamoni here, iro rakagara pakati pendwizi Naire, nemvura yakaritendenedza, rushosha rwaro rwaiya ruandhle, norukumbati rwaro rwaiya ruandhle? Ethiopia neEgipite raiya simba raro, naro raiya risina magumo; Phuti naRibhia dzaiya vadetseri vako. Asi rakaita hloko, rakaenda muusungwa, kunyazwi vana varo, vadoko vakapwanyiwa kuita zvigurwa dera kwemapato eshe; mabhigidha akaitwa ngendaa yevakuru varo vakuru varo veshe vakasungwa ngemanguri. Iwewewo unozoraradza, unozohwara; unozotsvaka bako kubva kumagaa. Mapako ako eshe anodai ngemiti yemionde inemaonde otanga kuibva; kudai yechizungunyiswa, anowira mumuromo wouwo unodya. Ringira, varwi vehondo vakadzi pakati pako. Misiwo yenyika yako yabeurwa yaamho kumagaa ako; muriro wapedza mipingidzo yemisiwo yako. Dzicherere mvura yomukuwo wokukombiwa kwako, gwinyisa marusvingo ako; enda mudhaka, utsikatsike matope, ubate foroma yezvidhina. Naapo muriro unozokupedza; shoti inozokupedza. Inozokupedza kudai ngendongwe. Dziwanze kudai ngendongwe, dziwanze kudai ngegwata rendongwe. Wakawanza vatengesi vako kupinda nyeredzi dzomudenga. Asi zvino vaenda kudai ngendongwe dzinotambanudza maphaphiro adzo, dzechimbururuka kuenda kuretu. Vangwariri vako vakadai ngegwata rendongwe, vanyori vako vakadai ngegwata rinogara padera perushosha ngezuva rechando, apo zuva rabuda rinombururuka; apana naumwe unozia kuti raenda pari. Vaushi vako vanoata, O mambo weAsiria; vakuru vako vanoata mubukuta. Vanhu vako vakapararira padera pemitunhu, akuna naumwe unovaunganidza. Akuna kuporeswa kwokuremadzwa kwako; ronda rako arirapiki. Veshe avo vanozwa mbiri yako vanoembera nyara ndiwe. Ngokuti ndiani wakambotiza kushata kwako kusina magumo? Chiprofeti icho chaakaona Habhakuki muprofeti. O Mambo Mwari, ndinozochema mukuwo wakaitawani kuti ndidetserwe, newe usikazozwi? Nokuti kuchema kwouri “Ngokugebengwa,” newe usikazoponesi? Ngenyi wechindionisa kushata, nokuita kuti ndiringire kutambudzika? Kuparadzwa, kupambwa zviri pamberi pangu; varipo vanomusa hasha nokurwisana. Ndizvo mupango unononoka kuitwa, kutonga kwakanaka akuitiki. Vakashata vanotendenedza vakarurama; ndizvo kutonga kwakanaka kunopauswa. “Ringirai pakati pemadzinza, muone! Mushamiswe! Mukangaidzwe! Ngokuti mushando unoitwa mumazuva enyu, womusikakoni kuugonda, kudai mwechiuronzerwa. Ngokuti, ringira, ndinomusa vaKharadhea, dzinza rinovava rinechara, iro rinohamba mukati mwenyika, kutora ndau dzokugara dzisiri dzavo. Vanokarudza nokutyisa; kutonga kwavo nokuremeredzeka kwavo zvinobva kwevari vemene. Mahachi avo anokasira kurumba kupinda makhamba, anopinda kutyisa kune matika emadeekoni; mahachi avo anorumbirira. Vanhu vavo vanogadha mahachi vanobva kuretu; vagadhi vemahachi vanombururuka kudai ngegodzi rinokasira kuenda koodya. Vanouya veshe koogebenga, nehope dzavo dzakaringira mberi kakurutu; vanounganidza hloko kudai ngejecha. Kumadzimambo vanoadadira, vatongi vanovaita chishekedzo. Vanosheka rusvingo rweshe, nokuita mirwi yemavhu kurutora. Zvino vanotsvaira kudai ngedutu; vanopauka nokuita vanoshaisha; simba ravo remene ndicho chimwari chavo!” Auri uwo wekare here, O Mambo Mwari, Mwari wangu, Uwo Wakachena wangu? Atizofi. O Mambo Mwari, wavaemesera kutongwa; newe, O Buwe, wavaemesera kuororwa. Madziso ako akanyanya kuchena kuti aringire zvakashata, newe aukoni kuringira zvishaishi; ngenyi wechiringira avo vanoshanda ngokuchengedzera, wechinyarara apo wakashata echimedza munhu wakapinda kururama kuneivo? Waita vanhu kuti vadai ngehove dzoruandhle, kudai ngezvinotamanda zvisina mutongi padera pazvo Vanovabata veshe ngechiedzo, vanovakweera kubanze muchitaa chavo, vanovaunganidza mukati mwechitaa chavo; ndizvo vanodakara nokudakadzwa. Ndizvo vanopira mudiro kuchitaa chavo, nokupisha mutombo unegwema rakanaka kuchitaa chavo; ngokuti kubudikidza ndicho chikoaniswa chavo chinokudzwa, nokudya kwavo kunowanda. Zvino unozoangira kukutura here zviri muchitaa chake, nokuparadza madzinza asikaaitiri nyasha? Ndinozoema kundau yangu yokurinda, nokudziemesa padera porusvingo; ndinozoangira kurinda kuti ndione chaanozoereketa kwendiri, nechaanozopingura ngendaa yokugunun'una kwangu. Zvino Mambo Mwari wakandipingura, akati, “Nyora chioniso pamarusamba, uite kuti chinase kuoneka, kuti murumbi achidzidze. Ngokuti chichipo chioniso chomukuwo wakaemeserwa, chinoereketa ngepakugumisira, chisikanyepi. Kudai chechinonoka, chigarire; ngegwinyiso chinozouya, achizononoki. Ringira kumudadi! Mweya wake auzi kururama mukati mwake, asi wakarurama unozopona ngokugonda kwake.” Zvakanyadaro vhini muchengedzeri; unodzikudza aagari pakanyi; unobeura mukuro kudai ngeSheori, kudai ngorufu, aagutiswi. Unounganidza kwaari madzinza eshe, nokudziunganidzira vanhu veshe. Weshe aazoembi here nduyo ndiye, nechinai chinoshekedza ndiye, vechiti. “Ihehe kwaari uwo unounganidza izvo zvisiri zvake!” Unozodzitwarisa pachako ngezvakanaka kwomukuwo wakadini ngezvakagondiswa? Avazokasiri kumiruka here avo vanozokuruma, nokuti kumuka avo vanozokuita kuti umuke wechihuta? Newe unozoita mupambwa kwevari. Ngokuti wapamba madzinza akawanda, veshe vanosara veavo vanhu vanozokupamba; ngendaa yengazi yevanhu, nokugebengwa kwenyika, nokwemadhorobha, nokwaavo veshe vanogaramwo. “Ihehe kwaari unoona kuuyirwa kwoupfumi kumhatso yake ngenjira yakashata, kuti aemese saki rake padera, kuti anunurirwe kusimba revakashata!” Wakaronga zvinotsverudza kumhatso yako ngokuuraya vanhu vazhinji, newe wakashaishira mweya wako. Mapuwe emene anozodaidzira ari parukumbati, nemwamba uri pakati pesika unozoripingura. “Ihehe kwaari unoaka dhorobha ngengazi, nokuemesa dhorobha padera pokushaisha!” Ringira, azvibvi kunaMambo Mwari wehondo here, kuti vanhu vagutise murazvu womuriro wemene, madzinza anodzirembesa ngezvisina shwiro? Asi nyika inozozara ngokuzia uthende hwaMambo Mwari, kudai ngemvura inofukidza ruandhle. “Ihehe kwaari unoita kuti muakirwana wake amwe, echidurura ukaira metsa araradza, kuitira kuti aringire utitinini hwavo!” Munozozadzwa ngezvinotsverudza pandau youthende. Imwa iwewe pachako, udai ngouwo usikazi kuchekwa! Tsani iri munyara yokumudyo yaMambo Mwari inozoguma pasinde kwouri, nokunotsverudza kunozoapo padera pouthende hwako. Ngokuti kugebenga kwakaitika muRebhanoni kunozokufukidza, nokuurawa kwezvikara kunozomutyisa, ngendaa yengazi yevanhu yakaparadzwa, nendaa yokugebenga kwakaitika kunyika, kumadhorobha, nokwavari veshe vanogaramwo. Muedzaniso wakatsetswa unodetserenyi, kuti muiti wawo autsetsa; zve, muedzaniso wakanyunguruswa nomudzidzisi wemanyepo? Ngokuti muiti wawo unogonda mweuri, kunyazwi miedzaniso isikaereketi! “Ihehe kwaari unoti kumuti, ‘Muka;’ nokune buwe risikaereketi, ‘Miruka pachako!’ ” Uyu unokona kudzidzisa here? Ringira, wakasetwa ngomukore nesirivha, nawo amuna nakamwe kufema nepadodoko mukati mwawo. Asi Mambo Mwari uri mutemperi rake rakachena; nyika yeshe ngainyarare pamberi pake. Mukumbiro waHabhakuki muprofeti, unoembwa kudai ngeShigionothi. O Mambo Mwari, ndakazwa mbiri yako, ndinoema mukutya, O Mambo Mwari, mushando wako. Mumukuwo wedu umusire; munguva yedu uuziise; muushungu karakadza nyasha. Mwari wakauya kubva Themani, Uwo Wakachena kubva kuMutunhu wePharani. Sela. Uthende hwake hwakafukidza matenga, nenyika yakazara ngokukudzwa kwake. Kun'anikira kwake kwaiya kwakadai ngokujeka kwezuva; mirazvu yaibuda munyara yake, apo panogara simba rake rakafishika. Wakatuma nhenda pamberi pake, echipanga rufu kuti rumuteere. Wakaema, akazungunyisa nyika; wakaringira, akaita kuti madzinza ahute. Mitunhu yemhera nariini yakaparadzwa; kuteera njira dzake dzekaretu zvimitunhu zvemhera nariini zvakanzvaira. Ndakaona matende evaKhushani pashi pokutambudzika, nemachira epamafasitera enyika yeMidhiani akahuta. Ushungu hwako hwaiya hwokurwisana nerwizi here, O Mambo Mwari? Nokuti kutsamwa kwako kurwisana nendwizi, nokuti kuzonda kwako kurwisana noruandhle, apo wakakwira padera pemahachi ako, nepadera pengoro dzako dzokunyisa? Uta hwako hwakabudiswa pamhene; wakaisa misee pasinga. Sela. Wakamwesa nyika ngendwizi. Mitunhu yakakuona, ikatya; ndambi yemvura yakakukuza yechipinda; ruandhle rwakaereketa ngeizwi rarwo. Rwakamirudza nyara dzarwo mudenga. Zuva nomwedzi zvakaema paugaro hwazvo hwakakwirira; ngokujeka kwemisee yako zvakapinda ndipo, nokujeka kwomukhondo wako unon'anikira. Muushungu wakatsikatsika nyika, mukunyangadzwa wakatsikatsika madzinza. Wakabuda pamberi kuponesa vanhu vako, kooponesa wakadzodzwa wako. Wakapwanya soro rewemhatso yakashata, wechiradzika pamhene kubvira padzeyo metsa kuguma padenga. Sela. Wakabaya ngemisee yake mukuru wengwazi dzake, wakauya kudai ngechipupuri kundiparadza; kudakara kwavo kwaiya kwakadai ngokwaavo vanopedza varombo ngokufishika. Wakatsikatsika ruandhle ngemahachi ako, nokuvhundura mvura inesimba. Ndinozwa, ndani yangu inohuta, miromo yangu inohuta ngeizwi. Kuora kwakapotera mumagodo angu, kuhamba kwangu kunohuta pashi pangu. Ndinogarira mukunyarara zuva rokutambudzika pakuuya kwaro padera pevanhu vanotirwisa. Kunyazwi muonde ukarekera kutumbuka maruwa, pasina michero pamuvhini; kunyazwi kubarwa kwemaorivhi kukakorera, neminda isikazobari kudya; kunyazwi amuna makwai muchibaya, nokuti amuna n'ombe muchibaya, asi ndinozodakara munaMambo Mwari, ndinozodakara munaMwari woruponeso rwangu. Mwari, Mambo Mwari isimba rangu; unoita kuti tsoka dzangu dzidai ngetsoka dzeshoma; unoita kuti ndihambe padera pendau dzangu dzakakwirira. Kumuembi mukuru pachidangari changu. Izwi raMambo Mwari iro rakauya kunaZefania mukororo waKhushi, mukororo waGedharia, mukororo waAmaria, mukororo waHezekia, mumazuva aJosia mukororo waAmoni, mambo waJudha. “Ndinozotsvaira yaamho zveshe kubva pahope yenyika,” unoronza Mambo Mwari. “Ndinozotsvaira kupedza vanhu nezvikara; ndinozotsvaira kupedza shiri dzomudenga nehove dzomuruandhle. Ndinozoita kuti vakashata vapumhunwe; ndinozogura vanhu kubva kuhope yenyika,” unoronza Mambo Mwari. “Ndinozotambanudza nyara yangu kurwisa Judha, nokurwisa veshe vagari veJerusarema; ndinozogura vakasara vaBhaari kubva kuiyi ndau, nezina revapristi vokuhura pamwepo nevapristi vavo; avo vanokotama pashi kudira hondo yomudenga vari pazvachungu zvemhatso; naavo vanokotama pashi, vechipika kunaMambo Mwari, asi vanopikazve ndiMarikhamu; avo vakahwirira sure kubva mukuteera Mambo Mwari, avo vasikazi kutsvaka Mambo Mwari, nokuti kubvunzisisa ndiye. “Nyarara pamberi paMambo Mwari, Mwari! Ngokuti zuva raMambo Mwari riri pasinde; Mambo Mwari wanasirira mubairo, wachenesa vakakokwa vake. Pazuva romubairo waMambo Mwari, ndinozoorora makota nevana vamambo, navo veshe vanopfeka zvokupfuka zvipara. Pairo zuva ndinozoorora veshe vanodarika padera pedimba, avo vanozadza mhatso yomukuru wavo ngokugebenga nokuchengedzera. “Pazuva iro,” unoronza Mambo Mwari, “Kunozoapo bope rokuchema kubva kuMusiwo Hove, kuboorera kubva kurutii rwechipiri, kupwanyiwa kukurutu kubva kuzvimitunhu. Vagari veMortha, boorerai, ngokuti vatengesi veshe vapera; veshe avo vaipima sirivha vakaurawa. Panguva iyo ndinozotsvakisisa Jerusarema ngezvibani, neni ndinozoorora vanhu vakagara pamasese avo, avo vanoti mumwoyo mwavo, ‘Mambo Mwari aazoshandi zvakanaka, nokuti zvakashata.’ Upfumi hwavo hunozopambwa, nemhatso dzavo dzinozoita matongo. Kunyazwi vanoaka mhatso, avazogarimwo; kunyazwi vanosima minda yemivhini, avazomwi vhini rayo.” Zuva guru raMambo Mwari riri pasinde, riri pasinde yaamho, naro rinokasira kakurutu; kuzwika kwezuva raMambo Mwari kunovava, ngwazi inochema kakurutu. Iro zuva rinozoita zuva roushungu, zuva rokutambudzika nokusvipa mwoyo, zuva rokuparadzwa nokuangiridzwa, zuva rechidima chakasvipa, zuva remakore nechidima chikurutu, zuva rokuridzwa kwegwama nokuridza mhere yehondo nokurwisana nemadhorobha anorusvingo, nendau dzehondo dzakakwirira. “Ndinozounza kutambudzika kwakadaro padera pevanhu, kuti vahambe kudai ngemapofu; ngokuti vakashaisha kunaMambo Mwari, ngazi yavo inozodururwa kudai ngebukuta, nenyama yavo kudai ngemadisa.” Sirivha yavo nokuti mukore wavo zvinozotama simba rokuvanunurira ngezuva roushungu hwaMambo Mwari; nyika yeshe inozopedzwa ngomuriro wendurumwa yake; ngokuti unozopedza yaamho, magumo anotyisa eavo veshe vagari vomunyika. Unganidzanai pamwepo, unganidzanai, O dzinza risikatsveruki; musati mwadzingirwa kuretu kudai ngemazungu anotorwa ngedutu, pasati pauyapo padera penyu ushungu hunotyisa hwaMambo Mwari, pasati pauyapo padera penyu zuva roushungu hwaMambo Mwari. Tsvakai Mambo Mwari, imwimwi mweshe mwakapfaa venyika, vanoita kupanga kwake; tsvakai kururama, tsvakai kupfaa; pamweni mungafishwa ngezuva roushungu hwaMambo Mwari. Ngokuti Gaza rinozosiiwa, neAshikeroni rinozoita dongo; vanozodzinga vanhu vaAshidhodhi masikati, neEkironi rinozobvitwa. Ihehe kwevari vagari vokuhumbikumbi yoruandhle, dzinza revaKherethi! Izwi raMambo Mwari rinorwisana nemwi, O Khenani, nyika yevaFiristia; ndinozokuparadza, metsa pasisina unosaramwo. Newe, O humbikumbi yoruandhle, inozoita mbusho, michacha yevaushi nezvibaya zvezvifuyo. Humbikumbi inozoita nhaka yevakasara vemhuri yaJudha, apo pevanozoushira zvifuyo zvavo padera payo, nomumhatso dzeAshikeroni vanozoatamwo madeekoni. Ngokuti Mambo Mwari, Mwari wavo, unozovahambira, nokuvaunzazve kubva kuubatwa hwavo. “Ndazwa kureiwa kwaMoabhi, nokutuka kwevana vaAmoni, kwevakaita vanhu vangu, nokudzikudza kwavo ngendaa yenyika yavo. Ndizvo kudai ngezvendinopona,” unoronza Mambo Mwari wehondo, Mwari waIsuraeri, “Moabhi inozodai ngeSodhoma, nevaAmoni kudai ngeGomora, nyika yeminzwa nemirindi yemunyu, nokuita dongo mhera nariini. Vakasara vevanhu vangu vanozovapamba, nevanopona vedzinza rangu vanozogara nhaka yavo.” Izvi zvinozoita chikoaniswa chavo ngendaa yokudzikudza kwavo, ngokuti vakareya nokudzikurisa kuvanhu vaMambo Mwari wehondo. Mambo Mwari unozotyisa kakurutu kwevari; ngokuti unozopedza zvimwari zveshe zvenyika; nekwaari zvinozogwadama pashi, chimwe ngachimwe pandau yacho, mahumbikumbi eshe nezviwi zveshe zvevemadzinza. Nemwiwo, vaEthiopia, munozourawa ngeshoti yangu. Naye unozotambanudza nyara yake kurwa nevari dera, nokuparadza Asiria; naye unozoita kuti Ninevhe riite dongo, nokuoma kudai ngehlengwe. Zvifuyo zvinozoata pashi mukati mwaro, nemhuka dzeshe dzomushango; zveshe hurekure nenungu zvinozogara padera pesika dzemisiwo yaro; izwi raro rinozorira mumafasitera; kuparadzwa kunozoapo mumadimba aro, ngokuti wakabudisa pamhene zvakatsetswa zvemisidhari. Iri ndiro dhorobha raidakara rechigara ngokungwaririka risikatyi chiro, iro raironza mumwoyo mwaro kuti, “Ndini, akuna umwenizve ngepabanze pangu!” Rakazoita dongo ngenjiranyi, nendau yezvinoata zvikara! Weshe unopinda ngepasinde paro unozoridza murudzi nokumirudza chibhakera. Ihehe kuiswa mavhu, kusvipiswa, dhorobha rinotambudza! Arizi kupurutana kuizwi; arizi kuashira kupangwa. Arizi kugonda munaMambo Mwari; arizi kukwedzera pasinde naMwari waro. Vakuru varo vari mukati mwaro imhondoro dzinobhonga; vatongi varo mathika emadeekoni asikasiyi chiro metsa nechimangwani. Vaprofeti varo avana ndaa nezviro, vanhu vasikagondeki; vapristi varo vasvipisa ndau yakacheneswa, vagura mupango. Mambo Mwari uri mukati mwayo wakarurama; aaiti zvakashata. Mangwanani eshe unoita kutonga kwake mambakwedza, amwe ngaamwe aakoreri akadi; asi vasikazi kururama avazii kutsveruka. “Ndauraya madzinza; masvingo awo aita matongo; ndaita kuti mapato awo aite shango, kuti pasaa naumwe unohamba ndiwo; madhorobha awo aparadzwa, amuna munhu, amuna nounogaramwo. Ndakati, ‘Ngegwinyiso rinozonditya, rinozoashira kupangwa; arizokoreri kuona zveshe zvendaunza padera paro.’ Asi vakapinda kudisa kuita zviito zvavo zveshe kuti zvisvipiswe. Ndizvo ndigarirenyi,” unoronza Mambo Mwari, “Metsa pazuva rendinozomiruka kuita uchapupu. Ngokuti kugura kwangu kuti ndiunganidze madzinza, kuti ndiunganidze umambo, kudurura padera pahwo ushungu hwangu, kweshe kupisha kwoushungu hwangu; ngokuti mumuriro wendurumwa dzangu nyika yeshe inozopedzwa. “Panguva iyo ndinozotsandura kuereketa kwevanhu kuti kuite kuereketa kwakaperera, kuti veshe vakumbire ngezina raMambo Mwari, kumudira ngomwoyo umwe. Kubvira ngoruseri rwendwizi dzeEthiopia vanhu vangu, vakaparadzwa vangu, vanozounza zvipo zvangu. Pairo zuva auzotsverudzwi ngezviito zvako zveshe, izvo zvewakandirwisa ndizvo; ngokuti zvino ndinozodusa kubva pakati pako vanodakara mukudzikudza, newe auchazodzitunhumadzi mumutunhu wangu wakachena. Asi ndinozorekera pakati pako vanhu vanotambudzika nevanourombo. Vanozotsvaka pokuhwara ngezina raMambo Mwari. Vakasara vaIsuraeri avazoiti zvakashata, nokuti kuereketa manyepo; norurumi runochengedzera aruzooneki mumuromo wavo. Zvino vanozodya nokuata pashi, akunazve unozovatyisidzira.” Emba kakurutu, O mwanasikana weZioni; daidzira, O Isuraeri! Dakara nokudakadzwa ngomwoyo wako weshe, O mwanasikana weJerusarema! Mambo Mwari wakadusa kutongwa kwako, warasha gaa rako. Mambo waIsuraeri, Mambo Mwari, uri pakati pako; auchazotyi zvakashata nakamwe. Pairo zuva kunozoronzwa kuneJerusarema kuti, “Usatya, O Zioni; usatenda kuti nyara dzako dzipere simba. Mambo Mwari, Mwari wako, uri pakati pako, ngwazi inopa kunyisa; unozodakara padera pako ngokudakadzwa; unozozorora murudo rwake, unozodakara ndiwe ngokuemba, kudai ngepazuva redhiri. Ndinozodusa kubva kweuri kutambudzika, kuitira kuti usazoremerwa ngokushoorwa. Ringira, ngouwo mukuwo ndinozotonga veshe vanokutambudza. Neni ndinozoponesa wakaremara, nokuunganidza wakadzingwa; ndinozotsandura kutsverudzwa kuita kukudzwa nembiri kunyika dzeshe. Panguva iyo ndinozomuunza kanyi, panguva apo pendinozomuunganidza; ngokuti ndinozomupa mbiri nokukudzwa pakati pevanhu veshe venyika, apo ndinozohwirinza ubatwa hwenyu pamberi pemadziso enyu,” unoronza Mambo Mwari. Mugore rechipiri rokutonga kwaDhariusi mambo, mumwedzi wechitanhatu, pazuva rokutanga romwedzi, izwi raMambo Mwari rakauya kubudikidza ndiHagai muprofeti kunaZerubhabheri mukororo waShearatieri, mutongi waJudha, nokunaJoshua mukororo waJehozadhaki, mupristi mukuru rechiti, “Izvi ndizvo zvinoronza Mambo Mwari wehondo: Vanhu ava vanoti, ‘Ausati waguma mukuwo, mukuwo wokuakisa mhatso yaMambo Mwari.’ ” Zvino izwi raMambo Mwari rakauya kubudikidza ndiHagai muprofeti rechiti, “Mukuwo here wokuti imwimwi mwemene mugare mumhatso dzenyu dzinemawaro ngepadera, apo iyi mhatso yechiita dongo? Ndizvo zvino, izvi ndizvo zvinoronza Mambo Mwari wehondo: Pinimidzai ngenjira dzenyu. Mwasima zvizhinji, mwakukura zvishomani; munodya, asi amugutswi; munomwa, asi amukwaniswi ngezvomunomwa; munodzipfekesa, asi akuna unodziirwa; nouwo unoshandira kuthuswa unoshandira muthuso kuuisa munyede inemauri. Izvi ndizvo zvinoronza Mambo Mwari wehondo: Pinimidzai ngenjira dzenyu. Kwirai kumutunhu, muunze basha, muake mhatso; neni ndinozodakara ndiyo, ndechizokudzwa, unoronza Mambo Mwari. “Mwakaringira kuona zvizhinji, ringirai, zvakaita zvishomani; naapo mwakazviunza kanyi, ndakazvifuridza. Ngenyi? Unoronza Mambo Mwari wehondo. Ngendaa yemhatso yangu yaita dongo, apo imwimwi mweshe munorumba kumhatso dzenyu. Ndizvo matenga aramba nebeto, nenyika yaramba nemichero yayo. Neni ndadaidza kuoma kuti kuuye padera penyika, padera pezvimitunhu, padera pezviyo, padera pevhini idzva, padera pemafuta, nepeizvo zvinoberekwa ngemavhu, nepadera pevanhu, nepadera pemhuka, nepemishando yavo yeshe yenyara.” Zvino Zerubhabheri mukororo waShearatieri, naJoshua mukororo waJehozadhaki, mupristi mukuru, navo veshe vakasara vevanhu, vakapurutana izwi raMambo Mwari, Mwari wavo, nemazwi aHagai muprofeti, kudai ngezvaakamutuma Mambo Mwari, Mwari wavo; nevanhu vakatya Mambo Mwari. Zvino Hagai nhumwa yaMambo Mwari wakaereketa mashoko aMambo Mwari kuvanhu echiti, “Ndinemwi, unoronza Mambo Mwari wehondo.” NaMambo Mwari wakamusa mweya waZerubhabheri mukororo waShearatieri, mutongi waJudha, nomweya waJoshua mukororo waJehozadhaki, mupristi mukuru, nomweya yavo veshe vakasara vevanhu; navo vakauya, vakashanda mhatso yaMambo Mwari wehondo, Mwari wavo, ngezuva remakumi mairi nemarongomuna romwedzi mumwedzi wechitanhatu, ngegore rechipiri rokutonga kwaDhariusi mambo. Mumwedzi wechinomwe, ngezuva remakumi mairi narimwe romwedzi, izwi raMambo Mwari rakauya kubudikidza ndiHagai muprofeti rechiti, “Ereketa zvino kunaZerubhabheri mukororo waShearatieri, mutongi waJudha, nokunaJoshua mukororo waJehozadhaki, mupristi mukuru, nokwevari vakasara vevanhu wechiti. “Ndiani wakasara pakati penyu weavo vakaona iyi mhatso muuthende hwayo hwokutanga? Munoiona yakaitawani zvino? Mwechiedzanisa mukuona kwemadziso enyu aizi kudai ngechisina shwiro here? Asi zvino gwinya, O Zerubhabheri, unoronza Mambo Mwari; gwinya, O Joshua, mukororo waJehozadhaki, mupristi mukuru; mugwinye, imwimwi mweshe vanhu venyika, unoronza Mambo Mwari; mushande, ngokuti ndinemwi, unoronza Mambo Mwari wehondo, kudai ngechigondiso chendakatenderana nemwi apo mwakabuda kubva muEgipite. Mweya wangu unogara pakati penyu; musatya. Ngokuti izvi ndizvo zvinoronza Mambo Mwari wehondo: Kamwezve, kwemukuwo mudoko, ndinozozungunyisa matenga nenyika, ruandhle nenyika yakaoma; ndinozozungunyisa madzinza eshe, kuitira kuti upfumi hwemadzinza eshe huzouya, neni ndinozozadza iyi mhatso ngouthende, unoronza Mambo Mwari wehondo. Sirivha ngeyangu, nomukore ngowangu, unoronza Mambo Mwari wehondo. Uthende hwemhatso iyi hwakateera hunozopinda kukura kuno uhwo hweyokutanga, unoronza Mambo Mwari wehondo; nomundau iyi ndinozopa kunyarara, unoronza Mambo Mwari wehondo.” Pazuva remakumi mairi nemarongomuna romwedzi wechipfumbamwe, mugore rechipiri rokutonga kwaDhariusi, izwi raMambo Mwari rakauya kubudikidza ndiHagai muprofeti rechiti, “Izvi ndizvo zvinoronza Mambo Mwari wehondo: Bvunza vapristi ngendaa yechironzo wechiti, ‘Kudai aripo unotwara nyama yakacheneswa mupendero wechigwama chingwa, nokuti muriwo, nokuti vhini, nokuti mafuta, nokuti kudya kumweni, kunozocheneswa here?’ ” Vapristi vakapingura, vakati, “Haiwa.” Zvino Hagai wakati, “Kudai aripo usikazi kusukika ngendaa yomuiri wakafa, naye echigwama chimweni cheizvi, chinozoita chisikazi kusukika here?” Vapristi vakapingura, vakati, “Eya, chinozoita chisikazi kusukika.” Zvino Hagai wakapingura akati, “Vakadaro vanhu ava, rakadarozve dzinza iri pamberi pangu, unoronza Mambo Mwari; yakadarozve mishando yeshe yenyara dzavo; nezvevanopapo azvizi kusukika. “Asi zvino, pinimidzai zvinozoitika kubvira kuzuva iri nokuenda mberi. Naapo buwe risati raiswa padera pebuwe rimweni mutemperi raMambo Mwari, mwakaita maitirenyi? Apo umwe auya kumurwi wezvipimo echikarira kuona makhirogramu mazana mairi (200), asi riripo zana rimwe (100); apo umwe auya koochera zana rimwe (100) revhini kuchidziyo, asi woona maritha makumi marongomuna. Ndakatumira nhenda yezvisimwa, chikhuta nematsanza kuparadza mishando yeshe yenyara dzenyu; asi amuzi kupetuka kwendiri, unoronza Mambo Mwari. Pinimidzai zvino kubvira kuzuva remakumi mairi nemarongomuna romwedzi wechipfumbamwe. Kubvira pazuva raakaiswa madzeyo etemperi raMambo Mwari, pinimidzai ndicho. Iripo mbeu yakasara mutsapi here? Muvhini, muonde, muphomegraniti, muorivhi, aisati yabereka chiro here? Kubvira pazuva iri kuenda mberi ndinozomufumisa.” Izwi raMambo Mwari rakauya kwechipiri kubudikidza ndiHagai ngezuva remakumi mairi nemarongomuna romwedzi rechiti, “Ereketa kunaZerubhabheri, mutongi waJudha, wechiti, ‘Ndaakuda kuzozungunyisa matenga nenyika. Ndaakuda kuzoriga pashi madendemaro oumambo, ndechizoparadza simba roumambo hwevemadzinza; ndechiparadza ngoro naavo vanokwira mukati mwadzo; nemahachi nevagadhi vawo vanozowiswa pashi, veshe umwe ngaumwe ngeshoti yehama yake. Pazuva iro, unoronza Mambo Mwari wehondo, ndinozokutora, O Zerubhabheri, muranda wangu, mukororo waShearatieri, unoronza Mambo Mwari, ndinozoita kuti udai ngechioniso chendandazi; ngokuti ndakutsanangura,’ unoronza Mambo Mwari wehondo.” Mumwedzi wechisere, mugore rechipiri rokutonga kwaDhariusi, izwi raMambo Mwari rakaguma kunaZekharia, muprofeti mukororo waBherekhia, mukororo waIdho rechiti, “Mambo Mwari wakanyangadzwa yaamho ngemadzibaba enyu. Ndizvo wechiti kwevari, ‘Izvi ndizvo zvinoronza Mambo Mwari wehondo: Petukai kwendiri, unoronza Mambo Mwari wehondo, neni ndinozopetuka kwomuri, unoronza Mambo Mwari wehondo.’ Musadai ngemadzibaba enyu, avo vevakadaidza kwevari vaprofeti vokutanga vechiti, ‘Unoronza izvi Mambo Mwari wehondo: Petukai zvino kubva kunjira dzenyu dzakashata, nokubva kuzviito zvenyu zvakashata. Asi avazi kuzwa, nokuti kupurutana kwendiri, unoronza Mambo Mwari. Madzibaba enyu ari pari? Nevaprofeti, vanopona mhera nariini here? Asi mazwi angu nezviemeso zvangu, zvendakapanga varanda vangu vaprofeti, azvizi kubatira kumadzibaba enyu here?’ ” Ndizvo vakatenderuka, vakati, “Mambo Mwari wehondo wakatiitira, kudai ngenjira dzedu nokudai ngezviito zvedu, kudai ngezvaakaronga kuita.” Ngezuva remakumi mairi nemarongomuna romwedzi wegumi naumwe, uwo mwedzi unozwi Shebhati, mugore rechipiri rokutonga kwaDhariusi, izwi raMambo Mwari rakaguma kunaZekharia, muprofeti mukororo waBherekhia, mukororo waIdho, naye wakati “Muusiku ndakaona, ringira, munhu echigadha hachi rakatsvuka! Waiya akaema pakati pemiti yemitire mubani; ngesure kwake kwaiyapo mahachi akatsvuka, anemaara, neakachena.” Zvino ndakati, “Zviinyi izvi mambo wangu?” Ngirosi, iyo yakaereketa neni, yakati kwendiri, “Ndinozokuonisa kuti izvi zviinyi.” Ndizvo munhu, uwo waiya akaema pakati pemiti yemitire wakapingura, akati, “Ava ndivo avo vaakatuma Mambo Mwari kuhamba hamba vechiona nyika.” Zvino vakaereketa kungirosi yaMambo Mwari, iyo yakaema pakati pemiti yemitire, vakati, “Tahamba hamba techiona nyika, ringira, nyika yeshe inogara mukunyarara.” Zvino ngirosi yaMambo Mwari yakapingura yechiti, “O Mambo Mwari wehondo, unozoita mukuwo wakaitawani usikaitira nyasha Jerusarema nemadhorobha aJudha, awo ewakanyangadzirwa aya makore makumi manomwe?” Zvino Mambo Mwari wakapingura ngirosi yakaereketa neni ngemazwi akanaka anoembedzera. Ndizvo ngirosi yakaereketa neni yakati kwendiri, “Daidzira izwi iri, wechiti, ‘Izvi ndizvo zvinoronza Mambo Mwari wehondo: Ndine ndurumwa huru ngendaa yeJerusarema neZioni. Neni ndinonyangadzwa kakurutu ngemadzinza avo vakagarisika; ngokuti ndakanyangadzwa kadodoko kega, navo vakawanza kutambudzika. Ndizvo izvi ndizvo zvinoronza Mambo Mwari: Ndapetukazve Jerusarema nenyasha; mhatso yangu inozoakwa mukati mwaro, unoronza Mambo Mwari wehondo, nebote rokupima rinozotambanudzwa muJerusarema.’ ” Daidzirazve wechiti, “Izvi ndizvo zvinoronza Mambo Mwari wehondo: Madhorobha angu achazarazve ngoupfumi nokukura kuende mberi; Mambo Mwari uchazoembedzerazve Zioni, nokutsanangurazve Jerusarema.” Naapo ndakamirudza madziso angu, ndikaona, ringira, nyanga murongomuna. Ndakabvunza ngirosi yakaereketa neni, “Izvi zviinyi?” Yakandipingura yechiti, “Idzi ndidzo nyanga dzakaparadza Judha, Isuraeri, neJerusarema.” Zvino Mambo Mwari wakandionisa vapfuri varongomuna. Neni ndakabvunza, “Ava vanouya kuitenyi?” Yakapingura yechiti, “Idzi ndidzo nyanga dzakaparadza Judha, ndizvo akuna soro raizokona kumirudzwa; asi ava vauya kudzityisidzira, kukhuwira pashi nyanga dzemadzinza, awo akamirudza nyanga dzawo padera penyika yaJudha kuparadza vanhu vayo.” Ndakaringira neni ndakaona munhu anebote rokupima ndiro munyara mwake. Zvino ndakabvunza, “Unoenda kuri?” Naye wakati kwendiri, “Koopima Jerusarema, kuona kupamhama kwaro nourebu hwaro.” Ringira, ngirosi iyo yakaereketa neni yakabuda pamberi, nengirosi imweni yakauya pamberi kooshongana nayo. Yakati kweiri, “Rumba, ereketa kujaha iri wechiti, ‘Jerusarema rinozogarwa kudai ngemaguta asina marukumbati ngouwandu hwevanhu nemhuka dzirimwo.’ Ngokuti inini ndinozoita rukumbati rwomuriro kuritendenedza, unoronza Mambo Mwari, nokuita uthende mukati mwaro. “Mirukai! Mirukai! Budai, mutize kubva kunyika yedera, unoronza Mambo Mwari; ngokuti ndakamuparadzira kudai ngemadutu marongomuna omudenga, unoronza Mambo Mwari. Miruka, utizire Zioni, iwewe unogara nemwanasikana weBhabhuroni.” Ngokuti izvi ndizvo zvakaronza Mambo Mwari wehondo: ngesure kwouthende wakandituma kumadzinza akamuchakata: ngokuti iye unomugwama, unogwama mboni yedziso rake. Zvino ringira, ndinozozungunyisa nyara yangu kurwa navo, vanozoita vapambi vehloko dzavo. Zvino munozozia kuti Mambo Mwari wehondo wandituma. “Emba, udakare, O mwanasikana Zioni! Ngokuti, ringira, ndinozouya, ndigare pakati pako,” unoronza Mambo Mwari. Madzinza akawanda anozoshonganiswa munaMambo Mwari ngeiro zuva, navo vanozoita vanhu vangu; ndinozogara pakati pako, newe unozozia kuti Mambo Mwari wehondo wandituma kwouri. Mambo Mwari unozogara nhaka yaJudha iyo ndiyo chikoaniswa chake munyika yakacheneswa, unozotsanangurazve Jerusarema. Nyararai, imwimwi vanhu veshe, pamberi paMambo Mwari; ngokuti wamiruka muugaro hwake hwakachena. Zvino wakandionisa Joshua mupristi mukuru akaema pamberi pengirosi yaMambo Mwari, naSathani akaema kunyara yake yokumudyo kumuitira ndaa. NaMambo Mwari wakati kunaSathani, “Mambo Mwari ngaakurambidze, O Sathani! Mambo Mwari uwo wakatsanangura Jerusarema ngaakurambidze! Ichi andichopi chitsiki chakabviswa mumuriro here?” Zvino Joshua waiya akasimira zvokusimira zvinetsvina, apo akaema pamberi pengirosi. Ngirosi yakati kwevari avo vaiya vakaema pamberi pake, “Dusai kubva kwaari zvokusimira zvinetsvina.” Nokwaari wakati, “Ringira, ndatora kushaisha kwako kubva kwouri, neni ndinozokusimidza ngezvokusimira zvemadhiri.” Neni ndakati, “Ngavaise pasoro pake dzungudza rakasukika.” Ndizvo vakaisa dzungudza rakasukika pasoro pake, vakamusimidza ngezvokusimira; nengirosi yaMambo Mwari yakaema pasinde. Zvino ngirosi yaMambo Mwari yakagondisa Joshua yechiti, “Izvi ndizvo zvinoronza Mambo Mwari wehondo: Kudai ukahamba ngenjira dzangu, wechingwarira mitemo yangu, zvino unozotonga padera pemhatso yangu nokungwarira maruwanze angu, neni ndinozokupa simba rokuhamba pakati paavo vanoema pano. Zvino, purutana, O Joshua, mupristi mukuru, nevangani vako vanogara pamberi pako! Ngokuti vari chioniso chezviro zvichauya: Ndinozounza muranda wangu, Nhai. Ngokuti ringira, padera pebuwe rendaisa pamberi paJoshua, padera pebuwe rimwe anozoapo madziso manomwe; ndinozonangura kunyorwa kwaro, unoronza Mambo Mwari wehondo, neni ndinozobvisa kushaisha kweiyi nyika ngezuva rimwe. Pairo zuva, unoronza Mambo Mwari wehondo, munozodaidzana umwe neumweni kuuya pashi pomuvhini nepomuonde.” Ngirosi iyo yakaereketa neni yakauyazve, yakandimusa kudai ngomunhu unomuswa muhope dzake. Yakati kwendiri, “Unoonenyi?” Neni ndakati, “Ndinoona chigadzikiro chechibani cheshe chomukore, nendiro huru padera pacho; zviripo zvibani zvinomwe padera pacho, nemiromo minomwe pazvibani zvinomwe, padera pacho. Pasinde pacho pane miti miiri yemiorivhi, umwe ngokumudyo kwendiro huru, noumweni ngokumuoshwe kwayo.” Ndakati kungirosi iyo yakaereketa neni, “Izvi zviinyi, mambo wangu?” Zvino ngirosi iyo yakaereketa neni yakandipingura, ikati kwendiri, “Auzii kuti izvi zviinyi here?” Ndakati, “Haiwa, mambo wangu.” Yakati kwendiri, “Iri ndiro izwi raMambo Mwari kunaZerubhabheri, rinoti, ‘Haiwa ngesimba, nokuti ngehondo, asi ngoMweya wangu,’ unoronza Mambo Mwari wehondo. Urianani, O mutunhu mukuru? Pamberi paZerubhabheri unozodai ngorubaya; naye unozounza buwe repadera, anokudaidzira kuti, ‘Nyasha, nyasha kweriri!’ ” Zve, izwi raMambo Mwari rakauya kwendiri rechiti, “Nyara dzaZerubhabheri dzakaisa tsikiro remhatso iyi; nyara dzake dzinozoipedza. Zvino unozozia kuti Mambo Mwari wehondo wandituma kwouri. Ngokuti ndiani washoora zuva rezviro zvidoodoko? Vanozodakara kuona tambo inebuwe yokupimisa munyara yaZerubhabheri. Aya manomwe madziso aMambo Mwari, anorumba apa naapo munyika yeshe.” Zvino ndakati kweiri, “Ngeyenyi iyi miti miiri yemiorivhi iri ngokumudyo kwechigadzikiro chechibani, nokumuoshwe kwacho?” Nenguva yechipiri ndakati kweiri, “Ngedzenyi nhai mbiri dzomuorivhi dzinobudisa mafuta omukore ngomupopi mbiri dzomukore?” Yakati kwendiri, “Auzii kuti izvi zviinyi here?” Ndakati, “Haiwa, mambo wangu.” Zvino yakati, “Ava ndivo vairi vakadzodzwa, avo vanoema pasinde paMambo wenyika yeshe.” Ndakaringirazve mudenga, ndikaona bhuku rakapetwa rechimbururuka. Nayo yakati kwendiri, “Unoonenyi?” Ndakapingura, “Ndinoona bhuku rakapetwa rechimbururuka; kureba kwaro mamitha mapfumbamwe, nemamitha marongomuna nehafu kupamhama.” Zvino yakati kwendiri, “Ichi chituko chinobuda padera pehope yenyika yeshe; weshe unoba unozourawa ngouno, kudai ngezvakanyorwa kurutii kwaro; neweshe unopika mhiko dzokunyepa unozourawa, kudai ngezvakanyorwa kurutii rumweni. Ndinozoribudisa kubanze, unoronza Mambo Mwari wehondo, naro rinozopotera mumhatso mwembavha, nomumhatso mwouwo unopika ngokunyepa ngezina rangu; naro rinozosara mukati mwemhatso iyo, nokuipedza nebasha rayo nemapuwe ayo.” Zvino ngirosi yakaereketa neni yakabuda pamberi, ikati kwendiri, “Ringira mudenga, uone kuti chiinyi ichi chinobuda.” Ndakati, “Chiinyi?” Nayo yakati, “Ichi chitundu chinobuda.” Yakatizve, “Ichi chishaishi chavo munyika yeshe.” Ringira, chidumaidzo chomuthovhi chakamirudzwa, napo paiya nomukadzi akagara mukati mwechitundu. Nayo yakati, “Ichi kushata.” Ndizvo yakamukandira sure muchitundu nokutsikirira uremu hwechidumaidzo chomuthovhi pomuromo wacho. Zvino ndakaringira mudenga, ndikaona, ringira, ndakaona vakadzi vairi vechiuya pamberi. Dutu raiya mumaphaphiro avo. Vaiya nemaphaphiro akadai ngemaphaphiro ousore, navo vakamirudza chitundu pakati penyika nedenga. Zvino ndakati kungirosi iyo yakaereketa neni, “Vanotora kuenda nacho kuri chitunducho?” Yakati kwendiri, “Kunyika yeShina, koochiakira mhatso munyika mweShina; naapo yanasirirwa, vanozogadzika chitundu ngemagaro acho.” Ndakaringirazve mudenga nokuona, ringira, dzakabuda ngoro murongomuna kubva pakati pemitunhu miiri; nemitunhu yaiya mitunhu yethusi. Ngoro yokutanga yaiya nemahachi akatsvuka, ngoro yechipiri mahachi matema, ngoro yechitatu mahachi akachena, nengoro yechirongomuna mahachi akasvipirika neakatsvukuruka. Zvino ndakati kungirosi iyo yakaereketa neni, “Izvi zviinyi, mambo wangu?” Ngirosi yakandipingura, ikati kwendiri, “Izvi mweya mirongomuna yomudenga, inobuda kubanze, yapedza kuema pamberi paMambo wenyika yeshe.” Ngoro inemahachi matema inoenda kunyika yedera; ineakachena inoenda kunyika yokumabirirazuva; ineakasvipirika inoenda kunyika yokubani. Naapo mahachi anesimba abuda; aisundwa kuenda kuhambahamba munyika mweshe. Nayo yakati, “Endai, muhambehambe kuringira nyika. Ndizvo akahambahamba kuringira nyika.” Zvino yakadaidzira kwendiri, yakaereketa yechiti, “Ringira, avo vanoenda kunyika yedera vanyaradza mweya wangu munyika yedera.” Izwi raMambo Mwari rakauya kwendiri rechiti, “Tora kubva kuvasungwa, kubva kuHeridhai, Thobhija, neJedhaia, avo vaguma kubva Bhabhuroni, nokupetuka ngezuva ririro, kupotera mumhatso yaJosia mukororo waZefania. Tora sirivha nomukore, unasire dzungudza, upfekese padera pesoro romupristi mukuru Joshua mukororo waJehosadhaki; uti kwaari, ‘Izvi ndizvo zvinoronza Mambo Mwari wehondo: Ringira, uwo munhu zina rake ndiNhai; naye unozoita nhai pandau yake; unozoaka temperi raMambo Mwari. Ndiye uwo unozoaka temperi raMambo Mwari; unozotwara kukudzwa kwoumambo, naye unozogara nokutonga padendemaro rake. Unozoapo mupristi pasinde pedendemaro rake; nokuzwisisa kwakanyarara pakati pavo vairi.’ Nemadzungudza anozongwarirwa ndiHeremu, Thobhija, Jedhaia, naHeni mukororo waZefania, kuita mukarakadziso mutemperi raMambo Mwari.” Naavo vari kuretu vanozouya nokudetsera kuaka temperi raMambo Mwari, nemwi munozozia kuti Mambo Mwari wehondo wandituma kwomuri. Izvi zvinozoitika, kudai mwechigwinyisira kupurutana izwi raMambo Mwari wenyu. Mugore rechirongomuna rokutonga kwamambo Dhariusi, izwi raMambo Mwari rakauya kunaZekharia pazuva rechirongomuna romwedzi wechipfumbamwe, unozwi Khisirevhi. Zvino vanhu veBhetheri vaiya vatuma Shareza naRegemerekhi, nevanhu vavo kookumbira nyasha pamberi paMambo Mwari, nokukumbira vapristi vomumhatso yaMambo Mwari wehondo nevaprofeti vechiti, “Ndochema here ngomwedzi wechishanu, ndechidziparadzanisa, kudai ngezvendakaita ngaaya makore akawanda kudai?” Zvino rakauya izwi raMambo Mwari wehondo kwendiri, “Ereketa kuvanhu veshe venyika nokuvapristi wechiti, ‘Apo mwakaera kudya mwechibonda mumwedzi wechishanu nowechinomwe, makore aya makumi manomwe, mwakaerera inini, apo pemwakaera kudya here? Naapo mwakadya nokumwa, amuzi kudzidyira nokudzimwira here?’ “Awo andiwopi mazwi aakadaidzira Mambo Mwari ngevaprofeti vokutanga, apo Jerusarema richine vanhu nouthende, pamwepo nemadhorobha aro akaritendenedza, naapo vanhu vachakagara mubani nemarutii emitunhu here?” Izwi raMambo Mwari rakauya kunaZekharia rechiti, “Izvi ndizvo zvinoronza Mambo Mwari wehondo: ‘Tongai kutonga kwakarurama, muite nyasha nokukungurira umwe kuneumweni; musatambudza shirikadzi, nherera, vapara, nokuti varombo; musaronga kuitirana zvakashata mumwoyo yenyu umwe kuneumweni.’ “Asi vakaramba kupurutana, vakafuratira pfudzi risikapurutani, vakatsiira nzee dzavo, kuti vasazozwa. Vakaita kuti mwoyo yavo ikonze kudai ngebuwe readhimanti, kuitira kuti vasazozwa mitemo, namazwi aakatuma Mambo Mwari wehondo ngoMweya wake ngevaprofeti vokutanga. Ndizvo ushungu hukuru hwakauya hwechibva kunaMambo Mwari wehondo. Ndizvo zvakaitika, apo akadaidza, vakaramba kuzwa; ngokudaro apo vakadaidzira, neni ndakaramba kuzwa, unoronza Mambo Mwari wehondo, neni ndakavaparadzira ngechipupuri pakati pemadzinza eshe evasaizia. Ndiyo nyika yevakasiya kuita shango, ndizvo akuna naumwe wakapindamwo nokubudamwo; nenyika yakanaka yakaitwa shango.” Izwi raMambo Mwari wehondo rakauya kwendiri rechiti, “Izvi ndizvo zvinoronza Mambo Mwari wehondo: Ndine ndurumwa neZioni nendurumwa huru, neni ndine ndurumwa ngendaa yaro ngoushungu hukurutu. Izvi ndizvo zvinoronza Mambo Mwari: Ndinozopetuka kuZioni, neni ndinozogara pakati peJerusarema; Jerusarema rinozodaidzwa kuti Dhorobha Rakagondeka, nomutunhu waMambo Mwari wehondo unozodaidzwa kuti mutunhu wakacheneswa. Izvi ndizvo zvinoronza Mambo Mwari wehondo: Harahwa nembuya vachazogarazve mumapato eJerusarema, umwe ngaumwe anendonga munyara ngendaa yousharuka. Nemapato edhorobha anozozara ngevarumbwana nevasikana vechitamba mumapato aro. Izvi ndizvo zvinoronza Mambo Mwari wehondo: Kunyazwi zvechioneka kudai ngezvisikaitiki mukuona kwevakasara vevanhu ava mumazuva aya, zvichaonekawo kudai ngezvisikaitiki mukuona kwangu here? Unoronza Mambo Mwari wehondo. Izvi ndizvo zvinoronzaMambo Mwari wehondo: Ringira, ndinozoponesa vanhu vangu kubva kunyika yokumabvazuva nokubva kunyika yokumabirirazuva; neni ndinozovaunza kuti vagare muJerusarema. Vanozoita vanhu vangu, neni ndinozoita Mwari wavo, mukugondeka nomukururama. “Izvi ndizvo zvinoronza Mambo Mwari wehondo: Nyara dzenyu ngadzigwinye, imwimwi mwazwa mazwi aya ngemiromo yevaprofeti, avo vaiyapo apo pakaradzikwa madzeyo okuakisa temperi, mhatso yaMambo Mwari wehondo. Ngokuti asati aguma mazuva awo, paiya pasina musharo womunhu nokuti musharo wemhuka; nokuti kunyarara kubva kugaa, nokuti avo vakabuda nokuti vakapotera, neni ndakavaemesa veshe kuti varwisane umwe neumweni. Asi zvino andizobati vakasara vevanhu ava kudai ngemazuva okutanga, unoronza Mambo Mwari wehondo. Ngokuti kunozoapo kukushwa kwokunyarara; muvhini unozobara michero yawo, mavhu anozobudisa michero yawo, nematenga anozobudisa beto rawo; neni ndinozoita kuti vakasara vevanhu ava vaanazvo izvi zveshe. Kudai ngezvemwakaita chituko pakati pevemadzinza, O mhatso yaJudha nemhatso yaIsuraeri, ngokudaro ndinozomuponesa nemwi munozoita chifumiso. Musatya, asi nyara dzenyu ngadzigwinye.” Ngokuti izvi ndizvo zvinoronza Mambo Mwari wehondo: “Kudai ngezvendakapinimidza kuunza dambudziko padera penyu, apo madzibaba enyu akandimukira kuti ndiite ushungu, unoronza Mambo Mwari wehondo, neni ndakarekera kutenderuka, ngokudarozve ndakapinimidza mumazuva ano kuita zvakanaka kuJerusarema nokumhatso yaJudha; musatya imwimwi. Izvi ndizvo zviro zvomunozoita: Ereketai gwinyiso umwe kuneumweni, itai kutonga kwakanaka kwegwinyiso, muunze kunyarara mumisiwo yenyu, musaronga kuita zvakashata mumwoyo yenyu umwe kuneumweni, musazoda mhiko dzokunyepa; ngokuti izvi zveshe ndizvo zviro zvendinonyenya,” unoronza Mambo Mwari. Izwi raMambo Mwari wehondo rakauya kwendiri rechiti, “Izvi ndizvo zvinoronza Mambo Mwari wehondo: Kuera kudya mwedzi wechirongomuna, nokuera kudya kwemwedzi wechishanu, nokuera kudya kwemwedzi wechinomwe, nokuera kudya kwemwedzi wegumi, kunozoita kumhatso yaJudha kudakara nokudakadzwa, kudya kwakawanda kunodakadza; ndizvo idai gwinyiso nokunyarara.” Izvi ndizvo zvinoronza Mambo Mwari wehondo: “Vanhu vachauya vagari vemadhorobha akawanda; vagari vomudhorobha rimwe vanozoenda kunerimweni vechiti, ‘Uyai, ngatikasire kuenda kookumbira nyasha kunaMambo Mwari, nokutsvaka Mambo Mwari wehondo; inini pachangu ndinozoenda.’ Vanhu vakawanda nemadzinza akagwinya vanozouya kutsvaka Mambo Mwari wehondo muJerusarema, nokukumbira nyasha kunaMambo Mwari. Izvi ndizvo zvinoronza Mambo Mwari wehondo: Mumazuva awo vanhu gumi vanobva kumadzinza endimi dzeshe dzemadzinza vanozobata muJudha, vechibatirira kumupendero wechokufuka chake vechiti, ‘Ngatiende newe, ngokuti tazwa kuti Mwari unewe.’ ” Izwi raMambo Mwari rinorwisana nenyika yeHadhirakhi, rinozowira padera peDhamasekusi. Ngokuti kunaMambo Mwari ngerake dhorobha guru reAramu kudai ngezvinoita madzinza eshe aIsuraeri. Hamathiwo inoganurana nayo, Thire neSidhoni, kunyazwi vakangwara kakurutu. Thire rakadziakira mangome, nokuunganidza sirivha kudai ngebukuta, nomukore kudai ngematope emapato. Asi zvino ringira, Mambo Mwari unozotorera nhaka yaro, nokuzuwira upfumi hwaro muruandhle, naro rinozopedzwa ngomuriro. Ashikeroni rinozozviona nokutya; Gazawo rinozoona, rechizosvipa mwoyo kakurutu; Ekironiwo, ngokuti magondero aro afota. Mambo unozopera kubva Gaza; Ashikeroni arizogarwi. Mubvandirimwo unozogara muAshidhodhi, neni ndinozopedza kudzikudza kwevaFiristia. Ndinozodusa ngazi yake kubva pamuromo wake, nezvinonyangadza zvake kubva pakati pemazino ake; chinosarawo chinosarira Mwari wedu, chinozodai ngedzinza mwaJudha, Ekironi rinozodai ngomuJebhusi. Zvino ndinozodzimika kutendenedza mhatso yangu kuingwarira kuti kusaapo naumwe unofora kuenda mberi nokupetuka sure; apana mutambudzi uchazofora pakati pavo nakamwe, ngokuti zvino ndaona ngemadziso angu emene. Dakara kakurutu, O mwanasikana weZioni! Daidzira, O mwanasikana Jerusarema! Ringira, Mambo wako unouya kwouri, asi munyisi, ndiye munyisi wakapfaa, echigadha padera pechimbongoro padera pemwana wembongoro. Ndinozogura ngoro dzinobva Efuremu, nemahachi ehondo kubva Jerusarema, nouta hwehondo hunozogurwa; naye unozopanga kuti kuapo kunyarara kumadzinza; nokutonga kwake kunozobva kuruandhle kuguma kuruandhle, nokubva kuRwizi kuenda kumagumo enyika. Asi kudai ndiwewo, ndaa yengazi yechitenderano changu newe, ndinozosunhura mabanditi ako kubva murindi apo risina mvura. Petukai kungome dzenyu, O mabanditi okugonda; nyamashi ndinoronza kuti ndinozopetudzira kairi kwomuri. Ngokuti ndakunga Judha kudai ngouta hwangu, ndaita Efuremu misee yahwo. Ndinozomirudzira vakororo vako, O Zioni, kurwisana nevakororo vako, O Girisi, nokukuita kuti udai ngeshoti yengwazi. Zvino Mambo Mwari unozooneka padera pavo, nemisee yake inozoposhwa kudai ngemheni; Mambo Mwari, Mwari unozoridza gwama, nokuhamba kudai ngezvipupuri zvokubani. Mambo Mwari wehondo unozovavhikira; navo vanozoparadza nokunyisa ngemapuwe anokandirwa ngechimvii; vanozomwa, nokuita bope kudai ngepavhini; vanozozara kudai ngendiro huru, nokunyikwa ngemakhona earita. Pazuva iro Mambo Mwari wavo unozovaponesa ngokuti makwai evanhu vake; ngokuti vanozodai ngemapuwe edzungudza, anozopenya padera penyika yake. A kunakanyi nokuringirika kwakanaka kwake! Zviyo zvinozoita kuti majaha akure akagwinya, nevhini idzva kuti vasikana vakure vakagwinya. Kumbirai mvura kubva kunaMambo Mwari ngomukuwo wemvura yokuteera, kunaMambo Mwari uwo unoita makore anotinhira, uwo unopa mvura yokupfunha kwevari, unomupa mwenje murubaya kumunhu weshe. Ngokuti miedzaniso yokudira inoereketa zvisina shwiro, neman'anga anoona manyepo, varoti vanoronza hope dzokunyepa, vechipa kuembedzera kusina shwiro. Ndizvo vanhu vanonzerereka kudai ngemakwai, vanotambudzika ngokutama muushi. “Ushungu hwangu hunobaka kuvaushi, neni ndinozoorora makotokoto; ngokuti Mambo Mwari wehondo unongwarira makwai ake, mhatso yaJudha, naye unozovaita kuti vadai ngehachi rake rinodadisa muhondo. Kubva mwevari munozobuda buwe repakhona, kubva mwevari munozobuda hoko yetende, kubva mwevari kunozobuda uta hwehondo, kubva mwevari mutungamiriri wehondo weshe. Pamwepo vanozodai ngengwazi muhondo, dzinotsikatsika pashi magaa adzo mumatope emapato vanozorwa, ngokuti Mambo Mwari unavo, navo vanozotsverudza vagadhi vemahachi. Neni ndinozogwinyisa mhatso yaJudha, ndinozoponesa mhatso yaJosefa. Ndinozovapetudza, ngokuti ndinenyasha kwevari, navo vanozoita kudai ngevendisikazi kuramba; ngokuti ndiri Mambo Mwari, Mwari wavo, neni ndinozovapingura. Zvino vanhu vaEfuremu vanozoita kudai ngengwazi, nomwoyo yavo inozodakara kudai ngevamwa vhini. Vana vavo vanozozviona nokudakara; mwoyo yavo inozodakara munaMambo Mwari. Ndinozoridza murudzi kwevari, ndivaunganidze; ngokuti ndavaripira, navo vanozowanda kudai ngezvevaiya vakaita karetu. Kunyazwi ndakavakusha pakati pemadzinza, asi munyika dziri kuretu vanozondikarakadza; vanozorera vana vavo nokupetuka. Ndinozovaunza kanyi kubva kunyika yeEgipite, nokuvaunganidza kubva Asiria; ndinozovaunza munyika yeGireadhi neRebhanoni, metsa pasisina ugaro kwevari. Unozohamba kupinda ngomuruandhle rwokutambudzika, mafungu oruandhle anozochairwa pashi, ndau dzeshe dzakadzama dzorwizi Naire dzinozopwa. Kudzikudza kweAsiria kunozodzaswa pashi, nendonga youmambo hweEgipite inozobviswa. Ndinozovagwinyisa munaMambo Mwari, navo vanozohamba muzina rake,” unoronza Mambo Mwari. Beura misiwo yako, O Rebhanoni, kuti muriro upedze misidhari yako. Boorera, O musaiprusi, ngokuti musidhari wawa, ngokuti miti yakagwinya yaitwa shango. Boorerai, miokhi yeBhashani, ngokuti gwasha rakagwinya rarigirwa pashi. Purutanai izwi rokuboorera kwavaushi! Ngokuti uthende hwavo hwapambwa. Purutanai kubhonga kwemhondoro itsva! Ngokuti makanyi omuJorodhani aparadzwa. Izvi ndizvo zvinoronza Mambo Mwari, Mwari wangu: “Ita muushi wemakwai akaemeserwa kuurawa. Avo vanoatenga vanoauraya, vechienda vasina kuororwa; naavo vanoatengesa vanoti, ‘Unomuchena Mambo Mwari, ngokuti ndaita mupfumi;’ nevaushi vawo vemene avarwadziwi mwoyo ndiwo. “Ngokuti andichazorwadziwi mwoyo ndivo avo vanogara munyika iyi, unoronza Mambo Mwari. Ringira, ndinozovaita veshe uwo nouwo kuti awire munyara yomuakirwana wake, uwo nouwo awire munyara yamambo wake; naavo vanozoparadza nyika, andizovanunuri naumwe kubva kunyara yavo.” Ndizvo, ndakaemera vatengesi nevatengi vemakwai, ndakaita muushi wemakwai akaemeserwa kuurawa. Ndakatora ndonga mbiri; imwe ndakaidudza kuti, “Unaku,” neimweni ndakaidudza kuti, “Zvisungo;” neni ndakausha makwai. Ndakauraya vaushi vatatu ngomwedzi umwe; ngokuti mweya wangu wakaremba ndivo, navo vakandinyenya. Ndizvo ndakati, “Andichaiti muushi wenyu. Iyo inofa ngaife; neiyo inourawa ngaiurawe; neidzo dzakasara ngadzidye nyama yeimweni.” Ndakatora ndonga yangu inozwi “Unaku,” ndikaigura, kuti ndigure chitenderano changu chendakaita nevanhu veshe. Ndizvo chakagurwa ngeiro zuva; vatengesi nevatengi vemakwai vaindiringira vakazia raiya izwi raMambo Mwari. Ndakati zvino kwevari, “Kudai mwechipinimidza kuti zvakanaka kwemuri, ndipei musharo wangu; asi kuti zvisikazi kunaka, ungwarirenyi.” Ndizvo vakapima zvigurwa makumi matatu zvesirivha kuita musharo wangu. Zvino Mambo Mwari wakati kwendiri, “Zvikandire kumuumbi,” uwo mutengo mukuru, mutengo wendakaemeserwa ndivo! Ndizvo ndakatora izvo zvigurwa makumi matatu zvesirivha, ndikazvikandira kumuumbi, mumhatso yaMambo Mwari. Zvino ndakagura ndonga yangu imweni yechipiri, inozwi “Zvisungo,” kuti ndigure ukama pakati paJudha naIsuraeri. Zvino Mambo Mwari wakati kwendiri, “Torazve ndonga dzomuushi uri benzi. Ngokuti, ringira, zvino ndinomirudza muushi munyika, uwo usikahambiri idzo dzinopera, nokuti kutsvaka vana vemakwai, nokuti kurapa idzo dzakaguka, nokuti kugutsa dzinopona, asi kudya nyama yedzakakora, nokugura masondo adzo kuita zvigurwa. O muushi wangu usina shwiro, uwo unotiza makwai! Shoti ngaibaye pamuoko wake, nepadziso rake rokumudyo! Muoko wake ngauonyane yaamho, nedziso rake rokumudyo ripofomadzwe yaamho!” Izwi raMambo Mwari ngendaa yaIsuraeri. Izvi ndizvo zvinoronza Mambo Mwari, uwo unotambanudza matenga nokuemesa madzeyo enyika, nokusika mweya womunhu mukati mwake: “Ringira, ndaakuda kuita kuti Jerusarema riite tsani yokuthethereka kwevanhu veshe vanoritendenedza, richarwisa Judha nomukutendenedzwawo kurwisa Jerusarema. Pazuva iro ndinozoita kuti Jerusarema rireme kudai ngebuwe kuvanhu veshe; veshe vanoritwara vanozodzipwanya pachavo kuita zvigurwa. Nemadzinza eshe omunyika anozoungana pamwepo kurirwisa. Pazuva iro, unoronza Mambo Mwari, ndinozounza kukarudza kunotyisa padera pemahachi eshe, nevagadhi vawo, ngokupenga. Asi padera pemhatso yaJudha dziso rangu rinozoramba rakaringira apo pendinochaya mahachi eshe evanhu ngoupofu. Zvino vatongi vaJudha vanozoti mumwoyo mwavo, ‘Vagari veJerusarema vane simba kubudikidza ndiMambo Mwari wehondo, Mwari wavo.’ “Pazuva iro ndinozoita kuti vatongi vaJudha vadai ngehari yakatsvuka ngomuriro padera pehuni, kudai ngesasi rinobaka muriro pakati pomwanda wekoroni; navo vanozopedza vanhu veshe vanovatendenedza, kumudyo nokumuoshwe; neJerusarema rinozogarwazve kundau yaro yemene, muJerusarema. Mambo Mwari unozopa kunyisa kumatende aJudha kutanga, kuti uthende hwemhatso yaDhavhidha nouthende hwevagari veJerusarema husazodzikurisa kupinda hwaJudha. Pazuva iro Mambo Mwari unozovhikira vagari veJerusarema; naye usina simba pakati pavo ngeiro zuva unozodai ndiDhavhidha; nemhatso yaDhavhidha inozodai ndiMwari, kudai ngengirosi yaMambo Mwari pamasoro avo. Nepazuva iro, ndinozotsvaka kuparadza madzinza eshe anouya kurwisa Jerusarema. “Neni ndinozodurura padera pemhatso yaDhavhidha, nepadera pevagari veJerusarema, mweya wenyasha nowokupota, kuitira kuti apo vooringira umwe uwo wevakabaya, vanozobonda ngendaa yake, kudai ngounobondera mukororo wake umwe ega, nokumuchema kakurutu, kudai ngounochema mwana wake wedangwe. Pairo zuva kunozoapo kubonda kukurutu muJerusarema, kudai ngokubonda kweHadhadhirimoni murubaya rweMegidho. Nyika inozobonda, mhuri imwe pachayo; mhuri yemhatso yaDhavhidha yega pachayo, nevakadzi vavo vega pachavo; mhuri yemhatso yaNathani yega pachayo, nevakadzi vavo vega pachavo; mhuri yemhatso yaRevhi yega pachayo, nevakadzi vavo vega pachavo; mhuri yaShimei yega pachayo, nevakadzi vavo vega pachavo; mhuri dzeshe dzinosara, imwe ngaimwe pachayo, nevakadzi vayo pachavo. “Pairo zuva chinyuka chinozobeurirwa mhatso yaDhavhidha nevagari veJerusarema, chokusuka kushaisha nokusikasukika. Pazuva iro, unoronza Mambo Mwari wehondo, ndinozobvisa mazina emiedzaniso yokudira munyika, aichazokarakadzwi nakamwe. Ndinozodusa vaprofeti nemweya inetsvina kubva munyika. Nokudai echizobudazve muprofeti, baba ake namai ake avo vakamubereka vanozoti kwaari, ‘Auzoponi akadi; ngokuti unoereketa manyepo ngezina raMambo Mwari.’ Vabereki vake avo vakamubereka vanozomubaya apo ooprofeta. Pazuva iro, vaprofeti vanozotsveruka veshe umwe ngaumwe ngechioniso chake, apo vanoprofeta; avazosimiri chokufuka chinemamviri kuitira kuchengedzera, asi umwe ngaumwe wavo unozoti, ‘Andiri muprofetipi, ndiri murimi wemavhu; ngokuti nyika ndiyo yaiya nhaka yangu kubvira muutsva hwangu.’ Kudai umwe echivabvunza kuti, ‘Ngeenyi maronda aya ari munyara dzako?’ Naapo unozopingura kuti, ‘Aya maronda endakaremadzwa mumhatso yehama dzangu.’ ” “Muka, O shoti, urwe nomuushi wangu, urwe nomunhu uri hama yangu, unoronza Mambo Mwari wehondo. Baya muushi, kuti makwai apararire kweshe; ndinozopetudza nyara yangu padera pevadoko. Munyika mweshe, unoronza Mambo Mwari, marupande mairi ematatu anozogurwa nokufa; asi rupande rumwe rwechitatu runozosaramwo rwechipona. Neni ndinozoisa urwu rupande rwechitatu mumuriro, ndinozoaererisa kudai ngounoeresa sirivha, nokuvaedza kudai ngounoedzwa kunoitwa mukore. Vanozodaidza ngezina rangu, neni ndinozovapingura. Ndinozoti, ‘Vanhu vangu;’ navo vanozoti, ‘Mambo Mwari ndiye Mwari wedu.’ ” Ringira, zuva raMambo Mwari rinouya, apo zvakapambwa zvako zvinozokoaniswa pakati pako. Ngokuti ndinozounganidza madzinza eshe kurwisa Jerusarema kuhondo; nedhorobha rinozotorwa, mhatso dzinozochakatwa, nevakadzi vanozobhinywa; norupande rwedhorobha runozoenda muuhloko, asi vakasara vevanhu avazourawi kubva mudhorobha. Zvino Mambo Mwari unozobuda pamberi, nokurwisa awo madzinza, kudai ngezvaanorwa ngezuva rehondo. Pazuva iro tsoka dzake dzinozoema padera poMutunhu wemaOrivhi, uwo uri pamberi paJerusarema ngokumabvazuva; Mutunhu wemaOrivhi unozomweka ngepakati kuita marupande mairi kubva kumabvazuva kuenda kumabirirazuva, ngomubani rakapamhama yaamho; norupande rwomutunhu runozoenda dera, norupande rwawozve runozoenda kubani. Nemwi munozotiza ngomubani romutunhu waMambo Mwari; ngokuti bani riri pakati pemitunhu rinozoguma Azari; munozotiza, kudai ngezvemwakatiza pamberi pokuzungunyika kwenyika ngamazuva aUzia mambo waJudha. Zvino Mambo Mwari, Mwari wangu unozouya, navo veshe vakacheneswa vanaye. Pazuva iro akuzoapo kutonhora nokuti chando. Nakwo kunozoangira kuita masikati (rinoziikanwa kunaMambo Mwari;) haiwa masikati, haiwa usiku, ngokuti nguva yemadeekoni kunozoapo kujeka. Pairo zuva mvura yokupona inozopopoma kubva Jerusarema; rupande rwayo kuruandhle rwokumabvazuva, norupande rwayo rumweni kuruandhle rwokumabirirazuva; inozoangira nguva yemayanga nenguva yechando. NaMambo Mwari unozoita mambo padera penyika dzeshe; pairo zuva Mambo Mwari unozoita umwe, nezina rake rimwe. Nyika yeshe inozotsandurwa kuita rubaya kubva Gebha kuguma Rimoni ngokubani kweJerusarema. Asi Jerusarema richagara rakwirira pandau paro, kubvira paMusiwo Bhenjamini kuguma kundau yomusiwo wekaretu, kuguma paMusiwo wepaKhona, nokubvira paThawa raHananeri kuguma pokukamurira vhini ramambo. Napo panozogarwa, akuchazomboitikizve kuti paemeserwe kuparadzwa; Jerusarema rinozogara ngokungwaririka. Iyi ndiyo nhenda yaanozochaya ndiyo Mambo Mwari vanhu veshe vanorwa hondo neJerusarema: nyama yavo inozoora apo vachakaema ngetsoka dzavo, madziso avo anozoora ari mundau dzawo, norurumi rwavo runozoora mumuromo wavo. Pairo zuva nheruso huru inobva kunaMambo Mwari inozowira padera pavo; ndizvo umwe ngaumwe unozobata kunyara yomuakirwana wake, nenyara yake inozorwisa nyara yomuakirwana wake; kunyazwi Judha unozorwisa Jerusarema. Noupfumi hwevemadzinza veshe vanoritendenedza hunozounganidzwa, mukore, nesirivha, nezvokusimira zvakawanda kakurutu. Nenhenda yakadai ngeiyi inozowira padera pemahachi, manyurusi, mangamera, mbongoro, nemhuka dzeshe dzirimwo mumatende aya. Zvino veshe vanosara vemadzinza akauya koorwa neJerusarema vanozokwira gore ngegore koodira Mambo, Mambo Mwari wehondo, nokungwarira mushongano wokudya wematende. Kunyazwi ndiani wemhuri dzenyika usikazokwiri Jerusarema koodira Mambo, Mambo Mwari wehondo, akuzoapo mvura padera pavo. Kudai mhuri yeEgipite isikakwiri nokudzipira pachavo, nhenda inozouya padera pavo iyo yaanounza Mambo Mwari padera pemadzinza awo asikakwiri kungwarira mushongano wokudya wematende. Uku kunozoita kuororwa kweEgipite, nokuororwa kwemadzinza eshe asikakwiri kungwarira mushongano wokudya wematende. Pairo zuva kunozoapo padera pesimbi dzemahachi chinyorwa chinoti, “KUCHENESWA KUNAMAMBO MWARI;” nehari dziri mumhatso yaMambo Mwari dzinozocheneswa kudai ngezvidziyo zviri pamberi pearita; nehari dzeshe dziri muJerusarema nemwaJudha dzinozoita dzakacheneswa kunaMambo Mwari wehondo, navo veshe vanopira midiro vanozouya nokudzitora, nokubikira mukati mwadzo. Pairo zuva akuchazoapo muKhenani mumhatso yaMambo Mwari wehondo. Chiprofeti. Izwi raMambo Mwari kunaIsuraeri kubudikidza ndiMarakhai. “Ndakamuda,” unoronza Mambo Mwari. Asi munoti, “Wakatida ngenjiranyi?” “Esau aasiri mukoma waJakobe here?” Unoronza Mambo Mwari. “Asi ndada Jakobe, asi ndanyenya Esau, ndaita kuti nyika yake yezvimitunhu iite matongo nenhaka yake kuita rubaya rwemakava.” Kudai Edhomu rechiti, “Taputsirwa pashi, asi tinozoakisa matongo,” unoronza Mambo Mwari wehondo: “Vangaaka, asi ndinozoputsira pashi, metsa vadaidzwa kuti, ‘Nyika yokushaisha,’ ‘Vanhu vaanonyangadzwa ndivo Mambo Mwari mhera nariini.’ ” Madziso enyu emene anozoona izvi, nemwi munozoti, “Mambo Mwari mukurutu, kunyazwi nokubanze kwemigano yaIsuraeri.” “Mukororo unoremeredza baba ake, nomuranda tenzi wake. Ndizvo kudai ndiri baba, amundiremeredzi ngenyi? Ndizvo kudai ndiri tenzi, amundiremeredzi ngenyi? Unoronza Mambo Mwari wehondo kwomuri, O vapristi, vanoshoora zina rangu. Nemwi munoti, ‘Takashoora zina rako ngenjiranyi?’ Ngokupira chingwa chakasvipiswa padera pearita rangu. Nemwi munoti, ‘Takarisvipisa ngenjiranyi?’ Ngokupinimidza kuti tafura raMambo Mwari chiro chinoshooreka. Apo mwechipira mhuka dziri mapofu kuita mudiro, asikushatapi here? Apo mwechipa inokumhina neinorwara, asikushatapi here? Edza kuipa zvino kunomutongi wako; unozodakara ndiwe here, nokuti kukuashira?” Unoronza Mambo Mwari wehondo. Nazvino kumbirai nyasha dzaMwari kuti atiitire nyasha. Kushata ngekwenyu. Unozoonisa nyasha kuneumwe wenyu here? Unoronza Mambo Mwari wehondo. “O kudai umwe pakati penyu aizokonya misiwo, kuti musazobasira muriro padera pearita rangu pasina shwiro. Andidakari ndimwi, unoronza Mambo Mwari wehondo, neni andizoashiri munikero kubva kunyara dzenyu. Ngokuti kubvira mukubuda kwezuva metsa kupota kwaro zina rangu iguru pakati pemadzinza; nokundau dzeshe mutombo wokupisha unegwema rakanaka unozopirwa kuzina rangu, nomunikero wakachena; ngokuti zina rangu iguru pakati pevemadzinza, unoronza Mambo Mwari wehondo. Asi imwimwi munorisvipisa, apo munoti, ‘Tafura raMambo Mwari rasvipiswa; nemichero yaro, iri kudya kwake, inoshooreka.’ Munotizve, ‘Ringirai, A kurembesanyi kwezvinoita!’ Nemwi munofemba kwendiri, unoronza Mambo Mwari wehondo. Munounza chakapambwa nokuti chakaremara nokuti chinorwara; izvi munounza kudai ngeminikero yenyu. Ndinozoashira izvi kubva kunyara dzenyu here? Unoronza Mambo Mwari. Ngaatukwe muchengedzeri, uwo unegondohwe pakati pemakwai ake, unopika kuripira, asi echipira kunaMambo Mwari chiro chinoshooreka; ngokuti ndiri Mambo mukuru, unoronza Mambo Mwari wehondo, nezina rangu rinoremeredzwa pakati pemadzinza.” “Nazvino, O vapristi, uyu mutemo ngewenyu. Kuti imwimwi musikazopurutani, kuti musikazouisi mumwoyo, kuirikidza zina rangu,” unoronza Mambo Mwari wehondo, “Zvino ndinozounza chituko padera penyu, neni ndinozotuka zvifumiso zvenyu; ngegwinyiso ndazvituka, ngokuti amuzi kuuisa mumwoyo. Ringirai, ndinozokaraidza mibarirwana yenyu, nokuseta hope dzenyu ngemadisa, madisa emishongano yenyu yokudira; nemwi munozobviswa pamwepo nawo. Ziai zvino kuti ndatumira uyu mutemo kwomuri, kuti chitenderano changu naRevhi chigare chiripo,” unoronza Mambo Mwari wehondo. “Chitenderano changu naye chaiya chitenderano chokupona nokunyarara, icho chendakamupa; izvi zvaida kuremeredza naye wakandiremeredza nokuema mukutya zina rangu. Kudzidzisa kwegwinyiso kwaiya mumuromo wake, nokushata akuzi kuoneka mumiromo yake. Wakahamba neni mukunyarara nomukururama, wakatenderudza vazhinji kubva mukushata. Ngokuti miromo yomupristi ngaingwarire kuzia, nevanhu vanosisira kutsvaka kudzidziswa kubva kumuromo wake, ngokuti mutumwa waMambo Mwari wehondo. “Asi mwakapauka kubva munjira; mwaita kuti vazhinji vapumhunwe ngemitemo yenyu; mwasvipisa chitenderano chaRevhi,” unoronza Mambo Mwari wehondo. “Ndizvo inini ndinomuita vanoshooreka nevari pashi pamberi pevanhu veshe, kudai ngezvomusikazi kungwarira njira dzangu, asi mwakatonga ngomukheto mukudzidzisa kwenyu.” Atina baba umwe teshe here? Atizi kusikwa ndiMwari umwe here? Ngenyi zvino techichengedzerana umwe ngaumwe, ngokusvipisa chitenderano chemadzibaba edu? Judha waiya asina kugondeka, nechiro chinonyangadza chaitwa muIsuraeri nomuJerusarema; ngokuti Judha wakasvipisa ndau yakachena yaMambo Mwari yaanoda, waroora mwanasikana wechimwari chipara. Mambo Mwari ngaauraye kubva kumatende aJakobe munhu weshe unoita izvi, mupupuri weshe nokuti mupinguri, nouwo unopa munikero kunaMambo Mwari wehondo. Neizvi munoitawo: Munofukidza arita raMambo Mwari ngemasodzi, ngokuchema nokuboorera, ngokuti iye warekera kupinimidza ngomunikero, nokuti kuuashira ngokudakara kubva kunyara dzenyu. Munobvunza mwechiti, “Ngenyi asikaiti?” Ngokuti Mambo Mwari uri chapupu pakati pako nomukadzi woutsva hwako, uwo wousikazi kugondeka kwaari, kunyazwi mungani wako, nomukadzi wechitenderano chako. Aazi kuita umwe here? Zveshe nyama nomweya ngezvake. Chiinyi chaanoda? Mibarirwana yevanodira Mwari. Ndizvo dziringire pachako, usatendera mweya naumwe kuita usikagondeki kumukadzi woutsva hwake. “Ngokuti ndinonyenya kurambana,” unoronza Mambo Mwari, Mwari waIsuraeri, “Ngokuti umwe unofukidza zvokufuka zvake ngokugebenga,” unoronza Mambo Mwari wehondo. Ndizvo ngwarirai kumweya wenyu, kuti musaita vasikagondeki. Mwarembesa Mambo Mwari ngemazwi enyu. Asi munoti, “Tamurembesa ngokudini?” Ngokuronza, “Veshe vanoita zvakashata vakanaka mukuona kwaMambo Mwari, naye unodakara ndivo;” nokuti ngokubvunza kuti “Uri pari Mwari wokutonga kwakanaka?” “Ringirai, ndinotuma mutumwa wangu kunasirira njira pamberi pangu, naMambo Mwari, womunotsvaka unozouya ngokukasira kutemperi rake. Mutumwa wechitenderano uwo womunodakara yaamho mwaari, ringira unouya,” unoronza Mambo Mwari wehondo. Asi ndiani uwo ungakona kutsunga ngezuva rokuuya kwake? Ndiani uwo ungakona kuema apo ooneka? Ngokuti iye wakadai ngomuriro womueresi, nokudai ngesipo yomusuki; unozogara kudai ngomueresi nomupereresi wesirivha, unozochenesa mibarirwana yaRevhi, nokuvapereresa kudai ngomukore nesirivha, metsa vapire zvipo zvemidiro kunaMambo Mwari mukururama. Zvino munikero waJudha neJerusarema unozodakadza Mambo Mwari, kudai ngemazuva ekaretu nokudai ngemakore akapinda. “Zvino ndinozokwedzera kwomuri kutonga; ndinozoita chapupu chinokasira kupupura kuitira ndaa vanoringidza, vanoomba, vanopika ngokunyepa, vanotambudza nokunyima musharo wevashandi, weshirikadzi, wenherera, naavo vanopaukisa vapara, vasikandityi,” unoronza Mambo Mwari wehondo. “Ngokuti inini Mambo Mwari andipinduki; ndizvo imwimwi, O vana vaJakobe, amuzi kupedzwa. Kubvira kumazuva emadzibaba enyu mwakapauka kubva kuzviemeso zvangu, amuzi kuzvingwarira. Petukai kwendiri, neni ndinozopetuka kwomuri,” unoronza Mambo Mwari wehondo. “Asi munoti, ‘Toita mapetukirenyi?’ Munhu unozobira Mwari here? Asi imwimwi munondibira. Asi munoti, ‘Tinokubira ngokudini?’ Mukupa kwenyu chimwe chegumi neminikero. Munotukwa ngechituko, ngokuti munondibira, dzinza renyu reshe. Unzai zvegumi zvakazara mudura mwangu, kuti kudya kuapo mumhatso mwangu, muizvi mundiedze,” unoronza Mambo Mwari wehondo; “Ringirai kuti andizomubeuriri mafasitera omudenga, ndimudururire chifumiso chinofashukira, kuti kutamike nendau yakakwana yokuchiashira. Neni ndinozorambidza udyi ngendaa yenyu, nahwo ahuzopedzi michero yeivhu renyu; mivhini yenyu muminda aizoporodzi michero yayo,” unoronza Mambo Mwari wehondo. “Zvino madzinza eshe anozomuerenga kuti munomuchena, ngokuti munozoita nyika inodakadza,” unoronza Mambo Mwari wehondo. “Mwaereketa mazwi ehasha kundirwisa,” unoronza Mambo Mwari. “Asi munoti, ‘Taita maereketerenyi kurwisana newe?’ Mwati, ‘Akudetseri chiro kushandira Mwari. Tinouyirwa ngenyi ngokungwarira zviemeso zvake, nokuhamba techichema pamberi paMambo Mwari wehondo? Zvino tinoerenga kuti vanodzikudza vanomuchena; vanoita zvakashata vakagarisika, asi apo vanoedza Mwari vanopokonyoka.’ ” Zvino avo vakaremeredza Mambo Mwari vakaereketa umwe kunoumweni. Mambo Mwari wakapurutana, wakazwa, nebhuku romukarakadziso rakanyorwa pamberi pake raavo vakaremeredza Mambo Mwari nokupinimidza ngezina rake. “Navo vanozoita vangu,” unoronza Mambo Mwari wehondo, “Vangu vemene ngeiro zuva rendinozoita; neni ndinozovakungurira, kudai ngomunhu unokungurira mwana wake emene, uwo unomushandira. Zvino kamwezve munozoona muparadzaniso pakati pevakarurama nevakashata, pakati pouwo unoshandira Mwari nouwo usikamushandiri.” “Ringira, zuva rinouya, rechibaka kudai ngechoto, navo veshe vanodzikudza, veshe vaiti vezvakashata, vanozoita mazungu; zuva rinouya rinozovapisha,” unoronza Mambo Mwari wehondo, “Kuti arizovasiiri runzinde nokuti nhai. Asi kwomuri munoremeredza zina rangu, zuva rokururama rinozobuda rinokuponesa mumaphaphiro aro. Munozobuda, mwechitomuka kudai ngemakonyana anobuda muchibaya. Nemwi munozotsikatsika pashi vakashata, ngokuti vanozodai ngemarota pashi petsoka dzenyu, ngeiro zuva rendinozoita izvi,” unoronza Mambo Mwari wehondo. “Karakadzai kudzidzisa kwaMosi muranda wangu, zviemeso nezvitongero zvendakamupanga muHorebhi kunevaIsuraeri veshe. Ringirai, ndinozomutumira Erija muprofeti risati raguma zuva guru rinotyisa raMambo Mwari. Unozopetudza mwoyo yemadzibaba kunevana, nomwoyo yevana kunemadzibaba avo, kuti ndisazouya kuchaya nyika ngechituko.” Tsamba yokubarwa kwaJesu Kristu, mukororo waDhavhidha, mukororo waAbrahama. Abrahama wakabara Isaka, naIsaka wakabara Jakobe, naJakobe wakabara Judha nevanun'una vake; naJudha wakabara Farezi naZara ndiTamari, naFarezi wakabara Hezironi, naHezironi wakabara Aramu, naAramu wakabara Aminadhabhi, naAminadhabhi wakabara Nasoni, naNasoni wakabara Sarimoni naSarimoni wakabara Bhoazi ndiRahabhi, naBhoazi wakabara Obhedhi ndiRute, naObhedhi wakabara Jesi, naJesi wakabara Dhavhidha uwo waiya mambo. NaDhavhidha mambo wakabara Soromoni ngomukadzi uwo waiya waUria, naSoromoni wakabara Rehobhoamu, naRehobhoamu wakabara Abhia, naAbhia wakabara Asa, naAsa wakabara Jehoshafati, naJehoshafati wakabara Joramu, naJoramu wakabara Uzia, naUzia wakabara Jotamu, naJotamu wakabara Ahazi, naAhazi wakabara Hezekia, naHezekia wakabara Manase, naManase wakabara Amoni, naAmoni wakabara Josia, naJosia wakabara Jekonia nevanun'una vake, ngomukuwo wokutorwa kuenda Bhabhuroni. Ngesure kwokutorwa kuenda Bhabhuroni, Jekonia wakabara Saratieri, naSaratieri wakabara Zerubhabheri, naZerubhabheri wakabara Abhiudhi, naAbhiudhi wakabara Eriakimu, naEriakimu wakabara Azo, naAzo wakabara Zadhoki, naZadhoki wakabara Akimu, naAkimu wakabara Eriudhi, naEriudhi wakabara Eriazari, naEriazari wakabara Matani, naMatani wakabara Jakobe, naJakobe wakabara Josefa, mwamuna waMaria, uwo wakabara Jesu unozwi Kristu. Ndizvo mibarirwana yeshe kubva kunaAbrahama kuguma kuna Dhavhidha iri gumi namirongomuna, kubvira kunaDhavhidha kuguma pakutorwa kuenda Bhabhuroni mibarirwana iri gumi namirongomuna, nokubvira pakutorwa kuenda Bhabhuroni metsa kuguma kunaKristu mibarirwana gumi namirongomuna. Zvino kubarwa kwaJesu Kristu kwaiya kwakadai; apo Maria mai ake aiya aemeserwa Josefa, vasati vashongana, iye wakaoneka aanemimba yoMweya Wakachena. NaJosefa mwamuna wake, ngokuti waiya munhu wakarurama, asikadi kumutsverudzisa, waida kuti amurambe ngokufishika. Kwakati achakarakadza ndizvo, penya, ngirosi yaMambo yakaoneka kwaari ngokurota yechiti, “Josefa, iwewe Mukororo waDhavhidha, usatya kutora Maria mukadzi wako; ngokuti mimba iyo yaanayo ngeyoMweya Wakachena. Unozobara mukororo; newe unozodudza zina rake kuti Jesu ngokuti ndiye unozoponesa vanhu vake kubva kuzvishaishi zvavo.” Zveshe izvi zvakaitika kuti zvizadzisike izvo zvakaereketwa ndiMambo kubudikidza ngomuprofeti echiti, “Penya, mhandara inozoita mimba, ibereke mukororo, navo vanozodudza zina rake kuti Emanueri” ukwo ngokukumuchwa kunoti, “Mwari unesu.” NaJosefa amuka muhope wakaita kudai ngokuronza kwengirosi yaMambo, wakatora mukadzi wake. Naye aazi kushongana naye metsa wakabara mukororo; naye wakadudza zina rake kuti JESU. Kwakati apo Jesu abarwa muBhetherehema reJudhia ngemazuva aHerodhi mambo, penya, kwakauya vazii vaidzidza ngezvenyeredzi vechibva kumabvazuva vakaguma Jerusarema vechiti, “Uri pari uwo wakabarwa Mambo wavaJudha? Ngokuti takaona nyeredzi yake kumabvazuva, nesu tauya kuti timudire.” Kwakati Herodhi mambo azwa, wakatambudzika neveJerusarema veshe naye. Naapo aunganidza pamwepo vapristi vakuru veshe nevanyori vevanhu, wakavabvunza kuti, “Unozobarwa pari Kristu?” Navo vakati kwaari, “MuBhetherehema reJudhia; ngokuti kwakanyorwa ngomuprofeti kudai: ‘Iwewe Bhetherehema, nyika yaJudha, auri mudoko akadi mukati mwevatongi vaJudha; ngokuti kwouri kunozobuda mutungamiriri uwo ndiye unozoita muushi wevanhu vangu vaIsuraeri.’ ” Naapo Herodhi adaidza vazii vaidzidza ngezvenyeredzi ngokufishika, wakanasa kubvunzisisa kwavari mukuwo weyakaoneka nyeredzi. Naye wakavatuma Bhetherehema, akati, “Endai munase kutsvakisisa uwo mwana mudoko; kuti mwamuona mundiunzire izwi, kuti neniwo ndiende ndimudire.” Navo, apo vazwa mambo, vakaenda, penya, nyeredzi iyo yevakaona kumabvazuva yakavatungamirira metsa yakaguma pandau apo paiya nemwana mudoko. Naapo vaona nyeredzi vakadakara ngokudakara kukurutu. Vapotera mumhatso, vakaona mwana mudoko naMaria mai ake; navo vakawa pashi, vakamudira; kwakati vabeura pfuma yavo vakamupa zvipo, mukore, makha nemhura. Navo vechipangwa mukurota kuti vasachahwirira kunaHerodhi, vakaenda ngenjira imweni kunyika yavo. Naapo vaenda, penya, ngirosi yaMambo yakaoneka kunaJosefa mukurota yechiti, “Miruka, utore mwana mudoko namai ake, utizire Egipite, ugare apo metsa ndikuronzere, ngokuti Herodhi unozotsvaka mwana mudoko kumuuraya.” Naye wakamiruka, akatora mwana mudoko namai ake usiku, wakaenda Egipite, naye wakagareyo metsa kufa kwaHerodhi, kuti zvidzadzisike izvo zvakaereketwa ndiMambo kubudikidza ngomuprofeti echiti, “Ndakadaidza mukororo wangu kuti abude Egipite.” Naapo Herodhi aona kuti wakaitirwa jee ngevazii vaidzidza ngezvenyeredzi, wakatseneka kakurutu, wakatuma, akauraya vadoko veshe vevakomana vaiya vari muBhetherehema nenharaunda yaro yeshe, avo vaiya vaane makore mairi nevaiya pashi paawo, kudai ngomukuwo uwo waaiya akanasa kubvunzisisa vazii vaidzidza ngezvenyeredzi. Zvakazadzisika izvo zvakaereketwa kubudikidza ndiJeremia muprofeti echiti, “Izwi rakazwika muRama, kuchema nokutsumba kukurutu, Racheri echichemera vana vake, asikatendi kuembedzerwa, ngokuti vaiya vasisipo.” Asi apo Herodhi afa, penya, ngirosi yaMambo yakaoneka mukurota kunaJosefa ari muEgipite yechiti, “Miruka, utore mwana mudoko namai ake, uende munyika yeIsuraeri; ngokuti avo vaitsvaka kuuraya mwana mudoko vakafa.” Naye wakamiruka, akatora mwana mudoko namai ake, akauya munyika yeIsuraeri. Asi azwa kuti Akirausi waiya mambo weJudhia pandau yababa ake Herodhi, wakatya kuendayo; echinyowedzwa mukurota, wakapaukira kunyika yeGarire, wakauya akagara muguta rinozwi Nazaretha; kuti rizadzisike izwi rakaereketwa ngevaprofeti kuti, “Unozozwi muNazaretha.” Ngaawo mazuva wakauya Johani muBhabhatidzi echichumaira mushango mweJudhia echiti, “Tenderukai; ngokuti umambo hwomudenga hwaa pasinde.” Ngokuti uyu ndiye waakareketa ndiye Isaya muprofeti echiti, izwi rounodaidzira mushango: “Nasirirai njira yaMambo, ruramisai makwara ake.” Uyu Johani waisimira chipfeko chakanasirwa ngemamviri ekamera, nebhande redoo muchiunu chake; nokudya kwake kwaiya ndongwe neuchi womushango. Kwakauya kwaari veJerusarema neveshe veJudhia nevenharaunda yeshe yeJorodhani, navo vakabhabhatidzwa ndiye murwizi rweJorodhani, vechitenda zvishaishi zvavo. Asi echiona vazhinji vevaFarisi nevaSadhusi vechiuya kurubhabhatidzo rwake, wakati kwavari, “Imwimwi vana vemabuura, ndiani wakamunyowedza kuti mutize ushungu hunouya? Ndizvo mwechipangidzira michero inoonisa kutenderuka. Musapinimidza mwechiti mukati mwenyu, ‘Tina Abrahama baba edu.’ Ngokuti ndinoti kwomuri Mwari unesimba ngaaya mapuwe kumusira vana kunaAbrahama. Nazvinopano sanho raiswa panzinde dzemiti, ndizvo muti weshe usikabereki michero yakanaka unotemerwa pashi, ukandirwe mumwoto. Inini ngegwinyiso ndinomubhabhatidza mumvura, kuita chioniso chokutenderuka, asi iye unouya sure kwangu unesimba kupinda inini, anditosisiri nokutwara magwada ake; uyu ndiye unozomubhabhatidza ngoMweya Wakachena nemwoto. Uwo rutsero rwake ruri munyara yake, naye unozonasa kutsvaira mbuwa yake nokuunganidza koroni yake mudura, asi unozopisha makoto ngomwoto usikadzimi.” Naapo Jesu wakauya Jorodhani kunaJohani echibva Garire, koobhabhatidzwa ndiye. Asi Johani wakada kumurambira echiti, “Inini ndinosisira kuti ndibhabhatidzwe ndiwe, newe wouya kwendiri here?” Asi Jesu wakapingura akati kwaari, “Wechitenda zvino; ngokuti ngokudaro kunodikanwa kuti tizadzise kururama kweshe.” Naapo wakamutendera. Naapo Jesu abhabhatidzwa, paripo wakabva mumvura, penya, denga rakabeuka kwaari, naye wakaona Mweya waMwari wechidzaka kudai ngenjia, wechiuya padera pake. Penya, izwi rechibva mudenga rakati, “Uyu ndiye Mukororo wangu, unodikanwa, wendinonasa kudakara ndiye.” Naapo Jesu wakakweiwa ndiMweya kuenda mushango kuti aedzwe ndiDhiabhorosi. Wakati aera kudya mazuva makumi marongomuna masikati nousiku waiya nenzara. Muedzi wakauya kwaari akati, “Kuti iwewe uri Mukororo waMwari, chironzera aya mapuwe aite zvingwa.” Asi iye wakamupingura akati, “Kwakanyorwa kuti munhu aazorarami ngechingwa chega, asi ngemazwi eshe anobuda mumuromo waMwari.” Naapo Dhiabhorosi wakamutora kuenda naye kudhorobha rakachena, wakamuisa padera pechachungu cheTemperi, akati kwaari, “Kuti iwewe uri Mukororo waMwari, dzikandire pashi, ngokuti kwakanyorwa kuti, ‘Unozoronzera ngirosi dzake ngendaa yako, nadzo dzinozokubata ngenyara dzadzo, kuti kunyazwi ngouri mukuwo usazopumhunwa tsoka yako pabuwe.’ ” Jesu wakati kwaari, “Kwakanyorwazve kuti, ‘Usazoedza Mambo Mwari wako.’ ” Zve, Dhiabhorosi wakamutora kuenda pamutunhu wakanyanya kureba, wakamupangidzira umambo hweshe hwenyika noutende hwahwo. Naye wakati kwaari, “Izvi zveshe ndinozokupa, kudai wechizogwadama pashi nokundidira.” Naapo Jesu wakati kwaari, “Ibva Sathani, ngokuti kwakanyorwa kuti, ‘Unozodira Mambo Mwari wako nokumushandira iye ega.’ ” Naapo Dhiabhorosi wakamusiya, penya, ngirosi dzakauya kwaari, dzikamushandira. Naapo azwa kuti Johani wakasungwa, wakahwirirazve Garire. Echibva Nazaretha, wakauya akagara muKhapernaume, riri pasinde peruandhle, munharaunda dzeZebhuruni neNafitari, kuti rizadzisike izwi iro rakaereketwa ndiIsaya muprofeti echiti, “Nyika yeZebhuruni nenyika yeNafitari, panjira inoenda kuruandhle, ruseri rweJorodhani, Garire revanhu vemadzinza. Vanhu avo vaiya vakagara muchidima vakaona kujeka kukurutu; naavo vaiya vakagara munyika nomubvute rokufa, kujeka kwakavabudira.” Kubvira ngouwo mukuwo Jesu wakatanga kuchumaira echiti, “Tenderukai; ngokuti umambo hwomudenga hwaa pasinde.” Echihamba pasinde peruandhle rweGarire, wakaona vakoma vairi, Simoni unozwi Petro, naAndreu munun'una wake, vechikandira nhaa yavo muruandhle; ngokuti vasiya vabati vehove. Wakati kwavari, “Teerai sure kwangu, neni ndinozomuita vabati vevanhu.” Paripo vakasia nhaa dzavo vakamuteera. Echibva apo wakaona vakoma vamweni vairi, Jakobe mukororo waZebhedhi nomunun'una wake Johani, vari mungarava pamwepo nababa avo Zebhedhi vechinasira nhaa dzavo; naye wakavadaidza. Paripo vakasiya ngarava nababa avo, vakamuteera. NaJesu wakahamba-hamba muGarire mweshe, echidzidzisa mumhatso dzavo dzokudira nokuchumaira vhangeri roumambo, nokurapa mbeu dzeshe dzokurwara nembeu dzeshe dzenhenda mukati mwevanhu. Nembiri yake yakateketeswa munyika yeshe yeSiria, navo vakaunza kwaari veshe vairwara avo vaiya nenhenda dzakaparadzana, nevaiya nezvinorwadza, naavo vaiya vane madhimoni, navo vaiya nenhutu, naavo vaiya vakaoma muiri, naye wakavaponesa. Yakamuteera mbungano huru yevanhu vechibva Garire, Dhekaporisi, Jerusarema, Judhia noruseri rweJorodhani. Naye echiona mbungano zhinji, wakakwira mutunhu, naapo agara pashi, vadzidzi vake vakauya kwaari; wakashama muromo wake, wakavadzidzisa echiti. “Vanomuchena varombo vomweya, ngokuti ngehwavo umambo hwomudenga. Vanomuchena vanotsumba, ngokuti vanozoembedzerwa. Vanomuchena vakapfaa, ngokuti vanozogara nhaka yomunyika. Vanomuchena avo vane nzara nenyota ngokuda kururama, ngokuti vanozogutiswa. Vanomuchena avo vanenyasha, ngokuti vanozoitirwa nyasha. Vanomuchena avo vanemwoyo wakachena, ngokuti vanozoona Mwari. Vanomuchena vaiyanisi, ngokuti vanozozwi vana Mwari. Vanomuchena avo vanotambudzwa ngendaa yokururama, ngokuti umambo hwomudenga ngehwavo. “Munomuchena apo mwootukwa, mwootambudzwa, mwooreiwa mazwi eshe akashata okunyepa ngepamusoro pangu. Dakarai, mwechidakara kakurutu; ngokuti musharo wenyu mukuru mudenga; ngokuti ngokudaro vakatambudza vaprofeti avo vaiya pamberi penyu. “Imwimwi muri munyu wenyika, asi kuti munyu warasha kunaka kwawo, ungachazorungwa ngenyi? Sure kweizvi auchanakiri chiro, kwega kurashwa kubanze nokutsikwa-tsikwa ngevanhu. Imwimwi muri kujeka kwenyika. Guta rakaakwa padera pomutunhu aringafishiki. Nechibani avabasiri vechichiisa pashi pechitundu, asi pachigadzikiro pacho, nacho chinojekisa veshe vari mumhatso. Ngokudaro ngakujeke kujeka kwenyu pamberi pevanhu, kuti vaone mishando yenyu yakanaka, vairikidze Baba enyu ari mudenga. “Musapinimidza kuti ndakauya kuparadza Mipango nokuti zvidzidziso zvevaprofeti. Andizi kuuya kuparadza, asi kuzvizadzisa. Ngegwinyiso ndinoti kwomuri, metsa denga nenyika zvipinde, apana chiro chidoko nokuti chidonhwe chimwe achitongozopindi kubva muMipango metsa zveshe zvaitika. Ndizvo kunyazwi ndiani unozogura chimwe chidoko cheiyi mipango, echidzidzisa vanhu kuita kudaro, iye unozoita mudoko wokugumisira muumambo hwomudenga. Asi iye unozozviita nokuzvidzidzisa, iye unozozwi mukuru muumambo hwomudenga. Ngokuti ndinoti kwomuri, kudai kururama kwenyu kusikapindi kururama kwevanyori nekwevaFarisi, amutongozopindi muumambo hwomudenga. “Mwakazwa kuti kwakaronzwa kwavari vekaretu kuti, ‘Usazouraya.’ Neuwo unozouraya unozoa nendaa yokutongwa. Asi inini ndinoti kwomuri munhu weshe uwo unomutsenekera munun'una wake unozoa nendaa yokutongwa, nouwo unozotuka munun'una wake kuti, ‘Munhu usinashwiro’, unozoa nendaa yokutongwa ngemakota, nouwo unozoti, ‘Iwewe benzi’, unozoa nendaa yokurashwa muGehena remwoto. Ndizvo kudai woohina chipo chako paarita, naapo ukakarakadza kuti munun'una wako unekhururu newe, siyapo chipo chako pamberi pearita, uende; utange kuiyana nomunun'una wako, naapo unozouya kuhina chipo chako. Tenderana negaa rako ngokukasira, uchiri munjira naro, kuti kunyazwi ngouri mukuwo gaa rako risazokuhina kumutongi, nomutongi akuhine kunejoni, newe uiswe mutirongo. Ngegwinyiso ndinoti kwouri, ‘Autongozobudimwo metsa waripa nekamare kokupedzisira.’ “Mwakazwa kuti kwakaronzwa kuti, ‘Usazoomba.’ Asi inini ndinoti kwomuri, kunyazwi ndiani unomuringira mukadzi ngokuemura, watoomba naye mumwoyo mwake. Asi kudai dziso rako rokumudyo rechikupumhunisa, ribvite, urirashe kubva kwouri; ngokuti kwakapinda kunaka kwouri kuti chimwe chenhengo dzemuiri wako chife, kunekuti muiri wako weshe ukandirwe muGehena. Kuti nyara yako yokumudyo yechikupumhunisa, iteme, uirashe kubva kwouri; ngokuti kwakapinda kunaka kwouri kuti chimwe chenhengo dzemuiri wako chife, kunekuti muiri wako weshe urashwe muGehena. “Kwakaronzwa kuti, ‘Uwo unoramba mukadzi wake, ngaamupe tsamba yokuparadzana.’ Asi inini ndinoti kwomuri, iye unoramba mukadzi wake asina ndaa yokuomba, unomuitisa muombi, nouwo unomuroora uwo wakarambwa unoomba. “Zve, mwakazwa kuti kwakaronzwa kwavari vekaretu kuti, ‘Usazopika wechinyepa, asi unozoita kunaMambo mhiko dzako.’ Asi inini ndinoti kwomuri, musazopika nakamwe, kunyazwi ngomudenga, ngokuti riri dendemaro raMwari; kunyazwi ngenyika, ngokuti iri chitambarariro chetsoka dzake; kunyazwi ngeJerusarema, ngokuti riri dhorobha raMambo mukuru; kunyazwi ngesoro rako, ngokuti aungakoni kuita kuti rubvudzi rumwe ruchene nokuti rusvipe. Asi kuereketa kwenyu ngakuite, ‘Eya, eya,’ nokuti, ‘Haiwa, haiwa;’ ngokuti zveshe izvo zvinopinda izvi zvinobva kuneuwo wakashata. “Mwakazwa kuti kwakaronzwa kuti, ‘Dziso ngendaa yedziso, nezino ngendaa yezino.’ Asi inini ndinoti kwomuri, usarwisana nouwo wakashata. Asi iye unozokurova padama rako rokumudyo, wechipindurira kwaari rimwenizve. Kuti aripo unozokumangarira nokutora hembe yako, ipa kwaarizve nejazi rako. Nouwo unozokuangiridza kuenda naye khiromitha rimwe, enda naye makhiromitha mairi. Ipa kwaari uwo unokumbira kwouri, nouwo unoda kukwereta kwouri, usamurambira. “Mwakazwa kuti kwakaronzwa kuti, ‘Unozomuda muakirwana wako, unyenye gaa rako.’ Asi inini ndinoti kwomuri, idai magaa enyu, muvakumbirire avo vanomutambudza, kuti muite vana vaBaba enyu ari mudenga; ngokuti iye unoita kuti zuva rake ribude padera pevakashata nevakanaka, nokunaisa mvura padera pevakarurama nevasikazi kururama. Ngokuti kudai mwechida avo vanomuda imwimwi, munozoashira musharo wenyi? Andizvopi here zvevanoita vabharisi? Kudai mwechichingamidza hama dzenyu dzega, munopinda vamweni ngokuitawani? Avadaropi nevemadzinza here? Ndizvo imwimwi itai vakaperera, kudai ndiBaba enyu ari mudenga vakaperera. Chumairo Inoendemberi. “Wonai kuti musaita kururama kwenyu pamberi pevanhu, kuti vamuone; kuti mwechizodaro, amuzooni musharo kunaBaba enyu ari mudenga. “Ndizvo apo woopa zvipo zvako kuvarombo, usaridza gwama pamberi pako, kudai ngezvevanoita vadziitisi mumhatso dzokudira nomumapato, kuti vairikidzwe ngevanhu. Ngegwinyiso ndinoti kwomuri, vatoashira musharo wavo. Asi apo iwewe woopa zvipo zvako kuvarombo, usatendera kuti nyara yako yokumuoshwe izie chinoitwa ngenyara yako yokumudyo, kuti zvipo zvako zvipuwe ngokufishika; naBaba ako vanoona mukufishika vanozokupawo. “Naapo mwookumbira, musazodai ngevadziitisi; ngokuti vanoda kukumbira vechiema mumhatso dzokudira nepamhararano mumapato, kuti vaoneke ngevanhu. Ngegwinyiso ndinoti kwomuri, vatoashira musharo wavo. Asi iwewe, apo wookumbira, potera mukamera rako repakati, naapo konya musiwo, kumbira kunaBaba ako vari mukufishika, naBaba ako vanoona mukufishika vanozokupawo. Asi mukukumbira kwenyu musazotera kuhwirinzira mazwi asina shwiro, kudai ngezvevanoita vemadzinza; ngokuti ivo vanokarakadza kuti vanozozwika ngokuwanda kwemazwi avo. Ndizvo musazodai ndivo, ngokuti Baba enyu unozia izvo zvomunotama musati mwakumbira kwaari. Ndizvo kumbirai ngeiyi njira: “Baba edu ari mudenga, ngariremeredzwe zina renyu. Umambo hwenyu ngahuuye. Kuda kwenyu ngakuitwe munyika kudai ngomudenga. Tipei ngeiri zuva kudya kwedu kunotamika nyamashi. Tirekererei ndaa dzedu kudai tisu takarekerera avo vane ndaa kwetiri. Musatipinza mukuedzwa, asi tinunurei kubva kuneuwo wakashata. “Ngokuti kudai imwimwi mwechirekerera vanhu zvipaukwa zvavo, Baba enyu ari mudenga vanozomurekererawo nemwi. Asi kudai musikarekereri vanhu zvipauka zvavo, naBaba enyu avazomurekereriwo imwimwi zvipaukwa zvenyu. “Zve mwoera kudya, musasununika hope dzenyu kudai ngevadziitisi; ngokuti vanodzishaisha hope dzavo kuti vari vaoneke ngevanhu kuti kuera kudya. Ngegwinyiso ndinoti kwomuri, vatoashira musharo wavo. Asi iwewe, apo woera kudya, dzodza soro rako, ushambe muhope mwako, kuti usazooneka ngevanhu kuti uri kuera kudya, asi ndiBaba ako vari pakafishika; naBaba ako avo vanoona mukufishika, vanozokupawo. “Musadziunganidzira upfumi munyika, apo unundu nengura zvinozvishaishira, naapo mbavha dzinopwanya dzibe. Asi dziunganidzirei upfumi mudenga, apo unundu nokuti ngura zvisikazvishaishiri, naapo mbavha pedzisikapwanyi dzibe. Ngokuti apo pane upfumi hwako, ndipozve panozoa nemwoyo wako. “Chibani chomuiri idziso, ndizvo kudai dziso rako riri dziso kwaro, muiri wako weshe unozozara ngokujeka. Asi kuti dziso rako rakashata, muiri wako weshe unozozara ngechidima. Ndizvo kudai kujeka kuri mukati mwako kuri chidima, kukuranyi kwechidima icho! “Akuna munhu ungakona kushandira madzimambo mairi; ngokuti unozonyenyeredza umwe, ade umweni, nokuti unozoshoora umwe abatirire kunoumweni. Amungashandiri Mwari nemare. “Ngendaa yeichi ndinoti kwomuri, musadembatemba mundaramo yenyu, kuti munozodyenyi nokuti munozomwenyi nokuti ngendaa yomuiri wenyu, kuti munozopfekenyi. Kurarama akupindi kudya here, nomuiri aupindi zvokupfeka here? Ringirai shiri dzomudenga kuti adzikushi, adzivhunizve, nokuti kuunganidza mumatura; asi Baba enyu ari mudenga unodzipa zvokudya. Imwimwi amuna mutengo mukuru kupinda idzo here? Ndiani kwomuri ngokudembatemba ungakona kututsira zuva rimwe rokupona kwake. Nemwi munodembatemba ngenyi ngezvokufuka? Pinimidzai ngeminyimbiri yomushango kumera kwayo; aishandi, airukizve, asi inini ndinoti kwomuri, naSoromoni muuthende hwake hweshe aazikupfekeswa kudai ngoumwe wayo. Asi kudai Mwari echipfekesa kudaro mwenje womushango, uwo uripo nyamashi, mangwani unokandirwa muchoto, aazopindi here kakurutu kumupfekesa, imwimwi muno kutenda kudoodoko? Ndizvo musadembatemba mwechiti, ‘Tinozodyenyi?’ nokuti, ‘Tinozomwenyi?’ nokuti, ‘Tinozosimirenyi?’ Ngokuti vemadzinza vanotsvaka izvi zveshe; ngokuti Baba enyu vari mudenga vanozia kuti munozvitama izvi zveshe. Asi tsvakai kutanga umambo hwake nokururama kwake, neizvi zveshe zvinozotutsirwa kwomuri. Ndizvo musazodembera mangwani, ngokuti mangwani unozodzidembera. Kutambudzika kwezuva kunokwana zuvaro. “Musatonga, kuti musazotongwawo. Ngokuti ngokutonga kwomunotonga ndikwo, munozotongwawo; neicho chipimo chomunopima ndicho, ndicho chomunozopimirwawo ndicho. Unopenyerenyi chitsepedzo chiri mudziso romukoma wako, asi auoni danda riri mudziso mwako? Nokuti ungaita maereketerenyi kunemukoma wako kuti, ‘Rekera, ndiduse chitsepedzo chiri mudziso rako,’ naapo ringira, danda riri mudziso rako. Iwewe mudziitisi, tanga kudusa danda riri mudziso rako, naapo unozonasa kukona kudusa chitsepedzo chiri mudziso romukoma wako. “Musapa izvo zvakachena kunembwa, zve, musakandira mapherere enyu pamberi penguruve, kuti dzisazoatsika-tsika pashi petsoka dzadzo, dzikunukuke dzimurume. “Kumbirai, munozopuwa; tsvakai, munozoona; kuhudzai, munozobeurirwa. Ngokuti weshe unokumbira, unoashira; naye unotsvaka, unoona; nokwaari unokuhudza, unozobeurirwa. Ngokuti ndiani munhu kwomuri, unoti mukororo wake echimukumbira chingwa, amupe buwe? Nokuti echikumbira hove, amupe nyoka? Ndizvo kudai imwimwi mutori vakashata mwechizia kupa zvipo zvakanaka kuvana venyu, kunozopinda kwakaitawani Baba enyu vari mudenga kuvapa zvakanaka avo vanokumbira kwaari? “Ndizvo izvo zveshe zvomunoda kuti vanhu vaite kwomuri, itaiwo kudaro kwavari, ngokuti ichi chiri kuzadzisika kweMipango nezvidzidziso zvevaprofeti. “Pindai ngepamusiwo wakamanikana; ngokuti musiwo wakapamhama nenjira yakapamhama inoenda mukuparadzwa, navo vanopinda ndiyo vazhinji. Ngokuti musiwo wakamanikana nenjira yakatsonga, iyo inoenda mukurarama, navo vanoiona vashomani. “Ngwarirai vaprofeti vokunyepa, avo vanouya kwomuri vakapfeka makushe emakwai, asi ngomukati vari mathika anokara. Muchavazia ngemichero yavo. Vanhu vangakaya here michero yomuvhini paminzwa nokuti maonde parukato? Ngokudaro miti yeshe yakanaka inobereka michero yakanaka; asi muti wakashata unobereka michero yakashata. Muti wakanaka aungakoni kubereka michero yakashata, nomuti wakashata aungakoni kubereka michero yakanaka. Muti weshe usikabereki michero yakanaka unotemerwa pashi ukandirwe mumwoto. Ndizvo munozovazia ngemichero yavo. “Andivopi veshe vanoti kwendiri, ‘Mambo, Mambo’, vanozopinda muumambo hwomudenga, asi iye unoita kuda kwaBaba angu vari mudenga. Vazhinji vanozoti kwendiri ngeiro zuva, ‘Mambo, Mambo, atizi kuprofeta here ngezina rako, ngezina rako atizi kurasha madhimoni here, ngezina rako atizi kuita mishando yakawanda ine simba here?’ Naapo ndinozovaronzera kuti, ‘Andizi kumuzia akadi. Ibvai kwendiri, imwimwi munoshanda zvakashata.’ “Ndizvo kunyazwi ndiani unozwa mazwi angu aya nokuaita, unoedzaniswa nomunhu wakangwara, uwo wakaaka mhatso yake padera poruware. Nemvura yakanaya nendambi yakauya nomubvumo wakavhuvhuta, wakarova padera peiyo mhatso, nayo aizi kuwa, ngokuti yaiya yakaakwa paruware. Kunyazwi ndiani uwo unozwa mazwi angu aya, asikaaiti, unoedzaniswa nomunhu uri benzi, wakaaka mhatso yake pajecha. Nemvura yakanaya nendambi yakauya nomubvumo wakavhuvhuta, wakarova padera peiyo mhatso, nayo yakawa, nokuwa kwayo kwayia kukurutu.” Kwakaitika apo Jesu apedza mazwi aya, mbungano yakashamiswa ngokudzidzisa kwake. Ngokuti wakavadzidzisa kudai ngounesimba, asikaiti kudai ngevanyori vavo. Naapo Jesu adzaka kubva pamutunhu, mbungano huru yakamuteera. Penya munhu waiya nemapere wakauya kwaari, akamugwadamira echiti, “Mambo, dai wechida ungandimhodyosa.” Naye wakatambanudza nyara yake, akamugwama akati, “Ndinoda, chimhodyoka.” Paripo mapere ake akamhodyoswa. NaJesu wakati kwaari, “Ngwara kuti usazoronzera munhu; asi enda, udzipangidzire kumupristi, nokupa chipo icho chaakaronza Mosi kuti chiite chapupu kwavari.” Naapo apotera muKhapernaume, kwakauya kwaari nduna yezana yechimukumbira, yechiti, “Mambo, muranda wangu wakaata mumhatso echirwara ngokuoma muiri, echirwadziwa kakurutu.” Wakati kweiri, “Inini ndinozouya, ndimuponese.” Asi nduna yezana yakapingura, ikati, “Haiwa, Mambo, hazvisisiri kuti iwewe upotere pashi pedenga rangu, asi ronza ngeizwi rega nomuranda wangu unozoponeswa. Ngokuti ininiwo ndiri munhu unotongwa, ndine majoni ari pashi pangu; neni ndinoti kuneuyu, ‘Enda,’ naye unoenda; nokuneumweni, ‘Uya,’ naye unouya; nokumuranda wangu, ‘Ita ichi,’ naye unochiita.” Naapo Jesu azwa ichi, wakashama, akati kwavari vaimuteera, “Ngegwinyiso andizi kumboona kutenda kukurutu kwakadai, haiwa kunyazwi kuvaIsuraeri. Neni ndinoti kwomuri kuti vazhinji vanozouya kubva kumabvazuva nokumabirirazuva, vanozogara pashi padhiri naAbrahama naIsaka naJakobe muumambo hwomudenga. Asi vana voumambo vanozokandirwa muchidima chiri kubanze; kunozoiteyo kuboorera nokukwetsana kwemazino.” NaJesu wakati kunduna yezana, “Enda, ngakuitwe kwouri kudai ngokutenda kwako.” Nomuranda wakaponeswa ngeiro awa. Naapo Jesu apotera mumhatso yaPetro, wakaona vambuya vake vakaata vechirwara ngomutsarara. Naye wakabata nyara yake, nomutsarara wakavasiya; navo vakamiruka, vakamushandira. Kwaita madeekoni, vakaunza kwaari vazhinji vaiya nemadhimoni, naye wakaabudisa akaadzinga ngeizwi rake, wakaponesa veshe vairwara, kuti kuzadzisike ukwo kwakaereketwa ndiIsaya muprofeti echiti, “Iye emene wakatora nhenda dzedu, akatwara kurwara kwedu.” Zvinopano Jesu echiona mbungano huru yechimutendenedza, wakapanga kuti vaambuke ruseri. Kwakauya kwaari munyori, akati kwaari, “Mudzidzisi, ndinozokuteera apo pounoenda.” NaJesu wakati kwaari, “Hava dzine mirindi neshiri dzemudenga dzine zvisaki; asi Mukororo woMunhu aana nepokutsamira soro rake.” Umwe wevadzidzi wakati kwaari, “Mambo, kutanga nditendere kuti ndiende nditsire baba angu.” Asi Jesu wakati kwaari, “Nditeere, urekere vakafa kuti vatsire vakafa vavo.” Naapo apotera mungarava, vadzidzi vake vakamuteera. Penya, kwakabuda mubvumo mukurutu muruandhle, ngokudaro ngarava yakadumaidzwa ngemafungo; asi iye waiya akaata. Vakauya kwaari, vakamumusa vechiti, “Mambo, tiponese; tofa.” Naye wakati kwavari, “Munombotya ngenyi, imwimwi munokutenda kudoodoko?” Naapo wakamiruka, akakaraidza mubvumo noruandhle; kwakaapo kuterama kukurutu. Nevanhu vakashama vechiti, “Uyu munhu uri wakaitawani, kuti mubvumo noruandhle zvinomupurutana?” Naapo aguma ruseri munyika yavaGadhareni, kwakashongana naye vanhu vairi vaiya nemadhimoni vechibva mumaiba, vane ushungu hunotyisa, ngokudaro kwaiya kusina nomunhu waichahamba ngeiyo njira. Ringirai, vakadaidzira vakati, “Tinenyi newe, iwewe Mukororo waMwari? Wauya panapa kutishwinyisa usati waguma mukuwo here?” Zvino kwaiyapo danga renguruve zhinji dzechifura kanharauko kubva kwaari. Nemadhimoni akamukumbira akati, “Kudai wechitibudisa, titumei tipotere mudanga renguruve.” Naye wakati kwaari, “Endai.” Nawo abuda, akapotera munguruve. Penya, danga reshe rakadzaka ngepamakaha muruandhle, rakafa mumvura. Avo vaiusha vakatiza, vakaenda mudhorobha, vakaronza zveshe izvo zvaiya zvaitwa kuneavo vaiya nemadhimoni. Penya, vedhorobha reshe vakabuda kooshongana naJesu. Kwakati vechimuona, vakamunyengerera kuti abve mumigano yavo. Echipotera mungarava, wakaambuka ruseri, akaguma kuguta rekwake. Penya, vakaunza kwaari munhu wairwara ngenhenda yokuoma muiri, akaata pamanhi. NaJesu aona kutenda kwavo, wakati kuneuwo waiya nenhenda yokuoma muiri, “Mukororo, shinga; zvishaishi zvako zvarekererwa.” Penya, vamweni vevanyori vakati pakati pavo, “Munhu uyu unotuka.” NaJesu echizia kupinimidza kwavo wakati, “Munopinimidzirenyi zvakashata mumwoyo yenyu? Ngokuti ngechiri chinopinda kureruka, kuronza kuti, ‘Zvishaishi zvako zvarekererwa,’ nokuti kuronza kuti, ‘Miruka uhambe?’ Asi kuti muzie kuti Mukororo woMunhu unesimba munyika rokurekerera zvishaishi,” (naapo wakati kuneuwo waiya nenhenda yokuoma muiri,) “Miruka, tora manhi ako uende kumhatso yako.” Naye wakamiruka, akaenda kumhatso yake. Naapo mbungano yazviona, yakatya, yakakudza Mwari, uwo waiya akahina simba rakadai kuvanhu. NaJesu echipinda mberi, wakaona munhu unozwi Mateu, echigara pandau yokubharisa chibharo; naye wakati kwaari, “Nditeere.” Naye wakamiruka, akamuteera. Kwakaitika achatseama panokudya mumhatso, ringirai, vabharisi nevashaishi vazhinji vakauya vakagara pashi naJesu navadzidzi vake. VaFarisi vechiona, vakati kunevadzidzi vake, “Ngenyi Mudzidzisi wenyu echidya nevabharisi nevashaishi?” Asi iye echizwa wakati, “Avo vakamhodyoka avatami n'anga, asi avo vanorwara. Asi endai mwoodzidza kuti zvinoronzenyi izvi, ‘Ndinoda nyasha, haiwa kuhinwa mubairo.’ Ngokuti andizi kuuya kudaidza vakarurama, asi vashaishi.” Naapo vakaguma kwaari vadzidzi vaJohani vechiti, “Isusu nevaFarisi tinogara techiera kudya ngenyi, asi vadzidzi vako avaeri kudya?” NaJesu wakati kwavari, “Vemhatso yanyamuroorwa vangatsumba here apo mukwambo achinavo? Asi mazuva anozouya apo mukwambo unozoduswa kwavari, naapo vanozoera kudya. Apana munhu unoisa chitembwe chitsva pajira rakatsakara, ngokuti icho chinoiswa kuinamira, chinobaurisa kubva kweiri, neburi rinozopinda kukura. Zve, avaisi vhini idzva mumbudu dzakatsakara; ngokuti mbudu dzinozoputiswa nevhini rinozodururika nembudu dzinozoparadzwa. Asi vanoisa vhini idzva mumbudu itsva, nazvo zveshe zvinozongwaririka.” Achaereketa izvi kwavari, penya, wakauya mutongi wakatikuti, wakamugwadamira, akati kwaari, “Mwana wangu womusikana watofa, asi chiuya uise nyara yako padera pake, naye unozorarama.” NaJesu wakamiruka, akaenda naye, nevadzidzi vake. Penya, mukadzi waiya nenhenda yokubuda ngazi makore gumi namairi, wakauya ngesure kwake, akabata mupendero wegauni rake. Ngokuti iye wakati mukati mwake, “Kudai ndingabata kwega gauni rake, ndinozoponeswa.” Asi Jesu echikunukuka, amuona, wakati, “Mukunda, shinga. Kutenda kwako kwakuponesa.” Nedzimai iro rakaponeswa kubvira ngeawa iro. Naapo Jesu aguma mumhatso yomutongi, wakaona varidzi veminanzi nembungano yechiita hohoho. Wakati, “Taraukai, ngokuti mwanasikana uyu aazi kufa akadi, asi wakaata.” Navo vakamusheka. Naapo abudisa mbungano kubanze, wakapotera mukati, wakamubata ngenyara nemwanasikana wakamiruka. Nembiri yacho yakateketeswa munyikamwo mweshe. Naapo Jesu achapinda kuenda mberi kubva apo, mapofu mairi akamuteera, echidaidzira echiti, “Iwewe Mukororo waDhavhidha, tiitire nyasha.” Apotera mumhatso, mapofu akauya kwaari, naJesu wakati kwaari, “Munotenda here kuti ndine simba rokuita ichi?” Akati, “Eya, Mambo.” Naapo wakagwama madziso awo, akati, “Ngakuitwe kwomuri kudai ngokutenda kwenyu.” Nemadziso awo akapembenudzwa; naJesu wakaapanga echiti, “Ngwarai kuti zvisazoziikanwa ngomunhu.” Asi vabvapo, vakateketesa mbiri yake munyikamwo mweshe. Vachabuda kubvapo, penya, kwakaunzwa kwaari chimbungumbungu chaiya nedhimoni. Naapo dhimoni rakarashwa kubva kwechiri, chimbungumbungu chakaereketa; nembungano yakashamiswa yechiti, “Akuzi kutongombooneka zvakadai muIsuraeri.” Asi vaFarisi vaiti, “Iye unorasha madhimoni ndimambo wemadhimoni.” NaJesu wakahambahamba mumadhorobha eshe nomumaguta eshe, echidzidzisa mumhatso dzavo dzokudira, echichumaira vhangeri roumambo, echirapa mbeu dzeshe dzenhenda nokurwara kweshe. Asi aona mbungano, wakavazwira urombo ngokuti vaidezwaira nokupepesheka kudai ngemakwai asina muushi. Naapo wakati kuvadzidzi vake, “Ngegwinyiso kukukura kwakawanda asi vashandi vashomani. Ndizvo kumbirai kunaMambo wokukukura kuti atumire vashandi mukukukura kwake.” Naapo adaidza kwaari vadzidzi vake gumi navairi, wakavapa simba padera pemweya ine tsvina kuti vaidzinge nokurapa nhenda dzeshe nokurwara kweshe. Aya ndiwo mazina evapostori gumi navairi: uwo wokutanga ndiSimoni waizwi Petro, naAndreu munun'una wake; naJakobe mukororo waZebhedhi, naJohani munun'una wake, Firipi, Bhathoromeu; Thomasi naMateu mubharisi; Jakobe mukororo waArifeusi, naThadheusi; Simoni muKhenani naJudhasi Isikarioti uwo wakamupira. Ava gumi navairi Jesu wakavatuma, akavapanga echiti, “Musaenda munjira yevemadzinza, musapotera muguta kunyazwi ngeriri revaSamaria. Asi endai kumakwai akarashika emhatso yaIsuraeri. Muchaenda mwechichumaira, mwechiti, ‘Umambo hwomudenga hwakwedzera.’ Mwechirapa vanorwara, mwechimusa vakafa, mwechimhodyosa vanemapere, mwechidzinga madhimoni; mwakaashira ngenyasha, mwechipawo ngenyasha. Musatora mukore nokuti sirivha nokuti thusi muzvikwama zvenyu; zve, nokuti munzaa werwendo rwenyu, musina mabhachi mairi nokuti magwada nokuti ndonga; ngokuti mushandi unosisira kupuwa kudya kwake. Kunyazwi ngomuri mudhorobha nokuti muguta mwemunozopinda, bvunzai kuti ndiani uri mukati mwaro unosisira; apo ndipo pomunozogara metsa mubvemwo. Mwoopotera mumhatso muichingamidze. Nokudai mhatso iyo yechisisira, kunyarara kwenyu ngakuuye padera payo; asi kuti isikasisiri ngakuhwirire kwomuri. Kunyazwi ndiani usikazomuashiri nokuti kupurutana mazwi enyu, mwechibudamwo mumhatso iyo nokuti dhorobha iro, guwai bukuta kubva patsoka dzenyu. Ngegwinyiso ndinoti kwomuri, kunozopinda kureruka kunenyika yeSodhoma neyeGomora ngezuva rokutongwa kuneiro dhorobha. “Ringirai, ndinomutuma kudai ngemakwai mukati mwemathika. Ndizvo mwechingwara kudai ngenyoka, mwakapfaa kudai ngenjia. Asi ngwarai vanhu, ngokuti vanozomuhina kubangano revatongi, navo vanozomurova mumhatso dzavo dzokudira. Nemwi munozounzwa pamberi pemakota nepemadzimambo ngepamusoro pangu, kuita chapupu kwavari nokumadzinza. Asi apo voomuhina, musazodembatemba kuti munozoereketenyi nokuti munozoronza chiinyi; ngokuti kunozohinwa kwomuri ngeawaro chomunozoereketa. Ngokuti andimwipi munoereketa, asi Mweya waBaba enyu unoereketa uri mukati mwenyu. Nomukoma unozohina munun'una kuti afe, ngokudaro baba mwana wavo, nevana vanozomukira vabari nokuvauraya. Nemwi munozonyenywa ndivo veshe ngendaa yezina rangu. Asi uwo unoshingirira metsa kumagumo, ndiye unozoponeswa. Naapo vanozomutambudza muguta rimwe, mwechitizira kune rimweni; ngokuti ngegwinyiso ndinoti kwomuri, amuzopedzi kuhamba madhorobha eshe aIsuraeri, asati auya Mukororo woMunhu. “Mudzidzi aari padera pomudzidzisi wake akadi, nomuranda aari padera pamambo wake. Kwakanaka kuti mudzidzi adai ngomudzidzisi wake, nomuranda kuti adai ndimambo wake. Kudai vakadudza munewemhatso kuti Bheerizebhuri, vanozopinda kwakaitawani kuvadudza kudaro avo vari vemhatso yake! “Ndizvo musavatya; ngokuti apana chiro chakafishika chisikazooneki; nokuti chakafishiridzwa chisikazoziikanwi. Icho chendinomuronzera muchidima, mwechichiteketesa mukujeka, neicho chomunozwa ngevherevhere, mwechichichumaira muri padera pechachungu chemhatso. Musatya avo vanouraya muiri, asi vasina simba rokuuraya mweya. Asi mutye uwo unesimba rokuparadza zveshe mweya nomuiri muGehena. Zviwanzaburi zviiri azvitengiswi ngesendi here? Nechimwe chazvo achizowi pashi pamavhu kusatenderwa ndiBaba enyu. Asi nebvudzi resoro renyu rakaerengwa reshe. Ndizvo musatya, muri vanopinda kudikanwa kunezviwanzaburi zvakawanda. “Ndizvo weshe uwo unozonditenda pamberi pevanhu, neniwo ndinozomutenda pamberi paBaba angu vari mudenga. Kunyazwi ndiani unozondiramba pamberi pevanhu, neniwo ndinozomuramba pamberi paBaba angu vari mudenga. “Musapinimidza kuti ndakauya kuunza kunyarara padera penyika. Andizi kuuya kuunza kunyarara, asi shoti. Ngokuti ndakauya kuparadzanisa munhu nababa ake, nemwanasikana namai ake, nomunyamwana namazvarira ake. Nemagaa omunhu anozoita avo vari vemhatso yake. Iye unopinda kuda baba kunyazwi mai kuneinini, aazi kundisisira. Naye unopinda kuda mukororo kunyazwi mwanasikana kuneinini, aazi kundisisira. Neuwo usikatori muchinjiko wake, ateere sure kwangu, aazi kundisisira. Iye unoona kurarama kwake unozokurasha, nouwo unozorasha kurarama kwake ngepamusoro pangu unozokuona. “Iye unomuashira imwimwi unondiashira inini, nouwo unondiashira, unoashirawo uwo wakandituma. Iye unoashira muprofeti ngezina romuprofeti, unozoashira musharo womuprofeti; nouwo unoashira munhu wakarurama ngezina romunhu wakarurama, unozoashira musharo womunhu wakarurama. Nouwo unozopa umwe wevadoko ava tsani yemvura inotonhora yega ngezina romudzidzi, ngegwinyiso ndinoti kwomuri, aatongozorashikirwi ngomusharo wake.” Kwakaitika apo Jesu apedza kupanga vadzidzi vake gumi navairi, wakamiruka kubvapo, akaenda koodzidzisa nokuchumaira mumadhorobha avo. Zvinopano apo Johani azwa ari mutirongo mishando yaKristu, wakatumira izwi ngevadzidzi vake. Navo vakati kwaari, “Ndiwe here uwo unouya, nokuti tichagarira umweni?” NaJesu wakapingura, akati kwavari, “Endai, muronzere Johani izvo zvomunozwa nezvomunoona. Mapofu anoona, nezvirema zvinohamba, nevanemapere vanomhodyoswa, nemadziiranzee vanozwa, nevakafa vanomuswa, nevarombo vane vhangeri rinochumairwa kwavari. Unomuchena uwo usikapumhunwi ndini.” Naapo vachaenda, Jesu wakatanga kuereketa kumbungano ngendaa yaJohani, wakati, “Mwakaenda mushango koonenyi? Rutsanga rwakazungunyiswa ngedutu here? Asi mwakaenda koonenyi? Munhu wakapfekeswa ngemachira akapfaa here? Penya, avo vanopfeka machira akapfaa vari mumhatso dzemadzimambo. Asi mwakaendeyo koonenyi? Muprofeti here? Eya, ndinoti kwomuri, nouwo unonyanya kupinda muprofeti. Uyu ndiye wevakanyora ndiye kuti, ‘Penya, ndinotuma munyai wangu pamberi pehope yako, uwo unozonasira njira yako pamberi pako.’ Ngegwinyiso ndinoti kwomuri, ‘Pakati peavo vakaberekwa ngevakadzi, akuzi kutongobva mukuru kupinda Johani Mubhabhatidzi. Asi iye uri mudoko muumambo hwomudenga uri mukuru kwaari.’ Kubvira kumazuva aJohani Mubhabhatidzi metsa zvinopano umambo hwomudenga hunopambwa ngezvigebengwa zvinohutora ngesimba. Ngokuti vaprofeti veshe neMipango zvakaprofeta metsa orooguma Johani. Kudai mwechitenda kuchiashira, ‘Uyu ndiye Erija, uwo wakaemeswa kuuya.’ Uwo unenzee dzekuzwa ngaazwe. Asi ndouedzanisa nenyi uyu mubarirwana? Wakadai ngevana vanogara pandau dzomusika, vechidaidzira kunevangani vavo vechiti, ‘Takaridza minanzi kwomuri, nemwi amuzikuzvina; takaita chiriro, nemwi amuzikubonda.’ Ngokuti Johani wakauya asikadyi nokuti kumwa, navo vakati, ‘Unedhimoni.’ Mukororo woMunhu wakauya echidya nokumwa, navo vakati, ‘Penyai mubhoki nomumwisi wevhini, shamwari yevabharisi neyevashaishi!’ Asi kungwara kwakapembedzwa ngemishando yakwo.” Naapo wakatanga kuganyira madhorobha umwo mwaiya mwaitwa mishando mizhinji yake inesimba, ngokuti avazi kutenderuka. “Ihehe kwouri, Khorazini! Ihehe kwouri, Bhethisaidha! Ngokuti kudai mishando inesimba yaiya yakaitwa muThire neSidhoni, iyo yakaitwa mukati mwenyu, vaidai vakatotenderuka karetu, vane masaka nemarota. Kani hai, ndinoti kwomuri, ‘Kunozopinda kureruka kuneThire neSidhoni ngezuva rokutongwa kunekwomuri.’ Newe Khapernaume, unozokuriswa mudenga here? Unozodzaswa pashi kuHaidhesi. Ngokuti kudai mishando inesimba yaiya yakaitwa muSodhoma, iyo yakaitwa mukati mwako, raidai riripo nanyamashi. Kani hai, ndinoti kwomuri kuti kunozopinda kureruka kunyika yeSodhoma ngezuva rokutongwa kuneiwewe.” Ngouwo mukuwo Jesu wakapingura, akati, “Ndinokutenda, Baba, Mambo womudenga newenyika, ngokuti iwewe wakazvifisha izvi kune vakangwara nevanekuzia, wakazvipangidzira kuchiya. Eya, Baba, ngokuti chaiya chinodakadza mukuona kwako. Zviro zveshe zvakahinwa kwendiri ndiBaba angu. Akuna unozia Mukororo, ndiBaba ega. Akunazve unozia Baba, asi Mukororo ega, nouwo waanoda kumupangidzira Mukororo. Uyai kwendiri imwimwi mweshe munoremba, munodzimbirwa ngomutwaro, neni ndinozomuzorodza. Mwechitora joka rangu padera penyu, mudzidze kwendiri, ngokuti inini ndakapfaa mumwoyo, nemwi munozoona kuzorora kumweya yenyu. Ngokuti joka rangu rakanaka nomutwaro wangu unoreruka.” Ngouwo mukuwo Jesu wakahamba ngomuminda yekoroni ngezuva reSabatha. Nevadzidzi vake vaiya vafukama, vakatanga kupurura mitsonzoti yekoroni vechidya. Asi apo vaFarisi vaona ichi, vakati kwaari, “Ringira, vadzidzi vako vanoita icho chisikatenderwi ngeMipango kuti chiitwe ngeSabatha.” Asi wakati kwevari, “Amuzikudzidza here icho chaakaita Dhavhidha, apo aiya afukama, naavo vaiya naye, kuti wakapotera mumhatso yaMwari, akadya zvingwa izvo zvaipangidzirwa, zvaiya zvisikatenderwi kuti iye azvidye, nokuti avo vaiya naye, asi kwega vapristi? Zve amuzikudzidza here muMipango kuti ngezuva reSabatha vapristi vari muTemperi vanogura Sabatha vasina ndaa? Asi ndinoti kwomuri chiri panapa chiro chinopinda Temperi kukura. Asi dai mwaizia kuti kunotinyi uku, ‘Ndinoda nyasha, haiwa kuhinwa mibairo,’ mwaizodai musikazi kuvaitira ndaa avo vasina ndaa. Ngokuti Mukororo woMunhu ndiye Mambo weSabatha.” Naye echibvapo wakapotera mumhatso yavo yokudira. Ringira, kwaiyapo munhu unenyara yake yakaonyana. Navo vakamubvunza kuti, “Kunotenderwa here kuponesa ngezuva reSabatha?” kuti vamuparise ndaa. Naye wakati kwavari, “Ndiani munhu kwomuri anegwai rimwe, kuti iro rikazowira mudzara ngezuva reSabatha, aazoribati here kuribudisa? Ndizvo munhu unopinda gwai kudikanwa kwakaitawani? Ndizvo kunotenderwa ngeMipango kuita zvakanaka ngezuva reSabatha.” Naapo wakati kunemunhu uwo, “Tambanudza nyara yako.” Naye wakaitambanudza, nayo yakaponeswa kudai ngeimweni. NevaFarisi vakabuda, vakaita bangano ndiye, kuti vangamuita maurairenyi. Asi Jesu echizia wakabvapo nembungano huru yakamuteera, naye wakavaponesa veshe. Wakapanga kuti vasazoita kuti aziikanwe, kuti rizadzisike izwi rakaereketwa ndiIsaya muprofeti echiti, “Ringirai muranda wangu wendakatsanangura, mudikani wangu, uwo mweya wangu unodakara ndiye. Ndinozoisa mweya wangu padera pake, naye unozoteketesa kutonga kwakarurama kumadzinza. Aazorwi nokuti kudaidzira, zve akuna unozozwa izwi rake mumapato. Aazoruvhuni rutsanga rwakakopfama, netonje rinopwititika aazoridzimi, metsa atume kutonga kwakwo kuti kunyise; vemadzinza vanozogonda kunezina rake.” Naapo kwakaunzwa kwaari umwe waiya nedhimoni, ari bofu nechimbungumbungu. Naye wakamuponesa, ngokudaro chimbungumbungu chakaereketa nokuona. Nevanhu vazhinji veshe vakashamiswa, vakati, “Uyu andiyepi here Mukororo waDhavhidha?” Asi vaFarisi vazwa vakati, “Uyu munhu unodzinga madhimoni ngesimba raBheerizebhuri, mambo wemadhimoni.” NaJesu echizia mikarakadzo yavo, wakati kwavari, “Umambo hweshe hunodziparadza hunozopera; nemadhorobha eshe nokuti mhatso zvinodziparadza azvizoemi akadi. Nokudai Sathani echidzinga Sathani, iye wadziparadza. Ndizvo umambo hwake hungazoita maemerenyi? Kudai inini ndechidzinga madhimoni ngesimba raBheerizebhuri, ndizvo vakororo venyu vanoadzinga ndiani? Ndizvo vachaita vatongi venyu. Asi kuti inini ngoMweya waMwari ndechidzinga madhimoni, ndizvo umambo hwaMwari hwauya kwomuri. Munhu ungaita mapotererenyi mumhatso youwo unesimba, aparadze nhumbi dzake, kuti asati asunga uwo unesimba? Naapo unozoparadza mhatso yake. Iye usipo neni unorwa neni; nouwo usikaunganidzi neni unotatanisa. Ndizvo ndinoti kwomuri, ‘Kushaisha kweshe nezvituko zveshe zvinozorekererwa kuvanhu, asi kutukwa kwoMweya akurekererwi.’ Nouwo unoereketa izwi rokurwa noMukororo woMunhu, unozorekererwa; asi iye unoereketa kurwa noMweya Wakachena, aazorekererwi munyika muno nokuti munyika inouya. “Mwechiita kuti muti unake nemichero yawo inake. Nokuti muite kuti muti ushate nemichero yawo ishate. Ngokuti muti unoziikanwa ngemichero yawo. Imwimwi vana vemabuura, mungaita maereketerenyi zvakanaka, muri vakashata? Ngokuti muromo unoereketa kubva kunezvakawanda zviri mumwoyo. Munhu wakanaka kubva kuupfumi hwakanaka hwomwoyo wake wakanaka unobudisa zvakanaka. Nomunhu wakashata kubva kuupfumi hwakashata unobudisa zvakashata. Asi inini ndinoti kwomuri, mazwi eshe asina shwiro anozoereketwa ngevanhu, vanozobvunzisiswa ndiwo ngezuva rokutongwa. Ngokuti ngemazwi ako unozopembedzwa, zve ngemazwi ako unozopariswa ndaa.” Naapo vamweni vevanyori nevaFarisi vakamupingura vechiti, “Mudzidzisi, tinoda kuona chioniso chinoitwa ndiwe.” Asi iye wakapingura akati kwavari, “Mubarirwana wakashata nounoomba unotsvaka chioniso; asi akuna chioniso chinozooniswa kwouri, kwega chioniso chaJona muprofeti. Ngokuti kudai ndiJona wakapedza mazuva matatu nousiku hutatu mundani yehove huru, ngokudaro Mukororo woMunhu unozogara mazuva matatu neusiku hutatu ari mumwoyo wenyika. Vanhu veNinevhe vanozomiruka ngezuva rokutongwa pamwepo nouyu mubarirwana nokuuitira ndaa, ngokuti ivo vakatenderuka ngokuchumaira kwaJona. Ringirai, chiri panapa chiro chikuru chinopinda Jona. Mambokadzi wokubani unozomiruka ngezuva rokutongwa pamwepo nomubarirwana uyu nokuuitira ndaa. Ngokuti iye wakabva ari kumagumo enyika kuuya koozwa ngokungwara kwaSoromoni. Ringirai, chiri panapa chiro chikuru chinopinda Soromoni. “Asi apo mweya unetsvina wabuda kumunhu, unoparura kuhamba ndau dzisina mvura, wechitsvaka kuzorora, usikakuoni. Naapo unoti, ‘Ndinozohwirirayo kumhatso yangu apo pendakabva. Naapo wauya unoiona isina chiro, yakatsvairwa nokurongedzwa.’ Naapo unoenda worowotorazve mweya imweni minomwe, inoupinda ngokushata, nayo inopoteramwo yechigara apo. Nokupedzisira kwouwo munhu kunozopinda kushata kunekugara kwokutanga. Kunozodarowo nokuneuyu mubarirwana wakashata.” Apo achaereketa kumbungano, ringira, mai ake nevanun'una vake vakaema ngokubanze, vechitsvaka kuti vaerekete naye. Noumweni wakati kwaari, “Ringirai, mai ako nevanun'una vako vakaema kubanze vechitsvaka kuereketa newe.” Asi iye wakapingura akati kuneuwo wakamuronzera, “Ndiani mai angu, ndianizve vanun'una vangu?” Naye wakatambanudzira nyara yake kunevadzidzi vake akati, “Ringirai, mai angu nevanun'una vangu! Ngokuti uwo unozoita kuda kwaBaba angu vari mudenga, ndiye munun'una wangu, hanzvadzi namai.” Ngeiro zuva Jesu wakabuda mumhatso, akagara ngeparuandhle. Kwakaungana kwaari mbungano zhinji, ndizvo wakapotera mungarava, akagara nembungano yeshe yakaema ngepamhiri. Naye wakaereketa kwavari zviro zvakawanda ngemiedzaniso, akati, “Ringirai, kwakabuda mukushi kookusha. Kwakati mukukusha kwake mbeu dzimweni dzakawira munjira, neshiri dzakauya dzikadzidya. Nedzimweni dzakawira paruware apo pedzaiya dzisina mavhu mazhinji, nadzo dzakamera ngokukasira, ngokuti dzaiya dzisina mavhu akadzama. Naapo zuva rakwira dzakapishwa, ngokuti dzaiya dzisina nzinde, dzakazeketera. Dzimweni dzakawira pane minzwa; neminzwa yakakura yakadzizingizira. Nedzimweni dzakawira mumavhu akanaka, nadzo dzakabereka tsangu, dzimweni zana rakapetwa, dzimweni makumi matanhatu akapetwa nedzimweni makumi matatu akapetwa. Uwo unenzee dzokuzwa, ngaazwe.” Nevadzidzi vakauya kwaari, vakati, “Unoereketa kwavari ngenyi ngemiedzaniso?” Naye wakapingura akati kwavari, “Ngokuti kunopuwa kwomuri kuzia zvakafishika zvoumambo hwomudenga, asi kwavari avo akuzi kupuwa. Ngokuti kwaari unacho kunozopuwazve, naye unozoa nezvakawanda. Asi uwo usina, neicho chaanacho chinozoduswa kwaari. Ngeiyi ndaa ndinoereketa kwavari ngemiedzaniso, ngokuti vechinyaona avaoni, vechinyazwa avazwi, zve avazwisisi. Kwavari kwakazadzisika kuprofeta kwaIsaya, ukwo kunoti, ‘Ngokuzwa munozozwa, nemwi musikazwisisi, mwechinyaona munozoona, musikaonisisi. Ngokuti mwoyo yaavo vanhu yakaita gwizhimbira, nenzee dzavo dziri madziiranzee, nemadziso avo akatswatira, kuti pamweni vangazoona ngemadziso avo, vazwe ngenzee dzavo nokuzwisisa ngemwoyo yavo, vatenderuke, neni ndivaponese.’ “Asi anomuchena madziso enyu, ngokuti anoona, nenzee dzenyu, ngokuti dzinozwa. Ngokuti ngegwinyiso ndinoti kwomuri, vaprofeti vazhinji nevanhu vakarurama vakadisisa kuona zvomunoona imwimwi, navo avazi kuzviona, nokuzwa zvomunozwa navo avazi kuzvizwa. “Ndizvo zvinopano izwai muedzaniso womukushi. Apo munhu kunyazwi ngouri arizwa izwi roumambo, asikarizwisisi, naapo unouya uwo wakashata unovhomora izvo zvakakushwa mumwoyo mwake; uyu ndiye wakakushwa panjira. Nouwo wakakushwa paruware, uyu ndiye unorizwa izwi, ngokukasira unoriashira ngokudakara. Asi aana kuita nzinde mukati mwake, asi unogara kamukuwo; naapo kunouya kutambudzwa ngendaa yeizwi, ngokukasira unopumhunwa. Iye wakakushwa muminzwa uyu ndiye unorizwa izwi, asi kudembatemba ngezvenyika nokuchengedzerwa kwoupfumi kunodzipa izwi, naro aribereki. Asi iye wakakushwa pamavhu akanaka, uyu ndiye unorizwa izwi, naye unorizwisisa; zve unobereka michero ngegwinyiso, vamweni zana rakapetwa, vamweni makumi matanhatu akapetwa, vamweni makumi matatu akapetwa.” Muedzaniso umweni waakaronza kwavari echiti, “Umambo hwomudenga hunoedzaniswa nomunhu wakakusha mbeu dzakanaka mumunda wake. Asi apo vanhu vachaata, gaa rake rakauya, rakakushawo senga mukati mwezviyo, rakaenda. Asi apo miningwi yoomera, yechitumbuka, naapo senga rakaonekawo naro. Naapo varanda vomune wemhatso vakauya, vakati kwaari, ‘Mambo, auzi kukusha mbeu dzakanaka mumunda wako here? Ndizvo senga rinobva pari?’ Asi iye wakati kwavari, ‘Munhu uri gaa wakaita izvi.’ Ndizvo varanda vakati kwaari, ‘Ungada here kuti tiende tiribvite?’ Asi wakati, ‘Haiwa, ngekuti apo mwechibvita senga mungabvita nekoroni nayo. Chirekerai zveshe zvikure pamwepo metsa mukuwo wokukukura. Ngomukuwo wokukukura ndinozoti kuvacheki, mwechiunganidza senga kutanga, murisunge kuita mwanda kuti ripishwe. Asi mwechiunganidza koroni mutsapi yangu.’ ” Muedzaniso umweni waakaronza kwavari echiti, “Umambo hwomudenga hunoedzaniswa kudai ngetsangu yomustadhi, iyo yaakatora munhu, akaisima mumunda wake. Iyo ngegwinyiso idoko kunetsangu dzeshe, asi apo yakura inopinda mapfiba eshe kukura, inoita muti, kuti shiri dzomudenga dziuye, dzimate nokuaka zvisaki munhai dzawo.” Muedzaniso umweni waakaronza kwavari echiti, “Umambo hwomudenga hunoedzaniswa nomumera uwo waakatora mudzimai, akauisa mukati mwemitani mitatu youfu metsa hweshe hwakafema.” Izvi zveshe Jesu wakazviereketa kunembungano ngemiedzaniso; naye aazikuereketa kwavari nachimwe ngepabanze pemiedzaniso, kuti kuzadzisike izwi iro rakaereketwa ngomuprofeti echiti, “Ndinozobeura muromo wangu kuereketa miedzaniso, ndinozoonisa zvakafishika kubvira pakusikwa kwenyika.” Naapo wakaendisa mbungano, wakapotera mumhatso. Nevadzidzi vake vakauya kwaari, vakati, “Tidudzire muedzaniso wesenga romumunda.” Naye wakapingura akati kwavari, “Iye unokusha mbeu dzakanaka ndiye Mukororo woMunhu. Munda inyika. Mbeu dzakanaka vana voumambo, senga vana vouwo wakashata. Gaa iro rakarikusha ndiDhiabhorosi. Nokukukura kuri kupera kwenyika, nevacheki ingirosi. Ndizvo kudai ngesenga rinounganidzwa pamwepo rechipishwa ngemwoto; ndizvo zvinozoitwa mukupera kwenyika. Mukororo woMunhu unozotuma ngirosi dzake, nadzo dzinozounganidza kubva muumambo hwake zveshe zvinopumhunisa, naavo veshe vanoita zvinonyangadza. Nadzo dzinozovakandira muchoto chomwoto. Kunozoiteyo kuboorera nokukwetsana kwemazino. Naapo vakarurama vanozojeka kudai ngezuva muumambo hwaBaba avo. Uwo unenzee ngaazwe. “Zve, umambo hwomudenga hunoedzaniswa noupfumi hwakafishwa mumunda; uhwo hwaakaona munhu akahufishazve, ngokudakara kwake unoenda nokutengesa zveshe zvaanazvo, echitenga uwo munda. “Zve, umambo hwomudenga hunoedzaniswa nomunhu mutengisi unotsvaka mapuwe akanaka. Uwo apo aona buwe rimwe rinomutengo mukuru, wakaenda, akatengesa zveshe zvaaiya nazvo, akaritenga. “Zve, umambo hwomudenga hunoedzaniswa nechitaa chakakandirwa muruandhle, nacho chakaunganidza mbeu dzeshe dzehove. Icho apo chazara vakachikweera kuhumbikumbi, vakagara pashi, vakaunganidza dzakanaka muzvidziyo, asi dzakashata vakadzirasha. Ndizvo zvinozoitika mukupera kwenyika; ngirosi dzinozobuda dziparadzanise vakashata kubva mukati mwevakarurama, dzivakandire muchoto chomwoto. Kunozoiteyo kuboorera nokukwetsana kwemazino. “Mwanasa kuzwa izvi zveshe here?” Navo vakati kwaari, “Eya.” Wakati kwavari, “Ndizvo munyori weshe uwo wakadzidziswa ngezvoumambo hwomudenga, wakadai ngomunhu uri munewemhatso, uwo unobudisa kubva kwoupfumi hwake zviro zvitsva nezvekaretu.” Kwakaitika apo Jesu apedza iyi miedzaniso, wakabvapo. Naapo auya kunyika yake, wakavadzidzisa mumhatso yavo yokudira, zvakaita kuti vashamiswe, vakati, “Kunobva kuri uku kungwara kwouyu munhu neiyi mishando yesimba? Uyu andiyepi here mukororo womutsetsi? Mai ake avadaidzwi kuti Maria here? Nevanun'una vake ndiJakobe, Josefa, Simoni naJudhasi here? Nehanzvadzi dzake dziri panapa nesu dzeshe here? Ndizvo iye wakazviona pari izvi zveshe?” Navo vakapumhuniswa ndiye. Asi Jesu wakati kwavari, “Muprofeti aarekeri kuremeredzwa kwega munyika mwake nomumhatso yake.” Naye aazi kuita apo mishando ine simba yakawanda ngendaa yokusikatenda kwavo. Ngouwo mukuwo Herodhi mutongi wematunhu marongomuna wakazwa mbiri yaJesu. Naye wakati kuvaranda vake, “Uyu ndiJohani Mubhabhatidzi; wamuka kwevakafa. Ndizvo mishando iyi ine simba inoitwa ndiye.” Ngokuti Herodhi waiya akamubata Johani, akamusunga, akamuisa mutirongo ngendaa yaHerodhiasi mukadzi womunun'una wake Firipi. Ngokuti Johani waiya akati kwaari, “Autenderwi ngezvironzo kuti umuroore.” Naapo aida kumuuraya, wakatya mbungano ngokuti vaiti muprofeti. Asi apo zuva rokuberekwa kwaHerodhi raguma, mwanasikana waHerodhiasi wakazvina pakati pavo, naye wakadakadza Herodhi. Ndizvo iye wakagondisa ngokupika mhiko kuti unozomupa kunyazwi chiinyi chaaizokumbira. Naye echiangiridzwa ndimai ake, wakati, “Ndipe panapa muchidziyo soro raJohani Mubhabhatidzi.” Namambo wakakurudzwa; asi ngendaa yokupika kwake, nendaa yaavo vaigara naye panokudya, wakapanga kuti rihinwe kwaari. Naye wakatuma kuti Johani agurwe soro mutirongo. Nesoro rakaunzwa riri muchidziyo rikapuwa kumusikana, naye wakariunza kunamai ake. Nevadzidzi vake vakauya vakatora muiri wake, vakauika, navo vakaenda vakaronzera Jesu. Zvinopano Jesu azwa izwi wakabvapo ngengarava kuenda kundau iri yega ari ega. Naapo mbungano yazwa ndizvo, yakamuteera ngetsoka, yechibva kumadhorobha. Naye wakabuda akaona mbungano huru, wakavazwira urombo naye wakaponesa vairwara vavo. Kwakati aamadeekoni vadzidzi vake vakauya kwaari vechiti, “Panapa muri pandau iri yega nomukuwo watopera zvinopano. Ndizvo chiparadza mbungano kuti vaende mumaguta vadzitengere zvokudya.” Asi Jesu wakati kwavari, “Avasisiri kuenda; vapei imwimwi zvokudya.” Navo vakati kwaari, “Panapa tine zvingwa zvishanu zvega nehove mbiri.” Naye wakati, “Zviunzenyi panapa pendiri.” Naye wakapanga mbungano kuti igare pashi pamwenje, atora zvingwa zvishanu nehove mbiri, wakaringira mudenga, akazvibonga, akazvigura, akazvihina kunevadzidzi, nevadzidzi vakahina kune mbungano. Navo veshe vakadya, vakaguta, navo vakatonhera matsekeneswa ezvaiwarakatika vakazadza zvitundu gumi nazviiri. Naavo vakadya vaiya vanoda kuita mazana makumi mashanu evamuna, ngepabanze pevakadzi nevana. Paripo iye wakaronzera vadzidzi vake kuti vapotere mungarava, vatungamire kuambuka ruseri, achiendesa mbungano. Naapo aendesa mbungano, wakakwira pamutunhu ari ega kookumbira. Kwoita madeekoni waiya aripo ega. Asi zvinopano ngarava yaiya yaane mastadhia akawanda kubva kuhumbikumbi, yechikandirwa apo naapo ngemafungu, ngokuti dutu raipesana navo. Panguva yokurinda yechirongomuna yousiku iye wakauya kwavari, echihamba padera peruandhle. Asi vadzidzi vechimuona echihamba padera poruandhle vakatyiswa vechiti, “Idzimudzangara.” Navo vakadaidzira ngokutya. Asi paripo Jesu wakaereketa kwavari echiti, “Shingai, ndini hangu, musatya.” NaPetro wakamupingura echiti, “Mambo, kuti uriwe, ronza kuti ndiuye kwouri padera pemvura.” Naye wakati, “Uya.” Naapo Petro adzaka kubva mungarava, wakahamba padera pemvura kuuya kunaJesu. Asi echiona dutu rine simba rechipesana naye, wakatya; naye echitanga kudzemera, wakadaidzira echiti, “Mambo, ndiponese.” Asi paripo Jesu wakatambanudza nyara yake, akamubata, akati kwaari, “Iwewe unokutenda kudoodoko, wagononda ngenyi?” Kwakati apo vakwira mungarava, dutu rakaterama. Naavo vaiya mungarava vakamudira, vakati, “Ngegwinyiso iwewe uri Mukororo waMwari.” Naapo vakaambuka ruseri vakaguma munyika yeGenesareta. Naapo vanhu vomunyikamwo vamuzia, vakaziisa munyika mweshe, vakaunza kwaari veshe avo vaiya nenhenda. Navo vakamupota kuti ava vatenderwe kwega kubata mupendero wegauni rake. Naavo veshe vakaubata vakaponeswa yaamho. Zvinopano kwakauya kunaJesu vaFarisi nevanyori vechibva Jerusarema vechiti, “Ngenyi vadzidzi vako vechigura tsika dzevakuru, ngokuti avashambi nyara dzavo apo vechidya chingwa?” Asi iye wakavapingura, akati kwavari, “Imwimwi nemwi munogura ngenyi mupango waMwari ngetsika dzenyu? Ngokuti Mwari wakati, ‘Remeredza baba ako namai ako, nouwo unotuka baba nokuti mai, ngaafe.’ Asi imwimwi munoti, iye unozoti kunababa ake nokuti kunamai ake, ‘Chiro chiri nechiri icho chemwaida kudetserwa ndicho ndini chaachipo kunaMwari,’ aachatamiki kuremeredza baba ake nokuti mai ake. Ndizvo ngokudaro munoita kuti izwi raMwari riite risina shwiro ngetsika dzenyu. Imwimwi vadziitisi, Isaya wakanasa kuprofeta ndimwi echiti, ‘Vanhu ava vanondiremeredza ngemiromo yavo, asi mwoyo yavo iri kuretu kwendiri.’ Asi vanotera kundidira, vechidzidzisa kuita zvidzidziso mipango yevanhu.” Naye echidaidza pamwepo mbungano, wakati kwavari, “Izwai muzwisise. Andichopi akadi chinopotera mumuromo chinosvipisa munhu, asi icho chinobuda mumuromo, ndicho chinosvipisa munhu.” Naapo vakauya vadzidzi vake, vakati kwaari, “Auzii here kuti vaFarisi vapumhuniswa ngokuzwa izwi iri?” Asi iye wakapingura, akati, “Chisimwa cheshe chisikazi kusimwa ndiBaba angu vari mudenga chinozobvitwa. Varekerenyi, vari mapofu anokweya mapofu. Nokudai bofu rechikweya bofu, eshe anozowira mukati mwerindi.” NaPetro wakapingura, akati kwaari, “Tidudzire muedzaniso uyu.” Asi wakati, “Imwimwi nemwi hamusati mwanasa kuzia here? Amuzwisisi here kuti icho chinopotera ngepamuromo chinoenda mundani, chinorashwa mushango? Asi izvo zvinobuda kumuromo zvinobva mumwoyo. Izvi zvinomusvipisa munhu. Ngokuti mumwoyo munobva mirangariro yakashata, kuuraya, kuomba, kuhura, umbavha, uchapupu hwokunyepa, kutuka. Izvi ndizvo zvinomusvipisa munhu. Asi kudya ngenyara dzisikazi kushambwa akusvipisi munhu akadi.” Naapo Jesu wakabvapo, wakaenda munyika yeThire neyeSidhoni. Penya dzimai reKhenani rakabva kundau iyo, rakadaidzira rechiti, “Ndiitire nyasha, Mambo, Mukororo waDhavhidha. Mwanasikana wangu unotambudzwa kakurutu ngedhimoni.” Asi iye aazi kuripingura neizwi. Nevadzidzi vake vakauya kwaari, vakamupota vechiti, “Wechimuendesa, ngokuti unodaidzira sure kwedu.” Asi wakapingura, akati, “Ndakatumirwa kwega kumakwai akarashika emhatso yaIsuraeri.” Asi uwo wakauya akagwadama, akati, “Mambo, ndidetsere.” Asi wakapingura, akati, “Akuzi kunaka kutora chingwa chevana nokuchikandira kuzvimbwa.” Asi uwo wakati, “Eya, Mambo, kunyazwi zvituhwa zvembwa zvinodya matsekeneswa anowarakatika patafura ramambo wazvo.” Naapo Jesu wakapingura, akati kweriri, “A dzimai, kutenda kwako kwakakura! Ngakuitike kwouri kudai ngezvounoda.” Nemwanasikana waro wakaponeswa kubvira ngeawa iro. NaJesu wakabvapo, wakauya pasinde peruandhle rweGarire; wakakwira pamutunhu, akagara apo. Nembungano huru yakauya kwaari, inazvo zvirema nemapofu nevakakuvara nezvimbungumbungu, nevamweni vazhinji, vakavaisa pashi kutsoka dzake, naye wakavaponesa. Ngokudaro mbungano yakashamiswa apo yaona zvimbungumbungu zvichiereketa nevakakuvara vechiponeswa nezvirema zvechihamba nemapofu echiona. Navo vakakudza Mwari waIsuraeri. Naapo Jesu wakadaidza vadzidzi vake kwaari, akati, “Mwoyo wangu unovazwira urombo, ngokuti vaiya neni mazuva matatu vasina zvokudya. Neni andizovaendesi vasikazi kudya, ngokuti vangazodemera munjira.” Nevadzidzi vake vakati kwaari, “Ngepari petingaona zvingwa zvakawanda murubaya muno zvinokwanisa kugutisa vanhu vazhinji vakadai?” NaJesu wakati kwavari, “Munezvingwa zvinganai?” Navo vakati, “Zvinomwe nezvihove zvishomani.” Naye wakaronzera mbungano kuti igare pashi. Naye wakatora zvingwa zvinomwe nehove, akazvibonga, akazvigura, akahina kunevadzidzi, nevadzidzi vakazvihina kune mbungano. Navo vakadya veshe, vakaguta. Navo vakatonhera matsekeneswa akasara, zvitundu zvinomwe zvakazara. Naavo vakadya vaiya vamuna mazana makumi marongomuna, ngepabanze pevakadzi nevana. Naye wakaendesa mbunganu, wakapotera mungarava, akauya kumigano yeMagadhana. VaFarisi nevaSadhusi vakauya vechimuedza, vakakumbira kuti avaitire chioniso chinobva mudenga. Asi iye wakapingura, akati kwavari, “Kwooita madeekoni munoti, ‘Kubanze kunozoara, ngokuti mudenga mwakatsvuka.’ Nomumangwanani munoti, ‘Kunozonaya nyamashi, ngokuti mudenga mwakatsvuka muneruseto.’ Munozia kududzira hope yomudenga, asi amukoni here kududzira zvioniso zvemikuwo? Mubarirwana wakashata nounoomba unotsvaka chioniso, akuna chioniso chinozoitwa kwouri, asi kwega chioniso chaJona.” Naye wakavasiya akaenda. Naapo vadzidzi vake vaguma ruseri vaiya variyarwa kutora zvingwa. NaJesu wakati kwavari, “Wonai mungware mumera wevaFarisi newevaSadhusi.” Navo vakapangana pakati pavo, vakati, “Unodaro ngokuti atizi kutora zvingwa.” NaJesu echizia izvo, wakati, “Munopangana ngenyi pakati penyu, imwimwi munokutenda kudoodoko, ngokuti amuna chingwa? Amuzii nazvinopano here nokuti kukarakadza ngezvingwa zvishanu zvakapuwa vanhu makumi emazana mashanu, nezvitundu zvinganai zvemwakatonhera matsekeneswa? Zve, nokuti zvingwa zvinomwe zvevanhu vaiya makumi emazana marongomuna, nezvitundu zvinganai zvemwakatonhera matsekeneswa? Amuzi kuzwisisa ngenyi kuti andizi kuereketa kwomuri ngezvingwa? Asi mungware mumera wevaFarisi newevaSadhusi.” Naapo vakanasa kuzwisisa kuti aasaivapanga kuti vangware ngomumera wezvingwa, asi kuti vangware kudzidzisa kwevaFarisi nekwevaSadhusi. Zvino Jesu auya munyika yeSizaria Firipi, wakabvunza vadzidzi vake echiti, “Vanhu vanoti Mukororo woMunhu ndiani?” Navo vakati, “Vamweni vanoti ndiJohani Mubhabhatidzi, nevamweni vanoti ndiErija, nevamweni vanoti ndiJeremia nokuti umwe wevaprofeti.” Iye wakati kwavari, “Asi imwimwi munoti ndiri anani?” Simoni Petro wakapingura, akati kwaari, “Iwewe uri Kristu, Mukororo waMwari Unopona.” NaJesu wakapingura, akati kwaari, “Unomuchena iwewe Simoni, mukororo waJona, ngokuti nyama nengazi azvizi kuonisa ichi kwouri, asi Baba angu vari mudenga. Neni ndinoti kwouri, ‘Iwewe uri Petro, nepadera peiri buwe ndinozoaka chiara changu; nezvimana zveHaidhesi azvizochinyisi.’ Neni ndinokupa makii oumambo hwomudenga; neicho chounozosunga munyika, chinozosungwa mudenga. Neicho chounozosunhura munyika, chinozosunhurwa mudenga.” Naapo wakapanga vadzidzi vake kuti vasazoronzera munhu naumwe kuti ndiye Kristu. Kubvira ngouwo mukuwo Jesu wakatanga kuonisa kuvadzidzi vake kuti kunosisira kuti aende Jerusarema, atambudzike ngezvakawanda ngevakuru nevapristi vakuru nevanyori, aurawe nezuva rechitatu amuswe. Naapo Petro wakamutora dumba, akatanga kumupanga echiti, “Mwari ngaaite kuti chisaitika icho kwouri, Mambo. Ichi achizoitiki kwouri nariini.” Asi iye wakakunukuka, akati kunaPetro, “Ibva sure kwangu, Sathani. Uri mupumhunisi kwendiri; ngokuti aunyeri ngeizvo zvaMwari, asi ngeizvo zvevanhu.” Naapo Jesu wakati kuvadzidzi vake, “Kunyazwi ndiani unoda kuuya sure kwangu, ngaadzirambe atore muchinjiko wake, anditeere. Ngokuti iye unoda kuuyirwa ngendaramo yake, unozorashikirwa ndiyo; nouwo unozorasha ndaramo yake ngepamusoro pangu, unozoiona. Munhu unozouyirwa ngenyi kudai echiona nyika yeshe, akarashikirwa ngendaramo yake? Nokuti munhu unozoita mutenganisonyi nendaramo yake? Ngokuti Mukororo woMunhu unozouya muutende hwaBaba ake pamwepo nengirosi dzake; naapo unozopa munhu weshe kudai ngemishando yake. Ngegwinyiso ndinoti kwomuri, varipo vamweni venyu vanoema panapa, avo vasikazozwi kufa metsa vaona Mukororo woMunhu echiuya muumambo hwake.” Ngesure kwemazuva matanhatu Jesu wakatora Petro, Jakobe naJohani, munun'una wake, wakavatungamira akakwira navo padera pomutunhu wakareba, vari vega. Naye wakatsandudzwa pamberi pavo, nehope yake yakajeka kudai ngezuva, nezvokufuka zvake zvakachena kudai ngokujeka. Penya, kwakaoneka kwaari Mosi naErija, vechiereketa naye. NaPetro wakati kunaJesu, “Mambo, kwakanaka kwetiri ngokuti tiri panapa. Kudai wechida, ndinozoaka pano zvitumba zvitatu, chimwe chako, chimweni chaMosi nechimweni chaErija.” Apo achaereketa, penya gore rinon'anikira rakavatibikira, penya izwi rakabva mugore rechiti, “Uyu ndiye Mukororo wangu, wendinoda, wendinonasa kudakara ndiye; mwechimuzwa.” Naapo vadzidzi vazwa izvi, vakadzikandira pashi vakatsikitsira hope dzavo pamavhu, vakatya kakurutu. NaJesu wakauya, akavabata, akati, “Mirukai, musatya.” Naapo vamirudza madziso avo, avazi kuona munhu, kwega Jesu. Vachadzaka kubva padera pomutunhu, Jesu wakavapanga echiti, “Musazoronzera munhu naumwe ngendaa yechioniso metsa Mukororo woMunhu amuka kwavakafa.” Nevadzidzi vake vakamubvunza vechiti, “Ndizvo, ngenyi vanyori vanoti, ‘Kunosisira kuti Erija atange kuuya?’ ” Naye wakapingura echiti, “Ngegwinyiso Erija unouya aunzidzire zveshe. Asi ndinoti kwomuri, Erija wakatouya hake, navo avazi kumuzia, asi vakaita kwaari zveshe izvo zvevakada. Ngokudaro Mukororo woMunhu naye unozotambudzwa ndivo.” Naapo vadzidzi vakazwisisa kuti wakaereketa kwavari ndiJohani Mubhabhatidzi. Vaguma kunembungano kwakauya kwaari munhu, akamugwadamira pashi echiti, “Mambo, wechimuitira nyasha mwana wangu; ngokuti unenhutu, unotambudzika kakurutu. Ngokuti kazhinji unowa mumwoto nekazhinjizve mumvura. Neni ndamuunza kunevadzidzi vako, navo vakorera kumuponesa.” Jesu wakapingura, akati, “A! Mubarirwana usikatendi nounopauka, ndinozogara nemwi mukuwo wakaitawani? Ndinozomusengerera mukuwo wakaitawani? Wechimuunza pano kwendiri.” NaJesu wakakaraidza iro dhimoni; naro rakabuda kubva kwaari. Nomurumbwana wakaponeswa kubvira ngeawa iro. Naapo vadzidzi vakauya kunaJesu, ari ega, navo vakati, “Ngenyi isusu takorera kuridzinga?” Naye wakati kwavari, “Ngendaa yokutenda kwenyu kudoko, ngokuti ngegwinyiso ndinoti kwomuri, kudai munokutenda kudai ngetsangu yomustadhi, mungaronza kuneuyu mutunhu kuti, ‘Ibva panapa, uende apo;’ nawo unozobva apo; kusina chiro chisikazoitwi ndimwi.” [ Asi iyi mbeu aibudi kwega ngokukumbira nangokuera kudya.] Navo vachaungana pamwepo muGarire, Jesu wakati kwavari, “Mukororo woMunhu unozohinwa munyara dzevanhu. Navo vanozomuuraya, naye ngezuva rechitatu unozomukazve.” Navo vakatambudzika kakurutu. Naapo vauya muKhapernaume, avo vaiashira chibharo vakauya kuna Petro, vakati, “Mudzidzisi wenyu aadusi chibharo chemare chinozwi dhidhirakama here?” Wakati, “Eya.” Kwakati apotera mumhatso Jesu wakatanga kuereketa kwaari echiti, “Unopinimidzenyi, Simoni? Madzimambo enyika vanoashira kunaani murimwa nokuti chibharo? Kunevakororo vavo nokuti kuvapara here?” Petro wakati kwaari, “Kuvapara.” Naapo Jesu wakati kwaari, “Ngokudaro vakororo vavo vari vakasunungurwa. Asi kuti tisazovapumhunisa, enda iwewe kuruandhle, ukandire chitebo, utore hove iyo inotanga kubatwa. Naapo wabeura muromo wayo, unozoona chigurwa chemare yesirivha chinozwi sitatera; icho unozochitora uhine kwavari ngepamusoro pangu nepako.” Panguva iyo vadzidzi vakauya kunaJesu, vakati, “Ndiani wakakurisisa muumambo hwomudenga?” NaJesu wakadaidza kwaari mwana mudoko, wakamuisa pakati pavo. Akati, “Ngegwinyiso ndinoti kwomuri, musikatenderuki, muite kudai ngevana vadoko, amutongozopindi muumambo hwomudenga. Ndizvo iye unozodzipfaisa kudai ngouyu mwana mudoko, iye ndiye wakakurisisa muumambo hwomudenga. Nouwo unozoashira umwe mwana mudoko wakadai ngouyu ngezina rangu, unondiashira inini. “Asi kunyazwi ndiani unozoita kuti umwe wevadoko vakadai vanonditenda vashaishe, kunopinda kumunakira iye kuti guyo gurutu risungirwe muhuro mwake, kuti anzvaidzwe muudzamu rworuandhle. Ihehe kunyika ngendaa yezvipumhuniso! Ngokuti kunotamika kuti zvipumhuniso zviuye; asi ihehe kwaari munhuwo unoita kuti vanhu vashaishe! Kuti nyara yako dangani rutsoka rwako rwechikuita kuti ushaishe, ruteme, ururashe kubva kwouri. Kunopinda kunaka kwouri kuti upotere mukurarama uri chirema nokuti wechikumhina, kunekuti unenyara mbiri dangani tsoka mbiri ukandirwe mumuriro usikadzimi. Nokudai dziso rako rechikuita kuti ushaishe, ribvite, urirashe kubva kwouri. Kunopinda kunaka kwouri kuti upotere mukurarama uri jochotore kunekuti unemadziso mairi ukandirwe mumuriro weGehena. “Ngwarai kuti musazoshoora umwe weava vadoko. Ngokuti ndinoti kwomuri, mudenga ngirosi dzavo dzinogara dzechiona hope yaBaba angu vari mudenga. [ Ngokuti Mukororo woMunhu wakauya kuponesa avo vakarashika.] Munopinimidzenyi? Kuti munhu anezana remakwai nerimwe rawo rarashika, aasii here arimakumi mapfumbamwe nepfumbamwe, aende mumitunhu kutsvaka iro rakarashika? Kudai kwechiitika kuti unoriona, ngegwinyiso ndinoti kwomuri, unopinda kudakara ngeiro kunemakumi mapfumbamwe nepfumbamwe asikazi kurashika. Ngokudaro andikwopi kuda kwaBaba enyu vari mudenga kuti umwe weava vadoko arove. “Kudai munun'una wako echizokushaishira, enda umuonise ndaa yake pakati penyu muri mwega. Kudai iye echizopurutana, wauyirwa ngomunun'una wako. Asi kuti asikazopurutani, tora umwe dangani vairi kuenda newe, kuti ngemiromo yevairi dangani yevatatu vanoita chapupu, mazwi eshe angagwinyiswa. Asi kuti iye echizoramba kuvapurutana, wechironzera vechiara. Asi kudai echizoramba kupurutana kunyazwi kunevechiara, ngaaite kwouri kudai ngewevemadzinza nokudai ngomubharisi. “Ngegwinyiso ndinoti kwomuri, ‘Kunyazwi chiinyi chomunozosunga munyika, chinozosungwawo mudenga. Neicho chomunosunhura munyika, chinozosunhurwawo mudenga.’ Zve ndinoti kwomuri, kudai vairi venyu vanozotenderana panyika ngechiro chevanozokumbirira, chinozoitwa kwavari ndiBaba angu vari mudenga. Ngokuti apo vairi nokuti vatatu vechiungana pamwepo ngezina rangu, ndiripo pakati pavo.” Naapo Petro wakauya echiti kwaari, “Mambo, munun'una wangu unozondishaishira kanganai ndechimurekerera? Metsa mikuwo minomwe here?” Jesu wakati kwaari, “Andironzi kwouri kuti, metsa mikuwo minomwe akadi; asi metsa mikuwo iri makumi manomwe akapetwa kanomwe. Ndizvo umambo hwomudenga hunoedzaniswa nomunhu uri mambo, uwo waida kuerengerana nevaranda vake chikwereti. Naapo atanga kuerenga, umwe wakaunzwa kwaari anechikwereti chematarenda makumi emazana gumi. Asi ngokuti iye waiya asina chokuripira ndicho, mambo wake wakapanga kuti atengeswe nomukadzi wake nevana vake nazvo zveshe zvaaiya nazvo, kuti chikwereti chiripwe. Ndizvo muranda uwo wakawa pashi ngemabvi, akamupota echiti, ‘Wechindikungurira, neni ndinozokuripira zveshe.’ Naapo mambo wouwo muranda wakamukungurira, akamusunhura, akamurekerera chikwereti. Asi uwo muranda wakabuda, akaona umwe wevaranda mungani wake, uwo waakakweretwa ndiye zana remadhinari; naye wakamubata ngenyara, akamudzipa pahuro echiti, ‘Ripa kwendiri chikwereti chako.’ Ndizvo muranda uwo mungani wake wakawa pashi, akamupota echiti, ‘Wechindikungurira, neni ndinozokuripira.’ Asi aazi kutenda. Asi wakaenda akamuisa mutirongo, metsa aripa icho chikwereti. Ndizvo varanda vangani vake, vechiona icho chakaitika, vakasvipa mwoyo kakurutu, vakauya, vakaronzera mambo wavo izvo zveshe zvakaitika. Naapo mambo wake amudaidza, wakati kwaari, ‘Iwewe muranda wakashata, ndakakukungurira chikwereti icho cheshe, apo wandipota. Usaisisa newe here kuti ukungurire muranda uwo mungani wako, kudai ndini ndakakukungurira iwewe?’ Namambo wake wakatseneka, akamuhina kuvashwinyisi metsa aripa izvo zveshe zvaaiya nechikwereti kwaari ndizvo. Ngokudaro Baba angu vari mudenga vanozoita kwomuri, kuti imwimwi musikakunguriri munun'una wenyu ngomumwoyo mwenyu.” Kwakatika apo Jesu apedza kuereketa aya mazwi, wakabuda muGarire, wakauya kumigano yeJudhia, ruseri rweJorodhani. Mbungano huru yakamuteera, naye wakavaponesa apo. NevaFarisi vakauya kwaari, vechimuedza vechiti, “Kunotenderwa here ngezvironzo kuti munhu arambe mukadzi wake ngendaa kunyazwi ngeiri?” Naye wakapingura, akati, “Amuzikudzidza here kuti uwo wakavasika pakutanga, wakavasika mwamuna nomukadzi. Akati, ‘Ngeiyi ndaa munhu unozosiya baba ake namai, unozonamatira kumukadzi wake neava vairi vanozoita nyama imwe.’ Ndizvo avachaiti vairi, asi nyama imwe. Ndizvo icho chaakasunganidza Mwari, munhu asasunhura.” Vakati kwaari, “Ndizvo ngenyi Mosi akapanga kuhina tsamba yokuparadzana nokumuramba?” Wakati kwavari, “Mosi ngendaa yokukonza kwomwoyo yenyu wakamutendera kuti murambe vakadzi venyu. Asi kubvira pakutanga zvaiya zvisikazi kudaro. Asi inini ndinoti kwomuri, kunyazwi ndiani uwo unoramba mukadzi wake isiri ndaa yokuomba, aroore umweni, unoomba.” Vadzidzi vakati kwaari, “Kuti yakadaro ndaa yomunhu nomukadzi wake, akuzi kunaka kuroora.” Asi wakati kwavari, “Veshe avangaashiri izwi iri, asi kwega kwavari avo vakaripuwa. Ngokuti varipo vari ngomwa kubva mundani dzemadzimai avo; varipozve mitenwa avo vakatenwa ngevanhu, varipozve vakadziitisa ngomwa ngepamusoro poumambo hwomudenga. Iye unesimba rokuashira, ngaariashire.” Naapo vakaunza kwaari vana vadoko, kuti aise nyara dzake padera pavo, avakumbirire. Asi vadzidzi vakavarambidza. Asi Jesu wakati, “Tenderai vana vadoko kuti vauye kwendiri, musavarambidza, ngokuti umambo hwomudenga ngehwevakadaro.” Naye wakaisa nyara dzake padera pavo, akabva apo. Penya, umwe wakauya kwaari, akati, “Mudzidzisi, chiinyi icho chakanaka chendingaita kuti ndizoona kupona kusikaperi?” Naye wakati kwaari, “Unondibvunza ngenyi ngendaa yechakanaka? Uripo umwe wakanaka, asi kudai wechida kupotera mukupona wechingwarira mipango.” Wakati kwaari, “Mipango iri?” NaJesu wakati, “Usazouraya, usazoomba, usazoba, usazoita chapupu chokunyepa, remeredza baba ako namai, unozoda muakirwana wako kudai ngokudzida iwewe.” Jaha rakati kwaari, “Ndakazvingwarira izvi zveshe. Chiinyi chasara kuti ndiite?” Jesu wakati kweriri, “Kuti wechida kuita wakaperera, enda utengese zveshe zvounazvo, uhine kuvarombo, newe unozoona upfumi mudenga, uuye unditeere.” Asi apo jaha razwa izwi iro rakaenda rechitambudzika; ngokuti raiya noupfumi hwakawanda. Naapo Jesu wakati kuvadzidzi vake, “Ngegwinyiso ndinoti kwomuri, kwakakonza kunegurudza kuti ripotere muumambo hwomudenga. Zve ndinoti kwomuri, kwakapinda kuita nyore kuti kamera ripotere ngepauri renaiti, kunekuti gurudza ripotere muumambo hwaMwari.” Apo vadzidzi vazwa izvi, vakashamiswa kakurutu, vakati, “Kuti zvakadaro, ndiani ungaponeswa?” Asi Jesu echivaringira, wakati kwavari, “Kunevanhu ichi achiitiki; asi kunaMwari zveshe zvinoitika.” Naapo Petro wakapingura, akati kwaari, “Ringira, isusu takasiya zveshe, tikakuteera; ndizvo tinozoonenyi?” Jesu wakati kwavari, “Ngegwinyiso ndinoti kwomuri, munyika itsva, apo Mukororo woMunhu paanozogara padera pedendemaro routhende hwake, imwimwiwo mwakanditeera munozogarawo padera pemadendemaro gumi namairi, mwechitonga madzinza gumi namairi aIsuraeri. Nemunhu weshe wakasiya mhatso, nokuti vanun'una, nokuti hanzvadzi, nokuti baba, nokuti mai, nokuti vana, nokuti minda, ngepamusoro pezina rangu, unozoashira zvakapetwa kuita zana, naye unozogara nhaka yokupona kusikaperi. Asi vazhinji avo vari vepamberi vanozoita vesure; naavo vari vesure vanozoita vepamberi. “Ngokuti umambo hwomudenga hunoedzaniswa nomunhu uri mune wemhatso, uwo wakafumira mangwanani maishi kootora vashandi vomunda wake vemivhini. Naapo atenderana nevashandi ngechigurwa chesirivha ngezuva, wakavatuma kumunda wemivhini. Naye wakabudazve rooda kuita awa rechitatu, akaona vamweni vakaema pandau yomusika, vasikashandi. Wakati kwavari, ‘Mwechiendawo mumunda wemivhini, neicho chinomusisira ndinozomupa.’ Navo vakaenda. Wakabudazve rooda kuita awa rechitanhatu nerechipfumbamwe, wakaitazve kudaro. Rooda kuita awa rechigumi narimwe wakabuda, akaona vamweni vakaema, akati kwavari, ‘Munoema panapa ngenyi zuva reshe musina chomunoshanda?’ Vakati kwaari, ‘Ngokuti apana munhu watitora.’ Wakati kwavari, ‘Mwechiendawo mumunda wemivhini.’ Kwaita madeekoni mambo womunda wemivhini wakati kunenhunge yake, ‘Daidza vashandi, uvape misharo yavo, utange ngouwo wokugumisira metsa kuguma kunouwo wokutanga.’ Kwakati vechiuya avo vakatorwa ngeawa rechigumi narimwe vakaashira chigurwa chesirivha. Kwakati avo vokutanga voouya vakapinimidza kuti vangatutsirwa; navo ngokudaro vakaashira munhu weshe chigurwa chesirivha. Naapo vaashira, vakavhuruvhutira munewemhatso vechiti, ‘Ava vokupedzisira vashanda awa rimwe rega, newe waita kuti vaedzane nesu, isusu takatwara mutwaro nokupisha kwezuva.’ Asi iye wakapingura, akati kunoumwe wavo, ‘Mungani, andizi kukuitira chakashata. Auzi kutenderana neni here ngechigurwa chesirivha? Tora icho chiri chako uende. Ndinoda kumupawo uyu wokupedzisira kudai ndiwe. Akutenderwi here kwendiri kuti ndiite icho chendinoda ngezviri zvangu? Nokuti dziso rako raita godo ngokuti inini ndakanaka here?’ Ndizvo avo vesure vanozoita vepamberi, nevepamberi vanozoita vesure.” Apo Jesu akwira Jerusarema, wakatora vadzidzi gumi navairi vari vega munjira, naye wakati kwavari, “Penyai, tinokwira Jerusarema; noMukororo woMunhu unozohinwa kuvapristi vakuru nevanyori, navo vanozomutongera rufu. Navo vanozomuhina kunevemadzinza kuti aitirwe jee nokuchaiwa nokukohomerwa, ngezuva rechitatu unozomuka.” Naapo kwakauya kwaari mai evakororo vaZebhedhi, pamwepo nevakororo vake, akagwadama, echikumbira kwaari chiro. Naye wakati kwaari, “Chiinyi chomunoda?” Wakati kwaari, “Ronza kuti ava vakororo vangu vairi vagare umwe ngokumudyo kwako noumweni ngokumuoshwe kwako muumambo hwako.” Asi Jesu wakapingura, akati “Amuzii chomunokumbira. Munokona here kumwa kutsani yendichamwa inini?” Vakati kwaari, “Tinokona.” Iye wakati kwavari, “Ngegwinyiso munozomwa kutsani yangu; asi kugara ngokumudyo kwangu nokuti ngokumuoshwe kwangu, andikwopi kwangu kuhina, asi ngekwaavo vakakunasirirwa ndiBaba angu.” Naapo varigumi vazwa, vakatsenekera avo vakoma vairi. Asi Jesu wakavadaidza kwaari, akati, “Munozia kuti vatongi vemadzinza vanotonga padera pavo, nevakuru vavo vanesimba padera pavo. Asi akuzodaropi pakati penyu; asi iye unoda kuti aite mukuru pakati penyu ngaaite mushandiri wenyu. Nouwo unoda kuita wokutanga pakati penyu ngaaite muranda wenyu. Kudai ngoMukororo woMunhu aazi kuuya kushandirwa, asi kushandira nokuhina kupona kwake kuita muripo wevazhinji.” Navo vachabuda kubva muJerikho mbungano huru yakamuteera. Penya, mapofu mairi akagara panjira, apo akazwa kuti Jesu waizopindapo, akadaidzira echiti, “Mambo, Mukororo waDhavhidha, tiitire nyasha.” Nembungano yakaakaraidza kuti anyarare. Asi akapinda kudaidzisa echiti, “Mambo, Mukororo waDhavhidha, tiitire nyasha.” NaJesu wakaema, akaadaidza, akati, “Munoda kuti ndimuitirenyi?” Akati kwaari, “Mambo, kuti madziso edu apembenudzwe.” Ndizvo Jesu wakaazwira urombo, akagwama madziso awo; paripo madziso awo akapembenudzwa, nawo akamuteera. Naapo vakwedzera pasinde peJerusarema, vaguma Bhethifaje, kuMutunhu wemaOrivhi, Jesu wakatuma vairi vevadzidzi vake. Wakati kwavari, “Endai kuguta iro remwakaringirana naro, paripo munozoona mbongoro yakasungwa netsiru pamwepo nayo; mwechidzisunhura, mudziunze kwendiri. Kuti aripo unozoereketa chiro kwomuri, munozoti, ‘Mambo unodzitama,’ chiriporipo unozodzitumira.” Ichi chakaitika kuti kuzadzisike ukwo kwakaereketwa ngomuprofeti echiti, “Ronzerai mwanasikana weZioni. Penya, Mambo wako unouya kwouri, ari wakapfaa, echigadha padera pembongoro nepadera petsiru rechifuyo chemitwaro.” Nevadzidzi vakaenda, vakaita kudai ngezvaakavapanga Jesu. Navo vakaunza mbongoro netsiru rayo, vakaisa zvokufuka zvavo padera padzo, vakamugadzika padera payo. Norupande ruzhinji rwembungano rwakachinga zvokufuka zvavo munjira; nevamweni vakatema matai emiti, vakaawara munjira. Nembungano yaihamba pamberi pake, neiyo yaiteera ngesure, yakadaidzira yechiti, “Hosana kuMukororo waDhavhidha! Unomuchena uwo unouya ngezina raMambo! Hosana mudengadenga!” Naapo apotera muJerusarema, vedhorobha reshe vakaita nyongano vechiti, “Ndiani uyu?” Nembungano yakati, “Uyu muprofeti Jesu, unobva Nazaretha reGarire.” NaJesu wakapotera muTemperi, wakabudisa avo veshe vaitengesa naavo vaitenga muTemperi, naye wakapinduridza matafura eavo vaitenganisana mare nezvigaro zvaavo vaitengesa njia. Wakati kwavari, “Kwakanyorwa kuti, ‘Mhatso yangu inozozwi imhatso yokudira; asi imwimwi mwaiita bako rembavha.’ ” Mapofu nezvirema zvakauya kwaari muTemperi, naye wakavaponesa. Asi apo vapristi vakuru nevanyori vaona izvo zvinoshamisa zvaakaita, nevana vaidaidzira muTemperi vechiti, “Hosana kuMukororo waDhavhidha,” vakatseneswa, navo vakati kwaari, “Unozwa here icho chevanoereketa ava?” NaJesu wakati kwavari, “Eya. Amuzi kutongodzidza here, kuti kubva kumiromo yendumure neyevanoamwa unoashira kukudzwa kwakaperera?” Naye wakavasiya, akabuda mudhorobha, akaenda Bhethani, naye wakaata apo. Mangwanani apo echihwirira kudhorobha waiya nenzara. Naapo aona muonde pasinde penjira, wakaguma kwouri, akaona usina chiro, asi mashakani ega, naye wakati kwouri, “Michero isachazoberekwa kwouri kunoti mhera nariini.” Paripo muonde wakazeketera. Kwakati vadzidzi vaona, vakashamiswa vechiti, “Muonde wazeketera ngokukasira ngenyi?” Jesu wakapingura, akati kwavari, “Ngegwinyiso ndinoti kwomuri, kudai munokutenda musikagonondi, amungazoiti chega icho chakaitwa kunemuonde, asi kunyazwi mwechizoti kunouyu mutunhu, ‘Ibva panapa, ukandirwe muruandhle,’ chinozoitika. Nazvo zveshe zvomunozokumbirira mumikumbiro ngokugonda, munozozviashira.” Naapo apotera muTemperi, vapristi vakuru nevakuru vevanhu vakauya kwaari achadzidzisa, vakati, “Ngesimba raani rounoita izvi ndiro? Ndiani wakakupa simbaro?” Jesu wakapingura, akati kwavari, “Inini ndinozomubvunzawo chiro chimwe, kuti mukandironzera, ndinozomuronzerawo kuti isimba raani rendinoita izvi ndiro. Rubhabhatidzo rwaJohani rwakabva kuri? Rwakabva mudenga here, nokuti rwakabva kuvanhu?” Navo vakapangana pakati pavo vechiti, “Kuti tikaronza kuti, ‘Rwakabva mudenga,’ unozoti kwetiri, ‘Ndizvo amuzikumutenda ngenyi?’ Asi kuti tikaronza kuti, ‘Rwakabva kuvanhu,’ tinotya vanhu; ngokuti veshe vanoti kuti Johani waiya muprofeti.” Navo vakapingura kunaJesu vakati, “Atizii.” Naye wakati kwavari, “Ininiwo andimuronzeri kuti ndinoita izvi ngesimba raani. “Asi munopinimidzenyi? Munhu waiya nevakororo vairi; naye wakaenda kunewokutanga, akati, ‘Mwana, enda nyamashi ushande mumunda wemivhini.’ Naye wakapingura, akati, ‘Andidi’, asi ngesure wakatenderuka, akaenda. Naye wakaenda kunewechipiri, wakaereketa ndizvo ndizvo. Iye wakapingura, akati, ‘Ndinoenda, baba’, asi ngesure aazi kuenda. Ndiani pavairi wakaita kuda kwababa ake?” Vakati, “Uwo wokutanga.” Jesu wakati kwavari, “Ngegwinyiso ndinoti kwomuri, vabharisi nemhombo vanomutangira kupotera muumambo hwaMwari. Ngokuti Johani wakauya kwomuri munjira yokururama, nemwi amuzi kumutenda; asi vabharisi nemhombo vakamutenda; nemwi apo mwaona izvo amuzi kutenderuka ngesureni, kuti mugonde kwaari. “Izwai muedzaniso umweni. Kwaiyapo munewemhatso wakatikuti, wakasima munda wemivhini, wakaushoshera ngerusvingo, wakatsvaka pokukamurira vhini mukati mwawo, naye wakaaka chitumba akauhina kuti ungwarirwe ngevarimi, akaenda kunyika imweni. Naapo nguva yokuibva kwemichero yakwedzera, wakatuma varanda vake kuvarimi avo, kuti vaashire chikoaniswa chake chemichero. Nevarimi avo vakatora varanda vake, vakachaya umwe, vakauraya umweni, vakaponda umweni ngemapuwe. Wakatumazve varanda vamweni vakapinda kuwanda kuneavo vokutanga, navo vakaita kwavari ndizvo ndizvo. Asi pakupedzisira wakatuma kwavari mukororo wake echiti, ‘Vanozoremeredza mukororo wangu.’ Asi apo varimi vaona mukororo uwo, vakati pachavo, ‘Uyu ndiye unogara nhaka. Uyai ngatimuuraye, titore nhaka yake.’ Navo vakamubata, vakamubudisa kubanze kwomunda wemivhini, vakamuuraya. Ndizvo apo mambo womunda wemivhini ouya, unozoitenyi kuneavo varimi?” Vakati kwaari, “Unozouraya vanhu vakashata ngokuuraya kwakashata, naye unozohina munda uwo wemivhini kuvarimi vamweni, avo vanozohina kwaari michero ngemikuwo yayo.” Jesu wakati kwavari, “Amuzi kutongodzidza here muzvinyorwa kuti, ‘Buwe iro rakarambwa ngevaaki, ndiro rakaitwa soro repakona; ichi chakabva kunaMambo, nacho chinoshamisa mukuona kwedu?’ “Ndizvo ndinoti kwomuri kuti, umambo hwaMwari hunozoduswa kwomuri, nahwo hunozohinwa kudzinza iro rinobereka michero yahwo. [ Naye uwo unozowa padera pebuwe iri, unozoputika; asi iye werinowa padera pake, rinozomukuya kuita bukuta.”] Naapo vapristi vakuru nevaFarisi vazwa miedzaniso yake, vakazia kuti unoereketa ndivo. Naapo vakatsvaka kuti vamubate, vakatya mbungano ngokuti iyi yaigonda kuti muprofeti. NaJesu wakapingura, akaereketazve kwavari ngemiedzaniso echiti, “Umambo hwomudenga hunoedzaniswa nomunhu uri mambo, wakaitira mukororo wake dhiri romuchadho. Naye wakatuma varanda vake kudaidza avo vakakokwa kudhiri romuchadho, navo avazi kuda kuuya. Wakatumazve varanda vamweni echiti, ‘Ronzerai avo vakakokwa kuti, penyai ndanasirira kudya kwangu; n'ombe dzangu nedzakanuna dzangu dzaurawa, nazvo zveshe zvanasirirwa; uyai kudhiri romuchadho.’ Asi avo vakazvirerusa, vakaenda, umwe kumunda wake noumweni kootengesa kwake, navo vakasara vakabata varanda vake, vakavashononesa, vakavauraya. Naapo mambo azwa izvi wakatseneka, naye wakatuma hondo dzake, akavauraya avo vaurayi, akapisha dhorobha ravo. Naapo wakati kuvaranda vake, ‘Dhiri romuchadho ranasirirwa, asi avo vakakokwa vaiya vasikasisiri. Ndizvo endai pamhararano dzenjira, navo veshe vomunozoona, mwechivakoka kuti vauye kudhiri romuchadho.’ Naavo varanda vakabuda, vakaenda munjira, vakaunganidza veshe avo vevakandoona, veshe vakashata nevakanaka; mhatso yedhiri romuchadho yakazara ngevaeni. Asi apo mambo apotera kuringira vaeni, wakaona munhu waiya asikazi kupfeka bhachi romuchadho. Naye wakati kwaari, ‘Hama, waita mapoterenyi muno usina bhachi romuchadho?’ Asi iye wakanyarara. Naapo mambo wakati kuvaranda vake, ‘Mwechimusunga tsoka nenyara, mwechimukandira muchidima chiri kubanze; kunozoiteyo kuboorera nokukwetsana kwemazino.’ Ngokuti vazhinji vanodaidzwa, asi vashomani vanotsanangurwa.” Naapo vaFarisi vakaenda, vakaita bangano rokuti vamuteye mukuereketa kwake. Navo vakatumira kwaari vadzidzi vavo pamwepo nevaHerodhi vechiti, “Mudzidzisi, tinozia kuti iwewe uri wegwinyiso, unodzidzisa njira yaMwari ngegwinyiso, autunhumadzi munhu; ngokuti aupenyi hope yomunhu. Tironzere zvinopano unopinimidzenyi. Ndizvo here kuti tibhadhare chibharo kunaSiza nokuti tisabhadhara?” Asi Jesu, echizia kushata kwavo, wakati, “Munondiedza ngenyi, imwimwi vadziitisi? Ndipangidzirenyi mare yechibharo.” Navo vakaunza kwaari chigurwa chemare chinozwi dhinariusi. Naye wakati kwavari, “Ngowaani uyu mutodzaniso nouku kunyorwa?” Vakati, “NgezvaSiza.” Naapo wakati kwavari, “Ndizvo mwechihina kunaSiza zvaSiza, nokunaMwari izvo zviri zvaMwari.” Naapo vazwa, vakashamiswa, vakamusiya vakaenda. Ngezuva ndiro ndiro, vaSadhusi avo vanoti akuna kumuka kwevakafa, vakauya kwaari, vakamubvunza vechiti, “Mudzidzisi, Mosi wakati, ‘Kuti munhu akafa, asina vana, munun'una wake unozoroora mukadzi wake aberekere mukoma wake vana.’ Ndizvo kwaiyapo nesu vakoma vanomwe; nouwo wokutanga wakaroora, wakafa asina vana, wakasiya mukadzi wake kune munun'una wake. Ngokudarozve newechipiri newechitatu, metsa kupedzisira ngowechinomwe. Napakugumisira kwavo veshe mukadzi wakazofawo. Ndizvo mukumuka kwevakafa, unozoita mukadzi waani kwavari vanomwe? Ngokuti veshe vakamuroora.” Jesu wakapingura, akati kwavari, “Munokangaidzwa ngokusikazia zvinyorwa nokuti simba raMwari. Ngokuti mukumuka kwavakafa, avaroori, zve avaroorwi, asi vari vakadai ngengirosi dziri mudenga. Asi ngendaa yokumuka kwevakafa, amuzi kutongodzidza here icho chakaereketwa kwomuri ndiMwari echiti, ‘Inini ndiri Mwari waAbrahama naMwari waIsaka naMwari waJakobe?’ Mwari aasiri Mwari wevakafa akadi, asi wevanopona.” Naapo mbungano yazwa izvi, yakashamiswa ngokudzidzisa kwake. Asi apo vaFarisi vazwa kuti waiya anyararisa vaSadhusi, vakaungana pamwepo. Umwe wavo waiya gweta, wakamubvunza mubvunzo, echimuedza echiti, “Mudzidzisi, ngouri mupango mukuru muMipango?” Naye wakati kwaari, “Unozomuda Mambo Mwari wako ngomwoyo wako weshe, ngomweya wako weshe nemirangariro yako yeshe.” Ichi chiri mupango mukuru nowokutanga. Newechipiri wakadai ngouyu, “Unozomuda muakirwana wako kudai ngokudzida iwewe. Kuneiyi mipango miiri ndipo pasingwisingwi yeMipango yeshe nevaprofeti.” Zvinopano vaFarisi vachaungana, Jesu wakavabvunza echiti, “Munopinimidzenyi ndiKristu? Mwana waani?” Vakati kwaari, “Mukororo waDhavhidha.” Wakati kwavari, “Ndizvo ngenyi Dhavhidha, ari muMweya, unomudaidza kuti Mambo echiti, ‘Mambo wakati kunaMambo wangu, gara ngokumudyo kwangu, metsa ndiite magaa ako chitambarariro chetsoka dzako?’ Ndizvo, kuti Dhavhidha akamudaidza kuti Mambo, zvino uri mukororo wake ngokuitawani?” Kwaiya kusina munhu waikona kumupingura neizwi, zve, kwaiya kusina munhu kubvira ngezuva iro waishinga kuchamubvunza mibvunzo. Naapo Jesu wakaereketa kumbungano nokuvadzidzi vake echiti, “Vanyori nevaFarisi vanogara pachigaro chaMosi. Ndizvo zviro zveshe zvevanomupanga, zviitei muzvingwarire; asi musaita kudai ngemishando yavo; ngokuti vanotera kuereketa vasikazviiti. Ngokuti vanosunga mitwaro inorema, inokonza kutwara nokuiisa pamapfudzi evanhu, asi ivo vemene avatendi kumirudza chinwe chavo kuvadetsera kutwara mitwaro iyo. Asi mishando yavo yeshe vanoiita kuti vaoneke ngevanhu; vanosungira zvibhokisi zvikuru zvine mavhesi pahuma dzavo, vechikurisa mipendero yemagauni avo. Vanoda zvigaro zvepamberi mumishongano yokudya nezvigaro zvepamberi mumhatso dzokudira, nokuchingamidzwa pandau dzemisika, nokudaidzwa ngevanhu kuti ‘Rabhi.’ Asi imwimwi musatenda kudaidzwa kuti ‘Rabhi;’ ngokuti umwe uri Mudzidzisi wenyu neimwimwi mweshe muri hama. Musadaidza munhu kunyazwi ngouri munyika kuti ‘Baba,’ ngokuti umwe uri Baba enyu, vari mudenga. Zve musadaidzwa kuti ‘Matenzi,’ ngokuti Tenzi wenyu umwe ndiKristu. Asi iye uri mukuru pakati penyu unozoita muranda wenyu. Kunyazwi ndiani unozodzikurisa iye unozopfaiswa; nouwo unozodzipfaisa unozokuriswa. “Asi ihehe kwomuri vanyori nevaFarisi, vadziitisi! Ngokuti munokonyera umambo hwomudenga kuvanhu ngokuti amupoteri imwimwi, zve amutenderi avo vanoda kupotera kuti vapotere. [ Ihehe kwomuri vanyori nevaFarisi, vadziitisi, ngokuti munopedza mhatso dzeshirikadzi, ngokudziitisa munoita mikumbiro yakareba, ndizvo munozoashira kutongwa kwakapinda kukura.] “Ihehe kwomuri vanyori nevaFarisi, vadziitisi! Ngokuti munoambuka ruandhle nenyika kutsvaka mudzidzi umwe, naapo atenderuka, munomuita kakapetwa kairi kuita mukororo weGehena kupinda imwimwi. “Ihehe kwomuri imwimwi vatungamiriri mapofu, imwimwi munoti, ‘Kunyazwi ndiani unopika ngeTemperi, aanandaa; asi uwo unopika ngomukore womuTemperi, ndiye unendaa yemhiko yake.’ Imwimwi mapenzi mapofu; ngechiri chakapinda kukura, mukore nokuti Temperi, iro rinochenesa mukore? Zve munoti, ‘Kunyazwi ndiani unopika ngearita, aanandaa; asi kunyazwi ndiani unopika ngechipo chiri padera paro, unendaa.’ Imwimwi mapofu; ngechiri chakapinda kukura, chipo nokuti arita iro rinochenesa chipo? Ndizvo uwo unopika ngearita, unopika ndizvo zveshe zviri padera paro. Nouwo unopika ngeTemperi, unopika ndiro nouwo unogara mukati mwaro. Nouwo unopika ngedenga, unopika ngedendemaro raMwari nouwo unogara padera paro. “Ihehe kwomuri vanyori nevaFarisi, vadziitisi! Munohina chimwe chegumi cheminte neanise nokumini, nemwi mwarekera kuita zvakakura zveMipango, kutonga kwakwo nenyasha nokugondeka; kwaisisira kuti muzviite izvi, musikasii zvimweni zvisikazi kuitwa. Imwimwi vatungamiriri mapofu, munohluza nhunzi mwechitangurira kamera. “Ihehe kwomuri vanyori nevaFarisi, vadziitisi! Ngokuti munosuka kubanze kwetsani nekwendiro, asi mukati mwakazara ngokukara nokudzida. Iwewe muFarisi uri bofu, suka kutanga mukati mwetsani nemwendiro kuti kubanze kwadzo kuchenewo. “Ihehe kwomuri vanyori nevaFarisi, vadziitisi! Ngokuti mwakadai ngemaiba akacheneswa, awo ngegwinyiso anooneka akanaka ngokubanze, asi ngomukati akazara ngemagodo evakafa nezveshe zvinetsvina. Ngokudaro nemwi kubanze munooneka muri vakarurama kunevanhu, asi ngomukati mwakazara ngokudziitisa nokushata. “Ihehe kwomuri vanyori nevaFarisi, vadziitisi! Ngokuti imwimwi munoaka maiba evaprofeti nokunemesa maiba evakarurama. Nemwi munoti, ‘Kudai taiyapo ngemazuva emadzibaba edu, tingadai tisikazi kutenderana navo mukuparadza ngazi yevaprofeti.’ Ndizvo munodzipupurira kuti imwimwi muri vakororo vaavo vakauraya vaprofeti. Zadzisai imwimwi chipimo chemadzibaba enyu. Imwimwi nyoka, imwimwi vana vemabuura, mungaita mapokonyokerenyi kubva mukutongwa nokukandirwa muGehena? Ndizvo, ringirai ndinotuma kwomuri vaprofeti nevakangwara nevanyori; vamweni vavo munozovauraya nokuvakohomera; nevamweni vavo munozovarova mumhatso dzenyu dzokudira nokuvatambudza kubva kudhorobha rimwe kuenda kunerimweni, kuti padera penyu iuye ngazi yeshe yevakarurama yakaparadzwa munyika, kubvira kungazi yaAbheri wakarurama, metsa kuguma kungazi yaZekharia, mukororo waBharakia, uwo wemwakauraya pakati peruwanze nearita. Ngegwinyiso ndinoti kwomuri, izvi zveshe zvinozoitika kunouyu mubarirwana. “Jerusarema, Jerusarema, iwewe unouraya vaprofeti, wechivaponda ngemapuwe avo vanotumwa kwouri, kuwandanyi kwemikuwo yendakada kuunganidza vana vako pamwepo, kudai ngemhambo inounganidza zvitiyo zvayo pashi pemaphaphiro ayo, nemwi amuzikutenda! Penyai, mhatso yenyu yasiiwa kwomuri iri dongo. Ngokuti ndinoti kwomuri, amuchatongozondioni metsa munozoti, ‘Unomuchena uwo unouya ngezina raMambo.’ ” Jesu wakabuda muTemperi; oenda vadzidzi vake vakauya kwaari kuti vamupangidzire mhatso dzeTemperi. Naye wakapingura, akati kwavari, “Amuoni izvi zveshe here? Ngegwinyiso ndinoti kwomuri, arizosiiwi panapa buwe padera pebuwe rimweni risikazoputsirwi pashi.” Achagara paMutunhu wemaOrivhi, vadzidzi vake vakauya kwaari ari ega vechiti, “Tironzere, izvi zvinozoitika riini? Zve chiinyi chinozoita chioniso chokuuya kwako nechokuguma kwenyika.” Jesu wakapingura, akati kwavari, “Ngwarai kuti musazopaukiswa ngomunhu. Ngokuti vazhinji vanozouya ngezina rangu vechiti, ‘Inini ndiri Kristu’, vanozorashikisa vazhinji. Nemwi munozozwa ngokuambana nemawirira okuambana; ngwarai kuti musazotambudzika; ngokuti kunosisira kuti zveshe zviitike, asi magumo aasati aguma. Ngokuti dzinza rinozomukirana nedzinza, noumambo hunozomukirana noumambo; kunozoapo nzara nokuzungunyika kwenyika kundau dzakaparadzana. Izvi zveshe zviri zvokuamba kwemadambudziko. Naapo vanozomuhina mukutambudzwa, navo vanozomuuraya; nemwi munozonyenywa ngemadzinza eshe ngepamusoro pezina rangu. Naapo vazhinji vanozopumhunwa, vanozohinana umwe noumweni nokunyenyana. Nevaprofeti vokunyepa vazhinji vanozoapo, navo vanozorashikisa vazhinji. Ngokuti kushaisha kunozowanda, rudo rwevazhinji runozopora. Asi iye unozoshingirira metsa kumagumo unozoponeswa. Neiri vhangeri roumambo rinozochumairwa munyika dzeshe kuita chapupu kumadzinza eshe; naapo kupera kunozoguma. “Ndizvo apo mwozoona chinyangadzo chokuparadza chaakaereketa ndicho Dhanieri muprofeti chechiema mundau yakachena, (uwo unodzidza ngaazwisise) naapo avo vari muJudhia ngavatizire kumitunhu. Naye uri padera pechachungu chemhatso, asadzaka kutora zviro zviri mumhatso yake. Naye uri mumunda asahwirira sure kootora bhachi rake. Asi ihehe kwavari avo vaanemimba naavo vanoamwisa ngaao mazuva! Kumbirai kuti kutiza kwenyu kusazoitika ngenguva yechando nokuti ngezuva reSabatha. Ngokuti kunozoapo kutambudzika kukurutu, ukwo kusikazi kumboitika kwakadaro kubvira mukuamba kwenyika metsa kuguma zvinopano, zve, akuchatongozoitiki zvakadaro. Kudai mazuva awo asikazofupiswi, akuna nomunhu unozoponeswa; asi ngepamusoro pevakatsanangurwa, awo mazuva anozofupiswa. Ngouwo mukuwo kuti aripo munhu unozoti kwomuri, ‘Penyai, Kristu uri panapa’, nokuti ‘Apo’, musazozvitenda. Ngokuti vanozoapo vaKristu vokunyepa nevaprofeti vokunyepa, navo vanozoita zvioniso zvikuru nemishamiso, kupaukisa, kudai zvechiitika, eya nevakatsanangurwa. Penyai, ndamuronzera izvi ngepamberi. Ndizvo kuti vechizoti kwomuri, ‘Penyai, uri mushango,’ musaendeyo. ‘Penyai, uri mukamera romukati,’ musazotenda. Ngokuti kudai ngemheni inobva kumabvazuva, inojekisa metsa kuguma kumabirirazuva; kunozodaro nokuuya kwoMukororo woMunhu. Ngokuti apo panemiiri yakafa, ndipo pedzinoungana ngwanga. “Ngokukasira ngesure kwokutambudzika kwemazuva awo, zuva rinozoita chidima, nemwedzi auzojeki, nenyeredzi dzinozowa kubva mudenga, nesimba reshe romudenga rinozozungunyiswa. Naapo kunozooneka chioniso choMukororo woMunhu mudenga, nemadzinza eshe enyika anozobonda, nawo anozomuona Mukororo woMunhu echiuya padera pemakore omudenga, anesimba nouthende hukuru. Naye unozotuma ngirosi dzake ngokuridzwa kukurutu kwegwama, nadzo dzinozounganidza vakatsanangurwa vake kubva kumadutu marongomuna, kubva kumagumo amwe omudenga metsa kuguma kumagumo amweni. “Zvinopano dzidzai muedzaniso kumuti womuonde; apo dai rawo riri mbishi, rechiburikira mashakani, imwimwi munozia kuti zienza raapasinde. Ngokudaro imwimwiwo, apo mwoona izvi zveshe, munozia kuti uri pasinde pamisiwo. Ngegwinyiso ndinoti kwomuri kuti uyu mubarirwana auzopindi metsa izvi zveshe zviitike. Denga nenyika zvinozopinda, asi mazwi angu aatongozopindi akadi. “Asi ngendaa yezuva iro neawa iro akuna naumwe unozia, kunyazwi ngirosi dzomudenga nokuti Mukororo, kwega Baba. Ngokuti kudai ngemazuva aNoa, kunozodarozve kuuya kwoMukororo woMunhu. Ngokuti ngemazuva awo ngepamberi pendambi, vakadya, vechimwa nokuroora nokuroodza, metsa rakaguma zuva iro raakapotera ndiro Noa mungarava. Navo avazikuzia metsa ndambi yakaguma, yakavatora veshe, kunozodarowo kuuya kwoMukororo woMunhu. Naapo vanhu vairi vanozoapo mumunda, umwe unozotorwa noumweni unozosiiwa. Vakadzi vairi vechikuya paguyo, umwe unozotorwa noumweni unozosiiwa. Ndizvo rindai; ngokuti amurizii zuva raanozouya Mambo wenyu. Asi mwechizia ichi, kuti kudai munewemhatso aizia mukuwo weinouya ndiwo mbavha iye waizorinda, asikatendi kuti mhatso yake ipwanyiwe. Ndizvo itai vakanasirirwa; ngokuti ngeawa romusikapinimidzi Mukororo woMunhu unouya. “Ndizvo ndiani uri muranda unogondeka newakangwara, uwo mambo wake wakamuemesa kuita mutongi padera pemhatso yake, kuti avape kudya kwavo ngenguva kwayo? Unomuchena muranda uwo apo mambo wake ouya unozomuona echiita kudaro. Ngegwinyiso ndinoti kwomuri, unozomuemesa kuti aite mutongi padera peizvo zveshe zvaanazvo. Asi kuti uwo muranda wakashata unozoti mumwoyo mwake, ‘Mambo wangu unononoka kuuya;’ naye atange kurova varanda avo vari vangani vake, adye echimwa pamwepo nezviradza, mambo wouwo muranda unozouya ngezuva raasikakariri neawa raasikazii. Naye unozomutema kuita zvigurwa, aemese kwaari chikoaniswa chake pakati pevadziitisi. Unozoiteyo kuboorera nokukwetsana kwemazino. “Zvinopano umambo hwomudenga hunoedzaniswa nevasikana varigumi, avo vakatora zvibani zvavo, vakabuda kooshongana nomukwambo. Vashanu vavo vaiya mapenzi nevashanu vaiya vakangwara. Ngokuti avo vaiya mapenzi vakatora zvibani zvavo, avazikutora mafuta navo. Asi vakangwara vakatora mafuta mukati mwezvidziyo zvavo, pamwepo nezvibani zvavo. Apo mukwambo achanonoka, vakakutsira veshe vakaata. Asi pakati pousiku kwakadaidzirwa kuti, ‘Penyai, mukwambo! Budai kooshongana naye.’ Naapo vasikana veshe vakamiruka, vakanasirira zvibani zvavo. Namapenzi akati kunevakangwara, ‘Tipenyiwo mafuta enyu; ngokuti zvibani zvedu zvinodzima.’ Asi vakangwara vakapingura, ‘Azvingadaropi, ngokuti aazokwani isusu nemwi. Asi mwechienda kuneavo vanotengesa, mudzitengere.’ Asi vachaenda kootenga, mukwambo wakauya; naavo vaiya vakanasirira vakapotera naye mumuchadho, noruvhi rwakakonywa. Ngesureni kwakauyawo vasikana vamweni vechiti, ‘Mambo, Mambo, tibeurire.’ Asi iye wakapingura echiti, ‘Ngegwinyiso ndinoti kwomuri, anditongomuzii.’ Ndizvo rindai imwimwi ngokuti amuzii zuva nokuti awa. “Ngokuti zvakadai ngomunhu wakatikuti echida kuenda kunyika imweni, wakadaidza varanda vake, akahina kwavari zviro zvake. Nokuneumwe wakahina matarenda ari mashanu, nokuneumweni wakahina mairi, nokuneumweni rimwe; kuneumwe ngaumwe wavo wakahinwa kudai ngokukona kwake kushandisa, wakaenda rwendo rwake. Paripo uwo wakaashira matarenda mashanu wakaenda akaaberekesa, wakauyirwa ngemashanu amweni. Ngokudarozve uwo wakaashira mairi, wakauyirwazve ngemairi. Asi iye wakaashira rimwe, wakaenda, akatsira mumavhu, akafisha mare yamambo wake. Ngesure kwomukuwo wakareba mambo wevaranda avo wakauya, akaerengerana navo. Nouwo wakaashira matarenda mashanu wakauya, wakaunza matarenda amweni mashanu echiti, ‘Mambo, wakahina kwendiri matarenda aiya mashanu, penya, ndakauyirwa ngeamweni matarenda mashanu.’ Namambo wake wakati kwaari, ‘Wakashuma, iwewe muranda wakanaka nounogondeka; wakagondeka padera pezvishomani, ndinozokuemesa padera pezvakawanda; pinda mukudakara kwamambo wako.’ Wakauyawo uwo wakaashira matarenda mairi, akati, ‘Mambo, wakahina kwendiri matarenda mairi; penya, ndakauyirwa ngematarenda amweni mairi.’ Mambo wake wakati kwaari, ‘Wakashuma, muranda wakanaka nounogondeka; iwewe wakagondeka ngezvishomani, ndinozokuemesa padera pezvakawanda, pinda mukudakara kwamambo wako.’ Wakauyawo uwo wakaashira tarenda rimwe, akati, ‘Mambo, ndakakuzia iwewe kuti uri munhu wakakonza, unokukura pousikazi kukusha nokuunganidza pousikazi kuparadzira. Neni ndakatya, ndakaenda, ndikafisha tarenda rako mumavhu. Penya, iri riri rako.’ Asi mambo wake wakapingura, akati kwaari, ‘Iwewe muranda wakashata nounenungo! Waizia here kuti ndinokukura pendisikazi kukusha nokuunganidza pendisikazi kuparadzira? Ndizvo kwaisisira kuti uise mare yangu kwavari vebhange, kuti mukuuya kwangu ndaizoashirazve yangu nokuuyirwa kwayo. Ndizvo torai kwaari tarenda, muhine kwaari unematarenda gumi. Ngokuti kwaari weshe unacho unozohinwa, naye unozoa nezvakawanda. Asi kunouwo usina, eya, neicho chaanacho chinozobviswa kwaari. Mwechirasha muranda uwo usikadetseri chiro muchidima chiri kubanze. Kunozoiteyo kuboorera nokukwetsana kwemazino.’ “Asi apo Mukororo woMunhu oouya muuthende hwake nengirosi dzeshe naye, naapo unozogara padera pedendemaro routhende hwake. Nepamberi pake anozounganidzwa madzinza eshe, naye unozovaparadzanisa umwe kuneumweni kudai ngomuushi unoparadzanisa makwai kubva kunembudzi. Naye unozoisa makwai ngokumudyo kwake, asi mbudzi ngokumuoshwe kwake. Naapo Mambo unozoti kwavari vari ngokumudyo kwake, ‘Uyai, imwimwi mwakadakadziswa ndiBaba angu, mugare nhaka youmambo hwakanasirirwa imwimwi kubvira pakusikwa kwenyika. Ngokuti ndaiya ndinenzara nemwi mwakandipa kudya, ndaiya ndinenyota nemwi mwakandipa chokumwa, ndaiya ndiri mupfumba nemwi mwakandiashira, ndaiya ndiri mutitinini nemwi mwakandifukidza, ndairwara nemwi mwakandihambira, ndaiya mutirongo nemwi mwakauya kwendiri.’ Naapo vanozomupingura vakarurama vechiti, ‘Mambo, takakuona riini unenzara tikakupa kudya? Nokuti unenyota tikakupa chokumwa? Takakuona riini uri mupfumba, tikakuashira? Nokuti uri mutitinini tikakufukidza? Takakuona riini wechirwara nokuti uri mutirongo tikauya kwouri?’ NaMambo unozopingura echiti kwavari, ‘Ngegwinyiso ndinoti kwomuri, kudai ngezvemwakaita kuneumwe weava vadoko vanun'una vangu, mwakachiita kwendiri.’ Naapo unozoti kwavari vari ngokumuoshwe kwake, ‘Ibvai kwendiri, imwimwi mwakatukwa, muende mumwoto usikaperi, uwo wakanasirirwa Dhiabhorosi nengirosi dzake. Ngokuti ndaiya nenzara amuzi kundipa kudya, ndaiya ndine nyota amuzi kundipa chokumwa, ndaiya ndiri mupfumba amuzikundiashira, ndaiya ndiri mutitinini amuzikundifukidza, ndairwara, ndaiya mutirongo amuzi kundihambira.’ Naapozve avo navo vanozomupingura vechiti, ‘Mambo, takakuona riini unenzara, nokuti unenyota, nokuti uri mupfumba, nokuti uri mutitinini, nokuti wechirwara, nokuti uri mutirongo, nesu atizikukushandira?’ Naapo iye unozovapingura echiti, ‘Ngegwinyiso ndinoti kwomuri, kudai ngezvemusikazi kuitira kuneumwe weava vadoko vanun'una vangu, amuzi kuchiitira kwendiri.’ Naavo vanozoenda mukuororwa kusikaperi, asi vakarurama mukupona kusikaperi.” Naapo Jesu aiya apedza eshe mazwi aya, wakati kuvadzidzi vake, “Munozia kuti ngesure kwemazuva mairi Phasika rinozoapo, noMukororo woMunhu unozopirwa kuti akohomerwe.” Naapo vakaungana vapristi vakuru nevakuru vevanhu kungome yomupristi mukuru, uwo waidaidzwa kuti Kaiafasi. Navo vakaita bangano rokuti vabate Jesu ngourimbwi, vamuuraye. Asi vakati, “Haiwa ngemazuva omushongano wokudya, kuti isazoapo hohoho pakati pevanhu.” Naapo Jesu ari muBhethani mumhatso yaSimoni uwo waiya nemapere, kwakauya kwaari dzimai raiya nenhera yearibhasitera yemakha anomutengo mukuru, naro rakaadurura musoro mwake, achatseama pakudya. Asi apo vadzidzi vake vaona, vakarurumwiswa vechiti, “Kurashanyi uku? Ngokuti aya aizotengeswa ngomutengo mukuru uhinwe kuvarombo.” Asi Jesu echizia, wakati kwavari, “Munoritambudzirenyi dzimai? Ngokuti naro rashanda mushando wakanaka kwendiri. Ngokuti munavo varombo nguva dzeshe, asi inini amuneni akadi nguva dzeshe. Ngokuti radurura makha aya padera pomuiri wangu, raita kunasirira muiri wangu kuikwa. Ngegwinyiso ndinoti kwomuri, kunyazwi ngepari perinozochumairwa vhangeri munyika dzeshe, ichiwo cheraita dzimai iri chinozoereketwa ndicho, kuita chicherechedziso kweriri.” Naapo umwe wegumi navairi, unozwi Judhasi Isikarioti, wakaenda kuvapristi vakuru. Naye wakati kwavari, “Chiinyi chomunozondipa kuti ndikazomuhina kwomuri?” Navo vakamuerengera zvigurwa zvesirivha makumi matatu. Kubvira ngouwo mukuwo iye wakatsvaka nguva yokuti amupire. Zvinopano ngezuva rokutanga rokudya zvingwa zvisina mumera, vadzidzi vakauya kunaJesu vechiti, “Unoda kuti tikunasirire pari pokudyira Phasika?” Naye wakati kwavari, “Endai muguta kunemunhu wakatikuti, mwechiti kwaari, ‘Mudzidzisi unoti nguva yangu yaapedo; ndinozodyira Phasika kumhatso yako nevadzidzi vangu.’ ” Nevadzidzi vakaita kudai ngezvaakavapanga Jesu, navo vakanasirira Phasika. Zvinopano apo kwaita madeekoni, wakatseama pakudya nevadzidzi varigumi navairi. Kwakati vachadya, wakati kwavari, “Ngegwinyiso ndinoti kwomuri, umwe wenyu unozondipira.” Navo vakatambudzika kakurutu, vakatanga kuronza kwaari umwe ngaumwe kuti, “Ndini here, Mambo?” Naye wakapingura, akati, “Uwo washeya ngenyara yake muchidziyo neni, ndiye unozondipira. Mukororo woMunhu unoenda kudai ngezvakanyorwa ndiye. Asi ihehe kuneuwo munhu waanozopirwa ndiye Mukororo woMunhu! Kwaizopinda kunaka kunouwo munhu dai asakabarwa.” NaJudhasi uwo wakamupira wakapingura, akati, “Rabhi, ndini here?” Iye wakati kwaari, “Watoronza.” Vachadya, Jesu wakatora chingwa, akachibonga, akachigura; naye wakachihina kwavari echiti, “Torai, mudye; ichi chiri muiri wangu.” Wakatora tsani, akaibonga, akahina kwavari echiti, “Imwai mweshe kweiri. Ngokuti iyi iri ngazi yangu yechitenderano, inoparadzirwa ngepamusoro pevazhinji kuita kurekererwa kwezvishaishi. Asi ndinoti kwomuri andichazomwi ngesure kwouku kumichero iyi yomuvhini metsa zuva rendinozorimwazve idzva muumambo hwaBaba angu.” Naapo vaiya vaemba ruyo, vakabuda kuenda kuMutunhu wemaOrivhi. Naapo Jesu wakati kwavari, “Imwimwi mweshe munozopumhuniswa ndini usiku huno; ngokuti kwakanyorwa kuti, ‘Ndinozorova muushi nemakwai edanga anozopararira.’ Asi ngesure kwokumuka kwangu ndinozoenda pamberi penyu muGarire.” Asi Petro wakapingura, akati kwaari, “Kunyazwi veshe vanozopumhuniswa ndiwe, inini anditongozopumhuniswi.” Jesu wakati kwaari, “Ngegwinyiso ndinoti kwouri, usiku huno, risati rarira jongwe, iwewe unozondiramba katatu.” Petro wakati kwaari, “Kunyazwi ndechizofa newe, anditongozokurambi.” Nevadzidzi veshe vakaronza kudaro. Naapo Jesu wakauya navo kundau inozwi Getsemani, akati kuvadzidzi vake, “Garai panapa imwimwi ndichaendapo kookumbira.” Naye wakatora navo Petro navakororo vairi vaZebhedhi, naye wakatanga kusururika nokutambudzika kakurutu. Zvino wakati kwavari, “Mweya wangu unotambudzika kakurutu metsa kufa. Garai panapa, murinde neni.” Naye wakaenda mberi kadodoko, akawa ngehope yake, akakumbira echiti, “Baba angu, kudai kungaitika, tsani iyi ngaibve kwendiri; asi haiwa kudai ngokuda kwangu, asi kudai ngokuda kwako.” Naye wakauya kunevadzidzi vake, akavaona vakaata, akati kuna Petro, “Ndizvo mwakorera kurinda neni awa rimwe here? Rindai, mwechikumbira, kuitira kuti musapinda mukuedzwa; mweya ngegwinyiso unotenda, asi nyama aina simba.” Zve ngokwechipiri wakaenda echiti, “Baba angu, kudai iyi isikapindi ngokubanze kwokuti ndiimwe inini, kuda kwako ngakuitike.” Wakauyazve akavaona vakaata, ngokuti madziso avo aiya echiremerwa. Naye wakavasiyazve, akaenda, akakumbira ngokwechitatu, echironza mazwi ndiwo ndiwo. Naapo wakauya kuvadzidzi, akati kwavari, “Muchakaata here zvinopano, mwechizorora? Penyai mukuwo waapasinde, noMukororo woMunhu unohinwa munyara dzevashaishi. Mirukai, tiende; penyai, waa pasinde uwo unondipira.” Achaereketa, penya, Judhasi, umwe wevanegumi navairi, wakauya, nayo mbungano huru vaneshoti nenduku, vechibva kuvapristi vakuru nevakuru vevanhu. Zvinopano uwo wakamupira, waiya avapa chioniso echiti, “Uwo wendinozochingamidza ngomuromo ndiye; mwechimubata.” Paripo wakauya kunaJesu, akati, “Mwauya, Rabhi”; naye wakamuchingamidza ngomuromo. Jesu wakati kwaari, “Hama, ita icho chewahambira kuita.” Naapo vakauya, vakamubata Jesu ngenyara dzavo, vakamutora. Penya umwe weavo vaiya naJesu wakatambanudza nyara yake, akashwamura shoti yake, wakatema muranda womupristi mukuru, akagura nzee yake. Naapo Jesu wakati kwaari, “Hwirinza shoti yako mundau mwayo; ngokuti avo veshe vanotora shoti vanozopera ngeshoti. Aupinimidzi here kuti ndingakumbira kunaBaba angu, naye ungatuma zvinopano ngirosi dzinopinda hondo dzirigumi nambiri ngokuwanda? Asi kuti zvakadaro zvinyorwa zvingazoita mazadzisikirenyi, zvinoti kunosisira kuti zviitike kudaro?” Ngeawa ririro Jesu wakati kumbungano, “Mwabuda here muneshoti nenduku kuti mundibate kudai ngevanorwa negandanga? Ndakagara nemwi mazuva eshe ndechimudzidzisa muTemperi, nemwi amuzi kundibata. Asi izvi zveshe zvakaitika kuti kuzadzisike izvo zvakanyorwa ngevaprofeti.” Naapo vadzidzi vake veshe vakamusiya, vakatiza. Naavo vaiya vamubata Jesu vakamukweya kuenda kunaKaiafasi mupristi mukuru, apo pevaiya vakaungana vanyori nevakuru. Asi Petro wakamuteera ari kuretu, metsa kuguma kungome yomupristi mukuru, naye wakapotera mukati, akagara pashi nevadzimbabwe kuti aone magumo azvo. Nevapristi vakuru nemakurukota eshe vakatsvaka chapupu chokunyepa kumuitira ndaa Jesu kuti aurawe. Asi avazi kuiona; kunyazwi zvizhinji zvapupu zvokunyepa zvakauya, asi avazi kuiona. Pakugumisira kwakauya zviiri zvapupu zvokunyepa. Avo vakati, “Uyu wakati, ‘Ndinesimba rokuputsa Temperi raMwari, nangemazuva matatu ndinozoriakazve.’ ” Nomupristi mukuru wakamiruka, akati kwaari, “Aupinguri chiro here? Chiinyi chevanopupura ava kukuitira ndaa?” Asi Jesu wakanyarara. Nomupristi mukuru wakati kwaari, “Ndinokuphikisa ndiMwari Unopona, kuti utironzere kuti uri Kristu here, Mukororo waMwari?” Jesu wakati kwaari, “Watoronza; kani hai ndinoti kwomuri, ngesure kweizvi munozoona Mukororo woMunhu echigara pashi ngokumudyo kwoUnesimba, echiuya ari padera pemakore omudenga.” Naapo mupristi mukuru wakabaura zvokufuka zvake echiti, “Waereketa kutuka. Tichatama ngenyi zvimweni zvapupu? Penyai zvinopano mwazwa kutuka kwake. Munopinimidzenyi imwimwi?” Navo vakapingura, vakati, “Unosisira kufa.” Naapo vakamupfirira muhope mwake, vakamupamhadza, vakamurova ngendonga vechiti, “Profeta kwetiri, iwewe Kristu, kuti ndiani wakurova?” NaPetro waiya akagara pashi kubanze paruwanze; nomusikana wakauya kwaari echiti, “Iwewewo waiya naJesu weGarire.” Asi iye wakaramba pamberi pavo veshe echiti, “Andizii chounoreketa.” Naapo abuda kuenda muberere, musikana umweni wakamuona, akati kuneavo vaiyapo, “Uyu naye waiya naJesu weNazaretha.” Zve wakaramba ngokupika mhiko kuti, “Andimuzii munhuwo.” Ngesure kwekamukuwo vakauya avo vaiema apo, navo vakati kuna Petro, “Ngegwinyiso iwewe newe uri umwe wavo, ngokuti kuereketa kwako kunopangidzira kudaro.” Naapo wakatanga kutuka nokupika kuti, “Anditongomuzii munhuwo.” Paripo jongwe rakarira. NaPetro wakakarakadza izwi raJesu, iro raakaereketa kuti, “Risati rarira jongwe, iwewe unozondiramba katatu.” Naye wakabuda kubanze, akachema kakurutu. Kwaedza vapristi vakuru veshe nevakuru vevanhu vakaita bangano ndiJesu kuti vamuuraye. Naapo vaiya vamusunga, vakamukweya kuenda naye kunaPiratu mutongi. Naapo Judhasi, uwo wakamupira, aona kuti Jesu wakaitirwa ndaa, wakatenderuka, akaunzazve zvigurwa zvesirivha makumi matatu kuvapristi vakuru nevakuru echiti, “Ndakashaisha ngokupira ngazi isina ndaa.” Asi vakati, “Chinenyi icho kwetiri? Wechidzionera wemene.” Naye wakakandira zvigurwa zvesirivha muTemperi, akaenda akadzisungira. Nevapristi vakuru vakatora zvigurwa zvesirivha, vakati, “Akutenderwi kuti tizviise mubhokisi remare yezvipo, kwechioneka kuti imare yengazi.” Vakaita bangano, vakatenga ndizvo munda womuumbi wehari, kuti vaikemwo vapara. Ndizvo uwo munda unodaidzwa metsa nanyamashi kuti, Munda weNgazi. Naapo rakazadzisika izwi iro rakaereketwa ndiJeremia muprofeti echiti, “Navo vakatora zvigurwa zvesirivha makumi matatu, mutengo wakatenderwana ngevamweni vevana vaIsuraeri kuti vamutenge ndiwo. Navo vakazvipa kutenga munda womuumbi wehari, kudai ngezvaakandipanga Mambo.” NaJesu wakaema pamberi pomutongi. Nomutongi wakamubvunza echiti, “Iwewe uri Mambo wevaJudha here?” Jesu wakati, “Watoronza kudaro.” Naapo aitirwa ndaa ngevapristi vakuru nevakuru, aazikupingura chiro. Zvino Piratu wakati kwaari, “Auzvizwi here izvo zvakawanda zvevanokuitira ndaa ndizvo?” Naye aazi kupingura neizwi, ngokudaro mutongi wakashamiswa kakurutu. Zvinopano pamushongano wokudya, mutongi waindosunhurira vanhu bhanditi rimwe, iro revaida. Ngouwo mukuwo vaiya nebhanditi raiya nembirikira, raizwi ndiBharabhasi. Ndizvo apo vakaungana pamwepo, Piratu wakati kwavari, “Munoda kuti ndimusunhurire anani, Bharabhasi nokuti Jesu unozwi Kristu?” Ngokuti iye waizia kuti yaiya ndaa yendurumwa yavakamupira ndiyo. Apo agara pashi padendemaro rokutonga, mukadzi wake wakatumira kwaari echiti, “Usaa nechiro chounoita kunouno munhu wakarurama; ngokuti ndatambudzwa ngezvakawanda nyamashi mukurota ngendaa yake.” Asi vapristi vakuru nevakuru vevanhu vakanyengerera mbungano kuti ikumbire Bharabhasi nokuuraya Jesu. Mutongi wakati kwavari, “Ndiani pakati paavo vairi womunoda kuti ndimusunhurire?” Navo vakati, “Bharabhasi.” Piratu wakati kwavari, “Ndizvo ndinozoitenyi ndiJesu, uwo unozwi Kristu?” Veshe vakati, “Ngaakohomerwe.” Naye wakati, “Ngenyi? Kushatanyi kwaakaita?” Asi avo vakapinda kudaidzira kuti, “Ngaakohomerwe.” Naapo Piratu aona kuti asaikona kudetsera chiro, asi kwega kuti hohoho yaimuswa, wakatora mvura, akashamba nyara dzake pamberi pembungano echiti, “Inini andina ndaa yengazi youyu munhu. Dzionerenyi pachenyu imwimwi.” Nevanhu veshe vakapingura, vakati, “Ngazi yake ngaiuye padera pedu nepadera pevana vedu.” Naapo wakavasunhurira Bharabhasi. Naapo aiya ashwapura Jesu yaamho, wakamuhina kuti akohomerwe. Naapo majoni omutongi akatora Jesu kuenda naye mumhatso yokutongera, akaunganidza pamberi pake chikwata cheshe chemajoni. Nawo akamukumura, akamupfekedza gauni rakatsvukuruka. Naapo varuka dzungudza reminzwa, vakariisa musoro mwake, norutsanga munyara yake yokumudyo; navo vakagwadama pashi pamberi pake, vakamuitira jee vechiti, “Mwauya, Mambo wevaJudha!” Navo vakamupfira mata, vakatora rutsanga vakamurova musoro. Naapo vaiya vamuitira jee, vakakumura gauni, vakamupfekedza zvokufuka zvake, navo vakamukweya koomukohomera. Naapo vachabuda kubanze vakaona munhu weKureni, zina rake raizwi Simoni; uwo wavakaangiridza kuti atware muchinjiko wake. Naapo vaguma kundau inozwi Gorogotha, ukwo kunoti, Ndau yeDehenya, vakamupa vhini rakakumanidzwa nezvinozhazha kuti arimwe. Kwakati araira, wakaramba kurimwa. Naapo vaiya vamukohomera, vakakoanisana zvokufuka zvake, vechiita mabhigidha. Navo vakagara pashi, vechimurindapo. Navo vakaisa padera pesoro rake mazwi endaa yake, yakanyorwa kuti, “UYU NDIJESU, MAMBO WEVAJUDHA.” Naapo kwakakohomerwa naye magandanga mairi, rimwe ngokumudyo nerimweni ngokumuoshwe. Navo vaipinda ndipo vakamutuka, vechigudwaira masoro avo vechiti, “Iwewe unoputsa Temperi nokuriaka ngamazuva matatu, dziponese. Kuti uri Mukororo waMwari, dzaka pamuchinjikopo.” Ngokudarowo vapristi vakuru vakamuitira jee, pamwepo nevanyori nevakuru vevanhu vechiti, “Iye wakaponesa vamweni, asi aakoni kudziponesa. NdiMambo waIsuraeri, ngaadzake pashi zvinopano kubva pamuchinjiko, nesu tinozomutenda. Iye wakagonda kunaMwari; ngaachimununura zvinopano, kuti echimuda; ngokuti wakati, ‘Inini ndiri Mukororo waMwari.’ ” Nemagandanga awo akakohomerwa naye akamutukawo zvimwezvo. Zvinopano kubvira ngeawa rechitanhatu chaiyapo chidima padera penyika yeshe metsa kuguma awa rechipfumbamwe. Rooita awa rechipfumbamwe Jesu wakadaidzira ngeizwi guru echiti, “Eloi, Eloi, Lama Sabakathani?” Uko kunoti, “Mwari wangu, Mwari wangu, wandisiya ngenyi?” Vamweni avo vaiema apo vazwa, vakati, “Uyu unodaidza Erija.” Paripo umwe wavo wakarumba wakatora siponji, wakainyika muvhini rinorungura, wakariisa parutsanga, akamuita kuti amwe. Asi vamweni vakati, “Murekerei, ngatione kuti Erija unouya here koomuponesa.” Naapo Jesu adaidzirave ngeizwi guru, wakafa. Penya, jira reTemperi rakabaurwa kuita mairi, kubvira ngedera metsa kuguma pashi; nenyika yakazungunyika nemapuwe akamweka; nemaiba akabeurwa nemiiri mizhinji yevakafa vakarurama yakamuswa. Navo vakabuda mumaiba ngesure kwekumuka kwake, vakapotera mudhorobha rakachena, vakaoneka ngevazhinji. Zvinopano apo nduna yezana, naavo vaiya nayo, vechirinda Jesu, vaona kuzungunyika kwenyika neizvo zvakaitika, vakatya kakurutu vechiti, “Ngegwinyiso uyu waiya Mukororo waMwari!” Kwaiyapo madzimai mazhinji vairingira vari kuretu, avo vaiya vakamuteera Jesu kubva Garire, vechimushandira. Pakati pavo kwaiyapo Maria Magadhareni, Maria mai aJakobe naJosefa, namai evana vaZebhedhi. Kwooita madeekoni kwakauya gurudza reArimathia, zina raro raizwi Josefa, iro naro raiya mudzidzi waJesu. Iro rakaenda kunaPiratu, rikapota kupuwa muiri waJesu. Naapo Piratu wakapanga kuti riupuwe. Naapo Josefa aiya atora muiri uwo, wakauputira ngejira rakachena. Naye wakamuisa muiba idzva raiya rake, iro raiya akatsa pabuwe; naye wakamburumbudzira buwe guru pamuromo weiba akaenda. Kwaiyapo Maria Magadhareni naMaria umweni vakagara ngepamberi peiba. Nechimangwani ngesure kwezuva rokunasirira Phasika, vapristi vakuru nevaFarisi vakaungana kunaPiratu vechiti, “Changamire, tinokarakadza kuti uwo muchengedzi wakati achapona, ‘Ngesure kwemazuva matatu ndinozomukazve.’ Ndizvo panga kuti iba rigwinyisiswe metsa kuguma zuva rechitatu, kuti vasazouya vadzidzi vake usiku, vamube nokuronza kune vanhu kuti, ‘Wakamuka kwevakafa.’ Nokuchengedza kwokugumisira kungapinda kushata kunoukwo kwokutanga.” Piratu wakati kwavari, “Imwimwi munavo varindi. Endai mwechirigwinyisisa kudai ngezvomunokona.” Ndizvo vakaenda, vakagwinyisisa iba, vechinamira namo pabuwe, varindi varipo navo. Ngesure kweSabatha, mumambakwedza ngezuva rokutanga revhiki, kwakauya Maria Magadhareni noumweni Maria koona iba. Penya, kwaiya kuriyo kuzungunyika kukurutu kwenyika; ngokuti ngirosi yaMambo yakadzaka kubva mudenga, yakauya yakamburumbudza ikabusa buwe, nayo yakagara padera paro. Kuoneka kwayo kwaiya kwakadai ngemheni, nezvokufuka zvayo zvaiya zvakachena kudai ngechando. Ngokuitya varindi vakahuta, vakaita kudai ngevakafa. Nengirosi yakati kumadzimai, “Musatya imwimwi; ngokuti ndinozia kuti munotsvaka Jesu uwo wakakohomerwa. Apachina panapa akadi; ngokuti wamuka, kudai ngezvaakaronza. Uyai muone pandau apo paaiya akaata. Kasirai muende muronzere vadzidzi vake kuti, ‘Wamuka kwevakafa, penyai, unomutangira kuenda Garire; naapo munozomuonapo! Ringirai, ndamuronzera.’ ” Navo vakaenda ngokukasira vechibva paiba, vanokutya nokudakara kukurutu; vakarumba kooronzera vadzidzi vake. Penya, Jesu wakashongana navo, akati, “Mwauya.” Navo vakauya vakabata tsoka dzake, vakamudira. Naapo Jesu wakati kwavari, “Musatya; endai mwooronzera vanun'una vangu kuti vaende Garire, vanozondionapo.” Naapo vachaenda, penya vamweni vevarindi vakauya kudhorobha, vakaronzera vapristi vakuru zveshe izvo zvakaitika. Naapo vakaungana pamwepo nevakuru vevanhu, apo vaiya vapangana, vakahina mare yakawanda kumajoni vechiti, “Ronzai imwimwi kuti vadzidzi vake vakauya nousiku, vakamuba takaata. Kudai izvi zvikanyazwika ngomutongi, tinozonasirisa kuti musaa nendaa.” Navo vakatora mare iyo, vakaita kudai ngezvevakapangwa, neizwi iri rakashumirwa pakati pevaJudha metsa nanyamashi. Nevadzidzi gumi naumwe vakaenda muGarire, pamutunhu apo paakavaronzera Jesu. Naapo vamuona vakamudira. Asi vamweni vakagononda. NaJesu wakauya kwavari, akaereketa kwavari echiti, “Simba reshe rakapuwa kwendiri mudenga nomunyika. Ndizvo endai, mwechiita vadzidzi kumadzinza eshe, mwechivabhabhatidza ngezina raBaba neroMukororo neroMweya Wakachena, mwechivadzidzisa kungwarira zviro zveshe zvendakamupanga; penyai, ndinemwi mazuva eshe metsa kuguma kwenyika.” Kutanga kwevhangeri raJesu Kristu, Mukororo waMwari. Kudai ngezvezvakanyorwa munaIsaya muprofeti, “Ringirai, ndinotuma munyai wangu pamberi pehope yako, uwo unozonasirira njira yako. Izwi rounodaidzira mushango kuti, ‘Nasirirai njira yaMambo, ruramisai makwara ake.’ ” Wakauya Johani uwo waibhabhatidza mushango, echichumaira rubhabhatidzo rwokutenderuka kwokurekererwa zvishaishi. Vakabuda kuenda kwaari venyika yeshe yeJudhia, navo veshe veJerusarema; navo vakabhabhatidzwa ndiye murwizi rweJorodhani, vechitenda zvishaishi zvavo. NaJohani waiya akafuka jira remamviri engamera anebhande redoo muchiunu chake, naye wakadya ndongwe neuchi womushango. Naye wakachumaira echiti, “Iye unouya sure kwangu unesimba kupinda inini, andisisiri kuti nditsikitsire ndisunhure rusinga rwemagwada ake. Inini ndakamubhabhatidza mumvura; asi iye unozomubhabhatidza ndiMweya Wakachena.” Ngemazuva awo, Jesu wakabva Nazaretha reGarire, akabhabhatidzwa ndiJohani muJorodhani. Paripo achabuda kubva mumvura wakaona denga rechibeurwa, noMweya wechidzaka padera pake kudai ngenjia neizwi rechibva mudenga rechiti, “Iwewe ndiwe Mukororo wangu unodikanwa, uwo wendinonasa kudakara ndiye.” Paripo Mweya wakamusundira mushango. Waiyamwo mushango mazuva makumi marongomuna, echiedzwa ndiSathani, naye waiya pamwepo nezvikara zvomushango, nengirosi dzakamushandira. Ngesure kwokusungwa kwaJohani, Jesu wakauya muGarire echichumaira vhangeri raMwari echiti, “Nguva yasvika noumambo hwaMwari hwaapasinde; tenderukai, mutende vhangeri.” Echipinda ngepasinde peruandhle rweGarire, wakaona Simoni naAndreu munun'una waSimoni vechikandira nhaa muruandhle; ngokuti vaiya vabati vehove. Jesu wakati kwavari, “Nditeerei neni ndinozomuita vabati vevanhu.” Paripo vakasiya nhaa dzavo vakamuteera. Echipinda mberi pafupi, wakaona Jakobe mukororo waZebhedhi naJohani munun'una wake, vaiya mungarava vechinasirisa nhaa dzavo. Paripo wakavadaidza; vakasiya baba avo Zebhedhi nevaranda vari mungarava, navo vakamuteera. Vakahamba kuenda muKhapernaume, paripo ngezuva reSabatha wakapotera mumhatso yokudira akadzidzisa. Vakashamiswa ngokudzidzisa kwake, ngokuti wakavadzidzisa kudai ngounesimba asikaiti kudai ngevanyori. Paripo waiyapo munhu mumhatso yavo yokudira, waiya nomweya une tsvina, naye wakadaidzira echiti, “Tinenyi isusu newe, Jesu weNazaretha? Wauya kutiparadza here? Ndinokuzia kuti urianani, uri Wakachena waMwari.” Jesu wakamukaraidza echiti, “Nyarara, buda kubva kwaari.” Nomweya unetsvina wakamusukumidza, ukaboorera ngeizwi guru, ukabuda kubva mwaari. Navo veshe vakashamiswa, ngokudaro vakabvunzisana vechiti, “Chiinyi ichi? Kudzidzisa kutsva kunesimba! Unopanga kunyazwi mweya inetsvina, nayo inomupurutana.” Paripo mbiri yake yakapararira kunyika dzeshe dzakatendenedza Garire. Paripo abuda kubva mumhatso yokudira, wakapotera mumhatso yaSimoni naAndreu, pamwepo naJakobe naJohani. Ambuya vaSimoni vaiya vakaata vechirwara ngemutsarara, paripo vakamuronzera ndivo. Naye wakauya kwavari, akavabata ngenyara, akavamirudza; nemutsarara wakavasiya, navo vakavashandira. Madeekoni zuva rabira vakaunza kwaari veshe vairwara nevaiya nemadhimoni. Nevedhorobha reshe vakaungana pamusiwo. Naye wakaponesa vazhinji vairwara ngenhenda dzakaparadzana, akadzinga madhimoni mazhinji, asikatenderi kuti madhimoni aerekete, ngokuti aimuzia. Mumangwanani maishi wakamiruka, akabuda akaenda pandau iri yega, akakumbira aripo. Simoni naavo vaiya naye vakateera vechimutsvaka yaamho. Vakamuona, vakati kwaari, “Veshe vanokutsvaka.” Wakati kwavari, “Ngatiende kumaguta amweni, kuti ndimbochumairazve iyoyo, ngokuti ngezvandakauyira.” Wakahamba echichumaira mumhatso dzavo dzokudira muGarire mweshe, echidzinga madhimoni. Wakauya kwaari munhu waiya nemapere, akamugwadamira, echimupota echiti kwaari, “Kudai wechida ungandimhodyosa.” Naye wakamuzwira urombo, wakatambanudza nyara yake, akamubata akati kwaari, “Ndinoda, mhodyoswa.” Paripo mapere akabva kwaari, naye wakamhodyoswa. Wakamupangirisa, akamuendesa paripo, akati kwaari, “Ngwara kuti usazoronzera munhu ngeizvi; asi enda, udzipangidzire kunemupristi, uhine ngendaa yokumhodyoswa kwako izvo zvaakaemesa Mosi, kuita chapupu kwavari.” Asi iye wakabuda, akatanga kuchumaira kakurutu nokuereketa ngeizvi, ngokudaro Jesu waiya asikachakoni kupotera mudhorobha pamhene, asi waiya kubanze pandau iri yega; navo vakauya kwaari kubva kumarutii eshe. Naapo aiya apoterazve muKhapernaume ngesure kwemazuva akatikuti, kwakashumwa kuti uri mumhatso. Vazhinji vakaungana pamwepo, ngokudaro pakatamika nendau kunyazwi nepamusiwo; naye wakachumaira izwi kwevari. Navo vakaguma kwaari, vakaunza kwaari munhu wakaoma muiri, akatwarwa ngevarongomuna. Vechikorera kukwedzera kwaari ngendaa yembungano, vakabweshura denga ngepaaiyapo; naapo vabeura, vakadzasa musengere apo paiata uwo wairwara ngokuoma muiri. Jesu echiona kutenda kwavo, wakati kuneuwo wakaoma muiri, “Mukororo, zvishaishi zvako zvarekererwa.” Asi vaiyapo vanyori vamweni vakagara, vechidzibvunza mumwoyo yavo vechiti, “Uyu unoereketa kudai ngenyi? Unotuka Mwari! Ndiani unokona kurekerera munhu zvishaishi asi Mwari ega?” Paripo Jesu, echizia mumweya wake kuti vaidzibvunza zvakadaro mukati mwavo, wakati kwavari, “Munodzibvunza ngenyi ngeizvi mumwoyo yenyu? Chiinyi chakapinda kureruka, kuronza kunouwo unorwara ngokuoma muiri kuti, ‘Zvishaishi zvako zvarekererwa,’ nokuti kuronza kuti, ‘Miruka, utore manhi ako, uhambe?’ Asi kuti muzie kuti Mukororo woMunhu unesimba munyika rokurekerera zvishaishi,” wakati kuneuwo unorwara ngokuoma muiri, “Ndinoti kwouri, miruka, utore manhi ako, uende kumhatso yako.” Naye wakamiruka, paripo akatora manhi ake, akabuda kubanze pamberi pavo veshe; ngokudaro veshe vakashamiswa kakurutu, vakamuirikidza Mwari vechiti, “Atisati taona zvakadai!” Naye wakabuda kuendazve kuruandhle; yeshe mbungano yakauya kwaari, naye wakaidzidzisa. Echipinda wakaona Revhi mukororo waArifeusi akagara panothererwa chibharo naye wakati kwaari, “Nditeere.” Naye wakamiruka, akamuteera. Kwakaitika kuti apo akagara pakudya mumhatso mwake, vatheresi vazhinji nevashaishi vakagara pashi naJesu nevadzidzi vake; ngokuti vaiya vazhinji vaimuteera. Vanyori vevaFarisi, vechiona kuti waidya nevashaishi nevatheresi, vakati kunevadzidzi vake, “Ngenyi echidya nevatheresi nevashaishi?” Naapo Jesu azwa, wakati kwavari, “Avatami n'anga avo vakagwinya, asi avo vanorwara; andizi kuuya kudaidza vanhu vakarurama, asi vashaishi.” Vadzidzi vaJohani nevaFarisi vaiya vechiera kudya; navo vakauya vakati kwaari, “Ngenyi vadzidzi vaJohani nevadzidzi vevaFarisi vechiera kudya, asi vadzidzi vako avaeri?” Jesu wakati kwavari, “Vanaye nyamuroora vanoera here kudya mukwambo achinavo? Mukuwo wevanaye mukwambo, avazokoni kuera kudya. Asi mazuva anozouya, apo mukwambo unozoduswa kubva kwavari, naapo vanozoera kudya ngeiro zuva. Apana munhu unotungira chitembwe chitsva padera pejira rakatsakara; kuti zvakadaro, ichi chitsva chakatungirwa apo chinozobaurisa jira rakatsakara, nokubauka kwakapinda kushata kunozoitika. Akuna munhu unoisa vhini idzva munyede dzevhini dzakatsakara; kuti zvakadaro, vhini rinozoputisa nyede, nevhini rinozorashika pamwepo nenyede; asi vhini idzva rinoiswa munyede itsva.” Ngezuva reSabatha rimweni, echihamba ngepakati peminda yekoroni, vadzidzi vake vakatanga kupurura mitsonzoti yekoroni vechihamba. VaFarisi vakati kwaari, “Ringira, vanoita ngenyi ngezuva reSabatha icho chisikatenderwi?” Wakati kwavari, “Amuzi kumbodzidza here icho chaakaita Dhavhidha, apo aitama, afukama, iye naavo vaiya naye; kuti wakapotera mumhatso yaMwari ngemazuva aAbhiathari mupristi mukuru, akadya zvingwa zvikapirwa, izvo zvisikatenderwi kudyiwa, asi ngevapristi vega, akahinazve kwavari avo vaiya naye?” Wakati kwavari, “Sabatha rakaitirwa vanhu, vanhu avazi kuitirwa Sabatha. Ndizvo Mukororo woMunhu ndiMambo weSabatha.” Wakapoterazve mumhatso yokudira, kwaiyapo munhu waiya nenyara yakaputa. Navo vakamuringisisa, kuona kuti unozomuponesa here ngezuva reSabatha, kuti vamuparise ndaa. Naye wakati kunemunhu uwo waiya nenyara yakaputa, “Uyai pano.” Wakati kwavari, “Chiinyi chinotenderwa ngeSabatha, kuita zvakanaka nokuti zvakashata, kuponesa munhu nokuti kuuraya?” Asi vakanyarara. Naapo aiya avaringisisa ngoushungu, echisvipa mwoyo ngokukonza kwomwoyo yavo, wakati kumunhuwo, “Tambanudza nyara yako.” Naye wakaitambanudza. Nenyara yake yakaponeswa. VaFarisi vakabuda, paripo vakapangana nevekwaHerodhi, kuti vangamuita maurairenyi. Jesu wakabvapo nevadzidzi vake, akaenda kuruandhle, nembungano huru yakabva Garire yakamuteera; neyaibvawo Judhia, Jerusarema, Idhumia, neyaibva ruseri rweJorodhani, nevanotendenedza Thire neSidhoni, mbungano huru yechizwa ngezviro zvikuru zvaakaita, yakauya kwaari. Naye wakaronza kuvadzidzi vake kuti ngarava doko ngaimugarire ngendaa yembungano, kuti isazomutsikirira; ngokuti waiya akarapa vazhinji, veshe avo vaiya nenhenda vakamutsikirira kuti vamubate. Nomweya inetsvina apo yamuona, yakawa pamberi pake, ikaboorera yechiti, “Iwewe uri Mukororo waMwari.” Naye wakaikaraidza kakurutu kuti isazoita kuti aziikanwe. Wakakwira mumutunhu, akadaidza kwaari avo vaaida, navo vakauya kwaari. Wakaemesa vanegumi navairi kuti vagare naye nokuvatuma koochumaira nokuvapa simba rokudzinga madhimoni. Wakadudza Simoni kuti Petro; wakadudza Jakobe naJohani munun'una wake vakororo vaZebhedhi kuti Bhoanegesi, kuronza kuti, Vakororo voKutinhira; Andreu, Firipi, Bhatoromeu, Mateu, Thomasi, Jakobe, mukororo waArifeusi, Thadheusi, Simoni muKhenani naJudhasi Isikarioti, uwo wakamupira. Zvino wakapotera mumhatso; nembungano yakaunganazve, ngokudaro vakakorera nokudya chingwa. Naapo hama dzake dzazwa, dzakabuda kuuya koomubata, ngokuti vakati, “Unohahamuka.” Nevanyori avo vakadzaka kubva Jerusarema vakati, “Una Bheerizebhuri, naye ngesimba romuzvare wemadhimoni unodzinga madhimoni.” Naye wakavadaidza kwaari, akaereketa kwavari ngemiedzaniso akati, “Sathani ungaita marashirenyi Sathani? Kudai umambo hwechidziparadza ngekwawo, uwo umambo ahungakoni kuema. Nokudai mhatso ikadziparadza ngekwayo, iyo mhatso aingakoni kuema. Kudai Sathani echidzimukira, echidziparadza, aangakoni kuema, asi unozogumirwa. Asi apana munhu ungakona kupotera mumhatso youwo unesimba, nokuparadza nhumbi dzake, kuti asikazi kutanga kusunga uwo unesimba; naapo unozoparadza mhatso yake. “Ngegwinyiso ndinoti kwomuri, zvishaishi zveshe nokutuka kweshe kwevanozotuka ndikwo zvinozorekererwa kuvakororo vevanhu. Asi kunyazwi ndiani unozotuka Mweya Wakachena, aazorekererwi, asi unendaa yechishaishi chemhera nariini.” Ngokuti ivo vakati, “Une mweya unetsvina.” Kwakauya mai ake nevanun'una vake, vechiema ngokubanze, vakatumira kwaari kumudaidza. Nembungano yaiya yakagara naye, yakati kwaari, “Ringira, mai ako nevanun'una vako vari kubanze vanokutsvaka.” Naye wakavapingura akati, “Ndiani mai angu nevanun'una vangu?” Echiringira kuneavo vaiya vakagara vakamutendenedza, wakati, “Ringirai mai angu nevanun'una vangu! Kunyazwi ndiani unozoita kuda kwaMwari uwo ndiye munun'una wangu, mukunda namai.” Wakatanga kudzidzisazve ari pahumbikumbi yoruandhle. Nembungano hurutu yaamho yakaungana kwaari, ngokudaro wakapotera mungarava, akagara muruandhle; mbungano yeshe yaiya pahumbikumbi pasinde poruandhle. Wakavadzidzisa zvakawanda ngemiedzaniso, mukudzidzisa kwake wakati kwavari, “Purutanai! Mukushi wakabuda kookusha. Kwakaitika mukukusha kwake, kuti dzimweni mbeu dzakawa panjira, neshiri dzakauya dzakadzidya. Nedzimweni dzakawa pandau inetsanza, apo paiya pasina mavhu akawanda, paripo dzakamera, ngokuti paiya pasina mavhu akadzama. Kwakati zuva rabuda, dzakatsva ngokuti dzaiya dzisina nzinde, dzakaputa. Nedzimweni dzakawa pakati peminzwa, neminzwa yakakura, yakadzidzipa, nadzo adzizi kubereka michero. Nedzimweni dzakawa pamavhu akanaka, dzakabereka michero dzechikura, dzechiwanda, dzakabereka dzimweni makumi matatu, dzimweni makumi matanhatu, dzimweni zana.” Naye wakati, “Iye unenzee dzokuzwa ngaazwe.” Naapo ari ega, avo vaiya naye nevanegumi navairi vakamubvunza ngendaa yemiedzaniso. Wakati kwavari, “Kwakapuwa kwomuri kuzwisisa zvakafishika zvoumambo hwaMwari, asi kwavari avo vari kubanze zveshe zvinoitwa ngemiedzaniso, kuti vechiona vangaona vasikaonesesi, vechizwa vangazwa vasikazwisisi, kuti pamweni vangatenderuka, nokushaisha kurekererwe kwavari.” Wakati kwavari, “Amuzii uyu muedzaniso here? Munozoita maziirenyi miedzaniso yeshe? Mukushi unokusha izwi. Ava ndivo vakawa munjira, apo panokushwa izwi; naapo vazwa, paripo unouya Sathani nokudusa izwi iro rakushwa mukati mwavo. Ava ngokudaro ndivo vakakushwa mutsanza, apo vazwa izwi, paripo vanoriashira ngokudakara, navo avana nzinde mukati mwavo, asi vanoangirira kwenguva doko; asi apo kwaguma kutambudzwa nokuti kushononeswa ngendaa yeizwi, paripo vanopumhunwa. Naavo vakakushwa pakati peminzwa, ndivo vanozwa izwi, nokudembatemba kuri munyika, nokuchengedzerwa ngoupfumi, nokuemura kwezviro zvinhani, zvechipotera zvinodzipa izwi, naro aribereki michero. Naavo vakakushwa pamavhu akanaka ndivo vanorizwa izwi, vanoriashira, vanobereka michero, vamweni makumi matatu, vamweni makumi matanhatu nevamweni zana.” Naye wakati kwavari, “Chibani chinounzwa here kuti chiiswe pashi pechitundu nokuti pashi pomubhedhi, chisikaiswi pachigadzikiro pacho? Ngokuti apana chiro chakafishika, chisikazooneswi pamhene; apanazve chiro chakahwara, chisikazobudiswi pakujeka. Uwo unenzee dzokuzwa ngaazwe.” Naye wakati kwavari, “Ngwarai izvo zvomunozwa; chipimo chomunopima ndicho vamweni nemwi muchapimwawo ndicho, nakwo kunozotutsirwa kwomuri kwakapinda kukura. Ngokuti kwaari unacho, kunozopuwa kwaari, nokwaari usina, nechaatori nacho chinozobviswa kwaari.” Naye wakati, “Umambo hwaMwari hwakadai ngomunhu unokusha mbeu mumavhu, naye unoata nokumuka usiku namasikati, nembeu dzinomera, dzechikura iye asikazii njira yedzinomera ndiyo. Mavhu anoita ngekwawo, kuti mbeu dzikure kutanga muningwi, kwoteera mutsonzoti, zvino zviyo zvaibva pamutsonzoti. Naapo zviyo zvaibva paripo unotuma vane sikeyo, ngokuti kukukura kwaguma.” Wakati, “Tinozouedzanisa nenyi umambo hwaMwari? Nokuti ngouri muedzaniso wetingauendzanisa ndiwo? Hwakadai ngetsangu yomustadhi iyo apo yakushwa mumavhu iri doko kunadzo dzeshe mbeu dzakasimwa munyika; asi apo yakushwa inomera yechiita huru kupinda mapfiba eshe, inobudisa matai makuru, ngokudaro shiri dzomudenga dzinoaka zvisaki zvadzo mukati mwemumvuri wematai awo.” Ngemiedzaniso yakawanda kudaro wakaereketa izwi kwavari, kudai ngezvevaikona kurizwa; azi kuereketa kwavari pasina muedzaniso, asi ari ega nevadzidzi vake wakavadudzira zveshe. Ngeiro zuva, apo kwaita madeekoni, wakati kwavari, “Ngatiambuke ruseri.” Vechisiya mbungano, vakaenda naye mungarava. Nengarava dzimweni dzaiyapo dzakaendawo naye. Kwakaguma mubvumo mukuru wedutu, nemafungu akachaya kupotera mungarava, ngokudaro aiya ooda kuzadza ngarava. Asi iye waiya ngesure mungarava, akaata akaisa soro rake pamutsamiro; navo vakamumusa, vakati kwaari, “Mudzidzisi, aubatiki tisu here, tofa?” Naye wakamuka akakaraidza dutu, akati kuneruandhle, “Terama kuti chowee.” Nedutu rakaterama, kwaiyapo kunyarara kukurutu. Wakati kwavari, “Munotya ngenyi? Amusati mwagonda here?” Navo vakatya kakurutu, vakati umwe kunoumweni, “Ndizvo uyu ndiani, kuti dutu noruandhle zvinomupurutana?” Vakaguma ruseri rworuandhle, munyika yeGerasa. Apo echibuda kubva mungarava, paripo munhu unemweya wakashata wakashongana naye, echibva mumaiba. Uwo waigara mumaiba; kwaiya kusina munhu waikona kuchamusunga, kunyazwi ngemaketani; ngokuti kazhinji waisungwa ngemanguri nemaketani, asi waidambura maketani nokugura manguri. Kwaiya kusina munhu waikona kumunyisa. Nguva dzeshe masikati nousiku waigara mumaiba nomumitunhu echiiboorera, echidzicheka ngemapuwe. Naye aona Jesu achikuretu, wakarumba kwaari akamugwadamira; naye echiboorera ngeizwi guru wakati, “Ndinenyi newe, Jesu, Mukororo waMwari Uripadera pazveshe? Ndinokuphikisa ndiMwari, kuti usanditambudza.” Ngokuti iye waiya ati kwaari, “Buda kubva kumunhuwo, iwewe mweya wakashata.” Jesu wakamubvunza kuti, “Zina rako ndiani?” Nawo wakapingura ukati kwaari, “Ndini Hondo zina rangu, ngokuti tiri vazhinji.” Nawo wakamupota kakurutu kuti asazoiendesa kubva kuneiyo nyika. Zvinopano kwaiyapo pamutunhu mutanga mukuru wenguruve dzechifura; nayo yakamupota yechiti, “Titumirei munguruve; kuti tipotere kwedziri.” Naye wakaitendera. Nomweya yakashata yakabuda ikapotera munguruve, nomutanga weshe wakarumba kudzaka ngepamakaha, kupotera muruandhle, dzaida kuguma makumi emazana mairi, nadzo dzakanzvaira muruandhle. Vaushi vadzo vakatiza, vakazvironzera mudhorobha nomunharaunda. Nevanhu vakauya koona kuti chiinyi chakaitika. Vakauya kunaJesu, vakaona uwo waiya nemadhimoni akagara, asimira, aamunhu kwaye, iye uwo waiya nehondo, navo vakatya. Naapo vakazviona, vakatsanangura izvo zvakaitika kwaari uwo waiya nemadhimoni nendaa yenguruve. Vakatanga kumupota kuti abve mumigano yavo. Naapo achapinda mungarava, uwo waiya nemadhimoni wakamupota kuti aende naye. Asi aazi kumutendera, wakati kwaari, “Enda kanyi kwako kuhama dzako, uvaronzere kukura kwezvaakakuitira Mambo, nenjira yaakakuitira nyasha ndiyo.” Naye wakaenda, akatanga kuchumaira muDhekaporisi ngokukura kwezvaakaitirwa ndiJesu; veshe vakashamiswa. Naapo Jesu aambukazve ruseri ngengarava, mbungano huru yakaungana kwaari, naye waiya pasinde poruandhle. Naapo pakauya umwe wevatongi vemhatso yokudira zina rake raizwi Jairosi, amuona, wakadzikandira patsoka dzake, akamupota kakurutu echiti, “Mwanasikana wangu mudoko waapasinde pokufa. Ndinokupota kuti uuye, uise nyara dzako padera pake, kuti aponeswe ararame.” Iye wakaenda naye. Nembungano huru yakamuteera, nayo yakamutsikirira. Nedzimai raibuda ngazi makore gumi namairi, rakatambudzika ngenjira dzakawanda ngen'anga zhinji, naro rakapedza zveshe zveraiya nazvo, naro arizi kudetserwa ngechiro, asi rakaangira yaamho kurwara. Iro rechizwa ngendaa yaJesu, rakaguma pakati pembungano ngesure kwake naro rakabata gauni rake. Ngokuti rakati, “Kudai ndikabata kunyazwi gauni rake ndinozoponeswa.” Paripo ngazi yaro yakaema kubuda; naro rakazwa mumuiri mwaro kuti raponeswa nhenda yaro. Paripo Jesu, echizia mukati mwake kuti simba raiya rabuda kubva kwaari, wakakunukukira pakati pembungano, akati, “Ndiani wabata gauni rangu?” Vadzidzi vake vakati kwaari, “Unoona kuti mbungano inokutsikirira, newe unoti, ‘Ndiani wandibata?’ ” Naye wakaringaringa kuti aone uwo waiya aita ichi. Asi dzimai rechitya nokuhuta, rechizia icho chaiya chaitika kweriri, rakauya, rikawa pashi pamberi pake, naro rakamuronzera gwinyiso reshe. Wakati kweriri, “Mukunda, kutenda kwako kwakuponesa, enda ngokunyarara, uponeswe nhenda yako.” Achaereketa, vakaguma vaibva kumhatso yomutongi vechiti, “Mwanasikana wako watofa. Uchamuneserenyi Mudzidzisi?” Asi asikavapurutani Jesu azwa izwi iro rakaereketwa, wakati kune mutongi wemhatso yokudira, “Usatya, gonda kwega.” Naye aazi kutendera munhu naumwe kuti amuteere kwega Petro, Jakobe naJohani, munun'una waJakobe. Naapo aguma mumhatso yomutongi wemhatso yokudira, wakaona nyongano, nevaichema nokubonda kakurutu. Apotera, wakati kwavari, “Munoita nyongano nokuchema ngenyi? Mwana aazi kufa akadi, asi wakaata.” Navo vakamusheka. Asi iye wakavabudisa veshe kubanze, wakatora baba vemwana namai, naavo vaiya naye, akapotera pandau paiya nemwana. Echibata nyara yemwana wakati kwaari, “Tarita Kumi,” ukwo kunoti, “Chisikana, ndinoti kwouri, Muka.” Paripo chisikana chakamuka, chakahamba; ngokuti chaiya chaane makore gumi namairi. Paripo vakashamiswa kakurutu. Naye wakavapangisisa kuti zvisazoziikanwa ngomunhu naumwe. Naye wakavaronzera kuti vachipe zvokudya. Wakabuda kubvapo, akaguma munyika yekwake, nevadzidzi vake vakamuteera. Naapo Sabatha raguma wakatanga kudzidzisa mumhatso yokudira, nevazhinji vechimuzwa vakashamiswa. Vakati, “Munhu uyu wakazviona pari zveshe izvi? Kungwaranyi kwakapuwa kuneuyu munhu? Mishamiso yakakura yakadai inoitwa ngenyara dzake! Uyu andiyepi here mutsetsi, mukororo waMaria, mukoma waJakobe, Josesi, Judha naSimoni? Nevakunda vake avari pano nesu here?” Navo vakapumhunwa ndiye. Jesu wakati kwavari, “Muprofeti aarekerwi kuremeredzwa, asi kwega munyika yake nokuhama dzake nomumhatso yake.” Naye aazi kukona kuitapo mishando ine simba, asi wakaisa nyara dzake padera pevanhu vashomani vairwara, akavaponesa. Wakashamiswa ngokusikatenda kwavo. Naye wakahamba pakati pemaguta avo echidzidzisa. Wakadaidza kwaari vane gumi nevairi, akatanga kuvatuma vairi vairi, naye wakavapa simba rokukurira mweya yakashata. Akavapanga kuti vasazotora chiro parwendo rwavo, asi mudondoro wega; vasatora chingwa nokuti nyede nokuti mare muzvikwama zvavo; asi kuti vapfeke magwada, vasazopfekazve mabhachi mairi. Wakati kwavari, “Kunyazwi ngepari pomunopotera mumhatso, garaipo metsa mubvepo. Kunyazwi ngeiri ndau yomusikazoashirwi nokuti kupurutanwa, mwoobvapo zuwai bukuta pashi petsoka dzenyu kuti riite chapupu kwavari.” Vakabuda, vakachumaira kuti vanhu vatenderuke. Vakadusa madhimoni mazhinji, vakadzodza mafuta vazhinji vairwara, vakavaponesa. Mambo Herodhi wakazvizwa, ngokuti zina raJesu raiya rateketeswa. Vaiti, “Johani Mubhabhatidzi wamuka kwevakafa, ndizvo mishando iyi ine simba inoshandwa ndiye.” Asi vamweni vakati, “NdiErija.” Nevamweni vakati, “Muprofeti wakadai ngoumwe wevaprofeti vekaretu.” Asi Herodhi azwa wakati, “NdiJohani, uwo wendakagura soro inini, wamukazve.” Ngokuti uyu Herodhi waiya akatuma kumubata Johani nokumusunga mutirongo, ngepamusoro paHerodhiasi mukadzi waFiripu munun'una wake, ngokuti iye waiya amutora. Ngokuti Johani waiya akati kunaHerodhi, “Akutenderwi kwouri kuti utore mukadzi womunun'una wako.” NaHerodhiasi waiya akamuzonda, akadisisa kumuuraya, asi wakakorera. Herodhi waimutya Johani, echizia kuti waiya munhu wakarurama, wakacheneswa, wakamungwarira. Apo amuzwa, wakatambudzika kakurutu, asi wakamuzwa ngokudakara. Asi raguma zuva rakanaka, apo Herodhi ngezuva rokubarwa kwake wakaitira dhiri nhunge dzake nenduna dzake nevakuru veGarire. Mwanasikana waHerodhiasi wakapotera akazvina, akamudakadza yaamho Herodhi naavo vaitseama naye pakudya; namambo wakati kunemusikana, “Kumbira kwendiri kunyazwi chiinyi chounoda, neni ndinozokupa.” Naye wakapika kwaari kuti, “Kunyazwi chiinyi chounozokumbira kwendiri ndinozochipa kwouri, kunyazwi rupande rwoumambo hwangu.” Wakabuda, akati kunamai ake, “Ndokumbirenyi?” Naye wakati, “Soro raJohani Mubhabhatidzi.” Paripo wakapotera kunamambo ngokukasira, akarikumbira akati, “Ndinoda kuti mundipe zvinopano mundiro soro raJohani Mubhabhatidzi.” Namambo wakasvipa mwoyo kakurutu; asi ngendaa yemhiko dzake nendaa yeavo vaitseama naye pakudya, aazi kuda kumurambira. Paripo mambo wakatuma umwe wevarindi vake, akapanga kuti riunzwe soro raJohani. Naye wakaenda akagura soro rake ari mutirongo, wakaunza soro rake riri mundiro, akapa musikana, nomusikana wakaripa kunamai ake. Naapo vazwa vadzidzi vake vakauya, vakatora muiri wake, vakauisa muiba. Navapostori vakaungana kunaJesu, vakashuma kwaari zveshe zvevakaita nezvevaiya vadzidzisa. Naye wakati kwavari, “Uyai imwimwi muri mwega pandau iri yega, mumbozorora padoko.” Ngokuti vazhinji vaiuya nokuenda, navo vaiya vasina nenguva yokudya. Navo vakaenda ngengarava kundau iri yega vari vega. Nevanhu vazhinji vakavaona vechienda, vakavazia, vakarumba ngetsoka vechibva kumadhorobha eshe, navo vakavatangira kuguma. Abuda wakaona mbungano huru, wakakurudzwa ngepamusoro payo, ngokuti yaiya yakadai ngemakwai asina muushi; naye wakatanga kuidzidzisa zviro zvizhinji. Naapo zuva rooda kubira, vadzidzi vake vakauya kwaari vechiti, “Panapa indau iri yega nezuva rotoda kubira. Vaendese munharaunda nomumizi, vadzitengere zvokudya.” Asi iye wakavapingura akati kwavari, “Vapei imwimwi vadye.” Navo vakati kwaari, “Tinozoenda here isusu tivatengere zvingwa zvezvigurwa zvesirivha mazana mairi, tivape kuti vadye?” Asi iye wakati kwavari, “Munezvingwa zvinganai? Endai muone.” Naapo vazvizia vakati, “Zvishanu nehove mbiri.” Wakavapanga kuti veshe vagare pashi ngezvikwata zvikwata padera pemwenje muishi. Navo vakagara pashi ngezvikwata zvemazana nezvemakumi mashanu. Echitora zvingwa zvishanu nehove mbiri, wakaringira mudenga, akazvibonga. Wakagura zvingwa, akazvipa kuvadzidzi kuti vaise pamberi pavo; nehove mbiri akadzikoanisira veshe. Navo veshe vakadya, vakaguta. Vakatonhera matsekeneswa akazara zvitundu gumi nazviiri ezvingwa nehove. Avo vakadya zvingwa vaiya vamuna makumi emazana mashanu. Paripo wakaangiridza vadzidzi vake kuti vapotere mungarava nokutungamira kuenda ruseri rweBhethisaidha, iye emene echiendesa mbungano. Naapo avavhaisa wakaenda pamutunhu kookumbira. Kwoita madeekoni, ngarava yaiya pakati poruandhle, naye waiya ega panyika. Echivaona vechitambudzika ngokuhluza ngarava, ngokuti dutu raiya rechipesana navo, kwaa kuda kuita murindo wechina wousiku, iye wakaguma kwavari echihamba padera poruandhle. Waida kuvapinda, asi apo vechimuona echihamba ngepadera poruandhle, vakakarakadza kuti raiya dzimudzangara, navo vakaboorera; ngokuti vakamuona veshe, vakatyiswa. Asi paripo iye wakaereketa kwavari echiti, “Shingai, ndini, musatya.” Naye wakakwira kwavari mungarava nedutu rakaterama. Navo vakashamiswa kakurutu mukati mwavo, ngokuti avazi kuzwisisa ngendaa yezvingwa, ngokuti mwoyo yavo yaiya yakakonziswa. Apo vaambuka ruseri vakaguma kunyika yeGenesareta, navo vakasungira ngarava pahumbikumbi. Naapo vabuda kubva mungarava, paripo vanhu veyo vakamuzia, navo vakarumba nharaunda yeshe, vakatanga kutwara ngemisengere avo vairwara, kuvaisa apo pevakazwa kuti ndipo paari. Kunyazwi ngepari paakapotera mumizi nokuti mumadhorobha nokuti munyika, vakavaradzika vairwara pamusika, vakamupota kuti vabate kunyazwi mupendero wegauni rake; naavo veshe vakamubata vakaponeswa. VaFarisi nevamweni vevanyori vakabva Jerusarema vakaungana kwaari. Vakaona kuti vamweni vevadzidzi vake vaidya chingwa ngenyara dzine tsvina, ukwo kunoti dzisikazi kushambwa. (Ngokuti vaFarisi nevaJudha veshe avadyi vasikazi kunasa kushamba kakurutu nyara dzavo, vechibatirira mitoo yemadzibabamukuru; naapo vabva kumusika, avadyi vasikazikushamba; neimweni mitoo mizhinji iripo yevakaashira kuingwarira, kudai ngokusuka tsani nehari nendiro dzethusi.) VaFarisi nevanyori vakamubvunza vechiti, “Vadzidzi vako avateeri ngenyi mitoo yemadzibabamukuru, asi vanodya chingwa ngenyara dzine tsvina?” Wakati kwavari, “Isaya wakanasa kuprofeta ndimwi, imwimwi vadziitisi, kudai ngezvezvakanyorwa kuti, “ ‘Ava vanhu vanondiremeredza ngemiromo yavo, asi mwoyo yavo iri kuretu neni; asi vanotera kundidira, vechidzidzisa tsika dzevanhu kudai ngezvidzidzo kwazvo.’ “Munorekera mipango yaMwari, mwechibatirira mitoo yevanhu.” Wakati kwavari, “Munoramba yaamho mipango yaMwari, kuti mubatirire tsika dzenyu! Ngokuti Mosi wakati, ‘Remeredza baba ako namai ako,’ zve, ‘Naye unotuka baba kunyazwi mai ngegwinyiso ngaafe mukufa.’ Asi imwimwi munoti, ‘Kudai munhu echiti kunababa ake nokuti kunamai ake, icho chewaida kuuyirwa ndicho kwendiri chiri Korbhani,’ (ukwo kunoti, ‘Chakapirwa kunaMwari.’) Ngokudaro amuchamutenderi kuti aitire chiro kunababa nokuti mai. Ngokudaro munoita kuti izwi raMwari riite risina shwiro ngendaa yemitoo yenyu yemwakaashidzana. Nezvimweni zvizhinji zvakadaro zvomunoita.” Wakadaidzazve mbungano kwaari akati kweiri, “Ndizwenyi, imwimwi mweshe, muzwisise; apana chiro chinobva ngokubanze kwomunhu chechipotera mukati mwake chingamusvipisa, asi izvo zviro zvinobva mukati mwomunhu ndizvo zvinomusvipisa.” [ “Iye unenzee dzokuzwa ngaazwe.”] Apo apotera mumhatso, abva kunembungano, vadzidzi vake vakamubvunza ngomuedzaniso uyu. Naye wakati kwavari, “Nemwiwo amuna kuzwisisa here? Amuoni here kuti kunyazwi chiinyi chinobva ngokubanze chechipotera mumunhu achingakoni kumusvipisa, ngokuti achipoteri mumwoyo mwake, asi mundani mwake, chechibudiswa mushango?” (Ngokudaro kunocheneswa kudya kweshe.) Wakati, “Icho chinobuda kubva kumunhu ndicho chinomusvipisa. Ngokuti mukati mumwoyo yevanhu kunobuda mikarakadzo yakashata, kuhura, kuba, kuuraya, kuomba, mbau, matsambo, kuchengedzera, kuemura, kutuka, kudzikudza, upenzi. Zveshe izvi zviro zvakashata zvinobuda kubva ngomukati, ndizvo zvinosvipisa munhu.” Wakamiruka kubvapo, akaenda kumigano yeThire neSidhoni. Wakapotera mumhatso, asaida kuti aziikanwe ngomunhu; asi aazi kukona kuti afishike. Paripo dzimai raiya nemwanasikana waro mudoko waiya nomweya wakashata, razwa ndiye, rakaguma rikawira patsoka dzake. Asi dzimai iro raiya muGiriki, ngokubarwa raiya muSurofoenikia. Naro rakamupota kuti aduse dhimoni kubva kumwanasikana waro. Iye wakati kweriri, “Vana ngavagutiswe kutanga, ngokuti akuzi kunaka kutora chingwa chevana kuchikandira kumatuhwa embwa.” Asi rakapingura, rikati kwaari, “Eya, Mambo; matuhwa embwa anodya pashi petafura matsekeneswa evana.” Wakati kweriri, “Ngendaa yeizwi iri, enda; dhimoni rabuda kubva kumwanasikana wako.” Rakaenda kumhatso yaro, rakaona mwana akaradzikwa pamubhedhu, nedhimoni raiya rabuda kubva kwaari. Jesu wakabudazve kubva kumigano yeThire, wakahamba ngepakati peSidhoni metsa kuguma kuruandhle rweGarire, kupotya pakati pemiganu yeDhekaporisi. Vakaunza kwaari umwe waiya dziiranzee raiya mbeveve, navo vakamupota kuti aise nyara yake padera paro. Wakaritora riri rega kubva pakati pembungano, wakaisa zvinwe zvake munzee dzaro, wakapfira mata, akagwama rurumi rwaro. Echiringira mudenga, wakaita mahwema, akati kweriri, “Efata,” ukwo kunoti, “Beuka.” Apapo nenzee dzaro dzakabeurwa, nemusungo worurumi rwaro wakasunhuka, naro rakaereketa zvinozwika. Iye wakavapanga kuti vasazoronzera munhu; asi echinyanya kuvapanga, vakanyanyisawo kuzviteketesa. Navo vakashamiswa kunopinda binzo vechiti, “Iye wakaita zveshe kuti zvinake; unoita kuti nedziiranzee rizwe nechimbungumbungu kuti chierekete.” Ngemazuva awo kwaiyapozve mbungano huru, yaiya isina chokudya; iye wakadaidza vadzidzi akati kwavari, “Ndinosvipa mwoyo ngendaa yembungano, ngokuti yakagara neni zvinopano mazuva matatu, isina chokudya. Kuti ndikavaendesa kumakanyi kwavo vasati vadya, vanozofukama munjira, nevamweni vavo vanobva kuretu.” Nevadzidzi vake vakamupingura vakati, “Munhu ungazviona pari zvingwa kuti agutse ava vanhu muno mushango?” Naye wakavabvunza akati, “Munezvingwa zvinganai?” Vakati, “Zvinomwe.” Wakapanga mbungano kuti igare pashi; akatora zvingwa zvinomwe, akabonga, akazvigura akazvipa kuvadzidzi vake kuti vazviise pamberi pevanhu, navo vakazvipa kumbungano. Navo vaiya nehove doko shomani; abonga wakapanga kuti dziiswewo pamberi pavo. Navo vakadya, vakaguta; navo vakatonhera matsekeneswa ezvakasara akaita zvitundu zvinomwe. Vaiya vaida kukwana makumi marongomuna emazana. Naye wakavaendesa. Paripo wakapotera mungarava nevadzidzi vake, wakaenda kunharaunda yeDharamanuta. VaFarisi vakauya kunaJesu, vakatanga kuphikisana naye, vechitsvaka kwaari chioniso chinobva mudenga, vechimuedza. Naye wakaita mahwema makuru mumweya wake, akati, “Uyu mubarirwana unotsvaka ngenyi chioniso? Ngegwinyiso ndinoti kwomuri, mubarirwana uyu auzopuwi chioniso.” Wakavasiya, akapoterazve mungarava, akaambuka ruseri. Vadzidzi vaiya variarwa kutora zvingwa, vaiya nechingwa chimwe chega mungarava. Naye wakavapanga echiti, “Penyai, ngwarai mumera wevaFarisi nomumera waHerodhi.” Vakapangana pakati pavo vechiti, “Ngokuti atina zvingwa.” Jesu echizia wakati kwavari, “Munopangana ngenyi, ngokuti amuna zvingwa? Amusati mwazia nokuti kuzwisisa here? Mwoyo yenyu ichakandokonza here? Munemadziso musikaoni here, munenzee musikazwi here? Amucherechedzi here? Naapo zvendakagurira vanhu makumi emazana mashanu zvingwa zvishanu, mwakazadza zvitundu zvinganai ngematsekeneswa?” Vakati kwaari, “Gumi nezviiri.” “Naapo zvingwa zvinomwe zvakagurirwa kuvanhu makumi emazana marongomuna, mwakazadza zvitundu zvinganai ngematsekeneswa?” Vakati kwaari, “Zvinomwe.” Naye wakati kwavari, “Amusati mwazwisisa here?” Vakaguma muBhethisaidha. Vakaunza kwaari bofu, navo vakamupota kuti aribate. Naye wakaribata ngenyara, akaribudisa kubanze kwedhorobha; naapo apfira mata mumadziso aro, wakaisa nyara dzake padera paro, akaribvunza kuti, “Unoona chiro here?” Naro rakaringira rikati, “Ndinoona vanhu, asi ndinovaona vechihamba vakadai ngemiti.” Wakaisazve nyara dzake padera pemadziso aro; naro rakaringisisa, rakapembenudzwa, rikaona zviro zveshe pamhene. Wakariendesa kanyi kwaro echiti, “Usapoterazve mumizi.” Jesu nevadzidzi vake vakaenda vakapotera mumizi yeSizaria Firipi; vachimunjira wakabvunza vadzidzi vake echiti kwavari, “Vanhu vanoti, inini ndirianani?” Navo vakamuronzera vechiti, “Johani Mubhabhatidzi, nevamweni vanoti, Erija, nevamweni vanoti, Uri umwe wevaprofeti.” Naye wakavabvunza, “Imwimwi munoti ndirianani?” Petro wakapingura akati kwaari, “Iwewe uri Kristu.” Naye wakavapangisisa kuti vasaronzera munhu ndiye. Wakatanga kuvadzidzisa echiti, “Kunosisira kuti Mukororo woMunhu atambudzike ngezvakawanda nokurambwa ngevakuru nevapristi vakuru nevanyori, aurawe, ngesure kwemazuva matatu amukezve.” Wakaereketa izwi iri pamhene, Petro wakamutora, akatanga kumurambidza. Asi iye echikunukuka, echiona vadzidzi vake, wakakaraidza Petro akati, “Ibva uende sure kwangu, Sathani. Ngokuti aunyeri ngezvaMwari, asi ngeizvo zvevanhu.” Naapo adaidzira kwaari mbungano pamwepo nevadzidzi vake, wakati kwavari, “Kunyazwi ndiani unoda kuuya sure kwangu, ngaadzirambe atore muchinjiko wake, anditeere. Ngokuti kunyazwi ndiani unoda kuponesa ndaramo yake unozorashikirwa ndiyo, nouwo unozorashikirwa ngendaramo yake ngendaa yangu neyevhangeri, unozoiponesa. Ngokuti munhu unozouyirwa ngenyi, kudai echiuyirwa ngenyika yeshe, arashe ndaramo yake? Ngokuti munhu ungaita mutenganiso wenyi nendaramo yake? Ngokuti kunyazwi ndiani unozotsveruka ndini nemazwi angu kuneuyu mubarirwana unoomba nounoshaisha, Mukororo woMunhu unozotsverukawo ndiye apo oozouya muuthende hwaBaba ake, pamwepo nengirosi dzake dzakachena.” Wakati kwavari, “Ngegwinyiso ndinoti kwomuri, varipo vamweni veavo vanoema panapa, vasikazozwi kufa metsa vaone umambo hwaMwari hwechiuya unesimba.” Ngesure kwemazuva matanhatu Jesu wakatora Petro, Jakobe naJohani, akakwira navo padera pomutunhu wakareba, vari vega. Naye wakatsandudzwa pamberi pavo, nezvokufuka zvake zvakan'anikira zvikachena kuti mbeembee, ngokudaro akuna musuki munyika ungaita kuti zvichene kudaro. Kwakaoneka kwavari Erija naMosi, vechiereketa naJesu. NaPetro wakati kunaJesu, “Rabhi, zvakanaka kuti tindoapanapa; ngatitoita zvitumba zvitatu, chimwe chako, chimweni chaMosi nechimweni chaErija.” Ngokuti iye waiya asikachazii kuti ungaereketenyi, ngokuti vakakarudzwa nokutyiswa kakurutu. Kwakauya gore rikavathibikira, izwi rakazwika rechibva mugore rechiti, “Uyu ndiye Mukororo wangu unodikanwa; muzwenyi.” Paripo vechiringaringa avazi kuona munhu, kwega Jesu navo. Vachadzaka kubva pamutunhu, wakavapangirisisa kuti vasazoronzera munhu izvo zvevaiya vaona, metsa Mukororo woMunhu azomukazve kubva kwevakafa. Navo vakaringwarira izwi iro, veibvunzisana pakati pavo kuti chiinyi kumuka kwevakafa. Vakamubvunza vechiti, “Ngenyi vanyori vanoti kunosisira kuti Erija atange kuuya?” Wakati kwavari, “Ngegwinyiso Erija unotanga kuuya, kuti amusidzire zveshe. Asi ngenyi zvakanyorwa zvichiti, ‘Mukororo woMunhu unosisira kuti atambudzike ngezviro zvakawanda nokurambwa?’ Asi inini ndinoti kwomuri, Erija wakatouya, navo vakaita kwaari zvevakada, kudai ngezvakanyorwa ngendaa yake.” Naapo vaguma kunevadzidzi, vakaona mbungano huru yechivaunganira nevanyori vechivabvunza. Paripo mbungano yeshe yamuona yakashamiswa kakurutu, yakarumba kuuya kwaari, ikamuchingamidza. Wakavabvunza kuti, “Chiinyi chomunobvunza kwavari?” Umwe wembungano wakamupingura akati, “Mudzidzisi, ndaunza mwana wangu kwouri, unemweya wakashata naye aakoni kuereketa. Naapo wamubata, unomuposhera pashi; naye unobudisa mafuro, mazino echikwetsana, echioma muiri; neni ndakumbira vadzidzi vako kuti vaudzinge, asi avazi kukona.” Naye wakapingura, akati kwavari, “A! Mubarirwana usikatendi, ndinozogara nemwi nguva yakadini? Ndinozotsengerera mukuwo wakaitawani? Muunzenyi kwendiri.” Vakamuunza kwaari; naapo mweya wakashata waona Jesu, paripo mweya wakasukumidza murumbwana kakurutu, naye wakawa pashi pamavhu, akaburukuta echibudisa mafuro. Wakabvunza baba ake kuti, “Mukuwo wakaitawani wechiita kudai kwaari?” Navo vakati, “Kubvira pauhwana hwake. Nemikuwo mizhinji wakamukandira mumuriro nomumvura kuti umuuraye; asi kudai unesimba rokuita chiro, tiitire nyasha, utidetsere.” Jesu wakati kwaari, “Kudai unesimba! Zviro zveshe zvingaitika kwaari unotenda.” Paripo baba vemwana vakadaidzira vakati, “Ndinotenda; detsera kusikatendi kwangu!” Jesu aona kuti mbungano yairumba kuuya pamwepo, wakakaraidza mweya wakashata echiti kwouri, “Iwewe mweya wembeveve newedziiranzee, ndinokupanga kuti ubude kubva mwaari, usachazopoterazve mwaari.” Nawo wechiboorera, wakamukandira pashi ngesimba gurutu, wakabuda kubva mwaari. Nomurumbwana uwo wakaita kudai ngewatofa, ngokudaro vazhinji vavo vakati, “Watofa.” Asi Jesu wakamubata ngenyara, akamumirudza, naye wakamiruka. Naapo apotera mumhatso, vadzidzi vake vakamubvunza vari vega vechiti, “Isusu atizi kukona ngenyi kuudzinga?” Wakati kwavari, “Urwu rudzi arungabudi ngechiro chimweni kwega asi ngokukumbira.” Vakabvapo vakahamba ngemuGarire, iye aazi kuda kuti munhu azie ichi. Ngokuti waidzidzisa vadzidzi vake, echiti kwevari, “Mukororo woMunhu unozohinwa munyara dzavanhu, navo vanozomuuraya; naapo aurawa, ngesure kwemazuva matatu unozomuka.” Asi avazi kuzwisisa izwi iro, vakatya nokumubvunza. Vakaguma Khapernaume; apo aamumhatso wakavabvunza kuti, “Chiinyi chemwaiphikisana ndicho munjira?” Navo vakanyarara, ngokuti vaiya vechiphikisana munjira kuti ndiani mukuru. Naapo agara pashi, wakadaidza kwaari vanegumi navairi, akati kwavari, “Kunyazwi ndiani unoda kuita wokutanga ngaaite chigumisirwa kwavari veshe nomuranda wavo veshe.” Naye wakatora mwana mudoko, akamuemesa pakati pavo; amutengura munyara dzake, wakati kwavari, “Kunyazwi ndiani unozoashira umwe weava vadoko wakadai ngezina rangu, unondiashira inini; nouwo unondiashira inini, aandiashiri inini asi uwo wakandituma.” Johani wakati kwaari, “Mudzidzisi, takaona umwe echirasha madhimoni ngezina rako, nesu takamurambidza ngokuti waiya asikatiteeri.” Asi Jesu wakati, “Musamurambidza; ngokuti akuna munhu ungaita mushando mukuru ngezina rangu, ungakona paripo kuereketa zvakashata ndini. Ngokuti uwo usikarwi nesu unotirwira isusu. Kunyazwi ndiani unozomupa tsani yemvura yokumwa, ngepamusoro pokuti muri vaKristu, ngegwinyiso ndinoti kwomuri aazorashikirwi ngomusharo wake. “Kunyazwi ndiani unozoita kuti umwe weava vadoko vanonditenda ashaishe, kunopinda kunaka kwaari kuti guyo guru risungirwe muhuro mwake aposherwe muruandhle. Kudai nyara yako yechikupumhunisa, igure, ngokuti kwakapinda kunaka kwouri kuti upotere mukupona uri chirema, kunekuti unenyara mbiri upotere muGehena, mumuriro usikadzimi, [ apo peisikafi honye yavo, nepasikadzimi muriro.] Kudai tsoka yako yechikupumhunisa, igure; ngokuti kwakapinda kunaka kwouri kuti upotere mukupona wechikumhina kunekuti unetsoka mbiri ukandirwe muGehena, [ apo peisikafi honye yavo, pasikadzimi muriro.] Kudai dziso rako rechikupumhunisa, ribvite; ngokuti kwakapinda kunaka kwouri kuti upotere muumambo hwaMwari unedziso rimwe, kunekuti unemadziso mairi ukandirwe muGehena, apo peisikafi honye yavo, pasikadzimi muriro. Ngokuti munhu weshe unozorungwa ngomuriro. Munyu wakanaka; asi kuti munyu warasha kunaka kwawo, unozorungwa ngenyi? Garai munemunyu mukati mwenyu, mugarisane zvakanaka umwe noumweni.” Wakabvapo akaenda kunyika yeJudhia noruseri rweJorodhani. Mbungano yakaunganazve kwaari; kudai ngokuita kwake, wakavadzidzisazve. VaFarisi vakauya kwaari, vakamubvunza vechimuedza vechiti, “Kunotenderwa here kuti mwamuna arashe mukadzi wake?” Wakapingura akati kwavari, “Chiinyi chaakapanga Mosi kwomuri?” Navo vakati, “Mosi wakatenda kuti kunyorwe tsamba yokumuramba nokuparadzana naye.” Asi Jesu wakati kwavari, “Ngendaa yokukonza kwomwoyo yenyu iye wakamunyorera uyu mupango. Asi kubvira pakutanga kwokusikwa, ‘Mwari wakavasika mwamuna nomukadzi.’ ‘Ngeiyi ndaa mwamuna unozosiya baba ake namai, abatirire kumukadzi wake, navo vairi vanozoita nyama imwe.’ Ngokudaro avachaiti vairi, asi nyama imwe. Ndizvo chaakasunganidza Mwari, munhu asazosunhura.” Vaa mumhatso vadzidzi vake vakamubvunzazve ngeiyi ndaa. Wakati kwavari, “Iye unozorasha mukadzi wake, aroore umweni, unoomba echishaishira mukadzi wake. Kunyazwi mukadzi naye akarasha mwamuna wake, akaroorwa ngoumweni, unoomba.” Vaiunza vana vadoko kwaari kuti avabate; asi vadzidzi vakavarambidza. Asi Jesu echiona wakashishwa akati kwavari, “Tenderai vana vadoko vauye kwendiri, musavarambidza; ngokuti umambo hwaMwari ngehwevakadai ngeava. Ngegwinyiso ndinoti kwomuri, iye usikaashiri umambo hwaMwari kudai ngemwana mudoko aatongozopoteri mwouri.” Naye wakavatengura, akavafumisa, echiisa nyara dzake padera pavo. Naapo Jesu echitanga rwendo rwake, kwakarumba umwe echiuya kwaari, akamugwadamira, akamubvunza kuti, “Mudzidzisi wakanaka, chiinyi chendingaita kuti ndigare nhaka yokupona kusikaperi?” Jesu wakati kwaari, “Unondidaidza ngenyi kuti, Wakanaka? Akuna wakanaka, asi umwe ega Mwari. Unozia mipango inoti: ‘Usauraya, usaomba, usaba, usaita chapupu chokunyepa, usachengedzera munhu, remeredza baba ako namai ako.’ ” Wakati kwaari, “Mudzidzisi, izvi zveshe ndakazvingwarira kubvira muudoko hwangu.” Jesu echimuringira wakamuda, akati kwaari, “Chiro chimwe chinotamika kwouri; enda utengese zvounazvo, upe kuvarombo, newe unozoa nepfuma kudenga; uuye, unditeere.” Iye wakatambudzika ngeizwi iro, akaenda echisvipa mwoyo, ngokuti waiya nepfuma zhinji. Jesu aringaringa wakati kuvadzidzi vake, “A, kukonzanyi kwavari avo vanoupfumi kupotera muumambo hwaMwari!” Vadzidzi vakashamiswa ngemazwi ake. Asi Jesu wakapingurazve, akati kwavari, “Vana, kwakakonza kupotera muumambo hwaMwari! Kwakapinda kureruka kuti ngamera ripotere ngepauri renaiti kune kuti mupfumi apotere muumambo hwaMwari.” Vakashamiswa kupinda binzo, vechiti pakati pavo, “Ndiani zvinopano ungaponeswa?” NaJesu echivaringira wakati, “Kuvanhu azvingaitiki, asi haiwa kunaMwari, ngokuti zviro zveshe zvinoitika kunaMwari.” Petro wakatanga kuti kwaari, “Penya, isusu takasiya zveshe tikakuteera.” Jesu wakati, “Ngegwinyiso ndinoti kwomuri, akuna munhu wakasiya mhatso nokuti vanun'una nokuti vakunda nekuti mai nokuti baba nokuti vana nokuti minda ngepamusoro pangu nepevhangeri, usikazoashiri zana rakapetwa zvinopano ngenguva iyi, mhatso, vanun'una, vakunda, madzimai, vana neminda, pamwepo nokushononeswa, nepanguva inozouya unozoashira kurarama kusikaperi. Asi vazhinji vokutanga vanozoita vokugumisira, naapo vokugumisira vanozoita vokutanga.” Vaiya munjira, vechikwira kuenda Jerusarema, naJesu waihamba pamberi pavo; vakashamiswa, naavo vakamuteera vakatya. Naye wakatorazve vanegumi navairi, wakatanga kuvaronzera zvinozomugumira echiti, “Penyai, tinokwira Jerusarema, noMukororo woMunhu unozopirwa kuvapristi vakuru nevanyori, navo vanozomutongera rufu, vanozomupira kunevemadzinza; navo vanozomuitira jee nokumupfira nokumurova nokumuuraya; ngesure kwemazuva matatu unozomukazve.” Jakobe naJohani, vakororo vaZebhedhi, vakakwedzera kwaari vechiti kwaari, “Mudzidzisi, tinoda kuti utiitire kunyazwi chiinyi chetinozokumbira.” Wakati kwavari, “Munoda kuti ndimuitirenyi?” Navo vakati kwaari, “Titendere isusu kuti tigare umwe ngokumudyo kwako noumweni ngokumuoshwe kwako muuthende hwako.” Asi Jesu wakati kwavari, “Amuzii chomunokumbira. Munesimba here rokumwa tsani yendinomwa nokuti kubhabhatidzwa ngorubhabhatidzo rwendinobhabhatidzwa ndirwo?” Navo vakati kwaari, “Tinokona.” NaJesu wakati kwavari, “Tsani yendinomwa munozoimwawo, norubhabhatidzo rwendinobhabhatidzwa ndirwo munozobhabhatidzwa ndirwo; asi kugara ngokumudyo kwangu nokumuoshwe kwangu andinipi ndinopa, asi ngekwaavo vakakunasirirwa.” Naapo vanegumi vazwa, vakatanga kushishirwa Jakobe naJohani. Naapo Jesu avadaidza kwaari wakati kwavari, “Munozia kuti avo vanosisira kutonga vemadzinza vanesimba padera pavo. Nevakuru vavo vanesimba padera pavo. Asi akuzodaropi kwomuri; asi kunyazwi ndiani uwo unoda kuita mukuru kwomuri ngaaite mushandiri wenyu, nouwo unoda kudziita wokutanga pakati penyu ngaaite hloko yavo veshe. Ngokuti noMukororo woMunhu aazi kuuya kushandirwa, asi kushandira, nokupa kupona kwake kuti kuite muripo wevazhinji.” Vakaguma muJerikho; naapo echibva muJerikho nevadzidzi vake nembungano huru, Bhathimeusi, mukororo waThimeusi, bofu, mupemhi, waiya akagara ngepamhiri penjira. Echizwa kuti ndiJesu weNazaretha, wakatanga kuboorera echiti, “Jesu Mukororo waDhavhidha, ndiitire nyasha!” Vazhinji vakamukaraidza kuti anyarare, asi iye wakapindisisa kuboorera kakurutu echiti, “Mukororo waDhavhidha, ndiitire nyasha!” Naapo Jesu wakaema akati, “Mudaidzenyi.” Vakadaidza bofu, vechiti kweriri “Tsunga; miruka, unokudaidza.” Naro rechirasha jira raro rakatomukira mudenga, rakaguma kunaJesu. Jesu wakaribvunza, akati, “Chiinyi chounoda kuti ndikuitire?” Nebofu rakati kwaari, “Rabhoni, kuti ndione.” Jesu wakati kweriri, “Enda; kutenda kwako kwakuponesa.” Paripo rakaona rakamuteera munjira. Naapo vakwedzera Jerusarema, kuBhethifaje nokuBhethani, paMutunhu wemaOrivhi, wakatuma vairi vevadzidzi vake, wakati kwavari, “Endai muguta remwakaringirana naro, naapo muchapotera kweriri, paripo munozoona tsiru rembongoro rakasungwa, iro risikazi kumbogadhwa ngomunhu; risunhurenyi muuye naro. Kudai munhu echizoti kwomuri, ‘Munorisunhurirenyi?’ Munozoti, ‘Mambo unorida, paripo unozoripetudzazve panapa.’ ” Navo vakaenda, vakaona tsiru rembongoro rakasungwa pasinde pomusiwo ngokubanze mupato, navo vakarisunhura. Vamweni vaiya vakaema apo vakati kwavari, “Munoitenyi, mwechisunhura tsiru rembongoro?” Vakaronza kwavari kudai ngezvaakaronza Jesu; navo vakavatendera. Vakaunza tsiru rembongoro kunaJesu, vakakandira machira avo padera paro, naye wakagara padera paro. Vanhu vazhinji vakachinga machira avo munjira, nevamweni matai evakatema mushango. Avo vaihamba ngepamberi naavo vaiteera ngesure vakadaidzira vechiti, “Hosana! Unomuchena uwo unouya ngezina raMambo! Unomuchena umambo uwo unouya waBaba edu Dhavhidha! Hosana mudengadenga!” Naapo Jesu wakapotera muJerusarema, akapinda muTemperi; naapo aringaringa zviro zveshe, zuva rabira wakabuda kuenda muBhethani pamwepo nevanegumi navairi. Nechimangwani voobva Bhethani, iye wakazwa nzara. Echiona muonde kuretu unemashakani, wakenda kwouri kuti pamweni ungaona michero kwouri. Naapo aguma kwouri aazi kuona michero, kwega mashakani, ngokuti yaiya isati yaanguva yemaonde. Jesu, wakati kumuonde, “Apana munhu uchazodya michero kubva kwouri mhera nariini.” Nevadzidzi vake vakazvizwa. Vakaguma muJerusarema. Apotera muTemperi wakatanga kudzinga avo vaitengesa nevaitenga muTemperi, naye wakapinduridza matafura eavo vaitenganisana mare nezvigaro zveavo vaitengesa njia; naye aazi kutendera naumwe kutwara chidziyo kunyazwi ngechiri muTemperi. Wakavadzidzisa, akati kwavari, “Akuzi kunyorwa here kuti, “Mhatso yangu inozozwi imhatso yokudira yemadzinza eshe? Asi imwimwi mwaiita bako remadzongoni.” Vapristi vakuru nevanyori vakazvizwa, navo vakatsvaka kuti vangamuita maurairenyi; ngokuti vaimutya, ngokuti mbungano yeshe yakashamiswa ngokudzidzisa kwake. Naapo zuva rabira vakabuda kubva mudhorobha. Mangwanani maishi vechipinda ndipo, vakaona muonde wazeketera metsa kunzinde. Petro echikarakadza wakati kwaari, “Rabhi, penya! Muonde wewakatuka wazeketera.” Jesu wakapingura, akati kwavari, “Gondai munaMwari. Ngegwinyiso ndinoti kwomuri, kunyazwi ndiani unozoti kuneiri dunhu, ‘Bvitwa, uposherwe muruandhle,’ asikagonondi mumwoyo mwake, asi echigonda kuti icho chaaronza chinozoitika, chinozoitika kwaari. Ndizvo ndinoti kwomuri, zveshe zvomunokumbira nezvomunokumbirira, gondai kuti mwaashira, munozoa nazvo. Naapo mwaema mwechikumbira, rekererai, kunyazwi ndiani unendaa kwomuri; kuti Baba enyu arimudenga amurekererewo zvishaishi zvenyu. [ Asi kudai musikarekereri, naBaba enyu arimudenga aazomurekereri zvishaishi zvenyu.”] Vakauyazve Jerusarema. Naapo echihamba muTemperi, vakauya kwaari vapristi vakuru nevanyori nevakuru vavo navo vakati kwaari, “Unoita izvi zviro ngesimba raani? Nokuti ndiani wakakupa iri simba rokuita izvi zviro?” Jesu wakati kwavari, “Neniwo ndinozomubvunza mubvunzo umwe; kudai mwechizondipingura, ndinozomuronzera kuti ngesimbaraani rendinoita ndiro izvi zviro. Rubhabhatidzo rwaJohani rwakabva mudenga here nokuti kuvanhu? Ndipingurenyi.” Navo vakapangana pakati pavo vechiti, “Kuti tikati, ‘Rwakabva mudenga,’ iye unozoti, ‘Ndizvo amuzi kumutenda ngenyi?’ Asi tikati, ‘Rwakabva kuvanhu,’ ” vaitya mbungano ngokuti veshe vaitenda kuti Johani waiya muprofeti wegwinyiso. Ndizvo vakapingura Jesu vakati, “Atizii.” NaJesu wakati kwavari, “Neni andizomuronzeri kuti isimbaraani rendinoita ndiro izvi zviro.” Zvino wakatanga kuereketa kwavari ngemiedzaniso echiti, “Munhu wakasima munda wemivhini, wakaushoshera ngorushosha kutendenedza, wakatsa rindi rokukamurira vhini, akaaka chitumba, wakaupa kuvarimi kuti vaushandise, akaenda kunyika imweni. Naapo nguva yokuibva kwemichero yaguma, wakatuma muranda kuvarimi kuti aashire michero imweni yemivhini kubva kunevarimi. Navo vakamubata, vakamurova, vakamupetudza asina chiro. Wakatumazve kwavari muranda umweni, nouwo naye vakamuremadza soro rake, vakamutsverudza. Naye wakatuma umweni, nouwo vakamuuraya. Nevamweni vazhinji ngokudaro, vakarova vamweni nevamweni vakavauraya. Wakasara naumwe, mukororo unodikanwa; wakamutuma kwavari pakugumisira echiti, ‘Vanozoremeredza mukororo wangu.’ Asi avo varimi vakati pakati pavo, ‘Uyu ndiye unogara nhaka; uyai, ngatimuuraye, nenhaka inozoita yedu.’ Vakamubata, vakamuuraya, vakamurasha kubanze kwomunda wemivhini. Mambo womunda wemivhini unozoitenyi? Unozouya, auraye varimi, unozopa munda wemivhini kunevamweni. Amuzi kudzidza here ichi chinyorwa chinoti: “ ‘Buwe iro rakarambwa ngevaaki ndiro rakaitwa soro repakhona; ichi chakaitwa ndiMambo Mwari, chinoshamisa mukuona kwemadziso edu?’ ” Navo vakatsvaka kuti vamubate, asi vakatya mbungano, ngokuti vakazia kuti waiereketa muedzaniso uwo ndivo. Ndizvo vakamusiya, vakaenda. Vakatuma kwaari vamweni vevaFarisi nevaHerodhi, kuti vamuparise ndaa mukuereketa kwake. Vaguma vakati kwaari, “Mudzidzisi, tinozia kuti iwewe uri wegwinyiso, aubatiki ngoukuru hwomunhu; ngokuti auringiri hope yomunhu, asi ngegwinyiso unodzidzisa njira yaMwari. ‘Kunotenderwa here kubhadhara chibharo kunaSiza nokuti haiwa? Tinozobhadhara here nokuti tisabhadhara?’ ” Asi iye echizia kudziitisa kwavo, wakati kwavari, “Munondiedzerenyi? Unzai kwendiri chigurwa chesirivha ndichione.” Vakachiunza. Naye wakati kwavari, “Uyu muedzaniso nouku kunyorwa ngekwaani?” Navo vakati kwaari, “NgezvaSiza.” Jesu wakati kwavari, “Bhadharai Siza zviro zvaSiza nokuti Mwari zviro zvaMwari.” Navo vakashamiswa kakurutu ndiye. Vakauya kwaari vaSadhusi, avo vanoti akuna kumuka kwevakafa, navo vakamubvunza mubvunzo vechiti, “Mudzidzisi, Mosi wakatinyorera kuti, ‘Kudai mukoma womunhu echifa, echisiya mukadzi, asi asina mwana, munun'una wake ngaamutore mukadzi, abarire mukoma wake vana.’ Vaiyapo vakoma vanomwe; wokutanga wakaroora mukadzi asi wakafa asikazi kusiya vana. Nowechipiri wakamutora, naye wakafa asikazi kusiya vana; nowechitatu ngokudarowo. Vanomwe veshe avazi kusiya vana. Ngesure kwavo veshe mukadzi wakazofawo. Mukumuka kwevakafa, apo voozomuka, unozoita mukadzi waani kwavari? Ngokuti vanomwe vakamuita mukadzi.” Jesu wakati kwavari, “Andikwopi kupauka kwenyu here, ngokuti amuzii zvakanyorwa nokuti simba raMwari? Ngokuti apo voomuka kubva kwevakafa, avazoroori nokuti kuroodzwa, asi vanozodai ngengirosi dziri mudenga. Asi ngendaa yevakafa kuti vanomuswa, amuzi kudzidza here mubhuku raMosi, pandau inoronza ngepfiba, ngenjira iyo Mwari yaakaereketa kwaari echiti, ‘Inini ndini Mwari waAbrahama, Mwari waIsaka naMwari waJakobe?’ Iye aasiri Mwari wevakafa akadi, asi ndiMwari wevanopona; mwapauka kakurutu.” Kwakaguma umwe wevanyori, wakavazwa vechibvunzisana pamwepo, naye echiona kuti wakanasa kuvapingura wakamubvunza, akati, “Ngouri mupango wokutanga kweiri yeshe?” Jesu wakapingura akati, “Wokutanga unoti, ‘Izwai, A Isuraeri! Mambo Mwari, Mwari wedu ndiMambo Mwari umwe; newe unozomuda Mambo Mwari, Mwari wako, ngomwoyo wako weshe, ngomweya wako weshe, ngomupinimidzo wako weshe nesimba rako reshe.’ Nowechipiri ngouyu, ‘Unozomuda muakirwana wako kudai ngokudzida kwako iwewe pachako.’ Akuna mupango umweni wakapinda kukura kuneiyi.” Nomunyori wakati kwaari, “Wanasa, Mudzidzisi; waereketa gwinyiso kuti uripo Mwari umwe, akuna umwenizve ngepabanze pake; nokumuda ngomwoyo weshe, ngokuzwisisa kweshe, ngesimba reshe, nokumuda muakirwana wako kudai ngokudzida kwako iwewe pachako, kunopinda kakurutu midiro yokupisha nemibairo yeshe.” Naapo Jesu aona kuti wapingura ngokungwara, wakati kwaari, “Iwewe auri kuretupi akadi kubva kuneumambo hwaMwari.” Sure kweizvi apana waishinga kuchamubvunza chiro. Jesu achadzidzisa muTemperi wakati, “Vanyori vanoronza ngenyi kuti Kristu mukororo waDhavhidha? Dhavhidha emene ari muMweya Wakachena wakati, ‘Mambo Mwari wakati kunaMambo wangu, gara ngokumudyo kwangu, metsa ndiite magaa ako chitambarariro chetsoka dzako.’ Dhavhidha emene unomudaidza kuti Mambo; ndizvo uri mukororo wake ngenjiranyi?” Nouzhinji hwevanhu vakamuzwa ngokudakara. Mukudzidzisa kwake wakati, “Ngwarai vanyori, avo vanodisisa kuhamba vakapfeka machira akareba, nokuchingamidzwa mundau dzemisika, nezvigaro zvepamberi mumhatso dzokudira nendau dzepamberi mumadhiri. Avo vanochakata mhatso dzeshirikadzi, vachidzionisa kudai ngevanhu vakanaka ngokurebesa mikumbiro. Vanozoashira kurashwa kwakanyanyisa kukura.” Jesu wakagara pashi pasinde pebhokisi rezvipo, wakaringira mapire embungano mare mubhokisi rezvipo. Nevazhinji vaiya nepfuma vaipamwo yakawanda. Kwakaguma shirikadzi yaiya murombo, yakapa zvigurwa zviiri zvemare, zvinoita sendi. Wakadaidza kwaari vadzidzi vake, akati kwavari, “Ngegwinyiso ndinoti kwomuri, iyi shirikadzi murombo yapa kupinda avo veshe vapa mubhokisi rezvipo. Ngokuti avo veshe vapa ngouwandu hwepfuma yavo; asi iyo mukutama kwayo yapa zveshe zveyaiya nazvo, zveshe zveinopona ndizvo.” Achabuda kubva muTemperi, umwe wevadzidzi vake wakati kwaari, “Mudzidzisi, ringirai, kunaka kwemapuwe aya nokunaka kwemhatso dzakadai!” Jesu wakati kwaari, “Unoona here idzi mhatso dzakakura? Akuzosari buwe narimwe padera pebuwe rimweni, risikazorigwi pashi.” Achakagara paMutunhu wemaOrivhi akaringirana neTemperi, Petro, Jakobe, Johani naAndreu vakamubvunza vari vega, vakati, “Tironzerei, kuti izvi zvinozoitika riini nokuti chionisonyi chinozoonisa kuti izvi zviro zvoda kuitika?” Jesu wakatanga kuvaronzera echiti, “Ngwarai kuti musazopaukiswa ngomunhu kunyazwi ngouri. Vazhinji vanozouya ngezina rangu vechiti, ‘Ndini Kristu,’ navo vanozopaukisa vazhinji. Naapo mwoozwa ngokurwa nemawirira okurwa, musazotambudzika; izvi zvinosisira kuti zviitike, asi magumo aasati aguma. Ngokuti dzinza rinozomukirana nedzinza, noumambo unozomukirana noumambo; kunozoapo kuzungunyika kwenyika kundau dzakaparadzana, kunozoapo nzara. Izvi zviri kutanga kwemadambudziko. “Asi dzingwarirenyi imwimwi pachenyu; ngekuti vanozomupira kumakota; nemwi munozorohwa mumhatso dzavo dzokudira; munozoema pamberi pevatongi nemadzimambo ngepamusoro pangu, kuita chapupu pamberi pavo. Nevhangeri rinosisira kutanga kuchumairwa kumadzinza eshe. Naapo vanozomukweya vechimupira mukutongwa, musazodembatemba ngepamberi kuti munozoereketenyi; asi ereketai kunyazwi ngechiri chemwapuwa ngeawa iro, ngokuti andimwipi munozoereketa, asi ndiMweya Wakachena. Mukoma unozopira munun'una kuti aurawe, nababa unozopira mwana wavo, nevana vanozomukira vabari nokuvauraisa. Nemwi munozonyenywa ndivo veshe ngendaa yezina rangu. Asi iye unozoshingirira metsa kumagumo unozoponeswa. “Naapo mwoona chinyangadzo chinoparadza chechiema apo pechisikasisiri (uwo unodzidza ngaazwisise,) zvino avo vari muJudhia ngavatizire kumitunhu; nouwo uri padera pemhatso asazodzaka nokuti kupotera kutora chiro kunyazwi ngechiri mumhatso mwake; nouwo uri mumunda asazopetuka sure kootora jira rake. Asi ihehe kwavari vane mimba naavo vanoamwisa ngaawo mazuva! Nemwi kumbirai kuti zvisazoitika ngomukuwo wechando. Ngokuti ngaawo mazuva kunozoapo kutambudzika kukuru, ukwo kusikazi kumboapo kwakadaro kubvira pakutanga kwokusikwa kwaakasika Mwari metsa zvinopano, akuchatongozoitikizve kwakadaro. Kudai Mambo asikazi kufupisa mazuva, akuna naumwe waizoponeswa; asi ngepamusoro paavo vakatsanangurwa, avo vakatsanangura, mazuva akafupiswa. Naapo kudai aripo munhu unozoti kwomuri, ‘Ringira, Kristu uri panapa!’ Nokuti, ‘Ringira, uri apo!’ Musazozvitenda. Ngokuti vanozoapo vaKristu vokunyepa nevaprofeti vokunyepa, navo vanozoita zvioniso nezvishamiso, kupaukisa vakatsanangurwa, kudai zvechibvira. Asi ngwarai; ndamuronzera zviro zveshe nguva isati yaguma. “Asi ngaawo mazuva, ngesure kwokutambudzika ukwo, zuva rinozoita chidima nomwedzi auzojeki; nenyeredzi dzinozowa kubva mudenga nemasimba omudenga anozozungunyiswa. Naapo vanozoona Mukororo woMunhu echiuya mumakore anesimba guru nouthende. Naapo unozotuma ngirosi nokuunganidza vakatsanangurwa vake kubva kumhepo marongomuna, kubvira kumagumo enyika metsa kuguma kumagumo edenga. “Dzidzai muedzaniso kubva pamuonde; apo dai rawo rakanyorova rooburikira mashakani aro, munozia kuti zienza raa pasinde. Nemwiwo ngokudaro, apo mwoona izvi zvechiitika, munozozia kuti iye uri pasinde, eya pamisiwo. Ngegwinyiso ndinoti kwomuri, uyu mubarirwana auzopindi izvi zveshe zvisati zvaitika. Denga nenyika zvinozopinda, asi mazwi angu aatongozopindi. “Asi ngendaa yezuva iro neawa iro, apana naumwe unozvizia, kunyazwi ngirosi dzomudenga nokuti Mukororo, asi ndiBaba ega. Ngwarai, murinde; ngokuti imwimwi amuzii nguva iyo kuti inoguma riini. Kwakadai ngomunhu echihamba rwendo kuenda kunyika imweni, iye wakasiya mhatso yake, wakapa varanda vake simba, umwe ngaumwe mushando wake, akapangazve murindi wepamusiwo kuti arinde. Ndizvo rindai, ngokuti amuzii imwimwi kuti munewemhatso unoguma riini, dangani zuva rabira, nokuti pakati pousiku, nokuti ngokurira kwejongwe, nokuti mangwanani. Kuti pamweni echiguma ngokukasira iye asamuona mwakaata; neicho chendinoronza kwomuri, ndinoronza kwavari veshe: Rindai.” Kwaiya kwasara mazuva mairi kuti zuva rePhasika nomushongano wokudya Zvingwa zvisina Mumera rigume. Nevapristi vakuru nevanyori vakatsvaka kuti vangamuita mabatirenyi ngourimbwi, vamuuraye; ngokuti vaiti, “Haiwa ngepakati pomushongano wokudya, ngokuti pamweni kungazoita bope pakati pevanhu.” Naapo achiri muBhethani mumhatso yaSimoni waiya nemapere, akagara patafura, dzimai rakauya nenhera yearibhasita yemafuta enadhi, anodhura kakurutu, rakaiputsa nhera, rikaadururira musoro mwaJesu. Asi kwaiyapo vamweni vakatsamwa vechiti, “Kwaitirwenyi uku kurashwa kwemafuta? Ngokuti aya mafuta aizotengeswa ngemare inopinda zvigurwa zvesirivha mazana matatu, ikapuwa varombo.” Vakavhuruvhutira dzimairo. Asi Jesu wakati, “Rirekerenyi; munoritambudzirenyi? Raita mushando wakanaka kwendiri. Ngokuti munavo varombo nguva dzeshe, naapo mwechida mungaita zvakanaka kwavari; asi inini amuzoanenipi nguva dzeshe akadi. Raita icho cheraikona; radzodza muiri wangu usati watsirwa. Ngegwinyiso ndinoti kwomuri, kunyazwi ngepari apo perinozochumairwa vhangeri munyika dzeshe, neichi cheraita iri dzimai chinozoteketeswa kuita chicheredziso chake.” Zvino Judhasi Isikarioti, umwe wevanegumi navairi, wakaenda kuvapristi vakuru kuti amupire kwavari. Navo apo vazwa vakadakara, vakagondisa kumupa mare. Naye wakatsvaka nguva kwayo yokuti amupire. Ngezuva rokutanga redhiri reZvingwa zvisina Mumera, zuva reibaiwa makwai ePhasika, vadzidzi vake vakati kwaari, “Unoda kuti tiende kuri koonasirira kuti udye Phasika?” Naye wakatuma vairi vevadzidzi vake, akati kwavari, “Endai mudhorobha, unozoshongana nemwi mwamuna akatwara hari yemvura; muteerenyi, kunyazwi ngepari paanozopotera munozoti kumuna wemhatso, ‘Mudzidzisi unoti, Riripari kamera rangu revaeni, apo pendinozodya Phasika nevadzidzi vangu?’ Naye unozomupangidzira kamera guru romuturika rakanasirirwa ndizvo zveshe. Naapo munozotinasirira zvokudya zvePhasika.” Nevadzidzi avo vakabuda kuenda, vakaguma mudhorobha, vakaona kudai ngezvaakaronza kwavari, navo vakanasirira Phasika. Naapo aamadeekoni wakaguma nevanegumi navairi. Vari patafura vechidya, Jesu wakati, “Ngegwinyiso ndinoti kwomuri, umwe wenyu unozondipira, umwe uwo unodya neni.” Navo vakatanga kutambudzika, vechiti kwaari umwe ngaumwe, “Ndini here?” Wakati kwavari, “Ngoumwe wevanegumi navairi, uwo unosheya chingwa neni mundiro imweyo. Ngokuti Mukororo woMunhu unoenda kudai ngezvezvakanyorwa ngendaa yake, asi ihehe kwaari munhuwo Mukororo woMunhu waanozopirwa ndiye! Kwaiya kwakapinda kunaka kwaari munhuwo kudai asakabarwa.” Vachadya, Jesu wakatora chingwa, akabonga, wakachigura, akavapa, akati, “Torai; ichi ndiwo muiri wangu.” Wakatora tsani, naapo abonga wakaipa kwavari, navo vakamwa veshe kweiri. Naye wakati kwavari, “Iyi ingazi yangu yechitenderano, iyo inoparadzirwa vazhinji. Ngegwinyiso ndinoti kwomuri, andichazomwizve michero yemivhini metsa kuzuva iro rendinozomwa idzva muumambo hwaMwari.” Naapo vaemba ngoma vakabuda kuenda kuMutunhu wemaOrivhi. Jesu wakati kwavari, “Imwimwi mweshe munozopumhuniswa, ngokuti kwakanyorwa kuti, ‘Ndinozorova muushi nemakwai anozoparadzwa.’ Asi ngesure kwokumuswa kwangu, ndinozoenda pamberi penyu muGarire.” Asi Petro wakati kwaari, “Kunyazwi veshe vanozopumhuniswa, asi haiwa inini.” Jesu wakati kwaari, “Ngegwinyiso ndinoti kwouri, iwewe nyamashi, usiku uno jongwe risati rarira kairi, unozondiramba katatu.” Asi iye wakaereketa ngesimba yaamho echiti, “Kunyazwi ndechizofa newe, andizokurambi akadi.” Navo veshe vakadarowo. Vakaguma kundau inozwi Getsemani; naye wakati kuvadzidzi vake, “Garai panapa inini ndechikumbira.” Wakatora naye Petro, Jakobe naJohani, wakatanga kukaruka nokutambudzika kakurutu. Wakati kwavari, “Mweya wangu unotambudzika kakurutu metsa mukufa. Garai panapa, murinde.” Naye wakaendamberi padoko, akawa pashi pamavhu, akakumbira kuti, dai zvechiitika kuti awa iri ripinde kubva kwaari. Naye wakati, “Aba, Baba, zviro zveshe zvinoitika kwouri; dusa iyi tsani kubva kwendiri. Asi kusaita kuda kwangu, asi kuda kwako.” Wakauya, akavaona vakaata, akati kunaPetro, “Simoni, waata here? Wakorera here kurinda awa rimwe? Rindai mukumbire kuti musapotera mukuedzwa; mweya unotenda asi nyama aina simba.” Wakahwirirazve, akakumbira, echiereketa mazwi ndiwo ndiwo. Wakapetukazve akaona vakaata, ngokuti madziso avo aiya echirema; navo avazi kuzia chokumupingura. Wakauya ngekwechitatu, akati kwavari, “Muchakandoata here, mwechizorora? Zvakwana! Awa raguma; penyai, Mukororo woMunhu unopirwa munyara dzevashaishi. Mirukai, tiende. Wonai uwo unondipira waa pasinde.” Paripo, achaereketa, Judhasi wakaguma, umwe wevanegumi navairi, anembungano ine shoti nenduku, vechibva kuvapristi vakuru nevanyori nevakuru vevanhu. Zvinopano iye waiya akavapa chioniso echiti, “Uwo wendinozochingamidza ngomuromo ndiye; mubatenyi mumukweye ngokungwaririka.” Naapo aguma, paripo wakauya kwaari akati, “Rabhi!” Naye wakamuchingamidza ngomuromo. Navo vakamubata ngenyara dzavo vakamutora. Asi umwe weavo vaiema apo wakashwamura shoti yake, wakatema hloko yomupristi mukuru, akagura nzee yayo. Jesu wakati kwavari, “Mwabuda kundibata here kudai ngevanoambana negandanga, muneshoti nenduku? Ndaiya ndinemwi mazuva eshe muTemperi ndechidzidzisa, nemwi amuzi kundibata. Asi izvi zvinoitika kuti zvakanyorwa zvidzadzisike.” Navo veshe vakamusiya, vakatiza. Jaha rakamuteera, raiya nejira rakachena rakariti kupekupe pamuiri waro risina chimweni chokusimira. Navo vakaribata, asi iro rakasiya jira rakachena, rikatiza riri mupunu. Navo vakakweya Jesu kuenda naye kumupristi mukuru. Kwakaungana pamwepo vapristi vakuru veshe nevakuru vevanhu nevanyori. Petro waiya echimuteera ngokuretu, metsa wakaguma mukati muruwanze rwomupristi mukuru; naye wakagara nevarindi vomupristi mukuru nokugota muriro. Zvinopano vapristi vakuru nevatongi veshe vakatsvaka chapupu ndiJesu kuti vamuuraye, asi avazi kuchiona. Ngokuti vazhinji vakaereketa chapupu chokunyepa ndiye, nouchapupu hwavo ahuzi kutenderana. Kwakamiruka vamweni vanhu vakaita chapupu chokunyepa ndiye vechiti, “Takamuzwa echiti, ‘Ndinozoputsa iri Temperi rakaakiwa ngenyara, ngemazuva matatu ndinozoaka rimweni, risikaakwi ngenyara.’ ” Ndizvozve ngokudaro uchapupu hwavo ahuzi kutenderana. Nomupristi mukuru wakaema pakati pavo, akabvunza Jesu echiti, “Aupinguri chiro here? Chiinyi ichi chevanopupura ava ndiwe?” Asi iye wakanyarara, aazi kupingura chiro. Mupristi mukuru wakamubvunzazve echiti kwaari, “Iwewe uri Kristu here, Mukororo woUwo Unomuchena?” Jesu wakati, “Ndini; nemwi munozoona Mukororo woMunhu akagara ngokumudyo kwoUnesimba, echiuya mumakore omudenga.” Nomupristi mukuru wakabaura machira ake echiti, “Tichatamirenyi zvapupu? Mwazwa kutuka kwake. Munotinyi?” Navo veshe vakagura kuti unosisira kufa. Vamweni vakatanga kumupfira mata nokufukidza hope yake nokumupamhadza nokuronza kwaari kuti, “Profeta!” Nevarindi vomupristi mukuru vakamuashira ngokumupamhadza ngenyara. Naapo Petro ari paruwanze, kwakauya kwaari umwe wevasikana vomupristi mukuru. Naye echiona Petro echigota muriro, wakamuringira, akati, “Iwewewo waiya naJesu weNazaretha.” Asi iye wakaramba echiti, “Andizii, andizwisisi kuti unotinyi.” Naye wakabuda akaenda paruwanze pamusiwo, nejongwe rakarira. Nomusikana uwo wakamuona, wakatangazve kuronzera avo vaiemapo echiti, “Uyu ndiye umwe wavo.” Asi iye wakarambazve. Ngesure kwenguva doko avo vaiemapo vakatizve kunaPetro, “Ngegwinyiso iwewe uri umwe wavo, ngokuti uri muGarire.” Asi iye wakatanga kutuka nokupika echiti, “Andimuzii uyu munhu womunoereketa ndiye.” Apapo ngokukasira jongwe rakarira kwechipiri. NaPetro wakakarakadza izwi raakaereketa Jesu kwaari rokuti, “Jongwe risati rarira kairi unozondiramba katatu.” Naapo akarakadza ngeizvo, wakachema. Mangwanani maishi vapristi vakuru, pamwepo nevakuru vevanhu, vanyori nevatongi veshe vakapangana; vakasunga Jesu, vakamutora, vakamupira kunaPiratu. Piratu wakamubvunza echiti, “Iwewe ndiwe mambo wevaJudha here?” Asi iye wakapingura, akati kwaari, “Watoronza.” Nevapristi vakuru vakamuitira ndaa dzakawanda. Piratu wakamubvunzazve echiti, “Aupinguri chiro here? Ringira kuwanda kwendaa dzevanokuitira.” Asi Jesu aazi kuchazomupingurazve, ndizvo Piratu wakashamiswa. Zvinopano kumushongano wokudya waisivasunhurira mubhanditi umwe uwo wevaizokumbira. Pakati pemabhanditi aiya mutirongo paiya naumwe waizwi Bharabhasi, uwo wakasungwa pamwepo naavo vaiya vakamukira, avo mukumukira kwavo vakauraya munhu. Nembungano yechikwirayo, yakatanga kukumbira Piratu kuti avaitire kudai ngomutoo wake kwavari. Piratu wakapingura kwavari echiti, “Munoda here kuti ndimusunhurire mambo wevaJudha?” Ngokuti wakazia kuti vapristi vakuru vaiya vamupira ngendaa yendurumwa. Asi vapristi vakuru vakavherudza mbungano kuti zvirinane kuti avasunhurire Bharabhasi. Piratu wakapingurazve, akati kwavari, “Ndizvo ndinozoitenyi kwaari uwo womunoti ndimambo wevaJudha?” Navo vakaboorerazve vechiti, “Mukohomere.” Piratu wakati kwavari, “Ngenyi? Chiinyi chakashata chaakaita?” Asi vakaboorera kakurutu vechiti, “Mukohomere.” NaPiratu echida kudakadza mbungano wakavasunhururira Bharabhasi, akavapa Jesu, ambomupamhadza, kuti akohomerwe. Masoja akamukweya kuenda mukati mungome, akakoka pamwepo chikwata cheshe chemasoja. Nawo akamupfekesa jira rakatsvukuruka, akapomba dzungudza reminzwa, akariisa musoro mwake. Akatanga kumuchingamidza echiti, “Makosi, mambo wevaJudha!” Akamurova musoro ngorutsanga, akamupfira mata, akagwadama ngemabvi awo, akamudira. Naapo vamuitira jee, vakamukhumura jira rakatsvukuruka, vakamupfekesa zvokusimira zvake. Navo vakamukweya kuenda naye kubanze koomukohomera. Navo vakaangiridza umwe waipindapo, Simoni weKurene, echibva munharaundayo, baba waArekizanda naRufusi, kuti atware muchinjiko wake. Vakamuunza kundau inozwi Gorogotha, (iyo inozwi ngokukumuchwa, Ndau yeDenhenya.) Navo vakamupa vhini rakakumanidzwa nemhura; asi iye aazi kuriashira. Vakamukohomera, vakapaurirana zvokufuka zvake pakati pavo, vechiita mabhigidha okuona kuti umwe ngaumwe ungatorenyi. Raiya awa rechitatu revakamukohomera. Nechinyorwa chendaa yake chaiti “MAMBO WEVAJUDHA.” Jesu wakakohomerwa pamwepo nemagandanga mairi, rimwe ngokumudyo nerimweni ngokumuoshwe kwake. [ Nezvinyorwa zvakadzadzisika izvo zvinoti, “Wakaerengwa pamwepo nevashaishi.”] Naavo vaipinda ngaapo vakamutuka, vechigudwaira masoro avo vechiti, “Ehee! Iwewe unoparadza Temperi nokuriaka ngamazuva matatu, dziponese, udzake kubva pamuchinjiko!” Vakadarowo vapristi vakuru vechimuitire jee pakati pavo, nevanyori vechiti, “Wakaponesa vamweni, aangakoni kudziponesa. Ngaadzake kubva pamuchinjiko Kristu, Mambo wavaIsuraeri, kuti tione, titende.” Naavo vakakohomerwa naye vakamutukawo. Kubvira ngeawa rechitanhatu kwaiyapo chidima padera penyika yeshe metsa awa rechipfumbamwe. Ngeawa rechipfumbamwe Jesu wakadaidzira ngeizwi guru echiti, “Eloi, Eloi, Lama Sabakathani?” Ukwo kunoti ngokukumuchwa, “Mwari wangu, Mwari wangu, wandisiya ngenyi?” Vamweni veavo vaiemapo vechizwa, vakati, “Izwai, unodaidza Erija.” Umwe wakarumba, akazadza siponji ngevhini rinorungura, wakariisa padera perutsanga, akamupa kuti amwe echiti, “Rekerai, tione kuti Erija unouya here koomudzasa pashi.” Jesu wakadaidzira ngeizwi guru, wakafa. Nejira romuTemperi rakabaurwa ngepakati, kubvira ngedera metsa kuguma pashi. Naapo nduna yezana, iyo yaiema yakaringisana naye, yaona kuti wafa ngokudaro, yakati, “Ngegwinyiso munhu uyu waiya Mukororo waMwari!” Vaiyapo madzimai vairingira vari kuretu, pakati pavo kwaiyapo Maria Magadhareni, Maria mai aJakobe mudoko, Josesi naSarome. Avo vakamuteera achiri muGarire, vechimushandira; nemadzimai amweni akawanda avo vakakwira naye Jerusarema. Naapo kwaita madeekoni, ngokuti raiya zuva rokunasirira, ukwo kunoti raiya zuva rinotangira Sabatha. Kwakauya Josefa weArimathea, gota rairemeredzwa, uwo naye pachake waigarira umambo hwaMwari, wakapotera kunaPiratu ngokutsunga, akakumbira kupuwa muiri waJesu. Piratu wakashamiswa kuti waiya afa; echidaidza kwaari nduna yezana, wakaibvunza kuti watofa here? Naapo azwa ngenduna yezana kuti wafa, wakapa muiri waJesu kuna Josefa. Naye wakatenga jira rakachena, akamudzasa pashi, akamuputira mujira rakachena, akamuradzika muguwa rakatsetswa pabuwe, akamburumbudzira buwe pamusiwo weguwa. Maria Magadhareni naMaria mai aJosesi vakaona apo paakaradzikwa. Naapo Sabatha rapinda, Maria Magadhareni, Maria mai aJakobe naSarome, vakatenga mutombo unonuhwira, kuti vaende vamudzodze. Mangwanani maishi ngezuva rokutanga revhiki vakaguma kuiba zuva roobuda. Navo vaiti pakati pavo, “Ndiani unozotimburumbudzira buwe kubva pamusiwo weiba?” Navo vechiringira, vakaona kuti buwe raiya ramburumbudzwa, ngokuti raiya gurutu yaamho. Naapo vapotera muiba, vakaona murumbwana akagara ngokumudyo, akapfeka gauni rakachena; navo vakashamiswa. Naye wakati kwavari, “Musashamiswa; munotsvaka Jesu weNazaretha, uwo wakakohomerwa. Wamuka, amuna muno. Ringirai pevakamuradzika. Asi endai, muronzere vadzidzi vake naPetro kuti, ‘Unomutangira kuenda Garire; munozomuonayo kudai ngezvaakaronza kwomuri.’ ” Navo vakabuda, vakatiza kubva paiba, ngokuti vakagumirwa ngokuhuta nokushamiswa; navo avazi kuronza chiro kumunhu, ngokuti vaitya. [ Naapo amuka mangwanani maishi ngezuva rokutanga revhiki, wakaoneka kutanga kunaMaria Magadhareni, uwo waiya akaduswa madhimoni manomwe. Wakaenda akaronzera avo vaiya vanaye, vaitsumba nokuchema. Asi apo vazwa kuti unopona nokuti waiya aoneka ndiye, avazi kutenda. Ngesure kweizvi wakaoneka kunevairi vavo, anechiemo chimweni, vaihamba munharaunda. Navo vakapetuka, vakaronzera vamweni veshe. Asi avazi kuvatenda. Ngesure kweizvo wakaoneka kunevanegumi naumwe vakagara patafura; naye wakavaganyira ngokusikatenda kwavo nokukonza kwomwoyo yavo, ngokuti avazi kutenda avo vaiya vamuona ngesure kwokumuka kwake kubva kwevakafa. Naye wakati kwavari, “Endai munyika dzeshe, muchumaire vhangeri kunezvisikwa zveshe. Iye unotenda abhabhatidzwe unozoponeswa; asi uwo usikatendi unozorashwa. Neiyi mioniso inozoa naavo vanotenda; ngezina rangu vanozodzinga madhimoni; vanozoereketa ngendimi itsva; vanozobata nyoka, kunyazwi vakamwa chinouraya, achitongozovaremadzi; vanozoisa nyara dzavo padera pevanorwara navo vanozotambiswa.” Ndizvo zvino Mambo Jesu, apedza kuereketa navo, wakaashirwa mudenga, akagara ngokumudyo kwaMwari. Navo vakaenda, vakachumaira kundau dzeshe, Mambo echishanda pamwepo navo, echigwinyisa izwi ngemioniso yaiya navo.] Ngokuti vanhu vazhinji vakaedza kurongedza tsamba ngendaa yezviro zvakaitika pakati pedu, kudai ngezvezvakapuwa kwetiri ngaavo kubvira pakutanga vaiya zvapupu zvakaona ngemadziso nevashandi veizwi, kwakandinakira ininiwo, apo ndaiya ndanasa kuringisisa ngokwakaperera zviro zveshe kubvira pakutanga, kuti ndinyore ngokuteererana kwomuri, imwimwi makosi Theofirusi, kuti muzie gwinyiso remazwi awo emwakadzidziswa. Ngamazuva aHerodhi, mambo weJudhia, waiyapo mupristi waizwi ndiZekharia, webingo raAbhia, waiya nomukadzi wake waiya mukunda weverudzi rwaAroni, nezina rake raiya Erizabhethi. Navo veshe vaiya vakarurama pamberi paMwari, vechingwarira mipango nezviemeso zveshe zvaMambo Mwari vasina ndaa. Navo vaiya vasina mwana, ngokuti Erizabhethi waiya ngomwa, navo vaiya vakura yaamho veshe. Zvino achaita mushando woupristi pamberi paMwari ngokuteererana kwebingo rake, kudai ngomushuma woupristi, bingo rake raiya rokupotera muTemperi raMambo Mwari nokupisha mutombo unegwema rakanaka. Nembungano yeshe yevanhu yaikumbira kubanze ngeawa rokupisha mutombo unegwema rakanaka. Kwakaoneka kwaari ngirosi yaMambo Mwari yakaema ngokumudyo wearita rokupishira mutombo unegwema rakanaka. Zekharia wakatambudzika ngokuiona, nokutya kwakamugumira. Asi ngirosi yakati kwaari, “Usatya, Zekharia, ngokuti kukumbira kwako kwakazwika, nomukadzi wako Erizabhethi unozokubarira mukororo, newe unozodudza zina rake kuti Johani. Newe unozodakara nokudakadzwa, navazhinji vanozodakara ngokubarwa kwake; ngokuti iye unozoita mukuru mukuona kwaMambo Mwari, naye aazomwi vhini nokuti zvinoradzisa, naye unozozadzwa ngoMweya Wakachena, eya kubvira mundani yamai ake. Naye unozotenderudzira vazhinji vevana vaIsuraeri kunaMambo Mwari wavo, naye unozohamba pamberi pehope yake ngomweya nesimba raErija, kutenderudzira mwoyo yemadzibaba kunevana, nevasikapurutani kuti vahambe mukungwara kwevakarurama, kunasirira vanhu kuti vaite vakanasirirwa Mambo Mwari.” NaZekharia wakati kunengirosi, “Ndinozozia ngenyi ichi? Ngokuti ndakura yaamho nomukadzi wangu wakura yaamho.” Nengirosi yakamupingura yechiti kwaari, “Ndiri Gabhurieri, uwo unoema pamberi paMwari, neni ndatumwa kuti ndierekete kwouri nokukuunzira aya mashoko akanaka. Penya, unozoita chimbungumbungu usikakoni kuereketa metsa rigume zuva iro rezvinozoitika izvi, ngokuti auzi kugonda mazwi angu, awo anozoitika ngenguva yawo.” Nevanhu vechigarira Zekharia vakashamiswa ngokunonoka kwake muTemperi. Naapo abuda, waiya asikachakoni kuereketa kwavari, navo vakazia kuti iye waiya aona chioniso ari muTemperi; naye wakaereketa kwavari ngenyara, akagara ari chimbungumbungu. Naapo mazuva okushanda kwake apera, wakaenda kanyi kwake. Ngesure kwemazuva awo mukadzi wake Erizabhethi wakaita mimba, naye wakadzifisha mwedzi mishanu echiti, “Ndizvo Mambo Mwari wakaita ichi kwendiri ngamazuva awo aakandiringira ndiwo, kuti aduse chimene changu pakati pevanhu.” Ngomwedzi wechitanhatu ngirosi Gabhurieri yakatumwa kubva kunaMwari kuenda kudhorobha reGarire raizwi Nazaretha, kumhandara yaiya yakaemeserwa munhu zina rake raizwi ndiJosefa, worudzi rwaDhavhidha, nezina remhandara iyo raizwi Maria. Nayo yakapotera kwaari ikati, “Mwauya, iwewe waona nyasha, Mambo Mwari unewe!” Asi iye wakatambudzika kakurutu ngokuereketa kwayo, akapinimidza kuti uku kuchingamidza kunoronzenyi. Nengirosi yakati kwaari, “Usatya, Maria, ngokuti iwewe waona nyasha kunaMwari. Penya, unozoita mimba newe unozobara mukororo, unozodudza zina rake kuti Jesu. Naye unozoita mukuru, unozozwi Mukororo woUwo Uripadera pazveshe; naMambo Mwari unozomupa dendemaro rababa ake Dhavhidha, naye unozotonga padera pemhatso yaJakobe mhera nariini; noumambo hwake ahutongozoa nemagumo.” Maria wakati kunengirosi, “Ichi chingaita maitikirenyi ndisina mwamuna?” Ngirosi yakapingura, ikati kwaari, “Mweya Wakachena unozouya padera pako, ndizvo uwo unozobarwa unozozwi wakachena, Mukororo waMwari. Penya, Erizabhethi hama yako unemimba yomukororo, akura yaamho; nouyu waamwedzi wechitanhatu kwaari uwo waizwi ingomwa. Ngokuti kunaMwari apana chinokorereka.” NaMaria wakati, “Penya, ndiri murandakadzi waMambo Mwari; ngakuitike kwendiri kudai ngeizwi rako.” Nengirosi yakabva kwaari. NaMaria wakamiruka ngaawo mazuva, wakaenda ngokukasira kunyika yezvimitunhu, kuguta reJudhia, naye wakapotera mumhatso yaZekharia, akachingamidza Erizabhethi. Kwakaitika apo Erizabhethi azwa kuchingamidza kwaMaria, mwana wakanyanduka mundani mwake; naErizabhethi wakazadzwa ndiMweya Wakachena, naye wakadaidzira ngeizwi guru echiti, “Unomuchena iwewe pakati pevakadzi. Unomuchena uwo unozobarwa mundani mwako! Chaitika ngenyi ichi kwendiri, kuti mai aMambo wangu auye kwendiri? Ngokuti penya, apo izwi rokuchingamidza kwako razwika munzee dzangu, mwana wakanyanduka mundani mwangu ngokudakara. Unomuchena uwo wakatenda kuti kunozoapo kuitika kweizvo zvakaereketwa kwaari zvechibva kunaMambo Mwari.” Maria wakati, “Mweya wangu unokurisa Mambo, nomweya wangu unodakara kukurutu kuna Mwari, Muponesi wangu, ngokuti iye wakaringira upashi hwomurandakadzi wake. Ngokuti ringira, kubvira zvinopano yeshe mibarirwana inozondierenga kuti ndinomuchena; ngokuti uwo unesimba wakaita zvikuru kwendiri, nezina rake riri rakachena. Nenyasha dzake dziri padera pavo vanomutya kubvira kumubarirwana kuenda kumubarirwana. Iye wakaonisa simba rake ngomuoko wake, wakaparadza avo vanodzikudza ngokupinimidza kwomwoyo yavo. Wakadzasa pashi vane simba kubva pamadendemaro avo, akakurisa avo varipashi; wakagutisa avo vanenzara ngezvakanaka, akaendesa makurudza asina chiro. Wakadetsera muranda wake Isuraeri, kuti akarakadze nyasha dzake, kudai ngezvaakaereketa kunemadzibaba edu, kunaAbrahama nokurudzi rwake mhera nariini.” NaMaria wakagara naye kwaida kuita mwedzi mitatu, naye wakapetuka kanyi kwake. Zvinopano mukuwo waErizabhethi wakasvika wokuti abare, naye wakabara mukororo. Nevaakirwana vake nehama dzake vakazwa kuti Mambo Mwari waiya akurisa nyasha dzake kwaari, navo vakadakara pamwepo naye. Kwakaitika ngezuva rechisere kuti vakauya kuzocheka mwana, navo vaida kumududza zina rake kuti ndiZekharia, kudai ngezina rababa ake. Asi mai ake vakapingura vakati, “Haiwa; asi unozodudzwa kuti Johani.” Navo vakati kwaari, “Apana naumwe wehama dzenyu wakambodudzwa ngeiro zina.” Navo vakakopera kunababa ake, kuti vazwe kuti ungada kuti adudzwe kutinyi. Naye wakakumbira pokunyorerapo, wakanyora kuti, “Zina rake ndiJohani.” Navo veshe vakashamiswa. Paripo muromo wake wakabeurwa norurimi rwake rwakasunhurwa, naye wakaereketa, echikudza Mwari. Nokutya kwakagumira avo veshe vaigara pasinde pavo. Nemashoko eizvi akashumirwa munyika yeshe yezvimitunhu zveJudhia; navo veshe vakazvizwa vakazvingwarira mumwoyo yavo vechiti, “Uyu unozoita mwana wakaitawani?” Ngokuti nyara yaMambo Mwari yaiya naye. Nababa ake Zekharia wakazadzwa ndiMweya Wakachena, naye wakaprofeta echiti, “Unomuchena Mambo Mwari waIsuraeri, ngokuti iye wakahambira nokuripira vanhu vake, naye wakatimirudzira runyanga rworuponeso mumhatso yomuranda wake Dhavhidha, kudai ngezvaakaereketa ngomuromo wevaprofeti vakacheneswa vake vekaretu, kuponeswa kubva kumagaa edu nokubva kunyara yaavo veshe vanotinyenya; kuonisa nyasha kunemadzibaba edu, nokukarakadza chitenderano chake chakachena, mhiko iyo yaakapika kunababa edu Abrahama, yokuti isusu, techinunurwa kubva munyara yemagaa edu, timushandire tisina chokutya, mukucheneswa nomukururama pamberi pake mazuva eshe okurarama kwedu. Iwewe, mwana, unozozwi muprofeti woUwo Uripadera pazveshe; ngokuti iwewe unozohamba pamberi pehope yaMambo Mwari kunasirira njira dzake, kupa ruziyo rworuponeso kuvanhu vake ngokurekererwa kwezvishaishi zvavo, ngendaa yokupfaa kwenyasha dzaMwari wedu, naapo kuedza kwezuva kunobva mudenga kunozotihambira, kujeka padera paavo vanogara muchidima nomubvute rokufa, kutungamirira tsoka dzedu munjira yokunyarara.” Mwana wakakura, wakagwinya mumweya, waiya mushango metsa rorooguma zuva rokuoniswa kwake kunevaIsuraeri. Ngaawo mazuva chakabuda chironzo chechibva kunaSiza Agustusi kuti nyika yeshe inyorwe mazina. Nouku kunyorwa kwaiya kwokutanga kwakaitika apo Kureniusi ari mutongi weSiria. Navo veshe vakaenda koonyorwa, munhu weshe kudhorobha raakabarirwa. NaJosefawo wakakwira echibva Garire, mudhorobha reNazaretha, akaenda Judhia, kudhorobha raDhavhidha raizwi Bhetherehema, ngokuti iye waiya wemhuri norudzi rwaDhavhidha, kuti anyorwe pamwepo naMaria, uwo waiya chigango chake, akurirwa ngemimba. Naapo vachipo, mazuva akakwana okuti abare. Naye wakabara dangwe rake romukororo, naye wakamuputira ngejira, akamuradzika muchidziyo chen'ombe, ngokuti kwaiya kusina ndau yavo mumhatso yevaeni. Kwaiya nevaushi munyikeyo, vaigara mushango vechingwarira mutanga wavo usiku. Nengirosi yaMambo Mwari yakaoneka kwavari, nouthende hwaMambo Mwari hwakajeka kuvatendenedza, navo vakatya kakurutu. Nengirosi yakati kwavari, “Musatya; ngokuti penyai, ndinomuunzira mashoko akanaka, anodakadza kakurutu awo ari evanhu veshe; ngokuti mwaberekerwa nyamashi mudhorobha raDhavhidha Muponesi, ndiye Kristu Mambo. Neichi chinozoita chioniso kwomuri; kuti munozoona mwana akaputirwa ngejira akaradzikwa muchidziyo chen'ombe.” Paripo yaiyapo nengirosi mbungano huru yehondo yomudenga yechikudza Mwari yechiti, “Ngaakudzwe Mwari mudengadenga, nokunyarara munyika pakati pevanhu, avo vaanonasa kudakara ndivo!” Naapo ngirosi dzaenda mudenga kubva kwavari, vaushi vakati umwe kunoumweni, “Ngatiende Bhetherehema, toona ichi chaitika, chaaziisa Mambo kwetiri.” Navo vakaenda ngokukasira, vakavaona veshe Maria naJosefa, nomwana akaradzikwa muchidziyo chen'ombe. Naapo vechimuona vakaziisa mashoko awo akaronzwa kwavari ngendaa yemwana uyu; navo veshe vakazwa vakashamiswa ngeizvo zvevakaronzerwa ngavaushi. Asi Maria wakangwarira izvi zveshe, echizvitsengesesa mumwoyo mwake. Nevaushi vakahwirira, vechikurisa nokukudza Mwari ngeizvo zveshe zvevakazwa nezvevakaona, kudai ngezvezvakaronzwa kwavari. Naapo mazuva masere apera okuti achekwe, vakadudza zina rake kuti Jesu, iro rakadudzwa ngengirosi isati yaapo mimba yake. Naapo apera mazuva okucheneswa kwavo, kudai ngeMipango yaMosi, vakakwira naye Jerusarema kuti vamupire kunaMambo Mwari (kudai ngezvezvakanyorwa muMipango yaMambo Mwari kuti, “Vakororo veshe varimatangwe vanozozwi vakachena kunaMambo Mwari,”) nokupira mudiro kudai ngezvezvakaronzwa muMipango yaMambo Mwari, “Wemagora mairi nokuti mabwipwi mairi enjia.” Penya, kwaiyapo munhu muJerusarema zina rake raizwi ndiSimeoni, nomunhu uyu waiya akarurama nowaidira Mwari, echigarira kuembedzerwa kwaIsuraeri, noMweya Wakachena waiya padera pake. Nakwo kwakaoniswa kwaari ngoMweya Wakachena kuti aatongozofi asati aona Kristu waMambo Mwari. Echikweiwa ndiMweya wakauya muTemperi; naapo vabari vaunza mwana Jesu, kuti vaite kwaari kudai ngomushuma weMipango, naye wakamubata mumaoko ake, akakudza Mwari echiti, “Mambo Mwari, zvinopano tendera kuti muranda wako aende ngokunyarara, kudai ngeizwi rako; ngokuti madziso angu aona ruponeso rwako, urwo rwewakanasirira pamberi pehope yevanhu veshe, kujeka ukwo kunovhenekera vemadzinza, kuri uthendezve kuvanhu vako Isuraeri.” Baba ake namai ake vakashamiswa ngeizvo zvakaereketwa ngepamusoro pake. NaSimeoni wakavafumisa, akati kunamai ake Maria, “Penya, mwana uyu wakaemeserwa kuwa nokumuka kwevazhinji muIsuraeri, nokuitazve chioniso chinozorambwa, (eya neshoti inozobayawo mweya wako) kuti mipinimidzo yomwoyo mizhinji ioniswe.” Kwaiyapozve Ana muprofeti womukadzi, mwanasikana waFanueri wedzinza raAsha. Waiya aamusharuka, iye waiya akagara nemwamuna wake makore manomwe sure kwousikana hwake. Naye wakaita shirikadzi makore makumi masere namarongomuna. Aazi kutongobuda kubva muTemperi, echidira nokuera kudya nokukumbira usiku nemasikati. Naye echiuya ngeiro awa wakabonga Mwari, wakaereketa ndiye kwavari veshe vaigarira kuripirwa kweJerusarema. Naapo vaiya vaita zviro zveshe kudai ngezvaidiwa ngeMipango yaMambo Mwari, vakahwirira Garire, kudhorobha ravo Nazaretha. Nomwana wakakura, akagwinya, aneungwaru; nenyasha dzaMwari dzaiya padera pake. Nevabari vake vakagara vechindoenda makore nemakore Jerusarema kumushongano wokudya wePhasika. Naapo Jesu aanemakore gumi namairi, vakakwira kudai ngomushuma wokuenda kumushongano wokudya. Naapo vapedza mazuva awo voopetuka, murumbwana Jesu wakasara sure muJerusarema. Nevabari vake avazi kuzvizia. Asi vechipinimidza kuti uri mukati mwembungano, vakahamba muhambo wezuva rimwe, navo vakamutsvaka mukati mwehama dzavo neshamwari dzavo. Naapo vasikamuoni, vakahwirira Jerusarema vechimutsvaka. Ngesure kwemazuva matatu vakamuona ari muTemperi, akagara mukati mwevadzidzisi, echivazwa nokuvabvunza mibvunzo. Navo veshe vakamuzwa vakashamiswa ngokuzia kwake nokupingura kwake. Naapo vakati vechimuona vakahahairwa; namai ake vakati kwaari, “Mwana, watiitira zvakadai ngenyi? Penya, baba ako neni taikutsvaka techitambudzika.” Naye wakati kwavari, “Mwainditsvaka ngenyi? Musaizia here kuti kunosisira kuti ndiwe mumhatso yaBaba angu?” Navo avazi kuzwisisa izwi iro raakaereketa kwavari. Naye wakadzaka navo, akaguma Nazaretha, wakavapurutana. Namai ake vakangwarira mazwi eshe aya mumwoyo mwavo. NaJesu wakakura muungwaru nomuiri, nomukudiwa ndiMwari nevanhu. Ngegore regumi namashanu rokutonga kwaThibheriusi Siza, Phontiusi Piratu mutongi weJudhia, naHerodhi sadunhu weGarire, nomunun'una wake Firipu sadunhu wenyika yeIturia neyeTrakhonitisi, naRusaniasi sadunhu weAbhirene, Anasi naKaiafasi, vari vapristi vakuru, izwi raMwari rakauya kuna Johani mukororo waZekharia ari mushango; naye wakauya kunyika yeshe inotendenedza Jorodhani, echichumaira rubhabhatidzo rwokutenderuka kwokurekererwa kwezvishaishi. Kudai ngezvezvakanyorwa mubhuku remazwi aIsaya muprofeti kuti, “Izwi rounodaidzira mushango kuti: Nasirirai njira yaMambo Mwari, ruramisai makwara ake. Mapani eshe anozozadzwa, nemitunhu yeshe nezvimitunhu zvinozodzaswa pashi, nezvakashongoroka zvinozoruramiswa, nenjira dzakaita marindi dzinozoserereswa; nevanhu veshe vanozoona ruponeso rwaMwari.” Ndizvo wakati kuvazhinji avo vakabuda kuuya kuzobhabhatidzwa ndiye, “Imwimwi vana vemabuura! Ndiani wakamunyowedza kuti mutize ushungu hunouya? Ndizvo mwechibara michero inoonisa kutenderuka, musatanga kukarakadza mukati mwenyu kuti, tina Abrahama baba edu, ngokuti ndinoti kwomuri, Mwari unesimba kumusira vana kunaAbrahama ngaaya mapuwe. Kunyazwi zvinopano sanho ratoiswa panzinde dzemiti; ndizvo muti weshe usikabari michero yakanaka unotemerwa pashi nokukandirwa mumwoto.” Nembungano yakamubvunza yechiti, “Ndizvo tinozoitenyi?” Naye wakapingura, akati kwavari, “Uwo unemabhachi mairi, ngaakowane nousina; nouwo unezvokudya ngaaitewo kudaro.” Nevabharisi vechibharo vakauyawo kuti vazobhabhatidzwa, vakati kwaari, “Mudzidzisi, isusu tinozoitenyi?” Wakati kwavari, “Musapamba zviro zvinopinda izvo zvakaemeserwa kwomuri.” Majoni nawo akamubvunzawo, akati, “Nesuwo tinozoitenyi?” Naye wakati kwavari, “Musazotorera munhu chiro ngesimba nokuti musazoitira munhu ndaa yokunyepa, asi mwechigutiswa ngemisharo yenyu.” Naapo vanhu vachakarira, navo veshe vaidzibvunza mumwoyo ngendaa yaJohani, kuti pamweni ndiye Kristu, Johani wakapingura echiti kwavari veshe, “Inini ndinomubhabhatidza ngemvura, asi unouya uwo unondipinda ngesimba, uwo wendisikasisiri nokusunhura rusinga rwemagwada ake. Unozomubhabhatidza ndiMweya Wakachena nemwoto. Aye unerutsero rwake munyara yake, kuti anase kutsvaira mbuwa yake nokuunganidza koroni mudura rake; asi makoto unozoapisha ngomwoto usikadzimi.” Ndizvo wakachumaira mashoko akanaka nezviro zvimweni zvakawanda kuvanhu echivapanga. Asi Herodhi sadunhu, arambidzwa ndiye ngendaa yaHerodhiasi, mukadzi womunun'una wake, zve ngendaa yezveshe zvakashata zvaaiya akaita Herodhi, wakatutsira ichi chiro padera pazvo zveshe, kuti wakakonyera Johani mutirongo. Naapo vanhu veshe vakabhabhatidzwa, naapo Jesu wakabhabhatidzwawo, achakumbira, denga rakabeurwa, noMweya Wakachena, wairingirika wakadai ngenjia, wakadzaka padera pake, neizwi rakauya rechibva mudenga rechiti, “Iwewe uri Mukororo wangu, unodikanwa, ndinonasa kudakara ndiwe.” Jesu wakaamba kudzidzisa anemakore anoda kuita makumi matatu, ari mukororo waJosefa, mukuona kwevanhu, uwo waiya mukororo waHeri, mukororo waMathati, mukororo waRevhi, mukororo waMereki, mukororo waJanai, mukororo waJosefa mukororo waMatatiasi, mukororo waAmosi, mukororo waNahumi, mukororo waEsiri, mukororo waNagai, mukororo waMaathi, mukororo waMatathiasi, mukororo waSemeini, mukororo waJoseki, mukororo waJodha, mukororo waJohanani, mukororo waResa, mukororo waZerubhabheri, mukororo weShearatieri, mukororo waNeri, mukororo waMereki, mukororo waAdhi, mukororo waKhosami, mukororo waEramadhamu, mukororo waEri, mukororo waJoshua, mukororo waErieza, mukororo waJorimu, mukororo waMathati, mukororo waRevhi, mukororo waSimeoni, mukororo waJudha, mukororo waJosefa, mukororo waJonamu, mukororo waEriakimu, mukororo waMerea, mukororo waMena, mukororo waMatatha, mukororo waNathani, mukororo waDhavhidha, mukororo waJesi, mukororo waObhedhi, mukororo waBhoazi, mukororo waSara, mukororo waNashoni, mukororo waAminadhabhi, mukororo waAdhimini, mukororo waArni, mukororo waHezironi, mukororo waPerezi, mukororo waJudha, mukororo waJakobe, mukororo waIsaka, mukororo waAbrahama, mukororo waThera, mukororo waNahori, mukororo waSerugi, mukororo waReu, mukororo waPheregi, mukororo waEbha, mukororo waShera, mukororo waKhenani, mukororo waArifakisadhi, mukororo waShemu, mukororo waNoa, mukororo waRameki, mukororo waMethusera, mukororo waEnokhi, mukororo waJaredhi, mukororo waMaharareri, mukororo waKhenani, mukororo waEnosi, mukororo waSethi, mukororo waAdhamu, mukororo waMwari. NaJesu, azadzwa ndiMweya Wakachena, wakahwirira kubva Jorodhani, wakasundwa ndiMweya kuenda kushango. Wakapedza mazuva makumi marongomuna mushango echiedzwa ndiDhiabhorosi. Naye aazi kudya chiro ngaawo mazuva; naapo apera, wakafukama. Dhiabhorosi wakati kwaari, “Kudai uri Mukororo waMwari, panga buwe iri kuti riite chingwa.” Jesu wakamupingura akati, “Kwakanyorwa kuti, ‘Munhu aazoponi ngechingwa chega.’ ” Dhiabhorosi wakamukwidza pamutunhu, akamupangidzira umambo hweshe ngekamukuwo kadoko, naye wakati kwaari, “Ndinozopa kwouri iri simba reshe nouthende hwazvo, ngokuti rakapuwa kwendiri, kunyazwi ngouri wendinoda ndinozomupa. Ndizvo kudai iwewe wechizondidira zveshe zvinozoita zvako.” NaJesu wakamupingura akati kwaari, “Kwakanyorwa kuti, ‘Unozodira Mambo Mwari wako, umushandire iye ega.’ ” Naye wakamutungamirira kuenda Jerusarema, akamuisa padera pechachungu cheTemperi, akati kwaari, “Kudai uri Mukororo waMwari, dzikandire pashi kubva panapa, ngokuti kwakanyorwa kuti, ‘Iye unozopanga ngirosi dzake ngepamusoro pako, kuti dzikungwarire, nomunyara dzadzo dzinozokubata, kuti kunyazwi ngouri mukuwo usapumhunwa tsoka yako pabuwe.’ ” NaJesu wakapingura akati kwaari, “Kwakanyorwa kuti, ‘Usazoedza Mambo Mwari, Mwari wako.’ ” Naapo Dhiabhorosi aiya apedza zviedzo zveshe, wakabva kwaari kwekamukuwo. Jesu wakahwirira Garire ari musimba roMweya, nembiri yakateketeswa ngendaa yake munyika dzeshe dzinotendenedza. Naye wakadzidzisa mumhatso dzavo dzokudira, echikudzwa ngevanhu veshe. Naye wakauya Nazaretha, apo paakakurira; naye wakaenda mumhatso yokudira, kudai ngomushuma wake ngezuva reSabatha, akaema kudzidza. Kwakapuwa kwaari bhuku romuprofeti Isaya. Naye wakabeura bhuku, akaona apo pakanyorwa kuti, “Mweya waMambo Mwari uri padera pangu, ngokuti iye wakandidzodza kuchumaira vhangeri kuvarombo. Wakandituma kuteketesa kusunhurwa kumabhanditi nokusvinurwa madziso emapofu, kusunhura avo vakatsikirirwa, kuteketesa gore rinoashirika raMambo Mwari.” Naye wakakonya bhuku, akarihwirinza kunemuranda, akagara pashi. Nemadziso eavo veshe vaiya mumhatso yokudira akamuringira. Naye wakatanga kuereketa kwavari kuti, “Nyamashi ichi chinyorwa chazadzisika munzee dzenyu.” Veshe vakamupupurira zvakanaka, vakashamiswa ngemazwi enyasha akabva kumuromo wake; navo vakati, “Uyu andiyepi here mukororo waJosefa?” Naye wakati kwavari, “Ngegwinyiso munozoti kwendiri ngeichi chisana kuti ‘N'anga dziponese iwewe. Izvo zvetakazwa kuti wakazviita muKhapernaume, chizviitazve panapa munyika yekwako.’ ” Wakati, “Ngegwinyiso ndinoti kwomuri, akuna muprofeti unoashirika munyika yake. Asi ngegwinyiso ndinoti kwomuri, vaiya vazhinji vaiya shirikadzi muIsuraeri ngemazuva aErija, apo denga rakakonywa makore matatu nemwedzi mitanhatu, kwakaita nzara huru padera penyika yeshe; asi Erija aazi kutumwa kunoumwe wavo, asi kwega kuZarefathi, munyika yeSidhoni, kunedzimai raiya shirikadzi. Vaiyapo vazhinji vaiya namapere muIsuraeri ngomukuwo waErisha muprofeti; kwaiya kusina naumwe wavo wakamhodyoswa, asi Naamani ega muSiria.” Navo vakazara veshe ngoushungu vaiya mumhatso yokudira, apo vazwa izvi zviro. Navo vakamiruka, vakamubudisa kubanze kwedhorobha, vakamukweyera kuruwere rwomutunhu apo paiya pakaakiwa dhorobha ravo, kuti vamukandire pashi ngetsukupinya. Asi iye wakahamba ngepakati pavo akaenda. Naye wakadzaka Khapernaume, dhorobha reGarire. Waivadzidzisa ngezuva reSabatha. Navo vakashamiswa ngokudzidzisa kwake, ngokuti mazwi ake aiya nesimba. Mumhatso yokudira kwaiyapo munhu unemweya wedhimoni unetsvina; naye wakazhambarara ngeizwi guru, akati, “Iya! Tinenyi isusu newe, iwewe Jesu weNazaretha? Wauya here kutiuraya? Ndinokuzia kuti urianani, ndiwe Wakachena waMwari.” Asi Jesu wakaukaraidza akati, “Nyarara, buda kubva kwaari!” Naapo dhimoni rakamukandira pashi pakati pavo, rakabuda kwaari, risikazi kumuremadza. Vakashamiswa veshe navo vakaereketa umwe noumweni vechiti, “Izwi iri rinoronzenyi? Ngokuti unopanga mweya ine tsvina ngesimba, nayo inobuda.” Mbiri yake yakateketeswa munyika dzeshe dzakatendenedza. Naye wakamiruka kubuda mumhatso yokudira, akapotera mumhatso yaSimoni. Ambuya vaSimoni vaiya nomutsarara mukuru, navo vakamupota ngepamusoro pavo. Naye wakaema ngedera kwavo, akakaraidza mutsarara, nomutsarara wakavasiya. Paripo vakamiruka, vakavashandira. Naapo zuva roopota, avo veshe vaiya nevanorwara ngenhenda dzakaparadzana, vakavaunza kwaari; naye wakaisa nyara dzake padera poumwe ngaumwe wavo, akavaponesa. Nemadhimoni akabudawo kubva kuvazhinji, echizhambarara echiti, “Iwewe uri Mukororo waMwari!” Asi wakaakaraidza, aazi kuatendera kuti aerekete, ngokuti aimuzia kuti ndiKristu. Naapo kwaedza iye wakabuda, akaenda murubaya musina vanhu. Vanhu vakamutsvaka, vakauya kwaari vechida kumubatiridza kuti asabva kwavari; asi wakati kwavari, “Kunosisira kuti ndichumaire vhangeri roumambo hwaMwari mumadhorobha amweniwo, ngokuti icho ndicho chendakatumirwa.” Naye waichumaira mumhatso dzokudira dzeJudhia. Naapo mbungano ichamumanika kuti izwe izwi raMwari, iye wakaema pagandwa reGenesareta. Naye wakaona ngarava mbiri dzakaema pagandwa, asi vabati vehove vaiya vabuda mungarava vechisuka nhaa dzavo. Naye echipotera kuneimwe yengarava, yaiya yaSimoni, wakamukumbira kuti aisundire mugandwa kadodoko kubva pahumbikumbi. Naye wakagara pashi, akadzidzisa mbungano ari mungarava. Naapo apedza kuereketa, wakati kunaSimoni, “Sundira kwakadzama mwechidzasa nhaa dzenyu koobata hove.” Simoni wakapingura akati, “Mambo, tashanda usiku hweshe, atizi kubata chiro! Asi ngeizwi rako ndinozodzasa nhaa.” Naapo vaita kudaro, vakatendenedza hove zhinji, nenhaa dzavo dzaibauka. Vakakopera vamweni vavo vaiya mungarava imweni kuti vauye vavadetsere. Navo vakauya, vakazadza ngarava dzeshe mbiri, nadzo dzakatanga kudzemera. Asi Simoni Petro aona wakadzirigira pashi pamabvi aJesu echiti, “Mambo, ibva kwendiri, ngokuti ndiri munhu wakashata.” Ngokuti iye wakashamiswa, naavo veshe vaiya naye ngokuwanda kwehove dzevaiya vabata. Ndizvo zvakaitikawo kunaJakobe naJohani, vakororo vaZebhedhi, avo vaiya shamwari dzaSimoni. NaJesu wakati kunaSimoni, “Usatya; kubvira zvinopano unozobata vanhu.” Naapo vaunza ngarava dzavo kuhumbikumbi, vakasiya zveshe, vakamuteera. Naapo ari munerimwe remadhorobha, penya, kwakauya munhu waiya nemapere muiri wake weshe; naapo aona Jesu, wakawa pashi ngehope yake, akamupota echiti, “Mambo, kudai wechida, ungandimhodyosa.” Naye wakatambanudza nyara yake, akamubata, akati, “Ndinoda, wechimhodyoka.” Paripo mapere akapera. Naye wakamupanga kuti asazoronzera munhu naumwe; asi wakati, “Enda, udzipangidzire kumupristi, upe mubairo ngendaa yokumhodyoswa kwako, kudai ngezvaakapanga Mosi, kuita chapupu kwavari.” Asi mbiri yake yakaangirira kuteketeswa. Nembungano huru yakaungana pamwepo kuzwa nokuponeswa nhenda dzayo. Asi iye wakadzipaura kuenda murubaya kookumbira. Ngerimweni remazuva awo echidzidzisa, vaiyapo vaFarisi nevadzidzisi veMipango vakagarapo, avo vaiya vakauya kubva kumaguta eshe eGarire, Judhia neJerusarema; nesimba raMambo Mwari rokuponesa raiya naye. Penya, vanhu vakaunza munhu wairwara ngokuoma muiri, ari pamusengere, navo vakatsvaka kuti vamupotedze mukati nokumuradzika pamberi paJesu. Vasikaoni njira yokumupotedza ndiyo mukati ngendaa yembungano, vakakwira padera vakaita buri padenga remhatso, vakamudzasa pashi ari pamusengere pakati pevanhu pamberi paJesu. Iye echiona kugonda kwavo wakati, “Mwamuna, zvishaishi zvako zvarekererwa kwouri.” Vanyori nevaFarisi vakatanga kubvunzana pachavo vechiti, “Ndiani uyu unoereketa zvituko? Ndiani ungakona kurekerera zvishaishi, kwega Mwari?” Asi Jesu echindozia kupinimidza kwavo, wakapingura akati kwavari, “Munobvunzana ngenyi mumwoyo yenyu? Chiinyi chinopinda kureruka, kuronza kuti, ‘Zvishaishi zvako zvarekererwa kwouri,’ nokuti kuronza kuti, ‘Miruka uhambe?’ Asi kuti muzie kuti Mukororo woMunhu unesimba munyika rokurekerera zvishaishi” (wakati kuneuwo waiya nenhenda yokuoma muiri,) “Ndinoti kwouri, miruka utore musengere wako, uende kumhatso yako.” Paripo wakamiruka pamberi pavo, wakatora icho chaaiya akaata padera pacho, akaenda kumhatso yake echikudza Mwari. Navo veshe vakabatwa ngokushamiswa, navo vakakudza Mwari, vakazara ngokutya vechiti, “Taona zvinoshamisa nyamashi.” Ngesure kweizvi wakabvapo, akaona mubharisi zina rake ndiRevhi, akagara pandau yokubharisa chibharo, wakati kwaari, “Nditeere.” Naye wakasiya zveshe, wakamiruka, akamuteera. NaRevhi wakamuitira dhiri guru mumhatso yake; vaiyapo vazhinji vevabharisi nevamweni avo vaaigara navo pakudya. VaFarisi nevanyori vavo vakavhuruvhutira vadzidzi vake vechiti, “Munodya nokumwa ngenyi nevabharisi nevashaishi?” Jesu wakapingura, akati kwavari, “Avo vakapona avatami n'anga, asi avo vanorwara; andizi kuuya kudaidza vakarurama akadi, asi vashaishi kuti vatenderuke.” Navo vakati kwaari, “Vadzidzi vaJohani vanoera kudya kazhinji vechikumbira, ngokudarozve naavo vevaFarisi, asi vadzidzi vako vanodya nokumwa.” Jesu wakati kwavari, “Mungakona here kuita kuti vemhatso yanyamuroorwa vaere kudya apo mukwambo achinavo? Asi mazuva anozouya apo mukwambo unozoduswa kwavari, naapo vanozoera kudya ngaawo mazuva.” Wakavaronzera muedzaniso echiti, “Akuna munhu unobaura chitembwe pajira idzva kuchitungira pajira ratsakara; echiita kudaro, unozoshaishira jira idzva nechitembwe chitsva achizotodzani nejira rakatsakara. Apana munhu unoisa vhini idzva mukati mwenyede dzatsakara; echiita kudaro, vhini idzva rinozoputisa nyede nevhini rinozorashika nenyede inozotsakatika. Asi vhini idzva rinoiswa munyede itsva. Zve apana munhu wakambomwa vhini rekare, paripo orooemura idzva; ngokuti unoti, ‘Rekare rakapinda kunaka.’ ” Ngezuva reSabatha, echihamba ngomukati mweminda yekoroni, vadzidzi vake vakavhuna mitsonzoti yekoroni, vakapukutira panyara dzavo vechidya. Asi vamweni vevaFarisi vakati, “Munoita ngenyi icho chisikatenderwi mumipango kuitwa ngezuva reSabatha?” Jesu wakapingura, akati kwavari, “Amusati mwatongodzidza here icho chakaitwa ndiDhavhidha apo aiya nenzara, iye naavo vaiya naye; kupotera kwaakaita mumhatso yaMwari, akatora, akadya zvingwa zvakapirwa kunaMwari, akapawo kuneavo vaiya naye, izvo zvisikatenderwi mumipango kuti zvidyiwe, asi kwega ngevapristi?” Wakati kwavari, “Mukororo woMunhu ndiMambo weSabatha.” Ngezuva rimwenizve reSabatha, apo paakapotera mumhatso yokudira, akadzidzisa. Waiyapo munhu uwo waiya nenyara yokumudyo yakaoma. Vanyori nevaFarisi vakamurinda, kuti vaone kuti unozomuponesa here ngezuva reSabatha, vechitsvaka chokumuparisa ndaa ndicho. Asi iye waizia mikarakadzo yavo, akati kunemunhu uwo waiya nenyara yakaoma, “Uya ueme panapa.” Naye wakamiruka, akaemapo. Asi Jesu wakati kwavari, “Ndinomubvunza kuti, kunotenderwa here ngezuva reSabatha kuita zvakanaka nokuti kuita zvakashata? Kuponesa ndaramo nokuti kuiuraya?” Naye wakavaringisisa veshe, akati kwaari, “Tambanudza nyara yako.” Naye wakaita kudaro, nenyara yake yakaponazve. Asi vakazadzwa ngoushungu, vakapangana pakati pavo ngechevangaita kunaJesu. Ngaawo mazuva wakakwira pamutunhu kookumbira; naye wakakumbira usiku hweshe kunaMwari. Naapo kwaedza, wakadaidza vadzidzi vake, naye wakatsanangura kubva pakati pavo gumi navairi, avo vaakadudzazve kuti vapostori: Simoni, uwo waakadudza kuti Petro, naAndreu munun'una wake, Jakobe, Johani, Firipu, Bhathoromeu, Mateu, Thomasi, Jakobe mukororo waArifeusi, Simoni uwo waizwi muZeroti, Judhasi mukororo waJakobe, naJudhasi Isikarioti, uwo wakapira Mambo. Naye wakadzaka navo, akaema pandau yakaterama, nembungano huru yevadzidzi vake nembungano huru yevanhu vakabva Judhia kweshe neJerusarema nenharaunda dzeshe dzokuruandhle dzeThire nedzeSidhoni, avo vakauya kumuzwa nokuponeswa nhenda dzavo; naavo vakatambudzwa ngomweya inetsvina vakaponeswa. Nembungano yeshe yakaedza kumubata, ngokuti simba raibva kwaari rechivaponesa veshe. Naye wakaringira vadzidzi vake, akati: “Munomuchena imwimwi muri varombo, ngokuti umambo hwaMwari ngohwenyu. Munomuchena imwimwi munofukama zvinopano, ngokuti munozogutiswa. Munomuchena imwimwi munochema zvinopano, ngokuti munozosheka. Munomuchena imwimwi apo vanhu vanozomunyenya nokuparadzana nemwi, nokumukaraidza nokurasha zina renyu kudai ngerakashata, ngendaa yoMukororo woMunhu. Dakarai ngeiro zuva mwechinyanduka ngokudakara, ngokuti ringirai, musharo wenyu mukuru mudenga; ngokuti madzibaba avo vakaita kudarowo kunevaprofeti. Asi hezvo kwomuri imwimwi vapfumi, ngokuti imwimwi mwatoashira musharo wenyu. Hezvo kwomuri munogutiswa zvinopano, ngokuti munozofukama. Hezvo kwomuri imwimwi munosheka zvinopano, ngokuti munozotsumba nokuchema. Hezvo kwomuri apo vanhu veshe vooereketa zvakanaka ndimwi, ngokuti madzibaba avo vakaereketa kudaro kunevaprofeti vokunyepa. “Asi inini ndinoti kwomuri imwimwi munondizwa, idai magaa enyu, muite zvakanaka kwavari avo vanomunyenya, fumisai avo vanomutuka, kumbirirai avo vanomutambudza. Nokwaari unokurova padama, mupindurire rimwenizve, nokwaari uwo unokutorera bhachi rako, mupe nehembe yakozve. Wechipa kwavari veshe vanokumbira kwouri, nokwaari uwo unotora zviro zvako, usazviteerazve. Kudai ngezvomunoda kuti vanhu vamuitire, itaiwo kwavari zvakadaro. “Kudai mwechivada avo vanomuda, munenyi chomungazobongwa ndicho? Ngokuti nevashaishi vanovada avo vanovadawo. Nokudai mwechiitira zvakanaka kwavari avo vanomuitira zvakanaka, munenyi chomungazobongwa ndicho? Ngokuti nevashaishi vanondoitawo zvakadaro. Nokudai mwechikweretwa ngaavo vomunogonda kuzoashirazve kwavari, munenyi chomungazobongwa ndicho? Ngokuti nevashaishi vanokweretwa ngevashaishi kuti vandozoashira zvakadaro kubva kwavari. Asi idai magaa enyu, muvaitire zvakanaka, mwechivakweretesa musikakariri kupetudzirwa, nomusharo wenyu unozoita mukuru, nemwi munozoita vana veUwo Uripadera pazveshe; ngokuti iye unenyasha kwavari vasikabongi nekwavari vakashata. Itai vane nyasha, kudai ndiBaba enyu vane nyasha. “Musatonga, nemwi amuzotongwi; musaparisa ndaa, nemwi amuzopariswi ndaa; rekererai, nemwi munozorekererwa; ipai, nakwo kunozopuwawo kwomuri. Chipimo chakanaka, chakarondwa, chakazunguzirwa nechinerushangu, vanozotindikira kwomuri. Ngokuti ngeicho chipimo chomunozopima ndicho, chinozopimirwawo kwomuri.” Naye wakaronza muedzaniso kwavari echiti, “Bofu ringatungamirira bofu here? Avazowi veshe murindi here? Mudzidzi aari padera pomudzidzisi wake akadi, asi mudzidzi weshe apedza kudzidza unozodai ngomudzidzisi wake. Unopenyerenyi chitsepedzo chiri mudziso romukoma wako, asi usikaoni danda riri mudziso rako? Nokuti ungazoita maronzerenyi kunemukoma wako kuti, ‘Mukoma, tenda kuti ndibvise chitsepedzo chiri mudziso rako,’ apo iwewe wemene usikaoni danda riri mudziso rako wemene? Iwewe mudziitisi, tanga kubvisa danda riri mudziso rako, naapo unozonasa kuona pamhene kubvisa chitsepedzo chiri mudziso romukoma wako. “Ngokuti akuna muti wakanaka ungabereka michero yakashata, nokutizve muti wakashata aungabereki michero yakanaka; ngokuti muti weshe unoziikanwa ngemichero yawo. Ngokuti vanhu avakayi maonde kubva pamiti yeminzwa, nokuti parukato avakayi michero yemavhini. Munhu wakanaka kubva paupfumi hwokanaka hwemumwoyo mwake unobudisa icho chakanaka, nomunhu wakashata kubva paupfumi hwakashata hwemumwoyo wake unobudisa icho chakashata; ngokuti muromo unoereketa kubva kunezvakawanda zviri mumwoyo. “Munondidaidza ngenyi kuti, ‘Mambo, Mambo,’ musikaiti izvo zvendinomuronzera? Munhu weshe unouya kwendiri echizwa mazwi angu, echiaita ndinozomupangidzira uwo waanotodzana naye. Unodai ngomunhu echiaka mhatso, uwo wakatsa akadzamisa, akaisa tsikiro paruware; naapo ndambi yakwira, yakarova iyo mhatso, yaiya isina simba rokuikutukusa, ngokuti yaiya yakanasa kuakwa. Asi iye unozwa asikaiti, wakadai ngomunhu wakaaka mhatso padera pevhu isina tsikiro; naapo ndambi yakarova iyo mhatso, paripo yakawa, nokuwa kweiyo mhatso kwaiya kwakakura.” Naapo apedza mazwi ake eshe mukuzwa kwevanhu, wakapotera muKhapernaume. Hloko yenduna yezana, yaidikanwa kweiri, yairwara, iri pasinde pokufa. Naapo yazwa ndiJesu, yakatuma kwaari vakuru vevaJudha yechikumbira kuti auye aponese hloko yayo. Naapo vakaguma kunaJesu, vakamupota kakurutu vechiti, “Iyo inosisira kuti uyiitire ichi, ngokuti inoda dzinza redu, nayo yakatiakira mhatso yedu yokudira.” NaJesu wakaenda navo. Naapo aapasinde pemhatso, nduna yezana yakatuma hama dzayo yechiti kwaari, “Mambo, usadzinesa, ngokuti andisisiri kuti iwewe upotere pashi pedenga rangu; ndizvo ndapinimidza kuti andisisiri kuuya kwouri ndemene. Asi ronzai izwi, nomuranda wangu unozopona. Ngokuti inini neniwo ndiri munhu wakaemeswa pashi pesimba, ndine masoja pashi pangu; neni ndinoti kuneiri, ‘Chienda,’ naro rinoenda, nokunerimweni, ‘Chiuya,’ naro rinouya, nokunemuranda wangu, ‘Chiita ichi,’ naye unochiita.” Naapo Jesu azwa ichi wakashamiswa ndiyo, naye wakakunukukira kune mbungano yaimuteera, akati kweiri, “Ndinoti kwomuri, andizi kutongomboona kutenda kukurutu kwakadaro, kunyazwi muIsuraeri.” Naavo vakatumwa vapetuka kumhatso, vakaona muranda apona. Paripo ngesure kweizvo wakaenda kudhorobha rinozwi Naini, nevadzidzi vake vakaenda naye nembungano huru. Naapo echikwedzera pamusiwo wedhorobha, penya, munhu wakafa waitwarwa kubva mudhorobha, uwo waiya ari mukororo umwe ega wamai ake, vaiya shirikadzi; nevanhu vazhinji vedhorobha vaiya naye. Naapo Mambo amuona, wakamuzwira urombo, akati kwaari, “Usachema.” Naye wakakwedzera, akabata ruhlaka, nevatwari vakaema. Wakati, “Jaha, ndinoti kwouri, muka.” Nouwo waiya afa wakamuka akagara, akatanga kuereketa. Naye wakamupa kunamai ake. Kutya kwakabata veshe; navo vakairikidza Mwari vechiti, “Muprofeti mukuru wakabuda pakati pedu!” “NaMwari wakahambira vanhu vake!” Nembiri iyi yakateketeswa ngendaa yake muJudhia mweshe nomunyika dzeshe dzaitendenedza. NaJohani wakaziiswa izvi zviro zveshe ngevadzidzi vake. NaJohani, echidaidza kwaari vadzidzi vake vairi, wakavatuma kunaMambo echiti, “Ndiwe here uwo unouya, nokuti ticharindira umweni?” Naapo vanhu avo vaguma kwaari, vakati, “Johani Mubhabhatidzi wakatituma kwouri echiti, ‘Ndiwe here uwo unouya, nokuti ticharindira umweni?’ ” Ngeiro awa wakaponesa vazhinji vairwara ngenhenda nomweya yakashata, nevazhinji vaiya vari mapofu wakavapembenudza. Iye wakapingura, akati kwavari, “Endai muronzere Johani zvemwaona nezvemwazwa: mapofu anosvinurwa, zvirema zvinohamba, vane mapere vanoshambidzwa, madziiranzee anozwa, vakafa vanomuswa nevarombo vane mashoko akanaka anochumairwa kwavari. Naye unomuchena usikapumhunwi ndini.” Naapo nhumwa dzaJohani dzaiya dzaenda, wakatanga kuereketa kune mbungano ngendaa yaJohani echiti, “Mwakabuda kuenda mushango koopenyei? Rutsanga rwakazungunyiswa ngedutu here? Asi mwakabuda kuenda koonenyi? Munhu wakapfekeswa ngemachira akapfaa here? Penyai avo vanopfeka machira akapfaa vanogara mungome. Asi mwakabuda kuenda koonenyi? Muprofeti here? Eya, ndinoti kwomuri nouwo unonyanya kupinda muprofeti. Uyu ndiye wakanyorwa ndiye kwechizwi, ‘Penyai, ndinotuma nhumwa yangu pamberi pehope yako, uwo ndiye unozonasirira njira yako pamberi pako.’ Ndinoti kwomuri, mukati mwaavo vakaberekwa ngevakadzi akuna mukuru kupinda Johani; asi uwo uri mudoko muumambo hwaMwari uri mukuru kupinda Johani.” Vanhu veshe apo vazwa izvi pamwepo nevabharisi, navo vakatenda kururama kwaMwari, ngokuti vakabhabhatidzwa ngorubhabhatidzo rwaJohani. Asi vaFarisi nemagweta vakadzirambira zano raMwari, vakaramba kubhabhatidzwa ndiJohani. “Ndizvo ndovaedzanisa nenyi vanhu vomubarirwana uyu, vanotodzaniswa nenyi? Vanotodzaniswa nevana vanogara pandau yomusika, vechidaidzana vechiti, ‘Takaridza kwomuri, nemwi amuzi kuzvina; takabonda, nemwi amuzi kuchema.’ Ngokuti Johani Mubhabhatidzi wakauya asikadyi chingwa nokuti kumwa vhini, mwakati, ‘Une dhimoni.’ Mukororo woMunhu wakauya echidya nokumwa, nemwi mwakati, ‘Penyai, munhu unemakaro nomumwisi wevhini, shamwari yevabharisi neyevashaishi!’ Nokungwara kunopembedzwa ngevana vakwo veshe.” Umwe wevaFarisi wakakumbira kuti adye naye, naye wakapotera mumhatso youwo muFarisi, akagara patafura. Penya, mudzimai womudhorobha, waiya mushaishi, naapo azia kuti wakagara patafura panekudya mumhatso yomuFarisi, wakaunza nhera yemafuta anonuhwira, naye echiema ngesure kwetsoka dzaJesu, echichema, wakatanga kunyakatisa tsoka dzaJesu ngemasodzi ake, akadzipukuta ngebvudzi resoro rake, akachingamidza tsoka dzake ngomuromo, akadzidzodza ngemafuta. Asi muFarisi uwo wakamukoka echiona, wakati mukati mwake, “Uyu munhu dai aiya muprofeti, waidai azia kuti ndiani, nokuti mudzimai uyu wakadini unomubata, ngokuti mushaishi.” NaJesu echipingura wakati kwaari, “Simoni, ndinacho chokuereketa newe.” Naye wakati, “Mudzidzisi, chierekete.” “Kwaiyapo munhu wakakweretwa ngevanhu vairi. Umwe wavo wakamukwereta zvigurwa zvesirivha mazana mashanu, noumweni zvigurwa zvesirivha makumi mashanu. Naapo vasina chokuripira ndicho, iye wakavarekerera veshe. Ndizvo ndiani kwavari unozopindisisa kumuda?” Simoni wakapingura akati, “Ungaita uwo wakarekererwa zvakapinda kuwanda.” Wakati kwaari, “Wanasa kutonga.” Echikunukukira kunemudzimai wakati kunaSimoni, “Unomuona here uyu mudzimai? Inini ndapotera mumhatso yako, auzi kundipa mvura yokushamba tsoka dzangu, asi iye wanyakatisa tsoka dzangu ngemasodzi ake, akadzipukuta ngebvudzi rake. Iwewe auzi kundichingamidza ngomuromo, asi iye kubvira mukuwo wendapotera ndiwo aazi kurekera kuchingamidza tsoka dzangu ngomuromo. Iwewe auzi kudzodza soro rangu ngemafuta, asi iye wadzodza tsoka dzangu ngemafuta. Ndizvo ndinoti kwouri, zvishaishi zvake zvakawanda zvarekererwa kwaari, ngokuti iye wada kakurutu. Asi kwaari warekererwa zvishomani, iye unondodawo zvishomani.” Naye wakati kwaari, “Zvishaishi zvako zvarekererwa kwouri.” Zvino navo vaigara naye patafura panekudya vakatanga kuereketa mukati mwavo vechiti, “Ndiani uyu unokona kurekerera zvishaishi?” Naye wakati kuno mudzimai, “Kugonda kwako kwakuponesa; enda ngokunyarara.” Apapo ngesure kweizvo wakahamba ngomukati mwemadhorobha nemaguta, echichumaira nokuunza mashoko akanaka oumambo hwaMwari. Nevarigumi navairi vaiya naye nevakadzi avo vaiya vaponeswa mweya yakashata nenhenda: Maria Magadhareni, uwo wakabviswa madhimoni manomwe, naJoana mukadzi waChuza, muranda waHerodhi, Suzana nevazhinji vamweni, avo vaimushandira ngezviro zvavo. Naapo mbungano yaungana pamwepo nevanhu vakauya kwaari kubva kumadhorobha eshe, iye wakavaronzera muedzaniso echiti, “Mukushi wakabuda kookusha mbeu dzake. Naapo achakusha mbeu, dzimweni dzakawira panjira; nadzo dzakatsikwatsikwa ngetsoka, neshiri dzomudenga dzakadzidya. Nedzimweni dzakawira paruware; paripo dzakamera dzikazeketera, ngokuti dzaiya dzisina mwando. Dzimweni dzakawira mukati mweminzwa; neminzwa yakakura pamwepo nadzo, yakadzizingizira. Dzimweni dzakawira mumavhu akanaka, dzakakura, dzikabereka tsangu zana rakapetwa.” Achaereketa izvi wakadaidzira echiti, “Uwo une nzee dzokuzwa, ngaazwe.” Naapo vadzidzi vake vakamubvunza kuti muedzaniso uyu biningidzo rawo ngerenyi, wakati kwavari, “Kwakapuwa kwomuri kuzia zvakafishika zvoumambo hwaMwari; asi kunevamweni kuti vazwe ngemiedzaniso, kuti, ‘Vechinyaona avaonisisi, vechinyazwa avazwisisi.’ “Zvinopano muedzaniso ndiwo uyu: Mbeu izwi raMwari. Neidzo dziri pamhiri penjira, ndivo avo vakazwa; naapo Dhiabhorosi unouya nokubvisa izwi kubva mumwoyo yavo, kuti vasazotenda nokuponeswa. Neidzo dziri paruware, ndivo avo vanozwa izwi, vanoriashira ngokudakara; navo avana nzinde, vanotenda mukuwo mudoko, ngenguva yokuedzwa vanopumhunwa. Neidzo dzakawira mukati mweminzwa, ndivo avo vanozwa, vechienda mberi vanozingizirwa ngokudembatemba noupfumi, zvidakadziso zvendaramo ino nemichero yayo. Neidzo dzakawira mumavhu akanaka, ndivo avo vanozwa izwi ngomwoyo usina kuchengedza nowakanaka, vanobereka michero ngokusengerera. “Akuna munhu unoti abasa chibani, unozochidumaidza ngechidziyo nokuti kuchiisa pashi pomubhedhi, asi unochiisa padera pechigadzikiro chechibani, kuti avo vanopotera vaone kujeka. Ngokuti akuna chiro chakafishika chisikazooniswi, nechakadumaidzwa chisikazoziikanwi, chisikazobudi mukujeka. Ndizvo ngwarai ngenjira dzokuzwa kwomunoita; ngokuti kunyazwi ngouri unacho, kunozotutsirwa kwaari, asi iye usina, kunozotorwa kubva kwaari neicho chaanopinimidza kuti unacho.” Naapo mai ake nevanun'una vake vakauya kwaari, asi ngendaa yembungano avazi kukona kuguma paari. Wakaronzerwa kuti, “Mai ako nevanun'una vako vakaema kubanze, vanoda kukuona.” Asi iye wakapingura kwavari akati, “Mai angu nevanun'una vangu ndivo avo vanorizwa izwi raMwari nokuriita.” Zuva rimweni wakapotera mungarava nevadzidzi vake, naye wakati kwavari, “Ngatiambuke ruseri rwegandwa.” Ndizvo vakahluza. Asi vachahluza iye wakabatwa ngehope. Kwakadzaka mubvumo wedutu padera pegandwa, ngarava yakatanga kuzara ngemvura, navo vaiya mungozi. Navo vakauya kwaari, vakamumusa vechiti, “Mambo, Mambo, tofa!” Naye wakamuka, akakaraidza dutu nemafungu emvura; nawo akaterama, kwakaapo kunyarara. Naye wakati kwavari, “Kugonda kwenyu kuripari?” Navo vakatya nokushamiswa, vechiti umwe kunoumweni, “Uyu ungaita anani, unopanga dutu nemvura, nazvo zvechimupurutana?” Naapo vaguma kunyika yeGerasa, iyo yakaringirana neGarire. Naapo paakabuda mungarava nokutsika panyika, wakashongana nomunhu waibva mudhorobha, waiya nemadhimoni; kwomukuwo wakareba aazi kusimira zvokufuka, naye waiya asikagari mumhatso, asi mumaiba. Naapo aona Jesu wakazhambarara, akawa pashi pamberi pake, akati ngeizwi guru, “Ndinenyi newe, Jesu, iwewe Mukororo waMwari Uripadera pazveshe? Ndinokupota, usandishononesa.” Ngokuti iye waiya apanga dhimoni rine tsvina kuti ribude kubva mumunhu. (Ngokuti kazhinji raimubata; naye waingwarirwa ngevarindi, akasungwa ngemaketani nemanguri, asi waidambura zvisungo izvo, echisundwa kuenda mushango ngedhimoni.) Jesu wakamubvunza, akati, “Zina rako ndiani?” Naye wakati, “Ndiri Hondo.” Ngokuti madhimoni akawanda aiya akapotera mukati mwake. Nawo akamupota kuti asazoapanga kuti aende murindi. Zvinopano raiyapo danga renguruve dzakawanda dzaifura padera pomutunhu; nawo akamupota kuti aatendere kuti apotere mwedziri. Naye wakaatendera. Nemadhimoni akabuda kubva kunemunhu, akapotera munguruve. Nedanga iro rakarumba kudzaka ngepamakaha kupotera mugandwa, nadzo dzakanzvaira dzikafa. Naapo vaushi vaona zvakaitika, vakatiza, vakateketesa zvakaitika mudhorobha nomunharaunda. Navo vakabuda kuenda koona zvakaitika, vakauya kunaJesu, vakaona munhuwo wakabviswa madhimoni akagara patsoka dzaJesu, asimira aterama. Navo vakatya. Naavo vakazviona vakavaronzera ngenjira yaakaponeswa ndiyo uwo waiya nemadhimoni. Naapo vanhu veshe venharaunda dzenyika yevaGeraseni vakamukumbira kuti abve kwavari; ngokuti veshe vakabatwa ngokutya kukurutu. Naye wakapotera mungarava, akahwirira. Asi munhu uwo wakabviswa madhimoni wakamupota kuti agare naye; asi iye wakamuendesa echiti, “Hwirira kumhatso yako, uvaronzere ngokukura kweizvo zvaakakuitira Mwari.” Naye wakahamba echiteketesa mudhorobha reshe kukura kweizvo zvaakaita Jesu kwaari. Naapo Jesu auyazve, mbungano yakamuashira ngokudakara, ngokuti veshe vaiya vakamugarira. Naapo kwakauya munhu zina rake raizwi ndiJairosi, naye waiya mukuru wemhatso yokudira; naye echiwira patsoka dzaJesu wakamupota kuti auye kumhatso yake, ngokuti waiya nemwanasikana umwe ega, waiya anemakore anoda kuita gumi namairi, naye waiya oodakufa. Naapo echienda, mbungano yakamutsikirira. Nedzimai raibuda ngazi makore gumi namairi, iro raiya rapedza zveshe zveraipona ndizvo ngeman'anga pasina waikona kumurapa. Iro rakauya ngesure kwake, rakabata mupendero wechokufuka chake; paripo nhenda yaro yokubuda ngazi yakapora. NaJesu wakati, “Ndiani uwo wandibata?” Naapo veshe varamba, Petro naavo vaiya naye vakati, “Mambo, mbungano inokutsikirira nokukupfanyirira.” Asi Jesu wakati, “Uripo wandibata; ngokuti ndinozwa kuti simba rabuda kwendiri.” Naapo dzimai raona kuti arizi kufishika, rakauya rechihuta, rakawa pashi pamberi pake, rikaronza zveshe pamberi pevanhu veshe kuti ramubata ngendaa yenyi, nokuti raponeswa chiriporipo. Iye wakati kweriri, “Mwanasikana, kugonda kwako kwakuponesa; enda ngokunyarara.” Achaereketa kwakauya umwe echibva kumhatso yomukuru wemhatso yokudira echiti, “Mwanasikana wako watofa; usachanesa Mudzidzisi.” Asi Jesu echizwa, wakapingura kwaari echiti, “Usatya. Kwega tenda, naye unozoponeswa.” Naapo aguma kumhatso, aazi kutendera kuti munhu apotere naye, kwega Petro, Johani, Jakobe, nababa omusikana namai ake. Navo veshe vaimuchema vechimutsumba; asi wakati, “Musachema; ngokuti aazi kufa, asi wakaata.” Navo vakamusheka, vechizia kuti watofa. Asi iye echimubata ngenyara wakadaidzira echiti, “Musikana, muka!” Mweya wake wakauyazve, naye wakamuka chiriporipo. Iye wakapanga kuti apuwe chokudya. Vabereki vake vakashamiswa; asi wakavapanga kuti vasaronzera munhu ngeizvo zvaitwa. Naye wakadaidza pamwepo gumi navairi, akavapa simba rokukurira madhimoni eshe nokurapa nhenda, naye wakavatuma kuenda koochumaira umambo hwaMwari nokurapa vanorwara. Wakati kwavari, “Musatora chiro parwendo rwenyu, haiwa ndonga, nokuti nyede, nokuti chingwa, nokuti mare; zve, musatora mabhachi mairi. Kunyazwi ngeyani mhatso yomunozopotera, garaimwo metsa mubve muripo. Naavo vasikazomuashiri, mwoobva mudhorobha iro, munozoguwa bukuta pashi petsoka dzenyu kuita chapupu chokuvaitira ndaa.” Navo vakaenda, vakahamba mumaguta eshe, vechichumaira vhangeri nokuponesa vanhu kundau dzeshe. Zvinopano Herodhi sadunhu, azia zveshe zvaiya zvaitika, wakatambudzika, ngokuti vamweni vakaronza kuti Johani wamuswa kubva kwevakafa, vamweni vaiti Erija wakaoneka, nevamwenizve vaiti umwe wevaprofeti vekare wakamukazve. Herodhi wakati, “Ndakagura soro raJohani; asi uyu ndiani, uwo wendinozwa ndiye zviro zvakadai?” Naye wakaedza kuti amuone Jesu. Vapetuka vapostori vakamushumira zveshe izvo zvevakaita. Naye wakavatora, akaenda navo vari vega kudhorobha raizwi Bhethisaidha. Naapo mbungano yazvizia, yakamuteera. Naye wakavaashira ngokudakara, akaereketa kwavari ngoumambo hwaMwari, naye wakaponesa avo vaitama kuponeswa. Naapo zuva ratanga kubira, vanegumi navairi vakauya, vakati kwaari, “Wechiendesa mbungano, vaende mumaguta nomunharaunda inotendenedza, vaatemwo nokuona zvokudya; ngokuti tiri murubaya rusina vanhu.” Asi iye wakati kwavari, “Mwechivapa imwimwi zvokudya.” Vakati, “Atina zvimweni zvinopinda zvingwa zvishanu nehove mbiri, asi kuti tikaenda kootengera vanhu ava veshe kudya.” Ngokuti vaida kuguma makumi emazana mashanu evamuna. Naye wakati kuvadzidzi vake, “Mwechivagarisa pashi ngezvikwata, chimwe chinoda kuita makumi mashanu.” Navo vakaita kudaro, vakavagarisa pashi veshe. Naye echitora zvingwa zvishanu nehove mbiri, wakaringira mudenga, akazvibonga, akazvigura, wakazvipa kuvadzidzi kuti vaise pamberi pembungano. Navo vakadya, vakaguta veshe. Navo vakaunganidza matsekeneswa, vakazadza zvitundu gumi nazviiri. Zvinopano kwakaitika kuti echikumbira ari ega, vadzidzi vake vaiya naye; naye wakavabvunza echiti, “Mbungano inoti inini ndirianani?” Navo vechipingura vakati, “Johani Mubhabhatidzi; asi vamweni vanoti ndiErija; asi vamweni vanoti umwe wevaprofeti vekare wamukazve.” Naye wakati kwavari, “Imwimwi munoti inini ndirianani?” NaPetro echipingura wakati, “Iwewe ndiwe Kristu waMwari.” Asi wakavaronzera nokuvapanga kuti vasazoronzera munhu naumwe ichi echiti, “Kunosisira kuti Mukororo woMunhu atambudzike ngezvakawanda, arambwe ngevakuru nevapristi vakuru nevanyori, aurawe, ngezuva rechitatu amuswe.” Naye wakati kwavari veshe, “Kudai aripo munhu unoda kuuya sure kwangu, ngaadzirambe, atore muchinjiko wake zuva ngezuva anditeere. Ngokuti kunyazwi ndiani ungada kungwarira kurarama kwake, unozorashikirwa ndikwo; asi kunyazwi ndiani unozorasha kurarama kwake ngepamusoro pangu, ndiye unozokuponesa. Ngokuti unodetserwa ngenyi munhu kudai echizouyirwa ngenyika yeshe, asi arashikirwe ngokupona kwake? Ngokuti iye unozoita nyowa ndini nemazwi angu, Mukororo woMunhu unozoitawo nyowa ndiye, apo ouya muuthende hwake nehwaBaba nehwengirosi dzakachena. Asi ndinomuronzera ngegwinyiso, kuti varipo veavo vanoema panapa, avo vasikazorairi rufu metsa vaona umambo hwaMwari.” Zvinopano kwaakuda kuita mazuva masere ngesure kweaya mazwi, wakatora naye Petro, Johani naJakobe, akakwira pamutunhu kookumbira. Echikumbira, kuoneka kwehope yake kwakatsandudzwa, nezvokusimira zvake zvakachena zvechin'anikira. Penya, vanhu vairi vaiereketa naye, Mosi naErija, avo vakaoneka vari muuthende, vakaereketa ngendaa yokuenda kwake, ukwo kwaaizoita muJerusarema. Zvinopano Petro naavo vaiya naye vakabatwa ngehope, asi varamba kumuka, vakaona uthende hwake nevanhu vairi avo vakaema naye. Naapo vanhu avo vooparadzana naye, Petro wakati kunaJesu, “Mambo, kwakanaka kwetiri kuti tigare panapa; ngatiake zvitumba zvitatu, chimwe chako nechimweni chaMosi nechimweni chaErija,” asikazii chaaiereketa. Naapo achaereketa izvi, gore rakauya, rikavatibikira; navo vakatya apo vambonywa ngegore. Neizwi rakabuda rechibva mugore rechiti, “Uyu ndiye Mukororo wangu, uwo wakatsanangurwa; mwechimupurutana!” Naapo izwi rapinda, Jesu wakaoneka ari ega. Navo vakanyarara, avazi kuronzera munhu ngaawo mazuva ngechimwe cheizvo zvevakaona. Nechimangwani, apo vadzaka kubva pamutunhu, mbungano huru yakashongana naye. Penya, munhu waibva mukati mwembungano wakadaidzira echiti, “Mudzidzisi, ndinokupota kuti uringire mukororo wangu, ngokuti ndiye ega mwana wangu. Penya, mweya unomubata, paripo ngokukasira unoboorera, nawo unomuhutisa kumuita kuti abudise mafuro, unoramba wechimukuadza kakurutu, aumurekeri. Neni ndapota vadzidzi vako kuti vaudzinge, asi vaukorera.” Jesu wakapingura, akati, “A mubarirwana usikatendi nounopauka, ndinozogara nemwi mukuwo wakaitawani ndechitsengerera? Unza panapa mukororo wako.” Naapo achauya, dhimoni rakamupwamhwatisa pashi, rikamuhutisa kakurutu. Asi Jesu wakakaraidza mweya wakashata, akaponesa murumbwana, akamupazve kunababa ake. Navo veshe vakashamiswa ngoukuru hwaMwari. Naapo veshe vachashamiswa ngezviro zveshe zvaakaita, wakati kuvadzidzi vake, “Mazwi aya ngaapinde munzee dzenyu; ngokuti Mukororo woMunhu unozopirwa munyara dzevanhu.” Asi avazi kuzwisisa izwi iri, rakafishika kwavari kuti vasazorizia; navo vakatya kumubvunza ngeiri izwi. Kwakamuka hasha pakati pavo kuti ndiani wavo unozoita mukuru. Asi apo Jesu aona kupinimidza kwomwoyo yavo, wakatora mwana mudoko, wakamugadzika parutii pake. Wakati kwavari, “Uwo unoashira mwana uyu mudoko ngezina rangu unondiashira inini, nouwo unondiashira inini unoashirawo uwo wakandituma; ngokuti uwo uri mudoko mukati mwenyu mweshe, ndiye mukuru.” NaJohani wakapingura, akati, “Mambo, takaona munhu echirasha madhimoni ngezina rako, nesu takamurambidza, ngokuti aazi kukuteera nesu.” Asi Jesu wakati kwaari, “Musazomurambidza; ngokuti usikaambani nemwi, unomurwira imwimwi.” Naapo mazuva ookwedzera okuti aashirwe mudenga, wakaringira hope yake kuenda Jerusarema. Naye wakatuma nhumwa pamberi pake, navo vakapotera muguta revaSamaria kuti vamunasirire; asi avazi kumuashira, ngokuti hope yake yairingira kuenda Jerusarema. Naapo vadzidzi vake Jakobe naJohani vaona ichi, vakati, “Mambo, unoda here kuti tironze kuti muriro udzake kubva mudenga, uvapedze?” Asi wakakunukuka, akavakaraidza. Navo vakaenda kuguta rimweni. Vachahamba munjira, munhu umweni wakati kwaari, “Ndinozokuteera kunyazwi ngepari pounoenda.” NaJesu wakati kwaari, “Hava dzine mirindi neshiri dzomudenga dzine zvisaki, asi Mukororo woMunhu aana nopokutsamira soro rake.” Naye wakati kuneumweni, “Nditeere iwewe.” Asi iye wakati, “Mambo, tenda kuti ndiende kutanga ndimbotsira baba angu.” Asi wakati kwaari, “Siya vakafa kutsira vakafa vavo; asi iwewe enda uteketese umambo hwaMwari.” Munhu umweni wakati, “Ndinozokuteera, Mambo; asi kutanga tenda kuti ndiende ndivhaise vemhatso yangu.” Asi Jesu wakati kwaari, “Akuna munhu wakamboisa nyara yake kubata badza ren'ombe echiringira sure ungasisira umambo hwaMwari.” Ngesure kweizvi Mambo wakaemesa vamweni makumi manomwe, naye wakavatuma vairi vairi pamberi pake kumadhorobha eshe nokundau dzeshe, apo paaida kuguma emene. Naye wakati kwavari, “Kukukura kwakakura, asi vashandi vashomani; ndizvo kumbirai kunaMambo wokukukura kuti atume vashandi mukukukura kwake. Endai! Penya, ndinomutuma muri vakadai ngevana vemakwai mukati mwemathika. Musatora chikwama nokuti nyede nokuti magwada. Musachingamidza munhu munjira. Kunyazwi ngeiri mhatso yomunozopotera, kutanga mwechiti, ‘Kunyarara ngakua kuneiyi mhatso!’ Kuti aripo mukororo wokunyarara, kunyarara kwenyu kunozoa padera pake; asi kuti asipo, kunyarara kwenyu kunozohwirira kwomuri. Garai mumhatsomwo, mwechidya nokumwa izvo zvevanozomupa. Ngokuti mushandi unosisira muthuso wake. Musazohamba-hamba mwechibva pamhatso imwe mwechienda pane imweni. Kunyazwi ngomuri mudhorobha mwomunozopotera, navo vechimuashira, mwechidya izvo zvinoiswa pamberi penyu. Mwechiponesa vanorwara varimwo, mwechironza kwavari kuti, ‘Umambo hwaMwari hwakwedzera kwomuri.’ Asi kunyazwi ngeriri dhorobha romunozopinda, navo vasikazomuashiri, budai muende mumapato aro mwechiti, ‘Eya, kunyazwi nebukuta redhorobha renyu, iro rinonamira kutsoka dzedu, tinorizuwira kwomuri; asi mwechizia ichi, kuti umambo hwaMwari hwakwedzera pasinde.’ Ndinomuronzera, kunozopinda kurerukira Sodhoma ngeiro zuva kune iro dhorobha. “Hezvo kwouri, Khorazini! Hezvo kwouri, Bhethisaidha! Ngokuti kudai mishando yesimba iyo yakaitwa kwomuri, yaiya yakaitwa muThire neSidhoni, vaizodai vakatenderuka karetu, vechigara mumarota vakasimira masaka. Asi kunozopinda kurerukira Thire neSidhoni ngezuva rokutongwa kuneimwimwi. Iwewe, Khapernaume, unozokuriswa mudenga here? Iwewe unozodzaswa pashi muHaidhesi. “Iye unomuzwa imwimwi unondizwa inini. Naye unomuramba imwimwi unondiramba inini. Nouwo unondiramba inini unoramba uwo wakandituma.” Makumi manomwe vakapetuka ngokudakara vechiti, “Mambo, nemadhimoni aitipfaira ngezina rako!” Wakati kwavari, “Ndakamuona Sathani echiwa kubva mudenga, akadai ngemheni. Penyai, ndakamupa simba rokutsika nyoka nezvinyaada, nepadera pesimba reshe regaa; akuna nechiro nachimwe chinozomuremadza. Zvakanyadaro musadakara ngeichi, kuti mweya inomupfaira; asi dakarai ngokuti mazina enyu akanyorwa mudenga.” Ngeawa iro iye wakadakara muMweya Wakachena, akati, “Ndinokubonga Baba, Mambo womudenga nenyika, kuti wakazvifisha izvi kunevakangwara nevanozia ukazvionisa kunevana vadoko; eya Baba, ngokuti mwakazviona izvi zvakanaka mukuona kwenyu. Zveshe zvakapuwa kwendiri ndiBaba angu; akuna naumwe unozia Mukororo kuti ndiani, kwega Baba, nokuti Baba kuti ndiani, kwega Mukororo nouwozve waanoda Mukororo kuti amuonise kwaari Baba.” Naye wakakunukukira kuvadzidzi vake, ngokufishika akati, “Anomuchena madziso awo anoona zvomunoona imwimwi! Ngokuti ndinoti kwomuri vaprofeti vazhinji nemadzimambo vaiya nechidisiso chokuona zvomunoona, navo avazi kuzviona, zve, nokuzwa zvomunozwa, navo avazi kuzvizwa.” Penya, gweta rakamiruka rechimuedza, rikati, “Mudzidzisi, chiinyi chendinozoita kuti ndigare nhaka yokupona kusikaperi?” Iye wakati kwaari, “Chiinyi chakanyorwa muMipango? Unodzidzenyi?” Naro rechipingura rakati, “Unozomuda Mambo Mwari wako ngomwoyo wako weshe nomweya wako weshe nesimba rako reshe nokurangarira kwako kweshe; nomuakirwana wako kudai ngokudzida kwako.” Naye wakati kwaari, “Wanasa kupingura; ita kudaro, newe unozorarama.” Asi iro rechida kudzipembedza rakati kunaJesu, “Ndiani muakirwana wangu?” Jesu wakapingura, akati, “Munhu waidzaka echibva Jerusarema kuenda Jerikho, naye wakashongana namadzongoni awo akamukhumura zvokufuka zvake, akamurova, akaenda, echimusiya ooda kufa. Zvinopano mupristi wakatikuti waidzaka ngeiyo njira; naapo echimuona wakapwashira ngokurutii rumweni. Ngokudarozve muRevhi, naapo aguma echimuona, wakapwashira ngokurutii rumweni. Asi muSamaria, echihamba rwendo, wakagumapo paaiya; naapo amuona, wakamuzwira urombo, wakauya kwaari, akapomba maronda ake, echidurura mafuta nevhini. Naye wakamugadzika pachifuyo chake, akamuunza kumhatso yevaeni, akamungwarira. Nechimangwani wakabudisa zvigurwa zvesirivha zviiri, wakazvipa kunemuna wemhatso, akati, ‘Wechimungwarira; neicho chounozotutsira kubhadhara, inini apo ndouyazve ndinozokuripira.’ Ngouri kwavari vatatu, mukupinimidza kwako, wakaita muakirwana kwaari uwo wakawira pakati pemadzongoni?” Naro rakati, “Uwo wakamuitira nyasha.” NaJesu wakati kwaari, “Enda, uite kudaro newe.” Zvinopano vachahamba murwendo rwavo, vakaguma muguta, nomudzimai unozwi Maritha wakamuashira mumhatso mwake. Naye waiya nemunun'una waizwi Maria, iye wakagara patsoka dzaMambo, echipurutana kudzidzisa kwake. Asi Maritha wakaneseka ngemishando yakawanda; naye wakauya kwaari, akati, “Mambo, amunawo ndaa ndizvo here kuti munun'una wangu wandisiya ndechishanda ndega? Ndizvo muronzerei kuti andidetsere.” Asi Mambo wakapingura, akati kwaari, “Maritha, Maritha, unodembatemba nokuneseka ngezviro zvakawanda; asi chiro chimwe chinodikanwa. Maria watsanangura rupande rwakanaka, rusikazoduswi kubva kwaari.” Jesu waikumbira pandau imweni, naapo apedza, umwe wevadzidzi vake wakati kwaari, “Mambo, tidzidzisei kukumbira, kudai ndiJohani wakadzidzisa vadzidzi vake.” Iye wakati kwavari, “Naapo mwookumbira, muti: Baba, ngariremeredzwe zina renyu. Umambo hwenyu ngahuuye. Tipei zuva ngezuva kudya kwedu. Tirekererei zvishaishi zvedu, ngokuti isusuwo tinorekerera veshe avo vanendaa kwetiri. Musatipinza mukuedzwa.” Naye wakati kwavari, “Ndiani kwomuri uneshamwari, ungati aenda kweiri pakati pousiku echiti kwaari, ‘Shamwari, ndikweretisewo zvingwa zvitatu; ngokuti shamwari yangu yaguma kwendiri yechibva parwendo rwayo, neni andina chokuipa chokudya.’ Naye ungapingura arimukati echiti, ‘Usandinesa; musiwo wakonywa zvinopano, nevana vangu vaata neni mumubhedhi; andikoni kumuka kuti ndikupe.’ Ndinoti kwomuri, kunyazwi asikazomuki amupe ngokuti ishamwari yake, asi ngendaa yokuangirira kwake unozomuka, amupe zveshe zvaanoda. Neni ndinomuronzera kuti, kumbirai, kunozopuwa kwomuri; tsvakai, munozoona; dododzai, munozobeurirwa. Ngokuti munhu weshe unokumbira unozoashira, nouwo unotsvaka unozoona, nouwo unodododza unozobeurirwa. Ndiani baba pakati penyu, apo mukororo wake echikumbira hove, unozomupa nyoka here? Nokuti kudai echikumbira zanda, unozomupa chinyaada here? Ndizvo kudai imwimwi mutori vakashata mwechizia kupa vana venyu zvipo zvakanaka, Baba enyu ari mudenga vanozopinda kwakaitawani kupa Mweya Wakachena kunevanokumbira kwaari?” Zvinopano waibudisa dhimoni raiya chimbungumbungu; naapo dhimoni rabuda, chimbungumbungu chakaereketa, nevanhu vazhinji vakashamiswa. Asi vamweni vavo vakati, “Iye unobudisa madhimoni ndiBheerizebhuri, muzvare wemadhimoni.” Naapo vamweni vechimuedza vakatsvaka kwaari chioniso chinobva mudenga. Asi iye echizia mikarakadzo yavo, wakati kwavari, “Umambo hweshe hunodzipaura mukati mwahwo, hunoparara, nemhatso inodzipaura inowa pashi. Nokudai Sathani echidzimukira ngokwake, umambo hwake hungaita maemerenyi? Ngokuti munoti inini ndinobudisa madhimoni ndiBheerizebhuri. Kuti inini ndechibudisa madhimoni ndiBheerizebhuri, vakororo venyu vanoabudisa ndiani? Ndizvo ivo vanozoita vatongi venyu. Asi kuti inini ndechiabudisa madhimoni ngechinwe chaMwari, ngokudaro umambo hwaMwari hwauya kwomuri. Naapo uwo unesimba, anezvokurwa ndizvo, unongwarira mhatso yake, nenhumbi dzake dzinozongwaririka. Asi kuti umweni unomupinda ngesimba akauya padera pake, amunyise, unozobvuka kubva kwaari zvokurwa ndizvo zvake, izvo zvaaigonda ndizvo, unokoanisira zvakachakatwa zvake. Iye usipo neni unorwa neni, nouwo usikaunganidzi neni unotatanisa. “Naapo mweya unetsvina wabuda kumunhu, unohamba ndau dzisina mvura wechitsvaka kuzorora; usikakuoni unoti, ‘Ndohwirira kumhatso yangu apo pendakabva.’ Naapo wauyazve, unoiona yakatsvairwa nokurongedzwa. Naapo unoenda worowotorazve mweya imweni minomwe iyo inopinda kushata kuneuwo wokutanga, nayo inopoteremwo nokugara umwo; nokupedzisira kwechiemo chake munhuwo chinozoshata kupinda chiemo chokutanga.” Naapo achaereketa izvi, dzimai raiya pakati pembungano rakadaidzira, rikati kwaari, “Inomuchena iyo ndani yakakubereka nemazamo awo ewakaamwa!” Asi iye wakati, “Eya, kakurutu vanomuchena avo vanorizwa izwi raMwari vechiringwarira!” Naapo mbungano yechiangira kuungana pamwepo, wakatanga kuti, “Uyu mubarirwana, mubarirwana wakashata; unotsvaka chioniso, asi akuna chioniso chinozopuwa kwouri, asi chioniso chaJona. Ngokuti kudai ndiJona wakaita chioniso kuvanhu veNinevhe, ngokudarozve Mukororo woMunhu unozoita chioniso kuneuyu mubarirwana. Mambo womukadzi wenyika yokubani unozomiruka pamwepo nevanhu vomubarirwana uyu ngezuva rokutongwa, naye unozovaparisa ndaa; ngokuti iye wakabva kumagumo enyika, kuenda koozwa kungwara kwaSoromoni. Penyai, mukuru kunaSoromoni uri panapa. Vanhu veNinevhe vanozoema ngezuva rokutongwa pamwepo nouyu mubarirwana, navo vanozouparisa ndaa; ngokuti ivo vakatenderuka ngokuchumaira kwaJona. Penyai, mukuru kunaJona uri panapa. “Akuna munhu unobasira chibani echichiisa pandau yakafishika nokuti pashi pechitundu, asi pachigadzikiro pacho, kuti avo vanopotera vaone kujeka. Chibani chomuiri idziso rako. Apo dziso rako rakanaka, muiri wako weshe unozara ngokujeka; asi kuti rakashata, muiri wako uri muchidima. Ndizvo ngwara kuti kujeka ukwo kuri mukati mwako akuri chidima akadi. Ndizvo kudai muiri wako weshe wakazara ngokujeka, pasina rupande runechidima, muiri weshe unozozara yaamho ngokujeka, kudai ngechibani chechinasa kujeka, chinozokujekisa yaamho.” Naapo achaereketa, muFarisi wakamukoka kuti adye naye; naye wakapotera, akagara patafura kudya. MuFarisi aona wakashamiswa kuti iye aazi kushamba asati adya. NaMambo wakati kwaari, “Zvinopano imwimwi vaFarisi munosuka kubanze kwetsani nokwendiro, asi mukati mwenyu mwakazara ngokukara nokushata. Imwimwi mapenzi! Iye wakaita zvokubanze, aazi kuitazve zvomukati here? Asi ipai zviri mukati kuita zvipo kuvarombo; penyai, zveshe zvinochena kwomuri. “Asi hezvo kwomuri imwimwi vaFarisi! Ngokuti munopa chegumi chemindi nerue nemiriwo yeshe, asi munorekeredza kutonga kwakwo norudo rwaMwari; asi kwaisisira kuti muite izvi, musikarekeri zvimweni. Hezvo kwomuri imwimwi vaFarisi! Ngokuti munoda zvigaro zvepamberi mumhatso dzokudira nokuchingamidzwa pandau dzemisika. Hezvo kwomuri! Ngokuti mwakadai ngemaiba asikaoneki, nevanhu vanohamba padera pawo vasikazii.” Umwe wemagweta wakapingura echiti kwaari, “Mudzidzisi, mwechiereketa kudai, munotitukawo nesu.” Naye wakati, “Hezvo kwomuri nemwi magweta! Ngokuti munotwikisa vanhu mitwaro inodzimbira kuitwara, nemwi mwemene musikaigwami ngechimwe chezvinwe zvenyu. Hezvo kwomuri! Ngokuti munoaka maiba evaprofeti, avo vakaurawa ngemadzibaba enyu. Ndizvo muri zvapupu nevanotenderana nemishando yemadzibaba enyu; ngokuti ivo vakavauraya, nemwi munoaka maiba avo. Ndizvozve ungwaru hwaMwari hwakati, ‘Ndinozotuma kwavari vaprofeti nevapostori, nevamweni vavo vanozovauraya nevamweni vavo vanozovatambudza,’ kuti ngazi yevaprofeti veshe yakaparadzwa kubvira pakusikwa kwenyika ibvunzisiswe kuneuyu mubarirwana, kubvira kungazi yaAbhera metsa kuguma kungazi yaZekharia, uwo wakafa pakati pearita neTemperi. Eya ndinoti kwomuri, inozobvunzisiswa kuneuyu mubarirwana. Hezvo kwomuri magweta! Ngokuti imwimwi mwakadusa kii rokuzia; amuzi kupotera imwimwi mwemene, naavo vaipotera mwakavarambidza. ” Naapo echibva apo, vanyori nevaFarisi vakatanga kumuangiridza kakurutu nokumunyangadza kuti aerekete zviro zvakawanda, vechimuteya kuti vamubate ngechiro chinobva pamuromo wake. Ngouwo mukuwo, naapo vanhu vasikaerengeki vaungana pamwepo vaitsikirirana, wakatanga kuereketa kunevadzidzi vake kuti, “Ngwarai mumera wevaFarisi, uwo uri kudziitisa. Ngokuti akuna chiro chakadumaidzwa chisikazoonekwi, nokuti chakafishika chisikazoziikanwi. Ndizvo icho chemwakaereketa muchidima chinozozwika mukujeka, neicho chemwakapangirana munzee mukati mwemakamera akafishika, chinozoteketeswa padera pechachungu chemhatso. “Ndinomuronzera, shamwari dzangu, musatya avo vanouraya muiri, ngesure kweizvo vasina chevangaita. Asi ndinomunyowedza ngouwo womunosisira kutya; mwechimutya uwo ngesure kwokuuraya, unesimba rokurasha mugehena, eya, ndinomuronzera mutyenyi uwo! “Zviwanzaburi zvishanu azvitengeswi ngemasendi mairi here? Nechimwe chazvo achizoriyarikanwi pamberi paMwari. Asi nebvudzi resoro renyu rakaerengwa reshe. Musatya; imwimwi munopinda kudikanwa kunezviwanzaburi zvizhinji. “Neni ndinomuronzera, kunyazwi ndiani unonditenda pamberi pevanhu, Mukororo woMunhu unozomutendawo pamberi pengirosi dzaMwari; asi iye unondiramba pamberi pevanhu, ndinozomurambawo pamberi pengirosi dzaMwari. Nomunhu weshe unoereketa izwi rakashata ngoMukororo woMunhu, kunozorekererwa kwaari; asi uwo unotuka Mweya Wakachena akuzorekererwi kwaari. Naapo voomuunza mumhatso dzokudira nepamberi pevatongi nepamberi pevanesimba, musazodembatemba ngenjira yomunozopingura ndiyo nokuti munozopingura ngemazwi akadini nokuti munozoereketenyi; ngokuti Mweya Wakachena unozomudzidzisa ngeiro awa icho chinosisira kuti muerekete.” Umwe wembungano wakati kwaari, “Mudzidzisi, wechironzera mukoma wangu kuti tikoane nhaka.” Asi wakati kwaari, “Munhuwe, ndiani wandiemesa kuti ndiite mutongi nokuti mukoanisiri padera penyu?” Naye wakati kwavari, “Ngwarai, mwechidzitarausa kubva mukuemura kweshe; ngokuti kurarama kwomunhu akubvi mukuwanda kwoupfumi hwaanahwo.” Wakavaronzera muedzaniso akati, “Munda wegurudza wakabereka zvakawanda; naro rakakarakadza mukati mwaro rechiti, ‘Ndinozoitenyi, ngokuti andina ndau yokuisa zviyo zvangu?’ Naro rakati, ‘Ndinozodai; ndoputsira pashi matura angu, ndiake anopinda kukura, naapo ndinozoisa zviyo zvangu zveshe nezviro zvangu.’ Neni ndinozoti kumweya wangu, ‘Une zviro zvakawanda zvakaunganidzirwa kukwanisa makore mazhinji, chigarisika, wechidya, wechimwa, wechidakara.’ Asi Mwari wakati kwaari, ‘Iwewe benzi! Ngouyu usiku mweya wako unozodaidzwa kubva kwouri. Neizvo zvewakadzingwaririra zvinozoita zvaani?’ “Ndizvo zvakaita uwo unodziunganidzira upfumi, asi asiri mupfumi pamberi paMwari.” Wakati kunevadzidzi vake, “Ngeiyi ndaa ndinoti kwomuri, musadembatemba ngendaa yokurarama kwenyu, kuti munozodyenyi, nokuti ngendaa yomuiri wenyu, kuti munozofukenyi. Ngokuti kupona kunopinda kudya, nomuiri unopinda zvokufuka. Mwechipinimidza ngemakungu, kuti aakushi nokuti kuunganidza, aana tsapi nokuti matura, asi Mwari unoaburira. Imwimwi munopinda kwakaitawani kudikanwa kuneshiri! Ndiani kwomuri ngokudembatemba ungatutsira zuva rimwe rokupona kwake? Ndizvo kudai imwimwi musina simba rokuita icho chidodoko, munodembatemba ngenyi ngezvimweni? Pinimidzai ngemaruva, kukura kwaanoita; aashandi, zve, aaruki; asi inini ndinoti kwomuri, naSoromoni muuthende hwake hweshe aazi kumbopfekeswa kudai ngerimwe rawo. Asi kudai Mwari echipfekesa kudaro mwenje worubaya, uwo uripo nyamashi namangwani unokandirwa muchoto, iye unozopinda kwakaitawani kumupfekesa, imwimwi munokutenda kudoodoko! Musatsvaka zvokudya nezvokumwa nokuti musanyunyuta. Ngokuti madzinza eshe enyika anozvitsvaka izvi zveshe, asi Baba enyu vanozia kuti munozvitama izvi zviro. Asi tsvakai umambo hwake, neizvi zvinozotutsirwa kwomuri. “Musatya, imwimwi chikwata chidoko, ngokuti chiri chidisiso chaBaba enyu kuti vamupe umambo. Tengesai zvomunazvo, mukovere varombo; mudziitire zvikwama zvisikatsakari, noupfumi mudenga husikaperi, apo mbavha peisikakwedzeri nokuti unundu pousikaparadzi. Ngokuti apo pouri upfumi hwenyu, apo ndipo panemwoyo wenyu. “Zviunu zvenyu ngazvisungiswe nezvibani zvenyu ngazvijeke; nemwi muite kudai ngevanhu vanorindira mambo wavo apo oobva kudhiri romuchadho, kuti apo oouya nokudododza, vamubeurire paripo. Vanomuchena avo varanda apo mambo oouya unozovaona vechirinda; ngegwinyiso ndinoti kwomuri, unozodzisimidza nokuita kuti vagare pashi panekudya, naye unozouya nokuvashandira. Kudai echizouya ngomurindo wechipiri nokuti wechitatu, andovaona vakadaro, vanomuchena avo varanda! Asi mwechizia ichi, kuti kudai munewemhatso aiya azia awa iro raiuya ndiro mbavha, waizorinda asikatendi kuti mhatso yake ipwanyiwe. Ndizvo imwimwi itai vakanasirirwa, ngokuti Mukororo woMunhu unouya ngeawa romusikapinimidzi.” Petro wakati, “Mambo, unoereketa muedzaniso uyu kwetiri here nokuti kwavari veshe?” Mambo wakati, “Ndiani muranda unogondeka newakangwara, uwo mambo wake unozomuemesa padera pemhatso yake, kuti avape kudya kwavo ngomukuwo wakwo? Unomuchena uwo muranda apo mambo wake oouya unozomuona echiita kudaro. Ngegwinyiso ndinoti kwomuri, unozomuemesa padera pezviro zveshe zvaanazvo. Asi kudai uwo muranda echizoti mumwoyo mwake, ‘Mambo wangu unononoka kuuya,’ orootanga kurova varanda vevamuna nevarandakadzi, adye nokumwa nokuradza, mambo womuranda uwo unozouya ngezuva raasikamukariri neawa raasikazii, naye unozomugura kuita zvigurwa zviiri, amuemesere chikoaniswa chake pamwepo nevasikatendi. Nouwo muranda waizia chiri kuda kwamambo wake, asi aazi kunasirira nokuti kuita kudai ngokuda kwake, unozoshwapurwa ngemishwapu mizhinji. Asi uwo usikazi kuzia, akaita izvo zvinosisira kuti ashwapurwe, unozoshwapurwa ngemishwapu mishomani. Nokwaari uwo wakapuwa zvakawanda, kunozobvunzwa zvakawanda. Nokwaari uwo wevakapa zvakawanda, vanhu vanozobvunza zvakapinda kuwanda. “Ndakauya kukandira mwoto padera penyika; neni ndinozodenyi kuti mwoto watobaka nazvinopano! Asi ndinorubhabhatidzo rwokubhabhatidzwa ndirwo; ndinokumanikidzwa metsa rwaitika! Munopinimidza here kuti ndakauya kupa kunyarara munyika? Ndinomuronzera kuti haiwa, asi kuparadzana! Ngokuti kubvira zvinopano vanozoapo vashanu mumhatso imweyo vakaparadzana, vatatu vakapesana nevairi, nevairi vakapesana nevatatu; “Baba vanozopesana nomukororo, nomukororo unozopesana nababa, namai vanozopesana nemwanasikana, nemwanasikana unozopesana namai, namazvarira vanozopesana nomuzakazi wake, nemuzakazi unozopesana namazvarira ake.” Naye wakatizve kumbungano, “Apo mwoona gore rechimirukira mudenga ngokumabirirazuva, paripo munoti, ‘Kunoda kunaya,’ nakwo kunonaya. Naapo mwoona dutu rechivhuvhuta kubva ngokubani, munoti, ‘Kunozopisha,’ nakwo kunopisha. Imwimwi vadziitisi! Munokona kududzira hope yenyika neyomudenga; asi ngenyi musikazii njira yokududzira ndiyo nguva iyi? “Amukoni ngenyi ngokwenyu kuparadzanisa icho chakanaka? Naapo wechienda negaa rako pamberi pamambo, ita kuti utenderane naro uchimunjira, kuti asazokukweya akuunze pamberi pomutongi, uwo unozokupira kumuphurisa nomuphurisa unozokuisa mutirongo. Ndinoti kwouri, autongozobudimwo usati waripa nesendi rokupedzisira.” Vaiyapo ngouwo mukuwo vamweni vakamuronzera ngevaGarire, avo vaiya vakumanidzirwa ngazi yavo nemidiro yavo ndiPiratu. Naye wakapingura, akati kwavari, “Munopinimidza here kuti avo vaGarire vaiya vashaishi kupinda vamweni veshe vaGarire, ngokuti ivo vakaanenhamo yakadaro? Ndinomuronzera, kuti haiwa; asi ngepabanze pokuti mwatenderuka imwimwi, munozoperawo mweshe ngokudaro. Nokuti avo varigumi navasere avo vakawirwa padera pavo ngorusvingo rwaiya muSiroamu, rukavauraya, munopinimidza here kuti vaiya vanendaa kupinda vanhu veshe vanogara muJerusarema? Ndinomuronzera, kuti haiwa; asi ngepabanze pokuti mwatenderuka imwimwi, munozopera mweshe ngokudaro.” Wakavaronzera uyu muedzaniso, “Munhu waiya nomuonde wakasimwa mumunda wake wemivhini; naye wakauya echitsvaka michero kwouri, asi aazi kuona chiro. Wakati kumurimi wemivhini, ‘Ringira, makore aya matatu ndakauya ndechitsvaka michero kuneuyu muonde, ndisikaioni. Chiutemera pashi; unopedzerenyi kudya mumunda?’ Nouwo wakapingura, akati kwaari, ‘Mambo, chimborekerai nyamwakazve ndipande pashi pawo kuutendenedza, ndiise mwarira. Kudai wechizobereka michero ngesure kweizvi, zvakanaka; asi kudai usikazobereki, unozoutemera pashi.’ ” Naye waidzidzisa muneimwe yemhatso dzokudira ngeSabatha. Penya mudzimai waiya nomweya waimurwarisa makore gumi namasere, waiya nenunda, asikakoni napadoodoko kudzitwasura. Naapo Jesu amuona, wakamudaidza, akati kwaari, “Mudzimai, wasunhurwa kubva kunhenda yako.” Naye wakaisa nyara dzake padera pake, paripo iye wakatwasurwa, akakudza Mwari. Asi mukuru wemhatso yokudira, wakashishwa ngokuti Jesu waiya amuponesa ngezuva reSabatha, wakati kunembungano, “Aripo mazuva matanhatu awo anosisira kuti vanhu vashande ndiwo, ndizvo ngaawo mazuva mwechiuya muponeswe, haiwa ngezuva reSabatha.” Asi Mambo wakamupingura akati, “Imwimwi vadziitisi! Umwe ngaumwe wenyu aasunhuri here ngezuva reSabatha n'ombe yake nokuti mbongoro yake kubva muchibaya, kuitinha kuenda nayo kumvura? Akusisiri here kuti uyu mudzimai, mukunda waAbrahama uwo waakasunga Sathani, ringirai, makore aya gumi namasere, asunhurwe kubva mukusungwa uku ngezuva reSabatha?” Naapo aiya aereketa izvi, magaa ake akatsverudzwa; mbungano yeshe yakadakara ngendaa yeizvo zveshe zvakanaka yaamho zvakaitwa ndiye. Ndizvo wakati, “Umambo hwaMwari hwakadai ngenyi, ndohuedzanisa nenyi? Hwakadai ngetsangu yomustadhi iyo yaakatora munhu, akaisima mumunda mwake, nayo yakamera, yakaita muti neshiri dzomudenga dzakaaka zvisaki mumatai awo.” Wakatizve, “Ndohuedzanisa nenyi umambo hwaMwari? Hwakadai ngomumera uwo waakatora mudzimai, akaufisha mukati mwemitani mitatu yeufu, metsa hwafemeswa hweshe.” Naye wakahamba ngomumadhorobha nomumaguta echidzidzisa, echienda Jerusarema. Noumweni wakati kwaari, “Mambo, vashomani here vanozoponeswa?” Naye wakati kwavari, “Shingirirai kupinda ngepamusiwo wakamanikana, ngokuti ndinoti kwomuri vazhinji vanozotsvaka kupinda, navo avazokoni. Naapo amiruka munewemhatso nokukonya musiwo, nemwi mwotanga kuema kubanze nokudododza pamusiwo mwechiti, ‘Mambo, tibeurire.’ Naye unozopingura echiti kwomuri, ‘Andimuzii kuti munobva pari.’ Naapo munozotanga kuti, ‘Takadya nokumwa mukuona kwako, newe wakadzidzisa mumapato edu.’ Asi unozoti, ‘Ndinomuronzera, andimuzii kuti munobva pari; ibvai kwendiri, imwimwi mweshe vashandi vezvakashata!’ Apo kunozoiteyo kuboorera nokukwetsana kwemazino, naapo mwozoona Abrahama, Isaka naJakobe nevaprofeti veshe muumambo hwaMwari, nemwi mwemene mwarashwa kubanze. Vanozobva kumabvazuva nokumabirirazuva, dera nokubani, navo vanozogara patafura muumambo hwaMwari. Penyai, varipo vamweni vesure vanozoita vepamberi, varipo vamweni vepamberi vanozoita vesure.” Ngeawa iro vakauya vamweni vevaFarisi vechiti kwaari, “Buda uende kubva panapa, ngokuti Herodhi unoda kukuuraya.” Naye wakati kwavari, “Endai mwechiti kuneiyo hava, ‘Penya, ndinodzinga madhimoni ndechiponesa nyamashi namangwani, ngezuva rechitatu ndizopedza mushando wangu. Asi kunodikanwa kuti ndihambe njira yangu nyamashi namangwani nezuva rinoteera; ngokuti azvingaitiki kuti muprofeti afire kubanze kweJerusarema.’ A Jerusarema, Jerusarema, iwewe unouraya vaprofeti wechivaponda ngemapuwe avo vanotumwa kwouri! Kanganai kendaida kuunganidza vana vako pamwepo kudai ngemhambo inounganidza zvitiyo zvayo pashi pemaphaphiro ayo, nemwi amuzi kutenda! Penyai, mhatso yenyu yasiiwa kuita dongo. Neni ndinoti kwomuri, amuchazondioni metsa munozoti, ‘Unomuchena uwo unouya ngezina raMambo.’ ” Ngezuva reSabatha rimweni Jesu wakapotera mumhatso yomutongi uwo waiya umwe wevaFarisi, koodya, vaimuringisisa. Penya, kwaiyapo pamberi pake munhu waiya nenhenda yechizvimbo. NaJesu wakaereketa kunemagweta nevaFarisi echiti, “Kunotenderwa here ngemipango kuponesa ngezuva reSabatha nokuti akutenderwi?” Asi ivo vakanyarara. Naye wakamutora, akamuponesa, akamurekera kuti aende. Naye wakati kwavari, “Ndiani kwomuri, unemwana nokuti kabi yake yawa muhunza, usikazoibudisi ngokukasira ngezuva reSabatha?” Navo avazi kukona kumupingura ngendaa iyi. Zvinopano wakavaronzera muedzaniso avo vakakokwa, naapo aona kuti vatsanangura zvigaro zvepamberi echiti kwavari, “Naapo wakokwa kunyazwi ngouri munhu kudhiri romuchadho, usazogara pashi pandau yepamberi, ngokuti pamweni munhu mukuru kupinda iwewe wakokwawo ndiye; nouwo wakakukoka iwewe naye unozouya echiti kwouri, ‘Taraukira uyu agare panapa,’ naapo unozotanga kutsveruka ngekoogara ndau yesure. Asi apo wakokwa, enda ugare pandau yesure, naapo uwo wakakukoka ouya, ungazoti kwouri, ‘Shamwari, enda pandau yepamberi;’ naapo unozokuriswa mukuona kwavo veshe vanogara newe pakudya. Ngokuti iye unodzikurisa unozopfaiswa, nouwo unodzipfaisa unozokuriswa.” Wakati kuneuwozve wakamukoka, “Apo wonasira kudya kwemasikati nokuti kwemadeekoni, usazodaidza shamwari dzako nokuti vakoma vako nokuti hama dzako nokuti makurudza ari vaakirwana vako, kuti pamweni vanozokukokawo, nakwo kuite kuhwirinzirwa kwouri. Asi apo woonasira kudya iwewe, koka varombo, vakakuwara nezvirema nemapofu; newe unozofumiswa, ngokuti avo avana chokuhwirinzira kwouri. Ngokuti iwewe unozohwirinzirwa mukumuka kwevakarurama.” Naapo umwe weavo vaigara naye patafura pakudya azwa izvi, wakati kwaari, “Unomuchena uwo unozodya chingwa muumambo hwaMwari!” Asi iye wakati kwaari, “Munhu wakanasira kudya kwemadeekoni kwakawanda, wakakoka vazhinji; naye wakatuma varanda vake ngomukuwo wokudya kwemadeekoni kooronza kwavari vakakokwa kuti, ‘Chiuyai; ngokuti zviro zveshe zvanasirwa zvino.’ Asi veshe vakatanga kutendamurandu ngomwoyo umwe. Uwo wokutanga wakati kwaari, ‘Ndakatenga munda, nakwo kunosisira kuti ndiende ndiuone; ndapota ngandirekererwe.’ Noumweni wakati, ‘Ndakatenga kabi dzemajoka mashanu, neni ndinoendayo koodziedza. Ndapota ngandirekererwe.’ Noumweni wakati, ‘Ndakaroora mukadzi, ndizvo andingakoni kuuyayo.’ Nomuranda uwo wakauya akaziisa mambo wake izvi. Naapo mune wemhatso wakatseneka, akati kumuranda wake, ‘Enda ngokukasira mumapato nomunjira dzomudhorobha, uvaunze panapa varombo nevakakuwara nemapofu nezvirema.’ Nomuranda wakati, ‘Mambo, icho chewapanga chaitwa, asi ndau ichirimwo.’ Namambo wakati kuno muranda wake, ‘Buda uende munjira nomumarushosha, uite kuti vapotere, kuti mhatso yangu izare. Ngokuti ndinomuronzera kuti, apana munhu naumwe weavo vakakokwa unozoraira kudya kwangu kwemadeekoni.’ ” Zvinopano yaihamba naye mbungano hurutu. Naye wakakunukuka, akati kwavari, “Kudai aripo munhu unoda kuuya sure kwangu, asikanyenyi baba ake namai ake, mukadzi wake, vana vake, vakoma vake, hanzvadzi, eya, nokurarama kwakezve, aangakoni kuita mudzidzi wangu. Iye usikatwari muchinjiko wake nokuuya sure kwangu, aangakoni kuita mudzidzi wangu. Ngokuti ndiani kwomuri echida kuaka rusvingo, asikatangi kugara pashi aerenge mare yarwo, kuti unayo here yokurupedza? Kuti pamweni apedza kuisa madzeyo, asikakoni kurupedza, avo veshe vanoruona vatange kumuitire jee vechiti, ‘Uyu munhu wakatanga kuaka, asikazi kukona kurupedza.’ Nokuti ndiani mambo, uwo echienda kooshongana namambo umweni mukurwa, asikatangi kugara pashi apangane kuti dani unesimba here ane vanhu makumi emazana gumi kushongana nouwo unouya kurwa naye anemakumi emazana makumi mairi evanhu? Nokuti umweni achikuretu yaamho, atume nhumwa kubvunza chaanoda chokuti vaiyane. Ndizvo kunyazwi ndiani kwomuri usikasii zveshe zvaanazvo, aangakoni kuita mudzidzi wangu. “Munyu wakanaka, asi kuti munyu warasha kunaka kwawo, ucharungwa ngenyi? Auchadetseri chiro kuuisa mumunda nokuti kuita mwarira; vanhu vanourasha kubanze. Uwo unenzee dzokuzwa, ngaazwe.” Zvinopano vabharisi nevashaishi veshe vaikwedzera kwaari kumuzwa. VaFarisi nevanyori vakavhuruvhuta vechiti, “Munhu uyu unoashira vashaishi nokudya navo.” Naye wakavaronzera uyu muedzaniso echiti, “Ndiani munhu kwomuri, kudai anezana remakwai, nerimwe rawo rarashika, aasii here makumi mapfumbamwe nemapfumbamwe mushango, aende kootsvaka iro rakarashika, metsa ariona? Naapo ariona, unoripakata pamapfudzi ake ngokudakara. Naapo aguma kanyi, unodaidza pamwepo shamwari dzake nevaakirwana vake echiti kwavari, ‘Dakarai neni, ngokuti ndariona gwai rangu iro raiya rakarashika.’ Ndinoti kwomuri, ngokudaro kunozoapo kudakara mudenga ngendaa youmwe mushaishi watenderuka kupinda kudakara ngemakumi mapfumbamwe nemapfumbamwe vari vakarurama vasikatami kutenderuka. “Nokuti ngouri mudzimai, unezvigurwa zvesirivha zviri gumi, kuti akarasha chimwe chazvo, aabasiri chibani here, atsvaire mhatso nokunasa kutsvakisisa metsa achiona? Naapo achiona, unodaidza pamwepo shamwari dzake nevaakirwana vake echiti, ‘Dakarai neni, ngokuti ndachiona chigurwa chesirivha icho chendakarasha.’ Ngokudaro ndinoti kwomuri, kuripo kudakara pamberi pengirosi dzaMwari ngendaa yomushaishi umwe watenderuka.” Naye wakati, “Munhu umweni waiya nevakororo vairi. Nomudoko wavo wakati kunababa ake, ‘Baba, chindikoanisirai chikoaniswa chenhaka chendakaemeserwa.’ Naye wakakoanisira kwavari pfuma yake. Ngesure kwemazuva mashomani mukororo mudoko wakaunganidza zveshe pamwepo, akaenda kunyika iri kuretu, naye wakaparadza nhaka yake ngokupona kwokushaisha. Naapo aiya apedza zveshe, yakaguma nzara huru munyikamwo, naye wakatanga kutama. Ndizvo wakaenda akadzipira kunemunhu wenyikayo, naye wakamutuma kuenda murubaya koousha nguruve. Naye waido kugutisa ndani yake ngemateko aidyiwa ngenguruve; apana munhu waimupa chiro. Asi apo anasa kuzia pachake wakati, ‘Kuwandanyi kwakaita varanda vababa angu vane chingwa chinokwana nechokusiya, neni ndiri kufa ngenzara panapa!’ Ndomiruka ndiende kunababa angu, ndinozoti kwavari: ‘Baba, ndashaisha pamberi paMwari nepamberi penyu; neni andichasisiri kudaidzwa kuti ndiri mwana wenyu. Chindibatai kudai ngoumwe wevaranda venyu.’ Naye wakamiruka, akauya kunababa ake. Asi apo achikuretu, baba ake vakamuona vakamuzwira nyasha, navo vakarumba, vakamumbundira, vakamuchingamidza ngomuromo. Mukororo wakati kwaari, ‘Baba, ndakashaisha pamberi paMwari nepamberi penyu; andichasisiri kudaidzwa kuti ndiri mwana wenyu.’ Asi baba vakati kuvaranda vavo, ‘Unzai ngokukasira gauni rakapindisisa kunaka, mumupfekese; muise ndandazi pachikunwe chake nemagwada mutsoka dzake; mwechiunza mhuru inonuna muiuraye, ngatidye tidakare; ngokuti uyu mukororo wangu waiya afa, naye unoponazve; wakarashika, naye waoneka.’ Navo vakatanga kudakara. “Zvinopano mukororo wake wedangwe waiya mumunda; naapo achauya echikwedzera kumhatso, wakazwa kuridzwa nokuzvina. Naye wakadaidza umwe wevaranda, akabvunza kuti izvi zviinyi! Naye wakati kwaari, ‘Munun'una wako wauya nababa ako vamuuraira mhuru inonuna, ngokuti vamuashira achangwaririka nokupona.’ Asi iye wakatseneka, akaramba kupoteramwo. Nababa ake vakabuda kubanze, vakamunyengerera. Asi iye wakapingura, akati kunababa ake, ‘Ringirai, makore aya mazhinji ndakakushandira neni andizi kutongogura chimwe chemipango yako; asi auzi kundipa kachimbudzana kuti ndidakare neshamwari dzangu. Asi wauya uyu mukororo wako uwo wakapedza pfuma yako pamwepo nemamhombo, iwewe wamuuraira mhuru inonuna!’ Asi iye wakati kwaari, ‘Mukororo, undori neni nguva dzeshe neizvo zvendinazvo zvindori zvako. Asi kwaisisira kuti tidakare nokudakadzwa, ngokuti uyu munun'una wako waiya afa, naye unoponazve; waiya akarashika, nazvinopano unoonekazve.’ ” Wakatizve kuvadzidzi vake, “Kwaiyapo munhu waiya gurudza, uwo waiya nomungwariri, naye wakaitirwa ndaa yokuti waiparadza pfuma yamambo wake. Naye wakamudaidza, akati kwaari, ‘Chiinyi ichi chendinozwa ndiwe? Wechindipa mushumo womushando woungwariri hwako, ngokuti iwewe aungachaiti mungwariri.’ Nomungwariri wakati mukati mwake, ‘Ndodini, ngokuti mambo wangu unodusa kwendiri mushando woungwariri hwangu? Andina simba rokurima, ndinenyowa dzokupemha. Ndinozia chendinozoita, apo ndadzingwa kubva mumushando woungwariri hwangu, kuti vanhu vazondiashira mumhatso dzavo.’ Ndizvo echidaidza kwaari veshe vaiya nezvikwereti kunamambo wake umwe ngaumwe, wakati kuneuwo wokutanga, ‘Unechikwereti chakadini kunamambo wangu?’ Iye wakati, ‘Zana remabiya emafuta.’ Naye wakati kwaari, ‘Tora tsamba yako ukasire kugara pashi, unyore kuti makumi mashanu.’ Naapo wakatizve kuno umweni, ‘Iwewe unechikwereti chakadini?’ Naye wakati, ‘Zana rezvitundu zvekoroni.’ Naye wakati kwaari, ‘Tora tsamba yako unyore kuti makumi masere.’ Namambo wake wakakudza mungwariri wakashata ngokuti yaiya aita ngourimbwi. Ngokuti vanhu veiyi nyika vanopinda kungwara kundanga dzavo kunevanhu vokujeka. Neni ndinomuronzera, mwechidziitira shamwari ngoupfumi husikazi kururama, kuti apo hwapera vazomuashira muugaro husikaperi. “Uwo unogondeka ngezvidoodoko unozogondekazve ngezvakawanda; nouwo usikazi kururama ngezvidoodoko aazi kururamazve ngezvakawanda. Ndizvo kuti musikazi kuita vanogondeka ngoupfumi husikazi kururama, ndiani unozomugonda ngoupfumi hwegwinyiso? Kudai musikazi kuita vanogondeka ngeizvo zvaiya zvevamweni, ndiani unozopa kwomuri izvo zviri zvenyu? Apana muranda ungakona kushandira madzimambo mairi; ngokuti unozonyenya umwe ade umweni, nokuti unozobatirira kuneumweni, ashoore umweni. Amungakoni kushandira Mwari neMare.” VaFarisi, avo vaida mare, vakazwa zveshe izvi, navo vakamusvereredza. Naye wakati kwavari, “Imwimwi muri avo vanodzipembedza pamberi pevanhu, asi Mwari unozia mwoyo yenyu; ngokuti icho chinoremeredzwa pakati pevanhu, chiri chinonyangadza pamberi paMwari. “Mupango nezvinyorwa zvevaprofeti zvaindoapo metsa kuguma kwaJohani; kubvira ngouwo mukuwo umambo hwaMwari hunochumairwa, nomunhu weshe unopoteramwo ngesimba. Asi kunopinda kureruka kuti denga nenyika zvipinde, kunekuti kadonhwe kamwe keMipango kakorere kuitika. “Kunyazwi ndiani unoramba mukadzi wake, aroore umweni unoomba, nouwo unomuroora uwo wakarambwa kubva kumwamuna wake unoomba. “Kwaiyapo munhu waiya gurudza, uwo waipfeka machira akatsvukuruka neakachena akanaka echidya zvakanaka mazuva eshe. Kwaiyapozve mupemhi waizwi Razarusi waiiswa pamusiwo wegurudza, akazara ngezvironda, waida kudya matsekeneswa aiwa kubva patafura pegurudza; kunyazwi nembwa dzaiuya dzechinambura zvironda zvake. Kwakaitika kuti mupemhi wakafa, akatwarwa ngengirosi kuenda paditi raAbrahama. Negurudza rakafawo rikaikwa; riri muHaidhesi, rakamirudza madziso aro rechishononwa, rikaona Abrahama ari kuretu naRazarusi ari paditi pake. Naro rakadaidzira rikati, ‘Baba Abrahama, ndiitirei nyasha, tumai Razarusi kuti anyike kumagumo kwechinwe chake mumvura atonhodze rurumi rwangu; ngokuti ndiri mukurwadziwa mumurazvu uyu.’ Asi Abrahama wakati, ‘Mukororo, karakadza kuti iwewe ngenguva yokupona kwako wakaashira zviro zvako zvakanaka, naRazarusi ngokudaro wakaashira zviro zvakashata; asi zvinopano unoembedzerwa, newe uri mukurwadziwa. Nepadera peizvi zveshe, riripo gaha guru rakaiswa pakati pedu nemwi, kuti avo vanoda kubva uno kuuya kwomuri, avangakoni, zve akuna ungaambuka kubva kwomuri kuuya kwetiri.’ Naye wakati, ‘Ndinokupota, baba, kuti umutume kumhatso yababa angu, ngokuti ndine vanun'una vashanu, kuti anase kupupura kwavari, kuti vasazouyawo kundau iyi yokushononwa.’ Asi Abrahama wakati, ‘Vanaye Mosi nevaprofeti; ngavavapurutane.’ Asi iye wakati, ‘Haiwa, baba Abrahama; asi kudai umwe akaenda kwavari echibva kwevakafa, vanozotenderuka.’ Asi iye wakati kwaari, ‘Kudai vasikapurutani Mosi nevaprofeti, avatongozozwi kunyazwi umwe amuka kubva kwevakafa.’ ” Naye wakati kuvadzidzi vake, “Akungaitiki kuti zvipumhuniso zvisauya; asi ihehe kwaari uwo wezvinouya ndiye! Kurinane kwaari kuti guyo gurutu risungirwe muhuro mwake naye anzvaidzwe muruandhle, kunekuti aite kuti umwe weava vadoko ashaishe. Mwechidzingwarira pachenyu; kudai munun'una wako echishaisha, wechimurambidza, kuti iye echitenderuka, chimurekerera. Nokudai echikushaishira kanomwe ngezuva, akakunukuka kwouri kanomwe, naye echiti, ‘Ndinotenderuka,’ newe unosisira kumurekerera.” Vapostori vakati kunaMambo, “Wanza kugonda kwedu!” NaMambo wakati, “Kudai mwaiya nokugonda kwakadai ngetsangu yemustadhi, mwaizoronza kuneuyu muti womuonde kuti, ‘Bvitwa, usimwe muruandhle,’ nawo waizomupurutana. “Asi ndiani kwomuri, unemuranda echirima mumunda nokuti kuusha makwai, ungazoti kwaari apo auya echibva kumunda, ‘Uya zvinopano ugare pashi patafura panekudya?’ Aazoti here kwaari, ‘Ndinasirire kudya kwemadeekoni, udzisimidze pachako wechindishandira, metsa ndadya nokumwa; ngesure kweizvi ungazodyawo nokumwawo iwewe?’ Unobonga here uwo muranda ngokuti wakaita izvo zvaakapangwa kuita? Ngokudaro imwimwi nemwiwo, apo mwazopedza kuita zveshe izvo zvemwakapangwa mwechiti, ‘Tiri varanda vasikadetseri chiro; takaita izvo zvaiya bingo redu.’ ” Vari munjira kuenda Jerusarema wakahamba ngepakati peSamaria neGarire. Naapo achapinda muguta, vakashongana naye vanhu gumi vaiya nemapere, vakaema vari kuretu, navo vakadaidzira ngemazwi avo vechiti, “Jesu, Mambo, tiitire nyasha.” Naapo avaona wakati kwavari, “Mwechienda mudzipangidzire kuvapristi.” Naapo vechienda vakamhodyoswa. Naapo umwe wavo, apo aona kuti wamhodyoka, wakahwirira, echikudza Mwari ngeizwi guru; naye wakawa ngehope yake patsoka dzaJesu, echimubonga. Iye waiya muSamaria. Naapo Jesu wakati, “Avazi kumhodyoswa varigumi here? Asi varipari vapfumbamwe? Apana wakaoneka echipetuka kookudza Mwari, asi ega uyu mupara here?” Naye wakati kwaari, “Miruka, uende; kugonda kwako kwakuponesa.” VaFarisi vamweni vakamubvunza kuti umambo hwaMwari hunozouya riini, wakavapingura akati, “Umambo hwaMwari ahuuyi ngenjira youngaoneka pamhene; akuna naumwe unozoti, ‘Penya, uri panapa!’ Nokuti, ‘Uri apo!’ Ngokuti penyai, umambo hwaMwari huri mukati mwenyu.” Naye wakati kuvadzidzi, “Mazuva achazouya omunozodisisa kuti muone rimwe remazuva oMukororo woMunhu, nemwi amuzorioni. Navo vanozoti kwomuri, ‘Penyai apo!’ Nokuti, ‘Penyai, panapa!’ Musazoendapo, nokuti kuvateera. Ngokuti kudai ngemheni inopenya yechijekisa denga yechibva kurupande rumwe rwomudenga kuguma kurupande rumweni rwepashi pomudenga, nokuuya kwoMukororo woMunhu kunozodaro ngezuva rake. Asi kutanga kunosisira kuti ashononeswe ngezvakawanda nokurambwa ngouyu mubarirwana. Kudai ngezvakaitika ngemazuva aNoa, kunozoitikawo ngemazuva oMukororo woMunhu. Vakadya, vakamwa, vakaroora, vakaroodzwa, metsa rakaguma zuva raakapotera ndiro Noa mungarava, nendambi yakauya ikavapedza veshe. Kudaizve ngezvakaitika ngemazuva aRoti, vakadya, vakamwa, vakatenga, vakatengesa, vakasima, vakaaka, asi ngezuva raakabuda ndiro Roti kubva muSodhoma kwakanaya muriro nesorufa zvechibva mudenga zvikavapedza veshe. Izvi ndizvo zvinozoitika ngezuva raanozopangidzirwa Mukororo woMunhu. Ngeiro zuva, uwo uri padera pemhatso, nenhumbi dzake dziri mukati mwemhatso, asazodzaka kuti adzitore; nouwo uri mumunda asapetuka. Mwechikarakadza mukadzi waRoti. Kunyazwi ndiani unozotsvaka kuuyirwa ngokurarama kwake unozokurasha, asi kunyazwi ndiani unozorasha kurarama kwake iye unozokungwarira. Ndinoti kwomuri, ngouwo usiku vairi vanozoapo pamubhedhi umwewo; umwe unozotorwa noumweni unozosiiwa. Vanozoapo vakadzi vairi vechikuya pamwepo; umwe unozotorwa noumweni unozosiiwa.” [ Naapo vanhu vairi vanozoapo mumunda, umwe unozotorwa noumweni unozosiiwa.] Navo vakati kwaari, “Kuri, Mambo?” Naye wakati kwavari, “Apo panomuiri wakafa, ndipo panozoungana ngwanga.” Wakavaronzera muedzaniso, kuti vanosisira kundogara vechikumbira vasazoremba. Wakati, “Mudhorobha rimweni waiyapo mutongi uwo waiya asikatyi Mwari, asikaremeredzi munhu. Kwayiapo neshirikadzi mudhorobha iro nayo yakagara yechiuya kwaari yechiti, ‘Nditongere ndaa yangu kunegaa rangu.’ Kwekamukuwo aazi kutenda; asi ngesure kweizvi wakati mukati mwake, ‘Kunyazwi inini ndisikamutyi Mwari nokuti kuremeredza munhu, asi ngokuti shirikadzi iyi inondinesa, ndinozoitongera, kuti isazondishisha ngokundogara yechiuya.’ ” NaMambo wakati, “Izwai zvaanoronza mutongi usikazi kururama. Mwari aazotongeri here vakatsanangurwa vake, avo vanochema kwaari masikati nousiku? Unozononoka kuvadetsera here? Ndinomuronzera, kuti unozovatongera ngokukasira. Zvakanyadaro, naapo Mukororo woMunhu ouya, unozoona kugonda panyika here?” Wakaronzazve uyu muedzaniso kunevamweni avo vakadzigonda kuti vari vakarurama vechishoora vamweni: “Vanhu vairi vakakwira muTemperi kookumbira, umwe wavo waiya muFarisi noumweni waiya mubharisi. MuFarisi wakaema, akakumbira pachake, akati, ‘Mwari, ndinokubonga ngokuti andizi kudai ngevanhu vamweni, vane makaro, vasikazi kururama, vanoomba nokunyazwi nouyu mubharisi. Ndinoera kudya kairi ngevhiki, ndinopa chegumi chezviro zveshe zvendinazvo.’ Asi mubharisi, echiema ari kuretu, aazi kutenda nokumirudza madziso ake kuringira mudenga, asi wakarova diti rake echiti, ‘Mwari, ndiitire nyasha inini mushaishi!’ Ndinomuronzera, uyu munhu wakadzaka kuenda kumhatso yake echipembedzwa kunoumweni; ngokuti munhu weshe unodzikudza unozopfaiswa, asi uwo unodzipfaisa unozokuriswa.” Zvinopano vaiunza kwaari vana vadoko kuti avabate; naapo vadzidzi vaona, vakavarambidza. Asi Jesu wakavadaidza kwaari echiti, “Tenderai vana vadoko kuti vauye kwendiri, musavarambidza; ngokuti umambo hwaMwari ngehwevakadai. Ngegwinyiso ndinoti kwomuri, uwo usikaashiri umambo hwaMwari kudai ngomwana mudoko, aatongozopoterimwo.” Mutongi wakamubvunza echiti, “Mudzidzisi wakanaka, ndinozoitenyi kuti ndigare nhaka yokupona kusikaperi?” Jesu wakati kwaari, “Unondidaidza ngenyi kuti wakanaka? Akuna naumwe wakanaka asi Mwari ega. Unozia mipango: ‘Usaomba, usauraya, usaba, usaita chapupu chokunyepa, remeredza baba ako namai ako.’ ” Naye wakati, “Izvi zveshe ndakazvingwarira kubvira muudoko hwangu.” Naapo Jesu azwa izvi, wakati kwaari, “Uchatama chiro chimwe. Tengesa zveshe zvounazvo upe kuvarombo, newe unozoa noupfumi mudenga; uuye, unditeere.” Asi apo azwa izvi wakatambudzika kakurutu, ngokuti waiya mupfumi mukurutu. Jesu echimuringira wakati, “A, kukonzanyi kwezvakaita kuneavo vane upfumi kuti vapotere muumambo hwaMwari! Ngokuti kunopinda kureruka kunekamera kuti ripotere ngepaburi renaiti kuno kuti mupfumi apotere muumambo hwaMwari.” Avo vakazwa izvi vakati, “Ndizvo ndiani ungaponeswa?” Asi iye wakati, “Izvo zvisikaitiki kuvanhu zvinoitika kunaMwari.” NaPetro wakati, “Penya, isusu takasiya mizi yedu tikakuteera.” Naye wakati kwavari, “Ngegwinyiso ndinoti kwomuri, akuna munhu wakasiya muzi nokuti mukadzi nokuti vakoma nokuti vabari nokuti vana, ngepamusoro poumambo hwaMwari, usikazoashiri ngouyu mukuwo zvakawanda zvakahwirinzirwa, panguva inouya unozoashira kupona kusikaperi.” Naye wakatora gumi navairi, wakati kwavari, “Penyai, tinokwira Jerusarema, nazvo zveshe zvakanyorwa ngevaprofeti ngendaa yoMukororo woMunhu zvinozoitika. Ngokuti unozopirwa kunevemadzinza, naye unozoitirwa jee nokutambudzwa nokupfirwa mata; navo vanozomurova nokumuuraya, ngezuva rechitatu unozomukazve.” Asi avazi kuzwisisa nachimwe cheizvi zviro; neizwi iri raiya rakafishika kwavari, navo avazi kuzwisisa izvo zvakaereketwa. Naapo echikwedzera pasinde peJerikho, bofu raiya rakagara panjira rechipemha; rechizwa mbungano yechipinda, rakabvunza kuti, “Chiinyi ichi chiri kuitika?” Navo vakarironzera kuti, “Jesu weNazaretha unopinda ngepanapa.” Naro rakadaidzira rikati, “Jesu, mukororo waDhavhidha, ndiitire nyasha!” Naavo vaiya pamberi vakarikaraidza, kuti rinyarare; asi rakapinda kudaidzira kakurutu rechiti, “Mukororo waDhavhidha, ndiitire nyasha!” NaJesu wakaema, akapanga kuti riunzwe kwaari; naapo rakakwedzera pasinde, wakaribvunza kuti, “Unoda kuti ndikuitirenyi?” Naro rakati, “Mambo, kuti ndione.” Jesu wakati kweriri, “Chiona; kugonda kwako kwakuponesa.” Paripo rakaona, rakamuteera rechikudza Mwari; nembungano yechizviona, yakairikidza Mwari. Wakapotera muJerikho echipinda ndimwo. Penya, munhu waizwi Zakheusi; iye waiya mukuru wevabharisi, waiya gurudza. Naye wakatsvaka kuona Jesu kuti ndiani, asi waiya asikakoni ngendaa yembungano, ngokuti waiya mufupi. Ndizvo wakarumba kuenda mberi, akakwira mumuonde kuti amuone, ngokuti waipinda ngeiyo njira. Naapo Jesu agumapo wakaringira mudenga, akati kwaari, “Zakheusi, kasira kudzaka pashi; ngokuti kunosisira kuti ndigare mumhatso yako nyamashi.” Ndizvo wakakasira kudzaka pashi, akamuashira ngokudara. Naapo vazviona vakavhuruvhuta veshe vechiti, “Wapotera kuita mueni womunhu mushaishi.” NaZakheusi wakaema, akati kunaMambo, “Ringira, Mambo, ndinopa hafu youpfumi hwangu kuvarombo; kudai ndakatora chiro kumunhu ngourimbwi, ndinomuhwirinzira zvakapetwa karongomuna.” Jesu wakati kwaari, “Nyamashi ruponeso rwaguma kuneiyi mhatso, ngokuti nayewo mukororo waAbrahama. Ngokuti Mukororo woMunhu wakauya kootsvaka nokuponesa izvo zvakarashika.” Naapo vachazwa izvi zviro, wakaangira kuvaronzera muedzaniso, ngokuti waiya pasinde neJerusarema, ngokutizve ivo vaikarira kuti umambo hwaMwari hwaizokasira kuoneka apapo. Ndizvo wakati, “Munhu mukuru wakaenda kunyika yaiya kuretu kuti andoashira umambo nokupetukazve. Wakadaidza varanda vake gumi, akavapa umwe ngaumwe chigurwa chomukore, wakati kwavari, ‘Barisai metsa ndiuye.’ Asi vanhu vomunyika yake vakamunyenya, vakatuma vatumwa sure kwake vechiti, ‘Atidi kuti munhu uyu atonge padera pedu.’ Naapo oopetuka, aashira umambo, wakapanga kuti avo varanda, vaaiya akapa zvigurwa zvemukore, vadaidzwe kwaari, kuti azie zvevakauyirwa ngokuibarisa. Uwo wokutanga wakauya pamberi pake, akati, ‘Mambo, chigurwa chako chomukore chakauyirwa ngezvigurwa zvimweni gumi.’ Naye wakati kwaari, ‘Wakanasa, iwewe muranda wakanaka! Ngokuti wakagondeka ngezvishomani, wechitonga padera pemadhorobha gumi.’ Newechipiri wakauya akati, ‘Mambo, chigurwa chako chomukore chakauyirwa ngezvigurwa zvimweni zvishanu.’ Naye wakati kwaarizve, ‘Wechitonga padera pemadhorobha mashanu.’ Naapo umweni wakauya, akati, ‘Mambo, penya, chigurwa chako chomukore, icho chendakangwarira chiri mudhuku, ngokuti ndakakutya, ngokuti uri munhu usikakonwi; unotonhera icho chousikazi kuisa pashi, newe unocheka icho chousikazi kusima.’ Wakati kwaari, ‘Ngezvinobuda kubva pamuromo pako ndinozokutonga, iwewe muranda wakashata! Iwewe waitozia kuti ndiri munhu usikakonwi, ndechitonhera icho chendisikazi kuisa pashi, nokucheka icho chendisikazi kusima. Ndizvo wakarekera ngenyi kuisa chigurwa changu kwavari mubhange, neni mukuuya kwangu ndaizowona icho nokuuyirwa kwacho?’ Naye wakati kuneavo vaiema pasinde, ‘Mutorerenyi kubva kwaari icho chigurwa chomukore, mupe kwaari uwo unegumi rezvigurwa zvomukore.’ Navo vakati kwaari, ‘Mambo, uwo unegumi rezvigura zvomukore!’ Ndinoti kwomuri, ‘Kunemunhu weshe unacho unozopuwa, nokwaari usina, neicho chaanacho chinozotorwa kubva kwaari. Asi ao magaa angu, aiya asikatendi kuti nditonge padera pao, aunzenyi panapa muauraye pamberi pangu.’ ” Naapo aronza izvi, wakatungamira pamberi pavo kukwira Jerusarema. Naapo akwedzera pasinde peBhethifaje neBhethani, ngepaMutunhu unozwi wemaOrivhi, wakatumira mberi vairi vevadzidzi vake echiti, “Endai muguta iro remwakaringirana naro, umwo mwopindamwo munozoona tsiru rembongoro rakasungwa, iro risikazi kumbogadhwa ngomunhu. Risunhurenyi muuye naro. Kudai aripo unozomubvunza kuti, ‘Munorisunhurirenyi?’ Munozoronza kuti, ‘Mambo unorida.’ ” Ndizvo avo vakatumwa vakaenda, vakaona kudai ngezvaakaronza kwavari. Naapo vachasunhura tsiru, vanikazi varo vakati kwavari, “Munorisunhurirenyi tsiru?” Navo vakati, “Mambo unorida.” Navo vakariunza kunaJesu, vakaisa zvokufuka zvavo padera petsiru, vakakwidza Jesu padera paro. Naapo agadha tsiru, vakachinga zvokufuka zvavo munjira. Naapo echikwedzera pasinde pokudzaka Mutunhu wemaOrivhi, mbungano yeshe yevadzidzi vakatanga kudakara nokukudza Mwari ngeizwi guru ngendaa yemishando yeshe ine simba yevaiya vaona vechiti, “Unomuchena Mambo uwo unouya ngezina raMambo Mwari! Kunyarara mudenga nouthende mudengadenga!” Vamweni vevaFarisi mukati mwembungano vakati kwaari, “Mudzidzisi, rambidza vadzidzi vako.” Naye wakapingura, akati kwavari, “Ndinomuronzera kuti, kudai ava vaizonyarara, mapuwe emene anozodaidzira.” Naapo akwedzera pasinde wakaona dhorobha, wakarichemera echiti, “Dai waizia ngezuva iri izvo zviro zvingakupa kunyarara kwako! Asi zvinopano zvakafishika kumadziso ako. Ngokuti mazuva anozokugumira, apo magaa ako anozokushoshera rushosha nokukutendenedza, akukonyere mukati kumarutii eshe. Anozokupwanyira pashi, nevana vako vari mukati mwako, navo avazosii mukati mwako nebuwe rimwe rakagadzikwa padera perimweni; ngokuti iwewe auzi kuzia mukuwo wokuhambirwa kwako.” Naye wakapotera muTemperi, akatanga kuvadzingira kubanze avo vaitengesa echiti kwavari, “Kwakanyorwa kuti, ‘Mhatso yangu inozozwi imhatso yomukumbiro;’ asi imwimwi mwaiita bako rembavha.” Naye waidzidzisa mazuva eshe muTemperi. Vapristi vakuru nevanyori nevakuru vevanhu vakatsvaka kumuuraya; asi avazi kuona chiro chevangaita, ngokuti vanhu veshe vakabatirira kwaari vechipurutana mazwi ake. Ngezuva rimweni, echidzidzisa vanhu muTemperi nokuchumaira vhangeri, vapristi vakuru nevanyori nevakuru vevanhu vakauya kwaari vechiti, “Tironzere kuti unoita izvi ngesimba raani? Nokuti ndiani wakakupa iri simba?” Naye wakavapingura, akati kwavari, “Ininiwo ndinozomubvunza mubvunzo umwe, nemwi ndironzerei zvinopano: Rubhabhatidzo rwaJohani rwakabva mudenga here nokuti rwakabva kuvanhu?” Navo vakapangana pakati pavo vechiti, “Kuti tikati, ‘Rwakabva mudenga,’ iye unozoti, ‘Amuzi kumutenda ngenyi?’ Asi tikati, ‘Rwakabva kuvanhu,’ vanhu veshe vanozotiponda ngemapuwe; ngokuti vanotenda kuti Johani waiya muprofeti.” Navo vakapingura kuti avazi kuzia kuti rwakabva kuri. Jesu wakati kwavari, “Neniwo andimuronzeri kuti ndinoita izvi zviro ngesimba raani.” Naye wakatanga kuronzera vanhu muedzaniso uyu: “Munhu wakasima munda wemivhini, akaupa kuvarimi, akaenda kunyika imweni koogareyo mukuwo wakareba. Naapo nguva yaguma, wakatuma muranda kuvarimi, kuti vamupe imweni yemichero yomumunda wemivhini; asi varimi vakamurova, vakamupetudza asina chiro. Naye wakatumazve muranda umweni; nouwozve vakamurova, vakamubata ngenjira yaitsverudza, vakamupetudza asina chiro. Wakatumazve wechitatu, nayewo vakamukuwadza, vakamurasha kubanze. Naapo mambo womunda wemivhini wakati, ‘Ndinozoitenyi? Ndinozotuma mukororo wangu unodikanwa; pamweni vanozomuremeredza.’ Asi apo varimi vamuona, vakapangana pachavo vechiti, ‘Uyu ndiye unogara nhaka; ngatimuuraye, kuti nhaka iite yedu.’ Vakamubudisa kubanze kwomunda wemivhini, vakamuuraya. Ndizvo mambo womunda wemivhini unozoitenyi kwavari? Unozouya avauraye avo varimi, unozopa munda wemivhini kune vamweni.” Naapo vechizwa izvi vakati, “Mwari, musatendera kudaro!” Asi wakavaringira, akati, “Ndizvo chiinyi ichi chakanyorwa chinoti, ‘Buwe iro rakarambwa ngevaaki, ndiro rakaita soro repakona?’ Munhu weshe uwo unowira padera pebuwe iro unozoputika kuita zvigurwa; asi iye kwaari werinozowira padera pake rinozomukuya kuita bukuta.” Vanyori nevapristi vakuru vakaedza kumubata ngeawa iro, asi vakatya vanhu; ngokuti vakazwisisa kuti wakaronza uyu muedzaniso ndivo. Ndizvo vakamurinda, vakatuma vadongoreri, avo vakadziitisa kudai ngevanhu vakarurama, ngokudaro vakamuteya ngemazwi ake, kuti vazomupira kusimba romutongi woumambo. Vakamubvunza vakati, “Mudzidzisi, tinozia kuti izvo zvounoronza nokudzidzisa zvakanaka, auketi munhu, asi ngegwinyiso unodzidzisa ngenjira yaMwari. Kunotenderwa here kwetiri kuti tipe chibharo kunaSiza nokuti akutenderwi?” Asi iye echizia urimbwi hwavo wakati kwavari, “Ndipangidzirei chigurwa chemare. Chine muedzaniso wehope norunyoro rwaani?” Navo vakati, “Ngezva-Siza.” Naye wakati kwavari, “Ndizvo mwechipa kunaSiza izvo zviri zvaSiza nokuna Mwari izvo zviri zvaMwari.” Navo vakakorera kumubata ngemazwi okuereketa kwake pamberi pevanhu; navo vechishamiswa ngokupingura kwake vakanyarara. Kwakaguma kwaari vamweni vevaSadhusi, avo vanoti akuna kumuswa kwevakafa, navo vakamubvunza vechiti, “Mudzidzisi, Mosi wakatinyorera echiti kuti mukoma womunhu afa, anemukadzi asina vana, munun'una wake unozotora mukadzi abarire mukoma wake vana. Ndizvo vaiyapo vakoma vanomwe; uwo wedangwe wakaroora mukadzi, akafa asina vana; nouwo wechipiri wakamutora, newechitatu wakamutora, ngokudaro veshe vanomwe vakafa avazi kusiya vana. Ngesure kweizvi mukadzi naye wakafawo. Ndizvo pakumuka kwevakafa, unozoita mukadzi waani kwavari? Ngokuti veshe vanomwe vakamutora kuita mukadzi.” Jesu wakati kwavari, “Vanhu vomunyika muno vanoroora nokuroodzwa; asi avo vanoerengwa kuti vanosisira nyika iyo nokumuka kubva kwevakafa avaroori, avaroodzwizve. Ngokuti avachazofizve, ngokuti vanozodai ngengirosi vaa vana vaMwari, vaa vana vokumuka kwevakafa. Asi kuti vakafa vanomuswa, Mosi emene wakapangidzira kudaro, ngeizwi rinoronza ngendaa yepfiba, apo paakadaidza Mambo Mwari kuti ndiMwari waAbrahama, Isaka naJakobe. Zvinopano andiyepi Mwari wevakafa, asi Mwari wevanopona; ngokuti veshe vanoponera kwaari.” Vamweni vevanyori vakapingura, vakati, “Mudzidzisi, wanasa kuronza.” Ngokuti avazi kuchazoshingazve kumubvunza mubvunzo. Asi wakati kwavari, “Vanoronza ngenyi kuti Kristu mukororo waDhavhidha? Ngokuti Dhavhidha emene mubhuku reNduyo wakaronza kuti, ‘Mambo wakati kunaMambo wangu, gara ngokumudyo kwangu, metsa ndiite magaa ako chitambarariro chetsoka dzako.’ Ndizvo kuti Dhavhidha echimudaidza kuti Mambo, ungaita mukororo wake ngokuitawani?” Wakati kuvadzidzi vake mukuzwa kwevanhu veshe, “Ngwarai vanyori, avo vanodisisa kuhamba vakapfeka zvokusimira zvakareba, vanoda kuchingamidzwa pandau dzemisika nezvigaro zvepamberi mumhatso dzokudira nendau dzepamberi mumishongano yokudya, avo vanoparadza mhatso dzeshirikadzi nangokudziitisa vanoita mikumbiro yakareba. Vanozoashira kurashwa kwakanyanyisisa.” Wakaringira, akaona makurudza vechiisa zvipo zvavo mundau yezvipo; naye wakaona shirikadzi yaiya murombo yechiisamwowo zvigurwa zvethusi zviiri. Naye wakati, “Ngegwinyiso ndinomuronzera, kuti iyi shirikadzi murombo yaisamwo mare yakapinda kuwanda kupinda vamweni veshe; ngokuti avo veshe vaisamwo muzvipo kubva pauwandu wepfuma yavo, asi iye kubva muurombo hwake waisamwo zveshe zvaanopona ndizvo.” Naapo vamweni vachaereketa ngendaa yeTemperi, kuti rakanemeswa ngemapuwe akawanda nezvipo, iye wakati, “Ngendaa yeizvi zvomunoona, mazuva anozouya naapo arizosiiwi buwe rimwe rakaturikidzwa padera perimweni risikazowiswi pashi.” Navo vakamubvunza vechiti, “Mudzidzisi, izvi zvinozoitika riini? Chiinyi chinozoita chioniso apo zvooda kuitika?” Naye wakati, “Ngwarai kuti musazopaukiswa; ngokuti vazhinji vanozouya ngezina rangu vechiti, ‘Ndini aye!’ Nokuti, ‘Mukuwo wakwedzera!’ Musavateera. Naapo mwoozwa ngehondo nokumukirana, musazotyiswa; ngokuti kunosisira kuti izvi zviitike kutanga, asi magumo aasati aapasinde.” Naapo wakati kwavari, “Dzinza rinozomukira dzinza noumambo hunozomukira umambo; kunozoapo kuzungunyika kukurutu kwenyika, nokundau dzakaparadzana nzara nenhenda, nezvinotyisa kakurutu nezvioniso zvakakura zvinobva mudenga. Asi izvi zveshe zvisati zvaitika vanozomubata, navo vanozomutambudza, vechimupira kumhatso dzokudira nomumatirongo, vechimuunza pamberi pemadzimambo nepevatongi ngendaa yezina rangu. Iyi inozoita nguva yenyu yokuita uchapupu. Ndizvo nasirirai mipinimidzo yenyu, kuti musazodembatemba ngepamberi kuti chiinyi chomunozopingura; ngokuti ndinozomupa mazwi nokungwara, akuna naumwe wemagaa enyu ungakona kurwisana nakwo nokuti kuzviemera. Munozopirwa kuvatongi kunyazwi ngevabereki, vakoma, hama neshamwari, navo vanozoita kuti vamweni venyu vaurawe. Nemwi munozonyenywa ndivo veshe ngendaa yezina rangu. Asi akuna nekabvudzi nakamwe kesoro renyu kanozorashika. Mukusengerera kwenyu munozoponesa ndaramo dzenyu. “Asi apo mwoona Jerusarema rechitendenedzwa ngehondo, zvino ziai kuti kuparadzwa kwaro kwaapasinde. Naapo vari muJudhia ngavatizire kumitunhu, naavo vari mukati mwaro ngavabudemwo, naavo vari kubanze munharaunda vasazopoteramwo; ngokuti aya ari mazuva okuunzidzirwa, kuti zveshe izvo zvakanyorwa zvizadzisike. Hezvo kwavari vane mimba naavo vanoamwisa ngaawo mazuva! Ngokuti kutambudzika kukurutu kuchaapo padera penyika noushungu padera pevanhu ava; vanozowa ngokupinza kweshoti, vanozokweiwa kuita hloko kumadzinza eshe; neJerusarema rinozotsikwatsikwa pashi ngevemadzinza, metsa nguva yevemadzinza yazadzisika. “Nezvioniso zvinozoitika pazuva, pamwedzi, panyeredzi, nepadera penyika kunozoapo kupera simba nokutyiswa ngendaa yokutinhira kworuandhle nemafungu. Vanhu vachapera simba ngokutyiswa apo vakaringira izvo zvinouya padera penyika; ngokuti masimba omudenga anozozungunyiswa. Naapo vanozoona Mukororo woMunhu echiuya mumakore anesimba nouthende hukurutu. Naapo izvi zviro zvootanga kuitika, ringirai mudenga mumirudze masoro enyu, ngokuti kuripirwa kwenyu kwakwedzera pasinde.” Naye wakavaronzera muedzaniso echiti, “Ringirai muonde nemiti yeshe; kuti yaburikira mashakani, munodzionera pachenyu, nemwi munozia mwemene kuti zienza zvinopano raapasinde. Ndizvozve, apo mwoona izvi zvechiitika, mwechizia kuti umambo hwaMwari hwaapasinde. Ngegwinyiso ndinoti kwomuri, uyu mubarirwana auzopindi akadi zvisati zvaitika izvi zveshe. Denga nenyika zvinozopinda, asi mazwi angu aatongozopindi akadi. “Asi mwechidzingwarira imwimwi kuti pamweni mwoyo yenyu ingazozvimbirwa ngokudyisa nokuraradza nokudembatemba ngezvendaramo iyi, nezuva iro rimugumire ngokukasira kudai ngechirimbana. Ngokuti rinozogumira padera pavo veshe avo vanogara padera penyika yeshe. Asi rindai nguva dzeshe, kumbirai kuti muwe nesimba rokupokonyoka kubva kuneizvi zveshe zvinozoitika, nokuema pamberi poMukororo woMunhu.” Masikati eshe waidzidzisa muTemperi, asi usiku waibuda kuenda kooata muDunhu remaOrivhi. Vanhu veshe vaifumira kuuya kwaari muTemperi koomuzwa. Zvinopano mushongano wokudya chingwa chisina mumera wakakwedzera, unozwi Phasika. Nevapristi vakuru nevanyori vaitsvaka njira yokumuuraya ndiyo, ngokuti vaitya vanhu. Zvino Sathani wakapotera munaJudhasi uwo waizwi Isikarioti, umwe wevari gumi navairi; wakaenda kooshongana nevapristi vakuru nevangwariri veTemperi kuti waizomuita mapirenyi kwavari. Navo vakadakara, vakaita chitenderano kuti vamupe mare. Ndizvo wakatenda, akatsvaka mukuwo wokumupira kwavari pasina mbungano. Zvino zuva rechingwa chisina mumera rakaguma, iro raibaiwa gwai rePhasika. Jesu wakatuma Petro naJohani echiti, “Endai mutinasirire Phasika kuti tiridye.” Vakati kwaari, “Unoda kuti tirinasirire pari?” Wakati kwavari, “Penyai, apo mwoopotera mudhorobha, unozoshongana nemwi mwamuna wakatwara hari mwechimuteera kumhatso yaanopotera, nemwi munozoti kumuna wemhatso, ‘Mudzidzisi unoti kwouri, Riripari kamera revaeni, apo pendinozodya Pasika nevadzidzi vangu?’ Naye unozomupangidzira kamera guru romuturika rakanasirirwa ndizvo zveshe; tinasirirei apo.” Navo vakaenda, vakaona kudai ngezvaakaronza kwavari; navo vakanasirira Pasika. Naapo awa raguma, wakagara patafura nevapostori. Naye wakati kwavari, “Ngokudisisa ndaida kudya iri Phasika nemwi ndisati ndatambudzika; ngokuti ndinomuronzera kuti andichazoridyizve, metsa razadzisika muumambo hwaMwari.” Naye wakatora tsani, naapo abonga wakati, “Torai ichi, mukoanisirane pakati penyu; ngokuti ndinomuronzera kuti andichazomwi kumichero yomuvhini metsa hugume umambo hwaMwari.” Wakatora chingwa, naapo abonga wakachigura, akachipa kwavari, akati, “Ichi chiri muiri wangu, unopirwa ngepamusoro penyu. Mwechiita ichi kundikarakadza inini.” Netsani ngokudaro ngesure kwokudya, echiti, “Tsani iyi inodururirwa imwimwi chitenderano chitsva mungazi yangu. Asi ringirai, nyara youwo unondipira ineni patafura. Ngokuti Mukororo woMunhu unoenda kudai ngezvezvakaemeswa; asi hezvo kuneuwo munhu waanozopirwa ndiye!” Navo vakatanga kubvunzana pakati pavo kuti ndiani kwavari waizoita ichi chiro. Kwakabudazve hasha pakati pavo yokuti ndiani kwavari unozoita mukuru. Naye wakati kwavari, “Madzimambo emadzinza anotonga padera pavo; vanodaidzwa kuti vadetseri vevanhu. Asi imwimwi amuzodaro akadi; asi uwo wakakurisisa pakati penyu ngaadai ngewakatsongesesa, nouwo uri mutongi ngaadai ngomuranda. Ngokuti ndiani wakapinda kukura, uwo unogara panekudya nokuti uwo unoshandira? Andiyepi here uwo unogara panekudya? Asi inini ndiri pakati penyu ndakadai ngouwo unoshandira. “Asi imwimwi muri avo vakagara neni mukuedzwa kwangu; neni ndinomuemesera umambo kudai ndiBaba anguzve vakandiemesera inini, kuti mudye mwechimwa patafura rangu muumambo hwangu, nemwi munozogara pamadendemaro mwechitonga madzinza gumi namairi aIsuraeri. “Simoni, Simoni, ringira, Sathani wakatenderwa kuti amupuwe, kuti amutsere kudai ngekoroni, asi inini ndakakukumbirira kuti kugonda kwako kusazopera; newe apo watenderukazve, ugwinyise vakoma vako.” Naye wakati kwaari, “Mambo, inini ndakanasirira kutoenda newe mutirongo nomukufa.” Naye wakati, “Ndinokuronzera iwewe Petro, jongwe arizoriri nyamashi, usati waramba katatu kuti aundizii.” Naye wakati kwavari, “Apo zvandakamutuma musina chikwama nenyede nemagwada, mwakatama chiro here?” Navo vakati, “Atina chetakatama.” Naye wakati kwavari, “Asi zvinopano, uwo unechikwama ngaachitore nounenyede ngokudaro. Nouwo usina shoti ngaatengise bhachi rake atenge shoti. Ngokuti ndinomuronzera kuti ichi chinyorwa chinosisira kuti chizadzisike ndini kuti, ‘Naye wakaerengwa pamwepo nevashaishi;’ ngokuti izvo zvakanyorwa ngendaa yangu zvinozoitika.” Navo vakati, “Mambo, ringirai, shoti mbiri dziri panapa.” Naye wakati kwavari, “Zvakwana.” Naye wakabuda kubanze, wakaenda kudai ngomushuma wake kuMutunhu wemaOrivhi; nevadzidzi vakamuteera. Naapo aguma pandau iyo wakati kwavari, “Kumbirai kuti musapinda mukuedzwa.” Naye wakasiyana navo nharauko inoda kudai ngeekuposhera buwe, wakagwadama pashi, akakumbira echiti, “Baba, dai mwechida, bvisai tsani iyi kwendiri; asi, kusaita kuda kwangu, asi kuda kwenyu ngakuitike.” [ Yakaoneka kwaari ngirosi yechibva mudenga yechimugwinyisa. Asi mukurwadziwa kakurutu, wakagwinyisira kukumbira; nezia rake raiya rakadai ngemadonhwe makuru engazi echibomhera pashi pamavhu.] Naapo amiruka kubva pamukumbiro, wakauya kuvadzidzi vake, akavaona vakaata hope ngendaa yokusvipa mwoyo, naye wakati kwavari, “Munoatirenyi? Mukai, mukumbire kuti musapinda mukuedzwa.” Naapo achaereketa, kwakauya mbungano nouwo waizwi Judhasi, umwe wevari gumi navairi, echivatungamirira. Wakakwedzera kunaJesu kuti amuchingamidze ngomuromo. Asi Jesu wakati kwaari, “Judhasi, wopira here Mukororo woMunhu ngokuchingamidza ngomuromo?” Naapo avo vaimutendenedza vaona izvo zvaizoitika, vakati, “Mambo, tobaya here ngeshoti?” Umwe wavo wakatema hloko yomupristi mukuru, akagura nzee yake yokumudyo. Asi Jesu wakati, “Zvakwana izvi!” Naye wakabata nzee yake, akamuponesa. Jesu wakati kunevapristi vakuru nevangwariri veTemperi nevakuru vevanhu, avo vakauya kurwisana naye, “Ngenyi mwabuda nokuuya kudai ngevanorwa nembavha, muneshoti nenduku? Naapo ndaiya nemwi mazuva eshe muTemperi, amuzi kundibata. Asi iri riri awa renyu neresimba rechidima.” Naapo vakamubata, vakamukweya kuenda naye, vakamuunza mumhatso yomupristi mukuru. Asi Petro wakateera ari kuretu. Naapo vabasa muriro pakati poruwanze, vakagara pashi pamwepo, Petro wakagara pashi pakati pavo. Naapo musikana, echimuona akagara mukujeka kwomuriro, echimuringisisa wakati, “Munhu uyu waiya naye.” Asi iye wakaramba echiti, “Dzimai, andimuzii.” Ngesure kwekamukuwo, umweni wakamuona akati, “Iwewe newe uri umwe wavo.” Asi Petro wakati, “Mwamunewe, inini andiri umwe wavo akadi.” Ngesure kwomukuwo waida kuita awa, umwenizve wakagwinyisira kuronza echiti, “Ngegwinyiso munhu uyu waiya naye, ngokuti muGarire.” Asi Petro wakati, “Mwamunewe, andichizii chounoronza.” Paripo achaereketa, jongwe rakarira. NaMambo wakakunukuka, akaringira kunaPetro, naPetro wakakarakadza izwi raMambo, ngenjira yaakaronza kwaari kuti, “Jongwe risati rarira nyamashi, unozondiramba katatu.” Naye wakabuda kubanze, akachema kakurutu. Nevamuna avo vakabata Jesu vakamuitira jee, vakamurova; vakamufukidza muhope, vakamubvunza vechiti, “Profeta! Ndiani uwo wakurova?” Vakaereketa zviro zvimweni zvakawanda ndiye vechimutsambura. Naapo kwaedza, vakaunganidza pamwepo vakuru vevanhu nevapristi vakuru nevanyori, navo vakamukweya kuenda naye kubangano ravo vechiti, “Kuti uri Kristu, tironzere.” Asi iye wakati kwavari, “Kudai ndanyamuronzera, amuzotendi; kunyazwi ndikanyamubvunza, imwimwi amuzopinguri. Asi kubvira zvinopano Mukororo woMunhu unozogara ngokumudyo kwesimba raMwari.” Navo veshe vakati, “Iwewe zvino uri Mukororo waMwari here?” Naye wakati kwavari, “Imwimwi mwatoronza kuti ndini inini.” Navo vakati, “Tichatama chapupu chimweni ngenyi? Ngokuti isusu temene tazwa kubva pamuromo wake.” Naapo mushongano weshe wavo wakamiruka, vakamuunza pamberi paPiratu. Navo vakatanga kumuitira ndaa vechiti, “Takamuona uyu munhu echipaukisa dzinza redu, echirambidza kuti chibharo chisabhadharwa kunaSiza, echironza kuti iye emene ndiKristu, mambo.” NaPiratu wakamubvunza echiti, “Iwewe uri mambo wevaJudha here?” Naye wakamupingura, akati, “Ndizvo zvewaronza.” NaPiratu wakati kuvapristi vakuru nokumbungano, “Andioni ndaa kumunhu uyu.” Asi vakapinda kutsamwirira vechiti, “Unovherudza vanhu, echidzidzisa muJudhia mweshe, kutanga ngomuGarire metsa kuguma pandau iyi.” Naapo Piratu azwa izvi wakabvunza kuti, “Munhu uyu muGarire here?” Naapo azia kuti waiya woumambo hwaHerodhi, wakamutumira kunaHerodhi, uwo naye waiya muJerusarema ngaawo mazuva. Naapo Herodhi aona Jesu wakadakara kakurutu, ngokuti iye waiya nechidisiso chokuda kumuona kubvira mukuwo wakareba, ngokuti iye waiya azwa ndiye, naye waida kuona chioniso chinoitwa ndiye. Ndizvo wakamubvunza ngemazwi akawanda, asi aazi kupingura chiro. Vapristi vakuru nevanyori vakaema vechitsamwirira kumuitira ndaa. NaHerodhi pamwepo namajoni ake vakamubata ngenjira inotsverudza, akamuitira jee, vakamupfekisa zvokusimira zvinon'anikira, akamutumirazve kunaPiratu. Herodhi naPiratu vakaiyaniswa ngeiro zuva, ngokuti ngepasure vaiya magaa. Piratu wakadaidza pamwepo vapristi vakuru, vatongi nevanhu. Wakati kwavari, “Imwimwi mwaunza uyu munhu kwendiri mwechiti unopaukisa vanhu. Penyai, inini ndamubvunzisisa pamberi penyu; penya, andizi kuona ndaa kuneuyu munhu ngeizvo zvomunomuitira ndaa ndizvo. Kunyazwi Herodhiwo, ngokuti wamupetudza kwetiri; ringirai, akuna chiro chakaitwa ndiye chaangatongerwa kuti afe. Ndizvo ndichamurova ndimusunhure.” [ Zvinopano waisisira kuti avasunhurire mubhanditi umwe pamushongano wokudya.] Asi vakadaidzira veshe pamwepo, “Bvisa uyu munhu, utisunhurire Bharabhasi.” Uwo wakakonyerwa mutirongo ngendaa youdzongoni hwaakaita mudhorobha nendaa yokuuraya. Piratu wakaereketazve kwavari, echida kusunhura Jesu. Asi vakadaidzira vechiti, “Mukohomere, mukohomere!” Naye wakati kwavari ngokwechitatu, “Ngenyi, wakashaishenyi munhu uyu? Andizi kuona kwaari ndaa yaangatongerwa kuti afe. Ndizvo ndichamurova ndimusunhure.” Asi paripo vakatsamwirira ngemazwi makuru, vechikumbira kuti akohomerwe. Nemazwi avo akanyisa. NaPiratu wakagura kuti izvo zvevakakumbira zviitike. Naye wakavasunhurira uwo waiya akakonyerwa mutirongo ngendaa youdzongoni nokuuraya, uwo wevakakumbira; asi wakavapa Jesu kuti vaite kuda kwavo ndiye. Naapo vechimukweya kuenda naye, vakabata munhu waizwi ndiSimoni weKurene, echibva munharaunda, vakaisa padera pake muchinjiko kuti autware ngesure kwaJesu. Yakamuteera mbungano huru yevanhu, nevakadzi avo vaimuchema nokumutsumba. Asi Jesu echikunukukira kwavari wakati, “Vakunda veJerusarema, musandichemera inini, asi mwechidzichemera imwimwi nevana venyu. Ngokuti ringirai, mazuva achauya evanozoti, ‘Dzinomuchena ngomwa nendani dzisikazi kumbobereka nemazamo asikazi kumboamwisa!’ Naapo vanozotanga kuronza kumitunhu kuti, ‘Tiwirenyi padera pedu,’ nokuzvimitunhu kuti, ‘Tidumaidzenyi.’ Ngokuti kudai vechiita izvi kumuti muishi, chiinyi chinozoitwa kunewakaoma.” Vairi vamweni, madzongoni, vakakweiwa pamwepo naye koourawa. Naapo vaguma pandau inozwi Denhenya, vakamukohomerapo nevashaishi, umwe ngokumudyo noumweni ngokumuoshwe. Jesu wakati, “Baba, varekererei; ngokuti avachizii chevanoita.” Navo vechikoanisirana zvokufuka zvake pakati pavo, vakaita mabhigidha. Nevanhu vakaema vechiringira; asi vatongi vakamuitira jee vechiti, “Iye wakaponesa vamweni, ngaadziponese, kuti ari Kristu waMwari, wakatsanangurwa wake!” Majoni nawo akamuitira jee, vechiuya kwaari nokumupa vhini rinorungura vechiti, “Kuti iwewe uri Mambo wevaJudha, dziponese!” Rwaiyapo runyoro ngepadera pake rwaiti, “UYU NDIMAMBO WEVAJUDHA.” Umwe wevashaishi avo vakakohomerwa naye wakamutsambura echiti, “Andiwe here Kristu? Chidziponesa iwewe neisusu.” Asi umweni wakapingura echimurambidza, akati, “Aumutyi here Mwari, wechiona kuti uri mukurashwa kumwekwo naye? Nesu ngegwinyiso tinosisira kurashwa, ngokuti tinoashira zvinosisira zviito zvedu. Asi uyu munhu aazi kuita zvakashata.” Naye wakati, “Jesu, ndicherechedzewo apo woopotera muumambo hwako.” Naye wakati kwaari, “Ngegwinyiso ndinokuronzera, kuti nyamashi unozoapo neni muPharadhaisi.” Panguva yaida kuita awa rechitanhatu, nechidima chakafukidza nyika yeshe metsa kuguma awa rechipfumbamwe. Naapo kujeka kwezuva kwakapera, nejira romuTemperi rakabaurwa ngepakati. Apapo Jesu wakadaidzira ngeizwi guru, wakati, “Baba, ndinoisa mweya wangu munyara dzako!” Naapo aronza kudaro, mweya wake wakabuda. Naapo nduna yezana yaona zvakaitika, yakakudza Mwari yechiti, “Ngegwinyiso uyu waiya munhu wakarurama!” Nembungano yeshe iyo yakaungana pamwepo yechiringira, apo yaona zvakaitika, vakahwirira kanyi vechirova maditi avo. Naavo veshe vaiziyana naye nemadzimai awo akamuteera echibva Garire vakaema vari kuretu, vechiona zviro izvi. Zvinopano waiyapo munhu waizwi ndiJosefa, waibva mudhorobha reJudhia reArimathia. Waiya umwe wenhengo yevatongi, munhu wakanaka newakarurama. Waiya asikazi kutenderana nebangano nokuita kwavo, akandogarira umambo hwaMwari. Munhu uyu wakaenda kunaPiratu, akakumbira muiri waJesu. Naye wakaudzasa pashi, akauputira ngejira rakachena, akauika muiba rakatsiwa pabuwe, umwo musikazi kumboikwa munhu. Naro raiya zuva rokunasirira Phasika, neSabatha rooda kutanga. Nemadzimai avo vaiya vakabva naye Garire vakateera ngesure, vakaona iba nokuikwa kwomuiri wake. Navo vakahwirira, vakanasirira mitombo inegwema rakanaka nemakha. Vakazorora ngezuva reSabatha, kudai ngezvinoronza mupango. Asi ngezuva rokutanga revhiki, mangwanani maishi, vakauya kuiba, vechiunza mitombo inegwema rakanaka yevaiya vanasirira. Navo vakaona buwe ramburumbudzwa kubva paiba. Asi naapo vapotera mukati avazi kuona muiri waMambo Jesu. Naapo vachakangaidzwa ndizvo, penya, vamuna vairi vakaema pasinde pavo, vakapfeka zvinon'anikira; naapo vechityiswa, vakatsikitsira pashi hope dzavo, vamuna vakati kwavari, “Munotsvaka vanopona ngenyi pakati pevakafa? Amuna muno, wamuka. Cherechedzai zvaakamuronzera apo achiri muGarire echiti, ‘Kunosisira kuti Mukororo woMunhu apirwe munyara dzevanhu vakashata, akohomerwe, naye ngezuva rechitatu amuke.’ ” Navo vakakarakadza mazwi ake, vechipetuka kubva kuiba, vakaronza izvi zveshe kunevarigumi naumwe nokunevamweni veshe. Zvinopano vaiya Maria Magadhareni, Joana, Maria mai aJakobe, pamwepo nemadzimai amweni, vakaronza izvi kunevapostori. Asi mazwi aya akaoneka kwavari ari asina shwiro, navo avazi kuatenda. Asi Petro wakamiruka, akarumba kuenda kuiba, akaguma, wakakotama, akaringira mukati, akaona machira akachena andori ega; naye wakaenda kanyi kwake, echishamiswa ngeicho chakaitika. Pazuva iro vairi vavo vaihamba kuenda kuguta rinozwi Emausi, raida kuita makhiromitha gumi narimwe kubva Jerusarema. Navo vaiereketa umwe kunoumweni ngeizvo zveshe zvakaitika. Naapo vachaereketa vechibvunzisana, Jesu emene wakakwedzera kwavari, akahamba navo. Asi madziso avo akaitiswa rubuma kuti vasamuzia. Wakati kwavari, “Ngerenyi shoko iri romunoereketa umwe kunoumweni mwechihamba?” Vakaema vakanyarara, vane hope dzinotambudzika. Naapo umwe wavo, unozwi Kreopasi, wakapingura, akati kwaari, “Unogara uri wega here muJerusarema usikazii izvo zvakaitikamwo ngaaya mazuva?” Naye wakati kwavari, “Zviro zvenyi?” Vakati kwaari, “Izvo zvaJesu weNazaretha, uwo waiya muprofeti anesimba ngezviito namazwi pamberi paMwari nepamberi pevanhu veshe, nenjira yevakamupira ndiyo vapristi vakuru nevatongi vedu nokugura kuti aurawe ngokumukohomera. Asi isusu taigonda kuti ndiye waizoripira Isuraeri. Eya, nepadera peizvi zveshe, nyamashi ratoa zuva rechitatu kubvira panguva yezvakaitika izvi. Uyezve, vamweni vemadzimai vechiunga chedu vatishamisa. Vafumira kuenda kuiba, naapo vasikaoni muiri wake, vakauya vechiti vaona chioniso chengirosi, idzo dzati kwavari unopona. Nevamweni veavo vaiya nesu vakaendawo kuiba, vakaona kudai ngezvevakaronza madzimai; asi iye avazi kumuona.” Iye wakati kwavari, “A! Mapenzi nevanononoka kutenda ngomwoyo izvo zveshe zvakaereketwa ngevaprofeti! Kwaiya kusikasisiri here kuti Kristu atambudzwe ngeizvi zviro zveshe nokupotera muuthende hwake?” Naye echibva ngezvaMosi nezvevaprofeti veshe wakapangidzira kwavari muzvinyorwa zveshe izvo zvakanyorwa ngendaa yake. Ndizvo vakakwedzera kuguta apo pevaienda. Iye wakaita kudai ngounopinda kuenda mberi, asi vakamukoka vechiti, “Gara nesu, ngokuti rotengama nezuva rooda kubira.” Naye wakapotera koogara navo. Naapo agara navo pakudya, wakatora chingwa, akachibonga, akachigura, akachipa kwavari. Nemadziso avo akapembenuka navo vakamuzia; naye wakanyangarika kubva mukuona kwavo. Navo vakati umwe kunoumweni, “Mwoyo yedu aizi kupisha here mukati mwedu apo achaereketa kwetiri munjira nokupangidzira kwetiri zvakanyorwa?” Navo vakamiruka ngeiro awa, vakahwirira Jerusarema; vakaona varigumi naumwe vakaungana pamwepo nevamweni avo vaiya navo vechiti, “Mambo wamuka ngegwinyiso, naye waoneka kunaSimoni!” Zvino vakaronza izvo zvakaitika vari munjira, nokuziikanwa kwaakaita ndivo ngokugura chingwa. Naapo vacharonza izvi, Jesu emene wakaema pakati pavo, akati kwavari, “Kunyarara ngakugare kwomuri.” Asi vakakaruka, vakatyiswa kakurutu, vakapinimidza kuti vaona dzangaradzimu. Naye wakati kwavari, “Munotambudzika ngenyi? Inobuda ngenyi mibvunzo iyi mumwoyo yenyu? Ringirai nyara dzangu netsoka dzangu, ndini ndemene. Ndibatei muone; ngokuti dzangaradzimu arina nyama nemagodo kudai ngezvomunoona kuti inini ndinazvo.” Naapo aereketa kudaro, wakavapangidzira nyara dzake netsoka dzake. Naapo vasikagondi ngendaa yokudakara nokushamiswa, wakati kwavari, “Munazvo here panapa zvokudya?” Vakamupa chigurwa chehove chakasasikwa, naye wakachitora, akadya pamberi pavo. Naapo wakati kwavari, “Aya ndiwo mazwi endakaereketa kwomuri ndichiri nemwi, kuti kunosisira kuti zveshe zvizadzisike izvo zvakanyorwa muMipango yaMosi nezvevaprofeti nezveNduyo ndini.” Naapo wakajekisa mipinimidzo yavo kuti vazwisise zvinyorwa, naye wakati kwavari, “Kwakanyorwa kudai, Kristu unozotambudzwa nokumukazve kubva kwevakafa ngezuva rechitatu, nokutizve kutenderuka nokurekererwa kwezvishaishi kunosisira kuchumairwa ngezina rake kunemadzinza eshe, kutanga muJerusarema. Nemwi muri zvapupu zveizvi zviro. Penyai, ndinotuma chigondiso chaBaba angu padera penyu; asi garai mudhorobha, metsa mupfekeswe ngesimba rinobva mudenga.” Naapo wakavatungamirira kubuda mudhorobha metsa vaguma Bhethani, naye echimirudza nyara dzake wakavafumisa. Naapo achavafumisa, wakaparadzana navo, akakwidzwa mudenga. Navo vakamudira, vakahwirira kuenda Jerusarema ngokudakara kukurutu, navo vakatsamwirira kugara muTemperi vechikudza Mwari. Pakutanga waiyapo Izwi, neIzwi waiya naMwari, neIzwi waiya Mwari. Waiyapo pakutanga naMwari. Zviro zveshe zvakasikwa kubudikidza ndiye, ngepabanze pake paiya pasina chiro nachimwe chakasikwa cheizvo zvakasikwa. Mwaari kwaiyamwo kupona nokupona kwaiya kujeka kwavanhu. Kujeka kunojeka muchidima nechidima achizi kukudzima. Kwaiyapo munhu wakatumwa ndiMwari, zina rake raiya Johani. Wakauya kuita chapupu, kuti apupure ngokujeka, kuti vanhu veshe vatende kubudikidza ndiye. Iye waiya asiriye kujeka, asi wakauya kuti apupure ngokujeka. Kujeka ukwo kwaiya kujeka kwegwinyiso, ukwo kunojekisa vanhu veshe vanobarwa munyika. Waiya munyika, nenyika yakasikwa kubudikidza ndiye, asi nyika aizi kumuzia. Wakauya munezvake, nevanhu vake avazi kumuashira. Asi kwavari veshe vakamuashira, avo vakatenda muzina rake, wakavapa simba rokuti vaite vana vaMwari; avo vasikazi kubarwa ngengazi nokuti ngokuemura kwenyama nokuti ngokuemura kwomunhu, asi vakabarwa ndiMwari. NeIzwi wakaita munhu, wakagara pakati pedu, nesu takaringira uthende hwake, uthende huri hwouwo wakabarwa ega ndiBaba, akazara ngenyasha negwinyiso. (Johani wakaita chapupu ndiye, akadaidzira echiti, “Uyu ndiye wendakaereketa ndiye kuti, ‘Uwo unouya sure kwangu mukuru kupinda inini ngokuti waiyapo ndisati ndaapo.’ ”) Kubva mukuzara kwake isusu teshe takaashira, nyasha padera penyasha. Ngokuti mipango yakapuwa kubudikidza ndiMosi; asi nyasha negwinyiso zvakaapo kubudikidza ndiJesu Kristu. Akuna naumwe wakamboona Mwari; Mukororo ega, uwo unogara paditi raBaba, ndiye wakamuita kuti aziikanwe. Neichi ndicho chapupu chaJohani, apo vaJudha vakatuma kwaari vapristi nevaRevhi kubva Jerusarema koomubvunza kuti, “Urianani iwewe?” Naye wakatenda, aazi kuramba, asi wakatenda echiti, “Inini andinipi Kristu akadi.” Navo vakamubvunza vechiti, “Wati kudini? Uri Erija here?” Naye wakapingura echiti, “Andiriyepi.” “Uri muprofeti here?” Naye wakapingura echiti, “Haiwa.” Ndizvo vakati kwaari zvino, “Urianani? Tipingure kuti tione chokoopingura avo vakatituma. Unotinyi iwewe pachako?” Wakati, “Inini ndini izwi rounodaidzira mushango echiti, ‘Ruramisai njira yaMambo,’ kudai ngezvaakaronza Isaya muprofeti.” Zvino vaiya vakatumwa kubva kuvaFarisi. Navo vakamubvunza, vakati kwaari, “Zvino ngenyi wechibhabhatidza, kuti usiri Kristu nokuti Erija nokuti uwo muprofeti?” Johani wakavapingura echiti, “Inini ndinobhabhatidza ngemvura; asi pakati penyu panoema uwo womusikazii, ndiye uwo unouya sure kwangu, wendisikasisiri inini kuti ndisunungure rusinga rwegwada rake.” Izvi zvakaitika muBhethani seri kweJorodhani, apo paaibhabhatidza Johani. Nechimangwani aona Jesu echiuya kwaari, wakati, “Ringirai, Kagwai kaMwari kanodusa kushaisha kwenyika! Uyu ndiye wendakaereketa ndiye kuti, ‘Sure kwangu kunouya munhu uri mukuru kupinda inini, ngokuti waiyapo ndisati ndaapo.’ Inini pachangu ndaiya ndisikamuzii; asi ngendaa iyi ndakauya ndechibhabhatidza ngemvura kuti apangidzirwe kuvaIsuraeri.” NaJohani wakaita chapupu echiti, “Ndakaona Mweya wechidzaka kubva mudenga wakadai ngenjia, ukagara padera pake. Inini pachangu ndaiya ndisikamuzii; asi iye wakandituma kuti ndibhabhatidze ngemvura wakati kwendiri, ‘Uwo wounozoona Mweya wechidzaka nokugara padera pake, uyu ndiye unobhabhatidza ndiMweya Wakachena.’ Neni ndakaona, ndakapupura kuti uyu ndiye Mukororo waMwari.” Nechimangwanizve Johani waiya akaema nevairi vevadzidzi vake; naye aona Jesu echihamba, wakati, “Ringirai, Kagwai kaMwari!” Vadzidzi vairi vakamuzwa echiereketa izvi, vakateera Jesu. Jesu wakakunukuka, akavaona vechimuteera, akati kwavari, “Munotsvakenyi?” Vakati kwaari, “Rabhi (ukwo kunoti ngokukumuchwa, Mudzidzisi,) unogara pari?” Wakati kwavari, “Uyai muone.” Ndizvo vakauya vakaona apo paaigara, navo vakagara naye zuvaro. Raiya rooda kuita awa rechigumi. Umwe wevairi avo vakazwa Johani echiereketa, akamuteera, waiya Andreu, munun'una waSimoni Petro. Iye wakatanga kutsvaka mukoma wake Simoni, akati kwaari, “Tamuona Mesia” (ukwo kunoti ngokukumuchwa, Kristu.) Naye wakamuunza kunaJesu. Naapo Jesu amuringira wakati, “Iwewe ndiwe Simoni mukororo waJohani. Unozodaidzwa kuti Khefasi” (ukwo kunoti ngokukumuchwa, Petro.) Nechimangwani wakada kuenda Garire, wakaona Firipu. NaJesu wakati kwaari, “Nditeere.” Zvino Firipu waibva Bhethisaidha, dhorobha revaigara Andreu naPetro. Firipu wakaona Nathanaeri, akati kwaari, “Tamuona uwo waakanyora ndiye Mosi muMipango nevaprofeti, Jesu weNazaretha, mukororo waJosefa.” Nathanaeri wakati kwaari, “Kungabvawo chakanaka muNazaretha here?” Firipu wakati kwaari, “Uya uone.” Jesu wakaona Nathanaeri echiuya kwaari, akati ndiye, “Ringirai muIsuraeri wegwinyiso, usina kuchengedza mukati mwake!” Nathanaeri wakati kwaari, “Wandiziira pari?” Jesu wakapingura akati kwaari, “Firipu asati akudaidza, uri pashi pomuonde, ndakakuona.” Nathanaeri wakapingura akati, “Rabhi, iwewe uri Mukororo waMwari! Uri Mambo waIsuraeri!” Jesu wakapingura, akati kwaari, “Ngokuti ndati kwouri, ndakakuona uripashi pomuonde, unotenda here? Unozoona zviro zvikuru kupinda izvi.” Wakati kwaari, “Ngegwinyiso ndinoti kwomuri, munozoona denga rakabeuka nengirosi dzaMwari dzechikwira nokudzaka padera poMukororo woMunhu.” Ngezuva rechitatu kwaiyapo muchadho muKhana reGarire, namai aJesu vaiyapo. Jesu wakakokwawo nevadzidzi vake kumuchadho. Naapo vhini rapera, mai aJesu vakati kwaari, “Avachina vhini.” NaJesu wakati kwaari, “Chinenyi ichi kwendiri nokwouri, mai? Awa rangu arisati raguma.” Mai ake vakati kuvashandi, “Kunyazwi chiinyi chaanoronza kwomuri, itai.” Zvino aiyapo mabiya emapuwe matanhatu emvura kudai ngomuitiro wavaJudha wokushamba, rimwe ngarimwe raipinda nhuvi mbiri nokuti nhatu. Jesu wakati kwavari, “Zadzai mabiya ngemvura.” Navo vakaazadza kuti penu. Naye wakati kwavari, “Cherai zvino, muende nayo kunenhunge yomuchadho.” Navo vakatora vakaenda nayo. Naapo nhunge yomuchadho yaraira mvura iyo yakapindudzwa kuita vhini, isikazi kuzia kuti rabva kuri (asi vashandi avo vakachera mvura vaizia), nhunge yomuchadho yakadaidza mukwambo nayo yakati kwaari, “Munhu weshe unobudisa kutanga vhini rakanaka; naapo vanhu vamwa kakurutu, unobudisa iro risikazi kunasa kunaka; asi iwewe wakangwarira vhini rakanasa kunaka metsa zvino.” Jesu wakaita uyu, mushamiso wake wokutanga, muKhana reGarire, wakapangidzira uthende hwake; nevadzidzi vake vakatenda kwaari. Ngesure kweizvi wakadzaka kuenda Khapernaume, iye namai ake nevanun'una vake nevadzidzi vake; navo vakagarapo mazuva asikazi kuwanda. NePhasika revaJudha raiya raapasinde, naJesu wakakwira kuenda Jerusarema. Naye wakaona muTemperi avo vaitengesa n'ombe, makwai nenjia, nevaitenganisana mare vakagaramwo. Naapo aiya aita swepu, wakavadzinga veshe kubva muTemperi, zveshe makwai nen'ombe. Wakadurura pashi mare yavaitenganisana, akapinduridza matafura avo. Naye wakati kuneavo vaitengesa njia, “Dusai izvi zviro kubva pano! Musaita mhatso yaBaba angu mhatso yokutengesira!” Nevadzidzi vake vakakarakadza kuti kwakanyorwa kuti, “Kutsamwirira ngendaa yemhatso yako kuchandipedza.” Ndizvo vaJudha vakamupingura, vakati kwaari, “Muoniso wenyi woungaita kutionisa kuti unesimba rokuita izvi zviro?” Jesu wakapingura, akati kwavari, “Putsai iri Temperi, ndinozorimirudzazve ngemazuva matatu.” Ndizvo vaJudha vakati, “Temperi iri rakaakwa ngemakore makumi marongomuna namatanhatu, newe ungarimirudza here ngemazuva matatu?” Asi iye wakaereketa ngendaa yetemperi romuiri wake. Ndizvo apo amuswa kubva kwevakafa, vadzidzi vake vakakarakadza kuti waiya akaereketa ngeichi; navo vakatenda zvakanyorwa neizwi iro raakaereketa Jesu. Zvino apo aiya muJerusarema padhiri rePhasika, vazhinji vakatenda zina rake apo vaona mishamiso yaakaita. Asi Jesu aazi kudzipira kwavari, ngokuti iye waizia vanhu veshe, waiya asikatami naumwe kuti apupurire kwaari ngendaa yomunhu; ngokuti iye waizia emene izvo zviri mukati mwomunhu. Zvino kwaiyapo munhu wevaFarisi, zina rake ndiNikodhemusi, mutongi wevaJudha. Uyu munhu wakauya kunaJesu usiku wakati kwaari, “Rabhi, tinozia kuti iwewe uri mudzidzisi wakabva kunaMwari; ngokuti akuna naumwe ungakona kuita iyi mioniso younoita, kwega kuti Mwari anaye.” Jesu wakapingura, akati kwaari, “Ngegwinyiso ndinoti kwouri, kudai munhu asabarwa ngokwomudenga, aakoni kuona umambo hwaMwari.” Nikodhemusi wakati kwaari, “Munhu ungaita mabarirwenyizve apo aamusharuka? Ungakona here kuti apotere ngokwechipiri mundani yamai ake, abarwezve?” Jesu wakapingura echiti, “Ngegwinyiso ndinoti kwouri, kuti munhu asabarwa ngemvura noMweya, aangakoni kupotera muumambo hwaMwari. Munhu unobarwa ngokwenyama inyama, unobarwa ngokwoMweya mweya. Usashama ngokuti ndati kwouri, ‘Kunosisira kuti ubarwe ngokwomudenga.’ Dutu rinovhuvhuta perinoda, newe unozwa chaungira charo, asi auzii perinobva neperinoenda. Zvakadaro kwavari veshe vanobarwa ngokwoMweya.” Nikodhemusi wakapingura, akati kwaari, “Izvi zvingaita maitikirenyi?” Jesu wakapingura akati kwaari, “Iwewe uri mudzidzisi waIsuraeri, auzwisisi izvi here? Ngegwinyiso ndinoti kwouri, tinoereketa chetinozia, nesu tinopupura ngeicho chetakaona; nemwi amuashiri uchapupu hwedu. Kudai ndamuronzera zviro zvomunyika nemwi amuzi kuzvitenda, hino munozoita matenderenyi kudai ndechimuronzera ngezviro zvomudenga? Akuna naumwe wakambokwira mudenga, asi uwo wakadzaka kubva mudenga, Mukororo woMunhu. Kudai ndiMosi wakamirudza nyoka mushango, ngokudaro kunosisira kuti Mukororo woMunhu amirudzwe, kuti kunyazwi ndiani unomutenda aone kupona kusikaperi.” Ngokuti Mwari wakaida nyika kudai, wakahina Mukororo wake wakabarwa ari ega, kuti veshe vanomutenda vasafa asi vaone kupona kusikaperi. Ngokuti Mwari aazi kutuma Mukororo wake munyika kuti atonge nyika, asi kuti nyika iponeswe kubudikidza ndiye. Uwo unotenda kwaari aatongwi; asi uwo usikatendi watotongwa nazvino, ngokuti aazi kutenda zina rouwo wakabarwa ari ega Mukororo waMwari. Uku ndikwo kutongwa, kuti kujeka kwakaguma munyika, nevanhu vakada chidima kakurutu kupinda kujeka, ngokuti mishando yavo yaiya yakashata. Ngokuti weshe unoita zvakashata unozonda kujeka naye aauyi mukujeka, ngokuti mishando yake inozooneka pamhene. Asi uwo unoita zvinegwinyiso unouya mukujeka, kuti mishando yake inase kuoneka kuti yakaitwa munaMwari. Ngesure kweizvi Jesu nevadzidzi vake vakaenda munyika yeJudhia; naye wakagaramwo navo echibhabhatidza. NaJohani waibhabhatidza muAenoni pasinde peSarimu, ngokuti yaiyapo mvura yakawanda; vanhu vakauya vakabhabhatidzwa. (Ngokuti Johani waiya asati aiswa mutirongo.) Zvino kwakaapo kuphikisana pakati pevadzidzi vaJohani nomuJudha ngendaa yokucheneswa. Navo vakauya kunaJohani, vakati kwaari, “Rabhi, uwo waiya newe seri kweJorodhani, uwo wowakaita chapupu ndiye, uyu uri pano, unobhabhatidza, navo veshe vanoenda kwaari.” Johani wakapingura, akati, “Munhu aakoni kuashira chiro kunyazwi ngechiri kuti asikazi kuchipuwa kubva mudenga. Imwimwi mwemene mwakaita chapupu ndini kuti ndakati, ‘Inini andiriyepi Kristu, asi ndakatumwa pamberi pake.’ Uwo unanyamuroorwa ndiye mukwambo; asi shamwari yomukwambo, iyo inoema yechimuzwa, inodakara ngendaa yeizwi romukwambo; ndizvo uku kudakara kwangu kwazadkisika. Kunosisira kuti iye akuriswe, asi inini ndinosisira kuti nditsonge.” Uwo unouya echibva mudenga uri padera pazvo zveshe; uwo unobva munyika ngowenyika, naye unoereketa zvomunyika. Uwo unobva mudenga uri padera pazvo zveshe. Naye unopupura ngeizvo zvaakaona nezvaakazwa, asi akuna munhu unoashira chapupu chake. Uwo wakaashira chapupu chake, wakagwinyisa kuti Mwari igwinyiso. Ngokuti uwo waatuma Mwari unoereketa mazwi aMwari, ngokuti iye aapi kwaari Mweya ngechipimo. Baba vanoda Mukororo, navo vakapa zviro zveshe munyara dzake. Uwo unotenda Mukororo waane kupona kusikaperi; nouwo usikatendi Mukororo aazooni kupona, asi ushungu hwaMwari hunondogara padera pake. Ndizvo apo Mambo azia kuti vaFarisi vaiya vazwa kuti Jesu waiita nokubhabhatidza vadzidzi vakawanda kupinda Johani, (kunyazwi Jesu emene aazi kubhabhatidza, asi vadzidzi vake), wakabva Judhia, akaendazve Garire. Waisisira kuti ahambe ngomuSamaria. Ndizvo wakaguma muguta revaSamaria rinozwi Sikha, pasinde pomunda uwo waakapa Jakobe kuno mukororo wake Josefa. Chinyuka chaJakobe chaiyapo, ndizvo Jesu aremba ngomuhambo wake, wakagara pashi parutii rwechinyuka. Rooda kuita awa rechitanhatu. Kwakagumapo dzimai reSamaria koochera mvura. Jesu wakati kweriri, “Ndipewo mvura ndimwe.” Ngokuti vadzidzi vake vaiya vaenda muguta kootenga zvokudya. Ndizvo dzimai reSamaria rakati kwaari, “Ngenjiranyi kuti iwewe, uri muJudha, ukumbire mvura yokumwa kwendiri inini, dzimai reSamaria?” (Ngokuti vaJudha avaiyani nevaSamaria.) Jesu wakapingura, akati kweriri, “Kudai waizia iwewe chipo chaMwari, nokuti ndiani uwo unokumbira kwouri kuti, ‘Ndipewo mvura, ndimwe’, iwewe waizokumbira kwaari, naye waizokupa mvura yokupona.” Dzimai rakati kwaari, “Mambo, auna chidziyo chokuchera ndicho, nechinyuka chakadzama. Ndizvo mvura yokupona unoiona pari? Uri mukuru here iwewe kupinda baba edu Jakobe, uwo wakatipa ichi chinyuka, naye wakamwa kwechiri emene, nevakororo vake nezvifuyo zvake?” Jesu wakapingura akati kweriri, “Kunyazwi ndiani unomwa kuneiyi mvura unozozwazve nyota, asi kunyazwi ndiani unomwa mvura yendinozomupa inini, aachazozwizve nyota mhera nariini. Mvura iyo yendinozomupa inozoita chinyuka chemvura mukati mwake, chechivherukira kupona kusikaperi.” Dzimai rakati kwaari, “Mambo, ndipe mvurayo, kuti ndisachazozwa nyota nokuti ndisachazouya panozve koochera mvura.” Wakati kweriri, “Enda, woodaidza mwamuna wako, muuye pano.” Dzimai rakapingura rikati kwaari, “Andina mwamuna.” Jesu wakati kweriri, “Wanasa kupingura zvakanaka zvewati, ‘Andina mwamuna;’ ngokuti waimboiya nevamuna vashanu, nouwo woutori naye zvino aasiri mwamuna wakopi; ngeizvi waereketa gwinyiso.” Dzimai rakati kwaari, “Mambo, ndinoona kuti imwimwi muri muprofeti. Madzibaba edu akadira kuneiri dunhu; nemwi munoti muJerusarema ndiyo ndau inosisira kudiriramwo.” Jesu wakati kweriri, “Dzimai, nditende, nguva ichauya apo pemusikachazodiriri Baba kuneiri dunhu kunyazwi muJerusarema. Imwimwi munodira chomusikazii; isusu tinodira chetinozia, ngokuti ruponeso runobva kuvaJudha. Asi awa rinouya, nazvino raapano, apo vadiri vegwinyiso vanozodira Baba muMweya nomugwinyiso, ngokuti Baba vanotsvaka vakadaro kumudira. Mwari ndiMweya, naavo vanomudira vanosisira kuti vamudire muMweya nomugwinyiso.” Dzimai rakati kwaari, “Ndinozia kuti Mesia unouya,” (uwo unozwi Kristu). “Naapo oouya, unozotironzera zviro zveshe.” Jesu wakati kweriri, “Inini unoereketa newe ndini ndemene.” Panguvayo vadzidzi vake vakauya. Vakashamiswa ngokuti waiereketa nedzimai, asi apana naumwe wakati kwaari, “Unotsvakenyi?” nokuti, “Unoereketa naro ngenyi?” Ndizvo dzimai rakasiya nhuvi yaro yemvura, rakahwirira kuguta, rikati kuvanhu, “Uyai, muone munhu uwo wandironzera zveshe zvendakaita. Uyu ungaita Kristu here?” Vakabuda kubva muguta vechiuya kwaari. Panguva iyo vadzidzi vake vakamunyengerera vechiti, “Rabhi, idyai.” Asi wakati kwavari, “Inini ndinakwo kudya kwomusikazii imwimwi.” Ndizvo vadzidzi vakati umwe kunoumweni, “Uripo here munhu wamuunzira chokudya?” Jesu wakati kwavari, “Kudya kwangu ndikwo kuita kuda kwouwo wakandituma nokupedza mushando wake. Amuronzi here kuti, ‘Kwasara mwedzi mirongomuna, naapo kukukura kwaguma?’ Ndinomuronzera, mirudzai madziso enyu, muringire muminda, ngokuti yachena zvino yoda kukukurwa. Uwo unokukura unoashira misharo, naye unounganidza michero yokupona kusikaperi, ndizvo uwo unosima naye unokukura vadakare veshe pamwepo. Ngokudaro chisana ichi chinegwinyiso chinoti, ‘Umwe unokusha noumweni unokukura.’ Ndakamutuma kuti mukukure izvo zvomusikazi kushanda; vamweni vakashanda yaamho, nemwi mwapotera mumushando wavo.” Vanhu vazhinji vemuguta revaSamaria vakamutenda ngendaa yeizwi redzimai, rerakapupura rechiti, “Wandironzera zveshe zvendakaita.” Ndizvo apo vaSamaria vaguma kwaari, vakamunyengerera kuti agare navo; naye wakagarapo mazuva mairi. Nevazhinji vamweni vakamutenda ngendaa yeizwi rake. Navo vakati kunedzimai, “Zvino tinotenda, haiwa ngendaa yemazwi ako, asi ngokuti tadzizwira temene, nesu tinozia kuti uyu ngegwinyiso ndiye Muponesi wenyika.” Ngesure kwemazuva mairi wakabvapo, akaenda muGarire. (Ngokuti Jesu emene wakapupura kuti muprofeti aaremeredzwi munyika yake.) Ndizvo apo aguma muGarire, vaGarire vakamuashira, ngokuti veshe vaiya vakaona zveshe zvaakaita muJerusarema padhiri, ngokuti navowo vakaenda kudhiri. Ndizvo Jesu wakauyazve muKhana reGarire, apo paakapindudza mvura kuita vhini. Kwaiyapo nduna yaiya nomukororo wayo wairwara muKhapernaume. Naapo nduna iyi yazwa kuti Jesu waiya abva Judhia aguma muGarire, yakaenda kwaari, yakamunyengerera kuti adzake aponese mukororo wayo, ngokuti waiya ooda kufa. Ndizvo Jesu wakati kweiri, “Kuti musikaoni mioniso nemishamiso amuzotendi.” Nduna yakati kwaari, “Mambo, dzaka mwana wangu asati afa.” Jesu wakati kweiri, “Enda; mukororo wako unozopona.” Munhuwo wakagonda izwi rakaereketwa kwaari ndiJesu naye wakaenda. Naapo achadzaka, varanda vake vakashongana naye, vakamuronzera kuti mwana wake wapona. Ndizvo wakabvunza awa iro raakatanga kuitanane ndiro, navo vakati kwaari, “Zuro ngeawa rechinomwe mutsarara wakamusiya.” Ndizvo baba akazia kuti ndiro awa raakaereketa Jesu kwaari kuti, “Mukororo wako unozopona.” Naye pachake wakatenda nevemhatso yake yeshe. Uyu ndiwo muoniso wechipiri waakaita Jesu, abva Judhia apo aguma Garire. Sure kweizvi kwaiyapo dhiri revaJudha, naJesu wakakwira Jerusarema. Zvino riripo muJerusarema gandwa ngepamusiwo wemakwai, unodaidzwa ngechiHebheru kuti Bhethisaidha, rinemaberere mashanu. Mukati mwawo mwaiata vazhinji vairwara, vaiya mapofu nezvirema, nevakaputa, [vechigarira kuvhundurwa kwemvura. Ngokuti ngomukuwo wakatikuti, ngirosi yaidzaka mugandwa nokuvhundura mvura. Ndizvo kunyazwi ndiani waitanga kupoteramwo apo mvura yavhundurwa waiponeswa kunyazwi waiya nenhenda yakaitawani.] Kwaiyapo munhu umwe waiya nenhenda yake makore makumi matatu namasere. Naapo Jesu amuona akaata, wakazia kuti waiya aripo kwomukuwo wakareba, wakati kwaari, “Unoda kuponeswa here?” Munhu wairwara wakapingura kwaari echiti, “Mambo, andina munhu wokundidzasa mugandwa apo mvura yoovhundurwa. Asi mukuenda kwangu, umweni unodzaka kunditangira.” Jesu wakati kwaari, “Miruka, utore manhi ako uhambe.” Paripo munhuwo wakaponeswa, wakatora manhi ake akahamba. Ngezuva iro raiya Sabatha. Ndizvo vaJudha vakati kwaari uwo wakaponeswa, “Isabatha, autenderwi kuti utware manhi ako.” Asi wakavapingura kuti, “Uwo wakaita kuti ndiponeswe ndiye wakati kwendiri, ‘Tora manhi ako, uhambe.’ ” Vakamubvunza vechiti, “Ndiani munhu uwo wakati kwouri, ‘Tora manhi ako, uhambe?’ ” Asi uwo wakaponeswa aazi kuzia kuti ndiani, ngokuti Jesu waiya angarangaka mumbungano huru yaiyapo pandau iyo. Ngesure kweizvi, Jesu wakamuona ari muTemperi, naye wakati kwaari, “Ringira, wakaponeswa! Usachashaishazve, kuti chiro chakapinda kushata kuneicho chisazokugumira.” Munhu akaenda, akaronzera vaJudha kuti ndiJesu wakamuponesa. Ngendaa iyi vaJudha vaitambudza Jesu, ngokuti wakaita izvi ngeSabatha. Asi Jesu wakavapingura echiti, “Baba angu vanondoshanda metsa nazvino, neni ndinoshanda.” Ndizvo ngendaa iyi vaJudha vakapindisisa kutsvaka kumuuraya, ngokuti iye aazi kugura Sabatha kwega, asi wakaronzazve kuti Mwari waiya Baba ake vemene, echidziita pachake unoedzana naMwari. Ndizvo Jesu wakapingura, akati kwavari, “Ngegwinyiso ndinoti kwomuri, Mukororo aakoni kuita chiro ngokwake, asi icho chega chaanoona Baba vechiita; ngokuti kunyazwi ngechiri chaanoita Baba, Mukororo unoitawo ngokudaro. Ngokuti Baba vanomuda Mukororo, vanomupangidzira zveshe zvavanoita vemene; vanozomupangidzira mishando mikuru inopinda iyi, kuti mushamiswe. Ngokuti kudai ndiBaba vanomusa avo vakafa nokuvapa kupona, ngokudarozve Mukororo unopa kupona kuneavo vaanoda. Ngokuti Baba avatongi munhu naumwe, asi vakapa kutonga kweshe kuno Mukororo, kuti veshe varemeredze Mukororo, kudai ngezvevanoremeredza Baba. Uwo usikaremeredzi Mukororo aaremeredzi Baba uwo wakamutuma. Ngegwinyiso ndinoti kwomuri, uwo unozwa izwi rangu, atende uwo wakandituma, waanakwo kupona kusikaperi; aachapindi mukutongwa, asi wadarika kubva mukufa kupotera mukupona. “Ngegwinyiso ndinoti kwomuri, awa rinouya, nazvino raapano, apo vakafa vanozorizwa izwi roMukororo waMwari, naavo vanozorizwa vanozopona. Ngokuti kudai ndiBaba unokupona mukati mwake, ndizvo wakapawo Mukororo kuti aanokupona mukati mwake; naye wakamupa simba rokutonga ndaa, ngokuti iye Mukororo woMunhu. Musashama ngeichi; ngokuti awa rinozouya apo veshe vari mumaiba vanozorizwa izwi rake, navo vanozobudamwo, avo vakaita zvakanaka mukumuka kwokupona, naavo vakaita zvakashata mukumuka kwokutongwa. “Inini andikoni kuita chiro ngesimba rangu. Kudai ngezvendinozwa, ndinotonga; nokutonga kwangu kwakarurama, ngokuti anditsvaki kuda kwangu asi kuda kwouwo wakandituma. Kudai inini ndechidzipupurira pachangu, chapupu changu achina gwinyiso. Uripo umwe unoita chapupu ndini, neni ndinozia kuti chapupu chaanopupura ndini chinegwinyiso. Imwimwi mwakatuma kunaJohani, naye wakapupurira gwinyiso. Inini andiashiri chapupu chinobva kumunhu, asi ndinoronza izvi kuti imwimwi muponeswe. Iye waiya chibani chinobaka chinojekisa, nemwi mwakatenda kuti mudakare kwenguva doko mukujeka kwake. Asi inini ndinechapupu chinopinda kugwinya kunechaJohani; ngokuti mishando iyo yaakandipa Baba kuti ndiipedze, iyo mishando yendinoita, inopupura ndini kuti Baba vakandituma. NaBaba uwo wakandituma wakaita chapupu pachake ndini. Amuzi kumbozwa izwi rake nakamwe nokuti kumboona muemo wake, nemwi amuna izwi rake rinogara mukati mwenyu, ngokuti imwimwi amuzi kutenda uwo waakatuma. Munotsvakisisa zvinyorwa, ngokuti imwimwi munopinimidza kuti mukati mwazvo munokupona kusikaperi; neizvo ndizvo zvinopupura ndini. Asi nemwi amutendi kuuya kwendiri kuti muone kupona. Andiashiri kukudzwa kunobva kuvanhu. Asi ndinomuzia kuti amuna rudo rwaMwari mukati mwenyu. Inini ndakauya ngezina raBaba angu, nemwi amuzi kundiashira; kudai umweni echizouya ngezina rake remene, uwo munozomuashira. Mungaita matenderenyi, imwimwi munoashira kuirikidzwa kubva kuno umwe nokuno umweni, musikatsvaki kukudzwa ukwo kunobva kunaMwari ega? Musapinimidza kuti inini ndinozomuitira ndaa kunaBaba; ndiMosi unomuitira ndaa, uwo wemwakagonda imwimwi. Ngokuti dai mwakatenda Mosi, mwaizodai mwakatendawo inini, ngokuti wakanyora ngendaa yangu. Asi kuti musikatendi zvakanyorwa zvake, mungazoita matenderenyi mazwi angu?” Ngesure kweizvi Jesu wakaambuka ruseri rwoRuandhle rweGarire, urwo ndirwo Ruandhle rweThibheriasi. Nembungano huru yakamuteera, ngokuti yaiya yaona mishamiso yaakaita kwavari vairwara. Jesu wakakwira mudunhu, akagara pashi nevadzidzi vake. Zvino Phasika, dhiri revaJudha, rakakwedzera. Ndizvo Jesu amirudza madziso ake, aona kuti mbungano huru yaiya yechiuya kwaari, wakati kunaFiripu, “Tinozotenga pari zvingwa kuti ava vadye?” Asi wakaereketa izvi kumuedza, ngokuti iye waizia chaanozoita. Firipu wakamupingura echiti, “Zvingwa zvemazana mairi ezvigurwa zvesirivha azvivakwani kuti umwe ngaumwe atore kadoodoko.” Umwe wevadzidzi vake, Andreu, munun'una waSimoni Petro, wakati kwaari, “Uri pano murumbwana unezvingwa zvebhare zvishanu nezvihove zviiri; asi izvi zvingadetserenyi kuvanhu vazhinji vakadai?” Jesu wakati, “Garisai vanhu pashi.” Kwaiyapo pandau iyo mwenje wakawanda; ndizvo vanhu vakagara pashi, vaida kuita makumi emazana mashanu kuwanda. Ndizvo Jesu wakatora zvingwa, naapo abonga, wakakoanisa kunaavo vaiya vakagara pashi; wakaitazve kudaro nezvihove, veshe vakadya kudai ngezvevaikona. Naapo vaguta wakati kuvadzidzi vake, “Unganidzai matsekeneswa asara, kuti kusarashwa chiro.” Ndizvo vakaunganidza, vakazadza zvitundu gumi nazviiri ngematsekeneswa ezvingwa zvebhare zvishanu akasara kuneavo vaiya vadya. Ndizvo vanhu avo vaona uyu mushamiso waakaita, vakati, “Ngegwinyiso uyu ndiye muprofeti uwo unouya munyika!” Ndizvo apo Jesu echizia kuti vodo kuuya kuti vamutore ngesimba kuti vamuite mambo, wakabvapozve akaenda kumutunhu ari ega. Naapo zuva rabira, vadzidzi vake vakadzaka kuruandhle, vakakwira mungarava, vakatanga kuambuka ruandhle kuenda Khapernaume. Kwaiya kwasvipa, naJesu waiya asati aguma kwavari. Nemafungu oruandhle akakwira ngendaa yedutu guru raivhuvhuta. Naapo vaiya vahamba paida kuita makhiromitha mashanu nokuti matanhatu, vakaona Jesu echihamba padera peruandhle, echikwedzera kungarava, navo vakatyiswa. Asi wakati kwavari, “Ndini hangu; musatya.” Naapo vakadakara kumutora mungarava, paripo ngarava yakaguma kunyika kwavaienda. Nechimangwani mbungano iyo yaiya yakasara ruseri rworuandhle yakaona kuti paiya pasina ngarava imweni, yega imwe iyo yevaiya vapotera kweiri vadzidzi vake, nokuti Jesu aazi kukwira pamwepo nevadzidzi vake mungarava, asi kuti vadzidzi vake vaiya vaenda vari vega. Kwakauya ngarava dzimweni dzakabva Thibheriasi dzikaguma pasinde pendau apo pavakadya zvingwa ngesure Mambo azvibonga. Ndizvo apo mbungano yaona kuti Jesu paiya pasina apapo nokuti vadzidzi vake, yakakwirawo mungarava yakauya muKhapernaume yechitsvaka Jesu. Naapo yaiya yamuona ruseri rworuandhle, yakati kwaari, “Rabhi, waguma pano riini?” Jesu wakaipingura, akati, “Ngegwinyiso ndinoti kwomuri, amunditsvaki ngokuti mwakaona mishamiso, asi ngokuti mwakadya zvingwa mukaguta. Musashandira kudya ukwo kunopera, asi kudya ukwo kunogara mhera nariini, kwaanozomupa Mukororo woMunhu; ngokuti padera pake Baba Mwari wakaisa chioniso chake.” Ndizvo vakati kwaari, “Tingaitenyi kuti tishande mishando yaMwari?” Jesu wakapingura, akati kwavari, “Uyu ndiwo mushando waMwari kuti mutende uwo waakatuma.” Ndizvo vakati kwaari, “Iwewe unoita muoniso wenyi kuti tione, titende kwouri? Unoshandenyi? Madzibaba edu akadya mana mushango; kudai ngezvezvakanyorwa, ‘Wakavapa chingwa chakabva mudenga kuti vadye.’ ” Naapo Jesu wakati kwavari, “Ngegwinyiso ndinoti kwomuri, andiyepi Mosi wakamupa chingwa chakabva mudenga, asi Baba angu ndivo vanomupa chingwa chegwinyiso chinobva mudenga. Ngokuti chingwa chaMwari chiri uwo wakadzaka kubva mudenga nokupa kupona kunyika.” Ndizvo vakati kwaari, “Mambo, tipei ichi chingwa nguva dzeshe.” Jesu wakati kwavari, “Inini ndiri chingwa chokupona; iye unouya kwendiri aatongozwi nzara, nouwo unotenda kwendiri aatongozwi nyota. Asi ndakati kwomuri mwakandiona asi amuzi kunditenda. Zveshe zvaanondipa Baba zvinozouya kwendiri; nouwo unouya kwendiri andizomurashi akadi. Ngokuti andizi kudzaka kubva mudenga kuti ndiite kuda kwangu, asi kuda kwouwo wakandituma; uku ndikwo kuda kwowakandituma, kuti andisisiri kurashikirwa nachimwe chazvo zveshe zvaakandipa, asi kuti ndichimuse ngezuva rokupera. Ngokuti uku ndikwo kuda kwaBaba angu, kuti munhu weshe unoringira Mukororo nokutenda kwaari unowanokupona kusikaperi; neni ndinozomumusa ngezuva rokupera.” Ndizvo vaJudha vakavhuruvhuta ndiye, ngokuti wakati, “Inini ndiri chingwa chakadzaka kubva mudenga.” Vakati, “Uyu andiyepi here Jesu, mukororo waJosefa, baba namai ake vetinozia? Zvino unoita maereketerenyi kuti, ‘Ndakadzaka kubva mudenga?’ ” Jesu wakapingura akati kwavari, “Musavhuruvhuta pakati penyu. Akuna naumwe unokona kuuya kwendiri, kudai Baba wakandituma asamukweya; neni ndinozomumusa ngezuva rokupera. Kwakanyorwa muvaprofeti kuti, ‘Veshe vanozodzidziswa ndiMwari.’ Ndizvo munhu weshe wakazwa, akadzidza kubva kunaBaba, unouya kwendiri. Andironzi kuti uripo wakaona Baba, kwega iye wakabva kunaMwari; ndiye wakamuona Baba. Ngegwinyiso ndinoti kwomuri, iye unotenda waanokupona kusikaperi. Inini ndiri chingwa chokupona. Madzibaba enyu vakadya mana mushango, navo vakafa. Ichi ndicho chingwa chinodzaka kubva mudenga, kuti kunyazwi ndiani kwomuri unochidya, aachafi. Inini ndiri chingwa chokupona chakadzaka kubva mudenga; kuti kunyazwi ndiani unodya ichi chingwa unozopona kusikaperi; nechingwa chendinozomupa chiri nyama yangu, yendinozopa kuita kupona kwenyika.” Ndizvo vaJudha vakaitirana hasha pakati pavo vechiti, “Munhu uyu ungaita mapirenyi nyama yake kwetiri kuti tidye?” Ndizvo Jesu wakati kwavari, “Ngegwinyiso ndinoti kwomuri, kuti musikadyi nyama yoMukororo woMunhu, musikamwi ngazi yake, amuna kupona mukati mwenyu. Uwo unodya nyama yangu nounomwa ngazi yangu waanokupona kusikaperi, neni ndinozomumusa ngezuva rokupera. Ngokuti nyama yangu kudya yaamho nengazi yangu kumwa yaamho. Uwo unodya nyama yangu nounomwa ngazi yangu, unogara mukati mwangu neni ndinogara mukati mwake. Kudai ndiBaba vanopona vakandituma, neni ndinopona ndiBaba, ngokudaro uwo unondidya, ndiye unozopona ndini. Ichi ndicho chingwa chakadzaka kubva mudenga, chisikazi kudai ngechakadya madzibaba vakafa. Uwo unodya chingwa ichi unozopona mhera nariini.” Wakaereketa izvi echidzidzisa mumhatso yokudira muKhapernaume. Ndizvo vazhinji vevadzidzi vake, apo vazwa, vakati, “Iri izwi rakakonza, ndiani unokona kurizwa?” Asi Jesu, echizia mukati mwake kuti vadzidzi vake vakavhuruvhuta ngeizwi iro, wakati kwavari, “Ichi chinomupumhunisa here? Mungaitenyi kudai mwechiona Mukororo woMunhu echikwira apo paaiya pakutanga? NdiMweya unopa kupona, nyama ainyuri chiro. Mazwi endakaereketa inini kwomuri ari mweya nokupona. Asi varipo vamweni pakati penyu vasikatendi.” Ngokuti kubvira pakutanga, Jesu waindozia kuti ndiani avo vasikatendi nokuti ndiani unozomupira. Naye wakati, “Ngeiyi ndaa ndakaereketa kwomuri ndechiti, apana unokona kuuya kwendiri kuti asikazi kutenderwa ndiBaba.” Ngesure kweizvi vazhinji vevadzidzi vake vakahwirira sure, avazi kuchazohamba naye. Ndizvo Jesu wakati kunegumi navairi, “Imwimwi munoda kuendawo here?” Simoni Petro wakamupingura akati, “Mambo, tingaenda kunani? Ndimwi munemazwi okupona kusikaperi; nesu takatenda, tikazia kuti iwewe uri Wakachena waMwari.” Jesu wakavapingura, akati, “Inini andizi kumutsanangura here murigumi navairi, noumwe wenyu uri dhiabhorosi?” Wakaereketa ndiJudhasi, mukororo waSimoni Isikarioti, ngokuti Judhasi ndiye waizomupira, ari umwe wegumi navairi. Ngesure kweizvi Jesu waihamba muGarire; ngokuti waiya asikachadi kuhamba muJudhia, ngokuti vaJudha vaitsvaka kumuuraya. Zvino dhiri revaJudha rematumba raiya pasinde. Ndizvo vanun'una vake vakati kwaari, “Ibva pano uende Judhia, kuti vadzidzi vako vaone mishando younoita. Ngokuti akuna munhu unoshanda ngokufishika echitsvaka kuti aziikanwe pamhene. Kudai wechiita izvi zviro, dzipangidzire kunyika.” (Ngokuti vanun'una vake vaiya vasati vatenda kwaari.) Ndizvo Jesu wakati kwavari, “Nguva yangu aisati yaguma, asi nguva yenyu yakanaka mukuwo weshe. Nyika aikoni kumuzonda imwimwi, asi inondizonda inini ngokuti ndinopupura ndiyo kuti mishando yayo yakashata. Imwimwi endai kudhiri. Inini andiendiyo zvino kudhiri iri, ngokuti nguva yangu aisati yaguma.” Naapo aereketa izvi, wakagara muGarire. Asi apo vanun'una vake vaiya vaenda kudhiri, wakaendawo, haiwa pamhene, asi ngokufishika. Ndizvo vaJudha vaimutsvaka padhiri vaiti, “Umboripari?” Kwakaapo kugunun'una kukurutu pakati pevanhu ngendaa yake. Vamweni vakati, “Munhu wakanaka,” vamweni vakati, “Haiwa, asi unopaukisa mbungano.” Asi ngendaa yokutya vaJudha apana naumwe wakaereketa ndiye pamhene. Asi apo dhiri raapakati Jesu wakakwira muTemperi, akatanga kudzidzisa. Ndizvo vaJudha vakashamiswa vechiti, “Uyu unoita maziirenyi zvinyorwa, asikazi kudzidza?” Ndizvo Jesu wakavapingura, akati, “Kudzidzisa kwangu angokwangupi, asi ngokwouwo wakandituma; kunyazwi ndiani unoda kuita kuda kwaMwari, unozozia kuti chidzidziso chinobva kunaMwari here nokuti ndinodziereketera pachangu. Uwo unodziereketera unotsvaka kuirikidzwa kwake; asi uwo unotsvaka kuirikidza uwo wakamutuma, ndiye unogondeka, amuna kuchengedzera mukati mwake. Mosi aazi kumupa Mipango here? Asi apana pakati penyu unongwarira Mipango. Munotsvakirenyi kundiuraya?” Mbungano yakapingura ikati, “Unedhimoni! Ndiani unotsvaka kukuuraya?” Jesu wakapingura, akati kwavari, “Ndakaita mushando umwe nemwi mweshe mwakashamiswa. Ngeiyi ndaa Mosi wakamupanga kuti muchekwe (asi akuzi kubva kunaMosi akadi, asi kwakabva kumadzibaba,) nemwi ngezuva reSabatha munocheka munhu. Kudai munhu echiashira kuchekwa ngezuva reSabatha, kuti Mupango waMosi usagurwa, hino munonditsenekera ngenyi ngokuti ndakaponesa munhu ngeSabatha? Musatonga ngokuoneka kwokubanze, asi tongai ngokutonga kwakarurama.” Ndizvo vamweni vevanhu veJerusarema vakati, “Uyu andiyepi here munhu wevanotsvaka kuuraya? Ringirai, unoereketa pamhene navo avaereketi chiro kwaari! Vatongi avazii here ngegwinyiso kuti uyu ndiye Kristu? Asi tinozia paanobva munhu uyu. Naapo Kristu paanozooneka, apana naumwe unozia kuti unobva pari.” Ndizvo Jesu wakadaidzira, ari muTemperi echidzidzisa, akati, “Munondizia, munoziazve pendinobva. Andizi kuuya ngokwangu, asi uwo wakandituma unegwinyiso, nemwi amumuzii. Inini ndinomuzia, ngokuti ndinobva kwaari, naye wakandituma.” Ndizvo vakatsvaka kumubata; asi apana naumwe wakaisa nyara padera pake, ngokuti awa rake raiya risati raguma. Asi vazhinji vembungano vakatenda kwaari; vakati, “Naapo Kristu ouya unozokona here kuita mishamiso inopinda iyi yakaitwa ngouyu munhu?” VaFarisi vakazwa mbungano yechiita vherevhere ndiye; vapristi vakuru nevaFarisi vakatuma varindi veTemperi kuti vamubate. Ndizvo Jesu wakati, “Ndichiri nemwi mukuwo mudoko, neni ndinozoenda kuneuwo wakandituma; munozonditsvaka, asi amuzondioni; nependiri inini, amungakoni kugumapo.” Ndizvo vaJudha vakati pakati pavo, “Unozoenda kuri munhu uyu kwetisikazomuoni isusu? Unozoenda here kunevakapararira pakati pevaGiriki nokudzidzisa vaGiriki? Rinotinyi izwi iri raakaereketa kuti, ‘Munozonditsvaka, asi amuzondioni,’ zve, ‘Pendiri amungakoni kugumapo?’ ” Ngezuva rokupedzisira redhiri, zuva guru, Jesu wakamiruka, akadaidzira echiti, “Kunyazwi ndiani unenyota ngaauye kwendiri, amwe. Uwo unotenda kwendiri, kudai ngokuronza kwezvinyorwa, ‘Ndwizi dzemvura yokupona dzinozopopoma kubva mwaari.’ ” Asi wakaereketa izvi ngendaa yoMweya wavanozoashira avo vanotenda kwaari; ngokuti Mweya waiya usati wapuwa, ngokuti Jesu waiya asati airikidzwa. Naapo vazwa mazwi aya, vamweni vembungano vakati, “Uyu Muprofeti emene.” Vamweni vakati, “Uyu ndiKristu.” Asi vamweni vakati, “Kristu ungabva Garire here? Zvinyorwa azvizi kuronza here kuti Kristu unozobva kudzinza raDhavhidha nokubva Bhetherehema, muguta mwaaigara Dhavhidha?” Ndizvo kwaiyapo kuparadzana pakati pembungano ngendaa yake. Vamweni vavo vakada kumubata, asi apana naumwe wakaisa nyara padera pake. Ndizvo varindi vakapetuka kuvapristi vakuru nokuvaFarisi, avo vakati kwavari, “Mwarekera kuuya naye ngenyi?” Nevarindi vakapingura, vakati, “Akuna munhu wakamboereketa kudai ngouyu munhu!” Ndizvo vaFarisi vakavapingura vechiti, “Nemwiwo mwachengedzerwa here? Uripo here wevatongi nokuti wevaFarisi wakamutenda? Asi iyi mbungano isikazii Mipango yakatukwa.” Nikodhemusi, uwo wakaguma kwaari pakutanga, uwo waiya umwe wavo, wakati kwavari, “Mipango yedu inotonga here munhu isati yamuzwa nokuzia chaanoita?” Vakapingura, vakati kwaari, “Newe unobva Garire here? Tsvakisisa uone, ngokuti akuna muprofeti unozobuda kubva Garire.” [ Munhu weshe wakaenda kumhatso yake. Asi Jesu wakaenda kuMutunhu wemaOrivhi. Mangwanani maishi wakauyazve muTemperi; vanhu veshe vakauya kwaari, naye wakagara pashi, akavadzidzisa. Vanyori nevaFarisi vakaunza kwaari dzimai rakabatwa rechiomba; naapo vaiya vaita kuti rieme pakati pavo, vakati kunaJesu, “Mudzidzisi, iri dzimai rabatwa rechiomba yaamho. Zvino Mosi wakatipanga muMipango kuti madzimai akadaro apondwe ngamapuwe. Ndizvo iwewe unotinyi?” Vakaereketa izvi vechimuedza, kuti vaone chokumuparisa ndaa ndicho. Asi Jesu wakakotama pashi, akanyora ngechinwe pamavhu. Naapo vaangira kumubvunzisisa, wakatwasuka, akati kwavari, “Iye usina kushaisha pakati penyu, ngaatange kukandira buwe kumuponda.” Wakakotamazve pashi, akanyora pamavhu. Naapo vazvizwa, vakaenda umwe ngaumwe, kutanga ngevakurutu, metsa Jesu asara ari ega nedzimai rakaema pamberi pake. Naapo Jesu wakatwasuka akati kweriri, “Dzimai, vari pari avo vakakuitira ndaa? Apana here wasara echikuitira ndaa?” Rakati, “Haiwa, apana naumwe, Mambowoe.” Jesu wakati kweriri, “Neni andikuitiri ndaa; enda usachazoshaishazve.”] Ndizvo Jesu wakaereketazve kwavari echiti, “Inini ndiri kujeka kwenyika; uwo unonditeera aazohambi muchidima, asi unozoa nokujeka kwokupona.” Ndizvo vaFarisi vakati kwaari, “Unodzipupurira; chapupu chako achina gwinyiso.” Jesu wakapingura, akati kwavari, “Kunyazwi ndechidzipupurira pachangu, chapupu changu chinegwinyiso, ngokuti ndinozia pendakabva nependinoenda, asi imwimwi amuzii pendakabva nependinoenda. Imwimwi munotonga ngokwenyama, inini anditongi naumwe. Asi kunyazwi ndechinyatonga, kutonga kwangu kunegwinyiso, ngokuti andinipi ndega ndinotonga, asi inini naBaba vakandituma. Kwakanyorwa muMipango yenyu kuti chapupu chavanhu vairi chinegwinyiso; inini ndini ndinodzipupurira pachangu, naBaba avo vakandituma vanopupura ndini.” Ndizvo vakati kwaari, “Vari pari Baba ako?” Jesu wakapingura, akati, “Imwimwi amundizii nokuti Baba angu; dai mwaindizia, mwaizoziazve Baba angu.” Jesu wakaereketa aya mazwi ari pasinde pebhokisi rinopirwa zvipo, echidzidzisa ari muTemperi; asi apana wakamubata, ngokuti awa rake raiya risati raguma. Ndizvo wakatizve kwavari, “Inini ndinoenda, nemwi munozonditsvaka, nemwi munozofira muzvishaishi zvenyu. Pendinoenda, amukoni kuuyapo.” Ndizvo vaJudha vakati, “Unozodziuraya here, ngokuti unoti, ‘Pendinoenda, imwimwi amukoni kuuyapo?’ ” Wakati kwavari, “Imwimwi muri vepashi, inini ndinobva mudenga; imwimwi muri venyika iyi, inini andisiri wenyika iyi akadi. Ndakamuronzera kuti munozofira muzvishaishi zvenyu, ngokuti kudai musikatendi kuti ndini aye, munozofira muzvishaishi zvenyu.” Ndizvo vakati kwaari, “Urianani iwewe?” Jesu wakati kwavari, “Ndini uwo wendakamuronzera pakutanga. Ndine zvakawanda zvokuereketa ndimwi nokutonga; asi uwo wakandituma uri gwinyiso, neni ndinoereketa kunyika izvo zvandakazwa kubva kwaari.” Avazi kuzwisisa kuti waiereketa kwavari ndiBaba. Ndizvo Jesu wakati kwavari, “Naapo mwazomirudza Mukororo woMunhu, naapo munozozia kuti inini ndini aye nokuti andiiti chiro ngesimba rangu remene, asi ndinoereketa kudai ngezvendakadzidziswa ndiBaba. Nouwo wakandituma undori neni; aazi kundisiya ndega, ngokuti ndinoita zvinomudakadza mukuwo weshe.” Achaereketa izvi, vazhinji vakatenda kwaari. Ndizvo Jesu wakati kuneavo vaJudha vakatenda kwaari, “Kudai mwechigara mumazwi angu, ngegwinyiso muri vadzidzi vangu, nemwi munozozia gwinyiso negwinyiso rinozomusunhura.” Vakamupingura vechiti, “Isusu tiri mibarirwana yaAbrahama, atizi kumboitwa varanda ngomunhu naumwe. Unodaro ngenyi kuti, ‘Munozosunhurwa?’ ” Jesu wakavapingura echiti, “Ngegwinyiso ndinoti kwomuri, kunyazwi ndiani unoita chishaishi, muranda wokushaisha. Muranda aagari mumhatso mhera nariini; mukororo unogaramwo mhera nariini. Ndizvo kudai Mukororo echizomusunhura, munozosunhurwa yaamho. Ndinozia kuti imwimwi muri mibarirwana yaAbrahama; asi munotsvaka kundiuraya, ngokuti izwi rangu arizi kuona ndau mukati mwenyu. Inini ndinoereketa izvo zvendakaona kunaBaba angu, nemwiwo munoita zvemwakazwa kubva kunababa enyu.” Vakamupingura, vakati kwaari, “Abrahama ndibaba edu.” Jesu wakati kwavari, “Kudai mwaiya vana vaAbrahama, mwaizoita mishando yaAbrahama, asi zvino munotsvaka kundiuraya, munhu wamuronzera gwinyiso, iro rendakazwa kubva kunaMwari; Abrahama aazi kuita zvakadai. Imwimwi munoita mishando yababa enyu.” Vakati kwaari, “Isusu atizi kubarwa ngokuomba; tinaBaba umwe, ndiMwari.” Jesu wakati kwavari, “Kudai Mwari aiya Baba enyu, mwaizondida, ngokuti ndakabuda ndechibva kunaMwari; andizi kuuya ngokuda kwangu, asi iye wakandituma. Amuzwisisi ngenyi zvendinoronza? Ngokuti amukoni kuzwisisa izwi rangu. Imwimwi muri vababa enyu Dhiabhorosi, nokudisisa kwenyu kuita kuda kwababa enyu. Uwo waiya muurayi kubvira pakutanga, naye aazi kuema mugwinyiso, ngokuti gwinyiso amuna mukati mwake. Naapo echinyepa, unoereketa kudai ngechibarirwe chake, ngokuti iye uri munyepi nababa emanyepo. Asi ngokuti inini ndinoronza gwinyiso, amunditendi. Ndiani kwomuri ungandionisa ndaa yendakashaisha? Kudai ndechironza gwinyiso, amunditendi ngenyi? Uwo uri waMwari unozwa mazwi aMwari; ngeiyi ndaa imwimwi amundizwi, ngokuti amuri vaMwari akadi.” VaJudha vakapingura, vakati kwaari, “Atinasi kuronza here kuti uri muSamaria newe unedhimoni?” Jesu wakapingura echiti, “Inini andina dhimoni; asi ndinoremeredza Baba angu, nemwi amundiremeredzi. Asi inini anditsvaki kuirikidzwa kwangu; uripo umwe unokutsvaka, naye unoita mutongi. Ngegwinyiso ndinoti kwomuri, kunyazwi ndiani unongwarira izwi rangu, aatongozooni rufu.” VaJudha vakati kwaari, “Zvino tinozia kuti unedhimoni. Abrahama wakafa nevaprofeti ngokudaro; newe unoti, ‘Kunyazwi ndiani unongwarira izwi rangu, aatongozozwi rufu.’ Iwewe uri mukuru here kupinda baba edu Abrahama, vakafa? Nevaprofeti vakafa. Unodziita anani?” Jesu wakapingura echiti, “Kudai ndechidziremeredza pachangu, kudziremeredza kwangu akuna shwiro; ndiBaba angu vanondiremeredza, vomunoti ndivo Mwari wenyu. Asi amuzi kuvazia; inini ndinovazia. Kudai ndechiti, andivazii, ndaita munyepi kudai ndimwi. Asi ndinovazia neni ndinongwarira izwi ravo. Abrahama baba enyu vakadakara ngokuti vaizoriona zuva rangu, navo vakariona, vakadakara.” Ndizvo vaJudha vakati kwaari, “Ausati waguma makore makumi mashanu, newe wakaona Abrahama here?” Jesu wakati kwavari, “Ngegwinyiso ndinoti kwomuri, Abrahama asati aapo, ndaiyapo.” Ndizvo vakatora mapuwe kuti vamuponde; asi Jesu wakadzifisha pachake, akabuda kubva muTemperi. Naapo echipinda, wakaona munhu waiya bofu kubvira pakubarwa kwake. Nevadzidzi vake vakamubvunza vechiti, “Rabhi, ndiani wakashaisha, uyu munhu nokuti vabari vake, kuti abarwe ari bofu?” Jesu wakapingura akati, “Uyu munhu aazi kushaisha nokuti vabari vake, asi kuti mishando yaMwari ioniswe mwaari. Kunosisira kuti tishande mishando youwo wakandituma achimasikati; ngokuti usiku hunouya, naapo apana ungakona kushanda. Naapo ndichindorimwo munyika, ndiri kujeka kwenyika.” Naapo aereketa izvi, wakapfira mata pamavhu, wakakanya matope ngemata, wakadzodza madziso aro ngedope. Wakati kweriri, “Enda, ushambe muGandwa reSiroamu.” (Ngokukumuchwa kunoti Wakatumwa.) Ndizvo wakaenda, akashamba, wakauya oona. Ndizvo vaakirwana vake naavo vaimuona kare, ari mupemhi, vakati, “Uyu andiyepi here munhu uwo waigara pashi echipemha?” Vamweni vakati, “Ndiye.” Vamweni vakati, “Haiwa, asi unotodzana naye.” Naye wakati, “Ndini.” Ndizvo vakati kwaari, “Madziso ako akaita mapembenudzirwenyi?” Wakapingura, akati, “Munhu unozwi Jesu wakaita matope, akadzodza madziso angu, akati kwendiri, ‘Enda Siroamu ushambe.’ Ndizvo ndakaenda ndikashamba, ndikaona.” Navo vakati kwaari, “Uri pari munhuwo?” Wakati, “Andizii.” Vakaunza kuvaFarisi munhu uwo waiya bofu. Raiya zuva reSabatha apo Jesu paakaita matope akapembenudza madziso aro. Ndizvo vaFarisi vakamubvunzazve kuti wakaita mapembenudzirwenyi. Naye wakati kwavari, “Wakaisa matope pamadziso angu; ndakashamba, neni ndinoona.” Ndizvo vamweni vevaFarisi vakati, “Uyu munhu aabvi kunaMwari, ngokuti aangwariri Sabatha.” Asi vamweni vakati, “Munhu mushaishi ungaita maitirenyi iyi mioniso?” Kwakaapo kuparadzana pakati pavo. Ndizvo vakatizve kunebofu, “Unotinyi ndiye iwewe, ngendaa yokuti wakapembenudza madziso ako?” Naye wakati, “Muprofeti.” Ndizvo vaJudha avazi kutenda kuti ndiye waiya bofu nokuti wakapembenudzwa, metsa vakadaidza vabari vouwo wakapembenudzwa, navo vakavabvunza vechiti, “Uyu mukororo wenyu here, uwo womunoti, wakabarwa ari bofu? Ndizvo zvino unoita maonerenyi?” Ndizvo vabari vake vakapingura vakati, “Chetinozia ngechokuti uyu mukororo wedu nokuti wakabarwa andori bofu; asi kuti unoita maonerenyi atizii, nokuti ndiani wakapembenudza madziso ake, atizii. Mubvunzenyi; wabva muzero, unozodziereketera pachake.” Vabari vake vakaronza izvi ngokuti vaitya vaJudha, ngokuti vaJudha vaiya vakatenderana kuti kunyazwi ndiani unozomutenda kuti iye ndiKristu, unozodzingwa kubva mumhatso yokudira. Ngeiyi ndaa vabari vake vakati, “Wabva muzero, mubvunzenyi.” Ndizvo vakamudaidza ngekwechipiri uwo waiya bofu, vakati kwaari, “Irikidza Mwari iwewe, isusu tinozia kuti uyu munhu mushaishi.” Ndizvo iye wakapingura, akati, “Kunyazwi mushaishi, andizii. Chiro chimwe chega chendinozia, ngechokuti inini ndaiya bofu, zvino ndinoona.” Ndizvo vakati kwaari, “Wakaitenyi kwouri? Wakaita mapembenudzirenyi madziso ako?” Wakavapingura echiti, “Ndatomuronzera nemwi amuzi kupurutana. Ngenyi mwechida kuzwazve? Nemwiwo munoda kuita vadzidzi vake here?” Vakamutuka vechiti, “Iwewe uri mudzidzi wake, asi isusu tiri vadzidzi vaMosi. Tinozia kuti Mwari wakaereketa kunaMosi, asi uyu munhu, atizii paanobva.” Munhu wakapingura, akati kwavari, “Iri igumo! Kuti amuzii paanobva, asi wakapembenudza madziso angu. Tinozia kuti Mwari aapurutani vashaishi. Asi kunyazwi ndiani unomuremeredza nokuita kuda kwake, Mwari unomupurutana. Kubvira pakutanga akuzi kumbozwika kuti munhu wakambopembenudza madziso owakabarwa ari bofu. Kudai uyu munhu asikabvi kunaMwari, aangakoni kuita chiro.” Vakamupingura vakati kwaari, “Iwewe wakabarirwa mukushaisha yaamho, newe wotidzidzisa here?” Vakamudzingira kubanze. Jesu wakazwa kuti vaiya vamudzingira kubanze, amuona wakati, “Iwewe unotenda Mukororo woMunhu here?” Naye wakapingura akati, “Ndiani, Mambo, kuti nditende kwaari?” Jesu wakati kwaari, “Wamuona, ndiyezve unoereketa newe.” Wakati, “Mambo, ndinotenda.” Naye wakamudira. Jesu wakati, “Inini ndakauyira kutonga munyika muno, kuti vasikaoni vaone nevanoona vaitwe mapofu.” Vamweni vevaFarisi avo vaiya pasinde naye vakazwa izvi, vakati kwaari, “Nesuwo tiri mapofu here?” Jesu wakati kwavari, “Kudai mwaiya mapofu, mwaizodai musina kushaisha. Asi zvino munoti, ‘Tinoona,’ kushaisha kwenyu kunondogara kuripo. “Ngegwinyiso ndinoti kwomuri, uwo usikapindi ngepamusiwo mudanga remakwai, asi echipinda ngeimweni njira, iye uri mbavha nedzongoni. Asi uwo unopinda ngepamusiwo ndiye muushi wemakwai. Kwaari murindi womusiwo unobeurira muushi, nemakwai anozwa izwi rake, unodaidza makwai ake ngemazina awo nokuatungamirira kubanze. Naapo abudisa ake eshe, unoatungamirira, nemakwai anomuteera, ngokuti anozia izwi rake. Aazoteeri mupara, asi anozotiza kubva kwaari, ngokuti aazii izwi romupara.” Jesu wakaereketa uyu muedzaniso kwavari, asi avazi kuzwisisa izvo zvaakaereketa kwavari. Ndizvo Jesu wakaereketazve kwavari echiti, “Ngegwinyiso ndinoti kwomuri, inini ndiri musiwo wemakwai. Veshe vakatanga pamberi pangu imbavha nemadzongoni; asi makwai aazi kuvapurutana. Inini ndiri musiwo; kunyazwi ndiani unopinda ndini, unozoponeswa, unozopotera nokubuda, aone kudya. Mbavha inouya kwega kuba nokuuraya nokuparadza; inini ndakauya kuti vaone kupona, vakuone kakurutu. “Inini ndiri muushi wakanaka. Muushi wakanaka unoisira pashi kupona kwake ngepamusoro pemakwai. Asi uwo unoshanda kuti aone muthuso, asiri muushi akadi, uwo makwai aasiri ake akadi, unoona thika rechiuya, unosiya makwai, unotiza; nethika rinoruma nokuaparadza. Unotiza ngokuti unoshandira muthuso, aana ndaa nemakwai. Inini ndiri muushi wakanaka, neni ndinoazia angu, naanguwo anondizia. Kudai ngezvaanondizia Baba, neniwo ndinovazia Baba, neni ndinoisira kupona kwangu pashi ngendaa yemakwai. Ndinawo amweni makwai, asiri eiri danga; nawozve ndinosisira kuti ndiaunze, nawo anozopurutana izwi rangu. Nawo anozoita danga rimwe nomuushi umwe. Ngeiyi ndaa Baba vanondida, ngokuti ndinoisira pashi kupona kwangu, kuti ndikutorezve. Apana munhu unokutora kubva kwendiri, asi ndinokuisa pashi ngokuda kwangu. Ndine simba rokukuisa pashi, ndine simba rokukutorazve; uyu mupango ndakaupuwa ndiBaba angu.” Kwaiyapozve kuparadzana pakati pevaJudha ngendaa yemazwi aya. Vazhinji vavo vakati, “Une dhimoni, naye waakupenga. Ngenyi mwechimupurutana?” Vamweni vakati, “Aya mazwi andiopi anoereketwa ngounomuka nedhimoni. Dhimoni ringapembenudza madziso ebofu here?” Waiya mukuwo wedhiri rokupira Temperi muJerusarema; paiya pachando, naJesu wakahamba muTemperi, muBerere raSoromoni. Ndizvo vaJudha vakamuunganira, vakati kwaari, “Unotiita gariremwo metsa riini? Kuti uri Kristu, tironzere pamhene.” Jesu wakavapingura echiti, “Ndakamuronzera, nemwi amutendi. Mishando yendinoita ngezina raBaba angu, inopupura ndini; asi imwimwi amutendi ngokuti amusiri vemakwai angu. Makwai angu anozwa izwi rangu, neni ndinoazia, nawo anonditeera; ndinoapa kupona kusikaperi, nawo aazofi nariini, zve akuna unoabvuka kubva munyara yangu. Baba angu, uwo wakaapa kwendiri, mukuru kwavari veshe, apana naumwe unokona kuabvuka kubva munyara yaBaba. Inini naBaba tiriumwe.” VaJudha vakatonherazve mapuwe kuti vamuponde. Jesu wakavapingura echiti, “Ndakamuonisa mishando mizhinji yakanaka inobva kunaBaba. Ngouri kweiyo mishando womunondipondera ngemapuwe?” VaJudha vakamupingura vechiti, “Atikupondi ngendaa yomushando wakanaka, asi ngendaa yokutuka Mwari; ngokuti iwewe, uri munhu, unodziita Mwari.” Jesu wakavapingura echiti, “Akuzi kunyorwa here muMipango yenyu kuti, ‘Ndakati, muri zvimwari?’ Kudai akavadaidza kuti zvimwari, kwavari avo kwarakaguma izwi raMwari, (nezvinyorwa azvingadarikwi), munoereketa ngenyi ndiye, uwo waakaemesa Baba nokumutuma munyika kuti, ‘Unotuka Mwari,’ ngokuti ndakaronza kuti, ‘Inini ndiri Mukororo waMwari?’ Kudai ndisikaiti mishando yaBaba angu, musanditenda; asi kuti ndechiiita, kunyazwi musikanditendi, tendai mishando, kuti muzie nokuzwisisa kuti Baba vari mukati mwangu neni ndiri mukati mwaBaba.” Ndizvo vakatsvakazve kumubata, asi iye wakapokonyoka kubva munyara dzavo. Naye wakaendazve ruseri rweJorodhani kundau iyo yaaibhabhatidzira Johani pakutanga, wakagarapo. Vanhu vazhinji vakauya kwaari; navo vakati, “Johani aazi kuita mioniso, asi zveshe zvaakaronza Johani ngendaa youyu munhu zvine gwinyiso.” Vazhinji vakatenda mwaari apapo. Zvino munhu umweni wairwara, waizwi Razarusi weBhethani, guta raMaria nataita ake Maritha. Ndiye uyu Maria wakadzodza Mambo ngemafuta, akapukuta tsoka dzake ngebvudzi rake, mukoma wake Razarusi wairwara. Ndizvo hanzvadzi dzake dzakatumira kwaari dzechiti, “Mambo, penya, uwo wounoda unorwara.” Asi apo Jesu azvizwa wakati, “Uku kurwara andikwopi kworufu; asi ngokwokukurisa Mwari, kuti Mukororo waMwari akuriswe ndikwo.” Zvino Jesu wakada Maritha nomunun'una wake naRazarusi. Ndizvo apo azwa kuti wairwara, wakagara mazuva mairi pandau paaiyapo. Ngesure kweizvi wakati kuvadzidzi vake, “Ngatihwirirezve Judhia.” Vadzidzi vakati kwaari, “Rabhi, vaJudha vaitotsvaka kukuponda ngemapuwe, wohwirireyozve here?” Jesu wakapingura akati, “Amuna maawa gumi namairi muzuva here? Kudai munhu echihamba masikati aapumhunwi, ngokuti unoona kujeka kwomunyika muno. Asi kudai munhu echihamba usiku unopumhunwa, ngokuti kujeka amuna mukati mwake.” Wakaereketa izvi, naapo wakati kwavari, “Razarusi shamwari yedu waata, asi inini ndinoenda koomumusa.” Ndizvo vadzidzi vakati kwaari, “Mambo, kuti akaata, unozoitanane.” Zvino Jesu waiya aereketa ngorufu rwake, asi ivo vaikarakadza kuti waiereketa ngokuzorora mukuata. Naapo Jesu wakanasa kuvaronzera pamhene kuti, “Razarusi wafa; neni ndinodakara ngepamusoro penyu ngokuti ndaiya ndisiriyo, kuti mutende. Asi ngatiende kwaari.” Ndizvo Thomasi, uwo unozwi Munyambiri, wakati kuvadzidzi vangani vake, “Nesu ngatiendewo, kuti tife naye.” Naapo Jesu aguma, wakaona kuti Razarusi waiya aanemazuva marongomuna muiba. Bhethani raiya pasinde peJerusarema, pasikagumi makhiromitha matatu, nevazhinji vevaJudha vaiya vaguma kunaMaritha naMaria, kuti vavaembedzere ngendaa yokufa kwomukoma wavo. Naapo Maritha, azwa kuti Jesu uri kuuya, wakaenda kooshongana naye, asi Maria wakasara akagara mumhatso. Ndizvo Maritha wakati kunaJesu, “Mambo, kudai waiya pano, mukoma wangu waidai asikazi kufa. Nazvino ndinozia kuti izvo zvounozokumbira kunaMwari, Mwari unozokupa.” Jesu wakati kwaari, “Mukoma wako unozomukazve.” Maritha wakati kwaari, “Ndinozia kuti unozomuka mukumuka kwezuva rokupera.” Jesu wakati kwaari, “Inini ndiri kumuka nokupona; uwo unonditenda kunyazwi afa, unozoponazve, nouwo unopona echinditenda, aatongozofi. Unotenda ichi here?” Wakati kwaari, “Eya, Mambo; inini ndinotenda kuti iwewe ndiwe Kristu, Mukororo waMwari, uwo unouya munyika.” Naapo aronza izvi, wakaenda, akadaidza Maria munun'una wake ngokufishika, akati, “Mudzidzisi waapano, unokudaidza.” Naye azwa, wakakasira kumiruka, akaenda kwaari. Zvino Jesu waiya asati aguma muguta, asi waiya achipo paakashongana naMaritha. Naapo vaJudha avo vaiya naye mumhatso vechimuembedzera, vaona kuti Maria wamiruka ngokukasira, akabuda kubanze, vakamuteera, vechikarakadza kuti unoenda kuiba koochemerapo. Apo Maria aguma paiya naJesu, amuona wakawa pashi patsoka dzake, akati kwaari, “Mambo, kudai waiya pano, mukoma wangu waidai asikazi kufa.” Naapo Jesu amuona echichema, nevaJudha vechichema, avo vakauya naye, wakaita mahwema mumweya mwake nokutambudzika; naye wakati, “Mwakamuradzika pari?” Vakati kwaari, “Mambo, uyai muone.” Jesu wakachema masodzi. Ndizvo vaJudha vakati, “Wonai, kumudisisa kwake!” Asi vamweni vavo vakati, “Uyu munhu, wakasvinura madziso owaiya bofu, waiya asikakoni here kuita kuti uyu munhu asafa?” Naapo Jesu, echitambudzika kakurutu mukati mwake, wakaguma kuiba; raiya bako nebuwe raiya rakadumaidza padera paro. Jesu wakati, “Dusai buwe.” Maritha, hanzvadzi youwo wakafa, wakati kwaari, “Mambo, zvino wotonuhwa, ngokuti waane mazuva marongomuna afa.” Jesu wakati kwaari, “Andizi kukuronzera here kuti dai wechitenda ungazoona uthende hwaMwari?” Ndizvo vakadusa buwe. NaJesu wakaringira mudenga akati, “Baba, ndinomubonga ngokuti mwakandizwa. Neni ndinozia kuti unondizwa ngenguva dzeshe. Asi ngepamusoro pembungano yakaema pasinde ndaronza kudaro, kuti itende kuti ndiwe wakandituma.” Naapo aronza izvi, wakadaidzira ngeizwi guru echiti, “Razarusi, buda.” Uwo waiya akafa wakabuda, akasungwa tsoka nenyara ngemachira okuikwa nawo, nehope yake yakasungwa ngejira doko. Jesu wakati kwavari, “Musunhurenyi, mumurekere aende.” Ndizvo vazhinji vevaJudha avo vakauya kunaMaria, vechiona izvo zvaakaita Jesu, vakatenda; asi vamweni vavo vakaenda kuvaFarisi, vakavaronzera zvaaiya aita Jesu. Ndizvo vapristi vakuru nevaFarisi vakaungana pamwepo nevatongi kuita bangano, vakati, “Tinozoitenyi? Ngokuti uyu munhu unoita mioniso yakawanda. Kudai techimurekera echiangira kudaro, vanhu veshe vanozotenda kwaari, nevaRoma vanozouya vaparadze zveshe ndau yedu yakachena nedzinza redu.” Asi umwe wavo, Kaiafasi, uwo waiya mupristi mukuru ngegorero, wakati kwavari, “Amuzii chiro nachimwe. Amuzwisisi kuti zvirinane kwomuri kuti munhu umwe unosisira kufira vanhu vazhinji pane kuti dzinza reshe ripere.” Aazi kuronza izvi ngokuda kwake, asi ngokuti waiya mupristi mukuru ngegorero, wakaprofeta kuti Jesu unozofira dzinzaro, asi haiwa kufira dzinzaro kwega, asi kuti aunganidzewo pamwepo vana vaMwari avo vakapararira kunyika dzeshe, kuti vaite umwe. Ndizvo kubvira ngezuva iro vakaita bangano pamwepo kuti vamuuraye. Ndizvo Jesu aazi kuchahambazve pamhene pakati pevaJudha, asi kubva apo wakaenda kunyika iri pasinde norubaya, kudhorobha rinozwi Efuremu; naapo wakagara nevadzidzi vake. Zvino Phasika revaJudha raiya pasinde, vazhinji vakakwira Jerusarema vechibva munyika, Phasika risati raguma, kuti vadzichenese. Ndizvo vakatsvaka Jesu, vakaema muTemperi vechiti umwe kune umweni, “Munotinyi? Kuti aazouyi here kudhiri?” Ndizvo vapristi vakuru nevaFarisi vaiya vakaita mupango kuti kunyazwi ndiani unozia paari, ngaaronze, kuti vamubate. Ndizvo mazuva matanhatu Phasika risati raguma, Jesu wakaguma Bhethani, apo paiya naRazarusi, uwo waakamusa kwavakafa. Naapo vakamunasirira kudya kwemadeekoni; Maritha wakavaburira, naRazarusi waiya umwe weavo vaigara naye pakudya. Naapo Maria wakatora mafuta anoda kukwana litha okuzora enarde aidhura naye wakadzodza tsoka dzaJesu, akapukuta tsoka dzake ngebvudzi rake; nemhatso yakazara ngegwema rakanaka remafuta. Asi Judhasi Isikarioti, umwe wevadzidzi vake, (uwo waizomupira) wakati, “Ngenyi asikazi kutengeswa mafuta aya ngemadhora mazana matatu, apuwe varombo?” Izvi wakazvironza, haiwa ngokuti waivada varombo, asi ngokuti waiya mbavha, waingwarira nyede naye waitora zvaiiswamwo. Ndizvo Jesu wakati, “Murekerei ari ega. Ngaangwaririre zuva rokuikwa kwangu. Ngokuti varombo munavo nguva dzeshe, asi amunenipi nguva dzeshe.” Naapo vazhinji vembungano yevaJudha vakazia kuti waiyapo, vakauya, haiwa kuti vaone Jesu kwega, asi kuti vaonezve Razarusi, uwo waakamusa kubva kwavakafa. Ndizvo vapristi vakuru vakapangana kuti vauraye naRazarusiwo, ngokuti ngepamusoro pake vazhinji vevaJudha vaienda vechitenda kunaJesu. Nechimangwani mbungano huru iyo yakauya kudhiri, yakazwa kuti Jesu unouya Jerusarema. Yakatora matai emichindwi, yakabuda kooshongana naye, vakadaidzira vechiti, “Hosana! Unomuchena uwo unouya ngezina raMambo, Mambo waIsuraeri!” NaJesu wakaona mwana wembongoro, naye wakagadha padera payo, kudai ngezvezvakanyorwa, “Usatya, iwewe mukunda weZioni. Ringira, mambo wako unouya, akagadha padera pemwana wembongoro!” Vadzidzi vake avazi kuzvizwisisa izvi pakutanga, asi apo Jesu airikidzwa, naapo vakachizokarakadza kuti izvi zvaiya zvakanyorwa ngendaa yake nokuti vakamuitira izvi. Nembungano iyo yaiya naye apo paakadaidza Razarusi kubva muiba akamumusa kwavakafa yakaita chapupu. Ngeiyi ndaa mbungano yakaenda kooshongana nayezve, ngokuti yaiya yazwa kuti wakaita mushamiso. Ndizvo vaFarisi vakati pakati pavo umwe kunoumweni, “Munoona, amungaiti chiro; ringirai, nyika yeshe inomuteera.” Zvino vaiyapo vaGiriki vamweni pakati peavo vakakwira koodira kudhiri. Ndizvo ava vakauya kunaFiripu, uwo waibva Bhethisaidha reGarire, vakakumbira kwaari vechiti, “Mambo, tinoda kuona Jesu.” Firipu wakaenda, akaronzera Andreu; Andreu wakaenda naFiripu, vakaronzera Jesu. NaJesu wakavapingura echiti, “Awa raguma rokuti Mukororo woMunhu akudzwe. Ngegwinyiso ndinoti kwomuri, kudai tsangu yekoroni isikawi mumavhu nokufa, inondogara iriyo yega; asi kuti ikafa, inozobereka tsangu dzakawanda. Uwo unoda kupona kwake unozokurasha, nouwo unozonda kupona kwake munyika muno, unozokungwarira kupona kusikaperi. Kudai munhu echindishandira, ngaanditeere, kuti pendiri naye muranda wangu unozoapowo; kuti munhu echindishandira, Baba vanozomuremeredza. “Zvino mweya wangu unotambudzika. Neni ndinozotinyi, ‘Baba, ndiponese kubva kuneiri awa here?’ Haiwa, ndiyo ndaa yendakauyira awa iri. Baba, ngarikudzwe zina renyu.” Apapo rakauya izwi rechibva mudenga rechiti, “Ndakarikudza, neni ndinozorikudzazve.” Nembungano yaiya yakaema apo yakarizwa, yakati, “Kwatinhira.” Vamweni vakati, “Ingirosi yaereketa naye.” Jesu wakapingura akati, “Iri izwi arizi kuuya ngendaa yangu, asi ngendaa yenyu. Zvino kwaapano kutongwa kwenyika iyi, zvino mutongi wenyika iyi unozorashwa kubanze. Neni, naapo ndamirudzwa kubva panyika, ndinozokweera vanhu veshe kwendiri.” Wakaronza izvi echionisa njira yokufa kwaaizofa ndikwo. Ndizvo mbungano yakamupingura yechiti, “Takazwa muMipango kuti Kristu unozogara mhera nariini. Zvino unoronzenyi wechiti, ‘Mukororo woMunhu unosisira kuti amirudzwe?’ Ndiani uyu Mukororo woMunhu?” Jesu wakati kwavari, “Inguva doko kujeka kuchipo pakati penyu. Hambai muchinokujeka, kuti chidima chisamubata; nouwo unohamba muchidima aatongozii paanoenda. Muchinokujeka, tendai kujeka, kuti muite vana vokujeka.” Naapo Jesu aronza izvi, wakabvapo akadzifisha kubva kwavari. Kunyazwi aiya aita mioniso mizhinji pamberi pavo, asi avazi kumutenda. Uku kwaiya kuzadzisa izwi raIsaya muprofeti raakaereketa, iro rinoti, “Mambo, ndiani wakatenda izwi redu, nomuoko waMambo Mwari wakaoniswa kunaani?” Ndizvo vaiya vasikakoni kutenda, ngokuti Isaya unotizve, “Uwo wakapofomadza madziso avo, wakakonzisa mwoyo yavo, kuti vasazoona ngemadziso avo, vazwisise ngomwoyo yavo, vatenderuke neni ndivaponese.” Isaya wakaronza izvi ngokuti wakaona uthende hwake, akaereketa ndiye. Kunyazwi zvakanyadaro vazhinji vemadzimambo vakamutenda, asi ngendaa yokutya vaFarisi avazi kumutenda ngomuromo, kuti vasadzingwa kubva mumhatso yokudira. Ngokuti vaipinda kuda kukudzwa ngevanhu kunokukudzwa ndiMwari. Jesu wakadaidzira akati, “Uwo unonditenda, aatendi inini akadi, asi unotenda uwo wakandituma. Nouwo unondiona unoonawo wakandituma. Inini ndakauya ndiri kujeka munyika, kuti kunyazwi ndiani unotenda kwendiri asachagara muchidima. Kunyazwi ndiani unozwa mazwi angu asikaangwariri, andimutongi inini; ngokuti andizi kuuya kootonga nyika, asi kooponesa nyika. Iye unondiramba asikaashiri mazwi angu unaye unomutonga; izwi iro rendakaereketa ndiro rinozomutonga ngezuva rokupera. Ngokuti andizi kutera kudziereketera ngesimba rangu; asi Baba uwo wakandituma iye pachake wakandipanga chendinozoronza nechendinozoereketa. Neni ndinozia kuti mupango wake uri kupona kusikaperi. Ndizvo izvo zvendinoereketa, ndinozviereketa kudai ngezvandakaronzerwa ndiBaba.” Zvino nguva yeDhiri rePhasika isati yaguma, apo Jesu echizia kuti nguva yake yaguma kuti abve munyika muno aende kunaBaba, avada vake avo vaiya munyika, wakavada metsa kumagumo. Vachadya kudya kwemadeekoni, Sathani waiya atopinda mumwoyo mwaJudhasi, mukororo waSimoni Isikarioti, kuti amupire. Jesu, echizia kuti Baba vaiya vamupa zveshe munyara dzake nokuti wakabva kunaMwari nokuti unoenda kunaMwari, wakamiruka kubva pakudya kwemadeekoni, wakakhumura zvokupfeka zvepadera zvake, wakatora jira rokupukuta ndiro, akasungira muchiunu chake. Naapo wakadurura mvura muchidziyo chokushambira, akatanga kushamba tsoka dzevadzidzi nokudzipukuta ngejira raaiya akasungira muchiunu. Ndizvo wakaguma panaSimoni Petro; Petro wakati kwaari, “Mambo, iwewe unoshamba tsoka dzangu here?” Jesu wakapingura, akati kwaari, “Icho chendinoita inini, iwewe auchizii zvino, asi unozochizwisisa ngesure kweizvi.” Petro wakati kwaari, “Auzoshambi tsoka dzangu nariini.” Jesu wakamupingura, akati, “Dai ndisikakushambi, auna chikoaniswa neni.” Simoni Petro wakati kwaari, “Mambo, kusachaita tsoka dzangu dzega asi nadzo nyara dzangu nesoro rangu!” Jesu wakati kwaari, “Iye washambwa muiri weshe aachatami chiro chimweni kwega kushambwa tsoka dzake, asi wacheneswa yaamho. Nemwi mwacheneswa, asi haiwa mweshe.” Ngokuti waimuzia uwo waizomupira; ndizvo wakati, “Amuzi kucheneswa mweshe.” Naapo Jesu aiya ashamba tsoka dzavo nokutora zvokupfeka zvake nokugara pandau yake, wakati kwavari, “Munozwisisa here chendaita? Munondidaidza kuti Mudzidzisi nokuti Mambo; nemwi munonasa kuronza, ngokuti ndini. Zvino kudai inini, Mambo noMudzidzisi wenyu, ndashamba tsoka dzenyu, nemwiwo kunosisira kuti mushambane tsoka dzenyu. Ngokuti ndamupa chionero, kuti nemwi muite kudai ngezvandaita kwomuri. Ngegwinyiso ndinoti kwomuri, muranda aasimukuru kupinda mambo wake, nokuti wakatumwa aakuri kupinda uwo wakamutuma. Kudai mwechizia izvi zviro, munomuchena kudai mwechizviita. Andiereketi ndimwi mweshe akadi; ndinovazia avo vendakatsanangura; asi kuti chinyorwa chizadzisike chinoti, ‘Uwo unodya chingwa changu, wakandimirudzira chisisinho chake kurwisana neni.’ Zvino ndinomuronzera izvi zvisati zvaitika, kuti apo zvaitika mutende kuti ndini. Ngegwinyiso ndinoti kwomuri, iye unoashira uwo wendinotuma unoashira inini; nouwo unondiashira unoashira uwo wakandituma.” Naapo Jesu aiya aereketa izvi, wakatambudzika mumweya wake, wakapupura akati, “Ngegwinyiso ndinoti kwomuri, umwe wenyu unozondipira.” Vadzidzi vakaringirana vechishamiswa kuti unoereketa ndiani. Umwe wavadzidzi vake waiya akatseama paditi raJesu, uwo waidiwa ndiJesu; ndizvo Simoni Petro wakamukopera akati kwaari, “Tironzere, ndiani waanoereketa ndiye.” Ndizvo uwo wakatseyama paditi raJesu wakati kwaari, “Mambo, ndiani?” Jesu wakapingura akati, “Ndiye uwo wendinozosheya mushuva ndimupe.” Naapo asheya chigurwa chechingwa wakaupa Judhasi, mukororo waSimoni Isikarioti. Naapo ngesure kwechigurwa chechingwa, Sathani wakapotera kwaari. Ndizvo Jesu wakati kwaari, “Izvo zvounoda kuita zviite ngokukasira.” Paiya pasina munhu pakudya wakazia singwisingwi yezvaakaereketa kwaari. Ngokuti vamweni vakapinimidza kuti, ngokuti Judhasi waiya nenyede yemare, Jesu waimuronzera echiti, “Tenga zvetinoda paDhiri rePhasika,” nokuti ape chiro kuvarombo. Ndizvo iye aashira chigurwa chechingwa, paripo wakabuda kuenda. Hwaiya hwaa usiku. Naapo aiya abuda, Jesu wakati, “Zvino Mukororo woMunhu wakudzwa naMwari wakudzwa mukati mwake. Kudai Mwari akudzwa mukati mwake, Mwari unozomukudzawo mukati mwake emene, naye unozomukudza paripo apapo. Vana vadoko, inguva doko ndichinemwi. Munozonditsvaka; kudai ngezvandakaronza kuvaJudha, ndizvo ndinoti kwomuri, ‘Pendinoenda, amukoni kuuyapo.’ Ndinomupa mupango mutsva, kuti mudane umwe kunoumweni; kudai ndini ndakamuda, ngokudaro imwimwiwo mudane. Ngeichi vanhu veshe vanozozia kuti imwimwi muri vadzidzi vangu, kudai muno rudo umwe kunoumweni.” Simoni Petro wakati kwaari, “Mambo, unoenda kuri?” Jesu wakapingura, akati, “Pendinoenda, aukoni kunditeera zvino; asi unozoteera sure kweizvi.” Petro wakati kwaari, “Mambo, andikoni kukuteera zvino ngenyi? Ndinozofa ngepamusoro pako.” Jesu wakapingura, akati, “Unozofa ngepamusoro pangu here? Ngegwinyiso ndinoti kwomuri, jongwe arizoriri usati wandiramba katatu. “Mwoyo yenyu isatambudzika; tendai kunaMwari, mutendewo kwendiri. Mumhatso mwaBaba angu huriyo ugaro hwakawanda. Kudai zvisakadaro, ndaizodai ndisikazi kumuronzera here kuti ndinoenda koomunasirira ugaro? Kudai ndechienda koomunasirira ugaro, ndinozouyazve nokumuashira ndemene, kuti pendiri inini, nemwi mungazoapowo. Nependinoenda munoizia njira.” Thomasi wakati kwaari, “Mambo, atizii pounoenda. Njira tingaizia ngenyi?” Jesu wakati kwaari, “Inini ndiri njira negwinyiso nokupona. Akuna unouya kunaBaba, asikauyi ndini. Kudai mwakandizia, mwaizodai mwakamuzia Baba anguwo. Kubvira pano munomuzia, nemwi mwamuona.” Firipu wakati kwaari, “Mambo, tipangidzire Baba, nesu tikwaniswe.” Jesu wakati kwaari, “Ndakagara nemwi mukuwo wakadai kureba, asi ausati wandizia here, Firipu? Iye wakandiona inini wakaona Baba. Unoronza ngenyi kuti, ‘Tipangidzire Baba?’ Autendi here kuti inini ndiri mukati mwaBaba naBaba vari mukati mwangu? Mazwi endinoereketa kwomuri andidziereketeri ngesimba rangu; asi Baba vanogara mukati mwangu ndivo vanoita mishando yavo. Tendai inini kuti ndiri mukati mwaBaba naBaba vari mukati mwangu; asi kudai musikatendi kudaro, tendai ngepamusoro pemishando yemene. Ngegwinyiso ndinoti kwomuri, uwo unonditenda mishando yendinoita unozoitawo; mishando yakakura kupinda iyi unozoiita, ngokuti inini ndinoenda kunaBaba. Kunyazwi chiinyi chomunozokumbira ngezina rangu ndinozochiita, kuti Baba vairikidzwe kubudikidza ngoMukororo. Kudai mwanyazokumbirenyi kwendiri ngezina rangu, inini ndinozochiita. “Kudai mwechindida, munozongwarira mipango yangu. Neni ndinozokumbira Baba, naye unozomupa umweni Muembedzeri, kuti agare nemwi nokusikaperi, ndiye Mweya wegwinyiso; nyika aikoni kumuashira, ngokuti aimuoni nokuti kumuzia. Imwimwi munomuzia, ngokuti unogara nemwi, naye unozogara mukati mwenyu. “Andizomusii muri nherera; ndinozouya kwomuri. Kuchinenguva doko nenyika aichazondioni, asi imwimwi munozondiona; ngokuti inini ndinopona, nemwi munozoponawo. Ngeiro zuva munozozia kuti inini ndiri mukati mwaBaba angu, nemwi muri mukati mwangu, neni ndiri mukati mwenyu. Uwo unemipango yangu echiingwarira, uwo ndiye unondida; nouwo unondida unodiwa ndiBaba angu, neni ndinozomuda nokudzionisa pachangu kwaari.” Judhasi (haiwa Isikarioti) wakati kwaari, “Mambo, unozoita maitirenyi kuti unozodzionisa kwetiri, usikadzionisi kunyika?” Jesu wakamupingura, akati kwaari, “Kunyazwi ndiani unondida unozongwarira mazwi angu, naBaba angu vanozomuda, nesu tinozouya kwaari tiite ugaro hwedu pamwepo naye. Uwo usikandidi aangwariri mazwi angu. Neizwi romunozwa arisirangu akadi, asi ngeraBaba avo vakandituma. “Izvi zviro ndamuronzera apo ndichakagara nemwi. Asi Muembedzeri, Mweya Wakachena, waachazotuma Baba ngezina rangu, uwo unozomudzidzisa zviro zveshe, amucherechedzise zveshe zvendakamuronzera. Kunyarara ndinokusiya kwomuri; kunyarara kwangu ndinomupa. Andimupi kudai ngokupa kwenyika. Mwoyo yenyu isatambudzika, isakarukazve. Mwakazwa kuti ndakati kwomuri, ‘Ndinoenda, neni ndinozouyazve kwomuri.’ Kudai mwakandida, mwaizodakara kuti ndinoenda kunaBaba, ngokuti Baba vari vakuru kwendiri. Zvino ndamuronzera zvisati zvaitika, kuti apo zvoozoitika mutende. Ngesure kweizvi andichazoereketi zvizhinji nemwi, ngokuti mutongi wenyika iyi unouya. Aana simba padera pangu; asi ndinoita kudai ngezvaakandipanga Baba, kuti nyika izie kuti ndinomuda Baba. Mirukai, ngatibve pano. “Inini ndiri muvhini wegwinyiso naBaba angu murimi. Matai eshe ari mukati mwangu asikabari michero, unoadusa, nawo eshe anobara michero unoatongora, kuti abare michero yakapinda kuwanda. Imwimwi muri vakatocheneswa ngeizwi rendakaereketa kwomuri. Garai mukati mwangu neni mukati mwenyu. Kudai ngedai risikakoni kubara michero rega, risikagari mukati mwomuvhini, zvakadaro nemwi kudai musikagari mukati mwangu. Inini ndiri muvhini, imwimwi muri matai. Uwo unogara mukati mwangu, neni ndiri mukati mwake, ndiye unobara michero yakawanda, ngokuti ngepabanze pangu imwimwi amungakoni kuita chiro. Kunyazwi ndiani usikagari mukati mwangu, unorashwa kubanze kudai ngedai, rinofota; nematai vanoaunganidza, vaaposhere mumuriro nawo anotsva. Kudai mwechigara mukati mwangu, nemazwi angu anogara mukati mwenyu, munozokumbira izvo zvomunoda, nazvo zvinozoitwa kwomuri. Ngeizvi Baba angu vanokudzwa, kuti mubare michero yakawanda, ngokudaro muite vadzidzi vangu. Kudai ndiBaba vakandida, ngokudaro neni ndakamudawo; garai murudo rwangu. Kudai mwechingwarira mipango yangu, munozogara murudo rwangu, kudai ndini ndakangwarira mipango yaBaba angu nokugara murudo rwake. “Ndakaereketa izvi kwomuri, kuti kudakara kwangu kugare kwomuri, nokuti kudakara kwenyu kuzadzisike. Uyu ndiwo mupango wangu, kuti mudane kudai ndini ndakamuda. Akuna munhu unorudo rukuru kupinda urwu, kuti munhu afe ngepamusoro peshamwari dzake. Imwimwi muri shamwari dzangu kudai mwechiita izvo zvendinomupanga. Andichamudaidzi kuti muri varanda, ngokuti muranda aazii chinoitwa ndiMambo wake; asi ndakamudaidza kuti muri shamwari, ngokuti zveshe zvendakazwa kunaBaba angu ndakazviziisa kwomuri. Imwimwi amuzi kunditsanangura, asi ndakamutsanangura inini, ndikamuemesa kuti muende, mubare michero nokuti michero yenyu igare; kuti kunyazwi chiinyi chomunozokumbira kunaBaba ngezina rangu, vachipe kwomuri. Izvi ndinomupanga, kuti mudane umwe kunoumweni. “Kudai nyika yechimuzonda, mwechizia kuti yakatanga kundizonda inini. Kudai mwaiya vomunyika, nyika yaizoda vayo. Asi ngokuti amusiri vomunyika akadi, asi ndakamutsanangura kubva munyika, ndizvo nyika inomuzonda. Karakadzai izwi iro rendakaereketa kwomuri kuti, ‘Muranda aatongopindi mambo wake.’ Kudai vakanditambudza inini, vanozomutambudzawo; kudai vakangwarira izwi rangu, vanozongwarirawo izwi renyu. Asi zveshe izvi vanozomuitira ngendaa yezina rangu, ngokuti avamuzii uwo wakandituma. Kudai ndisikazi kuuya ndikaereketa kwavari, vaizodai vasina kushaisha; asi zvino avana chizato chinovapembedza kushaisha kwavo. Kunyazwi ndiani unondizonda, unozonda Baba angu. Kudai ndisikazi kuita pakati pavo mishando iyo isikazi kumboitwa ngoumweni, vangadai vasina kushaisha. Asi zvino vakaona vakazonda teshe inini naBaba angu. Asi kuti izwi rizadzisike iro rakanyorwa muMipango yavo yokuti, ‘Vakandinyenya pasina ndaa.’ “Naapo aguma Muembedzeri, uwo wendinozotuma kwomuri echibva kunaBaba, kunyazwi Mweya wegwinyiso, uwo unobva kunaBaba, unozondipupurira; nemwiwo muri zvapupu, ngokuti mwaiya neni kubvira pakutanga. “Ndakaereketa izvi zveshe kwomuri kuti musapumhuniswa. Vanozomudzinga kubva mumhatso dzavo dzokudira; eya, awa richauya apo kunyazwi ndiani unomuuraya, unozopinimidza kuti unoshandira Mwari. Navo vanozoita izvi ngokuti avazi kumuzia Baba nokuti inini. Asi ndakamuronzera izvi zviro, kuti apo raguma awa razvo mucherechedze kuti ndakamuronzera ndizvo. “Asi andizi kumuronzera izvi zviro kubvira pakutanga, ngokuti ndaiya ndichinemwi. Asi zvino ndinoenda kunouwo wakandituma; akuna naumwe wenyu unondibvunza kuti, ‘Unoenda kuri?’ Asi ngokuti ndamuronzera izvi zviro, mwoyo yenyu yazara ngokutambudzika. Asi ndinomuronzera gwinyiso; kuti zvakapinda kumunakira kuti ndiende, ngokuti kudai ndisikaendi, Muembedzeri aazouyi kwomuri; asi kuti ndikaenda, ndinozomutuma kwomuri. Naapo auya, unozoonisa nyika ngendaa yokushaisha, yokururama nendaa yokutongwa; ngendaa yokushaisha, ngokuti avanditendi; ngendaa yokururama, ngokuti ndinoenda kunaBaba, nemwi amuchazondioni; ngendaa yokutongwa ngokuti mutongi wenyika ino wakatongwa. “Ndichine zviro zvizhinji zvokumuronzera, asi amukoni kuzviashira zvino. Naapo Mweya wegwinyiso wauya, unozomutungamirira mugwinyiso reshe; ngokuti aazodziereketeri ngesimba rake, asi zvaanozozwa, ndizvo zvaanozoereketa, naye unozomuronzera zviro zvichauya. Uwo unozondikudza, ngokuti unozoashira zvokwangu nokuzvironza kwomuri. Zveshe zvaanazvo Baba ngezvangu; ndiyo ndaa ndakati unozotora zvokwangu nokuzvironza kwomuri. “Kwenguva doko nemwi amuchazondioni, nenguva dokozve nemwi munozondiona.” Vamweni vevadzidzi vake vakaereketa pachavo umwe kunoumweni vechiti, “Chiinyi ichi chaanoereketa kwetiri kuti, ‘Inguva doko nemwi amuchazondioni, nenguva dokozve nemwi munozondiona,’ echitizve, ‘Ngokuti ndinoenda kunaBaba?’ ” Ndizvo vakati, “Unoronzenyi echiti, ‘Inguva doko?’ Atizii kuti unoronzenyi.” Jesu wakazia kuti vaida kumubvunza; naye wakati kwavari, “Munobvunzana here pakati penyu ngeicho chendaronza kuti, ‘Inguva doko nemwi amuchazondioni, nenguva dokozve nemwi munozondiona?’ Ngegwinyiso ndinoti kwomuri, munozochema nokuboorera, asi nyika inozodakara; imwimwi munozotambudzika, asi kutambudzika kwenyu kunozotsandudzwa kuita kudakara. Naapo dzimai roopotwa ngokubara rinotambudzika, ngokuti nguva yaro yaguma; asi rabara mwana, arichakarakadzi ngokurwadziwa, ngendaa yokudakara kuti munhu wabarwa munyika. Nemwi munozotambudzika zvino, asi ndinozomuonazve nemwoyo yenyu inozodakara, nokudakara kwenyu akuna munhu unokudusa kubva kwomuri. Ngeiro zuva amuzondibvunzi chiro. Ngegwinyiso ndinoti kwomuri, kunyazwi chiinyi chomunozokumbira kunaBaba ngezina rangu, unozochipa kwomuri. Metsa zvino amuzi kukumbira chiro ngezina rangu. Kumbirai nemwi munozoashira, kuti kudakara kwenyu kuzadzisike. “Ndakaereketa izvi kwomuri ngemiedzaniso. Asi awa rinouya apo andichazoereketi kwomuri ngemiedzaniso, asi ndinozomuronzera pamhene ndiBaba. Ngeiro zuva munozokumbira ngezina rangu; neni andironzi kwomuri kuti ndinozomukumbirira kunaBaba; ngokuti Baba vemene vanomuda, ngokuti imwimwi mwakandida nemwi mwakatenda kuti ndakabva kunaMwari. Ndakabva kunaBaba, neni ndakauya munyika; zve, ndinosiya nyika, ndechienda kunaBaba.” Vadzidzi vake vakati kwaari, “Ringira, zvino worowoereketa pamhene, haiwa ngomuedzaniso! Zvino tinozia kuti unozia zviro zveshe, autami munhu naumwe kuti akubvunze; ngeichi tinotenda kuti iwewe wakabva kunaMwari.” Jesu wakavapingura echiti, “Zvino munotenda here? Ringirai, awa rinouya, eya ratoguma, naapo munozoparadzirwa munhu weshe echienda kanyi kwake nokundisiya ndega. Asi andiri ndega akadi, ngokuti Baba vaneni. Izvi ndakamuronzera kuti mwendiri muone kunyarara. Munyika munozoa nemadambudziko. Asi shingai mwoyo; ndainyisa nyika!” Naapo Jesu aereketa mazwi aya, wakamirudza madziso ake mudenga, akati, “Baba, awa raguma; irikidzai Mukororo wenyu kuti Mukororo amuirikidze, kudai ngezvemwakamupa simba padera penyama yeshe, kuti avape kupona kusikaperi avo veshe vemwakamupa. Uku ndikwo kupona kusikaperi, kuti vamuzie imwimwi, Mwari ega wegwinyiso, naJesu Kristu uwo womwakatuma. Inini ndakamuirikidza munyika, ndakapedza mushando womwakandipa kuti ndiuite. Nazvino imwimwi, Baba, ndiirikidzei mwemene ngokuirikidzwa ukwo kwendaiya nakwo nemwi, ngepamberi nyika isati yasikwa. “Ndakaita kuti zina renyu riziikanwe kuneavo vanhu vomwakandipa kubva munyika. Vaiya venyu, nemwi mwakavapa kwendiri, navo vakangwarira izwi renyu. Zvino vanozia kuti zveshe zvemwakandipa zvakabva kwomuri; ngokuti mazwi omwakandipa ndakaapawo kwavari, navo vakaashira, vakazia ngegwinyiso kuti ndakabva kwomuri; vakatenda kuti imwimwi mwakandituma. Ndinovakumbirira; andikumbiriri nyika, asi avo vomwakandipa, ngokuti vari venyu. Zveshe zvangu ngezvenyu nezvenyu ngezvangu; neni ndinoirikidzwa mwavari. Andichimwopi munyika, asi vachirimwo munyika, neni ndouya kwomuri. Baba Vakachena, vangwarirei muzina renyu, iro romwakandipa, kuti vaite umwe kudai tisu tiri umwe. Apo ndichinavo, ndakavangwarira muzina renyu, iro romwakandipa. Ndakavarinda, akuna naumwe wavo wakarashika, asi mukororo wokurashwa, kuti zvinyorwa zvizadzisike. Asi zvino ndinouya kwomuri, neizvi zviro ndinoereketa ndizvo munyika, kuti kudakara kwangu kuzadzisike mukati mwavo. Ndakapa kwavari izwi renyu, nenyika yakavazonda ngokuti avasiri venyika akadi, kudai ndini ndisiri wenyika akadi. Andikumbiri kuti muvaduse kubva munyika, asi kuti muvangwarire kubva kunouwo wakashata. Avasiri venyika akadi, kudai ndini ndisiri wenyika. Vachenesei mugwinyiso; izwi renyu igwinyiso. Kudai ngezvomwakandituma munyika, ngokudaro neniwo ndinovatuma munyika. Ngendaa yavo ndinodzichenesa, kuti navowo vacheneswe mugwinyiso. “Andikumbiriri ava vega, asi naavo vanozotenda kwendiri ngeizwi ravo, kuti veshe vaite umwe; kudai ndimwi, Baba, muri mukati mwangu, neni ndiri mukati mwenyu, kuti navo vagare mukati mwedu, kuti nyika itende kuti imwimwi mwakandituma. Nouthende hwomwakandipa, ndakahupawo kwavari, kuti vaite umwe kudai tisu tiriumwe, inini mukati mwavo nemwi mukati mwangu, kuti vaitwe vakaperera vari umwe, kuti nyika izie kuti imwimwi mwakandituma nokuti mwakavada kudai ngezvemwakandida inini. Baba, ndinoda kuti avowo vowakandipa vaapo pendiri kuti varingire uthende hwangu, uhwo hwomwakandipa inini, murudo rwenyu nyika isati yasikwa. Baba vakarurama, nyika aizi kumuzia asi inini ndinomuzia; naava vakazia kuti imwimwi mwakandituma. Neni ndakavaziisa zina renyu, neni ndichaita kuti riziikanwe, kuti rudo urwo rwomwakandida ndirwo rugare mukati mwavo, neni ndigare mukati mwavo.” Naapo Jesu aereketa mazwi aya, wakabuda nevadzidzi vake, vakaambuka ruseri rwebani reKedhironi, apo paiya nomunda, wakapotera mukati mwawo nevadzidzi vake. Zvino Judhasi, uwo wakamupira, waizia ngendau iyo, ngokuti Jesu waishonganamwo kazhinji nevadzidzi vake. Ndizvo Judhasi wakatora chikwata chemasoja nevarindi vamweni vaibva kuvapristi vakuru nevaFarisi, vakaendapo vanezvibani nemasasi nezvokurwa ndizvo. Zvino Jesu, echizia zveshe zvaizomugumira, wakabuda kwavari, akati, “Munotsvaka anani?” Vakamupingura, vakati, “Jesu weNazaretha.” Wakati kwavari, “Ndini.” Judhasi, uwo wakamupira, waiya akaema navo. Naapo avaronzera kuti, “Ndini,” vakaita fundamutete, vakawa pashi. Ndizvo wakavabvunzazve, akati, “Munotsvaka anani?” Navo vakati, “Jesu weNazaretha.” Jesu wakavapingura, akati, “Ndamuronzera kuti ndini. Ndizvo, kuti mwechitsvaka inini, rekerai vanhu ava vaende.” Izvi kwaiya kuzadzisika kweizwi, iro raakaereketa rinoti, “Avo vomwakandipa andizi kurashikirwa naumwe wavo.” Zvino Simoni Petro waiya aneshoti, wakaishwamura, akatema hloko yomupristi mukuru, akagura nzee yake yokumudyo. Zina rehloko iyo uwo raiya Marikusi. Ndizvo Jesu wakati kunaPetro, “Hwirinza shoti yako mumakara ayo! Tsani yaakandipa Baba andizoimwi here?” Ndizvo chikwata chemajoni nenduna nevarindi vevaJudha vakabata Jesu, vakamusunga. Navo vakamuunza kutanga kunaAnasi, ngokuti waiya muzvere waKaiafasi, uwo waiya mupristi mukuru ngegorero. Ndiye Kaiafasi uwo wakanyowedza vaJudha kuti kwaidikanwa kuti munhu umwe afire vanhu. Simoni Petro wakateera Jesu, nomudzidzi umweni. Zvino uwo mudzidzi waiziikanwa kumupristi mukuru, wakapotera naJesu muruwanze rwomupristi mukuru, asi Petro akaema pamusiwo kubanze. Ndizvo mudzidzi umweni, uwo waiziikanwa kumupristi mukuru, wakabuda pabanze, akaereketa kunouwo waingwarira musiwo, akapotedza Petro. Ndizvo musikana uwo waingwarira musiwo wakati kunaPetro, “Newe auri umwe here wevadzidzi vouyu munhu?” Iye wakati, “Andinipi.” Zvino varanda nevarindi vakabasira muriro wamasimbe, ngokuti kwaiya nechando, navo vaiya vakaema vechigota muriro pachavo. NaPetro wakaemawo navo, echigota pachake. Ndizvo mupristi mukuru wakabvunza Jesu ngendaa yevadzidzi vake nokudzidzisa kwake. Jesu wakamupingura, akati, “Inini ndakaereketa pamhene kuvanhu venyika; nguva dzeshe ndakadzidzisa mumhatso dzokudira nomuTemperi, apo paiungana veshe vaJudha. Andizi kuereketa chiro ngokufishika. Unondibvunzirenyi? Bvunza avo vakazwa zvendakaereketa kwavari; vanozia zvendakaereketa inini.” Naapo aiya aereketa izvi, umwe wevarindi vaiya vakaema apo wakamakaya Jesu ngepama echiti, “Unopingura mupristi mukuru kudaro here?” Jesu wakamupingura echiti, “Kudai ndaereketa zvakashata, pupura ngezvakashata. Asi kudai ndaereketa zvakanaka, unondimakairenyi?” Ndizvo Anasi wakamutumira akasungwa kunaKaiafasi mupristi mukuru. Zvino Simoni Petro wakaema echigota muriro. Ndizvo vakati kwaari, “Newe auri umwe here wevadzidzi vake?” Iye wakavapingura, akati, “Inini andisiri umwe wavo.” Umwe wevaranda vomupristi mukuru, waiya hama youwo waakatema nzee Petro, wakati, “Andizi kukuona unaye mumunda here?” Ndizvo Petro wakarambazve; paripo jongwe rakarira. Ndizvo vakakweya Jesu kubva kunaKaiafasi vechienda naye kumhatso yokutongera. Kwaiya achimangwanani. Ivo vemene avazi kupotera mumhatso yokutongera, kuti vasazosvipiswa, asi kuti vadye Phasika. Ndizvo Piratu wakabuda kwavari, akati, “Indaa yenyi yomunoitira uyu munhu?” Vakapingura, vakati kwaari, “Kudai uyu munhu asiri muiti wezvakashata, taidai tisikazi kumupira kwouri.” Ndizvo Piratu wakati kwavari, “Mutorenyi imwimwi pachenyu mumutonge kudai ngemipango yenyu.” VaJudha vakati kwaari, “Akutenderwi kuti isusu tiuraye munhu nokuti ngouri.” Uku kwaiya kuti rizadzisike izwi iro raakaereketa Jesu echionisa kuti injiranyi yaaizofa ndiyo. Ndizvo Piratu wakapoterazve mumhatso yokutongera, adaidza Jesu, akati kwaari, “Iwewe uri mambo wavaJudha here?” Jesu wakapingura echiti, “Unoereketa izvi pachako here nokuti wazvironzerwa ngevamweni ngendaa yangu?” Piratu wakapingura, akati, “Inini ndiri muJudha here? Dzinza rako nevapristi vakuru vakakupira kwendiri. Chiinyi chowakamboita?” Jesu wakapingura, akati, “Umambo hwangu angohwomunyika muno akadi. Kudai umambo hwangu hwaiya hwomunyika muno, varanda vangu vangadai vakandirwira, kuti ndisapirwa kuvaJudha. Asi zvino umambo hwangu auhuri hwomuno akadi.” Ndizvo Piratu wakati kwaari, “Ndizvo uri mambo here?” Jesu wakapingura akati, “Iwewe unoronza kuti ndiri mambo. Ngeiyi ndaa ndakabarwa, ngeiyi ndaa ndakauya munyika, kuti ndipupurire gwinyiso. Kunyazwi ndiani uri wegwinyiso unozwa izwi rangu.” Piratu wakati kwaari, “Gwinyiso chiinyi?” Aereketa izvi, wakabudazve kuvaJudha, akati kwavari, “Andioni ndaa kwaari. Asi imwimwi muno mutoo wokuti ndisunhure umwe kwomuri ngePhasika. Ndizvo munoda here kuti ndisunhure kwomuri mambo wevaJudha?” Ndizvo vakazhambararazve vechiti, “Haiwa uyu munhu, asi Bharabhasi!” Zvino Bharabhasi waiya dzongoni. Zvino Piratu wakatora Jesu, akamuchaya. Nemasoja akaruka dzungudza reminzwa, akariisa padera pesoro rake, akamupfekesa gauni rakatsvukuruka. Akauya kwaari echiti, “Mwauya, mambo wevaJudha!” Nawo aimuchaya ngenyara dzawo. NaPiratu wakabudazve, akati kwavari, “Ringirai, ndinomubudisa kwomuri, kuti muzie kuti andioni ndaa kwaari.” Ndizvo Jesu wakabuda, akapfekeswa dzungudza reminzwa negauni rakatsvukuruka. Piratu wakati kwavari, “Ringirai uyu munhu!” Naapo vapristi vakuru nevarindi vamuona, vakazhambarara vechiti, “Mukohomere, mukohomere!” Piratu wakati kwavari, “Mutorenyi imwimwi mumukohomere, ngokuti andioni ndaa kwaari.” VaJudha vakamupingura, vakati, “Tinechironzo, ngendaa yechironzo icho unosisira kuti afe, ngokuti iye wakadziita Mukororo waMwari.” Naapo Piratu azwa mazwi aya, wakapinda kutya; wakapoterazve mumhatso yokutongera, akati kunaJesu, “Unombobva pari?” Asi Jesu aazi kumupingura. Ndizvo Piratu wakati kwaari, “Aundipinguri here? Auzii here kuti ndinesimba rokukusunhura, neni ndine simba rokukukohomera?” Jesu wakamupingura, akati, “Aungakoni kuanesimba padera pangu kuti usikazi kuripuwa rechibva mudenga; ndizvo uwo wakandipira kwouri unokushaisha kwakapinda kukura.” Naapo Piratu wakatsvaka kumusunhura, asi vaJudha vakazhambarara vechiti, “Kuti ukasunhura munhu uyu, auri shamwari yaSiza akadi. Kunyazwi ndiani unodziita mambo unoereketa kumukira Siza.” Naapo Piratu azwa aya mazwi, wakabudisa Jesu kubanze, wakagara pachigaro chokutongera ndaa, pandau inozwi Yakagangatwa Mapuwe, asi ngokwechiHebheru inozwi Gabatha. Zvino raiya zuva rokunasirira Phasika, rooda kuita awa rechitanhatu. Wakati kuvaJudha, “Ringirai mambo wenyu!” Ndizvo vakazhambarara vechiti, “Mudusenyi, mudusenyi, mukohomere!” Piratu wakati kwavari, “Ndokohomera mambo wenyu here?” Vapristi vakuru vakapingura vechiti, “Isusu atina mambo asi Siza.” Ndizvo wakamupira kwavari kuti akohomerwe. Ndizvo vakatora Jesu. Naye wakabuda echitwara muchinjiko kuenda kundau inozwi Denhenya, iyo inodaidzwa ngokwechiHebheru kuti, Gorogotha. Apo ndipo pevakamukohomera, pamwepo nevairi vamwe, umwe ngeino noumweni ngeiyo, naJesu ngepakati. Piratu wakanyorazve chinyorwa, akachiisa padera pomuchinjiko. Uku ndikwo kunyorwa kwacho, “JESU WENAZARETA, MAMBO WEVAJUDHA.” VaJudha vazhinji vakadzidza ichi chinyorwa, ngokuti ndau iyo yaakakohomerwa Jesu yaiya pasinde pedhorobha; nacho chaiya chakanyorwa ngechiHebheru nechiRoma nechiGiriki. Ndizvo vapristi vakuru vevaJudha vakati kunaPiratu, “Usanyora kuti, ‘Mambo wevaJudha,’ asi kuti, ‘Iye wakati, ndiri mambo wevaJudha.’ ” Piratu wakapingura akati, “Chendanyora, ndanyora.” Naapo masoja aiya akohomera Jesu, akatora zvokufuka zvake, akazvipaura kuita mirwi mirongomuna, soja rimwe ngarimwe murwi waro. Vakatorazve gauni rake; asi gauni rake nehanzu yake raiya risina musono, asi rakarukwa kubvira ngedera kwaro metsa kubani kwaro. Ndizvo vakaronzerana pakati pavo vechiti, “Tisaribaura, asi ngatiite mabhigidha, tione kuti ngerani;” kuti chinyorwa chizadzisike chinoti, “Vakakoanisirana zvokufuka zvangu pakati pavo, negauni rangu rakaitirwa mabhigidha.” Ndizvo masoja akaita izvi. Asi kwaiya kwakaemapo pasinde pomuchinjiko waJesu mai ake, nahurwani amai ake, Maria mukadzi waKropasi, naMaria Magadhareni. Naapo Jesu aona mai ake nomudzidzi uwo waaida vechiema pasindepo, wakati kunamai ake, “Dzimai, wona mukororo wako!” Zvino wakati kunamudzidzi uwo, “Wona mai ako!” Kubvira ngeawa iro mudzidzi uwo wakavatora kuti vagare kanyi kwake. Ngesure kweizvi Jesu, echizia kuti zviro zveshe zvaiya zvaperera, kuti chinyorwa chizadzisike, wakati, “Ndapera ngenyota.” Paiya nechidziyo chakazara ngevhini rairungura; ndizvo vakaisa siponji chakazara ngevhini rairungura pachimuti chehisopi, vakachiisa pamuromo wake. Naapo Jesu aashira vhini rairungura, wakati, “Zvapera.” Wakakotamisa soro rake naye wakapa mweya wake. Zvino raiya zuva rokunasirira Phasika. VaJudha vakakumbira Piratu kuti mirenje yavo igurwe, vaduswepo kuti miiri isagara pamuchinjiko ngezuva reSabatha, ngokuti Sabatha iro raiya zuva guru. Ndizvo majoni akauya, akagura mirenje yowokutanga neyoumweni, avo vakakohomerwa naye. Asi apo vaguma panaJesu, vakaona kuti waiya afa, avazi kugura mirenje yake. Asi umwe wemajoni wakabaya parutii pake ngomukhondo, paripo pakabuda ngazi nemvura. (Nouwo wakazviona wakaita chapupu, nechapupu chake chine gwinyiso, naye unozia kuti unoereketa gwinyiso, kuti nemwiwo mutende.) Ngokuti izvi zvakaitika kuti chinyorwa chizadzisike chinoti, “Akuna godo rake narimwe rinozogurwa.” Nechinyorwa chimwenizve chinoti, “Vanozomuringira uwo wevakabaya.” Ngesure kweizvi, Josefa weArimathia, uwo waiya mudzidzi waJesu, asi ngokufishika ngokutya vaJudha, wakakumbira Piratu kuti aduse muiri waJesu naPiratu wakamutendera. Ndizvo wakauya, akadusa muiri wake. Nikodhemusiwo wakauya, uwo wakauya kwaari pakutanga usiku, echiunza mutombo wakaita mvemve wemhura nowemuaro, wairema kuda kuguma makhirogiramu makumi matatu. Ndizvo vakatora muiri waJesu, vakauputira ngejira rakachena pamwepo nomutombo wemakha unonuhwira, kudai ngomutoo wevaJudha wokuika. Zvino kwaiyapo munda pandau iyo yaakakohomerwa, nomumunda uwo mwaiya neiba idzva risikazi kumboikwamwo munhu. Ndizvo vakaikamwo Jesu, ngokuti raiya zuva rokunasirira revaJudha, ngokuti iba iro raiya pasindepo. Zvino ngezuva rokutanga revhiki, Maria Magadhareni wakaenda kuiba mangwanani kuchakasvipa, wakaona buwe rakamburumbudzwa kubva paiba. Ndizvo wakarumba, akaenda kunaSimoni Petro nokunomudzidzi umweni, uwo waaida Jesu, akati kwavari, “Vakadusa Mambo kubva muiba, nesu atizii pevakamuradzika.” Ndizvo Petro wakabuda noumweni mudzidzi vakaenda kuiba. Zvino vakarumba vari pamwepo, asi mudzidzi umweniwo wakarumba akapindira Petro, naye wakatanga kuguma paiba. Akakotama pashi, akaringira mukati, akaona machira akachena akaradzikwamwo, asi aazi kupindamwo. Ndizvo Simoni Petro wakagumawo, echimuteera, wakapotera muiba. Akaona machira akachena akaradzikwa, nedhuku iro raiya rakasungwa musoro mwake, risikazi kuradzikwa pamwepo nemachira akachena, asi raiya rakapetwa riri rega pandau imweni. Ndizvo mudzidzi umweni, uwo wakatanga kuguma paiba, wakapoterawo akaona, akatenda; (ngokuti vaiya vasati vazwisisa chinyorwa chinoti unosisira kuti amuke kubva kwevakafa.) Ndizvo vadzidzi avo vakaenda kanyi kwavo. Asi Maria wakaema kubanze kweiba echichema. Achachema wakakotama, akaringira muiba; naye wakaona ngirosi mbiri dzakafuka zvakachena, dzakagara imwe ngokusoro neimweni ngokutsoka, apo powaiya wakaradzikwa muiri waJesu. Nadzo dzakati kwaari, “Dzimai, unochemenyi?” Wakati kwedziri, “Ngokuti vakadusa Mambo wangu, neni andizii pevakamuradzika.” Apo aereketa izvi, wakakunukukira sure, akaona Jesu akaema, asi aazi kuzia kuti ndiJesu. Jesu wakati kwaari, “Dzimai, unochemenyi? Unotsvaka anani?” Aye, echipinimidza kuti waiya murimi, wakati kwaari, “Mambo, kudai wakamudusa kubva pano, ndironzere powakamuradzika, neni ndimutore.” Jesu wakati kwaari, “Maria!” Wakakunukuka, akati kwaari ngechiHebheru, “Rabhoni!” (Ndiwo kuti, Mudzidzisi.) Jesu wakati kwaari, “Usandibata, ngokuti andisati ndakwira kuna Baba. Asi enda kunevanun'una vangu, wooti kwavari, ‘Ndinokwira kuna Baba angu naBaba enyu, nokunaMwari wangu naMwari wenyu.’ ” Maria Magadhareni wakauya, akaronzera vadzidzi kuti, “Ndaona Mambo,” nokuti wakaereketa izvi kwaari. Zvino madeekoni ezuvaro rokutanga revhiki, misiwo yakakonywa umwo mwaiya nevadzidzi ngendaa yokutya vaJudha, Jesu wakauya, akaema pakati pavo, akati kwavari, “Kunyarara ngakugare kwomuri.” Naapo aereketa izvi, wakavaonisa nyara dzake norutii rwake. Naapo vadzidzi vakadakara apo vaona Mambo. Jesu wakatizve kwavari, “Kunyarara ngakugare kwomuri. Kudai ngezvaakandituma Baba, ngokudaro ndinomutumawo.” Naapo aereketa izvi wakavafemera, akati kwavari, “Ashirai Mweya Wakachena. Kunyazwi ndiani womunozorekerera zvishaishi zvake, zvinozorekererwa; kunyazwi ndiani womusikazorekereri, azvizorekererwi.” Zvino Thomasi, umwe wegumi navairi, uwo unozwi Manyambiri, waiya asiripo navo apo Jesu paakauya. Ndizvo vadzidzi vamweni vakati kwaari, “Tamuona Mambo.” Asi iye wakati kwavari, “Kuti ndisaona munyara dzake mauri ezvipikiri, ndipfekemwo chinwe changu mumauri ezvipikiri, ndipfeke nyara yangu parutii rwake, andizotendi.” Ngesure kwemazuva masere, vadzidzi vaiyazve mumhatso naThomasi waiya navo. Jesu wakauya misiwo yakakonywa, wakaema pakati pavo, wakati “Kunyarara ngakugare kwomuri.” Zvino wakati kunaThomasi, “Isa chinwe chako apa, uone nyara dzangu; utambanudze nyara yako, uipfeke parutii rwangu. Usaita usikatendi, asi unotenda.” Thomasi wakapingura, akati kwaari, “Mambo wangu naMwari wangu!” Jesu wakati kwaari, “Wazotenda ngokuti wandiona here? Vanomuchena avo vanotenda vasikazi kuona.” Zvino Jesu wakaita mioniso imweni mizhinji mukuona kwevadzidzi vake, isikazi kunyorwa mutsamba iyi. Asi iyi yakanyorwa kuti imwimwi mutende kuti Jesu ndiKristu, Mukororo waMwari, nokuti ngokutenda muone kupona ngezina rake. Ngesure kweizvi Jesu wakadzionisazve kuvadzidzi vake paRuandhle rweThibheriasi; naye wakadzionisa ngenjira iyi. Vaiya vari pamwepo Simoni Petro naThomasi, unozwi Manyambiri, naNathanaeri, uwo waibva Khana reGarire, nevana vaZebedhi, nevamweni vairi vevadzidzi vake. Simoni Petro wakati kwavari, “Ndinoenda koobata hove.” Vakati kwaari, “Nesu tinoendawo newe.” Vakaenda, vakakwira mungarava, asi usikuhwo avazi kubata chiro. Asi apo kwooita mambakwedza, Jesu wakaema pahumbikumbi, asi vadzidzi avazi kuzia kuti ndiJesu. Ndizvo Jesu wakati kwavari, “Vana, mwabata hove here?” Vakamupingura vechiti, “Haiwa.” Wakati kwavari, “Kandirai rutaa ngokurutii rwokumudyo rwengarava, nemwi munozoona.” Ndizvo vakarukandira, vaiya vasina simba rokurukweya ngendaa yokuwanda kwehove. Ndizvo mudzidzi uwo waaida Jesu wakati kunaPetro, “NdiMambo!” Naapo Simoni Petro azwa kuti ndiMambo, wakasimira jira rake, ngokuti waiya mupunu, wakadzikandira muruandhle. Asi vadzidzi vamweni vakauya vari mungarava, vechikweya rutaa rwakazara ngehove ngokuti vaiya vasiri kuretu nenyika, asi paida kuita zana remamitha. Naapo vaguma kuhumbikumbi, vakaona apo muriro wemasimbe, nehove yakaiswa padera pomuriro, nechingwa. Jesu wakati kwavari, “Unzai dzimweni dzehove dzemwabata zvino.” Simoni Petro wakakwiramwo akakweyera rutaa kuhumbikumbi, rwakazara ngehove huru dzaiya zana nemakumi mashanu nenhatu; kunyazwi dzaiya zhinji kudaro, rutaa aruzi kubauka. Jesu wakati kwavari, “Uyai mudye.” Apana naumwe wevadzidzi waishinga kumubvunza kuti, “Urianani?” Vaizia kuti ndiMambo. Jesu wakauya, akatora chingwa, akavapa, nehove ngokudaro. Zvino iyi yaiya yaanguva yechitatu yaakadzipangidza Jesu kuvadzidzi, ngesure kwokumuka kwake kwevakafa. Naapo vapedza kudya kwemangwanani, Jesu wakati kunaSimoni Petro, “Simoni, mukororo waJohani, unondida kupinda ava here?” Wakati kwaari, “Eya, Mambo, unozia kuti ndinokuda.” Wakati kwaari, “Usha vana vemakwai angu.” Wakati kwaarizve ngokwechipiri, “Simoni, mukororo waJohani, unondida yaamho here?” Wakati kwaari, “Eya, Mambo, unozia kuti ndinokuda.” Wakati kwaari, “Ngwarira makwai angu.” Wakati kwaari ngokwechitatu, “Simoni, mukororo waJohani, unondida here?” Petro wakarwadziwa mwoyo ngokuti wakati kwaari ngokwechitatu, “Unondida here?” Naye wakati kwaari, “Mambo, iwewe unozia zveshe; unozia kuti ndinokuda.” Jesu wakati kwaari, “Usha makwai angu. Ngegwinyiso ndinoti kwouri, apo uchiri mutsva, waidzisimidza, wechihamba kuenda powaida. Asi apo waa musharuka, unozotambanudza nyara dzako, noumweni unozokusimidza nokukuendesa pousikadi.” (Wakaereketa izvi echionisa kuti injira yakaitawani yaizofa ndiyo kuti airikidze Mwari.) Apo aereketa izvi, wakati kwaari, “Nditeere.” Ndizvo Petro echikunukukira sure, wakaona mudzidzi uwo waaida Jesu echimuteera, aye waiya akatseama paditi rake pakudya kwemadeekoni, uwozve wakati, “Mambo, ndiani unozokupira?” Naapo Petro echimuona wakati kunaJesu, “Mambo, uyukee, unozoitenyi?” Jesu wakati kwaari, “Kudai ndechida kuti agare metsa ndiuye, unenyi nazvo iwewe? Nditeere iwewe!” Ndizvo iri izwi rakapararira pakati pevakoma rokuti uyu mudzidzi aazofi. Asi Jesu aazi kuronza kwaari kuti aazofi, asi kuti, “Kudai ndechida kuti agare metsa ndiuye, unenyi nazvo iwewe?” Uyu ndiye mudzidzi uwo unopupura ngeizvi zviro, nowakanyora izvi zviro, nesu tinozia kuti chapupu chake ngechegwinyiso. Asi zviripo zvimweni zvizhinji zvaakaita Jesu; kudai zvakanyorwa chimwe ngachimwe chazvo, ndinoti pamweni nenyika yemene aingaeneri tsamba dzinganyorwa. Mudikani Thofireusi, ndakanyora mubhuku rokutanga zveshe zvaakatanga kuita Jesu nokudzidzisa, metsa kuguma pazuva iro raakaashirwa mudenga, apedza kupanga kubudikidza ndiMweya Wakachena vapostori avo vaaiya akatsanangura. Kwavari wakadzionisa ari unopona ngesure kwokutambudzika kwake ngenjira dzinoonisa gwinyiso dzakawanda, echioneka kwavari kazhinji pakati pemazuva makumi marongomuna, echiereketa ngendaa youmambo hwaMwari. Echigara pamwepo navo wakavapanga kuti vasazobva muJerusarema, asi kuti vagarire chigondiso chaBaba, “Icho chemwakazwa kubva kwendiri; ngokuti Johani wakabhabhatidza ngemvura, asi imwimwi munozobhabhatidzwa ndiMweya Wakachena ngesure kwemazuva mashomani.” Ndizvo, apo vaiya vaungana, vakamubvunza vechiti, “Mambo, ngouyu mukuwo unozohwirinza umambo kunaIsuraeri here?” Wakati kwavari, “Andizvopi zvenyu kuti muzie mikuwo nokuti nguva, izvo zvaakangwarira Baba pashi pesimba rake emene. Asi munozoashira simba apo Mweya Wakachena auya padera penyu; nemwi munozoita zvapupu zvangu muJerusarema, muJudhia mweshe, muSamaria nokumagumo enyika.” Naapo aiya aronza izvi, vacharingira, iye wakamirudzwa kuenda mudenga, negore rakamuashira kumufisha kubva mukuona kwavo. Kwakati vacharingisisa mudenga echikwira, penya, vanhu vairi vakaema pasinde pavo, vane zvokupfeka zvakachena. Vakati, “Vamuna veGarire, munoema ngenyi mwechiringira mudenga? Uyu Jesu watorwa kubva kwomuri kuenda mudenga, unozouyazve kudai ngezvemwamuona echienda mudenga.” Zvino vakapetuka Jerusarema, kubva paMutunhu wemaOrivhi, uri pasinde peJerusarema, muhambo wezuva reSabatha; naapo vaiya vapoteramwo, vakakwira mukamera romuturikwa, umwo mwevaigara, Petro, Johani, Jakobe naAndreu, Firipu, Thomasi Bhathoromeu, Mateu, Jakobe, mukororo waArifeusi, Simoni muZeroti naJudhasi, mukororo waJakobe. Ava veshe vakaangirira kukumbira ngechisungo chimwe, pamwepo nemadzimai, naMaria mai aJesu, nevanun'una vake. Mumazuva awo Petro wakaema pakati pevatendi, (uwandu hwevanhu vaiyapo hwaiya hwechida kuguma zana nemakumi mairi,) akati, “Hama, kunodikanwa kuti chinyorwa chizadzisike, icho chakaereketwa karetu ndiMweya Wakachena kubudikidza ngomuromo waDhavhidha ngendaa yaJudhasi uwo wakaita mutungamiriri weavo vakabata Jesu. Ngokuti iye wakaerengwa pamwepo nesu, akaashira chikoaniswa chake chouyu mushando.” (Zvino munhu uyu wakatenga munda ngomutuso wokusikarurama kwake; naye echiwa ngetsukupinya wakaputika ndani, nematumbu ake eshe akabuda. Zvakaziikanwa ngevagari veshe veJerusarema, ndizvo munda uwo wakadudzwa ngorurumi rwavo kuti, “Akeredhama,” ukwo kunoti, “Munda weNgazi.”) “Ngokuti kwakanyorwa mubhuku reNdwiyo kuti, ‘Ugaro hwake ngahuite shango, munhu asagara mukati mwahwo;’ ‘Mushando wake ngautorwe ngoumweni.’ “Ndizvo umwe wevanhu vakahamba nesu ngomukuwo weshe waakapotera nokubuda Mambo Jesu pakati pedu, kubvira parubhabhatidzo rwaJohani metsa kuguma pazuva raakatorwa mudenga kubva kwetiri, umwe wavo unosisira kuita chapupu nesu chokumuka kwake kubva kwevakafa.” Ndizvo vakaemesa vairi, Josefa waizwi Bharsabhasi, uwo mutupo wake waizwi Justusi, naMathiasi. Vakakumbira vakati, “Iwewe, Mambo, unozia mwoyo yevanhu veshe, wonisa pakati peava vairi uwo wewakatsanangura, kuti atore rupande rwouyu mushando noupostori, hwaakapauka Judhasi kubva kwouri, kuti aende kuugaro hwake.” Navo vakavaitira mabhigidha; nemabhigidha akabata Mathiasi; naye wakaerengwa pamwepo nevapostori vari gumi naumwe. Naapo raguma zuva rePentekosti vaiya vakaungana pamwepo veshe pandau imweyo. Paripo rakaguma kubva mudenga bope rakadai ngokuvhuvhuta kwedutu rine simba, naro rakazadza mhatso yeshe apo pevaigara. Kwakaoneka kwavari ndimi, dzakadai ngemirazvu yomuriro, dzakadziparadzanisa pakati pavo, dzikagara padera pavo veshe. Navo veshe vakazadzwa ndiMweya Wakachena, vakatanga kuereketa ngendimi dzimweni, kudai ngezvaakapa Mweya kwavari kuti vaerekete. Zvino muJerusarema mwaigara vaJudha, vanhu vanodira, vakabva kumadzinza eshe ari pashi pomudenga. Naapo iri bope razwika, mbungano yakaungana pamwepo, navo vakashamiswa ngokuti munhu umwe ngaumwe waivazwa vechiereketa ngendimi yake. Navo vakashamiswa nokukangaidzwa vechiti, “Ringirai, avo veshe vanoereketa avasiri vaGarire here? Nesu teshe tinoita mazwirenyi munhu umwe ngaumwe ngendimi yake yaakabarwa nayo? VaPartia, vaMedhe, vaEramu nevagari veMesopotamia, Judhia neKhapadhosia, Pontusi neAsia, Frigia nePamufiria, Egipite nemarupande eRibhia anotendenedza Kurene, nevaeni vanobva Roma, veshe vaJudha nevemadzinza vanotenda chiJudha, vaKrete nevaArabhia, tinovazwa vechiereketa ngendimi dzedu ngoukuru hwemishando inesimba yaMwari.” Veshe vakashamiswa nokukangaidzwa, vechiti umwe kunoumweni, “Zvinoronzenyi izvi?” Asi vamweni vechiita jee vakati, “Vadhakwa ngevhini idzva.” Asi Petro, echiema pamwepo nevane gumi naumwe, wakadaidzira ngeizwi rake, echichumaira kwavari echiti, “Vanhu veJudhia nemwi mweshe munogara muJerusarema, izvi ngazviziikanwe kwomuri, mupurutane mazwi angu. Ngokuti ava avazi kudhakwa, kudai ngezvomunopinimidza; ngokuti richiri awa rechitatu rezuva; asi izvi ndizvo zvakaereketwa ngomuprofeti Joeri echiti, “ ‘Mwari unoti, Mumazuva okupedzisira kunozoitika kuti ndinozodurura Mweya wangu padera pevanhu veshe, nevakororo venyu nevasikana venyu vanozoprofeta, nemajaha enyu anozoona zvioniso, neharahwa dzenyu dzinozorota hope. Kunyazwi nepadera pevaranda vangu vevamuna nepadera pevarandakadzi vangu ndinozodurura ngaao mazuva Mweya wangu; navo vanozoprofeta. Neni ndinozoonisa zvishamiso mugore nezvioniso munyika, ngazi nomuriro nokupwititika kwechiushi. Zuva rinozotsandurwa kuita chidima nomwedzi kuita ngazi, risati raguma zuva guru nerine mbiri raMambo. Kunozoitika kuti kunyazwi ndiani unozodaidza ngezina raMambo unozoponeswa.’ “Imwimwi vamuna vaIsuraeri, izwai mazwi aya. Jesu weNazaretha, munhu wakaoniswa kwomuri ndiMwari ngemishando ine simba nemishamiso nezvioniso, zvaakaita Mwari kubudikidza ndiye pakati penyu, kudai ngezvomunozia mwemene; uyu Jesu wakapirwa kudai ngokuemeswa kwebangano nokuzia zviri mberi kwaMwari, imwimwi ngenyara dzevanhu vakashata mwakamukohomera nokumuuraya. Asi Mwari wakamumusa, amusunhura pakurwadziwa kworufu, ngokuti azvisaizoitika kuti asungwe ndirwo. Ngokuti Dhavhidha wakaereketa ndiye kuti, ‘Ndakaona Mambo nguva dzeshe andori pamberi pangu; ngokuti iye uri ngokumudyo kwangu kuti ndisazokutukuswa; ndizvo mwoyo wangu wakadakara, norurumi rwangu rwakadakadzwa; kunyazwi nenyama yangu inozogara mukugonda. Ngokuti iwewe auzorekeri mweya wangu muHaidhesi, zve, auzotenderi Wakachena wako kuti aore. Iwewe wakandiziisa njira dzokupona, unozondizadzisa ngokudakara ngokuapo kwako.’ “Hama, ndingaereketa ngokurerukirwa ngendaa yababamukuru Dhavhidha, kuti iye wakafa, akaikwa, neiba rake riri pakati pedu metsa nyamashi. Ndizvo ari muprofeti, echizia kuti Mwari wakapika kwaari ngemhiko kuti unozoemesa umwe wemibarirwana wechiunu chake ngokwenyama kuti agare pachigaro chake choumambo, echiona zvaiya pamberi, wakaereketa ngokumuka kwaKristu kubva kwevakafa, kuti aazi kurekerwa ari muHaidhesi, nokuti nyama yake aizi kuora. Mwari wakamusa uyu Jesu kubva kwevakafa, nesu teshe tiri zvapupu zvakwo. Ndizvo amirudzwa kumudyo waMwari, aashira chigondiso choMweya Wakachena kubva kunaBaba, wakadurura izvi zvomunoona nezvomunozwa. Ngokuti Dhavhidha aazi kukwira mudenga; asi unoti, ‘Mambo Mwari wakati kunaMambo wangu, gara ngokumudyo kwangu, metsa ndaita magaa ako chitambarariro chetsoka dzako.’ “Ndizvo vemhatso yeshe yaIsuraeri ngavazie yaamho kuti Mwari wakamuita Mambo naKristu, Jesu uyu wemwakakohomera.” Naapo vazwa izvi, vakabaiwa mumwoyo, navo vakati kunaPetro nokunevapostori vamweni, “Hama, tinozoitenyi?” NaPetro wakati kwavari, “Tenderukai, mubhabhatidzwe mweshe umwe ngaumwe wenyu ngezina raJesu Kristu, kuti murekererwe zvishaishi zvenyu, nemwi munozoashira chipo choMweya Wakachena. Ngokuti chigondiso chakagondiswa kwomuri nokuvana venyu nokwavari veshe vari kuretu, veshe avo vaanozodaidza Mambo Mwari wedu.” Wakapupura ngemazwi amweni akawanda nokuvapanga echiti, “Dziponesei pachenyu kubva kunouyu mubarirwana wakashongoroka.” Ndizvo avo vakaashira mazwi ake ngokudakara vakabhabhatidzwa, ngezuva rimwero kwakatutsirwa kwavari vanhu vanoda kukwana makumi matatu emazana. Navo vakaangira kungwarira zvidzidziso zvevapostori nokuiyana, mukugura chingwa nomukukumbira. Munhu weshe wakagumirwa ngokutya; nemishamiso yakawanda nezvioniso zvakaitwa kubudikidza ngevapostori. Navo veshe vakatenda vaigara pamwepo, nezviro zvavo vakakowerana pakati pavo pamwepo; navo vaitengesa upfumi hwavo nenhumbi dzavo, vaizvikoanisira kwavari veshe kudai ngokutama kwomunhu. Zuva ngezuva vakagara pamwepo ngechisungo chimwe muTemperi, vechigura chingwa mumizi yavo, vakadya ngokudakara nomwoyo wokuzwanana, vechikudza Mwari, vechidikanwa ngevanhu veshe. NaMambo waitutsira kwavari zuva ngezuva avo vaiponeswa. Zuva rimweni Petro naJohani vaikwira kuTemperi ngeawa rokukumbira, awa rechipfumbamwe. Nomunhu waiya chirema kubvira mundani yamai ake waitwarwa, uwo wevaiisa zuva ngezuva pamusiwo weTemperi, unozwi Musiwo Wakanaka, kuti apemhe kunevaipotera muTemperi. Naapo aona Petro naJohani vooda kupotera muTemperi wakapemha. Petro echimuringisisa, naJohani, wakati, “Ringira kwetiri.” Naye wakavaringira, echikarira kuti unozopuwa chiro ndivo. Asi Petro wakati, “Andina sirivha nomukore; asi ndinokupa icho chendinacho. Ngezina raJesu Kristu weNazaretha, miruka uhambe.” Naye wakamubata ngenyara yokumudyo, akamumirudza; paripo tsoka dzake nemadziso etsoka dzake zvakagwinyiswa. Naye echinyanduka wakaema, akatanga kuhamba, akapotera navo muTemperi, echihamba nokunyanduka, echikudza Mwari. Vanhu veshe vakamuona echihamba, echikudza Mwari, navo vakazia kuti ndiye uwo waigara echipemha zvipo pamusiwo weTemperi unozwi Musiwo Wakanaka. Vakashamiswa nokukangaidzwa ngeizvo zvaiya zvaitika kwaari. Naapo achabata Petro naJohani, vanhu veshe vakarumba kuungana kwavari vari muBerere raSoromoni, vechishamiswa kakurutu. Naapo Petro azviona, wakaereketa kunavanhu, “Imwimwi vanhu vaIsuraeri, munoshamiswa ngenyi ngeizvi? Nokuti munotiringisisa ngenyi ingatei isimba redu nokuti unaku hwedu zvaita kuti ahambe? Mwari waAbrahama, waIsaka, waJakobe nowemadzibaba edu, wakakudza muranda wake Jesu, uwo wemwakapira imwimwi, mukamuramba pamberi pehope yaPiratu, apo paaiya ada kumusunhura. Asi imwimwi mwakaramba uwo Wakachena neWakarurama, mukakumbira kuti muurayi apuwe kwomuri. Mwakauraya Muambi wokupona; uwo waakamusa Mwari kubva kwevakafa. Isusu tiri zvapupu kuneizvi. Ngokugonda zina rake, zina rake remene raita kuti agwinye, uyu munhu womunoona nowomunozia; kubudikidza ngokugonda munaJesu kwaita kuti agwinye kudai pamberi penyu mweshe. “Nazvino hama, ndinozia kuti mwakazviita ngokusikazia, kudai ngezvevakaitawo vatongi venyu. Asi izvo zvaakaronza Mwari ngepamberi ngomuromo wevaprofeti veshe, kuti Kristu wake unozotambudzika, iye wakazvizadzisa kudaro. Ndizvo tenderukai mukunukukire kunaMwari kuti zvishaishi zvenyu zvitsukutidzwe, kuti nguva dzokugwinyiswa mumweya dziuye dzinobva pamberi paMambo, zve, kuti atume Kristu Jesu uwo wakaemeserwa imwimwi. Uwo unosisira kuti aashirwe mudenga metsa nguva yaguma yokumusirirwa kwezviro zveshe, yaakaereketa ndiyo Mwari ngemiromo yevaprofeti vake vakacheneswa kubvira pakutanga. Ngokuti Mosi wakati, ‘Mambo Mwari wenyu unozomumirudzira muprofeti unobva pakati pehama dzenyu, muprofeti wakadai ndini. Munosisira kuzopurutana kuzviro zveshe zvaanozoereketa kwomuri. Kunozoitika kuti weshe usikazopurutani kunouwo muprofeti, unozoparadzwa kubva pakati pevanhu.’ Eya, nevaprofeti veshe, kubvira kunaSamueri naavo veshe vakateera, vakaronza ngaaya mazuva. Imwimwi muri mibarirwana yevaprofeti nevechitenderano chaakaita Mwari namadzibaba enyu, echiti kunaAbrahama, ‘Ngemibarirwana yako madzinza eshe omunyika anozofumiswa.’ Mwari wakamirudza Muranda wake, akamutumira kwomuri kutanga kuti amufumise, ngokutenderudza umwe ngaumwe wenyu kubva mukushata kwenyu.” Apo Petro naJohani vachaereketa kunevanhu, vapristi nenduna yeTemperi nevaSadhusi vakauya kwavari, vakatsamwa kakurutu ngokuti vaidzidzisa vanhu nokuchumaira kumuka kwevakafa munaJesu. Navo vakavabata, vakavaisa mutirongo metsa zuva rechimangwani, ngokuti aiya aamadeekoni. Asi vazhinji vakazwa izwi vakatenda; nouwandu hwevanhu hwaida kuguma makumi mashanu emazana. Ngezuva rechimangwani, vatongi vavo, vakuru nevanyori, vakaungana muJerusarema, naAnasi mupristi mukuru, Kaiafasi, Johani naArekizanda, naavo veshe vaiya vemhatso yomupristi mukuru. Naapo vaiya vavaemesa pakati pavo, vakavabvunza kuti, “Imwimwi mwaita izvi zviro ngesimba nokuti ngezina raani?” Zvino Petro, azadzwa ndiMweya Wakachena, wakati kwavari, “Imwimwi vatongi vevanhu nevakuru, kudai isusu techibvunziswa nyamashi ngendaa yomushando wakanaka wakaitwa kunomunhu wakaremara, kuti waponeswa ngenjira yakaitawani, ngazviziikanwe kwomuri mweshe nokuvanhu veshe vaIsuraeri, kuti ngezina raJesu Kristu weNazaretha, uwo wemwakakohomera, uwo waakamusa Mwari kubva kwevakafa, kubudikidza ndiye, uyu munhu unoema pamberi penyu apona. Uyu ndiye ‘Buwe rakarambwa ndimwi vaaki, uwo wakaita soro repakona.’ Akunazve kuponeswa ngoumweni, ngokuti akuna zina rimweni pashi pomudenga rakapuwa kunavanhu kuti tiponeswe ndiro.” Zvino apo vaona kushinga kwaPetro naJohani, vaona kuti vaiya vanhu vasikazi kudzidza, vanhutu vasina chevanozia, vakashama; navo vakazia kuti vaiya naJesu. Vechiona munhu wakaponeswa echiema navo, avazi kukona kuramba chiro. Asi apo vaiya vavapanga kuti vabve pakati pevatongi, vakapangana pakati pavo vechiti, “Tinozoitenyi ngevanhu ava? Ngokuti zvakaoneka pamhene ngevanhu veshe vanogara muJerusarema kuti ngegwinyiso mushamiso unembiri wakaitwa kubudikidza ndivo; nesu atikoni kuramba. Asi kuti zvisachazopararira pakati pevanhu, ngativakohomedzise kuti vasachazoereketazve kunevanhu kunyazwi ngouri ngezina iri.” Naapo vakavadaidza, vakavapangisisa kuti vasachazoereketa nokuti kudzidzisa ngezina raJesu. Asi Petro naJohani vechipingura vakati kwavari, “Kuti kwakanaka mukuona kwaMwari kupurutana kwomuri kunokupurutana kunaMwari, gurai imwimwi; ngokuti isusu atikoni kurekera kuereketa ngeizvo zviro zvetakaona nezvetakazwa.” Ndizvo apo vaiya vavakohomedzisazve, vakavarekera kuti vaende, vasikaoni ndaa yokuti vavaorore ndiyo, ngendaa yevanhu, ngokuti vanhu veshe vaikudza Mwari ngeizvo zvakaitwa. Ngokuti munhu uwo waiya nemakore anopinda makumi marongomuna okubarwa kwake, uwo chioniso ichi chokuponeswa chakaitwa kwaari. Naapo varekerwa kuti vaende, vakauya kunevanhu vavo, vakavaronzera zveshe izvo zvakaronzwa kwavari ngevapristi vakuru nevakuru. Naapo vazvizwa, vakadaidzira kunaMwari ngechisungo chimwe, vakati, “A Mambo, iwewe ndiwe wakasika denga nenyika noruandhle nazvo zveshe zviri mukati mwazvo; iwewe wakaereketa ndiMweya Wakachena kubudikidza ngomuromo womuranda wako, baba edu Dhavhidha kuti, “ ‘Ngenyi madzinza akaita ushungu nevanhu vakapinimidza zvisina shwiro? Madzimambo enyika akadzinasirira pachavo nevatongi vakaungana pamwepo kumukira Mambo Mwari naKristu wake.’ Ngokuti ngegwinyiso vakaungana mudhorobha iri kumukira Muranda wako wakachena Jesu, uwo wemwakadzodza, veshe Herodhi naPhontiusi Piratu, nemadzinza nevanhu veshe vaIsuraeri, kuita zveshe izvo zvakaemeswa ngepamberi ngenyara yako nangokupanga kwako kuti zviitike. Zvino, Mambo Mwari, ringira kukohomedzisa kwavo, upe kuvaranda vako kuti vaerekete izwi rako ngokushinga kweshe. Naapo mwechitambanudza nyara yenyu kuponesa, zvioniso nemishamiso zvinoitwa kubudikidza ngezina roMuranda wenyu wakachena Jesu.” Naapo vaiya vakumbira, ndau yakazungunyiswa apo pevaiya vakaungana; navo veshe vakazadzwa ndiMweya Wakachena, vakaereketa izwi raMwari ngokushinga. Zvino mbungano yeshe yeavo vakatenda vaiya nomwoyo umwe nomweya umwe, akuna naumwe wavo waironza kuti zviro zvaaiya nazvo zvaiya zvake; asi zveshe zvaiya zvavo veshe. Ngesimba guru vapostori vakaita chapupu chokumuka kwaMambo Jesu kubva kwevakafa; nenyasha huru dzaiya padera pavo veshe. Ngokuti paiya pasina naumwe pakati pavo waitama, ngokuti vazhinji vaiya neminda nokuti mhatso vakazvitengesa, vakaunza mitengo yeizvo zvakatengeswa, vakaiisa patsoka dzevapostori; nazvo zvakakoanisirwa kunaumwe ngaumwe kudai ngokutama kwomunhu. NaJosefa, uwo wakadudzwa ngevapostori kuti, Bhanabhasi, (zvinoronza kuti, “Mukororo wokuembedzera,”) muRevhi, munhu weSaipurasi, wakatengesa munda, naye wakaunza mare, akaiisa patsoka dzevapostori. Asi munhu waizwi Ananiasi, nomukadzi wake Safira, wakatengesa nhaka. Wakasara norupande rwomutengo, nomukadzi wake echizia naye, aunza rupande rwomutengo, wakaruisa patsoka dzevapostori. Asi Petro wakati, “Ananiasi, Sathani wazadza ngenyi mwoyo wako kuti unyepe kunoMweya Wakachena nokusara norupande rwomutengo womunda. Ngenguva uchipo waiya usiri wako here? Nangesure kwokutengeswa kwawo, ausaiya uri pashi pesimba rako here? Wakapinimidza ngenyi izvi mumwoyo mwako? Auzi kunyepera vanhu, asi Mwari.” Naapo Ananiasi echizwa aya mazwi, wakawa pashi, akafa. Nokutya kwakakura kwakagumira avo veshe vakazvizwa. Majaha akamiruka, akamuputira, akamutwara kuenda kubanze koomuika. Ngesure kwomukuwo unoda kuita maawa matatu, mukadzi wake, asikazii izvi zvakaitika, wakapoteramwo. Petro wakati kwaari, “Ndironzere kuti mwakatengesa munda here ngemare yakadai?” Naye wakati, “Eya, ngemare yakadaro.” Asi Petro wakati kwaari, “Mwakatenderana ngenyi kuedza Mweya waMambo? Wona, tsoka dzaavo vaika mwamuna wako dziri pamusiwo, navo vanozokutwara kuenda kubanze.” Paripo wakawa pashi patsoka dzake, akafa. Naapo majaha apotera akamuona afa, akamutwara kumubudisa kubanze, akamuika paiya nomwamuna wake. Nokutya kwakakura kwakagumira veshe vechiara nepadera peavo veshe vakazwa izvi. Zvino zvioniso nezvishamiso zvakawanda zvaiitwa ngenyara dzevapostori pakati pevanhu. Navo vaiyapo veshe ngechisungo chimwe muBerere raSoromoni. Asi akuna naumwe wechikwata chimweni waishinga kuti apindire mukati mwavo, asi vanhu vakavaremeredza. Nevatendi vakapinda kututsirwa kunaMambo, vazhinji vamuna nevakadzi, ndizvo vakabudisa mumapato avo vairwara, vakavaradzika pamanhi nepamisengere, kuti apo Petro echipindapo, bvute rake ritibikire vamweni vavo. Vakaunganawo vanhu vazhinji vechibva kumadhorobha aitendenedza Jerusarema, vechiunza vairwara ngomweya ine tsvina, navo veshe vakaponeswa. Asi kwakamiruka mupristi mukuru, naavo veshe vaiya naye, venhengo yechikwata chevaSadhusi, navo vakazara ngendurumwa, vakabata vapostori, vakavaisa mutirongo risina shwiro. Asi usiku ngirosi yaMambo yakabeura misiwo yetirongo, ikavabudisa kubanze, nayo yakati, “Endai, mueme muTemperi mwechironzera vanhu mazwi eshe okupona uku.” Naapo vazwa izvi, vakapotera muTemperi mangwanani maishi, vakadzidzisa. Naapo mupristi mukuru wakauya naavo vaiya naye, akadaidza pamwepo vatongi veshe nevakuru veshe vevanhu vaIsuraeri, vakatumira izwi kutirongo kuti vavaunze. Asi apo vangwariri veTemperi vakatumwa vagumapo, avazi kuvaona mutirongo, navo vakapetuka vakavaronzera vechiti, “Mhatso yetirongo taiona yakakonywa zvakanaka, nevangwariri vakaema pamisiwo; asi apo tabeura atizi kuona munhu mukati.” Zvino apo nduna yeTemperi nevapristi vakuru vazwa mazwi aya, vakakangaidzwa kakurutu ndivo, kuti izvi zvingazoita mapererenyi. Naapo pakauya munhu umweni akavaronzera echiti, “Wonai, vanhu vemwakakonyera mutirongo vanoema muTemperi vechidzidzisa vanhu.” Naapo nduna pamwepo nevangwariri veTemperi vakaenda, vakavaunza, asi avazi kuita zvokuvaangiridza, ngokuti vaitya kupondwa ngemapuwe ngevanhu. Naapo vaiya vavaunza, vakavaisa pamberi pevatongi. Nomupristi mukuru wakavabvunza echiti, “Takamupangirisisa kuti musazodzidzisa ngeiri zina, zvino wonai, mwazadza Jerusarema ngorudzidziso rwenyu, nemwi munoda kuunza padera pedu ngazi yomunhu uyu.” Asi Petro nevapostori vakapingura, vakati, “Tinosisira kuti tipurutane Mwari, haiwa kupurutana vanhu. Mwari wemadzibaba edu wakamusa Jesu uwo wemwakauraya ngokumuturika pamuti. Iye Mwari wakamumirudza ngokumudyo kwake kuti aite Mutungamiriri noMuponesi, kuti ape kutenderuka kuvaIsuraeri nokukungurirwa zvishaishi. Nesu tiri zvapupu zvaaya mazwi, noMweya Wakachena, uwo waakapa Mwari kwavari vanomupurutana.” Naapo vazwa izvi, vakazadzwa ngoushungu, vakada kuvauraya. Asi umwe wevaFarisi wakamiruka kubva pakati pevatongi, zina rake ndiGamarieri, mudzidzisi weMipango, uwo wairemeredzwa ngevanhu veshe, naye wakapanga kuti avo vanhu vambobudiswa kubanze kwomukuwo mudoko. Wakati kwavari, “Imwimwi vamuna vaIsuraeri, dzingwarirenyi ngeizvo zvomunoda kuita ngeava vanhu. Ngokuti ngemazuva ekaretu Theudhasi wakamiruka, echiti iye waiya mukuru. Vanhu vaida kuita mazana marongomuna vakamuteera; asi wakaurawa, naavo veshe vakamuteera vakaparadzwa, vakapera. Ngesure kwake Judhasi muGarire wakamiruka ngemazuva okunyorwa mazina, wakakweya vanhu vamweni kuti vamuteere; iye naye wakafa, naavo veshe vakapaukiswa ndiye vakapararira veshe. Ndizvo zvino ndinoti kwomuri, taraukai kubva kuneava vanhu, muvarekere vari vega; ngokuti kudai iri zano nouyu mushando zviri zvevanhu, zvinozoparadzwa. Asi kuti zviri zvaMwari, amuna simba rokuvanyisa. Ngokuti pamweni mungadai mwechirwisana naMwari!” Navo veshe vakatenderana naye, naapo vadaidza vapostori kwavari, vakavashwapura, vakapangirisisa kuti vasazoereketa ngezina raJesu, vakavarekera. Ndizvo vakabva pamberi pevatongi, vechidakara ngokuti vakaerengwa kuita vanosisira kuitirwa zvinotsverudza ngendaa yezina rake. Mazuva eshe muTemperi nomumakanyi avazi kurekera kudzidzisa nokuchumaira ndiJesu kuti ndiye Kristu. Zvino mumazuva aya, apo vadzidzi vaiangira kuwanzwa, vaJudha vaiereketa chiGiriki vakavhuruvhutira vaHebheru, ngendaa yokuti shirikadzi dzavo dzairekeredzwa mukukoanisirwa kwezuva ngezuva. Nevari gumi navairi vakadaidza kwavari chiunga chevadzidzi, vakati, “Akusisiri kuti isusu tisiye izwi raMwari, tishande pamatafura. Ndizvo, hama dzangu, tsanangurai vamuna vanomwe kubva pakati penyu vanogondeka, vakazara ndiMweya nokungwara, vetingaemesa padera pouyu mushando. Asi isusu tinozoangira mukukumbira nomumushando weizwi.” Neizwi iro rakadakadza chiunga cheshe, navo vakatsanangura Stefano, munhu wakazara ngokugonda noMweya Wakachena, Firipu, Prokhorusi, Nikano, Thimona, Phamenasi naNikorusi weAntiokhi waiya akatenderukira kuchiJudha. Vakavaisa pamberi pevapostori, naapo vaiya vakumbira, vakaisa nyara dzavo padera pavo. Neizwi raMwari rakaangira kupararira; chiunga chevadzidzi chakaangira kukura kakurutu muJerusarema; nevapristi vazhinji vakapurutana mukutenda. Stefano azara ngenyasha nesimba, waiita mishamiso nezvioniso zvikuru pakati pevanhu. Zvino vamweni veavo vemhatso yokudira vanozwi Vanhu Vakasununguka, nevaKurene, nevaArekizanda, neavo vanobva Sirisia, nevaAsia, vakamiruka vechiita hasha naStefano. Navo avazi kukona kuemesedzana noungwaru noMweya zvaakaereketa ndizvo. Naapo ngokufishika vakanyengerera vanhu kuti vati, “Takamuzwa echiereketa mazwi okutuka Mosi naMwari.” Navo vakavherudza vanhu nevakuru nevanyori, vakamutsotokera, vakamubata, vakamuunza kune vatongi. Vakaemesa zvapupu zvokunyepa, izvo zvakati, “Munhu uyu aatongorekeri kuereketa mazwi okutuka iyi ndau yakachena neMipango; ngokuti takamuzwa echironza kuti, uyu Jesu weNazaretha unozoparadza ndau iyi, nokupinduridza mitoo yaakapa kwetiri Mosi.” Naavo veshe vaiya vakagara pavatongi, vechimuringisisa, vakaona hope yake yakadai ngehope yengirosi. Zvino mupristi mukuru wakati, “Izvi zvine gwinyiso here?” Naye wakati, “Hama nemadzibaba, purutanai kwendiri. Mwari wouthende wakaoneka kunababa edu Abrahama, apo pevaigara muMesopotamia, vasati vagara muHarani, wakati kwaari, ‘Buda munyika yako nokubva kuhama dzako, uende munyika yendinozokupangidzira.’ Naapo wakabuda kubva munyika yevaKharadhea, akagara muHarani. Ngesure kwokufa kwababa ake, Mwari wakamuthuthisa kubveyo kuti auye munyika iyi yomunogara zvinopano imwimwi; naye aazi kumupa nhaka mukati mwayo, haiwa kunyazwi nepanokwana kutsikwa ngetsoka, asi wakamugondisa kuti unozoipa kwaari kuti iite nhaka yake neyorudzi rwake runozouya sure kwake, apo paaiya asati abara mwana. NaMwari wakaereketa ngenjira iyi kuti, ‘Mibarirwana yake inozoita vanhu vapara munyika yevamweni, avo vachavaita hloko dzavo, vechivabata ngenjira yakashata metsa kupera kwemakore mazana marongomuna. Asi ndinozoritonga iro dzinza revanozoitwa ndiro hloko,’ wakaronza Mwari, ‘Nangesure kweizvo vanozobuda, vandidire mundau iyi.’ Naapo wakamupa chitenderano chokuchekwa. Ndizvo Abrahama abara Isaka, wakamucheka ngezuva rechisere; naIsaka wakabara Jakobe naJakobe wakabara madzibaba mukuru gumi navairi. “Nemadzibaba mukuru vakaita ndurumwa ndiJosefa, vakamutengesa Egipite; asi Mwari waiya naye, naye wakamununurira kubva kumadambudziko ake eshe, wakamupa nyasha noungwaru pamberi paFaro, mambo weEgipite, uwo wakamuemesa kuti aite mutongi padera peEgipite nemhatso yake yeshe. Zvino nzara yakauya padera penyika yeshe yeEgipite neyeKhenani, nokutambudzika kukurutu; nemadzibaba edu avazi kuona zvokudya. Asi apo Jakobe azwa kuti yaiyamwo koroni muEgipite, wakatuma madzibaba edu panguva yokutanga. Parwendo rwechipiri, Josefa wakaita pachake kuti aziikanwe kuvakoma vake, nehama dzaJosefa dzakaziikanwa kunaFaro. NaJosefa wakavatuma koodaidza kuti vauye kwaari baba ake Jakobe nehama dzake dzeshe, vanhu makumi manomwe navashanu; ndizvo Jakobe wakadzaka kuenda Egipite. Naye wakafa, iye namadzibaba edu, navo vakatwarwa kupetudzwa Shekemi, vakaikwa muiba raakatenga Abrahama ngesirivha kubva kuvakororo vaHamori muShekhemu. “Naapo wakwedzera mukuwo wechigondiso, chaakapika Mwari kuna Abrahama, vanhu vakaangira kuwanda nokuita vazhinji muEgipite, metsa ‘Kwagadzwa mambo umweni kutonga padera peEgipite, uwo waiya asikazii Josefa.’ Wakabata dzinza redu ngourimbwi, wakaangiridza madzibaba edu kuti varashe vana vavo, kuti vasapona. Panguva iyi Mosi wakabarwa, naye waiya akanaka kakurutu pamberi paMwari. Wakarerwa mwedzi mitatu mumhatso yababa ake; naapo aiswa pabanze, mwanasikana waFaro wakamutonha, akamurera kuti aite mwana wake. NaMosi wakadzidziswa ungwaru hweshe hwevaEgipite, waiya akagwinya mumazwi ake nomumishando yake. “Naapo aguma makore makumi marongomuna okubarwa, wakada mumwoyo mwake kuti ahambire hama dzake vana vaIsuraeri. Naapo echiona umwe wavo echishaishirwa, wakarwira uwo waitsikirirwa, akauraya muEgipite. Asi wakapinimidza kuti hama dzake dzaizwisisa kuti Mwari waida kuvaponesa kubudikidza ngenyara yake, asi avazi kuzwisisa. Ngezuva raiteera, wakaguma kwavari vechiambana, naye wakaereketa kwavari kuti avaiyanise echiti, ‘Vamuna, muri hama; munoshaishirana ngenyi?’ Asi iye waishaishira muakirwana wake wakamututumidza echiti, ‘Ndiani wakakuemesa kuita mambo nomutongi padera pedu? Iwewe unoda kundiuraya here kudai ngezvewakauraya muEgipite zuro?’ Naapo Mosi azwa izwi iro wakatiza, akaita chigarandimo munyika yeMidhiani, apo paakabara vakororo vairi. “Naapo makore makumi marongomuna apera, ngirosi yakaoneka kwaari ari mushango roMutunhu weSinai, iri mumirazvu yomuriro. Naapo Mosi echiona, wakashamiswa ngechioniso; achakwedzera kuringira, izwi raMambo Mwari rakazwika rechiti, ‘Inini ndini Mwari wemadzibaba ako, Mwari waAbrahama, waIsaka nowaJakobe.’ NaMosi wakahuta, akatya kuringira. Mambo Mwari wakati kwaari, ‘Dusa magwada kubva patsoka dzako, ngokuti pandau pewakaema pamavhu akachena. Ngegwinyiso ndakaona kutambudzwa kwevanhu vangu vari muEgipite, ndakazwa kugomera kwavo, ndadzaka kuti ndivanunure. Zvino uya, ndinozokutuma Egipite.’ “Ndiye uyu Mosi wevakaramba vechiti, ‘Ndiani wakuita mambo nomutongi?’ Ndiye wakatumwa ndiMwari kuti aite mambo nomusunhuri kubudikidza ngengirosi yakaoneka kwaari mupfiba. Uyu munhu wakavatungamirira kubuda, aita mishamiso nezvioniso munyika yeEgipite nomuRuandhle Rwakatsvuka nomushango kwemakore makumi marongomuna. Uyu ndiye Mosi uwo wakati kuvana vaIsuraeri, ‘Mwari unozomumirudzira Muprofeti kubva muhama dzenyu, wakadai ndini.’ Uyu ndiye waiya mumbungano mushango nengirosi yakaereketa kwaari paMutunhu weSinai, anemadzibaba edu; uwo wakaashira mazwi okupona kuti aape kwetiri. Madzibaba edu akaramba kumupurutana, asi vakamututumidza parutii kubva kwavari, vakakunukudzira mwoyo yavo kuhwirira Egipite, vechiti kunaAroni, ‘Tiitire zvimwari zvinozotitungamirira; ngokuti uyu Mosi wakatibudisa kubva kunyika yeEgipite, atizii chakaitika kwaari.’ Navo vakaumba konyana ngaawo mazuva, vakaita mudiro kunouwo muedzaniso, vakadakara ngomushando wenyara dzavo. Asi Mwari wakavafuratira, akavarekera kuti vadire hondo dzomudenga, kudai ngezvakanyorwa mubhuku revaprofeti kuti, “Mwakapira kwendiri here mhuka dzakaurawa nemidiro kwemakore makumi marongomuna muri mushango, imwimwi vemhatso yaIsuraeri? Nemwi mwakatora tende raMorekhi nenyeredzi yechimwari chenyu Refani, miedzaniso yemwakaita kuti muidire; neni ndinozomututisa kuenda mberi kweBhabhuroni. “Madzibaba edu vaiya netende rechapupu mushango, kudai ngezvaakaemesa uwo wakaereketa kunaMosi, kuti ariite kudai ngechionero chaakaona. Iro rakaashirwa ngemadzibaba edu vakapotera naro naJoshua, apo pevakapotera kugara nhaka yevemadzinza, aakadzinga Mwari kubva pamberi pehope dzemadzibaba edu. Naro rakaapo metsa kuguma kumazuva aDhavhidha, uwo wakaona nyasha pamberi paMwari, akadisisa kuti atsvakire mhatso yaJakobe ugaro. Asi ndiSoromoni wakazomuakira mhatso. Asi Uripadera pazveshe aagari muugaro hwakaitwa ngenyara; kudai ngezvaakaereketa muprofeti echiti, “Denga ndicho chigaro changu choumambo, nenyika ndicho chitambarariro chetsoka dzangu. Munozondiakira mhatso yakadini, unoronza Mambo Mwari, nokuti ngeiri ndau yokuzorora kwangu? Nyara yangu aizi kuita izvi zveshe here? “Imwimwi mune mitsipa yakakukutara, nevano mwoyo nenzee zvisikazi kuchekwa, munondogara mwechirwisana noMweya Wakachena; kudai ngezvevakaita madzibaba enyu, ndizvo zvomunoitawo imwimwi. Ngouri wevaprofeti usikazi kutambudzwa ngemadzibaba enyu? Navo vakauraya avo vakavaronzera ngepamberi ngokuuya kwoUmwe Wakarurama, zvinopano imwimwi mwakamupira nokumuuraya. Imwimwi mwakaashira Mipango yakaunzwa ngengirosi, nemwi amuzi kuingwarira.” Naapo vechizwa izvi vakanyangadzwa navo vakamukwetsera mazino. Asi iye azadzwa ngoMweya Wakachena, akaringira mudenga, akaona uthende hwaMwari naJesu akaema ngokumudyo kwaMwari. Akati, “Ringira, ndinoona mudenga mwakabeurwa, noMukororo woMunhu akaema ngokumudyo kwaMwari.” Asi vakadaidzira ngeizwi guru, vakatsiira nzee dzavo, vakamutsotokera ngechisungo chimwe. Navo vakamubudisa kubanze kwedhorobha, vakamuponda ngemapuwe. Nezvapupu zvakaisa zvokufuka zvavo patsoka dzejaha raizwi Sauri. Navo vakaponda Stefano ngemapuwe; wakakumbira echiti, “Mambo Jesu, ashirai mweya wangu.” Naye wakagwadama pashi, akadaidzira ngeizwi guru echiti “Mambo, usavaitira ndaa ngouku kushaisha.” Naapo aereketa izvi, wakafa. NaSauri waiya mubangano rokuurawa kwake. Kwakabuda ngeiro zuva kutambudzwa kukurutu kwechiara chaiya muJerusarema; navo veshe vakapararira munyika yeJudhia neSamaria, kwakasara vapostori vega. Nevanhu vaidira vakaika Stefano, vakamuchema kakurutu. Asi Sauri waiparadza chiara, echipotera mumhatso ngemhatso, nokubata ngesimba veshe vamuna nevakadzi nokuvakonyera mutirongo. Ndizvo avo vakapararira vakahambira ndau dzeshe vechichumaira izwi. Firipu wakadzaka kudhorobha reSamaria, wakachumaira kwavari ndiKristu. Vanhu vazhinji vakapurutana ngechisungo chimwe kune izvo zvaironzwa ndiFiripu, apo vazwa, vaona zvioniso zvaakaita. Ngokuti kwakabuda mweya yetsvina kubva muvazhinji vaiya nayo, yechidaidzira ngeizwi guru; nevazhinji vaiya vakaoma muiri nezvirema vakaponeswa. Kwakaapo kudakara kukurutu mudhorobha iro. Asi waiyapo munhu umweni, zina rake raizwi Simoni, waikamba mudhorobha iro, echishamisa dzinza revaSamaria, echironza kuti iye waiya mukuru. Vakamupurutana veshe, kubvira kuvadoko metsa kuvakuru vechiti, “Uyu munhu isimba guru raMwari.” Navo vakamupurutana ngokuti kubvira mukuwo wakareba iye waiya avashamisa ngokukamba kwake. Asi apo vakatenda Firipu waiya echichumaira mashoko akanaka ngendaa youmambo hwaMwari nezina raJesu Kristu, vakabhabhatidzwa, veshe vamuna nevakadzi. Kunyazwi naye Simoni wakatenda. Abhabhatidzwa wakaangira kugara naFiripu; wakashamiswa kakurutu echiona zvioniso nemishamiso mikuru yechiitwa. Naapo vapostori vaiya muJerusarema vazwa kuti vaSamaria vaiya vaashira izwi raMwari, vakatuma kwavari Petro naJohani. Avo vairi vadzakayo, vakavakumbirira kuti vaashire Mweya Wakachena; ngokuti waiya usati wadzaka padera poumwe wavo, asi vaiya vakabhabhatidzwa ngezina raMambo Jesu. Naapo vakaisa nyara dzavo padera pavo, vakaashira Mweya Wakachena. Zvino apo Simoni aona kuti Mweya wakapuwa kubudikidza ngokuiswa kwenyara dzevapostori padera pavo, iye wakada kuvapa mare echiti, “Ndipeiwo iri simba kuti kunyazwi ndiani wendinozoisa nyara yangu padera pake, unozoashira Mweya Wakachena.” Asi Petro wakati kwaari, “Mare yako ngaipere pamwepo newe, ngokuti wapinimidza kuti chipuwo chaMwari chingatengwa ngemare! Iwewe auna rupande nokuti chikoaniswa kuiyi ndaa, ngokuti mwoyo wako auzi kururama pamberi paMwari. Ndizvo tenderuka ubve mukushaisha kwako uku, ukumbire kunaMambo, kuti pamweni kungarekererwa kwouri kupinimidza kwomwoyo wako. Ngokuti ndinoona kuti uri muchanduru chinovava nomukusungwa ngemaketani okushaisha.” NaSimoni wakapingura, akati, “Ndikumbirirei kunaMambo kuti ndisazogumirwa ngechimwe cheizvo zvemwaereketa.” Ndizvo apo vaiya vaita chapupu nokuereketa izwi raMambo, vakapetuka Jerusarema, vechichumaira vhangeri mumizi mizhinji yevaSamaria. Asi ngirosi yaMambo yakaereketa kunaFiripu yechiti, “Miruka, uende kubani ngenjira inodzaka kubva Jerusarema kuenda Gaza. Iyi injira yomushango.” Naye wakamiruka, akaenda. Ringira, munhu weEthiopia, muthenwa, nduna huru yaKhandase mambokadzi weEthiopia, waingwarira upfumi hwake hweshe, waiya akauya Jerusarema koodira. Iye waipetuka; akagara mungoro yake, naye waifunda bhuku romuprofeti Isaya. NoMweya wakati kunaFiripu, “Kwedzera ushongane nengoro iyi.” Firipu wakarumba kuenda kwaari, wakamuzwa echifunda bhuku raIsaya muprofeti, wakabvunza akati, “Unozwisisa here izvi zvounofunda?” Naye wakapingura akati, “Ndingaita mazwisisirenyi, asi kuti umwe anditungamirira?” Naye wakapota Firipu kuti akwire, agare naye. Norupande rwezvinyorwa rwaaifunda rwaiya urwu, “Iye wakakweiwa kudai ngegwai koourawa, nokudai ngemwana wegwai rinonyarara pamberi pounorigunda, ngokudaro aabeuri muromo wake. Mukutsverudzwa kwake kutonga kwakarurama kwakabviswa kwaari. Ndiani unozoronza mibarirwana yake? Ngokuti kupona kwake kwakatorwa kubva munyika.” Nomuthenwa wakapingura kunaFiripu, akati, “Ndinokupota, muprofeti unoereketa izvi ndiani, ndiye emene here nokuti unoereketa ngoumweni?” Naapo Firipu wakabeura muromo wake, akatanga kubvira pachinyorwa ichi, wakachumaira kwaari ndiJesu. Vachahamba munjira, vakaguma pamvura; nomuthenwa wakati, “Ringira, mvura iri pano. Chiinyi chinondirambidza kuti ndisabhabhatidzwa?” [ Firipu wakapingura, akati, “Kudai wechitenda ngomwoyo wako weshe, kunotenderwa.” Naye wakapingura echiti, “Ndinotenda kuti Jesu Kristu Mukororo waMwari.”] Naye wakapanga kuti ngoro iemeswe. Navo veshe vakadzaka mumvura, Firipu nomuthenwa, naye wakamubhabhatidza. Naapo vabuda kubva mumvura, Mweya waMambo wakabvisa Firipu; nomuthenwa aazi kuchamuona, ngokuti iye wakaenda munjira yake echidakara. Asi Firipu wakaoneka ari muAzotusi; echihamba, wakachumaira vhangeri mumadhorobha eshe metsa wakaguma Sizaria. Asi Sauri echifemurika ngoushungu wokuda kuuraya vadzidzi vaMambo, wakaenda kumupristi mukuru, akakumbira kwaari tsamba dzokuenda Dhamasekusi, kumhatso dzokudira, kuti kudai echizoona vateeri veNjira iyi, kunyazwi vamuna nokuti vakadzi, waizovaunza vakasungwa Jerusarema. Zvino echihamba wakakwedzera Dhamasekusi. Paripo kujeka kwakauya kwechibva mudenga kumutendenedza. Naye wakawa pashi, wakazwa izwi rechiti kwaari, “Sauri, Sauri, unonditambudzirenyi?” Naye wakati, “Urianani, Mambo?” Wakati, “Ndini Jesu uwo wounotambudza; [kwakakonza kwouri kupunhura zvibaiso zvinopinza.” Asi iye echihuta nokushama wakati, “Mambo, unoda kuti ndiitenyi?” NaMambo wakati kwaari,] “Asi miruka, upotere mudhorobha, naapo unozoronzerwa iwewe izvi zvinosisira kuti uite.” Vamuna vaihamba naye vakaema vasikaereketi, vechizwa izwi, asi vasikaoni munhu. Sauri wakamiruka kubva pashi, naapo abeura madziso ake, aazi kuona chiro; ndizvo vakamubata ngenyara, vakamuunza muDhamasekusi. Naye wakaita mazuva matatu asikaoni, asikazi kudya nokuti kumwa. Zvino waiyamo mudzidzi muDhamasekusi, zina rake raizwi ndiAnaniasi. Mambo wakati kwaari muchioniso, “Ananiasi,” naye wakati, “Ndiri pano, Mambo.” NaMambo wakati kwaari, “Miruka uende mupato rinozwi Rakarurama, ubvunze mumhatso yaJudhasi munhu unozwi ndiSauri weTharsusi; ngokuti, ringira, iye unokumbira, naye waona muchioniso munhu unozwi ndiAnaniasi, echipotera nokuisa nyara dzake padera pake, kuti aonezve.” Asi Ananiasi wakapingura echiti, “Mambo, ndakazwa ngevanhu vazhinji ngendaa yomunhu uyu, ngokuwanda kweizvo zvakashata zvaakaita kune vakacheneswa venyu muJerusarema; nepano unaro simba raakapuwa ngevapristi vakuru kuti asunge avo veshe vanokumbira ngezina renyu.” Asi Mambo wakati kwaari, “Enda, ngokuti mudziyo wakatsanangurwa ndini kuti atware zina rangu kune vemadzinza nemadzimambo nokuvana vaIsuraeri. Ngokuti inini ndinozomuonisa zveshe zvaanosisira kuzotambudzwa ndizvo ngendaa yezina rangu.” Ndizvo Ananiasi wakaenda, akapotera mumhatso. Echiisa nyara dzake padera paSauri, akati, “Mukoma Sauri, Mambo Jesu, uwo wakaoneka kwouri munjira yewakauya ndiyo, wandituma kuti uonezve, uzadzwe ndiMweya Wakachena.” Paripo zvakawa kubva kumadziso ake zviro zvakadai ngemagwamba ehove, naye wakaonazve. Wakamiruka, akabhabhatidzwa, wakadya zvokudya, akagwinyiswa. Sauri wakagareyo mazuva amweni nevadzidzi muDhamasekusi. Paripo mumhatso dzokudira wakachumaira ndiJesu echiti, “Uyu Mukororo waMwari.” Veshe vakamuzwa vakashamiswa vechiti, “Uyu andiyepi here wakauraya avo vaikumbira ngezina iro muJerusarema? Naye wakauya pano here ngeichi chizato, kuti aende navo vakasungwa pamberi pevapristi vakuru?” Asi Sauri wakaramba echigwinyiswa, akanasa kugutsa vaJudha vaigara muDhamasekusi, echikohomedzisa kuti uyu Jesu ndiye Kristu. Nangesure kwemazuva mazhinji apera, vaJudha vakapangana kumuuraya, asi bangano ravo rakaziikanwa kunaSauri. Vakarinda misiwo masikati nousiku kuti vamuuraye; asi vadzidzi vake vakamutora usiku, vakamubudisa ngepaburi reparukumbati, vakamudzasa ari mudendere. Naapo aguma Jerusarema, wakaedza kuti abatanewo nevadzidzi; navo veshe vakamutya, vasikatendi kuti waa mudzidzi. Asi Bhanabhasi wakamutora, akamuunza kune vapostori, wakadudzira kwavari maonere aakaita Mambo munjira, nenjira yaakaereketa ndiyo kwaari, nenjira yaaiya akachumaira ngezina raJesu ngokushinga muDhamasekusi. Ndizvo wakagara navo echihamba kupotera nokubuda pakati pavo muJerusarema, akachumaira ngokushinga ngezina raMambo. Wakaereketa echiphikisana nevaJudha vaiereketa chiGiriki, asi vakatsvaka mazano okuda kumuuraya. Asi apo hama dzazvizia, vakamudzasa kuenda Sizaria, vakamutumira Tharsusi. Ndizvo chiara cheshe chaiya muJudhia nomuGarire neSamaria chakaona kunyarara, chikaakiwa, nacho chechihamba ngokumutya Mambo nomukuembedzerwa ndiMweya Wakachena, chakawandiswa. Kwakaitika kuti Petro echihamba kundau dzeshe pakati pavo veshe wakadzaka kune vakacheneswa vaigara Ridha. Naapo wakaona munhu waizwi ndiAeneasi, uwo waiya akaata mumubhedhi wake makore masere, ngokuti waiya akaoma muiri. Petro wakati kwaari, “Aeneasi, Jesu Kristu unokuponesa; miruka, unasire mubhedhi wako.” Paripo iye wakamiruka. Naavo veshe vaigara muRidha nomuSharoni vakamuona, vakatenderukira kunaMambo. Zvino kwaiyapo muJopa mudzidzi, zina rake raizwi Thabhitha, ukwo kunoti ngokukumuchwa, Dhokasi. Iri dzimai raiya nemishando yakanaka nokukovera zvipo. Kwakaitika ngaawo mazuva, kuti rakarwara, rikafa. Naapo vaiya varishambidza, vakariisa mukamera romuturika. Ngokuti Ridha raiya pasinde peJopa, vadzidzi vechizwa kuti Petro waiyamwo, vakatuma vanhu vairi kwaari, vechimupota vechiti, “Usanonoka kuuya kwetiri.” Ndizvo Petro wakamiruka, akaenda navo. Naapo aguma, vakamuunza mukamera romuturika; shirikadzi dzeshe dzakaema pasinde pake dzechichema, dzechipangidzira mabhachi nezvokufuka zvaakaita Dhokasi, achiripo navo. Petro wakabudisa veshe pabanze, wakagwadama, akakumbira. Akunukukira kunomuiri, akati, “Thabhitha, muka.” Naye wakasvinura madziso ake, naapo aona Petro, wakamuka, akagara. Naye amubata ngenyara yake wakamumirudza. Naapo adaidza vakacheneswa neshirikadzi wakamuisa pamberi pavo echipona. Zvakaziikanwa mukati mweJopa reshe, vazhinji vakatenda kuna Mambo. Naye wakagara mazuva mazhinji muJopa nomunhu unozwi Simoni, musukuti. MuSizaria waiyamwo munhu waizwi Khoneriusi, nduna yezana yechikwata chemajoni chaizwi cheItaria. Waiya munhu unodira nounotya Mwari pamwepo nevemhatso yake yeshe, wakakovera zvipo ngenyasha kuvanhu nokugara echikumbira kunaMwari. Zvino nguva yooda kuita awa rechipfumbamwe rezuva, wakanasa kuona muchioniso ngirosi yaMwari yechipotera, yechiti kwaari, “Khoneriusi.” Wakaringisisa ngirosi echitya, akati, “Chiinyi, Mambo?” Nayo yakati kwaari, “Mikumbiro yako nokukovera zvipo kwako zvakakwira kuita mucherechedziso pamberi paMwari. Zvino tuma vanhu kuJopa vaunze munhu unozwi Simoni, uwo unozwi Petro. Iye unogara nomunhu unozwi Simoni, musukuti, mhatso yake iri pasinde poruandhle.” Apo ngirosi yakaereketa kwaari yaenda, wakadaidza vairi vevaranda vemhatso yake, nejoni raidira reavo vaigara vechimushandira, naapo aronza kwavari zveshe, wakavatuma kuenda Jopa. Zvino nechimangwani, avo vachahamba vechikwedzera kudhorobha, Petro wakakwira padenga remhatso rakaterama kookumbira, rooda kuita awa rechitanhatu. Wakazwa nzara, echidisisa kuti adye chiro; asi vachanasirira, wakabatwa ndimweya. Naye wakaona denga rakabeuka, nechiro chaidzaka chakadai ngejira gurutu rakadzaswa panyika rakasungwa marupande aro marongomuna. Mukati mwaro mwaiya nembeu dzeshe dzemhuka dzine mirenje mirongomuna nezvipuka zveshe zvinotamanda zvomunyika neshiri dzomudenga. Neizwi rakauya kwaari rechiti, “Miruka, Petro; uraya, wechidya.” Asi Petro wakati, “Haiwa, Mambo! Ngokuti andizi kumbodya chiro chisina shwiro nechakasvipiswa.” Neizwi rakauyazve kwaari ngokwechipiri rechiti, “Chaakachenesa Mwari, usati achina shwiro.” Ichi chakaitika mikuwo mitatu, jira rakaashirwazve mudenga. Zvino Petro achakangaidzwa mukati mwake kuti chinoronzenyi chioniso icho chaaiya aona, penya, avo vanhu vakatumwa ndiKhoneriusi, vaiya vechibvunza mhatso yaSimoni, vakaema pamusiwo. Navo vakadaidzira, vakabvunza kuti, Simoni unozwi Petro unogarapo here. NaPetro achapinimidza ngechioniso, Mweya wakati kwaari, “Ringira, vanhu vatatu vanokutsvaka. Asi miruka udzake, uende navo usikagonondi; ngokuti ndini ndakavatuma.” Petro wakadzaka kune vanhu avo, akati, “Ndini uwo womunotsvaka; mwahambirenyi?” Navo vakati, “Khoneriusi, nduna yezana, munhu wakarurama nounotya Mwari, unembiri yakanaka kudzinza reshe revaJudha, wakapangwa ngengirosi yakachena kukudaidza kuti uuye kumhatso yake, nokuzwa mazwi anobva kwouri.” Ndizvo Petro wakavadaidza kuti vapotere mukati, wakavapa zvokudya. Nechimangwani wakamiruka, akaenda navo, nehama dzimweni dzeJopa dzakaendawo naye. Nechimangwani vakapotera muSizaria, naKhoneriusi waivagarira, waiya adaidza pamwepo hama dzake neshamwari dzake dzinodikanwa. Naapo Petro apotera, Khoneriusi wakashongana naye, akawira patsoka dzake, akamudira. Asi Petro wakamumirudza echiti, “Miruka; neniwo ndiri munhu.” Naapo achaereketa naye, wakapotera mukati, akaona vazhinji vakaungana; akati kwavari, “Imwimwi munozia kuti azvitenderwi ngemipango kuti muJudha ashonganiswe nokuti auye kunomunhu wedzinza rimweni. Asi inini Mwari wakandipangidzira kuti ndisazoronza kuti munhu chiro chisina shwiro nokuti wakasvipiswa. Ndizvo apo ndadaidzwa, ndauya ndisikarambi. Ndizvo ndinobvunza mwakandidaidzirenyi?” NaKhoneriusi wakati, “Aamazuva marongomuna akapinda, metsa kuguma awa iri, ndaingwarira awa rokukumbira rechipfumbamwe mumhatso yangu; ndakaona munhu wakaema pamberi pangu anezvokufuka zvinon'anikira. Naye wakati, ‘Khoneriusi, mikumbiro yako yakazwika, nokukovera zvipo kwako kwakakarakadzwa pamberi paMwari. Ndizvo tuma kuJopa, udaidze Simoni, uwo unozwi Petro; unogara mumhatso yaSimoni, musukuti, pasinde poruandhle.’ Ndizvo paripo ndakatuma vanhu kwouri, newe ngokuuya wanasa; ndizvo tiri pano teshe pamberi paMwari kuzwa zveshe zvakapangwa kwouri ndiMwari.” NaPetro ashama muromo wake, wakati, “Ngegwinyiso ndinoona kuti Mwari andiyepi mutsananguri wevanhu, asi kumadzinza eshe, weshe unomutya nokuita zvakarurama unoashirika kwaari. Munorizia izwi iro raakatuma kunavana vaIsuraeri, echichumaira mashoko akanaka okunyarara ndiJesu Kristu (ndiye Mambo wavo veshe.) Imwimwi munorizia izwi rakachumairwa munyika yeshe yeJudhia, kubvira ngomuGarire ngesure kworubhabhatidzo rwaakachumaira Johani; ngenjira iyo Mwari yaakamudzodza ndiyo Jesu weNazaretha ndiMweya Wakachena nesimba; uwo waihamba echiita zvakanaka, echiponesa avo veshe vaitambudzwa ndiDhiabhorosi, ngokuti Mwari waiya naye. Nesu tiri zvapupu zveizvo zveshe zvaakaita kweshe munyika yevaJudha nomuJerusarema. Ndiye wevakauraya ngokumuturika pamuti; uyu Mwari wakamumusa kubva murufu ngezuva rechitatu, akamupa simba kuti aoneke pamhene, asi haiwa kuoneka ngevanhu veshe, asi kwetiri isusu, takatsanangurwa karetu ndiMwari kuita zvapupu, avo vakadya nokumwa naye ngesure kwokumuka kwake kubva kwevakafa. Wakatipanga kuchumaira kuvanhu nokupupura kuti uyu ndiye wakaemeswa ndiMwari kuita Mutongi wevanozwa nevakafa. Kwaari vaprofeti veshe vanoita chapupu ndiye, kuti ngezina rake, munhu weshe unotenda kwaari unozorekererwa zvishaishi.” Naapo Petro achaereketa aya mazwi, Mweya Wakachena wakadzaka padera pavo veshe vakazwa izwi. Naavo vatendi vevakachekwa avo vakauya naPetro vakashamiswa ngokuti chipo choMweya Wakachena chakadururwawo padera pevemadzinza. Ngokuti vaivazwa vechiereketa ngendimi nokukurisa Mwari. Naapo Petro wakapingura, akati, “Pane ungarambidza mvura here kuti ava vasabhabhatidzwa, avo vakaashira Mweya Wakachena kudai tisu?” Naye wakapanga kuti vabhabhatidzwe ngezina raJesu Kristu. Vorovomupota kuti agarepo mazuva amweni. Zvino vapostori nehama dzaigara muJudhia vakazwa kuti vemadzinza navo vaiya vaashira izwi raMwari. Naapo Petro akwira Jerusarema, vatendi avo vevakachekwa vakaita hasha naye vechiti, “Iwewe wakapotera kunevanhu vasikazi kuchekwa, ukadya navo.” Asi Petro wakatanga kuvaronzera zveshe ngokuteererana kwazvo echiti, “Ndaiya ndiri mudhorobha reJopa ndechikumbira; ndakabatwa ndimweya, ndakaona muchioniso chiro chakadai ngejira guru, rechidzaswa rakasungwa marupande marongomuna kubva mudenga; chakauya kwendiri. Apo ndaringisisa, ndakaona mhuka dzine mirenje mirongomuna nezvikara zvomushango nezvinotamanda neshiri dzomudenga. Ndakazwawo izwi rechiti kwendiri, ‘Miruka, Petro; uuraye, udye.’ Asi ndakati, ‘Haiwa, Mambo! Ngokuti apana chiro chisina shwiro nokuti chakasvipiswa chakambopotera mumuromo mwangu.’ Asi izwi rakapingura ngokwechipiri rechibva mudenga rechiti, ‘Chaakachenesa Mwari, usati chiro chisina shwiro.’ Izvi zvakaitika katatu; nazvo zveshe zvakaashirwazve kuhwirira mudenga. Panguvayo vanhu vatatu vakaguma pamhatso petaigara, avo vaiya vatumwa kwendiri vechibva Sizaria. NoMweya wakandironzera kuti ndiende navo, pasina muketo pakati pavo nesu. Nehama idzi nhanhatu dzakaendawo neni; nesu takapotera mumhatso yomunhuwo. Naye wakaerengudza kwetiri ngenjira yeyakaoneka ndiyo ngirosi yechiema mumhatso mwake yechiti, ‘Tumira izwi kuJopa, uunze Simoni uwo unozwi Petro. Naye unozoereketa kwouri mazwi ounozoponeswa ndiwo, iwewe nevemhatso yako veshe.’ Naapo ndichatanga kuereketa, Mweya Wakachena wakadzaka padera pavo, kudai ngezvewakadzaka padera pedu pakutanga. Neni ndakakarakadza izwi raMambo raakaereketa echiti, ‘Johani wakabhabhatidza ngemvura, asi imwimwi munozobhabhatidzwa ndiMweya Wakachena.’ Ndizvo, kudai Mwari akavapa chipo chimwecho icho chaakapawo kwetiri, apo petakatenda kunaMambo Jesu Kristu, inini ndirianani kuti ndingarwisana naMwari?” Naapo vazwa izvi, vakanyarara. Vakakudza Mwari vechiti, “Ndizvo Mwari wakapawo kunevemadzinza kutenderuka kuti vapone.” Ndizvo avo vakapararira kundau dzeshe ngendaa yokutambudzwa ukwo kwakaitika ngendaa yaStefano, vakahamba metsa kuguma Foenisia neSaipurasi neAntiokhi, vasikaereketi izwi kumunhu, asi kwega kuvaJudha. Asi vaiyapo vamweni vaiya vanhu veSaipurasi neveKurene, avo vakati vaguma muAntiokhi, vaiereketawo kuvaGiriki, vechichumaira ndiMambo Jesu. Nenyara yaMambo yaiya navo, vazhinji vakatenda, vakatenderukira kunaMambo. Mbiri yavo yakazwika munzee dzechiara chaiya muJerusarema, navo vakatuma Bhanabhasi kuenda Antiokhi. Naapo aguma nokuona nyasha dzaMwari, wakadakara; akavapanga veshe kuti varambe vakagondeka munaMambo ngomwoyo unogwinyisira. Ngokuti waiya munhu wakanaka, wakazara ndiMweya Wakachena nokugonda. Vanhu vazhinji vakatutsirwa kunaMambo. Bhanabhasi wakaenda Tarsusi kootsvaka Sauri; naapo amuona, wakamuunza Antiokhi. Bhanabhasi naSauri vakapedza gore reshe vechiungana pamwepo nechiara, vechidzidzisa vanhu vazhinji; muAntiokhi vadzidzi vakatanga kududzwa kuti vaKristu. Mazuva awo vaprofeti vakadzaka Antiokhi vechibva Jerusarema. Umwe wavo waizwi ndiAgabhusi wakamiruka, akavaronzera kubudikidza ndiMweya kuti nzara huru inozogumira nyika yeshe; iyo yakaitika ngemazuva aKraudhiusi. Nevadzidzi vakatenderana, munhu weshe kudai ngezvaaikona, kuti atumire zvingadetsera hama dzaigara muJudhia; navo vakaita kudaro, vakazvitumira kunevakuru ngenyara dzaBhanabhasi naSauri. Asi ngouwo mukuwo Herodhi mambo wakatambanudza nyara dzake kutambudza vamweni vechiara. Wakauraya Jakobe, mukoma waJohani, ngeshoti. Naapo aona kuti zvakadakadza vaJudha, wakaenda mberi kubatawo Petro. Awo aiya mazuva edhiri reChingwa chisina Mumera. Naapo amubata, wakamukonyera mutirongo, akamuisa kuzvikwata zvirongomuna zvemajoni, kuti zvimurinde, echipinimidza kumubudisa pamberi pevanhu ngesure kwePhasika. Ndizvo Petro wakangwarirwa mutirongo, asi chiara chakaangira kumukumbirira kunaMwari. Ngousiku uhwo apo Herodhi paaizomuka echimubudisa, Petro waiya akaata pakati pemajoni mairi, akasungwa ngemaketani mairi, nevarindi vaiya pamusiwo vechingwarira tirongo. Apapo ngirosi yaMambo yakaemapo, nokujeka kwakajeka mukamera retirongo; nayo yakatsungudza Petro ngeparutii, ikamumusa yechiti, “Kasira kumiruka.” Nemaketani akarungunuka kubva munyara dzake. Nengirosi yakati kwaari, “Dzisimidze usunge magwada ako”, naye wakaita kudaro. Yakati kwaari, “Pfeka chokufuka chako, unditeere.” Petro wakabuda kubanze akaiteera; aazi kunasa kuzia zvaiitwa ngengirosi, asi wakapinimidza kuti waiona chioniso. Naapo vapinda varindi vokutanga nevechipiri, vakaguma pamusiwo wesimbi wokupotera ndiwo mudhorobha. Nawo wakavabeukira wemene; vakabuda, vakahamba ngepato rimwe; paripo ngirosi yakamusiya. Naapo Petro apembenuka, wakati, “Zvino ndinozia ngegwinyiso kuti Mambo wakatuma ngirosi yake, akandinunura kubva munyara yaHerodhi nokubva mukukarira kweshe kwevanhu vevaJudha.” Naapo azia ngeizvi, wakaenda kumhatso yaMaria, mai aJohani, mutupo wake waizwi Marako; apo pevaiya vakaungana vazhinji vechikumbira. Asi adododza pamusiwo, musikana waizwi ndiRodha wakauya koodaira. Asi apo azia izwi raPetro, aazi kubeura musiwo ngokudakara, asi wakarumba kupotera, akavaronzera kuti Petro wakaema pamusiwo. Vakati kwaari, “Unopenga.” Asi iye wakaangira kugwinyisa kuti ndizvo. Asi vakati, “Ingirosi yake!” Asi Petro wakaangira kudododza; naapo vabeura vakamuona, vakashamiswa. Asi wakaita ngenyara yake kuti vanyarare, wakadudzira kwavari ngenjira yaakabudiswa ndiyo ndiMambo mutirongo. Wakati, “Ronzai izvi kunaJakobe nokunehama.” Wakabvapo, akaenda kundau imweni. Zvino kwaedza, kwaitika bope guru pakati pevarindi, ngendaa yezvakaitika kunaPetro. Naapo Herodhi amutsvaka, asikamuoni, wakabvunzisisa varindi, akapanga kuti vaurawe. Naye wakadzaka kubva Judhia, akaenda Sizaria, akagarayo. Zvino Herodhi wakatsenekera kakurutu vanhu veThire neveSidhoni; navo vakauya kwaari muchiunga chimwe, naapo vaiyana naBrastusi, nduna yekamera ramambo, vakakumbira kuti vaiyaniswe, ngokuti nyika yavo yaiona zvokudya kubva munyika yamambo. Ngezuva rakaemeswa, Herodhi wakadzisimidza zvokufuka zvoumambo, akagara pachigaro choumambo, wakaereketa kwavari. Nevanhu vakadaidzira vechiti, “Iri izwi raMwari, haiwa romunhu!” Paripo ngirosi yaMambo yakamurova, ngokuti aazi kukudza Mwari; naye wakadyiwa ngehonye, akafa. Asi izwi raMwari rakaangira kupararira nokuwanziswa. Zvino Bhanabhasi naSauri vakahwirira Jerusarema, apo vaiya vapedza mushando wavo, vechitora navo Johani uwo waizwi Marako. Zvino muAntiokhi muchiara chaiya chiripo mwaiya nevaprofeti nevadzidzisi: Bhanabhasi, Simeoni uwo waizwi ndiNiga, Rusiasi weKurene, Manaene uwo wakakura pamwepo naHerodhi sadunhu, naSauri. Vachadira Mambo, vechiera kudya, Mweya Wakachena wakati, “Paradzanisai kwendiri Bhanabhasi naSauri kuti vaite mushando wendakavadaidzira.” Apo vaera kudya nokukumbira, vakaisa nyara dzavo padera pavo, vakavaendesa. Ndizvo vatumwa ndiMweya Wakachena, vakadzaka kuenda Sereusia, nokubvapo vakahamba ngengarava kuenda Saipurasi. Naapo vaguma Saramisi, vakateketesa izwi raMwari mumhatso dzokudira dzevaJudha. Navo vaiyazve naJohani mudetseri wavo. Naapo vaiya vahamba pachiwi peshe metsa kuguma Phafosi, vakashongana noumwe waiya n'anga muprofeti wokunyepa, muJudha, zina rake raizwi ndiBha-Jesu. Uwo waigara pamwepo nomutongi mukuru waizwi ndiSergiusi Phaurusi, waiya munhu uneungwaru. Iye adaidza kwaari Bhanabhasi naSauri, waidisisa kuti azwe izwi raMwari. Asi n'anga Erimasi, (ngokuti ndikwo kukumuchwa kwezina rake) wakarwisana navo, echida kupaukisa mutongi mukuru kubva mukugonda. Asi Sauri, uwozve unozwi Phauri, azadzwa ndiMweya Wakachena, wakamuringisisa, akati, “Iwewe mukororo waDhiabhorosi, iwewe gaa rokururama kweshe, wakazara ngokuchengedzera nourimbwi hweshe, aurekeri here kushongorosa njira dzakarurama dzaMambo? Zvino, ringira, nyara yaMambo iri padera pako, newe unozoita bofu, usikakoni kuona zuva kwomukuwo.” Paripo mhute nechidima zvakawira padera pake; wakahambahamba kutsvaka vanhu vokumutungamirira ngenyara. Apo mutongi mukuru aona izvo zvakaitika, wakatenda, echishamiswa ngezvidzidziso zvaMambo. Zvino Phauri nevangani vake vakahamba ngengarava kubva Phafosi, vakaguma Pherga muPhamufiria. Johani wakabva kwavari, akapetuka Jerusarema; asi vechihamba kubva Pherga, vakaguma Antiokhi muPhisidhia. Ngezuva reSabatha, vapotera mumhatso yokudira, vakagara pashi. Ngesure kwokudzidzwa kweMipango nevaprofeti, vakuru vemhatso yokudira vakatumira izwi kwavari vechiti, “Vamuna, hama, kudai muneizwi mukati mwenyu rokupanga vanhu, riereketenyi.” Ndizvo Phauri wakamiruka, akakopera ngenyara, akati, “Imwimwi vanhu vaIsuraeri, nemwi munotya Mwari, purutanai. Mwari wevanhu ava vaIsuraeri wakatsanangura madzibaba edu, wakakudza vanhu ava apo vaiya vanhu vapara munyika yeEgipite, ngomuoko unesimba wakavabudisa mukati mwayo. Mumakore anoda kukwana kuita makumi marongomuna wakavasengerera mushango. Naapo aparadza madzinza manomwe aigara munyika yeKhenani, wakavakoanisira nyika yavo kuita nhaka. Nangesure kwemakore anoda kuguma mazana marongomuna nemakumi mashanu, wakavapa vatongi metsa kuguma kunaSamueri muprofeti. Ngesure kweizvi vakakumbira kuti vapuwe mambo, naMwari wakavapa Sauri mukororo waKishi, munhu wedzinza raBenjamini, uwo wakatonga makore makumi marongomuna. Naapo amubvisa, wakavamirudzira Dhavhidha kuti aite mambo wavo. Muuchapupu hwaakaita ndiye, wakati, ‘Ndaona munaDhavhidha mukororo waJesi kuti munhu unoda zvinodiwa ngomwoyo wangu, uwo unozoita kuda kwangu kweshe.’ Ngorudzi rwomunhu uyu Mwari, kudai ngechigondiso chake, wakaunza kunevaIsuraeri Muponesi, Jesu. Asati auya Jesu, Johani waiya achumaira ngorubhabhatidzo rwokutenderuka kuvanhu veshe vaIsuraeri. Naapo Johani echipedzisa mushando wake, wakati, ‘Munopinimidza kuti inini ndiri anani? Andiriyepi. Haiwa, asi umwe unouya sure kwangu, uwo wendisikasisiri inini kusunhura tambo dzemagwada etsoka dzake.’ “Vamuna, hama, vakororo vorudzi rwaAbrahama, naavo vari pakati penyu vanomutya Mwari, izwi iri roruponeso rakatumirwa kwetiri. Ngokuti avo vanogara muJerusarema nevatongi vavo avazi kumuzia nokuti kuzwisisa mazwi evaprofeti, awo anodzidzwa Sabatha rimwe ngarimwe, vakaazadzisa ngokumuitira ndaa. Kunyazwi avazi kuona ndaa kwaari yaiita kuti afe, asi vakakumbira Piratu kuti Jesu aurawe. Naapo vazadzisa zveshe zvakanyorwa ngendaa yake, vakamudzasa kubva pamuchinjiko, vakamuradzika muiba. Asi Mwari wakamumusa kubva kwevakafa; wakaoneka mazuva mazhinji kwavari avo vakakwira naye kubva Garire kuenda Jerusarema, avo zvino vari zvapupu zvake kuvanhu. Nesu tinochumaira kwomuri mashoko akanaka echigondiso icho chakaitwa kumadzibaba, kuti Mwari wakachizadzisa ichi kwetiri vana vavo, ngokumumusa Jesu; kudai ngezvakanyorwawo munduyo yechipiri yechiti, “ ‘Iwewe uri Mukororo wangu, nyamashi ndaita Baba ako.’ Ngendaa yokuti wakamumusa kubva kwevakafa, zvino aachahwiriri mukuora, wakaereketa kudai, ‘Ndinozokupa zvifumiso zvakachena nezvinogondeka zvaDhavhidha.’ Nomunduyo imweni unoti, ‘Auzotenderi Wakachena wako kuti aore.’ Ngokuti Dhavhidha, apedza kuita kuda kwaMwari pakati pedzinza rake, wakafa, naye wakaikwa pane madzibaba ake, akaora. Asi uwo waakamusa Mwari aazi kuora. Ndizvo ngakuziikanwe kwomuri vamuna, hama, kuti kubudikidza ndiye uyu kunochumairwa kwomuri kurekererwa kwezvishaishi. Kubudikidza ndiye veshe vanotenda vanopembedzwa kubva kuzviro zveshe zvemwaiya musikapembedzwi ngeMipango yaMosi. Ndizvo ngwarai kuti zvisazomugumira izvo zvakaereketwa ngevaprofeti: Ringirai, imwimwi vashoori, mushamiswe, mupere; ngokuti ndinoshanda mushando mumazuva enyu, mushando womusikazotendi, kunyazwi munhu amuronzera ndiwo.” Navo vechibuda, vanhu vakavapota kuti aya mazwi aereketwe kwavari ngeSabatha raiteera. Naapo mushongano wokudira waparara, vazhinji vevaJudha neavo vemadzinza vakatenderukira muchiJudha vakateera Phauri naBhanabhasi; ivo vechiereketa kwavari, vakavagwinyisa kuti vaangire kugara munyasha dzaMwari. NgeSabatha raiteera uzhinji hwevanhu veshe vedhorobha vakaungana kuzwa izwi raMwari. Asi apo vaJudha vechiona mbungano, vakazara ngendurumwa, vakaphikisa zvakaereketwa ndiPhauri, vechimutuka. Naapo Phauri naBhanabhasi vakaereketa ngokushinga vechiti, “Kwaisisira kuti izwi raMwari ritange kuereketwa kwomuri. Kwechioneka kuti munoriramba mwechiti ribve kwomuri, mwechidzierenga kuti amusisirwi nokupona kusikaperi, ringirai, tinokunukukira kuenda kune vemadzinza. Ngokuti Mambo wakatipanga kudaro echiti, ‘Ndakakuemesa kuti uite kujeka kunevemadzinza, kuti uite ruponeso metsa kumagumo enyika.’ ” Naapo vemadzinza vazwa izvi, vakadakara, vakakurisa izwi raMambo; naavo veshe vakaemeserwa kupona kusikaperi vakatenda. Neizwi raMambo rakaparadzirwa munyikamwo mweshe. Asi vaJudha vakavherudza vakadzi vaidira vairemeredzeka nevakuru vedhorobha, vakamusira madambudziko Phauri naBhanabhasi, vakavadzinga kubva munharaunda yavo. Asi ivo vakaguwa bukuta patsoka dzavo kuvaitira ndaa, vakaguma Ikoniumu. Nevadzidzi vakazara ngokudakara noMweya Wakachena. Zvino muIkoniumu vakapotera pamwepo mumhatso yokudira yevaJudha, vakaereketa ngokudaro vazhinji vakatenda vaJudha navaGiriki. Asi vaJudha vasikatendi vakavherudza mweya yevemadzinza kuti varwisane naavo vakoma. Ndizvo vakagarapo mukuwo wakareba, vechiereketa ngokushinga ndiMambo, uwo wakaita chapupu kuizwi renyasha dzake, echitendera kuti zvioniso nemishamiso zviitwe ngenyara dzavo. Asi vanhu vazhinji vedhorobha vakaparadzana; rumwe rupande rwakaema navaJudha norupande rumweni rwakaema nevapostori. Naapo vakavamukira veshe vemadzinza nevevaJudha nevatongi vavo, kuti vavaitire zvakashata nokuvaponda ngemapuwe, vakazvizia, vakatiza kuenda kumadhorobha eRikaonia, anozwi Ristra neDhebhe nokunharaunda dzawo. Naapo vaichumaira vhangeri. Zvino muRistra mwaigara munhu waiya chigwadara tsoka dzake, wakabarwa ari chirema kubvira mundani yamai ake, aazi kumbohamba. Wakapurutana Phauri echiereketa; iye amuringisisa, aona kuti waiya nokutenda kwaimuita kuti aponeswe, wakati ngeizwi guru, “Ema ngetsoka dzako.” Naye wakanyanduka, akahamba. Naapo mbungano yaona izvo zvakaitwa ndiPhauri, yakadaidzira yechiti ngorurumi rwechiRikaonia, “Zvimwari zvadzaka kwetiri, zvinomuemo wevanhu!” Navo vakadudza Bhanabhasi kuti, Zeusi, naPhauri kuti, Hermesi, ngokuti iye waiya muereketi mukuru. Nomupristi waZeusi, uwo temperi rake raiya pamberi pedhorobha, wakaunza n'ombe nemaruva kumisiwo, waida kupira mudiro kwavari, pamwepo nembungano. Asi apo vapostori Bhanabhasi naPhauri vazvizwa, vakabaura zvokusimira zvavo, vakarumba kuenda pakati pembungano, vechidaidzira vechiti, “Vanhu, munoita izvi ngenyi? Isusuwo tiri vanhu vakadai ndimwi, tinounza kwomuri mashoko akanaka okuti mutenderuke kubva kuneizvi zvisina shwiro, muuye kunaMwari unopona, uwo wakasika denga nenyika noruandhle neizvo zveshe zviri mukati mwazvo. Panguva yakapinda wakaatendera madzinza eshe kuti ahambe ngenjira dzawo; asi aazi kusiya asina uchapupu pachake, echiita zvakanaka, echimupa mvura inonaya kubva mudenga, nokukukura zviyo zvakawanda, echizadza mwoyo yenyu ngezvokudya nokudakara.” Ngemazwi aya zvakavakonzera kurambidza mbungano kuti isazopira mudiro kwavari. Asi vaJudha vakagumapo vechibva Antiokhi naIkoniumu, navo vakavherudza mbungano, vakaponda Phauri ngemapuwe, vakamukweya kumubudisa kubanze kwedhorobha, vechipinimidza kuti wafa. Asi apo vadzidzi vaungana kumutendenedza, wakamiruka, akapotera mudhorobha; nechimangwani wakaenda naBhanabhasi Dhebhe. Naapo vachumaira vhangeri mudhorobha iro, vakaita vadzidzi vazhinji, vakapetuka Ristra neIkonaiumu neAntiokhi, vechigwinyisa mweya yevadzidzi, vechivapota kuti vaangirire kugara mukutenda, vechiti kunosisira kuti tipotere muumambo hwaMwari kubudikidza ngokupotya madambudziko akawanda. Naapo vaiya vagadza vakuru muchiara chimwe ngachimwe, vakakumbira nokuera kudya, vakavapira kunaMambo uwo wevakatenda kwaari. Zvino vakahamba vechipinda ngemuPhisidhia, vakaguma Pamufiria. Naapo vaiya vaereketa izwi muPherga, vakadzaka kuenda Ataria. Vechibvapo vakahamba ngengarava kuenda Antiokhi, apo pevakapirwa munyasha dzaMwari, kuita mushando uwo wevaiya vapedza. Naapo vaguma, vakaunganidza chiara pamwepo, vakavashumira zveshe zvaakaita Mwari ndivo, nenjira yaakabeurira ndiyo vemadzinza musiwo wokugonda. Navo vakagarapo nevadzidzi mukuwo wakareba. Vanhu vamweni vakadzaka vechibva Judhia, vaidzidzisa hama vechiti, “Ngepabanze pokuti mwachekwa, kudai ngomushuma waMosi, amungaponeswi.” Naapo Phauri naBhanabhasi vaitirana hasha navo nokubvunzisana, Phauri naBhanabhasi nevamweni vavo vakaemeswa kuti vakwire Jerusarema kuvapostori nevakuru ngeiyi ndaa. Ndizvo vechitumwa ngechiara, vakahamba ngemuFoenisia nomuSamaria, vechivaronzera ngokutenderuka kwevemadzinza, navo vakaita kuti hama dzeshe dzidakare kakurutu. Naapo vaguma Jerusarema, vakaashirwa ngechiara nevapostori nevakuru, navo vakashumira zveshe zvaaiya aita Mwari ndivo. Asi vakamiruka vamweni vorudzidziso rwevaFarisi, avo vakatenda vechiti, “Kunosisira kuti vachekwe nokupangwa kuti vangwarire Mipango yaMosi.” Vapostori nevakuru vakaungana kuti vapangane ngeiyi ndaa. Ngesure kwokuphikisana kukurutu, Petro wakamiruka, akati kwavari, “Hama, munozia kuti kubvira mazuva okutanga Mwari wakatsanangura pakati penyu, kuti kubudikidza ngomuromo wangu vemadzinza vazwe izwi revhangeri, vatende. Mwari uwo unozia mwoyo wakaita chapupu ndivo, ngokuvapa Mweya Wakachena kudai ngezvaakaita kwetiri; naye aazi kuita mupauko pakati pedu navo, echichenesa mwoyo yavo ngokugonda. Ndizvo zvino munoedza Mwari ngenyi, ngokuisa joka mumutsipa mwevadzidzi, revasikazi kukona kutwara madzibaba edu nokuti isusu? Asi tinotenda kuti tinozoponeswa ngenyasha dzaMambo Jesu kudai ndivo.” Mbungano yeshe yakanyarara, nayo yakapurutana kunaBhanabhasi naPhauri vechivaronzera ngezvioniso nemishamiso zvaakaita Mwari kubudikidza ndivo pakati pevemadzinza. Naapo vapedza kuereketa, Jakobe wakapingura echiti, “Hama, vakoma, mwechindizwai. Simeoni wadudzira njira yaakatanga ndiyo Mwari kuhambira vemadzinza, kuti atore kubva kwaari vanhu vezina rake. Nemazwi evaprofeti anotenderana neizvi, kudai ngezvakanyorwa, “ ‘Ngesure kweizvi ndinozopetuka, ndinozoakisazve ugaro hwaDhavhidha hwakaputsika, neni ndinozoakisazve matongo ahwo, ndinozohuemesa, kuti vakasara veavo vanhu vatsvake Mambo Mwari, nevemadzinza veshe, avo vanodaidzwa ngezina rangu, unoronza Mambo Mwari uwo wakaita izvi zveshe, kuti zviziikanwe kubvira karetu.’ “Ndizvo kugura kwangu inini ndinoti atisisiri kutambudza avo vemadzinza vanotenderukira kunaMwari, asi ngativanyorere kuti vasasvipiswa ngokudya zvakadirwa miedzaniso, kuomba, vasadya zvinodzipwa nengazi. Ngokuti kubvira kumibarirwana yekaretu, Mosi unavo kumadhorobha eshe vanochumaira ndiye, echidzidzwa mumhatso dzokudira Sabatha rimwe ngarimwe.” Naapo vapostori nevakuru vakatenderana pamwepo nechiara cheshe, kuti vatsanagure vanhu kubva pakati pavo kuti vavatume kuenda Antiokhi, pamwepo naPhauri naBhanabhasi. Vakatuma Judhasi unozwi Bharsabhasi naSirasi, avo vaiya vanhu vakuru pakati pehama, vakanyora tsamba vechiti, “Hama, veshe vapostori nevakuru, kunehama dzemadzinza dzinogara muAntiokhi nomuSiria nevari muSirisia, tinomuchingamidza. Takazwa kuti vanhu vamweni vakabva kwetiri vakamutambudza ngemazwi, vechipaukisa mweya yenyu, vetisikazi kutuma kuita izvo, zvakaoneka kwetiri zvakanaka, apo taungana ngechisungo chimwe, kuti titsanangure vanhu nokuvatuma kwomuri pamwepo nevanodikanwa vedu, Bhanabhasi naPhauri, vanhu avo vakaisa kupona kwavo mungozi ngendaa yezina raMambo wedu Jesu Kristu. Ndizvo tatuma Judhasi naSirasi, ivo vanozomuronzera vemene zviro izvi ngomuromo. Ngokuti zvakaoneka zvakanaka kuMweya Wakachena nokwetiri kuti tisamutwarisa mutwaro unorema kupinda izvo zviro zvinosisira: kuti murekere kudya izvo zvinopirwa miedzaniso yokudira nengazi nezvinodzipwa nokuomba. Kudai mwechidzingwarira kubva kuneizvi pachenyu, zvinozonaka kwomuri. Chisarai zvakanaka.” Ndizvo vakatumwa kuti vaende, vakadzaka Antiokhi; naapo vaiya vaunganidza mbungano pamwepo, vakavapa tsamba. Naapo vaidzidza, vakadakara ngemazwi okugwinyiswa. Judhasi naSirasi vemene vaiya vaprofeti, vakaembedzera hama ngemazwi mazhinji nokuvagwinyisa. Ngesure vagarapo kamukuwo, vakaendeswa ngehama ngokunyarara kuneavo vakavatuma. [ Asi zvakanakira Sirasi kugarapo.] Asi Phauri naBhanabhasi vakagara muAntiokhi, vechidzidzisa nokuchumaira izwi raMambo, nevamweniwo vazhinji. Ngesure kwamazuva Phauri wakati kunaBhanabhasi, “Ngatihwirire zvino, tihambire hama mumadhorobha eshe etakachumaira izwi raMambo, tione kugara kwavanoita.” Asi Bhanabhasi waida kutora Johani, waizwi Marako, kuhamba navo. Asi Phauri wakakarakadza kuti azvizi kunaka kutora uwo wakadzipaura kubva kwavari vari muPhamufiria, usikazi kuenda navo kumushando. Vakaitirana hasha dzakashata, vakaparadzana umwe kubva kunoumweni, naBhanabhasi wakatora Marako kuenda naye, akahamba ngengarava kuenda Saipurasi. Asi Phauri wakatsanangura Sirasi, akaenda, apirwa kunyasha yaMambo ngehama. Naye wakahamba muSiria nomuSirisia, echigwinyisa zviara. Naye wakagumawo Dhebhe neRistra, apo paiya nomudzidzi waizwi ndiThimothi, mukororo womudzimai waiya muJudha, waiya mutendi; asi baba ake vaiya muGiriki. Iye waipupurirwa zvakanaka ngevatendi vaigara muRistra nomuIkonaiumu. Phauri waida kuti aende naye; wakamutora, akamucheka ngendaa yevaJudha vaigara kundau idzo, ngokuti veshe vaizia kuti baba ake vaiya muGiriki. Vachahamba mumadhorobha vakapa kwavari mipango iyo yakaemeswa ngevapostori nevakuru vaiya muJerusarema, kuti vaingwarire. Ndizvo zviara zvakagwinyiswa mukugonda navo vakaangira kuwanda mazuva eshe. Navo vakahamba ngepakati penyika idzi, Frigia neGaratia, vaiya varambidzwa ndiMweya Wakachena kuereketa izwi muAsia. Naapo vaiya vaguma pakaringirana nomuMisia, vakaedza kuenda Bhithinia; asi Mweya waJesu auzi kuvatendera. Ndizvo vapinda ngomuMisia, vakadzaka kuenda Troasi. Nechioniso chakaoneka usiku kunaPhauri; munhu waibva Masedhonia wakaema, echimupota echiti, “Ambukai Masedhonia, mutidetsere.” Naapo aona chioniso, paripo takaedza kuenda Masedhonia, techigura kuti Mwari wakatidaidza kuti tichumaire vhangeri kwavari. Ndizvo tichabva Troasi, takaruramisa kuhamba ngengarava kuenda Samotresi, ngezuva raiteera, takaenda Neaporisi. Kubvapo takaenda muFiripi, iro riri dhorobha renharaunda yokutanga yeMasedhonia, raitongwa ngevaRoma. Nesu takagara mudhorobha iro mazuva amweni. Ngezuva reSabatha takabuda kuenda kubanze kwomusiwo waiya pamhiri porwizi, apo petaipinimidza kuti pandau yokukumbirirapo; takagara pashi tikaereketa kumadzimai vaiya vaunganapo. Nomudzimai umwe wakatizwa, zina rake raizwi Ridhia, mutengesi wemachira akatsvukuruka, wedhorobha reThiatira, uwo waidira Mwari. Mambo wakabeura mwoyo wake kuti apurutane izvo zvakaereketwa ndiPhauri. Naapo abhabhatidzwa nevemhatso yake, wakatipota echiti, “Kudai mwandierenga kuti ndiri unogondeka kunaMambo, uyai mupotere mumhatso mwangu, mugaremwo.” Naye wakatinyengerera. Naapo, tichaenda kundau yokukumbira, takashongana nomusikana, waiya hloko anomweya wokufembera, waiunza mare yakawanda kune madzimambo ake ngokufembera. Wakateera Phauri nesu, echidaidzira echiti, “Ava vanhu varanda vaMwari Uripadera pazveshe, avo vanoteketesa kwomuri njira yoruponeso.” Wakaita izvi mazuva mazhinji. Asi Phauri, echitambudzwa kakurutu, wakakunukuka, akati kunomweya uwo, “Ndinokupanga ngezina raJesu Kristu kuti ubude kubva mwaari.” Nawo wakabuda ngeawa iro. Asi apo madzimambo ake azia kuti magondero avo okuona mare apera, vakabata Phauri naSirasi, vakavakweya kuenda navo pandau yomusika pamberi pevatongi. Naapo vavaunza pavatongi vakuru, vakati, “Ava vanhu vaJudha vanoshaishira dhorobha redu. Vanodzidzisa tsika dzisikatenderwi ngemipango yedu kuashira nokuti kungwarira, isusu vaRoma.” Mbungano yakavarwisa; nevatongi vakuru vakavabaurira zvokufuka zvavo, nokupanga kuti vashwapurwe ngemishwapo. Naapo vaiya vavashwapura yaamho, vakavakonyera mutirongo, vechikohomedzisa mungwariri wemabhanditi kuti anase kuvangwarira yaamho. Iye akohomedziswa kudaro, wakavakonyera mutirongo yomukati, wakasunga tsoka dzavo ngemanguri. Kwaakuita pakati pousiku Phauri naSirasi vaikumbira nokuemba kukudza Mwari, nemabhanditi aivapurutana. Paripo kuzungunyika kukurutu kwenyika kwakaitika, ngokudaro madzeyo emhatso yetirongo akakutukutuswa; paripo misiwo yeshe yakabeurwa nezvisungo zvomunhu weshe zvakasunhurwa. Naapo mungwariri wamabhanditi amuka muhope echiona misiwo yetirongo yabeuka, wakashwamura shoti yake echida kudziuraya pachake, echipinimidza kuti mabhanditi aiya atiza. Asi Phauri wakadaidzira ngeizwi guru kuti, “Usadzikuwadza, ngokuti teshe tiri muno.” Naye wakakumbira zvivheneko, wakapoteramwo echirumba, echihuta ngokutya. Wakawira pamberi paPhauri naSirasi. Wakavabudisa kubanze, akati, “Madzimambo, kunosisira kuti ndiitenyi kuti ndiponeswe?” Navo vakati, “Tenda Mambo Jesu, newe unozoponeswa, iwewe nevemhatso yako.” Navo vakachumaira kwaari izwi raMambo nokwavari veshe vaiya mumhatso mwake. Wakavatora ngeawa iro rousiku, akashamba zvironda zvavo. Wakabhabhatidzwa paripo nemhuri yake yeshe. Naapo wakavapotedza mumhatso mwake, akaisa zvokudya pamberi pavo; akadakara kakurutu nevemhatso yake yeshe, ngokuti waiya atenda Mwari. Asi apo kwaedza, vatongi vakatuma mapurisa vechiti, “Sunhurai avo vanhu vaende.” Nomungwariri wemabhanditi wakaronza aya mazwi kunaPhauri echiti, “Vatongi vatumira izwi rokuti musunhurwe muende; ndizvo zvino budai, muende ngokunyarara.” Asi Phauri wakati kwavari, “Vakatishwapura pamberi pevanhu veshe, tiri vasikazi kutongwa ndaa, tiri vanhu vaRoma, navo vakatikonyera mutirongo; zvino votibudisa ngokufishika here? Haiwa! Asi ngavauye vemene vatibudise.” Mapurisa akaronza aya mazwi kuvatongi, navo vakatya apo vazwa kuti vaiya vaRoma; ndizvo vakauya, vakavapota kuti vavakungurire. Naapo vavabudisa kubanze, vakakumbira kwavari kuti vabve mudhorobha. Ndizvo vakabuda mutirongo, vakapotera mumhatso yaRidhia; naapo vaona hama, vakavagwinyisa, vakaenda. Zvino vahamba ngemuAmufiporisi nomuAporonia, vakaguma Thesaronika, apo paiya nemhatso yokudira yevaJudha. NaPhauri wakapoteramwo, kudai ngomuitiro wake, mumaSabatha matatu wakaphikisana navo ngezvinyorwa echidudzira nokugwinyisisa kuti kwaisisira kuti Kristu atambudzwe nokumuka kubva kwevakafa echiti, “Uyu Jesu wendinochumaira kwomuri, ndiye Kristu.” Nevamweni vavo vakaongwa, vakaiyana naPhauri naSirasi, nembungano huru yevaGiriki vaidira nevazhinji vemadzimai airemeredzeka. Asi vaJudha vaiya nendurumwa, vakatora vanhu vakashata vapepesheki, vakaunganidza mbungano, vakaita bope mudhorobha; vakarwisa mhatso yaJasoni, vakaedza kuvabudisa kunevanhu. Naapo vasikavaoni, vakakweya Jasoni nehama dzimweni nokuvaunza pamberi pevatongi vedhorobha, vechidaidzira vechiti, “Ava vanounza madambudziko munyika, vatogumawo muno. Jasoni ndiye wakavaashira, navo veshe vanoita zvinorwisana nezviemeso zvaSiza, vechironza kuti uripo mambo umweni, Jesu.” Vanhu nevatongi vedhorobha vakakaruka apo vazwa izvi. Naapo vaiya vatora chibatiso kubva kunaJasoni nokunevamweni, vakavatendera kuti vaende. Paripo vatendi vakatuma Phauri naSirasi usiku kuti vaende Bheria; naapo vagumayo vakapotera mumhatso yokudira yevaJudha. Zvino vaJudha ava vaiya vakarurama kupinda veThesaronika ngokuti vakaashira izwi ngomwoyo weshe, vechitsvakisisa zvinyorwa mazuva eshe kuti vaone kuti izvi zvakadaro here. Ndizvo vazhinji vavo vakatenda, nemadzimai vairemeredzeka vevaGiriki nevamuna vazhinji. Asi apo vaJudha veTesoronika vazia kuti izwi raMwari rakachumairwawo ndiPhauri muBheria, vakagumapowo vechiita bope nokutambudza mbungano. Paripo vatendi vakatumira Phauri kuti aende kuruandhle, asi Sirasi naThimothi vakasaramwo. Asi avo vakaperekedza Phauri vakamugumisa Atenesi; naapo vakapangwa kuti varonzere Sirasi naThimothi kuti vauye kwaari ngokukasira, vakaenda. Zvino Phauri achavagarira muAtenesi, mweya wake wakatambudzika yaamho, echiona dhorobha rakazara ngemiedzaniso yokudira. Ndizvo wakaphikisana mumhatso yokudira navaJudha nevanhu vaidira, nomundau yomusika mazuva eshe wakapangana naavo vakashongana nayepo. Nevamweni vakangwara vevaEpikurio nevaStoiki, vaida ungwaru, vakashongana naye. Vamweni vakati, “Uyu muereketi wezvisina shwiro unotinyi?” Vamweni vakati, “Wakadai ngomuchumairi wezvimwari zvipara.” Ngokuti iye wakachumaira kwavari ndiJesu nokumuka kwevakafa. Navo vakamubata, vakamuunza pamberi paAreopagusi vechiti, “Tingazia here kuti uku kudzidzisa kutsva kunoereketwa ndiwe kunoronzenyi? Ngokuti unoronza zviro zvisikazwiki kunzee dzedu. Ndizvo tinoda kuzia kuti izvi zvinoronzenyi.” Zvino veshe veAtenesi nevapara vaigaramwo avazi kupedzera mukuwo wavo kuzviro zvimweni, asi kwega kuronza nokuti kuzwa chiro chitsva. Ndizvo Phauri wakaema pakati paAreopagusi, wakati, “Imwimwi vamuna veAtenesi, pazviro zveshe ndinoona kuti munodira yaamho. Ngokuti ndechipinda, ndakaringira zviro zvomunodira, ndakaonazve arita rine izvi zvinyorwa, ‘KUNA MWARI USIKAZIIKANWI.’ Ndizvo uwo womunodira musikamuzii, uyu ndiye wendinochumaira kwomuri inini. Mwari uwo wakasika nyika nazvo zveshe zviri mukati mwayo, ndiye Mambo womudenga nomunyika, aagari mumatemperi akaakwa ngenyara dzevanhu, zve aashandirwi ngenyara dzevanhu, kudai ngounotama chiro, ndiye unopa veshe kupona nokufema nezviro zveshe. Wakaita madzinza eshe evanhu kubva pamunhu umwe, kuti vagare padera penyika peshe, wakaemesera nguva dzavo nemigano yokugara kwavo, kuti vatsvake Mwari, kuti pamweni ngokugonda vaambamire, vamuone, kunyazwi asiri kuretu akadi kubva pana umwe ngaumwe wedu. ‘Ngokuti kwaari tinopona nokuhamba, tine unhu hwedu;’ kudai ngezvevakaereketazve vamweni vevanyori venyu venduyo vechiti, ‘Ngokuti isusu tiri mibarirwana yake.’ Ndizvo ngokuti tiri mibarirwana yaMwari, atisisiri kuti tipinimidze kuti uMwari hwakada kudai ngomukore nokuti sirivha nokuti buwe rakatsetswa ngengwazi ngemazano omunhu. Ngegwinyiso ngemikuwo yokusikazia kwomunhu Mwari aazi kuringisisa; asi zvino unopangisisa vanhu veshe kundau dzeshe, kuti vatenderuke; ngokuti wakaemesa zuva raanozotonga ndiro nyika ngokururama ngouwo munhu waakagadza; ngouwo waakagwinyisa kuvanhu veshe ngokumumusa kubva kwevakafa.” Naapo vazwa ngokumuka kubva kwevakafa, vamweni vakaita jee; asi vamweni vakati, “Tinozokuzwazve ngeiyi ndaa.” Ngokudaro Phauri wakabuda kubva pakati pavo. Asi vanhu vamweni vakanamatira kwaari, vakatenda. Pakati pavo paiya Dhionisiusi muAreopagusi nomudzimai waizwi Dhamarisi nevamweni navo. Sure kweizvi Phauri wakabva Atenesi akaguma Khorinte. Naye wakaona munhu muJudha waizwi Akwira, waiya munhu wePontusi ngokubarwa, waiya achandoguma echibva Itaria, pamwepo nomukadzi wake Prisira, ngokuti Kraudhiusi waiya apanga kuti vaJudha veshe vabve muRoma. Phauri wakaenda kwavari. Ngokuti iye waiya nomushando wakatodzana newavo, wakagara navo, vakashanda pamwepo; ngokuti mushando wavo waiya wokuruka matende. Naye wakaphikisana navo vomumhatso yokudira mazuva eshe eSabatha, echida kutenderudza veshe vaJudha nevaGiriki. Asi apo Sirasi naThimothi vaiya vauya vechibva Masedhonia, Phauri akabatika ngeizwi, wakapupura kuvaJudha kuti Jesu ndiye Kristu. Vakati vaphikisa nokumutuka, iye wakaguwa bukuta kubva pane zvokusimira zvake, akati kwavari, “Ngazi yenyu ngaigare padera pemasoro enyu! Andina ndaa inini. Kubvira zvino ndinozoenda kune vemadzinza.” Naye wakabvapo, akapotera mumhatso yomunhu waizwi Thitiusi Justusi, uwo waidira Mwari; mhatso yake yaiya pasinde pemhatso yokudira. Krispusi, mukuru wemhatso yokudira, wakatenda Mambo nevemhatso yake yeshe; nevazhinji vevaKhorinte vakazwa Phauri, vakatenda, vakabhabhatidzwa. Mambo wakati kunaPhauri muchioniso usiku, “Usatya, asi ereketa, usanyarara; ngokuti inini ndinewe, akuna munhu unozokumukira kukuremadza; ngokuti ndine vanhu vakawanda mudhorobha iri.” Naye wakagarapo gore nomwedzi mitanhatu, echidzidzisa izwi raMwari pakati pavo. Asi apo Gario aita mutongi mukuru weAkhaiya, vaJudha vakamukira Phauri ngechisungo chimwe, vakamuunza pamberi pechigaro chokutonga vechiti, “Uyu munhu unopausa vanhu kuti vadire Mwari ngenjira inopesana neMipango.” Apo Phauri ooda kubeura muromo wake kuereketa, Gario wakati kuvaJudha, “Kudai yaiya ndaa yokushata nokuti yokumukira, imwimwi vaJudha, ndaisisira kuti ndisengerere kwomuri. Asi kudai iri ndaa yemibvunzo yemazwi neyemazina neyemipango yenyu, dzionerei pachenyu imwimwi; andidi kuita mutongi wendaa dzakadaro.” Naye wakavadzinga kubva pachigaro chokutonga. Navo veshe vakabata Sosithenesi, mukuru wemhatso yokudira, vakamurova pamberi pechigaro chokutonga. NaGario aazi kutambudzika ngechimwe cheizvi. Naapo Phauri agarapo mazuva mazhinji, wakavhaisa vatendi, akahamba ngengarava kubva apo kuenda Siria, echiperekedzwa ndiPrisira naAkwira; muKhenikeria wakaparwa soro rake, ngokuti waiya akapika mhiko. Naapo aguma paEfesu, wakavasiyapo; asi Phauri pachake wakapotera mumhatso yokudira, akaereketa nevaJudha. Naapo vakakumbira kuti agare navo mukuwo wakapinda kureba, aazi kutenda; asi wakavavhaisa echiti, “Ndinozouyazve kwomuri, kudai Mwari echitenda,” wakahamba ngengarava kubva Efesu. Naapo aguma Sizaria, wakakwira kuchingamidza chiara, wakadzaka kuenda Antiokhi. Agarapo mukuwo, wakabveyo, akahamba nyika yeGaratia neFrigia ngokuteererana, echigwinyisa vadzidzi veshe. Zvino muJudha waizwi Aporosi, muArekizandria ngokubarwa, waiya munhu waikona kuereketa zvakanaka, wakauya Efesu; naye waiya ngwazi muzvinyorwa. Uyu waiya akadzidziswa njira yaMambo; echipisha mumweya, wakanasa kuereketa nokudzidzisa ngendaa yaJesu, kunyazwi waizia ngorubhabhatidzo rwaJohani rwega. Wakatanga kuereketa ngokushinga mumhatso yokudira, asi apo Prisira naAkwira vamuzwa, vakamutora parutii, vakanasa kumududzira ngenjira yaMwari. Naapo echida kupinda kuenda Akhaiya, vatendi vakamugwinyisa, vakanyora tsamba kunevadzidzi kuti vamuashire. Naapo aguma, wakadetsera kakurutu avo vakatenda kubudikidza ngenyasha. Ngokuti wakanasa kunyisa vaJudha pamhene, echionisa ngezvakanyorwa kuti Jesu ndiye Kristu. Naapo Aporosi ari muKhorinte, Phauri apedza kuhambira nyika dzedera wakaguma Efesu, akaona vadzidzi vamweni. Naye wakati kwavari, “Mwakaashira Mweya Wakachena here apo pemwakatenda?” Navo vakati kwaari, “Haiwa, atizi nokutongozwa kuti uripo Mweya Wakachena.” Naye wakati, “Mwakabhabhatidzwa ngorubhabhatidzo rwenyi?” Navo vakati, “Ngorubhabhatidzo rwaJohani.” Phauri wakati, “Johani wakabhabhatidza ngorubhabhatidzo rwokutenderuka, echironzera vanhu kuti vatende uwo waizouya sure kwake, kunoronza Jesu.” Naapo vazwa izvi, vakabhabhatidzwa ngezina raMambo Jesu. Naapo Phauri aisa nyara dzake padera pavo, Mweya Wakachena wakauya padera pavo; navo vakaereketa ngendimi nokuprofeta. Veshe pamwepo vaida kukwana kuita vanhu gumi navairi. Naye wakapotera mumhatso yokudira, akaereketa ngokushinga kwemwedzi mitatu, echiphikisana navo echivanyengerera ngendaa yezvoumambo hwaMwari. Naapo vamweni vakaomesa mwoyo nokuramba kutenda, vechiereketa zvakashata ngeiyo Njira pamberi pevanhu vazhinji, wakabva kwavari, akaenda pamwepo nevadzidzi, echipangana navo zuva ngezuva muchikora chaTiranusi. Izvi zvakaangira kuitwa makore mairi, ngokudaro avo veshe vaigara muAsia vakazwa izwi raMambo, veshe vaJudha nevaGiriki. Mwari wakaita mishamiso isina kumboitika ngenyara dzaPhauri, ngokudaro kwakatorwa kubva pamuiri pake madhuku nokuti machira, kuenda nazvo kunevairwara, nenhenda dzevaiya nadzo dzakabva kwavari, nomweya yakashata yakabuda kubva mwavari. Asi vamweni vevaJudha, n'anga vaihamba vechidzinga mweya yakashata, vakaedza kudaidza zina raMambo Jesu padera peavo vaiya nomweya yakashata vechiti, “Ndinokupanga ndiJesu uwo unochumairwa ndiPhauri.” Vaiyapo vakororo vanomwe vomupristi mukuru wevaJudha waizwi Sikevha, avo vaiita izvi. Asi mweya wakashata wakapingura, ukati kwavari, “Jesu ndinomuzia naPhauri ndinomuzia; asi imwimwi muri anani?” Naapo munhu waiya nomweya wakashata wakavanyandukira, akavanyisa veshe, ngokudaro vakatiza kubva mumhatsomwo vari mititinini, vakaremadzwa. Neizvi zvakaziikanwa ndivo veshe vaJudha nevaGiriki vaigara muEfesu, nokutyisa kwakagumira veshe. Nezina raMambo Jesu rakakudzwa. Vazhinji veavo vakatenda, vakauya vechireurira nokuonisa zviito zvavo. Nevazhinji veavo vaishandisa zvokukamba vakaunza tsamba dzavo pamwepo, vakadzipisha mukuona kwavo veshe. Navo vakaerenga mutengo wadzo, vakaona kuti waiya mazana makumi mashanu ezvigurwa zvesirivha. Ngenjira iyi izwi raMambo rakakura ngesimba, rakanyisa. Zvino ngesure kweizvi, Phauri wakaemesa mumweya kuhamba ngemuMasedhonia nomuAkhaiya, echienda Jerusarema, echiti, “Ndagumayo, ndinosisirazve kuti ndione Roma.” Naapo atuma vairi veavo vaimudetsera kuti vaende Masedhonia, Thimothi naErastusi, iye emene wakagara mukuwo mudoko muAsia. Ngouwo mukuwo kwaitwa bope gurutu ngendaa yeiyo Njira. Ngokuti munhu umweni waizwi Dhemetriusi, mupfuri wesirivha, waipfura miedzaniso yesirivha yechimwarikadzi Artemisi, wakapfumisa vapfuri ngemare yakawanda. Wakavaunganidza pamwepo vashandi vomushando umwewo, akati, “Vamuna, munozia kuti ngouyu mushando tinopfumiswa. Nemwi munoona nokuzwa kuti uyu Phauri wakanyengerera nokutenderudza vanhu vazhinji, haiwa muEfesu mwega, asi munyika yeshe yeAsia echiti, ‘Akuna zvimwari zvakaitwa ngenyara.’ Nengozi iripo andiyopi yega yokuti mushando wedu uyu ungashoorwa; asiwo kuti temperi rechimwarikadzi chikuru Artemisi rinozoerengwa kuti arina shwiro, nokuti ukuru hwake huparadzwe, uwo unodirwa ndivo veshe muAsia nomunyika dzeshe.” Apo vazwa izvi vakazara ngoushungu, vakadaidzira vechiti, “Mukuru Artemisi wevaEfesu!” Dhorobha rakazara ngehohoho; vakarumba ngechisungo chimwe kupotera mundau yokutambira, vechikweya Gaiusi naAristakhusi, vanhu veMasedhonia, avo vaiperekedza Phauri murwendo rwake. Phauri wakada kupotera kunevanhu avo, asi vadzidzi avazi kumutendera. Vamweni venduna dzeAsia vaiya shamwari dzake, vakatuma kwaari, vakamupota kuti arekere kupotera mundau yokutambira. Ndizvo vamweni vakadaidzira chiro chimwe, nevamweni chimweni; ngokuti mbungano yakakangaidzwa, uzhinji hwavo avazi kuzia chevakaunganira. Navo vakabudisa pamberi Arekizanda kubva pakati pechiunga, vaJudha vechimusukumidzira mberi. NaArekizanda wakakopera ngenyara, echida kudzirwira kunevanhu. Asi apo vazia kuti muJudha, veshe ngeizwi rimwe vakadaidzira kwomukuwo waida kuita maawa mairi vechiti, “Mukuru Artemisi wevaEfesu!” Naapo munyori wedhorobha anyaradza chiunga, wakati, “Imwimwi vamuna veEfesu, ndiani munhu usikazii kuti dhorobha reEfesu mungwariri wetemperi reArtemisi mukuru nomuedzaniso wakawa kubva mudenga? Ndizvo kwechioneka kuti izvi zviro azvingarambiki, kunosisira kuti munyarare, musikaiti ngechara. Ngokuti imwimwi mwaunza panapa ava vanhu, vasiri madzongoni ematemperi nokuti vatuki vechimwarikadzi chedu. Ndizvo kuti Dhemetriusi nevapfuri vanaye vane ndaa kunomunhu kunyazwi ngouri, mazuva okutonga ndaa aripo, nevatongi varipo; ngavamangarirane umwe noumweni. Asi kuti mwechitsvaka chiro chimweni, chinozogurwa ngomushongano wakaemeswa. Ngokuti ngegwinyiso tine ngozi yokuitirwa ndaa, ngendaa yebope raitwa nyamashi, apana chizato chetingapa kupembedza bope iri.” Naapo aereketa kudaro, wakaparadza mushongano. Bope rakati ranyarara, Phauri wakadaidza vadzidzi, wakavagwinyisa, akavavhaisa, wakabvapo akaenda Masedhonia. Naapo ahamba ngemundau idzo, echivagwinyisa ngemazwi mazhinji, wakaguma Girisi. Wakapedzamwo mwedzi mitatu. VaJudha vakapangana kumurwisa, apo echirongedza kuhamba ngengarava kuenda Siria, wakadziemesera kuhwirira echihamba ngemuMasedhonia. Wakaperekedzwa kuguma Asia ndiSopata, mukororo waPhirusi weBheria, naAristakusi naSekundusi veThesaronika, Gaiusi weDhebhe, Thimothi, Thichikusi naTrofimusi veAsia. Ava vakatungamira mberi, vakatigarira muTroasi; asi isusu takahamba ngengarava kubva Firipi ngesure kwemazuva eChingwa chisina Mumera, takaguma kwavari muTroasi ngesure kwemazuva mashanu; takagarapo mazuva manomwe. Nangezuva rokutanga revhiki, apo taungana kugura chingwa, Phauri wakaereketa kwavari; echida kubvapo nechimangwani, wakaangira kuereketa kwake metsa pakati pousiku. Zvaiyapo zvibani zvakawanda mukamera romuturikwa umwo mwetakaungana. Jaha, raizwi Utikusi, raiya rakagara pachiwindo, rakabatwa ngehope dzemadzikirira apo Phauri acharebesa kuereketa kwake; iro rechinyiswa ngehope dzaro, rakawa kubva kumuturikwa wechitatu, navo vakarimirudza rafa. Asi Phauri wakadzaka, akakotama padera pake, akamufungatira, akati, “Musatambudzika, ngokuti uchapona.” Naapo akwira mumuturikwa, wakagura chingwa, akadya, wakaangira kuereketa navo mukuwo wakareba, metsa kwakaedza; ngokudaro wakabvapo. Navo vakaunza jaha rechizwa, vakaembedzerwa kakurutu. Asi isusu, takatanga kuenda kungarava, takahamba ngengarava kuenda Asosi, apo techikarira kutorapo Phauri; ngokuti ndiye waiya aronga kudaro, echida pachake kuhamba ngetsoka. Naapo ashongana nesu muAsosi, takamukwidza mungarava, tikaenda Mitureni. Techihamba kubvapo ngezuva raiteera, takaguma kundau yakaringirana neKhiosi. Ngezuva raiteera takaguma Samosi; ngezuva raiteera, takaguma Miretusi. Ngokuti Phauri wakadziemesera kuhamba ngengarava kudarika Efesu, kuti asazopedza mukuwo muAsia; ngokuti waikasira, kuti kudai echikona ungaguma Jerusarema ngezuva rePentekosti. Ari muMiretusi wakatumira izwi Efesu, kuti vauye kwaari vakuru vechiara. Naapo vaguma kwaari, wakati kwavari, “Imwimwi mwemene munozia kugara kwangu pakati penyu nguva dzeshe kubvira ngezuva rokutanga rendakatsika tsoka muAsia, ndechishandira Mambo ngokupfaa kweshe kwomupinimidzo nemasodzi, nokuedzwa ukwo kwakandigumira kubudikidza ngokurwiswa ngevaJudha. Andizi kutya kuita kwomuri chiro chinomudetsera, ndechichumaira izwi kwomuri nokumudzidzisa pamhene, kubva kumhatso kuenda kumhatso, ndechivapanga kakurutu veshe vaJudha navaGiriki ngendaa yokutenderuka kunaMwari nokugonda kunaMambo wedu Jesu. Zvino, ringira, ndinoenda Jerusarema, ndakasungwa muMweya, ndisikazii izvo zvinozondigumira apo; asi kuti Mweya Wakachena unondipupurira mumadhorobha eshe kuti kusungwa nokutambudzwa kunondigarira. Asi andierengi kupona kwangu kuita chiro chinodikanwa kwendiri, kuti ndipedze bingo rangu, nomushando wendakaashira kubva kunaMambo Jesu kuchumaira vhangeri renyasha dzaMwari. “Zvino, ringirai, inini ndinozia kuti imwimwi mweshe mwendakahambira pakati penyu ndechichumaira umambo, amuchazoonizve hope yangu. Ndizvo ndinopupura kwomuri ngeiri zuva kuti ndakachena kune ngazi yenyu yeshe, ngokuti andizi kuumira kumuronzera kupanga kweshe kwaMwari. Dzingwarirenyi imwimwi pachenyu nedanga reshe remwakaemeswa padera paro ndiMweya Wakachena, kuti muite vangwariri varo, muushe chiara chaMwari, chaakatenga ngengazi yoMukororo wake emene. Ndinozia kuti ngesure kwokuenda kwangu, mathika anokara anozopotera pakati penyu, asina nyasha kudanga. Vamweni vanobva pakati penyu pemene vanozobuda vanhu, vechiereketa manyepo kupausa vadzidzi kuti vavateere. Ndizvo rindai, mwechikarakadza kuti ngomukuwo wemakore matatu andizi kurekera kupanga mweshe umwe ngaumwe wenyu usiku nemasikati, ndechichema masodzi. Nazvino ndinomupira kunaMwari nokuizwi renyasha dzake, iro rine simba rokumuaka nokumupa nhaka pakati pavo veshe vakacheneswa. Andizi kuemura sirivha nokuti mukore nokuti zvokufuka zvomunhu. Imwimwi mwemwene munozia kuti idzi nyara dzakashandira izvo zvendaitama, nezveavo vaiya neni. Ngezviro zveshe ndakamupa chionero, kuti ngokushanda kudaro tinosisira kuti tidetsere avo vasina simba, nokukarakadza mazwi aMambo Jesu, kudai ngezvaakaronza emene echiti, ‘Kunopinda kudakadza kupa kunokuashira.’ ” Naapo aereketa kudaro wakagwadama pashi, akakumbira navo veshe. Navo veshe vakachema masodzi, vakamumbundira Phauri, vakamuvhaisa ngomuromo, vechitambudzika kakurutu ngeizwi raakaereketa, kuti avachazomboonizve hope yake. Vakamuperekedza kuenda kungarava. Naapo taparadzana navo, takahamba ngengarava tikarurama kuenda Khosi, ngezuva raiteera takaguma Rodhesi nokubvapo takaguma Patara. Taona ngarava yaiambuka kuenda Foenisia, takapoteramwo, takahamba. Naapo taona Saipurasi, takarisiya ngokumuoshwe, takahamba kuenda Siria, tikaguma Thire; ngokuti apo ngarava yaibudiswa mitwaro yayo. Techiona vadzidzi, takagarapo mazuva manomwe. Kubudikidza ndiMweya Wakachena vakaronzera Phauri kuti asakwira Jerusarema. Naapo tapedzapo mazuva edu, takabvapo, tikaenda rwendo rwedu; navo veshe pamwepo nevakadzi vavo nevana vakatiperekedza metsa takabuda mudhorobha; tikagwadama pahumbikumbi yoruandhle, takakumbira. Naapo takavhaisana, takapotera mungarava, navo vakahwirira kanyi. Naapo tapedza rwendo kubva Thire, takaguma Putoremaisi; nesu takachingamidza vatendi, takagara navo zuva rimwe. Nechimangwani takabvapo, takaguma Sizaria: takapotera mumhatso yaFiripu muvhangeri, uwo waiya umwe wevanomwe, takagara naye. Waiya nevasikana varongomuna, mhandara, avo vaiprofeta. Naapo tichagarapo mazuva mazhinji, kwakadzaka muprofeti waibva Judhia, waizwi Agabhusi. Echiuya kwetiri, wakatora bhande raPhauri, wakadzisunga tsoka dzake nenyara, akati, “Unoronza izvi Mweya Wakachena, ‘Ngokudaro vaJudha vari muJerusarema vanozosunga munewebhande iri, vanozomupira munyara dzevemadzinza.’ ” Naapo tazwa izvi, teshe, isusu nevanhu veiyo ndau, taimupota kuti asakwira Jerusarema. Zvino Phauri wakapingura, akati, “Munoitenyi mwechichema nokutambudza mwoyo wangu? Ngokuti inini ndakanasirira haiwa kusungwa kwega, asi nokufira zina raMambo Jesu muJerusarema.” Naapo asikazi kutenda kupotwa, takanyarara techiti, “Kuda kwaMambo ngakuitike.” Mazuva aya apera, takatora nhumbi dzedu, takakwira Jerusarema. Vakahambawo nesu vamweni vevadzidzi vaibva Sizaria, vakauya kumhatso yomunhu unozwi Nasoni weSaipurasi, mudzidzi wokutanga, wetaizogara mumhatso mwake. Naapo taguma Jerusarema, vatendi vakatiashira ngokudakara. Ngezuva raiteera Phauri wakaenda nesu kunaJakobe; nevanhu vakuru veshe vaiyapo. Naapo avachingamidza, wakaerengudza chimwe ngachimwe ngokuteererana kwazvo izvo zvaakaita Mwari pakati pevemadzinza ngokushanda kwake. Naapo vazvizwa, vakakudza Mwari. Vakati kwaari “Unoona, hama, kuwanda kwemakumi emazana eavo vakatenda pakati pevaJudha; navo veshe vanotsamwirira muMipango. Zvino vakaronzerwa kuti iwewe unodzidzisa vaJudha veshe vari pakati pevemadzinza kuti varambe zvaMosi, wechivaronzera kuti vasacheka vana vavo nokuti vasangwarira mishuma. Zvino toitenyi? Ngegwinyiso vanozozwa kuti iwewe wauya. Ndizvo ita izvi zvetinokuronzera. Tine vanhu varongomuna pano vakapika mhiko. Tora vanhu ava udzichenese pachako navo, uvabhadharire zveshe zvavo, kuti vapare masoro avo. Ndizvo veshe vanozozia kuti apana gwinyiso pane izvo zveshe zvevakaronzerwa ngendaa yako, asi kuti iwewe wemene unonasa kuhamba, wechingwarira Mipango. Asi ngendaa yeavo vemadzinza vakatenda, takanyora tsamba, techigura kuti vadzingwarire kubva pane zvinobairwa miedzaniso yokudira nengazi neizvo zvinodzipwa nokuomba.” Zvino Phauri wakatora vanhu avo, ngezuva raiteera akadzichenesa pachake, wakapotera muTemperi navo, echionisa pamhene kuzadzisika kwemazuva okucheneswa, metsa mudiro wakapirwa ngendaa yaumwe ngaumwe wavo. Naapo mazuva manomwe ooda kupera, vaJudha vaibva Asia, avo vamuona ari muTemperi vakavherudza mbungano yeshe, vakamubata, vechidaidzira, “Vanhu vaIsuraeri, detserai! Uyu ndiye munhu unodzidzisa vanhu veshe kundau dzeshe kurwisana navanhu neMipango neiyi ndau; ndiyezve wakaunza vaGiriki muTemperi, wakasvipisa iyi ndau yakachena.” Ngokuti vaiya vakaona Trofimusi muEfesu anaye mudhorobha, vakapinimidza kuti Phauri wakamuunza muTemperi. Nedhorobha reshe rakavherudzwa, nevanhu vakarumba pamwepo. Navo vakabata Phauri, vakamukweyera kubanze kweTemperi; paripo misiwo yakakonywa. Naapo vachatsvaka kumuuraya, izwi rakaguma kunduna huru yemakumi emazana, kuti Jerusarema reshe raiya nehohoho. Paripo wakatora majoni nenduna dzemazana, akarumba kudzaka kwavari; naapo vaona nduna huru nemajoni, vakarekera kuponda Phauri. Naapo nduna huru yakakwedzera, ikamubata, ikapanga kuti asungwe ngemaketani mairi; ikabvunza kuti ndiani nokuti waitenyi. Vamweni pakati pembungano vakadaidzira chiro chimwe, vamweni chimweni; naapo yakorera kuzia gwinyiso ngendaa yehohoho, yakapanga kuti aunzwe kumhatso yevarwi vehondo. Naapo aguma pamakwiro, wakatwarwa ngemajoni ngendaa yebope rembungano. Ngokuti mbungano yakateera ngesure, yechidaidzira yechiti, “Muurayenyi!” Naapo vooda kuunza Phauri mumhatso yevarwi, wakati kunenduna huru, “Ndingatenderwa here kuereketa chiro kwouri?” Naye wakati kwaari, “Unozia chiGiriki here? Andiwepi muEgipite, uwo pamazuva apera wakavherudza vanhu kumukira, akaenda mushango nevaurayi mazana makumi marongomuna here?” Phauri wakati, “Inini ndiri muJudha, unobva Tarsusi reSirisia, wakabarwa mudhorobha guru rine mbiri; ndinokupota, nditendere ndierekete kuvanhu.” Naapo amutendera, Phauri echiema pamakwiro wakakopera vanhu ngenyara; naapo kwaiyapo kunyarara kukuru, iye wakaereketa kwavari ngendimi yechiHebheru echiti. “Hama nemadzibaba, izwai zvino kudzirwira kwendinoita pamberi penyu.” Naapo vazwa kuti waiereketa kwavari ngendimi yechiHebheru, vakapinda kunyarara. Zvino wakati. “Inini ndiri muJudha, ndakabarwa muTarsusi reSirisia, asi ndakakurira panapa mudhorobha iri, patsoka dzaGamarieri, ndakadzidziswa kudai ngomushuma wemipango yemadzibaba edu, ndechitsamwirira kunaMwari, kudai ngezvomunoita imwimwi mweshe nyamashi. Neni ndakatambudza veiyi Njira metsa parufu, ndechivasunga nokuvakonyera mutirongo, veshe vamuna nevakadzi, kudai ngezvaanondiitira chapupu mupristi mukuru navo veshe vakuru. Ndakaashira kubva kwavari tsamba dzokuenda kunevatendi, ndakaenda Dhamasekusi, kuti ndivaunzezve Jerusarema vakasungwa kuti vaororwe. “Zvino ndakati ndechihamba rwendo rwangu, ndechikwedzera Dhamasekusi, ooda kuita masikati, paripo kujeka kukurutu kwakajeka kunditendenedza kwechibva mudenga. Ndakawa pashi, ndikazwa izwi rechiti kwendiri, ‘Sauri, Sauri, unonditambudzirenyi?’ Neni ndakapingura ndikati, ‘Ndimwi anani, Mambo?’ Naye wakati kwendiri, ‘Ndini Jesu weNazaretha, uwo wounotambudza.’ Naavo vaiya neni vakaona kujeka, asi avazi kuzwa izwi rouwo waiereketa kwendiri. Ndakati, ‘Ndinozoitenyi, Mambo?’ NaMambo wakati kwendiri, ‘Miruka, uende Dhamasekusi; naapo unozoronzerwa zveshe zvowakaemeserwa kuti uite.’ Naapo ndisikakoni kuona ngendaa yokupenya kwokujeka ukwo, avo vaiya neni vakandibata ngenyara, vakanditungamirira, ndakaguma muDhamasekusi. “Zvino munhu umweni waizwi Ananiasi, wakarurama kudai ngezvinodiwa ngeMipango, unembiri yakanaka mukati mwavaJudha veshe vaigara apo, wakauya kwendiri; echiema pasinde pangu, wakati kwendiri, ‘Mukoma Sauri, chionazve.’ Ngeiro awa ndakaringira neni ndakamuona. Naye wakati, ‘Mwari wemadzibaba edu wakakuemesa kuti uzie kuda kwake, kuona Uwo Wakarurama nokuzwa izwi rinobva pamuromo wake; ngokuti iwewe unozoita uchapupu ndiye kuvanhu veshe cheizvo zvewakaona nezvewakazwa. Zvino uchagarirenyi? Miruka, ubhabhatidzwe, usukwe zvishaishi zvako, ukumbire ngezina rake.’ “Naapo ndapetuka Jerusarema, ndechikumbira muTemperi, ndakabatwa ndimweya, ndakaona Jesu echiti kwendiri, ‘Kasira, ubude kubva muJerusarema, ngokuti avazoashiri uchapupu hwako ndini.’ Neni ndakati, ‘Mambo, ivo vemene vanozia kuti ndaivakonyera mutirongo nokuvaponda mumhatso dzeshe dzokudira, avo vakatenda mwemuri. Naapo ngazi yaStefano chapupu chenyu yaparadzwa, ininiwo ndaiema pasinde, ndechitendera nokungwarira zvokufuka zveavo vakamuuraya.’ Naye wakati kwendiri, ‘Enda, ngokuti inini ndinozokutuma kuenda kuretu kuvanhu vemadzinza.’ ” Navo vakamupurutana metsa azoereketa izwi iri, vakadaidzira ngemazwi avo, vakati, “Bvisai munhu wakadaro panyika! Ngokuti aasisiri kuti apone.” Vachadaidzira nokukandira zvokufuka zvavo, vechikushira bukuta mudenga, nduna huru yakapanga kuti apotedzwe mumhatso yevarwi, echironza kuti abvunzisiswe ngokushwapurwa, kuti vazie kuti indaa yenyi yevakadaidzira kudaro ndiye. Asi apo vamusunga kuti ashwapurwe, Phauri wakati kunenduna yezana yaiema pasinde, “Kunotenderwa here kwomuri ngemipango kuti mushwapure munhu muRoma, asikazi kunyiswa ngendaa?” Naapo nduna yezana yazwa, yakaenda kunduna huru yemakumi emazana, yakamuronzera yechiti, “Unoda kuitenyi? Ngokuti uyu munhu muRoma.” Nduna huru yemakumi emazana yakauya, ikati kwaari, “Ndironzere, uri muRoma here?” Naye wakati, “Eya.” Nduna huru yemakumi emazana yakapingura, ikati, “Ndakatenga uRoma uhwu ngomutengo mukuru.” NaPhauri wakati, “Asi inini ndakabarwa ndakadaro.” Ndizvo vaida kumubvunzisa vakabva kwaari ngokukasira; nenduna huru yemakumi yakatya, apo yazia kuti waiya muRoma, ngokuti yaiya yamusunga. Asi nechimangwani, echida kuzia gwinyiso reizvo zvaakaitirwa ndaa ngevaJudha, wakamusunhura, akapanga vapristi vakuru nevatongi veshe vevaJudha kuti vaungane, wakadzasa Phauri, akamuisa pamberi pavo. Phauri echiringisisa vatongi vevaJudha wakati, “Hama, inini ndakapona ndisina ndaa mumwoyo pamberi paMwari metsa kuguma zuva iri.” Zvino mupristi mukuru Ananiasi wakapanga avo vaiema pasinde pake kumupamhadza pamuromo. Naapo Phauri wakati kwaari, “Mwari unozokupamhadza, iwewe rukumbati rwakachena! Unogara kunditonga ngeMipango, nokupanga kuti ndipamhadzwe ngenjira inopesana neMipango here?” Naavo vaiema pasinde vakati, “Unotuka mupristi mukuru waMwari here?” NaPhauri wakati, “Andizi kuzia, hama, kuti ndiye mupristi mukuru; ngokuti kwakanyorwa kuti, ‘Usazoereketa zvakashata ngomutongi wevanhu vako.’ ” Asi apo Phauri paakaona kuti rupande rwavo rumwe rwaiya vaSadhusi norumweni rwaiya vaFarisi, wakadaidzira mumbungano, “Hama, inini ndiri muFarisi, mukororo wevaFarisi; ngendaa yokugonda kwokumuka kubva kwevakafa inini ndinotongwa.” Naapo adaro, pakamuswa hasha pakati pevaFarisi nevaSadhusi; nembungano yakaguka ngepakati. (Ngokuti vaSadhusi vanoti akuna kumuka kwevakafa nokuti akuna ngirosi nokuti mweya; asi vaFarisi vanotenda zveshe.) Naapo kwakamuka bope guru; vamweni vevanyori vevaFarisi vakamiruka, vakaphikisa vechiti, “Ationi kushata kunouyu munhu. Pamweni mweya wakaereketa kwaari nokuti ngirosi?” Naapo kwamuka kuphikisana kukurutu, nduna huru yemakumi emazana, yechitya kuti Phauri unozobvajurwa ndivo kuita zvigurwa, yakapanga varwi kuti vadzake vamubvuke ngesimba kubva kwavari, vamuise mumhatso yevarwi. Usiku hwaiteera Mambo wakaema pasinde pake, akati, “Shinga! Ngokuti kudai ngezvewakaita chapupu ndini muJerusarema, ngokudaro kunosisira kuti uite chapupu muRomawo.” Zvino kwaedza, vaJudha vakapangana, vakadzisunga ngemhiko yokuti avazodyi nokuti kumwa metsa vauraya Phauri. Naavo vakapangana iri zano vaipinda makumi marongomuna kuwanda. Navo vakauya kunevapristi vakuru nevakuru vechiti, “Tadzisunga ngemhiko hurutu kuti, atizorairi chiro metsa tauraya Phauri. Ndizvo zvino imwimwi pamwepo nevatongi ronzerai nduna huru yemakumi emazana kuti amudzase kwomuri, muite kudai ngevanoda kunasa kutsvakisisa ndaa yake. Isusu tinonga tanasirira kumuuraya asati aguma pano.” Asi mukororo womukunda waPhauri wakazwa ngendaa yokumuhwarira kwavo, naye wakaenda, akapotera mumhatso yevarwi, akaronzera Phauri. NaPhauri wakadaidza kwaari imwe yenduna dzezana, akati, “Enda neiri jaha kunduna huru yemakumi emazana, ngokuti rinacho chiro chokumuronzera.” Ndizvo yakaenda naro kunduna huru yemakumi emazana, yakati, “Phauri mubhanditi wakandidaidza kwaari, akakumbira kuti ndiunze iri jaha kwouri rinacho chokuronza kwouri.” Nduna huru yemakumi emazana yakaribata ngenyara, ikaenda naro, ikaribvunza ngokufishika yechiti “Chiinyi chounoda kundironzera?” Naro rakati, “VaJudha vatenderana kukukumbira kuti udzase Phauri mangwani kuvatongi vevaJudha, vechiita kudai ngevanoda kutsvakisisa chiro ndiye. Ndizvo usazotenda kwavari; ngokuti vanozomuhwarira vanhu vanopinda makumi marongomuna, avo vadzisunga ngemhiko yokuti avazodyi nokuti kumwa metsa vamuuraya; zvino vanasirira, vechigarira chigondiso chinobva kwouri.” Ndizvo nduna huru yemakumi emazana yakatendera kuti jaha riende, echiripangisisa kuti, “Usazoronzera munhu kuti waziisa izvi kwendiri.” Zvino wakadaidza kwaari nduna mbiri dzezana, akati, “Nasirirai varwi mazana mairi, vanogadha mahachi makumi manomwe, vane mikhondo mazana mairi, okuenda Sizaria ngeawa rechitatu rousiku. Munasire zvifuyo kuti mugadhise Phauri padera pazvo, mumugumise akangwaririka kunaFerikisi mutongi.” Naye wakanyora tsamba ngendaa iyi echiti. “Kraudhiusi Rusiasi unomuchingamidza imwimwi mambo wakanasa kunaka Ferikisi. Uyu munhu wakabatwa ngevaJudha, waiya ooda kuurawa ndivo, apo ndakaguma kwavari nevarwi vehondo, ndakamuponesa, ndaiya ndazwa kuti muRoma. Ngokuti ndaida kuti ndizie ndaa yevakamuitira, ndamudzasa kuenda naye kuvatongi vavo vevaJudha. Ndakaona kuti wakaitirwa ndaa yemibvunzo yemipango yavo, asi waiya asina ndaa yaakaitirwa inosisira kuti aurawe nokuti asungwe. Naapo ndakaronzerwa inini kuti kunopanganwa zano rokuuraya uyu munhu, paripo ndakamutumira kwouri, ndechipangirazve avo vakamuitira ndaa kuti vaerekete kushaisha kwake pamberi pako.” Ndizvo varwi, kudai ngezvevakapangwa, vakatora Phauri, vakamuunza usiku Antipatirisi. Asi ngechimangwani vakasiya vanogadha mahachi kuti vaende naye, vakahwirira kumhatso yevarwi. Naavo vaguma Sizaria, vakapa tsamba kunomutongi, vakaunza Phauri pamberi pake. Naapo aidzidza, wakabvunza kuti waiya wenyika iri. Naapo azia kuti waiya weSirisia, wakati, “Ndinozozwa ndaa yako, apo vaguma avo vanokuitira ndaa.” Wakapanga kuti angwarirwe mungome mwaHerodhi. Ngesure kwemazuva mashanu, Ananiasi mupristi mukuru wakadzaka pamwepo nevakuru vamweni, noumweni waiya muereketeri, waizwi Teturusi, navo vakaronzera mutongi vechiitira ndaa Phauri. Naapo adaidzwa, Teturusi wakatanga kumuitira ndaa echiti, “Kubudikidza ndimwi tinodakara ngokunyarara kukurutu, zviro zvakashata zvinonasiriswa kuneiri dzinza ngenyasha dzenyu. Tinozviashira ngenjira dzeshe nokundau dzeshe, Ferikisi wakanasa kunaka, techikubonga kakurutu. Asi andichadi kumunonosa, ndinokupota kuti undizwe ngenyasha dzako mazwi mashomani. Ngokuti takaona uyu munhu kuti wakashata yaamho, unomusa bope pakati pevaJudha veshe munyika dzeshe, nomutungamiriri wechikwata chevaNazaretha. Wakaedza kusvipisa Temperi, asi takamubata. Takada kumutonga kudai ngemipango yedu. Asi nduna huru yemakumi emazana Rusiasi wakauya, akamubvuka ngesimba guru kubva kunyara dzedu, echipanga avo vanomuitira ndaa kuti vauye kwouri. Ngokumubvunzisisa wemene unozokona kuzia izvi zveshe zvetinomuitira ndaa ndizvo.” NevaJudha vakapindirawo kumuitira ndaa, vechigwinyisa kuti izvi ndizvo. Naapo mutongi akopera kwaari kuti aerekete, Phauri wakapingura, akati, “Inini ndinozia kuti iwewe wakaita mutongi wedzinza iri makore mazhinji, ndizvo ndinodakara ngokudzirwira pamberi pako. Kudai ngezvoungakona kudzionera iwewe pachako, kuti aasati apinda mazuva gumi namairi kubvira panguva yendakakwira Jerusarema koodira. Avazi kundiona muTemperi ndechiitirana hasha nomunhu nokuti ndechivherudza mbungano kuita bope, kunyazwi mumhatso dzokudira nokuti mudhorobha. Avakoni zvinopano kuonisa kwouri gwinyiso reizvo zvevanondiitira ndaa ndizvo. Asi izvi ndinotenda kwouri, kuti kudai ngeNjira yevanodudza kuti kupaukisa, ngokudaro inini ndinodira Mwari wemadzibaba edu, ndechitenda zveshe zviri zveMipango neizvo zvakanyorwa muvaprofeti. Ndine gonda munaMwari, iro revanotendawo ava, kuti kunozoapo kumuka kwevakafa, kwevakarurama nokwevasikazi kururama. Ngeiyi ndaa ndinoedza pachangu kugara ndino mwoyo usina ndaa kunaMwari nokunevanhu nguva dzeshe. Zvino ngesure kwemakore akawanda, ndakauya koopa zvipo nezvokupira mudiro kunevedzinza rangu. Mukuita izvi vakandiona ndakacheneswa muTemperi, pasina nembungano nokuti bope. Asi vaiyapo vaJudha vamweni vakabva Asia; avo vaisisira kuti vaapano pamberi pako nokundiitira ndaa, kudai vane ndaa kwendiri. Nokuti ava vanhu vari pano ngavaronze kushata kwevakaona kwendiri, ngeiyo nguva yendakaema pamberi pevatongi, ngokubanze kweizwi rimwe rega rendakadaidzira ndakaema pakati pavo ndechiti, ‘Indaa yokumuka kwevakafa, ndiyo ndaa yendinotongwa ndiyo nyamashi pamberi pako.’ ” Asi Ferikisi, echizia kakurutu ngendaa yeNjira iyi, wakavaronzera kuti vaemere echiti, “Apo Rusiasi nduna huru yemakumi emazana adzaka uno, ndinozokwarisisa ndaa yenyu.” Naye wakapanga nduna yezana kuti iye angwarirwe akasunhurika, pasina hama yake inorambidzwa kumushandira. Ngesure kwemazuva Ferikisi wakauya naDhrusira mukadzi wake, waiya muJudha, naye wakadaidza Phauri, akamuzwa echiereketa ngorutendo ruri munaKristu Jesu. Naapo paaionisa ngokururama nokudzibata nokutongwa kunozouya, Ferikisi wakatyiswa, akati, “Enda hako zvinopano, naapo ndazoona mukuwo kwawo, ndinozokudaidzazve.” Iye waigonda kuti waizopuwa mare ndiPhauri. Ndizvo wakamudaidza mikuwo mizhinji echipangana naye. Asi apo makore mairi apera, Phokiusi Festusi wakagara pandau yeFerikisi mutongi; naFerikisi echida kudiwa ngevaJudha, wakasiya Phauri mutirongo. Ndizvo Festusi aguma munyikayo, ngesure kwemazuva matatu wakakwira Jerusarema, echibva Sizaria. Apo vapristi vakuru nevakuru vevaJudha vakamuronzera ndaa yaPhauri, vakapota kwaari, vechikumbira kuti avadakadzise ngokuita kuti Phauri atumirwe Jerusarema, kuti vazohwarira kumuuraya munjira. Asi Festusi wakapingura akati Phauri wakangwarirwa muSizaria, ngokuti iye waida kukasira kuendayo. Wakati, “Ndizvo ngavadzake neni avo vane simba pakati penyu, kudai iripo ndaa kunouwo munhu, ngavamumangarire.” Naapo agara pakati pavo mazuva asikapindi masere nokuti gumi, iye wakadzaka kuenda Sizaria; nechimangwani wakagara pachigaro chokutonga ndaa, akapanga kuti Phauri aunzwe. Naapo auya, vaJudha avo vakadzaka vechibva Jerusarema vakaema vechimutendenedza, vechimuitira ndaa dzakawanda dzakashata, dzevasaikona kuonisa pamhene. Naapo Phauri mukudzirwira kwake wakati, “Andizi kugura mipango yevaJudha nokuti yeTemperi nokuti kunaSiza.” Asi Festusi, echida kudiwa ngevaJudha, wakapingura Phauri, akati, “Unotenda here kukwira Jerusarema, utongwe ngeidzi ndaa pamberi pangu?” Asi Phauri wakati, “Ndinoema pachigaro chokutonga chaSiza, apo panosisira kuti nditongwe. Andizi kuita chiro chakashata kuvaJudha, kudai ngezvounonasa kuzia iwewe. Ndizvo kudai ndiri muiti wezvakashata, ndakaita chinosisira kuti ndife, andirambi kufa akadi; asi kudai pasina gwinyiso kuneizvo zvevanondiitira ndaa ndizvo ava, apana munhu ungandipira kwavari. Ndinopota kuti ndaa yangu ikwidzwe kunaSiza.” Naapo Festusi apangana nevatongi vevaJudha, wakapingura echiti, “Iwewe wapota kuti ndaa yako ikwidzwe kunaSiza; unozoenda kunaSiza.” Zvino kwapera mazuva amweni, mambo Agripa naBhenise vakaguma Sizaria, vakachingamidza Festusi. Navo vachagarapo mazuva mazhinji, Festusi wakatura ndaa yaPhauri pamberi pamambo echiti, “Pane munhu wakasiiwa ari bhanditi ndiFerikisi. Naapo ndaiya muJerusarema vapristi vakuru nevakuru vevaJudha vakanditurira ndaa, vechikumbira kuti atongwe. Inini ndakapingura kuti andiwopi mushuma wevaRoma kuti vapire munhu kunyazwi ngouri kumutongi, asati aonana hope kuhope nouwo unomumangarira, kuti aone mukuwo wokudzirwira ngendaa yaanoitirwa. Ndizvo apo vaungana pano, andizi kunonoka, asi ngezuva raiteera ndakagara pachigaro chokutonga ndaa, ndakapanga kuti uwo munhu aunzwe. Naapo vaimuitira ndaa vaema, avazi kumuitira ndaa yezvakashata kudai ngezvendaikarira. Asi vakamuitira ndaa yezviro zvimweni nemibvunzo ngendaa yokudira kwavo nendaa youmwe Jesu, wakafa, waakagwinyisisa Phauri kuti unopona. Ndechikangaidzwa ngenjira yokubvunzwa kweizvi zviro, ndakamubvunza kuti ungatenda kuenda Jerusarema, atongerweyo ndaa idzi. Asi apo Phauri akumbira kuti angwarirwe metsa ndaa igurwe ndimambo mukuru, ndakapanga kuti angwarirwe metsa ndakona kumutumira kunaSiza.” Agripa wakati kunaFestusi, “Inini ndingada kuti ndimuzwe munhuwo pachangu.” Iye wakati, “Mangwani unozomuzwa.” Ndizvo nechimangwani Agripa naBhenise vakauya, vakapfeka zvouthende hukuru, vakapotera kundau yokupurutana ndaa, pamwepo nenduna huru nevakuru vedhorobha. Naapo Festusi apanga, Phauri wakapotedzwamwo. NaFestusi wakati, “Mambo Agripa nevanhu veshe vari pano nesu, munoona munhu uyu, uwo wevakaitira ndaa vaJudha veshe, veshe vomuJerusarema nevepano, vechidaidzira kuti aasisiri kuti apone. Asi inini ndakaona kuti aazi kuita chiro chinomuita kuti aurawe; zvino kudai ngezvaakakumbira kuti ndaa yake ikwidzwe kunamambo mukuru, ndakagura kumutumirayo. Asi andina chiro chine gwinyiso chokunyora kunamambo wangu. Ndizvo ndamuunza pamberi penyu, kakurutu pamberi pako, mambo Agripa, kuti ngesure kwokutsvakisisa ndingatozoona chokunyora. Ngokuti kwendiri kunooneka chiri chiro chisina shwiro, mukutumira bhanditi, pasikadudzirwi ndaa dzaanopomerwa ndidzo.” Agripa wakati kunaPhauri, “Unotenderwa kudziereketera pachako.” Naapo Phauri wakatambanudza nyara yake, akadzirwira. “Ndinopinimidza kuti ndinomuchena ngokuti ndiri pamberi pako, mambo Agripa, ndinodzipingurira nyamashi ndaa dzeshe dzendinomangarirwa ngevaJudha, kakurutu ngokuti iwewe unonasa kuzia mishuma nemibvunzo yeshe iri pakati pevaJudha. Ndizvo ndinokupota kuti undipurutane ngokusengerera. “Njira yokupona kwangu kubvira muutsva hwangu, ukwo kwakapera kubvira pakutanga pakati pevedzinza rangu nomuJerusarema, vaJudha veshe vanoizia. Vakandizia kubvira pakutanga, kudai vechida kupupura, kuti ngenjira yakapindisisa kururama yokudira kwedu, ndakapona ndiri muFarisi. Nazvino ndinoema pano kutongwa ngendaa yegonda rechigondiso icho chakaitwa kunemadzibaba edu ndiMwari, chigondiso icho madzinza edu gumi namairi chevaigonda kuashira, apo vechidira Mwari usiku namasikati. Ngendaa yeichi chigondiso ndinoitirwa ndaa ngevaJudha, mambowoe! Ngenyi kwechipinimidzwa ndimwi kuti azvingaitiki kuti Mwari amuse vakafa? “Ngegwinyiso inini pachangu ndakagutswa mukati mwangu kuti ndinosisira kuti ndiite zvakawanda zvinorwisana nezina raJesu weNazaretha. Ndakaita izvi muJerusarema; ndakakonyera vazhinji vevakacheneswa mutirongo, ndapuwa simba kubva kuvapristi vakuru, asi apo vaiurawa, ndakatenderawo. Ndechivatambudza kazhinji mumhatso dzokudira, ndakaedza kuita kuti vatuke Mwari; ndine ushungu hukuru kwavari, ndakavatambudza metsa kuguma kumadhorobha emadzinza amweni. “Ndizvo zvakaita kuti ndiende Dhamasekusi, ndine simba nokutumwa kubva kuvapristi vakuru. Pakati pemasikati, ndiri munjira, mambowoe, ndakaona kujeka kwakabva mudenga, kwakapinda kujeka kwezuva, kwechijeka kunditendenedza naavo vaihamba neni. Naapo takawa teshe pashi, ndakazwa izwi rechiti kwendiri mundimi yechiHebheru, ‘Sauri, Sauri, unonditambudzirenyi? Kwakakonza kwouri kupunhura pakapinza.’ Neni ndakati, ‘Ndimwi anani, Mambo?’ NaMambo wakati, ‘Ndini Jesu wounotambudza. Asi miruka, ueme ngetsoka dzako; ngokuti ndaoneka kwouri ngendaa iyi, kuti ndikuemese kuita mushandi nomupupuri weizvo zvewaona neizvo zvendinozooneka kwouri ndizvo. Ndinozokununurira kubva kunevanhu veshe nokubva kunevemadzinza, avo vendinokutumira kwavari kubeura madziso avo nokuvatenderudza kuti vabve muchidima, vapotere mukujeka, nokubva kusimba raSathani kuuya kunaMwari, kuti vaashire kukungurirwa kwezvishaishi, kuti vagare nhaka mukati mweavo vakacheneswa ngokugonda kwendiri.’ “Ndizvo, mambo Agripa, andizi kuramba kupurutana chioniso chomudenga, asi ndakatanga kuchumaira kwavari veshe veDhamasekusi nomuJerusarema nomunyika mweshe mweJudhia nokunevemadzinza kuti vatenderuke, vakunukukire kunaMwari, vechiita mishando inosisira kutenderuka kwavo. Ngeiyi ndaa vaJudha vakandibata ndiri muTemperi, vakaedza kundiuraya. Ndizvo ndakadetserwa ngorudetso rwakabva kunaMwari, ndichakaema nanyamashi, ndechipupura kwavari veshe vadoko nevakuru, ndisikaronzi chiro chimweni ngokubanze kweizvo zvevakaronza vaprofeti naMosi kuti zvinozouya; kuti kunosisira kuti Kristu atambudzike nokuti aite wokutanga kumuka kubva kwevakafa, kuti achumaire kujeka kuvanhu vedu nokune vemadzinza.” Achadzirwira kudaro, Festusi wakadaidzira ngeizwi guru echiti, “Phauri, unopenga! Kudzidza kwako kukuru kunokupengesa.” Asi Phauri wakati, “Andipengi akadi, mambo Festusi, asi ndinoereketa mazwi anegwinyiso noungwaru. Ngokuti mambo unozia ngendaa yeizvi zviro, uwozve pamberi pake ndinoereketa ngokusunhurika; ngokuti ndinozia kuti akuna nachimwe cheizvi chakafishika kwaari, ngokuti izvi azvizi kuitika pakafishika. Mambo Agripa, unotenda here zvinyorwa zvevaprofeti? Ndinozia kuti unozvitenda.” NaAgripa wakati kunaPhauri, “Ngokukasira unoda kundiita muKristu here?” NaPhauri wakati, “Ndinoda pamberi paMwari, kunyazwi mukuwo mudoko nokuti muzhinji, haiwa iwewe wega, asi naavo veshe vanondizwa nyamashi vangaita vakadai ndini, ngokubanze kweizvi zvisungo.” Naapo mambo wakamiruka nomutongi naBhenise naavo vaaigara navo. Naapo vaiya vatorana dumba, vakapangana umwe kunoumweni vechiti, “Munhu uyu aazi kuita chiro chinomuita kuti aurawe nokuti asungwe.” NaAgripa wakati kunaFestusi, “Munhu uyu dai asikazi kukumbira kuti ndaa yake ikwidzwe kunaSiza, waizodai asunhurwa.” Naapo kwagurwa kuti tiende ngengarava Itaria, vakapira Phauri nemabhanditi amweni kunduna yezana yaizwi ndiJuriusi wehondo yaAgustusi. Techipotera mungarava yaAdramitiumu, yaida kuenda kundau dziri kumhiri kworuandhle rweAsia, takahamba, Aristakhusi muMasedhonia wakabva Thesaronika wakahamba nesu. Nechimangwani takaguma paSidhoni; naJuriusi wakabata Phauri zvakanaka, wakamutendera kuti ahambire shamwari dzake, kuti vamudetsere. Techihamba ngengarava kubvapo, takahamba ngepakafishika peSaipurasi, ngokuti dutu raipesana nesu. Apo tahamba kuambuka ruandhle ruri pasinde neSirisia nePhamufiria, takaguma Mira, mudhorobha reRisia. Naapo nduna yezana yakaona ngarava yeArekizandria, yaihamba kuenda Itaria, nayo yakatipotedzamwo. Naapo takahamba zvianana mazuva mazhinji, tikaguma tatambudzika apo pakaita maringwa neSinidhusi, naapo dutu risikatitenderi kugumayo, takahamba kuenda pakafishika paKrete, apo pakaita maringwa naSaramoni. Ngokutambudzika takahamba ngepasinde payo, tikaguma kundau yaidaidzwa kuti, Mazambuko Akanaka, pasinde pawo paiya nedhorobha reRasea. Naapo mukuwo wakareba wapera, nokuhamba kwomumvura kwaiya kwaane ngozi zvino, ngokuti mukuwo womushongano wokuera kudya waiya wapinda, Phauri wakavanyowedza, akati kwavari, “Vamuna, ndinoona kuti muhambo wengarava uyu unozoita madambudziko nokurashikirwa ngezvakawanda, andizvopi zvega zvemitwaro nengarava, asi nokupona kwedu.” Asi nduna yezana yakanasa kupurutana muhambisi wengarava mukuru nomuna wengarava kupinda izvo zvakaereketwa ndiPhauri. Ngokuti zambuko raiya risikazi kunaka kuti vangagarapo kupedza nguva yechando; uzhinji hwavo vakapangana kubvapo, kuti pamweni vangakona kuguma paFoenikisi nokugarapo nguva yechando; ndau iyo ndiro zambuko reKrete, rinoringira kubani kwemabirirazuva nedera kwemabirirazuva. Apo dutu rokubani rakavhuvhuta zvianana, navo vechikarira kuti vakaona chevaida, vakamirudza chitsimiso, vakahamba kuteera Krete, pasinde pemahumbikumbi. Asi ngokukasira mubvumo mukuru, unozwi wedera kwemabvazuva, wakavhuvhuta, wechibva munyika. Naapo ngarava yakabatwa, isikakoni kuenda mberi, takaringirana nokunobva dutu, takarekera, tikatorwa ndiro. Takahamba ngokubani kuenda pachiwi chidoko pakafishika chinozwi Khaudha, takakona kusunga mukumbi. Asi tatambudzika. Vapedza kuukwidza, vakashandisa zvaidetsera, vechisunga ngarava ngepashi; navo vechitya kuti vanozokandirwa pajecha repaSiritisi, vakadzasa machira okuhambisa ndiwo ngarava, ngokudaro takatorwa. Techitambudzwa kakurutu ngomubvumo wedutu nechimangwani vakatanga kurasha mitwaro muruandhle; ngezuva rechitatu vakatanga kurasha midziyo yengarava ngenyara dzavo. Naapo zuva nokuti nyeredzi azvizi kujeka kwemazuva mazhinji, nomubvumo mukuru waiya padera pedu, gonda reshe rokuti tinozopona rakapera. Naapo vagara mukuwo wakareba vasina kudya, Phauri wakaema pakati pavo, akati, “Hama, mwaisisira dai mwakapurutana kwendiri, musikazi kuhamba kubva Krete, musaizoona uku kutambudzika nokurashikirwa. Zvino ndinomupanga kuti mutsunge mwoyo; ngokuti akuna munhu unozofa pakati penyu, asi kwega ngarava. Ngokuti kwakaema pasinde pangu usiku huno ngirosi yaMwari, wendiri wake nowendinoshandira yechiti, ‘Usatya, Phauri; kunosisira kuti ueme pamberi paSiza; wona, Mwari wakakupawo veshe avo vanohamba newe.’ Ndizvo, hama, tsungai mwoyo, ngokuti ndinogonda Mwari kuti kunozoitika kudai ngezvaakaereketa kwendiri. Asi kunosisira kuti tikandirwe pachiwi chimweni.” Asi apo usiku hwechigumi nohurongomuna hwaguma, tichandotorwa apo naapo muruandhle rweAdhria, kwooita pakati pousiku vashandi vengarava vakakarakadza kuti vaikwedzera pasinde penyika. Navo vakapima kudzama kwemvura, vakaona kuti aiya mamitha makumi marongomuna; ngesure vahamba nharauko doko vakapimazve, vakaona kuti aiya mamitha makumi matatu. Vechitya kuti pamweni tingazowira pamapuwe, vakadzasa zvitsimiso zvengarava zvirongomuna ngesure kwengarava, vakadisisa kuti kuedze. Apo vashandi vengarava vachatsvaka kutiza kubva mungarava, vakadzasa mukumbi muruandhle, vechiita kudai ngevanokandira zvitsimiso kubvira ngemberi kwengarava. Phauri wakati kunenduna yezana nokuvarwi, “Ngapabanze pokuti ava vagare mungarava, amungaponi.” Naapo varwi vakacheka mapote omukumbi, vakaurekera kuti uwe. Naapo kwaedza, Phauri wakavapota kuti veshe vadye echiti, “Zuva iri raarechigumi namarongomuna romunogara mwechirekera kudya, musina chemwakatongodya. Ndizvo ndinomupota kuti mudye, ngokuti ndikwo kunomupa simba rokuti mupone; ngokuti akuna norubvudzi runozotsakatika kubva musoro roumwe wenyu.” Naapo aereketa izvi, wakatora chingwa, akachibonga kuna Mwari pamberi pavo veshe, naye wakachigura, akatanga kudya. Naapo vakashingiswa veshe, vakatorawo kudya. Nesu teshe taiya mungarava taiya vanhu vaiya mazana mairi nemakumi manomwe navatanhatu. Naapo vaguta, vakarerusa ngarava, vechirasha koroni muruandhle. Naapo kwaedza, avazi kuzia iyo nyika, asi vakaona chipforo chine humbikumbi rine jecha, vakapangana kuti vangakona here kuhambisa ngarava kuiisa padera pehumbikumbi. Vakacheka mapote ezvitsimiso vakazvisiya muruandhle, ngouwo mukuwo vechisunhura mapote aisunga zvihambiso zvengarava, vechikwidza machira okuhambisa emberi kunedutu, vakaaringirisa kumhiri. Asi vechiguma pandau panoshongana maruandhle mairi, vakaemesa ngarava mujecha; nemberi kwengarava kwakaemeswa kwakagara kusikakutukuswi, asi rutii rwayo rwesure rwakatanga kupwanywa ngemafungu. Vangwariri vakapangana kuda kuuraya mabhanditi, kuti amweni awo asazoshambira kubuda nokutiza; asi nduna yezana, yechidisisa kuponesa Phauri, yakavapinga kuti vasaita kukarakadza kwavo. Wakavapanga kuti avo vaikona kushambira vadzikandire muruandhle, vabude kunyika nevakasara, vamweni vabude padera pezvigurwa zvengarava nokuti padera pemarupande amweni engarava. Ndizvo zvakaitika kuti veshe vakabuda kunyika vakangwaririka. Naapo tapona, takazia kuti chiwi chaizwi Maritha. Vagari vepachiwipo vakatiitira nyasha dzinoshamisa, ngokuti vakatibasirira muriro, vakatiashira teshe, ngokuti mvura yainaya nechando chaitonhora. Asi apo Phauri aunganidza dzido rehuni nokuriisa pamuriro, buura rakabuda ngendaa yokupisha, rikaramba rakaruma panyara yake. Naapo vagari vepachiwipo vaona chikara chakaruma panyara yake, vakati umwe kunoumweni, “Ngegwinyiso uyu munhu muurayi; kunyazwi akapona kubva muruandhle, kururama akumutenderi kuti apone.” Asi iye wakazuwira chikara pamuriro, asikazi kuremadzwa. Vakaema vechikarakadza kuti uchazvimba nokuti kuwa pashi ngokukasira echifa; asi apo vagarira mukuwo wakareba, vasikazi kuona chiro chakashata chechiitika kwaari, vakakunukudza kupinimidza kwavo, vakati, uyu chimwari. Zvino pasinde pendau iyo paiya neminda yamambo mukuru wechiwi, zina rake raizwi Pabhuriusi; uwo wakatiashira, akanasa kutingwarira mazuva matatu. Kwakaitika kuti baba aPabhuriusi vaiya vakaata vakabatwa ngemutsarara nenyoka dzokuhambisa; Phauri wakapoteramwo mwevaiya, akakumbira, echiisa nyara dzake padera pavo, akavaponesa. Naapo izvi zvaitika, vamweni vevanhu vaiya nenhenda pachiwi, vakauya vakaponeswa. Vakationisa kuremeredzwa kukurutu; tobvapo ngengarava, vakakwidza mungarava izvo zvetaitama parwendo. Ngesure kwemwedzi mitatu takahamba tiri mungarava yokwaArekizandria, iyo yaiya yakagara pachiwipo mukuwo wechando weshe, chioniso chayo chaizwi Chimwari Manyambiri. Techiguma Sirakuse, takagarapo mazuva matatu. Tabvapo takatenderera, tikaguma Regiumu. Ngesure kwezuva rimwe dutu raibva ngokubani rakavhuvhuta, nepazuva rechipiri takaguma Phuteori. Ndipo petakaona vatendi, vakatikoka kugara navo mazuva manomwe. Ndizvo takaguma Roma. Kubvira apo, vakoma vakazwa ngendaa yedu, vakauya kutiashira, metsa paMusika weApiusi nokuHodhera Nhatu. Apo Phauri avaona, wakabonga Mwari, akashingiswa. Naapo takapotera muRoma, nduna yezana yakapira mabhanditi kune nduna yechikwata chemajoni, asi Phauri wakatenderwa kugara ari ega nejoni raimungwarira. Kwapera mazuva matatu, wakadaidza pamwepo avo vaiya vakuru vevaJudha; naapo vaiya vaungana, wakati kwavari, “Hama, kunyazwi inini andizi kuita chiro chakashata kunevanhu vedu nokuti kumishuma yemadzibaba edu, asi ndakabva Jerusarema ndiri bhanditi, ndakaiswa munyara dzevaRoma. Naapo vaiya vandibvunzisisa, vakada kundisunhura, ngokuti paiya pasina ndaa yokuti ndiurawe. Asi apo vaJudha varamba, ndakaitwa kuti ndikwidze ndaa yangu kunaSiza; haiwa kuti ndaiya nendaa yokumangarira dzinza rangu ndiyo. Ndizvo ngeiyi ndaa ndakamudaidza kuti ndimuone nokuereketa nemwi, ngokuti ngendaa yegonda raIsuraeri ndakasungwa ngeketani iyi.” Navo vakati kwaari, “Atizi kuashira tsamba dzakabva Judhia ngendaa yako, akunazve umwe wevatendi wakauya pano kootironzera nokuti kuereketa chiro chakashata ndiwe. Asi tinodisisa kuzwa ndiwe izvo zvounopinimidza; ngokuti ngendaa yechiunga ichi, kunoziikanwa kwetiri kuti kundau dzeshe chinoereketwa zvakashata ndicho.” Naapo vaiya vamuemesera zuva, vakauya kwaari vakawanda pandau paaigara. Wakavaerengudzira, echipupura ngoumambo hwaMwari, echinasa kuvaronzera ndiJesu, kubvira kuMipango yeshe yaMosi nevaprofeti, kubvira mangwanani metsa madeekoni. Vamweni vakatenda izvo zvaakaronza, asi vamweni avazi kuzvitenda. Ndizvo avazi kutenderana pachavo; naapo vechibvapo, Phauri aereketa izwi rimwe kuti, “Mweya Wakachena wakanasa kuereketa ndiIsaya muprofeti kunemadzibaba enyu “echiti, ‘Enda kuneava vanhu wechiti, ngegwinyiso munozozwa, asi musikazwisisi; ngegwinyiso munozoona, asi musikaonesisi. Ngokuti mwoyo yeava vanhu yakakonza nenzee dzavo adzizwisisi nemadziso avo vakatswatira; kuti vasazoona ngemadziso avo, vazwe ngenzee dzavo, nokuzwisisa ngomwoyo yavo, vatenderuke, neni ndivaponese.’ “Ndizvo ngakuziikanwe kwomuri kuti urwu ruponeso rwaMwari runotumirwa kumadzinza; navo vanozozwawo.” [ Naapo aereketa mazwi aya, vaJudha vakaenda vechiitirana hasha huru.] Naye wakagara makore mairi eshe ari mumhatso yake yaaibhadhara pachake, echiashira avo veshe vaipoteramwo, echichumaira umambo hwaMwari nokudzidzisa ngendaa yaMambo Jesu Kristu ngokushinga kweshe, pasina naumwe waimurambidza. Phauri, muranda waJesu Kristu, wakadaidzwa kuita mupostori, wakaemeserwa vhangeri raMwari, iro raakagondisa karetu kubudikidza ngevaprofeti vake muzvinyorwa zvakachena, ngendaa yoMukororo wake, wakabarwa kubva kurudzi rwaDhavhidha ngokwenyama, wakaoniswa ngesimba kuti Mukororo waMwari ndimweya wokuchenesa ngokumuka kwake kubva kwavakafa, Jesu Kristu Mambo wedu, kubudikidza ndiye takaashira nyasha noupostori kuti tiunze kupurutana kwokugonda pakati pamadzinza eshe ngendaa yezina rake, nemwiwo muri pakati pavo mwakadaidzwa kuita vaJesu Kristu. Kwavari veshe vari muRoma vanodikanwa ndiMwari, vakadaidzwa kuita vakacheneswa. Nyasha kwomuri nokunyarara kunobva kunaMwari Baba wedu naMambo Jesu Kristu. Pakutanga, ndinobonga Mwari wangu kubudikidza ndiye Jesu Kristu ngendaa yenyu mweshe, ngokuti kugonda kwenyu kunochumairwa munyika dzeshe. Ngokuti Mwari uwo wendinoshandira mumweya wangu muvhangeri roMukororo wake, ndiye chapupu changu, kuti ndinomukarakadza ngenguva dzeshe mumikumbiro yangu, ndechikumbira ngokuda kwaMwari pakugumisira ndingabudirira kuti ndiuye kwomuri. Ngokuti ndine chishuwo chokuda kumuona, kuti ndingakoanisirana nemwi chimwe chezvipo zvomweya kuti mugwinyiswe, zvinoronza kuti, isusu tingagwinyisana ngokugonda kwoumwe ngaumwe wedu, kweshe kwenyu nokwangu. Ndinoda kuti muzie, hama, kuti kazhinji ndaida kuti ndiuye kwomuri (asi ndakapingwa metsa zvino), kuti ndianemuchero umweni pakati penyu kudai ngezvendinawozve kumadzinza amweni. Ndine chikwereti kwavari veshe vaGiriki nevapara, vakangwara nemapenzi; ndizvo kudai ngezvendinodisisa ndakasisira kuchumaira vhangeri kwomurizve imwimwi vari muRoma. Ngokuti andina nyowa ngevhangeri; ngokuti isimba raMwari rokuponesa veshe vanotenda, kutanga kuvaJudha nokuvaGirikiwo. Ngokuti mukati mwaro rinoonisa kururama kwaMwari kubva mukugonda kuenda mukugonda; kudai ngezvakanyorwa, “Uwo wakarurama kubudikidza ngokugonda unozopona.” Ngokuti ushungu hwaMwari hunooniswa hwechibva mudenga kurwa nazvo zveshe zvisikasisirani naMwari nokusikarurama kwevanhu vanotsikirira gwinyiso ngokusarurama. Ngokuti izvo zvinoziikanwa ngevanhu ngendaa yaMwari zviri pamhene kwavari, ngokuti Mwari wakazvionisa kwavari. Ngokuti kubvira pakusikwa kwenyika zviro zvake zvisikaoneki, zvechiziikanwa kudai ngezviro zvakasikwa, zvinoti, simba rake remhera nariini noUmwari hwake, zvinonasa kuoneka. Ndizvo avachaiti vasina ndaa; ngokuti kunyazwi vechimuzia Mwari avazi kumuremeredza kudai ndiMwari nokuti kumubonga, asi vakaita vasina shwiro mumipinimidzo yavo nemwoyo yavo isina kungwara yakaita chidima. Vechidziita vakangwara, vakaita mapenzi; vakatenganisana uthende hwaMwari husikaori kuti vaashire muemo womuedzaniso womunhu unoora nokuti weshiri nokuti wemhuka dzine mirenje mirongomuna nokuti wezvinotamanda. Ndizvo Mwari wakavarekera mukuemura kwomwoyo yavo kutsvina, kuti vadzishaishire miiri yavo pakati pavo pachavo, vakatenganisa gwinyiso raMwari kuti vaashire manyepo nokudira nokushandira icho chakasikwa pandau yoMusiki, uwo unomuchena mhera nariini! Ameni. Ngeiyi ndaa Mwari wakavarekera mukuemura kwavo kunotsverudza. Ngokuti nevakadzi vavo vakatenganisana chibarirwe kuita izvo zvinosiyana nechibarirwe, ngokudarowo vamuna navo vechirekera chibarirwe chavo nevakadzi, vakatsva ngokuemurana kwavo umwe kunoumweni, vamuna vechiita nevamuna izvo zvisikasisiri, vechiashira mukati mwavo ukwo kuthuswa kunosisira kupauka kwavo. Kudai ngezvevasikazi kuona zvakanaka kugara vasikazii Mwari, Mwari wakavarekera mukupinimidza kunonyangadza nokuita zviro zvisikasisiri. Vaiya vakazadzwa ngokusikarurama kweshe, kuomba, kuboka, kuitirana zvakashata. Vakazadzwa ngendurumwa, kuuraya, hasha, kuchengedzera, kushatisisa, kureya, kushonyongora, kunyenya Mwari, kudada, kudzikudza, kuganza, kutanda zvakashata, kusikapurutana vabari, mapenzi, vasikagondeki, vasina rudo kuhama, vasina nyasha. Kunyazwi vechizia chiemeso chaMwari chinoti avo vanoita zvakadaro vanosisira kufa, avateri kuita izvi zvega, asi vanotenderazve naavo vanogara vechizviita. Ndizvo auchaiti usina ndaa, kunyazwi ndiani unotonga umweni; ngokuti ngeicho chounotonga umweni ndicho unodziitira ndaa ndicho, ngokuti iwewe, mutongi, unondoita zviro ndizvo ndizvo. Tinozia kuti kutonga kwaMwari kunegwinyiso kunowira padera paavo vanoita zviro zvakadaro. Iwe munhuwe, unotonga avo vanoita zviro zvakadaro, asi newe wechiitawo zvakadaro, unopinimidza kuti iwewe unozopokonyoka kutonga kwaMwari here? Nokuti unoshoora here upfumi hwenyasha dzake nokushingirira nokusengerera, usikazii kuti nyasha dzaMwari dzinokukweera kuti utenderuke? Asi ngokukonza nokusikatenderuka kwomwoyo wako unodziunganidzira pachako ushungu pazuva roushungu, apo panozooniswa kutonga kwakarurama kwaMwari. Uwo unozounzidzira kumunhu weshe kudai ngemishando yake; kwavari avo ngokusengerera vanoita zvakanaka mukutsvaka uthende nokuremeredzwa nokusikaori, unozovapa kupona kusikaperi; asi kwavari vanodzida vasikapurutani gwinyiso, asi vanopurutana zvisikazi kururama, kunozoapo ushungu nokutseneka. Kunozoapo kutambudzika nokurwadziwa padera pomunhu weshe unoita zvakashata, kutanga kuvaJudha nokuvaGirikiwo, asi uthende nokuremeredzwa nokunyarara kunozoa kunomunhu weshe unoita zvakanaka, kutanga kuvaJudha nokuvaGiriki navo. Ngokuti kunaMwari akuna mukheto. Ngokuti avo veshe vakashaisha vasina Mupango vanozofawo vasina Mupango, navo veshe vakashaisha vari pashi peMupango vanozotongwa ngeMupango. Ngokuti andivopi vazwi veMupango vanozopembedzwa pamberi paMwari, asi vaiti veMupango vanozopembedzwa. Naapo vemadzinza avo vasina Mupango vanodziitira zvinodiwa ngeMupango, ava kunyazwi vasina Mupango vari mipango pachavo. Vanoonisa zvinodiwa ngeMupango zvakanyorwa mumwoyo yavo, naapo mwoyo yavo inoita chapupu nawo nemipinimidzo yavo umwe ngaumwe inovaitira ndaa nokuti kuvapembedza, ngeiro zuva raanozotonga ndiro Mwari zvakafishika zvevanhu, ndiye Kristu Jesu, kudai ngevhangeri rangu. Asi kudai iwewe wechidzidaidza pachako kuti uri muJudha, wechigonda Mupango nokuganza ndiMwari, wechizia kuda kwake, wechikona kutsara izvo zvakapinda kunaka, ngokuti unodzidziswa muMupango, newe unegwinyiso kuti uri mutungamiriri wemapofu, nokujeka kwaavo vari muchidima, nomupangi wemapenzi, nomudzidzisi wevana, iwewe muMupango une chiemo chokuzia nechegwinyiso, ndizvo iwewe unodzidzisa vamweni, audzidzidzisi here? Iwewe unochumaira kuti munhu asazoba, unoba here iwewe? Iwewe unoti munhu asazoomba, unoomba here iwewe? Iwewe unonyenya miedzaniso inodirwa, unoba here zvakacheneswa mumatemperi? Iwewe unodziganzisa ngeMupango, ngokugura kwako Mupango, unoita here kuti Mwari asaremeredzwa? Ngokuti, kudai ngezvakanyorwa kuti, “Zina raMwari rinotukwa pakati pevemadzinza ngendaa yenyu.” Ngokuti ngegwinyiso kuchekwa kunodetsera kudai uri muiti weMupango; asi kudai uri muguri weMupango, kuchekwa kwako kunoita kusikachekwi. Ndizvo, kudai avo vasikazi kuchekwa vechingwarira zviemeso zveMupango, kusikachekwa kwavo akuzoerengwi here kuti kuri kuchekwa? Zvino avo vasikazi kuchekwa kuri chibarirwe kudai vechingwarira Mupango avazokutongi iwewe uneMupango yakanyorwa nokuchekwa asi unogura Mupango. Ngokuti andiyepi muJudha emene unooneka akadaro ngokubanze, nokuti kuchekwa ukwo kuri kwokubanze kwomuiri. Asi muJudha ndiye uri muJudha ngomukati, nokuchekwa kwemene kwomumwoyo, kunoitwa mumweya andikwopi kwezvakanyorwa. Kukudzwa kwake akubvi kuvanhu asi kunobva kunaMwari. Ndizvo muJudha unenyi chaanopinda vamweni ndicho? Nokuti kuchekwa kunodetserenyi? Kakurutu ngenjira dzeshe. Kutanga ndivo vaJudha vakapuwa mazwi aMwari. Ndizvo kunozoitikenyi kudai vamweni vavo vasikazi kugondeka? Kusikagondeka kwavo kunozoita here kuti kugondeka kwaMwari kuite kusina shwiro? Haiwa! Mwari ngaaoneke ari gwinyiso, kunyazwi munhu weshe munyepi, kudai ngezvakanyorwa, “Kuti iwewe upembedzwe ngemazwi ako nokunyisa mukutongwa kwako.” Asi kudai kusikarurama kwedu kwechionisa kururama kwaMwari, tinozotinyi? Mwari uri usikazi kururama here, uwo unounzidzira ngoushungu? (Ndinoereketa kudai ngomunhu.) Haiwa! Ngokuti kudai zvakadaro Mwari ungazoita matongerenyi nyika? Asi kudai gwinyiso raMwari rechiwanzwa ngokunyepa kwangu, kuita kukudzwa kwake, ngenyi inini ndichatongwa kudai ngomushaishi? Atironzi ngenyi (kudai ngokureyiwa kwedu nokudai ngezvevanoronza vamweni tisu kuti tinoti), “Ngatiite zvakashata kuti kunaka kuuye?” Avo kurashwa kwavo kunovasisira! Zvino chiinyi? Isusu vaJudha tirinane kuvapinda here? Haiwa, azvizi kudaro; ngokuti ngepamberi tambotonga kuti vanhu veshe, vaJudha nevaGiriki, vari pashi pesimba rokushaisha, kudai ngezvakanyorwa kuti, “Apana naumwe wakarurama, haiwa, apana naumwe; apana naumwe unozwisisa, apana naumwe unotsvaka Mwari. Veshe vakapauka, veshe pamwepo vakaita vasina shwiro; apana naumwe unoita zvakanaka, haiwa, apana naumwe.” “Mikuro yavo iiba rakabeuka; ngorurumi rwavo vanochengedzera.” “Uroyi hwechianzo huri pashi pemiromo yavo.” “Miromo yavo yakazara ngokutuka nokuvava.” “Tsoka dzavo dzinohambisa kuenda kooparadza ngazi; kuparadzwa nokutambudzika zviri munjira dzavo, nenjira yokunyarara avazi kuizia.” “Apana kutya Mwari pamberi pemadziso avo.” Zvino tinozia kuti kunyazwi ngechiri chinoronzwa ngoMupango chinoereketwa kwavari vari pashi peMupango, kuti miromo yeshe inyaradzwe, nenyika yeshe iuye mukutonga kwaMwari. Ngokuti akuna munhu naumwe ungapembedzwa pamberi pake ngemishando yoMupango, ngokuti kubudikidza ngoMupango kushaisha kwakaziikanwa. Asi zvino kururama kwaMwari kwakaoniswa ngepabanze peMupango, kunyazwi Mupango nevaprofeti zvinoita chapupu ndizvo, kururama kwaMwari kunouya kubudikidza ngokugonda Jesu Kristu kwavari veshe vanotenda. Ngokuti apana muparadzaniso, ngokuti veshe vakashaisha avahaniri kuuthende hwaMwari; vechipembedzwa ngenyasha dzake ngokuripirwa kuri munaJesu Kristu, uwo waakaemesa Mwari kuita mudiro wokuiyanisa, ngokugonda, ngengazi yake, kuti kuashirwe ngokugonda. Uku ndikwo kunoonisa kururama kwaMwari, ngokuti mukusengerera kwake wakafuratira zvishaishi zvakaitwa ngepamberi. Kwaiya kuonisa ngouyu mukuwo kuti iye pachake wakarurama nokupembedza uwo unotenda munaJesu. Zvino kuganza kwedu kunoitenyi? Kwakabviswa. Ngomupango uri? Ngomupango wemishando here? Haiwa! Asi ngomupango wokugonda. Ngokuti tinotenda kuti munhu unopembedzwa ngokugonda ngepabanze pemishando yoMupango. Zve Mwari ndiMwari wevaJudha vega here? Andiyepi Mwari wevemadzinzawo here? Eya, uri wevemadzinzawo. Mwari ndiumwe ega; naye unozopembedza vakachekwa kubudikidza ngokugonda nevasikazi kuchekwa kubudikidza ngokugonda. Ndizvo tinorekeredza Mupango ngokugonda uku here? Haiwa! Asi tinogwinyisisa Mupango. Ndizvo tinozotinyi ndiAbrahama, baba edu ngokwenyama? Ngokuti kudai Abrahama akapembedzwa ngemishando, unacho chokuganza ndicho, asi haiwa pamberi paMwari. Ngokuti zvinyorwa zvinotinyi? “Abrahama wakagonda Mwari, kwakaerengerwa kwaari kuti kuri kururama.” Zvino kwaari unoshanda, muthuso wake auerengwi kuti chipo, asi kuti muthuso. Asi kwaari usikashandi asi iye unogonda kunouwo unopembedza vasikadi Mwari, kugonda kwake kunoerengerwa kwaari kuti kururama. Dhavhidhawo unofumisa munhu uwo waakaerengera Mwari kuti kururama ngepabanze pemishando echiti, “Vanomuchena avo vane zvinyangadzo zvavo zvakarekererwa, nezvishaishi zvavo zvakafishwa; unomuchena munhuwo waasikaerengi Mambo kuti uno kushaisha.” Ndizvo chifumiso ichi ngechevakachekwa here nokuti kunevasikazi kuchekwawo? Ngokuti tinoti, “Kuna Abrahama kugonda kwake kwakaerengerwa kwaari kuti wakarurama.” Ndizvo kwakaita maerengerwenyi kwaari? Zvakaitika achekwa here nokuti asati achekwa? Haiwa achekwa, asi asati achekwa. Wakaashira kuchekwa kuita chioniso chinogwinyisa kururama kwokugonda ukwo kwaaiya anakwo asati achekwa, kuti aite baba weavo veshe vanotenda, kunyazwi vasina kuchekwa, kuti kuerengerwe kwavari kuti vakarurama, nokuti aite baba vevakachekwa haiwa vevakachekwa vega asi veavozve vanohamba muzvitsiko zvokugonda kwavaiya vanakwo baba edu Abrahama apo vaiya vasati vachekwa. Ngokuti chigondiso chokuti unozogara nhaka yenyika achizi kuitwa kunaAbrahama nokuti kunevana vake kubudikidza ngoMupango akadi, asi chakaitwa kubudikidza ngokururama kwokugonda. Ngokuti kudai avo veMupango vari vanogara nhaka, kugonda kwaitwa kusina shwiro nechigondiso chinoita chisina shwiro. Ngokuti Mupango inounza ushungu, asi apo pasina Mupango apana kupauka. Ndiyo ndaa kwechiitwa ngokugonda, kuitira chigondiso kuti chiitwe ngenyasha, chigwinyiswe kumibarirwana yeshe, haiwa kwavari veMupango, asi nokwavari avo vanokoanisirana kugonda kwaAbrahama, uri baba edu teshe, kudai ngezvakanyorwa, “Ndakakuita baba wemadzinza akawanda” mukuona kwaMwari uwo waakatenda, unomusa vakafa echidaidza izvo zvisipo kudai ngezviripo. Abrahama wakatenda Mwari kunyazwi paiya pasina chizato chaiita kuti agonde, ngokudaro wakaita baba wemadzinza akawanda, kudai ngezvaakaronzerwa kuti, “Mubarirwana wako unozowanda.” Aazi kurembedzeka mukugonda, apo paakapinimidza ngomuiri wake uwo waiya wakadai ngowakafa, anemakore anoda kuita zana, nokuti ngokufa kwechibereko chaSara. Akuna kugononda kwakamuita kuti apere simba ngechigondiso chaMwari, asi wakagwinyiswa mukugonda kwake echikudza Mwari, echigwinyisa kakurutu kuti Mwari unokona kuita icho chaakagondisa. Ndiyo ndaa yakaita kuti kugonda kwake, “Kuerengerwe kwaari kuti kururama.” Zvino akuzi kunyorwa ngendaa yake yega kuti, “Kwakaerengerwa kwaari kuti kururama,” asi ngendaa yeduwo. Kunozoerengerwa kudaro kwetiri isusu tinotenda kwaari uwo wakamusa Jesu Mambo wedu kubva kunevakafa, uwo wakapirwa ngendaa yezvishaishi zvedu, echimuswazve kuitira kupembedzwa kwedu. Ndizvo, kudai ngezvetinopembedzwa ngokugonda, tino kunyarara naMwari kubudikidza ndiMambo wedu Jesu Kristu. Kubudikidza ndiye takapotedzwa ngokugonda munyasha idzi dzetinoema mukati mwadzo, nesu tinoganza mukugonda ngokuwa nouthende hwaMwari. Andizvopi zvega, asi tinoganza mumadambudziko edu, techizia kuti kutambudzika kunobara kusengerera nokusengerera kunobara kurovedzera, nokurovedzera kunobara kugonda, nokugonda akutitsverudzi, ngokuti rudo rwaMwari rwakadururwa mumwoyo yedu kubudikidza ndiMweya Wakachena wakapuwa kwetiri. Ngokuti apo petaiya tisina simba, ngomukuwo wakasisira Kristu wakafira vasikatendi Mwari. Ngokuti zvakakonza kuti munhu afire munhu wakarurama, kunyazwi pamweni umwe ungashingirira kufira munhu wakanaka. Asi Mwari unoonisa rudo rwake kwetiri ngokuti apo tichiri vashaishi Kristu wakatifira. Kakurutu zvino, takapembedzwa ngengazi yake, tinozoponeswa ndiye kubva kuushungu hwaMwari. Ngokuti kudai apo taiya magaa takaiyaniswa kunaMwari kubudikidza ngokufa kwoMukororo wake, kakurutu tiri vakaiyaniswa, tinozoponeswa ngendaramo yake. Andizvopi zvega, asi tinoganzazve kunaMwari kubudikidza ndiye Mambo wedu Jesu Kristu, zvino kubudikidza ndiye takaashira kuiyaniswa. Ndizvo kudai ngezvokwakapotera kushaisha munyika kubudikidza ngomunhu umwe norufu rwakauya kubudikidza ngokushaisha, ngokudaro rufu rwakagumira vanhu veshe ngokuti veshe vakashaisha; ngegwinyiso kushaisha kwaiyapo munyika Mupango usati waapo, asi kushaisha akuerengwi apo pasina Mupango. Asi rufu rwakatonga kubvira kunaAdhamu metsa kuguma kunaMosi, kunyazwi nokwavari vasikazi kushaisha ngenjira yaakapauka ndiyo Adhamu, uwo waiya muedzaniso wouwo waiya echizouya. Asi chipo chenyasha achizi kuedzaniswa nokupauka. Ngokuti kudai vazhinji vakafa ngokupauka kwomunhu umwe, kakurutu nyasha dzaMwari nechipo chenyasha chomunhu umwe, Jesu Kristu, chakawanziswa kune vazhinji. Asi chipo chenyasha achizi kuedzanisirwa uwo wakashaisha. Ngokuti kutongwa kwakaguma ngoumwe kwakaunza kurashwa, asi chipo chenyasha chakauya ngokupauka kwavazhinji kuti kupembedzwe. Kudai, ngokuti munhu umwe wakashaisha, rufu rwakatonga kubudikidza ngomunhu umwe, kakurutu avo vanoashira ngokuwanda kwenyasha nechipo chokururama vanozotonga mukururama kubudikidza ngomunhu umwe, Jesu Kristu. Ndizvo kudai kupauka kwoumwe kwakaunza kurashwa kwevanhu veshe, ndizvo kubudikidza ngokuita kwomunhu umwe wakarurama chipo chenyasha chakatungamirira vanhu veshe mukupembedzwa nomukupona. Ngokuti ngokusikapurutana kwomunhu umwe vazhinji vakaitwa vashaishi, ngokudaro ngokupurutana kwomunhu umwe vazhinji vanozoitwa vakarurama. NoMupango wakapotera kuti kushaisha kuwande; asi apo kushaisha kwawanzwa, nyasha dzakapinda kakurutu kuwanzwa, ndizvo, kudai kushaisha kwakatonga kubudikidza ngorufu, nyasha dzinotongawo kubudikidza ngokururama kunotungamirira kupinda mukupona kusikaperi kubudikidza ndiye Jesu Kristu Mambo wedu. Ndizvo tinozotinyi? Tondogara mukushaisha here kuti nyasha dziwanzwe? Haiwa! Isusu takafa kuzvishaishi tingachaita maponerenyi mukati mwazvo? Nokuti amuzii here kuti isusu teshe takabhabhatidzwa munaKristu Jesu takabhabhatidzirwa murufu rwake? Ndizvo takaikwa pamwepo naye ngokubhabhatidzwa murufu, ndizvo kudai ndiKristu akamuswa kubva kwevakafa ngouthende hwaBaba, ngokudaro isusuwo tihambe mukupona kutsva. Ngokuti kudai takabatanidzwa pamwepo naye murufu rwakadai ngorwake, ngegwinyiso tinozobatanidzwa naye mukumuka kwakadai ngokwake; techizia kuti munhu wedu wekare wakakohomerwa pamwepo naye kuti muiri wokushaisha upere, kuti isusu tisachazoita varanda vokushaisha. Ngokuti uwo wafa wapembedzwa kubva kuzvishaishi. Asi kudai isusu takafa pamwepo naKristu, tinogonda kuti tinozoponazve naye. Ngokuti tinozia kuti Kristu amuswa kubva kwevakafa aachatongofizve; rufu aruchazotongi padera pake. Ngokuti rufu rwaakafa, wakafa kuzvishaishi kamwe kega; asi ndaramo yaanopona, unopona kunaMwari. Ndizvo ngokudaro mwechidzierenga nemwi kuti muri vakafa kuzvishaishi, asi kuti munopona kunaMwari munaKristu Jesu. Ndizvo musatendera kuti kushaisha kutonge mumiiri yenyu inofa, kuti mupurutane kuemura kwayo. Zve, musapa zvemiiri yenyu kuita midziyo inoshandiswa kuita zvisikazi kururama, asi dzipirenyi kunaMwari kudai ngevanhu vakamuswa kubva kwevakafa, nezvemiiri yenyu kuita midziyo yokushanda zvokururama kunaMwari. Ngokuti kushaisha akuzotongi padera penyu akadi, ngokuti imwimwi amusiri pashi peMipango asi pashi penyasha. Zvino chiinyi? Tinozoshaisha here ngokuti atisiri pashi peMupango asi pashi penyasha? Haiwa! Amuzii here kuti uwo womunodzipa kwaari kuita hloko dzinopurutana, munoita hloko dzouwo womunopurutana, kunyazwi dzokushaisha kunoisa murufu nokuti dzokupurutana kunoisa mukururama? Asi ngaabongwe Mwari kuti kunyazwi imwimwi mwaiya hloko dzokushaisha, mwakaita vanopurutana ngomwoyo weshe kugwinyiso rinooneka mudzidziso yakapuwa kwomuri, nokuti imwimwi, mwechisunhurwa kubva mukushaisha, mwakaita hloko dzokururama. Ndinoereketa ngomushuma wevanhu, ngendaa yokutama simba kwenyu muchibarirwe. Ngokuti kudai ngezvemwakapira nhengo dzemiiri yenyu kuita hloko dzokusikasukika nedzokushaisha kuti muite zvakashata yaamho, ndizvo zvino mwechipira nhengo dzemiiri yenyu kuita hloko dzokururama kunomuita vakacheneswa. Naapo pemwaiya hloko dzokushaisha, mwaiya mwakasunhurwa kubva kundaa dzokururama. Ndizvo zvino mwaiya nemichero yakaitawani ngouwo mukuwo kubva kuneizvo zviro zvomunotsveruka ndizvo? Ngokuti magumo azvo rufu. Asi zvino mwasunhurwa kubva mukushaisha mwaita hloko dzaMwari, munemichero yenyu inoita kuti mucheneswe, nemagumo enyu kupona kusikaperi. Ngokuti misharo yokushaisha kufa, asi chipo chenyasha dzaMwari kupona kusikaperi munaKristu Jesu Mambo wedu. Amuzii here, hama, ngokuti ndinoereketa kuneavo vanozia mipango, kuti mipango inotonga padera pomunhu mukuwo wega waanopona? Ngokuti mukadzi unomwamuna unosungwa ngomupango kunomwamuna wake achapona; asi kuti mwamuna wake afa, unosunhurwa kubva kumupango wemwamuna wake. Ndizvo kudai apo mwamuna wake achapona, akagara nemwamuna umweni, unozozwi muombi. Asi kuti mwamuna wake afa, iye unosunhurwa kubva kumupango, ndizvo aachazozwi muombi kunyazwi akagara nomwamuna umweni. Ndizvo, hama dzangu, imwimwiwo mwakafa kuMupango kubudikidza ngomuiri waKristu, kuti muite vemunhu uwo wakamuswa kubva kwevakafa, kuti tiberekere Mwari michero. Ngokuti apo petaiya munyama, kuemura kwokushata, kwakamuswa ngendaa yoMupango, kwakashanda munhengo dzomuiri wedu kukabudisa michero inounza rufu. Asi zvino isusu takasunhurwa kubva kuMupango, takafa kuneizvo zvaiya zvakatiita vasungwa, ndizvo zvino atishandi tiri hloko pashi pemitemo yekaretu yakanyorwa, asi tiri mundaramo itsva yomweya. Ndizvo tinozotinyi? Mupango kushaisha here? Haiwa! Asi kudai waiya usiri mupango ndaizodai ndisikazi kuzia kushaisha. Ngokuti ndaizodai ndisikazi kuzia kuemura kudai mupango usikazi kuti, “Usazoemura.” Asi kushaisha, kwechiona njira muzvironzo, kwakashanda mukati mwangu mbeu dzeshe dzokuemura. Ngokuti ngepabanze peMupango kushaisha kwakafa. Neni ndaipona ngepabanze peMupango karetu, asi apo kwaguma zvironzo, kushaisha kwakamuswa neni ndakafa, nomupango uwo waigondisa kupona, uyu ndakauona wechiita rufu kwendiri. Ngokuti kushaisha, kwechiona njira kubudikidza ngezvironzo, kwakandichengedzera nokubudikidza ndizvo kwakandiuraya. Ndizvo Mupango wakachena, nezvironzo zvakachena, zvakarurama zvakanaka. Ndizvo izvo zviri zvakanaka zvakaita rufu kwendiri here? Haiwa! Asi ndikwo kushaisha, kunounza rufu kwendiri kubudikidza ngeicho chakanaka, kuitira kuti kushaisha kuoneke kuti kushaisha, ngokubudikidza ngezvironzo kuite kwakanyanyisisa kushata. Ngokuti tinozia kuti Mupango ngewoMweya; asi inini ndiri wenyama, ndakatengeswa pashi pokushaisha. Inini andizwisisi zvendinoita. Ngokuti andiiti izvo zvendinoda, asi ndinoita izvo zvendinonyenya. Zvino kudai ndechiita zvendisikadi, ndinotendera kuti Mupango wakanaka. Ndizvo zvino andinipi ndinoita kudaro, asi kushaisha kunogara mukati mwangu. Ngokuti ndinozia kuti amuna zvakanaka zvinogara mukati mwangu, izvo zvinoronza munyama yangu. Ngokuti kuda kurimwo mukati mwangu, asi kuita zvakanaka amuna akadi. Ngokuti zvakanaka zvendinoda kuita andizviiti, asi kushata kwendisikadi ndikwo kwendinoita. Zvino kudai ndechiita zvendisikadi, andinipi ndinozviita, asi kushaisha kunogara mukati mwangu. Ndizvo ndinoona zvakaita mupango kuti apo ndooda kuita zvakanaka, kushata kundoripo pendiri. Ngokuti ndinodakara muMupango waMwari ngomunhu womukati mwangu, asi ndinoona mupango umweni uri munhengo dzangu, wechiambana nomupango mumupinimidzo wangu wechindiisa muuranda kumupango wokushaisha uri munhengo dzangu. Munhu unotambudzika wakadai ndini! Ndiani unozondinunurira kubva kunouyu muiri worufu? Ngaabongwe Mwari kubudikidza ndiye Jesu Kristu Mambo wedu! Ndizvo zvino, inini ndemene ngomupinimidzo wangu ndiri hloko yoMupango waMwari, asi ngenyama yangu ndiri hloko yemipango yokushaisha. Ndizvo zvino akuchina kuitirwa ndaa kwavari vari munaKristu Jesu. Ngokuti mupango woMweya wokupona munaKristu wakandisunhura kubva kunemupango wokushaisha neworufu. Ngokuti Mwari wakaita izvo zvewaiya usikakoni kuita Mupango, ngendaa yokupera simba kwawo kubudikidza ngenyama; Mwari wakatuma Mukororo wake ari mumuemo wenyama ino kushaisha ngendaa yokushaisha, iye wakaitira ndaa kushaisha kuri munyama, kuti kururama kwoMupango kuzarisike mukati mwedu, isusu tisikahambi ngezvenyama asi ngezvoMweya. Ngokuti avo vanopona ngezvenyama vanoemesa mipinimidzo yavo kuzviro zvenyama, asi avo vanopona ngezvoMweya vanoemesa mipinimidzo yavo kuzviro zvoMweya. Ngokuti kuemesa mupinimidzo kuzviro zvenyama kufa, asi kuemesa mupinimidzo kuzviro zvoMweya kupona nokunyarara. Ngokuti mupinimidzo wezvenyama kuambana naMwari; ngokuti aupfairi Mupango waMwari, ngegwinyiso aungakoni; naavo vari munyama avangamudakadzi Mwari. Asi imwimwi amuri munyamapi, asi mwaa muMweya, kudai ngegwinyiso Mweya waMwari wechigara mukati mwenyu. Kunyazwi ndiani usina Mweya waKristu, uyu aasiri wake akadi. Asi kudai Kristu ari mukati mwenyu, kunyazwi muiri wakafa ngendaa yokushaisha, Mweya unopona ngendaa yokururama. Kudai Mweya wouwo wakamusa Jesu kubva kwevakafa wechigara mukati mwenyu, uwo wakamusa Kristu kubva kwevakafa unozoponesazve miiri yenyu inofa ngoMweya wake unogara mukati mwenyu. Ndizvo zvino, hama, tine zvikwereti, haiwa kunyama, kuti tipone ngezvenyama, ngokuti kudai mwechipona ngezvenyama munozofa, asi kudai ndiMweya mwechiuraya zviito zvomuiri munozopona. Ngokuti veshe vanotungamirirwa ndiMweya waMwari ava vana vaMwari. Ngokuti amuzi kuashira Mweya wouhloko kuti mutyezve, asi mwakaashira Mweya kuti muite vana vaMwari, ndiwo tinochema techiti, “Abha! Baba!” Mweya emene unoita chapupu pamwepo nomweya wedu kuti isusu tiri vana vaMwari; kudai tiri vana, tiri vanogara nhaka, vanogara nhaka yaMwari, naavo vanogara nhaka pamwepo naKristu, kudai ngegwinyiso techitambudzwa pamwepo naye kuti tikudzwewo pamwepo naye. Ngokuti ndinoerenga kuti madambudziko omukuwo uno aasisiri kuedzaniswa nouthende uhwo hunozooniswa kwetiri. Ngokuti ngokushuwira kukurutu zvakasikwa zvinogarira kuoniswa kwevana vaMwari; ngokuti zvakasikwa zvakapfaiswa kunezvisina shwiro, haiwa ngokuda kwazvo asi ngokuda kwouwo wakaita kuti zvipfaiswe mukugonda; ngokuti zvakasikwa zvemene zvinozosunhurwa kubva muuranda hwokuora kupotera mukusunhurika kwouthende hwevana vaMwari. Ngokuti tinozia kuti zvakasikwa zveshe zvinogomera pamwepo mukurwadziwa kudai ngekwokubara metsa nazvino. Andizvopi zvega zvisikwa, asi isusuwo pachedu, avo vane michero yokutanga yoMweya, tinogomera mukati mwedu techigarira kuitwa vana vaMwari, kusunhurwa kwemiiri yedu. Ngokuti takaponeswa ngokugonda. Asi kugonda ukwo kunooneka akusiri kugonda akadi. Ngokuti ndiani unogonda icho chaanoona? Asi kudai tine gonda reicho chetisikaoni, tinozochigarira ngokusengerera. Ngokudaro Mweya unotidetsera mukurembedzeka kwedu; ngokuti atizii njira inosisira yokukumbira ndiyo, asi Mweya emene unoita muemeri ngokugomera kusikabviri kuronzwa. Mwari unoringisisa mwoyo unozia mupinimidzo woMweya, ngokuti Mweya unokumbirira vakacheneswa kudai ngokuda kwaMwari. Nesu tinozia kuti zveshe zvinoshanda pamwepo kuita zvakanaka kwavari avo vanomuda Mwari, avo vakadaidzwa kudai ngokuemesa kwake. Ngokuti avo vaakazia ngekaretu wakavaemesa ngekaretu kuti vatodzaniswe nomuemo woMukororo wake, kuti iye aite dangwe pakati pehama dzakawanda. Naavo vaakaemesa ngekaretu wakavadaidzawo; naavo vaakadaidza wakavaruramisawo; naavo vaakaruramisa wakavakurisawo. Ndizvo tinozotiyi kuneizvi? Kudai Mwari echitirwira, ndiani unozorwisana nesu? Iye usikazi kuramba noMukororo wake, asi wakamupa ngendaa yedu teshe, aazotipi ngenyasha zviro zveshe zvaanazvo here? Ndiani unozoitira ndaa vakatsanangurwa vaMwari? NdiMwari unopembedza. Ndiani unozoitira ndaa? NdiJesu Kristu wakafa, eya, wakamuswa kubva kwevakafa, uwo uri ngokumudyo kwaMwari, uwozve unotikumbirira. Ndiani unozotiparadzanisa norudo rwaKristu? Madambudziko here, nokuti kurwadziwa, nokuti kutambudzwa, nokuti nzara, nokuti kutama zvokupfeka, nokuti ngozi, nokuti shoti? Kudai ngezvakanyorwa, “Ngendaa yako tinourawa zuva reshe; takaerengwa tiri vakadai ngemakwai akaemeserwa kuurawa.” Haiwa, muizvi zveshe tiri vanopinda vanyisi kubudikidza ndiye uwo wakatida. Ngokuti ndinaro gwinyiso kuti kunyazwi rufu nokuti kupona, nokuti ngirosi, nokuti umambo, nokuti zviri pano, nokuti zvinouya, nokuti masimba, nokuti urebu, nokuti udzamu, nokuti chiro chimweni chakasikwa, achingakoni kutiparadzanisa norudo rwaMwari ruri munaKristu Jesu Mambo wedu. Ndinoronza gwinyiso ndiKristu, andinyepi; mhumba yangu inondiitira chapupu muMweya Wakachena, kuti ndinotambudzika kakurutu nokurwadziwa kusina magumo mumwoyo wangu. Ngokuti ndaizoda kuti inini ndemene ndiite wakatukwa newakaparadzaniswa kubva kunaKristu ngendaa yehama dzangu, idzo dziri hama dzedzinza rangu. Ndivo vaIsuraeri, kwavari wakavaita vana vake, vanouthende, zvitenderano, nokupuwa kwoMupango, kudira nezvigondiso; ndiwo madzibaba mukuru avo, kubudikidza ndivo Kristu wakabarwa ngokwenyama, uwo uri padera pazveshe, Mwari ngaakudzwe mhera nariini! Ameni. Asi azvironzi kuti izwi raMwari rakakorera. Ngokuti andivopi veshe akadi avo vakabva kunaIsuraeri vanoita vanhu vaIsuraeri, andivopi veshe vanoita vana vaAbrahama; asi, “Kubudikidza ndiIsaka mibarirwana inozodudzwa.” Izvi zvinoronza kuti andivopi vana vakabarwa ngokwenyama vanoita vana vaMwari, asi vana vechigondiso ndivo vanoerengwa kuti mibarirwana. Ngokuti iri ndiro izwi rechigondiso rinoti, “Ngouyu mukuwo ndinozopetuka naSara unozoa nomukororo.” Izvi andizvopi zvega zvakadaro; asi Rebheka naye apo aiya aanemimba ngemwamuna umwe, ndiIsaka baba edu, kunyazwi vana vasati vabarwa nokuti vasati vaita zvakanaka nokuti zvakashata, kuti zano raMwari rokutsanangura rigwinyiswe, haiwa ngemishando asi ngendaa yokudaidza kwake, kwakaronzwa kwaari, kuti, “Mukuru unozoshandira mudoko.” Kudai ngezvakanyorwa zvinoti, “Jakobe ndakamuda, asi Isau ndakamuzonda.” Zvino tinozotinyi? Kuripo kusikarurama here kunaMwari? Haiwa! Ngokuti unoti kunaMosi, “Ndinozomuitira nyasha wendinoda kuitira nyasha, nokukungurira wendinoda kukungurira.” Ndizvo azviiti ngokuda kwomunhu nokuti ngokuita kwomunhu, asi ngenyasha dzaMwari. Ngokuti zvinyorwa zvinoti kunaFaro, “Ngeiyi ndaa ndakakuemesa kuti ndionise simba rangu mwouri, nokuti zina rangu riteketeswe munyika dzeshe.” Ndizvo unoitira nyasha kwaari weshe waanoda kuitira nyasha, naye unokonzesa mwoyo wouwo weshe waanoda. Zvino unozoti kwendiri, “Ngenyi iye achiri kutsvaka ndaa? Ngokuti ndiani ungakona kuambana nokuda kwake?” Asi iwewe urianani, munhu, unopingurana naMwari? Chiro chakaumbwa chingaronza here kunouwo wakachiumba kuti, “Wakandiumba kudai ngenyi?” Muumbi aana simba here padera pedongo, kubva pachimburumbwa chimwecho kuumba chidziyo chimwe chemishando inoremeredzeka nechimweni chemishando isikaremeredzeki? Kungaanenyi kudai Mwari, echida kuonisa ushungu hwake nokuita kuti simba rake riziikanwe, akashingirira ngokusengerera kukurutu kumidziyo youshungu yakaemeserwa kuparadzwa, kuitira kuti aziise upfumi hwouthende hwake kumidziyo yenyasha, iyo yakanasirirwa uthende karetu, kunyazwi isusu avo vaakadaidza, haiwa vanobva kuvaJudha vega asi navozve vanobva kumadzinza? Kudai ngezvaakaronza mutsamba yaHosea echiti, “Avo vaiya vasiri vanhu vangu ndinozovadaidza kuti, ‘Vanhu vangu,’ nouwo waiya asikadikanwi ndinozomudaidza kuti, ‘Mudikani wangu.’ Kunozoitika kuti pandau paakaronza kwavari kuti, ‘Amuri vanhu vangupi,’ vanozodaidzwa kuti, ‘Vana vaMwari unopona.’ ” NaIsaya wakadaidzira ngendaa yevaIsuraeri kuti, “Kunyazwi uwandu hwevana vaIsuraeri hwechinyazodai ngejecha roruandhle, vakasara vavo ndivo vanozoponeswa; ngokuti Mambo Mwari unozozadzisa izwi rake munyika echiripedzisa ngokukasira.” Kudai ngezvaakaronza Isaya karetu echiti, “Kudai Mambo Mwari wehondo asikazi kutisiira mibarirwana, tingadai takaitwa kudai ngeSodhoma nokudai ngeGomora.” Ndizvo zvino, tinozotinyi? Kuti vemadzinza avo vasikazi kuteera kururama vakahanira kururama, ndikwo kuti, kururama kubudikidza ngokugonda; asi Isuraeri echiteera mupango wokururama aazi kuhanira mupango uwo. Ngenyi? Ngokuti avazi kukutsvaka ngokugonda, asi kudai ngounohanira ngemishando. Vakapumhunwa ngebuwe rokupumhunisa, kudai ngezvakanyorwa kuti, “Ringirai, ndinoradzika buwe muZioni rokupumhuna, ruware runozovaita kuti vawe, nouwo unotenda kwaari aazotsverudzwi.” Hama, chidisiso chomwoyo wangu nokukumbira kwangu kunaMwari ngendaa yevaIsuraeri kuti vaponeswe. Ngokuti ndinovaitira chapupu kuti vanotsamwirira kunaMwari, asi vanoita ngokusikazia. Ngokuti, vasikazii kururama kunobva kunaMwari, vechitsvaka kuemesa kururama kwavo, avazi kudzipfaisa pashi pokururama kwaMwari. Ngokuti Kristu ndiye magumo oMupango, kuti weshe unogonda aruramiswe. Mosi unonyora ngendaa yokururama kunobva kuMupango echiti, “Munhu uwo unoita kururama kweMipango, unozopona ndiyo.” Asi kururama ukwo kunobva mukugonda kunoronza kuti, “Usaereketa mumwoyo mwako kuti, ‘Ndiani unozokwira mudenga?’ ” (ukwo kunoti, kudzasa Kristu pashi). “Nokuti, ‘Ndiani unozodzaka mukudzama?’ ” (ukwo kunoti, kumubudisa Kristu kubva kunevakafa). Asi zvinoronzenyi? “Izwi riri pasinde pako, pamuromo pako nomumwoyo mwako” (ndikwo kuti, izwi rokugonda retinochumaira); ngokuti kudai wechipupura kuti Jesu ndiMambo ngomuromo wako nokutenda mumwoyo mwako kuti Mwari wakamumusa kubva kunevakafa, unozoponeswa. Ngokuti munhu unotenda ngomumwoyo wake naye unoruramiswa, naye unopupura ngomuromo wake unoponeswa. Ngokuti zvinyorwa zvinoti, “Kunyazwi ndiani unotenda mwaari aazotsverudzwi.” Ngokuti akuna muparadzaniso pakati pomuJudha nomuGiriki; ngokuti Mambo umwewo ndiye Mambo wavo veshe unodururira upfumi hwake padera pavo veshe vanokumbira kwaari. Ngokuti, “Kunyazwi ndiani unokumbira ngezina raMambo unozoponeswa.” Asi vangazoita makumbirirenyi kwaari uwo wevasikazi kutenda? Zve, vangazoita matenderenyi kwaari uwo wevasikazi kuzwa ndiye? Zve, vangazoita mazwirenyi pasina muchumairi? Vangazoita machumairirenyi kuti vasikazi kutumwa? Kudai ngezvakanyorwa kuti, “Manakirenyi akaita tsoka dzaavo vanochumaira mashoko akanaka!” Asi andivopi veshe vakapurutana vhangeri; ngokuti Isaya unoti, “Mambo Mwari, ndiani wakatenda izwi redu?” Ndizvo kugonda kunouya ngokuzwa, nokuzwa kunouya ngeizwi raKristu. Asi ndinobvunza, avazi kuzwa here? Eya, ngegwinyiso vakazwa; “Izwi ravo rakabuda kuenda panyika peshe, nemazwi avo akaguma kumagumo enyika.” Asi ndinobvunzazve, vaIsuraeri avazi kuzwisisa here? Pakutanga Mosi unoti, “Ndinozomuita kuti muite ndurumwa ngavanhu vasiri dzinza; ngedzinza risina kungwara ndinozomutsenesa.” Naapo Isaya asingatyi unoti, “Ndakaoneka ngaavo vasikazi kunditsvaka; ndakadzionisa kwavari vasikazi kubvunza ndini.” Asi kuvaIsuraeri unoti, “Zuva reshe ndakatambanudzira nyara dzangu kunevanhu vasikapurutani nevanoramba.” Ndinobvunza zvino, Mwari wakaramba vanhu vake here? Haiwa! Ngokuti inini pachangu ndiri muIsuraeri, wedzinza raAbrahama, wemhatso yaBhenjamini. Mwari aazi kuramba vanhu vake vaakazia ngekaretu. Amuzii here izvo zvinoronza zvinyorwa ndiErija, ngenjira yaakapota ndiyo kuna Mwari kuitira vaIsuraeri ndaa? “Mambo Mwari, vakauraya vaprofeti vako, vakaputsira pashi maarita ako; inini ndini ndega ndasara, navo vanotsvaka kundiuraya.” Asi mupinguro waMwari unotinyi kwaari? “Ndakadzisiira makumi emazana manomwe evanhu vasikazi kugwadamira Bhaari ngemabvi avo.” Ndizvo ngomukuwo unozve varipo vakasara, vakatsanangurwa ngenyasha. Asi kuti kuri kwenyasha, akuchiri kwemishando akadi; kuti zvakadaro nyasha adzichazi kuita nyasha. Ndizvo chiinyi? Icho chaakatsvaka Isuraeri aazi kuchiona. Vakatsanangurwa vakachiona, asi vamweni veshe vakakonziswa. Kudai ngezvakanyorwa kuti, “Mwari wakavapa mweya wokukangaidzwa, wakavapa madziso okuti vasaona nenzee dzokuti vasazwa, metsa kuguma kuneiri zuva.” Dhavhidha unoti, “Tafura ravo ngariite murau nechirimbana, ngavawe nokuunzidzirwa kwavo; madziso avo ngaaitiswe rubuma, kuti vasaona, uvakopfamise mishana yavo nguva dzeshe.” Ndizvo ndinobvunza kuti, vakapumhunwa here kuti vawe? Haiwa! Asi kubudikidza ngokushaisha kwavo ruponeso rwakauya kunevemadzinza, kuvamusira godo. Zvino kudai kushaisha kwavo kwechiita upfumi hwenyika, nokukorera kwavo kwechiita upfumi hwevemadzinza, kuzara kwouwandu hwavo kunozopinda kwakaitawani! Asi ndinoereketa kwomuri imwimwi vemadzinza. Kwechioneka zvino kuti inini ndiri mupostori wevemadzinza, ndinokudza mushando wangu, kuti pamweni ndingaita kuti vanhu vangu vaIsuraeri vaite godo, kuti ndikone kuponesa vamweni vavo. Ngokuti kudai kurashwa kwavo kuri kuiyaniswa kwenyika, kuashirwa kwavo kunozoronzenyi? Kunozoita kupona kunevakafa! Kudai hlama yakapirwa kuita michero yokutanga yakacheneswa, ngokudarozve hlama yeshe yakachena; kudai nzinde yakachena, ndizvo nenhai dzakachenawo. Asi kudai nhai dzimweni dzakagurwa, newe, uri muorivhi womushango, wakabatanidzwa mukati mwadzo, ukakoanisirana nadzo kunaka kwomuorivhi, usaganza padera penhai. Kudai wechiganza, iwewe andiwepi unotwara nzinde, asi nzinde ndiyo inotwara iwewe. Ndizvo unozoti, “Nhai dzakagurwa kuti inini ndibatanidzwe.” Zvakanaka. Dzakagurwa ngendaa yokugononda kwadzo, asi iwewe unoema kubudikidza ngokugonda. Usadzikudza mumupinimidzo wako, asi itya. Ngokuti kudai Mwari asikazi kurekera nhai dzepo, aazokurekeri newewo. Ndizvo ringira nyasha noushungu hwaMwari: ushungu hwakaoniswa kwavari vakawa, asi dzakaoniswa nyasha dzaMwari kwouri, kudai wechizoangira kugara munyasha dzake; pamweni newe ungazotemwawo. Kunyazwi naavo vaIsuraeri, kudai vasikaangiri kugara mukugononda kwavo, vanozobatanidzwa, ngokuti Mwari unesimba rokuvabatanidzazve. Ngokuti kudai iwewe wakatemwa kubva kumuorivhi womushango pakusikwa nokubatanidzwa, ngenjira yakaparadzana pakusikwa, mukati mwomuorivhi womumunda, kunozopinda kwakaitawani idzi dziri dzepo kuti dzibatanidzwe kumuorivhi wadzo. Ngokuti andidi, hama, kuti muite vasikazii ngeichi chakafishika; kuti musadziita vakangwara mumipinimidzo yenyu, ngokuti vaIsuraeri vamweni vakagumirwa ngokutindiara kwomwoyo, metsa kugume kuzarisika kwouwandu hwevemadzinza. Ndizvo vaIsuraeri veshe vanozoponeswa; kudai ngezvakanyorwa, “Kunozobuda Mununuri kubva muZioni; iye unozodusa kusikatya Mwari kubva kunaJakobe.” “Neichi chinozoita chitenderano changu navo, apo pendinozodusa zvishaishi zvavo.” Ngendaa yevhangeri vari magaa a Mwari, ngendaa yenyu; asi ngendaa yokutsanangurwa vari vanodikanwa ngendaa yemadzibabamukuru avo. Ngokuti zvipo nokudaidza kwaMwari zviri zvisikakunukudzwi. Kudai ndimwi ngemikuwo yakapinda mwaiya vasikapurutani kunaMwari, asi zvino mwakaashira nyasha ngokusikapurutana kwavo, ndizvo zvino vari vasikapurutani kuitira kuti ngenyasha idzo dzaoniswa kwomuri vangaashirawo nyasha. Ngokuti Mwari wakavakonyera veshe mukusikapurutana, kuti avaitire nyasha veshe. Kukuranyi kwakaita upfumi noungwaru noruziyo rwaMwari! Ndiani ungakona kududzira zvitongero zvake nenjira dzake adzingazwisisiki! “Ngokuti ndiani wakazia mupinimidzo waMambo Mwari? Nokuti ndiani wakaita mupangi wake?” “Nokuti ndiani wakamupa chipo kutanga kuti azopuwawo chipo?” Ngokuti kubva kwaari nokubudikidza ndiye nekwaari zviro zveshe zvakasikwa ngezvake. Kwaari ngakuapo uthende husikaperi. Ameni. Ndizvo ndinomupota, hama, ngenyasha dzaMwari, kuti mupire miiri yenyu kuita mudiro unopona, wakachena nounoashirika kunaMwari, uri mushando wenyu wokudira uneshwiro. Musatodzera zveiyi nyika, asi mwechitsandurwa ngokumusirirwa kwomupinimidzo wenyu, kuti mutsvakisise kuzia kuda kwaMwari, kwakanaka, kunoashirika nekwakaperera. Ngokuti kubudikidza ngenyasha dzakapuwa kwendiri ndinoti kuno munhu weshe uri pakati penyu, asadzipinimidza iye pachake kupinda kupinimidza kunosisira, asi kuti apinimidze ngokutonga kwakangwara, kudai ngezvaakapa Mwari kunomunhu weshe kudai ngechipimo chokutenda kwake. Ngokuti kudai ngezvetinadzo nhengo dzakawanda mumuiri umwe, andidzopi dzeshe nhengo dzine mushando umwewo, ndizvo isusu, tiri vazhinji, tiri muiri umwe munaKristu, umwe ngaumwe inhengo umwe kunoumweni. Tine zvipo zvakaparadzana, kudai ngenyasha dzakapuwa kwetiri: kudai chinyari chokuprofeta, ngatiprofete kudai ngokukura kwokugonda kwedu; kudai uri mushando, ngazvioneke mukushandira; kudai ngomudzidzisi, ngazvioneke mukudzidzisa; kudai ngomupangi, ngaazvioneke mukupanga; kudai ngomupi, ngazvioneke mukupa ngenyasha; kudai ngomutongi, ngaatonge ngokungwara; kudai ngomuiti wenyasha, ngaaite ngokudakara. Rudo ngaruite rusina kudziitisa; nyenyai izvo zvakashata, batirirai kuneizvo zvakanaka; dananai umwe kunoumweni ngorudo rukuru; muremeredzane umwe kunoumweni. Shandai ngesimba, musaita nungo. Itai vanopisha mumweya, mwechishandira Mambo. Itai vanodakara mukugonda kwenyu, musengerere mumadambudziko, mwechiangirira mukukumbira. Koveranai nevakacheneswa zvevanotama, ashirai vapfumba. Fumisai vanomutambudza; vafumisenyi musavatuka. Dakarai naavo vanodakara, mwechichema naavo vanochema. Garai mukunyarara umwe kunoumweni; musatsvaka zvine mbiri, asi mwechihamba pamwepo nevakapfaa; musadziita vakangwara mumipinimidzo yenyu. Musaunzidzira munhu kushata ngendaa yokuitirwa zvakashata, asi tsvakai zvakarurama mukuona kwevanhu veshe. Kudai zvechiitika, ngepomunokona ndipo, garai mukunyarara nevanhu veshe. Musaunzidzira pachenyu, vanodikana, asi taraukirai ushungu hwaMwari; ngokuti kwakanyorwa kuti, “Kuunzidzira ngekwangu, inini ndinozounzidzira, unoronza Mambo Mwari.” Haiwa, “Kudai gaa rako rafukama, wechiripa zvokudya; kudai rine nyota, wechiripa zvokumwa; ngokuti ngokuita kudaro unozoisa murwi wemasimbe anopisha omuriro padera pesoro raro.” Musanyiswa ngokushata, asi nyisai kushata ngokunaka. Munhu weshe ngaapfaire madzimambo anotonga padera pake. Ngokuti akuna umambo usikazi kubva kunaMwari, navo varipo vakagadzwa ndiMwari. Ndizvo iye unoemesedzana noumambo, unorwisana neicho chaakaemesa Mwari, naavo vanorwisa vanodzitorera kutongwa. Ngokuti vatongi avatyisi kwavari vanoita mishando yakanaka, asi kwavari vanoita zvakashata. Unoda kuita usikatyi mambo here? Ita zvakanaka newe unozokudzwa ndiye; ngokuti iye muranda waMwari kwouri unokuitira zvakanaka. Asi kudai wechiita zvakashata, wechitya, ngokuti iye aateri kutwara shoti pasina chiro! Ngokuti muranda waMwari muunzidziri woushungu kunouwo unoita zvakashata. Ndizvo munosisira kuti muvapfaire, haiwa ngendaa youshungu hwega, asi ngendaazve yemhumba. Ngeiyi ndaa munobhadharazve chibharo, ngokuti madzimambo varanda vaMwari, vanogara vechiita izvi zviro. Bhadharai kwavari veshe izvo zvinovasisira; chibharo kwavari vechibharo, murimwa kwavari vomurimwa, mwechitya vanotyiwa, remeredzai avo vanosisira kuremeredzwa. Musaita chikwereti chechiro kumunhu, kwega kuti mudane umwe noumweni; ngokuti iye unomuda muakirwana wake wakazadza Mupango. Ngokuti Mupango unoti, “Usazoomba, usazouraya, usazoba, usazoemura,” neimweni mipango inoerengerwa pamwepo neizwi iri rokuti, “Unozomuda muakirwana wako kudai ngezvounodzida iwewe pachako.” Rudo arushandi zvakashata kunomuakirwana; ndizvo rudo ruri kuzadza Mupango. Nemwi munozia awa kuti zvino yaanguva yaamho yokuti mumuke kubva muhope. Ngokuti zvino ruponeso rwedu rwaapasinde kwetiri kunomukuwo wetakatenda; usiku hwapera, kuedza kwaapasinde. Ndizvo ngatirashe mishando yechidima, ngatipfeke chihlangu chokujeka. Ngatihambe ngenjira inosisira kudai ngevanohamba masikati, tisikahambi ngouhaya nokudhakwa, tisikahambi ngokushanja, nokuti ngokuemura kunotsverudza, tisikahambi ngehasha nendurumwa. Asi mupfeke Mambo Jesu Kristu, musikatsvaki kudakadza nyama pakuemura kwayo. Ashirai munhu wakarembedzeka mukugonda, muashirenyi, asi musikaphikisani naye ngendaa yemipinimidzo. Munhu umwe unogonda kuti ungadya zviro zveshe, asi munhu wakarembedzeka unodya miriwo yemashakani. Iye unodya asashoora usikadyi, naye usikadyi asatonga unodya; ngokuti Mwari wakamuashira. Urianani iwewe unotonga muranda woumweni? Zviri pamberi pamambo wake kuti aeme nokuti kuwa. Asi unozoema, ngokuti Mambo unesimba rokuita kuti aeme. Munhu umweni unoremeredza zuva rimwe kupinda rimweni, umweni unoremeredza mazuva eshe kuti akatodzana. Munhu weshe ngaanase kuzia mumupinimidzo wake. Uwo unongwarira zuva, unoringwaririra kukudza Mambo. Nouwo unodya, unodyira kukudza Mambo ngokuti unobonga Mwari; apo uwo usikadyi, aadyiri kukudzwa kwaMambo naye unobonga Mambo. Ngokuti apana naumwe wedu unodziponera pachake ega, apanazve unodzifira pachake ega. Ngokuti kudai techipona, tinoponera Mambo, nokuti dai techifa, tinofira Mambo; ndizvo zvino, kunyazwi techipona nokuti techinyafa, tiri vaMambo. Ngokuti ngeiyi ndaa Kristu wakafa akaponazve, kuti aite Mambo wevakafa nevanopona. Ngenyi iwewe wechiitira ndaa hama yako? Nokuti iwewe unoshoora ngenyi hama yako? Ngokuti isusu teshe tinozoema pamberi pechigaro chokutonga chaMwari. Ngokuti kwakanyorwa kuti, “Kudai ngezvendinopona, unoronza Mambo Mwari, mabvi eshe anozondigwadamira nendimi dzeshe dzinozokudza Mwari.” Ndizvo umwe ngaumwe wedu unozodzipingurira kunaMwari. Ndizvo tisachaitirana ndaa umwe kunoumweni, asi zvirinane kuti mugure kuti asazoapo munhu unoisa chipumhuniso munjira yehama yake nokuti kuita kuti iwe. Ndinozia neni ndinoongiwa munaMambo Jesu kuti akuna chiro chinosvipisa mwechiri pachacho; asi chinoita chakasvipiswa kwaari unopinimidza kuti chakasvipiswa. Ngokuti kudai hama yako yechisvipiswa mwoyo ngendaa yokudya kwako, ngokudaro auchahambi ngorudo. Usamuuraya ngokudya kwako uwo waakafira Kristu. Ndizvo musatendera kuti kunaka kwenyu kuereketwe ndikwo kuti kwakashata. Ngokuti umambo hwaMwari andihwopi hwokudya nokuti kumwa, asi kururama nokunyarara nokudakara muMweya Wakachena. Kunyazwi ndiani unoshandira Kristu ngokuita izvi unoashirika kunaMwari nokuashirikazve kunevanhu. Ndizvo ngatitsvake izvo zvinounza kunyarara neizvo zvetingagwinyisana ndizvo umwe kunoumweni. Musaparadza mushando waMwari ngendaa yezvokudya. Ngegwinyiso zviro zveshe zvakacheneswa, asi zvakashata kunyazwi kunaani unoita kuti vanhu vamweni vawe ngezvaanodya; kwakanaka kurekera kudya nyama nokurekera kumwa vhini nokuti kurekera kuita chiro chimweni chinoita kuti hama yako ipumhunwe. Kugonda kwounakwo, ngakugare pakati pako naMwari. Unomuchena usikadziitiri ndaa pazviro zvaanotendera. Asi uwo unogononda watoitirwa ndaa, kudai echidya, ngokuti aaiti ngokugonda; ngokuti kunyazwi ngechiri chisikaitwi ngokugonda kushaisha. Isusu takagwinya tinosisira kutwara kurembedzeka kwevasina simba, haiwa kuti tidzidakadze pachedu. Umwe ngaumwe wedu ngaadakadze muakirwana wake ngezvakanaka, zvinomuaka. Ngokuti Kristu aazi kudzidakadza pachake; asi, kudai ngezvakanyorwa, “Kutuka kweavo vakakutuka iwewe kwakawira padera pangu.” Ngokuti kunyazwi ngezviri zvakanyorwa karetu zvakanyorwa kuti isusu tidzidze, kuti kubudikidza ngokusengerera nokuembedzerwa kwezvinyorwa tiwe nokugonda. Mwari wokusengerera nowokuembedzera ngaamupe kuti muite mupinimidzo umwewo umwe kunoumweni, kudai ngezvinoda Kristu Jesu, kuti muri pamwepo ngeizwi rimwe mukudze Mwari naBaba aMambo wedu Jesu Kristu. Ndizvo ashiranai umwe noumweni, kudai ndiKristu wakamuashirawo kuti Mwari akudzwe. Ngokuti ndinomuronzera kuti Kristu wakaitwa muranda kune vakachekwa kuti aonise gwinyiso raMwari, kuti agwinyisise zvigondiso zvakagondiswa kumadzibaba, nokuitira kuti madzinza akudze Mwari ngendaa yenyasha dzake. Kudai ngezvakanyorwa kuti, “Ngeiyi ndaa ndinozomukudza pakati pevemadzinza, ndiembere kukudzwa kwezina renyu.” Zve unoti, “Dakarai, imwimwi vemadzinza, pamwepo nevanhu vake.” Zve, “Kudzai Mambo Mwari, imwimwi mweshe vemadzinza, vanhu veshe ngavamukudze.” Zve Isaya unoti, “Runzinde rwaJese runozouya, nouwo unozomiruka kutonga padera pevemadzinza; vemadzinza vanozogondera mwaari.” Zvino Mwari wokugonda ngaamuzarise ngokudakara kweshe nokunyarara mukutenda, kuti kubudikidza ngesimba roMweya Wakachena muwe negonda rinofashukira. Inini ndemene ndinonasa kuzia ndimwi, hama dzangu, kuti imwimwi mwemene mwakazara ngokunaka, mwakazara ngokuzia kweshe, munokonazve kupangana umwe kunoumweni. Asi ndakanyora kwomuri ngokushinga yaamho ngezviro zvimweni, kumukarakadzisa ngendaa yenyasha dzakapuwa kwendiri ndiMwari, kuti ndiite mushandiri waKristu Jesu kunevemadzinza mumushando woupristi muvhangeri raMwari, kuti vemadzinza vangaita mudiro unoashirika, wakacheneswa ndiMweya Wakachena. Ndizvo ndinakwo kuganza ngomushando wangu munaKristu Jesu ngezviro zvaMwari. Ngokuti andizoshingi kuereketa ngezviro zvimweni kwega ngeizvo zvaakaita Kristu kubudikidza ndini kuitira kuti vemadzinza vapurutane, ngeizwi nomushando, ngesimba rezvioniso nemishamiso, ngesimba roMweya waMwari, kuti kubvira ngeJerusarema nokunharaunda dzaro metsa kuguma Iririkomu ndakanasa kuchumaira vhangeri raKristu. Eya, ngokudaro ndakadisisa kuchumaira vhangeri pandau dzisaiziikanwa zina raKristu, kuti ndisazoaka padera petsikiro roumweni munhu, asi kudai ngezvakanyorwa kuti, “Vanozoona avo vasikazi kuronzerwa mashoko ndiye, naavo vanozozwisisa uwo wevasikazi kuzwa ndiye.” Iyi ndiyo ndaa yakandipinga kazhinji kuti ndisauya kwomuri. Asi zvino, ndisina ndau yokushanda kuneidzi nyika, ndinodisisa ngaaya makore akawanda kuti ndiuye kwomuri. Ndinogonda kuti ndinozomuona apo ndoopinda kuenda Sipeini, nokuperekedzwa ndimwi parwendo rwangu, apo ndambodakara pamwepo nemwi kamukuwo kadoko. Asi zvino, eya, ndinoenda Jerusarema kooshandira vakacheneswa vaMwari. Ngokuti zvakavadakadza avo veMasedhonia neveAkhaiya kupa zvipo kunevarombo vari pakati pevakacheneswa muJerusarema. Vakadakara kuzviita, ngegwinyiso ivo vane chikwereti kwavari; ngokuti kudai vemadzinza vakauya vakakoanisirana navo zvifumiso zvavo zvoMweya, ivo vanosisirawo kuvashandira ngezviro zvevanotama zvomuiri. Ndizvo apo ndapedza kuita izvi nokuvaunzira michero iyi yakaunganidzwa, ndinozopinda kuenda Sipeini ngekwenyuyo; neni ndinozia kuti apo ndoouya kwomuri, ndinozouya ngokufumiswa kwakazara kwaKristu. Zvino ndinomupota, hama, ndiMambo wedu Jesu Kristu norudo rwoMweya, kuti mutambudzike pamwepo neni mumikumbiro yenyu kunaMwari ngendaa yangu, kuti ndinunurwe kubva kunevasikatendi vari muJudhia, nokuti nomushando wangu kuneveJerusarema uashirike kunevakacheneswa vaMwari, ndizvo kuti ngokuda kwaMwari ndingauya kwomuri ngokudakara kuti ndizorore pamwepo nemwi. Zvino Mwari wokunyarara ngaagare nemwi mweshe. Ameni. Ndinoda kuronza kwomuri kuti Febhi hama yedu, mushandiri wechiara chiri muKhenikerea, kuti mumuashire munaMambo ngenjira inosisira vakacheneswa, mumudetsere ngeizvo zveshe zvaanotama kudetserwa ndizvo ndimwi, ngokuti iye emene wakadetsera vazhinji neniwo pachangu. Tambisai Prisikha naAkwira, vangani vangu mumushando waKristu Jesu, avo ngendaa yangu vakaradzika pashi kupona kwavo; andinipi ndega ndinovabonga asi zviara zveshe zvevemadzinza. Tambisaizve chiara chiri mumhatso yavo. Tambisai Epaenetusi mudikani wangu, ndiye mutendi wokutanga kutenda munaKristu muAsia. Tambisai Maria, uwo wakashanda ngesimba pakati penyu. Tambisai Andronikhusi naJuniasi, hama dzangu nevangani vangu muubhanditi; vanhu vane mbiri mukati mwevapostori, vaiya munaKristu kutangira inini. Tambisai Ampriatusi, mudikani wangu munaMambo. Tambisai Ubhanusi, mungani wedu mukushandira Kristu, naStakhusi mudikani wangu. Tambisai Aperesi, unotendwa munaKristu. Tambisai avo vari vemhuri yaAristobhurusi. Tambisai Herodhioni hama yangu. Tambisai avo vemhuri yaNakisusi, vari munaMambo. Tambisai Trifaena naTrifosa, avo vakashanda ngesimba muna Mambo. Tambisai Persisi unodikanwa, wakashanda kakurutu munaMambo. Tambisai Rufusi, wakatsanangurwa munaMambo, namai ake nevanguwo. Tambisai Asinikritusi, Fregoni, Hermesi, Patrobhasi, Hermasi nehama dziri kwavari. Tambisai Firorogusi, Juria, Nereusi nehama yake, Orimpasi nevakacheneswa veshe vaanogara navo. Chingamidzanai umwe kunoumweni ngomuromo ngenjira yakachena. Zveshe zviara zvaKristu zvinomutambisa. Ndinomupota, hama, ngwarai avo vanomusa kuparadzana nokupumhunisa, zvakapesana neizvo zvemwakadzidziswa; mubve kwavari. Ngokuti vanhu vakadaro avashandiri Kristu Mambo wedu, asi vanoshandira ndani dzavo, nokuereketa kwavo kwakaserera kwakanaka vanochengedzera mwoyo yeavo vasina ndaa. Ngokuti kupurutana kwenyu kwakazwika kunevanhu veshe, ndizvo ndinodakara ndimwi, asi ndinoda kuti mungware kuneizvo zvakanaka asi musikazi kungwara kuneizvo zvakashata. Mwari wokunyarara unozoparadza Sathani pashi petsoka dzenyu ngokukasira. Nyasha dzaMambo wedu Jesu Kristu ngadzigare nemwi. Thimothi, mungani wangu wendinoshanda naye, unomutambisa; naRukiusi, Jasoni naSosipata, hama dzangu. Inini Thetiusi unonyora tsamba iyi, ndinomutambisa munaMambo. Gaiusi, unondiburira nechiara cheshe, unomutambisa. Erastusi, mungwariri wemare yedhorobha, unomutambisa, nehama yedu Kwatusi unomutambisa. [ Nyasha dzaMambo wedu Jesu Kristu ngadzigare nemwi mweshe. Ameni.] Zvino kwaari unesimba rokumugwinyisa kudai ngezvinoronzwa ngevhangeri rangu nokuchumairwa kwaJesu Kristu, kudai ngokuoniswa kwechakafishika chakangwarirwa mukunyarara kubvira pakutanga pakusikwa kwenyika, asi zvino chaoniswa kubudikidza ngezvinyorwa zvevaprofeti kumadzinza eshe, kudai ngomupango waMwari wemhera nariini, kuitira kuti apurutane nokugonda; kunaMwari ega wakangwara ngaugare uripo uthende mhera nariini kubudikidza ndiJesu Kristu! Ameni. Phauri, wakadaidzwa kuita mupostori waKristu Jesu ngokuda kwaMwari, naSosithenesi hama yedu, kuchiara chaMwari icho chiri muKhorinte, kwavari vakacheneswa munaKristu Jesu, vakadaidzwa kuita vakacheneswa, pamwepo naavo veshe vari kundau dzeshe vanodaidza zina raMambo wedu Jesu Kristu, Mambo wavo nowedu. Nyasha ngadzigare kwomuri nokunyarara kunobva kunaMwari Baba edu naMambo Jesu Kristu. Ndinobonga Mwari wangu ngenguva dzeshe ndimwi, ngendaa yenyasha dzaMwari dzakapuwa kwomuri munaKristu Jesu, ngokuti muzviro zveshe mwakafumiswa mwaari mukuereketa kweshe nomukuzia kweshe, kudai ngouchapupu ndiKristu hwakagwinyiswa mukati mwenyu, kuti musatama chipo chomweya apo mwechigarira kuoniswa kwaMambo wedu Jesu Kristu. Uwo unozomugwinyisawo metsa kumagumo, kuti muite vasikaitirwi ndaa ngezuva raMambo wedu Jesu Kristu. Mwari unogondeka, uwo wemwakadaidzwa ndiye mukuiyana noMukororo wake, Jesu Kristu Mambo wedu. Zvino ndinomupota, hama, ngezina raMambo wedu Jesu Kristu, kuti mweshe muerekete chiro chimwecho, zve, kuti kusaapo kuparadzana pakati penyu, asi kuti muite vakasungwa pamwepo mumupinimidzo umwe nebiningidzo rimwero. Ngokuti kwakaronzwa kwendiri, hama dzangu, ngaavo vemhuri yaKhroe, kuti dziripo hasha pakati penyu. Zvendinoronza ngeizvi, kuti umwe ngaumwe wenyu unoti, “Inini ndiri waPhauri,” nokuti, “Inini ndiri waAporosi,” nokuti, “Inini ndiri waKhefasi,” nokuti, “Inini ndiri waKristu.” Kristu wakaparadzaniswa here? Phauri wakakohomerwa here ngendaa yenyu? Nokuti mwakabhabhatidzwa here ngezina raPhauri? Ndinobonga Mwari kuti andizi kubhabhatidza naumwe wenyu, kwega Krispusi naGaiusi, kuti kusaapo naumwe ungazoti, mwakabhabhatidzwa ngezina rangu. (Inini ndakabhabhatidzawo vemhuri yaStefanasi, ngokubanze kwavo andikarakadzi kuti ndakabhabhatidza umwenizve.) Ngokuti Kristu aazi kundituma kuti ndibhabhatidze, asi kuti ndichumaire vhangeri, haiwa ngoungwaru hwemazwi, kuti ngokudaro muchinjiko waKristu usazoitwa usina shwiro. Ngokuti izwi romuchinjiko upenzi kwavari vanopera, asi kwetiri isusu tinoponeswa, isimba raMwari. Ngokuti kwakanyorwa kuti, “Ndinozoparadza ungwaru hwevakangwara nokuzwisisa kwevanozia ndinozokurasha.” Uripari wakangwara? Iripari ngwazi yokufunda? Iripari ngwazi yokuereketa yeiyi nguva? Mwari aazi kuzviita upenzi here zvoungwaru hweiyi nyika? Ngokuti, muungwaru hwaMwari, nyika aizi kuzia Mwari kubudikidza ngoungwaru hwayo, kwakadakadza Mwari, kubudikidza ngoupenzi hwokuchumaira, kuti avo vanotenda avaponese. Ngokuti vaJudha vanokumbira chioniso nevaGiriki vanotsvaka ungwaru, asi isusu tinochumaira Kristu wakakohomerwa, kuvaJudha chipumhuniso nokunevemadzinza upenzi, asi kwavari vakadaidzwa, veshe vaJudha nevaGiriki, Kristu simba raMwari noungwaru hwaMwari. Ngokuti upenzi hwaMwari hwakapinda kungwara kuneungwaru hwevanhu; nokurembedzeka kwaMwari kwakapinda kugwinya kunekugwinya kwevanhu. Ngokuti ringirai kudaidzwa kwenyu, hama, kuti akuna vazhinji venyu vakangwara ngokwenyama, akuna vazhinji vane simba, akuna vazhinji vanoremeredzwa, vanodaidzwa. Asi Mwari wakatsanangura zviro zvoupenzi munyika, kutsverudza vakangwara; Mwari wakatsanangura zviro zvakarembedzeka munyika kutsverudza zvakagwinya. Mwari wakatsanangura zviri pashi nezvinoshoorwa munyika, kunyazwi nezviro zvisipo, kuita kuti zviripo zviite zvisina shwiro, kuti kusazoapo naumwe unozoganza pamberi paMwari. Ndiye chinyuka chokupona kwenyu munaKristu Jesu, uwo wakaitwa ungwaru hwedu ndiMwari, nokururama kwedu, kucheneswa nokuripirwa, kuitira kuti kudai ngezvakanyorwa, “Iye unoganza, ngaaganze ndiMambo Mwari.” Naapo pendakauya kwomuri, hama, ndechichumaira chakafishika chaMwari, andizi kushandisa mazwi makuru nokuti ungwaru hwakakura. Ngokuti ndakadziemesera kuti andizozii chiro pakati penyu kwega Jesu Kristu, uwo wakakohomerwa. Neni ndakauya kwomuri ndakarembedzeka, ndechitya, ndechihuta kakurutu. Mazwi angu nokuchumaira kwangu kwaiya kusina mazwi okukoka oungwaru, asi mukuoniswa kwoMweya nokwesimba, kuti kugonda kwenyu kusazotseama muungwaru hwevanhu, asi musimba raMwari. Asi pakati pevabva muzero tinoereketa ungwaru, kunyazwi husiri ungwaru hweiyi nyika nokuti hwevatongi veiyi nyika, avo vanopera. Asi tinoereketa ungwaru hwaMwari, hwakafishika, hwakafishwa, uhwo Mwari hwaakaemesa karetu nyika isati yasikwa, kuita uthende hwedu. Apana naumwe wevatongi weiyi nyika wakazwisisa izvi; ngokuti dai vakazwisisa, vaizodai vasikazi kukohomera Mambo wouthende. Asi kudai ngezvakanyorwa kuti, “Izvo zvisikazi kuoneka ngemadziso nokuti kuzwika ngenzee nokuti zvisikaziikanwi mumwoyo mwevanhu, izvo ndizvo zvaakanasirira Mwari kwavari vanomuda.” Zviro izvi Mwari wakazvionisa kwetiri kubudikidza ndiMweya; ngokuti Mweya unotsvakisisa zveshe, kunyazwi noudzamu hwaMwari. Ngokuti ndiani munhu unozia zvomunhu, kwega mweya womunhu uri mukati mwake? Ngokudarozve akuna unozwisisa zvaMwari, kwega Mweya waMwari. Zvino atizi kuashira mweya wenyika, asi Mweya unobva kunaMwari, kuti tizwisise zvipo zvakapuwa kwetiri ndiMwari. Tinoereketa ngezviro izvi ngemazwi, haiwa akadzidziswa ngoungwaru hwevanhu, asi ngemazwi akadzidziswa ndiMweya, mukududzira gwinyiso roMweya kwavari voMweya. Asi munhu wenyama aashiri zviro zvoMweya waMwari, ngokuti zviri upenzi kwaari, naye aakoni kuzvizwisisa, ngokuti zvinotongwa ndiMweya. Asi uwo woMweya unotonga zviro zveshe, asi iye emene aatongwi ngomunhu. “Ngokuti ndiani wakazia mupinimidzo waMambo Mwari kuti amupange?” Asi isusu tinawo mupinimidzo waKristu. Asi inini, hama, ndaiya ndisikakoni kuereketa kwomuri kudai ndivo voMweya, asi kudai ndivo venyama, kudai ngevana vadoko munaKristu. Ndakamupa mukaka, haiwa kudya kwakagwinya, ngokuti mwaiya musati mwakona. Haiwa, kunyazwi nazvino, amusati mwakona, ngokuti muchiri venyama. Ngokuti kwechioneka kuti kuripo pakati penyu ndurumwa nehasha, amurivopi here venyama, mwechihamba ngomuitiro wevanhu? Ngokuti apo umwe unoti, “Inini ndiri waPhauri,” noumweni unoti, “Inini ndiri waAporosi,” amuri vanhupi here? Ndizvo Aporosi uri anani? NaPhauri uri anani? Varanda vemwakatenda kubudikidza ndivo, umwe ngaumwe kudai ngezvaakapuwa ndiMambo. Inini ndakasima, Aporosi wakadiridzira, asi Mwari wakameresa. Ndizvo andiyepi unosima uri chiro, nokuti unodiridzira, asi ndiMwari ega unomeresa. Uwo unosima nouwo unodiridzira chiro chimwe; asi umwe ngaumwe unozoashira musharo wake, kudai ngomushando wake. Ngokuti tiri vashandi pamwepo naMwari; imwimwi muri munda waMwari. Imwimwi muri mhatso yaMwari. Kudai ngenyasha dzaMwari dzakapuwa kwendiri, kudai ngomuaki uri ngwazi nowakangwara ndakaisa tsikiro, asi umweni unoaka padera paro. Muaki umwe ngaumwe ngaangware ngenjira yaanoaka ndiyo padera paro. Ngokuti akuna naumwe ungaaka tsikiro rimweni, kwega iro rakaakwa, tsikiro iro ndiJesu Kristu. Asi kudai munhu echiaka padera peiro tsikiro, ngomukore, sirivha, mapuwe anomutengo mukuru, mimbiti, mwenje, mahlanga, mushando womunhu weshe unozooniswa, ngokuti zuva iro rinozouonisa, ngokuti unozooniswa ngomuriro, nomuriro wemene unozoedza mushando womunhu weshe kuti wakadini. Asi kudai mushando womunhu nokuti ngouri wechizotsima waakaaka padera paro, iye unozoashira musharo. Kudai mushando womunhu nokuti ngouri wechizopishwa, iye unozorashikirwa ndiwo, asi muaki emene unozoponeswa, asi kudai ngokupotya muriro. Amuzii here kuti imwimwi muri temperi raMwari nokuti Mweya waMwari unogara mukati mwenyu? Kudai munhu kunyazwi ndiani echishaishira temperi raMwari, Mwari unozomushaishirawo. Ngokuti temperi raMwari rakachena, ndimwi temperi iro. Munhu asadzichengedzera pachake. Kudai munhu echipinimidza kuti wakangwara pakati penyu paneiyi nguva, ngaaite benzi, kuti aite wakangwara. Ngokuti ungwaru hweiyi nyika upenzi kunaMwari. Ngokuti kwakanyorwa kuti, “Unobata vakangwara muurimbwi hwavo.” Zve unoti, “Mambo Mwari unozia mikarakadzo yevakangwara kuti iri isina shwiro.” Ndizvo munhu asaganza ngevanhu. Ngokuti zviro zveshe ngezvenyu, kunyazwi Phauri nokuti Aporosi nokuti Khefasi nokuti nyika nokuti kupona nokuti rufu nokuti zviro zviripo nokuti zviro zvichazouya, zveshe ngezvenyu. Nemwi muri vaKristu, naKristu ngewaMwari. Munhu ngaapinimidze tisu kuti tiri vashandi vaKristu nevangwariri vezvakafishika zvaMwari. Kuneizvi kunotsvakisiswa kunemungwariri kuti aite unogondeka. Asi kwendiri chiri chiro chidoko kuti nditongwe ndimwi nokuti ngokutonga kwomunhu. Asi inini andidzitongi pachangu. Ngokuti andizii chiro chinondiitira ndaa pachangu, asi andipembedzwi ngeichi. Asi uwo unonditonga ndiMambo. Ndizvo musatonga chiro nguva isati yaguma, Mambo asati auya, uwo unozounza mukujeka zviro zvakafishika zvechidima, naye uchabudisa pamhene mipinimidzo yomwoyo. Naapo munhu weshe unozoashira kukudzwa kwake kunobva kunaMwari. Inini ndakaedzanisa muedzaniso uyu kwendiri nokuna Aporosi ngendaa yenyu, hama, kuti mudzidze kubudikidza tisu biningidzo reizvo zvakanyorwa zvinoti, “Musapinda zvakanyorwa,” kuti kusazoapo naumwe wenyu unodzitunhumadza kurwisana umwe kunoumweni. Ngokuti ndiani unokuita wakapinda vamweni? Unenyi chousikazi kuashira? Asi kuti wakachiashira, unoganza ngenyi, kudai ngousikazi kuchiashira kudai ngechipo? Zvino mwagutiswa! Zvino mwaganya! Mwakaita madzimambo tisiripo! Ngegwinyiso ndingada kuti muite madzimambo kuti isusuwo tiite madzimambo nemwi. Ngokuti ndinopinimidza kuti Mwari wakatiemesa isusu vapostori tiri vokugumisira kwavari veshe, kudai ngevanhu vakatongerwa rufu. Ngokuti takaitwa vokuringirwa kunyika, kungirosi nokunevanhu. Tiri mapenzi ngendaa yaKristu, asi imwimwi muri vakangwara munaKristu. Isusu takarembedzeka, asi imwimwi mwakagwinya. Imwimwi munakwo kuremeredzwa, asi isusu atiremeredzwi. Metsa kuguma awa iri tine nzara nenyota, tiri mititinini, tinopamhadzwa, tiri vapepesheki. Tinotambudzika, techishanda ngenyara dzedu. Naapo techitukwa, tinofumisa; apo techitambudzwa, tinoshingirira; naapo techireiwa, tinoiyanisa. Takaitwa vakadai ngemarara enyika, tiri makoko ezviro zveshe metsa nazvino. Andinyori izvi zviro kumutsverudza, asi kuti ndimupange kudai ngezvomuri vana vanodikanwa. Ngokuti kunyazwi mungaane vadzidzisi vari makumi emazana gumi munaKristu, amuna madzibaba akawanda. Ngokuti munaKristu Jesu inini ndakamubara kubudikidza ngevhangeri. Ndizvo ndinomupota, itai vanondiedzerera. Ngendaa iyi ndakatumira kwomuri Thimothi, mwana wangu unodikanwa nounogondeka munaMambo, iye unozomuedzurira njira dzangu munaKristu, kudai ngezvendinodzidzisa kundau dzeshe muzviara zveshe. Asi vamweni venyu vanodzikudza vechipinimidza kuti andiuyiyo kwomuri. Asi ndinozouya kwomuri ngokukasira, kudai Mambo echitenda, neni ndinozozia, haiwa ngeizwi raavo vanodzikudza, asi ngesimba ravo. Ngokuti umambo hwaMwari andihwopi hweizwi, asi hwesimba. Munodenyi? Ndinozouya kwomuri nendonga here nokuti norudo nomweya wakapfaa? Kunozwika kuti kuripo kuomba pakati penyu, nokuomba kwakadaro apana pakati pevemadzinza; kwokuti munhu unotora mukadzi wababa ake. Nemwi munodzikudza! Amusisiri kubonda here, kuti uwo wakaita uku kushata aduswe pakati penyu? Ngokuti inini ngegwinyiso ndisinyaripo ngomuiri, asi ndiripo ngomweya; nazvino kudai ngouripo ndatomutonga munhu uwo wakaita icho chiro. Naapo imwimwi mwaungana pamwepo muzina raMambo wedu Jesu, nomweya wangu uripo nesimba raMambo wedu Jesu, munozopira munhu uyu kunaSathani kuti aparadzwe nyama, kuti mweya wake uponeswe ngezuva raMambo Jesu. Kudziganzisa kwenyu akuzi kunaka. Amuzii here kuti zvimumera zvishomanani zvinofemisa hlama yeshe? Dusai mumera wekare, kuti muite hlama itsva, kudai ngezvomuri vasina mumera. Ngokuti Kristu gwai rePhasika redu wakabairwa kuita mudiro. Ndizvo ngatingwarire mushongano wedhiri, haiwa ngomumera wekare, nokuti ngomumera wekururu nowokushata, asi ngechingwa chisina mumera, chokugondeka nechegwinyiso. Ndakanyora kwomuri mutsamba yangu kuti musazwanana nevanoomba, izvi azvironzi vanoomba venyika iyi, nokuti vanoemura, nokuti mbavha, nokuti vanodira miedzaniso; ngokuti mukadaro, kunosisira kuti mubve munyika. Asi zvino ndinonyora kwomuri kuti musazwanana nomunhu unozwi mutendi, kudai ari muombi, nokuti muemuri, nokuti mudiri wemiedzaniso, nokuti mutuki, nokuti chiradza, nokuti mupambi; nomunhu wakadaro, haiwa, musadya naye. Ngokuti ndinenyi kuti nditonge avo vari vokubanze? Amutongi here avo vomukati? Asi avo vokubanze Mwari unozovatonga. “Budisai munhu uwo wakashata kuti abve pakati penyu.” Uripo here unendaa kuno umweni, unoshinga kuenda koomangara pamberi pevasikazi kururama, asikaendi pamberi pevakacheneswa? Amuzii here kuti vakacheneswa vanozotonga nyika? Nokudai nyika inozotongwa ndimwi, amusisiri here kutonga ndaa dzakatsonga? Amuzii here kuti tinozotonga ngirosi? Kunozopinda kwakaitawani muzviro zvokupona uku? Ndizvo kudai munendaa dzokugura dzokupona uku, munovaemesa kuita vatongi here avo vasina chimiro kwacho muchiara? Ndinoereketa izvi kuti ndimutsverudze. Chiri gwinyiso here kuti apana naumwe munhu wakangwara pakati penyu, ungakona kugura ndaa pakati pehama dzake. Asi mutendi unomangarira mutendi umweni wake here, kuti atongwe ngevasikatendi? Ndizvo ngegwinyiso dziripo ndaa pakati penyu, kuti munomangarirana umwe noumweni kuronza kukorera kwenyu. Amutendi ngenyi kushaishirwa? Amutendi ngenyi kubirwa? Asi imwimwi munoshaisha mwemene nokubirana, nokuna vatendi ngokudaro. Amuzii here kuti vasikazi kururama avazogari nhaka youmambo hwaMwari? Musachengedzerwa! Akuna vasvinuki, vadiri vemiedzaniso, vaombi, vashaishi, vanoshanja nevamuna, mbavha, vaemuri, varadzi, vatuki, vanoba, avatongozogari nhaka youmambo hwaMwari. Nevamweni venyu vaiya vakadaro. Asi mwakashambwa nokucheneswa nokupembedzwa, muzina raMambo Jesu Kristu, muMweya waMwari wedu. “Zviro zveshe zvinotenderwa kwendiri,” asi andizvopi zviro zveshe zvinondinakira. “Zviro zveshe zvinotenderwa kwendiri,” asi andizonyiswi ngechiro nachimwe. “Kudya ngekwendani, nendani ngeyokudya.” Asi Mwari unozoparadza zveshe chimwe ngachimwe. Muiri ausiri wokuomba akadi, asi ngowaMambo naMambo ngowomuiri. Mwari wakamusa Mambo naye unozotimusawo ngesimba rake. Amuzii here kuti miiri yenyu inhengo dzaKristu? Ndizvo ndinozotora here nhengo dzaKristu ndidziite nhengo dzemhombwe? Haiwa! Amuzii here kuti uwo unokwambatirana nemhombwe, unoita muiri umwe nayo? Ngokuti wakati, “Vairi vanozoita nyama imwe.” Asi iye wasunganidzwa naMambo unoita mweya umwewo naye. Tizai kuomba! Chishaishi cheshe chaanoita munhu chiri ngokubanze kwomuiri; asi iye unoomba unoshaishira muiri wake. Amuzii here kuti muiri wenyu itemperi roMweya Wakachena uri mukati mwenyu, womwakaashira kubva kunaMwari, nemwi amuchiri venyu akadi? Ngokuti imwimwi mwakatengwa ngomutengo. Ndizvo kudzai Mwari mumiiri yenyu. Zvino ngendaa yeizvo zvemwakanyora ndizvo kwendiri, ndinoti, “Zvakanaka kuti munhu asagwama mukadzi.” Asi, ngendaa dzokuomba, munhu weshe ngaano mukadzi wake, nomukadzi weshe ngaano mwamuna wake. Mwamuna ngaape kumukadzi wake izvo zvinomusisira, ngokudaro mukadzi ngaape kumwamuna wake. Mukadzi aana simba rokutonga padera pomuiri wake, asi mwamuna. Ngokudarozve mwamuna aana simba rokutonga padera pomuiri wake, asi mukadzi. Musanyimana, asi mwechiita ngokutenderana kwenguva, kuti mudzipire mukukumbira, mworomwozo kwambatirana, kuti Sathani asamuedza ngendaa yokutama simba kwenyu rokudzibata. Asi ndinoronza izvi kumutendera, haiwa kumupanga. Asi ndinoda kuti vamuna veshe vadai ndini. Asi munhu weshe unechipo chake chakaparadzana chinobva kunaMwari, umwe chembeu iyi noumweni chembeu iyo. Asi ndinoti kwavari vasikazi kuroora, nokunevari shirikadzi, zvakanaka kwavari kudai vechigara kudai ndini. Asi kuti vasina simba rokudzibata, ngavaroore, ngokuti kwakapinda kunaka kuroora kuno kutsva ngokuemura. Kwavari vakaroora, ndinovapanga, asi andinipi, asi ndiMambo, kuti, “Mukadzi asaparadzana nomwamuna wake.” (Asi kudai iye echiparadzana naye, ngaagare asikazi kuroorwa, nokuti ngaaiyaniswe nomwamuna wake;) zve, kuti mwamuna asazoramba mukadzi wake. Asi kunevamweni ndinoronza inini, haiwa Mambo. Kudai aripo mutendi, uno mukadzi usikatendi, nomukadzi uwo echitenda kugara naye, asamuramba. Nomukadzi uno mwamuna usikatendi nomwamuna echitenda kugara naye, asamuramba. Ngokuti mwamuna usikatendi unocheneswa kubudikidza ngomukadzi, nomukadzi usikatendi unocheneswa kubudikidza ngomwamuna. Dai zvisikazi kudaro, vana venyu vaizodai vasikazi kucheneswa, asi zvino vakacheneswa. Asi kudai usikatendi echida kuenda, ngaaende; mutendi mwamuna nokuti mukadzi aazi kusungwa mundaa dzakadaro. Ngokuti Mwari wakatidaidzira kunyarara. Iwewe mukadzi, unozia ngenyi kuti unozoponesa mwamuna wako? Iwewe mwamuna, unozia ngenyi kuti unozoponesa mukadzi wako? Munhu weshe ngaapone kudai ngezvaakamukoanisira Mambo, nokuneizvo zvaakamudaidzira Mwari. Ndizvo zvendinopanga kuzviara zveshe. Uripo here panguvayo munhu wakadaidzwa akachekwa? Asazoita kuti chioniso chokuchekwa chiduswe. Uripo here panguvayo wakadaidzwa asikazi kuchekwa? Asachatsvaka kuchekwa. Kuchekwa chiro chisina shwiro, nokusikachekwa chiro chisina shwiro, kwega kungwarira Mipango yaMwari. Munhu weshe ngaagare mukudaidzwa kwaakadaidzwa kwokuri. Wakadaidzwa here uri hloko? Usakanuka ndizvo. Asi kudai ungasunhurika, tsanangura icho. Ngokuti uwo wakadaidzwa kunaMambo ari hloko, uri wakasunhurwa waMambo. Ngokudaro uwo wakadaidzwa ari wakasunhurika, uri hloko yaKristu. Imwimwi mwakatengwa ngomutengo; musaita hloko dzevanhu. Hama, munhu weshe mukudaidzwa kwaakadaidzwa ndikwo, ngaagarepo pamberi paMwari. Zvino ngendaa yemhandwe, andina chironzo chaMambo. Asi ndinoronza kupinimidza kwangu, kudai ngouwo wakaitirwa nyasha ndiMambo kuita unogondeka. Ndizvo ndinopinimidza kuti zvakanaka, ngendaa yokutambudzika kuripo, kuti munhu agare kudai ngezvaari azvo. Wakasungirwa pamukadzi here? Usatsvaka kusunhurika. Wakasunhurwa here kubva pamukadzi? Usatsvaka kuroora. Asi kudai waroora, auzi kushaisha; nokudai mhandwe yaroorwa, aizi kushaisha. Asi vakadaro vanozoa nokutambudzika munyika, asi inini ndinoda kumungwadza. Asi ndinoronza izvi, hama, nguva idoko, kuti kubvira zvino, veshe avo vane vakadzi vaite kudai ngevasina; naavo vanochema, kuti vaite kudai ngevasikachemi; naavo vanodakara, vaite kudai ngevasikadakari; naavo vanotenga, vaite kudai ngevasikazi kuganya; naavo vanoshandisa zvomunyika, vaite kudai ngevasikanyanyi kuzvishandisa, ngokuti muemo wenyika ino unopinda. Asi ndinoda kuti imwimwi muite vasina zvokudembatemba. Iye usikazi kuroora unobatika ngezviro zvaMambo, ngenjira yaangamudakadza ndiyo Mambo; asi uwo wakaroora, unobatika ngezviro zvomunyika, ngenjira yaangamudakadza ndiyo mukadzi wake, nokudisisa kwake kwakapaurwa. Uwo usikazi kuroorwa nemhandwe unobatika ngezviro zvaMambo, kuti aite wakacheneswa zveshe muiri nomweya. Asi uwo wakaroorwa unobatika ngezviro zvenyika, ngenjira yaangadakadza ndiyo mwamuna wake. Ndinoronza izvi kwomuri kuti mudetserwe, haiwa kuteya murau padera penyu, asi kuti zviitwe ngenjira inosisira, kuti mubatirire kunaMambo musikakangaidzwi. Asi kudai ngevakagondisana kuti aripo munhu unopinimidza kuti unoita zvisikasisiri kunemhandwe yake, yabva muzero, nokudai kwechisisira kudaro, echida kuroora, aashaishi; ngavaroore. Asi iye unoema akagwinya mumwoyo mwake, asina chinomuangiridza, asi unesimba padera pokuda kwake, naye wakadziemesera mumwoyo mwake kuti unozongwarira mhandwe yake, unoita zvakanaka. Ndizvo uwo unoroodza mhandwe yake kuti iroorwe unoita zvakanaka; nouwo usikairoodzi, unoita zvakapinda kunaka. Mukadzi unosungirwa kumwamuna wake nguva yeshe yaanopona mwamuna wake. Asi kuti mwamuna afa, wasunhurika kuti aroorwe ngowaanoda, kwega ngenjira yaMambo. Asi unopinda kudakara kudai echindogara akadaro. Uku ndikwo kupinimidza kwangu; ndinopinimidza kuti ndino Mweya waMwari. Zvino ngendaa yezviro zvinopirwa kumiedzaniso yokudira, tinozia kuti, “Teshe tinakwo kuzia.” Kuzia kunopara kudzikudza, asi rudo runoaka. Kunyazwi ndiani unopinimidza kuti unozia chiro, iye asati aanakwo kuzia kunodikanwa; asi munhu weshe unoda Mwari, unoziikanwa ndiye. Ndizvo ngendaa yokudya izvo zvinopirwa kumiedzaniso, tinozia kuti, “Akuna muedzaniso munyika unopona,” nokuti, “Akuna Mwari umweni, asi umwe.” Ngegwinyiso kunyazwi zvinyaripo zvinodaidzwa kuti zvimwari, mudenga nokuti munyika; kudai ngezvezviripo zvimwari zvizhinji nemadzimambo mazhinji, asi kwetiri uripo Mwari umwe, ndivo Baba, zviro zveshe zviripo zvinobva kwaari, nesu tiripo ngokuda kwake, naMambo umwe Jesu Kristu, kubudikidza ndiye zviro zveshe zviripo, nesu kubudikidza ndiye tiripo. Asi veshe avana kuzia uku. Ngokuti vamweni vechirovedzera kumiedzaniso metsa zvino, vachandopinimidza ngokudya kwevanodya kudai ngechiro chinopirwa kunemuedzaniso wokudira; nemhumba yavo isina simba inosvipiswa. Asi kudya akuzotiunzi pasinde paMwari. Kunyazwi techirekera kudya, atiiti vakapinda kushata, kunyazwi techidya, atiiti vakapinda kunaka. Asi ngwarai kuti kunyazwi ngeiri njira, uku kusunhurika kwenyu kusaita chipumhuniso kwavari vasina simba. Ngokuti kudai munhu echizokuona iwewe unokuzia, wechidya mutemperi romuedzaniso wokudira, aizogwinyiswi here mhumba yake, isina simba, kudya zviro zvakapirwa kumiedzaniso yokudira? Ndizvo ngokuzia kwako iye usina simba unofa, hama iyo yaakafira Kristu. Ngokudaro apo pounoshaishira hama dzako nokuremadza mhumba yadzo isina simba, unoshaishira Kristu. Ndizvo kudai chokudya chechiita kuti hama yangu iwe, andizodyi nyama mhera nariini, kuti ndisazoita kuti hama yangu iwe. Andizi kusunhurika here? Andisiri mupostori here? Andizi kuona Jesu Mambo wedu here? Imwimwi amusiri mushando wangu munaMambo here? Kudai ndisiri mupostori kunevamweni, zvakanyadaro kwomuri ndiri mupostori; ngokuti imwimwi muri chioniso choupostori hwangu munaMambo. Uku ndikwo kudzirwira kwangu kwavari vanonditonga. Atitenderwi here kuti tidye nokumwa? Atitenderwi here kuhamba murwendo rwedu tine mukadzi mutendi, kudaiwo ngevamweni vevapostori nehama dzaMambo naKhefasi? Nokuti inini ndega naBhanabhasi, atitenderwi here kurekera kudzishandira? Ndiani mujoni unoshanda mushando woujoni ngemare yake? Ndiani unosima munda wemivhini, asikadyi michero yawo? Ndiani unousha zvifuyo, asikadyi mukaka wazvo? Ndinoereketa izvi here ngomushuma wevanhu, nokuti Mipango aironziwo kudaro here? Ngokuti kwakanyorwa muMipango yaMosi kuti, “Usazosungira pamuromo wen'ombe apo inopura zviyo.” In'ombe here yaanopinimidza ndiyo Mwari? Nokuti aaereketi ngendaa yedu tega here? Eya, zvakanyorwa ngendaa yedu, ngokuti uwo unorima unosisira kuti arime echigonda, nouwo unopura, unosisira kuti apure echigonda kuashira. Kudai isusu takakusha kwomuri zviro zvoMweya zvakanaka, indaa huru here kudai techizokukura zviro zvenyu zvenyika? Kudai vamweni vanouku kutenderwa padera penyu, kunozopinda kwakaitawani kwetiri isusu? Kunyazwi atizi kushandisa uku kutenderwa, asi tinosengerera zviro zveshe kuti tisazopinga vhangeri raKristu. Amuzii here kuti avo vanoshanda pane zvakacheneswa, vanodya kwezviro zvomutemperi? Naavo vanoshandira pamaarita, vane zvikoaniswa zvavo zvepaarita? Ngokudaro Mambo wakapanga kuti avo vanochumaira vhangeri, vapone ngezvevhangeri. Asi inini andizi kushandisa chimwe cheizvi zviro; nokuti andizi kunyora izvi kuti zviitirwe kwendiri, ngokuti zvirinane kuti ndife, pane kuti munhu aite kuti kuganza kwangu kuitwe kusina shwiro! Ngokuti kudai ndechichumaira vhangeri, andina chiro chokuganza ndicho, ngokuti ndamanikidzwa. Ngokuti indaa kwendiri kudai ndisikachumairi vhangeri! Ngokuti kudai ndechiita izvi ngokuda kwangu, ndinoona musharo; asi kudai ndechizviita ngokusikada kwangu, ndino ungwariri hunogondwa kwendiri. Ndizvo musharo wangu ngowenyi? Izvi zvega, apo ndechichumaira vhangeri, ndichumaire vhangeri ngenyasha, kuti ndisashandisa kweshe kutenderwa kwangu muvhangeri. Ngokuti kunyazwi ndaiya ndiri wakasunhurika kunevanhu veshe, ndakadziisa pashi muusungwa kwavari veshe, kuti ndiuyirwe ngevakapinda kuwanda. KuvaJudha, ndakaita kudai ngomuJudha, kuti ndiuyirwe ngavaJudha. Kwavari vari pashi peMipango, ndakaita kudai ngouri pashi peMipango, kunyazwi ndisiri pashi peMipango ndemene, kuti ndiuyirwe ngaavo vari pashi peMipango. Kwavari vasina Mipango ndakaita kudai ndivo vasina Mipango, (kunyazwi andizi kusunhurika kubva kuMipango yaMwari, asi ndiri pashi peMipango yaKristu,) kuti ndiuyirwe ngaavo vasina Mipango. Kwavari vakarembedzeka, ndakaita wakarembedzeka, kuti ndiuyirwe ngevakarembedzeka. Ndakaita zviro zveshe kuvanhu veshe, kuti ngenjira dzeshe ndiponese vamweni. Neni ndinoita izvo zveshe ngendaa yevhangeri, kuti ndionewo chikoaniswa muzvifumiso zvaro. Amuzii here kuti avo vanorumba mujaho, vanorumba veshe, asi ndiumwe unoashira muthuso? Ngokudaro rumbai imwimwi kuti muuashire. Mutambi weshe wemitambo unodzibata muzviro zveshe. Unoita kudaro kuti aashire dzungudza rinoora. Asi isusu tinoashira risikaori. Ndizvo inini andirumbi kudai ngomunhu usikazii nokuti kuambana kudai ngounoambana nedutu; asi ndinoponda muiri wangu, ndechiuisa muuranda, kuti ngesure ndapedza kuchumaira kunevamweni, inini pachangu ndiite unorashwa. Andidi kuti muite vasikazii, hama, kuti madzibaba edu eshe aiya pashi pegore, navo veshe vakaambuka ruandhle, navo veshe vakabhabhatidzwa munaMosi mugore nomuruandhle, navo veshe vakadya kudya kumwekwo kwomweya, navo veshe vakamwa kumwa kumwekwo kwomweya. Ngokuti vakamwa kubva pabuwe romweya rakavateera, nebuwe iro raiya Kristu. Asi Mwari aazi kudakadzwa ngevazhinji vavo, ngokuti vakapedzwa mushango. Zvino zviro izvi zvinoita zvionero zvedu kuti isusu tisazoemura zvakashata, kudai ngezvakaemura avo. Musazoita vanodira miedzaniso, kudai ngezvakaitwa ngevamweni vavo; kudai ngezvakanyorwa kuti, “Vanhu vakagara pashi kudya nokumwa, vakamirukazve kutamba.” Atisisiri kudzipinza mundaa dzokuomba kudai ngezvevakaita vamweni vavo, vakaurawa ngezuva rimwe vanhu makumi mairi namatatu emakumi emazana. Atisisiri kuedza Kristu, kudai ngezvavakamuedza vamweni vavo, navo vakapedzwa ngenyoka. Nemwi musazovhuruvhuta kudai ngezvevakavhuruvhuta vamweni vavo, navo vakapedzwa ngoMuurayi. Asi izvi zviro zvakaitwa kwavari kuita zvionero; nazvo zvakanyorwa kuti zvitingwadze, isusu tagumirwa ngokupera kwenyika. Ndizvo iye unokarakadza kuti unoema, ngaangware kuti asazowa. Akuna kuedzwa kwakamugumira ukwo kusikazi kugumira vanhu vamweni. Mwari unogondeka, naye aazotendi kuti muedzwe kupinda simba romunaro, asi pakuedzwa unozomunasirirazve njira yokupokonyoka ndiyo, kuti mukone kuwa nesimba rokushingirira. Ndizvo, vanodikanwa vangu, tizai kubva mukudira miedzaniso. Ndinoita kudai ngounoereketa kunevakangwara; pinimidzai pachenyu zvendinoronza. Tsani yokubonga, yetinobonga ndiyo, andiyopi yokuiyana mungazi yaKristu here? Chingwa icho chetinogura, andichopi chokuiyana mumuiri waKristu here? Ngokuti pane chingwa chimwe, isusu tinyari vazhinji, tiri muiri umwe. Ngokuti isusu teshe tinodya chingwa chimwe. Ringirai vaIsuraeri vari venyama. Avo vanodya midiro inopirwa, avana kuiyana here nearita? Ndizvo, ndotinyi zvino? Ndinozoronza here kuti chiro chakapirwa miedzaniso yokudira chine shwiro nokuti muedzaniso chiro chine shwiro? Asi izvo zviro zvevanopira, vanozvipira kunemadhimoni, haiwa kunaMwari. Neni andidi kuti muiyane nemadhimoni. Amungamwi kubva kunetsani yaMambo nokutsani yemadhimoni. Amukoni kudya kubva patafura raMambo nepatafura remadhimoni. Nokuti isusu tinoda kumusa ndurumwa yaMambo here? Isusu takagwinya kumupinda here? “Zviro zveshe zvinotenderwa,” asi andizvopi zviro zveshe zvinodetsera. “Zviro zveshe zvinotenderwa,” asi andizvopi zviro zveshe zvinoaka. Kusazoapo munhu unodzitsvakira zvake, asi zvoumweni. Idyai cheshe chinotengeswa pamusika wenyama, musikabvunzi mubvunzo ngendaa yemhumba, ngokuti, “Nyika ngeyaMambo Mwari, nazvo zveshe zvirimwo.” Kudai umwe weavo vasikatendi echimukoka koodya, nemwi mwechida kuenda, idyai cheshe chinoiswa pamberi penyu, musikabvunzi mubvunzo ngendaa yemhumba. Asi kudai aripo munhu unozoti kwomuri, “Ichi chakapirwa kune miedzaniso yokudira,” musachidya, ngendaa youwo wachironza kwomuri, uye ngendaa yemhumba. Andironzi ngendaa yemhumba yako, asi ngendaa yemhumba youmweni, ngokuti kusunhurika kwangu kunotongwa ngenyi ngemhumba youmweni? Kudai ndechidya ndechibonga, ngenyi ndechitukwa ngendaa yeizvo zvendinobonga? Ndizvo kunyazwi mwechidya nokuti mwechimwa, kunyazwi chiinyi chomunoita, itai zveshe mukukudza Mwari. Musapumhunisa vaJudha nokuti vaGiriki nokuti chiara chaMwari, kudai ndiniwo ndinoedza kudakadza vanhu veshe ngezviro zveshe zvendinoita, ndisikatsvaki kuuyirwa kwangu, asi kuuyirwa kwevazhinji, kuti vaponeswe. Itai vaedzereri vangu, kudai ndiniwo ndiri muedzereri waKristu. Zvino ndinomuirikidza ngokuti munondikarakadza ngezviro zveshe nokubatirira kuzviemeso kudai ngezvendakazvipira kwomuri. Asi ndinoda kuti muzie kuti Kristu ndiye soro romunhu weshe, nomwamuna ndiye soro romukadzi wake, naMwari ndiye soro raKristu. Kunyazwi ndiani mwamuna unokumbira nokuti kuprofeta anesoro rakafukidzwa, aaremeredzi soro rake. Asi mukadzi weshe unokumbira nokuti kuprofeta anesoro rake risikazi kufukidzwa, aaremeredzi soro rake, ngokuti kudai zvakadaro, zvakatodzana nokuparwa soro rake. Ngokuti kudai mukadzi asikazi kudzifukidza pachake, ngaagundwe bvudzi rake. Asi kudai zvechitsverudza kuti mukadzi agundwe nokuti kuparwa, ngaafukidze soro rake. Ngokuti azvisisiri kuti mwamuna afukidze soro rake, ngokuti iye muedzaniso nouthende hwaMwari; asi mukadzi ndiye uthende hwomwamuna. Ngokuti mwamuna aazi kubva kumukadzi, asi mukadzi wakabva kumwamuna. Ngokuti mwamuna aazi kusikirwa mukadzi, asi mukadzi wakasikirwa mwamuna. Ngeiyi ndaa kunosisira kuti mukadzi afukidze soro rake kuonisa kuti uri pashi pesimba remwamuna wake ngendaa yengirosi. Zvakanyadaro mukadzi aari ngokubanze kwomwamunapi, nokuti mwamuna aari ngokubanze kwomukadzipi kunaMambo. Ngokuti kudai ngomukadzi wakabva kuno mwamuna, ngokudaro mwamuna unobarwa ngomukadzi; asi zviro zveshe zvakabva kunaMwari. Dzigurirei mwemene; zvinosisira here kuti mukadzi akumbire kunaMwari anesoro risikazi kufukidzwa? Amudzidziswi here ngechibarirwe chenyu kuti, kudai mwamuna ane bvudzi rakareba, rinomutsverudzisa, asi kudai mukadzi anebvudzi rakareba, riri uthende kwaari? Ngokuti bvudzi rake rakahinwa kwaari kumufukidza. Asi kuti aripo munhu unooneka, echida kuita hasha, atina muitiro wakadaro, kunyazwi nezviara zvaMwari azvinawo. Asi ndechimupa uku kupanga, andimuirikidzi akadi, kuti munoungana pamwepo musikaunganiri zvakapinda kunaka, asi munounganira zvakapinda kushata. Ngokuti kutanga kwazvo zveshe, naapo mwoungana muchiara, ndinozwa kuti kuripo kuparadzana pakati penyu; neni ndinotenda zvimweni zvazvo. Ngokuti ngegwinyiso kunosisira kuti kuapo kuparadzana pakati penyu, kuti zvinase kuoneka pamhene kuti ngevari vanoashirika. Naapo mwaungana pamwepo, asikutipi mudye kudya kwaMambo. Ngokuti apo nguva yaguma yokudya, munhu weshe unodzitorera kutangira vamweni kudya kwake; umweni unenzara noumweni waradza. Chiinyi! Amuna here mhatso dzokudyira nedzokumwira? Nokuti munoshoora here chiara chaMwari nokuvatsverudza avo vasina chiro? Ndinozotinyi kwomuri? Ndinozomuirikidza ngeichi here? Ngendaa iyi andimuirikidzi. Ngokuti ndakaashira kubva kunaMambo, icho chendakapawo kwomuri, kuti Mambo Jesu ngousiku uhwo hwaakatengeswa ndihwo, wakatora chingwa, naapo abonga, wakachigura, akati, “Uyu ndiwo muiri wangu, unogurwa ngendaa yenyu. Itai ichi mukundikarakadza.” Ngokudarozve wakatora tsani, ngesure kwokudya echiti, “Tsani iyi ndiyo chitenderano chitsva mungazi yangu. Itai ichi nguva dzeshe dzomunomwa kweiri, mukundikarakadza.” Ngokuti nguva dzeshe dzomunodya ichi chingwa nokumwa kuiyi tsani, munoteketesa kufa kwaMambo metsa auye. Ndizvo, kunyazwi ndiani unozodya chingwa nokuti kumwa kutsani yaMambo ngenjira isikasisiri, unozoita ndaa yomuiri neyengazi yaMambo. Asi munhu ngaadziringire pachake, adaro ngaadye kuneicho chingwa nokumwa kuneiyo tsani. Ngokuti uwo unodya nokuti kumwa, asikanasi kuzwisisa muiri, unodyira nokuti kumwira kutongwa pachake. Ngeiyi ndaa vazhinji venyu vakarembedzeka nokurwara, nevazhinji vakafa. Asi kudai isusu pachedu takadziringira, taizodai tisikatongwi. Asi apo petinotongwa, tinoororwa ndiMambo, kuti tisazorashwa pamwepo nevenyika. Ndizvo, hama dzangu, apo mwoungana pamwepo kuti mudye, emeranai. Kudai aripo unenzara, ngaadye kanyi, kuti kuungana kwenyu kusazoita kuti mutongwe. Ngendaa yezviro zvimweni ndinozozvirongedza ndauyeyo. Zvino ngendaa yezvipo zvoMweya, hama, andidi kuti muite vasikazii. Munozia kuti apo muchiri mahedheni mwaikweyiwa kuenda kune iyo miedzaniso isikaereketi, kunyazwi mwaikweyiwa ngenjira yakadini. Ndizvo ndinoda kuti muzwisise kuti akuna munhu, unoereketa ndiMweya waMwari, ungaronza kuti, “Jesu wakatukwa!” Zve, akuna munhu ungaronza kuti, “Jesu ndiMambo”, kwega atungamirirwa ndiMweya Wakachena. Zvino zviripo zvipo zvakaparadzana, asi Mweya ndiumwe; kuripozve kuparadzana kwokushandira, asi Mambo ndiumwewo; kuripozve kuparadzana kwemishando, asi Mwari umwe, uwo unoshanda zviro zveshe kwavari veshe. Asi kuno munhu weshe kunopuwa kuoniswa kwoMweya, kuti veshe vafumiswe. Ngokuti kuno umwe kunopuwa kubudikidza ndiMweya izwi roungwaru, nokuno umweni kunopuwa izwi roruziyo, ndiMweya umwewo. Kuno umweni kunopuwa kugonda, kubudikidza ndiMweya umwewo, nokuno umweni kunopuwa zvipo zvokuponesa, kubudikidza ndiMweya umwewo, nokuno umweni kunopuwa kuita mishando yokuita mishamiso, nokuno umweni kunopuwa kuprofeta, nokuno umweni kunopuwa kuzwisisa mweya, nokuno umweni kunopuwa kuereketa ngendimi dzakaparadzana, nokuno umweni kunopuwa kududzira ndimi. Asi izvi zveshe zvinoshandwa kubudikidza ngaumwe ndiMweya umwewo; unokoanisira kuno munhu umwe ngaumwe, kudai ngokuda kwake. Ngokuti kudai ngomuiri umwe, unemarupande akawanda, nemarupande eshe omuiri akanyawanda ari muiri umwe, ndizvo zvakaitawo Kristu. Ngokuti isusu teshe takabhabhatidzwa muMweya umwe kuita muiri umwe, vaJudha nokuti vaGiriki, vakasungwa nokuti vakasunhurika, nesu teshe takaitwa kuti timwe kuMweya umwewo. Ngokuti muiri auizwi ngerupande rumwe, asi ngemarupande mazhinji. Kudai tsoka yechiti, “Ngokuti andiri nyarapi, andichiri womuiripi”, izvo zvingaita kuti isaita nhengo yomuiri here? Nokudai nzee yechiti, “Ngokuti andiri dzisopi, andichiri womuiripi;” izvo zvingaita kuti isaita nhengo yomuiri here? Kudai muiri weshe waiya dziso, kuzwa kwaizoapari? Kudai weshe waiya nzee, kunuhwidza kwaizoapari? Asi kuti ngezvezvakaita zvino Mwari wakaemesa marupande mumuiri rumwe ngarumwe, kudai ngokuda kwake. Kudai eshe aiya rupande rumwe, muiri ungazoapari? Asi zvino kunemarupande mazhinji, asi muiri umwe. Dziso aringakoni kuronza kunenyara kuti, “Andikutami iwewe,” nokutizve soro aringakoni kuronza kudaro kunemirenje, “Andikutami iwewe.” Haiwa, marupande omuiri awo anoringirika akarembedzeka, ndiwo anopinda kudikanwa, naawo marupande omuiri etinopinimidza ndiwo kuti aanyanyi kuremeredzwa, ndiwo etinoremeredza kakurutu, nemarupande edu asikanasi kuringirika, ndiwo anoringirika akapinda kunaka; apo marupande edu anoringirika aatami kuremeredzwa. Asi Mwari wakaronga muiri, echipa kuremeredzwa kukurutu kuno urwo rupande rwaikutama, kuti kusazoapo kuparadzana mumuiri, asi kuti marupande eshe angwarirane rumwe kuno rumweni. Kudai rupande rumwe rwechitambudzika, marupande eshe anotambudzika pamwepo narwo; kudai rupande rumwe rwechiremeredzwa, marupande eshe anodakara pamwepo narwo. Zvino imwimwi muri muiri waKristu, uwo nouwo muri marupande awo. NaMwari wakaemesa muchiara, vokutanga vapostori, vechipiri vaprofeti, vechitatu vadzidzisi, ngesure vaiti vemishamiso, ngesure zvipo zvokuponesa, vadetseri, vatungamiriri nevaereketi vendimi dzakaparadzana. Veshe vapostori here? Veshe vaprofeti here? Veshe vadzidzisi here? Veshe vaiti vemishamiso here? Veshe vanezvipo zvokuponesa here? Veshe vanoereketa ngendimi here? Veshe vanodudzira here? Asi itai vanodisisa zvipo zvakapinda kukura. Asi ndinomuonisa njira yakapinda kunaka. Kunyazwi ndikanyaereketa ngendimi dzevanhu nedzengirosi, asi ndisina rudo, ndiri thusi rinoita bope nokuti ngoma yesimbi inorira. Kunyazwi ndinokuprofeta, ndikazia zvakafishika zveshe nokuzia kweshe, kunyazwi ndinokugonda kweshe, kunokwana kudusa mitunhu, asi ndisina rudo, andiri chiropi. Ndikapa zveshe zvendinazvo kukovera varombo, nokuti ndikapa muiri wangu kupishwa, asi ndisina rudo, azvindidetseri chiro. Rudo runosengerera; rudo runenyasha; rudo aruna ndurumwa nokuti kudziganzisa, nokuti kudzitunhumadza. Aruiti zvisikasisiri. Rudo arudzitsvakiri zvarwo, arutseneswi nokuti kuereketa zvakashata. Arudakari ngezvisikazi kururama, asi runodakara ngezvegwinyiso. Runodumaidza zviro zveshe, runotenda zviro zveshe, runogondera zviro zveshe, runoshingirira zviro zveshe. Rudo aruperi; asi kudai kunyaripo kuprofeta, kunozopera; kunyaripo kuereketa ngendimi, dzinozonyarara; kunyaripo kuzia, kunozopera. Ngokuti tinozia zvimweni nesu tinoprofeta zvimweni; asi apo zvaguma zvakaperera, naapo izvo zvisikazi kuperera zvinozopera. Naapo ndichiri mwana mudoko, ndakaereketa kudai ngomwana mudoko, ndakapinimidza kudai ngomwana mudoko, ndakazia kudai ngomwana mudoko; apo ndaa munhu wakura, ndakarasha zvouhwana. Ngokuti zvino tinoona ngomuchiboniboni mumauma, asi ngenguva iyo tinozoonana hope kuhope. Zvino ndinozia zvimweni, asi ngenguva iyo ndinozonasa kuzia kudai ngezvendakaziikanwa. Ndizvo zvino zvinogara kugonda, kutenda norudo, izvi zvitatu; asi chikuru chazvo chakapindisisa kukura rudo. Teerai rudo, mudisise zvipo zvoMweya, kakurutu kuti muprofete. Ngokuti uwo unoereketa ngendimi aaereketi kunevanhu asi kunaMwari; ngokuti apana munhu unomuzwa, asi unoereketa zvakafishika muMweya. Asi ngenjira imweni uwo unoprofeta unoereketa kuvanhu zvinoaka, zvinoembedzera nezvinonyaradza. Uwo unoereketa ngendimi unodziaka, asi uwo unoprofeta unoaka chiara. Zvino ndinoda kuti imwimwi mweshe muerekete ngendimi, asi kupinda izvo, kuti muprofete. Ngokuti uwo unoprofeta, mukuru kupinda uwo unoereketa ngendimi, asi kuti umweni akakhumucha, kuti chiara chiakiwe. Asi zvino, hama, kudai ndechiuya kwomuri, ndechiereketa ngendimi ndinozomudetsera ngenjiranyi, ngepabanze pokuti ndierekete kwomuri ngenjira inomuunzira chioniso nokuti ruziyo nokuti chiprofeti nokuti chidzidziso? Kunyazwi zviro zvisina kupona zvinorira, kunyazwi iri nyere nokuti chidangari, kudai zvisikaparadzani mukurira kwazvo, kungaitwa maziirwenyi kurira kwazvo? Ngokuti kudai gwama rikarira kusikaziikanwi, ndiani unozodzinasirira kuenda kuhondo? Ndizvo nemwiwo pachenyu, kudai mwechiereketa ngendimi izvo zvisikanasi kuzwisisika, zvingaita maziikanirwenyi izvo zvinoereketwa? Ngokuti ngokudaro munozoereketa kunedutu. Dziripo ndimi dzembeu dzakaparadzana dzakawanda munyika, akuna naimwe yadzo isikaronzi chiro. Ndizvo kudai ndisikazii biningidzo reizwi, ndinozoita munhu mupara kwaari unoereketa nouwo unoereketa unozoita munhu mupara kwendiri. Ndizvo nemwiwo pachenyu, kwechioneka kuti munodisisa kuwa nezvipo zvoMweya, tsvakai kuti muwanzwe mukuaka chiara. Ndizvo uwo unoereketa ngendimi, ngaakumbire simba rokukhumucha. Ngokuti kudai ndechikumbira ngendimi, mweya wangu unokumbira, asi mupinimidzo wangu auzwisisi. Ndizvo ndinozoitenyi? Ndinozokumbira mumweya, ndechikumbira ngomupinimidzowo. Ndinozoemba mumweya, ndechiemba ngomupinimidzowo. Ngenjira imweni, kudai wechibonga mumweya, uwo usikazii ungazoita maronzerenyi kuti, “Ameni,” apo wobonga, kwechioneka kuti iye aazii chounoronza? Ngokuti ngegwinyiso iwewe unonasa kubonga, asi umweni aazi kuakiwa. Ndinobonga Mwari, ngokuti ndinoereketa ngendimi kupinda imwimwi mweshe. Asi muchiara ndingada kuti ndierekete mazwi mashanu ngokupinimidza kwangu, kuti ndidzidzise vamweni, kupinda kuereketa mazwi ari gumi remakumi emazana ngendimi dzisikaziikanwi. Hama, musaita vana mukupinimidza; asi munezvakashata itai vana, asi mukupinimidza itai vabva muzero. Kwakanyorwa muMipango kuti, “Ngevanhu vendimi dzimweni, ngemiromo yevenyika mukanza ndinozoereketa kuneava vanhu; kunyazwi zvakadaro, avazondizwi”, unoronza Mambo Mwari. Ndizvo ndimi dziri chioniso, haiwa kwavari vanotenda, asi kwavari vasikatendi; asi kuprofeta kuri chioniso, haiwa kwavari vasikatendi, asi kwavari vanotenda. Ndizvo, kudai chiara cheshe chaungana pamwepo, navo veshe vechiereketa ngendimi, kukapoteramwo munhu usikazii nokuti usikatendi, wakadaro aazoronzi here kuti muri vanopenga? Asi kudai veshe vechiprofeta, oroopoteramwo umwe usikatendi, munhu mupara nokuti usikazii, iye unooniswa kushaisha kwake ndivo veshe, unotongwa ndivo veshe. Zvakafishika zvomwoyo wake zvinooniswa; ndizvo ngokudaro unozowa pashi ngehope yake nokudira Mwari, echironza kuti, “Mwari uri pakati penyu ngegwinyiso.” Ndizvo chiinyi, hama? Apo mwooungana pamwepo, uwo nouwo unenduyo, chidzidziso, chioniso, ndimi nokukhumucha. Zviro zveshe ngazviitwe zvinoaka. Kudai aripo munhu nokuti ngouri unoereketa ngendimi, ngavaite vairi nokuti vasikapindi vatatu, ngavaite ngokuteererana; noumweni ngaakhumuche. Asi kudai pasina unokhumucha, ngaanyarare muchiara, ngaadziereketere ega nokunaMwari. Vaprofeti vairi nokuti vatatu ngavaerekete nevamweni ngavazvipime. Asi kudai chiro chechioniswa kuno umweni unogara apo, wokutanga ngaanyarare. Ngokuti imwimwi mweshe mungaprofeta ngokuteererana, kuti veshe vadzidze nokuti veshe vaembedzerwe. Nomweya yevaprofeti inopfaira vaprofeti, ngokuti Mwari andiyepi Mwari wehohoho, asi wokunyarara. Kudai ngezvezvakaita kuzviara zveshe zvevakacheneswa, vakadzi ngavanyarare muzviara. Ngokuti akutenderwi kwavari kuti vaerekete, asi ngavapfaire kudai ngezvinoronzwa ngeMipango. Kudai vechida kuzia chiro, ngavabvunze kuvamuna vavo vaakanyi. Ngokuti zvinotsverudza kuti mukadzi aerekete muchiara. Nokuti izwi raMwari rakatanga kubuda kubva kwomuri here? Nokuti rakagumira imwimwi mwega here? Kudai aripo munhu unopinimidza ngokwake kuti uri muprofeti nokuti uri womweya, ngaazvitende izvo zvendinonyora kwomuri, kuti zviri mipango yaMambo. Asi kudai aripo munhu usikabatiki ngeizvi, musabatikawo ndiye. Ndizvo, hama dzangu, emurirai kuti muprofete, musarambidza kuereketa ngendimi. Asi zveshe ngazviitwe ngenjira inosisira nokuteererana. Zvino ndinomuziisa, hama, vhangeri iro rendakachumaira kwomuri, romwakaashirawo, romunoema mukati mwaro, kubudikidza ndirowo munoponeswa; ngemazwi awo endakachumaira kwomuri, kudai mwechiabatisisa, ngepabanze pokuti mwakatenda pasina shwiro. Ngokuti ndakapa kwomuri kutanga, icho chendakaashirawo inini, kuti Kristu wakafira zvishaishi zvedu, kudai ngezvakanyorwa, nokuti iye wakaikwa, zve, wakamuswa ngezuva rechitatu, kudai ngezvakanyorwa, nokuti wakaoneka kunaKhefasi; ngesure wakaoneka kunegumi navairi. Ngesure wakaoneka kunehama dzinopinda mazana mashanu vari pamwepo, vazhinji vavo vachiripo metsa nazvino, asi vamweni vavo vakafa. Naapo wakadzionisa kunaJakobe; nangesure wakaoneka kuvapostori veshe. Pakupedzisira wakadzionisazve kwendiri, kudai ngouwo wakabarwa nguva isati yaguma. Ngokuti inini ndiri mudoko wevapostori, andisisiri kudaidzwa kuti ndiri mupostori, ngokuti ndakatambudza chiara chaMwari. Asi ngenyasha dzaMwari ndiri munhu wakadai zvino, nenyasha dzake dzakapuwa kwendiri, adzizi kuoneka dzisina shwiro; asi ndakashanda kakurutu kupinda veshe, kunyazwi andinipi, asi inyasha dzaMwari dzaiya mwendiri. Ndizvo kunyazwi ndini nokuti ndivo, ndiyo njira yetinochumaira ndiyo nenjira yemwakatenda ndiyo. Zvino kudai Kristu echichumairwa kuti wakamuka kubva kwevakafa, kunoronzwa ngenyi ngevamweni pakati penyu, kuti akuna kumuka kubva kwevakafa? Asi kudai kusina kumuka kwevakafa, zvino Kristu aazi kumuswawo; kudai Kristu asikazi kumuswa, kuchumaira kwedu akuna shwiro nokugonda kwenyu akuna shwiro. Isusu tinooneka tiri zvapupu zvokunyepa zvaMwari, ngokuti takapupura ndiMwari kuti wakamusa Kristu, uwo waasikazi kumusa, kuti riri gwinyiso kuti vakafa avamuswi. Ngokuti kudai vakafa vasikamuswi, zvino Kristu aazi kumuswa. Kudai Kristu asikazi kumuswa, kugonda kwenyu akuna shwiro nemwi muchirimwo muzvishaishi zvenyu. Zvino naavowo vakafa munaKristu vakarova. Kudai mukupona uku kwega tino kugonda munaKristu, tinosisira kukungurirwa kupinda vanhu veshe. Asi zvino Kristu wakamuswa kubva kwevakafa, wakaita muchero womutanguro weavo vakafa. Ngokuti kufa kwakaguma kubudikidza ngomunhu, kumukazve kwevakafa kwakaguma kubudikidza ngomunhu; ngokuti kudai ngezvevanofa veshe munaAdhamu, ndizvo veshe muna Kristu vachaitwa vanorarama. Asi umwe ngaumwe kudai ngourongwa hwake. Kristu ndiye muchero womutanguro, zvino pakuuya kwake avo vari vaKristu. Naapo kunouya magumo, paanozopa umambo kunaMwari Baba, apo apedza kuparadza kutonga kweshe noumambo hweshe nesimba reshe. Ngokuti kunosisira kuti atonge metsa aisa eshe magaa ake pashi petsoka dzake. Gaa rokugumisira rinozoparadzwa rufu. “Ngokuti Mwari wakapfaisa zviro zveshe pashi petsoka dzake.” Asi apo chooti, “Zviro zveshe zvapfaiswa,” zviri pamhene kuti azvironzi kuti iye wapfaiswa, uwo wakapfaisa zviro zveshe pashi pake. Naapo zviro zveshe zvapfaiswa kwaari, zvino Mukororo emene unozopfairawo uwo wakapfaisa zveshe zviro pashi pake, kuti Mwari aite zveshe munezveshe. Kudai zvisikazi kudaro, vanozoitenyi avo vakabhabhatidzirwa vakafa? Kudai vakafa vasikamuswi, ndizvo vanobhabhatidzirirwenyi vakafa? Isusu tinogara munyatwa ngenyi maawa eshe? Ndinopika, hama, ngokuganza kwangu kwendinakwo ndimwi, munaKristu Jesu Mambo wedu, kuti ndinofa zuva ngezuva. Kudai ngomushuma wevanhu ndakaambana nezvikara zvomushango muEfesu, kunondidetserenyi? Kudai vakafa vasikamuswi, “Ngatidye, techimwa, ngokuti mangwani tinozofa.” Musachengedzerwa: “Kuiyana nevakashata kunoparadza miitiro yakanaka.” Mukai mumipinimidzo yenyu yakarurama, murekere kuita zvakashata; ngokuti vanhu vamweni avana ruziyo ndiMwari. Ndinoereketa izvi kumutsverudza. Asi umweni unozoti, “Vakafa vanoita mamusirwenyi? Vanozouya nomuiri wakadini?” Iwewe benzi! Icho chounokusha, achingameri asi kuti chafa. Neicho chounokusha, aukushi uwo muiri unozoapo, asi tsangu yega, pamweni yekoroni nokuti yembeu imweni. Asi Mwari unopa muiri unomuemo wakadai ngokuda kwake, nokumbeu imwe ngaimwe unopa muiri wayo. Nyama yeshe aizi kuita nyama yembeu imweyo, asi iriyo mbeu imwe yenyama yevanhu, nembeu imweni yenyama yemhuka, nembeu imweni yenyama yeshiri, nembeu imweni yenyama yehove. Iriyozve miiri yomudenga nemiiri yomunyika, asi uthende hweiyo yomudenga ngohwembeu imweni, nouthende hweiyo yomunyika ngohwembeu imweni. Huriyo uthende humweni hwezuva, huriyo uthende humweni hwomwedzi, huriyo uthende humweni hwenyeredzi; ngokuti nyeredzi imwe inosiyana nenyeredzi imweni uthende hwayo. Ndizvowo zvakaita kumuka kwevakafa. Muiri unokushwa mukuora, unomuswa mukusikaora. Unokushwa mukusikaremeredzwa, unomuswa muuthende. Unokushwa mukurembedzeka, unomuswa musimba. Unokushwa uri muiri wenyama, unomuswa waa muiri womweya. Kudai uripo muiri wenyama, uripozve muiri womweya. Kwakanyorwazve kuti, “Munhu wokutanga, Adhamu, wakaitwa munhu unopona,” Adhamu wokugumisira wakaitwa mweya unopa kupona. Asi andiwopi mweya wokutanga, asi wenyama; ngesure kwouya womweya. Munhu wokutanga wakabva mumavhu, munhu wemavhu. Munhu wechipiri wakabva mudenga. Avo vari vemavhu vakadai ngouwo wemavhu. Naavo vari vomudenga, vakadai ngouwo womudenga. Kudai ngezvetaiya mumuemo wouwo wemavhu, zve, tinozowa nomuemo wouwo womudenga. Zvino ndinoronza izvi, hama, nyama nengazi azvingakoni kugara nhaka youmambo hwaMwari; nokuti zvinoora azvingagari nhaka yezvisikaori. Ringirai, ndinomuronzera zvakafishika! Atizofi teshe, asi tinozotsandudzwa teshe, nenguva doko, ngokuphipha kwedziso, ngenguva yokuridzwa kwegwama rokugumisira. Ngokuti gwama rinozorira, nevakafa vanozomuswa vasikaori, nesu tinozotsandudzwa. Ngokuti muiri uyu unoora unosisira kupfeka usikachazoori, nouyu unofa unosisira kupfeka usikachazofi. Naapo muiri uyu unoora wazopfeka usikachazoori, nouwo muiri unofa wazopfeka usikachazofi, naapo rinozozarisika izwi rakanyorwa kuti, “Kufa kwamedzwa ngokunyiswa.” “Iwewe rufu, kunyisa kwako kuri pari? Iwewe rufu, ukaira hwako huri pari?” Ukaira hworufu kushaisha; nesimba rokushaisha riri Mipango. Asi ngaabongwe Mwari, unotipa kunyisa kubudikidza ndiye Mambo wedu Jesu Kristu. Ndizvo, hama dzangu dzinodikanwa, itai vakagwinya, vasikatsukunuswi, ngenguva dzeshe mwechitsamwirira mumishando yaMambo, ngokuti munozia kuti mishando yenyu aiiti isina shwiro munaMambo. Zvino ngendaa yokuunganidzira munikero wokupa vakacheneswa: kudai ngezvendakapanga vezviara zveGaratia, itaiwo kudaro nemwi. Ngezuva rokutanga reshe revhiki, uwo nouwo wenyu ngaadziisire ngokwake mumangwaririro, kudai ngezvaakamufumisa Mwari, kuti kusazoapo kuunganidzwa ndagumeyo. Naapo ndaguma, ndinozotuma avo vomunozotsanangura netsamba kuti vatware zvipo zvenyu kuenda Jerusarema. Kudai zvechioneka zvakasisira kuti ndiendewo, vanozohamba neni. Ndinozouya kwomuri ngesure ndahamba ngemuMasedhonia; ngokuti ndinosisira kuhamba ngemuMasedhonia. Pamweni ndinozogara nemwi nokuti kupedza nguva yechando ndiripo, kuti imwimwi mundiperekedze parwendo rwangu kunyazwi ngepari pendinozoenda. Ngokuti andidi kumuona zvino, ndechipinda; ngokuti ndinogonda kuzogara mukuwo nemwi, kudai Mambo echitenda. Asi ndinozogara muEfesu metsa raguma zuva rePentekosti, ngokuti musiwo wakapamhama wakabeurirwa inini, kuti ndiite mushando mukuru, nawo aripo magaa mazhinji. Kudai Thimothi echiuya kwomuri, wonai kuti agare pakati penyu pasina chaanotya, ngokuti iye unoshanda mushando waMambo, kudai ngezvendinoita inini; ndizvo musazotendera naumwe kuti amushoore. Muendesei mberi murwendo rwake mukunyarara, kuti auye kwendiri; ngokuti ndinomuringirira kuti unozouya pamwepo nehama. Asi ngendaa yaAporosi, hama yedu, ndakapota kakurutu kwaari kuti amuhambire pamwepo nedzimweni hama, asi waiya asikadi kuuyayo zvinopano. Asi unozouya apo aona mukuwo. Rindai, gwinyai kuema mukugonda kwenyu, itai vakashinga, muite vakagwinya. Zveshe zvomunoita, ngazviitwe ngorudo. Zvino, hama, munozia vemhuri yaStefanasi, kuti ndivo vatendi vokutanga muAkhaiya, navo vakadziemesera kushandira vakacheneswa; ndinomupota kuti nemwiwo mupfaire vakadaro pachenyu, nokuno munhu weshe unodetsera mumushando, echidzimbirwa navo. Neni ndinodakara ngokuuya kwaStefanasi naFotunatusi naAkhaikusi, ngokuti izvo zvakasarira kwomuri, ivo vakazvizadzisa kwendiri; ngokuti vakamusirira mweya wangu nowenyuzve. Ndizvo tendai vanhu vakadaro. Zviara zviri muAsia zvinomutambisa. Akwira naPrisira vanomutambisa kakurutu munaMambo, pamwepo nechiara chiri mumhatso yavo. Vatendi veshe vanomutambisa. Chingamidzanai ngomuromo ngokucheneswa. Inini, Phauri, ndinonyora kutambisa kwangu ngenyara yangu yemene. Kudai aripo munhu kunyazwi ngouri usikamudi Mambo, ngaaite unotukwa. Mambo wedu, uyai. Nyasha dzaMambo Jesu Kristu ngadzigare nemwi. Rudo rwangu ngarugare nemwi mweshe ndiye Jesu Kristu, Ameni. Phauri, mupostori waKristu Jesu ngokuda kwaMwari, naThimothi hama yedu, kuchiara chaMwari chiri muKhorinte, pamwepo nevakacheneswa veshe vari munyika yeshe yeAkhaiya; nyasha ngadzigare kwomuri nokunyarara kunobva kunaMwari Baba edu naMambo Jesu Kristu. Ngaakudzwe Mwari naBaba aMambo wedu Jesu Kristu, Baba wenyasha, Mwari wokuembedzera kweshe, uwo unotiembedzera mukutambudzika kwedu kweshe, kuti isusuwo tikone kuembedzera avo vari mukutambudzika kunyazwi kwakaitawani, ngoukwo kuembedzerwa kwetinoembedzerwa ndikwo pachedu ndiMwari. Ngokuti kudai ngokutambudzika kwaKristu kunowanzwa kwetiri, ndizvo kuembedzerwa kwedu kunowanzwawo kubudikidza ndiKristu. Kudai techitambudzwa, kunoitirwa kuembedzerwa noruponeso rwenyu; kunyazwi techiembedzerwa, kunoitirwa kuembedzerwa kwenyu, kunoshanda mukushingirira nomukusengerera paawo madambudziko etinotambudzikawo ndiwo. Gonda redu ndimwi rakagwinya; techizia izvi, kuti kudai ngezvomunokoanisirana madambudziko edu, ndizvo munokoanisirana kuembedzerwa kwedu. Ngokuti atidi, hama, kuti muite vasikazii ngokutambudzika kwedu kwakatigumira tiri muAsia; kuti takaremerwa kakurutu kupinda simba redu, ngokudaro negonda reshe rokuti tinopona rakapera. Ngegwinyiso isusu pachedu takazwa mumwoyo yedu kuti taiya taashira kutongerwa rufu, kuti tisadzigonda pachedu, asi kuti tigonde kuna Mwari unomusa vakafa. Uwo wakatinunura kubva mukufa kwakakura kudaro, unozoangira kutinunura; mwaari tinogonda kuti uchazotinunura. Imwimwiwo mwechitidetsera ngemikumbiro yenyu, kuti vazhinji vatibongere ngendaa yezvifumiso zvenyasha zvakapuwa kwetiri ngendaa yemikumbiro mizhinji. Ngegwinyiso uku ndikwo kudziganzisa kwedu, kuri chapupuzve chemhumba yedu, kuti takadzibata munyika mukucheneswa nomugwinyiso raMwari, kakurutu takaita kudaro kwomuri, haiwa ngoungwaru hwenyama akadi, asi ngenyasha dzaMwari. Ngokuti atinyori zviro zvimweni kwomuri, asi zvomunofunda nokuzwisisa, neni ndinogonda kuti munozozvizwisisa metsa kumagumo, kudai ngezvemwakatizwisisa ngezvimweni, kuti ngezuva raMambo wedu Jesu isusu tiri kuganza kwenyu, kunyazwi imwimwiwo muri kuganza kwedu. Mukugonda uku ndaipinimidza kuti nditange kuuya kwomuri, kuti mufumiswe kwechipiri. Nokupinda ngokwomuri ndechienda Masedhonia, ndoobva Masedhonia ndipetuke kwomuri, ndiendiswe mberi ndimwi murwendo rwangu rweJudhia. Ndizvo apo ndaipinimidza kudaro, ndakaonisa kushanduka kwomwoyo here? Nokuti izvo zviro zvendinoemesa kuti ndiite, ndinozozviemesa here ngokwenyama, kuti kungaapo kwendiri kuronza kuti, “Eya, eya,” nokuti, “Haiwa, haiwa?” Asi kudai ndiMwari unogondeka, izwi redu kwomuri andiropi rokuti, “Eya naHaiwa.” Ngokuti Mukororo waMwari, Jesu Kristu, uwo wetakachumaira pakati penyu inini, Sirivhanusi naThimothi, waiya asiri, “Eya” nokuti, “Haiwa,” asi mwaari unoramba ari, “Eya.” Ngokuti mwaari chimwe ngachimwe chezvigondiso zvaMwari kwaari zviri, “Eya.” Ngendaa iyi kubudikidza ndiye tinoti, “Ameni,” kuita kukudzwa kwaMwari tisu. Asi ndiMwari uwo unotigwinyisa pamwepo nemwi munaKristu, nowakatidzodza, ngokuisa ruphau rwake padera pedu, akatipazve chibatiso choMweya mumwoyo yedu. Asi ndinodaidza Mwari kuita chapupu kumwoyo wangu, kuti ngendaa yokusikada kumutambudza andizi kuuya Khorinte. Haiwa, kuti titonge padera pokugonda kwenyu; asi tinoshanda pamwepo kumudetsera kuti mudakare; ngokuti munoema mwakagwinya mukugonda. Asi ndakadziemesera pachangu, kuti andizoitizve kwomuri rwendo rumweni runomutambudza. Ngokuti kudai ndechimutambudza imwimwi, ndizvo ndiani ungazondidakarira, kwega uwo wakatambudzwa ndini? Neni ndakanyora ichi kwomuri kuti ndoogumeyo, ndisazotambudzika ngaavo vendinosisira kudakara ndivo; ndechigonda kwomuri mweshe kuti kudakara kwangu ndikwo kudakara kwenyu mweshe. Ngokuti ngokutambudzika kukurutu nokurwadziwa kwomwoyo ndakanyora kwomuri, ndinemisodzi mizhinji; haiwa kuti mutambudzike, asi kuti muzie rudo rukuru rwendinarwo kwomuri. Asi kudai aripo wakaita dambudziko, iye aazi kutambudza inini, asi kuti wakatambudza imwimwi, andidi kuti ndinyanye kumutambudza imwimwi mweshe. Kuororwa kwavanhu vazhinji kunokwana kumunhu wakadaro; ndizvo zvino kwaisisira kuti imwimwi mumukungurire nokumuembedzera, kuti asazomedzwa ngokutambudzika kwakapinda kukura. Ndizvo ndinomupota kuti mugwinyise rudo rwenyu kwaari. Ngeiyi ndaa ndakanyora kwomuri kuti ndimuedze ndimuzie, kuti munopurutana here muzviro zveshe. Asi kunouwo womunokungurira chiro, neniwo ndinomukungurira; ngokuti izvo zvendakungurira, kudai ndakukungurira zviro, ndakazvikungurira ngendaa yenyu mukuona kwaKristu. Tinoita izvi kuti Sathani asazoona chokutinyisa ndicho; ngokuti atiri vasikazii mazano ake. Zvino apo ndaguma Troasi koochumaira vhangeri raKristu, musiwo wakabeurirwa kwendiri ndiMambo; asi ndaiya ndisina kuzorora mumweya wangu, ngokuti andizi kuonapo Thithusi hama yangu; asi ndechivavhaisa, ndakaenda Masedhonia. Asi ngaabongwe Mwari, uwo munaKristu unotitungamirira kudai ngemabhanditi mukufora kwokunyisa kwaKristu. Mwari unotishandisa kuti ruziyo ngendaa yaKristu rugume kundau dzeshe kudai ngegwema rakanaka. Ngokuti isusu tiri gwema rakanaka raKristu kunaMwari, pakati paavo vanoponeswa nepakati paavo vanoparadzwa. Kuneavo tiri gwema rinobva murufu kuenda murufu; nokune vamweni tiri gwema rinobva mukupona kuenda mukupona. Ndiani ungakona kuita mushando wakadai? Ngokuti isusu atizi kudai ngevazhinji vamweni, vanoshaishira izwi raMwari; asi munaKristu tinoereketa kudai ngevanhu vegwinyiso, kudai ngevanhu vakatumwa kubva pamberi paMwari. Tinotangazve kudziganzisa pachedu here? Ngegwinyiso tinotama here kudai ngezvevanotama vamweni, tsamba dzokutendwa ndidzo dzinonyorerwa kwomuri, nokuti dzinobva kwomuri? Imwimwi pachenyu muri tsamba yedu, yakanyorwa pamwoyo yedu, inoziikanwa nokudzidzwa ngevanhu veshe; nemwi munoonisa kuti muri tsamba yaKristu, yakashandwa tisu, isikazi kunyorwa ngeinki, asi ndiMweya waMwari unopona, isikazi kunyorwa pamarusamba emapuwe, asi pamarusamba omwoyo yenyama. Nesu tinakwo kugonda kwakadaro kunaMwari kubudikidza ndiKristu. Haiwa kuti isusu pachedu tagutswa, kuti tironze chiro kuti chinobva kwetiri, asi kugutswa kwedu kunobva kunaMwari, uwo wakatiita vanokona kuita vashandiri vechitenderano chitsva, haiwa chetsamba yakanyorwa, asi choMweya; ngokuti zvakanyorwa zvinouraya, asi Mweya unopa kupona. Zvino kudai mazwi emishando yorufu, akanyorwa nokunangurwa pamapuwe kwakauya nouthende, kwakaita kuti vana vaIsuraeri vasakona kuringisisa hope yaMosi ngendaa yokun'anikira kwayo, uhwo uthende hwaipinda, kunozopinda kwakaitawani kupenya kwouthende kwemishando yoMweya? Ngokuti kudai mishando yokurashwa yaiya nouthende, uthende hwemishando yokururama hunopinda kwakaitawani kupenya! Ngegwinyiso icho chaiya nouthende hwapera, uthende hwacho, ngendaa youthende hwakapindisisa kukura. Ngokuti kudai icho chaipinda chakauya kubudikidza ngouthende, kakurutu icho chinogara chinouthende hunopinda. Ndizvo zvino tinakwo kugonda kwakadaro, tinoereketa ngokutsunga kukurutu. Atizi kudai ndiMosi, uwo wakafukidzira hope yake ngejira, kuti vana vaIsuraeri vasazoringisisa magumo ezvaipinda. Asi mipinimidzo yavo yakakonzeswa. Ngegwinyiso metsa nyamashi naapo pevanozwa kudzidzwa kwechitenderano chekaretu, jira rimwero rindoripo risikazi kufukurwa, iro jira rinoduswa munaKristu mwega. Asi metsa nyamashi, apo zvinyorwa zvaMosi zvechidzidzwa, jira iro rindoripo padera pemwoyo yavo; asi apo munhu echizotenderukira kunaMambo, jira iro rinoduswa. Zvino Mambo ndiMweya; naapo panoMweya waMambo, kuripo kusunhurika. Isusu teshe tinehope dzisikazi kufukidzwa, techiringira uthende hwaMambo, kudai ngomuchiboniboni, tinotsandudzwa techitodzana nomuedzaniso umwewo kubva kuuthende humweni kuenda kuuthende humweni; ngokuti zvinobva kunaMambo, Mweya. Ndizvo tinawo uyu mushando, kudai ngezvetakaitirwa nyasha, atiperi simba. Asi takarasha zviro zvakafishika zvinotsverudza, techiramba kuita ngourimbwi nokuti kubata izwi raMwari ngokuchengedzera; asi ngokuonisa gwinyiso, tinodziganzisa kunemhumba yomunhu weshe mukuona kwaMwari. Kunyazwi vhangeri redu rakafishika, rakafishika kwavari vari kufa. Kwavari mwari weiyi nyika wakapofomadza mipinimidzo yevasikatendi, kuti vasaona kujeka kwevhangeri routhende hwaKristu, uwo uri muedzaniso waMwari. Ngokuti atidzichumairi pachedu, asi tinochumaira Kristu Jesu, kuti ndiMambo, nesu pachedu tiri varanda venyu ngendaa yaJesu. Ngokuti ndiMwari wakati, “Kujeka kunozojeka kwechibva muchidima”, ndiye wakajeka mumwoyo mwedu, kuti atipe kujeka kwokuzia uthende hwaMwari pahope yaJesu Kristu. Asi tino uhwu upfumi muzvidziyo zvedongo, kuti ukuru hukurutu hweiro simba huite hwaMwari, husaita hunobva kwetiri. Tinomanikwa kumarutii eshe, asi atipedziswi; tinokangaidzwa, asi atiperi simba. Tinotambudzwa, asi atizi kusiiwa; tinoponderwa pashi, asi atiurawi. Nguva dzeshe tinotwara mumiiri yedu rufu rwaJesu, kuti kupona kwaJesu kuoniswewo mumiiri yedu. Ngokuti isusu tinopona, tinogara techipirwa murufu ngendaa yaJesu, kuti kupona kwaJesu kuoneke mumiiri yedu inofa. Ndizvo rufu runoshanda mwetiri, asi kupona kunoshanda mwomuri. Asi kudai ngezvetinawo Mweya umwewo wokugonda, kudai ngezvakanyorwa kuti, “Ndakatenda, ndizvo ndakaereketa”; nesuwo tinotenda, ndizvo tinoereketa, techizia kuti uwo wakamusa Mambo Jesu, unozotimusawo pamwepo naJesu, naye unozotiunza pamwepo nemwi pamberi pake. Ngokuti zviro zveshe zvinoitwa ngendaa yenyu, kuti nyasha kudai ngezvedzinowanziswa kunevanhu vazhinji, dziite kuti kubonga kuwandiswe kuti Mwari akudzwe. Ndizvo atiperi simba. Kunyazwi munhu wedu wokubanze echipera, munhu wedu womukati unondoitwa mutsva zuva ngezuva. Ngokuti kutambudzika kwedu kwenguva doko kunotinasirira uthende hwakakura kakurutu nohunogara mhera nariini, ngokuti atiringiri kuzviro zvinooneka, asi kuizvo zvisikaoneki; ngokuti zviro zvinooneka zvinogara nguva fupi, asi zviro zvisikaoneki zvinogara mhera nariini. Ngokuti tinozia kuti dai mhatso yetinogara yomunyika muno yanyaputsika, iri muchacha, tinayo mhatso inobva kunaMwari, isikazi kuakwa ngenyara, yemhera nariini iri mudenga. Ngokuti tiri muneuyu muchacha tinogomera, techidisisa kufukidzwa ngemhatso yedu inobva mudenga, kudai ngegwinyiso techipfekedzwa kudaro tisazooneka tiri mititinini. Ngokuti isusu tichiri mumuchacha uyu, tinogomera, techidzimbirwa; haiwa kuti tikumurwe, asi kuti tipfekedzwe, kuti uwo unofa amedzwe ngokupona. Zvino uwo wakatiitira chiro chakadaro ndiMwari, uwo wakatipa chibatiso choMweya. Ndizvo tinotsunga mwoyo nguva dzeshe, techizia kuti tichapona ngomuiri uyu, tiri kuretu kubva kunaMambo, ngokuti tinohamba ngokugonda, haiwa ngokuona. Tinotsunga mwoyo, nesu tinotenda kusiya muiri wedu, tiite vaa kanyi naMambo. Ngeiyi ndaa tinechidisiso chedu chokuti tinyari pakanyi nokuti tisipo, tiite vanodakadza kwaari. Ngokuti isusu teshe tinozooneka pamberi pechigaro chokutonga chaKristu, kuti umwe ngaumwe aashire kudai ngezvaakaita mumuiri, zvakanaka nokuti zvakashata. Ndizvo techizia kutya Mambo, tinoonga vanhu, asi tiri vanoziikanwa kunaMwari; neni ndinogondazve kuti tiri vanoziikanwa mumhumba dzenyu. Atidziganzisizve kwomuri, asi tinomupa nguva yokuganza tisu, kuti mukone kupingura kuneavo vanoganza ngezvinooneka, haiwa ngezvomumwoyo. Ngokuti tinyari vanopenga, tinodaro ngendaa yaMwari, nokuti tinyari vakaterama, tinodaro ngendaa yenyu. Ngokuti rudo rwaKristu runotionga; ngokuti tinozia kuti umwe wakafira veshe; ndizvo veshe vakatofa. Naye wakafira veshe kuti avo vanopona vasachadziponera pachavo, asi kuti vaponere kunouwo wakafa ngendaa yavo, akamuswazve. Ndizvo isusu kubvira zvino atichazii munhu naumwe ngokwenyama. Kunyazwi takamuzia Kristu ngokwenyama, asi zvino atichamuzii ngokwakadaro. Ndizvo kudai munhu ari munaKristu, waa chisikwa chitsva; zviro zvekaretu zvapinda, wonai zvaitwa zvitsva! Zveshe izvi zvinobva kunaMwari, uwo wakatiiyanisa kwaari kubudikidza ndiKristu, naye wakapa kwetiri mushando wokuiyanisa; ndikwo kuti, Mwari waiya munaKristu, echiiyanisa nyika kwaari, asikaerengeri kwavari kupauka kwavo, naye wakapa kwetiri izwi rokuiyanisa. Ndizvo tinoita vaemereri vaKristu, zvechiita ingatei Mwari wainyengerera vanhu kubudikidza tisu. Tinomupota ngendaa yaKristu, itai vanoiyaniswa munaMwari. Iye wakamuita kushaisha ngendaa yedu, uwo waiya asikazi kuzia kushaisha, kuti mwaari isusu tiite kururama kwaMwari. Mukushanda pamwepo naye, tinomupota kuti musaashira nyasha dzaMwari pasina shwiro. Ngokuti iye unoti, “Ndakamuzwa ngenguva inoashirika, nepazuva rokuponeswa ndakakudetsera”; penyai, zvino ndiyo nguva inoashirika; penyai, zvino zuva roruponeso. Isusu atiisi chipumhuniso munjira youmweni kuti kushandira kwedu kusazoshoorwa, asi ngezviro zveshe tiite vanotendwa kudai ngezvinosisira vashandi vaMwari, kubudikidza ngokusengerera kukurutu, mukutambudzika, mukutama, mukuhahairwa, mukurohwa, mukukonyerwa mutirongo, muhohoho, mukushanda ngesimba, mukurinda, munzara, mukucheneswa, mukuzia, murubambazira, mukuitirwa nyasha, muMweya Wakachena, ngorudo rusikadziitisi, ngeizwi regwinyiso, ngesimba raMwari; ngezvokurwa ndizvo zvokururama ngokumudyo nokumuoshwe; mukukudzwa nomukusikakudzwa, mukureyiwa nomumbiri yakanaka; tinobatwa kudai ngevachengedzi, asi tiri vegwinyiso; kudai ngevasikaziikanwi, asi tiri vanonasa kuziikanwa; kudai ngevanofa, asi wonai tinopona; kudai ngevanoororwa, asi atiurawi; kudai ngevanosvipa mwoyo, asi tinogara techidakara; kudai ngevarombo, asi tinofumisa vazhinji, kudai ngevasina chevanacho, asi tinazvo zveshe. Muromo wedu wakaereketa zvakaperera kwomuri, imwimwi vaKhorinte; mwoyo yedu yakabeuka yaamho. Amumanikidzwi tisu, asi munodzimanikidza murudo rwenyu. Zvino ngokuunzidzira kwakatodzana, ndinoereketa kudai ngounoereketa kwendinoita kuvana vangu, mwoyo yenyu ngaibeuke yaamho. Musaita vanosungirwa ngokusikasisirani pamwepo nevasikatendi. Ngokuti kuri pari kuzwanana kwokururama nokushata? Nokuti kuri pari kuiyana kwokujeka nechidima? Nokuti kuri pari kutenderana kwaKristu naBheriari? Nokuti mutendi unechikoaniswa chenyi nousikatendi? Kuri pari kutenderana kwetemperi raMwari nemiedzaniso yokudira? Ngokuti isusu tiri temperi raMwari unopona; kudai ngezvaakaronza Mwari kuti, “Ndinozogara pakati pavo, nokuhamba pakati pavo; neni ndinozoita Mwari wavo, navo vanozoita vanhu vangu. Ndizvo budai kubva pakati pavo, mudziparadzanise kubva kwavari, unoronza Mambo Mwari, musagwama chiro chakasvipiswa; naapo ndinozomuashira neni ndinozoita Baba enyu, nemwi munozoita vakororo vangu nevasikana vangu, unoronza Mambo Mwari Unesimbareshe.” Ndizvo vanodikanwa, kudai ngezvetinazvo izvi zvigondiso, ngatidzichenese pachedu kubva kunezvinosvipisa zveshe zvenyama nezvomweya, techiperera mukucheneswa mukutya Mwari. Tibeurirei ndau mumwoyo yenyu; atizi kushaishira munhu, atizi kusvipisa munhu, atizi kubira munhu. Andironzi izvi kumuitira ndaa, ngokuti ndakamboronza kuti muri vepamwoyo yedu, kuti tife pamwepo nokupona pamwepo. Ndakaganza ndimwi nguva dzeshe; ndinodzikudza ndimwi kakurutu; ndakazara ngokuembedzerwa, ndinodakara kakurutu mukutambudzika kwedu kweshe. Ngokuti kunyazwi taguma Masedhonia, miiri yedu aizi kuzorora, asi takatambudzwa kumarupande eshe; ngokubanze kwaiyayo kuambana, ngomukati kwaiyamwo kutya. Asi Mwari uwo unoembedzera vakasvipa mwoyo, iye wakatiembedzera ngokuguma kwaThithusi, haiwa ngokuguma kwake kwega, asizve ngokuembedzerwa kwaakaembedzerwa ndikwo ndimwi, echitironzera ngechishuwo chenyu nokuchema kwenyu nokushingirira kwenyu ngendaa yangu; ndizvo ndakapindisisa kudakara. Ngokuti kunyazwi ndakamuchemedza ngetsamba yangu, andisvipi mwoyo ndizvo, kunyazwi ndakanyasvipa mwoyo ndizvo; ngokuti ndinoona kuti iyo tsamba yakamuchemedza, asi kwega kwomukuwo mufupi. Zvino ndinodakara, haiwa ngokuti mwakachemedzwa, asi kuti mwakachemedzwa kuti mutenderuke. Ngokuti mwakachemedzwa ngendaa yokuda kwaMwari, kuti musarashikirwa ngechiro ngendaa yedu. Ngokuti kuchemedzwa kunobva kunaMwari kunounza kutenderuka kworuponeso, kuri kutenderuka kusina kuchema. Asi kuchema kwomunyika kunopara rufu. Ngokuti wonai kutsamwirira kwokuchemedzwa ngenjira yaMwari kwakaunza kutsamwirira kwakaitawani kukura mukati mwenyu! Eya, kudzirwira, kunyangadzwa, kutya, chishuwo, kushingirira nokuunzidzira! Ngezviro zveshe mwakadzipangidzira kuti muri vasina ndaa kuneizvi. Ndizvo kunyazwi ndakanyora kwomuri, andizi kunyora ngendaa youwo wakaita kushata ukwo, nokuti ngendaa youwo wakashaishirwa, asi kuti kutsamwirira kwenyu ngendaa yedu kuoniswe kwomuri pamberi paMwari. Ndizvo takaembedzerwa. Kututsira mukuembedzerwa kwedu takadakara kakurutu ngendaa yokudakara kwaThithusi, ngokuti mweya wake wakagwinyiswa ndimwi mweshe. Ngokuti kudai chainyaiapo chiro chendakaganza kwaari ndimwi, andizi kutsverudziswa; asi kudai ngezvetakaereketa zviro zveshe kwomuri zvaiya gwinyiso, kwakadarozve nokuganza kwedu, kwendakaita pamberi paThithusi, kwakaoneka kuti kunegwinyiso. Norudo rwake rwomwoyo runopinda kuwanzwa kwomuri, apo ookarakadza nokupurutana kwenyu mweshe, kuti mwakamuashira ngokutya nokuhuta. Ndinodakara kuti ngezviro zveshe ndinogonda ndimwi. Ndizvo, hama, tinoda kuti muzie ngenyasha dzaMwari dzakapuwa kuzviara zviri muMasedhonia; ngokuti, mukuedzwa kukuru kwokutambudzika, nouwandu hwokudakara kwavo, noudzamu hwourombo hwavo, zvakawandisa upfumi hwokupa kwavo. Ngokuti ndinoita chapupu ndivo, kuti kudai ngezvevaikona, eya, nokupinda zvevaikona, vakapa ngokuda kwavo, vechitipota ngokunyengerera kakurutu kuti tiashire ichi chipo noukama mukushandira vakacheneswa. Navo vakaita ichi, chisicho chetaikarira; asi kutanga vakadzipira ngokwavo kunaMambo nokwetirizve ngokuda kwaMwari. Ngokudaro kudai ngezvetakakumbira Thithusi, kuti iye kudai ngezvaiya aamba, ngokudaro apedzisewo pakati penyu mushando wenyasha. Ndizvo kudai ngezvomunowanza munezviro zveshe, mukugonda, mukuereketa, mukuzia, mukutsamwirira kweshe, nomurudo rwenyu kwetiri, wonai kuti muwanzewo muneuyu mushando wenyasha. Andiereketi ngokumupanga, asi ngokutsamwirira kwevamweni kuti ndiedze gwinyiso rorudo rwenyuwo. Ngokuti imwimwi munozia nyasha dzaMambo wedu Jesu Kristu, kuti kunyazwi iye waiya mupfumi, asi ngendaa yenyu wakaita murombo, kuti imwimwi ngourombo hwake muite vapfumi. Muneiyi ndaa ndinoronza kupinimidza kwangu, ngokuti izvi zvakamunakira imwimwi, mwakatangira vamweni gore rakapera, musikateri kuita kwega, asi mwechidisisa kuita. Asi zvino pedzisai kuzviita, kuti kudai ngezvemwaidisisa kuita, pedzisai pomunokona ndipo. Ngokuti kudai kuripo kuda, nechipo chinoashirika kudai ngezvaanazvo munhu, haiwa kudai ngezvaasina. Ngokuti andironzi izvi kuti vamweni varerukirwe, nemwi mwechitambudzika, asi kuti mutodzane; kuti kuwandirwa kwenyu ngenguva iyi kudetsere kutama kwavo, kuti kuwandirwa kwavozve kudetsere kutama kwenyu; kuti kuapo kutodzana. Kudai ngezvakanyorwa, “Aye wakaunganidza zvakawanda aazi kusara nechiro; nouwo wakaunganidza zvishomani aazi kutama chiro.” Asi ngaabongwe Mwari uwo wakaisa mumwoyo mwaThithusi ukwo kutsamwirira kwendaiya nakwo pachangu ndimwi. Ngokuti ngegwinyiso iye wakazwa kupota kwedu; asi iye emene, echitsungirira kakurutu, wakabuda kuuya kwomuri ngokuda kwake. Nesu tinotumira pamwepo naye hama iyo inembiri yakanaka kuzviara zveshe; andizvopi zvega, asi wakaemeswazve ngezviara kuti ahambe nesu ngendaa yeizvi zvipo zvinoshandwa tisu, kuita kuti Mambo airikidzwe, nokuonisa kutendera kwedu. Techingwarira kuti munhu asatiitira ndaa ngouwandu hweizvo zvinoshandwa tisu, ngokuti tinongwarira kuti zviite zvinoremeredzeka, haiwa kwega mukuona kwaMambo, asi nomukuona kwevanhuwo. Nesu takatuma pamwepo navo hama yedu, yetakaedza nguva zhinji tikaona kuti inotsungirira zviro zvizhinji, asi zvino iri inopindisisa kutsungirira, ngendaa yegonda guru reinaro kwomuri. Kudai ndiThithusi, mudetseri wangu nomungani wangu mumushando unoitwa kwomuri; ngendaa yehama dzedu, ndidzo nhumwa dzechiara, uthende hwaKristu. Ndizvo wonesai kwavari chioniso chorudo rwenyu, nechokuganza kwedu ndimwi, mukuona kwezviara. Ngokuti azvisisiri kuti ndinyore kwomuri ngendaa yokushandira vakacheneswa, ngokuti ndinozia kudisisa kwenyu, kwendinoganza ndikwo ndimwi kwavari vanhu veMasedhonia, kuti veAkhaiya vakapedza kunasirira gore rakapera; nokutsamwirira kwenyu kwakamusa vazhinji vavo. Asi ndakatumira hama kuti kuganza kwedu ndimwi kusazoita kusina shwiro ngeiyi ndaa, kuti muite vakanasirira, kudai ngezvendakamuronzera; kuti kusazoitika, kuti kunyazwi ngeiri njira, kudai vechiuya neni vamweni veMasedhonia, vamuone musikazi kunasirira, isusu, (ndisikaronzi imwimwi), tingazotsverudzwa ngokugonda uku. Ndizvo ndaipinimidza kuti zvaisisira kunyengerera hama kuti dzitange pamberi pangu kuuya kwomuri, vanasirire zvipo izvi nguva isati yaguma zvemwakagondisa, kuti zvipo zviite zvakanasirirwa ngokuda kubonga kuti zvisaita zvakapambwa. Asi ndinoronza izvi, kuti iye unokusha ngokutsonzedza, unozovhunazve ngokutsongesesa, nouwo unokusha ngokuwanza, unozovhunazve ngokuwanzisisa. Umwe ngaumwe ngaape kudai ngezvaakaemesa mumwoyo mwake; haiwa zimupira nokuti ngokuangiridzwa; ngokuti Mwari unoda unopa ngokudakara. NaMwari unesimba rokuwanza zvipo zveshe, kuti imwimwi mugutswe ngezviro zveshe ngenguva dzeshe, muwanze kuita mishando yeshe yakanaka. Kudai ngezvakanyorwa, “Iye wakakusha ngokuwanza, wakapa varombo; kururama kwake kunogara mhera nariini.” Uwo unopa mukushi mbeu nechingwa chokudya, uwo unozomupa nokudziwanza mbeu dzenyu dzokukusha, nokuwanza michero yokururama kwenyu. Imwimwi munozofumiswa ngezviro zveshe, mupe ngokusunhurika kweshe, nokushanda kubudikidza tisu, kuti Mwari abongwe; ngokuti mushando uyu wokukoanisa, auteri kukwanisa kutama kweshe kwevakacheneswa vega, asi kunowandisazve kubonga kuzhinji kunaMwari. Kwechioneka kuti ngokuedzwa kwenyu ngouyu mushando, munozoirikidza Mwari ngendaa yokupurutana nokupupura kwenyu vhangeri raKristu, nendaa yokuwanda kwezvipo zvenyu kwavari, nokwavari veshe, naapo ivo vemene vanomushuwira nokumukumbirira ngendaa yenyasha huru dzaMwari dziri mukati mwenyu. Ngaabongwe Mwari ngechipo chake chisikabviri kuronzwa! Zvino inini pachangu, Phauri, ndinomupota ngokupfaa nenyasha dzaKristu, inini ndiri pakati penyu ndakapfaa, asi ndinoshinga kwomuri ndisipo! Ndinomupota kuti ndiri pakati penyu ndisazoonisa kutsunga kwokurwisana ndikwo nevamweni, avo vanotikarakadzira kuti tinohamba ngezvenyama. Ngokuti kunyazwi techihamba mumuiri, atirwi akadi kudai ngokwenyama, ngokuti zvokurwa ndizvo zvedu andizvopi zvenyama akadi, asi zvine simba pamberi paMwari rokuputsa ndau dzakagwinya dzoumambo, kuputsa mikarakadzo nezviro zveshe zvakaturama zvinomuswa kurwisana nokuzia Mwari, nokuunza mipinimidzo yeshe muuranda hwokupurutana Kristu. Takanasirira kuorora kusikapurutana kweshe, apo kupurutana kwenyu kwaperera. Imwimwi munoringira zviro zviri pamberi pehope dzenyu, kudai aripo munhu unodzigonda echiti ndiri waKristu, ngaarangarire ichizve mukati mwake kuti, kudai ndiye uri waKristu, nesu takadarowo. Kunyazwi zvino ndikanyaganza ngezvakatikuti ngesimba redu, retakapuwa ndiMambo, rokumuaka ndiro, haiwa rokumuputsira pashi, andizotsverudzwi akadi. Andidi kuita kudai ngounomutyisidzira ngetsamba dzangu. Ngokuti vanoti, “Tsamba dzake dzinemashoko makuru, dzinesimba, asi mukuoneka kwomuiri wake wakarembedzeka, nokuereketa kwake akuna shwiro.” Munhu wakadaro ngaazwisise izvi, kuti kudai ngezvetinoronza mutsamba dzedu, apo tisipo, ndizvo zvetinoita tiripo. Ngokuti atizi kutsunga kudziisa pamwepo nokudziedzanisa nevamweni vanodziganzisa pachavo. Asi apo vechidziedzanisa pachavo umwe noumweni, nokudzitodzanisa umwe noumweni, azvionisi ungwaru. Asi isusu atizoganzi kupinda zvetiri, asi tinozogara tiri mukati mwendau yedu yetakaemeserwa ndiMwari, kuti tigume kweshe kunyazwi nokwomuriyo. Ngokuti atizi kunyanya kudziganzisa, kupinda zvinosisira apo takaguma kwomuri, ngokuti tisu takatanga kuguma kwomuri nevhangeri raKristu. Atiganzi kupinda zvinosisira, izvo zvinoti, atiganzi ngemishando yevanhu vamweni; asi kugonda kwedu ngekwokuti, kudai kutenda kwenyu kwechikura, mishando yedu inozokudzwa yaamho pakati penyu, kuti tichumaire vhangeri kunyika dziri ngemberi kwenyu, tisikaganzi ngemishando youmweni yaakaita. “Asi iye unoganza, ngaaganze munaMambo.” Ngokuti andivopi vanodziganzisa vanotendwa, asi avo vaanoganzisa Mambo. Dai mwechindisengerera padoko muupenzi hwangu; asi ngegwinyiso munondisengerera! Ngokuti ndinendurumwa ndimwi ngendurumwa yaMwari; ngokuti ndakamugangisira kumwamuna umweni, kuti ndimuise kunaKristu kudai ngemhandwe ichakazara. Asi ndinotya kuti pamweni, kudai ngenyoka yakachengedzera Evha ngourimbwi hwayo, ngokudaro mipinimidzo yenyu ingazopauswa kubva mukururama nokuperera zviri kunaKristu. Ngokuti kudai umweni echiuya echichumaira Jesu umweni, wetisikazi kuchumaira isusu, nokuti kudai mwechiashira mweya wakasiyana, womusikazi kumboashira, nokuti kuashira vhangeri rimweni rakasiyana, romusikazi kumboashira, izvo zvakadaro munganasa kuzvipfaira. Ngokuti ndinoronza kuti nepadoko, andiri mudokopi kune vapostori vepadera. Kunyazwi ndisikanyanasi kuereketa, asi andizi kudaropi mukuzia; ngegwinyiso ngenjira dzeshe takazvionisa kwomuri pamhene zviro zveshe. Ndakashaisha here ngokudzipfaisa pachangu, kuti imwimwi mukudzwe, ngokuti ndakachumaira kwomuri vhangeri raMwari, ndisikapuwi musharo? Ndakabira zviara zvimweni, ngokuashira musharo kubva kwezviri kuti ndishandire imwimwi. Naapo ndaiya ndinemwi, ndechitama, andizi kuita mutwaro kuno munhu, ngokuti apo hama dzauya dzechibva Masedhonia, dzakandipa zveshe zvendaitama. Ndizvo ngezviro zveshe ndakangwarira kuti ndirekere kuita mutwaro kwomuri, ndinozoangira kuita kudaro. Kudai ngegwinyiso raKristu riri mwendiri apana munhu unozondipinga ngokuganza uku munyika dzeAkhaiya. Ndaa ngeyenyi? Ngokuti andimudi here? Mwari unozia kuti ndinomuda! Asi izvo zvendinoita, ndinozoangira kuzviita kuti nditamise ndaa kwavari vanotsvaka ndaa, kuti kuneizvo zvevanoganza ndizvo, vaoneke vakadai tisu. Ngokuti vanhu vakadaro vari vapostori vokunyepa, nevashandi vokuchengedzera, vechidziitisa pachavo kudai ngevapostori vaKristu. Andizvopi zvinoshamisa! Kunyazwi Sathani emene unodziitisa pachake kudai ngengirosi yokujeka. Ndizvo andichopi chiro chikuru kudai vashandi vakezve vechidziitisa pachavo kudai ngevashandi vokururama. Magumo avo anozodai ngemishando yavo. Ndinotizve, kusazoapo naumwe unopinimidza kuti inini ndiri benzi; asi kudai mwechipinimidza kudaro, ndiashirei kudai ngebenzi, kuti ndiganze padoko. Izvo zvendinoereketa, andizviereketi kudai ngezvinobva kunaMambo, asi kudai ngebenzi mukugonda uku kwokuganza kwangu; kwechioneka kuti vazhinji vanoganza ngezvenyama, neni ndinozoganzawo. Ngokuti munosengerera mapenzi ngokudakara, imwimwi mwakangwara pachenyu! Ngokuti munosengerera munhu kudai iye echimuita varanda, kudai echimupamba, kudai echimutora kuita kuuyirwa kwake, kudai echidzikudza, kudai echimupamhadza muhope. Inini ndinotsveruka, ndinosisira kuronza kuti taiya takarembedzeka kwezviri! Asi kunyazwi ndiani unoshinga kuganza ngechiro, inini ndinoereketa kudai ngebenzi, ndinoshingawo kuganza ndizvo. VaHebheru here? Ndizvo neniwo. VaIsuraeri here? Ndizvo neniwo. Ngovorudzi rwaAbrahama here? Ndizvo neniwo. Vashandi vaKristu here? (Inini ndinoereketa kudai ngounopenga), inini ndinovapinda; mumushando ndakapinda kakurutu, mukukonyerwa mutirongo ndakavapinda kakurutu, mukupondwa ngendonga kakurutu metsa parufu ndakavapinda. Ndakachaiwa ngevaJudha kashanu ngemboma dziri makumi marongomuna kwechirekerwa imwe. Ndakapondwa katatu ngendonga, ndakapondwa ngemapuwe kamwe, ndakaputsikirwa ngengarava katatu, usiku humwe nezuva rimwe ndaiya muruandhle. Ndaiya murwendo kazhinji, mungozi dzendwizi, mungozi dzemadzongoni, mungozi dzevedzinza rangu, mungozi dzevemadzinza, mungozi dzomumadhorobha, mungozi dzomushango, mungozi dzomuruandhle, mungozi dzepakati pevakoma vokunyepa, mukushanda nomukurwadziwa, mukusikaata kazhinji, mukupera ngenzara nenyota, mukuera kudya kazhinji, mukutonhorwa nomukuita mutitinini. Ngepabanze peizvo zvinondigumira zvokubanze chiripo chinondimanika zuva ngezuva chiri kutambudzikira zviara zveshe. Ndiani wakarembedzeka neni andizi kurembedzeka naye? Ndiani unopumhuniswa neni andizikurwadziwa mwoyo? Kudai kwechisisira kuti ndiganze, ndinozoganza ngeizvo zvokurembedzeka kwangu. Mwari naBaba waMambo Jesu, uwo unotendwa mhera nariini, unozia kuti andinyepi. MuDhamasekusi nduna yaitonga pashi paAretasi mambo, yakarinda dhorobha revaDhamasekusi, kuti indibate, neni ndakadzaswa ngepafasitera parukumbati ndiri mudendere, ndakapokonyoka kubva kunyara dzake. Ndinosisira kuti ndiganze, kunyazwi azvizi kunaka; asi ndaguma mukuereketa ngezvioniso nezvakaoniswa zvaMambo. Ndinozia munhu waiya munaKristu makore gumi namarongomuna apinda, wakakwidzwa mudenga rechitatu (kunyazwi waiya mumuiri kunyazwi waiya ngokubanze kwomuiri, andizii; ndiMwari unozia). Neni ndinozia uwo munhu (kunyazwi waiya mumuiri nokuti waiya ngokubanze kwomuiri, andizii; ndiMwari unozia); nenjira yaakakwidzwa ndiyo kuenda muPharadhaisi, naye wakazwa zviro zvisikabviri kuronzwa, zvisikatenderwi munhu kuti azvironze. Ngendaa yewakadaro ndinozoganza; asi ngendaa yangu andizoganzi, kwega kuganza ngokurembedzeka kwangu. Ngokuti kunyazwi ndechida kuganza, andizoiti benzi, ngokuti ndinozoereketa gwinyiso. Asi ndinorekera kuita kudaro, kuti kusazoapo naumwe ungapinimidza ndini, kupinda maonere aanondiita, nokuti kupinda mazwire aanoita ndini. Ndizvo kuti inini ndirekere kuganza ngendaa yokukura kweizvo zvakaoniswa kwendiri, kwakapuwa kwendiri munzwa mumuiri, uri mutumwa waSathani, kuti unditambudze, kuti ndisazoganza kupinda binzo. Ngendaa yeichi, ndakapota Mambo katatu, kuti ubviswe kwendiri, asi wakati kwendiri, “Nyasha dzangu dzinokwana kwouri, ngokuti simba rinoitwa rakaperera mukurembedzeka.” Ndizvo ndinozopinda kuganza ngokudakara mukurembedzeka kwangu, kuti simba raKristu rigare padera pangu. Ndizvo ndinodakara mukurembedzeka, mukuremadzwa, mukutamikirwa, mukutambudzwa, mumadambudziko, ngendaa yaKristu; ngokuti apo ndiri wakarembedzeka, naapo ndinesimba. Ndaa benzi! Imwimwi mwakandiangiridza kuti ndidaro. Ngokuti inini ndaisisira kuti nditendwe ndimwi, ngokuti andiri mudokopi kunevapostori vepadera, kunyazwi andiri chiropi. Ngegwinyiso zvioniso zvoupostori zvakaitwa pakati penyu mukusengerera kweshe, ngezvioniso nemishamiso nemishando inesimba. Ngokuti chiinyi chemwakapindwa ndicho kuita vari pashi kune zviara zvimweni, kwega kuti inini pachangu andizi kuita mutwaro kwomuri? Ndikungurirenyi ngouku kusikarurama! Ringirai, inguva yechitatu yendanasirira kuti ndiuye kwomuri. Neni andizoiti mutwaro, ngokuti anditsvaki zvenyu, asi ndinotsvaka imwimwi; ngokuti akusisiri kuti vana vaunganidzire vabari, asi kuti vabari vaunganidzire vana vavo. Inini ndinozopedza zveshe zvangu nokupedzwa ngokudakara, ngendaa yomweya yenyu. Kudai ndechimuda kakurutu, kudiwa kwangu ndimwi kunozopinda kutsonga here? Asi zvakanyadaro, inini pachangu andizi kuita mutwaro kwomuri; asi ndiri wakangwara, ndakamubata ngourimbwi! Ndakauyirwa here ndimwi kubudikidza ngoumwe weavo vendakatuma kwomuri? Ndakapota Thithusi kuti ndimutume, ndikamutuma pamwepo nehama. Thithusi unacho chaakauyirwa ndicho here kwomuri? Atizi kuhamba here ngomweya unotodzana? Atizi kuhamba here muzvitsiko zvakatodzana? Munopinimidza kuti nguva iyi yeshe tinodzipembedza pamberi penyu here? Mukuona kwaMwari tinoereketa munaKristu. Asi zviro zveshe, vanodikanwa, zviri zvokuakiwa kwenyu. Ngokuti ndinotya, kuti kunyazwi ngeiri njira, apo ndouyeyo, ndingazomuona musiri avo vendingada kuti muite vakadaro, neni ndemene ndioneke kwomuri ndiri womusikadi kuti ndiite wakadaro; kuti pamweni kunyazwi ngeiri njira kungazoapo hasha, ndurumwa, ushungu, kusikazwanana, kureyana, makuhwa, kudzikudza nehohoho. Ndinotya kuti apo ndogumeyozve, Mwari wangu unozondipfaisa pamberi penyu, neni ndingazotsumba ngendaa yevazhinji vakashaisha ngepamberi, vasikazi kutenderuka kubva mukusikasukika, kuomba nezvinotsverudza zvevakaita. Iyi inguva yechitatu yendinouya kwomuri. “Ngemiromo yezvapupu zviiri nokuti zvitatu mazwi eshe anozogwinyiswa.” Ndakavaronzera avo vakashaisha karetu nevamweni veshe ndinovaronzerazve, zvino ndisipo navo, kudai ngezvendaiyapo ngomukuwo wechipiri, kuti ndouyeyozve, andizovakunguriri; mwechitsvaka chioniso chaKristu unoereketa kwendiri. Aazi kurembedzeka kwomuri, asi unesimba mukati mwenyu. Ngokuti wakakohomerwa pamuchinjiko ngendaa yokurembedzeka, asi unopona ngesimba raMwari. Ngokuti nesuwo tiri vakarembedzeka mwaari, asi techishanda pamwepo nemwi tinozopona pamwepo naye ngesimba raMwari. Dziringisisenyi imwimwi pachenyu, muone kuti muri mukutenda here. Dziedzenyi pachenyu. Amuzii here pachenyu, kuti Kristu uri mukati mwenyu? Asi kuti muri vakarashwa! Asi ndinogonda kuti imwimwi munozozia kuti isusu atizi kurashwa akadi. Asi tinokumbira kunaMwari kuti imwimwi musaita chiro chakashata nachimwe; andikwopi kuti isusu tioneke tiri vakagondeka, asi kuti muite zvinoremeredzeka, kunyazwi isusu tinoerengwa tiri varashwa. Ngokuti apana chetingaita chinorwisana negwinyiso, asi zvinoemererana negwinyiso. Ngokuti tinodakara apo isusu tiri vakarembedzeka, imwimwi mwakagwinya. Ndizvo zve, tinokumbirira ichi kuti muite vakaperera. Ngeiyi ndaa ndinonyora kwomuri izvi zviro ndisipo pomuri, kuti apo ndaapo ndisazofemurika mukushandisa simba rendakapuwa ndiMambo rokuaka, haiwa rokuputsira pashi. Pakupedzisira, hama, chisarai. Itai vakaperera, purutanai kupanga kwangu; itai vano mupinimidzo umwewo, mugare mukunyarara; naMwari worudo nowokunyarara unozogara nemwi. Chingamidzanai ngomuromo ngokucheneswa. Veshe vakacheneswa vanomutambisa. Nyasha dzaMambo Jesu Kristu norudo rwaMwari nokuiyana kwoMweya Wakachena ngazvigare nemwi mweshe. Phauri mupostori, (andizi kutumwa ndechibva kuvanhu nokuti kubva kumasimba evanhu, asi kubudikidza ndiJesu Kristu naMwari Baba, uwo wakamumusa kubva kwavakafa;) nehama dzeshe dzineni. Kuzviara zveGaratia. Nyasha kwomuri nokunyarara zvinobva kunaMwari Baba edu nokuna Mambo Jesu Kristu, uwo wakadzipira pachake ngendaa yezvishaishi zvedu, kuti atinunure kubva munguva ino yakashata, kudai ngokuda kwaMwari wedu naBaba, kwaari ngaugare uthende mhera nariini nariini. Ameni. Ndinoshamiswa kuti mwakasira kutiza kubva kwaari uwo wakamudaidza ngenyasha dzaKristu nokuenda kunerimweni vhangeri; haiwa kuti ririyo vhangeri rimweni, asi kuti variyo vamweni vanomunzeremusa, vanoda kupausa vhangeri raKristu. Asi kunyazwi tisu, nokuti ngirosi inobva mudenga, ikachumaira kwomuri vhangeri rakaparadzana neiro retakachumaira kwomuri, ngaitukwe! Kudai ngezvetakaronza karetu, ndinoronzazve kudaro zvino kuti, kudai aripo munhu unochumaira kwomuri vhangeri rakaparadzana neiro remwakaashira, ngaatukwe! Ngokuti inini zvino ndinotsvaka kudiwa ngevanhu here, nokuti kudiwa ndiMwari? Nokuti ndinoedza kudakadza vanhu here? Kudai ndaiya ndichadakadza vanhu, ngokudaro andingaiti muranda waKristu. Ngokuti inini ndinoda kuti muzie, hama, kuti vhangeri rakachumairwa ndini, raiya risiri revanhu; ngokuti andizi kuriashira kubva kumunhu, nokuti kuridzidziswa, asi rakauya kwendiri kubudikidza ngokuoniswa ndiJesu Kristu. Ngokuti mwakazwa ngegwinyiso ngendaramo yangu yenguva yakapinda, mukudira kwevaJudha. Inini ndakatambudza chiara chaMwari ngenjira inopinda binzo yaamho, ndaiedza kuchiparadza. Neni ndakapinda vanhu vazhinji vendanga yangu mukudira kwevaJudha, pakati pevanhu vedzinza rangu, ndechivapinda kakurutu mukungwarira mishuma yemadzibaba angu. Asi apo Mwari, uwo wakanditsanangura akandiemesa ndisati ndabarwa, akandidaidza kubudikidza ngenyasha dzake, wakadakadzwa kuti aonise kwendiri Mukororo wake, kuti ndichumaire ndiye pakati pevemadzinza; paripo andizi kupangana nounenyama nengazi, nokuti andizi kukwira Jerusarema kuneavo vaiya vapostori kutangira inini, asi paripo ndakaenda Arabhia, ndorondo hwirirazve Dhamasekusi. Zvino kwapera makore matatu ndakakwira Jerusarema koomusa Khefasi, ndakagara naye mazuva gumi namashanu; asi andizi kuona vamweni vapostori, ngepabanze paJakobe munun'una waMambo. Muneizvo zvendinonyora kwomuri, pamberi paMwari andinyepi. Zvino ndakaenda kunharaunda yeSiria neyeSirisia, ndaiya ndisikaziikanwi ngehope kunezviara zveJudhia zvaiya muna Kristu; asi vakazwa zvega kuti, “Uwo waititambudza, zvino waakuchumaira ukwo kutenda kwaakamboedza kuparadza.” Navo vakakudza Mwari kubudikidza ndini. Zvino kwapera makore gumi namarongomuna ndakakwirazve Jerusarema, pamwepo naBhanabhasi, ndikatorazve Thithusi. Neni ndakakwirayo ngokuti ndakaoniswa chioniso. Ndakaisa pamberi pavo vhangeri rendinochumaira pakati pemadzinza, (asi ndakariisa kunevakuru vari vega ngokufishika,) kuitira kuti ndaizotera kurumba nokuti ndaiya ndakambotera kurumba pasina shwiro. Asi kunyazwi naThithusi uwo waiya neni, aazi kuangiridzwa kuti achekwe kunyazwi waiya muGiriki. Asi ndakaita kudaro ngendaa yevatendi vokunyepa avo vakapotedzwamwo tisikazii, vechipoteramwo ngokufishika kuti vanengere kusunhurika kwedu kwetinakwo munaKristu Jesu, kuti vatipotedze muuhloko. Atizi kudzipfaisa kwavari, kunyazwi nepadoko, kuitira kuti gwinyiso revhangeri rigare nemwi. Asi kubva kunaavo vaiya nembiri yokuti vari vakuru (kunyazwi vari vakadini, azvina ndaa kwendiri; Mwari aatsananguri unhu hwomunhu); avo ndinoti, vaiya vanembirikira avazi kututsira chiro kwendiri. Asi ngenjira imweni, apo vaona kuti inini ndakapuwa vhangeri kune vasikazi kuchekwa, kudai ngezvakapuwawo Petro vhangeri kunevakachekwa; (ngokuti uwo wakashanda kubudikidza ndiPetro kumuita mupostori kune vakachekwa, wakashandawo kubudikidza ndini ngokunditumira kune vemadzinza), naapo Jakobe, Khefasi naJohani, avo vaizwi ndivo madzeyo vakazia nyasha idzo dzakapuwa kwendiri, vakatibata inini naBhanabhasi ngenyara dzokumudyo ngoukama, kuti isusu tiende kunevemadzinza, navo vaende kunevakachekwa. Chiro chimwe chega chevakatironzera kuti tikarakadze ngevarombo; icho chaiya acho chendaidisisa kuita inini. Asi apo Khefasi aguma Antiokhi, ndakamuphikisa pamberi pehope yake, ngokuti waiya anendaa pachake, ngokuti vasati vaguma vanhu vamweni vechibva kunaJakobe, iye waidya pamwepo nevemadzinza. Asi apo vaguma, wakanyongoroka akadzipaura, akagara ega pachake, ngokuti waitya chikwata chevakachekwa. Nevamweni vaJudha vakadziitisawo kudai ndiye; kunyazwi naBhanabhasi wakapaukiswawo ngokudziitisa kwavo. Asi apo ndaona kuti avazi kuhamba ngokururamisa, kudai ngegwinyiso revhangeri, ndakati kunaKhefasi pamberi pavo veshe, “Kudai iwewe kunyazwi uri muJudha, asi unogara kudai ngevari vemadzinza, haiwa kudai ngezvevanoita vaJudha, unovaangiridza ngenjiranyi vemadzinza kuti vagare kudai ngevaJudha.” Isusu pachedu tiri vaJudha ngechibarirwe, haiwa vemadzinza vashaishi. Asi techizia kuti munhu aapembedzwi ngemishando yeMupango, asi kubudikidza ngokugonda munaKristu Jesu, isusu nesu takatenda muna Kristu Jesu, kuti tipembedzwe ngokugonda munaKristu, haiwa ngokuita mishando yeMupango, ngokuti akuna naumwe ungazopembedzwa ngemishando yeMupango. Asi kudai, taitsvaka kupembedzwa munaKristu, isusuwo temene takaoneka tiri vashaishi, ndizvo Kristu waamushandi wokushaisha here? Haiwa! Asi kudai ndechizoakazve izvo zvendakaparadza, ndinodzionisa kuti ndiri mupauki. Ngokuti inini kubudikidza ngeMupango ndakafa kuneMupango, kuti ndipone kunaMwari. Ndakakohomerwa pamwepo naKristu; asi andinipi ndichapona, asi ndiKristu unopona mukati mwangu. Nendaramo yendinopona zvino munyama, ndinopona ngokugonda kuri kunoMukororo waMwari, uwo wakandida, akadzipira ngendaa yangu. Andirerusi nyasha dzaMwari; ngokuti kudai kupembedzwa kwechizounzwa ngeMupango, ngokudaro Kristu wakatera kufa pasina shwiro. Imwimwi vaGaratia mapenzi! Ndiani wakamurowa? Imwimwi pamberi pemadziso enyu Jesu Kristu wakaoniswa pamhene akakohomerwa pamuchinjiko! Chiro chega chendinoda kuzwa kubva kwomuri ngeichi: Mwakaashira Mweya ngemishando yeMupango here nokuti ngokugonda zvemwakazwa? Muri mapenzi akadai here? Mwakatoamba ndiMweya, zvino mwogumisira ngenyama here? Mwakatambudzikira zviro zvakawanda kudaro pasina shwiro here? Kudai zvakadaro ngegwinyiso pari pasina shwiro. Ndizvo uwo unomupa Mweya, echishanda mishamiso pakati