Vitsa katar o Jesus Kristo, šiav katar o David, šiav katar o Abraham. Katar o Abraham avilo o Isak; katar o Isak avilo o Jakob; katar o Jakob avilo o Juda ai leske phral; katar o Juda avilo o Fares ai o Zara, lengi dei sas e Tamara; katar o Fares avilo o Esrom; katar o Esrom avilo o Ram; katar o Ram avilo o Aminadab; katar o Aminadab avilo o Nason; katar o Nason avilo o Salmon; katar o Salmon avilo o Boaz, leski dei sas e Rahab; katar o Boaz avilo o Obed, leski dei sas e Rut; katar o Obed avilo o Jesai; katar o Jesai avilo o amperato David. O David avilo lestar o Salomon, leski dei sas e phivli le Urieski. Katar o Salomon avilo o Roboam; katar o Roboam avilo o Abia; katar o Abia avilo o Asa; katar o Asa avilo o Josafat; katar o Josafat avilo o Joram; katar o Joram avilo o Ozias; katar o Ozias avilo o Joatam; katar o Joatam avilo o Ahaz; katar o Ahaz avilo o Ezekias; katar o Ezekias avilo o Manase; katar o Manase avilo o Amos; katar o Amos avilo o Josias; katar o Josias avilo o Jekonias ai leske phral ande e vramia kai ningerde le Židovon ande o Babilon. Mai pale kana ningerde le ande o Babilon, katar o Jekonias avilo o Salatiel, katar o Salatiel avilo o Zorobabel; katar o Zorobabel avilo o Abiud; katar o Abiud avilo o Eliakim; katar o Eliakim avilo o Azor; katar o Azor avilo o Sadok; katar o Sadok avilo o Akim; katar o Akim avilo o Eliud; katar o Eliud avilo o Eleazar; katar o Eleazar avilo o Matan; katar o Matan avilo o Jakob; katar o Jakob avilo o Josef, o řom la Mariako, kastar arakhadilo o Jesus, kai akharen les o Kristo. Si ande sa deš-u-štar vitsi de katar o Abraham ži ka o David, deš-u-štar vitsi de katar o David žikin či ningerde le Židovon ande o Babilon, ai deš-u-štar vitsi de katar ningerde le ande o Babilon ži ka o Kristo. Eta sar areslias te arakhadiol o Jesus Kristo. E Maria, leski dei, sas tomnime pala o Josef, sas phari katar o Svinto Duxo, angla savořende te bešen ande jekh than. O Josef, lako řom, kai sas jekh manuš lašio ai kai či kamelas te del la pe o lažiav, manglias te del pe rigate latar čorořal. Sar vo delas pe godji, eta, jekh andželo le Baresko avilo leste ande o suno, ai phenel: Josef, šiav katar o David, na dara te les tusa la Maria, tjiri řomni, ke o šiavořo kai si t'avel la avel katar o Svinto Duxo; La avela la jekh šiav, ai tu desa les o anav o Jesus; vo skipila pesko narodo anda le bezexa. Sa kudia areslias te kerdiol so o Baro phendiasas katar o profeto: Eta, e šei pativali avela phari, la avela la jekh šiav, Ai dena les o anav o Emanuel, so si kudia «o Del amensa». O Josef uštilo, kerdias so o andželo le Baresko dias les ordina, vo lias peska řomnia pesa. Numa vo či hamisailo late žikin či arakhadilo lake jekh šiav, kaske dias o anav o Jesus. O Jesus arakhadilo ande o Betlehem ande e Judea, ande e vramia kai sas o amperato o Herodo, eta drabarne anda e čači rig dural avile ande o Jerusalem, ai phenen: Kai lo o amperato le Židovongo kai arakhadilo? Ke ame dikhliam leski čeřai pa e čači rig katar ame avas, ai ame aviliam te das les pativ. O amperato Herodo, ašundias kudia, isdraias, ai sa o Jerusalem lesa. Vo kjidias sa le mai bare rašan židovitsko ai le zakonaren anda o narodo, ai vo pušel kai trubul t'arakhadiol o Kristo. Von phenel leske: Ande o Betlehem ande e Judea; ke eta so sas ramome katar le profeturi: Ai tu, Betlehem, phuv anda e Judea. Tu či san anda le mai tsinoře anda le foruri ande e Judea, ke anda tute anklela avri jekh birevo kai pravarela o Israel, tjiro narodo. Atunči o Herodo akharel čorořal le drabarnen, ai pušel lendar pria mišto de sode vramia e čeřai strefial. Porme tradias le ande o Betlehem, phenelas: Žian, ai pušen vorta pa o tsinořo šiavořo; kana tume arakhena les, keren te žianav, eta te žiav vi me te dav les pativ. Pala ke ašunde ka o amperato, von geletar. Ai eta, e čeřai kai von dikhle pe e rig čači phirelas angle lende žikin či aresli opral pa o than kai sas o tsinořo šiavořo, voi terdili. Kana von dikhle e čeřai, len lias le jekh pria bari veselia. Von dine andre ande o kher, dikhle le tsinoře šiavořes la Mariasa, leski dei, dine čanga kai řudjisaile leste; von puterde atunči penge moxte, ai von dine les sunakai ai duxi — tumuia ai miro. Porme, katar o Del sas lenge phendo ande o suno te na žian palpale ka o Herodo ai von gele ande pengo them pa jekh kaver vurma. Kana von geletar, eta, jekh andželo katar o Baro sikadilo ande o suno ka o Josef, ai phenel: Ušti, le le tsinoře šiavořes ai leska da, naš ande e Egipta, ai beš kothe žikin či dava tusa duma; ke o Herodo rodela le tsinoře šiavořes te mudarel les. O Josef uštilo, lias riate le tsinoře šiavořes ai leska da, ai gelotar ande e Egipta. Vo bešlo kathe žikin či mulo o Herodo, eta t'aresel so o Baro phendiasas katar o Profeto: Me akhardem muře šiaves avri anda e Egipta. Atunči Herodo, dikhlias ke diliarde les le drabarne, lias les jekh bari xoli, ai vo tradias te mudaren sa le šiavořen do beršenge ai mai terne kai si ande o Betlehem ai anda sa kudia rig, pala e vramia kai vo pušlias mišto katar le drabarne. Atunči areslias so sas phendo katar o Jeremia, o profeto: Ašunde o tsipimos ande o Rama, roimata ai bare vatimata: E Rahel rovel peske šiaven, ai či kamlias te miluin la, ke von manai. Kana o Herodo mulo, eta, jekh andželo le Baresko sikadilo ande o suno ka o Josef, ande e Egipta, ai phenel: Ušti, le le tsinoře šiavořes ai leska da, ai žia ande o them o Israel, ke kudala kai kamenas te mudaren le tsinoře šiavořes mule. O Josef uštilo, lias le tsinoře šiavořes ai leska da, ai gelo ande o them o Israel. Numa, ašundias ke o Arkelaus amperetsil ande e Judea ande o than katar o Herodo, lesko dad, darailo te žial kothe; ai, sar sas leske phendo ande o suno, vo gelo ande e phuv e Galilea. Ai avilo te bešel ande jekh foro kai akharen les Nazaret, eta t'aresel so sas phendo katar le profeturi: Vo avela akhardo Nazariano. Ande kudia vramia, sikadilo o Jono kai boldias, delas duma ande e pusta ande e Judea. Vo phenelas: Kein tume, ke e amperetsia la čerengi si paše. O Jono si kudo kai phendiasas pa leste o profeto Esai, kana vo phendias: Kathe si o hango kai tsipil ande e pusta: Lašiaren e vurma le Bareski Teliaren leske vurmitsi. Pe o Jono sas pe leste jekh tsolo anda o bal la gumulako, ai jekh prastia anda e mortsi pe leske prašave. Vo xalas grastoře ai avdjin sirbato. O narodo anda o Jerusalem, anda sa e Judea ai anda sa o them krugom o Jordan, žianas paša leste; ai, puřinas penge bezexa, von bolenas pe lestar ande o pai o Jordan. Numa, vo dikhelas ke aven ka lesko bolimos but Farizianuri ai Sadusenuri, vo phenel lenge: Vitsa sapengi! Kon sikiardias tumen te našen katar e xoli kai si t'avel? Sikaven angla savořende dieli ke keisailian, ai na phenen ande tumende: Amen si ame o Abraham amaro dad! Ke me phenav tumenge ke anda kakala bař o Del šai ankalavel šiaven le Abrahamoske. Inke o tover si thodino ka e vuna le kopačengi: Sako kopači kai či del laši fruta avela šindi ai šiudini ande e jag. Me, bolav tume ande o pai, anav tumen te kein tume; numa kudo kai avel pala mande mai zuralo si mandar, ai me či sim harniko te lav leske papuča. Vo, bolela tumen ande o Svinto Duxo ai ande e jag. Si les leski setka ande o vast; vo hulavel o gjiv, ai vo kjidela pesko gjiv ande peski stala, numa vo phabarela o sulum ande jekh jag kai či bilala šoha. Atunči o Jesus avilo anda e Galilea ka o Jordan karing o Jono, t'avel boldo lestar. Numa o Jono či kamel, phenelas: Me trubuv t'avav boldo tutar, ai tu aves mande! O Jesus del les palpale: Muk te keras kadia akana, ke mišto t'ame te keras kadia sa so si vorta. Ai o Jono muklia pe. Sar o Jesus sas boldo, vo anklisto avri anda o pai, strazo puterdilo o čeri angla leste ai vo dikhlias o Duxo le Devlesko kai vulel tele sar jekh gulumbo ai avel karing leste. Ai eta, jekh hango ašundiol anda o čeri kai phendias: Kado si muřo Šiav kai si mange drago, ande kaste me thodem sa muři dragostia. Atunči o Jesus sas ningerdo katar o Duxo ande e pusta, te zumavel les o beng. Kana postisardias štar-var-deš dies ai štar-var-deš ratia, sas bokhalo. O zumaitori, pašilo paša leste, phenel leske: Te san tu o Šiav le Devlesko, de ordina ke kakala bař te kerdion manře. O Jesus del palpale: Si ramome: o manuš či traila ferdi anda o manřo, numa anda sako vorba kai anklel anda o mui le Devlesko. O beng ningerdias les ande o foro svinto, thodias les opre pe o templo, ai phenel leske: Te san tu o Šiav le Devlesko, xuti tele; ke si ramome: Vo dela ordina ka peske andželi Te arakhen tu pe sa tjire vurmi; Von ningerena tu pe le vast, Daratar ke tjiro punřo te na malavel jekh bař. O Jesus phenel leske: Vi mai si ramome: Tu či zumavesa le Bares, tjiro Del. O beng mai ningerdias les pe jekh plai but vučo. Sikadias leske sa le thema la lumiake ai lengo vestimos. Ai phenel leske: Me dava tut sa kadala dieli, te tu bangios ai te kames ma. O Jesus phenel leske: Žiatar, Satan! Ke si ramome: Tuke avela drago o Baro, tjiro Del, ai tu služisa ferdi les. Atunči o beng muklias les. Ai eta, andželi avile paša o Jesus, ai dine les te xal. O Jesus, ašundias ke o Jono line les, gelotar ande e Galilea. Vo gelotar anda o Nazaret, ai avilo te bešel ande o Kapernaum, kai si paša e maria, ande e phuv o Zabulon ai o Neftali. Eta t'aresel so sas phendo katar o Esai, o profeto: O narodo anda o Zabulon ai anda o Neftali, pe e rig paša e maria, anda o them inčial o Jordan, ai katar e Galilea le Streiengi, kudo narodo, kai bešen ande o tuniariko, dikhlias jekh bari vedaria: Pe kudala kai bešenas ande e phuv ai e ušialin le merimaski e vedaria uštili. De anda kudia vramia o Jesus lias pe te del duma, ai te phenel: Keisavon, ke e amperetsia le čereski pašiol. Sar vo phirelas pe o berego la mariako katar e Galilea, vo dikhlias do phralen, o Simon, kai akharen les Petri, ai o Andreas, lesko phral, kai šiudenas jekh setka ande e maria; ke von sas mašiaria. Vo phenel lenge: Aven pala mande, ai me kerava t'astaren manušen. Strazo, von mukle penge setki, ai gele pala leste. Kothar gelo mai angle, vo mai dikhlias aver do phralen, o Jakob, šiav katar o Zebedeo, ai o Jono, lesko phral, kai sas ande jekh čuno le Zebedeosa, lengo dad, ai kai lašiarenas penge setki. Vo akharel le, ai strazo von mukle o čuno ai penge dades, ai gele pala leste. O Jesus gelo ande sa e Galilea, sikiarelas ande le khangeria le židovitsko, phenelas e laši viasta la amperetsiako, ai sastiarelas sako nasvalimos ai sako bangimos maškar o narodo. Leski viasta geli ande sa e Siria, ai anenas leste sa kudalen kai si dukhade ande o nasvalimos ai varesavi dukh, bengale, lunatikuri, paralitikuri; ai vo sastiarelas len. Baro narodo žianas pala leste, anda e Galilea, anda le Deš Foruri anda o Jerusalem, anda e Judea, ai inčial o Jordan. Dikhel pe o narodo, o Jesus anklisto pe o plai; ai, pala ke bešlo tele, leske vortača pašile paša leste. Porme, puterdias o mui, vo sikiarel le, ai phenel: Veseli t'aven le čoře ande o duxo, ke e amperetsia le čereski si lengi! Veseli t'aven le nekežime, ke avena len mila! Veseli le prosti, ke lenge avela e phuv! Veseli kudala kai si bokhale ai trušale anda e kris, ke von avena pravarde! Veseli le milosi, ke avela mila anda lende! Veseli kudala kai si lengo ilo vužio, ke von dikhena le Devles! Veseli kudala kai keren e patia, von avena akharde šiave le Devleske! Veseli kudala kai avena marde ke von keren sar o Del mangel, ke e amperetsia le čereski si lengi! Veseli avena tume, kana dena tumen pe o lažiav, kana gonina tumen ai kana phenena xoxaimos pe tumende sako fialo, pala mande. Veselin tume ai aven ande o veselimos, ke tumaro pokjinimos avela baro ande o čeri; ke sa kadia marde le profeton kai sas angla savořende tumendar. Tume san o lon la phuviako. Numa t'avela ke o lon xasarel pesko gusto, sar šai londiarela les? Vo manai lašio ferdi te šiuden les avri, ai te avela inčardo tela le punře katar le manuš. Tume san e vedaria la lumiaki. Jekh foro thodino pe jekh plai naštil t'avel garado; ai či den jag jekh lampa te thon les tela e vadra, numa thon les pe e vadra, ai vo strefial sa sogodi si ande o kher. Ke te tumari vedaria te strefial kadia angla le manuš, eta te dikhen tumare laše dieli, ai te luvudin tumare Dades kai si ande o čeri. Na gindin tume ke me avilem te dav rigate o zakono vai le profeton. Me či avilem te šiudav, numa te sikavav lengo pherdo čačimos. Me phenav tumenge čačimasa, žikin o čeri ai e phuv či nakhena, či bilala katar o zakono ferdi jekh vorba vai jekh bukva, žikin či sa aresela. Kudo kai lela tele jekh anda le mai tsinoře poronki, ai kai sikiarela le manušen te keren kadia, avela akhardo o mai tsinořo ande e amperetsia le čereski, numa kudo kai lela len opre, ai kai sikiarela te len le sama, kudo avela akhardo baro ande e amperetsia le čereski. Ke, me phenav tumenge, ke tumari kris te na nakhavela e kris le zakonarengi ai le Farizianongi tume či dena andre ande e amperetsia le čereski. Tume ašundian ke sas phendo ka le purane: Tu či mudaresa; kudo kai mudarel trubul t'avel dino strafo. Numa me, phenav tumenge ke varekon kai xoliavol pe pesko phral trubul t'avel dino strafo katar le krisinitoria; kudo kai phenela peske phraleske: «Prosto!» trubul t'avel dino strafo katar e bari kris; ai ke kudo kai phenela leske: «Dilo!» trubul t'avel dino strafo katar e jag le merimaski. T'avela te sikaves so des ka o altari, ai ke kothe des tu godji ke tjiro phral si les vareso pe tute, muk kothe sode te des angla o altari, ai žia angla savořende te lašiardios tjire phralesa; porme, aidi ai de tjiri podarka. Lašiardo sigo tjire dušmanosa, žikin san pe e vurma lesa, daratar ke del tu ka o krisinitori, ke o krisinitori del tu ka o fitsiri la krisako, ai ke thon tu ande o temnitsa. Me phenav tumenge čačimasa, tu či anklesa avri kothar žikin či pokjinesa e mai paluni palianka. Tume ašundian ke sas phendo: Tu či keresa kurvetsia. Numa me, phenav tumenge ke varekon kai dikhel pe jekh žiuvli te gindil-pe pe late vo vuže kerdia kurvetsia lasa ande pesko ilo. T'avela tjiri jakh e čači ke šai peravel tu, ankalav la avri ai šiude la dur tutar; ke mai mišto avela tuke ke jekh jakh ferdi anda tute xasavol, ai ke tjiro stato sa te na avel šiudino ande e jag le merimaski. Ai t'avela tjiro vast o čačo ke šai peravel tu, šin les ai šiude les dur tutar: ke mai mišto avela tuke ke jekh vast ferdi anda tute xasavol, ai ke tjiro stato sa te na avel šiudino ande e jag le merimaski. Sas phendo: Ke kudo kai del palpale peska řomnia te del la jekh lil ke muklias la. Numa me, phenav tumenge ke kudo kai mukel peska řomnia, ferdi te na ke dias pes pe o lažiav, kerel ke aresli kurva, ai kudo kai lel jekha řomnia šiudinia kerel jekh kurvetsia. Tume mai ašundian ke sas phendo ka le purane: Tu či solaxasa xoxamnes, numa tu desa karing o Baro so tu phendias solaxasa. Numa me, phenav tumenge te na solaxan či jekh fialo, či pa o čeri, ke si o skamin amperatosko le Devlesko; či pa e phuv, ke si kai vo thol peske punře; či pa o Jerusalem, ke si o foro le bare amperatosko. Na solaxa či pe tjiro šero, ke tu naštis te keres parno vai kalo ferdi jekh anda tjire bal. Ke tjiri vorba t'avel ei, ei, niči, niči; so thon opral avel katar o Xitro. Tume ašundian ke sas phendo: Jakh pala jakh, ai dand pala dand. Numa me, phenav tuke te na malaves palpale kudales kai kerel tuke nasul. T'avela varekon kai del tut palma pe e buka e čači, muk les te del tu vi pe e buka e stingo. T'avela varekon te kamel te kerel kris pe tute, ai te lel tjiro tsolo, mai muk leske vi tjiri bunda. T'avela varekon te zuriarel tu te žial lesa jekh kilometro, žia dui lesa. De ka kudo kai mangel tutar, ai na de tu palpale katar kudo kai mangel te lel tutar vužile. Tume ašundian ke sas phendo: T'avel tuke drago tjiro vortako, ai te vuřitsis tjire dušmanos. Numa me, phenav tumenge: Kamen tumare dušmanon, svintsin kudalen kai den tumen armaia, keren mištimos kudalenge kai vuřitsin tumen, ai řudjin kudalenge kai keren tumenge nasul ai kai maren tumen. Eta tume t'aven šiave tumare dadeske kai si ande o čeri; ke vo uštiavel pesko kham pe le nasul ai pe le laše, ai vo del brišin pe le vorta ai pe le nai vorta. Te kamena tume kudalen kai kamen tumen, so šai nirina tume? Kai kjidel e taksa le amperatoske či kerel vi vo kadia? Ai te dena tume pozdraimos ferdi le phralen, keren tume vareso šodo? Kai či patian či keren von sa kadia? Aven tume vorta, sar tumaro Dad čeresko si vorta. Len tume sama te na keren tumaro zakono angla le manuš, te dikhen tumen; aver fialo, tumen či avela pokjinimos paša tumaro Dad kai si ande o čeri. Kana tu desa vareso le čořenge, na bašav e tuturiaza angla tute, sar keren le athaitoria ande le khangeria židovitsko ai ande le vulitsi, eta te aven luvudime katar le manuš. Me phenav tumenge čačimasa, von line lengo pokjinimos. Numa kana tu des le čořenge, ke tjiro vast o stingo te na žianel so del tjiro vast o čačo. Eta so des t'avel garado; ai tjiro Dad, kai dikhel so keres garades, dela tuke. Kana tume řudjin, na aven sar le athaitoria, kai drago lenge te řudjin ande le khangeria židovitsko ai ande le koltsuri le vulitsenge, te dikhen le le manuš, me phenav tumenge čačimasa, von line pengo pokjinimos. Numa kana tu řudjis, žia ande tjiri soba, phandav tjiro vudar, ai řudjisar tjire Dades kai garadilo; ai tjiro Dad, kai dikhel so keres garades, dela tuke. Kana řudjis, na butiar le vorbi intaino, sar kudala kai či patian ke von gindin te o Del šunela len te phenena but vorbi. Na aven sar lende; ke tumaro Dad vo žianel so trubul tumen. Eta sar tume trubul te řudjin: Amaro Dad kai san ande o čeri! Ke tjiro anav t'avel svintsime; ke tjiri amperetsia t'avel; ke te keres sar tu kames pe e phuv sar ande o čeri. De ame adies amaro manřo sako diesesko. Jertisar amenge amare bezexa, sar vi ame jertisaras kudalenge kai hamisaile amende. Na zumav amen, numa skipisar amen katar o xitro. Ke tuke si, ande sa le berš kai avena, e amperetsia, e zor ai o vestimos. Amen. Te jertina tume le manušenge so kerde tumenge nasul, tumaro Dad anda o čeri jertila tumenge vi vo. Numa te na jertina tume le manušenge, tumaro Dad či vo či jertila tumare nasulimata. Kana tume postin, na nekežin tumaro mui, sar le athaitoria, kai rimon pengo mui, te sikaven le manušenge ke von postin. Me phenav tumenge čačimasa, von line pengo pokjinimos. Numa kana tu postis, tho duxi pe tjiro šero ai xalav tjiro mui, Eta te na sikaves le manušenge ke tu postis, numa tjire Dadeske kai garadilo; ai tjiro Dad, kai dikhel so keres garades, dela tuke. Na kjide tuke mandjin pe e phuv, kai o kermo ai e řuzinia rimon, ai kai le čor phagen ai čoren; Numa kjiden tumenge mandjin ande o čeri, kai o kermo ai e řuzinia či rimon, ai kai le čor či phagen ai či čoren. Ke kothe kai si tjiro mandjin, kothe si vi tjiro ilo. E jakh si o lampa le statosko. T'avel tjiri jakh laši, sa tjiro stato strefiala. Numa t'avel tjiri jakh ke nai laši, sa tjiro stato avela ande o tuniariko. T'avel e vedaria kai si ande tute ke si tuniariko, sode avela baro kudo tuniariko. Khonik naštil te služil do birevon. Ke, vai ke vuřitsila jekhes, ai kamela le kavres; vai ke astardiola ka jekh, ai vuřitsila le kavres. Tume naštin te služin le Devles ai le Love. Sa anda kudia me phenav tumenge: Na daran pala tumaro traio de so tume xana, či anda tumaro stato — sar tume avena uriade. O traio nai vo mai but sar o xamos, ai o stato mai but sar o tsolo? Dikhen le čiriklia le čereske; von či bariaren ai či kjiden, ai von či garaven ande le stali; ai tumaro Dad čeresko pravarel len. Či san tume mai kuč lendar? Kon anda tumende, te nekežila šai mai lunžiarel pesko traio? Ai sostar gindin pala tumare tsalia? Len sama sar barion le luludia ande le kimpuri; von či keren butji ai či khuven. Ai me mothav tumenge ke inke o Salomon, ande sa pesko vestimos, nas uriado sar jekh anda lende. Te si ke o Del uriavel kadia e čar le kimpongi, kai si adies ai tehara avela šiudini ande o bov, či uriavela vo mai zurales tumen, manuš, kai si tume tsiřa patiamos? Na daran tume, ai na phenen: So xasa ame? So piasa ame? Sar avasa ame uriade? Ke sa kudala dieli, si kai či patian pe ke roden le. Tumaro Dad čeresko vo žianel so trubul tumen. Roden mai angluno e amperetsia ai e kris le Devleski; ai sa kudala dieli avena tumenge dine opral. Na daran so avela tehara; ke tehara o dies lela sama pestar. Sako dies si les pesko kjinuimos. Na de pe kris, eta te na aves dino pe kris. Ke von dena tumen pe kris krisasa sar tume dena kris, ai mezurina tumen sar tume mezurin. Sostar dikhes tu o sulum kai si ande e jakh tjire phraleski, ai či dikhes tu e beli kai si ande tjiri jakh? Vai sar tromas tu te phenes tjire phraleske: Muk ma te lav jekh sulum anda tjiri jakh, tu kai si tu jekh beli ande tjiri? Athaitori, le mai angluno e beli anda tjiri jakh, ai atunči tu dikhesa sar te les o sulum anda e jakh tjire phraleski. Na den le dieli svintsi ka le žiukel daratar ke ambolden pe ai šinen tumen, ai na šiuden tumare perli angla le bale, daratar ke inčaren le tela le punře. Mangen, ai dena tumen; roden, ai tume arakhena; malaven, ai putrena tumenge. Ke kon mangel lel, kon rodel arakhel, ai putren kudaleske kai malavel. Savo anda tumende dela jekh bař ka pesko šiav, te mangela lestar manřo? Vai, te mangela jekh mašio, dela les vo jekh sap? T'avela kadia, nasul sar tume san, tume žianen te den laše dieli ka tumare šiave, sar mai but zurales tumaro Dad kai si ande o čeri dela vo mai laše dieli kudalenge kai mangen lestar. Sa so tume kamen ke le manuš keren tumenge, keren sa kadia lenge, ke kudia si o zakono ai le profeturi. Den andre katar o vudar tang. Ke buvlo si o vudar, bari si e vurma kai ningerel ka o xasarimos, ai but den andre kothar. Numa tang si o vudar, kjidini si e vurma kai ningerel ka o traio, ai tsiřa si kai arakhen la. Arakhen tume katar le falši profeturi. Von aven tumende ande le tsalia le bakrenge, numa andral si ruva bokhale. Tume prinžiarena le ka lenge fruti. Kjidena tume struguro vai figi pe le kanře? Sako lašio kopači del laše fruti, numa e čořo kopači del čoře fruti. Jekh lašio kopači naštil te ninkerel čoře fruti, či jekh čořo kopači te ninkerel laše fruti. Sako kopači kai či ninkerel laše fruti si šindi ai šiudini ande e jag. Si kadia ke ka lenge fruti ke tume prinžiarena le. Kudala kai phenen mange: Baria, Baria! či dena andre ande e amperetsia le čereski, numa kudo ferdi kai kerel so mangel muřo Dad kai si ande o čeri. But phenena mange ande kudo dies: Baria, Baria, phendiam e Devleski vorba. Gonisardiam ame le demonon pa tjiro anav ai kerdiam ame but čudeni pa tjiro anav. Atunči me phenava lenge vorta: Me šoha či prinžiardem tumen, žiantar mandar, tume kai či keren sar trubul. Sa anda kudia, kon-godi ašunel kadala vorbi ai lel le opre, avela sar jekh manuš godiaver kai vazdias pesko kher pe jekh stanka. O brišin pelo, le paia avile, le balvalia avile ai phurde pe kudo kher; vo či pelo tele, ke vo sas thodino pe e stanka. Numa kon-godi ašunel kadala vorbi kai me phenav, ai či lel le opre, avela sar jekh manuš dilo kai vazdias pesko kher pe e kišai. O brišin pelo, le paia avile, le balvalia phurde ai perade kudo kher; vo pelo tele, ai lesko phařaimos si baro. Kana o Jesus getosardias pesko divano, o narodo sas lenge šodo so vo phenel: Ke vo sikiarelas sar ke si les putiaria, ai na sar le zakonaria. Kana o Jesus vulisto pa o plai, baro narodo gelo pala leste Ai eta, jekh žiungalo nasvalo pašilo ai bangilo angla leste, ai phenel: Baria, te kamesa, tu šai vužares man. O Jesus vazdias o vast, asbadias les, ai phenel: Me kamav, av vužio! Strazo vo vužilo katar pesko nasvalimos. Porme o Jesus phenel leske: Le tu sama te na phenes khanikaske; numa žia sikadio ka le raša le bare, ai de so o Moše phendiasas, eta von te dikhen. Sar o Jesus avilo ande o Kapernaum, jekh fitsiri kai si baro pe šel ketani avel ai terdiarel les. Řudjisarel les ai phenel: muři sluga sovel ande o kher, naštil te mai phirel ai dukhal les but. O Jesus phenel leske: Žiava me, ai me sastiarava les. O fitsiri del palpale: Baria, me či sim harniko ke tu t'aves ande muřo kher; numa phen ferdi jekh vorba, ai muři sluga avela sasti. Ke, me kai sim tela le vast muře barenge, si ma ketani tela muřo vast, ai me phenav jekheske: Žia! ai vo žial; le kavreske: Aidi! ai vo avel; ai ka muři sluga: Ker kadia! ai vo kerel. Kana ašundias les, sas šodo le Jesusoske, ai vo phenel kudalenge kai aven pala leste: Me phenav tumenge čačimasa, inke ande o Israel či arakhlem jekh kasavo baro patiamos. Eta, me phenav tumenge ke but avena pa e rig e čači ai pa e rig e stingo, ai avena ka e skafidi ka o Abraham, o Isak ai o Jakob, ande e amperetsia le čereski. Numa kudala kai trubul te aven le Devleske avena šiudine ande o tuniariko avri, kai rovena ai grintsina le dand. Porme o Jesus phenel le fitsiri: Žia, t'avel tuke sar si tjiro patiamos. Ai ande kudo časo leski sluga sastili. O Jesus gelo atunči ande o kher le Petrosko, kai dikhlias leska sakra pe o pato ai si la tatimos. Vo asbadias lako vast, ai o tatimos muklias la; porme voi uštili, ai služisardias les. Riate, andine ka o Jesus but bengailen. Vo gonisardias le duxuri katar peski vorba, ai vo sastardias sa le nasvalimata. Eta t'aresel so sas phendo katar o Esai, o profeto: Vo lias pe peste amare bangimata, ai vo lias pe peste amare nasvalimata. O Jesus, dikhlias baro narodo krugom pestar, dias ordina te nakhen pe o kaver berego. Jekh zakonari pašiol, ai phenel leske: Birevo, me žiava pala tute kai-godi kai tu žiasa. O Jesus del les palpale: Le lisitsi si le groapi, ai le čiriklia ande o čeri si le kuiburi; numa o Šiav le manušesko nai les kai te hodinil pesko šero. Jekh kaver, maškar le vortača, phenel leske: Baria, muk ma angla savořende te žiav t'angropov muře dades. Numa o Jesus del les palpale: Av pala mande, ai muk le mulen te angropon le mulen. Vo anklisto ande o čuno, ai leske vortača gele lesa. Ai eta, uštilo pe e maria jekh pria baro tumano ke le talazuri šai tasavenas o čuno. Ai vo sovel. Le vortača pašile paša leste, uštiaven les, ai phenen: Baria, skipisar ame, ame xasavas! Vo phenel lenge: Sostar si tumenge dar? Atunči vo uštilo, daravel le balvalia ai e maria, ai aresle muto. Kudala manuš čudinisaile: Kon si kado, phenenas von, kas patian vi le balvalia ai e maria? Kana aresle pe o kaver berego, ande o them le Gadarenengo, dui bengaile, ankliste avri anda le groapoševuri, avile angla leste. Von sas kadia bengeske ke khonik či tromalas te nakhen kothar. Ai eta, von tsipin: So si maškar amende ai tute, Šiav le Devlesko? Avilian tu kathe te kjinuis ame mai angla e vramia? Sas dur lendar but bale kai xanas. Le demonuri řudjinas le Jesus: Te desa tu amen avri, trade ame anda kudala bale. Vo phenel lenge: Žian! Von ankliste, ai gele ande le bale. Ai eta, sa le bale šiude pe ande e maria, ai von xasaile ande le paia. Kudala kai denas le te xan našle, ai gele ande o foro te phenen sa so nakhlias ai so areslias le bengailenge. Atunči sa o foro anklisto angla o Jesus; ai, sar dikhle les, von řudjisaile leste te mukel lengi phuv. O Jesus, anklisto ande jekh čuno, nakhlias e maria, ai gelo ande pesko foro. Ai eta, ande leske jekhe paralitikos sovel pe jekh pato. O Jesus, dikhlias lengo patiamos, phenel le bangeske: Av veselo, muřo šiav, tjire bezexa si jertime. Pe kudia, uni zakonaria phenen ande pende: Kado manuš prasal. Ai o Jesus, žianelas lenge ginduri, phenel: Sostar si tumen nasul ginduri ande tumare ile? Ke, so si mai mišto, te phenes: Tjire bezexa si jertime, vai te phenes: Ušti, ai phir? Eta, te žianen ke o Šiav le manušesko si les pe e phuv e putiaria te jertil le bezexa: Ušti, phenel vo le bangeske, le tjiro pato, ai žia ande tjiro kher. Ai vo uštel, ai gelo ande pesko kher. Kana o narodo dikhlias kudia, lias len e dar, ai von vestin le Devles, kai dias ka le manuš kasavi putiaria. Kothar gelotar mai angle, o Jesus dikhlias jekhe manušes bešel kai trubulas te pokjinen e taksa, ai kai akharen les Matei. Vo phenel leske: Av mansa. Kudo manuš uštilo, ai gelo pala leste. Sar o Jesus sas pala e skafidi ande o kher, eta, but kai kjiden e taksa le amperatoske ai žene kai nai lengo traio lašio avile te thon pe pala e skafidi lesa ai leske vortakonsa. Le Farizianuri dikhle kudia, ai phenen ka leske vortača: Sostar tumaro birevo xal vo kudalensa kai kjiden e taksa ai le ženensa kai nai lengo traio lašio? Sar o Jesus ašundias, vo phenel: Nai kudala kai si saste ke trubul le doxtoro, numa le nasvale. Žian, ai sikion so si kudia: Me mangav o mištimos, ai na te šinaven le žigenien. Ke me či avilem pala kudala kai si vorta, numa pala le bezexale. Atunči le vortača katar o Jono avile paša o Jesus, ai phenen: Sostar ame ai le Farizianuri postin but, žikin tjire vortača či postin? O Jesus del le palpale: Le vortača le terneske ande o abiav šai nekežin von žikin o terno si lensa? Le dies avena kana o terno lena les lendar, atunči von postina. Khonik či suvel jekh purano tsolo jekhe kotoresa nevo; ke kudo kotor ankalavela jekh partia le tsoloski ai e groapa ašela mai bari. Či mai thona vi e mol nevi ande le bočonkuri purane; aver fialo, le bočonkuri phaglion, e mol pitial, ai le bočonkuri xasardile; numa thon e mol nevi ande le bočonkuri neve, ai e mol ai le bočonkuri garaven sa. Žikin vo phenel kudala vorbi, eta, jekh birevo aresel, bangilo angla leste, ai phenel: muři šei muli de jekh tsiřa vramia; numa aidi, tho pe late le vast, ai voi traila. O Jesus uštilo, ai gelo pala leste peske vortakonsa. Ai eta, jekh žiuvli kai xasavol lako rat de deš-u-dui berš pašili palal, ai asbadia tele lesko tsolo. Ke voi phendias ande peste: Te šai ferdi t'asbav lesko tsolo, me sastiuvava. O Jesus amboldias pe, ai phenel, kai dikhlias la: Av veselo, muři šei, tjiro patiamos sastiardias tu. Ai kudia žiuvli sastili ande kudo časo. Kana o Jesus areslo ka o kher le birevosko, ai ke ašundias kai gjilaben ande le tuturiazi ai o narodo kai tsipil, vo phenel lenge: Žiantar; ke e terni šei nai muli, numa voi sovel. Ai von marde mui lestar. Kana o narodo sas tradino, vo dias andre, lias o vast la ternia šako, ai e terni šei uštili. E viasta geli ande sa kudia rig. Gelotar kothar, o Jesus gele pala leste dui koře, kai tsipinas: T'avel tuke mila anda amende, Šiav katar o David! Kana aresle ka o kher, le koře pašile paša leste, ai o Jesus phenel lenge: Gindin tume ke me šai kerav kudia? Ei, Baria, den von palpale. Atunči vo asbadias lenge jakha, phendias: T'avel tumenge sar si tumaro patiamos. Ai lenge jakha puterdile. O Jesus phendias lenge kadia zurales: Len sama ke te khonik te na žianel. Numa, sar von ankliste avri, von dine duma pa leste ande sa o them. Sar von žianastar, eta, andine ka o Jesus jekhe bengailes mute. O demono sas dino avri, o muto dias duma. Ai o narodo sas lenge šodo, phenenas: Šoha kasavi diela či dikhilias ande o Israel. Numa le Farizianuri phenen: Si katar o prinso le demonongo ke vo del avri le demonon. O Jesus nakhel ande sa le foruri ai le gava, sikiarelas ande le khangeria židovitsko, phenelas e laši viasta la Amperetsiaki, ai sastiarelas sa le nasvalimata ai le bangimata. Dikhlias o narodo, lias les mila lendar, ke von sas nekežime ai perade, sar le bakroře kai nai le kai lel sama lendar. Atunči vo phenel ka peske vortača: But barilias, numa nai dosta butiaria. Řudjin tume le birevos le kjidimasko te tradel butiaren te kjiden. Porme, akhardias peske deš-u-do vortakon, vo dias len e putiaria te gonin le duxuri bi-vuže, ai te sastiaren sa le nasvalimata ai sa le bangimata. Eta le anava katar le deš-u-dui vortača: O mai angluno, o Simon, akharen les Petri, ai o Andreas, lesko phral; o Jakob, šiav katar o Zebedeo, ai o Jono, lesko phral; o Filipo, ai o Bartelemi; o Tomas, ai o Matei, kai kjidel e taksa, o Jakob, šiav katar o Alfeo, ai o Tade; o Simon o Kananito, ai o Juda Iskariot, kudo kai bikjindias les. Kadia si le deš-u-dui kai o Jesus tradias, kana sikiardias le kadia: Na žian karing kudala kai či patian, ai na den ande le foruri kai si le Samaritanuri. Žian mai mišto karing le bakroře le xasarde katar o kher anda o Israel. Žian, den duma, ai phenen: E amperetsia le čereski si paše. Sastiaren le nasvalen, živindin le mulen, vužaren le žiungale nasvalen, gonin le demonon. Tume lian ivia, den ivia. Na len tumensa sunakai, či rup, či lov, ande tumare prasti; či gono kana žian, či dui bundi, či papuča, či rovli; ke o butiari trubul te niril pesko xamos. Ande varesavo foro vai gav kai tume den andre, pušen tume t'avela varekon harniko kai šai žian leste, ai bešen leste žikin či žiantar. Kana dena andre ande o kher, den pozdraimos; ai, t'avel o kher pativalo, ke tumari patia t'avel pe leste; numa te na avela pativalo, ke tumari patia t'amboldel pe tumende. Kana či lena tumen ai ke či ašunen tumare vorbi, anklen avri anda kudo kher vai anda kudo foro ai khosen e pulberia pa tumare punře. Me phenav tumenge čačimasa: O dies kai avela e kris, o them e Gomořa ai o Sodomo avela dino pe kris mai tsiřa katar kudo foro. Eta, me tradav tumen sar bakroře maškar le ruva. Len tume sama sar le sap, ai aven kovle sar le gulumbia. Len tume sama katar le manuš; ke von dena tumen ka le krisa, ai von marena tumen řaiansa ande penge khangeria židovitsko. Tumen ningerena tumen pala mande, angla le vladoruri ai angla le amperatsi, t'aven martururi lenge ai kudalenge kai či patian. Numa, kana dena tumen ka le krisa, te na len sama sar tume dena duma vai so si te phenen; so avela tumen te phenen avela tumen dino ka kudo časo; ke či avela tume ke den duma, numa o duxo tumare Dadesko dela duma ande tumende. O phral dela peske phrales ka o merimos, ai o dad peske šiaves; le šiave buntuina-pe pe penge niamuri, ai mudarena len. Tume avena vuřitsime savořendar, pala muřo anav; numa kudo kai ninkerela ži ande o gor avela skipime. Kana marena tumen ande jekh foro, našen ande jekh kaver. Me phenav tumenge čačimasa, tume či getona te nakhen sa le foruri anda o Israel, ke o Šiav le manušesko avela. O vortako nai vo mai but sar o birevo, či e sluga mai but sar o baro. Trubul ferdi ke o vortako te kerel anda leste sar o birevo, ai e sluga sar lesko baro. T'akharde von le birevos Beelzebul, sar mai but akharena von kadia le ženen anda o kher. Te na daran tume lendar, ke nai khanči garado te na avela sikado, či thodino rigate te na avela žianglo. So me phenav tumenge ande o tuniariko phenen les tume ande e vedaria le dieseski, ai so si tumenge phendo ka o kan, den duma pa leste pe le čardakuri. Na daran kudalendar kai mudaren o stato ai kai naštin te mudaren o duxo; daran mai sigo katar kudo kai šai mudarel o duxo ai o stato ande e jag le merimaski. Či bikjinen dui čirikliořa pe jekh šuv? Numa, či perel jekh pe e phuv bi te na kamel tumaro Dad. Ai inke le bal tumare šereske si gjinde. Te na daran tume: Tume san but mai but sar le čirikliořa. Sa anda kudia, kon-godi del duma pa mande angla le manuš, vi me dava duma pa leste angla muřo Dad kai si ande o čeri. Numa kudo kai phenel angla o narodo ke či prinžiarel ma, vi me phenav angla muřo dad kai si ande o čeri ke me či prinžiarav les. Na gindin tumen ke me avilem t'anav e patia pe e phuv; me či avilem t'anav e patia, numa jekh xanřo. Ke me avilem te hulavav maškar o manuš ai lesko dad, maškar e šei ai laki dei, maškar e bori ai laki sakra. Ai o manuš avena les dušmane le žene anda lesko kher. Kudo kai kamel peske dades vai peska da mai but sar man nai harniko mange, ai kudo kai kamel peske šiaves vai peska šeia mai but sar man nai harniko mange; kudo kai či lel pesko trušul, ai či avel pala mande, nai harniko mange. Kudo kai arakhel pesko traio xasarela les, ai kudo kai xasarel pesko traio pala mande arakhela les. Kudo kai lel tu lel man, ai kudo kai lel man lel kudales kai tradias man. Kudo kai lel jekhe profetos sar ke si jekh profeto avela pokjindo sar jekh profeto, ai kudo kai lel jekhe vortos ke si vorta avela les jekh pokjinimos vorta. Ai varekon kai dela ferdi jekh taxtai pai šudro ka jekh anda kudala tsikne kai si muřo vortako, me phenav tumenge čačimasa, vo či xasarela pesko pokjinimos. Kana o Jesus getosardias te sikiarel peske deš-u-do vortakon, vo gelotar kothar, te sikiarel ai te del duma ande le foruri le themeske. O Jono, ašundias ande peski temnitsa so kerel o Kristo, tradias peske vortakon te phenen leske: San tu kudo kai trubul t'avel, vai trubul ame t'ažiukeras avres? O Jesus del len palpale: Žian ningeren ka o Jono so tume ašundian ai so tume dikhlian: Le koře dikhen, le bange phiren, le žiungale nasvale vužion, le kašuke ašunen, le mule živindisavon, ai e laši viasta si phendi ka le čoře. Veselo t'avel kudo kai či mukela pesko patiamos pala mande! Sar von žianastar, o Jesus thodias pe te phenel le narodoske, pe so si o Jono: So gelian tume te dikhen ande e pusta? Jekh kaštořo kai miškil les e balval? Numa, so gelian tume te dikhen? Jekh manuš uriado ande le tsalia kuč? Eta, kudala kai si le tsalia kuč si ande le khera le amperatonge. So gelian tume te dikhen? Jekh profeto? Ei, me phenav tumenge, mai but sar jekh profeto. Ke si kudo kai si pa leste ramome: Eta, me tradav muřes mai angle kai phenel angla tjiri fatsa, te lašiarel tjiri vurma angla tute. Me phenav tumenge čačimasa, maškar kudala kai arakhadile katar jekh žiuvli, nas mai baro sar o Jono kai boldias. Numa, o mai tsinořo ande e amperetsia le čereski si mai baro lestar. De katar e vramia katar o Jono kai boldias ži akana, e amperetsia le čereski si phagli, ai si le nasul kai len la zurales. Ke sa le profeturi ai o Zakono phende ži ka o Jono; ai, te kamena tume te hatiaren, vo si o Elia kai trubulas t'avel. Kudo kai si les kan t'ašunel ašunela. Sar te sikavav me kadia vitsa? Voi miazol sar šiavoře kai bešen pe o than narodosko, ai kai den duma ka le kaver šiavoře. Phenen: Ame gjilabadiam ande e tuturiaza, ai tume či kheldian; ame gjilabadiam gjilia milosi, ai tume či vatisailian. Ke o Jono avilo, či xalas ai či pelas, ai von phende: Vo si jekh bengailo. O Šiav le manušesko avilo, xalas ai pelas, ai von phende: Vo si xamatori ai kai pel, jekh vortako kudalenge kai kjiden e taksa ai le narodosko kai si nasul. Numa o godiaverimos sas sikado pala so kerdias. Atunči vo lias pe te phenel pe le foruri ande save sas mai but čudeni, ke von či keisaile. Nasul tuke Horazin! Nasul tuke, Betsaida! ke, te le čudeni kai sas sikade maškar tumende sas kerde ande e Tira ai ande o Sidon, de dumult sas te kein pe, sas te len pe pende o gono ai šiuden le pulberia te garaven pen lažiavestar. Sa anda kudia me phenav tumenge: O dies la krisako, e Tira ai o Sidon avena mai tsiřa pharo pe lende sar pe tumende. Ai tu, Kapernaum, avesa tu uštiado ži ka o čeri? Tu avesa teliardo ži kai bešen le mule; ke, le čudeni kai sas sikade maškar tute t'avilinosas sikade ande o Sodomo, sas te mai ašel vo adies. Sa anda kudia me phenav tumenge: O dies la krisako, o them o Sodomo avela mai tsiřa pharo pe leste sar pe tumende. Ande kudia vramia, o Jesus lias e vorba, ai phenel: Me luvudiv tuke, Tate, Baria pe o čeri ai pe e phuv ke tu garadian kadala dieli ka kudala kai žianen ai si godiaver, ai ke tu sikadian le ka le šiavoře. Ei, Tate, me luvudisarav tu ke tu kamlian kadia. Sa kadala dieli sas mange dine katar muřo Dad, ai khonik či žianel le Šiaves, te na avilinosas o Dad; vi khonik či žianel le Dades te na avilinosas o Šiav ai kudo kaske o Šiav kamel te sikavel les. Aven mande, tume sa kai san kjinuime ai kai si tumenge pharo, ai me dava tumen te hodinin. Len pe tumende muřo pharimos ai sikion mandar, ke me sim kovlo ai prosto ande o ilo; ai tume arakhena hodina tumare duxonge. Ke muřo pharimos si kovlo, so si pe tumende vušořo. Ande kudia vramia, o Jesus nakhel maškar le kimpuri gjiveske jekh dies sabato. Leske vortača, kai sas bokhale, thode pe t'ankavalen simintsi ai xan. Le Farizianuri dikhle kudia, phenen leske: Eta, tjire vortača keren so nai slobodo te keren o sabato. Numa o Jesus dias len palpale: Či gjindian tume so kerdias o David, kana sas bokhalo, vo ai kudala kai sas lesa. Sar vo dias andre ande o kher le Devlesko, ai xalias le manře dišade pe o altari kai nas leske slobodo te xal, ai či kudalenge kai sas lesa, ai kai sas thodine le bare rašange ferdi? Vai, či gjindian tume ande o Zakono ke, o sabato, le raša šinen o sabato ande o templo, bi t'aven došale? Eta, me phenav tumenge, si kathe vareso mai baro sar o templo. Te žianglianas tume so si kudia: «Me mangav o mištimos ai na te šinaven le žigenien,» tume či dianas pe o strafo kon nai došale. Ke o Šiav le manušesko si o birevo pe o sabato. Gelotar kothar, o Jesus dias andre ande e khangeri židovitsko. Ai eta, sas kothe jekh manuš kai sas lesko vast šuko. Von pušen katar o Jesus: Si slobodo te sastiaren o sabato? Sas ke kamen te thon beda pe leste. Vo dias len palpale: Savo anda tumende, t'avela les ferdi jekh bakrořo ai ke te pelo ande e groapa o dies o sabato, či thola o vast te lel les avri? Sar jekh manuš te na avel vo mai kuč sar jekh bakrořo! Slobodo te keres mištimos o dies o sabato. Atunči vo phenel le manušeske: Vazde tjiro vast. Vo vazdias les, ai areslo sasto sar o kaver. Le Farizianuri ankliste avri, ai den pe duma sar te xasaren les. Numa o Jesus, žianglias, gelotar dur kothar. Baro narodo gelo pala leste. Vo sastiardias sa le nasvalen, ai vo del len poronka zurales te na puřin les. Eta t'aresel so sas phendo katar o Esai, o profeto: Eta muři sluga kai me alosardem, muřo mai drago ande kaste muřo duxo lias drago. Me thava muřo duxo pe leste, ai vo phenela e kris ka le thema. Vo či dela palpale, vo či tsipila, ai khonik či ašunela lesko hango ande le vulitsi. Vo či phagela e trestia kai peli, ai vo či mudarela e momeli kai del thuv, žikin či kerela te niril e kris. Ai le thema ažiukeren ande lesko anav. Atunči ande leske jekhe bengailes koře ai mute, ai vo sastiardias les, kadia ke o muto del duma ai dikhel. Sa o narodo sas lenge šodo, phenen: Nai kathe o šiav katar o David? Le Farizianuri ašunde kudia, phende: Kado manuš del avri le demonon ferdi katar o Beelzebul, prinso le demonongo. Sar o Jesus žianelas lenge ginduri, vo phenel lenge: Sako amperetsia huladi pe peste si phařadi, ai sako foro vai kher hulade pe peste naštin te bešen. Te si o Satan kai gonil le Satan, vo si hulado pe peste; sar leski amperetsia šai bešela? Ai me, te goniva le demonon katar o Beelzebul, tumare vortača kastar gonina le von? Sa anda kudia von si tumare krisinitoria. Numa, t'avel ke si katar o Duxo le Devlesko ke me goniv le demonon, e amperetsia le Devleski avili ži tumende. Vai, sar varekon šai te del vo ande o kher jekhe manušesko zurale ai čorel leske mištimata, bi te angla savořende te phandel kudale manušes zurale? Atunči ferdi šai čorel lesko kher. Kudo kai nai mansa si pe mande, ai kudo kai či kjidel mansa šiudel. Sa anda kudia me phenav tumenge: Sako bezex ai sako prasaimos avela jertime le manušenge, numa o prasaimos pe o Duxo či avela jertime. Kon-godi del duma pe o Šiav le manušesko, avela leske jertime; numa kon-godi dela duma pe o Svinto Duxo, či avela jertime leske či ande kadala berš či ande le berš kai avena. Vai ke phenen ke o kopači si laši ai ke laki fruta si laši, vai ke phenen ke o kopači si čoři ai ke laki fruta si čoři; ke prinžiaren o kopači katar laki fruta. Vitsa sapengi, sar tromana tume te phenen laše dieli, nasul sar tume san? Ke si anda o but ande o ilo ke o mui del duma. O manuš lašio tsirdel laše dieli anda pesko lašio mandjin, ai o manuš nasul tsirdel nasul dieli anda pesko nasul mandjin. Me phenav tumenge: O dies la krisako, le manuš pokjinena anda sako vorba intaino kai von phende. Ke si pala tjire vorbi ke tu avesa čačo, ai pala tjiri vorba ke tu avesa došalo. Atunči uni anda le zakonaria ai anda le Farizianuri line e vorba, ai phenen: Birevo, ame kamas te dikhas te keres jekh čudenia. Vo del len palpale: Jekh vitsa nasul ai kurvarisko mangel jekh čudenia; či avela lenge aver čudenia ke ferdi kudia katar o profeto Jonas. Ke, sar ke o Jonas sas trin dies ai trin ratia ande o peř jekhe bare mašesko, sa kadia o Šiav le manušesko avela trin dies ai trin ratia ande o brek la phuviako. Le manuš anda o Ninive uštena, o dies la krisako, kadala vitsasa ai strafuina la, ke von keisaile kana dias duma o Jonas; ai eta, si kathe mai but sar o Jonas. E amperatsiasa anda e rig tele uštela, o dies la krisako, kadala vitsasa ai strafuila la, ke voi avel anda o gor la lumiako te ašunel o godiaverimos katar o Salomon, ai eta, si kathe mai but sar o Salomon. Kana o duxo mahrime anklisto avri anda jekh manuš, vo žial ande le thana pusti, rodel te hodinil, ai vo či arakhel. Atunči vo phenel: Me žiava palpale ande muřo kher katar me anklistem avri; ai, kana aresel, vo arakhel les nango, šulado ai khoslo. Vo žialtar, ai vo lel pesa efta aver duxuri mai nasul lestar, von den andre ande o kher, bešen kothe, ai o manuš si mai nasul leske sar angla savořende. Sa kadia avela pe kadia vitsa nasul. Sar o Jesus mai del duma ka o narodo, eta, leski dei ai leske phral, kai sas avri, rodenas te den duma lesa. Varekon phenel leske: Eta, tjiri dei ai tjire phral si avri, ai von roden te den duma tusa. Numa o Jesus del palpale ka kudo kai phendias leske: Kon si muři dei, ai kon si muře phral? Porme, vazdias o vast pe peske vortača ai phenel: Eta muři dei ai muře phral. Ke, kon-godi kerel so kamel muřo Dad kai si ande o čeri, kudo si muřo phral, ai muři phei, ai muři dei. Sa kudo dies, o Jesus anklisto anda o kher, ai bešel pe o berego la mariako. Baro narodo kjidinisailo paša leste, vo anklisto ande jekh čuno, ai bešel tele. Sa o narodo bešel pe o berego. Vo del duma lensa paramičensa pe but dieli, ai vo phenel: Jekh manuš anklisto avri te thol simintsi te barion. Sar šiudel le simintsi, jekh partia peli pe o lungo la vurmako; le čiriklia avile ai xale le. Jekh kaver partia peli maškar le bař, kai nai but phuv; voi strazo uštili, ke voi či arakhlias jekh phuv andre. Numa kana o kham uštilo, voi phabuli ai šukili, ke nas la vuni. Jekh kaver partia peli maškar le kanře, le kanře uštile ai tasade le simintsi. Jekh kaver partia peli ande e laši phuv; voi dias fruta, jekh simintsa dias šel simintsi, jekh kaver šov-var-deš, jekh kaver trianda. Ke kudo kai si les kana t'ašunel, ašunela. Le vortača pašile, ai phenen leske: Sostar des tu duma lensa paramičensa? O Jesus del len palpale: Ke tumenge si tumen te žianen le čudeni katar e amperetsia le čereski, ai ke von či žianen. Ke dena kudales kai si les, ai avela les but, numa kudales kai nai les mai lena lestar so si les. Sa anda kudia me dav duma lensa paramičensa, ke sar von dikhen či dikhen, ai sar von ašunen či ašunen, či hatiaren. Ai lenge aresli e profesia katar o Esai: Tume ašunena tumare kanensa, ai tume či hatiarena; tume dikhena tumare jakhensa, ai tume či dikhena. Ke o ilo kadale narodosko areslo zuralo; von zuriarde penge kana, ai von phandarde penge jakha, daratar ke dikhen penge jakhensa, ke ašunen penge kanensa, ke von te hatiaren penge ilesa, ke von te pařudion, ai ke te sastiarav le. Numa t'aven svintsime tumare jakha, ke tume dikhen, ai tumare kana, ke tume ašunen! Me phenav tumenge čačimasa, but anda le profeturi ai anda le čače mangle te dikhen so tume dikhen, ai či dikhle, t'ašunen so tume ašunen, ai von či ašunde. Tume kadia, ašunen e paramiči katar o manuš kai šiudel simintsi. Kana jekh manuš ašunel e vorba la amperetsiaki ai či hatiarel la, o Xitro avel ai ankalavel so si thodino ande lesko ilo: Kudo si e simintsa kai šiude la pa e rig la vurmaki. E simintsa kai šiude la ande o than bařuno, si kudo kai ašunel e vorba ai lel la strazo veselimasa. Numa nai vuna ande leste inke, mai trubul les te ninkerel, ai, sar avel jekh beda vai jekh nasulimos pala e vorba, vo perel. E simintsa kai šiude la maškar le kanře, si kudo kai ašunel e vorba, numa ande kaste le ginduri la lumiake ai e dragostia le barvalimaski tasaven kudia vorba, ai či del khanči. Kudo kai lias e simintsa ande e laši phuv, si kudo kai ašundias e vorba ai hatiarel la; les si les fruta, ai jekh simintsa del šel, jekh kaver šov-var-deš, jekh kaver trianda. Vo mai phenel lenge jekh kaver paramiči, ai vo phenel: E amperetsia le čereski si jekh fialo sar jekh manuš kai thodias te bariol jekh laši simintsa ande pesko kimpo. Numa, žikin le žene soven, lesko dušmano avilo, šiudias čar žiungali maškar o gjiv, ai gelotar. Kana e čar barili ai dias fruti, e čar žiungali sikadili. Le služi le birevoske katar o kher avile te phenen leske: Baria, či thodian tu te bariol jekh laši simintsa ande tjiro kimpo? Katar avel e čar žiungali? Vo del le palpale: Si jekh dušmano kai kerdias kudia. Ai le služi phenen leske: Kamen tu te žias t'ankalavas la? Niči, phenel vo, daratar ke kana ankalavena e čar žiungali, ke tume ankalaven lasa o gjiv. Muken te bariol ande jekh than o jekh ai o kaver žikin či kjidena, ai, kana avela e vramia te kjiden, me phenava kudalenge kai kjiden: Ankalaven angla savořende e čar žiungali, ai phande la ande jekh than te phabaren la, numa kjiden o gjiv ande muři stala. Vo mai phenel lenge jekh kaver paramiči, ai vo phenel: E amperetsia le čereski si jekh fialo sar jekh simintsa garčitsaki kai jekh manuš lias ai thodias te bariol ande pesko kimpo. Kudia si e mai tsinoři anda le simintsi, numa, kana voi bariol, voi si mai bari sar le legumi ai aresel jekh kopači, kadia ke le čiriklia anda o čeri aven te bešen ande lake patria. Vo phenel lenge kadia kaver paramiči: E amperetsia le čereski si jekh fialo sar e drosda kai jekh žiuvli lias ai thodias la ande trin mezuri ařo, žikin či o ařo vazdel pe. O Jesus phenel le narodoske sa kudala dieli paramičensa, ai vo či del duma bi paramičensa, Eta t'aresel so sas phendo katar o profeto: Me putrava muřo mui paramičensa, me sikavava dieli garade dekin kerdili e lumia. Atunči muklias o narodo, ai dias ande o kher. Leske vortača pašile paša leste, ai phenen: Phen amenge so si e paramiči katar e čar žiungali le kimposki. Vo del palpale: Kudo kai thol te bariol, si o Šiav le manušesko. O kimpo, si e lumia; e laši simintsa si le šiave la amperetsiake; e čar žiungali, si le šiave le xitroske. O dušmano kai thodias la te bariol, si o beng; o kjidinimos, si e vramia kai getol pe e lumia; le manuš kai kjiden, si le andželi. Eta, sar ankalaven e čar žiungali ai kai šiuden la ande e jag, kadia avela kana getola pe e lumia. O Šiav le manušesko tradela peske andželon, kai ankalavena anda e amperetsia le Devleski sa kudalen kai keren te peren le manuša ande e bezex ai kudalen kai keren o nasul. Ai šiudena len ande o bov phabardo, kai avela roimata ai grintsina le dand. Atunči le vorta strefiana sar o kham ande e amperetsia lenge Dadeski. Ke kudo kai si les kana t'ašunel, ašunela! E amperetsia le čereski mai si jekh fialo sar jekh mandjin garado ande jekh kimpo. O manuš kai arakhlias les garavel les; ai, ande peski veselia, žial te bikjinel sa so si les, ai kjinel kudo kimpo. E amperetsia le čereski mai si jekh fialo sar jekh kai bikjinel kai rodel le šukar meržali. Vo arakhlias jekh perla pria kuč; ai vo gelo te bikjinel sa so si les, ai kjinel la. E amperetsia le čereski mai si jekh fialo sar jekh setka kai šiuden la ande e maria ai kjiden maše sako fialo ande late. Kana si pherdi, le mašiaria tsirden la; ai, kana bešen pe o berego von thon ande le kanti so si lašio, ai šiuden so si čořo. Sa kadia avela kana getola pe e lumia. Le andželi avena te hulaven le nasulen katar le vorta. Ai von šiudena len ande o bov phabardo, kai avela roimata ai grintsina le dand. Hatiardian tume sa kadala dieli? Ei, den von palpale. Ai vo phenel lenge: Sa anda kudia, svako zakonari kai sikilo so si ande e amperetsia le čereski si jekh fialo sar jekh birevo le kheresko kai tsirdel anda pesko mandjin dieli neve ai dieli purane. Kana o Jesus getosardias kudala paramiča, vo gelotar kothar. Gelo ande peski phuv, vo sikiarel ande e khangeri židovitsko, kadia ke kudala kai ašunen leste sas lenge šodo ai phenen: Katar avel leske kudo godiaverimos ai kudala čudeni? Nai vo o šiav le kaštaresko? Nai ke e Maria si leski dei? O Jakob, o Josef, o Simon ai o Jud, nai von leske phral? Ai leske pheia nai von maškar amende? Katar aven leske sa kadala dieli? Ai vo sas lenge jekh te peravel len. Numa o Jesus phenel lenge: Jekh profeto si ferdi vuřitsime ande pesko them ai ande pesko kher. Ai vo či kerdias but čudeni ande kudo than, ke von či patian. Ande kudia vramia O Herodo o tetrarxo, ašundias so den duma pa o Jesus, phenel peske slugenge: Si o Jono kai bolel! Vo živindinisailo anda le mule, anda kudia si ke si lestar čudeni. Ke o Herodo phandadias le Jono, phanglias les ai thodias les ande e temnitsa, pala e Herodias, e řomni le Filiposki, lesko phral, ke o Jono phendiasas leske: Nai tuke slobodo te les la tuke řomni. Vo kamelas te mudarel les, numa daralas katar o narodo, ke von dikhenas pe o Jono sar jekh profeto. Eta, kana vestisarde o dies kai arakhadilo o Herodo, e šei katar e Herodias kheldias maškar le gosti, ai kerdias veselo le Herodo, kadia ke vo dias peski vorba te del la sa sogodi voi mangel. Sar sikiardias la laki dei, voi phenel: De ma kathe, pe jekh tiari, o šero le Jonosko. O amperato nekežisailo, pala peski solax ai pala peske gosti, vo dias poronka te den les lake. Ai vo tradias te šinen o šero le Jonosko ande e temnitsa. Lesko šero andine les pe jekh tiari, ai dine les ka e šei terni kai ningerdias les ka peski dei. Le vortača le Jonoske avile te len lesko stato, ai angroposarde les. Ai von gele te phenen kudia ka o Jesus. Ka kudia viasta, o Jesus gelotar kothar ande jekh čuno, te bešel korkořo ande jekh than pusto; ai o narodo ašundias kudia, anklisto anda o foro ai gelo pala leste tele. Kana vo anklisto avri anda o čuno, vo dikhlias jekh baro narodo, ai lias les e mila lendar, ai vo sastiardias le nasvalen. Avili e riat, le vortača pašile paša leste, ai phenen: Kado than si pusto, ai o časo si vuže dur; trade o narodo, eta te žian ande le gava, te kjinen penge te xan. O Jesus del len palpale: Či trubul te žiantar; den le tume te xan. Numa von phenen leske: Amen si ame ferdi panž manře ai dui maše. Ai vo phenel: Anen len mange. Vo thodias te bešel o narodo pe e čar, lias le panž manře ai le dui maše, ai, vazdias le jakha karing o čeri, vo naisardias. Porme, vo phaglias le manře ai dias le ka le vortača, kai dine le ka o narodo. Sa xale ai pravardile, ai andine deš-u-dui košnitsi pherde kotora kai ašile. Kudala kai xale sas pašte panž mii manuš, bi le žiuvliango ai le šiavořengo. Strazo pala kudia, thodias zor pe le vortača t'anklen ande o čuno ai te nakhen pe e kaver rig angla savořende lestar, žikin vo tradel o narodo. Kana vo tradias le, vo anklisto pe o plai, te řudjil rigate; ai, sar e riat avili, vo sas kothe korkořo. O čuno sas dur katar e phuv, malavenas les le talazuri; ke e balval sas pe e kaver rig. Angla savořende te uštel o dies, o Jesus gelo karing lende, phirelas pe o pai. Kana le vortača dikhle ke vo phirel pe e maria, von isdraile, ai phenen: Si jekh čoxano! Ai, ande lengi dar, von tsipin. O Jesus phenel lenge strazo: Len tume sama, me sim; na daran! O Petri del palpale: Baria, t'avesa tu, de ordina ke me te žiav karing tute pe o pai. Ai vo phenel: Aidi! O Petri anklisto avri anda o čuno, ai phirel pe o pai, te žial karing o Jesus. Numa, dikhlias ke e balval si zurali, lias les e dar; ai, sar lelas pe te del andre, vo tsipil: Baria, skipisar ma! Strazo o Jesus thodias o vast, lias les, ai phenel leske: Manuš kai si tu tsiřa patiamos, sostar či patiailian? Ai von ankliste ande o čuno, ai e balval ašili. Kudala kai sas ande o čuno avile te den čanga angla o Jesus, ai phenen: Tu sas čačimasa o Šiav le Devlesko. Kana nakhle e maria, von avile ande o them o Genesaret. Le žene anda kudia rig, prinžiarde le Jesus, trade ženen ande sa so si krugom te phenen e viasta, ai andine leske sa le nasvalen. Von řudjin pe te mukel le ferdi t'asban o kotor katar lesko tsolo. Ai sa kudala kai asbade les sastile. Atunči le Farizianuri ai le zakonaria avile anda o Jerusalem paša o Jesus, ai phenen: Sostar tjire vortača šinen von so kerenas le phure? Ke von či xalaven penge vast, kana von žian te xan. Vo del le palpale: Ai tume, sostar šinen tume le poronki le Devleske te keren sar si tumaro zakono? Ke o Del phendias: De pativ tjire dades ai tjiria da; ai, kudo kai dela armaia peske dades vai peska da avela dino strafo te merel. Numa tume, tume phenen: Kudo kai phenel peske dadeske vai peska dake: E partia muře mištimaski kai me šai dav tumen si thodini rigate le Devleske, či mai trubul t'ažutil peske dades vai peska da. Tume kadia len tele e vorba le Devleski te keren sar si tumaro zakono. Athaitoria, o Esai mišto phendias pe tumende, kana vo phendias: Kado narodo del ma pativ pa le vušt. Numa lesko ilo dur lo mandar. Intaino von den ma pativ, kai sikiaren zakonuri kai si poronki katar le manuš. Akhardias vo peste o narodo, vo phenel leske: Ašunen, ai hatiaren. Nai so den ande o mui ke mahril le manušes; numa sogodi anklel anda lesko mui, kudo mahril le manušes. Atunči leske vortača pašile paša leste, ai phenen leske: Žianes tu ke le Farizianuri xoliaile katar le vorbi kai von ašunde? Vo del palpale: Sako kopači kai či thodias te bariol muřo dad avela ankaladi avri. Muken le; von si koře kai ningeren kavre kořen, t'avela ke jekh kořo ningerel jekhe kavre kořes, von perena vi le dui ande jekh groapa. O Petri, lias e vorba, phenel leske: Phen amenge so si kudia paramiči. Ai o Jesus phenel: Vi tume, vi akana či mai san godiaver? Či hatiardian tume ke sogodi xan žial ande le pořa, porme musai t'anklel avri? Numa so anklel anda o mui avel anda o ilo, ai kudo si kai mahril le manušes. Ke si anda o ilo ke aven le nasul ginduri, le mudarimata, le kurvimata, le lažaimata, le čorimata, le xoxaimata ai le pupuimata. Eta le dieli kai mahrin le manušes; numa te xas bi te xalaves le vast, či mahril le manušes. O Jesus, gelotar kothar, gelo ande e phuv e Tira ai o Sidon. Ai eta, jekh žiuvli anda o Kanan, kai avelas anda kudia rig, tsipil pe leste: T'avel tuke mila mandar, Baria, Šiav katar o David! muři šei si pria but mardi katar o demono. Vo či dias la palpale či jekh vorba ai leske vortača pašile ai phenen leske zorasa: Trade la, ke voi tsipil pala amende. Vo del palpale: Me sim tradino ferdi pala le bakroře xasarde katar o kher anda o Israel. Numa voi avili te del čanga angla leste, phenelas: Baria, ažutisar ma! Vo del palpale: Nai mišto te len o manřo katar le šiavoře, ai te šiuden les ka le tsinoře žiukel. Ei, Baria, phenel voi, numa le tsinoře žiukel xan le kotorořa kai peren pa e skafidi lenge birevongi. Atunči o Jesus phenel lake: Žiuvlio, tjiro patiamos si baro; t'avel tuke sar tu kames. Ai, ande kudo časo, laki šei sastili. O Jesus gelotar anda kudo than ai avilo paša e maria anda e Galilea. Anklisto pe o plai, vo bešel tele. Atunči pašilias paša leste jekh baro narodo, sas lensa bange, koře, mutsi, langane, ai but aver nasvale. Thode le ka leske punře ai vo sastiardias len; kadia ke o narodo sas lenge drago ke dikhen ke le mutsi den duma, ke le langane sas saste, ke le bange phiren, ke le koře dikhen ai o narodo vestil le Devles anda o Israel. O Jesus, akhardias peske vortakon, phenel: Mange si but mila anda kado narodo; ke eta trin dies kai von si paša mande, ai von či xale khanči. Me či kamav te tradav le bokhale, daratar ke či mai avela le zor pe e vurma. Le vortača phende leske: Sar šai lasa ame ande kado than pusto dosta te pravaras jekh kasavo baro narodo? O Jesus pušel lendar: Sode si tumen manře? Efta, den von palpale, ai uni tsinoře maše. Atunči vo thodias te bešel o narodo pe e phuv, lias le efta manře ai le maše, řudjisardias, phaglias le ai dias le ka peske vortača te den le ka o narodo. Sa xale ai pravardile, ai andine efta košnitsi pherde kotora kai ašile. Kudala kai xale sas štar mii manuš, bi t'aven gjinde le žiuvlia ai le šiavoře. Atunči, vo tradias o narodo, anklisto ande o čuno, ai gelo ande e rig o Magadan. Le Farizianuri ai le Sadusenuri astarde le Jesus, ai te zumaven les, mangel lestar te dikhen jekh semno t'avel katar o čeri. O Jesus del le palpale: [E riat, tume phenen: Avela laši vramia, ke o čeri si lolo: Ai diminiats: Si t'avel brišin adies, ke o čeri si jekh lolo tamlo. Tume žianen sar si o čeri, ai tume naštin te den p'o gor sar avela e vramia.] Jekh vitsa nasul ai kai dias rigate le Devles mangel jekh čudenia, či avela lake dini kaver čudenia ferdi kudo katar o Jonas. Porme vo muklias le, ai gelotar. Le vortača, kana nakhle pe e kaver rig, busterde te len manře. O Jesus phenel lenge: Arakhen tume katar e drosda le Farizianongi ai le Sadusenongi. Le vortača den duma maškar pende, ai phenen: Ke pala ke ame či liam manře, phenel kadia. O Jesus, žianglias, phenel: Sostar den tume godji ande tumende, žene kai si tume tsiřa patiamos, ke tume či lian manře? Mai san tume bi-godiake, ai či den tume godji anda le panž manře ai le panž mii manuš ai sode košnitsi tume andian, či anda le efta manře ai le štar mii manuš ai sode košnitsi tume andian? Sar tume či hatiaren ke me či dem duma pa o manřo? Len tume sama katar e drosda le Farizianongi ai le Sadusenongi. Atunči von hatiarde ke nai anda e drosda le manřeski ke vo phendias te len pe sama, numa anda so sikiaren le Farizianuri ai le Sadusenuri. O Jesus, areslo ande e phuv katar o Tsesarea anda o Filipo mangel katar peske vortača: So phenen le manuš ke me sim, me, o Šiav katar o manuš? Von den palpale: Uni phenen ke tu san o Jono kai boldias; le kaver, o Elia; le kaver, o Jeremia, vai jekh anda le profeturi. Ai tume, phenel lenge vo, so phenen tume ke me sim? O Simon Petri del palpale: Tu san o Kristo, o Šiav le Devlesko le živinde. O Jesus, mai lias e vorba, phenel leske: Tu san veselo, Simon, šiav katar o Jonas; ke nai o mas ai o rat ke sikade tuke kadia, numa muřo dad kai si ande o čeri. Ai me, phenav tuke ke tu san o Petri (o bař), ai ke pe kudo bař me vazdava muři khangeri, ai ke e martia naštila te kerel khanči lake. Me dava tu le kjei le themeske anda o čeri; so tu phandesa pe e phuv avela phanglo ande o čeri, ai so tu putresa pe e phuv avela puterdo ande o čeri. Atunči dias poronka ka le vortača te na phenen khanikaske ke vo si o Kristo. De atunčiara o Jesus lias te kerel te žianen leske vortača ke trubul te žial ande o Jerusalem, ke kjinuila but katar le purane, katar le mai bare raša židovitsko ai katar le zakonaria, ke mudarena les, ai ke vo živindila o trito dies. O Petri, lias les rigate, te xal pe lesa: Nai drago le Devleske, Baria! Či avela kudia. Numa o Jesus, amboldinisailo, phenel ka o Petri: Palpale mandar, Satan! tu thos ma te perav; ke tjire ginduri nai le ginduri le Devleske, numa kudala le manušenge. Atunči o Jesus phenel peske vortakonge: Te si varekon kai kamel t'avel pala mande, te bustrel pe pes, ke te lel pesko trušul, ai t'avel mansa. Ke kuda kai kamela te skipil pesko traio xasarela les, numa kudo kai xasarela les pala mande arakhela les. Ai so avela jekhe manušeske te nirila sa e lumia, te xasarela pesko duxo? Vai, pe soste šai o manuš te pařuvel pesko traio? Ke o Šiav le manušesko trubul t'avel ande o barimos peske Dadesko, peske andželonsa; ai atunči vo dela sakones sar kudo kerdias. Me phenav tumenge čačimasa, uni kai si kathe anda tumende či merena, žikin či dikhena le Šiaves le manušeske t'avel ande peski amperetsia. Šov dies pala kudia, o Jesus lias pesa le Petri, le Jakob ai le Jono, lesko phral, ai ningerdias le rigate pe jekh baro plai. Vo pařudinisailo angla lende; lesko mui strefialas sar o kham, ai leske tsalia aresle parne sar e vedaria. Ai eta, o Moše ai o Elia sikadile, den duma lesa. O Petri, lias e vorba, phenel ka o Jesus: Baria, si mišto ke ame sam kathe. Te tu kamesa, me thava kathe trin tseři, jekh tuke, jekh le Mošeske, ai jekh le Eliaske. Sar vo mai delas duma, jekh nuvero strefial, garavel le. Ai eta, jekh hango ašundiol anda o nuvero, phenel kakala vorbi: Kado si muřo šiav kai si mange drago, ai ande kaste me thodem sa so si mange drago: Ašunen leste. Kana von ašunde kudo hango, le vortača pele pe pengi fatsa, ai lias len jekh bari dar. Numa o Jesus, pašilo, asbadias le, ai phenel: Ušten, na daran! Von vazde le jakha, ai dikhle ferdi le Jesus. Sar von vulenas pa o plai, o Jesus del len kadia ordina: Na den duma khanikaske so dikhlian, žikin či o Šiav le manušesko živindila katar le mule. Le vortača pušle les kadia: Sostar le zakonaria phenen von ke o Elia trubul t'avel o mai angluno? Vo del palpale: Čačes si ke o Elia trubul t'avel, ai te thol sa le dieli sar sas. Numa me phenav tumenge ke o Elia avilo vuže, ai ke von či prinžiarde les, ai ke von kerde anda leste sar von kamle. Sa kadia o Šiav le manušesko kjinuila pala lende. Le vortača hatiarde atunči ke vo delas duma lensa pa o Jono kai boldias. Kana von aresle paša o narodo, jekh manuš avilo te del čanga angla o Jesus, ai phenel: Baria, t'avel tuke mila anda muřo šiav, kai si bengailo, ai kai kjinuil pria but; vo butivar perel ande e jag, ai butivar ande o pai. Me andem les ka tjire vortača, ai naštisarde te sastiaren les. Vitsa kai či patial ai nasul, del palpale o Jesus, ži kana avava me tumensa? Ži kana ninkerava me tumen? Anen les mange kathe. O Jesus del duma zurales ka o demono, kai anklisto anda o šiavořo avri, ai sastilo ka kudo časo. Atunči le vortača pašile paša o Jesus, ai phende leske rigate: Sostar naštisardiam te gonisaras kudale demonos? Si pala ke tume patian tsiřa, phenel lenge o Jesus. Me phenav tumenge čačimasa, t'avela tumen patiamos sar jekh simintsa garčitsaki, tume phenena kakale plaieske: Žiatar kathar, ai vo žialatar; khanči či avela te na keren. Numa kasavo demono či anklela avri ferdi ke katar o řudjimos ai katar o postimos. Kana von nakhen pa e Galilea, o Jesus phenel lenge: O Šiav le manušesko trubul t'avel dino ande le vast le manušenge. Von mudarena les, ai o trito dies vo živindila. Len lias le but mila. Kana von aresle ande o Kapernaum, kudala kai lenas e taksa avile ka o Petri ai phenen leske: Tumaro birevo či pokjinel vo ka o templo le štar dinari? Ei, phenel vo. Ai kana von dine ande o kher, o Jesus arakhel le, ai phenel: So gindis tu, Simon? Le amperatsi la phuviake, kastar len von le taksi, katar penge šiave, vai katar le streia? Vo phenel lenge: Katar le streia. Ai o Jesus del le palpale: Le šiave či pokjinen. Numa, te na rimosaras le, žia ka e maria, šiude e řai mašeski, ai tsirde o mai angluno mašio kai avela; puter lesko mui, ai tu arakhesa jekh teliari. Le les, ai de les te pokjines pe mande ai pe tute. Ande kudia vramia, le vortača pašile paša o Jesus, ai phenen: Kon si o mai baro ande e amperetsia le čereski? O Jesus, akhardias jekhe tsinoře šiavořes, thodias les maškar lende, ai phenel: Me phenav tumenge čačimasa, te na tume pařuven tume ai tume te na aresen sar le tsinoře šiavoře, tume či dena andre ande e amperetsia le čereski. Sa anda kudia, varekon kai mukela pe prosto sar kado tsinořo šiavořo avela o mai baro ande e amperetsia le čereski. Ai kon-godi lela ande muřo anav jekhe tsinoře šiavořes, sar kado, lel man. Numa, varekon te peravela jekhes anda kadala tsinoře kai patian pe ande mande, mai mišto avilinosas leske ke te phanden ka leski koř jekh bař ašavesko, ai te šiuden les ande o fundo la mariako. Če nasul la lumiake ke si kasave dieli kai ningeren le manušen ka e bezex! Musai t'aven kasave dieli; numa nasul t'avel le manušeske ke kerel le! T'avela tjiro vast vai tjiro punřo ke šai peres ande e bezex pala leste, šin les ai šiude les dur tutar; mai mišto tuke te des andre ande o traio bango vai jekhe vastesa, ke t'avel tu dui punře vai dui vast ai t'aves šiudino ande e jag pe sakda. Ai t'avela tjiri jakh ke si tuke te šai peres ande e bezex pala late, ankalav la avri ai šiude la dur tutar; mai mišto tuke te des ande o traio, jekha jakhasa, ke t'avel tu dui jakha ai t'aves šiudino ande e jag phabardi. Len tume sama te na vuřitsin jekhes ferdi anda kadala tsinoře; ke me phenav tumenge ke lenge andželi ande o čeri dikhen sakda e fatsa muře Dadeski kai si ande o čeri. Ke o Šiav le manušesko avilo te skipil so sas xasardo. So gindin tume? Te si jekh manuš ke si les jekh šel bakroře, ai ke jekh anda lende xasavol, či mukela vo le inia-var-deš ai inia pe o plai, te žial te rodel kudales kai xasailo? Ai, t'arakhela les vo, me phenav tumenge čačimasa, les avela mai but veselia anda kudo bakrořo sar anda le inia-var-deš ai inia kai či xasaile. Sa jekh fialo, nai ke kamel tumaro Dad kai si ande o čeri te xasavol jekh anda kadala mai tsinoře. T'avel ke tjiro phral kerdias bezex pe tute, žia ai de lesa duma, tu ai vo korkoře. T'ašunela tute, tu nirisardian tjire phrales. Numa, te na ašunela tute, le tusa jekhe vai do ženen, eta ke sa e diela te lašiardiol pe so phenen dui vai trin martururi. Te na kamela t'ašunel len, phen les ka e khangeri, ai te na kamela t'ašunel e khangeri, t'avel tuke sar jekh kai či patial ai jekh kai kjidel e taksa. Me phenav tumenge čačimasa, sogodi tume phandena pe e phuv avela phanglo ande o čeri, ai sogodi tume putrena pe e phuv avela puterdo ande o čeri. Me mai phenav tumenge, te si ke dui anda tumende thon pe ande jekh than pe e phuv te mangen jekh diela vareso, voi avela tumenge dini katar muřo Dad kai si ande o čeri. Ke kothe kai dui vai trin si kjidine ande muřo anav, me sim maškar lende. Atunči o Petri pašilo paša leste, ai phenel: Baria, sodivar jertiva me muře phraleske, kana kerela doš pe mande? Ži ka efta datsi? O Jesus phenel leske: Me či phenav tuke ži ka efta datsi, numa ži ka efta-var-deš var efta datsi. Sa anda kudia, e amperetsia le čereski si jekh fialo sar jekh amperato kai manglias te žianel sode kamenas leske leske služi. Kana vo lias pe te gjinel, andine leske jekhes kai kamelas leske deš mii teliaria. Sar nas les so šai te pokjinel, lesko birevo dias ordina te bikjinen les, les, leska řomnia, leske šiaven, ai sogodi sas les, ai ke o užilimos t'avel pokjindo. E sluga šiudias-pe pe čangende angla leste, ai phenel: Baria, te ažiukeres, me pokjinava tuke sa. O birevo kudala slugako lias les e mila, muklias les te žialtar, ai muklias lesko užilimos. Kana vo gelo avri, kudo sluga arakhlias jekhes anda peske vortača kai kamelas leske šel dinari. Vo lias les kořatar, phenelas: Pokjin so kames mange. Lesko vortako šiudias pe tele pe e phuv, řudjilas pe, phenelas: Ažiuker ai me pokjinava tuke. Numa o kaver či kamlias, ai gelo te šiudel les ande e temnitsa, žikin či pokjinela so kamel leske. Leske vortača dikhle so areslias, sas but nekežime, ai von gele te phenen ka o birevo sa sogodi nakhlias. Atunči o birevo akhardias kudala sluga, ai phenel leske: Nasul sluga, me dem tu palpale sa so kamesas mange, ke tu řudjisailian mande. Nas t'avel vi tuke mila anda tjiro vortako, sar mange sas mila anda tute? Ai lesko birevo xoliariko dias les ka kudala kai maren žikin či pokjinela sa so vo kamel leske. Sa kadia muřo Dad anda o čeri kerela kadia anda tumende, te na sako anda tumende či jertila peske phraleske anda sa pesko ilo. Kana o Jesus getosardias peske divanuri, vo gelotar anda e Galilea, ai gelo ande e phuv katar o Jordan. Jekh baro narodo gelo pala leste, ai kothe vo sastiardias le nasvalen. Uni Farizianuri astarde les, ai phenen, te zumaven les: Slobodo jekhe manušeske te del palpale peska řomnia pala varesavo baio? Vo del palpale: Či gjindian tume ke kudo kai kerdias e lumia, angla savořende kerdias le manušes ai la žiuvlia, ai ke vo phendias: Sa anda kudia o manuš mukela peske dades ai peska da, ai phandiola ka peski řomni, ai le dui avela jekh mas? Kadia von manai dui žene, numa si akana jekh. Ke o manuš te na hulavel so o Del thodias ande jekh than. Sostar kadia, phenen leske von, o Moše phendias te den ka e žiuvli jekh lil te muken la ai te den la palpale? Vo del len palpale: Si pala e zor tumare ileski ke o Moše muklias tume te den palpale tumare řomnian; angla savořende, nai kadia. Numa me phenav tumenge ke kudo kai del palpale peska řomnia, ferdi te na dias les pe o lažiav, ai kai lel jekha kavria, kerel jekh kurvetsia. Leske vortača phenen leske: T'avela kadia maškar o manuš ai e žiuvli, mai mišto te na ansuril pe. Vo del len palpale: Sa le manuš či len kadia vorba, numa ferdi kudala kaske si dini e vorba. Ke si enukuri kai si kadia anda o peř penga dako; si kai kerdile kadia katar le manuš; ai si kai kamle von t'aven kadia, pala e amperetsia le čereski. Kon-godi šai trail kadia, te trail. Atunči andine leske tsinoře šiavořen, eta te thol pe lende le vast ai te řudjil lenge. Numa le vortača traden le. Ai o Jesus phenel: Muken le tsinoře šiavořen te aven mande, ai na ašiaven len; ke e amperetsia le čereski si kudalenge kai si sar lende. Vo thol o vast pe lende, ai gelotar lendar. Ai eta, jekh manuš pašiol, ai phenel ka o Jesus: Birevo, so trubul te kerav mišto t'avel ma o traio pe sakda? Vo dias les palpale: Sostar pušes mandar tu so si mišto? Si jekh kai si mišto. Te kamesa te des andre ande o traio, le sama le poronki. Save? phenel leske vo. Ai o Jesus del les palpale: Tu či mudaresa; tu či keresa kurvetsia; tu či čoresa; tu či xoxavesa. De pativ tjire dades ai tjiria da, ai t'avel tuke drago tjiro vortako sar san drago tuke. O terno murš phenel leske: Me lem sama sa kudala dieli; so mai trubul man? O Jesus phenel leske: Te kamesa tu t'aves vorta, žia, bikjin so si tut, de le love ka le čoře, ai tut avela jekh mandjin ande o čeri. Porme aidi, ai av mansa. Pala kudia ke ašundias kudala vorbi o terno murš gelo-tar sa nekežime, ke sas les but mištimata. O Jesus phenel ka peske vortača: Me phenav tumenge čačimasa, jekh barvalo trudno avela leske te del andre ande e amperetsia le čereski. Me mai phenav tumenge, mai sigo šai nakhel e gumula pa e groapa jekha suviaki de sar jekh barvalo te del andre ande e amperetsia le čereski. Le vortača, ašunde kudia, sas lenge pria šodo, ai phenen: Kon šai avel skipime? O Jesus dikhel pe lende, ai phenel lenge: Le manuš naštin, numa o Del vo sa šai kerel. O Petri, lias atunči e vorba, phenel leske: Eta, ame sa mukliam, ai ame aviliam tusa; so avela amenge? O Jesus del les palpale: Me phenav tumenge čačimasa, kana o Šiav le manušesko, kana neviona sa le dieli, bešela pe o skamin amperatisko kai si vestime, tume kai avilian mansa, vi tume avena kadia te bešen pe le deš-u-dui skamina amperatisko, ai tume dena pe e kris le deš-u-do kumpanii anda o Israel. Ai ke varekon muklias, pala muřo anav, peske phralen, vai peske pheian, vai peske dades, vai peska da, vai peska řomnia, vai peske šiaven, vai peske phuvia, vai peske khera, lela jekh šel-var mai but, ai avela les o traio pe sakda. But anda le mai anglune avena le mai palune, ai but kai sas le mai palune avena le mai anglune. Ke e amperetsia le čereski si jekh fialo sar jekh birevo kheresko kai anklisto avri diminiats, eta te lel butiaren te žian ande leski rez. Vo lias pe lensa pe jekh dinaro pa o dies, ai vo tradias le ande peski rez. Vo anklisto avri karing o iniato časo, ai vo dikhlias kavren kai sas pe o platso bi te keren khanči. Vo phenel lenge: Žian vi tume ande muři rez, ai me dava tumen so avela vorta. Ai von gele. Vo mai anklisto karing mismeri ai karing o trito časo pala mismeri, ai sa kadia kerdias. Anklisto karing o panžto časo, vo arakhlias kavren kai sas pe o platso, ai vo phenel lenge: Sostar bešen tume kathe sa o dies bi te keren khanči? Von dine les palpale: Ke nas khonik te lel ame. Žian vi tume ka muři rez, phenel lenge vo. Kana e riat avili, o birevo la rezako phenel kudaleske kai lel sama: Akhar le butiaren, ai de len lengo lov, katar o mai paluno ži ka o mai angluno. Kudala katar o panžto časo avile, ai line sako jekh dinaro. Le mai anglune avile atunči, gindinas pe ke len mai but; numa von line sako jekh dinaro. Kana line le, von den duma pe o birevo le kheresko, ai phenen: Kadala mai palune kerde butji ferdi jekh časo, ai tu keres anda lende sar anda amende, kai ninkerdiam o kjinuimos le diesesko ai o tatimos. Vo dias palpale ka jekh anda lende: Muřo vortako, me či kerav tuke či jekh doš; či ašilian tu mansa pe jekh dinaro? Le so si tjiro, ai žiatar. Me kamav te dav kadalen kai si mai palune sode dem tut. Nai mange slobodo te kerav muře mištimasa so me kamav? Vai dikhes čoře jakhensa ke me sim lašio? Kadia le mai palune avena le mai anglune, ai le mai anglune avena le mai palune. Žikin o Jesus anklel ande o Jerusalem, vo lias rigate le deš-u-do vortakon, ai vo phenel lenge pe e vurma: Eta, ame anklias ande o Jerusalem, ai o Šiav le manušesko avela dino ande o vast le mai bare rašango židovitsko ai le zakonarengo. Von dena te mudaren les, ai von dena les ka kudala kai či patian, te maren mui lestar, te maren les le řaiansa, ai thona les pe o trušul; ai o trito dies vo živindila. Atunči e dei katar le šiave katar o Zebedeo pašili paša o Jesus peske do šiavensa, te mangel lestar jekh diela. Vo phenel lake: So kames tu? De ordina, phenel leske voi, ke muře dui šiave te bešen ande tjiri amperetsia, jekh pe tjiri čači ai o kaver pe tjiri stingo. O Jesus del palpale: Tu či žianes so tu manges. Šai pena tume o taxtai kai me trubuv te piav? Ame šai, den von palpale. Ai vo del len palpale: Si čačes ke tume šai pena muřo taxtai numa pe kudia so si te bešen pe muři čači vai pe muři stingo, nai kudia mandar, ai le thana avena dine kudalenge kaske muřo Dad garadias le. Le deš, ašunde kudia, lias le e xoli pe le dui phral. O Jesus akharel le, ai phenel: Tume žianen ke le birevia le themenge maren le, ai ke le bare porončin pe lende. Či avela kadia maškar tumende. Numa te varekon kamela t'avel baro maškar tumende, t'avel tumari sluga. Ai kon kamela t'avel o mai angluno maškar tumende, t'avel tumaro řobo. Kadia o Šiav le manušesko avilo, na te služin les, numa te služil ai te del pesko traio te skipil bute manušen. Kana ankliste avri anda o Jeriko, baro narodo gelo pala o Jesus. Ai eta, dui koře, bešen pe o berego la vurmako, ašunde ke o Jesus nakhel, ai tsipin: T'avel tuke mila amendar, Baria, Šiav katar o David! O narodo ašiavel len; numa von tsipin mai zurales: T'avel tuke mila amendar, Baria, Šiav katar o David! O Jesus terdilo, akharel le, ai phenel: So kamen tume te kerav tumenge? Von phenen leske: Baria, ke amare jakha te puterdion. Lias les e mila, o Jesus asbadias lenge jakha; ai strazo von arakhle o dikhimos, ai gele pala leste. Kana von pašile paša o Jerusalem, ai aresle ande o Betfage, karing o plai le Maslinengo, o Jesus tradias don anda le vortača; Phendias lenge: Žian ande o gav kai si angla tumende; tume arakhena strazo jekha magaritsa, ai jekhe magaritsos lasa; putren len, ai anen len mange. T'avela varekon ke phenel tumenge vareso, tume den palpale: O Baro trubul len. Ai pe kudia vramia vo mukela len te žian. Eta, kudia areslias eta te kerdiol so sas phendo katar o profeto: Phen ka e šei anda o Sion: Eta, tjiro amperato avel tute, kovlo, ai anklisto pe jekh magaritsa, ai pe jekh magaritsi, o tsinořo katar e magaritsa. Le vortača gele, ai kerde so o Jesus dias len ordina. Von andine la magaritsa ai le magaritsos, thode pe lende penge tsalia, ai thode les te bešel opral. But žene anda o narodo thode penge tsalia pe e vurma; le kaver šinde kaštoře katar le kopačia, ai šiude le pe sa o drom. Kudala kai žianas angla o Jesus ai kudala kai žianas palal tsipinas: Hosana le Šiaveske katar o David! Svintsime t'avel kudo kai avel ande o anav le Bare Devlesko! Hosana ande le thana but vuče! Kana vo dias andre ande o Jerusalem, sa o foro isdraias, ai phenenas: Kon si kado? O narodo del palpale: O Jesus si, o profeto, anda o Nazaret ande e Galilea. O Jesus dias andre ande o templo le Devlesko. Vo tradias avri kudalen kai bikjinenas ai kai kjinenas ande o templo; vo dias muial le skafidia kudalenge kai pařuvenas le love, ai le skamina kai bikjinen le gulumbon. Ai vo phenel lenge: Muřo kher avela akhardo jekh kher řudjimasko. Numa tume, kerdian anda leste jekh groapa čorengi. Koře ai bange pašile paša leste ande o templo. Ai vo sastiardias len. Numa le bare raša židovitsko ai le zakonaria lias len e xoli, kai dikhle le šukar dieli kai kerde ai le šiavoře kai tsipinas ande o templo: Hosana ka o Šiav le Davidosko! Von phenen leske: Ašunes tu so von phenen? Ei, del palpale o Jesus. Či gjindian tume šoha kakala vorbi kai o Del phendias: Tu lian luvudimata anda o mui le šiavořengo ai katar kudala kai si ka e čuči? Ai, muklias le, vo anklisto avri anda o foro te žial ande e Betania, kai vo nakhlias e riat. Diminiats, kana gelo palpale ande o foro, sas bokhalo. Dikhlias jekh kopači figengi pe e vurma, vo pašiol; numa vo arakhlias ferdi patria, ai vo phenel lake: Ke šoha fruta te na arakhadiol tute! Ai strazo o kopači šukili. Le vortača, kai dikhle kudia, sas lenge šodo: Sar kadia kopači šukili ande jekh tsiřa vramia? O Jesus dias len palpale: Me phenav tumenge čačimasa, te si tumen patiamos ai ke te patian tume, na ferdi ke tume kerena so si kerdo ka kudia kopači, numa kana tume phenena ka kako plai: Le tu kothar ai šiude tu ande e maria, kudia avela. Sogodi tume mangena řudjimasa, tume lena. O Jesus gelo ande o templo, ai, žikin vo sikiarelas, le bare raša ai le purane anda o narodo avile leste te phenen leske: Katar če putiaria keres tu kadala dieli, ai kon dias tu kudia putiaria? O Jesus del len palpale: Vi me pušiava tumendar, ai te tume dena man palpale, me phenava tumenge katar če putiaria me kerav kadala dieli. O bolimos katar o Jono, katar avelas vo? Anda o čeri, vai katar le manuš? Numa von denas pe duma maškar pende: Te dasa les ame palpale: Katar o čeri, vo phenela amenge: Sostar či patian tume ande leste? Ai t'ame dasa palpale: katar le manuš, ame darasa katar o narodo, ke sa ninkeren le Jono sar jekh profeto. Atunči von phenen ka o Jesus: Ame či žianas. Ai vo phendias lenge pe peski rig: Či me, či phenava tumenge katar savi putiaria kerav kadala dieli. So miazol tumenge? Jekh manuš sas les dui šiave; ai, žial ka o mai angluno, phenel: Muřo šiav, žia ker butji adies ande muři rez. Vo del palpale: Me naštiv. Atunči, vo keisailo, ai vo gelo. Del duma le kavresa, vo phenel sa jekh fialo. Ai kudo šiav del palpale: Me kamav mišto, Baria. Numa vo či gelo. Savo anda le dui kerdias so kamlias o dad? Von den palpale: O mai angluno. Ai o Jesus phenel lenge: Me phenav tumenge čačimasa, kudale kai kjiden e taksa ai le kurvi avena angla savořende tumendar ande e amperetsia le čereski. Ke o Jono avilo tumende te sikavel e vurma la krisaki, ai tume či patiailian ande leste. Numa kudale kai kjiden e taksa ai le kurvi patiaile ande leste; ai tume, kai dikhlian kudia, tume atunči či keisailian te patian tume ande leste. Ašunen jekh kaver paramiči. Sas jekh manuš, birevo pe o kher, kai thodias jekh rez. Thodias krugom latar jekh bar, hunadias jekh groapa kai kjidel le struguri, ai vazdias jekh turo; porme muklias e rez užile ka kudala kai bariaren, ai vo muklias o them. Kana e vramia te kjiden aresli, vo tradias peske slugen karing le butiaria la rezake, te len so dias les e rez. Le butiaria line le slugen, marde jekhes, mudarde le kavres, ai marde bařensa le tritos. Vo mai tradias kaver slugen, mai but sar le mai anglune; ai le butiaria keren anda lende sa jekh fialo. Pala kudia, vo tradias karing lende peske šiaves, phenelas: Lenge avela lažiav katar muřo šiav. Numa, kana le butiaria dikhle le šiaves, von phenen maškar pende: Kudo avela o birevo; aven, mudaras les ai ame lasa so si lesko. Ai von thode o vast pe leste, šiude les anda e rez, ai mudarde les. Akana, kana o birevo la rezako avela, so kerela vo anda le butiaria? Von den les palpale: Vo mudarela nasulimasa kudale nasulen, ai vo dela e rez ka le kaver butiaria, kai dena les so avela ande e vramia kai kjiden. O Jesus phenel lenge: Či gjindian tume šoha ande le Ramomata: O bař kai šiude kudala kai vazden khera areslo o mai lašio ande o koltso; Si katar o Baro ke kudia avilo, ai si jekh čudenia ka amare jakha? Sa anda kudia, me phenav tumenge, e amperetsia le Devleski lena la tumendar, ai dena la ka jekh them kai kerela te dela fruti. [ Kudo kai perela pe kudo bař phagliola, ai kudo pe kaste perela avela inčardo sar e kišai.] Pala kudia kana ašunde kudala paramiča, le bare raša ai le Farizianuri hatiarde ke si pa lende ke o Jesus del duma. Ai von rodine te len les; numa daraile katar o narodo, ke von ninkerenas les sar jekh profeto. O Jesus, lias e vorba, del duma lensa pale ande le paramiča, ai vo phenel: E amperetsia le čereski si jekh fialo sar jekh amperato kai kerel abiav peske šiaveske. Vo tradias peske slugen t'akharen le goston ka o abiav; numa von či kamle t'aven. Vo mai tradias kavre slugen, phenelas: Phenen le gostonge: Eta, me lašiardem muři pativ; muře guruva ai muře žigeni thule mudardiam le, sa si gata, aven ka o abiav. Numa, bi te len sama ke si akharde, von geletar, kako ka pesko kimpo ai kako ka peski butji. Ai le kaver line le slugen, dine le pe o lažiav ai mudarde le. O amperato xoliailo; vo tradias peske ketanen, kerdias te meren kudalen kai mudarde, ai phabardias lengo foro. Atunči vo phenel ka peske služi: O abiav si gata; numa le gosti nas leske harniči. Žian kai le droma kai anklen katar o foro, ai akharen ka o abiav sa kudalen kai tume arakhena. Kudala služi gele pe le vurmi, kjidine sa so von arakhle, nasul ai laše, ai e sala le abiaveski pherdili gosti. O amperato dias andre te dikhel kon si ka e skafidi, ai dikhlias kothe jekhe manušes kai nas pe leste jekh tsolo abiavesko. Vo phenel leske: Muřo vortako, sar dian tu kathe bi t'avel pe tute jekh tsolo abiavesko? Kudo manuš sas lesko mui phandado. Atunči o amperato phenel le slugenge: Phanden leske punře ai leske vast, ai šiuden les ande o tuniariko avri, kai si le roimata ai grintsin le dand. Ke but avena akharde, numa tsiřa alome. Atunči le Farizianuri gele te den pe duma sar te len le Jesus katar leske vorbi. Von trade paša leste penge vortakon manušensa ande e partida katar o Herod, kai phenenas: Baria, ame žianas ke tu san čačo, ai ke tu sikiares e vurma le Devleski sar si o čačimos, bi te les sama khanikastar, ke tu či dikhes sar si o manuš. Phen amenge so miazol tuke, si slobodo, vai niči, te pokjinas love ka o Amperato? O Jesus, žianelas lengo nasulimos, del palpale: Sostar zumaven man tume, athaitoria? Sikav mange o lov xurdo savesa tu pokjines so trubul. Ai von sikaven leske jekh dinaro. Vo mangel lendar: Kasko si kako vobrazo ai kako ramomos? Katar o Amperato, den von palpale: Atunči vo phenel lenge: Den ka o Amperato so si ka o Amperato, ai ka o Del so si ka o Del. Šodo lenge so von ašunde, von mukle les, ai gele-tar. Sa kudo dies, le Sadusenuri, kai phenenas ke nai živindimos, avile paša o Jesus, ai pušel les kadia: Birevo, o Moše phendias: Te mulo varekon bi t'avel les šiave lesko phral lela leska phivlia, ai avela te del šiaven peske phraleske. Eta, sas maškar amende efta phral. O mai angluno ansurisailo, ai mulo; ai, sar nas les glati, muklia peska řomnia ka pesko phral. Sa jekh fialo sas ka o duito, porme o trito, ži ka o eftato. Pala lende, vi e žiuvli muli. Kana živindina, saveske anda le efta avela voi e řomni? Ke voi sas savořengi. O Jesus del len palpale: Tume šibin tume, ke tume či hatiaren o Ramomos, či e zor le Devleski. Ke, kana živindina, le manuš či lena řomnia, či le řomnia či lena řomen, numa von avena sar le andželi le Devleske ande o čeri. Pe so si ke živindin pe le mule, či gjindian tume so phendias tumenge o Del: Me sim o Del katar o Abraham, o Del katar o Isak, ai o Del katar o Jakob? O Del nai o Del le mulengo, numa le živindengo. O narodo, kai ašunelas, sas lengo šodo sar sikiarelas o Jesus. Le Farizianuri, ašunde ke vo kerdias t'ašen mutsi le Sadusenuri, kjidinisaile, ai jekh anda lende, zakonari, pušel les kadia te zumavel les: Baria, savi si e mai bari poronka le Zakonoski? O Jesus del les palpale: T'avel tuke drago tjiro Baro, tjiro Del, anda sa tjiro ilo, anda sa tjiro duxo ai anda sa tjiri godji. Si e mai angluno ai e mai bari poronka. Ai eta e duito, kai si jekh fialo: T'avel tuke drago tjiro vortako sar san drago tuke. Anda kadala dui poronki aven sa o Zakono ai le profeturi. Sar le Farizianuri sas kjidine, o Jesus pušel lendar. Phenelas: So den tume godji tume pa o Kristo? Kasko šiav si vo? Von den les palpale: Le Davidosko. Ai o Jesus phenel lenge: Sar o David, kana miškilas les o Duxo, akharel les vo Baria, kana phenel: Vorba le Bare Devleski ka muřo Baro: Beš pe muřo čačo, Žikin či kerava anda tjire dušmaia te phires pe lende? T'akharela les o David Baria, sar si vo lesko šiav? Khonik naštisardias te del les palpale jekh vorba. Ai, de katar kudo dies, khonik či mai tromal te pušel les. Atunči o Jesus, del duma ka o narodo ai ka peske vortača, phenel: Le zakonaria ai le Farizianuri bešen ai phenen sa o zakono le Mošesko. Keren tume ai len sama sogodi von phenena tumenge; numa na keren sar lende. Ke von phenen, ai či keren. Von phanden so si pharo, ai thon le pe le dume le manušenge, numa von či kamen te miškin o nai. Sogodi von keren kamen te dikhel le o narodo. Kadia, le vorbi svintsi kai si pe lengo čikat ai pe lengo vast si le kuti pria bare, ai si len lunzi čukuri ka lenge tsalia. Lenge drago le mai angluni thana ande le pativa, ai le mai angluni skamina ande le khangeria židovitsko. Lenge drago te den len pozdraimos ande le thana kai si o narodo, ai t'akharen len le manuš Rabi, Rabi. Numa tume, te na akharen tume Rabi; ke jekh si ferdi tumaro birevo, ai tume san sa phral. Ai na akharen khanikas pe e phuv tumaro dad; ke ferdi jekh si tumaro Dad, kudo kai si ande o čeri. Te na akharen tumen birevo; ke jekh si ferdi tumaro Birevo, o Kristo. O mai baro maškar tumende avela tumari sluga. Kon-godi vazdela pe perela tele, ai kon-godi perela tele avela thodino opre. Nasul t'avel tumenge, zakonaria ai Farizianuri, athaitoria! Ke tume phandaven le manušenge e amperetsia le čereski, tume inke či dena andre, ai tume či muken te den andre kudalen kai kamen te den andre. [ Nasul t'avel tumenge, zakonaria ai Farizianuri, athaitoria! Ke tume xan sa o mištimos le phivliango, ai ke naročno keren but řudjimata te sikaven ke laše san; anda kudia, tume avena dine pe kris mai zurales.] Nasul t'avel tumenge, zakonaria ai Farizianuri, athaitoria! Ke tume našen e maria ai e phuv te roden manušes te pařuven les sar tumende; ai, kana arakhen les, tume keren anda leste du-var mai nasul sar tumende. Nasul t'avel tumenge, kai ningeren le kořen ai phenen: T'avela varekon ke solaxal pa o templo, nai khanči; numa, t'avela varekon ke solaxal pa o sunakai le templosko, vo thodias pe te ninkerel so solaxadias. Dile ai koře! Savo si o mai baro, o sunakai vai o templo kai svintsil o sunakai? Te si varekon, mai phenen tume, solaxal pa o altari, nai khanči; numa, t'avela varekon kai solaxal pa so si pe o altari, vo thodias pe te ninkerel so solaxadias. Koře! Savo si o mai baro, so si dino, vai o altari kai svintsil so si dino? Kudo kai solaxal pa o altari solaxal pa o altari ai pa sa so si opral. Kudo kai solaxal pa o templo solaxal pa o templo ai pa kudo kai bešel andre. Kudo kai solaxal pa o čeri solaxal pe o skamin amperatisko le Devlesko ai pa kudo kai bešel pe leste. Nasul t'avel tumenge, zakonaria ai Farizianuri, athaitoria! Ke tume pokjinen deš pala jekh šel anda e menta, anda o anel ai anda o kumin, numa tume muken so si o mai baro ande o zakono, e kris, e mila ai o čačimos; kudia sas te keren angla savořende, bi te bustren le kaver dieli. Koře kai ningeren le kavren, kai lena avri le tsintsari anda tumaro pimos, ai kai nakhaven jekh gumula. Nasul t'aven tumenge, zakonaria ai Farizianuri, athaitoria! Ke tume khosen avrial o taxtai ai o tiari, numa andral von si pherde čorimos ai nasulimos. Kořo Fariziano! Khos mai angluno andral o taxtai ai o tiari, eta ke vi avrial t'avel vužio! Nasul t'avel tumenge, zakonaria ai Farizianuri, athaitoria! Ke tume miazon sar le groapoševuri parniarde, kai miazon šukar avrial, ai andral si pherde kokala mulenge ai sako fialo mahrime. Tume sa kadia, avrial, tume miazon mišto ka le manuš, numa, andral, tume san pherde xoxaimos ai bezex. Nasul t'avel tumenge, zakonaria ai Farizianuri, athaitoria! Ke tume vazden le groapoševuri le profetonge ai uriaven le groapoševuri kudalenge kai sas vorta, Ai tume phenen: T'ame traisardiamas ande e vramia amare dadengi, ame či geliamas lensa te das muial o rat le profetongo. Tume sikaven pe tumende ke tume san le šiave kudalenge kai mudarde le profeton. Keren sar kerde tumare dada. Sapa, vitsa sapengi! Sar skipina tume katar e jag le bengeski? Sa anda kudia, eta, me tradav tumenge profeton, manuš godiaver ai zakonaria. Tume mudarena ai amblavena le unen, tume marena řaiasa le kavren ande le khangeria židovitsko, ai tume mesaina len foro forostar. Eta ke te perel pe tumende o rat bi-došalo dino muial pe e phuv, de katar o rat katar o Abel o vorta ži ka o rat katar o Zakaria, šiav katar o Barakia, kai tume mudardian maškar o templo ai o altari. Me phenav tumenge čačimasa, sa kudia perela pe kadia vitsa. Jerusalem, Jerusalem, kai mudarel le profeton ai kai mudaren bařensa kudalen kai si tute tradine, sodivar me kamlem te kjidav tjire šiaven, sar e khaini kjidel peske puien tela peske phaka, ai tume či kamlian! Eta, tumaro kher avela tumenge muklo pusto! Ke, me phenav tumenge, tume či mai dikhena ma, žikin či tume phenena: Svintsime t'avel kudo kai avel ande o anav le Bare Devlesko! Sar o Jesus žialastar avri anda o templo, leske vortača pašile te sikaven leske sar si kerdo. Numa vo phenel lenge: Dikhen tume sa kado? Me phenav tumenge čačimasa, či bešela kathe bař pe bařeste te na perel. Vo bešel pe o plai katar le Maslini. Ai le vortača aven ferdi von leste te pušen les: Phen amenge, kana kudia avela, ai savo avela o semno kana avesa ai getola pe e lumia? O Jesus del len palpale: Len tume sama te na khonik te na diliarel tume. Ke but avena ande muřo anav, phenena: Me sim o Kristo. Ai von diliarena bute ženen. Tume ašunena ke den duma pa le marimata ai e viasta le marimaski; len tume sama te na daran, ke trubul kudala dieli t'aresen. Numa inke či getola pe e lumia. Jekh them vazdela-pe pe jekh kaver them, ai jekh amperetsia pe jekh kaver amperetsia, ai avena, ande but thana, bokha ai isdrala e phuv. Sa kudia si ferdi ke len pe le dukha. Atunči dena te kjinuin tume, ai mudarena tumen; ai tume avena vuřitsi sa le themenge, pala muřo anav. Kadia but perena ai von puřina pe, vuřitsina jekh kavres. But falši profeturi vazdena pe, ai diliarena bute ženen. Ai, ke e bezex butiola, e mila butengi šudriola. Numa kudo kai ninkerela ži ande o gor avela skipime. Kadia laši viasta la amperetsiaki avela phendi pe sa e lumia, t'avel marturo ka sa le thema. Atunči avela te getol pe e lumia. Sa anda kudia, kana tume dikhena e bari griatsa, kai dias duma latar o profeto Daniel, thodini ande o than svinto, — ke kudo kai gjinel te lel sama! Atunči sa kudala kai si ande e Judea našena ande le plaia. Ke kudo kai si pe o čardako te na vulel tele te lel so si lesko ande o kher. Ai ke kudo kai si ande le kimpuri te na avel palpale te lel peski bunda. Nasul t'avel le žiuvliange kai ažiukeren glati ai kudalenge kai den čuči ande kudala dies! Řudjin ke te tumaro našimos te na avel ivende, či jekh dies sabato. Ke atunči, tumaro nekazo avela baro kai nas inke kadia dekin si e lumia ži akana, ai ke či mai avela kadia šoha. Ai, te na kamlinosas o Del te teliarel kudala dies, khonik či naštino te trail; numa pala le manuš kai alosardias, kudala dies avena mai tsiřa. T'avela varekon ke phenel tumenge atunči: O Kristo si katka, vai: Kathe lo, te na patian tume. Ke uštena falši Kristuri ai falši profeturi; von kerena bare šodimata ai čudeni, kadia te diliaren, te šai daštin, inke le alomen. Eta, me phendem tumenge angla savořende. T'avela te phenen tumenge: Eta, vo si ande e pusta, na žian; eta, vo si ande e soba, na patian len. Ke, sar o strefiaimos avel pa e rig e čači ai sikadiol ži pe e rig e stingo, kadia aresela kana avela o Šiav le manušesko. Ande savo than kai avela stato mulesko, kothe kjidena pe le uluri. Strazo pala kudala dies nekežime, o kham tamlola, o šiunuto či mai dela peski vedaria, le čeřaia perena anda o čeri, ai le zora le čereske miškina pe. Atunči o semno katar o Šiav le manušesko sikadiola ande o čeri, sa le kumpani la phuviake vatina pe, ai dikhena sar o Šiav le manušesko avela pe o nuvero le čeresko zorasa ai bare vestimasa. Vo tradela peske andželon ekha bari tuturiazasa, ai von kjidena le alomen pe le štar balvalia, de katar jekh gor le čeresko ži ka o kaver gor. Sikion tume te keren sar si o kopači figengo. Sar leske kaštoře aresen kovle, ai ke le patria barion, tume prinžiaren ke o milai pašiol. Sa jekh fialo, kana tume dikhena sa kudala dieli, te žianen ke o Šiav le manušesko pašiol ka o vudar. Me phenav tumenge čačimasa, kadia vitsa či nakhela, ke sa kudia si t'aresel. O čeri ai e phuv nakhena, numa muře vorbi či xasavona. Kana avela kudo dies ai kudo časo, khonik či žianel, či le andželi anda o čeri, či o Šiav, numa ferdi o Dad. So areslo ande e vramia kana sas o Noa, sa kadia aresela kana avela o Šiav le manušesko. Ke, ande le dies angla savořende o baro pai kai tasadias sa, le manuš xanas ai penas, ansurinas pe ai ansurinas penge šiaven, ži ka o dies kai o Noa dias andre ande o čuno; ai von či gindinas pe ka khanči, žikin či o baro pai avilo ai tasadias le sa: Sa kadia avela kana avela palpale o Šiav le manušesko. Atunči, anda le dui manuš kai si pe o kimpo, jekh avela lino ai o kaver muklo. Katar le dui žiuvlia kai inčaren pe o ašav, jekh avela lini ai e kaver mukli. Len tume sama, ke tume či žianen če dies o Baro avela. Te žianen mišto, te o birevo le kheresko žianelas ka če časo la ratiako avela o čor, vo lela sama ai či mukela te phagen lesko kher. Sa anda kudia, vi tume, len tume sama, ke o Šiav le manušesko avela ande o časo kai tume či dena tume godji. Savo si e sluga čači ai kai lel pe sama, kai lesko birevo thodias les baro pe peske žene, te del len te xan kana trubul e vramia? Veselo t'avel kudia sluga, kai lesko birevo, kana aresela khere, arakhel les ke kerel kadia! Me phenav tumenge čačimasa, vo thola les baro pe sa peske mištimata. Numa, t'avela jekh nasul sluga, kai phenel ande peste: Muřo birevo či avela sigo, ai vo lel pe te marel peske vortakon, te xal vo ai te pel le matensa. O birevo kudala slugako avela o dies kai vo či ažiukerel les ai o časo kai vo či žianel. Vo šinela les kotora, ai dela les leski partia le athaitoriensa: Kothe avena le roimata ai grintsina le dand. Atunči e amperetsia le čereski avela jekh fialo sar deš šeia pativale kai, line penge lampuri, gele angla o terno kai ansuril pe. Panž anda lende sas dile, ai panž godiaver. Le dilia, line penge lampuri, či line vuloi pensa. Numa le godiaver line penge lamponsa vuloi ande le khore. Sar o terno či avilo sigo, sa lias le e lindri ai sute. Maškar e riat, tsipin: Eta o terno, žian angla leste! Atunči sa kudala pativalia uštile, ai lašiaren penge lampuri. Le dilia phenel ka le godiaver: Den ame anda tumaro vuloi, ke amare lampuri meren. Le godiaver den palpale: Niči; či ašela dosta amenge ai tumenge; žian mai mišto ka kudala kai bikjinen, ai kjinen tumenge. Žikin von gele te kjinen, o terno avilo; kudala kai sas kothe dine andre lesa ande e soba le abiaveski, ai phandade o vudar. Mai palal, le kaver pativalia avile, ai phenen: Baria, Baria, puter amenge. Numa vo del palpale: Me phenav tumenge čačimasa, me či prinžiarav tumen. Arakhen tume, ke tume či žianen o dies, či o časo. Avela sar jekh manuš kai, žiantar te phirel, akharel peske slugen, ai thodias ande lenge vast pesko mištimos. Vo dias panž teliaria ka jekh, dui ka o kaver, ai jekh ka o trito, ka sako sar si harniko, ai vo gelotar. Kudo kai lias le panž teliaria gelotar te kerel butji kudale lovensa ai nirisardias panž kaver teliaria. Sa jekh fialo, kudo kai lias le dui teliaria nirisardias dui kaver. Kudo kai lias ferdi jekh gelo te kerel jekh groapa ande e phuv, ai garadias o lov peske birevosko. But vramia pala kudia, o birevo kudale slugengo avilo palpale, ai manglias lendar so kerde. Kudo kai lias le panž teliaria pašilo, andias panž mai but teliaria, ai vo phenel: Baria, tu dian ma panž teliaria, me nirisardem panž kaver. Lesko birevo phenel lesko: Mišto kerdian, laši ai čači sluga; tu sanas čačimasa ande le tsiřa dieli, me dava tut te les sama ande but; av ande e veselia tjire birevoski. Kudo kai lias le dui teliaria pašilo vi vo, ai vo phenel: Baria, tu dian ma dui teliaria; eta, me nirisardem dui kaver. Lesko birevo phenel leske: Mišto si, laši ai čači sluga; tu sanas čačimasa ande le tsiřa diela, me dava tut te les sama ande but; av ande e veselia tjire birevoski. Kudo kai lias jekh teliari pašilo vi vo, ai vo phenel: Baria, me žianavas ke tu san jekh manuš trudno, kai kjides kai či thodian te bariol, ai kai les kai tu či šiudian simintsi. Me darailem, ai me gelem te garavav tjiro teliari ande e phuv; eta lo, le so si tjiro. Lesko birevo del les palpale: Sluga nasul ai khaili, tu žianesas ke me kjidav kai či thodem te bariol, ai ke me lav kai či šiudem simintsi. Trubulas tu te des muřo lov ka le bankuri, ai, kana avilemas palpale, me lemas so si muřo ai but mai opral. Len lestar o teliari, ai den les ka kudo kai si les le deš teliaria. Ke dena kudales kai si les, ai avela les but, numa kudales kai nai les lena lestar vi so si les. Ai e sluga khančeski, šiuden les avri ande o tuniariko, kai avena roimata ai grintsina le dand. Kana o Šiav le manušesko avela ande pesko vestimos, sa le andželonsa, vo bešela pe pesko skamin vestimasko. Sa le thema avena kjidine angla leste. Vo hulavela le unen katar le kaver, sar o pastuřo hulavela le bakren katar le buznia. Ai vo thola le bakrořen pe peski čači, ai le buznian pe peski stingo. Atunči o amperato phenela kudalenge kai si pe leski čači: Aven, tume kai san svintsime katar muřo dad; len e amperetsia kai sas tumenge lašiardi dekin si e lumia. Ke me simas bokhalo, ai tume dian man te xav; me simas trušalo, ai tume dian ma te piav; me simas streino, ai tume lian sama mandar. Me simas nango, ai tume uriadian ma; me simas nasvalo, ai tume avilian mande; me simas ande e temnitsa, ai tume avilian karing mande. Le vorta den les palpale: Baria, kana dikhliam tu ame ke tu sanas bokhalo, ai diam tu ame te xas; vai ke sanas trušalo, ai diam tu ame te pes? Ai kana dikhliam tu ame streino, ai ame liam sama tutar; vai nango, ai ame uriadiam tut? Kana dikhliam tu ame nasvalo, vai ande e temnitsa, ai geliam ame karing tute? Ai o amperato dela palpale: Me phenav tumenge čačimasa, sako data kai tume kerdian kudala dieli ka jekh anda le mai tsinoře katar muře phral, mange si ke tume kerdian. Atunči vo phenela kudalenge kai si pe leski stingo: Durian mandar, armandine; žian ande e jag kai si pe sakda kai si lašiardi le bengeske ai leske andželonge. Ke me simas bokhalo, ai tume či dian ma te xav; me simas trušalo ai tume či dian ma te piav. Me simas streino, ai tume či lian sama mandar; me simas nango, ai tume či uriadian ma; me simas nasvalo ai ande e temnitsa, ai tume či avilian mande. Von dena palpale: Baria, kana dikhliam tu ame ke tu sanas bokhalo, vai trušalo, vai streino, vai nango, vai nasvalo, vai ande e temnitsa, ai či ažutisardiam tu ame? Ai vo del len palpale: Me phenav tumenge čačimasa, sako data ke tume či kerdian kudala dieli ka jekh anda le mai tsinoře, mange si ke tume či kerdian. Ai kudala žiana ka e dukh pe sakda, numa le vorta ka o traio pe sakda. Kana o Jesus getosardias sa kudala divanuri, vo phenel peske vortakonge: Tume žianen ke e Patradi si t'avel pa dui dies, ai ke o Šiav le manušesko avela dino ande o vast t'avel amblado pe o trušul. Atunči le mai bare raša ai le purane anda o narodo kjidinisaile ande o kimpo ka o baro rašai akharen les Kaifas. Ai von den pe duma sar te keren t'astaren le Jesus xitreniasa, ai te mudaren les. Numa von phenen: Te na avel žikin si o prasniko, te na avel buntuimos maškar o narodo. Sar o Jesus sas ande e Betania, ande o kher ka o Simon o žiungalo nasvalo. Jekh žiuvli pašili paša leste, ninkerelas jekh khoro duxi, sas duxi pria kuč; ai, žikin vo sas ka e skafidi, voi dias muial e duxi pe lesko šero. Le vortača dikhle kudia, xoliaile, ai phenen: So si lašio kado xasarimos? Šai bikjindiamas kadia duxi pria kuč, ai diamas le love ka le čoře. O Jesus, lias sama, phenel lenge: Sostar nekežin tume kadala žiuvlia? Voi kerdias jekh laši diela karing mande. Tumen si tume sakda le čoře tumensa, numa me či avava sakda tumensa. Kai dias muial kadia duxi pe muřo stato, voi kerdias kadia te getol ma pe muřo groapoševo. Me phenav tumenge čačimasa, kai-godi kadia laši viasta avela phendi, ande sa e lumia, phenena vi te den pe godji so kadia žiuvli kerdias. Atunči jekh anda le deš-u-dui, akharen les o Juda Iskariot, gelo karing le bare raša, ai phenel: So kamen tume te den ma, te me bikjinava les tumenge? Ai von pokjinde leske trianda kotora rup. De katar kudia vramia, vo rodelas jekh vramia laši te del ande o vast le Jesus. O mai angluno dies katar o prazniko kana xan le manře bi-drosdake, le vortača pušen katar o Jesus, te phenen leske: Kai kames tu te lašiaras tuke o xamos la Patradiako. Vo del palpale: Žian ande o foro ka jekh kasavo, ai phenen leske: O Baro phenel: muři vramia aresli; me kerava tute e Patradi muře vortakonsa. Le vortača kerde so o Jesus phendiasas lenge, ai von lašiarde e Patradi. E riat aresli, vo thodias pe pala e skafidi le deš-u-donsa. Žikin von xan, vo phenel: Me phenav tumenge čačimasa, jekh anda tumende bikjinela ma. Von si pria nekežime, ai sako lias pe te phenel leske: Sim me kudo, Baria? Vo del palpale: Kudo kai thodias mansa o vast ande o tiari, kudo si kai bikjinela ma. O Šiav le manušesko žialtar, sar si ramome pa leste. Numa nasul le manušeske kastar o Šiav le manušesko si bikjindo! Mai mišto kudale manušeske te na arakhadinosas. O Juda, kai sas te bikjinel les, lias e vorba ai phenel: Sim me kodo, Rabi? O Jesus del les palpale: Tu phendian. Žikin von xan, o Jesus lias o manřo; ai, pala kana řudjisardias, vo phaglias les, ai dias les ka le vortača, phenelas: Len, xan, kado si muřo stato. Vo atunči lias jekh taxtai, ai, pala kana řudjisardias, vo dias les lenge, phenelas: Pen, sa tume. Ke kado si muřo rat, o rat la patiako, kai si dino muial pala but manuš, te na mai aven len bezexa. Me phenav tumenge, me či mai piava de akana anda e fruta la rezaki, ži ka o dies kai me piava mol nevi tumensa ande e amperetsia muři Dadeski. Pala ke gjilabade gjilia, von gele ka o plai le Maslinengo. Atunči o Jesus phenel lenge: Inke kadia riat, tume si sa te muken man, ke si ramome: me malavava le pastuřes, ai le bakroře avena puřime. Numa, kana me živindiva, me avava angla savořende tumendar ande e Galilea. O Petri, lias e vorba, phenel leske: Makar ke sa le kaver mukena tu, me či mukava tu šoha. O Jesus phenel leske: Me phenav tuke, inke ande kadia riat, angla savořende ke te o kokošo gjilabel, tu tri-var phenesa ke či prinžiares man. O Petri del les palpale: Kana te trubula te merav tusa, me šoha phenava ke či prinžiarav tu. Ai sa le vortača phende sa jekh fialo. Pe kudia, o Jesus gelo lensa ande jekh than kai akharen les Getsemane, ai vo phenel le vortakonge: Bešen kathe, žikin me duriuvav te řudjiv. Vo lias pesa le Petri ai le do šiaven katar o Zebedeo, ai les lias les o nekežimos ai e dar. Vo phenel lenge: Muřo duxo si nekežime ži ka o merimos; bešen kathe, ai len sama mansa. Porme, gelo uni pašuri angle, vo pelo pe peski fatsa, ai řudjisardias kadia: Muřo Dad, te šai daštil, ke kado taxtai te duriol mandar! Numa, na so me kamav, numa so tu kames. Ai vo avel karing le vortača, ai arakhel le sar soven, ai vo phenel ka o Petri: Tume naštisardian te len sama mansa jekh časo! Len sama ai řudjin, eta tume te na peren ande o zumaimos; o duxo le manušesko si lašio numa o mas si kovlo. Vo mai durilo jekh duito data, ai řudjisardias kadia: Muřo Dad, te naštila ke kado taxtai duriol mandar bi ke te piav les, t'avel sar tu kames! Vo mai avilo, ai mai arakhlias le sar soven; ke lenge jakha sas phare. Vo muklias le, ai duriol, vo řudjisarel pe e trito data, phenel sa jekh fialo. Porme vo gelo karing peske vortača, ai phenel lenge: Tume soven akana, ai tume hodinin! Eta, o časo pašilo, ai o Šiav le manušesko avela dino ande le vast le bezexalenge. Ušten, žias; eta, kudo kai bikjinel ma pašiol. Sar vo mai delas duma, eta, o Juda, jekh anda le deš-u-dui, avel, ai lesa baro narodo si len xanře ai rovlia, tradine katar le bare raša ai katar le purane anda o narodo. Kudo kai bikjindias les lenge dias kako semno: Kas me čimidava, vo si, len les. Strazo, pašilo paša o Jesus, vo phenel: Unpači Rabi! Ai vo čimidias les. O Jesus phenel leske: Muřo vortako, so tu avilian te keres, ker les. Atunči kudala žene avile angle, thode o vast pe o Jesus, ai line les. Ai eta, jekh anda kudala kai sas le Jesusosa vazdias o vast, ai tsirdias pesko xanřo; vo maladias la sluga katar o baro rašai ai peradias lesko kan. Atunči o Jesus phenel leske: Tho tjiro xanřo palpale; ke sa kudala kai lena o xanřo xasavona katar o xanřo. Gindis-tu tu ke me naštiv t'akharav muře Dades, kai dela man akana strazo deš-u-dui armi andželi? Sar te aresen čače le Ramomata? Ke von phenen ke trubul t'avel kadia. Ande kudia vramia o Jesus phenel le narodoske: Tume avilian, sar pala jekh řobaš, le xanřensa ai le rovliansa, te len man. Me bešavas sako dies tumensa, sikiaravas ande o templo, ai tume či lian man. Numa sa kadia areslo eta ke te le Ramomata katar le profeturi t'aresen čače. Atunči le vortača mukle les, ai našle. Kudala kai line le Jesus ningerde les ka o baro rašai Kaifas, kai le zakonaria ai le purane sas kjidine. O Petri gelo pala leste dural ži ande o kimpo ka o baro rašai, dias andre, ai bešlo tele le slugensa, te dikhel so te getol pe. Le bare raša ai sa e kris židovitsko rodenas uni falši martururi pe o Jesus, dosta te mudaren les. Numa či arakhle, makar ke uni falši martururi sikadile. Eta, avile dui, kai phenen: Kado phendias: Me šai phařavav o templo le Devlesko, ai vazdava les ande trin dies. O baro rašai uštilo ai phenel leske: Či des tu khanči anglal so kadala manuš phenen pe tute? O Jesus bešel muto. Ai o baro rašai lias e vorba, phenel leske: Me mangav tu, katar o Del o živindo, te phenes amenge te san tu o Kristo, o Šiav le Devlesko. O Jesus del les palpale: Tu phendian. Mai but, me phenav tumenge: tume dikhena d'akanara sar o Šiav le manušesko bešel pe e čači rig katar o Del o zuralo, ai avel pe le nuveria le čereske. Atunči o Baro rašai šindias peske tsalia, phenelas: So prasaimos! So mai trubul amen martururi? Eta, tume ašundian lesko prasaimos. So miazol tumenge? Von den palpale: Trubul vo mudardo. Pe kudia, von čungarde les pe o mui, ai dine les dukhuma ai palmi pe o mui, phenenas: Kristo, phen so avela; phen amenge kon maladias tu. Numa, o Petri bešelas avri ande o kimpo. Jekh sluganka pašiol paša leste, ai phenel: Vi tu, tu sanas le Jesusosa anda e Galilea. Numa vo del palpale angla sa, phenelas: Me či žianav so tu phenes. Sar vo žialas karing o vudar, jekh kaver sluganka dikhlias les, ai phenel kudalenge kai si kothe: Vi kado sas le Jesusosa anda o Nazaret. Vo mai dias palpale, solaxasa: Me či prinžiarav kudale manušes. Tsiřa pala kudia, kudala kai sas kothe, pašile, phenen ka o Petri: Čačes ke vi tu san anda kudala žene, ke prinžiaras tu pala tjiro glaso. Atunči vo thodias pe te prasal ai te solaxal: Me či žianav kudale manušes. Strazo o kokošo gjilabadias. Ai o Petri dias pe godji ka le vorbi le Jesusoske kai phendiasas: Angla savořende ke te o kokošo gjilabel, tu phenesa tri-var ke či prinžiares man. Ai vo anklisto avri, vo rovel zurales. Sar o diminiats avilo, sa le bare raša ai le purane le narodoske kjidine pe te den pe duma pe o Jesus, te mudaren les. Pala ke phangle les von andine les ai dine les ka o Pontius Pilato, o vladoro. Atunči o Juda, kai bikjindias les, dikhlias ke dine les kris, keisailo, vo ningerdias le trianda kotora rup ka le bare raša ai ka le purane. Phenelas: Me kerdem bezex, kai dem ande tumare vast jekhe manušes kai nas došalo te merel. Von den palpale: So-i amare dieli? Kudia si tjiri diela. O Juda šiudias le love rupune ande o templo, ai gelo-tar te amblavel pe. Le bare raša kjidine le, ai phenen: Nai slobodo te thon le love ande o mandjin šinado, ke si o bikjinimos le ratesko. Ai, pala ke den pe duma, kjindine kudale lovensa o kimpo kudalesko kai kerel le khore. Sa anda kudia kudo kimpo akharde les o kimpo le Ratesko, ži adies. Atunči areslo so sas phendo katar o Jeremia, o profeto: Von line le trianda kotora rupune, love kai le Židovuri sas ande jekh than te pokjinen leske: Ai von dine le te kjinen o kimpo kudalesko kai kerel le khore sar o Baro dias ma e ordina. O Jesus andine les angla o vladoro. O vladoro pušel les, kadia: San tu o amperato le Židovongo? O Jesus del les palpale: Tu phenes. Numa či mai del palpale khanči so thon beda pe leste ka le raša le bare ai ka le purane. Atunči o Pilato phenel leske: Či ašunes sode thon beda pe tute? Ai o Jesus či del les palpale pe či jekh vorba, kudia sas šodo le vladoroske. Ka sako Patradi, o vladoro sas sikado te mukel jekhe řobos, savo mangel o narodo. Sas len atunči jekh řobaš vestime, bušol Barabas. Sar von sas kjidine, o Pilato phenel lenge: Savo kamen tume te mukav les tumenge, le Barabas, vai le Jesus, kai akharen les o Kristo? O Pilato vo žianelas mišto ke von dine les ande le vast le Jesus ke von sas xoliariko pe leste. Žikin vo bešel ka e kris, leski řomni tradias te phenen leske: Te na avel khanči maškar tute ai kudo bi-došalo, ke adies but kjinuisardem ande o suno pala leste. Le bare raša ai le purane thode zor pe o narodo te mangel te mukel le Barabas, ai te mudarel le Jesus. O vladoro, lias e vorba, phenel lenge: Savo anda le dui kamen tume te mukav les tumenge? Von den palpale: O Barabas. O Pilato phenel lenge: So kerava me anda o Jesus, kai akharen les o Kristo? Sa dine palpale: T'avel amblado pe o trušul! O vladoro phenel: Numa če nasulimos kerdias vo? Ai von tsipisarde mai zurales: T'avel amblado! O Pilato dikhlias ke či niril khanči, numa ke o buntuimos butiol, lias pai, xaladias peske vast angla o narodo, ai phenel: Me či sim došalo anda o rat kadalesko. Tumari diela si. Ai sa o narodo dias palpale: Ke te lesko rat perel pe amende ai pe amare šiave! Atunči o Pilato muklias lenge le Barabas; ai, thodias te maren le Jesus, vo dias les t'amblaven les pe o trušul. Le ketani le vladoroske ningerde le Jesus ande e avlin le vladoroski, ai von kjidine krugom lestar sa le kavre ketanen. Line pa leste leske tsalia, ai thode pe leste jekh bunda loli. Von khuvde jekh kurona anda le kanře, kai von thode pe lesko šero, ai von thode jekh řaioři ande lesko vast čačo; porme dine čanga angla leste, von prasan les, phenen: Unpači, amperato le Židovongo. Ai von čungarden pe leste, line e řaioři, ai malade les pe o šero. Pala kudia kai asaile lestar, line pa leste e bunda, thode pe leste leske tsalia, ai ningerde les t'amblaven les pe o trušul. Kana ankliste avri, von arakhle jekhe manušes anda e Sirena, akharen les o Simon, ai von thode pe leste zor te ningerel o trušul le Jesusosko. Aresle ande o than kai bušol Golgota, kudo si Šero Nango, Von dine les te pel mol drabesa hamime; numa, kana vo zumadias, či kamlias te pel. Kana amblade les pe o trušul von hulade leske tsalia, ai khelde pe kon lel le. Porme von bešle tele, ai len sama lestar. Te sikaven sostar sas vo dino strafo, ramosarde opral pa lesko šero: Kado si o Jesus, o amperato le Židovongo. Lesa sas amblade dui čor, jekh pe leski čači, ai o kaver pe leski stingo. Kai nakhenas maren mui lestar, ai miškinas o šero. Phenenas: Tu kai phařaves o templo, ai kai vazdes les ande le trin dies, skipisavo tu! Te san tu o Šiav le Devlesko, vuli pa o trušul! Le bare raša, le zakonarensa ai le puranensa, vi von asanas lestar, ai phenenas: Vo skipisardias le kavren, ai vo naštil te skipil pe pes! Te si vo o amperato le Židovongo, ke te vulel pa pesko trušul, ai ame patiasa ande leste. Vo dias pe ka o Del; ke o Del te skipil les akana, te kamela les. Ke vo phendias: Me sim o Šiav le Devlesko. Le čor, amblade lesa, prasan les sa kadia. De katar mismeri ži ka o trito časo, sas tuniariko pe sa e phuv. Ai karing o trito časo, o Jesus tsipisardias jekhe hangosa zurale: Eloi, Eloi, lama sabaxthani? si kudia: Muřo Del, muřo Del, sostar muklian ma tu? Uni anda kudala kai sas kothe, ašunde leste, phenenas: Vo akharel le Elia. Ai strazo jekh anda lende našlo te lel jekh dirza, kai pherdias la šut ai, phanglias la pe jekh kaštořo, dias les te pel. Numa le kaver phenen: Te dikhas te o Elia avela te skipil les. O Jesus mai tsipisardias jekh data jekh hangosa zurale, ai gelotar lesko duxo. Ai eta, e zanaveska ande o templo šindili ande donde, de opral ži tele, e phuv isdraias, le stanki phařadile. Le groapoševuri puterdile, ai uni staturi le svintsonge kai sas mule