Angledýr saréstyr Devél sozdyjá bolybén i phuv. Phuv sys biformákiri i čhučí (pusto), kalypén sys pe saró xoripén (biézdna), i Devléskiro Dúho (Fáno) kharélaspe (dviginelaspe) uprál paniá. I phendiá Devél: “Mek te javél dud (svéto).” I dud jaciá. I dykhciá Devél dud, so jov sys šukár; i roskerdiá (rosčhudiá) Devél dud kalypnástyr. I dyjá lav Devél dudéske Dyvés, a kalypnáske Rat. I sys bel'vél' i sys zlóko (ránko)-pérvo dyvés. I phendiá Devél: “Mek te javél svódo (tvierd') maškír paní, i mek jov te roskerél paní paniéstyr.” I kerdiá Devél svódo, i roskerdiá paní, savó sys tel buĥló svódo dolé paniéstyr, i savó sys uprál, kaj sys buĥló svódo. I jaciá adiáke. I dyjá lav Devél svodóske Bolybén. I sys bel'vél', i sys zlóko (ránko) – javír dyvés. I phendiá Devél: “Mek te skedénpe paniá, savé sys tel bolybén, dro jekh štéto, i mek te jačél šukí phuv.” I jaciá adiáke. I dyjá lav Devél šuké phuvjake, Phuv, a paniénge, savé sys skedyné, Móri (Derjavá). I dykhciá Devél, so davá sys šukár. I phendiá Devél: “Mek te barjakirel phuv zelenyben, čar, saví déla siemi (viringli); i kašt (drévo), savó déla barjakirdó (plódo) pir péskiro ródo, saveskire siémi isyn pe phuv.” I jaciá adiáke. I barjakirdia phuv zelenyben; čar, saví déla siemjo; i kašt (drévo), savó déla barjakirdó (plódo) pir péskiro ródo, saveskire siemi isyn pe phuv. I dykhciá Devél, so davá sys šukár. I sys bel'vél', i sys zlóko (ránko) – tríto dyvés. Tén'ci phendiá Devél: “Mek te javén duda (svietily) pe svódo pir bolybén, sob (kaj) jone te roskeren dyvés ratiatyr, sob (kaj) jone te javén syr znamiénii (ĥiertyká) vaš časy (cyry), dyvesá i beršá; i mek te javén duda pe svódo pir bolybén, sob (kaj) te den dud pe phuv.” I jaciá adiáke. I kerdiá Devél duj baré duda: jekh baredýr dud, sob (kaj) te rikirél zor pe dyvesá, jekh tyknedýr dud, sob (kaj) te rikirél zor pe ratia, adiáke-pac' i čergeniá. I čhudiá Devél len pe svódo pir bolybén, sob (kaj) jone te den dud pe phuv, i te rikirén zor pe dyvesá i ratia, i te roskeren (te rosčhuven) dud (svéto) kalypnástyr. I dykhciá Devél, so davá sys šukár. I sys bel'vél' i sys zlóko (ránko) – štárto dyvés. I phendiá Devél: “Mek te javén paniá pherdé odolenca [mek te sozden paniá odolén-r.s.], savé polzynena, savé isyn džidé, i mek te vurnian čirikliá uprál phuv pir bolybén.” I sozdyjá Devél baren morjoskire (derjavéskire) mačhen, i každo džidó di, savó kharélape, savénca paniá isyn pherdé pir péskiro ródo, i rázna čirikliá phakenca pir péskiro ródo. I dykhciá Devél, so davá sys šukár. I bahtiakirdiá Devél len, rakirí: “Bijanen i te javén tumen but-but, i pherdiakiren paniá dre móri (derjavá), mek te bijandjon but čirikliá pe phuv.” I sys bel'vél', i sys zlóko (ránko)-pándžto dyvés. I phendiá Devél: “Mek phuv te del džiibén džidé dieske pir péskiro ródo; kheritkoné murdalénge (skotoske) i capnienge, polzučone džidypnenge i murdalénge pir phuv, kažnonéske pir péskiro ródo.” I jaciá adiáke. I sozdyjá Devél phuvitkone murdalén pir léngiro ródo, i kheritkoné murdalén pir léngiro ródo, i kažnona capnia pe phuv pir péskiro ródo. I dykhciá Devél, so davá sys šukár. I phendiá Devél: “Sozdasa manušés, sob (kaj) jov te udelpe pir Amarí patrín (óbrazo), sob (kaj) jov te javél kadasavó-pac' syr Ame sam; i mek jov te xulainél pe morjoskire (derjavéskire) mačhende, pe bolybnáskire čirikliende, i pe kheritkoné murdalénde i pe sarí phuv, i pe saré capniende, savé polzynena pir phuv.” I sozdyjá Devél manušés pir Péskiri patrín (óbrazo), pir Devléskiri patrín (óbrazo) Jov sozdyjá les: muršés i džuvliá sozdyjá Jov. I bahtiakirdiá Devél len, i Devél phendiá lénge: “Bijanen i te javén tumen but-but, i pherdiakiren phuv i te len zor pe láte, i te xulainen tumé pe morjoskire (derjavéskire) mačhende, i pe bolybnáskire čirikliénde i pe kažnoné murdaléste, savó kharélape pir phuv.” I phendiá Devél: “Áke, Me dyjom tuménge kažno čar, saví déla siemi (viringli), so isyn pe phuv, i kažno kašt (drévo), dro savó isyn kaštuno siemjo, savó déla barjakirdé (plódy): davá javéla xabén tuménge. I kažnoné murdaleske pe phuv i kažnoné bolybnáskire čirikliake, i kažnoné capniake, saví polzynela pir phuv, i dre savénde isyn džidó di Me dyjom kažno zeleny (zeleno) čar te xan.” I jaciá adiáke. I dykhciá Devél, so Jov sozdyjá i, ake, davá sys drieván šukár. I sys bel'vél', i sys zlóko (ránko) – šóvto dyvés. Adiáke sys sozdyne bolybén i phuv i saró svéto. I končyndia Devél Péskire réndy (diély) ke eftáto (bitrinéngiro déšto) dyvés, savé Jov kerélas i pe eftáto dyvés Jov otkhinyja saré Péskire rendéndyr (dielendyr), savé Jov kerdiá. Devél bahtiakirdiá eftáto (bitrinéngiro déšto) dyvés i osvencyndia les, pal-dová so dre davá dyvés otkhinyja Jov saré Péskire rendéndyr, savé Jov sozdyjá i kerdiá. Ake, isyn lav, syr jačné bolybén i phuv, kiéli sys sozdyne jone, dre dová časo (cýro), kiéli Raj Devél (Jahvá), Devél sozdyjá phuv i bolybén, I kažno feldytko xrústo (kusto), savó angledýr na sys pe phuv, i kažno feldytko čar, saví angledýr na barija; pal-dová so Raj Devél, Devél angledýr na bičhadiá bryšýnd pe phuv, i na sys manušés, sob (kaj) te kerél butý pe phuv; ne phuvjátyr ĥazdyjápe paro, i paniakirdia pir sarí phuv. I Raj Devél, Devél phuvitkone prahostyr sozdyjá manušés, i phurdyja dre léskire ruthunia (nozdri) dúho (fáno) džiibnáskiro i jaciá manúš džidé diesa. I Raj Devél počhudia dro Edemo pe vastóko únta (sado); i mekciá odój manušés, savés Jov sozdyjá. I Raj Devél kerdiá adiáke, sob (kaj) te barjol phuvjátyr kažno kašt (drévo), šukár vaš jakhá i lačhó vaš xabén, i maškirál únta sys džiibnytko kašt, i kašt, savó déla džinybén pal fuipén i lačhipén. Edemostyr thadelas reka (len'), saví paniakirdia únta; i odothýr rozdžalaspe pe štar réki (leniá). Jekha khardé Fisono (Pišono): joj thadéla pir sarí Xavilaskiri phuv, doiá phuv, kaj isyn suvnakái; i dolé-phuvjákiro suvnakáj isyn lačhó; odój isyn bdalaho i onikso bar. I javirja reka (len') khardé Gihono; joj thadéla pir sarí Kušoskiri phuv. Tritona reka (len') khardé Xidekiéljo (Tigro); joj thadéla angíl Asirija. Štárto reka (len') isyn Jevfrato. I lyjá Raj Devél, Devél manušés, i mekciá te dživél les dre Edemoskiri únta (sado), sob (kaj) jov te barjakirel i te rakhél la. I priphendiá Raj Devél, Devél manušéske, phení: “Dre únta kaštéstyr (drevostyr) tu javésa te xas; a kaštéstyr, savó déla džinybén pal fuipén i lačhipén, léstyr na xa; pal-dová dre davá dyvés dro, dro savó tu xasa léstyr barjakirdó (plódo), tu merésa.” I Raj Devél, Devél phendiá: “Nalačhes manušéske te javes jekhdžineske, Ame sozdasa pomogibnaskires (pomošnikos) pir léste.” O Raj Devél, Devél phuvjátyr vyčhudiá saré feldytkone murdalén (žyvotnonen) i sarén bolybnytkone čiriklién, i jandiá ke manúš, sob (kaj) jov te dykhél, syr jov kharéla len, i sob (kaj), syr manúš kharéla kažno džidó di, dasavo lav te jačélpe léske. I dyjá lav (khariben) manúš kažnoné kheritkoné murdaleske i bolybnáskire čiriklienge i feldytkone murdalénge; ne vaš manušéske pomogibnaskiro na lathiape (lastiape), na pir léste. I kerdiá Raj Devél, Devél adiáke, so zoraló soiben pyjá pe manušéste; i, kiéli zasucia jov, to Raj Devél, Devél lyjá jekh léskiro pašvaro, i odová štéto začhakirdia ločasa (plotiasa). I Raj Devél, Devél sozdyjá pašvarestyr džuvliá, savó Jov lyjá manušéstyr, i jandiá la ke manúš. I phendiá manúš: “Ĥáda, davá isyn kokalo miré kokalendyr i loč (plot') miré ločatyr; joj iavéla te kharelpe džuvliása (romniása): pal-dová so sys lyny romestyr.” Paldavá manúš mekéla péskire dadés i da, i prijačela ke péskiri romný, i jone javéna jekh loč. I sys dujdžiné nange, Adamo i léskiri romný, i jone na ladžandyne. Sap sys mendredyr saré feldytkone murdaléndyr, savén Raj Devél (Jahvá), Devél sozdyjá. I phendiá sap džuvliáke: “Ci čačipén phendiá Devél: ‘Na xan ni savé kaštéstyr dre únta (sado)?’” I džuvlý phendiá sapeske: “Ame saštý (moginasa) te xas barjakirdé (plódy) kaštendyr. Ne pal kašteskire barjakirdé (plódy), savó isyn maškirál únta, Devél phendiá: “Na xan léndyr i na dočilavente ke jone, sob (kaj) tumé te na merén.” I phendiá sap džuvliáke: “Nad, na meréna. Ne Devél džinéla, so dro dyvés, dro savó tumé xána len, tumaré jakhá otčhakirenape, i javéna tumé, syr develá (Devél), te džinén lačhipén i fuipén.” I džuvlý dykhciá, so kašt (drévo) sys lačhó vaš xabén, i so jov sys kuč vaš jakhá, pal-dová so déla džinybén, i joj lyjá léskire barjakirdé (plódy), i xaja; i adiáke-pac' dyjá joj péskire romeske pašýl láte, i jov xaja. I dujende lénde otčhakirdepe jakhá, i ĥalyné jone, so jone sys nange, i sude smokovitka patria (listy), i kerdé péske buĥle kustyka (poiasy). I šundlé Ráskire-Devléskiri, Devléskiri zan (glos), syr Jov psirdiá dre únta dre dová dyvés pe vastóko, syr spyja xačkiribén; Adamo i léskiri romný ĥaradyne Ráskire-Devléskire, Devléskire jakhéndyr maškirál kaštá dre únta. I khardiá Raj Devél, Devél ke pe Adamos, i phendiá léske: “Kaj tu san?” I jov phendiá: “Tyrí zan me šundjom dre únta, i strahadyjom, pal-dová, so me som nango, i ĥaradyjom.” I Raj Devél, Devél phendiá: “Kon túke phendiá, so tu san nango? Ci na xajan tu dolé kaštéstyr, savéstyr Me zaphendjom túke te na xas?” O Adamo phendiá: “Džuvlý, savjá Tu dyján mánge, joj mánge dyjá kaštéstyr, i me xajom.” I Raj Devél, Devél phendiá džuvliáke: “Palsó davá tu kerdián?” “Sap xohadia man, i me xajom.” I phendiá Raj Devél, Devél sapeske: “Pal-dová so tu davá kerdián, tu javésa prokošnó angíl saré kheritkoné murdalénde (skoto) i angíl saré feldytkone murdalénde (zvieriende): tu javésa pe tyró per te psirés, i javésa saró péskiro džiibén te xas práho.” I naramanjo (namiro) keráva Me maškír túte i džuvliáte, i maškír ródo tyró i lákiro; jov javéla dro šeró te dukhavel tut, a tu javésa te dukhaves les dre pienta (khur). I džuvliáke Jov phendiá: “Ubarjakirava Me i keráva but butýr tyré mén'ki dro dová časo, syr javésa tu te psirés pharí; dre dukhá javésa te bijanes čhavorén, i tyró kamiben ke tyró rom, i jov javéla te xulainél pe túte.” Adamoske Jov phendiá: “Pal-dová, so tu kandyjan peskirjá romniá, i xajan kaštéstyr, pal savó Me priphendjom túke, phení: ‘Na xa léstyr’, prokošny javéla pal túte phuv, pharipnasa saró tyró džiibén tu javésa te čaravespe látyr. Hrústy suv'jenca (tiernii) i žylta xrústy phusadiénca (volčcy) bijanéla joi, phuv, túke; i javésa tu te xas feldytko čar. Khamlynasa (potosa) pe muj tu javésa te xas péskiro maró, paka tu risjosa dre phuv, savjátyr tu sánas lynó; pal-dová so tu san práho, i risjosa dro práho.” I dyjá péskire romniake lav Jeva, pal-dová so joj iaciá dasa saré džidypnaske. I kerdiá Raj Devél, Devél cypitka ídi Adamoske i léskire romniake i uridia len. I phendiá Raj Devél, Devél: “Ĥáda, jaciá Adamo syr jekh améndyr, te džinél lačhipén i fuipén; i akaná, syr jov te na protyrdel péskiro vast i adiáke-pac' te na lel džiibnáskire kaštéstyr, i te na xal, i te na javél te dživél viéčnes.” I bičhadiá Raj Devél, Devél krig les Edemoskire untatyr (sadostyr), sob (kaj) jov te kerél butý pe phuv, savjátyr jov sys sozdynó. I Jov tradyjá Adamos krig, i pe vastóko pašýl Edemoskire únta čhudiá xieruvimos kurtalása (miečosa), saví xačola jagása, sob (kaj) ke džiibnytko kašt te rakhél drom. O Adamo lyjá te dživél Jevasa syr romniása; i joj zapharija, i bijandiá Kainos, i phendiá: “Lathjom me manušés Rástyr-Devléstyr.” I javír mólo joj bijandiá léskire pšalés, Avieljos. I Avieljo sys bakrengiro čhupnári (pastuho), a Kaino obkerelas phuv. Syr progijá vari-savó časo, Kaino jandiá phuvjákire barjakirdé (plódy) syr dáro Ráske-Devléske. I Avieljo adiáke-pac' jandiá péskire pervoné bijanypnytkone ĥurtostyr i léngire čekenestyr (tukostyr). Raj Devél sykadiá patýv Avieljoske pe léskiro dáro. A Kainoske, i pe léskiro dáro, Jov na sykadiá patýv. O Kaino drieván xoliásyja, i kalyja mina pe léskiro muj. I phendiá Raj Devél Kainoske: “Sóske tu xoliasyjan? I sóske mina pe tyró muj kalyja? Kóli kerésa lačhipén, to sóske na ĥazdesa muj radypnasa? A kóli na kerésa lačhipén, tedy pašýl vudár isyn paštó grého (bizo), jov tyrdela tut ke pe, ne tu jav xulása pe léste.” I phendiá Kaino péskire pšaléske, Avieljoske: “Javén, pe félda.” I kiéli sys jone pe félda, Kaino ĥazdyjápe pe péskire pšaléste Avieljoste, i muliakirdiá les. I phendiá Raj Devél Kainoske: “Kaj isyn tyró pšal Avieljo?” Jov phendiá: “Me na džinóm (na džináv), so me som rakhibnari (storožo) péskire pšaléske?” I phendiá: “So tu kerdián? Tyré-pšaléskire rateskiri zan déla gódla phuvjátyr ke Me. I akaná tu san prokošnó phuvjátyr, saví otčhakirdiá péskire uštá te prilel tyré-pšaleskiro rat tyré vastéstyr. Kiéli tu javésa te obkeres phuv, joj butýr na javéla te del vaš túke péskiri zor; tu javésa te garadjos i te psirés bi kheréskiro pe phuv.” I Kaino phendiá Ráske-Devléske: “Čoripén miro isyn drieván baró, sob (kaj) te bistres les. Ĥáda, kadalé dyveséstyr Tu tradesa man phuvjátyr, i Tyré móstyr me javáva te ĥaradjovav, i te psirav bi kheréskiro pe phuv; i javéla adiáke: kažno, kon mánca streninelape, muliakiréla man.” I phendiá léske Raj Devél: “Paldavá kažnonéske, kon Kainos muliakiréla, otdelape pale fuipnasa dre eftá (bitrinéngiro deš) móly.” I Raj Devél kerdiá Kainoske ĥiertýk (znamiénijo), sob (kaj) nikón, kon streninelape lésa, te na muliakirél les. I gijá krig Kaino Rástyr-Devléstyr; i lyjá te dživél pe Nodoskiri phuv, pe vastóko Edemostyr. I lyjá te dživél Kaino péskire romniása; i joj zapharija, i bijandiá Jenohos. I čhudiá jov fóro, i pir péskire čhavéskiro lav khardiá fóro: Jenoho. Jenohostyr bijándyja Irado; Iradostyr bijándyja Miehiaeljo. Miehiaeljo dyjá pe svéto Mafusalos: Mafusalo dyjá pe svéto Lamiehos. I Lamieho lyjá péske dujén romnién: jekhakiro lav sys Ada i javirjakiro lav sys Cyla. Ada bijandiá Iavalos (Javalos): jov sys dad manušénge, savé dživdé pe šátry kheritkoné murdalénca. Léskire pšalés khardé Iuvalo (Juvalo): jov sys dad sarengire-manušéngiro, savé bašade pe gusli i svirol'ka (sviriel'). Cyla adiáke-pac' bijandiá Tuvalkainos, savó sys faurnari (kovaljo) pe saré strumiénty sastyrestyr i xarkomátyr (miediatyr). I phen Tuvalkainoskiri sys Noiema [Naama-ju.o.]. I phendiá Lamieho péskire romnienge: “Ada i Cyla, šunén mirí zan, Lamiehoskire romniále! Šunén miré lavá: me muliakirdjom muršés i terné-beršengires (otrokos) pal péskiri dukhady (rana). Kóli pal Kainoste otdelape pale fuipnasa dre eftá (bitrinéngiro deš) móly, to pal Lamiehoste dre eftadešá eftá móly.” I lyjá te dživél Adamo péskire romniása javír mólo, i joj bijandiá čhavores, i dyjá léske lav Sifo, pal-dová so joj rakirdiá: “Devél čhudiá mánge javír siémjo, zamiést Avieljoste, savés muliakirdiá Kaino.” I Sifoste adiáke-pac' bijándyja čhavó; i jov dyjá léske lav Jenoso [Enošo-ju.o.]; tén'ci manušá lyné te prikharen Devléskiro lav, kiéli mangnepe. Ĥáda, isyn phenybén pal Adamoskiro ródo: kiéli Devél sozdyjá manušés, Jov sozdelas les adiáke, sob (kaj) manúš te zdžal (te podžal) pe Léste. Muršes i džuvliá sozdyjá, i bahtiakirdiá len dro dyvés, kiéli sozdyjá len i dyjá lénge lav manúš (Adamo). Adamo dživdiá šel te trijánda berš, i léstyr bijándyja čhavó, savó zdžalas pe léste, i savó sys pir léskiri patrín (óbrazo) i dyjá léske lav: Sifo. Kiéli Adamostyr bijándyja čhavó Sifo, léske sys ohtošela (biduješelengiro bar) berš, i bijándyne léstyr čhavé i čhaja. Adamo dživdiá jeniašela (bišelengiro bar) trijánda berš; i myjá. Kiéli Sifoske sys šel te pandž berš, léstyr bijándyja Jenoso. Kiéli lathiape Jenoso, Sifo dživdiá ohtošela eftá (trinengiro deš) berš i bijándyne léstyr čhavé i čhaja. Sifo dživdiá jeniašela dešudúj berš; i jov myjá. Kiéli Jenososke sys jeniadeša berš, léstyr bijándyja Kainano. Kiéli bijándyja Kainano, Jenoso dživdiá ohtošela dešupandž berš, i bijándyne léstyr čhavé i čhaja. Jenoso dživdiá jeniašela pandž berš; i jov myjá. Kiéli Kainanoske sys eftadešá berš, léstyr bijándyja Maleleilo (Mahalaeljo). Kiéli lathiape Malieleilo, Kainano dživdiá ohtošela štardešá berš, i bijándyne léstyr čhaja i čhavé. Kainano dživdiá jeniašela deš berš; i jov myjá. Kiéli Malieleiloske sys šovdešapandž berš, léstyr bijándyja Iariédo (Jariedo). Paló (poslie) Iariedoskiro bijanypén, Malieleilo dživdiá ohtošela trijánda berš, i bijándyne léste čhaja i čhavé. Malieleilo dživdiá ohtošela jeniadeša pandž berš; i jov myjá. Kiéli Jariedoske sys šel šovdešá duj berš, léstyr bijándyja Jenoho. Paló Jenohoskiro bijanypén, Jariédo dživdiá ohtošela berš, i léstyr bijándyne čhavé i čhaja. Jariédo dživdiá jeniašela šovdešá duj berš; i jov myjá. Kiéli Jenohoske sys šovdešá pandž berš, léstyr bijándyja Mafusalo. Paló Mafusaloskiro bijanypén Jenoho dživdiá angíl Devléste trinšelá berš, i bijándyne léstyr čhavé i čhaja. Jenoho dživdiá trinšelá šovdešá pandž berš. I psirdiá Jenoho angíl Devléste; i na jaciá les, pal-dová so Devél lyjá les. Kiéli Mafusaloske sys šel eftadešá ohtó berš, léstyr bijándyja Lamieho. Paló Lamiehoskiro bijanypén, Mafusalo dživdiá iščo (inké) eftá šelá ohtodešá duj berš, i léstyr lathnepe čhavé i čhaja. Mafusalo dživdiá jeniašela šovdešá jeniá berš; i jov myjá. Kiéli Lamiehoske sys šel ohtodešá duj berš, léstyr bijándyja čhavó. I khardiá les Nojo, i phendiá: “Jov obradynela amen dre butý, amarí i dre pharí amaré-vastengiri butý syr javása te obkeras phuv, saví prokostia Devél.” I sys Lamiehoske, kiéli léstyr bijándyja Nojo, pandžšelá jeniadeša pandž berš, i bijándyne léstyr čhavé i čhaja. Lamiého dživdiá eftá šelá eftadešá eftá berš, i jov myjá. Kiéli Nojoske sys pandžšelá berš, léstyr bijándyne: Simo, Xamo i Iafieto. I sys adiáke, kiéli manušá pe phuv bijándyne (lotine) butýr, i léndyr bijándyne čhaja, to Devléskire čhavé dykhné manušengiren čhajén, so jone sys šukár, i lenas len paloróm, savjá kon vykedyjá. I phendiá Raj Devél: “Na saró džiibén manúš te na riskirél godý pe Miro Dúho (Fáno) [na ŭsády/na sak (vsiegda) Miré Duhoske te dživél dre manušéste-ju.o.]; pal-dová so jone isyn loč (plot'); mek te dživén jone šel te biš berš.” Dre dolé dyvesá pe phuv sys drieván vučé manušá, butýr odolé časostyr, syr Devléskire čhavé lyné te psirén ke manušéngire čhaja, i jone lyné te bijanen lénge. Jone sys zoralé, ĥaratuné, slavutna manušá. I Raj Devél dykhciá, so manušá lyné but te kerén fuipén pe phuv, so saré léngire dumki i ile sys xolynakire pe kažno dyvés. I Raj Devél lyjá te tanginél (te žalinel), so sozdyjá manušés pe phuv, i Jov lyjá te tuginel dro Péskiro iló. I phendiá Raj Devél: “Me xasiakiráva manušén phuvjákire móstyr, savén Me sozdyjom, manušéstyr ke kherítko murdál (skoto), i capnien i bolybnáskire čiriklien pe bolybén, pal-dová so Me tanginava, so len sozdyjom.” Ne Nojo lathiá bahtiakiribén angíl Ráskire-Devléskire jakhá. Ĥáda, isyn lav pal Nojoskiro ródo: Nojo sys čačunó manúš i bi grehoskiro dro péskiro ródo, Nojo psirdiá dro jekhipén angíl Devléste. Nojostyr bijándyne trin čhavé: Simo, Xamo i Iafieto. Ne phuv jaciá bipatyvaly angíl Devléste i joj sys pherdý nahratone rendénca (dielenca). I Devél dykhciá pe phuv i, ĥáda, joj sys xasibnýtko: pal-dová so kažno loč (plot') lyjá te kerél bipatyvale réndy (diély). I Devél phendiá Nojoske: “Angíl Mánde kažnoné ločake javéla kónco (jagóro); pal-dová so phuv pherdija léngire nahratone rendénca (zlodejanijenca). I ĥáda, Me xasiakiráva len phuvjátyr. Ker péske gofierytkone vešéstyr kovčego (baró mohtó); ker komorki dro kovčego, javriéstyr i andrál obmakh les smolasa. I ker les adiáke: dlengipén kovčegoskiro javéla trin šelá kuniá (logci), léskiro buĥlypén-pandždešá kuniá (loĥci), a léskiro vučipén-trijánda kuniá. I ker fenštrori (dudali) dro kovčego i dre kun' vučipnása, phande les uprál i dre kovčegoskire rigá ker vudár; ker dre léste telatuno, javír i tríto jarusy. I ĥáda, Me začhuvava daja phuv paniésa, sob (kaj) kažno loč (plot') te xasiakiráv, dre saví isyn džiibnytko dúho (fáno) tel bolybén; saró, so isyn pe phuv, sob (kaj) te merél. Ne túsa Me keráva Miro zaviéto, i tu zadžasa dre kovčego, i tyré čhavé, i tyrí romný, i túsa tyré-čhavéngire romniá. Adiáke-pac' zalydža dre kovčego kažnoné murdaléndyr i kažnoné ločatyr pir duj, sob (kaj) túsa jone te jačénpe džidé: mek jone te javén murškané i džuvlikane rodóstyr. Čirikliéndyr pir léngiro ródo, i kheritkoné murdaléndyr pir léngiro ródo, i saréndyr, kon polzynela pir phuv pir léngiro ródo, saréndyr pir duj ke tu te zadžán, sob (kaj) te jačénpe džidé. Tu le péske savó trej xabén, savó xána, i skéde ke pe; i jov javéla vaš túke i vaš lénge xabnasa.” I Nojo saró kerdiá, syr Devél léske priphendiá, adiáke jov i kerdiá. I phendiá Raj Devél Nojoske: “Zadžá tu i sarí tyrí čékar' (siemiéistvo) dro kovčego, pal-dová so Me dykháva, so tu san čačunó angíl Mánde saré dalé rodóstyr. I le kažnoné žužé riskiribnáskire murdaléndyr [zvieriendyr-ju.o.] [skotóstyr-r.s.] pir eftá (bitrinéngiro deš), murškané i džuvlikane rodóstyr, a nažužé murdaléndyr pir duj, murškané i džuvlikane rodóstyr. Adiáke-pac' i bolybnytkone čirikliendyr pir eftá murškané i džuvlikane rodóstyr, sob (kaj) te zrakhes ródo vaš sarí phuv. Pal-dová so pir eftá dyvesá, Me javáva te čhuvav pe phuv bryšýnd štardešá dyvesá i štardešá ratia; i saró, so isyn pe phuv, i so Me sozdyjom, Me xasiakiráva.” Nojo kerdiá saró, so priphendiá Raj Devél léske. Nojoske sys šov šelá berš, syr pe phuv jaciá panitko začhuiben (potopo). I zagijá Nojo, i léskire čhavé, i léskiri romný, i lésa léskire-čhavéngire romniá dro kovčego paniéskire začhuibnastyr. I žužé murdaléndyr (skotóstyr) i nažužé murdaléndyr (skotóstyr), čirikliéndyr i saréndyr, kon polzynela pirí phuv. Pir duj, murškané i džuvlikane rodóstyr, ke Nojo zaginé dro kovčego, syr Devél Nojoske priphendiá. Pir eftá dyvesá, pe phuv jaciá te čhuvelpe paní. Kiéli Nojoske sys šovšelá berš, pe javír čhon, dre dešueftato dyvés, dro davá dyvés rosphandlepe saré baré xoripnaskire (biezdnakire) ĥanyngá, i otčhakirdepe bolybnáskire fenštry; i pe phuv čhudiape bryšýnd štardešá dyvesá i štardešá ratia. Dre davá-pac' dyvés zagijá dro kovčego Nojo, i Simo, Xamo i Iafieto, Nojoskire čhavé, i Nojoskiri romný i triné léskire-čhavéngire romniá lésa. Jone, i saré riskiribnáskire murdalá (zviéri) pir léngiro ródo, i kažno kherítko murdál (skoto) pir léskiro ródo, i saré džidé sozdyibena, savé polzynena pir phuv, pir léngiro ródo, i saré čirikliá, savé vurniana pir léngiro ródo – saré čirikliá, konéste isyn phaká (kryly). I zaginé ke Nojo dro kovčego pir duj kažnoné ločatyr (plotiatyr), dre savó isyn džidó dúho. I kon zagijá, sys murškanó i džuvlikano džino kažnoné ločatyr, syr Devél priphendiá léske. I začhakirdia kovčego Devél pal léste. I paniéskiro začhuiben (potopo) sys štardešá dyvesá pe phuv, i barjolas vučedýr paní, i ĥazdyjápe kovčego, i jov ĥazdyjápe upré phuvjátyr. Pani zoralés ĥazdelaspe vučedýr i syg barjolas pe phuv; i kovčego plyvinela (dela plima) pir paní. I jaciá drieván but paní pe phuv, adiáke, so začhudepe saré vučé bérgi, savé sys tel saró bolybén. Pe dešupandž kuniá (lokci) pe lénde ĥazdyjápe paní i začhakirdepe bérgi. I xasijá saró, so sys džidó pe phuv, kažno loč (plot'), saví psirelas pir phuv: i čirikliá, i kherítka murdalá (skoto), i riskiribnáskire murdalá (zviéri), i saré gady (plazuny), savé polzynenas pir phuv, i saré manušá. Saró, so dyhinelas dre ruthunia (nozdri) džiibnáskire duhósa, myjá. Hasijá saró, so sys džidó pe phuv: manušéstyr ke kherítko murdál (skoto), i ke capnia, i ke bolybnáskire čirikliá, saró xasijá phuvjátyr. Jaciápe jekh Nojo džidó, i so lésa sys dro kovčego. Pani pe phuv jačelas butýr šel te pandždešá dyvesá. I priripirdia Devél pal Nojoste, i pal kažno džidó sozdyiben, i pal saré kheritkoné murdalénde (skoto), savé sys lésa dro kovčego; i ĥazdyjá Devél balvál pe phuv, i pirijaciá paní. I začhakirdepe xoripnaskire ĥanyngá i bolybnáskire fenštry (dudalia), i bolybnástyr pirijaciá te džal bryšýnd. Pani pe nábut risjolas phuvjátyr, i paló šel te pandžeša dyvesá paní jaciá te tyknjol. I dro eftáto (bitrinéngiro déšto) čhon, pe dešueftatone-čhonéskiro dyvés, pe Araratoskire bérgi terdijá kovčego. Pani saró časo tyknjolas ke déšto čhon; dro anglatunó dyvés deštone-čhonéskiro jačné dyc'le upralestyr bérgi. Pir štardešá dyvesá, Nojo otčhakirdiá fenštrori dro kovčego, saví jov kokoró kerdiá. I vymekcia korakos (voronos), savó vurniandyja, oturniandyja i risijá, paka vyšutija phuv paniéstyr. Adiáke-pac' jov otmekciá péstyr golumbos, sob (kaj) te dykhél, ci zgija paní phuvjátyr. Ne golumbo na lathiá (lastia) šuko štéto vaš péskire ĥerá, i risijá ke jov dro kovčego; pal-davá so paní sys uprál pir sarí phuv; i jov protyrdyjá péskiro vast, i lyi les, prilyjá ke pe dro kovčego. I promekcia javír eftá dyvesá; i nevéstyr (nevés) vymekcia golumbos kovčegostyr. Golumbo ke jov risijá bel'veliakiro; i ĥáda, jalo (sviažo) olivítko patrín (listo) sys léste dro muj: i Nojo ĥalyjá, so paní gijá krig phuvjátyr. Jov promekcia javír eftá dyvesá, i vymekcia golumbos; i jov butýr na risijá ke jov. Šovšelá pérvo berš ke pérvo (anglatunó) dyvés, pervoné-čhonéskiro, vyšutija paní pe phuv; i Nojo otčhakirdiá stréha (čhakín) dro kovčego, i podykhciá, i ĥáda, phuv uprál jaciá šukí. I pe javír čhon, pe biš te eftáto-čhonéskiro dyvés, phuv vyšutija. I Devél phendiá Nojoske: “Vydža kovčegostyr tu, i tyrí romný, i čhavé tyré, i tyré-čhavéngire romniá túsa. Vylydža kažno džidó sozdyiben, savó isyn túsa, kažnoné ločatyr, čirikliéndyr, i kheritkoné murdaléndyr (skotóstyr), i saré gaden, savé polzynena pir phuv: mek jone te rozdžanpe pir phuv, i mek jone te bijanen tyknen i te javén len but pe phuv.” I vygijá Nojo, i léskire čhavé, i romný léskiri i lésa léskire-čhavéngire romniá. I kažno riskiribnáskiro murdál (zvierjo), i kažno capny (plazuno), i kažno čirikly, i saró, so polzynela pir phuv, pir ródo péskiro, vyginé kovčegostyr. I kerdiá Nojo altárjo (žertvieniko) Ráske-Devléske; i lyjá kažnoné žužé kheritkoné murdalestyr (skotóstyr) i kažnoné žužé čirikliatyr, i jandiá céla xačkiribnaskire svénta dyibená pe altárjo. I sungadia Raj Devél gudló thuv (dymo) i phendiá Raj Devél dro Péskiro iló: “Me na javáva butýr te prokošav pal phuv manušés, pal-dová so manušéskiro iló isyn te kerél fuipén léskire ternypnastyr: i butýr Me na javáva te xasiakiráv saró, so isyn džidó, syr Me kerdjom. Akaná dre saré dyvesá javéna te počhuven dre phuv i te ukeden, šyl i xačkiribén, ivant (zima) i lynaj (milaj), dyvés i rat na pirijačena.” I Devél bahtiakirdiá Nojos i léskire čhavén, i phendiá lénge: “Te bijandjon čhavoré tuménde i te javén tumen butýr, i te pherdiakiren tumé phuv. Mek te darén i te trašadjon tuméndyr saré phuvitka riskiribnáskire murdalá (zviéri), i saré bolybnáskire čirikliá, saró, so psiréla pir phuv, i saré morjoskire (derjavéskire) mačhé; otdyné jone dre tumaré vastá. Saró, so psiréla i dživéla, javéla tuménge dro xabén; syr čar Me dáva saró tuménge. Na xan džidy loč (plot'), ratésa na xan. Me, ĥaljon, phučavape pal i tumaró rat, dro savó isyn tumaró džiibén, Me phučavape kažnoné riskiribnáskire murdalestyr (zvierjostyr), adiáke-pac' Me phučavape manušéskiro di manušéskire vastéstyr, léskire-pšaléskire vastéstyr. Kon pročhuvela manušéskiro rat, kodoleskiro rat pročhuvelape javire manušéskire vastésa: pal-dová so manúš sys sozdynó pir Devléskiri patrín (óbrazo). I te bijandjon čhavoré tuménde i te jačen tumen butýr, i te rozdžanpe tumé pir phuv, i te javén tumen butýr pe láte.” I phendiá Devél Nojoske i léskire čhavénge lésa: “Áke, Me čhuváva Miro zaviéto tuménca i tumaré rodosa korigedýr (pozžedýr) tuméndyr. I kažnoné džidé diésa, savó isyn tuménca, čiriklienca i kheritkoné murdalesa (skotosa), i saré riskiribnáskire murdalénca (zvierienca) pe phuv, savé isyn tuménde, sarénca, kon vygijá kovčegostyr, kažnoné murdalesa (žyvotnonesa), savó isyn pe phuv. Me čhuváva Miro zavieto tuménca, so butýr na javéla xasiakirdo kažno loč panitkone začhuibnasa (potoposa), i na javéla butýr panitko začhuiben pe xasibén phuvjake.” I phendiá Devél: “Ĥáda, isyn špéra (znako) pal zavieto, savó Me čhuváva maškír Mánde i maškír tuménde, i maškír kažno džidó di, savó te javél tuménca, dro tumaró ródo pe saró viéko. Me sykaváva Mirí bangi (raduga) dre óbloki, sob (kaj) joj te javél šperasa pal zavieto maškír Mánde i maškír phuv. I javéla, kiéli Me janáva óbloko pe phuv, tedy pe óbloko javéla bangi; i Me láva te ripirav Miro zaviéto, savó isyn maškír Mánde i maškír tuménde, i maškír kažnoné džidé diésa dre kažno loč (plot'), paní butýr na javéla syr potopo te xasiakirél kažno loč. I javéla bangi (raduga) pe óbloko, i Me dykháva la, i ripirava zaviéto pe saró viéko maškír Devléste i maškír kažno džidó di dre kažno loč, saví isyn pe phuv.” I phendiá Devél Nojoske: “Ĥáda, isyn ĥiertýk (znamiénijo) pal zaviéto, savó Me čhudjom maškír Mánde i maškír kažno loč, saví isyn pe phuv.” Nojoskire čhavé, savé vyginé kovčegostyr sys: Simo, Xamo i Iafiéto. Xamo sys Xanaanoskiro dad. Kadalé trin sys Nojoskire čhavé, i léndyr jačné manušá te rozdžanpe pir sarí phuv. Nojo jaciá te ganavel phuv, i počhudia vinagrado (drakh). I vypija jov mol (vino), i matija, i sys nango paštó dre péskiri šátra. I dykhciá Xamo, Xanaanoskiro dad, péskire-dadéskiro nangipén, i kiéli vygijá, rosphendiá dujenge péskire pšalénge. Simo i Iafiéto lyné ídi, i čhudé la pe péskire psiké, giné palalesa, i léngire-dadéskiro nangipén čhakirde; léngire muiá sys piriskirde pale, i jone léngire-dadéskiro nangipén na dykhné. I prosutiape Nojo péskire moliátyr (vinostyr), i udžindiá, so kerdiá pe léste léskiro tyknedýr čhavó; I phendiá jov: “Te javél prokošnó Xanaano, pishar'jéngiro-dynári jov javéla péskire pšalénge.” I phendiá jov: “Te javél bahtiakirdó Raj Devél, Devél Simoskiro, Xanaano te javél pisharisa léske. Mek te barjakirel Devél Iafietos; i mek jov te lel te dživél pe Simonoskire šátry; Xanaano javéla léske pisharisa.” I Nojo dživdiá paló paniéskiro začhuiben (potopo) trin šelá pandždešá berš. I saró pe saró adákicy dyvesá sys Nojoskire: jeniašela pandždešá berš; i jov myjá. Áke, isyn Nojoskire-čhavéngiro ródo: Simo, Xamo i Iafieto. Paló (poslie) paniéskiro začhuiben (potopo) léndyr bijándyne čhavé. Iafietoskire čhavé sys: Gomiero, Magogo, Madajo, Javano [Iavano-r.s.], Fuvalo, Miešeho i Firaso. Gomieroskire čhavé sys: Aškienazo [Askienazo-r.s.], Rifato i Fogarma. Javanoskire čhavé sys: Jeliša [Jelisa-r.s.], Farsiso, Kitimo (Kitimi) i Dodanimo (Dodanimi). Léndyr jačnépe ostrovy (džipá) manušytkoné nacyiénca, pe léngire phuvjá, kažno rakirdiá pe péskiri čib, pir péskiro kherítko ródo (pliemjo), maškirál péskire manušénde. Hamoskire čhavé sys: Xušo, Micraimo, Futo i Xanaano. Hušoskire čhavé sys: Sieva, Xavila, Savta, Raama i Savtieha. Ramoskire čhavé: Ševa i Diedano. Hušostyr bijándyja Nimrodo: léske treindiá te javél zoralesa pe phuv. Jov sys angíl Raste-Devléste zoraló murdalengiro (zvieriengiro) staribnari, paldavá i rakiréna: zoraló murdalengiro (zvieriéngiro) staribnari, syr angíl Raste-Devléste Nimrodo. Kralipén léskiro vagedyr (angledýr) sys: Vavilóno, Eriého, Akado i Xalne, pe Sienaaroskiri phuv. Dalé phuvjátyr vygijá Asuro (Assuro), i jov čhudiá Ninievija, Rehovof-iro, Kalaho, I Riesiéno maškír Niniévija i maškír Kalaho, davá isyn baró fóro. Micraimostyr bijándyne Ludimo, Anamimo, Liegavimo, Naftuhimo, Patrusimo, Kasluhimo, katýr vyginé Filistimliáni i Kaftorimo. Hanaanostyr bijándyne: Sidono, léskiro anglatunó čhavó, i Xiéto, Jevusiéjo, Amoriéjo, Giergiesiéjo, Jeviéjo, Arkiéjo, Siniéjo, Arvadiéjo, Cemariéjo i Ximafiéjo [Hamatiéjo-ju.o.]. Kodolé dyveséndyr Xanaanoskire kherítka ródy (pliémi) rozginepe pir rázna štéty, i sys miéža, kaj dživdé Xananiéi Sidonostyr proti Gieraro ke Gaza, adathýr ke Sodómo, Gomóra, Adma i Cievoimo, ke Laša. Kadalé sys Xamoskire čhavé, pir léngire kherítka ródy (pliémi), pir léngire jekhe-čibakire irjá (čib/ čibjá) (jazyki), pe léngire phuvjá, pir léngire manušýtka nácyi. Sys i Simoste čhavé, i jov sys dad sarénge Jevieroskire čhavénge, jov sys phuredýr pšal Iafietoske, phuredyre pšaléske. Simaskire čhavé sys: Jelamo, Asuro, Arfaksado, Ludo, Arámo. Aramoskire čhavé sys: Ŭco, Xulo, Giéfiero i Mašo. Arfaksadostyr bijándyja Sala, Salastyr bijándyja Jeviéro. Jevierostyr bijándyne duj čhavé; jekhés khardé Faliéko, pal-dová so dre léskire dyvesá rosčhudy pe pašá sys phuv; léskire pšalés khardé Ioktano. Ioktanostyr bijándyne Almodado, Šaliefo, Xacarmaviefo, Jeraho, Gadoramo, Uzalo, Dikla, Ovalo, Avimailo, Ševa, Ofiro, Xavila i Iovavo. Saré kadalé sys Ioktanoskire čhavé. Dživdé jone Miešatyr ke Siefara, vastočnone bergátyr. Kadalé sys Simoskire čhavé pir léngire kherítka ródy (pliémi), pir léngiri jekhe-čibakire irjá (čib/ čibjá) (jazyki), pe léngire phuvjá, pir léngire manušýtka nácyi. Kadalé sys Nojoskire-čhavéngire kherítka ródy (pliémi), pir léngiro ródo, dre léngire manušýtka nácyi. Léndyr jačné rázna manušá pe phuv paló potopo (paniéskiro začhuiben). Pe sarí phuv sys jekh čib, i jekh rakiribén. I sys adiáke: vastokóstyr giné jone dromésa, pe Sinaroskiri phuv lathné jone dólo i lyné te dživén odój. I phendlé jone jekh jekhéske: “Javén, kerása but kirpičy (kintá) i obhačkirasa len jagása.” I jačné lénde kirpičy zamiést bará, a phuvitko smola zamiést zvjoska. I phendlé jone: “Javén, kerása péske fóro i vučardý (bašnia), vučipnása ke bolybén; i dasa péske lav, sob (kaj) te na rozdžaspe pir sarí phuv.” I gijá telé Raj Devél te dykhél fóro i vučardý (bašnia), saví kerdé manušéngire čhavé. I phendiá Raj Devél: “Áke, jekh isyn nacyja, i saré rakiréna pe jekh čib; i ĥáda, so jone lyné te kerén, i na otiačena jone daléstyr, so zakamle te kerén; iavén, džása telé, i piripentynasa odój léngiro rakiribén adiáke, sob (kaj) jekh manúš te na ĥaljol, so rakiréla javír manúš.” I rosčhudiá Raj Devél len odothýr pir sarí phuv; i jone pirijačne te kerén fóro. Paldavá léske dynó lav Vavilóno, odój Raj Devél piripentyndia pir sarí phuv rakiribén, i odothýr len Raj Devél rosčhudiá te dživén pir sarí phuv. Ĥáda, isyn lav pal Simoskiro ródo: Simoske sys šel berš, i pir duj berš paló paniéskiro začhuiben (potopo), léstyr bijándyja Arfaksado; paló Arfaksadoskiro bijanypén, o Simo dživdiá pandžšelá berš, i léstyr bijándyne čhavé i čhaja. Dre trijandapandž berš Arfaksadostyr bijándyja Sala. Paló Salaskiro bijanypén, Arfaksado dživdiá štaršelatrin berš, i léstyr bijándyne čhavé i čhaja. Dre trijánda berš Salastyr bijándyja Jeviero. Paló Jevieroskiro bijanypén Sala dživdiá štaršelatrin berš, i léstyr bijándyne čhavé i čhaja. Dre trijánda trindeša štar berš Jevierostyr bijándyja Falieko. Paló Faliekoskiro bijanypén, Jeviero dživdiá štaršelá trindeša berš, i léstyr bijándyne čhavé i čhaja. Dre trijánda (trindeša) berš Faliekostyr bijándyja Ragavo. Paló Ragavoskiro bijanypén Faliéko dživdiá dujšelá jeniá berš, i léstyr bijándyne čhavé i čhaja. Dre trijánda (trindeša) duj berš Ragavostyr bijándyja Sieruho. Paló Sieruhoskiro bijanypén Ragavo dživdiá duj šelá eftá berš, i léstyr bijándyne čhavé i čhaja. Dre trijánda (trindeša) berš Sieruhostyr bijándyja Nahoro. Paló Nahoroskiro bijanypén Sieruho dživdiá duj šelá berš, i léstyr bijándyne čhavé i čhaja. Dre biš te jeniá berš Nahorostyr bijándyja Fara. Paló Faraskiro bijanypén Nahoro dživdiá šel te dešujenia berš, i léstyr bijándyne čhavé i čhaja. Dre eftadešá berš Farastyr bijándyja Avrámo [Abramo-ju.o.], Nahoro i Garano. Ĥáda, isyn Faraskiro ródo: Farastyr bijándyja Avrámo, Nahoro i Garano. Garanostyr bijándyja Loto. I Garano myjá angíl péskire dadéste Faraste, pe phuv, pe saví jov bijándyja, Ŭro Xaldiejéngiro. Avrámo i Nahoro lyné péske romnién, Avramoskire romniá khardé: Sara; Nahoroskire romniá khardé Milka [Mil'ka-ju.o.], saví sys Garanoskiri čhaj, Milkakire-dadéskiri i Iskaskire-dadéskiri. Sara sys nakhabný džuvlý, bičhavorengiri. I lyjá Fara Avramos, péskire čhavés, i Lotos, Aranoskire čhavés, péskire unukos, i Sara, peskirjá borja, péskire-čhavéskire Avramoskire romniá, i gijá krig lénca Urostyr Xaldiejengirostyr, sob (kaj) te džán pe Xanaanóskiri phuv; kiéli doginé jone ke Xarano, jone terdiné odój. I dživdiá Fara dujšelá pandž berš, i myjá Fara dro Xarano. I, ake, Raj Devél phendiá Avramoske: “Džá tyré phuvjátyr, tyré rodóstyr i tyré-dadéskire kheréstyr, pe doiá phuv, saví Me túke sykaváva. I Me sozdáva tútyr bari nacyja, i Me bahtiakirava tut, i barjakirava lav tyró; i tútyr javéla bahtiakiribén vaš javirénge. Me bahtiakirava manušén, savé javéna te bahtiakiren tut, i kon prokošel tut, odolén Me prokošava; i dre túte javéna bahtiakirde saré kherítka ródy pe phuv.” I gijá Avrámo, syr phendiá Raj Devél léske; i gijá lésa Loto. Avramoske sys eftadešá padž berš, kiéli jov gijá krig Xaranostyr. I Avrámo lyjá pésa peskirjá romniá Sara, Lotos, péskire pšaléskire čhavés, i saró léngiro majonko, so jone skedyné, i manušén sarén, savé lénde sys dro Xarano; i vyginé, sob (kaj) te džán pe Xanaanóskiri phuv; i javné pe Xanaanóskiri phuv. I progijá Avrámo pir daja phuv ke Sihiemoskiro štéto, ke dólo dembitkone vešoresa More. Tedy pe daja phuv dživdé Xananiéi. I Devél sykadyjá Avramoske, i phendiá: “Daja phuv Me dáva tyré rodóske, savó javéla angíl.” I jov kerdiá altárjo odój Ráske-Devléske, Savó sykadyjá léske. Odothýr jov gijá pe vastóko Viefiljostyr ke bérga; i čhudiá péskiri šátra adiáke, so látyr Viefíljo sys pe zapado (pal-paniá), a Gajo pe vastóko; i čhudiá odój Ráske-Devléske altárjo i prikhardia lav Ráskire-Devléskiro. I ĥazdyjápe Avrámo, i duredýr gijá pe paš-dyvés (jugo). I dre doiá phuv sys bokh. I javdiá Avrámo dro Jegípto te dživél odój; pal-dová so pe doiá phuv jaciá pharedyr bokh. I sys adiáke: kiéli jov džálas pašyledýr ke Jegípto, tedy phendiá péskire romniake Sarake: “Ĥáda, me džinóm (džináv), so tu san šukár džuvlý; i kiéli Jegiptiáni dykhéna tut, to jone phenéna: ‘Ake, isyn léskiri romný;’ i zamarna man, a tut jačkirena džidia; phen, so tu san mirí phen, sob (kaj) mánge pir túte te javél šukár, i, sob (kaj) miro di te javél džidó pir túte.” I sys adiáke: kiéli Avrámo javdiá dro Jegípto, Jegiptiáni dykhné, so joj sys drieván šukár. I adiáke-pac' dykhné la faraonóskire thagárja (kniázi), i šarde la faraonóske; i lyné la dro faraonóskiro kher. I jov pir láte kerdiá Avramoske but mištypén; i sys léste kherítka murdalá (tyknó i baró skoto): bakré i osly (miegárja), i slúgi (dynárja) i dynaricy (slugicy), i lošaki i vierbliudy. Ne Raj Devél čhudiá bari kára pe faraonoste i pe léskiro kher pal Avramoskire romniáte Sarate. I faraóno khardiá Avramos, i phendiá: “So da tu mánca kerdián? Vaš so na phendián mánge, so joj isyn tyrí romný? vaš so tu phendián: ‘Joj isyn phen mirí?’ I me kamdjom te lav la pal romniáte péske. I akaná, ĥáda, tyrí romný, le la i džá.” I faraóno dyjá pal léste priphenybén manušénge, i lydžiné dur les, i léskire romniá, i saró, so sys léste. I gijá Avrámo Jegiptóstyr, kokoró i léskiri romný, i saró, so sys léste, i Loto gijá lésa pe paš-dyvés pe Xanaano. I Avrámo sys drieván barvaló kheritkoné murdalénca (skotosa), i rupésa, i suvnakása. I džálas jov dromésa paš-dyveséstyr ke Viefíljo, pe štéto, kaj angledýr sys léskiri šátra maškír Viefíljo i maškír Gajo, ke dová štéto, kaj sys altárjo, savó jov angledýr odój kerdiá; i odój Avrámo prikhardia lav Ráskire-Devléskiro. I Lotoste, savó Avramosa psirdiá, adiáke-pac' sys kherítka murdalá (tyknó i baró skoto), i šátry. I phuv na mogindiá len dujén te rikirén, sob (kaj) te dživén khetané, pal-dová so léngiro mištypén sys dasavo baró, so jone na mogindlé te dživén khetané. I sys košybén maškír Avramoskire čhupnar'jende (pastuhende) i maškír Lotoskire čhupnar'jende (pastuhende); i Xananiei i Fierieziei tedy dživdé pe doiá phuv. I phendiá Avrámo Lotoske: “Mek te na javél košybén maškír mánde i túte, i maškír miré skotoskire čhupnar'jende i tyrende; pal-dová so ame sam seménca. Ci na sarí phuv isyn angíl túte? Le péskiri paš i džá. Kóli tu džása pe zérvo (liévo) rig, to me pe čačí (pravo) rig; a kóli tu pe čačí rig, tedy me pe zérvo.” Loto ĥazdyjá péskire jakhá i, ake, dykhciá sarí Iordanoskiri okruga (saví sys angíl dová, syr Raj Devél xasiakirdiá Sodómo i Gomóra), sarí ke Sigoro čhuvelaspe paniésa, syr Ráskire-Devléskiri únta (sado), syr Jegiptóskiri phuv. Tén'ci vykedyjá péske Loto saré Iordanoskire štéty; i gijá Loto pe vastóko. I roskerde jone péskire pašá jekh jekhestyr. Avrámo jaciá te dživél pe Xanaanóskiri phuv; a Loto jaciá te dživél dre okrugakire fórja, i čhudiá péskire šátry ke Sodómo. Manušá, savé dživdé ke Sodómo, sys fuj i drieván grehítka angíl Raste-Devléste. I phendiá Raj Devél Avramoske paló dová, syr Loto otgijá léstyr: “Ĥazde péskire jakhá, i dalé štetóstyr, pe savó tu san akaná, podykh pe paš-rat, i pe paš-dyvés, i pe vastóko i pe zapado; pal-dová so sarí phuv, saví tu dykhésa, Me dáva túke i tyré rodóske pe viéki, i sozdáva Me tyré rodóstyr but but manušén, syr phuvjákiro práho; kóli vari-kon saštý (moginéla) te piriginel phuvjákiro práho, tedy i ródo tyró javéla zgindlo; uštý, džá pir daja phuv dre lákiro dlengipén i buĥlypén, pal-dová so Me dáva la túke.” I piričhudia Avrámo péskiri šátra, i gijá, i jaciá te dživél pašýl dembitko vešoro Mamrié, so isyn dro Xievróno; i odój kerdiá altárjo Ráske-Devléske. Davá sys adiáke: kiéli dživdiá Amrafielo, Sienaaroskiro (Šinoaroskiro ) králi, o Arioho, Jelasaroskiro králi, Kiedorlaomiero, Jelamoskiro králi, i Tidalo, Goimengiro králi, to giné jone maribnása pe Bieraste, Sodomóskire kralíste, pe Biršaste, Gomorakire kralíste, Šynavoste, Admaskire kralíste, Šemievieroste, Cevoimoskire kralíste, i pe Bielaskire kralíste, savó akaná isyn Sigoro (Coaro). Jone saré javné khetané pe Sidimoskiro dólo, kaj akaná isyn Londo mórjo (derjáv). Dešudúj berš jone sys slúgi (dynárja) Kiedorlaomieroste, a pe dešutrito berš ĥazdyné jone búnto. Pe dešuštarto berš javdiá Kiedorlaomiero i králja, savé sys lésa, i zamardé Riefaimen dro Ašterof-Karnaimo, Zuzimen dro Gamo, Emimen dro Šav-Kiriafaimo, i Xoriejen pe bérga léngiri Sieiro, ke El-Farano, so isyn pašýl čhučí phuv. I kiéli risiné jone odothýr, jone javné ke Mišpato, savó isyn Kadiéso, i rozmarde Amalikitianengiri sarí rig, i adiáke-pac' Amoriejen, savé dživdé ke Xacacon-Famaro. I vyginé Sodomoskiro králi, Gomorakiro králi, Admaskiro králi, Cevoimoskiro králi i Bielaskiro králi, savó isyn Sigoro (Coaro); i lyné te marénpe lénca pe Sidimoskiro dólo, Kiedorlaomierosa, Jelamoskire kralísa, Tidalosa, Goimengire kralísa, Amrafielosa, Sienaaroskire kralísa, Ariohomosa, Jelasaroskire kralísa, – štar králja proti pandžende. Dro Sidimoskiro dólo but sys smolakire ĥanbiniá (jamy). Sodomoskiro i Gomorakiro králja, meknepe te našén, pyné dre lénde; a palatuné (posliédnia) našné dre bérgi. Odolé, kon pirizorjakirde, lyné Gomorakiro i Sodomoskiro majonko (mištypén), i saró léngiro xabén, i giné péske. I Lotos lyné, Avramoskire plimienikos, savó dživdiá ke Sodómo, i majonko léskiro, i giné péske. I jekh manúš, savó jaciápe džidó, javdiá, i rosphendiá Judoske Avramoske, savó tedy dživdiá pašýl dembitko vešoro Mamrié, Amorejaninos, Eškoloskire pšalés i Anieroskire pšalés, savé sys dro dorakiribén Avramosa. Avrámo, syr šundiá, so léskiri seménca lyné dro pliéno, skedyjá peskiren dynar'jén, savé bijándyne dro léskiro kher, trinšelá dešuohto manušén, i tradyjá vergén ke Dano; i jov rozmardiá len pe otriády, i jov, i léskire dynárja pyné pe lénde ratý, i rozmardiá len, i tradyjá len ke Xova, so isyn pir zérvo (liévo) rig Damaskostyr; i riskirdiá Lotos i saró léskiro majonko, i péskiri seménca, i saró léskiro mištypén riskirdiá, adiáke-pac' džuvlién i manušén. Kiéli jov risijá pale paló Kiedorlaomieroskiro i kral'jengiro rozmariben, savé isys lésa, to Sodomoskiro králi vygijá angíl léste pe dólo Šavié, so isyn akaná kralískiro dólo; i Salimoskiro králi, Mielhisedeko, vylydžijá maró i mol (vino). Jov sys rašáj Naj Vučedyreskiro Devléskiro, i bahtiakirdiá jov i phendiá: “Te javél bahtaló Avrámo Devléstyr, Naj Vučedyrestyr, Baré Rástyr pe bolybén i pe phuv. Te javél barjakirdó Devél, Naj Vučedyreskiro, Savó otdyjá vergén dre tyré vastá.” Avrámo saréstyr dyjá léske déšto paš. I phendiá Sodomoskiro králi Avramoske: “De mánge manušén, a majonko le péske.” Ne Avrámo phendiá Sodomakire kralíske: “Ĥazdava miro vast ke Naj Vučedyreskiro Raj Devél (Jahvá), Devél, Savó isyn phuvjákire i bolybnáskiro Baró Raj. So me na lavá ni thav, ni ĥeritkonendyr simiroro saré tyrestyr, sob (kaj) tu te na phenés: ‘Me barvaliakirdjom Avramos’, apríč doléstyr, so xané terné-beršengire manušá, i apríč pašátyr, saví isyn manušénge, savé mánca psirdé; Eniéro, Eškólo i Mamrié, mek jone te len péskiri paš.” Paló dalé réndy (diély) Ráskire-Devléskiro lav sys dro dykhibén Avramoske, i sys phendló: “Avramie, na dar; Me som tyró ščýto; mazúri (nagrada) túke tyró isyn drieván bari. Avrámo phendiá: “Baró Rajo, Dévla! So Tu désa mánge? Me jacjompe bi čhavorengiro, a xuláj dro miro kher isyn davá Jelijezero Damaskostyr.” I iščo (inké) Avrámo phendiá: “Ĥáda, Tu na dyján mánge čhavén, i, ĥáda, jekh miré kheréstyr javéla, pe miro meknó mištypén xulása.” I, ake, sys Ráskire-Devléskiro lav ke jov, i sys phendló: “Na doreséla (na dolela) jov tyró meknó mištypén; ne odová, kon vydžála tyré nutriatyr (maséndyr), odová doreséla tyró mištypén.” I vylydžijá les javrí, i phendiá: “Podykh pe bolybén, i gin čergeniá, kóli tu moginésa (saštý) te gines len.” I phendiá léske: “Adákicy túte javéna čhavoré.” Avrámo patiandyja Ráske-Devléske, i Jov priĥalyja davá léske dro čačipén. I phendiá léske: “Me som Raj Devél, Savó vylydžijá tut Urostyr Xaldiejengirestyr, sob (kaj) te dav túke daja phuv dro meknó mištypén péske.” Jov phendiá: “Rajo Baró, Devlale! Pir so mánge te džináv, so me prilava la?” Raj Devél phendiá léske: “Le mánge triné-beršytkona recá (tielica), triné-beršytkona buzniá (koza), triné-beršytkone bakrés, golumbica i terné golumbos.” Jov lyjá len sarén, rosčingirdia pe paš proti len, i čhudiá jekh pašýl javír; jekhe čiriklién na rosčingirdia. I priurniandyne pe trúpy riskiribnáskire čirikliá; ne Avrámo tradelas len. Kiéli kham bešelas, pyjá zoraló soiben pe Avramoste; i, ĥáda, pyjá pe léste dar i baró kalypén. I phendiá Raj Devél Avramoske: “Džin, so ródo tyró javéla čúžo pe phuv, saví na javéla léngiri, i keréna len pishar'jénca, i javéna te pritasaven len štaršelá berš, ne Me keráva séndo pe manušénde, savénge jone javéna te dynarinén; paló davá jone vydžána baré barvalypnasa, a tu džása ke tyré dadá ramanjosa (mirósa), i tu javésa ĥarado dro lačhó phuripen; ne dre štárto streč (pokoliénijo) jone risjona adarík: pal-dová so akaná Amoriejoskiro čoripén ke davá časo isyn na pherdó.” Kiéli besciá kham, i jaciá kalypén, ĥáda, thuv (dymo) sys bovestyr i jaga čibakire proginé maškirál rosčingirde koterá murdalengire. Dro dová dyvés Raj Devél kerdiá zaviéto Avramosa, i phendiá: “Tyré-čhavéngire čhavénca Me dáva daja phuv, Jegiptóskire rekátyr (leniátyr) ke bari reka (len'), reka (len') Jevfrato, Kieniejengiri, Kienieziejengiri, Kiedmoniejengiri, Hietiejengiri, Fierieziejengiri, Riefaimengiri, Amoriejengiri, Xananiejengiri, Giergiesiejengiri i Jevusiejengiri.” Ne Avramoskiri romný, Sara, na bijanelas čhavorén léske. Láte sys dynárica (slugica) Jegiptianka, savjá khardé Agar'. I Sara phendiá Avramoske: “Ĥáda, Raj Devél zakerdia miro per, sob (kaj) mánge te na bijanav čhavorén, me mangáva, zadžá ke mirí dynárica; saštý (moginéla) te javél, sob (kaj) mánge te javén látyr čhavoré.” Avrámo kandyjá Sara. I lyjá Avramoskiri romný, Sara, peskirjá dynárica Jegiptianka Agar', i dyjá la Avramoske, péskire romeske dre romniáte, pal-dová, syr joj dživdiá pe Xanaanóskiri phuv deš berš. Jov zagijá ke Agar', i joj zapharija. Kiéli dykhciá joi, so zapharija, to joj lyjá te bidykhel peskirjá xulania. I Sara phendiá Avramoske: “Dre xolý mirí tu san bangó; me otdyjom mirja dynárica ke kolýn tyró; a joi, syr dykhciá, so zapharija, to lyjá te bidykhel man; mek te javél Raj Devél sendarisa maškír mánde i túte.” Avrámo phendiá Sarake: “Áke, tyrí dynárica isyn dre tyré vastá; ker lása, so túke trej.” I Sara lyjá te na del láke vólia, i joj nastiá látyr. I lathiá la Ráskire-Devléskiro Jangólo pe čhučí phuv (pustynia) pašýl paniéskiri ĥanýng, katýr džála paní pe drom ke Suro. I phendiá láke: “Agaríje, Sarakiri dynárica! Katýr tu javdián, i karik džása?” Joj phendiá: “Me prastava Saratyr, miré xulaniatyr.” Ráskire-Devléskiro Jangólo phendiá láke: “Risjov ke péskiri xulany i jač te kandes.” I phendiá Ráskire-Devléskiro Jangólo láke: “Me butedyrjakirava i keráva baró, tyré-čhavéngiro ródo adiáke, so javéla naštý te pirigines les.” I duredýr phendiá Ráskire-Devléskiro Jangólo láke: “Ĥáda, tu san pharí, i tu bijanesa čhavés, i désa lav léske Izmailo, pal-dová so Raj Devél šundiá tyré mén'ki; jov javéla búso (diko) manúš; léskire vastá javéna pe sarénde, i sarengire vastá pe léste; jov javéla te dživél angíl sarénde péskire pšalénde.” I dyjá lav Agar' Ráske-Devléske, Savó rakirdiá láke, kadasavó lav: “Tu san Devél, Savó dykhéla man.” Paldavá phendiá joi: “Me, čačunés, adáj dykhcjom Kodolés, Kon dykhciá man.” Paldavá daja ĥanýng, katýr džála paní, kharélape: Bieer-lahai-roi (El' roj). Joj isyn maškír Kadiéso i Bariedo [Bieriedo-ju.o.]. E Agar' bijandiá čhavés Avramoske; i dyjá lav Avrámo péskire čhavéske, savó bijándyja Agarjatyr: Izmailo. Avramoske sys ohtodešašov berš, kiéli Agar' bijandiá léske Izmailos. Avramoske sys jeniadeša jeniá berš, i Raj Devél sykadyjá Avramoske i phendiá léske: “Me som Sarezorjákiro Raj Devél; psir angíl Mánde i jav bidošéngiro; 'i Me keráva Zaviéto (dorakiribén) Miro maškír túte i Mánde, i Me drieván butedyrjakirava tyró ródo.” I pyjá Avrámo pe péskiro muj, a Devél duredýr rakirdiá lésa, i phendiá: “Áke, isyn davá Zaviéto Miro túsa; tu javésa dadésa butenge manušytkoné nacyiénge, i tu na javésa butýr te kharespe Avramosa, ne javéla túke lav: Avraámo; pal-dová so Me keráva tut dadésa vaš but manušýtka nácyi (narody). Me keráva adiáke, so tútyr drieván but manušá bijandjona, i tútyr vydžána but manušýtka nácyi, i králja javéna tútyr; i Me čhuváva Miro Zavieto maškír Mánde i túte i maškír tyré-čhavorengiro ródo paló túte dro léngiro ródo, dorakiribén pe viéko dro dová, so Me javáva tyró Devél, i Me dáva túke i tyré-čhavéngire rodóske paló túte Me dáva daja phuv, pir saví tu psiresa, sarí Xanaanóskiri phuv, syr tyró mištypén pe viéko; i Me javáva léngiro Devél.” I Devél phendiá Avraamóske: “Tu rakh Miro Zavieto, tu i tyré-čhavéngiro ródo paló túte dre léngire-rodengire stréčy (pokolienii). Davá isyn Miro Zavieto, savó tumé san bangé (musinena) te zrakhen maškír Mánde i tuménde i maškír tyré-čhavéngiro ródo pal túte: mek te javél tuménde občhindlo kažno murškanó bijáto; občhinen jagóro (krajo) cypatyr pe tumarí loč (plot'): i davá javéla ĥiertýk (znamiénijo) pe Zavieto (dorakiribén) maškír Mánde i tuménde. Pe ohtóto (bidujéngiro déšto) dyvés bijanypnastyr, mek te javél občhindlo tuménde dre tumarí streč kažno murškanó bijáto, savó bijándyja dro kher i kindlo pal rup, vari-konéstyr čužonestyr, kon isyn na tyré rodóstyr. Kažnones trej te občhinen, kon bijándyja dro tyró kher, odová, kon i kindlo pal tyró rup, i javéla Miro Zavieto pe tumarí loč dorakiribnasa pe viéko. Naobčhindlo murš, savéste javéla naobčhindlo jagóro (krajo) pe léskiri loč, mek te xasjol davá di dalé manušéndyr, pal-dová so jov na zrakhciá Miro Zavieto.” I phendiá Devél Avraamóske: “Sara, tyrja romniá, na khar ‘Sara’; ne mek te javél lákiro lav: Sárra Me bahtiakirava la, i Me dáva túke látyr čhavés, Me bahtiakirava la, i javéna látyr manušýtka nácyi, manušéngire králja javéna látyr.” I pyjá Avraámo mósa, i zasandiape, i kokoró dre péste phendiá: “Naúšto (xaj) šele – beršytkoneste javéla čhavó. I jeniadešengiri Sárra, naúšto bijanéla?” I Avraámo phendiá Devléske: “Mek Izmailo te javél džidó angíl Túte!” I phendiá Devél: “Čačes, Sárra, tyrí romný, bijanéla túke čhavés, i tu désa léske lav: Isaáko (Ichako); i čhuváva Me Miro Zavieto lésa pe viéko, i léskire rodosa korigedýr (pozžedýr) léstyr. I pal Izmailoste Me šundjom tútyr: “Ĥáda, Me bahtiakirava les, i Me keráva, so léstyr javéla baró ródo; i Me dáva džiibén butenge léskire rodóstyr, dešudúj thagárja bijandjona léstyr, i Me sozdáva léstyr baró narodo. Ne Miro Zavieto Me čhuváva Isaakosa, savés bijanéla Sárra túke dro davá-pac' časo pe javír berš.” I Devél pirijaciá te rakirél Avraamosa; i gijá léstyr. I Avraámo lyjá Izmailos, péskire čhavés, i sarén, kon bijándyja dro léskiro kher, i sarén, kon sys kindlo pal léskiro rup, sarén Avraamóskire-kheréskire muršén; i občhindia jagóro (krajo) pe léngiri loč (plot') dro dová-pac' dyvés, syr Devél phendiá léske. Avraamóske sys jeniadeša jeniá berš, kiéli sys občhindly pe jagóro (pe krajo) léskiri loč. A Izmailoske, léskire čhavéske, sys dešutrin berš, kiéli sys občhindly pe jagóro (pe krajo) léskiri loč. Dro dová-pac' dyvés občhindlé sys Avraámo i Izmailo, léskiro čhavó, i lésa občhindlé sys saré muršá léskire kheréstyr, savé bijándyne dro kher, i savé sys kindle javire-rodoskire manušéstyr pal rup. I sykadyjá léske Raj Devél pašýl dembitko vešoro ke Mamrié, kiéli jov sys beštó angíl zagiibén dre šátra, dro dyvesýtko xačkiribén. Jov ĥazdyjá péskire jakhá, i dykhciá, i, ĥáda, trin muršá sys terdé mamúj léste. Syr dykhciá jov len, to prastándyja te pirilel len zagiibnastyr dre šátra, i kerdiá šerésa (klonindiape) ke phuv, i phendiá: “Rajo Baró! Kóli mánge te javél láska, me mangáva bahtalypén angíl Tyré jakhá, na prodža mamúj Tyré dynariste; i janéna nábut paní, i obmorena tumaré ĥerá; i otkinjon tumé tel dalé kaštá (drevy), a me janáva maró, i tumé zoraliakirena tumaré ile; korigedýr (pozžedýr) džána péske; adiáke syr tumé, džána mamúj tumaré dynariste.” Jone phendlé: “Adiáke ker, syr tu rakirésa.” I Avraámo sýges gijá, ke Sárra dre šátra, i phendiá: “Sygnedyr rozlydža trin saty fedyršo jaržó, ker posno maró, syr rostasavesa xumer (ciasto).” I prastándyja Avraámo ke ĥurto murdalénca, i lyjá naj fedyršones guruvóres, i dyjá terné-beršengireske, i odová sýges lyjá te keravel les. I lyjá jov ksil i thud, i keradia guruvóres, i čhudiá davá angíl lénde; a kokoró terdó sys pašýl lénde tel kašt. I jone xané. I phendlé léske: “Kaj isyn Sárra, tyrí romný?” Jov otphendiá: “Adái, isyn dre šátra.” I jekh léndyr phendiá: “Me nevéstyr (nevés) dre davá-pac' beršeskiro časo javáva ke tu, i, ake, tyré romniáte Sarrate javéla čhavó.” Sárra pašýl zagiibén dre šátra šundiá les pal léste. Avraámo i Sárra sys phuré dre beršá; i dová, so trej te javél džuvliénde, Sarrate pirijaciá. I Sárra zasandiape dre péste: “Ci mánge, kiéli me phurijom, te javél daja baht, i xuláj miro isyn phuró.” I phendiá Devél Avraamóske: “Sóstyr salape Sárra, i phendiá ‘Naúšto me, čačes, mogináva te bijanav, kiéli me phurijom?’” “Ci isyn vari-so te javél pharó vaš Ráske-Devléske? Dro phendló časo Me javáva ke tu pe javír berš, i Sarrate javéla čhavó.” Sárra na priĥalyjape, a phendiá: “Me na sandjompe.” Pal-dová so joj strahadyja. Ne Jov phendiá: “Nad, tu sandianpe.” I odolé manušá uštyné, i odothýr giné ke Sodómo, Avraámo gijá len te prolydžal. I Raj Devél phendiá: “Ci garavava Me Avraamostyr, so kamám te keráv! Avraamostyr, čačes, vydžána zoralé manušá, i dre léste bahtiakirenape saré phuvjákire-manušýtka nácyi, pal-dová so Me les vykedyjom vaš davá, sob (kaj) jov te priphenel péskire čhavénge i péskire kheréske, so javéla paló léste, te psirén Ráskire-Devléskire dromésa, te kerén čačipén i séndo; i keréla pe Avraamoste Raj Devél dová, so phendiá pal léste.” I Raj Devél phendiá: “Gódla dro Sodómo i Gomóra isyn bari, i pharó isyn drieván léngiro grého; džáva Me i dykháva, ci adiáke jone keréna grého, pal savó gódla pal lénde, džála ke Me, ci nad, udžinava.” I risiné manušá odothýr, i giné dro Sodómo; Avraámo usá sys terdó angíl Raste-Devléste. I podgíia Avraámo, i phendiá: “Naúšto Tu xasiakiresa čačuné manušés khetané zlydnitkonésa? Haj (moža) te javél dro davá fóro pandždešá manušá, savé patiána? Naúšto Tu xasiakiresa, i na potanginesa (ná požalinesa) davá štéto vaš pandždeše manušénge, savé patiána? Naštý te javél, sob (kaj) Tu te kerés adiáke, sob (kaj) Tu te xasiakires čačuné manušés khetané zlydnitkonesa, sob (kaj) dová-pac' te javél čačuné manušésa; so i zlydnitkonesa; naštý te javél Tútyr! Sendári saré phuvjákiro te kerél na pir čačipén?” O Raj Devél phendiá: “Kóli Me lathava dro fóro Sodómo pandždešá manušén, savé patiána, to tedy Me zrakháva saró davá štéto vaš lénge.” Avraámo phendiá dro otphenybén: “Ĥáda, me prilyjom duma te rakiráv Baré-Ráske, me som práho i práska (pieplo): saštý (moginéla) te javél, so ke pandždešá čačuné manušén, nauhtylla (nádosi) pandžen, naúšto, so kóli nauhtylla pandž manušá, to Tu xasiakiresa saró fóro?” Jov phendiá: “Na xasiakiráva, kóli odój lathava štardešapandž manušén.” Avraámo duredýr Lésa rakirdiá, i phendiá: “Saštý te javél, so odój lathenape štardešá manušá.” Jov phendiá: “Na keráva dová i, kóli odój lathenape štardešá manušá.” I phendiá Avraámo: “Me mangáva, Rajo Baró, te na xoliasos, so me javáva te rakiráv: saštý te javél, so odój lathenape trijánda manušá?” Jov phendiá: “Na keráva, kóli odój lathenape trijánda.” Avraámo phendiá: “Ĥáda, me prilyjom duma te rakiráv Ráske-Bareske: saštý te javél, so odój lathenape biš manušá? Jov phendiá: “Na xasiakiráva vaš bišenge.” Avraámo phendiá: “Mek te na xoliasol Baró Raj, so me phenáva iščo (inké) jékhvar: saštý te javél, so odój lathenape deš manušá? Jov phendiá: “Na xasiakiráva vaš dešenge.” I Raj Devél gijá, pirijaciá te rakirél Avraamosa, a Avraámo risijá pe péskiro štéto. I javné duj Jangóly bel'velié dro Sodómo, kiéli Loto sys beštó pašýl pórta (vráty) dro Sodómo. Loto dykhciá len, i uštyjá te pirilel len i kerdiá šerésa (klonindiape) ke phuv, i phendiá: “Rajale miré! Zadžán dre tumaré-dynariskiro kher, i rat'kiren, i vymoren tumaré ĥerá, i uštén tasiárles (ránes), i džán péskire dromésa.” Ne jone phendlé: “Nad, ame rat'kirasa javrí.” Jov drieván zoralés zrakirelas len; i jone giné ke jov, i javné dro léskiro kher. Jov kerdiá lénge baró skamínd, i pekcia posno maró; i jone xané. Jone iščo (inké) na pasine te soven, syr manušá dalé foróstyr, Sodomliani, ternestyr ke phuró, saré manušá saré foróskire rigéndyr, podginé ke kher trusciál (krugosa). I jone vykharde Lotos, i rakirdé léske: “Kaj isyn manušá, savé javné ke tu te rat'kiren? Vylydža len ke ame; sob (kaj) ame te džinas len.” Loto vygijá ke jone ke zagiibén, i čhakirdia pal péste vudár, i phendiá: “Mangav tumé, pšalále miré, na kerén čoripén; ĥáda, mánde isyn duj čhaja, savé na sys paloróm; fedýr len, me vylydžava ke tumé, kerén lénca, so tuménge isyn pir godý; adalé manušénge na kerén ničí, adiáke syr jone javné ke me tel kheréskiri stréha (čhakín).” Ne jone phendlé: “Jav adarík.” I phendlé: “Ĥáda, manúš, savó javdiá te dživél adái, i kaméla te sendiakirél? Akaná ame fujedýr kerása túsa, syr lénca.” I drieván prijačenas ke davá manúš, ke Loto, i podginé, sob (kaj) te phagiren vudár. Tedy odolé manušá ĥazdyné péskire vastá, i zalydžine Lotos ke pe dro kher, i phandle vudár; a manušén, savé isys angíl zagiibén dro kher, korjakirde, barestyr ke tyknó, adiáke, so jone zamenčindlepe, rodyi zagiibén. Odolé manušá phendlé Lotoske: “Kon isyn butýr túte adái? Ci ziatjo (džamutro), ci tyré čhavé, ci tyré čhaja, i sob (kaj) te na javél dre fóro túte, sarén vylydža dalé štetóstyr, pal-dová so ame xasiakirasa davá štéto; paldavá so bari godlyma isyn pe manušénde, savé dživéna adáj ke Raj Devél, i Raj Devél bičhadiá amen te xasiakiras les.” I vygijá Loto, i rakirdiá péskire ziatienca (džamutrenca), savé lenas pal péste léskire čhajén, i phendiá: “Uštén, vydžán dalé štetóstyr; pal-dová so Raj Devél xasiakiréla davá fóro.” Ne léskire ziatienge zdyjape, so jov salape. Kiéli jaciá te dyvesjol, e Jangóly lyné te sygniakiren Lotos, i rakirdé: “Uštý, le tyrja romniá i dujén tyrén čhajén, savé isyn túte, sob (kaj) tut te na xasiakiras pal bizlado dro fóro.” I syr jov ĥará jačelaspe pe štéto, tedy odolé manušá, pir Ráskire-Devléskiro tangipén ke jov, lyné les pal vast, i leskirja romniá, i dujén léskire čhajén, i vylydžiné les, i čhudé les pal fóro. Kiéli len vylydžiné javrí, tedy jekh léndyr phendiá: “Zrákh péskiro di, na dykh palál, i nikaj te na terdjos pašýl davá dólo; zrakhpe pe bérga, sob (kaj) te na xasjos túke.” Ne Loto phendiá lénge: “Nad, Rajo Baró.” “Ĥáda, Tyró pishári lathiá tangipén angíl Tyré jakhá, i baró isyn Tyró lačhipén, savó Tu kerdián mánge, so zrakhcián miro džiibén; ne me naštý (na mogináva) te garadjovav pe bérga, sob (kaj) te na lathel man bída i mánge te na merav; ĥáda, pašyledýr me te prastav dro davá fóro; prastava me odorík jov ža tyknó, i javéla zrakhno miro džiibén.” I phendiá Jangólo léske: “Ĥáda, pir tyró iló Me keráva davá: na čilavava fóro, pal savó tu rakirésa. Sygnedyr, džá odorík; pal-dová so Me naštý (na mogináva) te keráv réndo, paka tu javésa odorík.” Paldavá i davá fóro kharéna: Sigoro. Kham ĥazdyjápe pe phuv, i Loto javdiá dro Sigoro. I čhudiá Raj Devél pe Sodómo i Gomóra bryšýnd dzeveliátyr (sieratyr) i jag bolybnástyr Rástyr-Devléstyr, i čiladiá xasibnasa Raj Devél davá fóro, i saró, so isyn pašýl davá dólo, i adalé-for'jéngire saré manušén, i dová, so barija pe phuv. Ne Lotoskiri romný risijá palál pal léste, i jaciá londeskire stylbosa. I uštyjá Avraámo tasiárles (ránes) pe sámo zlokico (ránko) i gijá pe štéto, kaj sys terdó angíl Raste-Devléste, i podykhciá pe Sodómo i Gomóra, i pe saró štéto, so sys pašýl, i dykhciá: ĥáda, thuv (dymo) ĥazdélape phuvjátyr, syr thuv bovestyr. I sys adiáke, kiéli Devél xasiakirelas saré pašatuné fórja, Devél priripirdia pal Avraamoste, i vybičhadia Lotoskire-čhavéngiro ródo odolé štetóstyr, kaj Jov xasiakirelas fórja, ke savé dživdiá Loto. I vygijá Loto Sigorostyr, i lyjá te dživél dre ĥiebár (pieščera) pe bérga, i lésa sys léskire duj čhaja: pal-dová so jov darandyja te dživél ke Sigoro. I dživdiá pe bérga, i léskire duj čhaja lésa. I phurydyršo phen phendiá tyknedyršonake: “Dad amaró isyn phuró; i nane pe phuv manušés, savó te zadžál ke ame, syr davá kerélape pir sarí phuv; i jav, adiáke matiakirasa amaré dadés, i pirisovasa lésa, i bijanasa čhavén amaré dadéstyr.” I dre doiá rat jone mat'kirde péskire dadés; i zagijá phuredyršo phen i sys suty péskire dadésa: a jov na džindiá, kiéli joj pasijá i kiéli uštyjá. Pe javír dyvés phuredyršo phen phendiá tyknedyršonake: “Ĥáda, me tasiá sómas suty miré dadésa: mat'kirasa les i dre daja rat; i tu džá i sov lésa, i bijanasa amaré dadéstyr čhavén.” I dre daja rat mat'kirde jone péskire dadés; i gijá tyknedyršo phen i sys suty lésa: i jov na džindiá, kiéli joj pasijá i kiéli uštyjá. I duj Lotoskire čhaja zapharine péskire dadéstyr, i phuredyršo phen bijandiá čhavés, i dyjá léske lav: Moávo. Jov akaná isyn Moavitianengiro dad. I adiáke-pac' tyknedyršo phen bijandiá čhavés, i dyjá léske lav: Bien-Ammi. Jov akaná isyn Amonitianengiro dad. Avraámo gijá odothýr pe paš-dyvés (jugo), i lyjá te dživél maškír Kadieso i Suro; i vari-kicý dyvesá sys dro Gieraro. I Avraámo phendiá pal péskire romniáte Sarrate: “Joj isyn mirí phen.” I o Avimieliého, Gieraroskiro králi, bičhadiá, i lyjá Sárra. I Devél javdiá ratiákiro dro sunó ke Avimieliého, i phendiá léske: “Ĥáda, tu pal džuvliáte merésa, savjá tu lyjan, pal-dová so láte isyn rom.” Avimieliého na čiladiá la, i phendiá: “Rajo Baró! Naúšto Tu xasiakiresa manušén, savé isyn na bangé? Ci na kokoró jov phendiá mánge: ‘Joj isyn mirí phen?’ I kokori joj phendiá: ‘Jov isyn miro pšal’? Me kerdjom davá saré miré iléstyr i dre miré-vastengiri žužyma (čystota).” I Devél phendiá léske dro sunó: “I Me džinóm, so tu davá kerdián dre tyré ileskiri-žužyma (čystota), i rikirdjom tut angíl Mánde grehostyr; pal-dová i na domekcjom tut te čilaves la; akaná rískir romniá pale romeske: pal-dová so jov isyn proróko, i jov javéla te mangélpe pal túte, i tu javésa džidó; a kóli na riskiresa, tedy džin, so tu, i saré tyré, meréna.” I adiáke pe zlóko tasiárles (ránes) Avimieliého, skedyjá sarén peskiren pishar'jén, i rosphendiá dalé saré lavá lénge; i adalé manušá drieván strahádyne. I Avimieliého khardiá ke pe Avraamos, i phendiá léske: “So tu aménca kerdián? Dre so mirí bang isyn angíl túte, so tu kamdian te lydžas bída pe mánde i pe miro kralipén baró grého? Tu kerdián mánca réndy (diély), savé na keréna.” I Avimieliého phendiá Avraamóske: “So tu kamdian, kiéli kerdián davá réndo (diélo)?” Avraámo phendiá: “Pal-dová so me dumindjom, so adáj nane dar angíl Devléste, i zamarena man pal miré romniáte; davá isyn čačipén, joj isyn mánge phen; joj isyn miré-dadéskiri čhaj, ne na miré-dakiri čhaj; i jaciá miré romniása; kiéli Devél phendiá mánge te džav krig miré-dadéskire kheréstyr, tedy me phendjom láke: ‘Ker davá lačhipén vaš mánge, dre savó te na javas ame štéto, odój rákir pal mánde: ĥáda, isyn miro pšal.’” I Avimieliého lyjá bakrén i guruvén, i dynar'jén (slugen) i dynaricen, i dyjá Avraamóske; i riskirdiá léske Sárra, leskirja romniá. I phendiá Avimieliého: “Ĥáda, mirí phuv isyn angíl túte, dživ, kaj túke isyn pir iló.” I Sarrake phendiá: “Ĥáda, me dyjom tyré pšaléske šel šékieli rup, ĥáda, me dáva túke učhakiriben vaš jakhá angíl sarénde, savé isyn túsa, i angíl sarénde, so tu na san bangi.” I Avraámo mangdiápe Devléske, i Devél vysastiakirdiá Avimieliehos i leskirja romniá i léskire pisharicen (rabynién), i jone lyné te bijanen čhavén. Pal-dová so Raj Devél zaphandia kažno ločoví (čriévo) dro kher Avimieliehoskiri pal Sarrate, Avraamóskire romniáte. I kerdiá patýv Raj Devél Sarrake, syr Jov phendiá; i kerdiá Raj Devél Sarrake adiáke, syr rakirdiá. Sárra jaciá pharí, i Avraamóske dre baré léskire beršá bijandiá čhavés dre dová časo, pal savó rakirdiá léske Devél; i Avraámo dyjá péskire čhavéske lav, savó bijándyja léste, savés bijandiá léske Sárra: Isaáko [Ichoko-ju.o.]; i Avraámo občhindia Isaakos, péskire čhavés, pe ohtóto (bidujéngiro déšto) dyvés, syr Devél léske priphendiá. Avraamóske sys šel berš, kiéli léstyr bijándyja Isaáko, léskiro čhavó. I phendiá Sárra: “Devél kerdiá saben mánge, kon šunéla pal mánde, javéla te salpe.” I phendiá: “Kon phenéla Avraamóske: Sárra javéla te čaravel čhavorén kolynesa? Pal-dová so dro léskiro phuripen i me čhavés bijandjom.” Čhavoró vybarija, i otlyne les kolynestyr; i dro dová dyvés, kiéli Isaáko sys otlyno kolynestyr, Avraámo kerdiá baró svénko. I dykhciá Sárra, so Jegiptiankakire-Agarijakiro čhavó, savés joj bijandiá Avraamóske, salape. I phendiá joj Avraamóske: “Trade adalja pisharica (rabynia) i lákire čhavés; pal-dová so na javéla te prilel meknó mištypén adalé-pisharicakiro čhavó khetané miré čhavésa Isaakosa.” I davá sykadyjá Avraamóske drieván na pir iló vaš léskire čhavéske. Ne Devél phendiá Avraamóske: “Na piridživ pal tyré čhavéste i pisharicate; dre saró, so phenéla túke Sárra, kande la; pal-dová so pir Isaakoste javéla dynó túke tyré-čhavéngiro ródo; i pisharicakire čhavestyr Me sozdáva manušýtko nacyja, pal-dová so i léstyr javéla tyré-čhavéngiro ródo.” Avraámo uštyjá tasiárles (ránes) pe zlóko, i lyjá maró; cypitko gonó paniésa, i dyjá Agarijake, čhudiá láke pe psiké, i čhavés i otmekciá la. Joj gijá, i zablendyndiape pe čhučí phuv Virsávija; i dro gonó na jaciá paní, i jačkirdiá joj čhavés tel jekh xrústo (kusto), i gijá, durál bestiá, pe adakici dur, syr maribnýtko bust (striela) vurniala. Pal-dová so joj phendiá: “Na kamám čhavéskiro meribén te dykháv.” I joj besciá proti léste, i ĥazdyjá ĥodla, i rondiá. I šundiá Devél čhaveskiri zan (glos); i Devléskiro Jangólo bolybnástyr khardiá zoralés Agarja, i phendiá láke: “So túsa, Agárie? Na andyrša, Devél odothýr šundiá zan čhaveskiri, kaj jov isyn; uštý, ĥázde čhavés, i le les paló vast; pal-dová so léstyr Me sozdáva bari manušýtko nacyja.” I Devél otčhakirdiá láke jakhá, i joj dykhciá ĥanýng paniésa, i gijá, i pherdiakirdiá gonó paniésa, i paniakirdia čhavés. I Devél sys čhavésa; i jov vybarija, i lyjá te dživél pe čhučí phuv; i jaciá te del kar'je lukostyr. Jov dživdiá pe čhučí phuv Farano; i léskiri daj lyjá léske romniá Jegiptóskire phuvjátyr. I sys dre dolé dyvesá: Avimieliého Fiholosa, péskire barydyrésa pe xaladénde, phendiá Avraamóske: “Túsa Devél dro saró isyn, so tu te na keresas; i akaná sovlahá mánge adáj Devlésa, so tu na kerésa bibáht ni mánge, ni miré čhavéske, ni ŭnukoske miréske; i, syr me šukár i sómas túsa, adiáke i tu javésa te kerés mánca i phuvjása, pe saví tu dživesa syr gostjo.” I Avraámo phendiá: “Me sovlahava.” I Avraámo sykadiá bang Avimieliehoske pal ĥanýng paniésa, savó otlyne Avimieliehoskire pishárja. I phendiá Avimieliého: “Na džinóm, kon davá kerdiá, i tu na phendián mánge; me pal davá i na šundjom ke davá časo.” I lyjá Avraámo bakrén i guruvén, i dyjá Avimieliehoske, i jone dujdžiné kerdé zaviéto pal malypen (družba). I Avraámo čhudiá eftá (bitrinéngiro deš) lačhé bakror'jén tykné gurtostyr. I phendiá Avimieliého Avraamóske: “Vaš so adáj dalé eftá bakrorja, savén tu čhudián?” Jov phendiá: “Eftá bakror'jén adalen le miré vastéstyr, sob (kaj) jone te javén mánge dophenybnasa, so me vyĥanadjom daja ĥanýng.” Paldavá i khardiá jov davá štéto: Virsávija, adáj jone dujdžiné sovlahade. Adiáke jone kerdé zavieto dre Virsávija. I uštyjá Avimieliého, i Fiholo, léskiro barydyró pe xaladénde, i risiné jone pe Filistimijakiri phuv. I Avraámo čhudiá te barjon dembitko veladín (rošča) pašýl Virsávija, i mangdiápe odój Ráske-Devléske, Viečnone Devléske. I Avraámo dživdiá pe Filistimijakiri phuv, syr gostjo, but dyvesá. I sys adiáke, paló saró davá Devél sprobinelas (propatiakirelas) Avraamos, i phendiá léske: “Avraamie!” Jov phendiá: “Ĥáda, me som.” O Devél phendiá: “Le péskires čhavés, savó túte jekh, i savó isyn drógo túke, Isaakos; i džá pe Moriaskiri phuv, i shačkir les syr svénto dyibén odój pe jekh bergendyr, pal saví Me phenáva túke.” Avraámo uštyjá tasiárles (ránes) pe zlóko (ránko), dyjá andré péskire oslós (miegaris), lyjá pésa dujén peskiren terné-beršengiren i Isaakos, péskire čhavés. Jov čingirdia vaš shačkiribén kaštá, uštyjá, i gijá pe štéto, pal savó Devél léske phendiá. Pe tríto dyvés Avraámo ĥazdyjá péskire jakhá, i durál dykhciá dová štéto. I Avraámo phendiá péskire tyrne-beršengirenge: “Tumé jačénpe adáj oslosa; a me i čhavó džása odorík i pomangasape, i risjovasa ke tumé.” I Avraámo lyjá kaštá vaš célo shačkiribén, i čhudiá pe Isaakoste, péskire čhavéste; lyjá dre vastá jag i čhuri, i giné dujdžiné khetané. Ne lyjá te rakirél Isaáko Avraamóske, péskire dadéske, i phendiá: “Miro Dádo! Jov otphendiá: “Ĥáda me som, mro čhava.” Jov phendiá: “Ĥáda, jag i kaštá, kaj isyn bakro vaš shačkiribén?” I phendiá Avraámo: “Devél lathéla Péske vaš célo shačkiribén bakrés, mro čhavó.” I giné duredýr khetané. I javné pe štéto, pal savó Devél phendiá léske, i kerdiá odój Avraámo altárjo, čhudiá kaštá, i, sphandia péskire čhavés Isaakos, čhudiá les upré pe kaštá pe altárjo. I ĥazdyjá Avraámo péskiro vast, i lyjá čhuri, sob (kaj) te začhinel péskire čhavés. Ne Devléskiro Jangólo khardiá godlása les bolybnástyr i phendiá: “Avraamie! Avraamie! Jov phendiá: “Ĥáda, me som.” Jangólo phendiá: “Na ĥázde tyró vast pe čhavéste i na ker pe léste ničí; akaná Me džinóm (džináv), so tu daresa Devléstyr i na tangindian péskires čhavés, savó túte isyn jekh, vaš Mánge.” I otkerdia Avraámo péskire jakhá, i dykhciá: i, ĥáda, sys palál bakro, savó zapentyndiape péskire šengenca (rogénca) dre xrústy (kusty). Avraámo gijá, lyjá bakrés, i jandiá les pe célo shačkiribén zamiést péskire čhavéste. I dyjá lav Avraámo dolé štetoske: Iiegova-irié (Jahvá-ire). Paldavá i akaná rakiréna: pe bérga Raj Devél (Jahvá) javéla dykhno. I javír mólo rakirdiá ke Avraámo bolybnástyr Devléskiro Jangólo, i phendiá: “Me Pésa sovlahava –, rakiréla Raj Devél –, so, adiáke syr tu kerdián davá réndo (diélo), i na tangindian (na žalindian) péskire čhavés, savó túte isyn jekh, to Me bahtiakirava tut, i barjakiri, ubarjakirava tyró ródo, syr čergeniá pe bolybén, i syr práho pe morjoskiro (derjavéskiro) brégo; i priléla ródo tyró péskire-vergéngire fórja; i javéna bahtiakirde pir tyró ródo saré phuvjákire manušýtka ródy, pal-dová, so tu kandyjan Mirí zan.” I Avraámo risijá ke péskire terné-beršengire manušá, i uštyné, i giné khetané dre Virsávija [Bieer-Ševa-ju.o.]; i dživdiá Avraámo ke Virsávija. Paló saró davá, so sys, Avraamóske phendlé nevipen: “Ĥáda, i Milka adiáke-pac' bijandiá Nahoroske, tyré pšaléske, čhavén: Ucas, léskire anglatunes, Vuzas [Buzas-ju.o.], léskire pšalés, Kiemuilos, Aramoskire dadés, Kiesiedos, Xazos, Pildašos, Idlafos i Vafuilos”; Vafuilostyr bijándyja Rieviéka. Adalen ohtó džinén bijandiá Milka Nahoroske, Avraamóskire pšaléske; i léskiri bi-sovlahakiri džuvlý (naložnica), savjá khardé Rieuma, adiáke-pac' bijandiá Tievahos, Gahamos, Tahašos i Maahas. Sárra dživdiá pe svéto šel te bišteefta berš: ĥáda, sys lákiro džiibén. I myjá Sárra dre Kiríaf-Arba, so akaná isyn Xievróno, pe Xanaanóskiri phuv. I javdiá Avraámo te tuginel jasvénca, i te rovel pal Sarrate. I otgijá Avraámo péskire muliatyr, i rakirdiá Xietoskire čhavénge, i phendiá: “Me javdjom i me dživáva maškír tuménde; den mánge te javél štéto vaš maĥila (kula) maškír tuménde, sob (kaj) mánge mirja mulia te garavav miré jakhéndyr.” Hietoskire čhavé otphendlé Avraamóske i phendlé léske: “Vyšún amen, amaró rajo; tu san Devléskiro thagári (kniazjo) maškír aménde; dre fedyršo ĥaraibnytko štéto ĥarav tyrja mulia; nikón améndyr na otphenéla túke dro štéto vaš ĥaraiben tyré muliake.” Avraámo uštyjá, i kerdiá šerésa (klonindiape) ke phuv odolé phuvjákire manušénge, Xietoskire čhavénge; i rakirdiá lénge i phendiá: “Kóli tumé kaména, sob (kaj) me te garavav mirja mulia, tedy šunén man, mangén pal mánde Jefronos, Coharoskire čhavés, sob (kaj) jov te del mánge Mahpielaskiri ĥiebár (pieščera), saví léste isyn pe léskire-feldakiro jagóro (krajo), sob (kaj) pal lačhí timín (cena) la te otdél mánge maškír tuménde vaš ĥaraiben.” Jefrono sys beštó maškír Xietoskire čhavénde; i otphendiá Jefrono Xietejanino Avraamóske angíl Xietoskire čhavénde, saré kon sys dre léskire-foróskiri pórta, i phendiá: “Nad, miro xulájo, vyšún man; me dáva túke félda i dro ĥiebár (pieščera), saví isyn pe láte, me dáva túke, angíl miré-manušéngire čhavénde me darinava la túke, garav tyrja mulia.” Avraámo kerdiá šerésa ke phuv angíl odolé-phuvjákire manušénde, i phendiá Jefronoske angíl manušénde: “Kóli kamésa, me dáva túke pal félda rup: le mándyr, i me garavava odój mirja mulia.” Jefrono otphendiá Avraamóske i phendiá léske: “Mro rajo! Vyšún man: phuv isyn mol štaršelá rup; vaš mánge i vaš túke so da? Garavasa tyrja mulia.” Avraámo vyšundia Jefronos; i subladia (otvažyndia) Avraámo Jefronoske rup, ci but jov phendiá angíl Xietoskire čhavénde, štardešá šékieli rup, savó psiréla tylgar'jende (kupcende). I jaciá Jefronoskiri félda, saví sys pašýl Mahpiela, mamúj (proti) Mamrie, félda i ĥiebár (pieščera), saví sys pe láte, i saré vešá, savé sys pe félda i pašýl miéža trusciál (krugom). Avraámo jaciá xulása angíl Xietoskire čhavénde, angíl sarénde, savé zadžanas dre dalé-foróskiri pórta. Paló saró davá, Avraámo garadia peskirjá romniá Sárra, dre feldakiri dro ĥiebár dre Mahpiela, mamúj Mamrie, so akaná isyn Xievróno, pe Xanaanoskir phuv. Adiáke jaciápe Avraamóske Xietoskire čhavéngire félda, i dro ĥiebár, saví isyn pe láte, vaš garaiben. Avraámo sys phuró i Raj Devél bahtiakirdiá dro saró Avraamos. I Avraámo phendiá léskire pisharíske (raboske), savó dre léskiro kher sys phurydyr (upravliaiuščo), savó lydžijá saró xulaiben, savó léste sys: “Čhuv tyró vast tel mirí ĥerój, i sovlahá mánge Rása-Devlésa (Jahvasa), bolybnáskire i phuvjákire Devlésa, so tu na lésa miré čhavéske romniá Xananiejoskire čhajéndyr, maškír savénde me dživáva, ne tu džása pe mirí phuv, kaj me bijandyjom, i lésa miré čhavéske Isaakóske romniá.” O pishári phendiá léske: “Saštý (moginéla) te javél, so na zakaméla džuvlý te džal mánca pe daja phuv, ci bangó me javáva te riskirav tyré čhavés pe phuv, savjátyr tu vygijan?” Avraámo phendiá léske: “Rakhpe, na rískir miré čhavés odorík; Bolybnáskiro Raj Devél, Devél, Savó lyjá man miré dadéskire kheréstyr i miré phuvjátyr, kaj me bijandyjom, Savó rakirdiá mánge, i Savó mánge sovlahadiá, rakirí: ‘Rodoske tyréske Me dáva daja phuv, – Jov bičhavéla Péskire Jangolós angíl túte, i tu lésa miré čhavéske romniá odothýr’; kóli džuvlý na zakaméla te džal túsa, tu javésa vól'no miré sovlahatyr; čhavés mires na rískir odorík.” I čhudiá pishári péskiro vast tel ĥerój Avraamóske, péskire xuláske, i sovlahadiá léske dro davá. I lyjá pishári péskire xuláskire vierbliudendyr deš vierbliudy, i gijá. Dre léskire vastá sys kažna dróga vieščy (čýsy) dro [kučipena-r.s.] léskire-xuláskire barvalypnastyr. Jov uštyjá i gijá dre Miesopotamija, dro Nahoroskiro fóro, i terdiakirdia vierbliuden pal fóro, pašýl ĥanýng paniésa, tel bel'vél' dre dová časo, kiéli džána džuvliá paló paní te pheren. I phendiá: “Rajo Devlale, Dévla miré xuláske Avraamóskiro! Bičháv adadyvés te dykhavpe mánge, i ker lačhipén miré xuláske Avraamóske; ĥáda, me som terdó pašýl paní, i čhaja, savé dživéna ke davá fóro, džána te pheren paní; i čhajori, savjake me phenáva: “‘Bandiákir tyró khoró, me pjava nábut’, i saví phenéla: ‘Pi, me i vierbliudenge tyrenge davá te p'jén’, – ĥáda, isyn odoia, savjá Tu vykedyjan Tyréske pisharíske Isaakóske; i pir davá me udžinava, so Tu otlydžasape lačhipnása ke miro xulái.” Jov na pirijaciá te rakirél, i, ĥáda, vygijá Rieviéka, saví bijándyja Vafuilostyr, Milkakire čhavestyr, Nahoroskire romniatyr, Avraamóskire pšalestyr, i khoró (kuvšyno) sys pe lákiro psikó; patyvalý terný džuvlý sys drieván šukár, patyvalý čhaj, saví na džindiá romes. Joj gijá telé ke ĥanýng, pherdiakirdiá khoró (kuvšyno), i gijá upré. I pishári prastándyja te dykhelpe lása, i phendiá: “De mánge te pjáv nábut paní tyré khorestyr.” Joj ža phendiá: “Pi, miro rajo.” I mekciá telé péskiro khoró (kuvšyno) pe péskiro vast, i paniakirdia les. I, kiéli joj paniakirdia les, to phendiá: “Me kedava paní i vaš tyré vierbliudenge, paka jone p'jéna čalés.” I adái-pac' joj vyčhudiá paní khorestyr dre kopána (koryto) vierbliudenge te p'jén, i prastándyja nevéstyr (nevés) ke ĥanýng paló paní, i kedyja paní vaš sarénge léskire vierbliudendyr. Odová manúš dykhciá pe láte divosa dro štylypen, i kamdiá te ĥaljol, ci bahtiakirdiá Raj Devél léskiro drom, ci nad. Kiéli vierbliudy pirijačne te p'jén, tedy odová manúš lyjá suvnakuný čen, pharipnasa dre paš šékieljo, i duj vastytka (brasliety) pe lákire vastá, pharipnasa dre deš šékieli suvnakása; i phendiá: “Konéskiri san tu, čhaj? Phen mánge, ci isyn dre tyré-dadéskiro kher štéto aménge te rat'kiras?” Joj phendiá léske: “Me som Vafuiloskiri čhaj, Milkakire-čhaveskiri, savés joj bijandiá Nahoroske.” I butýr phendiá léske: “Aménde isyn but phus i xabén murdalénge; i isyn štéto, kaj te rat'kires.” I bandija odová manúš i kerdiá šerésa ke phuv Ráske-Devléske, i phendiá: “Te javél bahtiakirdó miré-xulaskiro Avraamóskiro Raj Devél, Savó na jačkirdiá mires xulás Péskire tangipnastyr i Péskire čačipnastyr! Devél čačuné dromésa jandiá man ke kher miré-xulaskiro, pšaleskiro kher.” Patyvalý terný džuvlý prastándyja, i rosphendiá pal davá dre péskire-dákiro kher. Rieviekate sys pšal, khardé les Laváno. Laváno vyprastandyja ke odová manúš, ke ĥanýng. I kiéli jov dykhciá čen i vastytka péskire pheniate pe vastá, i šundiá Rieviekakire lavá, péskire pheniakire, saví rakirdiá: “Adiáke rakirdiá mánca adavá manúš; tedy javdiá ke manúš, i ĥáda, jov sys terdó pašýl vierbliudende pašýl ĥanýng;” to phendiá: “Zadžá, bahtiakirdó Rástyr-Devléstyr, sóske tu san terdó adái? Me kedyjom kher i štéto vaš vierbliudenge.” I zagijá manúš. Laváno rozmuzdyndia vierbliuden, i dyjá phus i xabén vierbliudenge, i paní te morel ĥerá léske i manušénge, savé sys lésa; i čhudo sys angíl léste xabén; ne jov phendiá: “Me na javáva te xav, paka phenáva pal péskiro réndo. I phendlé: “Rákir.” Jov phendiá: “Me som Avraamóskiro pishári (rabo); Raj Devél drieván bahtiakirdiá mires xulás, i jov jaciá baré muršesa: Jov dyjá léske bakrén i ĥuruven, rup i suvnakái, pishar'jén i pisharicen, vierbliuden i oslen; Sárra, miré-xulaskiri romný, kiéli sys sarésa phuri, bijandiá miré xuláske čhavés, savéske jov otdyjá saró, so isyn léste; i miro xuláj lyjá mándyr sovláh, i phendiá: “Na le miré čhavéske romniá Xananiejoskire čhajéndyr, pe phuv, kaj me dživáva, a džá dro miré-dadéskiro kher, ke mirí seménca, i lésa romniá miré čhavéske. Me phendjom miré xuláske: “Saštý (moginéla) te javél so na džála džuvlý mánca.” Jov phendiá mánge: “Raj Devél, angíl Savéste me psirava, bičhavéla Péskire Jangolós túsa i bahtiakiréla tyró drom, i lésa romniá miré čhavéske miré semencatyr i miré dadéskire kheréstyr; tu tedy javésa vól'no (psiro) miré sovlahatyr, kiéli spsiresa ke mirí seménca; i kóli jone na déna túke, tedy tu javésa vól'no (psiro) miré sovlahatyr.” I me akaná javdjom ke ĥanýng, i phendjom: “Rajo Dévla! Dévla miré xulaskiro Avraamóskiro! Kóli Tu bahtiakiresa drom, savó me keráva, ĥáda, me som terdó pašýl štéto, katýr džála paní, i čhaj javéla pal paní, i savjake me phenáva: ‘De mánge nábut te pjáv tyré khorestyr’, i, saví phenéla mánge: ‘I tu pi, i vierbliuden tyrén me paniakirava’, – ĥáda, romný, savjá Raj Devél dyjá miré-xuláskire čhavéske. Me na pirijacjom te rakiráv dre mirí godý, i, gada, vygijá Rieviéka i khoró (gliako) pe lákiro psikó, i gijá ke ĥanýng, i pherdia paní; i me phendjom láke: ‘Paniakir man.’ Joj dre dová-pac' časo zlyjá péskiro khoró (gliako) péstyr i phendiá: ‘Pi; i vierbliuden tyrén me paniakirava.’ I me pijom, i vierbliudenge joj dyjá paní. Me phucjom látyr i phendjom: ‘Konéskiri tu, čháie?’ Joj phendiá: ‘Vafuiloskiri čhaj, Nahoroskire-čhavéskire, savés léske bijandiá Milka [Mil'ka-ju.o.].’ I me dyjom láke čen i vastytka (kore) pe lákire vastá. I bandijom me šerésa i dyjom patýv Ráske-Devléske, i bahtiakirdjom miré xuláskire Avraamóskire Ras-Devlés, Savó mamuje dromésa jandiá man, sob (kaj) te lav miré-xuláskire pšaléskire čha pal léskire čhavéste. I, akaná phenén mánge, ci kaména tumé te kerén lačhipén i čačipén miré ráske, ci nad? Phenén mánge, i me džáva dre jekh rig ci dre javír.” I rakirdé Laváno i Vafuilo, i phendlé: “Rástyr-Devléstyr javdiá davá réndo; ame naštý (na moginasa) te phenas túke angíl ni čoripén, ni lačhipén. Ake, Rieviéka isyn angíl túte; le i džá; mek joj te javél tyré-xuláskire čhavéske romniása, syr Raj Devél phendiá.” Kiéli Avraamóskiro pishári šundiá léngire lavá, tedy dyjá patýv Ráske-Devléske, kiéli kerdiá šerésa ke phuv. I vylyja pishári rupuvé, i suvnakuné šukarjakiribena, i uribená, i dyjá Rieviekake, adiáke-pac' i lákire pšaléske i dáke dyjá barvalé počastúnki (podarki). Hané i piné, jov i manušá, savé sys lésa, i jačnépe te rat'kiren. Kiéli jone uštyné pe zlóko (pe ránko), tedy jov phendiá: “Otmeken man ke miro xulái.” Ne lákiro pšal i lákiri daj phendlé: “Mek te javél nábut aménca terný dyvesá deš; korigedýr (pozže) joj džála.” Jov phendiá lénge: “Na zarikiren man, pal-dová so Raj Devél bahtiakirdiá miro drom; otmeken man, i me džáva ke miro xulái.” Jone phendlé: “Kharasa ternia i phučasa, so joj phenéla” I khardé Rievieka, i phendlé láke: “Ci džása tu adalé manušésa?” Joj phendiá: “Džáva.” I otmekne Rievieka, peskirjá pheniá, i džuvliá, saví barjakirdia la, i Avraamóskire pisharís, i léskire manušén. I bahtiakirde Rievieka, i phendlé láke: “Amári phéne! Mek te bijandjon tútyr šelá šel, i mek te xulainél tyré – čhavéngiro ródo tyré vergéngire kherenca!” I uštyjá Rieviéka i lákiri pisharica, i bešné pe vierbliudende, i tradyne pal odoléste manušéste. I pishári lyjá Rievieka, i gijá. A Isaáko javdiá Bieer-lahai-roistyr, pal-dová so jov dživdiá pe paš-dyvesýtko (južno) phuv. Kiéli jaciá bel'vél', Isaáko vygijá pe félda te obduminel; i ĥazdyjá péskire jakhá, i dykhciá: ĥáda, džánas vierbliudy. Rieviéka podykhciá, i dykhciá Isaakos, i gijá telé vierbliudostyr. I phendiá pisharíske: “Kon isyn adavá manúš, savó džála pir félda gil (pe strieč) aménge? Pishári phendiá: “Adavá isyn miro xulái.” I joj lyjá učhakiriben, i čhakirdiape. O pishári phendiá Isaakóske saró, so kerdiá. I Isaáko lydžijá la dre Sarrakiri šátra, péskire-dakiri, i lyjá Rievieka, i joj iaciá léske romniása, i jov pokamdia la; i Isaáko pirijaciá te tuginel pal péskire date. I Avraámo lyjá péske javirja romniá, savjá khardé Xietura [Kietura-ju.o.]. Joj bijandiá léske Zimranos, Jekšanos, Miedanos, Madianos, Išbakos i Šuahos. Jekšanostyr bijándyja Ševa i Diedano. Diedanoste sys čhavé: Ašurimo, Lietušymo i Lieiumimo. Madianoskire čhavé sys: Efa, Efiero, Xanoho, Avida i Jeldaga. Saré adalé čhavé Xieturakire. I Avraámo otdyjá saró, so léste sys, Isaakóske, A bisovlahakire-džuvliakire čhavénge, savé sys Avraamoste, Avraámo dyjá počastúnki (podarki), i otbičhadia len Isaakostyr, péskire čhavestyr, kiéli kokoró sys džidó, pe vastóko, pe daja phuv. Avraámo dživdiá pe svéto šel te eftadešá pandž berš; i myjá Avraámo dre lačhó phuripen, phuró i pherdó džiibnasa, i pričhudiape ke péskire manušá. I léskire čhavé Isaáko i Izmailo garadé les, dre Mahpielaskiri ĥiebár (pieščera), pe Jefronoskiri félda, Coharoskire-Xietejaninoskiri, saví sys mamúj (proti) Mamrie, pe félda, saví Avraámo kindia Xietoskire čhavéndyr. Odój garadé Avraamos i Sárra, leskirja romniá. Paló (poslie) Avraamóskiro meribén Devél bahtiakirdiá Isaakos, léskire čhavés. Isaáko dživdiá pašýl Bieer-lahai-roi. Ĥáda, isyn Izmailoskiro, Avraamóskire-čhavéskiro ródo, savés bijandiá Avraamóske Agar', Jegiptianka, Sarrakiri dynárica (slugica); i, ĥáda, Izmailoskire-čhavéngire lavá, pir léngiro ródo, ake, léngire lavá: anglatunó Izmailoskiro sys Navajofo, pal léste Kiedaro, Adbiejélo, Mivsamo, Mišma, Duma, Massa, Hadado, Fiema, Jeturo, Nafišo i Kiedma. Adalé isyn Izmailoskire čhavé, i, ake, léngire lavá, pe štéty dre gavore, kaj jone dživdé. Adalé isyn dešudúj léngire-rodoskire thagárja (kniázi). Izmailo dživdiá pe svéto šel te trijánda eftá berš; i myjá jov, i pričhudiape ke péskire manušá. Jone dživdé Xavilastyr ke Suro, so isyn angíl Jegípto, syr džása ke Asirija [Aššur-ju.o.]. Jone lyné te dživén angíl sarénde péskire pšalénde. Ĥáda, isyn Avraamóskire-čhavéskiro Isaakoskiro ródo. Avraamostyr bijándyja Isaáko. Isaakóske sys štardešá berš, kiéli jov lyjá péske romniá Rievieka, Miesopotamijatyr Vafuiloskire-Aramejaninoskirja čha, Lavanoskire-Aramejaninoskirja pheniá. I Isaáko mangdiápe Ráske-Devléske pal péskire romniáte, pal-dová so láte na sys čhavoré; i šundiá les Raj Devél, i léskiri romný Rieviéka jaciá pharí. Čhavoré andré lákiri ločoví (utroba) jačné te marénpe, i joj phendiá: “Kóli adiáke javéla, tedy vaš so mánge davá?” I joj gijá te mangél Ras-Devlés. O Raj Devél phendiá láke: “Duj rázna kherítka ródy (pliémi) isyn dro tyrí ločoví (utroba), i duj rázna manušýtka nácyi (narody) vydžána tyré ločoviátyr; jekh manušá javéna zoraledýr javirendyr, i phuredýr javéla te dynarinél (te služynel) tyknedyršoneske.” I láke podgíia časo te bijanél: i, ĥáda, blizniaty (dujore) sys dre lákiri ločoví (utroba). Anglatunó vygijá saró loló, syr cýpa, saró dre balá; i dyné léske lav: Isávo. Paló (poslie) davá vygijá léskiro pšal, savó rakirdiape péskire vastésa pal Isavoskiri piénta (khur); i sys dynó léske lav: Jakovo. Isaakóske sys šovdešá berš, kiéli jone bijándyne. Vybarine čhavé, i jaciá Isávo manušésa, savó roskedelaspe dro murdalengiro stariben (ohota), jaciá feldytkoné manušésa; a Jakovo jaciá štylone manušésa, savó dživdiá pe šátry. Isaakóske sys drógo Isávo, pal-dová so jov starelas i janelas te xal léske péskire doresybnastyr, i davá sys pir iló léske; a Rieviekake sys drógo Jakovo. I Jakovo keradia xabén bobostyr (nuklestyr); a Isávo javdiá khino feldatyr. I Isávo phendiá Jakovóske: “De mánge te xav davá loló, pal-dová so me khinyjom.” Daléstyr les prokharde: Edómo. Ne Jakovo phendiá: “Akaná bikin mánge péskiro anglatunó bijanypén.” Isávo phendiá: “Ĥáda, me meráva; so mánge dre davá anglatuné bijanypnastyr?” Jakovo phendiá: “Akaná sovláha mánge.” Jov sovlahadiá léske, i bikindia péskiro anglatunó bijanypén Jakovóske. I Jakovo dyjá Isavoske maró i xabén čečevicatyr; i jov xaja, i pija, i uštyjá, i gijá; i podykhciá vučipnástyr Isávo pe anglatunó bijanypén. Sys pe phuv bokh, baredýr anglatuné bokhátyr, saví sys, kiéli dživdiá Avraámo; i gijá Isaáko ke Avimieliého, dro Gieraro, ke Filistimijakiro králi. Raj Devél sykadyjá léske i phendiá: “Na džá dro Jegípto; dživ pe phuv, pal saví Me túke phenáva. Psir pir sarí phuv, i Me javáva túsa, i bahtiakirava tut, pal-dová so túke i tyré rodóske Me dáva sarí daja phuv, i Me rikirava sovláh, savjása Me sovlahadjom Avraamóske, tyré dadéske; Me keráva baró tyré-čhavéngiro ródo, syr bolybnáskire čergeniá, i tyré rodóske Me dáva saré dalé phuvjá; javéna bahtiakirde dro tyró ródo saré phuvjákire manušá. Pal-dová so Avraámo kandyjá Miré lavá i rikirdiape ke saró, so Me priphendjom te rakhén: Miré uphenybená, Miré statúty i Miré zakóny.” Isaáko jaciá te dživél ke Gieraro. Odolé štetytka manušá phučné léstyr pal léskire romniáte, i jov phendiá: “Davá isyn mirí phen”, pal-dová so darandyja te phenél: ‘Romný mirí,’ sob (kaj) te na zamarén man adalé štetytka manušá pal Rieviekate, dumindia jov, pal-dová so joj sys šukár. Ne kiéli jov but časo dživdiá odój, o Avimieliého, Filistimijakiro králi, dykhciá dre fenštra (dudali), i dykhciá, so Isaáko broinela Rieviekasa, péskire romniása. I Avimieliého khardiá Isaakos, i phendiá: “Ĥáda, joj isyn tyrí romný, syr davá tu phendián: ‘Joj isyn mirí phen’?” Isaáko phendiá léske: “Pal-dová so me dumindjom, te na merav mánge pir láte.” Ne Avimieliého phendiá: “So davá tu aménca kerdián? Nábut so i jekh amaré manušéndyr na pasijá tyré romniása, i tu zalydžasas amen dro grého.” I Avimieliého dyjá uphenybén saré manušénge, i phendiá: “Kon čilavéla adalé manušés i leskirja romniá, odová javéla otdynó pe meribén.” I počhuvelas ziárka dro doiá phuv Isaáko, i dro dová berš jov doresciá giv dre šel móly butýr: adiáke bahtiakirdiá les Raj Devél. I jaciá jov baré manušésa i barija dre patýv butýr i butýr ke dová, so jaciá drieván slavútno. Léste sys but ĥurty, tykné murdalén i tabuny baré kheritkoné murdalén, i drieván but féldy te počhuven giv, i Filistimliáni lyné léske te den jakhalo (te zavidynen). I saré ĥanyngá (kolodcy), savé vyĥanade léskire-dadéskire pishárja, kiéli dživdiá léskiro dad Avraámo, Filistimliáni začhude i zaĥanade phuvjása. I Avimieliého phendiá Isaakóske: “Džá péske améndyr, pal-dová so tu jacián pe but zoraledýr améndyr.” I Isaáko gijá péske odothýr, čhudiá šátry pe Gieraroskire dólo, i jaciá te dživél odój. I nevéstyr vyĥanadia Isaáko ĥanyngá paniésa, savé sys vyĥanade, kiéli dživdiá Avraámo, léskiro dad, i savé Filistimliáni začhude, kiéli myjá Avraámo i khardiá len dolé-pac' lavénca, savénca léskiro dad len khardiá. I ĥanade Isaakoskire pishárja dólo, i lathné odój ĥanýng džidé paniésa. I košnepe Gieraroskire čhupnárja (pastuhi) Isaakoskirenca, i rakirdé: “Pani isyn amaró.” I jov khardiá ĥanýng lavésa: Jesiéko, pal-dová so sys čingardá (spory) lésa pal láte. Vyĥanade javír ĥanýng; sys čingardá adiáke-pac' i pal láte; i jov khardiá la lavésa: Sitna. I jov tradyjá péske odothýr, i vyĥanadia javír ĥanýng, pal savó na sys čingardá; i khardiá les lavésa: Riehovo, paldavá jov phendiá: “Akaná pal láte. Devél aménge dyjá baró i buĥló štéto, i amen javéla but pe phuv.” Odothýr jov pirigija dre Virsávija [Biejér-Šeba-ju.o.]. I dre doiá rat sykadyjá léske Raj Devél, i phendiá: “Me som Devél, tyré-dadéskiro Avramoskiro; na andyrša, pal-dová so Me som túsa; i Me bahtiakirava tut, i Me keráva tyré-čhavéngiro ródo, vaš Avraamóske, Miré pisharíske.” I jov kerdiá odój altárjo, i mangdiápe Ráske-Devléske. I čhudiá odój péskiri šátra, i Isaakoskire pishárja vyĥanade odój ĥanýng. Javdiá ke jov Gierarostyr Avimieliého i Ahuzafo, léskiro drúgo (mal), i Fiholo, léskire-xaladéngiro barydyró. Isaáko phendiá lénge: “Vaš so tumé javné ke me, kiéli tuménge na pir iló sómas me i bičhadé man krig péstyr?” Jone phendlé: “Ame, čačes, dykhciam, so Raj Devél isyn túsa, i paldavá ame phendiam: ‘Čhuvasa maškirál aménde i túte sovláh,’ i kerása túsa dorakiribén (sojuzo), sob (kaj) tu aménge te na kerés čoripén, syr i ame na čilavasas tut, a ame kerasas túke jekh lačhipén i otmekciam tut ramanjosa (mirósa); akaná tu san bahtiakirdó Rástyr-Devléstyr.” Jov kerdiá lénge svenkitko skamínd, i jone xané i piné. I uštyné tasiárles pe zlóko, sovlahade jekh jekhéske; i otmekciá len Isaáko, i jone giné léstyr ramanjosa (mirósa). Dro dová-pac' dyvés javné Isaakoskire pishárja, i rosphendlé léske pal ĥanýng, saví jone ĥanade, i phendlé léske: “Ame lathiam paní.” I jov khardiá la: Šyva. Pir davá lav dalé foroske Biejer-Šyva (Biejér-Šeba) ke davá dyvés. Isavoske sys štardešá berš, i lyjá péske romniá Jegudifa, Bieeroskire-Xietejaninoskirja čha, i Vasiemafa, Jelonoskire Xietejaninoskirja čha; léndyr sys pharipén pe godý Isaakóske i Rieviekake. Kiéli Isaáko jaciá phuró, i léskire jakhá jačné fujes te dykhén, jov khardiá péskire phurydyršone čhavés Isavos i phendiá léske: “Mro čháva!” Odová phendiá léske: “Ĥáda, me som.” Jov phendiá: “Ĥáda, me jacjom phuró, me na džinóm (na džináv) péskiro meribnytko dyvés; le akaná tyré častyra (orudii): kolčano tyró, lúko tyró, džá pe félda, i uhtyl (starav) mánge vešeskire čiriklién, i keráv mánge xabén, savó me kamám, i jan mánge te xas, sob (kaj) tut te bahtiakirél miro iló, angledýr syr me meráva.” Rieviéka šundiá, kiéli Isaáko rakirdiá péskire čhavéske Isavoske. I gijá Isávo pe félda te doresel i te janel vešeskire čiriklién (dič); a Rieviéka phendiá péskire čhavéske Jakovóske: “Ĥáda, me šundjom, syr tyró dad rakirdiá tyré pšaléske Isavoske: ‘Jan mánge vešeskire čiriklién (dič) i keráv mánge xabén; me pirihava, i bahtiakirava tut angíl Raste-Devléste, angíl miro meribén.’ Akaná, mro čháva, šun miré lavá, so me priphenava túke: džá dre stada i le odothýr mánge dujén lačhin'konen buznoren (kozljonken), i me keravava léndyr tyré dadéske xabén, savó jov kaméla, a tu janesa tyré dadéske, i jov pirihala, sob (kaj) te bahtiakirél tut angíl léskiro meribén.” Jakovo phendiá Rieviekake, péskire dáke: “Isávo, miro pšal, isyn manúš balytko, a me som manúš bi balengiro; saštý (moginéla) te javél, so čilavéla man miro dad; i me dre léskire jakhá javáva syr xohaniuko, i keráva pe péste prokošybén, a na bahtiakiribén.” Léskiri daj phendiá léske: “Mek te javél pe mánde tyró prokošybén, mro čháva, šun miré lavá, i džá, jan mánge.” Jov gijá, i lyjá, i jandiá péskire dáke; i léskiri daj keradia xabén, savó xaja pir iló dad. I Rieviéka lyjá péskire phuredyršoneskire-čhaveskiri Isavoskiri fedýr ídia, saví sys láte dro kher, i uridia dre láte péskire tyknedyršone čhavés Jakovós; a léskire vastá i bi balengiri men občhudiá buzniengire (kozliatengire) cypasa; habén i maró, savó joj kerdiá, joj dyjá dre vastá péskire čhavéske Jakovóske. Jov zagijá ke péskiro dad i phendiá: “Miro dádo!” Odová phendiá: “Ĥáda, me som; kon tu san, miro čhavó?” Jakovo phendiá péskire dadéske: “Me som Isávo, anglatunó tyró čhavó; me kerdjom, syr tu mánge phendián; uštý, beš, i xa miré vešeskire čiriklién, sob (kaj) te bahtiakirél tyró iló man.” I phendiá Isaáko péskire čhavéske: “Syr tu adiáke sýges lathian, miro čhavó?” Jov phendiá: “Pal-dová so tyró Raj Devél, Devél, bičhadiá pe drom mánge.” Isaáko phendiá Jakovóske: “Jav pašyledýr, me čilavava tut, miro čhavó, ci tu san, čačes, miro čhavó Isávo, ci nad?” Jakovo podgíia ke péskiro dad Isaáko, i jov čiladiá les, i phendiá: “Zan (glos), syr Jakovoste; a vastá, syr vastá Isavoste.” I jov na ĥalyjá les, pal-dová so léskire vastá sys, syr vastá Isavoste, léskire pšaléste, balenca; i bahtiakirdiá les, i phendiá: “Ci tu san miro čhavó Isávo?” Jov otphendiá: “Me som.” I phendiá Isaáko: “Pode mánge, me pirihava miré-čhavéskire vešeskire čiriklién (dič), sob (kaj) te bahtiakirél tut miro iló.” Jakovo podyja léske, i jov xaja; jandiá léske i mol (vino), i jov pija. Isaáko, léskiro dad, phendiá léske: “Jav pašyledýr, čamude man, miro čháva.” Jov podgíia i čamudia les. I sungadia Isaáko léskire dúho, i bahtiakirdiá les i phendiá: isyn “Ĥáda, dúho isyn miré čhavestyr, syr feldatyr khandypen, savó bahtiakirdiá Raj Devél; mek te del túke Devél bolybnáskire pahlyniatyr (rosatyr) i phuvjákire thulypnastyr, i but maró i mol (vino); mek te javén dynar'jénca túke manušýtka rasy, i mek te kerén šerésa pe phuv semency túke; jav xulása pe tyré pšalénde, i mek te kerén šerésa ke phuv túke tyré-dákire čhavé; a kon košela tut – javéla kokoró prokošnó; kon bahtiakiréla tut – javéla kokoró bahtiakirdó!” I sys adiáke: syr féni (tóka) kerdiá Isaáko bahtiakiribén pe Jakovoste, i syr vygijá Jakovo péskire dadéstyr Isaakostyr, to Isávo, léskiro pšal, javdiá péskire staribnastyr (ohotatyr) pal vešeskire čirikliende. Keradia i jov adiáke-pac' xabén, i jandiá péskire dadéske, i phendiá péskire dadéske: “Uštý, mro dádo, i xa tyré-čhavéskire vešeskire čiriklién, sob (kaj) te bahtiakirél man tyró iló.” Isaáko, léskiro dad, phendiá léske: “Kon tu san?” Jov phendiá: “Me som tyró čhavó, tyró anglatunó Isávo.” I izdrandyja drieván Isaáko, i phendiá: “Kon ža adavá, savó jandiá mánge vešeskire čiriklién (dič), i me xajom saréstyr, angíl syr tu javdián, i me bahtiakirdjom les, jov i javéla bahtiakirdó.” Isávo šundiá péskire dadéskire lavá, ĥazdyjá zoralý i drieván kirki ĥodla, i phendiá péskire dadéske: “Miro dádo! Bahtiakir i man.” Ne jov phendiá: “Tyró pšal javdiá xohaibnasa i lyjá tyró bahtiakiribén.” I phendiá jov: “Ci na paldavá léske dynó lav: Jakovo, so jov man duj móly oblydžija? Jov lyjá miro anglatunó bijanypén, i ĥáda, akaná lyjá miro bahtiakiribén.” I phendiá: “Naúšto tu na mekcian mánge bahtiakiribén?” Isaáko otphendiá Isavoske: “Ĥáda, me čhudjom les xulása pe túte, i sarén léskire pšalén otdyjom dro pishariben (rabstvo) léske, me dyjom léske maró i mol (vino); so me te keráv vaš túke, miro čháva?” Ne Isávo phendiá péskire dadéske: “Naúšto, miro dádo, túte isyn jekh bahtiakiribén? Bahtiakir i man, miro dádo!” I ĥazdyjá Isávo péskiri zan, i zarondia. I phendiá Isaáko, léskiro dad, léske: “Ĥáda, phuvjákire thulypnastyr javéla džiibén tyró, i bolybnáskire pahlyniatyr, so isyn uprál. I tu javésa te dživés tyré kurtalása, i tu javésa te dynarines (te služynes) tyré pšaléske; ne javéla časo, kiéli tu ĥazdesape pe léste i sčhurdesa léskiro ĥámo tre meniatyr.” I drieván lyjá te na kamel Isávo Jakovós pal bahtiakiribén, savésa léskiro dad les bahtiakirdiá; i phendiá Isávo dre péskiro iló: syg javéna roibnytka dyvesá pal miré dadéste: i me zamarava péskire pšalés, Jakovós. I piridyne Rieviekake Isavóskire lavá, lákire-phuredyršoneskire čhavéskire; i joj bičhadiá, i khardiá péskire tyknedyršones čhavés Jakovós, i phendiá léske: “Ĥáda, Isávo, tyró pšal, kedelape te zamarél tut; i akaná, miro čháva, kande miré lavá, uštý, naš ke Laváno, miro pšal, dro Xarano, i dživ léste vari-savó časo, ke dová, syr prodžála xolý tyré pšaléste, paka prodžála tyré-pšaleskiri xolý pe túte, i jov bistrela, so tu kerdián léske: tedy me bičhaváva, i me láva tut odothýr; vaš so mánge dro jekh dyvés te našavav dujén tumen?” I phendiá Rievieka Isaakóske: “Me na kamám džiibén pal Xietoskire čhajende, kóli Jakovo léla čha paloróm Xietoskire čhajendyr, savé isyn adalé phuvjákire čhajendyr, tedy ke so mánge i džiibén?” I khardiá Isaáko Jakovós, i bahtiakirdiá les, i priphendiá léske, i phendiá: “Na le péske Xanaanoskire-čhajendyr romniá. Uštý, džá dre Miesopotamija, dro Vafuiloskiro kher, tyré-dákiro dad, i le odothýr péske romniá, Lavanoskire čhajendyr, tyré-dákire pšalestyr; Mek Devél Sarezorjákiro, te bahtiakirél tut, mek te bijandjon but tútyr, i mek te javél tútyr but manušá, mek te javén tútyr but manušýtka nácyi (narody). I mek te del túke bahtiakiribén Avraamóskiro, i tyré-čhavéngire rodóske túsa, sob (kaj) tu te priles phuv syr meknó mištypén, pe saví tu sánas čúžo, saví Devél dyjá Avraamóske!” I otmekciá Isaáko Jakovós, i jov gijá dre Miesopotamija ke Laváno, Aramejaninoskire-Vafuiloskiro čhavó, ke Rieviekakiro pšal, Jakovoskiri i Isavoskiri daj. Isávo dykhciá, so Isaáko bahtiakirdiá Jakovós, i bičhadiá les dre Miesopotamija te lel odothýr péske romniá, i priphendiá léske, phení: “Na le Xanaanoskire čhajendyr romniá;” i syr Jakovo kandyjá péskire dadés i da, to gijá dre Miesopotamija. I dykhciá Isávo, so Xanaanoskire čhaja sys na pir iló léskire dadéske Isaakóske. I gijá Isávo ke Izmailo, i lyjá romniá péske Mahalafa, Izmailoskirja čha, Avraamóskire-čhavéskire, Navaifoskire (Nevaitofoskire) pheniá, uprál péskire javire romniendyr. Jakovo vygijá Virsavijatyr, i gijá dro Xarano, i javdiá pe jekh štéto, i jaciápe odój te rat'kirel, pal-dová so besciá kham. I lyjá odolé štetóstyr jekh bar, i čhudiá péske tel šeró, i pasijá pe dová štéto. I dykhciá (dyjá) suné: ĥáda, stylba / uklaní (liesvíca) sys terdy pe phuv, a lákiro vučipén dodžála ke bolybén; i, ĥáda, Devléskire Jangóly ĥazdénape i džána telé pir láte. I ĥáda, Raj Devél sys terdó pe láte i rakirélas: “Me som Raj Devél (Jahvá), Devél Avraamóskiro, tyré-dadéskiro, i Isaakoskiro Devél. Phuv, pe saví tu san paštó, Me dáva túke i tyré-čhavéngire rodóske; i javéla baró tyró ródo, syr phuvjákiro práho; i tu javésa te dživés dur až ke mórjo (derjáv), i ke vastóko, i ke paš-rat, i ke paš-dyvés; i bahtiakirenape tútyr i tyré rodóstyr saré kherítka ródy (pliémi) pe phuv; i ĥáda, Me som túsa, i Me zrakháva tut, kaj by tu te na javes, karik by tu te na džas; i Me riskiráva tut pe daja phuv, Me na jačkirava tut, paka Me keráva saró pir dová, so Me túke phendjom.” Jakovo uštyjá péskire soibnastyr i phendiá: “Čačes, Ráj Devél isyn pe davá štéto; a me na džindjom!” I strahadyja i phendiá: “Syr darano isyn davá štéto! Davá nisó javír, syr Devléskiro Kher, a davá isyn bolybnaskiri pórta (vráty).” I uštyjá Jakovo tasiárles (ránes) pe zlóko, i lyjá bar, savó jov čhudiá péske tel šeró syr šerand, i čhudiá les syr ripiribnytko stýlbo (pomníko); i čhudiá upré pe léste jeliejo (olivítko dzet). I khardiá dová štéto: Viefil' [Bet-El'-ju.o.], a angledýr dolé-foróskiro lav sys: Luzo. I dyjá Jakovo sovláh i phendiá: “So Devél te javél mánca, i Jov zrakhéla dre davá drom man, dre savó me džáva, i déla mánge te xav maró i ídia te urjavpe, i me dro ramánjo (miro) risjováva dre miré-dadéskiro kher, i javéla Ráj Devél miré Devlésa, to davá bar, savó me čhudjom syr ripiribnytko stýlbo (pomníko), javéla Devléskire Kheresa; i saréstyr, so Tu, Dévla, désa mánge, me dáva Túke déšto paš.” I uštyjá Jakovo pe ĥerá i gijá pe vastokoskire-čhavengiri phuv. I dykhciá: ĥáda, pe félda ĥanýng, i odój sys trin stády bakrén, savé sys pašté pašýl láte; pal-dová so dolé ĥanyngatyr paniakirde stády bakréngire. Pe ĥanyngakiro thadypen sys baró bar. Kiéli skedenaspe odorík saré gurty, ravenas krig bar ĥanyngakire thadypnastyr i paniakirde bakrén, paló davá nevés čhudé bar pe léskiro štéto. Jakovo phendiá lénge: “Miré pšalále! Katýr tumé san?” Jone phendlé: “Ame sam Xaranostyr.” Jov phendiá lénge: “Ci džinéna tumé Lavanos, Nahoroskire čhavés?” Jone phendlé: “Džinása.” Jov phendiá lénge: “Ci isyn sastó jov? Jone phendlé: “Sasto; i, ĥáda, léskiri čhaj, Rahíl', džála bakrenca.” I jov phendiá: “Áke, dyvés isyn baró; nane časo te skedes guruvén; paniakiren bakrén, i čaraven.” Jone phendlé: “Ame naštý (na moginasa), paka pritradena saró skoto (kheritkoné murdalén), i ravena krig bar ĥanyngatyr; tén'či ame javása te paniakiras bakrén.” Jov rakirdiá duredýr lénca, syr javdiá Rahíl' péskire dadéskire bakrenca, pal-dová so joj čaradia len. Kiéli Jakovo dykhciá Rahilia, Lavanoskirja čha, péskire-dákire pšaleskirja, to tedy podgíia Jakovo, radia krig bar ĥanyngatyr i paniakirdia Lavanoskire bakrén, péskire dákire i bakrén Lavanoskiren pšaleskiren. I čamudia Jakovo Rahilia, i ĥazdyjá péskiri zan i zarondia. I phendiá Jakovo Rahiliake, so jov isyn seménca lákire dadéske, i so jov isyn Rieviekakiro čhavó. A joj prastándyja, i phendiá péskire dadéske. O Laváno, syr šundiá pal Jakovoste, péskire-pheniakire čhavéste; to prastándyja muial (gil) léske, oblyja les, i čamudia, i jandiá les dre péskiro kher; i jov rosphendiá Lavanoske davá saró. Laváno phendiá léske: “Čačes, tu san kokalo miro i loč (plot').” I dživdiá léste Jakovo saró čhon. I Laváno phendiá Jakovóske: “Naúšto tu bi pleskiribnaskiro javésa te dynarines (te služynes) mánge, pal-dová so tu san seménca? Phen mánge, sósa te pleskirav túke?” Lavanoste sys duj čhaja; phuredyršonakiro lav: Lija; tyknedyršonakiro lav: Rahíl'. Lija dykhciá fujes, a Rahíl' sys šukár stemása (stanósa) i sys šukár mósa. Jakovóske jaciá pir iló (jov pokamdia) Rahíl', i phendiá: “Me javáva te dynarinav túke eftá (bitrinéngiro deš) berš pal Rahiliate, tyré-tyknedyršone čhate.” Laváno phendiá: “Mánge isyn fedýr te otdav la pal túte, syr la te otdav pal savéste javiréste; dživ mánde.” Jakovo dynarindiá pal Rahiliate eftá berš; ne jone sykadyne léske pal vari-kicý dyvesá, pal-dová so léske sys pir iló joi. I phendiá Jakovo Lavanoske: “De mirja romniá, pal-dová so mánge podgíia časo (cýro), sob (kaj) te zadžav ke joi.” O Laváno khardiá sarén manušén dolé štetóstyr i kerdiá bjav. Bel'veliasa jov lyjá peskirjá čha Lija i jandiá la ke jov; i zagijá ke joj Jakovo. I Laváno dyjá peskirjá dynárica Ziel'fa péskire čhake Lijake. I sys adiáke: pe tasiárla (rankostyr), ake, jov dykhciá, so davá sys Lija. I phendiá Lavanoske: “So da tu kerdián mánca? Ci na pal Rahiliate me dynarindjom túte? Pal so tu xohadian man?” Laváno phendiá: “Naštý adiáke te kerás pe amaró štéto, sob (kaj) tyknedyršona čha te otdas paloróm angledýr phuredyršonatyr; dživ kurko adaliasa; paló davá me dáva túke i odolja, pal dynaribén, savó tu javésa te dynarines nevéstyr javír eftá berš.” Jakovo adiáke i kerdiá, i dživdiá kurko adaliasa. I Laváno dyjá Rahilia, peskirjá čha, léske dre romniáte. I Laváno dyjá peskirjá dynárica (slugica) Vala péskire čhake Rahiliake. Jakovo zagijá i ke Rahíl', i jov kamdiá butýr Rahilia, syr Lija; i sys jov dynarisa léste javír eftá (bitrinéngiro deš) berš. Kiéli Devél dykhciá, so jov drieván na kamdiá Lija, to otčhakirdiá láke ločoví (utroba), a Rahíl' sys bičhavorengiri. Lija pharija i bijandiá čhavés, i dyjá léske lav: Ruvimo, pal-dová so joj phendiá: “O Raj Devél dykhciá miro pharó džiibén, akaná javéla miro rom te kamel man.” I javír mólo joj iaciá pharí, i bijandiá čhavés, i phendiá: “O Raj Devél šundiá, so man rom na kaméla, i dyjá mánge javirés.” I dyjá léske lav: Simieono (Siemjono). I tríto mólo jaciá pharí, i bijandiá čhavés, i phendiá: “Akaná priphandelape ke me miro rom; pal-dová so me bijandjom léske trinen čhavén.” Kodoléske tritoneske dynó lav: Liévijo. I štárto mólo jaciá pharí, i bijandiá čhavés, i phendiá: “Akaná me barjakirava slavása Ras-Devlés.” Paldavá dyjá léske lav: Juda. I pirijaciá te bijanél. I dykhciá Rahíl', so joj na bijanéla čhavén Jakovóske, i Rahíl' dyjá jakhalo péskire pheniake, i phendiá Jakovóske: “De mánge čhavén; a kóli na adiáke, to me meráva.” Jakovo xoliásyja pe Rahiliate i phendiá: “So me som Devél, Savó na dyjá túke čhavén?” Joj phendiá: Ĥáda, isyn mirí dynárica Vala; zadžá ke joi; mek joj te bijanél pe miré čangá, sob (kaj) i mánde te javél látyr čhavé.” I dyjá joj Vala, peskirjá dynarka léske romniása; i zagijá ke joj Jakovo. Vala jaciá pharí, i bijandiá Jakovóske čhavés. I Rahíl' phendiá: “Obsendindia man Devél, i šundiá mirí zan (glos), i dyjá mánge čhavés.” Paldavá dyjá léske lav: Dano. I nevéstyr jaciá pharí i bijandiá Vala, Rahiliakiri dynárica, javire čhavés Jakovóske. I Rahíl' phendiá: “Baré zorjása me probindjom zorja péskire pheniasa i pirizorjakirdjom la.” I dyjá léske lav: Niefalimo. Lija dykhciá, so joj pirijaciá te bijanél, i lyjá peskirjá dynarka Ziel'fa, i dyjá la Jakovóske romniása. I Ziél'fa, Lijakiri dynárica, bijandiá Jakovóske čhavés. I Lija phendiá: “Jaciá butýr.” I dyjá léske lav: Gado. I Lijakiri dynárica Ziél'fa bijandiá javire čhavés Jakovóske. I phendiá Lija: “Baht mánge; paldavá javéna te kharén man džuvliá “bahtaliasa.” I dyjá léske lav: Asiro. Ruvimo gijá dro dová časo, kiéli ukedenas maró feldatyr, i lathiá mandragorytka phabá pe félda, i jandiá len péskire dáke Lijake. I Rahíl' phendiá Lijake: “De mánge tyré čhavéskire mandragory.” Ne joj phendiá láke: “Naúšto nauhtylla (nádosi) túke dová, so tu zakedyjan miré romes, so tu kamésa te zakedes i mandragory miré čhavéskire?” Rahíl' phendiá: “Adiáke mek jov te pasjol daja rat túsa, pal tyré-čhavéskire mandragory.” Jakovo javdiá bel'velié feldatyr, i Lija vygijá gil (pe strieč) léske, i phendiá: “Zadžá ke me; pal-dová so me tut kindjom pal miré-čhavéskire mandragory.” I pasijá jov lása dre daja rat. I šundiá Devél Lija, i joj iaciá pharí, i bijandiá Jakovóske pandžtone čhavés. I phendiá Lija: “Devél dyjá mánge pale, pal-dová so me dyjom peskirjá dynárica péskire romeske.” I dyjá léske lav: Isaharo. I nevéstyr Lija jaciá pharí, i bijandiá Jakovóske šovtone čhavés. I phendiá Lija: “Devél mánge dyjá naj fedýr mištypén; akaná javéla te dživél mánde miro rom, pal-dová so me bijandjom léske šoven čhavén.” I dyjá léske lav: Zavulono. Korigedýr (pozžedýr) joj bijandiá čha: i dyjá láke lav: Dina. I lyjá te priripirel Devél pal Rahiliate, i šundiá la Devél, i otčhakirdiá lákiri ločoví (per). Joj iaciá pharí, i bijandiá čhavés, i phendiá: “Devél zlyjá mirí ladž.” I dyjá léske lav: Iosifo (Joza) i phendiá: “Raj Devél déla mánge i javirés čhavés.” Korigedýr (pozžedýr) doléstyr, syr Rahíl' bijandiá Iosifos (Jozas), Jakovo phendiá Lavanoske: “Mek man, i me džáva pe péskiro štéto i pe péskiri phuv; otdé miré romnién i čhavén, pal savénde me dynarindjom túke, i me džáva; pal-dová so tu džinésa mirí butý, saví me kerdjom túke.” I phendiá Laváno léske: “Kóli me te lathav láska angíl tyré jakhá, me lyjom pe jakh, so pal túte Raj Devél bahtiakirdiá man.” I phendiá: “Phen, kicý te pleskirav, i me dáva.” I phendiá Jakovo léske: “Tu džinésa, syr me dynarindjom túke, i savé jačné tyré kherítka murdalá angíl mánde; pal-dová so nábut sys kherítka murdalá túte angíl mánde, a akaná jaciá but; Raj Devél bahtiakirdiá tut miré javibnasa; kiéli me javáva te keráv butý vaš péskiro kher?” I phendiá Laváno: “So te dav túke?” Jakovo phendiá: “Na de mánge ničí. Kóli jekh mánge kerésa, so me phenáva, tedy me nevéstyr javáva te čaravav i te rakhav tyré bakrén. Me adadyvés prodžava pir saró tyré-bakrengiro ĥurto (stada); otle léndyr raznone krapinkenca i piatnenca skoto, saró kaló skoto bakriendyr, adiáke-pac' piatnenca i krapinkenca buzniéndyr (kozendyr). Dasavo skoto javéla mánge syr mazúri (nagrada). I javéla te rakirél pal mánde angíl túte miro čačipén dro časo, savó javéla, tu javésa te dykhés pe mazúri (nagráda) mirí. Kažno buzniéndyr na krapinkenca i na piatnenca, i bakriendyr, savé isyn nakale, davá javéla sýrby čordo mánde.” Laváno phendiá: “Mištó, mek te javél pir tyró lav.” I otlyja dro dová dyvés buznen krapinkenca i piatnenca, i sarén buznien krapinkenca i piatnenca, pe savénde sys vari-kicý parnypen, i sarén kalen bakrén, i otdyjá len pe péskire-čhavéngire vastá; i sykadiá dlengipén maškír péste i Jakovoste pe triné-dyvesýtko drom. Jakovo rakhciá Lavanoskiro tyknó skoto, savó jaciápe. Jakovo lyjá jale (sviaža) topoljoskire randjorja mindaljostyr i javorostyr, i vyčhindia pe lénde parné dromore, zlyjá ke parnypen kora (čalka), saví sys pe randjorja, i čhudiá randjorja vyčhinybnasa angíl skoto dre panitka čaraibnytka (koryty), karik skoto javélas te p'jél, i kaj javi te pjol, pharjolas angíl randjorja. I pharjolas skoto angíl randiá, i bijandjolas (lotjolas) skoto riabo, i krapinkenca, i piatnenca. I otlyja Jakovo bakrorén i čhudiá mósa skoto ke riabo i ke saró kaló Lavanoskiro skoto; i rikirdia péskire ĥurty (stády) dre rig, i na čhudiá khetané len Lavanoskire skotosa. Kažno mólo, kiéli pharjolas zoraló skoto, Jakovo čhuvelas randjorja dre čaraibnytka (koryty) angíl skotoskire jakhá, sob (kaj) jov te pharjol angíl randjorja. A kiéli pharjolas nazoralo skoto, tedy jov na čhudiá. I Lavanoske jačelaspe nazoralo skoto, a zoraló Jakovóske. I kerdiápe davá manúš drieván barvaló, i sys léste but tykné kherítka murdalá (tyknó skoto), i dynaricen, i dynar'jén, i vierbliuden, i oslen. I šundiá Jakovo Lavanoskire-čhavéngire lavá, savé rakirdé: “Jakovo lyjá péske saró, so sys amareste dadéste, i amaré-dadéskire mištypnástyr kerdiá saró davá barvalypén.” I Jakovo dykhciá Lavanoskiro muj, i ĥáda, jov na sys dasavo ke jov, syr sys tasiá. I Raj Devél phendiá Jakovóske: “Risjov pe tyré-dadengiri phuv, kaj tu bijandyjan; i Me javáva túsa.” I bičhadiá Jakovo, i khardiá Rahilia i Lija pe félda, ke péskiri tykné-kheritkoné-murdalengiri stada, i phendiá lénge: “Me dykháva tumaré-dadéskiro muj, so jov ke me isyn na dasavo, syr sys tasiá; ne miré-dadéskiro Devél sys mánca; tumé džinéna kokoré, so me saré zorjátyr dynarindjom tumaré dadéske, a tumaró dad xohadia man i deš móly piriparudia mirí mazúri (nagrada). Ne Devél na dyjá léske te kerél čoripén mánge.” Kiéli jov phendiá: ‘So kherítka murdalá (skoto) krapinkenca javéla túke dre mazúri,’ tedy saró skoto lyjá te bijandjol krapinkenca. A kiéli jov phendiá: “Riaba javéna túke dre mazúri, tedy saró skoto bijandiá riaba.” I Devél otlyja tumaré dadéstyr skoto, i dyjá mánge. Jekhvar dre dasavo časo, kiéli skoto pharjola, me poddykhcjom, i dykhcjom dro sunó, i ĥáda, buzne (kozly), ĥazdynépe pe buzniénde, riaba krapinkenca i piatnenca. Devléskiro Jangólo phendiá mánge dro sunó: “Jakovo!” Me phendjom: “Ĥáda, me som.” Jov phendiá: “Gazde tyré jakhá i podykh: saré buzne, savé ĥazdynépe pe skoto, riaba krapinkenca i piatnenca, paldavá Me saró dykháva, so Laváno keréla túsa; Me som Devél, Savó sykadyjá túke dro Viefíljo, kaj tu čhudián jeliejo (olivítko dzet) pe ripiribnytko stýlbo (pomniko), i kaj tu Mánge dyján lav; akaná, uštý, vydža dalé phuvjátyr i risjov pe tyrí phuv, kaj tu bijandyjan.” Rahíl' i Lija phendlé dro otphenybén léske: “Ci isyn vari-saví paš ci meknó mištypén aménge dro amaré-dadéskiro kher? Ci na pal peskirende jov amen ginéla? Pal-dová so jov bikindia amen, i prohaia amaró rup; pir saró barvalypén, savó otlyja Devél amaré dadéstyr, isyn amaró i amaré čhavéngire, i adiáke saró ker, so Devél phendiá túke.” Tén'ci uštyjá Jakovo, čhudiá pe vierbliudende péskire čhavén i romnién, i lyjá pésa saró péskiro barvalypén i saró péskiro skoto, savó jov doresciá, léskiro barvalypén, savó jov lyjá péske dre Miesopotamija, sob (kaj) te džal ke Isaáko, péskiro dad, pe Xanaanóskiri phuv. I syr Laváno gijá te podčhinel péskiro tyknó skoto (bakrén), tedy Rahíl' čordia ídoly, savé sys lákire dadéste. Jakovo čordia Lavanostyr Aramejaninoste iló, pal-dová so jov na phendiá léske, so džála. I gijá jov léstyr sarésa, so léste sys; i uštyi, pirigija reka (len') i gijá ke bérga Galaádo. Pe tríto dyvés Lavanoske phendlé, so Jakovo gijá léstyr. Tedy jov lyjá pésa sarén peskiren semencen, i tradyjape pal léste eftá dyvesá, i dotradyja les pe bérga Galaádo. I Devél javdiá ke Aramejanino Laváno ratý dro sunó, i phendiá léske: “Rakhpe, na rákir Jakovóske ni lačhipén, ni čoripén.” I dotradyja Laváno Jakovós; a Jakovo čhudiá péskiri šátra pe bérga, i Laváno čhudiá šátra péskire semencasa pe bérga Galaádo. I Laváno phendiá Jakovóske: “So tu kerdián? Vaš so tu xohadian man i lydžijan pésa miré čhajén, syr pliennonen, savén léna kurtalása. Sóske tu čorahanés nastian, i ĥaradyjan mándyr, i na phendián mánge? Me otmekavas tut skamindesa i gilienca, timpanosa i guslienca; tu na dyján mánge te čamudav péskire ŭnuken i čhajén; na god'vares tu kerdián. Isyn dre miro vast zor te keráv tuménge čoripén; ne tyré-dadéskiro Devél tasiá rakirdiá ke me i phendiá: ‘Rakhpe, na rákir Jakovóske ni lačhipén, ni čoripén.’ Ne mek tu gíian mándyr, pal-dová so tu drieván zakamdian te javes dre tyré-dadéskiro kher: palsó tu čordian miré devloré?” Jakovo otphendiá Lavanoske i phendiá: “Me darandyjom (dardjompe), me dumindjom, sob (kaj) tu te na otles péskire čhajén mándyr, konéste tu lathesa tyrén devloré, odová na javéla džidó. Angíl amarí seménca phučpe, so mánde isyn, i le péske.” Jakovo na džindiá, so Rahíl' len čordia. I psirdiá Laváno dre Jakovoskiri šátra, i dre Lijakiri šátra, i dre dujé-dynaricengiri šátra, ne na lathiá. I vygijá Lijakire šatratyr, zagijá dre Rahiliakiri šátra. Rahíl' lyjá idolen, i čhudiá len tel vierbliudoskiri zen (sidjolka), i bestiá pe lénde. I Laváno obrodyja sarí šátra, ne na lathiá len. Joj phendiá péskire dadéske: “Mek te na xoliasol miro xulái, so me naštý (na moginav) angíl túte te uštav; pal-dová so mánde isyn džuvlitko.” I jov rodyja, ne na lathiá ídoly. Jakovo xoliásyja, i lyjá te košelpe Lavanosa. I lyjá Jakovo te rakirél, i phendiá Lavanoske: “Saví isyn mirí bang, savó isyn miro grého, so tu tradesape pal mánde? tu piridykhcian mánde saró, so tu lathian saréstyr, so isyn tyré kheréstyr? Sykáv adáj angíl miré semencate i tyrende; mek jone te rossendiakiren amen dujén. Ĥáda, biš berš me sómas ke tu; bakré i buzne (kozly) tyré na vyčhurdyne; tyré gurtostyr (stadatyr) bakrén me na xajom; zahanes, ci rozriskirde riskiribnáskire murdalesa (zvierjosa) me ke tu na jandjom; davá sys by mirí uriéža (ubytko); tu mándyr rodesas, ci dyvesé so xasjolas, ci ratiákiro; me menčyndjompe dyvesé xačkiribnastyr, a ratý šylypnastyr; i soiben miro našelas miré jakhéndyr. Dasavé miré biš berš sys dro tyró kher. Me dynarindjom túke dešuštar berš pal tyré dujénde čhajénde i šov berš pal tyré kheritkoné murdalénde; a tu deš móly parudian mirí mazúri (nagrada). Kóli te na javél mánca miré-dadéskiro Devél, Avraamóskiro Devél i Isaakoskiri dar; to tu akaná man nisosa otmekesas. Devél dykhciá miro pharó džiibén i miré-vastengiri pharí butý ke pritasaiben; i sykadiá tyrí bang pal mánde.” I otphendiá Laváno i phendiá Jakovóske: “E čhaja – miré čhaja; čhavé – miré čhavé; skoto – miro skoto, i saró, so tu dykhésa, davá isyn miro: ci saštý (mogináva) me akaná vari-so te keráv miré čhajénca i léngire čhavénca, savén jone bijandle? Akaná kerása dorakiribén pal ramánjo (miro) me i tu, i davá javéla dophenybnasa maškír mánde i túte.” I lyjá Jakovo bar, i čhudiá les dro ripiribnytko stýlbo (pomniko). I phendiá Jakovo péskire semencake: “Keden bará.” Jone lyné bará, i kerdé bérgica; i xané odój pe bérgica. I khardiá les Laváno: Iiegar-Sagadufa [Jegar-Sagaduta-ju.o.]; a Jakovo khardiá les Galaádo [Gal'-Edo-ju.o.]