penyu, unozviita ngemishando yeMupango here nokuti ngokuzwa mwakagonda? Kudai ndiAbrahama “Wakagonda Mwari, nakwo kwakaerengerwa kwaari kuti ndikwo kururama.” Ndizvo munoona kuti avo vanogonda ndivo vakororo vaAbrahama. Nezvinyorwa zvechiona ngepamberi kuti Mwari waizopembedza vemadzinza ngokugonda, zvakachumaira vhangeri karetu kunaAbrahama zvechiti, “Mweuri madzinza eshe anozofumiswa.” Ndizvo zvino avo vokugonda vanofumiswa pamwepo naAbrahama uwo waiya nokugonda. Ngokuti veshe avo vanogonda mishando yeMupango vari pashi pechituko, ngokuti kwakanyorwa kuti, “Wakatukwa weshe usikangwariri zveshe zvakanyorwa mubhuku reMupango kuti azviite.” Zvino zviri pamhene kuti apana munhu unopembedzwa ngeMupango pamberi paMwari; ngokuti, “Uwo wakarurama unozopona ngokugonda.” Asi Mupango autseyami pakugonda, ngenjira imweni, “Kunyazwi ndiani unoita mishando yeMupango unozopona ndiyo.” Kristu wakatiripira kubva pachituko cheMupango, iye aitwa wakatukwa ngendaa yedu; ngokuti kwakanyorwa kuti, “Wakatukwa weshe unoturikwa pamuti,” kuti munaKristu Jesu chifumiso chaAbrahama chiuye padera pevemadzinza, kuti tiashire chigondiso choMweya kubudikidza ngokugonda. Hama, ngomuedzaniso wendaramo yemazuva eshe, akuna munhu ungaita chitenderano chevanhu kuti chiite chisina shwiro kunyazwi kututsira kwechiri apo chatotsimiswa. Zvino zvigondiso zvakaitwa kunaAbrahama nokunemubarirwana wake; azvironzi kuti, “Nokumibarirwana,” kuronza yakawanda, asi chinoti, “Nokumubarirwana wako,” ndikwo kuti, kumunhu umwe, uri Kristu. Chendinoronza ngeichi; Mupango wakauya mazana marongomuna nemakumi matatu emakore karetu achingaiti kuti chiite chisina shwiro chitenderano chaiya chakaemeswa ndiMwari karetu, kuti chigondiso chaMwari chikorere. Ngokuti kudai nhaka yechipuwa ngokungwarira Mupango, aichabvi muchigondisopi; asi Mwari wakaipa kunaAbrahama kubudikidza ngechigondiso. Mupango ngewenyi? Uwo wakatutsirwa ngendaa yezvipaukwa, metsa mubarirwana uapo, uwo wakaitirwa chigondiso; nacho chakaemeswa kubudikidza ngengirosi ngomuiyanisi. Zvino muiyanisi azvironzi rupande rumwe akadi; asi Mwari ndiumwe. Ndizvo Mupango unorwisana here nezvigondiso zvaMwari? Haiwa! Ngokuti kudai ngezvewakapuwa Mupango unesimba rokukona kuita ruponeso ngegwinyiso kururama kwaizouya kubudikidza ngeMupango. Asi zvinyorwa zvakakonyera zveshe pashi pesimba rokushaisha, kuti icho chakagondiswa kubudikidza ngokugonda munaJesu Kristu chipuwe kwavari avo vanotenda. Asi kugonda kusati kwaguma, taiya takakonyerwa pashi peMupango, metsa kutenda kwaoniswa. Ndizvo Mupango wakaita mudzidzisi wedu metsa Kristu auya, kuti tipembedzwe kubudikidza ngokugonda. Asi zvino apo kugonda kwaguma, atichiri pashi pomudzidzisiwo, ngokuti munaKristu Jesu imwimwi mweshe muri vakororo vaMwari kubudikidza ngokugonda. Ngokuti avo veshe pakati penyu vakabhabhatidzwa munaKristu, mwakamupfeka Kristu. Apachina muJudha nokuti muGiriki, apachina wakasungwa nokuti wakasunhurika, apachina mwamuna nokuti mukadzi, ngokuti imwimwi mweshe muri umwe munaKristu Jesu. Zvino kudai muri vaKristu, muri mibarirwana yaAbrahama, muri vadyi venhaka kudai ngechigondiso. Inini ndinoronza izvi kuti mudyi wenhaka mukuwo weshe waachiri ndumure, aana chaanopinda ndicho muranda, kunyazwi ndiye mambo wazvo zveshe; asi uri pashi pevarindi nevangwariri metsa igume nguva yakaemeswa ndibaba. Ndizvo nesuwo, apo tichiri ndumure, taiya hloko dzomweya yaitonga mundau dzomudenga. Asi apo nguva yakwana, Mwari wakatumira Mukororo wake wakabarwa ngomudzimai, wakabarirwa pashi peMupango, kuti aripire avo vaiya pashi peMupango, kuti tiashire urerwa hwokuita vana. Ngokuti muri vana, Mwari wakatumira Mweya woMukororo wake mukati mwemwoyo yedu, wechidaidzira wechiti, “Abha, Baba!” Ndizvo iwewe auchaiti muranda, asi mwana; kudai uri mwana, unogarawo nhaka kubudikidza ndiMwari. Karetu musati mwazia Mwari, mwaiya hloko dzezviro zvechibarirwe zvaiya zvisiri zvimwari. Asi zvino mwamuzia Mwari, kakurutu kuziikanwa ndiMwari, munoita mapetukirenyi sure kuneiyo mweya yokuamba isina simba neyoubemha, yomunoda kusungwazve ndiyo? Munongwarira mazuva, mwedzi, nguva nemakore. Ndinomutyira, kuti mushando wangu pakati penyu ungaita usina shwiro. Ndinomupota, hama, itai vakadai ndini, ngokuti inini ndakadai ndimwi, amuzi kundishaishira. Zvino munozia kuti indaa yokurwadziwa kwomuiri kwakaita kuti ndichumaire vhangeri kwomuri pakutanga; kunyazwi kurwara kwangu kwaiya chiedzo kwomuri, amuzi kundinyenya nokuti kundiramba; asi mwakandiashira kudai ngevanoashira ngirosi yaMwari, kudai ngevanoashira Kristu Jesu. Kuripari kudakadzwa kwenyu kwemwakazwa? Ngokuti ndinomuitira chapupu imwimwi kuti kudai zvaibvira, mwaizodai mwakabvita madziso enyu mukaapa kwendiri. Ndizvo ndaita gaa renyu here ngokumuronzera gwinyiso? Vanotsamwirira kumutsvaka asi haiwa ngenjira yakanaka; vanoda kumukonyera kubanze, kuti imwimwi muvatsamwirire. Asi zvakanaka kutsamwirirwa ngenjira yakanaka ngenguva dzeshe, haiwa kwega apo ndinemwi. Vana vangu vadoko, vendinotambudzikira metsa Kristu abarwe mukati mwenyu, ndaida kuti dai ndaiyapo nemwi zvino, kuti nditsandure izwi rangu; ngokuti ndinokangaidzwa ndimwi. Ndironzerenyi, imwimwi munoda kutongwa ngeMupango, amupurutani Mupango here? Ngokuti kwakanyorwa kuti, “Abrahama waiya nevakororo vairi, umwe wakabarwa ngomurandakadzi, noumweni wakabarwa ngomukadzi wakasunhurika.” Asi mukororo womurandakadzi wakabarwa ngokuda kwenyama; asi mukororo womukadzi wakasunhurika wakabarwa kubudikidza ngechigondiso. Izvi zvinechidzidzo chomuedzaniso; ngokuti vakadzi vairi ava muedzaniso wezvitenderano zviiri. Umwe wevakadzi ndiHaga unobva kumutunhu weSinai, unobara vana vouranda. Zvino Haga idunhu reSinai muArabhia, unoedzaniswa neJerusarema rindoripo, ngokuti uri muusungwa pamwepo nevana vake. Asi mukadzi umweni unoedzaniswa neJerusarema iro romudenga rakasunhurika, ndivo mai edu. Ngokuti kwakanyorwa kuti, “Dakara, iwewe ngomwa usikabari. Pururidza, udaidzire, iwewe usikazi kurwadziwa ngokubara; ngokuti vanopinda kuwanda vana vomukadzi wakasiiwa kunouwo unemwamuna.” Zvino imwimwi, hama, muri vana vechigondiso kudai ndiIsaka. Asi kudai ngezvakaitika ngouwo mukuwo, iye wakabarwa ngokuda kwenyama wakatambudza uwo wakabarwa ngokuda kwoMweya, zvakandodaro nazvino. Asi chinyorwa chinotinyi? Chinoti, “Dzinga uwo murandakadzi nomukororo wake, ngokuti mukororo womurandakadzi aazogari nhaka pamwepo nomukororo womukadzi wakasunhurika.” Ndizvo hama, isusu atiri vanapi vouwo murandakadzi, asi tiri vouwo wakasunhurika. Kristu wakatisunungura akatiita vakasunhurika. Ndizvo emai mwakagwinya, musachasungwazve mujoka rouranda. Izwai! Inini Phauri ndinoti kwomuri, kudai mwechiashira kuchekwa, Kristu aadetseri chiro kwomuri. Inini ndinopupura kumunhu weshe unoashira kuchekwa kuti iye unomutari wokungwarira Mupango weshe. Imwimwi munoda kupembedzwa ngeMupango mwakadziparadzanisa kubva kunaKristu. Mwawa kubva kunyasha. Ngokuti kubudikidza ndiMweya ngokugonda tinogarira gonda rokururama. Ngokuti munaKristu Jesu zveshe kuchekwa nokusikachekwa azvidetseri chiro; chiro chimwe chega chinodetsera kugonda ukwo kunoshanda kubudikidza ngorudo. Imwimwi mwairumba zvakanaka; ndiani wakamupinga kuti musapurutana gwinyiso? Uku kunyengererwa akubvi akadi kunouwo wakamudaidza. Zvimumera zvidoodoko zvinofemesa hlama yeshe. Ndinogonda munaMambo, kuti amuzotori mukarakadzo umweni. Asi kunyazwi ndiani unomukangaidza unozodzitwarira kutongwa kwake. Asi inini, hama, ndichatambudzirwenyi kudai ndichachumaira kuchekwa? Kuti zvakadaro chipumhuniso chomuchinjiko chaduswa. Ndinoda kuti avo vanomunzeremusa dai vaizodzicheka pachavo. Ngokuti imwimwi, hama, mwakadaidzwa kuti muite vakasunhurika; kwega musashandisa kusunhurika kwenyu kuti kumutendere kuita zvenyama, asi ngorudo shandiranai umwe kunoumweni. Ngokuti Mipango yeshe inozadziswa ngomupango umwe, unoti, “Unozomuda muakirwana wako kudai ngokudzida kwako iwewe.” Asi kudai mwechirumana nokudyana, ngwarai kuti musazopedzana. Asi ndinoti, “Hambai ngoMweya, nemwi amuzoiti kuemura kwenyama.” Ngokuti kuemura kwenyama kunorwisana noMweya, nokuemura kwoMweya kunorwisana nenyama; ngokuti izvi zvinopesana chimwe nechimweni, kumurambidza kuti musaita zvomunoda. Asi kudai mwechikweyiwa ndiMweya, amusiri pashi peMupangopi. Zvino mishando yenyama inooneka pamhene, ndiyo iyi: kuomba, kusikasukika, kuemura, kudira miedzaniso, kuringidza, kunyenya, hasha, ndurumwa, ushungu, kudzida, kuparadzana, kudzidzisa manyepo, kururumwa, kuradza, kushadaya nezviro zvakadaro. Ndinomupanga kudai ngezvendakamupanga karetu, kuti avo vanoita zvakadaro avazogari nhaka youmambo hwaMwari. Asi michero yoMweya rudo, kudakara, kunyarara, kusengerera, nyasha, kunaka, kugondeka, kupfaa, kudzibata. Akuna mupango unorwisana nezvakadai. Naavo vari vaKristu Jesu vakakohomera nyama pamwepo nokudisisa nokuemura kwayo. Kudai techipona ndiMweya, ngatihambezve ndiMweya. Tisadziganzisa nokuti kutsenesana nokuti kururumwirana. Hama, kuti munhu abatwa ngechishaishi, imwimwi voMweya muunziridzirenyi wakadaro ngomweya wokupfaa, wechidzingwarira iwewe pachako newewo usazoedzwa. Twariranai mitwaro, ngokuita kudaro muzadzise mupango waKristu. Ngokuti dai munhu echidzipinimidzira kuti urinane kupinda vamweni, apo asikavapindi, iye unodzichengedzera pachake. Asi munhu weshe ngaaedze mushando wake wemene; naapo unozodzionera kuti ungaganza ngenyi pachake, haiwa ngomushando womuakirwana wake. Ngokuti munhu weshe unozodzitwarira mutwaro wake. Asi uwo unodzidziswa izwi ngaakoanisirane zviro zveshe zvakanaka nomudzidzisi wake. Musachengedzerwa; Mwari aaitirwi jee, ngokuti munhu unovhuna kunyazwi ngechiri chaanokusha. Ngokuti uwo unodzikushira nyama yake, unozovhuna kuora kubva kunyama; asi uwo unodzikushira Mweya, unozovhuna kubva kuMweya kupona kusikaperi. Tisaremba kuita zvakanaka, ngokuti ngenguva kwayo tinozovhuna, kudai tisikademeri. Ndizvo zvino kudai ngezvetinayo nguva, ngatishande zvakanaka kunevanhu veshe, kakurutu kuneavo vari vemhuri yokutenda. Munoona kukura kwetsamba yendakanyora kwomuri ngenyara yangu yemene! Ndivo avo vanoda kuoneka vari vakanaka munyama, vanomuangiridza kuti muchekwe; kwega kuti vasazotambudzwa ngendaa yomuchinjiko waKristu. Ngokuti kunyazwi naavo vemene vakachekwa, avangwariri Mupango, asi vanechidisiso chokuti muchekwe kuti vaganze ngenyama yenyu. Asi kusaitika kuti inini ndiganze ngechiro chimweni asi ngomuchinjiko waMambo wedu Jesu Kristu, kubudikidza ndiwo nyika yakakohomerwa kwendiri, neni ndakakohomerwa kunenyika. Ngokuti kuchekwa nokuti kusikachekwa akuna shwiro, asi kuita chisikwa chitsva kuri zviro zveshe. Kunyarara nenyasha ngazvigare padera pavo veshe vanohamba ngouyu murao nepadera pavaIsuraeri vaMwari. Kubvira zvino kusaapo munhu unonditambudza; ngokuti ndinotwara pamuiri wangu magotsa aJesu. Nyasha dzaMambo wedu Jesu Kristu ngadzigare nomweya yenyu, hama. Ameni. Phauri, mupostori waKristu Jesu ngokuda kwaMwari, ndinonyorera kwavari vakacheneswa vari muEfesu, avo vanogondeka munaKristu Jesu. Mwari Baba edu naMambo Jesu Kristu ngavamupe nyasha nokunyarara. Ngaakudzwe Mwari naBaba aMambo wedu Jesu Kristu, uwo wakatifumisa munaKristu ngezvifumiso zveshe zvomweya mundau dzomudenga, kudai ngezvaakatitsanangura mwaari ngorudo nyika isati yasikwa, kuti tiite vakacheneswa nevasina ndaa pamberi pake. Wakatiemesa karetu kuti tiite vana vake kubudikidza ndiJesu Kristu, kudai ngebiningidzo rokuda kwake, kuti tikudze Mwari ngendaa youthende hwenyasha dzake dzaakatipa pasina muripo kubudikidza ngoUnodikanwa. Mwaari tinakwo kuripirwa kubudikidza ngengazi yake, ndikwo kukungurirwa kwezvishaishi zvedu, kudai ngouwandu hwenyasha dzake, idzo dzaakapa ngokuwanzisa kwetiri. Muungwaru hweshe nokuzwisisa wakaita kuti zviziikanwe kwetiri kushamisa kwokuda kwake, kudai ngebiningidzo rake raakaemesa munaKristu, kudai ngourongwa hwokuzarisika kwenguva, kuti aunganidze zviro zveshe mwaari Kristu, zviro zvomudenga nezviro zvomunyika. Mwaari takaitwa nhaka, takaemeserwa karetu kudai ngebiningidzo rouwo unoshanda zviro zveshe kudai ngokuronga kwokuda kwake, kuti tiite kukudzwa kwouthende hwake, isusu takatanga kutenda kuna Kristu. Mwaari imwimwiwo, mwakazwa izwi regwinyiso, vhangeri rokuponeswa kwenyu, nemwi mwakatendawo mwaari, mwakaiswa ruphau rwoMweya Wakachena womwakagondiswa; uwo ndiwo chigondiso chenhaka yedu, metsa kuripirwa kwenhaka yemene, kuita kukudzwa kwouthende hwake. Ngeiyi ndaa neniwo, ndakati ndazwa ngokugonda kwenyu munaMambo Jesu norudo rwenyu kunevakacheneswa veshe, andirekeri kubonga ngendaa yenyu, ndechimukarakadza mumikumbiro yangu, kuti Mwari waMambo wedu Jesu Kristu, Baba vouthende, vamupe mweya woungwaru nowokuoniswa muruziyo rwake, munemadziso omwoyo yenyu akavhenekerwa, kuti imwimwi muzie biningidzo regonda rokumudaidza kwake, neroupfumi hwouthende hwenhaka yake kwavari vakacheneswa, noukuru hwakakurisa usina chipimo hwesimba rake kwetiri isusu tinotenda, kudai ngokushanda kwesimba rake guru, raakashanda munaKristu, apo paakamumusa kubva kwevakafa, akamugadzika ngokumudyo kwake mundau dzomudenga, padera pokutonga kweshe noukuru hweshe nesimba reshe noumambo hweshe, nepadera pemazina eshe anodudzwa, haiwa omunyika muno mwega, asi neeiyozve inouya. Uwo wakaisa zveshe pashi petsoka dzake nokumuita soro padera pezveshe ngendaa yechiara, icho chiri muiri wake, kuzara kwouwo unozarisa zveshe mune zveshe. Imwimwi mwaiya vakafa muzvipaukwa nomuzvishaishi. Muneizvo zvemwakahamba pakati pazvo karetu, mwakateera mitoo yeiyi nyika, mukateera njira yomuzvare wesimba romweya womudenga, mweya uwo unoshanda zvino mukati mwevakororo vokusikapurutana. Taigara teshe pakati pavo karetu, tiri mukuemura kwenyama yedu, techiita kuda kwenyama nokwemipinimidzo, ngechibarirwe taiya vana voushungu, kudai ngevanhu vamweni. Asi Mwari, unenyasha dzakawanda, kubva murudo rwake rwakakura rwaakatida ndirwo, kunyazwi apo taiya takafa kubudikidza ngezvipaukwa zvedu, wakaita kuti tipone pamwepo naKristu (mwakaponeswa ngenyasha.) Wakatimusa pamwepo naye, akaita kuti tigare pamwepo naye mundau dzomudenga munaKristu Jesu, kuti ngenguva dzinouya aonise kuwanda kukurutu kwoupfumi hwenyasha dzake norudo rwake kwetiri ndiKristu Jesu. Ngokuti mwakaponeswa ngenyasha kubudikidza ngokugonda; izvi zvisikaitwi ndimwi, asi chipo chaMwari; azviitiki kubudikidza ngemishando, kuti kusazoapo naumwe ungaganza. Ngokuti isusu tiri mushando wake, takasikirwa munaKristu Jesu kuti tiite mishando yakanaka, yaakaemesa karetu Mwari kuti tihambe mukati mwayo. Ndizvo karakadzai kuti karetu imwimwi mwaiya vemadzinza ngokwenyama, mwaizwi kuti, “Vasikazi kuchekwa,” ngaavo vanozwi, “Vakachekwa,” izvo zvinoitwa munyama ngenyara. Karakadzai imwimwi kuti ngouwo mukuwo mwaiya mwakaparadzana naKristu, musikaiyani norudzi rwaIsuraeri, muri vapara kuzvitenderano zvechigondiso, musina negonda, musina Mwari munyika. Asi zvino munaKristu Jesu imwimwi karetu mwaiya kuretu mwakwedzedzwa pasinde ngengazi yaKristu. Ngokuti iye uri kunyarara kwedu, uwo wakaita kuti teshe tiite umwe naye, wakaputsa rukumbati rwougaa rwaiparadzanisa ngepakati, aparadza ngomuiri wake mitemo yemipango nezviemeso, kuti adzisikire mukati mwake munhu umwe mutsva kuti vasaita vairi, kuti paite kunyarara, kuti aiyanise zvikwata zveshe zviiri munaMwari mumuiri umwe kubudikidza ngomuchinjiko, auraye ugaa kubudikidza ndiwo. Naye wakauya, akachumaira kunyarara kwomuri imwimwi mwaiya kuretu nokunyarara kwavari avo vaiya pasinde; ngokuti kubudikidza ndiye isusu teshe tinokona kupinda ndiMweya umwe kunaBaba. Ndizvo zvino amuchaiti vapara nevaeni, asi mwaita dzinza rimwe pamwepo nevakacheneswa, muri vemhuri yaMwari, mwakaakwa padera petsikiro revapostori nerevaprofeti, Jesu Kristu emene ndiye buwe guru repakhona. Mwaari mhatso yeshe inonasa kushonganiswa pamwepo nokukura kuita temperi rakachena munaMambo; mwaari imwimwiwo munoakwa pamwepo kuita ugaro hwaMwari muMweya. Ngeiyi ndaa inini Phauri, bhanditi raKristu Jesu ngendaa yenyu imwimwi vemadzinza, ngegwinyiso mwakazwa ngounhunge hwenyasha dzaMwari dzakapuwa kwendiri ngendaa yenyu, ngenjira yakaziiswa chakafishika chakaitwa kuti chiziikanwe kwendiri ngokuoniswa, kudai ngezvendakambonyora ngemazwi mashomani. Mukudzidza izvi mungazwisisa kuzia kwangu ngechakafishika chaKristu, icho chisikazi kuziikanwa kuvakororo vevanhu mumibarirwana imweni, kudai ngezvechakaoniswa kuvapostori vake vakacheneswa nevaprofeti ndiMweya; kuti vemadzinza vanogara nhaka pamwepo nesu navo vari venhengo dzomuiri umwewo pamwepo nesu vanokoanisirwawo chigondiso chiri kunaKristu Jesu kubudikidza ngevhangeri. Ngeiri vhangeri ndakaitwa mushandiri waro, kudai ngechipo chenyasha dzaMwari chendakapuwa ngokushanda kwesimba rake. Kwendiri, kunyazwi inini ndiri mudoko wokupedzisira wavo veshe vakacheneswa, nyasha idzi dzakapuwa, kuti ndichumaire kune vemadzinza upfumi husikatsvakiki hwaKristu, nokuita kuti vanhu veshe vaone urongwa hwechakafishika chaiya chakafishwa kubvira pakutanga munaMwari uwo wakasika zviro zveshe; kuti kubudikidza ngechiara uhwo ungwaru hwaMwari muzviemo zvakaparadzana zvino huziikanwe kuvatongi nevane simba mundau dzomudenga, kudai ngokuronga kwake kwemhera nariini, ukwo kwaakaita muna Kristu Jesu Mambo wedu, mwaari tinoshinga kupinda kubudikidza ngegonda rokutenda kwedu mwaari. Ndizvo ndinomukumbira kuti musademera ngokutambudzika kwangu ngendaa yenyu, kuri uthende hwenyu. Ngeiyi ndaa ndinogwadama ngemabvi angu pamberi paBaba, kubva mwaari mhuri dzeshe dzomudenga nedzomunyika dzinodaidzwa ngezina ravo, kuti iye amupe, kudai ngouwandu hwouthende hwake, kuti mugwinyiswe ngesimba kubudikidza ndiMweya wake mumunhu womukati, kuti Kristu agare mumwoyo mwenyu kubudikidza ngokugonda; kuti imwimwi, muane nzinde netsikiro zvakagwinya murudo, muane simba reshe rokuzwisisa, pamwepo nevakacheneswa veshe, chiinyi kupamhama nokureba nokukwira nokudzama nokukura mukuzia rudo rwaKristu runopinda ruziyo rweshe, kuti muzadzwe ngokuzara kweshe kwaMwari. Kwaari uwo ngesimba rinoshanda mukati mwedu unokona kakurutu kuita zvakawanda kupinda zveshe zvetinokumbira nezvetinopinimidza, kwaari ngakua nouthende muchiara nomunaKristu Jesu kunemazero eshe mhera nariini. Ameni. Ndizvo inini, bhanditi raMambo, ndinomupota kuti muhambe kudai ngezvinosisira kudaidzwa kwemwakadaidzwa ndikwo, ngokudzinaanisa kweshe nokupfaa nokusengerera, mwechisengerera umwe kunoumweni ngorudo, mwechitsamwirira kungwarira kuiyana kwoMweya ngechisungo chokunyarara. Uripo muiri umwe noMweya umwe, kudai ngezvemwakadaidzwa mukugonda kumwe kwokudaidzwa kwenyu, Mambo umwe, gonda rimwe, rubhabhatidzo rumwe, Mwari umwe, vari Baba weveshe, vari padera pavo veshe, vanoshanda kubudikidza ndivo veshe, naye uri mukati mwavo veshe. Asi nyasha dzakapuwa kuneumwe ngaumwe wedu kudai ngechipimo chechipo chaKristu. Ndizvo unoti, “Apo paakakwira mudenga, wakakweya vabatwa, akapa zvipo kuvanhu.” (Mukuti, “Wakakwira,” zvinoronzenyi asi kuti wakadzakazve kundau dziri pashi munyika? Uwo wakadzaka ndiyezve wakakwira ngepadera pematenga eshe, kuti azadzise zviro zveshe.) Naye wakapa vamweni kuti vaite vapostori, vamweni kuita vaprofeti, vamweni kuita vavhangeri, vamweni kuita vaushi nevadzidzisi, kuti vakacheneswa vanasirirwe kumushando wokushandira, kuaka muiri waKristu, metsa teshe taguma pakutenda kumwekwo noruziyo rwoMukororo waMwari, kuita vanhu vakaperera, kuchipimo choukuru hwakaperera hwaKristu; kuti tisachagara tiri vana vadoko, techizungunyiswa mberi nesure nokuvhuvhutwa ngemhepo yokudzidzisa kweshe, ngemazano akashata evanhu nourimbwi, kuti vatipause ngokuchengedzera. Asi techiereketa gwinyiso murudo, tikure mwaari ngezviro zveshe, uwo uri soro, munaKristu; kubva mwaari muiri weshe, unorimbanidzwa nokubatanidzwa pamwepo ngenhengo dzeshe dzinogwinyisa, nhengo yeshe inoshanda ngechipimo chayo, kudai ngomushando wakanaka wenhengo imwe ngaimwe, unoita kuti muiri ukure kuti udziake murudo. Ndizvo ndinoronza izvi nokupupura munaMambo, kuti musachahamba kudai ngevemadzinza muupenzi wemipinimidzo yavo isina shwiro; vari muchidima mukuzwisisa kwavo, vari vapara mukupona munaMwari ngendaa yokusikazia kwavo nendaa yokukonza kwomwoyo yavo; vakarashikirwa ngounhu hweshe vakadzipira mukuemura, vechishanda zveshe zvine tsvina ngokuboka. Asi imwimwi amuzi kudzidza zvakadaro ndiKristu! Ngegwinyiso mwakamuzwa mukadzidziswa ndiye, kudai ngegwinyiso riri munaJesu. Mwakadzidziswa kuti murashe munhu wekaretu, kunoronza kupona kwenyu kwekaretu, uwo unooreswa ngokuemura kwokuchengedzera, kuti mumusirirwe mumweya womupinimidzo wenyu, mupfeke munhu mutsva, uwo wakasikwa akadai ndiMwari mukururama nomukucheneswa kwegwinyiso. Ndizvo rashai kunyepa, “Ereketai gwinyiso munhu weshe kuno muakirwana wake,” ngokuti tiri nhengo umwe kunoumweni. “Tsenekai, musikashaishi.” Musatendera kuti zuva ripote mwakatseneka, musapa ndau kunaDhiabhorosi. Mbavha ngairekere kuba, asi paugaro peizvo ngaishande, yechishanda zvakanaka ngenyara dzayo, kuti ione zvokupa kwaari unotama. Musatendera kuti kuereketa kwakashata kubude mumiromo yenyu, asi kwega kwakanaka kunoaka, kudai ngezvinotamika, kuti kupe nyasha kwavari vanokuzwa. Musatsamwisa Mweya Wakachena waMwari, womwakaisirwa chioniso mwaari metsa kuguma kuzuva rokuripirwa. Rashai kubva kwomuri kushata kweshe, ushungu, kutseneka, bope, kutuka nokhururu kweshe; muitirane nyasha umwe kunoumweni, muano mwoyo yakapfaa, mwechirekererana umwe noumweni kudai ndiMwari wakamurekerera muna Kristu. Ndizvo itai vaedzereri vaMwari, kudai ngevana vanodikanwa. Muhambe murudo, kudai ndiKristu wakatida, akadzipira ngepamusoro pedu, kuita mudiro nomubairo kunaMwari zviite gwema rakanaka. Asi kuomba nezvinosvipisa zveshe nokuemura zvisazoereketwa ndizvo pakati penyu, kudai ngezvinosisira pakati pevakacheneswa. Musatendera kuti kuapo tsvina nokuti kuereketa zvoupenzi nokuti kutsvinya zvisikasisiri, asi ngakuapo kubonga. Muwe negwinyiso reizvi, kuti akuna muombi nokuti munhu wakasvipiswa nokuti unoemura (kuronza kuti mudiri wemiedzaniso), unodya nhaka muumambo hwaKristu nohwaMwari. Musachengedzerwa ngomunhu ngemazwi asina shwiro, ngokuti ngendaa yeizvi zviro ushungu hwaMwari hunouya padera pevana vokusikapurutana. Ndizvo musazwanana navo, ngokuti imwimwi karetu mwaiya chidima, asi zvino muri kujeka muna Mambo; hambai kudai ngevana vokujeka, (ngokuti michero yokujeka inooneka kunezveshe zvakanaka nokururama negwinyiso,) mwechiedza kudzidza zvinonasa kudakadza Mambo. Musikaiyani nemishando yechidima isina michero, asi ngazvibudiswe pakujeka. Ngokuti zvinotsverudza kunyazwi kuereketa ngeizvo zvinoitwa ndivo mukufishika; asi apo chiro cheshe pechinobudiswa pakujeka chinooneka, ngokuti chiro cheshe chinooneka chiri kujeka. Ndizvo iye unoti, “Muka, iwewe unoata, muka kubva kwevakafa, naKristu unozokuvhenekera.” Ndizvo nasai kungwara mukuhamba kwenyu, musikadai ngevanhu vasikazi kungwara, asi mudai ngevakangwara, mwechitenga mukuwo, ngokuti mazuva ari akashata. Ndizvo musaita mapenzi, asi mwechizia chiri kuda kwaMambo. Musaradza ngevhini, iro rinopara kusikadzibata, asi mwechizadzwa ndiMweya, mwechiereketa umwe kunoumweni ngenduyo nengoma nokuemba kwoMweya, mwechiemba ngokutetemba ngomwoyo yenyu kunaMambo, mwechibonga kunaMwari Baba ngezviro zveshe ngenguva dzeshe ngezina raMambo wedu Jesu Kristu. Mwechipfairana umwe kunoumweni mukutya Kristu. Vakadzi, pfairai vamuna venyu, kudai ngezvomunoita kunaMambo. Ngokuti mwamuna uri soro romukadzi, kudai ndiKristu uri soro rechiara, muiri uwo waari muponesi. Asi kudai ngechiara chinomupfaira Kristu, ndizvo vakadzi ngavapfaire vamuna vavo ngezviro zveshe. Vamuna, idai vakadzi venyu, kudai ndiKristu wakachida chiara, akadzipira ngepamusoro pacho, kuti achichenese, achisuka ngokushamba ngemvura neizwi, kuti adziisire chiara kwaari chiri chiara chinounaku, chisina ndemo nokuti kuonyana nokuti chiro chimweni chakadaro, asi kuti chiite chakacheneswa, chisina neara. Ngokudaro kunosisira kuti vamuna vade vakadzi vavo kudai ngezvevanoda miiri yavo. Uwo unoda mukadzi wake unodzida pachake. Ngokuti apana munhu wakambonyenya nyama yake, asi unoikodza nokuingwarira, kudai ngezvaanoitawo Kristu kunechiara, ngokuti isusu tiri nhengo dzomuiri wake. “Ngeiyi ndaa munhu unozosiya baba ake namai ake, unozonamatira kumukadzi wake, naavo vairi vanozoita nyama imwe.” Ichi chakafishika chikurutu, asi ndinoereketa ngendaa yaKristu nechiara. Asi umwe ngaumwe wenyu ngaade mukadzi wake kudai ngezvaanodzida pachake nomukadzi ngaangwarire kuti aremeredze mwamunawake. Vana, purutanai vabari venyu munaMambo, ngokuti izvi zvakarurama. “Remeredza baba ako namai ako,” (uyu uri mupango wokutanga une chigondiso,) “Kuti zvinake kwouri, nokuti upone mukuwo wakareba munyika.” Nemwi madzibaba, musatsamwisa vana venyu, asi muvarere mukudzidzisa nomukupanga kwaMambo. Hloko, purutanai avo vari madzimambo enyu ngokwenyama, ngokutya nokuhuta, ngomwoyo wakarurama, kudai ngevanoitira Kristu; musikashandi ngokuoneka ngemadziso, kudai ngevanodakadza vanhu, asi kudai ngehloko dzaKristu, mwechiita kuda kwaMwari mumwoyo, mwechishanda ngokuda kudai ngevanoitira Mambo haiwa kuvanhu, mwechizia kuti kunyazwi chiinyi chakanaka chaanoita munhu, unozochipuwa kubva kunaMambo, kunyazwi hloko nokuti wakasunhurika. Nemwiwo madzimambo, itai zvakadaro kwavari, murekere kuvatyisidzira, mwechizia kuti Mambo wavo nowenyuwo uri mudenga, kwaari akuna mutsananguro wevanhu. Pakugumisira, itai vakagwinya munaMambo nomukugwinya kwesimba rake. Pfekai nhumbi dzeshe dzokurwa ndidzo dzaMwari, kuti mukone kuema kurwisana nemazano akashata aDhiabhorosi. Ngokuti atidzipani nenyama nengazi, asi tinodzipana noumambo nevane simba nevanotonga nyika yechidima chino nomweya yakashata yomundau dzomudenga. Ndizvo torai nhumbi dzeshe dzokurwa ndidzo dzaMwari, kuti mukone kurwisa pazuva rakashata nokuramba mwakaema apo mwapedza zveshe. Ndizvo emai, mwakasimira gwinyiso muzviunu zvenyu, mwaisa chihlangu chepaditi chokururama, mwapfeka mutsoka dzenyu kunasirirwa kwevhangeri rokunyarara; muneizvi zveshe torai chihlangu chokugonda, chomunozokona kudzima ndicho misee yeshe yemirazvu yomuriro youwo wakashata. Ashirai chiqoko choruponeso neshoti yoMweya, iri izwi raMwari. Mukumbire nguva dzeshe muMweya, nokukumbira kweshe nokupota. Muneizvi mumipinimidzo ngwarai nokusengerera kweshe nokukumbirira vakacheneswa veshe, neniwo mundikumbirire, kuti ndipuwe izwi rokuereketa ngokushinga, kuti ndidudzire zvakafishika zvevhangeri, ngendaa yaro inini ndiri muemereri wakasungwa ngemaketani; kuti ndierekete ngokushinga, kudai ngezvinosisira kuti ndierekete. Zvino kuti muziewo magarire angu nezvendinoita, Thichikusi, munun'una unodikanwa nenhunge inogondeka munaMambo, unozomuronzera zviro zveshe. Ndamutumira kwomuri ngendaa iyi, kuti muzie kugara kwedu nokuti agwinyise mwoyo yenyu. Kunyarara ngakugare nevakoma, rudo pamwepo nokugonda, zvinobva kunaMwari Baba naMambo Jesu Kristu. Nyasha ngadzigare kwavari veshe vanomuda Mambo wedu Jesu Kristu ngorudo rusikaperi. Phauri naThimothi, varanda vaKristu Jesu, ndinonyorera kwavari veshe vakacheneswa munaKristu Jesu avo vari muFiripi, pamwepo nevatungamiriri vakuru vechiara nevadetseri. Nyasha ngadzigare kwomuri nokunyarara zvinobva kunaMwari Baba edu naMambo Jesu Kristu. Ndinobonga Mwari wangu mikuwo yeshe yendinokarakadza ndimwi, ngenguva dzeshe mukukumbira kwangu kweshe ndimwi mweshe ndinokumbira ngokudakara, ngendaa yokubatana pamwepo kwenyu mukuhambisa vhangeri kubvira pazuva rokutanga metsa zvino. Ndechigonda ichi, kuti uwo wakatanga mushando wakanaka mukati mwenyu unozouita kuti uperere metsa pazuva raJesu Kristu. Kudai ngezvezvakanaka kuti ndiwe nomupinimidzo wakadaro ndimwi mweshe, ngokuti ndinemwi mumwoyo mwangu, ngokuti mukusungwa kwangu nokudzirwira nokugwinyisa vhangeri, imwimwi mweshe munokovana neni munyasha. Ngokuti Mwari ndiye chapupu changu, munjira yendinomushuwira mweshe ndiyo kakurutu ngorudo rwaKristu Jesu. Uyu ndiwo mukumbiro wangu, kuti rudo rwenyu ruangirire kuwanda nokuwanziswa mukuzia nokuzwisisa kweshe, kuti muedze muzie zviri zvakapinda kunaka, kuti muite vakacheneswa vasina ndaa metsa pazuva raKristu, mwechizadzwa ngemichero yokururama, iyo iripo kubudikidza ndiye Jesu Kristu, mukukudza nokuirikidza Mwari. Asi ndinoda kuti muzie, hama, kuti izvo zvakaitika kwendiri zvakashanda kuhambisa vhangeri, ndizvo kusungwa kwangu ngendaa yaKristu kwakaziikanwa kwavari veshe vari mumhatso yamambo nokunevamweni veshe; hama zhinji dzakaitwa kuti dzigonde munaMambo ngokusungwa kwangu, nadzo dzinopinda kutsunga kuereketa izwi raMwari dzisikatyi. Ngegwinyiso vamweni vanochumaira Kristu ngegodo nehasha, asi vamweni ngomwoyo unoda. Vamweni vanoita kudaro ngorudo, vechizia kuti ndakaemeswa kurwira vhangeri; asi vamweni vanochumaira Kristu ngehasha, vasikaiti ngegwinyiso, vechipinimidza kututsira kutambudzika kwendiri muusungwa hwangu. Zvinendaa yenyi izvi? Kwega kuti ngenjira dzeshe, kunyazwi ngokudziitisa nokuti ngegwinyiso, Kristu unochumairwa; neni ndinodakara ndizvo. Eya, ndinozoangira kudakara, ngokuti ndinozia kuti izvi zvinozokunukuka kuita ruponeso rwangu ngokukumbira kwenyu nokudetsera kwoMweya waJesu Kristu. Ndikwo kudisisa nokukarira kwokugonda kwangu, kuti andizotsveruki ngechiro nachimwe, asi kuti ngokuereketa kwangu ngokutsunga, kudai ngenguva dzeshe, kuti nazvino Kristu unozokuriswa mumuiri wangu kunyazwi mukurarama nokuti murufu. Ngokuti kwendiri kurarama ndiKristu norufu kuuyirwa. Asi kudai ndechipona munyama, zvinoronza michero yomushando wangu neni; andizii chendichatsanangura. Asi ndinomanikidzwa pakati peizvi zviiri. Chidisiso changu ngechokuti ndibve ndiende koogara naKristu, ngokuti ndizvo zvakapindisisa kunaka. Asi kugara munyama kunopinda kusisira ngendaa yenyu. Ndechigonda izvi, ndinozia kuti ndinozogara ndechiangirira kugara nemwi mweshe, mukuenda mberi nokudakara mukugonda, kuti kuganza kwenyu kuwanzwe munaKristu Jesu, ndapetukazve kwomuri. Kwega kuti muhambe kudai ngezvinosisira vhangeri raKristu, kuti kunyazwi ndechiuya koomuona nokuti ndisipo, ndingazwa ngendaa yokugara kwenyu, ndinozozia kuti mwakaema mwakagwinya ngomweya umwewo, ngomwoyo umwe mwechirwira kugondwa kwevhangeri, musikatyisidzirwi ngechiro nachimwe ngeavo vanorwisana nemwi. Kwavari izvi zviri chioniso chiri pamhene chokurashwa, asi kwomuri zviri chioniso choruponeso, urwu runobva kunaMwari. Ngokuti kwakatenderwa kwomuri nguva ngenyasha, haiwa yokutenda kwega munaKristu, asi yokutambudzika ngendaa yake, mwechirwawo kurwa kwemwakaona kwendiri nazvino munozwa kuti ngekwangu. Ndizvo kudai kuripo kunyaradzwa munaKristu, kudai kuripo kuembedzerwa kworudo, kudai kuripo kuiyana kwoMweya, kudai dziripo nyasha dzinorudo nokuitirwa nyasha, itai kuti kudakara kwangu kuite kwakaperera; muite vane mupinimidzo umwe, munerudo rumwe nechisungo chimwe nomupinimidzo umwe. Musaita chiro ngokudzida nokuti ngokudzitunhumadza, asi mukupfaa kwomupinimidzo umwe ngaumwe ngaaerenge kuti vamweni vanomupinda ngokunaka. Umwe ngaumwe ngaarekere kuringira zviro zvake, asi ngaaringire zvevamweni. Uyu mupinimidzo ngaugare mukati mwenyu uwo waiya mukati mwaKristu Jesu, uwo, kunyazwi waiya mumuemo waMwari, aazi kupinimidza kuti chiri chiro chokukara kuedzana naMwari, asi wakadziita usina shwiro, echidzitorera muemo womuranda, akabarwa mumuemo womunhu. Naapo echioneka anomuemo womunhu, wakadzipfaisa pachake, akaita unopurutana metsa pakufa, kunyazwi rufu rwepamuchinjiko. Ndizvo Mwari wakamukudza kakurutu, akamupa zina riri padera pezina reshe, kuti ngezina raJesu mabvi eshe agwadame, evari mudenga nevari munyika nevari pashi penyika, kuti ndimi dzeshe dzitende kuti Jesu Kristu ndiye Mambo, kuti Mwari Baba akudzwe. Ndizvo, vanodikanwa vangu, kudai ngezvemwakandipurutana ngenguva dzeshe, haiwa panguva dzendiripo dzega, asi zvino munopinda kakurutu apo ndisipo, shandirai ruponeso rwenyu mukutya nomukuhuta; ngokuti ndiye Mwari unoshanda mukati mwenyu, echimuita kuti mukone mweshe kuda nokushandira kudakara kwake kwakanaka. Itai zveshe pasina kuvhuruvhuta nokuti kuita hasha, kuti muite vasina chevanoitirwa ndaa, vakarurama, muri vana vaMwari musina ndaa pakati pomubarirwana wakashongoroka nowakapauka, mujeke pakati pavo kudai ngenyeredzi dzinojeka padera penyika. Ngokubatisisa izwi rokupona kunoita kuti ndiwe nacho chokuganza ndicho ngezuva raKristu, kuti andizi kutera kurumba pasina shwiro nokuti kutera kushanda pasina shwiro. Asi kunyazwi ndechidururwa padera pomudiro nomushando wokugonda kwenyu, ndinodakara ndechidakara nemwi mweshe. Ngokudaro dakaraiwo imwimwi, mudakare neni. Asi ndinogonda munaMambo Jesu kutumira Thimothi kwomuri ngokukasira kuti neni ndidakadzwe ngemashoko enyu. Ngokuti andina munhu umweni wakadai ndiye, ungazonasa kumutambudzikira imwimwi ngokugara kwenyu. Ngokuti veshe vanodzitsvakira zvavo, haiwa izvo zvaJesu Kristu. Asi imwimwi munozia kugondeka kwake Thimothi, kuti kudai ngomwana unababa, ngokudaro iye wakashanda neni mukuhambisa vhangeri. Ndizvo ndinogonda kuti ndinozomutumira ngokukasira apo ndazoona zvooitika kwendiri; neni ndinogonda munaMambo kuti ndinozokasira kuuyayo. Asi ndapinimidza kuti zvinosisira kuti nditumire Ephafrodhitusi kwomuri, hama yangu, inoshanda pamwepo neni, nouri joni pamwepo neni, nhumwa yenyu, nounoshandira kutama kwangu; ngokuti waimushuwira imwimwi mweshe, naye wakatambudzika kakurutu ngokuti mwakazwa kuti wairwara. Ngegwinyiso wairwara ari pasinde pokufa. Asi Mwari wakamuitira nyasha, haiwa kwaari kwega asi nokwendiriwo, kuti ndisatambudzika padera pokutambudzika. Ndizvo ndinopinda kuda kumutumira kwomuri, ndizvo kuitira kuti mumuonezve mudakare, kuti neni ndisanyanya kutambudzika. Ndizvo muashirenyi munaMambo ngokudakara kweshe; muremeredze vakadaro, ngokuti wakaapasinde pokufa ngendaa yomushando waKristu, echipira kupona kwake mungozi, kuti apedzise izvo zvaisisira zvomushando wenyu kwendiri. Pakugumisira, hama dzangu, dakarai munaMambo. Kunyorazve kwomuri zviro izvo azvindinesi inini, asi kwomuri kungwaririka. Ngwarai imbwa, ngwarai vashandi vezvakashata, ngwarai ngaavo vanocheka nyama. Ngokuti tisu tiri vakachekwa, avo vanodira Mwari muMweya nokuganza munaKristu Jesu, tisikagondi munyama, kunyazwi inini pachangu ndinazvo zvendingagondawo munyama. Kudai aripo munhu unokarakadza kuti ungagonda nyama, inini ndingamupinda: ndakachekwa ngezuva rechisere, ndiri worudzi rwevanhu vaIsuraeri, ndiri wedzinza raBhenjamini, ndiri muHebheru wakabarwa ngevaHebheru; paMipango ndiri muFarisi; ngendaa yokutsamwirira ndakaita mutambudzi wechiara; ngendaa yokururama kweMipango ndakaita usina ndaa. Asi izvo zvaiya upfumi kwendiri, ndakazvierenga kuita zvisina shwiro ngendaa yaKristu. Eya ngegwinyiso, ndinoerenga zveshe kuti zviri zvisina shwiro ngendaa yokunaka kukurutu kwokumuzia Kristu Jesu, Mambo wangu. Ngendaa yake ndakatambudzika ngokurashikirwa ngezviro zveshe, neni ndinozvierenga kuti zviri marara, kuitira kuti ndiuyirwe ndiKristu, ndioneke mwaari ndisina kururama kuri kwangu, kunobva muMupango, asi ukwo kunouya kubudikidza ngokugonda munaKristu, kururama kunobva kunaMwari ngokugonda. Inini ndinoda kumuzia Kristu nesimba rokumuka kwake, nokukowana naye mukutambudzika kwake, ndechitodzaniswa naye mukufa kwake, kuti zvanyadini ndihanire mukumuka kubva kwevakafa. Andikwopi kuti ndatohanira ichi nokuti kuita waperera zvino; asi ndinoangirira kuenda mberi kuti chiite changu icho chaakandibatira Kristu Jesu. Hama, inini ndemene andidzierengi kuti ndabata kuita changu; asi chiro chimwe chendinoita, ndinoriarwa zviri sure nokunanambira zviri mberi, ndinogwinyisira kuenda kumagumisiro, koopuwa chipo chokudaidzwa kunobva mudenga kuri munaKristu Jesu. Ndizvo isusu teshe vakura ngatiwe nomupinimidzo wakadaro; nokudai muno mupinimidzo umweni nokuti ngowechiri chiro, neichozve Mwari unozochionisa kwomuri. Kwega ngatibatisise kuneizvo zvetakahanira kwezviri. Hama, itai vanondiedzerera, muringisise avo vanohamba kudai ngechionero chomunacho kwetiri. Ngokuti vazhinji vanohamba kudai ngemagaa omuchinjiko waKristu; ndakamuronzera ndivo kazhinji, nazvino ndinomuronzera ngokuchema. Magumo avo kuparadzwa, chimwari chavo indani dzavo, navo vanoganza ngezvinotsverudza zvavo; vanopinimidza ngezvomunyika. Asi nyika yedu iri mudenga, kubveyozve tinogarira kuuya kwoMuponesi, Mambo Jesu Kristu, uwo unozotsandudza muiri woupashi hwedu, kuti uite unotodzana nomuiri wouthende hwake, kubudikidza ngesimba iro rinomuitawo kuti akone kupfaisa zveshe pashi pake. Ndizvo, hama dzangu, avo vendinoda nevendinoshuwira, kudakara kwangu nedzungudza rangu, ngokudaro emai mwakagwinya munaMambo, vanodikanwa vangu. Ndinopota Yuodhia, ndinopota Sintikhe, kuti vaano mupinimidzo umwewo munaMambo. Eya ndinokumbirawo, iwewe mungani wangu wegwinyiso, detsera madzimai aya, ngokuti vakashanda pamwepo neni muvhangeri, pamwepo naKrementi nevamweni vangani vangu vendinoshanda navo, avo mazina avo ari mubhuku rokupona. Dakarai munaMambo ngenguva dzeshe; zve, ndinozoti, Dakarai. Kupfaa kwenyu ngakuziikanwe kuvanhu veshe. Mambo waapasinde. Musanyunyutira chiro, asi muzviro zveshe kubudikidza ngomukumbiro nokupota pamwepo nokubonga, mikumbiro yenyu ngaiziikanwe kunaMwari. Kunyarara kwaMwari, kunopinda kuzwisisa kweshe, kunozongwarira mwoyo yenyu nemipinimidzo yenyu munaKristu Jesu. Pakugumisira, hama, zveshe zviri zvegwinyiso, zveshe zvinoremeredzeka, zveshe zviro zvakarurama, zveshe zviri zvakachena, zveshe zvinodikanwa, zveshe zvine mbiri yakanaka, kudai kuripo kunaka, kudai kuripo kukudzwa, pinimidzai ngeizvi zviro. Rambai mwechiita zviro izvo zvemwakadzidza nokuashira nokuzwa nokuona mwendiri; naMwari wokunyarara unozogara nemwi. Inini ndinodakara kakurutu munaMambo kuti zvino pakupedzisira mwakamusirira kupinimidza ndini; ngegwinyiso mwaipinimidza ndini, asi mwakatama mukuwo wokuzvionisa. Haiwa kuti ndinoereketa ngendaa yokutama; ngokuti ndakadzidza kugutiswa kunyazwi ngohuri ugaro hwendinahwo. Ndinozia kuita murombo nokuita mupfumi. Kuzviro zveshe nepakati pazvo zveshe, ndakadzidza zvakafishika zveshe kugutiswa nokuita nzara, zveshe kupfuma nourombo. Ndingaita zveshe ndiye unondigwinyisa. Asi mwakaita zvakanaka kuti mwakatambudzika neni mukutambudzika kwangu. Imwimwi vaFiripi ngegwinyiso munozia kuti pakutanga kwevhangeri, apo pendakabva Masedhonia, apana chiara chakatambudzika neni ngendaa yokupa neyokuashira, asi imwimwi mwega. Ngokuti kunyazwi apo pendaiya muThesaronika, mwakatumira kamwe nokwechipiri kundidetsera mukutama kwangu. Haiwa kuti ndinotsvaka chipo, asi ndinotsvaka michero yomunozofumiswa ndiyo. Asi ndaanazvo zviro zveshe, ndafumiswa. Ndagutiswa, ndaashira kubva kunaEphafrodhitusi zvipo zvemwakatumira kubva kwomuri, zviri gwema rakanaka, mudiro unoashirika unodakadza kunaMwari. Asi Mwari wangu unozomugutisa ndizvo zveshe zvomunotama, kudai ngoupfumi hwake muuthende munaKristu Jesu. Kuna Mwari Baba wedu ngakugare uthende mhera nariini nariini. Ameni. Tambisai vakacheneswa veshe vari munaKristu Jesu. Hama dzineni dzinomutambisa. Veshe vakacheneswa vanomutambisa, kakurutu avo vemhuri yaSiza. Nyasha dzaMambo Jesu Kristu ngadzigare nomweya yenyu. Phauri, mupostori waKristu Jesu ngokuda kwaMwari, naThimothi hama yedu, ndinonyorera kwavari vakacheneswa nehama dzakagondeka munaKristu vari muKhorose. Nyasha kwomuri nokunyarara zvinobva kunaMwari Baba wedu ngazvigare nemwi. Tinobonga Mwari, Baba aMambo wedu Jesu Kristu, techimukumbirira nguva dzeshe, ngokuti takazwa ngokugonda kwenyu munaKristu Jesu norudo rwomunarwo kwavari veshe vakacheneswa, ngendaa yegonda iro rakagadzikirwa imwimwi mudenga. Mwakazwa ndiro karetu ngeizwi regwinyiso, vhangeri, iro rakaguma kwomuri, kudai ngezverinobara michero nokukura munyika yeshe, ndizvo raibara michero pakati penyu, kubvira kuiro zuva remwakazwa nokuzia nyasha dzaMwari mugwinyiso. Izvi ndizvo zvemwakadzidza kubva kunaEphafrasi mungani wedu unodikanwa wetinoshanda naye. Muranda wakagondeka waKristu ngendaa yenyu, uwo wakatiziisa ngorudo rwenyu muMweya. Ngeiyi ndaa nesuwo, kubvira pazuva iro retakazvizwa, atizi kurekera kupota nokumukumbirira, kuti muzadzwe ngokuzia kuda kwake ngoungwaru hweshe nokuzwisisa kweshe kwoMweya, kuti muhambe kudai ngezvinosisira kunaMambo, mwechinasa kumudakadza ndizvo zveshe, mwechibereka michero mumishando yeshe yakanaka, mwechikura mukuzia Mwari, mwechigwinyiswa ngokugwinya kweshe kunobva kusimba routhende hwake, kuti mukone kushingirira muzviro zveshe ngokusengerera kweshe nokudakara, mwechibonga kunaBaba, uwo wakamuita vanosisira kukoanisirwa nhaka yevakacheneswa mukujeka. Uwo wakatinunura kubva kusimba rechidima, wakatiisa muumambo hwoMukororo wake unodikanwa, mwaari tinakwo kuripirwa, kukungurirwa kwezvishaishi zvedu. Ndiye muedzaniso waMwari usikaoneki, dangwe rezvakasikwa zveshe; ngokuti mwaari zviro zveshe zvakasikwa, zviri mudenga nezviri munyika, zviro zvinooneka nezvisikaoneki, kunyazwi madendemaro nokuti umambo nokuti vatongi nokuti vane simba; zviro zveshe zvakasikwa kubudikidza ndiye, nazvo zvakasikirwa iye. Ndiye unotangira zviro zveshe, nemwaari zviro zveshe zvakabatana pamwepo. Ndiye soro romuiri, chiara; ndiye maambo, dangwe rokumuka kubva kwevakafa, kuti iye aite mukuru muzviro zveshe. Ngokuti mwaari kuzara kweshe kwaMwari kwakadakara kugaramwo, nokubudikidza ndiye Mwari wakadakara kudziiyanisira zviro zveshe kwaari, kunyazwi zviro zviri munyika nokuti zviro zviri mudenga, aita runyararo kubudikidza ngengazi yepamuchinjiko wake. Nemwiwo karetu mwaiya vapara nemagaa mukupinimidza kwenyu, mwechiita mishando yakashata, zvino wakaiyanisa munyama yomuiri wake kubudikidza ngokufa, kuti amuise muri vakacheneswa nevasina ndaa, musikashooreki pamberi pake, kudai mwechiangira kugara mwakadzimikwa nokugwinyiswa mukugonda, musikatsukunuswi kubva mugonda remwakagondiswa ngevhangeri remwakazwa, iro rakachumairwa kunezvisikwa zveshe pashi pomudenga. Inini, Phauri, ndakaitwa mushandiri waro vhangeri iri. Zvino ndinodakara mukutambudzika kwangu ngendaa yenyu, ndechizadzisa munyama yangu icho chakasarira chemadambudziko aKristu ngendaa yomuiri wake, kuronza, chiara. Inini ndakaitwa mushandiri kudai ngoungwariri hwakapuwa kwendiri ndiMwari ngendaa yenyu, kuzadzisa izwi raMwari kuti rinase kuziikanwa, mushamiso waiya wakafishwa kubvira pakutanga kumibarirwana yeshe, asi zvino waoniswa kunevakacheneswa vake. Kwavari Mwari wakatsanangura kuti avaziise icho chiri upfumi hwouthende hwechakafishika pakati pevemadzinza, ndiye Kristu mukati mwenyu, gonda routhende. Ndiye uwo wetinochumaira, techipanga munhu weshe nokudzidzisa munhu weshe muungwaru hweshe, kuti tiunze munhu weshe akaperera munaKristu. Ngokuti ndizvo izvi zvendinoshandawo, ndechitambudzika ngesimba rake iro raakafemera mukati mwangu ngesimba. Ngokuti ndinoda kuti muzie kuti kukura kwakaitawani kwokutambudzika kwendinakwo ngendaa yenyu, nendaa yaavo vari muRaodhisia, naavo veshe vasati vatongoona hope yangu ngokwenyama, kuti mwoyo yavo igwinyiswe nokubatana pamwepo murudo, kuti vawe noupfumi hweshe hwokuzwisisa hwakakwana nokuwa noruziyo rwechakafishika chaMwari, zvinoronza Kristu emene, mwaari kwakafishwa upfumi hweshe hwoungwaru nehworuziyo. Ndinoronza izvi kuti kusazoapo naumwe unozomuchengedzera ngemazwi ourimbwi. Ngokuti kunyazwi ndisipo ngomuiri, asi ndinemwi mumweya, ndechidakara, ndechiringira kuzwanana kwenyu nokugwinya kwokugonda kwenyu munaKristu. Ndizvo kudai ngezvemwakaashira Kristu Jesu Mambo, angirai kupona mukati mwake, munenzinde dzakadzimikwa nokuakwa mukati mwake, mwechigwinyiswa mukugonda, kudai ngezvemwakadzidziswa, mwechizadzwa ngokubonga. Ngwarai kuti asazoapo naumwe unomushaishira ngoungwaru hwevanhu nokuchengedzera ngezvisina shwiro, kuteera mishuma yevanhu, kudai ngokudzidzisa kwomweya yomunyika, haiwa kwaKristu. Ngokuti mwaari munekuperera kweshe kwoUmwari kunogara mumuiri, mwaari imwimwiwo muri vakaperera, uwo uri soro padera pevatongi veshe nepadera pevane simba. Mwaariwo imwimwi mwakachekwa ngokuchekwa kusikaitwi ngenyara, ngokubviswa kwomuiri wenyama, mukuchekwa ukwo kuri kwaKristu; apo pemwakaikwa pamwepo naye murubhabhatidzo, rwemwakamuswazve pamwepo naye kubudikidza ngokugonda musimba raMwari uwo wakamumusa kubva kwevakafa. Naapo pemwaiya vakafa mukupauka kwenyu nokusikachekwa kwenyama yenyu, Mwari wakamuita kuti mupone pamwepo naye, apo paakatikungurira kupauka kwedu kweshe, atsukutidza chisungo chakanyorwa cheMipango, icho chakatiitira ndaa nemitemo yacho chinopesana nesu; naye wakachibvisa munjira, akachikohomera pamuchinjiko. Wakadusapo vatongi nevane simba, akavabudisa pamhene, echivanyisa ndiwo. Ndizvo musatendera munhu kuti amutonge ngendaa yezvokudya nokuti zvokumwa nokuti ngendaa yemishongano yokudya nokuti yokutawa kwomwedzi nokuti yemaSabatha. Izvo zviri bvuri rezvinouya, asi muiri ngowaKristu. Musatendera naumwe kuti amukorerese kuashira chipo chenyu ngokudzipfaisa ngamaune nokudira ngirosi, echibatisisa kuneizvo zvaakaona, echidzikudza kusina shwiro ngomupinimidzo wenyama, asikanasi kubatirira kuSoro, kweriri muiri weshe unonasa kugutswa nokugwinyiswa ngenhengo nemidzira, unokura ngokukuriswa ndiMwari. Kudai mwakafa pamwepo naKristu kubva kuzvidzidziso zvokutanga zvenyika, munodzipfaisa ngenyi kungwarira zviemeso, kudai ngevachapona ngezvomunyika? Izvo zvinoti, “Musabata, musaraira, musagwama.” Mitemo iyi yeshe inoereketa ngezviro zvinopera ngokushandiswa; ndiyo mipango nezvidzidziso zvevanhu zvega. Zviro zvakadai ngegwinyiso zvinooneka zvakadai ngezvinoungwaru mukudira kwokuda nokudzipfaisa nokurekeredza muiri; asi azvina simba rokunyisa kuda kwenyama. Ndizvo kudai mwakamuswa pamwepo naKristu, tsvakai zviro zviri padera, apo pana Kristu, akagara ngokumudyo kwaMwari. Emesai mipinimidzo yenyu kunezviro zviri padera, haiwa kuzviro zviri munyika, ngokuti imwimwi mwakafa, nokurarama kwenyu kwakafishwa pamwepo naKristu munaMwari. Naapo Kristu uwo uri kurarama kwenyu ooneswa, munozoonekawo pamwepo naye muuthende. Ndizvo urayai zviemuriro zvenyu zvenyika: kuomba, kusikasukika, kuemura kwomuiri, kudisisa zvakashata nokuemura pfuma, ukwo kuri kudira miedzaniso. Ngendaa yeizvi zviro ushungu hwaMwari hunouya padera peavo vokusikapurutana. Kwezviri imwimwiwo mwakahamba mukati mwazvo karetu, apo muchagara mukati mwazvo. Asi zvino imwimwiwo rashai zviro zveshe izvi: kutseneka, ushungu, kunyenya, kutuka nokuereketa zvinotsverudza ngemiromo yenyu. Musanyeperana, kwechioneka kuti mwakarasha munhu wekaretu nezviito zvake, nemwi mwakadzipfekedza munhu mutsva, uwo unomusirirwa muruziyo kuti aedzane nomuedzaniso wouwo wakamusika. Apachina muGiriki nokuti muJudha, wakachekwa nokuti usikazi kuchekwa, wenyika mukanza, muSkuthia, hloko nowakasunhurika. Asi Kristu ndiye zveshe nomukati mwazvo zveshe. Ndizvo, kudai ngevakatsanangurwa vaMwari, vakacheneswa nevanodikanwa, pfekai pachenyu mwoyo wokuzwira urombo, nyasha, kunaaniswa, kupfaa nokusengerera, mwechisengerera umwe noumweni, mwechirekererana, kuti aripo munhu unendaa kunoumweni; kudai ngezvaakamurekerera Mambo, ndizvo nemwiwo munosisira kurekererana. Kupinda izvi zveshe, dzipfekedzei ngorudo, runosungira zviro zveshe pamwepo mukunyarara kwakaperera. Tenderai kuti kunyarara kwaKristu kutonge mumwoyo yenyu; ndikwo kwemwakadaidzirwa mumuiri umwe. Mwechibonga. Izwi raKristu ngarigare mukati mwenyu ngokuwandisa, mwechidzidzisana nokupangana umwe noumweni muungwaru hweshe; mwechibonga mumwoyo yenyu embai nduyo, ngoma nengoma dzoMweya kunaMwari. Kunyazwi chiinyi chomunoita, ngeizwi nokuti ngomushando, itai zviro zveshe ngezina raMambo Jesu, mwechibonga kunaMwari Baba kubudikidza ndiye. Vakadzi, pfairai vamuna venyu, kudai ngezvinosisira vari muna Mambo. Vamuna, idai vakadzi venyu, musaita ushungu kwavari. Vana, purutanai vabari venyu ngezviro zveshe, ngokuti ichi chiri mushando wenyu unodakadza Mambo. Madzibaba, musatsenesa vana venyu, kuti mwoyo yavo isazopera simba. Hloko, purutanai madzimambo enyu omunyika ngezviro zveshe, haiwa ngokurindwa, kudai ngevanodakadzisa vanhu, asi ngomwoyo weshe, mwechitya Mambo. Kunyazwi chiinyi chomunoita, shandai ngomwoyo, kudai ngevanoshandira Mambo, haiwa vanhu, mwechizia kuti munozoashira musharo wenhaka kubva kunaMambo. Munoshandira Mambo Kristu. Ngokuti iye unoita zvakashata unozoashira zvakashata zvaakaita; akuna mutsananguro. Madzimambo, itirai hloko dzenyu izvo zvakanaka nezvinoedzana, mwechizia kuti imwimwiwo munaMambo mudenga. Angirai mukukumbira, mwechirinda murimwo ngokubonga. Panguva imweyo mwechitikumbirirawo kuti Mwari atibeurire musiwo weizwi, kuti tierekete chakafishika chaKristu, chendiri muzvisungo ngendaa yacho, kuti ndinase kuchionisa pamhene kudai ngezvinosisira kuti ndierekete. Hambai muungwaru kwavari vari kubanze, mwechitenga mukuwo. Kuereketa kwenyu ngakuwe nenyasha nguva dzeshe, kwechirungwa ngomunyu, kuti muzie njira inosisira kupingurana ndiyo umwe kuno umweni. Thichikusi unozomuronzera mashoko eshe ngendaa yangu; uwo uri hama unodikanwa, mushandi unogondeka, mungani wedu unoshanda pamwepo neni munaMambo. Ndamutumira kwomuri ngeiyi ndaa, kuti muzie ngokugara kwedu nokugwinyisa mwoyo yenyu. Unouyayo naOnesimusi, hama inogondeka neinodikanwa, uwo uri umwe wenyu. Vanozomuronzera zveshe zvinoitwa uno. Aristakhusi mungani wangu muubhanditi unomutambisa, naMarako muzukuru waBhanabhasi (uwo wemwakaashira kupangwa ngendaa yake; kudai echiguma kwomuriyo mumuashire.) NaJesu unozwi Justusi unomutambisa. Avo ndivo vanhu vega vakachekwa pakati pevangani vangu vendinoshanda navo muumambo hwaMwari, navo vakandiembedzera. Ephafrasi, umwe wenyu, muranda waKristu Jesu, unomutambisa. Nguva dzeshe unomutambudzikira mukukumbira kwake ngendaa yenyu, kuti mueme mwakaperera mwechizia ngegwinyiso icho chiri kuda kwaMwari. Ngokuti ndinoita chapupu ndiye kuti unomushandira kakurutu naavozve vari muRaodhisia nevari muHieraporisi. Ruka, dhokodheya unodikanwa naDhemasi vanomutambisa. Tambisai hama dziri muRaodhisia, naNyumufa nechiara chiri mumhatso yake. Naapo iyi tsamba yadzidzwa pakati penyu, itaizve kuti idzidzwe muchiara chevaRaodhisia; kuti nemwiwo mudzidze tsamba inobva Raodhisia. Mwechironzera Akhipusi kuti, “Ngwara kuti upedzise mushando wowakaashira kubva kunaMambo.” Inini, Phauri, ndanyora kutambisa uku ngenyara yangu yemene. Karakadzai maketani angu. Nyasha ngadzigare nemwi. Phauri, Sirivhanusi naThimothi, ndinonyorera kuchiara chevaThesaronika chiri munaMwari Baba nomunaMambo Jesu Kristu. Nyasha nokunyarara ngazvigare nemwi. Tinobonga Mwari nguva dzeshe ndimwi mweshe, techimukarakadza mumikumbiro yedu. Tinogara techimukarakadza pamberi paMwari naBaba edu ngomushando wenyu wokugonda nokushandira kwenyu murudo nokusengerera kwokugonda munaMambo wedu Jesu Kristu. Ngokuti tinozia, hama munodiwa ndiMwari, kuti wakamutsanangura, ngokuti vhangeri redu arizi kuuya kwomuri ngeizwi rega, asi ngesimbawo nomuMweya Wakachena nokugwinyiswa kukurutu; kudai ngezvomunozia kuti taiya tiri vanhu vakadini pakati penyu ngendaa yenyu. Nemwi mwakaita vaedzereri vedu nevaMambozve, mwechiashira izwi mukutambudzika kukurutu, ngokudakara kwoMweya Wakachena; ngokudaro mwakaita chionero kwavari veshe vanotenda muMasedhonia nomuAkhaiya. Ngokuti kubvira kwomuri izwi raMambo rakazwika haiwa muMasedhonia nomuAkhaiya mwega, asi kundau dzeshe kugonda kwenyu munaMwari kwakaziikanwa, akuchasisiri kuti isusu tierekete chiro. Ngokuti avo vemene vanoshuma tisu ngenjira yemwakatiashira ndiyo pakati penyu, nenjira yemwakatenderuka ndiyo kuna Mwari kubva kumiedzaniso yokudira, kuti mushandire Mwari unopona wegwinyiso, nokugarira Mukororo wake unobva mudenga, waakamusa kubva kwavakafa, ndiJesu uwo unotinunura kubva muushungu hunouya. Ngokuti imwimwi mwemene munozia, hama, kuti kuuya kwedu kwomuri akuzi kuita kusina shwiro, asi kunyazwi takatambudzika pakutanga nokuitirwa zvinotsverudza muFiripi, kudai ngezvomunozia, takatsunga munaMwari wedu kuereketa kwomuri vhangeri raMwari ngokutambudzika kukurutu. Ngokuti kupota kwedu akuzi kubva mukupauka akadi nokuti mukusikasukika nokuti mukuchengedzera, asi kudai ngezvetakatendwa ndiMwari kuti tigondwe ngevhangeri, ndizvo tinoereketa, haiwa kudakadza vanhu, asi Mwari uwo unoedza mwoyo yedu. Ngokuti munonasa kuzia, naMwari ndiye chapupu chedu, atizi kuoneka kunyazwi ngouri mukuwo techironza mazwi ourimbwi, kudai ngezvomunozia, nokuti zano rokuemura pfuma; tisikatsvaki kuirikidzwa ngevanhu, nokuti kunobva kwomuri nokuti kunobva kunevamweni, kunyazwi taikona kuita mutwaro kwomuri, kudai ngevapostori vaKristu. Asi taiya takapfaa pakati penyu, kudai ngezvaanoita mureri apo echirera vana vake. Ndizvo techimudisisa taida kukoverana nemwi haiwa vhangeri raMwari rega, asi nokupona kwedu kwemene, ngokuti imwimwi mwakaita vanopinda kudikanwa kakurutu kwetiri. Ngokuti munokarakadza kushanda kwedu nokurwadziwa hama; takashanda usiku nemasikati, kuti tisazoita mutwaro kunoumwe wenyu, apo petakachumaira kwomuri vhangeri raMwari. Imwimwi muri zvapupu, naMwariwo, ngokucheneswa nokurungama nokusikaitirwa ndaa kwakaitawani kwetakaita kwomuri imwimwi vatendi; kudai ngezvomunozia njira yetakaita kunoumwe ngaumwe wenyu, kudai ndibaba vanoitira kunevana vavo, techimupanga nokumugwinyisa nokupupura, kuti muhambe kudai ngezvinosisira kuna Mwari, uwo unomudaidza kuumambo hwake hwemene nouthende. Isusuwo tinoangira kubonga Mwari ngeizvi, kuti apo pemwakaashira izwi raMwari iro remwakazwa kubva kwetiri, mwakariashira haiwa kudai ngeizwi revanhu, asi kudai ngezveriri gwinyiso, izwi raMwari, iro rinoshandawo mukati mwenyu imwimwi vatendi. Ngokuti imwimwi, hama, mwakaita vaedzereri vezviara zvaMwari munaKristu Jesu izvo zviri muJudhiya, ngokuti mwakatambudzwawo ngezviro zvakatodzana ngevanhu venyika yenyu kudai ngezvevakatambudzwa avo ngevaJudha, avo vakauraya veshe Mambo Jesu nevaprofeti, vakatidzinga, vasikadakadzi Mwari, vari vanorwisana nevanhu veshe, vechitirambidza kuereketa kunevemadzinza kuti vaponeswe. Ndizvo vakaangira vechizadzisa chipimo chokushaisha kwavo ngenguva dzeshe. Asi ushungu hwaMwari hwakauya padera pavo pakugumisira. Asi kudai tisu, hama, petakaparadzaniswa nemwi kwenguva doko, mukuonana kwomuiri, haiwa kwomwoyo, takatsamwirira kuona hope yenyu ngokumushuwira kakurutu. Ngokuti taida kuuya kwomuri, inini, Phauri, kamwe nokwechipiri, naSathani wakatipinga. Ngokuti chiinyi gonda redu nokuti kudakara kwedu nokuti dzungudza retinoganza ndiro pamberi paMambo wedu Jesu pakuuya kwake? Andimwipi here? Ngokuti imwimwi muri uthende hwedu nokudakara kwedu! Ndizvo apo takakorera kushingirira, takapinimidza kuti kwakanaka kuti tisiiwe sure tega muAtenesi; nesu takatuma Thimothi, hama yedu nomushandi waMwari muvhangeri raKristu, kuti amugwinyise nokumuembedzera mukutenda kwenyu, kuti asazoapo munhu unokutukuswa ngemadambudziko aya. Ngegwinyiso imwimwi mwemene munozia kuti izvi ndizvo zvetakaemeserwa. Ngokuti ngegwinyiso, apo petaiya nemwi, takambomuronzera kuti tinozorwadziwa ngokutambudzwa; kudai ngezvakaitika, kudai ngezvomunozia. Ngeiyi ndaa ininiwo apo ndakakorera kushingirira, ndakatumira kuti ndizie ngendaa yokutenda kwenyu, ndechitya kuti pamweni muedzi waiya amuedza nomushando wedu waizoita usina shwiro. Asi zvino Thimothi apetuka kwetiri kubva kwomuri, wakatiunzira mashoko anodakadza okutenda kwenyu norudo rwenyu. Wakatironzerawo kuti munonasa kupinimidza tisu ngenguva dzeshe, mwechishuwira kutiona, kudai tisuwo tinoshuwira kumuona. Ngeiyi ndaa, hama, takagwinyiswa ndimwi mukutama kwedu kweshe nokutambudzika kubudikidza ngokugonda kwenyu. Ngokuti zvino tinopona, kudai imwimwi mwechiangira kuema mwakagwinya munaMambo. Ngokuti tingaita mabongerenyi kuna Mwari ndimwi, ngendaa yokudakara kweshe kwetinodakara ndikwo ngendaa yenyu pamberi paMwari wedu? Tinokumbira kakurutu usiku nemasikati kuti tione hope dzenyu nokuzadzisa kunyazwi ngechiri chinotamika mukugonda kwenyu. Zvino Mwari wedu naBaba emene naMambo wedu Jesu ngaatungamirire njira yedu kwomuri. NaMambo ngaaite kuti muwande nokuwanza rudo pakati penyu umwe kunoumweni nokunevanhu veshe, kudai ngezvetinoitawo isusu kwomuri, kuti iye agwinyise mwoyo yenyu mukucheneswa kuti muite vasina ndaa pamberi paMwari wedu naBaba, pakuuya kwaMambo wedu Jesu pamwepo nevakacheneswa vake veshe. Ndizvo pakugumisira, hama, tinomukumbira nokumupota munaMambo Jesu kuti, kudai ngezvemwakaashira kwetiri njira inosisira yokuhamba ndiyo nokumudakadza Mwari, kudai ngezvomunohamba, kuti muwanze kudaro. Ngokuti munozia kupanga kwetakamupanga kubudikidza ndiMambo Jesu. Ngokuti uku ndikwo kuda kwaMwari, kucheneswa kwenyu; kuti murekere kuomba; kuti umwe ngaumwe wenyu azie njira yokudzitorera mukadzi pachake mukucheneswa nomukuremeredza, haiwa ngokuemura kwakashata, kudai ngevemadzinza vasikamuzii Mwari; kuti kusaapo naumwe unopauka nokushaishira hama yake ngeiyi ndaa, ngokuti Mambo ndiye muunzidziri weizvi zveshe, kudai ngezvetakambomuronzera nokupupura kudaro. Ngokuti Mwari aazi kutidaidzira kunezvisikazi kusukika, asi mune zvakacheneswa. Ndizvo kunyazwi ndiani unoramba izvi, aarambi munhu akadi, asi unoramba Mwari, uwo unopa kwomuri Mweya wake Wakachena. Asi ngendaa yorudo pakati pehama amutami kuti munhu amunyorere, ngokuti imwimwi mwemene mwakadzidziswa ndiMwari kuti mudane umwe kunoumweni; ngegwinyiso munodzida hama dzeshe dziri muMasedonia mweshe. Asi tinomupanga, hama, kuti muwanze nokuwanzisisa, kuti muedze kugara ngokunyarara nokubatika ngemishando yenyu yega nokushanda ngenyara dzenyu, kudai ngezvetakamupanga, kuti muhambe ngenjira inosisira pamberi pevari kubanze, musina chomunotama. Asi atidi kuti muite vasikazii, hama, ngendaa yaavo vakaata, kuti musazotambudzika kudai ngavamweni vasina gonda. Ngokuti kudai techitenda kuti Jesu wakafa nokumukazve, zvakanyadaro kubudikidza ndiJesu, Mwari unozovaunza pamwepo naye avo vakaata. Ngokuti tinoronza izvi kwomuri ngeizwi raMambo, kuti isusu tichapona, tasara metsa kuuya kwaMambo, atitongozotangiri avo vakaata. Ngokuti Mambo pachake unozodzaka kubva mudenga ngokudaidzira ngeizwi rengirosi huru nokuridzwa kwegwama raMwari, nevakafa vari munaKristu vanozotanga kumuka. Zvino isusu tichapona tasara, tinozotorwa pamwepo navo mumakore kooshongana naMambo mudenga. Ngokudaro tinozogara naMambo mhera nariini. Ndizvo embedzeranai ngamazwi aya. Asi ngendaa yenguva nemikuwo, hama, amutami kunyorerwa ndizvo, ngokuti imwimwi mwemene munonasa kuzia kuti zuva raMambo rinoguma kudai ngembavha inoguma usiku. Naapo vanozoti, “Kuripo kunyarara nokungwaririka,” zvino ngokukasira kuparadzwa kuchauya padera pavo, kudai ngokurwadziwa kunouya padera pomudzimai wosununguka, apana unozopokonyoka! Asi imwimwi, hama, amuri muchidimapi, kuti iro zuva rimugumire kudai ngembavha; ngokuti imwimwi mweshe muri vana vokujeka nevemasikati; atisiri vousiku akadi nokuti vechidima. Ndizvo zvino tisaata, kudai ngezvevanoita vamweni, asi ngatirambe techirinda, tingware; ngokuti avo vanoata, vanoata usiku, naavo vanoradza, vanoradza usiku. Asi isusu tiri vemasikati ngatingware, takapfeka chihlangu chepaditi chokugonda norudo, nechiqoko kuita gonda roruponeso. Ngokuti Mwari aazi kutiemesera ushungu, asi kuti tione kuponeswa kubudikidza ndiye Mambo wedu Jesu Kristu, uwo wakatifira kuti kunyazwi tichazwa nokuti taata, tipone pamwepo naye. Ndizvo embedzeranai umwe kunoumweni, muakane umwe kunoumweni, kudai ngezvomunoita. Asi tinomupota, hama, kuti muremeredze avo vanoshanda pakati penyu, vanomutungamirira munaMambo, vanomupanga; muvaremeredze kakurutu murudo ngendaa yomushando wavo. Itai vanokunyarara pakati penyu. Tinomupota, hama, pangai avo vane nungo, gwinyisai avo vane mwoyo inodemera, detserai avo vakarembedzeka, sengererai kwavari veshe. Ngwarai kuti pasazoapo naumwe unounzidzira zvakashata kumunhu ngendaa yezvakashata, asi ngenguva dzeshe tsvakai kuita zvakanaka, umwe kwoumweni nokwavari veshe. Dakarai nguva dzeshe, kumbirai ngokusikareki, bongai pazviro zveshe; ngokuti ichi chiri kuda kwaMwari muna Kristu Jesu ndimwi. Musadzima Mweya. Musashoora mazwi akaprofetwa, asi edzai zviro zveshe; batisisai izvo zvakanaka; taraukirai miemo yezveshe zvakashata. Mwari wokunyarara emene ngaamuchenese kakurutu; mweya wenyu nomwoyo nomuiri ngazvingwarirwe kakurutu, zvisina ndaa pakuuya kwaMambo wedu Jesu Kristu. Uwo unomudaidza unogondeka, naye unozozviita. Hama, tikumbirirei. Chingamidzai veshe vatendi ngomuromo ngokucheneswa. Ndinomupanga kakurutu ndiMambo kuti iyi tsamba idzidzwe kuhama dzeshe. Nyasha dzaMambo wedu Jesu Kristu ngadzigare nemwi. Phauri, Sirivhanusi naThimothi, ndinonyorera kuchiara chevaThesaronika chiri munaMwari Baba edu naMambo Jesu Kristu. Nyasha ngadzigare nemwi nokunyarara zvinobva kunaMwari Baba edu naMambo Jesu Kristu. Tinosisira kubonga Mwari nguva dzeshe ndimwi, hama, kudai ngezvinosisira, ngokuti kugonda kwenyu kunokura kakurutu, norudo rwenyu umwe kunoumweni runowanzwa. Ndizvo isusu temene tinoganza ndimwi pakati pezviara zvaMwari ngendaa yokusengerera kwenyu nokugonda kwenyu mukutambudzika kweshe nomumadambudziko omunoshingirira. Izvi zvinoonisa kururama kwokutonga kwaMwari, kuti muerengwe muri vanosisira umambo hwaMwari, uhwo hwomunotambudzikirawo. Ngokuti ngegwinyiso chiri chiro chakarurama kunaMwari kuti aunzidzire kutambudzika kwavari vanomutambudza, nokupa kuzorora kwomuri vanotambudzika pamwepo nesu, apo Mambo Jesu paanooniswa echibva mudenga pamwepo nengirosi dzake dzine simba, mumurazvu womuriro unobaka, echiunzidzira kwavari vasikamuzii Mwari nokwavari vasikapurutani vhangeri raMambo wedu Jesu. Avo vanozoororwa ngokuparadzwa kusikaperi, vanozopaurwa kubva kuhope yaMambo nokubva kuuthende hwesimba rake, apo paanouya kooirikidzwa ngevakacheneswa vake nokushamiswa pakati pavo veshe vanotenda, ngeiro zuva, ngokuti uchapupu hwedu kwomuri hwakatendwa. Ngeiyi ndaa isusu tinomukumbirira nguva dzeshe, techikumbira kuti Mwari wedu amuite vanosisira mukudaidza kwake nokuzadza ngesimba rake rokudisisa kweshe kuita zvakanaka nomushando wokugonda, kuti zina raMambo wedu Jesu riirikidzwe mwomuri, nemwi muirikidzwe mwaari, kudai ngezvakaita nyasha dzaMwari wedu naMambo Jesu Kristu. Zvino tinomupota, hama, ngendaa yokuuya kwaMambo wedu Jesu Kristu nokuunganidzwa kwedu kwaari, kuti musazokasira kuzungunyiswa mumipinimidzo nokuti kushamiswa, kunyazwi ngomweya nokuti ngeizwi nokuti ngetsamba, yakadai ngeinobva kwetiri, yechiti zuva raMambo raguma. Musazochengedzerwa ngomunhu kunyazwi ngeiri njira; ngokuti zuva iro arizogumi kusati kwaapo kupauka kutanga, nomunhu wokushaisha asati aoniswa, mukororo wokurashwa, uwo unorwisa nokudzitunhumadza padera pazvo zveshe zvinozwi zvimwari nepadera pezvinodirwa, ndizvo unogara pachigaro chake mutemperi raMwari, echidziita Mwari. Amuchakarakadzi here kuti apo ndichipo nemwi ndakamuronzera izvi zviro? Nazvino munozia icho chinomurambidza, kuti uwo aoniswe ngomukuwo wake waguma. Ngokuti chakafishika chisikazi kururama choshanda; asi zvichaitika metsa uwo unorambidza zvino abviswa. Apapo wakashata unozooniswa, uwo unozoparadzwa ndiMambo Jesu ngomweya womuromo wake, nokumuparadza ngokuoneka kwokuuya kwake. Kuuya kwouwo usikazi kururama kwakadai ngokushanda kwaSathani, unoshandisa simba reshe, zvioniso, mishamiso yemanyepo, ngembeu yeshe yokuchengedzera kweshe kwokusikarurama kwavari vanorashika, ngokuti vanoramba kuda gwinyiso kuti vaponeswe. Ngeiyi ndaa Mwari unovatumira simba guru rokuvapausa, kuti vatende manyepo, kuti veshe vasikatendi gwinyiso, asi vechidakadzwa ngokusikarurama vatongwe. Asi kunodikanwa kuti tibonge Mwari nguva dzeshe ngendaa yenyu, hama dzinodikanwa munaMambo, ngokuti Mwari wakamutsanangura kuita michero yokutanga yoruponeso kubudikidza ngokucheneswa kwoMweya nokubudikidza ngokutenda gwinyiso. Ngokuti izvi ndizvo zvaakamudaidzira kubudikidza ngevhangeri redu, kuti muashire uthende hwaMambo wedu Jesu Kristu. Ndizvo zvino, hama, emai mwakagwinya, mubate mipango yemwakadzidziswa tisu, kunyazwi ngeizwi nokuti ngetsamba yedu. Zvino Mambo wedu Jesu Kristu emene naMwari Baba edu, uwo wakatida nokubudikidza ngenyasha wakatipa kuembedzerwa kusikaperi negonda rakanaka, ngaaembedzere mwoyo yenyu nokuigwinyisa kumishando yeshe nokumazwi eshe akanaka. Pakugumisira, hama, tikumbirirei kuti izwi raMambo rihambiswe nokukudzwa, kudai ngezverinoita pakati penyu, zve, kuti tinunurwe kubva kuvanhu vasikazi kururama nevakashata; ngokuti andivopi veshe vanokugonda. Asi Mambo unogondeka; unozomugwinyisa nokumungwarira kubva kuno uwo wakashata. Nesu tine gonda munaMambo ndimwi, kuti munoita munozoitazve zviro zvetinomupanga. Mambo ngaatungamirire mwoyo yenyu kurudo rwaMwari nomukusengerera kwaKristu. Zvino tinomupanga, hama, muzina raMambo wedu Jesu Kristu, kuti mupauke kubva kunehama yeshe inenungo, isikahambi kudai ngemipango yevakaashira kubva kwetiri. Ngokuti imwimwi mwemene munozia njira yokutiedzerera ndiyo isusu; ngokuti atizi kuita nungo pakati penyu, atizi kudya chingwa chomunhu nokuti ngouri tisikazi kuchitenga, asi takashanda techitambudzika usiku nemasikati kuti tisazoita mutwaro kunoumwe wenyu; haiwa ngokuti taiya tisina simba, asi kuti tidziite chionero kwomuri, kuti imwimwi mutiedzerere. Ngokuti apo kunyazwi tichinemwi takamupanga kuti, “Kudai aripo munhu usikadi kushanda, asazodya.” Ngokuti tinozwa kuti vamweni vanoita nungo pakati penyu, vasikashandi, asi vanokangaidza vanhu. Zvino avo vakadaro tinovapanga nokuvapota munaMambo Jesu Kristu kuti vashande mishando yavo ngokunyarara, vadye chingwa chavo. Hama, musaremba kuita zvakanaka. Kudai aripo munhu usikapurutani izwi redu reiyi tsamba, muringisisei munhuwo, kuti musazwanana naye, kuti iye atsveruke. Musazomuerenga kuti igaa, asi mumupange kudai ngehama. Zvino Mambo wokunyarara emene ngaamupe kunyarara nguva dzeshe nenjira dzeshe. Mambo ngaagare nemwi mweshe. Inini Phauri ndanyora kutambisa uku ngenyara yangu yemene. Ichi chioniso chiri mutsamba yangu yeshe; ndiyo njira yendinonyora ndiyo. Nyasha dzaMambo wedu Jesu Kristu ngadzigare nemwi mweshe. Phauri, mupostori waKristu Jesu ngokupanga kwaMwari Muponesi wedu naKristu Jesu gonda redu, ndinonyorera kunaThimothi, mwana wangu wegwinyiso mukugonda. Nyasha nokukungurirwa nokunyarara zvinobva kunaMwari Baba naKristu Jesu Mambo wedu ngazvigare newe. Kudai ngezvendakakupota apo ndaienda Masedhonia, kuti ugare muEfesu, upange vamweni kuti vasadzidzisa kudzidzisa kumweni nokuti kupurutanazve kungano nokuerengudza kusikaperi kwemazina emadzibaba ekaretu, izvo zvinoamba hasha, zvisikadzidzisi zvakarongwa ndiMwari zvinoziikanwa ngokugonda. Asi zvinodiwa ngomupango rudo runobva mumwoyo wakacheneswa, runobva mumhumba isina ndaa nokugonda kwegwinyiso. Vanhu vamweni vechipauka vakakunukuka kuenda mukuereketa kusina shwiro, vechidisisa kuita vadzidzisi veMipango, vasikazwisisi zvevanoronza nokuti zvevanonasa kugwinyisisa. Asi tinozia kuti Mipango yakanaka, kudai munhu echizoishandisa ngenjira kwayo. Izvi zvinoronza kuzwisisa, kuti Mipango aizi kuitirwa munhu wakarurama asi yakaitirwa vasikapurutani Mipango nevasikapangwi nevasikadi Mwari nevashaishi, inoitirwa vasikazi kucheneswa nevatuki, vanouraya madzibaba nevanouraya madzimai, vanouraya vanhu, vaombi, mhombwe nevanoba vanhu, vanyepi nevanopika manyepo, nokuti kudai chiripo chimweni chinopesana nezvidzidziso zvakarurama, kudai ngezvinoronzwa ngevhangeri routhende hwaMwari unomuchena, rendakapuwa ngokugondwa. Ndinobonga Kristu Jesu Mambo wedu, uwo wakandipa simba, ngokuti wakandierenga kuita wakagondeka, akandiemesa kumushando wake, kunyazwi karetu ndaiya mutuki, mutambudzi nomutinini. Asi zvakanyadaro ndakaitirwa nyasha, ngokuti ndakazviita ngokusikazia mukusikatenda, nenyasha dzaMambo wedu dzakawanzwa kakurutu pamwepo nokugonda norudo zviri munaKristu Jesu. Rinogondeka iri izwi rinosisira kuashirwa, kuti Kristu Jesu wakauya munyika kuponesa vashaishi, inini ndiri mukuru wavo. Asi ngeiyi ndaa ndakaitirwa nyasha, kuti Jesu Kristu aonise kusengerera kwake kweshe mwendiri, ndiri mukuru wevashaishi, kuita chionero kwavari vanomutenda, kuti vaone kupona kusikaperi. Kuna Mambo usikaperi, usikaori, usikaoneki, ndiye Mwari ega, ngaugare kwaari uthende nokuremeredzwa mhera nariini nariini. Ameni. Ndinopa kupanga uku kwouri, Thimothi mwana wangu, kudai ngezvakaprofetwa ngendaa yako karetu, kuti ngokuzvipurutana uambane kuambana kwakanaka, wechibatisisa kugonda nemhumba yakanaka. Vamweni vakakurasha, vakaputsikirwa ngengarava yokugonda kwavo; pakati pavo vakadaro paiya naHimenaeusi naArekizanda, vendakapa kunaSathani, kuti vadzidziswe kusikatuka Mwari. Ndizvo, pakutanga pazvo zveshe, ndinomukumbira kuti kupota nemikumbiro nokukumbirira nokubonga zviitirwe vanhu veshe, madzimambo naavo veshe vari pandau dzokuremeredzwa, kuti tipone mukuiyana nokunyarara mukudira Mwari nokuremeredza. Izvi zvakanaka nezvinoashirika mukuona kwaMwari Muponesi wedu, uwo unoda kuti munhu weshe aponeswe, azwisise gwinyiso. Ngokuti uripo Mwari umwe, nomuiyanisi umwe pakati paMwari nevanhu, munhu uwo ndiKristu Jesu, uwo wakadzipira pachake kuita muripo wavo veshe, kwakapupurwa ndikwo ngenguva kwayo. Ukwo kwendakaemeserwa kuita muchumairi nomupostori (ndinoronza gwinyiso, andinyepi), mudzidzisi wevemadzinza mukugonda nomugwinyiso. Ndizvo ndinoda kuti vamuna vakumbire kundau dzeshe, vechimirudza mudenga nyara dzakacheneswa pasina ushungu nehasha; ngokudarowo kuti vakadzi vadzinemese mukuremeredzeka ngezvokufuka zvakasisira, haiwa ngebvudzi rakarukwa nomukore nokuti maperere nokuti ngezvokusimira zvinodhura. Asi ngavadzinemese ngeizvo zvinosisira vakadzi vanoronza kuti vanodira Mwari, ngemishando yakanaka. Mukadzi ngaadzidze mukunyarara ngokudzipfaisa kweshe. Anditenderi mukadzi kuti adzidzise nokuti kutonga mwamuna; asi kuti anyarare. Ngokuti Adhamu wakatanga kusikwa, sure kwazvo Evha; naAdhamu aazi kuchengedzerwa, asi mukadzi wakachengedzerwa wakaita mupauki. Asi unozoponeswa kubudikidza ngokubara vana, kudai echiangirira mukugonda, murudo, mukucheneswa pamwepo nokuremeredzeka. Izwi iri igwinyiso, kuti kudai munhu echitsvaka mushando woutungamiriri ukuru muchiara, unoemurira mushando wakanaka. Ndizvo mutungamiriri unosisira kuita usina ndaa, mwamuna womukadzi umwe, echidzibata, wakangwara mumupinimidzo, unoremeredzeka, unoashira vapfumba, unozia kudzidzisa, haiwa chidhakwa, usikaambani, asi wakapfaa, usikaiti hasha, usikadisisi mare. Unonasa kutonga muzi wake, unevana vake vanopurutana ngokuremeredza kweshe; (ngokuti kudai munhu asikakoni kutonga muzi wake zvakanaka, ungazoita mangwaririrenyi chiara chaMwari?) Asaita mutendi mutsva, kuti asadzikudza nokuwa mukurashwa kwaDhiabhorosi. Zve, kunosisira kuti aite unopupurirwa zvakanaka ngeavo vari kubanze, kuti asazowa mukushoorwa nokubatwa pamurau waDhiabhorosi. Ngokudaro vashandi vanosisira kuti vaite vanoremeredzeka, vasina mazwi mairi, vasikanyanyi kumwa vhini, vasikakariri mare. Vanosisira kunasa kubata chakafishika chokugonda ngemhumba isina ndaa. Avo navo ngavatangwe kuedzwa; naapo vaonisa pachavo kuti apana chevanoitirwa ndaa, ngavaitwe vashandi. Vakadzi ngokudaro ngavaite vanoremeredzeka, vasikareyi, asi vanodzibata, vanogondeka ngezviro zveshe. Mushandi ngaaite mwamuna womukadzi umwe, echinasa kutonga zvakanaka vana vake nomuzi wake. Ngokuti avo vanoshanda zvakanaka kudai ngevashandi vanopuwa zina rakaremeredzeka nokutsunga kukurutu mukugonda kuri munaKristu Jesu. Ndinogonda kuuya kwouri ngokukasira, asi ndinonyora zviro izvi kwouri, kuti kudai ndikanonoswa, muzie kuhamba kunosisira kuitwa ngevanhu mumhatso yaMwari, iyo iri chiara chaMwari unopona, sika nechidziro chegwinyiso. Ngegwinyiso kufishika kwokudira kwedu kwakakura: Uwo wakaoniswa mumuiri, wakaruramiswa muMweya, wakaoneka ngengirosi, wakachumairwa pakati pevemadzinza, wakatendwa munyika, akaashirwa mudenga muuthende. Zvino Mweya unoronza pamhene kuti ngemikuwo yokugumisira vamweni vanozopauka kubva mukugonda ngokupurutana kumweya inochengedzera nezvidzidziso zvemadhimoni, kubudikidza ngokuchengedzerwa ngevanoereketa mazwi emanyepo, vakapishwa mhumba dzavo ngesimbi inopisha. Vanorambidza kuroora nokurekera zvokudya, zvaakasika Mwari kuti zviashirwe ngokubonga ngaavo vanotenda nokuzia gwinyiso. Ngokuti zvisikwa zveshe zvakasikwa ndiMwari zvakanaka, apana chinosisira kurambwa, kudai chechiashirwa ngokubonga; ngokuti chinocheneswa ngeizwi raMwari nomukumbiro. Kudai wechironzera hama izvi zviro, unozoita mushandi wakanaka waKristu Jesu, wechikodzwa ngemazwi okutenda nechidzidziso chakanaka chowakateera. Asi ramba ngano dzinotsverudza nedzembuya. Asi udzirovedzese kudira Mwari, ngokuti kurovedzera mumuiri kunodetsera padoko, asi kudira Mwari kunodetsera kuzviro zveshe, ngokuti kunogondisa kupona kwazvino nokuchauya. Rinogondeka izwi iri rinosisira kuashirwa kakurutu. Ngokuti ndizvo zvetinotambudzikira nokurwadziwa, ngokuti gonda redu rakaemeswa munaMwari unopona, uri Muponesi wevanhu veshe, kakurutu weavo vanotenda. Panga nokudzidzisa izvi zviro. Usatendera munhu kuti ashoore utsva hwako, asi ita chionero kwavari vanotenda ngeizwi nokupona, murudo, mukugonda nomukusukika. Gara wechidzidza zvinyorwa, kuchumaira nokudzidzisa, metsa ndiuye. Usarekeredza chipo icho chiri mukati mwako, chowakapuwa kubudikidza ngokuprofeta nokuiswa kwenyara dzevakuru padera pako. Tsamwirira kuita zviro izvi, udzipire pachako kwezviri, kuti kubudirira kwako kuoneke kwavari veshe. Udzingwarire iwewe nokudzidzisa kwako; angirira kuita izvi zviro, ngokuti ngokuita izvi unozoponesa veshe iwewe naavo vanokuzwa. Usaganyira musharuka asi mupote kudai ndibaba, nemajaha matsva kudai ngehama, nemadzimbuya kudai ngaanamai, nevakadzi vatsva kudai ngevakunda, mukusukika kweshe. Remeredza shirikadzi idzo dziri shirikadzi ngegwinyiso. Asi kudai shirikadzi inevana nokuti vazukuru, ngavatange kudzidza zvidzidzo zvavo zvokudira Mwari pamhuri yavo nokuhwirinzira ngezvakanaka kuvabari vavo; ngokuti izvi zvinodakadza mukuona kwaMwari. Zvino shirikadzi yegwinyiso, yakasiiwa yega, inogonda muna Mwari, inoangira kupota nokukumbira usiku namasikati; asi uwo unokarira zvinodakadza wakafa kunyazwi echinyapona. Panga izvi zviro, kuti vaite vasikashooreki. Asi kudai aripo usikangwariri hama dzake, kakurutu avo vomuzi wake, watoramba kugonda naye washata kupinda uwo usikatendi. Usatendera kuti shirikadzi inyorwe zina isati yapedza makore makumi matanhatu okubarwa, yaiya mukadzi womwamuna umwe; inembiri yakanaka yemishando yakanaka, yakarera zvakanaka vana, yaiashira vapfumba, yaisuka tsoka dzevakacheneswa, yaidetsera vanotambudzika, yaigwinya kubatirira kumishando yeshe yakanaka. Asi ramba kunyora mazina eshirikadzi itsva. Ngokuti apo chidisiso chokuda mwamuna chavakurira, vatsvatsvana naKristu, vanozoda kuroorwa, vane ndaa ngokuti vakaramba kugondisa kwavo kwokutanga. Zve, vanodzidza kuita nungo, vechipepesheka kubva pamhatso kuenda pamhatso, vasikateri kuita nungo kwega, asi kuitawo gunyengu, vasikarekeri zvevamweni, vechiereketa zvisikasisiri. Ndizvo ndinodisisa kuti shirikadzi itsva dziroorwe, dzibare vana, dzingwarire mizi yadzo, dzisapa gaa ndau yokutituka ndiyo. Ngokuti vamweni vatopauka kuteera Sathani. Kudai aripo mukadzi mutendi unehama shirikadzi ngaadzidetsere, kuti chiara chisazodzimbirwa, kuti chidetsere avo vari shirikadzi ngegwinyiso. Vakuru vanonasa kutungamirira ngavaziikanwe kuti vanosisira kuremeredzwa kwakahwirinzirwa, kakurutu avo vanoshanda mushando weizwi nowokudzidzisa; ngokuti zvinyorwa zvinoti, “Usazosunga muromo wen'ombe inopura zviyo,” zve, “Mushandi unosisira musharo wake.” Usatenda kuashira ndaa inopomerwa munhu mukuru, asi kuti yechipupurirwa ngezvapupu zviiri nokuti zvitatu. Avo vanoangira kushaisha, uvarambidze pamberi pavo veshe, kuti vamweni navo vatye. Ndinokupanga mukuona kwaMwari nokwaKristu Jesu nekwengirosi dzakatsanangurwa, kuti ungwarire izvi usikatsananguri, usikaiti chiro ngomukheto. Usakasira kuisa nyara padera pomunhu, usaashidzana nevanhu vamweni zvishaishi zvavo; dzingwarire kuti ugare wakasukika. Usachamwa mvura yega, asi imwa vhini shomani ngendaa yomundani mwako neyokurwara kwako kuzhinji. Zvishaishi zvevanhu vamweni zviri pamhene, zvinoenda pamberi mukutongwa, nezvishaishi zvevamweni vanhu zvinovateera ngesure. Ngokudaro iriyo mishando yakanaka iri pamhene; neiyo isikazi kudaro aikoni kufishika. Veshe vari pashi pejoka rouhloko ngavazie kuti madzimambo avo anosisira kuremeredzwa kweshe, kuti zina raMwari nezvidzidziso zvisazotukwa. Avo vane madzimambo anotenda vasazovashoora ngokuti ihama, asi vanosisira kuvashandira, ngokuti avo vanoashira kudetserwa vari vatendi nevanodikanwa. Dzidzisa nokupanga izvi. Kunyazwi ndiani unodzidzisa zvidzidziso zvakaparadzana asikatendi mazwi egwinyiso aMambo wedu Jesu Kristu nezvidzidziso zvinozwanana nokudzidzisa kwaMwari, unodzikudza, asikazii chiro, asi unodisisa mibvunzo nehasha dzemazwi, kwezviri kunobva ndurumwa nehasha nokutuka nokupinimidzira zvakashata, nokuphikisana pakati pevanhu vane mipinimidzo yakashaishwa, vakarashikirwa ngegwinyiso, vechikarakadza kuti kudira Mwari injira yokuuyirwa. Eya, kuripo kuuyirwa kukurutu mukudira Mwari pamwepo nokugutiswa; ngokuti atizi kuuya nechiro munyika muno, ndizvo atikoni kutora chiro kuenda nacho. Asi kudai tine zvokudya nezvokufuka, tinozogutiswa ndizvo izvi. Asi avo vanodisisa kuita makurudza vanowira mukuedzwa, nokubatwa ngomurau woupenzi uzhinji wokuemura kunoremadza, kunonzvaidza vanhu mukufa nomukurashwa. Ngokuti kudisisa mare ndiyo nzinde yembeu dzeshe dzokushata, nomukudisisa kwavo kuita makurudza vamweni vakapauswa kubva mukugonda, vakadzibaya ngemadambudziko mazhinji. Asi iwewe, munhu waMwari, tiza izvi; uteere kururama, kudira Mwari, kugonda, rudo, kusengerera, kupfaa. Ambana kuambana kwakanaka kwokugonda, batisisa kupona kusikaperi kwewakadaidzirwa, ukaita uchapupu hwakanaka mukuona kwezvapupu zvizhinji. Ndinokupanga mukuona kwaMwari, uwo unopa kupona kuzviro zveshe, nokwaKristu Jesu, uwo wakapupura uchapupu hwakanaka pamberi paPhontiusi Piratu, kuti ungwarire mipango usina ara, usikashooreki metsa pakuoneka kwaMambo wedu Jesu Kristu, kwaachazoonisa ngenguva kwayo, uwo ega wakafumiswa noweumambo, Mambo wemadzimambo noMutongi wevatongi. Ndiye ega usikatongofi unogara mukujeka kusikagumirwi, uwo usina naumwe wakambomuona nokuti kukona kuoneka; kwaari ngakugare kuripo kuremeredzwa nesimba zvisikaperi. Ameni. Panga avo vari makurudza munyika muno kuti vasadzikudza nokuti kuemesa kugonda kwavo paupfumi husikagari, asi kunaMwari, uwo unotipa kakurutu zveshe kuti tidakare ndizvo; kuti vaite zvakanaka, vaite vapfumi kumishando yakanaka, vadakarire kupa vamweni nevakanasirira kukowana, vechidziunganidzira ugaro hwakanaka hwenguva inouya, kuti vabatisise kupona ukwo kwegwinyiso. Iwewe Thimothi, ngwarira icho chakapuwa kwouri. Furatira kuereketa kusina shwiro ndiMwari nokuramba kuzia zviri zvokunyepa; ngokupupura ndizvo vamweni vakapauka kubva mukugonda. Nyasha ngadzigare nemwi. Phauri, mupostori waKristu Jesu ngokuda kwaMwari, kubudikidza ngechigondiso chokupona chiri munaKristu Jesu, ndinonyorera kunaThimothi, mwana wangu unodikanwa. Nyasha nokukungurirwa nokunyarara zvinobva kunaMwari Baba naKristu Jesu Mambo wedu ngazvigare newe. Ndinobonga Mwari, uwo wendinoshandira ngemhumba yakacheneswa, kudai ngezvaakaita madzibaba angu, apo pendinomukarakadza nguva dzeshe mumikumbiro yangu usiku nemasikati. Apo ndechikarakadza masodzi ako, ndinozwa chishuwo chokuda kukuona kuti ndizadzwe ngokudakara. Ndinokarakadziswa ngokugonda kwako kwegwinyiso, kugonda ukwo kwakagara kutanga munambuya ako Roisi nokunamai ako Yunisi, kwendinogonda kuti kunogarawo mwouri. Ngeiyi ndaa ndinokukarakadzisa kuti ukunhidzire chipo chaMwari chiri mukati mwako kubudikidza ngokuiswa kwenyara dzangu padera pako; ngokuti Mwari aazi kutipa mweya wokutya, asi mweya wesimba, worudo nowokudzibata. Ndizvo usatsveruka kuita chapupu ndiMambo wedu nokuti ndini bhanditi rake, asi gwinyira zvakakonza ngendaa yevhangeri, mwechigonda simba raMwari, uwo wakatiponesa nokutidaidza ngokudaidzwa kwakacheneswa, haiwa kubudikidza ngemishando yedu asi kubudikidza ngokuemesa kwake emene nenyasha. Nyasha idzi dzakapuwa kwetiri kubudikidza ndiKristu Jesu nguva dzisati dzaapo, asi zvino zvakaoniswa kubudikidza ngokuoneka kwoMuponesi wedu Kristu Jesu, uwo wakanyisa rufu, akaunza kupona nokusikaora mukujeka kubudikidza ngevhangeri. Ngokuti ngeiri vhangeri ndakaemeswa kuita muchumairi, mupostori nomudzidzisi kweriri. Ngeiyi ndaa ndinotambudzwawo ngeizvi. Asi anditsveruki, ngokuti ndinomuzia uwo wendakatenda, ndinogonda kuti unokona kungwarira icho chendakapa kwaari metsa pazuva iro. Batisisa chionero chemazwi akagwinyisisa ewakazwa kubva kwendiri, mukugonda nomurudo zviri munaKristu Jesu. Ngwarira icho chakanaka chakapuwa kwouri, ngokudetserwa ndiye Mweya Wakachena unogara mukati mwedu. Unozia kuti veshe vari muAsia vakandiramba, pakati pavo ndiFigerusi naHermogenesi. Mambo ngaaitire nyasha kunevemhatso yaOnesiforusi, ngokuti waindigwinyisa nguva zhinji; aazi kutsveruka ngeketani dzangu, asi apo paakaguma muRoma, wakanditsvaka kakurutu naye wakandiona. Mambo ngaaite kuti aone nyasha kubva kunaMambo ngeiro zuva! Newe unonasa kuzia kuwanda kweizvo zvaakandishandira muEfesu. Iwewe zvino mwana wangu, ita wakagwinya munyasha dziri muna Kristu Jesu, neizvo zvewakazwa kubva kwendiri pamberi pezvapupu zvizhinji, upe iwewe kuvamuna vakagondeka, vanozokonawo kudzidzisa vamweni. Tora chikoaniswa chako chokutambudzika kudai ngesoja rakanaka raKristu Jesu. Apana soja rinoshanda muhondo rinodzikodyanisa kumishando yokupona uku, asi rinodisisa kumudakadza uwo wakarinyora kuti riite soja. Mutambi wemijaho aapuwi dzungudza kuti asikazi kupurutana zvironzo. Murimi unoshanda ndiye unosisira kuita wokutanga kuashira michero. Pinimidza ngezvendinoronza, ngokuti Mambo unozokupa kuzwisisa muzviro zveshe. Karakadzai ndiJesu Kristu, uwo wakamuswa kubva kwevakafa, mubarirwana waDhavhidha, ndiro vhangeri rangu, iro rendinotambudzikira zvakakonza metsa mukusungwa, kudai ngomushandi wezvakashata. Asi izwi raMwari arizi kusungwa. Ndizvo ndinotsungirira zveshe ngendaa yevakatsanangurwa, kuti vaonewo ruponeso ruri munaKristu Jesu, pamwepo nouthende husikaperi. Izwi iri ngeregwinyiso: Kudai takafa pamwepo naye, tinozoraramazve naye; kudai techitsungirira, tinozotongazve naye; kudai techimuramba, iye unozotirambawo; kudai isusu tisikagondeki, iye unogara akagondeka, ngokuti aakoni kudziramba. Vakarakadzise ngeizvi, wechivapanga mukuona kwaMwari kuti vasaita hasha ngemazwi asikadetseri chiro, asi anoparadza avo vanozwa. Gwinya kudzipira kunaMwari uri unotendeka kwaari, mushandi usikatami kutsveruka, unoruramisa kubata izwi regwinyiso. Asi tiza kuereketa kusikakudzi Mwari, ngokuti kunozoangira kupausa vanhu kubva kunaMwari, neizwi ravo rinozonyeketa kudai ngebandwa. Pakati pavo panaHimenaeusi naFiretusi, avo vakapauka kubva mugwinyiso vechironza kuti kumuka kubva kwavakafa kwakatopinda. Vanorigira pashi kugonda kwevamweni. Asi dzeyo rakagwinya raMwari rinondoema, rine chinyorwa ichi chinoti, “Mambo unozia avo vari vake,” zve, “Weshe unodaidza zina raMambo ngaabve kuneizvo zvisikazi kururama.” Zvino mumhatso huru amuna ndiro dzomukore nedzesirivha dzega asi dzirimwowo dzemiti nedzedongo, dzimweni dzinoremeredzeka nedzimweni dzisikaremeredzeki. Ndizvo, kudai munhu echizodzisuka kubva kunezvakadaro, unozoita chidziyo chinoremeredzeka, chakacheneswa, chinosisira kushandiswa ngomunikazi wacho, chakanasirirwa kuita mishando yeshe yakanaka. Asi tiza kubva mukuemura kwevatsva, uteere kururama, kugonda, rudo, kunyarara, pamwepo naavo vanokumbira kunaMambo ngomwoyo wakasukika. Asi ramba mibvunzo youpenzi neisina kuzia, wechizia kuti inopara hasha. Nomuranda waMambo aasisiri kuita hasha, asi kuita wakapfaa kwavari veshe, unozia kudzidzisa, echisengerera, uwo unodzidzisa ngokupfaa avo vanoramba, kuti pamweni Mwari ungavapa kutenderuka kuti vazie gwinyiso, zve, kuti vadzipokonyose kubva pamurau waDhiabhorosi, wevaiya vakabatwa ndiye kuti vaite kuda kwake. Asi zwisisa izvi, kuti kumazuva okugumisira nguva dzokutambudzika dzinozouya. Ngokuti vanhu vanozodzida pachavo, vechidisisa upfumi, vechiganza, vechidzikudza, vechituka, vasikapurutani vabari, vasikabongi, vasikazi kucheneswa, vasina rudo kuhama, vasikaiyanisiki, vanoreya, vasikadzibati, vanotyisa, vanoshoora zvakanaka, vachengedzeri, madzongoni, vanodzidingaringa, vanopinda kuda mitambe yakashata pane kuda Mwari, vane chiemo chokudira kubanze, asi vechiramba simba rakwo. Ibva kwavari! Ngokuti pakati pavo varipo vanozvonga kupotera mumhatso vechibata vakadzi vakarembedzeka, vanodzimbirwa ngezvishaishi, vechikweyiwa ngokuemura kwakaparadzana, vanogara vechidzidziswa, vasikatongohaniri ruziyo rwegwinyiso. Kudai ndiJanesi naJambresi vakarwisana naMosi, ndizvo navo vanorwisana negwinyiso, vanhu vakashaishirwa mumipinimidzo, vakarashikirwa ngokugonda kwavo. Asi avazobudiriri kuende mberi, ngokuti upenzi hwavo hunozobuda pamhene kuvanhu veshe, kudai ngohwaavozve vanhu vairi hwakaita kudaro. Zvino iwewe wakateera kudzidzisa kwangu, kuhamba kwangu, kudisisa, kugonda, kugwinyisira, rudo nokusengerera, madambudziko nenhamo, izvo zvakandigumira muAntiokhi, muIkoniumu nomuRistria, kutambudzikanyi kwendakashingirira. Mambo wakandinunura kubva kwezviri zveshe. Ngegwinyiso naavo veshe vanoda kuhamba ngokururama muna Kristu Jesu vanozotambudzwa. Asi vanhu vakashata nevanochengedzera vanozoangira kupinda kushata, vechichengedzera nokuchengedzerwa. Asi iwewe, gara muizvo zvowakadzidza nokugwinyiswa ndizvo, wechizia avo vewakadzidziswa ndivo, zve, kubvira paudoko hwako, wakazia zvinyorwa zvakachena zvine simba rokuita kuti ungware kuruponeso kubudikidza ngokugonda muna Kristu Jesu. Zvinyorwa zveshe zvakafemerwa ndiMwari, zvinodetsera kudzidzisa, kurambidza, kupanga nokudzidzisa njira yokupona kwakarurama, kuti munhu waMwari aite wakaperera, anazvo zveshe zvokuita mishando yeshe yakanaka. Ndinokupanga mukuona kwaMwari nokwaKristu Jesu, uwo unozotonga vachazwa nevakafa, mukuoneka kwake noumambo hwake: Chumaira izwi, ugwinyisire ngenguva kwayo neisiri nguva kwayo, rambidza, ukaraidze, upange ngokusengerera kweshe nokudzidzisa. Ngokuti nguva ichauya apo vanhu yevacharamba kupurutana kudzidziso dzegwinyiso, asi vane nzee dzinovava, vanozodziunganidzira vadzidzisi kudai ngokuemura kwavo. Vanozotsiira nzee dzavo kubva kugwinyiso, vechienda kungano. Asi iwewe, ngwara muzviro zveshe, gwinyira zvakakonza, ita mushando womuvhangeri, pedzisa mushando wako. Ngokuti zvino inini ndatodururwa kuitwa mudiro, nomukuwo wokuenda kwangu waguma. Ndarwa kurwa kwakanaka, ndapedza mujaho, ndangwarira kugonda. Kubvira zvino ragadzikirwa inini dzungudza rokururama, iro raanozondipa ngeiro zuva Mambo, mutongi wakarurama, haiwa kwendiri ndega, asi nokwavariwo veshe vakada kuoneka kwake. Uya kwendiri ngokukasira, ngokuti Dhemasi wakandisiya, ngokuda iyi nyika, wakaenda Thesaronika; Kresikhenesi wakaenda Garatia, Thithusi wakaenda Dharamatia. NdiRuka ega uchineni. Tora Marako uuye naye, ngokuti unorudetso rukurutu kwendiri mumushando. Ndakatuma Thichikusi kuEfesu. Jazi rendakasiya Troasi naKhapusi, uya naro woouya, nemabhuku, kakurutu mapepa emakanda. Arekizanda mupfuri wethusi wakandishaishira kakurutu; Mambo unozomuunzidzira kudai ngemishando yake. Newe unosisira kungwara ndiye, ngokuti wakaphikisa kakurutu mazwi edu. Pakudzirwira kwangu kwokutanga apana wakandiemerera, asi veshe vakanditiza. Isaita ndaa kwavari! Asi Mambo wakandiemerera, akandigwinyisa, kuti kubudikidza ndini mashoko ateketeswe yaamho nemadzinza eshe amazwe. Neni ndakapokonyorwa kubva pamuromo wemhondoro. Mambo unozondipokonyora kubva kumishando yeshe yakashata, unozondiponesa metsa ndapinda muumambo hwake hwomudenga. Kwaari ngahugare uthende mhera nariini nariini. Ameni. Tambisa Prisikha naAkwira nemhuri yaOnesiforusi. Erastusi wakasara Khorinte, asi ndakasiya Trofimusi Miretusi echirwara. Kasira kuti uuye chando chisati chaguma. Yubhurusi unokutambisa naPhudhenesi naRinusi naKraudhia nevatendi veshe. Mambo ngaagare nomweya wako. Nyasha ngadzigare nemwi. Phauri, muranda waMwari nomupostori waJesu Kristu, kudai ngokugonda kwevakatsanangurwa vaMwari noruziyo rwegwinyiso rwokudira Mwari, mugonda rokupona kusikaperi kwaakagondisa Mwari, uwo usikakoni kunyepa, nguva dzisati dzaapo, panguva kwayo wakaonisa izwi rake kubudikidza ngokuchumairwa kwaro kwendakapuwa inini ngomupango waMwari Muponesi wedu. Ndinonyorera kunaThithusi, mwana wangu wegwinyiso mugonda redu. Nyasha nokunyarara ngazvigare kwomuri zvinobva kunaMwari Baba nokuna Kristu Jesu Muponesi wedu. Ngeiyi ndaa ndakakusiya muKrete, kuti urongedze izvo zvakasara kuitwa nokuemesa vakuru mumadhorobha eshe, kudai ngezvendakakupanga: munhu usikashooreki, wakaroora mukadzi umwe, anevana vanotenda, vasikaitirwi ndaa yokusikadzibata nokuti vasikapurutani. Ngokuti kunosisira kuti mutungamiriri mukuru wechiara aite usikashooreki, kudai ngezvaari muranda waMwari, usina mutinini, usikakasiri kutseneka, usikadi vhini, usikaiti hohoho, usikadisisi pfuma, asi unoashira vapfumba, unoda kunaka, wakangwara, wakarurama, wakacheneswa, unodzibata. Unosisira kubatisisa izwi rinogondeka kudai ngezvaakadzidziswa, kuti akone zveshe kugwinyisa ngedzidziso yegwinyiso nokuvanyisa avo vanoita hasha. Ngokuti varipo vazhinji vasikapurutani, vanoereketa zvisina shwiro, vanochengedzera, kakurutu avo vokuchekwa; avo vanosisira kuti miromo yavo inyaradzwe, ngokuti vanoparadza mhuri dzeshe, vechidzidzisa zvisikasisiri, ngendaa yokuda pfuma inetsvina. Waiya umwe wavo, muprofeti wavo emene, wakati, “VaKrete vanyepi nguva dzeshe, zvikara zvakashata, vanokara, vane nungo.” Uchapupu uhwo hunegwinyiso. Ngeiyi ndaa varambidze kakurutu, kuti varurame mukugonda, vasikapurutani kungano dzevaJudha nokuti kumipango yevanhu vanoramba gwinyiso. Kunevakasukika zveshe zvakasukika, asi kwavari vakasvipiswa nevasikatendi apana chakasukika. Mipinimidzo yavo nemhumba yavo zvakasvipiswa. Vanopupura kuti vanomuzia Mwari, asi ngemishando yavo vanomuramba. Vanonyangadza, avapurutani, vasikadetseri chiro kumishando yeshe yakanaka. Asi iwewe, dzidzisa zvinosisira zvidzidziso zvine gwinyiso. Ronzera vamuna vakuru kuti vadzibate, vechiremeredzeka, vakangwara, vanogwinyisira mukugonda, murudo nomukusengerera. Ronzera mbuya ngokudaro dzihambe kudai ngezvinosisira vakacheneswa, dzisikareyi, dzisikadi vhini rakawanda, dziite vadzidzisi vezvakanaka, kuti dzidzidzise vakadzi vatsva kuda vamuna vavo nokuda vana vavo, kuti vaite vakangwara, vakasukika, vanongwarira mizi yavo, vane nyasha, vanopfaira vamuna vavo, kuti izwi raMwari risazotukwa. Ngokudaro panga vamuna vatsva kuti vaite vanodzibata. Ngezviro zveshe wechidzionisa kuita chionero chemishando yakanaka, muzvidzidziso zvako wechionisa kugondeka nokuremeredzeka nokuereketa kwakarurama, kusikashooreki, kuti gaa ritsveruke, risaane chiro chakashata cheringaereketa tisu. Ronzera hloko kuti dzipfaire madzimambo adzo nokunasa kuvadakadza ngezviro zveshe, dzisikavaphikisi, dzisikavabiri, asi dzechionisa kugondeka kweshe kwakanaka, kuti dzinemese zvidzidziso zvaMwari Muponesi wedu muzviro zveshe. Ngokuti nyasha dzaMwari dzakaoneka, dzinounza ruponeso kuvanhu veshe, dzechitidzidzisa kuti tirambe zvakashata nokuemura zvomunyika, nomumazuva aya tipone ngokungwara nomukururama nokudira Mwari, apo techigarira iro gonda rakafumiswa nokuoneka kwouthende hwaMwari wedu mukuru noMuponesi, Jesu Kristu. Ndiye wakadzipira ngendaa yedu kuti atiripire kubva mukushata kweshe nokuti adzichenesere vanhu vaite vake vemene, vanotsamwirira kuita mishando yakanaka. Ronza izvi zviro; upange nokurambidza ngesimba reshe. Usatendera munhu kuti akushoore. Vakarakadzise kuti vapfaire vatongi naavo vane simba, kuti vapurutane vakanasirirwa kuita mishando yeshe yakanaka, kuti vasaereketa zvakashata ngomunhu, kuti vasaita hasha, vaite vakapfaa, vechionisa kupfaa kuvanhu veshe. Ngokuti isusuwo ngekaretu taiya noupenzi, tisikapurutani, techichengedzerwa, tiri hloko dzokuemura nezvidakadziso zvenyama zvakaparadzana, takapedza mazuva edu tine khururu nendurumwa, techinyenya nokunyenyana. Asi apo unaku norudo rwenyasha dzaMwari Muponesi wedu zvaoneka, wakatiponesa, haiwa ngemishando yakarurama yetakaita isusu, asi kubudikidza ngenyasha dzake, ngokushambidzwa ngemvura yokubarwazve nokumusirirwa ndiMweya Wakachena. Uwo wakadururirwa padera pedu ngokuwanzisa kubudikidza ndiye Jesu Kristu Muponesi wedu, kuti isusu, techipembedzwa ngenyasha dzake, tiite vanogara nhaka kudai ngegonda rokupona kusikaperi. Iri izwi rinogondeka. Inini ndinoda kuti ugwinyisise kuronza izvi zviro, kuti avo vakatenda Mwari vangwarire kuita mishando yakanaka; izvi zviro zvakanaka zvinodetsera kuvanhu. Asi tiza mibvunzo youpenzi nokuerengudzwa kwemazina emadzibaba, hasha nokuphikisana ngendaa yeMipango, ngokuti izvi azvidetseri azvina shwiro. Munhu unophikisana negwinyiso, ngesure kwokuronzerwa kamwe nokwechipiri, murambe, wechizia kuti wakadaro wakapauka, unoshaisha, unodzirasha. Apo ndootuma Atemasi kwouri, nokuti Thichikusi, kasira kuuya kwendiri Nikoporisi, ngokuti ndakadziemesera kugarapo nguva yechando. Ita zveshe zvounokona kudetsera Zenasi gweta naAporosi murwendo rwavo, uone kuti kusatamika chiro kwavari. Vanhu vedu ngavadzidze kudzipira kuita mishando yakanaka kuti vaone zvinotamika, nokuti vasazoita vasina michero. Veshe vendinavo vanokutambisa. Tambisa avo vanotida mukugonda. Nyasha ngadzigare nemwi mweshe. Phauri, bhanditi raKristu Jesu, naThimothi hama yedu, ndinonyorera kunaFiremoni mungani wedu unodikanwa nounoshanda pamwepo nesu, nokunaAfia mukunda wedu, naAkhipusi uri soja pamwepo nesu, nokuchiara chiri mumhatso yako. Nyasha nokunyarara ngazvigare nemwi zvinobva kunaMwari Baba edu nokunaMambo Jesu Kristu. Naapo pendinopinimidza ndiwe mumikumbiro yangu, ndinobonga Mwari wangu ngenguva dzeshe, ngokuti ndinozwa ngorudo rwako kwavari veshe vakacheneswa nokugonda kwako kunaMambo Jesu. Ndinokumbira kuti kukoaniswa kwegonda rako kushande mukuzia zveshe zvakanaka zviri mukati mwedu munaKristu. Ngokuti ndinodakara kakurutu nokugwinyiswa murudo rwako, ngokuti mwoyo yevakacheneswa yakagwinyiswa kubudikidza ndiwe, hama yangu. Ngeiyi ndaa, kunyazwi ndinakwo kushinga kweshe munaKristu kuti ndikupange kuita izvo zvinodiwa, asi ngendaa yorudo ndinokupota, inini Phauri ndinoita kudai ngomunhu musharuka, nazvino kudaiwo ngebanditi raKristu Jesu. Ndinokupota ngendaa yomwana wangu, Onesimusi, uwo wendakaita baba ake muusungwa hwangu. Uwo karetu waiya asikadetseri kwouri, asi zvino unodetsera iwewe neni. Ndamutumira kwouri, iye emene, mwoyo wangu wemene. Ndaida kuti agare neni, kuti andishandire pandau yako mukusungwa kwangu ngendaa yevhangeri; asi ndaiya ndisikadi kuita chiro ndisati ndatenderwa ndiwe, kuti kunaka kwako kusazoita kwokumanikidzwa, asi ngokuda kwako. Ngokuti pamweni ndiyo ndaa yakaita kuti aparadzaniswe newe nguva doko, kuti ungaa naye mhera nariini, aasichiri hlokopi, asi unopinda hloko, waita hama inodikanwa, kakurutu kwendiri, asi zvinozopinda kwakaitawani kwouri, mumuiri nomuna Mambo. Ndizvo kudai wechindierenga kuti ndiri mungani wako, muashire kudai ngezvewaizondiashira inini. Asi kudai akakushaishira, kunyazwi zvakanyaita mashatirenyi nokuti anechikwereti kwouri, wechiisa icho pazvikwereti zvangu. Inini, Phauri, ndinonyora izvi ngenyara yangu; ndinozochibhadhara. Inini andironzi chiro kwouri ngendaa yezvikwereti zvako kwendiri kunyazwi iwewe wemene uri chikwereti kwendiri. Eya, hama, nditendere kuti ndidakadzwe ndiwe munaMambo! Musirira mwoyo wangu munaKristu. Ndechigonda kupurutana kwako ndinonyora kwouri, ndechizia kuti unozoita zvinopinda zvendaronza. Panguva imweyo ndinasirire kamera revaeni, ngokuti ndinogonda kuti kubudikidza ngemikumbiro yenyu ndinozopirwa kwomuri. Ephafrasi, bhanditi pamwepo neni munaKristu Jesu, unokutambisa, ngokudaro Marako, Aristakhusi, Dhemasi naRuka, vendinoshanda navo. Nyasha dzaMambo wedu Jesu Kristu ngadzigare nomweya yenyu. Karetu Mwari wakaereketa kumadzibaba edu ngenguva dzakawanda nenjira dzakaparadzana ngevaprofeti; pamazuva aya okupedzisira wakaereketa kwetiri ngoMukororo wake, uwo waakaemesa kugara nhaka yezviro zveshe, kubudikidza ndiyezve wakasika nyika. Aye uri kupenya kwouthende hwaMwari nomuedzaniso wemene waMwari, nokugwinyisa zviro zveshe ngesimba reizwi rake. Naapo achenesa zvishaishi, wakagara pashi ngokumudyo kwoUkuru mudenga. Mukororo wakapinda kunaka kunengirosi, ngokuti wakagara nhaka yezina rakapinda kunaka kuneradzo. Ngokuti ngeiri ngirosi yaakaronza nokuti ngouri mukuwo echiti, “Ndiwe Mukororo wangu, inini nyamashi ndakubara?” Zve, “Ndinozoita Baba ake, naye unozoita Mukororo wangu?” Zve, naapo echiunza dangwe munyika, unoti, “Ngirosi dzeshe dzaMwari ngadzimudire.” Ngendaa yengirosi unoti, “Uwo unoita ngirosi dzake dziite mhepo, nevashandiri vake kuti vaite murazvu womuriro.” Asi ngendaa yoMukororo unoti, “Dendemaro rako, A Mwari, rinogara mhera nariini nariini, nendonga yokururama ndiyo ndonga youmambo hwako. Iwewe wakada kururama, wakanyenya kushata; ndizvo Mwari, Mwari wako, wakakudzodza ngemafuta okudakara kupinda vangani vako.” Zve, “Pakutanga, Mambo Mwari, wakaradzika dzeyo renyika, nematenga ari mishando yenyara dzako; izvo zvichapera, asi iwewe unogara uripo; nazvo zveshe zvichatsakara kudai ngechokufuka; kudai ngejira unozozvipeta, kudai ngechokufuka zvinozotsandudzwa. Asi iwewe unondogara wakadaro, nemakore ako aatongozoperi.” Asi ngeiri yengirosi yaakaereketa ndiyo nokuti ngouri mukuwo echiti, “Gara iwewe ngokumudyo kwangu metsa ndiite magaa ako chitambarariro chetsoka dzako?” Ngirosi dzeshe andiyopi mweya inoshandira here, inotumwa kushandira avo vanozogara nhaka yoruponeso? Ndizvo tinosisira kuti tipinde kungwarira zvetakazwa, kuti tirekere kukukuzwa kubva kwezviri. Ngokuti kudai izwi iro rakaereketwa kubudikidza ngengirosi rakaoniswa kuti rakagwinya, nokupauka kweshe nokusikapurutana zvakathuswa ngokuunzidzirwa kwakasisira, isusu tingaita mapokonyokerenyi kudai techirekeredza ruponeso rukuru rwakadai? Urwo rwakatanga kuereketwa kubudikidza ndiye Mambo, rukagwinyisiswa kwetiri ngaavo vakamuzwa, naapo Mwari wakapupurawo pamwepo navo ngezvioniso nemishamiso nemishando yakawanda yesimba nezvipo zvoMweya Wakachena, zvakapuwa kudai ngokuda kwake. Ngokuti aazi kuipfaisa pashi pengirosi nyika inouya, yetinoereketa ndiyo. Asi umwe wakapupura pandau imweni echiti, “Munhu chiinyi kuti ukarakadze ndiye? Nokuti mukororo womunhu kuti mumungwarire? Wakamuita kwekamukuwo kadoodori ari pashi pengirosi; wakamupfekedza dzungudza routhende nokuremeredzwa. Wakapfaisa zveshe pashi petsoka dzake.” Ngokuti pakuisa pashi pake zviro zveshe, aazi kusiya chiro chisikazi kuiswa pashi pake. Asi zvino atisati taona kuti zveshe zvakaiswa pashi pake. Asi tinoona Jesu, uwo wakaitwa mudoko pashi pengirosi kwenguva doko, asi zvino akapfekedzwa dzungudza routhende nokuremeredzwa ngendaa yokutambudzika kworufu, kuti ngenyasha dzaMwari araire rufu ngendaa yomunhu weshe. Ngokuti kwakamusisira Mwari, iye wakaitirwa zviro zveshe, nokubudikidza ndiye zviro zveshe zviripo, mukuunza vana vazhinji muuthende, kuti apererise mukutambudzika uwo uri mutungamiri woruponeso rwavo. Ngokuti uwo unochenesa naavo vakacheneswa vana Baba umwe. Ngeiyi ndaa Jesu aatsveruki kuvadaidza kuti hama echiti, “Ndinozochumaira zina rako kuhama dzangu, ndinozoemba kukukudza pakati pembungano.” Zve, “Ndinozogonda kwaari.” Zve, “Inini ndiri pano, nevana avo vaakandipa Mwari.” Ndizvo kwechioneka kuti vana vakakoanisirwa ngazi nenyama, iye emene ngokudaro wakakoana navo pane zviro zvakadaro, kuti kubudikidza ngokufa ungaparadza uwo unesimba rorufu, ndiye Dhiabhorosi nokusunhura veshe avo vaiya muusungwa mukupona kwavo kweshe mukutya rufu. Ngokuti ngegwinyiso aazi kuuya koodetsera ngirosi, asi kudetsera mibarirwana yaAbrahama. Ndizvo unosisira kuti atodzane nehama dzake ngezviro zveshe, kuti aite mupristi mukuru unenyasha nounogondeka mumushando waMwari, kuti aripire zvishaishi zvevanhu. Ngokuti iye emene wakatambudzika echiedzwa, unesimba rokudetsera avo vanoedzwa. Ndizvo, hama dzakacheneswa, vanoashirawo kudaidzwa kwomudenga, pinimidzai ndiye Jesu, Mupostori noMupristi Mukuru wokutenda kwedu, uwo waigondeka kwaari uwo wakamuemesa, kudaiwo ndiMosi waigondeka mumhatso yaMwari yeshe. Ngokuti Jesu wakaerengwa kuita unosisira kuremeredzwa kupinda Mosi, kudai ngouwo wakaaka mhatso unoremeredzwa kupinda mhatso yemene. Ngokuti mhatso yeshe inoakiwa ngomunhu, asi uwo wakaaka zveshe ndiMwari. Zvino Mosi waigondeka mumhatso yaMwari yeshe kudai ngomuranda, kuti aite chapupu cheizvo zvaaizoereketa panguva yaiteera. Asi Kristu waigondeka padera pemhatso yaMwari kudai ngomukororo, nesu tiri mhatso yake kudai techibatisisa pakushinga kwedu negonda retinodzikudza ndiro mukugonda kwedu. Ndizvo, kudai ngezvaanoereketa Mweya Wakachena, “Nyamashi, kudai mwechizwa izwi rake, “Musakonzesa mwoyo yenyu kudai ngenguva yokumukirana, kudai ngezuva rokuedzwa mushango, paakandiedza madzibaba enyu echindinesa, akaona mishando yangu makore makumi marongomuna. Ndizvo ndakanyangadzwa ngorudzi urwu, ndikati, ‘Vanogara vechipauka mumwoyo yavo navo avazi kuzia njira dzangu.’ Kudai ngezvendakapika muushungu hwangu kuti, ‘Avazopoteri mukuzorora kwangu.’ ” Ngwarai, hama, kuti kusazoapo naumwe wenyu unemwoyo wakashata usikatendi, unofuratira kubva kuna Mwari unopona. Asi gwinyisanai umwe ngaumwe wenyu mazuva eshe kuchadaidzwa kuti, “Nyamashi,” kuti kusazoapo naumwe wenyu unokonzeswa ngokuchengedzerwa kwokushaisha. Ngokuti isusu takaitwa vanokoanisirana naKristu, kudai techibatisisa kuamba kwokugonda kwedu metsa pakugumisira. Apo kucharonzwa kuti, “Nyamashi, kudai mwechizwa izwi rake, musakonzesa mwoyo yenyu kudai ngenguva yokumukirana.” Ndiani avo vakazwa, vakamumukira? Andivopi veshe here vakabudiswa Egipite ndiMosi? Ndianizve vaakanyangadzirwa makore makumi marongomuna? Andivopi avo vakashaisha here, miiri yavo yakawira mushango? Wakapikazve kunaani kuti avazopoteri mukuzorora kwake, kudai kusiri kwavari avo vaiya vasikamupurutani? Ndizvo tinoona kuti avasaikona kupoteramwo, ngokuti vaiya vasikatendi. Ndizvo, kudai ngezvechichipo chigondiso chokupotera mukuzorora kwake, ngatingware kuti kusazoapo naumwe wenyu ungaoneka echikorera kuhanira kwechiri. Ngokuti ngegwinyiso mashoko akanaka akauya kwetiri, kudai ngekwavari; asi izwi revakazwa arizi kuvadetsera, ngokuti arizi kubvengedzwa pamwepo nokugonda kwaavo vakarizwa. Ngokuti isusu takatenda tinopotera mukuzorora ukwo, kudai ngezvaakaereketa echiti, “Kudai ngezvendakapika muushungu hwangu kuti, ‘Avazopoteri mukuzorora kwangu,’ ” kunyazwi mishando yake yakapedzwa kubvira mukuemeswa kwenyika. Ngokuti pandau imweni wakaereketa ngendaa yezuva rechinomwe echiti, “Mwari wakazorora ngezuva rechinomwe kubva kumishando yake yeshe.” Nepandau inozve echiti, “Avazopoteri mukuzorora kwangu.” Ndizvo kuchakabeuka kuti vamweni vapoteremwo, naavo vakaashira mashoko akanaka karetu vakakorera kupoteramwo ngokusikapurutana, unoemesazve zuva rimweni rinoti, “Nyamashi,” rechiti kubudikidza ndiDhavhidha ngesure kwomukuwo wakareba kudai, kudai ngezvezvakaereketwa karetu kuti, “Nyamashi, kudai mwechizwa izwi rake, musakonzesa mwoyo yenyu.” Ngokuti kudai Joshua aiya avapa kuzorora, Mwari asaizoereketa ngezuva rimweni sure kweizvo. Ndizvo zvino kuzorora kweSabatha revanhu vaMwari kuchiripo. Ngokuti avo vakapotera muzororo raMwari vakazororawo kubva kumishando yavo, kudai ngezvaakaita Mwari kubva kuneyake. Ndizvo ngatitsamwirire kupotera muzororo iro, kuti kusazoapo naumwe unozowa kubudikidza ngokuteera icho chionero chokusikapurutana. Ngokuti izwi raMwari rinopona, rinoshanda, rinopinza kupinda shoti ine upanga huiri, rinobaya kugumira panoparadzana mwoyo nomweya, nhengo nomwongo; rinokona kuzwisisa zvinotendwa nezvinonyerwa mumwoyo. Pamberi pake apana chisikwa chakafishika, asi zviro zveshe zviri pamhene nokufukurwa kumadziso ake uwo wetinozodzipingurira kwaari. Ndizvo zvino zvetinaye mupristi wakapinda kukura, wakapinda ngepakati pematenga, Jesu, Mukororo waMwari, ngatibatisise kutenda kwedu. Ngokuti atina mupristi mukuru usikakoni kutizwira urombo pakurembaremba kwedu, asi tinaye uwo wakaedzwa ngenjira dzeshe kudai tisu, asina kushaisha. Ndizvo ngatikwedzere ngokushinga kudendemaro renyasha, kuti tiashire nyasha nokuona nyasha dzokutidetsera ngomukuwo wokutama. Ngokuti mupristi mukuru weshe wakatsanangurwa kubva pakati pevanhu unoemeserwa vanhu kuita zviro zvaMwari, kuti apire zvipo nemidiro ngendaa yezvishaishi. Unokona kuzwira urombo kunevasikazii nevanopauka, ngokuti iye emene wakatendenedzwawo ngokurembaremba; ngeiyi ndaa, unosisira kuti apire midiro ngendaa yezvishaishi zvake, kudai ngezvaanopira ngendaa yevanhu. Akuna munhu unodzitorera kuremeredzwa uku, asi unotora kwega apo anodaidzwa ndiMwari, kudai ndiAroni. Ndizvo Kristuwo aazi kudzikudza ngokuita mupristi mukuru, asi wakaemeswa ngouwo wakati kwaari, “Ndiwe Mukororo wangu, inini nyamashi ndakubara;” kudai ngezvaakaronzazve kundau imweni kuti, “Iwewe uri mupristi mhera nariini kudai ngourongwa hworudzi rwaMerekhizedheki.” Ngemazuva okupona kwake munyama, Jesu wakakumbira mikumbiro nokupota, ngokuchema kakurutu nemasodzi, kwaari umwe uwo waikona kumuponesa kubva murufu, naye wakazwika ngendaa yokumutya Mwari. Kunyazwi waiya Mukororo, asi wakadzidza kupurutana kubudikidza ngeizvo zvaakatambudzika ndizvo; naapo aitwa wakaperera, wakaita muambi wokuponeswa kusikaperi kwavari veshe vanomupurutana, naapo aemeswa ndiMwari kuita mupristi mukuru kudai ngokuteererana kworudzi rwaMerekhizedheki. Ngendaa yeizvi tinazvo zvakawanda zvokuronza zvakakonza kududzira, kudai ngezvemwaita vanhu vasikachakoni kuzwisisa. Ngokuti kunyazwi ngouyu mukuwo mwaisisira kuita vadzidzisi, zvino imwimwi munodazve kuti umweni amudzidzise zvidzidziso zvokutanga zvemazwi aMwari. Imwimwi mwatoita vanosisira kupuwa mukaka, haiwa kudya kwakagwinya; ngokuti munhu weshe unomwa mukaka aazwisisi izwi rokururama, ngokuti mwana mudoko. Asi kudya kwakagwinya ngokwevakuru, ngokuti avo mipinimidzo yavo yakadzidziswa ngokuita kutsanangura zvakanaka kubva panezvakashata. Ndizvo ngatiangire kuenda mberi mukuperera, techisiya sure zvidzidziso zvokutanga zvaKristu, tisikaradzikizve dzeyo rokutenderuka kubva kumishando yakafa nokugonda kuna Mwari, nokuchidzidziso chokubhabhatidzwa nokuiswa nyara nechokumuka kwevakafa nechokutongwa kwemhera nariini. Neizvi tinozozviita, kudai Mwari echitendera. Ngokuti azviitiki kuvapetudzazve kuti vatenderuke avo vakambojekiswa nokuraira chipo chomudenga, vaashira chikoaniswa muMweya Wakachena, vakaraira unaku hweizwi raMwari nemasimba enguva inouya, kudai vechipauka kuhwirira sure, azvingaitiki kuvatenderudzazve, ngokuti vanokohomerazve Mukororo waMwari vechimutsverudza pamhene. Ngokuti nyika inomwirira mvura inonaya kazhinji padera payo, kudai yechimera miriwo inosisira avo vayakarimirwa, inoashira chifumiso chinobva kuna Mwari. Asi kudai yechibereka minzwa nemakato, inoita isina shwiro yaapasinde pokutukwa, magumisiro ayo kupishwa. Kunyazwi tinoereketa kudai, vanodikanwa, tinegonda rezviro zvakapinda kunaka ndimwi, zviro zvoruponeso. Ngokuti Mwari aasiri wokusikaruramapi; aazoriyarwi mushando wenyu norudo rwemwakaonisa ngendaa yezina rake mukushandira vakacheneswa, kudai ngezvemuchavashandira nazvino. Nesu tinodisisa kuti umwe ngaumwe wenyu aonise kutsamwirira kwakadaro kunokugonda kwakaperera metsa pakugumisira, kuti musaita nungo, asi vaedzereri veavo vanogara nhaka yezvigondiso kubudikidza ngokugonda nokusengerera. Ngokuti apo Mwari paakaita chigondiso kuna Abrahama, wakapika ndiye pachake, ngokuti paiya pasina mukuru wokuti apike ndiye, echiti, “Ngegwinyiso ndinozomufumisa nokumuwanza.” Ngokudaro Abrahama echishingirira mukusengerera wakahanira chigondiso. Ngegwinyiso vanhu vanopika ngomukuru wakavapinda pachavo, nemhiko inogwinyisa inopedza hasha dzeshe. Ngenjira imweyo, apo Mwari, paakada kunasa kuonisa kwavari avo vanogara nhaka yechigondiso, icho chine chiemo chisikatsandudzwi biningidzo racho, wakachigwinyisa ngemhiko, kuti kubudikidza ngezviro zviiri zvisikashanduki, mwezviri amungaitiki kuti Mwari anyepe, isusu tione kugwinyiswa kwakagwinya, isusu takatiza kubatisisa gonda rakaiswa pamberi pedu. Tinaro gonda iri kuita chitsimiso chomweya, rine gwinyiso rakatsima rinopotera muneicho chiri mukati mwejira rechisitiro, umwo Jesu mutungamiriri wakapoteramwo pokutanga ngendaa yedu, apo aitwa mupristi mukuru mhera nariini kudai ngourongwa hworudzi rwaMerekhizedheki. Ngokuti uyu Merekhizedheki, mambo weSaremu, mupristi waMwari Uri-Padera-Pazveshe, wakashongana naAbrahama, echipetuka kubva koorwa nemadzimambo naye wakamufumisa. Kwaarizve Abrahama wakapa “Chimwe chegumi cheizvo zveshe.” Zina rake pakutanga rinoronza kuti, “Mambo wokurarama;” sure kwazvo unozwi, mambo weSaremu, rinoronza kuti, “Mambo wokunyarara.” Asina baba, asina mai, asina madzisekuru, asina maambo emazuva nokuti magumo endaramo, asi wakaitwa kudai ngomuedzaniso woMukororo waMwari, unogara ari mupristi mhera nariini. Wonai kukuranyi kwaakaita! Kunyazwi naAbrahama, baba mukuru, akamupa chimwe chegumi cheizvo zvaakachakata. Ngegwinyiso naavo vemhuri yaRevhi vanoashira mushando woupristi, vanopangwa ngeMipango kuti vatore chegumi kuvanhu, ndikwo kuti kubva kuhama dzavo, kunyazwi vakabva muchiunu chaAbrahama. Asi munhu uyu, mubarirwana wake usikazi kuerengwa rudzi rwake kwavari, wakatora chegumi kubva kunaAbrahama, akamufumisa uwo wakaashira zvigondiso. Zviri pamhene pasina kuphikisa kuti mudoko unofumiswa ngomukuru. Panapa vanhu vanofa vanoashira chimwe chegumi; pamweni ngoumweni uwo unopupurwa ndiye kuti unorarama. Umwe ungaronza kuti Revhi pachake unoashira chegumi, wakapawo chegumi kubudikidza ndiAbrahama, ngokuti iye waiya achiri muchiunu chababa ake, apo Merekhizedheki paakashongana naye. Zvino kudai kuperera kwakaoneka kubudikidza ngoupristi hwaRevhi (ngokuti vanhu vakaashira Mipango paupristi uhu) kwaiya kuchatamikenyi kuti tierekete ngomupristi umweni kudai ngokuteera urongwa hwoupristi hwaMerekhizedheki, pane kuti umwe worudzi rwaAroni? Ngokuti apo upristi hwechishandurwa kunosisira kuti Mipango ishandurwe. Ngokuti uwo unoereketwa ndiye ngeizvi zviro ngowedzinza rimweni, kubva kwaari akuna naumwe wakamboshanda paarita. Ngokuti zviri pamhene kuti Mambo wedu wakabva kudzinza raJudha, ngeiri dzinza Mosi aazi kuereketa chiro ngendaa yevapristi. Izvi zvakapinda kunasa kuita pamhene, kudai kwechimiruka mupristi umweni wakatodzana nomuemo waMerekhizedheki, uwo usikazi kuitwa mupristi kudai ngechironzo chomupango wenyama, asi wakaitwa ngesimba rokupona kusikaperi. Ngokuti ndiye unopupurirwa kuti, “Iwewe uri mupristi mhera nariini kudai ngourongwa hworudzi rwaMerekhizedheki.” Ngokuti kuripo, munyara imweni, kutama simba kwomupango wokutanga ngendaa yokurembedzeka nokusikadetsera kwawo. (Ngokuti mupango apana chiro chowakaita chakaperera); kuripozve, munyara imweni, kutanga kwegonda rakapinda kunaka, kubudikidza ndiro tinokwedzera kunaMwari. Ichi chakagwinyiswa ngemhiko; ngokuti ivo ngegwinyiso vakaitwa vapristi pasina mhiko, asi uyu wakaitwa mupristi ngokupika mhiko ngendaa youwo wakati kwaari, “Mambo wakapika naye aazokunukudzi mupinimidzo wake, ‘Iwewe uri mupristi mhera nariini.’ ” Ndizvo Jesu wakaitwa chibatiso chechitenderano chakapinda kunaka. Vapristi vokutanga vaiya vazhinji, ngokuti vairambidzwa ngorufu kuangira kugara varimwo mumushando; asi unogara mhera nariini, anawo upristi hwake, ngokuti unoangira mhera nariini. Ndizvozve unesimba rokuponesa yaamho avo vanokwedzera kunaMwari kubudikidza ndiye, ngokuti unorarama nguva dzeshe kuti avakumbirire. Ngokuti zvaiya zvakanaka kuti taisisira kuwa nomupristi mukuru, wakachena, usikashooreki, usina chinosvipisa, wakaparadzaniswa nevashaishi, wakamirudzwa padera pematenga. Uwo usikatami kupira midiro zuva ngezuva, kutanga ngendaa yezvishaishi zvake, ngesure kweizvo ngendaa yezvishaishi zvevanhu, kudai ngezvevakaita avo vapristi vakuru. Ngokuti wakaita izvi kamwe kega, apo paakadzipira pachake. Ngokuti Mipango inoemesa kuita vapristi vakuru vanhu vakarembedzeka, asi izwi remhiko, rakateera kuuya sure kwokupirwa kweMipango, rakaemesa Mukororo uwo wakaitwa wakaperera mhera nariini. Zvino ndaa huru yeizvi zvetinoereketa ndizvo ngeiyi, kuti tinaye mupristi mukuru wakadaro, uwo wakagara pashi ngokumudyo kwedendemaro roUmambo hwomudenga, ari mushandi wezvakachena nowetende regwinyiso, raakaaka Mambo, haiwa munhu. Ngokuti mupristi mukuru weshe unoemeserwa kupira zveshe zvipo nemidiro; ndizvo kunosisira kuti uyu mupristi naye aanachowo chokupira. Zvino kudai aiya munyika, aasaizoita mupristipi, kudai ngezvevaripo vapristi vanopira zvipo kudai ngezvinodiwa ngeMipango. Vanoita midiro mundau yakachena iri muedzaniso nebvute reiyo yomudenga; ngokuti Mosi, apo ooda kudzimika tende, wakapangwa kwechizwi, “Ngwara kuti uite zveshe kudai ngechionero icho chakaoniswa kwouri pamutunhu.” Asi Jesu zvino wakahanira mushando wakapindisisa kunaka, ndizvo ndiye muiyanisi wechitenderano chakapinda kunaka, chakaitwa kubudikidza ngezvigondiso zvakapinda kunaka. Ngokuti kudai chitenderano chokutanga chaiya chakaperera, akusaizotsvakwazve chechipiri. Ngokuti Mwari unovaitira ndaa, apo paanoti: “Mazuva achazouya, unoronza Mambo Mwari, apo pendinozoita chitenderano chitsva nemhatso yaIsuraeri nemhatso yaJudha; haiwa chakadai ngechitenderano chendakaita nemadzibaba avo, ngezuva rendakavatora ngenyara kuvatungamirira kubuda munyika yeEgipite; ngokuti avazi kuangira kugara muchitenderano changu, neni andizi kupinimidza ndivo, unoronza Mambo Mwari. Ngokuti ichi ndicho chitenderano chendinozoita nevemhatso yaIsuraeri ngesure kwemazuva awo, unoronza Mambo Mwari; ndinozoisa Mipango yangu mumipinimidzo yavo, ndinozoinyora mumwoyo yavo, neni ndinozoita Mwari wavo, navo vanozoita vanhu vangu. Navo avazodzidzisani umwe kuno umweni, nokuti kuronzerana umwe kuno umweni wake, echiti, ‘Ziai Mambo Mwari,’ ngokuti veshe vanozondizia, kubvira kumudoko wakatsongesesa metsa kumukuru wavo wakakurisisa. Ngokuti ndinozoita nyasha pane zvinonyangadza zvavo, nezvishaishi zvavo andichazozvikarakadzizve.” Mukuronza kuti, “Chitenderano chitsva,” ngokudaro wakachiita chokutanga chisharuka. Asi icho chaita chisharuka nokutsakara chaapasinde pokurova. Zvino kunyazwi nechitenderano chokutanga chaiya nemitemo yokudira nendau yakachena yepanyika. Ngokuti tende rokutanga rakanasirwa, umwo mwaiya nechigadzikiro chechibani, tafura nezvingwa zvaipirwa kunaMwari; iyi inodaidzwa kuti, “Ndau yakachena.” Ngesure kwemachira ezvisitiro echipiri, paiya netende rinodaidzwa kuti, “Rakapindisisa kuchena.” Mukati mwaro mwaiya nearita yomukore yokupishira mutombo unonuhwira nebhokisi rechitenderano rakasetwa marutii aro eshe ngomukore, mukati mwaro mwaiya nehari yomukore ine mana nendonga yaAroni yakatungira mashakani matsva nemapuwe akanyorwa chitenderano; padera paro paiya nemakherubhi outhende echithibikira chigaro chenyasha. Ngendaa yeizvi zviro atikoni kuereketa ndizvo zvino chimwe ngachimwe. Zvino kunasirirwa uku kwaitwa kudaro, vapristi vaigara vechipotera kundau yokutanga yetende vechiita mishando yokudira Mwari; asi kundau yechipiri yetende kwaipotera mupristi mukuru ega, kamwe ngegore, haiwa asina ngazi, yaapira ngendaa yake nendaa yezvishaishi zvevanhu zvakaitwa ngokusikazia. Mweya Wakachena wechionisa kuti njira yokupotera mundau yakachenesisa yaiya isati yaoniswa, apo tende rokutanga richakaema. Ichi chiri muedzaniso wenguva ino, yavanopira ndiyo zveshe zvipo nemidiro, zvisikakoni kuita kuti mhumba younodira iperere, asi zvaiya zviemeso zvega zvenyama, zvokudya, zvokumwa norubhabhatidzo rwakaparadzana, zvakaemeswa metsa kuguma kumukuwo wokutsandudzwa. Asi apo Kristu auya ari mupristi mukuru wezviro zvakanaka zvauya, zvino kubudikidza ngomutende rakapinda kukura nokuperera, risikazi kuitwa ngenyara, kuronza kuti andiropi rokusikwa uku, haiwa nengazi yembudzi neyemakonyana, asi nengazi yake yemene, unopoteramwo kamwe kwega mundau yakachenesisa, wakationera kuripirwa kusikaperi. Ngokuti kudai ngazi yembudzi neyemikono, nemarota etsiru echifafazirwa kwavari vakasvipiswa, zvechivachenesa kuti nyama isukike, ngazi yaKristu inozopinda kwakaitawani, uwo kubudikidza ngomweya wemhera nariini wakadzipa asina chaangapomerwa kunaMwari, kuchenesa mhumba dzedu kubva kumishando yakafa kuti tishandire Mwari unopona! Ngeiyi ndaa iye uri muiyanisi wechitenderano chitsva, ngokuti rufu rwakauya kuti vaponeswe kubva kuzvipaukwa zvavo vaiya pashi pechitenderano chokutanga; kuti avo vanodaidzwa vaashire chigondiso chenhaka isikaperi. Ngokuti apo pane tsamba yokukoanisa nhaka, panosisira kuti kuapo pakutanga rufu rwouwo wakainyora. Ngokuti tsamba yokukoanisa nhaka ine simba apo munhu uwo afa, zvino aina simba kuti uwo wakainyora achapona. Ndizvo nechitenderano chokutanga achizi kugwinyiswa pasina ngazi. Ngokuti apo mipango yeshe yaiya yaronzwa ndiMosi kuvanhu veshe kudai ngezvinodiwa ngeMipango, wakatora ngazi yemakonyana neyembudzi, pamwepo nemvura, nehombori yehisopi yakasungwa ngemamviri akatsvuka, wakafafazira tsamba nevanhu veshe echiti, “Iyi ingazi yechitenderano chomwakapangwa ndiMwari.” Ngenjira imweyo, wakafafazira ngazi zveshe tende nendiro dzomushando wokudira. Ngegwinyiso, zviro zvinoda kuita zveshe pashi peMipango zvinocheneswa ngengazi, pasina kuparadzwa ngazi apana kurekererwa kwezvishaishi. Ndizvo kwaisisira kuti miedzaniso yeizvo zviri mudenga zvisukwe ngemidiro iyi, asi zviro zvomudenga zvemene zvinocheneswa ngemidiro yakapinda iyi kunaka. Ngokuti Kristu aazi kupotera kundau yakachenesisa, yakaitwa ngenyara dzomunhu, yakadai ngomuedzaniso weizvo zvegwinyiso, asi wakapotera mudenga remene, kuti zvino aeme pamberi pehope yaMwari ngendaa yedu. Zve, aazi kupindamwo kuti adzipire kuita mudiro kazhinji, kudai ngezvaaipotera mupristi mukuru kundau yakachenesisa gore ngegore ane ngazi isiri yake; ngokuti zvino kwaisisira kuti atambudzike kazhinji kubvira mukuemeswa kwenyika. Asi zvino pakugumisira kwenguva iye wakaoneka kamwe kuti abvise zvishaishi ngokudzipira kuita mudiro. Kudai ngezvekwakaemeserwa kuvanhu kufa kamwe, ngesure kwazvo kutongwa, ndizvo Kristu wakapirwa kamwe kuti atware zvishaishi zvevazhinji, unozoonekazve ngokwechipiri asikatwari zvishaishi, asi kuponesa avo vanomugarira. Ngokuti Mupango zveune mumvuri wega wezviro zvakanaka zvichauya, haiwa muemo wemene wezviro izvo zvegwinyiso, aungatongoiti kuti vaperere avo vanokwedzera pasinde ngemidiro imweyo inogara yechipirwa gore ngegore. Kudai zvaiya zvakadaro aisaizorekerwa kupirwa here, ngokuti kudai vadiri, apo vaiya vacheneswa kamwe mhera nariini, avasaichazoa nemhumba yokushaisha? Asi mumidiro iyi uripo mukarakadzisi wezvishaishi gore ngegore. Ngokuti azvingaitiki kuti ngazi yemikono neyembudzi iduse zvishaishi. Ndizvo apo Kristu auya munyika wakati, “Mibairo nezvipo iwewe auzi kuzvida, asi wakandinasirira muiri; Midiro yokupisha nemidiro yokushaisha amuzi kuidakarira. Zvino ndakati, ‘Wona, ndauya kuti ndiite kuda kwako, A Mwari’ (mutsamba yakapetwa kwakanyorwa kudaro ndini.”) Zvaakaronza pakutanga kuti, “Mibairo nezvipo nembeu dzeshe dzemidiro nemibairo yezvishaishi auzi kuzvida, zve, auzi kudakara ndizvo (izvo zvinopirwa kudai ngezvinodiwa ngoMupango.”) Zvino wakati, “Wona, ndauya kuti ndiite kuda kwako.” Unodusa chokutanga kuti agwinyise chechipiri. Ngokuda ukwo takacheneswa kubudikidza ngokupirwa kwomuiri waJesu Kristu kamwe kega. Nomupristi weshe ngegwinyiso unoema zuva ngezuva pamushando wake, echipira kazhinji midiro inotodzana, isikatongokoni kudusa zvishaishi. Asi apo Kristu aiya apira mudiro umwe wemhera nariini ngendaa yezvishaishi, wakagara pashi ngokumudyo kwaMwari, kubvira ngouwo mukuwo echigara metsa magaa ake aitwa chitambarariro chetsoka dzake. Ngokuti ngokupira mudiro umwe iye wakavaita vakaperera mhera nariini avo vakacheneswa. NoMweya Wakachena unoitawo chapupu kwetiri, ngokuti ngesure iye wakati, “Ichi ndicho chitenderano chendinozoita navo ngesure kwemazuva awo, unoronza Mambo Mwari; ndinozoisa Mipango yangu mumwoyo yavo, ndinozoinyora mumipinimidzo yavo, nezvishaishi zvavo nezvinyangadzo zvavo andichazozvikarakadzizve.” Zvino apo pane kurekererwa kweizvi, apachina kupirwa kwomudiro umweni ngendaa yokushaisha. Ndizvo hama, apo tinokutsunga kwokupotera kundau yakachena ngengazi yaJesu, ngenjira itsva inopona yaakatibeurira, kubudikidza ngejira rechisitiro, ndikwo kuti kubudikidza ngenyama yake, zvino zvetinaye mupristi mukuru padera pemhatso yaMwari, ngatikwedzere tine mwoyo wegwinyiso mukugonda kwakazara, tine mwoyo yedu yakafafazwa kucheneswa kubva kumhumba yakashata nemiiri yedu yakashambwa ngemvura yakaera. Ngatibatisise kutenda kwegonda redu tisikazungunyiswi, ngokuti unogondeka uwo wakagondisa. Zve, ngatikarakadzane kumusirana rudo nokuita mishando yakanaka, tisikarekeredzi kuungana pamwepo kudai ngomuitiro wevamweni, asi techigwinyisana umwe kuno umweni, kakurutu apo munotoona kuti Zuva rinokwedzera. Ngokuti kudai techizoshaisha maune ngesure kwokuashira kuzwisisa gwinyiso, akuchina mubairo unopirwa ngendaa yezvishaishi, asi kwasara kugarira mukutya kutongwa, nomuriro uno ushungu unozopedza magaa. Munhu uwo wakagura Mipango yaMosi unofa asikaitirwi nyasha ngeizwi rezvapupu zviiri nokuti zvitatu. Kuororwa kwakapindisisa kushata kwakaitawani kukura kunozoitwa kuneuwo wakatsikatsika pashi petsoka Mukororo waMwari, akaerenga ngazi yechitenderano, yaakacheneswa ndiyo, kuti chiro chisina shwiro, akaita ngokushoora Mweya wenyasha? Ngokuti tinomuzia uwo wakaronza kuti, “Kuunzidzira ngokwangu, inini ndinozounzidzira.” Zve, “Mambo unozotonga vanhu vake.” Ichi chiro chinotyisa kuwira munyara dzaMwari unopona. Asi karakadzai ngemazuva okutanga, apo ngesure kwokujekiswa kwenyu, mwakashingirira kurwisana kakurutu ngokutambudzika. Pamweni mwakaemeswa pamhene kuti mutsverudzwe nokutambudzwa, pamwenizve mwakakoanisirana naavo vakaitirwa zvakadaro. Ngokuti mwakazwira urombo avo vaiya mutirongo, mwakadakara mukushaishirwa kwenhumbi dzenyu, mwechizia kuti imwimwi mwemene mune nhaka yakapinda kunaka neinopinda kugara. Ndizvo musarasha kushinga kwenyu, ukwo kuno musharo mukurutu. Ngokuti munosisira kusengerera, kuti apo mwaita kuda kwaMwari, mungaashira icho chakagondiswa. Ngokuti, “Mumukuwo mudoko, uwo unouya unozouya, aazononoki; asi wakarurama wangu unozorarama ngokugonda. Mwoyo wangu auzodakari ngouwo unopetuka sure.” Asi isusu atisiri pakati pavo avo vanopetuka sure kuenda mukurashwa, asi tiri pakati peavo vanogonda vanoponeswa mweya. Zvino kugonda kutenda gwinyiso reizvo zvinogarirwa, gwinyiso rezviro zvisikaoneki. Ngegwinyiso ngokugonda madzibaba makuru edu vakapupurirwa zvakanaka. Ngokugonda tinozwisisa kuti nyika dzakaitwa ngeizwi raMwari, ndizvo izvo zvinooneka zvakaitwa ngezviro zvisikaoneki. Ngokugonda Abhera wakapa Mwari mudiro wakanasa kunaka kupinda waKheni. Kubudikidza ndiwo kwakapupurirwa kwaari kuti waiya akarurama, Mwari pachake echipupura ngendaa yezvipo zvake; wakafa, asi kubudikidza ngegonda rake uchandoereketa. Ngokugonda Enokhi wakatorwa kuti asaona rufu; “Naye aazi kuoneka, ngokuti Mwari waiya amutora.” Ngokuti zvakapupurwa ndiye asati atorwa kuti, “Wakanasa kudakadza Mwari.” Asi pasina kugonda azvingaitiki kumudakadza, ngokuti kunyazwi ndiani uwo unouya kunaMwari, unosisira kuti atende kuti uriyo, naye unopa muthuso avo vanomutsvaka. Ngokugonda Noa, echipangwa ndiMwari ngendaa yezvaizoitika zvaiya zvisati zvaoneka, echimutya Mwari, wakanasira ngarava kuti vaponeswe vemhatso yake; ngokudaro wakaitira ndaa nyika, wakaita unogara nhaka yokururama kubudikidza ngokugonda. Ngokugonda Abrahama wakapurutana apo adaidzwa, kuti abude kuenda kundau yaaizoashira kuita nhaka; naye wakabuda kuenda, asikazii paaienda. Ngokugonda wakaita munhu mupara munyika yaakagondiswa, kudai ngouri munyika isiri yake, echigara mumatende, kudai ngezvakaita Isaka naJakobe, avo vaiya vagari venhaka naye yechigondiso chimwe. Ngokuti wairingirira dhorobha rine madzeyo, Mwari ndiye ngwazi nomuaki waro. Ngokugonda Sara emene kunyazwi waiya ngomwa wakaashira simba rokuita mimba apo aamusharuka, ngokuti wakamuerenga kuita wakagondeka uwo wakagondisa. Ndizvo kubva kuno munhu umwe, naye wakaita kudai ngowakafa, yakabarwa mibarirwana yakawanda kudai ngouwandu hwenyeredzi dzomudenga nokuwanda kudai ngouwandu hwejecha riri pahumbikumbi yoruandhle risikaerengeki. Veshe ava vakafa mukugonda vasikazi kuashira zvigondiso, asi vakazviona, vakazvichingamidza zviri kuretu. Vakatenda kuti vaiya vanhu vapara nevahambi munyika, ngokuti vanhu avo vanoronza zvakadaro vanoonisa pamhene kuti vanotsvaka nyika yavo. Ngegwinyiso dai vaikarakadza ngenyika yevakabuda kubva kweiri, vaizoano mukuwo wokuhwirirayo. Asi zvino vanodisisa nyika yakapinda kunaka, kuronza kuti, yomudenga. Ndizvo Mwari aatsveruki kudaidzwa kuti Mwari wavo. Ngokuti wakavanasirira dhorobha. Ngokugonda Abrahama, apo echiedzwa, wakapira Isaka kuita mudiro. Eya, uwo wakaashira zvigondiso, wakanasirira akapira mukororo wake wakabarwa ari ega, ndiyezve wakaronzwa kuti, “Kubudikidza ndiIsaka mibarirwana yako inozodudzwa ngezina rako,” echierenga kuti Mwari unesimba rokumumusa, eya kubva kwevakafa, apapozve wakamuashira mumuedzaniso. Ngokugonda Isaka wakafumisa Jakobe naIsau ngezviro zvaizoitika panguva ichauya. Ngokugonda Jakobe, pakufa kwake, wakafumisa umwe ngaumwe wevakororo vaJosefa, “Pakudira akatseama padera pendonga yake.” Ngokugonda Josefa, pamagumisiro okupona kwake, wakaronza ngendaa yokubuda kwevana vaIsuraeri, wakapanga ngendaa yemagodo ake. Ngokugonda Mosi wakafishwa ngevabari vake mwedzi mitatu pakubarwa kwake, ngokuti vakaona kuti mwana waiya akanaka; navo avazi kutya mupango wamambo. Ngokugonda Mosi, apo akura, wakaramba kuzwi mukororo womwanasikana waFaro. Wakatsanangura kuitirwa zvakashata pamwepo nevanhu vaMwari kuno kudakara kamukuwo muzvidakadziso zvokushaisha, echierenga kuti kutsverudzwa ngendaa yaKristu kuri upfumi hwakakura kupinda upfumi hweEgipite, ngokuti wairingirira mberi kumusharo. Ngokugonda wakabuda kubva muEgipite, asikatyi ushungu hwamambo; ngokuti wakashingirira kudai ngowaimuona uwo usikaoneki. Ngokugonda wakangwarira Phasika nokufafazwa kwengazi, kuti muurayi asazogwama matangwe aIsuraeri. Ngokugonda vanhu vakaambuka Ruandhle Rwakatsvuka kudai ngevanoambuka panyika yakaoma, asi apo vaEgipite vechiedzererawo kuambuka vakanzvaidzwa. Ngokugonda marukumbati eJerikho akawa pashi, sure kwokutendererwa mazuva manomwe. Ngokugonda Rahabhi chifebi aazi kufa pamwepo naavo vaiya vasikapurutani, ngokuti waiya aashira vadongoreri ngokunyarara. Chiinyi chimweni chendingaronza? Ngokuti mukuwo unozondiperera kudai ndechironza ndiGidheoni, Bharaki, Samusoni, Jefetha, Dhavhidha, Samueri nevaprofeti, avo kubudikidza ngokugonda vakanyisa umambo, vakashanda zvakarurama, vakahanira zvigondiso, vakakonya miromo yemhondoro, vakadzima mirazvu yomuriro waibaka, vakapokonyoka kubva kushoti dzaipinza, pakurembaremba vakagwinyiswa, vakaita vanesimba guru mukurwa, vakadzinga hondo dzemadzinza. Vakadzi vakapuwa vakafa vavo vamuswa. Vamweni vakarwadziswa, vechiramba kuashira kununurirwa, kuti vahanire kumuka kwakapinda kunaka. Vamweni vakaedzwa ngokuitirwe jee nokushwapurwa, kunyazwi vakasungwa ngemaketani nokukonyerwa mutirongo. Vakapondwa ngemapuwe, vakaadzwa ngepakati ngesaho, vakaurawa ngeshoti. Vakahamba vakasimira matoo emakwai neembudzi, vechitama, vechitambudzwa, vechiitirwa zvakashata; (avo nyika aizi kuvasisira,) vechipepesheka mumashango nomumitunhu, mumapako nomumabani enyika. Naava veshe kunyazwi vakapupurirwa ngokugonda kwavo, avazi kuashira icho chakagondiswa. Mwari waiya akatinasirira chiro chimweni chakapinda kunaka, kuti ngokubanze kwedu ivo vasazoita vakaperera. Ndizvo kwechioneka kuti isusu takatendenedzwa ngegore guru rembungano yakadaro yevanopupura, ngatirashe zveshe zvinodzimbira nokushaisha kunotibatirira, ngatirumbe ngokusengerera mujaho wakaemeswa pamberi pedu, techiringira kunaJesu, muambi nomupedzi wokugonda kwedu, uwo ngendaa yokudakara kwakaiswa pamberi pake, wakashingirira muchinjiko, asikaerengi chimene chawo, wakagara pashi ngokumudyo kwedendemaro raMwari. Pinimidzai ndiye wakashingirira pachake kurwisa kwakadaro kunobva kuvashaishi vanomukira, kuti musazoremba nokuti kudemera mumweya yenyu. Mukurwisana kwenyu nokushaisha imwimwi amusati mwarwa metsa kuguma pakubomha ngazi. Nemwi mwakariyarwa kupotwa kunonyengerera kwakaitwa kwomuri kudai ngokuvana, “Mwana wangu, usashoora kupanga kwaMambo nokuti kudemera apo wechiororwa ndiye; ngokuti uwo waanoda Mambo unomuorora nokushwapura mukororo weshe waanoashira.” Shingirirai kuororwa. Mwari unomubata kudai ngevana; ngokuti uri pari mwana usikaororwi ndibaba ake? Asi kuti musikaororwi, kudai ngevana veshe, zvino muri mibvandirimwo, amuri vana vakepi. Ngepabanze peizvi, taiya nemadzibaba edu ngokwenyama aitiorora, nesu takavaremeredza. Atingapindi kuda kudzipfaisa kwakapindisisa kukuru kunaBaba emweya kuti tipone here? Ngokuti ngegwinyiso avo vakatiorora mazuva mashomani, kudai ngezvezvaioneka zvakanaka kwavari, asi unotiorora kuti tidetserwe, kuti tikoanisirane kuchena kwake. Kweshe kuororwa akudakadzi zvinopano, asi kunochemedza, asi ngesure kunobara michero mukunyarara yokururama kwavari vakadzidziswa. Ndizvo mirudzai nyara dzenyu dzakarembaremba nokugwinyisa mabvi enyu asina simba, munasire njira dzakarurama dzetsoka dzenyu, kuti icho chakaremara chisazoguduguka, asi kuti chiponeswe. Tsvakai kugarisana ngokunyarara nevanhu veshe nokuita vakacheneswa, ngokuti pasina izvi apana munhu ungazoona Mambo. Mwechingwarira kuti kusazoapo naumwe unokorera kuashira nyasha dzaMwari, kuti rusazoapo runzinde rwokuvava runomera, runounza kutambudza, nokubudikidza ndirwo vazhinji vaitwe vakasvipiswa. Wonai kuti kusaapo naumwe wakadai ndiIsau, muombi nousikatyi Mwari, uwo wakatengesa nhaka youtangwe hwake kuti apuwe tsima imwe yechokudya. Ngokuti munozia kuti ngesure kwazvo, naapo paakadisisa kuti agare nhaka yechifumiso, wakarambwa, ngokuti aazi kuona nguva yokutenderuka, kunyazwi akanyaitsvakisisa ngokuchema. Ngokuti imwimwi amuzikuuya kuchiro chingagwamwa, muriro unobaka nechidima nokusvipa nomubvumo, nokuridzwa kwegwama nemaungira emazwi, izwi iro maungira aro akaita kuti avo vakarizwa vakapota kuti izwi rimweni risachazoereketwa kwavari. Ngokuti avazi kukona kushingirira izvo zvakapangwa, “Kudai kunyazwi mhuka yaigwama mutunhu, yaizopondwa kufa ngemapuwe.” Ngegwinyiso zvakaoneka zvechityisa yaamho, kuti Mosi wakati, “Ndinohuta kakurutu ngokutya.” Asi imwimwi mwauya kuMutunhu weZioni nokudhorobha raMwari unopona, Jerusarema romudenga, nokuhondo dzengirosi dzisikaerengeki mumushongano wedhiri nokumushongano wematangwe awo akanyorwa mudenga, nokunaMwari Mutongi wavo veshe, nokumweya yevanhu vakarurama vakaitwa vakaperera, nokunaJesu, muemereri wechitenderano chitsva, nokungazi yokufafazwa, inoereketa zvakanaka kupinda ngazi yaAbhera. Ngwarai kuti musaramba uwo unoereketa; ngokuti kudai vasikazi kupokonyoka avo vakaramba uwo wakavapanga munyika muno, isusu tinozoita mapokonyokerenyi, kuti techiramba uwo unotipanga echibva mudenga! Panguvayo izwi rake rakazungunyisa nyika; asi zvino wakagondisa echiti, “Ndichazozungunyisazve kamwe, haiwa nyika yega, asi nedenga naro.” Izwi iri rokuti, “Ndichazozungunyisazve kamwe,” rinoronza kubviswa kweizvo zvinozungunyika, kuronza kuti zviri zvakaitwa, kuti izvo zvisikazungunyiswi zvisare. Ndizvo ngatibonge, ngokuti tinoashira umambo husikazungunyiswi, ndizvo ngatidire Mwari ngenjira inomudakadza nokuremeredza nokutya; ngokuti ngegwinyiso Mwari wedu muriro unoparadza. Rudo pakati pehama ngarugare. Musariyarwa kuonisa rudo kuvahambi, ngokuti ngokuita kudaro vamweni vakaashira ngirosi vasikazii. Karakadzai vakasungwa, mwechiita kudai ngevakasungwa pamwepo navo, naavo vanoitirwa zvakashata, kudai ngevanoitirwa pamwepo navo. Kuroora ngakuremeredzwe ngevanhu veshe, nomubhedhi wakwo auzi kusvipiswa; ngokuti Mwari unozotonga zvifebi nevaombi. Kupona kwenyu ngakuite kusikakariri mare, itai vanogutiswa ngeizvo zvomunazvo; ngokuti wakati, “Anditongokurekeri nokuti kukusiya.” Ndizvo ngokutsunga tingakona kuronza kuti, “Mambo Mwari mudetseri wangu; andizotyi. Munhu ungazoitenyi kwendiri?” Karakadzai vatungamiriri venyu, avo vakaereketa kwomuri izwi raMwari; mwechipinimidza ngemagumo okupona kwavo, muedzerere kugonda kwavo. Jesu Kristu unogara akadaro zuro nanyamashi, eya, mhera nariini. Musapauswa ngezvidzidziso zvakaparadzana nezvisikaziikanwi; ngokuti kwakanaka kuti mwoyo igwinyiswe ngenyasha, haiwa ngezvokudya, izvo zvevasikazi kudetserwa ndizvo avo vakahamba mwezviri. Tine arita isusu revasikatenderwi kudya kubva kweriri avo vanoita mushando mutende. Ngokuti miiri yemhuka dzine ngazi inounzwa kundau yakachena ngomupristi mukuru kuita mudiro wokushaisha, inopishwa kubanze kwekamba. Ndizvo Jesu wakatambudzikawo kubanze kwomusiwo wedhorobha, kuitira kuti achenese vanhu kubudikidza ngengazi yake. Ndizvo ngatibude tiende kwaari kubanze kwekamba, titware kutsverudzwa kwake. Ngokuti munyika muno atina dhorobha rinogara, asi tinotsvaka dhorobha iro rinouya. Kubudikidza ndiye, zvino, ngatiangire kupira mudiro wokukudza kunaMwari, kuronza kuti, kupira michero yemiromo yedu inopupura ngezina rake. Asi musariyarwa kuita zvakanaka nokukoana zvomunazvo. Ngokuti Mwari unonasa kudakadzwa ngemidiro yakadaro. Purutanai vatungamiriri venyu nokuvapfaira. Ngokuti ivo vanogara vakarinda mweya yenyu, navo vanozobvunziswa ngendaa yenyu. Ngavaite izvi ngokudakara, haiwa ngokutambudzika, ngokuti izvi zvingazomuremadza. Tikumbirirenyi; ngokuti tinozia kuti tine mhumba isina ndaa, tinoemurira kuhamba takagondeka muzviro zveshe. Ndinomupota kuti muite izvi, kakurutu kuti ndipetudzwe kwomuri ngokukasira. Zvino Mwari wokunyarara, uwo wakaunzazve kubva kwevakafa Mambo wedu Jesu, muushi mukuru wemakwai ngengazi yechitenderano chisikaperi, ngaamuchenese kuzviro zveshe zvakanaka, kuti muite kuda kwake, echishanda pakati pedu izvo zvinonasa kumudakadza pamberi pake, kubudikidza ndiye Jesu Kristu, kwaari ngahugare huripo uthende mhera nariini nariini. Ameni. Ndinomupota, hama, sengererai izwi rangu rokupanga, ngokuti ndakanyora kwomuri ngemazwi mashomani. Ndinoda kuti muzie kuti hama yedu Thimothi wakasunhurwa kubva mutirongo; kuti iye akakasira kuuya, ndinozouya pamwepo naye apo ndouya koomuona. Tambisai veshe vatungamiriri venyu nevakacheneswa veshe. Avo vakabva Itaria vanomutambisa. Nyasha ngadzigare nemwi mweshe. Jakobe, muranda waMwari nowaMambo Jesu Kristu, ndinonyorera kumadzinza gumi namairi akapararira, ndinomuchingamidza. Hama dzangu, naapo mwogumirwa ngokuedzwa kwembeu zhinji, musakuerenga kuita chiro asi kudakara, ngokuti munozia kuti kuedzwa kwokugonda kwenyu kunobara kusengerera; asi kusengerera ngakuanomushando wakaperera, kuti muite vakaperera vabva muzero, musikatami chiro. Kudai aripo umwe wenyu unotama ungwaru, ngaakumbire kuna Mwari, uwo unopa kunevanhu veshe ngokuwanzisa, asikakaraidzi, kunozopuwa kwaari. Asi ngaakumbire ngokugonda, asikagonondi, ngokuti uwo unogononda wakadai ngefungu roruandhle, rinosundwa ngedutu nokukandirwa apo naapo. Uwo munhu asakarira kuti unozoashira chiro kubva kunaMambo; munhu unemipinimidzo miiri unotsanduka-tsanduka munjira dzake dzeshe. Asi hama iri pashi ngaidakare ngokukudzwa kwayo, negurudza ngaridakare ngokupfaiswa kwaro, ngokuti gurudza rinozopinda kudai ngeruva romwenje. Ngokuti zuva rinobuda pamwepo nokupisha kwaro, rinoomesa mwenje; neruva rawo rinowa pashi, nounaku hwaro hunopera. Ndizvo zvinoita gurudza; rinozonyangarika munjira dzaro. Unomuchena munhuwo unoshingirira mukuedzwa. Ngokuti apo aedzwa unozoashira dzungudza rokupona rakagondiswa kwavari vanomuda. Munhu apo aedzwa asaronza kuti, “Ndinoedzwa ndiMwari;” ngokuti Mwari aangakoni kuedzwa ngezvakashata, zve, aaedzi munhu kunyazwi ngouri. Asi munhu weshe unoedzwa apo ookweyiwa ngokuemura kwake nokunyengererwa; ndizvo apo kuemura kwamera mimba, kunobara kushaisha, nokushaisha apo kwakura, kunobara rufu. Musachengedzerwa, hama dzangu dzinodikanwa. Zvipo zveshe zvakanaka, nezvipo zveshe zvakaperera, zvinobva mudenga, zvechidzaka kubva kunaBaba vokujeka, kwaari akuna kutsanduka nokuti kabvuri kokukunukuka. Ngokuda kwake iye wakatibara ngeizwi regwinyiso, kuti tiite kudai ngemichero yokutanga yezvakasikwa zvake. Munosisira kuzwisisa izvi, hama dzangu dzinodikanwa: munhu weshe ngaakasire kuzwa, anonoke kuereketa, anonoke kunyangadzwa; ngokuti kunyangadzwa kwomunhu akushandi kururama kwaMwari. Ndizvo mwechirasha tsvina yeshe nokushata kunofashukira, muashire ngokupfaa izwi rakasimwa, rine simba rokuponesa mweya yenyu. Asi itai vaiti veizwi, haiwa vanozwa kwega mwechidzichengedzera. Ngokuti kudai munhu ari muzwi weizwi, asiri muiti waro, uyu wakadai ngomunhu unoringira hope yake yechibarirwe muchiboniboni; ngokuti unodziona pachake, orooenda, paripo unoriyarwa chiemo chaanacho kuti chakaitawani. Asi uwo unoringira mupango wakaperera wokusunhurika, echiangira kudaro, asikaiti unozwa echiriyarwa, asi muiti womushando, uyu munhu unozofumiswa muzviito zvake. Kudai aripo munhu unokarakadza kuti mudiri, naye asikakoni kubata rurumi rwake, asi unochengedzera mwoyo wake, kudira kwake munhu uyu akuna shwiro. Kudira kwakaperera nokusikazi kusvipiswa pamberi paMwari wedu naBaba ndikwo uku, kuhambira nherera neshirikadzi mukutambudzika kwavo, nokudzingwarira kuti asasvipiswa ngezvenyika. Hama dzangu, imwimwi nokuita kwenyu kunomukheto munotenda kuna Jesu Kristu, Mambo wedu wouthende here? Ngokuti kudai munhu unendandazi yomukore, naye akasimira zvakanaka echipotera mumhatso yenyu yokudira, munhu murombo unezvokusimira zvine tsvina echipoterawomwo, nemwi kudai mwechiremeredza uwo unosimira zvokufuka zvakanaka mwechiti, “Gara pano pandau yakanaka,” mwechiti kumurombo, “Ema apo,” nokuti, “Gara pashi pechitambarariro chetsoka dzangu,” ngokuita kudaro amuzikuita mukheto pakati penyu nokuita vatongi vemipinimidzo yakashata here? Purutanai, hama dzangu dzinodikanwa. Mwari aazi kukheta varombo munyika kuti vaite makurudza okugonda nevanogara nhaka youmambo uhwo hwaakagondisa kwavari vanomuda here? Asi imwimwi amuzi kuremeredza murombo. Andivopi makurudza anomutambudza here? Andivopi vanomukweya kuenda pazvigaro zvokutongwa here? Andivopi vanotuka zina rinoremeredzeka romunodaidzwa ndiro here? Asi kudai mwechizadzisa mupango woumambo kudai ngezvakanyorwa kuti, “Unozomuda muakirwana wako kudai ngezvounodzida iwewe pachako”, munoita zvakanaka. Asi kudai mwechiita vanomukheto kuvanhu, munoshaisha mwechiitirwa ndaa ngeMipango kuti muri vapauki. Ngokuti kunyazwi ndiani unozongwarira Mipango yeshe, asi echipumhunwa ngorupande rumwe, iye waita unendaa kweiri yeshe. Ngokuti uwo wakati, “Usazoomba,” wakatizve, “Usazouraya.” Zvino kudai usikaombi, asi wechiuraya, waita mupauki weMipango. Mwechiereketa nokuita kudai ngevanozotongwa ngeMipango yokusunhurika. Ngokuti kutonga akuzoiti nyasha kwaari usikazi kuonisa nyasha. Nyasha dzinodziganzisa dzechinyisa pakutonga! Kunodetserenyi, hama dzangu, kudai munhu echironza kuti unokugonda, asi asina mishando? Kugonda ukwo kungamuponesa here? Kudai hama mwamuna nokuti mukadzi ari mutitinini, echitama zvokudya zvezuva ngezuva, noumwe wenyu echiti kwaari, “Endai mukunyarara, mwechiita vanodziirwa nokugutiswa,” asi musikavapi zvinotamika kumuiri, kunodetserenyi? Ndizvo kugonda kwega, kuti kusina mishando, kwakafa. Asi umweni unozoti, “Iwewe unokugonda, neni ndine mishando. Ndionise kugonda kwako kusina mishando, neni ndinozokuonisa kugonda kwangu ngemishando yangu.” Unotenda iwewe kuti Mwari ndiumwe; unoita zvakanaka. Kunyazwi namadhimoni anotendawo nokuhuta. Unoda kuoniswa here, iwewe munhu usina shwiro, kuti kugonda kusina mishando kwakafa? Abrahama, baba edu, avazi kupembedzwa here ngemishando, apo pevakapira Isaka mukororo wavo kuita mudiro paarita? Unoona kuti kugonda kwakashanda pamwepo nemishando yake, nokugonda kwakaitwa kwakaperera ngemishando. Nechinyorwa chakazadzisika chinoti, “Abrahama wakagonda Mwari, nakwo kwakaerengerwa kwaari kuti kururama,” naye wakadaidzwa kuti ishamwari yaMwari. Munoona kuti munhu unopembedzwa ngemishando, haiwa ngokugonda kwega. Ngokudaro, Rahabhi chifebi aazi kupembedzwa here ngemishando, apo paakaashira vatumwa nokuvatizisa ngenjira imweni? Ngokuti kudai ngomuiri usina mweya wakafa, ndizvo kugonda kusina mishando kwakafawo. Hama dzangu, musaita vadzidzisi vazhinji, mwechizia kuti tinozoashira kutongwa kwakapinda kurema. Ngokuti isusu teshe tinoshaisha ngezviro zvakawanda. Kudai aripo usikashaishi pamazwi, ndiye munhu wakaperera, unokona kubata muiri weshe nawo. Zvino kudai techiisa mikhayo mumiromo yemahachi, kuti atipurutane, tinotungamirira muiri wawo weshe. Ringirai ngarava, kunyazwi dzakanyakura kudini, dzinohambiswa ngedutu rine simba, dzinotenderudzwa ngechikombe apo paanoda muhambisi wengarava kuti aende. Ndizvo rurumi inhengo doodoko, narwo runoganza zvakakura. Wonai kukura kwakaita gwasha rinopishwa ngomuriro wakatsonga! Rurumi muriro. Rurumi inyika yakazara ngokushata pakati penhengo dzedu; runosvipisa muiri weshe, runopisha njira yeshe yokupona, narwo runopishwa pacharwo ngomuriro weGehena. Ngokuti mbeu dzeshe dzezvikara nedzeshiri nedzezvinotamanda nezviri muruandhle zvinopeteka, nazvo zvakapetwa ngevanhu, asi apana munhu ungapeta rurumi, ndirwo chiro chakashata chisikapeteki, chakazara ngoukaira unouraya. Ndirwo tinokudza Mambo naBaba, ndirwozve tinotuka vanhu vakasikwa ngomutodzaniso waMwari. Kubva pamuromo umwewo panobuda kubonga nokutuka. Hama dzangu, azvisisiri kuti izvi zviitike kudaro. Chinyuka chinobudisa here ngomuromo umwe mvura inotapira neinovava? Hama dzangu, muonde ungabereka here maorivhi, nokuti muvhini ungabereka here maonde? Zve, mvura inemunyu aingakoni kubudisa inotapira. Ndiani wakangwara nounozwisisa pakati penyu? Ngaaonise ngokupona kwake kwakanaka mishando yake mukupfaa kwoungwaru. Asi kuti munendurumwa inovava nokudisisa kwakashata mumwoyo mwenyu, musaganza, musanyepera gwinyiso. Ungwaru hwakadaro andihwopi hunobva mudenga, asi ngohwomunyika, husina mweya, ngehwemadhimoni. Ngokuti apo pane ndurumwa nokudisisa kwakashata, paripozve kukangaidzwa nezviito zveshe zvakashata. Asi ungwaru hunobva mudenga kutanga hwakaperera, zve, hunokunyarara, hwakapfaa, hunoreruka kupotwa, hwakazara ngenyasha nemichero yakanaka, husina mukheto, husina kudziitisa. Nemichero yokururama inokushwa mukunyarara ngaavo vanoita kunyarara. Kunobva pari kuambana nehasha pakati penyu? Azvibvi kuzvidisiso zvokuemura kwenyu zvinorwisana munhengo dzenyu here? Munoemura chiro nemwi musina; ndizvo munouraya. Munoemura chiro nemwi musikakoni kuchihanira; ndizvo munoambana nokurwisana. Amuna, ngokuti amukumbiri. Munokumbira musikaashiri, ngokuti munoshaisha kukumbira, kuti muzvishandise muzvidisiso zvenyu zvokuemura. Imwimwi vaombi! Amuzii here kuti ukama nenyika ugaa naMwari? Ndizvo kunyazwi ndiani unoda kuita ukama nenyika, unodziita gaa raMwari. Munopinimidza here kuti zvinyorwa zvinoereketa zviro zvisina shwiro zvinoti, “Mweya wakaita kuti ugare mukati mwedu unoshuwira ndurumwa here?” Asi unopinda kutipa nyasha dzakawanda; ndizvo zvinoti, “Mwari unorwisana nevanodzikudza, asi unoitira nyasha kunevakapfaa.” Ndizvo dzipfaisei pashi paMwari. Irwai naDhiabhorosi, naye unozomutiza. Kwedzerai pasinde naMwari, naye unozokwedzera pasinde kwomuri. Shambai nyara dzenyu, imwimwi vashaishi, muchenese mwoyo yenyu imwimwi munemipinimidzo miiri. Boorerai, tsumbai nokuchema. Kusheka kwenyu ngakutsanduke kuita kutsumba, nokudakara kwenyu kuita kudzimbirwa. Dzipfaisei pamberi paMambo naye unozomukurisa. Hama, musareyana. Kunyazwi ndiani unoreya umweni, nokuti kutonga umweni wake, unoereketa kurwisana neMipango, naye unotonga Mipango. Asi kudai wechitonga Mipango, auri muiti weMipangopi, asi mutongi. Umwe ega uri mupi weMipango nomutongi, uwo unesimba rokuponesa nokuparadza. Asi iwewe urianani unotonga muakirwana wako? Uyai zvino, imwimwi munoti, “Nyamashi nokuti mangwani tinozoenda kudhorobha rakatikuti, tipedze gore tiriyo, techitengesa tione zvokuuyirwa ndizvo.” Imwimwi amuzii zvinozoitika nechimangwani. Chiinyi kupona kwenyu? Ngokuti muri mhute inooneka mukuwo mudoodoko, naapo inoparara. Ngokuti mwaisisira kuronza kuti, “Kudai Mambo echizotenda, tinozorarama nokuita ichi nokuti icho.” Asi zvino munodziganzisa mukudzikudza kwenyu. Kweshe kudziganzisa kwakadaro kwakashata. Weshe, zvino, unozia kuita zvakanaka naye asikazviiti, kwaaari kushaisha. Uyai zvino, imwimwi makurudza, mucheme nokuboorera ngamadambudziko anozouya padera penyu. Upfumi hwenyu hwaora nezvokufuka zvenyu zvadyiwa ngounundu. Mukore wenyu nesirivha yenyu zvaane chinguraurwe, nechinguraurwe chazvo chinozoita chapupu chokumuitira ndaa, nacho chinozodya nyama yenyu kudai ngomuriro. Mwakadziunganidzira upfumi hwenyu mumazuva okugumisira. Ringira musharo wevashandi avo vakacheka minda yenyu, wemwakasara nawo musikazi kubhadhara ngourimbwi, unodaidzira nokudaidzira kwaavo vakacheka kwakazwika munzee dzaMambo wehondo. Mwakararama munyika mukushadaya nomukudakara; mwakakodza mwoyo yenyu ngezuva rokuuraya. Mwakamurasha nokumuuraya uwo wakarurama, uwo usikarwisani nemwi. Ndizvo sengererai, hama, metsa kuuya kwaMambo. Wonai murimi unogarira michero inomutengo mukuru yenyika, echisengerera, metsa iashire mvura yokuamba neyokugumisira. Nemwiwo itai vanosengerera kudaro. Tsimisai mwoyo yenyu, ngokuti kuuya kwaMambo kwaapasinde. Hama, musavhuruvhutirana umwe kunoumweni, kuti musazotongwa. Ringirai mutongi unoema pamisiwo! Hama, kudai ngechionero chokutambudzika nokusengerera, ashirai vaprofeti vakaereketa ngezina raMambo. Ngegwinyiso tinoti vanomuchena avo vakasengerera. Mwakazwa ngokusengerera kwaJobe, mwakaona kupedzisira kwaMambo, kuti Mambo wakazara ngokukungurira nenyasha. Asi kupinda zveshe, hama dzangu, musazopika, kunyazwi ngedenga nokuti ngenyika nokuti ngokupika kumweni, asi itai kuti, “Eya” wenyu aite eya, na “Haiwa” wenyu aite haiwa, kuti musapinda mukutongwa. Uripo here pakati penyu unotambudzika? Ngaakumbire. Uripo here pakati penyu unodakara? Ngaaembe nduyo yokukudza. Uripo here pakati penyu unorwara? Ngaadaidze vakuru vechiara, ngavamukumbirire, vechimudzodza ngemafuta ngezina raMambo. Mukumbiro wokugonda unozoponesa unorwara, naMambo unozomumusa; kudai akaita zvishaishi, zvinozorekererwa kwaari. Ndizvo reurirai zvishaishi zvenyu umwe kunoumweni, mukumbirirane umwe kunoumweni, kuti mutambiswe. Mukumbiro womunhu wakarurama une simba guru mukushanda kwawo. Erija waiya munhu ngechibarirwe waiya akadai tisu, naye wakakumbira kakurutu kuti isazonaya, akuzi kunaya makore matatu nemwedzi mitanhatu. Wakakumbirazve, nedenga rakanayisa mvura nenyika yakabereka michero yayo. Hama dzangu, kudai aripo pakati penyu unopauka kubva kugwinyiso noumwe echimutenderudza, munosisira kuzia kuti kunyazwi ndiani unotenderudza mushaishi kubva mukupauka kwake, unozoponesa mweya womushaishi kubva murufu, naye unozofukidza zvishaishi zvakawanda. Petro, mupostori waJesu Kristu, ndinonyorere kwavari vakatsanangurwa vari zvigarandimo, vakapararira muPontusi, Garatia, Khapadhosia, Asia neBhithinia, kudai ngokuzia karetu kwaMwari Baba, mukucheneswa kwoMweya, kuti vapurutane kunaJesu Kristu, nokufafazirwa ngengazi yake. Nyasha nokunyarara ngazviwanzwe kwomuri. Ngaakudzwe Mwari, Baba aMambo wedu Jesu Kristu! Uwo ngenyasha dzake huru wakatibarazve kuti tianegonda rinopona kubudikidza ngokumuka kwaJesu Kristu kubva kwevakafa, kuti tianenhaka isikaori, isikasvipiswi, isikanyangariki, yakangwaririrwa imwimwi mudenga, imwimwi munongwarirwa ngesimba raMwari kubudikidza ngokugonda kuti muano ruponeso rwakanasirirwa kuti ruzooniswa ngomukuwo wokugumisira. Muizvi munodakara kakurutu, kunyazwi zvino kwomukuwo mudoko, kudai zvechisisira, mwakatambudzwa ngezviedzo zvembeu zhinji, kuti kuedzwa kwokugonda kwenyu, kunomutengo mukuru kupinda mukore unopera kunyazwi wechipera unoedzwa ngomuriro, kungaoneka kwechiita kukudza nouthende nokuremeredza ngenguva yokuoneka kwaJesu Kristu. Kunyazwi amuzi kumuona munomuda; kwaari kunyazwi zvino amumuoni, asi munomutenda nokudakara ngokudakara kusikabviri kuti kuereketwe kwakazara ngouthende, ngokuti munoashira chomunovavarira mukugonda kwenyu, chiri ruponeso rwomweya yenyu. Ngendaa yourwu ruponeso vaprofeti avo, vakaprofeta ngenyasha idzo dzemwaizoitirwa, vakanasa kutsvakisisa, vechitsvaka ngendaa yomunhu nokuti nguva iyo yakaronzwa, ngoMweya waKristu waigara mukati mwavo, apo pewakapupura ngekaretu ngemadambudziko aKristu nouthende hwaizoteera. Kwavari zvakaoniswa kuti avasaidzishandira, asi imwimwi muzviro izvo, zvakaronzwa kwomuri kubudikidza ngaavo vakachumaira vhangeri kwomuri ndiMweya Wakachena wakatumwa kubva mudenga, izvo zviro ngirosi dzinoda kuzvizwisisa! Ndizvo sungai zviunu zvemipinimidzo yenyu, itai vakangwara; muemese reshe gonda renyu kunyasha dzinounzwa kwomuri pakuoneka kwaKristu Jesu. Kudai ngevana vanopurutana, musadzitodzanise nokuemura kwenyu kwokutanga kwenguva yokusikazia kwenyu. Asi kudai ngouwo wakamudaidza wakachena, ngokudaro imwimwiwo itai vakacheneswa mukupona kwenyu kweshe; ngokuti kwakanyorwa kuti, “Munozoita vakacheneswa, ngokuti inini ndakachena.” Kudai mwechimudaidza kuti Baba, uwo unotonga vanhu veshe asina mukheto kudai ngomushando womunhu umwe ngaumwe, ponai mukuwo wouchigarandimo hwenyu mukutya. Imwimwi munozia kuti amuzi kuripirwa ngezviro zvinoora, kudai ngesirivha nomukore, kubva kunjira isina shwiro yokupona kwenyu yomwakasiirwa ngemadzibaba enyu, asi mwakaripirwa ngengazi yaKristu ino mutengo mukuru, kudai ngeyegwai risina gotsa nokuti cheringapomerwa. Uwo ngegwinyiso wakaziikanwa nyika isati yaemeswa, asi wakaoniswa ngendaa yenyu mukugumisira kwenguva. Kubudikidza ndiye imwimwi munogonda kunaMwari, uwo wakamumusa kubva kwavakafa, akamupa uthende, kuti kugonda kwenyu nokutenda kwenyu zviemeswe pana Mwari. Zvino mwakachenesa mweya yenyu mukupurutana gwinyiso kuti muite rudo rusikadziitisi, mudanane umwe noumweni ngomwoyo wakasukika kakurutu. Imwimwi mwakabarwazve patsva, haiwa ngembeu inoora, asi ngeisikaori, kubudikidza ngeizwi raMwari rinopona mhera nariini. Ngokuti “Nyama yeshe yakadai ngomwenje, nouthende hwayo hweshe hwakadai ngeruva romwenje. Mwenje unozeketera neruva rinowa pashi. Asi izwi raMwari rinondogara mhera nariini.” Izwi iro ndiro vhangeri rakachumairwa kwomuri. Ndizvo mwechirasha kweshe kushata, kuchengedzera kweshe, kudziitisa, ndurumwa nokuereketa kweshe kwakashata, kudai ngevana vatsva vachaamba kuberekwa, disisai mukaka woMweya usina kuchengedzera, kuti mukure ndiwo, muponeswe, ngokuti mwakaraira kuti Mambo unenyasha. Uyai kwaari, ndiye buwe rinopona, ngegwinyiso rakarambwa ngevanhu, asi rakatsanangurwa ndiMwari rinomutengo mukuru pamberi pake. Imwimwiwo mwakadai ngemapuwe anopona, mwakaakiwa kuita mhatso yoMweya, kuita upristi hwakachena, kupira midiro yoMweya, inoashirika kunaMwari kubudikidza ndiye Jesu Kristu. Ngokuti zvirimwo muzvinyorwa zvinoti, “Ringirai, ndinoradzika muZioni buwe, buwe repakhona rakatsanangurwa, rino mutengo mukuru; nouwo unotenda kwaari aazotsverudzwi.” Kwomuri zvino imwimwi munotenda, unoremeredzeka; asi kwavari vasikatendi, “Buwe rakarambwa ngevaaki ndiro rakaita soro repakhona,” zve, “Ibuwe rinoita kuti vapumhunwe, nebuwe rinoita kuti vawe.” Vanopumhunwa ngokuti avapurutani izwi, kudai ngezvevakaemeserwa kuita. Asi imwimwi muri dzinza rakatsanangurwa, muri voupristi hwoumambo, dzinza rakachena, vanhu vaMwari vaakadzionera, kuti muchumaire ngemishando inesimba yaakaita uwo wakamudaidza kubva muchidima, kuti mupotere mukujeka kwake kunoshamisa. Imwimwi ngomukuwo wakapinda mwaiya musiri vanhu, asi zvino muri vanhu vaMwari; avo vaiya vasikazi kuashira nyasha, asi zvino mwaashira nyasha. Vanodikanwa, ndinomupota kudai ngezvomuri zvigarandimo nevahambi kuti murekere kuita kuemura kwenyama kunorwa hondo nomweya. Mudzibate ngokuremeredzeka kunosisira pakati pevemadzinza, kuti kuneizvo zvevanomureya ndizvo, kudai ngevaiti vakashata, vangaona ngemishando yenyu yakanaka, vakudze Mwari apo paanouya kootonga. Pfairai mipango yeshe yevanhu ngendaa yaMambo, kunyazwi ngeyamambo, uri mukuru, nokuti kuvatongi, vakatumwa ndiye kuunzidzira vanoita zvakashata nokuvakudza avo vanoita zvakanaka. Ngokuti ndikwo kuda kwaMwari kuti ngokuita zvakanaka munganyaradza kusikazia kwavanhu vano upenzi. Kudai ngevanhu vaMwari, ponai kudai ngevanhu vakasunhurika, asi musikashandisi kusunhurika kwenyu kuita bhachi rokuita zvakashata. Remeredzai munhu weshe. Idai hama dzeshe. Ityai Mwari. Remeredzai mambo. Varanda, pfairai vakuru venyu ngokuremeredza kweshe, haiwa kwavari avo vega vakanaka nevakapfaa, asi nekwavarizve vasikazi kururama. Ngokuti ichi chinoashirika, kuti munhu ashingirire madambudziko, kuti aanemwoyo wakanaka usina ndaa kunaMwari, echitambudzika pasina nendaa. Ngokuti mungakudzwa ngenjiranyi, mwechisengerera apo kudai mwechishaisha nokuchaiwa ngendaa yakwo? Asi apo mwechinasa, kudai mwechitambudzwa ngendaa yakwo, mwechisengerera, izvi zvinoashirika kunaMwari. Ngokuti mwakadaidzwa kuneizvo, ngokuti Kristu wakatambudzikirawo imwimwi, akamusiira chionero kuti muteere muzvitsiko zvake. Uwo usikazi kushaisha, akuna kuchengedzera kwakaoneka pamuromo wake. Naapo paakatukwa, aazi kutukawo; naapo atambudzika, aazi kutyisidzira; asi wakadzipira kwaari uwo unotonga ngokururamisa. Uwo wakatwara emene zvishaishi zvedu mumuiri wake pamuchinjiko, kuti isusu tife mukushaisha, tipone mukururama; kubudikidza ngemaronda ake mwakaponeswa. Ngokuti mwaiya mwechipepesheka kudai ngemakwai, asi zvino mwapetuka kuMuushi noMungwariri womweya yenyu. Ngokudaro, imwimwi vakadzi, pfairai vamuna venyu, kuti kunyazwi varipo vamweni vavo vasikapurutani izwi, vangakokwawo pasina izwi ngenjira yevanopona ndiyo vakadzi vavo, apo pevanoona kucheneswa nokuremeredza mukupona kwenyu. Musadzinemesa pachenyu ngokunemeswa kwokubanze, kwokuruka bvudzi nokusimira zvinemeso zvomukore nokuti zvokusimira zvakanakisisa; asi ngakuite kwomunhu wakafishika womumwoyo, ngezvinemeso zvisikaori zvomweya wakapfaa wakanyarara, uwo unemutengo mukuru mukuona kwaMwari. Ngokuti ngokudarowo karetu vakadzi vakacheneswa, avo vakagonda kunaMwari, vakadzinemesa ngokupfaira vamuna vavo. Kudai ndiSara wakapurutana Abrahama, echimudaidza kuti mambo. Mwaita vana vake, apo mwechiita zvakanaka, musikatendi kuti kutyisa kumukarudze. Ngokudaro imwimwi vamuna, garai nevakadzi venyu kudai ngezvinosisira mwechiremeredza vakadzi kudai ngechidziyo chakarembedzeka, kudaizve ngavanogara nhaka imweyo yenyasha dzokupona, kuti mikumbiro yenyu isazopingaidzwa. Pakupedzisira, imwimwi mweshe itai vano mwoyo umwewo, vanozwirana urombo, dananai kudai ngehama umwe kunoumweni, mune mwoyo inenyasha nemipinimidzo yakapfaa. Musaunzidzira zvakashata ngezvakashata nokuti kutuka ngokutuka; asi ngenjira imweni unzidzirai ngechifumiso, ngokuti mwakadaidzwa kuneizvo kuti mugare nhaka yokufumiswa. Ngokuti, “Uwo unozoda kupona nokuda kuona mazuva akanaka, ngaarambidze rurumi rwake kubva kunezvakashata, nomuromo wake kubva mukuereketa zvinochengedzera; ngaafuratire kubva kunezvakashata, aite zvakanaka; ngaatsvake kunyarara akuteere. Ngokuti madziso aMambo Mwari anoringira padera pevakarurama, nenzee dzake dzinopurutana kumikumbiro yavo. Asi hope yaMambo Mwari inorwa navo vanoita zvakashata.” Zvino ndiani ungazomuremadza kudai mwechitsamwirira kuita izvo zvakanaka? Asi kunyazwi mwechitambudzika ngokuita zvakarurama, munofumiswa. Musatya zvevanotya, zve, musatyisidzirwa, asi mumwoyo yenyu remeredzai Kristu aite Mambo. Mugare mwakanasirira kupingura munhu weshe unomubvunza ngendaa yegonda riri mukati mwenyu; asi muite ngokupfaa nokuremeredza, munemwoyo isina ndaa, kuti pane izvo zvevanomureya ndizvo, vangatsverudzwa avo vanotuka njira yenyu yakanaka yokupona munaKristu. Ngokuti kwakapinda kunaka kutambudzika ngokuita zvakanaka, kudai kutambudzika kuri kuda kwaMwari, pane kutambudzika ngokuita zvakashata. Ngokuti Kristu wakatambudzikawo kamwe mhera nariini ngendaa yezvishaishi, ari wakarurama ngendaa yevasikazi kururama kuti amuunze kunaMwari. Wakaurawa munyama, asi wakaitwa unopona mumweya, mwouri wakaenda, akachumairawo kumweya yaiya mutirongo, iyo karetu yaiya isikapurutani, apo Mwari ngokusengerera paakavagarira ngemazuva aNoa, panguva yokuakwa kwengarava, mukati mwayo vashomani, kuronza, vanhu vasere, vakaponeswa kubudikidza ngemvura. Ndiwo muedzaniso worubhabhatidzo runomuponesa, andirwopi runobvisa tsvina kubva panyama, asi chigondiso chakaitwa chomwoyo isina ndaa kunaMwari, kubudikidza ngokumuka kwaJesu Kristu kubva kwevakafa. Uwo wakaenda mudenga, uri ngokumudyo kwaMwari, nengirosi, vatongi nevane simba vanomupfaira. Ndizvo ngokuti Kristu wakatambudzika munyama, imwimwiwo pfekai mupinimidzo wakatodzana, ngokuti munhu wakatambudzika munyama wakarekera kushaisha, kuti mupone ndaramo yenyu yeshe, haiwa munyama kuita kuemura kwevanhu, asi ngokuda kwaMwari. Ngokuti mwakapedza mukuwo wakakwana mukuita izvo zvaidiwa kuitwa ngevemadzinza, kuhamba mukushata, kuemura, kudhakwa ngevhini, kutamba zvakashata, madhiri okumwa nokudira miedzaniso kunonyangadza. Vanoshamiswa ngokuti amuchahambidzani navo mukuita zvakanyanya kushata, ndizvo vanomutuka. Asi vanozodzipingurira kwaari uwo unoema akanasirira kutonga vanopona nevakafa. Ngokuti iyi ndiyo ndaa yakaita kuti vhangeri richumairwe kunevakafa navo, kuti vatongwe munyama kudai ngokutongwa kwomunhu weshe, kuti vararame mumweya kudai ndiMwari. Asi magumo ezviro zveshe aapasinde; ndizvo itai vakangwara, murinde mukukumbira. Kupinda zveshe dananai ngorudo rukuru pakati penyu, ngokuti rudo runofukidzira zvishaishi zvakawanda. Mwechikoverana umwe noumweni musikagunun'uni. Kudai ngevangwariri vakanaka venyasha dzaMwari dzakapetwa, koanisiranai umwe kunoumweni kunyazwi ngechiri chipo chaakaashira umwe ngaumwe wenyu. Kunyazwi ndiani unoereketa ngaaerekete mazwi emene aMwari; kudai aripo unoshandira ngaashandire kudai ngesimba raanopuwa ndiMwari, kuti Mwari airikidzwe ngezviro zveshe kubudikidza ndiye Jesu Kristu. Aye unouthende nokutonga mhera nariini nariini. Ameni. Vanodikanwa, musashamiswa ngokuedzwa kwakakura kuri pakati penyu, kunoita kudai ngechiro chinoshamisa chaiitika kwomuri. Asi dakarai, kudai ngezvomunoashira chikoaniswa chokutambudzwa kwaKristu, kuti imwimwi mudakare nokudaidzira ngokudakara kukurutu apo uthende hwake pounooniswa. Kudai mwechitsverudzwa ngendaa yezina raKristu, mwakafumiswa, ngokuti mweya wouthende uwo uri Mweya waMwari unogara padera penyu. Asi kusazoapo naumwe pakati penyu unotambudzika ngendaa yokuita muurayi, mbavha, muiti wezvakashata nousikarekeri zvevamweni. Asi kuti munhu echitambudzika ngokuita muKristu, asatsveruka, asi ngaakudze Mwari ngokuti unezina iri. Ngokuti nguva yaguma yokuti kutongwa kutange kumhatso yaMwari; kudai kwechitanga kwetiri, kunozoita kwakadini kugumisira kwevasikapurutani vhangeri raMwari? Zve, “Kudai zvechikonzera vakarurama kuti vaponeswe, chiinyi chinozoitika kunevasikadiri Mwari nevashaishi?” Ndizvo avo vanotambudzika kudai ngokuda kwaMwari ngavapire mweya yavo mukuita zvakanaka kuMusiki unogondeka. Ndizvo ndinopota vakuru vari pakati penyu, kudaiwo ndini ndiri mukuru pamwepo nemwi, nechapupu chemadambudziko aKristu, nounoashirawo uthende hunozooniswa. Ushai muhlambi waMwari waakaisa pashi penyu, haiwa ngokuangiridzwa, asi ngokuda, kudai ngokuda kwaMwari; haiwa kuti muuyirwe ngemare inetsvina, asi ngokudisisa, musikaiti kudai ngevatongi padera pezvakakoanisirwa kwomuri, asi mwechiita zvionero kumuhlambi. Naapo Muushi mukuru paanozooniwa, munozoashira dzungudza routhende risikazoperi. Ngokudaro imwimwi vadoko pfairai vakuru. Eya, imwimwi mweshe dzisimidzei ngokupfaa mukushandirana umwe noumweni, ngokuti “Mwari unorwisana nevanodzikudza, asi unopa nyasha kunevakapfaa.” Ndizvo dzipfaisei pashi penyara yaMwari inesimba, kuti amutunhumadze ngomukuwo unosisira. Kandirai kweshe kuneseka kwenyu padera pake, ngokuti unonyera ndimwi. Svinurai, murinde. Gaa renyu dhiabhorosi rinohamba-hamba kudai ngemhondoro inorira, rechitsvaka avo veringadya. Murwe naye mwakagwinya mukugonda kwenyu, mwechizia kuti madambudziko akatodzana anogumira hama dzenyu munyika dzeshe. Zvino Mwari wenyasha dzeshe, uwo wakamudaidza kuuthende hwake husikaperi huri munaKristu Jesu, mwambotambudzika mukuwo mudoko, iye emene unozomupererisa, unozomuemesa, unozomugwinyisa nokumutseya. Kwaari ngakugare kunesimba mhera nariini nariini. Ameni. Ndakanyora kwomuri ngokufupisa kubudikidza ndiSirivhanusi, hama yedu inogondeka kudai ngezvendinopinimidza, ndechimugwinyisa nokupupura kuti idzi ndidzo nyasha dzaMwari dzegwinyiso. Emai mwakagwinya mwedziri. Chiara chiri muBhabhuroni, chakatsanangurwa pamwepo nemwi, chinomutambisa; ngokudaro Marako mukororo wangu. Chingamidzanai ngomuromo umwe noumweni ngorudo. Kunyarara ngakugare kwomuri mweshe muri munaKristu. Simoni Petro, muranda nomupostori waJesu Kristu, ndinonyorera kwavari vakaashira kugonda kunomutengo mukuru kwakadai ngokwedu kubudikidza ngokururama kwaMwari wedu noMuponesi Jesu Kristu. Nyasha kwomuri nokunyarara ngazviwanzwe mukumuzia Mwari naJesu Mambo wedu. Simba rake rouMwari rakatipa zviro zveshe zvinotamika mukupona uku, nomukudira kubudikidza ngokuzia uwo wakatidaidza ngouthende hwake nokunaka. Ndizvo wakatipa isusu, kubudikidza ngeizvi zviro, zvigondiso zvake zvakakura nezvino mutengo mukuru, kuti kubudikidza ngeizvi mungaita vanosisira chiemo chouMwari, mwapokonyoka kubva mukuora kwokuemura kuri munyika. Ngendaa iyi imwimwi tutsirai kutsamwirira kweshe, mukutenda kwenyu tutsirai kunaka, mukunaka tutsirai kuzia, mukuzia tutsirai kudzibata, mukudzibata tutsirai kusengerera, mukusengerera tutsirai kudira Mwari, mukudira Mwari tutsirai kuda hama, mukuda hama tutsirai rudo. Ngokuti kudai izvi zviro zviri zvenyu, zvechitutsirwa pakati penyu, zvinoita kuti musaite nungo nokuti muite vasina michero mukuzia Mambo wedu Jesu Kristu. Ngokuti iye unotama izvi ibofu nowakapofomadzwa unoriyarwa kusukwa kwezvishaishi zvake zvekaretu. Ndizvo, hama, tsamwirirai kakurutu kuita kuti kudaidzwa kwenyu nokutsanangurwa kwenyu zvigwinyiswe. Ngokuti kudai mwechiita izvi amutongozopumhunwi. Ngokuti ngokuita kudaro, kupotera muumambo husikaperi hwaMambo wedu noMuponesi Jesu Kristu kunozopuwa kwomuri ngokuwandisa. Ndizvo ndinoda nguva dzeshe kugara ndechimukarakadzisa ngeizvi zviro, kunyazwi mwechizvizia nemwi mwakadzimikwa mugwinyiso iro romunaro. Neni ndinopinimidza kuti zvakanaka, kuti nguva dzeshe dzendiri mutende iri, kumumusira ngokumukarakadzisa, ndechizia kuti kubviswa kwetende rangu kunokasira kuuya, kudai ngezvaakaonisa kwendiri Mambo wedu Jesu Kristu. Eya, ndinozotsamwirira, kuti nguva dzeshe ngesure kwokufa kwangu mungazokona kukarakadza izvi zviro. Ngokuti atizi kuteera ngano dzakaitwa ngourimbwi, apo petakaziisa kwomuri simba nokuuya kwaMambo wedu Jesu Kristu, asi taiya zvapupu zvakaona ngemadziso zvoukuru hwake. Ngokuti wakaashira kuremeredzwa nouthende zvakabva kunaMwari Baba, apo izwi iro rakauya kwaari rechibva kuuthende hwakakurisisa rechiti, “Uyu ndiye Mukororo wangu unodikanwa, wendinonasa kudakara ndiye.” Nesu temene takarizwa izwi iri rechibva mudenga, apo petaiya naye pamutunhu wakachena. Nesu tineizwi rakaprofetwa rakapinda kugwinya; mungazoita zvakanaka kuripurutana, rakadai ngechibani chinojeka mundau ine chidima, metsa zuva riedze, nenyeredzi yemangwanani matsatse ibude mumwoyo yenyu. Kutanga kwazvo zveshe munosisira kuzwisisa izvi, kuti akuna kuprofeta muzvinyorwa kunodudzirwa ngomunhu pachake, ngokuti akuna kuprofeta kwakamboapo ngokuda kwomunhu; asi vanhu vakaereketa zvinobva kunaMwari, vechisundwa ndiMweya Wakachena. Asi vaprofeti vokunyepa vakabudapo pakati pevanhu, kudai ngezvevanozoapo vadzidzisi vokunyepa pakati penyu, vanozopotedza ngokufishika zvidzidziso zvinoparadza. Vanozoramba Mambo emene wakavatenga, vechidziunzira padera pavo kuparadzwa kunokasira. Vazhinji vanozoteera njira dzavo dzakashata; ngendaa yeava vadzidzisi njira yegwinyiso inozoreyiwa. Mukuemura kwavo vanozomuchengedzera ngemazwi okudziitisa. Kutongwa kwavo kwakaronzwa kubvira karetu akunonoki nokurashwa kwavo akuati. Ngokuti kudai Mwari asikazi kukungurira ngirosi pedzakashaisha, asi wakadzikandira mumurindi wakapindisisa kudzama, kuti dzingwaririrwe kutongwa muzvisungo zvechidima; kudai asikazi kukungurira nyika yekaretu, asi wakangwarira Noa, muchumairi wokururama, pamwepo nevamweni vanomwe, apo paakaunza ndambi padera penyika yevasikadiri Mwari; naye echishandura madhorobha eSodhoma neGomora kuita marota wakaaparadza ngokuapisha ngomuriro, akaaita chionero chezvinozoitika kwavari vasikadiri Mwari; kudai akanunura Roti munhu wakarurarama, wakatambudzika kakurutu ngokupona mukuemura kwevakashata, (ngokuti munhu uwo wakarurama, echigara pakati pavo zuva ngezuva, wakatambudzika mumweya wake wakarurama zuva ngezuva ngezviito zvavo zvisikazi kururama izvo zvaakaona nokuzwa), Mambo unozia njira yokununura vanodira Mwari kubva mukuedzwa nokungwarira vasikazi kururama pashi pokuororwa metsa rigume zuva rokutongwa, asi kakurutu avo vanohamba ngezvenyama mukuemura kunosvipisa, vechishoora vane simba. Vakatsunga, vanoita kuda kwavo, avatyi kutuka vakuru, apo ngirosi kunyazwi dzinopinda ngoukuru nesimba, adziunzi kutonga kwokuvatuka pamberi pavo kunobva kunaMambo. Vanhu ava, vakadai ngemhuka dzisina mipinimidzo dzakabarwa kuti dzibatwe, dziurawe. Vanotuka ngendaa dzevasikazwisisi, navo vachaparadzwa mukuora kwavo. Vanozoitirwa zvisikazi kururama kuita musharo wavo wokuita zvisikazi kururama. Vanoti kutamba masikati, ndikwo kudakara. Vari maara nemaonje anonyangadza, vechidakara ngokuchengedzera kwavo apo pevanodya nemwi. Vane madziso akazara ngokuomba, vasikakoni kurekera kushaisha. Vanonyengerera mweya isikazi kugwinya. Vane mwoyo yakarovedzera mukuemura. Vana vokutukwa! Vakasiya njira yakarurama navo vakapauka, vechiteera njira yaBharamu, mukororo waBheo, uwo wakada musharo wokuita zvakashata. Asi wakatukwa ngendaa yokupauka kwake; mbongoro isikakoni kuereketa yakaereketa ngeizwi romunhu, nayo yakarambidza kupenga kwomuprofeti. Ava zvinyuka zvisina mvura nemhute inosundwa ngomubvumo; avo vakangwaririrwa chidima chakasvipa. Ngokuti vanoereketa mazwi makuru okudzikudza asina shwiro, vanonyengerera mukuemura kwenyama vanhu avo vatopokonyoka kubva kwavari vanogara mukupauka. Vanovagondisa kusunhurika, asi ivo pachavo ihloko dzokuora; ngokuti munhu unoitwa hloko ngomunhu, kunyazwi ngouri waanonyiswa ndiye. Ngokuti kudai vakapokonyoka kubva kuizvo zvinosvipisa zvenyika kubudikidza ngokuzia Mambo noMuponesi Jesu Kristu, vechikodyaniswazve mwezviri nokunyiswa, chiemo chavo chokugumisira chinoita chakashata kupinda chokutanga. Ngokuti kwaiya kwakapinda kunaka kwavari kudai vasikazi kuzia njira yokururama, pano kuti vaizia, vopetuka sure kubva kumupango wakachena uwo wakapirwa kwavari. Kwakaitika kwavari kudai ngemazwi akangwara anegwinyiso anoti, “Imbwa yahwirirazve kumarutsi ayo,” nokuti “Nguruve yakasukwa yahwirirazve kooumbururuka mumatope.” Vanodikanwa, zvino iyi iri tsamba yechipiri yendinonyora kwomuri; mwedziri ndinoda kumusirira mipinimidzo yenyu inegwinyiso ngokumukarakadzisa kuti munosisira kukarakadza mazwi akaereketwa karetu ngevaprofeti vakachena, nomupango waMambo noMuponesi waakaereketa kubudikidza ngevapostori venyu. Pakutanga munosisira kuzwisisa izvi, kuti ngemazuva okugumisira vanoita jee vanozouya nejee, vechihamba ngokuemura kwavo, vechiti, “Chigondiso chokuuya kwake chiri pari? Ngokuti kubvira panguva yevakaata madzibaba edu, zveshe zviro zvinondogara kudai ngomugarire wazvo kubvira pakutanga pokusikwa!” Ngokuti ngemaune vanoriyarwa ndaa iyi, kuti ngeizwi raMwari matenga aiyapo karetu nenyika ngokudaro, yechibudiswa mumvura kubudikidza ngemvura, kubudikidza ndiyo nyika yenguvayo yaiyapo yechidumaidzwa ngemvura, nayo yakaparadzwa. Asi ngeizwi rimwero aripo matenga nenyika zvakangwaririrwa muriro, zvechingwarirwa metsa zuva rokutongwa nerokuparadzwa kwavanhu vasikadiri Mwari. Asi, vanodikanwa, musariyarwa chiro chimwe ichi, kuti kunaMambo zuva rimwe rakadai ngegumi remazana emakore, negumi remazana emakore akadai ngezuva rimwe. Mambo aanonoki kuita chigondiso chake, kudai ngenjira yevanoti vamweni unononoka, asi unosengerera kwomuri, asikadi kuti naumwe arashwe, asi kuti veshe vatenderuke. Asi zuva raMambo rinozoguma kudai ngembavha; naapo matenga anozopinda nokutinhira kukuru, nezvomudenga zvinozonyunguruka ngokupishwa ngomuriro, nenyika nemishando iri mukati mwayo zvinozopishwa. Kwechioneka kuti izvi zveshe zvinonyunguruka kudaro, kunosisira kuti muite vanhu vakaitawani mukupona kweshe kwakachena nomukudira Mwari, mwechikarira nokushuwira kuuya kwezuva raMwari, ngendaa yaro matenga echibaka anozonyunguruka, nezvomudenga zvinozonyunguruka ngokupishwa ngomuriro? Asi kudai ngechigondiso chake, tinokarira matenga matsva nenyika itsva, umwo munogara kururama. Ndizvo, vanodikanwa, kwechioneka kuti munokarira zviro zvakadaro, tsamwirirai kuti muoneke ndiye muri mukunyarara, musina ara nendaa; muerenge kuti kusengerera kwaMambo wedu ruponeso. Ndizvo mukoma wedu unodikanwa Phauri wakamunyorera kudai ngoungwaru hwakapuwa kwaari, kuereketa ngeizvi kudai ngezvaakaronza mutsamba dzake dzeshe. Munezviro zvimweni zvinokonza kuzwisisa, izvo vasikazii nevasina simba vanozvikunukudza, kudai ngezvevanoitazve kune zvinyorwa zvimweni, vechidziunzira kurashwa kwavo. Ndizvo imwimwi vanodikanwa, mwakapangiwa karetu, ngwarai kuti murekere kutorwa nokupauswa ngevanhu vasina tsika, mupauke kubva mukutsima kwenyu. Asi kurai munyasha nomukuzia Mambo wedu noMuponesi Jesu Kristu. Kwaari ngaugare uripo uthende zvino nemhera nariini nariini. Ameni. Icho chaiyapo kubvira pakutanga, icho chetakazwa, chetakaona ngemadziso edu, icho chetakaringira nokubata ngenyara dzedu, chiri Izwi rokupona, kupona uku kwakaoniswa, nesu takakuona, tinoita chapupu, nokuteketesa kwomuri uku kupona kwemhera nariini, ukwo kwaiya naBaba nakwo kwakaoniswa kwetiri. Icho chetakaona nechetakazwa tinochiteketesa kwomuri, kuti imwimwiwo muiyane nesu; eya, nokuiyana kwedu kuri munaBaba noMukororo wake Jesu Kristu. Nesu tinonyora izvi kuti kudakara kwedu kuzadzisike. Iri ndiro shoko retakazwa kubva kwaari nokuteketesa kwomuri, kuti Mwari kujeka nomwaari amuna chidima nepadoko. Kudai techironza kuti tinoiyana naye, naapo techihamba muchidima, tinonyepa, tisikaiti gwinyiso; asi kudai techihamba mukujeka kudai ndiye uri mukujeka, tinakwo kuiyana umwe kunoumweni, nengazi yaJesu Mukororo wake inotisuka kubva kuzvishaishi zveshe. Kudai techironza kuti atina kushaisha, tinodzichengedzera pachedu, negwinyiso amuna mukati mwedu. Kudai techitenda zvishaishi zvedu, iye unogondeka nokururama unozotirekerera zvishaishi zvedu nokutisuka kusikarurama kweshe. Kudai techironza kuti atizi kushaisha, tinomuita munyepi, neizwi rake amuna mukati mwedu. Vana vangu vadoko, ndinonyora kwomuri izvi zviro kuti musashaisha. Asi kudai umwe echishaisha tinomuemereri kunaBaba, Jesu Kristu wakarurama; nouyu ndiye muripiri wezvishaishi zvedu, haiwa wezvishaishi zvedu zvega, asiwo nezvishaishi zvenyika yeshe. Ngeichi tingaa negwinyiso rokuti tinomuzia, kudai techingwarira mipango yake. Kunyazwi ndiani unoti, “Ndinomuzia,” asi asikangwariri mipango yake munyepi, negwinyiso amuna mukati mwake; asi kunyazwi ndiani unongwarira izwi rake, ngegwinyiso rudo rwaMwari rwakaperera mukati mwake. Ngeichi tinegwinyiso rokuti tiri mukati mwake; kunyazwi ndiani unoronza kuti, “Inini ndinogara mukati mwake,” kunosisira kuti ahambewo kudai ngezvaakahamba. Vanodikanwa, andimunyoreri mupango mutsva, asi mupango wekaretu, wemwaiya nawo kubvira pakutanga; mupango wekaretu ndiwo izwi remwakazwa. Asi ndiri kumunyorera mupango mutsva, uri wegwinyiso mukati mwake nomukati mwenyu, ngokuti chidima chinopinda, nokujeka kwegwinyiso kunojeka zvino. Kunyazwi ndiani unoti, “Inini ndiri mukujeka,” echinyenya hama yake, uchiri muchidima metsa nazvino. Kunyazwi ndiani unoda hama yake unogara mukujeka, mukati mwake amuna chipumhuniso. Asi kunyazwi ndiani unonyenya hama yake uri muchidima, unohamba muchidima, naye aazii paanoenda, ngokuti chidima chakafukidza madziso ake. Ndinomunyorera, vana vadoko, ngokuti zvishaishi zvenyu zvakarekererwa ngendaa yezina rake. Ndinomunyorera, madzibaba, ngokuti mwamuzia uwo waiyapo kubvira pakutanga. Ndinomunyorera, majaha, ngokuti mwakamunyisa uwo wakashata. Ndamunyorera, vana vadoko, ngokuti mwamuzia Baba. Ndamunyorera, madzibaba, ngokuti mwamuzia uwo waiyapo kubvira pakutanga. Ndamunyorera, majaha, ngokuti mwakagwinya neizwi raMwari rinogara mukati mwenyu, nemwi mwakanyisa uwo wakashata. Musade nyika nokuti zviro zviri munyika. Rudo rwaBaba amuna mukati mwavo avo vanoda nyika; ngokuti zveshe zviri munyika, kuemura kwenyama, kuemura kwemadziso, kudzikudza kwokupona, azvibvi kunaBaba akadi, asi zvinobva munyika. Nenyika nokuemura kwayo inopinda; asi iye unoita kuda kwaMwari unogara mhera nariini. Vana vadoko, inguva yokugumisira! Kudai ngezvemwakazwa kuti gaa raKristu rinouya, nazvino akauya magaa akawanda aKristu. Ngeizvi tinozia kuti inguva yokugumisira. Vakabuda kubva kwetiri, asi vaiya vasiri vedu akadi; ngokuti kudai vaiya vedu, vangadai veigara nesu. Asi ngokubva kwetiri zvakaonisa kuti veshe vasaiya vedu akadi. Asi imwimwi mwakadzodzwa ngoUwo Wakachena, mweshe munozia. Andizi kumunyorera ngokuti amuzii gwinyiso, asi ngokuti munorizia, ngokutizve akuna nyepo ringabva mugwinyiso. Ndiani munyepi, asi iye unophikisa kuti Jesu andiyepi Kristu? Uyu ndiye gaa raKristu, unoramba Baba noMukororo. Kunyazwi ndiani unoramba Mukororo, zve, aana Baba; weshe unotenda Mukororo unavowo Baba. Asi icho chemwakazwa kubvira pakutanga ngachigare mukati mwenyu. Kudai icho chemwakazwa kubvira pakutanga chechigara mukati mwenyu, imwimwiwo munozogara mukati mwoMukororo nomukati mwaBaba. Neichi ndicho chigondiso chaakatigondisa, ndikwo kupona kusikaperi. Ndanyora izvi kwomuri ngendaa yaavo vanomupausa. Asi imwimwi kudzodzwa kwemwakaashira kwaari kunogara mukati mwenyu, amutami kuti munhu amudzidzise. Asi kudai ngokudzodza kwake kunomudzidzisa ngezviro zveshe, nazvo igwinyiso, asikunyepapi, kudai ngezvekwakamudzidzisa, munogara mukati mwake. Zvino, vana vadoko, garai mukati mwake, kuti apo echizooniswa, isusu tiite vakashinga, tisikatsveruki pamberi pake mukuuya kwake. Kudai mwechizia kuti iye wakarurama, munozia kuti veshe vanoita zvakarurama vakabarwa ndiye. Ringirai kukuranyi kworudo rwaakatipa Baba, kuti tidaidzwe kuti tiri vana vaMwari; ndizvo tiri vakadaro. Ngeiyi ndaa nyika aitizii ngokuti aizi kumuzia. Vanodikanwa, zvino tiri vana vaMwari; akusati kwaoniswa kuti tinozoita vakadini. Asi tinozia kuti apo iye paanooniswa tinozodai ndiye, ngokuti tinozomuona kudai ngezvaari azvo. Munhu weshe uneiri gonda mukati mwake unodzichenesa, kudai ndiye wakachena. Munhu weshe unoita zvishaishi unogura Mipango, ngokuti chishaishi kugura Mipango. Nemwi munozia kuti iye wakaoniswa kuti aduse zvishaishi, mukati mwake amuna kushaisha. Munhu weshe unogara mukati mwake aashaishi; uwo unoshaisha aazi kumuona nokuti kumuzia. Vana vadoko, musatendera munhu kuti amupause. Weshe unoita zvakanaka wakarurama, kudai ndiye wakarurama. Weshe unoshaisha mwana waDhiabhorosi; ngokuti Dhiabhorosi unondoshaisha kubvira pakutanga. Ngeiyi ndaa Mukororo waMwari wakaoniswa kuti aparadze mishando yaDhiabhorosi. Munhu weshe wakabarwa ndiMwari aashaishi, ngokuti mbeu yaMwari inogara mukati mwake; aakoni kushaisha, ngokuti wakabarwa ndiMwari. Vana vaMwari nevaDhiabhorosi vanooniswa ngenjira iyi; munhu weshe usikaiti zvakarurama aabvi kunaMwari akadi, nokuti uwozve usikadi hama yake. Ngokuti iri ndiro shoko remwakazwa kubvira pakutanga, rokuti tinosisira kuti tidanane, tisikadai ndiKheni, uwo waiya wowakashata, akauraya munun'una wake. Wakamuurairenyi? Ngokuti mishando yake yaiya yakashata neyomunun'una wake yaiya yakarurama. Musashama, hama, kuti nyika yechimunyenya. Tinozia kuti takabva murufu kuenda mukupona, ngokuti tino rudo kuhama. Iye usina rudo unogara murufu. Munhu weshe unonyenya hama yake muurayi, nemwi munozia kuti akuna muurayi unokupona kusikaperi kunogara mukati mwake. Ngeiyi ndaa tinozia rudo, ngokuti iye wakaisa pashi kupona kwake ngendaa yedu; nesu tinosisira kuti tiise pashi kupona kwedu ngendaa yehama. Asi kudai uno upfumi hwomunyika echiona hama yake iri mukutama, echikonyera nyasha dzake kwaari, rudo rwaMwari rungaita magarirenyi mukati mwake? Vana vadoko, tisada ngeizwi nokuti ngokuereketa, asi ngezviito negwinyiso. Ngeichi tinozozia kuti tinobva mugwinyiso, techigwinyisa mwoyo yedu pamberi pake, naapo kudai mwoyo yedu yechitiitira ndaa; Mwari uri mukuru kupinda mwoyo yedu, naye unozia zviro zveshe. Vanodikanwa, kudai mwoyo yedu isikatiitiri ndaa, tinokushinga pamberi paMwari; nesu tinoashira kunyazwi chiinyi chetinokumbira kubva kwaari, ngokuti tinongwarira mipango yake nokuita izvo zvinomudakadza mukuona kwake. Uyu ndiwo mupango wake, kuti titende zina roMukororo wake Jesu Kristu nokudanana umwe kunoumweni, kudai ngezvaakatipanga. Weshe unongwarira mipango yake unogara mukati mwake, naye unogara mukati mwake; ngendaa iyi tinozia kuti iye unogara mukati mwedu, ngoMweya uwo waakatipa. Vanodikanwa, musatenda mweya yeshe, asi edzai mweya muone kuti inobva kunaMwari; ngokuti vaprofeti vazhinji vokunyepa vakabuda kuenda munyika. Ngeichi munozia Mweya waMwari: mweya weshe unotenda kuti Jesu Kristu wakauya munyama unobva kunaMwari, nomweya weshe usikatendi Jesu aubvi kunaMwari akadi. Nouyu ndiwo mweya wegaa raKristu, womwakazwa kuti unouya, nazvino waamunyika. Vana vadoko, imwimwi munobva kunaMwari, mwakavanyisa; ngokuti uwo uri mukati mwenyu wakakura kupinda umwo uri munyika. Vanobva munyika; ndizvo vanoereketa ngezvinobva munyika, nenyika inovazwa. Isusu tinobva kunaMwari. Uwo unomuzia Mwari, unotizwa, nouwo usikabvi kunaMwari aatizwi. Pane izvi tinozia mweya wegwinyiso nomweya wokunyepa. Vanodikanwa, ngatidanane, ngokuti rudo runobva kunaMwari, nomunhu weshe unorudo wakabarwa ndiMwari, unomuzia Mwari. Uwo usina rudo aamuzii Mwari, ngokuti Mwari uri rudo. Rudo rwaMwari rwakaoniswa kwetiri ngenjira iyi; Mwari wakatuma Mukororo wake munyika wakabarwa ari ega, kuti tiponeswe kubudikidza ndiye. Rudo ruri muneichi, haiwa kuti isusu takamuda Mwari, asi kuti iye wakatida, akatuma Mukororo wake kuti aite muripo wezvishaishi zvedu. Vanodikanwa, kudai Mwari akatida kudaro, tinosisira kuti isusu tidanane. Akuna munhu wakamboona Mwari; kudai techidanana, Mwari unogara mukati mwedu, norudo rwake runoita rwakaperera mukati mwedu. Ngeichi tinozia kuti tinogara mukati mwake, naye unogara mukati mwedu, ngokuti wakatipa Mweya wake. Nesu takaona, tinopupura kuti Baba vakatuma Mukororo wavo kuti aite Muponesi wenyika. Mwari unogara mukati mwaavo vanotenda kuti Jesu mukororo waMwari, navo vanogara mukati mwaMwari. Ndizvo tinozia nokutenda rudo rwaanarwo Mwari kwetiri. Mwari rudo, nouwo unogara murudo unogara mukati mwaMwari, naMwari unogara mukati mwake. Ngeichi rudo runoitwa rwakaperera kwetiri, kuti tiite vakashinga ngezuva rokutongwa, ngokuti kudai ngezvaari azvo iye, nesu takadarowo munyika muno. Amuna kutya murudo, asi rudo rwakaperera runodzinga kutya; ngokuti kutya kunamaharura, asi uwo unotya aazi kuperera murudo. Tinoda ngokuti iye wakatanga kutida. Kudai aripo munhu unoti, “Ndinomuda Mwari,” naye echinyenya hama yake, munyepi; ngokuti uwo usikadi hama yake yaanoona, aangamudi Mwari waasikazi kumboona. Nouyu ndiwo mupango wetinawo kubva kwaari, kuti uwo unomuda Mwari, ngaadewo hama yake. Munhu weshe unotenda kuti Jesu ndiKristu, wakabarwa ndiMwari, nomunhu weshe unoda wakabara, unodazve mwana wakabarwa. Ngeichi tinozia kuti tinoda vana vaMwari, apo techida Mwari nokungwarira mipango yake. Ngokuti rudo rwaMwari ngourwu, kuti tingwarire mipango yake. Nemipango yake aidzimbiri, ngokuti kunyazwi ngechiri chakabarwa ndiMwari chinonyisa nyika. Nouku ndikwo kunyisa kwakanyisa nyika, ndikwo kugonda kwedu. Ndiani uwo unonyisa nyika kwega uwo unotenda kuti Jesu Mukororo waMwari? Uyu ndiye wakauya ngemvura nengazi, ndiJesu Kristu; aazi kuuya ngemvura yega, asi ngemvura nengazi. Mweya ndiwo unopupura, ngokuti Mweya igwinyiso. Ngokuti varipo vatatu vanopupura, ndiMweya, mvura nengazi, naavo vatatu vanotenderana chiro chimwe. Kudai techiashira uchapupu hwevanhu, uchapupu hwaMwari hwakapinda kukura; ngokuti uhwu ndihwo uchapupu hwaMwari hwaakapupura ndihwo ngendaa yoMukororo wake. Iye unotenda Mukororo waMwari uneuchapupu mukati mwake. Iye usikatendi Mukororo waMwari unomuita munyepi, ngokuti aazi kutenda uchapupu hwaakapupura Mwari ngendaa yoMukororo wake. Nouhwu ndihwo uchapupu, kuti Mwari wakapa kwetiri kupona kusikaperi, noukwo kupona kuri muMukororo wake. Kunyazwi ndiani uno Mukororo uno kupona; nouwo usina Mukororo waMwari, aana kupona. Ndanyora izvi zviro kwomuri imwimwi vanotenda muzina roMukororo waMwari, kuti muzie kuti munakwo kupona kusikaperi. Ndikwo kushinga kwetinakwo mwaari, kuti kudai techikumbira chiro kunyazwi ngechiri ngokuda kwake, iye unotizwa. Kudai techizia kuti unotizwa munecheshe chetinokumbira, tinozia kuti taanacho chetakakumbira kwaari. Kudai munhu echiona hama yake yechiita chishaishi chisiri chokufa, iye unozokumbira, naMwari unozomupa kupona, kunopuwa vasikaiti chishaishi chokufa. Chiripo chishaishi chokufa; ngeichi andironzi kuti akumbire ngendaa yacho. Kweshe kusikarurama kushaisha, kuripozve kushaisha kusiri kwokufa. Tinozia kuti munhu weshe wakabarwa ndiMwari aashaishi, asi uwo wakabarwa ndiMwari unomungwarira, nouwo wakashata aamugwami. Tinozia kuti tiri vana vaMwari, nenyika yeshe inogara pashi pesimba rouwo wakashata. Nesu tinozia kuti Mukororo waMwari wakauya, akatipa kuzwisisa kuti tizie uwo unegwinyiso; nesu tiri mukati mwouwo uri gwinyiso, mukati mwoMukororo wake Jesu Kristu. Uyu ndiye Mwari wegwinyiso nokupona kusikaperi. Vana vadoko, dzingwarirei kubva kumiedzaniso yokudira. Musharuka kunamai vakatsanangurwa nevana vavo, avo vendinoda mugwinyiso, andinipi ndega asi naavo veshe vanozia gwinyiso, ngendaa yegwinyiso rinogara mukati mwedu, naro rinozogara nesu mhera nariini. Nyasha nokukungurirwa nokunyarara ngazvigare nesu zvechibva kuna Mwari Baba nokubva kunaJesu Kristu, Mukororo waBaba mugwinyiso nomurudo. Ndinodakara kakurutu ngokuti ndakaona vamweni vevana venyu vechihamba mukati mwegwinyiso, kudai ngezvetakaashira mupango kubva kunaBaba. Asi zvino, mai, ndinomupota haiwa kudai ngounonyora kwomuri mupango mutsva, asi wetaiya nawo kubvira pakutanga, kuti tidanane. Nourwu ndirwo rudo, kuti tihambe kudai ngemipango yake; uyu ndiwo mupango kudai ngezvemwakauzwa kubvira pakutanga; munosisira kuhamba mukati mwawo. Ngokuti vachengedzeri vazhinji vakabuda kuenda munyika, avo vasikatendi kuti Jesu Kristu wakauya munyama; uyu ndiye muchengedzeri negaa raKristu! Dzingwarirei, kuti musazorashikirwa ngezvetakashanda, asi kuti muashire musharo wakaperera. Munhu weshe unotungamirira vamweni asikagari muzvidzidziso zvaKristu, aana Mwari; uwo unogara muzvidzidziso unavo veshe, Baba noMukororo. Kudai aripo munhu echiuya kwomuri asikaunzi uku kudzidzisa, musazomuashira mumhatso dzenyu, zve, musazomuchingamidza; ngokuti uwo unomuchingamidza unokowerana naye mumishando yake yakashata. Ndinyari nezvizhinji zvokunyora kwomuri, andisisiri kuzvinyora papepa ngeinki; asi ndinogonda kuti ndichauya kwomuri nokuereketa techipingurana ngomuromo, kuti kudakara kwedu kuzadzisike. Vana vehama yenyu yakatsanangurwa vanomutambisa. Musharuka kunaGaiusi unodikanwa, wendinoda mugwinyiso. Unodikanwa, ndinokukumbira kuti ngezviro zveshe ubudirire ugwinye, kudai ngezvounobudirira mweya wako. Ngokuti ndakadakara kakurutu apo hama pedzakauya dzechipupura ngegwinyiso rako, kudai ngezvounohamba mugwinyiso. Andina kudakara kunopinda uku kukura, kuzwa ngokuhamba kwevana vangu mugwinyiso. Unodikanwa, unoita mushando ngokugondeka ngeizvo zveshe zvounoitira hama, kakurutu kuvapfumba; vakapupura ngorudo rwako pamberi pechiara. Uchanasa kuti wechivaendesa mumuhambo wavo ngenjira inosisira Mwari; ngokuti ngendaa yeiro zina vakabuda kuenda, vasikatori chiro kubva kunevemadzinza. Ndizvo tinosisira kuashira vakadaro, kuti tiite vashandi pamwepo navo mugwinyiso. Ndakanyorera kuchiara, asi Dhiotrefesi, uwo unoda kuita mukuru pakati pavo, aatiashiri. Ndizvo kudai ndechiuyeyo, ndicharingisisa yaamho mishando yake yaanoita echitireya ngemazwi akashata. Asikagutiswi ndizvo izvo, unoramba kuashira hama, naavo vanoda kuvaashira, unovarambidza nokuvadzinga kubva muchiara. Unodikanwa, usaedzerera icho chakashata, asi edzerera icho chakanaka. Kunyazwi ndiani unoita zvakanaka unobva kunaMwari; kunyazwi ndiani unoita zvakashata aazi kumuona Mwari. Dhemetriusi unopupurirwa zvakanaka ngevanhu veshe, negwinyiso remene naro. Nesuwo tinopupura ndiye, newe unozia kuti uchapupu hwedu hunegwinyiso. Ndinazvo zvizhinji zvokukunyorera, asi andidi kuti ndizvinyore kwouri ngechibhariso; asi ndinogonda kuti ndinozokasira kukuona, nesu tinozoereketa techipingurana ngomuromo hope kuhope. Kunyarara ngakugare kwouri. Hama dzedu dzinokutambisa. Chingamidza hama imwe ngaimwe ngezina rayo. Judha, muranda waJesu Kristu, hama yaJakobe, ndinonyorera kwavari vakadaidzwa, vanodikanwa munaMwari Baba, vanongwaririrwa Jesu Kristu. Nyasha, kunyarara norudo ngazviwanzwe kwomuri. Vanodikanwa, apo ndechidisisa kakurutu kunyora kwomuri ngendaa yoruponeso ruri kwetiri teshe, ndakaona kuti zvinosisira kunyora kwomuri, ndechimupota kuti murwire kakurutu kutenda kwakapuwa kamwe kune vakacheneswa. Ngokuti varipo vamweni vakapotera ngokufishika pakati penyu, vanhu vakaemeserwa karetu kuti vaone uku kurashwa, vanhu vasikadiri Mwari, avo vanokunukudza nyasha dzaMwari wedu kuita kuemura kwakashata, vechiramba Tenzi wedu ega naMambo wedu Jesu Kristu. Zvino ndinoda kumukarakadzisa, kunyazwi mwakaziiswa zveshe, kuti Mambo wakaponesa vanhu kubva munyika yeEgipite, asi ngesure kweizvi wakaparadza vasikazi kutenda. Nengirosi idzo dzisikazi kugara mundau yadzo, asi dzakasiya ugaro hwadzo hwaidzisisira, wakadzingwarira muzvisungo zvisikaperi pashi pechidima metsa rigume Zuva guru rokutongwa. Kudai ngeSodhoma neGomora nemadhorobha akatendenedza, awo ngenjira imweyo vakadzipira mukuomba, vakadziisa mukuemura kwakashata yaamho, kwakaemeswa kuita chionero chokutambudzika ngokuororwa ngomuriro wemhera nariini. Asi ngenjira imweyo varoti vehope vanosvipisa nyama vechiramba umambo nokutuka vanouthende. Asi Mikhaeri, ngirosi huru apo peyairwa naDhiabhorosi, yechiphikisa ngendaa yomuiri waMosi, yakatya kumuitira ndaa, asi yakati, “Mambo ngaakutuke!” Asi ava vanhu vanotuka ngezviro zvevasikazwisisi ngechibarirwe, vanoparadzwa ngeizvo zviro zvevanozia, kudai ngemhuka dzisina mipinimidzo. Kushatanyi kwevanakwo! Ngokuti vakahamba ngenjira yaKheni, vakadzirasha pachavo mukupauka kwaBharamu kuti vaone kuuyirwa, vakaparadzwa mukumukira kwaKhora. Ava vanhu zvitsverudzo mumadhiri enyu orudo, apo pevanodya nemwi vasikatyi, vanodzigutsa pachavo; makore asina mvura, anovhuvhutwa kweshe ngedutu; miti yepachando, isina michero, yakafa kairi, yakabvitwa nenzinde; mafungu oruandhle anopenga, echibudisa mafuro okutsveruka kwavo; nyeredzi dzinopepesheka, vakangwarirwa muudzamu hwokusvipa kwechidima mhera nariini. Enokhi mubarirwana wechinomwe kubva kunaAdhamu wakaprofeta echiti, “Ringirai, Mambo wakauya nevakacheneswa vake vakawandisisa, kuti atonge veshe nokunyisa veshe vasikadiri Mwari ngemishando yavo yeshe yevakaita ngokusikadira Mwari, nezviro zveshe zvakakonza zvakaereketwa ngevashaishi vasikadiri Mwari.” Ava vavhuruvhuti nevasikagutswi, vechihamba kudai ngokuemura kwavo; nemiromo yavo inoereketa mazwi makuru okudzikudza, vechikudza vanhu kuti vaone kufumiswa. Asi imwimwi, vanodikanwa, munosisira kukarakadza mazwi akamboereketwa ngevapostori vaMambo wedu Jesu Kristu. Vakati kwomuri, “Ngomukuwo wokugumisira kunozoapo vaiti vejee, vanohamba kudai ngokuemura kwavo vasikadiri Mwari.” Ava ndivo vanoita miparadzaniso nevamweni, ngevenyama vasina Mweya. Asi imwimwi, vanodikanwa, mwechidziaka pachenyu padera pokutenda kwenyu kwakachenesesa, mwechikumbira muMweya Wakachena; dzingwarirei murudo rwaMwari; mwechirindira nyasha dzaMambo wedu Jesu Kristu, dzinomuunza mukupona kusikaperi. Muitire nyasha vamweni vanogononda; muponese vamweni, mwechivabvuka kubva mumuriro; nevamweni mwechivaitira nyasha ngokutya, mwechinyenya nezvokufuka zvakasvipiswa nokuitwa maara ngenyama. Zvino kwaari unesimba rokumungwarira kubva mukuwa nokumuemesa pamberi pouthende hwake musina ndaa ngokudakara, kunaMwari ega Muponesi wedu, kubudikidza ndiye Jesu Kristu Mambo wedu, kwaari ngakuwe nouthende, umambo, simba nokutonga, nguva isati yaapo nazvino nemhera nariini. Ameni. Chakapangidzirwa chaJesu Kristu, chaakapuwa ndiMwari kuti apangidzire varanda vake izvo zvinosisira kuitika ngokukasira; naye wakaita kuti zviziikanwe ngokutumira ngirosi yake kumuranda wake Johani, uwo wakapupurira izwi raMwari nouchapupu hwaJesu Kristu, echironza zveshe zvaakaona. Unomuchena uwo unodzidza ngokudaidzira mazwi omuprofeti, vanomuchena avo vanoazwa naavo vanongwarira zvakanyorwamwo; ngokuti nguva yaapasinde. Johani kuzviara zvinomwe zviri muAsi. Nyasha ngadzia kwomuri nokunyarara, zvinobva kunouwo uripo, waiyapo nounouya, nokunobva kumweya minomwe iri pamberi pedendemaro rake; nokunobva kunaJesu Kristu uri chapupu chakagondeka, dangwe rokumuka kwevakafa, nomutongi wemadzimambo enyika. Kwaari uwo wakatida, akatisunhura kubva kuzvishaishi zvedu ngengazi yake, akatiita voumambo nevapristi kunaMwari naBaba ake, kwaari ngakuapo uthende nokutonga mhera nariini nariini. Ameni. Ringirai! Unouya nemakore; nemadziso eshe anozomuona, naavozve vakamubaya; nemadzinza eshe enyika anozobonda ngendaa yake. Eya, Ameni. “Ndini Arfa naOmega,” unoronza Mambo Mwari, uwo uripo, waiyapo nounouya, Unesimbareshe. Inini, Johani, hama yenyu yomunokoanisirana nayo munaJesu mumadambudziko nomuumambo nokusengerera, ndaiya pachiwi chinozwi Phatimosi ngendaa yeizwi raMwari neyouchapupu hwaJesu. Ndaiya ndiri muMweya ngezuva raMambo, ndakazwa sure kwangu izwi guru rairira kudai ngokurira kwehwama, rechiti, “Nyora mubhuku izvo zvounoona, uritumire kuzviara zvinomwe, kuEfesu, kuSimirna, kuPhergamumu, kuThiatira, kuSardhisi, kuFiradherifia nokuRaodhisia.” Naapo ndakakunukuka kuti ndione izwi raiereketa kwendiri, ndechikunukuka ndakaona zvigadzikiro zvezvibani zvinomwe zvomukore, nepakati pezvigadzikiro zvezvibani ndakaona umwe wakadai ngoMukororo woMunhu, akapfeka chokufuka chakaguma kutsoka nediti rake rakasungwa ngebhande romukore. Soro rake nebvudzi rake zvakachena kudai ngemamviri egwai, zvakachena kudai ngechando; madziso ake akadai ngomurazvu womuriro, tsoka dzake dzakadai ngethusi rinon'anikira, apo ranyunguruswa muchoto, neizwi rake raidai ngechaungu chemvura yakawanda. Munyara yake yokumudyo waiya akabata nyeredzi nomwe, kubva pamuromo wake pakabuda shoti inopinza inoupanga huiri, nehope yake yain'anikira kudai ngezuva rinojeka ngesimba reshe. Naapo ndamuona, ndakawa patsoka dzake kudai ngewafa. Naapo wakaisa nyara yake yokumudyo padera pangu echiti, “Usatya; ndini muambi nemagumo, ndini umwe unopona. Ndaiya ndafa, wona, ndinopona mhera nariini nariini, neni ndine makiyi orufu neeHaidhesi. Zvino nyora zviro zvawaona, zviripo nezvinozoitika sureni. Kudai ngezvakafishika zvenyeredzi nomwe dzawaona munyara yangu yokumudyo, nezvigadzikiro zvezvibani zvinomwe zvomukore, nyeredzi nomwe ingirosi dzezviara zvinomwe nezvigadzikiro zvezvibani zvinomwe zviri zviara zvinomwe. “Nyorera ngirosi yechiara chiri muEfesu wechiti: ‘Aya ndiwo mazwi ouwo unobata nyeredzi nomwe munyara yake yokumudyo, unohamba pakati pezvigadzikiro zvezvibani zvinomwe zvomukore.’ “Ndinozia mishando yako nokutambudzika kwako nokusengerera kwako. Ndinozia kuti autenderi vaiti vezvakashata; newe wakavaedza vanodzidaidza kuti vapostori, asi andivopi, wakavaona kuti vanyepi. Ndinoziazve kuti iwewe unotsamwirira mukusengerera ngendaa yezina rangu, newe auzi kupera simba. Asi ndinokushoora ngeichi, kuti wakasiya rudo rwako rwokutanga. Ndizvo karakadza apo powakawa; utenderuke, uite mishando yowakaita kutanga. Kuti usikaiti kudaro, ndinozouya kwouri ndiduse chigadzikiro chechibani chako kubva pandau pacho, asi kuti ukatenderuka. Asi ichi unacho, chokuti unonyenya mishando yevaNikoraitisi, yendinonyenyawo. Iye unenzee ngaazwe zvinoereketwa ndiMweya kuzviara. Kwaari unonyisa, ndinozomutendera kuti adye kumuti wokupona uri muPharadhaisi raMwari. “Nyorera ngirosi yechiara chiri muSimirna wechiti: ‘Aya ndiwo mazwi ouwo wokuamba nowokugumisira, uwo wakafa, akamukazve.’ “Ndinozia dambudziko rako nourombo hwako, (asi uri gurudza,) nokutuka kwaavo vanoti vari vaJudha, asi andivopi, asi ngevemhatso yokudira yaSathani. Usatya izvo zvounozotambudzika ndizvo. Wona, Sathani woda kubata nokupotedza vamweni venyu mutirongo, kuti muedzwe, nemwi munozoa nedambudziko pamazuva gumi. Ita unogondeka metsa mukufa, neni ndinozokupa dzungudza rokupona. Iye unenzee ngaazwe zvinoereketwa ndiMweya kuzviara. Iye unonyisa aazoremadzwi ngokufa kwechipiri. “Nyorera ngirosi yechiara chiri muPhergamumu wechiti: ‘Aya ndiwo mazwi ouwo uneshoti inopinza inoupanga huiri.’ “Ndinozia pounogara, ndipo pane dendemaro raSathani; newe unobatisisa zina rangu, auzi kuramba kutenda kwako mwendiri, kunyazwi kumazuva aAntiphasi chapupu changu, wakagondeka wangu, wakaurawa pakati penyu, paanogara Sathani. Asi ndinokushoora ngezviro zvishomani: ngokuti unavo vamweni vanobatisisa zvidzidziso zvaBharamu, uwo wakadzidzisa Bharaki kuisa chipumhuniso pamberi pevana vaIsuraeri kuti vadye zvakadirwa zvimwari nokuita vanoomba. Ngokudarozve unavo vamweni vanobatisisa zvidzidziso zvevaNikoraitisi. Zvinopano tenderuka. Kuti usikaiti kudaro, ndinozouya kwouri ngokukasira, ndirwe navo ngeshoti yomuromo wangu. Iye unenzee ngaazwe zvinoereketwa ndiMweya kuzviara. Kwaari unonyisa ndinozomupa imweni yemana yakafishika, ndinozomupazve buwe rakachena, nepadera pebuwe pakanyorwa zina idzva, risikaziikanwi ngoumweni kwega ngouwo unoriashira. “Nyorera ngirosi yechiara chiri muThiatira wechiti: ‘Aya ndiwo mazwi ouwo Mukororo waMwari, uwo unemadziso akadai ngomurazvu womuriro, netsoka dzake dzakadai ngethusi rapukutwa rinon'anikira.’ “Ndinozia mishando yako, rudo rwako, kutenda kwako, kushandira kwako nokusengerera kwako, nokuti mishando yako yokugumisira yakakura kupinda yokutanga. Asi ndinokushoora ngeichi, kuti unotendera mukadzi Jezebheri, uwo unoti uri muprofeti wechikadzi pachake, naye unodzidzisa nokupausa varanda vangu kuti vaombe nokudya zvakadirwa miedzaniso yokudira. Neni ndakamupa nguva yokuti atenderuke, asi unoramba kutenderuka kubva mukuomba kwake. Wona, ndinozomukandira mumubhedhi, naavo vanoomba naye mudambudziko gurutu, kuti vasikatenderuki kumishando yake. Neni ndinozouraya vana vake vafe. Nezviara zveshe zvinozozia kuti inini ndini ndinotsvakisisa mupinimidzo nomwoyo, neni ndinozomupa umwe ngaumwe kudai ngemishando yake. Asi ndinoti kwomuri, imwimwi mwakasara muThiatira, avo vasina uku kudzidziswa, vasikazi kuzia izvo zvinodaidzwa ngevamweni kuti udzamu hwaSathani, ‘Andizomutwarisi mutwaro umweni.’ Asi batisisai izvo zvomunazvo metsa ndauya. Nouwo unonyisa nokuangira kuita mishando yangu metsa pakugumisira, “Ndinozomupa simba padera pemadzinza, naye unozoatonga ngendonga yesimbi, kudai ngehari dzomuumbi dzinoputswa kuita zviwenda; kunyazwi inini pachangu ndakaashira simba kubva kunaBaba angu. Neni ndinozomupa nyeredzi yemambakwedza. Iye unenzee ngaazwe zvinoereketwa ndiMweya kuzviara. “Nyorera ngirosi yechiara chiri muSardhisi wechiti: ‘Aya ndiwo mazwi ouwo unemweya minomwe yaMwari nenyeredzi nomwe.’ “Ndinozia mishando yako; unezina rokuti unopona, asi wakafa. Muka, ugwinyise izvo zvasara zvodo kufa, ngokuti andizi kuona mishando yako yakaperera pamberi paMwari wangu. Zvino karakadza maashirire nokuzwa kwowakaita, uzvingwarire nokutenderuka. Kudai usikamuki, ndinozouya kudai ngembavha, newe auzozii awa rendinozouya ndiro kwouri. Asi unemazina mashomani muSardhisi eavo vasikazi kusvipisa zvokufuka zvavo; navo vanozohamba neni, vakasimira zvakachena, ngokuti vanosisira. Iye unonyisa unozopfekedzwa kudai ndivo ngezvokufuka zvakachena, neni andizodzimi zina rake mubhuku rokupona; ndinozopupura ngezina rake pamberi paBaba angu nepamberi pengirosi dzake. Iye unenzee ngaazwe zvinoereketwa ndiMweya kuzviara. “Nyorera ngirosi yechiara chiri muFiradherifia wechiti: “Aya ndiwo mazwi ouwo wakachena, unegwinyiso, unekiyi raDhavhidha, uwo unobeura akuna unozokonya, naye akonya akunazve unobeura. “Ndinozia mishando yako. Wona, ndakaisa pamberi pako musiwo wakabeurwa, akuna munhu ungakona kuukonya. Ndinozia kuti iwewe une simba doko, asi wakangwarira izwi rangu, auzi kuramba zina rangu. Wona, ndinokupa vamweni vemhatso yokudira yaSathani avo vanodziti vaJudha vasivopi, asi vanonyepa; wona, ndinozoita kuti vauye vagwadame pamberi petsoka dzako, navo vanozozia kuti inini ndakakuda. Ngokuti wakangwarira izwi rangu rokusengerera, neni ndinozokungwarira kubva kuawa rokutambudzika rinouya padera penyika yeshe, kuedza avo vanogara munyika. Ndinokasira kuuya; batisisa chounacho, kuti asazoapo naumwe unozokutorera dzungudza rako. Iye unonyisa ndinozomuita sika mutemperi raMwari wangu; aachazobudimwo. Ndinozonyora padera pake zina raMwari wangu nezina redhorobha raMwari wangu, Jerusarema idzva rinodzaka kubva mudenga kunaMwari wangu, nezina rangu idzva. Iye unenzee ngaazwe zvinoereketwa ndiMweya kuzviara. “Nyorera ngirosi yechiara chiri muRaodhisia wechiti: ‘Aya ndiwo mazwi ouwo uri Ameni, chapupu chakagondeka chine gwinyiso, maambo ezvisikwa zvaMwari.’ “Ndinozia mishando yako, kuti autonhori nokuti kupisha. Ndinoda kuti utonhore nokuti upishe! Ndizvo, ngokuti unodzia, usikapishi nokuti kutonhora, ndinozokurutsa mumuromo wangu. Ngokuti unoti, ‘Ndiri gurudza, ndakapfuma, anditami chiro;’ usikazii kuti unenhamo nounotambudzika, uri murombo, bofu nomutitinini. Ndinokupanga kuti utenge kubva kwendiri mukore wakanyunguruswa ngomuriro kuti uite gurudza; nezvokufuka zvakachena kuti udzifukidze, kuti kutsveruka kwoutitinini hwako husazooneka; nomutombo wokudzodza madziso kuti uone. Avo veshe vendinoda, ndinovaganyira nokuvaorora; ndizvo tsamwirira utenderuke. Wona, ndinoema pamusiwo nokudododza; kudai aripo munhu unorizwa izwi rangu nokubeura musiwo, ndinozopotera mwaari, ndidye naye, naye adye neni. Iye unonyisa, ndinozomuita kuti agare neni padendemaro rangu, kudai ndini ndakanyisawo, ndikagara naBaba angu padendemaro ravo. Iye unenzee ngaazwe zvinoereketwa ndiMweya kuzviara.” Ngesure kweizvi ndakaringira, wona, musiwo wakabeurwa mudenga! Neizwi rokutanga rendakazwa rechiereketa kwendiri rakadai ngokurira kwehwama rakati, “Kwira pano, ndinozokupangidzira izvo zvinosisira kuitika sure kweizvi.” Paripo ndakabatwa ndiMweya; wona, mudengamwo ndakaona chigaro choumambo, nepadera pacho paigara umwe. Nouwo waigarapo kuringirika kwake kwaiya kwakadai ngebuwe rejasipa nerekarneriani, kwaiyapozve utahwadande hwechitendenedza chigaro choumambo, hwairingirika hwakadai ngebuwe reemeraridhi. Kutendenedza chigaro choumambo zvaiyapo zvigaro zvoumambo makumi mairi nemarongomuna, nepadera pezvigaro zvoumambo paigara vakuru makumi mairi nevarongomuna, vakapfeka zvokufuka zvakachena nemadzungudza omukore pamasoro avo. Pachigaro choumambo pakabuda kupenya kwemheni nemazwi nokutinhira. Pamberi pechigaro choumambo paibaka zvibani zvinomwe zvomuriro zviri mweya minomwe yaMwari; nepamberi pechigaro choumambo pane ruandhle rwakadai ngebuwe regirazi. Nepakati pechigaro choumambo nokuchitendenedza zvaiyapo zvisikwa zvinopona zvirongomuna, zvakazara ngemadziso mberi nesure. Chisikwa chinopona chokutanga chaiya chakadai ngemhondoro, nechisikwa chinopona chechipiri chaiya chakadai ngomukono wen'ombe, nechisikwa chinopona chechitatu chaiya chine hope yakadai ngeyomunhu, nechisikwa chinopona chechirongomuna chaiya chakadai ngegodzi rinombururuka. Nezvisikwa zvinopona zvirongomuna chimwe ngachimwe chazvo chaiya nemaphaphiro matanhatu, zvakazara madziso kutenderera kubanze nomukati; nazvo azvizi kuzorora kuemba masikati nousiku zvechiti, “Wakachena, Wakachena, Wakachena, Mambo Mwari Unesimbareshe, waiyapo, uripo nounouya!” Naapo zvisikwa zvinopona zvakudza, zvaremeredza nokubonga kwaari unogara pachigaro choumambo, unopona mhera nariini nariini, vakuru makumi mairi navarongomuna vanozowa pashi pamberi pouwo unogara pachigaro choumambo, nokumudira uwo unopona mhera nariini nariini, navo vanozokandira madzungudza avo vechiemba pamberi pechigaro choumambo vechiti, “Munosisira, imwimwi Mambo wedu naMwari wedu, kuashira kukudzwa nokuremeredzwa nesimba, ngokuti mwakasika zviro zveshe, ngokuda kwenyu zvakaapo nazvo zvakasikwa.” Zvino ndakaona munyara yokumudyo youwo wakagara pachigaro choumambo bhuku rakanyorwa mukati nokubanze, rakanamirwa ngezvinamiro zvinomwe; neni ndakaona ngirosi inesimba yechidaidzira ngeizwi gurutu yechiti, “Ndiani unosisira kubeura bhuku nokupwanya zvinamiro zvaro?” Asi mwaiya musina naumwe mudenga nokuti panyika nokuti pashi penyika waikona kubeura bhuku nokuti kuriringira. Ndakachema kakurutu ngokuti mwaiya musina naumwe wakaoneka akasisira kubeura bhuku nokuti kuriringira. Zvino umwe wevakuru wakati kwendiri, “Usachema. Wona, Mhondoro yorudzi rwaJudha, Runzinde rukuru rwaDhavhidha, rwanyisa, ndizvo unokona kubeura bhuku nezvinamiro zvinomwe zvaro.” Zvino ndakaona pakati pechigaro choumambo nepezvisikwa zvinopona zvirongomuna nepevakuru raiya rakaemapo Gwai rakadai ngerakaurawa, raiya rine nyanga nomwe nemadziso manomwe, izvo zviri mweya minomwe yaMwari yakatumwa panyika peshe. Naye wakaenda, akatora bhuku kubva munyara yokumudyo youwo waigara pachigaro choumambo. Naapo atora bhuku, zvisikwa zvinopona zvirongomuna nevakuru makumi mairi navarongomuna vakawa pashi pamberi peGwai, umwe ngaumwe wavo waiya nechimadangari nendiro yakanasirwa ngomukore yakazara ngomutombo unegwema rakanaka, uri mikumbiro yevakacheneswa. Navo vakaemba ruyo rutsva vechiti, “Munosisira imwimwi kutora bhuku nokubeura zvinamiro zvaro, ngokuti imwimwi mwakaurawa, kubudikidza ngengazi yenyu mwakatengera Mwari vanhu kubva kumadzinza eshe nendimi dzeshe nevanhu veshe nokumarusinga eshe; nemwi mwakavaita voumambo nevapristi kunaMwari wedu, navo vanozotonga padera penyika.” Zvino ndakaringira, ndikazwa izwi rengirosi dzakawanda dzaiya dzakatendenedza chigaro choumambo nezvisikwa zvinopona nevakuru; nouwandu hwadzo hwaiya makumi nemakumi emakumi emazana, dzechiti ngeizwi guru, “Rakasisira Gwai iro rakaurawa kuashira simba, upfumi, ungwaru, kugwinya, kuremeredzwa, uthende nokukudzwa!” Ndakazwa zviro zveshe zvakasikwa zviri mudenga nezviri munyika nezviri pashi penyika nezviri muruandhle, nazvo zveshe zviri mukati mwazvo zvechiti, “Kwaari uwo unogara pachigaro choumambo nokuGwai ngakuapo kukudzwa, kuremeredzwa, uthende nokugwinya, mhera nariini nariini!” Nezvisikwa zvinopona zvirongomuna zvakati, “Ameni!” Nevakuru vakawa pashi, vakadira. Zvino ndakaona Gwai rabeura chimwe chezvinamiro zvinomwe, ndakazwa chimwe chezvisikwa zvinopona zvirongomuna chechiti ngeizwi raizwika rakadai ngomutinhiro rechiti, “Uya!” Ndakaringira, ndikaona hachi rakachena! Nomugadhi waro waiya nouta; wakapuwa dzungudza, naye wakabuda echinyisa nokuti anyise. Naapo abeura chinamiro chechipiri, ndakazwa chisikwa chinopona chechipiri chechiti, “Uya!” Nehachi rimweni rakabuda shava; nomugadhi waro wakapuwa simba rokudusa kunyarara kubva munyika, kuti vanhu vaurayane; naye wakapuwa shoti huru. Naapo abeura chinamiro chechitatu, ndakazwa chisikwa chinopona chechitatu chechiti, “Uya!” Ndakaringira, ndikaona hachi rakasvipa! Nomugadhi waro waiya nechipimo munyara yake. Ndakazwa chakarira chakadai ngeizwi chaibva pakati pezvisikwa zvinopona zvirongomuna chechiti, “Chipimo chekoroni chinotengwa ngedhenario, nezvipimo zvitatu zvebhare zvinotengwa ngedhenario, usashaishira mafuta nevhini!” Naapo abeura chinamiro chechirongomuna, ndakazwa izwi rechisikwa chinopona chechirongomuna chechiti, “Uya!” Ndakaringira, ndikaona hachi rakacheneruka! Nomugadhi waro zina rake ndiRufu, neHaidhesi zvakamuteera; nazvo zvakapuwa simba padera perupande rwechirongomuna rwenyika, rokuuraya ngeshoti, ngenzara, ngenhenda nezvikara zvomunyika. Naapo abeura chinamiro chechishanu, ndakaona ngepashi pearita mwoyo yaavo vakaurawa ngendaa yeizwi raMwari nendaa youchapupu hwavakapupura. Vakadaidzira ngeizwi gurutu vechiti, “Mambo Mwari Unesimbareshe, iwewe wakachena nounegwinyiso, munozogarira kwomukuwo wakadini kureba musati mwatonga nokuunzidzira ngazi yedu padera paavo vanogara munyika?” Vakapuwa umwe ngaumwe zvokufuka zvakachena, navo vakaronzerwa kuti vazorore mukuwo mudoko, metsa uwandu hwevamweni vavo varanda nehama dzavo hwaperera, avo vaisisira kuurawa kudai ndivo pachavo. Naapo abeura chinamiro chechitanhatu, ndakaringira, ndikaona kuzungunyika kukurutu kwenyika; nezuva rakasvipiswa kudai ngejira rokusvipa remamviri, nomwedzi weshe wakatsvuka kudai ngengazi, nenyeredzi dzomudenga dzakawira pashi panyika, kudai ngomuonde unoriga maonde awo pachando asikazi kuibva, apo wazungunyiswa ngedutu guru. Denga rakabviswa kudai ngebhuku apo rechipetwa, nomutunhu weshe nechiwi cheshe chakabviswa kubva pandau yacho. Zvino madzimambo enyika nevanhu vakuru, nduna huru dzehondo, makurudza nevakagwinya, veshe hloko nevakasunhurika, vakahwara mumapako nomumapuwe emitunhu, vechidaidzira kumitunhu nokumapuwe vechiti, “Tiwirenyi, mutifishe kubva kuhope youwo unogara pachigaro choumambo nokubva kuushungu hweGwai; ngokuti raguma zuva guru roushungu hwavo, ndiani ungakona kuema?” Ngesure kweizvi ndakaona ngirosi murongomuna dzakaema kumarutii marongomuna enyika dzakabata madutu marongomuna enyika kuti risaapo dutu rinofuridza panyika nokuti muruandhle nokuti padera pomuti weshe. Zvino ndakaona ngirosi imweni yechikwira kubva kumabvazuva, ine chinamiro chaMwari unopona, nayo yakadaidzira ngeizwi guru kungirosi murongomuna dzakapuwa simba rokushaishira nyika noruandhle, yechiti, “Musashaishira nyika nokuti ruandhle nokuti muti naumwe, metsa taisa chinamiro pahuma dzevaranda vaMwari wedu.” Ndakazwa uwandu hwaavo vakanamirwa, vaiya zana namakumi marongomuna namarongomuna emakumi emazana, vakaisirwa chinamiro kubva kudzinza rimwe ngarimwe revana vaIsuraeri: Kudzinza raJudha vakaisirwa chinamiro makumi emazana ari gumi namairi, (12,000) kudzinza raRubheni makumi emazana ari gumi namairi, (12,000) kudzinza raGadhi makumi emazana ari gumi namairi, (12,000) kudzinza raAsha makumi emazana ari gumi namairi, (12,000) kudzinza raNafitari makumi emazana ari gumi namairi, (12,000) kudzinza raManase makumi emazana ari gumi namairi, (12,000) kudzinza raSimeoni makumi emazana ari gumi namairi, (12,000) kudzinza raRevhi makumi emazana ari gumi namairi, (12,000) kudzinza raIsakha makumi emazana ari gumi namairi, (12,000) kudzinza raZebhuruni makumi emazana ari gumi namairi, (12,000) kudzinza raJosefa makumi emazana ari gumi namairi, (12,000) kudzinza raBhenjamini vakaisirwa chinamiro makumi emazana ari gumi namairi (12,000). Ngesure kweizvi ndakaringira, ndikaona mbungano huru isina munhu ungakona kuierenga, inobva kumadzinza eshe nemarusinga eshe nevevanhu veshe nevendimi dzeshe, vakaema pamberi pechigaro choumambo nepamberi peGwai, vakapfeka zvakachena, vane matai emijindwi munyara dzavo. Vakadaidzira ngeizwi guru vechiti, “Ruponeso runobva kunaMwari wedu uwo unogara pachigaro choumambo, nokuneGwai!” Nengirosi dzeshe dzakaema dzechitendenedza chigaro choumambo, nokutendenedza vakuru nezvisikwa zvinopona zvirongomuna; dzakawa pashi ngehope dzadzo pamberi pechigaro choumambo, dzakadira Mwari dzechiti, “Ameni! Kukudzwa, uthende, ungwaru, kubonga, kuremeredzwa, simba nokugwinya ngazvigare kunaMwari wedu mhera nariini nariini! Ameni.” Noumwe wevakuru wakabvunza echiti kwendiri, “Ndiani ava, vakapfeka zvokufuka zvakachena, vanobva kuri?” Ndikati kwaari, “Mambo wangu, ndimwi munozia.” Naye wakati kwendiri, “Ava ndivo vanobuda kubva mudambudziko gurutu; navo vakasuka zvokufuka zvavo, vakazvichenesa mungazi yeGwai. “Ndizvo vari pamberi pechigaro choumambo chaMwari, vanomushandira masikati nousiku mutemperi rake, nouwo unogara pachigaro choumambo unozovangwarira ngokuapo kwake. Avachazozwi nzara nokuti nyota; zve, zuva arichazovapishi nokuti kupisha kumweni; ngokuti Gwai riri pakati pechigaro choumambo rinozovausha nokuvatungamirira kuenda navo kuzvinyuka zvemvura yokupona, naMwari unozopukuta masodzi eshe kubva pamadziso avo.” Naapo abeura chinamiro chechinomwe, kwakaapo kunyarara mudenga mukuwo unoda kuguma pakati peawa. Zvino ndakaona ngirosi nomwe dzakaema pamberi paMwari, dzakapuwa hwama nomwe. Nengirosi imweni yakauya ikaema pasinde pearita, inechidziyo chomukore chokupishira mutombo unegwema rakanaka; yakapuwa mutombo wakawanda wokupisha unegwema rakanaka, kuti ipire padera pearita romukore raiya pamberi pechigaro choumambo pamwepo nemikumbiro yevakacheneswa veshe. Nechiushi chomutombo wokupisha unegwema rakanaka chakakwira, pamwepo nemikumbiro yevakacheneswa, pamberi paMwari chechibuda kubva munyara yengirosi. Zvino ngirosi yakatora chidziyo chokupishira mutombo nayo yakachizadza ngomuriro waibva paarita, ikaukandira padera penyika; kwakaapo kutinhira nemazwi makuru nemheni nokuzungunyika kwenyika. Zvino ngirosi nomwe dzaiya hwama nomwe dzakanasirira kudziridza. Ngirosi yokutanga yakaridza hwama yayo, kwakaapo matsanza nomuriro, zvakabvengedzwa nengazi, izvo zvakakandirwa padera penyika; norupande rwechitatu rwenyika rwakapishwa, norupande rwechitatu rwemiti rwakapishwa, nomwenje weshe muishi wakapishwa. Ngirosi yechipiri yakaridza hwama yayo, nechakadai ngomutunhu mukuru, chinobaka ngomuriro, chakakandirwa muruandhle. Norupande rwechitatu rworuandhle rwakaita ngazi, norupande rwechitatu rwezvisikwa zvinopona zvomuruandhle zvakafa, norupande rwechitatu rwengarava rwakaputswa. Ngirosi yechitatu yakaridza hwama yayo, nenyeredzi huru yakawa kubva mudenga, yechibaka kudai ngesasi, yakawira padera porupande rwechitatu rwendwizi nepadera pezvinyuka zvemvura. Zina renyeredzi rakazwi, Chinovava; norupande rwechitatu rwemvura rwakavaviswa, nevanhu vazhinji vakafa ngemvura iyo ngokuti yaivava. Ngirosi yechirongomuna yakaridza hwama yayo, norupande rwechitatu rwezuva rwakafurwa, norupande rwechitatu rwemwedzi, norupande rwechitatu rwenyeredzi, kuti rupande rwechitatu rwokujeka kwazvo kudzime; nemasikati asazojeka rupande rwawo rwechitatu nousiku ngokudaro. Zvino ndakaringira, ndikazwa godzi rechichema ngeizwi guru rechimbururuka pakati pomudenga rechiti, “Ihehe, ihehe, ihehe kwavari vanogara padera penyika, ngendaa yemazwi amweni ehwama dzengirosi nhatu dzichazoridza.” Ngirosi yechishanu yakaridza hwama yayo, neni ndakaona nyeredzi yakabva mudenga ikawa panyika, yakapuwa kiyi yomurindi usina magumo; yakabeura murindi usina magumo, nechiushi chakakwira kubva mumurindi, chakadai ngechiushi chechoto chakakura. Zuva nomweya zvakasvipiswa ngechiushi chaibva mumurindi uwo. Zvino ndongwe dzakabuda dzechibva muchiushi kuuya padera penyika, dzakapuwa simba rakadai ngesimba rezvinyaada zvomunyika. Dzakaronzerwa kuti dzisazoshaishira mwenje wenyika nokuti chiro chimweni chinokura chakasvipira nokuti muti, asi vega vanhu avo vasina chinamiro chaMwari pahuma dzavo. Adzizi kupuwa simba rokuvauraya, asi kuti dzivarwadzise mwedzi mishanu; nokurwadzisa kwadzo kwaiya kwakadai ngokurwadzisa kwechinyaada apo charuma munhu. Ngaawo mazuva vanhu vanozotsvaka rufu vasikaruoni; nokudisisa kuti vafe, asi rufu runozotiza kubva kwavari. Nemiemo yendongwe idzo yaiya yakadai ngeyemahachi akanasirirwa kurwa hondo. Nepadera pemasoro adzo paiya nezvairingirika zvakadai ngemadzungudza omukore; nehope dzadzo dzaiya dzakadai ngedzevanhu, dzaiya nebvudzi rakadai ngebvudzi revakadzi, nemazino adzo akadai ngeemhondoro; dzaiya nemagwamba akadai ngechihlangu chepaditi chesimbi, nokutinhira kwemaphaphiro adzo kwakadai ngokutinhira kwengoro dzokurwa hondo, dzinokweiwa ngemahachi akawanda echirumba kuenda koorwa. Dzaiya nemiswe yakadai ngeyezvinyaada, ineukaira; pamiswe padzo paiya nesimba rokuremadza vanhu mwedzi mishanu. Dzaiya namambo wadzo waiya ngirosi yomurindi usina magumo; zina rayo ngechiHebheru ndiAbhadhoni, ngechiGiriki inezina rokuti Aphorioni. Dambudziko rokutanga rapinda. Wona, kuchauya madambudziko mairi ngesure kweizvi. Ngirosi yechitanhatu yakaridza hwama yayo, neni ndakazwa izwi rechibva panyanga murongomuna dzearita romukore riri pamberi paMwari rechiti kunengirosi yechitanhatu, yaiya nehwama, “Sunhura ngirosi murongomuna idzo dzakasungwa parwizi rukuru Yufratesi.” Ndizvo ngirosi murongomuna dzakasunhurwa, idzo dzakanasirirwa awa, zuva, mwedzi negore kuti dziuraye rupande rwechitatu rwevanhu. Nouwandu hwehondo dzevanogadha mahachi hwaiya mazana mairi emakumi emazana akapetwa kagumi; ndakazwa uwandu hwavo. Iyi ndiyo njira yendakaona ndiyo mahachi muchioniso changu; vagadhi vaiya nezvihlangu vane zvidzitiro zvepaditi zvakatsvuka kudai ngomuriro wesafire nesurufa; nemasoro emahachi akadai ngeemhondoro, muriro, chiushi nesurufa zvakabuda kubva pamiromo pawo. Ngenyatwa idzi nhatu rupande rwechitatu rwavanhu rwakaurawa, ngomuriro, chiushi nesurufa izvo zvakabuda kubva kumiromo yawo. Ngokuti simba remahachi riri mumiromo yawo nokumiswe yawo; ngokuti miswe yawo yakadai ngenyoka, inemasoro; kubudikidza ndiwo anoremadza. Vamweni vanhu, vasikazi kuurawa ngenyatwa idzi, avazi kutenderuka kubva kumishando yenyara dzavo, kuitira kuti vasazodira madhimoni nemiedzaniso yokudira yomukore, yesirivha, yethusi, yemapuwe neyemiti, iyo isikakoni kuona nokuti kuzwa nokuti kuhamba. Avazi kutenderuka kubva mukuuraya kwavo nokuti mukukamba kwavo nokuti mukuomba kwavo nokuti mukuba kwavo. Zvino ndakaona ngirosi imweni yakagwinya yechidzaka kubva mudenga, yakafuka gore, noutahwadande hwaiya padera pesoro rayo; nehope yayo yakadai ngezuva, netsoka dzayo dzaiya dzakadai ngesika dzomuriro. Yaiya yakabata munyara yayo kabhuku kakabeuka. Yakatsika rutsoka rwayo rwokumudyo padera poruandhle norwomuoshwe padera penyika. Yakadaidzira ngeizwi guru, kudai ngokurira kwemhondoro; naapo yadaidzira, kutinhira kunomwe kwakatinhira. Naapo kutinhira kunomwe kwaiya kwatinhira, ndaiya ndooda kunyora, ndakazwa izwi rechibva mudenga rechiti, “Namira izvo zvakaronzwa ngokutinhira kunomwe, usazvinyora.” Zvino ngirosi iya yendakaona yakaema padera poruandhle nepenyika, yakamirudza nyara yayo yokumudyo mudenga, ikapika ndiye unopona mhera nariini nariini, uwo wakasika denga neizvo zvirimwo, nenyika neizvo zvirimwo, noruandhle neizvo zvirimwo kuti, “Kusachazoapo mukuwo wokunonoka, asi mumazuva apo ngirosi yechinomwe yooridza hwama yayo, ngouwo mukuwo chakafishika chaMwari chinozozadziswa, kudai ngezvaakaronza kuvaranda vake vaprofeti.” Zvino izwi rendakazwa rechibva mudenga rakaereketazve kwendiri, rikati, “Enda, utore kabhuku kakabeuka kari munyara yengirosi yakaema padera poruandhle nepadera penyika.” Ndizvo ndakaenda kunengirosi ndikaironzera kuti indipe kabhuku, nayo yakati kwendiri, “Katore, ukadye; kanozovava mundani yako, asi mumuromo wako kanozotapira kudai ngouchi.” Ndakatora kabhuku kubva munyara yengirosi, ndakakadya, kaitapira kudai ngouchi mumuromo wangu; asi apo ndakadya, ndani yangu yakaitwa kuti ivave. Dzakati kwendiri, “Kunosisira kuti uprofetezve ngendaa yevanhu vazhinji, madzinza, ndimi nemadzimambo.” Zvino ndakapuwa chipimiso cherutsanga rwakadai ngomudondoro, kukazwi kwendiri, “Miruka, upime temperi raMwari nearita naavo vanodiramwo, asi usapima ruwanze ruri kubanze kwetemperi; usarupima, ngokuti rwakapuwa kunevemadzinza, navo vanozotsikatsika pashi ngetsoka dzavo padera pedhorobha rakachena mwedzi makumi marongomuna namiiri (42). Ndinozopa simba kuzvapupu zvangu zviiri kuti zviprofete mazuva gumi remazana nemazana mairi nemakumi matanhatu (1,260), zvakapfeka machira emasaka.” Ava vari miti miiri yemaorivhi nezvigadzikiro zviiri zvezvibani zvinoema pamberi paMambo wenyika. Kuti aripo munhu unoda kuvaremadza, muriro unobuda kumiromo yavo wechiuraya magaa avo; kuti aripo munhu unoda kuvaremadza, ngeiyi njira kunosisira kuti aurawe. Vane simba rokukonya denga, kuti isazonaya mvura ngamazuva okuprofeta kwavo, navo vane simba padera pemvura kuitsandudza kuti iite ngazi, nokuita kuti nyika igumirwe ngemadambudziko eshe, panguva dzeshe dzevanoda. Naapo vapedza uchapupu hwavo, chikara chinokwira kubva mumugodhi usina magumo chinozoambana navo nokuvanyisa nokuvauraya, nemiiri yavo yakafa inozorashwa mupato redhorobha guru rinozwi ngokuedzanisa Sodhoma neEgipite, paakakohomerwa Mambo wavo. Navo vanobva kuvanhu, kumarusinga, kundimi nokumadzinza, vanozoringira miiri yavo yakafa mazuva matatu nehafu, vasikatenderi kuti miiri yavo yakafa iikwe mumaiba; naavo vanogara munyika vanodakara ndivo nokupembera; vanozoashidzana zvipo umwe kunoumweni, ngokuti ava vaprofeti vairi vakatambudza avo vanogara munyika. Ngesure kwemazuva matatu nehafu mweya wokupona unobva kuna Mwari wakapotera mukati mwavo, vakaema ngetsoka dzavo, nokutya kukurutu kwakagumira avo vakavaona. Zvino vakazwa izwi guru rechibva mudenga rechiti kwavari, “Kwirai uno!” Vakakwira mudenga vari mugore, magaa avo akavaringira. Ngeiro awa kwaiyapo kuzungunyika kukurutu kwenyika norupande rwegumi rwedhorobha rwakawa; vakaurawa vanhu vari makumi emazana manomwe mukuzungunyika kwenyika, nevamweni vakatya, vakakudza Mwari womudenga. Dambudziko rechipiri rapinda. Wona, dambudziko rechitatu rinokasira kuuya. Zvino ngirosi yechinomwe yakaridza hwama yayo, kwakazwika mazwi makuru mudenga echiti, “Umambo hwenyika hwaita umambo hwaMambo wedu nohwaKristu wake, naye unozotonga mhera nariini nariini.” Nevakuru vari makumi mairi navarongomuna, vanogara pazvigaro zvavo zvoumambo pamberi paMwari, vakawa ngehope dzavo, vakadira Mwari vechiti, “Tinomubonga, imwimwi Mambo Mwari, Munesimbareshe, uwo uripo nowaiyapo, ngokuti mwakadzitorera simba renyu guru, mukatonga. Madzinza akatseneka, noushungu hwenyu hwakauya, nomukuwo wevakafa kuti vatongwe, nomukuwo wokupa musharo kunevaranda venyu vaprofeti nevakacheneswa nokwavari vanotya zina renyu, vadoko nevakuru, nokuparadza avo vanoparadza nyika.” Zvino temperi raMwari rakabeurwa mudenga, mwakaoneka mutemperi rake bhokisi rechitenderano chake; kwakaapo kupenya kwemheni nemazwi okutinhira nokuzungunyika kwenyika nematsanza makurutu. Chioniso chikuru chinoshamisa chakaoneka mudenga: mukadzi akapfeka zuva, nomwedzi pashi petsoka dzake, nepadera pesoro rake paiya nedzungudza renyeredzi gumi nembiri. Waiya nemimba naye wakachema echirwadziwa ngokubara, nokurwadziwa ngokusununguka. Nechioniso chimweni chinoshamisa chakaoneka mudenga; wona, dragoni guru rakatsvuka rine masoro manomwe nenyanga gumi, nepadera pemasoro aro paiya nemadzungudza manomwe. Muswe waro unokweya rupande rwechitatu rwenyeredzi dzomudenga nokudzikandira panyika. Nedragoni rakaema pamberi pomukadzi waiya ooda kubara mwana, kuti ridye mwana wake apo abarwa. Naye wakabara mukororo, unozotonga madzinza eshe ngendonga yesimbi. Asi mwana wake wakabvukwa, akakwidzwa kunaMwari nokuchigaro chake choumambo, nomukadzi wakatizira mushango, apo paiya nendau yaakanasirirwa ndiMwari, kuti vamurere apo mazuva gumi remazana nemazana mairi nemakumi matanhatu (1,260). Zvino kwakaapo kurwa mudenga; Mikhaeri pamwepo nengirosi dzake dzakarwisa dragoni. Nedragoni rakarwisa pamwepo nengirosi dzaro, asi dzakanyiswa nendau yadzo aizi kuchazoapo mudenga. Dragoni guru rakakandirwa pashi, iyo nyoka sharuka, inozwi ndiDhiabhorosi naSathani, muchengedzeri wenyika yeshe, wakakandirwa pashi munyika, nengirosi dzake dzakakandirwa pashi pamwepo naye. Neni ndakazwa izwi guru rechibva mudenga rechiti, “Zvino rwaguma ruponeso, simba noumambo zvaMwari wedu nesimba raKristu wake, ngokuti mupumhi wehama dzedu wakandirwa pashi, uwo unovaitira ndaa pamberi paMwari wedu masikati nousiku. Navo vakamunyisa ngengazi yeGwai neizwi rouchapupu hwavo, navo avazi kuda kupona kwavo metsa murufu. Ndizvo dakarai, imwimwi matenga neavo vanogara mukati mwawo! Asi kushatanyi kwezvinoita kunyika nokuruandhle, ngokuti Dhiabhorosi wakadzaka pashi kwomuri anoushungu hukurutu, ngokuti unozia kuti nguva yake yafupika!” Naapo dragoni raona kuti rakakandirwa pashi panyika, rakatambudza mukadzi uwo wakabara mukororo. Asi mukadzi wakapuwa maphaphiro mairi egodzi guru, kuti ambururuke kuenda mushango kundau yake, paanorerwa mukuwo nemikuwo nehafu yomukuwo kubva kuhope yenyoka. Zvino nyoka yakabudisa mvura mumuromo wayo kudai ngorwizi sure kwomukadzi, kuti atorwe ngorwizi. Nenyika yakadetsera mukadzi, ikabeura muromo wayo nokumedza rwizi urwo rwakabudiswa ngedragoni kubva mumuromo waro. Zvino dragoni rakatsenekera mukadzi, rikaenda, rikaambana nevamweni vana vake, avo vanongwarira mipango yaMwari vechibata uchapupu hwaJesu. Dragoni rakaema padera pejecha roruandhle. Zvino ndakaona chikara chechibuda kubva muruandhle, chine nyanga gumi nemasoro manomwe; nepadera penyanga dzacho paiya nemadzungudza gumi, nepadera pemasoro acho paiya nemazina okutuka Mwari. Nechikara chendakaona chaiya chakadai ngekhamba, netsoka dzacho dzaiya dzakadai ngebheya, nomuromo wacho waiya wakadai ngowemhondoro. Kwechiri dragoni rakapa simba raro, chigaro choumambo hwaro nesimba rokutonga gurutu. Ndakaona rimwe remasoro acho rairingirika rakadai ngerakakuwara yaamho, asi bonje rokufa kwacho raiya rapora, nenyika yeshe yakateera chikara yechishamiswa. Vanhu vakadira dragoni, ngokuti ndiro rakapa chikara simba raro, navo vakadira chikara vechiti, “Ndiani ungaedzaniswa nechikara nounesimba rokurwa nacho?” Chakapuwa muromo wokuereketa mazwi akakura nokutuka, chakapuwazve simba rokuti chiite mishando yacho mwedzi makumi marongomuna namiiri (42). Nacho chakabeura muromo wacho kutuka Mwari nokutuka zina rake nougaro hwake, navo vanogara mudenga. Chakapuwazve simba rokurwa nevakacheneswa nokuvanyisa. Chakapuwazve simba padera pedzinza reshe, pomunhu weshe, padera pendimi yeshe nembeu yeshe yomunhu. Veshe vanogara padera penyika vanozochidira, weshe unezina risikazi kunyorwa mubhuku rokupona reGwai rakaurawa kubvira mukuemeswa kwenyika. Kuti aripo unenzee ngaazwe: Kuti aripo wakaemeserwa kusungwa, unozosungwa muusungwa; kuti aripo wakaemeserwa kuurawa ngeshoti, ngegwinyiso unozourawa ngeshoti. Pano ndipo panokusengerera nokugonda kwevakacheneswa. Ndakaona chikara chimweni chechikwira kubuda chechibva munyika; chaiya nenyanga mbiri dzakadai ngedzegwai, chakaereketa kudai ngedragoni. Chinoshandisa simba rechikara chokutanga mukuona kwacho, chinoita kuti nyika navo vanogaramwo vadire chikara chokutanga, chaiya nebonje rokufa rakapora. Chinoita mioniso mikuru, kunyazwi kuita kuti muriro udzake padera penyika wechibva mudenga mukuona kwevanhu; ngemioniso yechinotenderwa kuita pamberi pechikara, chinochengedzera avo vanogara munyika, chechironza kwavari kuti vaite muedzaniso wechikara chakabaiwa ngeshoti asi chikapona. Chakapuwa simba rokupa mweya kumuedzaniso wechikara, kuti muedzaniso wechikara ukone kuereketa nokuita kuti veshe vasikadiri muedzaniso wechikara vaurawe. Chinoitazve kuti veshe, vadoko nevakuru, vapfumi nevarombo, vakasunhurika nehloko, vaiswe chioniso panyara yavo yokumudyo nokuti pahuma yavo, kuitira kuti pasazoita munhu naumwe ungazokona kutenga nokuti kutengesa, asi uwo unechioniso, ndikwo kuti, zina rechikara nokuti namba yezina racho. Pano ndipo panodiwa ungwaru; iye unozwisisa ngaaerenge namba yechikara, ngokuti ndiyo namba yomunhu. Namba yake ndiyo mazana matanhatu nemakumi matanhatu nematanhatu (666). Zvino ndakaringira, ndakaona Gwai rakaema pamutunhu weZioni! Vaiyapo naye zana nemakumi marongomuna namarongomuna emakumi emazana (144,000) vane zina rake nezina raBaba ake rakanyorwa pahuma dzavo. Ndakazwa izwi rakabva mudenga rakadai ngechaungira chemvura zhinji nokudai ngokutinhira kukurutu; neizwi rendakazwa raiya rakadai ngerevaridzi vechiridza zvimadangari zvavo, navo vanoemba nduyo itsva pamberi pechigaro choumambo nepamberi pezvisikwa zvinopona zvirongomuna nepamberi pevakuru. Apana munhu waikona kudzidza nduyo iyo kwega avo vari zana nemakumi marongomuna nemarongomuna emakumi emazana (144,000) vakatengwa kubva munyika. Ava ndivo vasikazi kudzisvipisa ngavakadzi, ngokuti vakadai ngemhandwe; ndivo vanoteera Gwai kweshe kwerinoenda. Vakatengwa kubva pakati pevanhu kuti vaite mitanguro kunaMwari nokuGwai, nomumiromo yavo amuzi kuoneka kunyepa; avana ndaa. Neni ndakaona ngirosi imweni yechimbururuka pakati pedenga, ine vhangeri remhera nariini koochumaira kwavari avo vanogara munyika, kumadzinza eshe, marusinga eshe, kundimi dzeshe nokuvanhu veshe; yechiti ngeizwi guru, “Ityai Mwari mumukudze, ngokuti awa rokutonga kwake raguma; mumudire uwo wakaita denga nenyika noruandhle nezvinyuka zvemvura.” Ngirosi imweni yechipiri yakateera yechiti, “Rawa, rawa, Bhabhuroni gurutu! Rakaita kuti madzinza eshe amwe vhini roushungu hwokuomba kwaro.” Zvino ngirosi imweni yechitatu yakadziteera yechiti ngeizwi gurutu, “Kuti aripo munhu unodira chikara nomuedzaniso wacho, nokuashira chioniso pahuma yake nokuti panyara yake, iye unozomwa vhini roushungu hwaMwari, rinodururwa risikazi kubvengedzwa mutsani youshungu hwake, naye unozotambudzwa ngomuriro nesurufa pamberi pengirosi dzakachena nepamberi peGwai. Nechiushi chokutambudzwa kwavo chinopwititika mhera nariini nariini. Navo avana zororo masikati nousiku, avo vanodira chikara nomuedzaniso wacho, kunyazwi ndiani unoashira chioniso chezina racho.” Pano ndipo panodiwa kusengerera kwevakacheneswa, vanongwarira mipango yaMwari nokugonda kunaJesu. Ndakazwa izwi rechibva mudenga rechiti, “Nyora izvi: vanomuchena vakafa vanofira munaMambo kubvira zvinopano.” “Eya,” unoronza Mweya, “Kuti vazorore kubva kumishando yavo, ngokuti mishando yavo inovateera!” Ndakaringira, ndikaona gore rakachena, nepadera pegore pane umwe wakadai ngoMukororo woMunhu echigarapo, anedzungudza romukore pasoro rake, nomunyara mwake anesikeyo inopinza. Nengirosi imweni yakabuda kubva mutemperi, yechidaidzira ngeizwi guru kwaari uwo wakagara padera pegore yechiti, “Shandisa sikeyo yako, ucheke, ngokuti awa rokucheka raguma; ngokuti zvokukukura zvenyika zvaibva.” Ndizvo uwo wakagara padera pegore wakakandira sikeyo yake munyika, nenyika yakachekwa. Zvino ngirosi imweni yakabuda kubva mutemperi riri mudenga, nayo yaiya nesikeyo inopinza. Ngirosi imweni yakabuda kubva paarita, inesimba padera pomuriro, yakadaidzira ngeizwi gurutu kuneiyo inesikeyo inopinza yechiti, “Shandisa sikeyo yako inopinza, uunganidze zvikore zvemavhini enyika, ngokuti mavhini ayo aibva.” Ndizvo ngirosi yakakandira sikeyo yayo munyika ikaunganidza mavhini enyika, ikaakandira muchisviniro chikurutu chevhini choushungu hwaMwari. Nechisviniro chevhini chakatsikwatsikwa kubanze kwedhorobha, kwakabuda ngazi kubva muchisviniro chevhini, ikagumira pamatomu emahachi, nokureba kwayo kwaiita makhiromitha mazana matatu (300), yechiita mamitha mairi kudzama. Ndakaona chioniso chimweni mudenga, chikuru chinoshamisa: ngirosi nomwe dzine madambudziko manomwe, awo okugumisira, ngokuti ndiwo okugumisira kuonisa ushungu hwaMwari. Ndakaona chairingirika chakadai ngoruandhle rwegirazi, rwakabvengedzwa nomuriro; naavo vakanyisa chikara nomuedzaniso wacho nenamba yezina racho, vaiema pasinde poruandhle rwegirazi, vane zvimadangari zvaMwari munyara dzavo. Vanoemba ruyo rwaMosi, muranda waMwari, noruyo rweGwai vechiti, “A Mambo Mwari, Unesimbareshe, mishando yenyu mikuru neinoshamisa! Nenjira dzenyu dziri dzakarurama, dzine gwinyiso, imwimwi Mambo wemadzinza! Ndiani usikazomutyi nokukudza zina renyu, A Mambo? Ngokuti imwimwi mwega mwakachena. Madzinza eshe anozouya nokudira pamberi penyu ngokuti zviito zvenyu zvakarurama zvakaoniswa.” Ngesure kweizvi ndakaona, temperi retende rouchapupu rakabeurwa mudenga, nengirosi nomwe dzakabuda kubva mutemperi, idzo dzaiya nemadambudziko manomwe, dzakapfeka machira akachena, anojeka, dzakasunga pamaditi adzo ngamabande omukore. Nechimwe chezvisikwa zvinopona zvirongomuna chakapa ngirosi nomwe mikheyo minomwe yomukore yakazara ngoushungu hwaMwari, unopona mhera nariini nariini; netemperi rakazara ngechiushi chaibva muuthende hwaMwari nomusimba rake, akuna waikona kupotera mutemperi metsa madambudziko manomwe engirosi nomwe apera. Zvino ndakazwa izwi guru rechibva mutemperi rechironzera ngirosi nomwe rechiti, “Endai, mwodururira munyika mikheyo minomwe youshungu hwaMwari.” Ndizvo ngirosi yokutanga yakaenda, ikadurura mukheyo wayo munyika; kwakaapo zvironda zvakashata nezvinorwadza padera pevanhu vaiya nechioniso chechikara, vakadira muedzaniso wacho. Ngirosi yechipiri yakadururira mukheyo wayo muruandhle, rwakaita ngazi yakadai ngeyomunhu wakafa, nezviro zveshe zvaipona zvaiya muruandhle zvakafa. Ngirosi yechitatu yakadururira mukheyo wayo mundwizi nezvinyuka zvemvura, nazvo zvakaita ngazi. Ndakazwa ngirosi yepamvura yechiti, “Wakarurama, iwewe Wakachena, uripo nowaiyapo, ngokuti wakatonga izvi; ngokuti vakaparadza ngazi yevakacheneswa neyevaprofeti, wakavapa ngazi kuti vamwe. Ngokuti vanosisirwa ndizvo!” Ndakazwa izwi rechibva paarita rechiti, “Eya, A Mambo Mwari Unesimbareshe, gwinyiso nokururama zvitongero zvako!” Ngirosi yechirongomuna yakadururira mukheyo wayo padera pezuva, rakapuwa simba rokupisha vanhu ngomuriro. Vanhu vakapishwa ngokupisha kwaityisa; vakatuka zina raMwari, uwo unesimba padera peaya madambudziko, navo avazi kutenderuka kuti vamukudze. Ngirosi yechishanu yakadururira mukheyo wayo padera pechigaro choumambo hwechikara, noumambo hwacho hwakasvipiswa kuita chidima; vakatsenga marurumi avo ngendaa yokurwadziwa kwavo. Vakatuka Mwari wedenga ngendaa yokurwadziwa kwavo neyezvironda zvavo, avazi kutenderuka kubva kumishando yavo. Ngirosi yechitanhatu yakadururira mukheyo wayo padera porwizi rukuru, Yufratesi, nemvura yarwo yakapwa kuti paitwe njira yemadzimambo aibva ngokumabvazuva. Ndakaona mweya mitatu yakashata yakadai ngemachedye, yechibuda kubva mumuromo wedragoni, wechikara nowomuprofeti wokunyepa. Ngokuti ndiyo mweya yemadhimoni inoita mioniso, inobuda kuenda kumadzimambo enyika dzeshe, kuvaunganidza pamwepo kurwa hondo yezuva guru raMwari Unesimbareshe. (“Ringira, ndinouya kudai ngembavha! Unomuchena uwo unogara akarinda nokungwarira zvokufuka zvake, kuti asazohamba ari mutitinini nevanhu vaone kutsveruka kwake!”) Mweya yakavaunganidza pamwepo kundau inozwi ngechiHebheru Hamagedhoni. Ngirosi yechinomwe yakadururira mukheyo wayo mumhepo, izwi guru rakabuda mutemperi, rechibva pachigaro choumambo rechiti, “Zvapera!” Kwakaapo kupenya kwemheni, mazwi, kutinhira, kwakaapozve kuzungunyika kukurutu kwenyika, kusikazi kumboapozve kwakadaro kubvira pakusikwa kwevanhu panyika, uku ndikwo kuzungunyika kwakapinda kushata kwenyika kwakadai. Nedhorobha guru rakagurwa kuita marupande matatu, nemadhorobha evemadzinza akawa. Mwari wakakarakadza Bhabhuroni guru, kuti ripuwe tsani yevhini rokutyisa kwoushungu hwake. Chiwi cheshe chakatiza, nemitunhu aizi kuonekazve; nematsanza makurutu, rimwe ngarimwe rairema makhirogramu angakwana makumi mashanu akabva mudenga, akawira padera pevanhu, metsa vakatuka Mwari ngendaa yedambudziko rematsanza, ngokuti dambudziko rawo raiya rakakura kakurutu. Zvino imwe yengirosi nomwe dzaiya nemikheyo minomwe yakauya, ikati kwendiri, “Uya pano, ndinozokupangidzira kutongwa kwehure guru rinogara padera pemvura zhinji, iro madzimambo enyika akaomba naro, navanogara munyika vakaradza ngevhini rokuomba kwaro.” Ngirosi yakanditora kuenda neni mushango ndakabatwa ndiMweya, ndakaona mukadzi akagadha padera pechikara chakatsvuka, chakazara ngemazina okutuka, chine masoro manomwe nenyanga gumi. Mukadzi wakapfeka zvakatsvukuruka nezvakatsvuka, nokunemeswa ngomukore nemapuwe anemutengo mukuru nemapherere, munyara mwake mwaiya netsani yomukore yakazara ngezvinonyangadza, zvine tsvina zvokuomba kwake; nepahuma pake pakanyorwa zina rakafishika, “BHABHURONI GURU, MAI WEMAHURE NEEZVINONYANGADZA ZVENYIKA.” Neni ndakaona mukadzi araradza ngengazi yevakacheneswa nengazi yezvapupu zvaJesu. Naapo ndakamuona, ndakashamiswa kakurutu. Asi ngirosi yakati kwendiri, “Washamiswa ngenyi? Ndinozokuronzera biningidzo rakafishika romukadzi nerechikara chinomutwara, chine masoro manomwe nenyanga gumi. Chikara chewaona chaiyapo, apachina, chodo kukwira kubva mumugodhi usina magumo nokuenda mukuparadzwa. Naavo vanogara munyika, vane mazina avo asikazi kunyorwa mubhuku rokupona kubvira pakusikwa kwenyika, vanozoshamiswa apo vaona chikara chaiyapo, chisiripo nechichauya. “Ndipo panodiwa kupinimidza kuneungwaru; masoro manomwe mitunhu minomwe, apo pagarwa ngomukadzi; ndiwozve madzimambo manomwe, vashanu vavo vakawa, noumwe uchiripo, noumweni aasati auya; naapo auya unosisira kuti agare mukuwo mudoko. Nechikara chaiyapo, zvino apana, ndicho chechisere, asi ngechimwe chezvinomwe, chinoenda mukurashwa. Nenyanga gumi dzewaona ndiwo madzimambo gumi asati aashira umambo, asi anoashira simba kudai ngemadzimambo pamwepo nechikara awa rimwe. Avo vanomupinimidzo umwe, vanopira simba ravo nokutonga kwavo kuchikara; vanozorwisana neGwai, neGwai rinozovanyisa, ngokuti ndiMambo wemadzimambo noMutongi wevatongi, naavo vanaye vanodaidzwa nokutsanangurwa nokugondeka.” Nayo yakati kwendiri, “Mvura iyo yewakaona, apo pakagara hure, ndivo vanhu, zviunga, madzinza nendimi. Nyanga gumi dzewaona, idzo nechikara zvinozonyenya hure; zvinozomuparadza mukumuita mutitinini, nokudya nyama yake nokumupisha ngomuriro. Ngokuti Mwari wakaisa izvi mumwoyo yazvo kuti zviite kuda kwake, ngokuita zvinomupinimidzo umwe nokupa simba roumambo hwazvo kune chikara, metsa mazwi aMwari aitika. Nomukadzi wowaona ndiro dhorobha guru iro rinotonga padera pemadzimambo enyika.” Ngesure kweizvi ndakaona ngirosi imweni yechidzaka kubva mudenga, inesimba guru; nenyika yakajekiswa ngouthende hwayo. Yakadaidzira ngeizwi rine simba yechiti, “Rawa, rawa, Bhabhuroni guru! Raita ugaro hwamadhimoni, nendau yemweya yeshe inetsvina, neyeshiri dzeshe dzinetsvina, dzinonyenyiwa. Ngokuti madzinza eshe akamwa vhini roushungu hwokuomba kwake, nemadzimambo enyika akaomba naye, nevatengisi vomunyika vakapfuma ngesimba rouwandu hwepfuma yokuangira kwake kuemura.” Ndakazwa izwi rimweni rechibva mudenga rechiti, “Budai kubva kwaari, vanhu vangu, kuti musakoanisana naye muzvishaishi zvake, zve, kuti musazoashidzana naye madambudziko ake; ngokuti zvishaishi zvake zvakaita murwi zvinoguma mudenga, naMwari wakakarakadza ngezvakashata zvake. Mupei musharo kudai ngezvaakamupa pachake, mumuhwirinzire kairi kakapetwa kudai ngemishando yake; mutsani iyo yaakazadza, mumudzadzire kairi. Ndizvo mupenyi kutambudzika nokusvipa mwoyo kukurutu, kudai ngouwandu hwaakadzikudza ndihwo nokupona mukudzidakadzisa pachake, ngokuti unoti mumwoyo mwake, ‘Inini ndakagara pano, ndini mambokadzi, andiri shirikadzi akadi, andizombooni dambudziko.’ Ndizvo madambudziko ake anozomugumira ngezuva rimwe, rufu, kubonda, nzara, naye unozopishwa ngomuriro; ngokuti Mambo Mwari, uwo unomutonga, unesimba.” Madzimambo enyika, awo akaomba nokupona echidzidakadzisa pamwepo naye, anozochema nokubonda ngendaa yake, apo paanozoringira chiushi chokutsva kwake. Vanozoema vari kuretu, ngokutya kutambudzwa kwake vechiti, “Kutyisanyi uku! Kutyisanyi uku! Newe dhorobha guru, dhorobha rakagwinya Bhabhironi! Ngokuti ngeawa rimwe kutongwa kwako kwakugumira.” Nevatengisi venyika vanochema nokubonda ngendaa yake ngokuti apana munhu uchatenga zviro zvavo, mukore, sirivha, mapuwe anemutengo mukuru, mapherere, nemachira akanaka orukangaza neakatsvukuruka, neesirika yakatsvuka; nembeu dzeshe dzemiti inonuhwira, nembeu dzeshe dzezvidziyo zvenyanga dzenzou, mbeu dzeshe dzezvidziyo zvakaitwa ngemiti inemutengo mukuru, zvethusi, zvesimbi, mapuwe akachena, sinamoni, mutombo unonuhwira, mutombo wokupisha unegwema rakanaka, mafuta okudzora, makha, vhini, mafuta, ufu hwakamotseka, koroni, n'ombe, makwai, mahachi, ngoro, hloko, kunyazwi nemweya yevanhu. “Michero yaidisiswa ngomweya wako yakabva kwouri, nezviro zveshe zvainakisisa nezvaipenya zvakaparadzwa kwouri, auchazozvionizve!” Vatengesi veizvi zviro, avo vakaita makurudza ndiye, vanozoema kuretu ngokutya dambudziko rake, vechichema nokubonda vechiti, “Kutyisanyi uku! Kutyisanyi uku, dhorobha guru! Raipfeka machira akanaka orukangaza akatsvukuruka, akatsvuka, rakanemeswa ngomukore namapuwe anemutengo mukuru nemapherere! Ngokuti upfumi hwakakura kudaro hwaparadzwa ngeawa rimwe!” Nenduna dzeshe dzengarava, navo veshe vahambisi vengarava, navo veshe vairarama ngokushanda muruandhle, vakaema vari kuretu, vakadaidzira vechiona chiushi chokutsva kwake vechiti, “Ngeriri dhorobha ringaedzaniswa neiri dhorobha guru?” Navo vakakandira bukuta padera pemasoro avo, vechichema nokubonda vechiti, “Kutyisanyi uku! Kutyisanyi uku, dhorobha guru umwo veshe vaiya nengarava dzavo muruandhle vakaitwa makurudza ngezvinokosha zvake! Ngokuti ngeawa rimwe rakaparadzwa. Dakarai ngendaa yake, iwewe denga, nemwi vakacheneswa, nemwi vapostori, nemwi vaprofeti! Ngokuti Mwari wakamutonga ngendaa yeizvo zvaakaita kwomuri.” Nengirosi inesimba yakamirudza buwe rakadai ngeguyo rakakura, ikarikandira muruandhle yechiti, “Ngokuwa kwakakura kudaro Bhabhuroni, dhorobha guru, rinozokandirwa pashi, arichazooneki nepadoodoko. Neizwi revaridzi vezvimadangari nerevaembi, revanoridza minanzi, revaridzi vehwama arichazozwiki mukati mwako; mbeu dzemishando yeshe kunyazwi ngouri adzichazoapo nepadoodoko mukati mwako; neizwi rokukuya arichazozwiki nepadoodoko mukati mwako. Kujeka kwechibani akuchazojeki nepadoodoko mukati mwako; neizwi romukwambo neromuroorwa arichazozwiki mukati mwako; ngokuti vatengesi vako vaiya vanhu vakuru venyika, ngokuti madzinza eshe akachengedzerwa ngokurowa kwako. Mukati mwake mwakaoneka ngazi yevaprofeti neyevakacheneswa neyeavo veshe vakaurawa munyika.” Ngesure kweizvi ndakazwa bope guru rakadai ngerevanhu vazhinji mudenga rechiti, “Haleluya! Ruponeso nouthende nesimba ngezvaMwari wedu, ngokuti kutonga kwake kunegwinyiso nekwakarurama; wakatonga muombi mukuru wakashaishira nyika ngokuomba kwake, naye wakaunzidzira kwaari ngazi yevaranda vake padera pake.” Naapo vakadaidzirazve vechiti, “Haleluya! Chiushi chake chinopwititika kukwira mudenga mhera nariini nariini.” Nevakuru makumi mairi nevarongomuna nezvisikwa zvinopona zvirongomuna vakawa pashi, vakadira Mwari unogara pachigaro choumambo vechiti, “Ameni. Haleluya!” Izwi rakazwika rechibva pachigaro choumambo rechiti, “Kudzai Mwari wedu, imwimwi mweshe varanda vake, imwimwi munomutya, vadoko nevakuru.” Apapo ndakazwa chakadai ngeizwi rechiunga chakakura kudai ngebope remvura yakawanda nokudai ngeizwi romutinhiro unesimba rechiti, “Haleluya! Ngokuti Mambo Mwari wedu Unesimbareshe unotonga. Ngatidakare nokudakara kukurutu, ngatimupe mbiri; ngokuti muchadho weGwai waguma nomuroorwa waro wakadzinasirira. Wakatenderwa kuti adzisimidze ngemachira akanaka orukangaza, anojeka neakaperera.” Ngokuti machira akanaka orukangaza ndizvo zviito zvakarurama zvevakacheneswa. Ngirosi yakati kwendiri, “Nyora izvi: Vanomuchena vakakokwa kudhiri romuchadho weGwai.” Nayo yakati kwendiri, “Aya ndiwo mazwi egwinyiso aMwari.” Ndakawa pashi patsoka dzayo kuidira, asi yakati kwendiri, “Ausisiri kuita kudaro! Inini ndiri muranda pamwepo newe nevangani vako, vanobatirira kuuchapupu hwaJesu. Dira Mwari! Ngokuti uchapupu hwaJesu huri mweya wokuprofeta.” Ndakaona denga rakabeuka, ndikaona hachi rakachena! Mugadhi waro waizwi Unogondeka neUnegwinyiso, naye mukururama unotonga nokuita hondo. Madziso ake akadai ngomurazvu womuriro, nepadera pesoro rake pane madzungudza akawanda. Waiya nezina rakanyorwa, risina kuziikanwa ngevanhu, asi iye ega. Naye wakasimira zvokusimira zvakanyikwa mungazi: nezina rake rinozwi, Izwi raMwari. Nehondo dzomudenga dzakasimira machira akanaka, akachena neakaperera, dzaimuteera dzakagadha mahachi akachena. Neshoti yakapinza inobuda kubva pamuromo wake, kuti atemere pashi ndiyo madzinza, naye unozoatonga ngendonga yesimbi; unotsikatsika chikamuriro chevhini rokutyisa kwoushungu hwaMwari Unesimbareshe. Naye unezina rakanyorwa padera pechokufuka chake nepachizva chake kuti, “MAMBO WEMADZIMAMBO NOMUTONGI WEVATONGI.” Ndakaona ngirosi yakaema muzuva, yakadaidzira ngeizwi guru, yechiti kuneshiri dzeshe dzinombururuka mudenga, “Uyai, muungane padhiri guru raMwari, kuti mudye nyama yemadzimambo, nyama yenduna huru, nyama yevanhu vane simba, nyama yemahachi nevagadhi vawo, nyama yevanhu veshe, vakasunhurika nevakasungwa, yevadoko nevakuru.” Ndakaona chikara nemadzimambo enyika nehondo dzawo dzakaungana pamwepo kuti varwe hondo nouwo wakagadha hachi nehondo yake. Nechikara chakabatwa nomuprofeti wokunyepa uwo wakashanda zvioniso mukuona kwacho, zvaakachengedzera ndizvo avo vaiya vaashira chioniso chechikara, naavo vakadira muedzaniso wacho. Ava vairi vakakandirwa vechizwa mugandwa romuriro raibaka ngesurufa. Nevamweni vakaurawa ngeshoti youwo waigadha hachi, shoti iyo yakabuda kubva mumuromo wake; neshiri dzeshe dzakaguta ngenyama yavo. Zvino ndakaona ngirosi yechidzaka kubva mudenga, yakabata munyara yayo kiyi romugodhi usina magumo neketani huru. Yakabata dragoni, nyoka yekare, ndiyo Dhiabhorosi naSathani, ikamusunga makore gumi remazana. Yakamukandira mumugodhi usina magumo, ikaukonya ikaisa chinamiro padera pake, kuti asachazochengedzerazve madzinza, metsa makore gumi remazana apera. Ngesure kweizvi kunosisira kuti ambosunhurwa mukuwo mudoko. Ndakaona zvigaro zvoumambo, naavo vakagara padera pazvo, vakapuwa simba rokutonga. Ndakaona mweya yeavo vakagurwa masoro ngendaa youchapupu hwaJesu neizwi raMwari. Avazi kudira chikara nokuti muedzaniso wacho vasikazi kuashira chioniso pahuma dzavo nepanyara dzavo. Vakararama, vakatonga vari pamwepo naKristu makore gumi remazana (1,000). Vamweni vevakafa avazi kurarama metsa makore gumi remazana apera. Uku ndikwo kumuka kwokutanga. Vanomuchena nokucheneswa avo vane chikoaniswa mukumuka kwokutanga. Padera peava kufa kwechipiri akuchina simba, asi vanozoita vapristi vaMwari nevaKristu, navo vanozotonga naye makore gumi remazana. Naapo makore gumi ramazana apera, Sathani unozosunhurwa kubva mutirongo rake. Unozobuda nokuenda koochengedzera madzinza kumarupande marongomuna enyika, Gogi naMagogi. Unozovaunganidza pamwepo kurwa hondo; uwandu hwavo hwakadai ngejecha roruandhle. Vakakwira pakupamhama kwenyika, vakatendenedza matumba evakacheneswa nedhorobha rinodikanwa. Naapo wakadzaka muriro wechibva mudenga, ukavapedza. NaDhiabhorosi uwo wakavachengedzera wakakandirwa mugandwa romuriro nesurufa, munechikara nomuprofeti wokunyepa navo vanozotambudzwa masikati nousiku mhera nariini nariini. Ndakaona chigaro chikuru choumambo chakachena, nouwo wakagara padera pacho; ngokuapo kwake nyika nedenga zvakamutiza, akuzi kuchazooneka ndau yazvo. Ndakaona vakafa, vakuru nevadoko, vakaema pamberi pechigaro choumambo, nemabhuku akabeurwa. Bhuku rimwenizve rakabeurwa, bhuku rokupona. Nevakafa vakatongwa kudai ngemishando yavo, kudai ngezvakanyorwa mumabhuku. Noruandhle rwakabudisa vakafa vaiya mukati mwarwo, rufu neHaidhesi zvakabudisa vakafa vaiya mukati mwazvo, navo veshe vakatongwa umwe ngaumwe ngendaa yezvaakaita. Zvino rufu neHaidhesi zvakakandirwa mugandwa romuriro. Uku ndikwo kufa kwechipiri, gandwa romuriro. Kudai aripo wakaoneka zina rake risikazi kunyorwa mubhuku rokupona, wakakandirwa mugandwa romuriro. Zvino ndakaona denga idzva nenyika itsva; ngokuti denga rokutanga nenyika yokutanga zvakapinda, noruandhle paiya pasisina. Neni ndakaona dhorobha rakachena, Jerusarema idzva, rechidzaka kubva mudenga kunaMwari, rakanasirirwa kudai ngomuroorwa wakanemeserwa mwamuna wake. Neni ndakazwa izwi guru rechibva pachigaro choumambo rechiti, “Ringira, ugaro hwaMwari huri pakati pevanhu. Unozogara navo; navo vanozoita vanhu vake, naMwari emene unozoa navo, echiita Mwari wavo. Naye unozopukuta masodzi eshe kubva pamadziso avo. Rufu aruchazoapo; akuchina kubonda nokuti kuchema zve, nokuti kurwadziwa, ngokuti zviro zvokutanga zvapinda.” Nouwo wakagara pachigaro choumambo wakati, “Ringira, ndinoita zviro zveshe kuti zviite zvitsva.” Wakatizve, “Nyora izvi, ngokuti aya mazwi anogondeka, anegwinyiso.” Zvino wakati kwendiri, “Zvaitwa! Ndini Arfa naOmega, wokutanga nowokugumisira. Kwavari vane nyota ndinozovapa mvura isina mutengo, mvura inobva pachinyuka chokupona. Iye unonyisa unozogara nhaka yezviro izvi, neni ndinozoita Mwari wake, naye unozoita mukororo wangu. Asi ngendaa yevanotya, vasikagondi, vanonyangadza, vaurayi, vaombi, varoyi, vadiri vemiedzaniso, navo veshe vanyepi vanozoa nechikoaniswa chavo mugandwa rinobaka ngomuriro nesurufa, ndirwo rufu rwechipiri.” Zvino yakauya imwe yengirosi nomwe yeidzo dzaiya nemikheyo minomwe yakazara ngemadambudziko manomwe okugumisira, yakaereketa kwendiri yechiti, “Uya pano, ndinozokuonisa muroorwa, mukadzi weGwai.” Yakanditora ndakabatwa ndiMweya kuenda kumutunhu mukuru wakareba, ikandionisa dhorobha rakachena Jerusarema, rechidzaka kubva mudenga kunaMwari, rine uthende hwaMwari; kujeka kwaro kwaiya kwakadai ngebuwe rino mutengo mukuru rakadai ngebuwe rejasipa, rakaera kudai ngegirazi. Raiya rine rukumbati rukuru, rwakareba kuenda mudenga, rine misiwo gumi namiiri, nepamisiwo pane ngirosi gumi nambiri; nemazina akanyorwa padera payo, mazina evakororo gumi navairi vaIsuraeri. Kumabvazuva kwaiya nemisiwo mitatu, dera kwaiya nemisiwo mitatu, kubani kwaiya nemisiwo mitatu, kumabirirazuva kwaiya nemisiwo mitatu. Norukumbati rwedhorobha rwaiya nemadzeyo gumi namairi, nepadera pawo paiya nemazina gumi namairi evapostori gumi navairi veGwai. Iyo yakaereketa neni yaiya nendonga yomukore yokupima dhorobha nemisiwo yaro norukumbati rwaro. Nedhorobha raiya nemarupande marongomuna akaedzana, nokureba kwaro kwakandodai ngokupamhama kwaro; nayo yakapima dhorobha ngendonga, rakaita makhiromitha mazana makumi mairi nemazana marongomuna (2,400) kureba kwaro; nokupamhama nokukwira kwaro mudenga kwaiya kwakaedzana. Nayo yakapima rukumbati rwaro, rwaiya mamitha matanhatu kureba kuenda mudenga, kudai ngokupima kwomunhu, kunoti, kwengirosi. Norukumbati rwaro rwakaakiwa ngejasipa, nedhorobha raiya romukore wakaera, wakadai ngegirazi rakaera. Madzeyo orukumbati rwedhorobha akanemeswa ngembeu dzeshe dzemapuwe anemutengo mukuru. Dzeyo rokutanga raiya rejasipa, rechipiri raiya resafire, rechitatu raiya reagate, rechirongomuna raiya reemeraridhi, rechishanu raiya reonikisi, rechitanhatu raiya rekhaneriani, rechinomwe raiya rekrusoriti, rechisere raiya rebheruri, rechipfumbamwe raiya retopazi, rechigumi raiya rekrusoprasi, rechigumi narimwe raiya rejakiniti nerechigumi namairi raiya reametisiti. Nemisiwo gumi namiiri yaiya nemapherere gumi namairi, umwe ngaumwe wemisiwo waiya nepherere rimwe, nepato redhorobha raiya romukore wakaera, wakadai ngegirazi rakaera. Neni andizi kuona temperi mudhorobha, ngokuti Mambo Mwari Unesimbareshe neGwai ndivo temperi raro. Nedhorobha aritsvaki zuva nokuti mwedzi kurijekisa, ngokuti uthende hwaMwari ndikwo kujeka kwaro, neGwai ndicho chibani charo. Nemadzinza anozohamba ngokujeka kwaro, nemadzimambo enyika anozounza uthende hwawo mukati mwaro. Nemisiwo yaro aizokonyiwi masikati, ngokuti ahuzoapo usiku. Vanozounzamwo mukati mwaro uthende nokuremeredzwa kwemadzinza. Asi akuna nachimwe chakasvipiswa chinozopoteramwo nokuti uwo unoita chinonyangadza nemanyepo, asi avo vega vakanyorwa mubhuku rokupona reGwai. Zvino ngirosi yakandionisa rwizi rwemvura yokupona, rwakaera kudai ngegirazi, rwechibuda muchigaro choumambo hwaMwari necheGwai. Pakati pepato redhorobha, nokumarutii eshe orwizi, waiyapo muti wokupona, wechibereka mbeu dziri gumi nambiri dzemichero, wechibereka michero yawo mwedzi umwe ngaumwe; nemashakani omuti aiya mutombo wokuponesa madzinza. Akuchazoapozve nachimwe chiro chakatukwa; asi chigaro choumambo hwaMwari necheGwai zvinozoapo mukati mwaro, nevaranda vake vanozomudira. Vanozoona hope yake, nezina rake rinozoapo pahuma dzavo. Akuchazoapo usiku; navo avazotsvaki kujeka kwechibani nokuti kujeka kwezuva, ngokuti Mambo Mwari unozoita kujeka kwavo navo vanozotonga mhera nariini nariini. Nayo yakati kwendiri, “Aya mazwi anogondeka, anegwinyiso, naMambo Mwari, Mwari womweya yevaprofeti, wakatuma ngirosi yake kuti ionise varanda vake zvinosisira kuitika ngokukasira.” “Ringira, ndinokasira kuuya. Unomuchena uwo unongwarira mazwi okuprofeta kweiri bhuku.” Inini, Johani, ndakazwa ndikaona zviro izvi. Naapo ndazwa nokuzviona, ndakawa pashi kuti ndidire pamberi petsoka dzengirosi yakandionisa izvi; asi yakati kwendiri, “Ngwara kuti usaita kudaro! Ndiri muranda pamwepo newe nehama dzako vaprofeti, naavo vanongwarira mazwi okuprofeta kwebhuku iri. Dira Mwari!” Nayo yakati kwendiri, “Usakonya mazwi okuprofeta kwebhuku iri, ngokuti mukuwo waapasinde. Iye usikazi kururama ngaagare asikazi kururama, nouwo unetsvina ngaagare anetsvina, nouwo wakarurama ngaagare kuita zvakarurama, nouwo wakacheneswa ngaagare kuita wakacheneswa. “Ringira, ndinokasira kuuya, ndinouya nomusharo wangu, kuti ndihwirinzire kuneweshe kudai ngezvaakaita. Ndiri Arfa naOmega, wokutanga newokugumisira, muambi nowokupedzisira.” Vanomuchena avo vanosuka zvokusimira zvavo, kuti vawe nesimba rokuuya kumuti wokupona nokupotera ngepamisiwo mudhorobha. Ngokuti ngokubanze kunembwa, varoyi, vaombi, vaurayi, vadiri vemiedzaniso, navo veshe vanoda nokuita vanyepi. “Inini, Jesu, ndakatuma ngirosi yangu kwomuri nouchapupu uhwu muzviara. Ndini runzinde nomubarirwana waDhavhidha, nyeredzi inojeka masase.” Mweya nomuroorwa vanoti, “Uyai.” Nouwo unozwa ngaati, “Uyai.” Naye unozwa nyota ngaauye. Uwo unoda ngaatore mvura yokupona pasina mutengo. Inini ndinopupura kumunhu weshe unozwa mazwi okuprofeta kwebhuku iri, kuti kudai aripo munhu unozotutsira kwaari awo, Mwari unozotutsira kwaari madambudziko akanyorwa mubhuku iri. Kudai aripo munhu unozodusa mazwi ebhuku rokuprofeta uku, Mwari unozodusa chikoaniswa chake kumuti wokupona nokudhorobha rakachena, izvo zvakanyorwa mubhuku iri. Iye unopupura izvi unoti, “Eya, ndinokasira kuuya.” Ameni. Uya, Mambo Jesu! Nyasha dzaMambo Jesu ngadzigare nevakacheneswa veshe. Ameni.