živindisaile. Ankliste avri anda le groapoševuri, von gele ande o foro svinto, ai sikadile ka but žene. O fitsiri kai si baro pe jekh šel ketani ai kudala kai sas lesa t'arakhen le Jesus dikhle ke isdral e phuv ai so areslias, lias len jekh bari dar, ai phenenas: Čačes, kado manuš sas o Šiav le Devlesko. Sas kothe but žiuvlia kai dikhenas de dural; von gele pala o Jesus de anda e Galilea te služin les. Maškar lende sas e Maria anda e Magdala, e Maria, e dei katar o Jakob ai katar o Josef, ai e dei le šiavengi katar o Zebedeo. E riat aresli, avilo jekh manuš barvalo anda o Arimate, bušol Josef, vi vo sas vortako katar o Jesus. Vo gelo karing o Pilato, ai manglias o stato le Jesusosko. O Pilato dias ordina te den les leske. O Josef lias o stato, phanglias les ande jekh paplano parno, ai thodias les ande pesko groapoševo nevo, kai sas hunado ande jekh stanka. Porme spidias jekh baro bař angla o groapoševo, ai gelotar. E Maria anda e Magdala, ai e kaver Maria sas kothe, bešenas angla o groapoševo. Teharin, kai sas o sabato, le bare raša ai le Farizianuri gele ande jekh than paša o Pilato, ai phenen: Baria, ame diam ame godji ke kudo xoxamno phendiasas, kana vo mai trailas: Trin dies pala kudia me živindiva. De ordina ke o groapoševo t'avel arakhado ži ka o trito dies, eta ke te na leske vortača t'aven te čoren lesko stato, ai te phenen le narodoske: Vo živindisailo anda le mule. Kudo xoxaimos avela mai baro sar le mai angluno. O Pilato phenel lenge: Tumen si tume kai arakhen, arakhen les sar tume kamen. Von gele te len sama katar o groapoševo. Astarde o bař kai phandavenas anglal ai thode le ketanen te arakhen les. Pala o sabato, kana uštel o dies o mai angluno le kurkesko, e Maria anda e Magdala ai e kaver Maria gele te dikhen o groapoševo. Ai eta, strazo e phuv isdraias zurales ke jekh andželo le Baresko vulisto anda o čeri, avilo te spidel o bař rigate, ai bešel opral. Lesko mui sas sar te strefial, ai leske tsalia parne sar o iv. Kai arakhen isdraile daratar, ai aresle sar mule. Numa o andželo lias e vorba, ai phenel ka le žiuvlia: Tumen, na daran; ke me žianav ke tume roden le Jesus kai sas amblado pe o trušul. Vo nai kathe; vo živindisailo, sar vo phendiasas. Aven, dikhen o than kai vo sas tele, ai žian sigo te phenen ka leske vortača ke vo živindisailo anda le mule. Ai eta, vo žiala angla savořende tumendar ande e Galilea: kothe tume dikhena les. Eta, me phendem tumenge. Von geletar sigo katar o groapoševo, darasa ai but veselimasa, ai von našle te ningeren e viasta ka le vortača. Ai eta, o Jesus avilo angla lende, ai phenel: Me dav tumen pozdraimos. Von pašile t'asban leske punře, ai von klonisaile angla leste. Atunči o Jesus phenel lenge: Na daran; žian te phenen ka muře phral te žian ande e Galilea, kothe von dikhena man. Žikin von si pe e vurma, uni ketani kai arakhenas gele ande o foro, ai phende ka le bare raša so areslias. Kudala, pala ke kjidine pe le puranensa ai avile ande jekh than, dine ka le ketani but love, phenenas: Phenen ke leske vortača avile riate te čoren les, žikin ame sovasas. Ai te avela o vladoro t'ašunel, žianasa ame sar te phenas leske te na avela tumen či jekh baio. Le ketani line le love, ai kerde sar sas lenge phendo. Ai kudia viasta geli maškar le Židovuri, ži adies. Le deš-u-jekh vortača gele ande e Galilea, pe o plai kai o Jesus sikadias lenge. Kana von dikhle les, von klonisaile angla leste. Numa uni či patian. O Jesus, pašilo, del duma lensa kadia: Sa e putiaria si man dini ande o čeri ai pe e phuv. Žian, keren anda sa le thema t'aven vortača, bolen le ande o anav le Devlesko, le Šiavesko ai le Svinto Duxosko, ai sikiaren le te len sama sa so me sikiardem tumen. Ai eta, me sim tumensa sako dies, žikin či getola pe e lumia. Kadia e Nevi Viasta katar o Jesus Kristo, Šiav le Devlesko. Sar si ramome ande o Esai, profeto: Eta, te tradav angla tute kudales kai phenela ande muřo anav, kai lašiarela tjiri vurma. Si o hango kudalesko kai tsipil ande e pusta: Lašiaren e vurma le Bareski, teliaren leske vurmitsi, O Jono avilo, bolelas ande e pusta, ai phenelas pa o bolimos le keimasko, te aven jertime le bezexa. Sa o them ande e Judea ai sa o narodo ande o Jerusalem žianas paša leste; ai, puřinas penge bezexa, bolenas pe lestar ande o pai o Jordan. O Jono sas pe leste jekh tsolo anda o bal la gumulako, ai jekh prastia mortsiaki krugom o prašav. Vo xalas grastoře ai avdjin sirbato. Vo delas duma, phenelas: Avel pala mande kudo kai si mai zuralo mandar, ai me či sim harniko te bangiuvav te putrav leske doria le papučenge. Me, bolav tumen ande o pai; vo, bolela tumen ande o Svinto Duxo. Ande kudia vramia, o Jesus avel anda o Nazaret ande e Galilea, ai boldias les o Jono ande o Jordan. Sar vo anklelas avri anda o pai, vo dikhlias ke o čeri puterdiol, ai o duxo vulel pe leste sar jekh gulumbo. Ai jekh hango ašundiol anda o čeri, phenel kakala vorbi: Tu san muřo Šiav kai kamav tu but, ande tute me thodem sa muři dragostia. Strazo, o Duxo spidias le Jesus ande e pusta, Kai vo sas ande e pusta štar-var-deš dies, te zumavel les o Satan. Vo sas le sirbatone žigeniensa, ai le andželi služisarde les. Pala ke o Jono sas dino ka e kris, o Jesus gelo ande e Galilea, phenelas e Laši Viasta le Devleski. Vo phenelas: E vramia si gata, ai e amperetsia le Devleski si paše. Kein tume, ai patian tume ka e laši viasta. Sar vo nakhelas pe o berego la mariako katar e Galilea, vo dikhlias le Simon ai le Andreas, phral le Simonosko, kai šiude jekh setka ande e maria; ke von sas mašiaria. O Jesus phenel lenge: Aven mansa, ai me kerava anda tumende t'astaren le manušen. Strazo, von mukle penge setki, ai gele pala leste. Gelo tsiřa mai dur, vo dikhlias le Jakob, šiav katar o Zebedeo, ai le Jono, lesko phral, kai, vi von, sas ande jekh čuno ai lašiarenas le setki. Strazo, vo akharel le; ai, mukle penge dades o Zebedeo ande o čuno le butiarensa, gele pala leste. Von gele ande o Kapernaum. Ai, o sabato, o Jesus dias angla savořende andre ande e khangeri židovitsko, ai vo sikiarelas. Lenge sas šodo so vo sikiarel; ke vo sikiarelas sar t'avel les zor, ai na sar le zakonaria. Arakhadilias ande lengi khangeri židovitsko jekh manuš kai sas les jekh duxo nasul, ai vo tsipil: So si maškar amende ai tute, Jesus anda o Nazaret? Tu avilian te xasares amen. Me žianav kon san tu: o Svinto le Devlesko. O Jesus daravel les, phenelas: Aš, ai ankli avri anda kado manuš. Ai o duxo nasul anklisto avri anda kudo manuš, isdraias les pria zurales, ai phurdias baro tsipimos. Savořen lias len e dar, kadia ke pušen jekh kavrestar: So si kadia? Jekh nevo zakono! Vo porončil zorasa inke pe le duxuri nasul, ai von patian lesko mui! Ai lesko vestimos gelo strazo ande sa le riga krugom e Galilea. Sar anklen avri anda e khangeri židovitsko, von gele le Jakobosa ai le Jonosa ka o kher le Simonosko ai le Andreasko. E sakra le Simonoski sovelas nasvali; ai strazo dine duma pa late ka o Jesus. Vo pašilo, vo vazdias la, lias la vastestar, ai strazo o tatimos muklias la. Porme voi služisardias len. E riat, kana pelo tele o kham, andine leske sa le nasvalen ai le bengailen. Ai sa o foro sas kjidino angla lesko vudar. Vo sastiardias bute ženen kai sas le sako fialo nasvalimos; vo vi mai dias avri but duxuri nasul, ai vo či mukelas le duxuri te den duma, ke vo žianelas le. Karing e diminiats žikin inke sas pria tamlo, vo uštilo, ai anklisto avri te žial ande jekh than pusto, kai řudjil. O Simon ai kudala kai sas lesa gele te roden les. Ai, kana arakhle les, von phenen leske: Sa roden tu. Vo del le palpale: Žias pe kaver than, ande le gava paše, eta te dav duma vi kothe; ke pala kudia me avilem avri. Ai vo gelo te del duma ande le khangeria židovitsko, ande sa e Galilea, ai vo gonil le demonon. Jekh žiungalo nasvalo avel leste; ai, šiudias-pe pe čangende, vo phenel leske milasa: Te kamesa, tu šai vužares man. O Jesus, lias les e mila, thodias o vast, asbadias les, ai phenel: Me kamav, av vužio. Strazo o nasvalimos muklias les, ai vo areslo vužio. O Jesus tradias les strazo, zurale poronkonsa, ai vo phenel leske: Le tu sama te na phenes khanči khanikaske; numa žia te sikaves tu ka le raša, ai de pala tjiro vužimos so o Moše phendias, eta t'avel lenge marturo. Numa kudo manuš gelotar, vo thodias pe te tsipil opre le dieli ai te puřil, kadia ke o Jesus naštisardias mai te del andre ande jekh foro, vo bešelas avri, ande le thana pusti, ai avenas leste pa sako rig. Uni dies pala kudia o Jesus avilo palpale ande o Kapernaum. Ašunde ke vo avilo ande o kher, ai kjidinisaile kasave but manuš ke o than angla o vudar naštilas te mai ninkerel len. Vo mothol lenge e Vorba. Žene avile leste, andine jekhe paralitikos ningerdo katar štar manuš. Sar naštinas t'aven ži leste, katar o baro narodo, von puterde o čardako le kheresko kai vo sas, ai von vuliarde les katar kudo puterimos pe o pato pe savo o paralitiko sas. O Jesus, dikhlias lengo patiamos, phenel le paralitikoske: Muro šiav, tjire bezexa si jertime. Sas kothe uni zakonaria, bešenas tele ai phenenas ande pende: Sar kado manuš del vo duma kadia? Vo prasal. Kon šai jertil le bezexa, te na avela vo o Del? O Jesus, hatiardias strazo ande peste katar o duxo so von gindinas ande pende, phenel lenge: Sostar si tumen kasave ginduri ande tumare ile? So si mai mišto, te phenes le paralitikoske: Tjire bezexa si jertime, vai te phenes: Ušti, le tjiro pato, ai phir? Eta, eta tume te žianen ke o Šiav le manušesko si les pe e phuv e putiaria te jertil le bezexa. Me dav tu ordina, phenel vo le paralitikoske: Ušti, le tjiro pato, ai žia ande tjiro kher. Ai, strazo, vo uštilo, lias pesko pato, ai gelo-tar avri angla savořende, kadia sas lenge sa šodo ai vestinas le Devles, phenenas: Ame šoha či dikhliam diela kadia. O Jesus mai anklisto avri karing e maria. Sa o narodo avelas leste, ai vo sikiarelas len. Kai nakhelas, vo dikhlias le Levi, šiav katar o Alfeo, bešelas pala e skafidi kai pokjinen e taksa. Vo phenel leske: Av pala mande! O Levi uštilo, ai gelo pala leste. Sar o Jesus sas pala e skafidi ande o kher ka o Levi but manuš kai kjiden e taksa le amperatoske ai žene kai nai lengo traio lašio, vi von thode pe pala e skafidi lesa ai leske vortakonsa; ke von sas but, ai gele pala leste. Uni zakonaria, kai sas Farizianuri, dikhle les ke xal le manušensa kai kjiden e taksa ai le ženensa kai nai lengo traio lašio, phenen leske vortakonge: Sostar xal vo le manušensa kai kjiden e taksa ai le ženensa kai nai lengo traio lašio? Sar o Jesus ašundias, vo phenel lenge: Nai kudala kai si saste ke trubul len doxtoro, numa le nasvalen. Me či avilem te akharav kudalen kai si vorta, numa le bezexalen. Le vortača le Jonoske ai le Farizianuri postin. Von avile te phenen ka o Jesus: Sostar le vortača le Jonoske ai kudala katar le Farizianuri postin von, numa tjire vortača či postin? O Jesus del len palpale: Le vortača le terneske kai ansuril pe šai postin von žikin si o terno lensa? Sogodi si lensa o terno, von naštin te postin. Le dies avena kai o terno avela lendar lino, ai atunči von postina kudo dies. Khonik naštil te suvel jekh kotor nevo ka jekh tsalia purani; aver fialo, o kotor nevo šinel jekh partia anda e tsalia, ai o šinimos avela mai baro. Ai khonik či thol mol nevi ande le bočonkuri purane; aver fialo, e mol phagel le bočonkuri, ai e mol ai le bočonkuri xasavon; numa trubul te thon e mol ande le bočonkuri neve. Areslias, jekh dies o sabato, ke o Jesus nakhel maškar o gjiv. Leske vortača, žianas pe vurma, thode pe t'ankalaven simintsi. Le Farizianuri phenen leske: Eta, sostar keren von so nai slobodo te keren o sabato? O Jesus del len palpale: Či gjindian tume šoha so kerdias o David, kana sas bokhalo ai manglias te xal, vo ai kudala kai sas lesa. Sar dias vo ande o kher le Devlesko, pe e vramia kana sas o baro rašai o Abiatar, ai vo xalias le manře dišade pe o altari, kai slobodo ferdi le rašange te xan, ai inke vo dias ka kudala kai sas lesa! Porme vo phenel lenge: O sabato si thodino le manušenge, ai nai ke o manuš si thodino le sabatoske; kadia o Šiav le manušesko si o birevo vi pe o sabato. O Jesus mai dias andre ande e khangeri židovitsko. Vo arakhlias jekhe manušes kai sas lesko vast šuko. Von lenas sama pe o Jesus, te dikhen te sastiarela vo o dies o sabato; sas te thon pe leste beda. Ai o Jesus phenel le manušeske kai sas lesko vast šuko: Ušti, kathe angla savořende. Porme phenel lenge: Si slobodo, o dies o sabato, te keren mištimos vai te keren nasulimos, te skipis jekhe manušes vai te mudares les? Numa von ašile mutsi. Atunči, dikhel pe lende vuřitsimasa, ai vi mai nekežime anda lengo zuralimos ande o ilo, vo phenel le manušeske: Vazde tjiro vast. Vo vazdias les, ai lesko vast sastilo. Le Farizianuri ankliste avri, ai strazo von kjidinisaile le vortakonsa le Herodoske te len sama sar te xasaren les. O Jesus gelotar karing e maria peske vortakonsa. Jekh baro narodo gelo pala leste anda e Galilea; ai anda e Judea, ai anda o Jerusalem, ai anda o Idumea, ai anda inčial o Jordan, ai krugom katar e Tira ai o Sidon. Jekh baro narodo, sikionas so vo kerel, aven leste. Vo thodias peske vortakon te ninkeren leske jekh tsinořo čuno, eta te na avel kjidino katar o narodo. Ke, sar vo sastiarelas bute ženen, sa kudala kai sas len nasvalimata šiudenas-pe pe leste t'asban les. Le duxuri nasul, kana von dikhenas les, denas čanga angla leste, ai tsipinas: Tu san o Šiav le Devlesko. Numa vo delas len poronka pria zurales te na phenen kon si vo. Vo atunči anklisto pe o plai; vo akhardias kudalen kai vo kamlias, ai von avile paša leste. Vo alosardias deš-u-don, t'aven lesa, kai akharel le apostoluri. Ai te tradel len te phenen e Laši Viasta ai te del len e putiaria te gonin le demonon. Eta le deš-u-dui kai vo thodias: O Simon, kai akharel les Petri; o Jakob, šiav katar o Zebedeo, ai o Jono, phral le Jakobosko, dias lenge o anav Boanerges, kai si kudia šiave katar o řondeto; o Andreas; o Filipo; o Bartelemi; o Matei; o Tomas, o Jakob, šiav katar o Alfeo; o Tade; o Simon o Kananito; ai o Juda Iskariot, kudo kai bikjindas le Jesus. Vo gelo ande o kher, ai o narodo mai pašilo, kadia ke vo ai leske vortača naštinas te mai xan. Le niamuri le Jesusoske, ašunde kudo, avile te len les; ke von phenenas: Lias pe avri anda e godji. Ai le zakonaria, kai vuliste anda o Jerusalem, phenenas: Lias les o Beelzebul; si katar o prinso le demonongo ke von gonil le demonon. O Jesus akharel le, ai phenel lenge paramičensa: Sar o Satan šai gonil vo le Satan? T'avela jekh amperetsia huladi, kudia amperetsia naštil te ninkerel. Ai t'avela jekh kher t'avel hulado maškar peste, kudo kher či ninkerela. T'avela ke o Satan marel-pe pe peste, leski amperetsia si huladi, ai leski putiaria našti te žial mai angle, numa getola pe. Khonik naštil te del andre ande o kher kai si jekh manuš zuralo ai te čorel leske mištimata, bi angla savořende te phandel kudale manušes; atunči vo čorela lesko kher. Me phenav tumenge čačimasa, sa le bezexa avena jertime le šiavenge katar le manuš, ai le prasaimata kai von phenena; numa kon prasala pe o Svinto Duxo či avela šoha jertime; vo si došalo pe jekh bezex merimaski. O Jesus delas duma kadia ke von phenenas: Si ande leste jekh duxo nasul. Avile leski dei ai leske phral, kai, bešenas avri, trade t'akharen les. O narodo bešelas tele krugom lestar, ai phenen leske: Eta, tjiri dei ai tjire phral si avri ai akharen tu. Ai vo del palpale: Kon si muři dei, ai kon si muře phral? Porme, šiudias le jakha pe kudala kai bešen tele sa krugom lestar. Eta, phenel vo, muři dei ai muře phral. Ke, kon-godi kerel so mangel o Del, kudo si muřo phral, muři phei, ai muři dei. O Jesus mai lias pe te sikiarel pe o berego la mariako. Jekh baro narodo kjidinisailo krugom lestar, vo anklisto ai bešel ande jekh čuno. Sa o narodo sas tele pe e phuv pe o berego. Vo sikiarelas len but dieli paramičensa, ai vo phenel lenge ande pesko sikiarimos: Ašunen: Jekh kai bariarel anklisto avri te šiudel simintsi. Sar vo šiudel, jekh partia anda le simintsi peli pe e rig la vurmaki ai le čiriklia avile, ai xale la. Jekh kaver partia peli ande jekh than kai si bař, kai nas but phuv; voi uštili strazo, ke e phuv nas pria andre. Numa, kana o kham uštilo, voi phabuli ai šukili, ke nai la vuni. Jekh kaver partia peli maškar le kanře: le kanře barile, ai tasade la, ai voi či dias fruta. Jekh kaver partia peli ande e laši phuv; voi dias fruta kai anklisti ai barili, ai voi dias trianda, šov-var-deš, ai jekh šel pe jekh. Porme vo phenel: Ke kudo kai si les kan t'ašunel, ašunela! Kana sas korkořo, kudala kai sas krugom lestar le deš-u-donsa pušen les pala le paramiča. Vo phenel lenge: Tumenge si dino so si šodo katar e amperetsia le Devleski; numa kudalenge kai si avri sa si te nakhel sar paramiča. Eta kana dikhena dikhen ai či len sama, ai kai ašunena ašunen ai či hatiaren, daratar ke te na pařudion, ai ke le bezexa te na aven lenge jertime. Vo mai phenel lenge: Tume či hatiaren kadia paramiči? Sar hatiarena tume sa le paramiča? Kai šiudel e simintsa šiudel e vorba le Devleski. Le vuni si pe e rig la vurmaki, kai e vorba si thodini te bariol. Kana von ašunen la, strazo o Satan avel ai ankalavel e vorba kai sas thodini ande lende. Le kaver, sa jekh fialo, len le simintsi ande le thana bařune; kana von ašunen e vorba, von len la angla savořende veselimasa. Numa nai la vuna ande lende, von či ninkeren, ai, sar avel jekh nasulimos vai jekh marimos pala e vorba, von strazo muken o patiamos. Le kaver len le simintsi maškar le kanře; si kudala kai ašunen e vorba, numa kaske o nekazo le traiosko, o dilimos le barvalimasko ai le kaver dieli kai mangen, tasaven e vorba, ai keren te na del khanči. Le kaver len le simintsi ande e laši phuv; si kudala kai ašunen e vorba, len la, ai den fruti, trianda, šov-var-deš ai jekh šel pe jekh. Vo mai phenel lenge: Anena o lampa te thon les tela e vadra, vai tela o pato? Nai te thon les pe e vadra? Ke sa garado avela sikado; sa kai garaves avela hatiardo. Te si varekon kai si les kan t'ašunel, t'ašunel! Vo mai phenel lenge: Len sama so tume ašunen. Mezurina tumen la mezurasa kai tume mezurisardian lasa, ai mai thona opral tumenge. Ke dena kudales kai si; numa kudales kai nai les lestar lena inke so si les. Vo mai phenel: Si anda e amperetsia le Devleski sar kana jekh manuš kai šiudel simintsi ande e phuv: Kai vo sovel vai lel sama, riate ai diese, e simintsa bariol ai uštel bi te žianel vo sar. E phuv voi del anda peste, angla savořende e čar, porme o sulum, porme e simintsa kerdiol ande o sulum; ai, kana e fruta pakjili, lel o serpo, ke sigo avel o kjidinimos. Vo mai phenel: Sar te sikavav me e amperetsia le Devleski, vai katar savi paramiči sikavav la me tumenge? Si sar jekh fialo ka jekh simintsa la garčitsaki, kai, kana thon la te bariol ande e phuv, si e mai tsinoři anda sa le simintsi kai si pe e phuv. Numa, kana sas thodini te bariol, voi anklel, aresel mai bari sar sa le zelenimata, ai barion pe late le kaštoře, kadia ke le čiriklia anda o čeri šai bešen tela laki ušialin. Si katar but paramiča kasave ke vo phenel lenge e vorba, sar von si harniči t'ašunen. Vo či delas lensa duma bi paramičensa numa, rigate, vo motholas sa ka peske vortača. Sa kudo dies, karing e riat, o Jesus phenel lenge: Nakhas pe e kaver rig. Pala ke trade o narodo, von andine les ande o čuno kai vo sas; ai mai sas aver čunuri lesa. Vazdilias jekh baro buntuimos ai le taluzuri šiuden pe ande o čuno, kadia ke pherdilo vuže. Ai vo, sovelas anglal pe jekh šeranditsa. Von uštiaven les, ai phenen leske: Birevo, či des tu godji ke ame xasavas? Vo uštilo, vo daradias e balval, ai vo phenel la mariake: Muto! Aš akana! Ai e balval ašili, ai sas jekh baro mutsimos. Porme vo phenel lenge: Sostar si tumenge kadia dar? Sar nai tumen patiamos? Len lias len jekh bari dar, ai von phenen jekh kavreske: Kon si kado, kai patial lesko mui vi e balval ai e maria? Von aresle pe e kaver rig la mariaki, ande o them le Gerasianengo. Strazo sar o Jesus vulisto anda o čuno, avilo angla leste jekh manuš, anklisto avri anda le groapoševuri, ai sas ande leste jekh duxo nasul. Kudo manuš bešelas ande le groapoševuri, ai khonik naštilas te mai phandel les, inke jekhe lansosa. Ke butivar sas leske punře phangle sastrensa ai sas phanglo lansonsa, numa vo šindias le lansuri ai phaglias le sastria, ai khonik nas dosta zuralo te ninkerel les. Vo sas sakda, riate ai diese, ande le groapoševuri ai pe le plaia, tsipilas ai malavelas pe bařensa. Dikhlias le Jesus de dural, vo našlo, dias čanga angla leste, ai tsipil jekhe zurale hangosa: So si maškar mande ai tute, Jesus, Šiav katar o Del Mai Vučo? Me mangav tu ande o anav le Devlesko, na hamisavo mande. Ke o Jesus phenelas leske: Ankli avri anda kado manuš, duxo nasul. Ai vo pušel les: Sar bušos? Armia si muřo anav, del vo palpale, ke ame sam but. Ai vo řudjil pe leste strazo te na traden le avri anda o them. Sas kothe, karing o plai, but bale kjidine kai xanas. Ai le duxuri phenen leske, phenenas: Trade amen ande kadala bale, eta te ame t'avas ande lende. Vo muklias len. Ai le duxuri nasul ankliste avri, dine andre ande le bale, ai le bale šiude pe pa le plaia ande e maria; sas pašte dui mii, ai von tasule ande e maria. Kudala kai lenas sama lendar našle, ai ningerde e viasta ande o foro ai krugom. Le žene gele te dikhen so areslias. Von avile paša o Jesus ai von dikhle le manušes, kai sas e armia ande leste, bešel tele, uriado, ai ande peski godji, ai len lias len e dar. Kudala kai dikhle so nakhlias phenen lenge so areslias le manušeske ai le balenge. Atunči von thode pe te řudjin le Jesus te mukel lengi phuv. Sar vo anklelas ande o čuno, kudo kai sas řimome katar le duxuri nasul mangel lestar te bešel lesa. O Jesus či muklias les, numa phenel leske: Žia ande tjiro kher, karing le tjire, ai phen lenge sa so o Baro kerdias tuke, ai sar sas leske mila tutar. Vo gelotar. Ai vo lias pe te phenel ande sa le Deš Foruri sa sogodi o Jesus kerdias leske. Ai sa sas lenge šodo. O Jesus ande o čuno gelo pe e kaver rig, kai jekh baro narodo kjidinisailo paša leste. Vo sas pe o berego la mariako. Atunči avilo jekh anda le birevia katar e khangeri židovitsko, bušol Jairus, kai, dikhlias les, bangilo ka leske punře, Ai vo phenel leske řudjimasa kadia: muři tsinoři šiavoři merel; aidi, tho pe late le vast, eta t'avel voi skipime ai te trail. O Jesus gelo lesa. Ai jekh baro narodo žialas pala leste ai kjiden les. Eta, sas jekh žiuvli, sas la ke lako rat pitialas de deš-u-dui berš. Voi but kjinuisaili ande le vast le bute doxtorenge, voi dias sa le love so sas la, ai lake nas či jekh mištimos, numa lake sas nasul ai mai nasul. Voi ašundias ke den duma pa o Jesus, voi avili ande o narodo palal, ai asbadias leske tsalia. Ke voi phenelas peske: Te šai ferdi t'asbav leske tsalia, me sastiuvava. Strazo voi hatiardias peste mai mišto, ai voi hatiardias ande pesko stato ke voi sastili anda pesko nasulimos. O Jesus hatiardias strazo ande peste ke jekh zor anklisti avri anda leste; ai, amboldinisailo maškar o narodo, vo phenel: Kon asbadias muře tsalia? Leske vortača phenen leske: Tu dikhes o narodo kai kjiden tu, ai tu phenes: Kon asbadias ma? Ai vo dikhel krugom pestar, te dikhel kon si kudo kai kerdias kadia. E žiuvli, darasa ai isdraimasa, žianelas so areslias lake, avili te šiudel pe ka leske punře, ai phenel leske sa o čačimos. Numa o Jesus phenel lake: muři šei, tjiro patiamos skipisardias tu; žia patiasa, ai av sasti anda tjiro nasvalimos. Sar vo mai delas duma, avile katar o birevo la khangeriako židovitsko žene kai phenen: Tjiri šei muli; sostar mai diliares tu le birevos? Numa o Jesus, bi te lel sama lenge vorbi, phenel ka o birevo la khangeriako židovitsko: Na dara, patia tu ferdi. Ai, vo či muklias khanikas t'avel lesa, ferdi o Petri, o Jakob, ai o Jono, phral le Jakobosko. Von aresle ka o kher le birevosko katar e khangeri židovitsko, kai o Jesus dikhel jekh narodo buntuime ai le žene kai roven ai vatin but. Vo dias andre, ai phenel lenge: Sostar keren tume kasavo mui, ai sostar roven tume? E glata či muli, numa voi sovel. Ai von marde mui lestar. Atunči, kerdias t'anklel sa o narodo avri, vo lias pesa le dades ai la da la glatake, ai kudalen kai sas lesa, ai vo dias andre kai sas e glata. Vo lias la vastestar, ai phenel lake: Talita kumi, kudia bušol: Terni šei, ušti! Me phenav les tuke. Strazo e terni šei uštili, ai thodias pe te phirel; ke voi sas deš-u-dui beršengi. Ai von sas ande jekh bari čudenia. O Jesus phendias lenge pria zurales, te na žianel khonik e diela; ai vo phendias te den te xal e terni šei. O Jesus gelotar kothar, ai gelo ande pesko them. Leske vortača gele pala leste. Kana o sabato areslo, vo thodias pe te sikiarel ande e khangeri židovitsko. But žene kai ašunenas leste sas lenge šodo ai phenenas: Katar aven leske kadala dieli? So si kadia godji kai si ande leste? Ai sar kasave čudeni kerdion pa leske vast? Nai vo o kaštari, o šiav la Mariako, o phral le Jakobosko, le Josefosko, le Judesko ai le Simonosko? Ai leske pheia nai von maškar amende? Ai kudia či patian pe ande leste. Numa o Jesus phenel lenge: Jekh profeto vuřitsin les ande pesko them, maškar leske niamuri, ai ande lesko kher. Vo naštisardias te kerel kothe či jekh čudenia, ke ferdi ke thodias le vast pe uni nasvale ai sastiardias le. Ai leske sas šodo ke von či patian. Atunči vo akhardias le deš-u-don, ai vo lias pe te tradel len dui pe dui, dias le putiaria pe le duxuri nasul. Vo phendias lenge te na len pesa khanči pe o drom, ferdi jekh rovli; te ne avel len manřo, či gono, či love xurde ande e prastia; te thon spargati pe le punře, ai te na len pe peste dui bundi. Porme vo phenel lenge: Ande uni khera kai tume den andre, bešen kothe žikin tume či žian-tar kothar. Ai, te si varekai žene kai či kamen t'aven tume lende ai či kamen t'ašunen tumende, žian-tar kothar, ai khosen le pulberia pa tumare punře eta te sikaven lenge. Von geletar, ai von den duma te kein pe. Von gonisarde but duxuri nasul, ai von thonas vuloi but pe le nasvale ai sastiarenas len. O amperato Herodo ašundias so den duma pa o Jesus kai lesko anav areslo vestime, ai phenen: O Jono kai boldias živindisailo anda le mule, ai si anda kudia ke si lestar čudeni. Le kaver phenenas: O Elia si. Ai kaver phenenas: Si jekh profeto sar jekh anda le profeturi. Numa o Herodo kai ašundias kudia, phenelas: O Jono si kai šindem lesko šero, vo si kai živindisailo. Ke o Herodo vo korkořo phandadiasas le Jono, ai phanglias les ande e temnitsa, pala e Herodias, řomni katar o Filipo, lesko phral, ke vo lias la, Ai ke o Jono phenelas leske: Nai tuke slobodo te les la řomnia tjire phraleski. E Herodias xoliaili pe o Jono, ai kamelas te mudarel les. Numa voi naštilas; ke o Herodo daralas katar o Jono, vo prinžiarelas ke vo si jekh manuš vorta ai svinto; vo lelas sama lestar. Ai, kana ašunelas leste, butivar sas leske šodo, ai vo ašunelas leste dragosa. Numa, jekh dies baxtalo areslo, kana o Herodo, o prasniko katar o dies kai arakhadilo, dias jekh pativ peske barenge, le birevia pa jekh mii ketani ai ka le mai bare anda e Galilea. E šei katar e Herodias avili ande e soba, khelel, ai kerdias veselo le Herodo ai leske goston. O amperato phenel la ternia šeiake: Mang mandar so tu kames, ai me dava les tuke. Vo phendias kudia solaxasa: So tu mangesa mandar, me dava les tuke, makar t'avel dopaš muřo them. Anklisti avri, voi phenel ka peski dei: So mangava me? Ai laki dei del palpale: O šero le Jonosko kai bolel. Voi gribisaili te del andre karing o amperato, ai voi manglias lestar kadia: Me kamav te des ma akana, pe jekh tiari, o šero le Jonosko kai bolel. O amperato nekežisailo, pala peski solax ai pala le gosti, či kamlias te del pe palpale. Vo tradias pe kudia vramia jekhes kai arakhel, dias les ordina t'anel leske o šero katar o Jono kai boldias. O ketano gelo te šinel ande e temnitsa o šero katar o Jono kai boldias, ai andias o šero pe jekh tiari. Vo dias les ka e terni šei, ai e terni šei dias les ka peski dei. Le vortača le Jonoske, ašunde kudia, avile te len lesko stato, ai thode les ande jekh groapoševo. Le apostoli, kjidinisaile paša o Jesus, phenen leske sogodi von kerde ai sogodi von sikiarde. O Jesus phenel lenge: Aven rigate ande jekh than pusto, ai hodinisaras, jekh tsiřa. Ke sas but kai žian ai aven, ai len nas le inke e vramia te xan. Von geletar kadia ande jekh čuno, te žian rigate ande jekh than pusto. But žene dikhle ke žian-tar ai prinžiarde le, ai anda sa le foruri našle telal ai gele anglal ande o than kai von gele. Kana von ankliste avri anda o čuno, o Jesus dikhlias jekh baro narodo, ai lias les mila lendar, ke von sas sar le bakroře kai nai len pastuřo; ai vo thodias pe te sikiarel le but dieli. Sar o časo sas vuže posno, leske vortača pašile paša leste, ai phenenas: Kado than si pusto, ai o časo si vuže angle. Trade len, eta te žian ande le kimpuri ai ande le gava krugom, te kjinen penge so te xan. O Jesus del len palpale: Den le tume te xan. Numa von phenen leske: Žiasa ame te kjinas manřo pe dui šela dinari ai dasa le ame te xan? Ai vo phenel lenge: Sode si tumen manřo? Žian te dikhen. Von gele te dikhen, ai dine palpale: Panž, ai dui maše. Atunči vo del len poronka te thon o narodo te bešen ande jekh than pe e čar zeleno, Ai von bešle tele, ande řinduri pe jekh šel ai pe panž-var-deš. Vo lias le panž manře ai le dui maše, ai vazdias le jakha karing o čeri, vo řudjisardias. Porme, vo phaglias o manřo, eta te den les ka o narodo. Vo vi mai huladias le dui maše maškar sa. Sa xale ai pravardile, ai andine deš-u-dui košnitsi pherde kotora manřo ai so ašilias anda le maše. Kudala kai xale le manře sas panž mii žene. Strazo pala kudia, thodias zor pe peske vortača t'anklen ande o čuno ai te nakhen angla savořende lestar pe e kaver rig, karing o Betsaida, žikin vo tradel o narodo palpale. Kana vo tradias le, vo gelo pe o plai, te řudjil. E riat avili, o čuno sas maškar e maria, ai o Jesus sas korkořo pe e phuv. Vo dikhlias ke sas lenge trudno te spiden; ke e balval avelas pe lende. Angla savořende te uštel o dies, vo gelo karing lende, phirelas pe e maria, ai vo kamelas te nakhel le. Kana von dikhle les ke vo phirel pe e maria, von gindisaile ke si jekh čoxano, ai von tsipin. Kana von dikhenas les sa, von rimosaile. Strazo o Jesus del lensa duma, ai phenel lenge: Arakhen tume, me sim, te na daran! Porme anklisto karing lende ande o čuno, ai e balval ašili. Lenge sas inke pria šodo ai pherdile dar; ke von či hatiarde e čudenia le manřengi, ke lengo ilo sas zuralo. Kana nakhle e maria, von avile ande o them katar o Genesaret, ai avile pe e phuv. Kana ankliste avri anda o čuno, le žene strazo prinžiarde le Jesus. Gele sa krugom, ai avile t'anen le nasvalen pe le paturi, kai-godi ašunenas ke vo sas. Ande varesavo than kai vo areselas, ande le gava, ande le foruri vai ande le kimpuri, thonas le nasvalen pe le thana le foroske, ai řudjinas pe leste te muken len ferdi t'asban o gor leske tsalengo. Ai sa kudala kai asbanas les sas saste. Le Farizianuri ai le zakonaria, avile anda o Jerusalem, kjidinisaile paša o Jesus. Von dikhle ke uni anda leske vortača len pesko xamos le vastensa nai-vuže, sar te phenas, či xalade le. [Eta, le Farizianuri ai sa le Židovuri či xanas bi te xalaven mišto penge vast, sar si o zakono le puranengo; ai, kana von avile katar o than le forosko, von xanas ferdi kana vužionas. Len mai si le but kaver zakonuri kai len sama, sar te xalaven le taxta, le khore ai le kanti xarkumake ai le skamina.] Ai le Farizianuri ai le zakonaria pušen les: Sostar tjire vortača či žian von pala o zakono le puranengo, numa len von pengo xamos le vastensa bi-vuže? O Jesus del len palpale: Athaitoria, o Esai mišto phendias pe tumende, sar si ramome: Kado narodo vestil ma katar le vuš numa lesko ilo si dur mandar. Intaino von vestin man, kai den zakonuri kai si ferdi poronki katar le manuš. Tume muken le poronki le Devleske, ai tume len opre o zakono le manušengo. Vo mai phenel lenge: Tume mišto rimon le poronki le Devleske, te ninkeren tumare zakonuri. Ke o Moše phendias: De pativ tjire dades ai tjira da; ai: Kudo kai dela armaia peske dades vai peska da, avela dino strafo te merel. Numa tume, tume phenen: T'avela jekh manuš ke phenel peske dadeske vai peska dake: So sas ma t'ažutisarav tu si korban, si te phenas, jekh ke das ka o Del, atunči tume muken les te či kerel khanči peske dadeske vai peska dake. Šindian kadia tume e vorba le Devleski katar tumaro zakono, kai tume thodian. Ai tume keren but kaver dieli kadia. Atunči, mai akhardias o narodo peste, vo phenel lenge: Ašunen sa mande, ai hatiaren. Nai khanči avrial o manuš, kai del ande leste, šai mahril les; numa so anklel avri anda o manuš, kudo si kai mahril. T'avela varekon ke si les kan t'ašunel, ke t'ašunela. Kana vo dias ande o kher, dur katar o narodo, leske vortača pušen les pa kudia paramiči. Vo phenel lenge: Vi tume, tume san bi-godiake? Či hatiaren tume ke khanči so avel avrial kai del ande o manuš naštil te mahril les? Ke či del kudo ande lesko ilo, numa ande lesko dji, porme žial ande le thana garade. Kadia Jesus motholas ke sa le xamata vuže. Vo mai phenel: So anklel avri anda o manuš, kudo si kai mahril le manušes. Ke si andral, si anda o ilo le manušengo, ke anklen avri le nasul ginduri, le lažaimata, le čorimata, le mudarimata, le kurvimata, le xanžalimata, le bengimata žiungalimaske, o athaimos kai diliarel, le žiungalimata, o dikhimos kai kamel te lel le kavrenge dieli, le barimata, o traio ande o dilimos. Sa kudala dieli nasul anklen avri de andral, ai mahril le manušes. O Jesus, gelotar kothar, gelotar ande e phuv katar e Tira. Vo dias andre ande jekh kher, kamlias te khonik te na žianel, numa naštisardias te bešel garado. Ke jekh žiuvli, kai lias laka šeia jekh duxo nasul, ašundias pa leste, ai avili te šiudel pe ka leske punře. Kudia žiuvli sas Grekaika, arakhadili ande e Fenitsia ande o them e Siria. Voi řudjisardias les te gonil le duxo nasul avri anda laki šei. O Jesus phenel lake: Muk angla savořende le šiavořen te pravaren pe; ke nai mišto te len o manřo le šiavořengo, ai te šiuden les ka le tsinoře žiukel. Ei, Baria, del les voi palpale, numa le tsinoře žiukel, tela e skafidi, xan le kotorořa katar le šiavoře. Atunči vo phenel lake: Pala kadia vorba, žia, o duxo anklisto avri anda tjiri šei. Ai, kana voi avili ande pesko kher, voi arakhlias la glata ke sovel pe o pato, o duxo gelo-tar avri. O Jesus muklias e phuv katar e Tira, ai avel pa o Sidon karing e maria anda e Galilea, nakhelas pa o them le Deš Foruri. Andine leske jekhe kašukes, kai sas leske trudno te del duma, ai řudjisarde les te thol pe leste le vast. Vo lias les rigate dur katar o narodo, thodias leske le naia ande le kan, ai asbadias leski šib peske čungaresa. Porme, vazdias le jakha pe o čeri, vo tsirdias pesko duxo, ai phenel: Effata, kudia bušol, puterdio! Strazo leske kan puterdile, leski šib puterdili, ai vo delas duma pria mišto. O Jesus phenel lenge te na phenen khanikaske; numa so vo mai but phenel lenge, so mai but den duma. Von sas ande e pria bari čudenia, ai phenenas: Vo kerel sa sar mai šukar; ai inke kerel te ašunen le kašuke, ai te den duma le mutsi. Ande kudo dies, jekh baro narodo kjidinisailo mai jekh data ai nas len so te xan, o Jesus akhardias le vortakon, ai phenel lenge: Mange si mila pala kado narodo; ke eta trin dies ke von si paša mande, ai von či xale khanči. Te tradava le me pende bokhale, le zora či avena le dosta pe e vurma; ke uni anda lende avile dural. Leske vortača den les palpale: Sar šai pravarasa le ame manřesa, kathe, ande jekh than pusto? O Jesus pušel lendar: Sode si tume manře? Efta, von den palpale. Atunči vo kerdias te bešel o narodo pe e phuv, lias le efta manře, ai kana řudjisardias, vo phaglias len, ai dias le ka peske vortača te den le; ai von dine le ka o narodo. Mai sas uni tsinoře maše, ai o Jesus, kana řudjisardias, dias te den le. Von xale ai pravardile, ai andine efta košnitsi pherde kotora kai ašile. Von sas pašte štar mii. Atunči o Jesus tradias le. Strazo vo anklisto ande o čuno peske vortakonsa, ai gelo ande e rig o Dalmanuta. Le Farizianuri avile, ai thode pe te den duma le Jesusosa, ai te zumaven les, mangle lestar t'avel jekh semno anda o čeri. O Jesus tsirdias pesko duxo, phenel: Sostar kadia vitsa mangel voi jekh semno? Me phenav tumenge čačimasa, či avela sikado či jekh semno ka kadia vitsa. Porme vo muklias le ai anklisto ande o čuno te nakhel pe e kaver rig. Le vortača busterde te len manřo; len sas le ferdi jekh lensa ande o čuno. O Jesus del len kadia poronka: Len tume sama mišto katar e drosda le Farizianongi ai katar e drosda le Herodoski. Le vortača phenen ande peste, ai phenenas: Si ke ame či liam manře. O Jesus hatiardias, phenel lenge: Sostar gindin tume ke či lian manře? Vi akana či mai san godiaver, ai či hatiaren tume? Si tumaro ilo zuralo? Si tume jakha, či dikhen tume? Si tume kan, či ašunen tume? Ai nai tumen godji? Kana me phaglem le panž manře pe le panž mii manuš, sode košnitsi pherde kotora andian tume? Deš-u-dui, den les von palpale. Ai kana me phaglem le efta manře pe le štar mii manuš, sode košnitsi pherde kotora andian tume? Efta, den von palpale. Ai vo phenel lenge: Sa tume či hatiaren? Von gele ande e Betsaida; ai ande karing o Jesus jekhe kořes, řudjisaile leste t'asbal les. Vo lias le kořes vastestar, ai ningerdias les avri anda o gav; porme thodias čungar pe leske jakha, thodias pe leste le vast, ai pušel les te dikhel vareso. Vo dikhel, ai phenel: Me dikhav le manušen, numa dikhav le sar kopačia kai phiren. O Jesus mai thodias le vast pe leske jakha; ai, kana o kořo dikhel angla peste, sastilo, ai dikhel sa mišto. Atunči o Jesus tradias les ande lesko kher, phenelas: Na de andre ande o gav. O Jesus gelo-tar, peske vortakonsa, ande le gava katar o Tsesarea anda o Filipo, ai vo pušel le pe e vurma: So phenen ke me sim? Von den palpale: «O Jono kai boldias; le kaver phenen: o Elia; le kaver: Jekh anda le profeturi.» Ai tume, pušel le vo, so phenen tume ke me sim? O Petri del les palpale: Tu san o Kristo. O Jesus del len poronka zurales te na phenen kudia khanikaske. Atunči vo lias pe te sikiarel le ke trubul ke o Šiav le manušesko te kjinuil but, ke t'avel šiudino katar le purane, katar le bare raša ai katar le zakonaria, ke mudaren les, ai ke vo živindila o trito dies. Vo phendias lenge kudala dieli angla lende. Ai o Petri, lias les rigate, xoliailo pe leste. Numa o Jesus, amboldinisailo ai dikhel pe peske vortača, del duma pe leste, ai phenel: Palpale mandar, Satan! Ke tu či dikhes le dieli le Devleske, tut si tu ferdi ginduri manušenge. Porme, akhardias o narodo peske vortakonsa, vo phenel lenge: Te si varekon te kamel t'avel pala mande, te na mai del pe godji peste, te lel pe peste pesko trušul, ai t'avel pala mande. Ke kudo kai kamela te skipil pesko traio xasarela les, numa kudo kai xasarela pesko traio pala mande ai pala e laši viasta skipila pesko traio. Ai so avela jekhe manušeske te niril sa la lumia, te xasarela pesko duxo? So dela jekh manuš ande o than peske duxosko? Ke varekon avela leske lažiav mandar ai katar muře vorbi maškar kadia vitsa kurvetsiaki ai bezexali, o Šiav le manušesko vi leske avela lažiav lendar, kana vo avela ande o vestimos pesko Dadesko le svintsi andželonsa. Vo mai phenel lenge: Me phenav tumenge čačimasa, uni anda tumende kai si kathe či merena, mai angle te dikhen e amperetsia le Devleski avel zorasa. Šov dies pala kudia, o Jesus lias pesa le Petri, le Jakob ai le Jono, ai ningerdias le ferdi len rigate pe jekh baro plai. Vo pařudisailo angla lende; leske tsalia aresen te strefian, kasave parne ke nai sapui pe e phuv te šai parniarel kadia. O Elia ai o Moše sikadile lenge, denas duma le Jesusosa. O Petri, lias e vorba, phenel le Jesusoske: Rabi, mišto ke ame sam kathe; vazdas trin tseři, jekh tuke, jekh le Mošeske, ai jekh le Eliaske. Ke vo či žianelas so te phenel, e dar lias len. Jekh nuvero avilo te garavel len, ai anda o nuvero anklel jekh hango: Kado si muřo Šiav o mai drago; ašunen leste! Strazo le vortača dikhen krugom pendar, ai von dikhel ferdi le Jesus korkořo lensa. Sar von vulenas pa o plai, o Jesus del len poronka te na phenen khanikaske so von dikhle, žikin či o Šiav le manušesko živindila anda le mule. Von ninkerde kudia vorba, pušenas jekh avres so si kudia ke živindil anda le mule. Le vortača pušen les kadia: Sostar le zakonaria phenen von ke o Elia trubul te avel angla savořende? Vo del len palpale: O Elia avela o mai angluno, ai thola sa le dieli palpale. Ai sostar si ramome pa o Šiav le manušesko ke trubul te kjinuil but ai avela vuřitsime? Numa me phenav tumenge ke o Elia avilo, ai ke von kerde anda leste sar von kamle, sar sas ramome pe leste. Kana aresle paša le vortača, von dikhle krugom lendar jekh baro narodo, ai le zakonaria den duma lensa. Sa o narodo, kana dikhle les, čudinisaile but ai našle karing leste te den les pozdraimos. Vo pušel len: Pe soste den duma tume lensa? Ai jekh manuš anda o narodo del les palpale: Birevo, me andem paša tute muře šiaves, kai si ande leste jekh duxo muto. Ande varesavo than kai lel les, vo šiudel les tele pe e phuv; e glata si le spuma ande o mui, grintsil le dand, ai avel sastruno. Me řudjisailem ka tjire vortača te gonin o duxo, ai von naštisarde. Vitsa kai či patial, phenel lenge o Jesus. Ži kana avava me tumensa? Ži kana ninkerava me tumen? Anen les mange. Andine le leske. Ai strazo ke o duxo dikhlias le Jesus, o duxo miškil les zurales, vo pelo pe e phuv, ai amboldas pe spumasa ande o mui. O Jesus pušel katar o dad: De sode vramia si leske kadia? De tsinořara, del vo palpale. Ai butivar o duxo šiudias les ande e jag ai ande o pai te mudarel les. Numa, te šai daštis tu te keres vareso, aidi t'ažutisares ame, t'avel tuke mila amendar. O Jesus phenel leske: Te šai daštis! Sa šai daštil kudo kai patial. Strazo o dad la glatako tsipil: Me patiav! aidi t'ažutisares ma te patiav mai but! O Jesus, dikhlias ke kjidel o narodo, daravel le duxo nasul, ai phenel leske: Duxo muto ai kašuko, me dav tu ordina, ankli avri anda kadia glata, ai na mai de andre. Ai vo anklisto avri, tsipilas, ai miškilas pe pria but. E glata aresli sar mulo, kadia ke but phenenas ke mulo. Numa o Jesus lias les vastestar, uštiadias les. Ai vo bešel pe punřende. Kana o Jesus gelo ande o kher, leske vortača pušen les korkořo. Sostar naštisardiam ame te gonisaras kudo duxo? Vo phenel lenge: Kasavo šai anklel avri ferdi katar o řudjimos. Von geletar kothar, ai nakhle pa e Galilea. O Jesus či kamelas te žianel o narodo kai sas. Ke vo sikiarelas peske vortakon ai vo phenel lenge: O Šiav le manušesko avela dino ande le vast le manušenge; von mudarena les, ai, trin dies pala ke avela mulo, vo živindila. Numa le vortača či hatiarenas kudia vorba, ai daranas te pušen les. Von aresle ande o Kapernaum. Kana von dine andre ande o kher, o Jesus pušel le: Pa soste denas tume duma pe e vurma? Numa von bešen mutsi, ke pe e vurma von denas duma te žianen kon si o mai baro. Atunči vo bešlo tele, akhardias le deš-u-don, ai phenel lenge: Te kamela varekon t'avel o mai angluno, vo avela o mai paluno savořengo ai e sluga savořengi. Ai lias jekh tsinoři glata, thodias les maškar lende, ai lias les ande peski angali, vo phenel lenge: Varekon kai lela ande muřo anav jekhes anda kadala tsinoře glati man lel vo; ai kon-godi lel ma lel na man, numa kudales kai tradias ma. O Jono phenel leske: Birevo, ame dikhliam jekhe manušes kai gonil le demonon ande tjiro anav; ai ame či mukliam les, ke vo či avel amensa. Muken les te kerel, del palpale o Jesus, ke nai khonik kai, kerela jekh čudenia ande muřo anav, šai te del vo strazo nasul duma pa mande. Kon nai pe amende si amensa. Ai ke varekon dela tumen te pen jekh taxtai pai ande muřo anav, ke tume san le Kristoske, me phenav tumenge čačimasa, vo či xasarela khanči. Numa, te si varekon ke rimol jekhes anda kadala tsinoře kai patian pe mande, mai mišto avela leske te thon leske jekh bař ašavesko pe e koř, ai te šiuden les ande e maria. T'avela ke tjiro vast si tuke ke šai peres pala leste, šin les; mai mišto tuke t'aves jekhe vastesa ande o traio, sar t'aven tu le dui vast ai te žias ande e pařa, [ande e jag kai či merela šoha, kai o kjermo či merel, ai kai e jag či merel]. T'avela tjiro punřo ke si tuke te peres, šin les; mai mišto avela tuke t'aves bango ande o traio, ke te si tu le dui punře ai t'aves šiudino ande e pařa, [ kai o kjermo či merel, ai kai e jag či merel.] Ai t'avela tjiri jakh ke si tuke te peres, ankalav la, mai mišto tuke te des andre ande e amperetsia le Devleski jekha jakhasa, ke t'aven tu dui jakha ai t'aves šiudino ande e pařa, kai o kjermo či merel, ai kai e jag či merel. Ke sako manuš avela londiardo ande e jag. O lon, si jekh diela laši; numa t'avela o lon ke nai les gusto, sar avena tume te londiaren les pale? T'avel tumen lon ande tumende, ai t'aven patiasa jekh avresa. O Jesus gelotar kothar, gelo pe e phuv ande e Judea ai inčial o Jordan. O narodo mai kjidinisaile paša leste, sar sas lesko zakono, vo mai thodias pe te sikiarel. Uni Farizianuri avile ži leste; ai te zumaven les, von pušen les t'avela slobodo jekhe manušeske te del palpale peska řomnia. Vo del len palpale: So phendias tumenge o Moše? O Moše, phenen von, vo muklias te ramos jekh lil ke mukes la ai te trades la. O Jesus phenel lenge: Si pala o zuralimos tumare ilesko ke o Moše dias tumen kudo zakono. Numa kana sas kerdi e lumia, o Del kerdias le manušes ai la žiuvlia. Sa anda kudia o manuš mukela peske dades ai peska da, ai astardiola ka peski řomni, ai le dui aresena jekh mas. Kadia von manai dui, numa von si jekh mas. Ke te le manuš te na hulaven so o Del thodias ande jekh than. Kana von dine andre ande o kher, le vortača pušle les pa kudia. Vo phenel lenge: Kudo kai tradel peska řomnia ai lel kavria, kerel jekh kurvetsia karing late; ai t'avela jekh žiuvli ke mukel peske řomes ai lel kavres, voi kerel jekh kurvetsia. Andine leste tsinoře glati, eta t'asbal le. Numa le vortača xoliavon pe kudala kai anen le. O Jesus, dikhlias kudia, nas leske mišto, ai phenel lenge: Muken t'aven mande le tsinoře glati, ai na thon tume angla lende; ke e amperetsia le Devleski si kudalenge kai si sar lende. Me phenav tumenge čačimasa, kon-godi avela ke či lel e amperetsia le Devleski sar jekh tsinoři glata či dela andre. Porme vo lias le ande peski angali, thodias pe lende le vast. Sar o Jesus žialas pe e vurma, jekh manuš našlo, ai šiudias-pe pe le čanga angla leste: Lašio birevo, mangel lestar vo, so trubul te kerav t'avel ma o traio pe sakda? O Jesus phenel leske: Sostar akhares ma tu lašio? Si lašio o Del ferdi. Tu žianes le poronki: Tu či mudaresa; tu či keresa kurvetsia; tu či čoresa; tu či phenesa xoxaimos; tu či keresa nasulimos khanikaske; de pativ tjire dades ai tjira da. Vo del les palpale: Birevo, me lem sama kudala dieli de terne murš. O Jesus, dikhlias pe leste, kamlias les, ai phenel leske: Mai trubul tu jekh diela; žia, bikjin sa so si tu, de les ka le čoře, ai avela tu jekh mandjin ande o čeri. Porme aidi, ai av mansa. Numa, nekežime pala kudia vorba, kudo manuš gelotar sa nekežime; ke sas les but mištimata. O Jesus, dikhlias krugom pestar, phenel peske vortakonge: Trudno avela kudalenge kai si len barvalimos te den andre ande e amperetsia le Devleski. Le vortača sas lenge šodo sar o Jesus del duma kadia. Ai mai vo phenel lenge: muře glati, če trudno si kudalenge kai ninkeren pe pengo barvalimos te den andre ande e amperetsia le Devleski! Mai sigo šai jekh gumula te nakhel pa e groapa jekha suviaki sar ke jekh barvalo te del andre ande e amperetsia le Devleski. Le vortača sas lenge mai šodo, ai von phenen jekh avreske: Kon šai avela skipime? O Jesus dikhel pe lende, ai phenel: Trudno avela le manušeske, numa na le Devleske: Ke sa šai kerel o Del. O Petri lias pe te phenel leske: Eta, ame sa mukliam, ai ame aviliam pala tute. O Jesus del palpale: Me phenav tumenge čačimasa, nai khonik kai, pala mande ai pala e laši viasta, muklias pesko kher, vai peske phralen, vai peske pheian, vai peska da, vai peske dades, vai peske glaten, vai peske phuvia, či lela šelvar mai but, akana ande kadala berš, khera, phral, pheia, deia, glati, ai phuvia — ai marimata; ai, ande le berš kai avena, o traio pe sakda. But anda le mai anglune avena le mai palune, ai but anda le mai palune avena le mai anglune. Von sas pe e vurma te žian ande o Jerusalem, ai o Jesus žialas angla lende. Le vortača sas pherde dara, ai žianas pala leste darasa. Ai o Jesus mai lias pesa le deš-u-don rigate, ai lias pe te phenel lenge so t'aresel leske. Eta, ame anklias ande o Jerusalem, ai o Šiav le manušesko avela dino ande o vast le bare rašango ai ka le zakonaria. Von dena les strafo te merel, ai von dena les ande le vast kudalenge kai či patian, Kai marena mui lestar, čungardena pe leste, marena les raiasa, ai mudarena les; ai, trin dies pala kudia, vo mai živindila. Le šiave katar o Zebedeo, o Jakob ai o Jono, pašile paša o Jesus, ai phenen leske: Birevo, ame kamas te keres amenge so ame mangas tutar. Vo phenel lenge: So mangen tume te kerav tumenge? De ame, phenen leske von, te bešas jekh pe tjiri čači ai o kaver pe tjiri stingo, kana tu avesa ande tjiro vestimos. O Jesus del len palpale: Tume či žianen so tume mangen. Šai pena tume o taxtai kai me piava, vai t'aven bolde ande o bolimos kai me trubuv t'avav boldo lesa? Ame šai, phenen von. Ai o Jesus del len palpale: Čačes si ke tume pena o taxtai kai me trubuv te piav, ai ke tume avena bolde ande o bolimos kai me trubuv t'avav boldo. Numa pe so si ke te bešen pe muři čači vai pe muři stingo, nai kudia pala mande, ai avela dino kudalenge kaske si šinado. Le deš, ašunde kudia, line pe te xoliavon pe o Jakob ai o Jono. O Jesus akharel le, ai phenel lenge: Tume žianen ke kudala kai dikhen pe ke si le birevia le themenge maren le, ai ke le bare porončin pe lende. Nai kadia maškar tumende. Numa kon kamel t'avel baro maškar tumende, t'avel tumari sluga; ai savo kamela t'avel o mai angluno maškar tumende, t'avel o řobo savořengo. Ke o Šiav le manušesko avilo, na te služin les, numa te služil ai te del pesko traio te skipil bute manušen. Von aresle ande o Jeriko. Ai, kana o Jesus anklisto avri, peske vortakonsa ai bute ženensa, o šiav katar o Time, o Bartime, kořo kai mangel, bešelas paša e vurma. Vo ašundias ke sas o Jesus ande o Nazaret, ai vo sa thodias pe te tsipil: Šiav katar o David, t'avel tuke mila mandar! But porončin les, t'ašaven les; numa vo tsipilas but mai but: Šiav katar o David, t'avel tuke mila mandar! O Jesus terdilo, ai phenel: Akharen les. Von akharde le kořes, phenena leske: Le zor, ušti, akharel tu. O kořo šiudias peski bunda, ai uštilo anda jekh data, avel karing o Jesus. O Jesus, lias e vorba, phenel leske: So manges tu te kerav tuke? Rabuni, del les palpale o kořo, t'aresav te dikhav. Ai o Jesus phenel leske: Tjiro patiamos skipisardias tu. Strazo vo dikhlias, ai gelo pala o Jesus pe e vurma. Kana aresle paša o Jerusalem, ai ka o Betfage ai e Betania, karing o plai le Maslinengo, o Jesus tradias don ande peske vortača. Phenel lenge: Žian ande o gav kai si angla tumende; sar tume dena andre, tume arakhena jekhe magaritsos phanglo, pe savo inke či jekh manuš či bešlo, puter les, ai anen les. Te si varekon te phenen tumenge: Sostar keren tume kudia? den palpale: O Baro trubul les. Ai strazo vo mukela les t'avel kathe. Le vortača geletar, arakhle le magaritsos phanglo avri paša jekh vudar, pala jekh vurma, ai von puterde les. Varekon kai sas kothe phenel lenge: So keren tume? Sostar putren tume kadale magaritsos? Von dine palpale sar o Jesus phendias lenge. Ai mukle len te žiantar. Von andine ka o Jesus le magaritsos, pe savo von šiudine penge tsalia, ai o Jesus bešel opral. But žene thode penge tsalia pe e vurma, ai le kaver patria kai šinenas ande le kimpuri. Kudala kai žianas anglal ai kudala kai žianas palal o Jesus tsipinas: Hosana! Svintsime t'avel kudo kai avel ande o anav le Baresko! Svintsime t'avel e amperetsia kai avel, e amperetsia katar o David, amaro dad! Hosana ande le than but vuče! O Jesus dias andre ande o Jerusalem, ande o templo. Kana sa dikhlias, sar sas vuže posno, gelo-tar ande e Betania le deš-u-donsa. Teharin, kana ankliste avri anda e Betania, o Jesus sas bokhalo. Dikhlias de dural jekh kopači figengi kai sas la patria, vo gelo te dikhel te arakhel vareso; ai, pašilo, vo arakhlias ferdi patria, ke nas inke e vramia t'avel figi. Lias atunči e vorba, vo phenel lake: Ke šoha khonik te na xal anda tjiri fruta! Ai leske vortača ašunde leste. Von aresle ande o Jerusalem, ai o Jesus dias andre ande o templo. Vo lias pe te gonil kudalen kai bikjinen ai kjinen ande o templo; vo dias muial le skafidia kudalenge kai pařuven love, ai le skamina kudalenge kai bikjinen le gulumbon. Ai vo či muklias khanikas te ningerel či jekh diela maškar o templo. Ai vo sikiarelas ai phenel: Nai ramome: Muřo kher avela akhardo jekh kher řudjimasko sa le themenge? Numa tume, tume kerdian anda leste jekh groapa čorengi. Le bare raša ai le zakonaria, ašunde les, rodenas sar te xasaren les, ke von daranas lestar, ke sa o narodo sas lenge šodo sar vo sikiarel. Kana e riat aresli, o Jesus anklisto avri anda o foro. Diminiats, kana nakhenas, le vortača dikhle o kopači figengi šuki ži ka e vuna. O Petri, dias pe godji so nakhlias, phenel ka o Jesus: Rabi, dikh, o kopači kai tu dian armaia šukili. O Jesus lias e vorba, ai phenel lenge: Patian tume ande o Del. Me phenav tumenge čačimasa, t'avel varekon ke phenel kakale plaieske: Le tu kothar ai šiude tu ande e maria, ai te patial ande pesko ilo, ai patiala pe ke kudia si t'avel, dikhela ke aresel. Sa anda kudia me phenav tumenge: Sogodi tume mangena řudjimasa, gindin tume ke lian les, ai tume dikhen ke aresela. Ai, kana san opre te řudjin tume, te si tume vareso pe varekaske, jertin leske, eta ke tumaro Dad kai si ande o čeri jertil tumenge vi vo tumare bezexa. Numa te na jertin tume, tumaro Dad kai si ande o čeri či vo či jertil tumenge tumare bezexa. Von mai gele ande o Jerusalem, ai žikin o Jesus phiravelas pe ande o templo, le bare raša, le zakonaria ai le purane avile leste. Ai von phenen leske: Katar savi putiaria keres tu kadala dieli, ai kon dias tu e putiaria te keres? O Jesus del le palpale: Vi me pušiava tumen, den ma anglal, ai me phenava tumenge katar savi putiaria me kerav kadala dieli. O bolimos katar o Jono avelas vo anda o čeri, vai katar le manuš? Den ma anglal. Numa von denas pe duma maškar pende: Te dasa les ame palpale: Anda o čeri, vo phenela: Sostar či patian tume ande leste? Ai ame te dasa palpale: Katar le manuš... Von daranas katar o narodo, ke sa ninkerenas le Jono sar jekh profeto. Atunči von dine palpale ka o Jesus: Ame či žianas. Ai o Jesus phenel lenge: Či me, me či phenava tumenge katar savo barimos me kerav kadala dieli. O Jesus lias pe atunči te del lenge duma paramičensa. Jekh manuš thodias jekh rez. Thodias krugom jekh bar, hunadias jekh groapa kai kjidel le struguri, ai vazdias jekh turo; porme muklias e rez užile ka kudala kai bariaren, ai vo muklias o them. Ande e vramia kai trubul te kjiden, vo tradias jekha sluga karing kudala kai kjiden, te lel lendar jekh partia katar so dias o rez. Line les, von marde les, ai trade les nango. Vo mai tradias karing lende jekha kaver sluga; von malade les pe o šero, ai dine les pe o lažiav. Vo tradias jekha trito, kai von mudarde les; porme but kaver, kai von marenas uni vai mudarenas le kaver. Mai sas les jekh šiav kai sas leske drago; tradias les karing lende o mai paluno, phenelas: Avela lenge lažiav katar muřo šiav. Numa kudala kai kjiden phenen maškar pende: Eta lesko šiav; aven, mudaras les, ai avela sa amenge. Ai von line les, mudarde les, ai šiude les avri anda e rez. Akana, so kerela o birevo anda kudala kai kjiden? Vo avela, xasarela kudalen kai kjiden, ai vo dela e rez ka le kaver. Či gjindian tume kadia vorba kai si ramome: O bař kai šiude kudala kai vazden khera areslo o mai lašio ande o koltso: Si katar o Baro ke kudia avilo, ai si jekh čudenia ka amare jakha? Von rodine te len les, numa daranas katar o narodo. Von hatiarde ke lenge phendias o Jesus kudia paramiči. Ai von mukle les, ai geletar. Von trade paša o Jesus uni Farizianon ai vortakon le Herodoske eta te len les pe leske vorbi. Ai von avile te phenen leske: Birevo, ame žianas ke tu san čačo, ai ke tu či daras khanikastar; ke tu či les sama sar si le manuš, ai tu sikiares e vurma le Devleski sar si o čačimos. Si slobodo, vai niči, te pokjinas ka o Amperato? Trubul ame te pokjinas, vai te na pokjinas? O Jesus, žianelas lenge athaimata, del len palpale: Sostar zumaven ma tume? Anen mange jekh dinaro, eta te dikhav les. Von andine jekh; ai o Jesus pušel le: Kasko si kako vobrazo ai kako ramomos? Katar o Amperato, den von palpale. Atunči vo phenel lenge: Den palpale ka o Amperato so si ka o Amperato, ai ka o Del so si le Devlesko. Ai von si karing leste ande e čudenia. Le Sadusenuri, kai phenenas ke nai te živindin le mule, avile paša o Jesus, ai pušle les kadia: Birevo, eta so o Moše phendias amenge: Te o phral varekasko merel, ai muklias jekha řomnia, bi t'avel les glati, lesko phral lela leska phivlia, ai dela glati peske phraleske. Eta, sas efta phral. O mai angluno ansurisailo, ai mulo bi te mukel glati. O duito lias la phivlia t'avel leski řomni, ai mulo vi vo bi te mukel glati. Sa jekh fialo kerdias o trito, ai či jekh anda le efta či muklias glati. Pala lende, e žiuvli vi voi muli. Kana živindina le mule, saveski anda le efta avela voi e řomni? Ke sa le efta line la sar řomni. O Jesus del len palpale: Či šibin-tume tume, ke tume či hatiaren či le ramomata, či e zor le Devleski? Ke, kana živindina le mule, le manuš či lena řomnian, či le žiuvlia řomen, numa avena sar le andželi ande o čeri. So avela o živindimos le mulenge, či gjindian tume, ande e kliška katar o Moše, pa e buř: Me sim o Del katar o Abraham, o Del katar o Isak, ai o Del katar o Jakob? O Del nai o Del le mulengo, numa le živindengo. Tume but šibin tume. Jekh zakonari, kai ašunelas ke den duma, prinžiardias ke o Jesus dias mišto palpale ka le Sadusenuri, pašilo, ai pušel les: Savo si e mai angluni anda le poronki? O Jesus del palpale: Eta e mai angluno: Ašun, Israel, o Baro, amaro Del, si ferdi jekh Baro. Ai, te avela tuke drago o Baro, tjiro Del, anda sa tjiro ilo, anda sa tjiro duxo, anda sa tjiro gindo, ai anda sa tjiri zor. Eta e duito: Te avel tuke drago tjiro vortako sar san drago tuke. Manai aver poronka mai bari sar kadala. O zakonari phenel leske: Mišto, birevo; tu phendian čačimasa ke o Del si jekh, ai ke nai aver ferdi vo. Ai ke te kames les anda sa tjiro ilo, anda sa tjiro gindo, ai anda sa tjiri zor, ai t'avel tuke drago tjiro vortako sar san drago tuke, si mai but sar sa le phabarimata ai sa so des. O Jesus, dikhlias ke dias palpale godiasa, phenel leske: Tu či san dur katar e amperetsia le Devleski. Ai khonik či mai kamelas te pušel les. O Jesus, mai sikiarel ande o templo, phenel: Sar le zakonaria phenen von ke o Kristo si o šiav katar o David? O David vi vo, miškisardo katar o Svinto Duxo, phendias: O Baro phendias ka muřo Baro: Beš pe muři čači žikin či kerava anda tjire dušmaia te phires pe lende. O David vi vo akhardias les Baro; sar šai avel vo lesko šiav? Ai jekh baro narodo ašunelas leste dragosa. Vo phendias lenge ande pesko sikiarimos: Len tume sama katar le zakonaria, kai drago lenge te phiraven pe ande le lungi řobi ai den len pozdraimos ande le thana kai si o narodo. Kai rodel le mai anglune skamina ande le khangeria židovitsko; kai xan le mištimata le phivliange, ai kai naročno řudjin. Von avena dine pe e kris mai zurales. O Jesus bešlo angla e kutia le lovengi, dikhelas sar o narodo tholas love. Uni barvale thonas but. Mai avili jekh čoři phivli, ai thodias andre dui tsinoře xarkune kotora, si jekh šuv. Atunči o Jesus, akhardias peske vortakon, phenel lenge: Me phenav tumenge čačimasa, kadia čoři phivli voi thodias mai but de sar le kaver kai thodine ande e kutia. Ke sa thodine kai či mai trubulas len, numa voi thodias so trubulas la, sogodi sas la, sogodi sas la te trail. Kana o Jesus anklisto avri anda o templo, jekh anda leske vortača phenel leske: Birevo, dikh, če bařa, ai sar si vazdine! O Jesus del les palpale: Dikhes tu kado baro vazdimos? Či ašela bař pe bařeste te na avel dino muial. Vo bešlo pe o plai le Maslinengo, angla o templo. Ai o Petri, o Jakob, o Jono ai o Andreas pušen lestar čorořal kadia. Phen amenge, kana avela kudia, ai katar savo semno žianasa sa kudala dieli ke avena? O Jesus lias pe atunči te phenel lenge: Len tume sama ke khonik te na diliarel tumen. Ke but avena ande muřo anav, phenena: Me sim. Ai von diliarena buten. Kana tume ašunena pa le marimata ai e viasta le marimaski, te na daran tume, ke trubul kudala dieli t'aven. Numa inke či getola pe e lumia. Jekh them vazdela-pe pe jekh kaver them, ai jekh amperetsia pe jekh kaver amperetsia; avela te isdral e phuv ande uni thana, avela e bokh. Kothar lena pe le dukha. Len tume sama tume. Ningerena tumen ande e kris, ai tume avena marde le rovliansa ande le khangeria židovitsko; tumen ningerena tume angla le vladori ai angla le amperatsi, pala mande, te sikaven tume. Trubul o mai angluno ke e laši viasta t'avel phendi ka sa le thema. Kana ningerena tumen te den tume ande le vast tumare dušmanongo, na daran so avela tume te phenen angla savořende, numa phenen so avela tumenge te phenen ka kudo časo; ke či avela tume ke dena duma, numa o Svinto Duxo. O phral dela peske phrales ka o merimos, ai o dad peske šiaves; le glati uštena pe penge niamuri ai keren te meren. Tume avena vuřitsime katar sa, pala muřo anav, numa kudo kai ninkerela ži ande o gor avela skipime. Kana tume dikhena e bari griatsa ke si kothe kai či trubul t'avel — ke kudo kai gjinel te lel sama — atunči, ke kudala kai si ande e Judea te našen ande le plaia; ke kudo kai si pe o čardako te na vulel ai te na del andre te lel vareso anda pesko kher; ai kudo kai si ande le kimpuri te na žial palpale te lel peski bunda. Nasul le žiuvliange kai si phare ai kudalenge kai den čuči kudo dies. Řudjin ke kudala dieli te na aresen ivende. Ke o pharimos, ande kudala dies, avela kadia kai inke nas dekin si e lumia kai o Del kerdias ži akana, ai ke či mai avela šoha. Ai, te na avela ke o Baro teliarela kudala dies, khonik či naštino te trail; numa vo teliardias le, pala le manuš alome kai vo alosardias. T'avela varekon kai phenel tumenge atunči: «O Kristo si katka» vai «Vo kathe-lo», te na patian. Ke uštena falši Kristuri ai falši profeturi; von kerena šodo ai čudeni te diliaren le alomen, te šai daština. Len tume sama: Me sa phendem tumenge angla savořende. Numa ande kudala dies, pala o nasulimos, o kham kaliola, o šiunuto či mai dela peski vedaria, le čeřaia perena anda o čeri, ai le zurale kai si ande o čeri miškina pe. Atunči dikhena le Šiaves le manušesko sar avel pe le nuveria jekha baria zorasa ai le vestimasa. Atunči vo tradela le andželon, ai vo kjidela le alomen pa le štar balvalia, de anda o gor la phuviako ži ka o gor le čeresko. Sikion ai len sama katar o kopači figengo. Sar leske kaštoře aresen kovle, ai ke le patria barion, tume žianen ke o milai pašiol. Sa jekh fialo, kana dikhena tume ke kudala dieli aresen, te žianen ke o Šiav le manušesko si paše, ka o vudar. Me phenav tumenge čačimasa, kadia vitsa či nakhela, ke sa kadia aresela. O čeri ai e phuv nakhena, numa muře vorbi či nakhena. Kana avela o dies vai o časo, khonik či žianel, či le andželi ande o čeri, či o Šiav, numa o Dad ferdi. Len tume sama, arakhen tume ai řudjin, ke tume či žianen kana kudia vramia avela. Avela sa jekh fialo kai jekh manuš kai, žiantar pe o drom, mukel pesko kher, thol bare pe leste peske slugen, del sakones so te kerel, ai del ordina ka o vudarari te lel sama. Len sama, ke tume či žianen kana avela o birevo le kheresko, vai e riat, vai maškar e riat, vai kana gjilabel o kokošo, vai diminiats. Daran ke vo arakhel tume ke soven, kana vo avela strazo. So me phenav tumenge, me phenav les savořenge: Arakhen tume. O prasniko la Patradiako ai le manřengo bi-drosdake trubul t'avel pa dui dies. Le bare raša ai le zakonaria rodenas sar te daštin t'astaren le Jesus xitreniasa, ai te mudaren les. Ke von phenenas: Te na avel žikin si o prasniko, eta te na avel buntuimos maškar o narodo. Sar o Jesus sas ande e Betania, ande o kher katar o Simon, o nasvalo žiungalo, jekh žiuvli dias andre, žikin vo sas ka e skafidi. La sas la jekh kanta anda o albatro, kai sas andre jekh duxi anda o vužio nardo, jekh duxi pria kuč; ai, puterdias e kanta, voi dias muial e duxi pe lesko šero. Uni anda kudala kai sas kothe nas lenge mišto ai phenen jekh avreske: So si lašio te xasaren kadia duxi? Šai te bikjindiamas la pe mai but de trin šela dinari, ai te diam le ka le čoře. Ai von xoliaile pe kudia žiuvli. Numa o Jesus phenel: Muken la. Sostar nekežin la tume? Voi kerdias jekh laši diela karing mande. Ke tumen si tume sakda čoře tumensa, ai tume šai keren lenge mištimos kana tume kamen, numa me či avava tumensa sakda. Voi kerdias so šai daštisardias; voi angla savořende thodias duxi pe muřo stato te getol ma le groapoševoske. Me phenav tumenge čačimasa, kai-godi e laši viasta avela phendi, ande sa e lumia, phenena ka le manuš kai dena pe godji kadia žiuvlia ai so voi kerdias. O Juda Iskariot, jekh anda le deš-u-dui, gelo karing le bare raša, eta te del len ande o vast le Jesus. Pala ke ašunde leste, lias len e veselia, ai phende ke den les love. Ai o Juda rodelas sar mai mišto te del les lenge. O mai angluno dies kana xan le manře bi-drosdake ai kana šinen le bakrořen te xan le pe e Patradi, le vortača le Jesusoske phenen leske: Kai kames tu te žias te lašiaras tuke o xamos la Patradiako? Ai vo tradias don anda peske vortača, ai phenel lenge: Žian ande o foro; tume arakhena jekhe manušes kai ningerel jekh khoro paiesko, žian pala leste. Kai-godi vo žiala andre, phenen ka o birevo le kheresko: O Baro phenel: Kai lo o than kai me xava e Patradi muře vortakonsa? Ai vo sikavela tumenge jekh bari soba opre, si sa gata. Kothe si te lašiaren e Patradi. Le vortača geletar, aresle ande o foro, arakhle le dieli sar vo phendiasas lenge; ai von lašiaren e Patradi. E riat aresli, vo avel le deš-u-donsa. Žikin von si pala e skafidi ai kai von xan, o Jesus phenel: Me phenav tumenge čačimasa, jekh anda tumende, kai xal mansa, dela ma ande o vast. Von len pe te nekežin, ai phenen leske, jekh pala kavreste: Me sim? Vo del len palpale: Jekh si anda le deš-u-dui, kai thol mansa o vast ande o tiari. O Šiav le manušesko žial-tar sar si ramome pa leste. Numa nasul t'avel le manušeske kastar o Šiav le manušesko si bikjindo! Mai mišto avilinosas kudale manušeske te na arakhadinosas. Žikin von xan, o Jesus lias o manřo; ai pala ke řudjisardias, vo phaglias les, dias les lenge, phenelas: Xan, kado si muřo stato. Vo lias atunči jekh taxtai; ai, pala ke řudjisardias, vo del len, ai von pile sa. Ai vo phenel lenge: Kado si muřo rat, o rat la patiako, kai avela šiordo bute ženenge. Me phenav tumenge čačimasa, me či mai piava šoha anda e fruta la rezaki, ži ka o dies kai me mai piava ande e amperetsia le Devleski. Pala ke gjilabade, von gele ka o plai le Maslinengo. O Jesus phenel lenge: Tume si sa te muken ma; ke si ramome: Me malavava le pastuřes, ai le bakroře žiantar pe sako rig. Numa, pala ke živindiva, me žiava angla tumende ande e Galilea. O Petri phenel leske: Makar sa le kaver mukena tu, me či mukava tu šoha. Ai o Jesus phenel leske: Me phenav tuke čačimasa, tu, adies, inke ande kadia riat, angla savořende ke o kokošo gjilabel duvar, tu či prinžiaresa ma trivar. Numa o Petri lias mai zurales: Kana trubula me te merav tusa, me prinžiarava tut. Ai sa phenen sa jekh fialo. Von gele atunči ande jekh than kai akharen les Getsemane, ai o Jesus phenel peske vortakonge: Bešen tele kathe, žikin me řudjiva. Vo lias pesa le Petri, le Jakob ai le Jono, ai les lias les e dar ai o nekazo. Vo phenel lenge: Muřo duxo si nekežime ži ka o merimos; bešen kathe, ai len sama. Porme, gelo uni pašuri angle, vo šiudias pe tele pe e phuv, ai řudjil ke, te šai daštila, kudo časo te duriol lestar. Vo phenelas: Aba, Tate, sako fialo diela tu šai keres, duriar mandar kado taxtai! Numa te avel, na so me kamav, numa so tu kames. Ai vo avel karing le vortača, kai arakhel le sar soven, ai vo phenel le Petroske: Simon, tu soves! Tu naštisardian te les sama jekh časo! Len sama ai řudjin, eta te na peren te zumaven tumen; o duxo zurales kamel, numa o mas si kovlo. Vo mai duriol, ai sa kadia řudjil pe. Vo avel palpale, ai mai arakhlias le sar soven; ke lenge jakha sas phare. Von či žianenas so te den les palpale. Vo avilo pe e trito data, ai phenel lenge: Soven akana, ai hodinin? Si dosta. O časo avilo; eta, o Šiav le manušesko si dino ande le vast le bezexalenge. Ušten, žias; eta, kudo kai bikjindias ma pašiol. Ai strazo, sar vo mai delas duma, areslo o Juda, jekh anda le deš-u-dui, ai lesa jekh narodo xanřensa ai rovliansa tradino katar le bare raša, katar le zakonaria ai katar le purane. Kudo kai bikjindias les phendiasas lenge ke del len kasavo semno: Saves me čimidava, vo si; len les, ai ningeren les sar trubul. Sar vo areslo, vo pašiol paša o Jesus, phenelas: Rabi! Ai vo čimidias les. Atunči kudala žene thode o vast pe o Jesus, ai line les. Jekh anda kudala kai sas kothe, tsirdias e xanřo, maladias la sluga katar o baro rašai, ai šindias lesko kan. O Jesus lias e vorba, phenel lenge: Tume avilian, sar pala jekh řobaš, le xanřensa ai le rovliansa, te len ma. Me simas sako dies maškar tumende, sikiaravas ande o templo, ai tume či lian ma. Numa si eta ke le Ramomata t'aresen. Atunči sa mukle les, ai našle. Jekh terno manuš gelo pala leste, sas les pe o stato jekh paplano. Line les; numa vo muklias pesko tsolo, ai našlo sa nango. Von ningerde le Jesus ka o mai baro rašai kai kjidinisaile sa le bare rašan, le purane ai le zakonaria. O Petri gelo pala leste de dural ži andre ande o kimpo le mai bare rašasko; vo bešel le slugensa, ai vo tatiol paša e jag. Le bare raša ai sa e kris e židovitsko rodenas marturon pe o Jesus, te mudaren les, ai von či arakhle. Ke but phenenas xoxaimos pe leste numa lenge vorbi nas sar jekh fialo. Uni uštile, ai thode falšo doš pe leste, phenenas: Ame ašundiam ke vo phendias: Me phařavava kado templo kerdo anda o vast le manušesko, ai ande le trin dies me vazdava jekh kaver kai či avela kerdo anda o vast le manušesko. Inke pe kudo punto so von phenen nas vorta sar trubul. Atunči o mai baro rašai, uštilo maškar lende, pušel le Jesus, ai phenel: Či des tu khanči palpale so kadala žene phenen pe tute? O Jesus bešlo muto, ai či del khanči palpale. O baro rašai mai pušel lestar, ai phenel leske: San tu o Kristo, o Šiav le Devlesko svintsime? O Jesus palpale: Me sim. Ai tume dikhena le Šiaves le manušesko bešel pe e čači katar o Del o Mai Zuralo ai avela pe le nuveria le čereske. Atunči o baro rašai šindias peske tsalia, ai phenel: So mai trubul ame martururi? Tume ašundian o prasaimos. So miazol tumenge? Sa dine les strafo ke trubul t'avel mudardo. Ai uni line pe te čungarden pe leste, te garaven lesko mui ai te malaven les dukhumensa, phenen leske: De pe o gor kon mardias tu! Ai le služi line les te den les palmi. Žikin o Petri sas tele ande o kimpo, avel jekh sluganka katar o baro rašai. Dikhlias le Petri ke tatiol, voi dikhel pe leste, ai phenel leske: Vi tu, tu sanas le Jesusosa anda o Nazaret. Vo xoxavel, phenelas: Me či žianav, me či hatiarav so tu phenes. Porme vo anklisto avri te žialtar. Ai o kokošo gjilabadias. E sluganka, dikhlias les, voi lias pe te mai phenel kudalenge kai sas kothe: Kudo si anda kudala žene. Ai vo mai del palpale: Či sim. Tsiřa pala kudia, kudala kai sas kothe mai phenen ka o Petri: Čačimasa tu san anda kudala žene, ke tu san anda e Galilea. Atunči vo lias pe te prasal ai te del armaia: Me či prinžiarav kudale manušes kai tume den duma pa leste. Strazo, pe e duito data, o kokošo gjilabel. Ai o Petri dias pe godji ka le vorbi kai o Jesus phendiasas leske: Angla savořende ke o kokošo gjilabel duvar, tu či prinžiaresa ma trivar. Ai kai delas pe godji, vo rovel. De diminiats, le bare raša den pe duma le puranensa ai le zakonariensa, ai sa la krisasa e židovitsko. Pala ke phangle le Jesus, von andine les, ai dine les ka o Pilato. O Pilato pušel les: San tu o amperato le Židovongo? O Jesus del les palpale: Tu phenes. Le bare raša thodine pe leste but doš. O Pilato mai pušel les: Či des tu khanči anglal? Dikh ande sode dieli von phenen pe tute. Ai o Jesus či mai del khanči palpale, so si šodo le Pilatoske. Ka sako prasniko, vo mukelas jekhe řobos, kudales kai mangel o narodo. Sas ande e temnitsa jekh kai bušol Barabas peske čorensa pala jekh mudarimos kai von kerde ande jekh buntuimos. O narodo, anklen karing o Pilato, thode pe te mangen so sas les o zakono te del le. O Pilato del len palpale: Kamen tume te mukav tumenge le amperatos le Židovongo? Ke vo žianelas ke naročno le bare raša dinesas les. Numa le birevia katar le raša vazden o narodo, eta ke o Pilato te mukel lenge mai mišto le Barabas. O Pilato, mai lias e vorba, phenel lenge: So kamen tume te kerav anda kudo kai tume akharen o amperato le Židovongo? Von mai tsipin: Amblav les pe o trušul! O Pilato phenel lenge: Če nasul kerdias vo? Ai von tsipin mai zurales: Amblav les! O Pilato, kamlias te kerel so mangelas o narodo, muklias lenge le Barabas; ai, pala ke thodias te maren le Jesus la řaiasa, vo dias les lenge t'amblaven les pe o trušul. Le ketani ningerde le Jesus andre ande le vladorosko kher, si kudia, kai kjiden pe, ai von kjidine sa le ketanen. Von thode pe leste jekh bunda loli, ai thode pe lesko šero jekh kurona kanřengi, kai von khuvde. Porme thode pe te den les pozdraimos: Unpači, amperato le Židovongo! Ai von malaven lesko šero jekha řaiořasa, čungarden pe leste, ai šiudine-pe pe čangende, von bangile angla leste. Pala kudia te asaie lestar, von line pa leste e bunda loli, ai ningerde les te karfon les pe o trušul. Von thodine zor te ningerel o trušul jekhe manušes kai nakhelas kai avelas pa le kimpuri, o Simon anda e Sirena, dad katar o Aleksander ai o Rufus. Ai von ningerde le Jesus ande o than kai bušol Golgota, so si kudo, šero manušesko. Von dine les te pel mol hamime mirosa, numa vo či pilias. Von karfode les pe o trušul, ai hulade leske tsalia, khelde pe te žianen so sako šai lel. Sas o iniato časo, kana von amblade les. O ramomos phenelas pa soste vo si dino strafo, sas kakala vorbi: O amperato le Židovongo. Von amblade lesa dui řobon, jekh pe leski čači, ai o kaver pe leski stingo. Kadia areslo so phendias o Ramomos: Vo sas thodino maškar le čor. Kai nakhen prasan les, ai miškin o šero, phenenas: Ei! tu kai phařaves o templo, ai kai uštiaves les ande le trin dies, skipisavo tu korkořo, vuli pa o trušul! Le bare raša vi von, le zakonariensa, asanas maškar pende, ai phenenas: Vo skipisardias le kavren ai naštil te skipil pe vo korkořo! Ke o Kristo, o amperato anda o Israel, te vulel akana pa o trušul, eta ke ame te dikhas ai ame te patias! Kudala kai sas amblade lesa vi von prasanas les. O miažitso avilo, sas tuniariko pe sa e phuv, ži ka o trito časo. Ai ka o trito časo, o Jesus tsipisardias jekh glasosa zurale: Eloi, Eloi, lama sabaxthani? kudia bušol: Muřo Dad, Muřo Dad, sostar muklian ma tu? Uni anda kudala kai sas kothe, ašunde leste, phenenas: Eta, vo akharel le Elia. Ai jekh anda lende našlo te pherel jekh dirza šut, ai, astardias la pe jekh kaštořo, dias les te pel, phenelas: Muken, dikhasa ke te si o Elia te vuliarel les. Numa o Jesus, phurdias jekh baro tsipimos, getosailo. E zanaveska katar o templo šindili ande donde, de opral ži tele. O fitsiri kai sas angla o Jesus, dikhlias sar vo getosailo, phenel: Čačimasa, kado manuš sas o Šiav le Devlesko. Mai sas žiuvlia kai dikhenas de dural. Maškar lende sas e Maria anda e Magdala, e Maria, dei katar o Jakob o terniar ai katar o Jose, ai e Salome, kai žianas pala leste ai služinas les kana sas ande e Galilea, ai but kaver kai ankliste lesa ande o Jerusalem. E riat aresli — o dies kai lašiarenas o sabato. Areslo o Josef anda o Arimate, manuš kai denas les pativ ande e kris e bari, kai vi vo ažiukerelas e amperetsia le Devleski. Vo tromailo te žial karing o Pilato, te mangel o stato le Jesusosko. O Pilato sas leske šodo ke mulo kadia sigo, akharel kadales kai si baro pe le jekh šel ketani, ai pušel lestar te mulo de dumult. Kana ašundias lestar ke si kadia, vo dias o stato ka o Josef. Ai o Josef, kjindias jekh paplano, vuliardias le Jesus pa o trušul, phanglias les ande o paplano, ai thodias les ande jekh groapoševo šindo ande jekh stanka bařeski. Porme spidias jekh bař angla o groapoševo. E Maria anda e Magdala, ai e Maria, dei le Joseski, dikhle kai thodine les. Kana o sabato nakhlo, e Maria anda e Magdala, e Maria, dei katar o Jakob, ai e Salome, kjindine duxia, eta te xalaven le Jesus. O mai angluno dies le kurkesko, von gele ka o groapoševo, de diminiats sar o kham uštel. Von phenen maškar pende; Kon spidela amenge o bař dur angla o groapoševo? Ai, vazde le jakha, von dikhle ke o bař, kai sas baro, sas spidino. Von dine andre ande o groapoševo, dikhle jekhe terne manušes bešel pe e čači, pe leste jekh řotia parni, ai len lias le e dar. Vo phenel lenge: Te na lel tume e dar, tume roden le Jesus anda o Nazaret, kai sas amblado; vo živindisailo, vo nai kathe; eta o than kai thodinesas les. Numa žian te phenen ka leske vortača ai ka o Petri ke vo gelo anglal ande e Galilea; kothe tume dikhena les, sar vo phendiasas tumenge. Von ankliste avri anda o groapoševo ai našle. E dar ai o isdraimos line len sa; ai von či phende khanči khanikaske, ande pengi dar. O Jesus, živindisailo e diminiats katar o mai angluno dies le kurkosko, sikadilo angla savořende ka e Maria anda e Magdala, kastar vo gonisardiasas efta demonon. Voi geli te ningerel e viasta ka kudala kai sas lesa, ai kai nekežinas ai rovenas. Kana von ašunde ke vo trail, ai ke voi dikhlias les, von či patianas. Pala kudia, vo sikadilo, jekh kaver fialo, maškar dui anda lende kai sas pe e vurma te žian pe o kimpo. Von avile te phenen les le kavrenge, kai či patiaie či len. Porme, sikadilo le deš-u-jekhenge, žikin von sas pala e skafidi; ai vo phenel lenge ke či patian ai ke lengo ilo si zuralo, ke či patiaie kudalen kai dikhle les živindo. Porme vo phenel lenge: Žian pe sa e lumia, ai phenen e laši viasta savořenge. Kudo kai patiala pe ai avela boldo avela skipime, numa kudo kai či patiala avela strafome. Eta le čudeni kai avena kudalensa kai patian: Ande muřo anav, von gonina le demonon, von dena duma neve šiba; von lena le sapen le vastensa; te pena varesavo pimos merimasko, či avela len či jekh nasulimos; von thona le vast pe le nasvale, ai le nasvale sastiona. O Baro, pala ke dias lensa duma, sas lino ande o čeri, ai vo bešel pe e čači le Devleski. Ai von gele te phenen kai-godi: O Baro ažutilas len ande lengi butji, ai sikavelas katar le čudeni kai kerenas ke so von denas duma sas o čačimos. But line pe te ramon so sas angla savořende le dieli kai kerdile pe maškar amende. Le dieli sar ke phende amenge kudala kai dikhle len de angla savořende ai eta von aresle ministeri la vorbake, vi mange miazolias mišto, pala ke rodem vorta sa kudala dieli de anda o gor, te thav te ramov le sar avile, muřo lašio Teofilo, eta ke tu te prinžiares čačimasa le sikiarimata kai tu lian. Ande e vramia kai sas o Herodo, amperato anda o Judea, sas jekh rašai, akharen les Zakaria, anda e kumpania o Abia; leski řomni sas maškar le šeia katar o Aron, ai voi bušolas Elisabeta. Vi le dui von sas vorta angla o Del, lenas mišto opre, bi te šai phenen pe lende khanči, sa le poronki ai sa le ordini le Bareske. Len nas len glati, ke e Elisabeta naštil t'aven la; ai von sas vi vo vi voi bute beršenge. Eta, žikin vo kerdias peski služetsia angla o Del, sar si thodino pe leste, vo sas alome ke šiude pe leste, sar si o zakono le rašango, te del andre ande o templo le Baresko te phabarel e duxi. Sa o narodo sas avri řudjimasa, ka o časo la duxako. Atunči jekh andželo le Baresko sikadilo ka o Zakaria, ai bešel pe punřende pe e čači katar o altari la duxako. O Zakaria rimosailo kana dikhlias les, ai e dar lias les. Numa o andželo phenel leske: Na dara, Zakaria; ke avela pe tjiro řudjimos. Tjiri řomni e Elisabeta avela la jekh šiav, ai tu desa les o anav o Jono. Vo avela tuke jekh diela veselo ai veselimasko, ai but veselina pe sar arakhadiola. Ke vo avela baro angla o Baro. Vo či pela či mol, či řetia matimaski, ai vo avela pherdo Svinto Duxo de anda o peř peska dako; vo anela but anda le šiave katar o Israel ka o Baro, lengo Del; vo phirela angla o Del le duxosa ai la zorasa katar o Elia, t'anel le ile le dadenge karing le glati, ai kudalen kai buntuin pe ka e godji e vorta, eta te lašiarel le Bareske jekh narodo harniko angla o Del. O Zakaria phenel le andželoske: Sar prinžiarava me kudia? Ke me sim phuro, ai muři řomni bute beršengi. O andželo del les palpale: Me sim o Gabriel, me bešel pe punřende angla o Del; me sim tradino te dav tusa duma, ai te phenav tuke kadia laši viasta. Ai eta, tu avesa muto, ai tu naštisa te des duma ži ka o dies kai kudala dieli aresena, ke tu či patiaian ka muře vorbi, kai kerdiona ande pengi vramia. Numa, o narodo ažiukerel le Zakaria, sas lenge šodo ke bešel kadia but ande o templo. Kana vo anklisto avri, vo naštil te del lensa duma, ai von hatiarde ke vo dikhlias vareso ande o templo; vo kerel lenge semnuri, ai bešel muto. Kana leske dies te služil nakhle, vo gelotar peste. Tsiřa vramia pala kudia, e Elisabeta ažiukerel glata. Voi garadili pašte panž šion, phenelas: Si e dragostia kai o Baro dias ma, kana šiudias le jakha pe mande te lel mandar muřo lažiav maškar le manuš. Ka o šovto šion, o andželo Gabriel sas tradino katar o Del ande jekh foro anda e Galilea, akharen les Nazaret, paša jekh šei pativali tomnime pala jekh manuš katar e vitsa le Davidoski, akharen les Josef. O anav la terniako sas Maria. O andželo avilo late, ai phenel: Dav tu pozdraimos, tu kaske jekh dragostia si dini; o Baro si tusa. Rimosaili katar kudi vorba, e Maria pušel pe so si kudia kasavo pozdraimos. O andželo phenel lake: Na dara, Maria; ke tu arakhlian dragostia angla o Del. Ai eta, tu ažiukeresa glata, ai tu avela tut jekh šiav, ai tu desa les o anav o Jesus. Vo avela baro ai akharena les o Šiav katar o Mai Vučo, ai o Baro o Del dela les o skamin amperatisko katar o David, lesko dad. Vo amperetsila pe o kher katar o Jakob pe sakda, ai leski amperetsia či getola pe šoha. E Maria phenel le andželoske: Sar avela kadia, ke me či prinžiardem řomes? O andželo del la palpale: O Svinto Duxo avela pe tute, ai e zor katar o Mai Vučo garavela tut tela peski ušialin. Sa anda kudia e glata kai arakhadiola tutar akharena les o Šiav le Devlesko. Eta, e Elisabeta, tjiro niamo, vi voi ažiukerela jekhe šiaves pe peske phurimata, ai kudia kai akharenas la bi-glatengi si ande pesko šovto šion. Ke khanči nai so naštil te na kerel o Del. E Maria phenel: Me sim e sluganka le Bareski; t'avel mange sar si leski vorba! Ai o andželo muklias la. Sa ande kudia vramia, e Maria uštili, ai gelitar sigo karing o plai, ande jekh foro anda e Judea. Voi del andre ande o kher le Zakaresko, ai del pozdraimos la Elisabeta. Sar e Elisabeta ašundias o pozdraimos katar e Maria, laki glata isdraili ande lako peř, ai voi pherdili Svinto Duxo. Voi tsipil jekhe hangosa zurale: Tu san svintsime maškar le žiuvlia, ai e fruta katar tjiro peř si svintsime. Sar si ma ke e dei muře Bareski avel voi paša mande? Ke eta, strazo sar ke tjiro hango kai des man pozdraimos maladias muřo kan, e glata isdraili veselimastar ande muřo peř. Veselo kudia kai patiaias, ke le dieli kai sas lake phende katar o Baro si t'aresen. Ai e Maria phenel: Muřo duxo tsipil dragostar pe o Baro, ai muřo duxo veselil pe ande o Del, muřo Skipitori, ke vo šiudias le jakha pe peski tsinoři sluganka. Ke eta, d'akanara sa le vitsi phenena mange e pria veselo, ke o Mai Zuralo kerdias mange bare dieli. Lesko anav si Svinto, ai leski mila žial berš beršestar pe kudala kai daran lestar. Vo sikavel e zor peske vasteski; vo gonisardias kudalen kai sas le ande o ilo ginduri barimatange. Vo dias muial le zuralen pa lenge skamina amperatisko, ai vo vazdias le tsinořen. Vo pravardias mištimasa le bokhalen, ai vo tradias le barvalen nange. Vo ažutisardias le Israel, peski sluga, ai vo dias pe godji ka peski mila, sar vo phendiasas ka amare dada, karing o Abraham ai so avela lestar pe sakda. E Maria bešli la Elisabetasa pašte trin šion. Porme geli palpale peste. E vramia aresel kana e Elisabeta si te arakhadiol la jekh glata, ai si la jekh šiav. Lake vortača ai lake niamuri ašunde ke o Baro sas leske bari mila karing late, ai von veselisaile lasa. O oxtoto dies, avile te šinen la glata, ai von akharen les Zakaria, sar o anav leske dadesko. Numa leski dei lias e vorba, ai phenel: Niči, vo avela akhardo Jono. Von phenen lake: Nai anda tjire niamuri khonik kai akharen les kadia. Ai von keren semnuri ka lesko dad te žianen sar kamel vo t'akharen les. O Zakaria mangel tsiglitsa, ai vo ramol: Jono si lesko anav. Ai sa sas lenge šodo. Strazo, lesko mui puterdilo, leski šib puterdili, ai vo del duma, svintsil le Devles. E dar lias savořen krugom, ai, ande sa le plaia ande e Judea, den duma pa sa kudala dieli. Sa kudala kai ašunde garade les ande pesko ilo, phenenas: So avela kudia glata? Ai o vast le Baresko sas lesa. O Zakaria, lesko dad, pherdilo Svinto Duxo, ai vo phenel so avela, ande kakala vorbi: Svintsime t'avel o Baro, o Del anda o Israel, ke vo avilo ai skipisardias pesko narodo, ai thodias amenge jekh zuralo Skipitori anda o kher katar o David, leski sluga. Sar vo phendiasas pa o mui katar peske svintsi profeturi ande e vramia purani, jekh Skipitori kai skipila amen katar amare dušmaia ai anda o vast sa kudalengo kai vuřitsin ame! Kadia si ke vo sikavel peski mila karing amare dada, ai del pe godji ka peski svinto patia. Sar sas e solax kai vo solaxadia ka o Abraham, amaro dad, te mukel ame, kana ame avasa skipime anda o vast amare dušmanongo, te služisaras les bi darako, te phiras angla leste ande o svintsimos ai ande e kris sa le dies amare traiosko. Ai tu, tsinoři glata, tu avesa akhardo profeto katar o Mai Vučo; ke tu phiresa angla e fatsa le Bareski, te lašiares leske vurmi, eta te des lesko narodo te žianel o skipimos, katar o jertimos lenge bezexengo. Sar ke le Devleske si mila ande amende katar savo o kham kai uštel avilo amende opral, te strefiarel kudalen kai bešen ande o tuniariko ai ande e ušialin le merimaski, te ningerel amare punře pe e vurma la patiaki. Eta, e glata bariol, ai zuriavol ande e godji. Ai vo bešel ande e pusta, ži ka o dies kana vo sikadiol angla o Israel. Ande kudia vramia anklisto avri jekh zakono katar o Amperato Agusto, dias ordina te gjinen sa o narodo pe e phuv. Kudo mai angluno gjinimos sas kana o Kerinius sas vladoro ande e Siria. Sa žianas te ramon pe, sako ande pesko foro. O Josef vo anklelas anda e Galilea, anda o foro o Nazaret, te žian ande e Judea, ande o foro katar o David, akharen les Betlehem, ke vo sas ande o kher ai anda e familia katar o David, eta te ramol pe la Mariasa, leski tomnime, kai sas phari. Kana von sas kothe, e vramia kai e Maria trubul te avel la glata aresli, ai la si la lako mai angluno arakhado. Voi dias pe leste, ai thodias les te sovel kai xan le guruva, ke nas than lenge ande o kher kai sovelas o narodo. Mai sas, sa ande kudia rig, pastuřuri kai nakhenas e riat ande le kimpuri te arakhen riate penge žigenien. Ai eta, jekh andželo le Baresko sikadilo lenge, ai o vestimos le Baresko strefialas krugom lendar. Len lias len jekh pria bari dar. Numa o andželo phenel lenge: Na daran; ke me phenav tumenge jekh laši viasta, kai avela sa le narodoske jekh diela pria veselo. Si adies, ande o foro katar o David, ke arakhadilo tumenge jekh skipitori, kai si o Kristo, o Rai. Ai eta pe če semno tume prinžiarena les. Tume arakhena jekha glata uriadi ande o poxtan ai sovel ande jekh than kai xan le guruva. Ai sigo avilo le andželosa jekh armia čeresko, luvudin le Devles ai phenen: Vestimos t'avel le Devleske ande le than but vuče, ai patia pe e phuv maškar le manuš kai si leske! Kana le andželi geletar te žiantar palpale ande o čeri, le pastuřuri phenel jekh kavreske: Aven ži ande o Betlehem, te dikhas so areslias, so o Baro kerdias te žianas. Von gele sigo, ai von arakhle le Josef ai la Maria, ai la tsinořa glata kai sovel ande o than kai xan le guruva. Pala ke von dikhle les, von phenen so sas lenge phendo pe e tsinoři glata. Sa kudala kai ašunenas lende sas lenge šodo so phenenas lenge le pastuřuri. E Maria garavel sa kudala dieli, ai nakhavelas le ande pesko ilo. Ai le pastuřuri gele palpale, vestin ai luvudin le Devles pe sa so von ašunde ai dikhle, ai ke sas jekh fialo sar sas lenge phendo. O oxtoto dies, kana e glata trubulas t'avel šindo, areslo; dine les o anav o Jesus, anav kai phendiasas o andželo angla savořende t'avel ande o peř peska dako. Ai, kana le dies te vužiol getosaile, sar si o zakono katar o Moše, o Josef ai e Maria ningerde les ande o Jerusalem, te sikaven les ka o Baro. Sar si ramome ande o zakono katar o Baro: Sako murš o mai angluno arakhado avela thodino rigate le Bareske, ai te den sakrifiso dui čirikliořa vai dui terne gulumburi, sar si ramome ande o zakono le Baresko. Ai eta, sas ande o Jerusalem jekh manuš, akharenas les o Simeon. Kudo manuš sas vorta ai patialas, vo ažiukerelas e mila pe o Israel, ai o Svinto Duxo sas pe leste. Leske sas phendo katar o Svinto Duxo ke vo či merela angla savořende te na dikhela le Kristos le Baresko. Vo avilo ka o templo, spidino katar o Duxo. Ai, sar le niamuri anen la tsinořa glata o Jesus te keren karing leste so dias ordina o zakono, vo lias les ande peske vast, svintsisardias le Devles, ai phenel: Akana, Baria, tu mukes tjira sluga Te žialtar ande e patia, sar si tjiri vorba. Ke muře jakha dikhle tjiro skipimos, skipimos kai tu lašiardian angla sa le naroduri, vedaria te sikiarel sa le themenge, ai viasta ka o Israel, tjiro narodo. Lesko dad ai leski dei sas lenge šodo anda le dieli so phenen pa leste. O Simeon svintsil len, ai phenel la Mariake, leski dei: Eta, kadia glata si šinado t'anel te peren ai te ušten but anda o Israel, ai t'aresel jekh semno kai le manuš či mangena, ai vi tuke jekh xanřo nakhavela pa tjiro duxo, eta ke le ginduri butenge ande le ile t'aven dine avri. Mai sas kothe jekh profetiasa, e Anna, šei katar o Fanuel, anda e kumpania o Ašer. Voi sas bute beršengi. Voi traisardias efta berš peske řomesa dekin sas šei pativali. Bešli phivli, ai phuri oxto-var-deš ai štare beršengi, voi či mukelas o templo, ai voi služilas le Devles riate ai diese ande o posto ai ande o řudjimos. Avili, vi voi, ande kudo časo, voi luvudil le Devles, ai voi del duma pa o Jesus ka sa kudala kai ažiukeren te skipil pe o Jerusalem. Kana von kerde sa so dias ordina o zakono katar o Baro, o Josef ai e Maria gele palpale ande e Galilea, ande o Nazaret, pengo foro. Eta e glata zuriavol ai bariol. Vo sas pherdo godji, ai e dragostia le Devleski sas pe leste. O dad ai e dei le Jesusoske žianas sako berš ande o Jerusalem, pe o prasniko la Patradiako. Kana vo sas deš-u-do beršengo, von ningerde les pe o prasniko sar sas lengo zakono. Porme, kana le dies nakhle, ai ke von žian palpale, e glata o Jesus bešlo ande o Jerusalem. Lesko dad ai leski dei či line sama. Von gindisarde ke vo sas peske vortakonsa pe o drom, von gele jekh dies pe e vurma, ai roden les maškar penge niamuri ai vortača. Numa, či arakhle les, von gele palpale ande o Jerusalem te roden les. Pala trin dies, von arakhle les ande o templo, bešelas maškar le zakonaria, ašunelas lende ai pušelas len. Sa kudala kai ašunenas leste sas lenge šodo sar si leski godji ai sar del palpale. Kana leske niamuri dikhle les, lenge sas šodo, ai leski dei phenel leske: muři glata, sostar kerdian tu kadia amensa? Eta, tjiro dad ai me, ame rodas tu nekežimasa. Vo phenel lenge: Sostar roden ma tume? Či žianen tume ke trubuv te lav sama le dieli muře Dadeske? Numa von či hatiarde so vo phenel lenge. Porme vo vulisto lensa ande o Nazaret, ai vo ašunelas lende. Leski dei garavelas sa kudala dieli ande pesko ilo. Ai o Jesus bariol ande e godji, pe o stato, pe o šukarimos, angla o Del ai angla le manuš. O deš-u-panžto berš katar o Amperato Tiber — kana o Pontius Pilato sas vladoro ande e Judea, o Herodo vladoro ande e Galilea, lesko phral o Filipo tetrarxo ande o Iture ai pe e phuv katar o Traxonitis, o Lisanias tetrarxo katar o Abilen, ai ande e vramia katar le raša Anas ai Kaifas — e vorba le Devleski sas phendi ka o Jono, šiav katar o Zakaria, ande e pusta. Ai vo žialas ande sa o them krugom o Jordan, phenelas pa o bolimos le keimasko, te lel palpale le bezexa, sar si ramome ande e kliška le vorbi katar o Esai, o profeto: Si o hango kudalesko kai tsipil ande e pusta: Lašiaren le vurmi le Bareske, teliaren leske vurmitsi. Sako dolina avela pherdi, sako plai ai sako plaiořo avela mai tele; so si bango avela lašiardo, ai le vurmi rimome avena platsko. Ai sako mas dikhela o skipimos le Devlesko. Vo kadia phenelas ka o baro narodo kai avenas te bolen pe lestar: Vitsa sapengi, kon sikiardias tumen te našen katar e xoli kai avel? Den fruti te sikaven ke kein tume, ai na thon tume ande tumende te phenen: O Abraham si amaro dad! Ke me phenav tumenge ke anda kakala bař o Del šai kerel šiave katar o Abraham. Inke o tover si thodino ka e vuna la kopačeski; sako kopači kai či del laši fruta avela šindi ai šiudini ande e jag. O narodo pušel lestar, phenenas: So trubul ame te keras? Vo del len palpale: Kai si les dui bundi te hulavel kudalesa kai nai les, ai ke kudo kai si les te xal te kerel sa jekh fialo. Mai aven vi kudala kai kjiden e taksa le amperatoske te bolen pe, ai von phenen leste: Birevo, so trubul ame le keras? Vo del len palpale: Na mangen khanči mai but opral pa so si tu ordina. Ketani vi von pušen les: So trubul ame te keras? Vo del len palpale: Na len pe e zor khanči ai na athaven khanikas, ai t'avel tumenge mišto so pokjinen tume. Sar o narodo ažiukerelas, ai ke sa pušenas pe ande pende te nai o Jono o Kristo, vo phenel savořenge: Me, bolav tumen paiesa; numa avel kudo kai si mai zuralo mandar, ai me či sim harniko te putrav le doria katar leske papuča. Vo bolela tumen ande o Svinto Duxo ai ande e jag. Si les leski sita ande o vast; vo hulavela so si, ai vo kjidela o gjiv ande peski stala, numa vo phabarela o sulum ande jekh jag kai či merela šoha. Si ke kadia o Jono phenel e laši viasta le narodoske, mai phenel lenge but kaver dieli te sikiarel len. Numa o Herodo o vladoro, o Jono dias pa leste duma pala e Herodias, řomni leske phraleski, ai pala sa le žiungale dieli kai vo kerdias. Thodias o Herodo mai but pe sa le kaver dieli te phandavel le Jono ande e temnitsa. Sa o narodo bolelas pe, o Jesus vi vo sas boldo; ai, žikin vo řudjil, o čeri puterdilo, ai o Svinto Duxo vulisto pe leste sar jekh forma, sar jekh gulumbo. Ai jekh hango ašundilo anda o čeri: Tu san muřo Šiav kai si mange drago; ande tute, me thodem sa muři dragostia. O Jesus sas pašte trianda beršengo kana lias pe te kerel peski butji. Sas, sar gindinas, šiav katar o Josef, šiav katar o Elia, šiav katar o Matat, šiav katar o Levi, šiav katar o Melxi, šiav katar o Janai, šiav katar o Josef, šiav katar o Matatias, šiav katar o Amos, šiav katar o Nahum, šiav katar o Esli, šiav katar o Nagai, šiav katar o Mat, šiav katar o Matatias, šiav katar o Semei, šiav katar o Joseh, šiav katar o Joda, šiav katar o Joanan, šiav katar o Resa, šiav katar o Zorobabel, šiav katar o Saltiel, šiav katar o Neri, šiav katar o Melxi, šiav katar o Adi, šiav katar o Kosam, šiav katar o Elmadan, šiav katar o Er, šiav katar o Jošua, šiav katar o Eliezer, šiav katar o Jorim, šiav katar o Matat, šiav katar o Levi, šiav katar o Simeon, šiav katar o Juda, šiav katar o Josef, šiav katar o Jonam, šiav katar o Eliakim, šiav katar o Melea, šiav katar o Mena, šiav katar o Matat, šiav katar o Natan, šiav katar o David, šiav katar o Jesai, šiav katar o Obed, šiav katar o Boaz, šiav katar o Sala, šiav katar o Nason, šiav katar o Aminadab, šiav katar o Admin, šiav katar o Arni, šiav katar o Esrom, šiav katar o Fares, šiav katar o Juda, šiav katar o Jakob, šiav katar o Isak, šiav katar o Abraham, šiav katar o Tara, šiav katar o Nahor, šiav katar o Seruh, šiav katar o Rago, šiav katar o Falek, šiav katar o Eber, šiav katar o Šelak, šiav katar o Kainan, šiav katar o Arfahad, šiav katar o Šem, šiav katar o Noa, šiav katar o Lameh, šiav katar o Matusela, šiav katar o Enok, šiav katar o Jared, šiav katar o Malelel, šiav katar o Kainan, šiav katar o Enos, šiav katar o Set, šiav katar o Adamo, šiav katar o Del. O Jesus, pherdo Svinto Duxo, avilo anda o Jordan, ai sas ninkerdo katar o Duxo ande e pusta, kai vo sas zumado katar o beng štar-var-deš dies. Vo či xalias khanči kudala dies, ai, kana von nakhle, vo sas bokhalo. O beng phenel leske: Te san tu o Šiav le Devlesko, de ordina ka kako bař t'avel manřo. O Jesus del les palpale: Si ramome: O manuš či traila ferdi anda o manřo. O beng vazdias les, sikadias leske anda jekh data sa le amperatsi la phuviake, ai phenel leske: Me dava tu sa kadia zor, ai o vestimos kadale amperetsiango; ke von sas mange dine, ai me dav len kaske me kamav. T'avela ke tu des čanga angla mande, von avena tjire. O Jesus del les palpale: Si ramome: Avela tuke drago o Baro, tjiro Del, ai tu služisa ferdi les. O beng mai ningerdias les ande o Jerusalem, thodias les opre pe o templo, ai phenel leske: Te san tu o Šiav le Devlesko, xuti kathar tele; ke si ramome: Vo dela ordina ka peske andželi pala tute, eta te len tutar sama; ai: Von ningerena tut pe penge vast, daratar ke tjiro punřo malavel jekh bař. O Jesus del les palpale: Si phendo: Tu či zumavesa le Bares tjiro Del. Pala ke zumadias les sako fialo, o beng durilo lestar žikin či arakhela vramia mai laši. O Jesus, e zor le Duxoski pe leste, gelo palpale ande e Galilea, ai lesko vestimos gelo ande sa o them krugom. Vo sikiarel ande le khangeria židovitsko, ai les vestinas les sa. Vo gelo ande o Nazaret, kai vo barilo, ai, sar sas lesko zakono, vo dias andre ande e khangeri židovitsko o dies o sabato. Vo uštilo te gjinel, ai dine leste e kliška katar o profeto o Esai. Puterdias la, vo arakhlias o than kai si ramome: O Duxo le Baresko si pe mande, Ke vo alosardias ma te phenav e laši viasta le čořenge: Vo tradias ma te sastiarav kudalen kai si lengo ilo šindo, te phenav le phanglenge ke skipina pe, ai le kořenge ke puterdiona lenge jakha, te tradel slobodo kudalen kai si len pharimos, te phenen jekh berš dragostia katar o Baro. Atunči, phanglias e kliška, dias la ka e sluga, ai bešel tele. Sa kudala kai sas ande e khangeri židovitsko sas lenge jakha thodine pe leste. Atunči vo lias pe te phenel lenge: Adies kadia vorba ramome, kai tume ašundian, kerdili. Ai sa sas leske martururi; lenge sas šodo katar le vorbi drago kai anklenas anda lesko mui, ai von phenenas: Nai vo o šiav katar o Josef? O Jesus phenel lenge: Amburim tume phenen pe mande kadia paramiči: Doxtoro, sastiar tu korkořo; ai tume phenena mange: Ker kathe, ande tjiri phuv, sogodi ame ašundiam ke keres ande o Kapernaum. Numa, mai phenel vo, me phenav tumenge čačimasa, či jekh profeto nai mišto lino ande peski phuv. Me phenav tumenge čačimasa: sas but phivlia ande o Israel ande e vramia kai sas o Elia, kana o čeri sas phandado trin berš ai šov šion ai ke sas jekh bari bokh pe sa e phuv; ai eta o Elia nas tradino karing či jekh anda lende, numa karing jekh žiuvli phivli, ande o Sarepta, ande o them o Sidon. Vi mai sas but nasvale žiungale ande o Israel ande e vramia katar o Elise, o profeto; ai či jekh anda lende nas vužardo, numa o Naman o Siriano. Len lias le sa e xoli ande e khangeri židovitsko, kana von ašunde kudala dieli. Ai von uštile, von dine les avri anda o foro, ai ningerde les ži opre pe o plai pe savo o foro sas vazdino, eta te šiuden les tele. Numa o Jesus nakhlo maškar lende, gelotar. Vo vulisto ande o Kapernaum, foro anda e Galilea; ai vo sikiarel o dies o sabato. Malavela len sar vo sikiarel: Ke vo delas duma putiariasa. Arakhadilias ande e khangeri židovitsko jekh manuš kai sas les jekh demono bi-vužio, ai kai tsipil jekhe hangosa zurale: A! so si maškar amende ai tute, Jesus anda o Nazaret? Tu avilian te xasares amen. Me žianav kon san tu: O svinto le Devlesko. O Jesus daravel les, phenelas: Aš, ai ankli avri anda kado manuš. Ai o demono šiudias les maškar lende, ai anklisto avri anda leste, bi te kerel leske či jekh nasulimos. Sa sas lenge šodo, ai phenenas jekh avreske: Vo porončil barimasa ai zorasa ka le duxuri bi-vuže, ai von ankliste avri! Ai lesko vestimos gelo ande sa le thana krugom. Kana anklisto avri anda e khangeri židovitsko, vo gelo ka o kher le Simonosko. E sakra la Simonoski sas la jekh pria baro tatimos, ai von mangle les mištimasa te ažutil la. Vo bangilo pe late, vo daravel o tatimos, ai o tatimos muklias la. Strazo voi uštili, ai služisardias len. Pala ke pelo tele o kham, sa kudala kai sas len nasvale andine le leske. Vo thol o vast pe sako anda lende, ai sastiardias le. Demonuri mai ankliste anda but žene, tsipinas ai phenenas: Tu san o Šiav le Devlesko. Numa vo daravelas len ai či mukelas len te den duma, ke von žianenas ke vo si o Kristo. Sar o dies areslo, vo anklisto avri ai gelo ande jekh than pusto. O narodo thodias pe te roden les, ai aresle ži leste; von kamenas te ninkeren les, eta te na mukel len. Numa vo phenel lenge: Mai trubul te phenav e viasta ka le kaver foruri, e laši viasta pa e amperetsia le Devleski ke pala kudia me sim tradino. Ai vo delas duma ande le khangeria židovitsko ande e Judea. Sar o Jesus bešelas paša e maria o Genesaret, ai ke o narodo kjidelas pe krugom leste t'ašunen e vorba le Devleski, vo dikhlias pe o berego la mariako dui čunuri, pa save le mašaria vuliste te xalaven penge setki. Vo anklisto ande jekh anda kudala čunuri, kai sas le Simonosko, ai řudjisailo lestar te duriol tsiřa katar e phuv. Porme vo bešlo tele, ai anda o čuno vo sikiarel o narodo. Kana vo getosardias te del duma, vo phenel ka o Simon: Žian angle maškar o pai, ai šiuden tumare setki t'astaren maše. O Simon dias les palpale: Birevo, ame kerdiam butji sa e riat bi te las khanči; numa pala tjiri vorba, me šiudava e setka. Šiudias la, von line but maše, ai lengi setka šindiolas. Von keren semnuri penge vortakonge kai sas ande o kaver čuno t'aven te ažutin len, ai von pherde le dui čunuri, ži kai šai tasonas. Kana dikhlias kudia, o Simon Petri pelo ka le čanga le Jesusoske ai phenel: Baria, žiatar mandar, ke me sim jekh manuš bezexalo. Ke e dar lias les, les ai sa kudalen kai sas lesa, pala o astarimos kai sas len. Sa jekh fialo sas ka o Jakob ai ka o Jono, šiave katar o Zebedeo, kai sas ande jekh than le Simonosa. Atunči o Jesus phenel le Simonoske: Na dara; d'akanara tu astaresa le manušen. Ai, andine le čunuri pe e phuv, von mukle sa, ai gele pala leste. O Jesus sas ande jekh foro, ai eta, jekh manuš pherdo nasulimos žiungalo, dikhlias les, pelo pe peski fatsa, ai kerdias leske kako řudjimos: Baria, te kamesa, tu šai vužares man. O Jesus vazdias o vast, asbadias les, ai phenel: Me kamav, av vužio. Strazo o žiungalimos muklias les. Porme dias les ordina te na phenel khanikaske. Numa, phenel vo, žia sikav tu ka le raša ai de pala tjiro vužimos so o Moše phendias, eta t'aves lenge marturo. Lesko vestimos žial sar mai but ai mai but, ai le žene avenas — baro narodo — t'ašunen leste ai t'aven saste lestar. Numa vo gelo ande e pusta te řudjisarel. Jekh dies o Jesus sikiarelas. Le Farizianuri ai le zakonaria bešenas kothe, avile anda sa le gava anda e Galilea, anda e Judea ai anda o Jerusalem; ai e zor le Bareski sikavel pe katar le sastiarimata. Ai eta, žene, ningeren pe jekh pato jekhe paralitikos, rodenas te den les andre ai te thon les angla leske jakha. Sar či žianenas katar te ningeren les, ke sas jekh baro narodo, von ankalade les pe o čardako, ai von vuliarde les katar jekh puterimos, leske patosa, maškar sa kai si kjidine, angla o Jesus. Dikhlias lengo patiamos, o Jesus phenel: Manuš, tjire bezexa si jertime. Le zakonaria ai le Farizianuri thode pe te den pe godji ande pende: Kon si kado, kai prasal? Kon šai jertil le bezexa, te na avela o Del? O Jesus, žianelas lenge ginduri, lias e vorba ai phenel lenge: Če ginduri si tumen ande tumaro ilo? So si mai vušořo: te phenav «tjire bezexa si jertime» vai «ušti ai phir»? Eta, tume te žianen ke o Šiav le manušesko si les pe e phuv e putiaria te jertil le bezexa. Me dav tu poronka, phenel vo le paralitikoske, ušti, le tjiro pato, ai žiatar ande tjiro kher. Ai strazo, vo uštilo angla lende, lias o pato pe savo vo sovelas, ai gelo ande pesko kher, vestilas le Devles. Sa sas lenge šodo, ai vestinas le Devles; pherde daratar, von phenenas: Ame dikhliam adies dieli šodo. Pala kudia, o Jesus anklisto avri, ai dikhlias jekhes kai kjidel e taksa le amperatoske, bušol Levi, bešel ande o kher kai pokjinen e taksa. Vo phenel leske: Aidi pala mande. Ai, muklias sa, vo uštilo, ai gelo pala leste. O Levi dias les jekh bari pativ ande pesko kher, ai but kai kjiden e taksa ai kaver manuš sas pala e skafidi lensa. Le Farizianuri ai lenge zakonaria bulguinas ande pende, phenenas leske vortakonge: Sostar xan tume ai pen kudalensa kai kjiden e taksa ai le ženensa kai si lengo traio nasul? O Jesus, lias e vorba, phenel lenge: Nai kudalen kai si saste ke trubul len o doxtoro, numa le nasvalen. Me či avilem t'akharav te kein pe kudalen kai si vorta, numa le bezexalen. Von phenen leske: Le vortača katar o Jono, sar kudala katar le Farizianuri, butivar postin ai řudjin pe, žikin tjire xan ai pen. Vo del le palpale: Šai keren tume te postin le vortača le terneske ande o abiav žikin vo si lensa. Le dies avena kai o terno avela lino lendar, atunči postina kudala dies. Vo mai phenel lenge jekh paramiči: Khonik či šinel anda jekh tsolo nevo jekh kotor te thol les ka jekh tsolo purano; aver fialo, vo šinel o tsolo nevo, ai o kotor kai vo lias či avela jekh fialo sar o purano. Ai khonik či thol mol nevi ande le bočonkuri purane; aver fialo, e mol nevi phařavel le bočonkuri, del muial, ai le bočonkuri si xasarde. Numa trubul te thon e mol nevi ande le bočonkuri neve. Ai khonik, kana pela mol purani, či kamel nevi, ke vo phenel: E purani si laši. Areslias jekh sabato ke o Jesus nakhelas maškar kimpuri gjiveske. Leske vortača ankalade simintsi, inčarde le ande le vast ai xale. Uni Farizianuri phenen leske: Sostar keren tume so nai slobodo te keren pe o sabato? O Jesus del len palpale: Či gjindian tume so kerdias o David, kana sas bokhalo, ai vo ai kudala kai sas lesa; sar vo dias andre ande o kher le Devlesko, lias o manřo kai sas dišado pe o altari, xalias, ai dias kudalen kai sas lesa, makar ke sas ferdi le rašange te xan? Ai vo phenel lenge: O Šiav le manušesko si birevo vi pe o sabato. Areslias, jekh kaver sabato, ke o Jesus dias andre ande e khangeri židovitsko, ai ke vo sikiarel. Vo arakhlias jekhe manušes kai lesko vast čačo sas šuko. Le zakonaria ai le Farizianuri len sama katar o Jesus, te dikhen ke kerel jekh sastiarimos o sabato. Sas jekh diela te thon beda pe leste. Numa vo žianelas lenge ginduri, ai vo phenel le manušeske kai sas lesko vast šuko: Ušti, ai beš katka ande o maškar. Vo uštilo, ai bešel pe punřende. Ai o Jesus phenel lenge: Me pušiav tumendar te si slobodo, o dies o sabato, te keres mištimos vai te keres nasulimos, te skipis jekhe manušes vai te mudares les. Atunči, šiudel pesko dikhimos pe lende sa, vo phenel le manušeske: Vazde tjiro vast. Vo vazdias les, ai lesko vast sastilo. Von pherdile xoli, ai von dine pe duma so šai keren le Jesusoske. Ande kudia vramia, o Jesus gelo pe o plai te řudjil, ai vo nakhlo sa e riat te řudjil le Devles. Kana o dies avilo, vo akhardias peske vortakon, ai vo alosardias deš-u-don, kaske vo dias o anav apostoli: O Simon, kai akharel les Petri; o Andreas, lesko phral; o Jakob, o Jono, o Filipo, o Bartelemi; o Matei, o Tomas, o Jakob, o šiav katar o Alfeo, o Simon, akharen les o Zeloto; o Jud, šiav katar o Jakob, ai o Juda Iskariot, kai areslo te bikjinel les. Vo vulisto lensa, ai terdilo pe jekh than platsko, kai sas jekh narodo katar leske vortača ai jekh baro narodo anda sa e Judea, anda o Jerusalem, ai anda e Tira ai anda o Sidon pa e rig la mariaki. Von avile t'ašunen leste, ai t'aven sastiarde anda penge nasvalimata. Kudala kai sas rimome katar le duxuri bi-vuže sas saste. Ai sa o narodo rodelas t'asban les, ke jekh zor anklelas anda leste ai sastiarelas savořen. Atunči o Jesus, vazdias le jakha pe le vortača, phenel: Veseli san tume kai san čoře, ke e amperetsia le Devleski si tumari! Veseli tume kai san bokhale akana, ke tume avena pravarde! Veseli tume kai roven akana, ke tume avena ande e veselia! Veseli avena tume, kana le manuš vuřitsina tumen, kana gonina tumen, dena tumen pe o lažiav, ai šiudena tumaro anav sar nai lašio, pala o Šiav le manušesko! Veselin tume kudo dies ai isdran dragostar, ke tumaro pokjinimos avela baro ande o čeri; ke kadia lenge dada kerenas karing le profeturi. Numa, nasul tumenge, barvale, ke vuže lian tumaro mištimos! Nasul tumenge kai san pravarde, ke tume avena bokhale! Nasul tumenge kai asan akana, ke tume avena ande o žalimos ai ande le asva! Nasul, kana sa le manuš phenena mištimos pa tumende, ke kadia kerenas lenge dada karing le falši profeturi! Numa me phenav tumenge, tumenge kai ašunen mande: Kamen tumare dušmanon, keren mištimos kudalenge kai vuřitsin tumen. Svintson kudalen kai den tumen armaia, řudjin kudalenge kai maren tumen. T'avela varekon ke malavel tu pe jekh buka, mai sikav leske vi e kaver. T'avela varekon ke lel tjiri bunda, te na des tu palpale te lela vi tjiro gad. De ka varekon kai mangel tutar, ai na mai mang palpale tjiro mištimos katar kudo kai lias tutar. So tume kamen ke le manuš keren tumenge, keren sa kadia lenge. Te kamena tume kudalen kai kamen tumen, so šai avela tumenge? Le bezexale vi von kamen kudalen kai kamen len. Te kerena tume mištimos kudalenge kai keren tumenge mištimos, so šai avela tumenge? Le bezexale vi von keren sa jekh fialo. Ai t'avela tume te den užile ka kudala kai ažiukeren tume te len palpale lendar, so šai avela tumenge? Le bezexale vi von den užile ka le bezexale, eta te len sa jekh fialo. Numa kamen tumare dušmanon, keren mištimos, ai den užile bi t'ažiukeren khanči. Ai tumaro pokjinimos avela baro, ai tume avena šiave kudalesko kai si Mai Vučo, ke vo si lašio kudalenge kai či naisin ai le nasulenge. T'avel tumenge mila, sar tumaro Dad si miloso. Na den pe e kris, ai tume či avena dine pe e kris; na den strafo, ai tume či avena dine pe o strafo; jertin, ai tume avena jertime. Den, ai avela tumen dino: Von dena muial ande e bari pošotsi kai si pe tumaro dži jekh laši mezura, kjidini, miškisardi ai dini opral; ke von mezurina tumenge la mezurasa kai sas tumari. Vo phenel lenge vi kadia paramiči: Jekh kořo šai ningerel vo jekhe kořes? Či perena von vi le dui ande jekh groapa? O vortako nai vo mai baro sar o birevo; numa sako vortako kai sikiola avela sar o birevo. Sostar dikhes tu o sulum kai si ande e jakh tjire phraleski, ai či dikhes tu e beli kai si ande tjiri jakh? Vai sar šai phenes tu tjire phraleske: Phrala, muk ma te lav o sulum kai si ande tjiri jakh, tu kai či dikhes e beli kai si ande tjiri? Xoxamno, le angla savořende e beli anda tjiri jakh, ai atunči tu dikhesa sar te les o sulum kai si ande e jakh tjire phraleski. Nai jekh lašio kopači kai nai pe leste laše fruti, či jekh čořo kopači te šai del laše fruti. Ke sako kopači prinžiaren les katar lake fruti. Či kjiden figi ai či kjiden struguro pe le kanře. O manuš o lašio tsirdel laše dieli anda o lašio mandjin peske ilesko, ai o nasul tsirdel nasul dieli anda pesko nasul mandjin; ke si anda o but kai si ande o ilo ke o mui del duma. Sostar akharen ma tume Baro, Baro! ai či keren tume so me phenav tumenge? Me sikavava tumenge sar miazol o manuš kai avel mande, ašunel muře vorbi ai lel le opre. Si jekh fialo sar o manuš kai, vazdel jekh kher, hunadias, hunadias but andre, ai thodias te astardiol pe e stanka. Jekh tasaimos avilo, ai o pai šiudias-pe pe kudo kher, bi te šai miškil les, ke vo sas mišto vazdino. Numa kudo kai ašunel, ai či lel ma opre, si jekh fialo sar jekh manuš kai vazdias jekh kher pe e phuv, bi t'avel astarimos. O pai šiudias-pe pe leste; ai vo strazo pelo, ai o phařaimos kudale kheresko si baro. Pala ke getosardias sa kudala divanuri angla o narodo kai ašunelas leste, o Jesus dias andre ande o Kapernaum. Jekh fitsiri kai si baro pe jekh šel ketani sas pria astardo ka peski sluga kai sas nasvalo, areselas te merel. Ašundias ke den duma pa o Jesus, vo tradias leste uni purane anda le Židovuri, te mangen les t'avel te sastiarel leska sluga. Von aresle paša o Jesus, ai von but řudjin pe leste, phenenas: Les šai trubul te des les kudia! Ke leske drago amaro them, ai vo si kai vazdias amari khangeri židovitsko. O Jesus, gelo lensa, nas vo dur katar o kher, kana o fitsiri pe jekh šel tradias vortakon te phenen leske: Baria, na de tu khanči kjinuimos; ke me či sim harniko t'aves tela muřo čardako. Sa anda kudia me či gindisailem ke sim dosta harniko t'avav karing tute. Numa phen jekh vorba, ai muři sluga avela sasti. Ke, me kai sim tela o vast le barengo, si ma ketani tela muře ordini; ai me phenav jekheske: Žia! ai vo žial; le kavreske: Aidi, ai vo avel; ai muřa slugake: Ker kadia! ai vo kerel. Kana o Jesus ašundias kudala vorbi, leske sas drago o fitsiri ai amboldias pe karing o narodo kai žialas pala leste, vo phenel: Me phenav tumenge, inke ande o Israel me či arakhlem jekh kasavo patiamos. Palpale ka o kher, le žene tradine katar o fitsiri arakhle sasto la sluga kai sas nasvalo. O dies pala kudia, o Jesus gelo ande jekh foro akharen les Nain; leske vortača ai jekh baro narodo žianas pe o drom lesa. Kana vo areslo paša o vudar le forosko, eta, ningerenas ande le mormuntsi jekhe mules, sas ferdi o jekh šiav peska dako, kai sas phivli; ai sas lasa but žene anda o foro. O Baro, dikhlias la, lias les mila latar, ai phenel lake: Na rov! Vo pašilo, ai asbadias o pato. Kudala kai ningerenas les terdile. Vo phenel: Terno murš, me phenav tuke, ušti! Ai o mulo uštilo, ai thodias pe te del duma. O Jesus dias les ka leski dei. Sa lias le e dar, ai von luvudisarde le Devles, phenenas: Jekh baro profeto sikadilo maškar amende, ai o Del phirel maškar pesko narodo. Kudia vorba pe o Jesus geli ande sa e Judea ai ande sa o them krugom. O Jono phende leske sa kudala dieli leske vortača. Vo akhardias don, ai tradias len karing o Jesus, te phenen leske: San tu kudo kai trubul t'avel, vai trubusaras ame t'ažiukeras jekh aver? Aresle paša o Jesus, von phenen: O Jono kai bolel tradias ame karing tute, te phenas tuke: San tu kudo kai trubul t'avel, vai trubul ame t'ažiukeras aver? Ka kudo časo, o Jesus sastiardias bute ženen anda le nasvalimata, le bangimata, ai duxuri xitri, ai kerdias te dikhen but koře. Ai vo phenel lenge: Žian te phenen ka o Jono so tume dikhlian ai ašundian: Le kašuke ašunen, le mule živindin, e laši viasta si phendi ka le čoře. Raduime te avel kodo kai či perel ande e bezex mandar. Kana le tradine katar o Jono geletar, o Jesus thodias pe te phenel le narodoske, pa o Jono: So gelian tume te dikhen ande e pusta? Jekh trestia kai miškil la e balval? Numa, so gelian tume te dikhen? Jekh manuš uriado ande le tsalia kovle? Eta, kudala kai si pe lende tsalia šukar, ai kai train ande o guglimos, si ande le khera le amperatonge. So gelian tume te dikhen? Jekh profeto? Ei, me phenav tumenge, ai mai but sar jekh profeto. Si kudo kai si pa leste ramome: Eta, me tradav muřa sluga kai phenel mai angle angla tjiri fatsa, Te lašiarel tjiri vurma angla tute. Me phenav tumenge, maškar kudala kai arakhadile katar žiuvli, nai mai baro sar o Jono. Numa, o mai tsinořo ande e amperetsia le Devleski si mai baro lestar. Ai sa o narodo kai ašunde ai inke kudala kai kjiden e taksa hatiarde e kris le Devleski ai bolde pe ande o bolimos le Jonosko. Numa le Farizianuri ai le zakonaria, kai či bolde pe lestar, kerde khanči so kamelas o Del karing lende. Sar sikavava me kadia vitsa, ai pe kaste miazol voi? Voi miazol sar le šiavoře kai bešen pe o than narodosko. Phenen: Ame gjilabadiam ande e tuturiaza, ai tume či kheldian; ame gjilabadiam gjilia milosi, ai tume či vatisailian. Ke o Jono avilo, či xalas ai či pelas, ai phenen: Vo si jekh bengailo. O Šiav le manušesko avilo, xalas ai