. I phendiá Laváno: “Adadyvés daja bérgica maškír mánde i túte isyn sýrby jakhítko (svidietieljo). Paldavá i léske dynó lav: Galaádo, adiáke-pac' kharélape: Micpa, doléstyr, so phendiá Laváno: “Mek te dykhél Raj Devél pe mánde i pe túte, kiéli ame javása dur jekh jekhestyr. Kóli tu javésa fujes te kerés miré čhajenca, cji, kóli tu lésa (te les tu) butýr miré čhajendyr javire romnien, usajékh kóli nane manušés maškír aménde, ne dykh, Devél isyn jakhítko maškír mánde i túte.” I phendiá Laváno Jakovóske: “Ĥáda, isyn daja bérgica i, ĥáda, isyn ripiribnytko stýlbo, savó me čhudjom maškír mánde i túte; daja bérgica isyn jakhítko, i davá ripiribnytko stýlbo (pomniko) isyn jakhítko, so ni me na piridžava ke tu pal daja bérgica, ni tu na piridžasa ke me pal daja bérgica i pal davá ripiribnytko stýlbo, vaš čoripén. Avraamóskiro i Nahoroskiro Devél, mek te javél sendarisa maškír aménde, léngire-dadéskiro Devél.” Jakovo sovlahadiá péskire dadéskire Isaakoskire darása. I začhindiá i jandiá Jakovo svénto dyibén (žértva) pe bérga, i khardiá péskire semencen te xan maró; i jone xané maró i rat'kirde pe bérgica. I Laváno uštyjá tasiárles pe zlóko (rankosa) i čamudia péskire ŭnuken i čhajén, i bahtiakirdiá len, i gijá, i risijá Laváno pe péskiro štéto. I gijá Jakovo péskire dromésa, i pirilyne les Devléskire Jangóly. Jakovo dykhciá len, i phendiá: “Davá isyn Devléskiro taboro (lod).” I dyjá lav dolé štetoske: Mahanaimo. I bičhadiá Jakovo angíl péste manušén ke péskiro pšal Isávo pe Sieiroskiri phuv, pe Edómo štéto, i priphendiá lénge, rakirí: “Adiáke phenén miré xuláske Isavoske: ‘Ĥáda, so rakiréla tyró pishári Jakovo: Me dživdjom Lavanoste, i dživdjom péske davá časo, i isyn mánde guruva i osly (miegárja) i tyknó skoto (bakré), pisharicy (rabyni) i pishárja (raby); i me bičhadjom manušés te phenél pal mánde miré xuláske, sob (kaj) te lathav láska angíl tyré jakhá.’” I manušá, savé sys bičhadé te phenén, risiné ke Jakovo, i phendlé: “Ame psirdiam ke tyró pšal Isávo; jov džála muial ke tu (pe strieč), i lésa isyn štaršelá manušá.” Jakovo drieván strahadyja i pyjá dre dar, i manušén, savé sys lésa, jov roskerdiá pe paš, i tyknó i baró skoto i vierbliuden, pe duj tabuny. I phendiá: “Kóli Isávo peréla maribnása pe jekh tabuno i les rozmarla, tedy palatunó (posliednjo) tabuno saštý (moginéla) te zrakhelpe.” Jakovo phendiá: “Miré dadéskiro Avraamóskiro Devél i Devél miré dadéskiro Isaakoskiro, Rajo Dévla, Savó phendiá mánge: “Risjon pe tyrí phuv, kaj tu bijandyjan, i Me javáva te pomoginav túke! Me na som mol saró lačhipén i tangipén, savé Tu kerdián Tyré pisharíske; pal-dová so me miré khijasa pirigijom davá Iordáno; a akaná mánde isyn duj tabuny. Zrákh man miré-pšaléskire vastéstyr, Isavóskire vastéstyr, pal-dová so me darava léstyr, sob (kaj) jov, syr javéla, te na zamarél man i da lákire čhavorenca.” Tu phendián: “Me javáva te dav vast (te pomoginav) túke, i tyré – čhavéngiro ródo keráva, syr morjoskiro (derjavéskiro) práho, savó te na gines, pal-dová, so les but.” I dre daja rat Jakovo rat'kirdia odój. I lyjá doléstyr, so léste sys, dro počastunko Isavoske, péskire pšaléske: dujšelá buznien (kozen), biš buznen (kozlen), dujšelá bakrien, biš bakrén, trijánda vierbliudicen, savé došenape, léngire khurorenca štardešá gurumnien, deš guruvén, biš oslicen, deš oslen. I péskire pishar'jénge jov dyjá dre vastá kažno stada peskirenca (rozdiél'nes), i phendiá péskire dynar'jénge: “Džán angíl mánde, i jačkiren štéto stadatyr ke stada.” I priphendiá anglatuneske, i phendiá: “Kiéli miro pšal Isávo dykhelape túsa i phučela tútyr, rakirí: “Konéskiro tu san?” i “Karik džása?” i “Konéskiri isyn daja stada angíl túte?”, to tu phen: ‘Tyré-pishariskiro Jakovóskiro, davá isyn počastunko, bičhadó miré xuláske Isavoske; ĥáda, i jov kokoró isyn pal aménde’. Dová-pac' jov priphendiá i javireske i tritoneske, i sarénge, savé giné pal stády, rakirí: “Adiáke phenén Isavoske, kiéli dykhenape lésa; i phenén: ‘Ĥáda, i tyró pishári Jakovo džála pal aménde’. Paldavá jov phendiá kokoró dre péste: ‘Kovliakirava me les počastunkenca (darenca), savé džána angíl mánde; i korigedýr (pozže) dykháva léskiro muj; saštý (moginéla) te javél, so jov priléla man.’” I giné počastúnki angíl léste; a jov doiá rat rat'kirdia dro taboro / lod (stáno). I uštyjá jov dre doiá rat, i lyjá dujén péskire romnién, i dujén péskire pisharicen, i peskiren dešujékh čhavén, pirigija pir paní Javoko brodosa. I lyjá len, i pirilydžija pir thadypen panieskiro, i saró, so léste sys. I jaciápe Jakovo jekhdžinó. I sprobinelas zorja Vari-Kon lésa, paka lyjá te šerinelpe dyvés; i odová Vari-Kon, dykhí, so Jov na léla upralypén pe Jakovoste, čiladiá léskiri ĥerój, kaj isyn stjogno (stac') i dukhadia Jakovoskiri ĥerjakiri phabaj (sustavo), kiéli Jakovo sprobinelas zorja Lésa. I phendiá: “Otmek Man; pal-dová so jaciá zlokico.” O Jakovo phendiá: “Na otmekáva Tut, angíl dová, syr Tu bahtiakiresa man.” I phendiá: “Syr isyn tyró lav?” Jov phendiá: “Jakovo.” I phendiá: “Akaná lav túke javéla na Jakovo, a Izrailjo; pal-dová so tu sprobindian zorja Devlésa, i tu manušén pirizorjakiresa.” I Jakovo phuciá léstyr, rakirí: “Phen Tyró lav, me mangáva.” Ne Jov phendiá: “Vaš so tu phučesa pal Miro lav?” I bahtiakirdiá les odój. I dyjá Jakovo dolé štetoske lav: Pienuelo [Peni-El'-ju.o.], pal-dová so rakirdiá jov: “Me dykhcjompe Devlésa muj ke muj, i zrakhciape miro džiibén.” I uštyjá kham, kiéli jov džálas pašýl Pienuelo; i langandyja jov pe péskiro stjogno. Paldavá i akaná Izrailjoskire čhavé na xána žyly, savé isyn pe phabaj (sustavo) stjognoskiri, pal-dová so, Kon sprobindia zorja, čiladiá žyly pe Jakovóskiro stjogno dre phabaj. Ĥazdyja Jakovo jakhá, i dykhciá, i, ĥáda, džála Isávo, i lésa štaršelá manušá. I jov roskerdiá pe paš Lijakiren čhavén, Rahiliakiren i dujén dynaricakiren (slugicengiren). I čhudiá dynaricakiren i léngire čhavén angíl, Lija i lákire čhavén palál pal lénde, a Rahilia i Jozas (Iosifos) palál. A kokoró gijá angíl lénde, i kerdiá šerésa (klonindiape) ke phuv eftá (bitrinéngiro deš) móly, podgií ke péskiro pšal. Isávo prastándyja ke jov gil (pe strieč), i oblyja les, i pyjá léske pe men, i čamudia les, i jone rondlé. I dykhciá Isávo i dykhciá romnién i čhavén, i phendiá: “Kon isyn adalé túte?” Jakovo phendiá: “Čhavé, savén Devél dyjá tyré pisharíske.” I podginé dynaricy i léngire čhavé, i kerdé šerésa ke phuv; podgíia i Lija i lákire čhavé, i kerdé šerésa ke phuv. I pe kónco (pe jagóro) podginé Joza (Iosifo) i Rahíl', i kerdé šerésa ke phuv. I phendiá Isávo: “Vaš so túke davá célo taboro (lod), savó me strenindjom?” I phendiá Jakovo: “Sob (kaj) te javél tangipén i láska dre miré-raskire jakhá.” O Isávo phendiá: “Míro pšála, mánde isyn but; mek te javél tyró túte.” Jakovo phendiá: “Nad, kóli vaš mánge isyn (te javél) láska dre tyré jakhá, prilé miro počastunko (dáro) miré vastéstyr; pal-dová so me dykhcjom muj tyró sýrby vari-kon dykhciá Devléskiro muj, i tu ilésa sánas ke me; prilé miro bahtiakiribén, savó me jandjom túke; pal-dová so Devél dyjá mánge, i mánde isyn saró.” I mangdiá les: i odová lyjá počastunko. I phendiá: “Ĥazdasape ame dro drom i džása; i me angíl túte džáva.” Jakovo phendiá léske: “Miro raj džinéla, so čhavoré isyn nazorale (zlomka), a kherítka murdalá (skoto) déna ciucia (thud) léngire tyknenge; kóli te trades les jekh dyvés, tedy muljola saró skoto; mek miro raj te džal angíl péskire pishariste, a me džáva pe nábut, syr džála skoto, savó isyn angíl mánde, i syr džána čhavé, i me javáva dro Sieiro ke miro xulái.” I phendiá Isávo: “Me mekava vari-kicý manušén túsa, savé isyn pašýl mánde.” Jakovo ž phendiá: “Ke so davá? Mánge jekh trej te javél láska dre miré-raskire jakhá!” I risijá Isávo dre dová-pac' dyvés péskire dromésa dro Sieiro. A Jakovo gijá dro Sokhofo [Sukkot-ju.o.] i čhudiá péske kher, i vaš péskire kheritkoné murdalénde (skoto) kerdiá šátry. Odoléstyr jov dyjá dolé štetoske lav: Sokhofo. Jakovo, risii Miesopotamijatyr, bahtales javdiá dre fóro Sihiémo, savó isyn pe Xanaanóskiri phuv, i terdijá angíl fóro. I jov kindia paš félda, pe saví čhudiá péskiri šátra, Jemoroskire čhavéndyr, Sihiemoskire dadéstyr, pal šel ĥaspria (moniety). I odój čhudiá altárjo; i prikhardia jov lav Ráskire-Devléskiro (Jahvaskiro) Izrailjoskire Devléskiro [El' – Elohie – Israel'-ju.o.] Lijakiri čhaj Dina, savjá joj bijandiá Jakovóske, gijá javrí te dykhél pe phuvjákire čhajende. I dykhciá la o Sihiémo [Šehiem-ju.o.], Jevejaninoskire (Xevijanoskire)-Jemoroskiro čhavó, dolé-phuvjákire thagariskiro (kniazjoskiro) čhavó, i lyjá la, i sutia lása, i kerdiá davá pir zor. I prijacia léskiro iló ke Dina, Jakovoskiri čhaj, i jov kamdiá čha, i rakirdiá pir iló čhake. I phendiá Sihiémo Jemoroske, péskire dadéske, rakirí: “De mánge adalia čha dre romniáte.” Jakovo šundiá, so Jemoroskiro čhavó lyjá pe zor Dina, leskirja čha; ne syr léskire čhavé sys kheritkoné murdalénca (skotosa) pe félda, tedy Jakovo sys štyl, paka javné jone. Vygijá Jemoro, Sihiemoskiro dad, ke Jakovo, te rakirél lésa. Čhavé Jakovóskire javné feldatyr, i kiéli šundlé davá, tedy xoliasyne odolé muršá, i dre xolý zahačine, pal-dová so jov kerdiá ladž Izrailjoske: pirisutia Jakovóskire čhasa: a adiáke na treindiá te kerél. Jemoro jaciá te rakirél lénge i phendiá: “Sihiémo, miro čhavó, priphandiape ilésa ke tumarí čhaj; den la léske dre romniáte; iavén semencasa aménge; otdén paloróm pal aménde tumaren čhajén; i amaré čhajén len péske, i dživén aménca; daja phuv isyn angíl tuménde, dživén i kerén butý i kofy pe láte, i javén xulanca pe phuv dre láte.” Sihiémo phendiá lákire dadéske i pšalénge: “Mánge te lathav láska dre tumaré jakhá, me dáva, so phenéna mánge; phenén naj baredýr vieno (vykinybén) i dáry, me dáva, so mánge phenéna, otdén mánge čha dre romniáte.” I otphendlé Jakovóskire čhavé Sihiemoske i Jemoroske, léskire dadéske mendripnasa; a rakirdé jone adiáke pal-dová so jov kerdiá napatyvales Dinasa, léngire pheniasa; i phendlé lénge: “Ame naštý (na moginasa) davá te kerás, te otdas paloróm amarja pheniá pal manušéste, savó isyn naobčhindlo, davá isyn vaš aménge ladž; pe jekh dorakiribén ame javása te zdžasape tuménca, kóli tumé javéna, syr ame sam i tuménde saré muršá javéna občhindlé; i javása te otdas paloróm pal tuménde amaré čhajén i te las pal péste tumaré čhajén, i javása te dživás tuménca, i javása jekh manušýtko nacyja; a kóli tumé na kandéna dro davá amen, sob (kaj) te občhinenpe, tedy ame lása peskirjá čha i džása péske.” I sys pir iló dalé lavá Jemoroske i Sihiemoske, Jemoroskire čhavéske. Ternó manúš sýges kerdiá davá: pal-dová so kamdiá Jakovoskirja čha. A jov butýr saréndyr sys dre patýv péskire-dadéskire kheréstyr. I javdiá Jemoro i léskiro čhavó Sihiémo, ke péskire-foróskiri pórta (vráty), i lyné te rakirén péskire foróskire manušénge, i phendlé: “Adalé manušá isyn dro ramánjo (miro) aménca; mek jone te dživén pe phuv i te kerén kofy (pribyli) pe láte; ĥáda, phuv isyn čhučí angíl lénde. Javása te las léngire čhajén péske paloróm, i amaré čhajén te otdas pal lénde. Féni (tóka) jekh dorakiribén jone javéna dre jekh godý aménca, sob (kaj) i aménde te javén saré muršá občhindlé, syr jone isyn občhindlé, tedy adalé manušá javéna te dživén aménca i javéna jekh manušýtko nacyja (narodo). Ci na vaš aménge léngire stády, i léngiro barvalypén, i kažno léngiro murdál? Jekh trej, – te zdžaspe lénca dre godý i javéna te dživén aménca.” I kandyné Jemoros i léskire čhavés Sihiemos, saré, savé vydžána léskire foróskire portatyr; i občhindlé sys muršá, – saré, kon vydžála dalé-foróskire portatyr. Pe tríto dyvés, kiéli jone sys dro nasvalypen, duj Jakovóskire čhavé, Simieono (Siemjono) i Liévijo, Dinakire pšála, kažno lyjá péskiri kurtála, i bi darákiro pyné maribnása pe fóro, i zamardé sarén muršén; kokores Jemoros i léskire čhavés Sihiemos, zamardé kurtalakire vostrimasa; i lyné Sihemoskire kheréstyr Dina i giné krig. Jakovóskire čhavé javné ke zamardé manušá, i obkedyne fóro, pal-dová, so jone kerdé napatyvalypen léngire pheniake. Jone lyné léngiro tykné i baré kheritone murdalén (skoto), i léngire oslen, i so sys dro fóro, i so sys pe félda; i saró léngiro barvalypén, i sarén léngire čhavén, i léngire romnién lyné dro pliéno, i zakedyne saró, so sys dre kherá. I phendiá Jakovo Simieonoske (Siemjonoske) i Lievijoske: “Tumé mánge kerdé pharipén, kerdé man vergosa vaš odolé-phuvjákire manušénge, vaš Xananiejénge i Fierieziejénge. Mánde manušá isyn nábut; skedénape pe mánde, zamarna man, i javáva me xasiakirdo i miro kher javéla.” Jone phendlé: “A syr saštý sys te kerén napatyvales amaré pheniasa, syr biladžakuné džuvliása!” I phendiá Devél Jakovóske: “Uštý, džá dre Viefil' [Bet-El'-ju.o.], i dživ odój; i ker odój Devléske altárjo (žertvieniko), Savó javdiá ke tu, kiéli tu nastian Isavostyr, tyré pšalestyr.” Jakovo phendiá péskire kheréske [sem'iake-ju.o.] i sarénge, kon lésa sys: “Čhurdén krig čužoné devloré, savé isyn tuménde, i vyžužakirenpe, i paruven tumaré ídi; uštasa i džása dre Viefil'; odój me keráva altárjo Devléske, Savó šundiá man dro dová dyvés, kiéli mánge sys bibáht i Jov sys mánca dre drom, savésa me psirdjom.” I otdyné Jakovóske sarén čužoné devloré, savé sys dre léngire vastá; čenia, savé sys dre léngire kaná, i zaĥanadia Jakovo len tel dembo, savó sys pašýl Sihiémo. I giné jone. I trašaibén Devléskiro sys pe pašatyne fórja, i na tradynepe pal Jakovóskire čhavénde. I javdiá Jakovo dro Luzo, so isyn pe Xanaanóskiri phuv, dre Viefil', kokoró i saré manušá, savé sys lésa, i kerdiá odój altárjo, i khardiá dová štéto: El'-Viefil', pal-dová so adáj sykadyjá Devél léske, kiéli jov našelas péskire pšalestyr. I myjá Dievora (Debora), saví čaradia Rievieka, i garadé la teledýr Viefiljostyr tel dembo, savó i khardiá Jakovo rovibnytkoné dembósa (Allon-Bahut). I sykadyjá Jakovóske Devél, syr jov risijá Miesopotamijatyr, i bahtiakirdiá les, i phendiá Devél léske: “Tyró lav isyn Jakovo; akaná tu na javésa te kharespe Jakovosa, ne javéla túke lav Izrailjo.” I dyjá léske lav: Izrailjo [Israel'-ju.o.]. I phendiá léske Devél: “Me som Sarezorjákiro Devél; mek te bijandjon čhavoré túte i jačen but tumen, o narodo, i but manušýtka nácyi (narody) vydžána tútyr, i králja vydžána tútyr; phuv, saví Me dyjom Avraamóske i Isaakóske, Me dáva túke, i tyré-čhavéngire rodóske Me dáva daja phuv.” I ĥazdyjápe léstyr Devél štetóstyr, pe savó rakirdiá léske. I čhudiá Jakovo ripiribnytko stýlbo (pomniko) pe štéto, pe savó rakirdiá léske Devél, baruno ripiribnytko stýlbo; i čhudiá pe léste thaduno svénto dyibén, i čhudiá pe léste jeliejo (olivítko dzet); i dyjá Jakovo lav štetoske, pe savó Devél rakirdiá léske: Viefil'. I giné jone péske Viefiljostyr. I kiéli jaciápe nádur ke Jefrafa, to Rahíl' bijandiá, i lákiro bijanypén sys pharó. Kiéli joj menčindiape dro bijanypén, phuri, saví prilesas bijanypén, phendiá láke: “Na andyrša, pal-dová so i davá javéla túke čhavó.” I kiéli vydžálas látyr di, pal-dová so joj merelas; joj dyjá léske lav: Bienoni. Ne léskiro dad khardiá les Vieniamino. I Rahíl' myjá, i ĥaradé la pe drom dre Jefrafa, davá isyn Vifliejémo. Jakovo ža pe lákiri koplíca čhudiá naĥrobniko. Davá nagrobniko Rahiliake isyn ke davá dyvés. I gijá Izrailjo, čhudiá péskiri šátra pal vučardý (bašnia) Gadero (Edero). Dro davá-pac' časo, kiéli Izrailjo sys dre doiá rig, Ruvimo gijá i pirisutia Valasa, péskire dadéskire bi-sovlahakire džuvliása. I šundiá Izrailjo. Jakovoste sys dešudúj čhavé. Lijakire čhavé sys: anglatunó Jakovóskiro Ruvimo, pal léste Simieono (Siemjono), Liévijo, Juda, Isaharo i Zavulono. Rahiliakire čhavé sys: Iosifo (Joza) i Vieniamino. Valakire čhavé sys: Rahiliakire dynaricakire: Dano i Niefalimo. Zielfakire čhavé sys: Lijakire dynaricakire: Gado i Asiro. Adalé čhavé Jakovóskire, savé bijándyne ke Miesopotamija. I javdiá Jakovo ke péskiro dad Isaáko, dre Mamrie, dre Kiríaf-Arba, dro Xievróno, kaj psirdé Avraámo i Isaáko. I dživdiá péske Isaáko šel te eftadešá berš. I pirijaciá te dyhinel (te phurdel) Isaáko, i myjá, i pričhudiape ke péskire manušá, dre phuré beršá; i ĥaradé les léskire čhavé Isávo i Jakovo. Ĥáda, isyn Isavoskiro ródo, jov khardiape Edómo. Isávo lyjá péske romnién Xanaanoskire čhajéndyr: Ada Oliviema, Jelonoskire-Xietejaninoskire čha, i Oliviema, Anakirja čha, Cyvieonoskire-Jevejaninoskire čhavéskire, i Vasiemafa, Izmailoskirja čha, Navaiofoskirja pheniá. Ada bijandiá Isavoske Jelifazos, Vasiemafa bijandiá Raguilos, E Oliviéma bijandiá Jeusos, Jeglomos i Koriejos. Adalé sys Isavóskire čhavé, savé bijándyne pe Xanaanóskiri phuv. I lyjá Isávo peskiren romnién, čhavén i čhajén, i péskire kheréskire sarén manušén, i saré péskire stády (kheritkoné murdalén), i saró skoto, i saró péskiro mištypén, savó jov doresciá pe Xanaanóskiri phuv, i gijá pe javír phuv, péskire pšalestyr Jakovostyr, pal-dová so léngiro barvalypén sys dasavo baró, so jone na mogindlé te dživén khetané, i phuv, pir saví jone lodyne, sys čúžo, i na uhtylelas (na sys dósi) lénge, pir baré léngire stády. I jaciá te dživél Isávo pe bérga Sieiro, Isávo, jov adiáke-pac' khardiape Edómo (Jedomo). I, ĥáda, Isavoskiro ródo, Idumiejengire-dadéskiro, pe bérga Sieiro. Ĥáda, sys Isavóskire-čhavéngire lavá: Jelifazo, Adakiro čhavó, Isavóskire romniakire, i Raguilo, Vasiemafakiro čhavó, Isavóskire-romniakire. Jelifazoste sys čhavé: Fiemano, Omaro, Cefo, Gafamo i Kienazo. Famná sys Jelifazoskiri bi-sovlakiri džuvlý, Isavóskire-čhaveskiri, i bijandiá Jelifazoske Amalikos. Ĥáda, sys čhavé Adakire, Isavóskire-romniakire. I, ĥáda, sys Raguiloskire čhavé: Nahafo i Zieraho, Šamma i Miza. Adalé sys Vasiemafakire čhavé, Isavóskire-romniakire. I adalé sys čhavé Oliviemakire, Anakire-čhakire, Cyvieonoskire čhakire, Isavóskire-romniakire: joj bijandiá Isavoske Jeusos, Jeglomas i Koriejos. Ĥáda, sys barydyrá Isavóskire čhavéndyr, Jelifazoskire čhavé, Isavóskire anglatuneskire: barydyró Fiemano, barydyró Omaro, barydyró Cefo, barydyró Kienazo, barydyró Koriéjo, barydyró Gafamo, barydyró Amaliko. Adalé sys Jelifazoskire barydyrá pe Edomoskiri phuv; adalé sys Adakire čhavé. Adalé sys Raguiloskire čhavé, Isavóskire-čhavéskire: barydyró Nahajo, barydyró Zieraho, barydyró Šamma, barydyró Miza. Adalé sys barydyrá Raguiloskire pe Edomoskiri phuv; adalé sys Vasiemafakire čhavé, Isavóskire romniakire. Adalé sys Oliviemakire čhavé, Isavóskire romniakire: barydyró Iieuso, barydyró Iieglomo (Jeglomo), barydyró Koriéjo. Adalé sys Oliviemakire barydyrá, Anakire čhakire, Isavóskire romniakire. Ĥáda, sys Isavóskire čhavé, i, ĥáda, léngire barydyrá. Davá-pac' isyn, so isyn Edomostyr. Adalé sys Sieirakire-Xorejaninoskire čhavé, savé dživdé pe daja phuv: Lotano, Šovalo, Cyvieono, Ana, Dišono, Ecero i Dišano. Adalé sys barydyrá Xoriejéndyr, Sieiroskire čhavéndyr, pe Edomoskiri phuv. Lotanoskire čhavé sys: Xori i Giemano; a phen Lotanoste sys: Famna. Adalé sys Šovaloskire čhavé: Alvano, Manahafo, Evalo, Šefo i Onamo. Adalé sys Cyvieonoskire čhavé: Aiá i Aná. Davá sys odová Ana, savó lathiá tato paní pe čhučí phuv, kiéli rakhciá péskire dadéskire Cyvieonoskire oslen. Adalé sys Anaskire čhavé: Dišono i Oliviema, Anaskiri čhaj. Adalé sys Dišonoskire čhavé: Xiemdano, Ešbano, Ifrano i Xierano. Adalé sys Eceroskire čhavé: Bilgano, Zaavano i Akano. Adalé sys Dišanoskire čhavé: Uco i Arano. Adalé sys barydyrá Xoriejendyr: barydyró Lotano, barydyró Šovalo, barydyró Cyvieono, barydyró Ana. Barydyró Dišono, barydyró Ecero, barydyró Dišano. Ĥáda, sys barydyrá Xoriejéngire, pir léngiri barydyršyma pe Sieiroskiri phuv. Ĥáda, akaná králja, savé sys pe Edomoskiri phuv, angledýr, syr sys králja te xulainen pe Izrailjoskire čhavénde: sys kralísa dro Edómo o Bela, Vieoroskiro čhavó, a lav dolé foroske sys Dingava. I myjá Bela, i jaciá paló léste kralísa Iovavo, Zerahoskiro čhavó, Vosoratyr. I myjá Iovavo, i jaciá paló léste kralísa Xušamo, Fiemanitijakire phuvjátyr. I myjá Xušamo, i jaciá paló léste kralísa Gadado, Biedadoskiro čhavó, savó pyjá meribnasa pe Madianitianende pe Moavoskiri félda, léskire-foróskiro lav sys Avifo. I myjá Gadado, i jaciá paló léste kralísa Samlá Masriekijatyr. I myjá Samla, i jaciá paló léste kralísa Sáulo Riehovofostyr, so sys pašýl reka (len'). I myjá Sáulo, i jaciá paló léste kralísa Baal-Xanano, Ahboroskiro čhavó. I myjá Baal-Xanano, Ahboroskiro čhavó, i jaciá paló léste kralísa Gadaro; léskire foróskiro lav sys Pau; léskire-romniakiro lav sys Miegietaviejel' [Mietabiel'-ju.o.], Matriedakiri čhaj, Miezagavoskire-čhaveskiri. Adalé sys lavá Isavóskire barydyrengire, pir léngire kherítka ródy (pliémi), pir léngire štéty, pir léngire lavá: barydyró Fimná, barydyró Alvá, barydyró Jetiefiejo, barydyró Olimiefá, barydyró Elá, barydyró Pinono, barydyró Kienazo, barydyró Fiemano, barydyró Mivcaro, barydyró Magdiilo, barydyró Iramo. Ĥáda, sys Idumiejengire (Edomoskire) barydyrá, pir léngire štéty, pe léngiri phuv, pe saví jone dživdé. Ĥáda, isyn Isávo, savó sys Idumiejengiro dad. Jakovo dživdiá pe Xanaanóskiri phuv péskire dadéskiri, kaj jov sys čúžo manúš. Ĥáda, isyn Jakovóskiro džiibén. Jozáske (Iosifoske) sys dešuefta berš, jov rakhciá gurty kheritkoné murdalénca khetané pšalénca, péskire dadéskire romniéngire, Valakire i Ziel'fakire čhavénca. I rosphenelas Joza (Iosifo) nalačhi mavlýn (malva) pal lénde léskire dadéske. Izrailjoske Joza sys pir iló butýr saréndyr péskire čhavéndyr, pal-dová so jov sys léskire phuripnaskiro čhavó, – i jov kerdiá léske cviatytko uribén. I dykhné léskire pšála, so léngiro dad ĥazdéla les butýr léskire saréndyr pšaléndyr; i lyné te na dykhén pe léste laskasa, i na mogindlé te rakirén lésa ilytkes. I dykhciá (dyjá) Joza suné, i rosphendiá les péskire pšalénge; i jone butýr lyné les te na vyrikiren. Jov phendiá lénge: “Šunén sunó, savó me dykhcjom: Ĥáda, ame maškirál félda phandasa ĥarby (snopy); i ĥáda, miro ĥarbo uštyjá, i terdijá mamúj (rovnes); i ĥáda, tumaré ĥarby terdiné pašýl, i klonindlepe miréske ĥarboske.” I phendlé léskire pšála léske: “Naúšto tu javésa tu xulaines aménca? Ci naúšto tu, čačes, javésa te raines pe aménde?” I butedýr lyné te na vyrikiren les pal léskire suné i lavá. I dykhciá jov javír suné, i rosphendiá les péskire pšalénge, rakirí: “Ĥáda, me dykhcjom iščo (inké) sunó: ĥáda, kham, i čhon, i dešujékh čergeniá kloninenape mánge.” I jov rosphendiá péskire dadéske i pšalénge; i koscia les léskiro dad, i phendiá léske: “So da za suné, savé tu dykhcián? Naúšto me, i tyrí daj, i tyré pšála javása te kerás šerésa túke ke phuv?” Pšale léskire dénas jakhalo léske, a léskiro dad zaripirdia davá lav. Léskire pšála giné te rakhén ĥurty kheritkoné murdalénca, péskire dadéskire dro Sihiemo. I phendiá Izrailjo Jozáske: “Ci na čaravena pšála tyré dro Sihiemo? Džá, me bičhaváva tut ke jone.” Jov otphendiá léske: “Ĥáda, me som.” I phendiá léske: “Džá, podykh, ci saste isyn tyré pšála, i ci saré kherítka murdalá (skoto) isyn, i jan otphenybén mánge.” I bičhadiá les Xievronoskire dolostyr; i jov javdiá dro Sihiemo. I lathiá les vari-savó manúš, psiri pe félda, i phuciá léstyr odová manúš, rakirí: “So tu rodesa?” Jov phendiá: “Me rodava miré pšalén; phen mánge, kaj jone čaravena péskire ĥurty? I odová manúš phendiá: “Jone giné adathýr, pal-dová so me šundjom, syr jone rakirdé: ‘Javén dro Dofano.’ I gijá Joza pal péskire pšalénde, i lathiá len dro Dofano. I dykhné les jone durál, angledýr syr jov podgíia ke jone, i lyné te duminen fuipén pe léste, sob (kaj) te zamarén les. I phendlé jekh jekhéske: “Ĥáda, džála odová, savó dykhéla suné! Javén, akaná, i zamarasa les, i čhurdasa les dre vari-saví ĥanbín (rovo/hohói), i phenása, so riskiribnáskiro murdál (zvierjo) xaja les; i dykhasa, so javéla léskire sunendyr.” I šundiá davá Ruvimo, i zrakhciá les léngire vasténdyr, phení: “Na muliakirasa les.” I phendiá lénge Ruvimo: “Na pročhuven rat, a čhurdén les dre ĥanbín (rovo/hohói), saví isyn pe čhučí phuv, a vastá na čhuvén pe léste.” Davá rakirdiá jov, sob (kaj) te zrakhél les léngire vasténdyr i te riskirél les ke léskiro dad. Kiéli Joza javdiá ke péskire pšála, jone tyrdyne krig Jozastyr léskiro uribén, cviatytko psikitko (nakidka), saví sys pe léste, i lyné les i čhurdyné dre ĥanbín; daja ĥanbín sys čhučí, paní dre láte na sys. I jone bešné te xan maró, i, dykhné, ĥáda, džálas Galaadostyr karavano Izmail'tianengiro, léngire vierbliudy lydžánas stiraksa (aromaty), bal'zamo i ladano: džánas jone te lydžán davá dro Jegípto. Juda phendiá péskire pšalénge: “Savó lačhipén javéla, kóli ame zamarasa amaré pšalés i garavasa léskiro rat? Javén, biknasa les Izmail'tianenge, a amaré vastá mek te na javén pe léste; pal-dová so jov isyn amaró pšal, loč (plot') amarí.” Pšála les kandyné. Tén'ci, kiéli džánas Madiamoskire kúpcy (tylgárja), jone tyrdyne Jozas javrí ĥanbiniatyr, ĥazdyné les i bikindle Jozas Izmail'tianenge pal biš rupuvé; a jone lydžiné Jozas dro Jegípto. Ruvimo nevéstyr javdiá ke ĥanbín; i ĥáda, nane Jozas dre ĥanbín. I roskostia jov péskire ídi, i risijá ke péskire pšála, i phendiá: “Terné-beršengires nane, a me karik keravape?” I lyné Jozaskiri ídia, i zamardé buznés (kozlos), i makhne ídia ratésa; i počhude i cviatytko psikitko, i jandlé ke péskiro dad, i phendlé: “Ame lathiam davá; podykh, ci tyreskire-čhaveskiri daja ídia, ci nad.” Jov ĥalyjá la, i phendiá: “Daja isyn ídia miré čhaveskiri, janúro (xiščno zviérjo) xaja les; čačó, Joza sys riskirdo pe koterá.” I roskostia Jakovo péskire ídi, i čhudiá balytko gonó praskasa pe péskire pašvare, i obrovelas jov but dyvesá péskire čhavés. I skedynépe saré léskire čhavé i čhaja, sob (kaj) te štyliakiren les; ne jov na kamdiá, sob (kaj) te podrikiren les, i phendiá: “Obrovibnasa džáva me ke miro čhavó dro liúno (pe dová svéto).” Adiáke rovelas léskiro dad pal léste. Madianitiani bikindle les dro Jegípto Potifaroske, faraonóskire barydyréske, savó sys raj pe stregar'jénde (stražnikende). I adiáke sys dre dová časo (cýro): o Juda gijá krig péskire pšaléndyr, i jaciá te dživél pašýl jekhéste Odolamitianinoste, saveskiro lav sys Xirá. I dykhciá odój Juda jekha-Xananejaninoskirja čha, savjákiro lav sys Šúa, i lyjá la, i zagijá ke joi. Joj zapharija, i bijandiá čhavés; i jov dyjá léske lav: Iro. I javír mólo zapharija, i bijandiá čhavés, i jov dyjá léske lav: Onano. I tríto mólo bijandiá čhavés, i dyjá léske lav: Šelá. Juda sys ke Xiezivo, kiéli joj bijandiá les. I lyjá Juda romniá Iroske, anglatuné péskire čhavéske; lav lákiro sys Famár'. Anglatunó Judáskiro Iro, na sys lačhó Devléske, i Devél les muliakirdiá. I phendiá Juda Onanoske: “Zadžá ke tyré-pšaleskiri romný, le la paloróm syr diévirjo (salo), i čhuv pale, tyré-pšaleskiro ródo.” Onano džindiá, so ródo na javéla léske, i, paldavá, kiéli jov džálas ke léskire-pšaleskiri romný, to vyčhuvelas sal (siemjo) pe phuv, sob (kaj) te na del ródo léskire pšaléske.” Davá sys xolý angíl Raste-Devléste, pal dová so jov kerdiá; i Jov muliakirdiá i les. I phendiá Juda Famarjáke, péskire borjake: “Dživ pivliása (udovasa) dre tyré-dadéskiro kher, paka (angíl dová, syr) podbarjola miro čhavó Šelá.” Pal-dová so jov phendiá: “Te na merél i jov adiáke-pac', syr myné léskire pšála.” Famar' gijá i lyjá te dživél dre péskire-dadéskiro kher. Progijá (nakhcia) but časo, i myjá Šuoskiri čhaj, Judaskiri romný. Juda štylyi, gijá dre Famna ke manúš, savó občhinela výlna pe léskire bakrende, kokoró i léskiro drúgo (mal) Xira, Odolamitianino. I phendlé Famarjake: “Ĥáda, tyró sastro džála dre Famna, te občhinel výlna pe péskire kheritkoné murdalénde (bakrende).” I zlyjá joj péstyr pivliakiro (udovakiro) uribén, učhakirdiá pes cergicasa, i začhakirdiape, besciá pašýl Jenaimoskiri pórta (vráty), so sys pe drom dre Famna. Paldavá so joj dykhciá, so Šelá vybarija, i joj na sys dyný léske dre romniáte. I dykhciá la Juda, i gindia la pal biladžakuné džuvliáte, pal-dová so joj učhakirdiá péskiro muj. Jov podgíia ke joi, i phendiá: “Te zadžav me ke tu.” Pal-dová so jov na džindiá, so joj sys léskiri bori. Joj phendiá: “So tu désa mánge, kóli zadžasa ke me?” Jov phendiá: “Me bičhaváva túke buznores (kozljonkos) stadatyr.” Joj phendiá: “Ci désa tu mánge symadý (zalogo), paka bičhavesa?” Jov phendiá: “Saví symadý te dav túke?” Joj phendiá: “Tyrí angrusty čergonorjasa (piečatka), i tyrí kustýk, i tyró destó (trost'), savó isyn dro tyró vast.” I dyjá jov láke, i zagijá ke joi; i joj iaciá pharí léstyr. I, uštyjá, i gijá joi, zlyjá péstyr cergica, i uridiape dre péskire-pivliakiri (udovakiri) ídia. E Juda bičhadiá buznores (kozljonkos) pir péskire maleste Odolamitianinoste, sob (kaj) te lel symadý (zalogo) džuvliakire vasténdyr, ne jov na lathiá la. I phuciá odolé štetoskire manušéndyr: “Kaj isyn biladžakuny džuvlý, saví sys dro Jenaimo pašýl drom?” Ne jone phendlé: “Adái, na sys biladžakuny džuvlý.” I risijá jov ke Juda, i phendiá: “Me na lathjom la; i manušá dolé štetoskire phendlé: “Adái, na sys biladžakuny džuvlý.” Juda phendiá: “Mek joj te lel len péske, sob (kaj) manušá te na len te sanpe améndyr; ĥáda, me bičhadjom dales buznores; ne tu na lathian la.” Progijá (nakhcia) pašýl trin čhoná, i phendlé Judáske: “Famar', tyrí bori, zagijá dro bléndo, i ĥáda, joj isyn peraly blendostyr.” Juda phendiá: “Vylydžan la, i mek joj te javél shačkirdy.” Ne kiéli lydžiné la, joj bičhadiá te phenén lákire sastreske: “Me jacjom peraly odoléstyr, koneskire isyn dalé priedmiety.” I phendiá: “Phenén te džinén, konéskiri daja antrusty černorjasa (piečatka), i kustýk i destó (trost').” Juda pridžindia priedmiety, i phendiá: “Joj isyn čačunedyr mándyr, pal-dová so me na dyjom la Šelaske, miré čhavéske.” I jov na džinelas la butýr. I kiéli jej bijanelas, to jaciá džindló, so blizniaty (dujore) sys dre lákiri ločoví (utroba). I kiéli joj bijanelas, to sykadyjá vast, i lyjá phuri, saví babinelas, i priphandia léske pe vast loló thav, phendiá: “Adavá vygijá angledýr.” Ne jov riskirdiá péskiro vast; i ĥáda, vygijá léskiro pšal. I joj phendiá: “Syr tu skedyjan péske zor te vydžas? I dynó léske lav: Fariéso. Paló davá vygijá léskiro pšal lolé thavinasa pe vast. I dynó léske lav: Zara [Zarah-ju.o.]. Jozas (Iosifos) lydžiné dro Jegípto, i kindia les Izmail'tianengire vasténdyr, savé jandlé les odorík, o Potifaro Jegiptianino, Faraonóskiro barydyró pe stregar'jénde. I sys Raj Devél Jozasa: jov sys bahtaló dre réndy (diély), i dživdiá dro péskire-xulaskiro Jegiptianinoskiro kher. I léskiro xuláj dykhciá, so lésa sys Raj Devél, i so sareske, so jov keréla, Raj Devél dre léskire vastá déla baht. I lathiá Joza dre léskire jakhá láska, i dynarindiá léske. I o Potifaro čhudiá les dykhibnaskiresa (nadziratieljosa) pe péskiro kher, i saró, so sys léste, jov otdyjá dre léskire vastá. I dolé dyveséndyr, syr jov les čhudiá pe péskiro kher i pe saró, so sys léste, Raj Devél bahtiakirdiá Jegiptianinoskiro kher vaš Jozáske, i sys Ráskire-Devléskiro bahtiakiribén pe saró, so sys léste dro kher i pe félda. I jačkirdiá jov saró, so sys léste, dre Jozáskire vastá; i na džindiá pal léste ničí, apríč maró, savó jov xaja. Joza sys šukár stemása (stanósa) i mósa. I sys adiáke pal dolé réndy, so lyjá te dykhél pe Jozaste léskire-xulaskiri džuvlý (romný), i phendiá: “Pasjov mánca.” Ne jov otphendiape, i phendiá péskire xuláskire romniake: “Ĥáda, miro xuláj na džinéla pal mánde ničí dro kher, i saró, so sys léste, otdyjá dre miré vastá; nane baredýr mándyr dro davá kher; i jov dyjá zor mánge pe saró, apríč túte, pal-dová so tu san léske romný; syr me keráva davá baró fuipén i javáva grehítko angíl Devléste?” Kiéli adiáke joj kažno dyvés rakirdiá Jozáske, a jov la na kandyjá, sob (kaj) te pasjol lása i te javél lása, to vygijá so dro jekh dyvés, so jov zagijá dro kher te kerél péskiro réndo, a kheritkonendyr adáj dro kher nikón na sys; joj uhtyldia les pal léskiro uribén i phendiá: “Pasjov mánca.” Ne jov, jačkirdiá léskiro uribén dre lákire vastá, poprastandyja, i nastiá javrí. Joi, dykhí, so jov jačkirdiá léskiro uribén dre lákire vastá i nastiá javrí, khardiá péskire kheritkonen, i phendiá lénge adiáke: “Dykhén, jov jandiá ke ame adalé Judos te salpe améndyr. Jov javdiá ke me, sob (kaj) te pasjol mánca, ne me zadyjom gódla, i jov, syr šundiá, so me ĥazdyjom ĥodla, jačkirdiá mánde léskiro uribén, i prastándyja, i nastiá javrí.” I joj iačkirdiá léskiro uribén péste ke léskire xulaskiro javiben dro péskiro kher. I rosphendiá léske dolé-pac' lavá: “O pishári Judo, savés tu jandian ke ame, sys javi ke me te salpe mándyr. Ne, kiéli me ĥazdyjom ĥodla, to jov jačkirdiá mánde léskiro uribén i nastiá javrí.” Kiéli léskiro xuláj šundiá péskire-romniakire lavá, savé joj phendiá léske: “Adiáke kerdiá tyró pishári mánge”, jov zahačíia xoliása; i lyjá Jozas léskiro xulái, i otdyjá les dre bešyben, kaj bešté sys kralískire bešybnarja. I jov odój sys dro bešyben. Ne Raj Devél sys Jozasa, i dyjá ke jov tangipén, i dyjá léske láska dre jakhá bešybnaskire barydyr (fandaríske). I otdyjá fandari dre vastá Jozáske sarén bešybnar'jen, savé sys dro bešyben (štaribén), i dro saró, so jone odój na kerdé, jov sys xuláj pe lénde. O fandari i ne dykhciá ni pal či, so sys léste dre vastá, pal-dová so Raj Devél sys Jozasa, i dre saró, so jov kerdiá, Raj Devél délas baht léske. I sys adiáke pale dolé réndy, so Jegiptóskire-kralískiro barydyró vinočerpijo (kučikari) i barydyró xliebodaro (pekaibnari) jačné bangé angíl péskire xulaste, Jegiptóskire kralíste. I rosholiasyja faraóno pe dujende péskire kralískire barydyrende, pe vinočierpijoste (kučikariste) i pe xliebodaroste (pekaibnariste), i otdyjá len dre kica (tiemnica) stregar'jéngire ráske, dro bešyben, dro štéto, kaj sys beštó Joza. Raj stregar'jéngiro čhudiá ke jone Jozas, i jov dynarindiá lénge. I sys jone tel rakhibnar'jénde vari-kicý časo. Jekhvar Jegiptóskire-kralískire kučikári i pekaibnári, savé sys zaphandle dro bešyben, dykhné suné, kažno péskiro sunó, dujénge dre jekh rat, kažnonéske sunó péskire značynybnasa. I javdiá ke jone Joza pe zlóko (ránko), dykhciá len, i ĥáda, jone strahádyne péske. I phuciá jov faraonóskire barydyrendyr, savé sys lésa dre kica (tiemnica) xulaskiri, rakirí: “Sóske adadyvés tuménde isyn smutna (smentna) muiá?” Jone phendlé léske: “Ame dykhciam suné; a te piriphenen len nane konéske.” O Joza phendiá lénge: “Ci davá isyn na Devléstyr isyn piriphenyben (značinyben)? Rosphenén len mánge.” I rosphendiá barydyr kučikari péskiro sunó Jozáske, i phendiá léske: “Me dykhcjom suné, ĥáda, vinagradoskiro (drakhákiro) xrústo sys angíl mánde; pe xrústo sys trin randiá. Jov rozbarijape, sykadyjá pe léste luludí (cveto), vybarine i vyspieindle pe léste múri; i faraonóskiro tahtáj sys mánde dro vast; me lyjom múri, vytasadjom len dro faraonóskiro tahtáj (čaša), i podyjom faraonóske tahtáj dre vastá.” I phendiá léske Joza: “Ĥáda, isyn léskiro značinyben: trin randiá – dalé isyn trin dyvesá; pir trin dyvesá faraóno ĥazdéla tyró šeró, i riskiréla tut pe tyró štéto, i tu podesa faraonóske dro léskiro vast tahtáj (čaša), syr ĥaredyr, kiéli tu i sánas léste kučikarisa, priripir man, kiéli šukár javéla túke, i, me mangáva tut, ker mánge lačhó réndo, i phen pal mánde faraonóske, i vylydža man dalé kheréstyr, pal-dová so man čorde Judéngire phuvjátyr; adiáke-pac' i adáj ničí na kerdjom, pal so te čhurdén man dro bešyben.” Barydyró pekaibnari dykhciá, so piriphendia jov lačhés, i phendiá Jozáske: “Me adiáke-pac' dykhcjom suné: ĥáda, pe šeró mánde sys trin korzíny (khudé); dre upratuno khudo sys liubo faraonóskiro xabén, so kerdiá manúš, savó pekela; i čirikliá kliuindle les khudestyr pe miro šeró.” I phendiá Joza: “Ĥáda, léskiro značynyben: trin khudé – dalé isyn trin dyvesá, pir trin dyvesá faraóno léla krig tyró šeró tútyr, i ublavela tut pe kašt (drévo), i čirikliá javéna te kliuinen tyró mas tútyr.” Pe tríto dyvés, savó sys faraonóskiro bijanypnytko dyvés, kerdiá jov svénko vaš sarénge péskire dynar'jénge (slugenge), i priripirdia pal barydyršone kučikariste (vinočierpijoste) i pekaibnariste (xliebodaroste), maškír péskire dynar'jende; i riskirdiá barydyršone kučikaris pe léskiro štéto, i jov podyja tahtáj faraonóske dro vast, a barydyršone pekaibnaris ubladia, syr piriphendia o Joza lénge. I na priripirdia kučikari pal Jozaste, ne bistyrdia les. Syr gijá duj berš o faraóno dykhciá suné: ĥáda, jov sys terdó pašýl reka (len'); i ĥáda, vyginé rekátyr (leniátyr) eftá (bitrinéngiro deš) gurumnia, lačhé i masune, i čaradepe pe trostnikitko čar (triščyna). Tén'ci, ake, paló lénde vyginé rekátyr (leniátyr) javír eftá gurumnia, šuké, i terdiné pašýl dolé gurumniénde, pe brégo reka (len'); i shane šuké gurumnia eftá (eftane) gurumnién lačhen i thulen. I uštyjá faraóno, i zasutia nevéstyr, i dykhciá suné javír: ĥáda, pe jekh ĥerój (stiebljo) ĥazdynépe eftá kolosy (givlinia) zoralé i lačhé; ne ĥáda, paló (poslie) lénde vybarine eftá kolosy, sane i sys vyšut'kirde vastočnone balvaliasa; i shane sane kolosy (givlinia) eftá zoralé i pherdé kolosy. I uštyjá faraóno, i ĥalyjá, so davá sys sunó. I sys adiáke: zlokosa (pe ránko) pyjá léskiro dúho (fáno), i bičhadiá jov, i khardiá sarén Jegiptóskire magén (čovahanen) i sarén léskire tanukén (mudriecen), i rosphendiá lénge faraóno péskiro sunó; ne nikón na sys, kon by te piriphenel les faraonóske. I lyjá te rakirél barydyr kučikari faraonóske, i phendiá: “Grehi miré priripirava me adadyvés; syr faraóno xoliásyja pe péskire pishar'jende, i otdyjá man i barydyršone pekaibnaris (xliebodaros) tel rakhibnar'jende dro kher, kaj stregar'jéngiro raj; i dre jekh rat jov i ame dykhciam suné, i dro kažno sunó sys javír značynyben. I sys odój aménca ternó Judo, pishári stregar'jengire ráske; ame rosphendiam léske amaré suné, i jov aménge kažnonéske piriphendia; i syr jov rosphandia značynyben aménge, adiáke i sys: me som riskirdo pe miro štéto, a odová sys ublado.” I bičhadiá faraóno, i khardiá Jozas (Iosifos). I sýges lydžiné javrí les bešybnastyr. Jov podčhindiape i muradiape i parudia péskiri ídia, javdiá ke faraóno. Faraóno phendiá Jozáske: “Me dykhcjom suné, i nane nikonés te piriphenel les, a pal túte me šundjom, so tu džinésa te piriphenes suné.” I phendiá Joza faraonóske: “Davá saró isyn na miro; Devél déla otphenybén dro lačhipén faraonóske.” I phendiá faraóno Jozáske: “Me dykhcjom suné: ĥáda, terdó me som pe brégo rekakiro (leniakiro); i ĥáda, vyginé rekátyr (leniátyr) eftá gurumnia, thule i lačhé, i čaradepe dre trostnikitko čar; ne ĥáda, paló lénde vyginé eftá javír gurumnia, šuké, vydycjonas syr nasvale, drieván nalačhé pir masá; me na dykhcjom pe sarí Jegiptóskiri phuv dasaven šuken, syr jone sys; i shane šuké gurumnia anglatunen thulen gurumnién; i zaginé thule dro léngiro per, ne na sys bicialó, so jone zaginé dro léngiro per: jone sys adiáke-pac' šuké, syr i angledýr. I me uštyjom. I me dykhcjom javír suné: “Ĥáda, pe jekh rand' ĥazdynépe eftá kolosy (givlinia), pherdé i lačhé; ne ĥáda, paló lénde vybarine eftá kolosy (givlinia) sane, i sys vyšut'kirde vastočnone balvaliasa; i shane sane kolosy (givlinia) eftá lačhé kolosy (givlinia). Me rosphendjom davá magenge (čovahanenge), ne nikón na mogindiá (na dyjá ráda) te piriphenel mánge.” I phendiá Joza (Iosifo) faraonóske: “Sunó faraonóskiro isyn jekh: so Devél keréla, to dová Jov sykavéla faraonóske: eftá lačhé gurumnia, davá isyn eftá berš; i eftá lačhé kolosy, davá isyn eftá berš: sunó jekh; i eftá šuké gurumnia, savé vyginé paló dolende, davá eftá berš, adiáke-pac' i eftá sane kolosy, so sys vyšut'kirde vastočnone balvaliasa, adalé eftá berš-bokh. Ĥáda, sóske me phendjom faraonóske: so Devél keréla, dová Jov sykadiá faraonóske. Ĥáda, javéna eftá berš, so pir sarí Jegiptóskiri phuv javéla saró but; ne paló lénde javéna eftá berš bokh, i bistrelape saró dová, so sys pe Jegiptóskiri phuv but, i bokh bogakirela phuv, i bicialó na javéla anglatunó butypen (dostatko), so sys pe phuv, pirdál bokh, saví javéla, pal-dová so joj iavéla drieván pharí. A dová, so sunó dykhciá faraóno duj móly, davá isyn, so davá Devléskiro lav isyn čačunó, i so syg Devél keréla davá. I paldavá akaná, mek te vykedel faraóno muršés god'vares i godes, i mek te čhuvél les pe Jegiptóskiri phuv. Mek te priphenel faraóno te čhuvén pe phuv dykhibnaskiren (nadziratielien), i te skedén dre eftá barvalé beršá, kiéli javéna, pándžto paš Jegiptóskire phuvjátyr; mek jone te len kažno maró dalé-lačhengire beršengiro, kiéli jone javéna, i skedéna dre fórja maró vaš xabén tel faraonóskiro džinybén, i mek te rakhén; i javéla davá xabén te pasjol vaš phuv pe eftatone-bokhakire beršá, savé javéna pe Jegiptóskiri phuv, sob (kaj) phuv te na xasjol bokhátyr.” Davá sys pir iló faraonóske i sarénge léskire dynar'jénge. I phendiá faraóno péskire dynar'jénge: “Ci lathasa ame adasaves, syr jov isyn, manušés, dre savéste te javél Devléskiro Dúho (Fáno)?” I phendiá faraóno Jozáske (Iosifoske): “Adiáke syr Devél otčhakirdiá túke saró davá, i nane adasaves god'vares i godes, syr tu san; to tu javésa pe miro kher, i tyré lavéske javéna te rikirenpe saré miré manušá; jekhe priestolosa (tronosa) me javáva baredýr tútyr.” I phendiá faraóno Jozáske: “Ĥáda, me čhuváva tut pe sarí Jegiptóskiri phuv.” I zlyjá faraóno péskire vastéstyr angrusty čergenorjasa (piečatka), i uridia la pe Jozaskiro vast; uridia les dre visonytko ídia, čhudiá léske pe men suvnakuný zandirori (cepočka); i phendiá te lydžán les pe javír péskire maribnytkoné vurdenendyr (koliesnicendyr) i te den gódla angíl léste: “Bangiakiren čang”! I čhudiá les pe sarí Jegiptóskiri phuv. I phendiá faraóno Jozáske: “Me som faraóno, i bi-tyré laveskiro nikón na ĥazdéla ni péskiro vast, ni ĥerój, pe sarí Jegiptóskiri phuv.” I dyjá faraóno Jozáske lav: Cafnaf-Panieaho [Cafnat-Panieah-ju.o.]; i dyjá léske dre romniáte Asieniefa [Asienat-ju.o.], Potifaroskirja čha, Iliopol'skone (Gieliopoliskone) žriecoskirja. I gijá Joza pir sarí Jegiptóskiri phuv. E Jozáske bijanypnastyr sys trijánda berš, kiéli jov terdijá angíl faraonóskiro muj, Jegiptóskire kralíste. I gijá Joza faraonostyr, i gijá pir sarí Jegiptóskire phuv. Phuv dre dalé lačhé eftá berš janelas jekhe zjornostyr (ziarkatyr) pir burnyk (žmienia). I skedyjá jov eftá-beršengiro kažno maró, savé but bijandjonas pe Jegiptóskiri phuv, i čhudiá maró dre fórja; dre kažno fóro čhudiá feldakiro maró, savó sys pašýl léste. I skedyjá Joza drieván but maró, syr morjoskiro (derjavéskiro) práho adiáke, so pirijaciá te ginel, pal-dová so naštý sys te piriginel. Angíl bokhalé beršá Jozaste bijándyne duj čhavé, savén bijandiá Asieniefa, Potifaroskiri čhaj, Iliopol'skone-žriecoskiri. I dyjá lav Joza péskire anglatuné čhavéske: Manásija [Menašše-ju.o.], pal-dová so jov rakirdiá: “Devél dyjá mánge te bistrav saré bidy miré i saró miré-dadéskiro kher.” A javireske dyjá lav: Jefriémo, pal-dová so jov rakirdiá: “Devél man sozdyjá buté čhavorenca pe phuv, kaj man pritasavéna.” I proginé lačhé eftá beršá, savé sys pe Jegiptóskiri phuv, i jačné bokhalé eftá beršá, syr phendiá Joza. I pe saré phuvjá sys bokh; a pe sarí Jegiptóskiri phuv sys maró. Ne kiéli i sarí Jegiptóskiri phuv lyjá te bokhaljol, tedy manušá lyné te rakirén pal maró faraonóske. I phendiá faraóno sarénge Jegiptianenge: “Džán ke Joza (Iosifo), i kerén, so jov tuménge phenéla.” I sys pir sarí phuv bokh: i otkerdia Joza saré piraliá (žytnicy), i lyjá te biknel Jegiptianenge maró. Bokh jaciá baredýr pe Jegiptóskiri phuv. I saré rigéndyr javénas manušá dro Jegípto te kinen Jozastyr maró; pal-dová so bokh jačelas baredýr pir sarí phuv. I ĥalyjá Jakovo, so dro Jegípto isyn maró, i phendiá Jakovo péskire čhavénge: “So tumé san bešté i dykhéna?” I phendiá: “Ĥáda, me šundjom, so isyn maró dro Jegípto; džán odorík, i kinen aménge odothýr maró, sob (kaj) aménge te dživás i te na meras.” E deš Jozáskire pšála giné te kinen maró dro Jegípto, a Vieniaminos, Jozáskire pšalés, Jakovo na bičhadiá léskire pšalénca; pal-dová so phendiá: “Te na kerélpe lésa bída.” I javné Izrailjoskire čhavé te kinen maró, khetané javire manušénca, pal-dová so pe Xanaanóskiri phuv sys bokh. Joza sys raj pe doiá phuv; i jov biknelas maró saré phuvjákire manušénge. Jozáskire pšála javné, i kerdé šerésa (klonindlepe) ke phuv. I dykhciá Joza péskire pšalén, i ĥalyjá len; ne na sykadiá, so jov džinéla len, i rakirdiá lénca šylales, i phendiá lénge: “Katýr tumé javné? Jone phendlé: “Hanaanoskire phuvjátyr te kinas xabén.” O Joza ĥalyjá péskire pšalén, ne jone na ĥalyné les. I priripirdia Joza sunó, savó jov dykhciá pal lénde; i phendiá lénge: “Tumé san poddykhibnarja (špiony); tumé javné te vydykhen nazorale (zlomka) štéty dalé phuvjákire.” Jone phendlé léske: “Nad, xulájo amaró, tyré pishárja (raby) javné te kinen xabén; ame saré sam čhavé jekheskire manušéskire, ame sam manušá čačuné, tyré pishárja isyn na poddykhibnarja.” Jov phendiá lénge: “Nad, tumé javné te vydykhen nazorale štéty dalé phuvjákire.” Jone phendlé: “Ame, tyré pishárja, sam dešudúj pšála; ame sam jekhe-manušéskire čhavé pe Xanaanóskiri phuv, i, ĥáda, tyknedýr akaná isyn amaré dadésa, a jekhés na jaciá. I phendiá lénge Joza: “Davá-pac' me i rakirdjom tuménge, rakirí: tumé san poddykhibnarja; ĥáda, syr tumé javéna sprobindle: me sovlahava faraonóskire džiibnasa, tumé na vydžána adathýr, kóli na javéla adarík tumaró tyknedýr pšal; bičhaven tuméndyr jekhés, i mek jov te janel tumaré pšalés, a tumé javéna zarikirde; i otčhakirelape, ci isyn čačipén tuménde; i kóli nad, tedy sovlahava faraonóskire džiibnasa, so tumé san poddykhibnarja.” I otdyjá len stregar'jénge pe trin dyvesá. I phendiá lénge Joza pe tríto dyvés: “Ĥáda, so kerén, i tumé jačénape džidé; pal-dová so me darava Devléstyr: kóli tumé san čačuné manušá, tedy mek tuméndyr jekh pšal te javél dro kica (tiemnica), kaj tumé san bešté; a tumé džán, lydžán maró vaš bokh tumaré sem'iakiri. A tyknedyršone tumaré pšalés janén ke me, sob (kaj) te javén čačuné tumaré lavá, i, sob (kaj) tumé te na merén.” Adiáke jone kerdé. I rakirdé jone jekh jekhéske: “Čačunés amen sendiakirdia pharés Devél pal grého pal amaré pšaléste; ame dykhciam léskire iléskire mén'ki, kiéli jov mangdiá amen, ne ame na šundiám; pal-dová i jaciá aménge daja bída.” Ruvimo lénge phendiá: “Ci na rakirdjom me tuménge: ‘Na kerén grého proti terné manušéste?’ Ne tumé na kandyné; ĥáda, léskiro rat pal léskiro rat javéla bibáht.” A dová na džindlé jone, so Joza ĥaljola len; pal-dová so maškír lénde sys manúš, savó pirilydžalas (piričhuvelas). I otgijá léndyr, i zarondia. I risijá ke jone, i rakirdiá lénca, i lyjá léndyr Simieonos (Siemjonos), phandia les angíl léngire jakhá. O Joza priphendiá te čhuvén léngire goné marésa, a léngiro rup te riskirén kažnonéske (svakoneske) dro léskiro gonó, i te den lénge pésa pe drom. Adiáke i kerdó sys lénca. Jone čhudé maró pe péskire oslende i giné odothýr. I jekh léndyr otčhakirdiá péskiro gonó, sob (kaj) te del te xal pe rat péskire oslóske (miegaríske); i dykhciá dre péskiro gonó rup, i phendiá péskire pšalénge: “Rup miro otdynó pale; ĥáda, jov mánde isyn dro gonó.” I lyjá te marélpe zoralés léngiro iló, i jone rakirdé darása jekh jekhéske: “So davá Devél kerdiá aménca?” I javné ke Jakovo, péskiro dad, pe Xanaanóskiri phuv, i rosphendlé léske saró, so kerdiápe lénca: “Huláj dolé phuvjákiro rakirdiá aménca šylales, i prilyjá amen pal dolé-phuvjákire poddykhibnar'jende.” I phendiam ame léske: ‘Ame sam čačuné manušá; ame na sámas poddykhibnarja; ame sam dešudúj pšála, čhavé amaré dadéste; jekhés na jaciá, a tyknedýr pšal isyn akaná amaré dadésa pe Xanaanóskiri phuv.’ I phendiá aménge dolé-phuvjákiro xulái: “Ĥáda, syr me dodžinava, ci tumé san manušá čačuné: jačkiren mánde jekhés tumaré pšaléndyr; a tumé len maró vaš tumaré sem'iakiri bokh i džán, ianén ke me tumaré tyknedyršone pšalés; i me dodžinava, so tumé na san poddykhibnarja, ne manušá san čačuné; Me otdáva tumaré pšalés tuménge, i tumé saštý (moginéna) te dživén pe daja phuv.” Kiéli jone vyčhuvenas péskire goné, ĥáda, kažnonéste léskiro venzlo (pingljo) sys rupésa dro gonó. I dykhné jone péskire venzly rupésa, jone i léngiro dad, i strahádyne. I phendiá lénge léngiro dad Jakovo: “Tumé otlyne mándyr čhavén Jozas nane, i Simieonos (Siemjonos) nane, i Vieniaminos te len kaména, – saró davá pe mánde!” I phendiá Ruvimo péskire dadéske: “Zamar miré dujén čhavén, kóli me na janáva les ke tu; otdé les pe miré vastá; me janáva les túke.” Jov phendiá: “Na džála miro čhavó tuménca; pal-dová so léskiro pšal myjá, i jov jaciápe jekh. Kóli kerélape lésa bída pe drom, dro savó tumé džána, tedy lydžána tumé miré syva balá tugasa dro liúno (ado) [maĥilytko (koplíca)-ju.o.].” Bokh jaciá baredýr pe phuv. I kiéli jone xané saró maró, savó jandlé Jegiptóstyr, tedy léngiro dad phendiá lénge: “Džán nevéstyr, kinen aménge nábut xabén.” I phendiá léske Juda: “Odová manúš pharés prirakhcia amen: ‘Na javén ke me, kóli tumaró pšal na javéla tuménca’. Kóli bičhavesa aménca amaré pšalés, tedy džása i kinasa túke xabén, a kóli na bičhavesa, tedy na džása, pal-dová so odová manúš phendiá aménge: ‘Na javén ke me, kóli tumaró pšal na javéla tuménca’.” Izrailjo phendiá: “Vaš so tumé kerdé mánge dasaví xolý, so phendlé odoléske manušéske, so tuménde isyn pšal?” Jone phendlé: “Odová manúš phuciape pal aménde i pal amaró ródo, rakirdiá: ‘Ci džidó isyn tumaró dad? Ci isyn tuménde pšal?’ Ame i rosphendiam léske pir léskire phučibena. Ci mogindiam (saštyndiam) ame te džinas, so jov phenéla: ‘Janén tumaré pšalés?’ O Juda phendiá Izrailjoske, péskire dadéske: “Mek terné-beršengire manušés mánca, i ame uštasa i džása, i javása džidé i na merasa i ame, i tu, i amaré čhavé; me otphenava pal léste, miré vasténdyr phučesa les. Kóli me na janáva les ke tu, i na čhuváva les angíl tyró muj, tedy me jačavape angíl túte bangó dre saré džiibnáskire dyvesá; kóli ame te na tyrdasas časo, spsirasas by duj móly.” Léngiro dad, o Izrailjo, phendiá lénge: “Kóli adiáke, tedy, ĥáda, so kerén: len pésa dalé phuvjákire barjakirdé (plódy), i lydžán dro počastunko odoléske manušéske: vari-kicý bal'zamo i vari-kicý avgín (meda), aromaty i ladano, fistaški i mindalitka peĥendá (oriehi); len i javír rup dre tumaré vastá; a rup, savó pale čhudo dre tumaré goné, otdén pale tumaré vasténca: saštý (moginéla) te javél, davá jone na dodykhne; i len tumaré pšalés, i, uštén, džán nevéstyr ke odová manúš; O Devél, Sarezorjákiro, mek te del tuménge te lathén láska odolé manušéste, sob (kaj) jov te otmekél tumen i javirés tumaré pšalés i Vieniaminos, a mánge, kóli trej te javav bi čhavorengiro, tedy mek me jačavape bi čhavorengiro.” I odolé manušá lyné dalé počastúnki (dáry), i dre duj móly rup lyné dre péskire vastá, i Vieniaminos, uštyné, i giné dro Jegípto i javné ke Joza. O Joza, syr dykhciá maškír lénde Vieniaminos, to phendiá péskire kheréskire ráske: “Lýdža adalé manušén dro kher, i začhin vari-so masestyr, i keráv, pal-dová so dro paš-dyvés adalé manušá javéna mánca te xan.” I kerdiá odová manúš, syr phendiá o Joza, i odová manúš lydžijá kodolén manušén dro Jozaskiro kher. I manušá adalé strahádyne, so lydžiné len dro Jozaskiro kher, i phendlé: “Davá isyn pal rup, savó čhudo sys angledýr dre amaré goné, zalydžine amen, sob (kaj) te priphandenpe ke ame i te perén pe aménde, i te len amen dro pishariben (rabstvo) i te zamarén oslen.” I podginé jone ke Jozáskire-kheréskiro raj, i lyné te rakirén léske pašýl kheréskire vudará, i phendlé: “Šun, amaró rajo, angledýr sámas te kinas xabén, i kerdiápe, so kiéli ame javdiám te rat'kiras i otčhakirdiam amaré goné, – ĥáda, sys kažnonéste rup dre léskiro gonó, amaró rup pir saró léskiro, i ame otdasa les pale péskire vasténca; a, sob (kaj) te kinas xabén ame jandiam javír rup dre amaré vastá, ame na džinása, kon amaró rup čhudiá dre amaré goné.” Jov phendiá: “Na duminen, na darén; tumaró Devél i tumaré-dadéskiro Devél dyjá tuménge klado dre tumaré goné; tumaró rup dogijá ke me.” I jandiá ke jone Simieonos (Siemienos). I odová manúš lydžijá adalé manušén dro Jozaskiro kher, i dyjá paní lénge, i jone obmorde péskire ĥerá; i dyjá xabén léngire oslénge (miegar'jénge). I jone skedyné počastúnki (dáry) ke Jozaskiro javiben dro paš-dyvés, pal-dová so šundlé, so odój javéna te xan maró. I javdiá Joza kheré; i jone jandlé léske dro kher počastúnki, savé sys pe léngire vastá, kerdé šerésa léske ke phuv. Jov phuciape léndyr pal sastypen, i phendiá: “Ci sastó isyn tumaró phuró dad, pal savéste tumé rakirdé? Ci isyn džidó jov?” Jone phendlé: “Sasto isyn tyró pishári, amaró dad; džidó.” I bandine jone i kerdé šerésa ke phuv. I ĥazdyjá Joza péskire jakhá, i dykhciá Vieniaminos, péskire pšalés, péskire-dákire čhavés, i phendiá: “Ci adavá isyn tumaró tyknedýr pšal, pal savéste tumé mánge rakirdé?” I phendiá: “Mek te javél Devléskiri láska túsa, čhavó miro!” I sýges gijá léndyr Joza, pal-dová so zahačíia láska ke léskiro pšal, i jov nábut so na zarondia, i zagijá jov dre andratuný štúba, i rondiá odój. I obmordia péskiro muj, vygijá, lyjá pes dre vastá i phendiá: “Poden xabén.” I podyne léske léskiro, i lénge léngiro, i Jegiptianenge, savé xané lésa, xabén féni (tóka) vaš lénge: pal-dová so Jegiptianenge naštý (na moginénas) te xan Judenca, pal-dová so davá isyn magiripén vaš Jegiptianenge. I bešné jone angíl léste, anglatuné-rodoskiro pir léskiro anglatunó ródo, i tyrnedyr pir léskiro ternypen, i divindlépe adalé manušá jekh angíl javiréste. I léstyr bičhavenas lénge xabén, i Vieniaminoske xabén sys dre pandž móly butýr, syr kažnonéske léndyr. I piné, i šukár matine jone lésa. I priphendiá Joza (Iosifo) péskire kheratuneske, i phendiá: “Čhuv adalé manušéngire goné xabnasa, adákicy but, kicý jone déna ráda te lydžán, i kažnoneskiro čhuv rup dre léskiro gonó, a miro tahtáj (čaša), rupuvó, čhuv dre gonó tyknedyreske, khetané rupésa, pal savó jov kindia maró.” I kerdiá odová manúš pir Jozaskiro lav, savó jov phendiá. Zlokosa (pe ránko), kiéli jaciá bicialó, adalé manušá sys otmekne, jone i léngire osly (miegárja). I syr jone nádur giné foróstyr, syr Joza phendiá péskire kheratuneske: “Džá, dotrade adalen manušén, i, kiéli dotradesa, to phen lénge: ‘Vaš so tumé zapleskirde čoripnasa pal lačhipén?’ Ci davá nane tahtái, savéstyr p'jéla miro xulái? I jov drabakirela pe léste. Našukar tumé davá kerdé.” Jov dotradyja len, i phendiá lénge dalé lavá. Jone phendlé léske: “Vaš so amaró raj rakiréla dasavé lavá? Nad, tyré pishárja na keréna dasavo réndo (diélo). Ĥáda, isyn rup, savó ame lathiam dre amaré goné, ame pale túke jandiam rup Xanaanoskire phuvjátyr: syr aménge te čoras tyré-xuláskire kheréstyr rup ci suvnakái?” Konéste tyré pishar'jéndyr tu lathesa, odoléske meribén, i ame javása pishárja amaré ráske.” Jov phendiá: “Šukár, syr tumé phendlé, adiáke mek i te javél, konéste lathelape tahtáj (čaša), odová javéla mánge pisharisa, a tumé na javéna bangé.” Jone sýges, kažno péske, zmekne pe phuv péskiro gonó, i kažno otčhakirdiá péskiro gonó. Jov obrodyja, lyjá phuredyršonestyr, i končyndia tyknedyršonesa; i lathiape tahtáj dro Vieniaminoskiro gonó. I roskušne jone péskire ídi, i, čhudiá kažno (sváko) pe osloste péskiro gonó, i risiné jone dro fóro. I javné Juda i léskire pšála dro Jozaskiro kher, savó sys kheré, i pyné angíl léste pe phuv. O Joza phendiá lénge: “So da tumé kerdé? Naúšto tumé na džindlé, so adasavó manúš, syr me, usajékh ĥaljola?” O Juda phendiá: “So aménge te phenas amaré ráske? So te rakiras? Sósa te jačaspe čačunenca (te opravdynaspe)? Devél lathiá tyré-pishar'jengiro čoripén: ĥáda, ame sam pishárja amaré xuláske, i ame, i odová, dre saveskire vastá lathiape tahtái.” Ne Joza phendiá: “Nad, me na keráva davá; odová, dre saveskire vastá lathiape tahtái, javéla mánge pisharisa, a tumé džán ramanjosa (mirósa) ke tumaró dad.” I podgíia ke jov Juda i phendiá: “De vólia tyré pisharíske te zaterdjol te phenáv lav miré ráske dre kaná, i na xoliasov pe tyré pishariste, pal-dová so tu san dová-pac', syr faraóno isyn. Miro raj phuciá peskiren pishar'jendyr, rakirdiá: ‘Ci isyn tuménde dad ci pšal?’ Ame phendiam amaré ráske, so aménde isyn phuró dad, i ternedyr čhavó, léskire-phuripnaskiro čhavó, saveskiro pšal myjá, a jov jaciápe jekh péskire datyr, i dadéske jov isyn drógo. Tu phendián tyré pishar'jénge: ‘Janén les ke me, sob (kaj) mánge te podykhav pe léste.’ Ame phendiam amaré ráske: ‘Terné-beršengiro na moginéla te jačkirel péskire dadés, tedy jov meréla’. Ne tu pishar'jénge phendián: ‘Kóli na javéla tuménca tumaró tyknedýr pšal, tedy tumé na javéna ke me.’ Kiéli ame javdiám ke tyró pishári, ke amaró dad, tedy piriphendiam léske lavá miré raskire. I amaró dad phendiá: ‘Džán nevéstyr, kinen aménge nábut xabén’. Ame phendiam: ‘Naštý aménge te džas; a kóli javéla aménca tyknedýr amaró pšal, tedy džása; pal-dová so naštý te dykhas odolé-manušéskiro muj, kóli na javéla aménca amaré tyknedyršone pšalés.’ I phendiá aménge tyró pishári, amaró dad: ‘Tumé džinén, so mirí romný bijandiá mánge dujén čhavén; iekh gijá mándyr, i me phendjom: ‘Jov, xaj, roskušno’; i me na dykhcjom les ke davá časo; kóli i kadales léna miré jakhéndyr, i kerélape lésa bída, tedy lydžána tumé man miré syvone balenca dro liúno (ado)’. Akaná, kóli me javáva ke tyró pishári, amaró dad, i na javéla aménca terné-beršengires, saveskire ilésa phandlo isyn léskiro iló, to, kiéli jov dykhéla, so nane terné-beršengires, jov meréla; i lydžána tyré pishárja, tyré pisharís, amaré dadés, dro liúno (ado). Paldavá me, tyró pishári, lyjompe te otphenav pal terné-beršengireste miré dadéske, i phendjom: ‘Kóli na janáva les ke tu, tedy me jačavape bangó angíl miré dadéste dre saré džiibnáskire dyvesá.’ Adiáke mek me, tyró pishári, zamiést terné-beršengireste te jačavpe pisharisa mireste raste; a terné-beršengiro mek te džal péskire pšalénca: pal-dová so syr me džáva ke péskiro dad, kóli terné-beršengires na javéla mánca? Mek fedýr me te dykháv, saví bída lathelas miré dadés.” Butýr Joza na mogindiá te rikirelpe angíl sarénde, savé sys terdé pašýl léste, i zadyja gódla: “Lydžán krig mándyr sarén.” I na jaciápe pašýl Jozaste nikón, kiéli jov priĥalyjape péskire pšalénge. I jov zoralés rondiá, i šundlé Jegiptiáni, i šundiá faraonóskiro kher. I phendiá Joza péskire pšalénge: “Me som Joza (Iosifo), ci džidó isyn miro dad?” Ne léskire pšála na mogindlé te otphenen léske, pal-dová so lénge jaciá pharó pe iló angíl léste. I phendiá Joza péskire pšalénge: “Poddžan ke me.” Jone podginé. Jov phendiá: “Me som Joza, tumaró pšal, savés tumé bikindle dro Jegípto; ne akaná tumé na piridživen i na xoliason pe péste pal dová, so tumé bikindle man adarík, pal-dová so Devél bičhadiá man angíl tuménde vaš tumaró džiibnáskiro zrakhibén; pal-dová so akaná pe phuv javéla duj berš bokh, i duredýr pandž berš javéla, dre savé ni te čhuvén dre phuv, ni te ukeden na javéna; Devél bičhadiá man angíl tuménde, sob (kaj) te jačkirel tumen pe phuv i te zrakhél tumaró džiibén baré vyrakhibnasa. Adiáke na tumé bičhadé man adarík, ne Devél, Savó i čhudiá man faraonóske dadésa i rása pir saró léskiro kher, i te xulainav pe sarí Jegiptóskiri phuv. Džán sygnedyr ke miro dad i phenén léske: ‘Adiáke rakiréla tyró čhavó Joza (Iosifo): Devél čhudiá man rása pe saró Jegípto; jav ke me sygnedyr; tu javésa te dživés pe Giesiemoskiri phuv; i tu javésa pašýl mánde, tu, i tyré čhavé, i tyré-čhavéngire čhavé, i kherítka murdalá (tyknó i baró tyró skoto), i saró tyró; Odój me javáva te čaliakirav tut, pal-dová so odój javéla bokh iščo (inké) pandž berš, sob (kaj) tu te na jačes čororó: tu i tyró kher, i saró tyró. I ĥáda, tumaré jakhá i miré-pšaléskire jakhá Vieniaminóskire dykhéna, so davá miré uštá rakiréna tuménca. Phenén miré dadéske pal sarí mirí sláva dro Jegípto i pal saró, so tumé dykhné, i janén sygnedyr miré dadés adarík.’” I pyjá jov pe men Vieniaminoske, péskire pšaléske, i rondiá; i Vieniamino rondiá pe léskiri men. I čamudia sarén péskire pšalén, i rondiá, oblyi len. Tén'ci rakirdé lésa léskire pšála. Dogijá ke faraonóskiro kher šunybén (mavlýn), so javné Jozáskire pšála; i šukár sys faraonóske i léskire pishar'jénge. I phendiá faraóno Jozáske: “Phen tyré pšalénge: Ĥáda, so kerén: skedén tumaré kheritkoné murdalén [skoto/žyvotnonen-ju.o.], i džán pe Xanaanóskiri phuv; i len tumaré dadés i tumaré sém'i (irjá), i javén ke me; me dáva tuménge fedyršo kotér phuv pe Jegiptóskiri phuv, i tumé javéna te xan phuvjákiro túko. Túke rakiráva te phenés lénge: ‘Kerén davá: len péske Jegiptóskire phuvjátyr vurdená vaš tumaré čhavénge i vaš tumaré romniénge, i janén tumaré dadés i javén; i ná žalinen tumaró mištypén vieščy (čýsy), pal-dová so fedyršo saré Jegiptóskire phuvjátyr me dáva tuménge’.” Adiáke i kerdé Izrailjoskire čhavé. I dyjá lénge Joza (Iosifo) vurdená, pir faraonóskiro priphenybén, i dyjá lénge xabén pésa pe drom, kažnonéske léndyr jov dyjá ídia te paruven (zmiena), a Vieniaminoske dyjá trin šelá rupuvé i pandž ídia te paruven; adiáke-pac' i péskire dadéske bičhadiá deše oslén (miegar'jén), savé sys landade fedyršone Jegiptóskire xabnenca, i dešé oslicén (miegaricén) landadé givésa, marésa i péskire dadéske xabnása pe drom. I otmekciá péskire pšalén, i jone giné. I phendiá lénge: “Na košenpe pe drom.” I giné jone Jegiptóstyr, i javné pe Xanaanóskiri phuv ke Jakovo, péskiro dad, i rosphendlé léske, i phendlé: “O Joza isyn džidó, i akaná xulainela pe sarí Jegiptóskiri phuv.” Ne léskiro iló kaštalyja, pal-dová so jov na patiandyja lénge. Kiéli jone piriphendle léske saré Jozáskire lavá, savé jov rakirdiá lénge, i kiéli dykhciá maribnýtka vurdená, savé bičhadiá Joza, sob (kaj) te ladžan les: tedy otdžidyjá Jakovóskiro dúho (fáno), léngire dadéskiro, i phendiá Izrailjo: “Uhtýlla (dósi), džidó iščo (inké) isyn miro čhavó Joza; me džáva te dykháv les angíl dová, syr te merav.” I gijá Izrailjo (Jakovo) sarésa, so léste sys, i javdiá dre Virsávija, i jandiá svénto dyibén (žértva) Devléske péskire dadéskire Isaakoskireske. I phendiá Devél Izrailjoske ratý dro sunó: “Jákovie! Jakovie!” Jov phendiá: “Ĥáda, me som.” O Devél phendiá: “Me, som Devél, tyré dadéskiro Devél; na dar, džá dro Jegípto, pal-dová so Me sozdáva tútyr bari manušýtko nacyja, Me džáva túsa dro Jegípto, Me i lydžáva tut pale. O Joza péskire vastésa učhakiréla tyré jakhá.” Jakovo gijá Virsavijatyr; i lydžiné Izrailjoskire čhavé Jakovós, péskire dadés, i péskire bijatén, i péskire romnién pe maribnýtka vurdená, savé bičhadiá faraóno, sob (kaj) te janén les. Jone lyné péskire kheritkoné murdalén (skoto) i péskiro mištypén, savó sys lénde pe Xanaanóskiri phuv, i javné dro Jegípto, – Jakovo i saró léskiro ródo lésa. Peskiren čhavén i ŭnuken pésa, peskiren čhajén i ŭnučken, i saró péskiro ródo jandiá jov pésa dro Jegípto. Ĥáda, sys Izrailjoskire-čhavéngire lavá, savé javné dro Jegípto: Jakovo i léskire čhavé. Jakovóskiro anglatunó čhavó sys Ruvimo. Ruvimóskire čhavé sys: Xanoho i Falu, Xiecrono i Xarmi. Simieonoskire čhavé sys: Iiemuilo i Iamino (Jamino), i Ogado, Iahino, i Coharo, i Sáulo, Xananejankakiro čhavó. Lievijoskire čhavé sys: Girsono, Kaafo i Mierari. Judáskire čhavé sys: Iro i Onano, i Šelá, i Fariéso, i Zaro; ne Iro i Onano myné pe Xanaanóskiri phuv. Fariesoskire čhavé sys: Jesromo i Xamulo. Isaharoskire čhavé sys: Fola i Fuva, Ióvo i Šymrono. Zavulonoskire čhavé sys: Sieriedo i Jelono, Iahlieilo (Jahlieilo). Adalé sys Lijakire čhavé, savén joj bijandiá Jakovóske dre Miesopotamija, i léskire čhasa Dinasa. Sarén léskire čhavén i čhajén sys trijánda trin manušá. Gadóskire čhavé sys: Cyfiono i Xagi, Šuni i Ecbono, Jeri, Arodi i Arieli. Asiroskire čhavé sys: Imna, Išva, Išvi, Bria, i Sierah, léngiri phen. Brijaskire čhavé: Xieviero i Malhiilo. Davá sys Ziel'fakire čhavé, savjá Laváno dyjá Lijake, péskire čhake; joj bijandiá len Jakovóske dešušov dijá. Rahiliakire čhavé, Jakovóskire romniakire sys: Joza (Iosifo) i Vieniamino. I bijándyne Jozaste pe Jegiptóskiri phuv Manásija i Jefriémo, savén bijandiá léske Asieniefá, Potifaroskiri čhaj, Iliopol'skone-žriecoskiri. Vieniaminóskire čhavé sys: Béla i Biehiéro, i Ašbiélo; Gierá i Naamáno, Ehií i Róšo, Mupímo i Xupímo, i Árdo. Adalé sys Rahiliakire čhavé, savé bijándyne Jakovostyr, saró pe saró dešuštar dijá. Danoskiro čhavó sys: Xušymo. Niefalimoskire čhavé sys: Iahceilo (Jahceilo) i Guni, i Iiecero, i Šyliémo. Adalé sys Valakire čhavé: savjá dyjá Laváno péskire čhake Rahiliake; joj bijandiá len Jakovóske sarén eftá manušén. Sarén manušén, savé javné Jakovosa dro Jegípto, savé vyginé léskire trušulendyr (črieslendyr), apríč čhavénde Jakovóskire romniéndyr, sys sarén šovdešá šov dijá. Jozáskire čhavé, savé bijándyne léstyr dro Jegípto, sys duj dijá. Sarén Jakovóskire kheréskire manušén, savé javné dre Jegípto, sys eftadešá. O Jakovo bičhadiá Judas angíl péste ke Joza, sob (kaj) jov te sykavél drom dro Giesiémo. I javné jone pe Giesiemoskiri phuv. O Joza dyjá andré péskiro maribnýtko vurdén, i tradyjá muial (pe strieč) Izrailjoske, péskire dadéske, dro Giesiémo, i, dykhciá les, pyjá léske pe men, i ĥará (dlúges) rondiá léste pe men. I phendiá Izrailjo Jozáske: “Merava me akaná, dykhí tyró muj, pal-dová so tu san džidó.” I phendiá Joza péskire pšalénge i péskire-dadéskire kheréske: “Me džáva, i phenáva faraonóske: ‘Miré-dad pšála i miré-dadéskiro kher, savé sys pe Xanaanóskiri phuv, javné ke me’. Adalé manušá isyn bakréngire čhupnárja, pal-dová so jone zalenape kheritkoné murdalénca; tyknó i baró péskiro skoto, i saró, so lénde sys, jandlé jone.” Kóli faraóno kharéla tumen i phenéla: ‘Savó tumaró zalyiben (zajomka)?’ to tumé phenén: ‘Ame, tyré pishárja sam terné beršéndyr i ke (žýko) davá časo, dykhasas ame pal kheritkoné murdalénde, i ame, i amaré dadá, sob (kaj) tumé te mekén te dživén pe Giesiemoskiri phuv.” Pal-dová so vaš Jegiptianenge isyn magiripén kažno manúš, savó sys čhupnári (pastuho) bakrengiro. I javdiá Joza i phendiá faraonóske: “Miro dad i miré pšála, tykné i baré péskire kheritkoné murdalénca, i sarésa, so lénde sys, javné Xanaanoskire phuvjátyr; i ĥáda, jone isyn pe Giesiemoskiri phuv.” I péskire pšaléndyr jov lyjá pandžé manušén, i jandiá len ke faraóno. I faraóno phendiá léskire pšalénge: “Savó tumaró zalyiben (zajomka)?” Jone phendlé faraonóske: “Bakréngire čhupnárja tyré pishárja isyn, ame, i amaré dadá.” I jone phendlé faraonóske: “Ame javdiám te dživás nábut pe daja phuv, pal-dová so nane xabén vaš tyré-pishar'jengire kheritkoné murdalénge; pe Xanaanóskiri phuv isyn bari bokh. Adiáke mangasa te des vólia (te pozvolines) tyré pishar'jénge te dživás pe Giesiemoskiri phuv.” I phendiá faraóno Jozáske: “Tyró dad i tyré pšála javné ke tu. Jegiptóskiri phuv isyn angíl túte; pe fedýr phuv čhuv te dživél tyré dadés i tyré pšalén; mek jone te dživén pe Giesiemoskiri phuv. I kóli džinésa, so maškír lénde isyn talanýtka (odarime) manušá, čhuv len dykhibnaskirenca (smotritielienca) pal miro skoto.” I jandiá Joza Jakovós, péskires dadés, i sykadiá les faraonóske; i bahtiakirdiá Jakovo faraonos. Faraóno phuciá Jakovostyr: “Ci but isyn túke berš?” Jakovo phendiá faraonóske: “Miré džiibnáskire dyvesá džána ke šel te trijánda berš; tykné i nabahtale miré džiibnáskire dyvesá, i na doginé ke miré dadengíre-džiibnáskire dyvesá.” I bahtiakirdiá Jakovo faraonos, i vygijá faraonostyr. I čhudiá te dživél Joza péskire dadés i peskiren pšalén, i dyjá lénge pe Jegiptóskiri phuv fedýr phuvjákiri paš, pe Raamsiesoskiri phuv, syr phendiá faraóno. I délas o Joza péskire dadéske, i péskire pšalénge, i saré dadéskire kheréske maró, ci but trej kažnoné sem'iake (irjáke). I na sys maró pir sarí phuv; pal-dová so bokh jaciá drieván zoraledýr, manušá jačné bizorjákire bokhátyr pe Jegiptóskiri i Xanaanóskiri phuvjá. O Joza skedyjá saró rup, savó sys pe Jegiptóskiri i Xanaanóskiri phuvjá, pal maró, savó kinenas, i jandiá Joza rup dro faraonóskiro kher. I na jaciá rup (lové) pe Jegiptóskiri i Xanaanóskiri phuvjá. Saré Jegiptiáni javné ke Joza i rakirdé: “De aménge maró; pal so aménge te meras angíl túte, pir davá so rup butýr nane aménde?” O Joza phendiá: “Janén tumaré kheritkoné murdalén, i me javáva te dav tuménge pal tumaré kheritkoné murdalénde, kóli rup nane tuménde.” I pritradenas jone ke Joza péskire kheritkoné murdalén; i Joza délas lénge maró pal grénde, i pal stády tykné, i baré murdalengire, i pal oslénde (miegar'jénde); i délas lénge maró dre dová berš pal saré léngire kheritkoné murdalengirende. I gijá péske davá berš; i javné jone ke jov pe javír berš, i phendlé léske: “Na čhakirasa amaré xulastyr, so rup nane i amaró skoto amaré xulaste; ničí na jaciápe aménde angíl amaré xulaste, apríč aménde i amarí phuv, vaš so aménge angíl tyré jakhá te xasjovas, aménge i amaré phuv'jenge? Kin amen i amaré phuvjá pal maró, i ame amaré phuv'jénca javása pishar'jénca faraonóske, a tu de aménge siemi, sob (kaj) ame te javas džidé i te na meras, i, sob (kaj) te na javél čhučí phuv.” I kindia Joza sarí Jegiptóskiri phuv vaš faraonóske, pal-dová so bikindle Jegiptiáni kažno péskiri félda; pal-dová so bokh pritasavelas len. I jaciápe phuv faraonóske. I kerdiá manušén jov pishar'jénca jekhe Jegiptóskire rigátyr ke javír. Jekhe žriecengiri phuv na kindia, pal-dová so žriecenge faraonostyr sys dyný paš phuv, i jone čaliakirenaspe péskire phuvjátyr; pal-dová i na bikindle péskiri phuv. I phendiá Joza manušénge: “Ĥáda, me akaná kindjom vaš faraonóske tumen i tumarí phuv; ĥáda, tuménge isyn siemi (vie/iríngli), i čhuvén len dre phuv; kiéli tumé javéna te ukeden, den pándžto paš faraonóske; a štar pašá jačénape tuménge te počhuven pe féldy pe čaliakiriben tuménge i odolénge, kon isyn dre tumaré kherá i pe čaliakiriben tumaré čhavénge.” Jone phendlé: “Tu zrakhcián aménge džiibén; i javása te rodas láska dre – amaré-xuláskire jakhá, i javása pishar'jénca faraonóske.” I čhudiá Joza pe Jegiptóskiri phuv zakóno, davá isyn ke adadyvés: pándžto paš te den faraonóske, apríč jekhe žriecengire phuvjátyr, saví na sys faraonoskiri. I dživdiá Izrailjo pe Jegiptóskiri phuv, dro Giesiémo, i sys jone xulaja pe láte, bijandle, i jaciá len but but. Jakovo dživdiá pe Jegiptóskiri phuv dešuefta berš; i sys dyvesá Jakovóskire, léskire džiibnáskire beršá, šel te štardešá eftá berš. I javdiá časo Izrailjoske te merél, i khardiá jov péskire čhavés Jozas, i phendiá léske: “Kóli me lathjom dre tyré jakhá láska, čhuv tyró vast tel stac' (stjogno) mánde i sovlahá, so tu kerésa pir mánge tangipén i čačipén, na garavesa man dro Jegípto. Sob (kaj) mánge te pasjovav miré dadénca, tu vylydžasa man Jegiptóstyr i garavesa man dro léngiro garaibnytko štéto.” O Joza phendiá: “Keráva pir tyró lav.” I phendiá Jakovo: “Sovláha mánge.” I sovlahadiá léske. I sovlahadiá Izrailjo pe čhuibén pašýl šereskiri šeranduny. Paló (poslie) davá Jozáske phendlé: “Ĥáda, tyró dad isyn nasvaló.” I jov lyjá pésa dujén péskire čhavén: Manasijas i Jefriemos. Jakovóske phendlé: “Ĥáda, tyró čhavó Joza (Iosifo) džála ke tu.” Izrailjo skedyjá péskiri zor i besciá pe čhuibén. I phendiá Jakovo Jozáske: “Devél Sarezorjákiro sykadyjá mánge dre Luza, pe Xanaanóskiri phuv, i bahtiakirdiá man, i phendiá mánge: “Ĥáda, Me dáva túke but čhavorén i javéla but but tumen, i Me keráva adiáke, so tútyr vydžána but manušýtka nácyi, i Me dáva paló (poslie) túte daja phuv tyré rodóske, sob (kaj) jone viéčnes te javén xulanca.” I akaná duj tyré čhavé, savé bijándyne pe Jegiptóskiri phuv, angíl dová, syr me javdjom ke tu dro Jegípto, jone isyn miré; Jefriémo i Manásija, syr Ruvimo i Simieono (Siemjono) javéna miré; čhavé tyré, savé bijandjona paló lénde, javéna tyré; jone tel péskire-pšalengiro lav javéna te ginenpe dre paš léngire mekné mištypnástyr. Kiéli me gijom Miesopotamijatyr, pe Xanaanóskiri phuv myjá mánde Rahíl', pe drom, na dogii vari-kicý ke Jefrafa, i me garadjom la odój pe drom ke Jefrafa, so kakaná isyn Vifliejémo.” I dykhciá Izrailjo Jozáskire čhavén, i phendiá: “Kon isyn adavá?” I phendiá Joza péskire dadéske: “Dalé isyn miré čhavé, savén Devél dyjá mánge adái.” O Jakovo phendiá: “Lýdža pašyledýr len ke me, i me bahtiakirava len.” Izrailjoskire jakhá phuripnastyr fujes dykhné; jov na mogindiá šukár te dykhél. Joza lydžijá pašyledýr len ke jov, i čamudia jov len, i oblyja len. I phendiá Izrailjo Jozáske: me i na dumindjom te dykháv tyró muj, ĥáda, Devél sykadiá mánge i tyrén čhavén.” I lydžijá len krig Joza léskire čangendyr, i kerdiá šerésa léske ke phuv. I lyjá Joza dujén, Jefriemos dro čačó péskiro vast proti zérvo (liévo) i Izrailjoskiro, a Manasijas dro zérvo (liévo) proti Izrailjoskiro čačó (pravo), i lydžijá vastésa pašyledýr len ke jov. Ne Izrailjo protyrdyjá péskiro čačó (pravo) vast i čhudiá Jefriemoske pe šeró, usajékh so odová sys tyknedyršo, a zérvo (liévo) pe šeró Manasijaste. Pefromi jov čhudiá adiáke péskire vastá, na dykhí pe dová, so Manásija sys anglatunó. I bahtiakirdiá Joza, i phendiá: “Devél, angíl Savéste psirdé miré dadá, Avraámo i Isaáko, Devél, Savó rakhéla man dolé dyveséndyr, syr me bijandyjom, adadyvés, O Jangólo, savó vyrakhcia man kažnoné čoripnástyr, mek te bahtiakirél adalé terné manušén; mek te javél pe lénde dynó miro lav i lav miré dadéngiro Avraámoskiro i Isaakoskiro, i mek te javél len but maškír phuv.” I dykhciá Joza, so léskiro dad čhudiá péskiro čačó (pravo) vast pe šeró Jefriemoske; i na pir iló léske sys davá. I lyjá jov péskire-dadéskiro vast, sob (kaj) te piričhuvel les Jefriemóskire šerestyr pe Manasijáskiro šeró, i phendiá Joza péskire dadéske: “Na adiáke, miro dádo, pal-dová so adavá čhavó isyn anglatunó, čhuv pe léskiro šeró čačó (pravo) tyró vast. Ne léskiro dad na zakamdiá i phendiá: “Me džinóm (džináv), mro čháva, džinóm, i léstyr vydžána manušá, i jov javéla baró; ne léskiro tyknedýr pšal javéla baredýr léstyr, i léstyr vydžála bari manušýtko nacyja (narodo).” I bahtiakirdiá Izrailjo dro dová dyvés len, rakirí: “Túsa javéna te bahtiakirenpe manušá Izrailjostyr, rakirí: ‘Mek te kerél túke Devél, syr Jefriemoske i Manasijaske’.” I čhudiá Jefriemos vučedýr Manasijastyr. I phendiá Izrailjo Jozáske: “Ĥáda, me meráva: i Devél javéla tuménca, i riskiréla tumen pale pe tumaré-dadengiri phuv; i me dáva túke butýr angíl tyré pšalénde, jekh phuvjákiro kotér [sklono-ju.o.], savó me lyjom Amoriejéngire vasténdyr miré kurtalása i lukosa.” I khardiá Jakovo péskire čhavén, i phendiá: “Skedénpe i me rosphenava tuménge, so javéla tuménca pe dyvesá; so javéna angíl: skedénpe i šunén, Jakovóskire čhavé, šunén, Izrailjo, tumaré dadés. Ruvimo, anglatunó miro! Tu san miro zoralypén i anglatunó miré zorjake, naj patyvaledyr pir mina i naj zoraledýr; ne tu san šumno, syr paní, tu na javésa te priphenes javirénge, pal-dová so tu gíian pe tyré-dadéskiro čhuibén; tu magirdian miro čhuibén. Pšála Simieono i Lievijo, léngire kurtaly na tanginena; dre léngire mysli mek te na dykhél miro di, i ke léngiro skedyibén mek te na javél mirí sláva, pal-dová so jone dre péskiri xolý zamardé manušés, i pir péskiro iló piričhindle guruveske žyly; mek te xasjol léngiri xolý, pal-dová so láte nane tangipén, i léngiri bari xolý, pal-dová so joj isyn na manušany; me roskerava pe pašá len te dživén pir Jakovoste, i rosčhuvava len pir Izrailjo. Juda! Javéna te šarén tut tyré pšála. Tyró vast javéla pe tyré-vergengiro dumo; túke keréna šerésa ke phuv tyré-dadéskire čhavé. Ternó ščer (liévo) Juda, doresybnastyr, syr jov zahala, miro čhavó, ĥazdélape jov. Pasijá jov, syr ščer (liévo) i syr ščeriha (l'vica): kon ĥazdéla les? Na otdžala Judastyr skipietro i zakonoskiro dyibnari léskire trušulendyr, ke davá časo, paka javéla Ramanjoskiro (Primiritieljo), i les javéna te kandén manušá. Jov priphandela ke vinagradýtko (drakhítko) kaštoro péskire osljonkós (miegaricorés), i ke fedyršo vinagradýtko (drakhítko) kaštoro péskire oslicákire (miegaricákire) čhavés; morela dre mol (vino) péskiri ídia i dre grozdiéngiro rat péskiro uribén; hačona léskire jakhá moliátyr (vinostyr), i parné léskire dandá thudestyr. Zavulono javéla te dživél pašýl morjoskiro (derjavéskiro) brégo, kaj isyn terdé pármy (korabli), i kónco (jagóro) léskiro ke Sidono. Isaharo isyn zoraló óslo (miegári), savó isyn paštó maškirál paniéskiro thadypen; i dykhciá jov, so otkhinyben sys lačhó, i so phuv sys šukár: i bandiakirdia péskire psiké vaš pharipén i lyjá te kerél butý dro pleskiriben. Dano javéla te sendinel péskire manušén, syr jekh Izrailjoskire rodycendyr (čangendyr); Dano javéla sapesa pe drom, saplyniasa pe drom, saví dukhavela greske ĥerój adiáke, so manúš, savó beštó uklisto, peréla pale. Pe tyró podrikiribén (pomošč) me rozginava, Rajo Dévla! Gados, manušá syr xaladé javéna te pritasaven, ne jov len otčhurdela pir piénty (khurjá). Vaš Asiroske léskiro maró isyn drieván thulo, i jov javéla te doresel kralískire prismáki (frišmáki). Niefalimo isyn syr šukár olieniha, savó pir iló rakiréla. Joza (Iosifo) isyn otbaripen lačhé vešeskiro, otbaripen pašýl džiibnáskiri ĥanýng; léskire randiá rozbarjonape pe vánta; holiakirenas les, i dénas kar'je lukostyr dre léste i na mogindlé te dykhén pe léste manušá, savé dyné kar'je lukostyr; ne jaciápe zoraló léskiro lúko, i zoralé isyn léskire-vastengire masá, zoralé Jakovóskire-Devléskire vasténdyr. Odothýr isyn Čhupnári i Izrailjoskiri tvárdyma, tyré-dadéskire Devléstyr, Savó pomoginela túke, i Sarezorjakirestyr, Savó i bahtiakiréla tut vučipnástyr bolybnáskire bahtiakiribnasa, xoripnaskire bahtiakiribnasa, savó isyn paštó dro dólo, bahtiakiribnasa ciuciendyr (soscendyr) i ločoviátyr (utrobatyr), tyré-dadéskire bahtiakiribnenca, savé isyn vučedýr bahtiakiribnastyr phurané bergendyr i lačhipnastyr viečnone bergicengiro. Mek te javén jone pe Jozaskiro šeró i pe tiemjo (gutup), savó sys vykedyno maškír péskire pšalénde. Vieniamino isyn riskiribnáskiro ruv (januro), pe zlóko (rankosa) javéla te xal dová, so jov uhtyléla i bel'veliasa javéla te roskerél (te dielinel) dová, so doreséla.” Ĥáda, isyn saré Izrailjoskire dešudúj ródycy: i ĥáda, so lénge phendiá léngiro dad; i bahtiakirdiá len, i dyjá bahtiakiribén lénge, kažnonéske péskiro. I priphendiá jov lénge, i phendiá lénge: “Me pričhuvavape ke péskire manušá; garavén man miré dadénca dre ĥiebár (pieščera), saví isyn pe Jefronoskire-Xietejaninoskiri félda, dre ĥiebár (pieščera), saví isyn pe Mahpielaskiri félda, so isyn angíl Mamrie, pe Xanaanóskiri phuv, saví kindia Avraámo feldasa Jefronostyr Xietejaninostyr vaš péske vaš garaiben; odój garadé Avraamos i Sárra, leskirja romniá; odój garadé Isaakos i Rievieka, leskirja romniá; i odój garadé Lija; daja félda i ĥiebár (pieščera), saví sys pe láte, sys kindly Xietiejéngire čhavéndyr.” I pirijaciá Jakovo te rakirél péskire čhavénge, i čhudiá khetané péskire ĥerá pe čhuibén, i myjá, i pričhudiape ke péskire manušá. I Joza pyjá pe léskire-dadéskiro muj, i rondiá pe léste, i čamudia les. I phendiá Joza peskirenge dynar'jénge, sastypnar'jénge (uračenge) te bal'zaminen léskire dadés; i sastypnarja bal'zamindle Izrailjos. I progijá léske štardešá dyvesá, pal-dová so adákicy dyvesá trej vaš bal'zaminyben, i obrovenas les Jegiptiáni eftadešá dyvesá. Kiéli proginé (nakhle) roibnytka dyvesá pal léste, o Joza phendiá faraonóskire kheritkonenge: “Kóli me lathjom láska dre tumaré jakhá, tedy phenén faraonóske adiáke: ‘Dad miro sovlahadiá man, phendiá: Ĥáda, me meráva; dre miro maĥilýtko (koplíca), savó me vyganadjom péske pe Xanaanóskiri phuv, odój garav man. I akaná me kamdjom te džav, i te garavav miré dadés, i te risjovav.’” I phendiá faraóno: “Džá i garav tyré dadés, syr jov zasovlahadia tut.” I gijá Joza te garavel péskire dadés. I giné saré lésa faraonóskire dynárja, léskire phurydyrá, i saré Jegiptóskire-phuvjákire phurydyrá, i saró Jozaskiro kher, i léskire pšála, i léskire-dadéskiro kher. Jekhe péskire čhavén i tykné i baré kheritkoné murdalén (skoto) jačkirdé pe Giesiemoskiri phuv. I lésa giné adiáke-pac' maribnýtka vurdená i manušá, adiáke so taboro (lod) sys drieván baró. I doginé jone ke Gorién-gaatada (givaobmaribnaskiri šúrna ke Atado) pašýl Iordáno, i rondlé odój baré roibnasa i drieván zoralés; i kerdiá Joza roibén pal péskire dadéste eftá dyvesá. I dykhné Xananiéi odolé phuvjákire manušá roibén dro Gorien-gaatada, i phendlé: “Baró dasavo roibén isyn Jegiptianende! Paldavá dynó dalé štetoske lav: Jegiptianengiro roibén, so isyn pašýl Iordáno. I kerdé Jakovóskire čhavé lésa, syr jov rakirdiá lénge; i otlydžine léskire čhavé les pe Xanaanóskiri phuv i ĥaradé les dre ĥiebár (pieščera), pe Mahpieloskiri félda, saví Avraámo kindia feldasa vaš péske vaš garaiben Jefronoste Xietijaninostyr angíl Mamrie. I risijá Joza dro Jegípto, kokoró i léskire pšála, i saré, kon psirdiá lésa te garaven léskire dadés. I dykhné Jozaskiro pšála, so léngiro dad myjá, i phendlé: “So, kóli ame na javása dróga Jozáske, i jov zakaméla te othal pale aménge pal saró fuipén, savó ame léske kerdiám?” I bičhadé jone te phenén Jozáske: “Tyró dad angíl léskiro meribén dyjá lav, rakirí: Adiáke phenén Jozáske: ‘Me mangáva te primanges tyré pšalénge léngiro čoripén, i grého, adiáke syr jone kerdé túke fuipén. I akaná primáng tyré dadéskire Devléskire pishar'jengiro čoripén.’” Joza rondiá, kiéli léske rakirdé davá. Javné i kokoré léskire pšála, pyné angíl léste léngire mujenca, i phendlé: “Ĥáda, ame sam pishárja túke.” I phendiá Joza: “Na darén, pal-dová so me Devléstyr darava; ĥáda, tumé kerdé mánge fuipén; ne Devél pirikerdia davá dre lačhipén, sob (kaj) te kerél dová, so akaná isyn: te zrakhes džiibén buté manušénge; i paldavá na darén: me javáva te čaliakirav tumen i tumaré čhavén.” I podrikirdia dúho (fáno) dre lénde, i rakirdiá pir léngiro iló. I dživdiá Joza kokoró ke Jegípto i ke léskire-dadéskiro kher; o Joza dživdiá šel te deš berš. I dykhciá Joza Jefriemóskire čhavén ke tríto ródo, adiáke-pac' Mahiroskire čhavén, Manasijáskire čhavés, savé bijándyne pe Jozáskire čangá. I phendiá Joza péskire pšalénge: “Me meráva, ne Devél javéla te pomoginel, i vylydžala tumen dalé phuvjátyr pe phuv, pal saví Jov sovlahadiá Avraamóske, Isaakóske i Jakovóske.” I zasovlahadia Joza Izrailjoskire čhavén, i phendiá: “Devél javéla te pomoginel tuménge i tumé vylydžan miré kokalý adathýr.” I myjá Joza šel te deš berš. I bal'zamindle les, i čhudé dro Jegípto dro mulykano /ĥrobo [kovčego-r.s.] Ĥáda (Ake), isyn Izrailjoskire-čhavéngire lavá, savé zaginé Jakovosa dro Jegípto, zaginé kažno péskire kheresa: Ruvimo, Simieono, Lievijo i Juda, Isaharo, Zavulono i Vieniamino, Dano i Niefalimo, Gado i Asiro. Sarén manušén, savé vyginé Jakovostyr, sys eftadešá, a Joza (Iosifo) sys angledýr ke Jegípto. I myjá Joza (Iosifo) i saré léskire pšála, i saró léskiro ródo; a Izrailjoskire čhavé jačné but, i jone rozbarinepe i jačné jone drieván zoralé, i doiá phuv pherdija lénca. I terdijá dro Jegípto nevó králi, savó na džindiá Jozas (Iosifos), i phendiá péskire manušénge: “Ĥáda, Izrailjoskire-čhavéngire manušá, len isyn drieván but i jone isyn zoraledýr améndyr; ake, xohavasa len, sob (kaj) len te na javél but, pal-dová so, kiéli javéla maribén, to khetaniakirenape jone amaré vergenca (vrogenca), i džána pe aménde, i vydžána amaré phuvjátyr.” I čhudé pe lénde barydyrén pe butý, sob (kaj) te menčynen len pharé butienca. I jone kerdé faraonóske Pifomo i Raamsieso, fórja, vaš prigaraiben (zapasy). Ne so len butýr menčyndle, to len butýr bijandjona, i butýr jone barjona adiáke, so jone, Jegiptiáni, darándyne Izrailjoskire čhavéndyr. I paldavá Jegiptiáni začhuvenas bi tangipnaskiro (bi žalostiakiro) Izrailjoskire čhavén te kerén pharé butiá i léngiro džiibén kerdé kirkesa pharé butiátyr pe ĥlina (gleja) i bará, i kažnoné feldakire butiátyr, ke kažno butý, ke saví začhude len te kerén maribnása. Jegiptóskiro králi priphendiá phur'jenge, savé babinenas tyknemasen (bijatén) Judycende, léndyr jekhakiro lav sys Šyfra, a javirjakiro Fua, i phendiá: “Kiéli tumé javéna te babinen čhavorén Judycende, to tumé dykhén, syr jone bijanena: kóli javéla čhavó, tedy muliakirén les; a kóli čhaj, tedy mek te dživél.” Ne phurja, savé babindle tyknemasen, syr džuvlý bijanéla, darándyne Devléstyr, i na kerdé adiáke, syr rakirdiá lénge Jegiptóskiro králi, i jačkirenas čhavorén džidenca. Jegiptóskiro králi khardiá khetané phur'jen, savé babindle tyknemasen i phendiá lénge: “Vaš so tumé keréna dasavo réndo (diélo), so mekéna čhavorén džiden?” Phurja, savé babinenas tyknemasen, otphendlé faraonóske: “Judéngire džuvliá na adiáke, syr Jegiptóskire; jone isyn zoralé, pal-dová so angledýr, syr javéla ke jone phuri, saví babinela tyknemases, jone uže bijandle.” Devél paldavá kerdiá lačhipén phur'jenge, savé babinenas tyknemasen; a manušá jačenas but i jone drieván zoraljonas. I adiáke syr phurja, savé babindle tyknemasen, darándyne Devléstyr, to Jov kerdiá lénge kherá. Tedy faraóno priphendiá sarénge péskire manušénge: “Kažnones čhavés, savó bijandjola Judénde, čhurdén dre reka (len'); a kažnona čha jačkiren te dživél.” Vari-kon Lievijoskire kheritkoné rodóstyr (pliemjostyr) gijá, i lyjá péske romniá dolé-pac' rodóstyr. Džuvlý zapharija i bijandiá čhavés, i, dykhí, so jov sys drieván šukár, garadia les trin čhoná; ne na moginy duredýr te garavel les, lyjá triščynatyr (trosnikostyr) khudo (korzina), i občhudiá les asfal'tosa i smolasa; i, čhuvi dre léste tyknemases, čhudiá dre triščyna (trosniko) pašýl brégo rekakiro (leniakiro). A léskiri phen terdijá durál te dykhél, so lésa javéla. I faraonoskiri čhaj vygijá pe reka (len') te morelpe, a lákire dynaricy (slugicy) psirdé pir brégo rekakiro (leniakiro). Joj dykhciá maškirál triščyna khudo, i bičhadiá peskirjá dynárica te lel les. Otčhakirdia i dykhciá tyknemases; i ĥáda, čhavoró rovelas; i joj potangindia les (požalindia) i phendiá: “Adavá isyn Judéngire čhavorendyr.” I phendiá léskiri phen faraonóskire čhake: “Ci te na spsirav mánge i te kharav ke tu Judycendyr čaraibnarka, sob (kaj) joj te čaravel túke tyknemases?” Faraonoskiri čhaj phendiá láke: “Džá!” E patyvalý terný džuvlý gijá, i khardiá tyknemaseskirja da. Faraonoskiri čhaj phendiá láke: “Le adalé tyknemases i čaliakir mánge les: me dáva túke lové.” Džuvlý lyjá tyknemases i čaliakiria les. I vybarija tyknomas, i joj iandiá les ke faraonoskiri čhaj, i jov sys láte zamiést čhavéste, i dyjá lav léske: Mójza (Moisiejo), pal-dová so joj rakirdiá: “Me paniéstyr vylyjom les.” Proginé but dyvesá i beršá, kiéli Mójza vybarija, kerdiápe adiáke, so jov vygijá ke péskire pšála, Izrailjoskire čhavé, i dykhciá léngiri pharí butý; i dykhciá, so Jegiptianino marela jekhe Judos, léskire pšaléndyr. Podykhciá odorík i adarík pir rigá, i dykhciá, so nane nikonés, jov zamardiá Jegiptianinos, i zaganadia les dro práho. I vygijá jov pe javír dyvés, i ĥáda, duj Judy košenape; i phendiá jov odoléske, savó marelas: “Palsó tu marésa tyré pašatunes?” A odová phendiá: “Kon čhudiá tut barydyrésa i sendarisa pe aménde? Ci na kames tu te zamares man, syr zamardian Jegiptianinos?” Mójza strahadyja, i phendiá: “Čačó, udžindlé pal davá réndo (diélo).” I šundiá faraóno pal davá réndo, i kamdiá te zamarél Mojzás; ne Mójza nastiá faraonostyr, i terdijá pe Madiamitianengiri phuv, i bestiá pašýl ĥanýng. Madiamitianengire rašaste sys eftá (bitrinéngiro deš) čhaja. Jone javné i kedyne paní, i pherdiakirde čaraibnytka (koryty), sob (kaj) te paniakiren bakrén péskire dadeskiren. I javné čhupnárja (pastuhi), i ottradyne len. Tedy uštyjá Mójza, i zaterdija pal lénde, i paniakirdia léngire bakrén. I javné jone ke Raguilo, léngiro dad, i jov phendiá: “So tumé adiáke syg javné adadyvés?” Jone phendlé: “Vari-savó Jegiptianino zaterdija pal aménde čhupnar'jendyr, i pherija (začerpnindia) aménge paní, i paniakirdia bakrén.” Jov phendiá péskire čhajenge: “Kaj jov isyn? Sóske tumé les jačkirdé? Kharén les, i mek jov te xal maró.” Mojzáske sys pir iló te dživél dalé manušéste; i jov otdyjá paloróm pal Mojzaste peskirjá čha Siepfora. Joj bijandiá čhavés, i Mójza dyjá léske lav: Girsamo, pal-dová so, – rakirdiá jov, – Me javdjom pe čúžo phuv.” Progijá but berš, myjá Jegiptóskiro králi. I xasjonas Izrailjoskire čhavé butiátyr i dénas gódla, i léngiri gódla butiátyr dogijá ke Devél. I šundiá Devél léngire mén'ki, i priripirdia Devél Péskiro zavieto (dorakiribén) Avraamosa, Isaakosa i Jakovosa. I dykhciá Devél Izrailjoskire čhavén, i potangindia len Devél. Mójza rakhciá bakrén Ioforoste, Madiamitianengire rašaste, savó sys léskiro sastro (tiestjo). Jekhvar tradyjá jov kheritkoné murdalén (skoto) dur pe čhučí (pusto) phuv, i javdiá ke Devléskiri bérga Xorivo. I sykadyjá léske Ráskire-Devléskiro Jangólo maškír xrústo (kusto) dre jag. I dykhciá jov, so xrústo xačolas jagása, ne xrústo na vyhačola. Mójza phendiá: “Džáva me i dykháva pe davá baró dívo, sóske xrústo na vyhačola.” Devél dykhciá, so jov džála te dykhél, i khardiá les Devél maškirál xrustostyr, i phendiá: “Mojze! Mojze!” Jov phendiá: “Ĥáda, me som!” I phendiá Devél: “Na džá adarík; zle telé tyré ĥeritka ĥerendyr; pal-dová so štéto, pe savó tu san terdó, isyn svénto phuv.” I phendiá Jov: “Me som Devél tyré-dadéskiro, Avraamóskiro Devél, Isaakoskiro Devél i Jakovóskiro Devél.” Mójza začhakirdia péskiro muj; pal-dová so darandyja te dykhél pe Devléste. I phendiá Raj Devél: “Me dykhcjom Miré-manušéngire mén'ki dro Jegípto, i Me šundjom léngiri gódla pal léngire manušénde, savén čhudé te dykhén pal lénde, Me džinóm léngiro piridživipen, i Me džáva te rakhav len Jegiptianengire vasténdyr i te vylydžav len dalé phuvjátyr pe lačhí i bari phuv, kaj thadéla thud i avgín, pe Xananiejengiri, Xitiejengiri, Amoriejengiri, Fierieziejengiri, Jeviejengiri i Jevusiejengiri phuv. I ĥáda, akaná gódla Izrailjoskire-čhavengiri dogijá ke Me, i Me dykháva mén'ki, savénca len menčynena Jegiptiáni. I adiáke džá; Me bičhaváva tut ke faraóno; i vylydža Jegiptóstyr Miré manušén, Izrailjoskire čhavén.” Mójza phendiá Devléske: “Kon me som, sob (kaj) mánge te džav ke faraóno, i te vylydžav Jegiptóstyr Izrailjoskire čhavén?” I phendiá Devél: “Me javáva túsa, i, ĥáda, túke javéla dophenybén, so Me bičhadjom tut: kiéli tu vylydžasa Jegiptóstyr manušén, to tumé kerén mangipén Devléske pe daja bérga.” I phendiá Mójza Devléske: “Ĥáda, me javáva ke Izrailjoskire čhavé i phenáva lénge: “Devél tumaré dadéngiro bičhadiá man ke tumé.” A jone phenéna: “Syr isyn Léskiro lav? So te phenáv mánge lénge?” Devél phendiá Mojzáske: “Me Som, Savó isyn Džidó usady (sak) (Jahvá).” I phendiá: “Adiáke phen Izrailjoskire čhavénge: “Savó isyn Džidó Usady (Jahvá) bičhadiá man ke tumé.” I phendiá iščo (inké) Devél Mojzáske: “Adiáke phen Izrailjoskire čhavénge: ‘Raj Devél (Jahvá), Devél tumaré dadéngiro, Avraamóskiro Devél, Isaakoskiro Devél i Jakovóskiro Devél, bičhadiá man ke tumé.’ Ĥáda, Miro lav pe viéko, ripiribén pal Mánde isyn rodóstyr dro ródo. Džá, skéde phurydyren Izrailjoskiren i phen lénge: “Raj Devél, Devél tumaré-dadéngiro, sykadyjá mánge, Devél Avraamóskiro, Isaakoskiro i Jakovóskiro, i phendiá: “Me javdjom te dykháv tumen i dykhcjom, so kerélape tuménca dro Jegípto.” I phendiá: “Me vylydžava tumen Jegiptóskire pharé dynaribnastyr pe phuv Xananiejengiri, Xiettiejengiri, Amorriejengiri, Fierieziejengiri, Jeviejengiri i Iievusiejengiri, pe phuv, kaj thadéla thud i avgín (meda).” I jone javéna pe šunén zan tyrí, i džása tu i Izrailjoskire phurydyrá ke Jegiptóskiro králi, i phenéna léske: “Raj Devél, Devél Judéngiro, khardiá amen; i adiáke otmek amen pe čhučí phuv, pe triné-dyvesengiro drom, sob (kaj) te janas svénto dyibén (žértva) Ráske-Devléske, amaré Devléske.” Ne Me džinóm, so Jegiptóskiro králi na mekéla tumen te džán, kóli na začhuvesa les zoralé vastésa; i Me ĥazdáva Miro vast, i Me divakirava (zdivinava) Jegípto saré Miré divenca, savé keráva maškír lénde; i paló davá jov otmekéla tumen. I Me dáva adalé manušénge tangipén (žalima) pe Jegiptianengire jakhá; i kiéli džána, džán na čhučé vasténca: kažno džuvlý vymangela péskire susiedkatyr (kotarkatyr) i, kon dživéla dre lákiro kher, rupuvé i suvnakuné priedmiety, i ídi; i tumé prikeden lénca čhavén i čhajén tumaren, i adiáke tumé obkedena Jegiptianen.” I otphendiá Mójza i phendiá: “A kóli jone na patiána mánge, i na šunéna mirí zan, i phenéna: ‘Na sykadyjá túke Raj Devél?’” I phendiá léske Raj Devél: “So davá isyn dro vast túte? Jov otphendiá: “Destó.” Raj Devél phendiá: “Čhurde les pe phuv.” Jov čhurdyjá les pe phuv, i destó risijá dre sapeste, i prastándyja léstyr. I phendiá Raj Devél Mojzáske: “Ĥazde tyró vast i le les pal pori.” Jov ĥazdyjá péskiro vast i lyjá les; i jov jaciá destesa dro léskiro vast. Ake, vaš dová, sob (kaj) te patián, so sykadyjá túke Raj Devél, Devél léngire-dadéngiro, Avraamóskiro Devél, Isaakoskiro Devél i Jakovóskiro Devél.” Iščo phendiá léske Raj Devél: “Čhuv tyró vast ke pe pal brek.” I jov čhudiá péskiro vast ke pe pal brek, vylyja les, i ĥáda, léskiro vast parnyja prokazatyr, syr iv. Iščo phendiá: “Čhuv nevéstyr (nevés) tyró vast péske pal brek.” I vylyja les pal péskire brekatyr, i ĥáda, jov nevéstyr jaciá dasavo, syr léskire masá. Kóli jone na patiána túke, i na šunéna zan anglatuné dophenybnaske, tedy javéna te patián glosake javire dophenybnaske; kóli na patiána i dalenge dujenge dophenybnenge i na šunéna tyrí zan, tedy le rekátyr (leniátyr) paní i vyčhuv pe phuv; i paní lyny rekátyr (leniátyr), kerélape ratésa pe phuv. I phendiá Mójza Ráske-Devléske: “O, miro Rajo Dévla! Manúš me na som rakiribnytko, i adasavó sómas i atasiá, i tríto dyvés, i kiéli Tu jacián te rakirés Tyré dynarisa: me pharés rakiráva i namištes.” I Raj Devél phendiá: “Kon dyjá uštá manušéske? Kon keréla manušés bičibakiresa, ci kašukesa, ci dykhibnytkonesa, ci kororesa? Ci na Me som Raj Devél? I adiáke džá, i Me javáva pašýl tyré uštá, i vysykliakirava tut, so túke te rakirés.” Mójza phendiá: “Rajo Dévla! Bičháv javirés, konés moginésa te bičhaves?” I zahačíia xolý Devléskiri pe Mojzaste, i Jov phendiá: “Naúšto nane túte Aaronós pšalés, Lievitianinos? Me džinóm, so jov moginéla te rakirél, ĥáda, jov vydžála angíl túke, i, dykhéla tut, obradynelape dro péskiro iló; tu javésa te rakirés léske i te čhuvés lavá dre léskire uštá, a Me javáva pašýl tyré uštá i pašýl léskire, i Me javáva te sykliakirav tumen, so tuménge te kerén; i javéla jov te rakirél zamiést túte manušénge; i adiáke jov javéla tyré ušténca, a tu javésa léske zamiést Devléste; i le destó davá dro tyró vast: lésa tu javésa te kerés znamiénii (ĥiertyká).” I gijá Mójza, i risijá ke Ioforo, péskiro sastro, i phendiá léske: “Džáva me, i risjováva ke miré pšála, savé isyn dro Jegípto, i podykhava, ci džidé jone isyn?” I phendiá Ioforo Mojzáske: “Džá ramanjosa (mirósa).” I phendiá Raj Devél Mojzáske pe Madiamoskiri phuv: “Džá, risjov dro Jegípto, pal-dová so myné saré, savé rodyne tyró iló.” I lyjá Mójza peskirjá romniá i péskire čhavén, čhudiá len pe osloste, i gijá pe Jegiptóskiri phuv. I Devléskiro destó Mójza lyjá dro péskiro vast. I Raj Devél phendiá Mojzáske: “Kiéli tu džása i risjosa dro Jegípto, dykh, saré dívy, savé Me dyjom te kerés túke, ker len angíl faraonoste, a Me xoliakirava léskiro iló, i jov na otmekéla manušén. I phen faraonóske: ‘Adiáke rakiréla Raj Devél: “Izrailjo isyn Miro čhavó, anglatunó Miro; me rakiráva túke: ‘Otmek Miré čhavés, sob (kaj) jov te dynarinél Mánge;’ a kóli na otmekesa les, tedy, ĥáda, Me zamarava tyré čhavés, anglatunes tyrés.’” Dromésa pe rat'kiriben kerdiápe, so streindia les Raj Devél, i kamdiá te muliakirél les. Tedy Siepfora, lyjá čhuri barestyr, občhindia jagóro (krajo) péskire-čhaveskiri loč (plot'), i, čhurdyjá les ke léskire ĥerá, phendiá: “Tu san rateskiro ternó mánde.” I otgijá léstyr Raj Devél. Tedy phendiá joi: ‘Rateskiro’ ternó – pir občhinyben.” I Devél phendiá Aaronóske: “Džá pe čhučí phuv gil Mojzáske. I jov gijá, i strenindiape lésa pašýl Devléskiri bérga, i čamudia les. I piriphendia Mójza Aaronóske saré Devléskire lavá, Savó les bičhadiá, i saré dívy, savé Jov uphendia. I gijá Mójza Aaronosa, i skedyné jone sarén Izrailjoskire-čhavéngire barydyrén, i piriphendia Aaróno saré lavá, savé rakirdiá Devél Mojzáske, i kerdiá Mójza dívy angíl manušéngire jakhá, i patiandyné manušá; i šundlé, so Raj Devél sys ke Izrailjoskire čhavé i dykhciá léngire mén'ki i terdiné jone pe čangá i poklonindlepe. Paló davá Mójza i Aaróno javné ke faraóno i phendlé: “Adiáke rakiréla Raj Devél (Jahvá), Devél Izrailjoskiro: ‘Otmek Miré manušén, sob (kaj) jone te kerén Mánge svénko pe čhučí phuv.’” Ne faraóno phendiá: “Kon isyn adasavó Raj Devél, sob (kaj) me te kandav Léskiri zan i te otmekav Izrailjo? Me na džinóm Ras-Devlés, i Izrailjo na otmekáva.” Jone phendlé: “Devél Judéngiro khardiá amen; otmek amen pe čhučí phuv pe trin dromeskire dyvesá, te janas svénto dyibén (žértva) Ráske-Devléske, amareske Devléske, sob (kaj) Jov te na xasiakirél amen fransenca (jazvasa) ci kurtalása.” I phendiá lénge Jegiptóskiro králi: “Vaš so tumé, Mójza i Aaróno, otmarena manušén léskire rendéndyr? Džán pe péskiri butý.” I phendiá faraóno: “Ĥáda, pe daja phuv manušá isyn drieván but, i tumé len otmarena léngire butiátyr.” I dro dová-pac' dyvés faraóno dyjá uphenybén pričhuvibnar'jenge /dykhibnar'jenge (pristavnikenge) pir butý, i manušénge, savén čhudé te dykhén pal butý, rakirí: “Na den butýr manušénge phus te kerén kirpičo, syr tasiá i pe tríto dyvés, mek jone kokoré te psirén i te keden péske phus, a bará čhuvén pe lénde adákicy-pac', ci but jone kerdé tasiá i pe tríto dyvés, i na tykniakiren; jone isyn sýrby pe svénko, paldavá i godlena: ‘Džása, i janasa svénto dyibén (žértva) amaré Ráske-Devléske’ den lénge butýr butý, sob (kaj) jone te kerén butý, i te na zalenpe čhučone (pustone) rakiribnenca.” I vyginé manušá, savén čhudé te dykhén pal lénde, i phendlé manušénge: “Adiáke rakiréla faraóno: me na davá tuménge phus; ne tumé kokoré džán, len péske phus, kaj lathéna, a tumaré butiátyr ničí na tykniakirelape.” I rozginepe manušá pir sarí Jegiptóskiri phuv, te skedén žnivo zamiést phus. A pričhuvibnarja, savé pal lénde dykhné, rakirdé: “Kerén péskiri butý pe kažno dyvés, syr i ĥaredyr, kiéli sys tuménde phus.” A dykhibnar'jen pal butý Izrailjoskire čhavéndyr, savén čhudé pe lénde faraonóskire pričhuibnarja te dykhén, mardé, rakirí: “Sóske tumé tasiá i adadyvés na keréna adákicy kirpičo, syr kerdé ke /žýko davá časo?” I javné Izrailjoskire-čhavéngire dykhibnarja ke faraóno, i zagodlyne, rakirí: “Vaš so tu adiáke pes lydžása tyrenca pishar'jénca? phus na déna tyré pishar'jénge, a kirpiči, rakiréna aménge, kerén. I ĥáda, tyrén pishar'jén marena; grého isyn tyré manušénge.” Ne jov phendiá: “Tumé san sýrby pe svénko, pe svénko, paldavá i rakiréna: ‘Džása, janasa svénto dyibén (žértva) Ráske-Devléske’. Džán, kerén butý, phus na déna tuménge, a ci but trej kirpiči, adákicy den.” I dykhné Izrailjoskire-čhavéngire dykhibnarja péskiri bída dre lavá: “Na tykniakiren, ci but trej pe kažno dyvés kirpičy.” I kiéli jone vyginé faraonostyr, strenindlepe Mojzasa i Aaronosa, savé sys terdé, i len užakirde, i phendlé lénge: “Mek te dykhél, i te sendiakirél tumen Raj Devél pal dová, so tumé kerdé amen nalačhenca dre faraonóskire i léskire-pishar'jengire jakhá, i dyné lénge kurtála dre vastá, sob (kaj) te zamarén amen. I risijá lavésa Mójza ke Raj Devél, i phendiá: “Rajo Dévla! Vaš so Tu domekcian adalen manušén ke dasaví bída, vaš so bičhadian man? pal-dová so dolé časostyr, syr me javdjom ke faraóno i lyjom te rakiráv Tyré lavésa, jov lyjá fujedýr te obdžalpe adalé manušénca, te zrakhes len, – Tu na zrakhcián Tyré manušén.” I phendiá Raj Devél Mojzáske: “Kakaná tu dykhésa, so Me keráva faraonosa; pir zoraló vasteskiro pekaiben jov otmekéla len; pir zoraló vasteskiro pekaiben jov až vytradela len péskire phuvjátyr.” I rakirdiá Devél Mojzáske, i phendiá léske: “Me som Raj Devél. Me sykadyjom Avraamóske, Isaakóske i Jakovóske dasavé lavésa: “Devél Sarezorjákiro”, a lavésa Miresa: “Raj Devél” na sykadyjom lénge; i Me čhudjom zavieto Miro lénca, sob (kaj) lénge te dav Xanaanengiri phuv, pe saví jone dživdé. I Me šundjom Izrailjoskire-čhavéngire ĥondiá pal dová, so Jegiptiáni rikiréna len dre pishariben, i priripirdjom Miro zavieto. I adiáke phen Izrailjoskire čhavénge: ‘Me som Raj Devél, i Me vylydžava tumen Jegiptianengire dynaribnastyr, i vylydžava tumen léngire plienóstyr, i zrakháva tumen protyrdyne vasteskire masesa i baré sendenca; i Me prilava tumen Péske syr manušén i Me javáva tuménge Devlésa, i tumé udžinena, so Me som Raj Devél, Devél tumaró, vylydžii tumen Jegiptóskire dynaribnastyr; i Me zalydžava tumen pe doiá phuv, pal saví Me ĥazdyjom Miro vast, sovlahadjom te dav la Avraamóske, Isaakóske i Jakovóske, i Me dáva la tuménge pe saró tumaré-rodoskiro džiibén. Me som Raj Devél.’” Mójza piriphendia davá Izrailjoskire čhavénge; ne jone na šundlé Mojzás pir napatiaiben i pharí butý. I phendiá Raj Devél Mojzáske, rakirí: “Zadžá, phen faraonóske, Jegiptóskire kralíske, sob (kaj) jov te otmekél Izrailjoskire čhavén péskire phuvjátyr.” I phendiá Mójza angíl Raste-Devléste: “Ĥáda, Izrailjoskire čhavé na šunéna man, syr kandéla man faraóno? A me na som rakiribnytko.” I rakirdiá Raj Devél Mojzáske i Aaronóske, i délas lénge, syr trej te rakirén Izrailjoskire čhavénge i faraonóske, Jegiptóskire kralíske, sob (kaj) te vylydžan Izrailjoskire čhavén Jegiptóskire phuvjátyr. Ĥáda (ake), isyn léngire barydyrá pe stréčy (pokolienii): Ruvimóskire čhavé, kon sys anglatunó Izrailjoskiro: Xanoho i Falo, Xiecrono i Xarmi: dalé isyn Ruvimóskire čékarja (siemieistvy). Simieonoskire čhavé sys: Jemuilo, i Jamino, i Ogado, i Jahino, i Coharo, i Sáulo, Xananejankakiro čhavó: davá isyn Simieonoskire čékarja (siemieistvy). Ĥáda, isyn Lievijoskire-čhavéngire lavá pir léngiro ródo: Girsono i Kaafo, i Mierari. A dživdiá Lievijo šel te trijánda eftá berš. Girsonoskire čhavé sys: Livni i Šymiei léngire čekar'jenca (siemieistvenca). Kaafoskire čhavé sys: Amramo i Icgaro, i Xievróno, i Uziilo. A dživdiá Kaafo šel te trijánda trin berš. Mierariskire čhavé sys: Mahli i Mušy. Davá isyn Lievijoskire čékarja (siemieistvy) pir léngiro ródo. Amramo lyjá Iohavieda, peskirjá bibja, paloróm, i joj bijandiá léske Aaronós i Mojzás. A dživdiá Amramo šel te trijánda eftá berš. Icgaroskire čhavé sys: Koriejo, i Niefiego, i Zihri. Uziiloskire čhavé sys: Misailo, i Elcafano, i Sifri. Aaróno lyjá péske romniá Jelisavieta, Aminadavoskirja čha, Naasonoskirja pheniá, i joj bijandiá léske Nadavos i Aviudos, Jelizaros i Ifamaros. Koriejoskire čhavé sys: Asiro, Jelkano i Aviasafo: davá isyn Koriejoskire čékarja (siemieistvy). Jelizáro, Aaronoskiro čhavó, lyjá péske romniá jekha Futiiloskire čhajendyr, i joj bijandiá léske Finiesos. Ĥáda, isyn Lieviténgire barydyrá pir stréčy (pokolienii) i pir léngire čékarja (siemieistvy). Aaróno i Mójza, davá isyn odolé, savénge phendiá Raj Devél: “Vylydžan Izrailjoskire čhavén Jegiptóskire phuvjátyr pir léngire otriády.” Jone i rakirdé faraonóske, Jegiptóskire kralíske, sob (kaj) jone te vylydžan Izrailjoskire čhavén Jegiptóstyr; ĥáda, isyn Mójza i Aaróno. I adiáke dro dová časo, kiéli Raj Devél rakirdiá Mojzáske pe Jegiptóskiri phuv, Raj Devél phendiá Mojzáske: “Me som Raj Devél! Phen faraonóske, Jegiptóskire kralíske, saró, so Me túke rakiráva.” Mójza ža phendiá angíl Raste-Devléste: “Ĥáda, me na som rakiribnytko: syr kandéla man faraóno?” I Raj Devél phendiá Mojzáske: “Dykh, Me čhudjom tut devlesa faraonóske, a Aaróno, tyró pšal, javéla tyresa prorokosa: tu javésa te rakirés saró, so Me phenáva túke, a Aaróno, tyró pšal, javéla te rakirél faraonóske, sob (kaj) jov te otmekél Izrailjoskire čhavén péskire phuvjátyr; ne Me pharjakirava faraonóskiro iló, i keráva but Miré znamiénii (ĥiertyká) i Miré dívy pe Jegiptóskiri phuv; faraóno na kandéla tumen, i Me čhuváva Miro vast pe Jegípto, i vylydžava Miren xaladén, Miré manušén, Izrailjoskire čhavén, Jegiptóskire phuvjátyr – baré sendenca; tedy Jegiptiáni udžinena, so Me som Raj Devél, kiéli čhuváva Miro vast pe Jegípto i vylydžava Izrailjoskire čhavén Jegiptóstyr.” I kerdé Mójza i Aaróno, syr phendiá lénge Devél, adiáke jone i kerdé. Mojzáske sys ohtodešá berš, a Aaronóske sys ohtodešá trin berš, kiéli jone lyné te rakirén faraonóske. I phendiá Raj Devél Mojzáske i Aaronóske: “Kóli faraóno phenéla tuménge: ‘Kerén dívo’, tedy tu phen Aaronóske: ‘Le tyró destó i čhurde les angíl faraonoste, – jov kerélape sapesa.’” Mójza i Aaróno javné ke faraóno i kerdé adiáke, syr rakirdiá Raj Devél. I čhurdyjá Aaróno péskiro destó angíl faraonoste i angíl léskire pishar'jende, i jov kerdiápe sapesa. I khardiá faraóno magen i džinybnaskiren pir čergeniá; i adalé Jegiptóskire čovahane kerdé dová-pac' péskire čarenca: kažno léndyr čhurdyjá péskiro destó, i jone kerdépe sapenca; ne Aaronoskiro destó proglynindia léngire desté. Faraonóskiro iló jaciá xoliamó, i jov na kandyjá len, syr i rakirdiá Raj Devél. I phendiá Raj Devél Mojzáske: “Narto (upriamo) isyn faraonóskiro iló: jov na kaméla te otmekél manušén. Džá ke faraóno atasiá: ĥáda, jov vydžála ke paní, tu terdjov pe léskiro drom, pe brégo reka (len'), i destó, savó piririsija dre sapeste, le tre tyró vast, i phen léske: ‘Raj Devél, Devél Judéngiro, bičhadiá man te phenáv túke: Otmek Miré manušén, sob (kaj) jone te kerén Mánge mangipén (pátieri) pe čhučí phuv; ne, ĥáda, tu ke davá časo na kandyjan. Adiáke rakiréla Raj Devél: Tu udžinesa daléstyr, so Me som Raj Devél: ĥáda, dalésa destesa, savó isyn dro miro vast, me pekavava pir paní, savó dre reka (len'), i jov risjola dro rat, i mačhé dre reka (len') meréna; i reka (len') javéla te khandel, i Jegiptianenge javéla džungaló (gidko) te p'jen paní rekátyr (leniátyr).’” I phendiá Raj Devél Mojzáske: “Phen Aaronóske: ‘Le tyró destó i čhuv tyró vast pe Jegiptianengire paniá: pe léngire réki (leniá), pe léngire thadypna, pe léngire ziery (oziery) i pe kažno štéto, kaj isyn paní; i risjona dro rat, i javéla rat pir sarí Jegiptóskiri phuv i dre kaštune khoré i dre baruné khoré (sasúdy).’” I kerdé Mójza i Aaróno, syr priphendiá Raj Devél. I ĥazdyjá Aaróno destó, i pekadiá pir rekakiro (leniakiro) paní angíl faraonóskire jakhá i angíl jakhá léskire pishar'jengire, i saró paní, so sys dre reka (len'), risijá dre rat, i mačhé dre reka (len') vymyne, i reka (len') lyjá te khandel, i Jegiptiáni na mogindlé te p'jen paní rekátyr (leniátyr); i sys rat pir sarí Jegiptóskiri phuv. I Jegiptóskire čovahane péskire zarakiribnasa kerdé dová-pac'. I jaciá pharedyr faraonóskiro iló, i jov na kandyjá len, syr i rakirdiá Raj Devél. I risijá faraóno, i gijá dro péskiro kher; i iló léskiro na parudyja i daléstyr. I lyné saré Jegiptiáni te ĥanaven pašýl reka (len'), sob (kaj) te lathén paní vaš pibén, pal-dová so na mogindlé te p'jen paní rekátyr (leniátyr). I proginé eftá (bitrinéngiro deš) dyvesá paló dová, syr Raj Devél xasiakirdiá reka (len'). I phendiá Raj Devél Mojzáske: “Džá ke faraóno i phen léske: ‘Adiáke rakiréla Raj Devél: ‘Otmek Miré manušén, sob (kaj) jone te dynarinén Mánge’; kóli tu javésa proti te otmekes len, tedy ĥáda, Me xasiakiráva saró tyró štéto žambenca (capnienca); i javéla – pherdý (te kišynel) reka (len') žambenca, i jone vydžána, i zadžána dre tyró kher, i kaj tu san sutó, i pe tyró čhuibén, i dre tyré-dynar'jengire kherá, i tyré manušéngire, i dre tyré bova, i dre tyré xumera (tiasty), i pe túte, i pe tyré manušénde, i pe saré tyré dynar'jende džána upré žamby.’” I phendiá Raj Devél Mojzáske: “Phen Aaronóske: ‘Čhuv tyró vast tyré destesa pe réki (leniá), pe thadypena i pe ziery (oziery); i vylydža žamben pe Jegiptóskiri phuv.’” Aaróno čhudiá péskiro vast pe Jegiptóskiro paní; i vyginé žamby, i začhakirde Jegiptóskiri phuv. Dová-pac' kerdé i čovahane (tanuki) péskire zarakiribnasa i vylydžiné žamben pe Jegiptóskiri phuv. I khardiá faraóno Mojzás i Aaronós i phendiá: “Mangénpe Ráske-Devléske, sob (kaj) Jov te otlel žamben mándyr i miré manušéndyr, i me otmekáva Izrailjoskire manušén te janén svénto dyibén (žértva) Ráske-Devléske.” Mójza phendiá faraonóske: “Uphen časo mánge kokoró, kiéli te mangavpe pal túte, pal tyré dynar'jende i pal tyré manušénde, sob (kaj) te xasjon žamby tútyr, tyré kherendyr, i te jačénpe dre jekh reka (len').” Jov phendiá: “Atasiá.” Mójza otphendiá: “Javéla pir tyró lav, sob (kaj) tu te džinés, so nane nikonés, syr Raj Devél, Devél amaró; i džána krig žamby tútyr, tyré kherendyr, i tyré dynar'jéndyr (slugéndyr), i tyré manušéndyr; jekh dre reka (len') jone jačénape.” Mójza i Aaróno vyginé faraonostyr, i Mójza riskirdiá mangipén ke Raj Devél pal žambende, savén Jov lydžijá pe faraonoste. I Raj Devél kerdiá pir Mojzáskiro lav. Žamby mulyne dre kherá, pe vulícy (gásy) i pe féldy. I skedyné len dre kučy, i zakhandyja phuv. I dykhciá faraóno, so kerdiápe lokhedýr, i léskiro iló jaciá nartedyr, i jov na kandyjá len, syr i rakirdiá Raj Devél. I phendiá Raj Devél Mojzáske: “Phen Aaronóske: ‘Čhuv tyró destó i pekav dro phuvjákiro práho, i kerélape práho moškenca pir sarí Jegiptóskiri phuv.’” Adiáke jone i kerdé: Aaróno čhudiá péskiro vast péskire destesa, i pekadiá dro phuvjákiro práho, i javné moški pe manušénde i pe kheritkoné murdalénde (pe skoto). Saró phuvjákiro práho kerdiápe moškenca pir sarí Jegiptóskiri phuv. Adiáke-pac' i čovahane kamlé péskire zarakiribnasa te vykharen mošken, ne na dyné ráda (na zmogindle). I sys moški pe manušénde i pe kheritkoné murdalénde. I phendlé čovahane faraonóske: “Davá isyn Devléskiro angúšt.” Ne faraonóskiro iló jaciá pharedyr, i jov na kandyjá len, syr i rakirdiá Raj Devél. I phendiá Raj Devél Mojzáske: “Atasiá uštý tasiárles (ránes), i jav angíl faraonóskiro muj. Ĥáda, jov džála ke paní, i tu phen léske: ‘Adiáke rakiréla Raj Devél: Otmek Miré manušén, sob (kaj) jone te kerén Mánge mangipén. A kóli na otmekesa Miré manušén, tedy, ĥáda, Me bičhaváva pe túte, i pe tyré dynar'jende, i pe tyré manušénde, i dre tyré kherá džuklane pušumen, i javéna pherdé Jegiptianengire kherá džuklane pušumenca i kokori phuv, pe saví jone dživéna; i dre dová dyvés Me čhuváva dre rig Giesiemoskiri phuv, pe saví isyn Miré manušá, i odój na javéna džuklane pušuma; sob (kaj) tu te džinés, so Me, Raj Devél, som maškír phuv; Me otkedava Miré manušén tyrendyr. Atasiá javéla davá javiben.’” Adiáke i kerdiá Raj Devél: priurniandyne drieván but džuklane pušuma (džuklane muhi) dro faraonóskiro kher, i dre léskire-dynar'jengire kherá, i pe sarí Jegiptóskiri phuv, xasijá phuv džuklane pušumendyr. I khardiá faraóno Mojzás i Aaronós i phendiá: “Džán, janén tumaré Devléske svénto dyibén (žértva) pe daja phuv.” Ne Mójza phendiá: “Naštý davá te kerés, pal-dová so džungaló (brytko) isyn vaš Jegiptianenge amaró janybén amaré Ráske-Devléske; kóli ame lása te janas svénto dyibén (žértva), so isyn džungaló vaš Jegiptianenge dre léngire jakhá, tedy ci na domarena jone amen barénca? Ame džása pe čhučí phuv, pe triné-dyvesengiro drom, i janasa svénto dyibén Ráske-Devléske, amaré Devléske, syr Jov phenéla aménge.” I phendiá faraóno: “Me otmekáva tumen te janén Ráske-Devléske, tumaré Devléske svénto dyibén (žértva) pe čhučí phuv, jekh so na džán dur; mangénpe pal mánde.” Mójza phendiá: “Ĥáda, me vydžava tútyr i javáva te mangavpe Ráske-Devléske, i otdžana džuklane pušuma faraonostyr, i léskire dynar'jéndyr (slugéndyr), i léskire manušéndyr atasiá; jekh so mek faraóno te pirijačel te xohavél, na otmeki manušén te janén Ráske-Devléske svénto dyibén.” I gijá javrí Mójza faraonostyr, i mangdiápe Ráske-Devléske. I kerdiá Raj Devél pir Mojzáskiro lav, i otlydžija džuklane pušumen faraonostyr, léskire dynar'jéndyr (slugéndyr) i léskire manušéndyr; na jaciápe ni jekh. Ne faraóno xoliakirdia péskiro iló i pe davá mólo, i jov na otmekciá manušén. I phendiá Raj Devél Mojzáske: “Džá ke faraóno i phen léske: ‘Adiáke rakiréla Raj Devél, Devél Judéngiro’: ‘Otmek Miré manušén, sob (kaj) jone te kerén Mánge patýv. Ne, kóli tu na zakamesa te otmekes len, i duredýr javésa len te rikires, to tedy, ĥáda, Ráskire-Devléskiro vast javéla pe tyré kheritkoné murdalénde (pe skoto), savó isyn pe félda, pe grénde, pe oslende, pe vierbliudende, pe guruvende i bakrende; javéla dukh ke meribén drieván pharí; i roskerela Raj Devél Izrailjoskire kheritkoné murdalén (skoto) Jegiptóskire murdaléndyr, i saré Izrailjoskire čhavéngire-murdaléndyr na meréla (muljola) ničí.’” I uphendia Raj Devél časo, pheny: “Atasiá Raj Devél keréla davá pe daja phuv.” I kerdiá davá Raj Devél pe javír dyvés, i vymyne saré Jegiptóskire kherítka murdalá; Izrailjoskire-čhavéngire kheritkoné murdaléndyr (skotóstyr) nijékh na mulyja. Faraóno bičhadiá te udžinel, i ĥáda, Izrail'tianengire kheritkoné murdaléndyr na mulyja nijékh. Ne iló faraonóskiro jaciá syr bar, i jov na otmekciá manušén. I phendiá Raj Devél Mojzáske i Aaronóske: “Len pherdý burnyk (žmienia) bovestyr práska (pieplo), i mek te čhurdel la Mójza ke bolybén dre faraonóskire jakhá; i ĥazdélape pylo pir sarí Jegiptóskiri phuv, i javéla pe manušénde i pe kheritkoné murdalénde šuvlypen čyl'čakenca (naryvenca), pe sarí Jegiptóskiri phuv.” Jone lyné bovestyr práska, i terdiné angíl faraonóskiro muj. Mójza čhurdyjá la ke bolybén, i kerdiápe šuvlypen čyl'čakenca pe manušénde i pe kheritkoné murdalénde. I na mogindlé čovahane te vyrikiren angíl Mojzaste pir šuvlypnaskiri pričyna, pal-dová so šuvlypen sys pe čovahanende i pe saré Jegiptianende. O Raj Devél pharjakirdia iló faraonóskiro, i jov na kandyjá len, syr i rakirdiá Raj Devél Mojzáske. I phendiá Raj Devél Mojzáske: “Atasiá uštý tasiárles (ránes), i jav angíl faraonóskiro muj, i phen léske: ‘Adiáke rakiréla Raj Devél, Devél Judéngiro: Otmek Miré manušén, sob (kaj) jone te kerén Mánge patýv; pal-dová so davá mólo Me bičhaváva saré Miré meribnytka fránsy (jazvy) dro tyró iló, i pe tyré dynar'jende, i pe tyré manušénde, sob (kaj) tu te džinés, so nane adasaves, syr Me som, pir sarí phuv; adiáke, syr Me te čhuvav Miro vast, tedy te nasvaliakirav tut i tyré manušén meribnytkone fransenca (jazvasa), i tu javésa te xasjos phuvjátyr: ne vaš davá Me tut zrakhcjom, sob (kaj) te sykavav pe túte Mirí zor, i, sob (kaj) te javél Miro lav vyphendlo pir sarí phuv; tu iščo (inké) san proti Miré manušénde, sob (kaj) te na otmekes len, Ĥáda, Me atasiá bičhaváva, dre davá-pac' časo grado drieván baró, savó nijékhvar na sys dro Jegípto léskire javibnaskire dyveséstyr ke davá časo; i adiáke bičháv te skedén tyré stády i saró, so isyn túte pe félda: pe saré manušénde i kheritkoné murdalénde, savé jačénape pe félda i na skedénape dre kherá, peréla grado, i jone meréna.’” Odolé-faraonóskire pishar'jendyr, savé strahádyne Ráskire-Devléskire lavéndyr, sýges skedyné péskire pishar'jén i péskire stády dre kherá; a kon na riskirdiá péskiro iló ke Ráskire-Devléskiro lav, odová mekciá peskiren pishar'jén i péskire stády pe félda. I phendiá Raj Devél Mojzáske: “Ĥazde vast tyró ke bolybén, te džal grado pe sarí Jegiptóskiri phuv, pe manušénde, pe kheritkoné murdalénde, i pe sarí čar feldytko pe Jegiptóskiri phuv.” I ĥazdyjá Mójza péskiro destó ke bolybén, i Raj Devél kerdiá gromo i grado, i jag rosčhuvelape pir phuv, i bičhadiá Raj Devél grado pe Jegiptóskiri phuv; i sys grado i jag maškirál grado, drieván zoraló grado, savó na sys pir sarí Jegiptóskiri phuv dolé časostyr, syr jaciá džiibén pe láte. I vymardia grado saró pir Jegiptóskiri phuv, so sys dre félda, manušéstyr ke kherítka murdalá, i sarí čar feldytko vymardia grado, i saró veš pe félda vyphagirdia. Pe jekh Giesiemoskiri phuv, kaj dživdé Izrailjoskire čhavé, na sys grado. I bičhadiá faraóno, i khardiá Mojzás i Aaronós, i phendiá lénge “Davá mólo me kerdjom grého; Raj Devél isyn čačunó, a me i miré manušá sam bangé; mangénpe Ráske-Devléske: mek te pirijačen Ráskire-Devléskire grómy i grado; i me otmekáva tumen, i me na javáva butýr te zarikirav.” Mójza phendiá léske: “Syr syg me vydžava foróstyr, i ĥazdáva miré vastá ke Raj Devél; to grómy pirijačena, i grado butýr na javéla, sob (kaj) tu te udžines, so phuv isyn Raskiri-Devléskiri;” ne me džinóm, so tu, i tyré pishárja iščo (inké) na daréna Rástyr-Devléstyr. Ljono (ĥandlado) i jačmienjo (ĥersto) sys vymarde, pal-dová so jačmienjo (ĥersto) vykolosindiape, a ljono dyjá siemi; a parnó giv i giv (polba) na vymarde, pal-dová so jone sys pozdnia (korigitka). I vygijá Mójza faraonostyr i foróstyr, i ĥazdyjá péskire vastá ke Raj Devél, i pirijaciá gromo i grado, i bryšýnd pirijaciá te čhuvelpe pe phuv. I dykhciá faraóno, so pirijaciá bryšýnd i grado i gromo, i durydyr griešyndia, i kerdiá kokoró pharó péskiro i pishar'jengiro iló. I jaciá pharedyr faraonóskiro iló, i jov na otmekciá Izrailjoskire čhavén, syr i rakirdiá Raj Devél pir Mojzaste. I phendiá Raj Devél Mojzáske: “Zadžá ke faraóno, pal-dová so Me kerdjom pharó léskiro iló i léskire pishar'jengiro, sob (kaj) te sykavav maškír lénde dalé Miré dívy, i sob (kaj) tu te rosphenes tyré čhavéske i tyré-čhavéskire čhavéske pal dová, so Me kerdjom dro Jegípto, i pal Miré dívy, savé Me sykadjom pir léste, i sob (kaj) tumé te džinén, so Me som Raj Devél” Mójza i Aaróno giné ke faraóno i phendlé léske: “Adiáke rakiréla Raj Devél, Devél Judéngiro: ‘Ci ĥará (dlúges) tu javésa te na javes dre jekh godý angíl Mánde? Otmek Miré manušén, sob (kaj) jone te kerén Mánge patýv; a kóli tu na otmekesa Miré manušén, tedy, ĥáda, atasiá Me lydžáva pe tyró štéto phakitkone skočken (saranča): joj učhakiréla phuv adiáke, so naštý javéla te dykhés phuv, i so jaciápe tuménde gradostyr, to joj shala, obhala adiáke-pac' saré vešá, savé tuménde barjona pe félda, i joj (saranča) pherdiakirela tyré kherá, saré tyré-pishar'jengire kherá i saré Jegiptianengire kherá, so na dykhné tyré dadá, ni tyré-dadengíre dadá dyveséstyr, syr dživéna jone pe phuv, adiáke-pac' ke davá dyvés.’” I Mójza phendiá angíl sarénde i vygijá faraonostyr. Tedy faraonóskire pishárja phendlé léske: “Ci ĥará (dlúges) jov javéla te menčynel amen? Otmek adalé manušén, mek jone te kerén patýv Ráske-Devléske, péskire Devléske; naúšto tu na dykhésa, so Jegípto xasjola?” I riskirdé pale Mojzás i Aaronós ke faraóno, i faraóno phendiá lénge: “Džán, kerén patýv Ráske-Devléske, Devléske tumareske; ne kon tuméndyr džála?” I phendiá Mójza: “Džása ame amaré tyknemasenca i phurenca, amaré čhavénca i čhajenca, i amaré bakrenca i guruvenca džása, pal-dová so aménde isyn svénko Ráske-Devléske.” Faraóno phendiá lénge: “Te javél adiáke, Raj Devél te javél tuménca! Me skedyjompe te otmekav tumen: ne sóske čhavénca? Dykhén, tuménde isyn nalačhé dúmy! Nad: džán jekh muršá, i kerén patýv Ráske-Devléske, adiáke, syr tumé davá mangné.” I vytradyné len faraonostyr. Tedy Raj Devél phendiá Mojzáske: “Ĥazde tyró vast pe Jegiptóskiri phuv, mek te perén phakitka skočki (saranča) pe Jegiptóskiri phuv, i mek te vyhal sarí phuvjákiri čar i saró, so jaciápe gradostyr.” I ĥazdyjá Mójza péskiro destó pe Jegiptóskiri phuv, i Raj Devél jandiá pe daja phuv vastokóstyr balvál, saví sys saró dová dyvés i rat. Jaciá zlóko (ránko), i vastokóstyr balvál lydžijá phakitkone skočken (saranča). I pyné phakitka skočki pe sarí Jegiptóskiri phuv, i pasine pir sarí Jegiptóskiri rig drieván but; angledýr na sys dasaven phakitkone skočken, i paló davá na javéla dasaven; jone učhakirde sarí phuv adiáke, so phuv na sys bicialy, i vyhane sarí phuvjákiri čar i saré vyšeskire barjakirdé (plódy), savé jačnépe gradostyr, i na jaciápe ni savó zelenyben ni dre vešá, ni pe feldytko čar pe sarí Jegiptóskiri phuv. Faraóno sygnedyr khardiá Mojzás i Aaronós i phendiá: “Kerdjom me grého angíl Raste-Devléste, Devléste tumareste, i angíl tuménde; akaná primangen grého miro iščo (inké) mólo, i phenén pátieri (molítva) Ráske-Devléske, Devléske tumareske, sob (kaj) Jov te otlydžal mándyr davá meribén.” Mójza vygijá faraonostyr, i phendiá pátieri (molítva) Ráske-Devléske. I ĥazdyjá Raj Devél javire rigátyr zapadostyr drieván zoralý balvál, i jov lydžijá saranča i čhurdyjá la dro Loló mórjo (derjáv): na jaciápe ni jekh phakitko skočko pe sarí Jegiptóskiri phuv. Ne Raj Devél pharjakirdia faraonóskiro iló, i jov na otmekciá Izrailjoskire čhavén. I phendiá Raj Devél Mojzáske: “Ĥazde tyró vast ke bolybén, i javéla kalypén (ciamlypén) pe Jegiptóskiri phuv dasaví ĥensto, so počhuinesa les.” Mójza ĥazdyjá péskiro vast ke bolybén, i sys ĥensto kalypén pir sarí Jegiptóskiri phuv trin dyvesá; i na dykhné manušá jekh jekhés, i nikón na uštyjá péskire štetóstyr trin dyvesá; Izrailjoskire čhavénde sarénde sys dud (svéto) dre léngire kherá. Faraóno khardiá Mojzás i phendiá: “Džán, kerén patýv Ráske-Devléske, mek te jačélpe tumaró tyknó i baró skoto (kherítka murdalá), a tumaré čhavé mek te džán tuménca.” Ne Mójza phendiá: “De adiáke-pac' dre amaré vastá svénto dyibén (žértva) i célo shačkiribén, sob (kaj) te janas Ráske-Devléske, Devléske amareske; mek te džán i stády amaré aménca, na jačélape nijékh naj (kopyto), paldavá léndyr ame lása vaš svénto dyibén Ráske-Devléske, Devléske amareske, ne paka ame javása odorík, ame na džinása, so te janas dro svénto dyibén Ráske-Devléske.” I pharjakirdia Raj Devél faraonóskiro iló, i jov na zakamdiá te otmekél len. I phendiá léske faraóno: “Džá mándyr; rakhpe, na jav butýr angíl muj miro; dre dová dyvés, kiéli tu dykhésa muj miro, tu merésa.” I phendiá Mójza: “Syr phendián tu, adiáke i javéla; me na dykháva butýr muj tyró.” I phendiá Raj Devél Mojzáske: “Iščo jekh bída Me lydžáva pe faraonoste i pe Jegiptianende; paló davá jov otmekéla tumen adathýr; kiéli jov javéla te otmekél, sygnymasa javéla te tradel tumen adathýr; to phen manušénge, sob (kaj) kažno murš péskire pašatunestyr i kažno džuvlý péskire pašatuniatyr te vymangen rupuvé i suvnakuné kuč vieščy (viešča).” I dyjá Raj Devél patýv Péskire manušénge dre Jegiptóskire jakhá; ne i Mójza sys drieván baró pe Jegiptóskiri phuv, dre faraonóskire-pishar'jengire jakhá i manušéngire. I phendiá Mójza: ‘Adiáke rakiréla Raj Devél: “Dro pašrat Me prodžava maškirál Jegípto, i meréla kažno bijáto anglatuné bijanypnastyr pe Jegiptóskiri phuv, faraonóskire anglatuné bijanypnastyr, savó isyn beštó pe trono péskiro, ke anglatuné bijanypén pisharicakiro, saví isyn pašýl žorny (beledin), i ke saró anglatunó bijanypnaskiro kheritkoné murdaléndyr; i javéla baró roviben pir sarí Jegiptóskiri phuv, savó na sys, i savó na javéla butýr; saré Izrailjoskire čhavénde ni pe manušéste, ni pe kheritkoné murdalénde na riskiréla džukel péskire čibása, sob (kaj) tumé te džinén, saví rozn' keréla Raj Devél maškír Jegiptianende i Izrail'tianende. I javéna saré tyré pishárja ke me, i pokloninenape (keréna šerésa) mánge, rakirí: “Vydža tu i saré manušá, savénca tu xulainesa. Paló saró me i vydžava.” I vygijá Mójza faraonostyr xoliása. I phendiá Raj Devél Mojzáske: “Na kandyjá tumen faraóno, sob (kaj) te javén butýr Miré dívy pe Jegiptóskiri phuv.” Mójza i Aaróno kerdé saré dalé dívy angíl faraonoste; ne Raj Devél pharjakirdia faraonóskiro iló, i jov na otmekciá Izrailjoskire čhavén péskire phuvjátyr. I phendiá Raj Devél Mojzáske i Aaronóske pe Jegiptóskiri phuv: “Davá čhon mek te javél tuménde čhonengire anglypnasa (načalosa), pervonesa mek te javél jov tuménde maškirál beršeskire čhoná. Phenén sarénge Izrailjoskire manušénge: ‘Le déšto dyvés dalé-čhonéskiro, mek te len péske kažno jekhés bakrés pir čékar' (siemieistvo), pir bakreste pe čékar' (pe siemieistvo); a kóli čékar' adiáke isyn tykny, so na shala bakrés, tedy mek joj te lel péskire susiedosa (kotarisa), savó dživéla pašýl léskiro kher, pe kažnoné manušéste čekarjatyr: adákicy ci but kažno shala, rozginen pe bakreste. Bakro tuménde trej te javél bidošéngiro, muršytko, jekhe-beršytko; len les bakréndyr ci buznendyr, i mek jov te javél tuméndyr dalé-čhonéskiro ke dešuštarto dyvés: tedy mek te začhinen les saró Izrailjoskire-manušéngiro skedyibén bel'velié, i mek te len léskire ratestyr i te obmaken lésa pe duj kosiaki i pe vudarengiri pirikladina dre kherá, kaj javéna te xan les; mek te shan léskiro mas dre daja-pac' rat, pekno pe jag; priesnone marésa i kirke čar'jenca mek te shan les; na xan léstyr nadopekno, ci kerado dro paní, ne xan pekno pe jag, šeró ĥerénca i andratuné masenca; na jačkiren léstyr ke zlóko, ne so jačélape léstyr ke zlóko, dová xačkirén pe jag. Han les adiáke: mek te javén tumaré pera podphandle, ĥerá tumaré te javén uridé i desté tumaré te javén dre tumaré vastá, i xan les sýges: ĥáda, isyn Patradí Ráskire-Devléskiri. A Me džáva dre daja-pac' rat pir Jegiptóskiri phuv, i muliakirava kažnoné anglatuné bijatós pe Jegiptóskiri phuv manušéstyr ke kherítko murdál, i pe sarénde Jegiptóskire devlorende Me keráva séndo. Me som Raj Devél. I javéla tuménde rat ĥiertykasa (znamienijosa) pe kherá, kaj tumé san, i dykháva rat, i Me prodžava mamúj tuménde, i na javéla maškír tuménde xasibnýtko dukh, kiéli Me javáva te xasiakiráv Jegiptóskiri phuv. I mek te javél tuménge davá dyvés ripirdo, i svenkinen dro davá svénko Ráske-Devléske, dre saré tumaré ródy, syr uphenybén viéčno te svenkinen les. Eftá dyvesá xan priesno maró; pervoné anglatuné dyveséstyr vyčhurden šutlypen (kislyma) tumaré kherendyr, pal-dová so, kon javéla te xal kvašeno (šutlo) anglatuné dyveséstyr ke eftáto dyvés, dová di javéla muliakirdó Izrailjoskire manušéndyr. I dro anglatunó dyvés mek te javél tuménde svénto skedyibén, i pe eftáto dyvés svénto skedyibén: ni saví butý tuménge naštý te kerén dre dalé dyvesá; jekh so te xal kažno manúš, jekh davá saštý te kerén tuménge. Dykhén rakhunes (rakhibnasa) pe opriesnoki, pal-dová so dro davá-pac' dyvés Me vylydžijom tumaré manušén Jegiptóskire phuvjátyr, i rakhén davá dyvés dre saré tumaré ródy, syr uphenybén viéčno. Dešuštarengire dyveséstyr dro anglatunó čhon, bel'vieliatyr xan priesno maró ke bel'vél' biš te-jekheskiro dyveseskiro dro dová-pac' čhon; eftá dyvesá naštý te javél kvašeno dre tumaré kherá, pal-dová so, kon javéla te xal kvašeno (pe droždžy), odová di javéla muliakirdo Izrailjoskire manušéndyr, ci manúš, savó javdiá, ci savó dživéla pe doiá phuv. Niči kvašeno na xan; pe kažno štéto, kaj tumé javéna, xan priesno maró.’” I skedyjá Mójza sarén Izrailjoskire phurydyren, i phendiá lénge: “Vykeden i len péske bakrén pir tumaré čékarja i začhinen bakrores vaš patradí; i len pučko isopo, i bulaven (obmakninen) dre rat, savó isyn dre sudinki [khoré-r.s] i makhen pirikladina i duj kosiaki vudarengire ratésa, savó isyn dre sudinki; a tumé nikón te na vydžán pal péskire kheréskire vudará ke ránko. I syr džála Raj Devél te xasiakirél Jegípto, i dykhéla rat pe pirikladina i pe duj kosiaki i prodžála Raj Devél mamúj vudará, i na domekela meribén te zadžál dre tumaré kherá vaš xasiakiriben. Rakhén davá, syr statúto vaš péske i vaš péskire čhavénge pe viéko. Kiéli zadžána tumé pe phuv, saví Raj Devél déla tuménge, syr Jov rakirdiá, rakhén davá dynaribén.” I kiéli phenéna tuménge tumaré čhavé: “Savó isyn davá dynaribén (služenijo)?” to tumé phenén: “Davá isyn patraditko svénto dyibén (žértva) Ráske-Devléske, Savó progijá mamúj Izrailjoskire-čhavéngire kherá dro Jegípto, kiéli muliakirdiá Jegiptianen, i amaré kherá rakhciá. I terdiné manušá pe čangá i klonindlepe.” I giné Izrailjoskire čhavé, i kerdé, syr phendiá Raj Devél Mojzáske i Aaronóske, adiáke i kerdé. Dre pašrat Raj Devél muliakirdiá sarén anglatuné bijatén pe Jegiptóskiri phuv, faraonóskire anglatunestyr, savó sys beštó pe péskiro trono, ke bešybnariskire anglatuneste, savó sys beštó dro štaribén, i saró anglatunó bijanypnaskiro kheritkoné murdaléndyr. I uštyjá faraóno ratý kokoró i saré léskire pishárja, i saró Jegípto; i kerdiápe pe Jegiptóskiri phuv baró roviben, pal-dová so na sys kher, kaj te na javél muló. I faraóno khardiá Mojzás i Aaronós ratý, i phendiá: “Uštén, vydžán miré manušéndyr, syr tumé, adiáke Izrailjoskire čhavé, i džán, kerén patýv Ráske-Devléske, syr tumé rakirdé; tykné i baré kheritkoné murdalén len, syr tumé rakirdé; džán i bahtiakiren man.” I sygniakirenas Jegiptiáni manušén, sob (kaj) sygnedyr len te vybičhaven dolé phuvjátyr; pal-dová so rakirdé jone: ‘Ame saré merasa’. I lydžiné manušá péskiro tiasto (xumer), angledýr syr jov zašutlyja (zakisnindia); léngire kvašni, zaphandle dre léngire ídi, sys pe léngire psiké. I kerdé Izrailjoskire čhavé pir Mojzáskiro lav i vymangne Jegiptianendyr rupuvé i suvnakuné priedmiety i ídi. O Raj Devél kerdiá adiáke, sob (kaj) te javél láska Péskire manušénge dre Jegiptianengire jakhá: i jone dénas lénge, i jone obkedyne Jegiptianen. I giné Izrailjoskire čhavé Raamsiesostyr ke Sokhofo ke šov šelá tysjoncy (bará) muršén pezal, apríč čhavorende; i but javire-rodoskire manušá vyginé lénca, i tyknó i baró kherítko murdál, stada sys drieván bari. I spekne jone tiastostyr (xumerestyr), savó vylydžiné Jegiptóstyr, priesna mariklia, pal-dová so jov iščo (inké) na zakvasindiape, pal-dová so jone sys vytradyné Jegiptóstyr, i na mogindlé te na sygniakiren, i xabén na skedyné péske pe drom. Časo (cýro), savó Izrailjoskire čhavé dživdé ke Jegípto, sys štaršelá trijánda berš. Syr proginé štaršelá trijánda berš, dre dová-pac' dyvés vyginé saré Ráskire-Devléskire otriády Jegiptóskire phuvjátyr ratý. Davá-isyn rat bdienija (te na soven) Ráske-Devléske pal léngiro vylydžiiben Jegiptóskire phuvjátyr; daja rat-bdienija Ráske-Devléske saré Izrailjoskire čhavénde dre léngire ródy. I phendiá Raj Devél Mojzáske i Aaronóske: “Ĥáda, isyn statúto (ustavo) Patradiakiro: ni savó javire-rodoskiro manúš naštý te xal davá, a kažno pishári (rabo), savó kindlo pal rup, kiéli občhinesa les, saštý (moginéla) te xal la; manúš, savó javdiá javire rigátyr i lynó pe butý, naštý te xal la. Dro jekh kher trej te xas la, i na lydžán mas kheréstyr, i kokalý dalé na phagiren. Saré Izrailjoskire manušénge trej te kerén la. Kóli túte javéla te dživél manúš javire rigátyr, i zakaméla jov te kerél Patradí Ráskire-Devléskiri, to tedy občhin saré muršén, i tedy mek jov lel te kerél la, i javéla syr dalé-phuvjákiro manúš; a nisavó naobčhindlo naštý te xal la; iekh Zakóno mek te javél i vaš tuménge i vaš manušéske, savó jaciá te dživél maškirál tuménde.” I saró kerdé Izrailjoskire čhavé: syr phendiá Raj Devél Mojzáske i Aaronóske, adiáke i kerdé. Dro dová-pac' dyvés Raj Devél vylydžijá Izrailjoskire čhavén Jegiptóskire phuvjátyr. I phendiá Raj Devél Mojzáske: “Vysvencyn Mánge kažnones anglatunes (pervones) bijatós, savó otkerela kažno ločoví (utroba) maškirál Izrailjoskire čhavénde, manušéstyr ke kherítka murdalá (ke skoto): jone isyn Miré.” I phendiá Mójza manušénge: “Ripiren davá dyvés, dre savó vyginé tumé Jegiptóstyr, pishar'jengire kheréstyr, pal-dová so zoralé vastésa vylydžijá tumen Raj Devél odothýr, i na xan kvašeno; adadyvés vydžán tumé, dro čhon Avivo (Sientiabrjo). I kiéli zalydžala tut Raj Devél pe Xananiejengiri, i Xietiejengiri, i Amoriejengiri, i Jeviesiejengiri i Iievusiejengiri phuv, pal saví sovlahadiá Jov tyré dadénge, so déla túke phuv, kaj thadéla thud i avgín, ker davá dynaribén dre davá čhon, eftá dyvesá xa priesno maró, i pe eftáto dyvés-svénko Ráske-Devléske; priesno maró trej te xan eftá dyvesá, i naštý te javél túte kvašeno maró, i naštý te javél túte šutlo (kvašeno) dre saré rigá tyré. I phen dre dová dyvés tyré čhavéske: davá vaš dová, so Raj Devél kerdiá mánca, kiéli me vygijom Jegiptóstyr. I mek te javél túke davá šperasa (znakosa) pe tyró vast i ripiribnasa angíl tyré jakhá, sob (kaj) Ráskire-Devléskiro zakóno te javél dre tyré uštá, pal-dová so zoralé vastésa vylydžijá tut Raj Devél Jegiptóstyr. Ker davá statúto dre uphendló časo, beršestyr dro berš. I kiéli janéla tut Raj Devél pe Xanaanóskiri phuv, syr Jov sovlahadiá túke i tyré dadénge, i déla la túke, – otdé Ráske-Devléske saró, so otkerela ločoví (utroba); i saró anglatunó tyknó kheritkoné murdaléndyr (skotóstyr), savó javéla túte, murškané rodóstyr, Ráske-Devléske, a kažnones oslendyr, savó rosphandelape, zaparuv bakresa; a kóli na zaparuvesa, vykin les; i kažnones manušeskires anglatuné bijanypnaskires tyré čhavéndyr vykin. I kiéli korigedýr (pozžedýr) phučela tútyr tyró čhavó, rakirí: ‘So isyn davá?’ Tedy phen léske: ‘Zoralé vastésa vylydžijá amen Raj Devél Jegiptóstyr, pishar'jengire kheréstyr. Pal-dová so, kiéli faraóno na kamdiá te otmekél amen, Raj Devél muliakirdiá sarén, kon bijándyja anglatunó pe Jegiptóskiri phuv, kon bijándyja anglatuné manušéste ke anglatunó tyknó kheritkoné murdaléndyr; paldavá me janáva saró dro svénto dyibén (žértva) Ráske-Devléske, so rosphandela ločoví (ložesna), muršytkone rodóstyr, a kažnones, kon bijándyja anglatunó miré čhavéndyr, vykinava. I mek te javél daja špéra (znako) pe tyró vast i zamiést phandluny (poviazka) pe tyré jakhá, pal-dová so zoralé vastésa Raj Devél vylydžijá amen Jegiptóstyr.’” Kiéli faraóno otmekciá manušén, to Devél na lydžijá len pir Filistimijákire-phuvjákiro drom, pal-dová so joj sys pašýl; pal-dová so Raj Devél phendiá: “Sob (kaj) te na piriduminen manušá, syr dykhéna maribén, i te na risjon dro Jegípto.” I Raj Devél oblydžija manušén čhučé dromésa ke Loló mórjo (derjáv). I vyginé Izrailjoskire čhavé kurtalenca Jegiptóskire phuvjátyr. I lyjá Mójza pésa Jozáskire (Iosifóskire) kokalý, pal-dová so Joza sovlahadiá Izrailjoskire čhavén, i phendiá: “Javéla te dykhél tumen Devél, i tumé vylydžan pésa adathýr miré kokalý.” I giné Izrailjoskire čhavé Sokhofostyr, i terdiné stanósa (taborosa) dre Jefamo, kaj sys čhučé-phuvjákiro jagóro (krajo). Raj Devél gijá angíl lénde dyvesé dre stýlbo oblokoskiro, sykadiá lénge drom, a ratiákiro dro stýlbo jagakiro, svencyndia lénge, sob (kaj) lénge te džán dyvesé i ratý. Na otdžalas oblokoskiro stýlbo dyvesé i jagakiro stýlbo ratý manušéngire móstyr. I phendiá Raj Devél Mojzáske adiáke: “Phen Izrailjoskire čhavénge, sob (kaj) jone te risjon i te terdjon stanósa (taborosa) angíl Pi-Gahirofomo, maškír Migdolomo i maškír mórjo (derjáv), angíl Vaalo-Cefonomo; mamúj (proti) léste čhuvén stáno pašýl mórjo (derjáv).” I phenéla faraóno pal Izrailjoskire čhavénde: “Jone zablendyndele pe doiá phuv, zaphandia len čhučí phuv. A Me pharjakirava faraonóskiro iló, i jov javéla te tradelpe pal lénde, i Me sykaváva sláva Mirí pe faraonoste i pe saré léskire xaladénde; i udžinena Jegiptiáni, so Me som Raj Devél.” I kerdé adiáke. I phendló sys Jegiptóskire kralíske, so manušá našné; i risijá faraonóskiro i léskire-dynar'jengiro iló proti adalé manušénde, i jone phendlé: “So da me kerdiám? Palsó otmekciam Izrail'tianén, sob (kaj) jone te na kerén butý aménge?” Faraóno dyjá andré péskiro maribnýtko vurdén i péskire manušén lyjá pésa; i lyjá šovšelá fedyrša maribnýtka vurdená (koliesnicy) i saré Jegiptóskire vurdená, i pe sarénde lénde barydyrén. I pharjakirdia Raj Devél Jegiptóskire-kralískire-faraonóskiro iló, i jov tradyjape pal Izrailjoskire čhavénde; Izrailjoskire čhavé giné tel vučó vast. I tradynepe pal lénde Jegiptiáni, i saré faraonóskire maribnýtka vurdená dyné andré, i manušá uklisté pe grénde, i saré léskire xaladé dotradyne len, kaj jone terdiné pašýl mórjo (derjáv), pašýl Pi-Gahirofo angíl Vaal-Cefono. Faraóno podgíia pašýl, i Izrailjoskire čhavé porisine jakhénca, i ĥáda, Jegiptiáni džána pal lénde: i drieván strahádyne i zagodlyne ke Raj Devél Izrailjoskire čhavé, i phendlé Mojzáske: “Naúšto nane maĥily/kuly [groby-r.s.] dro Jegípto, so tu jandian amen te meras pe čhučí phuv? So da tu kerdián aménca, vylydžii amen Jegiptóstyr? Ci na davá-pac' ame rakirdiam túke dre Jegípto: ‘Jačkir amen, mek ame javása te kerás butý Jegiptianenge?’ Paldavá so fedýr aménge te javas dro dynaribén Jegiptianende, syr te meras pe čhučí phuv.” Ne Mójza phendiá manušénge: “Na darén, terdjon, i dykhéna Ráskire-Devléskiro zrakhibén, savó Jov keréla tuménge akaná, pal-dová so Jegiptianen, savén tumé akaná dykhéna, tumé butýr na dykhéna dre viéki; O Raj Devél javéla te terdjol pal tuménde, a tumé javén štyl.” I phendiá Raj Devél Mojzáske: “So tu godlesa ke Me? Phen Izrailjoskire čhavénge, sob (kaj) jone te džán: a tu ĥázde tyró destó i čhuv tyró vast pe mórjo (derjáv), i rosker les, i prodžána Izrailjoskire čhavé maškír mórjo (derjáv) pir šukí phuv; a Me pharjakirava Jegiptianengiro iló, i jone džána palál pal lénde. I Me sykaváva Miro baripén pe faraonoste i pe saré léskire xaladénde, pe léskire maribnýtka vurdená i pe léskire manušénde, savé uklisté pe grénde; i udžinena Jegiptiáni, so Me som Raj Devél, kiéli sykaváva Miro baripén pe faraonoste, pe léskire maribnýtka vurdená, i pe léskire manušénde, savé uklisté pe grénde.” I gijá Ráskire-Devléskiro Jangólo, savó gijá angíl Izrail'tianengiro stáno, i gijá palál pal lénde; gijá i oblokoskiro stýlbo léngire móstyr, i terdijá palál pal lénde; i zagijá dre paš maškír Jegiptóskiro stáno i maškír Izrail'tianengiro stáno, i sys oblokosa i ciamlypnasa vaš jekhenge i svencynelas ratý vaš javirénge, dre sarí rat, jone na javénas pašyledýr jekh ke javír. I čhudiá Mójza péskiro vast pe mórjo (derjáv), i tradyjá Raj Devél mórjo (derjáv) zoralé vastočnone balvaliasa sarí rat, i kerdiápe mórjo (derjáv) šuké phuvjása, i otginé paniá. I giné Izrailjoskire čhavé maškír mórjo (derjáv) pir šukí phuv: paní lénge sys vantasa pir čačó (pravo) i pir zérvo (liévo) rig. Tradynepe Jegiptiáni, i zaginé pal lénde dre paš morjoskiri saré faraonóskire grajo, léskire maribnýtka vurdená i léskire manušá uklisté pe grénde. I dre tasiarlakiri (rannjo) stréga podykhciá Raj Devél pe Jegiptianengiro stáno jagakire oblokoskire stylbostyr, i kerdiá konfuzo dro Jegiptianengiro stáno; i otlyja róty léngire maribnytkoné vurdenendyr adiáke, so jone tyrdyne len baré zorjása. I phendlé Jegiptiáni: “Prastasa Izrail'tianendyr, pal-dová so Raj Devél isyn terdó pal lénde proti Jegiptianende.” I phendiá Raj Devél Mojzáske: “Čhuv tyró vast pe mórjo, i mek te risjon paniá pe Jegiptianende, pe léngire maribnýtka vurdená i pe léngire manušénde, savé uklisté pe grénde.” I čhudiá Mójza péskiro vast pe mórjo (derjáv), i ke ránko (ke zlóko) paní risijá pe péskiro štéto; a Jegiptiáni prastándyne gil panieske. Adiáke tasadiakirdia Raj Devél Jegiptianen maškír mórjo (derjáv). I paní risijá, i učhakirdiá maribnýtka vurdená i manušén, savé sys uklisté pe grénde sarén faraonóskire xaladén, savé zaginé pal lénde dre mórjo (derjáv); na jaciápe léndyr ni jekhés. A Izrailjoskire čhavé proginé pir šukí phuv maškír mórjo (derjáv): paní sys lénge vantasa pir čačó (pravo) i pir zérvo (liévo) rig. I zrakhciá Raj Devél dro dová dyvés Izrail'tianén Jegiptianengire vasténdyr; i dykhné Izrail'tiáni Jegiptianen mulenca pe brégo morjoskiro (derjavéskiro). I dykhné Izrail'tiáni zoraló vast, savésa kerdiá saró Raj Devél pe Jegiptianende, i strahádyne manušá Rástyr-Devléstyr, i patiandyné Ráske-Devléske i Mojzáske, Léskire pisharíske. Tedy Mójza i Izrailjoskire čhavé bagandle Ráske-Devléske daja gilý i rakirdé: “Bagava Me Ráske-Devléske, pal-dová so Jov vučés ĥazdyjápe; gres i léskire manušés, savó sys beštó uklisté, čhurdyjá dre mórjo (derjáv). Raj Devél isyn zoralypén miro i sláva mirí, Jov sys miro zrakhibén: Jov isyn miro Devél, i Me slavinava Les; miré-dadéskiro Devél, i me barjakirava Les. Raj Devél isyn murš maribnaske, lav Léske Jahvá (Iiegova). Faraonóskire maribnýtka vurdená i léskire xaladén Jov tasadiakirdia dro mórjo (derjáv), i léskire vykedyné barydyrá tasadyne dro Loló mórjo (derjáv). Valny (velny) xoripnastyr začhakirde len: jone giné te tasadjon dro xoripén, syr bar. Tyró čačó vast (diesnica), Raj Devél, slavinelape zorjása; Tyró čačó vast, Raj Devél rozriskirdia pe koterá vergos (vrogos). Baré Tyré slavása Tu teliakirdian odolén, savé ĥazdynépe pe Túte. Tu bičhadian Tyró xoliamipen, i jov shačkirdiá len, syr phus. Tyré phurdypnastyr paniá roskerdepe (rostempindlepe), paningá jačné, syr vánta, jaciá ĥensto piena dro morjoskiro (derjavéskiro) iló. O vérgo phendiá: “Tradava me, dotradava, roskerava doresybén; čaljola lénca miro di, vylava me mirí kurtála, xasiakiréla miro vast len. Tu phurdyjan Tyré duhósa, i začhakirdia len mórjo (derjáv): jone tasadyne, syr molovi (svinco), dre baré paniá. Kon isyn syr Tu, Rajo Dévla, maškír devlorende? Kon isyn, syr Tu, naj barydyr sventypnasa, šaribnasa ke dar Tu, divengiro Keribnari? Tu čhudián Tyró čačó vast (diesnica); nakhadia (proglytyndia) len phuv. Tu lydžása Tyré tangipnasa adalen manušén, savén Tu zrakhcián, – prolydžasa len Tyré zorjása dre Tyré svénta kherá. Šundlé manušýtka nácyi, i trinskirenape: dar oblyja Filistimijákire manušén; tedy strahádyne Edomoskire thagárja, dar oblyja Moavitoskire ran, zasmentnindle saré Xanaanoskire manušá. Mek te perél pe lénde dar i traš; Tyré-vastengire slavatyr mek te javén jone muta (niema), syr bar, ke davá časo (cýro), paka prodžána Tyré manušá, Rajo Dévla, ke davá časo, paka prodžána adalé manušá, savén Tu dorescian. Zalydža len i rosčhuv te dživén len pe bérga Tyré mekné mištypnástyr, pe štéto, savó Tu kerdián Péske kheresa, Rajo Dévla, pe svénto štéto, savó sozdyne Tyré vastá, Rajo Baró! Raj Devél javéla kralísa dre viéki i dre viečnyma. Kiéli zaginé faraonóskire grajo léskire maribnytkoné vurdenenca i manušénca, savé sys uklisté pe grénde dro mórjo (derjáv), tedy Raj Devél poriskirdia pe lénde morjoskire (derjavéskire) paniá, a Izrailjoskire čhavé proginé pir šukí phuv maškír mórjo (derjáv). I lyjá Mariam proročica, Aaronoskiri phen, dre péskiro vast bubno (timpano), i vyginé pal láte saré džuvliá bubnenca i bagaibnasa. I bagandia Mariam angíl lénde: “Bagán Ráske-Devléske, pal-dová so vučés ĥazdyjápe Jov, gres i manušés leskires tasadiakirdia Jov dro mórjo (derjáv).” I lydžijá Mójza Izrail'tianén Lolé morjostyr (derjavestyr), i jone zaginé pe čhučí phuv Suro; i giné jone trin dyvesá pir čhučí phuv, i na lathenas paní. Javné dre Miéra (Mara), i na mogindlé te p'jen paní dre Miéra, pal-dová so jov sys kirko, paldavá i dyné dolé štetoske lav: Miéra. I lyné te den gódla manušá pe Mojzaste, rakirí: “So aménge te pjas?” Mójza dyjape te kharel Ras-Devlés, i Raj Devél sykadiá léske veš, i jov čhurdyjá les dro paní, i paní jaciá gudló. Odój Raj Devél dyjá manušénge uphenybén i Zakóno, i odój Jov sprobinelas len. I phendiá: “Kóli tu javésa te šunés rakhunes Ráskire-Devléskiri, tyré Devléskiri zan, i te kerés lačhipén angíl Léskire jakhá, i te šunés Léskire priphenybená, i te rakhés saré Léskire uphenybená, tedy Me na lydžáva pe túte ni jekh dukhendyr, savé Me lydžijom pe Jegípto, pal-dová so Me som Raj Devél, Tyró sastiakiribnari.” I javné jone dro Jelimo: odój sys dešudúj panieskire ĥanyngorja (istočniki) i eftadešá finikitka kaštá, i terdiné odój taborosa (stanósa) pašýl paniá. I giné Jelimostyr, i javdiá saró skedyibén Izrailjoskire-čhavéngiro pe čhučí (pusto) phuv Sino, so isyn maškír Jelimo i maškír Sinajo, pe dešupandžto dyvés javire-čhonéskiro pir léngiro vygiiben Jegiptóskire phuvjátyr. I lyné te žalinenpe xoliása (zagodlyne) Izrailjoskire-čhavéngiro skedyibén pe Mojzaste i Aaronoste pe čhučí phuv, i phendlé lénge Izrailjoskire čhavé: “Ne, kóli ame te meras Ráskire-Devléskire vastéstyr pe Jegiptóskiri phuv, kiéli ame sámas bešté pašýl pirja masesa, i kiéli ame xajam maró ke čalypen! Paldavá so vylydžiné tumé amen pe daja čhučí phuv, sob (kaj) saró davá skedyibén te muliakirén bokhasa.” I phendiá Raj Devél Mojzáske: “Ĥáda, Me mekava telé tuménge syr bryšýnd maró bolybnástyr, i mek manušá te vydžán i te skedén kažno dyvés, ci but trej pe dyvés, sob (kaj) Mánge te sprobinav len, ci javéna jone te kerén pir Miro Zakóno, ci nad; a pe šóvto dyvés mek te skedén, so janéna, i javéla dre duj móly butýr proti dová, pe kicý skedéna jone dre javír dyvesá.” I phendlé Mójza i Aaróno saré Izrailjoskire-čhavéngire skedyibnaske: “Bel'velié udžinena tumé, so Raj Devél vylydžijá tumen Jegiptóskire phuvjátyr, i pe ránko (pe zlóko) dykhéna Ráskire-Devléskiri sláva, pal-dová so šundiá Jov tumaró xoliamó rakiribén pe Raste-Devléste: a ame, kon sam adasavé, so tumé rakiréna pe aménde?” I phendiá Mójza: “Tumé udžinena, kiéli Raj Devél bel'velié déla tuménge mas dre xabén, a pe ránko maró, kicý tumé kaména, pal-dová so Raj Devél šundiá gódla tumarí, saví tumé ĥazdyné proti Léste: a ame so? Tumarí gódla na pe aménde, a pe Raste-Devléste. I phendiá Mójza Aaronóske: “Phen saré Izrailjoskire čhavéngire skedyibnaske: terdjon angíl Ráskire-Devléskiro muj, pal-dová so Jov šundiá tumarí gódla.” I kiéli rakirdiá Aaróno ke saró Izrailjoskiro-čhavéngire skedyibén, tedy jone risiné mósa pe čhučí phuv, i ĥáda, Raskiri-Devléskiri sláva javdiá dro óbloko. I phendiá Raj Devél Mojzáske: “Me šundjom Izrailjoskire-čhavengiri gódla; phen lénge: ‘Bel'velié javéna te xan mas, a pe zlóko čaljona marésa, i udžinena, so Me som Raj Devél (Jahvá), Devél tumaró.’” Bel'velié priurniandyne pieriepjoly i začhakirde stáno, a pe ránko sys pašty pahlyn (rosa) pašýl stáno; pahlyn ĥazdyjápe, i ĥáda, uprál pe čhučí phuv vari-so drobno (xurdo), syr krupa, drobno, syr iniejo pe phuv. I dykhné Izrailjoskire čhavé, i rakirdé jekh jekhéske: “So isyn davá?” Pal-dová so jone na džindlé, so sys davá. I Mójza phendiá lénge: “Davá isyn maró, savó Raj Devél dyjá tuménge dro xabén; ĥáda, so phendiá Raj Devél: ‘Skedén les kažno manúš pe adákicy, ci but léske te xal, pir gomoro pe manušéste, ci but isyn manušýtka dijá, dre doiá šátra, skedén adákicy.’” I kerdé adiáke Izrailjoskire čhavé, i skedyné, kon but, kon nábut. I mierindle gomorosa, i odoléste, kon skedyjá but, na sys butýr mieratyr, i kodoleste, kon skedyjá nábut, na sys nauhtylyben. Kažno skedyjá adákicy, ci but treindiá te shal léske. I phendiá lénge Mójza: “Nikón te na jačkirel davá ke ránko.” Ne jone na kandyné Mojzás, i jačkirdé vari-savé koterá daléstyr ke ránko, – i zalydžinepe kirme, i joj zakhandyja. I xoliásyja pe lénde Mójza. I jone skedenas les tasiárles (ránes) pe kažno ránko, kažno ci but léske te shal; ne kiéli pritat'kirela kham, jov maró, biladyja (taindia). Pe šóvto dyvés skedyné maró dre duj móly, pir duj gomory pe kažnonéste, i javné saré barydyrá skedyibnaskire, i rosphendlé Mojzáske. I jov phendiá lénge: “Ĥáda, so phendiá Raj Devél: atasiá otkhinyben, svénto Ráskire-Devléskiro sávato (subóta); so trej te peken, peken, i so trej te keraven, keraven adadyvés, a so jačélape, otčhuven i zrakhen ke ránko. I otčhude dová ke ránko, syr phendiá Mójza, i jov na zakhandyja, i kirmen na sys dre léste. I phendiá Mójza: “Han les adadyvés, pal-dová so adadyvés Ráskire-Devléskiro sávato; adadyvés na lathéna les pe félda; šov dyvesie skedén les, a pe eftáto dyvés – sávato, na javéla les dro davá dyvés.” Ne vari-savé manušéndyr vyginé dro eftáto dyvés te skedén, i na lathné. I phendiá Raj Devél Mojzáske: “Ci but (dlúges) tumé javéna te na kerén pir Miré uphenybená i Miré zakóny? Dykhén, Raj Devél dyjá tuménge sávato, pal-dová Jov déla dre šóvto dyvés maró pe duj dyvesá: jačénpe kažno péste. Nikón te na vydžál péskire štetóstyr pe eftáto dyvés.” I mangnepe manušá pe eftáto dyvés. I dyjá Izrailjoskiro kher dolé mareske lav: manna; joj sys syr koriandreskiro siemjo, parnó, smakosa syr marikly avginesa. I phendiá Mójza: “Ĥáda, so phendiá Raj Devél: ‘Čhuvén pherdés mannasa gomoro vaš zrakhibén dre tumaré ródy, sob (kaj) tumé te dykhén maró, savésa Me čaradjom tumen pe čhučí phuv, syr vylydžijom tumen Jegiptóskire phuvjátyr.’” I phendiá Mójza Aaronóske: “Le jekh khoró (sasudo), i čhuv dre léste pherdó gomoro manna, i čhuv les angíl Raste-Devléste vaš zrakhibén dre tumaré ródy.” I čhudiá les Aaróno angíl kovčego (mohtó) te dophenel pal zrakhibén, syr phendiá Raj Devél Mojzáske. Izrailjoskire čhavé xané manna štardešá berš, paka javné pe phuv, pe saví dživdé; manna xané jone, paka javné pe Xanaanoskire-rigakiri miéža. A gomoro isyn déšto paš efatyr. I gijá saró Izrailjoskire-čhavéngiro skedyibén čhučé phuvjátyr Sin péskire dromésa, pir Ráskiro-Devléskiro uphenybén; i terdiné stanósa dro Riefidimo, i na sys paní te p'jen manušénge. I vyrakirenas manušá Mojzáske, i rakirdé: “Den aménge te pjas paní.” I phendiá lénge Mójza: “So tumé vyrakirena mánge? So tumé sprobinena Ras-Devlés?” I kamlé odój manušá paní, i košnepe manušá pe Mojzaste, i rakirdé: “Palsó tu vylydžijan amen Jegiptóstyr, te muliakires amen i čhavén amaren i stády amaré bi panieskiro?” Mójza dyjá gódla ke Raj Devél i phendiá: “So mánge adalé manušénca te keráv? Sarésa nábut, i zamarna man barénca.” I phendiá Raj Devél Mojzáske: “Prodža angíl manušénde, i le pésa vari-savén Izrailjoskire phurendyr i tyró destó, savésa tu pekadian pir paní, le dre péskiro vast, i džá; ĥáda, Me terdjovava angíl túte odój pe skála dro Xorivo, i tu pekavesa dre skála, i džála látyr paní, i javéna te p'jen manušá.” I kerdiá Mójza adiáke dro jakhá Izrailjoskire phurydyrengire. I dyjá dolé štetoske lav: Masá i Mieriva, pirdál dová, so Izrailjoskire čhavé pinindle i pal-dová so jone sprobindle Devlés: rakirí “Ci isyn Raj Devél maškír aménde, ci nane?” I javné Amalikitiani i lydžiné maribén Izrail'tianenca dro Riefidimo. Mójza phendiá Isusóske (Johošuaske): “Vykede aménge muršén, i džá marpe Amalikitianenca; atasiá me terdjovava pe bergicakiro vučipén, i Ráskire-Devléskiro destó javéla dro miro vast.” I kerdiá Isúso (Johošuá), syr phendiá léske Mójza, i gijá te marélpe Amalikitianenca; a Mójza i Aaróno i Oro giné upré pe bergicakiro vučipén. I kiéli Mójza ĥazdelas péskire vastá, to pirizorjakirelas Izrailjo, a kiéli jov obmekelas péskire vastá, to pirizorjakirelas Amaliko; ne Mojzáskire vastá jačné pharé, i tedy jone lyné bar i podčhude tel léste, i jov bestiá pe léste, Aaróno i Oro podrikirenas léskire vastá, jekh jekhe, a javír javire rigátyr. I sys léskire vastá ĥazdyné, paka zagijá kham. I domardiá Isúso (Johošuá) Amalikos i léskire manušén kurtalakire vostrimasa. I phendiá Raj Devél Mojzáske: “Začhin davá vaš ripiribén dre lylvarí, i patiakir Isusós (Johošuas), so Me sarésa khosava krig ripiribén Amalikitianengiro bolybnástyr.” I kerdiá Mójza altárjo (žertvieniko), i dyjá léske lav: Iiegova (Jahvá) Nissi. “Pal-dová so, phendiá jov, vast Ráskire-Devléskiro isyn pe trono: maribén Raste-Devléste proti Amalikoste sys rodóstyr dre ródy. I šundiá Ioforo, Madiamitianengiro rašái, Mojzáskiro sastro, pal saró, so kerdiá Raj Devél vaš Mojzáske i vaš Izrailjo, Péskire manušénge, kiéli vylydžijá Raj Devél Izrailjo Jegiptóstyr, i lyjá Ioforo, Mojzáskiro sastro, Siepfora, Mojzaskirja romniá, saví angíl davá sys bičhady pale, i dujén lákire čhavén, savéndyr jekhéske lav sys Girsamo [Gierš-ju.o.], pal-dová so rakirdiá Mójza: “Me javdjom pe čúžo phuv”; a javireske lav sys Jeliezero, pal-dová so, rakirdiá jov – Devél miré-dadéskiro sys mánge Pomogibnaskiro i zrakhciá man faraonóskire kurtalátyr. I javdiá Ioforo, Mojzáskiro sastro, léskire čhavénca i léskire romniása ke Mójza pe čhučí phuv, kaj jov sys terdó stanósa (taborosa) pašýl Ráskire-Devléskiri bérga, i dyjá te džinél Mojzáske: “Me, tyró sastro Ioforo, džáva ke tu, i tyrí romný, i duj lákire čhavé lása.” Mójza vygijá gil péskire sastreske, i kerdiá šerésa i čamudia les, i paló saró jone zaginé dre šátra. I rosphendiá Mójza péskire sastreske pal saró, so kerdiá Raj Devél faraonosa i Jegiptianenca pal Izrailjo, i pal saró pharipén, savó sys lénca pe drom, i syr zrakhciá len Raj Devél. Ioforo sys rado pal saré bahtalé réndy, savé Raj Devél kerdiá Izrailjoske, kiéli zrakhciá les Jegiptianengire vasténdyr. I phendiá Ioforo: “Te javél bahtiakirdó Raj Devél, Savó zrakhciá tumen Jegiptóskire vastéstyr i faraonóskire vastéstyr, Savó zrakhciá adalé manušén Jegiptianengire zoralypnastyr; kaná me udžindjom, so Raj Devél isyn baró, vučedýr saré devlorendyr, dre dová-pac', sósa jone šardepe vučedýr pe Izrail'tianende.” I jandiá Ioforo, Mojzáskiro sastro, céla shačkiribena i svénta dyibená (žertvy) Devléske; i javdiá Aaróno i saré Izrailjoskire phurydyrá te xan maró Mojzáskire sastresa angíl Devléste. Pe javír dyvés besciá Mójza te sendiakirél manušén, i terdé sys manušá angíl Mojzaste zlokostyr (rankostyr) ke bel'vél'. I dykhciá Mojzáskiro sastro saró, so jov keréla manušénca, i phendiá: “So da dasavo isyn, so tu kerésa manušénca? Vaš so tu san jekhdžinó beštó, a saré manušá isyn terdé angíl túte rankostyr ke bel'vél'?” I phendiá Mójza péskire sastreske: “Manušá javéna ke me te mangén Devléstyr séndo; kiéli lénde kerélape vari-savó réndo, jone javéna ke me i me dynarinava maškír adaleste i javiréste i, me phenáva zoralés Devléskire uphenybená i Léskire zakóny.” Ne Mojzáskiro sastro phendiá léske: “Nakuč davá tu kerésa: tu zmenčynesa i pes i adalé manušén, savé isyn túsa, pal-dová so isyn drieván pharó vaš túke davá réndo (diélo): tu jekhdžinó naštý (tu na moginésa) les te kerés; adiáke pošun miré lavá; me dáva túke godý, i Raj Devél javéla túsa: jav tu vaš manušénge maškiratunesa (posriednikosa) angíl Raste-Devléste i piride Devléske manušéngire réndy; sykliákir len Devléskire uphenybnenge i zakonenge, sykáv lénge drom Léskiro, pir savó lénge trej te džán, i réndy, savé jone isyn bangé te kerén; tu vykede saré manušéndyr odarime manušén, savé daréna Devléstyr, čačunen manušén, savé bidykhena kofy, i čhuv len barydyrénca pe tysjonco, barydyrénca pe šelende, barydyrénca pe pandždešende i barydyrénca pe deše manušénde, mek jone te sendiakiren manušén dro kažno časo, i pal kažno baró réndo te rosphenén túke, a saré tykné réndy te sendiakiren kokoré: i javéla túke lokhedýr, i jone lydžána túsa pharipén; kóli tu kerésa davá, i Raj Devél phenéla túke, tedy tu saštý (moginésa) te vyterdjos, i saré adalé manušá javéna te otdžan pe péskiro štéto ramanjosa (mirósa).” I Mójza kandyjá péskire-sastreskire lavá, i saró kerdiá, so jov rakirdiá; i vykedyjá Mójza saré Izrailjostyr odarime manušén, i čhudiá len barydyrénca pe manušénde; tysjoncengirenca, šelengirenca, pandždešengirenca i dešengirenca. I sendindle jone manušén dro kažno časo; pal baré réndy rosphenenas Mojzáske, a saré tykné réndy (diély) sendindle kokoré. I otmekciá Mójza péskire sastres, i jov gijá pe péskiri phuv. Dro tríto čhon, syr Izrailjoskire čhavé vyginé Jegiptóskire phuvjátyr, javné jone pe čhučí phuv Sinajoskiri. I giné jone Riefidimostyr i javné pe čhučí phuv Sinajoskiri, i terdiné odój stanósa (taborosa) pe čhučí phuv; i terdijá odój Izrailjo stanósa proti bérga. Mójza gijá upré pe bérga ke Devél i prikhardia les Raj Devél bergátyr, i rakirdiá: “Adiáke phen Jakovóskire kheréske i rosphen Izrailjoskire kheréske: ‘Tumé dykhné, so Me kerdjom Jegiptianenge, i syr Me lydžijom tumen sýrby pe orloskire (kidoskire) phaká, i jandjom tumen ke Pe; adiáke, kóli tumé javéna te šunén Mirí zan i te rakhén dre godý Miro zavieto (dorakiribén), tedy tumé javéna Miré vykedyné narodosa saré manušytkoné nacyiéndyr, pal-dová so sarí phuv isyn Mirí, a tumé Mánde javéna rašángire kralipnasa i sventoné manušénca; ĥáda, isyn lavá, savé tu phenésa Izrailjoskire čhavénge.” I javdiá Mójza i khardiá ke pe manušéngire phurydyren, i rosphendiá lénge saré dalé lavá, savé rakirdiá léske Raj Devél. I saré manušá otphendlé pal jekh, i rakirdé: “Saró, so phendiá Raj Devél, kerása.” I Mójza dolydžija manušéngire lavá Ráske-Devléske. I phendiá Raj Devél Mojzáske: “Ĥáda, Me džáva ke tu dro ĥensto óbloko, sob (kaj) te šunén manušá, syr Me javáva te rakiráv túsa, i, sob (kaj) manušá te patián túke saró časo.” I Mójza dyjá te džinél manušéngire lavá Ráske-Devléske. I phendiá Raj Devél Mojzáske: “Džá ke manušá, i vysvencyn len adadyvés i atasiá; mek jone te vymoren péskire ídi (rizy), sob (kaj) te javén skedyné ke tríto dyvés: pal-dová so pe tríto dyvés zdžála Raj Devél angíl saré manušéngire jakhá pe bérga Sinajo; i prolydža vaš manušénge saré rigéndyr špéra (čerta), i phen: ‘Rakhénpe te zadžán pe bérga i te čilavenpe ke lákiri podešva (nizo); kažno (sváko), kon čilavelape ke bérga, otdynó javéla meribnáske; vast mek te na kasynelpe ke joi, a mek te marén les barénca ci te den karjo maribnytkoné bustiasa (strielasa); ci kherítko murdál (skoto) davá, ci manúš, mek na jačélape džidó.’ Dro časo, kiéli javéla ĥará (dlúges) zvuko (zniko) rogóstyr (trubátyr), to moginéna jone te džán upré pe bérga.” I zgija Mójza bergátyr ke manušá, i vysvencyndia manušén, i jone vymorde péskiri ídia. I phendiá manušénge: “Javén skedyné ke tríto dyvés, na kasynenpe ke romniá.” Pe tríto dyvés, kiéli jaciá zlóko (ránko), sys grómy, i bliskavícy, i ĥensto óbloko pe bérga, i rogoskiro (trubakiri) zniko (zvuko) drieván zoraló; zatrinskirdepe saré manušá, savé sys dro stáno. I vylydžijá Mójza stanostyr manušén te dykhenpe Devlésa, i terdiné jone pašýl sámo nizo bergákiro. Bérga Sinajo sarí sys dro thuv (dymo) daléstyr, so zgija pe láte Raj Devél dre jag; i džálas látyr thuv, syr thuv bovestyr, i sarí bérga drieván trinskirdiape; i rogoskiro zniko (zvuko) jačelas zoraledýr i zoralydyr. Mójza rakirdiá, i Raj Devél otphenélas léske zaniása. I zgija Raj Devél pe bérga Sinajo, pe bergákiro vučipén, i khardiá Raj Devél Mojzás pe bergákiro vučipén, i gijá Mójza. I phendiá Raj Devél Mojzáske: “Džá telé i dophen manušénge, sob (kaj) jone te na kušenpe ke Raj Devél te dykhén Les, i, sob (kaj) but léndyr te na xasjon; rašaja, savé džánas pašyledýr ke Raj Devél, lénge treindiá te osvencynen pes, sob (kaj) te na xas'kirel len Raj Devél. I phendiá Mójza Ráske-Devléske: “Manušá naštý (na moginéna) te džán upré pe bérga Sinajo, pal-dová so Tu angíl podrakhcian amen, i phendián: “Prolydža špéra (čerta) trusciál (krugom) bérga i osvencyn la.” I Raj Devél phendiá léske: “Džá telé, tén'či džá upré tu, i túsa Aaróno; a rašaja i manušá, mek te na skedénpe te džán ke Raj Devél, sob (kaj) len te na xasiakirél.” I gijá telé Mójza ke manušá, i piriphendia lénge. I phendiá Raj Devél saré dalé lavá, i rakirdiá: “Me som Raj Devél, tyró Devél, Savó vylydžijá tut Jegiptóskire phuvjátyr, pisharibnaskire kheréstyr; mek te na javél túte javirén devlen angíl Mánde. Na ker péske ni savó vyčhindlo óbrazo (kumiro) i nisaví figura ke dová, so isyn uprál pe bolybén, i so isyn telál pe phuv, i so isyn dro paní tel phuv; na ker šerésa (na klóninpe) lénge i na dynarin (na služyn) lénge; pal-dová so Me Raj Devél, Devél tyró, Devél, Savó zevlynela (rievninela), čhuvéla kára pe čhavénde pal dadengiri bang ke tríto i štárto ródo, konéske na som drógo Me, i Me keráva lačhipén ke tysjoncy ródy, konéske som drógo Me, i kon rakhéla dre godý Miré uphenybená. Na rákir tyré-Ráskire Devléskiro lav ivjá (naprásnes), pal-dová so Devél na jačkiréla odolés, sob (kaj) te na čhuvél kára, kon rakiréla Léskiro lav ivjá. Rípir dyvés sávato (subóta), sob (kaj) te svenkines les; šov dyvesá ker butý, i ker tyré réndy, a eftáto dyvés – sávato Ráske-Devléske, tyré Devléske: na ker dro davá dyvés nisavó réndo (diélo) ni tu, ni tyró čhavó, ni tyrí čhaj, ni tyró pishári, ni tyrí pisharica, ni tyró kherítko murdál (skoto), ni savó manúš, savó javdiá ke tu, savó isyn dre tyré kherá; pal-dová so pal šov dyvesá sozdyjá Raj Devél bolybén i phuv, mórjo (derjáv) i saró, so isyn dre lénde, a pe eftáto dyvés otkhinyja; pal-dová so Raj Devél bahtiakirdiá dyvés sávato i osvencyndia les. Kutiakir (važyn) tyré dadés i tyré da, sob (kaj) te javén ĥará (dluga) tyré dyvesá pe phuv, saví Raj Devél, Devél tyró, déla túke. Na zamar (na umar). Na ker biladžaipén. Na čor. Na rákir xohanó dophenybén pe tyré pašatuneste. Na tyrdepe ke tyré pašatuneskiro kher; na pričhúv iló ke tyré-pašatuneskiri romný, ni léskire pisharís, ni léskire pisharica, ni léskire guruvés, ni léskire oslós, ničí, so isyn tyré pašatuneste.” Saré manušá dykhné grómy i bari jag, i rogoskiro zniko (zvuko), i bérga, savjátyr gijá thuv (dymo); i, syr dykhné davá, to manušá otginé, i terdiné durál. I phendlé Mojzáske: “Rákir tu aménca, i ame javása te šunas, ne sob (kaj) te na rakirél aménca Devél, sob (kaj) aménge te na meras.” I phendiá Mójza manušénge: “Na darén, Devél javdiá, sob (kaj) te sprobinel tumen, i, sob (kaj) Léskiri dar te javél angíl tumaré muiá, sob (kaj) tumé te na kerén grého.” I sys terdé manušá durál, a Mójza zagijá dro kalypén (ciamlypén), kaj sys Devél. I phendiá Raj Devél Mojzáske: “Adiáke phen Izrailjoskire čhavénge: ‘Tumé dykhné, syr Me bolybnástyr rakirdjom tuménca; na kerén angíl Mánde rupuvé devloré ci suvnakunen devloré, na kerén péske: ker Mánge altárjo (žertvieniko) phuvjátyr, i jan pe léste céla shačkiribena tyré i ramanjona (mirna) svénta dyibená tyré i tyré bakrén i tyré guruvén; pe kažno štéto, kaj Me čhuváva ripiribén vaš Miro lav, Me javáva ke tu, i Me bahtiakirava tut; kóli tu javésa te kerés Mánge altárjo barendyr, to tedy na sčhuv les vyčingirde (tjosanone) barendyr, pal-dová so, syr tu čhuvésa pe lénde tyrí dalta (tieslo), tedy magiresa len; i na zadžá pir ĥerunia (stupien'ki) ke Miro altárjo, sob (kaj) te na otčhakirelpe angíl léste tyró nangipén.’ I ĥáda, isyn zakóny, savé tu désa te džinés lénge (Izrail'tianenge): “Kóli tu kinesa pisharís Judos, mek jov te kerél butý šov berš, a pe eftáto (bitrinéngiro déšto) mek jov te vydžál pe vólia bi lovengiro; kóli jov javdiá jekhdžinó, mek jekhdžinó i te vydžál; a kóli jov isyn romanduno, mek te vydžál lésa i léskiri romný; kóli léskiro xuláj dyjá léske romniá, i joj bijandiá léske čhavén i čhajén, tedy romný i lákire čhavé mek te jačénpe adalé xulaste, a jov vydžála jekhdžinó; ne kóli pishári phenéla: ‘Miro xuláj isyn drógo mánge, miry romný i miré čhavé, me na džáva pe vólia,’ – tedy mek léskiro xuláj te janel les angíl sendar'jende (devlorende), i te čhuvél les ke vudár ci ke kosiako, i léskiro xuláj te prophusavel léskiro kan jarjasa, i jov jačélape léskire pisharisa pe saró viéko. Kóli vari-kon biknela peskirjá čha dre pisharicate, tedy joj naštý (na moginéla) te vydžál, syr vydžána pishárja; kóli joj na kerdiá pir iló péskire xuláske, i jov la na obrenčynela (angrustiakirela), mek jov te del vólia láke, sob (kaj) la te vykinen; a čužoné manušénge naštý la te biknel léske, kiéli kokoró na zakamdiá la; kóli jov obrenčynela (angrustiakirela) la péskire čhavéske, mek te obžalpe lása, syr péskire čhajenca; kóli javirja pal léste léla, tedy joj na bangi te jačélpe bi xabnaskiro, bi idiakiro i bi romanduno džiibnáskiro; a kóli jov dalé trin réndy na keréla vaš láke, mek joj te otdžal vól'no, bi vykinybnaskiro. Kon pekavela manušés adiáke, so jov meréla, mek odová manúš te javél otdynó pe meribén; ne, kóli vari-kon na kamdiá, a Devél domekcia léske te poperel tel léskire vastá, tedy Me uphenava túke štéto, karik te našél o manúš, savó zamardiá; a kóli, kon skedelape te zamarél pašatunes, tedy i Miré altarjostyr (žertvienikostyr) le les pe meribén. Kon pekavela péskire dadés ci péskire da, odolés trej te otdén pe meribén. Kon čorela manušés i biknela les; ci jov lathelape dre léskire vastá, tedy trej te otdes les pe meribén. Kon košela péskire dadés ci peskirjá da, odolés trej te otdes pe meribén. Kiéli košenape, i jekh manúš pekavela javirés baresa ci burnykasa (kulakosa), i odová na meréla, ne zanasvaljola, tedy, kóli jov uštéla i javéla te vydžál kheréstyr kaštesa, kon pekadiá les, na javéla otdynó pe meribén; jekh mek odová manúš te zapleskirel lové pal dová časo, ci but jov na kerdiá butý i te del lové pe léskiro sastiakiriben. A kóli kon pekavela péskire pisharís ci dynárica kaštesa, i jone meréna tel léskiro vast, tedy jov isyn bangó te lydžál kára; ne kóli jone jekh dyvés ci duj dyvesá javéna džidé, tedy naštý te čhuvél kára pe léste, pal-dová so jone isyn léskiro rup. Kiéli marenape manušá, i pekavena peralia džuvliá, i joj sčhurdela, ne na javéla javír doš, tedy trej te les bangé manušéstyr štrafo, savó čhuvéla pe léste odolé-džuvliákiro rom, i jov isyn bangó te zapleskirel, ci but léske phenéna sendárja angíl manušénde; a kóli javéla doš, tedy otdé di pal di, iakh pal jakh, dand pal dand, vast pal vast, ĥerój pal ĥerój, obhačkiriben pal obhačkiriben, rana (dukhady) pal rana (dukhady), pekaiben pal pekaiben. Kóli vari-kon pekavela péskire pisharís dre jakh, ci peskirjá pisharica dre jakh, i poškodynela la: mek te otmekél len pe vólia pal jakh; i kóli vymarla péskire pisharíske ci péskire pisharicake dand, mek te otmekél pe vólia pal dand. Kóli guruv zaphusavela muršés ci džuvliá ke meribén, tedy guruvés te zamarén barénca, i léskiro mas te na xan; a xuláj guruveskiro na bangó; ne kóli guruv angledýr phusadiape (bodindiape) i tasiá i pe tríto dyvés, i léskire xuláske sys phendló pal davá, i jov na rakhciá les, a guruv zamardiá muršés ci džuvliá, tedy guruvés te zamarén barénca, i léskire xulás te otdén pe meribén; kóli pe léste javéla čhudo vykinybén, mek te del vykinybén pal péskiro di, savó čhudo javéla pe léste. Ne kóli jov zaphusavela ci čhavores, ci zaphusavela čhajorja, – pir davá-pac' zakóno te obžanpe lésa. Kóli guruv zaphusavela dynarís ci dynárica, tedy léskire xuláske te zapleskirel trijánda šekeli rup, a guruvés te zamarén barénca. Kóli kon rosčhakirela ĥanbín (jama), ci, kóli kon vyganavela ĥanbín (jama) i na začhakirela la, i peréla dre láte guruv ci óslo (miegári), tedy xuláj ĥanbinakiro isyn bangó te zapleskirel, te otdél rup léngire xuláske, a mas javéla léskiro. Kóli konéskiro guruv zaphusavela ke meribén léskire-susiedoskire guruvés, mek te biknen džidé guruvés i te roskeren pe paš léskiri timín; adiáke-pac' i zamardé guruvés mek te roskeren pe paš; a kóli isyn džindló, so guruv phusavelape (bodinelape) i tasiá i pe tríto dyvés, ne léskiro xuláj na rakhciá les, tedy jov isyn bangó te zapleskirel guruvés pal guruveste, a zamardo javéla léskiro. Kóli vari-kon čorela guruvés ci bakriá, i začhinela, ci biknela, tedy jov isyn bangó pandž guruvén te vypleskirel pal guruveste, i štar bakrien pal bakriate. Kóli vari-kon uhtyléla čores, savó podĥanavelape te čorel, i pekavela les adiáke, so jov meréla, tedy rat na javéla pe léste; ne kóli ĥazdyjápe kham pe léste, tedy léskiro rat javéla pe léste. Čor isyn bangó te zapleskirel; a kóli nane sósa, tedy mek les te biknen vaš vypleskiriben lésa pal čordo mištypén; kóli lathelape čordo dre léskire vastá, so isyn džidó, ci guruv, ci óslo (miegári), ci bakri, mek te vypleskirel jov dre duj móly. Kóli vari-kon mekéla kheritkoné murdales (skoto) pe čúžo félda ci dro vinagrádniko te vyhal, pal-dová so jov mekciá péskire murdales te vyhal čúžo félda, to mek jov te otdél fedyršo dáro péskire feldatyr i fedyršone léskire vinagradnikostyr. Kóli jačéla jag i oblela tiernjo (kodro), i vyhačkirla ĥarby (snopy), ci žatva, ci félda, tedy odová manúš isyn bangó te zapleskirel, kon kerdiá davá shačkiribén. Kóli vari-kon otdéla pašatuneske te zrakhél rup ci ídi, i jone javéna čorde léskire kheréstyr, tedy, kóli lathelape čor, mek jov te zapleskirel dre duj móly; a kóli na lathelape čor, mek kheréskiro xuláj te javél angíl sendar'jende i te sovlahal, so jov na ĥazdyjá péskiro vast pe léskire-pašatuneskiro mištypén. Pal kažno sprečno réndo, pal guruveste, pal osloste, pal bakriate, pal ídi, pal kažno viešča (viešč), saví xasijá, pal saví vari-kon phenéla, so joj isyn léskiri, réndo (diélo) dujengiro bangó te javél dolydžino ke sendárja. Konés sendárja bangiakirena, odová zapleskirela péskire pašatuneske dre duj móly. Kóli vari-kon otdéla péskire pašatuneske oslós, ci guruvés, ci bakriá, ci javirés vari-savés kheritkoné murdales pe zrakhibén, a jov meréla, ci javéla kaliečyndlo, ci otlydžino adiáke, so nikón davá na dykhéla, to sovláh angíl Raste-Devléste mek te javél maškír dujende dre dová, so kon lyjá pe zrakhibén, na ĥazdyjá péskiro vast pe péskire-pašatuneskiro mištypén; i xuláj isyn bangó te prilel, a odová na javéla te pleskirel; a kóli léste javéla čordo, tedy jov isyn bangó te zapleskirel léskire xuláske; kóli javéla zahano riskiribnáskire murdalesa (zvierjosa), tedy mek dro dophenybén te janel zahano dová: pal zahano jov na pleskirela. Kóli vari-kon zalela péskire pašatunestyr kheritkoné murdales (skoto), i jov javéla kaliečyndlo, ci murdjola, a léskire xulás na sys pašýl léste, tedy jov isyn isyn bangó te zapleskirel; ne kóli léskiro xuláj sys pašýl léste, tedy jov isyn na bangó te pleskirel; kóli jov sys lynó pal vužlypén (dlugo) pal lové, tedy mek jov i te džal pal doiá timín. Kóli vari-kon obhohavela napaloromitkona čha, saví isyn naobrenčyndly (naangrustiakirdy) i pirisovela lása, mek te del láke vieno (dáro) i te lel la péske paloróm (te lel la romniása); a kóli dad na zakaméla te otdél la pal léste, mek jov te zapleskirel adákicy rup, ci but trej pe vieno, syr pal napaloromitkone čhajende. Drabakiribnaskiren na jačkir džidenca. Kažno skotoložniko mek te javél otdynó pe meribén. Kon janéla svénto dyibén (žértva) devlorénge, apríč jekhe Raste-Devléste, mek jov te javél muliakirdo. Manušés, savó javéla javire rigátyr, na pritasav, i na dukhav les, pal-dová so tumé kokoré sánas javire-rigakire manušá, savé javné pe Jegiptóskiri phuv. Ni ŭdoven (pivlien), ni siroten (piroten) na pritasaven; kóli tu pritasavesa len, tedy, kiéli jone javéna te godlen ke Me, Me šunava léngiri gódla, i zahačkirelape Mirí xolý, i Me zamarava tumen kurtalása (miečosa), i javéna tumaré romniá ŭdovenca (pivlienca), i tumaré čhavé sirotenca (pirotenca). Kóli désa tu dro dlugo (vužlypén) lové čororeske Miré manušéndyr, tedy na pritasav len, i na čhuv pe lénde kófo (procento). Kóli lésa dre symadý (zalogo) tyré-pašatuneskiri ídia, ke khameskiro zagiibén, otdé la pale, pal-dová so joj (ídia) isyn jekhori učhakiriben léste, joi-léskire-maséngiro uribén: dro so jov javéla te sovél? Adiáke, kiéli jov zagodlela ke Me, Me ušunava, pal-dová so Me som tangipnaskiro. Sendar'jen na koš, i thagar'jen dre tyré manušénde na obrakir. Na zarikir te janes Mánge pérva barjakirdé (plódy) tyré gumnostyr (givaobkeribnaskire šurnatyr) i tyré priesostyr (točylostyr); otdé Mánge odolé čhavéndyr, kon bijándyja anglatunó; davá-pac' ker tyré guruvesa i tyré bakriasa. Eftá dyvesá mek jone te javén pašýl péskire date, a pe ohtóto (bidujéngiro déšto) dyvés otdé len Mánge. I javéna tumé Mánde sventoné manušénca; i mas, savó riskirdiá riskiribnáskiro murdál (zvierjo) pe félda, na xan, čhurdén les džuklenge. Na rozlydža čhučó (pusto) rakiribén, na de tyró vast napatiaibnytkoneske, sob (kaj) te javes jakhitkonesa xohaibnaske. Na džá palál pal manušéngiro skopo te kerés fuipén, i na dophen dro réndo adiáke, sob (kaj) čačipén te riskirén, syr but manušá. I čorores na podrikir dro léskiro réndo pir čačipén, kóli lathesa tyré-vergoskire guruvés, ci leskires oslós; savó zablendyndia, jan les pale ke jov. Kóli dykhésa tyré-vergoskire oslós, savó pyjá tel péskiro pharipén, tedy na jačkir les, zle léstyr pharipén; na sendiakir xohanés tyré-čororeskiro réndo pir čačipén, otdža xohaibnastyr, i na muliakir nabanges i savó isyn čačipnáskiro; pal-dová so Me na čačakirava (na opravdynava), kon keréla fujes. Myty (vziatki) na prilé: pal-dová so myty (vziatki) keréna kororenca, kon dykhéla, i pirikerena lavá čačuné manušéndyr. Kon javéla javire rigátyr, na dukhav (na pritasav) les: tumé džinéna léskiro di, pal-dová so tumé kokoré sánas na péskire manušá pe Jegiptóskiri phuv. Šov berš čhuv ziárka (ziarno) dre tyrí phuv i skéde, so joj bijanéla, a pe eftáto (bitrinéngiro déšto) berš jačkir la te otkhinjol, sob (kaj) te čaravenpe tyré manušéndyr čororé, a so jačélape pal lénde, to mek te čaravenpe feldýtka riskiribnáskire murdalá (zvieri); adiáke-pac' ker tyré vinagradnikosa i tyré olivitkone untasa (maslinasa). Šov dyvesá ker tyré réndy, a pe eftáto dyvés otkhinjov, sob (kaj) te otkhinjol tyró guruv i tyró óslo (miegári), i te otkhinjol butiátyr tyré-dynaricakiro čhavó, i kon javdiá javire rigátyr. Rakhén saró, so Me phendjom tuménge; i javire-devlengire lavá na rakirén: mek te na javél davá šundlo tyré uštendyr. Trin móly dro berš svenkin Mánge: dykh (rakh) svénko apriesnokengiro: eftá dyvesá xa priesno maró, syr Me rakirdjom túke, dro uphendló časo čhonéskiro Avivo; pal-dová so dro davá čhon tu vygijan Jegiptóstyr; i mek te na javén manušá angíl Mánde čhučé vasténca; dykh (rakh) i svénko ubijanypnaskiro pervoné barjakirdenca (plodenca) pharé butiátyr, savé tu počhudian pe félda, i svénko plodengiro skedyibén dro beršeskiro kónco (jagóro), kiéli ukedesa feldatyr tyrí butý. Trin móly dro berš isyn bangé te javén saré tyré muršá angíl Baré-Ráskiro, Ráskire-Devléskiro muj. Na čhuv rat Miré-sventoné dyibnástyr (žertvatyr) kvašenone marésa, i čekén (túko) Miré svenkoskire žertvatyr naštý te jačélpe ke ránko (ke zlóko). Tyré pérva (anglatuné) phuvjákire barjakirdé (plódy) jan dre Ráskiro-Devléskiro, tyré Devléskiro Kher. Na keráv buznores dro léskire – dákiro thud. Ĥáda, Me bičhaváva angíl túte Jangolós te rakhél tut pe drom i te zalydžal tut pe dová štéto, savó Me kerdjom skedynó. Rakh pes angíl Léskiro muj, i šun Léskiri zan; na jav proti Léste, pal-dová so Jov na otmekéla tumaró grého; pal-dová so Miro lav isyn dre Léste. Kóli tu javésa te šunés Léskiri zan i te kerés saró, so Me phenáva, tedy Me javáva vergosa (vrogosa) tyré vergénge i namalesa (protivnikosa) tyré namalenge. Kiéli džála angíl túte Miro Jangólo, i lydžála tut ke Amoriei, Xietiei, Fierieziei, Xananiei, Jeviei i Jevusiei, i Me vymarava len: tedy na kloninpe (na ker šerésa) léngire devlorénge, i na dynarin lénge, i na pirile léngire réndy, ne phagir len, i rosphagir léngire stýlby: dynarin Ráske-Devléske, tumaré Devléske, i Jov bahtiakiréla Tyró maró i Tyró paní; i Me otlydžava nasvalypena tuméndyr. Na javéla bi časoskiro te bijanen i na javéla nakhabnen (bičhavorengiren) pe tyrí phuv; Me keráva pherdé tyré-džiibnáskire dyvesá. Me bičhaváva Mirí traš (dar) angíl túte, i dro konfuzo Me janáva kažnoné manušén, ke savé tu javésa, i Me javáva te obriskirav ke tu palalesa sarén tyré vergén; Me bičhaváva angíl túte šeršnien (voslen), i jone tradéna tyré móstyr Jeviejen, Xananiejen i Xietiejen; Me na vytradava len tyré móstyr dro jekh berš, sob (kaj) phuv te na kerélpe čhučí i te na vybarjon proti túte feldýtka riskiribnáskire murdalá (zvieri); nábut pe nábut Me javáva te tradav len tútyr, ke davá časo, paka tu vybarjosa dre manušénde i na lésa dre péskire vastá daja phuv. Prolydžava tyré miéžy Lolé morjostyr (derjavestyr) ke mórjo (derjáv) Filistimijakiro i čhučé phuvjátyr ke reka (len'); pal-dová so Me otdáva dre tumaré vastá adalé-phuvjákire manušén, i tu tradesa len krig tyré móstyr; na ker zavieto (dorakiribén) ni lénca, ni léngire devlorenca; lénge naštý te dživén pe tyrí phuv, sob (kaj) jone te na zalydžan tut dro grého pe Mánde; pal-dová so, kóli tu javésa te mangespe léngire devlorénge, to davá javéla túke feliasa (sietkasa).” I phendiá Jov Mojzáske: “Džá upré ke Raj Devél, tu i Aaróno, Nadavo i Aviudo i eftadešá Izrailjoskire phurydyrá, i kerén šerésa (pokloninenpe) durál. I Mójza, mek jekhdžinó te poddžál ke Raj Devél, a jone mek te na poddžan, i manušá mek te na ĥazdénpe lésa.” I javdiá Mójza, i piriphendia manušénge saré lavá Rástyr-Devléstyr i saré zakóny. I otphendlé saré manušá dre jekh zan, i phendlé: “Saró, so phendiá Raj Devél, kerása.” I začhindiá Mójza saré lavá Rástyr-Devléstyr, i, uštyi pe ránko, čhudiá tel bérga altárjo (žertvieniko) i dešudúj bará, pir dešudúj Izrailjoskire ródycy; i bičhadiá Izrailjoskire čhavéndyr ternen, i jone jandlé céla shačkiribena, i zamardé guruvorén (tiel'cen) vaš mírno svénto dyibén (žértva) Ráske-Devléske. Mójza lyjá paš rat, čhudiá dre tahtaja, a javire pašésa občhudiá altárjo; i lyjá zavietoskiri lylvarí, i progindia zoralés (dyjá upré) manušénge, i phendlé jone: “Saró, so phendiá Devél, kerása i javása te kandas.” I lyjá Mójza rat, i obryzgindia manušén, rakirí: “Ĥáda, isyn zavietóskiro rat, savó Raj Devél kerdiá tuménca pir saré dalé lavá.” Tén'ci gijá upré Mójza i Aaróno, Nadavo i Aviudo i eftadešá Izrailjoskire phurydyrá, i dykhné jone Izrailjoskire Devlés; i tel Léskire ĥerá sys vari-so, so podžalas syr butý kerdy žužé sapfirostyr, i sys jasno, syr kokoró bolybén. I Jov na protyrdyjá Péskiro vast pe vykedyné Izrailjoskire čhavénde: jone dykhné Devlés, i xané, i piné. I phendiá Raj Devél Mojzáske: “Džá upré ke Me pe bérga; i jav odój, i Me dáva túke baruné skrižáli (tablicy), i Zakóno i priphenybená (dešatune), savé Me čhindjom te sykliakires lénge.” I uštyjá Mójza Isusósa (Johošuasa), péskire pomogibnaskiresa, i gijá Mójza pe Devléskiri bérga, a phurydyrenge phendiá: “Jačénpe adái, paka ame risjovasa ke tumé; ĥáda, Aaróno i Oro isyn tuménca; kóli javéla tuménde réndo, mek te javél ke jone.” I gijá upré Mójza pe bérga, i učhakirdiá óbloko bérga, i Ráskire-Devléskiri sláva zakerdia bérga Sinajo; i učhakiréla la óbloko šov dyvesá, a pe eftáto dyvés khardiá Raj Devél ke Pe Mojzás oblokostyr. Bicialy sys sláva Ráskire-Devléskiri pe bergákiro vučipén angíl Izrailjoskire-čhavéngire jakhá, syr jag, saví shačkiréla. Mójza zagijá dre maškirál óbloko, i gijá upré pe bérga; i sys Mójza pe bérga štardešá dyvesá i štardešá ratia. I phendiá Raj Devél Mojzáske, i rakirdiá: “Phen Izrailjoskire čhavénge, sob (kaj) jone te kerén Mánge janybén; kažnoné manušéstyr, savó pe iló javéla te del, prilén janybén Mánge.” Ĥáda, isyn janybén, savé tumé san bangé te prilén léndyr: suvnakái, i rup, i xarkóma (mied'), i ĥolubovo výlna (šers'), purpurno i červlieno, i visono, i buzniengiri výlna, i bakrane lolé cypi, sine cypi, i veš sitimo, dzet (jeliejo) vaš šandalo (svietíl'niko), aromatytka čarjá te makhes i vaš gudló thuv (dymo), bar onikso i učhude bará vaš efódo i vaš napiersniko (žylietka). I keréna jone Mánge svénto štéto, i Me javáva te dživáv maškír lénde; saró, syr Me túke sykaváva, i sykaibén (obrazco) šatrakiro (skinijakiro), i sykaibén saré dalé lákire khorengiro; adiáke i kerén. Kerén kovčego (mohtó) vešéstyr sitimo: dlengipén léske te javél duj pašésa kuniá (lokti), i buĥlypén léske te javél jekh pašésa kuniá, i vučipén léske jekh pašésa kuniá; i občhuv les žužé suvnakása, andrestyr i javriestyr, učhakir les; i ker uprál pašýl léste suvnakuný viánka. I vyčhuv vaš léske štar suvnakuné baré angrustiá i prizorjakir (priker) pe štar telatuné léskire véngly; duj baré angrustiá pe jekh léskiri rig, duj baré angrustiá pe javír léskiri rig. Ker vešéstyr sitimo balandiniá (šosty), i občhuv len suvnakása; I čhuv andré šosty dre baré angrustiá, pir kovčegoskire rigá, sob (kaj) lénca te lydžán kovčego; dre kovčegoskire baré angrustiá bangé te javén šosty i naštý te otlen léstyr. I čhuv len dre kovčego dosykaibnása (otkrovienijasa), savó Me túke dyjom. Ker adiáke-pac' žužé suvnakástyr denko (kryška): dlengipén lákiro duj kuniá pašésa, a buĥlypén lákiro jekh pašésa kuniá; i ker suvnakástyr dujén xieruvimen: čiekanone butiátyr ker len pe duj zaučhakiribnytka jagóry (koncy); ker jekhe xieruvimos jekhe jagoróstyr, a javire xieruvimos javire jagoróstyr; kerén xieruvimen khetané denkosa (kryškasa) pe lákire duj jagóry; i javéna xieruvimy ĥazdyné upré phakenca, zaučhakiri péskire phakenca kryška, a péskire mujenca javéna jekh ke jekh; ke denko javéna xieruvimengire muiá. I čhuv pe kovčego (mohtó) upré, dro kovčego čhuv dosykaiben (otkrovienija), savó Me túke davá; odój Me javáva te sykadjovav túke i te rakiráv túsa uprál, kaj upré denko, maškirál duj xieruvimy, savé pe kovčego dosykaibnása (otkrovienijasa), pal saró, so Me javáva te piridav pir túte Izrailjoskire čhavénge. I ker skamínd vešéstyr sitimo, dlengipnása dre duj kuniá, buĥlypnasa dre jekh kun', a vučipnása dre jekh kun' pašésa, i občhuv les žužé suvnakása, i ker pašýl léste suvnakuný viánka (frizo). I ker pašýl léskire rigá (boki) dre burnyk (ladoška) buĥlypnasa, i pašýl léskire rigá ker suvnakuný viánka pašýl; i ker vaš léske štar suvnakuné baré angrustiá, i prizorjakir (priker) angrustiá pe štar véngly pašýl léskire štar ĥerore; pašýl boki (rigá) bangé te javén brenčy (obruči), sob (kaj) te čhuvés balandiniá (šosty), sob (kaj) te lydžas pe lénde skamínd; a balandiniá ker vešéstyr sitimo, i občhuv len suvnakása, i javéna te lydžán pe lénde davá skamínd; ker adiáke-pac' vaš léske čarore, kadily, tahtaja i kučika, sob (kaj) lénca te občhuves: žužé suvnakástyr ker len; i čhuv pe skamínd svénta maré (priedloženija) angíl Miro muj saró časo. I ker momolýtko (svietíl'niko) žužé suvnakástyr; čekanindlo bangó te javél davá momolýtko; léskiro destó, léskire randiá, kučikorja léskire, phabá léskire i luludiá (cvety) léskire trej, sob (kaj) jone te vydžán léstyr; trej, sob (kaj) šov randiá te vydžán léskire rigéndyr: trin randiá momolytkoneskire jekhe léskire rigátyr, i trin randiá momolytkoneskire javire léskire rigátyr; trin kučikorja, savé podžana pe mindal'no luludí (cveto) te javén pe jekh rand', phabasa i luludienca i trin kučikorja, savé poddžana pe mindal'no luludí (cveto) pe javír rand', phabasa i luludienca: adiáke javéla pe saré šov randiá, savé vydžána momolytkonestyr; a pe momolytkoneskiro destó trej, sob (kaj) te javél štar kučikorja, savé te javén sýrby mindal'no luludiá phabenca i luludienca; šove randiendyr, savé vydžána momolytkoneskire ĥerjatyr te javél phabaj tel duj léskire randiá, i phabaj tel trita duje léskire randiendyr. Phaba i randiá léngire trej, sob (kaj) jone te vydžán léndyr: trej, sob (kaj) jov saró te javél čekandlo, célo, žužé suvnakástyr. I ker ke jov eftá lampady, i čhuv pe léste lampady léskire, sob (kaj) te sviencynen (te den dud) pe anglatuny léskiri rig (boko); i ščypcy (cymty) ke jov i lotki ke jov te javén žužé suvnakástyr; talantostyr, žužé suvnakástyr, te kerén les saré léskire sudinkenca. Dykh, ker len pir dová sykaibén (obrazco), savó sys sykado túke pe bérga. Šátra (skínija) ker deše cergendyr (pokryvalendyr) krencenone visonóstyr, i golubovonatyr, purpurovonatyr i červljonone vylnátyr, i ker xieruvimy pe lénde vysude butiasa; dlengipén kažnoné-cergakire te javél biš te ohtó (bidujéngiro deš) kuniá (lokti), a buglypen kažnoné-cergkiro jadiake-pac' te javél štar kuniá: te javél jekh baripén saré cergenge. Pandž cergi mek te javén khetaniakirde jekh jekhasa, i javír pandž cergi khetaniakirde jekh jekhasa. Ker feliá (pietli) golubovoné cviatosa (mastiniasa) pe jagóro (krajo) dre anglatuny cérga pe jagóro, kaj khetaniakirenape duj pašá; adiáke ker i pe jagóro (krajo) pe palatuny cérga. Pandždešá feliá (pietli) ker dre jekh cérga, i pandždešá feliá (pietli) ker pe jagóro cergakiro, saví khetaniakirelape javirjasa; feliá trej, sob (kaj) te podžan jekh ke javír; i ker pandždešá nanglore (kriučki) suvnakuné, i nanglorenca khetaniakir cergi jekh javirjasa, i javéla šátra (skínija) syr jekh célo. I ker deki (cergi) buzniengire vylnátyr, sob (kaj) te zaučhakiren šátra; dešujekh cergi ker dasavé; dlengipén dre jekh cérga te javél trijánda kuniá (lokti), a buglypen štar kuniá; davá isyn jekh cérga: dre dešujekh cergi jekh baripén (razmiero). I khetaniakir pandž cergi iščo (inké) jékhvar i šov cergi iščo (inké) jékhvar; šóvto cérga ker dujendyr anglatuné-šatrakire rigátyr. Ker pandždešá feliá (pietli) pe jagóro dro krajnjo cérga, sob (kaj) te khetaniakires la javirjasa, i pandždešá feliá pe jagóro dre javír cérga, vaš khetaniakiriben lása; ker pandždešá nanglore xarkomátyr (miediatyr), i čhuv dre feliá, i khetaniakir len, sob (kaj) jov te javél syr jekh cérga. A lišnjo iščo (inké) kotér, so jačélape šatrakire cergendyr, – paš lišnjo cérga mek te javél zmekny pe palatuny šatrakiri rig (boko); a lišnjo kotér šatrakire-cergakire dlengipnastyr, pe kun' jekhe rigátyr, i pe kun' javire rigátyr, mek te javél zmekno pir rigá dre šátra dolé i javire rigátyr, vaš lákiro učhakiriben. I ker deka (pokryška) bakrane lolé cypendyr, i iščo (inké) upratuny deka sine (barsukengire) cypendyr. I ker brusy vaš šátra vešéstyr sitimo, sob (kaj) jone te terdjon: dlengipnása bruso dre deš kuniá (lokti), i jekh pašésa kun' buĥlypén dre kažno bruso; dre kažno bruso pir duj šypy, jekh angíl javiréste; adiáke ker dre saré brusy dre šátra. Adiáke ker brusy vaš šátra: biš brusy pir paš-dyvesýtko rig, ke jugo, I tel biš brusy ker štardešá rupune (rupuvé) gerore: duj ĥerore tel jekh bruso vaš duj léskire šypy, i duj ĥerore tel javír bruso vaš duj léskire šypy; i biš brusy vaš javire-šatrakiri rig ke paš-rat (sieviero), i vaš lénge štardešá rupuvé ĥerorja: duj ĥerorja tel jekh bruso, i duj ĥerorja tel javír bruso. Vaš palatuny šatrakiri rig ke zapado ker šov brusy. I duj brusy ker vaš šatrakire véngly pe palatuny rig; trej, sob (kaj) jone te javén khetaniakirde dro nizo i khetaniakirde upré ke jekh bari angrusty (brenčo): adiáke trej te javél lénca dujenca; vaš duj véngly mek jone te javén; i adiáke javéla ohtó (bidujéngiro deš) brusy, i vaš lénge dešušov rupuvé ĥerorja: duj ĥerorja tel jekh bruso, i duj ĥerorja tel javír bruso. I ker balandiniá (šosty) vešéstyr sitimo, pandž vaš brusy jekhe-rigakire skinijatyr, i pandž balandiniá vaš brusy javire rigátyr dre šátra, i pandž balandiniá vaš brusy palatuné rigátyr (bokostyr) pale šátra, ke zapado; a andratuný balandin javéla te prodžal maškirál brusy jekhe jagoróstyr ke javír; brusy občhuv suvnakása, i baré angrustiá (brenčy) te čhuvén andré balandiniá, ker suvnakástyr, i balandiniá (šosty) občhuv suvnakása. I čhuv šátra (skínija) upré pir sykaibén (obrazco), savó sys sykado túke pe bérga. I ker pologo (zaviesa) golubovoné, purpurone i červljonone vylnátyr i krencone visonóstyr; uzorenca spiecoskire butiátyr trej te javén kerdé pe láte xieruvimy; i ublav la pe štar sitimoskire stýlby, občhude suvnakása, suvnakuné nanglorenca, pe štar rupuvé ĥerorja; i ublav pologo telé pe nanglore, i zalydža odorík pal šýrma, saví isyn angíl kovčego dosykaibnása (otkrovienijo); i javéla šýrma, te roskerél svénto štéto Sventoné – Sventonendyr. I čhuv denko (kryška) pe kovčego dosykaibnása (otkrovienijasa) dro Svénto-Sventonendyr. I čhuv skamínd pal šýrma, i momolýtko (svietíl'niko) proti skamínd pe rig šatrakiri ke paš-dyvés (jugo); skamínd čhuv pe paš-ratítko (sievierno) rig. I ker šýrma te učhakires zagiibén dre šátra golubovoné i purpurone i červljonone vylnátyr i krenconone visonóstyr vysude butiátyr pir uzoro; i ker vaš šýrma pandž stýlby sitimostyr, i občhuv len suvnakása; nanglore ke jone te javén suvnakuné; i vyčhuv vaš lénge pandž ĥerorja xarkomátyr (miediatyr). I ker altárjo (žertvieniko) vešéstyr sitimo (akacyja) dlengipnása dre pandž kuniá (lokti) i buĥlypnasa pandž kuniá adiáke, sob (kaj) jov te javél altárjo štaré-venglytko, i vučipnása trin kuniá. I ker šyngá (rógi) pe léskire štar véngly, adiáke, sob (kaj) léstyr te vydžán šyngá; i občhuv les xarkomasa (miediasa). Ker ke jov pirja te vyčhuven dre lénde práska (pieplo), i lopatkicy, kopanycy te skedel, i bustiá (videlki), lopatkicy vaš vangar; saré pribory ker xarkomátyr (miediatyr). Ker ke jov riešotka, khudiakire (sietkakire) rodóstyr, xarkomátyr, i sker pe xarkomakiri khudý, pe lákire štar véngly, štar baré angrustiá xarkomátyr; i čhuv la pir jagóro altarjoskiro telál, adiáke, sob (kaj) khudý (sietka) te javél ke paš altárjo. I ker balandiniá vaš altárjo vešéstyr sitimo, i občhuv len xarkomasa; i čhuv andré balandiniá léskire dre brenčy adiáke, sob (kaj) balandiniá te javén pir duj rigá dro altárjo, kiéli te lydžas les. Ker les čhučesa andrál, phaliendyr, syr sys sykado túke pe bérga, adiáke mek te kerén. I ker gréda (dvóro): paš-dyvesytkoné (južnone) rigátyr ke jugo. Ubladýtka (šyrmy) vaš gréda trej te javén krencona, visonóstyr, dlengipnása dre šel kuniá pir jekh rig; stýlby vaš lénge biš, i osnovy vaš lénge te javén biš xarkuné (miedítka); nanglore pe stýlby i sphandypena pe lénde rupéstyr. Adiáke-pac' i pir paš-ratítko (sievierno) rig-ubladýtka (šyrmy) šel kuniá dlengipnása; stýlby vaš lénge biš, i osnovy vaš lénge (stýlby) biš xarkuné; nanglore pe stýlby i sphandypena pe lénde rupéstyr. I pir gredakiro buĥlypén zapadoskire rigátyr-ubladýtka (šyrmy) dlengipnása pandždešá kuniá; stýlby vaš lénge deš, i osnovy ke jone deš. I dro gredakiro buĥlypén anglatuné rigátyr ke vastóko-ubladýtka (šyrmy) te javén pandždešá kuniá. Ke jekh rig-ubladýtka (šyrmy) dre dešupandž kuniá, stýlby vaš lénge trin, osnovy vaš lénge trin; i ke javír rig-ubladýtka (šyrmy) dre dešupandž kuniá; stýlby vaš lénge trin i stýlby vaš lénge trin. A vaš gredakiri pórta šýrma dre biš kuniá golubovoné i purpurone i červljonone vylnátyr i krencone visonóstyr vysude butiátyr spiecostyr; stýlby vaš láke te javén štar, i osnovy ke jone štar. Saré stýlby pašýl gréda trej, sob (kaj) jone te javén khetaniakirde sphandypnasa rupéstyr; nanglore lénde rupéstyr, a osnovy ke jone xarkomátyr (miediatyr). Gredakiro dlengipén javéla šel kuniá, a buĥlypén pir saró dlengipén-pandždešá, vučipén pandž kuniá; šyrmy krencone visonóstyr, a osnovy tel stýlby xarkomátyr. Saré pribory dre šátra vaš kažno dynaribén dre láte, i saré kile dalé, i saré kile pir gréda-xarkomátyr. I priphen Izrailjoskire čhavénge, sob (kaj) jone te janén túke jeliejo (olivítko dzet) žužó, vymardo maslinendyr te osvencynen, sob (kaj) te xačol dud (svéto) dro kažno časo; dre šátra skedyibnáskiri, pal pologo, savó isyn angíl kovčego dosykaibnása (otkrovienijasa), javéla te zahačkirel Aaróno i léskire čhavé, bel'vieliatyr ke ránko, angíl Ráskire-Devléskiro muj. Davá isyn statúto viéčno vaš léngire stréčy (pokolienii) Izrailjoskire čhavéndyr. Akaná le ke pe Aaronós, tyré pšalés, i léskire čhavén lésa, čhavén Izrailjoskire rodóstyr, sob (kaj) jov te javél Mánge rašása, Aaronós i Nadavos, Aviudos, Jelizaros i Ifoamaros, Aaronóskire čhavén. I ker tyré pšaléske Aaronóske svénta uribená vaš sláva i šukaripén. I phen sarénge god'varé ilésa, savén Me pherdiakirdjom godé duhósa (fanosa), sob (kaj) jone te kerén Aaronóske uribená te vysvencynen les, sob (kaj) jov te javél rašáj Mánge. Ĥáda, isyn ídi, savé jone isyn bangé te kerén: napierstniko (žylietka), efódo, upratuny riza, xitono stiažno, kidaro i kustýk. Mek te kerén svénta ídi Aaronóske, tyré pšaléske, i léskire čhavénge, sob (kaj) jov te javél rašáj vaš Mánge. Mek jone te len suvnakái, golubovo i purpurno i červlieno výlna (šers') i visono, i mek te kerén efódo suvnakástyr, golubovoné, purpurnone i červljonone vylnátyr i krenconone visonóstyr, vysude butiátyr spiecostyr. Léste trej te javén pe duj léskire jagóry (koncy) duj naramniki te sphanden les, sob (kaj) jov te javél sphandlo. I kustýk efodoskiri, saví te javél upralestyr, trej, sob (kaj) joj te javél jekhe butiátyr lésa (efodosa), suvnakástyr, golubovoné, purpurone i červljonone vylnátyr i krenconone visonóstyr. I le duj bará aniksostyr i vyčhin pe lénde Izrailjoskire-čhavéngire lavá: šov léngire lavá pe jekh bar, i šov lavá, savé jačénape, pe javír bar pir léngiro bijanypén: kon džal pérvo; trej, sob (kaj) te kerél davá o čhinybnari pe bar, savó vyčhinela jakhítka (čergenorja), vyčhin pe duj bará Izrailjoskire-čhavéngire lavá; i čhuv len andré dre suvnakuné opravy; i čhuv dalé duj bará pe efodoskire naramniki: dalé bará pe ripiribén Izrailjoskire čhavénge; i javéla Aaróno te lydžál léngire lavá angíl Raste-Devléste pe duj péskire psiké vaš ripiribén. I ker opravy suvnakástyr; i duj cepočki (zandirorja) žužé suvnakástyr, ker len krenconenca khudé butiátyr, i priker krencona zandirorja ke opravy. Ker napierstniko (žylietka) te sendines vastengire butiátyr, syr efódo: suvnakástyr, golubovoné, purpurone i červljonone vylnátyr i krenconone visonóstyr ker les; trej, sob (kaj) jov te javél štaré venglenca, duje rigéndyr, dre burnyk (piadien') dlengipnása i dre burnyk buĥlypnasa; i čhuv andré dre léste bará dre opravy dre štar riady; pérvo riado: rubino, topazo, izumrudo, – davá isyn jekh riado; iavír riado: karbunkulo, sapfiro i almazo (diamanto); tríto riado: jahonto, agato i amietisto štárto riado: xrisolito, onikso i jaspiso; dre suvnakuné opravy trej, sob (kaj) jone te javén čhudé andré. Trej, sob (kaj) saré bará te javén dešudúi, adákicy, ci but isyn Izrailjoskire čhavé, pir léngire lavá; pe kažno, sýrby pe jakhítko (čergenorí), trej, sob (kaj) jone te javén vyčhindlé pir jekh lav dešudujé rodycendyr. Ke napierstniko (žylietka) ker krencona cepočki (lancužki) krenconone khudé butiátyr žužé suvnakástyr; i ker ke napierstniko (žylietka) duj baré angrustiá suvnakástyr, i priker duj baré angrustiá ke duj napierstnikoskire jagóry; i čhuv andré duj khudé cepočki (zandirorja) suvnakástyr dre baré angrustiá pir napierstnikoskire jagóry (koncy), a duj javír jagóry (kraí) duje dalé zandiror'jengire (cepočkengire) priker ke duj opravy, i priker ke efodoskire naramniki léskire rigátyr, saví isyn angíl; iščo (inké) ker duj suvnakuné baré angrustiá i priker len ke javír duj napierstnikoskire jagóry, pe doiá rig, saví isyn pašty ke efódo andrál; adiáke-pac' ker duj suvnakuné baré angrustiá i priker len ke duj efodoskire naramniki telál, léskire rigátyr, saví isyn angíl, pašýl léskiro šovo, pe efodoskiri kustýk; i prikeren ke jone napierstniko (žylietka) léskire baré angrustienca ke efodoskire baré angrustiá šnurosa (dorjasa) ĥolubovone vylnátyr, sob (kaj) jov te javél pe efodoskiri kustýk, i, sob (kaj) kaj te na perél napierstniko efodostyr. I javéla te lydžál Aaróno Izrailjoskire čhavéngire lavá pe napierstniko, sob (kaj) te sendiakirél (te rosphandel čačipén) pašýl léskiro iló, kiéli javéla te zadžál andré svénto štéto, vaš kažno ripiribén pal čačipén angíl Raste-Devléste. I čhuv pe napierstniko, sob (kaj) te rosphandel čačipén Urimo i Tumimo, i jone javéna pe iló Aaronoste, kiéli jov javéla te džal andré svénto štéto angíl muj Ráskiro-Devléskiro, i javéla Aaróno saró časo (cýro) te lydžál Izrailjoskire-čhavéngiro séndo pašýl péskiro iló angíl Ráskiro-Devléskiro muj. I ker upratuny riza ke jefodo sarí golubovoné cviatosa (mastiniasa); maškirál láte trej, sob (kaj) te javél otčhakiriben (kula) vaš šeró; pašýl davá otčhakiriben trej, sob (kaj) jov te javél obsudo pohtanesa, adiáke-pac' syr pašýl broniakiro (pancyrjoskiro) otčhakiriben, sob (kaj) jov te na kušelpe; pir lákiri podia ker phabá golubovoné thavendyr, jahontovone, purpurone i červljonone cviatosa (mastiniasa), pašýl lákiri podia; suvnakuné kudunorja (pozvonki) maškír lénde pašýl: suvnakuný kudunori i phabaj, suvnakuný kudunori i phabaj, trusciál (krugom) pir upratune-rizakiri podia; joj javéla pe Aaronoste, kiéli jov javéla te dynarinél syr rašái, sob (kaj) te javél šundly léstyr zniko (zvuko), kiéli jov javéla te zadžál andré svénto štéto angíl Ráskire-Devléskiro muj i, kiéli javéla te vydžál, sob (kaj) léske te na merél. I ker phaljori (dosočka) žužé suvnakástyr, i vyčhin pe láte, syr vyčhinena pe jakhítko (čergenorí): “Sventyma Devléskiri”, i priker la golubovoné-cviatoskire šnurosa (dorjasa) ke kidaro, adiáke, sob (kaj) joj te javél pe anglatuny kidaroskiri rig; i javéla joj pe Aaronoskiro šeró, i lydžála pe péste Aaróno janybnaskire nado uhtylybena, kiéli vysvencynenas Izrailjoskire čhavéndyr, i saré dáry, savé jone janénas; i javéla joj saró časo pe léskiro šeró, sob (kaj) jone te lathén láska angíl Raste-Devléste. I ker xitono visonóstyr i kidaro visonóstyr, i ker kustýk vysude butiátyr uzorenca; ker Aaronóskire čhavénge xitony, sker lénge kustyka, i phandlunia (poviazki) pe šeró, ker lénge vaš sláva i šukaripén, i uri dre lénde Aaronós, tyré pšalés, i léskire čhavén lésa, i pomakh len, i pherdiakir léngire vastá, i vysvencyn len, i jone javéna rašaja Mánge. I ker lénge telatuné ídi ljonostyr (ĥandladestyr) te učhakiren nange masá trušulendyr ke čangá, i mek te javén jone pe Aaronoste i pe léskire čhavénde, kiéli jone javéna te zadžán dre šátra (skínija) vaš skedyibén ci te poddžan ke altárjo (žertvieniko) te dynarinén pe svénto štéto, sob (kaj) lénge te na lydžán pe péste grého i te na merén. Davá isyn statúto pe viéko vaš léske i vaš léskire-čhavéngire čhavénge pal léste. Ĥáda, so túke trej te kerés pe lénde, sob (kaj) tu te vysvencines len dre rašande Mánge: le jekhés guruvóres (tiel'cos) guruvendyr, i dujén bakrén bi došengiro, i priesna maré (maca), i apriesnoki, pirimiešindle jeliejosa i priesna mariklia, pomakhne jeliejosa: parné givestyr ker len, i čhuv len dro jekh khudo (korzina), i jan len dro khudo, i khetané guruvóres i dujén bakrén. Aaronós i léskire čhavén jan ke zagiibén dre šátra vaš skedyibén, i obmor len paniésa. I le uribená, i Aaronós uri dro xitono i dre upratuny riza, dro efódo i dro napierstniko, i obphande les pir efódo; i čhuv léske pe šeró kidaro, i priker diadema svénto pe kidaro; i le jeliejo te makhes, i čhuv les léske pe šeró, i pomakh les. I jan adiáke-pac' léskire čhavén, i uri len dre xitony; i obphande len kustykasa, Aaronós i léskire čhavén, i čhuv pe lénde phandlunia (poviazki), i javéla lénge dynó rašaiben pir statúto pe viéko; i pherdiakir Aaronóskire i léskire-čhavéngire vastá. I jan guruvóres angíl šátra vaš skedyibén, i čhuvéna Aaróno i léskire čhavé péskire vastá pe guruvoreskiro šeró; i začhin guruvóres angíl Raste-Devléste angíl zagiibén dre šátra vaš skedyibén; le guruvoreskiro rat, i čhuv tyré anguštesa (pal'cosa) pe altarjoskire šyngá (rógi), a saró rat vyčhuv pašýl altárjo; le saró čekén (túko), savó učhakiréla buke (andratuné masá), i sal'niko kalé bukesa (piečonkasa), i duj bukore (počki) i túko, savó isyn pe lénde, i shačkir pe altárjo; a guruvoreskiro mas i léskiri cýpa i léskiro ĥnejo (mesta) shačkir pe jag pal stáno: davá – svénto dyibén (žértva) pal grého. I le jekhés bakrés, i čhuvéna Aaróno i léskire čhavé péskire vastá pe bakreskiro šeró; i začhin bakrés, i le léskiro rat, i bryzgin pe altárjo saré rigéndyr; rosčingir bakrés pe pašá, vymor léskire buke (andratuné masá) i léskire ĥerá i čhuv len pe rosčhingirde léskire pašá i pe léskiro šeró; i shačkir saré bakrés pe altárjo. Davá isyn célo shačkiribén Ráske-Devléske, gudló thuv, svénto dyibén, Ráske-Devléske. Le i javire bakrés, i čhuvéna Aaróno i léskire čhavé péskire vastá pe bakreskiro šeró; i začhin bakrés, i le léskiro rat, i čhuv pe čačó (pravo) Aaronoskiro kan pe jagóro (krajo) i pe léskire-čhavéngiro čačó kan pe jagóro, i le léngiro pravone-vasteskiro baró angúšt (pal'co), i pe léngiro pravone-ĥer'iakiro baró angúšt; i obryzgin ratésa altárjo saré rigéndyr; i le rat, savó isyn pe altárjo, i makhibnytko aliejo, i bryzgin pe Aaronoste i pe léskire uribená, i pe léskire čhavénde, i pe léskire-čhavéngire uribená lésa – i javéna vysvencyndle jone, jov i léskire ídi, i léskire čhavé i léngire uribená lénca. I le bakrestyr čekén i kurdiuko, i čekén, savó učhakiréla buke (andratuné masá), i sal'niko kalé bukestyr, i duj bukore i čekén, savó isyn pe lénde, čačó (pravo) psikó, i le jekh krenglo maró, jekh marikly pe jeliejo i jekh apriesnoko khudestyr (korzinatyr), savó isyn angíl Raste-Devléste, i čhuv saró pe vastá Aaronóske i pe léskire-čhavéngire vastá, i jan davá, trinskiri angíl Ráskire-Devléskiro muj; i le davá léngire vasténdyr, i xačkir sarésa pe altárjo celoné shačkiribnasa syr gudló thuv angíl Raste-Devléste: davá isyn svénto dyibén (žértva) Ráske-Devléske. I le kolýn bakriatyr te obsvencynes, savó vaš Aaronóske, i jan les, trinskiri angíl Ráskire-Devléskiro muj, – i davá javéla tyrí paš (dólia); i obsvencyn kolýn, savó sys trinskirdo, i psikó, savó sys ĥazdynó, obsvencyndle bakrestyr, savó isyn vaš Aaronóske i vaš léskire čhavénge, i javéla davá Aaronóske i léskire čhavénge dro viéčno statúto (ustavo), pal-dová so davá isyn svénto dyibén ĥazdypnasa i davá javéla janybén Izrailjoskire čhavéndyr, savó trej, sob (kaj) jov te javél angíl mirna svénta dyibená lénde, davá javéla léngiro svénto dyibén ĥazdypnasa Ráske-Devléske. A obsvencindle uribená, savé isyn vaš Aaronóske, piridžana korigedýr (pozžedýr) léstyr ke léskire čhavé, sob (kaj) dre lénde te makhes len i te vysvencynes len syr rašán; eftá dyvesá trej, sob (kaj) te ur'jelpe dre lénde čhavó léskire čhavéndyr, savó terdjola pe léskiro štéto syr rašái, savó javéla te zadžál dre šátra skedyibnáskiri te dynarinél pe svénto štéto. Bakrés, savó sys obsvencyndlo, le, i keráv léskiro mas pe svénto štéto; i mek te shan Aaróno i léskire čhavé saró bakreskiro mas khudestyr, pašýl vudará dre šátra skedyibnáskiri, pal-dová so dalésa sys kerdó žužakiriben te piridén lénge rašaipen, i te vysvenciakiren len; javír manúš naštý te xal davá, pal-dová so davá isyn svénto; a kóli vari-savó mas jačélape, sósa svenciakirenas i maró ke ránko, to shačkir les pe jag, so jaciápe: naštý te xas les, pal-dová so davá isyn svénto. I ker Aaronosa i léskire čhavénca dro saró adiáke, syr Me phendjom túke; pal eftá dyvesá vysvencynesa len. I guruvóres pal grého jan kažno dyvés vaš léskiro žužakiriben, i svénto dyibén (žértva) pal grého, sob (kaj) te žužakirel altárjo i pomakh les vaš léskiro obsvencynyben; eftá (bitrinéngiro deš) dyvesá žužakir altárjo, i obsvencyn les, i javéla altárjo bari sventyma: saré, kon čilavéla altárjo, osvencynenape. Ĥáda, so tu javésa te janes pe altárjo: dujén bakrén jekhe-beršytkonen kažno dyvés saró časo; iekhés bakrés jan zlokostyr (rankostyr), a javire bakrés jan bel'velié, i déšto paš efakiri parné givestyr fededyrone jaržestyr, smiešindlo štartone pašésa ginosa vytasade jeliejosa, a te janes thaduno svénto dyibén – štárto paš gino moliátyr (vinostyr), vaš jekhe bakreske; iavirés bakrés jan bel'velié: jaržeskire darosa, dasavo-pac' syr rankosa (zlokosa), i dasavesa thadune-sventoné dyibnasa jan les dre gudló thuv, dro jaguno svénto dyibén Ráske-Devléske. Davá javéla syr célo shačkiribén saró časo dre tumaré stréčy (pokolienii) angíl vudará dre šátra vaš skedyibén angíl Raste-Devléste, kaj Me javáva te sykadjovav tuménge, sob (kaj) te rakiráv túsa; odój Me javáva te sykadjovav Izrailjoskire čhavénge, i obsvenciakirelape davá štéto Miré slavása. I Me vysvenciakirava šátra vaš skedyibén i altárjo; i Aaronós i léskire čhavén vysvenciakirava, sob (kaj) jone sventes te dynarinén Mánge; i Me javáva te dživáv maškír Izrailjoskire čhavénde, Me javáva lénge Devlésa, i udžinena, so Me som Raj Devél, léngiro Devél, Savó vylydžijá len Jegiptóskire phuvjátyr, sob (kaj) Mánge te dživáv maškír lénde. Me som Raj Devél, léngiro Devél. I ker altárjo te xačkires gudlé smóly, sitimoskire vešéstyr ker les: dlengipén léske te javél kun' (loktjo), i buĥlypén léske te javél kun', sob (kaj) jov te javél štaré-venglytko; a vučipén léske te javél duj kuniá; léstyr bangé te vydžán léskire šyngá (rógi); občhuv les žužé suvnakása, léskiro upralypén i léskire rigá trusciál (krugom), i léskire šyngá; i ker ke jov suvnakunó krenglypen (frizo) trusciál. Tel léskiro krenglypen, pe duj léskire véngly, ker duj baré angrustiá suvnakástyr; ker len duje léskire rigéndyr; i javéna jone čhuibnasa vaš balandiniá (šosty), sob (kaj) te lydžas les pe lénde; balandiniá ker vešéstyr sitimo (akacyja), i občhuv len suvnakása. I čhuv altárjo angíl pologo, savó te javél angíl kovčego dosykaibnása (otkrovienijasa), kaj Me javáva te sykadjovav túke. Pe léste Aaróno javéla te xačkirel dróga smóly (fimiámo); kažno ránko, kiéli jov skedéla lampady, javéla te xačkirel dróga smóly lénge; i kiéli Aaróno xačkiréla bel'velié lampady, jov javéla te xačkirel dróga smóly (fimiámo) lénge: davá isyn kažnoné thuvliakiriben pe kažno dyvés angíl Raste-Devléste dre tumaré ródy. Na čhuvén pe léste nisavó javír thuvliakiriben, ni célo shačkiribén, ni marunó janybén, i ni thaduno svénto janybén na čhuvén pe léste. I javéla te žužakirel Aaróno sventoné dyibnástyr léskire šyngá (rógi) jékhvar dre berš; jov javéla les te žužakirel jékhvar dro berš dre tumaré ródy žužakirdé žertvakire ratésa pal grého. Davá isyn bari sventyma Raste-Devléste. I phendiá Raj Devél Mojzáske, rakirí: “Kiéli tu javésa te kerés Izrailjoskire čhavénge ginybén pir šeré angíl, syr len te piridykhen, to mek kažno te del vykinybén pal péskiro di Ráske-Devléske angíl léngiro piriginybén, i na javéla maškirál lénde xasibnýtka fránsy angíl léngiro ginybén; kažno, kon zadžála dro ginybén, isyn bangó te del paš šékieljo, svencyndlo šékieljo; dro šékieljo biš giery, paš šékieljo te javél janybén Ráske-Devléske; kažno, kon poperela dro piriginybén bišé beršéndyr i butýr, trej, sob (kaj) jov te del janybén Ráske-Devléske; barvaló na butedýr i čororó na tyknedýr syr paš šékieljo trej, sob (kaj) jone te den dro svénto janybén Ráske-Devléske, vaš léngire dijá te vykinen; i le vykinybnaskiro rup Izrailjoskire čhavéndyr, i mek les dro réndo pe skinijakiri šátra skedyibnáskiri te dynarinén; i davá javéla vaš Izrailjoskire čhavénge dro ripiribén angíl Raste-Devléste, vaš tumaré dijá te vykinen.” I phendiá Raj Devél Mojzáske, rakirí: “Ker moske čaró xarkomátyr (miediatyr) te obmorespe i tel léskire ĥerá predkico xarkomátyr, i čhuv les maškír skedyibnáskiri šátra i maškirál altárjo, i čhuv dre léste paní; i mek Aaróno i léskire čhavé léstyr isyn te obmoren péskire vastá i péskire ĥerá; kiéli lénge trej te zadžán dre skedyibnáskiri šátra, mek jone te obmorenpe paniésa, sob (kaj) lénge te na merén; ci kiéli lénge trej te poddžan te javén pašyledýr ke altárjo te dynarinén, te janén céla shačkiribena Ráske-Devléske, mek jone te obmoren paniésa péskire vastá i ĥerá, sob (kaj) lénge te na merén; i javéla lénge davá viéčno statúto, léske i léskire rodóske dre léngire ródy.” I phendiá Raj Devél Mojzáske, rakirí: “Le péske sámo fededýr lačhé-khandypnytka čar'jendyr (parfuny): smirna samatočno pandžšelá šékieli, gudly korica khanduny paš proti dová, duj šelá pandždešá gudly triščyna (trosniko) duj šelá pandždešá, kasija pandžšelá šékieli, pir šékieljo obsvencyndlo, i olivítko dzet gino; i ker saréstyr miro vaš obsvencybnytko makhiben, čhudo khosyiben, davá javéla miro vaš makhiben te obsvencynes; i pomakh lésa šátra vaš skedyibén i kovčego dosykaibnása (otkrovienijasa), i skamínd i saré léskire pribory, i momolýtko (svietíl'niko) i saré léskire pribory, i kurinybnaskiro altárjo (žertvieniko), i altárjo vaš céla shačkiribena i saré léskire pribory, i moskiro čaró te obmorespe (umyval'niko) i léskiro tel predkico; i vysvencyn len, i javéla bari sventyma: saró, so pričilavelape ke jone, javéla osvencyndlo; pomakh i Aaronós i léskire čhavén, i vysvencyn len, sob (kaj) jone te javén rašaja Mánge. A Izrailjoskire čhavénge phen: ‘Davá javéla Mánde makhibnaskiro miro te osvencynenpe dre tumaré ródy; naštý te čhuvés davá miro pe javire manušénde, i piró léskiro čhuibén (sostavo) na kerén dasavo-pac' léske. Jov isyn sventyma: trej, sob (kaj) svénto jov te javél vaš tuménge; kon čhuvéla dasavo-pac' miro, ci kon lésa makhela javirés manušés, odová manúš xasjola péskire manušéndyr.’” I phendiá Raj Devél Mojzáske: “Le péske lačhé-khandypnytka čar'jendyr: stakta, oniho, gudló xalvano i žužó livano, saró pir šerá (rávnes), i ker léndyr gudlé smóly (fimiámo) te xačkires, dasavo čhuibén, syr keréla spieco pir parfuny (parfiumiero): londo, žužó, svénto. I rostasav (rostolkin) les xurdes (drobnes), i čhuv les angíl kovčego dosykaibnása (otkrovienijasa), dre šátra skedyibnáskiri, kaj Me javáva te sykadjovav túke, davá javéla bari sventyma vaš tuménge; na kerén péske gudlé smóly (fimiámo), kerdó pir davá čhuibén, sventonesa mek te javél jov túte vaš Ráske-Devléske; kon keréla dasavo, sob (kaj) te thuvliakiren lénca, odová manúš te xasjol péskire manušéndyr.” I phendiá Raj Devél Mojzáske: “Dykh, Me čhuváva ukrat (kak raz) Viesielieilos, Urijaskire čhavés, Orovoskire čhavés, Judáskire rodycóstyr; i Me les pherdiakirdjom Devléskire Duhósa (Fanosa), godypnasa, godiása, džinybnasa i kažnoné iskustvosa, te vyduminel vučé-mastieritka thana te kerél butý suvnakása, rupésa i xarkomasa (miediasa), te čhinel kuč bará vaš čhuibén andrál oprava i te vyčhinel veš, sob (kaj) te kerés kažno réndo; i, ĥáda, Me dáva léske pomogibnaskiren Agoliavos, Ahisamahovoskire čhavés, Danóskire rodycóstyr, i dro kažno god'vareskiro iló me čhuváva godypén, sob (kaj) jone te kerén saró, so Me priphendjom túke: šátra skedyibnáskiri i kovčego dosykaibnása (otkrovienijasa) i denko (kryška) pe léste, i saró, so trej vaš šátra, i skamínd, i so trej vaš léske, i momolýtko (svietíl'niko) žužé suvnakástyr i saré pribory, so trej vaš léske, i altárjo te thuvliakires gudlé smóly (fimiámo), i altárjo vaš célo shačkiribén, i saró, so trej vaš léske, i moske čaró (umyval'niko) i predkico tel léste, i uribená te dynarinél rašása i svénta uribená rašáske Aaronóske, i léskire čhavénge uribená vaš svénto dynaribén, i dzet (jeliejo) te makhes i gudlé smóly te xačkires vaš svénto štéto; saró adiáke, syr Me phendjom túke, jone keréna.” I phendiá Raj Devél Mojzáske: “Phen adiáke Izrailjoskire čhavénge: ‘Sávaty (suboty) Miré rakhén, pal-dová so-davá so znamiénii (ĥiertyká) maškír Mánde i tuménde dre tumaré ródy, sob (kaj) tumé te džinén, so Me som Raj Devél, Savó svenciakirela tumen; i rakhén sávato, pal-dová so jov isyn svénto vaš tuménge: kon magirela les, odová mek te javél otdynó meribnáske; kon léla te kerél dre davá dyvés vari-saví butý (réndo), dová di isyn bangó te javél xasiakirdo péskire manušéndyr; šov dyvesá mek te kerén réndo, a pe eftáto (bitrinéngiro déšto) dyvés sávato te otkhinjon, jov isyn otdynó Ráske-Devléske: kažno, kon keréla réndo dro savatoskiro dyvés, mek te javél otdynó meribnáske; i mek te rakhén Izrailjoskire čhavé sávato, te svenkinen sávato dre péskire ródy, syr viéčno zavieto; davá isyn ĥiertýk (znamiénijo) maškír Mánde i Izrailjoskire čhavénde pe viéko, pal-dová so pal šov dyvesá Devél sozdyjá bolybén i phuv, a pe eftáto dyvés otkinyja.’” I kiéli Devél pirijaciá te rakirél Mojzasa pe bérga Sinajo, Jov dyjá léske duj tablicy (skrižáli) dosykaibnása (otkrovienijasa), baruné skrižáli, pe savé čhindló sys Devléskire anguštesa. Kiéli manušá dykhné, so Mójza ĥará (dlúges) na džála telé bergátyr, to skedynépe ke Aaróno i phendlé léske: “Uštý, i ker aménge devlores, savó te džal angíl aménde; pal-dová so adalé manušésa, Mojzasa, savó vylydžijá amen Jegiptóskire phuvjátyr, ame na džinása, so kerdiápe lésa.” I phendiá lénge Aaróno: “Vylen suvnakuné čenia, savé isyn dre tumaré-romniengire kaná, tumaré čhavéngire i tumaré čhajengire, i janén ke me.” I saré manušá vylyne péskire kanendyr suvnakuné čenia, i jandlé ke Aaróno. Jov lyjá len léngire vasténdyr, i kerdiá léndyr vyčhudes guruvóres, i obkerdia les daltasa (riezcosa). I phendlé jone: “Ĥáda, isyn devloro tyró, Izrailjo, savó vylydžijá tut Jegiptóskire phuvjátyr!” Dykhí davá, Aaróno čhudiá angíl léste altárjo, i phendiá Aaróno: “Atasiá javéla svénko Ráske-Devléske.” Pe javír dyvés jone uštyné tasiárles (ránes), i jandlé céla shačkiribena, i jandlé mirna svénta dyibená: i bešné manušá te xan i te p'jen, a korigedýr (pozžedýr) uštyné te khelen. I phendiá Raj Devél Mojzáske: “Sygnedyr džá telé; pal-dová so rozmeknepe tyré manušá, savén tu vylydžijan Jegiptóskire phuvjátyr; jone syg otginé droméstyr, savó Me uphendjom lénge: jone kerdé péske vyčhudé guruvóres, i klonindlepe léske (kerdé šerésa), i jandlé léske svénta dyibená, i phendlé: ‘Ĥáda, isyn tyró devloro, Izrailjo, savó vylydžijá tut Jegiptóskire phuvjátyr!’” I phendiá Raj Devél Mojzáske: “Me dykháva adalé manušén, i ĥáda, manušá adalé, jone – pharé-šeritka; i adiáke mek Man, mek te zahačol Miro xoliakiribén pe lénde, i Me domarava len, i keráva tútyr baró narodo.” Ne Mójza lyjá te primangel Ras-Devlés, Péskire Devlés, i phendiá: “Mek te na zahačol, Rajo Dévla, Tyró xoliakiribén pe Tyré manušénde, savén Tu vylydžijan baré zorjása i zoralé vastésa Jegiptóskire phuvjátyr, sob (kaj) Jegiptiáni te na rakirén: ‘Pe xasibén Jov vylydžijá len, sob (kaj) te muliakires len dre bérgi i te domares len phuvjákire móstyr;’ rískir Tyró xačkirdo xoliamipen, i otparuv Tyré-manušéngiro xasiakiriben; priripir Avraamos, Isaakos i Izrailjo, Tyré pishar'jén, savénge Tu sovlahadian Pésa, rakirí: ‘Me ubarjakirava tumaró ródo, syr bolybnáskire čergienia, i sarí daja phuv, pal saví Me phendjom, Me dáva tumaré rodóske, i javéna viečna xulaja.’” I otriskirdia Raj Devél xolý, pal saví phendiá, so janéla la pe Péskire manušénde. I risijá i gijá telé Mójza bergátyr; dro léskiro vast sys duj skrižáli dosykaibnása (otkrovienijasa), pe savé sys čhindló duje rigéndyr: i pe doiá i pe javír rig sys čhindló; skrižáli sys Devléskiri butý, i so sys čhindló pe skrižáli, sys Devléskire čhinybnasa. I šundiá Isúso (Johošuá) zan manušéngiri, savé godlenas, i phendiá Mojzáske: “Saví isyn maribnýtko gódla dro stáno.” Ne Mójza phendiá: “Davá nane gódla odolengire manušéngiri, savé pirizorjakirde dro maribén, i na roibén manušéngiri, savén domardé; me šunava bagaibnytko zan.” Kiéli jov podgíia ke stáno i dykhciá guruvóres i khelyben, tedy jov zahačíia xoliása, i čhurdyjá péskire vasténdyr skrižáli, i rozmardiá len tel bérga; i lyjá guruvóres, savó jone kerdé, i xačkirdiá les dre jag, rostriindia les dro práho, i rosčhudiá pir paní, i dyjá les te p'jen Izrailjoskire čhavénge. I phendiá Mójza Aaronóske: “So kerdé túke adalé manušá, so tu zalydžijan len dre baró grého?” Ne Aaróno phendiá: “Mek te na zahačol butýr xolý miré xulaskiri; tu džinés adalé manušén, so jone isyn bibahtalé. Jone phendlé mánge: ‘Ker aménge devlores, savó te džal angíl aménde; pal-dová so, so Mojzasa, adalé manušésa, savó vylydžijá amen Jegiptóskire phuvjátyr, ame na džinas, so lésa kerdiápe’. I me lénge phendjom: ‘Konéste isyn suvnakái, zlen péstyr’. I otdyné mánge; me čhurdyjom les dre jag, i vygijá davá guruvoro.” Mójza dykhciá, so adalé manušén na obrikiresa, pal-dová so Aaróno domekcia, so len naštý te obrikirel, ke ladž angíl léskire vergénde (vrogende). I terdijá Mójza dre stanoskire (taboroskire) vudará i phendiá: “Kon isyn pe rig Ráskire-Devléskiri, – džán ke me!” I skedynépe ke jov saré Lievijoskire čhavé. I jov phendiá lénge: “Adiáke rakiréla Raj Devél, Devél Izrailjoskiro: ‘Čhuvén kažno péskiri kurtála pe péskiro pašvaro, prodžan pir stáno vudarendyr ke vudár i pale, i zamarén kažno péskire pšalés, kažno péskire males, kažno péskire pašatunes.’” I kerdé Lievijoskire čhavé pir Mojzáskiro lav: i xasiné dro dová dyvés manušéndyr pašýl trin tysjoncy (bará) manušén. Pal-dová so Mójza phendiá: “Adadyvés otdén tumaré vastá Ráske-Devléske, kažno dre péskire čhavéste i péskire pšaléste, mek te bičhavel adadyvés Jov tuménge bahtiakiribén.” Pe javír dyvés Mójza phendiá manušénge: “Tumé kerdé baró grého; i adiáke me džáva upré ke Raj Devél, sob (kaj) te vymangav te otmekél tumaró grého.” I risijá Mójza ke Raj Devél, i phendiá: “Adalé manušá kerdé baró grého: kerdé péske suvnakuné devlores; otmek léngiro grého lénge, a kóli nad, tedy khos krig i man Tyré lylvarjatyr, dre saví Tu začhindian.” I Raj Devél phendiá Mojzáske: “Odolés, kon kerdiá grého angíl Mánde, Me khosava krig Miré lylvarjatyr (knigatyr); i adiáke džá, lýdža adalé manušén, karik Me túke phendjom; ĥáda, Miro Jangólo džála angíl túte, i dro Miro dyvés, syr Me javáva te čhuvav kára, Me zadžava ke jone pal léngiro grého.” I čhudiá meribnytko kára Raj Devél pe manušénde pal guruvoreste, savó kerdiá Aaróno. I phendiá Raj Devél Mojzáske: “Džá adathýr, tu i manušá, savén tu vylydžijan Jegiptóskire phuvjátyr, pe phuv, pal saví Me sovlahadjom Avraamóske, Isaakóske i Jakovóske, rakirí: ‘Tyré-čhavéngire rodóske Me dáva la.’ I angíl túte bičhaváva Me Jangolós, i tradava krig Xananiejen, Amoriejen, Xietiejen, Fierieziejen, Jeviejen i Jevusiejen, [i lydžála Jov tumen-r.s.] pe phuv, kaj thadéla thud i avgín; pal-dová so Me Kokoró na džáva maškír tuménde, sob (kaj) te na xasiakiráv Mánge tumen pir drom, pal-dová so tumé san manušá pharé-ilytka.” Manušá šundlé xoliamó davá lav, zarondle, i nikón na čhudiá pe péste péskire šukarjakiribena (prikedyibena). Paldavá so Raj Devél phendiá Mojzáske: “Phen Izrailjoskire čhavénge: ‘Tumé san pharé-ilytka manušá; kóli Me džáva maškír tuménde, to tedy Me dre jekh menta (minuta) xasiakiráva tumen; i adiáke zlen péstyr šukarjakiribena péskire; Me javáva te dykháv, so Mánge te keráv tuménca.’” Izrailjoskire čhavé zlyne péstyr šukarjakiribena péskire pašýl Xorivoskiri bérga. Mójza lyjá i čhudiá péske šátra pal stáno, durál stanostyr, i khardiá la šátra skedyibnáskiri, i kažno, kon rodyja Ras-Devlés, javélas dre šátra skedyibnáskiri, saví sys paló stáno. I kiéli Mójza džálas ke šátra, saré manušá uštenas, i kažno terdjolas pašýl zagiibén dro péskiri šátra i dykhciá dro Mojzáskiro sliado, paka jov zadžalas dre šátra. Kiéli Mójza zadžalas dre šátra, tedy zmekelaspe oblokoskiro stýlbo i terdjolas pašýl zagiibén dre šátra, i Raj Devél rakirdiá Mojzasa. I dykhné saré manušá oblokoskiro stýlbo, savó sys terdó pašýl zagiibén dre šátra i uštenas saré manušá, i kažno kerdiá šerésa (klonindiape) pašýl zagiibén dre péskiri šátra. I rakirdiá Raj Devél Mojzasa muj pe muj, sýrby rakirdiá kon péskire malesa; i jov risijá dro stáno; a léskiro dynári Isúso (Johošuá), Navinoskiro čhavó, ternó, na otdžalas šatratyr. Mójza phendiá Ráske-Devléske: “Ĥáda, Tu rakirésa mánge: ‘Lýdža adalé manušén’, a dyján te džináv mánge, konés bičhavesa mánca, mek (xoc'). Tu phendián: ‘Me džinóm tut pir lav, i túte isyn láska dre Miré jakhá’; i adiáke, kóli me lathjom (lastiem) láska dre Tyré jakhá, tedy me mangáva; sykáv mánge Tyró drom, sob (kaj) me te džináv Tut, sob (kaj) te lathav láska dre Tyré jakhá; i depe mysliake, so adalé manušá isyn Tyré manušá.” Raj Devél phendiá: “Me Kokoró džáva [Miro očertanijo-ju.o.], i lydžáva tut dro štylypen (pokojo).” Mójza phendiá Léske: “Kóli Tu na džása Kokoró aménca, tedy i na lýdža amen adathýr, paldavá so pir so te udžinas, so me i Tyré manušá lathiam láska dre Tyré jakhá? Ci na pir davá, kiéli Tu džása aménca? Tedy me i Tyré manušá javása te vydaspe slavutnedyr kažnoné javire manušéndyr pe phuv.” I phendiá Raj Devél Mojzáske: “I davá pal so tu rakirdian, Me keráva, pal-dová so tu lathian láska dre Miré jakhá, i Me džinóm tut pir lav.” Mójza phendiá: “Sykáv mánge Tyrí sláva (baripén).” I phendiá Raj Devél: “Me lydžáva angíl túte sarí Mirí sláva, i barjakirava angíl túte lav Iiegova (Jahvá), i konés te primanges, Me primangava, konés te potangines – Me potanginava.” I paló dová Jov phendiá: “Miro muj naštý túke te dykhés, pal-dová so manušéske naštý te dykhél Man i te jačélpe džidesa.” I phendiá Raj Devél: “Ĥáda, isyn Mánde štéto, terdjov pe daja skála; kiéli javéla te džal Mirí sláva, Me čhuváva tut dre skalakiri rospharadyiben, i učhakirava tut Miré vastésa, paka Me prodžava; i kiéli Me zlava Miro vast, tu dykhésa Man palalestyr, a Miro muj na javéla bicialó.” I phendiá Raj Devél Mojzáske: “Vyčingir daltasa (riezcosa) péske duj skrižáli (tablicy) baruné, dasavé-pac', savé sys angíl lénde, i Me čhináva pe dalé skrižáli lavá, savé sys angíl lénde, savé tu rozmardian; i ker saró ke ránko, i džá upré pe bérga Sinajo rankosa, i terdjov angíl Mánde odój pe bergákiro vučipén; ne nikonéske naštý te džal upré túsa, i nikón naštý te sykadjol pe sarí bérga; ni tyknó, i ni baré kherítka murdalá (baró skoto), naštý, sob (kaj) jone te čaravenpe pašýl daja bérga.” I vyčingirdia daltasa (riezcosa) Mójza duj baruné skrižáli, dasavé syr sys angledýr, i, uštyi pe ránko, gijá upré pe bérga Sinajo, syr phendiá léske Raj Devél; i lyjá dre péskire vastá duj baruné skrižáli. I gijá telé Devél dro óbloko, i terdijá odój pašýl léste, i vyphendia Léskiro lav Iiegova (Jahvá). I progijá Raj Devél angíl léskiro muj, i phendiá: “Raj Devél, Raj Devél (Jahvá), Devél, Savéske isyn dróga manušá i Savó tanginela, Savó ĥará (dlúges) vyrikiréla i but tange-ilytko i čačunó, Savó rakhéla láska vaš tysjoncy manušénge, Savó otmekéla bang i čoripén, i grého, Savó na jačkiréla bi otphenybnaskiro, Savó čhuvéla kára pal dadengiri bang dre čhavénde i čhavéngire čhavénde ke tríto i štárto ródo.” Mójza dová-pac' momiento pyjá pe phuv, i kerdiá šerésa (klonindiape) Ráske-Devléske, i phendiá: “Kóli te javél láska vaš mánge dre Tyré jakhá, Rajo Baró, tedy mek te džal Raj Baró maškír aménde; pal-dová so adalé manušá isyn pharé-šeritka. Otmek amaró čoripén i gréhi amaré, i ker amen Tyré prilyibnaskirenca (nasliednikenca) vaš Tyró meknó mištypén.” I Raj Devél phendiá: “Ĥáda, Me sčhuvava zavieto (dorakiribén): angíl saré tyré manušénde Me keráva dívy, savé na sys pir sarí phuv i ni savé manušénde; i dykhéna saré manušá, maškír savénde Tu san, Mirí Devléskiri butý; pal-dová so darano javéla dová, so Me keráva vaš túke; zrákh dová, so Me rakiráva túke akaná: “Ĥáda, Me vytradava tyré móstyr Amoriejen, Xananiejen, Xietiejen, Fierieziejen, Jeviejen, i Jevusiejen; dykh, na zadžá dre malypen (družba) odolé-phuvjákire manušénca, pe saví tu zadžasa, sob (kaj) jone te na kerenpe feliasa (sietkasa) maškír tuménde. Altári léngire roskeden, stýlby léngire phagiren, vyčingiren léngire svénta veladinia (roščy), pal-dová so túke naštý te mangespe javire devloreske, apríč Raste-Devléste; pal-dová so lav Léskiro-Rievnitieljo (Zevlynari); Jov isyn Devél Zevlynari. Na zadžá dre malypen odolé phuvjákire manušénca, sob (kaj), kiéli jone javéna te kerén bléndo palál péskire devlorende i te janén svénta dyibená péskire devlorénge, te na kharén i tut, i tu, sob (kaj) te na xas by léngire svénta dyibená (žertvy); na le léngire čhajendyr péskire čhavénge romnien, sob (kaj) léngire čhaja, savé keréna bléndo palál pal péskire devlorende, te na zalydžan i tyré čhavén dro bléndo palál pal péskire devlorende. Na ker péske vyčhudé devloré. Opriesnokengiro svénko rakh: eftá (bitrinéngiro deš) dyvesá xa priesno maró, syr Me phendjom túke, dro uphendló čhonéskiro časo Avivo, pal-dová so dro čhon Avivo tu vygijan Jegiptóstyr. Saré, kon roskerela ločoví (ložesny) Mánge, syr i saró tyró kherítko murdál (skoto) muršytkone rodóstyr, kon roskerela ločoví, guruvendyr i bakréndyr; anglatuné (pervoné) bijanypnytkonen oslendyr zaparuv bakresa, a kóli na zaparuvesa, tedy vykin les; sarén anglatunen (pervonen) tyré čhavéndyr vykin; mek te na javén angíl Miro muj čhučé vasténca. Šov dyvasa ker butý, a pe eftáto dyvés otkhinjov; otkinjov i dro časo, kiéli počhuvena dre phuv i ukedena. I svenkin svénko siedmica (eftuny), svénko, kiéli léna te ukeden pšenica (parnoj giv) i svénko skedyibén plodengiro pe beršeskiro kónco (jagóro); trin móly dre berš tumé san bangé te javén saré tyré muršá angíl Ráskire-Bareskiro muj, Ráskire-Devléskiro, Izrailjoskire Devléskiro, paldová, so Me tradava krig manušén tyré móstyr, i keráva barydyr tyré phuvjákiro štéto, i nikón na zakaméla tyrí phuv, kóli tu javésa te javes angíl Ráskire-Devléskiro, tyré Devléskiro muj, trin móly dro berš. Na čhuv rat Miré sventoné janybnastyr pe kvašeno, i svénto dyibén (žértva) vaš svénko Patradí naštý, sob (kaj) te rat'kirel ke ránko. Sama anglatuné tyré phuvjákire barjakirdé (plódy) jan dre Ráskire-Devléskiro, tyré Devléskiro Kher. Na keráv buznores (kozljonkos) dre léskire-dákiro thud. I phendiá Raj Devél Mojzáske: “Čhin péske dalé lavá, pal-dová so dalé lavénca Me keráva zavieto (dorakiribén) túsa i Izrailjosa.” I sys odój Mójza Raste-Devléste štardešá dyvesá i štardešá ratia, na xaja maró, i na pija paní; i čhindiá pe skrižáli dorakiribnaskire lavá, deše-lavengiro (deštuno). Kiéli Mójza džálas telé Sinajoskire bergátyr, i duj skrižáli dosykaibnása (otkrovienijasa) sys Mojzaste dre vast, i syr jov džálas telé bergátyr, to tedy Mójza na džindiá, to léskiro muj jaciá te ziainel lučenca (lunkenca) doléstyr, so Devél rakirdiá lésa. I dykhciá Aaróno i saré Izrailjoskire čhavé Mojzás, i ĥáda, léskiro muj ziainelas, i darándyne te poddžan ke jov. I khardiá len ke pe Mójza, i javné ke jov Aaróno i saré skedyibaskire barydyrá, i rakirdiá Mójza lénca. Paló (poslie) davá javné saré Izrailjoskire čhavé, i jov rosphendiá lénge saró, so rakirdiá léske Raj Devél pe bérga Sinajo. I kiéli Mójza pirijaciá te rakirél lénca, tedy jov čhudiá pe péskiro muj pohtan te učhakirel. Kiéli Mójza zadžála angíl Ráskire-Devléskiro muj, sob (kaj) te rakirél Lésa, tedy jov zlelas pohtan, paka jov vydžála; a vygii rosphenelas Izrailjoskire čhavénge saró, so phendló sys. I dykhné Izrailjoskire čhavé, so ziainelas Mojzáskiro muj, i Mójza nevés čhuvelas pohtan te učhakirel péskiro muj, angíl dová, syr jov zadžalas te rakirél Lésa. I skedyjá Mójza saró Izrailjoskire-čhavéngiro skedyibén, i phendiá lénge: “Ĥáda, so priphendiá Raj Devél te kerén: ‘Šov dyvesá kerén réndy (butiá), a eftáto dyvés tuménde trej, sob (kaj) te javél sventonesa, sávato (subóta) otkhinyben Ráske-Devléske: kažno (sváko), kon javéla te kerél dre láte réndo, otdynó javéla meribnáske; na xačkirén jag dre saré tumaré kherá pe savatoskiro dyvés.’” I phendiá Mójza saré Izrailjoskire-čhavéngire skedyibnaske: “Ĥáda, so priphendiá Raj Devél: Skedén péstyr janybén Ráske-Devléske: kažno péskire iléstyr, so jov saštý te janel Ráske-Devléske syr svénto janybén, suvnakái, rup, xarkóma (mied'), výlna golubovoné, purpurone i červljonone cviatosa (mastiniasa), i visono, i buzniakiri (kozakiri) výlna, cypi bakrane lolé, i cypi sinia (barsukitka), i sitimo veš, i jeliejo vaš momolýtko (svietíl'niko), i aromatytka čarjá vaš dová, sob (kaj) te xačkirel gudlé thuvesa (dymosa), bar onikso i bará, sob (kaj) te čhuvés andré vaš efódo i vaš napierstniko (žylietka). I kažno tuméndyr, kon isyn godó i lačhó ilésa, mek te javél i te kerél saró, so priphendiá Raj Devél: šátra i lákiro učhakiriben i lákiro upratuno učhakiriben, lákire nanglore i bruski, lákire balandiniá (šosty), lákire stýlby i lákire predkicy tel ĥerá, kovčego i léskire balandiniá, denko (kryška) i pologo (zaviesa) te zakerel drom, skamínd i léskire balandiniá i saré léskire pribory (sudinki), i svencona maré, i momolýtko vaš svéto léskire priborenca, i léskire lampady i jeljojo (dzet) vaš svéto, i altárjo vaš xačkiribén smolengiro i léskire balandiniá, i makhibnaskiro jeliejo, i aromatytka čarjá, i pologo ke skinijakiro zagiibén, altárjo vaš célo shačkiribén i vaš léske xarkuny (miedno) rišotka, i léskire balandiniá (šosty) i saré pribory léskire, moske čaró (umyval'niko) i léskiro predkico tel ĥerá, gredakire (dvoroskire) ubladýtka šyrmy (zaviesy), léskire stýlby i léngire predkicy tel ĥerá, i šýrma pašýl zagiibén pe gréda (dvóro), šatrakire kile, i gredakire kile i léngire šole, thanune uribená te dynarinén, pe svénto štéto, i svénta uribená Aaronóske rašáske i léskire čhavénge vaš svénto butý rašása.” I gijá krig saró skedyibén Izrailjoskire čhavéndyr Mojzastyr. I javénas saré, savén lydžijá ke dová iló, i saré, savén džingadia dúho, i lydžiné janybén Ráske-Devléske te kerén skedyibnáskiri šátra i vaš saró, so trej vaš láke i vaš svénta uribená; i javénas romá romniénca, i saré, konéskiro iló lydžijá len, i jandlé prikerdia (broški), čenia, angrustiá pe vast, kulony (miriklia), i kažno suvnakuné priedmiety, kažno (sváko), kon kamdiá te janel suvnakáj Ráske-Devléske; i kažno, konéste sys výlna ĥolubovone, purpurone i červljonone cviatosa (mastiniasa), visono i buzniakiri výlna, cypi bakrane lolé i cypi sine, odová manúš janelas len; i kažno, kon janelas syr svénto dyibén rup ci xarkóma (mied'), janelas davá dro dáro Ráske-Devléske; i kažno, konéste sys veš sitimo, janelas davá veš pe kažno trébima vaš šátra; i saré džuvliá, lačhé ilésa, khudé péskire vasténca i janénas priaža (thava te khuves) golubovoné, purpurone i červljonone cviatosa i visono; i saré džuvliá, savén tyrdyja iló, savé džindlé te khuven, khudé buzniengiri výlna (kozengiri); thagárja (kniázi) janénas bar onikso i bará te čhuvén vaš efódo i napierstniko (žylietka), adiáke-pac' aromatytka čarjá te thuvliakiren, i jeliejo (dzet) vaš momolýtko (svietíl'niko) i vaš dová, sob (kaj) te čhuvén makhibnaskiro jeliejo i vaš fimiámo (dróga smóly); i saré muršá i džuvliá Izrailjoskire čhavéndyr, savén tyrdyja iló te janén pe kažno réndo, savó Raj Devél pir Mojzaste priphendiá te kerén, janénas pir péskiro iló dáro Ráske-Devléske. I phendiá Mójza Izrailjoskire čhavénge: “Dykhén, Raj Devél vykedyjá ukrat (pir lav) Viesielieilos, Uriiskire čhavés, Oraskire čhavés, Judáskire rodycóstyr. I Jov pherdiakirdiá les Devléskire duhósa, godiása, ĥalyibnasa, lydžiibnasa te džinél i odarimasa (iskustvosa) ke kažno butý, te čhuvél parkali uzorenca (thana), te kerél vastytka butiá suvnakástyr, rupéstyr i xarkomátyr (miediatyr), i te vyčhinel daltasa bará te čhuvél len dre opravica, i te čhinel veš, i te kerél kažno sany butý; i, sob (kaj) léste te javél iló te sykliakirél javirén, čhudiá dro léskiro iló, i dro iló Agoliavoskiro, Ahisamahovóskire čhavéskiro, Danóskire rodycóstyr. Jov, Raj Devél, pherdiakirdiá léngiro iló godiása, sob (kaj) te kerél kažno butý, saví keréla vyčhinybnari (riezčyko) i saví keréla odarimo khuvibnari (tkačo) i vysuibnari (vyšyval'ščyko) pir golubovo, purpurno, červljono i visonytko parkaljo (than), i khuvibnari, savó keréla kažno butý i čhuvéla sane-butiakire parkali (thana). I lyjá te kerél butý Viesielieilo i Agoliavo i saré godé ilésa, savénge Raj Devél dyjá godý i ĥalyibén, sob (kaj) te džinén te kerén kažno butý, saví trej vaš svénto štéto, syr priphendiá Raj Devél. I khardiá Mójza Viesielieilos i Agoliavos i sarén godé ilésa, savénge Raj Devél dyjá godý, i saré, konéskiro iló tyrdyja te javén pašyledýr ke butý i te kerén butý. I lyné jone Mojzastyr saró janybén, savé jandlé Izrailjoskire čhavé, pe trébima vaš svénto štéto, sob (kaj) te kerén butý. Ne usajékh na pirijačne te lydžán ke jov pir péskiro iló janybén kažno zlóko (ránko). Tedy javné saré godé ilésa (spiecy), savé kerdé rázna butiá pe svénto štéto, kažno péskire butiátyr, savjása, kon zalyjape, i phendlé Mojzáske: “Manušá janéna butýr, syr trej vaš butý, saví priphendiá te kerél Raj Devél.” I priphendiá Mójza, i sys dynó te džinén sarénge dro stáno, sob (kaj) ni murš, ni džuvlý te na kerén butýr ničý vaš janybén pe svénto štéto; i pirijačne manušá te lydžán. A skedynó matierialo (zapaso), savó uhtylelas (sys dósi) pe kažna butiá, savé treindiá te kerél, i až jaciápe. I kerdé saré godé ilésa, savé zalenaspe skinijakire butiasa pe šátra: deš cergi (deki) krenconone visonóstyr i golubovoné, purpurone i červljonone vylnátyr; i xieruvimy kerdé jone pe lénde vysude butiasa; dlengipén kažnoné cergakiro sys biš te eftá kuniá (logci), i buĥlypén kažnoné cergakiro sys štar kuniá: saré cergenge jekh baripén (razmiero). I khetaniakirdia jov (Viesielieilo) pandž cergi jekh javirjasa, i javír pandž cergi khetaniakirdia jekh javirjasa. I kerdiá jov feliá (pietli) golubovoné cviatosa pe jagóro (krajo) jekhe cergakiro, kaj jov khetaniakirelape javirjasa; adiáke-pac' kerdiá jov i pe jagóro (krajo) palatuné (posliednjone) cergakiro, vaš lákiro khetaniakiriben javirjasa; pandždešá feliá (pietli) jov kerdiá dre jekh cérga, i pandždešá feliá (pietli) kerdiá pe jagóro javire cergakiro, kaj joj khetaniakirelape javirjasa; dalé feliá (pietli) poddžanas jekh javirjasa; i kerdiá jov pandždešá nanglore (kriučki) suvnakuné, i dalé nanglorenca jov khetaniakirdia jekh cérga javirjasa, i jaciá šátra jekh célo. Korigedýr (pozžie) jov kerdiá cérga buzniakire (kozakire) vylnátyr te učhakiren šátra: dešujekh cergi dasavé kerdiá; dlengipnása cérga sys trijánda kuniá, i buĥlypnasa cérga sys štar kuniá: dešujekhe cergenge sys jekh baripén. I khetaniakirdia jov pandž cergi iščo (inké) mólo i šov cergi iščo (inké) mólo pir jekh (otdiel'nes). I kerdiá jov pandždešá feliá (pietli) pe jagóro (pe krajo) krajnjone cergakiro, kaj jov khetaniakirelape javirjasa, i pandždešá feliá (pietli) kerdiá pe cergakiro jagóro, savó khetaniakirelape javirjasa; i kerdiá jov pandždešá xarkuné nanglore (miedítka kriučki) te učhakiren khetaniakiriben, sob (kaj) te sčhuvelpe jekh célo. I kerdiá vaš šátra pologo lolé bakrane cypendyr i upralestyr učhakiriben sinjone (barsukitkone) cypendyr. I kerdiá jov bruski vaš šátra vešéstyr sitimo, savé sys terdé mamúj (priames). Deš kuniá sys brusoskiro dlengipén, i jekh pašésa sys kun' dro buglypen kažnoné brusoskiro; dro kažno bruso sys pir duj šypy, jekh proti javiréste: adiáke jov kerdiá saré šatrakire bruski. I kerdiá vaš skínija dasavé biš bruski vaš paš-dyvesýtko rig (južno), i štardešá rupuvé predkicy tel ĥerá kerdiá tel biš bruski: duj predki (padnožyi) tel ĥerá tel jekh brusko vaš léskire duj šypy, i duj predki tel ĥerá tel javír brusko vaš léskire duj šypy; i vaš javír šatrakiri rig, ke paš-rat (sieviero), kerdiá biš brusy, i štardešá rupuvé predkicy tel ĥerá: duj predki tel ĥerá tel jekh bruso, i duj tel ĥerá predki tel javír bruso; a vaš palatuny šatrakiri rig ke zapado, kerdiá jov šov brusy, i duj brusy jov kerdiá vaš venglo dre šátra pe palatuny rig; i sys jone khetaniakirde telál i khetaniakirde upré ke jekh bari angrusty: adiáke jov kerdiá lénca dujenca pe duj véngly; i sys ohtó brusy, i rupuvé predki tel ĥerá dešušov pir duj predki tel ĥerá tel kažno bruso. I kerdiá balandiniá (šosty) vešéstyr sitimo (akacyja), pandž vaš brusy jekhe-šatrakire rigátyr, i pandž balandiniá vaš brusy javire-šatrakire rigátyr, i pandž balandiniá vaš brusy palatuné-šatrakire rigátyr; i kerdiá andratuný balandin, saví prodžalas by pir maškirál baré-angrustiakiro jekhe jagoróstyr ke javír; bruski občhudiá suvnakása, i baré angrustiá, dre savé čhuvenape pale balandiniá, kerdiá suvnakástyr, i balandiniá občhudiá suvnakása. I kerdiá šýrma golubovoné, purpurone i červljonone vylnátyr i krencone visonóstyr, i vysude sane butiasa kerdiá jov pe láte xieruvimy; i kerdiá vaš láke štar stýlby sitimostyr i občhudiá len suvnakása, suvnakuné nanglorenca (kriučkenca), i vyčhudiá jov vaš lénge štar rupuvé predki tel ĥerá. I kerdiá jov šýrma ke šatrakiro zagiibén ĥolubovone, purpurone i červljonone vylnátyr i krenconone visonóstyr, vysude sane butiátyr, i pandž stýlby vaš láke nanglorenca (kriučkenca); i občhudiá léngiro vučipén i léngiro sphandypen suvnakása, i vyčhudiá pandž xarkuné (miedítka) predki tel ĥerá. I kerdiá Viesielieilo kovčego (mohtó) sitimoskire vešéstyr; léskiro dlengipén sys duj kuniá pašésa, buĥlypén léskiro sys jekh pašésa kun' i léskiro vučipén sys jekh pašésa kun'; i občhudiá les andré i javriestyr žužé suvnakása, i kerdiá trusciál (krugom) léste suvnakuný viánka (frizo); i vyčhudiá jov vaš láke štar suvnakuné baré angrustiá, pe štar léskire telatuné véngly: duj brenčy pe jekh léskiri rig, i duj brenčy pe léskiri javír rig. I kerdiá balandiniá (šosty) sitimoskire vešéstyr, i občhudiá len suvnakása; i čhudiá balandiniá dre baré angrustiá, pir kovčegoskire rigá, sob (kaj) te lydžán kovčego. I kerdiá denko (kryška) žužé suvnakástyr: léskiro dlengipén sys duj kuniá pašésa, a buĥlypén sys jekh pašésa kun'. I kerdiá duj xieruvimy suvnakástyr: čekannone butiasa kerdiá len pe duj zaučhakiribnaskire jagóry, iekh xieruvimo jekhe jagoróstyr, a javír xieruvimo javire jagoróstyr: jov kerdiá xieruvimy dalé duje jagorendyr adiáke, so jone zadžanas pal jagóry pe denko. I sys xieruvimy, savé ĥazdyné upré phakenca, i učhakirenas péskire phakenca (krylenca) denko, a péskire mujenca sys riskirdé jekh ke jekh; ke denko sys xieruvimengire muiá. I kerdiá Viesieliilo sitimoskire vešéstyr skamínd dlengipnása dre duj kuniá, buĥlypnasa sys dre kun' i vučipnása dre jekh pašésa kun', i občhudiá les žužé suvnakása, i kerdiá trusciál (krugom) pašýl léste suvnakuný viánka (frizo); i kerdiá trusciál léste vánty (sciany) dre burnyk (ladoška) i kerdiá suvnakuný viánka pašýl léskire vánty; i vyčhudiá vaš léske štar suvnakuné baré angrustiá, i čhudiá brenčy pe štar véngly, paš štar léskire ĥerorja; pe jagóry pašýl ke vánty sys baré angrustiá, sob (kaj) te učhuven andré balandiniá te lydžán skamínd; I kerdiá jov balandiniá (šosty) vešéstyr sitim, i jov občhudiá len suvnakása te lydžán skamínd, tén'či jov kerdiá khoré (sasúdy), savó trej ke skamínd: čaré (bliudy), kadila, kučika (kružki) i tahtaja (čašy), sob (kaj) te čhuvén lénca, žužé suvnakástyr. I kerdiá žužé suvnakástyr momolýtko (svietíl'niko), čekanno kerdiá momolýtko; léskiri ĥerój (stiebljo), léskire randiá (vétki), léskire tahtajore (čašečki), phabá léskire i luludiá (cvety) léskire vydžánas léstyr; šov randiá vydžánas léskire rigéndyr: trin momolytkoneskire randiá jekhe léskire rigátyr, i trin randiá momolytkoneskire javire léskire rigátyr; trin tahtajore, savé zdenaspe (podžanas) pe mindal'no luludjori (cviatko), phabaj i luludiá pe jekh rand', i trin tahtajore, savé zdenaspe pe mindal'no luludjori (cviatko), phabaj i luludiá pe javír rand': adiáke pe saré šov randiá, savé vydžánas momolytkonestyr; a pe momolytkoneskiri ĥerój (stiebljo) sys štar tahtajore, savé zdenas (podžanas) pe mindal'no luludjori phabenca i luludienca; tel šov randiá, savé vydžánas léstyr, sys phabaj tel anglatuné duj randiá, i phabaj tel javír duj randiá, i sys phabaj tel trita duj randiá; léngire phabá i léngire randiá vydžánas léstyr; saró jov sys čekanno, célo, žužé suvnakástyr. I kerdiá ke jov eftá lampady, i ščypcy (cymty) ke jov i lotki ke jov, žužé suvnakástyr; talantostyr žužé suvnakástyr jov kerdiá les saré léskire priborenca. I kerdiá jov altárjo te xačkirén fimiámo (gudlé smóly) sitimoskire vešéstyr: dlengipén léskiro sys kun' i buĥlypén léskiro sys kun', štaré-venglytko, vučipén léskiro duj kuniá; léstyr vyginé léskire šyngá (rógi); i občhudiá les žužé suvnakása, léskiro vučipén i léskire rigá trusciál (krugom) pašýl, i léskire šyngá, i kerdiá ke jov suvnakuný viánka (frizo) trusciál; tel léskiri viánka pe duj léskire véngly kerdiá jov duj suvnakuné baré angrustiá; duje léskire rigéndyr kerdiá len, sob (kaj) te čhuvén dre lénde balandiniá (šosty) te lydžán les; balandiniá kerdiá jov sitimoskire vešéstyr, i občhudiá len suvnakása. I kerdiá miro vaš svénto makhiben i aromatytka čarjá te xačkirén, žužé, spiecoskire butiátyr te čhuvén lačhé-khandune (parfuny). I kerdiá jov altárjo vaš célo shačkiribén sitimoskire vešéstyr dlengipnása dre pandž kuniá i buĥlypnasa dre pandž kuniá (lokti), štaré-venglytko, vučipnása dre trin kuniá; i kerdiá jov šyngá (rógi) pe štar léskire véngly adiáke, so léstyr vydžána šyngá (rógi), i občhudiá les xarkomasa (miediasa). I kerdiá jov saré altarjoskire pribory ke altárjo: pirja, lopatki, tahtaja, bustiá (videlki) i ugol'nicy; saré léskire pribory kerdiá jov xarkomátyr (miediatyr). I kerdiá jov vaš altárjo riešotka, ródo sietkakiro xarkomátyr (miediatyr), pir léskiri jagóro (krajo) telál ke léskiri paš; i kerdiá štar baré angrustiá pe štar véngly xarkuny (miedno) riešotka te čhuvén balandiniá. I kerdiá balandiniá sitimoskire vešéstyr, i občhudiá len xarkomasa (miediasa), i čhudiá andré balandiniá dre baré angrustiá pe rigá altarjoskire, sob (kaj) te lydžán len lénca; čhučó (pusto) andrál phaliendyr jov kerdiá les. I kerdiá Viesieliilo moske čaró (umyval'niko) xarkomátyr (miediatyr) i léskiro predko tel ĥerá xarkomátyr (miediatyr) gožone patrinienca (risunkenca), savé lyné džuvliendyr, kon gožakirela zagiibén dre skedyibnáskiri šátra. I kerdiá jov gréda (dvóro) pašýl-dyvesytkoné (južnone) rigátyr, ke paš-dyvés, ubladýtka šyrmy (zaviesy) krenconone visonóstyr, dlengipnása dre šel kuniá; stýlby vaš lénge sys biš i predki tel ĥerá ke jone sys biš xarkomátyr (miedítka); nanglore (kriučki) pe stýlby i léngire sphandypena sys rupéstyr. I pir paš-ratítko sys ubladýtka šyrmy dre šel kuniá; stýlby vaš lénge sys biš i osnovy ke jone sys biš xarkuné (miedítka); nanglore pe stýlby i léngire sphandypena sys rupéstyr. I pir západno (bel'velitko) rig ubladýtka šyrmy sys dre pandždešá kuniá, stýlby vaš lénge sys deš, i predki tel ĥerá sys deš, naglore pe stýlby i léngire sphandypena sys rupéstyr. I anglatuné rigátyr ke vastóko-ubladýtka šyrmy dre pandždešá kuniá. Pe jekh rig pe gredakiri pórta-ubladýtka šyrmy dre dešupandž kuniá; stýlby vaš lénge trin, i osnovy ke jone sys trin; i vaš javír rig, pir duj rigá pe gredakiri pórta-ubladýtka šyrmy dre dešupandž kuniá i stýlby vaš lénge trin, i predki tel ĥerá ke jone sys trin. Saré ubladýtka šyrmy pe saré gredakire rigá sys krencone visonóstyr, a osnovy tel stýlby sys xarkomátyr (miediatyr), nanglore (kriučki) pe stýlby i léngire sphandypena sys rupéstyr; vučipén léngiro sys občhudo rupésa, i saré stýlby dre gréda khetaniakirdepe rupuvé sphandyipnasa. Šýrma vaš pórta dre gréda (dvóro) sys uzorengire butiátyr, golubovoné, purpurone i červljonone vylnátyr i krencone visonóstyr, dlengipnása dre biš kuniá, vučipnása dre pandž kuniá, pir saró dlengipén, dasavé-pac' syr gredakiri šýrma; i vaš lénge sys štar stýlby, i osnovy tel stýlby sys štar xarkuné (miedítka); nanglore lénde sys rupuvé, a vučipén léngiro sys občhudo rupésa, i léngiro sphandypen sys rupuvó. Saré kile pašýl šátra (skínija) i gréda (dvóro) sys xarkuné (miedítka). Ĥáda, isyn matierialoskiro ginybén doléske, so gijá vaš šátra dosykaibnása (skínija otkrovienijasa), kerdó pir Mojzáskiro priphenybén, i Lievíty podyne vast tel dykhibén Ifamaroskiro, Aaronóskire-čhavéskiro, rašaskiro. A kerdiá saró o Viesielieilo, so priphendiá Raj Devél Mojzáske. Viesieliilo sys Urijaskiro čhavó, Oraskire-čhavéskiro, Judáskire rodycóstyr, i lésa kerdiá butý Agoliavo, Ahisamahoskiro čhavó, Danóskire rodycóstyr, spieco-vyčhinybnari i vučé-klasoskiro khuvibnari i vysuibnari pir golubovo, purpurno, červljono i visonytko parkaljo (than). Saró suvnakái, savó gijá pe réndo (diélo) pe sarí butý pe svénto štéto, suvnakái, savó jandlé dro dáro, sys biš te jeniá talánty i eftašelá trijánda šékieli, pir pharipén dro šékieljo vaš svénto štéto; I rup, savó gindlé skedyibnaskire manušéndyr dro skedyibén, sys šel talánty i tysjonco (bar) eftašelá eftadešá pandž šékieljo, pir pharipén dro šékieljo vaš svénto štéto. Pir paš šékieljo manušéstyr pir pharipén pir šékieljo vaš svénto štéto šove šelendyr triné tysjoncendyr, pandžé šelendyr pandždeše manušéndyr, kažnonestyr, savé zaginé dre ginybén, bišé beršéndyr i butýr. Šel talánty rup gijá pe vyčhuiben vaš osnovy tel stýlby pe svénto štéto i predki tel ĥerá pašýl šyrmy; šel osnovy šele talantendyr, pir talanto pe jekh osnova; a tysjoncostyr (barestyr) eftá šelendyr eftadešendyr pandžendyr šekieliendyr kerdiá jov nanglore pe stýlby i učhakirdiá léngiro vučipén, i kerdiá vaš lénge sphandypen. Harkóma (mied'), saví jandlé dre dáro, sys eftadešá talánty i duj tysjoncy štaršelá šékieli; látyr kerdiá jov tel osnovy vaš stýlby pašýl zagiibén dre šátra dosykaibnaskiri, i xarkuno (miedno) altárjo, riešotka miedno vaš léske, i saré khoré vaš altárjo, i osnovy vaš stýlby pe gréda (dvóro), osnovy vaš vudarengire stýlby trusciál (krugom) gréda, i saré šatrakire kile i saré kile pašýl gréda (dvóro). Golubovoné, purpurone i červljonone vylnátyr kerdé jone uribená te dynarinén (te kerén Devléskiri butý) pe svénto štéto; adiáke-pac' kerdé jone svénta uribená Aaronóske, syr priphendiá Raj Devél Mojzáske. I kerdé efódo suvnakástyr, golubovoné, purpurone i červljonone vylnátyr i krencone visonóstyr; i rozmarde jone suvnakáj pe listy i rosčhindle pe thava, sob (kaj) len te čhuvés maškirál golubova, purpurna, červljona i visonytka thava, vučé-klasoskire butiátyr. I kerdé léske sphandypnytka (naramniki); pe duj léskire jagóry jov sys sphandlo. I efodoskiri kustýk, saví sys uprál léste, jekhe lésa butiasa, kerdó sys suvnakástyr, ĥolubovone, purpurone i červljonone vylnátyr i krencone visonóstyr, syr priphendiá Raj Devél Mojzáske. I obkerde jone oniksostyr bará, čhuvi len dre suvnakuné opravicy i vyčhindlé pe lénde Izrailjoskire-čhavéngire lavá, syr vyčhinena pe čergenorí (štampo); i čhudiá jov (Viesielieilo) len pe efodoskiro naramniko, vaš Izrailjoskire-čhavéngiro ripiribén, syr phendiá Raj Devél Mojzáske. I kerdiá jov napierstniko (žylietka) vučé-klasoskire butiátyr, dasavé khudé butiasa, syr efódo, suvnakástyr, ĥolubovone, purpurone i červljonone vylnátyr i krencone visonóstyr; jov sys štaré-venglytko; duje rigéndyr kerdé jone napierstniko (žylietka) dre burnyk (piadien') dlengipnása i dre burnyk (piadien') buĥlypnasa, duje rigéndyr jov sys; i čhudé andré dre léste dre štar riady bará. Riadosa: rubino, topazo, izumrudo (mirikle), – davá jekh riado; dro javír riado: karbunkulo, sapfiro i almazo (dyamanto); dro tríto riado: jahonto, agato i amietisto; dro štárto riado: xrizolijo, onikso i jaspiso; i čhudé jone len dre suvnakuné opravicy. Bará sys adákicy, ci but sys Izrailjoskire-čhavéngire lavá: dešudúj sys len, adákicy ci but léngire lavá, i pe kažno léndyr sys vyčhindlo, syr čergenorí, pir jekh lav, vaš dešudúj ródy. Ke napierstniko kerdé jone gremba zandirorja (cepočki) krenconone butiátyr žužé suvnakástyr; i kerdé duj suvnakuné opravicy i duj suvnakuné baré angrustiá, i prikerde baré angrustiá ke duj napierstnikoskire jagóry (koncy); i uridé duj khudé suvnakástyr zandirorja (cepočki) dre duj baré angrustiá pir napierstnikoskire jagóry (kraí), A duj jagóry (koncy) pe duj zandirorja prikerde ke duj opravicy, i prikerde len ke efodoskire naramniki pe anglatuny rig léskiri; iščo (inké) kerdé jone duj suvnakuné baré angrustiá, i prikerde ke duj javír napierstnikoskire jagóry, pe doiá rig, saví sys andré ke efódo; i iščo (inké) kerdé duj suvnakuné baré angrustiá, i prikerde len ke duj naramniki efodoskire telál, anglatuné léskire rigátyr, pašýl léskiro khetaniakiriben pe efodoskiri kustýk; i prikerde jone napierstniko (žylietka) léskire baré angrustienca ke efodoskire baré angrustiá šeloresa golubovoné vylnátyr, sob (kaj) jov te javél pe efodoskiri kustýk, i, sob (kaj) te na otiačel napierstniko efodostyr, syr priphendiá Raj Devél Mojzáske. I kerdiá jov upratuny riza ke efódo, khudý, sarí golubovoné vylnátyr, i maškír upratuny riza kerdiá jov otčhakiriben, syr otčhakiriben dre pancyrjo, i pašýl léste obsuiben, sob (kaj) te na kušelpe; pir podia upratune rizakiri kerdé jone phabá golubovoné, purpurone i červljonone vylnátyr; i kerdé žužé suvnakástyr kudunorja (zvonki) i ublade kudunorja maškír phabá pir podia upratuny rizakiri trusciál (krugom); kudunori (zvonko) i phabaj, kudunori i phabaj pir podia trusciál pašýl upratuno rizakiro jagóro, te dynarinél, syr phendiá Raj Devél Mojzáske. I kerdé jone vaš Aaronóske i vaš léskire čhavénge xitony khudé visonóstyr, i kidaro visonóstyr, i phandlunia (poviazki) pe šeró, visonóstyr i telatuné rizy (xolova) ljonostyr (ĥandladestyr) krencone visonóstyr, i kustýk krencone visonóstyr i golubovoné, purpurone i červljonone vylnátyr, vysude butiátyr pir uzoro, syr priphendiá Raj Devél Mojzáske. I kerdé polirovano phaljori, svénto diadema, žužé suvnakástyr, i vyčertindle pe láte čhinybnasa, syr vyčhinena pe čergenorí (štampo): “Sventyma Devléskiri” i prikerde jone ke joj šeloro (šnuro) golubovoné vylnátyr, sob (kaj) te priphanden la ke kidaro upré, syr priphendiá Raj Devél Mojzáske. Adiáke kerdy sys sarí butý vaš skedyibnáskiri šátra; i kerdé Izrailjoskire čhavé saró, syr priphendiá Raj Devél Mojzáske, adiáke i kerdé pir lav. I jandlé ke Mójza šátra, pologo, i saré lákire pribory, lákire nanglore, lákire bruski, lákire balandiniá (šosty), lákire stýlby i lákire telĥera predki, i šýrma te učhakiren bakrane lolé cypendyr, i šýrma sine cypendyr i pologo, savó učhakiréla, kovčego dosykaibnása (otkrovienijasa) i léskire balandiniá, i denko (kryška), skamínd saré léskire priborenca i sventoné marésa, momolýtko žužé suvnakástyr, lampady čhudé pe léste i saré léskire pribory, i jeliejo vaš dud (svéto), suvnakunó altárjo i makhibnytko jeliejo, i fimiámo (gudlé smóly te xačkirén), i ubladytko šýrma ke zagiibén dre šátra, harkuno (miedno) altárjo i xarkuny riešotka ke jov, léskire balandiniá i saré léskire pribory, moske čaró i léskire tel’ gera predki, šyrmy gredakire (dvoroskire), stýlby i telĥera predki, ubladytko šýrma ke vudár gredakiro, šele i kile i saré pribory, savé trej, sob (kaj) te dynarinén dre skedyibnáskiri šátra, uribená rašángire te dynarinén pe svénto štéto, svénta uribená Aaronóske rašáske, i uribená léskire čhavénge vaš svénto butý. Syr priphendiá Raj Devél Mojzáske, adiáke i kerdé Izrailjoskire čhavé saré dalé butiá. I dykhciá Mójza sarí butý, i ĥáda, jone kerdé la, syr priphendiá Raj Devél, adiáke i kerdé. I bahtiakirdiá len Mójza. I phendiá Raj Devél Mojzáske: “Dre anglatunó (pérvo) čhon, pe anglatunó dyvés čhonéskiro, čhuv upré skedyibnáskiri šátra, i čhuv dre láte kovčego (mohtó) dosykaibnása (otkrovienijasa), i učhakir kovčego šyrmasa; i zalydža skamínd, i rosčhuv pe léste saré léskire pribory, i jan momolýtko (svietíl'niko), i čhuv pe léste léskire lampady; i čhuv suvnakunó altárjo te xačkirén dróga smóly (fimiámo) angíl kovčego dosykaibnása (otkrovienijasa), i čhuv šýrma pašýl zagiibén dre šátra; i čhuv altárjo vaš célo shačkiribén angíl zagiibén dre skedyibnáskiri šátra; i čhuv moske čaró (umyval'niko) maškirál skedyibnáskiri šátra i maškirál altárjo i čhuv dre léste paní; i čhuv gréda (dvóro) trusciál i ublav šýrma pe gredakiri pórta. I le makhibnytko jeliejo (dzet), i pomakh šátra i saró, so isyn dre láte, i obsvencyn la i saré lákire pribory, i joj iavéla svénto; pomakh altárjo vaš célo shačkiribén i saré léskire pribory, i svenciakir altárjo, i javéla altárjo drieván svénto; i pomakh moske čaró (umyval'niko) i léskire tel ĥerá predki, i svenciakir les. I jan Aaronós i léskire čhavén ke zagiibén dre skedyibnáskiri šátra i obmor len paniésa, i čhuv pe Aaronoste svénta uribená, i pomakh les i vysvencyn les, sob (kaj) jov te javél Mánge rašása. I léskire čhavén jan, i uri len dre xitony, i pomakh len, syr pomakhcian tu léngire dadés, sob (kaj) jone te javén Mánge rašanca, i léngiro pomakhiben te vysvencynel len pe viéki dre léngire ródy.” I kerdiá Mójza saró, syr priphendiá léske Raj Devél, adiáke i kerdiá. Dre anglatunó (pérvo) javire – beršeskiro čhon, pe anglatuné-čhonéskiro dyvés sys čhudý upré šátra. I čhudiá Mójza šátra, čhudiá lákire tel ĥerakire predki vaš fundámiento, čhudiá lákire bruski, čhudiá balandiniá i čhudiá lákire stýlby, rostyrdyja jov učhakiriben pe šátra, i čhudiá pologo uprál davá učhakiriben, syr phendiá Raj Devél Mojzáske. I lyjá i čhudiá dosykaiben (otkrovienija) dre kovčego, i učhudia balandiniá dre baré angrustiá kovčegoskire, i čhudiá denko (kryška) pe kovčego uprál. I zalydžijá kovčego dre šátra, i ubladia šýrma, i učhakirdiá kovčego dosykaibnása (otkrovienijasa), syr phendiá Raj Devél Mojzáske. I čhudiá skamínd dre skedyibnáskiri šátra, pe paš-ratítko (sievierno) šatrakiri rig, pal pologo, i rosčhudiá pe léste maré riadosa angíl Raste-Devléste, syr priphendiá Raj Devél Mojzáske. I čhudiá momolýtko dre skedyibnáskiri šátra proti skamínd, pe paš-dyvesýtko (južno) rig dre šátra, i čhudiá lampady angíl Raste-Devléste, syr phendiá Raj Devél Mojzáske. I čhudiá suvnakunó altárjo dre skedyibnáskiri šátra angíl pologo. I zahačkirdia pe léste dróga smóly, syr phendiá Raj Devél Mojzáske. I ubladia šýrma angíl zagiibén dre šátra; I altárjo vaš célo shačkiribén čhudiá jov angíl zagiibén dre skedyibnáskiri šátra, i jandiá pe láte célo shačkiribén i marunó janybén, syr phendiá Raj Devél Mojzáske. I čhudiá moske čaró (umyval'niko) maškír skedyibnáskiri šátra i altárjo, i čhudiá dre léste paní vaš obmoriben, i morenas léstyr Mójza i Aaróno i léskire čhavé péskire vastá i péskire ĥerá: kiéli jone zadžanas dre skedyibnáskiri šátra i poddžanas ke altárjo, to jone obmorenaspe, syr phendiá Raj Devél Mojzáske. I čhudiá gréda (dvóro) pašýl skínija i altárjo, i ubladia šýrma pe pórta gredakiri. I adiáke kerdiá Mójza réndo. I učhakirdiá óbloko skedyibnáskiri šátra, i baripén Ráskiro-Devléskiro pherdiakirdiá šátra; i naštý sys Mojzáske te zadžál dre skedyibnáskiri šátra, pal-dová so občhudiá la óbloko, i baripén Ráskire-Devléskiro pherdiakirdiá šátra. Kiéli ĥazdelaspe óbloko šatratyr, tedy džánas dromésa Izrailjoskire čhavé dre saré péskire dromá; kóli na ĥazdélape óbloko, to i jone na džánas dromésa, paka jov ĥazdélape, pal-dová so Ráskire-Devléskiro óbloko sys terdó uprál šátra dyvesé, i jag sys ratý dre láte angíl jakhá saré Izrailjoskire kheréskiro, dre saré léngire dromá. I khardiá Raj Devél Mojzás, i phendiá léske skedyibnaskire šatratyr, phení: “Phen Izrailjoskire čhavénge i phen lénge: kiéli vari-kon tuméndyr kaméla te janel svénto dyibén (žértva) Ráske-Devléske, tedy, kóli kheritkoné murdaléndyr (skotóstyr), to sob (kaj) te janén tumé tumaró svénto dyibén ĥurtostyr ci stadatyr: kóli léskiro svénto dyibén isyn célo shačkiribnaskiro dyibén baré kheritkoné murdaléndyr, mek te janel les murškané rodóstyr, te javél jov bidošéngiro; mek te janel les ke vudará skedyibnáskiri šátra, sob (kaj) léske te lathel láska angíl Raste-Devléste; i čhuvéla péskiro vast pe šeró vaš célo shačkiribnaskiro svénto dyibén, i lathéla jov láska, te žužakirel jov pes grehéndyr; i začhinela guruvóres (tiel'cos) angíl Raste-Devléste. Aaronóskire čhavé, rašaja, mek te janén rat, i mek te bryzginen ratésa saré rigéndyr pe altárjo, savó isyn pašýl zagiibén dre skedyibnáskiri šátra; i zlela cýpa celoné-xačkiribnaskire sventoné dyibnástyr, i rosčingirela les pe pašá; Aaronóskire čhavé, rašaja, čhuvéna pe altárjo jag, i pe jag rosčhuvena kaštá; i rosčhuvena Aaronóskire čhavé, rašaja, pašá, šeró i túko (čekén) pe kaštá, savé isyn pe jag pe altárjo; a sventoné dyibnaskire pašá andrypnastyr (bukore) i lákire ĥerá vymorela jov paniésa, i shačkiréla rašáj saró pe altárjo: davá isyn célo shačkiribén, svénto dyibén, gudló thuv Ráske-Devléske. Kóli léskiro celoné-xačkiribnaskiro svénto dyibén tykné kheritkoné murdalestyr, bakréndyr ci buzniendyr, mek te janel jov murškané rodóstyr, te javél jov bidošéngiro, i začhinela les angíl Raste-Devléste pe paš-ratítko (sievierno) altarjoskiri rig, i Aaronóskire čhavé, rašaja, mek te bryzginen dalé ratésa pe altárjo saré rigéndyr; i rosčingirena les pe pašá, otdena davá šeró i davá túko (čekén), i rosčhuvela len rašáj pe kaštá, savé isyn pe jag, pe altárjo, a pašá andrypnastyr (bukore) i ĥerá vymorela paniésa, i saró janéla rašái, i pe altárjo shačkiréla, davá isyn célo shačkiribén, svénto dyibén (žértva), gudló thuv, Ráske-Devléske. Kóli jov janéla Ráske-Devléske čirikliendyr célo shačkiribén, mek te janel péskiro svénto dyibén gorlicendyr ci terné golumbendyr; rašáj les janéla ke altárjo, i phagiréla léske šeró, i shačkiréla pe altárjo, a rat vytasavela ke altarjoskiri vánta; léskiro valjo lákire porenca otlela i čhurdéla la pašýl altárjo pe vastokoskiri rig, kaj isyn pieplo (práska); i phagiréla la (čirikliá) dre lákire phaká (kryly), na otlyi len, i shačkiréla la rašáj pe altárjo, pe kaštá, savé isyn pe jag: davá isyn célo shačkiribén, svénto dyibén, gudló thuv, Ráske-Devléske. Kóli vari-konéste pe iló te janel Ráske-Devléske marunó svénto dyibén, mek te janel jaržó parné givestyr, i čhuvéla pe léste jeliejo (olivítko dzet), i čhuvéla pe léste livano, i janéla les ke Aaronóskire čhavé, ke rašaja, i léla pherdý burnyk (žmienia) jaržó jeliejosa i saré livanosa, i shačkiréla rašáj davá syr ripiribén pe altárjo; davá isyn svénto dyibén, gudló thuv, Ráske-Devléske; a so jačéla marune janybnastyr, dová javéla Aaronóske i léskire čhavénge: davá isyn naj baredýr sventyma Ráskire-Devléskire sventoné dyibnástyr (žertvendyr). Kóli janesa svénto dyibén syr marunó janybén, savó isyn pekno dro bov, tedy jan pšienična maré priesna, pirimiešyndle jeliejosa, ci priesna mariklia, pomakhne jeliejosa. Kóli tyró svénto dyibén isyn marunó janybén skoroviedatyr (xičatyr), to tedy davá trej te javél pšenično jaržó, pirimiešyndlo jeliejosa, priesno; rosphagir les pe koterá (kuski), i čhuv pe léste jeliejo: davá isyn marunó janybén. Kóli tyró svénto dyibén isyn marunó janybén pirjatyr, to tedy trej te kerél les pšeničnone jaržestyr jeliejosa (olivitkone dzetesa), i jan marunó janybén, savó sčhudo daléstyr, Ráske-Devléske; otdé les rašáske, a jov les janéla ke altárjo; i léla rašáj dalé sventoné dyibnástyr paš syr ripiribén, i shačkiréla pe altárjo: davá isyn svénto dyibén, gudló thuv, Ráske-Devléske; a so jačélape marune janybnastyr, to mek te javél Aaronóske i léskire čhavénge: daja isyn bari sventyma sventoné dyibnástyr (žertvendyr) Ráske-Devléske. Ni savó marunó janybén, savó janéna Ráske-Devléske, na kerén kvašeno pe droždžy, pal-dová so ni kvašeno, ni avgín naštý tumé te xačkirén dro svénto dyibén Ráske-Devléske; syr janybén pervoné barjakirdendyr (plodendyr) janéna len Ráske-Devléske, a pe altárjo naštý te čhuvén len vaš gudló thuv. Kažno tyró marunó janybén lond'kir londesa, i na jačkir tyró svénto dyibén bi londeskiro tyré Devléskire zavietostyr: kažnoné tyré janybnasa jan lond. Kóli janesa Ráske-Devléske pervoné barjakirldendyr marunó janybén, jan dro dáro tyré anglatuné barjakirdendyr, savé isyn kolosendyr, savé vyšut'kirde pe jag, rostasade ziárki, i čhuv pe lénde jeliejo, i čhuv pe lénde livano: davá isyn marunó janybén; i shačkiréla rašáj syr ripiribén paš ziárki i jeliejo saré livanosa: davá isyn svénto dyibén (žértva) Ráske-Devléske. Kóli vari-konéskiro svénto dyibén isyn mírno (ramanjono), i, kóli jov janéla baré kheritkoné murdaléndyr (skotóstyr), murškanés ci džuvlikanes, mek te janel les Ráske-Devléske, te javél jov bidošéngiro, i čhuvéla péskiro vast pe péskire-žertvakiro šeró, i začhinela les pašýl vudár skedyibnáskiri šátra; a Aaronóskire čhavé, rašaja, pobryzginena ratésa pe altárjo saré rigéndyr; i janéla jov mirnone žertvatyr dro svénto dyibén Ráske-Devléske túko (čekén), savó učhakiréla andratuné masá (bukore), i saró čekén (túko), savó isyn pe andratuné masá, i duj bukore (počki) i čekén (túko), savó te javél pe lénde, savó isyn pe stjogny, i sal'niko, savó isyn pe kaló buko (piečonka); bukorenca (počkenca) jov roskedela davá; i Aaronóskire čhavé shačkirena davá pe altárjo khetané celoné shačkiribnasa, savó isyn pe kaštá pe jag: dová isyn svénto dyibén, gudló thuv, Ráske-Devléske. A kóli tykné kheritkoné murdaléndyr janéla jov Ráske-Devléske mírno (ramanjono) svénto dyibén, murškanó ci džuvlikano, mek te janel les, te javél bidošéngiro. Kóli jov janéla péskiro svénto dyibén bakréndyr, mek te janel les te javél angíl Raste-Devléste, i čhuvéla péskiro vast pe šeró péskire žertvakiro, i začhinela la angíl skedyibnáskiri šátra, i Aaronóskire čhavé pobryzginena lákire ratésa pe altárjo saré rigéndyr; i mek te janel mirnone žertvatyr Ráske-Devléske dro svénto dyibén lákiro čekén, saró kurdiuko, otčhiny les pir sámo xriebtoskiro kokalo, i čekén (túko), savó zaučhakirela andratuné masá (bukore), i saró čekén, savó isyn pe andratuné masá, i duj bukore (počki) i čekén, savó isyn pe lénde, savó isyn pe stjogny, i sal'niko, savó isyn pe kaló buko (piečonka); bukorenca jov otkedela davá; rašáj shačkiréla davá pe altárjo; davá isyn jagakiro maró – svénto dyibén Ráske-Devléske. A kóli jov janéla svénto dyibén buzniendyr, mek te janel les angíl Raste-Devléste, i čhuvéla péskiro vast pe lákiro šeró, i začhinela la angíl skedyibnáskiri šátra, i pobryzginena Aaronóskire čhavé léskire ratésa pe altárjo saré rigéndyr; i janéna léstyr dro janybén, dro svénto dyibén Ráske-Devléske čekén, savó učhakiréla andratuné masá, i duj bukore (počki) i čekén (túko), savó isyn pe lénde, savó isyn pe stjogny, i sal'niko, savó isyn pe kaló buko (piečonka); bukorenca (počkenca) jov otkedela davá; i shačkiréla len rašáj pe altárjo: davá isyn jagakiro maró, gudló thuv, Ráske-Devléske; a saró čekén Ráske-Devléske. Davá isyn uphenybén viéčno dre tumaré ródy, dre saré tumaré kherá; ni savó čekén (túko), i ni savó rat te na xan. I phendiá Raj Devél Mojzáske rakirí: “Phen Izrailjoskire čhavénge: kóli savó di keréla grého na džiný proti vari-savé Ráskire-Devléskire priphenybená i keréla vari-so, so naštý te kerél; kóli pomakhno rašáj keréla grého i keréla manušén bangenca, to tedy pal péskiro grého, savó kerdiá jov, mek te janel baré kheritkoné murdalestyr guruvóres, bidošengires, Ráske-Devléske dro svénto dyibén pal grého, i te janel guruvóres ke šatrakire-skedyibnaskiro vudár angíl Raste-Devléste, i čhuvéla péskire vastá pe guruvoreskiro šeró, i začhinela guruvóres angíl Raste-Devléste; i léla pomakhno rašáj guruvoreskiro rat, i lydžála les dre skedyibnáskiri šátra, i obmakninela (bulavela) rašáj péskiro angúšt (pal'co) dro rat, i pobryzginela ratésa eftá (bitrinéngiro deš) móly angíl Raste-Devléste angíl šýrma pe svénto štéto; i čhuvéla rašáj guruvoreskiro rat angíl Raste-Devléste pe altarjoskire šyngá vaš gudló thuv, savó isyn dre skedyibnáskiri šátra, a palatunó guruvoreskiro rat vyčhuvela tel ĥerá dro altárjo vaš céla shačkiribena, savó isyn pašýl skedyibnaskiro zagiibén dre šátra; i vylela guruvorestyr pal saró grého léskiro čekén (túko), savó učhakiréla andratuné masá, i saró čekén, savó isyn pe andratuné masá, i duj bukore (počki) i čekén, savó isyn pe lénde, savó isyn pe stjogny, i sal'niko pe kaló buko (piečonka); bukurenca otkedela jov davá, syr otkedelape guruvorestyr mirna svénta dyibená (žertvy); i shačkiréla len saré rašáj pe shačkiribnaskiro altárjo; a guruvoreskiri cýpa i saró léskiro mas léskire šerésa i ĥerénca, i léskire andratuné masá i léskiro nažužypen, saré guruvóres mek jov te vylydžal pal stáno pe žužó štéto, kaj vyčhuvelape práska (pieplo), i shačkiréla les jagása pe kaštá; kaj vyčhuvelape práska, odój mek te javél jov shačkirdo. Kóli saró Izrailjoskiro skedyibén keréla grého, na džiný pal davá, i garadó javéla réndo (diélo) skedyibnaskire jakhéndyr, i keréla vari-so proti Ráskire-Devléskire priphenybená, so na treindiá te kerél, i javéla bangó, to tedy, kiéli grého javéla udžindlo, savó jone kerdé, mek saré skedyibnástyr jone te janén guruvóres baré kheritkoné murdaléndyr dro svénto dyibén (žértva) pal grého, i te janén les angíl skedyibnáskiri šátra; i čhuvéna skedyibnaskire phurydyrá péskire vastá pe guruvoreskiro šeró angíl Raste-Devléste, i začhinena guruvóres angíl Raste-Devléste. I zalydžala pomakhno rašáj guruvoreskiro rat dre skedyibnáskiri šátra, i obmakninela (bulavela) rašáj péskiro angúšt (pal'co) dre rat i pobryzginela eftá móly angíl Raste-Devléste angíl šýrma pe svénto štéto, i počhuvela rat pe altarjoskire šyngá (rógi), savé isyn angíl Raste-Devléste dre skedyibnáskiri šátra, a palatunó rat vyčhuvela tel ĥerá dro altárjo vaš céla shačkiribena, savó isyn pašýl zagiibén dre skedyibnáskiri šátra; i saró léskiro čekén vylela léstyr, i shačkiréla pe altárjo; i jov keréla guruvoresa dová, so kerélape guruvoresa pal gréhi; adiáke trej te kerél lésa, i adiáke žužakirela len rašái, otmekno javéla lénge; i vylydžala guruvóres pal stáno (táboro (lod)), i shačkiréla les adiáke, syr shačkirdiá pervoné guruvóres. Davá isyn svénto dyibén pal skedyibnaskiro grého. A kóli keréla grého baredýr, i keréla na džiný vari-so proti Ráskire-Devléskire, Devléskire priphenybená, so na treindiá te kerél, i javéla bangó, to tedy, kiéli udžindlo javéla grého, savó jov kerdiá, mek te janel jov dro svénto dyibén buznés (kozlos) bidošengires, i čhuvéla péskiro vast pe buzneskiro šeró, i začhinela les pe štéto, kaj saré céla shačkiribena začhinenape angíl Raste-Devléste, davá isyn svénto dyibén pal grého; i léla rašáj péskire anguštesa (pal'cosa) žertvatyr rat pal grého, i počhuvela les pe saré shačkiribnaskire šyngá (rógi), a palatunó léskiro rat vyčhuvela tel ĥerá dro altárjo vaš céla shačkiribena; i saró léskiro čekén (túko) shačkiréla pe altárjo, adiáke-pac' syr čekén mirnone žertvakiro, i adiáke vyžužakiréla les rašáj léskire grehostyr, i otmekno léske javéla. Kóli vari-kon manušéndyr pe phuv keréla grého, i na džinéla i keréla vari-so proti Ráskire-Devléskire priphenybená, so na treindiá te kerél, i javéla bangó, to tedy, kiéli udžinela jov péskiro grého, savó jov kerdiá, mek te janel jov dro svénto dyibén (žértva) buznia bidošengirja pal péskiro grého, savó jov kerdiá, i čhuvéla jov péskiro vast pe žertvakiro šeró pal célo grého, i začhinena buznia (koza) dro svénto dyibén pal grého pe štéto, kaj začhinena céla shačkiribnaskire svénta dyibená (žertvy); i léla rašáj davá rat péskire anguštesa, i rosčhuvela altarjoskire šyngá, vaš céla shačkiribena lákiro rat, savó jačélape, vyčhuvela ke ĥerá dro altárjo; i saró lákiro čekén otkedela, adiáke-pac' syr otkedela čekén ramanjone (mirnone) sventoné dyibnástyr (žertvatyr), i shačkiréla les rašáj pe altárjo dro gudló thuv, Ráske-Devléske; i adiáke vyžužakiréla les rašái, i otmekno léske javéla. A kóli jov zakaméla te janel svénto dyibén pal grého bakrén stadatyr, mek te janel džuvlikane rodóstyr, bidošengirja, i čhuvéla jov péskiro vast pe sventoné-dyibnaskiro šeró pal grého pe dová štéto, kaj začhinena céla shačkiribnaskira svénta dyibená; i léla rašáj péskire anguštesa rat sventoné dyibnástyr pal grého, i počhuvela pe saré altarjoskire šyngá (rógi) vaš céla shačkiribena, a lákiro rat, savó jačélape, vyčhuvela ke altarjoskire ĥerá; i saró lákiro čekén otkedela, syr otkedelape bakriakiro čekén mirnone žertvatyr, i shačkiréla davá rašáj pe altárjo dro svénto dyibén Ráske-Devléske; i adiáke vyžužakiréla les rašáj grehostyr, savó jov kerdiá, i otmekno javéla léske. Kóli vari-kon keréla grého dolesa, so šundiá prokošybnaskiri zan i sys jakhítko, ci dykhciá ci džindiá, ne na phendiá davá, tedy jov lydžála pe péste grého. Ci, kóli vari-kon čilavelape ke vari-so nažužo, ci ke nažužé riskiribnáskire murdaleskiro (zvierjoskiro) trúpo, ci ke nažužé kheritkoné murdaleskiro (skotoskiro) trúpo, ci ke nažužé-ĥadoskiro trúpo, ne jov na džindiá davá, tedy jov isyn nažužo i javéla bangó. Ci kóli jov čilavelape ke manušéskiro nažužypen (načystota), savó te na javél davá nažužypen, savéstyr magirenape, i jov na džindiá davá, ne korigedýr (pozžedýr) jov udžinela, tedy jov javéla bangó. Ci, kóli vari-kon, na poduminy péskire ušténca, sovlahadiá te kerél vari-so nálačho ci lačhó, savó b te na javél davá réndo (diélo), dre savó na duminy manušá sovlahana, i jov na džindiá davá, ne korigedýr udžinela, tedy jov dro davá javéla bangó. Kóli jov isyn bangó dro vari-so daléstyr, i pridžindia bang, dre so jov kerdiá grého, tedy mek te janel Ráske-Devléske pal péskiro grého, savó jov kerdiá, svénto dyibén sýrby pal bang tykné kheritkoné murdaléndyr (skotóstyr), bakriá ci buznia, pal grého, i vyžužakiréla les rašáj léskire grehostyr. Kóli jov na moginéla te janel bakriá, tedy dre bang pal péskiro grého, mek te janel Ráske-Devléske dujén gorlicen ci dujén ternen golumben, jekhés dro svénto dyibén pal grého, a javirés dro célo shačkiribén; mek te janel len ke rašái, i rašáj te janel angledýr doiá dalé čirikliendyr, saví te javél pal grého i otriskirela láke šeró meniatyr lakirjatyr, ne te na otkedel; i pobryzginela dalé-žertvakire ratésa pal grého pe altarjoskiri vánta, a palatunó rat, savó jačélape, vytasavela ke altarjoskire ĥerá: davá isyn svénto dyibén pal grého; a javirja mekéla dro célo shačkiribén pir uphenybén; i adiáke vyžužakiréla les rašáj léskire grehostyr, savó jov kerdiá, i otmekno léske javéla. Kóli jov na moginéla te janel dujén gorlicen ci dujén terné golumben, mek te janel pal davá, so kerdiá grého, déšto paš (efa) dre svénto dyibén pal grého; mek te na čhuvél pe láte jeliejo, i livano, mek te na čhuvél pe láte, pal-dová so davá isyn pal grého; i janéla les ke rašái, a rašáj látyr léla pherdý burnyk (žmienia) dro ripiribén, i shačkiréla pe altárjo dro davá svénto dyibén Ráske-Devléske: davá isyn svénto dyibén pal grého; i adiáke vyžužakiréla les rašáj léskire grehostyr, savó jov kerdiá dro vari-so dalé vakancyiendyr (slučajendyr), i otmekno léske javéla; a so jačélape, dová javéla rašáske, syr marunó janybén. I phendiá Raj Devél Mojzáske dasavé lavá: “Kóli vari-kon keréla čoripén i pir nadžinyben keréla grého proti dová priedmieto, so sys obsvencyndlo Ráske-Devléske, mek pal péskiri bang jov te janel Ráske-Devléske bakréngire stadatyr bakrés bidošengires, pir tyrí timín, rupuvé šekielienca pir šékieljo sventoneskiro, dro svénto dyibén (žértva) pal čoripén; pal doiá sventyma, proti saví jov kerdiá grého, mek jov te otdél i te dočhuvel ke dová pándžto paš (dólia), i te otdél la rašáske, i rašáj vyžužakiréla les bakreskire janybnasa pal čoripén, i otmekno léske javéla. Kóli vari-kon keréla grého i keréla vari-so proti Ráskire-Devléskire priphenybená, so na treindiá te kerél, i pir nadžinyben kerélape bangesa i lydžála pe péste grého, mek te janel ke rašáj dro svénto dyibén pal čoripén bakrés bidošengires, pir tyrí timín i vyžužakiréla rašáj tyré čoripnástyr, so jov kerdiá pir nadžinyben, i otmekno léske javéla. Ake, isyn svénto dyibén pal bang, savó jov kerdiá angíl Raste-Devléste.” I phendiá Raj Devél Mojzáske, rakirí: “Kóli vari-kon keréla grého i keréla čoripén angíl Raste-Devléste, i javéla te xohavél angíl péskire pašatuneste dre dová, so léske sys dynó te garavel, ci léste čhudo, ci dro dová, dro so jov čordia, ci dro dová, so jov xohavela péskire pašatunes, ci kóli jov lathéla xasiakirdo, i xohavela dro dová, i sovlahala xohanés dro vari-so, so manušá keréna i keréna grého dolesa, to tedy, syr jov kerdiá grého i jaciá bangó, léske trej te riskirél; čordo ci so čordia, ci otlyno, ci dová, so sys dynó te garavel, ci našado, ci dová, so jov lathiá; ci kóli jov dro so sovlahadiá xohanés, to tedy léske trej te otdél saró, i te pričhuvel ke dová pándžto dólia, i te otdél odoléske, konéske trej, dro dyvés, kiéli jov janéla svénto dyibén pal čoripén; i pal péskiri bang mek jov te janel Ráske-Devléske ke rašáj dre svénto dyibén (žértva) pal čoripén bakréngire stadatyr bakrés bidošengires, pir tyrí timín; i vyžužakiréla les rašáj angíl Raste-Devléste, i otmekno léske javéla, so by jov te na kerél, saró, dro so jov kerdiá čoripén. I phendiá Raj Devél Mojzáske, rakirí: “Priphen Aaronóske i léskire čhavénge: ‘Ĥáda, isyn Zakóno pal célo shačkiribén: célo shačkiribén mek te jačélpe pe shačkiribnaskiro štéto pe altárjo sarí rat ke zlóko (ránko), i altarjoskiri jag mek te xačol pe léste; i mek rašáj te ur'jelpe dre péskiri gandladytko (ljonytko) ídia, i ur'jela pe péskire masá pohtanytka telatuné xolova, i zlela práska (pieplo) celoné shačkiribnastyr, savó xačkirdiá jag pe altárjo, i čhuvéla les pašýl altárjo; i mek te zlel péstyr ídi péskire, i urjavela javír ídi, i vylydžala práska (pieplo) pal stáno pe žužó štéto; a jag pe altárjo mek te xačol, te na murdjol, i mek rašáj te xačkirel pe léste kaštá kažno zlóko (ránko), i rosčhuvela pe léste célo shačkiribén, i xačkiréla pe léste čekén (túko) mirnone sventoné dyibnástyr (žertvatyr); iag pe altárjo mek saró časo te xačol i te na murdjol. Ĥáda, isyn Zakóno pal marunó janybén: Aaronóskire čhavénge trej te janén les angíl Raste-Devléste ke altárjo; i mek te lel rašáj péskire burnykasa (žmieniasa) marune janybnastyr i parné-giveskire jaržestyr i jeliejostyr i saró livano, savó pe altárjo: davá isyn gudló thuv dro ripiribén, lačhó, angíl Raste-Devléste; a palatunó léstyr mek te xan Aaróno i léskire čhavé; priesno trej te xan les pe svénto štéto, pe gréda (dvóro) dre skedyibnáskiri šátra mek te xan les; naštý te peken les kvašeno. Davá Me dáva lénge dre dólia Miré sventoné dyibnendyr. Ake, isyn bari sventyma, dasaví-pac' isyn syr svénto dyibén pal grého i svénto dyibén pal čoripén. Saró Aaronóskire-muršytko ródo moginéla les te xal. Ake, isyn viéčno kotér dre tumaré ródy Ráskire-Devléskire sventoné dyibnendyr. Saré, kon pričilavelape ke jone, osvencinenape.’” I phendiá Raj Devél Mojzáske dasavé lavá: “Ĥáda, isyn janybén Aaronostyr i léskire čhavestyr, savó jone janéna Ráske-Devléske dro svénto dyibén dro dyvés, kiéli les pomakhena: déšto efakiri paš parné-giveskiri jaržestyr dro svénto dyibén saró časo, paš daléstyr vaš zlóko (ránko) i javír paš vaš bel'vél'; pe skorovieda (xič) dro jeliejo les trej te keraves; kóli jov pročhudo jeliejosa jan les dre koterá (kuski), syr phagelape dro koterá syr marunó janybén; jan les dro gudló thuv, lačhó Ráske-Devléske; i rašáske, savó pomakhno pe léskiro (Aaronoskiro) štéto léskire čhavéndyr, trej te kerél davá: davá isyn viéčno uphenybén Rástyr-Devléstyr. Saró trej te javél xačkirdo; i kažno marunó janybén rašastyr, saró mek te javél shačkirdo, a na shano.” I phendiá Raj Devél Mojzáske, rakirí: “Phen Aaronóske i léskire čhavénge: ‘Ĥáda, isyn Zakóno pal grehoskiro svénto dyibén (žértva): pal grého svénto dyibén te javél začhindló angíl Raste-Devléste pe dová štéto, kaj začhinelape célo shačkiribén; davá isyn bari sventyma; O rašái, savó janéla svénto dyibén pal grého, bangó te xal les. Les trej te xal pe svénto štéto, pe gréda (dvóro) angíl šátra skedyibnáskiri. Saré, kon pričilavelape ke léskiro mas, osvencynenape; i kóli léskire ratésa obryzgindly javéla ídia, tedy obryzgindlo štéto vymor pe svénto štéto; Khoró ĥlejatyr (gliniano sasudo), dre savó joj keradyja, trej te rozmaren; kóli joj keradyja dro khoró xarkomátyr (dre miedítka sudinki), tedy trej la vyžužakiren i vymoren paniésa; saré muršá rašaskire rodóstyr moginéna te xan les: davá isyn bari sventyma; kažno svénto dyibén pal grého, savéstyr rat lydžalape dre skedyibnáskiri šátra vaš žužakiriben pe svénto štéto, na trej te javél shano; les trej te xačkirel pe jag. Ĥáda, isyn Zakóno pal svénto dyibén pal grého: davá isyn bari sventyma; svénto dyibén pal grého trej te začhinen pe dová štéto, kaj začhinena célo shačkiribén, i lákire ratésa trej te bryzgines pe altárjo saré rigéndyr; kon janéla, odoléske trej te sykavél látyr saró čekén (túko), kurdiuko i čekén (túko), savó učhakiréla andratuné masá, i duj bukore (počki) i čekén (túko), savó isyn pe lénde, savó isyn pe stjogny, i sal'niko, savó isyn pe kaló buko (piečonka); bukorenca (počkenca) mek jov te roskedel davá; i shačkiréla davá rašáj pe altárjo pal grého Ráske-Devléske: ake, isyn svénto dyibén pal grého. Saré rašaskire-rodoskire muršá saštý (moginéna) te xan les; pe svénto štéto trej te xan les: davá isyn bari sventyma. Syr pal grehoskiro svénto dyibén, adiáke i pal svénto dyibén pal čoripén Zakóno isyn jekh: jov otlydžalape rašáske, savó žužakirela lésa. I kiéli rašáj ianéla vari-konéskiro svénto dyibén celoné shačkiribnaskiro, a cýpa celoné-shačkiribnaskire sventoné dyibnástyr, saví jov janéla, otlydžalape rašáske; i kažno marunó janybén, savó isyn pekno dro bov, i kažno kerado dre pirí ci pe skorovieda (xič), otlydžalape rašáske, savéske janéna les; i kažno marunó janybén, savó isyn pirimiešyndlo jeliejosa i isyn šuko, otlydžalape saré Aaronóskire čhavénge, syr jekhéske, adiáke i javireske. Ĥáda, isyn Zakóno pal mírno (ramanjono) svénto dyibén, savó janéna Ráske-Devléske: kóli vari-kon dro parikiriben les janéla, tedy khetané parikibnaskire sventoné dyibnasa léske trej te janel priesna maré, pirimiešyndle jeliejosa, i priesna mariklia, pomakhne jeliejosa, i jaržó parné givestyr, počhudo jeliejosa, maré, pirimiešyndle jeliejosa; apríč mariklia mek jov te janel dre péskiro janybén kvašeno maró, khetané parikiribnaskire mirnone sventoné janybnasa; iekh vari-so saré janybnastyr peskirestyr, mek te janel jov dro ĥazdypen Ráske-Devléske: davá otlydžalape rašáske, savó bryzginela mirnone-žertvakire (ramanjone-sventoné dyibnaskire) ratésa; a mas ramanjone-sventoné dyibnástyr dro parikiriben trej te xan dro léskiro janybnytko dyvés, naštý te jačkirel léstyr ke ránko (ke zlóko). Kóli vari-kon janéla svénto dyibén pir sovláh ci iléstyr, tedy léskiro svénto dyibén trej te xan dro janybnytko dyvés, i pe javír dyvés, so jačélape léstyr, les saštý te xan, a so jačélape altarjostyr, mas, ke tríto dyvés trej te shačkiren pe jag; kóli javéna te xan mas mirnone-žertvakiro pe tríto dyvés, tedy jov na javéla lačhó; kon la janéla, odoléske ni dre so na zaginelape: davá isyn magiripén, i kon javéla les te xal, odová lydžála pe péste grého; davá mas, kóli jov pričilavelape ke vari-so, so isyn nažužo, naštý te xan, ne trej te shačkiren les pe jag; a mas žužó moginéla te xas kažno žužó manúš; kóli vari-savó di, konéste isyn pe péste nažužypen, javéla te xal mas mirnone-žertvatyr Ráskire-Devléskire, tedy xasjola dová di péskire manušéndyr; i kóli vari-savó di, kon pričilavela ke vari-so nažužo, ke nažužypen Manušéskiro, ci ke nažužo kherítko murdál (ke skoto), ci ke vari-savó nažužo ĥado (polzuno), javéla te xal mas mirnone Ráskire-Devléskire sventoné dyibnástyr, tedy xasjola dová di péskire manušéndyr.’” I phendiá Raj Devél Mojzáske, rakirí: “Phen Izrailjoskire čhavénge: nisavó čekén (túko) ni guruvestyr, ni bakriatyr, ni buznestyr (kozlostyr) te na xan. Čekén mulestyr i čekén, savó roskustia riskiribnáskiro murdál (zvierjo), saštý te mekén pe kažno réndo; a vaš xabén, na xan les; pal-dová so, kon javéla te xal čekén kheritkoné murdalestyr, savó janelape dro svénto dyibén Ráske-Devléske, to xasjola dová di péskire manušéndyr; i nisavó rat na xan dre saré tumaré kherá ni čirikliendyr, ni kheritkoné murdalestyr; a kon javéla te xal vari-savó rat, xasjola dová di péskire manušéndyr.” I phendiá Raj Devél Mojzáske dasavé lavá: “Phen Izrailjoskire čhavénge: kon janéla péskiro mírno svénto dyibén Ráske-Devléske, odová mirnone sventoné dyibnástyr paš trej te janel dro janybén Ráske-Devléske; péskire vasténca isyn bangó jov te janel dro svénto dyibén Ráske-Devléske: čekén kolynesa isyn bangó jov te janel, sob (kaj) jov te trinskirel kolynesa angíl Raste-Devléste; a čekén shačkiréla rašáj pe altárjo, a kolýn otlydžalape Aaronóske i léskire čhavénge; i čačó (pravo) psikó, syr ĥazdypen, mirnone tumaré sventoné dyibnendyr žertvendyr otdén rašáske; kon Aaronóskire čhavéndyr janéla rat mirnone žertvatyr i čekén (túko), odoléske i čačó (pravo) psikó pe dólia; pal-dová so Me láva Izrailjoskire čhavéndyr mirnone sventoné dyibnendyr léngiro kolýn trinskiribnaskiro i psikó ĥazdypnaskiro, i Me otdáva len Aaronóske rašáske i léskire čhavénge syr viéčno paš Izrailjoskire čhavéndyr. Ĥáda, isyn paš Aaronóske i paš léskire čhavénge Ráskire-Devléskire žertvendyr pe jag dyveséstyr, kiéli jone javéna angíl Raste-Devléste vaš svénto butý, savó phendiá Raj Devél te del lénge dyveséstyr léngire makhibnastyr Izrailjoskire čhavéndyr. Davá isyn viéčno uphenybén dre léngire ródy. Ĥáda, isyn Zakóno pal célo shačkiribén, pal marunó janybén, pal svénto dyibén paló grého, pal svénto dyibén pal čoripén, pal svénto dyibén vysvenciakiribnaskiro i pal mírno svénto dyibén, savó dyjá Raj Devél Mojzáske pe Sinajoskiri bérga, kiéli phendiá Izrailjoskire čhavénge, pe Sinajoskiri čhučí phuv, te janén Ráske-Devléske léngiro janybén.” I phendiá Raj Devél Mojzáske dasavé lavá: “Le Aaronós i léskire čhavén lésa, i ídi, i olivítko dzet (jeliejo) te makhes, i guruvóres (tiel'cos) vaš svénto dyibén pal grého i dujén bakrén (ovnen), i khudo (korzina) apriesnokenca, i skéde saré manušén ke skedyibnáskiri šátra ke zagiibén.” Mójza kerdiá adiáke, syr phendiá léske Raj Devél, i skedynépe manušá ke skedyibnáskiri šátra ke zagiibén. I phendiá Mójza manušénge: “Ĥáda, so phendiá Raj Devél te kerén.” I jandiá Mójza Aaronós i léskire čhavén, i obmordia len paniésa; i čhudiá pe léste (Aaronoste) xitono, i obphandia les kustykasa i čhudiá pe léste upratuny riza i čhudiá pe léste efódo i obphandia les efodoskire kustykasa i prikerdia lésa efódo pe léste, i čhudiá pe léste napierstniko (žylietka), i pe napierstniko čhudiá Urimo i Tumimo, i čhudiá pe léskiro šeró kidaro, a pe kidaro léskire anglatuné rigátyr čhudiá suvnakuný phaljori (dosečka), svénto diadema (koróna), syr phendiá Raj Devél Mojzáske. I lyjá Mójza makhibnytko jeliejo, i pomakhcia šátra i saró, so sys dre láte, i osvenciakirdia davá; i lésa pobryzgindia pe altárjo eftá (bitrinéngiro deš) móly, i pomakhcia altárjo i saré léskire pribory, i čaró moske (umyval'nica) i lákiro predko tel ĥerá, sob (kaj) len te osvencynel; i čhudiá makhibnytko jeliejo pe šeró Aaronóske, i pomakhcia les, sob (kaj) te vysvencynel les. I jandiá Mójza Aaronóskire čhavén, i uridia len dre xitony, i obphandia len kustykasa, i čhudiá pe lénde kidary, syr phendiá Raj Devél Mojzáske. I jandiá guruvóres (tiel'cos) pal grého vaš svénto dyibén, i Aaróno i léskire čhavé čhudé péskire vastá pe guruvoreskiro šeró pal grého; i začhindiá les, i lyjá rat, i péskire anguštesa čhudiá pe altarjoskire šyngá (rógi) saré rigéndyr, i vyžužakirdiá altárjo, a rat, savó jaciápe, vyčhudiá telĥera altarjoske, i osvencyndia les, sob (kaj) te kerél les žužesa. I lyjá saró čekén (túko), savó sys pe andratuné masá, i sal'niko pe kaló buko (piečonka), i duj bukore (počki) i léngiro čekén, i shačkirdiá Mójza pe altárjo; a guruvóres (tiel'cos) i léskiri cýpa, i mas léskiro, i léskiro nažužypen (načystota) shačkirdiá pe jag pal stáno, syr phendiá Raj Devél Mojzáske. I jandiá bakrés (ovnos) vaš célo shačkiribén, i čhudiá Aaróno i léskire čhavé péskire vastá pe bakreskiro šeró; i začhindiá les Mójza i bryzgindia kutý (nábut) ratésa pe altárjo saré rigéndyr; i rosčingirdia bakrés pe pašá, i shačkirdiá Mójza šeró i pašá i čekén, a andratuné masá i ĥerá vymordia paniésa, i shačkirdiá Mójza saré bakrés pe altárjo: davá isyn célo shačkiribén dre gudló thuv, ake, isyn svénto dyibén Ráske-Devléske, syr phendiá Raj Devél Mojzáske. I jandiá javire bakrés, osvencybnaskire bakrés, i čhudiá Aaróno i léskire čhavé péskire vastá pe bakreskiro šeró; i začhindiá les Mójza, i lyjá léskiro rat, i čhudiá pe jagóro (krajo) čačé (pravone) Aaronóskire kanestyr i pe baró léskire-čačé-vasteskiro angúšt (pal'co) i pe baró angúšt, léskire čačé-ĥer'iakiro. I jandiá Mójza Aaronóskire čhavén, i čhudiá rat pe jagóro (pe krajo) léngire čačeskiro kan, i pe baró léngire-čačé-vasteskiro angúšt i pe baró léngire čačé-ĥerjakiro angúšt, i pobryzgindia Mójza ratésa pe altárjo saré rigéndyr. I lyjá čekén (túko) i kurdiuko i saró čekén, savó sys pe andratuné masá, i sal'niko pe kaló buko (piečonka), i duj bukore (počki) i léngiro čekén i čačó psikó; i khudé apriesnokenca, savé sys angíl Raste-Devléste, lyjá jekh apriesnoko i jekh maró jeliejosa i jekh marikly, i čhudiá len pe čekén i pe čačó psikó; i čhudiá saró davá pe Aaronóskire vastá i pe léskire-čhavéngire vastá, i jandiá davá, trinskiri angíl Raste-Devléste; i lyjá davá Mójza léngire vasténdyr i shačkirdiá pe altárjo vaš célo shačkiribén: davá isyn svénto dyibén posvencindlo dro gudló thuv, davá isyn svénto dyibén Ráske-Devléske. I lyjá Mójza kolýn i jandiá les, trinskiri angíl Raste-Devléste: davá sys Mojzaskiri dólia posvencynone bakrestyr, syr phendiá Raj Devél Mojzáske. I lyjá Mójza makhibnytko jeliejo i rat, savó sys pe altárjo, i pobryzgindia Aaronós i léskire ídi, i léskire čhavén i léskire čhavéngire ídi lésa; i adiáke vysvencyndia Aaronós i léskire ídi, i léskire čhavén i ídi léskire čhavéngire lésa. I phendiá Mójza Aaronóske i léskire čhavénge: “Keraven mas pašýl skedyibnáskiri šátra, i odój xan les marésa, savó isyn dro khudo (korzina) osvencyndlo, syr mánge rakirdo i phendló: Aaron i léskire čhavé isyn bangé les te xan; a so jačélape masestyr i marestyr, xačkirén pe jag. Eftá dyvesá na otdžan skedyibnaskire vudarendyr dre šátra, paka prodžána dyvesá vaš tumaró vysvenciakiriben, pal-dová so pir eftá dyvesá isyn bangó te kerélpe tumaró vysvenciakiriben; syr adadyvés sys kerdó, adiáke phendiá Raj Devél te kerén tuménge te žužakirenpe; pašýl skedyibnaskiro zagiibén dre šátra javén dyvés i rat eftá dyvesá, i javén rakhunes Raste-Devléste, sob (kaj) te na merén, pal-dová so adiáke mánge sys phendló Rástyr-Devléstyr.” I kerdiá Aaróno i léskire čhavé saró, so rakirdiá Raj Devél pir Mojzaste. Pe ohtóto (bidujéngiro déšto) dyvés khardiá ke pe Mójza Aaronós i léskire čhavén, i Izrailjoskire phurydyren, i phendiá Aaronóske: “Le péske guruvendyr guruvóres (tiel'cos) dro svénto dyibén (žértva) pal grého i bakrés dro célo shačkiribén, dujén bidošengiren, i jan len angíl Raste-Devléste; i Izrailjoskire čhavénge phen: len buznés dro svénto dyibén pal grého, i guruvóres (tiel'cos), i bakrores, jekhe-beršytkonen, bidošengiren, dro célo shačkiribén, i guruvés i bakrés dro svénto dyibén mírno, sob (kaj) te kerés svénto janybén angíl Raste-Devléste, i marunó janybén, pieriemiešindlo jeliejosa; pal-dová so adadyvés Raj Devél sykadjola tuménge.” I jandlé dová, so priphendiá Mójza, angíl skedyibnáskiri šátra, i javné saré manušá i terdiné angíl Raste-Devléste. Tén'ci phendiá Mójza: “Davá isyn čačipén, savó Raj Devél priphendiá te kerén tuménge, i sláva Ráskire-Devléskiri sykadjola tuménge.” I phendiá Mójza Aaronóske: “Jav ke altárjo i ker tyró svénto dyibén pal grého i tyró célo shačkiribén, i vyžužakir pes i manušén, i ker janybén manušéndyr, i vyžužakir len, syr priphendiá Raj Devél.” I podgíia Aaróno ke altárjo, i začhindiá guruvóres (tiel'cos), savó sys pal léste, dro svénto dyibén pal grého: Aaronóskire čhavé podlydžine léske rat, i jov obmaknindia péskiro angúšt (pal'co) dro rat, i čhudiá pe altarjoskire šyngá (rógi), a palatunó rat vyčhudiá tel altarjoskire ĥerá, a čekén i bukore (počki) i sal'niko pe kaló buko (piečonka) sventoné dyibnástyr pal grého shačkirdiá pe altárjo, syr priphendiá Raj Devél Mojzáske; mas i cýpa shačkirdiá pal stáno pe jag. I začhindiá Aaróno murdalén (žyvotnonen) vaš célo shačkiribén, i Aaronóskire čhavé podlydžine léske rat; jov pobryzgindia lésa pe altárjo saré rigéndyr; i jandlé léske célo shačkiribén dre koterá i šeró, i jov len xačkirdiá pe altárjo, a andratuné masá i ĥerá obmordia i xačkirdiá celoné shačkiribnasa pe altárjo, I jandiá janybén manušéndyr, i lyjá manušéndyr buznés pal grého, i začhindiá les, i jandiá les dro svénto dyibén pal grého, syr i anglatunes. I jandiá célo shačkiribén i kerdiá les pir uphenybén. I jandiá marunó janybén i pherdiakirdiá lésa péskire vastá, i shačkirdiá pe altárjo apríč saré celoné shačkiribnastyr pe ránko (pe zlóko). I začhindiá guruvóres i buznés (kozlos), savé sys manušéndyr, dro mírno svénto dyibén; i Aaronóskire čhavé podlydžine léske rat, i jov obryzgindia lésa pe altárjo saré rigéndyr; podlydžine i čekén guruvestyr i buznestyr kurdiuko, i čekén, savó zaučhakirela andratuné masá, bukore i sal'niko, so sys pe kaló buko, i čhudé čekén (túko) pe kolýn, i jov xačkirdiá čekén pe altárjo; kolynd i čačó (pravo) psikó jandiá Aaróno, trinskiri angíl Raste-Devléste, syr priphendiá Mójza. I ĥazdyjá Aaróno péskire vastá, risii ke manušá, i bahtiakirdiá len, i gijá telé, keri, syr kerdiá svénto dyibén (žértva) pal grého, célo shačkiribén i mírno svénto dyibén. I zaginé Mójza i Aaróno dre skedyibnáskiri šátra, i vyginé, i bahtiakirde manušén. I javdiá sláva Ráskire-Devléskiri saré manušénge: I vygijá jag Rástyr-Devléstyr i shačkirdiá pe celoné-shačkiribnaskiro altárjo i čekén; i dykhné saré manušá, i dyné gódla radymátyr, i pyné pe péskire muiá. Nadavo i Aviudo (Avigu), Aaronóskire čhavé, lyné kažno péskiri kadila, i čhudé dre lénde jag, i začhude dre láte dróga smóly te thuvliakiren, i jandlé angíl Raste-Devléste jag čúžo, pe saví Jov na dyjá vólia lénge; i vygijá jag Rástyr-Devléstyr, i xačkirdiá len, myné jone angíl Raste-Devléste. I phendiá Mójza Aaronóske: “Ĥáda, pal so rakirdiá Raj Devél, kiéli Jov phendiá: ‘Dre odolénde, savé javéna pašyledýr ke Me i Me vysvencynavape i angíl saré manušénde proslavinavape.’” Aaróno sys štyl. I khardiá Mójza Misailos i Jelcafanos, Uziiloskire čhavén, Aaronóskire kakeskiren, i phendiá lénge: “Džán, vylydžan tumaré pšalén sventoné štetóstyr pal stáno.” I giné, i vylydžiné len dre xitony léngire pal stáno. I phendiá Mójza Aaronóske i Jelizaroske i Ifamaroske, léskire čhavénge: “Na zlen kidary tumaré šerendyr i ídi tumaré te na kušen, sob (kaj) tuménge te na merén i te na vykharen xolý pe saré manušénde. Ne tumaré pšála, saró Izrailjoskiro kher, saštý (moginéna) te rovén pal shačkirdende, savén xačkirdiá Raj Devél, i na vydžán skedyibnaskire skinijakire vudarendyr, sob (kaj) tuménge te na merén, pal-dová so pe tuménde isyn Ráskire-Devléskiro makhibnaskiro jeliejo.” I kerdé jone pir Mojzáskiro lav. I phendiá Raj Devél Aaronóske, rakirí: “Na pi, tu i tyré čhavé túsa, mol (vino) i pibena zoralé, kiéli zadžána dre skedyibnáskiri šátra, sob (kaj) te na merén.” Davá javéla viéčno uphenybén dre tumaré ródy, sob (kaj) tumé mogindlé te roskeden svénto nasventonestyr, i žužó nažužestyr, i te sykliakirén Izrailjoskire čhavén saré uphenybnenge, savé dyjá lénge Raj Devél pir Mojzaste. I phendiá Mójza Aaronóske i Jelizaroske i Ifamaroske, savé jačnépe léskire čhavéndyr: “Len marunó janybén, savó jaciápe Ráskire-Devléskire sventoné dyibnendyr, i xan les priesnone (bidroždžengire) pašýl altárjo, pal-dová so davá isyn bari sventyma; i xan les pe svénto štéto, pal-dová so davá isyn kotér (kusko) tyró, i kotér tyré čhavéngiro Ráskire-Devléskire sventoné dyibnendyr: adiáke mánge phendló Rástyr-Devléstyr; i kolýn trinskiribnaskiro, psikó ĥazdypnaskiro xan pe žužó štéto, tu i tyré čhavé, i tyré čhaja túsa, pal-dová so davá dynó dro kotér túke i dro kotér tyré čhavénge Izrailjoskire čhavéngire mirnone sventoné dyibnástyr; ĥazdypnaskiro psikó i trinskiribnaskiro kolýn jone isyn bangé te janén čekeneskire (tukoskire) sventoné dyibnenca (žertvenca), trinskiri angíl Raste-Devléste, i, mek te javél davá viečnone koteresa túke i tyré čhavénge túsa, syr phendiá Raj Devél.” I lyjá dobusoves (staratiel'nes) te rodél Mójza buznés syr svénto dyibén pal grého, i ĥáda, jov shačkirdo. I rosholiasyja jov pe Jelizaroste i Ifamaroste, savé jačnépe Aaronóskire čhavéndyr, i phendiá: “Sóske tumé na xané svénta dyibená pal grého pe svénto štéto? Pal-dová so joj isyn bari sventyma, i joj dyný tuménge, sob (kaj) te len pe péste gréhi manušéndyr i te žužakiren len angíl Devléste; ĥáda, léskiro rat na zalydžino andré svénto štéto, a tuménge treindiá sys te xan les pe svénto štéto, syr sys phendló mánge.” Aaróno phendiá Mojzáske: “Ĥáda, adadyvés jandlé jone péskiro svénto dyibén pal grého i péskiro célo shačkiribén angíl Raste-Devléste, i davá kerdiápe mánca; kóli me adadyvés javáva te xav svénto dyibén pal grého, ci javéla davá lačhó Ráske-Devléske?” I šundiá Mójza davá, i šardia. I phendiá Raj Devél Mojzáske i Aaronóske, rakirí lénge: “Phenén Izrailjoskire čhavénge: ‘Ĥáda, isyn murdalá (žyvotna), savén saštý tuménge te xan saré murdaléndyr pe phuv: kažno kherítko murdál (skoto), savéste isyn roskerdo kopyto (naj), i pe kopyty isyn xor rosčhinyben (razriezo), i savó žujskirela žvačka, xan; iekhe dolen na xan kodolendyr, savé žujskirena žvačka, i savénde isyn na roskerdo kopyto: vierbliudos, pal-dová so jov žujskirela žvačka, ne kopyto léste naroskerdo, nažužo jov isyn vaš tuménge; i tuškančykos, pal-dová so jov žujskirela žvačka, ne kopyto léste naroskerdo, nažužo jov isyn vaš tuménge, i šušujos (zajcos), pal-dová so jov žujskirela žvačka, ne kopyto léste naroskerdo, nažužo jov isyn vaš tuménge; i balyčen, pal-dová so kopyto lénde roskerdo i pe kopyto isyn xor rosčhinyben (razriezo), ne jone na žujskirena žvačka, nažužé jone isyn vaš tuménge; mas léngiro na xan i ke trúpy léngire na pričilavenpe; nažužé jone isyn vaš tuménge. Saré murdaléndyr (žyvotnendyr), savé isyn dro paní, xan dolen: savénde isyn pora i češuia dro paní, dro mórjo (derjáv) ci dre reka (len'), dolen xan; a saré dolé, savénde nane pora i češuia, dro mórjo (derjáv) ci dre réki (leniá), kon plyvinela dro paní i saréndyr, kon dživéla dro paní, magirdé jone isyn vaš tuménge; jone isyn bangé (musinen) te javén magirdé vaš tuménge: mas léngiro na xan, i léngire trupendyr gidinenpe; saré murdalá (žyvotna), savénde nane pora i češuia dro paní, magirdé jone isyn vaš tuménge. Gidinenpe dalé čirikliendyr: orlostyr (kidostyr), grifostyr i morjoskire (derjavéskire) orlostyr (kidostyr), kaĥnialestyr (koršunostyr), i sokolostyr léskire rodosa, kažnoné korakostyr (voronostyr) léskire rodosa, strausostyr, sovatyr, čajkatyr, i jastriebostyr (kaĥnialestyr) léskire rodosa, filinostyr, mačheskire staribnaristyr i ibisostyr, liebiedjostyr, pieliekanostyr i sipostyr, butianostyr (capliatyr), zujostyr léskire rodosa, udodostyr i nietopyrjostyr (vurniaibnytkone kar-musostyr). Saré murdalá (žyvotna), savé polzynena, vurniana, psiréna pe štar ĥerá, magirdé isyn vaš tuménge; saréndyr, savé polzynena, vurniana, psiréna pe štar ĥerá, kodolén jekhe xan, savénde isyn lytki vučedýr ĥerendyr, sob (kaj) lénca te uhten pir phuv; adalen xan léndyr: saranča lákire rodosa, solamos lákire rodosa, xargolos (xruščos) lákire rodosa, i xagabsa lákire rodosa. Kažno javír vurniaibnytko, savó polzynela, savéste isyn štar ĥerá, magirdó isyn vaš tuménge. Léndyr tumé javéna nažužé: kažno, kon pričilavelalape ke léngiro trúpo, nažužo javéla ke bel'vél'; i kažnonéske, kon léla léngiro trúpo, trej te obmorel péskiri ídia, i nažužo javéla ke bel'vél'. Kažno murdál, savéste kopyty (naja) roskerde pe duj (razdvoiena), ne savéste nane baró ročhinyben (razriezo), i savó na žujskirela žvačka, nažužo isyn vaš tuménge: kažno, kon čilavéla les, javéla nažužo. Saré murdaléndyr, savó psiréla pe štar ĥerá, pe lapy, kon psiréla, dová nažužo isyn vaš tuménge: kažno kon čilavéla léngiro trúpo, odová javéla nažužo ke bel'vél'. Jov isyn nažužo vaš tuménge. Kon léla léngiro trúpo, odoléske trej te obmorel péskire ídi, i nažužo jov javéla ke bel'vél', nažužé jone isyn vaš tuménge. Ĥáda, so javéla nažužo vaš tuménge murdaléndyr (žyvotnenendyr), savé polzynena pir phuv: kroto, karmus (myšo), jaščerka lákire rodosa, anaka, xamielieono, lieta (lietaho), xomieto i tinšemieto, dalé isyn nažužé vaš tuménge saréndyr, savé polzynena: kažno, kon pričilavelape ke jone mulé, nažužo javéla ke bel'vél'. I saró, pe so peréla vari-so léndyr muléndyr, kažno khoró (sasudo) vešéstyr, ci ídia, ci cýpa, ci gonó, i kažno viešč, saví trej pe réndo, javéna nažužé: dro paní trej te čhuvén len, i nažužé javéna jone ke bel'vél', korigedýr (pozžiedyr) jone javéna žužé; kóli vari-so léndyr peréla dro savó-libo khoró glinatyr (ĥlejatyr), tedy so isyn dre léste, javéla nažužo, i kokoró khoró (sasudo) rozmaren. Kažno xabén, savó xána, pe savó sys paní dasavé khorostyr, nažužo javéla, i kažno pibén, savó p'jena, dro kažno dasavo khoró, nažužo javéla. Saró, pe so peréla vari-so léndyr léngire trupostyr, nažužo javéla: bov i bovoro trej te rosphagiren, jone javéna nažužé: i jone isyn te javén nažužé vaš tuménge; ĥanyngori (istočniko) i ĥanýng kokori, dre so isyn paní, jačénape žužé; a kon pričilavelape ke léngiro trúpo, odová jačélape nažužo. I kóli vari-so léngire trupostyr peréla pe vari-saví ziárka (siemjo), saví čhuvéna dre phuv, tedy joj iavéla žužy; ne kóli tedy, syr paní čhudo pe ziárka, peréla pe léste vari-so léngire trupostyr, to joj (ziárka) javéla nažužy vaš tuménge. I kiéli murdjola vari-savó kherítko murdál (skoto), savó tumé xána, tedy kon čilavéla léskiro trúpo, javéla nažužo ke bel'vél'; i odoléske, kon javéla te xal léskire-muleskiro mas, trej te obmorel péskire ídi, i nažužo javéla ke bel'vél'; i odová, kon lydžála léskiro trúpo, bangó te obmorel péskire ídi, i nažužo javéla bel'vél'. Kažno murdál (žyvotno), savó polzynela pirí phuv, isyn magirdó vaš tuménge, naštý les te xan. Saré, kon polzynela pe per i saré, kon psiréla pe štar ĥerá, i buté-gerengiren murdaléndyr (žyvotnendyr), savé polzynena pir phuv, na xan, pal-dová so jone isyn magirdé; na magirén tumaré dijá vari-savé murdalesa (žyvotnonesa), savó polzynela, i na kerén pes pir lénde nažuženca, sob (kaj) te javén pir lénde magirdenca, pal-dová so Me som Raj Devél, Devél tumaró: svenciakiren pes i javén svénta, pal-dová so Me som Svénto, i na magirén tumaré dijá vari-savé murdalesa (žyvotnonesa), savó polzynela pirí phuv, pal-dová so Me som Raj Devél, savó vylydžijá tumen Jegiptóskire phuvjátyr, sob (kaj) Mánge te javav tumaré Devlésa. I adiáke javén svénta, pal-dová so Me som svénto. Ĥáda, isyn Zakóno pal kheritkoné murdalénde (pal skoto), pal čirikliende, pal kažno džidó sozdyiben, savó dživéla dro paní, i pal saré murdalénde (žyvotnonende), savé polzynena pir phuv, sob (kaj) te roskeden nažužo žužestyr, i murdalén (žyvotnonen), savén saštý te xas, murdaléndyr, savén naštý te xan.” I phendiá Raj Devél Mojzáske dasavé lavá: “Phen Izrailjoskire čhavénge: kóli džuvlý pharjola i bijanéla čhavores (bijatós), tedy joj iavéla nažužy eftá (bitrinéngiro deš) dyvesá; syr dre dyvesá lákire žužakiribnaskire mén'ki, joj iavéla nažužy; pe ohtóto (bidujéngiro déšto) dyvés občhinelape léste (čhavoreste) léskiri loč (plot') pe jagóro (pe krajo); i trijánda trin dyvesá bangi joj te bešél te žužakirelpe péskire ratendyr; nisó, so isyn svénto, láke naštý te čilavel, i ke svénto štéto naštý te javél, paka prodžána lákire-žužakiribnaskire dyvesá. Kóli joj bijanéla čhajorja, to tedy dre péskire-žužakiribnaskire dyvesá joj iavéla nažužy duj kurke, i šovdešá šov dyvesá joj isyn bangi te bešél te žužakirelpe péskire ratendyr. Syr prodžána lákire žužakiribnaskire dyvesá pal čhavéste ci pal čhate, láke trej te janel jekhe-beršytkones bakrores vaš célo shačkiribén i terné golumbicos ci gorlica dro svénto dyibén pal grého, ke zagiibén dre skedyibnáskiri šátra ke rašái; jov janéla davá angíl Raste-Devléste, i žužakirela la, i joj iavéla žužy péskire rateskire thadypnastyr. Ĥáda, isyn Zakóno pal čhavoreskiro ci čhajorjakiro bijanypén. Kóli joj naštý te janel bakrores, to tedy mek te lel dujén gorlicen ci dujén ternen ĥolumben, jekhés vaš célo shačkiribén, a javirés dro svénto dyibén (žértva) pal grého, i žužakirela la rašái, i joj iavéla žužy.” I phendiá Raj Devél Mojzáske i Aaronóske: “Kiéli konéste jačéla pe léskire-masengiri cýpa šulypen, ci lišajo ci pliama, i pe léskire-masengiri cýpa jačéla, xaj, prokazakiro fránso, tedy trej te janén les ke Aaróno, rašái, ci ke jekh léskire čhavéndyr, rašandyr; rašáj obdykhela fránso pe cýpa pe masá, i kóli balá pe fránso parudyne dre parné, i fránso isyn xor (gluboko) dre léskire-masengiri cýpa, tedy davá isyn prokáza; rašái, obdykhi les, déla te džinén pal léste, so jov isyn nažužo. A kóli pe léskire-masengiri cýpa pliama (piatno) isyn parny, ne joj nane xor dre cýpa, i balá pe léste na parudynepe dre parné, tedy rašáj phandela manušés, savéste isyn fránso pe eftá dyvesá; pe eftáto dyvés rašáj les obdykhela, i kóli fránso jačélape dasavo, syr sys, i na rozdžalape fránso pir cýpa, tedy rašáj bangó te phandel les pe javír eftá dyvesá; pe eftáto dyvés rašáj nevéstyr obdykhela les, i kóli fránso tyknedýr bicialó, i na rozgijápe fránso pir cýpa, tedy rašáj isyn bangó te phenél manušénge, so jov isyn žužó: davá isyn lišajo, i mek jov te vymorel péskire ídi, i javéla žužó. Kóli lišajo jačéla te rozdžalpe pir cýpa, korigedýr (pozžie) dová, syr jov psirdiá ke rašáj te žužakirelpe, tedy jov javír mólo bangó te javél ke rašái; o rašái, dykhí, so lišajo rozdžalape pir cýpa, jov déla te džinél manušénge, so jov isyn nažužo: davá isyn prokáza. Kóli javéla pe vari-konéste fránso ke prokáza, tedy trej les te janel ke rašái; o rašáj obdykhela les i, kóli šulypen pe cýpa isyn parnó, i bal parudyja dre parnó, i pe šulypen isyn džidó mas, to davá isyn ĥaratuny prokáza pe léskire-masengiri cýpa; i rašáj priĥaljola les nažužesa i phandela les; pal-dová so jov isyn nažužo. Kóli fránso rozbuĥljola pe cýpa, i učhakiréla prokáza sarí cýpa nasvaleskiri, léskire šerestyr ke ĥerá, ci but moginen te dykhén rašaskire jakhá, i dykhéla rašái, so fránso učhakirdiá saré léskire masá, to tedy jov priĥaljola nasvales žužesa, pal-dová so saró kerdiápe dro parnó, jov isyn žužó. Kiéli jačéla pe léste džidó mas, tedy jov isyn nažužo; i o rašái, dykhí džidó mas, priĥaljola les nažužesa, pal-dová so džidó isyn mas nažužo: davá isyn prokáza. Kóli džidó mas parudjola i piririsjola dro parnó, mek jov te javél ke rašái; i o rašáj obdykhela les, i kóli fránso obrisija dro parnó, rašáj priĥaljola nasvales žužesa; jov isyn žužó. Kóli konéste pe masengiri cýpa, sys čyl'čako (naryvo) i jov zadživdia, i pe čyl'čakoskiro štéto jaciá parnó šulypen, ci pliama parny ci lolovato, tedy jov isyn bangó te javél ke rašái; i rašáj obdykhela les i, kóli čyl'čako javéla tel cýpa, i bal léskiro parudyja dro parnó, tedy rašáj prigaljola les nažužesa: davá isyn prokazakiro fránso, jov roscvecyndia (rozluludija) pe čyl'čako; ne kóli rašáj dykhéla, so bal pe fránso isyn naparno, i jov nane tel cýpa, i nábut (kutý) isyn bicialy, tedy rašáj phandela les pe eftá dyvesá; kóli jov jačéla drieván te rozdžalpe pir cýpa, tedy rašáj priĥaljola les nažužesa: davá isyn prokazakiro fránso; kóli pliama jačélape pe péskiro štéto i na rozdžalape, tedy davá isyn čyl'čakoskiro šulypen, i rašáj priĥaljola les žužesa. I, kóli konéste pe masengiri cýpa javéla obhačkiriben, i pe zadživdo obhačkiribnaskiro jačéla lolovato ci parny pliama, i rašáj udykhéla, so bal pe pliama (piatno) piriparudyja dro parnó, i jov jačéla xor dre cýpa, tedy davá isyn prokáza, joj zacvecyndia pe obhačkiriben; i rašáj priĥaljola les nažužesa: davá isyn prokazakiro fránso; kóli rašáj dykhéla, so bal pe pliama naparno, i jov nane tel cýpa, i nane drieván bicialó, tedy rašáj phandela les pe eftá dyvesá; pe eftáto dyvés rašáj obdykhela les, i kóli joj drieván rozdžalape pir cýpa, tedy rašáj priĥaljola les nažužesa: davá isyn prokazakiro fránso; kóli pliama jačélape pe péskiro štéto, i na rozdžalape pir cýpa, i nábut so nane bicialy, tedy davá šulypen obhačkiribnastyr; rašáj priĥaljola les žužesa, pal-dová so davá šulypen obhačkiribnastyr. Kóli muršeste ci džuvliáte javéla fránso pe šeró ci pe čhora (broda), i tén'či obdykhela rašáj fránso, i jov jačéla xor dre cýpa i bal pe láte žylto sano, tedy rašáj priĥaljola len nažuženca: davá isyn parhima, davá isyn prokáza pe šeró ci pe čhora (broda); kóli rašáj obdykhela fránso parhimakiro, i joj na jačéla xor dre cýpa, i bal pe láte isyn na kaló, tedy rašáj odolés, konéste isyn fránso parhimakiro, phandela pe eftá dyvesá; pe eftáto dyvés rašáj obdykhela fránso, i kóli parhima na rozdžalape, i nane pe láte žylto bal, i parhima na jačéla xor dre cýpa, tedy nasvaleste trej te občhinen balá, ne štéto, kaj parhima te na občhinen, i rašáj isyn bangó parhatones javír mólo te zaphandel pe eftá dyvesá; pe eftáto dyvés rašáj obdykhela parhima, i kóli parhima na rozgijápe pir cýpa i na jačéla xor dre cýpa, tedy rašáj priĥaljola les žužesa; mek jov te vymorel péskire ídi, i javéla žužó. Ne kóli paló léskiro žužakiriben javéla but te rozdžalpe parhima pir cýpa, i rašáj udykhéla, so parhima rozdžalape pir cýpa, tedy rašáj mek te na rodél žylto bal: jov isyn nažužo. Kóli parhima jačélape, syr sys, i sykavelape pe láte kaló bal, tedy pošara progijá, jov isyn žužó; rašáj priĥaljola les žužesa. Kóli muršeste ci džuvliáte pe léngire-masengiri cýpa javéna jarka pliamy, jarka parné pliamy, i rašáj dykhéla, so pe léngire-masengiri cýpa bliedna-parné pliamy, tedy davá isyn lišajo, so roscvecyndia pe cýpa: jov isyn žužó. Kóli konéste pe šeró vyresne balá, tedy davá isyn pliešo: jov isyn žužó; a kóli angíl pe čykat vyresne balá, tedy jov isyn lyso: jov isyn žužó. Kóli pe pliešo ci pe lysina javéla parny ci lolovato pliama, tedy pe léskiro pliešo ci pe léskiri lysina roscvecyndia prokazakiro fránso. I o rašáj obdykhela les i, kóli dykhéla, so pe šulypen pe fránso parnó ci lolovato pe léskiro pliešo ci pe léskiri lysina, bicialy so poddžála pe masengire-cypakiro prokáza, tedy adavá manúš isyn prokazytko, nažužo jov isyn; rašáj isyn bangó te priĥaljol les nažužesa, léste pe šeró fránso. Prokazytkoneste, pe savéste isyn davá fránso, trej, sob (kaj) pe léste te javél rozkušny ídia, i léskiro šeró isyn bangó te javél na učhakirdo, i ke uštá jov bangó te javél učhakirdo i te del gódla: ‘Nažužo! nažužo!’ Dre saré dyvesá, paka pe léste isyn fránso, jov isyn bangó te javél nažužo, nažužo isyn jov; jov isyn bangó te dživél jekhdžinó, pal stáno te javél léskiro džiibén. Kóli javéla prokazakiro fránso pe ídi, ci pe ídia vylnátyr (šersiatyr), ci pe ídia ljonostyr (ĥandladestyr), ci pe osnova thavengiri, savé džána upralestyr, ci pe utoko thava, so džána pir buĥlypén ljonostyr (gandladestyr) ci vylnátyr, ci pe cýpa, ci pe vari-savó savó cypitko keriben, i fransakiri pliama (piatno) javéla zelenovato ci lolovato pe ídia, ci pe cýpa, ci pe osnova, ci pe utoko, ci pe vari-savó cypitko uribén, – tedy davá isyn fránso ke prokáza: trej te sykavén la rašáske; o rašáj obdykhela fránso, i zaphandela nasvaly ídia prokazasa pe eftá (bitrinéngiro deš) dyvesá pe eftáto dyvés rašáj prodykhela fránso, i, kóli fránso rozgijápe pir ídia, ci pe osnova, ci pe utoko, ci pir cýpa, ci pir vari-so, so kerdó cypatyr, tedy davá isyn prokáza zahaly, nažužo isyn fránso; jov isyn bangó te shačkirel ídia, ci osnova, ci vylnakiro utoko ci ĥandladeskiro (ljonoskiro), ci saví da te na javél, saví kerdy cypatyr, pe saví javéla fránso, pal-dová so davá isyn zahaly prokáza: trej te shačkiren la pe jag. Kóli rašáj dykhéla, so fránso na rozgijápe pe ídia, ci pe osnova, ci pe utoko, ci pe saví b te na javél riza, so kerdy cypatyr, tedy rašáj uphenela te obmoren dová, pe saví isyn fránso, i javír mólo zaphandela pe eftá dyvesá; kóli korigedýr (pozžedýr) nasvale-idiakiro vymoribnastyr rašáj udykhéla, so fránso na parudia péskiro bicialyben i fránso na rozgijápe, tedy joj isyn nažužy, shačkirla ídia pe jag; davá isyn vyhano štéto pe muitko rig ci pe palatuny; kóli rašáj dykhéla, so fránso pir lákiro moriben jaciá tyknedýr bicialó, tedy rašáj mek te otkušel štéto fransosa idiatyr, ci cypatyr, ci osnovatyr, ci utokostyr. Kóli jov nevéstyr sykadjola pe ídia, ci pe osnova, ci pe utoko, ci pe vari-so kerdó cypatyr, tedy davá isyn prokáza, saví rozdžalape: xačkir pe jag davá, pe so prokáza isyn. Kóli ídia, ci osnova, ci utoko, ci vari-so so kerdó cypatyr vymoresa, i džála krig léndyr fránso, tedy trej te vymoren len javír mólo, i jone javéna žužé. Ĥáda, isyn zakóno pal fránso ke prokáza pe vylnakiri ci ĥandladeskiri (ljonytko) ídia, ci pe osnova ci pe utoko ci pe vari-so, so kerdó cypatyr, syr te priĥaljos la žužesa ci nažužesa. I phendiá Raj Devél Mojzáske, rakirí: “Ĥáda, isyn zakóno pal manušéste, savéste isyn prokáza, kiéli trej les te vyžužakires: janén les ke rašái; i rašáj vydžála javrí stanostyr, i kóli rašáj dykhéla, so manúš, savéste sys prokáza, vysastija péskire dukhatyr, to tedy rašáj priphenela te les vaš dalé manušéske dujén džiden i žužen čiriklien, kiedrytko veš, červljono thav i isopo, i rašáj priphenela jekha čirikliá te zaphusaven uprál glinytko khorestyr (sasudostyr), uprál džidó paní; a kokoró jov léla džidia čirikliá, kiedrytko veš, červljono thav i isopo, i kindiakirela len i džidia čirikliá dro rat čirikliakiro, saví sys zaphusady uprál džidó paní, i bryzginela lésa pe manušéste, savó žužakirelape prokazatyr eftá móly, i priĥaljola les žužesa, i mekéla džidia čirikliá pe félda. O manúš, savó žužakirelape, vymorla péskire ídi, občhinela péskire saré balá, vymorelape paniésa, i javéla žužó; korigedýr (pozže) zadžála dre stáno, i jačéla eftá dyvesá pal péskiri šátra; pe eftáto dyvés vymuravela saré péskire balá, péskiro šeró, péskire čhora (broda), péskire jakhengire phovja (brovi), saré péskire balá vymuravela, i vymorela péskire ídi, i vymorela paniésa péskire masá, i javéla žužó. I pe eftáto dyvés jov léla bidošengire dujén bakrén, i jekha bakriá jekhe-beršytkona bidošengirja, i trin dešengire pašá jefatyr, pšeničnone jaržeskiro, zmiešyndlo jeliejosa (dzetesa), dro janybén marunó, i jeliejoskiro jekh logo (0.3 litro); I rašái, savó žužakirela, čhuvéla manušés, savó žužakirelape lénca angíl Raste-Devlés-te pašýl zagiibén dre šátra skedyibnáskiri; i léla o rašáj iekhe bakrés, i otdéla les dro svénto dyibén pal bang, i jeliejo logo, i janéla davá, trinskiri angíl Raste-Devléste; i začhinela bakrés pe dová štéto, kaj čhinena vaš svénto dyibén pal grého, i célo shačkiribén, pe svénto štéto, pal-dová so davá čhinena vaš svénto dyibén pal bang, savó poddžála pe svénto dyibén (žértva) pal grého, i jov trej, sob (kaj) te javél rašáske: davá isyn bari sventyma; i léla rašáj nábut (kutý) rat pal bang sventoné dyibnástyr, i čhuvéla rašáj rat pe čačé-jagoroskiro kan manušéske, savó žužakirelape i pe léskiro čačé-vasteskiro baró angúšt i pe baró angúšt (pal'co), savó pe léskiri čačí ĥerój; i léla rašáj logo jeliejo, i čhuvéla pe péskiri zérvo (liévo) burnyk (ladoška); i kind'kirela rašáj čačó (pravo) péskiro angúšt dro jeliejo, savó isyn pe léskiri zérvo (liévo) burnyk (ladoška), i čhuvéla jeliejosa péskire anguštestyr eftá móly angíl Raste-Devléste; i jeliejo (dzet), savó jaciápe pe léskiri burnyk, rašáj čhuvéla pe manušéste, savó žužakirelape, pe čačé-kaneskiro jagóro (pe krajo), pe baró angúšt léskire čačé-vasteskiro angúšt i pe baró angúšt pe léskiri čačí ĥerój pe štéto, kaj čhudiá rat pal sventoné dyibnástyr pal bang; a jeliejo (dzet), savó jaciápe, savó isyn pe vast rašaste, čhuvéla jov pe šeró manušéske, savó žužakirelape, i žužakirela les rašáj angíl Ráskire-Devléskiro muj. I janéla rašáj svénto dyibén pal grého, i žužakirela jov manušés, savó žužakirelape léskire nažužypnastyr; korigedýr (pozžedýr) davá, začhinela jov vaš célo shačkiribén; i janéla rašáj célo shačkiribén i marunó janybén pe altárjo; i žužakirela les rašái, i jov javéla žužó. Kóli jov isyn čororó i léste nane barvalypén, tedy mek te lel jekhe bakrés dro svénto dyibén pal bang te trinskirel, sob (kaj) te žužakirel pes, i jekh déšto paš efa jaržó parné givestyr (pšenicatyr), zmiešyndlo jeliejosa (dzetesa), dro marunó janybén, i logo jeliejo; i dujén gorlicen ci dujén ternen golumben, so doreséla léskiro vast, jekha čirikliá dro svénto dyibén pal grého, a javirja dro célo shačkiribén; i janéla len pe ohtóto (bidujéngiro déšto) dyvés péskire žužakiribnastyr ke rašáj ke zagiibén dre šátra (skínija), angíl Raste-Devléste. I o rašáj léla bakrés dro svénto dyibén pal bang i logo jeliejo, i janéla davá ke rašái, trinskiri angíl Raste-Devléste. I čhinela bakrés dro svénto dyibén pal bang, i léla rašáj rat sventoné dyibnástyr pal bang, i čhuvéla pe jagóro (pe krajo) pe čačó kan Manušéskiro, savó žužakirelape, i pe baró angúšt (pal'co) léskire čačé (pravone) vasteskiro i pe baró angúšt léskiro čačé-ĥerjakiro; i čhuvéla rašáj ieliejo (dzet) pe péskiro zérvo (liévo) vast, i jeliejosa, savó isyn pe léskiro liévo vast, rašáj počhuvela čačé péskire anguštestyr eftá móly angíl Raste-Devléste; i čhuvéla rašáj ieliejo, savó isyn pe léskiro vast, pe manušéste, savó žužakirelape, pe jagóro (krajo) pe čačó kan, pe baró angúšt léskire čačé-vasteskiro i pe baró angúšt léskire čačé-ĥerjakiro, pe štéto, kaj sys rat pal bang sventoné dyibnástyr; a savó jaciápe jeliejo, savó sys pe rašaskiro vast, čhuvéla jov pe šeró manušéske, savó žužakirelape, sob (kaj) te vyžužakirel les angíl Raste-Devléste; i janéla jekha gorlicendyr ci jekhés terné golumbendyr, so doreséla vast manušéskiro, savó žužakirelape, doléstyr, so doreséla léskiro vast, jekh čirikly dro svénto dyibén pal grého, a javír dro célo shačkiribén, khetané marune janybnasa; i žužakirela rašáj manušés, savó žužakirelape angíl muj Ráskire-Devléskiro. Ĥáda, isyn zakóno pal manušéste, pe savéste sys prokáza, savéste na sys barvalypén dro péskiro časo te žužakirelpe. I phendiá Raj Devél Mojzáske i Aaronóske dasavé lavá: “Kiéli tumé zadžána pe Xanaanóskiri phuv, saví Me dáva tuménge te len syr phuv péskiri, i Me janáva fránso ke prokáza pe kherá pe tumarí phuv, saví tumé lyné péske, to tedy odová manúš, konéskiro kher isyn, isyn bangó te džal i te phenél rašáske: ‘Mánde dro kher sykadyjá, xaj, fránso.’ Tén'ci o rašáj priphenela te vylydžan saró kheréstyr angledýr, syr zadžála rašáj te dykhél fránso, sob (kaj) te na jačél saró nažužesa, so isyn dro kher; korigedýr (pozžedýr) davá javéla rašáj te obdykhel kher. Kóli jov, obdykhi fránso, udykhéla, so pe kheréskire vánty isyn ĥaratuné zelena ci lolovata polosy jamkendyr, savé javéna xor dre vánta, to tedy rašáj vydžála kherestyro ke vudár kheréskiro i phandela kher pe eftá dyvesá, I pe eftáto dyvés nevéstyr (nevés) javéla rašái: i kóli dykhéla, so fránso rozgijápe pir kheréskire vánty, to mek rašáj te priphenel te vyphagiren bará, pe savé te javén fránsy, i te čhurdén len pal fóro pe nažužo štéto; i mek te vyĥablinen andrál saró kher, i mek te vyĥablinen sarí štukaturka, i te vyčhuven la pe nažužo štéto pal fóro. I jone léna javír bará, i čhuvéna len pe dolé-barengiro štéto, i léna javír štukaturka, i obmakhena kher; kóli fránso nevéstyr javéla i rozdžalape pe kher korigedýr (pozžedýr) davá, syr vyphagirde bará i vyĥablindle kher i obmakhne les, tedy rašáj iavéla i obdykhela, i, kóli fránso rozgijápe pe kher, tedy davá isyn zahaly prokáza pe kher, fránso isyn nažužo; to trej te rosphagiren davá Kher, i léskire bará, i léskiro veš i sarí kheréskiri štukaturka te vylydžan pal fóro pe nažužo štéto; i kon zadžála dro kher dro saró časo, kiéli jov isyn zaphandlo, odová manúš javéla nažužo ke bel'vél'; i kon te javél sutó dro dová kher, odová manúš isyn bangó te vymorel péskire ídi; i kon xála dro dová kher, odová isyn bangó adiáke-pac' te vymorel péskiri ídia. Kóli rašáj iavéla i dykhéla, so fránso pe kher na rozgijápe korigedýr (pozže) davá, syr obmakhne kher, tedy rašáj priĥaljola kher žužesa, pal-dová so fránso progijá. I, sob (kaj) te vyžužakirel kher, léla jov dujén čiriklien, kiedroskiro veš, červljono thav i isopo, i začhinela jekha čirikliá pe khoró ĥlejatyr (glinytko sasudo), uprál džidó paní; i léla jov kiedrovo veš i isopo, i červljono thav i džidia čirikliá, i kind'kirela len dro čirikliakiro rat, savjá začhindlé i dro džidó paní, i občhuvela kher eftá móly; i vyžužakiréla kher čirikliakire ratésa i džidé paniésa, i džidé čirikliasa i kiedrovoneskire vešesa, i isoposa i červljonone thavesa; i mekéla džidia čirikliá pal fóro pe félda, i vyžužakiréla kher, i javéla žužó.” Ĥáda, isyn zakóno pal kažno fránso ke prokáza i pal parhima, i pal prokazy pe ídia i pe kher, i pal šulypen, i pal pliešo, i pal pliamy, sob (kaj) te sykliakirél, kiéli davá isyn nažužo, i kiéli isyn žužó. Ake, isyn zakóno pal prokáza. I phendiá Raj Devél Mojzáske i Aaronóske, rakirí: “Rakirén Izrailjoskire čhavénge i phenén lénge: ‘Kóli konéste javéla te thadel léskire maséndyr, tedy léskire thadypnastyr jov isyn nažužo. I ĥáda, isyn zakóno pal léskiro nažužypen léskire thadypnastyr: kiéli thadéla léskire maséndyr léskiro thadypen, i kiéli zarikirelape dre léskire masá léskiro thadypen, davá isyn léskiro nažužypen. Kažno pasindly (čhuibén), pe savó pasjola adavá manúš, savéste te javél thadypen, nažužo, i kažno priedmieto, pe savó jov bešéla, isyn nažužo; i kon čilavéla léskiro čhuibén, odoléske trej te vymorel péskire ídi (rizy) i te obmorelpe paniésa, i nažužo javéla jov ke bel'vél'; kon jov bešéla pe vari-so, pe savó sys beštó manúš, savéste te javél thadypen, odová isyn bangó te vymorel péskire ídi i te obmorelpe paniésa, i jov nažužo javéla ke/žýko bel'vél'; i kon čilavéla manušéskire masá, savéste isyn thadypen, odová isyn bangó te vymorel péskire ídi i obmorelpe paniésa, i nažužo javéla jov ke bel'vél'; kóli manúš, savéste isyn thadypen, čungardela pe žužé manušéste, tedy adavá manúš isyn bangó te vymorel péskire ídi i te obmorelpe paniésa, i nažužo javéla jov ke bel'vél'; i kažno ĥliabo (povozka), dre savó tradyjá manúš, savéste isyn thadypen, nažužo javéla ke/žýko bel'vél'; i kažno, kon čilavéla vari-so, so sys tel léste nažužeste, nažužo javéla ke bel'vél'; i kon lydžála davá, isyn bangó te vymorel péskire ídi i te obmorelpe paniésa, i nažužo javéla ke bel'vél'; i kažno, kon čilavéla manušés, savéste isyn thadypen, namori péskire vastá paniésa, isyn bangó te vymorel péskire ídi i te vymorelpe paniésa, i nažužo javéla ke bel'vél'; khoró ĥlejatyr (gliniano sasudo), ke savó čilavelape manúš, savéste isyn thadypen, trej te rozmares, a kažno khoró vešéstyr trej te vymores paniésa. A kiéli manúš, savéste sys thadypen, javéla vól'no péskire thadypnastyr, tedy jov isyn bangó te otginel péske eftá dyvesá vaš péskiro žužypen, i te vymorel péskire ídi (rizy), i te obmorel péskire masá džidé paniésa, i javéla jov žužó; i pe ohtóto (bidujéngiro déšto) dyvés jov léla péske dujén gorlicen ci dujén terné golumben, i javéla angíl Raste-Devléste ke zagiibén dre skedyibnáskiri šátra i otdéla len rašáske; i janéla rašáj dalé čirikliendyr jekha dalé čirikliendyr dro svénto dyibén pal grého, a javirja dro célo shačkiribén, i žužakirela les rašáj angíl Raste-Devléste léskire thadypnastyr. Kóli vari-savó murš vyčhuvela péskiri sal (siemjo), tedy jov isyn bangó te obmorel paniésa saré péskire masá, i nažužo javéla jov ke bel'vél'; i kažno ídia i kažno cýpa, pe saví peréla siemjo, bangó isyn te javél vymordy paniésa, nažuži javéla ke bel'vél'; kóli murš pasjola džuvliása i javéla léste sal (siemjo) te vyčhuvelpe, tedy jone isyn bangé te obmorenpe paniésa, i nažužé dujdžiné jone javéna ke bel'vél'. Kóli džuvliáte čhuvélape rat, savó thadéla lákire maséndyr, tedy joj isyn bangi te bešél eftá dyvesá dre péskiro časo te žužakirelpe, i kažno, kon čilavéla la, nažužo javéla ke bel'vél'; i saró, pe so joj pasjola dro časo (cýro) láke te žužakirelpe, javéla nažužo; i saró, pe so joj bešéla, nažužo; i kažno, kon čilavéla lákiri pasindly (čhuibén), isyn bangó te vymorel péskire ídi i te obmorelpe paniésa, i nažužo javéla ke bel'vél'; i kóli vari-kon čilavéla vari-so pe čhuibén, ci pe dová priedmieto, pe savó joj sys bešty, nažužo javéla ke bel'vél'; i kóli vari-kon čilavéla vari-savó priedmieto, savó sys pe léskiro čhuibén, pe savó joj sys bešty, nažužo javéla ke bel'vél' kóli pirisovela lása rom, tedy lákiro nažužypen javéla pe léste, jov nažužo javéla eftá dyvesá, i kažno čhuibén, pe savó jov pasjola, javéla nažužo; kóli džuvliáte but dyvesá thadéla rat na dro lákiro džuvlikano časo, ci kóli láte tyrdelape thadypen ĥaredyr (dlugedyr) lákire-džuvlikane užakiribnastyr, syr prilyno užakiribnasa, to tedy dre saré dyvesá lákire thadypnaskire, i adiáke-pac', kiéli joj žužakirelape, joj iavéla nažužy; kažno čhuibén, pe savó joj pasjola dre saré dyvesá dro lákiro džuvlikano časo, joj – javéla nažužy, adiáke-pac' syr čhuibén dre lákiro žužakiribnaskiro časo; i kažno liubo priedmieto, pe savó joj bešéla, javéla nažužo, syr nažužo davá priedmieto dre lákiro časo, kiéli joj žužakirelape. I kažno, kon čilavéla len, javéla nažužo, i léske trej te vymorel péskire ídi i te obmorelpe paniésa, i jov nažužo javéla ke bel'vél'. A kiéli joj iavéla vól'no péskire thadypnastyr, tedy isyn bangó te otginel péske eftá dyvesá, i korigedýr (pozžedýr) joj iavéla žužy; i pe eftáto dyvés léla joj péske dujén gorlicen ci dujén ternen golumben, i janéla len ke rašáj dre šátra; i janéla rašáj iekhe čirikliendyr dro svénto dyibén pal grého, a javirja dro célo shačkiribén, i vyžužakiréla la rašáj angíl Raste-Devléste lákire nažužakirde thadypnastyr. Adiáke rakhén Izrailjoskire čhavén léngire nažužakiribnastyr, sob (kaj) jone te na merén dro péskiro nažužypen, magiri Miro kher (šátra), savó isyn maškirál lénde. Ĥáda, isyn zakóno pal manušénde, savénde thadéla maséndyr i pal dová, syr vyčhuvelape siemjo, savó keréna les nažužesa, i pal odolénde, kon piridživela pal péskiro žužypen, i pal manušénde, savénde maséndyr thadéla, muršeske ci džuvliáke i pal romeste, savó pirisovela nažužé džuvliása. I rakirdiá Raj Devél Mojzáske pal duje Aaronóskire čhavéngiro meribén, kiéli jone terdiné čužoné (napeskire) jagása angíl Raste-Devléste, i myné, i phendiá Raj Devél Mojzáske: “Phen Aaronóske, tyré pšaléske, sob (kaj) jov na dro kažno časo te zadžál pe svénto štéto pal pologo angíl denko (kryška), so isyn pe kovčego (mohtó), sob (kaj) léske te na merél, pal dová so pe denko Me javáva te javav dro óbloko. Ĥáda, sósa trej te zadžál Aaronóske pe svénto štéto: guruvoresa dro svénto dyibén pal grého i bakresa dro célo shačkiribén. Léske trej te ur'jel svencyndlo ĥandladestyr (ljonostyr) xitono, telatuny ídia ĥandladestyr mek te javél pe léskire masá, i ĥandladytkone kustykasa mek jov te podphandelpe, i gandladytko kidaro mek jov te ur'jel: davá isyn svencyndle ídi; i mek jov te obmorel péskire masá paniésa, i te ur'jel len. I Izrailjoskire čhavéngire skedyibnástyr mek jov te lel dujén buznen (kozlen) dro svénto dyibén pal grého i jekhe bakrés vaš célo shačkiribén. I te janel Aaróno guruvóres (tieliantos) dro svénto dyibén pal péskiro grého pal péste, i vyžužakiréla pes i kher péskiro. I léla dujén buznen, i čhuvéla len angíl Raste-Devléste pašýl zagiibén dre šátra skedyibnáskiri; i čhurdéla Aaróno pal duje buznende žriébijo: jekh žriébijo vaš Ráske-Devléske, a javír žriébijo vaš otmekiben; i janéla Aaróno buznés, pe savéste vygijá žriébijo vaš Ráske-Devléske, i janéla les dro svénto dyibén pal grého, a buznés, pe savéste vygijá žriébijo vaš otmekiben, čhuvéla džides angíl Raste-Devléste, sob (kaj) te kerél pe léste žužakiriben, i te otbičhavel les pe čhučí phuv vaš otmekiben. I janéla Aaróno guruvóres dro svénto dyibén pal grého pal péste, i vyžužakiréla pes i péskiro kher, i začhinela guruvóres dro svénto dyibén pal péskiro grého; i léla xačkirdé vangara dre pherdý kadila altarjostyr, savó isyn angíl Raste-Devléste, i léla gudlé smóly te xačkirel pherdé burnyka (prigoršni), i vylydžala len pal pologo; i čhuvéla la xačkirdé vangarenca pe jag angíl Raste-Devléste, i óbloko fimiamostyr (gudlé smolendyr) učhakiréla denko (kryška), savó te javél pe kovčego dosykaibnása (otkrovienijasa), sob (kaj) léske te na merél; i léla jov guruvoreskiro rat, i počhuvela péskiro angúšt (pal'co) pe denko angíl i pašýl denko, eftá móly. Tén'ci jov začhinela buznés (kozlos) dro svénto dyibén pal manušéngiro grého, i lydžála andré léskiro rat pal pologo, i keréla dová-pac' léskire ratésa, so kerdiá guruvoreskire ratésa, i čhuvéla lésa pe denko i angíl denko, i vyžužakiréla jov svénto štéto Izrailjoskire-čhavéngire nažužypnastyr i saré léngire nalačhé rendéndyr (dielendyr), dre saré léngire gréhi. Adiáke bangó isyn jov te kerél i vaš skedyibnáskiri šátra, saví isyn lénde, maškír léngiro nažužypen. Nijékh manúš naštý te javél dre šátra skedyibnáskiri, kiéli zadžála jov, Aaróno, te žužakirel svénto štéto, paka jov vydžála kokoró. I adiáke vyžužakiréla jov pes, kher péskiro i saró Izrailjoskiro skedyibén. I vydžála jov ke altárjo, savó isyn angíl Raste-Devléste, i vyžužakiréla les, i léla rat guruvoreskiro i rat buzneskiro, i čhuvéla pe šyngá (rógi) altarjoske saré rigéndyr, i čhuvéla jov pe léste ratésa péskire anguštestyr (pal'costyr) eftá móly, i vyžužakiréla les, i svenciakirela les Izrailjoskire-čhavéngire nažužypnastyr. I kiéli jov vyžužakiréla svénto štéto, skedyibnáskiri šátra i altárjo, to janéla jov džidé buznés (kozlos), i čhuvéla Aaróno péskire duj vastá pe džidé-buzneskiro šeró, i priĥaljola saró čoripén pe léste Izrailjoskire čhavéngiro, so jone kerdé proti Zakóno i saré léngire gréhi, i čhuvéla len pe buzneskiro šeró i bičhavéla krig buznés vykedyné manušésa pe čhučí phuv: i lydžála buzno pe péste saré léngire réndy, savé jone kerdé na pir Zakóno pe phuv, dre saví naštý te prodžan, i mekéla jov buznés pe čhučí phuv. I zadžála Aaróno dre šátra skedyibnáskiri, i zlela ĥandladytka (ljonytka) uribená, savé jov urjavelas, syr džálas jov pe svénto štéto, i jačkiréla len odój, i obmorela péskire masá paniésa pe svénto štéto, i ur'jela péskire ídi (rizy), i vydžála i janéla célo shačkiribén pal péste i célo shačkiribén pal manušénde, i vyžužakiréla pes i manušén; a čekén (túko) sventoné dyibnástyr pal grého pekela pe altárjo. I odová, kon lydžijá krig buznés vaš otmekiben, isyn bangó te vymorel péskire uribená i te obmorel péskire masá paniésa, i korigedýr (pozžedýr) jov saštý te zadžál dre stáno. A guruvóres pal grého i buznés pal grého, savengiro rat sys zalydžino te žužakirel svénto štéto, mek te vylydžan javrí stanostyr i te shačkiren léngire cypi i léngiro mas i léngiro nažužypen; kon shačkiréla len, odová isyn bangó te vymorel péskire uribená, i te obmorel péskire masá paniésa, i korigedýr (pozžedýr) adavá manúš moginéla te zadžál dro stáno. I davá mek te javél vaš tuménge syr viéčno uphenybén: dro eftáto (bidujéngiro déšto) čhon, dro deštone-čhonéskiro dyvés te javén kovlé tumaré dijá, i ni savó réndo te na kerén, ni manúš javire phuvjátyr, ni manúš, savó javire rigátyr, savó dživéla maškír tuménde, pal-dová so dro davá dyvés o rašáj žužakirela tumen, sob (kaj) te kerél jov tumen žuženca saré tumaré grehéndyr, sob (kaj) tumé te javén žužé (čysta) angíl Raste-Devléste; davá isyn sávato (subóta) te otkhinjon vaš tuménge, javén štyl (tiha) dre tumaré dijá: davá isyn viéčno uphenybén. Te žužakirel isyn bangó o rašái, savó isyn pomakhno, i savó isyn vysvencyndlo, sob (kaj) léske te kerél butý rašása pe štéto péskire dadéskiro: i ur'jela jov ĥandladestyr (ljonostyr) uribená, svénta ídi, i vyžužakiréla Svénto-Sventonengiro i šátra skedyibnáskiri, i altárjo vyžužakiréla, i rašán i sarén skedyibnaskire manušén vyžužakiréla. I davá javéla vaš tuménge syr viéčno uphenybén: te žužakiren Izrailjoskire čhavén saré léngire grehéndyr jekh mólo dro berš.” I kerdiá jov adiáke, syr Raj Devél priphendiá Mojzáske. I phendiá Raj Devél Mojzáske dasavé lavá: “Rakirén Aaronóske i léskire čhavénge i saré Izrailjoskire čhavénge i phen lénge: ‘Ĥáda, so priphenela Raj Devél: kóli kon Izrailjoskire kheréstyr začhinela guruvóres ci bakriá ci buznia dro stáno, ci kóli vari-kon začhinela len pal stáno i na janéla ke zagiibén dre skedyibnáskiri šátra (skínija), sob (kaj) te otdél dro svénto dyibén Ráske-Devléske angíl Ráskire-Devléskiro Kher, tedy odoléske manušéste javéla začhindló rateskiro pročhuviben: jov pročhudia rat, i xasjola odová manúš péskire manušéndyr; davá isyn vaš dová, sob (kaj) Izrailjoskire čhavé te kerén péskire svénta dyibená, savé jone začhinena pe félda, sob (kaj) te janén len angíl Raste-Devléste ke zagiibén dre šátra skedyibnáskiri, ke rašái, i te začhinen len Ráske-Devléske dro ramanjono (mírno) svénto dyibén; i počhuvela o rašáj ratésa pe altárjo Ráske-Devléske pašýl zagiibén dre šátra skedyibnáskiri, i zahačkirna čekén (túko) syr gudló thuv, lačhó Ráske-Devléske, sob (kaj) jone butýr te na janén svénta dyibén idolénge, pal savé jone psiréna nalačhé myslienca. Mek te javél davá vaš lénge viečnone priphenybnasa dre léngire ródy.’ Iščo phen lénge: ‘Kóli vari-kon Izrailjoskire kheréstyr i manušéndyr, savé javné javire rigéndyr, savé dživéna maškír tuménde, janéna célo shačkiribén ci svénto dyibén, i na lydžála ke zagiibén dre šátra skedyibnáskiri, sob (kaj) te janes les Ráske-Devléske, tedy odová manúš xasjola péskire manušéndyr. Kóli vari-kon Izrailjoskire kheréstyr i manušéndyr, savé javné javire rigéndyr, savé dživéna maškír tuménde, javéla te xal vari-savó rat, tedy Me riskiráva Miro muj pe dová di, kon javéla te xal rat, i xasiakiráva les adalé manušéndyr, pal-dová so maséngiro džiibén (vaš kažno sozdyiben) isyn dro rat, i Me dyjom tuménge les vaš altárjo, sob (kaj) te vyžužakiren tumaré dijá; paldavá Me i phendjom Izrailjoskire čhavénge: Nijékh di tuméndyr naštý te xal rat, i manúš, savó javdiá javire rigátyr, savó dživéla maškír tuménde, naštý te xal rat. Kóli vari-kon Izrailjoskire čhavéndyr i manušéndyr, savé javné javire rigéndyr, savé dživéna maškír tuménde, pe stariben uhtyléla riskiribnáskire murdales (zvierjos) ci čirikliá, savjá saštý te xal, tedy jov isyn bangó te del te vythadel lákire rateske i te zaučhakirel la phuvjása, pal-dová so kažnoné-maséngiro džiibén isyn dro léskiro rat, jov isyn léskiro di; paldavá Me phendjom Izrailjoskire čhavénge: na xan rat ni savéstyr maséndyr, pal-dová so di kažnoné maséngiro sozdyiben isyn dro léskiro rat: kažno, kon javéla les te xal, xasjola. I kažno, kon javéla te xal muleskiro mas, ci zahane riskiribnáskire-murdaleskiro (zvierjoskiro) mas, péskiro manúš ci manúš, savó javdiá javire rigátyr, trej, sob (kaj) jov te vymorel péskire uribená i te obmorelpe paniésa, i nažužo javéla jov ke bel'vél', a korigedýr (pozžedýr) jov javéla žužó; kóli jov na vymorela péskire uribená, i na obmorela péskire masá, tedy jov te lydžál pe péste péskiri bang.’” I phendiá Raj Devél Mojzáske, rakirí: “Rakirén Izrailjoskire čhavénge i phen lénge: ‘Me som Raj Devél, tumaró Devél. Na kerén réndy pir zakóny Jegiptóskire-phuvjákire, pe saví tumé dživdé, na kerén, i pir Xanaanóskiri-phuvjákire zakóny, pe saví Me lydžáva tumen, na kerén i pir léngire uphenybená na psirén. Ne te kerén pir Miré zakóny i te rakhén Miré uphenybená, kerén pir lénde. Me som Raj Devél, tumaró Devél. Rakhén Miré uphenybená i Miré zakóny, savé trej te kerén ke kónco / jagóro (te spolninen), i, kóli tumé keréna pir lénde, tumé javéna džidé. Me som Raj Devél, tumaró Devél. Nikón tuméndyr ni ke saví seménca pir loč (plot') naštý te poddžál pašýl dolesa, sob (kaj) te otčhakirel nangipén. Me som Raj Devél. Nangipén tyré-dadéskiro i nangipén tyré-dakiri na otčhakir. Joj isyn tyrí daj, na otčhakir lákiro nangipén. Nangipén tyré-dadéskire romniakiro na otčhakir: davá isyn nangipén tyré-dadéskiro. Nangipén tyré-pheniakiro, tyré-dadéskire čhakiro ci tyré-dákiro čhakiro, saví bijándyja dro kher ci na kheré, na otčhakir léngiro nangipén. Nangipén tyré-čhavéskire čhakiro ci tyré-čhakire čhakiro, na otčhakir léngiro nangipén, pal-dová so jone isyn tyró nangipén. Nangipén tyré-dadéskire romniakire čhakiro, saví isyn tyré dadéstyr, joj isyn tyrí phen pir dadéste, na otčhakir lákiro nangipén. Nangipén tyré-dadeskirja pheniá na otčhakir, joj isyn dadésa jekhe ratestyr. Nangipén tyré-dákire pheniá na otčhakir, pal-dová so joj isyn dasa jekhe ratestyr. Nangipén tyré-dadéskire pšaleskiro na otčhakir i na poddža ke léskiri romný, pal-dová so jejo isyn tyrí bibi. Nangipén tyré-borjakiro na otčhakir, pal-dová so jejo isyn romný tyré čhavéske, na otčhakir lákiro nangipén. Nangipén tyré-pšaléskire romniakiro na otčhakir, pal-dová so davá isyn tyré-pšaléskire nangipén. Nangipén džuvliákiro i lákire-čhakiro na otčhakir, lákire-čhavéskiro čha i lákire-čhakire čha na le paloróm, sob (kaj) te otčhakirel léngiro nangipén. Jone isyn jekhe ratestyr lása, davá isyn zlydnima. Na le paloróm péskire džuvliá khetané lákire pheniasa, sob (kaj) joj te na zevlynel, i sob (kaj) te otčhakirel lákiro nangipén, paka tyrí romný isyn džidy. I ke romný dro časo, kiéli láte isyn džuvlikany dukh, na čilav la, sob (kaj) te otčhakires lákiro nangipén. I romniása tyré pašatuneskiresa na pasjov, sob (kaj) te vyčhuves siemjo (sal) i te magirespe lása. Tyré čhavéndyr na otdé te dynarinén Molohoske, i na ladžakir tyré Devléskiro lav. Me som Raj Devél. Na pasjov muršesa, syr džuvliása, davá isyn magiripén. I nisave kheritkoné murdalesa (skotosa) na pasjov, sob (kaj) te vyčhuves siemjo (sal) i te magirespe léstyr: i džuvlý naštý te terdjol angíl kheritkoné murdaléste (angíl skoto) vaš nálačho réndo, davá isyn džungalypén (gidota). Na magirén pes ni sósa dalésa, pal-dová so sarésa dalésa magirdé pes manušá, savén Me tradava tuméndyr. I magirdiape phuv, i Me dykhcjom lákiro fuipén, i čhurdyjá krig péstyr phuv manušén sýrby čadyja, savé dživdé pe láte. A tumé rakhén Miré uphenybená i Miré zakóny, i na kerén saré dalé magiripena, ni péskiro manúš, ni manúš, savó javdiá javire rigátyr, savó i dživéla maškír tuménde. Pal-dová so saré dalé magiribena kerdé dalé-phuvjákire manušá, savé dživdé angíl tuménde, i magirdiape phuv. Ne, sob (kaj) phuv te na otriskirel tumen péstyr, syr tumé javéna te magirén la, adiáke-pac' syr joj užie otriskirdia péstyr manušýtka nácyi, savé sys vagedyr (angledýr) tuméndyr. Pal-dová so, kóli vari-kon javéla te kerél dalé džungalé (stetka) réndy, to odolengire dijá, savé kerdé adiáke, javéna čhurdyné te xasjon léngire manušéndyr. Paldavá rakhén Miré uphenybená, sob (kaj) tumé te na kerén pir džungalé prisykliaibena, pir savé kerdé manušá, savé sys vagedyr tuméndyr, i sob (kaj) tuménge te na magirenpe. Me som Raj Devél, Devél tumaró.’” I phendiá Raj Devél Mojzáske dasavé lavá: “Rákir saré skedyibnaske Izrailjoskire čhavéngire i phen lénge: ‘Javén svénta, pal-dová so Me som svénto Raj Devél, Devél tumaró. Dar kažno (sváko) manúš péskire datyr i péskire dadéstyr, i rakhén Miré sávaty (suboty). Me som Raj Devél, tumaró Devél. Na mangénpe idolénge, i na kerén péske vyčhudé devloré. Me som Raj Devél, tumaró Devél. Kiéli javéna te janén Ráske-Devléske mírno svénto dyibén, tedy janén les, sob (kaj) te doresen péske Devléskiri láska: dro dyvés, kiéli tumé janéna svénto dyibén (žértva) dro dyvés i pe javír dyvés tuménge trej te xan les, a so jačélape ke tríto dyvés isyn bangé te shačkiren pe jag; kóli vari-kon léla les te xal pe tríto dyvés, davá isyn džungaló (brytko): davá na javéla Ráske-Devléske pir Zakóno; kon léla la te xal, odová lydžála pe péste grého, pal-dová so jov magirdia Ráskire-Devléskiri sventyma, i xasjola dová di péskire manušéndyr. Kiéli javéna te ukeden, so vybarija pe jagóro (pe krajo) pe tyrí félda, i so jačélape tyré ukedyibnastyr, na podkede, i tyró vinagrado (drakh) na obkede ke žužypen, i múri, savé pyné dro vinagrádniko, na ĥázde, jačkir davá čororeske i manušéske, savó javdiá javire rigátyr. Me som Raj Devél, Devél tumaró. Na čoren, na rakirén načačipén, na xohaven jekh jekhés. Na den xohany sovél, pričhuvi ke davá lav Miro na magirén péskire Devléskiro. Me som Raj Devél. Na pritasav tyré pašatunes, i na le butýr syr trej. Pleskiriben butiarneske naštý te jačkires ke ránko (ke zlóko). Na obrakir kašukes, i na čhuv ničí angíl kororeste, sob (kaj) te na perél jov, dar Rástyr-Devléstyr tyrestyr. Me som Raj Devél. Na sendiakires xohanés pe séndo; na jav proti čororeste i na ker gudles (na ladin) barvalé manušénge. Pir čačipén sendiakir tyré pašatunes. Na psir piridyibnarisa maškír tyré manušénde, i na ĥazdepe pe tyré-pašatuneskiro džiibén. Me som Raj Devél. Na rikir xolý dre tyró iló pe tyré pšaléste; sykáv bang tyré pašatuneske, i na javéla pal léste grého. Na otdé pale čoripnasa (na otha pale), i na rikir xolý pe tyré-manušéngire čhavénde, a sykáv patýv ke tyró pašatuno, syr péske. Me som Raj Devél. Rakhén Miré uphenybená; tyré kheritkoné murdales (skoto) na zlyža javire porodasa; félda tyrí na začhuv duje raznone ziarkenca; na uripe dre rizy (dro uribén) kažnoné thavendyr, vylnátyr i ĥandladestyr (ljonostyr). Kóli vari-kon pirisovela džuvliása, a joj isyn pisharica, angrustiakirdy (obrenčyndly) romesa, ne iščo (inké) navykindly, ci vol'nyma iščo (inké) nane dyný láke: tedy trej te čhuvés kára iščo (inké) pe lénde, ne na meribnasa, pal-dová so joj isyn na vól'no. Mek jov te janel Ráske-Devléske ke zagiibén dre šátra skedyibnáskiri bakrés pal isyn bang, dro svénto dyibén pal péskiri isyn bang; i vyžužakiréla les o rašáj bakresa pal bang angíl Raste-Devléste grehostyr, i otmekno javéla léske grého, savó jov kerdiá. Kiéli tumé javéna pe phuv, saví Raj Devél déla tuménge, i počhuvena tumé vari-savó plodengiro veš, tedy léskire barjakirdé (plódy) ginen pal naobčhindle, naštý te xan len; a pe štárto berš saré léskire barjakirdé trej te javén svencindle vaš Ráskire-Devléskire svénki; a pe pándžto berš tumé saštý te xan léskire barjakirdé i te skedén péske saró, so léstyr isyn. Me som Raj Devél, Devél tumaró. Na xan ničí ratésa; na drabakiren i na čovahaniakiren. Na občinen tumaré šereskire balá saré rigéndyr, i na podčin tyré čhorengiro (brodakiro) jagóro (krajo). Vaš ripiribén pal muleste na kerén čhinybén pe tumaré masá, i na vyphusaven pe tumaré masá vari-savó začhinyben. Me som Raj Devél. Na magir tyrja čha, domeki la ke bléndo, sob (kaj) te na javél bléndo pe phuv i te na pherdjol phuv zlydnimasa. Rakhén miré sávaty (suboty) i den patýv Miré sventoné štetoske. Me som Raj Devél. Na riskirén godý ke manušá, savé vykharena mulen, i na psirén ke čovahane, i na dolydžan pes ke magiripén léndyr. Me som Raj Devél, tumaró Devél. Angíl phuré manušéste uštý i kutiakir léskiro phuripen, i dar tyré Devléstyr. Me som Raj Devél. Kiéli javéla te dživél manúš javire rigátyr pe tumarí phuv, na pritasaven les; o manúš, savó pritradyja javire rigátyr, i jaciá te dživél tuménde; mek te javél vaš tuménge dasavo-pac', syr tumaró manúš isyn; sykáv patýv léske, syr péske; pal-dová so i tumé sánas manušá, savé javné javire rigátyr pe Jegiptóskiri phuv. Me som Raj Devél, tumaró Devél. Na kerén xohaibén pe séndo, dre miéra, dre vaga (vieso) i dre miéra te čhuvés: mek te javén tuménde ubladýtka (viesy) čačuné, giri čačuné, efa čačuný i gino čačunó. Me som Raj Devél, tumaró Devél, Savó vylydžijá tumen Jegiptóskire phuvjátyr. Rakhén saré Miré uphenybená i saré Miré Zakóny i kerén pir lénde. Me som Raj Devél.’” I phendiá Raj Devél Mojzáske, rakirí: “Rákir davá Izrailjoskire čhavénge: Kóli vari-kon Izrailjoskire čhavéndyr i manušéndyr, savé javné javire rigéndyr, savé dživéna maškír Izrailitianende, déla jekhés péskire čhavéndyr Molohoske, odová mek te javél otdynó meribnáske, adalé phuvjákire manušá mek te zamarén les barénca; i Me riskiráva Miro muj pe odolé manušéste i xasiakiráva les léskire manušéndyr, pal-dová so jov otdyjá péskire čhavéndyr Molohoske, sob (kaj) te magirel Miro svénto štéto i te teliakirel svénto Miro lav; i, kóli adalé-phuvjákire manušá na riskirena péskire jakhá pe odolé manušéste, kiéli jov déla péskire čhavéndyr Molohoske, i na muliakirena les, to tedy Me riskiráva Miro muj pe odolé manušéste i pe léskiro ródo, i xasiakiráva les léskire manušéndyr, i sarén, kon psiréla pal léste, sob (kaj) blendyi te psirén palál Molohoste. I kóli vari-savó di riskiréla godý ke manušá, savé vykharena mulen i ke čovahane, sob (kaj) blendyi te psirés pal lénde, tedy Me riskiráva péskiro Muj pe dová di, i xasiakiráva les lákire manušénde. Svenciakiren pes i javén svénta, pal-dová so Me som Raj Devél, tumaró Devél, i Me som Svénto. Rakhén Miré statúty i kerén saró pir lénde, pal-dová so Me som Raj Devél, Savó svenciakirela tumen. Kon javéla te košel péskire dadés ci peskirjá da, odová mek te javél otdynó meribnáske; péskire dadés i da peskirjá jov kostia: léskiro rat javéla pe léste. Kóli vari-kon javéla te kerél biladžaipén paloromitkone romniása, kóli vari-kon javéla te kerél biladžaipén péskire pašatuneskire romniása, mek te javén otdyné meribnáske, biladžakuno i biladžakuny. Kóli vari-kon pasjola péskire-dadéskire romniása, odová xaj otčhakirdiá léskire-dadéskiro nangipén, mek te javén otdyné meribnáske dujdžiné, léngiro rat te javél pe lénde. Kóli vari-kon pasjola péskire borjasa, tedy dujdžiné jone mek te javén otdyné meribnáske: magiripén jone kerdé, léngiro rat te javél pe lénde. Kóli vari-kon pasjola muršesa, syr džuvliása, tedy jone dujdžiné kerdé magiripén: mek jone te javén otdyné meribnáske, léngiro rat te javél pe lénde. Kóli vari-kon léla péske romniá i lakirja da: davá isyn proti zakóno; pe jag trej te xačkirén les i len, sob (kaj) te na phagiren zakóno maškír tuménde. Kon khetaniakirelape kheritkoné murdalesa (skotosa), odolés te otdes meribnáske, i murdales te zamarén. Kóli džuvlý džála ke vari-savó murdál (žyvotno), sob (kaj) te kerél biladžaipén lésa, tedy zamar džuvliá i murdales, mek te javén jone otdyné meribnáske, léngiro rat te javél pe lénde. Kóli vari-kon léla peskirjá pheniá, péskire-dadéskire čha ci péskire-dákire čha, i udykhéla lákiro nangipén, i joj udykhéla léskiro nangipén: davá isyn ladž, mek te javén jone xasiakirdé angíl péskire-čhavéngire manušéngire jakhá; jov otčhakirdiá péskire-pheniakiro nangipén: péskiro grého lydžála jov. Kóli kon pasjola romniása dre davá časo, kiéli láte džuvlikany dukh, i otčhakirela lákiro nangipén, tedy jov otčhakirdiá lákiro thadypen, i joj otčhakirdiá péskire rata: dujdžiné jone mek te javén xasiakirdé péskire manušéndyr. Na otčhakir nangipén tyré-dákire pheniakiro i tyré-dadéskire pheniakiro, pal-dová so adasavó manúš nangiakirela péskiri seménca; grého péskiro lydžána jone. Kon pasjola péskire bibjasa, odová otčhakirdiá nangipén péskire kakeskiro; grého péskiro lydžána jone, bi čhavorengiro meréna jone. Kóli vari-kon léla péskire-pšaléskire romniá: davá isyn džungaló (brydko) réndo; jov otčhakirdiá péskire-pšaleskiro nangipén, bi čhavorengiro javéna jone. Rakhén saré Miré statúty i saré zakóny Miré, i kerén saró pir lénde, i na vyčhurdela tumen péstyr phuv, pe saví Me lydžáva tumen te dživén. Na kerén pir manušýtko prisykliaiben, savén Me tradava krig tuméndyr; pal-dová so jone kerdé saró davá, i Me xoliasyjom pe lénde, i phendjom Me tuménge: ‘tumé xulainena léngire phuvjása, i tuménge otdáva dro meknó mištypén (nasliedstvo) phuv, dre saví thadéla thud i avgín. Me som Raj Devél, tumaró Devél, savó čhudiá dre rig tumen saré manušéndyr. Roskeden péske žužé murdales nažužestyr i žužé čirikliá nažužatyr, i na magirén tumaré dijá murdalesa i čirikliasa i sarésa, so polzynela pir phuv, so priĥalyjom Me, syr nažužo. Javén svénta angíl Mánde, pal-dová so Me som Raj Devél, tumaró Devél, som Svénto, i Me čhudjom dre rig tumen manušéndyr, sob (kaj) tumé te javén Miré. Murš ci džuvlý, kóli jone javéna te vykharen mulen ci te čovahaniakiren, mek te javén otdyné jone meribnáske, trej te domaren len barénca, léngiro rat te javél pe lénde.’” I phendiá Raj Devél Mojzáske: “Rákir rašange, Aaronóskire čhavénge, i phen lénge: ‘Mek jone te na magirén pes čilavibnasa ke muló péskire manušéndyr; iekh so ke péskiri pašatuny seménca, ke péskiri daj i ke péskiro dad, ke péskiro čhavó i ke péskiri čhaj, ke péskiro pšal, i ke péskiri phen, saví te javél dre čhaja, i dživdiá pašýl léste i na sys paloróm, saštý léske te kerél davá nažužypen; i čilavibnasa ke kon by da te na javél dre péskire manušénde jov naštý te magirel pes, sob (kaj) te na jačél nažužo. Lénge naštý te čhinen ke nangipén (te muraven) péskire šeré i te podčhinen jagóry (kraí) dre péskire čhora (broda), i te kerén čhinybén pe péskire masá. Lénge trej te javén svénta péskire Devléske, i lénge naštý te teliakiren péskire-Devléskiro lav, pal-dová so jone janéna Ráske-Devléske svénto dyibén (žértva) pe jag, maró péskire Devléske, i paldavá isyn bangé te javén svénta. Lénge naštý te len pal péste biladžakunia džuvliá i došvalia čha, i naštý te len i džuvliá, savjá mekciá lákiro rom, pal-dová so jone isyn svénta péskire Devléske. Vysvencyn len, pal-dová so jone janéna maró tyré Devléske: mek te javén jone túte svénta, pal dová so Me som svénto Raj Devél, Savó svenciakirela tumen. Kóli e rašaskiri čhaj magirela pes biladžaipnasa, tedy joj teliakirela péskire dadés; jagása trej la te xačkirén. I baró rašáj péskire pšaléndyr, pe saveskiro šeró čhuvéla makhibnaskiro jeliejo (dzet), i savó isyn vysvencyndlo, sob (kaj) te ur'jelpe dre svénta rizy, naštý te nangiakirel péskiro šeró i te na kušel péskire rizy; i ni ke kon muléndyr naštý jov te poddžál: adiáke-pac' čilavibnasa ke muló péskiro dad i péskiri daj jov naštý te magirel pes. I sventoné štetóstyr jov naštý te otdžal i te teliakirel péskire Devléskiro svénto štéto, pal-dová les vysvencyndle makhibnaskire jeliejosa vaš léskire-Devléske. Me som Raj Devél. Paloróm léske trej te lel patyvalia ternia džuvliá. Léske naštý te lel džuvliá, savjate myjá rom, ci savjá rom mekciá, ci savjá obhohade, ci biladžakunia džuvliá, ne patyvalia ternia džuvliá péskire manušéndyr isyn bangó jov te lel paloróm; Léske naštý te ladžakirel péskiro siemjo (sal) dre péskire manušénde, pal dová so Me som Raj Devél, Savó les svenciakirava.’” I phendiá Raj Devél Mojzáske dasavé lavá: “Rákir Aaronóske dasavé lavá: ‘Nikón tyré rodóstyr dre saré léngire ródy, savénde pe masá javéla nauhtylyben, naštý te poddžál, sob (kaj) te janel maró péskire-Devléske; nikón, konéste pe masá isyn nauhtylyben, naštý te poddžál, ni kororó, ni langalo, ni ragando (urodo), ni savó, konéste isyn piriphagirdy ĥerój, ci piriphagirdo vast, ni ĥyrbasa, ni šuké člienosa, ni karliko, ni pliamasa pe jakh, ni ĥeralo, ni džuvalo (pošesiasa), ni došvalo murš (jevnuho); nijékh manúš rašaskire Aaronóskire rodóstyr, savéste pe masá isyn nauhtylyben, naštý te poddžál, sob (kaj) te janel Ráske-Devléske svénta dyibená; nauhtylyben isyn pe léste, paldavá léske naštý te poddžál, sob (kaj) te janel maró péskire-Devléske. Maro péskire Devléskiro isyn baré sventymatyr i sventymatyr jov saštý te xal; ne ke pologo jov naštý te javél, i ke altárjo naštý léske te poddžál, pal-dová so nauhtylyben isyn pe léste: jov naštý te teliakirel Miro svénto štéto, pal-dová so Me som Raj Devél, Savó svenciakirela len.” I dyjá te džinél davá Mójza Aaronóske i léskire čhavénge i saré Izrailjoskire čhavénge. I phendiá Raj Devél Mojzáske, rakirí: “Rákir Aaronóske i léskire čhavénge, sob (kaj) jone rakhibnasa te rikirén pes angíl Izrailjoskire-čhavéngire sventyma, i te na magirén Miro svénto lav dro dová, so jone rakiréna Mánge. Me som Raj Devél. Phen lénge: ‘Kóli vari-kon saré tumaré manušéndyr dre tumaré ródy, te rikirél pe péste nažužypen, te poddžál ke sventyma, savé posvencynena Izrailjoskire čhavé Ráske-Devléske, tedy te xasjol dová di Miré móstyr. Me som Raj Devél. Nijékh Aaronóskire rodóstyr prokazasa ci konéste thadéla, odoléske naštý te xal sventyma, paka jov na vyžužakirelape; i kon čilavéla vari-so nažužo mulestyr, ci konéste vyčhuvelape siemjo (sal), ci kóli vari-kon čilavéla vari-savó sozdyiben, so polzynela, savéstyr jov jačéla nažužo, ci čilavéla manušés, savéstyr jov jačéla nažužo, savó te na javél nažužypen, odová, kon čilavéla saró, nažužo javéla jov ke bel'vél', i léske naštý te xal svénto angledýr, syr jov obmorela péskire masá paniésa; ne kiéli zadžála kham i jov javéla žužó, tedy jov moginéla te xal sventyma, pal-dová so davá sys léskiro xabén. Padal' i mas, so jaciápe riskiribnáskire murdalestyr (zvierjostyr) jov te na xal, sob (kaj) te na magirelpe dalésa. Me som Raj Devél. Mek te rakhén jone Miré uphenybená, sob (kaj) te na lydžán pe péste grého, i te na merén dre léste, kiéli jone phagirena davá. Me som Raj Devél, savó svenciakirela len. Nikonéske javire manušéske naštý te xal sventyma: savó dživéla ke rašáj i nalyno butiarno naštý te xal sventyma; kóli rašáj kinela péske manušés pal rup, tedy jov saštý (moginéla) te xal sventyma; adiáke-pac' i léskire kherítka saštý te xan léskiro maró. Kóli rašaskiri čhaj vydžála paloróm pal javire manušéste rigátyr, tedy joj naštý te xal, so janéna dre sventyma; kiéli rašaskiri čhaj jačélape pivliasa (udovasa) ci rozdžalape romesa, i čhavén láte nane, i risjola dre péskire dadéskiro kher, syr sys dro péskiro ternypen, tedy joj saštý (moginéla) te xal péskire-dadéskiro maró; a nijékh javire rigátyr naštý les te xal. Kon délape dukhá (keréla doša) i xála vari-so sventymatyr, odová isyn bangó te otdél rašáske svénto i te dočhuvel ke joj lákiri pándžto paš. Rašange kokorenge naštý te magirén Izrailjoskire-čhavengiri sventyma, savó jone janéna Ráske-Devléske, i lénge naštý te vykharen pe péste bang dro čoripén, kiéli javéna te xan péskiri sventyma, pal-dová so Me som Raj Devél, Savó svencynela len.’” I phendiá Raj Devél Mojzáske dasavé lavá: “Rákir Aaronóske i léskire čhavénge i saré Izrailjoski-re čhavénge, i phen lénge: ‘Kóli vari-kon Izrailjoskire kheréstyr, i manušéndyr, savé javné javire rigátyr, i dživéna maškír Izrail'tianende, ci pir saví sovláh, ci pir iló janéla péskiro svénto dyibén, savó janéna Ráske-Devléske dro célo shačkiribén, tedy, sob (kaj) lénge te javél Rástyr-Devléstyr láska, svénto dyibén trej te javél bidošéngiro, murš, baré murdalestyr, bakréndyr i buznendyr (kozlendyr); nisavó murdál (žyvotno), pe savéste isyn doš, te na janén; pal-dová so davá na déla tuménge Rástyr-Devléstyr láska. I kóli vari-kon janéla mírno svénto dyibén Ráske-Devléske, sob (kaj) te kerél pir sovláh, ci pir iló, baré murdalestyr ci tyknestyr, tedy svénto dyibén isyn bangó te javél bidošéngiro, sob (kaj) te javél lačhó Ráske-Devléske: nisaví doš naštý pe léste te javél; korores murdales, ci savés domardes, ci urodos, ci nasvales, ci ĥerales, ci džuvales, dasaven na janén Ráske-Devléske, i dro svénto dyibén na den len pe Ráskire-Devléskiro altárjo; guruvóres i bakrés člienenca drieván dlengonenca ci tyknenca, syr svénto dyibén péskire iléstyr tu moginésa te janes; a kóli pir sovláh, tedy davá na javéla pir láska Devléske; murdalá, savéste jatry rostasade, rozmarde, otkušne ci vyčhindlé na janén Ráske-Devléske, i pe tumarí phuv davá na kerén; i javire-phuvjákire manušéngire vasténdyr na janén sarén dasaven murdalén dro svénto dyibén tumaré Ráske-Devléske, pal-dová so pe lénde isyn doš; jone na janéna tuménge láska Devléstyr.’” I phendiá Raj Devél Mojzáske dasavé lavá: “Kiéli bijandjola (lotjola) guruvoro, ci bakroró, ci buznoro, tedy eftá dyvesá léske trej te javél pašýl péskire date, a ohtotone (bidujengire deštone) dyveséstyr javéla lačhó vaš janybén dro svénto dyibén Ráske-Devléske; ne ni gurumnia, ni bakriá na čhinen dro jekh dyvés léngire dasa. Kóli janéna Ráske-Devléske parikiribnaskiro svénto dyibén, tedy janén les adiáke, sob (kaj) jov te del tuménge láska; dre dová-pac' dyvés trej les te xan, na jačkiren látyr ke ránko (ke zlóko). Me som Raj Devél. I rakhén Miré priphenybená i kerén saró pir lénde. Me som Raj Devél. Na magirén Miro svénto lav, sob (kaj) Me te javav sventonesa maškír Izrailjoskire čhavénde. Me som Raj Devél, Savó svenciakirela tumen, Savó vylydžijá tumen Jegiptóskire phuvjátyr, sob (kaj) te javél tumaró Devél. Me som Raj Devél.” I phendiá Raj Devél Mojzáske, rakirí: “De te džinén Izrailjoskire čhavene i phen lénge pal Ráskire-Devléskire svénki, dre savé tuménge trej te skedén svénta skedyibena. Ĥáda, Miré svénki isyn dasavé: šov dyvesá saštý te kerés butý, a pe eftáto (bitrinéngiro déšto) dyvés sávato (subóta) te otkinjon, svénto skedyibén; nisaví butý na kerén: davá isyn sávato Ráskiro-Devléskiro dre saré tumaré kherá. Ĥáda, isyn Ráskire-Devléskire svénki, svénta skedyibena, savé tuménge trej te kerén dre péskiro časo (cýro); dro pérvo (anglatunó) čhon, pe dešuštartone-čhonéskiro dyvés bel'velié te javél Patradí Ráskire-Devléskiri; i pe dešupandžto dyvés dolé čhonéskiro svénko opriesnoki Ráske-Devléske; eftá dyvesá xan apriesnoki. A pe anglatunó (pérvo) dyvés mek te javél tuménde svénto skedyibén; nisaví butý na kerén; i dre saré eftá (bitrinéngiro deš) dyvesá janén Ráske-Devléske svénta dyibená; pe eftáto dyvés adiáke-pac' svénto skedyibén; nisaví butý na kerén.” I phendiá Raj Devél Mojzáske dasavé lavá: “De te džinén Izrailjoskire čhavénge i phen lénge: ‘Kiéli javéna pe phuv, saví Me dáva tuménge, i javéna te čhinen pe láte žatva, tedy janén pérvo tumaré-žatvakiro ĥarbo (snopo) ke rašái; jov ĥazdéla davá ĥarbo angíl Raste-Devléste, sob (kaj) tuménge te javél Ráskire-Devléskiri láska; pe javír svenkoskiro dyvés ĥazdéla les rašái; i dro dyvés, kiéli ĥazdéna ĥarbo, janén Ráske-Devléske dre célo shačkiribén jekhe-beršytkone bidošengire bakrores, i khetané lésa marunó janybén duj dešta pašá efa pšenično (parné givestyr) jaržó pirimiešyndlo jeliejosa, dro Ráskire-Dev-léskiro svénto dyibén, vaš gudló thuv, i vyčhuiben ke jov štárto gino mol (vino); ni savó nevó maró, ni šuké ziárki, ni kinde ziárki na xan ke dová dyvés, dro savó janéna amaré Ráske-Devléske janybén: davá isyn viéčno uphenybén dre tumaré ródy dre saré tumaré kherá. Otginen péske pervoné dyveséstyr korigedýr (pozže) svénko, odolé dyveséstyr, dro savó tumé janéna trinskiribnaskiro ĥarbo, eftá pherdé kurke, ke pérvo dyvés korigedýr (pozže) eftáto kurko otginen pandždešá dyvesá i tedy janén nevó marunó janybén Ráske-Devléske: ianén tumaré kherendyr duj laby maró te ĥazdén, savé trej, sob (kaj) te javén duje-dešengire pašendyr, savé isyn dre efa pšeničnone jaržestyr, i trej te javén spekne šutle, syr pérvo barjakirdó (plódo) Ráske-Devléske; ianén khetané marésa eftá bakrorén bidošakiren, jekhe-beršytkonen, i baré kheritkoné murdaléndyr (skotóstyr) jekhe guruvóres i dujén bakrén; mek te javél davá dro célo shačkiribén Ráske-Devléske, i marunó janybén khetané sventoné dyibnasa te počhuven, dro svénto dyibén, dro gudló thuv, lačhó Ráske-Devléske. Kerén adiáke-pac' buznengire stadatyr jekhe buznés dre svénto dyibén pal grého, i dujén jekhe-beršytkonen bakrén dre mírno svénto dyibén. O rašáj isyn bangó te janel davá, trinskiri angíl Raste-Devléste, khetané trinskirde marésa pervoné barjakirdeskire (plodoskire) i duje bakrenca. Davá javéla posvencyndlo Ráske-Devléske; vaš rašáske, i kharén manušén dro davá dyvés, mek te javél tuménde svénto skedyibén, nisaví butý te na kerén: davá isyn viéčno uphenybén dre saré tumaré kherá dre tumaré ródy. Kiéli javéna tumé pe tumarí phuv te sčhinen žatva, na čhinen ke kónco (ke jagóro) tyrí félda, kiéli sčhinesa, i so jačélape tyré žatvatyr, na podkede; čororeske i manušéske, savó javdiá javire rigátyr jačkir davá: Me som Raj Devél, tumaró Devél.’” I phendiá Raj Devél Mojzáske, rakirí: “Phen Izrailjoskire čhavénge: dre eftáto čhon, pe anglatuné-čhonéskiro dyvés mek te javél tuménde otkhinyben, svénko rogengiro (trubengiro), svénto skedyibén; na kerén nisaví butý, i janén Ráske-Devléske svénto dyibén.” I phendiá Raj Devél Mojzáske dasavé lavá: “Adiáke-pac' pe déšto dyvés dro davá-pac' eftáto čhon, dyvés te žužakiren pes, mek te javél tuménde svénto skedyibén; pririkiren (pritasaven) tumaré dijá, i janén Ráske-Devléske svénto dyibén; na kerén nisavó réndo (diélo) dro davá dyvés, pal-dová so davá isyn dyvés te žužakirenpe, sob (kaj) te žužakiren tumé pes angíl Raste-Devléste, tumaré Devléste; a kažno di, savó na pririkirela pes pe davá dyvés, javéla xasiakirdo péskire manušéndyr; i kóli vari-savó di javéla te kerél vari-savó réndo dro davá dyvés, Me xasiakiráva davá di lákire manušéndyr; na kerén nisavó réndo: davá syn viekoskiro uphenybén dre tumaré ródy dre saré tumaré kherá; davá isyn vaš tuménge dro sávato te otkhinjol, i obrikiren tumaré dijá, bel'veliatyr dolé dyveséstyr dro jeniáto dyvés čhonéskiro; bel'veliatyr ke bel'vél' svenkinen tumaró sávato.” I phendiá Raj Devél Mojzáske, rakirí: “Phen Izrailjoskire čhavénge: dešupandžengiro dyveseskiro dro dová-pac' eftáto čhon javéla svénko kuščy (budy), eftá dyvesá Ráske-Devléske; pe pérvo dyvesá svénto skedyibén, na kerén nisaví butý; saré eftá dyvesá janén Ráske-Devléske svénto dyibén; pe ohtóto (bidujéngiro déšto) dyvés mek te javél tuménde svénto skedyibén, i janén svénto dyibén Ráske-Devléske: davá isyn otdyibén svenkoskire, na kerén nisaví butý. Ĥáda, isyn Ráske-Devléske svénki, dre savé tuménge trej te skedén svénto skedyibén, sob (kaj) te janes dro jagitko svénto dyibén Ráske-Devléske célo shačkiribén, marunó janybén, začhindlé svénta dyibená i thaduno dyibén, kažno dro péskiro dyvés: apríč sávaty Ráskire-Devléskire, i apríč tumaré dáry, i apríč saré tumaré sovlahá i apríč saró, so tumé janéna pir tumaró iló, so tumé déna Ráske-Devléske. A pe dešupandžto dyvés dro jeniáto (bijekhéskiro déšto) čhon, kiéli tumé ukedena, so bijandiá phuv, svenkinen Ráskire-Devléskiro svénko eftá dyvesá: dro pérvo dyvés otkinyben i pe ohtóto dyvés te javél otkinyben. A pe pérvo dyvés len péske gožone vešéstyr randiá (vétki), pal'makire randiá i randiá buĥle-patriniengire vešéstyr i vierba rekátyr (leniátyr), i radynénpe pherdés angíl Raste-Devléste, tumaré Devléste, eftá dyvesá. I svenkinen davá Ráskire-Devléskiro svénko eftá dyvesá dro berš: davá javéla viekoskiro uphenybén dre tumaré ródy; pe eftáto čhon svenkinen les. I javéna tumé te dživén eftá dyvesá dre budy; kažno péskiro manúš, Izrail'tianino isyn bangó te dživél dre budy, sob (kaj) te džinén tumaré ródy, so dre budy čhudjom Me te dživén Izrailjoskire čhavén, kiéli Me vylydžijom len Jegiptóskire phuvjátyr. Me som Raj Devél, tumaró Devél.” I dyjá te džinén Mójza Izrailjoskire čhavénge pal Ráskire-Devléskire svénki. I phendiá Raj Devél Mojzáske dasavé lavá: “Priphen Izrailjoskire čhavénge, sob (kaj) jone te janén túke žužó, vymardo jeliejo (dzet) vaš dud (svéto), sob (kaj) saró časo te xačol momolýtko (svietíl'niko); pal šýrma angíl kovčego dosykaibnása (otkrovienijasa) dre skedyibnáskiri šátra Aaróno i léskire čhavé isyn bangé te čhuvén les angíl Raste-Devléste ŭsády (sak) bel'veliatyr ke ránko (ke zlóko): davá javéla viekoskiro uphenybén dre tumaré ródy. Pe žužó šandalo (podsviečniko) trej léske te čhuvél momolýtko (svietíl'niko) ŭsády (sak) angíl Raste-Devléste. I le pšenično jaržó i spek léstyr dešudúj maré; dro kažno maró trej te javél duj dešta efatyr; i čhuv len dre duj riady, pir šov dro riado, pe žužó skamínd angíl Raste-Devléste; i čhuv pe kažno riado žužó livano, i javéla davá pašýl maró, dro ripiribén, dro svénto dyibén Ráske-Devléske; dro kažno savatoskiro (subotakiro) dyvés saró časo (cýro) trej léske te čhuvél len angíl Raste-Devléste Izrailjoskire čhavéndyr: davá javéla viekoskiro dorakiribén; jone javéna vaš Aaronóske i vaš léskire čhavénge, savé javéna te xan len (maré) pe svénto štéto, pal-dová so davá isyn bari sventyma vaš lénge Ráskire-Devléskire sventoné dyibnástyr: davá isyn viekoskiro uphenybén.” I vygijá čhavó jekhe Izrail'tiankakiro, savó bijándyja Jegiptianinostyr, ke Izrailjoskre čhavé, i roskostiape dre stáno Izrail'tiankakiro čhavó Izrail'tianinosa; i kostia Izrail'tiankakiro čhavó Ráskire-Devléskiro lav i obrakirdia. I jandlé les ke Mójza; i čhudé les dre bešyben ke davá časo, paka javéla phendly léske Ráskire-Devléskiri vólia.” I phendiá Raj Devél Mojzáske, rakirí: “Vylydža manušés, savó obrakirdia Ráskire-Devléskire lav javrí stanostyr, i saré, kon šunéla, les mek te čhuvén péskire vastá pe léskiro šeró, i saró skedyibén te domarel les barénca; i Izrailjoskire čhavénge phen: ‘Kon javéla te obrakirel péskire Ras-Devlés, odová lydžála péskiro grého; i odová manúš, savó košela Ráskire-Devléskire lav isyn bangó te merél, barénca zamarela les saró skedyibén: ci manúš, savó javdiá javire rigátyr, ci péskiro manúš léla te košel Ráskire-Devléskire lav, adasavó otdynó javéla meribnáske. Kon zamarela vari-savé manušés, odová javéla otdynó meribnáske. Kon zamarela kheritkoné murdales (skoto), odová isyn bangó te zapleskirel pal léste, murdál pal murdaléste. Kon keréla péskire pašatuneske doš (škoda) pe masá, odoléske trej te kerél dová-pac', so jov kerdiá: phagiriben pal phagiriben, jakh pal jakh, dand pal dand; syr jov kerdiá doš pe javire-manušéskire masá, adiáke i léske trej te kerés. Kon zamarela kheritkoné murdales, odová isyn bangó te zapleskirel pal saró; a kon zamarela manušés, odolés manušés isyn bangé te otdén meribnáske. Jekh séndo isyn bangó te javél tuménde, syr vaš manušéske, savó javdiá javire rigátyr, adiáke i vaš péskire manušéske; pal-dová so Me som Raj Devél, Devél tumaró.’” I piriphendia Mójza Izrailjoskire čhavénge; i vylydžiné manušés, savó obrakirdia Ráskire-Devléskire lavá javrí stanostyr, i domardé les barénca, i kerdé Izrailjoskire čhavé, syr priphendiá Raj Devél Mojzáske. I phendiá Raj Devél Mojzáske pe bérga Sinajo dasavé lavá: “De te džinén Izrailjoskire čhavénge i phen lénge: ‘Kiéli javéna pe phuv, saví Me dáva tuménge, tedy phuvjake trej te otkinjol pe Ráskire-Devléskiro sávato; šov berš počhuv ziárki dre tyrí félda i šov berš občhin tyró vinagrádniko (drakhitko), i skéde léngire barjakirdé (plódy), a pe eftáto berš mek te javél phuvjákiro sávato vaš otkhinyben, Ráskire-Devléskiro sávato: pe tyrí félda na čhuv, i tyró vinagrádniko na občhin; so kokoró vybarjola pe tyrí félda, na čhin, i múri na obkuš naobčhindle tyré lozatyr; mek te javél davá berš phuvjake otkhinyben; i davá, so vybarjola pe phuv dro savatytko berš, to davá javéla tuménge xabnasa, túke i tyré pisharíske, i tyré pisharicake, i tyré andynarščykoske, i odolé manušéske, savó javdiá javire rigátyr i dživéla ke tu; i kheritkoné murdaleske (skotoske) tyréske i riskiribnáskire murdalénge (zvierienge), savé dživéna pe tyrí phuv, mek te javél saró, so bijandjola pe láte xabnasa. I otgin péske eftá savatytko beršá, eftá móly pe eftá berš, sob (kaj) te javél túte dre eftá savatytka beršá štardešá jeniá berš; i priphen te bašaven pe rógo dro eftáto čhon, pe déšto-čhonéskiro dyvés, pe dyvés te žužakirenpe bašaven pe rógo pir sarí tumarí phuv; i sob (kaj) te svencynen pandždešengiro berš, i den te džinén pal vol'nyma pe phuv saré lákire manušénge; mek te javél davá tuménde baró svénko; i risjon kažno pe péskiro štéto, i kažno risjov ke péskiro ródyco. Pandždešytko berš mek te javél tuménde baró svénko: na čhuvén dre phuv (na sieinen) i na čhinen (žnieinen), so kokoró barjola pe phuv, i na kuš múri lákire naobčhindle lozatyr, pal-dová so davá isyn baró svénko: svénto mek te javél jov vaš tuménge; a so bijándyja pe félda, xan. Dro svenkitko (jubilieino) berš kažno manúš risjola pe péskiro štéto. Kóli javésa te biknes vari-so tyré pašatuneske, ci javésa so te kines tyré pašatunestyr, na pritasaven jekh jekhés; pir rozgindle beršá korigedýr (pozžedýr) tu san bangó te kines tyré pašatunestyr, i pir rozgindle beršá kofostyr jov isyn bangó te biknel túke; kóli but jačénape beršá, barjakir timín; a kóli nábut jačénape beršá, to tykniakir timín, pal-dová so džindlé beršá, to vaš žatva jov biknela túke. Na pritasaven jekh jekhés, dar tyré Devléstyr, pal-dová so Me som Raj Devél, tumaró Devél. Kerén saró pir Miré uphenybená, i rakhén Miré zakóny, i javéna te dživén štylytkes pe phuv; i javéla phuv te del péskiro barjakirdó (plódo), i javéna te xan čalés, i javéna te dživén pe láte štylytkes. Kóli tumé phenéna: ‘So aménge te xas pe eftáto berš, kiéli ame na javása ni te čhinas (sieinas), ni te ukedas umaloto (urožajo), so ame kerása?’ Me bičhaváva pe šóvto berš pe tuménde Miro bahtiakiribén, i jov janéla umaloto pe trin berš; i tumé javéna te počhuven dre phuv pe ohtóto (bidujéngiro déšto) berš, ne te xan javéna barjakirdé (plódy) phurané umalotostyr ke jeniáto berš, ke davá časo, paka dodžála ke spialyma umaloto léskiro, te xan javéna phuranó umaloto. Phuv naštý te biknen sarésa: pal-dová so Mirí isyn phuv, tumé san čúža manušá i javire-rigakire manušá; Pir sarí tumarí phuv tumé den vólia te vykinen phuv. Kóli tyró pšal jačéla čororó i biknela péskiri phuv, tedy javéla léskiri pašatuny seménca i vykinela, so bikindia léskiro pšal; kóli nane konéske pal léste te vykinel, ne kokoreste léste javéla barvalypén, i lathéla, ci but trej pal vykinybén, to tedy jov te rozginel péskire bikiibnytka beršá, i te riskirél, so jačélape odoléske, konéske jov bikindia, i te lel pale nevéstyr péskiro xulaiben; kóli léskiro vast na lathéla, ci but léske trej te riskirél, tedy dová, so jov bikindia, jačélape dre vastá manušéste, savó kindia jov ke svenkoskiro berš, a pe svenkoskiro berš jov otdžala, i jov nevéstyr vykinela pal péste. Kóli vari-kon biknela dro fóro kher, dre savó saštý te dživés, oblydžino vantasa: tedy les saštý te vykines ke beršeskiro kónco (ke jagóro) léskire bikiibnastyr: saštý te vykines les pal saró berš; kóli jov na javéla vykindlo pal saró berš, tedy kher, savó isyn dre fóro, i dro savó isyn vánta, jačélape odolé manušéste, savó les kindia dre léskire ródy, i pe svénko kher na otdžala léstyr. A kherá dre gavá, pašýl savénde nane vánta, trej te ginen len pal jekh phuvjákire feldasa: te vykines len saštý, i pe svénko jone otdžana. A Lieviténgire fórja, léngire kherá dre fórja, Lieviténge ŭsády (sak) saštý te vykinen; a kon Lievitendyr na vykinela, tedy léngiro bikindlo kher dro fóro pe svénko otdžala, pal-dová so dre fórja Lieviténgire kherá isyn léngire maškír Izrailjoskire čhavénde; i féldy pašýl léngire fórja te biknes naštý, pal-dová so davá isyn viekoskiro léngiro mištypén. Kóli tyró pšal jačéla čororó, i peréla dre urieža, tedy podrikir les, ci te javél jov čúžo, ci savó javdiá javire rigátyr, te dživél túsa. Na le léstyr baripén (procento) i kófo, i dar tyré Devléstyr; sob (kaj) te dživél tyró pšal túsa. Na de léske tyré lové tel baripén (procento), i na de tyró maró léske vaš kófo. Me som Raj Devél, Devél tumaró, Savó vylydžijá tumen Jegiptokire phuvjátyr, sob (kaj) te del tuménge Xanaanóskiri phuv, sob (kaj) te javav tumaré Devlésa. Kiéli túte čororjola tyró pšal i bikindlo javéla túke, tedy na čhuv pe léste pishar'jengiri butý; jov isyn bangó túte te javél syr nalyno, syr manúš, savó javdiá javire rigátyr i ĥará dživéla; ke svenkoskiro berš mek te kerél butý túte, a tedy mek te otdžal jov tútyr, kokoró i lésa léskire čhavé, i risjola ke péskiro kherítko ródo (pliemjo), i nevéstyr te zadžál dre léskire-dadéngiro mištypén. Pal-dová so jone isyn Miré pishárja, savén Me vylydžijom Jegiptóskire phuvjátyr: naštý len te biknen, syr biknena pishar'jén. Na xulain pe lénde bimanušytkes, i dar tyré Devléstyr. A, sob (kaj) tyró pishári i pisharica te javén Najudytkoné manušéndyr, savé dživéna pašýl tuménde; to kinen léndyr péske pisharís i pisharica. Adiáke-pac' i manušéngire čhavorendyr, savé javné javire rigátyr, i dživéna pašýl tuménde, saštý (možna) te kinen, i léngire kheritkoné rodóstyr (pliemjostyr), savó isyn tuménde, savó lénde bijándyja pe tumarí phuv, i jone moginéna te javén tumaré. Tumé saštý te piridén len syr meknó mištypén i tumaré čhavénge pir péste syr majonko; xulainen viéko lénca, syr pishar'jénca. A pe tumaré pšalénde, Izrailjoskire čhavénde, jekh pe jekhéste na xulainen zorjása. Kóli vari-konéste, kon javdiá javire rigátyr, cji, savó javdiá te dživél ke tu, javéla léste barvalypén, a pšal tyró angíl léste jačéla čororó i biknela pes manušéske, savó javdiá javire rigátyr, savó javdiá to dživél túte, ci vari-savé manušés, javire rodycóske, savó javdiá javire rigátyr; to tedy paló biknyben saštý les te vykinel; vari-kon léskire pšaléndyr isyn bangó te vykinel les, ci léskiro kak, ci léskire-kakeskiro čhavó isyn bangó les te vykinel, ci kon-libo léskire semencatyr, léskire rodycóstyr, isyn bangó les te vykinel, cji, kóli javéla léste lové, kokoró pes vykinela. I jov isyn bangó te rozginelpe manušésa, savó les kindia, léla te ginel dolé beršestyr, kiéli jov bikindia pes, ke svenkoskiro berš, i lové, pal savé jov bikindia pes, isyn bangó te otdél léske pir beršengiro ginybén; syr butiarno pir časo jov isyn bangó te javél léste; i kóli iščo (inké) but jačélape berš, tedy pir léngiro ginybén jov isyn bangó te otdél dre vykinybén pal péste lové, pal savé jov sys kindlo; kóli nábut jačélape berš ke svenkoskiro berš, tedy jov isyn bangó te piriginel, i pal dalé beršá te otdél pal péste vykinybén. Jov isyn bangó te javél léste, syr nalyno, pe saré beršá; jov na bangó te javél xulása pe léste zorjása dre tyré jakhá. Kóli jov na vykinelape adiáke, tedy dre svenkoskiro berš otdžala kokoró i léskire čhavé lésa, pal-dová so Izrailjoskire čhavé isyn Miré pishárja; jone isyn Miré pishárja, savén Me vylydžijom Jegiptóskire phuvjátyr. Me som Raj Devél, tumaró Devél. Na kerén péske vyčhudé obrazy (kumiry) i vyčhindlé muiá (izvajanii), i stýlby na čhuvén péste, i bará vyčhindlé mujenca na čhuvén pe tumarí phuv, sob (kaj) te na bandjon angíl lénde, pal-dová Me som Raj Devél, tumaró Devél. Rakhén sávaty (suboty) Miré i den patýv ke svénto Miro štéto. Me som Raj Devél. Kóli tumé javéna te kerén pir Miré uphenybená, i Miré priphenybená javéna te rakhén i te kerén pir lénde, tedy Me dáva tuménge bryšynda dre péskiro časo (cýro), i phuv déla péskire barjakirdé (plódy), i feldýtka vešá déna péskiro barjakirdó (plódo); i ukedyiben maritko javéla te dodžal tuménde ke vinagradoskiro skedyibén, a vinagradoskiro skedyibén javéla te dodžal ke sieinyben, i javéna te xan péskiro maró čalés, i javéna te dživén pe tumarí phuv štylytkes (bidarakires). Me bičhaváva ramánjo (miro) pe tumarí phuv, tumé pasjona te soven, i nikón tumen na strahakirela, Me tradava krig mižehone riskiribnáskire murdalén (zvierien) tumaré phuvjátyr, i kurtála na prodžála pir tumarí phuv. I tumé javéna te tradén tumaren vergén, i peréna jone angíl tuménde kurtalátyr; I pandž tuméndyr protradena šel manušén, i šel tuméndyr protradena but vergén ke kalypén, i peréna tumaré vérgi angíl tuménde kurtalátyr. Me podykhava pe tuménde, i buté-bijanybnytkonenca (plodorodnenca) Me keráva tumen, i Me butyrjakirava but tumen, i Me javáva tvardo (bi kunipnaskiro) dre Miro zavieto (dorakiribén) tuménca; i tumé javéna te xan phuranó javire-beršytko, i vyčhurdena phuranó vaš nevó: i Me čhuváva Mirí šátra (kher) maškír tuménde, i Miro dieske tumé na javéna džungalé (stetka); i Me javáva te psirav maškír tuménde, i Me javáva tumaré Devlésa, a tumé javéna Miré manušá. Me som Raj Devél, tumaró Devél, Savó vylydžijá tumen Jegiptóskire phuvjátyr, sob (kaj) tumé te na javén odój pishar'jénca, i te phagirav sastyrá tumaré ĥamostyr, i Savó lydžijá tumen zaĥazdyne šerésa. Kóli tumé na kandéna Man, i na javéna te kerén pir saré dalé priphenybená, i kóli tumé javéna te na prilén patyvása Miré uphenybená, i kóli tumaró di isyn nasvaló (brydinelape) Miré zakonendyr adiáke, so tumé na javéna te kerén pir saré Miré uphenybená, phagiri Miro zavieto, to tedy i Me keráva tuménca adiáke: Me bičhaváva pe tuménde dar, nasvalypen i xačkiribén, savéndyr khinjona jakhá i našavela zor di, i tumé javéna te počhuven dre phuv tumaré ziárki (siemi) ivjá, i tumaré vérgi shana len; i Me riskiráva Miro muj pe tuménde, i tumé peréna angíl tumaré vergénde, i namala tumaré javéna xulaja pe tuménde, i tumé prastána, kiéli nikón na javéla te tradelpe pal tuménde. Kóli pir saró davá tumé na kandéna Man, to tedy Me eftá móly keráva baredýr kára pal tumaré gréhi, i Me phagirava phut'kirdy tumarí nartyma (uporstvo), i bolybén tumaró uprál keráva, syr sastýr, i phuv tumarí, syr xarkóma (mied'); i ivjá (naprásnes) javéla te zdžal tumarí zor, i phuv tumarí na déla péskire čar'jenge te barjon, i phuvjákire vešá na déna péskire barjakirdé (plódy). Kóli paló saró davá tumé džána pe Mánde, i na zakamena te šunén Man, tedy Me dočhuvava tuménge maribén dre eftá móly pal tumaré gréhi: i Me bičhaváva pe tuménde feldytkone riskiribnáskire murdalén (zvierien), savé otlena tumaré čhavén, xasiakirena tumaré kheritkoné murdalén (skoto), i tumen skerena tyknedýr, adiáke, so javéna čhučé tumaré dromá. Kóli i paló davá Me na vysykliakirava tumen, i tumé džána pe Mánde, to tedy i Me džáva pe tuménde, i čhuváva kára pe tuménde dre eftá móly pal tumaré gréhi, i janáva Me kurtála pe tuménde te othal pale pal zavieto; i kóli tumé garadjona dre tumaré fórja, tedy Me bičhaváva pe tuménde fránsy (fuiá), i otdyné tumé javéna dre vergoskire vastá. A maró, savó déla zor manušéske, Me xasiakiráva tuménde; deš džuvliá javéna te peken tumaró maró dro jekh bov, i javéna te otdén maró tumaró, važyny les; tumé javéna te xan, i na javéna čale. Ne kóli iščo (inké) i paló davá tumé na kandéna Man i džána pe Mánde, tedy i Me dre xolý džáva pe tuménde, i čhuváva kára pe tuménde dre eftá móly pal tumaré gréhi, i tumé javéna te xan tumaré-čhavengiri loč (plot'), i loč tumaré-čhajengiri javéna te xan; Me rosphagirava ke phuv tumaré vučipená, i rosphagirava tumaré stýlby, i čhurdava telé tumaré trúpy pe tumaré-idolengire koterá, i jačéna džungalé (brytka) tumé Miré dieske; a tumaré for'jéndyr Me keráva čhučí phuv, i skerava čhučé tumaré khangirja, i Me, na javáva te sungavav gudló thuv tumaré janybnastyr. I Me keráva tumarí phuv čhučí adiáke, so denape divoske pal láte tumaré vérgi, savé dživéna pe láte; a tumen rosčhurdava Me te dživén maškír manušénde i nangiakirava palál pal tuménde kurtála, i javéla phuv tumarí čhučí i fórja tumaré rosphagirdé. Tedy phuv čaliakirela pes pal péskire sávaty (suboty) dre saré péskire čhučipnaskire dyvesá; kiéli tumé javéna pe tumaré-vergengiri phuv, tedy javéla te otkhinjol phuv, i čaliakirela pes pal péskire sávaty. Joi, phuv, javéla te otkhinjol dre saré péskire čhučipnaskire dyvesá, ci but joj na otkhinyja dre tumaré sávaty, kiéli tumé dživdé pe láte. Odolénge, kon jačélape tuméndyr, Me bičhaváva dre iló namuršypen pe phuv léngire vergengiri, i šumo patriengiro (listengiro), savó kuninelape, tradéla len, i tumé prastána, syr kurtalátyr, i peréna, kiéli nikón na tradelape, i obštavenape jekh pe jekhéste, syr kurtalátyr, na dykhí pe davá, syr nikón na tradelape, i na javéla tuménde zor te terdjon angíl tumaré vergénde; i xasjona tumé maškír manušénde, i shala tumen phuv tumaré vergengiri; a kon jaciápe tuméndyr, javéna te xasjon so dyvés pal péskiro čoripén pe tumaré-vergengiri phuv, i pal péskire-dadéngiro čoripén xasjona tumé. Ne kóli jone priĥaljonape dro péskiro čoripén i dre péskire-dadéngiro čoripén, syr jone ĥazdynépe proti Mánde i giné pe Mánde, pal so i Me gijom pe lénde i lydžijom len andré pe léngire-vergengiri phuv; tén'či, saštý, léngiro naobčhindlo iló kovljola, i tedy jone javéna te vyrikinen pal péskiro čoripén, to Me priripirava Miro zavieto Jakovosa, i Miro zavieto Isaakosa, i priripirava Miro zavieto Avraamosa, i phuv priripirava. To tedy syr phuv javéla jačkirdy lénca, i javéla te čaliakirel pes pal péskire sávaty, paldavá jaciá čhučí (pusto) léndyr, i jone javéna te vyrikiren pal péskiro čoripén, pal-dová, so jone na prilenas patyvása Miré zakóny, i léngire dieske sys džungalé (brydka) Miré uphenybená, i tedy, syr jone javéna pe léngire-vergengiri phuv, – Me na javáva te na prilav len patyvása, i jone na javéna džungalé Mánge ke davá, sob (kaj) te xasiakiráv len, sob (kaj) te roskušav Miro zavieto lénca, pal-dová so Me som Raj Devél, léngiro Devél; Me priripirava vaš lénge zavieto léngire dadénca, savén vylydžijom Me Jegiptóskire phuvjátyr angíl manušéngire jakhá, sob (kaj) te javav léngire Devlésa: Me som Raj Devél.’” Ĥáda, isyn uphenybená i statúty i zakóny, savé Raj Devél čhudiá maškír péste i maškír Izrailjoskire čhavénde pe bérga Sinajo, pir Mojzaste. I phendiá Raj Devél Mojzáske, rakirí: “Rákir Izrailjoskire čhavénge i phen lénge: ‘Kon sovlahala te vysvencynel vari-konéskiro di Ráske-Devléske pir tyrí timín (cena), to tyrí timín muršeske bišé beršéndyr ke šovdešá isyn bangi te javél pandždešá rupove šékieli, pir šékieljo sventoneske; kóli davá isyn džuvlý, tedy tyrí timín isyn bangi te javél trijánda šékieli; pandžé beršéndyr ke biš berš timín tyrí muršeske isyn bangi te javél trijánda šékieli, a džuvliáke deš šékieli. A čhonestyr ke pandž berš timín tyrí muršeske isyn bangi te javél pandž rupuvé šékieli, a džuvliáke tyrí timín trin rupuvé šékieli; šovdeše beršéndyr i phuredýr muršeske tyrí timín isyn bangi te javél dešupandž rupuvé šékieli, a džuvliáke deš šékieli. Kóli jov isyn čororó i na dre zor te zapleskirel pir tyrí timín, tedy mek te sykavén les rašáske, i rašáj mek te del léske timín (čol): adákicy, kicý isyn mol isyn manušéskiro barvalypén, savó dyjá sovláh, mek te del léske timín rašái. Kóli dová te javén kherítka murdalá (skoto), savén janéna dro svénto dyibén (žértva) Ráske-Devléske, tedy saró, so dynó Ráske-Devléske, isyn bangó te javél svénto. Naštý te vyparuven les i te zaparuves lačhó nalačhesa ci nálačho lačhesa; kóli léla kon te zaparuvel murdales murdalesa, tedy i jov i léskiro zaparuiben javéla svénto. Kóli dová javéla vari-savó nažužo murdál, savés na janéna Ráske-Devléske dro svénto dyibén, to dová trej te sykavén rašáske, i rašáj déla timín léske, ci lačhó joj ci nálačho, i savó déla rašáj timín, adiáke i trej te javél. Ne kóli vari-kon (xulái) kaméla te vykinel les, tedy mek te dočhuvel pándžto paš ke tyrí timín. Kóli kon otdéla péskiro Kher Ráske-Devléske dre sventyma, tedy rašáj isyn bangó te del timín léske, adiáke i javéla. Kóli manúš, savó otdyjá péskiro kher, zakaméla te vykinel les, tedy mek jov te dočhuvel pándžto rupeskiri paš tyré timinake, i tedy javéla léskiro. Kóli vari-kon péskire xulaibnastyr otdéla félda Ráske-Devléske, tedy tyrí timín trej te javél pir sieinybnaskiri timín: pal sieinyben xomiero ĥersto (jačmienjo) pandždešá šékieli rupésa. Kóli svenkitkone beršestyr vari-kon otdéla péskiri félda, davá trej te javél pir tyrí timín; kóli vari-kon otdéla péskiri félda paló svénko, tedy rašáj isyn bangó te rozginel rup pir beršá, savé jačnépe svenkoskire beršestyr, i isyn bangó pe adákicy te tykniakirel tyrí timín. Kóli manúš, savó otdyjá félda, zakaméla la te vykinel, tedy mek jov te dočhuvel pándžto rupeskiro/i paš tyré timinakiri, i joj iačélape pal léste; kóli jov félda na vykinela, i félda javéla bikindly javire manušéske, tedy la naštý te vykinel: doiá félda, kiéli joj otdžala syr svenkoskiri, javéla svénto Ráske-Devléske, sýrby félda sovlahady; rašáske joj iačélape dro xulaiben. A kóli vari-kon otdéla kindly félda Ráske-Devléske syr svénto, saví na léskire feldendyr, tedy rašáj isyn bangó te rozginel léske ci but timín ke svenkoskiro berš, i jov isyn bangó jov te otdél pir rozginyben dre dová-pac' dyvés, syr Ráskire-Devléskiri sventyma. A félda pe svenkoskiro berš piridžala nevés ke odová manúš, konéstyr kindle, konéske pridžalape doiá phuv dro xulaiben. Kažno tyrí timín isyn bangi te javél pir šékieljo rašáske, biš giery trej, sob (kaj) te javén dre šékieljo. Féni (jekhe) pervoné tyknoren murdaléndyr, savé otlydžanape Ráske-Devléske, naštý nikón te del dre sventyma: ci guruv da, ci tyknó kherítko murdál, jone isyn Ráskire-Devléskire. Kóli murdál isyn nažužo, tedy isyn bangé te vykinel pir tyrí timín i te dočhuvel ke dová pándžto paš; kóli na vykinela, tedy isyn bangé te biknel pir tyrí timín. Jekh saró zasovlahado, so tel sovláh manúš otdéla Ráske-Devléske péskire xulaibnastyr, ci manušés, ci kheritkoné murdales, ci félda péskire majonkostyr, na biknelape i na vykinelape; saró zasovlahado isyn bari sventyma Raskiri-Devléskiri; Saró zasovlahado, so isyn sovlahado manušéndyr, na vykinelape: davá isyn bangó te javél otdynó meribnáske. I kažno déšto paš, so phuv déla ci ziárka, ci barjakirdó (plódo) isyn Ráskire-Devléskire: davá isyn Ráskire-Devléskiri sventyma. Kóli vari-kon zakaméla te vykinel péskiri déšto paš, tedy mek jov te pričhuvel ke lákiri timín pándžto paš. I kažno déšto paš baré i tykné kheritkoné murdaléndyr, saréstyr, so prodžála tel destó čhupnariskiro (žezlo), déšto paš isyn bangé te otdén Ráske-Devléske; o manúš naštý te roskedel ci lačhó dová, ci fuj, i naštý te zaparuvel les; kóli kon les zaparuvela, tedy i kokoró jov i léskiro zaparuiben javéla sventonesa, i na moginéla te javél vykindlo.’” Ĥáda, isyn priphenybená, savé rakirdiá Raj Devél Mojzáske vaš Izrailjoskire čhavénge pe bérga Sinajo. I phendiá Raj Devél Mojzáske pe Sinajoskiri čhučí phuv, dre skedyibnáskiri skínija, pe pérvo dyvés javire-čhonéskiro, dro javír berš pir léngiro vygiiben Jegiptóskire phuvjátyr, rakirí: “Piriginen saró khetanyben (obščyna) Izrailjoskire čhavéndyr pir léngire ródy léngire čékarja (siemieistvy) [pir léngire-dadengíre kherá-ju.o.], pir lavá, kicý isyn saré muršén pir šeré. Bišé beršéndyr i phuredýr, sarén, kon sys dre zor dro Izrailjo vaš maribén, pir léngire otriády piriginen len – tu i Aaróno. Tuménca trej, sob (kaj) te javél jekh manúš te javén kažnoné rodycóstyr pir jekhe manušéste, savó dro péskire-dadéskiro ródo isyn šeraló. I, ake, isyn muršengire lavá, savé javéna tuménca: Ruvimostyr Jelicuro, Šedeuraskiro čhavó; Simieonostyr (Siemjonostyr) Šielumiilo, Curišadajoskiro čhavó; Judastyr Naasóno, Aminadavóskiro čhavó; Isaharostyr Nafanailo, Cuaroskiro čhavó; Zavulonostyr Jeliano, Xielonoskiro čhavó; Iosifóskire (Jozáskire) čhavéndyr: Jefriemostyr Jelišamo, Amiudoskiro čhavó; Manasijastyr Gamaliilo, Piedacuroskiro čhavó; Vieniaminostyr Avidano, Gidieonijakiro čhavó; Danostyr Ahieziero, Amišadajeskiro čhavó; Asirostyr Pagiilo, Ohranoskiro čhavó; Gadostyr Jeliasafo, Rieguilaskiro čhavó; Niefalimostyr Ahiro, Jenanoskiro čhavó.” Davá isyn vykedyné muršá khetanybnastyr, barydyrá péskire-dadengíre rodycendyr (čangendyr), Izrailjoskire-tysjoncengire šeralé. I lyjá Mójza i Aaróno adalen muršén, savén khardé pir lav. I skedyné jone saró skedyibén pe pérvo dyvés javire-čhonéskiro. I piriphendle jone péskiro bijanypnaskiro ródo, pir léngire ródy, pir léngire čékarja (siemieistvy), pir lavengiro ginybén, bišé beršéndyr i phuredýr pir šeré, syr rakirdiá Raj Devél Mojzáske. I kerdiá jov lénge piriginybén pe Sinajoskiri čhučí phuv. I sys Ruvimóskire čhavén, savó sys Izrailjoskiro anglatunó (pérvo), pir léngire ródy, pir léngire kherítka ródy, pir léngire-dadéskire čékarja (siemieistvy), pir lavengiro ginybén, pir šeré, sarén muršén, bišé beršéndyr i phuredýr, sarén, konéste sys zor te džal pe maribén, pirigindlo sys dre Ruvimoskiro ródyco (čang) štardešá šov tysjoncy pandžšelá. Simieonoskire čhavén pir léngire ródy, pir léngire ródycy, pir léngire čékarja (siemieistvy), pir lavengiro ginybén, pir šeré, sarén muršén, bišé beršéndyr i phuredýr, sarén, kon sys dre zor te džal pe maribén, pirigindlo sys dre Simieonoskiri ródyco pandždešá jeniá tysjoncy trinšelá. Gadóskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén, pirigindlo sys dre Gadoskiro ródyco (čang) štardešá pandž tysjoncy šovšelá pandždešá. Judáskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, saré, kon sys dre zor te džal pe maribén, pirigindlo sys dre Judáskiro ródyco eftadešá štar tysjoncy šovšelá. Isaharoskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén, pirigindlo sys dre Isaharoskiro ródyco pandždešá štar tysjoncy štaršelá. Zavulonoskire čhavén pir léngire ródy, kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén, pirigindlo sys dre Zavulonoskiro ródyco (čang) pandždešá eftá (bitrinensiro deš) tysjoncy štaršelá. Iosifóskire (Jozáskire) čhavén, Jefriemóskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén, pirigindlo sys dre Jefriemoskiro ródyco štardešá tysjoncy pandžšelá. Manasijáskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén, pirigindlo sys dre Manasijáskiro ródyco (čang) trijánda duj tysjoncy dujšelá. Vieniaminóskire čhavén pir léngire ródy, pir léngire kherítka ródy (pliémi), pir léngiri čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén, pirigindlo sys dre Vieniaminoskiro ródyco trijánda pandž tysjoncy štaršelá. Danóskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén, pirigindlo sys dre Danoskiro ródyco šovdešá duj tysjoncy eftašelá. Asiroskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén, pirigindlo sys dre Asiroskiro ródyco štardešá jekh tysjonco pandžšelá. Niefalimoskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén, pirigindlo sys dre Niefalimoskiro ródyco (čang) pandžeša trin tysjoncy štaršelá. Ake, isyn manušá, savé zaginé dre piriginybén, savén pirigindle Mójza i Aaróno i Izrailjoskire barydyrá – dešudúj manušá, pe jekhe manušéste kheritkoné rodóstyr (pliemjostyr). I sys sarén, savé zaginé dro piriginybén, Izrailjoskire čhavén, pir léngire čékarja (sem'i (irjá)), bišé beršéndyr i phuredýr, saré, kon sys dre zor te džal pe maribén dro Izrailjo, i sys sarén, savé zaginé dro piriginybén šovšelá trin tysjoncy pandžšelá pandždešá. A Lievíty pir léngire-dadengíre stréčy (pokolienii) na sys pirigindle maškír lénde.” I phendiá Raj Devél Mojzáske dasavé lavá: “Jekh Lievijoskire ródycy na zalydža dro piriginybén, i na gin len khetané Izrailjoskire čhavénca; ne dopatia Lieviténge šátra dosykaibnása i saró, so trej vaš láke, so isyn pašýl láte; mek jone te lydžán šátra dosykaibnása i saró, so trej vaš láke, i te dynarinén (te služynen) pašýl láte, i pašýl šátra mek te čhuvén péskiro stáno; i kiéli javéla trej te pirilydžas šátra, mek Lievíty te ĥazdén la; i kiéli javéla trej te čhuvén šátra, mek Lievíty te čhuvén la; a kóli poddžála vari-kon javire manušéndyr, javéla otdynó pe meribén. Izrailjoskire čhavé isyn bangé kažno te terdjol dro péskiro stáno i kažno pašýl péskiro sciago (znamia), pir péskire otriády; a Lievíty sys bangé te čhuvén stáno pašýl šátra dosykaibnása, sob (kaj) te na javél xolý pe Izrailjoskire-čhavéngiro khetanyben, i javéna te terdjon Lievíty pe stréga pašýl šátra dosykaibnása.” I kerdé Izrailjoskire čhavé, syr priphendiá Raj Devél Mojzáske, adiáke jone i kerdé. I phendiá Raj Devél Mojzáske i Aaronóske dasavé lavá: “Izrailjoskire čhavé, kažno (sváko) isyn bangó te čhuvél péskiro stáno pašýl péskiro sciago (znamia), pašýl péskire-čekarjakire špery (znaki); angíl skedyibnáskiri šátra isyn bangé te čhuvén péskiro stáno. Anglatuné rigátyr ke vastóko čhuvéna stáno: Judáskire-stanoskiro sciago pir léngire otriády, i barydyró Judáskire čhavéngiro, Naasóno Aminadavóskiro čhavó, i léskire xaladé, savé zaginé dro léskiro piriginybén, sys eftadešá štar tysjoncy šovšelá; paló léste čhuvéla stáno Isaharoskiro ródyco, o barydyró čhavéngiro Isaharo Nafanailo, Cuaraskiro čhavó, i léskire xaladé, savé zaginé dro léskiro piriginybén sys pandždešá štar tysjoncy štaršelá; duredýr čhuvéla stáno Zavulonoskiro ródyco (čang), i o barydyró Zavulonoskire-čhavéngiro Jeliavo, Xielonoskiro čhavó, i léskire xaladé, savé zaginé dre léskiro piriginybén, sys pandždešá eftá tysjoncy štaršelá; saré, savé zaginé dro piriginybén ke Judáskiro stáno sys šel te ohtodešá šov tysjoncy štaršelá, pir léngire otriády; angíl jone sys bangé (musindle) te džán maribnása. Ruvimóskire-stanoskiro sciago sys ke paš-dyvés (jugo) pir léngire otriády, i o barydyró Ruvimóskire-čhavéngiro Jelicuro, Šedeuraskiro čhavó, i léskire xaladé, savé zaginé dro léskiro piriginybén, sys štardešá šov tysjoncy pandžšelá; nádur léstyr čhuvéla stáno Simjoonoskiro (Siemjonoskiro) ródyco, i o barydyró čhavéngiro-Šelumiilo, Curišadoskiro čhavó, i léskire xaladé, savé zaginé dro léskiro piriginybén, sys pandždešá jeniá tysjoncy trinšelá; Pal lénde javéla Gadoskiro ródyco, i o barydyró Gadóskire-čhavéngiro o Jeliasafo, Rieguiloskiro čhavó, i léskire xaladé, savé zaginé dro léskiro piriginybén, sys štardešá pandž tysjoncy šovšelá pandždešá; saré, savé zaginé dro piriginybén ke Ruvimoskiro stáno, sys šel pandždešá jekh tysjonco štaršelá pandždešá, pir léngire otriády; javír (vtora) jone sys bangé te džán maribnása. Kiéli džála skedyibnáskiri šátra, to Lievitengiro stáno javéla maškirál dre stany. Syr sys terdé, adiáke i sys bangé te džán, kažno pe péskiro štéto pašýl péskire sciagi (znami). Jefriemóskire-stanoskiro sciago sys pir léngire otriády ke zapado, i Jefriemóskire-čhavéngiro barydyró o Jelišamo, Amiudoskiro čhavó, i léskire xaladé, savé zaginé dro léskiro piriginybén, sys štardešá tysjoncy pandžšelá; nádur léstyr Manasijáskiro sys ródyco (čang), i Manasijáskire-čhavéngiro barydyró Gamaliilo, Piedacuroskiro čhavó, i léskire xaladé, savé zaginé dro léskiro piriginybén, sys trijánda duj tysjoncy dujšelá; paló davá Vieniaminoskiro ródyco, i Vieniaminóskire-čhavéngiro barydyró Avidano, Gidieonoskiro čhavó, i léskire xaladé, savé zaginé dro léskiro piriginybén, sys trijánda pandž tysjoncy štaršelá; sarén manušén, savé zaginé dro piriginybén ke Jefriemoskiro stáno, sys šel te ohtó (bidujéngiro deš) tysjoncy šelá, pir léngire otriády; trita jone sys bangé te džán maribnása. Danóskire-stanoskiro sciago sys ke paš-rat (sieviero) pir léngire otriády, i Danóskire-čhavéngiro barydyró Ahiieziero, Amišadajoskiro čhavó, i léskire xaladé, savé zaginé dro léngiro piriginybén, sys šovdešaduj tysjoncy eftašelá; nádur léstyr čhuvéla stáno Asiroskiro ródyco, i Asiroskire-čhavéngiro barydyró o Pagiilo, Ohranoskiro čhavó, i léskire xaladé, savé zaginé dro léskiro piriginybén, sys štardešá jekh tysjoncy pandžšelá; durydyr sys Niefalimoskiro ródyco, i Niefalimoskire-čhavéngiro barydyró o Ahiro, Jenanoskiro čhavó, i léskire xaladé, savé zaginé dro léskiro piriginybén, sys pandždešá trin tysjoncy štaršelá; sarén manušén, savé zaginé dro piriginybén dre Danoskiro stáno, sys šel pandždešá eftá tysjoncy šovšelá; jone sys bangé te džán palatuné (posliednia) pašýl péskire sciagi. Ake, isyn manušá, savé zaginé dre Izrailjoskire-čhavéngiro piriginybén, kažno pir léngire čékarja (siemieistvy). Sarén, kon zagijá dro piriginybén dre stany, pir léngiro otriády, sys šovšelá trin tysency pandžšelá pandždešá.” A Lievíty na zaginé dro piriginybén khetané Izrailjoskire čhavénca, syr phendiá Raj Devél Mojzáske. I kerdé saró Izrailjoskire čhavé, so priphendiá Raj Devél Mojzáske: adiáke jone terdjonas stanenca (taborenca) pašýl péskire sciagi, i adiáke giné kažno angíl pir péskiro kher, pir péskire-dadéskire čékarja. Ĥáda, isyn Mojzáskiro i Aaronoskiro ródo, kiéli rakirdiá Raj Devél Mojzáske pe bérga Sinajo, i, ake, isyn Aaronóskire-čhavéngire lavá: anglatunó (pérvo) Nadavo, Aviudo, Jelizáro i Ifamaro; ake, isyn Aaronóskire-čhavéngire lavá, rašángire, savén pomakhne, savén jov (Aaróno) vysvencyndia, sob (kaj) jone te kerén butý syr rašaja; ne Nadavo i Aviudo myné angíl Raste-Devléste, kiéli jone jandlé javire-manušéngiri jag angíl Raste-Devléste pe Sinajoskiri čhučí phuv, čhavén lénde na sys; i jačnépe rašanca Jelizáro i Ifamaro pašýl péskire dadéste Aaronoste. I phendiá Raj Devél Mojzáske dasavé lavá: “Jan Lievijoskiro ródyco (čang), i čhuv les rašása angíl Aaronoste, sob (kaj) jone te dynarinén (te služynen) léske; i mek jone te javén pe stréga pal léste, i pe stréga pal saró skedyibén pašýl šátra skedyibnáskiri, sob (kaj) jone te lydžán butý pašýl šátra; i mek jone te rakhén saré pribory skedyibnaskire šatratyr, i javéna pe stréga pal Izrailjoskire čhavénde, sob (kaj) te lydžán butý pašýl šátra. Otdé Lievitén Aaronóske i léskire čhavénge sarésa: mek te javén jone otdyné léske Izrailjoskire čhavéndyr; Aaronós i léskire čhavén čhuv te kerén butý, sob (kaj) jone te dykhén péskiri rašaskiri butý; a kóli poddžála javír manúš, odová manúš javéla otdynó meribnáske.” I phendiá Raj Devél Mojzáske, rakirí: “Ĥáda, Me lyjom Lievitén Izrailjoskire čhavéndyr zamiést (pe štéto) saré anglatunende (pervonende), savó vydžála ločoviátyr (lonostyr) maškír Izrailjoskire čhavénde, Lievíty isyn bangé te javén Miré; pal-dová so saré anglatuné čhavoré – Miré; dro dová dyvés, kiéli Me xasiakirdjom sarén anglatunen bijatoren pe Jegiptóskiri phuv, Me vysvenciakirdjom Péske sarén anglatunen Izrailjoskire manušéstyr ke kherítka murdalá (skoto); jone isyn bangé te javén Miré. Me som Raj Devél.” I phendiá Raj Devél Mojzáske pe Sinajoskiri čhučí phuv dasavé lavá: “Pirigin Lievijoskire čhavén pir léngire čékarja (siemieistvy), pir léngire ródy; gin sarén muršén jekhe čhonestyr i phuredýr.” I pirigindia len Mójza pir Ráskire-Devléskiro lav, syr sys priphendlo. I ĥáda, isyn Lievijoskire čhavé pir léngire lavá: Girsono, Kaafo i Mierari. I, ake, isyn Girsonoskire-čhavéngire lavá pir léngire ródy: Livnjo i Šymiejo. I Kaafoskire čhavé pir léngire ródy: Amramo i Icgaro, Xievróno i Uziilo. I Mierariskire čhavé pir léngire ródy: Mahli i Muša. Ĥáda, isyn Lievijoskiro ródo pir léngire čékarja. Girsonostyr džála ródo Livniskiro i ródo Šymejaskiro: davá isyn Girsonoskiro ródo. Pirigindle sys saré muršá, jekhe čhonestyr i phuredýr, len sys eftá tysjoncy pandžšelá. Girsonoskire ródy bangé sys te terdjon stanósa (taborosa) pale šátra pe zapado; barydyró pe Girsonoskire-čhavéngiro, léngire-dadengiri streč (pokolienijo) sys Jeliasafo, Lajeloskiro čhavó. Girsonoskire čhavénge dopatialape skedyibnáskiri šátra te rakhén, i lákiro učhakiriben (pologo), i skedyibnáskiri šýrma pe zagiben, dre šátra, i pe gréda (dvóro) i dvoroskire-zagiibnaskiri šýrma, saví isyn trusciál (krugom) skínija i altárjo, i lákire šele, sarénca léngire priborenca. Kaafostyr sys ródo Amramoskiro i ródo Icgaraskiro, Xievronoskiro ródo, i Uziiloskiro ródo: dalé isyn Kaafoskire ródy. Pir ginybén saré muršén jekhe čhonestyr i phuredýr, sys ohtó tysjoncy šovšelá, savé rakhne svénto štéto. Kaafoskire-čhavéngire ródy sys bangé te čhuvén péskiro stáno pe paš-dyvesýtko (južno) šatrakiri rig; o barydyró Kaafoskire rodóstyr sys o Jelcafano, Uziiloskiro čhavó; Lénge sys dynó te rakhén kovčego, skamínd, momolýtko (svietíl'niko), altárjo, svénta khoré (sasúdy), savénca sys trej lénge te dynarinén (te služynen), i šýrma saré lákire priborenca. Šeraló barydyró pe Lieviténgire barydyrende sys o Jelizáro, Aaronóskire-rašaskiro čhavó; tel léskiro rakhiben sys odolé, savénge sys dopatiandlo te rakhén svénto štéto. Mieraristyr sys Mahliskiro ródo i Mušiskiro ródo: davá sys Mierariskiro ródo; pirigindle sarén muršén, jekhe čhonestyr i phuredýr – šov tysjoncy dujšelá; o barydyró Mierariskire-dadéngiro rodóstyr sys o Curiilo, Avihailoskiro čhavó; jone sys bangé te čhuvén péskiro stáno pe paš-ratítko (sievierno) rig šatratyr; Mierariskire čhavénge dopatianas te rakhén šatrakire bel'ki (brusy) i lákire balandiniá (šosty), i lákire stýlby, i lákire tel ĥerá predki i saré lákire pribory saré léngire keribnasa, i stýlby pe gréda (dvóro) saré rigéndyr i léngire predki (osnovy), i léngire kilore i léngire šele. Anglatuné rigátyr dre šátra, ke vastóko angíl skedyibnáskiri šátra, saví sys risii, kaj ĥazdélape kham, sys bangé te čhuvén stáno (taboro (lod)) Mójza i Aaróno i léskire čhavé, savénge sys dopatiandyno te rakhén svénto štéto pal Izrailjoskire čhavénde; a kóli vari-kon poddžála javire manušéndyr (savó na Aaronostyr), javéla otdynó meribnáske. Sarén gindlen Lievitén, savén pirigindle Mójza i Aaróno pir priphenybén Rástyr-Devléstyr, pir léngire ródy, sarén muršén, jekhe čhonestyr i phuredýr, sys biš te duj tysjoncy. I phendiá Raj Devél Mojzáske: “Pirigin sarén anglatunen čhavorén Izrailjoskire čhavéndyr jekhe čhonestyr i phuredýr, i pirigin len pir lavá; i le Lievitén vaš Mánge, – Me som Raj Devél, – i zamiést (pe štéto) sarénde anglatunende Izrailjoskire čhavéndyr, a Lieviténgire kheritkoné murdalén zamiést (pe štéto) saró pervoné-bijanypnytko murdalengiro kheritkoné Izrailjoskire čhavéndyr.” I pirigindia Mójza, syr priphendiá léske Raj Devél, sarén Izrailjoskire čhavéngire anglatuné čhavorén; i sys saré anglatuné čhavorén, pir lavengiro ginybén, jekhe čhonestyr i phuredýr biš te duj tysjoncy dujšelá eftadešá trin. I phendiá Raj Devél Mojzáske dasavé lavá: “Le Lievitén zamiést sarén anglatunen čhavorén Izrailjoskire čhavéndyr, i Lieviténgire kheritkoné murdalén (skoto) zamiést léngire kheritkoné murdalénde; mek Lievíty te javén Miré. Me som Raj Devél. A dro vykinybén pal dujšelá eftadešá trinende, savé jačnépe butýr Lieviténgire ginybnastyr, Izrailjoskire anglatuné čhavorendyr, to le pe pandž šékieli pal manušéste, pir svénto šékieljo le, biš giery dro šékieljo, i otdé davá rup Aaronóske i léskire čhavénge, dro vykinybén pal lišnjone (savé jačnépe) manušénde.” I lyjá Mójza vykinybnaskiro rup pal lišnjone manušénde, savén zaparude Lievíty, Izrailjoskire anglatuné čhavorendyr jov lyjá rup tysjonco (bar) trin šelá šovdešá pandž šékieli, pir svénto šékieljo, i otdyjá o Mójza vykinybnaskiro rup Aaronóske i léskire čhavénge pir Ráskire-Devléskiro lav, syr priphendiá Raj Devél Mojzáske. I phendiá Raj Devél Mojzáske i Aaronóske adiáke dasavé lavá: “Pirigin Kaafovoskire čhavén Lievijoskire čhavéndyr pir léngire ródy, pir léngire čékarja (siemieistvy), trijánda beršéndyr i phuredýr ke pandždešá berš, sarén, kon sys dre zor te kerél butý, sob (kaj) te bičhaves te kerén butý dre skedyibnáskiri šátra. 'Gada, saví isyn Kaafoskire-čhavengiri butý dre skedyibnáskiri šátra: te lydžán Svénto-sventonengiro (sama svénta priedmiety). Kiéli stanoske (taboroske) trej javéla te džal dro drom, Aaróno i léskire čhavé zadžána, i zlena pologo, savó učhakiréla, i začhakirena lésa kovčego dosykaibnása (otkrovienijasa); i čhuvéna pe léste učhakiriben sinjone-cviatoskire barsukengire cypatyr, i uprál léste čhurdena učhakiriben saró golubovoné vylnátyr (šersiatyr), i čhuvéna andré léskire balandiniá (šosty); i mareskiro skamínd učhakirena thaniasa (matierjalosa) ĥolubovone vylnátyr, i čhuvéna pe léste čaré, baré čaré, tahtaja i kučika, sob (kaj) te počhuven, i, léskiro maró vaš kažno dyvés trej, sob (kaj) te javél pe léste; i čhuvéna pe lénde than (matierjalo) loly, i začhakirena la učhakiribnasa sine-cviatoskire cypatyr, i učhuvena léskire balandiniá; i léna than golubovoné vylnátyr, i začhakirena momolýtko (svietíl'niko) i léskire lampady, i léskire ščypcy (cymty), i léskire lotki, i saré khoré (sasúdy) vaš dzet (jeliejo), savénca jone keréna butý pašýl léste, i začhakirena les i saré léskire sudinki učhakiribnasa sinjone cypendyr, i čhuvéna pe nosilki; i pe suvnakunó altárjo čhuvéna than ĥolubovone vylnátyr, i učhakirena la sinjone-barsukengire cypendyr učhakiribnasa, i čhuvéna léskire balandiniá. I léna saré butiarné priedmiety, savé trej vaš butý pe svénto štéto, i čhuvéna dre than ĥolubovone vylnátyr, i začhakirena len učhakiribnasa sinjone-barsukengire cypendyr, i čhuvéna pe nosilki. I vyžužakirena altárjo praskatyr (pieplostyr), i učhakirena les purpurnone thaniasa; i čhuvéna pe léste saré léskire khoré (sasúdy), savé trej vaš butý pašýl léste, – lopatkicy vaš vangar, bustiá (vilki), lopatki, i tahtaja, saré khoré (sasúdy) altarjostyr, i učhakirena les učhakiribnasa sinjone cypendyr, i čhuvéna andré léskire balandiniá. I kiéli skedelape dre drom stáno (taboro (lod)), Aaróno i léskire čhavé učhakirena saré svénta štéty i saré sventoné-štetoskire priedmiety, tedy Kaafoskire čhavé javéna, sob (kaj) te lydžán; ne naštý jone te čilaven svénto štéto, sob (kaj) te na merén. Dalé-skedyibnaskire skinijakire pašá isyn bangé te lydžán Kaafoskire čhavé. Jelizaroske, Aaronóskire-rašaskire čhavéske, dopatialape jeliejo (dzet) olivatyr vaš momolýtko (svietíl'niko) i fimiámo (gudlé smóly) te thuvliakiren, i kažnoné-dyvesengiro marunó janybén i makhibnaskiro jeliejo, te dykhél pal sarí šátra i saró, so isyn dre láte, svénto štéto i lákire priedmiety.” I phendiá Raj Devél Mojzáske i Aaronóske dasavé lavá: “Na domeken, sob (kaj) te xasjon Kaafoskiro kherítko ródo (pliemjo) Lievitendyr, ne, ĥáda, so trej lénge te kerén, sob (kaj) jone te javén džidé i te na merén, kiéli javéna ke Svénto-sventonengiro: Aaróno i léskire čhavé mek jone te javén i te čhuvén len kažnones dre butý léskiri i pašýl dro léngiro lydžaiben; ne kokoré jone naštý te javén, te dykhén svénto štéto, kiéli učhakirena les, sob (kaj) te na merén.” I phendiá Raj Devél Mojzáske dasavé lavá: “Pirigin i Girsonoskire čhavén pir čékarja/siemieistvy [léngire-dadengíre sem'i (irjá)-ju.o.], pir léngire ródy, trijande beršéndyr i phuredýr ke pandždešá berš, pirigin len sarén, kon sys dre zor te kerél butý, sob (kaj) te dynarinén pašýl skedyibnáskiri šátra. 'Gada, isyn Girsonoskire-čekarjakire butiá, pašýl léngire dynaribén i te lydžán pharipén: jone isyn bangé te lydžán šatrakiro učhakiriben i skedyibnáskiri šátra, i učhakiriben lákiro, i učhakiriben sine-cypitko, savó upralestyr, i skedyibnaskire-šatrakiri šýrma pašýl zagiibén, i gredakire (dvoroskire) šyrmy, i ubladytko šýrma pe gréda, saví isyn pašýl šátra i altárjo, i léngire šele, i saré priedmiety, savé trej te dynarinén i saró, so kerélape pašýl lénde: jone isyn bangé te kerén butý. Pir Aaronoskiro i léskire-čhavéngiro uphenybén isyn bangé te kerenpe saré Girsonoskire-čhavéngire butiá pašýl kažno pharipnaskiro lydžaiben i kažno léngiri butý, i dopatian lengireske rakhibnaske saró, so jone lydžána. Ĥáda, isyn čhavéngiro otphenybén Girsonoskire rodóstyr dre skedyibnáskiri šátra, i, ĥáda, so dopatialape léngire rakhibnaske tel Ifamaroskiro dykhibén, Aaronóskire, rašaskire čhavés. Mierariskire čhavén pirigin pir léngire ródy, pir léngire čékarja (siemieistvy), trijandane beršéndyr i phuredýr ke pandždešá berš, pirigin sarén, kon sys dre zor te kerél butý, sob (kaj) te dynarinén pašýl skedyibnáskiri šátra. Ĥáda, so jone isyn bangé te lydžán, pir dynaribén pašýl skedyibnáskiri šátra: lákire bruski i lákire balandiniá, i lákire stýlby i lákire tel ĥerá predki, i stýlby pe gréda saré rigéndyr, i léngire osnovy, i léngire kile (konki), i léngire šele, i saré strumiénty pašýl lénde, i saré léngire sudinki; i pir léngiro lav piriginen strumiénty, savé jone isyn bangé te lydžán. Ĥáda, isyn butiá Mierarinengire-čhavéngire rodóstyr, pir léngiro dynaribén pašýl skedyibnáskiri šátra, tel Ifamaroskiro dykhibén, Aaronóskire-rašaskire čhavéste.” I pirigindle Mójza i Aaróno i barydyrá Kaafavoskire čhavén pir léngire ródy i pir léngire čékarja, trijande beršéndyr i phuredýr ke pandždešá berš, sarén, kon sys dre zor te kerél butý, te dynarinél dre skedyibnáskiri šátra; i sys pirigindlo, pir léngire ródy, duj tysjoncy eftašelá pandždešá. Ake, sys saré, savén pirigindle Kaafovoskire rodendyr, kon sys dre zor te dynarinél pašýl skedyibnáskiri šátra, savén pirigindia Mójza i Aaróno pir Ráskire-Devléskiro priphenybén, savó dyjá Jov pir Mojzaste. I pirigindle Girsonoskire čhavén pir léngire ródy i pir léngire čékarja (siemieistvy), trijandane beršéndyr i phuredýr ke pandždešá berš, sarén, kon sys dre zor te kerél butý, dre skedyibnáskiri šátra; i pirigindlo sys pir léngire ródy, pir léngire čékarja (siemieistvy), sys duj tysjoncy šovšelá trijánda; ake, isyn piriginybén Girsonoskire-čhavéngire rodóstyr, sarén, kon sys dre zor te kerél butý pašýl skedyibnáskiri šátra, savén pirigindia Mójza i Aaróno, pir Ráskire-Devléskiro priphenybén. I pirigindle sys Mierarinoskire-čhavéngire ródy pir léngire ródy, pir léngire čékarja (siemieistvy), trijande beršéndyr i phuredýr ke pandždešá berš, sarén, kon sys dre zor te kerél butý, dre skedyibnáskiri šátra; i sys pirigindlo pir léngire ródy, trin tysjoncy dujšelá: ake, isyn piriginybén Mierariskire-čhavéngire rodóstyr, savén pirigindia Mójza i Aaróno pir Ráskire-Devléskiro priphenybén, savó sys dynó pir Mojzaste. I pirigindle sarén Lievitén, savén pirigindia Mójza i Aaróno i Izrailjoskire barydyrá pir léngire ródy i pir léngire čékarja, Trijande beršéndyr i phuredýr ke pandždešá berš, sarén, kon sys dre zor te kerél butý i te lydžál skedyibnáskiri skínija; i sys pirigindlo len ohtó (bidujéngiro déšto) tysjoncy pandžšelá eftadešá; kažnonéske léstyr pir Devléskiro priphenybén pir Mojzaste sys dyný péskiri butý i lydžaiben, i pirigindle, syr priphendiá Raj Devél Mojzáske. I phendiá Raj Devél Mojzáske dasavé butiá: “Priphen Izrailjoskire čhavénge te vybičhaven stanostyr sarén, konéste sys prokáza, i sarén, konéste thadelas maséndyr, i sarén, kon magirelaspe mulestyr, i vybičhaven muršén i džuvlién, pal stáno vybičhaven len, sob (kaj) te na magirén jone péskire stany, maškirál savénde Me dživáva.” I kerdé adiáke Izrailjoskire čhavé, i vybičhade len javrí stanostyr; syr rakirdiá Raj Devél Mojzáske, adiáke i kerdé Izrailjoskire čhavé. I phendiá Raj Devél Mojzáske dasavé lavá: “Phen Izrailjoskire čhavénge: kóli murš ci džuvlý keréla vari-savó grého proti manušéste, i pir davá keréla čoripén proti Raste-Devléste, i bangó javéla dová di: tedy mek te priĥaljonpe dro péskiro grého, savó jone kerdé, i te riskirén saró dová, dre so jone sys bangé, i te dočhuven ke dová pándžto paš i te otdén odoléske, proti konéste jone kerdé grého; kóli léste nane čhavó, savéske trej te otdes pal bang: tedy te otdes davá Ráske-Devléske; mek te javél davá rašáske, adiáke-pac', syr i bakro vaš žužakiriben pir patiaibén, savésa jov žužakirelape; i kažno svénto janybén Izrailjoskire čhavéndyr saró sventonendyr, savé jone janéna ke rašái, otdén léske, i saró jandlo, so vari-kon vysvencynela, otdén léske (rašáske); saró, so déla vari-kon rašáske, isyn léskiro.” I phendiá Raj Devél Mojzáske dasavé lavá: “Rákir Izrailjoskire čhavénge i phen lénge: ‘Kóli vari-konéskiri romný džála dro bléndo, i keréla biladžaipén, i pirisovela vari-kon lása i vyčhuvela siemjo (sal), i javéla davá sčhakirdo lákire-romeskire jakhéndyr, i joj magirelape čorahanés, i na javéla pe láte jakhitkones (svidietieljos), i joj na javéla uhtyldy dro dová, i kóli javéla pe léste zevlypnaskiro dúho (fáno) i jov javéla te zevlynel (te rievninel) peskirjá romniá, kiéli joj isyn magirdy, ci kiéli peréla pe léste zevlypnaskiro dúho (fáno), i jov javéla te zevlynel peskirjá romniá, kiéli joj nane magirdy, – mek te janelo rom peskirjá romniá ke rašái, i te janel pal láte dro svénto dyibén (žértva) déšto paš efa jačmienjostyr (ĥerstytko) jaržó; ne mek te na čhuvél pe láte jeliejo, i mek te na čhuvél livano, pal-dová so davá isyn janybén zevlynypnaskiro, janybén te priripirel, savó janéla ripiribén pal čoripén; a rašáj mek te janel la i te čhuvél la angíl Ráskire-Devléskiro muj, i léla rašáj svénto paní dre gliniano khoró (sasudo), i léla rašáj phuv šatrakire petostyr (polostyr) i čhuvéla dro paní; i čhuvéla rašáj džuvliá angíl muj Ráskire Devléskiro, i zlela romniakire šerestyr dykhlo, i déla láke dre vastá priripiribnaskiro janybén, – davá janybén isyn zevlynypnaskiro, rašaste dro vast javéla kirko paní, savó janéla prokošybén. I zasovlahala la rašái, i phenéla džuvliáke: ‘Kóli nikón túsa na pirisutia, i tu na san magirdy, i na kerdián napatiaiben péskire romeske, tedy na javéla túke nisavó fuipén dalé kirke paniéstyr, savó janéla prokošybén; ne kóli tu kerdián napatiaiben tyré romeske i magirdianpe, i kóli vari-kon túsa pirisutia apríč tyré romeste,’ – tedy mek rašáj te zasovlahal džuvliá prokošybnytkone sovlahasa, i phenéla rašáj romniake: ‘Mek te otdél tut Raj Devél prokošybnaske i sovlahake dre tyré manušénde, i mek te kerél Raj Devél adiáke, so tyrí breg i te javél di tyró šulesa; i mek te prodžal davá paní, savó janéla prokošybén dre tyré andratuné masá, dro tyró per, sob (kaj) te šuljol tyró di i te otperel tyrí breg.’ I phenéla džuvlý: “Amín', amín'.” I čhinela rašáj dalé sovlahá pe svítko, i morela len dro kirko paní; i déla te vyp'jel džuvliáke kirko paní, savó janéla prokošybén, i zadžála dre láte paní, savó janéla prokošybén láke ke dukhá. I léla rašáj džuvliakire vasténdyr zevlynypnaskiro janybén marestyr, i ĥazdéla davá janybén angíl Raste-Devléste, i lydžála les ke altárjo; i léla rašáj burnykasa (žmieniasa) marune janybnastyr paš dre ripiribén, i shačkiréla les pe altárjo, i paló davá jov déla džuvliáke te vyp'jel paní; i kiéli paniakirela o rašáj la paniésa, tedy, kóli joj isyn nažužy i kerdiá čoripén angíl péskire romeste, kirko pany, savó janéla prokošybén, zadžála dre láte, ke fuipén láke, i šuljola lákiro per i peréla lákiri breg, i javéla adáia džuvlý prokošny dre péskire manušénde. Kóli džuvlý na sys magirdy i sys žužy (čysto), tedy jačélape sasty i javéla pharí siemjostyr (saliatyr). Ĥáda, isyn Zakóno pal zevlynypén, kiéli džuvlý džála dro bléndo péskire romestyr i magirelape, cji, kiéli pe romeste peréla zevlynypnaskiro dúho (fáno), i jov javéla te zevlynel peskirjá džuvliá: tedy mek jov te čhuvél romniá angíl Ráskire-Devléskiro muj, i keréla lása rašáj saró pir davá Zakóno. I javéla rom žužó grehostyr, a džuvlý lydžála péskiro grého pe péste.’” I phendiá Raj Devél Mojzáske dasavé lavá: “Rákir Izrailjoskire čhavénge i phen lénge: kóli murš ci džuvlý zakaméla te del sovláh “nazorieistvo”, sob (kaj) te otdél pes dre nazoriei Ráske-Devléske, tedy jov isyn bangó te otphenelpe moliátyr (vinostyr) i zoralé pibnastyr, i naštý léske te p'jel ni uksuso (šutlo), moliátyr (vinostyr) ni uksuso zoralé pibnastyr, i ničí so kerdó vinagradostyr naštý te p'jel, i naštý te xal ni kerade, našut'kirde vinagradýtka múri; dre saré dyvesá péskire ‘nazorieistvoskire’ naštý léske te xal ničí, so kerdó vinagradostyr, ziarkendyr ke cýpa. Dre saré ‘nazorieistvoskire’ sovlahade dyvesá jov (léske) naštý te občhinel pe péskiro šeró balá; paka prodžána dyvesá, pe savé jov otdyjá pes Ráske-Devléske dre nazoriejende, jov javéla svénto: jov isyn bangó te barjakirel balá pe péskiro šeró. Dre saré dyvesá, pe savé jov otdyjá pes Ráske-Devléske dre nazoriei, naštý léske te poddžál ke muló trúpo: kasynybnasa ke péskiro dad i péskiri daj, i ke péskiro pšal, i ke péskiri phen, naštý léske te magirelpe, kiéli jone meréna, pal-dová so léskiro otdyibén Ráske-Devléske isyn pe léskiro šeró; dre saré péskire ‘nazorieistvoskire’ dyvesá jov isyn svénto Ráske-Devléske. Kóli meréla vari-kon pašýl léste syg, nadžiny, i jov dolesa magirela šeró péskire nazorieistvosa: tedy jov isyn bangó te občhinel balá péskire šerestyr dre léskiro žužakiribnaskiro dyvés, pe eftáto (bitrinéngiro déšto) dyvés jov isyn bangó te občhinel balá pe šeró, i pe ohtóto (bidujéngiro déšto) dyvés jov isyn bangó te janel dujén gorlicen, ci dujén ternen golumben, ke rašái, ke zagiibén dre šátra skedyibnáskiri. O rašáj iekha čirikliendyr janéla dro svénto dyibén (žértva) pal grého, a javirja dro célo shačkiribén, i vyžužakiréla les truposkire magiribnastyr, i svenciakirela léskiro šeró dro dová dyvés; i bangó isyn jov nevéstyr (nevés) te lel te otdél Ráske-Devléske dyvesá péskire nazorieistvoskire i te janel jekhe-beršytkone bakrores dro svénto dyibén pal bang; anglatuné dyvesá xasiné, pal dová so nazorieistvo léskiro magirdó. I ĥáda, isyn Zakóno pal nazorieistvo, kiéli prodžána dyvesá léskire nazorieistvóskire: trej les te janén ke skedyibnaskire-šatrakiro zagiibén, i jov janéla dre svénto dyibén Ráske-Devléske jekhés jekhe-beršytkone bakrés bidošakires dre svénto dyibén pal grého, i jekhe bakrés bidošakires dre svénto dyibén mírno, i khudo (korzina) opriesnokenca pšieničnone jaržestyr, maró, savó sys spekno jeliejosa, i priesna mariklia, savé sys pomakne jeliejosa, i pašýl lénde marunó janybén i vyčhuiben; i janéla davá rašáj angíl Raste-Devléste, i janéla léskiro svénto dyibén pal grého i léskiro célo shačkiribén; bakrés janéla dre mírno svénto dyibén Ráske-Devléske dro khudo pherdó apriesnokenca, adiáke keréla rašáj léskiro marunó janybén i léskiro iyčhuiben; i občhinela nazoriejo pašýl dre zagiibén skedyibnáskiri šátra péskire – ‘nazorieistvoskiro’ šeró, i léla péskire ‘nazorieistvoskire’ šereskire balá, i čhuvéla pe jag, saví isyn tel mírno svénto dyibén; i léla o rašáj kerado bakreskiro psikó i jekh posno paramo khudestyr i jekh posno marikly, i čhuvéla pe vastá nazoriejoske, paló dová, syr občhinela jov šeró péskire ‘nazorieistvostyr.’ i ĥazdéla adavá rašái, trinskiri angíl Raste-Devléste: davá isyn svénto. Ake, isyn svénto dyibén vaš rašáske, adiáke-pac', syr kolyneskiro trinskiriben i adiáke-pac' psikeskiro ĥazdyiben vaš žužakiriben pir patiaibén, savésa jov žužakirelape. Paló davá saró nazoriejo saštý te p'jel mol (vino). Ake, isyn Zakóno pal nazoriejoste, savó dyjá sovláh, i léskiro svénto dyibén (žértva) Ráske-Devléske pal péskiro nazorieistvo, apríč léste, so déla vólia léske léskiro barvalypén; pir péskiri sovláh, saví jov déla, adiáke i bangó jov isyn te kerél.” I phendiá Raj Devél Mojzáske, rakirí: “Rákir Aaronóske i léskire čhavénge: adiáke bahtiakiren Izrailjoskire čhavén, rakirí lénge: “Mek te bahtiakirél tut Raj Devél i te rakhél tut! Mek te podykhel pe túte Raj Devél Péskire ziaindle mósa i te otmekél túke! Mek te riskirél Raj Devél Péskiro muj pe túte i déla túke ramánjo (miro)!” Adiáke mek te prikharen Miro lav pe Izrailjoskire čhavénde, i Me bahtiakirava len.” Kiéli Mójza čhudiá šátra (skínija), i pomakhcia la, i obsvencyndia la i altárjo, i saró, so trej vaš léske, i pomakhcia len i obsvencindia len, to javné Izrailjoskire barydyrá, šeralé léngire čekar'jendyr (semieistvendyr), barydyrá pe ródycy, savé piriginenas, i jone jandlé svénta dyibená, i jandlé péskire dáry angíl Raste-Devléste, šov začhakirde ĥliaby (povozki) i dešudúj guruvén, pir jekh ĥliabo dujendyr barydyrendyr i pir jekhe guruveste kažnoné manušéstyr, i čhudé davá saró angíl šátra (skínija). I phendiá Raj Devél Mojzáske dasavé lavá: “Le davá léndyr, davá javéla trej, sob (kaj) te kerén butiá pašýl skedyibnáskiri šátra; i otdé davá Lieviténge, dykhí pir léngiri butý.” I lyjá Mójza ĥliaby i guruvén, i dyjá len Lieviténge: duj ĥliaby i štaren guruvén dyjá Girsonoskire čhavénge pir léngiri butý: i štar vurdená i ohtó (bidujéngiro deš) guruvén dyjá Mierariskire čhavénge pir léngiri butý, tel Ifamaróskiro dykhibén, Aaronóskire-čhavéskire, savó sys rašái; a Kaafoskire čhavénge na dyjá, pal-dová so butý léngiri sys te lydžán svénto štéto – pe psiké jone sys bangé te lydžán. I jandlé barydyrá svénto dyibén vaš altárjo te obsvencynen les dre léskiro makhibnaskiro dyvés, i čhudé barydyrá péskiro janybén angíl altárjo. I phendiá Raj Devél Mojzáske: “Pir jekhe barydyreste pe dyvés mek te janén péskire dáry te obsvencynen altárjo.” Dro pérvo dyvés jandiá péskiro o Naasóno, Aminadavóskiro čhavó, Judáskire rodycóstyr; ianybén (dáry) léskiro sys: jekh rupuvó baró čaró, važyndia jov šel te trijánda šékieli, jekh rupuvó tahtáj dre eftadešá šékieli, pir svénto šékieljo, čhudo pšeničnone jaržesa, pirimiešyndlo jeliejosa, dro marunó janybén, iekh suvnakuný kadila dre deš šékieli, čhudý pherdés fimiamosa (gudlé smolenca), iekh tielianto, jekh bakro, jekhe-beršytko bakroró, dro célo shačkiribén, iekh buzno dre svénto dyibén pal grého, i dro ramanjono (mírno) svénto dyibén dujén guruvén, pandžé bakrén, pandžé buznen, pandžé jekhe-beršytkone bakrorén; ĥáda, isyn Aminadavoskire-čhavéskiro, Naasonóskiro janybén. Pe javír dyvés jandiá dáry o Nafanailo, Cuaroskiro čhavó, barydyró Isaharoskire rodycóstyr; jov jandiá péskire dáry: jekh rupuvó baró čaró (bliudo), savó važyndia šel te trijánda šékieli, jekh rupuvó tahtáj dre eftadešá šékieli, pir svénto šékieljo, čhudo pšeničnone jaržesa, pieriemiešyndlo jeliejosa, dro marunó janybén, iekh suvnakuný kadila dre deš šékieli, savé sys čhudé pherdés fimiamosa (gudlé smolenca), iekhe tieliantos, jekhe bakrés, jekhés jekhe-beršytkone bakrores, vaš célo shačkiribén, iekhe buznés (kozlos) dro svénto dyibén pal grého, i dro ramanjono (mírno) svénto dyibén duje guruvén, pandžé bakrén, pandžé buznen, pandžé jekhe-beršytkonen bakrorén; ĥáda, sys Cuaroskire-čhavéskiro, Nafanailoskiro janybén. Pe tríto dyvés barydyró Zavulonoskire-čhavéngiro, o Jeliavo, Xielonoskiro čhavó, jandiá péskire dáry. Janybén léskiro sys: jekh rupuvó baró čaró, savó važyndia šel te trijánda šékieli, jekh rupuvó tahtáj dre eftadešá šékieli, pir svénto šékieljo, čhudo pherdés pšeničnone jaržesa, pieriemiešindlo jeliejosa, dro marunó janybén, iekh suvnakuný kadila dre deš šékieli, čhudé pherdés fimiamosa (gudlé smolenca), iekhe guruvóres, jekhe bakrés, jekhe jekhe-beršytkone bakrores, vaš célo shačkiribén, iekhe buznés dro svénto dyibén pal grého, i dro ramanjono (mírno) svénto dyibén duje guruvén, pandžé bakrén, pandžé buznen (kozlen), pandžé jekhe-beršytkonen bakrorén; ĥáda, sys Xielonovoskire-čhavéskiro, Jeliavoskiro janybén. Pe štárto dyvés barydyró Ruvimóskire-čhavéngiro, o Jelicuro, Šedieuroskiro čhavó, jandiá péskire dáry. Janybén léskiro sys: jekh rupuvó baró čaró, savó važyndia šel te trijánda šékieli, jekh rupuvó tahtáj dre eftadešá šékieli, pir svénto šékieljo, čhudé pherdés pšeničnone jaržesa, pieriemiešyndlo jeliejosa, dro marunó janybén, iekh suvnakuný kadila dre deš šékieli, saví sys čhudý pherdés fimiamosa (gudlé smolenca), iekh guruvoro, jekh bakro, jekh jekhe-beršytko bakroró, vaš célo shačkiribén, iekh buzno dro svénto dyibén pal grého, i dro ramanjono (mírno) svénto dyibén dujén guruvén, pandžé bakrén, pandžé buznien i pandžé jekhe-beršytkone bakrorén; ĥáda, sys Šedieuroskire-čhavéskiro, Jelicuroskiro janybén. Pe pándžto dyvés barydyró Simieonoskire-čhavéngiro, o Šelumiilo, čhavó Curišadoskiro. Janybén léskiro sys: jekh rupuvó baró čaró, savó važyndia šel te trijánda šékieli, jekh rupuvó tahtáj dre eftadešá šékieli, pir svénto šékieljo, čhudé pherdés pšeničnone jaržesa, pieriemiešyndlo jeliejosa, dro marunó janybén, iekh suvnakuný kadila dre deš šékieli, čhudý pherdés fimiamosa (gudlé smolenca), iekh guruvoro (tielianto), jekh bakro, jekh jekhe-beršytko bakroró, vaš célo shačkiribén; iekh buzno dro svénto dyibén pal grého, i dro ramanjono svénto dyibén duje guruvén, pandžé bakrén, pandžé buznen, i pandžé jekhe-beršytkonen bakrorén; ĥáda, sys Curišadoskire-čhavéskiro, Šelumiiloskiro janybén. Pe šóvto dyvés barydyró Gadóskire-čhavéngiro, o Jeliasafo, Rieguiloskiro čhavó jandiá. Janybén léskiro sys: jekh rupuvó baró čaró, savó važyndia šel te trijánda šékieli, jekh rupuvó tahtáj dre eftadešá šékieli, pir šékieljo svénto, čhudé pherdés pšeničnone jaržesa, pieriemiešyndla aliejosa, dro marunó janybén, iekh suvnakuný kadila dre deš šékieli, čhudý pherdés fimiamosa (gudlé smolenca), iekh guruvoro (tielianto), jekh bakro, jekh jekhe-beršytko bakro, dro célo shačkiribén, iekh buzno (kozlo) dro svénto dyibén pal grého, i dro ramanjono (mírno) svénto dyibén: duje guruvén, pandžé bakrén, pandžé buznen i pandžé jekhe-beršytkonen bakrorén; ĥáda, sys Rieguiloskire-čhavéskiro, Jeliasafoskiro janybén. Pe eftáto dyvés barydyró Jefriemóskire-čhavéngiro, o Jelišamo, Amiudoskiro čhavó. Janybén léskiro sys: jekh rupuvó baró čaró, savó važyndia šel te trijánda šékieli, jekh rupuvó tahtáj dre eftadešá šékieli, pir svénto šékieljo, čhudé pherdés pšeničnone jaržesa, pirimiešyndlo jeliejosa dro marunó janybén, iekh suvnakuný kadila dre deš šékieli, čhudý pherdés fimiamosa (gudlé smolenca), iekh guruvoro (tielianto), jekh bakro, jekh jekhe-beršytko bakroró vaš célo shačkiribén, iekh buzno dro svénto dyibén pal grého, i dro ramanjono (mírno) svénto dyibén duje guruvén, pandžé bakrén, pandžé buznen, pandžé jekhe-beršytkone bakrorén; ĥáda, sys Amiudoskire-čhavéskiro, Jelišamoskiro janybén. Pe ohtóto dyvés barydyró Manasijáskire-čhavéngiro, o Gamaliilo, Piedacuroskiro čhavó. Janybén léskiro sys: jekh rupuvó baró čaró, savó važyndia šel trijánda šékieli, jekh rupuvó tahtáj dre eftadešá šékieli, pir svénto šékieljo, čhudé pherdés pšeničnone jaržesa, pieriemiešyndlo jeliejosa, dro marunó janybén, iekh suvnakuný kadila dre deš šékieli, čhudý pherdés fimiamosa (gudlé smolenca), iekh guruvoro (tielianto), jekh bakro, jekh jekhe-beršytko bakrore, vaš célo shačkiribén, iekh buzno dro svénto dyibén pal grého, i dro ramanjono svénto dyibén duje guruvén, pandžé bakrén, pandžé buznen, pandžé jekhe-beršytkonen bakrorén; ĥáda, sys Piedacuroskire-čhavéskiro, Gamaliiloskiro janybén. Pe jeniáto (bijekhéskiro déšto) dyvés barydyró Vieniaminovoskire-čhavéngiro, o Avidano, Gidieonijoskiro čhavó. Janybén léskiro sys: jekh rupuvé baró čaró, savó važyndia šel trijánda šékieli, jekh rupuvó tahtáj dre eftadešá šékieli, pir svénto šékieljo, čhudé pherdés pšeničnone jaržesa, pirimiešyndlo jeliejosa, dro marunó janybén, iekh suvnakuný kadila dre deš šékieli, čhudý pherdés fimiamosa (gudlé smolenca), iekh guruvoro (tielianto), jekh bakro, jekh jekhe-beršytko bakroró, vaš célo shačkiribén, iekh buzno dro svénto dyibén pal grého, i dro ramanjono (mírno) svénto dyibén duje guruvén, pandžé bakrén, pandžé buznen, pandžé jekhe-beršytkone bakrorén; ĥáda sys Gidieonijoskire-čhavéskiro, Avidanoskiro janybén. Pe déšto dyvés barydyró Danóskire-čhavéngiro, o Ahiiezero, Amišadajoskiro čhavó. Janybén léskiro sys: jekh rupuvé baró čaró, savó važyndia šel trijánda šékieli, jekh rupuvó tahtái, eftá deša šékieli, pir svénto šékieljo, čhudé pherdés pšeničnone jaržesa, pieriemiešyndlo jeliejosa, dro marunó janybén, iekh suvnakuný kadila dre deš šékieli, čhudý pherdés fimiamosa (gudlé smolenca), iekh guruvoro (tielianto), jekh bakro, jekh jekhe-beršytko bakroró, vaš célo shačkiribén, iekh buzno dro svénto dyibén pal grého, i dro ramanjono (mírno) svénto dyibén mírno duje guruvén, pandžé bakrén, pandžé buznen, pandžé jekhe-beršytkonen bakrorén; ĥáda, sys Amišadajoskire-čhavéskiro, Ahiiezeroskiro janybén. Pe dešupervo dyvés barydyró Asiroskire-čhavéngiro, o Pagiilo, Ohranoskiro čhavó jandiá. Janybén léskiro sys: jekh rupuvó baró čaró, savó važyndia šel trijánda šékieli, jekh rupuvó tahtáj dre eftadešá šékieli, pir svénto šékieljo, čhudé pherdés pšeničnone jaržesa, pirimiešyndlo jeliejosa, dro marunó janybén, iekh suvnakuný kadila dre deš šékieli, čhudý pherdés fimiamosa (gudlé smolenca), iekh guruvoro (tielianto), jekh bakro, jekh jekhe-beršytko bakroró, dro célo shačkiribén, iekh buzno dro svénto dyibén pal grého, i dro ramanjono svénto dyibén duje guruvén, pandžé bakrén, pandžé buznen (kozlen), pandžé jekhe-beršytkone bakrorén; ĥáda, sys Pagiiloskiro, Ohranoskire-čhavéskiro janybén. Pe dešuiavir dyvés barydyró Niefalimoskire-čhavéngiro, o Ahiro, Enanoskiro čhavó. Janybén léskiro sys: jekh rupuvó baró čaró, savó važynela šel trijánda šékieli, jekh rupuvó tahtáj dre eftadešá šékieli, pir svénto šékieljo, čhudé pherdés pšeničnone jaržesa, pieriemiešyndlo jeliejosa, dro marunó janybén, iekh suvnakuný kadila dre deš šékieli, čhudý pherdés fimiamosa (gudlé smolenca), iekh guruvoro (tielianto), jekh bakro, jekh jekhe-beršytko bakroró, vaš célo shačkiribén, iekh buzno dro svénto dyibén pal grého, i dro ramanjono svénto dyibén duje guruvén, pandžé bakrén, pandžé buznen, pandžé jekhe-beršytkone bakrorén; ĥáda, sys Enanoskire-čhavéskiro, Ahiroskiro janybén. Ake, sys Izrailjoskire barydyrendyr janybén te obsvencynen altárjo dro dyvés, kiéli pomakhne les: dešudúj baré čaré, dešudúj rupuvé tahtaja, dešudúj suvnakuné kadily; pir šel te trijánda šékieli rup dro kažno čaró, i pir eftadešá dro kažno tahtái: i adiáke saró rup dre dalé khoré (sasúdy) sys duj tysjoncy štaršelá šékieli, pir svénto šékieljo; suvnakuné kadily, čhudé pherdés fimiamosa (gudlé smolenca), dešudúi, dre kažno kadila pir deš šékieli, pir svénto šékieljo: saró suvnakáj dre kadily sys šel te biš šékieli. Dro célo shačkiribén sys dešudúj guruvore (tielianty), baré kheritkoné murdalestyr (skotóstyr), dešudúj bakré, dešudúj iekhe-beršytkonen bakrore i pašýl lénde marunó janybén, i dro svénto dyibén pal grého dešudúj buznen, i dro ramanjono (mírno) svénto dyibén saró kheritkoné murdaléndyr (baré skotóstyr) sys biš te štar guruvore (tielianty), šovdešá bakré, šovdešá buzne, šovdešá jekhe-beršytkone bakrore. Ake, savó sys janybén te žužakirel altárjo paló léskiro makhiben. Kiéli Mójza zadžalas dre skedyibnáskiri šátra, sob (kaj) te rakirél Rása-Devlésa, to jov šundiá zan (glos), saví léske rakirdiá denkostyr (kryškatyr), savó sys pe kovčego sykadyibnasa (otkrovienijosa) maškír duj xieruvimy, i Jov rakirdiá léske. I phendiá Raj Devél Mojzáske dasavé lavá: “De te džinél Aaronóske i phen léske: ‘Kiéli tu javésa te zahačkires lampady, tedy pe anglatuny rig dro momolýtko (svietíl'niko) trej, sob (kaj) te xačon eftá lampady.’” Aaróno adiáke i kerdiá: pe anglatuny rig dro momolýtko (svietíl'niko) zahačkirdia léskire lampady, syr phendiá Mojzáske. I ĥáda, syr kerdó sys momolýtko: jov sys čekano suvnakástyr, léskire destorestyr (ĥerjatyr) i ke luludiá (cvety) jov sys čekano. Pir sykaibén (obrazco) dasavo-pac', savó sykadiá Raj Devél Mojzáske, jov kerdiá momolýtko. I phendiá Raj Devél Mojzáske dasavé lavá: “Le Lievitén Izrailjoskire čhavéndyr, i vyžužakir len; a sob (kaj) len te vyžužakires, ker lénca adiáke: občhuv len žužakiribnaskire (čystone) paniésa, i mek jone te vymuraven péskire (vybriinen) saré masá muradluniasa (britvasa) i te vymoren péskire uribená, i javéna jone žužé (čysta); i mek te len guruvóres i ke jov marunó janybén, pšenično jaržó, pieriemiešyndlo jeliejosa, i javire guruvóres le dro svénto dyibén pal grého; i jan Lievitén angíl skedyibnáskiri šátra, i skéde saró skedyibén Izrailjoskire čhavéngiro. I jan léngire Lievitén angíl Raste-Devléste, i mek te čhuvén upré Izrailjoskire čhavé péskire vastá pe Lievitende. A Aaróno mek te vysvencynel Lievitén angíl Raste-Devléste Izrailjoskire čhavéndyr, sob (kaj) jone te dynarinén Ráske-Devléske; a Lievíty mek te čhuvén péskire vastá pe tieliantengiro šeró, i jan jekhés dre svénto dyibén pal grého, a javirés vaš célo shačkiribén Ráske-Devléske, sob (kaj) Lievitén te žužakiren; i čhuv Lievitén angíl Aaronoste i angíl léskire čhavénde, i jan len angíl Raste-Devléste te vysvencynel. I adiáke rosker (roskede) Lievitén Izrailjoskire čhavéndyr, sob (kaj) Lievíty te javén Miré. Paló davá Lievíty zadžána dre skedyibnáskiri šátra te kerén butý, kiéli tu len vyžužakiresa i vysvencynesa len, pal-dová so jone otdyné Mánge Izrailjoskire čhavéndyr. Zamiést (pe štéto) sarén anglatunen Izrailjoskire čhavéndyr, kažno (sváko), savé roskušena dakiri ločoví (utroba), Me láva len ke Pe; pal-dová so saré anglatuné (pierviency) Izrailjoskire čhavéndyr isyn Miré, manušéstyr ke kherítko murdál (skoto): dro dová dyvés, kiéli Me xasiakirdjom sarén anglatunen pe Jegiptóskiri phuv, Me osvencyndjom len Péske, i lyjom Lievitén zamiést (pe štéto) saré anglatuné Izrailjoskire čhavéndyr. I Me dyjom Lievitén Aaronóske i léskire čhavénge, Izrailjoskire čhavéndyr, sob (kaj) jone te lydžán svénto butý pal Izrailjoskire čhavénde pašýl skedyibnáskiri šátra i te kerén butý rakhibnar'jenca vaš Izrailjoskire čhavénge, sob (kaj) te na javél pe Izrailjoskire čhavénde moróvo (meribnytka fránsy), kiéli Izrailjoskire čhavé te poddžan ke svénto štéto.” I adiáke kerdé Mójza i Aaróno i saró Izrailjoskire-čhavéngiro skedyibén Lievitenca: syr priphendiá Raj Devél Mojzáske pal Lievitende, adiáke i kerdé lénca Izrailjoskire čhavé. I vyžužakirdepe Lievíty, i vymorde péskire uribená i vysvencyndia len Aaróno angíl Raste-Devléste, i vyžužakirdiá len Aaróno, sob (kaj) jone te javén žužé. Paló davá zaginé Lievíty te kerén péskire butiá dre skedyibnáskiri šátra angíl Aaronoste i angíl léskire čhavénde. Syr phendiá Raj Devél Mojzáske pal Lievitende, adiáke i kerdé jone lénca. I phendiá Raj Devél Mojzáske dasavé lavá: “Ĥáda, isyn Zakóno pal Lievitende: biš te pandžé beršéndyr i phuredýr jone isyn bangé te len te dynarinén (te služynen) pe butý pašýl skedyibnáskiri šátra, a dre pandžeša berš jone isyn bangé te mekén péskiri butý i butýr te na kerén butý: tedy mek jone te den vast (te pomoginen) péskire pšalénge te rikirén stréga pašýl skedyibnáskiri šátra, ne te kerén butý mek jone kokoré te na kerén; adiáke kerén Lievitenca, so phenélape pal léngiri butý.” I phendiá Raj Devél Mojzáske pe Sinajoskiri čhučí phuv, pe javír berš, syr Judy vyginé Jegiptóskire phuvjátyr, dro pérvo čhon: “Mek Izrailjoskire čhavé te kerén Patradí dro uphendló vaš láke časo: pe dešuštarto dyvés dalé-čhonéskiro dyvés, bel'velié, te kerén la dro uphendló vaš láke časo, pir saré uphenybená i pir saré lákire zakóny kerén la.” I phendiá Mójza Izrailjoskire čhavénge, sob (kaj) jone te kerén Patradí. I kerdé jone Patradí dro pérvo čhon, pe dešuštarto čhonéskiro dyvés bel'velié, pe Sinajoskiri čhučí phuv: dre saró, syr priphendiá Raj Devél Mojzáske, adiáke i kerdé Izrailjoskire čhavé. Sys manušá, savé sys nažužé, savé čiladepe ke manušýtka trúpy, i na mogindlé te kerén Patradí dre dová dyvés; i javné jone ke Mójza i Aaróno dre dová dyvés, i phendlé léske odolé manušá: “Ame sam nažužé, so čiladiampe ke manušýtka trúpy; vaš so aménge te na das dová, sob (kaj) ame te janas svénto dyibén Ráske-Devléske dre uphendló časo maškír Izrailjoskire čhavénde?” I phendiá lénge Mójza: “Terdjon, me šunava, so phenéla pal tuménde Raj Devél.” I phendiá Raj Devél Mojzáske, rakirí: “Phen Izrailjoskire čhavénge: kóli kon tuméndyr ci tumaré rodóstyr javéla nažužo, so čilavelaspe ke trúpo, ci javéla dro baró drom, tedy i jov isyn bangó te kerél Devléskiri Patradí; pe dešuštarto dyvés javire-čhonéskiro, bel'velié, mek dasavé te kerén la, i opriesnokenca i kirkone čar'jenca mek te xan la; i mek te na jačkiren látyr nisó ke ránko (ke zlóko), i lákire kokalý na phagiren; mek te kerén la pir saré uphenybená pal Patradí; a kon isyn žužó i nane dro drom, i na keréla Patradí, – xasjola dová di péskire manušéndyr, pal-dová so jov na jandiá svénto dyibén Ráske-Devléske dre péskiro časo: lydžála pe péste grého odová manúš, kóli tuménde javéla te dživél manúš javire rigátyr, tedy i jov isyn bangó te kerél Ráskire-Devléskiri Patradí: pir uphenybén pal Patradí i pir lákiro Zakóno jov isyn bangó te kerél la; jekh uphenybén mek te javél tuménde i vaš manušénge javire rigátyr, i vaš péskire manušéske. Dro dová dyvés, kiéli sys čhudý uprál šátra (skínija), óbloko učhakirdiá šátra dosykaibnása (otkrovienijasa), i bel'veliatyr pe šátra sys bicialy sýrby jag (savó sys syr stýlbo) ke sámo ránko (ke zlóko). Adiáke sys usady (sak): óbloko učhakirelas la dyvesé, i dasavo-pac' syr jagitko stýlbo sys ratý. I kiéli óbloko šatratyr ĥazdelaspe, tedy Izrailjoskire čhavé džánas dro drom, i pe štéto, kaj óbloko terdjolas, odój terdjonas Izrailjoskire čhavé stanósa (taborosa). Pir Ráskire-Devléskiro uphenybén Izrailjoskire čhavé džánas dro drom, i pir Ráskire-Devléskiro uphenybén terdjonas: dro saró dová časo, kiéli óbloko terdó sys pe šátra, i jone sys terdé; i kóli óbloko ĥará (dlúges) sys terdó pe šátra, tedy i Izrailjoskire čhavé kerdé pir davá Ráskiro-Devléskiro uphenybén i na džánas; iavír mólo óbloko nábut dyvesá sys pe šátra: jone pir Ráskire-Devléskiro uphenybén terdjonas, i pir Ráskire-Devléskiro uphenybén džánas dro drom. Javír mólo óbloko sys terdó féni (tóka) bel'veliatyr ke ránko (ke zlóko), i rankostyr ĥazdelaspe óbloko, tedy i jone džánas; cji, kóli dyvesé i ratý sys terdó óbloko, to kiéli ĥazdelaspe, to i jone tedy džánas; cji, kóli duj dyvesá, ci čhon, ci vari-kicý dyvesá sys terdó óbloko pe šátra, to tedy i Izrailjoskire čhavé sys terdé i na džánas dro drom; a kiéli jov ĥazdelaspe, tedy i jone džánas. Pir Ráskire-Devléskiro uphenybén jone terdjonas, i pir Ráskire-Devléskiro uphenybén jone džánas dro drom: jone kerdé pir Ráskire-Devléskiro uphenybén, savó Jov dyjá pir Mojzaste. I phendiá Raj Devél Mojzáske dasavé lavá: “Ker péske duj rupuvé rógi (truby), čekanenca ker len (suvnakuné koterestyr), sob (kaj) jone te javén vaš túke te kharel khetanyben (obščyna) i vaš dová, sob (kaj) te skedelpe stáno (taboro (lod)). Kiéli phurdena dre rógi (truby), to skedénape ke tu saré manušá ke zagiibén pašýl skedyibnáskiri šátra. Kiéli jekhe rogosa zaphurdena, to skedénape ke tu thagárja (kniázi) i barydyrá pe tysjoncende Izrailjoskirende. Kiéli phurdena trivoga, to ĥazdénape stany, savé sys terdé ke vastóko; kiéli dro javír mólo phurdena trivoga, to ĥazdénape stany, savé sys terdé ke paš-dyvés (jugo); trivoga mek te bašaven angíl léngiro skedyibén dro drom; a kiéli trej javéla te skedes manušéngiro skedyibén, to bašaven, ne na trivoga. Aaronóskire čhavé, e rašaja, isyn bangé te bašaven rogénca: davá javéla tuménge viekoskire uphenybnasa dre tumaré ródy; i, kiéli džána tumé pe maribén pe tumarí phuv proti vergoste, savó džála maribnása pe tuménde, bašaven ĥará (dlúges) trivoga, – i tumé javéna priripirde angíl Raste-Devléste tumareste, i javéna zrakhné tumé vergéndyr; i dre tumaré-radymakiro dyvés, i pe tumaré svénki, i pe sámo anglypén (načalo) dro čhon bašaven rogénca vaš tumaró célo shačkiribén i vaš ramanjono (mírno) tumaró svénto dyibén i davá javéla pal tuménde ripiribnasa angíl tumaré Devléste. Me som Raj Devél, Devél tumaró.” Pe javír berš, dro javír čhon, pe bišengire-čhonéskiro dyvés, ĥazdyjápe óbloko otčhakiribnaskire šatratyr dosykaibnása (otkrovienijasa); i giné Izrailjoskire čhavé pir péskire stany (tabory) Sinajoskire čhučé phuvjátyr, i terdijá óbloko pe čhučí phuv Farano. I ĥazdynépe jone dro pérvo mólo, pir Ráskire-Devléskiro uphenybén, savó sys dynó pir Mojzaste. Sys ĥazdynó pérvo Judáskire-čhavéngire stanoskiro sciago (znamia) pir léngire otriády; pe otriády léngire rodycóstyr sys Naasóno, Aminadavóskiro čhavó; i pe otriády Isaharoskire-čhavéngire rodycóstyr sys Nafanailo, Cuaraskiro čhavó; i pe otriády Zavulonoskire-čhavéngire rodycóstyr sys Jeliavo, Xielonoskiro čhavó. I roskedyny sys šátra, i giné Girsonoskire čhavé i Mierariskire čhavé, savé lydžánas šátra. I ĥazdynó sys Ruvimóskire-stanoskiro sciago pir léngire otriády; i pe otriády léngire sys Jelicuro, Šedieuroskiro čhavó; i pe otriády Simieoonoskire-čhavéngire rodycóstyr sys Šelumiilo, Curišadajoskiro čhavó; i pe otriády, Gadóskire-čhavéngire rodycóstyr sys Jeliasafo, Rieguiloskiro čhavó. Tén'ci (poslie) giné Kaafovoskire čhavé, savé lydžánas pribory sventoné štetóstyr; šátra sys čhudý angíl léngiro javiben. I ĥazdynó sys Jefriemóskire-čhavéngiro stanoskiro sciago (znamia) pir léngire otriády; i pe léngire otriády sys Jelišamo, Amiudaskiro čhavó; i pe otriády Manasijáskire-čhavéngire rodycóstyr sys Gamaliilo, Piedacuraskiro čhavó; i pe otriády Vieniaminóskire-čhavéngire rodycóstyr sys Avidano, Gidieonijoskiro čhavó. Palatunó (posliednjo) saré stanendyr ĥazdynó sys sciago (znamia) Danóskire-čhavéngiro léngire otriadendyr; i pe léngire otriády sys Ahiiezero, Amišadajoskiro čhavó; i pe otriády Asiroskire-čhavéngire rodycóstyr sys Pagiilo, Ohranoskiro čhavó; i pe otriády Niefalimoskire-čhavéngire rodycóstyr sys Ahiro, Enanoskiro čhavó. Ĥáda, sys giibnytko (poriadko) Izrailjoskire čhavéngiro pir léngire otriády. I jone giné dro drom. I phendiá Mójza Xovavoske, Raguiloskire čhavéske, Madianitianinoske, Mojzáskire sastreske [semencake-r.s.]: “Ame džása angíl pe dová štéto, pal savó Raj Devél phendiá: ‘Tuménge Me dáva les’, džá aménca, ame kerása túke lačhipén, pal-dová so Raj Devél lačhipén phendiá pal Izrailjo.” Ne jov phendiá léske: “Na džáva, me džáva pe péskiri phuv, kaj bijandyjom.” Mójza phendiá: “Na mek amen, pal-dová so tu džinésa, syr ame terdjovasa stanósa pe čhučí phuv, i tu javésa vaš aménge xaj (sýrby) jakhá te lydžas; kóli tu džása aménca, to dová lačhipén, savó Raj Devél keréla aménge, ame kerása túke.” I giné dro drom jone Ráskire-Devléskire bergátyr, trin dyvesá sys dro drom, i kovčego Ráskire-Devléskiro zavietosa gijá angíl lénde trin dyvesá, sob (kaj) te vydykhen lénge štéto, kaj te terdjon. I óbloko Ráskire-Devléskiro svencyndia lénge dyvesé, kiéli jone giné stanostyr. Kiéli ĥazdélape kovčego dro drom, Mójza rakirdiá: “Zaterdjov, Rajo Dévla, i roznašenape Tyré vérgi, i našéna Tyré móstyr, savénge drieván Tu san na pir iló!” A kiéli terdjolas kovčego, jov rakirdiá: “Risjov, Rajo Dévla, ke Izrailjoskire tysjoncy, savén až naštý te pirigines.” Manušá lyné dro saró šunybén te žalinenpe Ráske-Devléske; i Raj Devél šundiá, i roshačija Léskiri xolý, i zahačíia pe lénde Raskiri-Devléskiri jag, i lyjá Jov te xasiakirél stanoskiro jagóro (krajo). I lyné te den gódla manušá Mojzáske; i pomangdiape Mójza Ráske-Devléske, i štylyja jag. I dyné lav dalé štetoske: Taviera, pal-dová so odój zahačíia pe lénde Ráskire-Devléskiri jag. Manušá, savé javné javire rigátyr, maškír lénde lyné te lathén láska pe ĥará (pe dlúges); lénca i Izrailjoskire čhavé sys bešté i rondlé, i rakirdé: “Kon čaliakirela pherdés amen masesa? Ame ripirasa mačhé, savé ame xajam dro Jegípto ivjá (darmes) i gurki (bobirki), i dyni, i purum, i purum-poriejo i syr' (česnoko); a akaná di amaró našavela zor, ničí nane, jekh manna dre amaré jakhá.” Manna sys dasaví-pac' syr koriandrytko siemjo, vidosa syr bdolaho; manušá psirdé i skedenas la, i mielindle dre žernovy beledin ci kurde (tolkindle) dre stupa, i kerade dre kakávi (kotlo), i kerdé látyr mariklia; pir smako joj sys dasaví-pac', syr marikly jeliejosa. I kiéli pahlyn (rosa) zdžála pe stáno ratý, tedy zdžála pe léste i manna. O Mójza šundiá, so manušá rovenas dre péskire čékarja (siemieistvy), kažno (sváko) pašýl péskire šatrakire vudará; i zoralés zahačíia Ráskire-Devléskiri xolý, i smentno sys vaš Mojzáske. I phendiá Mójza Ráske-Devléske: “Vaš so Tu menčynesa Tyré pisharís? I sóske me na lathjom tangipén angíl Tyré jakhá, so Tu čhudián pe mánde saró adalé-manušéngiro pharipén? Naúšto me lydžavas saré adalé manušén dro miro per, i naúšto me bijandjom len, so Tu rakirésa mánge: ‘Lýdža len pe tyré vastá, syr nian'ka lydžála bijatós (tyknemases)’, pe phuv, saví Tu sovlahasa phendián te des léngire dadénge? katýr mánge te lav mas, sob (kaj) te dav saré adalé manušénge? Pal-dová so jone rovena angíl mánde i rakiréna: ‘De aménge te xas mas.’ Me jekhdžinó naštý (na moginav) te lydžav sarén adalé manušén; pal-dová so jone sys pharé vaš mánge, kiéli Tu adiáke kerésa mánca, tedy fedýr muliakir man, kóli me lathjom tangipén (žalima) angíl Tyré jakhá, sob (kaj) mánge te na dykháv miro xasibén.” I phendiá Raj Devél Mojzáske: “Skéde Mánge eftadešá muršén Izrailjoskire phurydyrendyr, savén tu džinésa, so (kaj) jone isyn phurydyrá i léskire dykhibnaskire, i le len ke skedyibnáskiri šátra, sob (kaj) jone te jačen odój túsa. Me zdžava, i Me javáva te rakiráv odój túsa, i Me láva Duhóstyr, savó isyn pe túte, i čhuváva Les pe lénde, sob (kaj) jone te lydžán túsa manušéngiro pharipén, a sob (kaj) tu na jekhdžinó te lydžas. Manušénge phen: ‘Vyžužakirenpe ke atasiatuno dyvés, i javéna te xan mas; adiáke syr tumé rondlé angíl Ráskire-Devléskiro šunybén i rakirdé, kon čaliakirela pherdés amen masesa?’ Mištés aménge sys dro Jegípto, – tedy i déla tuménge Raj Devél mas, i tumé javéna te xan: na jekh dyvés tumé javéna te xan, na duj dyvesá, na pandž dyvesá, i na deš dyvesá i na biš dyvesá, ne saró čhon, paka jov léla te džal tumaré nakhestyr i jačéla vaš tuménge džungaló (brydko), pal-dová so tumé bidykhne Ras-Devlés, Savó sys maškír tuménde, i rondlé angíl Léste, rakirí: “Vaš so treindiá sys aménge te vydžas Jegiptóstyr?” I phendiá Mójza Ráske-Devléske: “Šovšelá tysjoncy sarén adalé manušén, maškír savénde i me som; a Tu rakirésa: “Me dáva lénge mas, i javéna te xan saró čhon!” Ci te začhines sarén bakrén i guruvén, sob (kaj) lénge te uhtylel (te javél dósi)? Ci saré morjoskire (derjavéskire) mačhé skedénape, sob (kaj) te čaliakiren len?” I phendiá Raj Devél Mojzáske: “Naúšto Ráskire-Devléskiro vast jaciá krotko (tyknó)? Akaná tu dykhésa, ci kerélape lav Miro ke Tu, ci nad?” Mójza vygijá i phendiá manušénge Ráskire-Devléskire lavá, i skedyjá eftadeše muršén phurydyre manušéndyr, i čhudiá len pašýl šátra. I zgija Raj Devél dro óbloko, i rakirdiá lésa, i lyjá Duhóstyr (Fanostyr), Savó sys pe léste i dyjá Les eftadaše phurydyrenge. I kiéli mekciá pe lénde Dúho (Fáno), to ne jone lyné te angilphenen (te proročynen), ne korigedýr (pozže) na pirijačne. Duj muršá jačnépe dro stáno, jekheskiro lav sys Jeldado, a javireskiro lav sys Modado; ne pe lénde sys Dúho (Fáno), i, so jone angilphenenas dro stáno [jone sys začhindlé (zapisyndle) ne jone na giné dre šátra šatratyr jone angilphenenas dro stáno-ju.o.] I priprastandyja ternó manúš i rosphendiá Mojzáske, i phendiá: “Jeldado i Modado angilphenena.” Dro otphenybén pe davá Isúso (Johošuá), Navinoskiro čhavó, Mojzáskiro ternó pomogibnaskiro, jekh savés jov vykedyjá, phendiá: “Rajo miro, Mójza! Priphen lénge te na kerén.” Ne Mójza phendiá léske: “Ci na zevlynesa tu pal mánde? Ne, kóli b saré maškír Ráskire-Devléskire manušénde te javén proróki, to Raj Devél bičhavelas Péskiro Dúho (Fáno) pe lénde!” I risijá Mójza dro stáno, jov i Izrailjoskire phurydyrá (godephuré). I ĥazdyjápe balvál Rástyr-Devléstyr, i jandiá morjostyr (derjavestyr) pieriepjolen, i rosčhurdyja len pašýl stáno (taboro (lod)), pe jekhe-dyveseskiro drom pir jekh rig i pe jekhe-dyveseskiro drom pir javír rig pašýl stáno, pe duj kuniá (lokti) vučedýr phuvjátyr. I terdiné manušá, i saró dová dyvés, i sarí rat, i saró javír dyvés skedyné pieriepjolen; i kon nábut skedyjá, odová skedyjá deš xomiery; i rosčhude len vaš péske pašýl stáno. Mas sys dre léngire dandá i na sys shano, syr Ráskire-Devléskiri xolý roshačija pe manušénde, to dyjá kára Raj Devél manušénge drieván baré fransenca. I dyné lav dolé štetoske: Kibrot-Gataava, pal-dová so odój garadé manušén, savé sys bokhalé ke xabén. Kibrot-Gataavatyr giné manušá dro Asirofo i terdiné ke Asirofo. I vyphendle xolý Mariam i Aaróno Mojzáske pal romniáte Jefiopliankate, savjá jov lyjá, pal-dová jov lyjá pal péste Jefioplianka, i phendlé: “Ci jekhéske Mojzáske rakirdiá Raj Devél? Ci na rakirdiá Jov i aménge?”, – i šundiá davá Raj Devél. Mójza sys manúš kovledyr (smirienedyr) saré manušéndyr pe phuv. I phendiá Raj Devél naužakirdes Mojzáske i Aaronóske i Mariamake: “Vydžán tumé trindžine ke skedyibnáskiri šátra.” I vyginé saré trindžine. I zgija Raj Devél dro oblokoskiro stýlbo, i terdijá pašýl skinijakiro zagiibén, i khardiá Aaronós i Mariam, i vyginé jone dujdžiné. I phendiá: “Šunén Miré lavá: kóli te javél tuménde Ráskire-Devléskiro proróko, tedy Me otčhakiravape léske dre dykhibén, i dro sunó Me rakiravas lésa; ne na adiáke, syr Miré pisharíske Mojzáske, jov isyn čačunó pir saró Miro kher: ušténca ke uštá Me rakiráva lésa, i dykhno (biciales), a na dro ciamlo phenybén, i patrín (óbrazo) Ráskire-Devléskiri jov dykhéla; syr tumé na darándyne te vyrakiren Miré pisharíske Mojzáske?” I roshačija Ráskire-Devléskiri xolý pe lénde, i Jov otgijá. I óbloko otgijá šatratyr, i ĥáda, e Mariam učhakirdiape prokazasa syr ivesa. O Aaróno podykhciá pe Mariamate, i ĥáda, joj sys dre prokáza. I phendiá Aaróno Mojzáske: “Miro Rajo! Na gin aménge dro grého, so ame kerdiám dylnypén i kerdiám grého; na domek, sob (kaj) joj te javél, syr muló bijandlo (tyknomas): savéste, kiéli jov vydžála péskre dákire ločoviátyr, to paš masá kirnyne.” I zadyja gódla Mójza ke Raj Devél: “Rajo Dévla! Sastiakir la!” I phendiá Raj Devél Mojzáske: “Kóli lákiro dad čungardelas láke dro muj, tedy so, ci na treindiá láke te ladžal eftá dyvesá? I adiáke mek te javél joj vybičhady pe eftá dyvesá pal stáno, a tén'či (poslie) nevéstyr te risjol.” I sys Mariam vybičhady pal stáno eftá dyvesá i manušá na džánas dro drom, ke davá časo, paka risijá e Mariam. Tén'ci (poslie) saró davá manušá giné Asirofostyr i terdiné pe čhučí phuv Farano. I phendiá Raj Devél Mojzáske dasavé lavá: “Bičháv péstyr manušén, sob (kaj) jone te vydykhen Xanaanóskiri phuv, saví Me dáva Izrailjoskire čhavénge, pir jekhe manušéste léngire dadéskire-rodycóstyr bičhaven, šeralen léndyr.” I bičhadiá len Mójza čhučé phuvjátyr Faranostyr, pir Ráskire-Devléskiro priphenybén, i saré jone sys muršá, šeralé Izrailjoskire čhavénde. Ĥáda, sys léngire lavá: o Samua, Ruvimóskire rodycóstyr, Zakhuroskiro čhavó, Simieonoskire rodycóstyr o Safato, Xoriskiro čhavó, Judáskire rodycóstyr o Xalievo, Jefonijaskiro čhavó, Isaharoskire rodycóstyr o Igalo, Jozaskiro čhavó, Jefriemóskire rodycóstyr o Osija, Navinoskiro čhavó, Vieniaminóskire rodycóstyr o Falti, Rafuskiro čhavó, Zavulonoskire rodycóstyr o Gadiilo, Sodijoskiro čhavó, Iosifóskire rodycóstyr, Manasijatyr, o Gadijo, Susijoskiro čhavó, Danóskire rodycóstyr o Amiilo, Giemalijoskiro čhavó; Asiroskire rodycóstyr o Siefuro, Mihailjoskiro čhavó; Niefalimoskire rodycóstyr o Nahbijo, Vofsijoskiro čhavó, Gadóskire rodycóstyr o Gieguilo, Mahijoskiro čhavó, Ĥáda, isyn lavá muršengire, savén bičhadiá o Mójza te vydykhen phuv. I khardiá Mójza Osijas, Navinoskire čhavés, Isusósa (Johošuasa). I bičhadiá len Mójza te vydykhen Xanaanóskiri phuv, i phendiá lénge: “Džán pe daja paš-dyvesýtko (južno) rig, i džán upré pe bérga, i obdykhen phuv, saví joj isyn, i manušén, savé dživéna pe láte, ci zoralé jone isyn, ci nad, ci but len, ci nábut? i saví isyn phuv, pe saví jone dživéna, ci lačhí joj isyn ci fuj? I savé isyn fórja, dre savé jone dživéna, ci pe šátry jone dživéna ci dre zorjakirde fórja (ukrieplienii)? I saví isyn phuv, ci thuly joj isyn ci posno? Ci isyn pe láte veš ci nad? Javén murškané, i len phuvjákire barjakirdendyr (plodendyr).” Davá sys dre dová časo, kiéli spieindia vinagrado (drakh). Jone giné, i vydykhne phuv čhučé phuvjátyr Sin, adiáke-pac' ke Riehovo, pašýl Emafo; i giné jone pe paš-dyvesýtko (južno) rig, i doginé ke Xievróno, kaj dživdé Ahimano, Siesajo i Falmajo [Falman-ju.o.], Enakoskire čhavé: Xievróno sys dokerdo eftá (bitrinéngiro deš) beršenca angledýr Coanostyr, Jegiptóskire foróstyr; i javné pe dólo Jesholo, i čhindlé krig odój vinagradoskiri rand' (grozd') mur'jenca, i lydžiné la pe balandin (šosto) dujdžiné; jone lyné adiáke-pac' granatytka phabá i inžyro; davá štéto khardé jone dolosa Jeshol, pir vinagradoskiri rand', saví sčhindle krig odój Izrailjoskire čhavé. I obdykhi phuv, risiné jone pir štardešá dyvesá. I giné, i javné ke Mójza i Aaróno, i ke saró Izrailjoskire-čhavéngiro skedyibén pe čhučí phuv Farano, dro Kadieso, i jandlé lénge i saré skedyibnaske otphenybén, i sykade lénge phuvjákire barjakirdé (plódy); i rosphenenas léske (Mojzáske) i rakirdé: “Ame psirdiam pe phuv, pe saví tu bičhadian amen; pe láte, čačes, thadéla thud i avgín, i ĥáda, isyn lákire barjakirdé (plódy); ne manušá, savé dživéna pe doiá phuv, isyn zoralé, i fórja oblydžyne zoralé tynosa, i drieván baré, i Jenakoskire čhavén ame dykhciam odój. Amaliko dživéla pe paš-dyvesýtko phuvjákiri paš, Xietiei, Jevusiei i Amoriei dživéna pe bérga, Xananiei dživéna pašýl mórjo (derjáv) i pe Iordanoskiro brégo”. Ne Xalievo štyliakirdia manušén angíl Mojzaste, pheny: “Javén i uhtylasa péske la, pal-dová so ame saštý (moginas) te pirizorjakiras len.” A odolé manušá, savé psirdé lésa, rakirdé: “Ame na moginasa (naštý) ame te džas proti odolé manušénde, pal-dová so jone zoraledýr améndyr.” I rozmekne nalačhi mavlýn (malva) pal phuv, saví jone obdykhne, maškír Izrailjoskire čhavénde, phení: “Phuv, saví ame progijam vaš dykhibén, isyn phuv, saví xála odolés, kon dživéla pe láte, i saré manušá, savén ame dykhciam maškír lénde, manušá isyn drieván vučé. Odój ame dykhciam i ispolinen, Enakoskire čhavén, ispolinskone rodóstyr; i ame sámas dre amaré jakhá angíl lénde, syr saranča, adasavé ame i sámas i dre léngire jakhá.” I ĥazdyjá gódla saró skedyibén, i rondlé manušá sarí doiá rat; i rakirdé jone xoliása pe Mojzaste i Aaronoste saré Izrailjoskire čhavé; i saró skedyibén phendiá lénge: “O, kóli ame merasas pe Jegiptóskiri phuv, ci kóli merasas ame pe daja čhučí phuv! I vaš so Raj Devél lydžála amen pe daja phuv, sob (kaj) ame te xasjovas kurtalátyr? Džuvliá amaré i čhavé amaré doresenape vergénge; ci nane fedýr te risjovas pale dro Jegípto?” I phendlé jone jekh jekhéske: “Čhuvasa péske barydyrés, i risjovasa dro Jegípto.” I pyné Mójza i Aaróno pe péskire muiá angíl saré Izrailjoskire-čhavéngire skedyibén. I Isúso (Johošuá), Navinoskiro čhavó, i Xalievo, Jefonijaskiro čhavó, savé obdykhenas phuv, roskušne péskire uribená, i phendlé saré Izrailjoskire-čhavéngire skedyibnaske: “Phuv, saví ame psirdiam te dykhas, isyn drieván lačhí; kóli Raj Devél isyn lačhó ke ame, tedy mek te lydžál Jov amen pe daja phuv i déla aménge la – daja phuv, dre saví thadéla thud i avgín (meda); iekh, sob (kaj) proti Raste-Devléste tumé te na ĥazdénpe, i na darén adalé-phuvjákire manušéndyr; pal-dová so jone doiačenape aménge pe xabén, te zaterdjon pal lénde nane konéske; a aménca isyn Raj Devél, na darén léndyr.” I phendlé saré manušá skedyibnástyr: “Te mares len barénca!” Ne Ráskire Devléskiri sláva zaziaindia dre skedyibnáskiri šátra sarénge Izrailjoskire čhavénge. I phendiá Raj Devél Mojzáske: “Kicý javéna te xoliakiren Man adalé manušá? I kicý javéna jone te na patián Mánge pir saré znamiénii (ĥiertyká), savé Me kerdjom maškír lénde? Zanasvaliakirava Me len fransenca i xasiakiráva len, ne i Me keráva tútyr butýr manušýtko nacyja i zoraledýr léndyr.” Ne o Mójza phendiá Ráske-Devléske: “Podšunena Jegiptiáni, manušá, savéndyr Tu zorjása Tyrjasa vylydžijan adalé manušén, i phenéna dalé-phuvjákire manušénge, savé šundlé, so Tu, Rajo Dévla, dživesa maškír adalé manušénde, i so Tu, Rajo Dévla, désa lénge te dykhés Pes muj ke muj, i óbloko Tyró terdó pe lénde, i Tu džása angíl lénde dyvesé dro oblokoskiro stýlbo, i ratý dro jagakiro stýlbo; i kóli Tu xasiakiresa adalé manušén, syr jekhés manušés, tedy manušá, savé šundlé Tyrí sláva, phenéna: “O Raj Devél na mogindiá te zalydžal adalé manušén pe phuv, saví Jov sovlahasa phendiá te del léske, a tén'či (poslie) i xasiakirdiá len pe čhučí phuv.” I adiáke mek te vybarjol Ráskire-Devléskiri zor, syr Tu phendián: “O Raj Devél ĥará (dlúges) užakiréla i Jov isyn buté-tangipnaskiro, Savó otmekéla gréhi i čoripén, i Jov na jačkiréla bi otphenybnaskiro, ne Jov čhuvéla kára pal dadéngiro čoripén pe čhavénde ke tríto i štárto ródo. Otmek grého adalé manušénge pir Tyrí bari láska, syr Tu primangdian adalé manušénge Jegiptóstyr ke dalé dyvesá.” I phendiá Raj Devél Mojzáske: “Otmekava grého lénge pir tyró lav; ne Me som džidó, i Mirí Ráskire-Devléskiri sláva isyn pherdý pir sarí phuv: saré, savé dykhné Mirí sláva i Miré znamiénii (ĥiertyká), savé Me kerdjom dro Jegípto i pe čhučí phuv, i sprobinenas Man deš móly, i na šundlé Mirí zan, i jone na javéna te dykhén phuv, saví Me sovlahasa phendjom te dav léngire dadénge; saré, kon xoliakirdia Man, na dykhéna la. Ne Miré pisharís Xalievos, pal-dová so dre léste sys javír dúho (fáno), i jov dre saró kandyjá Man, zalydžava pe phuv, pe saví jov psirdiá, i léskiro siemjo javéla xulása pe láte; Amalikitiani i Xananiei dživéna pe dólo; atasiá tumé risjon i džán tumé pe čhučí phuv ke Loló mórjo (derjáv).” I phendiá Raj Devél Mojzáske i Aaronóske dasavé lavá: “Kicý adalé xoliamé manušá javéna te žalinenpe xoliása pe Mánde? Xoliamó vyrakiriben Izrailjoskire čhavéngiro, savésa jone žalinenape pe Mánde, Me šunava. Phen lénge: “Me dživáva, – rakiréla Raj Devél: –, syr tumé rakirdé dro saró šunybén Mánge, adiáke i Me keráva tuménge; pe daja čhučí phuv peréna tumaré masá, i saré tumé san pirigindle, ci but tumen sys, bišé beršéndyr i phuredýr, savé žalindlepe xoliása pe Mánde, tumé na zadžána pe phuv, pe saví Me, ĥazdyi Miro vast, sovlahadjom te rosčhuvav te dživén tumen, apríč Xalievoste, Jefonijaskire čhavestyr, i Isusóste (Johošuaste), Navinoskire čhavéste; a tumaré čhavén, pal savénde tumé rakirdé, so jone doiačenape dro doresybén vergénge, Me zalydžava odorík, i jone udžinena phuv, saví tumé bidykhne, a tumaré trúpy peréna dre daja čhučí phuv; a tumaré čhavé javéna pe čhučí phuv te loden štardešá berš, i javéna te lydžán kára pal tumaró ladžaipén, ke davá časo, paka xasjona saré tumaré trúpy pe čhučí phuv; pir štaré-dešengiro-dyvesengiro progiiben, dre savé tumé obdykhne phuv, tumé lydžána kára pal tumaré gréhi štardešá berš, berš pal dyvés, sob (kaj) tumé te džinén, so isyn dasavo te javén odolenca manušénca, savén Me mekcjom. Me, Raj Devél, rakiráva, i keráva adiáke saré adalé xoliamé manušénca, savé ĥazdyneepe proti Mánde: pe daja čhučí phuv saré jone xasjona i vymerena.” I odolé, savén bičhadiá Mójza, sob (kaj) te obdykhen phuv, i savé risiné pale, i ĥazdyné proti léste saré adalé manušén, rozmekny nalačhi mavlýn (malva) pal phuv, adalé manušá, savé rozmekne nalačhi mavlýn pal phuv, myné, jone sys xasiakirdé angíl Raste-Devléste; iekh Isúso (Johošuá), Navinoskiro čhavó, i Xalievo, Jefonijaskiro čhavó, jačnépe džidé odolé muršendyr, savé psirdé te dykhén phuv.” I phendiá Mójza dalé lavá angíl sarénde Izrailjoskire čhavénde, i manušá drieván zasmentnindlepe. I, uštyi tasiárles (ránes) pe zlóko, giné jone pe bergákiro vučipén, rakirí: “Ĥáda, ame džása pe dová štéto, pal savó rakirdiá Raj Devél, pal-dová so ame kerdiám grého.” Tén'ci Mójza phendiá: “Vaš so tumé piridžana Ráskire-Devléskiro priphenybén? Davá javéla nakuč; na džán, pal-dová so nane maškír tuménde Ras-Devlés, sob (kaj) te na pirimaren tumen tumaré vérgi; pal-dová so Amalikitiani i Xananiei isyn odój angíl tuménde, i tumé peréna kurtalátyr, pal-dová so tumé otginé Rástyr-Devléstyr, i na javéla tuménca Raj Devél.” Ne jone dyné duma te ĥazdénpe pe bergákiro vučipén; Ráskire-Devléskiro zavietóskiro kovčego i Mójza na jačkirdé stáno. I giné péske Amalikitiani i Xananiei, savé dživdé pe doiá bérga, i rozmarde len, i tradyne len ke Xorma. I phendiá Raj Devél Mojzáske, rakirí: “De te džinén Izrailjoskire čhavénge i phen lénge: ‘Kiéli tumé zadžána pe phuv tumaré džiibnáskiri, saví Me dáva tuménge, i javéna te janén svénto dyibén Ráske-Devléske, célo shačkiribén, ci te javél svénto dyibén začhindlé guruvendyr i bakréndyr, sob (kaj) te kerél pir sovláh, ci pir patýv, ci dre tumaré svénki, sob (kaj) te kerén gudló thuv, lačhó Ráske-Devléske, tedy, kon janéla péskiro svénto dyibén Ráske-Devléske, to odová manúš isyn bangó te janel dro janybén marestyr déšto paš jefatyr pšeničnone jaržestyr, pieriemiešyndlo štartone pašésa gino jeliejo; I mol (vino) jekh štárto paš gino vaš célo shačkiribén, ci vaš začhindló svénto dyibén, pe kažnoné (svakone) bakreste; a kóli tumé janéna bakrés dro janybén marunó duj dešta pašá jefatyr pšeničnone jaržestyr, pieriemiešyndlo tritone pašésa jeliejoskire ginosa. I mol te vyčhuves jan tríto paš ginoskiro dro gudló thuv, lačhó Ráske-Devléske; Kóli terné guruvés janesa vaš célo shačkiribén, ci syr svénto janybén začhinesa pir sovláh, sob (kaj) te kerélpe, ci dro mírno svénto dyibén Ráske-Devléske, to tedy khetané guruvesa bangé te janén janybén marunó trin dešta pašá efakire pšeničnone jaržestyr, pieriemiešyndlo pašésa jeliejoskire ginosa, i mol (vino) vaš vyčhuiben jan paš gino dro svénto janybén syr gudló thuv, lačhó Ráske-Devléske. Adiáke ker pašýl kažno janybén guruveskiro i bakreskiro, i bakrés bakriendyr, ci buznien (kozen); adiáke tumé kerén kažno mólo, adákicy móly, kicý tumé janéna svénto dyibén. Kažno péskiro manúš adiáke isyn bangó te kerél davá, kiéli janéla svénto dyibén dro gudló thuv, lačhó Ráske-Devléske; i kóli javéla maškír tuménde te dživél manúš javire rigátyr, ci kon by te na javél maškír tuménde dro tumaré ródy, i janéla svénto janybén dro gudló thuv, lačhó Ráske-Devléske, tedy i jov isyn bangó te kerél adiáke, syr tumé keréna; vaš tuménge, skedyibén Ráskire-Devléskiro, i vaš manušéske, savó javdiá javire rigátyr, i savó dživéla maškír tuménde, uphenybén jekh, viekoskiro uphenybén dre tumaré ródy: so tumé, odová-pac' i manúš, savó javdiá javire rigátyr mek te javél angíl Raste-Devléste; zakóno jekh, i jekh pravy mek te javén vaš tuménge i vaš manušéske, savó javdiá javire rigátyr, i dživéla maškír tuménde.’ I phendiá Raj Devél Mojzáske dasavé lavá: “Rákir Izrailjoskire čhavénge i phen lénge: ‘Kiéli tumé zadžána pe phuv, dre saví Me lydžáva tumen, i javéna te xan maró adole-phuvjákiro, tedy janén marunó svénto dyibén trinskiribnasa Ráske-Devléske; načatki (pérva barjakirdé) tumaré jaržestyr syr marikly, ĥazdén trinskiribnasa, kiéli janéna tumé dro trinskiriben; ĥazdén les adiáke, syr janéna ĥumnostyr; načatkendyr (pervoné marikliendyr) tumaré xumerestyr (tiastostyr) janén dro ĥazdypen triinskiribnasa Ráske-Devléske dre tumaré ródy. Kóli keréna tumé na pir džinybén, i na keréna pir saré dalé priphenybená, savé phendiá Raj Devél Mojzáske: “Saró, so priphendiá tuménge Raj Devél pir Mojzaste, dolé dyveséstyr, dre savé Raj Devél rakirí tuménge, i angledýr dre tumaré ródy, tedy, kóli pir manušéngiro nadodykhiben kerdy doš, mek saró skedyibén te janel jekhe guruvés dro célo shačkiribén vaš gudló thuv, lačhó Ráske-Devléske, marune janybnasa i čhuibnasa les, pir uphenybén, i jekhe buznés (kozlos) dro svénto dyibén pal grého; i vyžužakiréla rašáj saré skedyibnástyr Izrailjoskire čhavéngiro, i javéla otmekno lénge: pal-dová so davá sys doš pir nadžinyben, i jone jandlé péskiro svénto dyibén Ráske-Devléske, i svénto janybén pal péskiro grého angíl Raste-Devléste, pal péskiri doš; i javéla primanglo saré skedyibnaske Izrailjoskire čhavengireske i manušéske, savó javdiá javire rigátyr, i dživéla maškír lénde, pal-dová so saré manušá kerdé daja doš pir nadžinyben. Kóli jekh vari-kon keréla grého pir nadžinyben, tedy mek te janel jekha-beršytkona buznia dro svénto janybén pal grého; i vyžužakiréla rašáj di, savó kerdiá grého angíl Raste-Devléste, i žužó javéla, i primanglo javéla léske; iekh Zakóno mek te javél vaš tuménge, syr vaš štetytkone manušéske Izrailjoskire čhavéndyr, adiáke i vaš manušéske, savó javdiá javire rigátyr, i dživéla maškír tuménde, kóli vari-kon keréla doš pir nadžinyben. Kóli vari-kon péskire manušéndyr ci manušéndyr javire rigátyr keréla vari-so xoliamé vastésa, tedy jov, xaj, kaliakirela Ras-Devlés: xasjola dová di péskire manušéndyr, pal-dová so lav Ráskire-Devléskiro jov bidykhcia i priphenybén Léskiro na zrakhciá; xasjola dová di; grého léskiro isyn pe léste.’” Kiéli Izrailjoskire čhavé sys pe čhučí phuv, lathné jone manušés, savó skedéla kaštá dro savatoskiro dyvés; i jandlé les manušá, savé lathné les, skedyi kaštá, ke Mójza i Aaróno i ke saró skedyibén; i čhudé les rakhibnar'jenge, pal-dová so na sys iščo (inké) džindló, so treindiá lésa te kerén. I phendiá Raj Devél Mojzáske: “Bangó isyn te merél adavá manúš; mek te marel les barénca saró skedyibén pal stáno.” I vylydžijá les saró skedyibén javrí stanostyr, i mardé les barénca, i jov myjá, syr priphendiá Raj Devél Mojzáske. I phendiá Raj Devél Mojzáske, rakirí: “Rákir Izrailjoskire čhavénge i phen lénge, sob (kaj) jone te kerén péske čibá/čibjá (kisti)pe péskire-idiengire jagóry (kraí) dre léngire ródy, i pe čibá (čibjá), savé te javén pe jagóro (pe krajo), i te čhuvén andré golubovoné vylnátyr thava; i javéna jone dre tumaré čibá (kisti) vaš dová, sob (kaj) tumé, dykhí pe lénde, te priripiren saré Ráskire-Devléskire priphenybená, i te kerén saró pir lénde, i te na psirén palál pal tumaró iló i pal tumaré jakhá, savé lydžána tumen ke kerén biladžaipén, sob (kaj) tumé te ripirén i te kerén saró, sob (kaj) te spolninen saré Miré priphenybená i te javén svénta angíl tumaré Devléste. Me som Raj Devél (Jahvá) tumaró, Savó vylydžyja tumen Jegiptóskire phuvjátyr, sob (kaj) te javav Me tumaró Devél: Me som Raj Devél, tumaró Devél.” O Koriejo, Icgaroskiro čhavó, Kaafoskiro čhavó, Lievijoskiro čhavó, i Dafano i Avirono, Jeliavoskiro čhavé, i Avnano, Faliefoskiro čhavó, Ruvimovoskire čhavé, ĥazdynépe xoliása pe Mojzaste, i lénca Izrailjoskire čhavéndyr dujšelá pandždešá muršá, skedyibnaskire barydyrá, savén kharéna pe skedyibén, slavutna manušá. I skedynépe proti Mojzaste i Aaronoste, i phendlé lénge: “Uhtýlla (dósi) tuménge, saró skedyibén, saré manušá isyn svénta, i maškír lénde isyn Raj Devél! Sóske tumé ĥazdéna pes vučedýr Ráskire-Devléskire manušéndyr?” O Mójza, syr šundiá davá, to pyjá pe péskiro muj, i phendiá Koriejoske i saré manušénge, savé sys khetané lésa, rakirí: “Atasiá sykavéla Raj Devél, kon isyn Léskiro, i kon isyn svénto, sob (kaj) te kerél pašyledýr les ke Pe; i konés Jov vykedéla, odolés i keréla Jov pašyledýr ke Pe. Ĥáda, so kerén: Koriejo i saré léskire manúš, len péske kadily, i atasiá čhuvén dre lénde jag, i čhuvén dre lénde fimiámo (gudlé smóly) te thuvliakiren angíl Raste-Devléste; i konés vykedéla Raj Devél, odová i javéla svénto. Uhtýlla (dósi) tuménge, Lievijoskire čhavé!” I tén'či phendiá Mójza Koriejoske: “Šunén, Lievijoskire čhavé! Naúšto nauhtylla (nádosi) tuménge dová, so Izrailjoskiro Devél otkedyja tumen Izrailjoskire manušéndyr i kerdiá pašyledýr tumen ke Pe, sob (kaj) tumé te kerén butý pašýl Ráskire-Devléskiri šátra i te terdjon angíl skedyibén pe butý vaš lénge? Jov kerdiá pašyledýr tut ke Pe i túsa sarén tyrén pšalén, Lievijoskire čhavén, i tumé domarenape iščo (inké) te jačen rašanca. I adiáke tu i saré tyré manušá skedynépe proti Raste-Devléste. So isyn dasavo Aaronosa, so tumé xoliása žalinenape pe léste?” I bičhadiá Mójza te kharén Dafanos i Avironos, Jeliavoskire čhavén. Ne jone phendlé: “Na džása!” Naúšto nauhtylla (nádosi) dová, so tu vylydžyjan amen phuvjátyr, pe saví thadéla thud i avgín, sob (kaj) te xasiakires amen pe čhučí phuv, i tu butýr kamésa te javes thagarisa pe aménde! Ci jandian tu amen pe phuv, kaj thadéla thud i avgín, i ci dyján tu dro xulaiben féldy i vinagradniki? Jakhá adalé-manušéngire tu kames te korjakires? Ame na džása!” Mójza drieván xoliásyja, i phendiá Ráske-Devléske: “Na rískir Tyré jakhá pe léngiro janybén. Me na lyjom léndyr ni jekhe oslós, i na kerdjom fuipén nijekheske léndyr.” I phendiá Mójza Koriejoske: “Atasiá tu, i saré tyré manušá, javén te terdjon angíl Ráskire-Devléskiro muj, tu, jone, i adiáke-pac' Aaróno; i len kažno (sváko) manúš péskiri kadila, i čhuvén dre lénde fimiámo (gudlé smóly), i janén angíl Ráskiro-Devléskiro muj kažno (sváko) péskiri kadila, dujšelá pandždešá kadily; tu i Aaróno, kažno péskiri kadila.” I lyjá kažno manúš péskiri kadila i čhudiá dre lénde jag, i čhudé andré dre lénde fimiámo (gudlé smóly) te xačkirén, i terdiné pašýl zagiibén dre skedyibnáskiri šátra; adiáke-pac' i Mójza i Aaróno. I skedyjá pe lénde Koriejo saré manušén ke zagiibén dre skedyibnáskiri šátra. I sykadyjá Ráskire-Devléskiri sláva saré manušénge. I phendiá Raj Devél Mojzáske i Aaronóske, rakirí: “Džán dre rig adalé manušéndyr, i Me xasiakiráva len dre jekh menta (minuta).” Jone pyné pe péskire muiá i phendlé: “Dévla, Devlale pe kažnoné-maseskiro (ločakiro) dúho (fáno)! Jekh manúš kerdiá grého, i Tu xoliasosa pe saré manušénde?” I phendiá Raj Devél Mojzáske dasavé lavá: “Phen manušénge: ‘Otdžan saré rigéndyr Koriejoskire, Dafanoskire i Avironoskire šatrendyr.’” I uštyjá Mójza, i gijá ke Dafano i Avirono, i pal léste giné Izrailjoskire phurydyrá. I phendiá manušénge: “Otdžan nažužé-manušéngire šatrendyr, i na kasynenpe ni ke so, so isyn léngiro, sob (kaj) te na xasjon tuménge dre saré léngire gréhi.” I otginé jone saré rigéndyr Koriejoskire šatrendyr, Dafanoskire i Avironoskire; a Dafano i Avirono vyginé i terdé sys pašýl péskire šatrengire vudará péskire džuvliénca, i péskire čhavénca, i péskire tykné čhavorenca. Tén'ci phendiá o Mójza: “Daléstyr udžinena, so Raj Devél bičhadiá man te keráv saré dalé réndy, a na pir péskiri myslia me keráva davá: kóli jone meréna, syr saré manušá meréna, i peréla pe lénde kára, saví, xaj, sud'ba saré manušénca: to na Raj Devél bičhadiá man; a kóli Raj Devél keréla dívo, i phuv rosčhakirela péskire uštá i nakhavela (proglytynela) len i saró, so, lénde, i jone džidé zdžana pe dová svéto (dro liúno), tedy džinén, so adalé manušá na prilyné patyvása Ras-Devlés.” I sys adiáke: syr jov phendiá dalé lavá, rozgijápe phuv tel léste; rosčhakirdia phuv péskire uštá, i nakhadia len i léngire kherá, i saré Koriejoskire manušén i saró, so lénde sys; i giné telé jone sarésa, so sys lénde džidó pe dová svéto, i učhakirdiá len phuv, i xasiné jone péskire manušéndyr. I saré Izrail'tiáni, savé sys pašýl lénde, našné léngire godlatyr, sob (kaj), rakirdé jone, i amen te na nakhavel phuv. I vygijá jag Rástyr-Devléstyr i xaja odolén dujšelá pandždešá muršén, savé jandlé gudlé smóly (fimiámo). I phendiá Raj Devél Mojzáske, rakirí: “Phen Jelizaroske, Aaronóskire-čhavéske, rašáske, mek jov te kedel kadily shačkirdé manušéndyr, i jag te vyčhurdel javrí; pal-dová so jone osvencyndlepe, kadily adalé-griešnikengire léngire meribnasa, i mek te rozmaren len pe sane bliahi (listy) te učhakiren altárjo, pal-dová so jone jandlé len angíl Ráskire-Devléskiro muj, i jone jačné obsvencyndle; i javéna jone ĥiertykasa (sykaibnasa) vaš Izrailjoskire čhavénge.” I lyjá rašáj Jelizáro xarkuné (miediana) kadily, savengire manušén Devél shačkirdiá, i rozmarde len dre sane bliahi (listy) te učhakiren altárjo, sob (kaj) te ripirén Izrailjoskire čhavé, sob (kaj) nikón javír manúš, savó na Aaronóskire rodóstyr, te na poddžál te janel gudlé smóly (fimiámo) te xačkirel angíl Ráskire-Devléskiro muj, i, sob (kaj) te na javél lésa, so Koriejosa i léskire manušénca, savé sys lésa khetané, syr rakirdiá léske Raj Devél pir Mojzaste. Pe javír dyvés saró Izrailjoskire-čhavéngiro skedyibén lyjá te rakirél xoliása pe Mojzaste i Aaronoste, i rakirdé: “Tumé muliakirdé Ráskire-Devléskire manušén.” I kiéli skedynépe manušá proti Mojzaste i Aaronoste, jone risiné ke skedyibnáskiri šátra (skínija), i ĥáda, óbloko učhakirdiá la, i javdiá Ráskire-Devléskiri sláva. I javné Mójza i Aaróno ke skedyibnáskiri šátra. I phendiá Raj Devél Mojzáske dasavé lavá: “Džán dre rig adalé manušéndyr, i Me xasiakiráva len dre jekh menta (minuta).” Ne jone pyné pe péskire muiá. I phendiá Mójza Aaronóske: “Le kadila, i čhuv jag dre láte altarjostyr i čhuv gudlé smóly (fimiámo), i lýdža sygnedyr ke manušá, i zaterdjov pal lénde, pal-dová so vygijá xolý Rástyr-Devléstyr i jaciá xasiakiriben.” I lyjá Aaróno, syr priphendiá Mójza, i prastándyja dre manušéngiro skedyibén, i ĥáda, lyjape xasiakiriben (moróvo) pe manušénde. I jov čhudiá fimiámo, i zaterdija pal manušénde. Terdijá jov maškír mulende i džidende, i xasiakiriben pirijaciá. I myné xasiakiribnastyr dešuštar tysjoncy eftašelá manušén, apríč adalé manušénde, savé myné pir Koriejoskiro réndo. I risijá Aaróno ke Mójza ke zagiibén dre skedyibnáskiri šátra, paló dová, syr xasiakiriben pirijaciá. I phendiá Raj Devél Mojzáske, rakirí: “Phen Izrailjoskire čhavénge, i le léndyr pir destó dadengíre rodycóstyr, saré léngire barydyrendyr pir ródycy, dešudúj i kažnoneskiro lav začhin pe léskiro destó; lav Aaronoskiro začhin pe Lievijoskiro destó, pal-dová so jekh destó léngire rodycoskire barydyrestyr trej jone te den; i čhuv len dre skedyibnáskiri šátra, angíl kovčego dosykaibnása (otkrovienijosa), kaj sykadjovava Me tuménge; i konés Me vykedava, odoléste destó lyndjola (zacvetinela); i adiáke Me štyliakirava Izrailjoskire čhavéngiro rakiribén xoliása, savésa jone rakiréna pe aménde.” I phendiá Mójza Izrailjoskire čhavénge, i dyné léske saré léngire barydyrá, kažnoné barydyrestyr pir destó pir léngire dadengíre ródycy dešudúj desté, i Aaronoskiro destó sys maškír léngire desté. I čhudiá Mójza desté angíl Ráskire-Devléskiro muj, dre šátra dosykaibnása (skínija). Pe javír dyvés zagijá Mójza dre dosykaibnaskiri šátra, i ĥáda, Aaronoskiro destó, Lievijoskire kheréstyr, lyndija (zacvetindia), mekciá bukore (počki), dyjá luludiá (cvety) i jandiá mindali. I vylydžijá Mójza saré desté Ráskire-Devléskire móstyr ke saré Izrailjoskire čhavé. I dykhné jone davá, i lyjá kažno péskiro destó. I phendiá Raj Devél Mojzáske: “Čhuv nevéstyr destó Aaronoskiro pe zrakhibén, syr ĥiertýk (syr sykaibén) vaš napatiaibnytkone manušénge, sob (kaj) te pirijačel léngiro xoliamó rakiribén pe Mánde, i jone te na merén.” O Mójza kerdiá davá syr priphendiá léske Raj Devél, adiáke jov i kerdiá. I phendlé Izrailjoskire čhavé Mojzáske: “Ĥáda, ame merasa, xasjovasa, saré xasjovasa! Kažno, kon poddžála ke Ráskire-Devléskiri šátra, meréla: ci na pridžalape sarénge aménge te meras?” I phendiá Raj Devél Aaronóske: “Tu i tyré čhavé i kher tyré-dadéskiro túsa lydžána pe péste otphenybén pal bizlado pe svénto štéto: i tu i tyré čhavé túsa lydžána pe péste grého pal bizlado pe tumaró svénto štéto. Adiáke-pac' i tyré pšalén, Lievijoskiro ródo, tyré-dadéskiro kherítko ródo (pliemjo), le péske: mek jone te javén paš túte i te kerén butý túke, a tu i tyré čhavé túsa javéna paš dosykaibnaskiri šátra; mek jone te dynarinén (te služynen) túke i te dynarinén pe sarí skínija; jekh, sob (kaj) te na poddžan ke sventoné-štetoskire priedmiety i ke altárjo, sob (kaj) te na merén i lénge, i tuménge. Mek jone te javén paš túte i lydžána te dynarinén dre skedyibnáskiri šátra, saré butiá pir šátra; a javír manúš naštý te poddžál ke tumé. Adiáke dynarinén pe svénto štéto i pašýl altárjo, sob (kaj) te na javél butýr xolý pe Izrailjoskire čhavénde; pal-dová so tumaré pšalén, Lievitén, Me lyjom Izrailjoskire čhavéndyr, i dyjom len tuménge, dro dáro Mánge, Ráske-Devléske, sob (kaj) jone te kerén svénto butý pašýl skedyibnáskiri šátra; i tu, i tyré čhavé túsa, dykhén pal tumarí sventyma dro saró, so isyn altarjoskiro i so isyn andrál pal šýrma, i dynarinén; tuménge davá Me dre dáro svénto dynaribén, a javír manúš, i savó poddžála, otdynó javéla meribnáske. I phendiá Raj Devél Aaronóske: “Ĥáda, Me dopatiava túke te dykhés, syr janéna svénto dyibén ĥazdypnasa Mánge; saréstyr, so janéna Izrailjoskire čhavé, Me dyjom túke i tyré čhavénge, vaš tumaró rašaipen, syr uphenybén pe viéko. Ĥáda, so isyn tyró samone baré janybnaskire sventymatyr, so janéna pe jag: kažno léngiro marunó janybén, i kažno léngiro svénto janybén pal grého, i kažno svénto janybén pal léngiri bang, so jone janéna Mánge, davá te javél syr bari sventyma túke i tyré čhavénge. Pe sámo svénto štéto xan davá, saré muršá saštý te xan, davá mek te javél vaš túke. I ĥáda, iščo (inké) so túke: léngire sventoné janybnaskire túke dáry i svénta dyibená ĥazdypnasa saré Izrailjoskire čhavéndyr. Me dyjom túke svénto dyibén, i tyré čhavénge, i tyré čhajenge túsa syr uphenybén pe viéko; kažno žužó manúš dro tyró kher saštý (moginéla) te xal davá. Saró fedyršone aliejostyr i saró fedyršone vinagradostyr i marestyr, léngire pérva barjakirdé (plódy), savé jone janéna Ráske-Devléske, Me dyjom len túke. Saró pérvo, so déla léngiri phuv, savé jone janéna Ráske-Devléske, mek te javén tyré; kažno žužó (čysto) manúš dro tyró kher saštý (moginéla) te xal davá. Saró sovlahado pe Izrailjoskiri phuv, mek te javél tyró. Saré, savé roskušena dakiri ločoví dre kažno loč (plot'), saví janéna Ráske-Devléske, manušéndyr i kheritkoné murdaléndyr (skotóstyr), mek te javél tyré; jekh anglatunó (pérvo) manušéndyr isyn bangó te javél vykindlo, i anglatunó nažužé kheritkoné murdalestyr te javél vykindlo; a vykinybén pal lénde: len jekhe čhonestyr pir tyrí timín, le vykinybén pandž šékieli rupésa, pir svénto šékieljo, savó dre biš giery; ne pal pervoné tyknoreste gurumniendyr [guruvendyr-r.s.], i pal pervoneste bakréndyr, i pal pervoneste buznendyr, na le vykinybén: jone isyn svénta; léngire ratésa občhuv altárjo, i adáj len xačkir syr svénto dyibén, dro gudló thuv, lačhó Ráske-Devléske; A mas léngiro pridžalape túke, adiáke-pac' syr kolýn sventoné dyibnástyr trinskiribnasa i pravo (čačó) psikó pridžalape túke. Kažno svénto dyibén ĥazdypnasa, savó Izrailjoskire čhavé janéna Ráske-Devléske, Me otdáva túke, i tyré čhavénge, i čhajenge tyrenge túsa syr uphenybén dro viéko, davá isyn zavieto londeskiro pe viéki angíl Raste-Devléste, savó sys dynó vaš túke i rodóske tyréske túsa.” I tén'či phendiá Raj Devél Aaronóske: “Pe léngiri phuv túte na javéla pravo pe meknó mištypén, i paš na javéla túke maškír lénde; Me som paš tyrí i meknó mištypén tyró maškír Izrailjoskire čhavénde.” A Lievijoskire čhavénge, ĥáda, Me dyjom syr meknó mištypén déšto (dešengiri) miéra saréstyr, so isyn dro Izrailjo, pal léngiro dynaribén, pal dová, so jone lydžána mangipén dre skedyibnáskiri šátra; i paldavá Izrailjoskire čhavé naštý butýr te poddžan ke skedyibnáskiri šátra, sob (kaj) te na kerén grého i te na merén: mek Lievíty te kerén rašaitko butý dre skedyibnáskiri šátra i te lydžán pe péste léngiro grého. Davá javéla uphenybén pe viéki dre tumaré ródy; maškír Izrailjoskire čhavénde jone na doreséna mištypnáskiri miéra; adiáke, syr déšto paš Izrailjoskire čhavengiri, saví jone janéna dro svénto janybén Ráske Devléske, Me dáva Lieviténge dre mištypnáskiri miéra, paldavá Me i phendjom lénge, maškirál Izrailjoskire čhavénde jone na doreséna mištypnáskiri miéra.” I phendiá Raj Devél Mojzáske, rakirí: “De te džinén Lieviténge i phen lénge: ‘Kiéli tumé javéna te len Izrailjoskire čhavéndyr déšto miéra, saví Me dyjom tuménge léndyr dro meknó mištypén, tedy janén léstyr svénto dyibén ĥazdypnasa Ráske-Devléske, déšto miéra dešengirjatyr, i zagindlo javéla tuménge davá tumaró svénto janybén, syr maró gumnostyr i syr mol (vino) priesostyr; adiáke i javéna tumé te janén svénto dyibén ĥazdypnasa Ráske-Devléske saré tumaré deštone mierendyr (pašendyr), savé javéna te len Izrailjoskire čhavéndyr, i javéna te den léndyr svénto dyibén Ráskire-Devléskiro rašáske Aaronóske; saréstyr, so delelape tuménge, janén svénto dyibén ĥazdyinasa Ráske-Devléske, saré fedyršonestyr, so sys svenciakirdo.’ I phen lénge: ‘Kiéli tumé janéna saré fedyrša daléstyr, tedy davá javéla zagindlo Lieviténge, syr dynó (givaobkeribnaskire šurnatyr) gumnostyr i syr dynó priesostyr; tumé saštý (moginéna) te xan davá pe kažno štéto, tumé i tumaré čékarja (siemieistvy), pal-dová so davá isyn pleskiriben pal tumaré butiá dre skedyibnáskiri šátra; i tumé na lydžána pal davá grého, kiéli janéna fedyršo saréstyr; i tumé na magirena svenciakirdo Izrailjoskire čhavénca i na meréna tumé. I phendiá Raj Devél Mojzáske i Aaronóske dasavé lavá: “Ĥáda, isyn uphenybén (statúto) pal Zakóno, savó priphendiá Raj Devél: ‘Phen Izrailjoskire čhavénge, mek te janén túke ternia ryžona reca (tjolka) bi došengirja, savjate nane nauhtylyben, i pe savjate na sys ĥámo; i otdén la Jelizaroske rašáske, i jov vylydžala la javrí stanostyr i začhinena la angíl léste; i mek te lel rašáj Jelizáro péskire anguštesa (pal'cosa) davá rat, i ratésa čhuvéla ke anglatuny rig pe skedyibnáskiri šátra eftá (bitrinéngiro deš) móly; i shačkirena reca angíl léskire jakhá: a cýpa lákiri mek te xačkirén; i mek te lel rašáj kiedroskiro veš, i isopo, i thav čiervljonone vylnátyr, i čhurdéla len pe xačkiribnaskire recate; i mek te vymorel rašáj péskire uribená, i obmorela paniésa péskire masá, i paló davá zadžála dro stáno, i rašáj nažužo javéla ke bel'vél'. I manúš, savó xačkirdiá reca, mek te vymorel paniésa péskiro uribén i obmorela péskire masá paniésa, i nažužo javéla ke bel'vél'; i tén'či vari-kon žužó mek te skedel recakiri práska (pieplo) i čhuvéla la pal stáno pe žužó štéto, i javéla joj te rakhelpe vaš Izrailjoskire manušénge syr paní te žužakirenpe: davá javéla svénto janybén Ráske-Devléske pal grého; i kon skedyjá recakiri práska (pieplo), mek te vymorel péskiro uribén, i javéla nažužo ke bel'vél'. Mek te javél davá syr viekoskiro uphenybén vaš Izrailjoskire čhavénge, i vaš manušénge, savé javné javire rigátyr, i dživéna ke jone. Kon lélape pal saveskire-manušéskiro trúpo, odová javéla nažužo eftá dyvesá. Jov isyn bangó (musinela) te vyžužakirel dalé paniésa pe tríto dyvés i pe eftáto dyvés, tén'či jov javéla žužó. Ne kóli jov na žužakirela pes pe tríto i pe eftáto dyvés, tedy jov na javéla žužó. Kažno, kon lélape pal saveskire-manušéskiro trúpo, savó myjá i na vyžužakirdiá pes, magirela Ráskire-Devléskiri šátra; i xasjola odová manúš Izrailjoskire manušéndyr. Pal-dová so jov na sys občhudo žužakiribnaskire paniésa, jov isyn nažužo, isyn léskiri mel pe léste. Ĥáda, isyn zakóno: kóli manúš meréla dre šátra, tedy kažno (sváko), kon javéla dre šátra, i saró, so dre šátra, javéla nažužo eftá dyvesá. Kažno otčhakirdo khoró (sasudo), savó sys nazaphandlo i naučhakirdo denkosa (kryškasa), isyn nažužo. Kažno, kon pe félda lélape pal zamardé-manušeskiri kurtála (miečo), ci pal manušéskire kokalý, ci pal mulykano (grobo), javéla nažužo eftá dyvesá; Vaš nažužeske mek te len zola (práska) dolé shačkirdé sventoné janybnastyr (recatyr) Ráske-Devléske pal grého, i čhuvéna pe léste džidó paní dro khoró, i mek vari-kon te lel žužó isopo, i obmakninela les dro paní, i počhuvela lésa šátra i saré khoré i manušén, savé isyn dre léste, i manušés, savó lyjape pal manušéskiro kokalo, ci ke zamardo, ci ke muló, ci ke mulykanó; i mek te občhuvel žužó manúš nažužes pe tríto dyvés i pe eftáto dyvés, i vyžužakiréla les pe eftáto dyvés; i vymorela jov péskire ídi, i obmorela péskire masá paniésa, i ke bel'vél' javéla žužó. Ne kóli vari-kon manušéndyr javéla nažužo i na vyžužakiréla pes, tedy xasjola odová manúš péskire manušéndyr, pal-dová so jov magirdia Ráskire-Devléskiro svénto štéto; žužakiribnaskire paniésa jov na občhudo, jov isyn nažužo. I mek te javél davá vaš lénge viekoskire uphenybnasa. I manúš, savó občhuvela žužakiribnaskire paniésa, mek te vymorel péskiro ídi i uribén; i kon lélape ke žužakiribnaskiro paní, odová javéla nažužo ke bel'vél'. I saró, ke so lélape nažužo manúš, javéla nažužo; i manúš, savó lélape, javéla nažužo ke bel'vél'.” I javné Izrailjoskire čhavé, saró skedyibén, pe čhučí phuv Sin dro pérvo čhon, i terdiné manušá dro Kadieso, i odój myjá Mariam, i odój la garadé. I na sys paní vaš manušénge, i skedynépe jone pe Mojzaste i Aaronoste; i manušá lyné xoliása te žalinenpe pe Mojzaste i phendlé: “Kóli féni (jekh) te meras tedy i ame, kiéli myné amaré pšála fransendyr angíl Raste-Devléste! sóske tumé jandlé Ráskire-Devléskiro skedyibén pe daja čhučí phuv, sob (kaj) te meras adáj aménge i amaré kheritkoné murdaleske (skotoske)? I vaš so tumé vylydžiné amen Jegiptóstyr, sob (kaj) te janén amen pe davá čhučó štéto, kaj naštý ziárki te počhuves dre phuv, nane inžyro, ni vinagrado (drakh), ni granatytka phabá, i adiáke-pac' nane paní vaš pibén?” I gijá Mójza i Aaróno manušéndyr ke zagiibén dre skedyibnáskiri šátra, i pyné pe péskire muiá, i javdiá lénge Ráskire-Devléskiri sláva. I phendiá Raj Devél Mojzáske, rakirí: “Le destó khieningoskiro (žezlo) i skéde manušén, tu i Aaróno, tyró pšal, i phenén dre léngire jakhá bergake, i joj déla péstyr paní: i adiáke tu kerésa lénge paní bergátyr, i paniakiresa manušén i léngire kheritkoné murdalén.” I lyjá Mójza khieningoskiro destó Ráskire-Devléskire móstyr, syr Jov priphendiá léske. I skedyné Mójza i Aaróno manušén ke bérga, i phendiá jov lénge: “Šunén, manušále, savé na kandéna, naúšto aménge dalé bergátyr te doreses vaš tuménge paní?” I ĥazdyjá Mójza péskiro vast i pekadiá dre bérga péskire khieningoskire destesa duj móly, i thadyja zorjása but paní, i piné manušá i léngire kherítka murdalá. I phendiá Raj Devél Mojzáske i Aaronóske: “Pal dová, so tumé na patiandyné Mánge, sob (kaj) te sykavav Mirí sventyma angíl jakhá Izrailjoskire čhavéngire, tumé na zalydžana adalé manušén pe phuv, saví Me dáva lénge.” Davá sys paní Mierivakiro, pašýl saví zaginé dre čingárd Izrailjoskire čhavé Rása-Devlésa, i Jov sykadiá lénge Péskiri sventyma. I bičhadiá Mójza Kadiesostyr manušén ke Jedomoskiro králi te phenén: “Adiáke rakiréla tyró pšal, Izrailjo: tu džinésa saró pharipén, savó pyjá pe aménde; dadá amaré piriginé dro Jegípto, i ame dživdiam ke Jegípto baró časo, i fujes kerdé Jegiptiáni aménge i amaré dadénge; i dyjam gódla mangipnasa ke Raj Devél, i šundiá Jov amarí zan (glos), i bičhadiá Jangolós, i Jov vylydžijá amen Jegiptóstyr; i ĥáda, ame som dro Kadieso, fóro pašýl tyró jagóro (krajo). Ame mangasa te mekes amen te prodžas pir tyrí phuv: ame na džása pir féldy i na pir vinagradniki, i ame na javása te pjas paní tyré ĥanyngendyr; ne džása kralískire dromésa, na riskirasa ni pe pravo (čačó), ni pe liévo (zérvo) rig, paka piridžasa miéžy pe tyrí phuv.” Ne Edómo phendiá léske: “Na džá pir mirí phuv, a to me kurtalása (miečosa) vydžava pe túte.” I phendlé gil léske Izrailjoskire čhavé: “Ame džása baré dromésa, i, kóli javása te pjas tyró paní, me i miré kherítka murdalá (miró skoto), tedy me javáva te pleskirav pal léste; jekhe ĥerénca mirenca prodžava, so ničí na mol.” Ne jov phendiá: “Tu na prodžasa.” I vygijá pe léste o Edómo buté manušénca i zoralé vastésa. I adiáke na zakamdiá Edómo te del vólia Izrailjoske te prodžal pir léskiri phuv, i Izrailjo gijá dre rig léstyr. I giné krig Izrailjoskire čhavé Kadiesostyr, i javné saré manušá ke bérga Or. I phendiá Raj Devél Mojzáske i Aaronóske pe bérga Or, pašýl jagóro Edomoskire-phuvjátyr: “Mek te pričhuvelpe Aaróno ke péskire manušá; pal-dová so jov na zadžála pe phuv, saví Me dáva Izrailjoskire čhavénge, pal-dová, so tumé na šundlé Miro priphenybén pašýl Mierivakiro paní; i le Aaronós i Jelizaros, léskire čhavés, i zalydža len pe bérga Or; i le Aaronostyr léskiro uribén i uri dre léste Jelizaros, léskire čhavés, i mek Aaróno te otdžal i jov meréla odój.” I kerdiá Mójza adiáke, syr priphendiá Raj Devél. Giné jone pe bérga Oro angíl saré manušéngire jakhá, i zlyjá Mójza Aaronostyr léskiro uribén, i uridia dre léste Jelizaros, léskire čhavés. I myjá odój Aaróno pe bergákiro vučipén. A Mójza i Jelizáro giné telé bergátyr. I dykhné saré manušá, so Aaróno myjá, i obrovenas Aaronós saró Izrailjoskiro kher trijánda dyvesá. Kiéli Xanaanoskiro králi o Arada, savó dživdiá ke paš-dyvesýtko rig (jugo), šundiá, so Izrailjo džála dromésa Afarimostyr, to terdijá pe maribén Izrail'tianenca i vari-kicý léndyr lyjá dro pliéno. I dyjá Izrailjo sovél Ráske-Devléske, i phendiá: “Kóli otdesa adalé manušén dre miré vastá, to rozmarava ke ruíny léngire fórja.” I Raj Devél šundiá Izrailjoskiri zan i otdyjá Xananiejen dre léskire vastá, i jov rozmardiá ke ruíny léngire fórja, i dyjá lav dolé štetoske: Xorma. Bergátyr Or giné jone Lolé-morjoskire (derjavéskire) dromésa, sob (kaj) te obdžan Edomoskiri phuv, i rakirdé manušá proti Raste-Devléste i próti Mojzaste: “Sóske tumé vylydžiné amen Jegiptóstyr, sob (kaj) te meras aménge pe čhučí phuv, pal-dová so adáj nane ni maró, ni paní, i amaré dieske jaciá džungaló (zbrydindia) davá nálačho xabén.” I bičhadiá Raj Devél pe manušénde mižeh sapen, savé dukhavenas manušén, i myné but manušá Izrailjoskire čhavéndyr. I javné manušá ke Mójza i phendlé: “Kerdiám ame grého, so rakirdiam proti Raste-Devléste i pe túte; pomangpe Ráske-Devléske, sob (kaj), Jov te otlydžal améndyr sapen.” I mangdiápe Mójza pal manušénde. I phendiá Raj Devél Mojzáske: “Ker péske sapes i čhuv les pe vučó kilo, i manúš, savés dandyrelas sap, dykhí pe léste, jačélape džidó.” I kerdiá Mójza xarkuné sapes i čhudiá les pe vučó kilo, i sys adiáke: i kiéli sap dandyrelas manušés, jov, dykhí, pe xarkuné sapeste, jačélape džidó. I giné Izrailjoskire čhavé, i terdiné ke Vamofo [Ovoto-ju.o.]; I giné Vamofostyr, i terdiné dro Iiie-Avarimo, pe čhučí phuv, so isyn proti Moávo, ke rig, kaj uštéla kham (vastóko). Odothýr giné jone, i terdiné pe dólo Zariedo. Gii odothýr, terdiné jone pe doiá Arnonoskiri paš pe čhučí phuv, pir saví thadéla ruslo pale miéža Amoriejoskiri, pal-dová so Arnono isyn pe miéža Moavoskiri, maškír Moávo i Amoriejo. Paldavá i phendló dre lylvarí pal brani (maribena) Ráskire-Devléskire. “Odothýr giné ke Vagiebo pe Sufa i Arnonoskire sygna rekicy, i sklony, pir savé rekicy vythadena, savé bandjona ke Šiebiet-Aro i thadena ke Moavoskiro jagóro (krajo).” Odothýr giné jone ke Bieer, davá isyn ĥanýng, pal saví Raj Devél phendiá Mojzáske: “Skéde manušén, i Me dáva lénge paní.” Tedy Izrailjo zabagandia daja gilý: “Pherdiakirpe, ĥanýng, bagán léske; ĥanýng, saví vyĥanade thagárja, vyĥanade manušéngire šeralé pir uphenybén žezloskiro péskire destenca.” Čhučé phuvjátyr giné jone dre Matana. Matanatyr dro Nagaliilo, Nagaliilostyr dro Vamofo, Vamofostyr dro Gajo, savó sys pe Moavoskiri loščýna, pe Fasgakire-bergákiro vučipén, savó sys riskirdo mósa ke čhučí phuv. I bičhadiá Izrailjo manušén ke Sigono, Amoriejengiro králi, sob (kaj) te phenén: “De vólia mánge te prodžav tyrí phuv, ame na javása te zadžas pe féldy i vinagradniki, ame na javása te pjas paní tyré ĥanyngendyr, a džása kralískire dromésa, paka prodžasa tyró them.” Ne Sigono na mekciá Izrailjo te džal pir léskiro them; i skedyjá Sigono sarén péskire manušén, i vygijá pe Izrailjo pe čhučí phuv, i dogijá ke Jaaco, i mardiápe Izrailjosa. I domardiá les Izrailjo kurtalása, i lyjá péske léskiri phuv Arnonostyr ke Javoko (Iavoko), ke Amonitianengiro them, pal-dová so zor sys pe Amonitianengire-themeskiri miéža. I lyjá Izrailjo saré dalé fórja, i dživdiá Izrailjo dre saré Amonitianengire fórja, ke Jesievóno i dre saré gavá, savé sys tel léskiri zor; pal-dová so Jesievóno sys Sigonoskiro fóro, Amoriejéngire-kralískiro, i jov mardiápe, pervoné Moavitoskire kralísa, savó sys angíl léste, i lyjá léskire vastéstyr sarí léskiri phuv ke Arnono. Paldavá rakiréna manušá, savé bagana: “Džán dro Jesievóno, mek te kerén i te zorjakiren fóro Sigono”; pal-dová so jag vygijá Jesievonostyr, bari jag Sigonoskire foróstyr, i xaja Ar-Moávo i thagar'jen, savé rikirde Arnonoskire vučipená. Bida túke, Moávo! Xasiné tumé, Xamososkire manušá! Našne léskire čhavé, i léskire čhajén lyjá Amoriejengiro králi Sigono dro pliéno; ame domardiam len maribnytkoné bustienca (strielenca); xasijá Jesievóno ke Divono, ame čhučakirdiam (spustošyndiam) len ke Nofa, saví isyn nádur Miedievatyr. I dživdiá Izrailjo pe Amoriejengiri phuv. I bičhadiá Mójza te vydykhen Iaziero (Jaziero), i lyné gavá, savé sys tel léngiri zor, i jone tradyne krig Amoriejen, savé sys dre lénde. I risiné, i giné ke Vasáno. I vygijá pe lénde Ogo, Vasanoskiro králi, kokoró i saré léskire manušá, pe maribén ke Jedreja. I phendiá Raj Devél Mojzáske: “Na dar léstyr, pal-davá so Me otdáva les i saré léskire manušén i sarí léskiri phuv dre tyré vastá, i tu kerésa lésa, syr tu kerdián Sigonosa, Amoriejéngire kralísa, savó dživdiá ke Jesievóno.” I domardé jone les i léskire čhavén i saré léskire manušén, adiáke so nijékh na jaciápe, i zalyne léskiri phuv. Tén'ci giné Izrailjoskire čhavé, i terdiné pe Moavoskire loščyny (ravniny), pašýl Iordáno, proti Jerihóno. I dykhciá o Valáko, Siepforoskiro čhavó saró, so kerdiá Izrailjo Amoriejenge; i drieván dardepe (darándyne) Moavitiani adalé manušéndyr, pal-dová so len sys but, i strahádyne Moavitiani Izrailjoskire čhavéndyr. I phendlé Moavitiani Madiamoskire phurydyrenge: “Adalé manušá akaná xána saró, so isyn pašýl aménde, syr guruv xála feldytko čar.” O Valáko, Siepforoskiro čhavó, sys Moavitianengiro králi dre dolé dyvesá. I bičhadiá jov manušén ke Valaámo, Vieoroskiro čhavó, dro Pieforo, savó isyn pe reka (len') Jevfrato, pe phuv léskire manušéngire-čhavengiri, sob (kaj) te kharel les i te phenél. “Ĥáda, manušá, savé vyginé Jegiptóstyr, i začhakirde phuvjákiro muj, i dživéna jone nádur mándyr; i adiáke, jav, prokoš mánge adalé manušén, pal-dová so jone isyn zoraledýr mándyr: saštý (moginéla) te javél, so me tedy javáva dre zor te domarav len, i te vytradav len phuvjátyr, me džinóm, so konés tu bahtiakiresa, odová javéla bahtiakirdó, i konés tu prokošesa, odová javéla prokošnó.” I giné Moavitianengire phurydyrá i Madiamoskire phurydyrá počastunkenca (darenca) dre vastá pal drabakiriben (magitko butý), i javné ke Valaámo, i piriphendle léske Valakoskire lavá. I phendiá jov lénge: “Rat'kiren adáj rat, i me dáva tuménge otphenybén, syr phenéla mánge Raj Devél.” I jačnépe Moavitianengiro phurydyrá Valaamoste. I javdiá Raj Devél ke Valaámo, i phendiá: “Save isyn adalé manušá túte?” O Valaámo phendiá Ráske-Devléske: “O Valáko, Siepforoskiro čhavó, Moavitianengiro králi, bičhadiá len ke me te phenén: “Ĥáda, isyn manušá, savé vyginé Jegiptóstyr i začhakirde phuvjákiro muj; i adiáke, jav, prokoš len mánge, saštý (moginéla) te javél, so me tedy javáva dre zor te maravpe lénca i te vytradav len.” I phendiá Raj Devél Valaamoske: “Na džá lénca, na koš odolé manušén; pal-dová so jone isyn bahtiakirde.” I uštyjá Valaámo pe ránko, i phendiá Valakoskire thagar'jenge: “Džán pe tumarí phuv; pal-dová so Raj Devél na mekéla man te džav tuménca.” I uštyné Moavitoskire thagárja, i javné ke Valáko, i phendlé léske: “Valaámo na zakamdiá te džal aménca.” Tén'ci Valáko bičhadiá butýr thagar'jen, butýr i slavutnedyr odoléndyr. I javné jone ke Valaámo, i phendlé léske: “Adiáke rakiréla Valáko, Siepforoskiro čhavó: ‘Na otphen te javes ke me; me sykaváva túke bari patýv i keráva túke saró, so tu phenésa mánge. Jav, prokoš mánge adalé manušén.” I otphendiá Valaámo, i phendiá Valakoskire pishar'jénge: “Mek Valáko te del mánge pherdó péskiro kher rup i suvnakái, me naštý (na mogináva) te na kandav miré Ráskire-Devléskiro uphenybén, i te keráv vari-so tyknó, ci baró [pir péskiri godý-r.s.]