pelas, ai phenen: Si xamatori ai jekh kai pel, jekh vortako kudalenge kai kjiden e taksa ai le narodosko kai si nasul. Numa o godiaverimos sas sikado pala so kerdias. Jekh Fariziano řudjisardias le Jesus te xal lesa. O Jesus dias andre ande o kher le Farizianosko, ai thodias pe pala e skafidi. Ai eta, jekh žiuvli bezexali kai sas ande o foro, ašundias ke vo si pala e skafidi ande o kher ka o Fariziano, andias jekh khoro alabastrosko pherdo duxi, ai voi bešli palal, ka le punře le Jesusoske. Voi rovel; ai sigo voi kjingiarel le peske asvensa, porme khoslias le peske balensa, čimidias le, ai makhlias le le duxiansa. O Fariziano kai akhardias les gosto, dikhlias kudia, phenel ande peste: Kado manuš te si profeto, vo žianelas kon si ai sar si kadia žiuvli kai asbal les, vo žianelas ke voi si jekh bezexali. O Jesus lias e vorba, ai phenel leske: Simon; si ma vareso te phenav tuke. Birevo, de duma, del vo palpale. Jekh kai del užile sas les dui kai kamenas leske: O jekh kamelas panž šela dinari, ai o kaver panž-var-deš. Sar nas len sar te pokjinen, vo muklias vi le donge lengo užilimos. Savo kamelas les mai but? O Simon del palpale: Kudo, gindiv ma, kaske mai but dias palpale. O Jesus phenel leske: Mišto kerdian kris. Porme, amboldias pe karing e žiuvli ai phenel ka o Simon: Dikhes kadia žiuvlia? Me dem andre ande tjiro kher, ai tu či dian ma pai te xalavav muře punře; numa voi, kjingiardias le peske asvensa; ai khoslias le peske balensa. Tu či čimidian man; numa voi, dekin dem andre, či ašili te čimidel muře punře. Tu či dian muial vuloi pe muřo šero; numa voi, voi dias muial duxo pe muře punře. Sa anda kudia, me phenav tuke, lake but bezexa si jertime; ke voi but kamlias. Numa kudo kaske jertisaras tsiřa kamel tsiřa. Ai vo phenel la žiuvliake: Tjire bezexa si jertime. Kudala kai sas pala e skafidi lesa thode pe te den pe duma ande pende: Kon si kado, kai jertil inke le bezexa? Numa o Jesus phenel la žiuvliake: Tjiro patiamos skipisardias tu, žia ande e patia. Atunči o Jesus žialas foro forostar ai gav gavestar, delas duma ai phenelas e laši viasta la amperetsiaki le Devleski. Le deš-u-dui sas lesa, ai uni žiuvlia kai sastiardias le katar le duxuri xitri ai anda le nasvalimata: E Maria (phenen lake anda e Magdala), anda kaste anklistias avri efta demonuri, e Johanna, řomni le Xusaski, kai lelas sama katar le mištimata le Herodoske, e Suzana, ai but kaver, kai ažutinas les penge mištimasa. Jekh baro narodo kjidinisailo, ai le žene avile anda uni foruri paša leste, vo phenel kadia paramiči: Jekh kai bariarel anklisto avri te šiudel simintsi. Sar vo šiudelas, jekh partia simintsa peli pe e rig la vurmaki; voi sas inčardi tela le punře, ai le čiriklia le čereske xale la. Jekh kaver partia peli pe e stanka; voi uštili, voi šukili, ke nas kjingimos. Jekh kaver partia peli maškar le kanře; le kanře barile lasa, ai tasade la. Jekh kaver partia peli ande e laši phuv; kana voi uštili, voi dias fruta jekh šel-var mai but. Pala ke dias duma kadia, o Jesus phenel bare glasosa: Ke kudo kai si les kan t'ašunel, ašunela. Leske vortača pušen lestar so si kudia paramiči. Vo del palpale: Si tumenge dino te žianen le čudeni katar e amperetsia le Devleski; numa le kavrenge, si lenge phende paramiča, eta te na dikhen kai dikhen, ai te na hatiaren kai ašunen. Eta so si kudia paramiči: E simintsa, si e vorba le Devleski. Kudo kai si pe e rig la vurmaki, si kudo kai ašunel, porme o Xitro avel, ai ankalavel anda lesko ilo e vorba, daratar ke patial ai ke skipil pe. Kudo kai si pe e stanka, si kudo kai, kana ašunel e vorba, lel la veselimasa; numa nai les vuna, vo patial pe jekh vramia ai vo perel tele ande e vramia kana si zumado. So pelias maškar le kanře, si kudo kai, kana ašunel e vorba, žialtar, ai mukel la te tasaven la le ginduri, le barvalimata ai le dragosti le traioske, ai vo ninkerel le fruti kai či pakiona. So pelias ande e laši phuv, si kudo kai, kana ašunel e vorba čači ai laši, ilesa ninkerel la, ai del fruti butivar. Khonik, kana dias jag jekh lampa, thol opral pa leste jekh kanta, či thon les tela jekh pato; numa thol les pe jekh vadra, eta ke kudala kai den andre dikhen e vedaria. Ke nai khanči garado kai či arakhena, khanči garado kai te na žianen ai avela avri ande e vedaria. Len tume sama sar tume ašunen; ke dena kudales kai si les, numa kudales kai nai les lena inke lestar so gindil ke si les. E dei ai le phral le Jesusoske aven t'arakhen les; numa naštin t'asban les, pala o narodo. Phenen leske: Tjiri dei ai tjire phral si avri, ai kamen te dikhen tu. Numa von del palpale: muře dei ai muře phral si kudala kai ašunen e vorba le Devleski, ai kai len la opre. Jekh dies, o Jesus anklisto ande jekh čuno peske vortakonsa. Vo phenel lenge: Nakhas inčial e maria. Ai von geletar. Žikin von tradenas o čuno, o Jesus lias les e lindri. Jekh bari balval avili pe e maria, o čuno pherdiolas pai, ai von sas te xasavon. Von pašile ai uštiade les, phenenas: Birevo, birevo, ame xasavas! Uštilo, vo daravel le balvalia ai le talazuri, kai ašile, ai muto avile. Porme vo phenel lenge: Kai lo tumaro patiamos? Lias len e dar ai si lenge šodo, von phenen jekh avreske: Kon si kado, kai porončil vi pe e balval ai pe o pai, ai kas patian? Von aresle ande o them katar le Gerasianuri, kai si inčial e Galilea. Kana vo vulisto pe e phuv, avilo angla leste jekh manuš anda o foro, kai sas ande leste but duxuri nasul. De dumult nai pe leste tsalia, ai vo bešelas na ande jekh kher, numa ande le groapoševuri. Dikhlias le Jesus, vo tsipisardias, šiudias pe ka leske punře, ai phenel jekhe hangosa zurale: So si maškar mande ai tute, Jesus, Šiav le Devlesko Mai Vučo? Me řudjiv tu, na rimosar ma. Ke o Jesus del poronka ka o duxo bi-vužio t'anklel avri anda kudo manuš, kai lias les de dumult; phandenas les le lansonsa ai le sastriansa pe le punře te garaven les, numa vo šinelas le, ai sas ningerdo katar o demono ande le pusti. O Jesus pušel les: Sar bušos tu? Armia, del vo palpale. Ke but duxuri dine andre ande leste. Ai von řudjinas pe zurales ka o Jesus te na del ordina te žian ande e hunia. Sas kothe, ande o plai, jekh bari trupa bale kai xanas. Ai le duxuri nasul řudjin le Jesus te muken le te den andre ande le bale. Vo muklias le. Le duxuri ankliste avri anda kudo manuš, dine andre ande le bale, ai e trupa šiudias pe tele pa o plai ande e maria, ai tasuli. Kudala kai denas len te xan, dikhle so areslias, našletar, ai phende e viasta ande o foro ai ande le kimpuri. Le žene gele te dikhen so areslias. Von avile paša o Jesus, ai von arakhle le manušes anda kaste ankliste avri le duxuri, bešelas ka leske punře, uriado, ai ande peski godji; ai len lias le e dar. Kudala kai dikhle so nakhlias phenenas lenge sar o manuš sas sasto. Sa o narodo anda o them e Gerasia řudjisarde le Jesus te duriol lendar, ke len lias le jekh bari dar. O Jesus anklisto ande o čuno, ai gelotar palpale. O manuš anda kaste ankliste avri le duxuri mangel lestar te bešel lesa. Numa o Jesus tradias les, phenelas: Žia palpale ande tjiro kher, ai phen sa sogodi o Del kerdias tuke. Vo gelotar, ai phenel ande sa o foro so o Jesus kerdias leske. Kana avilo palpale, o Jesus primisardias les o narodo, ke sa ažiukerenas les. Ai eta, avilo jekh manuš, bušol Jairus, kai si birevo pe e khangeri židovitsko. Vo šiudias pe ka leske punře, ai řudjil les te del andre ande lesko kher. Ke sas les ferdi jekh šei pašte deš-u-do beršengi kai merel. Kana o Jesus žial, kjidelas les o narodo. Eta, sas jekh žiuvli pitiala lako rat de deš-u-dui berš, ai kai dias sa peske love ka le doxtori, bi te či jekh te šai sastiarel la. Voi pašiol palal, ai asbadias o tsolo katar o Jesus. Strazo voi sastili anda pesko nasulimos. Ai o Jesus phenel: Kon asbadias man? Sar savoře den pe palpale, o Petri phenel: Birevo, o narodo si krugom tutar ai kjiden tu. Numa o Jesus del palpale: Varekon asbadias man, ke me hatiardem ke jekh zor gelitar anda mande. E žiuvli, dikhlias ke dine pe lako gor, avili isdraimasa te šiudel pe ka leske punře, ai voi phenel angla sa o narodo sostar voi asbadias les, ai sar voi sastili strazo. O Jesus phenel: muři šei, tjiro patiamos skipisardias tu; žia ande e patia. Sar vo mai delas duma, avilo katar o kher le birevosko anda e khangeri židovitsko varekon ai phenelas: Tjiri šei muli; na mai diliar le Jesus. Numa o Jesus, ašundias kudia, phenel ka o birevo la khangeriako židovitsko: Na dara, patia ferdi, ai voi avela skipime. Kana vo areslo ka o kher, vo či muklias khanikas te del andre lesa, te na ferdi le Petri, le Jono ai le Jakob, ai le dades ai la da la glatake. Sa rovenas ai vatinas-pe pe late. Atunči o Jesus phenel: Na roven; voi či muli, numa voi sovel. Ai von maren mui lestar, žianenas ke voi muli. Numa vo lias la vastestar, ai tsipil pe jekh hango baro: Glata, ušti. Ai lako duxo avilo ande late, ai strazo voi uštili; ai o Jesus dias ordina te den la te xal. Le niamuri la ternia šeiake sas lenge šodo, ai vo del len poronka te na phenen khanikaske so sas. O Jesus, kjidias le deš-u-don, dias len zor ai putiaria pe sa le duxuri nasul, la zorasa te sastiaren le nasvalen. Vo tradias len te phenen e amperetsia le Devleski, ai te sastiaren le nasvalen. Na len khanči pe o drom, phenel lenge vo, či rovli, či gono, či manřo, či love, ai te na aven tumen dui bundi. Ande varesavo kher kai tume den andre, bešen kothe; ai kothar tume žiantar. Ai, te le žene či primina tumen, anklen avri anda kudo foro, ai khosen e pulberia pa tumare punře, t'aven martururi pe lende. Von geletar, ai von gele gav gavestar, phenen e laši viasta ai keren kai-godi sastimata. O Herodo o vladoro ašundias sa sogodi sas, ai či žianelas so te gindil. Ke uni phenenas ke o Jono živindisailo katar le mule; kaver, ke o Elia sikadilo; ai mai kaver, ke jekh anda le purane profeturi živindisailo. Numa o Herodo phenelas: Me šindem e koř le Jonoski; kon si kado, kai ašunav pa leste kasave dieli? Ai vo rodelas te dikhel les. Le apostoli, avile palpale, phenen le Jesusoske sa sogodi von kerde. Vo lias len pesa, ai gelo rigate, karing jekh foro akharen les Betsaida. O narodo, dias pe o gor, gelo pala leste. O Jesus ažiukerdias le, ai del duma lensa pa e amperetsia le Devleski; vo mai sastiarelas sa kudalen kai trubunas t'aven saste. Sar o dies lelas pe te vulel le deš-u-dui pašile, ai phenen leske: Trade o narodo, eta te žian ande le gava ai ande le kimpuri krugom, te soven ai te arakhen so te xan; ke ame sam kathe ande jekh than pusto. O Jesus phenel lenge: Den le tume te xan. Numa von dine les palpale: Amen si ame ferdi panž manře ai dui maše. Te na žias ame te kjinas te xan sa kadale narodoske? Eta, sas pašte panž mii manuš. O Jesus phenel peske vortakonge: Keren te bešen tele řindo pa panž-var-deš. Von kerde kadia, von kerde te bešen sa tele. O Jesus lias le panž manře ai le dui maše, ai, vazdias le jakha karing o čeri, vo svintsisardias len. Porme phaglias le, ai dias le ka le vortača, eta te den le ka o narodo. Sa xale ai pravardile, ai andine palpale deš-u-dui košnitsi pherde kotora kai ašile. Jekh dies kai o Jesus řudjilas rigate, sas lesa leske vortača, vo pušel lendar kadia: So phenen o narodo ke me sim? Von den palpale: O Jono kai boldias; kaver phenen: O Elia; mai kaver, ke jekh anda le purane profeturi živindisailo. Ai tume, pušel le vo, so phenen tume ke me sim? O Petri del palpale: O Kristo le Devlesko. O Jesus del len poronka zurales te na phenen khanikaske. Vo mai phenel ke trubul ke o Šiav le manušesko kjinuila but, ke avela šiudino katar le phure, katar le bare raša ai katar le zakonaria, ke avela mudardo, ai ke živindila o trito dies. Porme phenel savořenge: Te kamela varekon t'avel pala mande, te bustrel pe vo, te lel sako dies pe peste pesko trušul, ai t'avel pala mande. Ke kudo kai kamela te skipil pesko traio xasarela les, numa kudo kai xasarela les pala mande skipila les. Ai so avela jekhe manušeske te niril sa e lumia, numa rimola pe vai xasavola peske? Ke kon-godi avela leske lažiav mandar ai katar muře vorbi, o Šiav le manušesko avela leske lažiav lestar, kana avela ande pesko vestimos, ai ande o vestimos le Dadesko ai leske svintsi andželongo. Me phenav tumenge čačimasa, uni anda kadala kai si kathe či merena te na dikhena e amperetsia le Devleski. Pašte deš dies pala kai phendias kadala vorbi, o Jesus lias pesa le Petri, le Jono ai le Jakob, ai vo anklisto pe o plai te řudjil. Žikin vo řudjil, lesko mui pařudisailo, ai lesko tsolo areslo pria parno ai strefialas. Ai eta, dui manuš den duma lesa: sas o Moše ai o Elia, kai, sikadionas ande pengo vestimos, denas duma ke žialtar, ai so si te avel ande o Jerusalem. O Petri ai leske vortača sas lenge pharo katar e lindri; numa kana uštiade, von dikhle o vestimos le Jesusosko ai le do manušengo kai sas lesa. Ande e vramia kai kudala manuš žiantar katar o Jesus, o Petri phenel leske: Mišto ke ame sam kathe; vazdas trin tseři, jekh tuke, jekh le Mošeske, ai jekh le Eliaske. Vo či žianelas so phenelas. Sar vo delas duma kadia, jekh nuvero avilo te garaven le; ai le vortača lias len e dar kai dikhle ke dine andre ande o nuvero. Ai anda o nuvero anklisto jekh hango, kai phenel: Kado si muřo Šiav alome, ašunen leste! Kana o hango ašundilo, o Jesus sas korkořo. Le vortača ašile muto, ai či phende khanikaske, ande kudia vramia, khanči so von dikhle. Teharin, kana von vuliste pa o plai, jekh baro narodo avilo angla o Jesus. Ai eta, maškar o narodo jekh manuš tsipil: Birevo, me mangav tu, šiude tjiro dikhimos pe muřo šiav, ke si ma ferdi jekh šiav. Jekh duxo lel les, ai strazo tsipil; ai o duxo miškil les zurales, kerel t'avel les spuma, ai trudno leske t'anklel avri anda leste, pala ke phagel les. Me řudjisardem tjire vortakon te gonil les, ai von naštisarde. Vitsa nasul kai či patian, del palpale o Jesus, ži kana avava me tumensa ai ninkerava me tumen? An kathe tjire šiaves. Sar vo pašiolas, o duxo šiudel les tele, ai miškil les zurales. Numa o Jesus daravel le duxo bi-vuže, sastiardias la glata, ai dias les ka lesko dad. Ai sa maladias le e čudenia katar o barimos le Devlesko. Žikin sako sas ande e dragostia de so kerelas o Jesus, vo phenel peske vortakonge: Tumenge, ašunen mišto kadia: O Šiav le manušesko trubul t'avel dino ande o vast le manušengo. Numa le vortača či hatiarde kudia vorba; sas garadi lenge, eta te na hatiaren; ai von daranas te pušen les pa kudia. Eta, jekh gindo avel lenge ka o ilo, te žianen savo anda lende si o mai baro. O Jesus, dikhlias lengo gindo ande o ilo, lias jekha tsinořa glata, thodias les paša peste, ai phenel lenge: Varekon kai primil ande muřo anav kadala tsinořa glata primil man; ai kon-godi primil man primil kudales kai tradias man. Ke kudo kai si o mai tsinořo maškar tumende, kudo si o mai baro. O Jono lias e vorba, ai phenel: Birevo, ame dikhliam jekhe manušes kai gonil le demonon ande tjiro anav; ai ame či mukliam les, ke vo či avel amensa. Te na keren kadia, phenel leske o Jesus; ke kon nai pe tumende si tumensa. Kana e vramia kai trubulas t'avel lino ka o čeri pašiol, o Jesus lias pe te žial ande o Jerusalem. Vo tradias angla peste varekas, kai thode-pe pe o drom ai dine andre ande jekh gavořo ande e Samaria, te lašiaren leske kai te bešel. Numa či line les, ke vo žialas karing o Jerusalem. Le vortača o Jakob ai o Jono, dikhle kudia, phenen: Baria, kames tu te ame mangas ke e jag te vulel anda o čeri ai te bilaven le? O Jesus amboldinisailo karing lende, phenelas: Tume či žianen če duxo si ande tumende. Ke o Šiav le manušesko avilo, na te xasarel le duxuri le manušenge, numa te skipil le. Ai von gele ande kaver gavořo. Žikin von si pe e vurma, jekh manuš phenel leske: Baria, me žiava tusa kai-godi tu žiasa. O Jesus del les palpale: Le lisitsi si le kai te garadion, ai le čiriklia anda o čeri si le kuiburi; numa o Šiav le manušesko nai les kai te hodinil lesko šero. Vo phenel jekh avreske: Aidi mansa. Ai vo del palpale: Baria, muk ma angla savořende te žiav te angropov muře dades. Numa o Jesus phenel leske: Muk le mulen t'angropon penge mule; ai tu, žia ta phen e amperetsia le Devleski. Jekh kaver phenel: Me žiava tusa, Baria, numa muk ma angla savořende te žiav te lav mange pozdraimos katar kudala katar muřo kher. O Jesus del les palpale: Kana varekon thol pe te phařavel e phuv ande o kimpo ai porme dikhel palpale, nai vužio ande e amperetsia le Devleski. Pala kudia, o Baro mai thodias efta-var-deš ai dui kaver vortakon ai tradias le po dui angla peste ande sa le foruri ai ande sa le thana kai vo trubulas te žial. Vo phenel lenge: O kjidimos si baro, numa tsiřa si le butiaria. Řudjin le birevos kudalengo kai kjiden te tradel butiaria ande pesko kjidimos. Žiantar; eta, me tradav tumen sar bakroře maškar le ruva. Na len tumensa tišila, či gono, či papuča, ai na den pozdraimos khanikas pe e vurma. Ande varesavo kher kai tume den andre, phenen angla savořende: Ke e patia t'avel pe kado kher! Ai t'avel kothe jekh manuš la patiako, tumari patia hodinila pe leste; te na, voi avela palpale tumende. Bešen ande kudo kher, xan ai pen so dena tumen; ke o butiari niril so den les. Na žian kher kherestar. Ande varesavo foro kai tume den andre, ai kai lena tumendar sama, xan so dena tumen. Sastiaren le nasvalen kai avena, ai phenen lenge: E amperetsia le Devleski pašili paša tumende. Numa ande varesavo foro kai tume den andre, ai či kamena te primin tumen, žian ande le droma, ai phenen: Ame khosas karing tumende e pulberia tumare foroski kai astardili pe amare punře; numa te žianen ke e amperetsia le Devleski pašili. Me phenav tumenge ke ande kudo dies o Sodom avela leske mai tsiřa trudno sar kudo foro. Nasul tuke, Horazin! Nasul tuke, Betsaida! Ke, t'avilinosas ke le čudeni kai sas kerde maškar tumende sas kerde ande e Tira ai ande o Sidon de dumult kamenas von te phiraven tsalia goneske ai te thon vušar pe pende. Sa anda kudia, o dies kai avela e kris, e Tira ai o Sidon avela len mai tsiřa zurales sar tume. Ai tu, Kapernaum, avesa uštiado ži ka o čeri? Tu avesa šiudino tele ži kai si le mule. Kudo kai ašunel tumende ašunel mande, ai kudo kai šiudel tumen šiudel man; ai kudo kai šiudel man šiudel kudales kai tradias man. Le efta-var-deš ai dui avile veselimasa, phenenas: Baria, inke le duxuri nasul patian amaro mui ande tjiro anav. O Jesus phenel lenge: Me dikhavas le Satan sar perel anda o čeri sar jekh strefiaimos. Eta, me dem tumen e putiaria te phiren pe le sapa ai le skorpioni, ai pe sa e zor le dušmanoski; ai khanči či avela te rimol tumen. Numa, na veselin tume ke le duxuri patian tumende; numa veselin tume ke tumare anava si ramome ande o čeri. Inke ande kudia vramia, o Jesus isdrailo veselimastar katar o Svinto Duxo, ai vo phenel: Me luvudiv tu, Tate, Baro pe o čeri ai pe e phuv, ke tu garadian kadala dieli katar le godiaver ai kudale kai sikile, ai ke tu sikadian le ka le glati. Ei, Tate, me luvudiv tu sar ke tu kamlian kadia. Sa kadala dieli sas mange dine katar muřo Dad, ai khonik či žianel kon si o Šiav, numa ferdi o Dad, či kon si o Dad, te na avela o Šiav ai kudo kaske o Šiav kamel te sikavel les. Ai, amboldinisailo karing le vortača, vo phenel lenge rigate: Veseli le jakha kai dikhle so tume dikhlian. Ke me phenav tumenge ke but profeturi ai amperatsi kamle te dikhen so tume dikhlian, numa von či dikhle, kamle t'ašunen so tume ašundian, numa von či ašunde. Jekh zakonari uštilo, ai phenel ka o Jesus, te zumavel les: Birevo, so trubul te kerav t'avel ma o traio pe sakda? O Jesus phenel leske: So si ramome ande o zakono? So gjines tu kothe? Vo del palpale: T'avel tuke drago o Baro, tjiro Del, anda sa tjiro ilo, anda sa tjiro duxo, anda sa tjiri zor, ai anda sa tjiri godji; ai tjiro vortako sar tu. Tu mišto dian palpale, phenel leske o Jesus; ker kudia, ai traisa. Numa vo, kamelas te sikavel pesko čačimos, phenel ka o Jesus: Ai kon si muřo vortako? O Jesus mai lias e vorba, ai phenel: Jekh manuš vulelas anda o Jerusalem ande o Jeriko. Vo pelo maškar le čor kai line pa leste leske tsalia, marde les, ai geletar, mukle les dopaš mulo. Jekh rašai, kai nečaino vulelas sa pa kudia vurma, dikhlias kudale manušes, nakhel inčial. Jekh Levito, kai areslo vi vo ande kudo than, dikhlias les, nakhlo inčial. Numa jekh Samaritano, kai žialas pe o drom, avilo kothe, lias les e mila kana dikhlias les. Vo pašilo, ai phanglias leske řani seliasa, thodias opral vuloi ai mol; porme thodias les pe peski žigania, ninkerdias les ži ka jekh kher sovimasko, ai lias sama lestar. Teharin, lias pestar dui dinari, dias le ka o birtaš, ai phenel: Le sama lestar, ai so tu desa mai but, me dava tuke kana avava palpale. Savo miazol tuke anda kudala trin ke sas o vortako kudalesko kai pelo maškar le čor? Kudo si kai sas leske mila karing leste, dias les palpale o zakonari. Ai o Jesus phenel leske: Žia, vi tu, ker sa kadia. Sar o Jesus sas pe e vurma peske vortakonsa vo dias andre ande jekh gav, ai jekh žiuvli, bušol Marta, lias les ande pesko kher. La sas la jekh phei, bušol Maria, kai, bešelas ka le punře le Bareske, ašunelas leski vorba. E Marta, kerelas butji sar jekh sluga, avili ai phenel: Baria, nai tuke khanči ke muři phei mukel ma korkořo te služiv? Phen lake te ažutil ma. O Baro del la palpale: Marta, Marta, tu gindis tu ai tu miškis tu pala tsiřa dieli. Jekh diela ferdi trubul. E Maria alosardias e laši partia, kai či avela lini latar. O Jesus řudjilas jekh dies ande jekh than alome. Kana getosardias, jekh anda leske vortača phenel leske: Baria, sikiar ame te řudjisaras, sar o Jono sikiardias ka peske vortača. Vo phenel leske: Kana tume řudjina, phenen: Tate! Ke tjiro anav t'avel svintsime, ke tjiri amperetsia t'avel. De ame sako dies amaro manřo diesesko. Jertisar amenge amare bezexa, ke vi ame jertisaras kudalenge kai den ame pe o lažiav; ai na zumav ame. Vo mai phenel lenge: Te si jekh anda tumende ke si les jekh vortako, ai ke žial maškar e riat t'arakhel les te phenel leske: Vortako, de ma užile trin manře, ke jekh anda muře vortača avilo dural mande, ai nai ma khanči te dav les, ai t'avela, andral anda o kher, ke kudo vortako del les palpale: Na diliar ma, o vudar si vuže phandado, muře glati ai me sam ande o than, me naštiv t'uštiav te dav tu manře. Me phenav tumenge, makar ke či uštela te del tut ke sas lesko vortako, vo uštela ke diliares les ai dela tu sogodi trubul tu. Ai me, phenav tumenge: Mangen, ai dena tumen: Roden, ai tume arakhena: Malaven, ai putrena tumenge. Ke kon-godi mangel lel, kudo kai rodel arakhel, ai putren kudaleske kai malavel. Savo si maškar tumenge o dad kai dela jekh bař peske šiaves, te mangela lestar manřo? Vai, te mangela jekh mašio, dela les vo jekh sap ande o than le mašesko? Vai, te mangela vo jekh anřo, dela les vo jekh skorpionka? T'avela kadia, ke tume kai san nasul žianen te den laše dieli ka tumare glati, sar mai but o Dad anda o čeri dela vo o Svinto Duxo kudalenge kai mangen lestar. O Jesus gonil jekh duxo nasul kai sas muto. Kana o duxo anklisto avri, o muto del duma, ai o narodo čudisailo. Numa uni phenen: Si katar o Beelzebul, o prinso le demonongo, ke vo gonil le demonon. Ai le kaver, te zumaven les, mangle lestar jekh semno kai avel anda o čeri. Sar o Jesus žianelas lenge ginduri, vo phenel lenge: Sako amperetsia huladi pe peste si phařadi, ai jekh kher perel pe jekh avreste. T'avela ke o Satan si hulado pe peste, sar leski amperetsia bešela voi? Ke tume phenen ke me goniv le demonon katar o Beelzebul. Ai t'avela me, me te goniva le demonon katar o Beelzebul, tumare šiave, kastar gonina le von? Sa anda kudia von avena tumare krisinitoria. Numa, t'avela ke si katar o nai le Devlesko ke me goniv le demonon, e amperetsia le Devleski avili voi karing tumende. Kana jekh manuš zuralo ai mišto armime arakhel pesko kher, so si lesko si garado. Numa, te jekh mai zuralo avel ai ninkerel les, vo lel lestar sa le armi ande kaste vo gjinelas pe, ai hulavel so si les. Kudo kai nai mansa si pe mande, ai kudo kai či kjidel mansa šiudel. Kana o duxo nasul anklel avri anda jekh manuš, vo žial ande le thana pusti, te rodel te hodinil. Či arakhel, vo phenel: Me žiava palpale ande muřo kher anda savo me anklistem avri; ai, kana arakhel, vo arakhel les šulado ai lašiardo. Atunči vo žialtar, ai vo lel efta aver duxuri mai nasul lestar; von den andre ande o kher, kothe bešen, ai kudale manušeske si mai nasul sar mai anglal. Žikin o Jesus del duma kadia, jekh žiuvli, vazdias o hango maškar o narodo, phenel leske: Veselo o peř kai ninkerdias tu! Veseli le čuča kai pravarde tu! Ai vo del palpale: Veseli mai sigo kudala kai ašunen e vorba le Devleski, ai kai arakhen la! Sar o narodo kjiden pe but, vo lias pe te phenel: Kadia vitsa si jekh vitsa nasul; voi mangel jekh čudenia; či avela lenge dini numa e čudenia kuda katar o Jonas. Ke, sar o Jonas sas jekh semno kudalenge anda o Ninive, sa kadia o Šiav le manušesko avela jekh pe kadia vitsa. E amperatsiasa katar e rig tele uštela, o dies kai avela e kris, le manušenge kudala vitsatar ai dela len strafo, ke voi avel anda o gor la phuviako t'ašunel o godiaverimos katar o Salomon; ai eta, si kathe vareso mai but sar o Salomon. Le manuš anda o Ninive uštena, o dies kai avela e kris, kudala vitsasa ai dena la strafo, ke či keisaile kana dias duma o Jonas! ai eta, si kathe vareso mai but sar o Jonas. Khonik či del jag jekh lampa te thol les ande jekh than garado tela e vadra, numa thon les pe e vadra, eta ke kudala kai den andre te dikhen e vedaria. Tjiri jakh si o lampa tjire statosko. Kana tjiri jakh si laši, sa tjiro stato si te strefial; numa kana tjiri jakh nai laši, tjiro stato si ande o tuniariko. Le sama ke e vedaria kai si ande tute te na avel tuniariko. T'avela ke tjiro stato strefial, ai či jekh partia nai ande o tuniariko, vo avela sa te strefial, sar ke jekh lampa kerel te strefial. Žikin o Jesus del duma, jekh Fariziano řudjil les t'avel te xal leste. Vo del andre, ai thodias pe pala e skafidi. O Fariziano dikhlias čudimasa ke či xaladias peske vast mai angla o xamos. Numa o Baro phenel leske: Tume le Farizianuri, tume khosen avrial o taxtai ai o tiari, ai ande tumen andre si o čorimos ai o nasulimos. Dile! Kudo kai kerel so si avrial či kerdias vo vi so si andral? Den mai sigo so si andral le čořenge, ai eta, sako diela avela vuži tumenge. Numa nasul t'avel tumenge, Farizianuri! Ke tume pokjinen jekh pe deš pa e menta, pa e ruta, ai pa sa le čara, numa tume muken rigate e kris ai o kamimos le Devlesko; kudala trubulas tume te keren bi te bustren le kaver dieli. Nasul t'avel tumenge, Farizianuri! Ke si tumenge drago le mai angluni skamina ande le khangeria židovitsko, ai te den tume pozdraimos pe le platsuri narodoske. Nasul t'avel tumenge! Ke tume si sar le groapoševuri kai či dikhion, ai pe save le manuš phiren bi te žianen. Jekh zakonari lias e vorba, ai phenel leske: Birevo, sar tu des duma, vi kadia amen des pe o lažiav. Ai o Jesus del palpale: Nasul t'avel vi tumenge, zakonaria! Ke tume phariaren le manušen pharimos trudno te ningeren ai ke tume či asban o pharimos jekhe tumare naiesa te ažutin len. Nasul t'avel tumenge! Ke tume vazden le groapoševuri le profetonge kai tumare dada mudarde. Tume san kadia martururi anda so kerde tumare dada, ai tume žian pala lende; ke von, von mudarde le profeton, ai tume, tume vazden lenge groapoševuri. Sa anda kudia o Del ande pesko godiaverimos phendias: Me tradava lenge profeton ai apostolon; von mudarena le unen ai marena le kavren. Eta t'avel manglo katar kadia vitsa o rat katar sa le profeturi kai sas dino muial dekin kerdilias e lumia, de katar o rat katar o Abel ži ka o rat katar o Zakaria, mudardo maškar o altari ai o templo; ei, me phenav tumenge, avela manglo katar kadia vitsa. Nasul t'avel tumenge, zakonaria! Ke tume lian e kjeia te putren le vudara le žianimaske, tume či dian andre, ai tume či muklian te den andre kudalen kai kamenas te den andre. Kana anklisto avri kothar, le zakonaria ai le Farizianuri line pe te kjiden les zurales, ai keren te del duma pe but dieli; zumaven les, te len sama uni vorbi kai anklen anda lesko mui. Pe kudia, le žene kjide pe miensa kadia t'ičaren pe jekh avres, o Jesus lias pe te phenel peske vortakonge: Angla savořende, len tume sama katar e drosda le Farizianongi, ke si o xoxaimos. Nai khanči garado kai te na anklel avri, či garado te na avel prinžiardo. Sa anda kudia sogodi tume phenena ande o tuniariko avela ašundo ande e vedaria, ai so tume phenena ka o kan ande le sobi avela phendo pe le čardakuri. Me phenav tumenge, tumenge kai san muře vortača: Na daran katar kudala kai mudaren o stato ai kai, pala kudia, naštin te keren mai khanči. Me sikavava tumenge kastar tume trubul te daran. Daran katar kudo kai, kana mudarela, si les e putiaria te šiudel ande e pařa; ei, me phenav tumenge, katar kudo tume trubul te daran. Či bikjinen panž čirikliořa pe dui šuvia? Numa, či jekh anda lende nai busterdo angla o Del. Ai jekh fialo le bal pa tumaro šero si gjinde. Te na daran; tume san mai kuč sar but čirikliořa. Me phenav tumenge. Kon-godi phenela pa mande angla le manuš, o Šiav le manušesko vo phenela pa leste angla le andželi le Devleske; numa kudo kai dela ma palpale angla le manuš avela dino rigate angla le andželi le Devleske. Ai kon-godi phenela pa o Šiav le manušesko, avela leske jertime; numa kudo kai prasal pe o Svinto Duxo, či avela leske šoha jertime. Kana ningerena tumen angla le khangeria židovitsko, angla le krisinitoria ai le rai bare, na len sama sar tume čačiona vai so tume phenena, ke o Svinto Duxo sikiarela tumen ka kudo časo so trubul tume te phenen. Varekon phenel le Jesusoske, maškar o narodo: Birevo, phen muře phraleske te hulavel mansa so muklias amaro dad. O Jesus del les palpale: O, manuš, kon thodias ma t'avav tumaro krisinitori, vai te hulavav tumenge? Porme phenel lenge: Len tuma sama mišto katar sa o xanžvalimos; ke o traio jekhe manušesko avel nai ferdi anda leske mandjinata, makar t'avela les but. Ai vo phenel lenge kadia paramiči: Le phuvia jekhe manušeske barvale dine les pria but. Ai vo gindil pe ande peste, phenelas: So kerava me? ke nai ma than kai te thav o kjidimos. Eta, phenel vo, so me kerava: Me peravava muře stali, me vazdava mai bare, me thova kothe sa so kjidem ai sa muře mištimata; ai me phenava muře duxoske: Muřo duxo, si tu but mištimata thodine rigate pe but berš; hodinisar, xa, pi, ai veselisavo. Numa o Del phenel leske: Dilia! kadia riat inke tjiro duxo avela lino; ai so tu lašiardian, kaske avela? Kadia si kudaleske kai kjidel mandjinata peske, ai kai nai barvalo le Devleske. O Jesus phenel atunči peske vortakonge: Sa anda kudia me phenav tumenge: Na daran pala tumaro traio de so tume xana, či pala tumaro stato sar avela uriado. O traio si mai but sar o xamos, ai o stato mai but sar le tsalia. Len sama sar si le kurunga: Von či bariaren ai či kjiden, len nai le či kherořo či stala; ai o Del pravarel le. Sar či san tume mai kuč le čirikliandar! Kon anda tumende, te nekežil pe, šai lunžiarel pesko traio? Te si kadia ke tume naštin te keren e mai tsinoři diela, sostar gindin tume anda so mai si? Len sama sar barion le luludia: Von či keren butji ai či khuven; numa me phenav tumenge ke inke o Salomon, ande sa pesko vestimos, nas uriado sar jekh anda lende. T'avela ke o Del uriavel kadia e čar kai si adies ande le kimpuri ai ke tehara avela šiudini ande o bov, sar te na mai but či uriavela tumen vo, žene kai tsiřa patian? Ai tume, na roden so xana ai so pena, ai na daran. Ke sa kudala dieli, si kudala thema kai či patian kai roden le. Tumaro Dad žianel so trubul tumen. Roden mai sigo e amperetsia le Devleski; ai sa kudala dieli avena tumenge dine opral. Na daran, tsinoři trupa; ke tumaro Dad kamel te del tumen e amperetsia. Bikjinen so si tumen, ai den ka le čoře. Keren tumenge tišili kai či rimon pe, jekh mandjin kai či bilal ande o čeri, kai le čor či pašion, ai kai o kermo či phařavel. Ke kothe kai si tumaro mandjin, vi kothe si tumaro ilo. Ke tumare prasti t'aven phangle, ai tumare lampasa dine jag. Ai tume, aven jekh fialo sar le manuš kai ažiukeren ke lengo birevo avel pa o abiav, eta te putren leske sar vo aresela ai malavela ande o vudar. Veseli kudala služi kai o birevo, kana aresela, arakhela ke len sama! Me phenav tumenge čačimasa, vo phandela opre pesko tsolo, thola le pala peski skafidi, ai pašiola te služil le. Te avela vo maškar e riat, veseli kudala služi, te arakhela len ke len sama! Te žianen mišto, te si o birevo le kheresko te žianela ka če časo o čor si t'avel, vo lela sama ai či mukela te phařavel lesko kher. Vi tume, arakhen tume, ke o Šiav le manušesko avela ka o časo kai tume či gindina. O Petri phenel leske: Baria, si amenge, vai savořenge, ke tu phenes kadia paramiči? Ai o Baro phenel: Savo si o manuš čačo kai lesko birevo dela leske te lel sama pa pesko kher ai kai o birevo thola les baro pe peske žene, te del len te xan ande e vramia kai trubul? Veselo kudia sluga, kai lesko birevo, kana aresel, arakhel les ke kerel kadia! Me phenav tumenge čačimasa, vo thola les baro pe sa leske mištimata. Numa, te si kudia sluga te phenel ande peste: Muřo birevo či avel sigo, vo lias pe te marel le slugen ai le sluganken, te xal, te pel ai te matiol. O birevo kudala slugako avela o dies kai vo či ažiukerel les ai o časo kai vo či žianel, vo šinela les kotora, ai dela les leski partia kudalensa kai nai čače. E sluga kai, žianelas so kamel lesko birevo, či lašiardias khanči ai či kerdias sar vo kamlias, avela mardo butivar. Numa kudo kai, či žianglias, kerdias kudala dieli pala save trubul t'avel mardo, avela mardo tsiřa. Mangena but katar kudala kaske dine but, ai mangena mai but katar kudo kaske dine mai but. Me avilem te šiudav jekh jag pe e phuv, ai sode kamlemas me, te avel vuže dino jag! Si jekh bolimos kai trubul te bolen ma ande leste, ai sode ažiukerav t'avel kudia! Gindin tume ke me avilem t'anav e patia pe e phuv? Niči, phenav tumenge me, numa te hulavav. Ke d'akanara panž ande jekh kher avena hulade, trin pe dui, ai dui pe trin; o dad pe o šiav ai o šiav pe o dad, e dei pe e šei ai e šei pe e dei, e sakra pe e bori ai e bori pe e sakra. Vo mai phenel le narodoske: Kana tume dikhen jekh nuvero ke uštel karing o stingo, tume phenen strazo: O brišin avel. Ai vi avel kadia. Ai kana tume dikhen ke phurdel e balval katar e rig tele, tume phenen: Avela tato, ai kudia aresel. Athaitori! Tume žianen sar si e phuv ai o čeri; sar či den tume pe o gor kadia vramia? Ai sostar či den tume pe o gor anda tumende so si vorta? Kana tu žias tumare dušmanosa angla o krisinitori, zumav pe e vurma te šiudes tu lestar, daratar ke ningerela tu angla o krisinitori, ke o krisinitori dela tu ande o vast ka o fitsiri la krisako, ai ke kudo thola tu ande e temnitsa. Me phenav tuke, tu či anklesa avri kothar žikin či pokjinesa ži ka o mai paluno šuv. Sa ande kudia vramia, uni manuš kai sas kothe phenen le Jesusoske so areslias le manušen ande e Galilea kai o Pilato mudardias ande e vramia kai von dine sakrifiso. Vo del len palpale: Gindin tume ke kudala Galileanuri sas von mai bare bezexale de sar le kaver Galileanuri, ke von kjinuisaile kadia? Niči, me phenav tumenge; numa tume te na keina tume, vi tume xasavona. Vai mišto, kudala deš-oxto žene pe kaste pelo o turo ande o Siloe ai mudardias len, gindin tume ke von sas mai but došale sar sa kudala kai bešen ande o Jerusalem? Niči, me phenav tumenge. Numa tume te na keina tume, vi tume xasavona. Vo mai phenel kadia paramiči: Jekh manuš sas les jekh kopači figengo ande peski rez. Vo avilo te rodel fruti, ai vo či arakhlias. Atunči phenel kudaleske kai kjidel e rez: Eta trin berš ke me avav te rodav fruta ka kado kopači, ai me či arakhav. Šinen les! Sostar lel vo jekh than intaino? Kudo kai kjidel e rez phenel leske: Baria, mai muk les kado berš, hunavava krugom lestar, ai thava gosni. Amburim mai angle dela vo fruta, te niči, tu šinesa les. O Jesus sikiarelas ande jekh khangeri židovitsko, o dies o sabato. Ai eta, sas kothe jekh žiuvli kai sas ande late jekh duxo kai bangiarelas la de deš-oxto berš; voi sas bangi, ai naštilas či jekh fialo te bešel vorta. Kana vo dikhlias la, o Jesus del duma lasa, ai phenel lake: Žiuvlio, tu san skipime anda tjiro bangimos. Ai vo thodias pe late le vast. Strazo voi bešli vorta, ai naisil le Devles. Numa o birevo katar e khangeri židovitsko, xoliariko ke o Jesus kerdias kudia diela te sastiol jekh dies o sabato, phenel le narodoske: Si šov dies te keren butji; aven te sastion kudala dies, ai na o dies le sabatosko. Athaitori! del les palpale o Baro, nai sako anda tumende, o dies o sabato, či putrel ande peski stala peske guruves vai peske magares, te ningerel les te pel? Ai kadia žiuvli, kai si jekh šei katar o Abraham ai ke o Satan ninkerelas la phangli de deš-oxto berš, či trubulas te skipin la katar kudo lanso o dies o sabato? Sar vo delas duma kadia, sa leske dušmaia sas pe lažiav mišto, ai o narodo veselilas pe anda sa le dieli veseli kai vo kerelas. Vo mai phenel: Sar si e amperetsia le Devleski, pe kaste te phenav la me? Si jekh fialo sar jekh simintsa garčitsaki kai jekh manuš lias ai šiudias la ande pesko kimpo; voi barili, areslo kopači, ai le čiriklia anda o čeri bešen ande lake patria. Vo mai phenel: Sar te sikav tumenge me e amperetsia le Devleski? Si jekh fialo sar e drosda kai jekh žiuvli lias ai thodias ande trin mezuri ařo, t'uštel sa o ařo. O Jesus nakhelas le foruri ai le gava, sikiarelas, ai žialas pe o drom karing o Jerusalem. Varekon phenel leske: Baria, si ferdi tsiřa žene kai si skipime? Vo del len palpale: Thon zor te den andre pa o vudar tang. Ke, me phenav tumenge, but roden te den andre, ai naština. Kana o birevo le kheresko uštela ai phandavela o vudar, ai ke tume san avri, tume lena tume te malaven ande o vudar, phenena: Baria, Baria, puter amenge! Vo dela tumenge palpale: Me či žianav katar san tume. Atunči tume thon tume te phenen: Ame xaliam ai piliam tusa, ai tu sikiardian ande amare vulitsi. Ai vo dela palpale: Me phenav tumenge, me či žianav katar tume san; žiantar mandar, tume sa, butiaria bezexale. Kothe avela roimata ai grintsina le dand, kana tume dikhena le Abraham, le Isak ai le Jakob, ai sa le profeton, ande e amperetsia le Devleski, ai ke tume avena šiudine avri. Avena anda e rig e čači ai anda e rig e stingo, opral ai telal; ai von thona pe pala e skafidi ande e amperetsia le Devleski. Ai eta, avela anda le mai palune kai avena le mai anglune, ai anda le mai anglune kai avena le mai palune. Sa kudo dies, uni Farizianuri aven te phenen leske: Žiatar, žia katar, ke o Herodo kamel te mudarel tu. Vo del le palpale: Žian ai phenen ka kudia lisitsa: Eta, me goniv le demonon ai me sastiarav adies ai tehara, ai o trito dies getova. Numa trubul me te phirav adies, tehara, ai o dies pala kudo, ke či avela mišto ke jekh profeto te avel mudardo avrial pa o Jerusalem. Jerusalem, Jerusalem, kai mudares le profeton ai kai mudares bařensa kudalen kai si tute tradine, sodivar me kamlem te kjidav tjire glaten, sar jekh khaini kjidel peske puien tela peske phaka, ai tume či kamlian. Eta, tumaro kher avela tumenge muklo; numa, me phenav tumenge, tume či mai dikhena ma, žikin či tume phenena: Svintsime t'avel kudo kai avel ande o anav le Baresko! O Jesus dias andre, jekh dies o sabato, ande o kher katar jekh anda le birevia katar le Farizianuri, te žial te xal, le Farizianuri len sama pe leste. Ai eta, jekh manuš, sas les jekh nasvalimos šuvliarelas les, O Jesus lias e vorba, ai phenel ka le zakonaria ai ka le Farizianuri: Slobodo, vai nai, te sastiares o sabato? Von ašile muto. Atunči o Jesus lias kudale manušes, sastiardias les, ai tradias les. Porme phenel lenge: Savo anda tumende, t'avela lesko šiav vai lesko guruv te perel ande jekh xaing, či ankalavela les strazo, o sabato? Ai von naštisarde te den khanči palpale pe kudia. Vo mothol atunči jekh paramiči ka le gosti, ke dikhelas ke von alon le mai anglune thana; ai vo phenel lenge: Kana tu avesa akhardo sar gosto varekastar ka o abiav, na tho tu pe o mai angluno than, daratar ke si maškar le gosti jekh ženo mai vestime tutar, ai ke kudo kai akhardias tumen sar gosti le jekhes ai le kavres avel te phenel tuke: Muk o than kakale ženeske. Tuke avela atunči o lažiav te les o mai paluno than. Numa, kana tu avela akhardo sar gosto, žia tai tho tu ka o mai paluno than, eta ke, kana kudo kai akhardias tu avela, vo te phenel tuke: Muro vortako, ankli mai opre. Atunči tuke avela pativ angla sa kudala kai si pala e skafidi tusa. Ke kon-godi uštela avela tele, ai kon-godi si tele avela uštiado. Vo mai phenel ka kudo kai akhardias les: Kana tu desa te xan o xamos ratiako vai diesesko na akhar sar gosti tjire vortakon, či tjire phralen, či tjire niamon, či tjire vortakon le barvale. Te keres kadia vi von si t'akharen tu ai te keren tuke sa jekh fialo. Numa, kana tu des jekh pativ, akhar le čořen, le bangen, le langanen, le kořen. Ai tu avesa veselo ke von naštin te keren tuke sa jekh fialo; ke avela tuke palpale kana živindina le vorta. Jekh anda kudala kai sas kothe pala e skafidi, pala ke ašundias kudala vorbi, phenel ka o Jesus: Veselo kudo kai lela pesko xamos ande e amperetsia le Devleski! Ai o Jesus del les palpale: Jekh manuš del jekh baro xamos, ai vo akhardias but ženen. Ka o časo kai si te xan, vo tradias peska sluga te phenel le gostenge: Aven, sa si vuže thodino. Numa sa ande jekh than line pe te jertin pe. O mai angluno phenel leske: Me kjindem jekh kimpo, ai musai si mange te žiav te dikhav les; jertisar ma, me mangav tu. Jekh kaver phenel: Me kjindem deš guruven, ai me žiav te zumavav le; jertisar mange, me mangav tu. Jekh kaver phenel: Me akana ansurisailem, sa anda kudia naštiv t'avav. E sluga avili palpale, phendias kudala dieli ka pesko birevo. Atunči o birevo le kheresko xoliariko phenel peska slugake: Žia sigo ande le platsuri ai ande le vulitsi le foroske, ai an kathe le čořen, le bangen, le kořen ai le langanen. E sluga phenel: Birevo, so tu dian ordina sas kerdo kudia, ai mai si than. Ai o birevo phenel la slugake: Žia ande le vurmi ai pe e rig le kimposki ai kudalen kai tu arakhesa, tho pe lende zor te den andre, eta ke muřo kher t'avel pherdo. Ke, me phenav tumenge, či jekh anda kudala kai sas akharde sar gosti či zumavena anda muřo xamos. But žene žianas pe o drom le Jesusosa. Vo amboldel pe, ai phenel lenge: T'avela varekon mande, ai te na vuřitsila peske dades, peska da, peska řomnia, peske šiaven, peske phralen ai peske pheian, ai inke pesko duxo, naštil t'avel muřo vortako. Ai varekon te na ningerela pesko trušul, naštil t'avel muřo vortako. Ke, savo anda tumende, te kamela te vazdel jekh turo, či bešel tele angla savořende te gjinel sode aresel leske ai te dikhel te šai getol, daratar ke te thol pe te vazdel, ai naštil te getol, sa kudala kai dikhena les asan lestar. Phenena: Kado manuš lias pe te vazdel, ai naštil te getol! Vai savo amperato, te žiala te kerel marimos pe jekh kaver amperato, či bešel tele angla savořende te lel sama te šai daštil, deš mii manušensa, te žial pe kudo kai avel pe leste te lel les biš miensa. Te naštil te daštil, žikin o kaver amperato si inke dur, vo tradel leske manušen te mangen lestar e patia. Kadia, varekon anda tumende te na mukela sogodi si lesko naštil t'avel muřo vortako. O lon si jekh laši diela; numa t'avela ke o lon xasarel pesko gusto, sosa mai lašiaren les? Vo nai lašio či la phuviake, či la gosniake; šiuden les avri. Kudo kai si les kan t'ašunel, ašunela! Sa kai kjiden e taksa ai le žene kai nai lengo traio lašio pašion paša o Jesus t'ašunen leste. Ai le Farizianuri ai le zakonaria bulguin, phenenas: Kado manuš primil le ženen kai si le nasul traio, ai xal lensa. Numa vo phenel lenge kadia paramiči: Savo manuš maškar tumende, t'avela les jekh šel bakroře, ai te xasarela jekhes, či mukela le inia-var-deš ai inia kavren ande o pusto te žial pala kudo kai si xasardo, ži kai či arakhel les? Kana vo arakhel les, vo thol les veselimasa pe le zeia, ai, palpale ka o kher, vo akharel peske vortakon ai kon si paša leste, ai phenel lenge: Veselin tume mansa, ke me arakhlem muře bakrořes kai sas xasardo. Sa jekh fialo, me phenav tumenge, avela mai but veselia ande o čeri pala jekh bezexalo kai keil pe, ke pala inia-var-deš ai inia kai či trubul te kein pe. Vai savi žiuvli, t'avela la deš palianki, ai te xasarela jekh, či del jag jekh lampa, ai rodel la mišto, ži kai či arakhel la? Kana voi arakhel la, voi akharel peske vortakon ai kon si paša late, ai phenel: Veselin tume mansa, ke me arakhlem e palianka kai me xasardemas. Sa jekh fialo, me phenav tumenge, si veselia angla le andželi le Devleske pala jekh bezexalo kai keil pe. Vo mai phenel: Jekh manuš sas les dui šiave. O mai terno phenel peske dadeske: Muřo dad, de ma e partia kai trubul t'avel muři. Ai o dad huladias so si lesko. Uni dies pala kudia, o mai terno šiav, kjidias sa, gelotar pe jekh them dur, kai biladias pesko mištimos, trailas ande e kurvetsia. Kana sa xalias, jekh bari bokh aresli ande o them, ai vo areslo ke trubul les sa. Vo gelo te thol pe te kerel butji kai jekh kai bešel ande o them, kai tradias les ande peske kimpuri t'arakhel le balen. Vo kamelas te pravarel pe anda so xanas le bale, numa khonik či delas les. Gindisailo ande peste, vo phenel peske: Sode butiaria ka muřo dad si len but manřo, ai me, kathe, merav bokhatar! Me uštiava, me žiava karing muřo dad, ai me phenava leske: Muřo dad, me kerdem bezex karing o čeri ai karing tute, me či mai sim harniko t'akharen ma tjiro šiav; ker anda mande sar jekh anda tjire butiaria. Ai vo uštilo, ai gelo karing pesko dad. Sar vo sas dur, lesko dad dikhlias les ai lias les e mila, vo našlo te šiudel pe ka leski koř ai čimidias les. O šiav phenel leske: Muřo dad, me kerdem bezex pe o čeri ai pe tute, me či mai sim harniko t'akharen ma tjiro šiav. Numa o dad phenel ka peske služi: Anen sigo e mai laši bunda, ai thon la pe leste; anen leske jekh angrusti pe o nai, ai papuča pe le punře. Anen le vitselos kai ame thuliardiam ai mudaren les. Xas ai veselisavas; ke muřo šiav kai eta lo sas mulo, ai vo avilo ka o traio; vo sas xasardo, ai les arakhliam les. Ai von line pe te veselin pe. Eta, o šiav o mai baro sas ande le kimpuri. Kana vo avilo ai pašiol paša o kher, vo ašundias e musika ai le khelimata. Vo akharel jekhes anda le služi, ai pušel lestar so si. Kudo sluga phenel leske: Tjiro phral avilo palpale, ai, ke vo si sasto vesto, tjiro dad mudardias le vitselos thuliarde. Les lias les e xoli, ai či kamelas te del andre. Lesko dad anklisto avri, ai mangel les te del andre. Numa vo del palpale ka pesko dad: Eta, de kaiti but berš kai me služiv tu, bi šoha te šinav tjire ordini, ai šoha tu či dian ma jekh bakrořes te veseli ma muře vortakonsa. Ai kana tjiro šiav areslo, kudo kai xalias tjiro mištimos le kurvensa, leske tu mudardian le vitselos thuliarde! Muři glata, phenel leske o dad, tu san sakda mansa, ai sogodi si ma si tjiro; numa trubul t'avas veseli ai te veselisavas, ke tjiro phral eta lo sas mulo ai vo avilo ka o traio, vo sas xasardo ai arakhliam les. O Jesus mai phenel peske vortakonge: Jekh manuš barvalo sas les jekh kai lias sama pa lesko kher. Ande jekh dies varekon phendias leske ke kudo manuš xalas leske mištimata. Vo akharel les, ai phenel leske: So ašunav ke phenen pa tute? Phen mange sar kerdian so dem tu te keres, ke tu naštisa te mai les sama katar muře mištimata. O manuš phenel ande peste: So kerava me, sar muřo birevo lel mandar te lav sama leske mištimata? Kerava me butji e phuv? Me naštiv. Mangava? Lažiav mange. Me žianava so si te kerav, t'aven žene kai šai len man ande penge khera kana šiudena ma anda muři butji. Ai, kerdias t'anen sako kai kamelas leske birevoske, vo phenel ka o mai angluno: Sode kames tu ka muřo birevo? Jekh šel mezuri vuloi, del vo palpale. Ai vo phenel leske: Le tjiro lil, beš tele sigo, ai ramosar panž-var-deš. Vo phenel atunči jekh avreske: Ai tu, sode kames tu? Jekh mia mezuri gjiv, del vo palpale. Ai vo phenel leske: Le tjiro lil, ai ramosar oxto šel. O birevo luvudil les ke kerdias mišto, ke le žene kadala lumiake si mai xitri ande le dieli jekh avresa sar kudala kai si ande e vedaria. Ai me, me phenav tumenge: Keren tumenge vortača le barvalimatansa kadala lumiake, te len tumen von ande penge tabernakuli pe sakda, kana avela te trubul tumen. Kudo kai si čačo ande le mai tsinoře dieli avela vorta vi ande le bare, ai kudo kai nai vorta ande le tsinoře dieli či avela vorta či ande le bare. T'avela ke či san čače ande le barvalimata kai nai laše, kon dela tumen sama ka le barvalimata čače? Ai te tume či sanas čače ande so si le avresko, kon dela tumen so si tumaro? Či jekh sluga naštil te služil do birevon. Ke, vai ke vuřitsila le jekhes ai kamela le kavres; vai ke astardiola ka jekh ai vuřitsila le kavres. Tume naštin te služin le Devles ai le Love. Le Farizianuri, kai sas xanžvale, ašunenas vi von sa kudia, ai marena mui lestar. O Jesus phenel lenge: Tume, tume roden te miazon vorta angla le manuš, numa o Del žianel tumare ile; ke so si uštiado angla le manuš si jekh žiungalimos angla o Del. O zakono ai le profeturi aresle ži ka o Jono; de kothar, e amperetsia le Devleski si phendi, ai sako thol zor te del andre. Mai sigo šai nakhen o čeri ai e phuv, de sar te perel ferdi e mai tsinoři bukva de so si ande o Zakono. Kon-godi mukel peska řomnia ai lel jekha avria kerel jekh kurvetsia, ai kon-godi lel jekha řomnia mukli katar pesko řom kerel jekh kurvetsia. Sas jekh manuš barvalo, kai sas pe leste phanřeski ai fino tsalia, ai kai sako dies sas les veselo ai šukar traio. Jekh čořo, bušolas Lazar, sovelas ka lesko vudar, pherdo phugnia, ai kamelas te kjidel le kotora kai perenas pa e skafidi le barvaleski; ai inke le žiukel avenas te čařen leske phugnia. O čořo mulo, ai ningerde les le andželi ande o peř le Abrahamosko. O barvalo vi vo mulo, ai sas angropome. Kothe kai si le mule, vo vazdias le jakha; ai, žikin vo sas kothe kai kjinuin les, vo dikhel de dural le Abraham, ai le Lazar paša leste. Vo tsipil: Tate Abraham, t'avel tuke mila mandar, ai trade le Lazar, te makhel o gor peske naiesko ande o pai ai te šudrarel muři šib; ke me pria but kjinuiv ande kadia pařa. O Abraham del palpale: muři glata, de tu godji ke tu lias tjire mištimata kana sas tu traio, ai ke o Lazar lias peske nasulimata ka pesko traio; akana vo si kathe řesgime, ai tu, tu kjinuis. Mai, si maškar amende ai tumende jekh bari hunia, eta ke kudala kai kamena te nakhen kathar karing tumende, vai kothar amende, naštin te keren. O barvalo phenel: Me řudjiv tu, tate Abraham, te trades le Lazar ande o kher muře dadesko; ke mai si ma panž phral. Si te phenel lenge kadala dieli, eta te na aven vi von ande kado than kai kjinuin. O Abraham del palpale: Len si le o Moše ai le profeturi; t'ašunen lende. Ai vo phenel: Niči, tate Abraham, numa t'avela varekon anda le mule ke žial karing lende, von keina pe. Ai o Abraham phenel leske: Te na ašunena von ka o Moše ai ka le profeturi, von či muken pe te patian makar ke varekon anda le mule živindila. O Jesus phenel ka peske vortača: Musai sakda te aven dieli le manušenge te keren bezex numa nasul kudaleske kai anel le! Mai mišto avilino leske te thon leske pe e koř jekh bař ašavesko ai ke te šiuden les ande e maria, ke te kerela te perel jekh anda kudala tsinoře. Len tume sama tume. T'avela ke tjiro phral kerdias bezexa, sikiar les; ai, te keila pe, jertisar leske. Ai t'avela ke vo kerdias bezexa pe tute eftavar ande jekh dies, ai ke eftavar avela tute, phenela: Me keiv ma, tu jertisa leske. Le apostoli phenen ka o Baro: Butiar amaro patiamos. Ai o Baro phenel: T'avela tumen patiamos sar jekh simintsa garčitsaki, tume phenena ka kudo sikomoro: Ankli avri anda e vuna, ai tho tu te barios ande e maria, ai vo patiala tumende. Kon anda tumende, si les jekh sluga kai hunavel vai garavel leske žigenien, phenela leske, kana avel pa le kimpuri: Pašio sigo, ai av pala e skafidi? Či phenela leske vo aver fialo: Lašiardo te xav, phande tu, ai služisar ma, žikin či xalem ai pilem; pala kudia, tu, tu xasa ai pesa. Kamela vo kudala slugake ke kerel so sas leske dini ordina? Tume sa kadia, kana tume kerdian sa sogodi sas tume ordina, phenen: Ame sam služi intaino, ame kerdiam so trubulas te keras. O Jesus, gelo ande o Jerusalem, nakhelas maškar e Samaria ai e Galilea. Sar vo delas andre ande jekh gav, deš žiungale nasvale avile angla leste. Bešen dural, von vazde o hango, ai phenenas: Jesus, Birevo, t'avel tuke mila amendar! Sar vo dikhlias len, vo phenel lenge: Žian te sikaven tume ka le raša. Ai, žikin von gele, areslias ke von sastile. Jekh anda lende, dikhlias ke sastilo, avilo palpale, vestilas le Devles zurale hangosa. Vo pelo pe peski fatsa ka le punře le Jesusoske, ai naisardias les. Sas jekh Samaritano. O Jesus, lias e vorba, phenel: Le deš nas von sastiarde? Ai le inia kaver, kai le von? Arakhadilias ferdi kado streino t'avel ai te del te naisil le Devles? Porme phenel leske: Ušti, žia; tjiro patiamos skipisardias tu. Le Farizianuri pušen katar o Jesus kana avela e amperetsia le Devleski. Vo del len palpale: E amperetsia le Devleski či avel kadia te šai dikhas la. Či phenena: Voi si kathe, vai, voi si katka. Ke eta lo, e amperetsia le Devleski si maškar tumende. Ai vo phenel le vortakonge: Dies avena kai tume kamena te dikhen jekh anda le dies katar o Šiav le manušesko, ai tume či dikhena. Phenena tumenge: Vo si kathe, vo si katka. Na žian, na našen pala leste. Ke, sar o strefiaimos strefial ai del vedaria de anda jekh gor le čeresko ži ka o kaver gor, kadia avela o Šiav le manušesko ande kudo dies. Numa trubul angla savořende ke te kjinuil but, ai t'avel šiudino katar kadia vitsa. So aresliasas ande e vramia katar o Noa sa kadia aresela ka le dies katar o Šiav le manušesko. Le manuš xana, pena, ansurina pe ai ansurina penge šiaven, ži ka o dies kai o Noa dias andre ande o čuno; o baro pai avilo, ai xasardias le sa. So aresliasas ande e vramia katar o Lot sa kadia avela. Le manuš xana, pena, kjinena, bikjinena, thona te bariol, vazdena. Numa o dies kai o Lot anklisto avri anda o Sodom, jekh brišin jag ai sulfuro pelo anda o čeri, ai kerdias sa te xasavon. Sa kadia avela o dies kai o Šiav le manušesko sikadiola. Ande kudo dies, ke kudo kai si pe o čardako, ai kai si leske dieli ande o kher, te na vulel te lel le; ai ke kudo kai si ande le kimpuri vi vo te na avel palpale. De tume godji ka e řomni le Lotoski. Kudo kai rodela te skipil pesko traio xasarela les, ai kudo kai xasarela les arakhela les. Me phenav tumenge, ande kudia riat, anda dui žene kai si ande jekh pato, jekh avela lino ai o kaver muklo; anda dui žiuvlia kai inčaren e simintsa ande jekh than, jekh avela lini ai e kaver mukli. Anda dui manuš kai avena ande jekh kimpo, jekh avela lino ai o kaver muklo. Le vortača phenen leske: Kai avela, Baria? Ai vo del palpale: Kai avela o stato mulo, kothe kjidena pe le uluria. O Jesus mothol lenge jekh paramiči, te sikavel lenge ke trubul sakda te řudjin, ai te na muken pen. Vo phenel: Sas ande jekh foro jekh krisinitori kai nas leske dar katar o Del ai kai či lelas sama khanikastar. Mai sas ande kudo foro jekh phivli kai avelas te phenel leske: Ker mange kris pe kudo kai si muřo dušmano. But vramia či kamlias. Numa atunči vo phenel ande peste: Makar ke či darav katar o Del; ai ke či lav sama khanikastar, numa, ke sar kudi žiuvli diliarel ma, me dava la kris, eta te na avel butivar te diliarel muřo šero. O Baro mai mothol: Ašunen so phenel o krisinitori nasul. Ai o Del či kerela vo kris kas vo alosardias kai mangenas lestar ko riat ai ko dies, ai či kerela vo pe lenge? Me phenav tumenge, vo dela len sigo kris. Numa, kana o Šiav le manušesko avela, arakhela vo patiamos pe e phuv? Mai phenel kadia paramiči, kai dikhel uni ženen kai gindin pe ke von si vorta, ai kai či len sama katar le kaver: Dui manuš ankliste te žian ka o templo te řudjin; jekh sas Fariziano, ai o kaver jekh kai kjidel e taksa. O Fariziano, pe punřende, řudjilas kadia ande peste: O Del, me naisiv tuke ke me či sim sar le kaver manuš, kai čoren, si nasul, ai keren kurvetsia, vai sar kako kai kjidel e taksa. Me postiv du-var o kurko, me dav deš anda jekh šel anda sogodi niriv. O manuš kai kjidel e taksa ninkerel pe dur, či tromal vadžai te vazdel le jakha pe o čeri; numa malavel pesko kolin, phenel; O Del, na av xoliariko pe mande, kai sim bezexalo. Me phenav tumenge, kudo vulisto ande pesko kher vorta, mai mišto sar o kaver. Ke kon-godi vazdiol avela teliardo, ai kudo kai teliol avela vazdino. Vi mai anen leske tsinoře glaten, eta t'asbal le. Numa la vortača, dikhle kudia, xoliaile pe kudala kai anen le. Ai o Jesus akharel le, ai phenel: Muken t'aven mande le tsinoře glati, ai na spiden le; ke e amperetsia le Devleski si kudalenge kai miazon sar lende. Me phenav tumenge čačimasa, kon-godi či primila e amperetsia le Devleski sar jekh tsinoři glata či dela andre. Jekh birevo pušel katar o Jesus, ai phenel: Lašio rabi, so trubul me te kerav t'avel ma o traio pe sakda? O Jesus del les palpale: Sostar akhares ma tu lašio? Si lašio o Del ferdi. Tu žianes le poronki: Tu či keresa kurvetsia; tu či mudaresa; tu či čoresa; tu či phenesa khanči falšo; de pativ tjire dades ai tjira da. Lem sa kudala dieli opre de terniara, phenel o birevo. O Jesus, ašundias kudia, vo phenel leske: Mai trubul tu jekh diela: bikjin sa so si tu, de love ka le čoře, ai avela tut jekh mandjin ande o čeri. Porme aidi, ai av mansa. Kana vo ašundias kudala vorbi, areslo but nekežime; ke vo sas but barvalo. O Jesus, dikhlias ke areslo pria nekežime, phenel: Če trudno kudalenge kai si len barvalimata te den andre ande e amperetsia le Devleski! Ke mai sigo šai jekh gumula te nakhel pa e groapa jekha suviaki sar ke jekh barvalo te del andre ande e amperetsia le Devleski. Kudala kai ašunen leste phenen: Ai kon šai avel skipime? O Jesus del palpale: So naštil te kerel o manuš šai kerel o Del. O Petri phenel atunči: Eta, ame sa mukliam, ai ame aviliam pala tute. Ai o Jesus phenel lenge: Me phenav tumenge čačimasa, nai khonik kai muklias, pala e amperetsia le Devleski, pesko kher, vai peska řomnia, vai peske phralen, vai peske niamon, vai peske glaten, kai či lela mai but ande kadala berš, ai, ande le berš kai avena, o traio pe sakda. O Jesus lias le deš-u-don paša peste, ai phenel lenge: Eta, ame anklias ande o Jerusalem, ai sogodi sas ramome katar le profeturi pala o Šiav le manušesko aresela. Ke vo avela dino ande o vast kudalenge kai či patian; marena mui lestar, dena les pe o lažiav, čungardena pe leste. Ai, pala ke marena les la rovliasa, mudarena les, ai o trito dies vo živindila. Numa von či hatiarde khanči anda kudia; sas lenge jekh šib garadi, vorbi kai či hatiarenas so si. Sar o Jesus pašilas ande o Jeriko, jekh kořo bešelas tele paša e vurma, ai mangelas. Ašunelas ke o narodo nakhel, pušelas so si. Phenen leske: Si o Jesus anda o Nazaret kai nakhel. Ai vo tsipil: Jesus, Šiav katar o David, t'avel tuke mila mandar! Kudala kai phirenas anglal ašiaven les, te na del duma; numa vo tsipilas mai zurales: Šiav katar o David, t'avel tuke mila mandar! O Jesus, terdilo, dias ordina t'anen les leske; ai, kana pašilo, vo pušel lestar: So manges tu te kerav tuke? Vo del palpale: Baria, t'aresav te dikhav. Ai o Jesus phenel leske: Puter tjire jakha, tjiro patiamos skipisardias tu. Strazo vo dikhlias pale, ai gelo pala o Jesus, vestilas le Devles. Sa o narodo, dikhlias kudia, luvudil le Devles. O Jesus, dias andre ande o Jeriko, nakhelas o foro. Ai eta, jekh manuš barvalo, akharen les Zakeus, birevo kudalenge kai kjiden e taksa, rodelas te dikhel kon si o Jesus; numa naštilas, katar o narodo, ke vo nas baro ande o stato. Vo našlo anglal, ai anklisto pe jekh sikomoro te dikhel les, ke vo trubulas te nakhel kothar. Kana o Jesus areslo ande kudo than, vo vazdias le jakha ai phenel leske: Zakeus, gribisavo ta vuli; ke trubul ma te bešav adies ande tjiro kher. O Zakeus gribisailo te vulel, ai lias les peste veselimasa. Dikhle kudia, sa bulguinas, ai phenenas: Vo gelo te bešel ka jekh manuš bezexalo. Numa o Zakeus, bešel angla o Baro, phenel leske: Eta, Baria, me dava le čořen dopaš anda so si ma, ai, te lem varikastar love athaimasa, dava les štar-var mai but. O Jesus phenel leske: O skipimos dias adies ande kado kher, ke kado vi vo si jekh šiav katar o Abraham. Ke o Šiav le manušesko avilo te rodel ai te skipil so sas xasardo. Von ašunenas kudala dieli, ai o Jesus mai phenel jekh paramiči, ke von sas paša o Jerusalem, ai von gindinas ke strazo e amperetsia le Devleski si t'avel. Vo phenel kadia: Jekh manuš anda e bari vitsa žialastar ande jekh them dur, te thon les amperato ai atunči t'avel palpale. Vo akharel deš anda peske služi, dias le deš love po jekh mina, ai phenel lenge: Keren butji žikin či avav palpale. Numa leske kai sas lesa vuřitsinas les, ai von tradine manušen pala leste, te phenen: Ame či kamas te kudo manuš amperetsil pe amende. Kana vo avilo palpale, pala ke thode pe leste t'avel baro amperato, vo akharel paša peste le služi kaste dias le love, eta te žianel sar sako butiardias les. O mai angluno avilo, ai phenel: Baria, tjiri mina andias deš mini. Vo phenel leske: Mišto si, laši sluga; ke sar ke tu sanas čačo ande jekh tsini diela, le t'aves baro pe deš foruri. O duito avel, ai phenel: Baria, tjiri mina dias panž mini. Vo phenel leske: Vi tu, t'aves baro pe panž foruri. Jekh aver avel, ai phenel: Baria, eta tjiri mina, ke me garadem ande o poxtan. Ke me daravas tutar, ke tu san jekh manuš trudno; tu les so tu či thodian, ai tu kjides kai tu či bariardian. Vo phenel leske: Me dav tu kris pala tjire vorbi, sluga nasul; tu žianesas ke me sim jekh manuš trudno, lavas so me či thodem, ai kjidavas so me či bariardem; sostar či thodian tu muřo lov ande jekh banka, eta ke kana avava palpale te lav mai but? Porme vo phenel ka kudala kai sas kothe: Len lestar e mina, ai den la ka kudo kai si les deš. Von phende leske: Gazda, si les vuže deš mini. Me phenav tumenge, dena kudaleske kai si les, numa kadalestar kai nai les mai lena inke so si les. So mai ašel, anen kathe muře dušmanon, kai či kamle t'amperetsiv pe lende, ai mudaren le angla mande. Pala ke dias duma kadia, o Jesus phirel angla o narodo, t'anklel ande o Jerusalem. Kana pašilo paša o Betfage ai e Betania, karing o plai akhardo o plai le Maslinengo, o Jesus tradias don anda peske vortača. Phenelas: Žian ande o gav kai si angla tumende; kana dena tume andre, tume arakhena jekhe magaritsos phanglo, pe savo či jekh manuš či bešlo; putren les, ai anen les mange. Te varekon pušel tumen: Sostar putren les tume? tume dena les palpale: O Baro trubul les. Kudala kai sas tradine gele, ai arakhle le dieli sar o Jesus phendiasas lenge. Sar von putrenas le magaritsos, leske birevia phenen lenge: Sostar putren tume kadale magaritsos? Von den palpale: O Baro trubul les. Ai von andine ka o Jesus le magaritsos, pe savo von šiudine penge tsalia, ai thode t'anklel opre o Jesus. Kana gele pe o drom, le žene thode penge tsalia pe e vurma. Ai sar vuže pašiol paša o Jerusalem, karing te vulel katar o plai le Maslinengo, sa le but vortača, lias len o veselimos, thodine pe te luvudin le Devles zurale hangosa anda sa le čudeni kai von dikhle. Von phenenas: Svintsime t'avel o amperato kai avel ande o anav le Baresko! Patia ande o čeri, ai vestimos ande le thana but vuče! Uni Farizianuri, maškar o narodo, phenen ka o Jesus: Birevo, ašiav tjire vortakon. Ai vo del anglal: Me phenav tumenge: Te von ašena, le bař tsipina! Sar vo pašiolas paša o foro, o Jesus, kai dikhel les, rovel pe leste, ai phenel: Te sanas vi tu, makar ande kado dies kai si tjiro, te žianesas le dieli kai šai den tu e patia! Numa akana von si garade ka tjire jakha. Avena pe tute dies kai tjire dušmaia avena krugom tut groapensa, ai kjidena tut pa sako rig. Von phařavena tut, tut ai tjire šiaven maškar tute, ai či mukena pe tute bař pe bařeste, ke tu či prinžiardian e vramia kai o Del avilo tute. Vo dias andre ande o templo, ai vo lias pe te gonil kudalen kai bikjinenas. Phenelas lenge: Si ramome: Muřo kher avela jekh kher řudjimasko. Numa tume, tume kerdian anda leste jekh groapa čorengi. Vo sikiarel sako dies ande o templo. Ai le bare raša, le zakonaria ai le bare anda o narodo rodenas te xasaren les; numa von či žianenas sar te keren, ke sa o narodo ašunelas leste dragosa. Jekh anda kudala dies, sar o Jesus sikiarelas ande o templo o narodo ai ke vo phenel e laši viasta, le bare raša ai le zakonaria, le puranensa, avile, ai phenen leske: Phen amenge, katar savi putiaria keres tu kadala dieli, vai kon si kudo kai del tu kudia putiaria? Vo del len palpale: Vi me pušiav tumendar jekh diela. Phenen mange, o bolimos le Jonesko avelas vo anda o čeri, vai katar le manuš? Numa von den pe godji kadia ande pende: Te dasa ame palpale: Anda o čeri, vo phenela: Sostar či patian tume ande leste? Ai t'ame dasa palpale: Katar le manuš, sa o narodo mudarena ame bařensa, ke von gindin pe ke o Jono sas jekh profeto. Atunči von den palpale ke von či žianen katar avelas. Ai o Jesus phenel lenge: Či me, či phenava tumenge katar savi putiaria me kerav kadala dieli. Vo lias pe atunči te phenel le narodoske kadia paramiči: Jekh manuš thodias te bariol jekh rez, dias la užile te len sama latar ka kudala kai bariaren, ai muklias pe but vramia o them. Kana si te kjiden, vo tradias jekha sluga ka kudala kai kjiden, ke te den les jekh partia anda so dias e rez. Kudala kai kjiden marde les, ai trade les bi te den les khanči. Vo mai tradias mai jekh data jekha kaver sluga; von marde les, dine les pe o lažiav, ai tradine les bi te den les khanči. Vo mai tradias jekha trito, von řanisarde les, ai gonisarde les. O birevo la rezako phenel: So kerava me? Me tradava muře šiaves kai si mange drago; amburim lena von lestar sama. Numa, kana kudala kai kjiden dikhle les, von den pe gindo ande pende, ai phenen: Eta lesko šiav; mudaras les, eta t'avel sa amenge. Ai von šiude les avri anda e rez, ai mudarde les. Akana, so kerela lenge o birevo la rezako? Vo avela, xasarela kudalen kai kjiden, ai vo dela e rez ka le kaver. Kana von ašunde kudia, von phenen: Te na kerel kadia o Del! Numa, šiudias o dikhimos pe lende, o Jesus phenel: So si kudia kai si ramome: O bař kai šiude kudala kai vazden khera areslo o mai lašio ande o koltso? Varekon kai perela pe kudo bař phagiola, ai kudo pe kaste o bař perela avela inčardo. Le bare raša ai le zakonaria rodenas te thon o vast pe leste ande kudo časo, numa daranas katar o narodo. Von hatiarde ke lenge sas ke o Jesus phendias kudia paramiči. Von thode pe te len sama le Jesusosa; ai von trade ženen kai kerenas pe sar ke von si vorta, te len les athaimasa kai pušenas les ai te len lestar uni vorbi, eta te den les ande o vast la krisako ai ka e putiaria le vladoroski. Kudala žene thode pe te pušen lestar: Birevo, ame žianas ke tu des duma ai sikiares vorta, ai ke tu či dikhes sar si o manuš, numa ke tu sikiares e vurma le Devleski sar si o čačimos. Slobodo amenge, vai niči te pokjinas so trubul ka o Amperato? O Jesus, hatiardias lengi xitrenia, del le palpale: Sikaven mange jekh šuv. Kasko si kado vobrazo ai kado ramomos? Katar o Amperato, den von palpale. Atunči vo phenel lenge: Den ka o Amperato so si le Amperatosko, ai ka o Del so si le Devlesko. Von naštisarde te den palpale khanči pe kudala vorbi angla o narodo; numa, šodo sas lenge sar dias palpale, von ašile muto. Uni anda le Sadusenuri, kai phenenas ke nai živindimos, pašile, ai pušen katar o Jesus kadia: Birevo, eta so o Moše ramosardias amenge: T'avela ke o phral varekasko mulo, sas les jekh řomni bi šiavengi, lesko phral lela leska řomnia, ai dela les šiave peske phrales. Eta, sas efta phral. O mai angluno ansurisailo ai mulo bi glatengo. O duito ai o trito line la phivlia; ai sa kadia kerdias vi le efta, kai mule bi t'aven len glati. Kadia, vi e žiuvli muli. Kana živindina, saveski avela voi e řomni? Ke le eftangi sas voi e řomni. O Jesus del len palpale: Le glati anda kadala berš len řomnia ai řomes; numa kudala kai si arakhade harniči te train le berš mai angle ai te živindin anda le mule či lena či řomnia či řomes. Ke von naština te mai meren, ke von avena sar le andželi, ai von avena šiave le Devleske, ke si šiave kai živindisaile. Ke le mule živindin, si so o Moše kerdias te žianen kana, pa e buř kai phabolas, vo akhardias le Bares le Devles katar o Abraham, Del katar o Isak, ai Del katar o Jakob. Eta, o Del nai o Del le mulengo, numa le živindengo; ke leske sa si živinde. Uni anda le zakonaria, line e vorba, phenen: Birevo, tu mišto dian duma. Ai von či mai tromaile te pušen les. O Jesus phenel lenge: Sar šai phenen ke o Kristo si o šiav le Davidosko? O David inke vo phenel ande e kliška le Psalmengi: O Baro phenel muře Bareske: Beš pe muři čači, žikin či kerava anda tjire dušmaia jekh šerandořo tela te punře. O David akharel les Baro; sar t'avel vo lesko šiav? Žikin sa o narodo ašunel leste, vo phenel peske vortakonge: Len tume sama katar le zakonaria kai drago lenge te phiraven pe ande le lungi řobi, ai te den len pozdraimos ande le thana le narodoske, kai roden le mai anglune thana ande le khangeria židovitsko, ai le mai anglune thana ande le pativa; kai xan le mištimata le phivliange, ai naročno řudjin. Von avena dine pe e kris mai zurales. O Jesus, vazdias le jakha, dikhel le barvalen kai thonas penge love ande e kutia ande o templo. Vi mai sas jekh čoři phivli, kai thodias andre dui tsinoře xarkune kotora. Ai vo phenel: Me phenav tumenge čačimasa, kadia čoři phivli voi thodias mai but sar sa le kaver; ke si katar so či mai trubulas len ke kadala dine pestar ande e kutia, numa voi thodias anda so trubulas la, sa sogodi sas la te trail. Sar varekon delas duma pa le šukar bař ai le podarki kai šukarenas o templo, o Jesus phenel: Le dies avena kai, de so tume dikhen, či bešela bař pe bař te na perel. Von pušen les: Birevo, kana aresela kudia, ai ka če semno žianasa ame ke kudala dieli si t'aven. O Jesus del palpale: Len tume sama te na diliaren tumen. Ke but avena ande muřo anav, phenena: Me sim, ai e vramia pašiol. Na žian pala lende. Kana tume ašunena ke den duma pa le marimata ai le buntuimata, te na len tumen e dar, ke trubul ke kudala dieli aresen mai anglal. Numa či avela strazo te getol pe e lumia. Atunči vo phenel lenge: Jekh them vazdela-pe pe jekh them, ai jekh amperetsia pe jekh amperetsia. Avena pria bare isdraimata la phuviake, ai, ande uni riga, ponuri ai bokha; avena čudeni pria zurale, ai bare semnuri ande o čeri. Numa, angla savořende sa, thona o vast pe tumende, ai marena tumen; dena tumen ka le khangeria židovitsko, šiudena tumen ande le temnitsi, ningerena tumen angla le amperatsi ai angla le vladoruri, pala muřo anav. Kudia aresela tumenge t'aven lenge martururi. Na thon tumenge ande e godji angla savořende sar šai den tume palpale; ke me dava tumen jekh mui ai jekh godji ke te tumare dušmaia naština te ninkeren vai te den palpale. Tume avena dine ande o vast inke katar tumare dada ai deia, katar tumare phral, katar tumare kai si paše ai katar tumare vortača, ai kerena te meren but anda tumende. Tume avena vuřitsime savořendar, pala muřo anav. Numa či xasavola jekh bal anda tumaro šero; tumari řabda skipila tumare duxuri. Kana tume dikhena o Jerusalem krugom lestar but ketani, te žianen atunči ke o phařaimos nai dur. Atunči, ke kudala kai si ande e Judea našen ande le plaia, ke kudala kai si ande o Jerusalem anklen avri, ai ke kudala kai si ande le kimpuri te na den ande o foro. Ke avena dies kai trubun te pokjinen, t'aresel pe sa so sas ramome. Nasul avela le žiuvliange kai si phare ai kudalenge kai den čuči ande kudo dies! Ke avela jekh baro baio ande o them, ai xoli pe kudo narodo. Von perena pe o šinimos la xanřesko, von avena ningerde phangle maškar sa le thema, ai o Jerusalem avela inčardo tela le punře sa le themenge, žikin či le vrami le themenge nakhen. Avena semnuri ande o kham, ande o šiunuto ai ande le čeřaia. Ai pe e phuv, avela dar ka le thema kai či žianena so te keren, kana bašen e maria ai le talazuri. Le manuš merela pengo duxo daratar kai ažiukeren so avela pe e phuv; ke le zora le čereske avena te isdran. Atunči dikhena le šiaves le Manušesko pe jekh nuvero zorasa ai jekhe bare vestimasa. Kana kudala dieli lena pe t'aven, ušten ai vazden le šere, ke tumaro skipimos pašiol. Ai vo phenel lenge jekh paramiči: Dikhen e figa, ai sa le kopačia. Kana tumen dikhen ke lenge patria len te barion, tume žianen anda tumende, ke o milai pašiol. Sa jekh fialo, kana dikhena tume ke kudala dieli pašion, te žianen ke e amperetsia le Devleski pašiol. Me phenav tumenge čačimasa, kadia vitsa či nakhela, ke sa kudia si t'aresel. O čeri ai e phuv nakhena, numa muře vorbi či nakhena. Len tume sama tume, ke tumare ile te na pharion katar o but xamos ai katar o pimos, ai katar le ginduri le traioske, ai ke kudo dies avel pe tumende bi te žianen; ke vo avela sar jekh setka pe sa kudala kai bešen pe sa e fatsa la phuviaki. Arakhen tume ai řudjin ande sa e vramia, eta t'avel tumen e zor te skipin tume katar sa kudala dieli kai aresena, ai t'aven pe punřende angla o Šiav le manušesko. Diese, o Jesus sikiarelas ande o templo, ai vo žialas te nakhel e riat pe o plai akharen les o plai le Maslinengo. Ai sa o narodo, de diminiatsara, žianas karing leste ande o templo t'ašunen leste. O prasniko le manřesko bi-drosdako, akhardo e Patradi, pašiol. Le bare raša ai le zakonaria rodenas sar te keren te mudaren le Jesus; ke von daranas katar o narodo. Eta, o Satan dias ande o Juda, kai akharena les Iskariot, kai sas anda le deš-u-dui. Ai o Juda gelo te del duma le bare rašansa ai le birevonsa kudalenge kai arakhen o templo, sar te del les lenge ande o vast. Len lias le e veselia, ai von dine pe duma te den les love. Pala kudia ke thodias pe, vo rodelas sar mai mišto te del len ande o vast le Jesus te na žianel o narodo. O dies le manřesko bi-drosdako, vai kai thon e Patradi, aresel, ai o Jesus tradias le Petri ai le Jono, phenelas: Žian te lašiaren amenge e Patradi, eta te ame te xas. Von phenen leske: Kai manges ame te lašiaras la? Eta, kana tume dena ande o foro, tume arakhena jekhe manušes ningerel jekh khoro pai; žian pala leste ande o kher kai vo dela andre, ai tume phenena ka o birevo le kheresko: Amaro birevo phenel tuke: «Kai si o than kai me xava e Patradi muře vortakonsa?» Ai vo sikavela tumenge jekh soba opre, lašiardi: kothe tume lašiarena e Patradi. Von geletar, ai arakhle le dieli sar vo phendias lenge ai von lašiaren e Patradi. O časo avilo, vo thodias pe pala e skafidi, ai le apostoli lesa. Vo phenel lenge: Me but kamlem te xav kadia Patradi tumensa angla savořende te kjinuiv; ke, me phenav tumenge, me či mai xava la, žikin či avela ande e amperetsia le Devleski. Ai, lias jekh taxtai ai naisardias, vo phenel: Len kado taxtai, ai den les maškar tumende; ke, me phenav tumenge, me či mai piava d'akanara anda e fruta la rezaki, žikin či e amperetsia le Devleski avela. Atunči vo lias manřo; ai, pala ke naisardias, vo phaglias les, ai dias les lenge: Kado si muřo stato, kai si dino tumenge; keren kadia kana den tume godji mande. Vo sa kadia lias o taxtai, kana xale, ai dias les lenge, phenela: Kado taxtai si e nevi patia ande muřo rat, kai si dino muial tumenge. Numa eta, o vast kai bikjinel ma si mansa pala kadia skafidi. O Šiav le manušesko žialtar sar si leske šinado. Numa nasul le manušeske kastar si bikjindo! Ai von line pe te pušen jekh kavrestar kon si kudo maškar lende kai kerela kudia. Mai vazdelas maškar le apostoli jekh pušimos kai či žianen; savo anda lende trubul t'avel o mai baro? O Jesus phenel lenge: Le amperatsi le themenge si bare pe lende, ai kudala kai si bare pe lende akharen le laše. Te na avel kadia maškar tumende. Numa ke o mai baro anda tumende t'avel o mai tsinořo, ai kudo kai vladil sar kudo kai služil. Ke savo si o mai baro, kudo kai si pala e skafidi, vai kudo kai služil? Nai kudo kai si pala e skafidi? Ai me, numa, me sim maškar tumende sar kudo kai služil. Tume, tume san kudala kai thodian zor mansa ande so me keravas; sa anda kudia me dav muři amperetsia tumenge, sar muřo Dad dias la mange, eta ke tume te xan ai te pen ka muři skafidi ande muři amperetsia ai ke tume te bešen pe le skamina amperatisko, te den kris le deš-u-do kumpanien anda o Israel. O Baro phenel: Simon, Simon, ašun, o Satan manglias e putiaria, te maravel tumen sar o khas. Numa me řudjisardem tuke, eta ke tjiro patiamos te ne perel; ai tu, kana tu pařuvesa tu, zuriar tjire phralen. Baria, phenel leske o Petri, me sim gata te žiav tusa vi ande e temnitsa vi ande o merimos. Ai o Jesus phenel: Petri, me phenav tuke, o kokošo či gjilabela adies žikin či phenesa tri-var ke či prinžiares ma. Vo mai phenel lenge: Kana me tradem tumen bi tišilako, bi gonesko, ai bi papučengo, trubulas tume vareso? Von dine palpale: Khanči. Ai vo phenel lenge: Akana, aver fialo, ke kudo kai si les jekh tišila te lel la, ke kudo kai si les jekh gono te lel les, ai ke kudo kai nai les xanřo te bikjinel peske tsalia ai te kjinel jekh. Ke, me phenav tumenge, trubul ke kudia vorba kai si ramome te kerdiol ande mande: Vo sas thodino maškar le čor. Ai so si pa mande si sigo t'aresel. Von phenen: Baria, eta dui xanře. Ai vo phenel lenge: Dosta. Pala ke anklisto avri, vo gelo, sar sas sikado, ka o plai le Maslinengo. Leske vortača gele pala leste. Kana vo areslo ande o than, vo phenel lenge: Řudjin, eta te na peren ande o zumaimos. Porme durilo lendar pašte so šai šiuden jekh bař, ai, thodias-pe pe čangende, vo řudjil. Phenelas: Tate, te kamesa tu te duriares mandar kado taxtai! Numa, te na avel pe muři, numa pe tjiri. Atunči jekh andželo sikadilo leske anda o čeri, te zuriarel les. Sas kjinuime, vo řudjil mai but ai leske paia aresle sar grontsuli rateske kai peren tele. Pala ke řudjisardias, vo uštilo ai avel karing le vortača, kai arakhel le sar soven nekežime, ai vo phenel lenge: Sostar tume soven? Ušten ai řudjin, eta te na peren ande o zumaimos. Sar vo mai delas duma, eta, jekh narodo avel; ai kudo kai akharenas les Juda, jekh anda le deš-u-dui, phirelas angla leste. Vo pašiol paša o Jesus, te čimidil les. Ai o Jesus phenel leske: Juda, si jekhe čimidimasa ke tu bikjindian le Šiaves le manušesko! Kudala kai sas le Jesusosa, dikhenas so si t'avel, phenen: Baria, malavasa ame xanřensa? Ai jekh anda lende malavel la sluga katar o baro rašai ai šindias lesko kan o čačo. Numa o Jesus lias e vorba, phenel: Muk, terdio! Ai, asbadias o kan le manušesko, vo sastiardias les. O Jesus phenel atunči ka le bare raša, ka le birevuri kai arakhen o templo ai ka le phure kai avile pe leste: Tume avilian sar pala jekh řobaš, le xanřensa ai le rovliansa. Me simas sako dies tumensa ande o templo ai tume či thodian o vast pe mande. Numa kathe si tumaro časo, ai e zor le tuniaričengi. Pala ke line le Jesus, von ningerde les ai andine les ande o kher le bare rašasko. O Petri žialas palal dural. Von dine jag maškar e bar ai von bešle tele. O Petri bešlo maškar lende. Jekh sluganka, kai dikhlias les ke bešel angla e jag, thodias pe leste le jakha ai phenel: Kado manuš vi vo sas lesa. Numa vo či prinžiarel les, phenelas: Žiuvlio, me či žianav les. Tsiřa pala kudia, jekh kaver dikhlias les, phenel: Vi tu san anda kudala žene. Ai o Petri phenel: Manuša, me či sim. Pašte jekh časo pala kudia, jekh kaver phendias zurales: Čačimasa kado manuš vi vo sas lesa, ke vo si Galileano. O Petri del palpale: Manuša, me či žianav so tu phenes. Strazo ande kudia vramia, sar vo inke delas duma, o kokošo gjilabel. O Baro amboldinisailo, dikhel pe o Petri. Ai o Petri dias pe godji ka e vorba kai o Baro phendiasas leske: Angla savořende ke o kokošo gjilabel adies, tu phenesa trivar ke či prinžiares man. Ai anklisto avri, vo rovel zurales. Le manuš kai ninkeren le Jesus maren mui lestar, ai malaven les. Von garade lesko mui ai pušen les, phenenas: De pe o gor kon malavel tu. Ai von phenen pe leste but kaver lažiave. Kana o dies areslo, le purane anda o narodo, le bare raša ai le zakonaria kjidinisaile, ai andine le Jesus ande pengi kris židovitsko. Von phenen: Te san tu o Kristo, phen les amenge. O Jesus del len palpale: Te me phenava les tumenge, tume či patian tume; ai, te pušiava me tumendar, tume či dena ma palpale. De akanara o Šiav le manušesko bešela pe e čači katar o Del o Mai Zuralo. Sa phenenas: Kadia tu san o Šiav le Devlesko? Ai vo del palpale: Tume phenen, me sim. Atunči von phenen: So mai trubun ame martururi? ame ašundiam les ame anda lesko mui. Von uštile sa ai von ningerde le Jesus angla o Pilato. Von line pe te thon beda pe leste, phenenas: Ame arakhliam kadale manušes ke vazdel amaro them te buntuil pe, či mukel te pokjinen so trubul ka o Amperato, ai kai phenel pe vo o Kristo, amperato. O Pilato pušel les, kadia: San tu o amperato le Židovongo? O Jesus del palpale: Tu phenes. O Pilato phenel le bare rašange ai le narodoske: Me či arakhav či jekh doš ande kado manuš. Numa von mai den duma, ai phenen: Vo vazdel o narodo, ke sikiarel ande sa e Judea, de katar e Galilea, katar lias pe, ži kathe. Kana o Pilato ašundias ke den duma pa e Galilea, von pušel te si kudo manuš Galileano; ai, vo hatiardias ke vo si anda o them katar o Herodo, vo tradias les ka o Herodo, kai vi vo sas ande o Jerusalem kudo dies. Kana o Herodo dikhlias le Jesus, lias les jekh bari veselia; ke de dumult vo kamelas te dikhel les, pala so vo ašundias ke phenen pa leste, ai vo ažiukerelas te dikhel les te kerel uni čudeni. Vo but pušel les; numa o Jesus či del les palpale. Le bare raša ai le zakonaria sas kothe, ai thonas zurales beda pe leste. O Herodo ai peske ketani, kai arakhen les, len lestar sama vuřitsimasa; maren mui lestar, thon pe leste jekh tsolo pria šukar ai traden les ka o Pilato. Sa ande kudo dies o Pilato ai o Herodo aresle vortača; von sas angla savořende dušmaia. O Pilato kjidias le bare rašan, le birevon, ai o narodo, phenel lenge: Tume andian mange kadale manušes sar jekh kai kerdias te vazdel pe o narodo te buntuil pe. Ai eta, me pušlem les angla tumende, ai me či arakhlem les došalo ande či jekh anda le dieli kai tume thon beda pe leste: Či o Herodo vi vo, ke vo tradias les amenge, ai eta, kado manuš či kerdias khanči ke t'avel mudardo. Me kadia mukava les, pala ke marena les la trestiasa. [Sa sako prasniko, leske sas zakono te mukel lenge jekhe čor.] Von tsipil sa ande jekh than: Mudar kadales, ai muk amenge le Barabas. Kudo manuš sas thodino ande e temnitsa pala jekh buntuimos kai sas ande o foro, ai pala jekh mudarimos. O Pilato mai del duma, ke kamelas te mukel le Jesus. Ai von tsipin: Amblav, amblav les pe o trušul! O Pilato phenel lenge pe e trito data: Če nasul kerdias vo? Me či arakhlem khanči ande leste kai trubul te merel. Me mukava les kadia, pala ke marena les la trestiasa. Numa von mai thon zor bare tsipimatansa te amblaven les pe o trušul. Ai lenge tsipimata nirisarde. O Pilato kerdias pe lengi te avela kadia. Vo muklias kudales kai sas thodino ande e temnitsa pala jekh buntuimos ai jekh mudarimos, ai kai von mangenas; ai vo muklias le Jesus sar von kamen. Sar ningerenas les, von line jekhes kai bušol Simon anda e Sirena, kai avelas pa le kimpuri, ai von thodine pe leste o trušul, te ningerel les pala o Jesus. Žianas pala leste jekh baro narodo ai žiuvlia kai marenas pengo kolin ai rovenas pe leste. O Jesus amboldias pe karing lende, ai phenel: Šeia anda o Jerusalem, na roven pe mande; numa roven pe tumende ai pe tumare glati. Ke eta, le dies avena kai phenena: Veseli kudala kai nai le glati, veseli le pořa kai nai le glati, ai le čuča kai či dine thud! Atunči von thona pe te phenen le plaienge: Peren pe amende! ai le plaiořenge: Garaven ame! Ke, te kerena kadala dieli le kašteske zeleno, so aresela le kašteske šuko? Tradine sa ande kudia vramia do čoren, kai trubulas te mudaren le le Jesusosa. Kana aresle ande o than kai akharen les Šero Nango, von amblade les kothe, vi le do čoren, jekh pe e čači, o kaver pe e stingo. O Jesus phenel: Tate, jertisar lenge, ke von či žianen so von keren. Von hulade leske tsalia, khelde-pe pe lende. O narodo sas kothe, ai dikhelas. Le birevia marenas mui lestar, phenenas: Vo skipisardias le kavren; ke te skipil pe vo, te si vo o Kristo, o alome katar o Del! Le ketani vi von marenas mui lestar; pašile ai den les šut. Von phenenas: Te san tu o amperato le Židovongo, skipisavo tu korkořo! Sas opral pa lesko šero kako ramomos: Kado si o amperato le Židovongo. Jekh anda le čor amblade paša leste prasal les, phenelas: Či san tu o Kristo? Skipisavo tu korkořo, ai skipisar ame! Numa, o kaver ašiavel les, ai phenelas: Či daras tu katar o Del, tu kai avili vi kris pe tute? Amen, vorta dine ame kris, ke ame las so trubulas pala amare mudarimata: Numa kado či kerdias khanči nasul. Ai vo phenel ka o Jesus: De tu godji mande, kana tu avesa ande tjiri amperetsia. O Jesus del les palpale: Me phenav tuke čačimasa, adies tu avesa mansa ande o řaio. Sas pašte mismeri ai sas tuniariko pe sa e phuv, ži ka o trito časo. O kham kalilo, ai e zanaveska ande o templo šindili pa o maškar. O Jesus tsipisardias jekhe hangosa zurale: Tate, me thav muřo duxo ande tjire vast. Ai, kai phendias kudala vorbi, vo getosailo. O fitsiri dikhlias so areslias, luvudisardias le Devles, ai phenel: Čačimasa, kado manuš sas vorta. Ai sa kudala kai avile ande jekh than te dikhen, kana dikhle so areslias, gele palpale, marenas pengo kolin. Sa kudala kai žianenas le Jesus ai le žiuvlia kai gele pala leste de katar e Galilea bešenas dur ai dikhenas so nakhel. Sas jekh manuš akhardo ande e kris bari, bušolas Josef, manuš lašio ai vorta, kai či kamlias te del le Jesus kris ai so kerde le kaver; vo sas anda o Arimate, foro židovitsko ai vo ažiukerelas e amperetsia le Devleski. Kudo manuš gelo karing o Pilato, ai manglias o stato le Jesusosko. Vo vuliardias les pa o trušul, patiardias les ande jekh tsolo, ai thodias les ande jekh groapoševo hunado ande jekh stanka, kai inke khonik nas thodino andre. Sas paraštuine, ai o sabato si t'avel. Le žiuvlia kai avilesas anda e Galilea le Jesusosa avile le Josefosa, dikhle o groapoševo ai sar thodine o stato le Jesusosko andre, ai von gele palpale, von lašiarde draba ai duxia. Porme von hodinisarde o sabato, sar si o zakono. O mai angluno dies anda o kurko, von gele ka o groapoševo de diminiats, ningerenas le draba kai von lašiarde. Von arakhle ke o bař sas spidino angla o groapoševo; ai, dine andre, von či arakhle o stato le Baresko Jesus. Sar von či žianenas so te gindin anda kudia, eta, dui manuš paša lende, ande le tsalia šukar. Isdraile daratar, von perade penge muia karing e phuv; numa von phenen lenge: Sostar roden tume maškar le mule kudales kai si živindo? Vo nai kathe, numa vo živindisailo. Den tume godji sar vo dias tumensa duma, kana vo mai sas ande e Galilea, ai ke vo phenelas: Trubul ke o Šiav le manušesko t'avel dino ande le vast le bezexalenge, ai ke vo živindila o trito dies. Ai von mai dine pe godji ka le vorbi le Jesusoske. Kana avile palpale katar o groapoševo, von phende sa kudala dieli ka le deš-u-jekh, ai ka sa le kaver. Kudala kai phende kadala dieli ka le apostoli sas e Maria anda e Magdala, e Johanna, e Maria, dei katar o Jakob, ai le kaver kai sas lensa. Von gindisaile ke so le žiuvlia phenenas sas dilimos, ai von či patiaile ka len. Numa o Petri uštilo, ai našlo ka o groapoševo. Bangilo, vo dikhlias ferdi le pištjiria kai sas pe e phuv; porme gelo peste, sas leske šodo so areslias. Ai eta, sa kudo dies, dui vortača žianas ande jekh gav akharen les Emaus, dur katar o Jerusalem deš kilometri; ai von denas pe duma anda sa so nakhlias. Žikin von denas duma ai xanas pe, o Jesus pašilo, ai žial pe o drom lensa. Numa lenge jakha či mukenas len te prinžiaren les. Vo phenel lenge: Pa soste den tume duma phirimasa, ke san tume kadia nekežime? Jekh anda lende, bušol Kleopas, del les palpale: Ferdi tu, anda kudala kai bešen ande o Jerusalem, či žianes so avelas ande kadala dies? So? phenel lenge vo. Ai von dine les palpale: So avelas pa o Jesus anda o Nazaret, kai sas jekh profeto zuralo ande e butji ai ande le vorbi angla o Del ai angla sa o narodo, ai amare bare raša ai amare krisinitoria dine les ande o vast te thon les te merel ai amblade les pe o trušul. Ame ažiukerasas ke vo si t'avel te skipil o Israel; numa so mai si eta o trito dies ke kadala dieli nakhle. Si čačes ke uni žiuvlia maškar amende kerde t'avel amenge šodo: gele de diminiats ka o groapoševo, ai či arakhle lesko stato. Von avile te phenen ke le andželi sikadile lenge ai phende lenge ke vo si živindo. Uni anda kudala kai sas amensa gele ži ka o groapoševo, ai von arakhle le dieli sar le žiuvlia phendesas; numa les, von či dikhle les. Atunči o Jesus phenel lenge: O, manuš bi-godiake, ai kai o ilo kovlo te patial sa sogodi phende le profeturi! Či trubulas ke o Kristo te kjinuil kudala dieli, ai ke vo te del andre ande pesko barimos? Ai, lias pe katar o Moše ai katar sa le profeturi, vo sikavel lenge ande sa le Ramomata so si pa leste. Kana aresle paša o gav kai von žianas, miazolas lenge ke vo žial mai dur. Numa von gribin les, phenenas: Beš amensa, ke e riat pašiol, e riat perel tele. Ai vo dias andre, te bešel lensa. Žikin vo sas pala e skafidi lensa, vo lias o manřo; ai, pala ke řudjisardias, vo phaglias les, ai dias les lenge. Atunči lenge jakha puterdile, ai prinžiarde les; numa vo bilailo angla lende. Ai von phenenas jekh avreske: Amaro ilo či phabolas vo andre ande amende, kana vo delas duma amensa pe e vurma ai sikavelas amenge le Ramomata? Uštile ande kudo časo, von gele palpale ande o Jerusalem, ai von arakhle le deš-u-jekh, ai kudalen kai sas lensa kjidine, phenenas: O Baro čačes živindisailo, ai vo sikadilo ka o Simon. Ai von phenen so areslias lenge pe e vurma, ai sar von prinžiarde les kana vo phaglias o manřo. Sar von denas duma kadia, vi vo sikadias pe maškar lende ai phenel lenge: E patia t'avel tumensa! Lias len e dar ai daran, von gindinas te dikhen jekh duxo. Numa vo phenel lenge: Sostar san tume rimome, ai sostar kasave ginduri ušten von ande tumare ile? Dikhen muře vast ai muře punře, mišto me sim; asban man ai dikhen: jekh duxo nai les či mas či kokalo, sar tume dikhen ke si man. Ai sar phenelas kudia, vo sikavel lenge peske vast ai peske punře. Sar, ande lengi veselia, von inke či patianas, ai ke lenge sas šodo, vo phenel lenge: Si tumen vareso te xas? Von sikavel leske mašio peko, Vo lias lendar ai vo xalias angla lende. Porme vo phenel lenge: Si kathe so me phenavas tumenge kana me mai simas tumensa, ke trubulas t'aresel sa so sas ramome pa mande ande o Zakono katar o Moše, ande le profeturi ai ande le psalmoria. Atunči vo puterdias lengo duxo, eta te hatiaren le Ramomata. Ai vo phenel lenge: Kadia si ramome ke o Kristo kjinuila, ai ke vo živindila anda le mule o trito dies, ai ke o keimos ai o jertimos le bezexenge ande lesko anav avena phende ka sa le thema, angla savořende ande o Jerusalem. Tume san martururi anda kadala dieli. Ai eta, me tradava pe tumende so muřo Dad phendias ke del tume; numa tume, bešen ande o foro žikin či avela pe tumende e zor opral. Vo ningerdias len ži karing e Betania ai vazdias le vast, vo svintsisardias le. Žikin vo svintsil len, vo huladilo lendar ai line les opre ande o čeri. Ai von, pala ke von luvudisarde les, gele palpale ande o Jerusalem jekh bare veselimasa; ai von sas sakda ande o templo, luvudin ai svintson le Devles. Anda gor sas e Vorba, ai e Vorba sas le Devlesa, ai e Vorba sas o Del. Vo sas de anda o gor le Devlesa. Sa le dieli sas kerde lestar, ai khanči anda so si kerdo nas kerdo bi leste. Ande leste sas o traio, ai o traio sas e vedaria le manušengi. E vedaria strefial ande o tuniariko, ai o tuniariko či lias la. Sas jekh manuš tradino katar o Del: lesko anav sas Jono. Vo avilo sar marturo, te del marturia la vedariake, eta ke te sa patian ande late. Vo nas e vedaria, numa vo sikadilo t'avel marturo ka e vedaria. Kadia vedaria sas e čači vedaria, kai avili ande e lumia ai strefial sako manušes. Vo sas ande e lumia, ai e lumia sas kerdi lestar, ai e lumia či prinžiardias les. Vo avilo ando pesko them, ai leske či line les. Numa ka sa kadala kai line les, ka kudala kai patian ande lesko anav, vo dias len e putiaria t'aresen glati le Devleske, save arakhadile, či anda o rat, či anda so kamelas o mas, či anda so kamlias o manuš, numa anda o Del. Ai e Vorba areslo mas, ai vo bešlo maškar amende, pherdo mištimos ai čačimos; ai ame dikhliam lesko vestimos, jekh vestimos sar o vestimos le jekhe Šiavesko kai avel katar o Del. O Jono sas lesko marturo, ai vo tsipil: Si kudo kai me phendem. Kudo kai avel pala mande sas mai opral mandar, ke vo sas angla savořende mandar. Ai ame sa liam leski dragostia ai mištimos pe šukarimos; ke o zakono sas thodino katar o Moše, o mištimos ai o čačimos avile katar o Jesus Kristo. Khonik šoha či dikhlias le Devles; lesko ferdi jekh Šiav, kai si ande e angali le Dadeski, si kudo kai kerdias te žianas les. Eta so phenel o Jono, kana le Židovuri tradine anda o Jerusalem le rašan ai le Leviton, te pušen les: Tu, kon tu san? Vo del palpale, ai či xoxavel, vo phenel ke nai vo o Kristo. Ai von pušen les: So si? san tu o Elia? Ai vo phenel: Me či sim. San tu o profeto? Ai vo del palpale: Niči. Von phenen leske atunči: Kon tu san? eta te das ame palpale kudalenge kai tradine amen. So phenes tu pa tute? Me, phenel vo, me sim o hango kudalesko kai tsipil ande e pusta: Lašiaren e vurma le Bareski, sar phendias o Esai, o profeto. Kudala sas tradine katar le Farizianuri. Von mai pušen les kadia: Sostar tu boles, te na san tu o Kristo, ai či o Elia, ai či o profeto? O Jono del len palpale: Me, bolav ande o pai, numa maškar tumende si varekon kai tume či žianen, kai avel pala mande. Me či sim harniko te putrav e dori pa leske papuča. Kudala dieli nakhle ande e Betania, inčial o Jordan, kai o Jono bolelas. Teharin, vo dikhlias le Jesus ke avel leste, ai vo phenel: Eta o bakrořo le Devlesko, kai lel e bezex la lumiaki. Kado si kai phendem pa leste: Pala mande avel jekh manuš kai sas mai opral mandar, ke sas angla savořende mandar. Me či prinžiaravas les, numa si te sikadiol ande o Israel ke me avilem te bolav ande o pai. O Jono phendias kadia marturia: Me dikhlem o Duxo ke vulel anda o čeri sar jekh gulumbo ai terdilo pe leste. Me či prinžiaravas les, numa kudo kai tradias ma te bolav ande o pai, kudo phendias mange: Kudo pe kaste tu dikhes ke o Duxo vulel ai terdiol, kudo si kai bolel ande o Svinto Duxo. Ai me dikhlem, ai me sim marturo ke vo si o Šiav le Devlesko. Teharin, o Jono mai sas kothe, dui ande leske vortača lesa; ai, dikhlias le Jesus ke nakhel, vo phenel: Eta o bakrořo le Devlesko. Le dui vortača ašunen leste ke phendias kudala vorbi, ai von gele pala o Jesus. O Jesus amboldinisailo, ai vo dikhlias ke von aven pala leste, vo phenel lenge: So roden tume? Von dine les palpale: Rabi (kudia bušol Birevo), kai bešes tu? Aven, phenel lenge vo, ai dikhen. Von gele, ai von dikhle kai vo bešel; ai von bešle paša leste kudo dies. Sas pašte o štarto časo pala mismeri. O Andreas, o phral katar o Simon Petri, sas jekh anda le dui kai ašundiasas le vorbi katar o Jono, ai kai gelo pala o Jesus. Vo si kai arakhlias o mai angluno peske phrales le Simon, ai vo phenel leske: Ame arakhliam le Mesias (kudia bušol Kristo). Ai vo ningerdias les karing o Jesus. O Jesus, dikhlias pe leste, phenel: Tu san o Simon, šiav katar o Jonas; tut akharen tut Sefas (Grekitsko-Petri), kudia bušol «bař». Teharin, o Jesus kamelas te žial ande e Galilea, ai vo arakhel le Filipo. Vo phenel leske: Av mansa. O Filipo sas anda e Betsaida, anda o foro katar o Andreas ai o Petri. O Filipo arakhlias le Natanael, ai phenel leske: Ame arakhliam kudales pa kaste o Moše ramosardias ande o Zakono kai le profeturi dine duma pa leste, o Jesus anda o Nazaret, šiav katar o Josef. O Natanael phenel leske: Šai avel anda o Nazaret vareso lašio? O Filipo del les palpale: Aidi ai dikh. O Jesus, dikhlias ke avel leste o Natanael, phenel pa leste: Eta čačes jekh Israelito, ande kaste nai xoxaimos. Katar žianes ma tu? phenel leske o Natanael. O Jesus del les palpale: Angla savořende ke o Filipo akhardias tu, kana tu sanas tela o kopači le figengo, me dikhlem tu. O Natanael mai lias pe ai phenel leske: Rabi, tu san o Šiav le Devlesko, tu san o amperato anda o Israel. O Jesus del les palpale: Sar ke me phendem tuke ke dikhlem tu tela o kopači le figengo, tu patias; tu dikhesa but mai bare dieli sar kadala. Ai vo phenel leske: Čačimasa, tume dikhena d'akanara o čeri puterdiol ai le andželi le Devleske anklen ai vulen pe o Šiav le manušesko. Trin dies pala kudia, sas abiav ande e Kana ande e Galilea. E dei le Jesusoski sas kothe. Ai o Jesus vi vo sas akhardo ka o abiav peske vortakonsa. E mol mai trubul, e dei le Jesusoski phenel leske: Manai len mol. O Jesus del la palpale: Žiuvlio, so si maškar tute ai maškar mande? Muřo časo inke či avilo. Leski dei phenel le slugenge: Keren so phenela tumenge. Eta, sas kothe šov kanti bařenge, thodine te xalaven pe le Židovuri ai šai žial andre dui vai trin mezuri. O Jesus phenel: Pheren pai kadala kanti, ai von pherdine le ži ka o mui. Len andral akana, phenel lenge vo, ai ningeren le ka kudo, kai lašiarel o abiav. Ai ningerde. Kana kudo kai lašiarel o abiav zumadias o pai pařudo mol — či žianelas katar avel kudia mol, žikin le služi kai line o pai žianenas mišto, — vo akharel le řomes, ai phenel leske: Sako manuš del angla savořende e laši mol, porme e mai prosto pala ke mation; tu, tu garadian e laši mol ži akana. Kadia sas, ande e Kana ande e Galilea, e mai angluni čudenia kai kerdias o Jesus. Vo sikadias pesko vestimos, ai leske vortača patianas ande leste. Pala kudia, vo vulisto ande o Kapernaum, peska dasa, peske phralensa ai peske vortakonsa, ai von bešle ferdi tsiřa dies. E Patradi le Židovongi pašiol, ai o Jesus anklel ande o Jerusalem. Vo arakhlias ande o templo kudalen kai bikjinen le guruven, le bakrořen ai le gulumbon, ai vi kudalen kai pařuven. Kerdias jekh bičo le šelensa, vo gonisardias le sa anda o templo, vi le bakrořen ai vi le guruven; vo peradias le xurde love kudalenge kai pařuvenas, ai dias muial le skafidia; ai vo phenel kudalenge kai bikjinen le gulumbon: Len kadala kathar, na keren anda o kher muře Dadesko jekh kher bikjinimasko. Leske vortača dine pe gindo ke sas ramome: E bari griža anda tjiro kher xal ma. Le Židovuri line e vorba, phenen leske: Če čudenia sikaves tu amenge, te keres kadia? O Jesus del palpale: Phařaven kado templo, ai ande trin dies me vazdava les. Le Židovuri phenen: Trubusardias štar-var-deš ai šov berš te vazden kado templo, ai tu, ande trin dies tu vazdesa les! Numa vo delas duma pa o templo peske statosko. Sa anda kudia, kana vo živindisailo anda le mule, leske vortača dinesas pe godji so vo phendias, ai von patian ka o Ramomos ai ka e vorba kai o Jesus phendias. Žikin o Jesus sas ande o Jerusalem, ka o prasniko e Patradi, but patianas ande lesko anav, dikhenas le čudeni kai vo kerdias. Numa o Jesus či ninkerel pe lende, ke vo žianelas len sa, ai leske či trubulas t'avel les martururi či jekh anda le manuš ke vo inke žianelas so si ande o manuš. Numa sas jekh manuš maškar le Farizianuri, bušolas Nikodem, jekh birevo le Židovongo, kai avilo, vo, paša o Jesus, riate, ai phenel leske: Rabi, ame žianas ke tu san jekh zakonari kai avilo katar o Del; ke khonik naštil te kerel le čudeni kai tu keres, te na avilo o Del lesa. O Jesus del les palpale: Čačimasa, čačimasa, me phenav tuke, te na jekh manuš mai arakhadiola nevo, naštil te dikhel e amperetsia le Devleski. O Nikodem phenel leske: Sar jekh manuš šai mai arakhadiol kana si phuro? Šai mai del vo ande o peř peska dako ai arakhadiol? O Jesus del palpale: Čačimasa, čačimasa, me phenav tuke, te na jekh manuš arakhadiola anda o pai ai o Duxo, naštil te del andre ande e amperetsia le Devleski. So arakhadilo anda o mas si mas, so arakhadilo anda o Duxo si duxo. Te na avel tuke šodo ke me phendem: Trubul te mai arakhadios nevo. E balval phurdel kai voi kamel, ai tu ašunes sar bašel; numa tu či žianes katar avel, či kai voi žial. Sa kadia si anda o manuš kai arakhadilo anda o Duxo. O Nikodem phenel leske: Sar šai t'avel kadia? O Jesus del les palpale: Tu san o zakonari ande o Israel, ai tu či žianes kadala dieli! Čačimasa, čačimasa, me phenav tuke, ame phenas so ame žianas, ai ame sam martururi anda so dikhliam; ai tume či len amari marturia. Te na patiana tume kana me dem duma pa le dieli la phuviake, sar patiana tume kana dava duma pa le dieli le čereske? Khonik či anklisto ande o čeri, te na avela kudo kai vulisto anda o čeri, o Šiav le manušesko kai si ande o čeri. Ai sar o Moše vazdias le sapes ande e pusta, sa kadia trubul ke o Šiav le manušesko t'avel vazdino. Eta ke sako kai patial ande leste t'avel les o traio pe sakda. Ke o Del kadia kamlias la lumia ke dias peske ferdi jekhe Šiaves, eta ke kongodi patial ande leste te na xasavol, numa t'avel les o traio pe sakda. O Del, čačes, či tradias peske Šiaves ande e lumia te del kris la lumia, numa ke e lumia t'avel skipime lestar. Kudo kai patial ande leste nai dino pe kris; numa kudo kai či patial si vuže dino kris, ke vo či patial ande o anav le jekhe Šiavesko le Devlesko. Ai kadia kris si ke, e vedaria avili ande e lumia, le manuš mai drago sas lenge o tuniariko sar e vedaria, ke lenge butia nas laše. Ke kon-godi kerel o nasulimos vuřitsil e vedaria, ai či avel ka e vedaria, daratar ke sikavel so vo kerdias. Kudo kai kerel o čačimos avel ka e vedaria, eta ke sikavel ke leske dieli si kerde katar o Del. Pala kudia, o Jesus sas peske vortačensa, gelo ande e phuv e Judea; ai kothe bešlo lensa, ai bolelas. Vi o Jono bolelas ande o Enon, paša o Salim, ke kothe sas but pai; ai avenas te bolen pe. Ke o Jono nas inke thodino ande e temnitsa. Eta, vazdias pes maškar le Jonoske vortača ai jekh Židovo jekh čingar, sar vužarenas pe. Von avile t'arakhen le Jono, ai phenen leske: Rabi, kudo kai sas tusa inčial o Jordan, ai kaske tu sanas marturo, eta, vo bolel, ai sa žian leste. O Jono del palpale: Jekh manuš naštil te lel mai but ke ferdi so si les dino anda o čeri. Tume san muře martururi ke me phendem: Me či sim o Kristo, numa me sim tradino angla leste. Kudo kaski si e řomni, si o řom; numa o vortako le řomesko, kai bešel kothe ai kai ašunel, si les jekh bari veselia katar o hango le řomesko. Kadia kudi veselia, kai si muři, si vorta. Vo trubul te bariol, ai me ke te teliuvav. Kudo kai avel de opral si opral pa sa; kudo kai si katar e phuv si phuviako, ai vo del duma sar si la phuviako. Kudo kai avel anda o čeri si opral pa sa, vo si marturo de so vo dikhlias ai ašundias, ai khonik či lel so phenel. Kudo kai ašundias so vo phendias šai phenel ke o Del si čačo; ke kudia, kai o Del tradias phenel le vorbi le Devleske, ke o Del či del o Duxo mezurasa. O Dad drago leske o Šiav, ai vo thodias sa le dieli ande leske vast. Kudo kai patial ande o Šiav si les o traio pe sakda; kudo kai či patial ande o Šiav či dikhela o traio, numa e xoli le Devleski bešel pe leste. O Jesus ašundias ke le Farizianuri ašunde ke vo kerel ai bolel mai but vortakon sar o Jono. Numa o Jesus či bolelas vo, numa leske vortača. Atunči vo muklias e Judea, ai gelo palpale ande e Galilea. Sar trubulas te nakhel e Samaria, vo areslo ande jekh foro ande e Samaria, bušol Sišar, paša o kimpo kai o Jakob dias ka o Josef, lesko šiav. Kothe sas e xaing le Jakoboski. O Jesus, kjino katar o drom, bešelas pe e rig la xaingaki. Sas pašte mismeri. Jekh žiuvli anda e Samaria avel te lel pai. O Jesus phenel lake: De ma te piav. Ke leske vortača gele ande o foro te kjinen te xan. E žiuvli samaritana phenel leske: Sar tu, kai san Židovo, manges mandar te pes, mandar kai sim jekh žiuvli samaritana? Le Židovuri, čačes, nai len patia le Samaritanonsa. O Jesus del la palpale: Te žianesas tu so del o Del ai kon si kudo kai phenel tuke: De ma te piav! tu anda tute manglianas lestar te pel, ai vo sas te del tu o pai o živindo. Baria, phenel leske e žiuvli, tut nai tu khanči te les pai, ai e xaing si pria andre; katar avela tut kudo pai živindo? San tu mai baro sar amaro dad o Jakob, kai dias ame kadia xaing, ai kai vo pilias anda late, ai vi leske šiave ai vi leske žigeni? O Jesus del la palpale: Kongodi pela anda kado pai mai avela trušalo; numa kudo kai pela o pai kai me dava les či mai avela šoha trušalo ai o pai kai me dava les avela ande leste jekh paiořo kai xutela ande o traio pe sakda. E žiuvli phenel leske: Baria, de ma anda kudo pai, eta te na mai avav trušali, ai te na mai avav te lav kathe. Žia, phenel lake o Jesus, akhar tjire řomes, ai aidi kathe. E žiuvli del palpale: Nai ma řom. O Jesus phenel lake: Tu čačes phenes: Nai ma řom. Ke tut sas tu panž řom, ai kudo kai si tu akana nai tjiro řom. Ande kodia tu phenes čačimos. Baria, phenel leske e žiuvli, me dikhav ke tu san jekh profeto. Amare purane kamenas pe kako plai; ai tume phenen, tume Židovuri, ke o than kai trubul te kamas si ande o Jerusalem. Žiuvlio, phenel lake o Jesus, patia ma, o časo avel kai nai či pe kado plai či ande o Jerusalem kai tumenge avela drago o Dad. Tumenge si drago so tume či žianen; ame, amenge si drago so ame žianas, ke o skipimos avel katar le Židovuri. Numa o časo avel, ai inke avilo, kai kudala kai kamen čačes kamena le Dades duxosa ai čačimasa; ke si kudala kai o Dad mangel. O Del si Duxo, ai trubul ke kudala kai kamen les kamen les ande o duxo ai ande o čačimos. E žiuvli phenel leske: Me žianav ke o Mesia trubul t'avel (kudo kai akharen les o Kristo); kana vo avela, vo phenela amenge sa le dieli. O Jesus phenel lake: Me sim kudo, me kai dav tusa duma. Pe kadia aresle leske vortača, ai sas lenge šodo ke vo del duma jekha žiuvliasa. Numa či jekh či phenel: So manges tu? vai: Pa soste des tu duma lasa? Atunči e žiuvli, muklias pesko khoro, gelitar ande o foro, ai phenel le ženenge: Aven te dikhen jekhe manušes kai phendias mange sogodi me kerdem; či avela vo o Kristo? Von ankliste avri anda o foro, ai avile karing leste. Ži ande kudia vramia, le vortača gribin les te xal, phenenas: Rabi, xa. Numa vo phenel lenge: Me xalem jekh xamos kai tume či žianen. Le vortača phenen penge jekh kavreske: Varekon andiasas leske te xal? O Jesus phenel lenge: Muřo xamos si te kerav sar mangel kudo kai tradias man, ai te getov leski butji. Či phenen tume ke mai si štar šion ži kai si te kjiden? Eta, me phenav tumenge, vazden le jakha, ai dikhen le kimpuri kai vuže parnion te aven kjidine. Kudo kai kjidel lel jekh pokjinimos, ai kjidel fruti pe o traio pe sakda, eta ke kudo kai bariarel ai kudo kai kjidel veselin pe ande jekh than. Ke ande kudia kai phenen si čačes: Aver si kudo kai bariarel, ai kaver si kudo kai kjidel. Me tradem tumen te kjiden kothe kai tume či kerdian butji; aver kerde butji, ai tume dinian andre ande lenge butji. But Samaritanuri anda kudo foro patian ande o Jesus pala so phendias zurales e žiuvli: Vo phendias mange sa so me kerdem. Kadia, kana le Samaritanuri avile t'arakhen les, von řudjin les te bešel paša lende. Ai vo bešlo kothe dui dies. Mai but patianas pe pala leske vorbi, ai von phenen le žiuvliake: Manai pala ke so tu phendian ke ame patias; ke ame inke ašundiam leste, ai ame žianas ke vo si o skipitori la lumiako. Pala kudala dui dies, o Jesus gelotar kothar, te žial ande e Galilea. Ke vo inke phendias ke jekh profeto nai les pativ ande pesko them. Kana vo areslo ande e Galilea, mišto line sama lestar le Galilenuri, kai von dikhle sogodi vo kerdias ande o Jerusalem kana sas o prasniko; ke vi von sas pe o prasniko. Vo kadia gelo ande e Kana ande e Galilea, kai pařudias o pai ande mol. Sas ande o Kapernaum jekh fitsiri le amperatosko, kai lesko šiav sas nasvalo. Ašundias ke o Jesus avilo anda e Judea ande e Galilea, vo gelo karing leste, ai řudjil les te vulel ai te sastiarel leske šiaves, kai sas te merel. O Jesus phenel leske: Te na dikhena tumen čudeni ai šodo, tume či patian. O fitsiri le amperatosko phenel leske: Baria, vuli angla te merel muřo šiav. Žia, phenel leske o Jesus, tjiro šiav trail. Ai kudo manuš patiaias ka e vorba kai o Jesus phendias leske, ai vo gelotar. Sar vo inke vulelas, leske služi avile angla leste, andine leske kadia viasta: Tjiri glata trail. Vo pušel lendar ka če časo sas leske mai mišto; ai von phenen leske: Aratji, ka o mai angluno časo, o tatimos muklias les. O dad prinžiardias ke sas ka kudo časo kai o Jesus phendias leske: Tjiro šiav trail. Ai vo patiaias, vo ai sa lesko kher. O Jesus mai kerdias kudi duito čudenia kana vo avilo anda e Judea ande e Galilea. Pala kudia, sas jekh prasniko le Židovongo, ai o Jesus anklisto ande o Jerusalem. Eta, ande o Jerusalem, paša o vudar le bakrořengo, si jekh bania kai akharen la židovitsko Betesda, ai kai si la panž stilpuri. Tela kudala vudara sovenas but nasvale, koře, bange, paralitikuri, [kai ažiukerenas te miškil pe o pai; ke jekh andželo vulelas univar ande e bania ai miškilas o pai; ai kudo kai vulelas o mai angluno kana o pai miškilas sas sasto, sogodi avelas lesko nasvalimos.] Sas kothe jekh manuš nasvalo de trianda-ai-oxto berš. O Jesus dikhlias les ke sovel tele, ai žianelas ke vo si nasvalo de dumult, phenel leske: Kames te sastios? O nasvalo del les palpale: Baria, nai man khonik te šiudel man ande e bania kana o pai miškil pe, ai žikin me žiav, jekh aver vulel angla mande. Ušti, phenel leske o Jesus, le tjiro pato, ai phir. Strazo kudo manuš sastilo; vo lias pesko pato, ai phirel. Sas jekh dies sabato. Le Židovuri phenen kudaleske kai sastilo: Si sabato; nai tuke slobodo te ningeres tjiro pato. Vo del len palpale: Kudo kai sastiardias ma phendias mange: Le tjiro pato, ai phir. Von pušen les: Kon si kudo manuš kai phendias tuke: Le tjiro pato, ai phir? Numa kudo kai sastilo či žianelas kon si; ke o Jesus gelotar katar o narodo kai sas ande kudo than. De kothar, o Jesus arakhel les ande o templo, ai phenel leske: Eta, tu sastilian; na mai ker bezex, daratar ke si t'avel tu dieli mai žiungale. Kudo manuš gelotar, ai phenel ka le Židovuri ke o Jesus si kai sastiardias les. Sa anda kudia le Židovuri našen pala o Jesus, ke vo kerelas kudala dieli sabatone. Numa o Jesus del len palpale: Muřo Dad kerel kadala dieli ži akana; vi me, kerav. Anda kudia, le Židovuri rodenas mai but te mudaren les, na ferdi ke del pe o lažiav o sabato, numa ke akharel le Devles Tate, kerel vo pes jekh fialo sar o Del. O Jesus mai lias e vorba, ai phenel lenge: Čačimasa, čačimasa, me phenav tumenge: O Šiav naštil te kerel khanči anda peste, vo kerel ferdi so dikhel ke kerel o Dad, o Šiav sa jekh fialo kerel. Ke o Dad si drago leske o Šiav ai sikavel leske sogodi kerel; ai sikavel leske le butia mai bare sar kadala, eta t'avel tumenge šodo. Ke, sar o Dad živindisarel le mulen ai del len traio, kadia o Šiav del o traio kaske vo kamel. O Dad či del kris khanikas, numa dias sa e kris ka o Šiav, eta te den pativ le Šiaves, sar den pativ le Dades. Kudo kai či del pativ le Šiaves či del pativ le Dades kai tradias les. Čačimasa, čačimasa, me phenav tumenge, kudo kai ašunel muři vorba, ai kai patial kudales kai tradias ma, si les o traio pe sakda ai či avela dino pe kris, numa nakhel katar e martia ka o traio. Čačimasa, čačimasa, me phenav tumenge, o časo avel, ai inke vuže avilo, kai le mule ašunena o hango le Šiavesko le Devlesko; ai kudala kai ašunena les traina. Ke, sar o Dad si les o traio ande leste, kadia dias ka o Šiav t'avel les o traio ande leste. Ai vo dias les e putiaria te del kris, ke vo si Šiav le Devlesko. Te na avel tumenge šodo anda kadia; ke o časo avela kai sa kudala kai si ande le groapoševuri ašunena lesko hango, ai anklena avri. Kudala kai kerde mištimos živindina pe o traio, numa kudala kai kerde nasulimos živindina t'aven pe kris. Me naštiv te kerav khanči anda mande; sar me ašunav, me dav kris; ai muři kris si vorta, ke me či kerav so me kamav, numa so mangel kudo kai tradias ma. T'avel ke me dav duma pa mande, nai muři marturia vorta čači. Te si jekh aver ke del duma pa mande, ai me žianav ke so vo phenel si čačimos. Tume tradian karing o Jono, ai vo sas marturo ka o čačimos. Mange, nai katar jekh manuš ke si mange marturo, numa me phenav kadia, eta te tume t'aven skipime. O Jono sas o lampa kai phabol ai strefial, ai tume kamlian te veselin tume jekh časo ka leski vedaria. Me, si ma jekh marturia mai bari sar o Jono; ke e butji kai o Dad dias man te kerav, kudala butia kai me kerav, si martururi pa mande ke si o Dad kai tradias man, ai o Dad kai tradias man vo si marturo pa mande. Tume či ašundian šoha lesko hango, tume či dikhlian leski fatsa, ai leski vorba či bešel ande tumende, ke tume či patian ande kudo kai vo tradias. Tume zumaven le Ramomata, ke tume gindin tume ke si ande lende o traio pe sakda. Von si kai si marturo pa mande. Ai tume či kamen t'aven mande t'avel tumen o traio! Me či tsirdav muřo vestimos katar le manuš. Numa me žianav ke nai ande tumende o kamimos le Devlesko. Me avilem ande o anav muře Dadesko, ai tume či len ma; t'avel jekh aver ande pesko anav, tume len les. Sar tume šai patian, tume kai tsirden tumaro vestimos jekh kavrestar, ai kai či roden o vestimos kai avel katar o Del? Na gindin tume ke me thav beda pe tumende angla o Dad; kudo kai thol beda pe tumende, si o Moše, ande kaste tume thodian t'ažiukeren. Ke te si ke tume patian ande o Moše, vi ande mande patian, ke vo ramosardias pa mande. Numa te tume te na patian ande kudala ramomata, sar patian tume muře vorbi? Pala kudia, o Jesus gelotar pe e kaver rig la mariaki e Galileaki (vai o Tiberiaseski). Jekh baro narodo žial pala leste, ke von dikhle le čudeni kai vo kerel pe le nasvale. O Jesus anklel pe o plai, ai kothe bešel peske vortakonsa. Eta, e Patradi pašiol, o prasniko le Židovongo. Kana vazdias opre le jakha, ai dikhel ke jekh narodo avel leste, o Jesus phenel ka o Filipo: Kai kjinasa ame manře, ke kadala žene t'aven len te xan? Vo phenelas kudia te zumavel les, ke vo žianelas so si te kerel. O Filipo del les palpale: Le manře kai si t'aven ame pe dui šela dinari či avena dosta ke sako te šai lel jekh tsiřa. Jekh anda leske vortača, o Andreas, phral katar o Simon Petri, phenel leske: Si kathe jekh terno šiavořo kai si les panž manře anda orzo ai dui maše; numa so šai avel kudo pe kaiti but žene? O Jesus phenel: Keren te bešen tele. Sas ande kudo than but čar. Von kadia bešle, sas amburim panž mii manuš. O Jesus lias le manře, naisardias, ai dias le ka kudala kai bešen tele; sa kadia dias le maše, sogodi von kamenas. Kana von pravardile, vo phenel peske vortakonge: Kjiden le kotora kai ašen, eta ke khanči te na xasavol. Von kjidine kadia, ai von pherde deš-u-dui košnitsi le kotorensa kai ašile anda le panž manře orzoske, pala ke sa xale. Kudale žene, dikhle e čudenia kai o Jesus kerdias, phenenas: Kado si čačes o profeto kai trubul t'avel ande e lumia. Ai o Jesus, sar žianelas ke von aven te len les te thon les amperato, mai gelotar pe o plai, ferdi vo. Kana e riat aresli, leske vortača vuliste tele pe o berego la mariako. Ankliste ande jekh čuno, von nakhle e maria te žian ande o Kapernaum. Sas vuže e riat, ai o Jesus inke či areslo ži lende. Phurdel jekh bari balval, ai e maria miškil pe but. Kana tradine o čuno pašte panž kilometri, von dikhle le Jesus sar phirel pe e maria ai pašiol paša o čuno. Ai lias len le e dar. Numa o Jesus phenel lenge: Me sim; na daran! Von kamenas te len les ande o čuno, ai strazo o čuno areslo kothe kai von žianas. O narodo kai bešlo pe e kaver rig la mariaki dikhliasas ke sas kothe ferdi jekh čuno, ai ke o Jesus či anklisto ande kudo čuno peske vortakonsa, numa ke von gele korkořo. Teharin, sas aver čunuri kai aresle anda o Tiberias paša o than kai von xale o manřo pala ke o Baro naisardias. Le žene anda o narodo, dikhle ke či o Jesus či leske vortača nas kothe, ankliste von ande kudala čunuri ai gele ande o Kapernaum te roden le Jesus. Ai arakhle les inčial e maria, von phenen leske: Rabi, kana avilian tu kathe? O Jesus del len palpale: Čačimasa, čačimasa, me phenav tumenge, tume roden ma, na ke tume dikhlian čudeni, numa sar ke tume xalian manřo ai ke tume pravardilian. Keren butji, na pala o xamos kai xasavol, numa pe kudo kai bešel pe o traio sakda, ai kai o Šiav le manušesko dela tume; ke vo si kai o Del tumaro Dad thodias pe leste e pečata. Von phenen leske: So trubul ame te keras, te keras e butji le Devleski? O Jesus del palpale: E butji le Devleski, si te patian ande kudo kai vo tradias. Če čudenia keres tu, eta ame te dikhas, ai te patias ande tute? So keres tu? Amare dada xale e mana ande e pusta, sar si ramome: Vo dias len o manřo anda o čeri te xan. O Jesus phenel lenge: Čačimasa, čačimasa, me phenav tumenge, o Moše či dias tumen o manřo anda o