. Akaná, kamen, jačénpe daj i tumé pe rat, i me udžinava, so javír mólo phenéla mánge Raj Devél.” I javdiá Devél ratý ke Valaámo, i phendiá léske: “Kóli adalé manušá javné te kharén tut, uštý, džá lénca; ne jekh ker dová, so Me javáva te rakiráv túke.” Valaámo uštyjá pe zlóko (pe ránko) i gijá Moavitianengire thagar'jenca. I zahačíia Devléskiri xolý pal davá, so jov gijá, i terdijá Ráskire-Devléskiro Jangólo pe drom, sob (kaj) te na domekel les. Jov tradyjá pe peskirjate oslicate, i khetané lésa sys duj léskire dynárja. I dykhciá oslica Ráskire-Devléskire Jangolós, Savó sys terdó pe drom nange kurtalása dro vast, i gijá dre rig oslica droméstyr, i gijá pe félda; a Valaámo lyjá te marel oslica, sob (kaj) te riskirél la pe drom. I terdijá Ráskire-Devléskire Jangólo pe venzko (pe tango) drom, maškír vinagradniki, kaj sys jekhe rigátyr vánta i javire rigátyr vánta. Oslica, syr dykhciá Ráskire-Devléskire Jangolós, to pritasadiape joj ke vánta, i pritasadia Valaamoskiri ĥerój ke vánta; i jov nevéstyr lyjá te marel la. Ráskire-Devléskiro Jangólo nevéstyr pirigija, i terdijá dro tyknó štéto, kaj na sys karik te zdžal, ni pe (čačó) pravo, ni pe (zérvo) liévo rig. Oslica, dykhí Ráskire-Devléskire Jangolós, pasijá tel Valaamoste. I zahačíia xolý Valamoskiri, i lyjá jov te marel oslica kaštesa. I otphandia Raj Devél uštá oslicake, i joj phendiá Valaamoske: “So me túke kerdjom, so tu marésa man, ĥáda, akaná tríto mólo?” Valaámo phendiá oslicake: “Pal-dová, so tu vysandian man; kóli mánde dre vast te javél kurtála, tedy me akaná zamaravas tut.” Oslica phendiá Valaamoske: “Ci na me som tyrí oslica, pe savjate tu tradesa anglypnástyr i ke/žýko davá dyvés? Ci kerdjom me adiáke túke? Jov phendiá: “Nad.” I otčhakirdiá Raj Devél jakhá Valaamoske, i dykhciá jov Ráskire-Devléskire Jangolós, savó sys terdó pe drom kurtalása dre vastá, i poklonindiape, i pyjá pe péskiro muj. I phendiá léske Ráskire-Devléskiro Jangólo: “Pal so tu mardian tyrja oslica, ĥáda, trin móly? Me vygijom, sob (kaj) te terdjovav pe drom túke, pal-dová so drom tyró isyn načačuno angíl Mánde. I oslica, dykhí Man, riskirdiá dre rig Mándyr, ĥáda, trin móly; kóli b joj te na risjol Mándyr, tedy Me zamaravas tut, a la jačkiravas džidia.” I phendiá Valaámo Ráskire-Devléskire Jangoloske: “Me kerdjom grého, pal-dová so Me na džindjom, so Tu terdó proti mánde pe drom; i adiáke, kóli davat isyn nakuč dre Tyré jakhá, tedy me risjováva.” I phendiá Ráskire-Devléskiro Jangólo Valaamoske: “Džá adalé manušénca, jekh rákir dová, so Me javáva te rakiráv túke.” I gijá Valaámo Valakoskire thagar'jenca.” O Valáko, šundiá, so džála Valaámo, vygijá te pirilel les dro Moavitoskiro fóro, savó isyn pe miéža paš Arnono, so isyn pašýl sama štéty pe jagóro (pe krajo). I phendiá Valáko Valaamoske: “Ci na bičhadjom me ke tu, te kharén tut? Sóske tu na gíian ke me? Naúšto me pe čačipén naštý (na mogináva) te sykavav patýv túke?” I phendiá Valaámo Valakoske: “Dykh, me i javdjom ke tu, ne ci mogináva me vari-so péstyr te phenáv? So čhuvéla Devél dre miré uštá, dová i me javáva te rakiráv.” I gijá Valaámo Valakosa, i javné jone dro Kiríaf-Xucofo. I začhindiá Valáko guruvén i bakrén, i bičhadiá ke Valaámo i ke thagárja, savé sys lésa. Pe javír dyvés pe ránko Valáko lyjá Valaamos i lydžijá les upré pe Vaaloskire vučipená, sob (kaj) jov te dykhél odothýr but manušén trusciál. Tén'ci phendiá Valaámo Valakoske: “Ker mánge adáj eftá altári, i jan mánge eftá guruvén (tielianten) i eftá bakrén.” O Valáko kerdiá adiáke, syr rakirdiá Valaámo, i jandlé vaš svénto otdyibén Ráske-Devléske pir guruvoreste i pir bakreste pe kažno altárjo. I phendiá Valaámo Valakoske: “Terdjov pašýl célo shačkiribén tyró, a me džáva; saštý (moginéla) te javél, so Raj Devél vydžála mánge te dykhelpe gil (pe strieč), i so Jov otčhakirla mánge, dová me phenáva túke.” I gijá jov pe vučó štéto. I dykhciape Devél Valaamosa, i phendiá léske Valaámo: “Eftá altári kerdjom me, i jandjom dro svénto otdyibén pir guruvoreste (tieliantoste) i pir bakreste pe kažno altárjo.” I čhudiá Raj Devél dre Valaamoskire uštá lav, i phendiá: “Risjov ke Valáko i adiáke phen.” I risijá jov ke Valáko, i, ake, jov sys terdó pašýl célo shačkiribén péskiro, jov i saré Moavoskire thagárja (kniázi). I prorakirdia jov péskiri pritča i phendiá: “Miesopotamijatyr, jandiá man o Valáko, Moavoskiro králi, vastočnone bergendyr: ‘iav, prokoš mánge Jakovós, jav, ker fuipén pe Izrailjo!’ Syr te prokošav me? O Devél na prokošela les. Syr te vyphenav fuipén? O Raj Devél na vyphenela pe léste fuipén. Bergakire vučipnástyr me dykháva les, i bergicendyr pe léste dykháva: ake, manušá dživéna, kon péske rozdiel'nes, i maškír manušénde na ginelape. Kon piriginela Jakovóskiro práho i piriginela Izrailjoskiro štárto paš? Mek te merél miro di čačipnaskire meribnasa, i mek te javél miro meribén syr léngiro!” I phendiá o Valáko Valaamoske: “So tu mánca kerésa? Me lyjom tut, sob (kaj) te prokošes miré vergén, a tu, ĥáda, bahtiakiresa len?” I otphendiá jov i rakirdiá: Ci bangó me som, lav dro lav, te phenáv dová, so čhuvéla Raj Devél dre miré uštá? I phendiá léske Valáko: “Jav mánca pe javír štéto, savéstyr tu dykhésa len, ne jekh léngiri paš dykhésa, a sarén len na dykhésa; i prokoš len mánge odothýr.” I lyjá les pe félda Cohim, tén'či, pe bergákiro Fastiakiro vučipén, i kerdiá jov eftá altári, i jandiá pe kažno altárjo svénto otdyibén Ráske-Devléske pir guruvoreste i pir bakreste pe kažno altárjo. I phendiá o Valaámo Valakoske: “Terdjov adáj pašýl tyró célo shačkiribén, a me džáva odorík te streninavpe Rása-Devlésa.” I dykhciape Raj Devél Valaamosa, i čhudiá jov lavá dre léskire uštá, i phendiá: “Risjov ke Valáko i odój rákir.” I javdiá ke jov, i, ake, jov sys terdó pašýl péskiro célo shačkiribén, i lésa Moavoskire thagárja. I phendiá léske o Valáko: “So rakirdiá Raj Devél?” Jov vyphendia péskiro primiéro (pritča) i phendiá: “Uštý, Valáko, Siepforooskiro čhavó, šun i zaripir man. Devél isyn na manúš, sob (kaj) Léske te xohavél, i Jov na Manušéskiro čhavó, sob (kaj) Léske te paruvelpe. Ci Jov phenéla, i na skerela? Javéla te rakirél, i na keréla ke kónco/ke jagóro (na spolninela)? Ĥáda, lyjom me te bahtiakirav, pal-dová so Jov bahtiakirdiá, i me naštý (na mogináva) te paruvav davá. Nane dykhno čoripén dre Jakovoste, i nane bicialy bída dro Izrailjo; léskiro Raj Devél, isyn lésa, i trubitko zan léste, syr kralíste; O Devél vylydžijá len Jegiptóstyr, sygnyma léste sys syr šyngaleste (losjoste); Nane čovahaniakiriben dre Jakovoste, i nane drabakiriben dro Izrailjo. Dro péskiro časo phenéna pal Jakovoste i pal Izrailjo: “Ĥáda, so keréla Devél!” Ĥáda, manúš syr ščeriha (lievica) uštéla i syr ščer (liévo) ĥazdélape, na pasjola, paka xála doresybén i na p'jela čalés zamardengiro rat.” I phendiá Valáko Valaamoske: “Te košes, na koš les, te bahtiakires, na bahtiakir les.” I otphendiá Valaámo, i phendiá Valakoske: “Ci na phendjom me túke, so me javáva te keráv saró dová, so phenéla mánge Devél?” I phendiá Valáko Valaamoske: “Džá, me láva tut pe javír štéto; saštý (moginéla) te javél, so javéla lačhó Devléske, i odothýr prokošesa mánge les.” I lyjá Valáko Valaamos pe Fiegorakiro vučipén, savó sys riskirdo pe čhučí phuv. I phendiá Valaámo Valakoske: “Ker mánge adáj eftá altári, i jan mánge adarík eftá guruvorén i eftá bakrén.” I kerdiá o Valáko, syr phendiá Valaámo, i jandiá svénto otdyibén (žértva) Ráske-Devléske pir guruvoreste i bakreste pe kažno altárjo. Valaámo dykhciá, so Ráske-Devléske isyn lačhó te bahtiakirél Izrailjo, i jov na gijá, syr angledýr, vaš čovahaniakiriben, ne risijá péskire mósa ke čhučí phuv. I podykhciá Valaámo, i dykhciá Izrailjo, savó sys terdó pir péskire ródycy (čangá), i sys pe léste Devléskiro Dúho (Fáno). I vyphendia jov péskiri pritča, i phendiá: “Rakiréla Valaámo, Vieoroskiro čhavó, rakiréla murš otčhakirde jakhasa, rakiréla o manúš, savó šundiá Devléskire lavá, savó dykhéla Sarezorjakire-Ráskiro Devléskiro sykaibén, peréla, ne jakhá léskire otčhakirde: savé goža isyn tyré šátry, Jakovo, tyré kherá, Izrailjo! dind'kirenape jone syr loščyny, syr unty pašýl reka (len'), syr aloitka vešá, savé Raj Devél počhudia, syr kiedry pašýl paní; čhuvélape paní léskire vedrendyr, i siemjo léskiri javéla syr baré paniá, léskiro králi javéla vučedýr Agagostyr, i javéla slavútno léskiro kralipén. O Devél vylydžijá les Jegiptóstyr, sygnyma léste syr jekhe šyngaleskireste, jov xála manušén, savé javéna te džán pe léste, rostasavela jov léngire kokalý i péskire maribnytkoné bustienca (strielenca) domarela vergén. Jov pribandija, isyn paštó syr ščer (liévo) i syr ščeriha, kon ĥazdéla les? Kon bahtiakiréla tut, javéla bahtiakirdó, i kon košela tut, javéla prokošnó!” I zahačíia xolý Valakoskiri pe Valaamoste, i pekadiá jov pes dre vastá, i phendiá Valáko Valaamoske: “Me khardjom tut te prokošes miré vergén, dykh, a tu bahtiakiresa len, dykh, davá isyn tríto mólo; i adiáke, prasta tu pe péskiro štéto, me kamdjom túke te sykavav patýv, ne, ake, Raj Devél otkedyja tútyr patýv.” I phendiá Valaámo Valakoske: “Ci na phendjom me tyré manušénge, savén tu pribičhadian ke me: “Mek te del mánge Valáko pherdó péskiro kher rup i suvnakái, Me naštý (na mogináva) te piriuštavav Ráskire-Devléskiro priphenybén, sob (kaj) te keráv vari-so lačhipén ci čoripén pir péskiro iló: ne so phenéla Raj Devél, dová i Me javáva te rakiráv?” I adiáke akaná, ĥáda, me džáva ke péskire manušá. Tu džá, me phenáva túke, so keréna adalé manušá tyré manušénca dre palatuné (posliednia) dyvesá.” I rosphendiá péskiri pritča, i phendiá: “Rakiréla Valaámo, Vieoroskiro čhavó, rakiréla murš otčhakirde jakhasa, rakiréla o manúš, savó šunéla Devléskire lavá, savéste isyn dykhibén Naj Vučedyreskire Rástyr-Devléstyr, savó dykhéla Sarezorjakire-Ráskire-Devléskiro sykaibén, peréla, ne léskire jakhá isyn otčhakirde. Me dykháva Les, ne akaná, xaj, les nane, ake, dykháva Les, ne nane Les pašýl. Džála čergen Jakovostyr i ĥazdélape khieningoskiro destó Izrailjostyr, i rozmarela Moavoskiro thagar'jen i xasiakiréla sarén Sifoskire čhavén. Edomosa javéna te xulainen javír manušá, Sieirosa javéna te xulainen léngire vérgi, a Izrailjo sykavéla péskiri zor. Kon bijandjola Jakovostyr, odová zauhtylela i xasiakiréla, so jaciápe foróstyr.” I dykhciá jov Amalikos, i prorakirdia péskiri pritča i phendiá: “Anglatunó (pérvo) manušéndyr isyn Amaliko, ne kónco (jagóro) léskiro avela meribén.” I dykhciá jov Kieniejen, i prorakirdia péskiri pritča, i phendiá: “Zoraló isyn tyró kher, i pe bérga čhudý tyrí gniázda (kúfo); Kaino javéla čororó, i nadluges (naĥara) ke dová, so Asuro zalela tut dro pliéno.” I prorakirdia péskiri pritča, i phendiá: “Bida, kon jačélape džidó, kiéli janéla davá Devél! Javéna pármy (korabli) Kitimostyr, i pritasavéna Asuros, i pritasavéna Jevieros; ne i léske [lénge-r.s.] javéla meribén!” I uštyjá Valaámo, i gijá pale pe péskiro štéto, a Valáko adiáke-pac' gijá péskire dromésa. I dživdiá Izrailjo ke Sitimo, i lyné manušá te kerén biladžaipén Moavoskire čhajenca, i khardé jone manušén ke péskire-devlengiro svénto janybén, i xané manušá léngiro svénto janybén i mangnepe léngire devlorénge. I prijacia Izrailjo ke Vaal-Fiegoro. I zahačíia Ráskire-Devléskiri xolý pe Izrailjo. I phendiá Raj Devél Mojzáske: “Le manušengiren sarén barydyrén, i ublav len angíl Raste-Devléste angíl kham, i otrisjola Izrailjostyr Ráskire-Devléskiri xolý.” I phendiá Mójza Izrailjoskire sendar'jenge: “Kažno (sváko) te muliakirél péskire manušén, savé pričhudepe ke Vaalo-Fiegoro.” I ĥáda, vari-kon Izrailjoskire čhavéndyr javdiá, i jandiá ke péskire pšála Madianitianka, pe Mojzáskire jakhá i pe jakhá Izrailjoskire čhavéngiro pe saró skedyibén, kiéli jone rondlé pašýl skedyibnaskiro zagiibén. O Finiejeso, čhavó Jelizaroskiro, Aaronóskire-rašaskiro čhavéskiro, dykhí davá, ĥazdyjápe skedyibnaskire manušéndyr, i lyjá dro vast péskiro čhurdybnytko bust (kop'jo), i gijá jov palál pal Izrail'tianoste, kaj jone sys suté, i propusadia len dujén, Izrail'tianos i džuvliá dre lákiro per: i pirijaciá Izrailjoskire-čhavéngiro meribén. Manušén, savé myné morovostyr, sys biš te štar tysjoncy. I phendiá Raj Devél Mojzáske dasavé lavá: “O Finiejeso, čhavó Jelizaroskiro, Aaronóskire-rašaskiro čhavéskiro, otlydžija Mirí xolý Izrailjoskire čhavéndyr, syr lyjá te zevlynel (te čhuinel nakuč) pir Mánde maškír lénde, i Me na xasiakirdjom Izrailjoskire čhavén dro zevlynypén Miro; paldavá phen léske: Ĥáda, Me dáva léske Miro zavieto pal ramánjo (miro),’ i javéla jov léske i léskire-čhavéskire rodóske pal léste viekoskire phendlé lavésa (zavietosa) pal rašaipen, pal-dová so jov sykadiá zevlynypén pal péskire Devléste i zaterdija pal Izrailjoskire čhavénde. Lav Izrail'tianinoskiro, savés zamardiá Madianitianka, sys Zimri, Saloskiro čhavó, barydyró Simieonoskire rodóstyr; a lav Madianitiankakiro, savjá zamardé, sys Xazva; joj sys Curaskiri čaj, Omofoskire-barydyreskiri, Madiamoskire kheritkoné rodóstyr (pliemjostyr). I phendiá Raj Devél Mojzáske dasavé lavá: “Pritasaven Madianitianen i marén len, paldavá so jone nakuč kerdé tuménca dro péskiro xohaibén, podlyne tumen Fiegorosa i Xazvasa, Madiamoskire-barydyreskire čhasa, péskire pheniasa, savjá zamardé dro maribnaskiro dyvés pal Fiegoro.” Paló davá maribén Raj Devél phendiá Mojzáske i Jelizaroske, Aaronóskire-rašaskire čhavéske: “Piriginen saró Izrailjoskire-čhavéngiro skedyibén bišé beršéndyr i phuredýr, pir léngire čékarja (siemieistvy), [dadéskiri seménca-ju.o.], sarén, kon isyn lahčo vaš maribén dro Izrailjo.” I phendlé lénge Mójza i Jelizáro, rašái, pe loščýna Moavitoskiri pašýl Iordáno, proti Jerihóno: “Piriginen sarén manušén bišé beršéndyr i phuredýr, syr phendiá Raj Devél Mojzáske i Izrailjoskire čhavénge, savé vyginé Jegiptóskire phuvjátyr: O Ruvimo, anglatunó (pérvo) čhavó Izrailjoskiro. Ruvimóskire čhavé sys: Xanohostyr streč (pokolienijo) Xanohoskiri, Falustyr Faluskiri streč (pokolienijo), Hiecronostyr streč Xiecronoskiri, Xarmastyr streč Xarmaskiri. Ĥáda, isyn stréčy Ruvimóskire: i pirigindlo len sys štardešá trin tysjoncy eftašelá trijánda. I Faluskire čhavé: Jeliavo. Jeliavoskire čhavé sys: Niemuilo, Dafano i Avirono. Davá sys odolé Dafano i Avirono, savé khardé pe skedyibén te rakirén, savé podrakirde manušén proti Mojzaste i Aaronoste khetané Koriejoskire manušénca, kiéli jone podrakirde manušén pe Raste-Devléste; i rosčhakirdia phuv péskire uštá i proglytyndia len i Koriejos; khetané lénca myné i drúgi (malá) léngire, kiéli jag shaia dujšelá pandždešá manušén, i jačné jone syr ĥiertýk (znamiénijo). Ne Koriejoskire čhavé na myné. Simieonoskire čhavé pir léngire stréčy (pokolienii) sys: Niemuilostyr streč Niemuiloskiri, Jaminostyr streč Jaminoskiri, Jahinostyr streč Jahinoskiri, Zarostyr streč Zaroskiri, Saulostyr streč Sauloskiri. Ĥáda, isyn Simjonoskire stréčy: biš te duj tysjoncy dujšelá. Gadóskire čhavé pir léngire stréčy sys: Cefonostyr streč Cefonoskiri, Xagiejostyr streč Xagiejoskiri, Šunistyr streč Šuniskiri, Oznijostyr streč Oznijoskiri, Jerijostyr streč Jerijoskiri, Arodostyr streč Arodoskiri, Arielijostyr streč Arielijoskiri. Ĥáda, isyn Gadóskire stréčy, pir léngiro piriginybén: štardešá tysjoncy pandžšelá. Judáskire čhavé sys: Iro i Onano; ne Iro i Onano myné pe Xanaanóskiri phuv; i Judáskire čhavé pir léngire stréčy sys: Šelastyr streč Šielaskiri, Fariesostyr streč Fariesoskiri, Zarostyr streč Zaroskiri; i Fariesoskire čhavé sys: Esromostyr streč Esromóskiro, Xamulostyr streč Xamuloskiri; Ĥáda, isyn Judáskire stréčy, pir ginybén léngiro: eftadešašov tysjoncy pandžšelá. Isaharoskire čhavé pir léngire stréčy sys: Folastyr streč Folaskiri, Fuvastyr streč Fuvaskiri, Jašuvastyr streč Jašuvaskiri, Šymronostyr streč Šymronoskiri. Ĥáda, isyn Isaharoskire stréčy pir léngiro ginybén: šovdešá štar tysjoncy trinšelá. Zavulonoskire čhavé pir léngire stréčy sys: Seriedostyr streč Seriedoskiri, Jelonostyr streč Jelonoskiri, Jahlieilostyr streč Jahlieiloskiri; ĥáda, isyn Zavulonoskire stréčy pir léngiro ginybén: šovdešá tysjoncy pandžšelá. Iosifóskire (Jozáskire) čhavé pir léngire stréčy sys: Manásija i Jefriémo. Manasijáskire čhavé: Mahirostyr streč Mahiroskiri, Mahirostyr bijándyja Galaádo, Galaadostyr streč Galaadoskiri. Ĥáda, isyn Galaadóskire čhavé: Jezierostyr streč Jezieroskiri, Xieliekostyr streč Xieliekoskiri, Asriilostyr streč Asriiloskiri, Šehiemostyr streč Šehiemoskiri, Šemidastyr streč Šemidaskiri, Xiefierostyr streč Xiefieroskiri. Salpaadoste, Xiefieroskire čhavéste na sys čhavén, a jekh čhaja; lavá Salpaadoskire čhajengire: Mahla, Noa, Xogla, Milka i Firca. Ĥáda, isyn Manasijáskire stréčy, a pirigindo len sys pandždešá duj tysjoncy eftašelá. Ĥáda, isyn Jefriemóskire čhavé pir léngire stréčy: Šutielastyr streč Šutielaskiri, Biehierostyr streč Biehieroskiri, Tahanostyr streč Tahanoskiri; i ĥáda, isyn Šutielaskire čhavé: Aranostyr streč Aranoskiri; ĥáda, isyn Jefriemóskire stréčy, pir léngiro ginybén: trijandaduj tysjoncy pandžšelá. Ĥáda, isyn Iosifóskire (Jozáskire) čhavé pir léngire stréčy. Vieniaminóskire čhavé pir léngire stréčy: Belastyr streč Belaskiri, Ašbielostyr streč Ašbieloskiri, Ahiramostyr streč Ahiramoskiri, Šefufamostyr streč Šefufamoskiri, Xufamostyr streč Xufamoskiri. I Bielaskire čhavé sys: Ardo i Naamano; Ardostyr streč Ardoskiri, Naamanostyr streč Naamanoskiri. Ĥáda, isyn Vieniaminóskire čhavé pir léngire stréčy; a pirigindlo sys len štardešá pandž tysjoncy šovšelá. Ĥáda, isyn Danóskire čhavé pir léngire stréčy: Šuhamostyr streč Šuhamoskiri. Ĥáda, isyn Danóskire čékarja (siemieistvy) pir léngire stréčy. I saré Šuhamoskire stréčy pir léngiro ginybén sys: šovdešá štar tysjoncy štaršelá. Asiroskire čhavé pir léngire stréčy sys: Imnastyr streč Imnaskiri, Išvastyr streč Išvaskiri, Vierijatyr streč Vierijaskiri; Vierijaskire čhavéndyr: Xievierostyr streč Xievieroskiri, Malhiilostyr streč Malhiiloskiri; Asiroskire-čhakiro lav sys Sara [Serah-ju.o.]. Ĥáda, isyn Asiroskire-čhavéngiro stréčy, pir léngiro ginybén: pandždešá trin tysjoncy štaršelá. Niefalimoskire čhavé pir léngire stréčy sys: Jahceilostyr streč Jahceiloskiri, Gunijostyr streč Gunijoskiri, Jecerostyr streč Jeceroskiri, Šyliemostyr streč Šyliemoskiri; ĥáda, isyn streč Niefalimoskiri pir léngire stréčy; pirigindlo len sys štardešá pandž tysjoncy štaršelá. Ĥáda, kicý sys manušén, savé zaginé dre Izrailjoskire-čhavéngiro piriginybén: šovšelá jekh tysjonco eftašelá trijánda manušá. I phendiá Raj Devél Mojzáske, rakirí: “Pir davá piriginybén trej te rozdes phuv syr meknó mištypén adalé manušénge pir léngiro ginybén (kicypen) pir lav. Konés butýr, odolénge phuv de butýr; a konés tyknedýr, odolénge phuv de tyknedýr: kažnonéske trej te den phuv dakicy, ci but manušén zaginé dro ginybén. Pir žriébijo trej te rozden phuv: pir lavá léngire-dadengíre ródycy jone isyn bangé te doresen phuv; pir žriébijo trej lénge te rozden léngiri phuv syr meknó mištypén, syr buté-manušengirenge, adiáke i tykné-manušengirenge. Ake, adalé isyn, kon zagijá dre ginybén Lievitengiro pir léngire stréčy: Girsonostyr streč Girsonoskiri, Kaafostyr streč Kaafoskiri, Mieraristyr streč Mierariskiri. Ĥáda, isyn stréčy Lievijonoskire: streč Livnijoskiri, streč Xievronoskiri, streč Mahlijoskiri, streč Mušyjoskiri, streč Koriejoskiri. Kaafostyr bijándyja Amramo. Amramoskire-romniakiro lav sys Iohavieda, Lievijoskiri čhaj, savjá bijandiá Lievijoskiri romný dro Jegípto, a joj bijandiá Amramoske Aaronós, Mojzás i Mariam, léngire pheniá. I bijándyne Aaronostyr Nadavo i Aviudo, Jelizáro i Ifamaro; ne Nadavo i Aviudo myné, kiéli jandlé natrebimo jag angíl Raste-Devléste. I sys pirigindlo len bište trin tysjoncy sarén muršén, jekhe čhonestyr i butýr, pal-dová so jone na sys pirigindle khetané Izrailjoskire čhavénca, pal-dová so na sys dynó lénge učastko (phuv) maškír Izrailjoskire čhavénde pir phuv syr meknó mištypén. Ĥáda, isyn odolé, savén pirigindle Mójza i Jelizáro, rašái, savé gindlé Izrailjoskire čhavén pe Moavoskire loščyny pašýl Iordáno, proti Jerihóno; maškír lénde na sys ni jekhe manušés, savén gindia Mójza i Aaróno, rašái, savé gindlé Izrailjoskire čhavén pe Sinajoskiri čhučí phuv; pal-dová so Raj Devél phendiá lénge, so meréna jone pe čhučí phuv, – i na jaciápe léndyr nikón (nikonés), apríč Xalievoste, Jefonijaskire čhavéste, i Isusóste (Johošuaste), Navinoskire čhavéste. I javné Salpaadoskire čhaja, Xiefieroskire čhavéskire, Galaadóskire čhavéskire, Mahiroskire čhavéskire, Manasijáskire-čhavéskire strečatyr, Iosifóskire čhavéskiro, i ĥáda, sys léskire-čhajengire lavá: Mahla, Noa, Xogla, Milka i Firca; i terdiné jone angíl Mojzaste i angíl Jelizaroste rašaste, i angíl thagar'jende i angíl saró skedyibén, pašýl zagiibén dre skedyibnáskiri šátra, i phendlé: “Amaró dad myjá pe čhučí phuv, i jov na sys khetané odolé manušénca, savé skedynépe proti Raste-Devléste khetané Koriejoskire malenca, ne jov pal péskiro grého myjá, i čhavé léste na sys; pal so te xasjol amaré-dadéskiro lav léskire rodycóstyr, pal-dová so léste nane čhavés? De aménge phuv maškír amaré dadéskire pšalénde.” I jandiá Mójza léngiro réndo (diélo) angíl Raste-Devléste. I phendiá Raj Devél Mojzáske: “Čačipén rakiréna Salpaadoskire čhaja, de lénge mištypnáskiri miéra pir phuv maškír léngire-dadéskire pšalénde i piride lénge léngire dadéskiri phuv, syr meknó mištypén. I Izrailjoskire čhavénge de te džinén, i phen: ‘Kóli kon meréla, i na sys léste čhavés, tedy piridén léskiri phuv léskire čhake’; kóli léste nane čha, piridén léskiri phuv léskire pšalénge; kóli nane léste pšalén, otdén léskiri phuv léskire-dadéskire pšalénge; kóli nane léskire-dadéskire pšalén, otdén léskiri phuv léskire-pašatuné semencake léskire strečatyr, sob (kaj) joj te javél léste; i mek te javél davá vaš Izrailjoskire čhavénge zalydžino dro Zakóno, syr phendiá Raj Devél Mojzáske.” I phendiá Raj Devél Mojzáske: “Džá upré pe daja bérga Avarimo, i podykh pe phuv, saví Me dáva Izrailjoskire čhavénge; i kiéli podykhesa pe láte, prijač ke péskire manušá i tu, syr prijacia Aaróno, tyró pšal; pal-dová so tumé na kandyné Miro rakiribén pe čhučí phuv Sin, dro dová časo, kiéli sys košybén pe skedyibén, sob (kaj) te sykaves angíl léngire jakhá Mirí sventyma pašýl paní Mieriva.” I phendiá Mójza Ráske-Devléske dasavé lavá: “Mek te čhuvél Raj Devél, Savó isyn pe kažno dúho (fáno) dre kažno loč (plot') manušés pe skedyibén; savó vydžála angíl lénde i savó zadžála angíl lénde, savó vylydžala len i savó janéla len, sob (kaj) te na jačélpe Ráskire-Devléskiro skedyibén, syr bakré, savénde nane čhupnaris (pastuhos).” I phendiá Raj Devél Mojzáske: “Le péske Isusós (Johošuas), Navinoskire čhavés, manušés, dre savéste isyn Dúho (Fáno), i čhuv pe léste tyró vast, i čhuv les angíl Jelizaroste, rašaste, i angíl saró skedyibén, i de léske priphenybén angíl léngire jakhá, i de léske tyré slavatyr, sob (kaj) te šunél les saró skedyibén Izrailjoskire čhavéndyr; i javéla jov te terdjol ke Jelizáro rašái, i te phučel léstyr pal léste te del godypén léske, Urimoskire sendosa angíl Raste-Devléste; i pir léskiro lav bangé isyn jone (musinena) te vydžán, i pir léskiro lav bangé te zadžán, jov i saré Izrailjoskire čhavé lésa, i saró skedyibén.” I kerdiá Mójza, syr priphendiá léske Raj Devél, i lyjá Isusós (Johošuas), i čhudiá les angíl Jelizaroste rašaste i angíl saró skedyibén; i čhudiá upré pe léste péskire vastá, i dyjá léske priphenybén, syr rakirdiá Raj Devél pir Mojzaste. I phendiá Raj Devél Mojzáske, rakirí: “Priphen Izrailjoskire čhavénge i phen lénge: ‘Dykhén, sob (kaj) Miro janybén, maró Miro syr svénto janybén Mánge, dro gudló thuv Mánge, te janén Mánge dro péskiro časo.’” I phen lénge: “Davá isyn svénto janybén vaš jag, saví tumé san bangé te janén Ráske Devléske: duj bakré jekhe-beršýtka bi došakire pe dyvés, dro célo shačkiribén kažno dyvés. Jekhe bakrés jan rankosa (zlokosa), a javire bakrés jan bel'velié; i dro marunó janybén jan déšto paš jefa pšeničnone jaržestyr, pieriemiešyndlo jekhe štartone ginasa vymarde jeliejostyr; davá-célo shačkiribén pe kažno dyvés, savó kerdó sys pašýl bérga Sinajo, dro gudló thuv, svénto janybén Ráske-Devléske; i vaš thaduno svénto dyibén pašýl láte te javél jekh štárto gino pe jekhe bakreste: pe svénto štéto ker vyčhuiben, mol (vino) Ráske-Devléske. Javirés bakrés bel'velié, dasavé marune janybnasa, syr zlokostyr (rankostyr), i dasavé vyčhuibnasa pašýl léste jan les dre svénto janybén, dro gudló thuv, lačhó Ráske-Devléske. A dro sávato (subóta) janén dujén jekhe-beršytkonen bakrén bi došakiro, i vaš marunó dyibén janén duj-dešengire pašá efatyr pšeničnone jaržestyr, pirimiešyndlo jeliejosa i vyčhuiben pašýl léste: davá-savatoskiro célo shačkiribén dro kažno sávato, butýr kažnoné-dyveseskire celoné shačkiribnastyr i vyčhuiben pašýl léste. I dro nevó čhon tumaró, janén célo shačkiribén Ráske-Devléske: baré kheritkoné murdalestyr (skotóstyr) dujén ternen guruvorén, jekhés bakrés i eftá jekhe-beršytkonen bakrén bi došakiro, i trin dešta pašá efatyr pšeničnone jaržestyr, pirimiešyndlo jeliejosa, dro marunó janybén pe jekhéste guruveste, i duj dešta pašá efatyr pšieničnone jaržestyr, pieriemiešandlo jeliejosa, dro marunó janybén pe bakreste, i pir déšto paš efatyr pšeničnone jaržestyr, pieriemiešyndlo jeliejosa, dro marunó janybén pe kažnoné bakreste; davá-célo shačkiribén, gudló thuv, svénto janybén, lačhó Ráske-Devléske; i vyčhuiben khetané lénca bangó te javél paš gino mol (vino) pe guruvoreste, jekh tríto paš ginostyr pe bakreste, i jekh štárto paš ginostyr pe bakreste; davá-célo shačkiribén dro kažno nevó čhon dre saré beršýtka čhoná. I jekhés buznés janén Ráske-Devléske dre svénto janybén pal grého: butýr celoné shačkiribnastyr, so pe kažno dyvés tumé san bangé te janén les vyčhuibnasa leskiresa. Dro pérvo čhon, pe dešuštarto čhonéskiro dyvés-Patradí Ráskire-Devléskiri. I pe dešupandžto dyvés dalé-čhonéskiro te javél svénko; eftá (bitrinéngiro deš) dyvesá jone isyn bangé te xan opriesnoki. Pe pérvo dyvés mek te javél tuménde svénto skedyibén, nisaví butý te na kerén; i janén svénto janybén, célo shačkiribén Ráske-Devléske: baré kheritkoné murdalestyr (skotóstyr) duje guruvén, jekhe bakrés i eftá jekhe-beršytkone bakrén; bi došakiro bangé jone te javén tuménde. I khetané lénca dro marunó janybén janén pšenično jaržó, pirimiešindlo jeliejosa, trin dešta pašá efatyr pe kažnoné guruveste, i duj dešta pašá efatyr pe bakreste, i pir déšto paš efatyr jan pe kažnonéste eftá bakréndyr, i jekhe buznés dro svénto dyibén Ráske-Devléske pal grého, vaš žužakiriben tumaró; apríč célo shačkiribén pe ránko (pe zlóko), savó isyn célo shačkiribén kažnoné dyveseskiro. Adiáke janén i dro kažno eftá dyveséndyr, davá isyn maró, svénto dyibén, gudló thuv, lačhó Ráske-Devléske; apríč kažnoné-dyveseskiro célo shačkiribén i léskire vyčhuibnastyr, trej te janén davá. I pe eftáto dyvés mek te javél tuménde svénto skedyibén; na kerén nisaví butý. I dro dyvés, kiéli janéna pérva barjakirdé (plódy) i kiéli janéna Ráske-Devléske nevó marunó janybén dre eftangirja (siedmicy) tumaré, mek te javél tuménde svénto skedyibén; nisaví butý te na kerén; i janén célo shačkiribén dro gudló thuv Ráske-Devléske: kheritkoné murdalestyr (baré skotóstyr) dujén guruvorén, jekhe bakrés i eftá jekhe-beršytkone bakrén, i vaš lénge dro marunó janybén pšenično jaržó, pieriemiešyndlo jeliejosa, trin dešta pašá efatyr pe kažnoné guruvoreste, duj dešta pašá efatyr pe bakreste, i pir déšto paš efatyr pe kažnonéste eftá bakréndyr, i jekhe bakrés dre svénto dyibén Ráske-Devléske pal grého, vaš žužakiriben tumaró; Apríč kažnoné-dyvesytkoneskiro célo shačkiribén i marunó janybén vaš lénge, janén davá Mánge léngire vyčhuibnasa: bi došakiro jone isyn bangé te javén jone tuménde. I dro eftáto čhon, pe pérvo-čhonéskiro dyvés, mek te javél tuménde svénto skedyibén; na kerén nisaví butý; mek te javél davá tuménde radymakiro dyvés rogoskire znikosa (trubakire zvukosa). I janén célo shačkiribén dre gudló thuv, lačhó Ráske-Devléske: jekhe guruvóres, jekhe bakrés, eftá jekhe-beršytkone bakrén, bi došakiren, i vaš lénge dro marunó janybén te javél pšenično jaržó, pieriemiešyndlo jeliejosa, trin dešta pašá efatyr pe guruvoreste, duj dešta pašá efatyr pe bakreste, i jekh déšto paš efatyr pe kažnonéste eftá bakréndyr, i jekhés buznés (kozlos) dre svénto dyibén Ráske-Devléske pal grého, vaš žužakiriben tumaró, apríč nevoné-čhoneskire célo shačkiribnen i léskiro marune janybén, i apríč célo shačkiribén pe kažno dyvés i léskiro marunó janybén, i léngiro vyčhuiben, pir uphenybén, dro gudló thuv, lačhó Ráske-Devléske. I pe déšto dyvés dalé eftá-čhonéskiro, mek te javél tuménde svénto skedyibén. Čhuvén pes teledýr dre tumaré ile, i nisavó réndo te na kerén; i janén célo shačkiribén Ráske-Devléske dro gudló thuv: jekhe guruvóres, jekhe bakrés, eftá jekhe-beršytkonen bakrén; bi došakiren, bangé jone te javén tuménde; i vaš lénge dro marunó janybén pšenično jaržó, pieriemiešyndlo jeliejosa, trin dešta pašá efatyr pe guruvoreste, duj dešta pašá efatyr pe bakreste, i pir déšto paš efatyr pe kažnonéste eftane bakréndyr, i jekhe buznés (kozlos) dre svénto dyibén Ráske-Devléske pal grého, apríč sventoné janybnastyr Ráske-Devléske pal grého, savó janéna pe žužakiribnaskiro dyvés, i apríč kažnoné-dyveseskire célo shačkiribén i léskiro marunó janybén, i léskiro vyčhuiben. I pe dešupandžto dyvés eftá-čhonéskiro mek te javél tuménde svénto skedyibén; nisaví butý te na kerén, i svenkinen Ráskire-Devléskiro svénko eftá dyvesá; i janén célo shačkiribén, svénto janybén, gudló thuv, lačhó Ráske-Devléske: dešutrin guruvorén, dujén bakrén, dešuštar jekhe-beršytkonen bakrén; bi došakiren, mek te javén jone; i vaš lénge dro marunó janybén pšenično jaržó, pieriemiešyndlo jeliejosa, trin dešta pašá efatyr pe kažnonéste dešutrinendyr guruvorendyr, duj dešta pašá efatyr pe kažnoné dujendyr bakréndyr, i pir déšto paš efatyr pe kažnonéste dešuštarendyr bakréndyr, i jekhe buznés dre svénto dyibén Ráske-Devléske pal grého, upredyr kažnoné-dyvesytkoné celoné shačkiribnastyr i léskire marune janybnastyr i léskire vyčhuibnastyr. I pe javír dyvés dešudúj guruvorén, dujén bakrén dešuštar jekhe-beršytkone bakrorén, bi došakiren, i vaš lénge marunó janybén i vyčhuiben vaš guruvorenge, bakrenge i bakrorenge, pir léngiro ginybén, pir uphenybén, i jekhe buznés dre svénto dyibén Ráske-Devléske pal grého, upredyr kažnoné-devesytkone celoné shačkiribnastyr i marune janybnastyr i léngire vyčhuibnastyr. I pe tríto dyvés dešujekh guruvorén, dujén bakrén, dešuštar jekhe-beršytkone bakrorén, bi došakiren, i vaš lénge marunó janybén i vyčhuiben vaš guruvorenge, bakrén i bakrorén, pir léngiro ginybén, pir uphenybén, i jekhe buznés (kozlos) dro svénto dyibén Ráske-Devléske pal grého, upredyr kažnoné-dyvesytkoné celoné shačkiribnastyr i marune janybnastyr i léskire vyčhuibnastyr. I pe štárto dyvés deš guruvorén, duje bakrén, dešuštar jekhe-beršytkonen bakrorén, bi došakiren, i vaš lénge marunó janybén i vyčhuiben vaš guruvorenge, bakrén i terné bakrorén, pir léngiro ginybén, pir uphenybén, I jekhe buznés dre svénto dyibén Ráske-Devléske pal grého, upredyr kažnoné-dyveseskiro celoné shačkiribnastyr i marune janybnastyr i léskire vyčhuibnastyr. I pe pándžto dyvés jeniá (bijekhéskiro deš) guruvorén, duje bakrén, dešuštar jekhe-beršytkone bakrorén, bi došakiren, i vaš lénge marunó janybén i vyčhuiben vaš guruvorenge, bakrenge i bakrorenge, pir léngiro ginybén, pir uphenybén, i jekhe buzne dre svénto dyibén Ráske-Devléske pal grého, upredyr kažnoné-dyvesytkoné celoné shačkiribnastyr i marune janybnastyr i léskire vyčhuibnastyr. I pe šóvto dyvés ohtó guruvorén, duje bakrén, dešuštar jekhe-beršytkonen bakrorén, bi došakiren, i vaš lénge marunó janybén i vyčhuiben vaš guruvorenge, bakrenge i bakrorenge, pir léngiro ginybén, pir uphenybén, i jekhe buznés dre svénto dyibén Ráske-Devléske pal grého, apríč kažnoné-dyvesytkoné célo shačkiribén i léskiro marunó janybén, i léskiro vyčhuiben. I pe eftáto dyvés eftá guruvorén, dujén bakrén, dešuštar jekhe-beršytkonen bakrorén bi došakiren, i vaš lénge marunó janybén i vyčhuiben vaš guruvorenge, bakrenge i bakrorenge, pir léngiro ginybén, pir uphenybén, i jekhe buznés dre svénto dyibén Ráske-Devléske pal grého, upredyr kažnoné-dyvesytkoné celoné shačkiribnastyr i marune janybnastyr i léskire vyčhuibnastyr. Pe ohtóto dyvés tuménde mek te javél svénto skedyibén. Na kerén nisaví butý. I janén célo shačkiribén, svénto dyibén, gudló thuv, lačhó Ráske-Devléske; jekhe guruvóres, jekhe bakrés, eftá jekhe-beršytkonen bakrorén, bi došakiren; i khetané lénca marunó janybén i počhuiben vaš guruvoreske, bakreske i bakrorenge pir léngiro ginybén, pir uphenybén, i jekhe buznés dre svénto dyibén Ráske-Devléske pal grého, apríč kažnoné-dyvesytkoné célo shačkiribnen i léskiro marunó janybén, i léngiro vyčhuiben. Janén davá Ráske-Devléske dre tumaré svénki, upredyr dolendyr, so tumé angledýr jandlé, pir sovél, ci pir iló, saré celoné shačkiribnendyr tumaré i marune tumaré janybnastyr, i tumaré vyčhuibnastyr i mirnone sventoné dyibnástyr.” I piriphendia Mójza Izrailjoskire čhavénge saró, so rakirdiá Raj Devél Mojzáske. I phendiá Mójza barydyrénge pe ródycy Izrailjoskire čhavéndyr: “Ĥáda, so priphendiá Raj Devél: ‘Kóli vari-kon déla sovél Ráske-Devléske ci sovlahala košybnasa, čhuvi otphenybén pal péskiro di, tedy jov naštý (na musinela) te paruvel péskiro lav, ne jov isyn bangó te kerél saró, so vygijá léskire uštendyr. Kóli džuvlý déla sovél Ráske-Devléske, i čhuvéla pe péste otphenybén dre péskire-dadéskiro kher, dro péskiro ternypen, i šunéla dad lákiri sovél i otphenybén, savó joj čhudiá pe péskiro iló, i na phenéla pal dová lákiro dad, tedy saré lákire sovela javéna te terdjon pal láte, i kažno lákiro otphenybén, savó joj čhudiá pe péskiro iló, javéla; kóli lákiro dad, šundiá, i priphenela láke te na rikirél sovél duredýr, tedy saré lákire sovela i otphenybena, savé joj čhudiá pe péskiro iló, na javéna dre zor, i Raj Devél otmekéla láke, pal-davá so láke zaphendia lákiro dad. Kóli joj vydžála paloróm, a pe láte lákiri sovél, ci lav lákire uštendyr, savésa joj sphandia pes, i šunéla lákiro rom, i šuny, ničí na phenéla: tedy lákiri sovél javéla, i lákire otphenybena, savé joj čhudiá pe péskiro iló, javéna; kóli lákiro rom, šuny, zaphenela láke, i otlydžala lákiri sovél, saví sys pe láte, i lav lákire uštendyr, savénca joj sphandia pes, tedy jone na javéna, i Raj Devél otmekéla láke. Sovél pivliakiri (udovakiri) i džuvliakiri, saví rozlydžijape romesa, savó b joj te na čhuvél otphenybén pe péskiro iló, javéla te rikirelpe. Kóli romný dre péskire-romeskiro kher dyjá sovél, ci čhudiá otphenybén pe péskiro iló sovlahasa, i lákiro rom šundiá, i jov sys štyl pal dová, i na zaphendia láke, tedy saré lákire sovela javéna, i kažno otphenybén, savó joj čhudiá pe péskiro iló, javéla dre zor; kóli lákiro rom, šuny, otlydžala len, tedy saré, savé vyginé lákire uštendyr lákire sovela i otphenybena lákire iléskire na javéna: lákiro rom otlyja zor léndyr, i Raj Devél otmekéla láke. Kažno sovél i kažno sovláh košybnasa, sob (kaj) te čhuvél teledýr péskiro di, lákiro rom saštý (moginéla) te zoraliakirel, i lákiro rom saštý (moginéla) te otlydžal; kóli lákiro rom na rakirdiá ničý pal dová dyvés, tedy jov dolesa zoraliakirdia saré lákire sovela, i saré lákire sovlahá košybnasa, savé sys pe láte, jov zoraliakirdia, pal-dová so jov, šuny, na rakirdiá pal dová; a kóli otlydžija len, to paló (poslie) dová, syr šundiá, tedy jov lyjá pe péste lákiro grého. Ĥáda, isyn uphenybená, savé Raj Devél priphendiá Mojzáske pal otlydžaiben maškír romeste i léskire romniáte, maškír dadéste i lákire čhate dre lákire terné beršá, dro lákire-dadéskiro kher. I phendiá Raj Devél Mojzáske, rakirí: “Otha pale Madianitianenge pal Izrailjoskire čhavénde, i paló (poslie) dová otdžasa ke tyré manušá.” I phendiá Mójza manušénge: “Skedén péstyr manušén pe maribén, sob (kaj) jone te džán pe Madianitianende, te kerén séndo Ráskiro-Devléskiro pe Madianitianende; pir tysjonco rodycóstyr, kažnoné Izrailjoskire rodycendyr bičhaven pe maribén. I sys vykedyno Izrailjoskire tysjoncendyr, pir tysjonco rodycóstyr, dešudúj tysjoncy skedyné manušén pe maribén. I bičhadiá len Mójza pe maribén, pir tysjonco rodycóstyr, len i Finiejesos, rašaskire Jelizaroskire čhavés pe maribén, i dre léskiro vast sys svénta khoré (sasúdy) i rógi (truby) vaš signalo. I giné maribnása pe Madianitianende, syr priphendiá Raj Devél Mojzáske, i domardé saré muršén; i khetané léngire zamardenca jone muliakikirde Madiamoskire kral'jén: Jevijos, Riekiemas, Curas, Xuras i Rievas, pandžé Madiamoskire kral'jén, i Valaamos, Vieoroskire čhavés, zamardé kurtalása; a Madiamoskire džuvlién i léngire čhavén lyné dro pliéno, i saré léngire kheritkoné murdalén (skoto), i saré léngire stády i saró léngiro majonko lyné dro doresybén, i saré léngire fórja i saré léngire foricy shačkirdé jagása; i lyné saró, so zakedyne i saró barvalypén, manušéstyr ke kherítka murdalá (skoto); i jandlé plienonen i doresybén i saró, so zakedyne ke Mójza i ke rašáj Jelizáro i ke Izrailjoskire-čhavéngiro skedyibén, ke stáno, pe Moavitoskire loščyny (ravniny), so isyn pašýl Iordáno proti Jerihóno. I vyginé Mójza, i rašáj Jelizáro, i saré thagárja skedyibnástyr te pirilen len stanostyr. I xoliásyja Mójza pe xaladéngire barydyrende, tysjoncengire barydyrende i šelengire barydyrende, savé javné maribnastyr, i phendiá lénge Mójza: “Vaš so tumé mekné džiden sarén džuvlién? Ake, jone, pir Valaamoskiro godypén, sys vaš Izrailjoskire čhavénge lydžaibnasa te otdžan Rástyr-Devléstyr pir Fiegoroste, pal so i xasiakiriben sys dro Ráskire-Devléskiro skedyibén; i adiáke zamarén sarén čhavorén, i sarén džuvlién, savé udžindlé muršés pe romeskiro čhuibén, zamarén (muliakirén); a sarén patyvalé tyrne džuvlién, savé na udžindlé muršeskiro čhuibén, jačkiren vaš péske; i javén pal stáno eftá dyvesá; kažno (sváko), kon zamarela manušés i lélape pal zamardeste, te žužakirelpe pe tríto dyvés i pe eftáto dyvés, tumé i tumaré manušá dro pliéno; i saré uribená, i saré cypitka rizy, i saró, so isyn kerdó buzniengire vylnátyr, i saré kaštune khoré (sasúdy) vyžužakiren.” I phendiá rašáj Jelizáro xaladenge, savé psirdé pe maribén: “Ĥáda, isyn Zakonoskiro uphenybén, savó priphendiá Raj Devél Mojzáske: Suvnakái, rup, xarkóma (mied'), sastýr, muslovi (volyvo) i molovi (svinco), i saró, so prodžála pir jag, prolydžan pir jag, sob (kaj) jov te vyžužakirelpe, a apríč davá žužakiribnaskire paniésa tumé san bangé (musinena) te vyžužakiren; saró, so na prodžála pir jag, prolydžan pir paní; i tumaré uribená vymoren pe eftáto dyvés, i vyžužakirenpe, i paló davá zadžán dro stáno.” I phendiá Raj Devél Mojzáske, rakirí: “Pirigin čordo doresybén, savó lyné dro pliéno, manušéstyr ke kherítko murdál, tu i rašáj Jelizáro [Jelieazaro-r.s.] i barydyrá skedyibnástyr; i roskeren čordo doresybén pe duj pašá maškír manušénde, savé mardépe, psirdé pe maribén, i maškír saró skedyibén; i xaladendyr, savé psirdé pe maribén, le dan' Ráske-Devléske, pir jekh di pandžešelendyr, manušéndyr i baré kheritkoné murdaléndyr (skotóstyr), i oslendyr i tykné kheritkoné murdaléndyr; le davá léngire pašatyr i otdé rašáske Jelizaroske dre svénto otdyibén ĥazdypnasa Ráske-Devléske; i Izrailjoskire čhavéngire pašatyr le pir jekhe manušéste (miéra) pandždeše manušéndyr, baré murdaléndyr, pir jekh šeró oslendyr i tykné kheritkoné murdaléndyr, i otdé davá Lieviténge, savé dynarinena pašýl Ráskire-Devléskiri šátra.” I kerdé Mójza i Jelizáro, rašái, syr priphendiá Raj Devél Mojzáske. I sys čordo doresybén, savó jaciápe doresybnastyr, so zakedyne manuše, savé sys pe maribén: tykné kherítka murdalá šovšelá eftadešá pandž tysjoncy, baré kherítka murdalá eftadešá duj tysjoncy, oslen šovdešá jekh tysjonco, manušén, džuvlién, savé na džindlé muršeskiro čhuibén, sarengire dijá sys trijánda duj tysjoncy. Paš bažyn manušéngiri, savé psirdé pe maribén, pir rozginyben sys: tykné kheritkoné murdalén trinšelá trijánda eftá tysjoncy pandžšelá, i dan' Ráske-Devléske tykné kheritkoné murdaléndyr sys šovšelá eftadešá pandž; baré kheritkoné murdalén trijánda šov tysjoncy, i léndyr dan' Ráske-Devléske eftadešá duj; oslen trijánda tysjoncy pandžšelá, i léndyr dan' Ráske-Devléske šovdešá jekh; manušén dešušov tysjoncy, i léndyr dan' Ráske-Devléske trijánda duj dijá. I otdyjá Mójza dan', svénto otdyibén Ĥazdypnasa Ráske-Devléske, rašáske Jelizaroske, syr priphendiá Raj Devél Mojzáske. I Izrailjoskire-čhavéngire pašatyr, savó roskerdiá Mójza manušéndyr, savé sys pe maribén; paš, saví sys pe skedyibnáskiri bažyn: tykné kherítka murdalá sys trinšelá trijandaefta tysjoncy pandžšelá, baré kherítka murdalá sys trijánda šov tysjoncy, oslen trijánda tysjoncy pandžšelá, manušén dešušov tysjoncy. Izrailjoskire-čhavéngire pašatyr Mójza lyjá jekh pandždeštona paš manušéndyr i kheritkoné murdaléndyr, i otdyjá davá Lieviténge, savé dynarinénas (služynénas) pašýl Ráskire-Devléskiri šátra, syr priphendiá Raj Devél Mojzáske. I javné ke Mójza tysjoncengire barydyrá pe xaladénde, tysjoncengire barydyrá i šelengire barydyrá, i phendlé Mojzáske: “Tyré pishárja pirigindle xaladén, savén aménge otdyné, i na gijá krig nijékh améndyr [léndyr–r.s]; i ĥáda, ame jandiam [ianasa-ju.o.] svénto dyibén Ráske-Devléske, kon so doresciá suvnakuné darendyr: zandirorja (lancužki), vastytka (kore), angrustiá, čenia i kulony te žužakiras dijá amaré angíl Raste-Devléste.” I lyné léndyr Mójza i rašáj Jelizáro suvnakáj dre saré dalé dróga priedmiety; i sys saró suvnakái, savó jandlé dre svénto dyibén ĥazdypnasa Ráske-Devléske, dešušov tysjoncy eftašelá pandždešá šékieli, tysjoncengire barydyrendyr i šelengire barydyrendyr. Haladé čorde, kažno (sváko) vaš péske. I lyné Mójza i rašáj Jelizáro suvnakáj tysjoncengire barydyrendyr i šelengire barydyrendyr, i jandlé les dre skedyibnáskiri šátra, dro ripiribén Izrailjoskire-čhavéngiro, angíl Raste-Devléste. Ruvimóskire i Gadóskire čhavénde stády sys drieván baré; i dykhné jone, so phuv Naziero (Jaziero) i Galaádo, i, ake, isyn štéto lačhó vaš stády kheritkoné murdalengire; i javné čhavé Gadóskire i Ruvimóskire, i phendlé Mojzáske i rašáske Jelizaroske i skedyibnaskire thagar'jenge: “Trusciál isyn štéty Atarofo i Divono, i Iaziero, i Nimra, i Jesievóno, i Jeliealo, i Sievamo, i Nievo, i Vieono, i daja phuv, saví Raj Devél xasiakirdiá angíl Izrailjoskiro skedyibén, isyn phuv lačhí vaš stády, a tyré pishar'jende isyn stády.” I phendlé: “Kóli ame lathiam láska dre tyré jakhá, to otdé daja phuv tyré dynar'jénge dro xulaiben; na lýdža amen pir Iordáno.” I phendiá Mójza Gadóskire i Ruvimóskire čhavénge: “Pšála tumaré džána pe maribén, a tumé jačénape adái? Vaš so tumé otriskirena iló Izrailjoskire čhavénde te piridžan pe phuv, saví déla lénge Raj Devél? Adiáke kerdé tumaré dadá, kiéli me bičhadjom len Kadies-Varnistyr te obdykhen phuv: jone doginé ke dólo Jesholo, i dykhné phuv, i otriskirde Izrailjoskire-čhavéngiro iló, sob (kaj) jone te na džán pe phuv, saví Raj Devél déla lénge; i zahačíia dre dová dyvés Ráskire-Devléskiri xolý, i sovlahadiá Jov dasavé lavénca: “Adalé manušá, savé vyginé Jegiptóstyr, bišé beršéndyr i phuredýr, na javéna te dykhén phuv, pal saví Me dyjom sovláh Avraamóske, Isaakóske i Jakovóske, pal-dová so jone na kandyné Man, apríč Xalievoste, Jefonijaskire čhavéste, Kieniezejaninoste, i Isusóste (Johošuaste), Navinoskire čhavéste, pal-dová so jone kandyné Ras-Devlés.” I zahačíia Ráskire-Devléskiri xolý pe Izrailjo, i lydžijá Jov len pir čhučí phuv štardešá berš, paka xasijá saró ródo, savó kerdiá fuipén dre Ráskire-Devléskire jakhá. I dykhén, zamiést tumaré dadende, ĥazdynépe tumé, griešnikengiro ródo, sob (kaj) te kerén butýr Ráskire-Devléskiri xolý pe Izrailjo. Kóli tumé otrisjona Léstyr, tedy Jov nevéstyr jačkiréla tumen pe čhučí phuv, i tumé xasiakirena saré adalé manušén.” I podginé jone ke jov, i phendlé: “Ame kerása adáj bakrane dvory (gražy) vaš amaré stády i fórja vaš amaré čhavénge; ame kokoré angledýr skedasape i džása pe maribén angíl Izrailjoskire čhavénde, paka len na janasa pe léngire štéty; a amaré čhavé mek te jačénpe dre fórja zoralé tynénca te rakhénpe adalé-phuvjákire manušéndyr; na risjovasa dre amaré kherá, paka zadžána Izrailjoskire čhavé kažno (sváko) pe phuv mekné mištypnástyr; pal-dová so ame na lása lénca phuv pir doiá Iordanoskiri rig i duredýr, kóli phuv dro meknó mištypén doiačelape aménge pir daja Iordanoskiri rig, ke vastóko.” I phendiá lénge Mójza: “Kóli tumé keréna davá, kóli kurtalenca džána pe maribén, angíl Raste-Devléste, i kažno (sváko) tuméndyr džála kurtalása pal Iordáno angíl Raste-Devléste, paka xasiakiréla Jov Péskire vergén angíl Péste, i zalyny javéla phuv angíl Raste-Devléste, to tedy korigedýr (pozžedýr) risjon i na javéna bangé angíl Raste-Devléste i angíl Izrailjo, i javéla daja phuv dro xulaiben angíl Raste-Devléste. Kóli tumé na keréna adiáke, tedy tumé keréna grého angíl Raste-Devléste, i džinén, so kára pal tumaró grého, savó lathéla tumen; kerén péske fórja vaš tumaré čhavénge i dvory (gražy) vaš tumaré bakrenge, i kerén, so phendlé tumaré uštá.” I phendlé Gadóskire i Ruvimóskire čhavé Mojzáske: “Pishárja tyré skerena, syr phendiá amaró raj; čhavé amaré, romniá amaré, stády amaré i saré amaré kherítka murdalá jačénape adáj dre Galaadóskire fórja, a pishárja tyré, saré skedynépe, syr xaladé, džána angíl Raste-Devléste pe maribén, syr rakiréla amaró raj.” I dyjá Mójza pal lénde priphenybén rašáske Jelizaroske i Isusóske (Johošuaske), Navinoskire čhavéske, i Izrailjoskire-čhavéngire barydyrénge pir ródycy, i phendiá lénge Mójza: “Kóli Gadóskire i Ruvimóskire čhavé piridžana tuménca pal Iordáno, saré, kon skedyjape pe maribén angíl Raste-Devléste, i phuv javéla tumarí: tedy otdén lénge Galaadoskiri phuv te xulainen; kóli jone na džána tuménca kurtalenca, to jone doreséna phuv khetané tuménca pe Xanaanóskiri phuv.” I phendlé Gadóskire i Ruvimóskire čhavé: “Syr phendiá Raj Devél tyré pishar'jénge, adiáke i kerása; ame džása kurtalenca angíl Raste-Devléste pe Xanaanóskiri phuv, a dre amaró xulaiben mekné mištypnástyr mek te javél pir daja Iordanoskiri rig.” I otdyjá Mójza lénge, Gadóskire i Ruvimóskire čhavénge, i pašake (pašeske) Manasijáskire rodycóske, Iosifóskire čhavéske, Sigonoskiro kralipén, Amoriejéngire kralís, i Ogoskiro kralipén, Vasanoskire kralís, phuv lákire for'jenca i štetenca pašýl lénde, – phuvjákire fórja pe saré rigá. I čhudé Gadóskire čhavé Divono i Atarofo, i Aroero, i Atarofo-Šofano, i Iaziero, i Iogbiego, i Bief-Nimra i Bief-Garano, fórja zoralé tynénca (zaborenca) i dvory (gražy) vaš bakrenge. I Ruvimóskire čhavé čhudé Jesievóno, Jeliealjo, Kiriafaimo, i Nievo, i Vaal-Mieono, savengire lavá parude, i Sivma, i dyné kharibena for'jenge, savé jone kerdé. I giné Mahiroskire čhavé, Manasijáskire čhavéskire, pe Galaádo, i lyné les, i vytradyné Amoriejen, savé sys dre léste; i otdyjá Mójza Galaádo Mahiroske, Manasijáskire čhavéske, i jov jaciá te dživél dre léste. I Iairo (Jairo), Manasijáskiro čhavó, gijá i lyjá léngire gavá, i khardiá len: Iairoskire foricy. I gijá Novaho, i lyjá Kienafo i fórja, savé sys tel léste, i khardiá les péskire lavésa: Novaho. Ĥáda, isyn Izrailjoskire-čhavéngire dromá [stany-r.s.], savénca giné jone Jegiptóskire phuvjátyr pir péskire otriády, tel barydyrende Mojzaste i Aaronoste. O Mójza, pir Ráskire-Devléskiro priphenybén, začhindiá léngire dromá, syr giné jone pir léngire dromá stanenca, i, ĥáda, isyn léngiro drom i, kaj jone sys terdé: Raamsesostyr giné jone dro pérvo čhon, pe dešupandžto dyvés pervoné čhonéskiro; pe javír dyvés, Patradí, vyginé Izrailjoskire čhavé tel vučó vast angíl saré Jegiptóskire jakhá; dre dová časo Jegiptiáni ĥaradé sarén anglatunen čhavorén, savén xasiakirdiá lénde Raj Devél, i pe léngire devlorende Raj Devél kerdiá séndo. I adiáke giné Izrailjoskire čhavé Raamsesostyr i terdiné stanósa (taborosa) dro Sokhofo. I giné Sokhofostyr, i terdiné stanósa dro Jefamo, so pe čhučé-phuvjákiro jagóro (krajo). I giné Jefamostyr, i riskirdé ke Pi-Gahirofo, so isyn angíl Vaal-Cefonomo, i terdiné stanósa angíl Migdolomo. Tén'ci giné jone Pi-Gahirofostyr, proginé maškirál mórjo (derjáv) pe čhučí phuv, i giné trin dyvesá dromésa čhučé phuvjákire Jefamosa, i terdiné stanósa dre Miéra [Mara-ju.o.]. I giné Mieratyr, i javné dro Jelimo; dro Jelimo sys dešudúj štéty ĥanyngenca, katýr džála paní i eftadešá finikitka drevy, i terdiné odój stanósa. I giné Jelimostyr, i terdiné stanósa pašýl Loló mórjo (derjáv). I giné jone Lolé morjostyr (derjavestyr), i terdiné stanósa pe čhučí phuv Sin. I giné čhučé phuvjátyr Sin, i terdiné stanósa dre Dofka. I giné jone Dofkatyr, i terdiné stanósa dro Alušo. I giné Alušostyr, i terdiné stanósa dro Riefidimo, i na sys odój paní, sob (kaj) te p'jen manušá. I giné Riefidimostyr, i terdiné stanósa pe čhučí phuv Sinajoskiri. I giné Sinajoskire čhučé phuvjátyr i terdiné stanósa dro Kibrot-Gataava. I giné Kibrot-Gataavatyr, i terdiné stanósa dro Asirofo. I giné Asirofostyr, i terdiné stanósa dre Rifma. I giné Rifmatyr, i terdiné stanósa dro Rimnon-Farieco. I giné Rimnon-Fariecostyr, i terdiné stanósa dre Livna. I giné Livnatyr i terdiné stanósa dre Risa. I giné Risatyr, i terdiné stanósa dro Kiegielafo. I giné Kiegielafostyr i terdiné stanósa pe bérga Šafier. I giné Šafierostyr i terdiné stanósa dre Xarada. I giné Xaradatyr i terdiné stanósa dro Makielofo. I giné Makielofostyr i terdiné stanósa dro Tahafo. I giné Tahafostyr i terdiné stanósa dro Taraho. I giné Tarahostyr i terdiné stanósa dre Mafka. I giné Mifkatyr i terdiné stanósa dre Xašmona. I giné Xašmonatyr i terdiné stanósa dro Masierofo. I giné Masierofostyr i terdiné stanósa dre Bienie-Jaakana. I giné Bienie-Jaakanatyr i terdiné stanósa dro Xor-Agidgado. I giné Xor-Agidgadostyr i terdiné stanósa dre Iotvafa. I giné Iotvafatyr i terdiné stanósa dro Avrono. I giné Avronostyr i terdiné stanósa dro Jecyon-Gaviero. I giné Jecion-Gavierostyr i terdiné stanósa pe čhučí phuv Sin, joj adiáke-pac' kharélape Kadieso. I giné Kadiesostyr i terdiné stanósa pe bérga Oro, pašýl Edomoskire-phuvjákiro jagóro (miéža). I gijá upré rašáj Aaróno pe bérga pir Ráskire-Devléskiro priphenybén, i myjá odój dro štardešytko berš paló davá, syr Izrailjoskire čhavé javné Jegiptóskire phuvjátyr, dro pándžto čhon, dro pérvo-čhonéskiro dyvés; Aaronóske sys šel te biš te trin berš, kiéli myjá jov pe bérga Or. Hanaanoskiro králi Arada, savó dživdiá ke paš-dyvés (jugo) Xanaanskone phuvjátyr, šundiá, so džána Izrailjoskire čhavé. I giné jone bergátyr Or i terdiné stanósa dre Salmona. I giné Salmonatyr i terdiné stanósa dro Punono. I giné Punonostyr i terdiné stanósa dro Ovofo. I giné Ovofostyr i terdiné stanósa dre Iie Avarimo [Iimo-r.s.], pe Moavoskiro jagóro (miéža). I giné Iimostyr i terdiné stanósa dro Divon-Gado. I giné Divon-Gadostyr i terdiné stanósa dro Almon-Divlafaimo. I giné Almon-Divlafaimostyr i terdiné stanósa pe Avarimoskire bérgi angíl Nievo. I giné Avarimoskire bergendyr i terdiné stanósa pe Moavitoskire loščyny (ravniny) pašýl Iordáno, proti Jerihóno; jone terdiné stanósa pašýl Iordáno Bief-Ješimofostyr ke Avie-Sitimo pe Moavitoskire loščyny. I phendiá Raj Devél Mojzáske pe Moavitoskire loščyny pašýl Iordáno, proti Jerihóno dasavé lavá: “Rákir Izrailjoskire čhavénge i phen lénge: ‘Kiéli piridžana tumé pir Iordáno pe Xanaanóskiri phuv, tedy tradén krig péstyr sarén adalé-phuvjákire manušén, i xasiakirén saré léngire vyčhindlé muiá, i xasiakirén saré léngire vyčhudé ídoly, i saré léngire vučipená rosphagiren. I len péske daja phuv, i dživén pe láte, pal-dová so Me dáva tuménge daja phuv; i rozden phuv pir žriébijo syr meknó mištypén tumaré kheritkoné rodénge: kóli baredýr, to ródo den butýr mištypnáskiri miéra, a tyknedýr ródo, to de tyknedýr mištypnáskiri miéra; konéske kaj vydžála, odój léske i javéla mištypnáskiri miéra; pir tumaré-dadéngiro ródo len péske mištypnáskiri miéra; kóli tumé na vytradena krig péstyr adalé-phuvjákire manušén, to tedy, savé jačénape léndyr manušá, javéna syr phusadé xrústy vaš tumaré jakhá i suv'jenca vaš tumaré pašvare i javéna te stasaven tumen pe phuv, pe saví tumé javéna te dživén, i tedy, so Me skedyjompe lénge te keráv, keráva tuménge.” I phendiá Raj Devél Mojzáske, rakirí: “De uphenybén Izrailjoskire čhavénge i phen lénge: ‘Kiéli tumé zadžána pe Xanaanóskiri phuv, tedy, ĥáda, isyn phuv, saví doiačelape tuménge syr meknó mištypén, Xanaanóskiri phuv lákire mieženca: paš-dyvesýtko (južno) rigakiro jagóro (miéža) javéla tuménde čhučé phuvjátyr Sin, pašýl Edómo, i džála tuménde paš-dyvesýtko miéža Londe-morjoskiro (derjavéskiro) jagoróstyr, i džála miéža pe paš-dyvés ke Akravimoskire vučipená i džála pir Sin, i javéna lákire vygiibena pe paš-dyvés ke Kadies-Varna, odothýr džála ke Gacar-Adaro i džála pir Acmono. Acmonostyr džála miéža ke Jegiptóskiro panitko thadypen, i javéna lákire vygiibena ke mórjo (derjáv); a zapadnone miežasa javéla tuménde baró mórjo (derjáv): davá javéla tuménde miéža ke zapado (pal-panitko rig); ke paš-rat javéla tuménde miéža: baré morjostyr (derjavestyr) prolydžan la ke bérga Or, bergátyr Or prolydžan miéža ke Jemafo, i javéna rigakire vygiibena ke Cedado; odothýr džála miéža ke Cyfrono, i lákire-miežakire vygiibena javéna ke Gacar-Enano: daja javéla tuménde paš-ratítko miéža; vastočno miéža prolydžan péske Gacar-Enanostyr ke Šefamo, Šefamostyr džála miéža ke Riblo, Ainoskire-vastočnone rigátyr, paló davá džála miéža i kasynelape morjoskire (derjavéskire) bregi vastočnone rigátyr Kinieriefoskire; i džála miéža ke Iordáno, i javéna vygiibena lákire ke Londo mórjo (derjáv). Daja phuv javéla tumarí pir lákire miéžy saré rigéndyr. I dyjá priphenybén Mójza Izrailjoskire čhavénge, i phendiá: “Ĥáda, isyn phuv, saví tumé rozdena syr meknó mištypén pir žriébijo pir miéra, pal saví dyjá lav Raj Devél te del jeniá (bijekhéskiro deš) rodycenge i pašé rodycóske; pal-dová so Ruvimóskire-čhavéngiro ródyco pir léngire čékarja (siemieistvy), i Gadóskire-čhavéngiro ródyco pir léngire čékarja (siemieistvy), i Manasijaskiri paš ródyco, doresné péskiri miéra mekné mištypnástyr; duj ródycy i paš ródyco doresné péskiri miéra mekné mištypnástyr pal Iordáno proti Jerihóno ke vastóko. I phendiá Raj Devél Mojzáske dasavé lavá: “Ĥáda, isyn muršengire lavá, savé javéna te rozden tuménge phuv: rašáj Jelizáro (Jelieazaro) i Isúso (Johošuá), Navinoskiro čhavó; i len pir jekhe thagariste (kniazjoste) rodycóstyr vaš phuvjákiro rozdyiben. I ĥáda, isyn dalé muršengire (thagar'jengire) lavá: vaš ródyco Judáskiro o Xalievo, Jefonijaskiro čhavó; vaš Simieonoskire-čhavéngiro ródyco o Samuílo, Amiudoskiro čhavó; vaš Vieniaminoskiro ródyco o Jelidado, Kislonoskiro čhavó; vaš Danóskire-čhavéngiro ródyco thagári o Buki, Jeglijoskiro čhavó; vaš Iosifóskire čhavénge, vaš Manasijáskire-čhavéngiro ródyco o thagári Xaniilo, Jefodoskiro čhavó; vaš Jefriemóskire-čhavéngiro ródyco thagári o Kiemuilo, Šiftanoskiro čhavó; vaš Zavulonoskire-čhavéngiro ródyco thagári o Jelicafano, Farnakoskiro čhavó; vaš Isaharoskire-čhavéngiro ródyco thagári o Faltiilo, Azanoskiro čhavó; vaš Asiroskire-čhavéngiro ródyco thagári o Ahiudo, Šielomijaskiro čhavó; vaš Niefalimoskire-čhavéngiro ródyco thagári o Piedailo, Amiudoskiro čhavó.” Ake, isyn odolé, savénge priphendiá Raj Devél te rozden phuvjákiri miéra mekné mištypnástyr Izrailjoskire čhavénge pe Xanaanóskiri phuv. I phendiá Raj Devél Mojzáske pe Moavitoskire loščyny (ravniny) pašýl Iordáno proti Jerihóno, rakirí: “Priphen Izrailjoskire čhavénge, sob (kaj) jone péskire mištypnaskire mieratyr te den Lieviténge fórja, sob (kaj) jone odój te dživén, i féldy pašýl fórja saré rigéndyr te den Lieviténge: fórja lénge javéna vaš džiibén, i féldy javéna vaš léngire kheritkoné murdalénge (vaš skoto), i vaš léngiro majonko, i vaš saró, so lénge trej vaš džiibén; féldy pašýl fórja, savé tumé san bangé te den Lieviténge, foróskire vantatyr bangé te javén pe duj tysjoncy kuniá, dre saré rigá; i otmierinen paló fóro ke vastokoskiri rig duj tysjoncy kuniá, i ke paš-dyvesýtko (južno) rig duj tysjoncy kuniá, i ke zapado duj tysjoncy kuniá, i ke paš-ratítko (sievierno) rig duj tysjoncy kuniá, a maškirál te javél fóro: dasavé javéna lénde féldy pašýl fórja. For'jéndyr, savé tumé déna Lieviténge, javéna šov fórja vaš zrakhibén, dre savé tumé déna saštypen (šanso) te našél zamaribnariske; i butýr léndyr den štardešá duj fórja: saré fórja, savé tumé bangé te den Lieviténge, javéla štardešá ohtó fórja, feldenca, savé javéna pašeyl lénde. I kiéli javéna te den fórja Izrailjoskire čhavéngire mištypnaskire mieratyr, tedy barestyr den butýr, tyknestyr tyknedýr; kažno ródyco, dykhí pir mištypnáskiri miéra, saví doreséna, isyn bangé (musinena) te den fórja péskire for'jéndyr Lieviténge.” I phendiá Raj Devél Mojzáske dasavé lavá: “De te džinén Izrailjoskire čhavénge i phen lénge: ‘Kiéli tumé piridžana pir Iordáno pe Xanaanóskiri phuv, vykeden péske fórja, savé javéna tuménde for'jenca vaš zrakhibén, karik moginéla te našél zamaribnari, savó muliakirdiá manušés nakami; i javéna lénde [tuménde-r.s.] dalé fórja vaš zrakhibén manušénge, savé tuménde kamenas te othan pale (te otomstinen), sob (kaj) te na javél zamaribnari-manúš, savó muliakirdiá, angledýr, syr jov javéla angíl manušénde pe séndo. Fórja, savé tuménge trej te den, fórja vaš zrakhibén, isyn bangé te javél tuménde šov: trin fórja den pir daja Iordanoskiri rig i trin fórja den pe Xanaanóskiri phuv; znašybnaskire for'jenca vaš našaiben bangé te javén jone; vaš Izrailjoskire čhavénge, i vaš manušéske, savó javdiá javire rigátyr, i vaš manušéske, savó dživéla maškír tuménde, javéna dalé šov fórja vaš zrakhibén, sob (kaj) te našél odorík kažno (sváko) manúš, savó zamardiá (muliakirdiá) manušés nakami. Kóli kon pekavela vari-konés sastruné strumientosa, adiáke, so odová manúš meréla, – tedy jov isyn zamaribnari: les isyn bangé (musinena) te otdén pe meribén; i kóli vari-kon pekavela javirés baresa dro vast, sóstyr saštý te meres adiáke, so odová manúš meréla, – tedy jov isyn zamaribnari: les bangé te otdén pe meribén; cji, kóli vari-kon kaštune strumientosa pekavela javirés, savéstyr saštý te meres, i pekavela vastésa adiáke, so odová manúš meréla, – tedy jov isyn zamaribnari: les bangé te otdén pe meribén; manúš, savó kaméla te othal pale pal rat, kokoró saštý (moginéla) te muliakirél zamaribnaris: syr les féni (tóka) pirilela, kokoró saštý (moginéla) te muliakirél les; kóli vari-kon pihninela (špulela) vari-konés pir xolý, ci kami čhurdéla pe léste vari-so adiáke, so odová manúš meréla, ci dro košybén pekavela les vastésa adiáke, so odová manúš meréla: tedy odolés manušés, savó pekadiá, manušá isyn bangé (musinena) te otdén pe meribén, – jov isyn zamaribnari; manúš, savó othala pale pal rat saštý (moginéla) te muliakirél zamaribnaris, syr les pirilela. Kóli jov pihninela (špulela) les nakami, bi košybnaskiro, ci čhurdéla pe léste vari-so, nakami, ci vari-savó bar, savéstyr saštý te meres, nadykhi čhurdéla pe léste adiáke, so odová meréla, ne jov na sys léskire vergosa i na kamdiá léske fuipén, to tedy manušéngiro skedyibén isyn bangó (musinela) te kerél séndo maškír zamaribnariste i manušéste, savó kaméla te othal pale pal rat pir saró uphenybén. I manušéngire skedyibnaske trej te zrakhél zamaribnaris manušytkoné vastéstyr, savó kaméla te othal pale pal rat, i skedyibén isyn bangó les te riskirél dro léskiro fóro, kaj jov sys dro našyben, karik jov nastiá, sob (kaj) jov odój te dživél ke baré-rašaskiro meribén, savó sys makhno sventoné jeliejosa; kóli manúš, savó zamardiá, vydžála pal fóro, dre savó jov sys dro našyben, dro savó jov nastiá, i lathéla les manúš, savó kaméla te othal pale pal rat na dro léskiro fóro, kaj jov sys dro našyben, i muliakiréla adales manušés, kon zamardiá kodolé zamaribnaris, tedy na javéla pe léste bang pal rateskiro pročhuiben, pal-dová so odová sys bangó (léske treindiá) te dživél dro péskiro fóro, kaj jov sys dro našyben ke baré-rašaskiro meribén, a kiéli meréla baró rašái, to manúš, savó zamardiá, sys bangó te risjol pe péskiri phuv. Mek davá mek te javél tuménde čhudé zakonosa (statutosa) dre tumaré ródy, dre saré tumaré kherá. Kóli vari-kon zamarela manušés, tedy odolé manušés, isyn bangé te zamares pir manušéngire lavá, savé dykhné; ne jekhe jakhitkones (svidietieljos) nauhtylla (nadósi), sob (kaj) te sendiakiren les pe meribén. I na len vykinybén pal zamaribnaskiro di, savó isyn bangó te merél, ne les trej te otdes meribnáske; i na len vykinybén pal manušéste, savó nastiá dro zrakhibnaskiro fóro, sob (kaj) léske te des saštypen te dživél pe péskiri phuv angledýr, syr meréla baró rašái. Na magirén phuv, pe saví tumé javéna te dživén; pal-dová so rat magirela phuv, i phuv na žužakirelape pe javír (javirčanes) ratestyr, savó sys pročhudo pe láte, syr ratésa, savó pročhudia les. Tumé naštý te magirén phuv, pe saví tumé dživéna, maškír saví som Me: pal-dová so Me Raj Devél dživáva maškír Izrailjoskire čhavénde.’” Javné phurydyrá dadengíre Galaadóskire-čhavéngire kheritkoné rodóstyr, Mahiroskire čhavéskire, Manasijáskire-čhavéskire Iosifóskire čhavéngire rodycóstyr, i rakirdé angíl Mojzaste i angíl thagar'jende, Izrailjoskire-čhavéngire barydyrende pe stréčy (pokolienii), i phendlé: “O Raj Devél priphendiá amaré ráske te des phuv dre mekné-mištypnáskiri miéra Izrailjoskire čhavénge pir žriébijo i amaré ráske phendló Rástyr-Devléstyr te des mištypnáskiri miéra Salpaadoskiri, amaré pšaleskiri, léskire čhajenge; kóli jone javéna čhavéngire džuvliénca vari-savé javire Izrailjoskire čhavéngire-rodycóstyr, tedy léngire-mištypnáskiri miéra otlelape amaré dadengíre-mištypnaskire mieratyr i pričhuvelape dolé rodycóske mištypnáskiri miéra, dre saví jone javéna, i otlelape doléstyr, so doiaciape pir žriébijo amaré mištypnaskire mieratyr. I kiéli javéla Izrailjoskire-čhavénde svénko, tedy léngiri mištypnáskiri miéra pričhuvelape ke dolé-rodycoskiri mištypnáskiri miéra, dre saví jone javéna, i mištypnáskiri miéra amaré-dadengíre rodycóstyr otlelape léngiri mištypnáskiri miéra.” I dyjá Mójza priphenybén Izrailjoskire čhavénge, pir Ráskire-Devléskiro lav, i phendiá: “Čačipén rakiréla Iosifóskire-(Jozaskiro) čhavéngiro ródyco. Ĥáda, so rakiréla Raj Devél pal Salpaadoskire čhajende: jone saštý (moginéna) te javén dolengire džuvliénca, kon isyn pir iló léngire jakhenge, jekh (féni) so jone isyn bangé te javén džuvliénca pir ródyco dre péskire dadéskire kherítko ródo (pliemjo), sob (kaj) čhavé Izrailjoskire te prilén meknó mištypén, kažno péskire dadendyr, sob (kaj) Izrailjoskire-čhavengiri mištypnáskiri miéra mekné mištypnástyr te na piridžal rodycóstyr dro ródyco; pal-dová so kažno (sváko) Izrailjoskire čhavéndyr isyn bangó te javél priphandlo ke péskire-dadengíre rodycoskiri miéra (phuv) mekné mištypnástyr. I kažno čhaj, savjake trej mištypnáskiri miéra dre Izrailjoskire-čhavéngiro ródyco, isyn bangi te javél džuvliása vari-koneskires péskire dadéskire rodycóstyr pir kherítko ródo, sob (kaj) čhavé Izrailjoskire te prilel meknó mištypén pir kažno (sváko) miéra, i, sob (kaj) te na piridžal mištypnáskiri miéra rodycóstyr dre javír ródyco; pal-dová so kažno Izrailjoskire čhavéngire rodycóstyr isyn bangó te javél priphandlo ke péskiri mištypnáskiri miéra.” Syr priphendiá Raj Devél Mojzáske, adiáke i kerdé Salpaadoskire čhaja. I vyginé Salpaadoskire čhaja Mahla, Firca, Xogla, Milka i Noa paloróm pal léngire-kakengire čhavénde. Jone sys džuvliá pir kherítko ródo Manasijáskire-čhavéngiro, Iosifóskire čhavéskire, i jaciápe léngiri mištypnáskiri miéra dre léngire-dadéskire rodycoskiro kherítko ródo. Davá isyn priphenybená i uphenybená, savé dyjá Raj Devél Izrailjoskire čhavénge pir Mojzaste pe Moavitoskire loščyny (ravniny), pašýl Iordáno, proti Jerihóno. Dalé isyn lavá, savé rakirdiá Mójza (Moisiejo) saré manušénge Izrailjostyr [Izrail'tianenge-r.s.] pal Iordáno pe čhučí phuv pe loščýna proti Sufo, maškír Farano i Tofielo, i Laváno, i Asirofo i Dizagavo, davá isyn drom pe dešujekh dyvesá te džas pezal Xorivostyr, pir drom bergátyr Sieir ke Kadies-Varni. Davá sys dro štardešytko berš, dešujekhe – čhonéskiro, pe pérvo čhonéskiro dyvés, syr rakirdiá Mójza Izrailjoskire čhavénge saró, so priphendiá léske Raj Devél pal lénde. Paló (poslie) dová, syr jov zamardiá (umardia) Sigonos, Amoriejéngire kralís, savó dživdiá ke Jesievóno, i Ogos, Vasanoskire kralís, savó dživdiá ke Ašterofa dre Jedreja, pal Iordáno, pe Moavitoskiri phuv, lyjá Mójza te rakirél angíl sarénde pal davá Zakóno, i phendiá: “O Rajo Dévla (Jahvá), Devél amaró, rakirdiá aménge dro Xorivo i phendiá: ‘Uhtýlla (dósi) tuménge te dživén pe daja bérga! Skedénpe, džán dro drom, i džán pe Amoriejengiri bérga i ke saré léngire manušá, savé dživéna pašýl, pe loščýna, pe bérga, pe tyliakirde štéty i pe paš-dyvesýtko (južno) rig, i ke bregi morjoskire (derjavéskire), pe Xanaanóskiri phuv i ke Liváno, adiáke-pac' ke bari reka (len') Jevfrato. Ĥáda, Me dáva tuménge daja phuv, džán, len dro majonko phuv, saví sovlahasa Raj Devél dyjá lav te del tumaré dadénge Avraamóske, Isaakóske i Jakovóske, lénge i léngire rodóske. I me phendjom tuménge dro dová časo (cýro): ‘Me naštý (na mogináva) jekhdžinó te lydžav tumen; Raj Devél, amaró, sozdyjá but tumen, i ĥáda, tumé akaná san adákicy but, syr bolybnáskire čergeniá; Raj Devél, Devél, tumaré-dadéngiro, mek te sozdel tumen butedýr dro tysjonco móly proti davá, ci but tumen akaná, i mek te bahtiakirél tumen, syr Jov rakirdiá tuménge: syr mánge jekhdžineske te lydžav tumaró pharipén, košybén tumaró i čingárd tumarí? Vykeden péske pir tumaró ródyco (čang) muršén mendronen, god'varen, i propatiakirden, i me čhuváva len tumaré barydyrénca.’ Tumé otphendlé mánge i phendlé: ‘Lačhó réndo (diélo) tu rakirésa te kerás.’ I lyjom me šeralen tumaré rodycendyr (čangendyr), muršén mendronen i propatiakirden, i čhudjom len barydyrénca pe tuménde, tysjoncengire barydyrénca, šelengire barydyrénca, pandždešengire barydyrénca, dešengire barydyrénca i dykhibnaskirenca pir tumaró ródyco. I dyjom me uphenybén tumaré sendar'jenge dro dová časo, phení: ‘Vyšunen tumaré pšalén i sendinén čačunés len, syr pšalés pšalesa, adiáke i léskire manušés, savó javdiá javire rigátyr; na dykhén pe muj pe séndo, syr tyknes, adiáke i bares vyšunen, na darén manušéskire móstyr: pal-dová so séndo – réndo (diélo) Devléskiro. A réndo, savó vaš tuménge isyn pharó, lydžán les ke me, i me vyšunava les.’ I dyjom me uphenybén tuménge dro dová časo pal saró, so trej tuménge te kerén. I gijam ame Xorivostyr, i gijam pir sarí daja bari i darany čhučí phuv, saví tumé dykhné, pir drom ke Amoriejengiri bérga, syr phendiá Raj Devél, amaró Devél, i javdiám dre Kadies-Varni. I phendjom me tuménge: ‘Tumé javné ke Amoriejengiri bérga, saví Raj Devél amaró Devél déla aménge; ĥáda, isyn Raj Devél, tyró Devél déla túke daja phuv, džá, le la dro xulaiben, syr rakirdiá túke Raj Devél tyré-dadéngiro, na dar i na strahadjov.’ Ne tumé saré javné pašyledýr ke me, i phendlé: ‘Ame bičhavasa angíl péste manušén, sob (kaj) jone aménge te rozĥaljon phuv, i te janén aménge džinybén pal drom, pir savó te džas aménge, i pal fórja, dre savé te džas aménge.’ Davá lav mánge sys pir iló, i me lyjom tuméndyr dešudujen manušén, pe jekhe manušéste kažnoné rodycóstyr. Jone giné, giné upré pe bérga, i doginé ke dólo Jeshol, i obdykhne la. I lyné jone dre péskire vastá phuvjákire barjakirdé (plódy), i jandlé aménge i jandlé aménge nevipen, i phendlé: ‘Lačhí isyn phuv, saví, Raj Devél, amaró Devél déla aménge.’ Ne tumé na zakamle te džán i na kandyné Ráskire-Devléskiro, amaré Devléskiro uphenybén, i tangindlepe (žalindlepe) xoliása dre tumaré šátry, i rakirdé: “O Raj Devél, pir xolý ke ame, vylydžijá amen Jegiptóskire phuvjátyr, sob (kaj) te otdél amen dre Amoriejéngire vastá i te xasiakirél amen; karik ame džása? Amaré pšála bizorjakirde amaró iló, phení: ‘Manušá odolé isyn butýr i vučedýr améndyr, fórja odój isyn baré i zoralé tynénca ke bolybén, i Jenakoskire čhavén dykhciam ame odój.’ I me phendjom tuménge te na darén i na strahadjon léndyr; O Raj Devél, tumaró Devél džála angíl tuménde, Jov javéla te zaterdjol pal tuménde, syr Jov kerdiá tuménca dre Jegípto, angíl tumaré jakhá, i pe daja čhučí phuv, odój, kaj, syr tu dykhcián, Raj Devél, tyró Devél lydžijá tut, syr manúš lydžála péskire čhavés, pir saró drom, savésa tumé giné, angíl dová, kiéli tumé javné pe davá štéto. Ne i usajékh tumé na patiandyné Ráske-Devléske, tumaré Devléske. Savó gijá angíl tuménde dromésa – te rodél tuménge štéto, te terdjon tuménge, ratý dre jag, sob (kaj) te sykavél tuménge drom, pir savó te džas, a dyvesé dro óbloko. I Raj Devél šundiá tumaré lavá, i xoliásyja, i sovlahadiá, i phendiá: “Nikón adalé manušéndyr, dalé-xolynakire rodóstyr, na javéla te dykhél lačhí phuv, saví Me sovlahadjom te dav tumaré dadénge; iekh o Xalievo, Iiefonijaskiro čhavó [Efuneskiro-ju.o.], udykhéla la; léske Me dáva phuv, pir saví jov gijá, i léskire čhavénge, pal dová, so jov kandyjá Ras-Devlés. I pe mánde xoliásyja Raj Devél pal tuménde, i phendiá: ‘I tu na zadžasa odorík: o Isúso (Johošuá), Navinoskiro čhavó, savó isyn pašýl túte, jov zadžála odorík; ker les zoraledýr, pal-dová so jov zalydžala Izrailjo pe léskiri phuv, a čhavé tumaré, pal savénde tumé rakirdé, so jone doiačenape vergénge, i tumaré čhavé, savé na džinéna akaná ni lačhipén, ni čoripén, jone zadžána odorík, lénge Me dáva la, i jone javéna xulaja láke; a tumé te risjon i džán pe čhučí phuv pir drom ke Loló mórjo (derjáv).’ I tumé otphendlé tedy i phendlé mánge: ‘Ame kerdiám grého angíl Raste-Devléste, džása i marasape, syr priphendiá aménge Raj Devél, amaró Devél.’ I piriphandlepe tumé kažno péskire maribnytkoné mardytkonesa (oružyjosa), i naduminy, skedynépe te džán upré pe bérga. Ne Raj Devél phendiá mánge: “Phen lénge: ‘Na džán upré i na marénpe, pal-dová so nane Man maškír tuménde, sob (kaj) te na zamarén tumen tumaré vérgi (vrogi).’” I me tuménge rakirdjom, ne tumé na kandyné i giné proti Ráskire-Devléskiro lav, i pir péskiro iló giné upré pe bérga. I vygijá proti tuménde o Amoriejo, savó dživdiá pe doiá bérga, i tradyne tumen adiáke, syr keréna byrlinia (pčoly), i domardé tumen pe Sieiro ke Xorma. I risiné tumé, i rondlé angíl Raste-Devléste: ne Raj Devél na šundiá tumarí gódla i na pomogindia tuménge. I jačenaspe tumé dro Kadieso adákicy but časo, ci but časo tumé sánas odój. I risijam ame i gijam pe čhučí (pusto) phuv ke Loló mórjo (derjáv), syr rakirdiá mánge Raj Devél, i but časo psirdiam pašýl bérga Sieiro. I phendiá mánge Raj Devél, rakirí: “Uhtýlla (dósi) tuménge te psirén pašýl daja bérga, risjon ke paš-rat (sieviero); i de manušénge uphenybén, i phen: ‘Tumé javéna te džán pir tumaré-pšalengire phuvjá, Isavóskire čhavéngire, savé dživéna ke Sieiro, i jone zadarena (strahadjona) tuméndyr; ne rakhénpe, sob (kaj) jone, te na zalydžan tuménca maribén, pal-dová so Me na davá tuménge léngiri phuv ni pe ĥerjakiro šago (lamny), pal-dová so bérga Sieiro Me dyjom Isavoske; kinen léndyr xabén pal rup, i xan; i kinen paní léndyr pal rup, i p'jen; pal-dová so Raj Devél, tyró Devél bahtiakirdiá tut dre kažno tyré-vastengiro réndo, rakhciá tut [dykhciá pal túte-r.s.] dro časo, kiéli tu psirdian pir bari daja čhučí phuv; ĥáda, štardešá berš Raj Devél, tyró Devél isyn túsa; túte saró sys.’” I gijam ame mamúj amaré pšalénde, Isavóskire čhavénde, savé dživdé pe Sieiro, loščynakire (ravninakire) dromésa, Jelafostyr i Jecyon-Gavierostyr, i riskirdé i giné pe čhučí phuv Moavoskiri. I phendiá mánge Raj Devél: “Na zadžá dro košybén Moavosa i na zalydža lésa maribén; pal-dová so Me na davá túke ničí léskire phuvjátyr, pal-dová so Aro Me otdyjom Lotoskire čhavénge”; Angledýr odój dživdé Emimy, baré manušá, but i vučé, syr Jenakoskire čhavé, i jone gindlepe maškír Riefaimende, syr Jenakoskire čhavé; e Moavitiani kharéna len Emimy [Emiei-ju.o.]; a pe Sieiro dživdé angledýr Xoriei; ne Isavóskire čhavé tradyne krig len, i xasiakirdé len péskire móstyr, i lyné te dživén zamiést lénde, – adiáke, syr kerdiá Izrailjo péskire phuvjása, saví dyjá lénge o Raj Devél; i adiáke, uštén i prodžan loščýna [sýgno rékica (lenorí) -ju.o.] Zariedo.” I progijam ame loščýna Zariedo. Dolé časostyr, syr ame gijam dre Kadies-Varni i syr gijam duredýr pir loščýna Zariedo, progijá trijánda ohtó (bidujéngiro deš) berš, i aménde pirilydžijape stanostyr saró manušéngiro ródo, savé psirdé pe maribén, syr sovlahadiá lénge Raj Devél; I Devléskiro vast sys pe lénde, sob (kaj) te vymuliakires len stanostyr, paka jone vymyne. I sys adiáke: pirilydžinepe saré manušá, savé psirdé pe maribén, i savé vymyne adalé manušéndyr, tedy phendiá mánge Raj Devél dasavé lavá: “Tu akaná džása pašýl Moavoskiri rig, pašýl fóro Aro, i syr tu javésa pašýl ke Amonitiani: na zadžá lénca dro košybén, i na zalydža lénca maribén, pal-dová so Me na davá túke ničý Amonoskire-čhavéngire phuvjátyr, pal-dová so Me otdyjom la Lotoskire čhavénge.” i joj gindiape Riefaimengire phuvjása; vagedyr (ĥaredyr) dživdé pe láte Riefaimy, Amonitiani kharéna len Zamzumimy; jone sys manušá baré, but i vučé, syr Jenakoskire čhavé, i tradyjá krig len Raj Devél angíl léngiro muj, i vytradyné jone len, i jačné te dživén jone pe léngiro štéto, syr Jov kerdiá vaš Isavóskire čhavénge, savé dživdé pe Sieiro, protradyi angíl léngiro muj Xoriejen, i jone vytradyné len, i jačné te dživén pe léngiro štéto, i dživéna ke adadyvés; Kaftorimy, savé vyginé Kaftorostyr, muliakirdé i Aviejen, savé dživdé dre gavá ke Gaza, i jačné te dživén pe léngiro štéto. Uštén, džán i piridžan sýgno rékica (lenorí) Arnono, ĥáda, Me piridava dro tyró vast Sigonos, Jesievonoskire kralís, Amorejaninos, i léskiri phuv; tu lepe te xulaines lása, i lýdža lésa maribén; dalé dyveséstyr Me láva te rozmekav dar i traš angíl túte pe manušénde tel saró bolybén; odolé, savé šunéna pal túte, zatrinskirenape i strahadjona tútyr.” I bičhadjom me manušén čhučé phuvjátyr Kiediemofo ke Sigono, Jesievonoskiro králi, lačhé lavénca, sob (kaj) te phenén: “Mek man te džav duredýr pir tyrí phuv; me džáva dromésa, Me na džáva dre rig ni pe čačó (pe pravo), ni pe zérvo (pe liévo); habén bikin mánge pal rup, i me javáva te xav, i paní te pjáv de mánge pal rup, i me javáva te pjáv, jekhe ĥerénca mirenca džáva duredýr, adiáke, syr kerdé mánge Isavóskire čhavé, savé dživéna ke Sieiro i Moavitiani, savé dživéna ke Aro, paka Me piridžava pir Iordáno pe phuv, saví Raj Devél, amaró Devél, déla aménge.” Ne o Sigono, Jesievonoskiro králi na zakamdiá te mekel amen te džas duredýr pir léskiri phuv, pal-dová so Raj Devél, tyró Devél, kerdiá nálačho léskiro dúho (fáno), i léskiro iló kerdiápe pharesa, sob (kaj) te piridel les dro tyró vast, syr davá akaná bicialó. I phendiá mánge Raj Devél: “Ĥáda, Me láva te otdav túke Sigonos i léskiri phuv; jav lákire xulása.” I Sigono saré péskire manušénca vygijá proti aménde pe maribén ke Jaaca; i otdyjá les Raj Devél, Devél amaró, dre amaré vastá, i ame domardiam les i léskire čhavén i saré léskire manušén, i lyné dre dová časo saré léskire fórja, i otdyné prokošybnaske saré fórja, muršén i džuvlién i čhavorén, na jačkirdé nikonés džiden; iekh lyjam ame péske dro doresybén (dobyča) léngire kheritkoné murdalén (skoto) i mištypén for'jéndyr, savé ame zauhtyldiam. Aroirostyr, savó isyn pe brégo Arnonoskiro, sygnone rekicakiro (lenorjakiro), i foróstyr, savó isyn pe loščýna [sýgno rékica (lenorí) -ju.o.], až ke/žýko Galaádo na sys fóro, savó sys by vaš aménge na pir zor: saró otdyjá Raj Devél, Devél amaró dre amaré vastá. Jekh ke Amonitianengiri phuv tu na gíian, ni ke štéty pašýl Javokoskiri sýgno rékica (lenorí), ni ke fórja pe bérga, ni ke saró, so na priphendiá aménge Raj Devél, Devél amaró. I risijam ame odothýr, i gijam ke Vasáno, i vygijá proti aménde pe maribén Ogo, o Vasanoskiro králi, saré péskire manušénca, pašýl Jedreja. I phendiá mánge Raj Devél: “Na dar léstyr, pal-dová so Me otdáva les dro tyró vast, i sarén léskire manušén, i sarí léskiri phuv, i tu kerésa lésa adiáke, syr tu kerdián Sigonosa [Sihonosa-ju.o.], Amoriejéngire kralísa, savó dživdiá ke Jesievóno.” I otdyjá Raj Devél, Devél amaró, dre amaré vastá i Ogos, Vasanoskire kralís, i sarén léskire manušén; i ame domardiam les adiáke, so nikón na jaciápe léste džidó; i lyjam ame dre dová časo saré léskire fórja, na sys fóro, savó ame te na las léndyr; šovdešá fórja, sarí Argovoskiri okruga, Vasanoskire-Ogoskiro kralipnastyr. Saré dalé fórja, sys kerdé zoralé tynénca, vučé vantenca, vudarenca, i zaučhakiribnenca, apríč fórja, savé na sys oblydžine zoralé tynénca, sys drieván but. I otdyjam ame len prokošybnaske, syr kerdiám Sigonosa, Jesievonoskire kralísa, otdyjam prokošybnaske kažno fóro muršenca, džuvliénca i čhavorenca; ne saré kheritkoné murdalén (skoto) i saró zakedyno dre fórja lyjam ame péske dro doresybén (dobyča). I lyjam ame dre dová časo duje Amoriejéngire-kral'jengire vastéstyr daja phuv, saví sys pir daja Iordanoskiri rig, Arnonoskire sygnone rekátyr (leniátyr) ke bérga Jermono, – Sidoniani Jermono kharéna Siriono, a Amoriei kharéna les Sieniro, – saré fórja pe loščýna, saró Galaádo i saró Vasáno ke Salha i Jedreja, Vasanoskire-Ogoskire kralipnaskire fórja; iekh Ogo, o Vasanoskiro králi, jaciápe Riefaimendyr. Ĥáda, léskiro čhuibén (odro), čhuibén sastruno, i akaná isyn dre Rava, Amonoskire čhavénde: dlengipén léskiro isyn jeniá (bijekhéskiro deš) kuniá (logci), a léskiro buĥlypén isyn štar kuniá, muršengire kuniá. Phuv daja ame lyjam dre dová časo, lyjam Aroierostyr, savó isyn pašýl Arnonoskiri sýgno rékica (lenorí); i pašýl bérga Galaadoskiri lákire for'jenca otdyjom me Ruvimóskire i Gadóskire rodycóske; a so jaciápe Galaadostyr i saró Vasáno, Ogoskiro kralipén, otdyjom me paš phuv Manasijáskire rodycóske, sarí okruga Argovoskiri saré Vasanosa. Iairo (Jairo), o Manasijáskiro čhavó, lyjá sarí Argengiri okruga ke Giesuroskire i Maahakire miéžy, i jov khardiá la Vasáno, pir péskiro lav, Jairoskire ĥavenca, so ke dalé dyvesá; I me dyjom Galaádo Mahiroske. I Ruvimóskire i Gadóskire rodycóske dyjom me phuv Galaadostyr ke Arnonoskiri sýgno rékica (lenorí), phuv maškirál sýgno rékica (lenorí) i miéža, ke sýgno rékica (lenorí) Iavokoskiri, Amonoskire-čhavéngire miéža, adiáke-pac' loščýna i Iordáno, savó i isyn miéža Kinieriefostyr ke loščýna morjoskiri, Londe-morjoskiri, pašýl Fasgakire-bergákiro sklono ke vastóko. I dyjom me tuménge dro dová časo uphenybén, rakirí: “Raj Devél, Devél tumaró, dyjá tuménge daja phuv; saré, kon moginéla te džal pe maribén, len maribnýtko (oružyjo), džán angíl tumaré pšalénde, Izrailjoskire čhavénde; iekh tumaré romniá i tumaré čhavé i tumaré kherítka murdalá (skoto) tumaré, mek te jačénpe dre tumaré fórja, savé me dyjom tuménge, paka Raj Devél déla ramánjo (miro) tumaré pšalénge, syr tuménge, i paka i jone doreséna dro xulaiben phuv, saví Raj Devél, Devél tumaró, déla lénge pal Iordáno; tedy risjon kažno dro péskiro xulaiben, savó me dyjom tuménge.” I Isusóske (Johošuaske) rakirdjom me dro dolé dyvesá: “Tyré jakhá dykhné saró, so kerdiá Raj Devél, Devél tumaró, duje dalé kral'jenca; dová-pac' keréla Raj Devél saré kralipnenca, savé tu javésa te prodžas; na darén léndyr, pal-dová so Raj Devél, Devél tumaró, Kokoró marelape pal tuménde.” I mangdjompe me Ráske-Devléske dre dolé dyvesá dasavé lavénca: “Baró Rajo, Rajo Dévla, Tu lyjan te sykaves Tyré pisharíske sláva Tyrí i zoraló vast Tyró; pal-dová so, savó devel isyn pe bolybén, ci pe phuv, savó mogindiá by te kerél dasavé réndy, syr Tyré, i zorjása dasavjasa, syr Tyrí isyn? De mánge te piridžav i te dykháv doiá lačhí phuv, saví isyn pal Iordáno, i doiá šukár bérga i Liváno.” Ne Raj Devél xoliasolas pe mánde pal tuménde, i na kandyjá man, i phendiá mánge Raj Devél: “Uhtýlla (dósi) túke, angíl na rákir Mánge butýr pal davá; a džá upré pe Fasgakiro vučipén, i podykh tyré jakhénca ke mórjo (derjáv), i ke paš-rat (sieviero), i ke paš-dyvés (jugo), i ke vastóko, i podykh tyré jakhénca, pal-dová so tu na prodžasa pir davá Iordáno; ne de uphenybén Isusóske (Johošuaske), i de zor léske i zoraliakir les dro dúho (fáno); pal-dová so jov javéla angíl adalé manušénde, i jov rozdela lénge pir mištypnáskiri miéra phuv, pe saví tu podykhesa.” I terdijam ame pe dólo, proti Bief-Fiegoro. I akaná, Izrailjo, šun uphenybená i zakóny, savé me sykliakirava tumen te kerén, sob (kaj) tumé te javén džidé, i te džán i te doresen doiá phuv, saví Raj Devél, tumaré dadéngiro Devél, déla tuménge; te na pričhuvén ke dová, so me rakirdjom tuménge, i te na otlen doléstyr; rakhén Ráskire-Devléskire, tumaré Devléskire priphenybená, savé me dáva tuménge. Jakhá tumaré dykhné saró, so kerdiá Raj Devél Vaal-Fiegorosa: kažnoné manušés, savó kerdiá syr Vaal-Fiegoro, tradyjá krig Raj Devél, Devél tyró, tyré manušéndyr; a tumé, savé rikirdepe zoralés ke Raj Devél, Devél tumaró, san džidé saré akaná. Dykhén, me sykliakirdjom tumen uphenybnenge i zakonenge, syr rakirdiá mánge Raj Devél, Devél miro, sob (kaj) tumé adiáke te kerén pe doiá phuv, dre saví tumé zadžána, sob (kaj) te xulainen lása; i, sob (kaj) tumé te rakhén i te kerén pir lénde: pal-dová so dre davá isyn godypén tumaró i godý tumarí angíl jakhá manušéngire, savé šunéna pal saré dalé uphenybená, i phenéna: ‘Jekh adalé baré manušá isyn manušá godé i baré-godiakire.’ Pal-dová so, ci isyn savé baré manušá, ke savé develá léskire te javén by adiáke pašýl, syr pašýl ke ame Raj Devél, amaró Devél, kiéli ame kharasa Les? I ci isyn, savé baré manušá, savénde te javén by dasavé čačuné uphenybená i zakóny, syr saró davá Zakóno isyn, pal savó me čhurdava lav adadyvés? Féni (tóka), rakhpe, i garav rakhunes tyró di, sob (kaj) túke te na bistres dolé réndy, savé dykhné tyré jakhá, sob (kaj) jone te na vydžán tyré iléstyr dre saré tyré džiibnáskire dyvesá; i rosphen pal lénde tyré čhavénge i tyré-čhavéngire čhavénge, pal dová dyvés, kiéli tu sánas terdó angíl Raste-Devléste, tyreste Devléste, pašýl Xorivo, i kiéli phendiá Raj Devél mánge: ‘Skéde ke Me manušén, i Me phenáva lénge Miré lavá, savéndyr jone vysykljona te darén Mándyr dre saré péskire džiibnáskire dyvesá pe phuv i vysykliakirena péskire čhavén.’ Tumé podginé i terdiné tel bérga, a bérga xačija jagása ke bolybén, i sys ciamlo (tjomno), óbloko i kalypén. I rakirdiá Raj Devél ke tumé maškirál jag; Léskire-lavengiri zan (glos) tumé šundlé, ne muj na dykhné, a jekh zan; i dyjá te džinél Jov tuménge zavieto Péskiro, savó phendiá tuménge te kerés saró, pir deš lavá (deštune) i čhindiá les pe duj baruné skrižáli (tablicy); i phendiá mánge Raj Devél dre dolé dyvesá te sykliakirav tumen uphenybnenge i zakonenge, sob (kaj) tumé te kerén pir lénde pe doiá phuv, dre saví tumé zadžána, sob (kaj) te xulainen lása. Rakhén i rikirén zoralés tumaré dijá, so tumé na dykhné ni savó moskiro óbrazo (stac') dro dová dyvés, kiéli rakirdiá ke tumé Raj Devél pe Xorivo jagatyr, sob (kaj) tumé te na perén dro bléndo i te na vyčhinen péske muiá, ci forma vari-saví moskiri, muršés ci džuvliá, ci kopija vari-savé kheritkoné-murdaleskiri, savó isyn pe phuv, ci vari-savjá čirikliá phakenca (krylenca), saví vurniala tel bolybén, ci kopija vari-savés gados, savó polzynela pir phuv, kopija vari-savé mačheskiri, savó isyn dro paní teledýr phuvjátyr; i sob (kaj) tu, dykhí pe bolybén, i kiéli dykhcián kham, čhon i čergeniá i saró, so isyn pe bolybén, sob (kaj) davá te na zlydžal tut, i te na mangespe lénge, i te na dynarines lénge, adiáke syr Raj Devél, Devél tyró, dyjá len saré manušénge tel saró bolybén syr meknó mištypén (nasliedstvo). A tumen lyjá Raj Devél i vylydžijá tumen sastruné bovestyr, Jegiptóstyr, sob (kaj) tumé te javén Léskire manušá Léskire mekné mištypnástyr, syr davá akaná bicialó. I Raj Devél xoliásyja pe mánde pal tuménde, i sovlahadiá, so me na piridžava pal Iordáno i na zadžava pe doiá lačhí phuv, saví Raj Devél, Devél tyró, déla túke dre mištypnáskiri miéra; me meráva pe daja phuv, na pirigii pal Iordáno, a tumé piridžana, i javéna tumé xulaja pe doiá lačhí phuv. Rakhénpe, sob (kaj) te na bistren tuménge dynó zavieto (lav) Ráskire-Devléskiro, savó Jov čhudiá tuménca, i sob (kaj) te na kerén péske vari-savó muj dre vari-saví forma, syr priphendiá túke Raj Devél, Devél tyró; pal-dová so Raj Devél, Devél tyró, isyn jag, saví xála, isyn Devél zevlynypnaskiro. Kóli bijandjona túte čhavé i tyré čhavénde čhavé, i ĥará (dlúges) dživi pe phuv, a tumé džána dro bléndo, i keréna kopii, savé sykavéna ídoly, i keréna daja xolý angíl Ráskire-Devléskire, tumaré Devléskire jakhá, i rosholiakirena Les, to tedy me dophenava tuménge adadyvés bolybnasa i phuvjása, so tumé syg xasiakirena phuv, vaš péske, pir saví tumé piridžana pal Iordáno; tumé na javéna but dyvesá pe láte, ne xasjona; i rosčhurdela tumen Raj Devél pir saré manušénde te dživén, i jačénape pe nábut maškirál manušénde, ke savé zalydžala tumen Raj Devél. I tumé javéna odój te dynarinén devlorénge, savé kerdé manušéngire vastá kaštéstyr i barestyr, savé na dykhéna i na šunéna, i na xána, i na sungavena. Ne kiéli tu javésa te rodes odój Ras-Devlés, tyré Devlés, tedy lathesa Les, kóli javésa te rodes Les saré tyré ilésa i saré tyré diesa. Kiéli tu javésa dre bída, i kiéli saró davá lathéla tut dre saré dyvesá, so iščo (inké) javéna, tedy tu risjosa ilésa ke Raj Devél, Devél tyró, i šunesa Léskiri zan (glos). Pal-dová so Raj Devél, tyró Devél, isyn Raj Devél tangipnaskiro; Jov na jačkiréla tut i na xasiakiréla tut, i na zabistrela zavieto tyré dadénca, savó Jov sovlahasa dyjá lénge. Pal-dová so phuč anglatunendyr, savé sys angledýr tútyr, dolé dyveséstyr, dre savó Devél sozdyjá manušés pe phuv, i jekhe bolybnáskire jagoróstyr (koncostyr) ke javír jagóro bolybnáskiro: ci sys vari-so dasavo, syr davá baró réndo, ci šundlo, ci so poddžalas pe davá (daleske)? Ci šundlé vari-savé manušá Devléskiri zan, saví rakirdiá jagatyr, i jačnépe džidé, syr šundián tu? Ci skedelaspe vari-savó Devél te džal, te lel péske manušén maškír javire manušénde thagar'jenca, znamienijénca (ĥiertykénca) i divenca, i maribnása, i zoralé vastésa, i vučé vastésa, i baré strahasa, syr kerdiá vaš tuménge Raj Devél, tumaró Devél, dro Jegípto angíl tyré jakhá? Túke sys dynó te dykhés davá, sob (kaj) tu te džinés, so jekh Raj Devél isyn Devél, i nane butýr apríč (kromie) Léste; bolybnástyr Jov dyjá túke te šunés Péskiri zan, sob (kaj) te sykliakires tut, i pe phuv sykadiá túke Péskiri bari jag, i tu šundián Léskire lavá maškír jag; i adiáke syr Léske jačné dróga tyré dadá, i Jov vykedyjá tumen, léngiro ródo paló (poslie) lénde, tedy i vylydžijá Jov tut Kokoró baré Péskire zorjása Jegiptóstyr, sob (kaj) te trades krig tyré móstyr manušén, savé sys baredýr i zoraledýr tútyr, i te zalydžas tut, i te des léngiri phuv dre mištypnáskiri miéra, syr davá akaná bicialó. I tu akaná džin i čhuv pe tyró iló, so Raj Devél isyn Devél uprál pe bolybén i pe phuv telál, i nane butýr apríč Léste; i rakh Léskire uphenybená i Léskire priphenybená, savé me rakiráva akaná túke, sob (kaj) šukár te javél túke i tyré čhavénge paló (poslie) túte, i, sob (kaj) tu but časo (cýro) te javes pe doiá phuv, saví Raj Devél, tyró Devél, déla túke pe saró džiibén.” Tedy Mójza otčhudia trin fórja pir daja Iordanoskiri rig pe vastóko khamestyr, sob (kaj) te našél odorík zamaribnari (umaribnari), savó muliakiréla péskire pašatunes, nakami, savó na sys vérgo (vrogo) léske ni tasiá, ni pe tríto dyvés, i sob (kaj) te našél dre jekh dalé for'jéndyr, te jačélpe džidó: Biecero pe čhučí phuv, pe loščýna (ravnina) dro Ruvimoskiro ródyco, i Ramófo dro Galaádo dro Gadoskiro ródyco, i Golano dro Vasáno dre Manasijáskiro ródyco. Ĥáda, isyn Zakóno, savó čhudiá angíl (proponindia) Mójza Izrailjoskire čhavénge. Ĥáda, isyn priphenybená, uphenybená i zakóny, savé dyjá Mójza Izrailjoskire čhavénge, syr jone vyginé Jegiptóstyr, pal Iordáno pe loščýna proti Bief-Fiegoro [Bet Pieor-ju.o.], pe Sigonoskiri phuv, Amoriejéngire-kralískiri, savó dživdiá ke Jesievóno, savés zamardiá (umardia) Mójza Izrailjoskire čhavénca, pir léngiro vygiiben Jegiptóstyr. I zalyne jone léskiri phuv i Vasanoskire-kralískire, Ogoskiri phuv, duje Amoriejéngire kral'jengire, savé pal Iordáno ke vastóko khameskiro, lyi Aroierostyr, savó isyn paštó pe brégo Arnonoskiro, sygnone rekicatyr (lenorjatyr), ke bérga Sióno, joj isyn Jermono, i lyné sarí loščýna pir daja Iordanoskiri rig ke vastóko, ke mórjo (derjáv), isyn loščyny pašýl Fasgakiro sklono.” I skedyjá Mójza saró Izrailjo, i phendiá lénge: “Šun, Izrailjo, uphenybén i zakóny, savé me láva te rakiráv adadyvés dre tumaré kaná, i vysykliakiren len, i pričhuvén zor te kerén saró pir lénde. Raj Devél, Devél amaró, čhudiá aménca zavieto (dorakiribén) pe Xorivo; na amaré dadénca čhudiá Raj Devél davá dorakiribén, ne aménca, savé adadyvés date [adái-r.s.] saré isyn džidé. Muj ke muj rakirdiá Raj Devél tuménca pe bérga maškirál jag; me sómas terdó maškír Raste-Devléste i maškír tuménde dro dová časo, sob (kaj) te piriphenav tuménge Ráskire-Devléskiro lav, pal-dová so tumé darándyne jagatyr i na giné pe bérga. Jov tedy phendiá: “Me som Raj Devél (Jahvá), Devél tyró, Savó vylydžijá tut Jegiptóskire phuvjátyr, pisharibnaskire kheréstyr; mek te na javél túte javirén devlen (javír develá) angíl Miro muj. Na ker péske nisavó vyčhindlo muj i nisaví kopija odoléske, so isyn uprál pe bolybén, i so isyn pe phuv telál, i so isyn dro paní tel phuv, na mangpe lénge i na dynarin (na služyn) lénge; pal-dová so Me Raj Devél, Devél tyró, isyn Devél zevlynypnaskiro (rievnostiakiro), pal dadengiri bang Me čhuváva kára pe čhavénde ke tríto i ke štárto ródo, savénge na som drógo Me, i, kon keréla lačhipén ke tysjonco ródy, konéske Me som drógo, i kon spolninela Miré priphenybená. Na rákir tyré Ráskire-Devléskiro lav ivjá (darmes), pal-dová so na jačkiréla Raj Devél bi naphenybnaskiro odolés, kon priripirela Léskiro lav ivjá. Rakh dyvés sávato (subóta), sob (kaj) sventes te rakhés les, syr rakirdiá túke Raj Devél, Devél tyró; šov dyvesá ker butý i ker kažna tyré réndy, a dyvés eftáto (bidešengiro déšto) – sávato Ráske-Devléske, Devléske tyréske. Na ker dro davá dyvés nisavó réndo, ni tu, ni čhavó tyró, ni čhaj tyrí, ni pishári tyró, ni pisharica tyrí, ni guruv tyró, ni óslo (miegári) tyró, ni vari-savó tyró kherítko murdál (skoto), ni savó tyró manúš, savó javdiá ke tu, sob (kaj) te otkhinjol tyró pishári i tyrí pisharica, syr i tu; i rípir, so i tu sánas pisharisa pe Jegiptóskiri phuv, ne Raj Devél, Devél tyró, vylydžijá tut odothýr zoralé vastésa i vučé psikesa, paldavá i phendiá túke Raj Devél, Devél tyró, te rakhés dyvés sávato. Kande tyré dadés i tyrja da, syr rakirdiá túke Raj Devél, Devél tyró, sob (kaj) te javén ĥará (dluga) tyré džiibnáskire dyvesá, i, sob (kaj) šukár túke te javél pe doiá phuv, saví Raj Devél, Devél tyró, déla túke. Na zamar (na umar). Na ker biladžaipén. Na čor. Na rákir xohanó dophenybén pe tyré pašatuneste.” Na čhurde jakh pe tyré pašatuneskire romniáte, i na čhurde jakh pe tyré pašatuneskiro kher, ni pe léskire féldy, ni pe léskire pishariste, ni pe léskire pisharicate, ni pe léskire guruveste, ni pe léskire osloste, ni pe saró, so isyn tyré pašatuneste.” Dalé lavá rakirdiá Raj Devél ke saró tumaró skedyibén pe bérga maškirál jag, óbloko i kalypén, zoralé zanasa, i butýr na rakirdiá, i čhindiá len pe duj baruné skrižáli (tablicy), i dyjá len mánge. I kiéli tumé šundlé zan maškirál mroko, i bérga xačija jagása, tedy tumé podginé ke me, saré tumaré-rodycoskire barydyrá i tumaré phurydyrá, i phendlé: “Ĥáda, sykadiá aménge Raj Devél, Devél amaró, Péskiri sláva i Péskiro vučipén, i zan (glos) Léskiri šundiám ame maškirál jag; adadyvés dykhciam ame, so Devél rakiréla manušésa, i jov jačélape džidó; ne akaná vaš so aménge te meras? Pal-dová so bari daja jag xála sarésa amen; kóli ame butýr na javása te šunas Ráskire-Devléskiri, amaré Devléskiri zan, to tedy ame merasa, pal-dová so, ci isyn saví loč (plot'), saví šundiá Ráskire-Devléskiri džideskiri zan (glos), saví rakirdiá maškirál jag, syr ame i jaciampe džidé? Jav pašýl (poddža) tu, i šun saró, so phenéla túke Raj Devél, Devél amaró, i piriphen aménge saró, so javéla te rakirél túke Raj Devél, Devél amaró, i ame javása te šunas i te kerás.” I Raj Devél šundiá tumaré lavá, syr tumé rakirdé mánca, i phendiá mánge Raj Devél: “Me šundjom adalé-manušéngire lavá, savé jone rakirdé túke; saró, so jone rakirdé, šukár. Ne, kóli by léngiro iló te javél lénde dasavo, sob (kaj) jone te darén Mándyr i te rakhén saré Miré priphenybená dre saré dyvesá, sob (kaj) šukár te javél lénge i léngire čhavénge dro viéko! Džá, phen lénge: ‘Risjon dre péskire šátry’; a tu adáj iačpe Mánca, i Me rosphenava túke saré priphenybená, i uphenybená, i zakóny, savénge túke trej te sykliakires len, sob (kaj) jone adiáke te kerén pe doiá phuv, saví Me dave lénge.” “Dykhén, kerén adiáke, syr rakirdiá tuménge Raj Devél, tumaró Devél; na džán ni pe čačó (pravo), ni pe zérvo (liévo); ne tumé džán pir dová drom, pir savó rakirdiá te džán tuménge Raj Devél, tumaró Devél, sob (kaj) tumé te javén džidé, i šukár te javél tuménge, i te dživén tumé but dyvesá pe doiá phuv, saví javéla tumarí.” Akaná isyn priphenybená, uphenybená i zakóny, savé rakirdiá Raj Devél, Devél tumaró, te sykliakires tumen, sob (kaj) tumé te kerén adiáke pe doiá phuv, pe saví tumé džána, sob (kaj) te javén tumé xulaja pe láte; sob (kaj) tu te dares tyré Rástyr-Devléstyr, i saré Léskire uphenybnendyr i Léskire priphenybnendyr, savé rakiráva túke, sob (kaj) tu te rakhés, i tyré čhavé, i tyré čhavéngire-čhavé dre saré tyré džiibnáskire dyvesá, sob (kaj) te javén ĥaredyr (dlugedyr) tyré dyvesá. I paldavá šun, Izrailjo, i pričhúv zor te kerés davá, sob (kaj) túke te javél mištó, i sob (kaj) tumé te javén drieván (zbit) but, syr Raj Devél, tyré-dadéngiro Devél rakirdiá túke, so Jov déla túke phuv, thadéla thud i avgín (meda). Šun, Izrailjo: Raj Devél, tumaró Raj Devél isyn Jekh; i sykáv patýv tyré Ráske-Devléske, saré tyré ilésa, i saré tyresa diesa, i saré zor'jenca tyrenca. I mek te javén dalé lavá, savé Me phenáva túke adadyvés, dro tyró iló; i piriphen len tyré čhavénge i rákir pal lénde, bešyndoj dre tyró kher i gii dromésa, i pasii, i uštyi; i priphande len syr špéra (znako) pe tyró vast, i mek te javén jone syr phandluny (poviazka) pe tyré jakhá, i čhin len pe tyré-kheréskire kasiaki i pe tyré vudará (pórty). Kiéli zalydžala tut Raj Devél, tyró Devél, pe doiá phuv, saví Jov sovlahadiá te del tyré dadénge, Avraamóske, Isaakóske i Jakovóske, te del túke baré i lačhé for'jenca, savé tu na kerdián, i kherenca, so sys čhudé pherdés kažnoné mištypnasa, savé tu na čhudián, i ĥanyngenca, vyčhingirde barestyr, savé tu na vyčingirdian, vinagradnikenca i maslinenca, savé tu na čhudián dre phuv, i, savé tu javésa te xas i te čaljos; tedy rakhpe, sob (kaj) tu te na bistres Ras-Devlés, Savó vylydžijá tut Jegiptóskire phuvjátyr, pisharibnaskire kheréstyr. Dar Rástyr-Devléstyr, tyré Devléstyr, i Léske Jekhéske dynarin, i Léskire lavésa sovlahá. Na mangénpe javire devlorénge, devlorénge odolé-manušéngire, savé javéna pašýl tuménde; pal-dová so Raj Devél, tyró Devél, Savó isyn maškír túte, isyn Devél zevlynypnaskiro; sob (kaj) te na zahačol Ráskire-Devléskiri, tyré Devléskiri xolý pe túte, i te na tradel krig Jov tut phuvjákire móstyr. Na propatiakiren Ras-Devlés, tumaré Devlés, syr tumé Les propatiakirde dre Masá. Rakhén zoralés tumaré Ráskire-Devléskire priphenybená, i Léskire uphenybená i zakóny, pir savé Jov priphendiá te kerés túke; ker čačipén i lačhipén angíl Ráskire-Devléskire jakhá, sob (kaj) šukár te javél túke, i sob (kaj) tu te zadžas i te xulaines lačhé phuvjása, saví Raj Devél sovlahadiá te del tyré dadénge, i, sob (kaj) Jov te tradel krig sarén tyrén vergén tyré móstyr, syr rakirdiá Raj Devél. Kóli phučela tútyr tyró čhavó dro javír časo, rakirí: ‘So značynena dalé dosykaibena, zakóny, i uphenybená, savé rakirdiá tuménge Raj Devél, Devél tumaró.’ to tu tedy phen tyré čhavéske: “Pishárja ame sámas faraonoste dro Jegípto, ne Raj Devél vylydžijá amen Jegiptóstyr zoralé vastésa; i sykadiá Raj Devél znamiénii (ĥiertyká), i dívy baré i darakune pe Jegípto, pe faraonoste i pe saró léskiro kher, angíl amaré jakhá; a amen Jov vylydžijá odothýr, sob (kaj) te janel amen i te del aménge phuv, saví Jov sovlahadiá amaré dadénge te del aménge. I priphendiá aménge Raj Devél te kerás saró pir saré dalé uphenybená, sob (kaj) ame te daras Rástyr-Devléstyr, Devléstyr amarestyr, sob (kaj) šukár te javél aménge dre saré dyvesá, sob (kaj) te zrakhél amaró džiibén, syr i akaná; i dro saró javéla amaró čačipén, kóli ame javása te pričhuvas zor te kerás pir saré dalé priphenybená angíl Raste-Devléste, Devléste amareste, syr Jov rakirdiá aménge.” Kiéli zalydžala tut Raj Devél, Devél tyró, pe phuv, pe saví tu džása, sob (kaj) te xulaines lása, i jov tradéla krig tyré móstyr butedýr-manušéngiri nácyi, Xietiejen, Giergiesiejen, Amoriejen, Xananiejen, Fierieziejen, Jeviejen i Jevusiejen, eftá manušýtka nácyi, savé isyn butýr i zoraledýr tútyr, i otdéla len túke Raj Devél, Devél tyró, i tu domaresa len, to tedy otdé len prokošybnaske, i na džá lénca dro khetaniakiriben i na tangine len; i tu na semencynpe (na džá lénca dre seménca): na otdé čha tyrja pal léskire čhavéste i na le lengirja čha pal tyré čhavéste; pal-dová so jone otriskirena tyré čhavén Mándyr, sob (kaj) te dynarinén javire devlorénge, i tedy zahačola pe tuménde Ráskire-Devléskiri xolý, i Jov syg xasiakiréla tut. Ne adiáke kerén lénca: altári (žertvieniki) léngire rosphagiren, stýlby léngire phagiren, i vešore léngire vyčingiren i léngire kaštune devloré xačkirén jagása; pal-dová so Raste-Devléste, tumaré Devléste, tumé san svénta manušá: tumen vykedyjá Raj Devél, Devél tumaró, sob (kaj) tumé te javén jekhe Léskire manušá (manušénca) saré manušéndyr, savé isyn pe phuv. Na pal-dová, so tumé sánas butýr saré manušéndyr, risijá ke tumé Raj Devél i vykedyjá tumen, – pal-dová so tumé san tyknedýr saré manušéngire nacyiéndyr, ne paldavá, so tumé san dróga Ráske-Devléske, i vaš dová, sob (kaj) Jov te zrakhél sovláh, savjása Jov sovlahadiá tumaré dadénge, paldavá vylydžijá tumen Raj Devél zoralé vastésa, i vyrakhcia tut pisharibnaskire kheréstyr, faraonóskire vastéstyr, Jegiptóskire kralístyr. I adiáke džin, so Raj Devél, Devél tyró, isyn Raj Devél čačunó, Savó rakhéla Péskiro zavieto (dorakiribén) i tangipén ke odolé manušá, savénge isyn drógo Jov, kon rakhéla Léskire priphenybená ke tysjoncy ródy, i Jov otdéla (riskiréla) pale pe léngiro šeró odolénge, kon Les drieván bidykhela, dro léngiro muj, xasiakiri len; Jov na javéla te otčhuvel fuipén pe léskiro šeró, kon Les drieván bidykhela, kokoreske odolé manušéske Jov otdéla pale. I paldavá rakh priphenybená, i uphenybená, i zakóny, savé adadyvés me priphenava tuménge te kerén saró pir lénde. I kóli tumé javéna te šunén dalé zakóny, i te rakhén len, i te kerén saró pir lénde, tedy Raj Devél, Devél tyró, javéla te rakhél zavieto i tangipén (žalima) ke tu, syr Jov sovlahadiá tyré dadénge, i javésa tu drógo Léske, i Jov bahtiakiréla tut, i Jov keréla adiáke, so javéla but tumen, i bahtiakiréla tre-maséngiro barjakirdó, i tyré-phuvjákiro barjakirdó, i maró tyró, i mol (vino) tyrí, i aliejo (dzet) tyró i dová, kon javéla bijandlo baré tyré kheritkoné murdaléndyr (skotóstyr) i tyré stadakire bakréndyr pe doiá phuv, saví Jov sovlahadiá tyré dadénge te del túke; bahtiakirdó tu javésa butýr saré manušéndyr; na javéla ni nabijanypnytkones-(naplodorodnones) ni túte, ni dre kheritkoné murdalénde; i otlydžala tútyr Raj Devél kažno nasvalypen, i nisavó zoraló Jegiptóskiro nasvalypen, savó tu džinésa, na lydžála pe túte, ne Jov janéla len pe sarénde, kon drieván bidykhela tut; i tu xasiakiresa saré manušýtka nácyi, savé Raj Devél, Devél tyró, déla túke: mek te na tanginél len tyrí jakh; i te na mangespe léngire devlorénge; pal-dová so davá isyn felý vaš túke. Kóli tu phenésa dre tyró iló: ‘Adalé manušá isyn butýr mándyr; syr me dáva ráda (mogináva) te vytradav len?’ Na dar léndyr, priripir dová, so kerdiá Raj Devél, Devél tyró, faraonosa i saré Jegiptosa, dová sys baró sprobinyben, savó dykhné tyré jakhá, znamiénii (ĥiertyká), dívy, i vast zoraló i psikó vučó, savénca vylydžijá tut Raj Devél, Devél tyró; dová-pac' keréla Raj Devél, Devél tyró, saré manušénca, savéndyr tu daresa; i bičhavéla Raj Devél, Devél tyró, voslen (šeršnien) pe lénde, paka jone xasjona, savé jačnépe i ĥaradjona tyré móstyr; na dar léndyr, pal-dová so Raj Devél, Devél tyró, isyn maškír túte, Devél baró i darano. I javéla Raj Devél, Devél tyró te tradel angíl túte nábut pe nábut dalé manušýtka nácyi; i tu désa ráda te xasiakires len syg, sob (kaj) te na skedénpe but pe túte feldýtka murdalá; ne otdéla len túke Raj Devél, Devél tyró, i janéla len dro bari túga (konfuzo), adiáke so jone xasjona; i otdéla léngire kral'jén dre tyré vastá, i tu xasiakiresa léngiro lav tel bolybnástyr: i nikón na terdjola proti túte, paka tu rozmaresa len pe koterá (kuski). Léngire devlorengire vyčhindlé muiá xačkirén sarésa jagása; na trej túke te les péske rup ci suvnakái, savó isyn pe lénde, sob (kaj) davá te na javél vaš túke syr felý (sietka), pal-dová so davá isyn magiripén vaš Ráske-Devléske, tyré Devléske; i na lýdža magiripén dro tyró kher, sob (kaj) te na peres sovlahake, syr jov; otrisjov saréstyr i gin syr džungalypén saró (gidinpe saréstyr); pal-dová so davá isyn sovlahado. Saré priphenybená, savé me rakiráva adadyvés tuménge, pričhuvén zor te kerén, sob (kaj) tumé te javén džidé te jačen tumen butýr, i te džán i te zakeden phuv, pal saví sovlahasa dyjá lav Raj Devél tumaré dadénge. I rípir saró drom, savésa tut lydžijá Raj Devél, Devél tyró, pir čhučí (pusto) phuv, ĥáda, akaná isyn štardešá berš, sob (kaj) te štyliakirel tut, sob (kaj) te sprobinel tut i te udžinel, so isyn pe tyró iló, ci javésa tu te rakhés Léskire priphenybená, ci nad. Jov štyliakirdia tut, sprobindia pharés (morindia) tut bokhasa i čaliakirdia tut mannasa, saví tu na džindian, i na džindlé tyré dadá, sob (kaj) te sykavél túke, so na jekhe marésa dživéla manúš, ne kažnoné lavésa, savó džála Devléskire uštendyr, dživéla manúš. Uribén tyró na kustiape pe túte, i ĥerój tyrí na šulyja, ĥáda, syr štardešá berš. I džin dro tyró iló, so Raj Devél, Devél tyró, sykliakiréla tut, syr manúš sykliakiréla péskire čhavés. I paldavá rakh priphenybená Ráskire-Devléskire, Devléskire tyreskire, psir Léskire droménca i dar Léstyr. Pal-dová so Raj Devél, Devél tyró, lydžála tut pe lačhí phuv, pe phuv, pir saví thadena sygna rekicy, i folahara (fontany) i ĥanyngorja (istočniki), savé vydžána loščynendyr i bergendyr, pe phuv, parnó giv (pšenica), giv, vinagradýtka (drakhitka) lozy, inžyro i granatytka kaštore pe phuv, maslinytka vešá i avgín (meda), pe phuv, pe saví na tu javésa te xas tyró maró bi mierakiro i ni dro so na javéla túte nauhtylyben (javéla dósi), pe phuv, pe saví isyn bará sastyrestyr, i bergendyr, savéndyr javésa te čingires xarkóma (mied'). I kiéli javésa tu te xas i te čaljos, tedy bahtiakir Ras-Devlés, Devlés tyrés pal lačhí phuv, saví Jov dyjá túke. Rakhpe, sob (kaj) tu te na bistres Ras-Devlés, Devlés tyrés, ne rakh Léskire priphenybená, i Léskire zakóny, i Léskire uphenybená, pal savé adadyvés Me rakiráva túke. Kiéli tu javésa te xas i te čaljos, i čhuvésa lačhé kherá i tu javésa te dživés dre lénde, i kiéli túte javéla but baré i tykné kherítka murdalá (skoto), i javéla but rup i suvnakái, i saró túte javéla but, tedy dykh, sob (kaj) te na zaphutjol tyró iló, i, sob (kaj) tu te na bistres Ras-Devlés, Devlés tyrés, Savó vylydžijá tut Jegiptóskire phuvjátyr, pisharibnaskire kheréstyr; Savó lydžijá tut pir čhučí phuv bari i darany, kaj sys sapa, vasiliski, skorpiony i šuké štéty, pe savé nane paní; Savó kerdiá vaš túke panieskiro thadypen granitytkone skalatyr, Savó čaliakirdia tut pe čhučí phuv mannasa, saví na džindlé tyré dadá, sob (kaj) Jov te štyliakirel tut i te sprobinel tut, sob (kaj) duredýr te kerél túke lačhipén, i sob (kaj) tu te na phenés dre tyró iló: ‘Mirí zor i miré-vasteskiri zor kerdé mánge davá barvalypén’, ne, sob (kaj) tu te ripires Ras-Devlés, Devlés tyrés, pal-dová so Jov déla túke zor te rikires barvalypén, sob (kaj) te kerés, syr akaná, Péskiro phendló lav, savésa Jov sovlahasa dyjá tyré dadénge. Kóli tu bistresa Ras-Devlés, Devlés tyrés, i džása pal javire devlorende, i tu javésa te dynarines lénge i te mangespe lénge, tedy Me rakiráva tuménge adadyvés, so tumé xasjona; syr manušá, savén Raj Devél xasiakiréla tumaré móstyr, adiáke xasjona i tumé pal dová, so tumé na kandyné Ráskire-Devléskire, tumaré Devléskiri zan. Šun, Izrailjo: tu akaná piridžasa Iordáno, sob (kaj) te džas te zauhtyles manušén, savé isyn butýr i zoraledýr tútyr, baré for'jenca i zoralé tynénca ke bolybén, i adalen manušén isyn but, jone isyn vučé, Jenakoskire čhavé, pal savénde tu džinésa i šundián: “Kon déla ráda te terdjol proti Jenakoskire čhavénde?” Džin akaná, so Raj Devél, Devél tyró, džála angíl túte, syr jag, saví saró xála; Jov javéla te tradel len i te tyliakirel len angíl túte, i tu tradesa krig len, i rozmaresa len syg, syr rakirdiá túke Raj Devél. Kiéli javéla te tradel len Raj Devél, Devél tyró, tyré móstyr, na rákir dro tyró iló, so pal “miro čačipén” jandiá man Raj Devél te zauhtylel daja phuv, i so pal adalé-manušéngiro načačipén Raj Devél tradéla len tyré móstyr. Na pal čačipén tyró, i na pal čačunó tyró iló tu džása te zauhtyles léngiri phuv, ne pal načačipén adalé-manušýtka nácyi Raj Devél, Devél tyró, tradéla len tyré móstyr, sob (kaj) te kerél saró pir lav, savésa sovlahadiá Raj Devél tyré dadénge Avraamóske, Isaakóske i Jakovóske; paldavá džin, so na pal tyró čačipén Raj Devél, Devél tyró, déla túke te zauhtyles daja lačhí phuv, pal-dová so tumé pharé-ilytka san manušá. Rípir, na bistyr, ci but tu xoliakirdian Ras-Devlés, Devlés tyrés, pe čhučí phuv: odolé dyveséstyr, syr vygijan tu Jegiptóskire phuvjátyr, i ke sámo tumaró javiben pe davá štéto, tumé na kandyné Ras-Devlés. I pašýl Xorivo tumé xoliakirde Ras-Devlés, i xoliásyja pe tuménde Raj Devél adiáke, so kamdiá te tradel krig (te vymarel sarésa) tumen, kiéli me gijom upré pe bérga, sob (kaj) te prilav baruné skrižáli, zavietoskire skrižáli, savé čhudiá Raj Devél tuménca, i sómas me pe bérga štardešá dyvesá i štardešá ratia, maró nahai, i paní napii, i dyjá mánge Raj Devél duj baruné skrižáli, savé čhindiá Devléskiro angúšt (pal'co), pe lénde saré lavá, savé rakirdiá Raj Devél tuménge pe bérga maškirál jag pe skedyibnaskiro dyvés. Syr proginé štardešá dyvesá i štardešá ratia, dyjá mánge Raj Devél duj baruné skrižáli, zavietoskire skrižáli, i phendiá mánge Raj Devél: “Uštý, i džá sygnedyr adathýr, pal-dová so rozmeknepe tyré manušá, savén tu vylydžijan Jegiptóstyr; syg jone giné krig droméstyr, savó Me phendjom lénge; jone kerdé péske vyčhudo muj (idolo).’” I phendiá mánge Raj Devél: “Dykháva Me adalé manušén, ĥáda, jone isyn pharé-ilytka. Na obrikir man, i Me tradava krig len, i Me (khosava krig) zlava léngiro lav bolybnástyr; a tútyr Me sozdáva manušén, savé javéna zoraledýr i butýr léndyr.’” Me risijom i gijom bergátyr, bérga xačija jagása; duj skrižáli zavietoskire sys dre miré duj vastá; i dykhcjom me, so tumé kerdé grého angíl Raste-Devléste, tumaré Devléste, kerdé péske guruvóres sastyrestyr, syg giné krig droméstyr, savéske te rikirespe, rakirdiá tuménge Raj Devél; i lyjom me duj skrižáli, i čhurdyjom len péskire duje vasténdyr, i rozmardjom len angíl tumaré jakhá. I pyjom mósa me angíl Raste-Devléste, mangdjompe me, syr ĥaredyr, štardešá dyvesá i štardešá ratia, na xajom maró, i paní na pijom, pal saré tumaré gréhi, savé tumé kerdé, i dalésa tumé kerdé čoripén dre jakhá Ráskire-Devléskire i xoliakirde Les; paldavá so me darandyjom xoliátyr i mižehipnastyr, savénca Raj Devél xoliásyja pe tuménde i kamdiá te muliakirél tumen. I kandyjá man Raj Devél i davá mólo. I pe Aaronoste drieván (zbit) xoliásyja Raj Devél i kamdiá te muliakirél les; ne me mangdjompe i pal Aaronoste dro dová časo. Grého tumaró, savó tumé kerdé, – guruvóres me lyjom, xačkirdjom sarésa les dre jag, rozmardjom les i sares skhostjom ke dová, so jov jaciá tyknin'ko, syr práho, i me čhurdyjom davá práho dro sýgno rékica (lenorí), saví thadyja bergátyr. I dre Taviera, dre Masá i dre Kibrot-Gataava tumé xoliakirde Ras-Devlés. I kiéli tumen bičhadiá Raj Devél Kadies-Varniatyr i rakirdiá: ‘Džán, zalen phuv, saví Me dáva tuménge, to tedy tumé na kandyné Ráskire-Devléskiro, tumaré Devléskiro phenybén, i na patiandyné Léske, i tumé na šundlé Léskiri zan’. Tumé na kandyné Ras-Devlés dolé-pac' dyveséstyr, syr me jacjom te džináv tumen. I terdindoj pe čangá angíl Raste-Devléste, mangdjompe me štardešá dyvesá i štardešá ratia, dre savé me mangdjompe, pal-dová so Raj Devél kamdiá te muliakirél tumen; i mangdjompe me Ráske-Devléske i phendjom: “Rajo Baró, Rajo Dévla, na muliakir Tyré manušén i Tyrí mištypnáskiri miéra, savjása Tu zrakhcián baré Tyré zorjása, savjása Tu vylydžijan Jegiptóstyr zoralé vastésa; priripir Tyré pishar'jén Avraamos, Isaakos i Jakovós; na dykh pe adalé-manušéngiri xolý i pe léngiro načačipén i pe léskire gréhi, so vari-kon dživéla pe doiá phuv, katýr Tu vylydžijan amen, te na phenél: “Raj Devél na mogindiá te zalydžal (te lydžál ke kónco/iagóro) len pe phuv, pal saví Jov dyjá lav lénge, i, nakami len, Jov vylydžijá len, sob (kaj) te muliakirél len pe čhučí phuv.” ‘A jone isyn Tyré manušá i Tyrí mištypnáskiri miéra, savjása Tu vylydžijan len Jegiptóskire phuvjátyr Tyré baré zorjása i Tyré vučé psikesa.’ Dro dolé dyvesá phendiá mánge Raj Devél: “Vyčingir péske duj baruné skrižáli (tablicy), dasavé-pac' syr sys pérva, i džá upré ke Me pe bérga, i ker péske kaštuno kovčego (mohtó); i Me začhinava pe skrižáli dolé lavá, savé sys pe pérva skrižáli, savé tu rozmardian; i čhuv len dro kovčego.” I kerdjom me kovčego vešéstyr sitimo, i vyčingirdjom duj baruné skrižáli, syr pérvo (anglatunó), i gijom upré pe bérga; i duj dalé skrižáli sys dre miré vastá. I začhindiá Jov pe skrižáli, syr sys čhindló angledýr, dolé deš lavá, savé rakirdiá tuménge Raj Devél pe bérga maškirál jag dro skedyibnaskiro dyvés, i otdyjá len Raj Devél mánge. I risijom me, i gijom telé bergátyr, i čhudjom skrižáli dro kovčego, savó me kerdjom, sob (kaj) jone odój te javén, syr priphendiá mánge Raj Devél. I Izrailjoskire čhavé giné Biejerof-Bienie-Jaakanostyr dro Moziero, i odój myjá Aaróno i garadé les odój, i jaciá rašása zamiést (pe štéto léskiro) léste o Jelizáro, léskiro čhavó. Odothýr giné jone dre Gudgoda, Gudgodatyr dre Iotvafa, pe phuv, kaj sys panieskire sygna rekicy. Dro dová časo vykedyjá (čhudiá dre rig) Raj Devél Lievijoskiro ródyco, sob (kaj) jone te lydžán Ráskire-Devléskiro zavietóskiro kovčego, te dynarinén Léske i te bahtiakiren Léskire lavésa, syr davá keréna ke davá dyvés; paldavá nane Lievitoske paš i miéra dro meknó mištypén léskire pšalénca: syr rakirdiá léske Raj Devél tyró. I sómas me (Mójza) pe bérga, syr i dro anglatunó (pérvo) časo, štardešá dyvesá i štardešá ratia, i kandyjá man Raj Devél i davá mólo; i na zakamdiá Raj Devél te muliakirél tut; i phendiá mánge Raj Devél: “Uštý, džá dro drom angíl adalé manušénde; mek jone te džán, i te zakeden phuv, saví Me sovlahadjom te dav léngire dadénge.” I paldavá, Izrailjo, so kaméla tútyr Raj Devél, Devél tyró? Jekh dová, sob (kaj) tu te dares Rástyr-Devléstyr, Devléstyr tyrestyr, sob (kaj) tu te psirés saré Léskire droménca, i te sykavén patýv Léske, i te dynarines Ráske-Devléske, Devléske tyréske, saré tyré iléstyr i saré tyré diestyr, i, sob (kaj) tu te rakhés priphenybená Ráskire-Devléskire i Léskire uphenybená, savé adadyvés rakiráva túke, sob (kaj) túke te javél mištés. Ake, Raste-Devléste, tyré Devléste, isyn bolybén i bolybnáskiro bolybén, phuv i saró, so isyn pe láte; ne jekhe daden tyrén prilyjá Raj Devél i jone jačné dróga Léske, i Jov vykedyjá tumen, paló (poslie) lénde léngiro siemjo [léngire-čhavéngire čhavorén-ju.o.], saré manušéndyr, syr akaná tu dykhésa. I paldavá občhinen tumaré-iléskire mas pe jagóro (krajo) [paruven iló i godý.