čeri, numa muřo Dad dias tumen o čačo manřo anda o čeri. Ke o manřo le Devlesko, si kai vulel anda o čeri ai kai del o traio la lumiake. Von phenen leske: Baria, de ame sakda kudo manřo. O Jesus phenel lenge: Me sim o manřo le traiosko. Kudo kai avel mande či avela šoha bokhalo, ai kudo kai patial ande mande či avela šoha trušalo. Numa, me phenav tumenge, tume dikhlian ma, ai tume či patiaian. Sa sogodi anda kudala kai o Dad del ma avel mande, ai me či šiudava avri kudales kai avel mande. Ke me vulistem anda o čeri, na te kerav so me kamav, numa so kamel kudo kai tradias man. Eta, so kamel kudo kai tradias ma, si te na xasarav khanikas anda kudalende kai dias ma, numa te živindisarav len o mai paluno dies. So kamel muřo Dad, si ke kon-godi dikhel le Šiaves ai patial ande leste avel les o traio pe sakda; ai me živindisarava les o mai paluno dies. Le Židovuri bulguin pala leste, ke vo phendias: Me sim o manřo kai vulisto anda o čeri. Ai von phenenas: Nai kado o Jesus, o šiav katar o Josef, kai ame žianasas leske dades ai leska da? Sar phenel vo: Me vulistem anda o čeri? O Jesus del len palpale: Na bulguin maškar tumende. Khonik naštil t'avel mande, te na avela o Dad kai tradias ma te tsirdel les peste; ai me živindisarava les o mai paluno dies. Si ramome ande le profeturi: Von avena sa sikade katar o Del. Kadia kon-godi ašundias le Dades ai lias so vo sikiardias avela mande. Khonik či dikhlias le Dades, te na kudo kai avel katar o Del; kudo kai dikhlias le Dades. Čačimasa, čačimasa, me phenav tumenge, kudo kai patial ande mande si les o traio pe sakda. Me sim o manřo le traiosko. Tumare dada xale e mana ande e pusta, ai von mule. Si o manřo kai vulel anda o čeri eta kudo kai xal te na merel. Me sim o manřo živindo kai vulisto anda o čeri. Te si varekon kai xal anda kudo manřo, vo traila pe sakda; ai o manřo kai me dava, si muřo mas, kai me dava pe o traio la lumiako. Pe kadia, le Židovuri si le čingar maškar lende, phenenas: Sar šai del ame vo pesko mas te xas? O Jesus phenel lenge: Čačimasa, čačimasa, me phenav tumenge: Te na xana tume o mas katar o Šiav le manušesko ai te na pena tume lesko rat, tume nai tumen traio ande tumende. Kudo kai xal muřo mas ai kai pel muřo rat si les o traio pe sakda; ai me živindiva les o mai paluno dies. Ke muřo mas si čačes jekh xamos, ai muřo rat si čačes jekh pimos. Kudo kai xal muřo mas ai kai pel muřo rat bešel ande mande, ai me bešav ande leste. Sar o Dad kai si živindo tradias man, ai ke me traiv katar o Dad, kadia kudo kai xal ma trail mandar. Kathe si o manřo kai vulisto anda o čeri. Nai sar tumare dada kai xale e mana ai kai mule. Kudo kai xal kado manřo traila sakda. Kadala dieli vo phendias ande e khangeri ande o Kapernaum. But anda leske vortača, pala ke ašunde leste, phenenas: Kadia vorba si zurali; kon šai ašunel la? O Jesus, žianelas ande peste ke leske vortača bulguin, phenelas lenge: Nai tumenge mišto? Ai te dikhena tume le Šiaves le manušeske te nakhel kai vo sas angla savořende? O duxo si kai zuriarel; o mas nai khančesko. Le vorbi kai me phenav tumenge si duxo ai traio. Numa si maškar tumende uni kai či patian. Ke o Jesus žianelas de anglal kon si kudala kai či patian pe, ai kon si kudo kai dela les ande o vast. Ai vo mai phenel: Sa anda koda me phenav tumenge ke khonik naštil t'avel mande, te na avela leske šinado katar o Dad. De kothar, uni anda leske vortača geletar, ai či mai gele von lesa. O Jesus phenel vo kadia ka le deš-u-dui: Ai tume, či kamen vi tume te žiantar? O Simon Petri del les palpale: Baria, kaste žiasa ame? Tute si le vorbi le traioske pe sakda. Ai ame patiaiam ai ame prinžiardiam ke tu san o Kristo, o svinto le Devlesko. O Jesus del les palpale: Nai ke me alosardem tumen, tumen le deš-u-don? Ai jekh anda tumende si jekh demono! Vo delas duma pa o Juda Iskariot, šiav katar o Simon; ke vo sas kai trubulas te bikjinel les, vo, jekh anda le deš-u-dui. Pala kudia, o Jesus phirel pe e Galilea, ke vo či kamelas te bešel ande e Judea, ke le Židovuri rodenas te mudaren les. Eta, o prasniko le Židovongo, o prasniko katar o Tabernaklo, pašiol. Ai leske phral phenen leske: Žiatar kathar, ai žia ande e Judea, eta ke te tjire vortača te dikhen vi von e butji kai tu keres. Khonik či kerel garades, kana kamel te sikadiol: te keresa tu kudala dieli, sikav tu ka e lumia. Ke či leske phral či patianas ande leste. O Jesus phenel lenge: muři vramia inke či avili, numa tumari vramia si sakda gata. E lumia naštil te vuřitsil tumen; me, voi vuřitsil ma, ke me phenav pa late ke lake butia si nasul. Anklen, tume, ka kudo prasniko; me či ankliav, ke muři vramia inke nai gata. Pala ke phendias lenge kudia, vo bešel ande e Galilea. Kana leske phral ankliste ka o prasniko, vi vo anklisto, na angla o narodo, numa garades. Le Židovuri rodenas les pe o prasniko, ai phenenas: Kai lo vo? Sas ande o narodo baro buntuimos pala leste. Le jekh phenenas: Si jekh manuš lašio. Kaver phenenas: Niči, del rigate le buten. Khonik či delas duma sar kamelas pa leste, daratar katar le Židovuri. Karing o maškar le prasnikosko, o Jesus anklisto ka o templo. Ai vo sikiarelas. Le Židovonge sas šodo, phenenas: Sar žianel vo kaiti, vo kai či sikilo? O Jesus del len palpale: Muřo sikiarimos nai mandar, numa katar kudo kai tradias man. Te si varekon kai kamel te kerel pe leske, vo žianela ke muřo sikiarimos si katar o Del, vai te dava duma anda mande. Kudo kai del duma anda peste rodel pesko vestimos; numa kudo kai rodel o vestimos kudalesko kai tradias les, kudo si čačo, ai nai xoxaimos ande leste. O Moše či dias tume o Zakono? Ai khonik anda tumende či kerel o Zakono. Sostar roden tume te mudaren ma? O narodo del palpale: Ande tute si jekh duxo nasul. Kon rodel tut te mudarel tu? O Jesus del len palpale: Me kerav jekh butji, ai tumenge si sa šodo. O Moše dias tume t'aven šinde — na ke avel katar o Moše, ke kudia avel katar le phure — ai tume šinen jekhe manušes o dies o sabato. T'avela ke jekh manuš lel o šinimos o dies o sabato, eta ke o Zakono katar o Moše te na avel busterdo, sostar xoliavon tume pe mande ke me sa sastiarav jekhe manušes o dies o sabato? Na den pe kris sar dikhen, numa den kris pe sar si e kris. Uni kai bešenas ande o Jerusalem phenenas: Nai vo kado kai rodenas te mudaren les? Ai eta, vo del duma sar vo kamel, ai von či phenen leske khanči! Šai t'avel čačes ke le birevia prinžiarde ke vo si o Kristo? Numa kado, ame žianas katar vo si; numa o Kristo, kana vo avela, khonik či žianel katar vo si. Ai o Jesus, sikiarelas ande o templo, tsipilas: Tume žianen ma, ai tume žianen katar me sim! Me či avilem anda mande, numa kudo kai tradias ma si čačo, ai tume či žianen les. Me, me žianav les; ke me avav lestar, ai vo tradias man. Von kadia rodenas te len les, numa khonik či thodias o vast pe leste, ke lesko časo inke či avilo. But anda o narodo patian ande leste, ai von phenenas: O Kristo, kana vo avela, kerela vo mai but čudeni sar kerel kado? Le Farizianuri ašunde o narodo sar bulguin pa leste kudala dieli. Atunči le bare raša ai le Farizianuri tradine slugen te len les. O Jesus phenel: Me mai sim tumensa pe tsiřa vramia, porme žiavtar karing kudo kai tradias ma. Tume rodena ma ai tume či arakhena ma, ai tume naštin t'aven kothe kai me avava. Pe kudia le Židovuri phenen maškar pende: Kai žiala vo, kai ame či arakhasa les? Žiala vo ka kudala kai si maškar le Grekuri, ai sikiarela vo le Grekon? So si kudia vorba kai vo phendias: Tume rodena ma ai či arakhena ma, ai tume naštin t'aven kai me avava? O mai paluno dies, o baro dies le prasnikosko, o Jesus, bešel pe punřende, tsipilas: Te si varekon trušalo, t'avel mande, ai te pel. Kudo kai patial ande mande, bare paia živinde pitiana anda lesko peř, sar phenel o Ramomos. Vo phenel ande kudia pa o Duxo kai trubul te len kudala kai patian ande leste; ke o Duxo nas inke dino, ke o Jesus nas inke vestime. Žene anda o narodo, ašunenas kadale vorbi, phenenas: Kado si čačes o profeto. Kaver phenenas: O Kristo si. Ai kaver phenenas: Šai t'avel mišto anda e Galilea kai avel o Kristo? O Ramomos či phenel vo ke si katar e vitsa le Davidoski, ai anda o gav o Betlehem, kai sas o David, ke o Kristo trubul t'avel? Sas kadia, pala leste, čingar ande o narodo. Uni anda lende kamenas te len les, numa khonik či thodias o vast pe leste. Kadia le služi gele palpale ka le bare raša ai le Farizianuri. Ai kudala phende lenge: Sostar tume či andian les? Le služi den len palpale: Šoha manuš či dias duma sar kado manuš. Le Farizianuri mai den len palpale: Nai ke vi tume, tume san diliarde. Si varekon maškar le birevia vai maškar le Farizianuri kai patian ande leste? Numa kado narodo kai či žianen o Zakono, si armandine! O Nikodem, kai avilosas ka o Jesus, ai kai sas jekh anda lende, phenelas lenge: Amaro zakono del vo strafo jekhe manušes mai anglal t'ašunel les ai te žianas so vo kerdias? Von den les palpale: San vi tu Galileno? Le sama le Ramomata ai tu dikhesa ke anda e Galilea či anklel profeto. Ai gele sa khere. O Jesus gelo ka o plai le Maslinengo. Numa, de diminiatsara, vo mai gelo ande o templo, ai sa o narodo avel leste. Bešlo tele, vo sikiarelas len. Atunči le zakonaria ai le Farizianuri andine jekha žiuvlia lini sar kerel kurvetsia; ai thodine la maškar o narodo; von phenen leske: Birevo, kadia žiuvli line la sar kerel kurvetsia. O Moše, ande o Zakono, dias amen ordina te mudaras la bařensa kasave žiuvlian; tu kadia, so phenes tu? Von phenenas kudia te zumaven les, eta te thon pe leste beda. Numa o Jesus, bangilo, ramolas pe e phuv le naiesa. Sar von mai pušenas lestar, vo uštilo ai phenel lenge: Ke kudo anda tumende kai nai les bezex šiudel o mai angluno bař pe late. Ai vo pale bangilo, vo ramolas pe e phuv. Kana von ašunde kudia, von geletar jekh pala kaver, de katar o mai phuro ži ka o mai paluno; ai o Jesus bešlo korkořo la žiuvliasa kai sas kothe maškaral. Atunči vo uštilo, ai dikhel ferdi la žiuvlia; o Jesus phenel lake: Žiuvlio, kai le kudala kai thon beda pe tute? Nai khonik te den tu strafo? Voi del palpale: Niči, Baria. Ai o Jesus phenel lake: Či me či dav tu strafo; žia, ai na mai ker bezex. O Jesus mai del lensa duma, ai phenel: Me sim e vedaria la lumiaki; kudo kai avel pala mande či phirela ande o tuniariko, numa avela les e vedaria le traioski. Pe kodo, le Farizianuri phenen leske: Tu des duma pa tute; so tu phenes nai čačimos. O Jesus del len palpale: Makar ke me dav duma pa mande, so me phenav si čačimos, ke me žianav katar me avav ai kai me žiav; numa tume, tume či žianen katar me avav ai kai me žiav. Tume den kris sar si o mas; me či dav kris khanikas. Ai me te dava kris, muři kris si čači, ke me či sim korkořo; numa o Dad kai tradias ma si mansa. Si ramome ande tumaro Zakono ke e marturia katar dui manuš si čači. Me phenav pa mande, ai o Dad kai tradias ma si marturo pa mande. Von phenen leske kadia: Kai lo tjiro Dad? O Jesus del len palpale: Tume či žianen man, či muře Dades. Te žianenas man tume, tume žianenas vi muře Dades. O Jesus phenel kudala vorbi, sikiarelas ande o templo, ande o than kai si o mandjin; ai khonik či thodias o vast pe leste, ke lesko časo inke či avilo. O Jesus phenel lenge: Me žiavtar, ai tume rodena ma, ai tume merena ande tumare bezexa; tume naštin t'aven kai me žiav. Pe kudia le Židovuri phenen: Mudarela vo pes korkořo, ke vo phenel: Tume naštin t'aven kai me žiav? Ai vo phenel lenge: Tume san telal; me, me sim opral. Tume san anda kadia lumia; me, me či sim anda kadia lumia. Sa anda kudia me phenav tumenge ke tume merena ande tumare bezexa; ke tume či patian kon sim me, tume merena ande tumare bezexa. Kon san tu? phenen leske von. O Jesus del len palpale: So me phenav tumenge de mai anglal. Si ma but dieli te phenav pa tumende ai te dav tumen kris; numa kudo kai tradias ma si čačo, ai so me ašundem lestar, me phenav les la lumiake. Von či hatiaren ke von del duma lensa pa o Dad. O Jesus kadia phenel lenge: Kana tume vazdena opre le Šiaves le manušesko, atunči tume žianena kon sim me, ai ke me či kerav khanči anda mande, numa ke dav duma sar ke o Dad sikiardias ma. Kudo kai tradias ma si mansa; ai vo či muklias ma korkořo, ke me kerav sakda so si leske drago. Sar o Jesus delas duma kadia, but patian ande leste. Ai vo phenel le Židovonge kai patian ande leste: Te bešena tume ande muři vorba, tume čačes san muře vortača. Tume žianena o čačimos, ai o čačimos skipila tumen. Von den les palpale: Ame sam anda e vitsa katar o Abraham, ai ame či samas šoha tela vast le kavrenge; sar phenes tu: Tume avena skipime? Čačimasa, čačimasa, me phenav tumenge, mai phenel lenge o Jesus, kon-godi thol pe ka e bezex si řobo la bezexako. Eta, o řobo či bešel sakda ande o kher; o šiav bešel sakda. T'avel ke o Šiav skipil tumen, tume avena čačes slobodo. Me žianav ke tume san katar e vitsa le Abrahamoski; numa tume roden te mudaren man, ke muři vorba či žial ande tumende. Me phenav so me dikhlem ka muřo Dad; ai tume, tume keren so tume ašundian katar tumaro dad. Von den les palpale: Amaro dad si o Abraham. O Jesus phenel lenge: T'avilianas tume šiave katar o Abraham, tume kerdianas le butia katar o Abraham. Numa akana tume roden te mudaren ma, me kai phendem tumenge o čačimos kai ašundem katar o Del. Kadia, o Abraham či kerdiasas. Tume keren le butia tumare dadeske. Von phenen leske: Ame či sam mastevi kai či prinžiaras amare daden; amen si ferdi jekh Dad, o Del. O Jesus phenel lenge: Te avilinosas o Del tumaro Dad, tume sas te kamen man, ke me anda o Del anklistem ai ke me avav; me či avilem anda mande, numa vo tradias man. Sar či hatiaren tume sar me dav duma? Ke tume naštin t'ašunen muři vorba. Tumaro dad si o beng, ai tume kamen te keren so mangel tumaro dad. Vo sas kai mudarel de anda o gor, ai vo či kamel te ninkerel o čačimos, ke nai o čačimos ande leste. Kana vo phenel o xoxaimos, vo del duma anda peste; ke vo si o xoxamno ai o dad le xoxaimosko. Ai me, sar ke me phenav o čačimos, tume či patian ma. Kon anda tumende del duma ke me sim bezexalo? Te me phenava o čačimos, sostar či patian tume mande. Kudo kai si anda o Del ašunel le vorbi le Devleske; tume či ašunen, ke tume či san anda o Del. Le Židovuri dine les palpale: Nai amen čačimos ke phenas ke tu san jekh Samaritano, ai ke tut si tu jekh demono? O Jesus mai del len palpale: Nai man demono; numa me dav pativ muře Dades, ai tume den ma pe o lažiav. Me či rodav t'avav vestime; si jekh kai rodel kudia ai kai del kris. Čačimasa, čačimasa, me phenav tumenge, te si varekon kai garavela muři vorba, vo či dikhela šoha o merimos. Akana, phenen leske le Židovuri, ame prinžiaras ke tu si tu jekh demono. O Abraham mulo, vi le profeturi, ai tu phenes: T'avela varekon ke garavela muři vorba, či merela vo šoha. San tu mai baro sar amaro dad o Abrahamo, kai mulo? Le profeturi vi von mule. Kon gindis ke tu san? O Jesus del palpale: Te luvudiv ma me anda mande, muřo luvudimos nai khanči. Muřo Dad si kai luvudil ma, vo kai tume phenen ke si tumaro Del, ai kai tume či žianen les. Me žianav les; ai, te phenava me ke či žianav les, me avava jekh fialo sar tumende, jekh xoxamno. Numa me žianav les, ai me arakhav leski vorba. O Abraham, tumaro dad, isdrailo dragostar ke vo dikhela muřo dies. Vo dikhlias les, ai vo veselisailo. Le Židovuri phenen leske: Tu inke či san panž-var-deše beršengo, ai tu dikhlian le Abraham! O Jesus phenel lenge: Čačimasa, čačimasa, me phenav tumenge, mai anglal katar o Abraham t'avel, me simas. Pe kudia, von line bař te šiuden le pe leste; numa o Jesus garadilo ai anklisto avri anda o templo. O Jesus nakhelas, dikhlias jekhe manušes kořes dekin arakhadilo. Leske vortača pušen les kadia: Rabi, kon kerdias e bezex, kado manuš vai leske niamuri, t'arakhadilo vo kořo? O Jesus del len palpale: Nai ke vo vai leske niamuri kerde bezex, numa ke te e butji le Devleski te sikadiol ande leste. Trubul ame te keras, žikin si o dies, le butia kudaleske kai tradias man; e riat avel, kai khonik naštil te kerel butji. Žikin me sim ande e lumia, me sim e vedaria la lumiaki. Pala ke phendias kudia, vo čungardias pe e phuv, ai kerdias čik le čungaresa. Porme thodias čik pe le jakha le kořeske. Ai vo phenel: Žia, ai xalav tu ka e xaing o Siloam (kudia bušol tradino). Vo gelo, xaladias pe, ai gelo palpale, dikhelas mišto. Leske vortača ai kudala kai angla savořende žianenas les sar jekh čořo kai mangelas phenenas: Nai vo kado kai bešelas tele ai kai mangelas? Uni phenenas: Vo si. Le kaver phenenas: Niči, numa miazol pe leste. Ai vo inke phenelas: Me sim. Von phenenas leske kadia: Sar tjire jakha puterdile? Vo del palpale: O manuš kai akharen les Jesus kerdias čik, svintsisardias muře jakha, ai phendias mange: Žia ka e xaing o Siloe, ai xalav tu. Me gelem, ai me xaladem ma, ai me arakhlem o dikhimos. Von phenen leske: Kai lo kudo manuš? Vo del palpale: Me či žianav. Von ningerde karing le Farizianuri kudales kai sas kořo. Eta, sas jekh dies o sabato kai o Jesus kerdias e čik, ai puterdias leske jakha. Mai jekh data, le Farizianuri vi von pušen lestar sar vo arakhadias te dikhel. Ai vo phenel lenge: Vo thodias čik pe muře jakha, me xaladem ma, ai me dikhlem. Pe kudia uni anda le Farizianuri phenenas: Kudo manuš či avel katar o Del, ke vo či lel sama o sabato. Kaver phenenas: Sar jekh manuš bezexalo šai kerel kasave čudeni? Ai sas hulaimos maškar lende. Von mai phenen le kořeske: Tu, so phenes tu pa leste, sar vo puterdias tjire jakha? Vo del palpale: Si jekh profeto. Le Židovuri či patian ke vo sas kořo ai ke arakhadias te dikhel, žikin či andine leske dades ai leska da. Ai von pušen lendar, phenenas: Si kado tumaro šiav, kai tume phenen ke arakhadilo kořo? Sar vo dikhel akana? Von den palpale: Ame žianas ke vo si amaro šiav, ai ke vo arakhadilo kořo. Numa sar vo dikhel akana, vai kon puterdias leske jakha, si ke ame či žianas. Pušen lestar, vo si peske beršengo, vo dela duma so si pa leste. Lesko dad ai leski dai phenenas kadia ke von daranas katar le Židovuri; ke le Židovuri thode pe inke ande jekh than, t'avela varekon te prinžiaren le Jesus sar Kristo, avela šiudino anda e khangeri židovitsko. Sa anda kudia leske niamuri phenenas: Si peske beršengo, pušen lestar. Le Farizianuri akharen pe duito data le manušes kai sas kořo, ai von phenen leske: De vestimos ka o Del; ame žianas ke kudo manuš si jekh bezexalo. Vo del palpale: Te si jekh bezexalo, me či žianav; me žianav jekh diela, si ke me simas kořo ai ke akana me dikhav. Von phenen leske: So kerdias vo? Sar puterdias vo tjire jakha? Vo del len palpale: Me phendem tumenge inke, ai tume či ašundian; sostar kamen tume te mai ašunen? Vi tume kamen t'aven leske vortača. Von prasan les ai phenen: Tu san lesko vortako; ame, ame sam le vortača le Mošeske. Ame žianas ke o Del dias duma ka o Moše; numa kado, ame či žianas katar lo vo. Kudo manuš dias len palpale: Šodo si ke tume či žianen katar lo vo; ai numa vo puterdias muře jakha. Ame žianas ke o Del či kerel pe le bezexalengi; numa, te si varekon te del les pativ ai kerel so vo kamel, kudo avela pe leski. Šoha nas ašundo te phenen ke varekon puterdias le jakha jekheske kai arakhadilo kořo. Te kudo manuš te na avilinosas katar o Del, vo naštil te kerel khanči. Von den les palpale: Tu arakhadilian sa ande e bezex, ai tu sikiares. Ai von gonisarde les. O Jesus ašundias ke von gonisarde les ai arakhlias les. Vo phenelas leske: Patias tu tu ka o Šiav le Devlesko? Vo del palpale: Ai kon si kudo, Baria, eta te patiav me ande leste? Tu dikhlian les, phenel o Jesus, ai kudo kai del tusa duma, vo si. Ai vo phenel: Me patiav, Baria. Ai vo dias čanga angla leste. Porme o Jesus phenel leske: Me avilem ande kadia lumia pe jekh kris, pe kudala kai či dikhen te dikhen, ai kudala kai dikhen t'aven koře. Uni Farizianuri kai sas lesa, ašunde kudala vorbi, phenen leske: Vi ame, sam ame koře? O Jesus del len palpale: T'avilianas tume koře, tume sas te na avel tume bezexa. Numa akana tume phenen: Ame dikhas. Sa anda kudia tumari bezex bešel. Čačimasa, čačimasa, me phenav tumenge, kudo kai či del andre pa o vudar ande e stala le bakrengi, numa kai anklel pa e kaver rig, si jekh čor ai jekh řobaš. Numa kudo kai del andre katar o vudar si kai arakhel le bakren. O vudarari putrel leske, ai le bakroře ašunen lesko hango; vo akharel pa anaveste le bakrořen kai si leske, ai vo ningerel le avri. Kana vo ankaladias avri sa peske bakrořen, vo phirel angla lende; ai le bakroře žian pala leste, ke von prinžiaren lesko hango. Von či žian pala jekh streino; numa von našen dur lestar, ke von či prinžiaren o hango le streinosko. O Jesus phenel lenge kadia paramiči, numa von či hatiaren pa soste vo del duma. O Jesus mai phenel lenge: Čačimasa, čačimasa, me phenav tumenge, me sim o vudar le bakrořengo. Sa kudala kai avile angla mande si čor ai řobaš; numa le bakroře či ašunde lende. Me sim o vudar. Te si varekon ke te den andre mandar, vo avela skipime; vo dela andre ai anklela avri, ai vo arakhela so te xal. O čor avel ferdi te čorel, te mudarel ai te phařavel; me avilem eta ke le bakroře t'avel le o traio, ai te bešen ande o but mištimos. Me sim o lašio pastuřo. O lašio pastuřo del pesko traio pala peske bakroře. Numa kudo kai si pokjindo, kai nai vo pastuřo ai kaske nai le bakroře, dikhel ke avel o ruv, mukel le bakrořen, ai lel pe ai našel; ai o ruv lel len ai phařavel len. Kai si pokjindo našel, ke vo si pokjindo, ai ke leske nai mila anda le bakroře. Me sim o lašio pastuřo. Me žianav muře bakrořen, ai von žianen man, sar o Dad žianel ma ai sar me žianav le Dades; ai me dav muřo traio pala muře bakre. Mai si ma kaver bakroře, kai nai ande kadia stala bakrengi; von ašunena muřo hango, ai avena sa ande jekh than ai jekh pastuřo. O Dad kamel ma, ke me dav muřo traio, eta te lav les. Khonik či lel les mandar, numa me dav les anda mande; si ma e putiaria te dav les, ai si ma e putiaria te lav les. Kadia si e ordina kai lem katar muřo Dad. Mai sas pala kadala vorbi nevo hulaimos maškar le Židovuri. But anda lende phenenas: Vo si les jekh demono, vo si dilo; sostar ašunen tume leste? Kaver phenenas: Nai le vorbi katar jekh kai si bengalo; jekh demono šai putrel vo le jakha jekhe kořeske? Vestisarde ande o Jerusalem o prasniko kai vužarde o templo. Sas o iven. Ai o Jesus phiravelas pe ande o templo, tela le stilpuri katar o Salomon. Le Židovuri ašiade krugom leste, ai phenen leske: Ži kana mukesa tu amen te na žianas? Te san tu o Kristo, phen les amenge čačimasa. O Jesus del palpale: Me phendem tumenge, ai tume či patian tume. Le butia kai me kerav ande o anav muře Dadesko si martururi pa mande. Tume či patian, ke tume či san anda muře bakroře. Muře bakroře ašunen muřo hango; me prinžiarav le, ai von aven pala mande. Me dav le o traio pe sakda; ai von či xasavona šoha, ai khonik či len len anda muřo vast. Muřo Dad, kai dias le mange, si mai baro sar sa; ai khonik naštil te lel le anda o vast muře Dadesko. Me ai o Dad sam jekh. Atunči le Židovuri mai line bař te mudaren les. O Jesus phenel lenge: Me sikadem tumenge but laše butia kai avile katar muřo Dad. Pala savo mudaren ma tume bařensa? Le Židovuri den les palpale: Nai pala ke jekh laši butji ke ame mudaras tu bařensa, numa pala jekh prasaimos, ai si ke tu, kai san jekh manuš, tu keres tu Del. O Jesus del len palpale: Nai ramome ande tumaro Zakono: Me phendem: Tume san dela? Te akharela vo dela kudalen kaske e vorba le Devleski si phendi, ai t'avela ke o Ramomos naštil t'avel phařado, kudo kai o Dad svintsisardias ai tradias les ande e lumia, tume phenen leske: Tu prasas! Ai kudia ke me phendem: Me sim o Šiav le Devlesko. Te na kerava me le butia muře Dadeske, na patian mande. Numa me te kerava, makar ke tume či patian mande, patian tume ka kudala butia, eta tume te žianen ai prinžiaren ke o Dad si ande mande ai ke me sim ande o Dad. Pe kudia, von mai rodine te len les; numa vo skipisailo anda lenge vast. O Jesus mai gelo inčial o Jordan, ande o than kai o Jono angla savořende bolelas. Ai vo bešel kothe. But žene aven leste, ai von phenenas: O Jono či kerdias či jekh čudenia; numa so o Jono phendias pa kado manuš sas čačimos. Ai, ande kudo than, but patian ande leste. Sas jekh manuš nasvalo, Lazar, anda e Betania, gav katar e Maria ai e Marta, laki phei. Sas kudia Maria kai svintsisardias duxasa le Bares ai kai khoslias leske punře peske balensa, ai sas lako phral o Lazar kai sas nasvalo. Le pheia tradine te phenen ka o Jesus: Baria, eta, kudo kai tu kames si nasvalo. Pala ke ašundias kudia, o Jesus phenel: Kudo nasvalimos nai merimasko; numa si te vestin le Devles, eta ke o Šiav le Devlesko t'avel vestime lestar. Eta, o Jesus sas leske drago e Marta, ai laki phei, ai o Lazar. Sar vo ašundias ke o Lazar sas nasvalo, vo mai bešlo dui dies ande o than kai vo sas, ai vo phenel atunči ka le vortača: Avas palpale ande e Judea. Le vortača phenen leske: Rabi, le Židovuri nai de dumult rodenas te mudaren tu le bařensa ai tu žias palpale ande e Judea! O Jesus del palpale: Nai deš-u-dui časuri ande o dies? Te si varekon ke phirel diese, vo či isdral, ke vo dikhel e vedaria kadala lumiaki. Numa, te si varekon ke phirel riate, vo isdral, ke e vedaria nai ande leste. Pala kadala vorbi, vo phenel lenge: Lazar, amaro vortako, sovel; numa žiav te uštiavav les. Le vortača phenen leske: Baria, te sovel vo, vo sastiol. O Jesus diasas duma pa lesko merimos, numa von gindinas ke vo dias duma pa leski lindri. Atunči o Jesus phenel lenge vorta: O Lazar mulo. Ai, pala tumende, eta ke tume te patian, me veseli ma ke me či simas kothe. Ame žias karing leste. Pe kudia o Tomas, akhardo Žiameno, phenel le kavre vortakonge: Žias vi ame, te meras lesa. O Jesus, vo areslo, arakhlias ke o Lazar sas inke de štar dies ande o groapoševo. Ai, sar e Betania si paše paša o Jerusalem, pašte trin kilometri, but Židovuri avilesas karing e Maria ai e Marta, te vatin le ke mulo lengo phral. Kana e Marta ašundias ke o Jesus areslo, voi geli angla leste, žikin e Maria bešelas tele ande o kher. E Marta phenel ka o Jesus: Baria, te avilianas tu kathe, muřo phral sas te na merel. Numa, inke akana, me žianav ke sogodi tu manges ka o Del, o Del del les tuke. O Jesus phenel lake: Tjiro phral živindila. Me žianav, del palpale e Marta, ke vo živindila kana avela o živindimos, o mai paluno dies. O Jesus phenel lake: Me sim o živindimos ai o traio. Kudo kai patial ande mande traila, makar t'avela mulo; ai kon-godi trail ai patial ande mande či merela šoha. Patias tu kudia? Voi phenel leske: Ei, Baria, me patiav ma ke tu san o Kristo, o Šiav le Devlesko, kai trubulas t'avel ande e lumia. Dias duma kadia e Marta ai vi voi gelitar. Porme akharel pe čoral la Maria, peski phei, ai phenel lake: O Birevo lo kathe, ai mangel tu. Sar e Maria ašundias, voi uštili sigo, ai geli karing leste. Ke o Jesus inke či dias andre ande o gav, numa sas ande o than kai e Marta arakhlias les. Le Židovuri kai sas la Mariasa ande o kher ai kai vatinas la, dikhle ke voi uštili sigo ai anklisti avri, gele pala late, phenenas: Voi žial ka o groapoševo, te rovel. Kana e Maria aresli kothe kai si o Jesus, voi peli ka leske punře, ai phenel leske: Baria, t'avilianas tu kathe, muřo phral sas te na avel mulo. O Jesus dikhlias ke rovel, voi ai le Židovuri kai sas lasa, isdrailo ande peste, ai sa lias les e mila. Ai vo phenel: Kai thodian les tume? Baria, den les von palpale, aidi ai dikh. O Jesus rovel. Pe kudia le Židovuri phenen: Dikhen sar kamelas les. Ai uni maškar lende phenen: Vo kai puterdias le jakha le kořeske naštisardiasas te kerel vo ke kado manuš te na merel? O Jesus mai isdraias ande peste, gelo ka o groapoševo. Sas jekh groapa, ai jekh bař sas thodino anglal. O Jesus phenel: Len o bař. E Marta, e phei le muleski, phenel leske: Baria, vo khandel inke, ke de štar dies vo si kothe. O Jesus phenel lake: Či phendem tuke me, te patiasa, tu dikhesa o vestimos le Devlesko? Von line tele kadia o bař. Ai o Jesus vazdias le jakha opre, ai phenel: Tate, me naisiv tuke de sar tu ašundian mande. Mange, me žianav ke tu sakda ašunes mande; numa me dem duma pala o narodo kai si krugom mandar, eta te patian ke tu san kai tradian man. Phendias kudia, vo tsipisardias jekh hango zuralo: Lazar, ankli! Ai o mulo anklisto, le punře ai le vast phangle ande selii, ai lesko mui garado ande jekh pištjiri. O Jesus phenel: Putren les, ai muken les te žial. But anda le Židovuri kai avile karing e Maria, ai kai dikhle so kerdias o Jesus, patian ande leste. Numa uni anda lende gele t'arakhen le Farizianon, ai phende lenge so o Jesus kerdias. Atunči le bare raša ai le Farizianuri kjidine e Kris e židovitsko, ai phenen: So kerasa ame? Ke kado manuš kerel but čudeni. Te mukasa ame te kerel, sa patian ande leste, ai le Romanuri aven te phařaven amaro foro ai amaro them. Jekh anda lende, Kaifas, kai sas o baro rašai kudo berš, phenel lenge: Tume či hatiaren khanči; tume či den tume godji ke tumenge avela mai mišto ke ferdi jekh manuš merel le narodoske, ai ke sa o them te na xasavol. Eta, či phenelas kudia vo anda peste; numa ke sas baro rašai kudo berš, vo sikiardias mai anglal ke o Jesus trubul te merel pala o them. Ai nai ke ferdi pala o them; sas kadia eta te kjiden ande jekh stato le šiave le Devleske řipime. De katar kudo dies, von thode pe te mudaren les. Sa anda kudia o Jesus či mai sikadiol maškar le Židovuri; numa vo gelotar ande le riga paša e pusta, ande jekh foro kai bušol Efraim; ai kothe bešel peske vortakonsa. E Patradi le Židovongi pašiol. Ai but žene anda o them anklen ande o Jerusalem angla e Patradi, te vužion. Von roden le Jesus, ai von phenen jekh avreske ande o templo: So miazol tumenge? Či avela vo pe o prasniko? Eta, le bare raša ai le Farizianuri dinesas e ordina ke, te si varekon te žianel kai lo vo, te phenel les, eta te len les. Šov dies angla savořende e Patradi, o Jesus areslo ande e Betania, kai sas o Lazar, kai vo živindisardias les katar le mule. Kothe, dine les te xal; e Marta služil, ai o Lazar sas jekh anda kudala kai sas pala e skafidi lesa. E Maria lias jekh funto anda jekh duxi anda o nardo vužio kai si pria kuč, maklias le punře le Jesusoske, ai voi khosel leske punře peske balensa; ai o kher pherdilo khandimos katar e duxi. Jekh anda le vortača, o Juda Iskariot, šiav katar o Simon, kudo kai trubulas te bikjinel les, phenel: Sostar či bikjindias voi kudia duxi trin šela dinari, te del le ka le čoře? Vo phendias kadia, na ke sas leske mila anda la čoře, numa ke vo sas čor, ai ke sas les e tišila; vo lelas so sas andre. Numa o Jesus phenel: Muk la te garavel kudia duxi pe o dies ka muřo groapoševo. Tumen si tume sakda le čoře tumensa, numa me či avava tumensa sakda. But Židovuri ašunde ke o Kristo sas ande e Betania; ai von avile, na ke ferdi pala leste, numa vi te dikhen le Lazar, kai vo uštilo anda le mule. Le bare raša thodine pe gindo vi te mudaren le Lazar. Ke but anda le Židovuri žianas lendar pala leste, ai patianas ande o Jesus. Teharin, but žene avile ka o prasniko, ašundesas ke phenen ke o Jesus žialas ande o Jerusalem. Line patria anda le kopačia palmi, ai gele angla leste, tsipinas: Hosana! Svintsime t'avel kudo kai avel ande o anav le Baresko, O amperato anda o Israel. O Jesus arakhlias jekh magaritsa, ai bešlo opral, sar si ramome: Na dara, šei anda o Sion; Eta, tjiro amperato avel, Bešel pe jekh tsiknořo katar e magaritsa. Leske vortača či hatiarde mai anglal kudala dieli; numa, kana o Jesus areslo vestime, von dine pe godji ke so sas ramome pa leste, ai ke kudia sas kerdo karing leste. Sa kudala kai sas le Jesusosa, kana akhardias le Lazar anda o groapoševo ai živindisardias les katar le mule, sas leske martururi; ai o narodo avel angla leste, ke von ašunde ke vo kerdias kadia čudenia. Le Farizianuri phenen penge von kadia jekh avreske: Tume dikhen ke či nirin khanči; eta, e lumia geli pala leste. Uni Grekuri, anda kudala kai ankliste te řudjin ka o prasniko, pušen katar o Filipo, anda e Betsaida ande e Galilea, ai von phenen leske zurales: Baria, ame kamas te dikhas le Jesus. O Filipo gelo te phenel ka o Andreas, porme o Andreas ai o Filipo phenen ka o Jesus. O Jesus del len palpale: O časo avilo kai o Šiav le manušesko trubul t'avel vestime. Čačimasa, čačimasa, me phenav tumenge, jekh simintsa gjiveski bešel korkořo te na perel ande e phuv ai te na merela; numa, te merela, vo dela but fruti. Kudo kai si leske drago lesko traio xasarela le, ai kudo kai vuřitsil pesko traio ande kadia lumia garavela le pe o traio sakda. Te si varekon te služil ma, t'avel mansa; ai kothe kai me avava, kothe avela vi muři sluga. Te si varekon te služil ma, o Del dela les pativ. Akana muřo duxo si rimome. Ai so phenava me? Tate, skipisar ma anda kado časo? Numa anda kadia me avilem ži ka kado časo. Tate, vestisar tjiro anav! Ai jekh hango avel anda o čeri: Me vestisardem les, ai mai vestisarava les. O narodo kai sas kothe, ai kai ašundias, phenenas ke si jekh řondieto. Kaver phenenas: Jekh andželo dias lesa duma. O Jesus phenel: Nai ke pala mande ke kudo hango ašundian les; numa pala tumende. Akana si e kris kadala lumiaki; akana o prinso kadala lumiako avela šiudino avri. Ai me, kana avava uštiado pa e phuv, me anava sa le manušen mande. Sar delas duma kadia, vo sikavelas ande savi martia vo si te merel. O narodo del les palpale: Ame sikiliam katar o Zakono ke o Kristo bešel pe sakda; sar phenes tu: Trubul o Šiav le manušesko t'avel vazdino? Kon si kudo Šiav le manušesko? O Jesus phenel lenge: E vedaria mai si pe jekh tsiřa vramia maškar tumende. Phiren, žikin si tumen e vedaria, eta ke o tuniariko te na lel tumen: kudo kai phirel ande o tuniariko vo či žianel kai žial. Žikin si tumen e vedaria, patian ande e vedaria, eta t'aven tume šiave la vedariake. O Jesus phenel kudala dieli, porme gelotar, ai garadilo dur lendar. Makar kasave but čudeni kai vo kerdias angla lende, von či patianas ande leste, eta t'aresel e vorba katar o Esai, o profeto, kai phendias: Baria, Kon patiaias so ame phendiam? Ai kaske o vast le Baresko sas sikado? Kadia naštinas von te patian, ke o Esai mai phendias: Vo kořardias lenge jakha; ai vo zuriardias lengo ilo. Daratar kai šai dikhen penge jakhensa ke hatiaren ande pengo ilo, ke kein pe, te sastiarav le. O Esai phendias kudala dieli, kana dikhlias lesko vestimos, ai ke delas duma pa leste. Numa, inke maškar le birevia, but patianas ande leste; numa, pala le Farizianuri, von či puřinas pe, daratar ke den le avri anda le khangeria židovitsko. Ke lenge sas drago o vestimos katar le manuš mai but sar o vestimos le Devlesko. Eta, o Jesus tsipilas: Kudo kai patial ande mande, na ande mande patial, numa ande kudo kai tradias man; ai kudo kai dikhel ma dikhel kudales kai tradias man. Me avilem sar jekh vedaria ande e lumia; eta, kon-godi patial ande mande te na bešel ande o tuniariko. Te si varekon ke ašunel muře vorbi ai či garavel len, nai ke me dav les pe e kris; ke me avilem na te dav kris la lumia, numa te skipiv la lumia. Kudo kai šiudel man ai kai či lel muře vorbi si les lesko krisinitori; e vorba kai me phendem, voi si kai dela les pe e kris o mai paluno dies. Ke me či dem duma anda mande; numa o Dad, kai tradias ma, vo sikiardias ma so trubul te phenav ai so avel. Ai me žianav ke muři poronka si o traio pe sakda. Sa anda kudia le dieli kai me phenav, me phenav le sar o Dad phendias le mange. Angla o prasniko la Patradiako, o Jesus žianelas ke lesko časo avilo te nakhel katar e lumia ka o Dad, ai sas leske drago peske kai sas ande e lumia, dias sa pesko kamimos lenge. Žikin xan, o beng dias ande o Juda Iskariot, šiav katar o Simon, sikiardias les te bikjinel les. O Jesus, kai žianelas ke o Dad thodias sa le dieli ande leske vast, ai ke vo avilo katar o Del ai žialtar ka o Del, uštilo katar e skafidi, lias le tsalia pa peste, ai lias jekh pištjiri, phanglias les pe lesa. Atunči dias muial pai ande jekh balai, ai lias pe te xalavel le punře peske vortakonge, ai khosel len le pištjiresa kai sas lesa phanglo. Vo avilo kadia ka o Simon Petri; ai o Petri phenel leske: Tu, Baria, tu xalavesa muře punře! O Jesus del les palpale: So me kerav, tu či hatiaresa akana, numa tu hatiaresa sigo. O Petri phenel leske: Niči šoha tu či xalavesa muře punře. O Jesus del les palpale: Te na me xalavava tut, tut či avela partia mansa ande e amperetsia le Devleski. O Simon Petri phenel leske: Baria, na ferdi le punře, numa vi le vast ai vi o šero. O Jesus phenel leske: Kudo kai si xalado trubul les ferdi te xalavel peske punře t'avel sa vužio; ai tume san vuže, numa na sa. Ke vo žianelas kudales kai si te del les ande o vast; sa anda kudia vo phendias: Tume či san sa vuže. Pala ke xaladias lenge punře, ai ke lias peske tsalia pe peste vo thodias pe pala e skafidi, ai phenel lenge: Hatiaren tume so me kerdem tumenge? Tume akharen ma Birevo ai Baro; ai tume phenen mišto, me sim. Te si ke me xaladem le punře, me, o Baro ai o Birevo, tume trubul te xalaven tumare punře jekh avreske. Ke me dem tumen jekh semno te sikavav, eta ke tume te keren sar me kerdem. Čačimasa, čačimasa, me phenav tumenge, e sluga nai voi mai bari sar lako birevo, či o apostolo sar kudo kai tradias les. Te žianena tume kadala dieli, tume san vesele, te kerena tume kadia. Na ke anda sa tumende ke me dav duma; ke me žianav kudalen kai me alosardem. Numa trubul ke o Ramomos te aresel: Kudo kai xal mansa o manřo Amboldinisailo pe mande. De akanara me phenav tumenge, angla savořende ke te e diela aresel, eta ke kana aresela, tume patiana so me phendem. Čačimasa, čačimasa, me phenav tumenge, kudo kai primila kudales kai me tradem primila man, ai kudo kai primil ma primil kudales kai tradias man. Dias duma kadia, o Jesus nas leske mišto ande lesko duxo, ai vo phenel naročno: Čačimasa, čačimasa, me phenav tumenge, jekh anda tumende bikjinel ma. La vortača dikhen jekh pe avreste, či žianenas pa kaste del duma. Jekh anda leske vortača, kudo kai o Jesus kamelas, bešel paša le Jesus. O Simon Petri kerel leske semno te pušel kon si kudo kai o Jesus del duma pa leste. Ai kudo vortako, bangilo pe o kolin le Jesusosko, phenel leske: Baria, kon si? O Jesus del les palpale: Kudo si kaske me dava o kotor o kjingo. Ai, kjingiardias pesko kotor, vo dias les ka o Juda, šiav katar o Simon, o Iskariot. De sar o kotor sas dino, o Satan dias ande o Juda. O Jesus phenel leske: So tut si te keres, ker les sigo. Numa či jekh anda kudala kai sas ka e skafidi či hatiarde sostar vo phendias leske kudia; ke uni gindinas ke, sar o Juda sas les e tišila, o Jesus kamelas te phenel leske: Kjin so trubul ame pe o prasniko, vai ke porončilas leske te del vareso le čořen. O Juda, lias o kotor, gribisailo t'anklel avri. Sas e riat. Kana o Juda anklisto avri, o Jesus phenel: Akana, o Šiav le manušesko sas vestime, ai o Del sas vestime ande leste. T'avel ke o Del sas vestime ande leste, o Del vi vo vestila les ande peste, ai mai vestila les. Muře tsinoře glati, me mai sim pe tsiřa vramia tumensa. Tume rodena ma; ai, sar me phendem le Židovonge: Tume naština t'aven kothe kai me žiav, me phenav les vi tumenge akana. Me dav tumen jekh poronka nevi: T'aven drago jekh avreske; sar me kamlem tumen, vi tume, kamen tume jekh avres. Ande kudia sa žianena ke tume san muře vortača, te si tume kamimos jekh avreske. O Simon Petri phenel leske: Baria, kai žiasa tu? O Jesus del les palpale: Tu naštis akana t'aves pala mande, numa tu avesa mai palal. Baria, phenel leske o Petri, sostar naštiv te žiav me pala tute akana? Me dava muřo traio pala tute. O Jesus del palpale: Tu desa tjiro traio pala mande! Čačimasa, čačimasa, me phenav tuke, o kokošo či gjilabela tri-var ke tu či mai prinžiaresa ma. Ke tumaro ilo te na rimol pe. Patian ande o Del, ai patian ande mande. Si but thana kai te bešen ande o kher muře Dadesko; te na avilinosas kadia, me phendemas les tumenge. Me žiav te lašiarav tumenge jekh than. Ai, kana me žiavatar, ai ke lašiardem tumenge jekh than, me avava palpale, ai me lava tumen mansa. Eta ke kothe kai me avava t'aven vi tume. Tume žianen kai me žiav, ai tume žianen e vurma. O Tomas phenel leske: Baria, ame či žianas kai tu žias; sar žianasa ame e vurma? O Jesus phenel leske: Me sim e vurma, o čačimos, ai o traio. Khonik či avel ka o Dad ke ferdi mandar. Te žianena man tume, tume žianena vi muře Dades. Ai de akanara tume žianen les, ai tume dikhlian les. O Filipo phenel leske: Baria, sikav amenge le Dades, ai avela amenge dosta. O Jesus phenel leske: Si de dumult ke mii sim tumensa, ai tu či prinžiardian ma, Filipo? Kudo kai dikhlias man dikhlias le Dades. Sar phenes tu: Sikav amenge le Dades? Či patias tu ke me sim ande o Dad, ai ke o Dad si ande mande? Le vorbi kai me phendem tumenge, či phenav le me mandar; ai o Dad kai bešel ande mande, vo si kai kerel peske butia. Patian mande, me sim ande o Dad, ai o Dad si ande mande; patian mišto katar leske butia. Čačimasa, čačimasa, me phenav tumenge, kudo kai patial ande mande kerel vi vo le butia kai me kerav, ke me žiavtar ka o Dad. Ai sa so tume mangena ande muřo anav, me kerava les, eta ke te o Dad luvudil pe ande o Šiav. Te mangena mandar vareso ande muřo anav, me kerava les. Te kamena tume ma, garavena muře poronki. Ai me, me řudjiva le Dades, ai vo tradela tumenge jekh kaver kai lela sama tumendar, eta te bešel sakda tumensa. Vo si o Duxo le čačimasko, kai e lumia naštil te lel, ke vo či dikhel les ai či žianel les; numa tume, tume žianen les, ke vo bešel tumensa. Me či mukava tumen korkořo, me avava tumende. Mai jekh tsiřa vramia, ai e lumia či mai dikhela ma; numa tume, tume dikhena ma, ke me traiv, ai vi tume traina. Ande kudo dies, tume prinžiarena ke me sim ande muřo Dad, ai ke tume san ande mande ai ke me sim ande tumende. Kudo kai si les muře poronki ai kai garavel le, kudo si kai kamel ma; ai kudo kai kamel ma avela drago muře Dadeske, me kamava les, ai me kerava te prinžiarel ma. O Juda, na o Iskariot, phenel leske: Baria, katar avela ke tu keresa te prinžiaras tu, ai na e lumia? O Jesus del les palpale: Te si varekon ke kamel ma, vo garavela muře vorbi, ai muřo Dad kamela les; ame avasa leste, ai ame kerasa amaro kher leste. Kudo kai či kamel ma či garavel muře vorbi. Ai e vorba kai tume ašunen nai mandar, numa katar o Dad kai tradias ma. Me phenav tumenge kadala dieli žikin bešav tumensa. Numa kudo kai lela sama tumendar, o Duxo Svinto, kai o Dad tradela ande muřo anav, sikiarela tume sa kadala dieli, ai dela tumen godji sa so me phendem tumenge. Me mukav tumenge e patia. Me či dav la tumenge sar e lumia del la. Ke tumaro ilo te na rimol pe, ai te na daral. Tume ašundian ke me phendem tumenge: Me žiavtar, ai me avava karing tumende. Te kamena man tume, tume veselina tume ke me žiavtar ka o Dad; ke o Dad si mai baro mandar. Ai akana me phenav tumenge kadala dieli angla savořende t'aresen, eta, kana von aresena, tume te patian. Me či mai dava duma tumensa; ke o prinso kadala lumiako avel. Les nai khanči ande mande. Numa ke te e lumia te žianel ke mange si drago o Dad, ai ke me kerav sar si e ordina kai o Dad dias ma. Ušten, žiastar kathar. Me sim e čači rez, ai muřo Dad kai lel sama. Sako řai kai si ande mande ai kai či del fruta, vo šinel la; ai sako řai kai del fruta, vo lašiarel la, eta te del mai but fruta. Inke tume san vuže, pala e vorba kai me phendem tumenge. Bešen ande mande, ai me bešava ande tumende. Sar e řai naštil anda peste te del fruta, te na avela phangli ka e rez, kadia vi tume naštin, te na bešena ande mande. Me sim e rez, tume san le řaja. Kudo kai bešel ande mande ai ande kaste me bešav del but fruti, ke bi mango tume naštin te keren khanči. Te si varekon kai či bešel ande mande, si šiudino avri, sar e řai, ai šukiol; porme kjiden le řaja, šiuden le ande e jag, ai von phabon. Te bešena tume ande mande, ai ke muře vorbi bešen ande tumende, mangen so tume kamen, ai avela tumen dino. Te dena tume but fruta, kadia muřo Dad avela luvudime, ai ke tume avena muře vortača. Sar o Dad kamelas ma, vi me kamlem tumen. Bešen ande muřo kamimos. Te garavena tume muře poronki, tume bešena ande muřo kamimos, sar ke me garadem le poronki katar muřo Dad, ai ke me bešav ande lesko kamimos. Me phendem tumenge kadala dieli, eta ke te muři veselia t'avel ande tumende, ai ke tumari veselia t'avel vorta. Kathe si muři poronka: T'aven drago jekh avreske, sar mange sanas drago. Nai mai baro kamimos ke te des tjiro traio pala vortača. Tume san muře vortača, te kerena tume so porončiv tumenge. Me či mai akharav tumen služi, ke e sluga či žianel so kerel lesko birevo; numa me akharav tumen vortača, ke me kerdem te žianen sogodi me sikilem katar o Dad. Nas ke tume alosardian man; numa me, me alosardem tumen, ai me thodem tumen, ai ke tume t'anen fruta, ai ke tumari fruta te bešel, eta ke so tume mangena katar o Dad ande muřo anav, vo del les tumenge. So me porončiv tumenge, si t'avel drago jekh avreske. Te si e lumia ke vuřitsil tumen, žianen ke vuřitsisardias man angla tumende. Te sanas tume anda e lumia, e lumia kamelas tumen, numa ke tume či mai san anda e lumia, ai ke me alosardem tumen anda e lumia, anda kudia e lumia vuřitsil tumen. Den tume godji ka e vorba kai me phendem tumenge: E sluga nai voi mai bari sar o birevo. Te marde man von, von vi tumen marena. Te von garade muři vorba, von garavena vi tumari. Numa von kerena tumenge sa kudala dieli pala muřo anav, ke von či žianen kudales kai tradias man. Te na me avilemas ai te na demas lensa duma, len sas te na aven len bezexa; numa akana nai len či jekh te jertil le katar lenge bezexa. Kudo kai vuřitsil man vuřitsil vi muře Dades. Te na kerdemas maškar lende le butia kai khonik či kerdias, len sas te na aven len bezexa; numa akana von dikhle, ai von vuřitsarde ai man ai muře Dades. Numa kudia areslias eta te kerdiol e vorba kai si ramome ande lengo Zakono. Von vuřitsarde man intaino. Kana avela kudo kai lel sama tumendar, ke me tradava tumenge katar e partia le Dadeski, o Duxo le čačimasko, kai avel katar o Dad, vo avela marturo anda mande. Ai vi tume, tume avena martururi, ke tume san mansa de anda o gor. Me phendem tumenge kadala dieli, eta te na muken tumaro patiamos. Von dena tumen avri anda le khangeria židovitsko; ai inke o časo avel kana kodo kai mudarela tumen gindila ke vo kerel mištimos le Devleske. Ai von kerena kadia, ke von či prinžiaren či le Dades či man. Me phenav tumenge kadala dieli, eta ke, kana o časo avela, tume dena tume godji ke me phendem le tumenge. Me či phendem le tumenge d'anda o gor, ke me simas tumensa. Akana me žiavtar karing kudo kai tradias man, ai khonik anda tumende či pušel ma: Kai žias tu? Numa, sar ke me phendem tumenge kadala dieli, o nekazo dias ande tumaro ilo. Numa me phenav tumenge o čačimos: mai mišto avelas tumenge ke me žiavtar, ke te či žiavatar, kudo kai lel sama tumendar či avela karing tumende; numa, te žiavatar, me tradava les tumenge. Ai kana vo avela, vo sikavela la lumiake so si e bezex, e kris, ai o strafo ai sar le žene šibin pe. So si e bezex, ke von či patiana ande mande; so si e kris, ke me žiav ka o Dad, ai ke tume či mai dikhena ma; so si o strafo, ke o prinso kadala lumiako si dino pe kris. Mai si ma but dieli te phenav tumenge, numa tume naštin te řibdin le akana. Kana o Duxo le čačimasko avela, vo ningerela tumen ande sa o čačimos; ke vo či dela duma anda peste, numa vo phenela sa so vo ašundias, ai vo phenela tumenge le dieli kai avena. Vo luvudila man, ke vo lela so si muřo, ai phenela tumenge. Sogodi o Dad si les si muřo; sa anda kudia me phendem ke vo lela so si muřo, ai ke o Duxo phenela les tumenge. Mai tsiřa vramia, ai tume či mai dikhena ma; ai porme mai tsiřa vramia, ai tume dikhena ma. Pe kudia, uni anda leske vortača phenen maškar pende: So si kudia kai vo phenel: Mai tsiřa vramia, ai tume či mai dikhena ma; ai porme mai tsiřa vramia, ai tume dikhena ma? ai: Ke me žiav ka o Dad? Von mai phenen: So si kudo kai phenel: Mai tsiřa vramia? Ame či žianas pa soste del duma. O Jesus hatiardias ke von kamenas te pušen les, ai vo phenel lenge: Tume pušen jekh avrestar pa soste me phendem: Mai tsiřa vramia, ai tume či mai dikhena ma, porme mai tsiřa vramia, ai tume dikhena ma. Čačimasa, čačimasa, me phenav tumenge, tume rovena ai tume vatina tume, ai e lumia veselila pe. Tume avena ande o nekazo, numa tumaro nekazo pařudiola ande veselia. E žiuvli, kana avela jekh glata, si la nekazo, ke lako časo avilo; numa, kana e glata arakhadili, voi či mai del pe godji ka pesko kjinuimos, pala e veselia kai si la ke jekh manuš arakhadilo ande e lumia. Vi tume kadia, tume san akana ande o nekazo; numa dikhava tumen, ai tumaro ilo veselila pe, ai khonik či lela tumen anda tumari veselia. Ande kudo dies, tume či mai pušena ma pa khanči. Čačimasa, čačimasa, me phenav tumenge, so tume mangena katar o Dad, vo dela les tumenge ande muřo anav. Ži akana tume či manglian khanči ande muřo anav. Mangen, ai tume lena, eta ke te tumari veselia t'avel vorta. Me phenav tumenge kadala dieli sar paramiča. O časo avel kai me dava duma tumensa bi paramičengo, numa kai me dava duma tumensa puterdes pa o Dad. Ande kudo dies, tume mangena ande muřo anav, ai me či phenava tumenge ke me řudjiva le Dades tumenge. Ke o Dad inke vo kamel tumen, ke tume kamlian man, ai ke tume patian ke me anklistem avri anda o Del. Me anklistem anda o Dad, ai me avilem ande e lumia; akana me mukav e lumia, ai me žiav ka o Dad. Leske vortača phenen leske: Eta, akana tu des duma puterdes, ai tu či phenes či jekh paramiči. Akana ame žianas ke tu žianes sa le dieli, ai ke tut či trubul tu khonik te pušel tu; sa anda kudia ame patias ke tu anklistian anda o Del. O Jesus del len palpale: Tume patian akana. Eta, o časo avel, ai inke avilo, kai tume avena puřitsime sako pe peski rig, ai kai tume mukena ma korkořo; numa me či sim korkořo, ke o Dad si mansa. Me phenav tumenge kadala dieli, eta t'avel tumen e patia ande tumende. Avena tumen bunto ande e lumia; numa len zor, me nirisardem la lumia. Pala ke dias duma, o Jesus vazdias le jakha pe o čeri, ai phenel: Tate, o časo avilo! Luvudisar tjire Šiaves, eta ke tjiro Šiav te luvudil tut, sar ke tu dias les putiaria pe sako mas, eta te del o traio pe sakda sa kudalenge kai tu dias les. Eta, o traio sakda, si ke te prinžiaren tut, o ferdi jekh čačo Del, ai kudales kai tu tradian, Jesus Kristo. Me luvudisardem tu pe e phuv, me getosardem e butji kai tu dian ma te kerav. Ai akana tu, Tate, luvudisar ma paša tute katar o luvudimos kai sas ma paša tute angla savořende t'avel e lumia. Me kerdem te žianen tjiro anav le manuš kai tu dian ma maškar e lumia. Von sas tjire, ai tu dian le mange; ai von garade tjiri vorba. Akana von prinžiarde ke sogodi tu dian ma avel tutar. Ke me dem le le vorbi kai tu dian ma; ai von line le, ai von čačes prinžiarde ke me avilem tutar, ai von patian ke tu tradian man. Lenge me řudjiv. Me či řudjiv la lumiake, numa kudalenge kai tu dian ma, ke von si tjire; ai sogodi si muřo si tjiro, ai sogodi si tjiro si muřo — ai me sim luvudime ande lende. Me či mai sim ande e lumia, ai von si ande e lumia, ai me žiav tute. Dad svinto, garav ande tjiro anav kudalen kai tu dian ma, eta t'aven jekh sar amende. Kana me simas lensa ande e lumia, me arakhadem le ande tjiro anav. Me arakhadem kudalen kai tu dian ma, ai či jekh anda lende či xasailo, te na niči o šiav le xasarimasko, eta te getol pe so si ramome. Ai akana me žiav tute, ai me phenav kudala dieli ande e lumia, eta t'avel ande lende muři veselia vorta. Me dem len tjiri vorba; ai e lumia vuřitsil len, ke von nai ande e lumia, sar me či sim ande e lumia. Me či řudjiv tu te les len pa e lumia, numa te les lendar rigate o nasulimos. Von nai la lumiake, sar me či sim la lumiako. Svintsisar le katar tjiro čačimos; tjiri vorba si o čačimos. Sar tu tradian ma ande e lumia, vi me tradem le ande e lumia. Ai te me svintsi ma lenge, eta ke vi von t'aven svintsime katar o čačimos. Na ke ferdi lenge me řudjiv, numa vi kudalenge kai patian ande mande katar lengi vorbi, eta ke sa t'aven jekh ande amende, sar tu, Tate, tu san ande mande, ai sar me sim ande tute, eta ke te vi von t'aven sar jekh, te e lumia te žianel ke tu tradian man. Me dem len o luvudimos kai tu dian man, eta ke von t'aven jekh sar ame sam jekh: Me ande lende, ai tu ande mande, eta t'aven vorta jekh, ai ke te e lumia te žianel ke tu tradian man ai ke tu kamlian le sar tu kamlian man. Tate, me kamav ke, kai me avava, kudala kai tu dian man t'aven vi von mansa te dikhen o luvudimos, o luvudimos kai tu dian man, ke tu kamlian man angla t'avel e lumia. Tate vorta, e lumia či prinžiarel tu; numa me žianav tu, ai kadala prinžiarde ke tu tradian man. Me kerdem te žianen tjiro anav, ai me kerava te mai žianen les, kadia o kamimos kai tu kames man t'avel ande lende, ai me t'avav ande lende. Kana vo phendias kudala dieli, o Jesus gelotar peske vortakonsa pe e kaver rig katar o paiořo o Kedron, kai si jekh kimpo garado, ande savo vo dias andre, vo ai peske vortača. O Juda, kai bikjindias les, žianelas kudo than, ke o Jesus ai leske vortača sas butivar kjidine kothe. O Juda kadia, lias pesa le ketanen, ai le slugen kai tradine le bare raša ai le Farizianuri, avile kothe lamponsa ai amblalensa ai xanřensa. O Jesus, žianelas so si t'aresel leske, gelo angle, ai phenel lenge: Kas roden tume? Von den les palpale: O Jesus anda o Nazaret. O Jesus phenel lenge: Me sim. Ai o Juda, kai bikjindias les, sas lensa. Kana o Jesus phendias lenge: Me sim, von dine palpale ai pele pe phuv. Vo mai pušel len: Kas roden tume? Ai von phenen: O Jesus anda o Nazaret. O Jesus del len palpale: Me phendem tumenge ke me sim. T'avela ke man roden, muken te žiantar kakala. Vo phenel kudia, eta t'aresel e vorba kai vo phendias: Me či xasardem či jekh anda kudala kai tu dian man. O Simon Petri, kai sas les jekh xanřo, maladias la sluga katar o baro rašai, ai šindias lesko kan o čačo. Kadia sluga bušol Malxus. O Jesus phenel ka o Petri: Tho palpale tjiri xanřo ande o gono. Či piava me o taxtai kai o Dad dias man te piav? Le ketani, o fitsiri, ai le služi katar le Židovuri, line atunči le Jesus, ai phangle les. Von ningerde les angla savořende ka o Anna; ke vo sas o sokro katar o Kaifas, kai sas o mai baro rašai kudo berš. Ai o Kaifas sas kudo kai sikiardias le Židovon: Mai mišto avelas ke ferdi jekh manuš merel pala o narodo. O Simon Petri, lesa jekh kaver vortako, gelo pala o Jesus. Kudo vortako prinžiardias les o baro rašai, ai vo dias le Jesusosa ande o kimpo garado le bare rašasko; numa o Petri bešlo avri paša o vudar. O kaver vortako, kai žianelas les o baro rašai, anklisto avri, delas duma ka e sluganka, ai kerdias te del andre o Petri. Atunči e sluganka, kai arakhelas o vudar, phenel le Petroske: Vi tu, či san tu anda le vortača katar kodo manuš? Vo phenel: Me či sim. Le řoburi ai le služi kai sas kothe dine jag, ke sas šil, ai von ašile krugom ai tationas. O Petri bešelas lensa, ai tatiolas. O baro rašai pušel le Jesus pa leske vortača ai so vo kerelas. O Jesus del les palpale: Me dem duma puterdes ka e lumia; me sakda sikiardem ande le khangeria židovitsko ai ande o templo, kai sa le Židovuri kjidenas pe, ai me či phendem khanči garades. Sostar pušes mandar tu? Puš so me phendem kudalen kai ašunde; eta, kudala žianen so me phendem. Ka kudala vorbi, jekh anda le služi kai sas kothe dias jekh palma le Jesus, phenelas: Kadia des tu palpale ka o rašai o baro? O Jesus phenel leske: Te dem duma nasul, sikav so dem duma nasul; ai te dem duma mišto, sostar malaves ma tu? O Anna tradias les phanglo ka o Kaifas, ka o baro rašai. O Simon Petri sas kothe, ai tatiolas. Phenen leske: Vi tu, či san tu anda leske vortača? Vo xoxavel, ai phenel: Me či sim. Jekh anda le služi katar o baro rašai, niamo kudalesko kai o Petri šindias lesko kan, phenel: Či dikhlem tu me lesa ande o kimpo garado? O Petri mai xoxadias. Ai strazo o kokošo gjilabadias. Von ningerde le Jesus katar o Kaifas ka e vladoreski avlin. Sas diminiatsa. Či dine von andre ande o kher, eta te na mahrin pe, ai te šai te xan e Patradi. O Pilato anklisto avri te žial lende, ai vo phenel: Če doš thon tume pe kado manuš? Von den les palpale: Te na avilasas vo jekh čor, ame či andiamas les tuke. Pe kudia o Pilato phenel lenge: Len les tume, ai den les kris sar si tumaro zakono. Le Židovuri phenen leske: Nai amenge slobodo te mudaras khanikas. Si t'aresel e vorba kai o Jesus phendias, kana vo sikadias sar si vo te merel. O Pilato del andre ande o kulvari, akharel le Jesus, ai phenel leske: San tu amperato le Židovongo? O Jesus del palpale: Si ande tute ke tu phenes kadia, vai le kaver phende pa mande? O Pilato del les palpale: Me, sim me Židovo? Tjiro them ai le bare raša dine tut mande. So kerdian tu? Muři amperetsia nai ande kadia lumia, del palpale o Jesus. T'avilinosas muři amperetsia anda kadia lumia, muře služi sas te maren pe pala mande eta te na avav dino ande o vast ka le Židovuri; numa akana muři amperetsia nai kathe tele. O Pilato phenel leske: Kadia tu san amperato? O Jesus del palpale: Tu phenes, me sim amperato. Me arakhadilem ai me avilem ande e lumia te sikavav so si o čačimos. Kon-godi si ande o čačimos ašunel muřo hango. O Pilato phenel leske: So si o čačimos? Pala ke phendias kudia, vo mai anklisto avri te žial karing le Židovuri, ai vo phenel lenge: Me či arakhav či jekh nasul ande leste. Numa, sar si maškar tumende jekh zakono ke si te mukav tumenge varekas ka o prasniko e Patradi, kamen tume te mukav tumenge le amperatos le Židovonge? Atunči mai jekh data von tsipin: Te na les, numa le Barabas. Eta, o Barabas sas jekh řobaš. Atunči o Pilato lias le Jesus, ai kerdias te maren les řaiansa. Le ketani khuvde jekh kurona kanřengi, kai von thode pe lesko šero, ai von thode pe leste jekh bunda loli; porme, pašile paša leste. Von phenenas: Unpači, amperato le Židovongo! Ai von denas les palmi. O Pilato mai anklisto avri, ai phenel le Židovonge: Eta, me anav les tumenge avri, eta ke tume te žianen ke me či arakhav ande leste khanči nasul. Kadia o Jesus anklisto avri, si pe leste e kurona le kanřengi ai e bunda loli. O Pilato phenel lenge: Eta o manuš. Kana le bare raša ai le služi dikhle les, von tsipin: Amblav! amblav! O Pilato phenel lenge: Len les tume, ai amblaven les pe o trušul; ke me, me či arakhav nasul ande leste. Le Židovuri den les palpale: Amen si ame jekh zakono; ai, sar si amaro zakono, vo trubul te merel, ke vo phendias peske o Šiav le Devlesko. Kana o Pilato ašundias kudia vorba, lias les mai bari dar. Vo dias andre ande o kulvari, ai vo phenel le Jesusoske: Katar san tu? Numa o Jesus či del les khanči palpale. O Pilato phenel leske: Mansa či des tu duma? Či žianes tu ke si ma e putiaria te karfov tu pe jekh trušul, ai ke si ma e putiaria te mukav tu? O Jesus del palpale: Tut nai tu pe mande či jekh putiaria, te na avilinosas dini tuke opral. Sa anda kadia kudo kai del ma tute kerel jekh mai bari bezex. De kothar, o Pilato rodelas te mukel les. Numa le Židovuri tsipinas: Te mukesas les tu, tu či san o vortako le Amperatosko. Kon-godi kerdiol amperato phenel-pe pe o Amperato. O Pilato, ašundias kadala vorbi, andias le Jesus avri; ai vo bešlo pe o skamin la krisako, ande o than kai akharen les e Vurma tsiglengi, ai židovitsko Gabata. Sas kai lašiaren e Patradi, ai pašte mismeri, o Pilato phenel le Židovonge: Eta tumaro amperato. Numa von tsipin: mudar les, amblav les pe o trušul! O Pilato phenel lenge: Amblavava me tumare amperatos pe o trušul? Le raša bare den palpale: Amen si ame amperato ferdi o Tsesar. Atunči vo dias les lenge te karfon les pe o trušul. Von kadia line le Jesus, ai ningerde les. O Jesus ningerel pesko trušul, areslo ande o than Šeresko, kai akharen les židovitsko Golgota. Kothe vo sas amblado, ai dui aver lesa, jekh pa sako rig, ai o Jesus maškaral. O Pilato kerel jekh ramomos kai thodias les pe o trušul, ai kai si kadia: Jesus anda o Nazaret, amperato le Židovongo. But anda le Židovuri gjinde kudo ramomos, ke o than kai sas thodino o Jesus po trušul, sas paša o foro. Sas ramome židovitsko, grekitsko ai latinitsko. Le raša bare katar le Židovuri phenen ka o Pilato: Na ramosar: Amperato le Židovongo. Numa ramosar ke vo phendias: Me sim amperato le Židovongo. O Pilato del anglal: So me ramosardem, ramosardem les. Le ketani, pala ke karfosarde le Jesus pe o trušul, line leske tsalia, ai hulade len ande štar parti, jekh pe sako ketano. Von mai line lesko tsolo, kai nas suvdo, anda jekh kotor de opral ži tele. Ai von phende maškar pende: Te na šinas les, numa khelas ame kaske avela. Kadia areslias te kerdiol e vorba kai sas ramome: Von hulade muře tsalia. Ai khelde pe kon te lel muřo tsolo. Eta so kerde le ketani. Paša o trušul le Jesusosko bešen leski dei ai e phei leska daki, e Maria, řomni le Klopaski, ai e Maria anda e Magdala. O Jesus, dikhlias peska da, ai paša late le vortakos kai vo kamelas, phenel ka peski dei: Žiuvlio, eta tjiro šiav. Porme phenel le vortakoske: Eta tjiri dei. Ai, de kothar, o vortako lias la peste. Pala kudia, o Jesus, kai žianelas ke si sa gata, phenel, eta ke te o ramomos getol pe: Trušalo sim. Sas kothe jekh kanta pherdi šut. Le ketani pherde jekh dirza, ai, phangle la pe jekh krianga anda o hisopo, von pašarde la ka lesko mui. Kana o Jesus lias o šut, vo phenel: Sa si gata. Ai teliardias o šero, vo dias palpale o duxo. Ande e dar ke le staturi te na bešen pe o trušul žikin si o sabato, ai kudo dies o sabato si jekh baro dies, kai si te lašiaren le Židovuri, mangen katar o Pilato te phagen le čanga le ambladenge te meren angla o sabato, ai te len le tele. Le ketani avile kadia, ai phangle le čanga le mai anglunoske, porme le kavreske kai sas amblado lesa. Pašile paša o Jesus, ai dikhle les ke si inke mulo, von či phagle leske čanga. Numa jekh anda le ketani xiviardias lesko prašav jekha xanřesa, ai strazo anklisto avri rat ai pai. Kudo kai dikhlias les si marturo, ai leski marturia si vorta; ai vo žianel ke phenel čačimos, eta te patiana vi tume. Kadala dieli aresle, eta ke te o Ramomos getol pe: Či jekh anda leske kokala či avena inčarde. Ai pe kaver rig o Ramomos mai phenel: Von dikhena kudales kai von pusade. Pala kudia, o Josef anda o Arimate, kai sas vortako le Jesusosko numa garades ke daralas katar le Židovuri, manglias katar o Pilato te lel o stato le Jesusosko. Ai o Pilato muklias les. Vo kadia avilo, ai lias o stato le Jesusosko. O Nikodem, kai angla savořende gelosas ka o Jesus riate, vi vo avilo, andias ande jekh hulado pašte trianda kilo mira ai aloes. Von line kadia o stato le Jesusosko, ai phangle les dirzensa le duxiansa, sar si o zakono t'angropon le Židovon. Eta, sas jekh kimpo ande o than kai o Jesus sas amblado, ande o kimpo jekh groapoševo nevo, kai inke khonik nas andre. Kothe thode le Jesus, pala ke le Židovuri lašiarenas pe, ke o groapoševo sas paše. O mai angluno dies le kurkesko, e Maria anda e Magdala geli ka o groapoševo de diminiatsa, sar inke sas tamlo; ai ke voi dikhlias ke o bař sas lino tele. Voi našli karing o Simon Petri ai karing o kaver vortako kai kamelas les o Jesus, ai phenel lenge: Von line avri anda o groapoševo le Bares, ai ame či žianas kai thode les. O Petri ai o kaver vortako ankliste avri, ai gele ka o groapoševo. Von našle vi le dui ande jekh than. Numa o kaver vortako našelas mai sigo sar o Petri, ai areslo mai angluno ka o groapoševo. Bangilo, vo dikhlias le dirzi kai sas pe e phuv, numa vo či del andre. O Simon Petri, kai žialas pala leste, areslo ai dias andre ande o groapoševo; vo dikhlias le dirzi kai sas tele, ai o pištjiri kai sas thodino pe o šero le Jesusosko numa kjidino ande jekh than rigate. Atunči o kaver vortako, kai areslosas o mai angluno ka o groapoševo, vi vo dias andre; ai vo dikhlias, ai vo patiaias. Ke von či hatiarenas inke ke, sar si ramome, o Jesus trubulas te živindil anda le mule. Ai le vortača gele palpale pende. Numa e Maria bešelas avri paša o groapoševo ai rovelas. Sar voi rovelas, voi bangiolas te dikhel ande o groapoševo; ai voi dikhlias do andželon sa ande parno, bešen pe o than kai sas o stato le Jesusosko, o jekh ka o šero, o kaver ka le punře. Von phenen lake: Žiuvlio, sostar roves tu? Voi del len palpale: Ke von line muře Bares, ai me či žianav kai von thode les. Sar voi phenelas kudia, voi amboldinisailas, ai voi dikhlias le Jesus opre; numa voi či žianelas ke si o Jesus. O Jesus phenel lake: Žiuvlio, sostar roves tu? So rodes tu? Voi gindilas pe ke si kudo kai lel sama katar o kimpo ai phenel leske: Baria, te san tu ke ningerdian les, phen mange kai thodian les, ai me lava les. O Jesus phenel lake: Mario! Voi amboldinisaili, ai phenel leske hebraitsko: Rabuni! (kudia bušol, Birevo!) O Jesus phenel lake: Na asba man; ke me inke či anklistem karing muřo Dad. Numa žia t'arakhes muře phralen, ai phen lenge ke me ankliav karing muřo Dad ai tumaro Dad, karing muřo Del ai tumaro Del. E Maria anda e Magdala geli te phenel ka le vortača ke voi dikhlias le Bares, ai ke vo phendias lake kadala dieli. E riat kudale dieseski, kai sas o mai angluno anda o kurko, le vudara ande o than kai sas le vortača sas phandade, pala ke e dar kai sas lenge katar le Židovuri. O Jesus avilo, sikadilo maškar lende, ai phenel lenge: E patia t'avel tumensa! Ai kana vo phendias kudia, vo sikavel lenge peske vast ai pesko prašav. Le vortača sas ande e veselia kai dikhle le Bares. O Jesus mai phenel lenge: E patia t'avel tumensa! Sar o Dad tradias man, vi me tradav tumen. Pala kudala vorbi, vo phurdias pe lende, ai phenel lenge: Len o Svinto Duxo. Kudala kaske tume jertina le bezexa, avena jertime; ai kaske tume či jertina, či avena jertime. O Tomas, akhardo Žiameno, jekh anda le deš-u-dui, nas lensa kana o Jesus avilo. Le kaver vortača phende leske kadia: Ame dikhliam le Bares. Numa vo phenel lenge: Te na dikhava ande leske vast le semnuri le karfiange, ai te na thava muřo nai ande e groapa le karfiangi, ai te na thava muřo vast ande lesko prašav, či patiava ma. Oxto dies pala kudia, le vortača le Jesusoske mai sas ande jekh than ande o kher, ai o Tomas sas lensa. O Jesus avel, le vudara sas phandade, sikadilo maškar lende, ai phenel: E patia t'avel tumensa. Porme phenel ka o Tomas: An angle kathe tjiro nai, ai dikh muře vast, an vi tjiro vast, ai tho les ande muřo prašav; ai na beš dilo, numa patia. O Tomas del les palpale: Muřo Baro ai muřo Del! O Jesus phenel leske: Sar tu dikhlian, tu patian. Veseli kudala kai či dikhle, ai kai patiande. O Jesus mai kerdias, angla peske vortača, but aver čudeni, kai nai ramome ande kadia kliška. Numa kadala dieli sas ramome ke tume te patian ke o Jesus si o Kristo, o Šiav le Devlesko, ai ke kudala kai patian t'avel tumen o traio ande lesko anav. Pala kudia, o Jesus mai sikadilo le vortakonge, pe o berego la mariako o Tiberias. Ai eta sar vo sikadilo. O Simon Petri, o Tomas, akhardo Žiameno, Natanael, anda e Kana anda e Galilea, le šiave katar o Zebedeo, ai kaver dui vortača le Jesusoske sas ande jekh than. O Simon Petri phenel lenge: Me žiav t'astarav maše. Von phenen leske: Vi ame žias tusa. Von ankliste ande jekh čuno, ai kudia riat či line khanči. E diminiatsa avili, o Jesus sas pe o berego; numa le vortača či žianenas ke si o Jesus. O Jesus phenel lenge: Glati, nai tumen khanči te xas? Von den les palpale: Nai. Vo phenel lenge: Šiuden e setka pe e rig e čači katar o čuno, ai tume arakhena. Von kadia šiude, ai naštinas te mai tsirden la, pala ke si pria but maše. Atunči o vortako kai o Jesus sas leske drago phenel ka o Petri: O Baro si! Ai o Simon Petri, sar ašundias ke sas o Baro thodias pe peste peske tsalia ai peski prastia, ke vo sas nango, ai xuklo andre ande e maria. Le kaver vortača avile le čunosa, tsirdenas e setka pherdi maše, ke nas dur katar e phuv, pašte jekh šel metri. Kana von vuliste pe e phuv, von dikhle kothe angara dine jag, mašio opral, ai manřo. O Jesus phenel lenge: Anen le maše kai tume lian. O Simon Petri anklisto ande o čuno, ai tsirdel pe e phuv e setka pherdi maše, ande sa jekh šel ai panž-var-deš ai trin maše. Ai makar ke sas kaiti, e setka či šindili. O Jesus phenel lenge: Aven, xan. Ai či jekh anda le vortača či tromailo te pušel les: Kon san tu? Žianenas ke vo si o Baro. O Jesus pašilo, lias o manřo, ai vo dias len; sa kadia kerdias le mašesa. Sas vuže e trito data ke o Jesus sikadilo peske vortakonge dekin vo živindisailo katar le mule. Pala ke xale, o Jesus phenel ka o Simon Petri: Simon, šiav katar o Jonas, mai but kames ma tu sar kamen ma kadala? Vo del les palpale: Ei, Baria, tu žianes ke me kamav tu. O Jesus phenel leske: Le sama katar muře bakroře. Vo mai phenel leske jekh duito data: Simon, šiav katar o Jonas, kames ma tu? O Petri del les palpale: Ei, Baria, tu žianes ke me kamav tu. O Jesus phenel leske: Le sama katar muře bakroře. Vo phenel leske pe e trito data: Simon, šiav katar o Jonas, kames ma tu? O Petri lias les o nekazo ke vo phendias leske pe e trito data: Kames ma tu? Ai vo dias les palpale: Baria, tu žianes sa le dieli, tu žianes ke me kamav tu. O Jesus phenel leske: Le sama katar muře bakroře. Čačimasa, čačimasa, me phenav tuke, kana tu sanas mai terno, tu korkořo phandesas tu, ai tu žiasas kai tu kamesas; numa kana tu avesa phuro, tu desa tjire vast, ai jekh kaver phandela tu, ai ningerela tu kai tu či kamesa. O Jesus phenel kadia te sikavel leske katar kudala vorbi sar merela o Petri ai vestila le Devles. Ai dias duma kadia, vo phenel leske: Av mansa. O Petri, amboldinisailo, dikhlias ke avel pala leste o vortako kai o Jesus sas leske drago, kudo kai, ži kana xanas, bešelas paša leste, ai phendias: Baria, kon si kudo kai del tu ande o vast? Sar dikhlias les, o Petri phenel ka o Jesus: Ai kado, Baria, so aresela leske? O Jesus phenel leske: Te kamava me te bešel žikin či avava, so-i tjiri diela? Tu, av mansa. Pe kudia, o hango gelo maškar le phral ke kudo vortako či merela. Numa o Jesus či phendias ka o Petri ke či merela, numa: Te kamava me te bešel žikin či avava, so-i tjiri diela? Si kudo vortako kai si marturo anda kadala dieli, ai kai ramosardias le. Ai ame žianas ke leski marturia si čači. O Jesus mai kerdias but aver dieli; te ramosarenas le po tsiřa, me gindiv ma ke inke e lumia naštil te ninkerel le kniški kai ramonas. Teofilo, me dem duma, ande muři mai angluno kliška, anda sa sogodi o Jesus lias pe te kerel ai te sikiarel de anda o gor, ži ka o dies kai sas lino ande o čeri, pala kudia kai dias peske ordini, pa o Svinto Duxo, ka le apostoli kai vo alosardias. Pala ke vo kjinuisardias, vo sikadilo lenge živindo, ai vo dias len but semnuri te hatiaren, sikadilo lenge pašte štar-var-deš dies, ai delas lensa duma pa le dieli katar e amperetsia le Devleski. Sar vo sas lensa, vo dias len poronka te na durion katar o Jerusalem, numa t'ažiukeren so o Dad phendias ke kerel, so me phendem tumenge phenel lenge vo; ke o Jono boldias le paiesa, numa tume, ande tsiřa dies, tume avena bolde ande o Svinto Duxo. Atunči le apostoli ande jekh than pušen les: Baria, avela ande kudia vramia ke tu thosa e amperetsia ande o Israel? Vo del len palpale: Nai ke tume te žianen kana avela e vramia vai o tsaito kai o Dad vo thodias sar vo kamlias. Numa tume lena jekh zor, o Svinto Duxo avela pe tumende, ai tume avena muře martururi ande o Jerusalem, ande sa e Judea, anda e Samaria, ai ži ande o gor la lumiako. Pala ke phendias kudo, vo sas lino žikin von dikhenas pe leske ai jekh nuvero garadias les ka lenge jakha. Ai žikin sar lenge dikhimata thodine karing o čeri žikin vo žialatar, eta, dui manuš ande o parno sikadile lenge, ai phenenas: Manuš anda e Galilea, sostar terdion tume te dikhen pe o čeri? Kudo Jesus, kai sas lino ande o čeri maškar tumende, vo avela palpale sa jekh fialo sar tume dikhlian les te žial ande o čeri. Atunči von gele palpale ande o Jerusalem, katar o plai kai akharen les le Maslinengo, kai si paše o Jerusalem, jekh kilometro katar o foro. Kana von aresle, von ankliste ande e soba opre kai von sas sikade te bešen; sas o Petri, o Jono, o Jakob, o Andreas, o Filipo, o Tomas, o Bartelemi, o Matei, o Jakob, šiav katar o Alfeo, o Simon o Zeloto, ai o Jud, šiav katar o Jakob. Sa ande jekh than thonas pe te řudjin pe, le žiuvliansa, ai e Maria, dei le Jesusoski, ai le phralensa katar o Jesus. Ande kudo dies, o Petri uštilo maškar le phral, sas kothe pašte jekh šel ai biš žene. Ai vo phenel: Manušale phralale, trubulas t'aresel so o Svinto Duxo, ande o Ramomos, phendias angla savořende, pa o mui le Davidosko, pa o Juda, kai ningerdias kudalen kai line le Jesus. Vo sas gjindo maškar amende, ai sas leski partia ande amari butji. Kudo manuš, kjindias jekh kimpo le lovensa katar o čořimos, pelo, phagilo lesko stato, ai sa leske pořa pele tele. E diela žianen la sa o narodo ande o Jerusalem ke kudo kimpo si akhardo ande lengi šib Akeldama, kudia si o kimpo le Ratesko. Eta, si ramome ande e kliška katar o Psalmo: Ke lesko kher avela pusto, Ai ke khonik či bešela andre! Ai si ramome: Ke jekh kaver te lel so sas lesko! Kadia trubul ke, maškar kudala kai avile amensa sa e vramia kai o Baro traisardias amensa, de katar o bolimos le Jonosko ži ka o dies kai vo sas lino maškar amende, t'avel jekh t'avel amensa sar marturo ke o Rai Jesus si živindo. Von sikaven don: O Josef akharen les Barsabas, vai Justus, ai o Matias. Porme von řudjisarde kadia: Baria, tu kai žianes o ilo savořengo, sikav savo anda le dui tu alosardian, eta t'avel les partia ka kadi ministeria ai ka kado apostolato, kai o Juda muklias te žial ande pesko than. Von tsirde pe kaste te perel, ai pelias pe o Matias, ai thodine les le deš-u-donsa. O dies la Řusaliako, von sas sa ande jekh than. Strazo avilo anda o čeri jekh bašimos sar jekh balval buntuimaski, ai vo pherdias sa o kher kai von bešenas. Šiba jekh fialo sar šiba jagake, sikadile lenge, hulade jekh avriatar, ai thode-pe pe sako ande lende. Ai von pherdile sa o Svinto Duxo, ai von thode pe te den duma pe le kaver šiba, sar o Duxo dias len te den duma. Eta sas kai avile ande o Jerusalem Židovuri, manuš kai patian, anda sako them kai si tela o čeri. Ka o bašimos kai sas, but žene avile, ai lenge sas šodo ke sako ande lende ašunelas ke den lensa duma ande lengi šib. Sa sas lenge šodo, či žianenas so si kudia, ai phenenas jekh kavreske: Eta, kadala žene kai den duma nai von sa anda e Galilea? Ai sar ašunas ame lende sako ande e šib amaria daki? Ame sam katar e Parta, e Medea, o Elam, ai vuni amendar bešen ande e Mesopotamia, e Judea, e Kapadotsia, o Pontus, e Azia, e Frigia, e Pamfilia, e Egipta, katar e phuv e Sirena paše e Libia, ai vuni avile anda e Roma, Židovuri ai proselituri kai bešen ande e Kreta ai Araburi, sar ašunas ame lende ke den duma amari šib pa le šukarimata le Devleske? Sa sas lengo šodo, ai či žianenas so te gindin, von phenenas jekh avreske: So t'avel kadia? Numa le kaver asanas, ai phenenas: Von si pherde mol gugli. Atunči o Petri, kai avilo le deš-u-jekhensa, vazdias o hango, ai del lensa duma kadia: Manuš Židovuri, ai kudala kai bešen ande o Jerusalem, žianen kadia, ai thon kan ka muře vorbi! Kadala žene nai mate, ke si o eniato časo katar o dies. Numa kathe si so phendias o profeto Joel: Ande le mai paluni diesa, phenel o Del, me thava anda muřo Duxo pe sako mas. Tumare šiave ai tumare šeia phenena so avela, Tumare terne murš dikhena so avela, Ai tumare phure avena len sune. Ei, pe muře služi ai pe muře sluganki, Ande kudala diesa, me thava anda muřo Duxo; ai von phenena so avela. Me kereva t'avel šodo dieli ande o čeri ai čudeni tele pe e phuv. Rat, jag, ai jekh aburo thuv; O kham pařudiola ande o tuniariko, Ai o šiunut o ande o rat. Angla savořende t'avel o dies le Baresko, De katar kudo dies baro ai vestime. Atunči kon-godi phenela o anav le Baresko avela skipime. Manuš anda o Israel, ašunen kakala vorbi! o Jesus anda o Nazaret, kudo manuš kaske o Del sas marturo angla tumende katar le šodimata ai le čudeni kai vo kerdias maškar tumende, sar tume žianen; kudo manuš dino ande o vast sar sas leske šinado ai sar kamlias o Del, tume ambladian les pe o trušul, tume mudardian les katar le vast le žiungalenge. O Del živindisardias les, kai ankaladias les anda le phanglimata le merimaske, ke naštilas o merimos mai te ninkerel les. Ke o David phendias leske: Me dikhavas sakda la Bares angla mande, Ke vo ši pe muřo čačo, eta te na miškin ma. Kadia muřo ilo si ande e veselia, ai muři šib ande o veselimos: Ai inke muřo mas hodinil ande o ažiukerimos, Ke tu či mukes muřo duxo kothe kai bešen le mule, Ai tu či kames ke te tjiro Svinto te dikhel o rimomos. Tu kerdian te žianav le vurmi le traioske, Tu pheres ma veselia kai san mansa. Manušale phralale, ke te muken ma te phenav tumenge sar kamav, pala o phuro David, kai mulo ai sas angropome, ai kai lesko groapoševo mai si adies maškar amende. Sar vo sas profeto, ai ke vo žianelas ke o Del phendiasas leske solaxasa ke si te kerel te bešel jekh anda leski vitsa pe o skamin amperatitsko. Si o živindimos le Kristosko kai vo phendias kana phendiasas: Ke vo či avela muklo kai bešen le mule ai ke lesko mas či avela rimome. Kudo si o Jesus kai o Del živindisardias; ame sam sa martururi. Uštiado pe e čači rig le Devleski, vo lias katar o Dad o Svinto Duxo kai sas phendo ke avel, ai kai vo dias les, si so tume dikhen ai ašunen. Ke o David či anklisto vo ande o čeri, numa vo phendias: O Baro phendias muře Bareske: Beš pe muřo čačo, Žikin či thava tjire dušmaia jekh skaminořo tele tjire punřenge. Ke sa o kher anda o Israel te žianel čačimasa ke o Del kerdias Baro ai Kristo kudale Jesus kai tume ambladian. Pale ke ašunde kudo divano, len sas lengo ilo asbado but, ai von phenen ka o Petri ai ka le kaver apostoli: Manušale phralale, so si te keras ame? O Petri phenel lenge: Kein tume, ai ke sako anda tumende t'avel amboldo ande o anav le Jesus Kristosko, te jertil tumare bezexa; ai tumen avela dino o Svinto Duxo. Ke so si t'avel tumenge si šinado, tumare glatenge, ai pe sa kudala kai si dur, kadia but kai o Baro amaro Del akhardias len. Ai, katar but kaver vorbi, vo mangel lendar ai vazdel len, phenelas: Skipin tume katar kadia vitsa kurvisko. Kudala kai line leski vorba sas bolde; ai ande kudo dies le vortača trin mii mai but sas. Von žianas but te sikion katar le apostoli, ande jekh than sar le phral, kai phagenas o manřo, ai ande le řudjimata. E dar lias sakones, ai sas but šodo ai čudeni katar le apostoli Sa kudala kai patian sas sa ande jekh than, ai sas len sa ande jekh than. Von bikjinenas penge khera ai so sas len mištimos, ai von hulavenas so bikjinde maškar sa, sar trubul sakones. Von sas sako dies ande jekh than ande o templo, von phagenas o manřo ande le khera, ai lenas pengo xamos veselimasa ai prosto ilesa, luvudin le Devles, ai sas len dragostia paša sa o narodo. Ai o Baro tholas sako dies ka e kumpania kudalen kai sas skipime. O Petri ai o Jono anklenas ande jekh than ka o templo, ka o časo kai řudjin; sas o trinto časo pala mismeri. Sas jekh manuš bango dekin arakhadilo, kai ningerenas les ai thonas les sako dies ka o vudar le templosko kai akharel les Šukar, te mangel vareso kudalendar kai den andre ande o templo. Kudo manuš, dikhelas le Petri ai le Jono kai sas te den andre, manglias lendar vareso. O Petri, sar vi o Jono thodine le jakha pe leste, ai phenel: Dikh pe amende. Ai vo dikhel pe lende zurales, ažukerelas te lel lendar vareso. Atunči o Petri phenel leske: Nai ma či rup, či sunakai; numa so si ma dav les tuke: ande o anav o Jesus Kristo anda o Nazaret, ušti ai phir. Ai lias les katar o vast o čačo, vo uštiadias les. Ande kudo momento, leske punře ai leske kilikia zuraile; pe jekh xutimos vo sas pe punřende, ai thodias pe te phirel. Vo dias lensa ande o templo, phirelas, xutelas, ai luvudilas le Devles. Sa e lumia dikhlias les ke phirel ai luvudil le Devles. Von prinžiaren ke vo si kudo kai bešelas ka o Šukar Vudar le templosko te mangel vareso, ai von pherdile šodo ai sas lenge šodo pala so areslias leske. Sar vo či mukelas le Petri ai le Jono, sa o narodo kai sas lenge šodo našenas karing lende, ka o vudar phenen leske katar o Salomon. O Petri, dikhlias kudia, phenel le narodoske: Manuš anda o Israel, sostar si tumenge šodo anda kadia? Sostar dikhen tume pe amende, sar t'avel katar amari zor vai katar amaro patiamos ke ame kerdiam te phirel kado manuš? O Del katar o Abraham, katar o Isak kai katar o Jakob, o Del amare dadengo, luvudisardias peska sluga o Jesus, kai tume dias les ande o vast ai či prinžiardian les angla o Pilato, kai kamelas te mukel les. Tume či prinžiardian le Svintos ai le Vorta, ai tume manglian te muken tumenge jekhes kai mudarel. Tume kerdian te merel o Prinso le traiosko, kai o Del živindisardias les katar le mule; ame sam martururi. Si katar o patiamos ande lesko anav kai lesko anav zuriardias kudales kai tume dikhen ai žianen; si o patiamos ande leste kai dias kadale manušes sa kado sastimos, angla sa tumende. Ai akana, phralale, me žianav ke tume kerdian kudia ke či žianenas, ai vi tumare birevia. Numa o Del kerdias kadia so vo phendiasas angla savořende pa o mui katar sa peske profeturi, ke lesko Kristo trubulas te kjinuil. Kein tume kadia ai pařuven tume, ke tumare bezexa t'aven khosle. Eta ke le vremi hodinake aven katar o Baro, ai ke te tradel kudales kai sas tumenge šinado, o Jesus Kristo, kai o čeri trubul te lel les ži ka e vramia kai thola o Del palpale sa le dieli, kai o Del diasas duma pa lende angla savořende katar o mui katar peske svintsi profeturi. O Moše phendias: O Baro tumaro Del ankalavela anda tumende jekhe profetos sar mande, tume ašunena leste ande sa so vo phenela tumenge, ai kon-godi či ašunela ka kudo profeto avela tradino anda o narodo. Sa le profeturi kai dine duma jekh pala kavreste de katar o Samuel, von phende kado dies. Tume san le šiave katar le profeturi ai e patia kai o Del kerdias tumare dadensa, kai phendias ka o Abraham: Sa le vitsi pa e phuv avena svintsime katar leski vitsa. Si tumenge angla savořende kai o Del vazdias peska sluga ai tradias les tumenge te svintsil tume, te del rigate sako anda tumende katar leske bezexa. Žikin o Petri ai o Jono denas duma le narodosa, avile le bare raša, o fitsiri le templosko, ai le Sadusenuri. Nai lenge mišto ke von sikiaren o narodo, ai phenen pa o Jesus ke si te živindin le mule. Von thodine le vast pe lende, ai šiude le ande e temnitsa ži pe teharin; ke sas vuže e riat. Numa, but anda kudala kai ašunde e vorba patian, ai kana gjinde le manuš sas pašte panž mii. Teharin, le birevia le narodoske, le purane, ai kudala kai ramon, kjidinisaile ande o Jerusalem. Ai o Anas, o baro rašai o Kaifas, o Jono, o Alexandre, ai sa kudala kai sas anda e vitsa katar le bare raša. Von thode maškar pende le Petri ai le Jono, ai pušen lendar: Katar če putiaria, vai ande o anav savesko tume kerdian kudia? Atunči o Petri, pherdo Svinto Duxo, phenel lenge: Birevia le narodoske, ai le phure anda o Israel, sar amen pušen ame adies pala jekh mištimos kai sas dino jekhe nasvale manušeske, eta ame sar te phenas sar vo sas sastilo. Te žianen sa, ai ke sa o narodo anda o Israel te žianel! Si katar o anav o Jesus Kristo anda o Nazaret, kai tume ambladian, ai kai o Del živindisardias katar le mule, si lestar ke kado manuš sikadiol sa sasto angla tumende. O Jesus si O bař šiudino tumendar kai vazden khera, Ai kai areslo o mai baro ande o koltso. Nai skipimos ande či jekh aver; ke nai tela o čeri či jekh kaver anav kai si dino ka le manuš, katar savo ame trubusaras t'avas skipime. Kana von dikhle e zor katar o Petri ai o Jono, lenge sas šodo, žianenas ke von sas manuš anda o narodo bi te sikion; ai von prinžiarde ke von sas le Jesusosa. Numa sar von dikhenas kothe paše paša lende o manuš kai sastilo, von naštin mai te phenen khanči. Von dine len ordina t'anklen avri anda e kris e židovitsko, ai den pe duma maškar pende. Phenenas: So kerasa ame kadale manušenge? Ke sa o narodo anda o Jerusalem dikhle ke jekh čudenia si sikardi kerdi lendar, ai ame naštisaras te das les palpale. Numa, eta ke te e diela te na mai žial mai angle maškar o narodo, te na mukas le te das len dar d'akanara te den duma varekaske pe kudo anav. Ai akharde le, von phende lenge zurales te na mai den duma ai te na sikiaren ande o anav le Jesusosko. O Petri ai o Jono den len palpale: Den kris te si vorta, angla o Del, te šunas tumen sar mai mišto ke le Devles; ke ame naštisaras te na das duma pa so ame dikhlias ai ašundiam. Von mai daraven le, ai mukle le, či žianenas sar te den len strafo, pala o narodo, ke sa luvudin le Devles anda so areslias. Ke o manuš kai sas vo sasto anda kudo nasvalimos čudato sas phuro de mai but sar štar-var-deš beršengo. Pala ke mukle len, von gele karing penge, ai mothon sa sogodi le bare raša ai le phure pende lenge. Kana von ašunde, von vazdine ka o Del o hango sa ande jekh than, ai phenen: Baria, tu kai kerdian o čeri, e phuv, e maria, ai sogodi si, tu phendian katar o Svinto Duxo, pa o mui amare dadesko, leski sluga o David: Sostar kudo buntuimos maškar le thema, Ai kudala ginduri intaino maškar o narodo? Le amperatsi la phuviake vazdinisaile, Ai le prinsuria thode pe ande jekh than Pe o Baro ai pe lesko Svinto. Kadia si, pe tjiro svinto sluga Jesus, kai tu svintsisardian, o Herodo ai o Pontius Pilato thode ande jekh than ande kado foro le themensa ai le narodosa anda o Israel. Kamle te keren sa so ande e zor e tjiri tu gindisardian angla savořende. Ai akana, Baria, dikh so von daraven, ai de ka tjire služi te phenen tjiri vorba zorasa, ai vazde tjiro vast, t'aven sastimata, čudeni ai šodo, katar o anav svinto katar tjiro sluga o Jesus. Kana von řudjisarde, o than kai von sas ande isdraias, von sa pherdile Svinto Duxo, ai von phenen e vorba le Devleski la zorasa. Le but kudala kai ašunde patianas, sas len ferdi jekh ilo ai jekh duxo. Khonik či phenelas ke so si lesko sas čačes lesko, numa sa sas ande jekh than maškar lende. Le apostoli sas but zorasa martururi, phenen sar živindisailo o Rai Jesus. Ai jekh bari dragostia bešel pe lende. Ke nai maškar lende či jekh čořo; sa kudala kai sas len kimpuri vai khera bikjinenas le, anenas le love anda so von bikjinde, ai thonas le ka le punře le apostolonge; ai denas sakones so trubulas les. O Josef, akharen les le apostoli Barnabas, so si kudia o «šiav kai vazdel», Levito, anda e Kipra, bikjindias jekh kimpo kai sas les, andias le love, ai thodias le ka le punře le apostolonge. Numa jekh manuš kai bušolas o Ananias, la Safirasa leski řomni, bikjindias jekh phuv, ai ninkerdias jekh partia anda so bikjindias. Leski řomni žianelas. Porme andias so ašilias, ai thodias les ke le punře le apostolonge. O Petri phenel leske: Ananias, sostar o Satan pherdias tjiro ilo, kadia sar tu xoxaves le Svinto Duxo, ai ke tu ninkerdias jekh partia anda so lian kana bikjindian o kimpo. Te na avilinosas bikjindo, nas t'avel tjiro? Ai, pala ke sas bikjindo le love nas von t'aven tjire? Sar tromailian tu te thos ande tjiro ilo kasavo gindo? Nai ke le manušenge ke tu xoxadian, numa le Devleske. O Ananias, ašundias kudala vorbi, pelo tele, ai mulo. Jekh bari dar lias sa kudalen kai sas kothe. Le terno murš uštile, phangle les, ningerde les, ai angroposarde les. Pašte trin časuri pala kudia, leski řomni del andre, bi te žianel so nakhlias. O Petri del lasa duma: Phen mange, si pe če prešo kai tume bikjindian o kimpo? Ei, del voi palpale, si pe kudo lov. Atunči o Petri phenel lake: Sar tume thodian tume ande jekh than te zumaven le Duxos le Baresko? Eta, kudala kai angroposarde tjire řomes si ka o vudar, ai von ningerena tut. Strazo, voi peli tele ke le punře le apostoloske. Le terne murš, arakhle la muli; von ningerde la, ai angroposarde la paša lako řom. Jekh bari dar lias sa e khangeri ai sa kudalen kai ašunde kudala dieli. But čudeni ai šodo kerdionas maškar o narodo katar le vast le apostolonge. Von bešenas sa ande jekh than ka o vudar katar o Salomon, ai khonik anda le kaver či tromalas te žial lensa; numa o narodo luvudinas len oprune hangosa. Le but kudala kai patianas le Bares, murš ai žiuvlia, bution but ai mai but; kadia ke anenas le nasvalen ande le vulitsi ai ke thonas le pe le thana ai kai soven, eta ke, kana o Petri nakhela, leski ušialin t'avel te garavel uni anda lende. O baro narodo vi mai našel anda le foruri paše, anenas le nasvalen ai le ženen kai si ande lende duxuri bi-vuže; ai sa sas saste. Numa o baro rašai ai sa kudala kai sas lesa, e partida katar le Sadusenuri, uštile, pherde xoli, thodine le vast pe le apostoli, ai šiudine le ande e temnitsa publiko. Numa jekh andželo le Baresko puterdias žikin si e riat le vudara la temnitsake, ankaladias le avri, ai phenel lenge: Žian, bešen ande o templo, ai phenen sa le narodoske sa le vorbi kadale neve traioske. Kana ašundine kudia, von dine andre de diminiatsara ande o templo, ai thode pe te sikiaren. O baro rašai ai kudala kai sas lesa avile, von akharde e kris židovitsko ai sa le phure katar le šiave ande o Israel, ai von tradine te žian t'anen le apostolon anda e temnitsa. Le slugi, kana aresle, či arakhle le ande e temnitsa, von avile palpale, ai phende so sas, Phenenas: Ame arakhliam e temnitsa mišto phandadi, ai kudala kai arakhen sas angla o vudar; numa, pala ke puterde, ame či arakhliam khanikas andre. Kana von ašunde kudala vorbi, o fitsiri le templosko ai le bare raša či mai žianenas so te gindin pe le apostoli ai so mai avela angle anda kudia diela. Varekon avel te phenel lenge: Eta, le manuš kai tume thodian ande e temnitsa von si ande o templo, ai von sikiaren o narodo. Atunči o fitsiri gelotar le slugensa, ai ningerdias le apostolon, bi zorako, ke sas lenge dar ke mudaren le bařensa o narodo. Pala ke ningerde le angla e kris židovitsko, o baro rašai pušel le kadia: Či phendiam tumenge ame zorasa te na sikiaren ande kudo anav? Ai eta, tume pherdian o Jerusalem ande tumaro sikiarimos, ai tume kamen te peraven pe amende o rat kudale manušesko! O Petri ai le apostoli den palpale: Mai mišto te patias le Devles sar le manušen. O Del katar amare dada živindisardias le Jesus, kai tume mudardian, kai ambladian les ka o kašt. O Del vazdias les pe pesko čačo sar Prinso ai Skipitori, te del ka o Israel te keil pe ai te jertil leske bezexa. Ame sam martururi ande kudala dieli, sa jekh fialo si o Svinto Duxo kai o Del dias ka kudala kai patian ande leste. Xoliariko anda kudala vorbi, von kamenas te mudaren len. Numa jekh Fariziano, bušol o Gamiliel, zakonari, drago sas le narodoske, uštilo ande e kris židovitsko, ai dias ordina t'ankalaven avri pe tsiřa vramia le apostolon. Porme vo phenel lenge: Manuš anda o Israel, len tume sama so tume si te keren karing kadala žene. Ke, nai de dumult ke sikadilo o Teudas, kai motholas ke vo si varekon, ai kaste gele pašte štar šela manuš: Mudarde les, ai sa kudala kai gele pala leste gonisarde le ai manai khanči. Pala leste, sikadilo o Juda o Galileno, ande e vramia kai gjinenas o narodo, ai vo anelas peste ka peski partida baro narodo; vi vo xasailo, ai sa kudala kai gele pala leste purisaile. Ai akana, me phenav tumenge, na len sama katar kudala manuš, ai muken le te žiantar. Te kadia diela vai kadia butji avena katar le manuš, von perena tele; t'avena katar o Del, tume naština te phagen len. Den tumen sama te na thon tume te maren pe le Devlesa. Von gele pala leste sar vo phendias. Ai akharde le apostolon, von thode te maren le řaiansa, ai phende lenge te na den duma ande o anav le Jesusosko, ai von mukle le. Le apostoli geletar anda e kris židovitsko, veseli ke sas dine pe kris harniči ke marde mui lendar pala o anav le Jesusosko. Ai sako dies, ande o templo ai ande le khera, von či ašenas te na sikiaren, ai te phenen e laši viasta katar o Jesus Kristo. Ande kudia vramia, le vortača bution, ai le Židovuri kai den duma grekisko bulguin pe le Židovuri katar o Foro, ke lenge phivlia sas busterde ande so denas sako dies. Le deš-u-dui akharde le but vortakon, ai phenen: Nai mišto ke ame mukas e vorba le Devleski te služisaras ka e skafidi. Sa anda kudia, phralale, alon maškar tumende efta manušen, kai si le jekh laši patia, kai si pherde Svinto Duxo ai godi, ai kai ame thasa pe lende kudia butji. Ai ame, ame žias sakda te řudjisaras ai ka e služetsia la vorbaki. So von phende drago sas kudalenge kai sas kjidine kothe. Von alosarde le Stefano, manuš pherdo patiamos ai kai si les o Svinto Duxo, le Filipo, le Proxoro, le Nikanor, le Timon, le Parmenas, ai le Nikolas, proselito anda o Antioxi. Von sikade le ka le apostoli, kai pala ke řudjisarde, thode pe lende le vast. E vorba le Devleski žialas angle but ai mai but, le vortača bution but ande o Jerusalem, ai but žene anda le raša lias le o patiamos. O Stefano, pherdo dragostia ai zor, kerelas bare šodi ai čudeni maškar o narodo. Uni manuš katar e khangeri židovitsko akharen la e khangeri katar le Mukli, ai uni Sirenuri, Aleksandrianuri, le Židovonsa anda e Tsilisia ai anda e Azia, thode pe te den duma lesa; numa naštin te ninkeren pe leski godji ai pe o Duxo sar vo del duma. Atunči pokjinde manušenge kai phenen: Ame ašundiam leste ke prasal pe o Moše ai pe o Del. Von buntuisarde o narodo, le purane ai le Zakonaren, ai von xukle pe leste, line les, ai ningerde les ka e kris židovitsko. Von andine falši martururi, kai phenenas: Kado manuš či terdiol te mothol vorbi pe o svinto than ai pe o zakono; ke ame ašundiam ke vo phenel ke o Jesus, kudo Nazareno, phagela kudo than, ai pařuvela le zakonuri kai o Moše dias amen. Sa kudala kai denas kris ande e kris židovitsko thodine penge jakha pe o Stefano, lesko mui miazolas sar kudo jekhe andželosko. O baro rašai phenel: Si kadia le dieli? O Stefano del palpale: Manušale, phralale ai dada, ašunen! O Del vestime sikadilo ka amaro dad o Abraham, kana vo sas ande e Mesopotamia, angla savořende te bešel ande o Xaran; ai vo phendias leske: Muk tjiro them ai tjiria familia, ai žia ande o them kai me sikavava tuke. Vo atunči anklisto anda o them katar le Xaldenuri, ai thodias pe te bešel ande o Xaran. Kothar, pala ke mulo lesko dad, o Del nakhadias les ande kado them kai tume bešen akana; vo či dias les či jekh kher ande kado them, inke nas kai te thol peske punře, numa vo phendias leske ke del les leske, ai leska vitsake pala leste, makar ke nas les glati. O Del delas duma kadia: Leski vitsa bešela ande jekh them streino; thona la tela e služetsia ai marena la štar šela berš. Numa o them ka savo von služina, me dava les pe e kris, phenel o Del. Pala kudia, von anklena avri, ai von služina ma ande kado than. Porme o Del dias ka o Abraham e patia kai šinen le muršen, ai kadia, o Abraham, arakhadilo lestar o Isak, šindias les o oxto dies; o Isak arakhadilo lestar o Jakob ai šindias les, ai katar o Jakob šindias le deš-u-do phuren. Le phure nas lenge drago o Josef, lengo phral bikjinde les te ningeren les ande e Egipta. Numa o Del sas lesa, ai skipisardias les anda sa kudala baiuri; vo dias les godji ai kerdias t'arakhel dragostia angla o Faraono, amperato anda e Egipta ai pe sa lesko kher. Avili jekh bokh pe sa o them ande e Egipta, ai ande kudo o Kanan. O nekazo sas baro ai amare dada či arakhenas so te pravaren pe. O Jakob ašundias ke si gjiv ande e Egipta, ai vo tradias amare daden jekh mai angluno data. Ai e duito data, o Josef prinžiarde les leske phral, ai o Faraono žianglias anda če familia si vo. Porme o Josef tradias t'anen leske dades o Jakob, ai sa leski familia ande sa efta-var-deš ai panž žene. O Jakob vulisto ande e Egipta, kai kothe mulo, kadia vi amare dada; ai len ningerde le ande o Šehem, ai thodine le andre o groapoševo kai o Abraham kjindiasas, pe lovende, katar le šiave katar o Hamor, ande o Šexem. E vramia pašiolas kai trubulas t'aresel so o Del kerdias le Abrahamoske, ai o narodo barilo ai butilo ande e Egipta, žikin či sikadilo jekh kaver amperato, kai či žianelas so sas o Josef. Kudo amperato, kerdias xitrenia pe amari vitsa, marelas amare daden, kadia te lelas lendar lenge glati, te na mai train. Ka kudia vramia, arakhadilo o Moše, kai sas šukar ka le jakha le Devleske. Vo sas pravardo trin šion ande o kher peske dadesko; ai, kana trubulas te muken les avri e šei le Faraoneski lias les, ai bariardias les sar pesko šiav. O Moše sikiarde les ande sa-godi žianenas le Egiptanuri, ai vo sas zuralo pe e vorba ai pe e butji. Sas štar-var-deš beršengo, kana avilias leske ande o ilo te žial ka peske phral, le šiave anda o Israel. Vo dikhlias jekhes kai marenas les, ai, gelo pala leste, vo kerdias te pokjinel kudales kai marelas les, ai vo mudardias le Egiptanos. Vo gindilas pe ke leske phral hatiarenas ke o Del dela o skipimos katar lesko vast; numa von či hatiarde. O dies pala kudo, vo sikadilo maškar lende sar von marenas pe, ai vo mangel lende te bešen ande e patia: Manušale, phenel vo, sostar maren tume jekh avres? Numa kudo kai marel peske vortakos del les palpale, phenel les: Kon thodias tu birevo ai krisinitori pe amende? Kames tu te mudares man, sar mudardian tu aratji le Egiptanos? Ka kudia vorba, o Moše našlo, ai gelo te bešel ande o them o Midian, kai arakhadile lestar dui šiave. Štar-var-deš berš pala kudia, jekh andželo sikadilo leske, ande e pusta ka o plai o Sinai, ande e pařa ande jekh buř kai phabol. O Moše, dikhlias kudia, sas leske šodo so vo dikhel; ai, sar vo pašiol te lel sama, o hango le Baresko ašundiol: Me sim o Del tjire dadengo, o Del katar o Abraham, katar o Isak ai katar o Jakob. Ai o Moše, sa isdralas, či tromalas te dikhel. O Baro phenel leske: Le le papuča pa tjire punře, ke o than pe savo tu bešes si jekh than svinto. Me dikhlem o nekazo muře narodosko kai si ande e Egipta, me ašundem leske vatimata, ai me vulistem te skipiv les. Akana, žia, me tradava tu ande e Egipta. Kudo Moše, kai von dine les palpale, phendesas leske: Kon thodias tu birevo ai krisinitori? Vo si kai o Del tradias les sar birevo ai sar skipitori le ažutimasa katar o andželo kai sikadilo leske ande e buř. Vo ankaladias le anda e Egipta, kerdias šodi ai čudenia ande o them e Egipta, ande e mari e Loli, ai ande e pusta, štar-var-deš berš. Kudo Moše si kai phendias ka le šiave anda o Israel: O Del ankalavela tumenge maškar tumare phral jekh profetos sar mande. Vo si kai, kana kjidinisaile ande e pusta, sas le andželosa kai delas duma lesa pe o plai o Sinai ai amare dadensa, ai vo lias le vorbi živinde, te del le amenge. Amare dada či kamenas te patian les, von dine les palpale, ai von ambolde penge ile karing e Egipta. Phenenas ka o Aron: Ker amenge dela kai phiren angla amende; ke kudo Moše kai ankaladias ame ande e Egipta, ame či žianas kai lo vo. Ai, ande kudo dies, von kerde jekh vitselo, von dine jekh sakrifiso kudales, ai von veselisaile anda e butji penge vastengi. Atunči o Del dias pe palpale, ai dias le ka le čeřaia le čereske, sar si ramome ande e kliška le Profetongi: Dian ma tume šinade manušen ai sakrifisuri Štar-var-deš berš ande e pusta, Kher katar o Israel? Tume ningerdian e tseřa katar o Molok Ai e čeřai katar o del o Raifan, Kudala staturi kai tume kerdian te kamen! Kadia me ningerava tumen inčial o Babilon. Amare phure sas len ande e pusta e tseřa svinto, sar dias ordina o Del kai phendias ka o Moše te kerel les sar sas o modelo kai vo dikhlias. Ai amare phure, line la, thodine la andre, kana ningerelas len o Jošua, ande o them kai sas le narodengo kai o Del gonisardias angla lende, ai bešli kothe ži ka o dies kai sas o David. O David arakhlias dragostia angla o Del, ai manglias te vazden jekh kher le Devleske katar o Jakob; ai sas o Salomon kai vazdias kudo kher. Numa o Mai Vučo či bešel ande so si kerdo katar o vast le manušesko, sar phenel o profeto. O čeri si muřo skamin amperatisko, Ai e phuv kai phirav pe late. Če kher vazdena mange tume, phenel o Baro, Vai kai avela o than kai me hodiniv? Nai ke muřo vast kai kerdias sa kadala dieli? Tume manuš kai si tume e koř zurali, phandade ande o ilo ai ande le kan! tume san sakda pe o Svinto Duxo. So tumare dada sas, vi tume san kadia. Savo anda le profeturi nas mardo katar tumare dada? Von mudarde kudalen kai phenenas angla savořende ke avel o Vorta. Vo si kai tume dian les akana ande vast, ai ke tume sanas kudala kai mudardian les, tume kai lian o zakono pala le poronkuri katar le andželi, ai kai tume či garadian le! Kana ašunde kudala vorbi, len lias le e xoli ande penge ile, ai grintsisarde le dand pe leste. Numa o Stefano, pherdo Svinto Duxo, vazdias le jakha karing o čeri, dikhlias o vestimos le Devlesko ai le Jesus opre pe o čačo le Devlesko. Ai vo phenel: Eta, me dikhav o čeri puterdo, ai o Šiav le manušesko opre pe o čačo le Devlesko. Von atunči phurde bare tsipimata, ai phandade penge kan, ai von našle sigo sa ande jekh than pe leste, Tsirde les avri anda o foro, ai mudarde les bařensa. Le martururi thode penge tsalia ka le punře jekhe terne muršeske kai bušolas o Saul. Ai von mudarde bařensa le Stefano, kai řudjilas ai phenelas: Baria Jesus, le muřo duxo! Porme, thodias-pe pe čangende, vo tsipisardias jekhe hangosa zurale: Baria, na tho pe lende kadi bezex! Ai, pala kudala vorbi, vo mulo. O Saul kamlias o merimos le Stefanosko. Sas, ande kudo dies, jekh baro marimos pe e khangeri ande o Jerusalem; ai sa, ferdi na le apostoli, našletar ande e rig katar e Judea ai e Samaria. Manuš kai patian angroposarde le Stefano, ai rovenas les bare bašimasa. O Saul, pe peski rig, phařavelas e khangeri; delas andre ande le khera, vo ankalavelas avri le manušen ai le žiuvlian, ai šiudelas len ande e temnitsa. Kudala kai našletar žianas than thanestar, phenenas e laši viasta la vorbasa. O Filipo, vulisto ande jekh foro ande e Samaria, delas duma pa o Kristo. O narodo sas ande jekh than, ašunenas mišto so phenelas o Filipo, kana von ašunenas ai dikhle le čudeni kai vo kerelas. Ke duxuri bi-vuže ankliste avri anda uni demoniakuri, kai tsipinas zurales, ai but paralitikuri ai bange sas sastiarde. Ai sas jekh bari veselia ande kudo foro. Sas angla savořende ande o foro jekh manuš akharenas les Simon, kai, phenelas peske jekh manuš baro, kerelas o drabarimos ai sas šodo le narodoske anda e Samaria. Sa, de katar o mai tsinořo ži ka o mai baro, ašunenas leste mišto, ai phenenas: Kado si e zor le Devleski, kudia kai akharen la e Bari. Von ašunenas leste mišto, ke vo but vramia kerdias t'avel lenge šodo katar pesko drabarimos. Numa, kana von patiaile ande o Filipo, kai phenel lenge e laši viasta le themeski katar o Del ai ande o anav o Jesus Kristo, murš ai žiuvlia bolde pe. O Simon vi vo patial, ai, pala ke boldias pe, vo či mai mukelas le Filipo, ai vo dikhelas šodimasa le čudeni ai le bare dieli kai kerenas. Le apostoli kai sas ande o Jerusalem, ašunde ke ande e Samaria line e vorba le Devleski, tradine le Petri ai le Jono. Kudala, aresle ka le Samaritanuri, řudjin lenge, eta te len o Svinto Duxo. Ke inke či vulisto pe či jekh anda lende; von ferdi sas bolde ande o anav le Bare Jesusosko. Atunči o Petri ai o Jono thode pe lende le vast, ai von line o Svinto Duxo. Kana o Simon dikhlias ke o Svinto Duxo sas dino kai thonas pe lende le vast le apostoli, vo kamelas te del len love, phenelas: Den ma kudia putiaria, eta ke kudaleske kai me thava le vast pe leste te lel o Svinto Duxo. Numa o Petri phenel leske: Ke te tjiro lov xasavol tusa, ke tu gindisailian ke so del o Del kjinel-pe pe lovende! Nai tuke či partia či khanči ande kadia diela, ke tjiro ilo nai vorta angla o Del. Keisavo tu anda tjiro nasulimos, ai řudjisar le Bares ke te o gindo tjire ilesko t'avel jertime, te šai daštila pe; ke me dikhav ke tu san pherdo nasul griatsa ai ande o phanglimos le bezexako. O Simon del palpale: Řudjin tume le Bares mange, eta te na aresel mange khanči anda so tume phendian. Pala ke sas martururi ke e vorba le Bareski, ai pala ke von dine duma, o Petri ai o Jono gele palpale ande o Jerusalem, phenenas e laši viasta ande but gava ka le Samaritanuri. Jekh andželo le Baresko, del duma ka o Filipo, phenel leske: Ušti, ai žia pe e rig tele, pe e vurma kai žial anda o Jerusalem ka o Gaza, kudia kai si pusto. Vo uštilo, ai gelotar. Ai eta, jekh Etiopiano, enuko kai lel sama katar le žiuvlia, ministero katar e Kandaka, amperatsiasa ande e Etiopia, žialas palpale, bešelas pe pesko vurdon, ai gjinelas o profeto o Esai. O Duxo phenel ka o Filipo: Žia angle, ai pašio paša o vurdon. O Filipo našel, ai ašunelas le Etiopiano kai gjinelas le Esai o profeto. Vo phenel leske: Hatiares tu so gjines? Von del palpale: Sar daštiva me, te na avela varekon te sikavel mange? Ai vo akharel le Filipo t'anklel opre ai te bešel lesa. O than le Ramomosko kai vo gjinelas sas kako: Vo sas ningerdo sar jekh bakrořo ka o masari, Ai, sar jekh bakrořo muto angla kudo kai šinel le bal pa leste, Vo či puterdias o mui. Ande pesko lažiav, nas kjidini les kris. Ai leski vitsa, kon phenela pa late? Ke line lesko traio pa e phuv. O enuko phenel ka o Filipo: Me mangav tu, pa kaste o profeto del vo duma kadia? si pa peste, vai pa varekaste aver? Atunči o Filipo, puterdias o mui ai lias pe katar kako than, phenel leske e laši viasta katar o Jesus. Sar von žianas pe penge vurma, von arakhle pai. Ai o enuko phenel: Eta o pai; so či mukela ma t'avav boldo? O Filipo phenel: Te patiasa tu anda sa tjiro ilo, kudia šai avel. O Enuko del palpale: Me patiav ke o Jesus Kristo si o Šiav le Devlesko. Vo terdias o vurdon; O Filipo ai o enuko vuliste vi le dui ande o pai, ai o Filipo boldias le enukos. Kana von ankliste avri anda o pai, o Duxo le Baresko lias le Filipo, ai o enuko či mai dikhlias les, vo gelo pesko drom veselo. O Filipo sas ande o Azot, kathar gelotar ži ande o Tsesarea, phenelas e laši vorba ande sa le foruri katar vo nakhelas. Numa o Saul, mai phurdelas e dar ai o merimos pe le vortača le Bareske, gelo ka o baro rašai židovitsko, ai manglias lestar lila pe le khangeria židovitsko ande o Damasko, eta ke, t'avela varekon katar o nevo zakono, murš vai žiuvli, t'anel len phangle ande o Jerusalem. Sar vo sas pe e vurma, ai ke vo pašiolas paša o Damasko, anda jekh data jekh vedaria avili anda o čeri ai strefialas krugom lestar. Vo pele pe e phuv, ai vo ašunelas jekh hango kai phenelas leske: Saul, Saul, sostar kjinuis ma tu? Vo del palpale: Kon san tu, Baria? Ai o Baro phenel: Me sim O Jesus kai tu kjinuis. Ai o Baro phenel leske: Ušti, de ande o foro, ai phenena tuke so trubul tu te keres. Le manuš kai sas lesa sas lenge šodo; von ašunenas mišto o hango, numa von či dikhenas khanikas. O Saul uštilo pa e phuv, ai, makar ke leske jakha sas puterde, vo či dikhel khanči; line les vastestar, mai ningerde les ande o Damasko. Vo bešlo trin diesa bi te dikhel, ai vo či xalias ai či pilias. Eta, sas ande o Damasko jekh vortako bušolas Ananias. O Baro phenel leske ande jekh suno: Ananias! Vo del palpale: Eta me, Baria! Ai o Baro phenel leske: Ušti, žia ande e vulitsa kai akharen la e Vorta, ai rode, ande o kher katar o Juda, jekhes kai bušol Saul anda o Tarsus. Vo řudjil, ai vo dikhlias sar suno jekhe manušes kai bušol Ananias, kai delas andre, ai kai thodias pe leste le vast, eta te puterdion leske jakha. O Ananias del palpale: Baria, me ašundem katar but žene sa o nasulimos ke kudo manuš kerdias te svintsonge ande o Jerusalem; ai si kathe e putiaria, katar le bare raša židovitsko, te phandel sa kudalen kai phenen tjiro anav. Numa o Baro phenel leske: Žia, ke kudo manuš trubula man ai me alosardem les te ningerel muřo anav angla le thema, angla le amperatsi, ai angla le šiave katar o Israel; ai me sikavava leske sa sogodi vo trubul te kjinuil pala muřo anav. O Ananias anklisto avri; ai, kana vo areslo ande o kher, vo thodias le vast pe o Saul, phenelas: Saul muřo phral, o Rai o Jesus, kai sikadilo tuke pe e vurma katar tu avesas, tradias ma te putrav tjire jakha ai t'aves pherdo Svinto Duxo. Strazo, pele pa leske jakha sar babitsi, ai leske jakha puterdile. Vo uštilo, ai bolde les; ai, pala ke lias te xal, e zor avili leske. O Saul bešlo uni diesa le vortakonsa kai sas ande o Damasko. Ai strazo vo del duma ande le khangeria židovitsko ke o Jesus si o Šiav le Devlesko. Sa kudala kai ašunenas leste sas lenge šodo, ai von phenenas: Nai vo kudo kai kjinuilas ande o Jerusalem kudalen kai phenenas o anav le Jesusosko ai či avilo vo kathe te ningerel le phangle ka le bare raša židovitsko? Numa o Saul zuriavolas but ai mai but, ai vo sikavel le Židovonge kai bešenas ande o Damasko kai šibin pe, sikavelas lenge ke o Jesus si o Kristo. Kana nakhlias jekh tsiřa vramia, le Židovuri dine pe duma te mudaren les, ai so von kamenas te keren ašundias kudia o Saul. Arakhenas le vudara diese ai riate, eta te len lesko traio. Numa, ande jekh riat, le vortača line les, ai vuliarde les pa o zido, ande jekh košnitsa. Kana vo gelo ande o Jerusalem, o Saul zumadias t'astardiol lensa numa sa daranas lestar, či patianas pe ke vo si jekh vortako. Atunči o Barnabas, lias les pesa, ningerdias les karing le apostoli, ai phenel lenge sar pe e vurma o Saul dikhlias le Bares, kai dias duma lesa, ai sar ande o Damasko vo dias duma čačimasa ande o anav le Jesusosko. Vo žialas ai avelas lensa ande o Jerusalem, ai phenelas bi darako ande o anav le Baresko. Vo mai delas duma ai sas les čingar le Židovonsa kai den duma grekitsko; numa kudala rodenas te lel lesko traio. Le phral ašunde, ningerde les ande o Tsesarea, ai kerde te žialtar ande o Tarsus. E khangeri sas ande e patia ande sa e Judea, e Galilea ai e Samaria, zuriavolas ai phirelas ande e dar le Bareski, ai von butionas ke ažutilas len o Svinto Duxo. Sar o Petri žialas ka sa o them vo vi mai vulisto karing kudala svintsi kai bešenas ande o Lida. Vo arakhlias jekhe manušes bušolas Eneas, sovelas pe jekh pato de oxto berš, ai sas paralitiko. O Petri phenel leske: Eneas, o Jesus Kristo sastiarel tu; ušti, ai lašiar tjiro pato. Ai vo strazo vuštilo. Sa o narodo anda o Lida ai anda o Saron dikhle les, ai von pařudisaile ka o Baro. Sas ande o Jope, maškar le vortača, jekh žiuvli bušolas Tabita (kudia si gazela): Voi kerelas but butia laše ai ažutilas le čořen. Voi peli nasvali ande kudia vramia, ai muli. Pala ke xalade le, thodine la ande jekh soba opre. Sar o Lida si paše paša o Jope, le vortača, kana ašunde ke si kothe o Petri, tradine do manušen karing leste, te řudjil les t'avel lende bi te mai ažiukerel. O Petri uštilo, ai gelotar kudala manušensa. Kana vo areslo, ningerde les ande e soba opre. Sa le phivlia sas krugom lestar roimasa, ai sikaven leske le bundi ai le tsalia kai suvelas e Tabita žikin sas lensa. O Petri dias avri savořen, thodias pe ande čangende, ai řudjil, vo phenel: Tabita, ušti! Voi puterdias le jakha, dikhlias le Petri, ai voi bešel. Vo del la o vast, ai kerdias te uštel. Vo atunči akharel le svintson ai le phivlian, ai sikavel la lenge živindi. Žianglias kadia sa o Jope, ai but patian ande o Baro. O Petri bešlo tsiřa vramia ande o Jope, ka jekh mortsari. Sas ande o Tsesarea jekh manuš bušol Kornelius, baro pe jekh šel ketani ande e trupa kai akharen les Italianitsko. Kudo manuš patialas ai daralas katar o Del, sa peske kheresa; vo but delas love le narodoske, ai řudjilas le Devles sakda. Karing o trito časo pala mismeri, vo dikhlias jekh suno — sikadilias leske jekh andželo le Devlesko kai dias ande lesko kher, ai phenel leske, Kornelio! Dikhel e andželo ai lias les e dar, vo del palpale: So si, Baria? Ai o andželo phenel leske: Tjire řudjimata ai so dian le čořenge ankliste opre angla o Del, ai vo či busterel tu. Trade akana manušen ande o Jope, ai ker t'avel o Simon, kai akharen les Petri; vo bešel ka jekh varekon kai bušol Simon, jekh mortsari, lesko kher si paša e maria. De sar o andželo dias lesa duma, gelotar. O Kornelius akharel don anda peske služi, ai jekhe ketanos kai patial maškar kudala kai sas astarde leste; ai, pala ke phendias lenge sa, vo tradias le ande o Jope. Teharin, sar von sas pe o drom, ai ke von pašion paša o foro, o Petri anklisto pe o čardako karing mismeri te řudjil. Sas les bokh, ai vo kamelas te xal. Žikin lašiaren leske te xal, vo pelo sar ande e lindri. Vo dikhlias o čeri puterdo, ai jekh diela jekh fialo sar jekh tsolo phanglo katar le štar koltsuri, kai vulelas ai perelas karing e phuv, ai sas ande o tsolo sa le žigeni štare punřensa ai le sapa la phuviake ai le čiriklia le čereske. Ai jekh hango phenel leske: Ušti, Petri, mudar ai xa. Numa o Petri phenel: Niči, Baria, ke me šoha či xalem mahrime či so nai vužio. Ai pe duito data o hango ašundiol leske: So o Del phendias ke si vužio, na dikh pe leste sar t'avel mahrime. Kudia areslias trivar; ai strazo pala kudia, e diela sas line ande o čeri. Žikin ke o Petri či žianelas so te gindil anda so dikhlias kai sas, eta, le manuš tradine katar o Kornelius, pušle kai si o kher le Simonosko, avile angla o vudar, ai pušen zurale hangosa te bešel kothe o Simon, kai bušol Petri. Ai sar o Petri delas pe godji so vi dikhlias, o Duxo phenel leske: Eta, trin manuš mangen tu; ušti, vuli, ai žia lensa bi te ažiukeres, ke me sim kai tradem len. Kadia o Petri vulisto, ai vo phenel kudale manušenge: Eta, me sim kudo kai tume roden; pala soste avilian tume? Von den palpale: Kornelius, baro pe jekh šel ketani, manuš vorta ai kai daral katar o Del, ai kastar sa le Židovongo den les pativ, sas naročno phendo katar jekh svinto andželo t'akharel tu ande pesko kher ai t'ašunel tjire vorbi. O Petri kadia dias len andre, ai bešle kothe. Teharin, vo uštilo, ai gelotar lensa. Uni anda le phral anda o Jope gele lensa. Von aresle ande o Tsesarea o dies pala kudo. O Kornelius ažiukerelas len, akhardiasas gosti peske niamon ai peske vortakon le mai laše. Kana o Petri dias andre, o Kornelius, kai gelo angla leste, pelo ka leske punře ai dias čanga. Numa o Petri vazdias les, phenelas: Ušti, vi me, me sim jekh manuš. Ai dela duma lesa, vo del andre, ai arakhlias but ženen kjidine. Tume žianen, phenel lenge vo, nai slobodo jekhe Židovoske te phangiol ka jekh streino vai t'avel leste, numa o Del sikiardias man te na dikhav pe či jekh manuš sar mahrime ai ke nai vužio. Sa anda kudia či ninkerdem ma te na avav, sar ke tume akhardian man; me mangav tumen sostar tume tradian te roden man. O Kornelius phenel leske: Si de štar diesa, pe kado časo, me řudjivas ande muřo kher ka o trito časo; ai eta, jekh manuš pe leste jekh tsalia sa parno sikadilo angla mande, ai phenel: Kornelio, avela sar si tjiro řudjimos, ai o Del dias pe godji so tu dian le čořenge. Trade ande o Jope, ai ker te avel o Simon, akharen les Petri; vo bešel ande o kher le Simonosko, o mortsari paša e maria. Strazo me tradem karing tute, ai tu mišto kerdian ke avilian. Akana ame san sa angla o Del, t'ašunas sa so o Baro dias tu ordina te phenes amenge. Atunči o Petri, puterdias o mui, phenel: Čačimasa, me prinžiarav ke o Del sa jekh fialo lel sama savořendar, numa ke ande sako them kudo kai daral lestar ai kai kerel e kris si leske drago. Vo tradias e vorba ka le šiave ande o Israel, phendias lenge e laši viasta katar e patia katar o Jesus Kristo, kai si o Rai savořengo. Tume žianen so areslias ande e Judea, pala ke lias pe ande Galilea, pala o bolimos kai o Jono phendias; tume žianen sar o Del svintsisardias katar o Svinto Duxo ai ande e zor le Jesus anda o Nazaret, kai žialas than thanestar, kerelas mištimos ai sastiarelas sa kudalen kai sas tela e zor le bengeski, ke o Del sas lesa. Ame sam martururi anda sa so vo kerdias ande o them le Židovongo ai ande o Jerusalem. Von mudarde les, amblade les pe o trušul. O Del živindisardias les o trito dies, ai vo muklias les te sikadiol, na sa le narodoske, numa le marturonge alome angla savořende katar o Del, amenge kai xaliam ai piliam lesa, pala ke vo živindisailo katar le mule. Ai o Jesus dias amen ordina te phenas le narodoske ai te sikavas ke vo si kai si thodino katar o Del sar krisinitori pe le živinde ai pe le mule. Sa le profeturi si leske martururi ke kon-godi patial ande leste katar lesko anav lel o jertimos peske bezexango. Sar o Petri mai mothol kudala vorbi o Svinto Duxo vulisto pe sa kudala kai ašunenas e vorba. Le Židovuri kai patianas ande o Jesus ai kai avilesas le Petrosa sas lenge šodo ke so si katar o Svinto Duxo vi mai avilo pe le nai-Židovuri. Ke von ašunenas lende sar denas duma pe le šiba ai vestin le Devles. Atunči o Petri phenel: Šai te na das ame o bolimos le paiesko kudalen kai line o Svinto Duxo kadia mišto sar ame? Ai vo dias ordina te bolen len ande o anav le Baresko. Pe kudia řudjisaile leste te bešel paša lende uni dies. Le apostoli ai le phral kai sas ande e Judea ašunde ke le nai-Židovuri vi von line e vorba le Devleski. Ai kana o Petri anklisto ande o Jerusalem, le čače šinde nai lenge mišto. Phenenas: Tu dian andre ka kudala kai nas šinde, ai tu xalian lensa. O Petri thodias pe te phenel lenge sar sa nakhlias. Vo phenel: Me simas ande o foro o Jope, ai žikin me řudjivas, me pelem sar ande jekh suno ai dikhlem jekh dikhimos: Jekh diela, jekh fiala sar jekh baro tsolo phanglo katar le štar koltsuri, vulelas anda o čeri ai avili ži mande. Le dikhimata thodine pe kudo tsolo me lavas sama, ai me dikhlem le žigeni štare punřensa la phuviake, le žigeni sirbati, le sapa, ai le čiriklia le čereske. Ai me ašundem jekh hango kai phenelas mange: Ušti, Petri, mudar ai xa. Numa me phendem: Niči, Baria, ke šoha či mahrime či bi-vužio či dias ande muřo mui. Ai pe e duito data o hango ašundilias ande o čeri: So o Del phendias ke si vužio, tu na dikh pe leste ke si mahrime. Kudia areslias trivar; porme sa sas lino ande o čeri. Ai eta, strazo trin manuš, tradine anda o Tsesarea karing mande sikadile angla o vudar ka o kher kai me simas. O Duxo phendias mange te žiavtar lensa bi t'ažiukerav. Le šov phral sas mansa, ame diam andre ande o kher ka o Kornelius. Kudo manuš mothodias amenge sar vo dikhlias ande pesko kher le andželos kai sikadilo leske ai phenelas: Trade ande o Jope, ai an le Simon, kai akharen les Petri, kai phenela tuke dieli katar save tu avesa skipime, tu ai sa tjiro kher. Kana me thodem ma te dav duma, o Svinto Duxo vulisto pe lende, sar pe amende angla savořende. Ai me dem ma godji ka kadia vorba le Bareski: O Jono boldias ande o pai, tume avena bolde ande o Svinto Duxo. Eta, sar o Del dias len sa jekh fialo so dias amen kai patiam ande o Rai o Jesus Kristo, sar daštiva me, me, te na kerav pe le Devleski? Pala ke ašundias kudia, von ašile, ai luvudisarde le Devles, phenenas: O Del dias kudalen kai či patian te kein pe, eta t'avel len o traio. Kudala kai geletar pala o maribe kana mudarenas le Stefano, gele ži ande e Fenesia, ande e inzula o Kipro, ai ande o Antioxi, phenenas e vorba ferdi le Židovonge. Numa sas maškar lende uni manuš anda o Kipro ai anda e Sirena, kai, avile ande o Antioxi, pušenas katar le Židovuri kai denas duma grekitsko, ai phenenas lenge e laši viasta katar o Rai Jesus. O vast le Baresko sas lensa, ai but anda lende patian ai ambolde pe ka o Baro. O hango avilo ka le kan ka kudala kai sas ande e khangeri ande o Jerusalem, ai von tradine le Barnabas ži ande o Antioxi. Kana vo areslo, ai dikhlias o mištimos le Devlesko, vo veselisailo, ai vo mangel lendar sa te bešen ande jekh ilo phangle zurale ka o Baro. Ke vo sas jekh manuš lašio, pherdo Svinto Duxo ai patiamos. Ai baro narodo avile ka o Baro. O Barnabas gelo atunči ande o Tarsus, te rodel le Saul; ai, kai arakhlias les, vo andias les ande o Antioxi. Sa ande jekh berš, von kjidenas pe ande jekh than le kavrensa ande e khangeri, ai von sikiarenas but ženen. Sas ande o Antioxi ke e mai angluno data, le vortača akharde le Kristianuri. Ande kudia vramia, profeturi vuliste anda o Jerusalem ande o Antioxi. Jekh anda lende, bušol Agabus, uštilo, ai phenel katar o Duxo ke avela jekh bari bokh pe sa e phuv. Voi aresli, čačes, kana sas amperato o Klodo. Le vortača dine pe duma te traden love, de so vo daštin, t'ažutin le phralen kai bešen ande e Judea. Von trade le love ka le phure katar le vast le Barnabaske ai le Sauloske. Karing kudia vramia, o amperato o Herodo thodias pe te kjinuil unen anda e khangeri. Ai vo kerdias te merel la xanřesa le Jakob, phral le Jonosko. Dikhlias ke sas drago le Židovonge, vo mai astardias le Petri. Sas ka le diesa le manřenge bi-drosdake. Pala ke lias les ai šiudias les ande e temnitsa, vo thodias les t'arakhen les štar-var-štar ketanen ke sas les gindo t'anen les angla o narodo pala e Patradi. Kadia o Petri sas garado ande e temnitsa; ai e khangeri či ašelas te řudjin leske le Devles. E riat angla savořende kai o Herodo sas te sikavel les, o Petri, phanglo do lansonsa, sovelas maškar dui ketani; ai kaver angla o vudar arakhenas e temnitsa. Ai eta, jekh andželo le Baresko avilo, ai jekh vedaria strefial ande e temnitsa. O andželo uštiavel le Petri, marel les pe o prašav, ai phenelas: Ušti sigo! Le lansuri pele pa leske vast. Ai o andželo phenel leske: Tho tjiri prastia ai tjire spargati. Ai vo kerdias kadia. O andželo mai phenel leske: Tho pe tute tjiri bunda, ai aidi mansa. O Petri anklisto, či žianelas ke so kerdiol katar o andželo te si čačes, ai vo gindilas pe ke dikhel suno. Kana von nakhle katar le mai angluni ketani porme katar le dui, von aresle ka o vudar o sastruno kai žial ande o foro, ai kai puterdilo anda peste angla lende; von ankliste avri, ai gele angle ande jekh vulitsa. Strazo o andželo muklias le Petri. Avilo peste, o Petri phenel: Me dikhav akana čačimasa ke o Baro tradias peske andželos, ai ke vo skipisardias ma anda o vast katar o Herodo ai anda sa so o narodo židovitsko ažiukerelas. Pala ke dias pe gindo, vo gelo karing o kher la Mariako, e dei le Jonoski, akharenas les Marko, kai but manuš sas ande jekh than ai řudjinas. Vo marel ka o vudar kai den andre, ai jekh sluganka, bušol Rod, pašili t'ašunel. Voi prinžiardias o hango le Petrosko; ai ande pesko veselimos, bi te putrel, voi našli te phenel ke o Petri si ka o vudar. Von phenen lake: Tu san dili. Numa voi zuriarel ke e diela si kadia. Ai von phenen: Lesko andželo si. Numa o Petri mai marel. Von puterde, ai sas lenge šodo ke dikhen les. O Petri, kerdias lenge anda o vast t'ašen, mothol lenge sar o Baro ankaladias les avri anda e temnitsa, ai vo phenel: Phenen kadia ka o Jakob ai ka le phral. Porme vo anklisto avri, ai gelotar ande jekh kaver than. Kana o dies avilo, le ketani but miškisaile, te žianen so areslo le Petroske. O Herodo, thodias pe te rodel les ai či arakhlias les, pušel katar kudala kai arakhenas les, ai dias ordina te ningeren le te kjinuin le. Atunči vo vulisto anda e Judea ande o Tsesarea, te bešel kothe. O Herodo sas les ginduri nasul karing le Tirienuri ai le Sidonuri. Numa von avile leste ande jekh than; ai, line pensa le Blaste, kai lel sama lestar, von mangen e patia, ke von trainas katar o amperato. Ande jekh dies thodino, o Herodo, pe leste peske tsalia amperatisko, bešelas pe pesko skamin amperatisko, delas lensa duma angla sa. O narodo tsipilas: Hango jekhe Devlesko, ai na jekhe manušesko! Strazo, jekh andželo le Baresko maladias les, ke vo či luvudisardias le Devles. Ai vo mulo, xalo katar le kjerme. Numa e vorba le Devleski geli but ai mai but, ai le vortača bution. O Barnabas ai o Saul, pala ke von dine duma, gele palpale ande o Jerusalem, ningerde pesa le Jono, akharen les Marko. Sas ande e khangeri ande o Antioxi profeturi ai doxtori: o Barnabas, o Simon akharen les Kalo, o Lusius anda e Sirena, o Manaen kai barilo le vladorosa Herod ai o Saul. Žikin von služinas le Bares ande pengi ministeria ai ke von postinas, o Svinto Duxo phenel: Thon mange rigate le Barnabas ai le Saul pe e butji savi me akhardem len. Atunči, pala ke postisarde ai řudjisarde, von thode pe lende le vast, ai mukle len te žian-tar. O Barnabas ai o Saul, tradine katar o Svinto Duxo, vuliste ande e Selevsia, ai kothar line o čuno te žian ande e inzula o Kipro. Aresle ande e Salamina, von phenen e vorba le Devleski ande le khangeria le Židovonge. Sas lensa o Jono t'ažutil len. Von atunči nakhle sa e inzula ži ande o Papos. Von arakhle jekhe drabarne, xoxamno profeto Židovo, bušol Bar-Jesus; sas le bare konsulosa o Sergius Paulus, manuš godiaver. Kudo mai paluno akharel le Barnabas ai le Saul, ai mangel t'ašunel e vorba le Devleski. Numa o drabarno, o Elimas, — kudia bušol lesko anav Grekitsko, — či mukelas len, rodelas te del rigate katar o patiamos le bare konsulos. Atunči o Saul, akharen les vi Paul, pherdo Svinto Duxo, thodias o dikhimos pe leste, ai phenel: Manuš pherdo sako fialo xitrenia ai athaimos, šiav le bengesko, dušmano sa la krisako, či avesa tu te rimos le vurmi vorta le Bareske? Akana eta, o vast le Baresko si pe tute, tu avesa kořo, ai pe jekh vramia tu či dikhesa o kham. Strazo o tamlo ai o tuniariko pele pe leste, ai vo rodel, le vastesa, ženen te ningeren les. Atunči o vladoro dikhlias so areslias, patial pe, sas pria šodo sar sikiarenas pa o Baro. O Paul ai peske vortača, gele pe o čuno anda o Papos, gele ande o Perge ande e Pamfilia. O Jono muklias le, ai gelo palpale ande o Jerusalem. Ande o Perge von gele pengo drom, ai aresle ande o Antioxi ande e Pisidia. Dine andre ande e khangeri Židovitsko o sabato, von bešle tele. Pala ke gjinde o zakono le profetengo, le birevia katar e khangeri židovitsko tradine te phenen lenge: Manuš phral, te si tumen vorbi te phenen te ažutin o narodo, den duma. O Paul uštilo, ai kerdias semno le vastesa, vo phenel: Manuš anda o Isrel, ai tume kai daran katar o Del, ašunen! O Del katar kudo narodo anda o Israel alosardias amare daden. Vo thodias kado narodo opre žikin von sas te bešen ande o them e Egipta, ai vo ankaladias len avri pe pesko zuralo vast. Vo pravardias len pašte štar-var-deš berš ande e pusta; ai, von pelade efta thema ande o than o Kanan, von dias len e phuv t'avel lengi. Pala kudia, pašte štar šela ai panž-var-deš berš, vo dias len krisinitoria, ži ka o profeto Samuel. Von mangle atunči jekhe amperatos. Ai o Del dias les lenge, pašte štar-var-deš berš, le Saul, šiav katar o Kis, anda e kumpania o Beniamin; porme, vo šiudias les, vo vazdias lenge le amperatos o David, kaske vo dias kadia marturia: Me arakhlem le David, Šiav katar o Jesai, manuš sar si muřo ilo, kai kerela sogodi me kamav. Si katar e vitsa le Davidoski, sar vo phendias, ke o Del vazdias ande o Israel jekh skipitori, kai si o Jesus. Angla savořende vo t'avel, o Jono phendias o bolimos le keimasko ka sa o narodo ande o Israel. Ai kana o Jono getosardias so sas te phenel, vo phenelas: Me či sim kudo kai tume gindin; numa eta, pala mande avel kudo kai me či sim harniko te putrav le doria leske papučenge. Manušale phralale, šiave anda e vitsa le Abrahamoski, ai tume kai daran katar o Del, tumenge si ke kadia vorbi skipimaske si tradine. Ke kudala kai bešen ande o Jerusalem ai lenge birevia či prinžiardias le Jesus, ai kai dine les strafo, von kerde so phenenas le vorbi katar le profeturi kai von gjinenas sako sabato. Makar ke von či arakhle ande leste khanči anda soste trubul te mudaren les, von mangle katar o Pilato te mudaren les. Ai, pala ke von kerde sa so sas ramome pa leste, von vuliarde les pa o trušul ai thodine les ande jekh groapoševo. Numa o Del živindisardias les katar le mule. Vo sikadilo but diesa ka kudala kai ankliste lesa anda e Galilea ande o Jerusalem, ai kai si akana leske martururi paša o narodo. Ai ame, ame mothas tumenge kadia laši viasta kai sas phendi ka amare dada. O Del kerdias la amenge, lenge šiave, ke živindisardias le Jesus, sar ri ramome ande e Psalmo e duito: Tu san muřo Šiav, Me kerdem t'arakhadios adies. Kai vo živindisardias les katar le mule, anda kudia ke vo či mai žiala palpale te rimol pe, si so vo phendias, kana phenelas: Me dava tumen le svintsimata kai phendem ke si te dav le ka o David. Sa anda kudia mai phenel pe kaver rig: Tu či mukesa ke te tjiro Svinto te dikhel o rimomos. Eta o David, pala ke les sas leski vramia sar kamlias o Del, vo mulo, sas thodino peske dadensa ai vo dikhlias o rimomos. Numa kudales kai o Del živindisardias či dikhlias o rimomos. Te žianen tume, manušale phralale, ke lestar, o Jesus, si ke o jertimos le bezexango si tumenge phendo, ai ke kon-godi patial ande leste avela jertime anda peske bezexa kai tume naština te keren katar o zakono le Mošesko. Kadia, len tume sama te na aresel tumenge so si phendo ande le profeturi: Dikhen, len sama, T'avel tumenge šodo ai bilan: Ke me si te kerav ande tumare diesa jekh butji, jekh butji kai tume či patiana, te phenena les tumenge. Kana von ankliste avri, řudjisarde len te mai den duma lenge o sabato kai avela pe kudala dieli; ai pala ke kjidenas pe, but anda le Židovuri ai anda le proselituri gele palal o Paul ai o Barnabas, kai denas duma lensa ai vazdenas len te bešen phangle ka e dragostia le Devleski. O sabato pala kudo, pašte sa o foro kjidinisailo t'ašunen e vorba le Devleski. Le Židovuri, dikhen o narodo, lias le e xoli, ai von dine palpale so phenelas o Paul, ai prasanas les. O Paul ai o Barnabas phenenas lenge zorasa: Tumenge angla savořende ke trubulas ke e vorba le Devleski sas t'avel phendi numa, sar tume den la palpale, ai ke tume inke den tume kris ke či san harniči t'avel tumen o traio pe sakda, eta, ame amboldas ame karing le nai-Židovuri. Ke kadia dias amen ordina o Baro: Te ningeren o skipimos ži ande o koltso la phuviako. Le nai-Židovuri veselisaile kana ašunde kudia, von luvudin e vorba le Bareski, ai sa kudala kai sas šinade ka sa o traio patian. E vorba le Devleski geli ande sa o them. Numa le Židovuri vazde le žiuvlian le mai baria kai patian ai le mai baren ande o foro; von kerde t'avel jekh kjinuimos pe o Paul ai pe o Barnabas, von dine le avri pa pengi phuv. O Paul ai o Barnabas khosle e kišai pa penge punře pe lende, ai gele ande o Ikonium, žikin le vortača sas pherde veselia ai Svinto Duxo. Ande o Ikonium, o Paul ai o Barnabas dine andre ande jekh than ande e khangeri židovitsko, ai von den duma kadia ke baro narodo anda le Židovuri ai le Grekuri patian. Numa le Židovuri kai či patian vazdine ai xoliarde le duxuri katar le nai-Židovuri pe le phral. Von bešle dosta vramia ande o Ikonium, denas duma zorasa, ninkerdionas-pe pe o Baro, kai vo sas marturo ka e vorba e šukar ai muklias t'aven katar lenge vast čudeni ai šodimata. O narodo anda o foro huladias pe ande dui: uni sas pala le Židovuri, le kaver pala le apostoli. Ai kudala kai či patian ai le Židovuri, ande jekh than penge birevonsa, thodine pe ande jekh than te prasan le ai te mudaren le bařensa. O Paul ai o Barnabas, ašunde kudia, gele te garadion ande le foruri katar e Likaonia, ande o Listre ai o Derbe, ai ande le riga krugom. Ai von phenen kothe e laši vorba. Ande o Listre, bešelas jekh manuš, leske punře bange ai kai šoha či phirdias. Vo ašunel sar del duma o Paul. Ai o Paul, šiudias le jakha pe leste ai dikhlias ke si les patiamos te sastiol. Vo phenel pe jekh hango baro: Beš vorta pe tjire punře. Ai vo uštilo ande jekh xutimos ai phirel. Kai dikhle so o Paul kerdias, o narodo vazdel o hango, ai phenen pe e šib anda e Likaonia: Le dela sar le manuš vuliste karing amende. Von akharenas le Barnabas Jupiter, ai le Paul Merkur, ke vo sas kai delas duma. O rašai katar o Jupiter, kai lesko templo sas angla o foro, andias guruva le luludiansa karing o vudar, ai kamelas, sa kadia vi o narodo, te den jekh sakrifiso. Le apostoli o Barnabas ai o Paul, ašunde kudia, šinde penge tsalia, ai našle maškar o narodo, tsipinas: Manušale, sostar keren tume kadia? Vi ame, ame sam manuš jekh fialo sar tumende; ai, anas tumenge jekh laši viasta, ame mangas tumen te na keren kudala dieli intaino, t'ambolden tume karing o Del živindo, kai kerdias o čeri, e phuv, e maria, ai sogodi si. Kudo Del, ande le berša kai nakhle, muklias sa le themen te žian pe pengi vurma sar von kamen. Makar ke vo kamelas te kerel marturia anda so si vo, kerel mištimos, del tumen anda o čeri le brišinda ai le vrami kai bariaren, del tume but xamos, ai pherel tumare ile e veselia. Trudno sas lenge t'ašaven, katar kudala vorbi, o narodo te na den len jekh sakrifiso. Atunči avile anda o Antioxi ai anda o Ikonium Židovuri kai nirisarde o narodo, ai kai šiude bař pe o Paul, ningerde les avri anda o foro, gindinas ke vo si mulo. Numa le vortača ašiade krugom les, vo uštilo, ai dias andre ande o foro. Teharin, gelotar ande o Derbe le Barnabasa. Kana von sikiarde ande kudo foro ai line uni vortakon, von gele palpale ande o Listre, ande o Ikonium ai ande o Antioxi, zuralenas le duxuri le vortakonge, vazdenas le te žian angle ande o patiamos, ai phenenas lenge ke si katar but kjinuimos ke trubun te das andre ande e amperetsia le Devleski. Von thonas le puranen lenge ande sako khangeri, ai, pala ke řudjisarde ai postisarde, von den le ka o Baro, ande kaste von patian. Nakhenas atunči e Pisidia ai avile ande e Pamfilia. Phenen e vorba ande o Perge, ai vuliste ande e Atalia. Kothar line o čuno pe o Antioxi, katar von gele pe e poronka le Devleski pe e butji kai von kerde. Pala ke von aresle, von akharde e khangeri, ai von mothon sa so Del kerdias lensa, ai sar von puterde le themenge o vudar le patiamosko. Ai von bešle dosta vramia le vortakonsa. Uni manuš, avile anda e Judea, sikiaren le phralen, phenenas: Tume te na avena šinde sar si o Zakono le Mošesko, tume naštin t'aven skipime. O Paul ai o Barnabas sas len lensa jekh divano ai jekh čingar; ai le phral dine pe gindo ke o Paul ai o Barnabas, ai uni anda lenge, anklen ande o Jerusalem karing le apostoli ai le purane te den duma pa kudia diela. E khangeri dias len so trubul, te žian mai angle ande pengo drom maškar e Fenitsia ai e Samaria, phenenas sar pařudion le nai-Židovuri, ai dine jekh bari veselia ka sa le phral. Aresle ande o Jerusalem, akhardias le peste e khangeri, le apostoli ai le purane, ai von phenen sa so o Del kerdias lensa. Atunči uni anda e partida katar le Farizianuri, kai patian, uštile, phenenas ke trubul te šinel le nai-Židovon ai te len sama o zakono katar o Moše. Le apostoli ai le purane kjidinisaile te len sama kudia butji. Jekh bari čingar avili, o Petri uštilo, ai phenel lenge: Manušale phralale, tume žianen ke de dumult o Del alosardias maškar amende, eta ke, katar muřo mui, le nai-Židovuri t'ašunen e vorba katar e Laši Viasta ai te patian. Ai o Del, kai žianel le ile, sas lenge marturo, dias len o Svinto Duxo sar amen; leske sam savoře jekh fialo ame vai von, vo vužardias lenge ile katar o patiamos. Akana kadia, sostar zumaven tume le Devles, kai thon pe e koř le vortakongi jekh pharimos kai či amare dada či ame či ninkerdiam? Numa si katar o mištimos le Baresko o Jesus ke ame patias ke ame sam skipime, sa jekh fialo sar lende. Sa so si kjidine ašen muto, ai ašunen ka o Barnabas ai ka o Paul, kai mothonas sa le čudeni ai le šodimata kai o Del kerdias lendar maškar le nai-Židovuri. Kana von ašile te den duma, o Jakob lias e vorba, ai phenel: Manušale phralale, ašunen mande! O Simon phendias sar o Del angla savořende šiudias le jakha pe le thema t'alol maškar lende jekh narodo kai si te ningerel lesko anav. Ai kudalasa si ande jekh than le vorbi katar le profeturi, sar si ramome: Pala kudia, me avava, ai me vazdava e tseřa le Davidoski kai peli. Me lašiarava lake pharaimata, ai me vazdava la, Eta ke so mai si anda le manuš te roden le Bares. Kadia sa le thema pe kaste muřo anav si phendo, Phenel o Baro, kai kerel sa te žianen le de sakda. Sa anda kudia me sim siguro te na keren trudno ka le nai-Židovuri kai ambolden pe ka o Del, numa te ramon lenge te len pe sama te na aven mahrime katar le staturi, katar e kurvetsia, katar le žigeni tasade ai katar o rat. Ke, de katar but vitsi, o Moše si les ande sako foro žene kai den duma pa leste, ai gjinen leske vorbi sa le diesa le sabatoske ande le khangeria židovitsko. Atunči miazol mišto le apostolonge ai le puranenge, ai sa la khangeriake, t'alon maškar lende ai te traden ande o Antioxi, le Paulosa ai le Barnabasosa, le Jud (akharen les Barsabas) ai le Silas kai porončinas maškar le phral. Von dine le jekh lil ramome kadia: Le apostoli, le purane, ai le phral, ka le phral maškar le nai-Židovuri, kai si ande o Antioxi, ande e Siria, ai ande e Tsilisia, unpači! Ašundiam ke uni manuš geletar amendar, ai kaske ame či diam či jekh ordina, rimosarde tumen katar penge divanuri ai miškisarde tumare duxuri. Ame diam ame gindo pe kudia, pala ke ame kjidinisailiam ande jekh than, t'alosaras manušen ai te tradas len tumenge amare dragonsa o Barnabas ai o Paul, kudala manuš kai dine pengo traio pala o anav amare baresko o Rai Jesus Kristo. Ame kadia tradiam le Jud ai le Silas, kai von phenena tumenge pa pengo mui sa jekh fialo dieli. Ke si mišto le Svinto Duxoske ai amenge te na thas pe tumende aver pharimos ke ferdi so trubul, žianen, te na xan o mas šinado le statonge, o rat, le žigeni tasade, le dieli mahrime katar save avelas mišto te len tume sama. Ašen Devlesa. Von kadia, line penge pozdraimos katar e khangeri, gele ande o Antioxi, kai von dine o lil ka le but manuš kai kjiden pe. Pala ke gjinde la, le phral veselisaile katar o ažutimos kai andine lenge. O Jud ai o Silas, kai vi von sas profeturi, vazdenas len ai zuriarenas len katar le but divanuri. Pala jekh vramia, le phral mukle le patiasa, gele palpale karing kudala kai tradine len. Numa o Silas arakhlias mišto te mai bešel. O Paul ai o Barnabas bešle ande o Antioxi, sikiarenas ai phenenas but kavrensa e laši viasta katar e vorba le Bareski. Uni diesa nakhle, pala kudia o Paul phenel le Barnabasoske: Aven palpale te dikhas le phralen ande sa le foruri kai ame phendiam e vorba le Bareski, te dikhas sar von si. O Barnabas kamelas t'anen vi le Jono, akharen les Marko; numa o Paul hatiardas mai mišto te na len pensa kudales kai muklias len de katar e Pamfilia, ai ke nas lensa ande lengi butji. Kudia čingar sas pria zurali te kerel ke hulaven pe jekh avrestar. Ai o Barnabas, lias le Marko pesa, lias o čuno te žian ande e inzula o Kipro. O Paul alosardias le Silas, ai gelotar, trade les le phral t'ažutil le o Baro. Von nakhle pa e Tsilisia ai e Siria, zuriaren le khangeria. Vo gelo atunči ande o Derbe ai ande o Listre. Ai eta, sas kothe jekh vortako kai bušolas Timoteo, šiav katar jekh židovaika kai patial ai katar jekh dad Greko. Le phral anda o Listre ai anda o Ikonium denas duma mišto pa leste. O Paul kamelas te lel les pesa; ai, lias les, vo šindias les, pala le Židovuri kai sas kothe, ke sa žianenas ke lesko dad si Greko. Sar nakhenas pa le foruri, vo porunčilas le phralenge te len sama so phenenas le apostoli ai le purane anda o Jerusalem. Le khangeria zuriavonas ande o patiamos, ai but butionas dies diesesa. Či muklias le o Svinto Duxo te phenen e vorba ande e Azia, ai von nakhle pa e Frigia ai o them e Galatia. Aresle paša e Misi, von kamenas te den andre ande e Bitinia; numa o duxo le Jesusosko či muklias le. Von nakhle atunči e Misi, ai vuliste ande o Troas. Ande e riat, o Paul dikhlias jekh suno: Jekh Makedoniako sikadilo leske, ai řudjisailo leste kadia: Nakh ande e Makedonia, ažutisar ame! Pala kudo suno le Paulosko, ame rodiam te žias strazo ande e Makedonia, diam pe o gor ke o Baro akhardiam amen te phenas e laši viasta. Geliam anda o Troas, ame geliam pe o čuno karing o Samotratsia, ai teharin vulistiam tele ande o Neapolis. Kothar ame geliam ande o Filipi, kai si o mai angluno foro katar jekh provinsia anda e Makedonia, ai jekh kolonia romanitsko. Ame nakhliam uni diesa ande kudo foro. O dies o sabato, ame geliam, avri katar o foro, karing jekh pai, kai ame gindisailiam ke šai t'avel kudo than kai řudjisaren. Ame bešliam tele, ai ame diam duma le žiuvliange kai kjidinisaile kothe. Jekh anda lende, bušol Lidia, bikjinel tsalia lole kuč, sas anda o foro o Tiatira, sas jekh žiuvli kai daralas katar o Del, ai voi šunelas. O Baro puterdias lako ilo, te lel sama so phenelas o Paul. Kana voi sas boldi, peska familiasa, voi kadia mangel amendar: Te gindina tume ke me sim čači ka o Baro, aven andre ande muřo kher, ai bešen kathe. Ai voi gribilas ame zorasa. Sar ame žiasas ande o than kai řudjin, jekh sluganka kai sas la jekh duxo nasul ai kai delas pe o gor, delas but love peske birevon, avili angla amende. Ai voi thodias pe t'avel pala amende, o Paul ai ame. Voi tsipil: Kadala manuš si le služi le Devleske Mai Vučo ai von phenen tumenge e vurma te skipin tume. Voi kerdias kudia but diesa. O Paul, čino, amboldinisailo, ai phenel ka o duxo: Me dav tu ordina, ande o anav le Jesus Kristosko, t'ankles avri anda late. Ai vo anklisto avri ande kudo časo. Le birevia la slugankake, dikhenas ke bilal so ažiukerenas te nirin, line le Paul ai le Silas, ai ningerde le pe o platso publiko angla le rai bare. Von sikaven len ka le krisinitoria ai phenenas: Kadala manuš rimon amaro foro; von si Židovuri kai phenen amenge zakonuri kai nai amenge slobodo te las ai te žias pala lende, amenge kai sam Romanuri. O narodo vazdinisailo pe lende. Atunči le ketani line pa lende le tsalia, dine ordina te maren le řaiensa. Pala ke marde le mišto, von šiude le ande e temnitsa, dine poronka ka kudo kai arakhel te lel lendar sama mišto. Kudo kai arakhel lias kudia ordina, šiudias le ande e temnitsa andre, ai thodias lenge punře ande phalia kaštune. Karing o maškar la ratiako, o Paul ai o Silas řudjinas ai gjilabenas le luvudimata le Devleske, ai le aver čor ašunenas lende. Ande jekh strazo miškisaili e phuv, kadia ke le ziduri la temnitsake isdraile; ande kudia vramia, sa le vudara puterdile, ai le phanglimata sa le řobonge šindile. Kudo kai arakhel le řobon uštilo, ai, kana dikhlias le vudara la temnitsake puterde, vo tsirdias peski xanřo ai kamelas te mudarel pe, gindilas pe ke le čor našletar. Numa o Paul tsipil pe jekh hango baro: Na ker tuke nasul, ame sam sa kathe. Atunči kudo kai arakhel, manglias vedaria, dias andre strazo, ai šiudias pe sigo isdraimasa ka le punře le Pauloske ai le Silasoske; vo ankaladias le avri, ai phenel: Bare, so trubul te kerav t'avav skipime? O Paul ai o Silas den palpale: Patia ande o Rai o Jesus ai tu avesa skipime, tu ai tjiri familia. Ai von phenen leske e vorba le Bareski, ai vi kudalenge kai sas ande lesko kher. Vo lias len pesa, ande kudo časo la ratiako, vo xaladias lenge šindimata, ai strazo von bolde les, les ai sa ande lesko kher. Vo ningerdias le ande pesko kher, vo dias len te xan, ai vo veselisailo sa peska familiasa ande ke patian o Del. Kana o dies avilo, le krisinitoria tradine ketanen te phenen ka kudo kai arakhel: Muk avri kudale manušen. Ai kudo kai arakhel phenel o nevimos ka o Paul: Le krisinitoria tradine te phenen mange te mukav tumen; akana anklen avri, ai žian patiasa. Numa o Paul phenel kudalenge kai sas tradine: Pala ke marde ame řaiensa angla o narodo ai bi krisako, ame kai sam Romanuri, von šiudine ame ande e temnitsa, ai akana von ankalaven ame pe čořořal! Či avela kadia. Ke te aven von te len amen avri. Le tradine ningerde kudala vorbi ka le krisinitoria, kai lias len e dar kana ašunde ke von si Romanuri. Von avile te ašiaven le, ai von mukle le avri, řudjin pe lende te muken o foro. Kana ankliste avri anda o foro, von dine andre ande o kher la Lidiako ai pala ke dikhle ai zuriarde le phralen, von geletar. O Paul ai o Silas nakhle pa o Amfipolis ai e Apolonia, ai von aresle ande e Tesaloniki, kai le Židovuri sas len jekh khangeri židovitsko. O Paul dias andre, sar si lesko zakono. Ande trin sabaturi, vo delas duma lensa, sar si le Ramomata, sikavelas lenge ai motholas ke o Kristo trubulas te kjinuil ai živindil katar le mule. Ai o Jesus pa kaste me dav tumenge duma, phenelas vo, vo si o Kristo. Uni anda lende mišto patian, ai gele pala o Paul ai o Silas, vi jekh but anda le Grekuri kai daran katar o Del, ai but žiuvlia anda le baria. Numa le Židovuri, xoliariko, line pensa uni nasul manušen anda o narodo, kerenas baio ande o narodo, ai buntuimos ande o foro. Von gele ka o kher kai si o Jason, ai von roden le Paul ai le Silas, te ningeren le karing o narodo. Či arakhle le, von ningerde le Jason ai uni phralen angla le rai bare le foroske, tsipinas: Kadala žene, kai diliarde la lumia, von avile vi kathe, ai o Jason lias le peste. Von keren sa so či trubul pe o zakono katar o Tsesar, phenen ke si jekh kaver amperato, o Jesus. Katar kakala vorbi von daraven o narodo ai le raien bare, kai mukle te žialtar le Jason ai le kavren pala ke pokjinen e mita. Strazo le phral kerde te žiantar riate o Paul ai o Silas ande o Berea. Kana von aresle, von dine andre ande e khangeri katar le Židovuri. Kudala Židovuri sas mai laše sar kudala anda e Tesaloniki, von line e vorba sigo opre, ai von len sama sako dies le Ramomata, te dikhen ke so phenen lenge si vorta. But anda lende patian, vi but žiuvlia Grekuri anda le baria, ai but manuš. Numa, kana le Židovuri anda e Tesaloniki ašunde ke o Paul phenel vi ande o Berea e vorba le Devleski, von avile te rimon o narodo. Atunči strazo le phral kerde te žialtar o Paul pe e rig la mariaki, o Silas ai o Timoteo bešle ande o Berea. Kudala kai žian pala o Paul ningerde les ži ande e Atena. Porme gele palpale, tradine te phenen ka o Silas ai ka o Timoteo e ordina t'aven pala leste mai sigo. Sar o Paul ažiukerelas le ande e Atena, hatiarelas ande peste ke lesko duxo xoliavol, kai dikhel kudo foro pherdo staturi. Vo kadia dias andre ande e khangeri židovitsko le Židovonsa ai le manušensa kai daran katar o Del, ai pe o platso publiko sako dies kudalensa kai nakhenas. Uni filosofuri epikurianuri ai stoisianuri thodine pe te den duma lesa. Ai uni anda lende phenenas: So si kado divano? Kaver, ašunenas leste so phenel pa o Jesus ai pa o živindimos, phenenas: Miazol ke vo phenel pa le dela streia. Atunči von line les, ai ningerde les ka e foroski kris, o Areopagos, phenenas: Šai žianasas ame so si kudia nevo sikiarimos kai tu sikiares? Ke tu keres t'ašunas dieli šodo. Ame kamas te žianas so si t'avel kudia. Eta sa le Atenianuri ai le streia kai bešenas ande e Atena sa e vramia phenenas vai ašunenas le mai paluni vesti. O Paul, opre maškar o Areopagos, phenel: Manuš anda e Atena, me arakhav tumen ande sa pria patian ande o Del. Ke, sar phiradem ma ande tumaro foro ai ke dikhlem le dieli ande kaste tume patian, me inke arakhlem jekh altari kakale ramomasa: Jekhe devleske kai nai prinžiardo: kas tume řudjin bi te žianen les, kudia si kai me phenav tumenge. O Del kai kerdias e lumia ai sogodi si, si o Baro pe o čeri ai pe e phuv, či bešel ande le templuri kerde anda o vast le manušesko; les či služin les le vast le manušenge, si ke či trubul les khanči, vo kai del sakones o traio, te phurdel, ai sako diela. Vo kerdias ke sa le manuš, kai ankliste avri anda jekh rat, te bešen pe sa e fatsa la phuviaki. Thodias sode t'avel e vramia ai o than kai te bešen; vo kamlias te roden le Bares, ai te thon zor t'arakhen les asbaimasa, makar ke vo nai dur katar sako anda amende, ke ande leste traisaras, miškisavas, ai sam. Si kudia kai mai phende vi uni anda tumare poeturi: Ame sam anda leski vitsa. Si kadia, sar sam anda e vitsa le Devleski, ame či trubul te patias ke o devlikanimos si jekh fialo sar o sunakai, sar o rup, vai sar o bař, hunade šukar ai katar e butji le manušeski. O Del, bi te mai del pe godji ande e vramia kana či žianenas, phenel akana ka sa le manuš, ande sako than, te žial te keil pe, ke vo thodias jekh dies kai vo dela pe kris la lumia sar si leski kris, katar o manuš kai vo alosardias, sar vo sikadias savořenge te dikhen o kai živindisardias kudale manušes katar le mule. Kana von ašunde ke den duma ke živindin le mule, uni asan, ai le kaver phenen: Ame ašunasa tute kudia aver data. Kadia o Paul gelotar lendar. Uni anda lende astardile leste ai patian, o Dionisio o krisitori, jekh žiuvli akharen la Damaris, ai aver lensa. Pala kudia, o Paul gelotar anda e Atena, ai gelo ande o Korinto. Vo arakhlias kothe jekhe Židovos akharen les Akilas anda o Pontus, nai de dumult ke avilo anda e Italia peska řomniasa e Prisila, ke o Klodo dias ordina ka sa le Židovuri t'anklen avri anda e Roma. Vo gelo le dikhel lenge, ai, sar sas len sa jekh fialo butji, vo bešlo lende ai kerel butji: von suvenas le tseři. O Paul delas duma ande e khangeri židovitsko sako sabato, ai kerelas te patian Židovuri ai Grekuri. Numa kana o Silas ai o Timoteo aresle anda e Makedonia, o Paul thodias sa peski vramia te phenel ke o Jesus si o Kristo. Le Židovuri atunči gele pe lende ai thode pe te prasan le, o Paul khoslias peske tsalia, ai phenel lenge: Ke tumaro rat te perel pe tumaro šero! me sim vužio. De akanara, me žiav karing le nai-Židovuri. Sar anklisto avri kothar, vo dias andre ka jekh manuš akharen les Titius Justus, manuš kai daral katar o Del, ai kai lesko kher sas paša e khangeri židovitsko. Numa o Krispus, birevo la khangeriako židovitsko, patial ka o Baro sa peska familiasa. Ai but anda le Koriantianuri ašunde le Paul ai boldisaile. O Baro phenel le Pauloske ande o suno riate: Na dara; numa de duma, ai na aš, ke me sim tusa, ai khonik či thola pe tute o vast te kerel tuke nasul: De duma, ke baro narodo si ma ande kado foro. Vo bešlo kothe jekh berš ai šov šion, sikiarelas maškar le Koriantianuri e vorba le Devleski. Ande e vramia kai o Galion sas baro konsulo ande e Axaia, le Židovuri vazdinisaile sa ande jekh than pe o Paul, ai ningerde les angla e kris, phenenas: Kado manuš vazdel le ženen te služin le Devles jekh aver fialo sar si o zakono. O Paul lelas te putrel o mui, kana o Galion phenel le Židovonge: Te si ke nai vorta e kris vai ke si nasul diela, me ašunava tumende sar trubul, o Židovuri; numa, kathe si divano pala jekh vorba, pala jekh anav, ai pala tumaro zakono, kudia si tumari diela: me či kamav t'avav krisinitori pe kudala dieli. Ai vo tradias le avri anda e kris. Atunči, sa line le Sostenes, o birevo katar e khangeri židovitsko, marde pes angla e kris, bi o Galion te lel sama. O Paul bešlo dosta vramia ande o Korinto. Atunči muklias peske phralen, ai lias o čuno pe e Siria, lesa e Prisila ai o Akilas, pala ke řanglias pesko šero ande o Senkre, ke vo kadia šinadias. Von aresle ande o Efese, ai o Paul muklias peske vortakon. Dias andre ande e khangeri židovitsko, vo del duma le Židovonsa, kai řudjisarde les te bešel mai but lensa. Numa vo či kamlias, ai vo muklias len, phenelas: Me avava karing tumende, te kamela o Del. Ai vo gelotar anda o Efese. Vulisto tele ande o Tsesarea, vo anklisto ande o Jerusalem, ai, pala ke dias pozdraimos e khangeri, vo vulisto ande o Antioxi. Kana vo bešelas jekh vramia ande o Antioxi, o Paul lias pesko drom, ai nakhlo pa e Galatia ai e Frigia, zuriarelas sa le vortakon. Jekh Židovo akharen les Apolos, anda e Alexandria, manuš kai žianel te del duma ai žianel le Ramomata, avilo ande o Efese. Vo sas sikiardo ande e vurma le Bareski, ai, baro godiako, vo sikiarelas ai phenelas vorta sa so si pa o Jesus, makar ke vo žianelas ferdi o bolimos katar o Jono. Vo thodias pe te del duma slobodo ande e khangeri židovitsko. O Akilas ai e Prisila ašunde leste, ai von sikade leske mai mišto e vurma le Devleski. Sar vo kamelas te nakhel ande o Axaia, le phral ažutisarde les, ai ramosarde ka le vortača te len lestar mišto sama. Kana vo areslo, nais le Devleske, vo pria trubulas kudalen kai aresle te patian; ke vo delas palpale sigo le Židovon angla o narodo, sikavelas katar le Ramomata ke o Jesus si o Kristo. Žikin ke o Apolos sas ande o Korinto, o Paul, pala ke nakhlo le thana opre katar e Azia, areslo ande o Efese. Arakhlias uni anda le vortača, vo phenel lenge: Lian tume o Svinto Duxo, kana tume patian? Von dine les palpale: Ame inke či ašundiam ke si jekh Svinto Duxo. Vo phenel: Ande savo bolimos san tume bolde? Ai von dine palpale: O bolimos katar o Jono. Atunči o Paul phenel: O Jono boldias te kein tume, phenelas le narodoske te patian ande kudo kai avela pala leste, si kudia ande o Jesus. Pe kudala vorbi, von sas bolde ande o anav le Bare Jesusosko. Kana o Paul thodias pe lende o vast, o Svinto Duxo avilo pe lende, ai von den duma pe le šiba ai phenen so avela. Von sas pašte deš-u-dui manuš. Atunči o Paul dias andre ande e khangeri židovitsko, kai vo dias duma sar kamel. Trin šion, vo delas duma pe le dieli so si e amperetsia le Devleski, zumavelas te hatiaren kudala kai ašunenas. Numa, sar uni sas lengo ilo zuralo ai či patian ai dine duma nasul angla o narodo pa e vurma le Bareski, o Paulo gelotar lendar, huladias le vortakon, ai sikiarelas sako dies ande e škola katar jekh akharen les Tiranus. Kudia gelo dui berš, kadia ke sa kudala kai bešen ande e Azia, Židovuri vai Grekuri, ašunde e vorba le Bareski. Ai o Del kerelas čudeni pria bare katar le vast le Pauloske, kadia ke thonas pe le nasvale le gada vai le dikloře kai asbade lesko stato, ai le nasvalimata mukena len, ai le duxuri xitri anklenas avri. Uni drabarne židovuri kai phirenas zumavenas te phenen pe kudala kai sas le duxuri xitri o anav la Baresko o Jesus, phenenas: Me mangav tu katar o Jesus kai o Paul del pa leste duma! Kudala kai kerenas kudia sas le efta šiave katar o Skeva, Židovo, jekh anda le bare raša židovitsko. O duxo xitro den len palpale: Me prinžiarav le Jesus ai me žianav kon si o Paul; numa tume, kon san tume? Ai o manuš ande kaste sas o duxo xitro xuklo pe lende, ai mardias le kadia ke von našle anda kudo kher nange ai řanime. Kudia žiangle sa le Židovuri ai sa le Grekuri kai bešenas ande o Efese, ai e dar lias savořen, ai o anav le Baresko o Jesus sas luvudime. But anda kudala kai patian avenas te puřin pe ai te mothon so von kerde. Ai uni anda kudala kai kerenas o drabarimos, andine penge kniški, phabarde le angla sa e lumia: Gjinde ke sas kadia kuč panž-var-deš mii dinari. Si kadia ke e vorba le Bareske bariol ande e zor. Pala ke kudala dieli nakhle, o Paul del pe gindo te žial ande o Jerusalem, te nakhhel pa e Makedonia ai e Axaia. Kana avava kothe, phenel peske vo, trubul te dikhav e Roma. Vo tradias ande e Makedonia don anda peske vortača kai ažutin les, o Timoteo ai o Erasto, ai vo mai bešel tsiřa vramia ande e Azia. Avilias, ande kudia vramia, jekh baro buntuimos pala e vurma le Bareski. Jekh akharen les Demetrius, aržintari, kerelas anda o rup tsinoře templuri katar e Diana, ai delas peske služen te nirin but. Vo kjidias len, kudalensa kai si len sa jekh fialo butji, ai phenel: Manušale, tume žianen ke amaro mištimos si pala amari butji ai tume dikhen ai ašunen ke na ferdi ande o Efese, numa pašte ande sa e Azia, kudo Paul sikadias ai dias palpale but ženen, kai phenel ke le dela kerde anda o vast le manušesko nai dela. E doš kai avili kothar, nai ke ferdi amari butji perel tele; mai si ke o templo ai o barimos katar e bari devleski e Diana te na avel khanči, ai ka jekh fialo e amperatsiasa kai sa řudjin pe late ande sa e Azia ai ande sa e lumia si inčardi sar te na avel khanči. Kudala vorbi pherde le xoli, von thode pe te tsipin: Bari si e Diana katar le Efesianuri! Sa o foro dilailo, von našle sa ande jekh than ande e teatra, ningerde pensa le Gais ai le Aristark, Makedonuri, vortača pe o drom le Paulosa. O Paul kamelas te sikadiol angla lende, numa le vortača či mukle les. Inke uni anda le bare ande e provinsia kai sas leske vortača, tradine karing leste, te phenen leske te na žial ka e teatra. Uni tsipinas jekh diela, le kaver aver, ke o buntuimos sas maškar lende, ai but anda lende či žianenas sostar kjidinisaile. Atunči ankalade avri anda o narodo le Alexandre, kai le Židovuri spidenas angle; ai o Alexandre kerdias semno le vastesa, kamelas te del duma le narodoske. Numa kana von prinžiarde ke vo si Židovo, sa ande jekh than tsipisarde pašte dui časuri: Bari si Diana katar le Efesianuri! Numa o baro le forosko, ašiadias o narodo, phenel: Manušale anda o Efese, kon si kudo kai či žianel ke o foro o Efese si kai arakhel o templo katar e bari Diana ai o svinto bař vulisto anda o čeri? Kudia naštisaren te den les palpale, tume trubul t'ašen, ai te na keren khanči sigo. Ke tume andian kadale manušen kai nai došale. Či čorenas ande le templuri žiungales, či prasanas amara Diana. Te si o Demetrius ai leske butiaria te nai lenge mišto pe varekaste, si diesa krisake ai bare konsuluri; ke te den pe kris jekh avres. Ai te si tume aver dieli, von lašiardiona ande jekh kjidimos sar trubul. Šai avel pe amende, čačes, pala so nakhlias adies, te thon beda pe amende ke vazdas ame. Intaino kidisailam ai nai či jekh diela te phenas ame soske buntuisailam. Pala kudala vorbi, vo tradias o narodo. Kana o buntuimos ašilo, o Paul kjidias le vortakon ai, pala ke zuriardias le, gelotar lendar, ai gelo ande e Makedonia. Vo nakhlo pa kudia rig, phenelas le vortakonge but te zuriarel le. Porme gelo ande e Gretsia, kai bešlo trin šion. Vo kamelas te lel čuno te žial ande e Siria, kana le Židovuri kerde pa leste te na žial. Atunči dias pe godji te lel o drom la Makedoniako. Sas lesa te žian ande e Azia: O Sopator anda o Berea, šiav katar o Pirus, o Aristark ai o Sekond anda e Tesaloniki, o Gaius anda o Derbe, o Timoteo, vi o Tixiko ai o Trofimo anda e Azia. Kudala gele anglal, ažiukerde amen ande o Troas. Amenge, pala le diesa bi-drosdake liam o čuno ande o Filipi, ai, ande panž diesa, ame kjidinisailiam ande o Troas, kai ame nakhliam kothe efta diesa. O mai angluno dies anda o kurko, ame kjidinisailiam te phagas o manřo. O Paul, kai trubulas te žialtar teharin, delas duma le vortakonsa ai gelo lesko divano ži o maškar la ratiako. Sas but lampuri ande e soba opre kai ame samas kjidine. Eta, jekh terno murš akharen les Eutikus, kai bešelas pe e feliastra, suto pria zurales žikin del duma but o Paul, vo pelo pa o trito čardako tele, ai line les mulo. Numa o Paul, vulisto, bangilo karing leste ai lias les ande peski angali, phenelas: Na rimon tume, ke lesko duxo si ande leste. Atunči vo anklisto opre, phanglias o manřo ai xalias, ai mai dias duma but ži ande o dies. Pala kudia vo anklisto avri. O terno murš ningerde les živindo, ai savořenge sas mišto. Amenge, ame geliam angla savořende pe o čuno angla o Paul, ai ame geliam pe jekh čuno ande o Asos, kai ame phendiam leske ke lasa les, ke vo manglias te kerel o drom pe punřende. Kana vo areslias ame ande o Asos, ame liam les pe o čuno, ai ame geliam ande o Mitileni. Kothar, geliam angle pa e maria, ai aresliam teharin angla o Xios. O dies pala kudo, ame aviliam karing o Samos, ai o dies pala kudo ame dikhliam o Mileto. O Paul dias pe godji te nakhel angla o Efese bi te terdiol, eta te na xasarel e vramia ande e Azia; ke vo gribilas pe t'arakhadiol pe, si šai daštila, ande o Jerusalem o dies la Řusaliako. Numa, anda o Mileto o Paul tradias te roden ande o Efese le puranen katar e Khangeri. Kana von aresle karing leste, vo phenel lenge: Tume žianen sar me kerdem, de katar o mai angluno dies kai me avilem ande e Azia, me či ašilem t'avav tumensa. Služisardem le Bares ande muřo kovlimos, ai maškar le zumaimata ai le roimata kai vazdine pe mande le Židovuri. Tume žianen ke me či garadem khanči tumendar so trubul, ai ke me či darailem te dav duma ai te sikiarav tume angla o narodo ai ande le khera, phendem le Židovonge ai le Grekonge te kein pe karing o Del ai ka o patiamos ande amaro Rai o Jesus Kristo. Ai akana eta, phanglo katar o Duxo, me žiav ande o Jerusalem ai či žianav so avela mange; ferdi, foro forostar, o Svinto Duxo phendias mange ke phanglimata ai bedi ažiukeren ma. Numa či lav sama mandar či jekh fialo anda muřo traio, sar t'avel mange kuč, ferdi te kerav muřo drom veselimasa, ai e ministeria kai me lem katar o Rai Jesus, te phenav e laši viasta ai šukar katar o Del. Ai akana eta, me žianav ke tume či mai dikhena muřo mui, tume sa maškar save me dem duma pa e amperetsia le Devleski. Sa anda kudia me phenav tumenge adies ke me sim vužio anda sa tumaro rat, ke me phendem tumenge sa so sikiarel o Del, khanči garavav. Len tume sama tumendar, ai pe sa kudala pe save o Svinto Duxo thodias tumen, te len sama katar e Khangeri le Bareski, kai vo kjindias pe pesko rat. Me žianav ke avena maškar tumende, pala ke me žiavatar, ruva bengeske kai rimon le bakrořen, ai kai vazdena pe maškar tumende manuš kai sikiarena dieli žiungale, te ningeren le vortakon pala pende. Len tume sama, den tume godji ke, pašte trin berš, me či ašilem či riate ai či diese te sikiarav tumen asvensa sakones anda tumende. Ai akana me dav tume ka o Del ai ka e vorba leski šukarimaski, ka kudo kai šai zuriarel ai del tumenge sa le svintsimasa. Me či kamlem či love, či sunakai, či tsalia khanikastar. Tume inke žianen ke kakala vast dine so trubul ma ai kudalen kai sas mansa. Me sikadem tumenge anda sako fialo ke si te keren butji kadia ke te ninkeren le kovlen, ai te den tume godji ka e vorba le Bareski, kai vo phendias: Mai but si veselia te den sar te len. Pala ke dias duma kadia, vo thodias-pe pe čangende, ai řudjisardias lensa savořensa. Ai sa lias len o roimos, ai, xukle pe e koř le Pauloski, von čimide les, nekežime mai but ke vo phendias ke či mai dikhena lesko mui. Ai von ningerde les ži ka o čuno. Ame liam o čuno kana huladiam ame lendar, ai ame geliam vorta ande o Kos, teharin ande o Rodes, ai kothar ande e Patara. Ai arakhliam jekh čuno kai nakhelas karing e Fenesia, ame anklistiam opre ai geliamtar. Kana ame aresliam ke dikhas e inzula o Kipro, ame mukliam la pe e stingo, žias mai angle amaro drom karing e Siria, ai ame vulistiam ande e Tira, kai o čuno trubulas te vuliarel so ningerelas. Ame arakhliam le vortakon, ai ame bešliam kothe efta dies. Le vortača, spidine katar o Duxo, phenenas le Pauloske te na žial ži ande o Jerusalem. Numa, kana ame getosardiam le efta dies, ame thodiam ame pe e vurma te žiastar, ai sa ningeren ame penge řomniansa ai penge glatensa ži avri anda o foro. Ame thodiam ame pe čangende pe o berego, ai řudjisardiam. Porme, mukliam ame jekh kavres, ame anklistiam pe o čuno ai von gele palpale pende. Getosardiam te žias pe o čuno, ame geliam anda e Tira ande o Ptolemais, kai ame diam pozdraimos le phralen, ai nakhliam jekh dies lensa. Ame geliamtar teharin, ai ame aresliam ande o Tsesarea. Diam andre ande o kher ka o Filipo o evanželisto, kai sas jekh anda le efta, ame sutiam leste. Sas les štar šeia pativalia kai phenenas so avela. Sar ame samas kothe but diesa, jekh profeto, akharenas les Agabus, vulisto anda e Judea; vo avilo t'arakhel ame. Vo lias e prastia le Pauloski, phanglias peske punře ai peske vast, ai phenel: Eta so phenel o Svinto Duxo: O manuš kaski si kadia prastia, le Židovuri phandena les sa jekh fialo ande o Jerusalem, ai dena les ande le vast ka kudala kai či patian. Kana ame ašundiam kudia, ame ai kudala kai sas kothe, ame mangliam le Paul te na žial ande o Jerusalem. Atunči vo del palpale: So keren tume, kai roven ai kai phagen muřo ilo? Me sim gata, na ferdi t'avav phanglo, numa inke te merav ande o Jerusalem pala o anav le Baresko o Jesus. Sar vo či muklias pe, ame či mai ašiavas les, ai ame phenas: Ke so kamel o Baro t'avel! Pala kudala diesa, ame lašiardiliam, ai ame anklistiam ande o Jerusalem. Uni vortača anda o Tsesarea vi von avile amensa, ai von ningerde amen kai jekh kai bušol Mnason, anda e inzula o Kipro, purano vortako, kaste ame trubulas te bešas. Kana ame aresliam ande o Jerusalem, le phral line ame veselimasa. Teharin o Paul gelo amensa ka o Jakob, ai sa le purane kjidinisaile. Pala ke diam len pozdraimos, vo phenel kotorales so o Del kerdias maškar kudala kai či patian katar leski ministeria. Kana von ašunde, von luvudisarde le Devles. Porme von phenen leske: Tu dikhes, phrala, sode mii Židovuri patian, ai sa si zurale pe o zakono. Eta, von ašunde ke tu sikiares ka sa le Židovuri kai si maškar kudala kai či patian te muken le Moše, phenes lenge te na šinen le glaten ai te na len pe sama sar si sikade. So te keras? Siguro ke but žianen ke tu avilian. Sa anda kudia ker so ame si te phenas tuke. Si maškar amende štar manuš kai šinade vareso solax: Le le tusa, vužisardio lensa, ai le sama lendar, eta te řanden pengo šero. Ai kadia sa žianena ke so si phendo pa tute nai čačes, numa ke vi tu les sama o zakono. Karing le nai-Židovuri kai patian akana, ame phendiam ai ame ramosardiam lenge te len pe sama katar le masa šinade le statonge, katar o rat, katar le žigeni tasade, ai katar e kurvetsia. Atunči o Paul lias kudale manušen, vužilo, ai dias andre teharin ande o templo lensa, te phenel savo dies von avena vuže kana dena so si šinado anda sako anda lende. Kana getosailo le efta diesa, le Židovuria anda e Azia, dikhle le Paul ande o Templo, vazdine sa o narodo, ai thodine o vast pe leste, tsipinas: Manuš Israelituri, ažutin ame! Eta o manuš kai del duma kai-godi ai sa la lumiake pe o narodo, pe o zakono ai pe kado than; vo inke andias Grekon ande o Templo, ai rimosardias kodo svinto than. Ke von dikhle angla savořende le Trofimo anda o Efese lesa ande o foro, ai von gindinas ke o Paul kerdias te del vo andre ande o Templo. Sa o foro miškisailo, ai o narodo našel pe sako rig. Von line le Paul, ai ningerde les avri anda o Templo, kai le vudara sas strazo phandade. Sar von rodenas te mudaren les, o hango avilo ka o baro fitsiri ke sa o Jerusalem dilailo. Strazo vo lias pesa ketanen ai kudalen kai si bare pe jekh šel ketani, ai našlo lende. Dikhle le fitsires ai le ketanen, von ašile te maren le Paul. Atunči o fitsiri pašilo, lias les, ai phanglias les do lansonsa. Porme vo pušel kon si vo, ai so vo kerdias. Akana uni maškar o narodo tsipinas jekh fialo, le kaver aver fialo; o fitsiri naštila khanči te hatiarel, pala o buntuimos, vo dias ordina te ningeren le Paul ande o armia. Kana o Paul areslo ka le trapti, trubulas te ningeren les le ketani, pala e zor le narodoski; ke o narodo žialas palal, tsipilas: mudaren les! Angla savořende te ningeren les ande o armia, o Paul phenel le fitsireske: Si mange slobodo te phenav vareso? O fitsiri del palpale: Tu žianes grekitsko? Tu či san o Egiptano kai buntuisailo de nai dumult, ai kai ningerdias ande e pusta štar mii řobon? Me sim Židovo, mai lel o Paul, anda o Tarsus ande e Tsilisia, manuš anda jekh foro baro. Muk ma, mangav tutar, te dav duma le narodoske. O fitsiri muklias les, o Paul, opre pe le trapti, kerel semno le narodoske. Savoře ašile, ai o Paul, delas duma pe e šib aramaiko phenel: Manušale phralale ai dada, ašunena so si ma akana te phenav tumenge te čačiuvav! Kana von ašunde ke vo delas lenge duma pe e šib aramaiko von mai ašile. Ai o Paul phenel: Me sim Židovo, arakhadilem ande o Tarsus ande e Tsilisia; numa me barilem ande kado foro, ai vorta sikiardo ka le punře katar le Gamaliel ande o zakono amare dadengo. Keravas e butji le Devleski, sar tume adies. Me mudardem pala kadia Vurma, phanglem ai thodem lansonsa ande e temnitsa muršen ai žiuvlian. O baro rašai ai sa e kris katar le purane si muře martururi. Inke me lem lendar lila le phralenge anda o Damasko, kai me gelem eta t'anav phangle ande o Jerusalem kudalen kai sas kothe ai te dav len strafo. Sar me simas pe e vurma, ai ke simas paše o Damasko, strazo, jekh bari vedaria avili anda o čeri ai strefiaias krugom mandar. Me pelem tele, ai me ašundem jekh hango kai phendias mange: Saul, Saul, sostar kjinuis ma tu? Me dem palpale: Baria, kon san tu? Ai vo phendias mange: Me sim o Jesus anda o Nazaret, kai tu kjinuis. Kudala kai sas mansa dikhen mišto e vedaria, numa či ašunenas o hango kudalesko kai del duma. Atunči me phendem: So si te kerav me, Baria? Ai o Baro phendias mange: Ušti, žia ande o Damasko, ai kothe phenena tuke sa so si te keres. Sar me či dikhavas khanči, pala o strefiamos kudala vedariako, kudala kai sas mansa line ma vastestar, ai me areslem ande o Damasko. Eta, jekh manuš akharen les Ananias, manuš kai patial sar si o zakono, ai kai sa le Židovuri kai bešenas ande o Damasko phenenas jekh laši diela pa leste, avilo te sikadiol mande, ai phenel mange: Saul, muřo phral, puter tjire jekha. Strazo muře jakha puterdile ai dikhav les. Vo phenel: O Del amare dadengo šinadias tu te žianes so vo kamel, te dikhes kudales kai si vorta, ai t'ašunes e vorba anda lesko mui: ke tu avesa lesko marturo, paša sa le manuš, anda le dieli kai tu dikhlian ai ašundian. Ai akana, so ažiukeres tu? Ušti, av boldo, ai xalado anda tjire bezexa, kai akhares o anav le Baresko. Palpale ande o Jerusalem, sar me řudjivas ande o templo, dikhlem jekh dikhimos. Me dikhlem le Bares kai phenelas mange: Gribisavo, ai ankli sigo avri anda o Jerusalem, ke von či lena opre so si te phenes pa mande. Ai me phendem: Baria, von inke žianen ke me thavas ande temnitsa ai keravas te maren řaiasa ande le khangeria židovitsko kudalen kai patianas ande tute, ai ke, kana mudarde le Stefano, tjiro marturo, inke me simas kothe, vi me žiavas pala le kaver, ai arakhavas le tsalia kudalenge kai mudarde les. Atunči vo phenel mange: Me tradava tut dur karing le thema. Von ašunde leste ži ka kudia vorba. Numa atunči von vazdine o hango, phenenas: Len pa e phuv kasavo manuš! Vo nai harniko te trail. Ai von spiden tsipimata, šiuden penge tsalia, šiuden kišai pe balval. O fitsiri dias poronka te den andre le Paul ande o armia, ai te maren les le bičosa, eta te žianel pala soste tsipin kadia pe leste. Pala ke marde les le bičosa, o Paul phenel le ketaneske kai sas kothe: Si tuke slobodo te mares jekhe manušes kai si romano, kai inke nai dino strafo? Ka kudala vorbi, o ketano gelo te phenel le fitsireske, phenelas: So si te keres tu? Kado manuš si romano. Ai o fitsiri, avilo vo, phenel ka o Paul. Phenen mange, san tu romano. Ei, del vo palpale. O fitsiri mai phenel: Me pokindem but love te aresav romano. Ai me, phenel o Paul, sim romano dekin arakhadilem. Strazo kudala kai trubulas te maren les dine pe palpale, ai o fitsiri, dikhlias ke o Paul si romano, lias les e dar ke phanglias les. Teharin, sar kamelas te žianel vorta so le Židovuri thon beda pe leste, o fitsiri lias pa leste le phanglimata, ai dias ordina ka le bare raša ai ka sa e kris le židovongi te kjiden pe; porme, anenas tele le Paul, vo thodias les maškar pende. O Paul, le jakha thodine pe e kris židovitsko, phenel: Manušale phralale, si ande sa muři godji ke me gelem ži adies angla o Del. O baro rašai o Ananias del ordina ka kudala kai si paša leste te malaven les pe o mui. Atunči o Paul phenel: O Del malavela tut, zido parno! Tu bešes te des man kris sar si o zakono, ai tu šines e kris kai des ordina te malaven man! Kudala kai sas paša leste phenen: Tu mares mui katar o baro rašai le Devlesko! Ai o Paul phenel: Me či žianavas, phralale, ke vo si o baro rašai; ke si ramome: Tu či desa duma nasul pa o birevo tjire narodosko. O Paul, žianelas ke jekh partida kai kjidine pe si anda le Sadusenuri ai e kaver anda le Farizianuri tsipisardias ande e kris židovitsko: Manušale phralale, vi me sim Fariziano, šiav katar Fariziano; si pala ke ažiukerav ke si te živindin le mule ke me sim dino pe kris. Kana vo phendias kudia, vazdinisailias jekh čingar maškar le Farizianuri ai le Sadusenuri, ai o kjidinimos huladilo. Ke le Sadusenuri phenenas ke nai živindimos, ai ke nai či andželo či duxo, žikin le Farizianuri patian ande le tri dieli. Sas jekh baro buntuimos, ai uni zakonaria ande e partida katar le Farizianuri vazdinisaile, kerde baro divano, ai phenen: Ame či arakhas či jekh nasulimos ande kado manuš; amburim jekh duxo vai jekh andželo dias lesa duma? Sar e čingar žialas mai zurales, o fitsiri, daralas ke o Paul šinen les kotora kudala žene, kerdias te vulen le ketani te len les maškar lende ai te ningeren les ande o armia. E riat pala kudia, o Baro sikadilo ka o Paul, ai phenel: Le zor; ke, sar ke tu sanas muřo marturo ande o Jerusalem, kadia trubul t'aves muřo marturo ande e Roma. Kana o dies avilo, le Židovuri dine pe duma, ai solaxade ande pende, phenenas ke či mai xan ai či mai pen žikin či mudarena le Paul. Kudala kai thode pe kadia sas mai but de štar-var-deš, ai von gele t'arakhen le bare rašan ai le puranen ka save von phenen: Ame sa solaxadiam armaiansa pe amende, te na xas khanči žikin či mudarasa le Paul. Tume kadia, akana, žian le krisasa židovitsko ka o fitsiri, t'anel les angla tumende, sar tume te len sama mai mišto; ai ame, angla savořende te pašiol, ame sam gata te mudaras les. O šiav katar e phei le Pauloski, ašundias ke dine pe duma te mudaren les gelo ande o armia ai phendias le Pauloske. O Paul akhardias jekh anda kudala kai si bare pe jekh šel ketani, ai phenel: Ninger kadale terne muršes karing o fitsiri, ke si les vareso te phenel leske. O ketano lias le terne muršes pesa, ningerdias les karing o fitsiri, ai phenel: O phanglo o Paul akhardias ma, ai řudjisailo mande t'anav tuke kadale terne muršes, kai si les vareso te phenel tuke. O fitsiri lias le terne muršes vastesa, ai gelo lesa rigate, vo pušel les: So si tut te phenes mange? Vo del palpale: Le Židovuri thode pe ande jekh than te řudjin tu t'anes le Paul angla e kris židovitsko, sar tu te žianes mai mišto pa leste. Na ašun lende, ke mai but de štar-var-deš anda lende kamen te mudaren les, ai von solaxade armaiansa pe pende, te na xan ai te na pen žikin či mudarena les; akana von si gata, ai ažiukeren ferdi so si te keres tu. O fitsiri tradias le terne muršes, pala ke phendias leske te na del duma khanikasa anda so vo phendias leske. Atunči vo akhardias don kai si bare pe jekh šel ketani, ai phenel: Keren gata, ka o eniato časo le ratiako, dui šela ketanen, efta-var-deš grastaren, ai dui šela kai tsirden sulitsi, te žian ži ande o Tsesarea. Vi t'avel grast le Pauloske, eta te ningeren les sasto vesto ka o vladoro o Feliks. Vo ramosardias jekh lil ramome kadia: Katar o Klodo Lisias, ka o pria lašio vladoro Feliks, unpači! Kado manuš, kai le Židovuri line les, sas t'avel mudardo lendar. Kana me avilem ketanensa ai skipisardem les lendar, ašundem ke vo si romano. Kamavas te žianav so si beda pe leste, ai ningerdem les angla e kris židovitsko. Me arakhlem ke si beda pe leste pala e diela katar lengo zakono, numa vo či kerdias khanči t'avel mudardo vai t'avel ande e temnitsa. Ašundem ke le Židovuri kamen te peraven les, me strazo tradem les tute, kerdem te žianen kudalenge kai thode beda pe lende ke trubul te pušen tutar. Le ketani, sar sas e ordina kai dine le, line le Paul, ai ningerde les e riate ži ka o Antipatris. Teharin, le ketani mukle le grastaren te žian o drom lesa, von gele palpale ka o armia. Aresle ande o Tsesarea, le grastaria dine o lil ka o vladoro, ai sikade leske le Paul. O vladoro, pala ke gjindias o lil, pušelas anda če provinsia si o Paul, ašundias ke vo si anda e Tsilisia. Me ašunava tut, phenel vo, kana kudala kai thode beda pe tute avena. Ai vo dias ordina te ningeren les ži kai sas o Herodo. Panž diesa pala kudia, areslo o baro rašai o Ananias, le purensa ai jekh kai delas duma mišto akharen les Tertul. Von thode beda ka o vladoro pe o Paul. O Paul akharde les, ai o Tertul thodias pe te thol beda pe leste, kadia: O pria lašio Feliks, tu des ame jekh bari patia, ai kado them lias le mištimata tutar kai les sama mišto amendar. Kudia ame prinžiaras ande sa ai kai-godi jekh bare naisimasa. Numa, te na ninkerav tu mai but, mangav tut t'ašunes, ande tjiro lašimos, so si ame te phenas ande tsiřa vorbi. Ame arakhliam kadale manušes, kai si jekh manuš pria nasul, kai vazdel te hulaven pe maškar sa le Židovuri ande e lumia, kai si o birevo katar e sekta le Nazarenuri, ai inke kamlias te mahril o templo. Ai ame astardiam les. Ame kamliam te das les kris sar si amaro zakono; numa o fitsiri Lisias, pe kudia avilo, lias les anda amaro vast zuralimasa, dias ordina kudalen kai thon beda pe leste t'aven angla tute. Šai daštisa vi tu, kana pušesa les, t'ašunes lestar anda sa so ame thas beda pe leste. Le Židovuri thode pe lesa te došaren les, ninkerenas ke kadia si e diela. Pala ke o vladoro kerdias leske semno te del duma, o Paul dias palpale: Žianav ke, de uni berš, tu san krisinitori ande kado them, bi-darako me lav e vorba te čačiuvav pa so si pa mande. Si tsiřa mai but de deš-u-dui dies, tu šai pušes, ke me anklistem ande o Jerusalem te řudjiv. Či arakhle ma či ande o Templo či ande le khangeria židovitsko, či ande o foro te dav duma varekasa, vai te kjidav kai ašunen mande o narodo. Ai von naštin te sikavel pe so thon beda pe mande akana. Me prinžiarav ke me služiv le Devles amare dadengo sar si e nevi vurma kai von akharen falšo, patiav sa so si ramome ande o zakono ai ande le profeturi, ai si ma ande o Del kako ažiukerimos, sar ažiukeren vi von, ke avela jekh živindimos le vortonge ai kudalenge kai nai vorta. Sa anda kudia thav zor sakda t'avel ma jekh godji bi došako angla o Del ai angla le manuš. Si mai dur but berš, me avilem te dav love ka muřo narodo ai te dav sakrifisuri. Atunči si ke uni Židovuri anda e Azia arakhle ma vužiardo ande o Templo, bi te kjiden pe o narodo vai te buntuin pe. Von trubul te sikadion angla tumende ai te thon beda, te si len vareso pe mande. Vai mai mišto, ke kadala te phenen če doš arakhle pe mande, kana me nakhlem angla e kris židovitsko, te na niči si t'avel ferdi anda kudala tsipimata kai me kerdem t'ašunen maškar pende: Si pala ke živindin le mule ke me sim adies pe kris angla tumende. O Feliks, kai žianelas mišto so si kudia vurma, phendias: Kana o baro Lisias avela, me lava sama tumari butji. Ai vo dias ordina ka o fitsiri t'arakhel le Paul, ai te mukel sakones anda leske vortača t'ažutin les. Uni diesa pala kudia, o Feliks avilo la Drusilasa, leski řomni, kai sas židovaika, ai vo akhardias le Paul. Vo ašunel leste pa o patiamos ande o Kristo. Numa, sar o Paul delas duma pa e kris, pa so šai řibdis, ai pa e kris kai avela, o Feliks, darailo, phenel: Pe kadia žiatar, kana mai avela ma e vramia, me akharav tu. Vo mai ažiukerelas ke o Paul del les love; kadia vo tradelas t'anen les butivar, te del duma lesa. Dui berš nakhle kadia, ai o Feliks thode ande lesko than le Porsius Festus. Ke kamelas t'avel drago le Židovonge, o Feliks muklias le Paul ande e temnitsa. O Festus, areslo ande e provinsia, anklisto trin dies pala kudia anda o Tsesarea ande o Jerusalem. Le bare raša ai le mai bare anda le Židovuri ningerde leske doš pe o Paul. Ai gribisaile pe o Festus. Ai, mangle lestar sar mištimos t'anen le Paul ande o Jerusalem. Von lašiarenas te len les, te mudaren les pe e vurma. O Festus dias palpale ke o Paul si arakhado ande o Tsesarea, ai vo trubul te žialtar kothe pe tsiřa. Ke le bare anda tumende vulen mansa, phenel vo, ai, te si vareso doš ande kudo manuš, te sikaven. O Festus nakhlias ferdi oxto vai deš diesa maškar lende, porme vo vulisto ande o Tsesarea, Teharin, bešlo ande peski kris, vo dias ordina t'anen leske le Paul. Kana vo areslo, le Židovuri kai avile anda o Jerusalem line les krugom, ai thode pe leste but ai bare doša, kai von naštinas te sikaven. O Paul lias pe te čačiol, phenelas: Me či kerdem či jekh doš, či pe le Židovuri, či pe o templo, či pe o Amperato. O Festus, kamelas te kerel veseli le Židovon, del palpale ka o Paul: Kames tu t'ankles ande o Jerusalem, ai te den tut kris pe kadala dieli angla mande? O Paul phenel: Si angla e kris katar o Tsesar ke me si te nakhav, kothe trubuv t'avav dino pe kris. Me či kerdem či jekh beda le Židovonge, sar tu mišto žianes. Te me kerdem vareso kai nai mišto, vai varesavi beda kai trubul te merav, me či dav ma palpale te na merav; numa, t'avena le dieli kai von thon beda pe mande ke si xoxamne, khonik nai leske slobodo te del ma lende. Me mangav katar o Tsesar. Atunči o Festus, pala ke dias pe duma le krisasa, del palpale: Tu manglian katar o Tsesar; tu žiasa angla o Tsesar. Uni diesa pala kudia, o amperato Agripa ai e Berenise aresle ande o Tsesarea, te den pozdraimos le Festus. Sar von nakhenas kothe but diesa, o Festus sikavelas ka o amperato e diela le Pauloski, ai phenel: O Feliks muklias phandado jekhe manušes pe savo, kana me simas ande o Jerusalem, le bare raša ai le purane anda le Židovuri thode beda, ai mangle te dav les strafo. Me dem len palpale ke nai o zakono ka le Romanuri te den ande o vast jekhe došales angla savořende te sikaven les angla kudala kai thon beda pe leste, ai te avel les e vriama te čačiol ande le dieli kai von mothon. Von kadia avile kathe, ai, bi te mai ažiukerav, me bešlem teharin pe muři kris, ai me dem ordina t'anen mange kudale manušes. Kudala kai thon beda, sikadile, či phende khanči pe leste so me ažiukeravas. Len sas len lesa čingara pa lengo patiamos, ai pa varekon Jesus kai mulo, ai kai o Paul phenel ke si živindo. Me či žianavas pe savi rig me te žiav ande kudia kris, me pušlem les te kamel te žial ande o Jerusalem, ai te den les kris pe kudala dieli. Numa kana o Paul akhardias ke leski butji te žianel la o Amperato, me dem ordina te garaven les žikin si te tradav les ka o Amperato. O Agripa phenel ka o Festus: Vi me kamav t'ašunav kudale manušes. Tehara, del palpale o Festus, tu ašunesa les. Teharin kadia, o Agripa ai e Berenise avile penge slugensa, ai dine ande o than ka e kris le bare fitsirensa ai le raiensa bare anda o foro. Pe e ordina katar o Festus, o Paul andine les. Atunči o Festus phenel: Amperato Agripa, ai tume sa kai san amensa, tume dikhen kadale manušes kai sa le Židovuri phende mande, vi ande o Jerusalem, vi kathe, tsipinas ke vo či trubul te trail. Me arakhlem ke nai khanči pe leste te trubul te mudaren les, ai inke vo akhardias ka o Amperato, me dem ma duma te mukav les te žialtar. Numa nai ma khanči so šai ramov ka o Tsesar pe leste; sa anda kudia me andem les angla tumende, ai mai but angla tute, amperato Agripa, eta te žianav so te ramov, pala ke te dikhas so si pe leste. Ke mange miazol dilimata te tradav jekhe řobos bi te sikavav anda soste vo si došalo. O Agripa phenel ka o Paul: Slobodo tuke te des duma te čačios. Ai o Paul, vazdias o vast, čačiol kadia: Me gindiv ma ke sim veselo, amperato Agripa, ke si ma adies te čačiuvav angla tute anda sa kudala dieli kai si pe mande thodine doš katar le Židovuri, ke tu žianes pria mišto lenge zakonuri ai lenge čingara. Me mangav tu t'ašunes mande vramiasa. Muřo traio, de katar le mai angluni vrami muře ternimaske, žianen les sa le Židovuri, ke vo nakhlias ande o Jerusalem, maškar muřo narodo. Von žianen de dumult, te kamen von te phenen, ke me traisardem Fariziano, sar si e partida e mai zurali katar amaro patiamos. Ai akana, me sim dino pe e kris ke me ažiukerav ke si t'avel so o Del phendias ka amare dada, ai so ažiukeren amare deš-u-dui kumpani, kai služin le Devles sakda riate ai diese. Si anda kudia kai ažiukerav, o amperato, kai thon beda pe mande le Židovuri! So! miazol tumenge ke nai čačes ke o Del živindil le mulen? Me gindisailem ke trubuv te žiav zorasa pe o anav o Jesus anda o Nazaret. Sa me kerdem ande o Jerusalem, me šiudem ande e temnitsa but anda le svintsi, lem kudia putiaria katar le bare raša, ai, kana mudarenas len, vi me simas le kavrensa. Me butivar mardem le ande le khangeria židovitsko, ai keravas te či mai patian. Ande muře xolia pe lende, me mardem le inke ande le foruri streia. Ande kudia sas ke me gelem ande o Damasko, dine ma ordina ai mukle ma le bare raša. Karing o maškar le diesesko, o amperato, me dikhlem pe e vurma ke strefial krugom mandar ai muře vortakondar jekh vedaria avel anda o čeri, ai o strefiamos sas mai baro sar o kham. Ame peliam sa pe e phuv, ai me ašundem jekh hango kai phenelas mange židovitsko: Saul, Saul, sostar kjinuis ma tu? Trudno avela tuke te des palpale le pusaimata. Me dem palpale: Kon san tu, Baria? Ai o Baro phenel: Me sim o Jesus kai tu kjinuis. Numa, ušti, ai beš pe tjire punře; ke me sikavav ma tuke te thav tu ministero ai marturo pe le dieli kai tu dikhlian ai pe kudala kai me sikavava ma tuke, Me skipisarava tu katar kado narodo ai katar kadala kai či patian, kai me tradav tu karing lende, eta tu te putres lenge jakha, te šai nakhen anda o tuniariko ka e vedaria ai katar e zor le Satanoski ka o Del, ke von te len, ke patian pe ande mande, o jertimos katar le bezexa ai t'avel lenge o svintsimos. Anda kudia, amperato Agripa, me naštisardem te na ninkerav ma ka kudo dikhimos le čeresko. Ka kudala anda o Damasko angla savořende, porme ande o Jerusalem, ande sa e Judea, ka kudala kai či patian, me dem duma pa o keimos ai te pařuven pe ka o Del, te sikion le dieli kai keren te kein pe. Eta anda soste le Židovuri line ma ande o templo, ai zumade te xasaren ma. Numa, sar ažutisardias ma o Del, me ninkerdem ži adies, dav duma angla le bare ai le tsikne, bi te dav khanči rigate anda so le profeturi ai o Moše phende ke si t'aresel. Ke o Kristo kjinuila, ai ke, živindila o mai angluno anda le mule, vo anela e vedaria ka le Židovuri ai ka le nai-židovuri. Sar vo delas duma kadia te čačiol, o Festus phenel oprune hangosa: Tu san dilo, Paul! Tjiro sikiarimos diliarel tu. Me či sim dilo, pria lašio Festus, mai del palpale o Paul; si, aver fialo, vorbi čačimaske ai laše godiake ke me phenav. O amperato, phendem tuke kadala dieli, ai me dem tusa duma sar kamav, ke me sim siguro ke tu žianes sa, ke nai garades ke nakhle. Patias-tu tu ka le profeturi, amperato Agripa? Ai o Agripa phenel ka o Paul: Tu sigo si te manges ma t'avav kristiano! O Paul del palpale: Ke t'avel akana vai t'avel mai palal, drago t'avel le Devleske ke na ferdi tu, numa mai sa kadala kai si krugom mandar adies, t'aresen sar me sim, bi kakale lansonsa! O amperato, o vladoro, Berenise, ai sa kudala kai bešenas lensa, uštile, ai, sar žiantar, phenenas jekh avreske: Kado manuš či kerdias khanči te mudaren les vai t'avel phandado. Ai o Agripa phenel ka o Festus: Kado manuš šai daštilas te mukas les, te na manglias pe ka o Tsesar. Kana thode pe te žias ame ande e Italia pe o čuno, dine le Paul ai uni kaver řobon ka jekh ofitsiri akharen les Julius katar e kumpania Agusto. Ame anklistiam pe jekh čuno anda o Adramit, kai trubulas te nakhel paša e Azia, ai ame geliamtar, sas amensa o Aristark, Makedono anda e Tesaloniki. O dies pala kudo, ame vulistiam tele ande o Sidon, ai o Julius, kai lelas sama mišto katar o Paul, muklias les te žial ka peske vortača ai te sastiaren les. Geliamtar kothar, ame žias pe e rig katar e inzula o Kipro, ke e balval phurdelas pe e kaver rig. Pala ke nakhliam e maria pe e Tsilisia ai e Pamfilia, ame aresliam ande e Mira ande e Lisia. Ai kothe, o fitsiri arakhlias jekh čuno anda e Aleksandria kai žialas ande e Italia, kerdias t'anklias opre. Pašte but diesa ame žias lokořes, ai trudno sas amenge te aresas paša o Knido, kai e balval či muklias ame te vulias tele. Ame nakhliam pe e kaver rig katar e Kreta, karing o Salmon. Geliam paš e rig e mariaki. Ame trudno nakhas paše le Laše Foruri nai dur katar o foro Lasea. But vramia nakhlias, dar sas te žias pe o čuno, ke inke sas o ivend. Sa anda kudia o Paul phendias le kavrenge, phenenas: O manuš, me dikhav ke te žias pe o čuno či avela bi-darako ai avela but phagimos, na ferdi anda so si ande o čuno ai le čunoske, numa vi amenge le ženenge. O fitsiri ašundias ka kudo kai tradel o čuno ai ka o birevo ai na ka le vorbi katar o Paul. Ai sar o porto nas lašio te bešen kothe ivende, mai but anda lende kamle te muken les te zumaven te žian ži ande o Feniks, porto anda e Kreta kai si angla e rig tele-pe-stingo ai e rig opre-pe-stingo, eta te nakhen o ivend. Jekh vušořo balval katar telal avel te phurdel ai, gindinas le matrosuri pe so von kamen, von vazdine o maiako ai nakhen paša e inzula e Kreta. Numa sigo jekh balval bari, kai akharen la Eurakilon, vazdinisaili. Marel o čuno bi te šai ame te ninkeras le ai ame mukliam ame te žias sar kamel e balval. Ame nakhliam opral pa jekh tsinoři inzula akharen la Koda, ai amenge sas trudno numa aviliam birevia pe o čunořo; thode les pe o čuno porme phangle šelensa o čuno. Daratar ke šai peras pe o berego, vuliardiam e kleonka. Kadia mukliam ame te ningerel ame e balval. Sar marel ame zurales o tumano, teharin šiudiam so si ande o čuno ande e maria; ai o trito dies šiudiam anda amare vast so mai ašilias anda o čuno. O kham ai le čeřaia či sikadile but diesa, ai o tumano sas kadia zuralo ke ame xasardiam sa ažiukerimos te skipisavas. Či xaliam de dumult. Atunči o Paul, bešelas maškar lende, phenel lenge: Manušale, trubulas t'ašunen mande ai te na žiantar anda e Kreta, eta te na avel tumenge kado xasarimos ai kado but phagimos. Akana me mangav tumende: Len zor; ke či jekh anda tumenge či xasavola, ai ferdi avela te xasavol o čuno. Jekh andželo le Devleske kasko me sim ai kai me služiv sikadilo mange kadia riat, ai vo phendias mange: Paul, ma dara; trubul tu te nakhes angla o Tsesar, ai eta, o Del dias tut sa kudalen kai si tusa ande o čuno. Sa anda kudia, manušale, len tume sama, ke man si ma patiamos ande o Del ke avela sar vo phendias. Numa ame trubusaras te peras pe jekh inzula. E deš-u-štarto riat, žikin ame sam miškime pe e maria e Adriatiko, le matrosuri, karing o maškar le ratiako, gindin pe ke pašiovas paša e phuv. Šiude e sonda te dikhen sode si o pai, von arakhle štar-var-deš metri; jekh tsiřa mai dur, von mai šiude mai ai arakhle trin-var-deš metri. Daratar te malavel le bař, von šiude štar maiake palal, ai ažiukeren o dies. Numa, sar le matrosuri rodenas te našen katar o čuno, thode o čunořo pe e maria. Phenenas ke phanden le maiake angle, numa o Paul phenel ka o fitsiri ai ka le ketani: Te na bešena kadala manuš ande o čuno, tume naština t'aven skipime. Atunči le ketani šinde o šelo le čunořesko, ai mukle les te perel. Angla savořende t'avel o dies, o Paul manglias savořen te len vareso te xan, phenelas: Adies si o deš-u-štarto dies ke tume ažiukeren ai ke tume či kamen khanči te xan. Me mangav tumen te len vareso te xan, ke kudia trubul te skipin tume, ai či xasavola jekh bal anda o šero či jekhesko. Dias duma kadia, vo lias manřo, ai, pala ke řudjisardias le Devles angla sa, vo phaglias les, ai thodias pe te xal. Ai sa line zor, vi von xale. Ame samas, ande o čuno, dui šela efta-var-deš ai šov žene ande sa. Kana von xale dosta, von šiudine o gjiv ande e maria te vušiaren o čuno. Kana o dies areslo, von či prinžiarde e phuv; numa von dikhle jekh golfo jekha phuviasa, von dine pe duma te spiden o čuno, te šai daština. Von mukle le maiake te žian pe e maria, ai von mukle le šele kai phangle le visili pale; porme thodine pe e balval e angluni tseřa, ai žian karing e phuv. Numa von arakhle jekh kotor kisaiko, ai naštilas te miškil pe o čuno anglal, žikin palal phagilo katar e zor le talazongi. Le ketani sas ande jekh than te mudaren le phanglen daratar ke uni anda lende skipin pe naimasa. Numa o fitsiri, kai kamelas te skipil le Paul či muklias len te keren kudia. Vo dias ordina ke kudala kai žianen te notin te xuten le mai angluni ande o pai te nirin e phuv, ai le kavrenge te thon-pe pe le phalia ai pe le kotora anda o čuno. Ai kadia sa aresle pe e phuv saste veste. Pala ke sa skipisailiam, ame prinžiardiam ke e inzula bušol Malta. Le sirbati kerde karing amende mištimasa; von line ame paša jekh bari jag, kai von dine jag ke o brišin del ai ke si pria šil. O Paul kjidias but čar šuki ai thodias la pe e jag. Jekh sap anklisto avri katar o tatimos ai astardilo pe lesko vast. Kana le sirbati dikhle e žigenia astardi pe lesko vast, von phenen jekh avreske: Čačes kado manuš si jekh kai mudarel, ke e kris či kamlias te mukel les te trail, pala ke vo sas skipime katar e maria. O Paul šiudias la žigenia ande e jag, ai nas les či jekh dukh. Kudala žene ažiukerenas te dikhen les ke phukiol vai te perel tele mulo; numa, pala ke but ažiukerde, dikhle ke nai leske khanči dukh, von pařude pengo gindo ai phenen ke vo si jekh del. Sas, nai dur kothar, phuvia si le mai bare manušeske anda e inzula, bušol Publius, kai lias ame peste ai garadias ame trin dies sar mai mišto. O dad le Publiusosko sas atunči ande o than nasvalo, sas les tatimos ai nasvalimos ande o dji; gelo o Paul karing leste, řudjisardias, thodia pe leste le vast, ai sastiardias les. Pe kudia, avile le kaver nasvale anda e inzula, ai von sastile. Dine ame bare podarki ai, kana žiastar, dine ame le dieli kai trubulas amen. Pala trin šion, ame anklistiam pe jekh čuno akharel les «le Dela Žiameia» anda e Alexandria, vo nakhlias o ivend ande e inzula. Aresliam ande o Sirakus, ame bešliam kothe trin dies. Kothar, žias paša e rig, ame aresliam ande o Regio; ai e balval katar e rig tele uštilo teharin, ame kerdiam ande dui dies e vurma ži ande o Puteoli, kai ame arakhliam phralen kai řudjisaile amende te nakhas efta dies lensa. Ai kadia ame geliam ande e Roma. Anda e Roma avile angla amende, ži ka o Bazar katar o Apius ai ka le Trin-Birturi, le phral kai ašunde ke dine duma pa amende. O Paul, kai dikhlias len, naisardias le Devles, ai lias zor. Kana ame aresliam ande e Roma, mukle le Paul te bešel korkořo, jekha ketanasa kai arakhel les. Trin dies pala kudia, o Paul akhardias le mai bare Židovon; ai, kana von kjidinisaile, vo mothol lenge kakala vorbi: Manušale phralale. Kerdem khanči či pe o narodo či pe o zakono amare dadenge, thode man ande e temnitsa ande o Jerusalem ai dine ma ande le vast ka le Romanuri. Pala ke von pušle man, von kamenas te muken man, ke nas ande mande khanči kudalestar trubul te mudaren man. Numa le Židovuri či kamle, ai musai sas mange te akharav ka o Tsesar, nai ma či jekh gindo te thav doš pe muřo them. Eta anda soste me manglem te dikhav tumen ai te dav tumensa duma; ke si pala ke ažiukerav ande o Israel ke si pe mande kado lanso. Von den les palpale: Ame či liam či jekh lil anda Judea pa tute, ai či avilo či jekh phral te anel vai te phenel nasul pa tute. Numa ame kamas te ašunas tutar so si tut gindo, ke ame žianas ke o narodo kai-godi si pe kudia partida ande savi tu san. Von thodine leske jekh dies, ai but avile t'arakhen les kai bešel. O Paul phenel lenge pa e amperetsia le Devleski, sas marturo, ai rodelas, katar o zakono katar o Moše ai katar le profeturi, te sikavel lenge so si o Jesus. O divano gelo de diminiats ži riate. Uni patian so vo phendias, ai le kaver či patian. Sar von žianastar čingarasa, o Paul mai mothol kakala vorbi: Si čačimasa ke o Svinto Duxo, kana dias duma tumare dadenge katar o profeto Esai, phendias: Žia karing kudo narodo, ai phen: Tume ašunen tumare kanensa ai tume či hatiaren. Tume dikhen tumare jakhensa, ai tume či dikhen. Ke o ilo kadale narodosko areslo zuralo. Von zuriarde penge kana, ai von phandade penge jakha, ke te na dikhen penge jakhensa, ke te na ašunen penge kanensa, ke te na hatiaren ande pengo ilo, ke te na pařuven pe, ai ke me te na sastiarav le. Žianen kadia ke kado skipimos katar o Del si tradino ka kudala kai nai-Židovuri, ai ke von ašunen. [ Kana vo phendias kudo, le Židovuri geletar, denas duma but maškar pende.] O Paul bešlo dui berša antregi ande jekh kher kai vo pokjinelas. Vo lelas sa kudalen kai avenas te dikhen les, phenelas pa e amperetsia le Devleski ai sikiarelas so si o Rai o Jesus Kristo. Mukle les te phenel bi-darako. Lil katar O Paul, sluga katar o Jesus Kristo, akhardo te avel apostolo, ai alome te phenel e Laši Viasta katar o Del, e Laši Viasta kai sas šinadi angla savořende katar o Del katar leske profeturi ande le Svintsi Ramomata. Si pala lesko Šiav (arakhadilo katar e vitsa le Davidoski ande o mas, ai phende leske «Šiav le Devlesko» zuralimasa, pala o Duxo Svintsimasko, katar lesko živindimos maškar le mule), o Jesus Kristo amaro Baro. Lestar ame liam e dragostia ai te sikiaras, t'anas ande lesko anav te patian o patiamos sa kudalen kai či patian, maškar save vi tume san, tume kai san akharde katar o Jesus Kristo. Ramosarav ka sa kudala kai, ande e Roma, kamel len o Del, akharde t'aven Svintsi; ke e dragostia ai e patia t'avel tumenge dine katar o Del amaro Dad ai katar o Rai o Jesus Kristo! Me angla savořende naisiv muře Devles katar o Jesus Kristo, pala sa tumende, sar ke tumaro patiamos si vestime ande sa e lumia. O Del, kai me služiv ande muři godji ande e Laši Viasta katar lesko Šiav, si muřo marturo ke me sakda dav duma pa tumende, mangav sakda ande muře řudjimata eta t'avel ma, sar vo kamel, e veselia te žiav karing tumende. Ke me kamav te dikhav tumen, te dav tumen uni dinimata anda o duxo, eta te tume t'aven zurale, vai mai mišto, eta t'avas zurale ande jekh than maškar tumende katar o patiamos kai si ame ande jekh than, tumenge ai mange. Me kamav te mukav tume te žianen, phralale, ke butivar sas ma gindo te žiav te dikhav tumen, eta te lav varesave fruti tumendar, sar anda le kaver thema; numa naštisardem ži akana. Me trubuv te žiav ka le Grekuri ai ka le sirbati, ka le godiaver ai ka kudala kai či žianen. Kadia me gribiv ma te phenav vi tumenge e Laši Viasta, tumenge kai san ande e Roma. Ke mange nai lažiav katar e Laši Viasta: si jekh zor katar o Del te skipil kongodi patial, le Židovos angla savořende, porme le Grekos. Ke ande e Laši Viasta si sikado sar o Del kerel le manušen čačes vorta angla peste katar o patiamos, sar si ramome: O vorta katar o patiamos traila. O Del tradela peski xoli anda o čeri pe sa kudala kai či patian ai pe kudala kai či keren mišto ai pe le manuš kai či muken e kris te žial angle, ke sa so kamen te žianen anda o Del si sikado lenge, o Del sikadias les lenge. Čačes, le lašimata kai či dikhion katar o Del, leski zor pe sa e vramia ai lesko stato devlikano, dikhel-pe pe e jakh, dekin si e lumia, šai dikhes les ande leske butia. Kadia nai lenge jertimos. Sar, prinžiarde le Devles, von či luvudisarde les sar Del, ai von či naisarde les; numa von dine rigate ande penge ginduri, ai lengo ilo bi-godiako areslo pherdo anda o tuniariko. Luvudin pe ke si godiaver, von aresle dile; ai von pařude o luvudimos le Devlesko kai či rimol-pe pe le vobrazuri kai sikaven le manušes kai rimol pe, le čiriklia, le žigenien, ai le sapa. Sa anda kudia o Del dias le te na aven vuže, sar ke mangen lenge ile; kadia ke von den pe o lažiav penge staturi; von kai pařude o čačimos le Devlesko t'avel xoxamno, ai kai kamen ai služisaren le manušes ande o than kudalesko kai kerdias le manušes, o Del kai svintsil pes sakda. Amen! Sa anda kudia o Del muklias len te keren o žiungalimos: Ke lenge řomnia pařude so si vorta la žiuvliake pe kudia kai či trubul; ai sa kadia le murš, mukle sar sas sikiarde ka le žiuvlia, lias len e pařa jekh pe le kaver, keren manuš manušesa dieli žiungale, ai von len ande pende o pokjinimos kai trubul len ke dine rigate. Sar von či kamle te žianen le Devles, o Del muklias le t'aven šiudine sar von kamen, te keren dieli kai nai mišto. Pherde sako diela bi-krisako, nasulimos, xanžalimos, kurvetsia pherde žaluzia, mudarimata, čingarimata, xitria, xoxaimos, maren mui, phenen nasul jekh pa jekh avreske; si dušmaia le Devleske, ai barimatange; prasan, luvudin pe. Zumaven te keren sa mai nasul, buntuin-pe pe penge niamuri. Nai len godji, nai len čačimos, nai len ilo, nai len mila. Ai, makar ke žianen ke e kris le Devleski phenel ke trubul te aven mudarde kudala kai keren kasave dieli, na ke ferdi von keren kadia, numa ažutin kudalen kai keren kudala dieli. O manuš, tu kai des duma pa le kaver, kon san tu, tuke naštin te jertin; ke, kai des e kris le kavren, tu des tu strafo korkořo, sar tu des kris, tu keres sa jekh fialo. Ame žianas, čačes, ke e kris le Devleski pe kudala kai keren kasave dieli si sar si o čačimos. Ai gindis tu tu, kai des kris kudalen kai keren kasave dieli, ai kai keres le, ke tu skipisa tu katar e kris le Devleski? Vai vuřitsis tu le barvalimata katar leski dragostia, lesko ninkerimos ai lesko lašimos, či hatiares tu ke o mištimos le Devlesko spidel tut te keis tu? Numa, pala tjiro zuralimos ai pala tjiro ilo kai či keil pe, tu kjides tuke jekh mandjin xoliako pe o Dies kana o Del sikavela peski xoli ai peski vorta kris, kai dela sakones sar sas lenge butia: Garavel o traio sakda kudalenge kai, pala ke ninkerde te keren mišto, roden e pativ, o vestimos ai te na meren; numa o mesaimos ai e xoli kudalenge kai rodel e čingar, buntuin-pe pe o čačimos ai patian pe so nai kris. Nasul ai nekazo pe sako duxo le manušesko kai kerel nasul, pe o Židovo mai angluno, porme pe o Greko! Pe varesavo kai kerel o mištimos, dela vestimos, pativ ai patia, pe o Židovo mai angluno, porme pe o Greko! Ke angla o Del nai jekh mai baro avrestar. Sa kudala kai kerde bezex bi te žianen o Zakono katar o Moše xasavona bi le Zakonesko, ai sa kudala kai kerde bezex le zakonesa avena dine kris katar o zakono. Nai kudala kai ašunen o Zakono si vorta angla o Del, numa kudala kai len les opre. Kana kudala kai či patian, kai nai len Zakono, keren sar si phendo o Zakono, von si, von kai nai len o Zakono, jekh zakono penge; von sikaven ke e butji le Zakonoski si ramome ande lenge ile, ninkeren ande pengi godji, ai lenge ginduri thon beda pe lende te len sama jekh avrestar. Si so sikadiola o dies kai, sar si muři Nevi Viasta, o Del dela pe e kris katar o Jesus Kristo le dieli garade le manušake. Tu kai des tu o anav Židovo, kai hodinis pe o Zakono, kai luvudis tu ande o Del, žianes so vo kamel, žianes t'alos so si le dieli, ke san sikado ande o Zakono; tu kai patias ke san kai ningeres le kořen, e vedaria kudalengi kai si ande o tuniariko, jekh birevo le dilenge, kai sikaves le glaten, tu žianes ke ande o zakono si o žianglimos ai o čačimos; tu kadia, kai sikiares le kavren, tu či sikiares tu korkořo! Tu kai des duma te na čoren, tu čores! Tu kai phenes te na keren kurvetsia, tu keres kurvetsia! Tu kai si tuke vuřito le staturi, tu čores ande lenge templuri! Tu kai keres tuke jekh vestimos anda o Zakono, tu rimos le Devles pala ke tu des rigate o Zakono! Ke o anav le Devlesko si pala tumende rimome maškar kudala kai či patian, sar si ramome. O šinimos si lašio, te trais pala o Zakono; numa te na trais pala o Zakono, tjiro šinimos manai šinimos. T'avela ke le nai-šinde len sama katar o Zakono, vo kai nai šindo či avela sar t'avel šindo? Vo kai nai šindo dekin arakhadilo numa kai kerel o Zakono, vo dela strafo tut, tut kai či keres sar trubul, sa makar ke si tu o lil le Zakonosko ai o šinimos. O Židovo, nai kudo kai sikadiol avrial; ai o šinimos, nai kudo kai dikhiol ande o mas. Numa o Židovo, si kudo kai si andral; ai o šinimos, si le ilesko, sar si o duxo ai na sar si o zakono. O luvudimos kudale Židovosko či avel katar le manuš, numa katar o Del. So si mai but le Židovos, vai pe so si lašio o šinimos? Vo si baro sar-godi, ai angla savořende ke sas phendo lenge katar o Del. Ei so! te si varekon ke či patian, lengo dilimos phařavela vo o čačimos katar o Del? Dur kothar! Ke o Del, aver fialo, t'avel prinžiardo čačo, ai sako manuš xoxamno, sar si ramome: Eta t'aves arakhado vorta ande sa tjire vorbi, Ai ke tu te niris kana dena tut pe e kris. Numa t'avela amaro nasulimos te del opral pe e kris le Devleski, so phenasa ame? O Del nai vo vorta kana lel les e xoli? (Me dav duma sar le manuš). Dur kothar, aver fialo, sar o Del dela vo kris la lumia? Ai te, katar muřo xoxaimos, o čačimos le Devlesko sikadiol mai but te vestil les, sostar mai sim me dino pe e kris sar bezexalo? Ai sostar či kerasa ame o nasulimos eta t'aresel o mištimos, sar uni, kai xoxaven pe amende, phenen ke ame phenas? O strafo kudale ženenge si vorta. So si! sam ame mai laše? Niči. Ke ame inke sikadiam ke sa, Židovuri vai Grekuri, si tela e amperetsia la bezexaki, sar si ramome: Nai khonik vorta, Inke či jekh; khonik nai godiaver, Khonik či rodel le Devles, sa dine rigate, sa kurvisaile. Nai či jekh te kerel mištimos, Inke či jekh. Lengo girtiano si jekh groapoševo puterdo; si len lengi šib t'athaven; si len tela lenge vuš jekh venino sapengo. Lengo mui si pherdo armaia ai žiungalimata; lenge punře si vušoře te maren ai mudaren; o phařaimos ai o nasulimos si pe lengo drom; von či žianen e vurma la patiaki. E dar le Devleski nai angla lenge jakha. Eta, ame žianas ke sa so phenel o Zakono, vo phenel les ka kudala kai si tela o Zakono, eta ke sako mui t'avel phandado, ai ke sa e lumia te prinžiarel ke si došalo angle o Del. Ke či kerel khanikas vorta angla peste katar e butji le Zakonoski, ke si katar o Zakono ke avel te žianen so si e bezex. Numa akana, bi le Zakonosko sikadiol sar o Del kerel le manušes vorta angle peste. Eta si martururi vi o Zakono ai vi le profeturi. O Del kerel vorta angla peste katar o patiamos ande o Jesus Kristo sa kudalen kai patian. Ke angla o Del sa jekh fialo sam. Ke sa kerde bezexa ai nas len o vestimos le Devlesko; ai vo kerel len vorta ivia katar pesko mištimos, katar o pokjinimos kai si ande o Jesus Kristo. O Del dias les sar sakrifiso eta ke katar lesko merimos, o Kristo skipil katar le bezexa le manušen kai patian ande leste. O Del kamlias te sikavel kadia sar vo si vorta: Angla savořende ažiukerdias ai muklias bi te pokinen le bezexa. Numa, ande kadia vramia, vo sikavel peski kris te kerel le vorta ka leske jakha. Ke vo kamel t'aven vorta sa kudala kai patian ande o Jesus. *** Kai si e diela te luvudis tu? Naštil t'avel. Katar savo zakono? Katar o zakono le butiango? Niči, numa katar o zakono le patiamasko. Ke ame gindisaras ke o manuš avel vorta katar o patiamos, bi le butia le zakonoske. Vai o Del si vo ferdi o Del le Židovongo? Vo si vi le nai-Židovongo? Ei, vo si vi le nai-Židovongo, sar si ferdi jekh Del, kai kerel vorta katar o patiamos kas si šinde, ai katar o patiamos le bi-šinden. Rimosarasa ame o zakono katar o patiamos? Dur kothar! Aver fialo, ame das ka o zakono lesko barvalimos. So phenasa ame ke o Abraham, amaro dad, lias sar manuš? T'avel ke o Abraham sas vorta katar le butia, šai te luvudil pe, numa či angla o Del. Ke so phenel o Ramomos? O Abraham patialas ande o Del, ai pe kudia sas les laši kris. Eta, kudo kai kerel jekh butji, o pokjinimos si les dino, nai sar te naisin leske, numa sar jekh diela kai trubul: Ai ka kudo kai či kerel butji, numa kai patial ande o Del kai kerel vorta angla leste le bezexales, lesko patiamos si gjindo leske pe e kris. Sa kadia o David sikavel e veselia le manušeski kaske o Del del les laši kris bi la butiake: Veseli kudala kaske le bezexa si jertime, ai kai leske bezexa si garade! Veselo o manuš kaske o Baro jertil e bezex! Kudo veselimos si ferdi kudalenge kai si šinde, vai si vo vi kudalenge nai šinde? Ke ame phenas ke o patiamos sas gjindo le Abrahamoske pe e kris. Sar sas leske gjindo? Sas mai palal, vai angla savořende lesko šinimos? Vo inke nas šindo, sas vo bi-šindo. Vo lias o semno le šinimasko, sar jekh pečata ke o Del lias les katar o patiamos kana nas vo šindo, eta t'aresel o dad savorenge kai nai šinde kai patian, ke e laši kris t'avel vi lenge, ai o dad le šindengo, kai nai ferdi si šinde, numa kai mai phiren pe le vurmi le patiamaske katar amaro dad o Abraham kana nas vo inke šindo. Čačimasa, nai katar o zakono ke e lumia sas šinadi le Abrahamoske vai leska vitsake, numa katar e kris le patiamaski. Ke, te avel le šiavenge katar o zakono, o patiamos si intaino, ai so si t'avel si rimome, ke o zakono kerel e xoli, ai kothe kai nai zakono, nai te den rigate. Sa anda kudia si katar o patiamos, ke avel e patia, ke t'avel sar dinimos ivia Devlesko, eta ke so sas phendo t'avel ka sa le šiave le Abrahamoske, avela na ferdi kudalenge kai si tela o zakono, numa vi kudalenge kai si les o patiamos katar o Abraham, amaro dad savořengo, sar si ramome: Me thodem tu dad pe but thema. Vo si amaro dad angla kudo ande kaste vo patial, o Del kai del o traio le mulen, ai kai akharel le dieli kai nai ande e lumia. Ažiukerel so či ažiukerelas, vo patial, kadia ke vo areslo dad but themengo, sar ke sas leske phendo: Kadia avela tjiri vitsa. Ai, bi te kovliol ande o patiamos, vo či lias sama ke lesko stato si vuže rimome, ke sas pašte jekh šel beršengo, ai ke e Sara naštilas te mai avel la glati. Vo patialas, so phendiasas leske o Del či delas palpale; numa vo zurailo ande o patiamos, luvudisardias le Devles, ai vo sas siguro ke so o Del phendias vo šai kerel les. Sa anda kudia kudo sas dino sar vorta katar o Del. Numa kudala vorbi sas dino sar vorta nas ramome ferdi leske; le vorbi si vi amenge, kai sam vorta, amenge kai patias ande kudo kai živindisardias le Jesus amare Bares, savo sas dino ande o vast pala amare bezexa, ai živindisailo t'avas vorta. Ke sam vorta katar o patiamos, amen si ame e patia le Devlesa katar amaro Rai o Jesus Kristo, kon dias ame o patiamos t'aresas ka kudo šukarimos, ande savo ame bešas zurales, ai ame luvudisaras ame kai ažiukeras e vestia le Devleski. Mai but, ame luvudisaras inke ande o nekazo, žianas ke o nekazo anel t'ažiukeras. E řabda kerel te nirisaras kana zumaven ame, ai kudo nirimos del o ažiukerimos. Eta, kudo ažiukerimos či xoxavel, ke o kamimos le Devlesko si thodino ande amare ile katar o Svinto Duxo kai sas amenge dino. Ke, kana ame samas inke bi zorako, o Kristo, ande e vramia ramome, mulo pala le žiungale. Tsiřa šai merenas pala jekh manuš vorta; uni amburim merenas pala jekh manuš lašio. Numa o Del sikadias pesko kamimos karing amende, ande so si, kana ame inke samas bezexale, o Kristo mulo pala amende. Sar mai but, akana ame sam kerde vorta katar lesko rat, avasa ame skipime lestar katar e Devleski xoli. Ke te si, kana ame samas dušmaia, ame samas lašiarde le Devlesa katar o merimos katar lesko Šiav, sar mai but, kana ame sam lašiarde le Devlesa, avasa ame skipime katar o traio le Kristosko. Ai na ferdi kudia, numa mai ame avasa luvudime ande o Del katar amaro Rai o Jesus Kristo, kastar ame akana liam t'avas lašiarde. Sa anda kudia, sar katar ferdi jekh manuš e bezex dias andre ande e lumia, ai katar e bezex e martia, ai ke kadia o merimos avilo pe sa le manuš, ke sa kerde bezexa, ke ži ka o Zakono e bezex sas ande e lumia. Eta, kana nai o zakono, e bezex nai gjindi. Numa o merimos amperetsisardias de katar o Adam ži ka o Moše, inke kudalenge kai či kerde bezex katar jekh šindimos jekh fialo sar o Adam. O Adam kai sikavel o mui kudalesko kai trubul t'avel. Numa nai o dinimos ivia sar o doš le adamosko; ke, te si ke pala o doš jekhesko but mule, sar mai but o šukarimos le Devlesko ai so si dino kai avel katar ferdi jekh manuš, o Jesus Kristo, kai sas dino ivia pe le but. Ai nai anda so si dino katar o Del sar anda kudo kai areslo katar jekh kai kerdias bezex; ke si ferdi pala e bezex jekhesko ke e kris avili te del strafo, žikin so si dino ivia aresel te pokjinel pala le but bezexa. Te si katar o doš le jekhesko ke e martia amperetsardias lestar korkořo, sar mai but kudala kai len o but mištimos ai so del e kris amperetsina von ande o traio katar o Jesus Kristo ferdi vo. Kadia si, sar ke katar o doš jekhesko o strafo areslo pe sa le manuš, sa jekh fialo katar jekh diela vorta sas dino o traio te žial pe sa le manuš. Ke, sar ke či patiaias ferdi jekh manuš but aresle bezexale, sa jekh fialo ke patiala jekh manuš but aresena vorta. Eta, o zakono avilo ke t'aven but bezexa, numa kothe kai e bezex si but, o mištimos del opral. Eta ke, sar e bezex amperetsisardias pe o merimos, kadia e dragostia amperetsil katar o vortimos te ningerel ame ka o traio, katar o Jesus Kristo amaro Baro. So phenasa ame? Bešasa ame ande e bezex, eta ke e dragostia te del opral? Dur kothar! Ame kai sam mule la bezexake, sar mai traisaras ame ande e bezex? Či žianen tume ke ame sa kai sam bolde ande o Jesus Kristo, si ande lesko merimos ke ame sam bolde? Ame sam kadia angropome lesa katar o bolimos ande leski martia, eta ke, sar o Kristo živindisailo katar le mule pe e zor vestime le Dadeski, sa kadia vi ame phiras neve ande o traio. Čačes, te ame aresliam ande jekh than lesa sar ke vo mulo, ame vi kadia avasa sar leste živinde. Žianas ke amaro purano stato sas karfome lesa, eta ke o stato bezexalo te na mai avel, te na mai avas ame řoburi la bezexake; ke kudo kai mulo si skipime katar e bezex. Eta, t'ame muliam le Kristosa, ame patias ke vi traisarasa lesa, žianas ke o Kristo živindisailo katar le mule ai či mai merel; e martia manai les putiaria pe leste. Ke vo mulo, ai si pala e bezex ke vo mulo jekh data pe sa; vo avilo palpale pe o traio, ai vo le Devleske trail. Kadia vi tume, dikhen pe tumende ke san mule la bezexake, ai sar živinde le Devleske katar o Jesus Kristo. Ke e bezex te na amperetsil ande tumaro stato merimasko, ai te patian ande so kamel o stato. Na muken tume te služin e bezex, te keren o nasulimos; numa den tume ka o Del, sar t'aven živinde katar le mule kai sanas, ai den tumen sa leske, te keren so si vorta. Ke e bezex či avela la putiaria pe tumende, sar ke tume san, na tela o zakono, numa tela o mištimos le Devlesko. So si! Kerasa ame bezexa, ke ame sam, na tela o zakono, numa tela o mištimos? Dur kothar! Žianen tume ke te den tume ka varesavo sar jekh řobo te patian leste, tume san řoburi kudaleske kai tume patian, t'avel e bezex tjiro birevo kai ningerel tume ka e martia, t'avel o patiamos ande o Del kai ningerel tume ka o mištimos. Numa nais le Devleske anda kodia ke, pala ke tume sanas řoburi la bezexake, tume patiaian le ilesa o čačo sikiarimos kai tume lian. Sanas skipime katar e bezex, tume san akana řoburi katar o mištimos. Me dav duma sar le manuš, sar tume san kovle. Sa jekh fialo kadia kai tume dian tumaro stato sar řobo ka o bi-vužio ai ka o mahrime, kadia akana den tumaro stato sar řobo ka o mištimos, t'aresen ka o svintsimos. Ke, kana tume sanas řoburi la bezexake, tume kerenas so kamenas bi krisako. Če fruta anenas tume atunči? Fruti kai tume lažian lendar adies. Ke kana getol pe kudala dieli, si o merimos. Numa akana, san line katar e bezex ai areslian řoburi le Devleske, tumen si tume sar fruta o svintsimos ai getona tume o traio pe sakda. Ke o pokjinimos la bezexako, si o merimos; numa so del o Del ivia, si o traio pe sakda ande o Jesus Kristo amaro Baro. Žianen tume, phralale — ke me dav duma ka le žene kai žianen o zakono — ke o zakono kerel peski putiaria pe o manuš kadia but traila. Kadia, jekh žiuvli ansurime si phangli katar o zakono ka pesko řom sode-godi vo si živindo; numa te o řom merel, voi si skipime katar o zakono kai phanglias la ka pesko řom. T'avel kadia, kana sas živindo lako řom, voi aresel řomni jekh kaver manušeske, la akharena la kurva; numa te mulo o řom, manai pe late zakono, kadia voi nai kurva kana aresel řomni jekh kavreski. Sa jekh fialo, muře phralale, vi tume sanas mudarde ka o Zakono, katar o stato le Kristosko, t'aven tume kudaleske kai živindisailo katar le mule, eta ame te keras butji le Devleske. Ke, kana ame samas ande o mas, amare bezexa nasul spidine katar o Zakono kerenas butji ande amende, kadia ke ningerena ame ka o merimos. Numa akana, ame sam rigate katar o Zakono, muliam kudala Zakonoske savo ninkerelas amen, kadia ame si te služisaras ande jekh Duxo nevo, ai na sar o lil kai phurilo. So phenas ame? O Zakono si bezex? Dur kothar! Numa me žianav e bezex ferdi katar o Zakono. Ke me sas te na žianav so si ke kamav te lav avresko, te na phendiasas o Zakono: Tu te na les avresko. Ai e bezex astardias te kerel ande mande katar e poronka ke kamlem but; ke bi le Zakonosko e bezex si muli. Me traivas, angla savořende bi zakonosko; numa kana e poronka avili, e bezex lias traio, ai me mulem. Kadia, e poronka kai ningerel ka o merimos sas mange te ningerel ma ka o merimos. Ke e bezex žianel sar te lel, diliardias ma katar e poronka, ai latar mudardias man. O zakono si svintsime, ai e poronka si svintsime, vorta ai laši. So si lašio areslo kadia mange jekh diela te merav? Dur kothar! Numa si e bezex, eta te sikadiol sar e bezex, kai del ma o merimos anda so si lašio, ai ke, katar e poronka, e bezex aresli mai bari sar šoha nas. Ame žianas čačes, ke o Zakono si duxosko; numa me, sim masesko, bikjindo ka e bezex. Ke me či žianav so kerav: me či kerav so me kamav, numa me kerav so si mange vuřito. Eta, te kerava me so či kamav, me prinžiarav kothar ke o Zakono si lašio. Ai akana manai me ke kerav les, numa si e bezex kai bešel ande mande. So si lašio, me žianav, či bešel ande mande, sar te phenas ande muřo mas; ke me kamav, numa nai ma e putiaria te kerav o mištimos. Ke me či kerav o mištimos kai me kamav, ai me kerav o nasulimos kai me či kamav. Ai te si ke me kerav so či kamav, manai ke me kerav les, si akana e bezex kai si ande mande. Me arakhav ande mande kako zakono: Kana me kamav te kerav o mištimos, me sim ferdi harniko te kerav o nasulimos. Ke mange si drago o zakono le Devlesko, sar si o manuš andral; numa me arakhav ande mande jekh kaver zakono, kai marel-pe pe so gindil pe muři godji, ai kai kerel anda mande phanglo ka o zakono la bezexako, kai si sa ande mande. Čořo kai sim! Kon skipila ma anda kado stato merimasko? Naisimos t'avel le Devleske katar o Jesus Kristo amaro Baro! Kadia si, inke me, pa muři godji služiv o zakono le Devlesko, numa katar o kovlimos manušesko služiv o zakono katar e bezex. Manai akana či jekh strafo kudalenge kai si phangle ande o Jesus Kristo. Čačes, o zakono katar o Duxo kai del o traio ande o Jesus Kristo šindias ma katar o zakono la bezexako ai katar e martia. Ke o Del kerdias so naštil te kerel o Zakono le Mošesko, ke o kovlimos manušesko kerel te na avel les zor; o Del dias strafo e bezex ande o mas, kana tradias, pala e bezex, peske šiaves ande jekh mas jekh fialo sar o mas bezexako, ai kudia ke e kris le Zakonoski te kerdiol ande amende, kai traisaras, na sar si o mas, numa sar si o Duxo. Kudala, kai train sar si o mas, drago lenge le dieli le maseske, žikin kudala kai train sar si o Duxo drago lenge le dieli le Duxoske. Ai e dragostia katar o mas, si o merimos, žikin e dragostia katar o Duxo, si o traio ai e patia; ke e dragostia katar o mas nai laši le Devleske, ke voi či thol pe ka o zakono le Devlesko, ai voi vadžai naštil. Eta kudala kai train sar si o mas naštin t'aven drago le Devleske. Tumenge, tume či train sar si o mas, numa sar si o Duxo, te o Duxo le Devlesko bešel ande tumende. Te si varekon ke nai les o Duxo le Kristosko, nai lesko. Ai t'avela o Kristo ande tumende, o stato mulo pala e bezex, numa o duxo trail pala e kris. Ai t'avela o Duxo kudalestar kai živindisardias le Jesus maškar le mule bešel ande tumende, kudo kai živindisardias le Kristos maškar le mule dela vi o traio ande tumare staturi merimaske katar o Duxo kai bešel ande tumende. Kadia, phralale, ame či kamas khanči le maseske, te traisaras sar si o mas. Te traina tume sar si o mas, tume merena; numa te katar o Duxo tume mudaren le dieli bezexale anda o stato, tume traina, ke sa kudala kai si tradine katar o Duxo le Devlesko si šiave le Devleske. Ai tume či lian jekh duxo kai kerel tumen služi, te mai aven ande e dar; numa ame liam jekh duxo kai kerel amende šiave Devleske, katar savo ame tsipisaras le Devleske: Aba! Tate! O Duxo vi vo si marturo ka amaro duxo ke ame sam glati le Devleske. Eta, t'ame sam leske glati, vi si ame te las partia katar o mištimos le Devlesko ai partia le Kristosa, t'avel ke ame kjinuisaras lesa, eta t'avas vestime lesa. Me gindi ma ke le dukha so si akana naštin te aven sar o vestimos kai sikavela amenge. Kadia e lumia ažiukerel sar mai sigo e vramia kai o Del sikavela peske šiaven. Ke e lumia sas thodini tela e putiaria kai či ningerel ka khanči — na anda peste, numa anda ke o Del kamlias, ažiukerimasa, ke vi voi avela skipime katar o služimos o rimome, t'aven la partia ka o vestimos le glatengo le Devlesko. Eta, ame žianas ke, ži ka kado dies, e lumia sa intrego vatil ai kjinuil sar le dukha katar e žiuvel. Ai nai ke ferdi voi; numa vi ame, kai si ame le mai angluni svintsi katar o Duxo vi ame vatisaras ame ande amende, kai ažiukeras te las, te neviol amaro stato. Ke si katar o ažiukerimos ke sam skipime. Kon ažiukerel so vuže dikhel? Eta, te dikhas so ažiukeras manai ažiukerimos. Numa ame te ažiukeras so či dikhas, ame ažiukeras les ninkerimasa. Sa kadia o Duxo ažutisarel ame ande amaro kovlimos, ke ame či žianas so te mangas ande amare řudjimata. Numa o Duxo vi vo mangel vatimasa so našti te phenen; ai kudo kai dikhel ande le ile hatiarel so o svinto Duxo mangel ke vo řudjil kudalenge kai si le Devleske, sar mangel o Del. Ame žianas, so mai si, ke o Del kerel mištimos kudalensa kai si lenge drago o Del, kudala kai si akharde sar vo kamlias. Kudala kai o Del žianelas len angla savořende, vo šinadias len t'aven jekh fialo sar lesko Šiav ke lesko Šiav t'avel o mai angluno kai arakhadilo maškar but phral. Ai kudalen kai vo šinadias, vo vi akhardias le; ai kudalen kai vo akhardias, vo vi kerdias len vorta angla peste; ai kudalen kai vo dias kris, vo vestisardias le. So phenas ame kadia karing kudala dieli? Te si o Del amenge, kon šai avel pe amende? Vo, kai či hamisailo ka pesko čačo Šiav numa kai dias les pala savoře, sar či dela ame vo sa le dieli lesa? Kon thola doš pe le alome katar o Del? Khonik, ke o Del phenel ke von nai došale. Kon dela len kris? o Kristo mulo — mai but, vo živindisailo, vo si pe e čači rig le Devleski, ai vo mangel amenge! Kon šai hulavela amen katar o kamimos le Kristosko? E dukh, vai e dar, vai o kjinuimos, vai e bokh, vai o čořimos, vai o xasarimos, vai e xanřo? Sar si ramome: Si pala tute ke mudaren ame sako dies, ke dikhen pe amende sar pe le bakroře kai ningeren le ka o masari. Numa ande sa kudala dieli ame mai but nirisaras kudalesa kai sam leske drago. Ke sim siguro ke či o merimos či o traio, či le andželi či le bare čereske, či le dieli akana či le dieli kai avena, či le zurale, či opral či telal, či jekh kaver kai arakhadilo naština te hulaven ame katar o kamimos le Devlesko sikado ande o Jesus Kristo amaro Baro. Me phenav o čačimos ande o Kristo, me či xoxavav, muři godji si marturo katar o Svinto Duxo: Si pe mande jekh baro nekazo, ai si ma ande o ilo jekh nekežimos sakda. Ke me kamlemas t'avav armandino ai hulado katar o Kristo pala muře phral, muře niamuri ande o mas. Si Židovuri; kerdias le peske šiave, ai dias len o vestimos, ai e patia, ai o Zakono, ai e molebina, ai so avela. Ai le phure kastar aven, ai o Kristo ande o mas si katar lengi vitsa. Vo kai si opral sa le dieli, o Del svintsol sakda, Amen! Nai ke te phenas ke e vorba le Devleski bešli bi te na kerel khanči. Ke kudala kai vulen anda o Israel nai von čačes o Israel, ai, te vulen katar o Abraham, nai von sa leske šiave; numa sas phendo: Ande o Isak avela phendo tuke jekh vitsa. Si kudia ke nai le šiave kai arakhadile sar sako manuš kai si le šiave le Devleske, ferdi le šiave kai arakhadile sar phendias o Del, von si leske čače šiave. Eta, čačes, e vorba kai sas t'avel si kadia: Me si t'avav ande kadia vramia, ai e Sara avela la jekh šiav. Ai, mai but, kadia sas vi ka e Rebeka, kai sas la glata ferdi katar o Isak amaro dad; Numa o Del žianel sar te alol le manušen: Vo alol sar vo akharel ai na anda so von keren. Te sikavel ke vo si čačo ande so vo kerel phendias ka e Rebeka — makar ke le šiave inke či arakhadile ai ke či kerde či mištimos, či nasulimos — o mai baro avela tela o vast le mai ternesko. *** Sar si ramome: Sas mange drago o Jakob. Ai vuřitsisardem le Esau. So phenasa ame kadia? Si jekh Del kai nas les kris? Dur kothar! Ke vo phenel le Mošeske: Mange avela mila anda kaste si mange mila, ai lava sama anda kaste lav sama. Kadia si, nai anda kudo kai kamel o manuš, či anda kudo kai kerel, numa anda o Del kai si miloso. Ke o Ramomos phenel ka o Faraono: Me thodem tu naročno te sikavav ande tute muři zor, ai eta ke muřo anav t'avel phendo pe sa e phuv. Kadia, leske si mila anda kaske vo kamel, ai vo zuriarel kas vo kamel. Tu phenesa mange: Sostar ma prasal o Del? Ke kon šai ninkerel angla so vo kamel? O manuš, tu mai sigo, kon san tu te des pale le Devles? O khoro la čikako phenela vo kudaleske kai lašiardias les: Sostar kerdian ma tu kadia? Kai lašiarel o khoro si vo baro pe e čik, te kerel sa anda jekh kotor jekh khoro kuč ai jekh lesni. Ai so te phenas — o Del kamlias te sikavel peski xoli ai leski zor, ninkerel jekhe bare ažiukerimasa le khore la xoliake kerdine te xasavon. Ai vo te kamlias te žianen o barvalimos so si lesko vestimos karing le khore la milake kai vo angla savořende lašiardias t'aven vestime? Kadia vo akhardias ame, na ferdi maškar le Židovuri, numa vi maškar le nai Židovuri, Sar vo phenel ande o Hosea: Me akharava muřo narodo kudales kai nai muřo narodo, ai drago kudalen kai nai mange drago; ai kothe kai phenenas lenge: Tume či sanas muřo narodo! Von avena akharde le šiave le Devleske živindo. O Esai, pe peski rig, tsipilas pala o narodo Israel: Makar ke le šiave anda o Israel te avena kaiti but sar e kišai la mariaki. Ferdi jekh tsiřa ašel skipime. Ke o Baro kerela sa ai sigo pe e phuv sa so vo kamel. Ai, sar o Esai phendias angla savořende: T'avel o Baro le řaioske zurale te na mukliasas amenge jekh vitsa, ame sas t'avas sar o Sodomo, ame sas t'avas jekh fialo sar e Gomořa. So phenasa ame? Le kaver thema, kai či roden t'aven vorta, avile von vorta angla o Del katar o patiamos, žikin ke o Israel, kai rodel jekh zakono te avel vorta, či areslo ka o gor kudale zakonesko. Sostar? Ke o Israel rodias te avel vorta, na katar o patiamos, numa katar peske butia. Von malade-pe pe o bař ke thode le angla lende, sar si ramome: Eta, me thav ande o Sion jekh bař angla lende jekh stanka kai kerel te perel kudo kai patial ande leste či avela lažiavdo. Phralale, so kamel muřo ilo ai muřo řudjimos le Devleske lenge, si t'aven skipime. Me sim lenge marturo ke von žian angle le Devleske, numa bi godiako: Či žianen e kris le Devleski, ai roden ke thon pengi kris, von nai thodine tela e kris le Devleski; ke o Kristo getol o zakono, te kerel vorta angla o Del sa kudalen kai patian. Čačimasa, o Moše sikavel kadia sar te avel vorta katar o Zakono: O manuš kai lel opre kudala dieli traila lendar. Numa eta sar del duma sar te avel vorta katar o patiamos: Na phen ande tjiro ilo: Kon anklela ande o čeri? (Si te vuliarel le Kristos;) vai: Kon vulela ande e vunia? (Si te kerel t'anklel o Kristo maškar le mule.) So phenel vo? E vorba si paša tute, ande tjiro mui ai ande tjiro ilo. Eta, si e vorba le patiamaski, kai ame phenas. Te avela te phenas pa tjiro mui ke o Jesus si o Baro, ai te patiasas tu ande tjiro ilo ke o Del živindisardias les katar le mule, tu avesa skipime. O manuš patial anda o ilo ai o Del kerel les vorta, ai o manuš phenel pa pesko mui ai aresel ka o skipimos. Sar ke phenel o Ramomos: Kon-godi patialas pe ande leste či avela lažiavdo. Savoře si jekh fialo, čačimasa, o Židovo ai o Greko, ke len si le jekh Baro, kai si vo barvalo ka kudalenge kai akharen les. Ke kon-godi akharel o anav le Baresko avela skipime. Sar akharena von kudales ande savo von či patian? Ai sar patiana von ande kudo kai von či ašunde ke den duma pa leste? Ai sar ašunena von pa leste, te nai khonik te den duma? Ai sar avena len manuš kai den duma, te na avena tradine? Sar si ramome: So si šukar le punře kudalenge kai phenen e laši viasta! Numa sa či patian ande e laši viasta. Kadia o Esai phenel: Baria, kon patiaias ka amari vorba? Kadia o patiamos avel anda so ašunas, ai so ašunas avel katar e Vorba le Kristoski. Numa me phenav: Či ašundine von? Aver fialo! Lengo hango gelo pe sa e lumia, ai lenge vorbi ži ande o gor la lumiako. Numa me pušiav: O Israel či hatiardias vo? O Moše, o mai angluno, phenel: Me vazdava tumari xoli katar jekh narodo kai nai les them, me vazdava tumari xoli katar jekh narodo kai nai les godji. Ai o Esai tromailo te phenel: Arakhle ma kudala kai či rodenas ma, Me sikadilem ka kudala kai či mangenas ma. Numa pala o Israel vo phendias: Me vazdem muře vast sako dies karing jekh narodo buntuimasko ai kai del palpale. Me phenav kadia: O Del šiudias vo pesko narodo? Dur kothar! Ke vi me sim Israelito, anda e vitsa katar o Abraham, anda e kumpania o Beniamin. O Del či šiudias pesko narodo, kai prinžiardias les angla savořende. Či žianen tume so phenel o Ramomos pa o Elia, sar vo vatisailo le Devleske kakale divanosa pe o Israel: Baria, von mudarde tjire profeton ai phagle le altaria; me ferdi ašilem, ai von roden te len muřo traio? Numa so dias les palpale o Del? Me garadem mange efta mii manuš, kai či dine čanga angla o Baal. Vi sa jekh fialo ande e vramia akana mai ašilias tsiřa manuš, sar alosardias o mištimos le Devlesko. Eta, avela katar e dragostia, manai katar le butia. Te na, e dragostia le Devleski manai čačes dragostia. So te phenav? O narodo Israel či lias so rodelas. Ferdi kudala kai o Del alosardias line les žikin le kaver zuriarde pe? Sar si ramome: O Del dias len jekh duxo sovimasko, jakha te na dikhen, ai kan te na ašunen, ži adies. Ai o David phenel: Ke lengi skafidi t'avel lenge jekh kletka, ai jekh groapa te peren tele, ai aven dine strafo! Ke te kořavon lenge jakha te na dikhen, Ai t'avel lengo dumo sakda bango tela o pharimos! Me phenav kadia: Kana miškisaile le Židovuri, pele von ai našti mai vazden pe? Dur kothar! Numa, ke von pele tele, o skipimos šai t'avel pe le thema, eta te lel le Židovon e žaluzia. Eta, sar le Židovuri pele tele e lumia barvalili, ai lengo kovlimos avilo o barvalimos le themengo; sar mai but avela kana von pařuvena pe. Me phenav les tumenge, kai či patian: Ke sim me apostolo kudalenge kai či patian, me veseli ma ande e butji kai si muři, eta, te šai daštiv, te xoliarav kudalen anda muři vitsa, ai te šai skipiv unen. Ke pala lengo šindimos e lumia astardili ande jekh than le Devlesa, so avela kana vi von si ande jekh than, te na niči jekh traio maškar le mule? Eta, t'avel o mai angluno kotor manřesko ke den les le Devleske, sa so mai si anda o manřo si lesko; ai te le vuni si svinto, le kaštoře vi von si le Devleske. Numa t'avela ke uni anda le kaštoře maslinake si šinde, ai ke tu, kai sanas jekh kopači maslini sirbato, sanas thodino ande lengo than, ai san astardo kašt maslinako kai e vuna ai ka o čiken la maslinako. Na luvudisavo katar kudala kaštoře. Te si te luvudis tu, te žianes ke či san tu kai ninkeres e vuna, numa e vuna ninkerel tut. Tu phenasa kadia: Le kaštoře sas šinde, eta ke me t'avas astardo kothe. Kudia si čačimos; von sas šinde pala ke či patian, ai tu, tu bešes katar o patiamos. Na muk tu ka le barimata, numa dara; ke te si o Del kai či lias sama katar le kaštoře kai barile, vo či lela sama či tutar. Dikh sar si o lašimos ai e xoli le Devleske: Xoli pe kudala kai pele tele, ai mištimos le Devlesko karing tute, te bešesa tu zuralo ande kudo mištimos; aver fialo, tu avesa šindo. Von sa jekh fialo, te na mukena pe ande pengo dilimos, von avena astarde; ke o Del si zuralo te mai astarel len. Te tu, tu sanas šindo katar o kopači maslini kai si sirbato, ai astardo kai či trubul pe o kopači e bariardo. Sar mai but von avena astarde vi von pe pengo kopači maslini. Ke me kamav, phralale, ke te žianen tume kado čačimos garado eta te na gindisaren tumenge ke san godiaver, si ferdi jekh partia anda o Israel ke nai harniko te hatiarel, žikin či sa kudala kai či patian den andre. Ai kadia sa o Israel avela skipime, sar si ramome: O skipitori avela anda o Sion, Ai dela rigate katar o Jakob le bi-lašen; Ai avela muři patia lensa, kana me lava lenge bezexa. Anda so si e Nevi Viasta, von si dušmaia pala tumende; numa so si anda o alomos, kamen len pala lenge dada. Ke o Del či keil pe so vo del ai so vo akharel. Sa kadia kai tume angla savořende či patiaian le Devles numa, akana ke le Židovuri či patiaie, tume akana lian mila. Sa jekh fialo von akana či patian, eta ke vi pe lende t'avel e mila katar e mila kai si pe tumende. Ke o Del phanglias sa le manušen te na patian, t'avel leske mila anda savořenge. Sar o barvalimos le Devlesko si baro, leski godji ai so žianel si pria andre! Sar leske krisa naštisaras te zumavas le! Kon šai hatiarel so vo kamel? Ke — sar phenel o Ramomos: Kon žianel le ginduri le Bareske, Vai kon sikiardias les? Kon dias les o mai angluno, te šai del les palpale? Si lestar, katar leste, ai leske ke si sa le dieli. Leske o vestimos ande sa le berš beršenge! Amen! Me mangav tumen kadia, phralale, katar e mila le Devleski amenge, te den tumaro stato leske sar jekh sakrifiso živindo, avela tumendar sar jekh molebina vorta, svinto ai drago leske. Na keren sar si ande kadia lumia, numa pařuven tume sa katar e godji, eta ke tume te žianen so kamel o Del, so si lašio, drago ai vorta. Katar o mištimos kai si mange dino, me phenav ka sako anda tumende te na avel tumenge te gindin tume ke san bare, numa te len pe tumende o gindo mai tele, sar si e mezura le patiamaski kai o Del dias sakones. Ke, sar ame si ame vast ai punře ande ferdi jekh stato, ai ke sa kudala dieli či keren sako jekh butji, kadia, ame kai sam mai but, amen si ame ferdi jekh stato ande o Kristo, ai ame sam ande jekh than le jekh ai le kaver. Amen si ame ke o Del dias aver fialo podarki ai trubul te keras butji lensa. Ke kudo kai dias les o Del te profetil te kerel kudia sar dias les o patiamos; ke kudo kai si akhardo ka e ministeria t'astardiol ka peski ministeria; ke kudo kai sikiarel t'astardiol ka pesko sikiarimos, ai kudo kai vazdel ka pesko vazdimos. Ke kudo kai del te del sar vo kamel anda peste; ke kudo kai porončil te kerel sigo; ke kudo kai kerel o mištimos te kerel veselimasa. Ke o Ramomos trubul t'avel čačo. Vuřitsin o nasulimos; astardion zurales ka o mištimos. Katar o kamimos phralengo, aven drago te kamen jekh pe le kaver; pativasa, len sama jekh kavrestar. Aven harniči, ai na kovle. Aven zurale ande o duxo. Služin le Bares. Veselin tume kai ažiukeren. Ninkeren tumen ande le kjinuimata. Žian angle ande o řudjimos. Ažutin so trubul le Svintson. Len sama mišto katar kudala kai aven tumende. Svintson kudalen kai maren tumen, svintson ai na den armaia. Veselin tuma kudalensa kai veselin pe, roven kudalensa kai roven. Train mišto jekh avresa ande jekh than. Na den tume gindo te ušten mai opre, numa keren le butia prosti. Na gindin tume ke san godiaver ka tumare jakha. Na den khanikaske o nasulimos pala o nasulimos. Roden so si mišto angla sa le manuš. Te šai daštin, sode šai keren ande tumende, t'avel tumen patia sa le manušensa. Na den strafo tume, muře dragi, numa muken te kerel e xoli e Devleski; ke si ramome: mange si te dav strafo, mange si te pokjinav, phenel o Baro. Numa t'avela tjiro dušmano bokhalo, de les te xal; t'avela trušalo, de les te pel; ke te keresa kadia, si angara phabarde ke tu kjides pe lesko šero. Na muk tu te niril tu o nasulimos, numa de opral o nasulimos katar o mištimos. Ke sako manuš t'ašel tela le rai bare; ke sako putiaria avela katar o Del, ai le rai bare kai thode len o Del. Sa anda kudia kudo kai ninkerel-pe pe le rai bare ninkerel-pe pe e poronka le Devleski kai vo thodias, ai kudala kai ninkeren pe len jekh strafo pe pende. Nai pala jekh laši diela, si pe jekh nasul, ke le rai bare daran lendar. Kames tu te na daras katar o rai baro? Ker o mištimos, ai tut ažutila tu. Ke vo kerel butji le Devleski te keres o mištimos. Numa te keresa o nasulimos, trubul te daras ke nai intaino ke si les e xanřo. O rai baro si sluga le Devleski pe tjiro mištimos. Numa te keresa tu nasul, dara; ke nai intaino ke vo si les e xanřo, si sluga le Devleski te kerel te pokjinen kudala kai keren o nasulimos. Musai te ašes tela le bare, na ferdi daratar ke e xoli Devleski avel, numa vi pala tjiri godji. Si vi pe kudia ke tume pokjinen love le themeske. Ke le rai bare si ministeri le Devleske sa thodine te keren pengi butji. Den ka sako so si lesko: O pokjinimos kaske kames o pokjinimos, e dar kaske kames e dar, e pativ kaske tu kames e pativ. Te na kames khanči khanikaske, te na avela ferdi te t'aven drago jekh avreske; ke kudo kai si leske drago le kaver kerel o Zakono. Čačes, le poronki: Tu či keresa kurvetsia, tu či mudaresa, tu či čoresa, tu či rodesa te les so si avresko, ai si te aven aver poronki, si ande kadia vorba: T'avel tuke drago tjiro vortako sar san drago tuke. O kamimos či kerel nasul khanikaske; o kamimos lašiarel o Zakono. Kudia diela si bari ke tume žianen ande če vramia ame sam: Si o časo t'ušten anda e lindri, ke akana o skipimos si mai paše paša amende akana ke sar patiaiam pe e mai angluno data. E riat la angle, o dies pašiol. Šiudas pa amende le butia la ratiake, ai thas pe amende le armi la vedariake. Phiras ande o čačimos, sar ande o pherdo dies, dur katar o but xamos ai katar o but matimos, katar o lažiamos ai katar e kurvetsia, katar le čingaria ai katar e žaluzia. Numa thon pe tumende sar tsalia o traio nevo ande o Jesus Kristo o Rai, ai na len sama katar o mas te kerel so vo kamel. Le sama katar kudo kai si kovlo ande o patiamos, bi te xas tu pe so vo gindil. Kasavo kamel te xal anda sa: Kasavo kaver, si kovlo, xal ferdi legumi. Ke kudo kai xal te na vuřitsil kudales kai či xal, ai kudo kai či xal te na del kris kudales kai xal, ke o Del lel vi les. Kon san tu, tu kai des kris jekha sluga kavreski? Te bešela vo opre, vai te perela tele kudia si e diela leske Bareske. Numa vo bešela opre, ke o Baro si les e putiaria te mukel les. Jekh gindil pe ke uni dies si mai bare sar le kaver; žikin kaver gindil ke si sar jekh fialo. Ke sako t'avel te patial pe ande pesko duxo. Kudo kai lel sama maškar le dies, vo kerel kadia le Devleske. Kudo kai xal, si le Bareske vo xal, ke vo naisil le Devles; kudo kai či xal, si le Devleske ke vo či xal, ai vo naisil le Devles. Čačes, khonik či trail ferdi peske, ai khonik či merel ferdi peske. Ke ame te traisarasa, ame traisaras le Bareske; ai ame te merasa, ame meras le Bareske. T'avela ke ame traisaras, t'avela ke ame meras, ame sam le Bareske. Ke o Kristo mulo ai vo traisardias, eta te porončil pe le mule ai pe le živinde. Numa tu, sostar des tu kris tjire phrales? Vai tu, sostar vuřitsis tu tjire phrales? Ke ame sa avasa angla e kris le Devleski. Ke si ramome: Me sim živindo, phenel o Baro, ai sako manuš dela čanga angla mande, ai sako šib dela luvudimos le Devles. Kadia sako anda amende phenela le Devleske so vo kerdias. Te na mai das ame kris jekh kavres; numa den tume godji mai but te na keres khanči t'avel ke tjiro phral miškil pe vai te perel ande e bezex. Me žianav ai me sim siguro katar o Rai Jesus ke khanči nai mahrime ande peste, numa jekh diela si mahrime kudaleske kai gindil ke si mahrime. Numa te, pala jekh xamos kai xas, nekežisares tjire phrales nai či jekh kamimos ande tute, katar tjiro xamos, xasares kudales pala savo o Kristo mulo. So si mišto tute či trubul te avel jekh diela le avrenge te phenen nasul pa tute. Ke e amperetsia le Devleski nai o xamos ai o pimos, numa e kris, e patia ai e veselia, katar o Svinto Duxo. Kudo kai služil le Kristos kadia si drago le Devleske ai kamen les le manuš. Si kadia, rode so si lašio pe e patia ai kai mukel ame zurale ande jekh than ande o patiamos. Pala jekh xamos, na rimosar e butji le Devleski. Pe o čačimos sako diela si vužio; numa nasul le manušeske, kana xal, t'aresel ke tjiro phral perel ande e bezex. Mišto si te na xas mas, te na pes mol, ai te mukes tu so šai avel tjire phraleske jekh diela te perel ande e bezex. Kudo patiamos kai si tu, garav les tuke angla o Del. Veselo kudo kai či del pe strafo pes anda so vo kerel! Numa kudo kai gindil pe ke nai mišto jekh xamos ai xal les si dino strafo, ke vo či kerel ke patial pe. Sogodi kai či avel katar o patiamos si jekh bezex. Ame kai sam zurale ande o patiamos, ame trubul te ninkeras o kovlimos kudalengo kai nai zurale, ai te na avas drago amenge. Ke sako anda amende te las sama katar so si lašio amare vortakeske te bariol ande o patiamos. Ke o Kristo či lias sama pestar, sar si ramome: Le prasaimata kudalenge kai prasaile tu pele pe mande. Eta, sogodi sas ramome angla savořende sas te sikiarel amen, te ažiukeras, ai te aven amen e řabda ai e zor kai den le Ramomata. Ke o Del kai řibdil ai kai lel sama tumendar te del tumen le godia te len sama jekh karing o kaver sar si o Jesus Kristo, eta ke sa ande jekh than, anda jekh mui, tume luvudina le Devles ai le Dades amare Baresko o Jesus Kristo. Len tume jekh avres, sar o Kristo lias tumen, pe o vestimos le Devlesko. Me phenav, čačes, ke o Kristo vo sas e sluga le Šindenge, te sikavel o čačimos le Devlesko te phenel so phendias ka amare dada, žikin kudala kai či patian luvudin le Devles pala leski mila ke si ramome: Sa anda kudia me luvudiva tu maškar le thema, ai me gjilabava te vestiv tjiro anav. Mai si phendo: Thema, veselin tume leske narodosa! Ai mai: Luvudin le Bares, tume sa le thema, vestin les, tume sa le naroduri! O Esai phenel: Anklela anda o Jesai jekh šiav, kai uštela t'amperetsil pe le thema; le thema ažiukerena ande leste. Ke o Del kai ažiukeren te pherel tume sako veselia ai sako patia ande o patiamos, t'aven tume but t'ažiukeren, katar e zor le Svinto Duxoski! Pe so si tumenge, muře phralale, me sim siguro inke ke tume san pherde mištimos, pherde ginduri, ai šai te sikaven tumen jekh avres. Numa, karing uni, me ramosardem tumenge sar jekh zorasa, sar te uštivav tumare ginduri, pala o mištimos kai o Del kerdias t'avav ministero katar o Jesus Kristo maškar kudala kai či patian, kerav devlikanes te služiv e Laši Viasta le Devleski, eta ke kudala kai či patian te aven leske dine dragosa svintsime katar o Svinto Duxo. Man si ma so šai luvudi ma ande o Jesus Kristo, pala so si anda le dieli le Devleske. Ke me či tromava te phenav pa aver dieli te na kerdias o Kristo mandar t'anav kudalen kai či patian te patian. Vo kerdias le katar le vorbi ai katar le butia, Katar e zor le čudenengi ai le šodimatangi, katar e zor le Duxoski le Devlesko, kadia ke, de katar o Jerusalem ai le thema krugom ži ande e Iliria, me but dem e Laši Viasta le Kristoski. Ai me kamlem te phenav e Laši Viasta kothe kai či žianenas le Kristos, eta te na vazdav pe so si le kavresko, sar si ramome: Kudala kaske nas sikado dikhena, ai kudala kai či ašunde hatiarena. Sa anda kudia butivar či muklias ma te žiav karing tumende. Numa akana, manai man khanči so ninkerel ma ande kadia rig, ai de but berš sas man gindo te žiav karing tumende. Gindiv ma ke dikhava tumen kana nakhava, kana žiava ande e Espania, ai te ažutin ma, pala te bešav maškar tumende jekh vramia dragosa. Sigo si te žiav ande o Jerusalem, te služiv le svintson. Ke e Makedonia ai e Gretsia von kamle te den vareso t'ažutin le čořen maškar le svintsi anda o Jerusalem. Von thodine pe ande pende, numa, čačimasa, trubulas t'ažutin kudale čořen. Ke le kristianuri židovitsko anda o Jerusalem hulade pengo mištimos duxoske kudalensa kai nai Židovuri; trubul vi le nai-Židovuri te služin len ai t'ažutin len ande o mištimos la lumiako. Sar getova kadia butji ai ke dava len so dine le, me žiava ande e Espania ai nakhava tumendar. Me žianav ke kana žiava tumende, si jekha mezurasa pherdi svintsimos katar o Kristo ke me žiava. Me mangav tumen, phralale, katar amaro Rai o Jesus Kristo ai katar o kamimos o Duxosko, te maren tume mansa, te phenen le Devleske řudjimata anda mande, eta t'avav skipime kudalendar kai nai patian anda e Judea, ai te so si te ningerav ande o Jerusalem t'avel mištimos le svintsonge, kadia te aresav tumende veselimasa, te kamela o Del, ai te veseli ma maškar tumende te hodiniv tsiřa. O Del kai del e patia te avel tumensa savořensa. Amen. Me tradav tumenge amari phei, e Febe, kai služil ka e khangeri ande o Senkere, eta te len latar sama anda amaro Baro sar si le svintsi, ai tume t'ažutin la ande le dieli kai trubul tumendar, ke voi ažutisardias buten ai vi man. Unpači Priskas ai Akilas, muře vortača la butiake ande o Jesus Kristo kai denas penge šere te skipin muřo traio; nai ke ferdi me naisiv lenge, mai si sa le khangeria kudalenge kai nai Židovuri. Den pozdraimos vi e khangeri kai si ande lengo kher. Den pozdraimos ka o Epainete, kai si mange drago, kai sas le Kristoske o mai angluno ande e Azia. Den pozdraimos la Maria, kai but ažutisardias tumen. Den pozdraimos ka o Andronikus ai o Junias, muře niamuri ai muře vortača kai sas mansa phangle ande e temnitsa. Si le bari pativ maškar le apostoli, ai kai inke sas ande o Kristo angla savořende mandar. Den pozdraimos ka o Ampliatus, kai si mange drago ande o Baro. Den pozdraimos ka o Urbano, amaro vortako ande e butji le Kristoski, ai o Staxis, muřo drago. Den pozdraimos ka o Apele, kai sas zumado ande o Kristo. Den pozdraimos ka kudala katar o kher o Aristobulo. Den pozdraimos ka o Herodion, muřo niamo. Den pozdraimos ka kudala katar o kher o Narsis kai si ande o Baro. Den pozdraimos ka e Trifena ai e Trifosa, kai keren butji le Bareske. Den pozdraimos ka e Persis, e drago, kai kerdias but butji le Bareske. Den pozdraimos ka o Refus, o alome katar o Baro, ai leski dei, kai si vi muři. Den pozdraimos ka o Asinkrite, o Flegon, o Hermes, o Patrobas, o Hermas, ai le phral kai si lensa. Den pozdraimos ka o Filologo ai e Julia, ka o Nere ai leski phei, ai o Olimpo, ai ka sa le svintsi kai si lensa. Den pozdraimos le jekh ai le kavren katar jekh svinto čimidimos. Sa le khangeria le Kristoske den tumen pozdraimos. Me vazdav tumen, phralale, te len tume sama katar kudala kai hulaven ai keren te peren te na muken o sikiarimos kai tume lian. Durion lendar. Ke kasave manuš či služin le Kristos amare Bares, numa pengo peř; ai, katar le vorbi gugle ai divanuri kai makhen, von diliaren le ile le prosti. Tumenge, tumaro patiamos žianen les savoře; me veseli ma anda tumende, ai me kamav tume t'aven godiaver sar si o mištimos ai vuže sar si katar o nasulimos. O Del la patiako inčarela sigo le Satan tela tumare punře. Ke o mištimos katar amaro Rai o Jesus Kristo t'avel pe tumende! O Timoteo, muřo vortako la butiako, del tume pozdraimos, vi o Lusius del tumen pozdraimos, o Jason ai o Sosipater, muře niamuri. [Me dav tumen pozdraimos ande o Baro, me o Tertius, kai ramov kado lil.] O Gaius, kaste sim ai kai lel sama katar e khangeri, del tumen pozdraimos. O Erasto, kai garavel le love le foroske, del tumen pozdraimos, vi o phral o Kartus. [Ke o mištimos katar amaro Rai o Jesus Kristo t'avel tumensa savořensa! Amen!] Kudaleske kai šai zuriarel tumen pala muři Laši Viasta ai so phenel o Jesus Kristo, sar sikade le garade čudimata de kaiti berš. Numa sikade le akana katar le ramomata le profetonge, pala e ordina le Devleski pe sakda sikaven le ka sa le thema, eta te patian o patiamos. Ka o Del, ferdi godiaver, t'avel vestime berš beršestar, katar o Jesus Kristo! Amen! Lil katar o Paul, akhardo t'avel apostolo sar kamel o Del, ai katar o phral o Sostenes, ka e khangeri le Devleski kai si ande o Korinto, ka kudala kai si svintsime ande o Jesus Kristo, akharde t'aven svintsi, ai ka sa kudala kai akharen ande savo than o anav amare Baresko o Jesus Kristo, lengo Baro ai amaro: ke o mištimos ai e patia t'aven tumenge dine katar o Del amaro Dad ai katar o Rai o Jesus Kristo! Me dav sakda ka o Del te naisiv leske anda tumende, katar o mištimos kai dias tumen o Jesus Kristo. Ke ande leste tume san pherde anda sa le barvalimata, sa e vorba ai sa o žianglimos, so si phendo pa o Kristo si zurales ninkerdo maškar tumende, kadia či trubul tumen či jekh podarka anda o Del, ande o ažiukerimos kai tume san žikin sikadiola amaro Rai o Jesus Kristo. Vo zuralela tumen ži ande o gor, te na phenen khanči pe tumende o dies kai avela o Jesus Kristo. O Del si čačo, vo kai akhardias tumen t'aven jekh leske Šiavesa, o Jesus Kristo amaro Baro. Me vazdav tumen, phralale, katar o anav amare Baresko o Jesus Kristo, t'avel tumen sa jekh šib, ai te na avel čingar maškar tumende, numa t'aven vorta ande jekh than ande jekh duxo ai ande jekh godji. Ke, muře phralale, me ašundem pa tumende, katar le žene anda o Klone, ke si čingara maškar tumende. Me kamav te phenav ke sako del duma kadia: Me, sim pala o Paul ai me, sim pala o Apolos! ai me, pala o Petri! ai me, pala o Kristo! O Kristo si vo hulado? O Paul sas vo karfome pala tumende, vai ke si ande o anav le Paulosko ke tume san bolde? Me naisiv le Devles ka me či boldem či jekh anda tumende, ferdi le Krispus ai le Gaius, eta ke khonik te na phenel ke tume san bolde ande muřo anav. Me mai boldem e familia katar o Stefanas; so mai si, me či mai žianav te boldem varekas avres. Nai ke pala o bolimos ke o Kristo tradias man, si pala te phenav e Laši Viasta, ai kudia bi e šibako la godiako, eta ke o trušul le Kristosko te na avel intaino. Ke so phenen pa o trušul si jekh dilimos kudalenge kai xasavon; numa amenge kai sam skepime, si jekh zor le Devleski. Vi mai si ramome: me bilalava e godji le godiaverengi, ai phagava o godiaverimos le godiaverengo. Kai lo o godiaver? kai lo o zakonari? kai lo kudo kai kerel čingar ande kadala berš? O Del či sikadias vo ke si dilimos e godji kadala lumiaki? Ke sar e lumia, peska godiasa, či prinžiardias le Devles ande leski godji, sas drago le Devleske te skipil kudalen kai patian katar o dilimos kai phenas. Le Židovuri mangen čudeni ai le Grekuri roden e godji; ame, ame das duma pa o Kristo karfome, skandalo le Židovonge ai dilimos kudalenge kai či patian, numa e zor le Devleski ai e godji le Devleski kudalenge kai si akharde, kadia le Židovoske sar le Grekoske. Ke o dilimos le Devlesko si mai godiaver sar le manuš, ai o kovlimos le Devlesko si mai zuralo sar le manuš. Len sama, phralale, ke maškar tumende kai san akharde nai but godiaver sar so si o manuš, či but bare, či anda le bare vitsi. Numa o Del alosardias le dieli dile anda e lumia te teliarel le godiaveren; o Del alosardias le dieli kovle anda e lumia te teliarel le dieli zurale; ai o Del alosardias le dieli žiungale anda e lumia ai kudala kai vuřitsin le, ai kudala kai si khanči te rimol so mangel e lumia, eta te na či jekh mas te na luvudil pe angla o Del. Eta, si lestar ke tume san jekh ande o Jesus Kristo, savo, katar o Del, si thodino amenge katar o Del sar godji, kris, svintsimos ai skipimos, eta, sar si ramome: Ke kudo kai luvudil pe te luvudil pe ande o Baro. Me, phralale, kana me gelem tumende, či gelem barimatansa katar e šib vai la godiasa ke me gelem te phenav tumenge so si o Del. Ke man nas man gindo te žianav maškar tumende aver diela ke ferdi o Jesus Kristo, ai o Jesus Kristo karfome. Inke me simas paša tumende ande jekh stato kovlo, daravas, ai bares isdravas; ai muři vorba ai muřo divano nas bare vorbi katar e godji le manušeski, numa pe jekh vurma te sikavav o Duxo ai e zor katar o Svinto-Duxo, eta ke tumaro patiamos t'avel thodino, na pe e godji le manušengi, numa pe e zor le Devleski. Numa, si jekh godji ke ame phenas maškar kudala kai si vorta, godji kai nai anda kadala berš, či katar le birevia anda kadala berš, kai si t'aven phařade; ame das duma pa e godji le Devleski, šodo ai garadi, kai o Del, angla savořende kadala berš, šinadias la t'avel amenge mištimos, godji kai či jekh birevo anda kadala berš či žianel, ke, te von žiangline, von sas te na karfosardinesas le Bares o vestime. Numa, sar si ramome, si dieli kai e jakh či dikhlias, kai o kan či ašundias, ai kai či ankliste ka o ilo le manušesko, dieli kai o Del lašiardias kudalenge kai si leske drago. O Del sikadias le amenge katar o Duxo. Ke o Duxo zumavel sa, inke so si ande o Del. Savo anda le manuš, čačes, žianel le dieli le manušeske, te na avela o duxo le manušesko kai si ande leste? Sa jekh fialo, khonik či žianel le dieli le Devleske, te na avela o Duxo le Devlesko. Eta ame, ame či liam o duxo la lumiako, numa o Duxo kai avel katar o Del, eta ame te žianas le dieli le Devleske kai dias ame vo katar pesko mištimos. Ai ame das duma, na le divanonsa kai sikiarel e godji manušeski, numa kudalensa kai sikiarel o Duxo, das jekh vorba katar o Duxo katar le dieli Duxoske. Numa o manuš kai nai les o Duxo či lel le dieli katar o Duxo le Devlesko, ke von si jekh dilimos leske, ai vo naštil te žianel le, ke si katar o Duxo kai si te del le kris. O manuš kai si les o Duxo le Devlesko aver fialo, del kris pe sa, ai vo nai dino kris khanikastar. Ke, kon šai žianel o gindo le Baresko, te sikiarel les? Eta ame, ame si ame o gindo le Kristosko. Me, phralale, nai sar ka le manuš le Duxoske kai me dem tumensa duma, numa sar ka le manuš le maseske, sar ka le glati le Kristoske. Me dem tumen thud, na o xamos o zuralo, ke tume naštin te ninkeren les; ai tume inke akana naštin, ke tume inke san maseske. Čačes, sar si maškar tumende žaluzia ai čingara, či san tume mai maseske, ai či phiren tume sar si o manuš? Kana o jekh phenel: Me, sim katar o Paul! ai jekh kaver: Me, sim katar o Apolos! či san tume manuš? So si o Apolos, ai so si o Paul? Služi, katar save tume patian, sar ke o Baro dias sakones. Me thodem te bariol, o Apolos kjindiardias, numa o Del bariardias. Kadia nai ke kudo kai thodias te bariol ke si vo vareso, či kudo kai kjindiarel, numa o Del kai bariarel. Kudo kai thol te bariol ai kudo kai kjingiarel si sa jekh fialo, ai sako lela pesko pokjinimos sar si leski butji. Ke ame sam butiaria le Devlesa. Tume san o kimpo le Devlesko, o kher le Devlesko. Sar si o mištimos le Devlesko kai dias man, me thodem o mai angluno bař sar jekh godiaver aršitekto, ai jekh kaver vazdias opral. Numa sako te lel sama sar vazdel opral. Ke khonik naštil te thol jekh kaver bař sar vo, o Jesus Kristo kai si vuže thodino. Eta, te si varekon te vazdel pe o bař sunakasa, rupesa, kuče bařensa, kaštesa, khasesa, sulumensa, e butji sakoneski dikhiola; ke o Dies sikavela la, ke voi sikadiola ande e jag, ai e jag zumavela e butji sakoneski. Te či bilavol e butji varekaski vazdini pe o bař, vo avela pokjindo. Te si biladi e butji varekaski vo xasarela pesko pokjinimos, vo, vo avela skipime, numa sar anda e jag. Či žianen tume ke tume san o templo le Devlesko, ai ke o Duxo le Devlesko bešel ande tumende? te si varekon ke phagel o templo le Devlesko, o Del phagela les; ke o templo le Devlesko si svinto, ai tume san kudo templo. Ke khonik te na diliarel pe korkořo: te si varekon maškar tumende kai gindil pe ke si godiaver sar si kadala berš, t'avel dilo, eta t'aresel čačes godiaver. Ke o godji kadala lumiaki si dilimos angla o Del. Kadi si ramome: Vo lel le godiaveren ande lengi xitria. Ai mai: O Baro žianel le ginduri le godiaverenge, Vo žianel ke si intaino. Ke khonik te na thol pesko vestimos ande le manuš; ke sa si tumaro te si o Paul, te si o Apolos, te si o Petri, te si e lumia, te si o traio, te si o merimos, te si le dieli akana, te si le dieli kai avena. Sa si tumaro; ai tume san le Kristoske, ai o Kristo si le Devlesko. Kadia, te dikhen tume pe amende sar le služi le Kristoske, ai kai len sama katar le šodimata le Devleske. So mai si, so mangel katar kudala kai len sama, si ke sako t'avel čačo. Mange, nai mange bari diela so tume den duma pa mande, vai katar jekh kris manušeski. Či me či dav ma pe e kris, ke me či sim došalo pe khanči; numa nai anda kudia ke me sim čačardo. Kudo kai del ma kris, si o Baro. Sa anda kudia na den kris khanči angla savořende e vramia ži kai avel o Del, kai sikavela ka e vedaria so si garado ande o tuniariko, ai kai sikavela so si ande o ilo. Atunči sako lela katar o Del so avela lesko. Si pala tumende, phralale, ke me kerdem kadala dieli pe mande ai pe o Apolos, eta te tume te žianen ande amende te na žian mai dur sar so si ramome, ai ke khonik te na kerel barimata jekh pe o kaver. Ke so šai san tu? So si tut te na lian les? Ai tu te lian, sar vestis tu sar te na lian les? Inke tume san pravarde, inke tume san barvale, bi amengo tume amperetsisardian. Ai sar tume amperetsin čačes, eta ke vi ame t'amperetsisaras tumensa! Ke o Del, miazol mange, kerdias anda amende, apostoli, le mai paluni anda le manuš; sar strafome te meras šai phenas, sar dikhle ame e lumia, le andželi ai le manuš. Ame sam dile pala o Kristo; numa tume, tume san godiaver ande o Kristo; ame sam kovle, numa tume san zurale. Tumen si pativ ai amen vuřitsin amen! Ži ka kado časo, ame vatisaras ande e bokh, ande e truš, ande o nangimos; ame sam marde, phiras katka ai kote; ame kjuvas kai keras butji amare vastensa; prasan ame, ame vazdas; maren, ame ninkeras; prasan ame, ame das duma dragosa, ame aresliam sar o gunoi la lumiako, šiudine katar sa, ži akana. Nai te kerav tumenge lažiav ke me ramosarav tumenge kadala dieli numa me arakhav tume sar muře šiave kai si mange drago. Ke, makar ke avena tumen deš mii birevia ande o Kristo, tumen nai tume but dada, ke sim me kai bariardem tumen ka o Jesus Kristo katar e laši viasta. Mangav tumende, keren sar mande. Pe kudia me tradem tumenge le Timoteo, kai si muřo drago šiav ai čačo ande o Baro; vo mai phenela tumenge save si muře vurmi ande o Kristo, sar me sikiarav kai-godi ande sa le khangeria. Uni si phukiarde ande le barimata, sar te na avav me karing tumende. Numa me sigo avava tumende, te kamela o Baro, ai me žianava, na le vorbi, numa e zor kudalengi kai phukile. Ke e amperetsia le Devleski nai ferdi ande le vorbi, numa ande e zor. So kamen tume? T'avav tumende jekha rovliasa, vai kamimasa ai ande jekh duxo kovlo? Ašunas ke phenen pa tumende sakda ke si maškar tumende kurvetsia, ai jekh kasavi kurvetsia kai inke nai ka kudala kai či patian; kadia griatsa ke jekh anda tumende si les e řomni leske dadeski. Ai tume kerdilian barimatange! ai tume či sanas mai sigo ande o nekazo, eta ke kudo kai kerdias kudia te šiuden les dur tumendar! Mange, nai kothe muřo stato, numa si muřo duxo, me inke dem pe kris, sar te avilemas kothe, pe kudo kai kerdias kadia. Ande o anav le Baresko o Jesus, tume ai muřo duxo si ande jekh than la zorasa katar o Rai Jesus, ke jekh kasavo manuš te den les ka o Satan te bilavel lesko mas, eta ke o duxo t'avel skipime ka o dies le Baresko o Jesus. Intaino si ke tume luvudisaren tumen. Či žianen tume ke jekh tsiřa drosda uštiavel sa o manřo? Šiuden tumendar e purani drosda, eta tume t'aven jekh manřo nevo, ke tume san bi drosdako, ke o Kristo, amaro bakrořo patradiako, sas mudardo. Vestisaras o prasniko, na la purane drosdasa, na la drosdasa anda e xitrenia ai anda o nasul, numa le manřesa bi drosdako katar o vužimos ai katar o čačimos. Me ramosardem tumenge ande muřo lil te na keren khanči le kurvarensa - na le kurvarensa anda kadia lumia, vai le xanvalensa ai le čorensa, vai kudalensa kai patian ande le kaver dela: aver fialo trubula tume t'anklen avri anda e lumia. Akana, so me ramosardem tumenge, si te na keren khanči unensa kai, akharen pe phral, si kurvari, vai xanžvale, vai kai patian ande le kaver dela vai prasan, vai matiarne, vai čora, te na inke xan kasave manušensa. Ke so si ma, čačes, te dav kris kudalen kai si avri? Nai kudalen kai si andre kai tume trubul te den kris? Kudalen kai si avri, o Del del len kris. Len avri le nasules maškar tumende. Uni anda tumende, kana si les čingar avresa, šai tromal vo te del kris angla kudala kai nai vorta, ai na angla le svintsi? Či žianen tume ke le svintsi dena kris la lumia? Ai t'avela ke tumendar si t'avel dini kris e lumia, či san tume harniči te keren varesavi kris? Či žianen tume ke ame dasa pe e kris le andželon? Ai ame dasa pe kris, sar mai mišto, le dieli kadaleske traioske. Kana si tume čingar pa le dieli ande kado traio, len tumen te del tumen kris manušen kai či patian pe ando Del? Me phenav les tumenge pe tumaro lažiav. Kadia nai maškar tumende ferdi jekh manuš godiaver kai šai lašiarel maškar le phral? Numa jekh phral del kris pe o kaver phral, ai kudia angla kudala kai či patian? Si vuže jekh doš tumende ke si tume krisa jekh pe le kaver. Či avela mai mišto te mukes tu kovlo katar e kris? Či mukes mai mišto te len pa tute? Numa tume xoxaven ai čoren pa le kaver, vi karing le phral tume keren kadia! Či žianen tume ke le nasul či avela lenge e amperetsia le Devleski? Te na šibin tume: či le kurvaria, či kudala kai patian ande le kaver dieli, či le murš kai si sar le žiuvlia, či le čor, či le xanžvale, či le matiarne, či kai prasan, či kai len avrestar, či avela lenge e amperetsia le Devleski. Ai kathe si so sanas tume, uni anda tumende. Numa tume san xalade, numa tume san svintsime, numa pe tumende manai kris ande o anav le Baresko o Jesus Kristo, ai katar o Duxo amare Devlesko. Sa si mange slobodo, numa sa či trubul man; sa si mange slobodo, numa či mukav ma t'avav sluga khančeske. Le xamata si le peřeske, ai o peř le xamaske; ai o Del bilavel le jekh ai le kaver. Numa o stato nai pe e kurvetsia. Si le Bareske, ai o Baro le statoske. Ai o Del, kai živindisardias le Bares, živindila ame katar peski zor. Či žianen tume ke tumaro stato si kotora le Kristoske? Lava me kotora katar o Kristo, te kerav lensa kotora jekha kurvake? Dur kothar! Či žianen tume ke kudo kai astardiol ka jekh kurva si jekh stato lasa? Ke, si phendo, le dui avena ferdi jekh mas. Numa kudo kai astardiol ka o Baro si lesa ferdi jekh duxo. Našen katar e kurvetsia. Uni bezexa kai jekh manuš kerel si avri anda o stato; numa kudo kai del pe ka e kurvetsia kerel bezex korkořo vo pe pesko stato. Či žianen tume ke tumaro stato si o templo katar o Svinto-Duxo kai si ande tumende, kai tume lian katar o Del, ai ke tume či san bare pe tumende? Ke tume sanas kjinde pe jekh baro prešo. Luvudin kadia le Devles ande tumaro stato ai ande tumaro duxo, kai si le Devleske. Pe so si le dieli kai tume ramosardian mange, me gindiv ma ke mišto avela le manušeske te na asbal la žiuvlia. Numa, te las sama te na avel e kurvetsia, ke sako t'avel les leski řomni, ai ke sako řomni t'avel la lako řom. Ke o řom te del ka peski řomni so trubul la, ai ke e řomni te kerel sa kadia karing pesko řom. E žiuvli nai voi bari pe pesko stato, numa lako řom, ai sa kadia, o řom nai vo baro pe pesko stato, numa si leski řomni. Na muken tume jekh avrestar, te na avela pe jekh tsiřa vramia eta te žian te řudjin; porme žian palpale ande jekh than, daratar ke o Satan zumavel tume kai či ninkerdion. Me phenav tumenge kadia t'avel mišto, či kerav me anda kadia jekh ordina. Me kamlemas ke sa le manuš t'aven sar mande; numa sako si les katar o Del jekh so si lesko, jekh kadia, o kaver aver fialo. Ka kudala kai nai ansurime ai ka le phivlia, me phenav ke mišto si te bešen sar mande. Numa te naštin te ninkeren pe, ke t'ansurin pe; ke mai mišto te ansurin tume sar ke te phabon. Ka kudala kai si ansurime, me dav ordina, na me, numa o Baro, ke e řomni te na žialtar katar o řom; (te voi žialatar, ke voi te bešel bi te meritil pe vai te lašiardiol peske řomesa), ai ke o řom te na šiudel peska řomnia. Le kavrenge, nai ke si o Baro, me sim kai phenav: Te si jekh phral ke si les jekh řomni kai či patial, ai ke voi kamel te bešel lesa, te na šiudel la; ai t'avela jekh řomni ke si la jekh řom kai či patial, ai ke vo kamel te bešel lasa, te na šiudel peske řomes. Ke o řom kai či patial si svintsime katar e řomni, ai e řomni kai či patial si svintsime katar o phral; aver fialo, tumare šiave či avena vuže, žikin akana von si svintsi. T'avela kudo kai či patial ke hulavel pe, te hulavel pe; o phral vai e phei nai phangle anda kudia. O Del akhardias amen te traisaras ande e patia. Ke so žianes tu, řomnio, te skipisa tu tjire řomes? Vai so žianes tu, řoma, te skipisa tjiria řomnia? Ferdi, ke sako te phirel sar si e partia kai dias les o Baro, sar si akhardo katar o Del. Kadia si ke me dav ordina ka sa le khangeria. Varekon si akhardo kana sas šindo, te bešel šindo; varekon si akhardo kana nas šindo, te na šinel pe. Te aven šinde vai bi-šinde nai khanči, numa te len sama le poronki le Devleske si sa. Ke sako te bešel sar sas kana sas akhardo. San tu akhardo kana sanas řobo, na le tu sama; numa te daštis tu t'aves skipime, mai mišto t'avel tuke. Ke o řobo kai si akhardo ande o Baro si jekh muklo katar o Baro; sa jekh fialo, o manuš slobodo kai si akhardo si jekh řobo le Kristosko. Tume san kjinde pe jekh baro lov; te na aresen řoburi le manušenge. Ke sako, phralale, bešel angla o Del sar vo sas kana sas akhardo. So si pe le pativalia, nai ma ordina katar o Baro, numa phenav so gindiv ma, sar ke te lem katar o Baro mila t'avav čačo. Eta so me gindiv ma ke si lašio, pala kadia vramia trudno; mišto avela jekhe manušeske te bešel kadia. San tu phanglo ka jekh žiuvli, na rode te šines kudo phanglimos; či san tu phanglo ka jekh žiuvli, na rode jekha žiuvlia. Te san tu ansurime, tu či kerdian bezexa; ai te si e pativali ke meritisaili, nai la bezex; numa kudala žene avela len bunto ande lengo mas, ai me kamavas te duriaras les tumendar. Eta so me phenav, phralale, ke e vramia si skurto; ke de akanara kudala kai si le řomnia t'aven sar ke nai le, kudala kai roven sar ke te na roven, kudala kai veselin pe sar ke te na veselin pe, kudala kai kjinen sar ke nai len khanči, ai kudala kai len anda e lumia sar ke či len, ke o mui kadala lumiako nakhela. Eta, me kamlemas te na daran či jekh fialo. Kudo kai nai ansurime lel sama le dieli le Bareske, sar t'avel drago le Bareske; ai kudo kai si ansurime lel sama katar le dieli la lumiake, sar t'avel drago peska žiuvliake. Nai sa jekh fialo e žiuvli ai e pativali: kudia kai nai meritime lel sama le dieli le Bareske, eta t'avel svinto ande o stato ai ande o duxo; ai kudia kai si meritime lel sama le dieli la lumiake, sar t'avel drago peske řomeske. Me phenav kadia tumare mištimaske; nai t'astarav tumen ande e kletka, si te ningerav tumen ka o mištimos ai ka o vužimos t'astardion ka o Baro sar san. Te si varekon ke dikhel sar jekh lažiav peska tomnime ke nakhli e vramia ai si vuže šei bari, ai ke musai te ansuril la, te kerel so vo kamel, vo či kerel bezex; ke ansuril la. Numa kudo kai lias kudia zurales, bi te thon pe leste zor ai dias pe godji ande pesko ilo te na ansuril peska šeia kudo kerel mišto. Kadia, kudo kai ansuril peska šeia kerel mišto, ai kudo kai či ansuril la kerel mai mišto. Jekh řomni si phangli kana lako řom si živindo; numa te merela o řom, lake si slobodo te meritil pe kasa voi kamel; ferdi, t'avel ande o Baro. Voi mai veselo avela, kadia, te bešel voi sar si, sar me phenav. Ai vi me, gindiv ma ke si ma o Duxo le Devlesko. So si pala o mas šinado le kavre devlenge? Ame žianas ke amen si sa so žianas, — o sikiarimos phukiarel, numa e mila vazdel. Te si varekon ke gindil pe ke žianel vareso, vo inke či žianel sar trubul te žianel. Numa te si varekon ke kamel le Devles, kudales vo prinžiarel les. Pala so si ke te xan mas kai si šinado le kavre devlenge ame žianas ke nai von khanči ande e lumia, ai ke si ferdi jekh Del. Ke, te si manuš ke akharen le dela, t'avela ande o čeri, t'avela pe e phuv, sar ke čačes si but dela ai but bare, numa amenge si ferdi jekh Del, o Dad, kastar aven sa le dieli ai kaske ame sam, ai ferdi jekh Rai o Jesus Kristo, kastar si sa le dieli ai kastar ame sam. Numa kudo žianglimos nai ka sa. Uni, sar von mai len sama katar le vobrazi, xan anda kudala masa sar si šinade ka le vobrazi, ai lengi godji, kai si kovli, si mahrime. Nai ke si jekh xamos te pašiarel ame ka o Del: t'ame xasa, amen nai ame khanči mai but; te na ame xasa, amen nai ame khanči mai xantsi. Len tume sama, univar, ke tumaro skipimos te na avel te peravel tele le kovles. Ke, te si varekon ke dikhel tu, tu kai žianes, bešes pala e skafidi ande jekh templo kavre devlesko, vo kai si kovlo, či xala vo pa kudia le masa šinade ka le kaver devlenge? Ai kadia o kovlo xasavola katar tu žianes, o phral pala savo o Kristo mulo! Ke keres kadia bezex pe le phral, ai ke rimos lengi godji kovli tu keres bezex pe o Kristo. Sa anda kudia, te si jekh xamos ke nai mišto muře phraleske, me či xava šoha mas, eta te na kerav te perel muřo phral. Či sim me skepime? Či sim me apostolo? Či dikhlem me le Kristos amare Bares? Či san tume muři butji ande o Baro? Te si le kavrenge ke me či sim apostolo, me sim les tumenge; ke tume san e pečata katar muřo apostolo ande o Baro. Kadia si te čačiuvav pe kudala kai thon beda pe mande. Nai amenge slobodo te xas ai te pias? Nai amenge slobodo te ningeras amensa jekha pheia ke te si amari řomni, sar keren le kaver apostoli, ai le phral le bareske ai o Petri? Vai mai mišto, si ferdi me ai o Barnabas kai amen nai amenge slobodo te na keras butji? Kon si kudo kai služil ketano pe peske love? Kon si kudo kai thol jekh rez, ai či xal anda late e fruta? Kon si kudo kai bariarel bakrian, ai či pravarel pe anda o thud kudale bakriango? Kadala dieli kai me phenav, si von ferdi so keren le manuš? O Zakono či phenel vo vi kadia? Ke si ramome ande o Zakono katar o Moše: Tu či phandesa o mui le guruvesko kana inčarel e simintsa. Ke o Del lel sama katar o guruv. Vai del vo duma ferdi anda amende? E, si pala amende ke si ramome ke kudo kai bariarel trubul te bariarel ažiukerimasa, ai kudo kai inčarel e simintsa ažiukerel t'avel les jekh partia. Te ame thodiam simintsa maškar tumende le lašimata duxoske, si jekh bari diela t'avela ke ame kjidas tumare mištimata so si pe e phuv? Te si le kaver ke veselin pe anda kudia pe tumende, nai mai mišto ame te veselisaras? Numa ame či kamliam te las so si amaro; aver fialo, ame kjinuisaras sa, eta te na thas bař anglal ka e Laši Viasta le Kristoski. Či žianen tume ke kudala kai keren butji ande le thana svintsime si pravarde katar o templo, ke kudala kai služin ka o altari si len partia ka o altari? vi sa kadia si, o Baro dias ordina ka kudala kai phenen e Laši Viasta te train katar e Laši Viasta. Me či lem khanči so si mange slobodo, ai nai ke me mangav vareso ke me ramosardem kadia; ke me mai mišto te merav sar te mukav le te len mandar kudo mištimos. Te si te phenav e Laši Viasta, nai mange jekh diela te vesti ma, ke si pe mande thodino kudia, ai nasul t'avel mange te na phenava e Laši Viasta! Te kerava kado mištimasa anda o ilo, nai te pokjinen mange; numa te kerava makar ke či kamav, si jekh pharimos pe mande. So si muřo pokjinimos? Si te dav ivia e Laši Viasta kai me phenav, bi te dav opral so si muřo zakono te dav duma pa e Laši Viasta. Ke, makar ke me sim slobodo katar savoře, me kerdilem sluga savořengi, eta te nirisarav sar mai buten. Le Židovonsa, me simas sar Židovo, eta te niriv le Židovon; kudalensa kai si tela o zakono, me simas sar tela o zakono (makar ke me či sim tela o zakono), eta te nirisarav len; kudalensa kai nai len zakono, me simas sar bi zakonosko (makar ke či sim bi le zakonosko katar o Del, ke sim tela o zakono le Kristosko), eta te niriv kudalen kai nai len zakono. Me simas kovlo le kovlensa, eta te niriv le kovlen. Me kerdilem sa savorenge, eta te skipiv varesar unen. Me kerav sa pala e Laši Viasta, eta t'avel man partia. Či žianen tume ke kudala kai našen ande o tsirko našen savoře, numa ke ferdi jekh niril o prešo? Našen kadia te nirin. Sa kudala kai maren pe len pe sako fialo sama, ai von keren kudia te len jekh kurona kai rimol pe; numa ame, keras kudia pala jekh kurona kai či rimol pe. Me kadia, me našav, sar te aresav; me malavav, na malavav e balval. Numa me zurales ninkerav muřo stato ai kerav t'avel sar me kamav, daratar ke šai te šiuden vi man, pala ke dem duma le kavrenge. Phralale, me kamav tume te žianen ke amare dada von sas sa tela o nuvero, ke von sa nakhle inčial e maria, ke von sa sas ambolde ande o Moše ai ande o nuvero la mariako, von sa xale sa o jekh xamos duxosko, ai ke von sa pile o jekh pimos duxosko, ke von penas ka jekh stanka duxoski kai žialas pala lende, ai kudia stanka sas o Kristo. Numa but anda lende nas drago le Devleske, ke von xasaile ande e pusta. Eta, kudala dieli aresle te sikaven amenge, eta te na avel amenge nasul so ame kamas, sar sas len. Na aresen te patian le kavre dela, sar uni anda lende, sar si ramome: O narodo bešlo te xal ai te pel; porme uštilo te khelel pe. Te na das ame ka e kurvetsia, sar uni anda lende kai dine pe, kadia ke pele tele biš ai trin mii ande jekh dies. Te na zumavas le Bares, sar kerde uni anda lende, kai xasaile katar le sapa. Na bulguin, sar bulguinas uni anda lende, kai xasaile katar kudo bilavel len o andželo. Kudala dieli areslias lenge te sikaven amenge, ai von sas ramome te sikiaren ame, amenge kai aresliam ke geton pe le berš. Si kadia, ke kudo kai gindil ke si pe punřende te lel pe sama te na perel tele! Či jekh zumavimos kai zumade ame či avilo te nas katar le manuš, ai o Del, kai si čačo, či mukela tumen te zumaven tumen mai but sar si tumari zor; numa le zumamasa vo lašiarel vi sar tume t'anklen avri, eta ke tume te šai ninkeren. Sa anda kudia, muře kuč dragi, našen katar so nai le Devlesko. Me dav duma sar ka le manuš godiaver; den pe kris so me phenav. O taxtai le svintsimasko kai ame svintsisaras, nai ke ame sam le ratesa le Kristosko? o manřo kai ame phagas, či sam ame le statosa katar o Kristo? Sar si ferdi jekh manřo, ame kai sam but, ame keras amenge jekh ferdi stato; ke ame xas sa ande ferdi jekh manřo. Dikhen le Israeliton sar si lengo mas: kudala kai xan so si šinado nai von ande jekh than le altaresa? So phenava me? Ke o mas šinado statoske katar xoxamno del si vareso, vai ke jekh stato si vareso? Khanči. Me phenav ke so den sakrifiso, den sakrifiso ka le demonuri, ai na ka o Del; eta, me či kamav t'aven tume le demononsa. Tume naštin te pen o taxtai le Baresko, ai o taxtai le demonongo; tume naštin te bešen pala e skafidi le Bareski, ai pala e skafidi le demonongi. Kamen tume te vazden e žaluzia le Bareski? Sam ame mai zurale lestar? Sa si slobodo, numa sa či trubul; sa si slobodo, numa sa či lašiarel. Ke khonik te na rodel so si lašio leske, numa ke sako te rodel so trubul le kavres. Xan sogodi bikjindiol pe o bazari, bi te les sama pala so si tu ande e godji; ke le Devleske si e phuv ai sa sogodi si ande late. Ke te si jekh kai či patial akharel tu gosto ai ke tu kames te žias, xa sogodi dena tu, bi te les sama khanči pala tjiri godji. Numa te si varekon te phenel tuke: Kako si jekh sakrifiso, na xa, pala kodo kai phendias tuke, ai pala e godji. Me dav duma kathe, na anda tumari godji, numa pala le kavreski. Sostar, čačes, muřo skipimos avela pe e kris katar e godji streino? Te xava me le řudjimasa, sostar prasana ma pala jekh diela kai naisardem? T'avela ke tume xan, t'avela ke tume pen, t'avela ke tume keren aver diela, keren sa pe e dragostia le Devleski. Te na aven tume diela ke peren le Grekuri ande e bezex, či le Židovuri, či e khangeri le Devleski, sa jekh fialo ke vi me thav zor sako fialo t'avav drago savořenge rodav, na so trubul ma, numa kudalenge kai si mai but, eta t'aven skipime. Keren sar mande, sar me sim anda o Kristo. Me luvudiv tumen ke tume den tume godji anda mande ai ke tume ninkeren so sikiardem tumen. Me kamav numa ke tume te žianen ke o Kristo si o birevo sakone manušesko, ke o manuš si o birevo la žiuvliako, ai ke o Del si o birevo le Kristosko. Sako manuš kai řudjil vai kai phenela so avela mai angle, o šero stadiasa, del pe o lažiav peske birevos. Sako žiuvli, aver fialo, kai řudjil vai kai phenel so avela, o šero bi dikhlesko, del pe o lažiav peske birevos: sar ke te si řangli. Ke te si jekh žiuvli ke nai la dikhlo, ke te šinel vi peske bal. Eta, te si lažiav jekha žiuvliake t'avel lake bal šinde vai t'avel řangli, te thol dikhlo. O manuš či trubul te garavel pesko šero, ke vo si o vobrazo ai o vestimos le Devlesko, žikin e žiuvli si o vestimos le manušesko. Čačes, o manuš nai ankalado anda e žiuvli, numa e žiuvli si ankaladi anda o manuš; ai o manuš nas kerdo pala e žiuvli, numa e žiuvli sas kerdi pala o manuš. Sa anda kudia e žiuvli, pala le andželi, trubul t'avel la pe o šero jekh semno kaski voi si. Numa, ande o Baro, e žiuvli nai bi le manušesko, či o manuš bi la žiuvliako. Ke, sar ke e žiuvli sas ankaladi anda o manuš, sa kadia o manuš si les traio katar e žiuvli, ai sa avel katar o Del. Den tume pe kris: mišto avela ke e žiuvli řudjil le Devles bi dikhlesko? So si pe lumia či sikiarel tumen ke si lažiav le manušeske t'avel les bal lunzi, numa ke si jekh luvudimos la žiuvliake t'avel la, ke le bal sas lake dine sar jekh dikhlo? Te si varekon ke si leske drago ke nai kadia, amen nai amen aver zakono, ai le khangeria le Devleske nai len aver zakono. Kai phenav tumenge t'arakhen tume, me či luvudiv tumen, ke tume kjiden tume, na t'aven mai laše, numa te mai rimon tume. Ai angla savořende, me ašundem ke, kana tume kjiden tume ande jekh than, si maškar tumende hulaimos, — ai me gindiv tsiřa kudia, (ke trubul vi t'avel aver patiamata maškar tumende, eta ke dikhen kudalen maškar tumende kai si čače.) Kana tume kjiden tume, nai te xan o xamos le Baresko; Ke, kana thon tume pala e skafidi, sako lel pesko xamos, ai o jekh si bokhalo, žikin o kaver si mato. Nai tume tumen khera te xan ai te pen ande lende? Vai vuřitsin tume e khangeri le Devleski, ai keren tume lažiav kudalenge kai nai len khanči? So phenava tumenge me? Luvudiva me tumen? Ande kadia me či luvudiv tumen. Ke me lem katar o Baro so me sikadem tumen; si ke o Rai o Jesus, ande e riat kai sas dino ande o vast, lias manřo, ai, pala ke řudjisardias, phaglias les, ai phenel: Kako si muřo stato, kai si phaglo pala tumende; keren kadia kana den tume godji mande. Sa jekh fialo, pala ke xale, vo lias o taxtai, ai phenel: Kado taxtai si e nevi patia ande muřo rat; keren kadia kana den tume godji mande sako data kai tume pen. Ke sako data ke tume xan kado manřo ai ke tume pen kado taxtai, tume phenen ke mulo o Baro, žikin či avela palpale. Sa anda kudia kudo kai xala o manřo vai pela o taxtai le Baresko bi te žianel, avela došalo karing o stato ai o rat le Baresko Ke sako te zumavel pe, ai kadia te xal anda o manřo ai te pel anda o taxtai; ke kudo kai xal ai kai pel bi te lel sama o stato le Baresko, xal ai pel jekh kris pe peste. Si anda kudia ke si maškar tumende but bange ai nasvale, ai ke uni mule. Te dasa e kris amen, ame či avasa dine pe e kris. Numa kana ame avasa dine pe e kris, ame avasa dine strafo katar o Baro, eta ame te na avas dine strafo la lumiasa. Kadia, muře phralale, kana tume kjiden tume te xan, ažiukeren jekh avres. Te si varekon ke si bokhalo, te xal peste, eta te na kjiden tume t'avel kris pe tumende. Me lašiarava le kaver dieli kana aresava tumende. Pe so si le dinimata duxoske, me kamav, phralale, ke tume te žianen. Tume žianen ke, kana tume san te na patian, tume žian karing le staturi mutsi, sar tume sanas ningerde. Sa anda kudia me phenav tumenge ke khonik, te dela duma katar o Duxo le Devlesko, či phenel: O Jesus si armandino! ai khonik naštil te phenel: O Jesus si o Baro! te na avela katar o Svinto-Duxo. Si but fialuri so del o Del, numa feri jekh Duxo; but službiri, numa feri jekh Baro; But so šai keren, numa sa o jekh Del kai kerel sa ande sa. Eta, sakoneske si les dino o Duxo t'avel lašio savořenge. Čačes, ka jekh si dini katar o Duxo e putiaria te del duma katar e godji; ka o kaver, te del duma katar o žianglimos sa anda kodo Duxo; ka jekh kaver, o patiamos, sa katar kodo Duxo, ka o kaver den les e putiaria te sastiarel, sa katar jekh Duxo; ka jekh kaver, si les e putiaria te kerel čudeni; ka jekh kaver, te del duma ande o anav le Devlesko ka jekh kaver, te lel sama save si le duxuri; ka jekh kaver, te del duma pe le šiba; ka jekh kaver, te tolmačil kudia šib. Jekh ferdi ai jekh fialo Duxo kerel sa kudala dieli, den le ka sakoneste sar vo kamel. Ke, sar o stato si jekh ai si les but kotora, ai sar sa le kotora le statoske, makar ke si von but, si ferdi jekh stato, kadia si ande o Kristo. Amen si amen sa, čačes, bolde ande jekh Duxo, t'avel amen jekh stato, te sam Židovuri, te sam Grekuri, te sam řoburi, te sam skipime, ai ame sa sam pravarde katar ferdi jekh Duxo. Kadia o stato nai vo ferdi jekh kotor, numa si kerdo anda but kotora. Te phenela o punřo: Sar ke me či sim jekh vast, me či sim anda o stato — či avela vo anda o stato anda kudia. Ai te o kan phenela: Sar ke me či sim jekh jakh, me či sim anda o stato — či avela vo anda o stato anda kudia. Te sa o stato te avilinosas jakh, sar sas t'ašunel? Te avilinosas sa kan, sar sas te šiungel? Akana o Del thodias sako kotor ande o stato sar vo kamlias. Te sas te avilinosas ferdi jekh kotor, kai sas t'avel o stato? Akana si but kotora, ai ferdi jekh stato. E jakh naštil te phenel le vasteske: Tu či trubus ma; či o šero te phenel le punřenge: Tumen či trubun ma. Numa mai mišto, le kotora le statoske kai miazon ke si le mai kovle trubun; ai kudala kai ame gindisaras ke si mai tsiřa te trubun le statos, ame las lendar sama mai mišto. Kadia amare kotora le mai tsiřa pativale si len mai bari pativ, žikin kudala kai si pativale či trubul len. O Del lašiardias o stato kadia te del pativ kudalen kai nai le, eta te na hulavel pe o stato, numa ke le kotora te len sama jekh katar le kaver. Ai te si ke jekh kotor kjinuil, sa le kotora kjinuin lesa; te si jekh kotor ke den les pativ, sa le kotora veselin pe lesa. Tume san o stato le Kristosko, ai tume san leske kotora, sako pe peski partia. Ai o Del thodias ande e Khangeri angla savořende le apostolon, pe e duito le profeton, pe e trito le doxtoron, atunči kudalen kai si le dino te keren čudeni, porme kudalen kai si len dino te sastiaren, te ažutisaren, te porončin, te den duma but šiba. Sa si von apostoli? Sa si von profeturi? Sa si von doxtori? Sa si len o dinimos te keren čudeni? Sa si len o dinimos te sastiaren? Sa den von duma pe le šiba? Sa von tolmačin? Mangen le dinimata le mai laše. Ai me mai kamav te sikavav tumenge jekh mai laši vurma. Makar ke me dava duma le šiba le manušenge ai le andželonge, te na avela ma dragostia, me sim sar jekh duba kai bašel, vai jekh tsimbala kai ašundiol. Ai makar ke avela ma o dinimos te dav duma pe mai angle, o godjimos katar sa le čudeni ai te žianav sa, kana makar avela man sa o patiamos žikin šai te pařuvav pa o than le plaia, te na nai ma e dragostia me či sim khanči. Ai makar kana dava sa muře barvalimata te pravarav le čořen, makar kana me dava muřo stato te phabaren les, te na nai ma e dragostia nai mange khanči kodo. E dragostia ažiukerel, voi si pherdi lašimos; e dragostia či kamel te lel avrestar; e dragostia či luvudil pe, voi či phukiarel pe barimatangi, voi či kerel khanči nasul, voi či rodel te niril, voi či xoliavol, voi či gindil pe ka o nasulimos, voi či veselil pe anda kai nai vorta, numa voi veselil pe anda o čačimos; voi či mukel, voi šai daštil sa, voi ažiukerel sa, voi ninkerel sa. E dragostia či xasavola šoha. Le dieli kai phenena ke avena getona pe, le šiba ašena, so žianen bilala. Ke ame žianas jekh partia, ai ame phenas so avela jekh partia, numa kana so si vorta avela, so si partia bilala. Kana me simas glata, me davas duma sar glata, me gindivas ma sar jekh glata, me davas ma duma sar jekh glata; kana me areslem murš, me kerdem te bilal so sas glatako. Adies ame dikhas sar ande jekh glinda, kai či dikhas mišto ande late, numa atunči ame dikhasa fatsa pe fatsa; adies me žianav jekh partia, numa atunči me žianava sar žianel man o Del. Akana kakala trin dieli bešen: o patiamos, o ažiukerimos, e dragostia; numa e mai bari anda kudala trin dieli, si e dragostia. Rode e dragostia. Mangen le dinimata duxoske, numa mai but e putiaria te del duma ande o anav le Devlesko. Čačes, kudo kai del duma pe le šiba či del duma ka le manuš, numa ka o Del, ke khonik či hatiarel les, ai si katar o duxo ke phenel čudeni. Kudo kai del duma ande o anav le Devlesko aver fialo, del duma le manušenge, zuriarel le, vazdel le, miluil le. Kudo kai del duma pe le šiba zuriarel pes; kudo kai del duma so avela zuriarel la Khangeria. Me kamav te den tume duma sa pe le šiba, numa mai but te del duma ande o anav le Devlesko. Kudo kai del duma kudia si mai baro sar kudo kai del duma pe le šiba, te na avela varekon te tolmačil, te lel te zuriavol e Khangeri. Ai akana, phralale, so avava me tumenge lašio, t'avilemas te dav duma sa pe le šiba, ai te na dava tumensa duma so sas mange sikado, vai so žianav, vai so avela, vai so sikilem? Si le dieli kai či train si len jekh bašimos, sar jekh fluta vai sar jekh harpa. Te nai len bašimos vužio, sar žianasa ame so ašunas kana gjilaben pe e fluta vai pe e harpa? Ai te si ke e tuturiaza nai la jekh bašimos vužio, kon šai lašiavol te marel pe? Sa jekh fialo tume, te si katar e šib te na dena tume jekh vorba te hatiaren, sar žianena von so tume phenen? Ke tume den duma pe e balval. Si ande e lumia le but šiba, nai či jekh te na avel gindo ande late; te na hatiarava me so phenel kudia šib, me sim jekh sirbato kudaleske kai del duma, ai kudo kai del duma avela jekh sirbato mange. Sa jekh fialo tume sa kamen le dinimata duxoske, roden kudala kai zuriaren e khangeri. Sa anda kudia, kudo kai del duma pe e šib te řudjil t'avel les te tolmačil. Ke me řudjiv pe e šib, muřo duxo si ande o řudjimos, numa muři godji bešel khančeski. So te keras? Me řudjiva katar o duxo, numa me vi řudjiva la godiasa; me gjilavaba katar o duxo, numa me gjilabava vi la godiasa. Aver fialo, te naisisa tu katar o duxo, sar šai jekh manuš kai šunel te del vo palpale Amen! kana tu naisis, ke vo či žianel so tu phenes? Tu des, si čačes, laše dieli naisimaske, numa o kaver či lel khanči. Me naisiv le Devles sar ke me dav duma pe le šiba mai but sar tume sa; numa, ande e Khangeri, mai drago mange te phenav panž vorbi muřa godiasa, eta te sikiarav vi le kavren, ke sar de mii vorbi ande jekh šib bi-žiangli. Phralale, te na aven glati tela e kris; numa pe e xitrenia, aven glati, ai, karing e kris, kerdion řom. Si ramome ande o Zakono: Si katar le manuš kai den duma pa jekh kaver šib ai katar le vuš streino ke me dava duma ka kado narodo, ai von či ašunena inke mande, phenel o Baro. Sar si kadia, le šiba si jekh semno, na kudalenge kai patian, numa kudalenge kai či patian; e duma ande o anav le Devlesko aver fialo, si jekh semno, na kudalenge kai či patian, numa kudalenge kai patian. T'avela kadia, ande jekh kjidinimos la Khangeriako, ke sa den duma pe e šib, ai ke aven manuš anda o narodo vai kai či patial, či phenena von ke tume san dile? Numa te den duma tume ande o anav le Devlesko ai ke avel varekon kai či patian vai jekh manuš anda o narodo, savoře keren les te hatiarel vo si dino kris savořendar, le garaimata anda lesko ilo si sikade, perel pe peski fatsa, vo kamel le Devles, ai phenela angla o narodo ke o Del si čačes maškar tumende. So te keras, phralale? Kana tume kjiden tume, le jekh vai le kaver maškar tumende si len jekh psalmo, jekh te sikavel, jekh te del duma pe le šiba, jekh te tolmačil, ke sa te zuriarel e khangeri. Si kai den duma pe e šib, ke dui vai trin mai but den duma, sako pala avreste, ai ke si varekon te tolmačil; te nai khonik te tolmačil, t'ašen ande e Khangeri, ai ke te den duma ande tumende ai ka o Del. So si katar le profeturi, ke dui vai trin te den duma, ai ke te le kaver le len sama; ai te si jekh kaver kai bešel ai si les vareso te del duma katar o Del, ke o mai angluno t'ašel. Ke tume sa šai phenen so avela jekh pala kavreste, eta ke sa te sikion ai ke sa t'aven vazdine. Le duxuri le profetonge keren so mangen le profeturi; ke o Del nai Del kai phařavel, numa o Del la patiako. Sar ande sa le khangeria le svintsonge, ke e žiuvli t'ašel kai kjiden pe, ke nai lake slobodo te del duma; numa te kerel sar phenen lake, sar ke vi phenel o zakono. Te kamena von te sikion pe vareso, ke te pušen katar penge řom ande o kher; ke nai mišto jekha žiuvliake te del duma ande e khangeri. Si tumendar ke e vorba le Devleski anklisti avri? vai si ke ferdi ži tumende avili? Te si varekon ke gindil pe ke si vo profeto vai ke si les dinimata duxoske, ke te žianel ke so me ramosarav tumenge si jekh poronka katar o Baro. Ai te si varekon ke či lel sama, te na len sama lestar. Kadia, si, phralale, mangen t'avel tumen te den tume te phenen so avela, ai muken te den duma pe le šiba. Numa sa te kerdiol sar mai mišto ai ordinasa. Me mai phenav tumenge phralale, e Laši Viasta kai me phendem tumenge, kai tume lian, ande savi tume žian angle — latar tume san skipime, te ninkeren tume so me phendem tumenge. Aver fialo, tume patianas intaino. Me sikiardem tumen angla savořende sa, sar me lem, ke o Kristo mulo pala amare bezexa, sar sas le Ramomata. Vo sas angropome, ai ke vo živindisailo o trito dies, sar si le Ramomata; ai ke sikadilo ka o Petri, porme le deš-u-donge. Atunči, vo sikadilo ka mai but de panž šela phral anda jekh data, kai but anda lende mai si živinde, makar ke uni mule. Atunči, vo sikadilo ka o Jakob, porme ka sa le apostoli. Pala lende sa, vo sikadilo vi mange, sar jekh šiav arakhadilo pala e vramia; ke me sim o mai tsinořo anda le apostoli, me či sim harniko t'akharen ma apostolo, ke me mardem e Khangeri le Devleski. Katar o mištimos le Devlesko me sim so sim, ai lesko mištimos karing mande nas intaino; dur kothar, me kerdem butji but mai but sar savoře; na me, numa o mištimos le Devlesko kai si ande mande. Kadi si, ke te si me, ke te si von, eta so ame phenas, ai so tume patian. Eta, te dena duma pa ke o Kristo uštilo anda le mule, sar uni maškar tumende šai phenen von ke či živindin le mule? Te na živindina le mule, či o Kristo nai živindo. Ai te nai o Kristo živindo, amaro divano nai khančesko, ai vi tumaro patiamos nai khančesko Šai vi t'avel kadia ke ame sam falši martururi karing o Del, ke ame sam martururi pe o Del ke vo živindisardias le Kristos, numa te si ke le mule či živindin, vo či živindisardias les. Ke te si ke le mule či živindin, o Kristo vi vo či živindisailo. Ai te si ke o Kristo či živindisailo, tumaro patiamos si intaino, tume mai san ande tumare bezexa, ai anda kudia vi kudala kai mule ande o Kristo si xasarde. Te si ferdi ke ande kado traio ke ame patias ande o Kristo, ame sam le mai nekežime anda sa le manuš. Numa akana, o Kristo živindisailo anda le mule, vo si o mai angluno anda le mule. Ke, sar ke o merimos avilo ferdi katar jekh manuš, si vi katar jekh manuš ke avilias o živindimos katar le mule. Ai sar ame meras ande o Adam, sa kadia ame traisaras ande o Kristo, numa sako ande pesko řindo, o Kristo sar o mai angluno, porme kudala kai si le Kristoske, kana vo avela. Atunči avela te getol pe sa, kana vo dela e amperetsia ka kudo kai si Del ai Dad, pala ke bilavela sa kai porončinas, sako baro ai sako zor. Ke vo trubul te amperetsil žikin či sa leske dušmaia t'aven tela leske punře. O mai paluno dušmano kai avela bilado, si e martia. O Del, čačes, sa thodias tela peske punře. Numa kana vo phenel ke sa si tela leste, si sikado ke kudo kai si baro pe sa le dieli vo či perel. Ai kana sa le dieli avena tela leste, atunči vi o Šiav inke avel tela leste ande sa le dieli, eta ke o Del t'avel sa ande sa. Aver fialo, so kerena kudala kai bolen pe pala le mule? Te si ke či jekh fialo či ušten le mule, sostar bolen pe von pala lende? Ai ame, sostar sam ame sako časo ande o xasamos? Sako dies šai te merav, me žianav, phralale, katar o vestimos kai tume san mande, ande o Jesus Kristo amaro Baro. Te si pala o zakono manušesko ke me mardem ma pe e žigania ande o Efeso, so nirisardem me? Te le mule te na živindina, xas ai pias, ke tehara ame meras. Te na šibin tume: le žiungale vortača rimon le laše dieli so keren. Aven tumende, sar mai trubul, ai na keren bezexa; ke uni či žianen le Devles; me phenav les pe tumaro lažiav. Numa uni phenena: Sar živindina le mule, ai če statosa avena von. Dile! so tu thos te bariol či avela te trailo, te na merela. Ai so tu bariares, nai ke si o stato kai arakhadiol; si ferdi jekh tsinoři simintsa, anda o gjiv amburim, vai anda varesavi simintsa; Porme o Del del les stato sar vo kamel, ai ka sako simintsa vo del jekh stato sar si lesko. Sako mas nai sa jekh fialo mas; numa aver si o mas le manušengo, aver si kudalengo si len štar punře, aver si le čirikliango, aver si le mašengo. Vi mai si staturi le čereske ai staturi la phuviake; numa aver fialo si te strefian le čereske, aver le phuviake. Aver fialo strefial o kham, aver fialo strefial o šiunuto, ai aver fialo strefian le čeřaia; inke jekh čeřai či strefial sar jekh kaver čeřai; Kadia si kai živindin le mule. O stato si thodino te bariol rimome, vo živindila bi rimome; vo si thodino te bariol vuřito, vo živindila vestime; vo si thodino te bariol bango, vo živindila pherdo zor; vo si thodino te bariol stato žiganiako, vo živindila stato duxosko. Te si jekh stato žiganiako, vi mai si jekh stato duxosko. Sa anda kudia si ramome: O mai angluno manuš, o Adam, areslo jekh živindo. O mai paluno Adam areslo jekh duxo živindo. Numa so si duxosko nai o mai angluno, so si masesko si; so si anda o duxo avel pala kudo. O mai angluno manuš, tsirdino anda e phuv, si phuviako; o duito manuš si anda o čeri. Sar o manuš phuviako, kadia si vi le phuviake; ai sar o manuš čeresko, kadia si vi le čereske. Ai sa sar jekh fialo ame ninkerdiam o vobrazo la phuviako, ame ninkerasa vi o vobrazo le čeresko. So me phenav, phralale, si ke o mas ai o rat naštin te len e amperetsia le Devleski, ai ke o rimome naštil te lel so nai rimome. Eta, me phenav tumenge jekh čudenia: ame či merasa sa, numa ame sa avasa pařude, ande jekh vramia, sar marel e jakh, ka e mai paluno tuturiaza. E tuturiaza bašela, ai le mule uštena bi rimome, ai ame, ame avasa pařude. Ke trubul ke kado stato rimome thol pe peste so nai rimome, ai ke kado stato merimasko lel pe peste o stato kai či merel: kana kado stato rimome lela pe peste so či rimol pe, ai kana kudo stato merimasko lela pe peste so či merel, atunči aresela e vorba kai si ramome: E Martia si tasadi anda o nirimos. O martia, kai lo tjiro nirimos? O martia, kai la tjiri suv? E suv le merimaski, si e bezex; ai e zor la bezexaki, si o zakono. Numa nais le Devleske, kai del ame te nirisaras katar o Rai o Jesus Kristo! Kadia, muře phral pria drago, bešen zurales, te na miškin tume, keren butji sar mai mišto ka e butji le Bareski, žianen ke tumari butji či avela intaino ande o Baro. Pala so si te kjidas love te keras mištimos le svintsonge, keren, vi tume, sar me dem ordina ka e Khangeri katar e Galatia. Ke sako anda tumende, o mai angluno dies katar o kurko, te thol rigate peste so šai daštil, sar si lesko barvalimos, eta te na ažiukeren ži kana me avava te lav so tume den. Ai kana me avava, me tradava lilensa, te ningeren so tume den ande o Jerusalem, le žene kai tume alosardian. Te trubula e diela ke te si te žiav me, von avena mansa. Me žiava tumende kana nakhava pa e Makedonia, ke me nakhava pa e Makedonia. Amburim me bešava paša tumende, vai inke šai te nakhav o iven, eta te žian mansa kothe kai me žiava. Či kamav kadia data ke ferdi te nakhav tumendar, numa avelas mange drago te bešav tsiřa vramia paša tumende, te o Baro kamela. Me bešava kadia ande o Efeso ži ka e Řusailia; ke jekh vudar baro ai jekh than lašio si mange puterde, ai le dušmaia si but. T'aresela o Timoteo, keren te na avel leske dar maškar tumende, ke vo kerel butji sar mande le Bareske. Ke te na khonik te na vuřitsil les. Žian lesa ande e patia, eta t'avel karing mande, ke me ažiukerav les le phralensa. So si anda o phral Apolos, me but ažutisardem les te žial tumende le phralensa, numa vo či kamel te kerel kudia akana; šai kerel kudia kana trubula. Len tume sama, ningeren o patiamos, aven zurale, zuriaren tume. Ke sogodi so tume keren te keren les kamimasa! Mai jekh poronka kai me tradav tumenge, phralale. Tume žianen ke e familia katar o Stefanas si le mai angluni ande e Axaia, ai ke voi si te služil le svintson. Len sama mišto katar kasave manuš, ai katar sa kudala kai keren jekh butji lensa. Me veseli ma ke si kothe o Stefanas, o Fortunatus ai o Axaikos; von ažutisarde man kana či sanas kathe, ke von kovliarde muřo duxo ai tumaro. Te len sama katar kasave manuš. Le Khangeria anda e Azia den tumen pozdraimos, o Akilas ai e Prisila, la khangeriasa kai si ande lengo kher, den tumen but pozdraimos ande o Baro. Sa le phral den tumen pozdraimos. Den tume pozdraimos jekh kavres katar jekh čimidimos. Me dav tumen pozdraimos, me o Paul, anda muřo vast. Te si varekon ke nai leske drago o Baro, t'avel armandino! Marana ta. Te avel amaro Baro. Ke o dragimos le Baresko o Jesus t'avel tumensa! Muřo kamimos si tumensa ande o Jesus Kristo. Lil katar o Paul, apostolo katar o Jesus Kristo sar kamel o Del, ai katar o phral o Timoteo, ka e Khangeri le Devleski kai si ande o Korinto, ai ka sa le svintsi kai si ande e Gretsia; Ke o dragimos ai e patia t'avel tumenge katar o Del ai katar o Rai o Jesus Kristo! Svintsime t'avel o Del, o Dad amare Baresko o Jesus Kristo, o Del la milako ai o Del kai zuriarel, kai zuriarel amen ande sa amare nekazo, eta ke, katar e zor kai ame si amen katar o Del, ame te šai zuriaras kudalen kai si ande o nekazo! Ke, sar liam but dukha le Kristoske sa jekh fialo lasa jekh baro mištimos katar o Kristo. Te sam ame nekežime, si kudia te len tume e zor ai o skipimos; te liam ame zor, si te len tume e zor te ninkeren sa kudala kjinuimata kai ame ninkeras. Ai so ame ažiukeras karing tumende si zurales, ke ame žianas ke, ke te si vi tumen kjinuimos sar ame, tume vi avela tume mila amensa. Ame kamas, čačes, te žianen tumen, so amen kjinuisaras ande e Azia, ke ame samas pria tela pharimos, mai but so šai ninkerdiam, kadia ke ame darailiam ke či traisaras. Ai ame dikhliam siguro ke si te meras, eta te na patias ame ande amende, numa te thas kudia ande o Del, kai živindil le mulen. Vo si kai skipisardias amen ai skipila amen katar savo merimos, vo katar ame ažiukeras ke si te mai skipil amen. Vi tume ažutisaren ame tumare řudjimansa, eta ke e dragostia kai ame lias katar but žene ai t'avel butenge te naisin pala amende. So si amaro vestimos, si so ame sam martururi amara godiake, ke ame sam tradine ande e lumia, ai mai but karing tumende, vužimasa ai svintsimasa angla o Del, na jekha godiasa manušeski, numa le mištimasa katar o Del. Ame či ramosaras aver diela ferdi so tume gjinen, ai so tume prinžiaren. Ai me gindiv ma ke tume prinžiarena ži ande o gor, sar tume prinžiardian jekh partia ke ame sam tumaro vestimos, sar vi tume avena amaro o dies katar o Rai o Jesus. Ande kado spidimos, me kamavas angla savořende te žiav karing tumende, eta t'avel tumen duvar mištimos; me kamlemas te nakhav tumendar kana žiav ande e Makedonia, porme kana avav anda e Makedonia pale, ai tume te ažutenas man te žiav ande e Judea. Kana kamavas kudia, me simas vušoro? Vai so me gindisailem sas gindo masesko, kadia ke si ande mande o ei ai o niči? Kadia sar ke o Del si čačo, e vorba kai ame phendiam tumenge nas «ei» ai «niči». Ke o Šiav le Devlesko, o Jesus Kristo, kai sas phendo amendar maškar tumende, mandar, ai katar o Silas, ai katar o Timoteo, nai «ei» ai «niči», numa sa «ei» si ke, sar phendias o Del, ande leste si o «ei»; sa anda kudia mai si o «Amen» lestar phendo vi tumenge vi amenge te vestisaras le Devles. Ai kudo kai zuriarel amen ande o Kristo, ai ka svintsisardias amen, si o Del, savo thodias e pečata pe amende ai thodias ande amaro ilo o mai angluno pokjinimos le Duxosko. Eta, me lav marturo le Devles pe muřo duxo, ke si te na rimov tumen ke me či mai avilem ande o Korinto; na te ame porončisaras tumen so te patian, numa te veselisavas tumensa; žianas ke tume ninkeren ande o patiamos. Me gindisailem ande mande te na avav palpale tumende te nekeživ tumen. Ke me te nekeživ tumen, kon šai veselila man, te na kudo kai si nekežime mandar? Me ramosardem sar te na zumavav tumen; kana me aresava, na mangav te avel man nekazo kudalendar kai trubulas te den ma veselia; si ma kudo patiamos ke muři veselia si vi tumari savořengi. Si ande jekh baro nekazo, o ilo darasa, ai but asvensa, ke me ramosardem tumenge, na ke tume te nekežin tume, numa ke tume te žianen savo baro kamimos si ma tumenge. Te si varekon kai nekežisardias kavres o nekazo, či nekežisardias man, numa tumen sa, vai jekh partia, te na butiarav but. Aresel kudale manušeske ke si strafuime katar le mai but tumendar. Kadia trubul mai mišto te jertin leske ai te miluin les, ke te na avel pe leste jekh mai baro nekežimos. Me mangava tumen kadia t'avel tumenge mila anda leste; ke me ramosardem tumenge kadia te žianav kana zumavav tumen, te patian tume man ande sako diela. Eta, kaske tume jertin, vi me jertiv; ai so me jertisardem, te jertisardem vareso, si pala tumende, angla o Kristo, eta te na mukas ka o Satan te niril pe amende, ke ame žianas so vo kamel te kerel. So mai si, kana me areslem ande o Troas te phenav e laši viasta le Kristoski, makar ke o Baro puterdias mange jekh vudar, nas ma hodina katar o duxo, ke me či arakhavas le Titus, muřo phral. Sa anda kudia, me muklem len, me gelemtar ande e Makedonia. Nais t'avel le Devleske, kai kerdias te nirisaras sakda le Kristosa, ai kai kerel te sikiaras o Kristo sar jekh gudlo khandimos! Ame sam, čačes, le Devleske o lašio khandimos katar o Kristo, kudalenge kai si skipime ai maškar kudala kai xasavon: Le jekhenge, jekh khandimos mulengo, del o merimos; le kavrenge, jekh khandimos traimasko, del o traio. Kon šai kerel kadia butji? Ke ame či bikjinas e vorba le Devleski, sar keren but; numa si čačimasa, si anda e partia le Devleski, ke ame das duma pa o Kristo angla o Del. Mai lasa ame pale te luvudisaras amen? Vai trubul amen sar varekon, lila poronkosa paša tumende, vai tumendar? Tume san amaro lil, ramome ande amare ile, žiangle ai gjinde katar sa le manuš. Tume san sikade sar jekh lil ramome katar o Kristo, tradino amendar ramone na la černilasa, numa katar o Duxo le Devlesko o živindo, na pe le skafidia bařenge, numa pe le skafidia le maseske, pe le ile. Kudo patiamos si amen katar o Kristo paša o Del. Ame či phenas ke ame sam anda amende harniči te keras kadia butji. Amari harničia, aver fialo, avel katar o Del. Vo kerdias anda amende harniči t'avas ministeri katar jekh nevi patia, na katar anda o lil, numa katar o duxo; o lil mudarel, numa o duxo živindil. Eta, o Zakono sas řanglo le bukvensa pe le bař, te sas vestime, kadia ke le šiave anda o Israel naštinas te dikhen pe o mui le Mošesko, pala e vedaria leske moski, makar ke kudia vedaria nakhelas. O Zakono le merimasko sa kudia e ministeria le duxoski vestime avela voi mai vestime? T'avela ke e ministeria le strafoski sas vestime, e ministeria la krisaki si mai but vestime lestar. Ai, ke so sas vestime nai les vestimos akana, pala kudo nevo vestimos kai si mai baro. Čačes, so nakhelas sas vestime, so ašel sakda si mai vestime. Si ame kudo t'ažiukeras, ame či daras, ai ame či keras sar o Moše, kai tholas jekh dikhlo pe pesko mui, ke le šiave anda o Israel te na dikhen te geton pe o vestimos: Numa von aresle zurale te na ašunen. Ke ži adies kudo dikhlo ašilo, kana von gjinen o Purano Zakono, ai vo či uštel, ke si ferdi ande o Kristo ke vo bilal. Ži ka kado dies, kana gjinen le lila katar o Moše, jekh dikhlo si šiudino pe lenge ile; numa kana le ile ambolden pe ka o Baro, o dikhlo len les tele. Eta, o Baro si o Duxo; ai kothe kai si o Duxo le Baresko, kothe si o slobodimos. Ame sa dikhen ande amaro mui, sar ande jekh glinda, o vestimos le Baresko, ame sam pařude sa ande kodo dikhimos, o vestimos vestimastar, sar katar o Baro, o Duxo. Sa anda kudia, ke si ame kudi ministeria, sar e mila kai dine ame, ame či xasaras e zor. Ame šiudas le dieli lažiavarde kai keren le garade, ame či keras khanči xitreniasa, ai ame či rimosaras e vorba le Devleski. Numa, kai phenas o čačimos, ame sam martururi ka sako godji le manušeski angla o Del. Te si amari Laši Viasta ke mai si pe late dikhlo, si pe late dikhlo kudalenge kai xasavon; le dilenge kai o del kadale beršengo kořardias lengi godji, eta te na dikhen ke strefial o šukarimos katar e Laši Viasta le vestimaski katar o Kristo, kai si o vobrazo le Devlesko. Ame či das duma pa amende; si o Jesus Kristo o Rai pa kaste ame das duma, ai ame phenas amenge tumare služi pala o Jesus. Ke o Del, kai phendias: E vedaria strefiala anda o tuniariko! kerdias te strefial e vedaria ande amare ile te šukarel o žianglimos katar o vestimos le Devlesko pe e fatsa le Kristoski. Ame ningeras kudo mandjin ande le kanti la phuviake, eta ke kudia bari zor t'avel le Devleske, ai na amenge. Ame sam gribime ka sako rig, numa na sam tele; ande o nekazo, numa na ande e dar; Marde, numa na šiudine; perade tele, numa na xasarde; numa sakda si amensa ande amaro stato e martia ande o Jesus, eta ke o traio le Jesusosko te sikadiol ande amaro stato. Ke ame kai traisaras, ame sam dine ka e martia pala o Jesus, kadia ke o traio katar o Jesus te sikadiol ande amaro mas merimasko. Kadia e martia hamil pe amende, ai o traio hamil pe ande tumende. Ai, sar amen si ame sa jekh fialo duxo ande o patiamos kai anklol avri ande kudia vorba katar o Ramomos: Me patilem, sa anda kudia me dem duma! vi ame patias, ai sa anda kudia ame das duma, žianas ke kudo kai živindisardias le Bares o Jesus živindila amen le Jesusosa, ai sikavela amen tumensa angla leste. Ke sa kado aresel pala tumende, eta ke o mištimos, kai butiol, te del mai but, pe o mištimos le Devlesko, le dragostii le Devleske but sar mai but. Sa anda kudia ame či xasaras e zor. Ai makar ke amaro manuš andral xasavol, amaro manuš avrial neviarel pe dies diesesa. Ke amare vušoře nekazuri akana si te keren amenge, mai but sode trubul amen, jekh kintari pe sakda vestime, ke ame las sama, na so ame dikhas, numa kudala kai ame či dikhas; ke le dieli kai dikhas nakhen, ai kudala kai či dikhas si pe sakda. Ame žianas ke, kana kadia tseřa ande savi ame bešas pe e phuv avela phařadi (amaro stato), amen si ame ande o čeri jekh kher kai si kerdo katar o Del, jekh than kai te bešas pe sakda kai nai kerdo anda o vast le manušesko. Kadia ame vatisavas ande kudia tseřa, kamas te las pe amende amaro kher kai bešas ande o čeri, t'avela te arakhen amen uriade ai na nange. Ke žikin ame sam ande kudia tseřa, ame vatisavas, pharo pe amende, ke ame kamas, na te las pa amende, numa te thas pe amende, eta ke so si merimasko, t'avel tasado katar o traio. Ai kudo kai lašiardias ame pe kudia, si o Del, kai dias amen o angluno pokjinimos o Duxo. Ame sam sakda pherde t'ažiukaras, ai ame žianas ke kai bešas ande kado stato ame bešas dur katar o Baro, ke ame phiras katar o patiamos ai na katar so dikhas, ame sam pherde t'ažiukeras, ai amenge si mai drago te mukas kado stato ai te bešas paša o Baro. Pe kudia si vi ke ame thas zor t'avas leske drago, t'avela ke ame bešas ande kado stato, t'avela ke ame mukas les. Ke ame trubusaras sa te nakhas angla e kris le Kristoski, eta ke sako lel pala o mištimos vai o nasulimos kai vo kerdias, kana sas ande pesko stato. Žianas e dar katar o Baro, ame rodas te keras te patian le manuš; o Del žianel amen, ai me gindav ma ke ande tumare godia vi tume žianen amen. Ame či mai sikavas ame tumende mai neve paša tumende; pale tumen vramia te luvudin tume pala amende, eta ke tume te den anglal kudalenge kai tsirden pengo vestimos anda so si kai dikhiol ai na anda o ilo. Čačes, te me sim avri anda e godji, si le Devleske; te sim ande muři godji, si tumenge. Ke o kamimos le Kristosko gribil amen, ke ame gindisavas ke, te si ke jekh mulo pala amende, sa ame sam mule; ai te mulo pala amende, eta ke kudala kai train te na train penge, numa kudaleske kai mulo ai živindisailo pala lende. Kadia, de akanara, ame či prinžiaras khanikas sar si o mas; ai te ame prinžiardiam le Kristos sar si o mas, akana ame či mai prinžiaras les kadia. Te si varekon ande o Kristo, vo si neviardo manuš. Le dieli le purane nakhle; eta, sa le dieli aresle neve. Ai sa kudia avel katar o Del, kai lašiardias ame peste katar o Kristo, ai kai dias amen e ministeria t'avas ande jekh than le kavrensa. Ke o Del sas ande o Kristo, lašiardias la lumia pesa, kai či thol pe le manuš so von šibisaile, ai vo thodias ande amende e vorba t'avas ande jekh than. Ame keras kadia t'avas le konsuli le Kristoske, sar ke o Del akharel tumen amendar; ame mangas tumen ande o anav le Kristosko: Lašiardion le Devlesa! Kudo kai či žianel so si e bezex, kerdias t'avel bezex amenge, eta ame t'avas ande leste kris le Devleski. Sar ame keras butji le Devlesa, ame mangas tumen te na len o mištimos le Devlesko intaino. Ke vo phenel: Ande e vramia kai trubul me kerav pe tjiri, O dies o skipimasko me ažutisarava tu. Eta akana si e vramia kai trubul, eta akana o dies le skipimasko. Ame či das či jekh diela skandalo ande so avela, eta ke e ministeria te na avel jekh diela asaimaski. Numa ame kamas t'avas karing sa sar mai mišto, sar služi le Devleske, katar but te nirisaras so avel amenge, ande le nasulimata, ande le nekazuri. Maren amen, thon amen ande le temnitsi, bulguin pe karing amende, kerdiam, butia phare, arakhliam e riate, ande le postimata; katar amaro vužimos, amaro žianglimos, amaro ažiukerimos, katar o lašimos, katar o Duxo Svinto, katar amaro čačo kamimos, katar e vorba le čačimaski, katar e zor le Devleski, katar le armi kudalensa arakhas ame ai te maras ame; maškar o vestimos ai o nekazo, maškar o prasaimos ai o luvudimos; dikhen pe amende sar t'avas xoxamne, makar ke sam čače; sar te na prinžiaren ame, makar ke prinžiaren ame, sar merimaske, ai eta ame traisaras, sar došale, makar ke či mudaren amen; sar nekežime ame sam sakda veseli, sar čoře ame barvaras buten; sar te nai amen khanči, ai ame line sako diela. Amaro mui puterdilo tumenge, Korintianuri, amaro ilo si phukiardo. Ame či phandaliam tumenge amaro ilo; numa tume phandalian tumaro. Keren amensa sa kadia — me dav duma tumensa sar ka muře glati — phukiaren tume! Na thon tume kudalensa kai či patian. Ke so šai avel maškar e kris ai e bezex? Vai so si len jekh avresa e vedaria ai o tuniariko? So šai avel len jekh avresa o Kristo ai o Belial? vai če partia šai t'avel o čačo le bi čačesa? Ke so šai t'avel maškar o templo le Devlesko ai le staturi? Ke ame sam o templo le Devlesko živindo, sar o Del phendias: Me bešava ai me phirava maškar lende; me avava lengo Del, ai von avena muřo narodo. Sa anda kudia, Anklen avri lendar, Ai hulaven tume, phenel o Baro; Na asban kudales kai nai vužio, Ai me lava tumen. Me avava tumenge jekh dad, Ai tume avena mange šiave ai šeia, Phenel o Baro Mai Zuralo. Sar si amenge kadia phendo ke avela, muře dragi, vužiaras ame anda sa o mahrimos le masesko ai katar o duxo, te getosaras amaro sakrifiso ande e dar e Devleski. Den ame jekh than ande tumare ile! Ame či kerdiam doš khanikaske, ame či čořardiam khanikas, ame či liam khanči khanikastar. Nai ke te strafov tumen ke me dav duma kadia; ke me inke phendem ke tume san ande amare ile pe o traio ai pe o merimos. Me but patiav ma ande tumende, me šai but luvudi ma anda tumende; me sim pherdo mila, me sim pherdo veselimos ande sa amare nekazuri. Ke, dekin aresliam ande e Makedonia, amaro mas nas les či jekh hodina; ame samas nekežime anda sako fialo: maras ame avrial, daras andral. Numa o Del, kai lel sama katar kudala kai peren tele, dias ame mila katar ke areslo o Titus, ai na ferdi ke vo avilo, numa mai but katar e mila ke vi o Titus hatiardias pala tumende: vo phendias amenge sar tume kamen, tumare asva, tumari zor mange, kadia ke muřo veselimos si mai baro. Makar ke me nekežisardem tumen pa muřo lil, či kei ma. Ai, ai te si ke keisailem — ke me dikhav ke kado lil nekežisardias tumen, makar ke si pe tsiřa — me veseli ma ande kado časo, na pala ke tume san nekežime, numa pala ke tumaro nekazo andias tumen te kein tume; ke tume san nekežime sar manglias o Del, eta te na len amendar khanči doš. Čačes, o nekežimos kai mangel o Del kerel jekh keimos kai skipil tumen katar či keis tume šoha, numa o nekežimos la lumiako del o merimos. Ai eta, sa kudo nekežimos si sar mangel o Del, če gribimos kerdias vo ande tumende! Če čačimos, če griatsia, če dar, če kamimos, če piatimos, če strafo! Tume sikadian savořenge ke tume san bi-došale ande kadia diela. Ai te si ke me ramosardem tumenge, nai pala kudo kai prasaias, či pala kudo kai lias o lažiav; sas eta kai tume gribin tume amenge te sikadiol maškar tumende angla o Del. Sa anda kudia ame sam mišto line. Numa, aver řesgia ke ame, ame samas veseli but mai but katar o veselimos katar o Titus, ke lesko duxo sas kovlo katar tumen sa. Ai te si angla leste ke me luvudisardem tumen, me či dem pe o lažiav; numa, sar ame sakda diam tumensa duma sar si o čačimos, so ame luvudisailiam paša o Titus vi kudia si o čačimos. Les si les tumenge duvar te kamel tumen, kana del pe godji ke tume sa patian, ai tume sar lian lestar sama darasa ai isdraimasa. Me veseli ma te šai ande sa le dieli te puři ma tumende. Ame keras te žianen, phralale, o mištimos le Devlesko kai sikadiol ande le Khangeria ande e Makedonia. Maškar le but nekazuri kai zumade len, lengi veselia del opral ai makar pengo baro čořimos dine but barvalimata pendar. Von, me šai phenav, dine pendar sar si le, ai inke mai but sar si le, mangle amen zurales o mištimos t'aven partia ande so avela le svintsonge ande Judea. Ai von dine na ferdi sar ame ažiukerasas, numa von dine mai — angle ka o Baro, porme amenge, sar kamlias o Del. Ame mangliam katar o Titus te getol tumende kudia butji lašimaski, sar lias pe angla savořende. Sar tume san laše ande sako diela, ande o patiamos, ande e vorba, ande o žianglimos, kai san laše ande sa, ai ande tumaro kamimos amenge, keren kadia mišto vi karing kudia butji mištimaski. Me či phenav kadia te dav jekh ordina, numa te zumavav, ke keren mišto le kaver, o čačimos tumara milako. Ke tume žianen o mištimos katar amaro Rai o Jesus Kristo, kai sas barvalo, numa pala tumende kerdilo čořo, eta ke katar lesko čořimos tume te barvalen tume. Me phenava so gindiv ma pe kudia, ke tumenge avela mai mišto, geton akana so lian te keren o berš kai nakhlo. Tumen sanas le mai angluni na ferdi te keren numa te mangen te keren. Geton akana te keren, eta te getol sar si tumen te keren kai thodian angla te keren kudalesa si tumen. Te kamen te den, o Del lela tumaro dinimos sar si tumen te den, na sar so nai tumen. Ke si t'avel, na te thon tume te vušiaren le kavren t'aven tume ande o nekazo, numa t'avel tumen sa jekh fialo; ande e vramia akana so si tumen mai but avela lenge dosta, eta ke so si len mai but sa kadia jekh fialo ažutisarena tumen, kadia si sa jekh fialo, sar si ramone: Kudo kai kjidias but nai les khanči mai but, ai kudo kai kjidias tsiřa či trubulas les khanči. Nais t'avel le Devleske ke thodias ande o ilo le Titusko t'ažutil tumen; ke vo lias amendar, ai si pherdo laši zorasa ke anda peste korkořo ke vo žial tumende. Ame tradas lesa o phral kai luvudin les pala e Laši Viasta kai žianen les ande sa le Khangeria, ai kai, mai but, si alome katar le Khangeria t'avel amaro vortako ande kadia butji le dromeski ande kadia butji t'ažutisaras, kai ame keras pe o mištimos le Baresko ai te sikavas ke ame kamas te ažutisaras. Ame keras kadia, eta ke te khonik te na prasal ame pala so ame kjidiam, katar ame las sama; ke ame rodas so si mišto, na ferdi angla o Baro, numa vi angla le manuš. Ame tradas lesa amare phrales, kai ame butivar zumadiam les ande le but dieli, ai kai mai sikavel kadia data ke si les baro čačimos ande tumende. Kadia, so si anda o Titus, vo si amensa ai vo si amaro vortako la butiako paša tumende; so mai si anda amare phral, von si tradine katar le Khangeria, o vestimos le Kristosko. Den len, angla e fatsa le Khangeriange, te sikaven ke kamen len, ai sikaven lenge ke amen si ame te luvudisavas anda tumende. Či mai trubul te ramosarav tumenge pa o ažutimos ke bičalen le svintsonge ande Judea. Me žianav, čačes, so tume kamen, kai me luvudi ma pa tumende paša le Makedonia, kai phenav ke le phrala ande o them trušal o Korinto gata si de katar o berš kai nakhlo; kudia tume dian dias zor butenge. Me tradam le phralen, eta so ame luvudisardiam tumen te na avel khanči pe kudo punto, ai tume t'aven gata, sar me phendem. Me či kamav, t'avel ke le Makedonia aven mansa ai dikhen ke na san tume gata; ame avas pherde lažiav ke t'amboldel pe kudia pe amende, te na phenav pe tumaro lažiav. Me dem ma gindo ke trubul ke ame t'akharas le phralen te žian angla savořende tumende ai te keren gata le dinimata sar sas phendo, eta t'aven gata, kana avava ai sikiarela ke tume den soske mangen ai na soske trubul. Te žianen, kudo kai thol te bariarel tsiřa kjidel tsiřa, ai kudo kai thol te bariol but kjidel but. Ke sako te del sar gindisailo ande pesko ilo, bi nekežimasko vai pe e zor; ke o Del kamel kudales kai del veselimasa. Ai o Del šai pherel tumen anda sako mištimos, eta ke, t'aven tumen sakda sa le dieli so trubul tumen, ai but pala sa le laše dieli, sar si ramome: Vo dias butivar, vo dias ka le čoře; Leski kris bešela pe sakda. Kudo kai del simintsa ka kudo kai bariarel, ai manřo te xal, dela tume ai butiarela e simintsa, ai vo butiarela le fruti tumare mištimastar. Tume avena kadia barvale karing sako dinimos, ke, sar ame das, von den le Devleske naisimos. Ke kana ažutin na ke ferdi ažutin le svintson, numa mai den opre le naisimata karing o Del. Anda kudo ažutimos kai sikavel so san tumen, eta von luvudin le Devles ke patian tume kai phenen e Laši Viasta le Kristoski, ai sar tume den karing lende ai karing tumende; von řudjin tumenge, ke von kamen tumen pala o mištimos kai si katar o Del kai del tumen. Nais te avel le Devleske ke lesko dinimos si bi-prešo! Me o Paul, mangav tumen, katar o kovlimos ai e dragostia le Kristoske, — me, mukav ma kovlo kana sim maškar tumende, ai pherdo zor kana sim dur tumendar. Me mangav tumende, kana avava angla tumende, te na keren t'avav zorasa, kai me lašiarav ma te avav karing uni anda tumende kai gindin pe amende von ke phiras sar si o mas. Te phirasa ame sar si o mas, ame či maras ame sar si o mas. Ke le armi savensa ame maras ame nai le manušenge; numa von si zurale, katar o vužimos le Devlesko, te das muial le armi. Ame das muial le ginduri ai le barimata kai ušten pe karing o žianglimos le Devlestar, ai ame anas sako gindo phanglo ka o patiamos ande o Kristo. Ame sam thodine vi te das strafo kana či patiana, kana getola pe ke tume mišto patian. Tume dikhen pe o mui le manušesko. Te si varekon kothe te gindil pe ke vo si anda o Kristo, ke phenel pe mišto ande peste ke, sar vo si anda o Kristo, vi ame sam anda o Kristo. Ai makar ke me luvudiva ma jekh tsiřa mai but anda o barimos kai o Baro dias ma te sikiarav tumen ai na te rimov tumen, či avela man lažiav anda kudia, eta te na miazol tumenge ferdi ke kamav te daravav tumen anda muře lila. Ke, phenen, leske lila si trudno ai zurale; numa, kana si kate amensa vo si kovlo, ai leski vorba si prosto. Ke kudo kai del duma kadia ke te lel sama ke sar ame sam ande e vorba ande amare lila, kana sam dur tumendar, sa kadia sam kana sam kathe, angla tumende. Ame či tromisaras t'avas sar le kaver vai te keras sar lende sar kudala kai den pe pativ von. Numa, kai von mesurin pe sar si lengi mesura kai len sama pe pende, von nai godiaver. Amenge, ame či kamas te luvudisaras mai but sode sam, te mesurisaras pala e mesura kai dias amen o Del amenge, kadia ke kerdias te avas vi ži tumende. Ame či žias mai dur sar daštisaras, sar ke ame te na aviliamas tumende, ke si ži tumende ke ame aviliam la Vastiasa Laši katar o Kristo. Nai avri anda sa e mesura, na e butji le kavrengi, ke ame luvudisaras, numa anda so tume ažiukeren, te bariola tumaro patiamos, t'avas mai bare maškar tumende, sar e mesura kai si amen dini, Ai te phenas e Laši Viasta mai dur tumendar, bi te luvudisaras pe so sas vuže kerdo kavrestar ande leske phuvia. Ke kudo kai luvudil pe te luvudil pe ande o Baro. Ke nai kudo kai del duma pa peste ke ašunen leste, si kudo kai o Baro tradel. O! te šai ninkerena tume mandar jekh tsiřa dilimos! Numa tume ninkerena ma! Ke me sim žaluzo anda tumende sar e žaluzia katar o Del, ke me tomnisardem tume ka ferdi jekh řom, te sikavav tumen ka o Kristo sar jekh pativali šei vuži. Kaver data, sar ke o sap diliardias la Eva xitreniasa, mange si dar ke tumare ginduri rimon pe ai den pe rigate katar e prosto diela le Kristoski. Ke, te si varekon avel te del duma jekh aver Kristo ke sar kudo pa kaste ame diam duma, vai te lena tume jekh kaver Duxo ke sar kudo kai tume lian, vai jekh kaver Laši Viasta sar kudo kai tume lian, tume ninkerdian les mišto. Eta, me gindiv ma ke me či simas mai kovlo ande khanči katar kudala apostoli kai si laše. Te me či žianav sar te dav duma, či sim me kadia te na žianav, ai me sikadiam les karing tumende ai ande sa le dieli. Vai kerdem me jekh bezex kana, me teliardem ma korkořo eta ke tume t'ušten? Me dem tumen ivia e Laši Viasta le Devleski Me lem pa le kaver khangeria kai lem lendar jekh pokjinimos, te služiv tumen. Ai kana me simas tumende ai kai trubulas ma vareso, me či thodem pharimos pe khanikaste; ke le phral kai avile anda e Makedonia dine man so trubul man. Ande sa le dieli me lem ma sama te na bešav pe tumende, ai me lem ma sama. Katar o čačimos anda o Kristo kai si ande mande, me phenav ke kudo vestimos či lena les mandar ande e rig katar e Gretsia. Sostar? Si ke me či kamav tumen? O Del žianel! Numa me kerav ai kerava kadia, te lav sa katar kudala «apostoli» kai den duma kai roden te luvudin pe, eta t'aven sar amende ande le dieli kai von keren. Kudala manuš si xoxamne apostoli, butiara kai athaven, uriade pe sar le apostoli le Kristoske. Ai kadia nai šodo, ke vi o Satan uriadias pe sar jekh andželo la vedariako. Nai kadia šodo ke kudala ministeri vi von uriaven pe sar le ministeri la krisake. Lengo getomos avela sar si lengi butji. Me mai phenav, ke khonik te na dikhel pe mande ke sim dilo, eta ke vi me, tu luvudiv ma jekh tsiřa. So me phenav, siguro sim so me šai luvudiv ma, či phenav me kadia sar mangel o Baro, numa sar jekh dilo. Sar ke si but kai luvudin pe sar si o mas, vi me si te luvudiv ma. Ke tume ninkeren mišto le dilen, tume kai san godiaver. Te si varekon te peravel tumen, te si varekon te xal tumen, te si varekon te lel tumen, te si varekon barimatango, te si varekon te marel tumaro mui, tume ninkeren les. Lažiav mange te phenav, ame sikadiam amaro kovlimos. Numa, sogodi šai tromal varekon — me dav duma sar dilo — vi me, tromav! Si von Hebreuri? Vi me. Si von Israelituri? Vi me. Vulen vo katar o Abraham? Vi me. Si von ministeri le Kristoske? Me dav duma sar jekh manuš kai či žianel so phenel. Me sim mai but; katar le butia, mai but; katar le dukhuma, mai but; katar le temnitsi, mai but. Butivar ande e dar le merimaski. Panž-var me lem katar le Židovuri trianda ai enia dukhuma, trivar marde man le rovliansa, jekh data marde man le bařensa, trivar sas te tasuvav, me nakhlem jekh dies ai jekh riat ande e maria. Butivar pe o drom, me sas te xasavav pe le paia, sas te xasavav katar le řobaša, sas te xasavav katar kudala anda muřo them, sas te xasavav katar kudala kai či patian, sas te xasavav ande le foruri, sas te xasavav ande le kimpuri, sas te xasavav pe e maria, sas te xasavav maškar le falši phral. Me simas ande e butji ai ande o nekazo, but riatia či sutem, butivar či xalem ai či pilem, postisardem butivar, simas pe o šil ai pe o nangimos. Ai, bi te dav duma pa le kaver dieli, si thodino pe mande sako dies le ginduri kai den ma sa le Khangeria. Kon si kovlo, te na avav me kovlo? Kon si te perel tele, te na me phabuvav? Te trubul te luvudisaras ame, si ande muřo kovlimos ke me luvudiv ma! O Del, kai si o Dad le Baresko o Jesus, ai kai svintsil pe sakda, vo žianel ke me či xoxavav! Ande o Damasko, o vladoro katar o amperato Aretas kerdias te arakhen o foro katar le Damasianuri, te len man; numa uliarde man katar jekh feliastra, ande jekh košnitsa, o lungo le zidosko, ai me skipisailem anda lenge vast. Trubul te luvudin tume. Nai kudia lašio. Me avava numa ka so dikhas ai so sikavel amenge o Baro. Me žianav jekhe manušes ande o Kristo, kai sas, palpale deš-u-štar berš, ningerdo ži ka o trito čeri (te si ande pesko stato me či žianav, te si avri anda pesko stato me či žianav, O Del ferdi žianel). Ai me žianav ke kudo manuš (te sas ande pesko stato vai bi pesko statosko me či žianav, o Del žianel) sas ningerdo ande o raio, ai ke vo ašundias vorbi kai naštin te khosen le kai nai slobodo jekhe manušeske te phenel le. Me luvudiv ma pala jekh kasavo manuš, numa anda mande me či luvudiv ma, te na niči anda muře bangimata. Te kamlemas me te luvudi ma, me či avilemas jekh dilo, ke me phendemas o čačimos; numa me ninkerav ma, eta ke te khonik te na gindil-pe pe mande ke me sim mai baro de sar so vo dikhel ande mande vai so ašunel mandar. Ai te na phukiarav ma me ande le barimata, pala le dieli šukar so dikhlem, sas mange thodino jekh kanřo ande o mas, jekh andželo katar o Satan te del ma palma ai te na mukel ma te luvudiv ma. Trivar řudjisardem le Bares te duriarel les mandar, ai vo phendia mange: Muřo mištimos dosta tuke, ke muři zor kerdiola ande tumaro kovlimos, me luvudiva ma mai but anda muře kovlimata eta ke te e zor le Kristoski te hodinil pe mande. Sa anda kudia si mange drago t'avav ande muře kovlimata, ande o lažiav, ande o prasaimos, o marimos ma, ande o nekazo, le Kristoske; ke, kana me sim kovlo, atunči me sim zuralo. Me simas jekh dilo; tume thodian pe mande zor. Ke tumendar trubulas te traden man, ke me či simas mai tele katar tumare «apostoli» le laše, makar ke me či sim khanči. Sikadilo muři apostolaki butji maškar tumende katar le semnuri, katar le šodi dieli kai kerdem ninkerimasa. Lem me sama tumendar mai tsiřa ke sar le kaver Khangeria, te na ke me či manglem love tumendar? Jertin mange te sim došalo. Eta, pe e trito data me sim gata te žiav tumende, ai me či avava tumenge pharo; ke me či rodav tumare mištimata, tumen ferdi. Nai kadia, čačes, le glati te kjiden le dadenge, numa le dada le glatenge. Me dava sar kamav, ai me dava ma anda mande pala tumare duxuri; t'avela kai kamav tumen mai but, kamena ma tume mai tsiřa. T'avel! me či simas pharo pe tumende; numa, sar manuš xitro, me lem tumen xitreniasa! Lem me tumendar vareso katar varekon anda kudala kai me tradem tumende? Me manglem le Titus te žial tumende, ai lesa me tradem le phrales; si o Titus kai manglias tumendar vareso? Či phirdiam ame sa ande kudo duxo, pe sa jekh fialo vurmi? Tume gindin tume de dumult ke ame čačiuvas paša tumende. Si angla o Del, ande o Kristo, ke ame das duma; ai sa kudia, amare dragi, ame phenas les te sikiaras tumen. Ke mange dar ke či arakhav tumen, kana aresava, sar me kamavas, ai ke či arakhen man tume sar tume kamen. Dar mange ke me arakhav čingara, žaluzia, xoli, mangimos peske, prasaimos, pupuimos, barimos ai buntuimos. Dar mange ke kana me aresava muřo Del teliarela ma mai pala tumende, ai si t'avel ma te rovav pe kudala ke kerde bezexa angla savořende ai ke či keisaile kai nai vuže, katar e kurvetsia ai katar le dilimata kai von gele. Me žiav tumende pe e trito data. Sako diela lašiardiola sar phenena dui vai trin martururi. Kana me simas tumende e duito data, me phendemas, ai adies, kai me či sim kothe, me phenav pale kudalenge kai kerde bezexa angla savořende ai sa le kavrenge ke, t'avava me palpale tumende, či khonik našela katar o strafo. Sar tume roden jekh marturia te dikhen ke o Kristo del duma ande mande, vo kai nai kovlo karing tumende, numa kai si zuralo maškar tumende. Ke vo sar karfome pala pesko kovlimos, numa vo trail katar e zor le Devleski; vi ame, ame sam kovle ande leste, numa ame traisarasa lesa katar e zor le Devleski te keras karing tumende. Len tume sama tumen, te dikhen te san ande o patiamos. Zumaven tume tumen. Či prinžiaren tume ke o Kristo si ande tumende? vai ke tume sanas šiudine. Numa me gindiv ma ke tume žianen ke ame, ame či sam šiudine. Numa ame řudjisaras le Devles ke tume te na keren khanči nasul, na te sikavavas ame ke sam laše, numa ke tume te keren so si mišto ai ke ame, t'avas sar šiudine. Ke ame nai amen zor karing o čačimos; amen si ame zor ferdi pe o čačimos Ame veselisavas kana ame sam kovle, žikin tume san zurale; ai eta ame mangas ande amare řudjimata, ke tume te aresen mai čače. Sa anda kudia me ramosarav kadala dieli makar ke či sim kothe, eta ke, kana avava, či mai trubul te kerav zurales, pala e putiaria kai o Baro dias ma, te sikiarav ai na te rimov tumen. So mai si, phralale, aven ande e veselia, sikion mai but, ažutin tume, te keren sa jekh fialo, train ande e patia; ai o Del le dragosko ai la patiako avela tumensa. Den pozdraimos jekh kavres jekhe čimidimasa. Sa le svintsi den tumen pozdraimos. Ke o šukarimos katar o Rai o Jesus Kristo, o kamimos le Devlesko, ai so del o Svinto Duxo, t'aven tumensa sa! Lil katar o Paul, apostolo, tradino na katar le manuš, či katar jekh manuš, numa katar o Jesus Kristo ai o Del o Dad, kai živindisardias les katar le mule, ai sa le phral kai si mansa, ka le Khangeria kai si ande e Galatia: ke o mištimos ai e patia t'avel tumenge dine katar o Del o Dad ai katar amaro Rai o Jesus Kristo, kai dias pe vo korkořo pala amare bezexa, eta te lel amen avri anda kadala berša nasul, sar kamlias amaro Del ai Dad, t'avel o mištimos berš beršestar! Amen! Mange šodo ke tume muklian kadia sigo o Del kai akhardias tumen le mištimasa katar o Jesus, te nakhen ka jekh kaver laši viasta. Na ke mai si jekh kaver laši viasta, numa ke si žene kai diliaren tumen, ai kai kamen te den muial e Laši Viasta katar o Kristo. Numa, kana makar ame, kana jekh andželo anda o čeri anela tumenge jekh kaver laši viasta sar kudia kai ame phendiam tumenge, t'avel armandino! Ame phendiam angla savořende, ai me mai phenav les pe kado časo: Te si varekon ke anel tumenge jekh kaver laši viasta sar kudi kai tume lian, t'avel armandino! Ai kana, si o lašimos le manušengo kai me kamav, vai le Devlesko? Rodav me t'avav drago le manušenge? Te mai avava drago le manušenge, či avilemas sluga le Kristoski. Me phenav tumenge, phralale, ke e Laši Viasta kai si phendi mandar nai katar o manuš; ke me či lem ai či sikilem la katar jekh manuš, numa sikadias la mange o Jesus Kristo. Tume žianglian, čačes, sar me traivas angla savořende kana simas astardo ande o patiamos židovitsko, sar me rimovas sar mai zurales ai phagavas e Khangeri le Devleski, ai sar me žianavas ande o patiamos židovitsko mai but kudalendar kai sas ande muře berš ai ande muřo them, pria lemas ma opre pala le zakonuri katar muře dada. Numa, kana sas drago le Devleske kai thodias ma rigate dekin arakhadilem katar muři dei, ai kai akhardias ma katar peski dragostia, te sikavel mange pesko šiaves, eta te phenav pa leste ka kudala kai či patian, strazo, či lem sama či khanikastar, ai me či anklistem ande o Jerusalem karing kudala kai sas apostoli angla savořende mandar, numa gelemtar ande e Arabia. Porme, mai avilem palpale ande o Damasko. Trin berš pala kudia, me gelem ande o Jerusalem te prinžiarav le Petri, ai me bešlem deš-u-panž dies leste. Numa me či dikhlem či jekh anda le kaver apostoli, te na nas ferdi o Jakob, o phral le Baresko. Ande so me ramosardem tumenge, eta, angla o Del, me či xoxavav. Me atunči gelem ande le riga katar e Siria ai e Tsilisia. Eta, či prinziarenas ma pe o mui le khangeria anda e Judea kai si le Kristoske; ferdi, von ašunde ke phenen: Kudo kai aver data marelas ame phenel akana o patiamos kai vo kamelas te phařavel. Ai von luvudisarde le Devles pala mande. Deš-u-štar berš pala kudia, me mai anklistem ande o Jerusalem. Mansa sas o Barnabas, vi mai lem le Titus mansa. Sas pala ke o Del sikadias mange ke trubul te žiav. Me sikavavas lenge e Laši Viasta pa savi me davas duma maškar kudala kai či patian, me sikavavas la ande jekh than garado mai but ka kudala kai sas le bare, eta ke muři butji te na nakhel ai te na xasavol. Numa o Titus, kai sas mansa, ai kai sas Greko, nas leske musai te šinen les. Ai kudia, pala le falši phral kai pe o čorořal dine andre ai garadile maškar amende, te len sama sar ame sam slobodo ande o Jesus Kristo, kamenas te teliaren amen. Ame či mukliam ame lenge či jekh vramia ai ame ninkerdiam pe lende, eta ke o čačimos katar e Laši Viasta t'avel ninkerdo maškar tumende. Kudala kai si le mai bare — sar von sas angla savořende, nai mange khanči: o Del či lel sama kon si mai baro — kudala kai si le mai bare naštinas te mai phenen vareso nevo mange. Aver fialo, dikhle ke e Laši Viasta sas mange dini pe kudalenge kai nai šinde, sar le Petroske pala le šinde. Ke Kudo kai kerdias anda o Petri o apostolo le šindengo vi kerdias anda mande o apostolo le bi-šindengo. Ai o Jakob, o Petri ai o Jono, kai dikhen le sar stilpuri, prinžiarde o mištimos kai sas mange dino, dine ma, man ai le Barnabas, o vast ai line amen sar phral, ame karing kudala kai či patian, ai von karing kudala kai patian. Von ferdi phenen amenge te das ame godji ka le čoře, so me lemas sama te kerav. Numa kana o Petri avilo ande o Antioxi, me ninkerdem ma angla leste ke vo či kerdias mišto. Čačes, angla savořende t'aven uni žene tradine katar o Jakob, vo xalas kudalensa kai či patian; ai, kana von avile, vo lias kothar pe ai thodias pe rigate, daratar katar kudala kai lenas o zakono židovitsko. Lesa vi le kaver Židovuri thode te keren daraimata, kadia ke vi o Barnabas sas ningerdo katar lengo daraimos. Kana dikhlem ke von či phiren sar si o čačimos katar e Laši Viasta me phendem ka o Petri angla sa: T'avela, tu kai san Židovo, te traisa tu sar kudala kai či patian ai na sar train le Židovuri, sostar thos tu zor pe kudala kai či patian te kerdion Židovuri? Ame, ame sam Židovuri dekin arakhadiliam, ai na nai-Židovuri bezexale. Numa, žianas ke nai katar le butia le zakonoske ke o manuš si vorta angla o Del, numa katar o patiamos ande o Jesus Kristo, eta t'avas čače katar o patiamos ande o Kristo ai na katar le butia katar o Zakono, ke či jekh manuš či avela čačiardo katar le butia le Zakoneske. Numa, žikin ame rodas te čačiovas katar o Kristo, te avilinosas ke vi ame arakhen ame bezexale, o Kristo avela vo jekh ministero katar e bezex? Dur amendar! Ke, te vazdava me le dieli kai me peradem, me kerav mange jekh kai či kerdias mišto, ke si pala o Zakono ke me mulem le Zakoneske, eta te traiv le Devleske. Me simas karfome le Kristosa; ai te me traiv, manai ke mange traiv, si o Kristo ke trail ande mande; te me traiv akana ande o mas, me traiv ande o patiamos ande o Šiav le Devlesko, kai kamel ma ai kai dias pe vo mange. Me či šiudav o mištimos le Devlesko; ke te si katar o Zakono ke avas vorta angla o Del, o Kristo mulo intaino. O Galatianuri kai nai tumen godji! Kon diliardias tumen, tume, kai sas tume risuime mišto angla le jakha e martia le Kristoski pe o trušul. Kamavas te žianav tumendar: Si katar le butia le Zakonoske ke tume lian o Duxo, vai ke šundian ai patian pe ande e Laši Viasta. San tume kasave dile? Tume lian angla savořende o traio nevo katar o Duxo. Kamen tume akana te geton anda tumari zor? Tume kjinuisardian kaiti intaino? Naštil avel intaino. Kudo kai del tumen o Duxo, ai kai kerel čudeni maškar tumende, kerel vo kudia katar le butia Zakonoske, vai katar sar del duma pa o patiamos? Sar o Abraham patiaias ande o Del, ai ke sas les laši kris, prinžiaren kadia ke si kudala kai si len o patiamos ke si le šiave katar o Abraham. Kadia o Ramomos phenelas angla savořende ke o Del dela laši kris le nai-Židovonge. Phendias angla savořende kadia laši viasta ka o Abraham: Sa le thema avena svintsime pala tute! Kadia ke kudala kai patian si svintsime le Abrahamosa kai patial. Ke kudala kai astardion ka le butia le Zakonoske si tela e arman; ke si ramome: Armandino t'avel varekon ka či lel sama sogodi si ramome ande e kliška le Zakonoski, ai či lel les opre. Ai ke khonik nai čačo katar e kris angla o Del katar o Zakono, kudo si sikado, ke si phendo: O manuš vorta traila katar o patiamos. Eta, o Zakono či avel katar o patiamos; numa vo phenel: Kudo kai lela opre kudala dieli traila lendar. O Kristo kjindias amen katar e arman le Zakonoski, vo areslo armandino pala amende, — ke si ramome: Armandino t'avel kudo kai si amblado pe o kašt. Eta ke o svintsimos katar o Abraham t'avel kudalenge kai či patian t'aresel ande o Jesus Kristo, ai ke ame te las katar o patiamos o Duxo kai sas šinado katar o Del. Phralale. Me si te sikavav tumen sar den duma le manuš. Kana jekh manuš muklias pesko mištimos sar trubul, khonik našti te del rigate kudo mištimos vai te thol vareso opral. O Del phendias so avela ka o Abraham ai ka lesko šiav. Le Ramomata či phenen leske šiave sar te avel baro narodo. Von phenen lesko šiav te sikavel te si ferdi jekh ženo — kodo si o Kristo. Eta so me gindiv: O Del kerdias patia le Abrahamosa, sar šinaimos. O Zakono kai avilo štar šela ai trianda berš mai palal naštil te del rigate e patia. Ke te si so avela tjiro avelas katar o Zakono, či mai avelas katar so si tuke šinado; eta, si katar so phendias ke o Del kerdias ka o Abraham t'avel les o dinimos o šukar. Sostar o Zakono? Vo sas dino atunči pala ke či patian, žikin či avela e vitsa kai sas phendi t'avel; vo si thodino katar le andželi, ai ramone katar jekh manuš kai si maškaral. Eta, či trubul jekh manuš maškaral kana si ferdi jekh, ai o Del si ferdi jekh. O Zakono si vo aver fialo sar so phendias o Del? Dur kothar! T'avilinosas jekh Zakono kai šai del o traio, e kris čačes sas t'avel katar o Zakono. Numa o Ramomos phandadias sa tela e bezex, eta ke so si t'avel si dino katar o patiamos ande o Jesus Kristo kudalenge kai patian. Angla savořende t'avel o patiamos, ame samas phangle ai lelas sama amendar o Zakono, te dikhas o patiamos kai avela sikado. Kadia o Zakono sas thodino te ningerel amen ka o Kristo, eta ke ame t'avas čačarde katar o patiamos. O patiamos avilo, ame či mai sam tela o Zakono. Ke tume san sa šiave le Devleske katar o patiamos ande o Jesus Kristo; tume sa, kai san bolde ande o Kristo, tume lian pe tumende sar tsalia o traio ande o Kristo. Nai či Židovo či Greko, manai či řobo či slobodo, manai či murš či žiuvli; ke tume san sa jekh ande o Jesus Kristo. Ai te san tume le Kristoske, avilian katar o Abraham, ai lena lestar le mištimata kai sas phende. Eta, kana kudo kai si te lel o mištimos si glata, me phenav ke vo si inke sar jekh řobo, makar ke avela birevo pe sa; numa vo si tela o vast kudalengo kai len sama lestar ai katar leske mištimata ži ande e vramia kai thodias o dad. Vi ame, sa kadia, kana ame samas glati, ame samas tela o thodimos katar le putari kai si ande kadia lumia; numa, kana e vramia nakhli, o Del tradias peski Šiaves, arakhadilo katar jekh žiuvli, arakhadilo tela o Zakono, eta te kjinel kudalen kai sas tela o Zakono, eta ame te las so avel amenge sar šiave. Ai ke sar ke tume san šiave, o Del tradias ande amare ile o Duxo katar pesko Šiav, savo tsipil: Abba! Tate! Kadia tu či mai san řobo, numa šiav; ai te san tu šiav, tu vi san te les o mištimos katar o Del. Aver data, či žianenas le Devles, tume služinas le devlen kai nai von čače dela; numa akana kai tume žianen le Devles, vai mai mišto kai prinžiarel tumen o Del, sar žiana tume palpale ka kudala kovle ai bi-laše zora so si, kasaven mai kamen tume te služin? Numa tume len sama le dies, le šion, le vrami ai le berš! Me darav ke intaino kerdem sa e butji tumenge. Aven sar mande, ke vi me sim sar tumende. Phralale, řudjiv tume. Tume či kerdian mange či jekh doš. Tume žianen ke si pala jekh bangimos ande o mas ke pe e mai angluno data me phendem tumenge e Laši Viasta. Ai simas zumado ande muřo mas, tume či sikadian či vuřetsia či griatsia; tume sikadian mange, aver fialo, lian ma sar jekh andželo le Devlesko, sar o Jesus Kristo. Kaila akana sa tumari veselia? Ke me phendem tumenge ke, te šai t'avel kudia, tume ankaladianas avri tumare jakha te den le mange. Areslem me tumaro dušmano ke phenav tumenge o čačimos? O gribimos kai si len tumenge nai vužio, numa von kamen te šinen tume amendar, eta te gribin tume lenge. Mišto si t'avel gribimos tumenge pe so si mišto ai ande sa e vramia, ai na ferdi kana sim maškar tumende. Muře glati, pala kudalende dukhal ma sar kana arakhadiol jekha žiuvliake jekh šiav, žikin či o Kristo t'avel ande tumende, me kamlemas t'avav akana paša tumende, ai te pařuvav e šib, ke me darav anda tumende. Phenen mange, tume kai kamen t'aven tela o Zakono, či ašunen tume o Zakono? Ke si ramone ke o Abraham sas les dui šiave, jekh katar e řobitsa, ai jekh katar e žiuvli slobodo. Numa kudo katar e řobitsa arakhadilo sar si o mas, ai kudo katar e žiuvli slobodo sar sas leske phendo katar o Del. Kudala dieli si sar paramiči. Eta kudala dui žiuvlia si dui patii, jekh katar o plai o Sinai, dias glati t'aven služi, si e Hagar, ke e Hagar, si sar o plai o Sinai ande e Arabia, ai o Jerusalem themesko, kai si ande o služimos peske glatensa. Numa o Jerusalem čeresko si slobodo, vo si amari dei; Ke si ramome: Veselisavo, tu kai naštis t'aven tu glati! Phařadio ai phurde tsipimata, tu kai či žianes e dukh t'avel tu glata! Ke le glati kudalatar kai si mukli avena mai but ke sar le glati kudalake kai si meritime. Tumenge, phralale, sar o Isak, tume san le glati arakhadile sar sas šindo katar o Del; ai sa jekh fialo sar atunči kudo kai arakhadilo sar si o mas kjinuil kudales kai arakhadilo sar si o Duxo, kadia si vi akana. Numa so phenel o Ramomos? Gonisar le řobitsa ai lake šiaves, ke o šiav katar e řobitsa či lela partia katar muřo mištimos le šiavesa katar e žiuvli slobodo. Sa anda kudia, phralale, ame či sam glati katar e řobitsa, numa katar e žiuvli slobodo. Si t'avas skipime ke o Kristo skipisardias ame. Bešen zurales, ai na muken tume mai jekh data t'aven phangle ka o služimos. Eta, me o Paul, me phenav tumenge ke, te tume šindian tume, o Kristo nai tumenge khanči. Ai me mai kamav te phenav mai jekh data pe sako manuš kai kerel te šinen les, leske musai te kerel sa o Zakono. Tume san hulade katar o Kristo, tume sa kai roden te čačon ande o Zakono; tumendar si lino o mištimos. Amenge, si katar o patiamos ke ame ažiukeras, katar o Duxo, so avela katar e kris. Ke, ande o Jesus Kristo, nai khanči te san šindo vai te na san šindo, numa o patiamos kai sikav pe katar o kamimos. Tume našenas miško: Kon astardias tumen, te na muken tumen te patian ka o čačimos? Kudo kai athavel tumen nai kudo kai akhardias tumen. Jekh tsiřa drosda uštiavel o xumer. Si ma kako patiamos ande tumende, ande o Baro, ke tume či gindina tume aver fialo. Numa kudo kai rimol tumen, savo avela, avela pe leste o pharimos. Mange, phralale, te mai dava duma pa o šinimos, sostar mai kjinuin von ma? Te na kadia, či mesailas khanikas so me phenav pa o Kristo pe o trušul. Te na mai aven len glati, kudala kai thon te diliaren tume maškar tumende! Phralale, tume san akharde t'aven slobodo, ferdi ande kudia slobodia te na train sar si o mas; numa den tume, katar o kamimos, služi jekh kavreske. Ke sa o Zakono si thodino ande ferdi jekh vorba, ande kadia: T'avel tuke drago tjiro vortako sar san drago tuke. Numa te xana ai te nakhavena le uni le kavren sar le žigeni, len tume sama ke te na rimon tume le uni le kavren. Me phenav kadia: Phiren sar si o Duxo, ai tume či kerena sar kamel o mas. Ke o mas kamel so či kamel o Duxo, ai o Duxo kamel so či kamel o mas; von maren pe maškar pende, eta ke tume te na keren so tume kamen. Te san tume ningerde katar o Duxo, tume či san tela o Zakono. Eta sar le butia le maseske si sikade; o lažiav, o mahrimos, e kurvetsia; o řudjimos ka le vobrazi ai o drabarimos. Aven dušmaia jekh avreske, čingaren pe, xan pe sar le žiukel, xoliaren pe, hulaven pe ai sako žial pe peski rig; kamen te len avrestar, mation ai xan but, ai keren aver kasave dieli. Me phenav tumenge angla savořende, sar mai phendem, ke kudala kai keren kasave dieli, či avela lenge e amperetsia le Devleski. Numa e fruta katar o Duxo, si o kamimos, e veselia, e patia, e řabda, o lašimos, e mila, o čačimos, o kovlimos, ai o ninkerimos. O Zakono nai pe kudala dieli! Kudala kai si le Jesus Kristoske karfosarde o mas ai so sas leske drago ai so kamelas. Te traisaras ame katar o Duxo, vi mai phiras sar si o Duxo. Na roden jekh intaino vestimos, te xoliaras jekh kavres, te kamas te las jekh kavrestar. Phralale, te si jekh manuš ke len les ke kerdias varesavo doš, tume kai san ande o Duxo, vazden les jekhe kovle duxosa. Le tu sama, daratar ke vi šai t'aves zumado. Ninkeren o pharimos jekh le kavreske, ai tume kerena kadia o zakono le Kristosko. Te si varekon ke gindil pe ke vo si varekon, makar ke von nai khanči, vo korkořo diliarel pe. Ke sako te lel sama so kerel, ai atunči šai luvudil pe katar leske butia, na sar lela sama sar keren le kavre; Ke sako ningerela pesko pharimos. Ke kudo kai sikiol e vorba te phenel sa le mištimata kudaleske kai sikiarel les. Na šibin tume: či maren mui katar o Del. Sa so jekh manuš thodias te bariol, vo kadia kjidela. Kudo kai thol te bariol so si drago peske, kjidela o merimos, numa kudo kai bariarel so si drago le Duxoske kjidela katar o Duxo o traio pe sakda. Te na mukas ame te na keras o mištimos; ke ame kjidasa kana avela e vramia, te na mukasa ame tele. Kadi si, žikin šai daštisaras, te keras o mištimos karing sa, ai mai but karing le phral kai patian. Dikhen če bare bukvensa sar me ramosardem tumenge anda muřo vast Sa kudala kai kamen t'aven tumenge drago sar si o mas thon pe tumende zor te šinen tume, eta ferdi te na maren le pala o trušul le Kristosko. Ke le šinde inke von či len sama o Zakono; numa von kamen t'aven tume šinde, te luvudin pe anda o semno anda tumaro mas. So si mange, dur mandar o gindo te luvudiv ma katar jekh kaver diela ke ferdi o trušul amare Baresko o Jesus Kristo. E lumia muli pe o trušul mange, ai me mulem la lumiake. Ke nai khanči ke te san šindo vai te na san šindo; so si vareso si, t'aves jekh nevo manuš, katar o trušul le Kristosko. Patia ai mila pe sa kudala kai len sama kudia diela, ai pe o Israel katar o Del! Ke khonik de akanara te na nekežil ma, ke me ninkerav pe muřo stato le semnuri katar o Jesus. Phralale, ka e dragostia katar amaro Rai o Jesus Kristo t'avel tumare duxosa! Amen! O Paul, apostolo katar o Jesus Kristo sar kamel o Del, ka le svintsi kai si ande o Efeso ai ka le čače ande o Jesus Kristo; ke o mištimos ai e patia t'aven tumenge dine katar o Del amaro Dad ai katar o Rai o Jesus Kristo. Svinto t'avel O Del, o Dad amare Baresko o Jesus Kristo, kai svintsisardias amen ande sako svintsimos duxosko ande le thana le čereske ande o Kristo! Ande leste o Del alosardias amen angla savořende t'avel e lumia, t'avas ame svintsi ai bi došake angla o Kristo, šinadias amen ande peski dragostia t'avas le šiave le Devleske katar o Jesus Kristo, sar vo kamel t'avel leske drago. Te luvudisaras le Devles pe lesko mištimos kai vo dias ivia amen anda pesko šiav kai kamel mai but. Ande o Kristo amen si ame o pokjinimos katar lesko rat, te lel amare bezexa, pala o barvalimos le mištimasko le Devlesko, kai vo thodias but pe amende. Katar sako fialo žianglimos ai godiaverimos, kerdias vo te žianas so si e čudenia kai vo kamlias, o mištimos kai thodias vo ande o Kristo. O Del kerela so kamel kana getona pe le vrami, te kjidel sa ande o Kristo, so si ande o čeri ai kudia so si pe e phuv. Ande o Kristo akhardias vi ame, sam vuže šinade sar kamel kudo kai kerel sa le dieli sar vo kamel. Eta te ame služisaras te luvudisaras lesko vestimos, ame kai de anda o gor ažiukerdiam le Kristos. Vi ande leste, pala ke tume ašundian e vorba le čačimaski, e Laši Viasta tumari skipimaski, ande leste tume patianas ai tume san pečatuime katar o Svinto Duxo kai sas phendo tumenge. Kudia si jekh mištimos katar so si t'avel amenge, te skipisarel kudalen kai si le Devleske. Te luvudisaras lesko vestimos. Sa anda kudia vi me, kana me ašundem ke den duma pa tumaro patiamos ande o Rai o Jesus ai pa tumari mila pe sa le svintsi, me či mukav ma te na řudjiv tumenge. Phenav pa tumende ande muře řudjimata, eta ke o Del katar amaro Rai o Jesus Kristo, o Dad o vestime, te del tumen jekh duxo godiako ai te žianen les; ai ke kerel te strefian tumare jakha ande tumaro ilo, te tume te žianen so tume ažiukeren kai si astardo ka so vo akharel, so si lesko barvalimos le vestimasko kai garavel peske narodoske, ai sar si bari ande amende kai patiaias leski zor. Te sikadiol kadia zor mišto sar kana vo thodias la ande o Kristo, kai živindisailo katar le mule, ai vazdias les te bešel pe peski čači rig ande le thana le čereske. Amperetsil opral sa kai porončin, pe sa le bare, pe sa zurale, pe sa birevia, ai pe sako anav kai šai mothon, na ferdi anda kadala berš, numa vi pe le berš kai avena. Vo sa thodias tela leske punře, ai vo dias les sar birevo o mai baro ka e Khangeri, kai si lesko stato, o pherdimos kudalesko kai pherel sa e lumia. Tume san mule katar tumare lažiave ai katar tumare bezexa, ande save tume phirenas angla savořende, sar phirenas ande kadia lumia, sar si o prinso katar e zor la balvaliaki, katar o duxo kai kerel akana ande le šiave kai buntuin pe. Vi ame sa, samas anda lende. Ai ame traisarasas angla savořende sar kamelas amaro mas, kerasas so kamel amaro mas ai amare ginduri, ai ame samas anda amende glati la xoliake, sar le kaver. Numa o Del, kai si barvalo ande e mila, pala o baro kamimos kai vo kamel amen lesa, ame kai samas mule pala amare lažiave, dias amen palpale o traio le Kristosa (si katar e dragostia ke tume san skipime); vo živindisardias ame ande jekh than, ai kerdias te bešas ande jekh than ande le thana čereske, ande o Jesus Kristo, eta te sikavel ande le berš kai avena o barvalimos pria baro lesko mištimasko katar peski mila karing amende ande o Jesus Kristo. Ke si katar o mištimos ke tume san skipime, pala o patiamos. Ai kudia či avel tumendar, si dino katar o Del. Nai katar le butia, eta ke te khonik te na luvudil pe. Ke ame sam leski butji, sam lašiarde ande o Jesus Kristo pe le laše butia, kai o Del lašiardias angla savořende, eta ame te keras kudia. Sa anda kudia, tume nai-Židovuri kai či patianas angla savořende ande tumaro mas, akharde bi-šinde katar kudala kai akharen pen le šinde (ai kai si šinde ande pengo mas katar o vast le manušesko) — den tume godji ke tume sanas ande kudia vramia bi le Jesusosko, streia ai či anda o narodo alome katar o Del ai či ande le patji kai trubunas t'aven, bi te ažiukeren ai bi-Devleske ande e lumia. Numa akana, ande o Jesus Kristo, tume kai sanas angla savořende dur, tume pašilian katar o rat le Kristosko. Ke vo si amari patia, vo kai anda le dui kerel jekh, ai kai peradias o zido kai hulavelas amen ai kerdias amen dušmaia. Vo biladias ande pesko mas o Zakono le Mošesko leske ordinonsa ai poronkonsa, eta te kerel ande peste le donsa ferdi jekh narodo nevo, kai thol e patia. O Kristo thol le ande jekh than, le dui naroduri ande ferdi jekh stato le Devlesa, katar pesko merimos pe o trušul. Eta phařavel le dušmanon. Vo avilo te phenel tumenge e patia, tumenge kai sanas dur, ai e patia kudalenge kai si paše. Ke lestar vi amen vi tumen Židovuri ai nai-Židovuri si drom te žias paša o Dad, ande sa jekh Duxo. Kadia si, tume le nai-Židovuri či mai san streia, či žene avrial, numa tume san akana sar le svintsi, žene anda o narodo le Devlesko. Tume san vazdine pe o fundo katar le apostoli ai katar le profeturi. O Jesus Kristo inke vo si o bař le koltsosko. Ande leste sa o kher, mišto thodino, vazdel pe t'avel jekh templo svinto ande o Baro. Ande leste vi tume san vazdine te bešel ande tumende o Del ande o Duxosko. Pala kudia, me o Paul, o řobaš pala o Kristo tumenge kai či patian. Tume sikilian e butji kai o Del dias man peske mištimasa te kerel tumenge. Si ke sas mange sikado ke me žianglem e čudenia pe savi me avilem te ramosarav ande tsiřa vorbi. Kana gjinena, šai gindin tume sode si ma godji katar e čudenia le Kristoski. Či sikadili kudia ka le šiave le manušenge ande le kaver vitsi, sar sikadiol akana katar o Duxo ke le svintsi apostoli ai ka le profeturi le Kristoske. Kudia čudenia, si ke kudala kai či patian si amensa, keras ferdi jekh stato, ai ažiukeras so phendias amenge o Jesus Kristo katar e Laši Viasta. Man thode ma ministero katar e Laši Viasta katar o mištimos le Devlesko, kai si mange dino anda peski putiaria. Mange, kai sim o mai tsinořo anda le svintsi, kudo mištimos sas dino te phenav kudalenge kai či patian le barvalimata kai či žianen katar o Kristo. Ai te thav ande e vedaria so vo kerela katar e čudenia garadi anda sa le vrami katar o Del kai kerdias sa le dieli. Eta ke kudala kai porončin ai le bare ande le thana le čereske te žianen adies katar e Khangeri sa e godji le Devleski. O Del kerdias kadia sar vo kamlias sakda katar o Jesus Kristo amaro Baro, ande kaste si amen, katar o patiamos ande leste, o slobodimos te pašiovas paša o Del bi darako. Kadia me mangav tumen te na daran pala muře baiuri pala tumenge; von si tumaro vestimos. Anda kudia, me dav čanga angla o Dad, kastar tsirdel pesko anav sako familia ande o čeri ai pe e phuv, eta te del tumen, sar si o barvalimos lesko vestimasko, t'aven zurales zuriarde katar lesko Duxo andre ande tumende. Kadia ke o Kristo te bešel ande tumare ile katar o patiamos; eta t'avel ande tumende e vuna ai o fundo katar o kamimos, te tume te šai hatiaren sa le svintsonsa so si o buvlimos, o barimos, o andre ai o opre, ai te žianen o kamimos le Kristosko, kai si mai but sogodi tume žianen, kadia ke tume t'aven pherde ande sako diela ande o Del. Eta, ka kudo kai šai kerel sa, katar e zor kai si ande amende, but mai but anda sa so ame mangas vai gindisavas, leske t'avel e vestia ande e Khangeri ai ande o Jesus Kristo, ande sa le vitsi, berš beršestar! Amen! Me mangav tumen, me, o řobaš ande o Baro, te phiren vorta harniči ande so si tumenge phendo, ande sa o kovlimos ai e dragostia, ažiukerimasa, te ninkeren tume jekh avres kamimasa. Te thon tume zor t'aven ande jekh than katar o duxo, phangle katar e patia. Ferdi jekh stato si ai ferdi jekh Duxo, sar tume sanas akharde ferdi ka jekh nedeždia; Ferdi si jekh Baro, ferdi jekh patiamos, ferdi jekh bolimos, ferdi Del ai Dad anda sa, kai si opral savořendar, ai maškar sa, ai ande sa. Numa sakones amenge o mištimos sas amenge dino sar si e mesura kai dias ame o Kristo. Sa anda kudia si phendo: Anklisto opre, vo ningerdias phanglen, Ai vo dias podarki le manušen. Eta, so si kudia: Vo anklisto, te na niči ke vo vi vulisto ande le thana tela e phuv? Kudo kai vulisto, sa kudo si kai anklisto opral pa sa o čeri, eta te pherel sa le dieli. Ai vo dias podarki jekhen te aven sar apostoli, le kavren sar profeturi, le kavren te sikiaren, le kavren sar pastuřuri ai doktoruri, te lašiaren sar mai mišto le svintson ka e butji le ministereski ai te lašiaren o stato le Kristosko, žikin či ame aresas sa t'avas jekh ande o patiamos ai te žianas le Šiaves le Devlesko, sar si kerdo manuš, pe e mesura sar mai laši le Kristoski, eta te na mai avas ame glati, vulias ai ningerel ame e balval katar le kaver patiamata, kai šibin le manušen, ai athaven len te diliaren len, numa ke, kjidas o čačimos ande o kamimos, ame te bariuvas anda sako fialo ande kudo kai si o birevo, o Kristo. Lestar si, ai nais ka sa le phanglimata kai ažutin les, sa o trupo si mišto astardo ai mišto kjidino, tsirdel o barimos sar si e zor kai trubul anda sako partia, ai bariarel pe vo ande o lašimos. Eta so me phenav ande o anav le Baresko, si ke tume či mai trubul te phiren sar kudala kai či patian, kai phiren pala le ginduri kai traden nikai. Lengi godji kalili, von si streia ka o traio le Devlesko, kai nai o patiamos ande lende, pala ke si zuralo lengo ilo. Xasarde sa le ginduri, von thode pe te rimon pe, te keren sa xanžvale sako fialo so nai vužio. Numa tume, nai kadia ke tume sikilian pa o Kristo! Čačes tume ašundian pa leste, ai sikilian o čačimos kai si ande o Jesus sar kristianuri. Tume trubul te len pe tumende tumaro purano zakono. Vo sikavelas tumenge sar traisardian angla savořende — kodo purano zakono kai kerniol tumen te ningeren tumen te xasavon, t'aven neviarde ande o duxo tumaria godiako, ai te thon pe tumende o manuš nevo, kerdo ande o Del ande jekh kris ai jekh svintsimos kai del o čačimos. Sa anda kudia, muken o xoxaimos, ai ke sako anda tumende del duma sar si o čačimos ka pesko vortako; ke ame sam astarde jekh ka o kaver. T'avela tumen xoli, na keren bezex; ke o kham te na perel tele pe tumari xoli, ai na muken t'avel o beng. Kudo kai čorelas te na mai čorel; numa mai mišto te kerel butji te kerel anda peske vast so si mišto, te šai del kudales kai trubul les. Te na anklel anda tumaro mui či jekh vorba nasul, numa feri uni laše vorbi, te vazden ai te den jekh mištimos kudalenge kai ašunen. Na nekezin o Svinto Duxo le Devlesko, pala savo tume san astarde le dieseske kai avena skipime. Ke sako vuřitsimos, sako buntuimos, sako phabardi xoli, sako tsipimos, sako xoxaimos, ai sako fialo nasulimos, te žialtar maškar tumendar. T'aven laše jekh karing kavreste, miloso, te jertin jekh avreske, sar o Del jertisardias tumenge ande o Kristo. Keren sar kerel o Del, sar le glati kai vo kamel; ai phiren ande o mištimos, sar sas o Kristo, kai kamlias amen, ai kai dias pe vo ka o Del pala amende sar jekh dinimos kai khandel šukar. Ke e kurvetsia, o bi-vužio, ai o xanžvalimos te na inke t'aven phende maškar tumende, kadia či trubul le svintson. Ke te na ašunen či vorbi kai nai laše, či divano dilo, či asaimos, dieli kai si kaver fialo sar o mištimos; ke t'ašunen mai mišto dragosti. Ke, te žianen mišto, či jekh kurvari, vai jekh kai nai vužio, vai xanžvalo, (o xanžvalo si sar kudo kai patial ande le staturi,) či avela len khanči ande e amperetsia le Kristoski ai le Devleski. Ke khonik te na diliarel tumen intaino katar o divano; ke si pala kudala dieli ke e xoli le Devleski avel pe le šiave le buntuimaske. Te na avel tumen či jekh partia lensa. Angla savořende tume sanas tuniariko, ai akana tume san vedaria ande o Baro. Phiren sar glati la vedariake! Ke e vedaria del fruta, o lašimos e kris ai o čačimos. Len sama so si drago le Bareske; ai na len partia ka le butia kai si ande o tuniariko, numa mai mišto šiuden le. Ke si lažiav te phenas so von keren ande o garaimos; numa sogodi si dino strafo sikadiol katar e vedaria, ke sogodi dikhiol si katar e vedaria. Sa anda kudia si phendo: Ušti, tu kai soves, Ankli avri katar le mule, Ai o Kristo strefiala tut. Len tume sama sar tume keren, na sar le dile, numa sar le godiaver; keren mištimos sako data kai šai daštin, ke le diesa si nasul. Sa anda kudia te na aven prosti, numa te hatiaren so kamel o Baro. Na mation la moliasa: si o čořimos, Aven, aver fialo, pherde duxo; Ninkeren tume le psalmonsa, le gjiliansa, ai le kantikonsa duxoske, gjilaben ai vestin ande sa tumaro ilo le luvudimata le Bareske; Naisin sakda anda sako diela la Devles le Dades, ande o anav amare Baresko o Jesus Kristo, Řebdin jekh le kavreske ande e dar katar o Jesus Kristo. Žiuvlia, patian tumare řomen, sar t'avel o Baro; ke o řom si o birevo la řomniako, sar ke o Kristo si o birevo la Khangeriako, kai si lesko stato, ai kai vo si lesko Skipitori. Eta, sar e Khangeri řebdil le kristos, vi e řomni trubul te řebdil pe řomes ande sako diela. Řom, t'aven tumenge drago tumare řomnia, sar o Kristo si leske drago e Khangeri, ai vo dias pe pala late, eta te svintsil la katar e vorba, pala ke vužiardias la katar o bolimos le paiesko, eta te sikadiol angla leste kudia Khangeri vestime, bi-makhli, bi semnosko po mui, numa svinto ai bi došako. Kadia trubul ke le řom t'aven lenge drago lenge řomnia sar kamen penge staturi. Kudo kai si leske drago leski řomni si vo peske drago. Ke šoha khonik či vuřitsil pesko mas; numa pravarel les ai lel sama lestar, sar o Kristo kerel la Khangeriake, Ke ame sam sa ande jekh stato. Sa anda kudia o manuš mukela peske dades ai peska da, ai astardiola ka peski řomni, ai le dui avena ferdi jekh mas Kadia čudenia si bari; me phenav ke kadia kerel o Kristo ai e Khangeri. So mai si, ke sako anda tumende t'avel leske drago leski řomni sar si drago peske, ai ke e řomni te del pativ pesko řom. Glati, patian o mui tumare niamongo, sar si o Baro, ke kadia si vorta. De pativ tjire dades ai tjira da si e mai angluno poronka kai phenel so si t'avel mai angle, eta ke tu t'aves veselo ai ke tu te trais but pe e phuv. Ai tume, dada, na xoliaren tumare glaten, numa len sama lendar te lašiaren le ai te sikiaren le sar si o Baro. Služi, patian ka tumare bare kathe pe phuv la darasa ai le izdraimasa, ande e prostia tumari ileski, sar o Kristo, na ferdi angla lenge jakha, sar t'aven drago le manušenge, numa sar služi le Kristoske, kai keren laše ilesa so kamel o Del. Služin le sa tumare ilesa, sar ke te služin le Bares ai na le manušen, žianen ke sako, te si řobo, te si slobodo, lela katar o Baro sar vo kerela mištimos. Ai tume, birevia, keren sa kadia karing lende, ai na daraven len, žianen ke vo kai si lengo birevo ai vi tumaro si ande o čeri, ai ke vo del kris sakoneske sar jekh fialo. So mai si, zuriavon ande o Baro, ai katar leski bari zor, Thon pe tumende sa le armi le Devleske, eta te ninkeren mišto pe le xitreni le bengeske. Ke ame či maras ame pe le manuš, numa pa le amperatsi opral, pe le bare, pe le putiaria la lumiake kali, pe le duxuri nasul kai si ande o čeri. Sa anda kudia, lel sa le armi le Devleske, eta te šai daštin te ninkeren ande le nasul dies, ai te ninkeren tume pe punřende pala ke kerdian sa. Ninkeren zurales: t'avel tumen pe le prašave o čačimos sar prastia; Le le tsalia sastrune la krisake; Thon papuči pe tumare punře o gribimos kai del e Laši Viasta la patiaki; Ningeren angla tumende le fedevia le patiamaske, savensa tume šai mudaren sa le sulitsi pařake katar o Xitro; len vi e stadi sastruni le skipimaski, ai e xanřo le Duxoski, kai si e vorba le Devleski. Keren ande sa e vramia katar o Duxo sako fialo řudjimos ai mangimos. Len sama kudia sa zuralimasa, ai řudjin sa le narodoske le Devlesko řudjin mange, eta ke t'avel mange, kana putrav o mui, te phenav zorasa te žianen e čudenia katar e Laši Viasta, kaske me sim ambasadoro ande le lansuri, ai ke me dav duma zurales sar trubul te dav duma. Eta ke vi tume, te žianen so si pe mande, so me kerav, o Tixiko, o mai drago phral ai o čačo ministero ande o Baro, phenela tumenge sa. Tradav les tumenge naročno karing tumende, ke te žianen tume sar ame sam, ai te das mai but zor ande tumare ile. Ke e patia ai e mila le patiamasa t'aven dine ka le phral katar e partia le Devleski ai katar o Rai o Jesus Kristo! Ke o mištimos t'avel sa kudalensa kai si lenge drago amaro Baro o Kristo katar jekh kamimos kai či rimol pe. Lil katar o Paul ai o Timoteo, služi katar o Jesus Kristo, ka sa le svintsi ande o Jesus Kristo kai si ande o Filipi, ka le bare řasa ai ka le diakonuri: ke o mištimos ai e patia t'aven tumenge katar o Del amaro Dad ai katar o Rai o Jesus Kristo! Me naisiv muře Devles sako data kai so dav ma godji tumende či mukav ma, ande sa muře řudjimata tumenge, te sikavav muři veselia pala e partia kai tume len ka e Laši Viasta, de katar o mai angluno dies ži akana. Me sim siguro ke kudo kai lias pe ande tumende kudia laši butji kerela la mai mišto pe o dies katar o Jesus Kristo. Vorta si kadia ke me dav ma godji anda tumende, ke me ninkerav tumen ande muřo ilo, te si ande muře phanglimata, te si kana čačiuvav ai phenav pa e Laši Viasta, tume kai san mansa sa ande kudo mištimos. Ke o Del si mange marturo ke tume san mange drago sa le řezgimasa ande o Jesus Kristo. Ai so me mangav ande muře řudjimata, si ke tumaro kamimos te butiol but mai but te žianen ai t'avel tumen sa e godji te len sama so si le dieli mai laše, eta tume t'aven vuže ai bi došake ka o dies le Kristosko, pherde fruti la krisake kai si katar o Jesus Kristo, ka o vestimos ai o luvudimos le Devleske. Ke kamav tume te žianen, phralale, ke so areslias mange sas mai mišto te žal mai angle e Laši Viasta. Čačimasa, sa le ketani ai le kaver, žianen ke si pala o Kristo ke me sim ande kadala šele, ai pašte sa le phral ande o Baro, si len zor katar muře šele, si len mai but zor te phenen bi darako e vorba. Uni, čačes, den duma pa o Kristo ke kamen te len ai katar duxo čingarako; numa le kaver phenen pa leste lašimasa. Kudala keren kamimasa, ke žianen ke me sim thodino tela e sama katar e Laši Viasta, žikin ke kudala, rimome katar duxo čingarako, phenen pa o Kristo vorbensa kai nai čače ai le gindosa te vazden pe mande uni nekazi ande muře šele. Khanči! Te si kadia, ke lenge ginduri si nasul vai laše, o Kristo si mai but phendo; me veseli ma, ai mai veseliva ma. Ke me žianav ke kudo kerela ke skipiva ma, anda tumare řudjimata ai če ažutimos kai thol ma o Duxo katar o Jesus Kristo, sar me ažiukerav ai ažiukerava ke či avela mange lažiav anda khanči, numa ke, akana sar sakda, o Kristo avela vestime ande muřo stato pherdo čačimasa, t'avel katar muřo traio, t'avel katar muři martia; ke o Kristo si muřo traio, ai e martia si mange jekh nirimos. Numa te trubul pala muři butji ke te traiv ande muřo mas, me či žianav so šai te phenav. Me gribiv ma pa le dui riga: me kamav te žiavtar ai t'avav le Kristosa, so si o mai lašio; numa pala tumende musai mange te bešav tumensa ande o mas. Ai me sim siguro, me žianav ke me bešava ai ke me bešava tumensa, te žian tume mai angle ai t'avel tumen veselia ande o patiamos, eta ke, kana avava paša tumende, t'avel tumen ande mande jekh bari diela te vestin tume ande o Jesus Kristo. Ferdi, phiren kadia t'aven harniči laše katar e Laši Viasta le Kristoski, eta ke, t'avela ke avav te dikhav tumen, t'avel ke či sim kothe, te ašunav ke phenen pa tumende te tume bešen zurales ande jekh ženo, maren tume sar jekh duxo pala o čačimos ande e Laši Viasta. Te na muken tume či jekh fialo te daran katar le dušmaia, so si lenge jekh semno ke xasavona, numa tumenge avela o skipimos; ai kudia katar o Del, ke vo jertisardias tumenge katar o Kristo, na ferdi te patian tume ande leste, numa te mai kjinuin leske, te ninkeren tume sa kudo marimos kai dikhlian ke ninkerdem ma, ai kai ašunen tumen akana ke mai si ma te ninkerav. O traio Kristosa zuriarel tume, lesko kamimos vušarel tumen san tume ande jekh than le Svinto Duxosa ai si tumen dragostia ai lašimos jekh pe le kaver. Keren, me mangav tumen, t'avel muři veselia laši, t'aven sa jekh fialo, te avel tumen sa jekh kamimos, sa jekh duxo, sa jekh gindo. Na keren khanči katar o duxo rigate vai katar o intaino vestimos, numa muken tume prosti te dikhen pe le kaver sar t'aven tume mai tele katar le kaver. Ke sako anda tumende, te na lel sama feri katar so si lesko, te lel sama vi katar so si le kavresko. T'aven ande tumende le ginduri kai sas ande o Jesus Kristo, savo, si sar o Del, numa vo či gindisailo ke trubul te rodel te thol pe te avel jekh fialo sar o Del, numa vo šiudias pa peste, kai kerdilo sar sluga, t'avel jekh fialo sar le manuš; ai sikadilo sar jekh prosto manuš, vo korkořo kovlilo, vo patiaias ži ka e martia, ži ka e martia le trušuleski. Sa anda kudia vi o Del vazdias les opre, ai dias les o anav kai si opral sa le anava, eta ke ka o anav le Kristosko sako čang bangiol ande o čeri, pe e phuv ai tela e phuv, ai ke sako šib puřil ke o Jesus Kristo si o Rai, pe o vestimos le Devlesko o Dad. Kadia, muři kuči dragi, sa tume sakda patianas, keren butji te skipin tume darasa ai isdraimasa, na ferdi sar angla mande, numa mai but akana ke či sim kothe; Ke si o Del kai thodias ande tumende so kamen ai so keren, sar si leske drago. Keren sa le dieli bi te bulguin ai bi te den pe godji, eta tume t'aven bi-došake ai vuže, šiave le Devleske bi-došale maškar jekh vitsa žiungali ai rimome, maškar save tume strefian sar jekh amblal ande e lumia, kana ningeren tume e vorba le traioski; ai me šai vesti ma, o dies katar o Kristo, ke či našlem intaino, či kerdem butji intaino. Ai makar t'avela šiordo muřo rat pe o sakrifiso katar tumaro patiamos, me veseli ma, ai me veseli ma tumensa savořensa. Vi tume, sa kadia veselin tume, ai veselin tume mansa. Me gindiv ma ande o Rai o Jesus te tradav tumenge sigo le Timoteo, eta t'avel vi mange mišto t'ašunav pa tumende. Ke nai khonik mansa kasa te hulavav muře ginduri, t'avel mange čačes pe o ilo sar tume san; sa kathe, čačes, roden so si lenge mišto, ai na le Jesus Kristoske. Tume žianen ke vo sas zumado, kai thodias pe te služil e Laši Viasta mansa, sar jekh glata peske dadesa. Me gindiv ma te tradav les tumende sar dikhava sar sim vai kai sim; ai me patiav ma ande o Baro ke vi me žiava tumende sigo. Me gindi ma ke musai te tradav tumende muře phrales o Epafrodito, muřo vortako ande e butji ai ande o marimos, pa kaste tume tradian mange so šai trubul ma. Ke vo kamel te dikhel tumen savořen, ai vo sas nekežime ke tume ašundian lesko nasvalimos, Vo sas nasvalo, čačes, ai sa paša o merimos; numa o Del sas leske mila anda leste, ai na ferdi anda leste, numa vi anda mande, eta te na avel mange nekežimos pe o nekežimos. Me tradem les kadia sar mai sigo, eta ke tume te veselin tume kana dikhen les, ai t'avav vi me mai tsiřa nekežime. Len les le Baresa jekh intrego veselimasa, ai den pativ kasave manušen. Ke si pala e butji le Kristoski ke vo sas paša e martia, vo pašte dias pesko traio ke či sanas tume kathe te ažutin ma tume. So mai si, muře phralale, veselin tume ande o Baro. Me či mukav ma te ramov tumenge sa jekh fialo, ai avela tume mai mišto. Len tume sama katar le žiukel, len tume sama katar le nasul butiara, len tume sama katar le falši šinde. Ke le šinde, ame sam, kai das le Devles amaro kulto katar o Duxo le Devlesko, kai ame luvudisaras amen ande o Jesus Kristo, ai kai či thas amaro patiamos ande o mas. Vi me, te kamavas, thavas muřo patiamos ande o mas. Te si varekon te kamel te thol pe te patial ande o mas, me šai daštiv mai but. Me, šindo o oxtoto dies, anda e vitsa o Israel, anda e kumpania katar o Beniamin, Hebreo arakhadilo katar o Hebreo; sar si o Zakono, Fariziano; zuralo ande o gindo, maravas e Khangeri; samas bi-došako, pala e kris le Zakoneski. Numa kudala dieli kai sas mange te niriv, me dikhav pe lende sar xasarimos, pala o Kristo. Ai inke me dikhav sako diela sar xasarimos, pala o šukarimos kai si ma ande o Jesus Kristo muřo Baro, pala savo me sa muklem, ai me dikhav len sar čik, eta te niriv le Kristos, ai t'arakhen ma ande leste, na muřa krisasa, kudia kai avel katar o zakono, numa katar kudia kai si pala o patiamos ande o Kristo, e kris kai avel katar o Del pa o patiamos, eta te žianav le Kristos, ai e zor leske živindimaski, t'avel ma leske dukha, t'avav sar leste ande o merimos, t'aresav. Te šai daštiv, te živindiv anda le mule. Nai inke ke me lem o prešo, vai ke me sim pria lašio; numa me našav, te zumavav te lav les, ke vi me sim lino katar o Jesus Kristo. Phralale, či miazol mange ke me lem les; numa me kerav jekh diela: bustrav so si palpale ai žiav karing so si angle, me našav t'aresav ande o gor, te niriv o prešo kai si o akharimos le Devlesko ande o čeri katar o Jesus Kristo. Ame kadia kai sam sa lašio, t'avel ame sa kudo gindo; ai te si tume ande uni punturi jekh kaver gindo, o Del sikavela tumenge vi pe kudia. Numa, te phiras mai angle pe e vurma kai andias ame kathe. Keren sa sar mande, phralale, ai thon tumaro dikhimos pe kudala kai phiren sar si sar amende. Ke si but kai phiren dušmaia pe o trušul le Kristosko, me butivar dem tumensa duma pa kudia, ai mai dav duma akana roimasa. Lengo getomos avela o xasarimos; len si le sar del lengo dji, von thon pengo vestimos ande so si lengo lažiav, von den pe godji ferdi ka le dieli la phuviake. Numa amaro foro amenge si ande o čeri, kai vi ažiukerel amen amaro Skipitori o Rai Jesus Kristo, kai pařuvela o stato le lažiavesko, te keren ande leste jekh stato vestime, katar e putiaria kai si les ande sa le dieli. Sa anda kudia, muře kuč dragi ai muře pria kuč phralale, tume kai san muři veselia ai muři kurona, bešen kadia zurales ande o Baro, muře kuč dragi! Me mangav e Evodi ai e Sintixi t'avel len jekh fialo gindo ande o Baro. Ai vi tu, čačo vortako, e, řudjiv tu t'ažutis le, von kai marde pe pala e Laši Viasta mansa, le Klementosa ai le kavrensa muře vortača ande e butji, kai lenge anava si ande e kliška le traioski. Veselin tume sakda ande o Baro; mai phenav tumenge, veselin tume. Ke tumaro guglimos te žianen les sa le manuš. O Baro si paše. Te na daran khančestar; numa anda sa le dieli keren te žianel o Del so trubul tumen katar le řudjimata ai le mangimata, te naisin les. Ai e patia le Devleski, kai si mai but sar sa le godia, arakhela tumare ile ai tumare ginduri ande o Jesus Kristo. So mai si, phralale, ke sa so si čačo, sa so si pativalo, sa so si vorta, sa so si vužio, sa so si drago, sa so si vestime, ai sa so si harniko trubul te pheren tumare ginduri. So tume sikilian, lian ai ašundian mandar, ai so tume dikhlian ande mande, keren kadia. Ai o Del la patiako avela tumensa. Me lem bari veselia ande o Baro anda sar ke tume neviardian tumare ginduri pe mande; tume mišto dian tume godji, numa naštinas te keren kudia angla savořende. Nai ke trubul man vareso ke me phenav kadia, ke me sikilem t'avel mange mišto sar me sim. Me žianav te traiv ande o kovlimos, ai me žianav te traiv ande o but. Ande sa ai kai-godi me sikilem t'avav pravardo ai t'avav bokhalo, t'avav ande so si but ai t'avav ande so si tsiřa. Me šai kerav sa katar kudo kai del ma zor. Numa tume mišto kerdian ke si tumen partia ande muřo nekazo. Tume inke žianen, Filipianuri, anda o gor kai den duma pa e Laši Viasta, kana me gelemtar anda e Makedonia, či jekh Khangeri či gjinde mansa so von line ai so von dine. Tume ferdi dian, ke tume tradianas man ande e Tesaloniki, ai duvar, so šai trubulas man. Nai ke me rodav ferdi tumen te den ma podarki; numa me rodav but dobinda te dav tumen. Me sa lem, ai man si ma but; me sim pherdo mištimos, kai lem katar o Epafrodito so avilo tumendar sar jekh duxi kai khandel šukar, jekh sakrifiso kai o Del lel, ai kai si leske drago. Ai muřo Del dela tumen so trubul savořen sar si lesko barvalimos, veselimasa, ande o Jesus Kristo. Ka amaro Del ai Dad t'avel vestime berš beršestar! Amen! Den pozdraimos sa le svintson ande o Jesus Kristo. Le phral kai si mansa den tumen pozdraimos. Sa le svintsi den tume pozdraimos, ai sar mai but kudala katar o kher o Tsesaresko. Ke o mištimos katar o Rai Jesus Kristo t'avel tumare duxosa! Lil katar O Paul, apostolo katar o Jesus Kristo sar kamel o Del, ai o phral Timoteo, ka le svintsi ai čače phral ande o Kristo kai si ande o Koloso; ke o mištimos ai e patia t'aven tumenge dine katar o Del amaro Dad! Ame naisaras sakda le Devles, o Dad amare Baresko o Jesus Kristo, ai ame či mukas ame te řudjisaras tumenge, ašundiam tumaro patiamos ande o Jesus Kristo ai tumari mila sa le svintsonge. E vorba le čačimaski katar e Laši Viasta avili e mai angluno data tumenge kerdias te žianen o ažiukerimos kai ši tumenge šinado kadia tumaro patiamos ai tumaro kamimos si pe tume ažiukeren kai si thodo rigate tumenge ande a čeri. Vo si maškar tumende, ai ande sa e lumia; vo ninkerel e fruta, ai vo žial mai baro, sa vi si maškar tumende, de katar o dies kai tume ašundian ai žianglian o mištimos le Devlesko sar čačimos, sar tume sikilian ai lian katar o Epafras, amaro drago vortako ande e služetsia, kai si amenge jekh čačo ministero ande o Kristo, ai kai phendias amenge savo dragostia milako si ande tumaro duxo. Sa anda kudia ke vi ame, de katar o dies kai ame ašundiam, ame či mukas ame te řudjisaras le Devles tumenge, ai te mangas te pherel o Del tumen e godiasa te žianen so vo kamel, ande sa o godiaverimos ai hatiarimos kai del lesko Duxo, te phiren vorta harniči ande o Baro ai t'aven leske dragi, tume kerena sako fialo laše butia ai žiana mai angle ande so tumen žianen le Devlesa, zuriarde sako fialo katar leski zor vestime, kadia t'aven sakda ai veselimasa te ninkeren ai te ažiukeren. Naisin le Dades, kai kerdias anda tumende harniči te len partia katar so ažiukeren le le svintsi ande e vedaria, kai skipisardias amen katar e zor anda o tuniariko ai ningerdias ame ande e amperetsia le Šiaveski katar lesko kamimos, ande kaste si ame o skipimos ai o jertimos le bezexango. Vo si o vobrazo le Devlesko kai či dikhiol, o mai angluno arakhado. Ke ande leste si kerde sa le dieli kai si ande o čeri ai pe e phuv, so tume dikhen ai so či dikhen, putiaria duxoske, bare so porončin, rai bare. Sa si thodino lestar ai leske. Vo sas angla savořende sa le dieli, ai sa le dieli bešen ande leste. Vo si o šero katar o stato kai si e khangeri; vo si o gor, o mai angluno arakhado ande le mule, eta t'avel o mai angluno anda sa. Ke o Del kamlias te bešel sa o mištimos ande leste; vo kamlias te lašiarel sa pesa, sogodi si pe e phuv ke sogodi si ande o čeri, kai kerel e patia lestar, katar o rat katar lesko trušul. Ai tume, kai sanas angla savořende streia ai dušmaia katar tumare ginduri ai katar tumare žiungale butia, o Del akana thodias tumen ande jekh than lesa katar o merimos pesko šiavesko ande pesko stato phuviako, t'aven angla leste svintsi, vuže ai bi-došake, te si te bešen tume zurales ai te na miškin tumen anda o patiamos bi t'ambolden tume katar o ažiukerimos kai dias tumen e Laši Viasta kai tume ašundian, kai sas phendi ka sako so arakhadilo tela o čeri, ai me o Paul, kerdilem laki sluga. Me veseli ma akana ande muře dukha pala tumende; ke ande so mai trubul ka le kjinuimata le Kristoske ande lesko stato, me getov le ande muřo mas, kai si e Khangeri. Si latar ke me sim thodino sluga, sar si e butji kai o Del dias ma paša tumende, eta te phenav sar mai mišto e vorba le Devleski, e čudenia garadi anda sa e vramia ai ande le berš, numa sikadi akana ka le svintsi, kudaleske o Del kamlias te žianen sar si o vestime barvalimos anda kudia čudenia maškar kudala kai či patian, te žianen: O Kristo del tumen ažiukerimos ai vestia. Pa leste ame phenas, vazdas sako manušes, ai sikiaras sako manušes ande sa e godji kai o Del dias amen, eta te sikavas ka o Del sako manušes, t'avel lašio ande jekh than le Kristosa ande peske beršengo. Ande kudia me kerav butji ai marav ma, leska zorasa kai kerel zurales ande mande. Me kamav, čačes, ke tume te žianen sode si baro o marimos kai me ninkerav pala tumende, ai pala kudala kai si ande e Laoditsea, ai sa kudalenge kai či dikhle muřo mui masesko, eta t'avel lengo ilo pherdo zor, t'aven ande jekh than ande o kamimos, ai te barvalion pherde godji te žianen e čudenia le Devleski, te žianen o Kristo, čudenia ande savi si garade sa le mandjinata katar e godji ai katar o godiaverimos. Me phenav kudia ke khonik te na diliaren tumen le divanonsa t'athaven tumen. Ke, bi te dikhen ma, me sim tumensa le duxosa, dikhav veselimasa ke tumen ninkeren mišto zurales, ai sar ninkeren ande o Kristo. Kadia si, sar tume lian le Bares o Jesus Kristo, train ande jekh than lesa, si tume vuna ai zor ande leste, zuriarde katar o patiamos, sar dine tume te sikion, ai muken te del opral tumaro naisimos. Len tume sama ke khonik te na keren anda tumende t'aven lesko katar vorbi xoxamne ai nange kai šibin tumen ai ninkeren-pe pe so šai keren le manuš, pe le putiaria kai si ande e lumia, ai na pe o Kristo. Ke ande leste bešel ande lesko stato sa lesko lašimos le Devlesko. Tumen si tume sa ande leste, kai si o birevo pe sa le bare ai pe sa le putiaria kai porončin. Ai ande leste tume san šinde ande jekh šindimos kai či jekh vast či šindias, numa anda o šindimos katar o Kristo, kai si te lel pa tumaro stato o nasul mas. San angropome lesa katar o bolimos, tume živindisailian ande leste ai lesa, katar o patiamos ande e zor le Devleski, kai živindisardias les katar le mule. Tume kai sanas mule ke kerdian bezexa ai ke či sanas šinde ande tumaro mas, vo andias tumen ande o traio pesa, kai jertisardias tumenge sa tumare lažiave; vo khoslias o užilimos ke ame kerdiam ai kai sas pe amende, ai vo phaglias les kai karfosardias les pe o trušul; vo šiudias le bare ai le putiaria kai porončin, av vo sikadias le te dikhen le o narodo, nirisardias le katar o trušul. Ke khonik te na del tumen kris pala o xamos vai pala o pimos, vai pala jekh prasniko, pala jekh nevo šunuto, vai pala o sabato. Sas e ušialin katar so sas t'avel, numa o stato si ande o Kristo. Na muken tumen te del tumen strafo varekon kai si leske drago kai kerel pes prosto avrial, ai řudjil le andželon, kai lel opre so vo dikhlias ande o suno. Jekh kasavo manuš si pria barimatango ai kudia anda intaino sar si lesko gindo manušesko le gindil, bi t'astardiol ka o Kristo kai si o šero katar sa o stato, ninkerdo ai zurales kjidino katar le kokala ai le phanglimata, o stato kai bariol sar o Del kamel. Tume mulian le Kristosa line katar le putiaria la lumiake. Sostar tume mai train ande e lumia, sostar mai porončin pe tumende. Na len! na zumaven! na asban! Kana tume len kudala dieli, von si te na mai aven. Von si zakono ai sikiarimos katar le manuš. Le zakonuri čačimasa miazon ke si godiaver, ke von sikaven jekh řudjimos anda pende, o kovlimos, ai o vuřitsimos le statosko, numa len nai len či jekh mištimos te keren t'avel mišto lengo mas. Te živindisailian tume le Kristosa, roden le dieli opral, kai o Kristo bešel pe rig e čači le Devleski. T'avel tumenge drago le dieli opral, ai na kudala kai si pe e phuv. Ke tume san mule, ai tumaro čačo traio si garado ande o Kristo le Devlesa. Kana o Kristo, tumaro traio, sikadiola, atunči vi tume sikadiona lesa ande o vestimos. Keren te meren le kotora kai si phuviake, sar e kurvetsia, o marimos, so kamel o mas, le ginduri nasul, ai o xanžvalimos (kai si sar vobrazi kai patian ande le). Si pala kudala dieli ke e xoli le Devleski avel pe le šiave kai buntuin pe, maškar save tume phirenas angla savořende, kana tume trainas ande le bezexa. Numa akana, muken tele sa kudala dieli, muken e xoli, na mesain tumen sar le žigeni, muken o nasulimos, o prasaimos ai le vorbi žiungale kai šai anklen anda tumaro mui. Na xoxaven jekh avres, ke muklian o purano traio ai leske butia, ai thodian pe tumende o traio nevo, kai neviol, sar si o vobrazo kudalesko kai kerdias tumen. Nai kathe či Greko či Židovo, či šindo či bi-šindo, či sirbato či Skito, či řobo či slobodo; numa o Kristo si sa ai ande sa. Kadia si, sar alome katar o Del, svintsi ai pria dragi, thon pe tumende le pořa la milake, le kamimaske, le kovlimoske, le guglimaske, le ažukerimaske. Ai, te si jekh anda tumende te vatil-pe pe o kaver, ninkeren tume jekh avres, jertin tume jekh avres. Sar ke o Kristo jertisardias tumen vi tume jertin tumen. Numa mai opral sa kudala dieli thon pe tumende opral e mila, kai astarel tume sar mai mišto. Ai ke e patia le Kristoski, ka savi tume san akharde t'avel tumen ferdi jekh stato, t'amperetsil ande tumare ile. Ai te naisin. Ke te e vorba le Kristoski te bešel ande tumende but; sikiaren jekh avres ai vazden tume jekh avres ande sako godji, katar le psalmoria, katar le gjilia, katar le gjilia duxoske, gjilaben le Devles ande tumare ile tela o mištimos. Ai sogodi tume kerena, la vorbasa vai la butiasa, keren sa ande o anav le Jesus Kristosko, keren lestar o naisimos le Devleske o Dad. Řomnia, patian o mui tumare řomengo, sar trubul ande o Baro. Řoma, kamen tumare řomnian, ai na xoliavon pe lende. Glati, patian o mui ande sa le dieli ka tumare dada, ke kudia si drago le Bareske. Dada, na xoliaren tumare glaten, daratar ke na peren tele. Řoburi patian ande sa le dieli ka tumare birevia sar si o mas, na ferdi angla lenge jakha, sar t'aven drago le manušenge, numa kovle ilesa, daratar katar o Baro. Sa sogodi tume keren, keren les laše ilesa, sar le Bareske ai na le manušenge, žianen ke tume lena katar o Baro so si lesko t'avel tumaro. Služin le Kristos, o Rai. Ke kudo kai či kerel vorta lela so nai vorta, ke či lela o Del sama jekhestar mai but avrestar. Birevia, den ka tumare služi so si vorta ai mišto, te žianen ke vi tume si tume birevo ande o čeri. Ninkeren ande o řudjimos, len sama le mištimasa, řudjin sa kadia amenge, eta ke o Del te putrel jekh vudar la vorbake, kadia te šai phenas e čudenia le Kristoski, pala kaste me sim phanglo, ai řudjin te kerav te žianen la le manuš sar mai mišto kana dav duma. Aven godiaver kudalensa kai si avri, ai keren mišto sako data kai šai daštin. Ke tumari vorba t'avel sakda lasa o mištimos, thon pe late o guglimos, eta tume te keren te žianen sar te den palpale sakones. O Tixiko, o mai drago phral ai o čačo ministero, muřo vortako kai služil le Bares, phenela tumenge sa so si nevo pa mande. Me naročno tradav les karing tumende ke tume te žianen sar ame sam ai te miluil tumare ile. Me tradav les le Onesimosa, o čačo ai mai šukar phral, kai si vi anda tumare. Von phenena tumenge sa sogodi nakhel kathe. Aristarxo, muřo vortako phanglo mansa, del tume pozdraimos, ai vi o Marko, o vero katar o Barnabas, pa savo tume lian ordini — te žiala tumende, len sama lestar; O Jesus, kai akharen les Justus, vi vo del tumen pozdraimos. Von si Židovuri, ai von ferdi kerde butji mansa pala e amperetsia le Devleski, ai ažutisarde man but. O Epafras, kai si anda tumare, del tumen pozdraimos; sluga katar o Jesus Kristo, vo but marel pe pala tumende ande peske řudjimata, eta ke, vorta ai zurale, ninkerena tume ka sa so kamel o Del. Ke me sim marturo ke vo kerel but pala tumende, kudalende anda o Laoditsea ai kudalende anda o Hierapolis. O Lukas, o doxtoro but drago, del tume pozdraimos, ai vi o Demas. Den pozdraimos le phralen kai si ande o Laoditsea, ai ka e Nimfa, ai ka e Khangeri kai si ande lako kher. Kana kado lil avela gjindo tumendar, keren vi kadia ke t'avel vo gjindo ande e Khangeri ande o Laoditsea, ai ke tume te gjinen vi tume kudo kai avela anda o Laoditsea. Ai phenen ka o Arxipos: Le sama katar e ministeria kai tu lian ande o Baro, eta te mišto te phires les. Me dav tume pozdraimos, me o Paul, anda muřo vužio vast. Den tume godji ka muře phanglimata. Ke o mištimos le Devlesko t'avel tumensa! O Paul, ai o Silas, ai o Timoteo, ka e khangeri katar le Tesalonikianuri, kai si ande o Del o Dad ai ande o Jesus Kristo o Rai: Ke o mištimos ai e patia t'avel pe tumende! Ame sakda naisaras le Devles tumenge, das duma pa tumende ande amare řudjimata, ame phenas bi t'ašias tumari butji ande o patiamos, e butji tumare mištimaski, ande amaro Rai o Jesus Kristo, angla o Del amaro Dad. Ame žianas, phralale kai san pria drago le Devleske, ke tume san alome, ke amari Laši Viasta na ferdi diam pa late vorbasa, numa vi la zorasa, le Svinto Duxosa, ai sar jekh pherdo čačimasa; ke tume či busterdian ke ame sikadiliam vi maškar tumende, pala tumende. Ai inke tume, tume keren sar amende ai sar o Baro, kai lian e vorba maškar le but kjinuimata, le veselimasa ande o Svinto Duxo, kadia ke tume san akana jekh te len pe pala tumende sa kudala kai patian ande e Makedonia ai ande e Gretsia. Na ferdi, čačes, e vorba le Bareski bešli tumende ande e Makedonia ai ande e Gretsia, numa tumaro patiamos ašundilo ande sako than, kadia ke ame či mai trubusaras te mai das duma. Ke phenen, pala amende, sar lian amen paša tumende, ai sar tume pařudian tume ka o Del, ai muklian le vobrazi te služin le Devles o živindo ai čačo, ai te ažiukeren anda o čeri peske Šiaves, kai živindisardias les katar le mule, o Jesus, kai ankalavel amen avri katar e xoli kai si t'avel. Tume inke sa žianen, phralale, kai ame či aresliam tumende intaino. Pala o kjinuimos ai o lažiav kai liam ande o Filipi, sar tume žianen, ame liam zor ande amaro Del, te phenas tumenge e Laši Viasta ande o Del, maškar le but marimata. Ke amaro phenimos či bešel pe o šibimos, či pe khanči kai nai vužio, či pe o athaimos; numa, sar ke o Del gindil ke ame sam harniči kai dias ame e Laši Viasta, kadia ame das duma, na t'avas drago le manušenge, numa t'avas drago le Devleske, kai zumavel le ile. Šoha, čačes, ame či diam duma te makhas tumen, sar tume žianen; šoha ame či rodiam te las love; o Del si amenge marturo. Ame či rodiam o vestimos kai avel katar le manuš, či tumendar či katar le kaver; ame šai sikadiamas ame barimasa sar le apostoli katar o Kristo, numa ame samas pherde dragostia maškar tumende. Sar ke jekh kai lel sama katar le glati katar peske šiave, ame kamliamas, anda amari dragostia tumenge, na ferdi te das tumen e Laši Viasta le Devleski, numa vi amaro traio, kadia areslian amenge kuč. Tume den tume godji, phralale, diese ai riate ka e butji, te na avas phare pe či jekh anda tumende, ame diam duma pa e Laši Viasta le Devleski. Tume san le marturia, ai vi o Del si, ke karing tumende kai patian ame phiras jekh vurma svintsi, vorta ai bi-došaki. Tume mai žianen ke ame samas tumenge sakoneske so si jekh dad peske šiavenge, Vazdas tumen, miluisaras tumen, mangas tumendar te phiren t'aven harniči le Devleske, kai akharel tumen ka peski amperetsia ai ka pesko vestimos. Sa anda kudia ame naisaras sakda le Devles sar tume lian e vorba katar o Del, kai ame kerdiam te tume ašunen, tume lian la, na sar e vorba le manušeski, numa, kadia sar voi si vorta, sar e vorba le Devleski, kai kerel ande tumende kai patian. Ke tume, phralale, tume areslian te keren sar le Khangeria le Devleske kai si ande o Jesus Kristo ande e Judea, ke vi tume, tume sanas marde katar tumaro narodo sar von sas marde katar le Židovuri. Von mudarde le Bares o Jesus ai le profeton, kai kjinuisardine ame, kai nai drago le Devleske, ai si dušmaia sa le manušenge; či muken amen te das duma ka kudala kai či patian t'aven skipime kadia ke von či muken pe te butiaren penge bezexa. Numa e xoli gribisaili t'astarel len. Amenge, phralale, pala ke ame samas tsiřa hulade tumendar, katar o stato numa na katar o ilo, kadia amen sas ame o gindo sar mai but t'avas te dikhas tumen. Kadia kamas ame te žias karing tumende, me kamav me o Paul, jekh ai vi duvar; numa o Satan či muklias amen. Tume san, čačes, amari ažiukerimos, vai amari veselia, vai amari kurona vestimaski, vi tume, angla amaro Rai o Jesus, kana vo avela. Ei, tume san amaro vestimos ai amari veselia. Sa anda kudia, sar ame našti mai ažiukerasas, ai ame diam ame godji te bešas ande e Atena, ame tradiam le Timoteo, amare phrales, ministero le Devlesko ande e Laši Viasta le Devleski, te ninkerel tumen ai te zuriarel tumen ande tumaro patiamos, eta ke khonik te na miškil tumen maškar le buntuimata kai si akana, ke vi tume žianen ke ame sam šinade pe kudia. Ai kana ame samas paša tumende, ame phendiam tumenge angla savořende ke ame avasa pe o marimos, sar vi areslias, ai sar tume žianen. Kadia, sar me našti mai ažiukeravas, me tradem le Timoteo te žianav sar si tumaro patiamos, daratar ke kudo kai zumavel te na zumavel tumen, ai ke ame si te kerdiam butji pe intaino. Numa o Timoteo, nai de dumult areslo kathe tumendar, dias ame laše vasti katar tumaro patiamos ai katar tumari mila, ai vo phendias amenge ke tumen si tume sakda jekh lašio gindo amendar, ai kamen te dikhen ame sar vi ame kamas te dikhas tumen. Pala kudia, phralale, maškar sa amare nasulimata ai amare buntuimata, amenge si mišto anda tumende, sar ke tume patian. Ke akana ame traisaras, sar tume bešen zurales ande o Baro. Sar ame šai naisaras le Devles pala tumende, pala sa e veselia kai tume den amen, angla amaro Del! Riate ai diese, ame řudjisaras les jekh baria zorasa te mukel ame te dikhas tumen, ai te getosaras so mai trubul tumen. Ke o Del inke vo, amaro Dad, ai amaro Rai o Jesus, te lašiarel amaro drom ke t'ame te žias tumende! Ke te o Baro butiarel but mai but maškar tumende, ai karing sa, kudia mila kai sas amen karing tumende, eta te zuriarel tumare ile te na aven došale ande o svintsimos angla o Del amaro Dad, kana avela amaro Rai o Jesus sa peske svintsonsa. So mai si, phralale, sar tume sikilian amendar sar tume trubul te phiren ai t'aven drago le Devleske, ai kudia si so tume keren, ame řudjisaras tumenge ande o anav le Baresko o Kristo te phiren karing kudia mišto ai mai mišto. Tume žianen, čačes, če ordina ame diam tumen katar o Rai o Jesus. So o Del kamel, si tumaro svintsimos; si ke te len tume sama katar e kurvetsia; ke te sako anda amende te žianel sar te garavel pesko stato ande o svintsimos ai ande e pativ, bi te del opral pe leste o nasul kai kamel, sar keren kudala kai či žianen le Devles; Te na avel khonik karing pesko phral t'athavel ai t'avel xanžvalo ande e butji, ke o Baro tsirdel jekh strafo ande sa kudala dieli, sar ame inke phendiam ai sikadiam. Ke o Del či akhardias amen te na avas vuže, numa ka o svintsimos. Kudo kai šiudel kadala ordini či šiudel jekh manušes, numa le Devles, kai vi dias tumen pesko Svinto Duxo. Pe so si o kamimos le phralesko, či trubul te ramosaras tumenge pe kudia; ke inke tume ašundian katar o Del t'aven drago jekh avreske, ai si kadia ke tume keren karing sa le phral ande sa e Makedonia. Numa ame vazdas tumen, phralale, t'avel tume mai but o kamimos, ai te thon tumari pativ te train kovles, te len sama katar tumare butia, ai te keren tumari butji tumare vastensa, sar ame diam tume poronka, kadia ke tume t'aven vorta karing kudala kai si avri, ai te na trubul tumen khonik. Ame či kamas, phralale, te na žianen anda kudala kai soven, eta te na nekežin sar le kaver kai či ažiukeren khanči. Ke, te patias ame ke o Kristo mulo ai ke živindisailo, vi te patias ke o Del anela katar o Jesus ai lesa kudalen kai si mule. Eta, čačes, so ame phenas tumenge si e vorba le Bareski; ame le živinde, kai bešas t'ažiukeras le Bares, ame či žiasa angla savořende katar kudala mule. Ke o Rai inke vo, pe jekh semno kai vo dela, pe o hango katar jekh andželo ai pe o bašimos katar e tuturiaza le Devleski, vulela anda o čeri, ai le mule anda o Kristo živindina le mai angluni. Pala kudia, ame le živinde, kai ašiliam, ame avasa sa ande jekh than line lensa pe le nuveria, t'arakhas le Bares ande o čeri, ai kadia ame avasa sakda le Baresa, Miluin tume kadia jekh avresa katar kadala vorbi. Pe so si e vramia ai kana avela, či trubul tumen, phralale, te ramosaras tumenge. Ke vi tume žianen ke o Dies le Baresko avela sar jekh čor ande e riat. Kana le manuš phenena: Patia ai mišto, atunči jekh phařaimos avela pe lende, sar le dukha kai len la žiuvlia kana avela la glata, ai von či skipina pe. Numa tume, phralale, tume či san ande o tuniariko, sar ke te o dies lel tumen sar jekh čor; tume san sa glati la vediarake ai glati le dieseske. Ame či sam la riatiake či le tuniarikoske. Na soven sar le kaver, numa te las sama ai te na avas mate. Ke kudala kai soven e riat, ai kudala kai mation e riat. Numa ame kai sam le dieseske, te na avas mate, liam pe amende le tsalia sastrune le patiamaske ai la milake, ai si ame t'ažiukeras o skipimos. Ke o Del či šinadias amen pe e xoli, numa te kjinas o skipimos katar amaro Rai o Jesus Kristo, kai mulo amenge, eta ke, t'avela ke ame las sama, t'avela ke mai sovas, ame te traisaras lesa. Sa anda kudia vazden tume jekh avres, ai zuriaren tume jekh kavres, sar tume čačes keren. Ame řudjisaras tumen, phralale, te len sama kudalenge kai keren butji maškar tumende, kai ningerel tumen ande o Baro, ai kai vazdel tumen opre. T'avel tumenge but mila ai dragostia lendar, pala lenge butia. T'aven ande e patia savořensa. Ame mai řudjisaras tume, phralale, phenen kudalenge kai či train mišto, t'avel tumenge mila katar kudala kai pele tele, vazden le kovlen, t'avel tumen vramia karing sa. Len tume sama ke khonik te del palpale o nasulimos katar o nasulimos; numa našen sakda pala o mištimos, t'avela maškar tumende, t'avela angla sa. Aven sakda veseli. Řudjin bi te muken tume. Naisin ande sako diela, ke kudia si so kamel o del karing tumende ande o Jesus Kristo. Na mudaren le Duxos. Na vuřitsin le profeton. Numa len sama sako diela; ninkeren so si mišto; len tume sama katar sako nasulimos. Ke o Del la patiako te svintsil tumen vo sa intrego, ai ke sa tumaro stato, o gindo ai o duxo, t'aven garade bi-došake, kana avela amaro Rai o Jesus Kristo! Kudo kai akhardias tumen si čačo, ai vo kudia kerela. Phralale, řudjin amenge. Den pozdraimos sa le phralen jekhe svinto čimidimasa. Me mangav tumen katar o Baro, ke kado lil t'avel gjindo ka sa le phral. Ke e dragostia katar amaro Rai o Jesus Kristo t'ašel tumensa! Lil katar o Paul, ai o Silas, ai o Timoteo, ka e khangeri katar le Tesalonikianuri, kai si ande o Del amaro Dad ai ande o Jesus Kristo o Rai: ke o mištimos ai e patia t'avel tumenge dine katar o Del amaro Dad ai katar o Rai o Jesus Kristo! Amen si amen pala tumende, phralale, te naisaras sakda, sar si vorta, le Devles ke tumaro patiamos kerel but mai angle, ai ke e mila anda sako anda tumende karing le kaver butiol but ai mai but. Kadia ame luvudisaras anda tumende ande le kaver khangeria le Devleske, pala tumaro patiamos ai ninkerimos maškar sa o marimos ai le nasulimata kai tume ninkerdian. Sa kodia sikavel ke e kris le Devleski si vorta, t'aven tume harniči ande e amperetsia le Devleski, pala kaste tume kjinuisailian. Ke si e kris katar o Del te rimol kudalen kai rimon tumen, ai te den tumen, tumen kai san nekežime, hodina amensa, kana o Rai o Jesus sikadiola anda o čeri le andželonsa peska zorasa, maškar jekh pařa jagaki, te del strafo kudalen kai či žianen le Devles ai kai či patian ka e Laši Viasta amare Bareski o Jesus. Len avela len o strafo jekh phařaimos pe sakda, dur katar e fatsa le Bareski ai katar e vestia leska zoraki, kana vo avela, ande kudo dies, t'avel vestime katar peske svintsi ai drago ka sa kudala kai patian tume avena maškar kuda lende, ke patianas amari marturia. Sa anda kudia ame řudjisaras tumenge sakda, eta ke te o Del t'arakhel tumen harniči sar tume kerdian katar pesko akharimos, ai ke te del tumenge katar peski zor sogodi tumen kamlian katar lesko mištimos, ai e butji katar tumaro patiamos, ke o anav amare Baresko o Jesus t'avel vestime ande tumende, ai ke tume t'aven luvudime ande leste, sar si o mištimos amare Devlesko ai katar o Rai Jesus Kristo. Pe so si ke avela amaro Rai o Jesus Kristo ai t'avas ande jekh than lesa, ame řudjisaras tume phralale, te na muken tume intaino te miškin tumen anda tumari laši godji, ai te na muken te diliaren tumen ke te o dies le Baresko si inke kathe, t'avela katar varesavo duxo vai varesavi vorba, vai katar jekh lil kai phenena ke avel amendar. Ke khonik te na diliarel tumen či jekh fialo; ke trubul ke o buntuimos katar o Del t'avel angla savořende, ai ke te dikhen ke sikadiol o Manuš o Bi-krisako, o šiav le xasarimasko, o dušmano kai uštel opral pa sa so akharen Del vai so si drago, žikin či bešela ande o templo le Devlesko, phenela ke vo si o Del. Busterdian tume ke me phendem tumenge kudala dieli, kana inke me simas tumende? Ai akana tume žianen ke vareso ninkerel les, eta te na avel. O Bi-krisako sikhadiola ande peski vramia. Ke e čudenia e žiungali le Bi-krisako vuže voi inke kerel butji mai trubul ferdi ke kudo kai ninkerel la bilal. Ai kana avela o Bi-krisako, kai o Rai o Jesus bilavela les peske duxosa anda pesko mui, ai kai phařavela les katar o strefiamos kana avela. Kudo Bi-krisako si te sikadiol, katar e zor katar o Satan, sako fialo čudeniensa, semnonsa ai šodi xoxaimatansa, ai sa le dilimasa le bezexango kudalenge kai xasavon ke von či line o kamimos le čačimasko t'aven skipime. Kadia o Del tradel lenge jekh zor te den rigate, te patian ande o xoxaimos, eta ke sa kudala kai či patian ande o čačimos, numa kai si lenge drago so nai kris, t'aven dine strafo. Amenge, phralale pria drago ande o Baro, ame trubusaras sakda te naisaras pala tumende le Devles, ke o Del alosardias tumen de anda o gor t'aven skipime, katar o svintsimos le Duxosko ai katar o patiamos le čačimasko. Si pala kudia ke vo akhardias tumen ka e Laši Viasta, t'avel tumenge o vestimos katar amaro Rai o Jesus Kristo. Kadia si, phralale, bešen zurales, ai ninkeren o sikiarimos kai tume lian, t'avela katar amari vorba, t'avela katar amaro lil. Ke amaro Rai o Jesus Kristo inke vo, ai o Del amaro Dad, kai kamel ame, ai kai dias amen katar pesko mištimos jekh řezgimos kai ašel sakda ai jekh lašio ažiukerimos, te lel sama katar tumare ile, ai te zuriarel tumen ande sako laši butji ai ande sako laši vorba! So mai si, phralale, řudjin amenge, eta ke e vorba le Bareski te žial angle ai t'avel vestime sar si ande tumende, eta ame t'avas skipime katar le manuš nasul ai bengeske; ke sa nai len o patiamos. O Baro si čačo, vo ninkerela tumen ai arakhela tumen katar o xitro. Amen si ame karing tumende kudo patiamos ande o Baro ke tume keren ai ke tume kerena dieli kai ame diam tumen poronka. Ke o Baro te tradel tumare ile karing o kamimos le Devlesko ai karing o ninkerimos le Kristosko. Ame phenas tumenge, phralale, ande o anav amare Baresko o Jesus Kristo, te durion katar sako phral kai trail ande o dilimos, na sar le sikimata kai tume lian amendar. Tume inke žianen sar tume trubul te keren sar amende, ke ame či traisardiam maškar tumende ande o dilimos. Ame či xalian o manřo khanikasko ivia; numa, anda e butji ai anda o kjino, ame samas riate ai diese ande e butji, te na avas phare pe či jekh anda tumende. Nai ke nas amen o zakono, numa ame kamliam te sikavas tumenge te keren sar amende. Ke, kana ame samas tumende, ame phendiam tumenge naročno: Te si varekon te na kamel te kerel butji, vi te na xal. Ame ašundiam, numa, ke si maškar tumende uni kai train ande o dilimos, kai či keren butji, numa kai keren so či trubul te keren. Ame mangas kudale ženen, ai ame mothas len katar o Rai o Jesus Kristo, te xan von pengo manřo, te kerel butia mišto. Tumenge, phralale, na muken tume te na keren o mištimos. Ai t'avela varekon ke či patial so ame phenas ande kado lil, len lesko anav, ai te na avel tumen khanči lesa, eta t'avel leske lažiav. Na dikhen pe leste sar pe jekh dušmano, numa phen leske sar jekh phral. Ke o Baro la patiako te del tumen vo e patia ande sa le vrami, ande sako fialo! Ke o Baro t'avel tumensa savořensa! Me dav tumen pozdraimos, me o Paul, anda muřo čačo vast. Si muři signatura ande sa muře lila; kadia me ramosarav. Ke o mištimos katar amaro Rai o Jesus Kristo t'avel tumensa sa. O Paul, apostolo katar o Jesus Kristo, katar e ordina le Devleski amaro Skipitori ai katar o Jesus Kristo kai ažiukeras les, ka o Timoteo, muřo čačo šiav ande o patiamos; ke o mištimos, ai e mila ai e patia t'aven tuke dine katar o Del o Dad ai katar o Jesus Kristo amaro Baro! Te na bustren o vazdimos kai me dem, kana gelemtar anda e Makedonia kana me manglem tu te bešes ande o Efeso, eta te phenav tuke te les sama ke uni manuš te na sitiaren kaver fialo, ai te na astardion ka le paramiča ai te den duma pe le vitsi bi te geton, kai keren čingara de sar te žian angle ande e butji le Devleski ande o patiamos. So kamel te kerel kadia poronka, si jekh kamimos kai avel anda jekh ilo vužio, jekh laši godji ai jekh patiamos čačo. Uni, dine pe rigate katar kudala dieli, rimosaile ande le intaino divanuri; Von kamen t'aven doxtori le zakonoske, ai von či hatiaren so phenen či so žianen. Ame žianas ke o zakono si lašio, te trail o manuš pala leste sar trubul, žianas mišto ke o zakono nai vo kerdo pe kudala kai si vorta, numa pe le nasul ai kudala kai buntuin pe, pe le žiungale ai pe le bezexale, pe kudala kai či patian ande o Del ai pe kudala kai rimon, kai mudaren penge daden, kai mudaren, pe le kurvaria, pe kudala kai keren griatsa, kai čoren le glaten, le xoxamne, pe kudala kai solaxan intaino, ai sa kudala kai keren aver fialo sar si e svinto doktrina, sar si ande e Laši Viasta le vestimaski katar o Del pria veselo, e Laši Viasta kai si mange dini. Me naisiv kudales kai zuriardias ma, o Jesus Kristo amaro Baro, vo thodias ma čačo krisinitori, kai thodias ma ande e ministeria, me kai simas angla savořende jekh kai prasal, marel, jekh manuš nasul. Numa lem me e mila, ke me keravas bi te žianav, ande o dilimos; O mištimos amare Baresko dias opral, le patiamasa ai la milasa kai si ande o Jesus Kristo. Si jekh vorba čači ai sa trubul te len la, ke o Jesus Kristo avilo ande e lumia te skipil le bezexalen, kai me sim o mai angluno. Numa me lem e mila, eta ke o Jesus Kristo te kerel te dikhen le manuš lesko ažiukerimos sar modelo ande mande o mai bezexalo o mai angluno modelo, te sikavav kudalenge kai patiana ande leste ai lena o traio kai avela. Ka o amperato kadala beršenge, kai či merel kai, či dikhen les, ferdi o jekh Del, t'avel leske pativ ai vestimos, berš beršestar! Amen! E poronka kai me dav tu, Timoteo, muřo šiav, sar sas e profesia kai sas angla savořende tuke, si ke, pala late, tu maresa tu o lašio marimos, le patiamasa ai ande jekh laši godji. Kudia godji, uni xasarde la, ai von tasule katar o patiamos. Anda kudala si o Himeneo ai o Aleksandro, kai me dem le ka o Satan, eta te sikion te na prasan. Me vazdav tumen kadia, angla sa le dieli, te keren te řudjin, te mangen, te pušen, řudjimasa, sa le manušenge, le amperatsonge ai sa kudalenge kai si vazdine te porončin, eta t'aven amen jekh traio lašio ai mirno, ande sa e mila ai o čačimos. Kudo si lašio ai drago angla o Del amaro Skipitori, kai kamel te sa le manuš t'aven skipime ai te aresen te žianen o čačimos. Ke ferdi jekh Del si, ai ferdi jekh kai lašiarel maškar o Del ai le manuš, o Jesus Kristo o manuš, kai dias pe vo korkořo te kjinel savořen. Si e marturia phendi ande peski vramia, ai pala savi me sim thodino te dav duma sar apostolo, me phenav o čačimos, me či xoxavav, sim thodino te sikiarav kudalen kai či patian ande o patiamos ai o čačimos. Me kamav ke te le manuš řudjin kai-godi, te vazden vast vuže, bi xoliako ai či gindonsa nasul. Me vi mai kamav ke le žiuvlia t'aven uriarde sar trubul bi-lažiaves ai prosto, te na muken penge čunřa, tela len pe pende sunakai, či meržali, či tsalia pria kuč, numa te len pe pende le lašimata, sar trubul le žiuvlian kai kamen te služin le Devles. Ke e žiuvli te ašunel muto so sikiol, sa so ašunel. Me či mukav la žiuvlia te sikiarel, či t'avel voi bari pe o murš; numa voi trubul te bešel muto. Ke o Adamo sas kerdo o mai angluno, e Eva pala kudia; ai nai ke o Adamo sas diliardo, si e žiuvli kai, diliardi, aresli došali kai či patiaias. Voi avela numa skipime kai aresel dei, te voi žiala angle lokořes ande o patiamos, ande e mila, ai ande o svintsimos. Kadia vorba si siguro: T'avela varekon te kamel te lel sama e khangeri, vo rodel jekh diela laši. Ke trubul ke o episkopo t'avel bi došako, řom jekha řomniako, triazo, te phiravel pe mišto, te avel gostari, te žianel te sikiarel. Trubul te na del pe ka e mol, či te buntuil pe, numa te avel kovlo, patiako, te mukel pe. Te na kamel le love. Vo trubul te mišto ninkerel pesko kher, ai te ninkerel peske glaten ande pesko te patian lesko mui. Ke si te varekon kai či naštil te ninkerel pesko kher, sar lela vo sama katar e Khangeri le Devleski? Či trubul t'avel vo jekh nevo kai dias pe ka o Del, daratar ke phukiol barimata kai te perel tela e kris le bengeski. Mai trubul te si te lel jekh laši marturia kudalendar kai si avrial, eta te na perel ande o lažiav ai ande le kletki le bengeske. Le diakonuri kai služin vi von trubul t'aven čače, dur katar o dilimos, katar e but mol, katar jekh nirimos kai nai lašio, te garaven e čudenia le patiamaski ande jekh godji vuži. Te zumaven len angla savořende, ai atunči, te nai pe lende či jekh doš te keren pengi ministeria. Lenge řomnia, sa jekh fialo, trubul t'aven pativalia, triazi, te na bulguin, te na pen, čače ande sa le dieli. Le diakonuri trubul t'aven řom jekha žiuvliako, ai te ninkeren mišto penge šiaven ai penge khera; ke kudala kai len sama mišto katar pengi ministeria len jekh řindo pativalo, ai jekh bari zor ande o patiamos ande o Jesus Kristo. Me ramosarav tuke kadala dieli, le ažiukerimasa te žiav sigo karing tute, numa trubul tu te žianes, te či avava sigo, sar tu trubul te žias ande o kher le Devlesko, kai si e khangeri le Devleski živindo, o piluro kai ninkerel o čačimos. Ai, bi te dav palpale, e čudenia la milaki si bari: vo si sikado ande o mas, sikado katar o Duxo, dikhlo katar le andželi, den pa leste duma ka le thema, patian ande leste ande e lumia, vuštiado ande o vestimos. Numa o Svinto Duxo phenel naročno ke, ande le mai paluni vrami, uni mukena o patiamos, t'astardion ka le duxi kai diliaren ai ka le sikavimata le demononge, katar o xoxaimos le falši doxtorongo kai si pe lende e pečata le lažiaveski ande lengi godji, dena ordina te na ansurin pe, ai te na xan o xamos le Devlesko kai vo kerdias te xan les řudjimasa kudala kai si čače ai kai žianen so si o čačimos. Ke sogodi o Del kerdias si lašio, ai khanči trubul te šiuden, ferdi si te len les naisimasa, ke sa si svintsime katar e vorba le Devleski ai katar o řudjimos. Kana tu phenesa kadala dieli le phralenge, tu avesa jekh lašio ministero katar o Jesus Kristo, pravardo katar le vorbi le čačimaske ai e laši doktrina kai si tu te žial pala late. Numa šiude le paramiča xoxamne kai nai laše, sikio t'avel tu e mila; te aves zuralo ande tjiro stato si mišto numa te bešel paša o Del si mai mišto; vo phenel amenge pe o traio kai si akana ai pe kudo kai si t'avel. Si kathe jekh vorba siguro ai laši t'avel lini. Ame keras butji, čačes, ai ame maras ame, ke ame thas amaro ažiukerimos ande o Del živindo, kai si o Baro sa le manušengo, mai but kudalengo kai patian. Phen kadala dieli, ai sikiar le. Ke khonik te na vuřitsil tjiro ternimos; numa t'aves jekh modelo le čačenge, sar des duma, sar žias, ande e mila, ande o patiamos, ande o vužimos. Žikin me či avava, tho tu ka o gjinimos, de duma pa o Del, ai sikiar. Na muk rigate so si tu dino kai si ande tute, kai sas tuke dino katar le profeturi ai le vastensa kai le phure thode pe tute. Le sama katar muře dieli, ke tu san pala lende, eta ke so tu mai sikios te dikhen les sa. Le sama tutar ai pe so tu sikiares; žia angle ande kudala dieli, ke, kai keres tu kadia, tu skipisa tu tut, ai tu skipisa kudalen kai ašunen tute. Na de pe o lažiav zurales le phures, numa vazde les sar jekhe dades; vazde le terne muršen sar le phralen, le žiuvlian phure sar le deian, kudala kai si terne sar pheia ande sa o vužimos. De pativ le phivlian kai si čačes phivlia. Te si jekh phivli ke si la glati vai nepotsi, ke te sikion angla savořende t'avel lenge mila karing pengi familia, ai te den ka pengi familia so von line lendar; ke kudia si drago le Devleske. Kudia kai si čači phivli, ai kai bešel korkořo, thol pesko ažiukerimos ande o Del kai ninkerel riate ai diese ande le mangimata ai ande le řudjimata. Numa kudia kai trail ande e lumia sar le kaver voi si muli, makar ke si živindi. Phen lenge kadala dieli, eta te na aresen došale. Te si varekon ke či lel sama katar peske niamuri, ai mai but katar kudala ande peski familia, vo del palpale pesko patiamos, ai vo si mai nasul sar kudo kai či patial. Ke jekh žiuvli, t'avel voi ramome ande e kliška sar phivli, te na avel mai terni de šov-var-deš beršengi, ai te sas voi řomni ferdi jekhe řomeski, te phenen pa late mištimata katar lake laše butia, bariardas glaten, lelas mišto sama katar le gosti, xaladias le punře le svintsonge, ažutisardias le čořen, kerdias sako fialo laši butji. Numa na ramosar le ternia phivlian; ke, kana le barimata muken le katar o Kristo, von kamen t'ansurin pe, ai von aresen došale ke von šinen so mai angle solaxade te ninkeren. Kudala, sikion te žian kher kherestar; numa so si mai nasul, den duma ai či keren khanči, phenen so či trubul te phenen. Me kamav ke le ternia t'ansurin pe, ke t'aven len glati, ke te porončin pe pengo kher, ke te na den ka o dušmano te phenel nasul pa amende; Ke ži akana uni dine pe palpale te žian pala o Satan. Ke te si uni čače žiuvlia, si len phivlia sar niamo, t'ažutin le, ai ke te na avel pharo pe e khangeri, ke trubul t'ažutisarel le phivlian kai si čačes sa korkoře. Ke le phure kai porončin mišto t'aven dine kris jekh duvar mai pativale, mai but kudala kai keren butji te den duma ai te sikiaren. Ke o ramomos phenel: Tu či phandesa o mui le guruvesko kana vo ičiarel e simintsa. Ai: O butiari trubul t'avel pokjindo. Na le sama so phenen nasul pe le phure, te na avena dui vai trin marturia. Kudala kai keren bezexa, phen lenge angla sa, eta ke vi le kaver t'avel lenge dar. Me mangav tu angla o Del, angla o Jesus Kristo, ai angla le andželi alome, te les sama katar kudala dieli ai te na aven tuke mai drago le uni le avrendar. Na tho le vast pe khanikaste sigo, ai na av kudalensa kai keren bezex; vi tu, garav tu vužio. Te na pes ferdi pai, numa pi jekh tsiřa mol, pala tjiro peř ai ke butivar nai tuke mišto. Le bezexa uni manušenge sikadion, inke angla savořende te den len pe e kris, žikin ka le kaver von sikadion ke pala kudia mai angle. Sa jekh fialo, le laše butia si sikade, ai kudala kai nai sikade naštin t'aven garade. Sa kudala kai si lengi koř tela služetsia te dikhen pe penge birevia sar t'aven harniči pativale, eta ke te o anav le Devlesko ai e doktrina te na prasan len. Ai kudala kai si le birevia kai patian te na vuřitsin le, sar ke von si phral; numa te služin le sar mai mišto ke von patian ai trubul te aven but drago lenge. Sikiar kudala dieli ai de len poronki. T'avela varekon te sikiaren falši doktrini, ai kai či astardiol ka le svintsi vorbi katar amaro Rai o Jesus Kristo ai ka e doktrina kai si sar e mila, vo pherel pe barimata, vo či žianel khanči, ai les si les nasvalimos te pušel ai te čingerel vorbensa, katar avel e žaluzia, le marimata, le xoxaimata, le nasul ginduri, le intaino čingara katar le manuš kai si lengi godji rimome, kai či žianen o čačimos, ai kai gindin ke o patiamos si te aven barvale. Si, čačes, jekh baro nirimos katar o patiamos kana si so kames; ke ame či andiam khanči ande e lumia, ai si siguro ke ame naštisaras te ningeras khanči; te si amen o xamos ai le tsalia, dosta amenge. Numa kudala kai kamen te barvavon peren ande o zumaimos, ande e kletka, ai ande le but kamimata dile ai žiungale kai tason le manušen ande o čořimos ai ande o xasarimos. Ke o kamimos le lovesko si e vuna sa le nasulimastar; ai uni, kai si le kado kamimos, dine rigate dur katar o patiamos, ai von inke šiude pe ande but te rimon pe. Tuke, manuš Devlesko, naš katar kudala dieli, ai rode e kris, e mila, o patiamos, o kamimos, o ažiukerimos, o kovlimos. Mar tu o lašio marimos le patiamasko, le o traio pe sakda, ai pala savo tu kerdian jekh šukar puřimos angla but manuš martururi. Me porončiv tuke, angla o Del kai del ame o traio ande sako dieli, ai angla o Jesus Kristo kai puřisailo šukar angla o Pontius Pilato, t'arakhes e poronka, ai te trais bi makhlo, bi došako, žikin či avela amaro Rai o Jesus Kristo. Mai sikavela les ande peski vramia o Del svintsime o ferdi jekh amperato, o Amperato le amperatongo ai o Baro le barengo. Ferdi les nai merimos, kai bešel ande jekh vedaria kai naštisaras te žias late, kai či jekh manuš či dikhlias ai naštil te dikhel, kai si les e pativ ai e zor pe sakda. Amen! De poronka ka le barvale kadale beršenge te na aven barimatange, ai te na thon pesko ažiukerimos ande le barvalimata intaino, numa te thon o patiamos ande o Del, kai del amen sar mai but sako dieli te veselisavas. De len poronka te keren o mištimos, t'aven barvale ande le laše butia, t'aven slobodo, t'avel lenge mila, ai te kjiden kadia mai angle jekh mandjin thodino pe jekh fundo zuralo, eta te len o traio o čačo. O Timoteo, garav so si tu, le tu sama katar le čingari intaino kai rimon, ai katar le čingara pa o falšo žianglimos. Uni den duma kadia, ai si dine pe kadia rigate katar o patiamos. Ke o mištimos t'avel tusa! O Paul, apostolo katar o Jesus Kristo, sar kamel o Del, te phenel so avela o traio kai si ande o Jesus Kristo, ka o Timoteo, muři glata pria drago: ke o mištimos, e mila ai e patia te aven tuke dine katar o Del ai katar o Jesus Kristo amaro Baro! Me naisiv le Devles, kai služisarav ai kai muře niamuri služisarde jekha godiasa vuži, ke si riate ai diese ke me dav ma godji sakda tute ande muře řudjimata, dav ma godji ka tjire asva, ai kamavas te dikhav tu eta t'avav pherdo veselia, garadem o gindo čačo katar o patiamos kai si ande tute, kai bešelas angla savořende ande tjiri mami e Lois ai ande tjiri dei e Eunisi ai kai, me sim siguro, bešel ande tute. Sa anda kudia me vazdav tut te des pařa o dinimoske kai tu lian katar o Del kai thodem pe tute le vast. Ke nai jekh duxo lažiavesko kai o Del dias amen, numa jekh duxo zuralo, kamimasko ai godiako. Te na avel tuke lažiav te des duma pa o Baro, či pa mande lesko řobaš. Numa kjinuisavo mansa pala e Laši Viasta, katar e zor le Devleski, kai skipisardias amen, ai akhardias amen pesko narodo, na pala amare butia, numa sar vo kamel, ai sar si o mištimos kai si dino ande o Jesus Kristo le vramiansa pe sakda, ai kai sikadilo akana katar amaro Rai o Jesus Kristo, kai phařadias e martia ai sikadias so si o traio kai či merel katar e Laši Viasta. Si pala kudia Laši Viasta ke me sim thodino te dav duma ai te avav apostolo; thodino te sitiarav kudalen kai či patian. Ai si pala kudia ke me kjinuiv kudala dieli; numa nai mange lažiav, ke me žianav ande kaste me patiaiem, ai me sim siguro ke si les e zor te garavel so si muřo ži adies. Ninker ande o patiamos ai ande e mila kai si ande o Jesus Kristo ai le sar te sikaves le čače vorbi kai tu lian mandar. Le sama o lašio dinimos so dine tu te garaves, katar o Svinto Duxo kai bešel ande tute. Tu žianes ke sa kudala kai si ande e Azia mukle ma, maškar save o Figelo ai o Hermogenes. Ke o Baro thol peski mila pe o kher katar o Onisiforo, ke vo butivar lias mandar sama, ai leske nai lažiav katar muře lansuri. Aver fialo, kana vo avilo ande e Roma; vo rodias ma gribimasa, ai vo arakhlias ma. Ke o Baro te del les te arakhel e mila paša o Baro ande kudo dies. Tu žianes mai mišto sar le kaver sar vo ažutisardias man. Tu kadia, muři glata, zuriar tu ande o mištimos kai si ande o Jesus Kristo. So tu ašundian mandar angla le but martururi, de le ka le kaver manuš čače harniči te sikiaren vi le kavren. Kjinuisar mansa, sar jekh laši ketana katar o Jesus Kristo. Nai ketana ka lel sama katar pesko traio, te kamela kudaleske kai porončil leske; ai kudo kai našel či den les kurona, te na našela pe sar trubul, trubul ke kudo kai thol te bariol kerel butji angla savořende te kjidel le fruti. Hatiar so me phenav tuke; ke o Baro dela tut godji ande sa le dieli. De tu godji ka o Jesus Kristo, kai avilo katar o David, živindisailo katar le mule, sar si muři Laši Viasta, pala kaste me kjinuiv žikin sim phanglo sar jekh čor. Numa e vorba le Devleski nai phangli. Sa anda kudia me sa ninkerav pala le alome, eta ke vi von te len o skipimos kai si ande o Jesus Kristo, le vestimasa pe sakda. Kadia vorba si siguro: te muliam ame lesa, ame vi traisarasa lesa; te žiasa ame angle, ame vi amperetsasa lesa; te dasa ame les palpale, vi vo dela amen palpale; te na avasa ame čače; vo bešela čačo, ke naštil te del pe vo korkořo palpale. Phen kudala dieli, ai mang angla o Del te na keren čingara pe le vorbi, kai ferdi rimon kudalen kai ašunen le. Tho zor te sikadios angla o Del sar jekh manuš zumado, jekh butiari kai či loliol lesko mui, kai phenel sar trubul e vorba le čačimaski. Muk le divanuri intaino kai rimon ke kudala kai ninkeren le žian angle ande o lažiav, ai lengi vorba xala e gangrena. Anda kudala si o Himeneo ai o Filite, kai dine pe palpale katar o čačimos, phende ke o živindimos vuže areslo, ai kai dine muial o patiamos unengo. Numa, o fundo zuralo so thodias o Del bešel opre, kudale vorbensa kai si lenge e pečata: O Baro žianel kudalen kai si leske; ai, kon-godi phenel o anav le Baresko, te duriol katar e bezex. Ande jekh baro kher, nai ferdi kanti sunakune ai rupune, numa mai si vi anda o kašt ai e phuv; le uni si kanti anda e pativ, ai le kaver mai prosti. Te si varekon ke garavel pe vužio, te lel pe sama katar kudala dieli, vo avela jekh kanta pativali, svintsome, laši peske birevoske, laši ka sako butji. Naš dur katar le dilimata le ternimaske, ai rode e kris, o patiamos, e mila, e patia, kudalensa kai akharen le Bares jekhe ilesa vuže. De palpale le čingara dile ai intaino, žianes ke von keren le čingara. Eta, či trubul ke jekh sluga le Bareski t'avel les čingara; vo trubul, aver fialo, te lel sama savořendar, t'avel vužio te sikiarel, godiaver ai te žianel t'ažiukerel; vo trubul te vazdel kovles le dušmanon, ande o ažiukerimos ke o Del dela len te kein pe t'aresen te žianen o čačimos, ai ke, avile ka pengi godji, von lena pe avri katar le kletki le bengeske, kai vo lias len te keren anda lende sar vo kamel. Te žianen ke ande le mai paluno dies, avela vramia trudno. Ke le manuš avena barimatange, vortača le lovenge, luvudina pe, dena opral, prasana, buntuina-pe pe penge niamuri, či naisina, či patiana, zurale, nai čače, ningerena divano, či řibdina, bengeske, dušmaia le ženenge kai si laše, Nai laše, bariarena pe, phukiona ande le barimata, drago lenge avela o traio mai but sar o Del, sikavena pe avrial sar ke si len amaro patiamos numa dena palpale leski zor. Žia dur katar kudala manuš. Si maškar lende kai aven ande o kher, ai kai diliaren le žiuvlian kai si le jekh duxo kovlo ai kořo, pherde bezexa, miškin pala sako diela, sakda sikion ai šoha naštin t'aresen te žianen o čačimos. Sa jekh fialo sar ke o Janes ai o Jambres thode-pe pe o Moše, sa jekh fialo kudala manuš či žianen o čačimos, lengi godji si rimome, dine palpale anda so si o patiamos. Numa von či žiana mai angle; ke lengo dilimos dikhena les sa, sar dikhenas o dilimos katar o Janes ai o Jambres. Numa tu, tu gelian pala so sikiardem tu, muři vurma, muře ginduri, muřo patiamos, muřo kovlimos, muřo dragomos, muřo ninkerdimos, muře kjinuimata, muře dukha: Ka če dukh me či simas thodino ande o Antioxi, ande o Ikonium, ande o Listre? Če marimos me či ninkerdem? Ai o Baro skipisardias ma anda sa. Eta, sa kudala kai kamen te train čačimasa ande o Jesus Kristo avena marde. Numa le manuš nasul ai xoxamne žiana mai but ande o nasulimos, den pe rigate ai den rigate le kavren. Tu, beš ande le dieli kai sikilian ai kai si tuke drago; žianes katar tu sikilian; de tsinořara, tu žianes le svintsi lila, kai šai daštin te godiaveren tu te skipis tu katar o patiamos ande o Jesus Kristo. Sa o Ramomos avel katar o Del, ai si lašio te sikiarel, o čačimos te sikavel te lašiaren, te sikiarel te train ande e kris, eta ke le manuš le Devleske t'aven laše ai vuže pe sako laši butji. Me řudjiv tu angla o Del ai angla o Jesus Kristo, kai trubul te del pe e kris le živinden ai le mulen, ai angla o anav ke vo sikadiola ai anda leski amperetsia, phen e vorba, žia angle zuralimasa, te šai daštis vai niči, mai phen, phen vi kodo lenge kai či keren vorta, vazde le manušen, sa le kovlimasa ai le sikiarimasa. Ke avela jekh vramia kana le manuš či řibdina svinto sikiarimos; numa, xal le e mortsi kana ašunen le dieli drago, von kjidena but doxtori sar von kamen. Dena rigate o kan katar o čačimos, ai von amboldena pe karing le kovle. Numa tu, te na aves mato ande či jekh diela, ninker le dukha, ker e butji sar jekh kai ningerel e Laši Viasta. Ke mange, me inke služiv sar trubul, ai e vramia kai si te žiavtar pašiol. Me mardem o lašio marimos, me getosardem muřo drom, me garadem o patiamos. De akanara e kurona la krisaki si mange thodini rigate; o Baro, o vorta krisinitori, vo dela la mange ande kadala diesa, ai na ferdi mange, numa vi sa kudalenge kai si lenge drago ke avel. Aidi sar mai sigo karing mande; Ke o Demas muklias ma, ke kamel kudia lumia, ai vo gelotar te žial ande e Tesaloniki; o Kreskes gelo ande e Galatia, o Titus ande e Dalmatsia. Ferdi o Lukas si mansa. Le le Marko, ai an les tusa, ke vo trubul ma pala muři ministeria. Me tradem le Tixiko ande o Efeso. Kana tu avesa, an e bunda kai me muklem ande o Troas ka o Karpus, ai le kniški, mai but le xarti. O Alexandre, o kovači, kerdias mange but nasul. O Baro dela les sar si leske butia. Le tu sama lestar, ke vo ninkerel pe zurales katar amare vorbi. E mai angluno data kai kamlem te čačiuvav, khonik nas t'ažutil ma, numa sa mukle ma. Ke kudia te na avel pe lende doš! O Baro ažutisardias ma ai zuriardias ma, eta ke o divano t'aresel mandar ai ke sa kudala kai či patian t'ašunen la. Ai me simas lino avri anda o mui le lionosko. O Baro skipila ma anda sa le butia nasul, ai vo skipila ma te del ma andre ande e amperetsia le čereski. Leske t'avel o vestimos berš beršestar! Amen! De pozdraimos la Priska ai le Akilas, ai e familia katar o Onesifora. O Erasto ašilo ande o Korinto, ai me muklem le Trofimo nasvalo ande o Mileto. Zumav t'aves angla savořende o iven. O Eubulus, o Pudens, o Linus, e Klodia, ai sa le phral den tu pozdraimos. Ke o Baro t'avel tusa! Ke o mištimos t'avel tumensa. O Paul, sluga le Devleski, ai apostolo katar o Jesus Kristo pe o patiamos katar le alome le Devleske ai pe o čačimos kai sikiarel amaro patiamos, save bešen ande o ažiukerimos katar o traio sakda, šinado anda le mai purane vrami katar o Del kai či xoxavel, ai kai sikadias peski vorba ande peski vramia katar o divano kai sas mange dino sar si e ordina katar o Del amaro Skipitori, Titus, muřo čačo šiav anda amaro patiamos: ke o mištimos ai e patia t'aven tumenge dine katar o Del amaro Dad ai katar o Jesus Kristo amaro Skipitori! Me muklem tu ande e Kreta, eta tu te lašiares so mai si te lašiares, ai ke, sar me dem tu ordina, tu te thos phure ande sako foro. T'arakhesa uni manušen pativale, řom jekha řomniako, te si len glati čače, kai nai pe lende doš ai či buntuin pe. Ke trubul ke o episkopo t'avel bi došako, sar te lel sama katar e butji Devleski; ke te na avel barimatango, te na del pe ka e mol, te na marel pe, te na kamel te niril intaino; numa t'avel lašio gostari, vortako le ženenge kai si laše, manuš kai lel pe sama, vorta, svinto, kai ninkerel, kai astardiol ka e čači vorba sar sas sikiardi, eta t'avel harniko te vazdel e sasti doktrinasa ai te del rigate so nai mišto. Si, čačes, mai but katar kudala kai si šinde, but žene kai buntuin pe ai kai diliaren le kavren. Von trubul te phandaven tumen lengo mui. Von diliaren famili antregi, sikiaren pala jekh lov lažiavardo so či trubul te sikiaren. Jekh anda lende, lengo profeto, phendias: Kretanuri sakda si xoxamne žigeni nasul, peřa khaile. Kudia marturia si čači. Sa anda kudia len len zurales, eta t'avel len jekh patiamos sasto, ai te na astardiol ka le paramiča židovitsko ai ka le poronki le manušenge kai den pe palpale katar o čačimos. Sa si vužio kudalenge kai si vuže; numa nai khanči vužio kudalenge kai si mahrime ai či patian, lengi godji ai lengo gindo si mahrime. Von keren sar ke te žianen le Devles, numa von den les palpale katar penge butia, si vuřitsoso, buntuin pe, ai nai laše pe či jekh laši butji. Numa tu, phen le dieli kai si vorta sar si e sasti doktrina. Phen ke le phure, trubul te bešen striazo, pativale, kovle, svintsi ande o patiamos, ande e mila, ande o ažiukerimos. Phen ke le phuria, trubul vi von te phiraven pe sar trubul o svintsimos, te na den duma intaino, te na pen mol; ke trubun von te sikiaren mišto, Te si te sikiaren le ternia žiuvlian t'avel lenge drago lenge řom ai lenge glati, te ninkeren pe, pativalia, te len sama katar e butji le khereski, laše, t'ašunen o mui penge řomengo, eta ke e vorba le Devleski te na prasan la. Vazde vi kadia le terne muršen te len pe sama, te sikaves tu vi tu karing sar jekh modelo laše butiango, ai te des jekh sikimos vužio, vorta, jekh vorba sasti, bi-došaki, eta ke o dušmano te perel tele, te na avel les khanči nasul te phenel pa amende. Vazde le slugen te ašunen o mui penge birevongo, t'aven lenge drago ande sa le dieli, te na den anglal intaino, Te na čoren khanči, numa te sikaven sakda jekh čačimos vorta, eta te den pativ ande sa e doktrina le Devleski amaro skipitori. O Del sikadias pesko mištimos le skipimasko kai si sa le manušenge Vo sikiarel amen te mukas o traio bi-Devlesko ai le dieli le phuviake, ai te traisaras ande kadala berš sar si e godji, e kris ai e mila, žikin ažiukeras o dies kai ažiukeras, kana avela o vestimos katar o baro Del ai katar amaro Skipitori o Jesus Kristo, kai inke vo dias pe pala amende, eta te kjinel ame katar sako bezex, ai te kerel peske jekh narodo t'avel lesko, vužiardo lestar ai harniko pe le laše butia. Phen kudala dieli pherdo zorasa, ai mai phen len te vazden le manušen kai ašunen tu. Ke khonik te na vuřitsil tu. Mai phen lenge te muken pe pala le rai bare ai ka e kris, te patian, t'aven laše ka sa e laši butji, te na den duma nasul pa khanikaste, t'aven kovle, te len pe sama, mištimasa pherde karing sa le manuš. Ke vi ame, ame samas angla savořende dile, či patiasas, šibisailiam, řoburi ande sako diela kai ame kamasas ai ande o barvalimos, traisarasas ande o nasulimos ai ande so sas amenge drago, le kavre vuřitsinas ame, ai ame vuřitsisarasas len. Numa, kana e dragostia le Devleski amaro Skipitori ai lesko kamimos le manušenge sikadile, vo skipisardias amen, na pala le butia laše kai ame šai te kerdiam, numa pala peski mila, ande o bolimos te mai neviarel amen ai o nevo traio katar o Svinto Duxo, kai vo dias pe amende pria but katar o Jesus Kristo amaro skipitori, eta ke, sam dine katar e kris katar lesko mištimos, ame t'aresas kai ažiukeras, te las o traio pe sakda. Kadia vorba si vorta. Me kamav ke tu te phenes kadala dieli, eta ke kudala kai patian ande o Del te thon pe te keren laše butia. Eta so si lašio ai so trubul le manušen. Numa muk le čingara dile pala le vitsi, ai le čingara, pala o zakono; ke von nai khančeske ai intaino. Tu de tu dur, pala o mai angluno ai o duito data kai phendian leste, kudalestar kai kerel te hulaven pe le manuš, žianes ke jekh manuš sar kudo si kurvari, ai ke kerel bezex, kai del pe strafo vo korkořo. Kana me tradava tuke le Artemas vai le Tixiko, gribisavo t'aves mande ande o Nikopolis; ke kothe me kamav te nakhav o iven. Le sama te des so trubul pe o drom ka o Zenas, o doxtoro le zakonosko, ai ka o Apolos. Trubul ke vi amare manuš te sikion te keren le butia laše te den amen so trubul ame akana, eta te na aven bi-frutengi. Sa kudala kai si mansa den tu pozdraimos. De pozdraimos kudalen kai kamen amen ande o patiamos. Ke o mištimos te avel tumensa sa! O Paul, ande e temnitsa katar o Jesus Kristo, ai o phral o Timoteo, ka o Filemon, amaro mai drago ai amaro vortako ande e butji, ka e phei Apia, ka o Arxipo, amaro vortako ande o marimos, ai ka e Khangeri kai si ande tjiro kher: ke o mištimos ai e patia t'aven tumenge dine katar o Del amaro Dad ai katar o Rai o Jesus Kristo! Me sakda naisiv muře Devles, dav duma pa tute ande muře řudjimata, ke mange phende pa tjiro patiamos kai tut si tu ande o Jesus Kristo pe sa le svintsi. Me mangav les ke tjiri partia ka o patiamos t'avel bari pe e butji le Kristoski, te kerel te žianen ande amende sako fialo mištimos. Sas ma, čačes, but veselia ai mila pala tjiro mištimos; ke tu, phrala, zuriardian o ilo le svintsongo. Sa anda kudia, makar ke si ma ande o Kristo sa slobodo te phenav tuke so si mai mišto, mai mišto si ande o anav la milako ke me phenav tuke jekh řudjimos me o Paul, kadia sar phuro, ai vi akana řobaš le Jesus Kristosko. Me mangav tu te kerel mištimos ka o Onesimos, kai areslo sar muřo šiav, kana me sim phanglo ande e temnitsa, ke kaver data či sas khančesko tuke, numa akana trubul, ai tuke ai mange. Me tradav tuke les, muře čače pořa. Me kamlemas te ninkerav les paša mande, te služil man ande tjiro than, žikin me sim phanglo pala e Laši Viasta. Numa, me či kamlem khanči te kerav bi te pušiav tutar, eta ke te tjiro mištimos te na avel pe zor, numa t'avel tutar korkořo. Amburim si vo hulado tutar pe jekh tsiřa vramia, eta ke tu te garaves les pe sakda, ai na mai sar jekh řobo, numa sar mai baro sar jekh řobo, sar jekh phral pria drago. Vo si but drago mange, ai inke mai drago tuke vi ande o mas, vi ande o Baro. Te ninkeresa ma tu sar tjiro vortako, le sama lestar sar te les sama mandar. Ai te kerela tuke vareso nasul, vai te kamela tuke vareso, tho les pe mande. Me o Paul, me ramov anda muřo vast «me pokjinava,» ke žianes ke tu kames mange tjiro traio. Ei, phrala, ke me te lav tutar kudo mištimos, ande o Baro; lašiar muřo ilo ande o Kristo. Si ke gjinav pe tjiro patiamos ke me ramov tuke, me žianav ke tu keresa mai but de sar me phenav tuke. Sa ande kudia vramia, lašiar mange jekh than, ke me užiarav ke me si t'avav, nais tumare řudjimaske. O Epafras, muřo vortako phanglo ande o Jesus Kristo, del tu pozdraimos, vi o Marko, o Aristarxo, o Demas, o Lukas, muře vortača ande e butji. Ke o mištimos katar amaro Rai Jesus Kristo t'avel tumare duxosa! Angla savořende, butivar ai sako fialo, o Del dias duma ka amare dada katar le profeturi. Numa, ande kadala mai paluni vrami, dias amensa duma katar o Šiav, kai thodias t'avel leske sako dieli, kastar vo vi kerdias e lumia, ai kai si o strefiaimos leske vestimasko ai e pečata katar so si, ai ninkerel sako dieli katar peski vorba zurali. Vo kerdias te vužion le bezexa ai bešlo pe e čači rig Devleski amperetisko ande le than but vuče. Areslo o Šiav mai baro sar le andželi ke vo lias o anav mai lašio sar lengo. Ke pa varesavo andželo o Del či phendias šoha: Tu san muřo Šiav, me kerdem tu adies Ai mai: Me avava tuke jekh dad, ai tu avesa mange jekh šiav Ai kana andias ande e lumia o mai angluno arakhado, vo mai phendias: Ke sa le andželi le Devleske te kamen les! Numa, vo phenel pa le andželi: Vo kerel peske andželon sar balvalia, Ai peske služi sar pařa la jagake. Numa vo phenel le Šiaveske: Tjiro skamin amperatisko, o Del, si pe sakda; Tjiri rovli amperetsiaki si jekh rovli vorta; Tuke si drago e kris, ai tu vuřitsis o nasulimos; Sa anda kudia, o Del, tjiro Del svintsisardias tu Jekhe vuloiesa svinto, mai opre sar tjire vortača Ai mai: Tu, Baria, tu de angla savořende thodian e phuv, Ai le čeri si le butia tjire vastengi. Von xasavona, numa tu bešesa; Von phuriona sar jekh tsolo, Tu kjidesa len sar jekh bunda ai von avena pařude, Numa tu, tu bešes jekh fialo, Ai tjire berša či getona pe. Ai ka varesavo andželo o Del či phendias šoha: Beš pe muři rig čači, Žikin či kerava anda tjire dušmaia te phires pe lende? Von si duxuri hai služin le Devles, tradine te keren jekh ministeria te kerel mištimos kudalenge kai trubun te len o skipimos. Sa anda kudia ame trubul sar mai but t'astardiuvas ka le dieli kai ame ašundiam, daratar ke te šai duriuvas latar. Ke e vorba phendi katar le andželi sas čači, ai dine o strato ka sako kai či patian as sar trubulas. Sar šai te skipisaras ame te na lasa sama kasavo baro skipimos, kai, phendo angla savořende katar o Baro, mai sas amenge phendo katar kudala kai ašunde. O Del sikavdias amenge ke so phendias sas čačo katar le semnuri ai le čudeni, ai katar le podarki katar o Svinto Duxo kai dias sar vo kamlias. Čačes, nai le andželonge ke o Del thodias lenge e lumia kai si t'avel anda savi ame das duma. Eta varekon phendias varekai kadia: So si o manuš, te des tu tut godji leste, vai o šiav le manušesko, te les tu sama lestar? Tu kerdian les pe jekh tsiřa vramia mai tele katar le andželi, Tu thodian pe leste e kurona le vestimaski ai le šukarimaski, Tu sa thodian tela leske punře. Čačes, kai thodian tela leste sa le dieli, o Del či muklias khanči te na avel tela leste. Numa, ame či dikhas akana ke sa le dieli si tela leste. Numa kudo kai sas kerdo pe jekh tsiřa vramia mai tele katar le andželi, ame dikhas les kuronasa vestime ai šukarimasa pala o merimos kai vo kjinuisardias, eta ke, katar o mištimos le Devlesko, vo kjinuisardias o merimos pala sa. Trubulas, čačes, ke kudo kastar ai kaske si sa le dieli, ai kai kamel te ningerel ka e vestia but anda le šiave, uštiavel sar mai mišto katar e dukh le Prinsos kai skipisardias len. Ke kudo kai svintsol ai kudala kai svintsisaile le von sa avile anda jekh Dad. Sa anda kudia vo nas leske lažiav t'akharel len phral. Kana vo phenel: Me vestiva tjiro anav mašar muře phral. Me luvudiva tut makar e kumpania. Ai mai: Me puřiva ma tute. Ai mai: Eta me ai le glati kai o Del dias ma. Kadia si, sar le glati vi von si le ratesa ai le masesa, vi vo sas sa kadia, eta ke, katar e martia, vo mudarel kudales kai si les e putiaria pe e martia, si kudo o beng, ai kai vo skipil kudalen kai, daratar ke si te meren, sas ninkerde sa pengo traio ande o služimos. Ke si siguro ke nai te ažutil le andželon ke vo avilo, numa si kudalenge kai avile katar o Abraham. Anda kudia, vo areslo sa jekh fialo ande sa le dieli sar peske phral, eta t'avel jekh baro rašai miloso ai čačo ande e služetsia le Devleski, te pokjinel le bezexa katar o narodo; ke, sar sas vo zumado ai sar vo kjinuisailo, vo šai ažutil kudalen kai zumaven len. Sa anda kudia, phralale svintsi, kai akhardias tumen o Del len sama katar o Jesus kai si o baro rašai katar amaro patiamos. O Jesus sas čačo ka kudo kai thodias les, sar sas o Moše ande sa pesko kher. Ke o Jesus si les jekh vestimos mai baro katar o Moše sar kudo kai vazdias o kher si les mai but pativ katar o kher. Sako kher si vazdino varekastar, numa kudo kai vazdias sa le dieli si o Del. O Moše sas čačo ande sa o kher le Devlesko, sar sluga, t'avel marturo pe soste si t'avel mai angle; numa o Kristo si sar Šiav pe le Devlesko kher; ai lesko kher, sam ame, te si te ninkeras ame ži ande o gor o patiamos ai te ažiukeras anda soste ame luvudisaras. Sa anda kudia, sar phenel o Svinto Duxo: Adies, te ašunena tu me lesko hango, Na zuralen tumare ile, sar kana buntuisailian, O dies kai sanas zumade ande e pusta, Vai kai tumare dada zumavena man Te zumaven ma, ai von dikhena muře butia Štar-var-deš berš. Kadia me lem xoli pe kudia vitsa ai me phendem: Len si le sakda jekh ilo kai del rigate, Von či žiangle muře vurmi. Me solaxemas ande muře xoli. Von či avena andre ande muři hodina! Len tume sama, phralale, ke či jekh anda tumende te na avel les ilo nasul ai kai či patial, kadia te del pe palpale katar o Del o živindo. Numa ažutin jekh kavres sako dies, kadia but sode šai daštin te phenen: Adies! eta ke či jekh anda tumende te na zuriarel pe katar o athaimos le bezexako, Ke amen si ame akana partia le Kristosa, te ninkeras ame ži ka o gor patiamos kai sas ame mai d'anglal. Žikin si phendo: Adies, te ašunena tume muřo hango, Na zuriaren tumare ile, sar kana buntuisailian. Kon sas, čačes, kudala kai buntuina pe pala ke ašunde? Kudala kai ankliste avri anda e Egipta kai ningerdias le o Moše. Kon sas kai o Del xoliailo pe lende štar-var-deš berš? Le bezexale kai lenge staturi pele ande e pusta. Kaske vo solaxadias ke von či dena andre ande leski hodina. Kudalenge kai či patian? Kadia ame dikhas ke von naštin te den andre pala ke či patian. Te las ame sama, ke vo phendias t'avas ande leski hodina, ke či jekh anda tumende te na avel les e hodina. Ke kudia laši viasta sas amenge phendi sa kadia mišto sar lenge, numa von či line e viasta patiamasa kana ašunde. Amenge kai patiam, ame das andre ande e hodina, sar si ramome: Me solaxadem ande muři xoli: Von či avena andre ande muři hodina! Vo phenel kudia, makar ke leske butia sas gata dekin kerdias e lumia. Ke vo delas duma varekai pa o eftato dies: Ai o Del hodinisailo anda sa peske butia o eftato dies. Ai mai kathe: Von či dena andre ande o them kai si muři hodina! Eta, šai mai si garado them unenge te den andre, numa kudala kai angla savořende sas lenge phendo te den andre či lena e hodina kai či patian. O Del mai thodias lenge jekh dies — Adies phendias ande o mui le David osko but mai palal, sar si phendo mai opre: Adies, tume t'ašunena muřo hango, Na zuriaren tumaro ilo. Ke, t'avilinosas ke o Jošua te dinosa len hodina: von či mai denas duma pa jekh kaver dies. Si kadia jekh dies, e sabato ski hodina, thodino rigate le narodoske katar o Del. Ke kudo kai del andre ande e hodina le Devleski hodinil pe anda peske butia, sar o Del hodinisailo anda peske. Te thas ame zor te das andre ande kudia hodina, eta ke khonik te na perel tele te sikavel sa jekh fialo ke či patial. Ke e vorba le Devleski si živindi ai zurali, mai skutsome sar jekh xanřo varesavi kai šinel pa le dui riga, žial ži kai te hulavel ai o duxo ai o ilo ai le, kokala ai o moxo; voi del pe e kris so gindis ai le ginduri le ileske. Khonik naštil te garadiol angla o Del, numa sa si nange ai dikhen le le jakha kudaleske kaske ame musai sa te phenas. Kadia, sar si amenge jekh baro rašai kai nakhlias o čeri; o Jesus, o Šiav le Devlesko, bešas zurales ande o patiamos kai ame phenas. Ke nai amen jekh baro rašai kai či lel sama katar amaro kovlimos; kaver fialo, vo sas zumado sar amende ande sa le dieli, bi te kerel bezex. Pašuvas siguro ka o skamin amperatisko le dragosko, eta t'arakhas mila ai t'arakhas dragostia, t'ažutin ame ande so trubul amen. Čačes, sako baro rašai lino maškar le manuš si thodino le manušenge ande e služetsia le Devleski, eta te sikavel so den ai le sakrifisuri pala lenge bezexa. Vo šai jertil kudalenge kai či žianenas ai kai dine rigate, ke vo lel partia vi ande o kovlimos. Ai si pala kudo kovlimos ke vo trubul te del sakrifisuri pala penge bezexa, sar pala kudala le narodoske. Khonik naštil te mangel peske kodo luvudimos, te nai akhardo katar o Del, sar sas o Aron. Ai o Kristo či vo či dias peske t'aresel baro rašai numa les si les katar kudo kai phendias: Tu san muřo Šiav, Me kerdem tu adies! Sar mai si phendo pe jekh kaver than: Tu san rašai pe sakda, Sar si e vitsa katar o Melkitsedek. Vo si kai, ande le dies kai sas ande pesko mas, manglias bare roimasa ai asvansa, řudjimasa ai mangimasa kudalestar kai šai skipil les katar e martia, ai o Del švndias les pala e mila ai o kovlimos. Makar ke sas le Devlesko Šiav, patialas katar le dieli kai vo kjinuisardias, ai kai, pala ke vo sas bariardo sar mai mišto, areslo amenge sa kudalenge kai patian ande leste kudo kai si les o skipimos pe sakda, O Del phendias ke vo si o baro rašai sar si e ordina katar o Melkitsedek. Amen si ame but te phenas pa kadia, ai dieli trudno te phenas ke tume areslian kovle te hatiaren. Tume, čačes, ke de dumult trubulas t'aven birevia, tumen trubul tumen te sikiarel tumen le mai angluni katar so phendias o Del, tume areslian ke trubul tumen thud ai na jekh xamos zuralo. Eta, kon-godi mai si ka o thud inke či žianel e vorba la krisaki; ke vo si jekh glata. Numa o xamos zuralo si le bare manušenge, kudalenge kai sikionas te len sama so si mišto ai so si nasul. Sa anda kudia, te mukar so sikiliam katar le mai angluni vorbi le Kristoske, žias angle le las so si mai mišto bare manušense. Žianas te musai amenge te amboldas katar le butia intaini ai te patias, ande o Del, e doktrina le bolimaski, le vast thodine pe le manuš, o živindimos le mulengo, ai ande e kris pe sakda. Kadia si ame te keras, te kamela o Del Žias angle. Ke naštil pe ke kudala kai sas jekh data ande e vedaria, kai zumade so dias o čeri, kai si len partia ka o Svinto Duxo, kai zumade e laši vorba le Devleski ai e zor le beršengi kai avena, ai kai pele tele, šai mai avena neviarde ai andine te kein pe, ke von mai karfon pe o trušul le Šiaves le Devlesko ai thon les pe o lažiav. Kana jekh phuv si kjingi katar o brišin kai perel pe late, ai kai voi del jekh čar kai trubul kudalenge kai bariaren la, voi si la o svintsimos le Devlesko; numa, te voi dela kanře ai buř; voi si dine palpale ai šai den la armaia, ai geton te šiuden la pe e jag. Makar ke ame das duma kadia. Muře kuč, ame ažiukeras, so si pala tumende, dieli mai laše ai mai drago pe o skipimos. Ke o Del nai vo te na avel vorta, te bustrel tumari butji kai tume sikadian pala lesko anav, kana ažutisardian ai mai ažutin bute svintson. Ame kamas ke sako anda tumende te garavel sa kudia harničia ži ande o gor ke tumaru ažiukerimos avel čačo, kadia te na muken tumen, ai te keren sar kudala kai, katar o patiamos ai o řebdimos, avela lenge so si phendo. Kana o Del dias peski vorba ka o Abraham, naštilas te solaxal katar jekh mai baro sar peste, vo solaxadias pe peste, ai phenel: čačimasa, me svintsiva ai butiarava tjiri vitsa. Ai kadia si ke o Abraham, gelo angle, lias so sas leske šinado. Eta le manuš solaxan pa kudo kai si mai baro lendar, ai e solax si lenge jekh siguro ke getol sogodi si čingar maškar lende. Sa anda kudia o Del, kamlias sar mai zurales te sikavel ke so šinadias lenge naštil te pařuvel les šoha, avilo jekha solaxasa, eta ke, katar dui dieli kai či pařudion, ande savo naštil pe ke o Del xoxavel, ame ninkeras jekh zor kai arakhel amen, ame kai si ame jekh than te garadiuvas ande o ažiukerimos. Kudo ažiukerimos ame ninkeras les sar jekh kliasto le duxosko, siguro ai zuralo; vo del inčial e zanaveska, kothe kai o Jesus dias amenge andre sar te sikavel amenge, sas thodino baro rašai pe sakda, sar si e ordina katar o Melkitsedek. Čačes, kodo Melkitsedek, amperato anda o Salem, rašai katar o Del Mai Vučo, gelo angla o Abraham kana vo avelas palpale katar o marimos kai xasarde le amperatson, ai svintsisardias les. Ai o Abraham dias deš anda šel anda so vo lias, — ke o Melkitsedek si angla savořende «amperato la krisako», sar lesko anav, porme amperato anda o Salem, sar si te phenas, «amperato la patiako». Vo si bi dadesko, bi dako, bi vitsako, kai nai či arakhadilo — phende — ai či mulo, — numa kai si sa jekh fialo sar o Šiav le Devlesko, — kudo Melkitsedek bešel rašai pe sakda. Len sama sode si baro kudo kai o phuro o Abraham dias deš anda šel anda so vo lias. Kudala anda le šiave katar o Levi kai služin le Devles si le, sar si o zakono, e ordina te len jekh anda šel katar o narodo, si kudia, pe le phral, kai vi von si anda o prašav katar o Abraham; ai vo, kai či lias vo lendar so vo si, vo lias deš ande šel katar o Abraham, ai vo svintsisardias kudales kai sas leske šinado. Eta naštisaras te phenas aver fialo ke o mai tele si svintsime katar o mai opre. Ai kathe, kudala kai len deš ande šel si manuš kai meren; numa kothe, si kudo kai phenas ke vo si živindo. Mai but, o Levi, kai lel deš ande šel, pokjindias, sar te phenas, katar o Abraham; ke inke vo sas ande le prašave peske dadeske, kana o Melkitsedek gelo angla o Abraham. Zakono kai sas dino ka o narodo Israel. Te si pria lašio e butji kai keren le Levituri kana služin le Devles — sa pe kudia služetsia le Levitongi ke hodinil o, soske trubul te mai avel kaver raša andeevitsa katar o Melkitsedek, ai na ande e vitsa katar o Aron? Ke, kana e služetsia si pařudi, trubul vi te pařuven o zakono Čačes, kudo kastar kudala dieli si phende si anda jekh kaver kumpania, kai či jekh anda lende nai te služil le altaros; ke sa žianen ke amaro Baro anklisto avri anda o Juda, kumpania kai o Moše či phendias khanči pa late anda e služetsia. Kudia si sar te dikhen mai but, kana avela jekh kaver rašai kai miazol sar o Melkitsedek, thodino, na sar si o zakono katar jekh ordina maseski, numa sar si e zor katar jekh traio kai či xasavol: Sar phenen le Ramomata: Tu san sakrifikatori pe sakda Sar si e vitsa katar o Melkitsedek. Kadia si šindi jekh purani ordina ke naštil te kerel khanči ai kai si intaino, ke o Zakono Mošesko či andias khanči t'avel pria mišto, — ai anel mai laši ažiukerimus, katar savo te pašiuvas ka o Del. Ai kadia, nas solaxako kana le Levituri aresle raša bi solaxako. Numa o Jesus areslo la solaxasa katar kudo kai phendias leske: O Baro solaxadias, ai vo či keil pe: Tu san sakrifikatori pe sakda, Sa anda kudia o Jesus si kai garavel jekh patia mai šukar. Mai but, sas mai but raša, ke o merimos či mukelas len te bešen pe sakda. Numa vo, sar ke vo bešel pe sakda, si les jekh služetsia pe sakda kai naštil te del les avreste. Si vi pala kudia ke vo šai skipil sar mai mišto kudalen kai pašion paša o Del lestar, trail sakda te mangel lenge mištimos. Sas amenge mai mišto, čačes, t'avel amen jekh baro rašai sar leste, svinto, bi došako, bi makhlo, hulado katar le bezexale, ai vazdino opral pa o čeri, kai či trubul les, sar le bare raša, te del sako dies sakrifisuri, angla savořende pala peske bezexa, atunči pala o narodo, ke kudia, vo kerdias la jekh data pe sa kana dias pe vo sar sakrifiso. Čačes, o Zakono thol sar bare raša le manušen kai si len lengo kovlimos; numa e vorba la solaxaki kai avili pala o Zakono thodias le Šiaves ai si laši pe sakda. E mai bari diela kai phenas kathe, si ke si ame kasavo baro rašai, kai bešel pe e čači rig le skaminosko amperatisko katar e amperetsia Devlikani ande o čeri, sar ministero ande o Than Svinto ai e čači tseřa, kai sas thodini katar o Baro ai na katar jekh manuš. Sako baro rašai si thodino te sikavel le dinimata den ai le sakrifisuri; kadia vi mai si musai ke kudo t'avel les vareso te sikavel. Te avilinosas vo pe e phuv, vo nas t'avel inke rašai, ke kothe si raša kai sikaven le dinimata sar si o Zakono, save vestin jekh molebina kaiti jekh vobrazo ai jekh ušialin anda le dieli čereske sar ke o Moše sas leske phendo devlikanes kana vo gelo te vazdel e tseřa: Le sama, sas leske phendo, te keres sa sar sikadem tuke pe o plai. Numa akana vo lias jekh ministero sar mai baro ke leski nevi patia si mai laši, ke si thodini pe le mai laše mištimata so avena. Čačes, te si e mai angluno patia ke sas bi došaki, či mai trubulas te pařuven la pe e nevi. Si sar sikiarimasa ke o Baro phenel ka o Israel: Eta, le dies avena, phenel o Baro, Kai me kerava le kheresa katar o Israel ai katar o kher anda o Juda Jekh patia nevi, Na sar la patiasa kai me kerdem tumare dadensa, O dies kai me lem le vastestar t'ankalavav le avri anda o them e Egipta; Ke von či ninkerde ande muři patia, Ai vi me či lem sama mandar, phenel o Baro. Numa eta e patia kai me kerava le kheresa katar o Israel, Pala kudala dies, phenel o Baro: Me thava lenge zakonuri ande lengo duxo, Me ramova le ande lengo ilo; Ai me avava lengo Del, Ai von avena muřo narodo. Či jekh či mai sikiarela peske vortakos, Či jekh peske phrales, te phenel: Prinžiar le Bares! Ke sa žianena ma, De katar o mai tsinořo ži ka o mai baro maškar lende; Ke me jertiva lenge bezexa, ai me či mai dava ma gindo ka lenge bezexa. Phenelas: jekh patia nevi, vo akhardias e mai angluno purani; eta, so sas purano, so phurilias, trubul pašte te bilal. E mai angluno patia sas la vi ordini sar si e molebina, ai sar si o altari phuviako. Jekh tseřa si, čačes, vazdini. Ande e partia andre, sas o sfešniko, e skafidi ai le manře šinade. Pala e duito zanaveska sas e tseřa akhardi svinto anda le svintsi. Sas phandado andre o altari sunakuno le duxiange, ai e lada la patiaki, garadi ande o sunakai. Sas ande e lada jekh kanta sunakuni sas ande late e mana, o Aronosko řai kai dias luludia, ai le tsigli bareske katar e patia Opral e lada sas le xeruburi le vestimaske, garavenas penga ušialinasa o trono. Nai e vramia te das duma pa kudia akana. Eta, kudala dieli sas kadia thodine, le raša kai služin den andre sako vramia ande e mai angluno tseřa; ai ande o duito o baro rašai ferdi del andre jekh data pa o berš, te ningerel rat te del les pala peste ai pala le bezexa bi žiangle le narodoske. O Svinto Duxo sikavel kothar ke e vurma le thaneski pria svinto nas inke puterdi, žikin e mai angluno tseřa mai si. Si kudia jekh paramiči te sikavel pe le vrami akana, kai sikavel ke dinimata ai sakrifisuri naštin te lašiaren mišto e godji kudaleski kai del e molebina, ke si ferdi le xamasa, le pimasa ai le kaver xalaimasa. Si ordini maseske thodine ferdi ži e vramia kana o Del pařuvel len. Numa o Kristo avilo sar jekh baro rašai le mištimasko kai avela; vo nakhlo anda jekh tseřa mai bari ai mai laši, kai nai kerdi anda o vast le manušesko, si kudia, kai nai anda kadia lumia; ai vo dias andre jekh data anda sa ande o than pria svinto, na le ratesa katar e buzni ai katar le guruva, numa peske ratesa, vo lias jekh pokjinimos pe sakda. Ke te si o rat katar le guruva ai katar le buznia, ai o vušiar katar jekh vitselos, thodine pe kudala kai si mahrime, svintsil ai vužiarel o mas, sar mai but o rat le Kristosko, kai, katar jekh duxo pe sakda, dias pe vo korkořo bi makhlo ka o Del, vužiarela vo tumare godia katar le butia mule, eta tume te služin le Devles o živindo! Ai si anda kudia ke vo si kai arakhel jekh nevi patia, eta ke, o merimos avilo te kjinel so sas šindo katar e mai angluno patia, kudala kai si akharde t'avel lenge pe sakda so sas lenge šinado. Ke kothe kai si t'avel dinimata katar jekh mulo, musai te dikhen ke si mulo kodo kai del. So avel katar o dad, čačes, si vorta ferdi kana mulo, ke nai či jekh zor žikin si živindo. Eta sostar si le ratesa ke inke e mai angluno patia sas thodini. O Moše, kana phendias angla sa o narodo sa le poronki le Zakonoske, lias o rat katar le vitselia ai le buznia, le paiesa, e pošom loli, ai o hisopo: ai vo makhlias les pe e kliška inke ai pe sa o narodo, phenelas: Kado si o rat la patiako kai o Del dias ordina tumenge. Vo sa kadia kerdias te makhel le ratesa pe e tseřa ai pe sa le vasuri la službake. Ai pašte sa, sar si o Zakono, si vužiardo le ratesa, ai bi le ratesko nai jertimos. Musai sas, ke le vobrazuri le dielenge kai si ande o čeri trubulas t'aven vužiarde kadia fialo, ke le dieli le čereske vi von si katar le sakrifisuri mai laši sar kudala. Ke o Kristo vo či dias andre ande jekh than svinto kerdo anda o vast le manušesko, kai ferdi dikhiolas sar o čačo, numa vo dias inke ande o čeri, eta t'avel akana pala amende angla e fatsa le Devleski. O baro rašai šidovitsko del andre sako berš ande o than svinto le ratesa streino, žiganiako numa butivar ke o Kristo dias andre. Aver fialo, o kristo trubulas te kjinuil butivar dekin si e lumia, žikin ke akana, kana getona pe le berš, vi sikadilo ferdi jekh data te lel tele e bezex katar pesko sakrifiso. Ai sar si šinado le manušenge te meren jekh data, pala kodia te avel e kris, sa kadia o Kristo, kai vo dias pe ferdi jekh data te ninkerel le bezexa butenge, sikadiola bi bezexako jekh duito data kudalenge kai ažiukeren les pala pengo skipimos. Čačes, o Zakono, kai si les jekh ušialin katar le mištimata kai avena, ai na čačes le dieli, naštila šoha, katar sa kudala sakrifisuri kai den sako berš sakda, te lašiarel le narodo. Aver fialo, von či ašile te den sakrifisuri, ke kudala kai keren kudia molebina, nas jekh data vužiarde, ai von mai dine pe gindo ka penge bezexa. Numa o gindo le bezexengo si neviardo sako berš katar kudala sakrifisuri; ke naštil pe ke o rat le guruvengo ai le buzniango te lel le bezexa. Sa anda kudia o Kristo, dias andre ande e lumia, phenel: Tu či kamlian či sakrifiso či te den tu, Numa tu kerdian mange jekh stato; Tu či dian ma či phabarimos či sakrifiso la bezexake. Atunči phendem: Eta, me avav (ande e kliška ramome pa mande) Te kerav, o Devla, so tu kames. Pala ke so vo phendias: Tu či kamlian ai tu či lian či sakrifiso či so den tu, Či phabarimos či sakrifiso pe e bezex (so den sar si o Zakono), Vo mai phenel: Eta, me avav Te kerav sar tu kames. Vo dias rigate kadia o mai angluno sakrifiso te thol o nevo. Si pala kudia kai o Del kamlias ke ame sam svintsime, ke dias o stato le Jesus Kristosko, jekh data pala sa. Ai žikin ke sako rašai kerel sako dies e služetsia ai del butivar sa jekh fialo sakrifisuri, kai naština šoha te len tele e bezex, o Kristo, pala ke dias jekh sakrifiso pala le bezexa, vo bešel pe sakda pe e rig e čači le Devleski, ažiukerel de akanara ke leske dušmaia aven tela leske punře. Ke, pala jekh dinimos; vo anel te aven sar mai laše pa sakda kudalen kai si svintsime katar. So si ke o Svinto Duxo vi vo sikavel amenge; ke, pala ke phendias. Eta e patia kai me kerav tumensa, Pala kadala dies, phenel o Baro: Me thava muře zakonuri ande lenge ile, Ai me ramova le ande lengo duxo, Vo mai phenel: Ai me či mai dava ma godji ka lenge bezexa či ka lenge dilimata. Eta, kothe kai si jertimos le bezexengo; manai te den sakrifiso pala e bezex. Kadia si, phralale, sar si ame, katar o rat le Jesusosko, slobodo amenge te das andre ande o than svinto katar o drom nevo ai živindo kai puterdias amenge pa e zanaveska, si kudia, pa pesko mas, ai sar si ame jekh baro rašai thodino pe o kher le Devlesko, pašiovas jekhe čače ilesa, ande sa o patiamos; le ile vužiarde katar jekh nasul godji, ai o stato xalado jekhe paiesa vuže. Ninkeras zurales o ažiukerimos, ke kudo kai dias e patia si čačo. Si te las sama jekh avreste te vazdel amen ka e mila ai ka le laše dieli. Te na mukas amari kumpania, sar si sikiarde uni; numa te vazdas ame jekh avres, ai kudia sar mai but ke tume dikhen ke o dies pašiol. Ke, te keresa ame bezexa anda amende pala ke ame žiangliam so si o čačimos, či mai ašel o sakrifiso te des pala le bezexa, numa jekh ažiukerimos pria darano katar e kris ai e pařa jekha jagaki kai xala kudalen kai buntuin pe. Kudo kai šinel o zakono katar o Moše merel bi milako, te sikaven pe leste dui vai trin martururi; Če strafo avela kudales, gindin tume, kai avela dino kris ke vo inčardias tela le punře le Šiaves le Devlesko, kai ninkerdias ke nai khanči o rat la patiako, savestar vo sas svintsime, ai kai dias pe o lažiav o Duxo le mištimasko? Ke ame žianas kudales kai phendias: Mange pokjinen, mange si te den! ai mai: O Baro dela kris pesko narodo. Si jekh diela pria darani ke te perel ande le vast le Devleske o živindo. Den tume godji ka kadala mai angluni dies, kana, pala ke tume žianglian, tume ninkerdian jekh baro marimos maškar tumare dukha, pe jekh vramia, prasaile pe tumende ai marde tumen, ai pe e kaver, tume san kudalensa kai sas marde. Čačes, tumenge sas mila pala le čor, ai tume muklias veselimasa te len tumare mištimata, žianglian ke si tume mai laše mištimata ai kai žian but mai angle. Na muken tumaro ninkerimos ke anela jekh baro nirimos. Ke tumen trubul tume te ninkeren mišto, eta pala ke kerdian so manglias o Del, tume lena so sas tumenge phendo. Mai jekh tsiřa, jekh tsiřa vramia: kudo kai trubul t'avel avela, vo či ažiukerela but. Ai muřo narodo vorta traila katar o patiamos; numa, te žialatar, muřo duxo či avela drago ande leste. Ame, ame či sam anda kudala kai žiantar te xasavon, numa anda kudala kai si len o patiamos te skipin pengo duxo. Eta o patiamos si jekh sigurimos anda le dieli kai ažiukeras, jekh sikavimos anda kudala dieli kai či dikhas. Katar o patiamos, le phure sas le jekh marturia laši. Si katar o patiamos ke ame prinžiaras ke e lumia sas kerdi katar e vorba le Devleski, kadia ke so ame dikhas nas kerdo anda le dieli kai dikhion. Si katar o patiamos ke o Abel dias le Devles jekh sakrifiso mai lašio sar kudo kai dias o Kain; lestar sas phendo vorta, o Del lias so vo dias; ai pa leste vo mai del duma, makar ke mulo. Si katar o patiamos ke o Enok sas lino te na mai dikhel o merimos, ai ke či mai dikhilo ke o Del lias les ande o čeri; ke; angla savořende te lel les, leske sas phendo ke vo sas drago le Devleske. Eta bi le patiamasko naštis t'aves leske drago; ke trubul ke kudo kai pašiol paša o Del patial ke o Del si, ai ke vo neviarel kudalen kai roden les. Si katar o patiamos ke o Noa šundias le Devlikane vorbi kai sas leske phende anda le dieli kai inke nas, ai lias les e dar lažiaveski, lašiardias jekh baro čuno te skipil peska familia; latar vo dias strafo la lumia, ai vo areslo t'avel leske e kris kai les la katar o patiamos. Si katar o patiamos ke o Abraham, kana vo gelo angle, patiaias ai gelotar pe jekh than kai trubulas vo te lel t'avel lesko, ai ke vo gelotar bi te žianel kai vo žial. Si katar o patiamos ke vo avilo te bešel ande e phuv sar ande jekh phuv streino, bešelas tela e tseřa, vi o Isak ai o Jakob, kai sas lesa t'ažiukeren. Ke o Abraham ažiukerelas o foro kai si les zurale funduri, kudo kai o Del risuisardias les ai vazdias les. Si katar o patiamos ke inke e Sara voi, makar ke sas but e beršengi, sas lake thodino t'avel la jekh glata, ke voi patiaias ka o čačimos kudalesko kai phendias lake. Sa anda kudia anda jekh manuš, inke rimome lesko stato, arakhadili jekh vitsa but sar le čeřaia ande o čeri, sar e kišai kai si pe o berego la mariako ai kai naštin te gjinen la. Si ande o patiamos ke von sa mule, bi te len so sas lenge šinado; numa von dikhle les ai dine les pozdraimos de dural, von prinžiarde ke von si streia ai kai phiren pe e phuv. Kudala kai den duma kadia sikaven ke von roden jekh them. Te gindisardesas von pe o them kai mukle aviliasas le e vramia te žian palpale. Numa akana von kamen jekh mai lašio, si kudia ande o čeri. Sa anda kudia o Del nai leske lažiav t'akharen les Del, ke vo lašiardias lenge jekh foro. Si katar o patiamos ke o Abraham dias le Isak, kana vo sas zumado, ai ke vo dias peske jekhe šiaves, vo kai sas leske šinado, ai kaske sas phendo: Ande o Isak avela thodino tuke jekh vitsa. O Abraham dias pe godji ke o Del si zuralo, inke te živindil le mulen; kadia vo arakhlias le Isak sar katar jekh živindimos. Si katar o patiamos ke o Isak svintsisardias le Jakob ai le Isau, pala le dieli kai avena. Si katar o patiamos ke o Jakob kana sas te merel svintsisardias sako nes anda le šiave katar o Josef, ai řudjisailo, bešlo pe o gor peska rovliako. Si katar o patiamos ke o Josef kana sas te merel dias duma ke si t'anklen avri le Israelituri, ai ke dias ordina sar te ningeren leske kokola. Si katar o patiamos ke o Moše, kana arakhadilo, sas garado trin šion katar peske niamuri, ke von dikhle ke e glata si šukar, ai ke von či daraile te garaven les katar e ordina le amperatoski. Si katar o patiamos ke o Moše areslo baro, či kamlias t'akharen les šiav katar e šei le Faraonoski, mai drago sas leske te maren les le narodosa le Devlesko ke t'avel les ferdi pe jekh tsiřa vramia o veselimos le bezexako. Kjinuisailo ande o prasaimos ke dikhlias pe o Mesia sar jekh barvalimos mai baro ke sa le mandjinata ande e Egipta, ke les sas leske jakha thodine pe kudo kai dela. Si katar o patiamos ke vo gelotar anda e Egipta, bi te daral katar e xoli la amperatoski; ke vo bešlo zuralo, sar te dikhel kudales kai či dikhiol. Si katar o patiamos ke vo thodias e Patradi ai makhlias o rat pe le vudara, eta ke kudo kai bilavel te na asbal le mai angluni arakhade katar le Israelituri. Si katar o patiamos ke von nakhle e Maria e Loli sar ande jekh than šuko, žikin ke le Egiptanuri kai zumade sas tasade. Si katar o patiamos ke le ziduri anda o Jeriko pele, pale ke von phirde krugom lendar efta dies. Si katar o patiamos ke e Rahab e kurva či xasaili kudalensa kai buntuisaile, ke voi lias sama katar le espionuri mištimasa. Ai so mai phenava me? Ke nai ma e vramia te dav duma pa o Gideon, pa o Barak, pa o Samson, pa o Jefte, pa o David, pa o Samuel, pa le profeturi. Kon, katar o patiamos, nirisarde le amperetsi, kerde e kris, line so sas phendo te avela, phandade o mui le lionongo, mudarde e zor la jagaki, skipisaile katar o skutsimos la xanřesko, sastile anda penge nasvalimata, sas harniči pe o marimos, našade le armi streia. Žiuvlia arakhle penge mulen kai živindisaile; kaver sas ande o kjino, ai či kamle te skipin pe, eta t'avel len jekh mai lašio živindimos; kaver řibdisarde te maren mui lendar ai te maren len le bičosa, le lansuri ai e temnitsa; Von sas inčarde, šinde firizosa, kjinuime, von mule mudarde katar e xanřo, von gele katka ai kote sas pe lende mortsia bakrorenge ai mortsia le buzniange, nange anda sa, marde kjinuime, von kai nas laše la lumiake, phirenas ande le pusti ai anda. Sa kudala, ka o patiamos sas martururi, von či line anda so sas lenge šinado. O Del dikhel vareso so si mai lašio amenge, eta te na žian bi amengo ka o mai lašio. Kadia vi ame, sar si krugom amende jekh baro nuvero martururi, šiudas pa amende sa o pharimos ai e bezex kai si pe amende vušori, ai našas zurales ande so si amenge puterdo, t'avel amaro dikhimos pe o Jesus, birevo ai kai getol o patiamos, kai, ande e veselia kai si garadi amenge, kjinuisardias pe o trušul, vuřitsisardias o žiungalimos, ai bešlo pe e rig čači katar o skamin amperatisko le Devlesko. Len sama, čačes, kudales kai ninkerdias pe peste kasavi dušmania katar le bezexale, eta te na muken tume o duxo tele. Tume inke či ninkerdian ži ka o rat, te ninkeren tume dur katar e bezex. Ai tume busterdian le vorbi kai o Del phenel tumenge sar šiavenge: Muřo šiav, le sama kana marel tu o Del, Ai na muk tu tele kana sikiarel tu; O Baro del štrafo kudales kai si leske drago, Ai vo marel la rovliasa sa kudalen kai prinžiarel le ke si leske šiave. Ninkeren o štrafo: si sar šiave ke o Del kerel tumensa; ke savo si o šiav ke lesko dad či marel les? Numa te na san marde sar sa leske šiave tume san kadia glati mastevi, ai na šiave čače. Aver fialo, sar amare dada le maseske marde amen, ai ke ame či phendiam khanči, či trubula ame te mukas ame ka o Dad le duxosko, t'avel amen o traio? Amare dada marenas ame pe jekh tsiřa dies, sar sas lenge mišto; numa o Del marel ame pe amaro mištimos, eta t'avas lesa ka lesko svintsimos. Čačes si ke sako marimos miazol angla savořende jekh diela nekežime, ai na e veselia; numa del mai palal kudalenge kai sas kadia sikiarde jekh fruta kovli la krisaki. Zuriaren tumare vast kovle Ai tumare čanga kovle; ai žian tumare punřensa pe le vurmi vorta, eta ke o punřo bango te na del rigate, numa mai sigo te zuriavol. Roden e patia savořensa, ai o svintsimos, bi savesko khonik či dikhela le Bares. Len sama te khonik te na mukel pe katar o mištimos le Devlesko; te na avel či jekh vuna vuřito kai bariol, te na kerel nasul bute ženenge. Te na kerel khonik kurvetsia, či te avel bi devlesko sar o Esau, kai pala jekh tsiřa xamos bikjindias pesko barimos sar mai angluno šiav. Tume žianen ke, mai palal, kana kamelas te lel o svintsimos peske dadestar, sas šiudino makar ke manglias les le asvensa, ke lesko keimos nas khančesko. Tume či pašilian paša o plai o Sinai kai šai asban la ai kai sas dini jag, či ka o nuvero, či ka o tuniariko, či ka e bari balval, či paša o bašimos la tuturiazako, či ka o bašimos le vorbengo, kai sas kadia ke kudala kai ašunde les mangle te či mai mothon lenge či jekh vorba, ke von či ninkerde so sas lengo phendo: T'avela makar jekh žigania te asbal e plai, avela mudardi bařensa. Ai so von dikhle sas kadia dar ano ke o Moše phendias: Lias ma e dar ai sa isdrav! Numa tume pašilian ka e plai katar o Sion, ka o foro le Devlesko živindo, o Jerusalem čeresko, kai gjilaben mii andželi, ka o kjidimos katar le mai angluni arakhade ramome ande o čeri, ka o krisinitori kai si o Del savořengo, ka le duxuri kai si vorta aresle sar mai laše, katar o Jesus kai avilo te del ame e nevi patia, ai katar o rat makhlo kai del duma mai mišto sar o Abel. Len tume sama te na den palpale t'ašunen ka kudo kai del duma; ke kudala kai či kamen as te ašunen ka kudo kai phenel pe e phuv so avela či skipisaile sar mai tsiřa skipisavasa ame, te žiasa ame palpale katar kudo kai del duma anda o čeri, vo, kasko hango atunči isdraias e phuv, ai ke akana phendias kadia: Mai jekh data mai miškisarava na ferdi e phuv, numa vi o čeri. Kudala vorbi: «Mai jekh data», sikaven ke le dieli kai miškin, si dieli kerde ai xasavon, eta ke le dieli kai či miškin te bešen. Sa anda kudia, las jekh amperetsia kai či miškil, sikavas amaro naisimos ai das le Devles jekh molebina t'avel leske drago, milasa ai darasa, ke amaro Del si vi jekh jag kai xal. Žian angle ande o kamimos phralengo. Na bustren te len gosten; ke kana kerde kadia, uni bešle lende andželi, bi te žianen. Den tume godji ka le manuš ande e temnitsa, sar t'aven vi tume ande e temnitsa; ka kudala kai kjinuin le, sar ke vi tume kjinvin tumen. Ke o ansurimos t'avel dino pativ savořendar, ai o pato ansurimasko te na avel mahrime, ke o Del dela kris le kurvaren ai le kurven. Na den tume te kamen le love; t'avel tumenge dosta so si tumen; ke o Del inke vo phendias: Me či mukava tut, ai či mukava tut korkořo. Sigurimasa ame šai te phenas: O Baro ažutil man, či darav khanikastar; So šai kerel mange jekh manuš? Den tume godji ka kudala kai ningerde tumen angle kai phende tumenge e vorba le Devleski; len sama sar traisarde ai sarmule, ai keren sar lende. O Jesus Kristo si sa kudo aratji, adies ai pe sakda. Na muken tume te ningeren tume ka le doktrini kui si aver fialo ai streia; ke mišto ke o ilo t'avel zuriardo katar o mištimos, ai na katar le xamata kai nai khančeske kudalenge kai si astarde lende. Amen si ame jekh altari kai kudala kai služin ka o tabernaklo židovitsko nai le e putiaria te xan lestar. Le staturi le žigenienge, kai lengo rat si ningerdo katar o baro rašai ande o svinto than pala le bezexa, si phabarde avri anda o kampo. Sa anda kudia vi o Jesus, eta te svintsol le narodos katar peski rat, kjinuisailius avri anda o vudar. Anklias ame avri te žias leste, avri anda o kimpo, te ningeras amaro žiungalimos. Ke amen nai ame kathe tele jekh foro pe sakda, numa ame rodas kudo kai avela. Lestar, das bi terdimasko jekh sakrifiso řudjimasko, si kudia, e fruta le vušengi kai phenen lesko anav. Ai na bustren o mištimos ai so si dino, ke si anda kasave sakrifisuri ke si drago le Devleske. Patian o mui kudalengo kai ningeren tumen ai len sama lendar, ke von len sama katar tumare duxuri ai musai sa te phenen le Devleske; t'avel kadia, eta ke von keren e služba veselimasa. Te na avel kadia, keren la vatimasa, ai či avela tumenge miškimos. Řudjin amenge; ke ame gindisavas ke si ame jekh laši godji, kamas ande sa le dieli te žias mišto. Si gribimasa ke me mangav tumen te keren kudia, eta t'avav sar mai sigo. Ke o Del la patiako, kai andias anda le mule o baro pastuřo le bakrorengo, katar o rat jekha patiako pe sakda, amaro Rai o Jesus, te kerel anda tumende harniči anda sako laši butji te keren sar vo kamel, ai te kerel ande tumende so si leske drago, katar o Jesus Kristo, kaske si o vestimos berš beršestar! Amen! Me mangav tumen, phralale, te ninkeren kadala vorbi te vazden tume, ke me ramosardem tumenge tsiřa. Te žianen ke amaro phral o Timoteo mukle les; t'avela sigo me anava les mansa kana avav te dikhav tumen. Den pozdraimos sa kudalen kai ningeren tumen, ai sa le svintson. Kudala anda e Italia den tumen pozdraimos. Ke o mištimos t'avel tumensa sa! Amen! O Jakob, sluga le Devleski ai katar o Rai o Jesus Kristo, ka le deš-u-dui kumpani kai si puřitsime, impači! Muře phralale, dikhen sa le but zumaimata sar jekh diela vesel kai šai avel pe tumende, žianen ke o zumaimos tumare patiamasko del e řabda. Numa trubul ke e řabda kerel mišto peski butji, eta tume t'aven vorta ai gata, ai te na peren ande khanči. Te si anda tumende varekon ke nai les godji, te mangel la katar o Del, kai del sakones sar kamel ai bi te pušel, ai avela les dino. Numa te mangel la patiamasa, te na gindil aver fialo; ke kudo kai gindil aver fialo si sar le talazuri la mariake, miškine katar e balval spidine pe jekh rig ai e kaver. Ke jekh kasavo manuš te na gindil ke vo lela vareso katar o Baro: Si jekh manuš kai či žianel so vo kamel, rigate anda sa peske vurmi. Ke o phral kai si mai tele te luvudil pe ke uštel. Ke o barvalo, aver fialo, te luvudil pe anda pesko kovlimos; ke vo nakhela sar e luludi la čaraki. O kham uštilo peske tatimasa kai phabarel, vo šukiardias le čaria, lenge luludia pele, ai lengi šukarimos bilaili: kadia o barvalo rimola pe ande so vo kamel te kerel. Veselo o manuš kai ninkerel o zumaimos, vo lela e kurona le traioski, kai o Baro phendias ke del la ka kudala kai kamen les. Ke khonik, kana si zumado, te na phenel: O Del si kai zumavel ma. Ke o Del naštil te avel zumado katar o nasul, ai vo či zumavel khanikas. Numa sako si zumado kana si lino ai astardo katar so vo kamel. Porme so kamel, kana si gata, del e bezex; ai e bezex, kana getol pe, del e martia. Te na šibin tume, muře phral dragi: sa o mai lašio mištimos ai sa o mai lašio dinimos vulel de opral, katar o Dad la vedariako, kaste nai pařudimos ai či kerniol pe te kerel ušialin. Vo kerdias amen sar vo kamlias, katar e vorba le čačimaski, eta t'avas sar te phenas le mai angluni kai si kerde lestar. Te žianen, muře phral dragi, kadia. Ke sako manuš te gribil pe t'ašunel, kovles te del duma, kovles te xoliavol; ke o xoli le manušeski či kerel e kris le Devleski. Sa anda kudia, šiuden sa o mahrime ai sa e xitrenia, len kovles mišto e vorba kai si thodini ande tumende, ai kai šai skipil tumare duxuri. Keren opre e vorba e Devleski, ai na ferdi ašunen la, te xoxaven tume korkořo, katar le falši ginduri. Ke, te si varekon ke ašunel e vorba ai či kerel so phenel, si jekh fialo sar jekh manuš kai dikhel ande jekh glinda pesko mui, ai kai, pala ke dikhlias pe, žialtar, ai strazo vo bustrel sar vo sas. Numa kudo kai thol pesko dikhimos ande o zakono o lašio, o zakono le skipimasko, ai kai ninkerel pe leste, ai či bustrel so ašundias, numa kerel kadia, kudo avela veselo ande so vo kerel. Te si varekon ke gindil ke patial, bi te ninkerel peski šib phangli, numa kai kerniol pesko ilo, o patiamos kudale manušesko si intaino. O patiamos vužio ai bi makhlo, angla o Del amaro Dad, si te žias te dikhes le bidadenge ai le phivlian ande lengo nekazo, te len pe sama katar o mahrimos la lumiako. Muře phralale kai patian ande amaro vestime Rai o Jesus Kristo te keren le manušensa sar jekh fialo. Den tume godji, čačes, ke del andre kai tume san ande e khangeri jekh manuš jekha angrustiasa sunakuni ai jekha tsaliasa sar mai šukar, ai ke vi del andre jekh čořo nai mišto uriado; t'avela te šiuden tumare dikhimata karing kudo kai si les e tsalia šukar, ai te tume phenen leske: Tu, beš kathe pe kako than pativalo! Ai te phenena tume le čořeske: Tu, beš katka pe puřende! vai te na niči: Beš kai thav muře punře! Nai ke ande tumende dikhen sar si le manuš, ai keren kris tumare nasule gindonsa? Ašunen, muře phral dragi: O Del či alosardias vo le čořen ka le jakha la lumiake, t'aven von barvale ande o patiamos, ai t'avel lenge e amperetsia kai vo phendias ke del la kudalenge kai si leske drago? Ai tume, tume teliaren le čořes! Nai le barvale kai porončin pe tumende, ai kai ningeren tumen angla le krisa? Nai von kai den pe o lažiav o šukar anav kai si tumaro? Te kerena tume o zakono amperatisko, sar si ramome: T'avel tuke drago tjiro vortako sar kames tu tu, tume keren mišto. Numa tume te na keren sar jekh, fialo sakoneske tume keren jekh bezex, tume san dine strafo katar o zakono sar kudala kai phagle e kris. Ke kon-godi lel sama sa o zakono, numa kerel bezex pe ferdi jekh poronka, si došalo anda sa. Čačes, kudo kai phendias: Tu či keresa kurvetsia, vi mai phendas: Tu či mudaresa. Eta, tu či keres kurvetsia, numa tu keres jekh merimos, tu areses te šines o zakono. Den duma ai keren sar t'aven dine kris katar jekh zakono slobodo, ke e kris si bi milako kudaleske kai nas leske mila. E mila niril e kris. Muře phralale, so avela kudaleske kai phenel ke si les o patiamos te nai les leske butia? O patiamos šai skipil les? Te si jekh phral vai jekh phei nange ai nai len so te xan sako dies, ai ke jekh anda tumende phenel lenge: Žian ande e patia, tation ai pravardion! ai ke tume či den len so trubul o stato, so avela kudo? Kadia si anda o patiamos; O patiamos korkořo bi le butiango si mulo. Numa uni phenena: Tu, si tut o patiamos; ai me, si ma le butia. Sikav mange tjiro patiamos bi le butiango, ai me, sikavava tuke o patiamos katar muře butia. Tu patias ke si ferdi jekh Del, tu keres mišto; vi le demonuri patian, ai von isdran. Kames tu te žianes, manuša dilo, ke o patiamos bi le butiango si intaino? O Abraham, amaro dad, nas vo čačardo katar peske butia, kana vo dias peske šiaves o Isak pe o altari? Tu dikhes ke lesko patiamos kerdias butile butiansa, ai ke katar le butia o patiamos kerdilo sar mai mišto. Kadia aresel so phenel o ramomos: O Abraham patiaias ande o Del, ai kudia sas leske laši kris; ai vo sas akhardo vortako le Devlesko. Tume dikhen ke o manuš si kerdu vorta angle o Del katar le butia, ai na ferdi katar o patiamos. E Rahab e kurva nas vi voi čačardi katar le butia, kana voi lias sama katar le tradine ai kerdias te žiantar pa jekh kaver vurma? Sar o stato bi duxosko si mulo, sa kadia o patiamos bi le butiango si mulo. Muře phralale, te na avel maškar tumende but manuš kai thon pe te sikiaren, ke tume žianen ke ame avasa pe e kris mai zurales. Ame miškisaras sa pe but vrami. O manuš kai či miškil pe la vorbasa si jekh manuš vorta, harniko te ninkerel sa pesko stato salavaresa. Te thasa ame o salavari ande o mui le grastengo te patian amaro mui, ame vi keras te tradas sa lengo stato. Eta, inke le čuni, kai si kasave bare ai kai spidel len le balvalia buntuimaske, si ningerde katar jekh tsinoři řata, sar kamel kudo kai tradel. Sa kadia, e šib si jekh tsinořo kotor ai voi luvudil pe anda bare dieli. Eta, sar jekh tsinoři jag šai del pařa jekh baro veš! E šib vi voi si jekh jag; si e lumia e bezexali. E šib si thodini maškar amaro stato, mahril sa o stato, ai del pařa sa o traio la pařasa kai avel katar o nasulimos. Sako fialo žigeni ai čiriklia, le sapa ai le maše, si sikiarde ai sas sikiarde katar le manuš; numa e šib, či jekh manuš naštil te sikiarel la; si nasul ai naštil te sikiarel la; voi si pherdo velino merimasko. Latar ame svintsisaras le Bares amaro Dad, ai latar ame das armaia le manušen kai si kerde sar o vobrazo le Devlesko. Anda sa kudo mui anklel avri o svintsimos ai e armai. Či trubul, muře phralale, t'avel kadia. O paiořo kai vulel anda jekh than či del o pai guglo ai o pai kerko. Jekh figa, muře phralale, naštil del voi maslini, vai jekh rez naštil del figi? Anda o pai lonalo naštil te del pai guglo. Savo anda tumende si lašio ai godiaver? Ke te sikavel kadia peske butia katar jekh lašio traio kovlimasa ai godiaverimasa. Numa te si tumen ande tumaro ilo žaluzia kerki ai jekh duxo čingarako, na luvudin tume ai na xoxaven pe o čačimos. Kadia godiaverimos nai voi kai avel de opral; numa si phuviaki, maseski, bengeski. Ke kothe kai si jekh žaluzia sigo ai jekh duxo čingarako, si buntuimos ai sako diela nasul. E godiaverimos de opral si mai angluno vuži, atunči patiaki, kovli, lašiarimaski, pherdi mila ai laše fruti, či diliarel, či athavel. E fruta la krisaki si thodini ande e patia kadalendar kai roden e patia. Katar aven le marimata, ai katar aven le čingara maškar tumende? Nai ke katar so tume kamen kai maren pe ande tumende? Tume kamen vareso, ai tumen nai tume; tume san mudarimaske ai kamen te len; tumen si tume čingara ai marimata, ai tumen nai tume, ke tume či mangen. Tume mangen, ai tume či len, ke tume či žianen sar te mangen, ke tume kamen te keren pe tumari. Kurvaria kai tume san! Či žianen tume ke o kamimos la lumiako nai drago le Devleske? Kudo kai kamel t'avel vortako la lumiako si dušmano le Devlesko. Gindin tume ke o Ramomos del duma intaino? Si la žaluziasa ke o Del kamel o duxo kai vo kerdias te bešel ande amende. Vo del, aver fialo, jekh mištimos mai baro; sa anda kudia o ramomos phenel: O Del ninkerel-pe pe le barimatange, Numa lel sama katar le kovle. Muken tume le Devleske; ninkeren tume pe o beng, ai vo našela dur tumendar. Pašion paša o Del, ai vo pašiola paša tumende. Xalaven tumare vast, manuš bezexale; vužiaren tumare ile, manuš prosti. Vatin tume; aven ande e žalia ai ande le asva; ke te tumaro asaimos te pařudiol ande e žalia, ai tumaro veselimos ande o nekazo. Kovlion tume angla o Baro, ai vo vazdela tumen. Na den duma nasul jekh pa kavreste, phralale. Kudo kai del duma nasul pa jekh phral, vai kai del kris peske phrales, del duma nasul pa o zakono ai del kris o zakono. Eta, te desa tu kris o zakono, tu či les sama o zakono, numa tu san krisinitori. Jekh ferdi si baro krisinitori ai krisako, si kudo kai šai skipil ai kai šai xasarel; numa tu, kon san tu, kai des kris le vortakos? Šunen kai phenen: Adies vai tehara ame žiasa ande savo foro, ame nakhasa jekh berš, ame kerasa butji; ai ame nirisasa. Ažiukeren! Tume kai či žianen so aresela tehara! ke, so si tumaro traio? Tume san jekh aburo kai sikadiol pe jekh tsiřa vramia, ai kai atunči bilal. Tume trubul te phenen, aver fialo: Te kamela o Del, ame traisarasa, ai ame kerasa kadia vai kudia. Numa akana tume luvudin tume ande tumare ginduri barimatange. Si diela nasul ke te luvudin tume kadia. Kudo kadia kai žianel so si te kerel, ai kai či kerel, kerel jekh bezex. Šunen barvale! Roven ai vatin tume, pala le nasulimata kai aven pe tumende. Tumare barvalimata si kjermale, ai tumare tsalia si xale katar le kjermi. Tumaro sunakai ai tumaro rup si řužinime. Ai lengo řužinimos uštel te del marturia pe tumende, ai xala tumaro mas sar jekh jag. Tume kjidian mandjinata pe le posledni dies! Eta, o pokjinimos le butiarengo kai kjidine ande tumare kimpuri, ai kai tume lian lendar, tsipin, ai le tsipimata ka kudala kai kjide aresle ži ka le kan le Bareske le řaioske zurale. Tume traisardian pe e phuv ande o šukarimos ai ande e dragostia, tume pravardian tumare ile ka o dies o phařaimasko. Tume dian strafo, tume mudardian le bi-došales, kai či ninkerdias-pe pe tumende. T'avel tumen te ažiukeren, phralale, žikin či avela o Baro; Eta, kai phařavel e phuv ažiukerel e kuč fruta la phuviaki, lel sama latar, žikin či lel le brišinda katar e primavera ai e tomna ia. Vi tume, te ažiukeren, zuriaren tumare ile, ke e vramia le Bareski pašiol. Na vatin tume jekh avrestar, phralale, eta te na aven tume dine kris: eta, o krisinitori si ka o vudar. Len, muře phral, sar modelo ande o kjinuimos ai o ažiukerimos le profeton kai dine duma ande o anav le Baresko. Eta, ame phenas veseli kudala kai řebdisard e. Tume ašundian ke dine duma sar řebdisaras o Job, ai tume dikhlian o getomos kai o Baro dias les, ke o Baro si pherdo mila ai lašimos. Angla savořende andasa, phralale, na solaxan či pa o čeri, či pa e phuv, či pa jekh kaver solax. Numa ke tumaro «ei» t'avel «ei», ai ke tumaro «na» t'avel «na», eta ke tume te na peren tela e kris. Si varekon anda tumende ke si ande e dukh? Ke te řudjil. Varekon si ande e veselia? Ke te gjilabel gjilia. Varekon anda tumende si nasvalo? Ke t'akharel le phuren katar e Khangeri, ai ke le phure te řudjin lenge, te thon pe leste vuloi ande o anav le Baresko; o řudjimos le patiamasko skipila le nasvales, ai o Baro uštiavela les. Ai te kerdias vo bezexa, avela leske jertime. Puřin tumare bezexa jekh avreske, ai řudjin jekh avreske, eta t'aven saste. O řudjimos kudalesko kai si vorta si zuralo. O Elia sas jekh manuš sa jekh fialo sar amende: vo řudjisardias zurales te na del brišin, ai či dias brišin pe e phuv trin berš ai šov šion. Porme mai řudjisardias, ai o čeri dias brišin, ai e phuv dias fruti. Muře phralale, te si jekh maškar tumende ke dias rigate dur katar o čačimos, ai ke jekh kaver anel les palpale, ke te žianen ke kudo kai andias jekhe bezexales katar e vurma kai vo xasailo skipila jekh duxo katar e martia ai kerel te aven jertime but bezexa. Katar o Petri, apostolo katar o Jesus Kristo, ka kudala kai si streia ai pe sako rig ande o Pontus, e Galasia, e Kapadotsia, e Azia ai e Bitinia, ai kai si alome sar alosardias le o Del o Dad, katar o svintsimos le Duxosko, eta te patian, ai te aven vužarde katar o rat le Jesus Kristosko: ke e dragostia ai e patia t'aven tumenge butiarde! Svintsime t'avel o Del, o Dad amare Baresko o Jesus Kristo, kai, sar si leski bari mila, neviardias amen ka jekh ažiukerimos živind, katar živindisailo o Jesus Kristo katar le mule. T'aven le mištimata kai či rimon pe, či aven mahrime, či šukion, save si tumenge garade katar o Del ande o čeri. Tume kai, katar e zor le Devleski, san garade katar o patiamos t'aven skipime gata t'aven sikade ande le posledni vrami! Kothe si kai kerdiol tumari veselia, makar ke akana, sar trubul, tume san nekezime pe jekh tsiřa vramia katar le but zumaimata. Eta o zumaimos tumare patiamasko, mai kuč sar o sunakai kai xasavol (makar ke si zumado katar e jag). Kadia tumen lena o luvudimos o vestimos ai e pativ, kana o Jesus sikadiola, vo kai kamel tumen bi te dikhen les, ai kai patian ande les bi te mai dikhen les, tume veselin tume ande jekh veselia pria bari ai vestime, ke tume lena o skipimos tumare duxongo katar jekh pokjinimos tumare patiamasko. Le profeturi, kai phende ke avela tumenge o šukarimos kai si tumenge garado katar o Del, von rodenas ai lenas sama. Kamenas te žianen kana ai sar avel e vramia pečatime katar o duxo le Kristosko kai sas ande lende, o duxo kai phendias angla savořende le kjinuimata le Kristoske ai o vestimos kai avena pala kudia. Sas lenge sikado ke nas lenge; numa tumenge, ke sas t'avel kadala dieli, kai si tumenge phende akana katar kudala kai den duma pa e Laši Viasta katar o Svinto Duxo tradino anda o čeri, ai ande save le andželi kamen te thon penge dikhimata. Sa anda kudia, thon tumare ginduri t'ašunen, na soven, ai t'avel tumaro ažiukerimos ande o mištimos kai anena tumenge, kana o Jesus Kristo avela. Sar le glati kai patian o mui, na len tume pa so tume kamen kai sas tumen angla savořende, kana tume či žianenas khanči. Numa, sar kudo kai akhardias tumen si svinto, vi tume t'aven svintsi ande sogodi keren, sar si ramome: Tume avena svintsi, ke me sim svinto. Ai te akharena tume sar Dad kudales kai del kris sar si e butji sakoneski, bi te lel sama kon sar si, ninkeren tume darasa žikin si e vramia kai tume phiren, žianen ke nai katar le dieli kai xasavon, katar o sunakai vai o rup, ke tume sanas kjinde anda o traio intaino kai avilias tumen katar tumare dada, numa katar o rat kuč le Kristosko, sar katar jekh bakrioři bi-došaki ai bi-makhli. Vo sas thodino angla savořende t'avel e lumia, numa sikadilo angla savořende te gotol pe e vramia, pala tumende, kai lestar patian ande o Del, savo živindisardias les anda le mule ai dias les o vestimos, kadia ke tumaro patiamos ai so tume ažiukeren te hodinin pe o Del. Pala ke vužiardian tumare duxuri ai kai patian o čačimos t'avel tume jekh kamimos phralengo čačo, te kamen tume phabardes jekh avres, anda sa tumaro ilo, sar tume san nevarde, na katar jekh simintsa rimome, numa katar jekh simintsa kai nai rimome, katar e vorba živindi ai sakda le Devleski. Ke Sako mas si sar e čar, Ai sa lesko vestimos sar e luludi la čaraki. E čar šukiol, ai e luludi perel. Numa e vorba le Devleski bešel pe sakda; Ai kudia vorba si kudia kai si tumenge phendi katar e Laši Viasta. Šiuden tumendar sako nasulimos ai sako xoxaimos, sako athaimos ai sako žaluzia, ai sa o pupuimos, kamen, sar le glati kai arakhadile, o thud devlikano ai vužio eta ke lestar tume te barion le skipimaske, te tume zumadian ke o Baro si lašio. Pašion paša leste, bař zivindo, šiudino katar le manuš, numa alome ai kuč angla o Del; ai inke tume, sar le bař živinde, vazden tume te thon jekh kher ande o duxo, jekh svinto služimos, eta te den so si šinado pala o duxo, drago le Devleske katar o Jesus Kristo. Ke si phendo ande o Ramomos: Eta, me thav ande o Sion jekh bař koltsosko, alome, kuč; Ai kudo kai patiala ande leste či avela perado tele. E pativ si kadia tumenge, kai patian. Numa, kudalenge kai či patian O bař kai šiude kudala kai vazden khera Areslo o mai lašio le koltsosko, Ai mai Jekh bař kai miškil, Ai jekh stanka kai peravel; Pele ke či mangle te patian pe ande e vorba le Devleski, ke kadia sas lenge šinado. Tume, aver fialo, tume san jekh vitsa alome, raša kai služin le Amperatos, jekh narodo svinto: jekh narodo develsko, alome te phenen le butia le mai šukar le Develske e kai akhardias tumen anda o tuniariko ka e šukar vedaria, tume kai angla savořende či sanas jekh narodo, ai kai akana san o narodo le Devlesko, tume kai nas pe tumende e mila, ai ke akana si pe tumende mila. Muři draži, me mangav tumen, sar streia ai manuš kai phiren pe e phuv, te arakhen tumen katar so kamel tumaro mas statosko kai kerel o marimos pe o duxo. Te phiren tumen mištimasa maškar kudala kai či patian ande o Del, eta ke, kothe kai maren tumendar mui sar t'aven tume čor, te dikhen von tumare laše butia, ai luvudin le Devles, o dies kai vo avela lende. Ašunen, pala o Del, sa le bare thodine katar le manuš, ka o Amperato sar o mai baro, ašunen ka le vladori sar tradine lestar te strafuin le čoren ai te luvudin le ženen kai keren so si mišto. Ke si sar kamel o Del ke kona tumen keren o mištimos tume ašaven le manušen kai či žianen ai le dilen. San slobodo, numa na keren anda kudia slobodia jekh zanaveska te garavel o nasulimos, numa keren sar služi le Devleske. Den pativ sa la lumia; kamen le phralen; daran katar o Del, den pativ le Amperatos. Služi, patian darasa tumare birevon, na ferdi kudalen kai si laše ai kovle, numa vi kudalen kai si nasul. Ke si jekh mištimos ke te ninkeren kjinuimos pala o gindo karing o Del, kana kjinuis bi t'aves došalo: Čačes, če vestimos si te ninkeres le nasulimata te kerdian doša? Numa kana tu ninkeres o kjino kana tu keres o mištimos, si jekh dragostia angla o Del. Ai ka kudia tume san akharde, ke vi o Kristo kjinuisailo pala tumende, sikadias tumenge jekh vurma te trail, eta ke tume te žian pala leske vurmi, vo kai či kerdias bezex, Ai ande o mui savesko či arakhadilias athaimos; vo kai, kana prasanos les, či prasalas, kana marenas les, či daravelas, numa dias pe ka kudo kai del kris vorta; vo kai ningerdias vo amare bezexa ande pesko stato pe o kašt, eta ke te meras ka le bezexa ame ai te traisaras ka e kris; si katar le dukha leske ke tume san saste. Ke tume sanas sar le bakroře xasarde. Numa akana tume avilian palpale karing o pastuřo, kudo kai arakhel tumare duxuri. Žiuvlia, patian tumare řomen, eta ke, te si uni ke či patian e vorba e Devleski, t'aven von nirisarde bi be mothon tumen jekh vorba pala o traio kai train tumen, kai dikhen sar tume train vužia ai dine rigate. T'avel tumaro, šukarimos na kudia avrial kai si ande le bal khuvde, le dieli sunakune, vai ke le tsalia kai len pa tumende, numa ke tumaro šukarimos te avel, so si tume andral kai či rimol pe, jekh duxo guglo ai kovlo; kai si jekh baro kuč angla o Del. Kadia lenas pe pende kaver data le svintsi žiuvlia kai ažiukerenas le Devles, ašunenas ka penge řom, sar e Sara, kai patialas le Abrahamo ai akharelas les lako baro. Latar tume san le šeia, kai keren so si mišto bi darako. Numa, vi tume, řom, sikaven godji kana san tumare řomniansa, ke von si le mai kove; den len pativ, ke vi tumensa von lena partia ande le mištimata. Ke t'avel kadia, eta te na avel khanči te ninkeren tume te na řudjin. Eta, savoře anda tumende, te aven tume sa jekh gindo ai sa jekh godji, pherde kamimos phralengo, mila, kovlimos. Na ker o nasulimos pala o nasulimos, ai na prasan pala o prasaimos, aver fialo den lenge o svintsimos, ke pe kudia tume san akharde, eta t'avela tumenge mai angle o svintsimos katar o Del. Te si varekon, čačes, te kamel o traio Ai t'avel les diesa veseli, Te lel sama peski šib katar o nasulimos Ai peske vuš katar le vorbi xoxamne, Ke te duriol katar o nasulimos ai te kerel o mištimos, Ke te rodel e patia, ai te žial pala late; Ke le jakha le Devleske si pe le vorta Ai leske kan len sama mišto katar lenge řudjimata, Numa e fatsa le bareski si pe kudala kai kerel o nasul. Ai ken marena tumen, te san tume gribime pe o mištimos? Kaver fialo, kana tume kjinuin pala e kris, tume avena veseli. Te na avel tume lendar či jekh dar, ai te na rimon tume. Numa svintson ande tumare ile le Kristos le Bare. Aven sakda gata te den angali, le kovlimasa ai la darasa, kudalen kai pušen tumendar pa o ažiukimos kai si ande tumende, ai te aven tumen jekh laši godji, eta ke, inke kana maren tumendar mui, kudala kai den duma nasul pa tumende sar tume mišto phiren ande o Kristo te peren tele. Ke mai mišto te kjinuis, te kamela kadia o Del, pala ke keres o mištimos sar ke te keres o nasulimos. Vi o Kristo kjinuisailo jekh data pala le bezexa, vo kai sas vorta pala kudo kai nas vorta, eta t'anel ame ka o Del, sas mudardo ande pesko mas, numa areslo živindo ande o Duxo, ai gelo te mothol pa e laši viasta ka le duxuri phangle, kai kaver data či patianas, kana o ažiukerimos le Devlesko žialas mai angle, ka le dies katar o Noa, žikin lašiarelas o arko, ande savo jekh tsiřa žene, si kudia, oxto, sas skipime anda o pai. Kudo pai sas, sar te phenas, jekh bolimos, nai o vužiarimos katar o marimos le statongo, numa te les tu jekh laši godji karing o Del, ai kai akana skipil tumen, vi tumen, pa o živindimos katar o Jesus Kristo, kai si pe o čačo le Devleske, dekin gelotar ande o čeri, kai le andželi, le bare ai le zurale, si tela leste. Kadia si, o Kristo kjinuisailo ande o mas, vi tume len sar armia kasavo gindo. Ke kudo kai kjinuisailo ande o mas či mai kerel bezexa, eta te trail, nanai sar kamen le manuš, numa sar kamel o Del, žikin mai si les e vramia te trail ande o mas. Dosta si, čačes, ande e vramia kai nakhli ke kerdian sar kudala kai či patian, kai phirdian ande o čořimos, ande e kurvetsia, ande o matimos, ande o but xamos, ai o vuřito patiamos ande le staturi. Kadia von arakhle šodo ke tume či šiuden tume lensa ande sa kudala kurvetsi nasul, ai von xaxaven pa tumende. Von trubun te čačion pen ande so von kerde le Devleske kai del kris le živinden ai le mulen. Ke e Laši Viasta sas phendi vi ka le mule, eta ke, ke sas dine kris sar le manuš le maseske, von train sar kamel o Del ande o duxo. O getimos sa le dielengo pašiol. Aven godiaver ai strazi, te šai žian te řudjin. Angla savořende, t'avel tumen jekh pe kavreste jekh zurali mila, ke e mila garavel jekh but bezexa. Len sama te len gosti jekh avrestar, bi te bulguin. Sar le laše manuša kai si tumen but mištimata le Devlestar, ke sako anda tumende te thol te služil le kavren anda o mištimos vo lias. Te si varekon te del duma, t'avel sar ke te phenel so avela katar o Del; te si varekon te služil, te služil sar la zoriasa le Devleski kai del les, eta ke ande sa le dieli o Del t'avel vestime katar o Jesus Kristo, kaske si o vestimos ai e zor, berš beršestar. Amen! Muře kuč, te na avel tumenge šodo, sar jekh diela šodo kai aresel tumenge, anda e pařa kai si maškar tumende te zumavel tumen. Veselin tume, aver fialo, anda e partia la dukhaki katar o Kristo, eta t'aven vi tume ande e veselia ai ande o veselimos kana lesko vestimos avela. Te san tume dine pe o lažiav pala o anav le Kristosko, tume san veseli, ke o Duxo le vestimosko, o Duxo le Devlesko, hodinil pe tumende. Ke khonik anda tumende te na kjinuil ke mudarel, vai čorel, vai lel avrendar, vai kai thol pe ande le butia le kavrenge. Numa te si varekon ke kjinuil sar kristiano, te na avel leske lažiav, ai ke mai sigo te luvudil le Devles pala lesko anav. Ke si e vramia kai e kris lel pe katar o kher le Devlesko. Eta, te si te lel pe amendar, so avela te geton pe kudala kai či patian ka e Laši Viasta le Devleski? Ai te si o vorta ke skipil pe trudno, so avela anda o xoxamno ai o bezexalo? Kadia, ke kudala kai kjinuin sar kamel o Del te thon penge duxuri ka o čačo kai kerdias len, te keren so si mišto. Eta e vorba kai me phenav le phurenge kai si maškar tumende, me kai sim phuro sar tumende, marturo katar o kjinuimos katar o Kristo, ai kai si man partia ka o vestimos kai si te sikadiol: Len sama katar le bakroře le Devleske kai tume arakhen le, na pe e zor, numa anda tumende, sar kamel o Del; na pe jekh nirimos intaino, numa dragostiasa; na t'aven bare pe kudala kai si tumare te len sama, lendar numa te sikaven tume sar jekh modelo lenge. Ai kana o Baro Pastuřo sikadiola, tume lena e kurona le vestimaski kai či rimol pe. Sa jekh fialo, tume kai san terne, patian o mui le phurengo. Ai tume, kai phiren ande jekh than, thon pe tumende e prostia; ke, sar phenen le Ramomata: O Del ninkerdiol pe la barimatange, Numa vo jertil le prostonge. Kein tume kadia tela o zuralo vast le Devlesko, eta ke vo te uštiavel tumen ande e vramia kai trubul; ai thon pe leste sa tumare ginduri, ke inke vo lel sama tumendar. Aven strazi, len sama. Tumaro dušmano o Beng, rodel sar jekh liono kai tsipil, rodel kas te xal. Ninkeren tume pe leste jekhe patiamasa zurale, žianen ke sa kudala kjinuimata si pe tumare phral ande e lumia. O Del sa le kamimasko, kai akhardias tumen ande o Jesus Kristo pala pesko vestimos pe sakda, pala ke tume kjinuisailian jekh tsiřa vramia, lašiarela tumen vo inke, zuriarela tumen, kerela anda tumende te na miškin tume. Leske t'avel e zor berš beršestar! Amen! Si katar o Silas, ka si kai muře jakha jekh phral čačo, kai me ramov tumenge kadala tsiřa vorbi, te vazdav tumen ai te phenav tumenge čačes ke kudo si so čačes mištimos le Devlesko Bešen zurales ande leste. E Khangeri le alomonengi kai si ande o Babilon del tumen pozdraimos, vi o Marko, muřo šiav. Den tume pozdraimos jekh avres katar jekh čimidimos drago. Ke e patia t'avel tumensa sa kai san ande o Kristo! O Simon Petri, sluga ai apostolo katar o Jesus Kristo, kudalenge kai line te hulaven jekh patiamos sa anda kudo prešo sar amaro, katar e kris amare Devleski ai katar o Skipitori o Jesus Kristo: ke o mištimos ai e patia te bution tumenge kai žianen le Devles ai le Kristos amare Bares! Sar lesko devlikano zuralimos dias amen so si t'anel ka o traio ai ka e mila, anda amaro žianglimos katar kudo kai akhardias amen anda pesko vestimos ai anda pesko vužarimos, save phenen amenge lestar le mai bare dinimata ai le mai kuč, eta ke te lendar t'aven vi tume t'avel tumen partia ande lesko devlimos, ai te našen katar o kamimos kai rimol kai si ande e lumia. Sa pala kudia, thon sa tumari zor t'avel tumare patiamasa o vužimos; le vužimasa o godiaverimos. Le godiaverimasa o ninkerimos, le ninkerimasa o ažiukerimos, le ažiukerimasa e mila, la milasa o kamimos le phralenge, le kamimasa le phralengo e mila. Te si kudala dieli ande tumende, ai te si but, von či mukena tumen kovle bi te na den khanči te žianen amare Bares o Jesus Kristo. Numa kudo kai nai ande leste kadala dieli si kořo, vo či dikhel dural, ai vo thodias pe te bustrel o vužarimos katar peske bezexa de dumult. Sa anda kudia, phralale, thon tume sar mai but te zuriaren sar san alome ai akharde; ke, kana keren kudia, tume či miškina tume. Kadia si, čačes, ke te den andre ande e amperetsia katar amaro Baro ai skipitori o Jesus Kristo avela tumenge pria mišto dino. Eta anda soste me dav ma sama te phenav tumenge kadala dieli, makar ke tume žianen le ai ke tume žian angle ande o čačimos kai si ži akana. Ai me dikhav ke trubul, kadia but vramia kai me sim ande kadia tseřa, te ninkerav tumen te na soven pa so me phenav tumenge ke me žianav ke sigo si te mukav la, sar ke amaro Rai o Jesus Kristo kerdias te žianav. Numa me dava sama ke kana me žiavatar tume te šai daštin sakda te den tume godji anda kadala dieli. Nai so gindin, čačes, ke geliam pala le paramiči xoxamne kana ame kerdiam te tume te žianen e zor ai sar avela amaro Rai o Jesus Kristo, numa si sar t'avel ke ame dikhliam leski amperetsia amare vuže jakhensa. Ke vo lias katar o Del o Dad pativ ai vestimos, kana o vestimos o mai šukar kerdias t'ašunel jekh hango kai phenelas: Kado si muřo Šiav o mai drago, ande kaste me thodem sa muři dragostia. Ai ame ašundiam kudo hango kai avilo anda o čeri, kana ame samas lesa pe o svinto plai. Ai ame ninkeras sar mai siguro e vorba kai sas phendi angla savořende, ke tume kerenas mišto te thon kan late, sar ka jekh lampa kai strefial ande jekh than tamlo, ži kai či o dies avel te sikadiol ai ke e čeřai la diminiatsaki uštel ande tumare ile; žianen angla savořende ande tumende ke či jekh profeto anda o Ramomos naštil te phenel jekh profesia korkořo anda peste, ke nai katar so jekh manuš kamel ke jekh profesia a sas andini, numa si spidine katar o Svinto Duxo ke le manuš dine duma katar o Del. Si maškar o narodo falši profeturi, ai inke avena maškar tumende falši doxtoruri, kai anena tumenge aver žiungale patiamata, ai kai šudena le Birevos kai kjindias len, anena pe pende jekh phařaimos strazo But žian pala lende ande pengo dilimos, ai e vurma le čačimaski avela prasaime pala lende. Katar o xanžalimos, von lena tumendar katar le paramiči xoxamne, von kai daran de dumult le strafostar, ai kudalengo phařaimos či sovel. O Del či keisailo pa le andželi kai kerde bezex, numa vo šiudias le ande le uni ande o tuniariko ai garadias le pe e kris; O Del či keisailo pa e purani lumia, numa vo skipisardias le Noa, kai delas duma pa e kris, ai efta kaver, kana vo andias le bare paia pe jekh lumia kurvetsisko; vo dias strafo kana phaglias ai inčardias pulberia le foruri Sodomo ai Gomořa, kerdias les te le bidevleske manušenge so be ažiukeren, ai te vo muklia le Lot le vorta, pria but sas leske nekazo hana dikhlias so kerenas kudala manuš bikrisake ande pengo dilimos (ke kudo vorta, kai bešelas maškar lende, rimolas sako dies pesko duxo vorta pala so vi dikhelas ai ašunelas pa lenge butia mudarimaske); kadia o Baro žianel sar te skipil katar o zumadimos le manušen kai patian, ai te thol rigate te garavel kon nai vorta t'aven dine strafo o dies kai avela kris, kudala mai but kai žian pala o mas ai kai si mahrime ande pende ai kai vuřitsin o barimos le devlesko. Von thon zor ai maren mui, von či daran te prasan le vestimen, žikin le andželi, mai bare ande e zor ai zurale, či ningeren pe lende kris prasaimaski angla o Baro. Numa von, sar žigeni bigodiake arakhadile t'aven line ai phařade, von den duma jekh prasamasa anda so von či žianen, ai von xasavona katar pengo dilimos sar žigeni, len kadia o pokjinimos pengo kurvatsiako. Von arakhen pengi dragostia kai den pe so si lenge drago ande o dies; manuš melale ai mahrime-von guglion ande penge xoxaimata, kana xan mišto tumensa. Len si lenge jakha pherde kurvetsia ai nai lengo šoha dosta le bezexa; von athavon le duxuri kai nai mišto ninkerde; lengo ilo si kerdo pe o xanžalimos; von si le glati armandine. Pala ke von mukhle le e vurma vorta, von xasaile kai gele pala e vurma katar o Balam, šiav katar o Beor, kai sas leske drago o pokjinimos katar o nasulimos, kadia vo sas lino pala ke či patiaias: jekh magaritsa muto dias duma jekhe hangosa manušeske, terdiadias o dilimos le profetosko. Kudala manuš si xainga bi paiesko, nuveria kai gonin e turberia, o Del thol len rigate ande o kalimos. Le divanonsa phukiarde barimatansa, von astaren katar so kamel o mas, katar le dilimata, kudalen kai daba skipisaile katar le manuš kai trainas rigate; von phenen lenge ke si te skipin pe, kana inke von si řoburi le rimomaske, ke sako si řobo anda so nirisardias pe leste. Čačes, te sia ke palake geletar katar o marimos la lumiako, ai žianen o Rai ai Skipitori o Jesus Kristo, von mai len pe neve ai xasarde, lengi mai paluno diela si mai trudno sar e mai angluno. Ke mai mišto sas t'avel lenge te na žiangline e vurma la krisaki ke de sar te den palpale, kana von prinžiarde les, anda o svinto poronka kai sas lenge dini. Areslias lenge so phenel jekh paramiči vorta: O žukel gelo palpale ka so vo šiadias, ai e bali xaladi geli palpale ande e čik. Eta inke, muře kuč, o duito lil kai me ramosardem tumenge. Ande o jekh ai ande o kaver me rodem t'uštiavav tumen katar so phenav te aven tume ginduri saste, eta te den tume godji ka le dieli phende angla savořende katar le svintsi profeturi, ai katar e poronka le Bareski ai le Skipitoreski, sikiarde katar tumare apostoli, ai te žianen ke angla savořende, ande le mai paluni dies, le manuš kai train sar von kamen, avena ai prasana tumendar ai phenena: Kai si kodia so phendias, ke si vo t'avel? Ke, dekin ke le dada mule, sa kadia ašel sar dekin kerdilias e lumia. Von či kamen te žianen, čačes, ke kaver čeri sas angla savořende katar e vorba le Devleski, sa jekh fialo jekh phuv tsirdini anda o pai ai lašiardi anda o pai, ai pa kudala dieli e lumia kai sas atunči tasaili, dias pa late o pai opral, žikin ke, sa katar kudia vorba, o čeri ai e phuv akana si garade ai thodine rigate le jagake, ži kai o dies la krisako ai le phařaimako le manušenge žiungale. Numa si jekh diela, muře kuč, kai tume te na bustrenla, si ke, angla o Baro, jekh dies si sar jekh mia berš, ai jekh mia berš sar jekh dies. O Baro sigo si te kerel so vo phendias, sar uni patian; numa les si les řabda karing tumende, či kamel te xasavol jekh anda tumende, numa sa t'aresen te skipin pe. O dies le Baresko avela sar jekh čor; ande kudo dies, o čeri nakhela bare bašaimasa, le čeřaia phabarde phagiona, ai e phuv le butiansa kai si ande late bilana. Sar sa kadala dieli si te bilan, sar trubul te train ande o svintsimos ai ande e mila, žikin tume ažiukeren ai gribin t'avel o dies le Devlesko, pala savo o čeri lela pařa, bilala ai le čeřaia phabarde bilana! Numa ame ažiukeras, sar vo phendias, nevo čeri ai nevi phuv, kai o vorta bešela. Sa anda kudia, muře kuč, žikin ažiukeras kudala dieli, thon zor t'arakhe tume vo bi makhle ai bi došake ka e patia. Gindin o ažiukerimos amare Baresko si tumaro skipimos, sar amaro drago phral o Paul vi vo ramosardias les tumenge; sar e godji kai sas les dini. So vo kerdias ande sa peske lila, kai vo del duma pa kadala dieli, ande save si plenturi trudno te hatiaras, kai le žene kai či žianen ambolden le sar si, sar le kaver Ramomata, te peren von tele. Tume kadia, muře kuč, kai si tumenge phendo, thon tume te len tume sama, daratar ke te na ningeren tume le žiungale rigate, ai te na aresen tumete peren tele katar tumaro zuralimos. Numa barion ande o mištimos ai ande o žianglimos katar ande amaro Baro ai Skipitori o Jesus Kristo. Leske t'avel o vestimos, akana ai pe sogodi avela! Amen! So si de anda o gor, so ame ašundiam, so ame dikhliam amare jakhensa, so ame liam sama ai so amare vast asbade, hadia si o divano le traiosko, ke o traio si sikado, ai ame dikhliam les ai ame sam leske martururi, ai ame phenas tumenge o traio pe sakda, kai sas paša o Dad ai kai sikadilias amenge. So ame dikhliam ai ašundiam, ame phenas les tumenge, eta ke vi tume t'aven ande jekh than amensa. Eta, ame sam ande jekh than le Dadesa ai leske Šiavesa o Jesus Kristo. Ai ame ramosaras kadala dieli, eta ke amari veselia t'avel laši. E nevestia kai ame ašundiam tumendar, ai kai ame phenas la tumenge, si ke o Del si vedaria, ai ke nai ande leste tuniariko. Te phenasa ame ke ame traisaras lesa, ai ke ame phiras ande o tuniariko, ame xoxavas, ai ame či keras o čačimos. Numa te phirasa ame ande e vedaria, sar si vo ande e vedaria, ame sam jekh avresa ande jekh than, ai o rat katar o Jesus lesko Šiav vužarel ame anda sako bezex. Te phenasa ame ke nai ame bezexa, ame diliaras ame korkořo, ai o čačimos nai ande amende. Te puřisaras ame amare bezexa, vo si čačo ai vorta te jertil amenge, ai te vužarel ame anda sako žiungalimos. Te phenasa ame ke nai ame bezexa, ame keras anda leste xoxamno, ai leski vorba nai ande amende. Muře glati, me ramov tumenge kadala dieli, eta te na keren tume bezexa. Ai te si varekon ke kerdias bezex, amen si ame jekh advokato paša o Dad, o Jesus Kristo o vorta. Vo inke si kai pokjinel amare bezexa, na ferdi pala amende, numa pala sa la lumiake. Te garavasa ame leske poronki, kothar ame žianas ke prinžiaras les. Kudo kai phenel: Me prinžiarav les, ai kai či garavel leske poronki, si jekh xoxamno, ai o čačimos nai ande leste. Numa kudo kai garavel leski vorba, o kamimos le Devlesko si čačes vorta ande leste; kothar ame žianasa ke sam ande leste. Kudo kai phenel ke vo bešel ande leste vi trubul te phirel sar phirel vo. Muře kuč, nai jekh poronka nevi ke me ramov tumenge, numa jekh poronka purani kai si tume de anda o gor; kudia poronka purani, si e vorba kai tume ašundian. Numa, si jekh poronka nevi kai me ramov tumenge, so si čačimos ande leste ai ande tumende, ke o tuniariko bilal ai e vedaria e čači inke avel. Kudo kai phenel ke si ande e vedaria, ai kai vuřitsil peske phrales, mai si ande o tuniariko. Kudo kai kamel peske phrales bešel ande e vedaria, ai nai khanči ande leste kai peravel kavres. Numa kudo kai vuřitsil peske phrales si ande o tuniariko, vo phirel ande o tuniariko, ai vo či žianel kai žial, ke o tuniariko kořardias leske jakha. Me ramov tumenge, muře glati, ke tumare bezexa si jertime pala lesko anav. Me ramov tumenge, dada, ke tume prinžiardian kudales kai si de anda o gor. Me ramov tumenge, terne murš, ke tume nirisardian le xitros. Me ramosardem tumenge, muře glati, ke tume žianglian le Daden. Me ramosardem tumenge, dada, ke tume žianglian kudales kai si de anda o gor. Me ramosardem tumenge, ke tume san zurale, ai e vorba le Devleski bešel ande tumende, ai ke tume nirisardian le xitros. Te na avel tumenge drago e lumia, či le dieli kai si ande e lumia. Te si varekon ke kamel e lumia, o kamimos le Devlesko nai ande leste; Ke sogodi si ande e lumia, so kamel o mas, so kamen le jakha, ai le barimata le traioske, či avel katar o Dad, numa avel katar e lumia. Ai e lumia nakhel, ai vi so kamel voi; numa kudo kai kamel te kerel sar kamel o Del bešel pe sakda. Tsinoře glati, si o mai paluno časo, ai sar ke tume ašundian ke o dušmano le kristasko avel, si akana but dušmanuri Kristoske: kathar ame žianas ke si o mai paluno časo. Von ankliste avri amendar, numa von nas anda amare; ke t'avelino anda amare, von sas te bešen amensa, numa kudia areslias eta te sikavel ke von nai anda amare. Numa tume lian o svintsimos katar kudo kai si svinto, ai tumen žianen o čačimos. Me ramosardem tumenge, na ke tume či žianen o čačimos, numa ke tume žianen les, ai ke či jekh xoxaimos či avel katar o čačimos. Kon si xoxamno, Kudo kai del palpale ke o Jesus si o Kristo. Vo si o dušmanu le Kristosko kai del palpale le Devles ai le Šiaves. Kon del palpale le Šiaves nai les či o Dad; kon-godi del pe ka o Šiav si les vi o Dad. Eta so tume ašundian de anda o gor te bešel ande tumende. Te si ke so tume ašundian de anda o gor beše ande tumende, tume bešen vi ande jekh than le šiavesa ai le Dadesa. Ai so vo phendias ke si t'avel amenge, si o traio pe sakda. Me ramosardem tumenge kadala dieli pala kudala kai roden te den tume rigate. Tumenge, o svintsimos kai tume lian lestar bešel ande tumende, ai tumen či mai trubul te sikiaren tume; numa sar lesko svintsimos sikiarel tumen ande sa le dieli, ai ke kudo si o čačimos ai ke nai jekh xoxaimos. Bešen ande leste sar sas o sikiarimos kai sas tumenge dino. Ai akana, tsinoře glati, bešen ande leste, eta ke, kana vo sikadiola, amen t'avel amen patiamos, ai kana vo avela te na avel amenge lažiav ai te garavas amen lestar. Te tume žianen ke vo si vorta, prinžiaren ke kon-godi kerel e kris arakhadilo lestar. Dikhen ke kamimos o Dad sikadias amenge, t'avas ame akharde glati le Devleske! Ai ame sam. Te si ke e lumia či prinžiarel ame, si ke voi či prinžiarel les. Muře kuč, ame sam akana glati le Devleske, ai so ame avasa inke či dikhiol; numa ame žianas ke, kana vo sikavela pe, ame avasa sa jekh fialo sar leste, ke ame dikhasa les sar vo si. Kon-godi si les kudo ažiukerimos ande leste vužiol, sar vo si vužio. Kon-godi kerel bezex šinel e kris, ai e bezex si te šines e kris Eta, tume žianen, o Jesus sikadilo te lel amendar e bezex, ai nai ande leste bezex. Kon-godi bešel ande leste či kerel bezex; kon-godi kerel bezex či dikhel les, ai či prinžiarel les. Tsinoře glati, ke khonik te na diliarel tumen. Kudo kai kerel e kris si vorta, sar vo si vorta. Kudo kai kerel bezex si anda o beng, ke o beng kerdias bezex de anda o gor. O Šiav le Devlesko sikadilo te rimol le butia le bengeske. Kon-godi arakhadilo katar o Del či kerel e bezex, ke e simintsa le Devleski bešel ande leste; ai vo naštil te kerel bezex, ke vo arakhadilo katar o Del. Kothar prinžiaren kudalen kai si le glati le Devleske ai le glati le bengeske. Kon-godi či kerel e kris nai ande o Del, či kudo kai nai leske drago lesko phral. Ke so sas tumenge phendo ai ke so tume ašundian de anda o gor, si ke trubul t'avas drago jekh avreske, ai te na miaziuvas sar o Kain, kai avilo katar o beng, ai kai mudardias peske phrales. Ai sostar mudardias les vo? Ke leske butia sas nasul ai ke kudala leske phraleske sas vorta. Te na avel tumenge šodo, phralale, te si ke e lumia vuřitsil tumen. Ame žianas ke ame nakhliam katar e martia ka o traio, ke ame kamas le phralen. Kudo kai či kamel bešel ande o merimos. Kon-godi vuřitsil peske phrales si jekh kai mudarel, ai tume žianen ke či jekh kai mudarel nai les o traio pe sakda ande leste. Ame žiangliam o kamimos, ke vo dias pesko traio pala amende; vi ame, trubul te das amaro traio pala le phral. Te si varekon kai si les sa le mištimata la lumiake, ai kai dikhel peske phrales ke trubul les vareso, numa vo phandavel angla leste pesko ilo, sar šai bešel o kamimos le Devlesko ande leste? Tsinoře glati, na kamen ferdi le vorbensa ai la šibasa, numa vi le kerimasa ai le čačimasa. Kothar ame žianas ke ame sam anda o čačimos, ai ame lašiaras amare ile angla leste; ke te si amaro ilo ke del ame strafo, o Del si mai baro sar amaro ilo, ai vo žianel sa le dieli. Muře draži, te si ke amaro ilo či del ame strafo, amen si ame te ninkeras angla o Del. So avela ke ame mangas, ame lasa lestar, ke ame arakhas leske poronki ai ame keras so si leske drago. Ai kathe si leski poronka: ke ame patias ande o anav leske Šiavesko o Jesus Kristo, ai ke ame kamas ame jekh kavres, sar e poronka kai vo dias amen. Kudo kai arakhel leske poronki bešel ande o Del, ai o Del ande leste; ai ame žianas ke vo bešel ande amende katar o Duxo kai vo dias amen. Muře dragi, na patian ka sako duxo; numa zumaven le duxon, te len sama te si katar o Del, ke but falši profeturi avile ande e lumia. Prinžiaren pe kadia o Duxo le Devlesko: sako duxo kai phenel pa o Jesus Kristo ke avilo ande pesko stato si anda o Del; ai sako duxo kai či prinžiarel le Jesus nai katar o Del, si katar o dušmano le Kristosko, kai tume ašundias ke si t'avel, ai ke akana avilo inke ande e lumia. Tume, tsinoře glati, tume san anda o Del, ai tume nirisardian le xoxamne profeton, ke kudo kai si ande tumende si mai baro sar kudo kai si ande e lumia. Von, si anda e lumia; sa anda kudia von den duma sar si e lumia, ai e lumia ašunel lende. Ame, ame sam anda o Del; kudo kai žianel le Devles ašunel amende; kudo kai nai anda o Del či ašunel amende: kothar si ke tume prinžiaren o duxo le čačimasko ai o duxo le šibimasko. Muře dragi, kamen jekh kavres; ke o kamimos si katar o Del, ai ke varekon kai kamel arakhadilo katar o Del ai žianel le Devles. Kudo kai či kamel či prinžiarel le Devles, ke o Del si o Kamimos. O kamimos le Devlesko sikadilo karing amende sar o Del tradias peske jekhe Šiaves ande e lumia, eta ke ame te traisaras lestar. Ai kudo kamimos si, na ke si ke ame kamliam le Devles, numa ke vo kamlias amen ai tradias peske Šiaves te pokjinel anda amende pala amare bezexa. Muře dragi, te si ke o Del kamlias amen kadia, vi ame trubusaras te kamas ame jekh avres. Khonik šoha či dikhlias le Devles; numa te kamas ame jekh avres, o Del trail ande jekh than amensa ai lesko kamimos sikadiol ande amende. Ame prinžiaras ke ame bešas ande leste, ai ke vo bešel ande amende, si ke vo dias amen pesko Duxo. Ai ame, ame dikhliam ai ame phenas ke o Dad tradias le Šiaves sar Skipitori la lumiako. Kudo kai puřil pe ke o Kristo si o Šiav le Devlesko, o Del bešel ande leste, ai vo ande o Del. Ai ame, ame prinžiaras o kamimos kai o Del si les amenge, ai ame patias. O Del si kamimos; ai kudo kai bešel ande o kamimos bešel ande o Del, ai o Del bešel ande leste. Sar si vo, kadia sam ame vi ande e lumia: anda kadia si o kamimos lašio ande amende, eta t'avas siguro ka o dies la krisako. E dar nai ande o kamimos, numa o kamimos lašio del rigate e dar; ke katar e dar šai t'avel jekh strafo, ai kudo kai daral nai leske mišto ande o kamimos. Ame kamas les, ke vo kamlias amen o mai angluno. Ke si varekon ke phenel: Drago mange o Del, ai ke vo vuřitsil peske phrales, si jekh xoxamno; ke kudo kai či kamel peske phrales kai vo dikhel, sar kamela vo le Devles kai či dikhel les? Ai amen si ame lestar kadia poronka: ke kudo kai kamel le Devles kamel vi peske phrales. Kon-godi patial ke o Jesus si o Kristo, vo si šiav Devlesko, ai kon-godi kamel le dades kamel vi le šiaves. Ame prinžiaras ke ame kamas le glaten le Devleske, ai ame las sama leske poronki. Ke o kamimos ka o Del si te garaves leske poronki. Ai leske poronki nai trudno, ke sogodi arakhadilo katar o Del niril e lumia; ai o nirimos kai si pe e lumia, si amaro patiamos. Kon si kudo kai niril e lumia, te na avela kudo kai patial ke o Jesus si o Šiav le Devlesko? Vo si, o Jesus Kristo, kai avilo le paiesa ai le ratesa; na ferdi le paiesa, numa le paiesa ai le ratesa; ai si o Duxo kai del marturia, ke o Duxo si o čačimos. Ke si trin kai den marturia: O Duxo, o pai ai o rat, ai le trin si ande jekh than. Te lasa ame e marturia le manušengi, e marturia le Devleski si mai bari; ke e marturia le Devleski si ke vo dias marturia pa pesko Šiav. Kudo kai patial ande o Šiav le Devlesko si les kudia marturia ande leste; kudo kai či patial ande o Del kerel anda leste xoxamno, ke vo či patial e marturia kai o Del phendias pa o Šiav. Ai eta kadia marturia, si ke o Del dias amen o traio pe sakda, ai ke kudo traio si ande lesko Šiav. Kudo kai si les o Šiav si les o traio; kudo kai nai les o Šiav le Devlesko nai les o traio. Me ramosardem tumenge kadala dieli, eta ke tume te žianen ke tumen si tume o traio pe sakda, tume kai patian ande o anav le Šiavesko le Devlesko. Amen si ame paša leste kudo patiamos, ke te mangasa ame vareso sar vo kamel, vo ašunel amende. Ai te žianasa ame ke vo ašunel amende, sogodi ame mangasa, ame žianas ke amen si ame e diela kai ame mangas lestar. Te dikhes tjire phrales ke kerel jekh bezex kai či ningerel les ka e martia, ke te řudjis, ai o Del dela traio ka kudo phral, vo dela les ka kudala kai či keren bezex kai ningerel len ka e martia. Si jekh bezex kai ningerel ka e martia; nai pala kudia bezex ke me mangav te řudjis. Sako žiungalimos si jekh bezex, ai si kasavi bezex kai či ningerel ka e martia. Ame žianas ke kon-godi si anda o Del či kerel bezex; numa kudo kai arakhadilo anda o Del lel pe sama vo, ai o Beng či asbal les. Ame žianas ke ame sam anda o Del, ai ke sa e lumia si tela e zor le bengoski. Ame vi žianas ke o Šiav le Devlesko avilo, ai ke vo dias ame godji te žianas le čače Devles ai ame bešas ande jekh than leske siavesa o Jesus Kristo. Vo si o Del o čačo, ai o traio pe sakda. Tsinoře glati, len tume sama katar le xoxamne dela. Katar o phuro, ka e Rani e alome katar o Devel ai ka lake glati, kai si mange drago ande o čačimos, — ai nai ke ferdi me kamav le, numa vi sa kudala kai si lenge drago o čačimos, pala o čačimos kai bešel ande amende, ai kai avela amensa pe sogodi avela e lumia; ke o mištimos, e mila ai e patia t'aven tumensa katar o Del ai katar o Jesus Kristos, o Šiav le Dadesko, ande o čačimos ai e mila. Me but sim veselime ke arakhlem anda tjire glati uni kai phiren ande o čačimos, sar si le poronki kai ame liam katar o Dad. Ai akana, so me mangav tutar, kamli Rani, na ke te dav tu jekh poronka nevi, numa kudia kai si ame de anda o gor; si ke t'avas drago jekh avreske. Ai o kamimos si te phires sar si le poronki. Kathe si e poronka ande savi tume trubun te phiren, sar tume sikilian de anda o gor. Ke but kai athaven dine andre e lumia, kai či puřin ke o Jesus Kristo avilo ande pesko mas. Kudo kai si kadia, si o athavari ai o dušmano le Kristosko. Len tume sama tume, eta te na xasaren e fruta tumaria butiaki, numa tume te len jekh pherdo pokjimos. Kon-godi žial mai angle ai či bešel ande o zakono le Kristosko nai les o Del; kudo kai bešel ande kudo zakono si les o Dad ai o Šiav Te si varekon ke avel tumende ai či anel kudo zakono, na ninkeren les ande tumaro kher, ai na phenen leske: Impači! ke kudo kai phenel leske: Impači! žial pala leske nasul butia. Makar ke si but dieli te ramov tumenge, me či kamlem te kerav kudia la xartiasa ai le černilasa; numa me gindiv ma ke si te žiav tumende, ai te dav duma tumensa mui moste, eta ke amari veselia t'avel laši. Le glati katar tjiri phei e alome den tumen pozdraimos. Katar o Phuro, ka o Gaius, o mai drago, kai si mange drago ande o čačimos. Muřo drago, me mangav ke tu te barios ande sako diela ai t'aves sasto vesto, sar butiol tjiro duxo. Me simas but veselime, kana le phral aresle ai dine marturia pa o čačimos kai si ande tute, ai sar tu phires ande o čačimos. Nai ma mai bari veselia ke sar t'ašunav ke muře glati phiren ande o čačimos. Muřo drago, tu keres sar trubul ande so tu keres le phralenge, ai inke le phralenge streia, save si martururi anda tjiro mištimos, angla e Khangeri. Tu keres mišto te des len so trubul pe o drom sar kamel o Del. Ke si pala o anav le Jesus Kristosko ke von geletar, bi te len khanči katar kudala kai či patian. Ame trubusaras te las sama katar kasave manuš, eta t'avas butiaria lensa pe o čačimos. Me ramosardem uni vorbi ka e khangeri; numa o Diotref, kai si leske drago t'avel o mai angluno maškar lende, či primil amen. Sa anda kudia, te si te žiav te dikhav tumen, me phenava tumenge so vo kerdias, sar phenel pe amende nasul divanuri; na ke ferdi mišto leske kadia, vo či primil le phralen, ai kudala kai kamen te primin len, vo či mukel len ai gonil le anda e khangeri. Muřo drago, na ker sar o nasulimos, numa ker sar o mištimos. Kudo kai kerel o mištimos si katar o Del; kudo kai či kerel o mištimos nai katar o Del. Savoře, ai vi o čačimos inke, den jekh laši marturia ka o Demetrius; vi ame das les marturia ai tu žianes ke amari marturia si čači. Si ma but dieli te ramov, numa či kamav te kerav kudia la černilasa ai le poresa, Gindiv ma ke sigo si te dikhav tu, ai ame dasa duma mui moste! Unpači. Le vortača den tu pozdraimos. De pozdraimos le vortačen, jekh pa jekh. O Jud, sluga katar o Jesus Kristo, ai phral katar o Jakob, ka kudala kai si akharde, kai si drago ande o Del o Dad, ai garade le Jesus Kristoske; ke e mila, e patia ai o kamimos te bution tumenge! Muře draži, sar me mai but kamav te ramov tumenge pala amaro skipimos ande jekh than, me hatiardem ke sas mange musai te kerav kudia eta te vazdav tumen te maren tume pe o patiamos kai sas ninkerdo le svintsonge jekh data pe sa. Ke thode pe maškar tumende uni manuš, kai lengo strafo si ramome de dumult, čoře, kai pařuven o mištimos amare Devlesko te diliaren, ai či prinžiaren amare ferdi jekhe birevos o Rai Jesus Kristo. Me kamav te mai phenav tumenge, tumenge kai žianen but mišto kadal dieli, ke o Baro, pala ke skipisardias le narodos ai tsirdias les avri anda o them e Egipta, vo atunči kerdias ke xasavon kudala kai či patian; ke thodias le rigate pe e kris le bare dieseski, phangle pe sakda ande o tuniariko. Den tumen godji ka le andželi kai nas lenge mišto ande e putiaria kai sas lenge dini numa kai mukle le thana kai bešenas; den tumen godji ka ke o Sodomo ai e Gomořa ai le foruri paše, kai o narodo kerde sar kudala andželi ai dine pe ka e kurvetsia ai ke so či trubul te kerel o manuš. Bešel pe lende o nekazo ande jekh jag pe sakda. Makar kudia, vi kudala manuš, ningerde le lenge sune, mahrin sa kadia lengo mas, vuřitsin e putiaria le Develeski ai prasan le vestimen ande o čeri. Eta, o arxandželo o Mihail, kana xalias pe le bengesa pa o stato le Mošesko, vo či tromalas te thol pe leste jekh kris prasamaski, numa phendias leske: Ke o Baro te del tu strafo! Von, aver fialo, von den duma jekh fialo prasaimasko anda so von či žianen, ai von rimon pe ande so von žianen sar žigeni bi-godiake. Nasul t'avel lenge! ke von gele pala e vurma katar o Kain, von šiudine pe pala jekh lov sar rimosailo o Balam, von xasaile katar o buntuimos sar o Kore, Von si melale ande tumare pativa, xan bi-lažiavesko, pravaren pe korkořo. Si nuveria bi-paiesko, spidine katar le balvalia; kopačia tomnake bi-frutake, duvar mule, ankalade avri. Sar talazuri zurale la mariake, šiudel e spuma katar lenge dieli nai vuži; čeřaia xasarde, kaske o tamlo tuniariko si lenge thodino rigate pe sakda. Si lenge ke o Enok, o eftato de katar o Adamo, phendias so avela, kadia: Eta, o Baro avilo peske svintsi miensa, te kerel jekh kris pe lende, ai te strafuil len te žianen sa le dieli bi-laše so von kerde ai sa le vorbi prasaimaske kai phende pe leste le nasul bezexale. Si manuš kai bulguin, kai vatin pe anda pende, kai phiren sar von kamen, kai si len ande o mui vorbi barimatange, kai si lenge drago le žene pala lovende. Numa tume, muře draži, den tume godji ka le dieli phende de angla savořende katar le apostoli katar amaro Baro o Jesus Kristo. Von phende tumenge ke ande le posledni vrami avena manuš kai asan tumendar, phirena sar von kamen bi-lašes si kudala kai kamen te hulaven, manuš kurvaria, nai len Duxo. Tumenge, muře draži, vazden tumaro traio pe o svinto patiamos, ai řudjin ande o Svinto Duxo, ninkeren tume ande o kamimos le Devlesko, žikin ažiukeren e mila katar amaro Rai o Jesus Kristo pe o traio pe sakda. Sikaven mila ka kudala kai či hatiaren; skipin le kavren ai len le avri anda e jag; ai vi le kavre, sikhaven lenge jekh mila hamime la darasa, numa vuřitsin ži ka e bunda mahrime katar lengo mas. Eta, kudaleske kai šai lel tumendar sama anda sako perimos ai te tradel tumen angla lesko vestimos bi-došako ai ande e veselia, ferdi ka o Del, amaro Skipitori, katar o Jesus Kristo amaro Baro, t'avel o vestimos, o barimos e zor ai o zuralimos, angla savořende de sa le vrami, ai akana, ai ande sa le berš! Amen! Ande kadia kliška si ramome le dieli kai o Kristo phendias peske slugenge kai si t'aven, ai kai vo kerdias te žianel peski sluga o Jono, kana tradias leske peske andželos. Kudo si e vorba le Devleski ai o čačimos sikavdo katar o Jesus Kristo, sa sogodi o Jono dikhlias. Veselo kudo kai gjinel ai kudala kai ašunen le vorbi katar so si t'avel, ai kai garaven le dieli kai si ramome! Ke e vramia si paše. O Jono ka le efta Khangeria kai si ande e Azia: ke o mištimos ai e patia t'aven tumenge dine katar kudalo kai si, kai sas, ai kai avel, ai katar e partia le efta duxongi kai si angla lesko skamin amperatisko, ai katar o Jesus Kristo, o čačo marturo, o mai angluno arakhado anda le mule, ai o prinso le amperatongo la phuviake! Kudaleske kai kamel amen, kai skipisardias amen anda amare bezexa katar pesko rat, ai kai kerdias anda amende jekh amperetsia, raša le Devleske leske Dadeske, leske t'aven o vestimos ai e zor, berš beršestar. Amen! Eta, vo avel le nuveronsa, ai sako jakh dikhela les, inke kudala kai pusade les; ai sa le kumpani la phuviake vatina pe pala leste. Ei, Amen! Me sim o mai angluno ai o mai paluno, phenel o Baro o Del, kudo kai avel, o Mai Zuralo. Me o Jono, tumaro phral, ai kai si les partia tumensa ka o kjinuimos ai e amperetsia ai o ažiukerimos ande o Jesus, me simas ande e inzula kai akharen la Patmos, pala e vorba le Devleski ai o čačimos sikavdo katar o Jesus. Me simas lino ande o Duxo o dies le Baresko, ai me ašundem pala mande jekh hango zuralo, sar o bašimos jekha tuturiazako, kai phenelas: So tu dikhes, ramosar les ande jekh kliška, ai trade les ka le efta Khangeria, ka o Efeso, ka e Smirna, ka o Pergamo, ka o Tiatira, ka o Sardis, ka e Filadelfia, ai ka o Laoditsea. Me amboldem ma te prinžiarav savo si kudo hango kai delas mansa duma. Ai, pala ke amboldisailem, me dikhlem efta lampuri sunakune, ai, maškar le efta lampuri, varekon kai miazolas sar jekh šiav manušesko, uriado ande jekh lungo řotia, ai sas les jekh prastia sunakuni pe o kolin. Lesko šero ai leske bal sas parne sar e pošom e parni, sar o iv; leske jakha sas sar jekh pařa jagaki; leske punře sas jekh fialo sar o abčin phabardo, sar t'avilinosas dino jag ande jekh bov; ai lesko hango sas sar o bašimos le bare paiengo. Sas les ande lesko vast o čačo efta čeřaia. Anda lesko mui anklelas avri jekh xanřo skutsome, kai šinel pa le dui riga; ai leski fatsa sas sar o kham kana strefial ande sa peski zor. Kana me dikhlem les, me pelem ka leske punře sar mulo. Vo thodias pe mande pesko vast o čačo, phenelas: Na dara! Me sim o mai angluno ai o mai paluno, ai o živindo. Me simas mulo; ai eta, me sim živindo pe le berš beršeste. Me si ma e putiaria pe o merimos ai pe e lumia le mulengi. Ramosar kadia tu le dieli kai tu dikhlian, ai kudala kai si, ai kudala kai si t'aven pala lende, e čudenia katar le efta čeřaia kai tu dikhlian ande muřo vast o čačo, ai katar le efta lampuri sunakune. Le efta čeřaia si le andželi katar le efta Khangeria, ai le efta lampuri si le efta Khangeria. Ramosar ka o andželo katar e Khangeri anda o Efeso: Eta so phenel kudo kai ninkerel le efta čeřaia ande pesko vast o čačo, kudo kai phirel maškar le efta lampuri sunakune. Me žianav tjire butia, tjire zurale butia, ai tjiro ninkerimos. Me žianav ke tu vuřitsis le nasulen; ke tu zumadian kudalen kai phenen penge apostoli ai kai nai, ai ke tu arakhlian le xoxamne; ke tut si tu ke šai ninkeres, ai ke tu kjinuisardian pala muřo anav, ai ke tu či muklian tu. Numa so si ma pe tute, či mai sim tuke drago sar angla savořende. De tu godji katar tu pelian, keisavo, ai ker tjire mai angluni butia; te na niči, me avava tute, ai me lava tjiro lampa pa lesko than, vai te na niči si te keis tu. Inke tut si tu mištimos kadia, ke tu si vuřitsis le butia katar le vortača le Nikolaske, butia kai vi me vuřitsiv. Ke sako kai si les kan, t'ašunel mišto so o Duxo phenel le Khangeriange: Kudales kai niriva me dava les te xal anda o kopači le traioski, kai si ande o řaio le Devlesko. Ramosar ka o andželo la Khangeriako ande e Smirna: Eta so phenel o mai angluno ai o mai paluno, kudo kai sas mulo, ai kai avilo ande o traio: Me žianav so tu kjinuisailian ai tjiro čořimos (makar ke tu san barvalo), ai le xoxaimata anda e partia kudalenge kai phenen penge Židovuri ai kai nai, numa kai o Satan si lensa ande jekh than. Na dara anda so si tu te kjinuis. Eta, o beng šiudela uni anda tumende ande e temnitsa, eta tume t'aven zumade, ai ke tumen avela jekh kjinuimos deše diesengo. Beš čačo ži ka o merimos, ai me dava tut e kurona le traioski. Ke kudo kai si les kan, t'ašunel mišto so o Duxo phenel le Khangeriange: Kudo kai nirila či mai kjinuila e duito martia. Ramosar ka o andželo katar e Khangeri anda o Pergamo: Eta so phenel kudo kai si les e xanřo skutsome, kai šinel pa dui riga: Me žianav kai tu bešes, me žianav ke kothe si o skamin amperatisko katar o Satan. Tu ninkeres muřo anav, ai tu či dian palpale muřo patiamos, inke ka le diesa katar o Antipas, muřo čačo marturo, kai sas mudardo tumende, kothe kai o Satan bešel. Numa si ma vareso pe tute, ke tu si tu kothe žene astarde ka e doktrina katar o Balam, kai sikiarelas ka o Balak te thol jekh bař te peren le šiave katar o Israel, te xan o mas šinado le statonge ai te den-pe pe o lažiav. Sa jekh fialo, vi tu, si tute žene astarde sa kadia ka e doktrina katar le votača le Nikolaske. Keisavo; te na niči, me avava tute sigo, ai me marava ma pe lende la xanřesa anda muřo mui. Ke kudo kai si les kan, t'ašunel mišto so o Duxo phenel le Khangeriange: Ka kudo kai nirila me dava les e mana garadi, ai me dava les jekh bařořo parno; ai pe kudo bařořo si ramome jekh anav nevo, kai khonik či žianel, te na avela kudo kai lel les. Ramosar ka o andželo katar e Khangeri anda o Tiatira: Eta so phenel o Šiav le Devlesko, kudo kai si leske jakha sar jekh pařa jagaki, ai kai leske punře si jekh fialo sar o abčin phabardo: Me žianav tjire butia, tjiro kamimos, tjiro patiamos, tjiri čači služetsia, tjiro ninkerimos, ai tjire mai paluni butia mai but sar le mai angluni. Numa so si ma pe tute, si ke tu mukes la žiuvlia Jezabel, kai voi phenel peske profetiasa. Sikiavel ai diliarel muře slugen, te den-pe pe o lažiav ai te xan mas šinade le statonge. Me dem la vramia, eta te voi te keil pe, ai voi či keisaili anda peski kurvetsia. Eta, me si te šiudav la pe jekh pato, ai tradava jekh baro kjino sa kudalenge kai keren kurvetsia lasa, vai te na niči ke si te kein pe anda penge butia. Me kerava te meren merimaske lake šiaven; ai sa le Khangeria žianena ke me sim kudo kai žianav le ginduria ai so kamen le manuš, ai me dava tumen sakones sar si tumare butia. Tumenge, ka sa le kaver anda o Tiatira, kai či len lako sikiarimos, ai kai či žianglian le «ginduri garade» katar o Satan, sar von akharen len, me phenav tumenge: me či thav pe tumende aver pharimata; ferdi, so si tumen, ninkeren les žikin či avav. Ka kudo kai nirila, ai kai garavela ži ande o gor muře butia, dava les t'avel baro pe le thema. Vo amperetsila len jekha rovliasa sastruni, phagena len sar e kanti la čikake, kadia inke me lem e putiaria katar muřo Dad. Ai me dava les e čeřai la diminiatsaki. Ke kudo kai si les kan, t'ašunel mišto so o Duxo phenel le Khangeriange. Ramosar ka e Khangeri anda o Sardis: Eta so phenel kudo kai si les le efta duxuri le Devleske ai le efta čeřaia: Me žianav tjire butia. Me žianav ke tu nakhes sar te san živindo, ai tu san mulo. Le tu sama, ai zuriar so mai ašilias te merel; ke me či arakhlem tjire butia vorta angla o Del. De tu godji sar tu lian ai ašundian, ai garav, ai keisavo. Te na lesa tu sama, me avava sar jekh čor, ai tu či žianesa ka če časo me avava pe tute. Numa si tu ande o Sardis uni manuš kai či marisarde penge tsalia; von phiren mansa ande le tsalia le parne, ke von si harniči. Kudo kai nirila vi pe leste avena kadia le tsalia parne; me či khosava lesko anav anda e kliška le traioski, ai me puřiva lesko anav angla muřo Dad ai angle le andželi. Ke sako kai si les kan, t'ašunel so o Duxo phenel ka le Khangeria! Ramosar ka o andželo katar e Khangeri anda e Filadelfia: Eta so phenel o Svinto, o Čačo, kudo kai si les e kjeia le Davidoski, kudo kai putrel, khonik našti te phandavel, kudo kai phandavel, ai khonik našti te putrel. Me žianav tjire butia. Eta, sar ke si tut tsiřa zor, ai ke tu garadian muři vorba, ai ke tu či dian palpale muřo anav, me thodem angla tute jekh vudar puterdo, kai khonik naštil te phandavel les. Eta, me dav tu kudalen kai si ande jekh than le Satanosa, kai phenen penge Židovuri ai kai nai, numa kai xoxaven; eta, me kerava t'aven, te den čanga ka tjire punře, ai te žianen ke me kamav tu. Sar ke tu garadian e vorba te ninkeres ande mande, vi me garavava tu ka o časo le zumaimasko kai si t'avel pe e lumia sa, te zumaven o narodo pe e phuv. Me sigo si t'avav. Ninker so si tu, eta ke khonik te na lel tjiri kurona. Kudo kai nirila, me kerava anda leste jekh piluro ande o templo muře Devlesko, ai vo či mai anklela avri; me ramova pe leste o anav muře Devlesko, ai o anav le forosko muře Devlesko, katar o nevo Jerusalem kai vulel anda o čeri paša muřo Del, ai muřo anav nevo. Ke kudo kai si les kan t'ašunel so o Duxo phenel le Khangeriange. Ramosar ka o andželo la Khangeriako ande o Laoditsea: Eta so phenel o Amen, o marturo čačo ai vorta, de anda o gor dekin si e lumia. Me žianav tjire butia. Me žianav ke tu či san či šudro či tato! Mai mišto t'aves tu šudro vai tato! Kadia, sar ke tu san kropo, ai ke tu či san či šudro či tato, me šiadava tu anda muřo mui. Sar ke tu phenes: Me sim barvalo, me barvailem, ai man či trubul ma khanči, ai ke tu či žianes ke tu san nasul, nekežime, čořo, kořo ai nango. Me sikiarav tu te kjines mandar sunakai zumado katar e jag, eta t'areses barvalo, ai tsalia parne, eta t'aves uriado ai ke o lažiav tjire nangimasko te na dikhiol, ai jekh drab te makhes tjire jakha, eta te dikhes. Me, sikiarav ai marav sa kudalen kai si mange drago. Av harniko, ai keisavo. Eta, me ninkerav ma angla o vudar, ai me malavav. Te si varekon ke ašunel muřo hango ai putrel o vudar, me dava andre leste, me xava lesa, ai vo mansa. Kudo kai nirila, me kerava te bešel mansa pe muřo skamin amperatisko, sar me nirisardem ai me bešav muře Dadesa pe lesko skamin amperatisko. Ke kudo kai si les kan, t'ašunel mišto so o Duxo phenel le Khangeriange. Pala kudia, me dikhavas, ai eta, jekh vudar sas puterdo ande o čeri. O mai angluno hango kai me ašundemas, sar o bašimos jekha tuturiazako, ai kai delas mansa duma, phenel: Ankli kathe, ai me sikavava tuke so si t'avel mai angle. Strazo me simas lino ande o duxo. Ai eta, sas jekh skamin amperatisko ande o čeri, ai pe kudo skamin amperatisko varekon bešelas. Kudo kai bešelas, lesko mui sas sar bařa e jaspo ai o sardiono; ai o skamin amperatisko sas lestar krugom jekh arko čeresko jekh fialo sar o smaragdo. Krugom o skamin amperatisko me dikhlem biš-ai-štar aver skamina, ai pe kudala skamina biš-ai-štar phure bešenas, uriade ande le tsalia parne, ai pe lengo šero kuroni sunakune. Anda le skamina amperatisko anklelas strefialimos, bašimos ai o řondieto marel. Angla o skamin amperatisko phabonas efta lampi phabarde, kai si le efta duxuri le Devleske. Mai si angla o skamin amperatisko sar jekh maria voiagaki, jekh fialo sar o kristalo. Maškar o skamin amperatisko ai krugom o skamin amperatisko, sas štar živinde pherde jakha anglal ai palal. O mai angluno živindo sas jekh fialo sar jekh liono, o duito živindo sas jekh fialo sar jekh vitselo, o trito živindo si les fatsa jekhe manušeski, ai o štarto živindo si jekh fialo sar jekh ulio kai vurial. Le štar živinde si le sako šov phaka, ai si pherde jakha sa krugom ai tela le phaka. Von sakda phenen diese ai riate: Svinto, svinto, svinto, si o Baro o Del, o Mai Zuralo, kai sas, kai si, ai kai avel! Kana le živinde den vestimos ai pativ ai dragostia kudaleske kai bešel pe o skamin amperatisko, kudales kai trail berš beršestar. Le biš-ai-štar phure klonin pe angla kudo kai bešel pe o skamin amperatisko, ai von kamen kudales kai trail berš beršestar, ai von šiuden penge kuroni angla o skamin amperatisko, phenenas: Tu san harniko, amaro Baro ai amaro Del, te les o vestimos ai e pativ ai e zor; ke tu kerdian sa le dieli, ai ke si tutar ke von si ai ke si thodine. Porme me dikhlem ande o vast o čačo kudalesko kai bešel pe o skamin amperatisko jekh kliška ramome andral ai avrial, phangli katar efta pečati. Ai me dikhlem jekhe andželos zurale, kai tsipilas jekhe zurale hangosa: Kon si harniko te putrel e kliška, ai te phagel le pečati? Ai khonik ande o čeri, či pe e phuv, naštil te putrel e kliška či te dikhel la. Ai me but ruiem ke nai khonik t'avel harniko te putrel e kliška či te dikhel la. Ai jekh anda le phure phenel mange: Na rov; eta, o liono anda e kumpania katar e vitsa le Amperatosko o Juda, so sas šiudino katar o David, nirisardias te putrel e kliška ai le efta pečati. Ai me dikhlem, maškar o skamin amperatisko ai krugom les le štar živinde ai le phure, jekh Bakrořo kai sas kothe sar mudardo. Les sas les efta šinga ai efta jakha, kai si le efta duxuri le Devleske tradine pe sa e phuv. Vo avilo, ai vo lias e kliška anda o vast o čačo kudalesko kai bešelas pe o skamin amperatisko. Kana vo lias e kliška, le štar manuš živinde ai le biš-ai-štar phure klonisaile angla o Bakrořo, ninkerelas sako jekh tsitura ai taxta sunakune pherde duxia, kai si le řudjimata katar le svintsi. Ai von gjilabenas jekh gjili nevi: Tu san harniko te les e kliška, ai te putres le pečati; ke tu sanas šinado, ai tu kjindian le Devleske katar tjiri rat le manušen anda sako kumpania, anda sako šib, anda sako narodo, ai anda sako them; tu kerdian anda lende jekh amperetsia ai raša amare Devleske, ai von amperetsina pe e phuv. Me dikhavas, ai me ašundem o hango bute andželongo krugom o skamin amperatisko ai katar le živinde ai katar le phure, ai sode sas von. Sas miriarduri ai miriarduri ai mii ai mii. Von gjilabenas jekhe zurale hangosa: O Bakrořo kai sas šinado si harniko te lel e zor, o barvalimos, e godji, e putiaria, e pativ, o vestimos, ai o luvudimos. Ai sa so si živindo kai si ande o čeri, pe e phuv, tela e phuv, pe e maria, ai sogodi si, me ašundem le ke gjilabenas: Ka kudo kai bešel pe o skamin amperatisko ai ka o Bakrořo, e pativ, ai e zor, berš beršestar. Ai le štar živinde phenenas: Amen! Ai le phure klonin pe ai kamen les. Me dikhavas, kana o Bakrořo puterdias jekh anda le efta pečati, ai me ašundem jekh anda le štar živinde kai phenelas sar anda jekh hango řondietosko: Aidi. Me dikhavas, ai eta, sikadilo jekh grast parno. Kudo kai bešel opre sas les jekh sulitsa; jekh kurona sas leske dini, ai vo gelo-tar sar jekh niritari te niril. Kana vo puterdias e duito pečata, me ašundem o duito živindo kai phenelas: Aidi. Ai anklisto jekh kaver grast, lolo. Kudo kai bešel opre lias e putiaria te lel e patia pa e phuv, eta ke te le manuš te šinen pe jekh avres; ai jekh bari xanřo dine les. Kana puterdias e trito pečata, me ašundem o trito živindo kai phenelas: Aidi. Me dikhavas, ai eta, sikadilo jekh grast kalo. Kudo kai bešel opre ninkerelas jekh kintari ande o vast. Ai me ašundem maškar le štar živinde jekh hango kai phenelas: Jekh kilo dživ pe jekh dinaro, ai trin mezuri orzo pe jekh dinaro; numa na amin tume ka o vuloi ai ka e mol. Kana puterdias e štarto pečata, me ašundem o hango katar o štarto živindo kai phenelas: Aidi. Me dikhavas, ai eta, sikadilo jekh grast galbeno. Kudo kai bešel opre bušol e martia ai avel pala late o Than le mulengo. E putiaria sas leske dini pe jekh firtari la phuviako, te mudarel le manušen katar e xanřo, katar e bokh, katar o merimos, ai katar le žigeni sirbati la phuviake. Kana puterdias o panžto pečata, me dikhlem tela o altari le duxuri kudalenge kai sas mudarde pala e vorba le Devleski ai pala e marturia kai von dine čačimasa. Von tsipinas jekhe zurale hangosa, phenenas: Ži kana, Birevo svinto ai čačo, mai ažiukeres tu te des pe e kris, ai te des strafo o narodo la phuviako ke mudarde amen? Jekh řotia parni sas dini sakones anda lende; ai sas lenge phendo te hodinin tsiřa vramia, žikin či getol sode si katar le but vortača kai služin ai lenge phral kai trubun t'aven mudarde sar lende. Me dikhavas, kana puterdias e šovto pečata; ai sas jekh baro isdraimos la phuviako, o kham areslo kalo sar jekh gono kiltsako, o šiunuto sa intrego areslo sar o rat, ai le čeřaia anda o čeri perenas pe e phuv, sar kana jekh kopači figengi miškiardi katar e balval šiudel peske figi nai pake pe e phuv. O čeri žial-tar sar jekh lil kai kjiden les; ai sa le plaia ai inzuli miškisarde le pa lengo than. Le amperatsi la phuviake, le bare, le birevia ketanesko, le barvale, le zurale, sa le řoburi ai le manuš slobodo garadionas ande le kaverni ai ande le stanki le plaienge. Ai von phenenas le plaienge ai le stankenge: Peren pe amende, ai garaven amen angla e fatsa katar kudo kai si pe o skamin amperatisko, ai angla e xoli le Bakrořeski; ke o baro dies leska xoliaki avilo, ai kon šai ninkerel? Pala kudia, me dikhlem štar andželon pe punřende pe le štar koltsuri la phuviake; von ninkerenas le štar barvalia la phuviake, eta te na phurdel e balval pe e phuv, či pe e maria, či pe či jekh kopači. Ai me dikhlem jekhe kaver andželos, kai anklelas pe e rig katar uštel o kham, ai kai ninkerelas e pečata le Devleski živinde; ai vo tsipilas anda jekhe zurale hangosa pe le štar andželon kaske sas thodino te keren nasul la phuviake ai la mariake, ai vo phenel: Na keren nasul la phuviake, či la mariake, či le kopačenge, žikin či ame thasa e pečata pe o čikat le slugengo katar amaro Del. Ai me ašundem sode sas kudala kai sas pe lende thodini e pečata, jekh šel ai štar-var-deš ai štar mii, anda sako kumpania katar le šiave anda o Israel: Anda e kumpania o Juda, deš-u-dui mii pečatuime; anda e kumpania o Reuben, deš-u-dui mii; anda e kumpania o Gad, deš-u-dui mii; anda e kumpania o Ašer, deš-u-dui mii; anda e kumapania o Neftali, deš-u-dui mii; anda e kumpania o Manase, deš-u-dui mii; anda e kumpania o Simeon, deš-u-dui mii, anda e kumpania o Levi, deš-u-dui mii, anda e kumpania o Isaxar, deš-u-dui mii; anda e kumpania o Zabulon, deš-u-dui mii; anda e kumpania o Josef, deš-u-dui mii; anda e kumpania o Beniamin, deš-u-dui mii, thode pe lende e pečata. Pala kudia, me dikhavas, ai eta, sas baro narodo, kai khonik naštila te gjinen le, anda sako them, anda sako kumpania, anda sako narodo, ai anda sako šib. Von ninkerenas pe angla o skamin amperatisko ai angla o Bakrořo, uriade ande řoti le parne, ai patria palmoske ande lenge vast. Ai von tsipinas jekhe zurale hangosa phenenas: O skipimos si amare Devlesko kai bešel pe o skamin amperatisko, ai le Bakrořesko. Ai sa le andželi bešenas krugom o skamin amperatisko ai krugom le phure ai le štar živinde; ai von kloninas-pe pe pengi fatsa angla o skamin amperatisko, ai von kamenas le Devles, phenenas: Amen! O luvudimos, o vestimos, e godji, o naisimos, e pativ, e zuralimos, ai e zor, t'aven amare Devleske, berš beršestar! Amen! Ai jekh anda le phure lias e vorba ai phenel mange: Kudala kai si uriade ande le řoti parne, kon si von, ai katar avile von? Me phenav leske: Muřo Baro, tu žianes. Ai vo phenel mange: Si kudala kai avile anda o baro kjino, von xalade penge řoti, ai von parniade le ande o rat le Bakrořesko. Sa anda kudia ke von si angla o skamin amperatisko le Devlesko, ai služin les diese ai riate ande lesko templo. Kudo kai bešel pe o skamin amperatisko thola peski tseřa pe lenge; von či mai avena bokhale, von či mai avena trušale, ai o kham či malavela len, či jekh tatimos. Ke o Bakrořo kai si maškar o skamin amperatisko pravarela len ai ningerela len kai vulel o pai le traiosko, ai o Del khosela sako asvin pa lenge jakha. Kana puterdias e eftato pečata, sas ande o čeri jekh ašiaimos pašte jekh dopaš časo. Ai me dikhlem le efta andželi kai bešen angla o Del, ai efta tuturiazi sas lenge dine. Ai jekh kaver andželo avilo, ai vo bešel pe o altari, sas les jekh taxtai sunakuno; dine les but tumuia te phabarel, eta vo te del le, le řudjimansa katar sa le svintsi, pe o altari sunakuno kai si angla o skamin amperatisko. O thuv le duxiango anklel, le řudjimansa katar le svintsi, anda o vast le andželesko angla o Del. Ai o andželo lias o taxtai, pherdias les jag katar o altari, ai šiudias les pe e phuv. Ai sas hanguri, řondieturi, strefiaimos, ai jekh isdraimos isdral. Ai le efta andželi kai sas len le efta tuturiazi lašiardion te bašaven. O mai angluno bašavelas ande e tuturiaza. Ai sas babitsa ai jag hamime ratesa kai sas šiudine pe e phuv; ai pašte dopaš e phuv phabulias; ai pašte dopaš le kopačia phabulias, ai sa e čar e zeleno phabulias. O duito andželo bašavelas e tuturiaza. Ai vareso sar jekh bari plai phabarde sas šiudin ande e maria; ai pašte dopaš e maria kerdilias rat, ai pašte dopaš sogodi sas živinde ande e maria mule, ai pašte dopaš e čunuri tasule. O trito andželo bašavelas ande e tuturiaza. Ai perel anda o čeri jekh bari čeřai phabardi sar jekh fladero; ai voi peli pe pašte dopaš le paia ai le xainga katar xuten le paia. O anav kudala čeřaiako si Absint; ai pašte dopaš le paia avile kerke, ai but manuš mule katar le paia, ke von aresle kerke. O štarto andželo bašavelas ande e tuturiaza. Ai pašte dopaš o kham sas malado, ai pašte dopaš o šiunuto, ai jekh pašte dopaš le čeřaia, eta ke pašte dopaš areslo tuniariko, ai ke o dies te xasarel pašte dopaš peski vedaria, ai e riat sa jekh fialo. Me dikhavas, ai me ašundem jekh ulio kai vurialas maškar o čeri, phenel pe jekhe zurale hangosa: Nasul, nasul, nasul le narodoske pe e phuv, pala le kaver bašimata katar le tuturiazi katar le trin andželi kai si te bašaven! O panžto andželo bašavelas ande e tuturiaza. Ai me dikhlem jekh čeřai kai perelas anda o čeri pe e phuv. E kjeia la xaingaki anda e hunia sas lake dini, ai voi puterdias e xaing la huniaki. Ai anklistias avri anda e xaing jekh thuv, sar jekh thuv katar jekh baro bov; ai o kham ai e balval kalile katar o thuv la xaingako. Anda o thuv ankliste avri grastoře, kai gele pe sa e phuv; ai sas lenge dino jekh putiaria sar e putiaria kai si len le skorpionki pe e phuv. Sas lenge phendo te na keren nasul la čarake pe e phuv, či ka či jekh zelenimos, či ka či jekh kopači, numa ferdi le manušenge kai nai le e pečata pe o čikat. Sas lenge dino, na te mudaren len, numa te hamim pe lende panž šion; ai o hamimos kai avela pe lende t'avel sar o hamimos katar e skorpionka, kana pusavel jekhe manušes. Ande kudo dies, le manuš rodena o merimos, ai či arakhena les; von kamena te meren, ai e martia našela dur lendar. Kudala grastoře miazonas sar le grast kai žian pe o marimos; sas pe lenge šere sar kuroni jekh fialo sar o sunakai, ai lenge muia sas sar le muia le manušenge. Len sas le bal sar le bal le žiuvliange, ai le dand sar le dand le liononge. Sas pe lende tsalia sar le tsalia sastrune, ai o bašimos lenge phakenge sas sar jekh bašimos vurdonengo katar but grast kai našen pe o marimos. Sas len poria jekh fialo sar le skorpionki ai kanře, ai si ande lenge poria kai sas e putiaria te keren nasul le manušenge panž šion. Sas pe lende sar amperato o andželo katar e hunia, bušolas židovitsko Abaddon, ai Grekitsko Apolion. E mai angluni dukh nakhli. Eta mai avel dui dukha pala kudia. O šovto andželo bašavelas ande e tuturiaza. Ai me ašundem jekh hango kai avelas katar le štar šinga katar o altari sunakuno kai si angla o Del, ai phenelas ka o šovto andželo kai sas les e tuturiaza: Puter le štar andželon kai si phangle pe o baro pai, o Efrato. Ai le štar andželi kai sas gata pe o časo, o dies, o šion ai o berš, sas puterde ke te mudaren jekh anda trin manuš. Sode sas le grastaria la armiake sas deš mi-var deš mii; me ašundem sode sas. Ai kadia me dikhlem le grasten ande o dikhimos, ai kudala kai bešenas opre, sas pe lende tsalia sastrune lole sar e jag, vineto sar o jatsinto ai galbeno sar o sulfuro. Le šere le grastenge sas sar le šere le liononge; ai anda lengo mui anklelas jag, thuv, ai sulfuro. Pašte dopaš le manuš sas mudarde anda kudala trin dukha, katar e jag, katar o thuv, ai katar o sulfuro, kai anklelas avri anda lengo mui. Ke e putiaria le grastengi sas ande lenge muia ai ande lenge poria; lenge poria sas jekh fialo sar le sapa t'aven len šere, ai lensa von kerenas nasul. Le kaver manuš kai nas mudarde katar kudala dukha či keisaile katar penge butia anda penge vast, kadia te na kamen le demonon, ai le vobrazi sunakune, rupune, abčineske, bařeske ai kašteske, kai naštin či te dikhen, či t'ašunen, či te phiren; ai te na keina pe anda penge merimata, či katar penge drabarimata, či katar pengi kurvetsia či katar penge čorimata. Me dikhlem jekhe kaver andželos zurale, kai vulelas anda o čeri, garado ande jekh nuvero; pa lesko šero opral sas arko čeresko, ai lesko mui sas sar o kham, ai leske punře sar stilpuri jagake. Vo ninkerelas ande pesko vast jekh tsinoři kliška puterdi. Vo thodias pesko punřo čačo pe e maria, ai pesko punřo stingo pe e phuv; ai vo tsipilas jekhe zurale hangosa, sar kana tsipil jekh liono. Kana vo tsipilas, le efta řondieturi kerde t'ašunen lenge hanguri. Ai kana le efta řondieturi kerde t'ašunen lenge hanguri, me lavas te ramov; ai me ašundem anda o čeri jekh hango kai phenelas: Garav tuke so phende le efta řondieturi, ai na ramosar les. Ai o andželo, kai me dikhavas opre pe e maria ai pe e phuv, vazdelas pesko vast o čačo karing o čeri, ai vo solaxadias pa kudo kai trail berš beršestar, kai kerdias o čeri ai le dieli kai si, ai e maria ai le dieli kai si, ke manai vramia, numa kana o eftato andželo bašavela peski tuturiaza, e čudenia katar o Del aresela, sar vo phendiasas peske slugenge, le profeturi. Ai o hango, kai me ašundem anda o čeri, mai dem mansa duma, ai phenel: Žia, le e tsinoři kliška puterdi anda o vast le andželosko kai bešel opre pe e maria ai pe e phuv. Ai me gelem karing o andželo, phendem leske te del ma e tsinoři kliška. Ai vo phenel mange: Le la, ai nakhav la, voi avela kerki ka tjiro poř, numa ande tjiro mui avela gugli sar o avdjin. Me lem e tsinoři kliška anda o vast le andželosko, ai nakhadem la; sas ande muřo mui gugli sar o avdjin, numa kana nakhadem la, muřo poř pherdilo kerko. Porme phende mange: Trubul te mai phenes so avela pe but naroduri, thema, šiba, ai amperatsi. Dine ma jekh kaštoro jekh fialo sar jekh rovli te mezuril, phende: Ušti, ai mezurisar o templo le Devlesko, o altari, ai gin kudalen kai kamen. Numa so si avrial anda o templo, muk les, ai na mezurisar les; ke vo si dino kudalenge kai či patian, ai von inčarena tela le punře o foro svinto pašte štar-var-deš ai dui šion. Me dava ka muře dui marturia e putiaria te phenen so avela, uriade ande le gone, pašte jekh mia ai dui šela ai šov-var-deš dies. Le dui marturia si le dui kopačia maslini ai le dui lampi kai bešen angla o Baro la phuviako. Te si varekon ke kamel te kerel lenge nasul, jag anklel anda lengo mui ai xal lenge dušmanon, ai te si varekon ke kamel te kerel lenge nasul, vo trubul t'avel mudardo kadia. Len si len e putiaria te phandaven o čeri, eta te na perel brišin le dies kana von phenen so avela; ai len si len e putiaria te pařuven le paia t'aven rat, ai te malaven le phuvia anda sako fialo dukh, sako data kai von kamen. Kana von getosaren te phenen e Laši Viasta, e žigania kai anklel avri anda e hunia kerela pe lende marimos, nirila len, ai mudarela len. Ai lenge staturi avena thodine pe o platso le bare forosko, kai si akhardo, sar te avel Sodomo ai Egipta, kothe kai lengo Baro sas karfome. Manuš maškar o narodo, le kumpani, le šiba, ai le thema, dikhena lenge staturi pašte trin diesa ai dopaš, ai von či mukena ke lenge staturi te angropon le. Ai pala lende o narodo la phuviako veselila pe ai avela ande e voia, ai von tradena podarki jekh avreske, ke kudala dui profeturi kjinuisarde o narodo pe e phuv. Pala le trin diesa ai dopaš, jekh duxo le traiosko avel katar o Del, dela ande lende, ai von bešen pe penge punře; ai jekh bari dar lela kudalen kai dikhen le. Ai von ašunen anda o čeri jekh hango kai phenel lenge: Anklen kathe! Ai von anklen ande o čeri ande jekh nuvero; ai lenge dušmaia dikhen len. Ande kudo časo, sas jekh isdraimos phuviako, ai jekh anda deš partii le foroske pelias tele; efta mii manuš sas mudarde ande kudo isdraimos phuviako, ai le kavren lias len e dar ai dine vestimos ka o Del čeresko. O duito nasulimos nakhlo. Eta, o trito nasulimos avel sigo. O eftato andželo bašavelas ande e tuturiaza. Ai sas ande o čeri zurale hanguri kai phenenas: E amperetsia la lumiaki si dini ka amaro Baro ai ka lesko Kristo; ai von amperetsina berš beršestar. Ai le biš-ai-štar phure, kai bešenas angla o Del pe penge skamina amperatisko, kloninas-pe pe pengi fatsa, ai von kamenas le Devles, phenenas: Ame naisaras tuke, Baro Del Mai Zuralo, kai san, ai kai sanas, sar ke tu lian tjiri bari zor ai lian so si tjiri amperetsia. Le thema xoliaile; ai tjiri xoli avili, ai e vramia avili te des pe kris le mulen, te pokjines tjire slugen le profeturi, le svintson ai kudalen kai daran katar tjiro anav, le tsinořen ai le baren, ai te phařaves kudalen kai phařaven e phuv. Ai o templo le Devlesko ande o čeri sas puterdo, ai o arko katar leski patia sikadilo ande lesko templo. Ai sas strefiaimos, hanguri, řondieturi, isdriamos phuviako, ai jekh bari babitsa. Jekh baro semno sikadilo ande o čeri: jekh žiuvli uriadi ande o kham, o šiunuto tela lake punře, ai jekh kurona anda deš-u-dui čeřaia pe lako šero. Voi sas phari, ai voi tsipilas, ai dukhalas la ke sas te avel la glata. Jekh kaver semno mai sikadilo ande o čeri; ai eta, sas jekh baro šerkano lolo, sas les efta šere ai deš šinga, ai pe sako šero efta korunitsi. Leska poriasa ningerelas pašte dopaš le čeřaia anda o čeri, ai šiudelas le pe e phuv. O šerkano ninkerelas pe angla e žiuvli kai si t'avel la glata, eta te xal laki glata, kana voi arakhadiola. Arakhadilo lake jekh šiav, kai trubul te marel sa le thema jekha rovliasa sastruni. Ai laki glata sas lini karing o Del ai karing lesko skamin amperatisko. Ai e žiuvli našli ande e pusta, kai sas la jekh than lašiardo katar o Del, eta t'avel pravardi pašte jekh mia ai dui šela ai šov-var-deš dies. Sas jekh marimos ande o čeri, o Mihail ai peske andželi marde-pe pe o šerkano. Ai o šerkano ai peske andželi marde pe, numa nas von le mai zurale, ai lengo than či mai arakhle les ande o čeri. Ai vo sas šiudino, o baro šerkano, kudo sap o purano, akhardo o Beng ai o Satan, kudo kai athadias sa e lumia. Vo sas šiudino pe e phuv, ai leske andželi sas šiudine lesa. Ai me ašundem ande o čeri jekh hango zuralo kai phenelas: Akana o skipimos areslo, ai e zor, ai e amperetsia amare Devleski, ai o barimos leske Kristosko; ke vo sas šiudino tele, kai tholas doš pe amare phral, kudo kai tholas doš pe lende diese ai riate. Von nirisarde pala o rat la Bakrořesko, ai nais le čačimaske ke sas phendo, ai lenge nas lenge drago lengo traio; či daranas katar e martia. Sa anda kudia veselin tume, čeri, ai tume kai bešen ande o čeri. Nasul t'avel la phuviake ai la mariake! ke o beng vulisto karing tumende, lias les jekh bari xoli, žianel ke si les tsiřa vramia. Kana o šerkano dikhlias ke sas šiudino tele pe e phuv, vo našel pala e žiuvli kai sas la e glata murš. Ai le dui phaka katar o baro ulio sas dine ka e žiuvli, eta te vurial ande e pusta, karing pesko than, kai voi sas pravardi jekh vramia, vrami, ai dopaš e vramia, dur katar e fatsa le sapeski. Ai, anda o mui, o sap šiudias pai sar jekh baro pai palal e žiuvli, eta te ningerel la o baro pai. Ai e phuv ažutisardias la žiuvlia, ai e phuv puterdias pesko mui ai tasavdias o pai kai o šerkano šiudiasas anda pesko mui. Ai o šerkano lias les e xoli pe e žiuvli, ai vo gelotar te kerel marimos pe so mai si latar, pe kudala kai garade le poronki le Devleske ai kai patian o čačimos le Jesusosko. Ai vo bešel pe e kišai la mariaki. Porme me dikhlem ke anklel anda e maria jekh žigania kai sas la deš šinga ai efta šere, ai pe leske šinga deš kuronitsi ai pe leske šere anava vuřitsimaske. E žigania kai me dikhlem sas jekh fialo sar jekh leopardo; lake punře sas sar kudala le rišeske, ai lesko mui sar o mui le lionosko. O šerkano dias la peski zor, ai pesko skamin amperatisko, ai jekh bari putiaria. Ai me dikhlem ke jekh anda leske šere sas merimasko; numa leski řana sastili. Ai sa e lumia sas late šodo anda e žigania. Ai sa o narodo sas lenge drago o šerkano, ke vo dias e putiaria ka e žigania, kamenas la ai phenenas: Kon si jekh fialo sar e žigania, ai kon šai marel-pe pe late? Ai sas lake dino jekh mui kai phenel vorbi barimatange ai prasaimaske; ai sas lake dini e putiaria te kerel so voi kamel štar-var-deš ai dui šion. Ai voi puterdias pesko mui te prasal le Devles, te prasal lesko anav, ai lesko tabernaklo, ai kudalen kai bešen ande o čeri. Ai sas lake dini e putiaria te kerel marimos pe le svintsi, ai te niril len. Ai sas lake din e putiaria pe sako kumpania, pe sako narodo, pe sako šib, ai pe sako them. Ai sa o narodo pe e phuv kamenas la, kudala kai lengo anav nas ramome dekin si e lumia ande e kliška le traioski katar o Bakrořo kai sas šinado. Te si varekon ke si les kan, t'ašunel mišto! Te si varekon ke trubul te ninkeren les phanglo, vo žiala phanglo; te si varekon ke trubal te mudarel les la xanřesa, vo avela mudardo la xanřesa. Kathe trubal o ninkerimos ai o patiamos le svintsonge. Porme me dikhlem ke anklel anda e phuv jekh kaver žigania, kai sas les dui šinga jekh fialo sar le bakrořeske, ai kai delas duma sar jekh šerkano. Voi lias sa e putiaria katar e mai angluno angla late, ai voi kerelas ke sa e phuv ai lako narodo kamen e mai angluno žigania, kai laki řana merimaski sastili. Voi kerelas bare čudeni, inke daštilas te vuliarel e jag anda o čeri pe e phuv, dikhenas sa le manuš. Ai voi diliarelas sa o narodo la phuviako katar le čudeni kai sas lake dine te kerel angla e žigania, ai phenelas le narodoske pe e phuv te keren jekh stato la žigeniako kai sas la e řana la xanřeski ai kai trailas. Ai sas lake dine e putiaria te miškil o stato la žiganiako, eta ke o stato le žiganiako te del duma, ai voi kerel ke sa kudala kai či kamena o stato la žiganiako t'aven mudarde. Ai voi kerdias ke sa, tsinoře ai bare, barvale vai čoře, slobodo vai řobo, te len jekh pečata pe pengo vast o čačo vai pe pengo čikat, ai ke khonik naštil te kjinel či te bikjinel, bi t'avel les e pečata, anda o anav la žiganiako vai o numero lake anavesko. Kathe si e godji. Ke kudo kai si godiaver te gjinel sode si o numero la žiganiako ke si o numero le manušesko, ai lesko numero si šov šela ai šov-var-deš ai šov. Me dikhavas, ai eta, o Bakrořo ninkerelas-pe pe o plai o Sion, ai lesa jekh šel ai štar-var-deš ai štar mii žene, kai sas len lako anav ai o anav lake Dadesko ramome pe le čikata. Ai me ašundem anda o čeri jekh hango, sar jekh bašimos katar le bare paia, sar o bašimos katar jekh baro řondieto; ai o hango kai me ašundem sas sar e musika kana bašaven ande tsituri. Ai von gjilabenas jekh gjili nevo angla o skamin amperatisko, ai angla le štar živinde ai le phure. Ai khonik naštila te sikiol e gjili, te na avilinosas maškar le jekh šel ai štar-var-deš ai štar mii, kai sas kjinde pa e phuv. Si kudala kai či mahrisaile le žiuvliansa, ke von si pativale; von žian pala o Bakrořo kai-godi vo žial. Von sas kjinde maškar le manuš, šinade sar le mai angluni fruti le Devleske ai le Bakrořeske; ai ande lengo mui či arakhle xoxaimos, ke von si bi-došako. Me dikhlem jekhe kaver andželos kai vurialas pa o maškar le čeresko, sas les jekh Laši Viasta pe sakda, te phenel la ka o narodo la phuviako, ka sako them, ka sako kumpania, ka sako šib, ai ka sako narodo. Vo phenelas jekhe zurale hangosa: Daran katar o Del, ai den les vestimos, ke o časo leska krisako avilo; ai kamen kudales kai kerdias o čeri, ai e phuv, ai e maria, ai le xainga katar xutel o pai. Ai jekh kaver, jekh duito andželo žialas palal, phenelas: Voi peli tele, voi peli tele, e Babilon e bari, kai pravarelas sa le thema anda e mol la xoliaki katar peski kurvetsia! Ai jekh kaver, jekh trito andželo, žialas palal, phenelas jekhe zurale hangosa: Te si varekon ke kamel la žigania ai lako stato, ai lel jekh pečata pe pesko čikat vai pe pesko vast, vo pela, vi vo, anda e mol la xoliaki katar o Del, thodini bi-hamime ande o taxtai leska xoliako, ai vo avela mardo ande e jag ai ande o sulfuro, angla le svintsi andželi ai angla o Bakrořo. Ai o thuv kai lenge kjinuimasko uštel pe sakda; ai len či avela hodina či diese či riate, kudala kai kamen la žigania ai lako stato, ai kon-godi lel e pečata katar lako anav. Kathe trubul o ninkerimos le svintsongo, kai garaven le poronki le Devleske ai patian ande o Jesus. Ai me ašundem anda o čeri jekh hango kai phenelas: Ramosar: Veseli de akanara le mule kai meren ande o Baro! Ei, phenel o Duxo eta te hodinin ande penge butia, ke lenge butia žian pala lende. Me dikhavas, ai eta, sas jekh nuvero parno, ai pe o nuvero bešelas varekon kai miazolas sar jekh manuš, sas les pe o šero jekh kurona sunakuni, ai ande lesko vast jekh serpo skutsome. Ai jekh kaver andželo anklisto avri anda o templo, tsipilas jekhe zurale hangosa kudaleske kai bešelas pe o nuvero: Šiude tjiri serpo, ai kjide; ke o časo le kjidimasko avilo, ke o kjidimos la phuviako si pako. Ai kudo kai bešelas pe o nuvero kerdias te nakhel pesko serpo pe e phuv. Ai e phuv sas kjidini. Ai jekh kaver andželo anklisto avri anda o templo kai si ande o čeri, si les, vi vo, jekh serpo skutsome. Ai jekh kaver andželo, kai sas les putiaria pe e jag, anklel avri anda o altari, ai del duma jekhe zurale hangosa ka kudo kai si les o serpo skutsome, phenelas: Le tjiro sapo skutsome, ai šin le struguri anda e rez la phuviaki; ke le struguri la phuviake si pake. Ai o andželo kerdias te nakhel pesko serpo pe e phuv. Ai vo kjidias e rez pe e phuv, ai šiudias o kjidimos ande o baro than kai keren e mol, pherdo sas e xoli katar o Del. Ai le struguri sas ičiarde avri anda o foro; ai rat anklistias anda o than, ži ka le salavaria le grastenge, pe jekh buvlimos de trin šel kilometri. Porme me dikhlem ande o čeri jekh kaver semno, baro ai šukar; efta andželi, kai ninkerenas efta dukha, le mai paluni, ke lendar si te aresel e xoli le Devleski. Ai me dikhlem sar jekh maria voiagaki, hamime jagasa, ai kudalen kai nirisarde la žigania, ai lako stato, ai o numero kai si lake anavesko paš e maria voiagaki, sas len tsituri le Devleske. Ai von gjilaben e gjili katar o Moše, e sluga le Devleski, ai e gjili katar o Bakrořo, phenenas: Tjire butia si bare ai šukar, Baria, Del Mai Zuralo! Tjire vurmi si vorta ai čače, amperato le themengo! Kon či darala, Baria, ai či luvudila tjiro anav? Ke tu ferdi san svinto. Ai sa le thema avena, ai klonina pe angla tute, ke tjire krisa sas sikade. Pala kudia, me dikhavas, ai ande o čeri o templo katar o tabernaklo le marturiako sas puterdo. Ai le efta andželi kai ninkerenas le efta dukha ankliste avri anda o templo, uriade ande e kiltsa vuži kai strefial, ai sas len prasti sunakune krugom o kolin. Ai jekh anda le štar živinde delas ka le efta andželi efta taxta sunakune, pherde anda e xoli le Devleski kai trail berš beršestar. Ai o templo pherdilo thuv, pala o vestimos le Devlesko ai anda leski zor; ai khonik naštilas te del andre ande o templo, žikin či le dukha katar le efta andželi geton pe. Ai me ašundem jekh hango zuralo kai avelas katar o templo, ai kai phenelas ka le efta andželi: Žian, ai den muial pe e phuv le efta taxta katar e xoli le Devleski. O mai angluno gelo, ai dias muial pesko taxtai pe e phuv. Ai jekh buboi xitro kai dukhalas malavelas le manušen kai sas len e pečata la žiganiaki ai kai kamenas lako stato. O duito dias muial pesko taxtai ande e maria. Ai vo areslo rat, sar jekh mulesko; ai sogodi sas živindo mulias, sogodi sas ande e maria. O trito dias muial pesko taxtai ande le paia, ai le xainga katar xutel o pai. Ai von aresle rat. Ai me ašundem sar o andželo le paiengo phenelas: Tu san vorta, tu kai san, ai kai sanas. Svinto, ke tu kerdian tjire krisa. Ke von dine muial o rat le svintsongo ai le profetongo, ai tu dian len rat te pen; von si harniči. Ai me ašundem o altari kai phenelas: Ei, Baria, Del Mai Zuralo, tjire krisa si čače ai vorta. O štarto del muial pesko taxtai pe o kham. Ai sas leske dino te phabarel le manušen katar e jag; ai le manuš sas phabarde katar jekh baro tatimos, ai von prasaile o anav le Devlesko kai si les putiaria pe kudala dukha, ai von či keisaile te den les vestimos. O panžto dias muial pesko taxtai pe o skamin amperatisko la žiganiako. Ai laki amperetsia sas garadi ande o tuniariko; ai le manuš čambenas pengi šib dukhatar, ai von prasanas le Devles le čeresko, pala penge dukha ai pala penge řani, ai von či kein pe anda penge butia. O šovto dias muial pesko taxtai pe o baro pai, o Efrato. Ai lesko pai bilal, eta ke e vurma te avel lašiardi le amperatonge kai aven pa e rig e čači. Ai me dikhlem ke anklen anda o mui le šerkanosko, ai anda o mui la žiganiako, ai anda o mui katar o falšo profeto, trin duxuri bi-vuže, jekh fialo sar le braški. Ke si le duxuri le demononge, kai keren čudeni, ai kai žian karing le amperatsi sa la phuviake, eta te kjiden len pe o baro marimos pe o baro dies katar o Del Mai Zuralo. Eta, me avav sar jekh čor. Veselo kudo kai bešel uštiado, ai kai arakhel peske tsalia, eta te na phirel nango ai te na dikhen lesko lažiav! Von kjidena len ande o than kai akharen les le židovuri Armagedon. O eftato delas muial pesko taxtai opral. Ai anklisto avri anda o templo anda o skamin amperatosko, jekh hango zuralo kai phenelas: Sa si gata! Ai sas strefialimos, hanguri, řondieturi, ai e phuv isdraili but, kasavo kai nas šoha dekin o manuš si pe e phuv. Ai o baro foro sas hulado ande trin parti, ai le foruri le themenge peline tele, ai o Del dias pe godji ka e Babilon e bari, te del la o taxtai la moliako katar peski phabardi xoli. Ai sa le inzuli našle-tar, ai le plaia či mai arakhle le. Ai jekh bari babitsa, kai le bambi kintjirinas štar-var-deš kilogrami perelas anda o čeri pe le manuš; ai le manuš prasanas le Devles, pala e dukh la babitsaki kai sas pria bari. Porme jekh anda le efta andželi kai ninkerelas le efta taxta avel, ai vo del ma e vorba, phenelas: Aidi, me sikavava tuke e kris pe e bari kurva kai bešel pe le bare paia. Si lasa ke le amperatsi la phuviake dine-pe pe o kurvimos, ai si anda e mol laka kurvetsiako ke o narodo la phuviako matile. Ai vo ninkerdias ma ande o duxo ande jekh pusta. Ai me dikhlem sar jekh žiuvli bešel pe jekh žigania loli, pe laki anava prasamaske, sas la efta šere ai deš šinga. Kudia žiuvli sas uriadi ande o poxtan liličoso kai strefial, ai uriadi ande o sunakai, bař kuč ai meržali. Voi ninkerelas ande pesko vast jekh taxtai sunakuno, pherdo žiungalimata ai mahrime katar laki kurvetsia. Pe lako čikat sas ramome jekh anav, jekh čudenia: Babilon e bari, e dei le kurvengi ai le vuritsengi pe e phuv. Ai me dikhlem kudala žiuvlia mati anda o rat le svintsongo ai le marturongo katar o Jesus. Ai, kai dikhav la, sas manga pria šodo. Ai o andželo phenel mange: Sostar si tuke šodo? Me phenava tuke e čudenia la žiuvliaki ai la žiganiaki kai ningerel la, kai si la le efta šere ai le deš šinga. E žigania kai tu dikhlian la sas, ai manai. Voi trubul t'anklel avri anda e hunia, ai te žial te xasavol. Ai o narodo pe e phuv, kudala kai lenge anava nas ramome dekin si e lumia ande e kliška le traioski, avela lenge šodo kai dikhen e žigania, ke voi sas ai manai, ai mai sikadiola. Kathe si e godji kai sikiarel. Le efta šere si efta plaia, pe save e žiuvli bešel. Vi mai si efta amperatsi; panž pele tele, jekh mai si, o kaver inke či avilo, ai kana vo avela, vo trubul te bešel tsiřa vramia. Ai e žigania kai sas, ai manai, voi si inke jekh oxtoto amperato, ai voi si anda le efta, ai voi žial te xasavol. Le deš šinga kai tu dikhlian si deš amperatsi, kai inke nai len amperetsia, numa len a putiaria sar amperatsi jekh časo la žiganiasa. Von sa jekh fialo kamen te keren, ai von den peski zor ai pengi putiaria ka e žigania. Von maren-pe pe o Bakrořo, ai o Bakrořo nirila len, ke vo si o Baro le Barengo ai o Amperato le Amperatongo, ai le akharde, le alome ai le čače kai si lesa vi von nirina len. Ai vo phenel mange: Le paia kai tu dikhlian, pe save e kurva bešel, si manuš but, naroduri, thema, ai šiba. Le deš šinga kai tu dikhlian ai e žigania vuřitsina la kurva; lena pa late ai thona la nangi, xana lako mas, ai bilavena la pe e jag. Ke o Del thodias ande lenge ile te keren so vo kamel ai te keren sa jekh fialo, ai te den pengi amperetsia ka e žigania, žikin či le vorbi le Devleske geton pe. Ai e žiuvli kai tu dikhlian, si o baro foro ai si la e putiaria amperatisko pe le amperatsi la phuviake. Pala kudia, me dikhlem ke vulisto anda o čeri jekh kaver andželo, kai sas les jekh bari putiaria; ai e phuv strefialas anda lesko vestimos. Vo tsipilas jekhe zurale hangosa, phenelas: Voi peli, voi peli, Babilon e bari! Voi aresli te bešen ande late demonuri, jekh than kai garadion pe sako duxo bi-vužio, jekh than kai garadion pe sako fialo čirikli mahrime vuřito, ke sa le thema pile e mol zurali anda lako lažiav, ai ke le amperatsi la phuviake gele lasa pe e kurvetsia, ai ke kudala kai bikjinen pe e phuv barvaile katar e zor ai o barvalimos. Ai me ašundem anda o čeri jekh kaver hango kai phenelas: Ankli avri latar, muřo narodo, eta te na aven tume lasa ande lake bezexa, ai ke te na avel tumen partia ka lake dukha. Ke lake bezexa kjidinisaile ži ande o čeri, ai o Del dias pe godji ka lake žiungalimata. Keren anda late sar voi kerdias, ai den la duvar mai but sar voi dias. Ande o taxtai kai voi dias muial, thon lake duvar mai but. Kaiti sode voi luvudisaili ai thodias pe ande o barvalimos, kaiti den la nekazo ai te žalil. Sar voi phenel ande pesko ilo: Me bešav sar amperatsiasa, me či sim phivli, ai me či dikhava e žalia! Anda kudia, ande jekh dies, lake dukha aresena, e martia, o žalimos ai e bokh, ai voi avela biladi katar e jag. Ke vo si zuralo, o Baro o Del kai dias la pe e kris. Ai sa le amperatsi la phuviake, kai gele lasa pe e kurvetsia ai pe o barvalimos, rovena ai vatina pe pala late, kana von dikhena o thuv katar e jag kai bilal la. Bešena dur, daratar katar lako kjinuimos, von phenena: Nasul! nasul! O baro foro e Babilon, o foro zuralo! Ande ferdi jekh časo avilias tjiri kris! Ai kudala kai bikjinen pe e phuv rovena ai avena ande e žalia pala late, ke khonik či mai kjinen lengo bikjinimasko, o sunakai, o rup, le bař kuč, le meržali, e sani kiltsa, o kuč poxtan, loličoso ai lolo, sako fialo kašt kai khandel, sako fialo diela anda kuč kokalo, anda kaštuni mai laši, abčin, sastruni ai marmoro, kinamono, aver simintsi, duxia, mura, tumuia, mol, vuloi, ařo, gjiv, guruva, bakroře, grast, vurdona, řoburi ai aver traiuri. Le fruti kai kamelas gele-tar dur tutar; ai sa le dieli le mai gugle ai šukar si xasarde tuke, ai tu či mai arakhesa le. Le manuš kai bikjinen kudala dieli, kai barvaile latar, ninkerena pe dur, daratar katar lako kjino; von rovena ai avena ande žalia ai tsipina: Nasul! nasul! Le bare foroske. Voi sas uriadi ande fino kiltsa, loličoso ai lolo, ai uriadi ande o sunakai, bař kuč ai meržali! Ande jekh časo kasave but barvalimata si phagle! Ai sa kapitanuri, ai o narodo ande le bare čunuri, le matrosuri, ai sa kudala kai train anda e maria, ninkerenas pe dur, ai von tsipinas, kai dikhenas o thuv la jagako kai bilala o foro: Šoha nas foro sar kudo baro foro? Ai von šiudenas pulberia pe pengo šero, von rovenas ai von sas ande e žalia, ai von tsipinas ai phenenas: Nasul! nasul! Le bare foroske kai barvaile katar lako barvalimos sa kudala kai si le čunuri pe e maria, ande jekh časo voi aresli pusto. Čeri, veselisavo pe late! Ai tume, le svintsi, le apostoli, ai le profeturi, veselin tume vi tume! Ke o Del dias la strafo katar o nasulimos kai voi kerdias tumenge. Atunči jekh andželo zuralo lias jekh bař jekh fialo sar jekh baro ašav, ai šiudias les ande e maria, phenelas: Kadia avela šiudino zurales e Babilon, o foro baro, ai či mai arakhena la. Ai či mai ašunena ande tute e muzika anda le tsituri, ai le gilabatori ai le muzikanturi kai bašaven ande le fluti ai le tuturiazi, či mai arakhena ande tute či jekh kai kerel butji varesoski, či mai ašunena ande tute o bašimos le ašavesko, e vedaria le lamposki či mai strefiala ande tute, ai o hango le řomesko ai la řomniako či ašunena le ande tute, ke kudala kai bikjinenas sas le bare la phuviake, ke sa le thema diliardian le tjire drabarimatensa, ai arakhle ande late o rat le profetongo ai le svintsongo ai sa kudalengo kai sas šindi lengi koř pe e phuv. Pala kudia, me ašundem ande o čeri sar jekh hango zuralo katar jekh narodo but kai phenelas: Aleluia! O skipimos, o vestimos, ai e zor si amare Devleske, ke leske krisa si čače ai vorta; ke vo dias pe kris la baria kurva kai rimolas e phuv katar peski kurvetsia, ai voi sas dini kris ke voi mudardias le slugen le Devleske. Ai von phenen pe e duito data: Aleluia! ai lako thuv anklel berš beršesa. Ai le biš-ai-štar phure ai le štar manuš živinde klonin pe ai kamen le Devles kai bešel pe pesko skamin amperatisko, phenenas: Amen! Aleluia! Ai jekh hango anklisto avri anda o skamin amperatisko, ai phenelas: Luvudin amare Devles, tume sa leske služi, tume kai daran lestar, tsinoře ai bare! Ai me ašundem sar hango katar jekh baro narodo, sar jekh bašimos katar le bare paia, ai sar jekh bašimos zuralo katar o řondieto, phenelas: Aleluia! Ke o Baro amaro Del Mai Zuralo dias andre ande peski amperetsia. Veselisaras ai avas ande e voia, ai das leske o vestimos; ke o abiav le Bakrořesko avilo, ai leski řomni lašiardili, ai sas lake dini te thol pe peste anda jekh sani kiltsa parni ai vuži (si le butia vorta katar le svintsi.) Ai o andželo phenel mange: Ramosar: Veseli kudala kai si akharde ka e pativ le abiaveski le bakrořeski! Ai vo phenel mange: Kadala vorbi si le čače vorbi katar o Del. Ai me pelem ka leske punře te kamav les; numa vo phenel mange: Le tu sama te na keres kudia! Me sim tjiro vortako te služiv, ai anda tjire phral, kai si len o čačimos le Jesusosko. Kam le Devles, ke e marturia le Jesusoski si o duxo katar e profesia. Porme me dikhlem o čeri puterdo, ai eta, sikadilo jekh grast parno. Kudo kai bešelas opre bušolas Vorta ai Čačo, ai vo del kris ai marel pe krisasa. Leske jakha sas sar jekh pařa jagaki; pe lesko šero sas but kuroni; sas jekh anav ramome, kai khonik či žianel, te na žianela ferdi vo; ai vo sas uriado ande jekh tsolo makhlo ande o rat. Lesko anav si e Vorba le Devleski. Le ketani kai si ande o čeri žianas pala leste pe le grast parne, uriade ande jekh sani kiltsa, parni, vuži. Anda leski mui anklelas avri jekh xanřo skutsome, te malavel le thema; vo lela sama lendar jekha rovliasa sastruni; ai vo inčarela o struguro ande e konža la moliaki katar e phabardi xoli le Devleski Mai Zurale. Sas pe lesko tsolo ai pe leski pulpa jekh anav ramome: Amperato le amperatongo ai Baro le barengo. Ai me dikhlem jekhe andželos kai bešel ande o kham. Ai vo tsipilas jekhe zurale hangosa, phenelas ka sa le čiriklia kai vurianas maškar o čeri: Aven, kjiden tume pe e bari pativ le Devleski, eta te xan o mas le amperatongo, o mas le birevongo le ketanengo, o mas le grastengo ai kudalengo kai bešel pe lende, o mas savořengo, tsinoře ai bare. Ai me dikhlem la žigania, ai le amperatsi la phuviake, ai lenge ketanen kai kjidinisaile te keren o marimos pe kudo kai bešel pe o grast ai pe leske ketani. Ai e žigania sas lini, ai lasa le falši profeturi, kai kerdesas angla late le čudimata katar save von diliarde kudalen kai linesas e pečata la žiganiaki ai kamenas lako vobrazo. Von sas šiudine vi le dui živinde ande e balta phabardi la jagaki kai phabol o sulfuro. Ai le kaver sas mudarde katar e xanřo kai anklelas anda o mui kudalesko kai bešelas pe o grast; ai sa le čiriklia pravarenas pe anda lengo mas. Porme me dikhlem sar vulistias anda o čeri jekh andželo, kai sas les e kjeia la huniaki ai jekh baro lanso ande o vast. Vo lias le šerkanos, kudo sap o purano, akhardo o Beng ai o Satan, ai phanglias les pe jekh mia berš. Vo šiudias les ande e hunia, phandadias ai thodias pečata opral lestar, eta te na mai diliarel le thema, žikin či getona pe le jekh mia berš. Pala kudia, trubul te mai avel puterdo pe jekh tsiřa vramia. Ai me dikhlem skamina amperatisko; ai kudalenge kai bešenas pe lende sas len dini e putiaria te den kris. Ai me dikhlem le duxuri kudalenge kai sas lenge šere šinde ke sas martururi le Jesusoske ai pala e vorba le Devleski, ai kudalenge kai či kamle la žigania či lako stato, ai kai či line e pečata pe pengo čikat ai pe pengo vast. Von živindisaile, ai von amperetsin le Kristosa pašte jekh mia berš. Le kaver mule či živindisaile žikin či le jekh mia berš getona pe. Si o mai angluno živindimos. Veseli ai svintsi kudala kai si len partia ka o mai angluno živindimos! E duito martia nai la putiaria pe lende; numa von avena sakrifikatoria le Devleske ai le Kristoske, ai von amperetsina lesa pašte jekh mia berš. Kana le jekh mia berš getona pe, o Satan avela muklo anda peski temnitsa. Ai vo anklela avri te diliarel le thema kai si ande le štar koltsuri la phuviake, o Gog ai o Magog, eta te kjidel le pe o marimos; von si but sar e kišai katar la maria. Ai von anklena pe e fatsa la phuviaki, ai von ankolina o kampo le svintsongo ai o foro o pria drago kai si les drago. Numa jekh jag vulel anda o čeri, ai xala len. Ai o Beng, kai diliardias le, sas šiudino ande e balta jagaki kai phabal o sulfuro, kai si e žigania ai o falšo profeto. Ai von avena kjinuime diese ai riate, berš beršestar. Porme me dikhlem jekh baro skamin amperatisko parno, ai kudales kai bešelas pe leste. E phuv ai o čeri našenas angla leski fatsa, ai nas than lenge. Ai me dikhlem le mulen, le baren ai le tsiknen, kai bešenas angla o skamin amperatisko. Kniški sas puterde. Ai jekh kaver kliška sas puterdi, kudia kai si e kliška le traioski. Ai le mule sas dine pe e kris sar von kerde le butia, sar sas ramome ande kudia kliška. E maria dias palpale le mulen kai sas ande late, e martia ai o than kai bešenas le mule dine palpale le mulen kai sas ande lende; ai sako sas dino pe e kris sar vo kerdias butji. Ai e martia ai o than kai bešen le mule sas šiudine ande e balta la jagaki. Si o duito merimos, e balta la jagaki. Kon-godi nas ramome ande e kliška le traioski sas šiudino ande e balta la jagaki. Porme me dikhlem jekh nevi phuv ai jekh nevo čeri; ke o mai angluno čeri ai e mai angluno phuv bilaile, ai nas mai maria. Ai me dikhlem ke vulel anda o Del, o foro svinto, o nevo Jerusalem, anda o čeri lašiardo sar jekh terni uriadi peske řomeske. Ai me ašundem anda o skamin amperatisko jekh zuralo hango kai phenelas: Eta o tabernaklo le Devlesko le manušensa! Vo bešela lensa, ai von avena lesko narodo, ai inke o Del avela lensa. Vo khosela sako asvin pa lenge jakha, ai e martia či mai avela, ai či mai avela te žalin, či tsipimos, či dukh, ke le mai angluni dieli bilaile. Ai kudo kai bešelas pe o skamin amperatisko phenel: Eta, me kerav sa le dieli neve. Ai vo phenel: Ramosar, ke kadala vorbi si čače ai vorta. Ai vo phenel mange: Si gata! Me sim o alfa ai o omega, de anda o gor ži kai getol pe. Ka kudo kai si trušalo me dava les katar o xaing kai xutel o pai le traiosko, ivia. Kudo kai nirila avela leske kudala dieli; me avava lesko Del, ai vo avela muřo šiav. Numa le darane, kudala kai či patian, le vuřitsi, le mudarimaske, le kurvaria, le drabarne, kudala kai si lenge drago le staturi, ai sa le xoxamne, lengi partia avela ande e balta phabardi la jagaki kai phabol o sulfuro. Kudia si e duito martia. Porme jekh anda le efta andželi kai ninkerelas le efta taxta pherde katar le efta mai paluni dukha avel, ai vo del mansa duma, phenelas: Aidi, me sikavava tuke la řomnia, e řomni katar o Bakrořo. Ai vo ningerdias ma anda o Duxo pe jekh baro plai opre. Ai vo sikavel mange o foro svinto, o Jerusalem, kai vulelas anda o čeri, tradino katar o Del. Si les vestimos le Devlesko, lesko strefialimos sas jekh fialo sar jekh bař pria kuč, sar o jaspis, vužio sar o kristalo. Sas la jekh baro ai vučo zido. Sas les deš-u-dui vudara, ai pe le vudara deš-u-dui andželi, ai anava ramome, kudala anda le deš-u-dui kumpani katar le šiave anda o Israel: pe e čači rig trin vudara, pe e rig opre trin vudara, pe e rig tele trin vudara, ai pe e stingo trin vudara. O zido le forosko sas les fundo ande deš-u-dui thana, ai pe lende le deš-u-dui anava le deš-u-donge apostoli katar o Bakrořo. Kudo kai delas mansa duma sas les mezura jekh kaštořo sunakuno, eta te mezuril o foro, leske vudara, ai lesko zido. O foro sas kerdo sar kvadrato, ai lesko lungimos sas jekh fialo sar o barimos. Vo mezuril o foro le řaiasa ai arakhlias 2200 kilometri; o lungimos, o buvlimos ai o vučimas sas sa jekh fialo. Vo mezuril o zido, ai arakhlias šov-var-deš ai panž metri, mezura manušeski, kai sas vi le andželongi. O zido sas lašiardo anda o jaspis, ai o foro sas anda o sunakai vužio, jekh fialo sar e voiaga vuži. Le funduri le zidoske le foroske sas šukarde le bařensa kuč anda sako fialo: o jekhto fundo sas anda o jaspis, o duito anda o safiro, o trito anda o xalsedono, o štarto anda o smaragdo, o panžto anda o sardonikso, o šovto anda o sardiono, o eftato anda o krisolito, o oxtoto anda o berilo, o iniato anda o topazo, o dešto anda o krisopraso, o deš-u-jekhto anda o jatsinto, o deš-u-duito anda o ametisto. Le deš-u-dui vudara sas deš-u-dui meržali; sako vudar sas anda ferdi jekh meržalia. O platso le forosko sas sunakuno vužio, sar e voiaga kai šai dikhes inčial. Me či dikhlem templo ande o foro; ke o Baro o Del Mai Zuralo si lesko templo, vi o Bakrořo. O foro či trubul les či o kham či o šiunuto te strefial les; ke o vestimos le Devlesko strefial les, ai o Bakrořo ai leski pařa. Le thema phirena ka leski vedaria, ai le amperatsi la phuviake anena pengo vestimos. Leske vudara či avena phandade diese, ke či avela kote riat. Anena o vestimos ai o barvalimos le themenge. Či dena andre ande leste khanči mahrime, či khonik kai kerel vuřitsimos vai xoxaimos; dena andre ferdi kudala kai si ramome ande e kliška le traioski katar o Bakrořo. Ai vo sikavel mange jekh baro pai le traiosko, strefial sar o kristalo, kai anklelas avri anda o skamin amperatisko katar o Del ai katar o Bakrořo. Maškar o platso le forosko ai pe le dui bereguri le paieske, sas o kopači le traioski, kai delas deš-u-duvar fruti, delas peski fruta sako šion, ai kai lake patria sas laše te sastiaren le thema. Či mai avela prasaimos. O skamin amperatisko le Devlesko ai le Bakrořesko avena ande o foro; leske služi služina les ai dikhena leski fatsa, ai lesko anav avela pe sa le čikata. Či mai avela riat; ai či mai trubula len či lampo či vedaria katar o kham, ke o Baro o Del strefiala len. Ai von amperetsina berš beršesa. Ai vo phenel mange: Kadala vorbi si čače ai vorta; ai o Baro, o Del katar le duxuri le profetonge, tradias peske andželos te sikavel ka peske služi le dieli kai sigo si t'aven. Ai eta, Me sigo si t'avav. Veselo kudo kai garavel le vorbi katar e profesia katar kadia kliška! Me sim o Jono, kai ašundem ai dikhlem kadala dieli. Ai kana me ašundem ai dikhlem, me pelem ka le punře le andželoske kai vo sikadias mange, te kamav les. Numa vo phenel mange: Le tu sama te keres kudia! Me sim tjiro vortako kai služiv, ai kudo tjire phralengo le profeturi, ai kudalengo kai arakhen le vorbi kadala kliškake. T'avel tuke drago o Del. Ai vo phenel mange: Na tho pečata pe kadala vorbi katar e profesia katar kadia kliška. Ke e vramia si paše. Ke kudo kai kerel nasul te kerel mai nasul, ke kudo kai si mahrime t'avel mai mahrime; ai ke kudo kai kerel vorta te kerel mai vorta, ai kudo kai si svinto t'avel mai svinto. Eta, me sigo avav, ai so si ma te dav si mansa, te dav sakones sar vo kerdias butji. Me sim o Alfa ai o Omega, o mai angluno ai o mai paluno, de anda o gor ži ande o gor. Veseli kudala kai xalaven penge tsalia, eta t'avel lenge slobodo ka o kopači le traioski, ai te den andre katar le vudara ande o foro! Avri anda o foro le vuřitsose, le drabarne, le kurvaria, le mudarimaske, kai patian le staturi, ai kon-godi si leske drago ai kerel o xoxaimos. Me, o Jesus, me tradem muře andželos te del tumenge kadala dieli ande le khangeria. Me sim ande e vitsa katar o David, e čeřai kai strefial diminiats. Ai o Duxo ai e řomni phenen: Aidi. Ai kudo kai ašunel phenen: Aidi. Ai kudo kai si trušalo, t'avel; ai kudo kai kamel, te lel o pai le traiosko, ivia. Me phenav varekaske kai ašunel le vorbi katar e profesia kadala kliška ke te lel sama: Te si varekon ke thol opral pe kudala vorbi, o Del malavela les le dukhensa katar kadia kliška; ai te si varekon ke lel tele vareso anda le vorbi katar kadia kliška anda kadia profesia, o Del šinela leski partia anda e fruta la kopačeski le traioski ai katar o foro svinto, kai ramon lendar ande kadia kliška. Kudo kai del marturia kadala dieli phenel: Ei, me sigo si t'avav Amen! Aidi sigo, Rai Jesus! Ke e dragostia le Bareski o Jesus t'avel tumensa sa! Amen. GATA E NEVI VASTIA.