-ju.o.], i te na javén tumé butýr pharé-ilytka; pal-dová so Raj Devél, Devél tumaró, isyn devlengiro Devél, i Raj Baró baré-rangiro, Devél baró, zoraló i darano, Savó na dykhéla pe muiá i na léla dáry, Savó déla čačunó séndo pirotoske (sirotaske) i pivliake (udovake), i Savéske isyn dróga manušá, savé javné javire rigátyr, i Jov déla léske maró i uribén. Prilén ilésa i tumé manušés, savó ke tumé javéla te dživél: pal-dová so tumé kokoré javné pe Jegiptóskiri phuv. Dar Rástyr-Devléstyr, Devléstyr tyrestyr, i Léske Jekhéske dynarin (služyn), i ke Jov prijač, i Léskire lavésa sovlahá: Jov isyn šaribén tyró i Jov isyn Raj Devél tyró, Savó kerdiá túsa dolé baré i darane réndy, savé dykhné tyré jakhá. Sys eftadešá dijá (manušá), kiéli javné tyré dadá dro Jegípto, a akaná Raj Devél, Devél tyró, sozdyjá tumen adiáke but, kicý isyn bolybnáskire čergeniá. I paldavá sykáv patýv Ráske-Devléske, Devléske tyréske, i rakh, so Jov phendiá te rakhés, i uphenybená Léskire i zakóny Léskire i priphenybená Léskire dre saré dyvesá. I akaná priripiren, – pal-dová so me rakiráva na tumaré čhavénca, savé na džinéna i na dykhné kára Ráskire-Devléskiri, tumaré Devléskiri; Léskiri sláva, Léskiro zoraló vast i Léskiro vučó psikó, znamiénii (ĥiertyká) Léskire i Léskire réndy (diély), savé Jov kerdiá maškirál Jegípto faraonenca, Jegiptóskire kralísa, i saré léskire phuvjása, i so Jov kerdiá Jegiptóskire xaladybnasa, léskire grenca i léskire maribnytkoné vurdenenca, savén Jov tasadia dre Lolé-morjoskire (derjavéskire) paniá, kiéli jone tradynepe pal tuménde, – i muliakirdiá len Raj Devél až ke/žýko davá dyvés; i so Jov kerdiá vaš tuménge pe čhučí phuv, paka tumé doginé ke davá štéto, i so Jov kerdiá Dafanosa i Avironosa, Jeliavoskire čhavénca, Ruvimóskire čhavésa, kiéli phuv roskerdiá péskire uštá maškír saró Izrailjo i nakhadia (proglynindia) len, i léngire čékarja (siemieistvy), i léngire šátry, i saró barvalypén léngiro, savó sys lénde. Pal-dová so jakhá tumaré dykhné saré baré Ráskire-Devléskire réndy, savé Jov kerdiá. I paldavá rakhén saré Léskire priphenybená, savé me rakiráva tuménge adadyvés, sob (kaj) tumé te zoraljon, i te džán i te len phuv, pe saví tumé piridžana, sob (kaj) te len la; i, sob (kaj) tumé te dživén but časo pe doiá phuv, saví sovlahadiá Raj Devél tumaré dadénge te del lénge i léngire rodóske pe phuv, pe saví thadéla thud i avgín (meda). Pal-dová so phuv, pe saví tu džása, sob (kaj) te les la, na dasaví, syr Jegiptóskiri phuv, savjátyr vyginé tumé, tu počhudian siemjo tyró, paniakirdian la tyré ĥerengire podrikiribnasa (pomoššasa), syr maslinitko únta (sado), ne phuv, pe saví tumé piridžana, sob (kaj) te zalen la, isyn phuv bergenca i loščynenca, i saví bolybnáskire bryšyndestyr paniakirelape, phuv, pal saví Raj Devél, Devél tyró, pekelape, jakhá Ráskire-Devléskire, Devléskire tyreskire, saró časo isyn pe láte, beršeskire anglypnástyr i ke beršeskiro kónco (ke jagóro). Kóli tumé javéna te šunén Miré priphenybená, savé Me rakiráva tuménge adadyvés, te rikirén syr Drógima dro tumaró iló Ras-Devlés, Devlés tumares, i te dynarinén Léske saré tumaré iléstyr i saré tumaré diestyr, to Me dáva tumaré phuvjake bryšýnd dre péskiro časo, tasiarluno/pervotuno (rannjo) i koriguno (pozdnjo); i tu skedesa tyró maró i tyrí mol (vino), i jeliejo tyró; i Me dáva čar pe félda tyrí vaš tyré kheritkoné murdalénge (skoto) i, tu javésa te xas i te čaljos. Rakhénpe, sob (kaj) te na xohavelpe iló tumaró, i tumé te na otdžan dre rig, i te na len te dynarinén javire devlorénge, i te na mangénpe lénge; i tedy, zahačola xolý Ráskire-Devléskiri pe tuménde, i Jov začhakirela bolybén; so na javéla bryšýnd, i phuv na janéla péskiro umaloto (urožajo), i tumé syg xasjona lačhé phuvjátyr, saví Raj Devél déla tuménge. I paldavá čhuvén (prilén) dalé Miré lavá dro tumaró iló i dro tumaró di, i phanden len pe ripiribén pe péskiro vast, i mek te javén jone phandypnasa maškír tumaré jakhá; i sykliakirén lénge péskire čhavén, rakirí pal lénde, kiéli tu san beštó dro tyró kher, i kiéli tu džása dromésa, i kiéli tu pasjosa, i kiéli uštesa; i čhin len pe tyré-kheréskire kosiaki i pe tyré vudará, sob (kaj) adákicy but te javén tumaré dyvesá i tumaré-čhavéngire dyvesá pe doiá phuv, saví Raj Devél sovlahadiá te del tumaré dadénge, ci but dyvesá bolybén javéla pe phuv. Kóli tumé javéna te rakhén saré dalé priphenybená, savé Me rakiráva tuménge te kerén saró pir lénde, i tumé javéna te rikirén syr Drógima dro péskiro iló Ras-Devlés, Devlés tumares, te psirén saré Léskire droménca i te pričhuvenpe ke Jov, to tedy vytradela Raj Devél saré adalé manušén tumaré móstyr, i tumé léna lofo (vlast') pe manušénde, savé isyn butýr i zoraledýr tuméndyr; kažno štéto, pe savó terdjola tumarí ĥerój, javéla tumaró; čhučé phuvjátyr i Livanostyr, rekátyr (leniátyr) Jefratostyr, adiáke-pac' ke západno (pal-panitko) mórjo (derjáv) javéna štéty tumaré. Nikón na vyterdjola proti tuménde: Raj Devél, Devél tumaró, janéla dar angíl tuménde pe kažno phuv, pe saví tumé terdjona, syr Jov rakirdiá tuménge. Ake, me vyphenava tuménge adadyvés bahtiakiribén i prokošybén: bahtiakiribén, kóli tumé šunéna priphenybená Ráskire-Devléskire, tumaré Devléskire, savé me rakiráva tuménge adadyvés, a prokošybén, kóli tumé na javéna te šunén priphenybená Ráskire-Devléskire, tumaré Devléskire i džána dre rig droméstyr, pal savó rakiráva tuménge adadyvés, i džána palál pal javire devlorende, savén tumé na džinéna. Kiéli janéla tut Raj Devél, Devél tyró, pe doiá phuv, pe saví tu džása, sob (kaj) te les lofo pe láte, tedy phenén bahtiakiribén pe bérga Garizimo, a prokošybén (arman) pe bérga Gievalo. Ĥáda, jone isyn pal Iordáno, pir drom ke khameskiro zagiibén, pe phuv Xananiejengiri, savé dživéna pe loščýna (ravnina), proti Galgálo, nádur dembitkone vešorestyr Morie. Pal-dová so tumé piridžana Iordáno, sob (kaj) te džán te les phuv, saví Raj Devél, tumaró Devél, déla tuménge i tumé léna la, i javéna te dživén pe láte. I paldavá kerén saró pir saré uphenybená i Léskire zakóny, savé Me vyphenava tuménge adadyvés. Ake, isyn uphenybená i zakóny, savé tuménge trej te pričhuvén zor te kerén ke kónco/iagóro (te spolninen pe phuv), saví Raj Devél tyré-dadéngiro Devél déla túke dro xulaiben, pe saré dyvesá, savé tumé javéna te dživén pe doiá phuv. Rozmaren sarésa (pe koterá) saré štéty, kaj isyn manušýtka nácyi (narody), pe savénde tumé léna lofo (vlast'), i savé dynarindlé péskire devlorénge, pe vučé bérgi, i pe bérgicy, i tel kažno kašt (drévo) randienca; i rosphagiren léngire altári, i phagiren léngire stýlby, i xačkirén jagása léngire veladinia (roščy), i rozmaren léngire-devlorengire istukany, i protraden léngiro lav dolé štetóstyr. Tuménge naštý te kerén dová vaš Ráske-Devléske, Devléske tumareske. Ne pe štéto, savó vykedéla Raj Devél, Devél tumaró, saré tumaré rodycendyr, sob (kaj) te javél Léskiro Lav odój, rodén Les odój i javén odorík, i odorík janén tumaré céla shačkiribena, i tumaré svénta dyibená Ráske-Devléske, i tumaré dešengirja (diesiatiny), i tumaré vastengiro ĥazdypen, i tumaré sovela, i tumaró janybén pir péskiro iló, i anglatunen (pervoné bijandlen) tumaré baré i tykné tumaré kheritkoné murdaléndyr (skotóstyr); i tumé xan odój angíl Raste-Devléste, Devléste tumareste, i radynénpe tumé i čékarja (siemieistvy) tumaré, pal saró, so kerdé tumaré vastá, sósa bahtiakirdiá tumen Raj Devél, Devél tyró. Odój tuménge naštý te kerén saró, syr adáj ame akaná kerása, kažno, pir péskiri godý, so léske zdelape čačipnása; pal-dová so tumé akaná iščo (inké) na zaginé pe štéto te otkhinjon i pe phuv dre mištypnáskiri miéra te prilén, saví Raj Devél, Devél tyró, déla túke. Ne kiéli tumé piridžana Iordáno i léna te dživén pe phuv, saví Raj Devél, Devél tumaró, déla tuménge dre mištypnáskiri miéra te prilén, i kiéli Jov štyliakirela tumen saré tumaré vergéndyr, savé javéna pašýl tuménde, i tumé javéna te dživén bi trašakiro (bi darákiro), to tedy, savó štéto vykedéla Raj Devél, Devél tumaró, sob (kaj) te javél lav Léskiro odój, odorík janén saró, so me phenáva tuménge: tumaré céla shačkiribena i tumaré svénta dyibená Ráske-Devléske, tumaré dešengirja (diesiatiny) i tumaré vastengiro ĥazdypen, i saró, so isyn vykedymo fedýr pir tumaré sovela, pal so tumé dyné lav Ráske-Devléske; i radynénpe angíl Raste-Devléste, Devléste tumareste, tumé i tumaré čhavé, i tumaré čhaja, i tumaré pishárja, i tumaré pisharicy, i Lievito, savó isyn maškirál tumaré kherá, pal-dová so nane léske paš i mištypnáskiri miéra tuménca. Rakhpe te janes tyró célo shačkiribén pe kažno štéto, savó tu dykhésa; ne pe jekh pe dová štéto, savó vykedéla Raj Devél dre jekh tyré rodycóstyr, jan tyró célo shačkiribén, i ker saró, so Me rakiráva túke. Ne kóli zakaméla di tyró, túke saštý (možna) te začhines i te xas, pir Ráskire-Devléskiro, tyré Devléskiro bahtiakiribén, mas, savó Jov dyjá túke, dre saré tyré kherá: nažužo i žužó saštý (možna) te xan davá, syr sierna i syr olienjos; iekh rat na xan: pe phuv vyčhuven les, syr paní. Naštý túke te xas dre tyré kherá dešengirja tyré marestyr, i mol (vino) tyrí i jeliejo tyró, i tyré baré murdalengiren (skotoskire) anglatunen i tyré tykné murdalengiren, i saréstyr, pe so isyn tyré sovela, savé tu sovlahadian i janybén pir péskiro iló, i tyré vastengire ĥazdypnastyr; ne xa davá angíl Raste-Devléste, tyré Devléste, pe dová štéto, savó vykedéla Raj Devél, tyró Devél, – tu i tyró čhavó, i tyrí čhaj, i tyró pishári, i tyrí pisharica, i Lievito, i manúš, savó javdiá te dživél dre tyré kherá, i rádynpe angíl Raste-Devléste, tyré Devléste, pal saró, so kerdé tyré vastá. Dykh, na jačkir Lievitos dre saré dyvesá, savé javésa te dživés pe tyrí phuv. Kiéli Raj Devél, Devél tyró, rozbuĥliakirela tyré miéžy, syr Jov rakirdiá túke, i tu phenésa: “Hava me mas”, pal-dová so di tyró zakaméla te xal mas, – to tedy, pir tyré-dieskiri rádyma, xa mas. Kóli dur javéla tútyr dová štéto, savó vykedéla Raj Devél, tyró Devél, sob (kaj) te javél Léskiro lav odój, tedy začhin baré i tykné tyré kheritkoné murdaléndyr, savó dyjá túke Raj Devél, syr me priphendjom túke, i xa dre tyré kherá, pir tyré-dieskiri rádyma; ne xa len adiáke, syr xána sierna i olienjos; adiáke nažužo, syr i žužó saštý (možna) te xan. iekh šylales dykh, sob (kaj) te na xas rat, pal-dová so rat isyn di, i džiibén isyn dro rat, na xa di khetané masesa. Na xa les; vyčhuv les pe phuv, syr paní. Na xa les, sob (kaj) šukár te javél túke i tyré čhavénge paló (poslie) túte, kóli tu javésa te kerés čačipén angíl Ráskire-Devléskire jakhá. Jekh sventymi tyré, savé isyn túte, i tyré sovela jan, i jav pe dová štéto, savó vykedéla Raj Devél. I jan célo shačkiribén tyró, mas i rat, pe Ráskire-Devléskiro, tyró Devléskiro altárjo; ne rat javire tyré sventoné janybnastyr Ráske-Devléske trej, sob (kaj) te javél pročhudo pašýl Ráskire-Devléskiro, tyré Devléskiro altárjo, a mas xa. Šun i ker saró pir saré dalé lavá, savé me priphenava túke, sob (kaj) šukár te javél túke i tyré čhavénge paló (poslie) túte dro viéko, kóli javésa te kerés, so isyn lačhó i čačunó angíl Ráskire-Devléskire, tyré Devléskire jakhá. Kiéli Raj Devél, Devél tyró tradéla krig manušén tyré móstyr, ke savé tu džása, sob (kaj) te les lofo péske pe lénde, i tu, lyi len, lésa te dživés pe léngiri phuv; to rakhpe, sob (kaj) tu te na poperes dre felý (sietka), adiáke-pac' syr jone, kiéli tu tradesa krig len tyré móstyr, i, sob (kaj) tu na rodyjan léngire devloré, rakirí: “Syr dynarindlé dalé manušýtka nácyi péskire devlorénge, adiáke javáva i me te keráv.” Na ker adiáke Ráske-Devléske, Devléske tyréske dová, pal-dová so saró, sóstyr ginéla syr džungalypén (gidinelape) Raj Devél, so na kaméla Jov, dová jone keréna devlorénge peskirenge: jone i péskire čhavén, i péskire čhajén xačkirena pe jag devlorénge peskirenge. Saró, so me rakiráva tuménge, pričhuvén zor te kerén; tu na pričhúv ke dová i na otle doléstyr. Kóli javéla maškír túte proróko, ci odová, kon piriphenela suné, i sykavéla túke znamiénii (ĥiertyká) ci dívo, i javéla dro čačipén doiá ĥiertýk (znamiénijo) ci dívo, pal savó jov rakirdiá túke, i phenéla: “Javén pal javire devlorende, savén tu na džinésa, i javása te dynarinás lénge”, to tu na šun lavá dalé-prorokoskire, ci adaleskire, kon piriphenela suné; pal-dová so pir davá sprobinela tumen Raj Devél, Devél tumaró, sob (kaj) te džinél, ci drógo isyn tuménge Raj Devél, Devél tumaró saré tumaré ileske i saré tumaré dieske. Džán pal Raste-Devléste, tumaré Devléste, i Léstyr darén; rakhén priphenybená Léskire, i Léskiri zan šunén, i Léske dynarinén, i ke Jov pričhuvenpe; a odolés prorokós ci odolés, kon piriphenela suné te otdén meribnáske pal dová, so jov podrakirelas tumen te otdžan Rástyr-Devléstyr, Devléstyr tumarestyr, Savó vylydžijá tumen Jegiptóskire phuvjátyr, i, Savó vyrakhcia tut pisharibnaskire kheréstyr; ne odová manúš kaméla te riskirél (te zmarel) tut droméstyr, pir savó priphendiá túke te džal Raj Devél, Devél tyró; i adiáke trade krig xolý kokoró péstyr. Kóli javéla te podrakirel tut čorahanés tyró pšal; tyré-dákiro čhavó, ci tyró čhavó, ci tyrí čhaj, ci pe tyró čhuibén romný, ci tyró mal, savó isyn drógo vaš túke syr isyn tyró di, rakirí: “Javén i javása te dynarinás javire devlorénge, savén tu na džindian i tyré dadá”, odolé-manušéngire devlorénge, savé isyn pašýl túte, pašatunen ke tu ci duratunen tútyr, jekhe-phuvjákire jagoróstyr (krajostyr) ke javír, tedy na poddepe léske i na šun les; i mek te na tanginél les tyrí jakh, na tangine les i na sčhakir les, ne muliakir (zamar) les; tyró vast angledýr saréndyr bangó te javél pe léste, sob (kaj) te zamares les, a korigedýr (pozžedýr) saré manušéngire vastá; mar les barénca ke meribén; pal-dová so jov kamdiá te otriskirel tut Rástyr-Devléstyr, Devléstyr tyrestyr, Savó vylydžijá tut Jegiptóskire phuvjátyr pisharibnaskire kheréstyr; i saró Izrailjo šunéla davá, i strahadjola, i na javéna butýr te kerén maškír túte dasavo fuipén. Kóli tu šunesa pal vari-savó tyré for'jéndyr, savó Raj Devél, tyró Devél, déla túke vaš džiibén, so jačné dre léste nadevlytka manušá maškír túte i lydžiné krig manušén léngire foróstyr, rakirí: “Javén i javása te dynarinás javire devlorénge, savén tumé na džindlé”, tedy tu rozrode, dodžin i mištés rosphuč; i kóli davá isyn čačipén, so kerdiápe davá džungalypén (daja brytkima) maškír túte, to phusav andré odolé-foróskire manušén kurtalása (miečosa), otdé prokošybnaske les i saró, so javéla dre léste, i kheritkoné murdalén (skoto) leskiren phusav andré kurtalása; a saró doresybén léskiro skéde maškír léskiri foruný (plóšča), i shačkir jagása fóro i saró léskiro doresybén dro célo shačkiribén Ráske-Devléske, Devléske tyréske, i mek te javél jov saró viéko dro rosčhurdypen, naštý nikieli nevéstyr te kerés les; nisó, so isyn prokošnó, mek te na pričhuvelpe ke tyró vast, sob (kaj) te tykniakirel Raj Devél Péskiri xolý, i te del túke tangipén, i te promangel tut, i te sozdel tútyr butýr manušén, syr Jov sovlahadiá tyré dadénge, kóli tu javésa te šunés Ráskire-Devléskiri, tyré Devléskiri zan (glos), rakhi saré Léskire priphenybená, savé akaná rakiráva túke, keri lačhés angíl Ráskire-Devléskire, tyré Devléskire jakhá. Tumé san Ráskire-Devléskire, tumaré Devléskire čhavé; na kerén čhinybena pe tumaré masá, i na občhinen pe čikat balá maškír tumaré jakhá, pal mulénde; pal-dová so tumé san svénta manušá Raste-Devléste, Devléste tumareste, i tumen vykedyjá Raj Devél, sob (kaj) tumé te javén jekh Léskire manušá saré manušéndyr, savé isyn pe phuv. Na xa nisavó magiripén. Ake, isyn kherítka murdalá/skoto [žyvotna-ju.o.], savén tuménge saštý (možna) te xan: guruva, bakré, buznia, olienjo i sierna, i guruv, i lan' (mirga), i zubro, i orikso (bergitko buzno), i kamielopardo (bergitko bakro). Kažno kherítko murdál (skoto), savéste pe kopyto isyn duj kokalki i pe kažna duj kopyty isyn xor rosčhinyben, i savó kherítko murdál žuinela žvačka, dolen xan; iekhe dolen na xan, savé žuinena žvačka i savénde duj kopyty isyn xor rosčhinybnasa: vierbliudos, šušujos i tuškančykos, pal-dová so usajékh so jone žuinena žvačka, pe kopyto lénde nane duj kokalki: nažužé jone isyn vaš tuménge; i balyčen, pal-dová so mek kopyty lénde isyn rosčhinybnasa, ne jone na žuinena žvačka: nažužé jone isyn vaš tuménge; na xan léngiro mas, i pal léngire trúpy na lenpe. I sarén murdalén, savé isyn dro paní, xan sarén, savénde isyn pora i češuia; a sarén dolen, savénde nane pora i češui, na xan: nažužo davá isyn vaš tuménge. Han kažnona žuža čirikliá; ne kadalen léndyr naštý tuménge te xan: orlós (kidós), grifos i morjoskire (derjavéskire) orlós, i koršunos, i sokolos, i kriečetos léskire rodosa, i kažnoné korakos (voronos) léskire rodosa, i strausos, i sova, i čajka, i kaĥnialos (jastriebos) léskire rodosa, i filinos, i ibisos, i liebiedjos, i pielikanos, i sipos, i rybolovos, i caplia, i zujos léskire rodosa, i udodos, i nietopyrjos (vurniaibnytkone karmusos). Saré murdalá, savé vurniana, isyn nažužé isyn vaš tuménge, na xan len. Han kažnona žuža čirikliá. Na xan ni savó muló mas; manušéske javire rigátyr, savó javéla dro tyró kher, otdé léske, jov mek te xal les, ci bikin léske, pal-dová so tumé san manušá svénta Raste-Devléste, tyré Devléste. Na keráv buznores dro thud léskire dakiresa. Otle dešengiri (déšto paš) saré tyré pribaripnastyr dre siemi (ziárki), savé javéna tyré feldatyr kažno berš, i xa angíl Raste-Devléste, tyré Devléste, pe dová štéto, savó Jov vykedéla, sob (kaj) te javél lav Léskiro odój, dešengiri (déšto paš) tyré marestyr, tyré moliátyr (vinostyr) i tyré jeliejostyr, i tyré baré murdaléndyr anglatunen (pervonen) i tyré tykné murdaléndyr, sob (kaj) tu te vysykljos te dares Rástyr-Devléstyr, tyré Devléstyr, pe saré dyvesá. Kóli dlengo javéla vaš túke drom adiáke, so tu na désa ráda te lydžas saró, pal-dová so dur tútyr dová štéto, savó vykedéla Raj Devél tyró, sob (kaj) te čhuvél odój lav Péskiro, i Raj Devél, Devél tyró, bahtiakirdiá tut, tedy paruv davá pe rup, i le rup dro tyró vast, i jav pe štéto, savó vykedéla Raj Devél, Devél tyró; i kin pe davá rup saró, so zakaméla tyró di: guruvén, bakrén, mol, sikiera i saró, so zakaméla tútyr tyró di; i xa odój angíl Raste-Devléste, Devléste tyreste, i rádynpe tu, i tyrí čékar' (siemieistvo). I Lievitos, savó isyn dre tyré kherá, na jačkir, pal-dová so nane léske paš i mištypnáskiri miéra túsa. Syr prodžána trin berš, otle saré dešengirja tyré pribaripnastyr dro dová berš, i čhuv davá dre tyré kherá; i mek javéla Lievito, pal-dová so nane léske paš i mištypnáskiri miéra túsa, i manúš, savó javdiá ke tu, i piroto (sirota), i pivly (udova), savé dživéna dre tyré kherá, i mek te xan i te čaljon, sob (kaj) te bahtiakirél tut Raj Devél, Devél tyró, dro kažno tyré-vastengiri butý, saví tu javésa te kerés. Pe eftáto (bitrinéngiro déšto) berš zmek (darin) vužlypén (dlugo). Te zmekes vužlypén isyn dre dová, sob (kaj) kažno (sváko) manúš, savó déla dro dlugo péskire pašatuneske, te zmekel (te darinel) vužlypén i te na phučelpe péskire pašatunestyr ci péskire pšalestyr, pal-dová so dynó te zmekel vužlypén vaš Ráske-Devléske; manušéstyr javire rigátyr phučpe, a so javéla tyré pšaléste tyreste, zmek léske. Ne nijékh te na javél túte bógo: pal-dová so bahtiakiréla tut Raj Devél pe doiá phuv, saví Raj Devél, Devél tyró, déla túke dre mištypnáskiri miéra, so tu lyjan la syr meknó mištypén, kóli tu javésa te šunés Ráskire-Devléskiri, tyré-Devléskiri zan, i te pričhuves zor te spolnines saré dalé priphenybená, savé me adadyvés rakiráva túke; pal-dová so Raj Devél, tyró Devél, bahtiakiréla tut, syr Jov rakirdiá túke, i tu javésa te des dro vužlypén butenge manušénge, a tu kokoró na javésa te les dro dlugo; i xuláj tu javésa pe buté manušénde, a jone pe túte na javéna xulaja. Kóli javéla túte čororó vari-kon tyré pšaléndyr, pe tyrí phuv, saví Raj Devél, Devél tyró, déla túke, tedy na xoliakir tyró iló i na [na garav-ju.o.] tasav tyró vast angíl tyré čororé pšaléste, ne otčhakir léske tyró vast i de léske dro vužlypén, dykhí pir léskiri trébima, so léske na uhtyléla (nádosi); rakhpe, sob (kaj) te na zadžál dre tyró iló nalačhi duma: “Javéla (poddžála syg) eftáto berš, berš te zmekav vužlypén”, i, sob (kaj) doléstyr tyrí jakh te na kerélpe xoliami ke čororó tyró pšal, i tu te na otphenes léske; pal-dová so jov javéla te del gódla túte ke Raj Devél, i javéla pe túte grého; de léske dro vužlypén, i, kiéli javésa te des léske, naštý, sob (kaj) te tanginél (te žalinel) tyró iló, pal-dová so pal dová bahtiakiréla tut Raj Devél, tyró Devél, dre saré réndy tyré i dro saró, so javéna te kerén tyré vastá; pal-dová so čororé ŭsády (sak) javéna maškír tyrí phuv, paldavá me i rakiráva túke: “Otčhakir vast tyró tyré pšaléske, čororeske tyréske i bogoske tyréske pe tyrí phuv.” Kóli biknelape túke tyró pšal, Judos, ci Judyca, tedy šov berš bangó isyn jov te javél syr dynári túke, a pe eftáto berš otmek les péstyr pe vólia; kiéli javésa te otmekes les péstyr pe vólia, na mek les čhučé (pustone) vasténca, ne de léske tyré stadatyr, tyré gumnostyr i tyré priesostyr: de léske, sósa bahtiakirdiá tut Raj Devél, Devél tyró: rípir, so i tu sánas pisharisa pe Jegiptóskiri phuv, i zrakhciá tut Raj Devél, tyró Devél, paldavá me adadyvés i rakiráva davá túke. Kóli jov phenéla túke: “Na džáva me tútyr, paldavá so tu mánge san drógo i tyró kher”, pal-dová so mištó isyn léske túte, tedy le jar' (šylo), i prophusav léskiro kan ke vudár; i javéla jov tyró pishári pe viéko. Adiáke ker i tyré dynaricasa. Na gin davá vaš péske pharipnasa, so tu san bangó (musinesa) te otmekes les péstyr pe vólia, pal-dová so jov pal šov berš zakerdia túke dre duj móly butýr syr pleskiriben butiarneske, savó túte sys nalyno; i bahtiakiréla tut Raj Devél, Devél tyró, dre saró, so tu javésa te kerés. Saró anglatunó bijanypnaskiro muršytko, so bijandjola baré tyré baré murdaléndyr i tykné kheritkoné tyré murdaléndyr, otdé Ráske-Devléske, Devléske tyréske: na ker butý pe anglatuné (pervoné) bijanypnaskire guruveste tyreste, i na občhin anglatuné bijanypnaskires tyré tykné kheritkoné murdaléndyr; kažno berš xa davá, tu i tyrí čékar' (siemieistvo) angíl Raste-Devléste, Devléste tyreste, pe štéto, savó vykedéla Raj Devél. Kóli javéla pe léste doš, langalo, ci kororó, ci javír vari-saví doš, tedy na lýdža les dre svénto janybén Ráske-Devléske, tyréske Devléske, ne túke saštý (možna) te xas davá dro kher tyró, žužó i nažužo saštý te xal les, syr sierna (mirga), adiáke-pac' i olienjos. iekh léskiro rat na xa; vyčhuv les pe phuv, syr paní. Dykh patyvása pe čhon Avivo, i svenkin Patradí Ráskire-Devléskiri, Devléskiri tyreskiri, pal-dová so dro čhon Avivo vylydžijá tut Raj Devél, tyró Devél ratý Jegiptóstyr. I začhin Patradí (patraditkone bakrores) Ráske-Devléske, Devléske tyréske, tykné i baré kheritkoné murdalestyr pe štéto, savó vykedéla Raj Devél, sob (kaj) te javél odój lav Léskiro. Na xa lása šutlo (kvasno); eftá (bitrinéngiro deš) dyvesá xa lása opriesnoki, davá isyn maró bidakiro, pal-dová so tu sygnypnasa vygijan Jegiptóskire phuvjátyr, sob (kaj) tu te ripires péskiro vygiibnaskiro dyvés Jegiptóskire phuvjátyr dre saré tyré džiibnáskire dyvesá. Naštý, sob (kaj) te javél túte nisó šutlo dre sarí tyrí mištypnáskiri miéra dre saré eftá dyvesá, i mas, savó tu jandian dre svénto dyibén Ráske-Devléske bel'velié dro pérvo dyvés, nisó naštý te jačélpe ke ránko (ke zlóko). Naštý, sob (kaj) tu te začhines Patradí dro kher, savó Raj Devél, Devél tyró, déla túke; ne pe jekh dová štéto, savó vykedéla Raj Devél, Devél tyró, sob (kaj) te javél odój lav Léskiro, začhin Patradí bel'velié, angíl khameskiro zagiibén, dre dová-pac' časo (cýro), dro savó tu vygijan Jegiptóstyr; i pek i xa pe dová štéto, savó vykedéla Raj Devél, Devél tyró, a pe javír dyvés tu saštý (moginésa) te risjos i te zadžas dre tyré šátry. Šov dyvesá xa priesna maré, a pe eftáto dyvés svénto skedyibén Ráske-Devléske, tyré Devléske; na zalepe butiasa. Eftangirja (siedmicy) otgin péske; le te gines eftá eftangirja dolé dyveséndyr, syr javéla sierpo (čhindló) te ukedel; tedy svenkin svénko eftangir'jengiro Ráske-Devléske, Devléske tyréske, pir zor tyré vasteskiro, ci but tu désa, dykhí pir dová, sósa bahtiakiréla tut Raj Devél, Devél tyró; i rádynpe angíl Raste-Devléste, Devléste tyreste, tu, i tyró čhavó, i tyrí čhaj, i tyró pishári, i tyrí pisharica, i Lievito, savó isyn dro tyró kher, i manúš, savó javdiá, i piroto (sirota), i pivly (udova), savé isyn maškír túte, pe štéto, savó vykedéla Raj Devél, Devél tyró, sob (kaj) te javél odój lav Léskiro; rípir, so i tu sánas pishári dro Jegípto, i rakh, i ker saró pir dalé uphenybená. Svénko kuščengiro ker péste eftá dyvesá, kiéli ukedesa saró tyré šurnatyr (gumnostyr), i tyré priesostyr; i rádynpe pe svénko tyró tu, i tyró čhavó, i tyrí čhaj, i dynári tyró, i dynárica tyrí, i Lievito, i manúš, savó javdiá, i piroto (sirota), i pivly (udova), savé isyn dre tyré kherá; eftá (bitrinéngiro deš) dyvesá svenkin Ráske-Devléske, Devléske tyréske, pe štéto, savó vykedéla Raj Devél, tyró Devél; pal-dová so bahtiakiréla tut Raj Devél, Devél tyró, dre saré tyré butiá, i dro kažno tyré-vastengiro réndo, i tu javésa jekh so te radynespe. Trin móly dro berš saré muršá isyn bangé te javén angíl Ráskire-Devléskiro, tyré Devléskiro muj, pe štéto, savó vykedéla Jov: pe svénko opriesnokengiro, pe svénko eftangir'jengiro i pe svénko kuščengiro; i nikonéske naštý, sob (kaj) te javél angíl muj Ráskire-Devléskiro čhučé vasténca, ne kažno (sváko) te javél dro péskiro vast darosa, dykhí pir Ráskire-Devléskiro, tyré-Devléskiro bahtiakiribén, savó Jov dyjá túke. Dre saré tyré kherá, savé Raj Devél, Devél tyró, déla túke, čhuv péske sendar'jen i rakhibnar'jen pir tyré ródycy, sob (kaj) jone te sendiakiren manušén čačuné sendosa; na pirikrencyn Zakóno, na dykh pe muiá, i na le počastunko (dáro), pal-dová so počastunko korjakirela god'varengire jakhá i pirikrencynela čačunengiro lavá; čačipén, róde čačipén, sob (kaj) tu te javes džidó, i te javél túte phuv, saví Raj Devél, Devél tyró, déla túke. Na počhuv dre phuv vešore vari-savé kaštendyr (drevendyr) pašýl svénto janybnaskiro štéto tyré Ráske-Devléske, savó tu kerésa péske, i na čhuv péske svénto stýlbo [veladín/rošča-r.s.], so drieván xoliakirela Ras-Devlés, Devlés tyrés. Na jan dre svénto dyibén Ráske-Devléske, Devléske tyréske, guruvés, ci bakrés, pe savénde javéla doš, ci vari-savó fuipén, pal-dová so davá isyn magiripén vaš Ráske-Devléske, Devléske tyreste. Kóli lathelape vari-kon maškír túte dre vari-savó tyré kherendyr, savé Raj Devél, Devél tyró, déla túke, murš ci džuvlý, kon keréla čoripén angíl Ráskire-Devléskire, tyré Devléskire jakhá, i phagiréla Léskiro zavieto, i džála, i léla te dynarinél javire devlorénge, i léla te mangélpe lénge, ci khameske, ci čhoneske, ci saré-bolybnáskire čergeniake, so me priphendjom te na kerés, i túke phendló javéla, i tu šunesa, to tedy tu šukár rozrode, i, kóli davá isyn čačipén, kóli kerdó davá magiripén dro Izrailjo, to vylydža odolés muršés, ci odolja džuvliá, savé kerdé davá fuipén, ke tyré vudará (pórty) i mar len barénca ke meribén. Pir duje-jakhitkonengire (svidietieliengiro) lavá, ci triné-jakhitkonengire, bangó isyn te merél manúš, savó isyn sendindlo pe meribén. Ne naštý te otdes les meribnáske pir lavá jekhe jakhitkoneskire (svidietieljoskiro). O jakhitkonengiro vast isyn bangó pérvo te javél pe léste te čhurdel bar angledýr saréndyr, sob (kaj) te domaren les, pal lénde vast saré-manušéngiro; i adiáke trade krig fuipén maškír péste. Kóli pir savó réndo (diélo) vaš túke javéla pharó te rossendiakires maškír rat i rat, maškír séndo i séndo, maškír maribén i maribén, i javéna manušá, savé na javéna dre jekh godý dre tyrí pórta, to tedy uštý i džá pe štéto, savó vykedéla Raj Devél, Devél tyró, i jav ke rašaja, Lievíty, i ke sendári, savó javéla dre dolé dyvesá, i phučpe léndyr, i jone phenéna túke, syr te rossendiakires; i ker pir lav, savó jone phenéna túke, pe dová štéto, savó vykedéla Raj Devél, i pričhúv zor te kerés saró, so jone sykliakiréna tut; pir Zakóno, savéske sykliakiréna jone tut, i pir sendoskiro prirakiriben, savó jone phenéna túke, ker, i na otdža ni pe čačó (pravo), ni pe zérvo (liévo) doléstyr, so jone phenéna túke. A kon keréla adiáke xoliamé muršypnasa, so na kandéla rašás, savó javéla terdó odój pe mangipén angíl Raste-Devléste, Devléste tyreste, ci sendariste, odová manúš isyn bangó te merél, i adiáke trade krig xolý Izrailjostyr; i saré manušá javéna te šunén, i strahadjona, i na javéna butýr te kerén xoliamé muršypnasa. Kiéli tu javésa pe phuv, saví Raj Devél, Devél tyró, déla túke i tu javésa te xulaines lása, i tu lésa te dživés pe láte, i phenésa: “Čhuváva me pe péste kralís, syr javire manušénde, savé isyn pašýl mánde”, to tedy čhuv pe péste kralís, savés vykedéla Raj Devél, Devél tyró; tyré pšaléndyr čhuv pe péste kralís; naštý, sob (kaj) te čhuvés pe péste kralísa manušés javire rigátyr, savó isyn na pšal túke. Jekh, sob (kaj) jov te na ubarjakirel (te na rozlydžal) péske but gren, i te na riskirél manušén dro Jegípto vaš dová, sob (kaj) te ubarjakirel péske butýr gren, pal-dová so Raj Devél phendiá tuménge: “Na risjon butýr dalé dromésa”; i sob (kaj) jov te na skedel péske but romnien, sob (kaj) te na rozmekelpe léskiro iló, i, sob (kaj) rup i suvnakáj jov te na skedel drieván but péske. Ne kiéli jov bešéla pe péskire-kralipnaskiro priestolo, isyn bangó te sčhuvel vaš péske spisko dalé Zakonóskire lylvarjatyr, saví isyn Lieviténgire rašande, i mek davá spisko te javél léste, i mek jov te ginel les dre saré péskire džiibnáskire dyvesá, sob (kaj) te vysykljol te darel Rástyr-Devléstyr, péskire Devléstyr, i te pričhuvel zor te spolninel saré dalé Zakonóskire lavá i dalé uphenybená; sob (kaj) te na phutjol léskiro iló angíl léskire pšalénde, i sob (kaj) jov te na otdžal Zakonóstyr ni pe čačó (pravo), ni pe zérvo (liévo), sob (kaj) jov te javél dluga dyvesá jov pe péskiro kralipén i te javén čhavé léskire maškír Izrailjo. Lieviténgire rašange, saré Lievijoskire rodycóske, na javéla paš i mištypnáskiri miéra Izrailjosa: jone isyn bangé te čaliakirenpe sventoné janybnastyr Ráske-Devléske i Léskire pašésa; i mištypnáskiri miéra na javéla lénge maškír léskire pšalénde: Kokoró Raj Devél isyn léngiri mištypnáskiri miéra, syr rakirdiá Jov lénge. I, ake, so trej te javél čhudo rašange manušéndyr, savé janéna dre svénto dyibén Ráske-Devléske guruvén ci bakrén: jone isyn bangé te otdén rašáske psikó, žandy (paščonki) i kužum (želudko); adiáke-pac' i pérva barjakirdé (načatki) marestyr tyrestyr, moliátyr (vinostyr) tyrjatyr i jeliejostyr tyrestyr, i pérva balytka tyré bakréngire vylnátyr otdé léske, Lievitoske, pal-dová so les vykedyjá Raj Devél, Devél tyró, saré rodycóstyr tyrestyr, sob (kaj) jov te terdjol angíl Raste-Devléste, Devléste tyreste, te dynarinél Ráskire-Devléskire lavésa, kokoró i léskire čhavé dre saré dyvesá. I kóli Lievito javéla jekhe tyré štetóstyr, saré Izrailjoskire-čhavéngire phuvjátyr, jov dživdiá, i javéla pir péskire-dieskiro vykedyiben pe štéto, savó vykedéla Raj Devél, i jov javéla te dynarinél lavésa vaš Ráske-Devléske, péskire Devleskireske, syr i saré léskire pšála, Lievíty, savé isyn terdé odój angíl Raste Devléste, to tedy mek jone te len kadasavé pašá syr javír Lievíty, apríč dová, so jone doresné dadéskire barvalypnastyr, syr jone bikindle les. Kiéli tu zadžasa pe phuv, saví déla túke Raj Devél, Devél tyró, tedy na sykljov te kerés magiripén, savé kerdé odolé manušá: naštý, sob (kaj) te javél túte manúš, savó prolydžala péskire čhavés, ci peskirjá čha pirdál jag, zumakiribnaskiro, drabakiribnari, čovahano, kalé-magitko (obajatieljo), kon vykharela dúhi, znaharjo, mulengiro čovahano; pal-dová so magirdó te javél angíl Raste-Devléste kažno (sváko), kon keréla davá, i pal dalé magiripena Raj Devél, Devél tyró, tradéla krig len tyré móstyr; iav bidošakiro angíl Raste-Devléste, Devléste tyreste; pal-dová so adalé manušá, savén tu tradesa krig, šunéna drabakiribnar'jen pir bolybén (čergeniá), zumakiribnaskiren, a túke na dová dyjá Raj Devél, Devél tyró. Prorokós maškír túte, tyré pšaléndyr, syr man, déla túke Raj-Devél, Devél tyró, Les šunén, – adiáke syr tu mangdian Rástyr-Devléstyr, tyré Devléstyr, pašýl Xorivo pe skedyibnaskiro dyvés, rakirí: “Me butýr na šunava Ráskire-Devléskire, miré Devléskiri zan (glos), i daja bari jag me butýr na dykháv, sob (kaj) mánge te na merav.” I phendiá mánge Raj Devél: “Mištó dová, so jone rakirdé. Me dáva lénge Prorokós léngire pšaléndyr, adasaves syr tu, i čhuváva lavá Miré dre Léskire uštá, i Jov javéla te rakirél lénge saró, so Me phenáva Léske; a kon na javéla te šunél Miré lavá, savé odová proróko javéla te rakirél Miré lavésa, odová otphenéla Mánge. Ne, prorokós, savó javéla murškanó te rakirél Miré lavésa dová, so Me na phendjom léske te rakirél, i savó javéla te rakirél javire-devlorengire lavésa, adasaves prorokós otdén meribnáske.” I kóli phenésa dro iló tyró: “Syr ame udžinasa lav, savó na Raj Devél rakirdiá?” Kóli proróko phenéla Ráskire-Devléskire lavésa, ne lav dová na javéla dro čačipén, i na kerélape, tedy na Raj Devél rakirdiá davá lav, ne rakirdiá davá proróko pir péskiri nahratyma, na dar léstyr. Kiéli Raj Devél, Devél tyró, xasiakiréla manušýtka nácyi (narody), savengiri phuv déla túke Raj Devél, Devél tyró, i tu prilesa meknó mištypén paló (poslie) lénde, i tu lésa te dživés dre léngire fórja i kherá léngire, to vykede (otle) péske trin fórja maškír tyrí phuv, saví Raj Devél, Devél tyró, déla túke te xulaines; ker péske drom, i rosker (rozdielin) pe trin pašá sarí tyrí phuv, saví Raj Devél, Devél tyró, déla túke dre mištypnáskiri miéra; jone javéna vaš našyben svakone (kažnoné) manušéske (umaribnariske). I ĥáda, savó zamaribnari (umaribnari) saštý (moginéla) te našél odorík i te jačélpe džidó: kon zamarela péskire pašatunes nakami, na sys léske vérgo (vrogo) tasiá i tríto dyvés; odová, kon džála péskire pašatunesa dro veš te čingirel kaštá, i zamahninelape léskiro vast toveresa, sob (kaj) te čingirel veš, i peréla sastýr vastorestyr (toveriščatyr) i poperla dre pašatuneste, i jov meréla, adasavó manúš mek te našél dro jekh fóro dolé for'jéndyr, sob (kaj) te jačélpe jov džidó, sob (kaj) manúš, savó javéla te othal pale (te otomstinel) pal rat dre léskiri xolý te na tradelpe pal zamaribnariste (umaribnariste) i te na dotradel les, kóli dur javéla drom, i te na zamarél les, maškír dová, syr jov isyn namol sendoske pe meribén, pal-dová so jov na sys vérgo léske tasiá i tríto dyvés; pir saró me dyjom túke uphenybén, rakirí: “Vykede vaš péske trin fórja.” Kiéli Raj Devél, Devél tyró, keréla baredýr tyrí phuv, syr Jov sovlahadiá tyré dadénge, i déla túke sarí phuv, pal saví Jov dyjá lav te del tyré dadénge, kóli tu javésa te pričhuves zor te kerés saró pir saré dalé priphenybená (dešengirja), pal savé me rakiráva adadyvés túke, te rikires dro iló syr Drógima Ras-Devlés, Devlés tyrés, i te psirés dre saré dyvesá Léskire droménca, tedy ke dalé trin fórja dočhuv iščo (inké) trin fórja, sob (kaj) te na pročhuvelpe rat Manušéskiro, savó na bangó maškír tyrí phuv, saví Raj Devél, Devél tyró, déla túke dre mištypnáskiri miéra, i sob (kaj) te na javél pe túte rateskiri bang. Ne kóli vari-kon javéla vergosa (vrogosa) péskire pašatuneske i javéla te podrakhel les, i ĥazdélape pe léste i zamarla les ke meribén, i našela dro jekh fóro dolé for'jéndyr, tedy léskire-foróskire šeralé isyn bangé te bičhaven, sob (kaj) te len les odothýr i te otdes les dre vastá manušéske, savó othala (otomstinela) pale pal rat, sob (kaj) jov te merél; mek te na tanginél les tyrí jakh; vymor manušéskiro rat Izrailjostyr, savó isyn nabango, i javéla túke šukár. Na piridža miéža tyré pašatuneskire, saví čhudé tyré-dadengíre dadá dre tyrí mištypnáskiri miéra, saví doiaciape túke pe phuv, saví Raj Devél, Devél tyró, déla túke. Na uhtyléla (nádosi) jekhe-jakhitkones (svidietieljos) proti vari-konéste dre vari-saví bang, i dro vari-savó grého, savó jov kerdiá: pašýl duje-jakhitkonengire lavá, ci pašýl triné-jakhitkonengire lavá, javéla réndo. Kóli vyštavela proti konéste načačuno jakhítko, keri les bangesa, to tedy, mek te javén duj adalé manušá, savé čingardenape, angíl Raste-Devléste, angíl rašande i angíl sendar'jende, savé javéna dre dolé dyvesá; sendárja isyn bangé mištés te roskedenpe, i, kóli jakhítko odová javéla xohanó, i xohaibén phendiá pe péskire pšaléste, to kerén léske dová, so jov kamdiá te kerél péskire pšaléske; i adiáke vytrade fuipén péstyr; i javír šunéna, i strahadjona, i na javéna butýr te kerén dasavo fuipén maškír túte; mek te na tanginél les tyrí jakh: di pal di, jakh pal jakh, dand pal dand, vast pal vast, ĥerój pal ĥerój. Kiéli tu vydžasa pe maribén proti tyré vergoste (vrogoste) i tu javésa te dykhés gren i maribnýtka vurdená i manušén butýr syr túte, tedy na dar léndyr, pal-dová so túsa isyn Raj Devél, Devél tyró, Savó vylydžijá tut Jegiptóskire phuvjátyr. I javéla adiáke, kiéli džána tumé pe maribén, tedy mek te poddžál rašái, i te rakirél manušénge, i te phenél lénge: “Šun, Izrailjo! Tumé adadyvés džána pe maribén tumaré vergenca, mek te na khinjol iló tumaró, na darén, na izdran, i na trašadjon léndyr, pal-dová so Raj Devél, Devél tumaró, džála tuménca, sob (kaj) te marélpe pal tuménde tumaré vergenca, i te vyrakhel tumen.” Pričhuvibnarja [barydyrá pe xaladénde-ju.o.], mek te phenén angíl manušénde, rakirí: “Kon čhudiá nevó kher i na neviakirdia les, odová mek te džal i te risjol dro péskiro kher, sob (kaj) jov te na merél pe maribén, i javír manúš te na neviakirel léskiro kher; i kon čhudiá vinagrádniko i na xaja múri léstyr, odová mek te džal i te risjol dro péskiro kher, sob (kaj) jov te na merél pe maribén i javír manúš te na xal múri léskire vinagradnikostyr; i kon angrustyndiape (zarenčyndiape) romniása i na lyjá la, odová mek te džal i te risjol dre péskiro kher, sob (kaj) te na merél pe maribén, i sob (kaj) javír manúš te na lel leskirja romniá.” Pričhuvibnarja [barydyrá pe xaladénde-ju.o.] mek te phenén angíl manušénde, i phenéna: “Kon darla (daréla) i nane murškanó, odová mek te džal i te risjol dro péskiro kher, sob (kaj) jov te na kerél namurškanenca léskire-pšalengire ile, syr léskiro iló.” Kiéli manušá, savé dykhéna, phenéna saró davá manušénge, tedy jone isyn bangé te čhuvés xaladéngire barydyrén, sob (kaj) te lydžán manušén pe maribén. Kiéli poddžasa (javésa pašýl) ke fóro, sob (kaj) te zales les, to čhurde (phen) lav léske pal ramánjo (miro); kóli jov dorakirelape túsa pe ramánjo (miro) i otčhakirela túke vudará, tedy saré manušá, savé isyn dre léste, javéna te pleskiren túke dan' i te dynarinén túke; kóli jov na dorakirelape túsa pe ramánjo i javéla te lydžál túsa maribén, tedy čhuv osada trusciál léste, i kiéli Raj Devél, Devél tyró, otdéla les dre tyré vastá, prophusav léste saré muršén kurtalása; iekhe džuvlién i čhavorén, i kheritkoné murdalén (skoto), i saró, so isyn dro fóro, saró léskiro doresybén le péske, i le syr trej doresybnastyr tyré vergéngire, savén otdyjá túke Raj Devél, Devél tyró; adiáke ker saré for'jenca, savé isyn tútyr drieván dur, savé isyn na adalé-manušéngire fórja. A dre adalé-manušéngire fórja, savé Raj Devél, Devél tyró, déla túke, na jačkir džidó nijékh di. A otdé len prokošybnaske: Xietiejen i Amoriejen, i Xananiejen, i Fierieziejen, i Jeviejen, i Jevusiejen, syr rakirdiá túke Raj Devél, Devél tyró, sob (kaj) jone te na vysykliakiren tumen te kerén dasavé magiripena, savé jone kerdé vaš péskire devlorénge, i sob (kaj) tumé te na kerén grého angíl Raste-Devléste, Devléste tumareste. Kóli baró časo tu javésa te rikires dre osada vari-savó fóro, sob (kaj) les te les, tedy na xasiakir léskiro veš, savéstyr saštý (možna) te čaravespe, i na čhučakir rigá, pal-dová so kašt (drévo) pe félda isyn na manúš, sob (kaj) mogindiá te džal tútyr pe štéto, kaj isyn osada. iekh dolé kaštá, pal savé tu džinésa, so jone ničý na janéna dro xabén, saštý te xasiakires i te čingires, i te kerés zoraló tyno proti fóro, savó lydžála túsa maribén, paka tu zauhtylesa les. Kóli pe phuv, saví Raj Devél, tyró Devél, déla túke, javéla lathno zamardo (umardo) manúš, savó javéla paštó pe félda, i isyn na džindló, kon zamardiá (umardia) les, tedy mek te vydžán phurydyrá tyré i sendárja tyré, i vymierinena štéto for'jéndyr, savé isyn pašýl zamardeste; i phurydyrá dolé foróskire, savó javéla pašyledýr ke zamardo, mek te len reca (ternia gurumnia), pe savjate na kerdé butý, i saví na lydžijá gamo, i mek dolé-foróskire phurydyrá te lydžán dalia reca dre buso (diko) loščýna, saví na sys rospašyndly i na zasieindly, i začhinena odój reca dre loščýna; i javéna rašaja, Lievijoskire čhavé; i saré dolé-foróskire phurydyrá, savé sys pašyledýr ke zamardo, mek te obmoren péskire vastá pe recakiro (terné-gurumniakiro) šeró, saví sys začhindly dre loščýna, i déna te džinén i phenéna: “Vastá amaré na pročhude davá rat, i jakhá amaré na dykhné; vyžužakir (vyčystin) Tyré manušén, Izrailjoskiren, savén Tu, Rajo Dévla, vyrakhcian, i na gin manušénge Tyrenge, Izrailjoske, bang pal pročhudo rat.” I jone vyžužakirenape ratestyr. Adiáke túke trej te otmores péstyr rat manušéskiro, savó na sys bangó, kóli túte isyn pe iló te kerés lačhipén i čačipén angíl Ráskire-Devléskire jakhá. Kiéli tu vydžasa pe maribén proti tyré vergénde (vrogende), i Raj Devél, Devél tyró, otdéla len dre tyré vastá, i lésa len dro pliéno, i tu dykhésa maškír plienonende džuvliá, gožona, i javéla joj pir iló túke la, i zakamesa te les la paloróm, tedy jan la dro péskiro kher, i mek joj te občhinel péskiro šeró i te občhinel péskire naja (nogti), i adáia zlela džuvlý péstyr plienoskiro péskiro uribén, i joj dživéla dro tyró kher, i obrovela péskire dadés i péskire da saró čhon; i paló (poslie) dová tu saštý (moginésa) te zadžas ke joj i te javes láke romesa, i joj iavéla túke romniása; kóli joj korigedýr (pozžedýr) na pokamelape túke, tedy otmek la, karik joj zakaméla, ne na bikin la pal rup i na rískir la dro dynaribén, pal-dová so tu otlyjan patýv i baripén látyr. Kóli vari-konéste javéna duj romniá, jekh kamly, a javír nad, i syr kamly, adiáke i nakamly bijanena léske čhavén, i anglatunó javéla nakamliakiro čhavó, tedy javéla adiáke: syr jov javéla te rozdel péskire čhavénge péskiro mištypén, léske naštý (na moginel) kamliakire-romniakire čhavéske te del pravo pal pervoneste angíl anglatuné-bijanybnaskire čhavéste nakamle romniatyr; ne jov isyn bangó te priĥaljol anglatunesa čhavés nakamle romniatyr, i te del léske duj pašá saréstyr, so léste lathelape, pal-dová so jov isyn anglatunó léskire zorjátyr, léske isyn pravo te javél anglatuné-rodoskiresa. Kóli vari-konéste javéla čhavó nakanduno i buntiaritko, savó na šunéla, so rakiréla léskiro dad i daj léske, i jone sykliakirdé ke dukhá les, ne jov na šunéla len, to tedy léskiro dad i daj mek te len i te janén les ke péskire-foróskire phurydyrá i ke vudará péskire, štetoskire, kaj jone dživéna, i phenéna péskire foróskire phurydyrenge: “Davá amaró čhavó isyn nakanduno i isyn buntiaritko, na šunéla amaré lavá, jov isyn obhaiačo (xála, syr na dre péste) i matiaro”; tedy saré manušá léskire foróskire mek te marén les barénca ke meribén; i adiáke vytrade fuipén péstyr, i saré Izrail'tiáni javéna te šunén, i strahadjona. Kóli vari-konéste lathelape bang, saví mol meribnáske, i jov javéla muliakirdo, i tu ublavesa les pe kašt, to léskiro trúpo naštý, sob (kaj) te rat'kirel pe kašt (drévo), ne ĥarav les dre dová-pac' dyvés, pal-dová so javéla prokošnó angíl Raste Devléste kažno (sváko) manúš, kon isyn ublado pe kašt, i na magir tyrí phuv, saví Raj Devél, Devél tyró, déla túke syr meknó mištypén. Kiéli tu dykhésa tyré-pšaléskire guruvés, ci leskirja bakriá, saví zablendyndia, na mek len, ne rískir len tyré pšaléske. Kóli dur javéla tútyr tyró pšal, ci tu na džinésa les, tedy le len dre péskiro kher, i mek jone javéna túte, paka tyró pšal léla te rodél len, i tedy otdé len léske; adiáke ker i léskire oslosa, adiáke ker léskire uribnasa, adiáke ker kažnoné-tyré-pšaléskire sarésa xasiakirdesa, savó jov xasiakiréla, i savó tu lathesa; naštý túke te otdžas daléstyr. Kiéli tu dykhésa tyré-pšaléskire oslós, ci guruvés leskires, savé pyné pe drom, na jačkir len, ne ĥázde len khetané lésa. Pe džuvliáte naštý te javél murškanó uribén, i murš naštý te ur'jelpe dro džuvlikano uribén, pal-dová so magirdó javéla angíl Raste-Devléste, Devléste tyreste, kažno (sváko) manúš, kon keréla davá. Kóli poperlape túke pe drom čirikliakiri (čirikleskiri) gniázda (kúfo) pe vari-savó kašt (drévo), ci pe phuv čiriklorenca, ci parnorenca, i čirikly-daj bešty pe čiriklorende, ci pe parnore, tedy na le da khetané čhavorenca: mek da, a čhavorén le péske, sob (kaj) túke te javél mištó, i sob (kaj) te javén dluga tyré džiibnáskire dyvesá. Kóli javésa te kerés nevó kher, tedy ker pierily trusciál pe jagóro (pe krajo) pe tyrí stréha (čhakín), sob (kaj) te na lydžas túke rat pe tyr kher, kiéli vari-kon peréla léstyr. Na čhuv dre phuv vinagrádniko péskiro duje-siemiengire sortenca, sob (kaj) te na kerés túke prokošnó saró umaloto mur'jengiro, savé tu čhuvésa dre phuv, khetané péskire vinagradnikoskire barjakirdenca (plodenca). Na pahin (na pharav phuv) pe guruveste i pe osloste khetané. Na uri ídia, kerdy raznone thavendyr, vylnátyr i ĥandladestyr (ljonostyr) khetané. Ker péske kistočki pe štar véngly pe tyró uribén, savésa tu učhakiresape. Kóli kon léla romniá, i zadžála ke joi, i jov léla te bidykhel la, i jov javéla te bangiakirel la dro biladžaipén, i mekéla pal láte nalačhi mavlýn (malva), i phenéla: “Me lyjom adalja romniá, i zagijom ke joi, i na lathjom láte čhaitko”, tedy dad ternin'kone-čhakiro i daj lákiri mek te len i te vylydžan čhaitko dosykaiben ke foróskire phurydyrá, ke pórta (ke vráty); i dad ternin'kone-čhakiro phenéla phurydyrenge: “Čha mirja me otdyjom paloróm adalé manušéske, i akaná jov la na kaméla, i ĥáda, jov bangiakirela la dro biladžaipén, rakirí: ‘Me na lathjom tyré čhate čhaitko.’ I čhuvéna ídia angíl foróskire phurydyrende.” Tedy phurydyrá dolé-foróskiro mek te len romes, i te čhuvén kára pe léste, i te čhuvén pe léste šel šékieli rup namirja (pieni), i te otdén lové dadéske ternin'kone-čhakireske pal dová, so jov mekciá nalačhi mavlýn pal Izrailjoskire čhate; joj mek te jačélpe léskire romniása, i jov naštý (na moginéla) te rozdžalpe lása dro saró péskiro džiibén. Kóli dová, so sys phendló, javéla dro čačipén, i na javéla čhaitko dosykaiben terné džuvliáte (otrokovicate), to ternia džuvliá mek te janén ke lákire-dadéskire kheréskire vudará, i adalé-foróskire manušá zamarena la barénca ke meribén; pal-dová so joj kerdiá ladžaipnaskiro réndo maškír Izrailjo, kerdiá biladžaipén dro péskire-dadéskiro kher; i adiáke vytrade fuipén péstyr. Kóli lathno javéla, so vari-kon sys paštó paloromitkone džuvliása, to trej te otdes meribnáske dujén, i muršés, savó isys paštó džuvliása, i džuvliá; i adiáke vytrade fuipén Izrailjostyr. Kóli javéla terný patyvalý džuvlý angrustiakirdy (zarenčyndly) romeske, i vari-kon dykhelape lása dro fóro i pasjola lása, tedy dujén len janén ke dolé-foróskiri pórta, i zamarén (umaren) len barénca ke meribén: ternia džuvliá (otrokovica) pal dová, so joj na godlyja dro fóro, a muršés pal dová, so jov čhudiá telé patýv péskire-pašatuneskire romniakiri: i adiáke vytrade fuipén péstyr. Kóli vari-kon pe félda dykhelape angrustiakirdiasa (obrenčyndliasa) i, uhtyly la, pasjola lása, te otdén meribnáske jekhe muršés, savó paštó sys lása, a terné džuvliáke ničí na ker; pe láte nane bang ke meribén: pal-dová so davá isyn dová-pac', syr kóli by vari-kon te ĥazdelpe pe péskire pašatuneste i te zamarél les; pal-dová so jov pirilyja la pe félda, i usajékh, kóli terný patyvalý džuvlý angrustiakirdy godlyja, ne na sys konéske te zrakhél la. Kóli vari-kon dykhelape patyvalé džuvliása naangrustiakirdiasa, i uhtyléla la i pasjola lása, i dykhéna len, to tedy murš, savó sys paštó lása, isyn bangó te del patyvalé-džuvliakire dadéske pandždešá šékieli rup, a joj mek te javél léskire romniása, pal-dová so jov čhudiá telé lákiri patýv; saró péskiro džiibén jov naštý (na moginéla) te rozlydžalpe lása. Nikonéske naštý te lel péskire dadéskire romniá i te otčhakirel jagóro (krajo) péskire dadéskire uribnastyr. Konéste rostasade jatry (murškané masá), ci otčhindlo kova, odová naštý (na moginéla) te zadžál pe Ráskire-Devléskire skedyibén. Khelbo (nadadeskiro čhavó) naštý te zadžál pe Ráskire-Devléskiro skedyibén, i déšto ródo léskiro naštý te zadžál pe Ráskire-Devléskiro skedyibén. Amonitianino i Moavitianino naštý (na moginéna) te zadžán pe Ráskire-Devléskiro skedyibén, i léngiro déšto ródo naštý te zadžál pe Ráskire-Devléskiro skedyibén dre viéki, paldavá so jone na strenindle tumen marésa i paniésa pe drom, kiéli tumé giné Jegiptóstyr, i paldavá so jone lyné proti tuménde Valaamos, Vieoroskire čhavés, Pieforostyr Miesopotamijakirestyr, sob (kaj) jov te prokošel tut; ne Raj Devél, Devél tyró, na zakamdiá te šunél Valaamos, i obriskirdia Raj Devél, Devél tyró léskiro prokošybén dro bahtiakiribén túke, pal-dová so tu san drógo Ráske Devléske, tyré Devléske. Na mang lénge ramánjo (miro), i na bahtaliakir len dre saré tyré dyvesá, dro viéko. Na dykh vučipnása (na brydinpe) pe Idumejaninoste, pal-dová so jov isyn tyró pšal; na dykh vučipnása pe Jegiptianinoste, pal-dová so tu sánas javi pe léngiri phuv; a čhavoré, savé lénde bijandjona dro tríto ródo, saštý (moginéna) te zadžán pe Ráskire-Devléskiro skedyibén. Kiéli tu džása dro drom pe tyré vergénde (vrogende), to rakhpe saré čoripnástyr. Kóli túte javéla vari-kon nažužo, so kerdiápe lésa ratý, to mek jov te vydžál javrí stanostyr i te na zadžál dro stáno, a kiéli jačéla bel'vél', to trej léske te obmorel péskire masá paniésa, i syr zadžála kham, to jov moginéla te zadžál pale dro stáno. Štéto isyn bangó te javél túte pal stáno, karik by túke trej te vydžas; apríč tyrí kurtála, trej, sob (kaj) te javél túte rydljovkica; i kiéli javésa te bešes pal stáno, vy'ganav lása ĥanbinori, i nevés zaganav lása tyró nažužypen. Pal-dová so Raj Devél, Devél tyró, psiréla maškír stáno tyró, sob (kaj) te zrakhél tut i te otdél vergén tyrén dre vastá tyré, a paldavá stáno tyró bangó te javél svénto, sob (kaj) Jov te na dykhél túte vari-so nažužo, i te na otdžal tútyr. Na vyde pisharís léskire xuláske, kiéli jov prastala sarésa ke tu péskire xulastyr; mek jov te dživél túte, maškír tuménde pe štéto, savó jov vykedéla dro vari-savó tyré for'jéndyr, léske javéla pir iló; na pritasav les. I, sob (kaj) te na javél biladžakuny džuvlý Izrailjoskire čhajendyr, i naštý, sob (kaj) te javél biladžakuno murš Izrailjoskire čhavéndyr. Na jan lové biladžakuné-džuvliakire i timín džukleskiri dre Ráskire-Devléskiro, tyré Devléskiro Kher, ni pir saví sovél, pal-dová so adalé dujdžiné isyn magiripén angíl Raste-Devléste, tyré Devléste. Na de dro kófo (tel procento) pšaléske tyréske ni rup, ni maró, ni vari-so javír, so saštý te otdes dro kófo, iavire rigátyr manušéske de dro kófo, a tyré pšaléske na de dro kófo, sob (kaj) Raj Devél, Devél tyró, te bahtiakirél tut dre saró, so kerélape tyré vasténca, pe phuv, pe saví tu džása, sob (kaj) te les la péske. Kóli tu désa sovél Ráske-Devléske, Devléske tyréske, sýges ker ke kónco (ke jagóro) les, pal-dová so Raj Devél, Devél tyró, phučela pal léste tútyr, i pe túte javéla grého; kóli tu na dyján sovél, tedy na javéla pe túte grého. So vygijá tyré uštendyr, rakh i ker ke kónco (ke jagóro) adiáke, syr tu dyján lav Ráske-Devléske, Devléske tyréske, pir péskiri vólia, savó phendián tu péskire ušténca. Kiéli zadžasa tu dro vinagrádniko tyré pašatuneskiro, tu saštý (moginésa) te xas múri čalés, ci but kaméla tyró di, a dro khoró (sasudo) tyró na čhuv. Kiéli tu javésa pe žatva (sčhinyben) tyré pašatuneskiri, kuš kolosy vasténca tyrenca, ne sierpo (čhindló) na jan pe žatva tyré pašatuneskiri. Kóli vari-kon léla romniá i jačéla lákire romesa, i joj na lathéla láska dre jakhá léskire, pal-dová so jov lathéla dre láte vari-so džungaló (brytko), i čhinela láke rozgiibnytko lyl, i déla láke dre vastá, i otmekéla la péskire kheréstyr, i joj vydžála léskire kheréstyr, džála, i džála pal javiréste paloróm, ne i adavá palatunó (posliednjo) rom roskamela la, i čhinela láke rozgiibnytko lyl, i déla láke dre vastá, i otmekéla la péskire kheréstyr, ci meréla adavá palatunó rom lákiro, savó lyjá la paloróm, to tedy naštý, sob (kaj) anglatunó (pérvo) lákiro rom, savó otmekciá la, nevéstyr te lel la péske syr romniá, pal-dová, syr joj iaciá magirdy, pal-dová so davá isyn magiripén angíl Raste-Devléste, i na magir phuv, saví Raj Devél, Devél tyró, déla túke dre mištypnáskiri miéra. Kóli vari-kon lyjá romniá naĥara, tedy jov mek te na džal pe maribén, i nisavó bangipen naštý te čhuvén pe léste; mek jov te jačélpe vól'no dro kher péskiro jekh berš i te radynélpe péskire romniása, savjá lyjá. Nikón naštý te lel dre symadý (zalogo) upratuno i telatuno žernovo (beledin), pal-dová so adasavó manúš léla dre symadý manušýtko di. Kóli vari-konés lathéna, so jov čordia vari-konéstyr péskire pšaléndyr, Izrailjoskire čhavéndyr, i kerdiá pisharisa les, i bikindia les; tedy adasaves čores trej te otdén meribnáske; adiáke vytrade fuipén péstyr. Dykh dro fránso (jazva) prokazakiro, rakh mištés i ker saró pir Zakóno, savéske vysykliakirena tumen rašaja, Lievíty; mištés kerén, so me rakirdjom lénge; rípir, so Raj Devél, Devél tyró, kerdiá Mariamake pe drom, kiéli tumé giné Jegiptóstyr. Kóli tu désa tyré pašatuneske vari-so dro vužlypén (dlugo), tedy na psir ke jov dro kher, sob (kaj) te les vužlypén léstyr, a terdjov pe vulíca (pe gása), a odová manúš, savéske tu dyján dro vužlypén, vylydžala túke péskiri symadý (zalogo) pe gása; kóli jov javéla manúš čororó, to tu na pasjov te soves, kóli túte isyn léskiri symadý: rískir léske symadý (zalogo) angíl khameskiro zagiibén, sob (kaj) jov te pasjol te sovél dre péskiri ídia i te bahtiakirél tut, i túke javéla davá dro čačipén angíl Raste-Devléste, Devléste tyreste. Na pritasav manušés, savó isyn túte syr andynarščyko (prilyno pe butý), čorores i bogos, tyré pšaléndyr, ci tyré manušéndyr, savé javné javire rigátyr, savé dživéna pe phuv tyrí, dre tyré kherá; dro dová-pac' dyvés otdé pleskiriben léske, sob (kaj) kham te na zadžál angíl davá, pal-dová so jov isyn čororó, i užakiréla léskiro di les; sob (kaj) jov te na del gódla pe túte ke Raj Devél, i te na javél pe túte grého. Pe dadende naštý te čhuvés kára meribnasa pal léngire čhavénde, i pe čhavénde naštý te čhuvés kára meribnasa pal dadende, kažno (sváko) isyn bangó te javél meribnáske pal péskiro grého. Na sendiakir xohanés manušés, savó javdiá javire rigátyr i pirotos (sirotas); i pivliatyr (udovatyr) na le ídi dre symadý; rípir, so i tu sánas pisharisa dro Jegípto, i Raj Devél vyrakhcia tut odothýr: paldavá me i rakiráva túke te kerés davá. Kiéli tu javésa te čhines telé giv pe félda tyrí i bistresa ĥarbo (snopo) pe félda, na risjov te les; mek jov te jačélpe manušéske, savó javdiá javire rigátyr, pirotoske (sirotaske) i pivliake (udovake), sob (kaj) Raj Devél, Devél tyró, te bahtiakirél tut dre saré tyré vastengire réndy. Kiéli javésa te obmares maslina tyrí, tedy na piridykh pal péste randiá (vétki): mek te jačélpe manušéske, savó javdiá javire rigátyr, pirotoske i pivliake. Kiéli javésa te les péske múri dre tyró vinagrádniko, na skéde dová, so jačélape pal péste: mek te jačélpe manušéske: savó javéla javire rigátyr, pirotoske (sirotaske) i pivliake (udovake); i rípir, so i tu sánas pisharisa pe Jegiptóskiri phuv: paldavá me i rakiráva túke te kerés adiáke. Kóli javéla sendytko réndo maškír manušénde, tedy mek te janén len pe séndo i te rossendiakiren len, manušés, savó isyn na bangó, mek les te otbičhaven, a kon javéla bangó, mek les te sendiakiren; i kóli manúš, savó sys bangó javéla mol maribnaske (dabenge), tedy mek sendári te phenél te čhuvén les i te marén les pašýl péste, dykhí pir léskiri bang, pir ginybén; štardešá móly saštý (možna) te des léske, ne na butýr, sob (kaj) baré maribnastyr pšal tyró te na javél zamardo angíl tyré jakhá. Na zamuzdyn muj guruveske, kiéli jov molotinela. Kóli pšála dživéna khetané, i jekh léndyr meréla, i na sys léste čhavés, tedy muleskire-pšaleskiri romný naštý te vydžál paloróm pal javire manušéste, ne divierjo lákiro isyn bangó te džal ke joj i te lel la paloróm, i te dživél lása, i anglatunó pérvo bijáto (tyknomas), savés joj bijanéla, jačélape léskire-muleskire pšaléskire lavésa, sob (kaj) léskiro lav te na xasjol dro Izrailjo. Kóli jov na zakaméla te lel paloróm peskirjá pšaléskire romniá pivlia, tedy bori léskiri džála ke pórta (ke vráty), ke phurydyrá, i phenéla: “Divierjo miro otphenelape te riskirél péskire pšaleskiro lav dro Izrailjo, na kaméla te lel man paloróm”; tedy léskire foróskire phurydyrá isyn bangé te kharén les i te dorakiren les, i kóli jov terdjola i phenéla: “Me na kamám te lav la”, tedy bori léskiri te džal ke jov angíl phurydyrengire jakhá, i zlela léskiri tyrah léskire ĥerjatyr, i čungardela léske dro muj, i phenéla: “Adiáke keréna manušésa, savó na čhuvéla pale ródo péskire pšaléskire kheréske”, i déna léske lav dro Izrailjo: “Kher rozurideskiro.” Kiéli marenape maškír péste duj muršá, i romný jekheskiri poddžála, sob (kaj) te otlel romes péskires manušéskire vasténdyr, savó marla les, i, vytyrdyi péskiro vast, uhtyléla les pal ladžavo štéto, tedy otčingir láke vast: mek te na tanginél la jakh tyrí. Dre tyrí sakva (sumka) naštý, sob (kaj) te javél duj giri, bari i tykny; dro tyró kher naštý, sob (kaj) te javél duj efy, bari i tykny; giria túte musinela te javél čačipnaskiri i čačuný, i efa túte trej, sob (kaj) te javél čačipnaskiri i čačuný, sob (kaj) te javén dluga dyvesá tyré pe phuv, saví Raj Devél, Devél tyró, déla túke; pal-dová so magirdó javéla angíl Raste-Devléste, Devléste tyreste, kažno (sváko) manúš, savó keréla xohaibén. Rípir, syr kerdiá túsa Amaliko pe drom, kiéli tumé giné Jegiptóstyr: syr jov strenindia tut pe drom, i mardia sarén palál pal túte, savé sys bizorjákire, kiéli tu khinyjan i jacián bizorjákiro, i jov na zadarandyja Devléstyr; i paldavá, kiéli Raj Devél, Devél tyró, štyliakirela tut saré tyré vergéndyr saré rigéndyr, pe phuv, saví Raj Devél, Devél tyró, déla túke dre mištypnáskiri miéra, sob (kaj) te les la, zle (skhos) ripiribén Amalikoskiro tel bolybnástyr; na bistyr. Kiéli tu javésa pe phuv, saví Raj Devél, Devél tyró, déla túke dre mištypnáskiri miéra, i javésa te les la, i lésa te dživés pe láte; tedy le pérva saré barjakirdé (plódy) phuvjákire, savé tu doresesa tyré phuvjátyr, saví Raj Devél, Devél tyró, déla túke, i čhuv dro khudo (korzina), i džá pe dová štéto, savó Raj Devél, Devél tyró, vykedéla, sob (kaj) te javél odój lav Léskiro; i jav ke rašái, savó javéla dre dolé dyvesá, i phen léske: “Adadyvés me rosphenava angíl Raste-Devléste, Devléste tyreste, so me zagijom pe daja phuv, saví Raj Devél sovlahadiá amaré dadénge te del aménge.’” Rašáj léla khudo tyré vastéstyr, i čhuvéla les angíl Ráskire-Devléskiro, tyré Devléskiro altárjo. Tu otphen i phen angíl Raste-Devléste, Devléste tyreste: ‘Dad miro sys Aramejanino, savó lodyja, i gijá dro Jegípto i lyjá te dživél odój nabute manušénca, i vyginé odój léstyr baré manušá, zoralé i but; ne Jegiptiáni kerdé fuipén aménge, i pritasavenas amen, i čhuvénas pe aménde pharé butiá; i dyjam ame gódla ke Raj Devél, Devél amaré-dadéngiro, i šundiá Raj Devél amarí gódla, i dykhciá amarí bída, butý amarí i pritasaiben amaró; i vylydžijá amen Raj Devél Jegiptóstyr zoralé vastésa i protyrdyne psikesa, baré strahasa, znamienijénca (ĥiertykénca) i divenca, i jandiá amen pe davá štéto, i dyjá aménge daja phuv, phuv pe saví thadéla thud i avgín; i adiáke, me jandjom pérva barjakirdé (načatki plodengire) phuvjátyr, saví Tu, Rajo Dévla, dyján mánge.” I čhuv davá angíl Raste-Devléste, Devléste tyreste, i pokloninpe (ker šerésa) angíl Raste-Devléste, Devléste tyreste, i rádynpe pal saró lačhipén, savó Raj Devél, Devél tyró, dyjá túke i kheréske tyréske, tu i Lievito, i manúš, savó javdiá javire rigátyr, savó javéla túte. Kiéli tu otlesa (končynesa te otčhuves dre rig) saré dešengirja (dešta pašá), so déla tyrí phuv pe tríto berš, dešengiro berš, i otdesa Lievitoske, manušéske, savó javdiá javire rigátyr, pirotoske (sirotaske) i pivliake (udovake), sob (kaj) jone te xan dre tyré kherá i te čaljon, to tén'či phen angíl Raste-Devléste, Devléste tyreste: “Me vykedyjom miré kheréstyr svénta dešengirja, i otdyjom len Lievitoske, manušéske, savó javdiá javire rigátyr, pirotoske i pivliake, pir saró Tyró uphenybén, savó Tu rakirdian mánge: me na pirigijom Tyré priphenybená i na bistyrdjom; me na xajom látyr dre túga mirí, i na otčhudjom dro rig la dro nažužakiriben, i me na dyjom látyr vaš muleske; me kandyjom Ráskire-Devléskiri, miré Devléskiri zan, kerdjom saró, so Tu priphendian mánge. Podykh Tyré sventoné štetóstyr, bolybnástyr, i bahtiakir Tyré manušén, Izrailjoskiren, i phuv, saví Tu dyján aménge, syr Tu sovlahadian dadénge amarenge te des aménge phuv, pe saví thadéla thud i avgín.” Dre davá dyvés Raj Devél, Devél tyró, priphenela túke te kerés saró pir dalé uphenybená i dalé zakóny: rakh i ker ke kónco (ke jagóro) len saré tyré iléstyr i saré tyré diestyr. Ráske-Devléske Tu phendián akaná, so Jov javéla tyré Devlésa, i so tu javésa te psirés Léskire droménca i te rakhés Léskire uphenybená, i priphenybená Léskire, i zakóny Léskire, i te kandes (te šunés) Léskiri zan (glos). I Raj Devél adadyvés čhudiá Léskiri zor pe davá, syr Jov dyjá lav túke, so tu javésa jekhe Léskire manušéndyr, kóli tu javésa te rakhés saré Léskire priphenybená, i so jov čhuvéla tut vučedýr saré manušéndyr, savén Jov sozdyjá, pir baripén, pir lav i pir patýv, i so tumé javéna svénta manušá Raste-Devléste, Devléste tyreste, syr Jov rakirdiá.” I rakirdiá Mójza i phurydyrá Izrailjoskire-čhavéngire manušénge: “Kerén ke kónco (ke jagóro) saré priphenybená, savé me rakiráva tuménge akaná. I kiéli tumé piridžana pal Iordáno, pe phuv, saví Raj Devél, Devél tyró, déla túke, tedy čhuv péske baré bará i obmakh len zvjoskasa; i čhin pe dalé bará saré lavá dalé Zakonóskire, kiéli tu piridžasa Iordáno, sob (kaj) te terdjos (te zadžas) pe phuv, saví Raj Devél, Devél tyró, déla túke, phuv, pir saví thadéla thud i avgín, syr rakirdiá túke Raj Devél, Devél tyré-dadéngiro. Kiéli tumé piridžana Iordáno, čhuvén dolé bará, syr me priphenava tuménge adadyvés, pe bérga Gieval [Eval-ju.o.], i obmakhen len zvjoskasa; i ker odój altárjo Ráske-Devléske, Devléske tyréske, altárjo barendyr, na čhuvi pe lénde sastýr; celoné barendyr ker altárjo Ráske-Devléske, Devléske tyréske, i jan pe léste célo shačkiribén Ráske-Devléske, Devléske tyréske, i jan svénto dyibén ramanjono (mírno) Ráske-Devléske, i xa odój, i rádynpe angíl Raste-Devléste, Devléste tyreste; i čhin pe bará saré lavá saré Zakonóskire drieván biciales (jasnes).” I phendiá Mójza i rašaja Lievíty saré Izrailjoske: “Šun i zaripir, Izrailjo: dro davá dyvés tu jacián tyré Ráskire-Devléskire, Devléskire manušytkoné nacyjása (narodosa); i adiáke šun Ráskire-Devléskiri, Devléskire-tyreskiri zan, i ker ke kónco (ke jagóro) Léskire priphenybená i uphenybená Léskire, savé priphendjom Me túke adadyvés.” I rakirdiá Mójza manušénge dro dová dyvés, rakirí: “Adalé manušá isyn bangé te terdjon pe bérga Garizim, sob (kaj) jone te bahtiakiren manušén, kiéli jone piridžana Iordáno: Simieono (Siemjono), Lievijo, Juda, Isaharo, Iosifo (Joza) i Vieniamino; a adalé manušá isyn bangé te terdjon pe bérga Gieval, sob (kaj) te rakirén prokošybén: Ruvimo, Gado, Asiro, Zavulono, Dano i Niefalimo. Lievíty javéna te rakirén zoralés i phenéna zoralé zaniása saré Izrail'tianenge: “Prokošnó javéla odová, kon keréla vyčhindlo ci vyčhudo óbrazo, magiripén angíl Raste-Devléste dová, so kerdé manušéskire vastá, i jov čhuvéla les dro garadó štéto! Saré manušá otphenena zoralés i phenéna: amín'. Prokošnó javéla manúš, savó košela péskire dadés ci peskirjá da! I saré manušá phenéna: amín'. Prokošnó javéla manúš, savó piridžala rigá (miéžy) péskire pašatuneskire! I saré manušá phenéna: amín'. Prokošnó javéla manúš, savó korores zmarela droméstyr! I saré manušá phenéna: amín'. Prokošnó javéla manúš, savó xohanés sendinela manušés, kon javdiá javire rigátyr, pirotos (sirotas) i pivlia (udova)! I saré manušá phenéna: amín'. Prokošnó javéla manúš, savó pasjola péskire-dadéskire romniása, pal-dová so jov otčhakirdiá péskire dadéskire-idiakiro jagóro (krajo)! I saré manušá phenéna: amín'. Prokošnó javéla manúš, savó pasjola vari-savé kheritkoné murdalesa/skotosa [riskiribnaskiresa murdalesa/zvierjosa-ju.o.]! I saré manušá phenéna: amín'. Prokošnó javéla manúš, savó pasjola péskire pheniasa, péskire-dadéskire čhasa ci péskire-dákire čhasa! I saré manušá phenéna: amín'. Prokošnó javéla manúš, savó pasjola sasiasa peskirjasa! I saré manušá phenéna: amín'. Prokošnó javéla manúš, savó čorahanés zamarela (muliakiréla) péskire pašatunes! I saré manušá phenéna: amín'. Prokošnó javéla manúš, savó léla lové, sob (kaj) te zamarél di i te pročhuvel rat, savó isyn nabango! I saré manušá phenéna: amín'. Prokošnó javéla manúš, savó na keréla ke kónco/ke jagóro (na spolninela) lavá saré Zakonóskire, i na javéla te kerél pir lénde! I saré manušá phenéna: amín'. Kóli tu, [kiéli piridžana pal Iordáno-r.s.], javésa te šunés Ráskire-Devléskiri, tyré Devléskiri zan, i javésa rakhunes te kerés saró pir saré Léskire priphenybená, savé me priphenava túke adadyvés, tedy Raj Devél, Devél tyró, čhuvéla tut vučedýr saré manušéndyr pe phuv; i javéna pe túte saré dalé bahtiakiribena, i spolninenape pe túte, kóli tu javésa te šunés Ráskire-Devléskiri, tyré Devléskiri zan (glos). Bahtiakirdó javésa tu dre fóro, i bahtiakirdó javésa pe félda. Bahtiakirdó javéla barjakirdó tyré maséndyr, i barjakirdó (plódo) tyré phuvjákiro, i barjakirdó (plódo) tyré murdalengiro, i barjakirdó tyré guruvengiro, i barjakirdó tyré bakrengiro. Bahtiakirde javéna tyré šurny (žytnicy) i tyré piraliá (kladovki). Bahtiakirdó javésa tu angíl, syr tu zadžasa, i bahtiakirdó tu javésa angíl, syr tu vydžasa. O Raj Devél domarela angíl túte vergén tyrén, savé ĥazdénape pe túte; jekhe dromésa jone vydžána pe túte, eftá droménca jone prastána péske tútyr. Bičhavéla Raj Devél túke bahtiakiribén dre tyré šurny i dro kažno tyré-vastengiro réndo; i bahtiakiréla tut pe phuv, saví Raj Devél, Devél tyró, déla túke. Čhuvéla tut Raj Devél Péskire manušénca sventonenca, syr Jov sovlahadiá túke, kóli tu javésa te rakhés priphenybená Ráskire-Devléskire, Devléskire tyreskire, i javésa te psirés Léskire droménca; i javéna te dykhén saré manušá pe phuv, so lav Ráskire-Devléskiro isyn pe túte i strahadjona tútyr. I déla túke Raj Devél dre saré tyré lačhé réndy saró but, dro barjakirdó (plódo) tyré maséndyr, i dre tyré kheritkoné-murdalengiro barjakirdó, i dre tyré-feldengiro barjakirdó pe phuv, saví Raj Devél sovlahadiá dadénge tyrenge te del túke. Otčhakirela túke Raj Devél lačhí Péskiri kučipnaskiri piralý (sokroviščnica), bolybén, sob (kaj) jov te del bryšýnd tyré phuvjake dro péskiro uliago (pora), i sob (kaj) te bahtiakirél saré réndy tyré vastengire: i tu javésa te des dre dlugo buté manušénge, a kokoró tu na javésa te zales dro vužlypén (dlugo). I keréla tut Raj Devél šerésa, a na porjasa, i javésa tu pe vučipén, a na javésa telé, kóli javésa te priles dre godý (te kerés pir) priphenybená Ráskire-Devléskire, Devléskire tyreskire, savé me priphenava túke adadyvés te rakhés i te kerés saró pir lénde, i tu na otdžasa saré lavéndyr, savé rakiráva tuménge adadyvés, ni pe čačó (pravo), ni pe zérvo (liévo), sob (kaj) te džas palál pal javire devlorende i te dynarines lénge. I javéla adiáke, so kóli tu na javésa te kandes zan Ráskire-Devléskiri, Devléskire tyreskiri i, kóli tu na javésa te pričhuves zor te kerés pir saré Léskire priphenybená i Léskire uphenybená, savé me priphenava túke adadyvés, to tedy javéna pe túte saré prokošybena dalé i lathéna tut. Prokošnó tu javésa dre fóro, i prokošnó tu javésa pe félda. Prokošne javéna šurny tyré i prokošne javéna piraliá (kladovki) tyré. Prokošnó javéla barjakirdó (plódo) tyré maséngiro i barjakirdó tyré phuvjákiro, barjakirdó tyré guruvengiro i barjakirdó tyré bakrengiro. Prokošnó tu javésa angíl zagiibén tyró, i prokošnó javésa angíl vygiiben tyró. Bičhavéla Raj Devél pe túte prokošybén, i piridživipen (konfuzo), i bída pe kažno tyré-vastengiro réndo, savó tu lésa te kerés, paka tu javésa tradyno krig, – i tu syg xasjosa pal nalačhé tyré réndy, pal dová, so tu jačkirdian Man. Bičhavéla Raj Devél pe túte moróvo (meribnytka fránsy), paka tradéla krig Jov tut phuvjátyr, pe saví tu džása, sob (kaj) te les la. Zanasvaliakirela tut Raj Devél šukiasa (čahotkasa), izdrane xačkiribnasa, šylaliasa (lihoradkasa), flokasa (vospalienijasa), zašut'kiribnasa, xačkirdé balvaliasa, i ržavčynasa, i jone javéna te na otmeken tut, paka tu xasjosa. I tyré bolybena, savé isyn uprál pe tyró šeró, kerénape xarkomasa (miediasa), i phuv tel túte sastyresa; zamiést bryšýnd Raj Devél déla túke pylo, i práho bolybnástyr javéla te perél, te perél pe túte, paka tu javésa tradyno krig. Otdéla tut Raj Devél pe meribén (pe xasibén) tyré vergénge (vrogenge); jekhe dromésa tu vydžasa proti lénde, a eftá droménca našesa léndyr; i javésa tu rosčhurdyno te dživés pir saré kralipená pe phuv. I javéna mulé masá tyré xabnasa saré bolybnáskire čiriklienge i riskiribnáskire murdalénge (zvierienge), i na javéla nikón len te ottradel. Zanasvaliakirela tut Raj Devél prokazasa Jegiptoskirjasa, počečujosa (vurgulenca), karostasa i ĥerasa, savéndyr tu na désa ráda te vysastjos. Zanasvaliakirela tut Raj Devél dylnypnasa, kororipnasa i iléskire šumosa. I tu javésa te macynes vastésa te psirés dro pašdyves, syr kororó vastésa te macynel, kiéli psiréla dro kalypén (dre tjomnyma), i túte na javéla baht dre tyré dromá, i javéna te pritasaven tut i te dukhaven tut (te zbidinen tut) kažno dyvés, i nikón na zrakhéla tut. Romniása obrenčynesape (angrustiakiresape) i javír javéla te sovél lása; kher čhuvésa i na javésa te dživés dre léste; vinagrádniko počhuvesa tu dre phuv, i na javésa te les múri léstyr. Guruves tyrés začhinena angíl jakhá tyré, i tu na javésa te xas les; oslós tyrés lydžána krig tútyr, i na otdena pale túke; bakré tyré javéna otdyné tyré vergénge (vrogenge), i nikón na zrakhéla tut. Čhavé tyré i čhaja tyré javéna otdyné javire manušénge; jakhá tyré javéna te dykhén i kažno dyvés te korjon pal lénde, i na javéla zor dre vastá tyré. Barjakirdé (plódy) tyré phuvjákire i saró, so tu kerésa, javéla te xal manušýtko nacyja, savjá tu na džindian; i tu javésa jekh pritasado i menčyndlo dre saré dyvesá. I tu zdžasa godiatyr doléstyr, so javéna te dykhén tyré jakhá. Zanasvaliakirela tut Raj Devél xoliamé prokazasa pe čangá i golieni, savjátyr tu naštý (na zmoginesa) te vysastjos, tyré ĥerjakire podešvatyr ke tyré-šereskiro tiemjo. Lydžála krig Raj Devél tut i kralís tyrés, savés tu čhuvésa pe péste, ke manušá, savén na džindian ni tu, ni dadá tyré, i odój tu javésa te dynarines javire devlorénge, kaštunenge i barunenge; i javésa darása (darjasa), pritčasa i sabnasa maškír saré manušénde, ke savé zalydžala tut Raj Devél. But ziárki (siemi) vylydžasa pe félda, a skedesa nábut, pal-dová so shana len (phakitka skočki) (saranča). Vinagradniki javésa te čhuvés dre phuv i te kerés butý, a mol (vino) na javésa te p'jes, i na skedesa múri léngire, pal-dová so shala len kirmo. Masliny javéna túte dre saré tyré rigá, ne dzetesa (jeliejosa) na pomakhesape, pal-dová so občhuvelape maslina tyrí. Čhavén i čhajén bijanesa, ne na javéla túte len, pal-dová so jone džána dro pliéno. Saré tyré vešá i barjakirdé (plódy) tyré-phuvjákire shala ržavčina (kirnypen). Manúš, savó javdiá javire rigátyr, savó dživéla maškír túte, javéla te barjol pe túte vučedýr, a tu javésa te obmekespe telé i telé. Jov javéla te del túke dro vužlypén (dlugo), a tu na javésa te des dro dlugo léske; jov javéla šeró (šerésa), a tu javésa pori (porjasa). I javéna pe túte saré dalé prokošybena, i javéna te džán pal túte, i lathéna tut, paka tu javésa protradyno pal dová, so tu na šundián Ráskire-Devléskiri, tyré Devléskiri zan, i na rakhcian Léskire priphenybená i uphenybená Léskire, savé Jov priphendiá túke: jone javéna syr ĥiertýk (znamiénijo) i syr uphenybén pe túte i pe tyró ródo dro viéko. Paldová so tu na dynarindian Ráske-Devléske, tyré Devléske, viesjolymasa (lošasa) i radymása i leskirjasa, pal saró pribaripen, i tu javésa te dynarines tyré vergoske (vrogoske), savés bičhavéla pe túte Raj Devél, dre bokh, i smega, i dro nangipén i dro kažno nauhtylyben; jov čhuvéla pe tyrí men sastruno ĥámo adiáke, so zamenčynela tut. Bičhavéla pe túte Raj Devél manušýtko nacyja (narodo) duripnastyr, jagoroskire phuvjátyr: syr órlo (kído) privurniana manušá, savengiri čib tu na galjosa, manušá biladžaipnytka, savé na déna patýv phuré manušéske i na tanginena (na žalinena) ternes; i javéla jov te xal tyré-murdalengire barjakirdé (plódo), i tyré-phuvjákire-barjakirdé, paka keréna čorores tut adiáke, so na jačkirena túke ni maró, ni mol, ni jeliejo, ni tyré-guruvengire barjakirdó, ni tyré-bakrengiro-barjakirdó, paka xasiakirena tut; i javéna te tasaven tut dre saré tyré kherá, paka pe sarí phuv tyrí daja nacyja rosphagirela vučé i zoralé tyré vánty, pe savé tu čhuvésa zor; i javéla te tasavel tut dre saré tyré kherá, pe sarí phuv tyrí, saví Raj Devél, Devél tyró, dyjá túke. I tu javésa te xas barjakirdó tyré maséndyr, loč (plot') tyré-čhavéngiro i čhajengiro tyrengiro, savén Raj Devél, Devél tyró dyjá túke dre osada i dre pritasaiben, dro savó pritasavela tut vérgo tyró. Murš, savó sys niegitko (rozvoliakirdo) i, savó dživdiá maškír tuménde dro baró mištypén, natangipnaskire jakhasa javéla te dykhél pe péskire pšaléste, pe romniáte péskire bregatyr i pe péskire čhavénde, savé jačénape léste, i na déla nijekheske léndyr loč (plot') péskire čhavengiri, savén jov javéla te xal, pal-dová so léste na jačélape ničý dre osada (občhuiben) i dro pritasaiben, dre savó pritasavela vérgo (vrogo) tyró dre saré tyré kherá. Džuvlý, saví dživdiá túte dre niega i mištypén, saví nijékhvar péskire ĥerá na čhudiá pe phuv, pal-dová so dživdiá dre mištypén i niega, javéla natangipnaskire jakhasa te dykhél pe romeste peskireste, i pe čhavéste peskireste, i pe čhate peskirjate, i na déla lénge ločovitko štéto (poslieda), savó vydžála maškír lákire ĥerá, i čhavén, savén joj bijanéla; pal-dová so joi, pašýl nauhtylyben dre saró, čorahanés javéla te xal len, dre osada i dro pritasaiben, dro savó pritasavela tut vérgo tyró dre kherá tyré. Kóli tu na javésa te pričhuves zor te spolnines saré lavá dalé-Zakonóskire, savé sys čhindlé dre daja lylvarí, i tu na javésa te dares dalé slavnone i darane lavéstyr Ráskire-Devléskire, Devléskire tyreskire, to Raj Devél zanasvaliakirela tut i tyró ródo naprostone fujenca (jazvenca), baré i saré fransenca, savé jačénape ĥará (dlúges), i xolynakire nasvalypnenca pe saró časo; i janéla pe túte saré fránsy Jegiptóskire, savéndyr tu darandyjan, i jone prijačena ke tu; i kažno nasvalypen i kažno fránso, savé nane čhindlé dre lylvarí dalé Zakonóskire, Raj Devél janéla pe túte, paka tu javésa tradyno krig; i jačélape tumen nábut, tedy syr tumen sys but, tumé sánas syr bolybnáskire čergeniá, pal-dová so tu na šundián tyré Ráskire-Devléskiri, Devléskiri zan. I javéla adiáke, so syr radyndiape Raj Devél, kiéli kerdiá tuménge lačhipén i kerdiá butýr tumen, adiáke javéla te radynélpe Raj Devél, xasiakiri tumen i tradyi tumen, i javéna vytradyné tumé phuvjátyr, pe saví džása, sob (kaj) te les la. I rosčhurdela te dživél tut Raj Devél pir saré manušénde, jagoróstyr (krajostyr) phuvjakirestyr ke javír jagóro phuvjákiro, i tu javésa odój te dynarines javire devlorénge, savén na džindian ni tu, ni dadá tyré, kašteske i barenge. Ne i maškír adalé manušénde tu na štyljosa, i na javéla štyl štéto vaš tyrí ĥerój, i Raj Devél déla túke odój iló šumosa, dukh jakhengiri i di, savó tuginela. I džiibén tyró javéla ublado angíl túte, i tu javésa te izdras ratý i dyvesé, i na javésa te patias dro džiibén tyró; tyré iléskire darátyr, savésa tu javésa oblyno, i doléstyr, so tu javésa te dykhés tyré jakhénca, rankosa (zlokosa) tu phenésa: “Kóli by te javél bel'vél'!”, a bel'velié phenésa: “Kóli by te jačél zlóko (ránko)!” I riskiréla tut Raj Devél dro Jegípto pe párma (pe korabljo) dolé dromésa, pal savó me phendjom túke: “Tu butýr na dykhésa les”; i odój javéna tumé te biknenpe tumaré vergénge dre pishar'jende i dre pisharicende, i na javéla kinybnaris.” Ake, isyn zavietoskire lavá, savó Raj Devél rakirdiá Mojzáske te čhuvél Izrailjoskire čhavénca pe phuv Moavoskiri, apríč zavieto, savó Raj Devél čhudiá lénca pe Xorivo. I skedyjá Mójza sarén Izrailjoskire čhavén, i phendiá lénge: “Tumé dykhné saró, so kerdiá Raj Devél angíl tumaré jakhá pe Jegiptóskiri phuv faraonosa i saré léskire slugénca (dynar'jénca) i saré léskire phuvjása; dolé baré zlydžaibena, savé dykhné tyré jakhá, i dolé baré znamiénii (ĥiertyká) i dívy; ne ke/žýko davá dyvés na dyjá tuménge Raj Devél iló, sob (kaj) tumé te ĥaljon, jakhá, sob (kaj) te dykhén, i kaná, sob (kaj) te šunén. Štardešá berš lydžijá tumen Raj Devél pir čhučí phuv, i tumaré ídi pe tuménde na roskušnepe i ĥeritka (obuv) tyré na roskušnepe pe tumarí ĥerój; maró tumé na xané, i mol (vino) i sikiera na piné, sob (kaj) tumé te džinén, so Me som Raj Devél, som Devél tumaró. I kiéli javné tumé pe štéto davá, vygijá pe aménde o Sigono, Jesievonoskiro králi, i Ogo, Vasanoskiri králi, sob (kaj) te marénpe aménca, i ame rozmardiam len; i lyjam léngiri phuv, i otdyjam la dre mištypnáskiri miéra Ruvimóskire i Gadóskire rodycóske i pašake Manasijáskire rodycóstyr. Rakhén lavá dalé zavietoskire, i kerén ke kónco (ke jagóro) len, sob (kaj) tuménge te javél baht dro saró, so tumé javéna te kerén. Saré tumé adadyvés san terdé angíl muj Ráskire-Devléskiro, tumaré Devléskiro, tumaré šeralé pe ródycy, phurydyrá tumaré, barydyrá tumaré, saré Izrail'tiáni, tumaré čhavé, tumaré romniá i tumaré manušá, savé javné javire rigátyr, i dživéna dro tyró stáno, manušéstyr, savó čingirela kaštá tyré ke manúš, savó léla paní tyró, sob (kaj) te zadžas túke dro zavieto Ráskire-Devleskiresa, tyré Devleskiresa, i dre dorakiribnaskiri sovláh Lésa, savó Raj Devél, Devél tyró, adadyvés čhuvéla túsa, sob (kaj) Jov te kerél tut adadyvés Léskire manušénca, i Léske te javél túke Devlésa, syr Jov rakirdiá túke i, syr Jov sovlahadiá tyré dadénge Avraamóske, Isaakóske i Jakovóske. Na jekhe tuménca me čhuváva davá zaviéto i davá sovlahado dorakiribén, ne i odolenca, savé adadyvés adáj aménca isyn terdé angíl amaré Ráskire-Devléskiro, Devléskiro muj, adiáke i kodolenca, savé nane adáj aménca adadyvés. Pal-dová so tumé džinéna, syr ame dživdiam pe Jegiptóskiri phuv, i syr ame gijam maškír manušénde, pirdál savé tumé giné, i dykhciam magiripén léngiro i ídoly léngire, kaštune i baruné, rupuvé i suvnakuné, savé sys lénde. Mek te na javél maškír tuménde muršés, ci džuvliá, ci ródo, ci ródyco (čang), savengiro iló te otdžal by (xaj) akaná Rástyr-Devléstyr, Devléstyr amarestyr, sob (kaj) jov te psirél te dynarinél odolé-manušéngire devlorénge; mek te na javél maškír tuménde rukh (kornjo), savó barjakiréla truta (jado) i palyno, i, sob (kaj) te na javél adadyvés manušés, syr adasavó, savó šundiá dalé prokošybnytka lavá, sob (kaj) te šarelpe dre péskiro iló, rakirí: “Me javáva bahtaló, na dykhí pe dová, so Me javáva te psirav pir vykedyiben miré iléskiro”; i adiáke xasjola khetané čalo bokhalesa; na otmekéla Raj Devél adasavé manušéske, ne dová-pac' časo zahačola xolý Ráskire-Devléskiri i mižehipen Léskiro pe odolé manušéste, i peréna pe léste saré dalé zavietoskire prokošybena, savé isyn čhindlé dre daja lylvarí, i léla krig (khosela krig) Raj Devél léskiro lav tel bolybnástyr; i čhuvéla dro rig les adasavé manušés Raj Devél pe xasibén saré Izrailjoskire rodycendyr, khetané saré zavietoskire prokošybnenca, savé isyn čhindlé dre daja lylvarí Zakonoskiri. I phenéla ródo, savó javéla pal tuménde i tumaré čhavé, savé javéna pale tuménde, i manúš javire phuvjátyr, savó javéla duratuné phuvjátyr, dykhí pe dalé-phuvjákiro xasibén i nasvalypen, savénca zamenčynela la Raj Devél: ‘Siera (dzevelia) i lond, shačkiribén pir sarí phuv; joj na sieinelape i na barjakiréla, i na vydžála pe láte ni saví čar, syr paló (poslie) dová, kiéli sys xasiakirdé Sodómo, Gomóra, Adma i Sievoimo, savé xasiakirdiá Raj Devél dre xolý Péskiri, i dre Péskiro mižehipen’. I phenéna saré manušá: “Palsó Raj Devél adiáke kerdiá lása phuvjása? Savó baró mižehipen Léskire xoliátyr!” I phenéna: “Pal-dová so jone mekné zavieto Ráskire-Devléskiro, péskire-dadéngiro Devléskiro, savó Jov čhudiá lénca, kiéli vylydžijá len Jegiptóskire phuvjátyr, i giné, i lyné te dynarinén javire devlorénge, i te mangénpe lénge, devlorénge, savé jone na džindlé, i pal savénde Jov na rakirdiá lénge: paldavá ĥazdyjápe Ráskire-Devléskiri xolý pe daja phuv, i jandiá Jov pe láte saré zavietoskire prokošybena, savé sys čhindlé dre daja lylvarí; i vytradyjá len Raj Devél phuvjátyr dre xolý, dro mižehipen i dre bari xolý i vytradyjá len pe javír phuv, syr akaná dykhasa.” But isyn Raste-Devléste, amaré Devléste čorahanybena (siekriety), savé Jov zaučhakirela (garavela) manušéndyr, so isyn otčhakirdo aménge i amaré čhavénge ke viéko, sob (kaj) ame te kerás saró pir dalé-Zakonóskire lavá. I javéla adiáke: kiéli javéna pe túte saré dalé lavá – bahtiakiribén i prokošybén, savé rakirdjom me túke, i tu lésa len ke péskiro iló maškír saré manušénde, maškír savénde rosčhuvela te dživél tut Raj Devél, Devél tyró, i risjosa tu ke Raj Devél, Devél tyró, i tu kandesa Léskiri zan, syr me rakiráva túke adadyvés, tu i tyré čhavé saré tyré iléstyr i saré tyré diestyr, tedy Raj Devél, Devél tyró riskiréla tyré manušén plienóstyr, i potanginela tut, i nevéstyr skedéla tut saré manušéndyr (narodendyr), maškír savénde Jov rosčhudiá tut te dživél Raj Devél, Devél tyró. Usajékh, kóli b tu te javes rosčhudo ke bolybnáskiro jagóro (ke krajo), i odothýr skedéla tut Raj Devél, Devél tyró, i odothýr léla tut, i janéla tut Raj Devél, Devél tyró, pe phuv, saví sys tyré-dadengiri, i tu doresesa la, i Jov bahtiakiréla tut, i sozdela tútyr butýr manušén, syr sys tyré dadende. I občhinela (paruvela) Raj Devél, Devél tyró, iló tyró i iló tyré-rodoskiro, sob (kaj) túke te javél drógo Raj Devél, Devél tyró, saré tyré iléstyr i saré diestyr tyrestyr, sob (kaj) te dživés túke; tén'či Raj Devél, Devél tyró, saré dalé prokošybena piridela pe tyré vergénde (vrogende) i pe odolénde, konéske tu na san drógo, savé tradyne tut, a tu risjosa i javésa te šunés zan Ráskire-Devléskiri i te kerés saró pir saré Léskire priphenybená, savé me priphenava túke adadyvés. I tén'či butýr déla túke Raj Devél, Devél tyró, dro kažno tyré-vastengiro réndo, dro barjakirdó tyré maséndyr, dro barjakirdó tyré kheritkoné murdaléndyr (skotóstyr), dro barjakirdó tyré-phuvjátyr; pal-dová so nevéstyr javéla te radynélpe Raj Devél pal túte, Jov bahtiakiréla tut, syr Jov radyndiape pal tyré dadende, kóli javésa tu te kandes Ráskire-Devléskiri, tyré-Devléskiri zan, te rakhés Léskire priphenybená i uphenybená Léskire, savé sys čhindlé dre daja Zakonoskiri lylvarí, i kóli risjosa tu ke Raj Devél, Devél tyró, saré ilésa tyresa i saré diesa tyresa. Pal-dová so davá priphenybén (zapovied'), savó me rakiráva túke adadyvés, nane garadó vaš túke i nane dur; jov (priphenybén) na pe bolybén, sob (kaj) te javél saštý (možna) te rakirés: ‘Kon džála upré vaš aménge pe bolybén, i janéla les aménge, i déla aménge te šunas les, i ame spolninasa les?’ i na pal mórjo (derjáv) jov, sob (kaj) te javél saštý te rakirés: ‘Kon psiréla pal aménde pal mórjo (derjáv), i janéla les aménge, i déla aménge te šunas les, i ame kerása saró pir léste?’ Davá lav isyn drieván pašýl ke tu: jov isyn dre tyré uštá i dro tyró iló, sob (kaj) te spolnines les. Dykh, me adadyvés proponindjom túke (čhurdyjom lav angíl túte) pal džiibén i lačhipén, mulypen (meribén) i čoripén. Me, Mójza, savó rakiráva túke adadyvés – te rikires syr Drógima dro iló Ras-Devlés, Devlés tyrés, te psirés pir Léskire dromá, i te kerés saró pir Léskire priphenybená, statúty i zakóny Léskire; i javésa tu dživés i javéla but tumen, i bahtiakiréla tut Raj Devél, Devél tyró, pe phuv, pe saví tu džása, sob (kaj) te les la; ne, kóli otrisjola iló tyró, i tu na javésa te šunés, i zablendynesa, i lésa te mangespe javire devlorénge i tu javésa te dynarines lénge, to tedy me dáva te džinén tuménge adadyvés, so tumé xasjona, i na javéna ĥará (dlúges) pe phuv, sob (kaj) te les la, vaš saví tu piridžasa Iordáno. Sob (kaj) te dosykavav angíl tuménde Me kharáva adadyvés bolybén i phuv: džiibén i mulypen (meribén) me proponindjom túke, bahtiakiribén i prokošybén. Vykede džiibén, sob (kaj) te dživés tu, i ródo tyró, i te rikires syr Drógima dro iló Ras-Devlés, Devlés tyrés, te šunés Léskiri zan i te pričhuvespe ke Jov; pal-dová so dro davá isyn džiibén tyró i dluga tyré dyvesá, sob (kaj) te javes túke gara (dlúges) pe phuv, saví Raj Devél sovlahadiá dadénge tyrenge, Avraamóske, Isaakóske i Jakovóske, te del lénge.” I gijá Mójza, i rakirdiá dalé lavá saré Izrailjoskire čhavénge, i phendiá lénge: “Akaná mánge šel te biš berš, me na davá ráda (na mogináva) te vydžav i te zadžav, i Raj Devél phendiá mánge: ‘Tu na piridžasa Iordáno’; O Raj Devél, Devél tyró, Kokoró džála angíl túte, Jov tradéla adalé manušén tyré móstyr, i tu javésa te les len; Isúso (Johošuá) džála angíl túte, syr rakirdiá Raj Devél; i keréla Raj Devél lénca adiáke-pac', syr Jov kerdiá Sigonosa i Ogosa, Amoriejéngire kral'jenca, i léskire phuvjása, savén Jov tradyjá krig; i otdéla len Raj Devél tuménge, i tumé keréna lénca pir saré priphenybená, savé rakirdjom me tuménge; iavén zoralé-voliakire, i javén murškané, na darén, i na strahadjon léndyr, pal-dová so Raj Devél, Devél tyró, Kokoró džála túsa, i Jov na otdžala tútyr, i na jačkiréla tut.” I khardiá Mójza Isusós (Johošuas) i angíl saré Izrail'tianengire jakhá phendiá léske: “Jav zoralé-voliakiro i murškanó, pal-dová so tu zadžasa adalé manušénca pe phuv, saví Raj Devél sovlahadiá dadénge leskirenge te del léske, i tu roskeresa la pe mištypnáskiri miéra léske; Raj Devél Kokoró džála angíl túte, Kokoró javéla túsa, Jov na otdžala tútyr i na jačkiréla tut, na dar i na strahadjov.” I čhindiá Mójza davá Zakóno, i otdyjá les rašange, Lievijoskire čhavénge, savé lydžánas Ráskire-Devléskiro Zavietoskiro kovčego, i saré Izrailjoskire-čhavéngire phurydyrenge. I dyjá lav lénge Mójza, i phendiá: “Syr prodžána eftá (bitrinéngiro deš) berš, dro otmekibnaskiro berš, pe svénko kuščengiro (budengiro), kiéli saró Izrailjo javéla angíl [Raste-Devléste-ju.o.] Ráskire-Devléskiro, [tyré Devléskiro muj-r.s.], pe štéto, savó vykedéla Raj Devél, de upré (gin zoralés) davá Zakóno angíl saró Izrailjo dro saró šunybén; skéde manušén, muršén i džuvlién, i čhavorén, i tyré manušén, savé javné javire rigátyr, savé javéna dre tyré šátry/budy [pórta-ju.o.], sob (kaj) jone te šunén i te sykljon, i, sob (kaj) jone te darén Rástyr-Devléstyr, tumaré Devléstyr, i te kerén ke kónco/iagóro te pričhuvén zor i te kerén ke kónco/ke jagóro (te spolninen) saré dalé Zakonóskire lavá; i sob (kaj) léngire čhavé, savé na džinéna davá, te šunén i te vysykljon te darén Rástyr-Devléstyr, dre saré dyvesá, paka tumé javéna te dživén pe phuv, pe saví tumé piridžana pal Iordáno, sob (kaj) te les la.” I phendiá Raj Devél Mojzáske: “Ĥáda, dyvesá tyré podginé ke meribén; khar Isusós i terdjon pašýl skedyibnáskiri šátra (skínija), i Me dáva léske uphenybén.” I javné Mójza i Isúso, i terdiné jone pašýl skedyibnáskiri šátra. I javdiá Raj Devél dre šátra, dro oblokoskiro stýlbo, i terdijá oblokoskiro stýlbo pašýl šatrakiro zagiibén. I phendiá Raj Devél Mojzáske: “Ĥáda, tu pasjosa tyré dadénca, i adalé manušá léna te blendynen i te psirén pal javire devlorende dolé-phuvjákire, pe saví jone zadžána, i jačkirena Man, i phagirena Miro zavieto, savó Me čhudjom lénca; i zahačola Mirí xolý pe lénde dro dová dyvés, i Me jačkirava len, i Me garavava Miro muj léndyr, i jone javéna tradyne krig, i lathéna len baré bidy i piridživipena, i phenéna jone dro dová dyvés: “Ci na paldavá lathné amen dalé bidy, so nane Devlés (nane Devél) maškír aménde?” i Me, čačes, garavava Miro muj léndyr dro dová dyvés pal saré léskire fuj réndy, savé jone keréna, gii ke javír devloré. I paldavá čhinen (pisynen) péske dalé-giliakire lavá, i sykliákir láke Izrailjoskire čhavén; i začhuv len te bagán, sob (kaj) daja gilý te javél syr jakhitkima (svidietiel'stvo) pe čhavénde Izrailjoskirende, pal-dová so Me zalydžava len pe phuv, syr Me sovlahadjom léngire dadénge, kaj thadéla thud i avgín, i jone javéna te xan i te čaljon, i javéna thule, i jone džána ke javír devloré, i javéna te dynarinén lénge, a Man mekéna i phagirena Miro zavieto. I kiéli lathéna len baré bidy i piridživipena, tedy daja gilý javéla pe lénde syr dophenybén, pal-dová so joj na vydžála léngire-rodoskire uštendyr. Me džinóm léngiri godý, saví isyn lénde akaná, angledýr syr Me jandjom len pe phuv, pal saví Me sovlahadjom te dav lénge.” I čhindiá o Mójza daja gilý dro dová dyvés, i vysykliakirdia láke Izrailjoskire čhavén. I priphendiá Raj Devél Isusóske (Johošuaske), Navinoskire čhavéske, i phendiá léske: “Jav zoralé-voliakiro i murškanó; pal-dová so tu zalydžasa Izrailjoskire čhavén pe phuv, pal saví Me sovlahadjom lénge, i Me javáva túsa.” Kiéli Mójza dočhindia dre lylvarí saré lavá dalé Zakonóskire ke kónco (ke jagóro), to tedy Mójza phendiá Lieviténge, savé lydžánas Ráskire-Devléskiro zavietóskiro kovčego (mohtó), phení: “Len daja Zakonoskiri lylvarí, i čhuvén la pe čačí (pravo) rig Ráskire-Devléskiri, tumaré Devléskiro kovčego zavietosa, i joj odój javéla dophenybnasa pe túte; pal-dová so me džinóm, so tumé san buntuítka i pharé-ilytka: Ĥáda i akaná, kiéli me dživáva akaná tuménca, tumé san narta (upriama) angíl Raste-Devléste, i iščo (inké) butýr javéna, syr me meráva? Skedén ke me sarén phurydyren pe tumaré ródycy i dykhiibnaskiren (nadziratielien) tumaren, i me phenáva lénge dro saró šunybén dalé lavá, i kharáva dro dophenybén pe lénde bolybén i phuv. Pal-dová so me džinóm, so syr me meráva, to tumé rozmekenape i otdžana droméstyr, savó me dyjom tuménge, i syr prodžála časo (cýro), to lathéna tumen bidy pal dová, so tumé javéna te kerén čoripén angíl Ráskire-Devléskire jakhá, xoliakiri Les péskire vastengire rendénca.” I phendiá Mójza dro saró šunybén angíl Izrail'tianengiro skedyibén dalé-giliakire lavá ke kónco (ke jagóro): “Pričhúv kan, bolybén, so me javáva te rakiráv; i šun, phuv, lavá miré uštengire. Počhuvelape syr bryšýnd miro sykliaiben, syr pahlyn (rosa) lavá miré, syr tyknó bryšýnd pe zelenyben, syr livnjo pe čar: pal-dová so me barjakirava (slavinava) lav Ráskire-Devléskiro; tumé den sláva amaré Devléske. Jov isyn zoralý Tvardyma; Léskire réndy isyn bidošengire, i saré dromá Léskire isyn čačuné. Devél isyn čačunó, i nane načačipén dre Léste; Jov isyn čačunó i patiaibnýtko. Ne jone rozmeknepe angíl Léste, jone nane Léskire čhavé pir péskire doša, ródo léngiro isyn buntuítko i rozmekno. Ci adiáke, so tumé otdena pale Ráske-Devléske, manušá dylyné i bigodiakire? Ci na Jov isyn Dad tyró, Savó sykliakirdiá tut, Savó sozdyjá tut i čhudiá tut? Priripir ĥaratuné dyvesá, dumin pal ĥaratuné rodengire beršá; phuč tyré dadéstyr, i jov rosphenéla túke, tyré phurendyr, i jone phenéna túke. Kiéli Naj Vučedyreskiro délas mištypnáskiri miéra manušénge i rosčhudiá te dživén manušéngire čhavén, to tedy čhudiá Jov miéžy manušéngire pir Izrailjoskire-čhavéngiro ginybén. Pal-dová so Ráskire-Devléskiri paš isyn Léskire manušá, a Jakovo isyn Léskiri miéra dro Léskiro meknó mištypén. Jov lathiá les pe čhučí phuv, pe mal (stiep), saví sys bimanušengiri i naobživdly, rakhciá les, dykhciá pal léste, rakhciá les, syr Péskiri čačí (pravo) jakh; syr órlo (kído) kharéla péskiri gniázda (kúfo), vurniala upré pe péskire čiriklorende, rosčhakirela péskire phaká, léla len i lydžála len pe péskire pora, adiáke-pac' jekh Raj Devél lydžijá les, i na sys Lésa javire devlores. Jov ĥazdyjá les pe phuvjákiro vučipén, i čaliakirdia les dolesa, so barjola pe félda, i paniakirdia les avginesa barestyr i jeliejosa tvardone bergátyr, gurumnitkone ksilesa, i bakrane thudesa, i masesa terné bakrengiresa i Vasanoskire bakrenca i buznenca, i vykedyme pšenicasa (parné tivesa), i tu, Izrailjo, pijan mol (vino), rat vinagradoskire mur'jengiro. I thulyja Izrailjo, i jaciá pharé-ilytko; jaciá thulo, zoralyja i rosthulyja; i jačkirdiá jov Devlés, Savó sozdyjá les, i lyjá nábut te kutiakirel Les, Savó vyrakhcia les. Jone xoliakirena Les javire devlorenca i magiripnasa xoliakirde Les; iandlé svénto dyibén vaš nalačhé dúhi, i na Devléske, a devlorénge, savén jone na džindlé, nevonenge, savé javné susiediendyr, i pal savé na dumindle léngire dadá. Odolés, Kon zaterdija pal túte, Izrailjo, bijandiá tut, tu zabistyrdian, i na priripirdian Devlés, Savó tut sozdyjá. I kiéli Raj Devél dykhciá davá, to Jov i dre xolý mekciá Péskire čhavén i Péskire čhajén, i phendiá Jov: “Garavava Me muj Miro léndyr, i Me javáva te dykháv, savó javéla léngiro kónco (jagóro); pal-dová so jone isyn rozmekno ródo, čhavé, dre savénde nane čačipén. Jone xoliakirde Man léngire nadevlesa, ne péskire idolenca jone xoliakirde Man: i Me len xoliakirava namanušenca, a dylyné manušytkoné nacyjása (narodosa) xoliakirava Me len; pal-dová so jag zahačíia dre xolý Mirí, i joj xačkiréla ke prieispodnjo ke sámo nižnjo liúno (ado), i xála phuv i so isyn pe láte, i xačkiréla bérgi. I Me skedáva bída pe lénde i vymekava pe lénde Miré maribnýtka bustiá (striély): jone javéna khiniakirde bokhasa, xasiakirdé xačkiribnasa i darane fransenca; i Me bičhaváva pe lénde riskiribnáskire murdalengire (zvieriengire) dandá i truta (jado) odolengiri, savé polzynena pir phuv; iavrí javéla te xasiakirél len kurtála, a dre kherá dar – i terné čhavés, i patyvalia čha, i kolynytkone bijatós, i syvone phures. Me phenavas: “Me rosčhurdava te dživén len, i lavá krig (skhosava) maškír manušénde ripiribén pal lénde”; ne Me otčhudjom davá vaš xolý vergengiri, sob (kaj) léngire vérgi te na zaphutjon, i te na phenén: “Amaró vast isyn vučó, i na Raj Devél kerdiá saró davá.” Pal-dová jone isyn manušá, savé xasiakirdé godý, i nane ĥalyibén dre lénde. Ne, kóli by jone te javén godé, to jone duminenas pal saró, i ĥaljonas, so lénca javéla! Sýrby jekh manúš dyjá ráda (mogindiá) te tradelpe pal tysjonco, i duj te tradén krig deš tysjoncy te našén, kóli b léngiro Zaterdibnaskiro (Zastempniko) te na biknel len, i Raj Devél te na otdél len! Pal-dová so zaterdibnaskiro léngiro nane adasavó, syr isyn amaró Zaterdibnaskiro; kokoré vérgi (vrogi) amaré sendárja dre dová. Pal-dová so léngiro vinagrado isyn Sodomóskire-vinagradoskire randiatyr i Gomorakire feldendyr, léngire múri isyn meribnytka, léngire vetkicy mur'jenca isyn kirke; mol (vino) léngiri isyn truta (otrava) drakonengiri i xasibnýtko truta aspidengiri. Ci na garadó davá Mánde? Ci na zaphandlo davá isyn dre Miré rakhibnytka štéty? Mánge te othav pale i te otdav, kiéli obštavelape léngiri ĥerój; pal-dová so syg javéla léngiro xasibnýtko dyvés, syg javéla prigotovindlo vaš lénge. Ne kiéli Raj Devél javéla te sendiakirél Léskire manušén, to Jov potanginela Péskire pishar'jén, pal-dová, so Jov dykhéla, so léngiro vast jaciá bizorjákiro, i na jaciá ni pisharís, ni vol'none manušés. Tedy phučela Raj Devél: “Kaj isyn léngire devloré, zoralý skála [tvierdynia-r.s.], pe saví jone rikirde patiaibén (nadieindlepe), savé xané mas syr svénto dyibén léngiro i piné mol, saví čhuvénas syr janybén léngiro? Mek jone te ĥazdénpe i te pomoginen (te poden vast) tuménge, mek te javén jone vaš tuménge učhakiribnasa! Tumé dykhéna akaná, so davá Me som, Me – i nane Devlés (nane Devél), apríč Mánde: Me muliakirava i otdžidiakirava, Me nasvaliakirava, i Me sastiakirava, i nikón na zrakhéla Miré vastéstyr. Me ĥazdáva ke bolybén vast Miro i rakiráva: “Te dživáv Me dro viéko!” Kiéli vostrinava Me kurtála Mirí ziaindly, i vast Miro priléla séndo, to tedy othava (otdáva) pale Me Miré vergénge, i konéske Me na som drógo, Me otdáva; Me paniakirava Miré maribnýtka bustiá (striély) ratésa, i kurtála Mirí čaliakirelape umardengire masesa, i plienonengire ratésa, šerenca vergéngire barydyrendyr. Radynénpe, Najudýtka nácyi, Léskire manušénca; pal-dová so Jov othala pale pal Péskire-pishar'jengiro rat, i Jov otdéla pale vergénge i Jov vyžužakiréla (vyčystinela) Péskiri phuv i Péskire manušén!” I javdiá Mójza ke manušá i phendiá saré lavá dalé giliatyr dro saró šunybén manušénge, jov i Isúso (Johošuá), čhavó Navinoskiro. Kiéli Mójza piriphendia saré dalé lavá saré Izrailjoske, to phendiá lénge: “Čhuvén pe iló tumaró saré lavá, savé me dyjom te džinén tuménge adadyvés, i piridén len péskire čhavénge, sob (kaj) jone te pričhuvén zor te kerén ke kónco (ke jagóro) saré dalé lavá Zakonóstyr; pal-davá so davá isyn na čhučó sykliakiribén vaš tuménge, ne davá déla džiibén tuménge, i pir davá tumé ĥará (dlúges) javéna pe doiá phuv, pe saví tumé džána pirdál Iordáno, sob (kaj) te zauhtylen la.” I rakirdiá Raj Devél Mojzáske dro dová-pac' dyvés i phendiá: “Džá upré pe daja bérga Avarimo, pe bérga Nievo, saví isyn pe Moavitoskiri phuv, mamúj Jerihóno, i dykh 'gara (dlúges) pe Xanaanóskiri phuv, saví Me dáva dro xulaiben Izrailjoskire čhavénge; i mer pe bérga, pe saví tu ĥazdesape, i pričhuvpe ke tyré manušá, syr myjá Aaróno, pšal tyró, pe bérga Or, i pričhudiape ke péskire manušá, pal-dová, so tumé kerdé grého proti Mánde maškír Izrailjoskire čhavénde pašýl paní Mierivo dro Kadieso, pe čhučí phuv Sin, pal-dová, so jone na rakhne Mirí sventyma maškír Izrailjoskire čhavénde. Tu javésa te dykhés angíl péste phuv, ne tu na zadžasa odorík, pe phuv, saví Me dáva Izrailjoskire čhavénge.” Davá isyn bahtiakiribén, savésa Mójza, manúš Devléskiro, bahtiakirdiá Izrailjoskire čhavén angíl léskiro meribén. Jov phendiá: “O Raj Devél javdiá Sinajostyr, sykadyjá lénge Sieirostyr, Faranoskire bergátyr, i gijá drieván buté sventonenca; jandiá Léskiri jag Zakonóstyr Léskire čačé vastésa. Čačunés Léske isyn dróga Léskire manušá, saré Léskire svénta isyn dro Léskiro [Tyró-r.s.] vast, i jone bešné telál paš Léskire piré (stópy), sob (kaj) te šunén Léskire lavá. Zakóno dyjá aménge Mójza, syr meknó mištypén, Jakovóskire skedyibnaske. I jov sys Izrailjoskiro králi, kiéli skedenaspe manušéngire barydyrá khetané Izrailjoskire rodycenca. Mek te dživél Ruvimo, i mek jov te na merél, i mek te na javél lénde nábut manušá!” Ne pal Judaste phendiá adiáke: “Šun, Rajo Dévla, zan Judaskiri, i jan les ke léskire manušá; péskire vasténca mek jov te zaterdjol pal péste (te broninel pes), i Tu, Rajo Dévla, jav te pomogines proti léskire vergénde.” I pal Lievijoste phendiá: “Te javél tumimo Tyró i urimo Tyró pe sventoné muršeste Tyreste, savés Tu sprobindian dre Masá [Massa-ju.o.], savésa Tu lydžijan čingárd pašýl Mierivakire paniá, savó rakiréla pal péskire dadéste i péskire date: “Me na dykháva pe lénde”, i, savó péskire pšalén na priĥaljola, i péskire čhavén na džinéla; pal-dová so jone, Lievíty, Tyré lavá rakhena, i ke zavieto Tyró rikirenape zoralés, savé sykliakiréna Tyré zakonenge [Zakonoske-ju.o.] Jakovós i Tyré priphenybnenge Izrailjo, jone čhuvéna aromatytka čarjá te thuvliakiren angíl muj Tyró i célo shačkiribén pe altárjo Tyró. Bahtiakir, Rajo Dévla, léskiri zor, i réndo léskire vastengiro, zanasvaliakir trušula (dumitko) odolengire, savé ĥazdénape pe léste i konéske jov isyn na pir iló, sob (kaj) jone te na moginen te terdjon pe ĥerá.” Pal Vieniaminoste phendiá: “Ráskire-Devléskiro drógo čhavó dživéla Léste bidarakiro, Raj Devél déla vast (pomoginela) léske kažno dyvés, i jov otkinjola maškír Léskire miéžy.” Pal Iosifoste (Jozaste) phendiá: “Phuv léskiri isyn bahtiakirdy Rástyr-Devléstyr bolybnáskire pahlyniasa (rosasa) i biezdnakire darenca, savé isyn pašté telál, vykedyné barjakirdesa (plodosa) khamestyr i vykedyné ubarjakiribnasa čhonestyr, samone fededyršone pervoné barjakirdenca phurané bergendyr i vykedyné darenca viečnone bergicendyr, i vykedyné phuvjákire darenca i doléstyr, so pherdiakirela la. Bahtiakiribén Devléskiro, Savó javdiá dro tiernytko xrústo, mek te javél pe šeró Iosifoskiro i pe tiemjo naj fedyršone péskire pšaléndyr. Léskiri zor isyn syr anglatuné-bijanypnaskire guruvoreste, i šyngá (rógi) léskire, syr šyngá guruveskire; lénca zaphusavela jov saré manušýtka nácyi ke phuvjákiro jagóro (ke krajo): davá isyn šelá tysjoncy (t'my) Jefriemóskire, davá isyn tysjoncy Manasijáskire.” Pal Zavulonoste jov phendiá: “Rádynpe, Zavulono, dre tyré dromá, i Isaharo, dre tyré šátry; kharéna jone manušén pe bérga, odój jone čhinena čačuné svénta dyibená Ráske-Devléske, pal-dová so jone čaliakirenape (čaravenape) morjoskire (derjavéskire) barvalypnasa i kučipnenca, savé isyn garadé dro práho.” Pal Gadoste jov phendiá: “Bahtiakirdó isyn odová, kon rozbuĥliakirela Gadoske phuv; jov isyn paštó syr ščer (liévo), i phagiréla i vast, i šeró; jov vykedyjá péske pérvo barjakirdó (načatko) phuvjákiro, odój jov doresciá mištypnáskiri miéra Zakonóskire dyibnaristyr, i javdiá jov manušéngire šeralenca, i kerdiá saró pir čačipén Ráskire-Devléskiro i sendy Izrailjoskire.” Pal Danoste jov phendiá: “Dano isyn ternó ščer (liévo), savó prastala Vasanostyr.” Pal Niefalimoste jov phendiá: “Niefalimo isyn pherdiakirdo radymása i isyn pherdó pe léste bahtiakiribén Rástyr-Devléstyr; mórjo (derjáv) i pašdyves (jugo) isyn léskire.” Pal Asiroste jov phendiá: “Bahtiakirdó te javél maškír čhavénde Asiro, léske javéna te sykavén patýv léskire pšála i obmakninela dre jeliejo léskiri ĥerój; sastýr i xarkóma (mied') – zaphandypena (šybiery) isyn tyré; syr dyvesá tyré, javéla te barjol tyró barvalypén [mištypén-ju.o.]. Nane javire Devlés (nane javír Devél) dro Izrailjo, Savó isyn pir bolybén, Savó javdiá te del vast (te pomoginel) túke, i Savó isyn dre Léskiri sláva pe óbloki; Tyró Raj Devél isyn ĥaratuno štéto te garadjos, i tu san tel viečna vastá; Jov tradéla krig vergén (vrogen) tyré móstyr i phenéla: “Hasiakir len!” Izrailjo dživéla bi darákiro, jekhdžinó; jakh Jakovoskiri dykhéla angíl péste phuv barvaly marésa i moliasa (vinosa), i bolybén léskiro čhuvéla kaplienca (čholynenca) pahlyniatyr (rosatyr). Bahtaló tu san, Izrailjo! Kon isyn adasavó, syr tu san, savés Raj Devél rakhéla, Jov isyn ščýto tyró i kurtála slavake tyrjake. Vérgi tyré poddenape túke, i tu štavesa léngire vučé štéty.” I gijá upré Mójza Moavitoskire loščynendyr pe bérga Nievo, pe Fasgakiro vučipén, so isyn proti Jerihóno, i sykadiá léske Raj Devél sarí phuv Galaadoskiri ke Dano, i sarí Niefalimoskiri phuv, i sarí Jefriemóskiri phuv i Manasijaskiri, i sarí Judaskiri phuv, až ke západno (pal-panitko) mórjo (derjáv), i paš-dyvesýtko (južno) rig, i loščýna pe dólo Jerihóno, Pal'mengiro fóro, ke Sigoro. I phendiá léske Raj Devél: “Ĥáda, isyn phuv, pal saví me sovlahadjom Avraamóske, Isaakóske i Jakovóske, rakirí: ‘Rodoske tyréske Me dáva la’; Me dyjom túke te dykhés la jakhénca tyrenca, ne pe láte tu na zadžasa.” I myjá odój Mójza, pishári Ráskire-Devléskiro, pe Moavitoskiri phuv, pir Ráskire-Devléskiro lav; i ĥaradé les pe dólo pe Moavitoskiri phuv proti Bief-Fiegoro, i nikón na džinéla štéto ĥaraibnytko léskiro až ke davá dyvés. Mojzáske sys šel te biš berš, kiéli jov myjá; ne jakhá léskire na korine, i zor dre léste jaciápe. I rondlé pal Mojzaste Izrailjoskire čhavé pe Moavitoskire loščyny trijánda dyvesá. I proginé roibnytka dyvesá i piridživipen pal Mojzaste. I Isúso (Johošuá), Navinoskiro čhavó, pherdija godiakire duhósa, pal-dová so Mójza čhudiá pe léste vastá péskire, i kandyné les Izrailjoskire čhavé, i kerdé adiáke, syr rakirdiá Raj Devél Mojzáske. I na sys butýr Izrailjoste prorokós adasaves, syr Mójza, savés Raj Devél džindiá muj ke muj, pir, saré znamiénii (ĥiertyká) i dívy, savé bičhadiá les Raj Devél te kerél pe Jegiptóskiri phuv pe faraonoste, i pe saré léskire pishar'jende, i pe sarí léskiri phuv, i pir zoraló vast, i pir baré dívy, savé Mójza kerdiá angíl saré Izrailjoskire jakhá. Kiéli myjá o Mójza (Moisiejo), Ráskire-Devléskiro pishári, Raj Devél phendiá Isusóske (Johošuaske/Ješuaske), Navinoskire čhavéske, Mojzáskire dynaríske: “Mójza, pishári (rabo) Miro, myjá; i adiáke uštý, piridža pir davá Iordáno, tu i saré adalé manušá, pe phuv, saví Me dáva lénge, Izrailjoskire čhavénge. Kažno štéto, pe savó terdjona tumaré piré (stópy) ĥerá, Me dáva tuménge, syr Me phendjom Mojzáske: saré čhučé phuvjátyr i Livanostyr ke reka (len') bari, reka (len') Jevfrato, sarí Xietiejéngiri phuv; i ke baró mórjo (derjáv), ke khameskiro zagiibén (zapado) javéna tumaré miežakire rigá. Nikón na uterdjola angíl túte dre saré tyré džiibnáskire dyvesá; i syr Me sómas Mojzasa, adiáke Me javáva i túsa; Me na otdžava tútyr i na jačkirava tut. Jav zoraló i murškanó; pal-dová so tu adalé manušénge piridesa phuv, saví Me sovlahadjom dadénge lengirenge te dav lénge. Dykh, jav zoraló i drieván murškanó, i lačhés rakh i ker saró pir Zakóno, savó rakirdiá túke Mójza, o pishári Miro; na otdža léstyr ni pe pravo (čačó), ni pe liévo (zérvo), sob (kaj) te te kerés god'vares dre saré tyré réndy (diély). Mek te na otdžal daja Zakonoskiri lylvarí tyré uštendyr; ne sykljov dre láte dyvés i rat, sob (kaj) dre čačipén te kerés ke kónco (ke jagóro) saró, so dre láte čhindló: tedy tu javésa te priles baht dre tyré dromá i javésa te te kerés god'vares. Ĥáda, Me rakiráva túke: jav zoraló i murškanó, na dar i na strahadjov; pal-dová so túsa Raj Devél, tyró Devél, isyn usiendie (viezdie), karik tu na džasas”. I dyjá Isúso uphenybén manušéngire dykhibnar'jenge i phendiá: “Prodžan pir stáno, i den uphenybén manušénge, i phenén: ‘Skedén péske xabén vaš drom; pal-dová so, promeki trin dyvesá, tumé džána pal davá Iordáno, sob (kaj) te javes te les phuv, saví Raj Devél, Devél dadéngiro tumarengiro, déla tuménge dro meknó mištypén (nasliedstvo).’” A rodycóske Ruvimóskire, Gadóskire i pašake (pašeske) Manasijáskire rodycóske Isúso phendiá: “Priripiren, so rakirdiá tuménge Mójza, pishári Ráskiro-Devléskiro: Raj Devél, Devél, tumaró štyliakirdia tumen, i dyjá tuménge daja phuv. Džuvliá tumaré, čhavé tumaré i kherítka murdalá (skoto) tumaró mek te jačénpe pe phuv, saví dyjá tuménge Mójza pal Iordáno; a tumé saré, kon moginéla te marélpe, len mardýtko (oružijo), džán angíl tumaré pšalénde i den vast lénge. Paka Raj Devél štyliakirela tumaré pšalén, syr i tumen; paka i jone doreséna dro meknó mištypén (nasliedstvo) phuv, saví Raj Devél, Devél tumaró, déla lénge. Tedy risjon dro tumaró meknó mištypén, i javén xulanca pe phuv, saví Mójza, pishári Ráskire-Devléskiro, dyjá tuménge pal Iordáno ke khameskiro ŭzgiiben”. Jone dro otphenybén Isusóske phendlé: “Saró, so phenésa aménge, kerása, i karik bičhavesa amen, ame džása. Syr šundiám ame Mojzás, adiáke javása te šunas i tut: jekh Raj Devél, Devél tyró, mek te javél túsa, syr Jov sys Mojzasa. Kažno, kon javéla proti tyró rakiribén i dro saró na javéla te šunél tyré lavá, so tu javésa léske te rakirés, javéla otdynó meribnáske. Dykh, jav zoraló i murškanó! I bičhadiá Isúso, čhavó Navinoskiro, Sitimatyr dujén poddykhibnaskiren čorahanés, i phendiá: “Džán, obdykhen phuv i Jerihóno”. Duj terné manušá giné i javné dre biladžakuniakiro kher, savjakiro lav sys Raav, i jačnépe te rat'kiren odój. I phendló sys Jerihonoskire kralíske: “Ĥáda, vari-savé manušá Izrailjoskire čhavéndyr javné darik dre daja rat, sob (kaj) te vydykhen phuv”. Jerihonoskiro králi bičhadiá te phenén Raavake: “Vyde manušén, savé javné ke tu, savé zaginé dro tyró kher; pal-dová so jone javné te vydykhen sarí phuv”. Ne džuvlý lyjá odolén dujén manušén, i garadia len, i phendiá: “Čačes, sys zaginé ke me manušá, ne me na džindjom, katýr jone sys. Kiéli dro ciamlypén treindiá te zaučhakires vudará, tedy jone giné. Tradenpe sygnedyr pal lénde; tumé dotradena len”. A kokori otlydžija len pe stréha (čhakín) i garadia len dre ljonoskire ĥarby (snopy), savé sys rosčhude láte pe stréha (čhakín). Manušá, savé sys bičhadé, tradynepe pal lénde pir drom ke Iordáno ke sámo pajasli (paromo); vudará dová-pac' časo začhakirdepe, paló (poslie) dová, syr vyginé manušá, savé tradynepe pal lénde. Angledýr, syr jone pasine te soven, joj gijá upré ke jone pe stréha (čhakín). I phendiá lénge: “Me džinóm, so Raj Devél otdyjá daja phuv tuménge; paldavá tumé jandlé pe aménde traš, i saré manušá dalé phuvjákire jačné tuméndyr dre dar. Pal-dová so ame šundiám, syr Raj Devél vyšut'kirdia angíl tuménde Lolé-morjoskiro (derjavéskiro) paní, kiéli tumé giné Jegiptóstyr, i syr tumé kerdé duje Amoriejéngire kral'jenca pal Iordáno, Sigonosa i Ogomosa, savén tumé tradyne. Kiéli ame šundiám pal davá, jaciá bizorjákiro amaró iló, i ni konéste améndyr na jaciá dúho proti tuménde; pal-dová so Raj Devél, Devél tumaró, isyn Devél uprál pe bolybén i pe phuv telál. I adiáke sovlahan mánge Rása Devlésa, so, syr me kerdjom tuménge tangipén, adiáke i tumé keréna tangipén miré-dadéskire kheréske: i den mánge čačuný špéra (znako), so tumé jačkirena džiden dadés mires i da mirja, i pšalén miren, i phenien miren, i sarén, kon isyn lénde, i zrakhena dijá amaré meribnástyr”. Adalé manušá phendlé láke: “Di amaró zamiést tuménde mek te javél otdynó meribnáske, kóli tumé na otčhakirena davá réndo amaró; kiéli Raj Devél otdéla aménge phuv, ame kerása túke tangipén i čačipén”. I zmekhcia joj len pir šelo pir fenštra, pal-dová so kher lákiro sys dre foróskiri vánta, i joj dživdiá dre vánta; I phendiá lénge: “Džán pe bérga, sob (kaj) te na streninen tumen manušá, savé rodéna tumen, i garadjon odój trin dyvesá, paka risjona manušá, savé tradynepe pal tuménde; a paló (poslie) davá džán dre drom tumaró”. I phendlé láke odolé manušá: “Ame javása vol'na tyré sovlahatyr, savjása tu amen sovlahadian, kóli na kerésa adiáke: ĥáda, kiéli ame javása pe daja phuv, tu priphande čiervljono šelo ke fenštra, pir saví tu amen zmekcian, a dadés tyrés i da tyrja i pšalén tyrén, saró tyré-dadéskiro ródo, skéde ke pe dro péskiro kher.” I kóli vari-kon vydžála tyré-kheréskire vudarendyr javrí, odoleskiro rat javéla pe šeró léskiro, a ame javása vol'na saré tyré sovlahatyr; a kon javéla túsa dro tyró kher, odoleskiro rat javéla pe šeró amaró, kóli konéskiro vast čilavéla les. Kóli tu otčhakiresa davá amaró réndo, tedy ame adiáke-pac' vol'na javása tyré sovlahatyr, savjása tu amen sovlahadian”. Joj phendiá: “Mek te javél pir tumaré lavá!” I otmekhcia len, i jone giné, a joj priphandia ke fenštra čiervlieno šelo. Jone giné i javné pe bérga, i sys odój trin dyvés, paka risiné manušá (šale), savé tradynepe pal lénde. Manušá (šale), savé tradynepe, rodyne len pir saró drom i na lathné. Adiáke duj adalé manušá giné pale, giné telé bergátyr, piriginé Iordáno i javné ke Isúso (Johošuá), Navinoskiro čhavó, i piriphendle léske saró, so lénca kerdiápe. I phendlé Isusóske: “Raj Devél otdyjá sarí daja phuv dre amaré vastá, i saré phuvjákire manušá daréna améndyr”. I uštyjá Isúso tasiárles (ránes) pe zlóko, i giné jone Sitimatyr, i javné ke Iordáno, jov i saré Izrailjoskire čhavé, i rat'kirde odój, iščo (inké) na pirigii les. Pirdál trin dyvesá, giné poddykhibnaskire pir stáno, I dyné manušénge uphenybén, rakirí: “Kiéli dykhéna Ráskire-Devléskiro, tumaré Devléskiro zavietóskiro kovčego, i rašán i Lievitén, savé lydžána les, tedy i tumé džán péskire štetóstyr i džán pal léste. Usajékh javéla štéto maškír tuménde i lénde musinel te javél ke duj tysjoncy kuniá (lokti) mierasa: na poddžan ke jov pašýl, sob (kaj) te džinés tuménge drom, pir savó te džas; pal-dová so tumé na psirdé dalé dromésa ni tasiá, ni pe tríto dyvés”. I phendiá Isúso manušénge: “Vysvencynenpe, pal-dová so atasiá keréla Raj Devél maškír tuménde dívy”. Rašange phendiá Isúso: “Len zavietóskiro kovčego i džán angíl manušénde”. Rašaja lyné zavietóskiro kovčego, i giné angíl manušénde. I Raj Devél phendiá Isusóske: “Dro davá dyvés Me láva te slavinav tut angíl saré Izrailjoskire-čhavéngire jakhá, sob (kaj) jone te džinén so, syr Me i sómas Mojzasa, adiáke Me javáva i túsa. A tu de uphenybén rašange, savé lydžána zavietóskiro kovčego, i phen: “Syr zadžána dro Iordanoskiro paní, terdjon dro Iordáno”. Isúso phendiá Izrailjoskire čhavénge: “Javén adarík i šunén Ráskire-Devléskire, tumaré Devléskire lavá”. I phendiá Isúso: “Daléstyr tumé udžinena, so maškír tuménde isyn džidó Raj Devél, Savó tradéla tuméndyr Xananiejen, i Xietiejen, i Jeviejen, i Fierieziejen, i Giergiesiejen, i Amoriejen, i Jevusiejen: ĥáda, saré phuvjákiro Ráskire-Devléskiro zavietóskiro kovčego džála angíl tuménde pir Iordáno. I len péske dešudujen manušén Izrailjoskire rodycendyr, pir jekhéste manušéste rodycóstyr. I syr féni (tóka) rašángire ĥerá, savé lydžána Ráskire-Devléskiro kovčego, saré phuvjákire Xulaskire, terdjona dre Iordanoskiro paní, Iordanoskiro paní xasjola, a paní, savó thadyja uprál paní, dová terdjola vantasa”. I adiáke, kiéli manušá giné péskire šatrendyr, sob (kaj) te piridžan Iordáno, i rašaja lydžiné zavietóskiro kovčego angíl manušénde: to tedy jekh manušá, savé lydžána kovčego zaginé dro Iordáno, i gera rašángire, lydžii kovčego obmeknepe dro Iordanoskiro paní (Iordáno vydžála saré péskire bregendyr dre saré dyvesá, kiéli pšienicakiro ukedyiben), to paní, savó thadéla uprál, terdijá i terdijá vantasa pe drieván baró štéto ke Adamoskiro fóro, savó pašýl Cartano; i savó thadéla dre morjoskiri loščýna, dro Londo mórjo (derjáv), gijá i xasijá. I manušá piridžanas proti Jerihóno; rašaja, savé lydžiné Ráskire-Devléskiro zavietóskiro kovčego, sys terdé pe šukí phuv maškír Iordáno tvardone ĥerjasa. Saré Izrailjoskire čhavé piriginé pir šukí phuv, paka saré manušá piriginé pirdál Iordáno. Kiéli saré manušá piriginé pirdál Iordáno, Raj Devél phendiá Isusóske: “Len péske manušéndyr dešudúj manušén, pir jekhe manušéste rodycóstyr (čangatyr), i den lénge uphenybén i phenén: “Len péske adathýr, maškirál Iordanos, kaj sys terdé tvardes ĥerá rašángire, dešudúj bará, i lydžán len pésa, i čhuvén len pe rat, kaj javéna te rat'kiren dre daja rat”. Isúso khardiá dešudujen manušén, savén vykedyjá Izrailjoskire čhavéndyr, pir jekhe manušéste rodycóstyr; i phendiá lénge Isúso: “Džán angíl Ráskire-Devléskiro, tumaré Devléskiro kovčego, maškirál Iordáno, i len odothýr i čhuvén pe péskiro psikó kažno (sváko) manúš pir jekh bar, pir Izrailjoskire čhavéngire-rodycoskiro ginybén, sob (kaj) jone te javén tuménde syr znamiénii (ĥiertyká). Kiéli phučena tuméndyr dro (časo), savó javéla tumaré čhavé i phenéna: “Ke so tuménde dalé bará?” Tumé phenéna lénge: “Dro ripiribén pal dová, so paní Iordanoskiro rozgijápe angíl Ráskire-Devléskiro zavietóskiro kovčego; kiéli jov gijá pirdál Iordáno, tedy paní Iordanoskiro rozgijápe. Adiáke bará dalé javéna vaš Izrailjoskire čhavénge ripiribnasa pe viéko”. I kerdé Izrailjoskire čhavé adiáke, syr priphendiá Isúso: lyné dešudúj bará Iordanostyr, syr rakirdiá Raj Devél Isusóske, pir Izrailjoskiro čhavéngiro-rodycoskiro ginybén, i jandlé len pésa pe rat, i čhudé len odój. I javír dešudúj bará čhudiá Isúso maškír Iordáno pe štéto, kaj sys terdé rašángire ĥerá, savé lydžiné zavietóskiro kovčego. Jone isyn odój i ke davá dyvés. Rašaja, savé lydžiné kovčego, sys terdé maškír Iordáno, paka kerdó sys saró, so Raj Devél priphendiá Isusóske te phenés manušénge, – adiáke, syr rakirdiá Mójza Isusóske; a manušá dalé časosa bahtales piridžanas. Kiéli saré manušá piriginé Iordáno, tedy pirigija i Ráskire-Devléskiro zavietóskiro kovčego, i rašaja angíl manušénde; I čhavé Ruvimóskire, i čhavé Gadóskire, i paš Manasijáskiro ródyco piriginé angíl Izrailjoskire čhavénde mardytkonenca, syr rakirdiá lénge Mójza. Pašýl štardešá tysjoncy mardytkonenca pe bran' piriginé angíl Raste-Devléste pe Jerihonoskire loščyny, sob (kaj) te marénpe. Dre dová-pac' dyvés barjakirdia Raj Devél Isusós angíl saré Izrailjoskire jakhá, i jačné te darenpe léndyr, syr dardepe Mojzastyr, dre saré léskire džiibnáskire dyvesá. I phendiá Raj Devél Isusóske: “Priphen rašange, savé lydžána kovčego dosykaibnása (otkrovienijasa) te vydžán Iordanostyr”. Isúso priphendiá rašange i phendiá: “Vydžán Iordanostyr”. I kiéli rašaja, savé lydžiné Ráskire-Devléskiro zavietóskiro kovčego, vyginé Iordanostyr, tedy, syr léngire ĥerá terdiné pe phuv, paní Iordanoskiro sýges pothadyja pir péskiro štéto i gijá, syr tasiá i pe tríto dyvés, vučedýr saré péskire bregendyr. I vyginé manušá Iordanostyr pe déšto dyvés pervoné-čhonéskiro, i čhudé stáno dre Galgálo, pe vastočno Jerihonoskiri rig. I dešudúj bará, savé lyné jone Iordanostyr, Isúso čhudiá dro Galgálo. I phendiá Izrailjoskire čhavénge: “Kiéli sphučena dre pérvo časo čhavé tumaré péskire dadyr: ‘So značynena dalé bará?’” Phenén tumaré čhavénge: “Izrailjo pirigija pirdál saró Iordáno pir šukí phuv.” Paldavá so Raj Devél, Devél tumaró, vyšut'kirdia paní Iordanoskiro vaš tumenke, paka tumé piriginé les, adiáke-pac' syr Raj Devél, Devél tumaró, kerdiá Lolé morjosa, savó vyšut'kirdia angíl aménde, paka ame pirigijam les, sob (kaj) saré phuvjákire manušá udžindlé, so vast Ráskire Devléskiro isyn zoraló, i sob (kaj) tumé te darén Rástyr-Devléstyr, Devléstyr tumarestyr, dre saré dyvesá. Kiéli saré Amoriejéngire králja, savé dživdé pir daja rig Iordanoskiri ke mórjo (derjáv), i saré Xanaanoskire králja, savé sys pašýl mórjo (derjáv), šundlé, so Raj Devél, Devél vyšut'kirdia paní Iordanoskiro angíl Izrailjoskire čhavénde, paka jone piridžanas: to tedy jaciá bi zorjakiro léngiro iló, i na jaciá butýr dre lénde dúho proti Izrailjoskire čhavénde. Dro dová-pac' časo Raj Devél phendiá Isusóske: “Ker péske vostra čhurja i občhin Izrailjoskire čhavén dro javír mólo”. I kerdiá péske Isúso vostra čhurja, i občhindia Izrailjoskire čhavén pe štéto, savó sys khardo “občhinybnaskiri bérga”. Ĥáda, sóske občhindia Isúso Izrailjoskire čhavén: saré manušá, savé vyginé Jegiptóstyr, muršá, saré, kon sys lačhó ke maribén pomyne pe čhučí phuv pe drom pir vygiiben Jegiptóstyr; saré, savé vyginé manušá, sys občhindlé; ne saré manušá, savé bijándyne pe čhučí phuv pe drom, paló davá, syr vyginé Jegiptóstyr, na sys občhindlé. Pal-dová so Izrailjoskire čhavé štardešá berš psirdé pir čhučí phuv, paka myné saré manušá, savé sys lačhé ke maribén, savé vyginé Jegiptóstyr, savé na šundlé Raskiri-Devléskiri zan, i savénge Raj Devél sovlahadiá, so jone na dykhéna phuv, saví Raj Devél sovlahasa dyjá lav léngire dadénge, te del lénge phuv, kaj thadéla thud i avgín. A zamiést lénde ĥazdyjá léngire čhavén, savén občhindia Isúso, pal-dová so jone sys naobčhindle; pal-dová so len pir drom na občhinenas. Kiéli saré manušá sys občhindlé, jačenaspe jone pe péskiro štéto dre stáno, paka vysastjonas. I phendiá Raj Devél Isusóske (Johošuaske): “Akaná Me zlyjom tuméndyr ladž Jegiptóskiri. Sóske i kharélape dová štéto: Galgálo, adiáke-pac' ke davá dyvés”. I sys terdé Izrailjoskire čhavé stanósa dro Galgálo, i kerdé Patradí pe dešuštarto čhonéskiro dyvés bel'velié pe Jerihonoskire loščyny. I pe javír dyvés Patradí lyné te xan, so vybarija pe daja phuv, opriesnoki i šuké ziárki (zjorny) dre dová-pac' dyvés. A manna pirijaciá te perél pe javír dyvés paló dová, syr jone lyné te xan, so barjola pe phuv, i na sys butýr manna Izrailjoskire čhavénde, ne jone xané dre dov-pac' berš dová, so barjola pe Xanaanóskiri phuv. O Isúso, sys nádur Jerihonostyr, dykhciá upré i dykhéla, i, ĥáda, sys terdó angíl léste manúš, i dre léskiro vast sys vytyrdyny kurtála. Isúso podgíia ke jov i phendiá léske: “Ci amaró tu, ci vergéndyr amarendyr?” Jov phendiá: “Nad; me som šeraló pe Ráskire-Devléskire xaladybén (voinstva), akaná javdjom darik”. Isúso pyjá péskire mósa pe phuv, i poklonindiape, i phendiá léske: “So xuláj miro phenéla péskire pisharíske?” Šeraló pe Ráskire-Devléskiro xaladybén phendiá Isusóske: “Le tyré ĥeritka tyré ĥerendyr, pal-dová so štéto, pe savó tu san terdó, isyn svénto”. Isúso adiáke i kerdiá. Jerihóno začhakirdiape, i sys začhakirdo darátyr Izrailjoskire čhavéndyr: nikón na vygijá léstyr, i nikón na zagijá. Tedy Raj Devél phendiá Isusóske: “Ĥáda, Me piridava dre tyré vastá Jerihóno i léskire kralís, i zoralen manušén, savé isyn dre léste. Džán pašýl fóro saré, savé isyn lačhé ke maribén, i obdžan fóro jékhvar dre dyvés; i ker davá šov dyvesá. I eftá rašaja mek te lydžán eftá rógi (truby) svenkitka angíl kovčego; a pe eftáto dyvés obdžan pašýl fóro eftá móly, i rašaja mek te trubinen dre rógi. Kiéli zatrubinela svenkitko šyng (rógo), kiéli ušunena zan rogoskiri, tedy saré manušá mek te zaden gódla zoralé zaniása; i vánta foróskiri rosperelape ke péskiro fundámiento, i saré manušá javéna te džán dre fóro, i javéna te zadžán sýges kažno (sváko) péskire rigátyr. I khardiá ke pe Isúso, Navinoskiro čhavó, Izrailjoskire rašán, i phendiá lénge: “Lydžán zavietóskiro kovčego; a eftá rašaja mek te lydžán eftá rógi svenkitka angíl Ráskire-Devléskiro kovčego”. I phendiá manušénge: “Džán i obdžan pašýl fóro: mardytkonenca mek te džán angíl Ráskire-Devléskiro kovčego”. Syr syg Isúso phendiá manušénge, eftá rašaja, savé lydžyne eftá rógi svenkitka angíl Raste-Devléste, giné i zatrubindle rogénca, i Ráskire-Devléskiro zavietóskiro kovčego gijá pal lénde. Manušá mardytkonenca giné angíl rašande, savé trubindle rogénca; a manušá, savé giné palál, giné pal kovčego, kiéli giné i trubindle rogénca. Manušénge Isúso dyjá uphenybén i phendiá: “Na den gódla i na den te šunén tumarí zan (glos), i sob (kaj) lav te na vydžál tumaré uštendyr ke dová dyvés, paka me phenáva tuménge: ‘Zaden gódla’, i tedy tumé zaden gódla”. Adiáke Ráskire-Devléskiro zavietóskiro kovčego gijá pašýl fóro, i obgija jékhvar; i javné dre stáno, i rat'kirde dro stáno. Pe javír dyvés Isúso uštyjá tasiárles (ránes) pe ránko, i rašaja lydžiné Ráskire-Devléskiro zavietóskiro kovčego. I eftá rašaja, savé lydžiné eftá rógi svenkitka angíl Ráskiro-Devléskiro kovčego, giné i trubindle rogénca; manušá mardytkonenca giné angíl lénde, a manušá, savé giné palál, giné pal Ráskire-Devléskiro zavietóskiro kovčego i gii, trubindle rogénca. Adiáke-pac' i pe javír dyvés obgine pašýl fóro jékhvar, i risiné dre stáno. I kerdé davá šov dyvesá. Pe eftáto dyvés uštyné tasiárles (ránes), angíl zlóko pe zoria, i obgine adiáke-pac' pašé fóro eftá móly; dre jekh davá dyvés obgine pašýl fóro eftá móly. Kiéli pe eftáto mólo rašaja trubindle rogénca, Isúso phendiá manušénge: “Zaden gódla, pal-davá so Raj Devél piridyja tuménge fóro!” Fóro javéla tel armania (prokošybén), i saró, so isyn dre léste, Ráske-Devléske; jekh Raav biladžakuny džuvlý mek te jačélpe džidy, joj i kažno (sváko) manúš, kon javéla láte dro kher; pal-dová so joj garadia manušén, savén ame bičhadiam. Ne tumé rakhénpe doléstyr, so isyn prokošnó, sob (kaj) i kokorenge te na perén tel prokošybén, kóli léna vari-so prokošnestyr, i sob (kaj) pe stáno Izrailjoskire čhavéngiro te na lydžas prokošybén i te na kerés léske bída. I saró rup, i suvnakái, i khoré (sasúdy) xarkuné i sastruné, mek te javén svénta Ráske-Devléske, i zadžána dre Ráskire-Devléskiri piralý”. Manušá zadyne gódla, i zatrubindle rogénca. Syr syg šundlé manušá zan rogoskiri, zadyne manušá zoralé zaniása; i rospyjape vánta foróskiri ke péskiro fundámiento i manušá giné dro fóro, kažno (sváko) péskire rigátyr, i lyné fóro. I otdyné prokošybnaske saró, so sys dre fóro, i muršén i džuvlién, i ternen i phuranen, i guruvén, i bakrén, i oslen, saró xasiakirdé kurtalása. A duje terné manušénge, savé obdykhenas phuv, Isúso phendiá: “Džán dro kher adalé biladžakuné-džuvliákiro i vylydžan odothýr la i sarén, kon isyn láte, adiáke syr tumé sovlahade láke”. I giné terné manušá, savé obdykhenas fóro, dro kher džuvliákiro i vylydžiné Raav, i dadés lakires, i da lakirja, i pšalén lakiren, i sarén, kon láte sys, i saré semencen lakiren vylydžiné, i čhudé len pal stáno Izrailjoskire. A fóro i saró, so sys dre léste, shačkirdé jagása; jekh rup, i suvnakái, i khoré (sasúdy) xarkuné i sastruné otdyné dro zrakhibén dro Ráskire-Devléskiro Kher. Raav, biladžakuna džuvliá, i kher lákire dadéskiro, i sarén, kon láte sys, Isúso jačkirdiá džiden, i joj dživéla maškír Izrailjo ke davá dyvés: pal-dová so joj garadia manušén, savén bičhadiá Isúso te obdykhen Jerihóno. Dre dová časo Isúso sovlahadiá i phendiá: “Prokošnó javéla angíl Raste-Devléste odová, kon ĥazdéla i skerela fóro davá Jerihóno; pe anglatuneste čhavéste peskireste jov čhuvéla fundámiento léskiro, i pe tyknydyršoneste péskire čhavéste čhuvéla vudará léskire”. I Raj Devél sys Isusósa, i sláva léskiri rozgijápe pir sarí phuv. Ne Izrailjoskire čhavé kerdé čoripén i lyné sovlahadestyr (prokošnestyr): Ahano Xarmijaskiro čhavó, Zavdijaskire-čhavéskiro, Zarakire čhavéskiro, Judáskire rodycóstyr, lyjá sovlahadestyr, i xolý Ráskire-Devléskiri zahačíia pe Izrailjoskire čhavénde. Isúso (Johošuá) Jerihonostyr bičhadiá manušén dro Gajo, so isyn pašýl Bief-Avieno, vastočnone Viefiljoskire rigátyr, i phendiá lénge: “Džán, obdykhen phuv”. Jone giné i obdykhne Gajo. I risiné ke Isúso, i phendlé léske: “Na saré manušá mek te džán, a mek te džán pašýl duj tysjoncy ci pašýl trin tysjoncy manušén, i tumé domaren Gajo; saré manušén na lýdža odorík, pal-dová so len nábut odój”. I adiáke giné odorík pašýl trin tysjoncy manušén narodóstyr; ne jone meknepe dro našyben Gajoskire manušéndyr. Manušá Gajoskire zamardé léndyr ke trijánda šov manušén, i tradyne len vudarendyr ke / žýko Sievarimo, i domardé len pe zmekiben bergátyr; sóstyr iló manušéngiro rozbiladia i jaciá, syr paní. Isúso roskustia ídi péskire, i pyjá péskire mósa pe phuv angíl Ráskiro-Devléskiro kovčego, i pasijá ke bel'vél', jov i Izrailjoskire phurydyrá, i občhuvenas prahosa péskire šeré. I phendiá Isúso: “Ne, Rajo Dévla, Xulájo! Vaš so Tu pirilydžijan adalé manušén pir Iordáno, sob (kaj) te otdes amen dre Amoriejéngire vastá, i te xasiakires amen? Ne, kóli by ame te jačaspe i te dživás pal Iordáno! O, Rajo Dévla! So mánge te phenáv paló davá, syr Izrailjo risijá dumesa ke péskire vérgi? Hananiei i saré phuvjákire manušá ušunena, i obdžana saré rigéndyr amen, i xasiakirena lav amaró phuvjátyr. I so skeresa tedy lavéske Tyréske bareske?” Raj Devél phendiá Isusóske: “Uštý, vaš so tu pyjan pe muj tyró? Izrailjo kerdiá grého, i piriginé jone Miro zavieto, savó Me dyjom lav lénge; i lyné sovlahadestyr, i čorde, i shačkirdé, i čhudé maškír péskire vieščy (viešča). Paldavá Izrailjoskire čhavé na mogindlé te vyterdjon angíl péskire vergénde, i sykade paluj (tylo) péskire vergénge, pal-dová so jone popyne tel sovél (prokošybén); Me na javáva butýr tuménca, kóli na xasiakirena péstyr zasovlahades. Uštý, obsvencyn manušén i phen: obsvencynenpe ke zlóko (ránko); pal-dová so adiáke rakiréla Raj Devél, Devél Izrailjoskiro: sovlahado isyn maškír túte, Izrailjo: paldavá tu na moginésa te zaterdjos angíl vergénde tyrende, paka protradesa péstyr zasovlahades. Atasiá poddžan saré pir tumaró ródyco, savó uphenela Raj Devél, mek te poddžál pir kherítko ródo (pliemjo); kherítko ródo, savó uphenela Raj Devél, mek te poddžál pir čékar' (siemieistvo), saví uphenela Raj Devél, mek te poddžál pir jekhe manušéste. I manušés ugaljona, kon čordia sovlahadestyr, mek les te shačkiren jagása, les i saró, so léste, pal-dová so jov pirigija Ráskire-Devléskiro zavieto i kerdiá proti zakóno maškír Izrailjo. Isúso, uštyjá tasiárles (ránes) rankosa, i phendiá te poddžál Izrailjoske pir léskiro ródyco; i sys uphendló ródyco Judáskiro. Korigedýr (pozže) phendiá te poddžál Judáskire kheritkoné rodóske; i uphendló kherítko ródo Zarakiro. Phendia te poddžál Zarinoskiro rodóske pir čékar', i sys uphendly sys čékar' (siemieistvo) Zavdijoskiri. Phendia te poddžál léskire čekarjake pir jekhe manušéste, i sys uphendló Ahano, Xarmijoskiro čhavó, Zavdijoskiro čhavó, Zarakiro čhavó, Judáskire rodycóstyr. Tedy Isúso phendiá Ahanoske: “Miro čhava! Vozde Ráske-Devléske, Izrailjoskire Devléske sláva, i priĥaljovpe angíl Léste, i de te džináv mánge, so tu kerdián; na sčhakir mándyr”. Dre otphenybén Isusóske Ahano phendiá: “Čačunés, me kerdjom grého angíl Raste-Devléste, Devléste Izrailjoskireste i kerdjom dová i dová. Maškirál doresybén (dobyča) jekh šukár Sienaaroskiri ídia, i duj šelá šékieli rup, i kotér (kusko) suvnakáj vagasa dre pandždešá šékieli; davá mánge pokamdiape, i me lyjom davá; i gada, jov isyn garadó dre phuv maškirál mirí šátra, i rup tel láte”. Isúso bičhadiá manušén, i jone prastándyne dre šátra; i ĥáda, saró davá sys garadó dre léskiri šátra, i rup tel láte. Jone lyné davá šatratyr, i jandlé ke Isúso i ke saré Izrailjoskire čhavé, i čhudé angíl Raste-Devléste. Isúso i saré Izrail'tiáni lésa lyné Ahanos, Zarijoskire čhavés, i rup, i ídia, i kotér suvnakái, i léskire čhavén, i léskire čhajén, i léskire guruvén, i léskire oslen, i léskire bakrén, i léskiri šátra, i saró, so léste sys, i vylydžiné len pe dólo Ahoroskiro. I phendiá Isúso: “Pal dová, so tu jandian pe aménde bída, Raj Devél pe túte janéla bída dre davá dyvés”. I mardé les saré Izrail'tiáni barénca, i shačkirdé len jagása, i čhurdyné pe lénde bará. I čhurdyné pe léste bari kuča bará, saví isyn i ke davá dyvés. Paló davá štylyja Raskiri-Devléskiri xolý. Paldavá dová štéto sys khardo dolosa Ahor adiáke-pac' ke davá dyvés. Raj Devél phendiá Isusóske: “Na dar i na strahadjov; le pésa saré manušén, savé isyn lačhé ke maribén, i uštyi, džá ke Gajo; ĥáda, Me otdáva dre tyré vastá Gajoskire kralís i léskire manušén, léskiro fóro i léskiri phuv. Ker Gajosa i léskire kralísa dová-pac', so tu kerdián Jerihonosa i léskire kralísa, jekh léskiro doresybén i léskire kherítka murdalá (skoto) roskeren péske. Ker zasada pal fóro”. Isúso i saré manušá, savé sys lačhé ke maribén, uštyné, sob (kaj) te džas pe Gajo; i vykedyjá Isúso trijánda tysjoncy manušén murškanen, i bičhadiá len ratý. I dyjá lénge uphenybén, i phendiá: “Dykhén, tumé javéna te čhuvén zasada pašýl fóro paló fóro; na džán dur foróstyr, i javén saré skedyné. A me i saré manušá, savé isyn mánca, poddžasa ke fóro. I, kiéli Gajoskire manušá vydžána proti aménde, syr i angledýr, tedy ame našasa léndyr. Jone džána pal aménde, adiáke so ame otlydžasa len foróstyr; pal-dová so jone phenéna: “Našéna améndyr, syr i garedyr, kiéli ame našasas léndyr, to tedy tumé uštena zasadatyr i zalena fóro; i Raj Devél, Devél tumaró, otdéla les dre tumaré vastá. Kiéli léna fóro, zahačkiren fóro jagása, pir lav Devléskiro kerén. Dykhén, me rakiráva tuménge”. Adiáke bičhadiá len Isúso, i jone giné dre zasada, i garadyne maškír Vieflijemo i maškír Gajo, palatuné Gajoskire rigátyr; a Isúso dre doiá rat rat'kirdia maškír manušénde. Uštyi tasiárles (ránes) pe ránko, Isúso obdykhcia manušén, i gijá jov i Izrailjoskire phurydyrá angíl manušénde ke Gajo; I saré manušá, godna ke maribén, savé sys lésa, giné, podginé pašedyr i giné ke fóro. I čhudiá stáno paš-ratitkoné (sieviernone) Gajoskire rigátyr, a maškír léste i Gajoste sys dólo. Korigedýr (pozže) jov lyjá pašýl pandž tysjoncy manušén i čhudiá len dre zasada maškír Vieflijemo i Gajo, palatuné foróskire rigátyr. I manušá čhudé saró stáno, savó sys paš-dyvesytkoné foróskire rigátyr adiáke, so palatuny (o) pašýl sys foróskire palatuné rigátyr. I gijá Isúso dre doiá rat maškirál loščýna. Kiéli dykhciá davá králi Gajoskiro, savó sys dová-pac' momiento foróskire manušénca, jov uštyi tasiárles (ránes), vygijá pe Izrailjo pe maribén, jov i saré léskire manušá, pe uphendló štéto angíl loščýna. Ne jov na džindiá, so vaš léske isyn zasada (zabešyben) pal fóro. Isúso i saró Izrailjo, xaj (sýrby) domardé lénca, našné pe čhučí phuv. A jone khardé ke pe saré manušén, savé sys dro fóro, sob (kaj) te tradén len; i, tradyi Isusós, otginé dur foróstyr. Dro Gajo i Viefíljo na jaciápe ni jekhe manušés, savó na tradyjape pal Izrailjo. I fóro péskiro jačkirdé otčhakirdesa, tradyi Izrailjo. Tedy Raj Devél phendiá Isusóske: “Protyrde čhurdybnytko bust (kop'jo), saví isyn dre tyró vast, ke Gajo, pal-dová so Me otdáva les dre tyré vastá”. Isúso protyrdyjá čhurdybnytko bust, saví sys dre léskiro vast, ke fóro. Manušá, savé bešté sys dre zasada, sýges uštyné péskire štetóstyr i prastándyne, syr syg jov protyrdyjá péskiro vast, zaginé dro fóro, i lyné les, i sýges zahačkirde fóro jagása. Manušá Gajoskire dykhné pale, i dykhné, so thuv foróstyr ĥazdélape ke bolybén. I na sys vaš lénge štéto, karik by te našén, ni odorík, ni adarík; pal-dová so manušá, savé našné pe čhučí phuv, risiné pe adalé manušénde, savé tradynepe pal lénde. Isúso i saró Izrailjo, dykhné, so manušá, savé sys bešté dre zasada, lyné fóro, i thuv foróstyr ĥazdelaspe ke bolybén, risiné i lyné te marén Gajoskire manušén. A dalé foróstyr vyginé gil lénge, adiáke so jone sys maškirál Izrail'tianende, savé jekh sys dolé rigátyr, a javír javirjatyr. Adiáke mardé len, so na jačkirdé ni jekhés léndyr, džides ci znašibnaris. A kralís Gajoskires lyné džides, i jandlé les ke Isúso. Kiéli Izrail'tiáni domardé sarén manušén Gajoskiren pe félda, pe čhučí phuv, karik jone tradyne len, i kiéli saré jone ke palatunó manúš pyné kurtalátyr, to tedy saré Izrail'tiáni risiné ke Gajo, i domardé les kurtalása. Mulen dro dová dyvés muršén i džuvlién, sarén Gajoskire manušén, sys dešudúj tysjoncy. Isúso na obmekcia péskiro vast, savó protyrdyjá čhurdybnytko bust, paka na otdyjá sovlahake (prokošybnaske) saré Gajoskire manušén. Jekh kherítka murdalá (skoto) i doresybén (dobyča) dalé kheritkoné murdalén foróskiro, Izrailjoskire čhavé roskerde maškír péste, pir Raskir-Devléskiro lav, savó Raj Devél phendiá Isusóske. I shačkirdiá Isúso Gajo, i kerdiá les dre viekoskire rosčhurdypena (ruíny), pe čhučí phuv, ke davá dyvés. A kralís Gajoskires ubladia pe veš, ke bel'vél': kiéli zagijá kham, to priphendiá Isúso, i zlyne les mules vešéstyr, i čhurdyné les pašýl foróskire vudará, i čhurdyné pe léste bari kuča bará, saví isyn ke davá dyvés. Tedy Isúso kerdiá altárjo (žertvieniko) Ráske-Devléske, Izrailjoskire Devléske, pe bérga Gievalo. Syr rakirdiá Mójza, pishári Ráskire-Devléskiro, Izrailjoskire čhavénge, pal so isyn začhindló dre Mojzáskire-zakonoskiri lylvarí, – altárjo (žertvieniko) barendyr celonendyr, pe savé na ĥazdyné sastyrá; i jandlé pe léste célo shačkiribén Ráske-Devléske, i kerdiá svénta mirna janybená. I čhindiá Isúso odój pe bará sčhinybnytko (spisko) Mojzáskire Zakonóstyr, savó jov začhindiá angíl Izrailjoskire čhavénde. Saró Izrailjo, phurydyrá léskire, i dykhibnarja léskire i sendárja, terdiné dolé i javire rigátyr kovčegoskire proti rašande i Lievitende, savé lydžánas Ráskire-Devléskiro zavietóskiro kovčego, syr manušá javire rigátyr, adiáke i dalé-phuvjákire manušá, jekh léngiri paš mamúj bérga Garizimo, a javír paš pašýl bérga Gievalo, syr angledýr rakirdiá Mójza, pishári Ráskiro-Devléskiro, te bahtiakires Izrailjoskire manušén. I korigedýr (pozže) Isúso gindia dre zan saré Zakonóskire lavá, bahtiakiribén i prokošybén, syr sys začhindló dre lylvarí Zakonoskiri. Saréstyr, so Mójza rakirdiá Isusóske, na sys nijékh lav, savó Isúso na progindia angíl saró Izrailjoskiro skedyibén i džuvliende, i čhavénde, i manušénde, savé javné javire rigátyr, i dživéna maškír lénde. Šundlé davá saré králja, savé sys pal Iordáno, pe bérga i pe loščýna i pir saró baré morjoskiro (derjavéskiro) brégo, nádur Livanostyr, Xietiei, Amoriei, Xananiei, Fierieziei, Jeviei i Jevusiei, i skedynépe khetané, sob (kaj) pal jekh te marénpe Isusósa i Izrailjosa. Ne kiéli Gavaonoskire manušá šundlé, so Isúso kerdiá Jerihonosa i Gajosa, to kerdé mendres: giné, skedyné maró pe drom i čhudé phurané goné pe péskire oslende i phurané, pokušne i lapikenca goné vaš mol (vino); i ĥeritka pe léngire ĥerá sys phurané lapikenca, i ídia pe lénde sys phurany; i saró léngiro dromitko maró sys šuko i pliesnivo. Jone javné ke Isúso dre Izrailjoskiro stáno dre Galgálo i phendlé léske i saré Izrail'tianenge: “Drieván duratuné phuvjátyr javdiám ame; i adiáke kerén aménca dorakiribén”. Izrail'tiáni phendlé Jeviejenge: “Moginel (saštý) te javél, so tumé dživéna pašýl aménde? Syr aménge te kerás tuménca dorakiribén?” Jone phendlé Isusóske: “Ame sam tyré dynárja. Isúso phendiá lénge: “Kon tumé san, i katýr tumé javné?” Jone phendlé léske: “Drieván duratuné phuvjátyr javné tyré dynárja dro lav Ráskire-Devléskire, tyré Devléskiro tyreskire; pal-dová so ame šundiám sláva Léskiri i saró, so kerdiá Jov dre Jegípto, i saró, so Jov kerdiá duje Amoriejéngire kral'jenge, savé sys pir doiá Iordanoskiri rig, Sigonoske, Jesievonoskire kralíske, i Ogoske, Vasanoskire kralíske, savó dživdiá ke Astarofo. Ušuny davá, phurydyrá amaré i saré amaré-phuvjákire manušá, phendlé aménge: “Len dro péskire vastá maró pe drom, i džán gil lénge, i phenén lénge: ame sam dynárja tumaré; i adiáke kerén lénca dorakiribén. Davá maró amaró kherendyr amarendyr ame lyjam tato dre dová dyvés, kiéli gijam ke tumé; a akaná, ĥáda, jov kerdiápe šuko i zapliesnindia. I dalé goné moliasa (vinosa), savé sys neve ame čhudiam pherdés, ĥáda, roskušnepe; i daja ídia amarí, i ĥeritka amaré phuranyne drieván (zbit) duratuné droméstyr”. Izrail'tiáni lyné léngiro maró, a Rástyr-Devléstyr na phučné. I kerdiá Isúso lénca ramánjo (miro), i kerdiá lénca dorakiribén dre dová, so jov zrakhéla lénge džiibén; i sovlahade lénge skedyibnaskire barydyrá. A pirdál trin dyvesá, syr jone kerdé lénca dorakiribén, to šundlé, so jone léngire pašatuné/susiédy (kotárja) dživéna nádur léndyr. Pal-dová so Izrailjoskire čhavé, gii dre drom, javné dre léngiro fóro pe tríto dyvés; fórja léngire sys: Gavaóno, Kiefira, Biejerofo i Kiríaf-Iarimo. Izrailjoskire čhavé na mardé len, pal-dová so skedyibnaskire barydyrá sovlahade lénge Rása-Devlésa, Devlésa Izrailjoskiresa. Paldavá saró Izrailjoskiro skedyibén zadyja gódla pe barydyrende. Saré barydyrá phendlé saré skedyibnaske: “Ame sovlahadiam lénge Rása-Devlésa, Izrailjoskire Devlésa, i pal-dová aménge naštý (na moginasa) te čilavas len; a ĥáda, so kerása lénca: jačkirasa len džidenca, sob (kaj) te na lathtel amen xolý pal sovláh, savjása ame sovlahadiam lénge”. I phendlé lénge barydyrá: “Mek jone te dživén, ne javéna te čingiren kaštá i pheren paní vaš saró skedyibén”. I kerdiá saró skedyibén adiáke, syr phendlé lénge barydyrá. Isúso khardiá len ke pe i phendiá: “Vaš so tumé xohade amen, pheny: ‘Me drieván dur tuméndyr’, tedy syr ža tumé dživéna nádur améndyr? Paldavá prokošne san tumé! Saró džiibén tumé javéna dynar'jénca; javéna te čingiren kaštá i te pheren paní vaš kher miré Ráskiro-Devléskiro!” Jone dro otphenybén Isusóske phendlé: “Dogijá ke džinybén tyré dynar'jengiro, so Raj Devél, Devél tyró, phendiá Mojzáske, Péskire pisharíske, te del tuménge sarí phuv i te muliakirél sarén dalé phuvjákire manušén angíl tumaró muj: pal-dová ame drieván dardiampe, sob (kaj) tumé te na otlen amaró džiibén, i ame kerdiám davá réndo. Kakaná ĥáda, ame sam dro tyró vast. Syr fedýr i čačunés túke bicialó te kerés aménca, adiáke i ker”. I jov, Isúso (Johošuá), kerdiá lénca adiáke: zrakhciá len Izrailjoskire-čhavéngire vastéstyr, i jone na muliakirdé len. I phendiá dro dová dyvés Isúso, sob (kaj) jone te čingiren kaštá, i te čhuvén paní vaš skedyibén i vaš Ráskiro-Devléskiro altárjo, – adiáke-pac' ke davá dyvés, pe štéto, savó by te na vykedel Raj Devél. I sys adiáke: kiéli Adonisiedeko, Jerusalimoskiro králi, šundiá, so Isúso lyjá Gajo i otdyjá les sovlahake (prokošybnaske), i so adiáke-pac' kerdiá Gajosa i léskire kralísa, syr kerdiá Jerihonosa i léskire kralísa, i so Gavaonoskire manušá kerdé ramánjo (miro) Izrailjosa i jačnépe te dživén maškír lénde, to tedy jov zoralés strahadyja, pal-dová so Gavaóno fóro sys baró, syr jekh kralískire for'jéndyr, i sys baredýr Gajostyr, i saré manušá léskire sys muršarja. Paldavá o Adonisiedeko, králi Jerusalimoskiro, bičhadiá ke Gogamo, Xievronoskiro králi, i ke Firamo, Iarmufoskiro králi, i ke Jafijo, Lahisoskiro králi, i ke Dieviro, Jeglonoskiro králi, sob (kaj) te phenén: “Javén ke me, i den vast mánge te xasiakiráv Gavaóno, pal-dová, so jov kerdiá ramánjo (miro) Isusósa i Izrailjoskire čhavénca”. Jone skedynépe, i giné pandž Amoriejéngire králja: Jerusalimóskire králi, Xievronoskiro králi, Iarmufoskiro králi, Lahisoskiro králi, Jeglonoskiro králi, jone i saré léngire manušá, i terdiné stanósa pašýl Gavaóno, sob (kaj) te džán maribnása proti léste. Manušá Gavaonoskire bičhadé ke Isúso dro stáno Izrailjoskiro, dro Galgálo, te phenén. “Na otle vast tyró tyré pishar'jendyr, jav ke ame sygnedyr, zrákh amen i pomogin aménge; pal-dová so skedynépe proti aménde saré Amoriejéngire králja, savé dživéna pe bérgi”. Isúso gijá Galgalostyr kokoró, i lésa saré manušá, savé sys lačhé ke maribén, i saré muršá murškané. I phendiá Raj Devél Isusóske: “Na dar léndyr, pal-dová so Me otdyjom len dre tyré vastá: nikón léndyr na vyterdjola angíl muj tyró”. I javdiá pe lénde Isúso naužakirdes, pal-dová so sarí rat gijá jov Galgalostyr. Raj Devél jandiá len dro dar angíl Izrail'tianende, i jone domardé zoralés len dre Gavaóno, i tradyne len pir drom ke Vieforonoskiro vučipén, i mardé len ke Azieko i ke Makiedo. Kiéli jone našné Izrail'tianendyr pir Vieforonskone-bergákiro zmekiben, to Raj Devél čhurdyjá pe lénde bolybnástyr baré bará až ke Azieko, i jone pomyne; butýr sys odoléndyr, savé myné barengire čhuibnastyr, syr kodolendyr, savén muliakirdé Izrailjoskire čhavé kurtalása. Isúso rakirdiá ke Raj Devél dre dová-pac' dyvés, dro savó otdyjá Raj Devél Amoriejos dre vastá Izrailjoske, kiéli domardiá len dro Gavaóno, i jone domardé sys angíl Izrailjoskire-čhavéngiro jakhá, i phendiá angíl Izrail'tianende: “Terdjov, kham, pe Gavaóno, i čhon, pe dólo Aialonoskiro!” I terdijá kham, i čhon sys terdó, paka manušá othanas (otomstinenas) pale péskire vergénge. Ci na davá sys čhindló dre lylvarí “Čačipnaskireskiri”: ‘Terdó isyn kham maškirál bolybén i na sygniakirdiape ke zagiibén saró dyvés?’ I na sys dasavo dyvés ni angledýr, ni paló davá, dre savó Raj Devél adiáke šundiá by manušéngiri zan. Pal-davá so Raj Devél mardiápe pal Izrailjo. Korigedýr risijá Isúso i saró Izrailjo lésa pozže dro stáno, dro Galgálo. A odolé pandž králja našné, i garadyne dre ĥiebár (pieščera) dro Makiedo. Kiéli jandlo sys Isusóske i phendló: “Lathnepe pandž králja, jone garadjona dre ĥiebár (pieščera) dro Makiedo”, to phendiá Isúso: “Pričhurden baré bará ke ĥebarakiro (pieščerakiro) zagiibén, i čhuvén ke joj manušén te rakhén len. A tumé na terdjon, a tradén tumaré vergén, i muliakirén palatuny paš léngire xaladendyr, i na den lénge te džán dre léngire fórja; pal-dová so Raj Devél, Devél tumaró, otdyjá len dre tumaré vastá”. Paló davá, syr Isúso i čhavé Izrailjoskire sarésa domardé len drieván zoralés, i, savé jačnépe džidé léndyr, našné dre fórja zoralé tynénca, to saré manušá risiné dro stáno ke Isúso dro Makiedo ramanjosa (mirósa), i nikón Izrailjoskire čhavéndyr na riskirdiá péskire čibása. Tedy Isúso phendiá: “Otčhakiren zagiibén ke ĥiebár, i vylydžan ke me látyr pandžen odolén kral'jén”. Adiáke i kerdé: vylydžiné ke jov ĥiebaratyr (pieščeratyr) pandžen odolén kral'jén: Jerusalimóskire kralís, Xievronoskire kralís, Iarmufoskire kralís, Lahisoskire kralís i Jeglonoskire kralís. Kiéli vylydžiné adalen kral'jén ke Isúso, to Isúso khardiá ke pe sarén Izrail'tianén i phendiá xaladéngire šeralenge, savé psirdé lésa: “Poddžan, terdjon tumaré gerenca pe menia dalé kral'jenge”. Jone podginé i terdiné péskire ĥerénca pe léngire menia. Isúso phendiá lénge: “Na darén i na strahadjon, javén zoralé i bidaripnaskire; pal-dová so adiáke keréla Raj Devél saré tumaré vergenca, savénca javéna te marénpe”. Korigedýr (pozžedýr) domardiá len Isúso, i muliakirdiá len, i ubladia len pe pandž vešyny; i sys ublade jone pe vešyny ke bel'vél'. Syr zagijá kham, to priphendiá Isúso, i zlyne len vešynendyr, i čhurdyné len dre ĥiebár, dre saví jone garadyne, i pričhurdyne baré bará ke ĥebarakiro zagiibén, savé odój isyn jone až ke davá dyvés. Dro dová-pac' dyvés lyjá Isúso Makiedo, i domardiá les kurtalása i léskire kralís, i otdyjá prokošybnaske len i saró džidó, so sys dre léste; nikonés na jačkirdiá, kon by jaciápe džidó; i kerdiá adiáke-pac' Makiedoskire kralísa, syr kerdiá Jerihonoskire kralísa. I gijá Isúso i saré Izrail'tiáni lésa Makiedostyr ke Livna, i mardépe proti Livna; i otdyjá Raj Devél i la dre Izrailjoskire vastá, i lákire kralís, i tradyjá krig la Isúso kurtalása i saró džidó, so sys dre láte: nikonés na jačkirdiá dre láte, kon by te jačélpe džidó. I kerdiá adiáke-pac' lákire kralísa, syr kerdiá Jerihonoskire kralísa. Livnatyr gijá Isúso i saré Izrail'tiáni lésa ke Lahiso; i terdiné nádur léstyr stanósa, i mardépe proti léste; i otdyjá Raj Devél Lahiso dre Izrailjoskire vastá, i lyjá jov les pe javír dyvés, i domardiá les kurtalása i saró džidó, so sys dre léste adiáke, syr kerdiá Livnasa. Tedy javdiá te pomoginel (te podrikirél) Lahisoske o Goramo, Gazieroskiro králi; ne Isúso domardiá les i léskire manušén kurtalása adiáke, so nikonés léste na jačkirdiá, kon by te jačélpe džidó. I gijá Isúso i saré Izrail'tiáni lésa Lahisostyr ke Jeglono, i terdiné nádur léstyr stanósa, i mardépe proti léste. I lyné les dro dová-pac' dyvés i domardé les kurtalása, i saró džidó, so sys dre léste dre dová-pac' dyvés, i otdyjá jov sovlahake, syr kerdiá Lahisosa. I gijá Isúso i saré Izrail'tiáni lésa Jeglonostyr ke Xievróno, i mardépe proti léste. I lyné les, i domardé les kurtalása, i kralís leskires, i saré fórja léskire, i saró džidó, so sys dre léste; nikonés na jačkirdiá, kon by te jačélpe džidó, syr kerdiá jov i Jeglonosa: otdyjá sovlahake les i saró džidó, so sys dre léste. Korigedýr (pozže) gijá Isúso i saró Izrailjo lésa ke Daviro i mardiápe proti léste. I lyjá les, kralís leskires, i saré léskire fórja, i domardé len kurtalása, i otdyné sovlahake saró džidó, so sys dre léste; nikonés na jaciápe, kon by jaciápe džidó. Syr kerdiá Xievronosa i léskire kralísa, adiáke kerdiá Davirosa i kralísa leskiresa, i syr kerdiá Livnasa i léskire kralísa. I domardiá Isúso sarí bergitko i paš-dyvesýtko (poludjono) phuv, i telatuné štéty, i phuv, saví isyn pašýl bérgi, i sarén lakiren kral'jén; nikonés na jačkirdiá, kon te jačélpe džidó, i saró džidó otdyjá sovlahake, syr rakirdiá Raj Devél, Devél Izrailjoskiro. I domardiá len Isúso Kadies-Varnatyr ke Gaza, i sarí phuv Gošen až ke Gavaóno; sarén kral'jén dalen i léngiri phuv Isúso lyjá jekhe molostyr, pal-dová so Raj Devél, Devél Izrailjoskiro, mardiápe pal Izrailjo. Korigedýr (pozže) Isúso i saré Izrail'tiáni lésa risiné dro stáno, dro Galgálo. Syr šundiá davá Iavino (Javino), Asoroskiro králi, to bičhadiá ke Iovavo, Madoroskiro králi, i ke Šimronoskiro králi, i ke Ahsafoskiro králi, i ke králja, savé dživdé pe paš-ratítko rig pe bérga i pe loščýna paš-dyvesytkoné Xinarofoskire rigátyr, i pe telatuné štéty, i dre Nafof-Dora ke zapado, ke Xananiei, savé dživdé ke vastóko i ke mórjo (derjáv), ke Amoriei i Xitiei, ke Fierieziei i ke Jevusiei, savé dživdé pe bérga, i ke Jeviei, savé dživdé nádur Jermonostyr pe phuv Masífa. I vyginé jone i saré léngire otriády (opolčenii) lénca, but manušá, savén sys adiáke but, kicý isyn práho pe morjoskiro (derjavéskiro) brégo; i gren i maribnýtka vurdyná sys drieván but. I skedynépe saré dalé králja, i javné i terdiné stanósa khetané pašýl Mieromoskire paniá, sob (kaj) te marénpe Izrailjosa. Ne Raj Devél phendiá Isusóske: “Na dar léndyr, pal-dová so atasiá, pašýl davá časo, Me otdáva len sarén pe maribén čhavénge Izrailjoskirenge; grenge lengirenge piričhin žyly i vurdyná léngire shačkir jagása”. Isúso i lésa saré manušá, savé sys lačhé pe maribén, sýges vyginé pe lénde ke Mieromoskire paniá i pyné pe lénde. I otdyjá len Raj Devél Izrail'tianenge dre vastá, i domardé jone len, i tradyne len ke baró Sidono, i ke Misriefof-Maima, i ke dólo Micfa ke vastóko, i pirimarde len adiáke, so nikonés léndyr na jaciápe, kon by te javél džidó. I kerdiá Isúso lénca adiáke, syr phendiá léske Raj Devél: léngire grenge jov piričhindia žyly i léngire maribnýtka vurdyná shačkirdiá jagása. Dre dová-pac' časo, Isúso risijá, lyjá Asoros i léskire kralís zamardiá kurtalása (Asoro angledýr sys saré dalé-kralipnaskire šeralesa); i pirimarde jone saró džidó, so sys dre léste, kurtalása, otdyi sovlahake (prokošybnaske); na jaciápe nijékh džidó di; a Asoro shačkirdiá jov jagása. I saré dalengire-kral'jengire fórja i sarén kral'jén lengiren lyjá Isúso, i domardiá kurtalása, otdyi len sovlahake, syr rakirdiá Mójza, Ráskiro-Devléskiro pishári; ne saré fórja, savé sys pe vučipén, na xačkirdé Izrail'tiáni, apríč jekhe Asoro, savó shačkirdiá Isúso. A saró doresybén (dobyča) dalé for'jengiro i kheritkoné murdalén (skoto) rosčorde Izrailjoskire čhavé péske; manušén sarén pirimarde kurtalása adiáke, so protradyne sarén len: na jačkirdé nijékh di. Syr priphendiá Raj Devél Mojzáske, Péskire pisharíske, adiáke Mójza priphendiá Isusóske, a Isúso adiáke i kerdiá: na otgijá ni jekhe lavéstyr dro saró, so priphendiá Raj Devél Mojzáske. Adiáke Isúso lyjá sarí daja phuv pe bérgicy, sarí phuv paš-dyvesýtko (poludjono), sarí phuv Gošen i telatuné štéty, i loščýna i bérga Izrailjoskiri, i telatuné štéty, bergátyr Xalako, saví zalela štéto ke Sieiro, ke Vaal-Gado pe Livanoskiro dólo, pašýl Jermonoskiri bérga, i sarén léngire kral'jén lyjá, i domardiá len, i muliakirdiá len. Dlugo časo Isúso lydžijá maribén saré adalé kral'jenca. Na sys fóro, savó kerdiá by ramánjo (miro) Izrailjoskire čhavénca, apríč Jeviejende, savé dživdé ke Gavaóno: saré lyné jone maribnása; pal-dová so Rástyr-Devléstyr sys dová, so jone xoliakirde iló péskiro i maribnása strenindle Izrailjo, vaš dová, sob (kaj) te javén otdyné sovlahake i sob (kaj) te na javél lénge otmekiben, ne, sob (kaj) te javén protradyne adiáke, syr priphendiá Raj Devél Mojzáske. Dro dová-pac' časo javdiá Isúso i domardiá Jenakimen pe bérga, dro Xievróno, dro Daviro, dre Anava, pe sarí Judaskiri bérga i pe sarí Izrailjoskiri bérga; léngire for'jenca otdyjá len Isúso sovlahake; na jaciápe nijekhes Jenakimostyr manušés pe Izrailjoskire-čhavengiri phuv; jaciápe jekh dro Gazo, dro Giefo i dro Azoto. I adiáke lyjá Isúso sarí phuv, syr rakirdiá Raj Devél Mojzáske, i otdyjá la Isusóske dre mištypnáskiri miéra Izrail'tianenge, pir dová, syr phuv roskerdiape maškirál léngire ródycy. I štylyja phuv maribnastyr. Ake, isyn králja dolé phuvjákire, savén domardé Izrailjoskire čhavé i savengiri phuv lyné péske pir doiá Iordanoskiri rig ke khameskiro ŭzgiiben, Arnonoskire sygnone rekicatyr (lenorjatyr) ke Jermonoskiri bérga i sarí loščýna ke vastóko: O Sigono, Amoriejengiro králi, savó dživdiá ke Jesievóno, savó rikirdia phuv Aroierostyr, so isyn pašýl brégo Arnonoskire rekicatyr (lenorjatyr), i ke paš rékica (lenorí), pašýl Galaádo, ke Javokoskiri rékica (lenorí), kaj sys Amonitianengiri rig, i ke loščýna ke Xinieriefoskiro mórjo (derjáv) ke vastóko i ke morjoskiri loščýna, Londo mórjo (derjáv), ke vastóko pir drom ke Bief-Ješymofo, a ke paš-dyvés (jugo) štetenca, savé sys pašté telál pašýl Fasga; i Ogoskiri provincyja, kon sys Vasaoskiro králi, palatunó (posliednjo) Riefaimendyr, savó dživdiá ke Astarofo i dre Jedreja, savó rikirdia bérga Jermono, i Salha, i saró Vasáno, ke Giesuroskiro i Maahoskiro-miežakiri rig, i paš Galaádo, ke Sigonoskiri rig, Jesievonskone-kralískiri. O Mójza, Ráskire-Devléskiro pishári, i Izrailjoskire čhavé domardé len; i dyjá la Mójza, Ráskire-Devléskiro pishári, dre meknó mištypén (nasliedijo) Ruvimóskire i Gadóskire rodycóske i paš Manasijáskire rodycóske. I, ĥáda, isyn králja Amoriejéngire phuvjákire, savén domardiá Isúso i Izrailjoskire čhavé pir daja Iordanoskiri rig ke zapado, Vaal-Gadostyr pe Livanoskiro doloske Xalaka, bérga, saví tyrdelape ke Sieiro, saví otdyjá Isúso Izrailjoskire rodycenge dro meknó mištypén (nasliedijo), pir léngiro roskeriben, pe bérga, pe telatuné štéty pe loščýna, pe štéty, savé isyn pašýl bérgi, i pe čhučí phuv, i pe paš-dyvés (jugo), Xietiejen, Amoriejen, Xananiejen, Fierieziejen, Jeviejen i Jevusiejen: iekh králi Jerihonoskiro, jekh Gajoskiro, so isyn pašýl Viefíljo, iekh králi Jerusalimoskiro, jekh králi Xievronoskiro, iekh králi Jarmufaskiro, jekh králi Lahisoskiro, iekh králi Jeglonoskiro, jekh králi Giezieroskiro, iekh králi Daviroskiro, jekh králi Gadieroskiro, iekh králi Xormakiro, jekh králi Aradoskiro, iekh králi Livnakiro, jekh králi Odolamoskiro, iekh králi Makiedoskiro, jekh králi Viefiljoskiro, iekh králi Tapuahoskiro, jekh králi Xiefieroskiro, iekh králi Afiekoskiro, jekh králi Šaronoskiro, iekh králi Madonoskiro, jekh králi Asoroskiro, iekh králi Šimrono-Mieronoskiro, jekh králi Ahsafoskiro, iekh králi Faanahoskiro, jekh králi Miegidonoskiro, iekh králi Kiediesoskiro, jekh králi Ioknieamoskiro pašýl Karmilo, iekh králi Doroskiro pašýl Nafaf-Doro, jekh králi Goimoskiro dro Galgálo, iekh králi Fircakiro: sarén kral'jén sys trijánda jekh (savén pirizorjakirde Izrailjoskire čhavé). Kiéli Isúso phurija, i zagijá dre phuré beršá, tedy Raj Devél phendiá léske: “Tu phurijan, zagijan dre phuré beršá, a phuv te les dre meknó mištypén jačélape iščo (inké) drieván but. Ĥáda, saví jačélape phuv: sarí provincyja pašýl Filistimo i sarí Giesuroskiri phuv. Sihorostyr, so isyn angíl Jegípto ke miéža Jekronoskiri ke paš-ratítko (sievierno rig), dalé phuvjá ginenape Xanaanskonenca, pe savé isyn pandž xulaja Filistimoskire: Gazsko, Azotsko, Askalonsko, Giefsko, Jekronsko i Avieisko; ke paš-dyvés (jugo) sarí Xanaanóskiri phuv Miearatyr Sidonskonatyr ke Afieko, ke Amoriejéngire rigá, adiáke-pac' phuv Gievaloskiri i saró Liváno ke khameskiro ŭzgiiben Vaal-Gado, so isyn pašýl Jermonoskiri bérga, ke zagiibén dre Jemafo. Sarén bergitkonen manušén Livanostyr ke Misriefof-Maimo, sarén Sidonianen Me vytradava Izrailjoskire-čhavéngire móstyr; rozde la dre mištypnáskiri miéra Izrailjoske, syr Me rakirdjom túke; rozde daja phuv dre mištypnáskiri miéra jeniá rodycenge i pašake Manasijáskire rodycóske. A ródyco (čang) Ruvimoskiro i Gadoskiro javire pašésa Manasijáskire rodycosa doresné péskiri mištypnáskiri miéra Mojzastyr pal Iordáno ke vastóko, syr dyjá lénge Mójza, Ráskiro-Devléskiro pishári, Aroierostyr, savó isyn pe brégo Arnonoskire rekicakiro (lenorjakiro), i fóro, savó isyn maškír sýgno rékica (lenorí) pe dólo, i sarí loščýna Miedieva ke Divono; adiáke-pac' saré Sigonoskire fórja, Amoriejéngire kralískire, savó sys kralísa ke Jesievóno, ke miéžy Amonitianengire, adiáke-pac' Galaádo i miéža Giesursko i Maahakire, i sarí bérga Jermono i saró Vasáno ke Salha, saró Vasanoskire-Ogoskiro kralipén, savó sys kralísa dre Astarofa i dre Jedreja. Jov jaciápe jekh Riefaimendyr, savén Mójza domardiá i protradyja. Ne čhavé Izrailjoskire na vytradyné manušén Giesuroskiren i Maahijoskiren, i dživéla Giesuro i Maaha maškír Izrailjo ke davá dyvés. Jekhe rodycóske Lievijoskireske na dyjá mištypnáskiri miéra: svénto janybén Ráskiro-Devléskire, Devléskiro Izrailjoskiro, ake, isyn léskiri mištypnáskiri miéra, syr phendiá léske Raj Devél. Rodycoske Ruvimóskire čhavénge pir léngire kherá dyjá mištypnáskiri miéra Mójza: rigasa lengirjasa sys Aroiero, savó isyn pe Arnonoskire-rekicakiro (lenorjakiro) brégo, i fóro, savó isyn maškír rékica (lenorí), i sarí loščýna pašýl Miedieva, Jesievóno i saré léskire fórja, savé isyn pe loščýna, i Divono, Vamofo-Vaalo i Bief-Vaal-Mieono, Iaaca (Jaca), Kiediemofo i Miefaafo, Kiriafaimo, Sivma i Cerief-Šaharo pe bérga Jemieko, Bief-Fiegoro i štéty pašýl sklono Fasgakiro i Bief-Ješymofo, i saré fórja pe loščýna, i saró Sigonoskiro kralipén, Amorieiskone-kralískiro, savó sys kralísa dre Jesievóno, savés zamardiá Mójza, adiáke-pac' i Madiamskone šeralen: Jevijas, i Riekiemos, i Curas, i Xuras, i Rievos, Sigonoskire thagar'jen, savé dživdé pe doiá phuv; adiáke-pac' Valaamos, Vieoroskire čhavés, zumakiribnaskires, zamardé Izrailjoskire čhavé kurtalása khetané dre ginybén, kicý jone zamardé. Rigasa pir miéža Ruvimóskire čhavéngire sys Iordáno. Ĥáda, isyn mištypnáskiri miéra Ruvimóskire čhavengiri, pir léngire kheritkarody, fórja i gavá léngire. Mójza adiáke-pac' dyjá mištypnáskiri miéra Gadóskire rodycóske, čhavénge Gadoskirenge, pir kherítka ródy léngire: rigasa lengirjasa sys Jaziero (Iaziero) i saré Galaadóskire fórja, i paš Amonoskire čhavéngiro pe phuv ke Aroiero, so isyn angíl Rava, i phuvjá Jesievonoskire ke Ramaf-Micfa i Vietonimo, i Mahanaimostyr ke Daviroskire-miežakire rigá, i pe dólo Bief-Garamo i Bief-Nimra i Sokhofo i Cafono, so jaciápe Sigonoskire kralipnastyr, Jesievonoskire kralískiro; léskire rigasa sys Iordáno ke Xinieriefoskiro paní pal Iordáno ke vastóko. Ĥáda, isyn Gadóskire-čhavengiri mištypnáskiri miéra, pir kherítka ródy léngire, fórja i gavá léngire. O Mójza dyjá mištypnáskiri miéra i pašake Manasijáskire rodycóske, savó sys pal paš Manasijáskire-čhavéngire rodycóstyr, pir kherítka ródy léngire; Léngiri rig pir miéža sys: Mahanaimostyr saró Vasáno, saró Ogaskiro kralipén, Vasanoskire-kralískiro, i saré gavá Jairoskire, so isyn dre Vasáno, šovdešá fórja; a paš Galaadaskiri i Astarofoskiri i Jedrejakiri, Vasanoskire-Ogoskire-kralipnaskire fórja, dyné Mahiraskire čhavénge, Manasijáskire-čhavéskire i pašake Mahiroskire čhavénge, pir kherítka ródy léngire. Ĥáda, so, Mójza dyjá dre mištypnáskiri miéra pe Moavitoskire loščyny pal Iordáno proti Jerihóno ke vastóko. Ne Lievijoskire rodycóske Mójza na dyjá mištypnáskiri miéra: Raj Devél, Devél Izrailjoskiro, Kokoró sys léngiri mištypnáskiri miéra, syr Jov rakirdiá lénge. Ĥáda, so, doresné (dolyne) dre mištypnáskiri miéra Izrailjoskire čhavé pe Xanaanóskiri phuv, so rozdyne lénge dre mištypnáskiri miéra rašáj Jelizáro i Isúso, Navinoskiro čhavó, i rodengire barydyrá pe Izrailjoskire-čhavéngire ródycy. Pir žriébijo rozdyne jone, syr priphendiá Raj Devél pir Mojzaste, jeniá rodycenge i pašake Manasijáskire rodycóske. Paldavá so duje rodycenge i pašake Manasijáskire rodycóske Mójza dyjá dre mištypnáskiri miéra pal Iordáno, Lieviténge na dyjá mištypnáskiri miéra maškirál lénde; pal-dová so Iosifóskire čhavéndyr vyginé duj ródycy: Manasijáskiro i Jefriemoskiro; pir davá jone i na dyné Lieviténge pašá pe phuv, a jekh fórja vaš džiibén léngire phuvjása vaš kheritkoné murdalénge (skoto) léngire i vaš javír léngire l'goty (vygody). Syr priphendiá Raj Devél Mojzáske, adiáke i kerdé Izrailjoskire čhavé, kiéli rozdenas phuv dre mištypnáskiri miéra. Judáskire čhavé javné dro Galgálo ke Isúso (Johošuá), i phendiá léske o Xalievo, Jefonijoskiro čhavó, Kieniezejanino: “Tu džinésa, so rakirdiá Raj Devél Mojzáske, Devléskire manušéske, pal mánde i pal túte dre Kadies-Varna. Mánge sys štardešá berš, kiéli Mójza, pishári Ráskire-Devléskiro, bičhadiá man Kadies-Varnatyr te obdykhav phuv, i me jandjom léske dre otphenybén, so sys mánde pe iló: pšála miré, savé psirdé mánca, jandlé dar dro iló manušéngiro, a me kerdjom saró dro čačipén miréske Ráske-Devléske, Devléske; i sovlahadiá Mójza dre dová dyvés i phendiá: ‘Phuv, pir saví psirdiá tyrí ĥerój, javéla mištypnaskire mierasa túke i tyré čhavénge pe viéko, pal-dová so tu dre čačipén saró kerdián Ráske-Devléske, Devléske miréske.’ I adiáke, ĥáda, Raj Devél jačkirdiá man džides, syr Jov rakirdiá; akaná štardešá pandž berš progijá dolé časostyr, kiéli Raj Devél phendiá Mojzáske davá lav, i Izrailjo psirdiá pir čhučí phuv; akaná, ĥáda, mánge ohtodešá pandž berš; ne i akaná me adiáke-pac' som zoraló, syr i tedy, kiéli bičhadiá man Mójza: ci but tedy sys mánde zor, adákicy i kakaná isyn vaš dová, sob (kaj) te maravpe, i te vydžav i te zadžav; i adiáke, de mánge daja bérga, pal saví rakirdiá Raj Devél dre dová dyvés; pal-dová so šundián dro dová dyvés, so odój dživéna Jenakoskire čhavé, i fórja lénde isyn baré i zoralé tynénca, moginéla te javél, so Raj Devél javéla mánca, i me vytradava len, syr rakirdiá Raj Devél”. Isúso bahtiakirdiá les, i dyjá dre mištypnáskiri miéra Xalievoske, Iiefonijoskire čhavéske Xievróno. Adiáke Xievróno jaciápe mištypnaskire mierasa Xalievoske, Iiefonijoskire-čhaveskiri, Kieniezejaninoskiri, ke davá dyvés, pal-dová, so jov dro čačipén kerdiá saró, syr phendiá Raj Devél, Devél Izrailjoskiro. Lav Xievronoske angledýr sys Kiríaf-Arba, syr khardiape maškirál Jenakoskire čhavénde jekh baró manúš. I phuv jaciá štyl maribnastyr. I sys žriébijo Judáskire čhavéngire rodóske, pir léngire kherítka ródy, vypyja dasavo: pe miéža Idumejasa sys čhučí phuv Sin, ke paš-dyvés (jugo), pašýl Fiemanoskiro jagóro (krajo); paš-dyvesytkoné léngire rigasa pir miéža sys Londeskire-morjoskiro (derjavéskiro) jagóro (krajo), savó tyrdelape ke paš-dyvés zalivostyr; pe paš-dyvés jov džála ke vučipén Akravimoskiro, džála pašýl Cino, i, džála upré paš-dyvesytkoné rigátyr ke Kadies-Varni, džála pašýl Xiecrono, i, džála upré ke Adaro, poriskirela ke Karkaja, Paló davá jov prodžála Acmono, džála pašyledýr ke Jegiptóskiri rékica (lenorí) adiáke, so jagóro dalé rigakiro isyn mórjo (derjáv). Davá javéla paš-dyvesýtko tumarí rig. Rigasa pir miéža ke vastóko sys Londo mórjo (derjáv), ke jagóro Iordanoskiro; a rig paš-ratitkoné sieviernone rigátyr lélape morjoskire (derjavéskire) zalivostyr, Iordanoskire jagoróstyr; adathýr rig džála upré ke Bief-Xogla i prodžála paš-ratitkoné rigátyr ke Bief-Arava, i džála rig upré ke Boganoskiro bar, Ruvimóskire čhavéskiro; Tén'ci (potom) džála upré rig ke Daviro dolostyr Ahoro, i pe paš-rat (sieviero) riskiréla ke Galgálo, savó isyn proti Adumimoskiro vučipén, savó isyn paštó paš-dyvesytkoné rekicakire rigátyr; adathýr rig prodžála ke Jen-Šemiešoskire paniá i končynelape pašýl Jen-Rogielo. Adathýr rig pir miéža džála upré ke Jenomoskire-čhavéskiro dólo paš-dyvesytkoné Jevusoskire rigátyr, savó isyn Jerusalimo, i ĥazdélape rig pe bergákiro vučipén, savó isyn ke zapado proti Riefaimoskiro dólo ke paš-rat; bergakire vučipnástyr miežakiri rig riskiréla ke Nieftoahoskiri panieskiri ĥanyngori (istočniko) i džála ke fórja Jefronoskire bergakire, i riskiréla miežakiri rig ke Vaalo, savó isyn Kiríaf-Jarimo; Tén'ci (potom) riskiréla miéža Vaalatyr ke mórjo (derjáv), ke bérga Sieiro, i džála paš-ratitkoné bergakire Iiearimoskire rigasa, saví isyn Kiesalono, i dodžála telé ke Viefsamiso, i prodžála pirdál Fimna. Adathýr miežakiri rig džála paš-ratitkoné (sieviernone) Jekronoskire rigasa, i riskiréla rig ke Šikarono, prodžála pirdál bérga Vaalo i dodžála ke Iavnieilo, i jagóro miežakiro dodžála ke sámo mórjo (derjáv). Zapadnone-miežakiri rig isyn pir brégo baré morjostyr (derjavestyr). Ĥáda, isyn miežakiri rig Judáskire-čhavéngiro pir léngire kherítka ródy (pliémi) saré rigéndyr. I Xalievoske, Jefonijoskire čhavéske, Isúso dyjá paš maškír Judáskire čhavénde, syr priphendiá Raj Devél Isusóske: Kiríaf-Arba, Jenakoskire dadéskiro, javirés davá štéto kharélape Xievróno. I vytradyjá odothýr Xalievo trinen Jenakoskire čhavén: Šiešajos, Ahimanos i Falmajos, Jenakoskire čhavén. Adathýr gijá jov proti Daviroskire manušénde (lav Daviroskiro angledýr sys Kiríaf-Siefiero). I phendiá Xalievo: “Kon džála maribnása pe Kiríaf-Siefiero i léla les, odoléske otdáva Ahsa, čha mirja, paloróm”. I lyjá les Gofoniilo, Kienazoskiro čhavó, Xalievoskire-pšaleskiro, i otdyjá jov léske Ahsa, peskirjá čha, dre romniá (romniáte). Kiéli javdiá časo láke te džal, la vysykliakirde te mangél lákire dadéstyr félda, i joj zgija oslostyr. Xalievo phendiá láke: “So túke?” Joj phendiá: “De mánge bahtiakiribén; tu dyján mánge phuv paš-dyvesýtko (poludjono), de mánge ĥanyngorja (istočniki) panieskire”. I dyjá jov láke ĥanyngorja upratune i ĥanyngorja telatuné. Ĥáda, isyn mištypnáskiri miéra Judáskire čhavéngire rodycoskire, pir kherítka ródy (pliémi) léngire: fórja pe jagóro (krajo) Judáskire čhavéngire rodycóstyr sys khetané Idumiejosa pe paš-dyvesýtko (taty) rig: Kavceilo, Jediero i Iaguro, Kina, Dimona, Adada, Kiedieso, Asoro i Ifnano, Zifo, Tieliemo i Valofo, Gacor-Xadafa, Kiriafo, Xiecrono, javirés kharélape Gacoro, Amamo, Šema i Molada, Hacar-Gada, Xiešmono i Vief-Palieto, Hacar-Šualo, Virsávija i Viziofeja, Vaalo, Iimo i Acemo, Jelfolado, Kiesilo i Xorma, Cyklago, Madmano i Sansana, Lievaofo, Šelihimo, Aino i Rimono: saré biš te jeniá fórja léngire gavenca. Pe telatuné štéty: Ještaolo, Cora i Ašna, Zanoaho, Jen-Ganimo, Tapuaho i Gajenamo, Iaramufo, Odolamo, Soho i Azieka, Šaaraimo, Adifaimo, Giediera ci Giedierofaimo: dešuštar fórja léngire gavenca. Cenano, Xadaša, Migdal-Gado, Dilieano, Micfe i Iokfieilo, Lahiso, Vockafo i Jeglono, Habono, Lahmaso i Xifliso, Giedierofo, Bief-Dagono, Najema i Makiedo: dešušov fórja léngire gavenca. Livna, Jefiero i Ašano, Ifofaho, Ašna i Niecyvo, Kieila, Ahzivo i Marieša: jeniá fórja léngire gavenca. Jekrono léskire for'jenca i gavenca, savé sys tel léskiri zor. I Jekronostyr saró ke mórjo (derjáv), so isyn pašýl Azoto, léngire gavenca, Azoto, léskire fórja i gavá, savé sys tel léskiri zor, Gaza lákire fórja i gavá, savé sys tel lákiri zor, ke kokori Jegiptóskiri sýgno rékica (lenorí) i baró mórjo (derjáv), saveskiro brégo isyn miežakiri rig. Pe bérgi sys: Šamiro, Iatiro i Soho, Dana, Kiriafo-Sana, javirés Daviro, Anafo, Eštemo i Animo, Gošeno, Xolono i Gilo: dešujekh fórja léngire gavenca. Aravo, Duma i Ješano, Ianumo, Bief-Tapuaho i Afieka, Humta, Kiríaf-Arby, javirés kharlape Xievróno i Cygoro: jeniá fórja léngire gavenca. Maono, Karmilo, Zifo i Juta, Izriejeljo, Iokdamo i Zanoaho, Kaino, Givá i Fimna: deš fórja léngire gavenca. Halhulo, Bief-Curo i Giedoro, Maarafo, Bief-Anofo i Jeltiekono: šov fórja léngire gavenca. Kiríaf-Vaalo, javirés kharlape Kiriafo-Jarimo, i Arava: duj fórja léngire gavenca. Pe čhučí phuv: Bief-Arava, Midino i Siekaha, Nivšano, Ir-Mielaho i En-Giedi: šov fórja léngire gavenca. Ne Jevusiejen, Jerusalimóskire manušén, na mogindlé te vytraden Judáskire čhavé, i paldavá Jevusiei dživéna Judáskire čhavénca ke Jerusalimo až ke davá dyvés. Tén'ci (potom) vypyja žriébijo Iosifóskire (Jozáskire) čhavénge: Iordanostyr pašýl Jerihóno, pašýl Jerihonoskiro paní pe vastóko, ke čhučí phuv, saví tyrdelape Jerihonostyr ke Viefiljoskiri bérga; Viefiljostyr džála miežakiri rig ke Luza, i piridžala ke Arhakiri miéža ke Atarofo, i zmekelape ke mórjo (derjáv), ke Iaflietoskiri rig, pe Telatuny rig Bief-Oronoskiri i ke Gaziero, i jagóro isyn pašýl mórjo (derjáv). Davá doresné (dolyne) dre mištypnáskiri miéra Iosifóskire (Jozáskire) čhavé: Manásija i Jefriémo. Rig pir miéža Jefriemóskire čhavéngiro pir léngire kherítka ródy sys dasaví: vastokóstyr léngire mištypnaskire mierakire rigasa sys Atarofo-Adaro ke Bief-Orono upratuno; Tén'ci (potom) džála miežakiri rig ke mórjo (derjáv) sieviernone Mihmiefafoskire rigasa i riskiréla ke vastočno rig pe Faanaf-Silómo, i obdžala les vastočnone Ianohoskire rigátyr; Ianohostyr, miéža džála telé ke Atarofo i Naarafo, prijačela ke Jerihóno i dodžála ke Iordáno. Tapuahostyr džála miežakiri rig ke mórjo (derjáv), ke sýgno rékica (lenorí) Kaná, i lákiro jagóro zadžála dre mórjo (derjáv). Ĥáda, isyn mištypnáskiri miéra Jefriemóskire čhavéngire pir ródycy, pir kherítka ródy (pliémi). I fórja otginé Jefriemóskire čhavénge dre Manasijáskire-čhavengiri mištypnáskiri miéra, saré fórja léngire gavenca. Ne Jefriemliani na vytradyné Xananiejen, savé dživdé ke Gaziero; paldavá Xananiei dživdé maškirál Jefriemlianende ke davá-pac' dyvés, pleskiri lénge dan'. I vypyja žriébijo Manasijáskire rodycóske, adiáke syr jov sys Iosifoskiro anglatunó čhavó. Mahiroske, Manasijáskire anglatuné čhavéske, Galaadóskire dadéske, savó sys muršari pe maribén, jaciápe Galaádo i Vasáno. Jaciápe mištypnáskiri miéra i javirénge Manasijáskire čhavénge, pir léngire kherítka ródy, i Avijezeroskire čhavénge, i Xieliekoskire čhavénge, i Asriiloskire čhavénge, i Xiefieraskire čhavénge, i Šiemidaskire čhavénge. Ĥáda, sys čhavé Manasijáskire, Iosifóskire-čhavéskire muršá, pir léngire kherítka ródy (pliémi). Salpaadoste, Xiefieroskire čhavéste, Galaadóskire čhavéste, Mahiroskire čhavéste, Manasijáskire čhavéste, na sys čhavén, a sys jekh čhaja. Ĥáda, isyn léngire čhajengire lavá: Mahla, Noa, Xogla, Milka i Firca. Jone javné ke rašáj Jelizáro i ke Isúso, Navinoskiro čhavó, i ke barydyrá, i phendlé: “Raj Devél phendiá Mojzáske te del aménge mištypnáskiri miéra maškír amaré pšalénde”. I dyné lénge mištypnáskiri miéra, pir Ráskire-Devléskiro uphenybén, maškír léngire dadéskire pšalénde. I vygijá Manasijaske deš rozdyibena (učastki), apríč Galaadóskire i Vasanoskiri phuv, saví sys pal Iordáno; pal-dová so Manasijáskire čhaja doresné (dolyne) mištypnáskiri miéra maškirál léskire čhavénde, a Galaadoskiri phuv jaciápe javire Manasijáskire čhavénge. Miežakiri rig Manasijaskiri džála Asirostyr ke Mihmiefafo, savó isyn proti Sihiema; adathýr džála miéža pe čačí (pravo) rig ke En-Tapuahoskire manušá. Phuv Tapuaho jaciápe Manasijaske, a fóro Tapuahoskiro pašýl miežakiri rig jaciápe Manasiijaskire-Jefriemóskire čhavénge. Adathýr miežakiri rig džála telé ke sýgno rékica (lenorí) Kano, paš-dyvesytkoné (južnone) panieskire rigátyr. Fórja dalé isyn Jefriemóskire, usajékh so jone isyn terdé maškír Manasijáskire fórja. Miéža Manasijaskiri – pe sieviernone rekicakiri (len'rjakiri) rig, i končynelape dro mórjo (derjáv). Dová, so isyn ke paš-dyvés, dová isyn Jefriemoskiro, a so isyn ke paš-rat, dová isyn Manasijáskiro; mórjo (derjáv) sys léngire miežasa; ke Asiro jone prijačena paš-dyvesytkoné rigátyr, i ke Isaharo vastočnone rigátyr. Isaharoste i Asiroste isyn i Manasijaske Bief-San i štéty, savé isyn tel léskiri zor, Ivlieamo i léskire štéty, i manušá Dorakire i štéty, savé sys tel léskiri zor, manušá En-Dorakire i štéty, savé sys tel léskiri zor, manušá Faanahoskire i štéty, savé sys tel léskiri zor, manušá Miegidonoskire i štéty, savé sys tel léskiri zor, i tríto okrugakire pašá Nafiefoskiro. Manasijáskire čhavé na mogindlé te vytraden dalé-for'jengire manušén, i Xananiei jačnépe te dživén pe daja phuv. Kiéli Izrailjoskire čhavé javné dre zor, tedy jone kerdé Xananiejen andynarščykenca (danikenca), ne te vytraden len na vytradyné. Iosifóskire (Jozáskire) čhavé rakirdé Isusóske i phendlé: “Sóske tu dyján mánge dre mištypnáskiri miéra jekh žriébijo i jekh učastko, tedy syr amen but manušá, pal-dová so adiáke bahtiakirdiá man Raj Devél? Isúso phendiá lénge: “Kóli túte isyn but manušá, tedy džá dro veš i odój, pe phuv Fierieziejengiri i Riefaimengiri, rosker péske štéto, kóli Jefriemóskiri bérga vaš túke isyn tiasno (tango). Iosifóskire čhavé phendlé: “Na jačélape pal aménde bérga, pal-dová so sastruné maribnýtka vurdyná saré Xananiejende, savé dživéna pe dólo, syr odolénde, savé isyn dre Bief-Sana i dre štéty, savé isyn tel léskiri zor, adiáke i odolénde, savé isyn pe Izrailjoskiro dólo.” Ne Isúso phendiá Iosifóskire, Jefriemóskire i Manasijáskire kheréske: “Túte isyn but manušá i zor túte isyn bari; na jekh žriébijo javéla túte: i bérga javéla tyrí, i davá veš, tu roskeresa čašča i joj iavéla ke kokoró lákiro jagóro; pal-dová so tu vytradesa Xananiejen, mek i isyn lénde maribnýtka vurdyná sastruné, i mek isyn jone zoralé.” Saró Izrailjoskire čhavéngiro skedyibén skedyjape dro Silómo, i čhudé odój skedyibnáskiri šátra (skínija), pal-dová so phuv sys zalyny lénca. Izrailjoskire čhavéndyr jaciápe eftá ródycy (čangá), savé na doresné (na dolyne) péskiri mištypnáskiri miéra. I phendiá Isúso Izrailjoskire čhavénge: “Ci ĥará (dlúges) tumé javéna te kuninenpe (te na radinen) pal dová, sob (kaj) te džas i te les dre meknó mištypén (nasliedijo) phuv, saví dyjá tuménge Raj Devél, Devél, tumaré-dadéngiro? Den péstyr pir trin manušá rodycóstyr, me bičhaváva len, i jone, uštyi, prodžána pir phuv i občhinena la, syr trej te rozdes lénge pe mištypnáskiri miéra, i javéna ke me; mek te rozden la pe eftá mištypnaskire miery (pašá); Juda mek te jačélpe pe péskiri rig pe paš-dyvés (jugo), a Iosifoskiro kher mek te jačélpe pe péskiri rig pe paš-rat (sievierno); a tumé rosčhinen phuv pe eftá mištypnaskire miery (pašá) i janén mánge adarík: me čhurdava tuménge žriébijo adáj angíl Ráskire-Devléskiro, tumaré Devléskiro muj; a Lieviténge nane paš maškír tuménde, pal-dová so sventyma Ráskire-Devléskiri isyn léngiri mištypnáskiri miéra; Gado, Ruvimo i paš Manasijáskire rodycóstyr doresné (dolyne) péskiri mištypnáskiri miéra pal Iordáno ke vastóko, saví dyjá lénge Mójza, Ráskiro-Devléskiro pishári. Adalé manušá uštyné i giné. Isúso dyjá manušénge, savé giné te rosčhinen phuv dasavo uphenybén: “Džán, obdžan phuv, občhinen la i risjon ke me; a me adáj čhurdava tuménge žriébijo angíl Ráskire-Devléskiro muj, dro Silómo”. Jone giné, proginé pir phuv i občhindlé la, pir lákire fórja, pe eftá-mištypnaskire miery (pašá), dre lylvarí, i javné ke Isúso dro stáno, dro Silómo. Isúso čhurdyjá lénge žriébijo dro Silómo angíl Raste-Devléste, i rozdyja odój Isúso phuv Izrailjoskire čhavénge pir léngire učastki (rozdyibena). Pérvo žriébijo vygijá Vieniaminóskire-čhavéngire rodycóske, pir léngire kherítka ródy (pliémi). Rig miežakiri léngiri pir žriébijo gijá maškír Judáskire čhavénde i maškír Iosifóskire čhavénde; miéža léngiri pe paš-ratítko rig lélape pašýl Iordáno, i prodžála daja miéža pašýl Jerihóno paš-dyveséstyr (sievierostyr), i džála upré pe bérga ke zapado, i lákiro jagóro isyn pe čhučí phuv Biefyvieno. Odothýr miežakiri rig džála ke Luza, ke paš-dyvesýtko (južno) Luzakiri rig, javirés Viefíljo, i na džála telé rig ke Atarof-Adaro, ke bérga, saví isyn pe paš-dyvesýtko (jugoskiri) rig Bief-Oronoskiri telatuny; tén'či (potom) miéža riskiréla i zmekelape ke morjoskiri rig pe paš-dyvés (jugo) bergátyr, saví isyn pe paš-dyvés angíl Bief-Orono, i lákiro jagóro isyn pašýl Kiríaf-Vaalo, javirés kharlape Kiríaf-Iarimo, Judáskire čhavéngire fórja. Daja isyn západno rig. Paš-dyvesytkoné rigasa Kiríaf-Iarimostyr džála miéža ke mórjo (derjáv) i dodžála ke štéto, katýr džála paní Nieftoahostyr; tén'či (potom) miéža džála telé ke bergákiro jagóro, savó isyn angíl Jenomoskire čhavéskiro dólo, pe Riefaimoskiro dólo, ke paš-rat (sieviero), i džála telé Jenomaskire dolosa ke paš-dyvesýtko Jevusoskiri rig, i džála ke En-Rogielo; Tén'ci (potom) riskiréla paš-ratiatyr i džála ke En-Šiemiešo, i džála ke Gielilofo, savó isyn proti Adumimoskiro vučipén, i džála telé ke Boganoskiro bar, Ruvimóskire čhavéskiro; tén'či (potom) džála nádur loščynatyr (Aravijatyr) ke paš-dyvés i džála telé pe loščýna (Aravija); adathýr džála miežakiri rig pašýl Bief-Xogla pe paš-rat, i rigakiro jagóro paš dre paš-ratítko (sievierno) Londe morjoskiro (derjavéskiro), pašýl paš-dyvesýtko (južno) jagóro Iordanoskiro. Ĥáda, isyn paš-dyvesýtko miéža. Rigátyr vastočnonatyr miežasa sys Iordáno. Ĥáda, sys Vieniaminóskire čhavengiri-mištypnáskiri miéra, léskire miežienca saré rigéndyr, pir léngire kherítka ródy (pliémi). Fórja, so sys Vieniaminóskire čhavénde léngire rodycóske, pir léngire kherítka ródy (pliémi): Jerihóno, Bief-Xogla i Jemiek-Kiecico, Bief-Arava, Cemaraimo i Viefíljo, Avimo, Fara i Ofra, Kiefar-Amonajo, Afni i Gieva: dešudúj fórja léngire gavenca. Gavaóno, Ráma i Bierofo, Micfe, Kiefira i Moca, Riekiemo, Irfieiljo i Farala, Céla, Eliefo i Jevuso, javirés kharlape Jerusalimo, Givieafo i Kiriafo: dešuštar fórja léngire gavenca. Ĥáda, sys Vieniaminóskire-čhavengiri mištypnáskiri miéra, pir léngire kherítka ródy (pliémi). Javír žriébijo vygijá Simieonoske, Simieonoskire-čhavéngire rodycóske, pir léngire kherítka ródy (pliémi); i sys léngiri mištypnáskiri miéra maškír Judáskire-čhavengiri mištypnáskiri miéra. Dre léngiri mištypnáskiri miéra sys: Virsávija ci Ševa, Molada, Hacar-Šualo, Balá i Acemo, Jeltolado, Viefulo i Xorma, Cyklago, Bief-Markavofo i Xacar-Susa, Bief-Lievaofo i Šaruhieno: trijánda fórja léngire gavenca. Aino, Rimono, Jefiero i Ašano: štar fórja léngire gavenca, i saré gavá, savé sys pašýl dalé fórja až ke Vaalaf-Biejera, ci ke paš-dyvesýtko (južno) Ráma. Ĥáda, sys Simieonoskire-čhavéngire rodycoskiri mištypnáskiri miéra, pir léngire kherítka ródy (pliémi). Judáskire-čhavéngire rozdyibnastyr (učastkostyr) dyný sys miéra Simieonoskire-čhavéngire rodycóske. Adiáke syr Judáskire-čhavéngiro rozdyiben (učastko) sys drieván baró vaš lénge, to Simieonoskire čhavé i doresné mištypnáskiri miéra maškír léngiri mištypnáskiri miéra. Tríto žriébijo vypyja Zavulonoskire čhavénge pir léngire kherítka ródy, i tyrdyjape léngire-mištypnaskire mierakiri rig ke Sarido; I léngiri isyn miežakiri rig léngiri džála ke mórjo (derjáv) i ke Maralo i khetaniakirelape Dabiešefosa, i khetanakirelape sygnone rekicasa, saví isyn angíl Ioknieamomo. Saridatyr džála miéža pale ke vastočno rig, ke khameskiro ŭzgiiben, ke Kislof-Favoroskiri miéža; adathýr džála ke Davrafo i ĥazdélape ke Iafijo; adathýr prodžála ke vastóko dro Gief-Xiefiero, dre Ita-Kacyno, i džála ke Rimono, Mifoaro i Neja; i riskiréla miežakiri rig paš-ratiatyr (sievierostyr), ke Xanafono i lákiro jagóro pe dólo Iftah-Ela. Duredýr: Katafo, Nagalalo, Šymrono, Idiealo i Vifliejémo: dešudúj fórja léngire gavenca. Ĥáda, isyn Zavulonoskire-čhavéngiro meknó mištypén, pir léngire kherítka ródy (pliémi); ĥáda, isyn fórja i léngire gavá. Štárto žriébijo vygijá Isaharoske, čhavénge Isaharoskirenge, pir léngire kherítka ródy (pliémi); miežakire rigasa lengirjasa sys: Izriejeljo, Kiesulofo i Suniemo, Hafaraimo, Šyono i Anaharafo, Ravifo, Kišyono i Avieco, Riemiefo, Jen-Ganimo, En-Xada i Bief-Pacieco; i khetaniakirelape rig Favorosa i Šagacymosa i Viefsamisosa, i léngire rigakiro jagóro pašýl Iordáno: dešušov fórja léngire gavenca. Ĥáda, isyn Isaharoskire čhavéngiro rodycoskiro meknó mištypén, pir léngire kherítka ródy; ĥáda, isyn fórja i léngire gavá. Pándžto žriébijo vygijá Asiroskire čhavéngire rodycóske, pir léngire kherítka ródy; miežasa lengirjasa sys: Xielkafo, Xali, Vietieno i Ahsafo, Alamielieho, Amado i Mišalo. I khetaniakirelape miežakiri rig Karmilosa palatuné rigátyr i Šihoro-Livnafosa; tén'či (potom) džála pale ke khameskiro ŭzgiiben dre Vief-Dagono, i khetaniakirelape Zavulonosa i dolosa Iftah-Elasa paš-dyveséstyr, dro Bief-Jemieko i Nieijelo, i džála pašýl Kavulo, zervone (lievone) rigátyr; durydyr: Jevrono, Riehovo, Xamono i Kaná, ke Sidono baró; tén'či (potom) miéža risjola ke Ráma ke Tíro fóro zoralé tynosa, i riskiréla miežakiri rig ke Xosa, i jagóro lákiro pašýl mórjo (derjáv) dro štéto Ahziva. Duredýr: Uma, Afieko i Riehovo: biš te duj fórja léngire gavenca. Ĥáda, isyn Asiroskire-čhavéngiro rodycoskiro meknó mištypén, pir léngire kherítka ródy (pliémi); ĥáda, sys fórja i léngire gavá. Šóvto žriébijo vygijá Niefalimoskire čhavénge, Niefalimoskire čhavénge pir léngire kherítka ródy; miežakiri rig léngiri gijá Xieliefostyr i dubravendyr, so sys dre Cananima, ke Adami-Niekievo i ke Iavnieilo, ke Lakumo, i lákiro jagóro (krajo) sys pašýl Iordáno; adathýr risjola miéža pe zapado ke Aznof-Favoro i džála odothýr ke Xukoko, i khetaniakirelape Zavulonosa paš-dyveséstyr (jugostyr), i Asirosa khetaniakirelape zapadostyr, i Judasa pašýl Iordáno, khameskire ŭzgiibnastyr. Fórja zoralé tynénca isyn: Cydimo, Cero, Xamafo, Rakafo i Xinieriefo, Adamo, Ráma i Asoro, Kiedieso, Jedreja i En-Gacoro, Irieono, Migdal-Jelo, Xoriemo, Bief-Anafo i Viefsamiso: dešujenia fórja léngire gavenca. Ĥáda, sys Niefalimoskire-čhavéngire rodycoskiri miéra dro meknó mištypén pir léngire kherítka ródy (pliémi); ĥáda, sys fórja i gavá léngire. Danóskire čhavéngire rodycóske, pir léngire kherítka ródy, vygijá eftáto žriébijo; léngire mištypnaskire mierakire rigasa sys: Cora, Ještaolo i Ir-Šemiešo, Šaalavino, Aialono i Iola, Jelono, Fimnafa i Jekrono, Jeltiekie, Givviefono i Vaalafo, Igudo, Bienie-Vierako i Gaf-Rimono, Mie-Iarkono i Rakono miežasa nádur Iopijatyr. I vygijá Danóskire čhavengiri rig tykny vaš lénge. I Danóskire čhavé giné maribnása pe Lasiemo, i lyné les, i domardé les kurtalása, i doresné les dro mištypén péske, i lyné te dživén dre léste, i khardé Lasiemo Danosa pir péskire dadéskiro lav Dano. Ĥáda, isyn Danóskire čhavéngire rodycoskire mištypnáskiri miéra, pir léngire kherítka ródy; ĥáda, fórja i gavá léngire. Kiéli mekné jone phuv te rozden, pir lákire miéžy, tedy Izrailjoskire čhavé dyné maškír péste mištypnáskiri miéra Isusóske, Navinoskire čhavéske: pir Ráskiro-Devléskiro uphenybén dyné jone léske fóro Famnaf-Sarai, savó jov mangdiá, pe bérga Jefriemóskiri; i kerdiá jov fóro i dživdiá dre léste. Ĥáda, sys mištypnaskire miery, savé rašáj o Jelizáro, Isúso, Navinoskiro čhavó, i barydyrá pe stréčy rozdyne Izrailjoskire-čhavéngire rodycenge, pir žriébijo, dre Silómo, angíl Ráskire-Devléskiro muj, pašýl skedyibnaskire skinijakiro zagiibén. I mekné te rozden (te roskeren) phuv. I phendiá Raj Devél Isusóske: “Phen Izrailjoskire čhavénge: kerén péste znašybnaskire fórja, pal savé Me rakirdjom tuménge pirdál Mojzaste, sob (kaj) mogindiá te našél odorík umaribnari, savó domardiá manušés, so dyjape dukhá, nakamišy; mek dalé fórja te javén tuménde zrakhibnasa manušéstyr, savó othala pale pal rat, I kon našela dre jekh dalé for'jéndyr, mek te terdjol pašýl foróskire vudará i te rosphenel dro saró šunybén dalé foróskire phurydyrenge péskiro réndo; i jone les priléna ke pe dro fóro, i déna léske štéto, sob (kaj) jov te dživél lénde; i kiéli tradelape pal léste manúš, savó othala pale pal rat, tedy lénge naštý te vyden dre léskire vastá umaribnaris, pal-dová so jov na kamišy zamardiá péskire pašatunes, léste na sys ke jov nakamiben ni tasiá, ni pe tríto dyvés; mek jov te dživél dre davá fóro, paka javéla angíl manušénde pe séndo, paka na meréla baró rašái, savó javéla dre dolé dyvesá. A korigedýr (pozžie) mek te risjol umaribnari i te džal dre péskiro fóro i dre péskiro kher, dre fóro, savéstyr jov nastiá. I vykedyné Kiedieso dre Galiliéia pe Niefalimoskiri bérga, Sihiemo pe Jefriemóskiri bérga, i Kiríaf-Arba, javirés Xievróno, pe Judaskiri bérga; pal Iordáno, proti Jerihóno ke vastóko vykedyné: Biecero pe čhučí phuv, pe loščýna, Ruvimóskire rodycóstyr, i Ramófo dro Galaádo Gadóskire rodycóstyr, i Golano dro Vasáno Manasijáskire rodycóstyr. Dalé fórja sys dyné vaš saré Izrailjoskire čhavénge i vaš manušénge, savé javné javire rigátyr, savé dživéna dre lénde, sob (kaj) te našél odorík kažno (sváko), kon zamardiá manušés pir doš, sob (kaj) te na merél jov manušéskire vastéstyr, savó othala pale pal rat, paka javéla angíl manušénde pe séndo. Tén'ci Lieviténgire-strečakire barydyrá javné ke rašáj Jelizáro i ke Isúso, Navinoskiro čhavó, i ke Izrailjoskire-čhavéngire barydyrá pe stréčy, i rakirdé lénge dro Silómo, pe Xanaanóskiri phuv, i phendlé: “Raj Devél rakirdiá pir Mojzaste te den aménge fórja vaš džiibén i léngiri phuv vaš amaré kheritkoné murdalénge (skoto)”. I dyné Izrailjoskire čhavé Lieviténge péskire mištypnaskire mieratyr, pir Ráskire-Devléskiro uphenybén, dalé fórja léngire phuvjása. Vygijá žriébijo Kaafovoskire kheritkoné rodénge; i jaciápe pir žriébijo rašaskire Aaronóskire čhavénge, Lieviténge, Judáskire rodycóstyr, i Simieonoskire rodycóstyr, i Vieniaminóskire rodycóstyr, dešutrin fórja; a javirénge Kaafoskire čhavéndyr: Jefriemóskire kheritkoné rodendyr rodycóstyr, i Danóskire rodycóstyr, i Manasijáskire rodycoskire pašatyr (pašestyr), pir žriébijo, jaciápe deš fórja. A Girsonoskire čhavénge – Isaharoskire-kheritkoné rodóstyr, so isyn dre léngiro ródyco i Asiroskire rodycóstyr, i Niefalimoskire rodycóstyr, i Manasijáskire-rodoskire pašatyr dre Vasáno, pir žriébijo, jačné dešutrin fórja; Mierarinoskire čhavénge, pir léngire kherítka ródy, Ruvimóskire rodycóstyr, Gadóskire rodycóstyr i Zavulonoskire rodycóstyr dešudúj fórja. I otdyné Izrailjoskire čhavé Lieviténge dalé fórja léngire phuvjása, syr rakirdiá Raj Devél pirdál Mojzaste, pir žriébijo. Judáskire-čhavéngire rodycóstyr i Simieonoskire-čhavéngire rodycóstyr dyné fórja, savé adáj khardé pir lav: Aaronóskire čhavénge, Kaafonoskire kheritkoné rodóstyr, Lievijoskire čhavéndyr, adiáke syr žriébijo léngiro sys pérvo, dyné fóro Kiríaf-Arba, Jenakoskiro dad, javirés kharlape Xievróno, pe Judaskiri bérga, paš-foritko phuv sys pašýl láte; a félda dalé foróskiri i léskire gavá otdyné dre majonko Xalievoske, Jefonijaskire čhavéske. I adiáke rašaskire Aaronóskire čhavénge dyné znašybnaskire fórja vaš umaribnar'jenge – Xievróno i léskiri phuv, – Livna i lákiri phuv, Iatiro i léskiri khetaný phuv, – Ještemo i léskiri khetaný phuv, Xolono i léskiri khetaný phuv, – Daviro i léskiri khetaný phuv, Aino i léskiri khetaný phuv, – Juta i lákiri khetaný phuv, – Bief-Šemiešo i léskiri khetaný phuv: jeniá fórja duje dalé rodycendyr; a Vieniaminóskire rodycóstyr: – Gavaóno i léskiri khetaný phuv, – Gieva i lákiri khetaný phuv, Anafofo i léskiri khetaný phuv, – Almono i léskiri khetaný phuv: štar fórja. Saré fórja Aaronóskire čhavénge, rašange, jačnépe dešutrin fórja léngire khetanune phuv'jenca. I Kaafoskire čhavéngire kheritkoné rodycenge, Lieviténge, javire Kaafonoskire čhavéndyr, pir léngiro žriébijo, jačnépe fórja Jefriemóskire rodycóstyr; i dyné lénge znašybnaskiro fóro vaš umaribnariske – Sihiemo i léskiri khetaný phuv, pe Jefriemóskiri bérga, – Gieziero i léskiri khetaný phuv, i Kivcaimo i léskiri khetaný phuv, Bief-Orono i léskiri khetaný phuv: štar fórja; Danóskire rodycóstyr: Jelfiekie i léskiri khetaný phuv, – Giviefono i léskiri khetaný phuv, Aialono i léskiri khetaný phuv, – Gaf-Rimono i léskiri khetaný phuv: štar fórja; pašatyr (pašestyr) Manasijáskire rodycóstyr: – Faanaho i léskiri khetaný phuv, – Gaf-Rimono i léskiri khetaný phuv: duj fórja. Saré fórja léngire phuv'jenca sys deš, so jačnépe javire rodénge Kaafoskire čhavéndyr. A Girsonoskire čhavénge, Lievitoskire rodóstyr, dyné: pašatyr Manasijáskire rodycóstyr znašybnaskiro fóro vaš umaribnariske – Golano dre Vasáno i léskiri khetaný phuv, i Bieještiera i lákiri khetaný phuv: duj fórja; Isaharoskire rodycóstyr: – Kišyono i léskiri khetaný phuv, – Davrafo i léskiri khetaný phuv, Jarmufo i léskiri khetaný phuv, – Jen-Ganimo i léskiri khetaný phuv: štar fórja; Asiroskire rodycóstyr: – Mišalo i léskiri khetaný phuv, Avdono i léskiri phuv, Hielkafo i léskiri khetaný phuv, – Riehovo i léskiri khetaný phuv: štar fórja; Niefalimoskire rodycóstyr znašybnaskiro fóro vaš umaribnariske – Kiedieso dre Galiliéia i léskiri khetaný phuv, – Xamof-Doro i léskiri khetaný phuv, – Karfano i léskiri khetaný phuv: trin fórja. Girsonoskire čhavénge pir léngire kherítka ródy (pliémi), doresné dešutrin fórja léngire phuvjása saré for'jéndyr. Mierariskire-čhavéngire kheritkoné rodóske, palatuné (posliednjone) Lieviténge, dyné: Zavulonoskire rodycóstyr Ioknieamo i léskiri khetaný phuv, Karfo i léskiri khetaný phuv, Dimna i lákiri khetaný phuv, Nagalalo i léskiri khetaný phuv: štar fórja; Ruvimóskire rodycóstyr Biecero i léskiri khetaný phuv, Jaca i léskiri khetaný phuv, Kiediemofo i léskiri khetaný phuv, – Miefaafo i léskiri khetaný phuv: štar fórja; Gadóskire rodycóstyr: znašybnaskire fórja vaš umaribnariske – Ramófo dre Galaádo i léskiri khetaný phuv, – Mahanaimo i léskiri khetaný phuv, Jesievóno i léskiri khetaný phuv, – Iaziero i léskiri khetaný phuv: saré sys štar fórja. Saré fórja Mierariskire čhavénge pir léngire kherítka ródy, palatuné (posliednjone) Lievitentire rodycenge, pir žriébijo, jačnépe dešudúj fórja. Saré Lieviténgire fórja maškír Izrailjoskire-čhavéngiro majenko (vladienijo) sys štardešá ohtó fórja léngire phuvjása khetanune. Paše dalé fórja sys: pašýl kažno fóro, pašýl léste sys khetaný phuv – adiáke sys pašýl dalé saré fórja. Adiáke otdyjá Raj Devél Izrailjoske sarí phuv, pal saví sovlahadiá Jov te del léngire dadénge, i jone doresné (dolyne) la dro meknó mištypén (nasliedijo) i lyné te dživén pe láte. I dyjá lénge Raj Devél ramánjo (pokojo) saré rigéndyr, syr sovlahadiá léngire dadénge; i nikón léngire saré vergéndyr na vyrikirdia proti lénde; sarén léngire vergén Raj Devél otdyjá dre léngire vastá. Na jaciápe nijékh lav, savó na kerdiápe čačipnása saré lačhé lavéndyr, savé Raj Devél rakirdiá Izrailjoskire kheréske; saró kerdiápe ke kónco (ke jagóro) (spolnindiape). Tedy Isúso khardiá ke pe ródyco Ruvimoskiro, Gadoskiro i paš Manasijáskiro ródyco, i phendiá lénge: “Tumé kerdé saró, so rakirdiá tuménge Mójza, Ráskire-Devléskiro pishári, i kandyné miré lavá dre saró, so me priphendjom tuménge; tumé na jačkirdé péskire pšalén pe but dyvesá ke davá dyvés, i kerdé, so triej te kerén pir Ráskire-Devléskiro, tumaré Devléskiro uphenybén: akaná tumaró Raj Devél, Devél, štyliakirdia (uspokoindia) tumaré pšalén, syr rakirdiá lénge; i adiáke, risjon i džán dre tumaré šátry, pe tumaré phuvjá, saví dyjá tuménge Mójza, Ráskire-Devléskiro pishári pal Iordáno; iekh pričhuvén zor (starinenpe) kučes te kerén saró (zapoviedi) i Zakóno, savó dyjá te kerén ke kónco (ke jagóro) tuménge Mójza, Ráskire-Devléskiro pishári: te rikirén syr Drógima Ras-Devlés, tumaré Devlés dro péskiro iló, te psirén saré Léskire droménca, te rakhén Léskire priphenybená, te pričhuvespe ke Jov i te dynarines Léske saré tumaré ilésa i saré tumaré diesa”. Korigedýr (pozžie) Isúso bahtiakirdiá len i otmekhcia len, i jone rozginepe pir péskire šátry. Jekhe Manasijáskire rodycoskire pašake dyjá Mójza mištypnáskiri miéra dro Vasáno, a javire léskire pašake dyjá Isúso mištypnáskiri miéra léskire pšalénca pir daja rig Iordáno ke zapado. I kiéli len otmekciá Isúso dre léngire šátry i bahtiakirdiá len, to phendiá lénge: “Baré barvalypnasa tumé risjona dre tumaré šátry, buté skotosa, rupésa, suvnakása, xarkomasa i sastyresa, i buté idiasa; rozden doresybén, savó lyné tumé tumaré vergéndyr, maškír péskire pšalénde”. I risiné, i giné čhavé Ruvimóskire i čhavé Gadóskire i paš Manasijáskiro ródyco Izrailjoskire čhavéndyr Silomostyr, savó isyn pe Xanaanóskiri phuv, sob (kaj) te džas pe Galaadoskiro phuv, pe phuv péskire majonkostyr (vladienijo), saví doresné jone dre mištypén (vladienijo) pir Ráskire-Devléskiro uphenybén, savó sys dynó pir Mojzaste. Syr javné jone pašýl miéžy pe phuv, so isyn pašýl Iordáno pe Xanaanoskiro phuv, čhavé Ruvimóskire i čhavé Gadóskire i Manasijaskiri paš ródyco kerdé odój pašýl Iordáno altárjo, baró žertvieniko pir bicialyben. I šundlé javír Izrailjoskire čhavé, so rakiréna: Ĥáda, čhavé Ruvimóskire i čhavé Gadóskire i paš Manasijaskiri ródyco kerdé altárjo pe Xanaanóskiri phuv, pe Iordanoskiri phuv, angíl Izrailjoskire čhavénde. Kiéli šundlé davá Izrailjoskire čhavé, tedy skedyjape saró Izrailjoskire-čhavéngiro skedyibén dro Silómo, sob (kaj) te džas proti lénde maribnása. Ĥaljon, i Izrailjoskire čhavé angledýr bičhadé ke čhavé Ruvimóskire i ke čhavé Gadóskire i ke paš Manasijáskiro ródyco pe Galaadoskiri phuv Finiejesos, rašás, Jelizaroskire čhavés. I lésa lyné dešen barydyrén, pir barydyreste pe stréčy (pokolienii) saré Izrailjoskire rodendyr; kažno (sváko) léndyr sys rodoskire barydyrésa pe tysjoncy Izrailjoskire. I javné jone ke čhavé Ruvimóskire i ke čhavé Gadóskire i ke paš Manasijáskiro ródyco, pe Galaadoskiri phuv, i rakirdé lénge i phendlé: “Adiáke rakiréla saró Ráskire-Devléskiro skedyibén: ‘Savó dasavo čoripén (pristuplienijo) kerdé tumé angíl Izrailjoskire Devléste, so otginé kakaná Devléstyr, keri péske altárjo i ĥazdynépe akaná proti Raste-Devléste? Naúšto na uhtýlla (nádosi) vaš tuménge Fiegoroskiro čoripén, savéstyr ame na vyžužakirdiampe ke davá dyvés, i pal savó sys meribén pe Ráskire-Devléskiro skedyibén? A tumé adadyvés otdžana Rástyr-Devléstyr! Dadyves tumé ĥazdénape proti Raste-Devléste, atasiá rosholiasola Raj Devél pe saré Izrailjoskire manušénde. Kóli phuv so tumé doresné zdelape tuménge nažužy, tedy piridžan pe phuv Ráskire-Devléskiro majonkoskiri (vladienijoskiri), pe saví isyn Ráskire-Devléskiri šátra (skínija), len mištypnáskiri miéra maškír aménde, i na ĥazdénpe proti Raste-Devléste, i pe aménde na ĥazdénpe, na kerén péske altárjo, apríč amaré Ráskire-Devléskire, Devléskire altarjostyr. Ci na jekh Ahano, Zarakiro čhavó, kerdiá proštaviben (pristuplienijo), lyjá sovlahadestyr, a xolý sys pe saré Izrailjoskire manušénde? Na jekh jov, kon myjá pal péskiro čoripén.’” Čhavé Ruvimóskire i čhavé Gadóskire i paš Manasijáskiro ródyco dre otphenybén pe davá rakirdé Izrailjoskire tysjoncengire barydyrénge: “Devél devlengiro, Raj Devél, Devél devlengiro, Raj Devél, Jov džinéla, i Izrailjo mek te džinél! Kóli ame ĥazdasape i otdžasa Rástyr-Devléstyr, tedy mek te na tanginél amen Raj Devél dre davá dyvés! Kóli ame kerdiám altárjo (žertvieniko) vaš dová, sob (kaj) te otdžas Rástyr-Devléstyr, i vaš dová, sob (kaj) te janas pe léste célo shačkiribén i marunó janybén i, sob (kaj) te kerás pe léste ramánjo (mírno) svénto janybén Ráske-Devléske: tedy mek te phučel Kokoró Raj Devél! Ne ame kerdiám davá pir zrakhibén doléstyr, sob (kaj) dre javír časo te na phenén tumaré čhavé amaré čhavénge: “So tuménge ke Raj Devél, Devél Izrailjoskiro! O Raj Devél čhudiá miežakire rigasa Iordáno maškír aménde i tuménde, čhavé Ruvimóskire i čhavé Gadóskire: nane tuménge paš dre Raste-Devléste”. Adiáke tumaré čhavé na domekenas by amaré čhavén te den patýv Ráske-Devléske. Paldavá ame phendiam: ‘Kerása péske altárjo na vaš célo shačkiribén i na vaš svénto janybén Ráske-Devléske’, ne, sob (kaj) jov, altárjo maškír aménde i tuménde te javél jakhitkonesa, maškír javire amaré ródy, te javél jakhitkonesa, so ame moginasa te dynarinás Devléske celoné shačkiribnasa amaresa i amaré sventoné janybnasa i amaré parikiribnasa, i, sob (kaj) dro javír časo te na phenén tumaré čhavé amaré čhavénge: ‘Nane tuménge paš dre Raste-Devléste’. Ame rakirdiam: ‘Kóli phenéna adiáke aménge i rodénge amarenge dre javír časo, tedy ame phenása: Tumé dykhéna Raskiri-Devléskiri altarjoskiri kopija, saví kerdé amaré dadá na vaš célo shačkiribén i na vaš svénto janybén Raskie-Devléske, ne sob (kaj) davá te javél jakhitkonesa maškír tuménde i aménde.’ Mek te na javél davá, sob (kaj) te ĥazdespe aménge proti Raste-Devléste i te otdžas akaná Rástyr-Devléstyr, i te kerás svénto janybén Devléske vaš célo shačkiribén i vaš mareskiro janybén i vaš svénto janybén, apríč amaré Ráskire-Devléskiro, Devléskiro altárjo, savó isyn angíl Léskiri šátra (skínija)”. Rašáj Finiejeso, skedyibnaskire barydyrá i šeralé pe tysjoncy Izrailjoskire, savé sys lésa, šundlé lavá, savé rakirdé čhavé Ruvimóskire i čhavé Gadóskire i čhavé Manasijáskire, i šarde len. I phendiá Finiejeso, Jelizaroskiro čhavó, rašái, čhavénge Ruvimoskirenge i čhavénge Gadoskirenge i čhavénge Manasijaskirenge: “Adadyvés ame udžindiam, so Raj Devél isyn maškír aménde, so tumé na kerdé angíl Devléste proštaviben dro davá, akaná tumé zrakhné Izrailjoskire čhavén Ráskire Devléskire vastéstyr”. I risijá Finiejeso, čhavó Jelizaroskiro, rašái, i barydyrá Ruvimóskire čhavéndyr i Gadóskire čhavéndyr pe Xanaanóskiri phuv ke Izrailjoskire čhavé, i jandlé lénge otphenybén. I čhavé Izrailjoskire šarde davá, i bahtiakirde Izrailjoskire čhavé Ras-Devlés, i otčhude giiben proti lénde maribnása, sob (kaj) te na nangiakiren phuv, pe saví dživdé čhavé Ruvimóskire i čhavé Gadóskire. I khardé čhavé Ruvimóskire i čhavé Gadóskire altárjo Ed (Jakhítko), pal-dová so jone phendlé: Ed isyn Jakhítko maškír aménde, so Raj Devél isyn amaró Devél. Syr progijá but časo paló dová, syr Raj Devél štyliakirdia Izrailjo saré léskire vergéndyr saré rigéndyr, Isúso phurija, zagijá dre phuré beršá. I khardiá ke pe Isúso sarén Izrailjoskire čhavén, léngire phurydyren, léngire barydyrén, léngire sendar'jen i léngire dykhibnaskiren, i phendiá lénge: “Me phurijom, zagijom dre phuré beršá. Tumé dykhné saró, so kerdiá Raj Devél, Devél tumaró, angíl tumaró muj sarénca adalé manušénca, pal-dová so Raj Devél, Devél tumaró, Kokoró mardiápe pal tuménde. Ĥáda, me roskerdjom (rozdyjom) tuménge pir žriébijo adalé manušén, savé jačnépe dre mištypnáskiri miéra tumaré rodycenge, saré manušá, savén me tradyjom krig, Iordanostyr ke baró mórjo (derjáv), pe khameskiro zagiibén. Raj Devél, Devél tumaró, Kokoró tradéla krig len tuméndyr, i zamarela len angíl tuménde, sob (kaj) tumé te doresen (te dolen) dro meknó mištypén (nasliedijo) léngiri phuv, syr rakirdiá tuménge Raj Devél, tumaró Devél. Pir saró adiáke-pac' starinenpe te rakhén i kerén saró, so čhindló dre Mojzáskire-Zakonoskiri lylvarí, na otgii léstyr ni pe čačó (pravo), ni pe zérvo (liévo). Na javén khetané dalé manušénca, savé jačnépe maškír tuménde, na priripiren léngire devlorengiro lav, na sovlahan lénca, i na dynarinén lénge, i na mangénpe lénge, ne prijačen ke Raj Devél, Devél tumaró, syr tumé kerdé ke davá dyvés; O Raj Devél tradyjá krig tuméndyr baré i zoralé manušén, i angíl tuménde nikón na vyterdija ke davá dyvés; iekh tuméndyr protradela tysjonco, pal-dová so Raj Devél, tumaró Devél, Kokoró marelape pal tuménde, syr rakirdiá tuménge. Paldavá kažno mólo pričhuvén te rikirén syr Drógima Ras-Devlés, Devlés tumares. Kóli tumé otrisjona i prijačena ke manušá, savé jačnépe adalé manušéndyr, savé jačnépe maškirál tuménde, i zadžána dro semencypen lénca, i javéna te psirén ke jone i jone ke tumé, to tedy džinén, so tumaró Raj Devél, Devél, na javéla butýr te tradel tuméndyr adalé manušén, ne jone javéna vaš tuménge feliasa i sietkasa, čupniasa vaš tumaré pašvare i phusadytkone xrustosa vaš tumaré jakhá, paka tumé javéna protradyne dolé lačhé phuvjátyr, saví dyjá tuménge Raj Devél, Devél tumaró. Ĥáda, me akaná džáva sarésa dro drom saré phuvjákiro. A tumé džinén saré tumaré ilésa i saré tumaré diesa, so na jaciápe ivjá ni jekh lav saré lačhé lavéndyr, savé rakirdiá pal tuménde Raj Devél, Devél tumaró; saró kerdiápe čačipnása vaš tuménge, ni jekh lav na jaciápe, savó te na kerélpe. Ne syr kerdiápe čačipnása pe tuménde kažno (sváko) lačhó lav, savó rakirdiá tuménge Raj Devél, Devél tumaró, adiáke Raj Devél keréla pe tuménde kažno (sváko) xoliamó lav, paka Jov tradéla krig ke xasibén tumen dalé lačhé phuvjátyr, saví dyjá tuménge Raj Devél, Devél tumaró. Kóli tumé piridžana (keréna bang) Ráskire-Devléskiro, tumaré Devléskiro zavieto, savó Jov čhudiá tuménca, i džána i javéna te dynarinén javire devlorénge i te mangénpe lénge: tedy zahačola pe tuménde Ráskire-Devléskiri xolý, i syg xasjona tumé dalé lačhé phuvjátyr, saví dyjá tuménge Raj Devél”. I skedyjá Isúso saré Izrailjoskiro ródycy dro Sihiemo, i khardiá Izrailjoskire phurydyren, i léskire barydyrén, i léskire sendar'jen, i léskire dykhibnaskiren, i terdiné jone angíl Raste-Devléste, Devléste. I phendiá Isúso saré manušénge: “Adiáke rakiréla Raj Devél, Devél Izrailjoskiro: ‘Pal reka (len') ĥará dživdé tumaré dadá, Fara, Avraamóskiro dad i Nahoroskiro dad, i dynarindlé javire devlorénge. Ne Me lyjom tumaré dadés Avraamos pirdál reka (len'), i lydžijom les pir sarí Xanaanóskiri phuv, i sozdyjom baró léskiro ródo, i dyjom léske Isaakos. Isaakóske dyjom Jakovós i Isavos. Isavoske dyjom Me bérga Sieiro dre meknó mištypén (nasliedijo); Jakovo i léskire čhavé piriginé dro Jegípto. I bičhadjom Me Mojzás i Aaronós i Me domardjom Jegípto jazvenca (fransenca), savé kerdjom Me maškír léste, i korigedýr (pozžie) vylydžijom tumen. Me vylydžijom tumaré daden Jegiptóstyr, i tumé javné ke Loló mórjo (derjáv). Tedy Jegiptiáni tradynepe pal tumaré dadende pe maribnýtka vurdená vurdenenca i manušénca, savé sys bešté uklisté pe grénde ke Loló mórjo (derjáv); Ne jone lyné te den gódla ke Raj Devél, i Jov čhudiá kalypén maškír tuménde i Jegiptianende, i Jov jandiá pe lénde mórjo (derjáv), savó len i začhakirdia. Tumaré jakhá dykhné, so Me kerdjom dro Jegípto. Korigedýr (pozžie) but dyvesá tumé sánas pe čhučí phuv. I jandjom Me tumen pe Amoriejengiri phuv, savé dživdé pal Iordáno; jone mardépe tuménca, ne Me otdyjom len dre tumaré vastá, i tumé doresné (dolyne) dro meknó mištypén (nasliedijo) léngiri phuv, i Me tradyjom krig len angíl tuménde. Gazdyjape o Valáko, Siepforoskiro čhavó Moavoskiro králi, i gijá maribnása pe Izrailjo, i bičhadiá i khardiá Valaamos, Vieorovoskire čhavés, sob (kaj) jov te prokošel tumen; ne Me na kamdjom te kandav Valaamos, i jov bahtiakirdiá tumen, i Me zrakhcjom tumen léskire vasténdyr. Tumé piriginé Iordáno i javné ke Jerihóno. I lyné te marénpe tuménca Jerihonoskire manušá, Amoriei, i Fierieziei, i Xananiei, i Xietiei, i Giergiesiei, ne Me otdyjom len dre tumaré vastá. Me bičhadjom angíl tuménde šieršnien, savé tradyne krig len tuméndyr, dujén Amoriejéngire kral'jén; na tyré kurtalása i na tyré lukosa davá sys kerdó. I dyjom Me tuménge phuv, pe saví tu na kerdián butý, i fórja, savé tumé na kerdé, i tumé dživéna dre lénde; vinagradytkone i inžyritkone untendyr (sadendyr), savé tumé na čhudé dre phuv, tumé xána barjakirdé (plódy). I adiáke, darén Rástyr-Devléstyr, i dynarinén Léske dre žužyma i dro čačipén: otčhurden devloré, savénge dynarindlé tumaré dadá pal reka (len') dro Jegípto, a dynarinén Ráske-Devléske. Kóli tuménge nane pir iló te dynarinén Ráske-Devléske, to tedy vykeden péske akaná, konéske te dynarines, ci devlorénge, savénge dynarindlé tumaré dadá, savé sys pal reka (len'), ci Amoriejéngire devlorénge, pe phuv savengiri tumé dživéna; a me i miro kher javása te dynarinás Ráske-Devléske”. I otphendlé manušá i phendlé: “Nad, na javéla dová, sob ame te jačkiras Ras-Devlés i jaciám te dynarinás javire devlorénge! Paldavá so Raj Devél, Devél amaró, Jov vylydžijá amen i amaré daden Jegiptóskire phuvjátyr, dynaribnaskire kheréstyr, i kerdiá angíl amaré jakhá baré znamiénii (ĥiertyká), i rakhciá amen pe saró drom, pir savó ame gijam, i maškír saré manušénde, pirdál savénde ame progijam. O Raj Devél tradyjá krig améndyr saré manušén i Amoriejen, savé dživdé pe daja phuv, pal-dová i ame javása te dynarinás Ráske-Devléske, pal-dová so Jov isyn amaró Devél”. Isúso phendiá manušénge: “Tuménge naštý te dynarinén Ráske-Devléske, pal-dová so Jov, Devél, isyn svénto, isyn Devél zevlynypnytko (rievnitieljo), Jov na javéla te vyrikirel tumaró proštaviben (biezzakonijo) i tumaré gréhi. Kóli tumé jačkirena Ras-Devlés i javéna te dynarinén javire devlorénge, tedy Jov janéla pe tuménde xas' i protradela tumen, paló davá, syr Jov kerdiá lačhipén tuménge”. I phendlé manušá Isusóske: “Nad, ame javása te dynarinás Ráske-Devléske”. Isúso phendiá manušénge: “Tumé san jakhítka pal péste, so tumé vykedyné péske Ras-Devlés – te dynarinén Léske?” Jone otphende: “Jakhítka sam ame”. “I adiáke, otčhurden na péskire devloré, savé isyn tuménde, i riskirén péskiro iló ke Raj Devél, Devél Izrailjoskiro”. Manušá phendlé Isusóske: “Amaré Ráske-Devléske, Devléske, ame javása te dynarinás, i Léskiri zan (glos) javása te šunas”. I kerdiá Isúso manušénca zavieto dro dová-pac' dyvés, i dyjá lénge uphenybén i Zakóno dro Sihiemo. I dočhindia Isúso dalé lavá dre Devléskire-Zakonoskiri lylvarí, i lyjá baró bar, i čhudiá les odój tel dembo, savó sys pašýl Ráskire-Devléskiro svénto štéto. I phendiá Isúso saré manušénge: “Ĥáda, davá bar javéla tuménge jakhitkonesa, pal-dová so jov šundiá saré Ráskire-Devléskire lavá, savé Jov rakirdiá aménca; mek jov te javél jakhitkonesa proti tuménde, sob (kaj) tumé te na xohaven angíl tumaré Devléste”. I otmekhcia Isúso manušén, kažnones (svakones) dre péskiri mištypnáskiri miéra. Paló davá myjá o Isúso (Johošuá), Navinoskiro čhavó, Ráskiro-Devléskiro pishári, sys šel jeniá berš léske. I garadé les pe léskiri mištypnáskiri mierakiri rig dre Famnaf-Sarai, so isyn pe Jefriemóskiri bérga [Serah-ju.o.], pe paš-rat (sieviero) bergátyr Gaašatyr. I dynarindiá Izrailjo Ráske-Devléske dre saré dyvesá Isusóskire i dre phurydyrengire dyvesá, dživdé pal Isusóste i, savé dykhné saré Devléskire réndy, savé Jov kerdiá Izrailjoske. I kokalý Iosifóskire (Jozáskire), savé vylydžiné Izrailjoskire čhavé Jegiptóstyr, garadé dro Sihiemo, dre félda, saví kindia Jakovo Jemoroskire čhavéndyr, Sihiemoskire dadéstyr, pal šel rupuvé ĥastalia, i savó jaciápe dre mištypnáskiri miéra Iosifóskire čhavénge. Paló saró myjá i Jelieazaro, Aaronoskiro čhavó, i garadé les pe Finiejesoskiri bérga, léskire čhaveskiri, saví sys dyný léske pe Jefriemóskiri bérga. [Dro dová dyvés čhavé Izrailjoskire, lyné Devléskiro kovčego i jone lydžiné les pésa, i o Finiejeso sys rašáj pe štéto Jelieazaroskiro, savó sys léskiro dad; syr jov myjá, to garadé les dro léskiro fóro Gavaofo. I čhavé Izrailjoskire giné kažno (sváko) pe péskiro štéto i dro péskiro fóro. I čhavé Izrailjoskire lyné te dynarinén (te služynen) Astartake i Astarofoske, i Devlorénge, savénge dénas patýv nacii, savé dživdé pašl lénde. I ogdyja Raj Devél len dre vastá Jeglonoskire, kon sys Moavitengiro králi, i jov rikirdia zor pe lénde dešuohto berš.-r.s.] Syr Isúso (Johošuá) myjá, to Izrailjoskire čhavé phučenas Rástyr-Devléstyr, rakirí: “Kon améndyr angledýr džála pe Xananiejende – te marélpe lénca?” I phendiá Raj Devél: “O Juda džála, ĥáda, Me piridava phuv dre léskire vastá.” O Juda phendiá Simieonoske (Simjonoske), péskire pšaléske: “Zadžá mánca dro miro žriébijo, i ame javása te maraspe Xananiejenca; i me zadžava dro tyró žriébijo túsa.” I gijá lésa Simieono. I gijá Juda, i otdyjá Raj Devél Xananiejen i Fierieziejen dre léngire vastá, i zamardé jone léndyr deš bará (tysjoncy) manušén dre Viezieka. Dre Viezieka jone strenindlepe Adoni-Vieziekosa, mardépe lésa i domardé Xananiejen i Fierieziejen. Adoni-Viezieko nastiá; ne jone tradynepe pal léste, i uhtyldé les, i otčingirde baré angušta (pal'cy) pe léskire vastá i pe léskire ĥerá. Tedy phendiá o Adoni-Viezieko: “Eftadešá králja otčingirde baré anguštenca pe léngire vastá i ĥerá skedyné kroški tel miro skamínd, syr kerdjom me, adiáke i mánge dyjá Devél.” I jandlé les dro Jerusalimo, i jov myjá odój. I giné maribnása Judáskire čhavé proti Jerusalimo, i lyné les, i domardé les kurtalása, i fóro otdyné jagake. Paló (poslie) davá giné Judáskire čhavé te marénpe Xananiejenca, savé dživdé pe bérgi i pe paš-dyvesýtko (poludienno) phuv i pe telatuné štéty. I gijá Juda pe Xananiejende, savé dživdé ke Xievróno (lav Xievronoske sys angledýr Kiríaf-Arba), i domardé Šešajos, Ahimanos i Falmajos. Odothýr gijá jov pe Daviroskire manušénde; lav Daviroske sys angledýr Kiríaf-Siefiero. I phendiá o Xalievo: “Kon domarla Kiríaf-Siefiero i léla les, odoléske otdáva me Ahsa, mirja čha, paloróm.” I lyjá les Gofoniilo, Kienazaskiro čhavó, tyknedyršone-Xalievoskire pšalés, i Xalievo otdyjá dre romniá (romniáte) léske Ahsaka, peskirjá čha. Kiéli javdiá časo te džal, to Gofoniilo vysykliakirdia la te mangél lákire dadéstyr félda, i joj zgija oslostyr. Xalievo phendiá láke: “So túke trej?” E Ahsa phendiá léske: “De mánge bahtiakiribén; tu dyján mánge paš-dyvesýtko (poludjonno) phuv, de mánge i thadypen panieskiro.” I dyjá láke Xalievo upratune panieskire ĥanyngá (kolodcy) i telatuné panieskire ĥanyngá. I Ioforoskire-Kienejaninoskire čhavé, Mojzáskire sastreskire, giné foróstyr Pal'm Judáskire čhavénca pe Judaskiri čhučí phuv, saví isyn pe paš-dyvés (pe jugo) Aradostyr, i javné i lyné te dživén maškír manušénde. I gijá Juda Simjonosa, péskire pšalesa, i domardé Xananiejen, savé dživdé ke Cefafo, i otdyné le prokošybnaske, i doléstyr kharélape davá fóro Xorma. Juda lyjá adiáke-pac' Gaza, lákire rigenca, Askalono, léskire rigenca, i Jekrono, léskire rigenca. O Raj Devél sys Judasa, i jov zauhtyldia bérga; ne manušén dolostyr na mogindiá te protradel, pal-dová so lénde sys sastruné maribnýtka vurdená. I otdyné jone Xalievoske Xievróno, syr rakirdiá o Mójza, i vytradyjá jov odothýr trinen Jenakoskire čhavén. Ne Jevusiejen, savé dživdé ke Jerusalimo, Vieniaminóskire čhavé na vytradyné, i dživéna Jevusiei Vieniaminóskire čhavénca ke Jerusalimo ke davá dyvés. I Iosifóskire čhavé giné adiáke-pac' pe Viefíljo, i Raj Devél sys lénca. I vydykhenas Iosifóskire čhavé Viefíljo (lav angledýr sys foroske Luzo). I dykhné rakhibnárja manušés, savó gijá foróstyr, i phendlé léske: “Sykáv aménge te zadžas dro fóro, i ame sykavasa túke tangipén.” Jov sykadiá lénge dre fóro zagiibén, i domardé jone fóro kurtalása, adalé manušés i saró léskiro ródo otmekne. Davá manúš gijá pe Xietiejengiri phuv, i čhudiá fóro, i dyjá léske lav Luzo. Davá léskiro lav isyn ke davá dyvés. I Manásija na vytradyjá manušén, savé dživdé ke Biefsano i dre fórja, savé zapasjona léstyr, ke Faanaha i dre fórja savé zapasjona léstyr, manušén, savé dživéna ke Dora i dre fórja, savé zapasjona léstyr, manušén Ivlieamostyr i, savé zapasjona léstyr fórja, manušén, savé dživéna ke Miegidono i, savé zapasjona léstyr fórja, i jačnépe Xananiei te dživén pe doiá phuv. Kiéli Izrailjo javdiá dre zor, to tedy kerdiá jov Xananiejen andynarščykenca (danikenca), ne te vytradel len, na vytradyjá. I Jefriémo na vytradyjá Xananiejen, savé dživdé ke Gaziero, i dživdé Xananiei maškír lénde ke Gaziero. I Zavulono na vytradyjá manušén, savé dživdé ke Kitrono i manušén, savé dživdé ke Naglolo, i dživdé Xananiei maškír lénde i pleskirde lénge dan'. I Asiro na vytradyjá manušén, savé dživdé ke Akko i manušén, savé dživdé ke Sidono, i ke Ahlavo, ke Ahzivo, ke Xielva, ke Afieko, i ke Riehovo. I dživdiá Asiro maškír Xananiejende, manušénde, savé dživdé pe doiá phuv, pal-dová so jov na vytradyjá len. I Niefalimo na vytradyjá manušén, savé dživdé ke Viefsamiso i manušén, savé dživdé ke Biefanafo, i dživdiá maškír Xananiejende, manušénde, savé dživdé pe doiá phuv; manušá, savé dživdé ke Viefsamisa i ke Biefanafa sys léskire andynarščyki (danniki). I stasade Amoriei Danóskire čhavén dre bérgi, pal-dová so na dyné lénge te zdžan pe dólo. I jačnépe Amoriei te dživén pe bérga Xierieso, dre Aialono i Šaalvima; ne vast Iosifóskire-čhavéngiro pirizorjakirdia Amoriejen, i kerdé jone len andynarščykenca (danikenca). Amoriejéngire-miežakire rigá bergicatyr Akravimo i Sielatyr tyrdelaspe i durydyr. I javdiá Ráskire-Devléskiro Jangólo Galgalostyr dro Bohimo, i phendiá: “Me vylydžijom tumen Jegiptóstyr i jandjom tumen pe phuv, pal saví sovlahadjom tumaré dadénge – te dav tuménge, i phendjom Me: “Na paruvava Miro zavieto tuménca dre viéko; i, sob (kaj) tumé te na khetaniakirenpe dalé-phuvjákire manušénca; léngire altári (žertvieniki) rossphagiren.” Ne tumé na šundlé Mirí zan (glos). So tumé davá kerdé? I paldová Me rakiráva: “Me na protradava len tuméndyr, i javéna jone tuménge čhupniasa, léngire devloré javéna vaš tuménge feliasa (sietkasa).” Kiéli Ráskire-Devléskiro Jangólo phendiá dalé lavá saré Izrailjoskire čhavénge, tedy manušá ĥazdyné bari gódla i zarondle. Daléstyr i kharéna dová štéto Bohimo. Odój jone jandlé svénto dyibén (žértva) Ráske-Devléske. Kiéli Isúso otmekciá manušén, i giné Izrailjoskire čhavé, kažno (sváko) dre péskiri mištypnáskiri miéra, sob (kaj) te doresen (te dolen) dro meknó mištypén (nasliedijo) phuv, tedy manušá dynarindlé Ráske-Devléske dre saré Isusóskire dyvesá i dre saré phurydyrengire dyvesá, savé dživdé korigedýr (pozžie) Isusóste i savé dykhné saré baré réndy Ráskire-Devléskire, savé Jov kerdiá Izrailjoske. Ne kiéli myjá o Isúso (Johošuá), Navinoskiro čhavó, Ráskire-Devléskiro pishári, to sys léske šel i deš berš, i garadé les dre léskire mištypnaskire-mierakiri rig dre Famnaf-Sarajo, pe Jefriemóskiri bérga, pe paš-rat (sieviero) bergátyr Gaaša; i kiéli saré adalé manušá otginé ke péskire dadá, i ĥazdyjápe korigedýr (pozžie) lénde javír ródo, savó na džindiá Ras-Devlés i Léskire réndy, savé Jov kerdiá Izrailjoske, tedy Izrailjoskire čhavé lyné te kerén čoripén angíl jakhá Devléskire, i lyné te dynarinén Vaalamenge; jone jačkirdé Ras-Devlés, péskire dadengíre Devlés, Savó vylydžijá len Jegiptóskire phuvjátyr, i risiné ke javír devloré, manušéngire devlorénge, savé sys pašýl lénde, i lyné te mangénpe lénge, i xoliakirde Ras-Devlés; i jone jačkirdé Ras-Devlés i lyné te dynarinén Vaaloske i Astartenge. I zahačíia Ráskire-Devléskiri xolý pe Izrailjo, i otdyjá len dre čoribnar'jengire vastá, i občorde len; i otdyjá len dre vergéngire vastá, savé sys pašýl lénde, i na mogindlé jone butýr te vyrikiren angíl péskire vergénde. Karik jone džánas, Ráskire-Devléskiro vast usiendie sys lénge dre čoripén, syr rakirdiá lénge Raj Devél i syr sovlahadiá lénge Raj Devél. I lénge sys drieván (zbit) tiasno. I čhuvelas lénge Raj Devél sendar'jen, savé zrakhné len vasténdyr léskire čoribnar'jendyr; ne i sendar'jen jone na šundlé, a psirenas, blendyny palál pal javire devlorende i mangnepe lénge, syg zdžanas droméstyr, savésa psirdé léngire dadá, kandyi Ráskire-Devléskire priphenybená (zapoviedi). Jone adiáke na kerdé. Kiéli Raj Devél délas lénge sendar'jen, tedy Kokoró Raj Devél sys sendári i zrakhciá len léngire vergéndyr dre saré sendar'jengire dyvesá: pal-dová so tangindia len Raj Devél, šuny léngire ĥondiá manušéndyr, savé len bidykhne i tasade. Ne syr syg myjá sendári, jone nevés (znoko) kerdé fujedýr péskire dadendyr, otrisii ke javír devore, dynári lénge i mangnepe lénge. Na mekné jone péskire rendéndyr i nalačhé péskire droméstyr. I zahačíia Ráskire-Devléskiri xolý pe Izrailjo, i phendiá Jov: “Pal dová, so adalé manušá piridžana Miro zavieto, savó Me čhudjom léngire dadénca, i na šunéna Mirí zan, to i Me na lavá butýr te tradav léndyr ni jekhés odolé manušéndyr, savén jačkirdjom Isusóske, kiéli jov merelas, sob (kaj) te zlydžas lénca Izrailjo: ci léna jone te rikirenpe Ráskire-Devléskire dromeske i te psirén pir léste, syr rikirdepe léngire dadá, ci nad?” I jačkirdiá Raj Devél adalé manušén, i na vytradyjá len syg, i na otdyjá len dre Isusóskire vastá. Ĥáda, isyn adalé manušá, savén jačkirdiá Raj Devél, sob (kaj) te zlydžal lénca Izrail'tianén, sarén, savé na džindlé pal saré Xanaanoskire maribena, vaš davá jekh, sob (kaj) te džinén i te sykljon maribnaske javír ródy, Izrailjoskire-čhavéngire, savé angledýr na džindlé les; pandž Filistimijákire xulaja, saré Xananiei, Sidoniani, i Jeviei, savé dživdé pe bérga Liváno, bergátyr Vaal-Jermono ke zagiibén dro Jemafo. Jone sys jačkirdé, sob (kaj) te zlydžas lénca Izrail'tianén i te udžines, ci šunéna jone Ráskire-Devléskire priphenybená (zapoviedi), savé Jov priphendiá léngire dadénge pir Mojzaste. I dživdé Izrailjoskire čhavé maškír Xananiejende, Xiettiejende, Amoriejende, Fierieziejende, Jeviejende i Jevusiejende, i lyné léngire čhajén péske paloróm, i péskire čhajén otdenas pal léngire čhavénde, i dynarindlé léngire devlorénge. I kerdé Izrailjoskire čhavé fuipén angíl Ráskire-Devléskire jakhá, i bistyrde Ras-Devlés, péskires Devlés, i dynarindlé Vaalenge i Astartenge. I zahačíia xolý Ráskire-Devléskiri pe Izrailjo, i otdyjá Jov len dre vastá Xusarsafiemoske, Miesopotamijakire kralíske, i dynarindlé Izrailjoskire čhavé Xusarsafiemoske ohtó (bidujéngiro deš) berš. Tedy zadyne gódla Izrailjoskire čhavé ke Raj Devél, i čhudiá Devél zrakhibnaris Izrailjoskire čhavénge, savó zrakhciá len, Gofoniilo, Kienazaskire čhavés, tyknedyršone Xalievoskire pšalés. Pe léste sys Ráskire-Devléskiro Dúho (Fáno), i sys jov sendarisa Izrailjoske. Jov vygijá pe maribén, i otdyjá Raj Devél dre léskire vastá Xusarsafiemos, Miesopotamijakire kralís, i pirizorjakirdia léskiro vast Xusarsafiemos. I otkinyja phuv štardešá berš. I myjá o Gofoniilo, Kienazaskiro čhavó. Izrailjoskire čhavé nevés lyné te kerén fuipén angíl jakhá Ráskire-Devléskire, i zorjakirdia Raj Devél Jeglonos, Moavitoskire kralís, proti Izrail'tianende, pal dová, so jone kerdé fuipén angíl Ráskire-Devléskire jakhá. Jov kedyja ke pe Amonitianen i Amalikitianen, i gijá i domardiá Izrailjo, i zalyne jone fóro Pal'm. I dynarindlé Izrailjoskire čhavé Jeglonoske, Moavitoskire kralíske, dešuohto berš. Tedy zadyne gódla Izrailjoskire čhavé ke Raj Devél, i Raj Devél dyjá lénge zrakhibnaris Aodos, Gieraskire čhavés, Jeminijoskire čhavés, savó sys lievša. I bičhadé Izrailjoskire čhavé ke jone počastúnki (dáry) Jeglonoske, Moavitoskire kralíske. Aodo kerdiá péske kurtála duje čhur'jenca, dlengipnása dre kun' (lokcjo), i priphandia les tel péskiro plaščo ke čačó (pravo) bjodro, i podlydžija počastúnki Jeglonoske, Moavitoskire kralíske; Jeglono sys manúš drieván (zbit) thulo. Kiéli podlydžija Aodo saré počastúnki i prolydžyja manušén, savé jandlé počastúnki, to tedy kokoró risijá istukanendyr, savé sys dre Galgálo, i phendiá: “Mánde isyn čorahano lav ke tu, králi.” Jov phendiá: “Štyl!” I vyginé léstyr saré, kon sys terdó pašýl léste. Aodo zagijá ke jov: jov sys beštó dre šylaly štúba, saví sys léste apríč javír. I phendiá Aodo: “Mánde isyn ke tu lav Devléskiro.” Jeglono uštyjá bankostyr. Aodo ĥazdyjá zérvo (liévo) péskiro vast i lyjá kurtála čačé (pravone) péskire bjodrostyr, i učhudia la dre léskiro per, adiáke, so zagijá pal čhuri i vastoro (rukoiatka), i mas začhakirdia čhuri, pal-dová so Aodo na vylyja kurtála léskire perestyr, i joj progijá dre palatuny paš. I vygijá Aodo dro trémo (priedvierijo), i zakerdia pal péste štubakire vudará i zaphandia. Kiéli jov vygijá, Jeglonoskire pishárja (raby) javné i dykhéna, ĥáda, štubakire vudará zakerde pe klydyn, i rakiréna: “Čačes, jov isyn, xači, vaš nužda dre šylaly štúba. Užakirde jone drieván (zbit) ĥará (dlúges), ne dykhéna, so nikón na otkerela štubakire vudará, lyné klydyn i otčhakirde i ĥáda, léngiro xuláj sys paštó pe phuv muló. Paka jone na ĥalyné, to Aodo maškirál davá ugija, progijá mamúj istukany (ídoly) i zrakhciape dre Sieirafa. Kiéli jov javdiá, to zatrubindia rogosa pe Jefriemóskiri bérga, i zgine lésa Izrailjoskire čhavé bergátyr, i jov gijá angíl lénde. I phendiá lénge: “Džán pal mánde, pal-dová so otdyjá Raj Devél tumaré vergén Moavitianen dre tumaré vastá.” I giné pal léste, i piriuhtylde piriprava pir Iordáno ke Moávo, i na dyné nikonéske te piridžan. I domardé jone dro dová časo Moavitianen pašýl duj šelá tysjoncy manušén, sarén zoralen i sasten, i nikón na nastiá. Adiáke smirindlepe dre dová dyvés Moavitiani angíl Izrailjo, i otkinyja phuv ohtodešá (bibišengiro šel) berš. Korigedýr (pozžedýr) Aodoste sys Samiegaro, Anafoskiro čhavó, savó domardiá šov šelá manušén Filistimlianen guruvengire šyngesa (rogosa); i jov adiáke-pac' jov zrakhciá Izrailjo. Kiéli myjá o Aodo, Izrailjoskire čhavé nevés lyné te kerén fuipén angíl Ráskire-Devléskire jakhá. I otdyjá len Raj Devél dre Navinoskire vastá, Xanaanoskire kralískire, savó kralindia pir Asora; xaladéngire barydyrésa léste sys o Sisara, savó dživdiá ke Xarošef-Goimo. I zadyne gódla Izrailjoskire čhavé ke Raj Devél, pal-dová so léste sys jeniašela sastruné vurdyná, i jov zoralés tasadia Izrailjoskire čhavén biš berš. Dre dová časo sys Izrailjoskire sendarkasa e Dievora, proročyca, Lapidoskiri romný. Joj dživdiá tel Dievorakiri Pal'ma, maškír Ráma i Viefíljo, pe Jefriemóskiri bérga; i psirdé ke joj Izrailjoskire čhavé pe séndo. E Dievora bičhadiá i khardiá ke pe Varakos, Avinoamoskire čhavés, Kiediesostyr Niefalimoskirestyr, i phendiá léske: “Rakiréla túke Raj Devél, Devél Izrailjoskiro: ‘Džá, džá upré pe Favoraskiri bérga i le pésa deš tysjoncy manušén Niefalimoskire čhavéndyr i Zavulonoskire čhavéndyr; a me janáva ke tu, ke Kisonoskiri sýgno rékica (lenorí), Sisaras, xaladéngire barydyrés Navinos, i léskire maribnýtka vurdyná i léskire buté manušén dro xaladybén, i otdáva les dre tyré vastá.’” O Varako phendiá láke: “Kóli tu džása mánca, me džáva; a kóli tu na džása mánca, to me na džáva.” Joj phendiá léske: “Te džav túsa, džáva; jekh na túke butýr javéla sláva pe davá drom, dre savó tu džása; ne dre vastá džuvliáke otdéla Raj Devél Sisaras.” I uštyjá Dievora i gijá Varakosa dro Kiedieso. Varako khardiá Zavulonianen i Niefalimlianen dro Kiedieso, i giné palál pal lénde deš tysjoncy manušén, i Dievora gijá lésa. Hieviero Kienejanino, otgijá tedy Kienejaninendyr, Xovavoskire čhavéndyr, Mojzáskire semencatyr, i čhudiá péskiri šátra pašé demby dre Caanimo nádur Kiediesostyr. I rosphendlé Sisaraske, so Varako, Avinoamoskiro čhavó, gijá upré pe bérga Favoro. Sisara skedyjá saré péskire maribnýtka vurdená, jeniá šelá sastruné vurdená, i saré manušén, savé sys léste Xarošef-Goimostyr ke Kisonoskiri sýgno rékica (lenorí). I phendiá Dievora Varakoske: “Uštý, pal-dová so davá dyvés, dre savó Raj Devél otdéla Sisaras dre tyré vastá; Kokoró Raj Devél džála angíl túte.” I zgija Varako bergátyr Favorostyr, i pal léste sys deš tysjoncy manušá. Tedy Raj Devél jandiá dre konfuzo (zamiešatiel'stvo) Sisaras i saré léskire vurdená i saré léskire otriády Varakoskire kurtalátyr, i zgija Sisara maribnytkoné vurdenestyr, i prastándyja pezal. Varako tradyjape pal léskire maribnýtka vurdená i léskire otriády ke Xarošef-Goimo, i pyjá Sisaraskiro otriado kurtalátyr, na jaciápe nikonés. O Sisara nastiá pezal dre Iailiakiri šátra, Xievieroskire-Kienejaninoskire romniakiri; pal-dová so maškír Iaivinoste, Asorskone kralíste, i Xievieroskire-Kienejaninoskiro kher sys ramánjo (miro). I vygijá Iail' pe strieč Sisaraske, i phendiá léske: “Zadžá, xulájo miro, zadžá ke me, na dar.” Jov zagijá ke joj dre šátra, i joj učhakirdiá les paringesa (kovrosa). O Sisara phendiá láke: “De mánge nábut paní te pjáv, me te pjáv kamám.” Joj rosphandia gonó thudesa, i paniakirdia les, i nevés učhakirdiá les. Sisara phendiá láke: “Terdjov pašýl šatrakire vudará, i kóli, kon javéla i phučelape tútyr i phenéla: “Ci nane adáj konés?’, tu phen: ‘Nane.’ E Iail', Xievieroskiri romný, lyjá šatratyr kilo, i lyjá dre péskiro vast mlotko, i podgíia štylin'kes ke jov, i učhudia kilo dre léskiro visko (cel') adiáke, so prophusadia les ke phuv; a jov sutia khinybnastyr, i myjá. I ĥáda, o Varako tradelaspe pal Sisaraste! Iail' vygijá pe strieč léske i phendiá léske: “Zadžá, me sykaváva túke manušés, savés tu rodesa.” Jov zagijá ke joi, i ĥáda, Sisara sys paštó muló, i kilo dre léskiro visko (cel'). I čhudiá telé Devél dro dová dyvés Iavinos (Javinos), Xanaanoskire kralís, angíl Izrailjoskire čhavénde. Vast Izrailjoskire čhavéngiro jačelaspe zoraledýr i butýr, i butýr pe Iavinoste, Xanaanoskire kralíste, paka jone protradyne Iavinos, Xanaanskone kralís. Dro dová dyvés zabagandle Dievora i Varako, Avinoamoskire čhavésa, dasavé lavénca: “Izrailjo othaja pale (otomstindia), manušá sykade, so jone otdena pes; slavinén Ras-Devlés! Šunén, králi, zaripiren, thagarjale: me Ráske-Devléske bagava, brenčynava Ráske-Devléske, Devléske Izrailjoskire. Kiéli vydžasas Tu, Rajo Dévla, Sieirostyr, kiéli Tu gíian Edomoskire feldatyr, tedy triskirdiape phuv, i thadyja bolybén, i óbloki čhuvénas paní; a bérgi taindle (biladjonas) Ráskire-Devléskire móstyr, adiáke-pac' davá, sys Sinajo, Ráskire-Devléskire, Izrailjoskire Devléskire móstyr. Dro Samiegaroskire dyvesá, Anafovoskire čhavéskire, dre Iailiakire dyvesá, sys čhudé dromá, i manušá, savé psirdé angledýr mamuje (vortone) droménca, tedy psirdé pašatuné droménca. Hasiné gavitka manušá ke Izrailjo, na jaciá len, paka me, Dievora, ĥazdyjompe, paka ĥazdyjompe me, e daj dro Izrailjo. Vykedyné neven devloren, daléstyr pašýl vudará džála maribén. Ci bicialó sys ščýto i čhurdybnytko bust (kop'jo) maškír štardeše tysjoncy pir Izrailjo? Iló miro isyn ke tumé, Izrailjoskire barydyrá, ke rievnitieli (zevlynybnarja), savé otdena pes manušénge; slavinén Ras-Devlés! Manušá, savé tradéna pe parné oslicende, savé sys bešté pe paringa (kovry) i psiréna pir drom, bagán gilý! Maškir manušéngiri zan (glos), savé skedéna stády pašé ĥanyngá, odój mek te zabagan sláva Ráske-Devléske, sláva Izrailjoskire thagar'jenge! Tedy vyginé ke pórta (vráty) Ráskire-Devléskire manušá. “Ĥazdepe, ĥazdepe, Dievora, ĥazdepe, ĥazdepe! Zabaga gilý! Uštý, Varako! I lýdža tyré plienonen, Avinoamoskiro čhavó! Tedy Jov piridyja manušén nabutenge zoralendyr; Raj Devél dyjá mánge murškanen (smialonen). Jefriemostyr javné manušá, savé dživdé saró péskiro džiibén pe Amalikoskiri phuv; pal túte, Vieniamino, maškír tyré manušénde, Mahirostyr giné barydyrá, i Zavulonostyr manušá, savénde sys khija (destó) vaš čhinybnariske (piscoske). I Isaharoskire thagárja sys Dievorasa, i adiáke-pac' Isaharo, syr Varako, čhurdyjape pe dólo pezal. Dro Ruvimoskiro kherítko ródo (pliemjo) sys bari čingárd. So beštó tu san maškír bakréngire, šuny stadengiro miekinypen (blejanypen)? Dro Ruvimóskire kherítka ródy džála bari čingárd. Galaádo dživéla štylés pal Iordáno, i Danoske, sóstyr te darel parmenca (korablienca)? Asiro isyn beštó pe morjoskiro (derjavéskiro) brégo i pašýl péskire pričhudia (pristani) jov dživéla štylés. Dro Zavulono isyn manušá, savé otdyné péskiro di pe meribén, i dro Niefalimo – pe feldakire vučipená. Javné králja, mardépe, tedy mardépe Xanaanoskire králja dre Fanaaho pašýl Miegidonóskiro paní, ne jone na doresné ni nábut rup. Bolybnástyr mardépe, čergeniá péskire dromendyr mardépe Sisarasa. Kisonoskiri sýgno rékica (lenorí) ulydžija len, sýgno rékica (lenorí) ulydžija len, sýgno rékica (lenorí) Kiedumimo, sýgno rékica (lenorí) Kisono. Kharpe (dviginpe), di miro, zorjása! Tedy phadine grengire naja (kopyty) prastaibnastyr, zoralé léskire prastybnastyr! Prokošen (kerén armania) Mierozos, rakiréla Devléskiro Jangólo, prokošen, prokošen léskire manušén pal dová, so na javné Ráske-Devléske te poden vast Ráske-Devléske murškanenca. Mek te javél bahtiakirdy maškír romniende e Iail', Xievroskire-Kienejaninoskiri romný, maškír džuvliende dre šátry, mek te javél bahtiakirdy! Pani mangdiá jov: thud podyja joj léske, dro thagaritko (viel'možeske) tahtáj iandiá joj fedyršo thud. A liévo (zérvo) péskiro vast protyrdyjá ke kilo, a pravo (čačó) péskiro ke dynar'jengiro mlotko; pekadiá Sisaras, promardia léskiro šeró, rozmardiá i prophusadia léskiro visko (cel'). Ke lákire ĥerá zbandija jov, pyjá, i pasijá, ke lákire ĥerá zbandija jov, pyjá, kaj zbandija, odój i pyjá domardo. Dre fenštra vydykhela i déla gódla Sisaraskiri daj pirdál riešotka: so dlúges (ĥará) na džála léskiro maribnýtka vurdén, so na sygniakirena léskire-vurdeneskire róty? God'varedyr látyr džuvliá otphenena láke, i kokori joj otphenéla pe péskire lavá: ‘Čačes, jone lathné, dielinena (roskerena) doresybén, pir patyvalé rakliate, pe duje rakliende pe kažnoné (svakone) xaladeste; dro doresybén jone doresné (dolyne) kažnoné luludienca (cviatenca) ídia Sisaraske, saví doresné jone dro doresybén kažnoné-luludienca ídia, vysudy duje rigéndyr, zlyny psikendyr plienonestyr.’ Adiáke mek te xasjon saré Tyré vérgi, Rajo Dévla! A savé rikiréna syr Drógima Tut dro péskiro iló, mek te javén syr kham, savó džála upré dre sarí péskiri zor!” I otkinyja phuv štardešá berš. Izrailjoskire čhavé nevés lyné te kerén fuipén angíl Ráskire-Devléskire jakhá, i otdyjá len Devél dre Madianitianengire vastá pe eftá berš. Pharó sys Madianitianengiro vast pe Izrailjo, i Izrailjoskire čhavé kerdé péske Madianitianendyr uščel'i dre bérgi, i ĥiebará (pieščery), i fórja zoralé tynénca. Kiéli počhuvela dre phuv (posieinela) Izrailjo, to javéna Madianitiani i Amalikitiani i manušá vastokóstyr, i psiréna lénde; i terdé sys jone lénde šatrenca, zniščynenas, so barjola pe phuv ke kokori Gaza, i na jačkirena vaš xabén Izrailjoske ni bakriá, ni guruvés, ni oslós. Pal-dová so jone javénas péskire skotosa i péskire šatrenca adákicy but, syr saranča; lénge i vierbliudenge lengirenge na sys ginybén, i psirdé jone pir Izrailjoskiri phuv, sob (kaj) te kerén la čhučí. I drieván (zbit) čorija Izrailjo Madianitianendyr, i zadyne gódla Izrailjoskire čhavé ke Raj Devél. I kiéli zadyne gódla Izrailjoskire čhavé ke Raj Devél pe Madianitianende, to bičhadiá Raj Devél prorokós ke Izrailjoskire čhavé, i phendiá lénge: “Adiáke rakiréla Raj Devél, Izrailjoskiro Devél: ‘Me vylydžijom tumen Jegiptóstyr, vylydžijom tumen pishar'jengire kheréstyr; zrakhcjom tumen Jegiptianengire vastéstyr i sarengire vasténdyr, savé pritasavenas tumen, protradyjom len tuméndyr, i dyjom tuménge léngiri phuv, i phendjom tuménge: ‘Me – Raj Devél, Devél tumaró; na ginen Amoriejéngire devloré, pe savengiri phuv tumé dživéna’, ne tumé na kandyné Mirí zan.’” I javdiá Ráskire-Devléskiro Jangólo, i bestiá dre Ofra tel dembo, savó sys Ioasoskiro, Avijezeroskire rodóske; léskiro čhavó, o Giedieóno, vytrinskirelas tedy parnó giv (givny) dro točylo, sob (kaj) te garavel la Madianitianendyr. I sykadyjá léske Ráskire-Devléskiro Jangólo, i phendiá léske: “Te javél Raj Devél túsa, murš zoraló!” Giedieóno phendiá léske: “Rajo miro! Kóli Raj Devél te javél aménca, tedy sóstyr lathiá amen saró davá? I kaj saré Léskire dívy, pal savénde rosphendlé aménge amaré dadá, rakirí: “Jegiptóstyr vylydžijá amen Raj Devél? Kakaná jačkirdiá amen Raj Devél i otdyjá amen Madianitianenge dre vastá.” O Raj Devél dykhciá pe léste, i phendiá: “Džá daljasa tyré zorjása, i zrákh Izrailjo Madianitianengire vastéstyr, Me bičhaváva tut.” Giedieóno phendiá Léske: “Rajo Dévla! Syr me te zrakhav Izrailjo? Ĥáda, kherítko ródo (pliemjo) miro dre Manasijáskiro ródyco sámo čororó, i me dre miré dadéskiro kher som tyknedyršo.” I phendiá léske Raj Devél: “Me javáva túsa, i tu protradesa Madianitianen, syr jekhe manušés.” Giedieóno phendiá Léske: “Kóli me dorescjom (dolyjom) láska angíl Tyré jakhá, tedy ker mánge ĥiertýk (znamiénijo), so Tu rakirésa mánca. Na džá adathýr, paka me javáva ke Tu, i me janáva miro počastunko, i proponinava Túke.” Jov phendiá: “Me jačavape ke tyró risiben.” Giedieóno gijá i keradia buznores (kozljonkos) i opriesnoki efatyr jaržestyr; mas čhudiá dro khudo (korzina), a zumin čhudiá dre pirí, i jandiá ke Jov tel dembo, i podyja. I phendiá léske Ráskire-Devléskiro Jangólo: “Le mas i apriesnoki, i čhuv pe lénde bar, i vyčhuv zumin.” Jov adiáke i kerdiá. Ráskire-Devléskiro Jangólo, ĥazdyi khinyngoskire-desteskiro jagóro, savó sys dro léskiro vast, lyjape pal mas i opriesnoki; i Ráskire-Devléskiro Jangólo sčhakirdiape léskire jakhéndyr. I dykhciá Giedieóno, so davá sys Ráskire-Devléskiro Jangólo, i phendiá Giedieóno: “Pal so mánge, Rajo Baró, Rajo Devlykano! Pal-dová so me dykhcjom Ráskire-Devléskire Jangolós muj pe muj. O Raj Devél phendiá léske: “Ramánjo túke, na dar, na merésa.” I kerdiá odój Giedieóno altárjo Ráske-Devléske, i khardiá les: Iiegova (Jahvá) Šalom. Jov isyn kakaná ke davá dyvés dre Avijezieroskiri Ofra. Dre doiá rat Raj Devél phendiá léske: “Le tyré dadéskire stadatyr guruvóres i javirés eftá-beršytkones guruvóres, i rosphagir Vaaloskiro altárjo, savó isyn tyré dadéste, i čingir telé svénto veš, savó isyn pašýl léste. I čhuv altárjo (žertvieniko) Ráske-Devléske, tyré Devléske, pe vučipén dalé bergákiro, dro riado, i le javire guruvóres, i jan dro célo shačkiribén pe vešeskire kaštá, savó tu čingiresa telé.” Giedieóno lyjá deše manušén péskire dynar'jéndyr (slugéndyr) i kerdiá, syr rakirdiá léske Raj Devél; ne syr davá te kerés dyvesé, pal-dová so jov dardiape kheritkonendyr léskire dadéstyr i manušéndyr, savé dživdé ke fóro, to davá kerdiá jov ratý. Zlokosa uštyné foróskire manušá, i ĥáda, Vaaloskiro altárjo (žertvieniko) rosphagirdo, i veš pašýl léste sys čingirdo telé, i javír guruvoro ĥazdynó dro célo shačkiribén pe nevó kerdó altárjo, I rakirdé jone jekh jekhéske: “Kon davá kerdiá?” Rodyne, phučnepe i phendlé: “Giedieóno, Ioasoskiro čhavó, kerdiá davá.” I phendlé manušá foróskire Ioasoske: “Vylydža tyré čhavés; jov isyn bangó (musinel) te merél pal dová, so rosphagirdiá Vaaloskiro altárjo (žertvieniko) i čingirdia telé veš, savó sys pašýl léste. Ioáso phendiá sarénge, kon podgíia ke jov: “Ci tuménge te zajačen pal Vaaloste, ci tuménge te zaterdjon pal léste? Kon zajačela pal léste, odová javéla otdynó meribnáske pe do-pac' zlóko (ránko); kóli jov isyn Devél, to tedy mek kokoró te zajačel pal péste, pal-dová so jov phagirdiá léskiro altárjo.” I lyjá te kharel les Giedieonos dolé dyveséstyr Iierovaalosa, pal-dová so phendiá: “Mek Vaalo kokoró te sendinelpe lésa, pal-dová, so jov rosphagirdiá léskiro altárjo.” Maškir davá časo saré Madianitiani i Amalikitiani i vastokoskire manušá skedynépe khetané, piriginé reka (len') i terdiné stanósa pe Izriejeljoskiro dólo. I Ráskire-Devléskiro Dúho (Fáno) oblyja Giedieonos; jov zatrubindia rogosa (trubasa), i khardo sys Avijezieroskiro kherítko ródo (pliemjo) te džal pal léste. I bičhadiá jov manušén pir saró Manasijáskiro ródyco, i jone vykhardepe te džán pal léste; adiáke-pac' jov bičhadiá manušén ke Asiro, Zavulono i Niefalimo, i saré javné gil lénge. I phendiá Giedieóno Devléske: “Kóli Tu zrakhésa Izrailjo miré vastésa, syr rakirdian Tu, tedy ĥáda, me rosčhuvava adáj dre givaobkeribnaskiri šúrna (pe gumno) čhindly výlna: kóli pahlyn (rosa) javéla pe jekh výlna, a pe sarí phuv javéla šuko, tedy javáva me te džináv, so Tu zrakhésa miré vastésa Izrailjo, syr Tu rakirdian.” Adiáke i kerdiápe: pe javír dyvés, uštyi zlokosa (utrosa), jov jaciá te vytasavel výlna i vytasadia vylnátyr pahlyn (rosa) pherdó tahtáj paní. I phendiá Giedieóno Devléske: “Na xoliasov pe mánde, kóli javír mólo phenáva i javír jekh mólo keráva sproba pe výlna: mek te javél šuko pe jekh výlna, a pe sarí phuv mek te javél pahlyn.” Devél adiáke i kerdiá dre doiá rat; pe jekh výlna sys šuko, a pe sarí phuv sys pahlyn. Iierovaalo, jov isyn i Giedieóno, uštyi tasiárles (ránes) pe zlóko i saré manušá, savé sys lésa, i jone terdiné stanósa pašé Xarodoskiri sýgno rékica (lenorí); Madiamoskiro stáno sys léstyr ke paš-rat (sieviero) pašé Morjoskiri bérgica dre dólo. I phendiá Raj Devél Giedieonoske: “Manušén túsa isyn drieván but, na mogináva Me te otdav Madianitianen dre léngire vastá, sob (kaj) te na zaphutjol angíl Mánde Izrailjo i te na phenél: ‘Miro vast zrakhciá man,’ i adiáke de te džinén (ob'iavin) dre šunybén manušénge i phen: ‘Kon daréla i isyn namurškano, odová mek te risjol i te džal pale bergátyr Galaadostyr.’” I risiné bište duj tysjoncy manušén, a deš tysjoncy jačnépe. I phendiá Raj Devél Giedieonoske: “Usajékh isyn but manušá; lýdža len ke paní, odój Me vykedava len túke: pal konéste Me phenáva; mek te džal túsa, odová i mek te džal túsa; a pal konéste phenáva túke, naštý te džal túsa, odová mek i te na džal.” Jov jandiá manušén ke paní. I phendiá Raj Devél Giedieonoske: “Kon javéla te lokčynel paní péskire čibása, syr lokčynela džukel, odolés čhuv dre rig, adiáke-pac' i odolén sarén, savé javéna te bandjon pe péskire čangá i te p'jen.” I sys manušá, savé lokčyndle péskire mósa vastéstyr trinšelá manušá; saré palatuné manušá bandjonas pe péskire čangá te p'jen paní. I phendiá Raj Devél Giedieonoske: “Triné šelenca manušénca, savé lokčyndle paní, Me zrakháva tumen i otdáva Madianitianen dre tumaré vastá, a saré javír manušá mek te džán, kažno pe péskiro štéto.” I lyné jone skedynó xabén manušéndyr péske i léngire rógi (truby), i otmekhcia Giedieóno sarén Izrail'tianén pir šátry, i urikirdia péste trinšelá manušén; Madiamoskiro stáno sys léste telál pe dólo. Dre doiá rat phendiá léske Raj Devél: “Uštý, zadžá dre stáno, Me otdáva les dre tyré vastá; kóli tu daresa te džas jekhdžinó, tedy džá dro stáno tu i Fura, tyró dynári; i šunesa, so rakiréna, i tedy jačéna zoraledýr tyré vastá, i džása dre stáno.” I gijá telé jov i Fura, léskiro dynári, ke sámo jagóro (krajo) polko, savó sys dro stáno. Madianitiani i Amalikitiani, i saré vastokoskire manušá, terdiné pe dólo adakicyk but, syr saranča; vierbliudenge lengirenge na sys ginybén, len sys but, syr práho pe morjoskiro (derjavéskiro) brégo. Giedieóno javdiá. I, ĥáda, jekh rosphenéla javireske sunó, i rakiréla: “Dykhcjom suné me, sýrby krenglo labo giveskiro maró katyndiape pir stáno Madiamoskiro, i podkatyndiape ke šátra, i pekadiá dre láte adiáke, so joj pyjá, piriskirdia la, i šátra rospyjape.” Javír phendiá dre otphenybén léske: “Davá nane so javír so, syr kurtála Giedieonoskire-čhaveskiri Izrail'tianinoskiri; otdyjá Devél dre léskire vastá Madianitianen i saró stáno.” Giedieóno šundiá suneskiro rosphenyben i léskiro piriphenyben, pomangdiape Ráske-Devléske, i risijá dre Izrailjoskiro stáno, i phendiá: “Uštén! Otdyjá Raj Devél dre tumaré vastá Madiamoskiro stáno.” I roskerdiá (podielindia) trinšelá manušén pe trin otriády, i dyjá sarénge lénge dre vastá rógi (truby) i čhučé khoré (kuvšyny), i dre khoré momolytka (svietil'niki). I phendiá lénge: “Dykhén pe mánde i kerén dová-pac' (dová sámo); ĥáda, me poddžava ke stáno, i so javáva te keráv, dová i tumé kerén; kiéli me i manušá, savé mánca zatrubinasa rogosa, trubinen i tumé rogénca tumarenca pašýl péskiro stáno i godlen: ‘Devléskiri kurtála i Giedieonoskiri!’” I podgíia Giedieóno i šel manušén lésa ke stáno, dre anglypén (načalo) maškiratuny stréga (straža), i rozdžingade rakhibnar'jen, a jone naĥara čhudé rakhibnar'jen i zatrubindle rogénca, i rozmarde khoré (kuvšyny), savé sys dre léngire vastá. I zatrubinde saré trin otriády rogénca, i rozmarde khoré, i rikirde dro zérvo (liévo) péskiro vast momolytka (svietil'niki), a dro čačó vast rógi, i trubindle, i godlyne: “Devléskiri kurtála i Giedieonoskiri! I kažno (sváko) manúš sys terdó pe péskiro štéto pašýl stáno; i lyné te prastan Madianitiani dro saró stáno, i godlyne, i obrisine dro našyben. Kiéli trinšelá manušá trubindle rogénca, obriskirdia Raj Devél jekheskiri kurtála pe javiréste dro saró stáno, i prastándyja opolčenijo (otriado) ke Biefšyta ke Carera, ke Avielmieholoskire rigá, nádur Tabafatyr. I khardé ke pe Izrail'tiáni Niefalimoskire rodóstyr, Asiroskire i saré Manasijáskire rodóstyr, i tradynepe pal Madianitianende. Giedieóno bičhadiá manušén pe sarí Jefriemóskiri bérga te phenén: “Vydžán gil Madianitianenge, i piriuhtylen léndyr piriprava (pirigiiben) pir paní ke Biefvara i Iordáno.” I skedynépe saré Jefriemliani, i piriuhtylde piripravy pir paní ke Biefvara i Iordáno. I uhtyldé jone dujén Madiamskone thagar'jen: Orivos i Zivos i domardé Orivos dre Cur-Orivo, a Zivos dre Jekiev-Zivo i tradynepe pal Madianitianende: šeré Orivoskiro i Zivoskiro jandlé ke Giedieóno pal Iordáno. I phendlé léske Jefriemliani: “Palsó tu davá kerdián, so na khardian amen, kiéli gíian te marespe Madianitianenca?” I drieván (zbit) košnepe lésa. Giedieóno otphendiá lénge: “Ci isyn kerdjom me so vari-so dasavo, syr tumé kakaná kerdé? Ci na bahtaledyr o Jefriémo podkedyja vinagrado, syr Avijeziero obkedyja? Dre vastá tumaré otdyjá Devél Madiamoskire thagar'jen Orivos i Zivos, i so me mogindjom te keráv dasavo, syr tumé?” Tedy štylyja léngiro dúho (fáno) pe léste, kiéli phendiá jov lénge dasavé lavá. I javdiá Giedieóno ke Iordáno, pirigija kokoró i trinšelá manušá, savé sys lésa. Jone sys khine, tradyi vergén. I phendiá jov Sakhofoskire manušénge: “Den maró manušénge, savé džána pal tuménde; jone zakhinyne, a me tradava Zieviejos i Salmanos, Madiamoskire kral'jén.” Sakhofoskire thagárja (kniázi) phendlé: “Naúšto vast Zieviejoskiro, Salmanoskiro dro tyró vast, sob aménge tyré xaladenge te das maró?” I phendiá Giedieóno: “Paldavá, kiéli otdéla Raj Devél Zieviejos i Salmanos dre miré vastá, me roskušava tumaré masá čhučé-phuvjákire tiernovnikosa i sastruné phalienca dandenca. Odothýr gijá jov dre Pienuelo, i dová-pac' jov phendiá léskire manušénge, i Pienueloskire manušá otphendlé léske dová-pac', so otphende Sakhofoskire manušá. Jov phendiá i Pienueloskire manušénge: “Kiéli me risjováva ramanjosa (mirósa), to rosphagirava daja vučardý (bašnia).” Zieviejo i Salmano sys dre Karkoro i lénca léngire opolčenii (otriády) ke dešupandž tysjoncy, saré, jačnépe saré opolčenijestyr vastokoskire manušéndyr; pyné šel te biš tysjoncy manušén, savé vytyrdyne kurtála. Giedieóno gijá ke manušá, savé dživdé pe vastóko Novatyr i Iogbiegatyr i domardiá stáno, kiéli stáno terdijá bidarakires. Zieviejo i Salmano prastándyne; jov tradyjape pal lénde, i uhtyldia Giedieóno dujén Madiamoskire kral'jén, Zieviejos i Salmanos, i pe saró stáno jandiá dar. I risijá Giedieóno, Ioasoskiro čhavó, maribnastyr Xieriesoskire vučipnástyr. I uhtyldia terné manušés Sakhofoskire manušéndyr, i vyphucia léstyr, i jov začhindiá léske Sokhofoskonen thagar'jen i phurydyren eftadešá eftá manušén. I javdiá jov ke Sakhofoskire manušá, i phendiá: “Ĥáda, isyn Zieviejo i Salmano, pal savénde tumé sandlepe mándyr, rakirí: ‘Naúšto Zieviejoskiro i Salmanoskiro vast isyn dre tyró vast, sob (kaj) aménge te das maró tyré khininen manušénge?’” I lyjá foróskire phurydyren i čhučé-phuvjákiro tiernovniko (xrústo suv'jenca) i sastruné phalia dandenca, i dyjá kára lénca Sakhofoskire manušénge; i vučardý (bašnia) Pienuel'sko rosphagirdiá i pirimardia foróskire manušén. I phendiá Zieviejoske i Salmanoske: “Save sys odolé, savén tumé domardé pe Favoro? Jone phendlé: “Jone sys adasavé, syr tu, kažno (sváko) poddžalas pe kralískire čhavénde.” Giedieóno phendiá: “Davá sys miré pšála, miré-dákire čhavé. Te javél džidó Raj Devél! Kóli tumé jačkirdé len džidenca, me na zamaravas tumen.” I phendiá Iiefieroske, anglatuné péskire čhavéske: “Uštý, domar len.” Ne ternó čhavó na vytyrdyja péskiri kurtála, pal-dová so darandyja, adiáke syr sys iščo (inké) ternó. I phendlé Zieviejo i Salmano: “Uštý kokoró i muliakir amen, pal-dová so pir manušéste i zor léskiri.” I uštyjá Giedieóno, i domardiá Zieviejos i Salmanos, i lyjá priažki, savé sys pe léngire vierbliudengire menia. I phendlé Izrail'tiáni Giedieonoske: “Jav xulása aménge, tu, i tyró čhavó, i tyré-čhavéskiro čhavó, pal-dová so tu zrakhcián amen Madianitianengire vastéstyr.” Giedieóno phendiá lénge: “Me na javáva tuménge xulása, ni miro čhavó na javéla tuménge xulása; Raj Devél mek te xulainél tuménca.” I phendiá lénge Giedieóno: “Mangáva tuméndyr jekh: den mánge kažno (sváko) pir čen péskire doresybnastyr (dobyčatyr).” (Pal-dová so vergénde but sys suvnakuné čenia, pal-dová so jone sys Izmail'tiani). Jone phendlé: “Dasa.” I rosčhude ídia, i čhurdyné odorík kažno (sváko) pir čen péskire doresybnastyr. Vaga (vieso) dre suvnakuné čenia, savé jov vymangdia, sys tysjonca eftašelá suvnakuné šékieli, apríč priažki, guziki i purpurone ídi, savé sys pe Madiamoskire kral'jénde, i apríč suvnakuné zandirorja (lancužki), savé sys pe léngire vierbliudengire menia. Doléstyr Giedieóno kerdiá efódo i čhudiá les dre péskiro fóro, dre Ofra, i lyné saré Izrail'tiáni biladžaipnytkes te psirén odorík pal léste, i sys jov (efódo) feliasa Giedieonoske i saré léskire kheréske. Adiáke poddynepe (smirindlepe) Madianitiani angíl Izrailjoskire čhavénde, i na lyné butýr te ĥazdén péskiro šeró, i otkinyja phuv štardešá berš dre Giedieonoskire dyvesá. I gijá Iierovaalo, Giedieóno, Ioasovoskiro čhavó, i dživdiá dre péskiro kher. Giedieonoste sys eftadešá čhavé, savé vyginé léstyr, pal-dová so léste but sys romniá. Adiáke-pac' i naložnica (bi-sovlahakiri džuvlý), saví dživdiá ke Sihiemo, bijandiá léske čhavés, i jov dyjá léske lav Avimieliého. I myjá Giedieóno, Ioasoskiro čhavó, dre baré beršá, i garadó sys dre péskire Ioasasoskire-dadéskiri-koplíca, dre Avijezieroskiri Ofra. Kiéli myjá Giedieóno, to Izrailjoskire čhavé nevés (znoko) lyné biladžaipnytkes te psirén pal Vaaloskire devlorende i jone čhudé Vaalvierifos syr devlores péske. I na priripirde Izrailjoskire čhavé Ras-Devlés, Devlés péskires, Savó zrakhciá len saré léngire vergéngire vastéstyr, savé sys pašýl léste; i kheréske Iierovaaloskireske, (cji Giedieonoskireske), na kerdé lačhipén pal saré lačhé réndy (diély), savé jov kerdiá Izrailjoske. Avimieliého, Iierovaaloskiro (Giedieonoskiro) čhavó, gijá dro Sihiemo ke péskire-dákire pšála, i rakirdiá lénge i saré péskire-dákire dadéskire rodóske, i phendiá: “Dophenen saré Sihiemoskire manušénge: so javéla fedýr vaš tuménge, sob (kaj) tumé te javén xulanca pe tuménde saré eftadešá Iierovaaloskire čhavé, cji, sob (kaj) te javél jekh xulái? I priripiren, so me som tumaró kokalo i loč (plot') tumarí.” Pšála léskire dákire, dophendle pal léste saré dalé lavá Sihiemoskire manušénge; i zbandija léngiro iló ke Avimieliého, pal-dová so rakirdé jone: jov isyn amaró pšal. I dyné léske eftadešá šékieli rup Vaalvierifoskire kheréstyr, o Avimieliého prilyjá pe butý ke pe dalé balvalitkone i lokhe-godiakiren (svoievol'none) manušén, savé i giné pal léste. I javdiá jov dro léskire-dadéskiro kher dre Ofra, i zamardiá péskire pšalén eftadešá Iierovaaloskire čhavén, pe jekh bar. Jaciápe jekh Iofámo, Iierovaaloskiro tyknedýr čhavó, pal-dová so garadyja. I skedynépe saré Sihiemoskire manušá i saró Miloskiro kher, i giné i čhudé Avimieliehos kralísa pašýl dembo, so nádur isyn Sihiemostyr. Kiéli rosphendlé pal davá Iofamoske, jov gijá i terdijá pe Garizimoskire-bergákiro vučipén, i, ĥazdyjá péskiri zan (glos), dyjá gódla i rakirdiá lénge: “Šunén man, Sihiemoskire manušále, i te šunél tumen Devél! Giné vari-kiéli drevy (kaštá) te pomakhen pe péste kralís i phendlé maslinake: ‘Kralin pe aménde.’ Maslina otphendiá lénge: “Ci jačkirava me miro túko, savésa manušá sykavéna patýv devleske i manušénge, i ci džáva me te badinav pir vešá?” I phendlé kaštá smokovnicake: ‘Džá tu, kralin pe aménde.’ Smokovnica phendiá lénge: “Ci jačkirava me miro gudlypen i lačhó miro barjakirdó (plódo), i ci džáva te badinav pir vešá?” I phendlé kaštá vinagradoskire lozake: ‘Džá tu, – kralin pe aménde.’ Vinagradoskiri loza phendiá lénge: ‘Ci jačkirava me miro sóko (xum), savó viesielinela (lošakirela) devlen i manušén, i ci džáva te badinav pir vešá?’ Pe kónco (jagóro) phendlé saré kaštá tiernovnikoske: ‘Džá tu, – kralin pe aménde.’ Tiernovniko phendiá kaštenge: ‘Kóli tumé pir čačipén te čhuvén man kralísa pe péste, to tedy džán, otkhinjon tel mirí zer (tien'); kóli nad, tedy vydžála tiernovnikostyr jag i shačkiréla Livanoskire kiedry.’ I adiáke dykhén, ci pir čačipén, i ci pir patiaben tumé keréna, čhuvi Avimieliehos kralísa? I ci šukár tumé kerdé Iierovaalosa i léskire kheresa, i ci pir léskire lačhé réndy (diély) kerdé tumé? Pal tuménde miro dad mardiápe, na tangindia péskiro džiibén i vyrakhcia (zbavindia) tumen Madianitianengire vastéstyr; a tumé kakaná ĥazdynépe proti miré-dadéskiro kher, i domardé eftadešá miré-dadéskire čhavén pe jekh bar, i čhudé kralísa pe Sihiemoskire manušénde Avimieliehos, léskire pisharicakire čhavés, pal-dová so jov isyn tumaró pšal. Kóli tumé kakaná pir čačipén i pir patiaben kerdé Iierovaalosa i léskire kheresa, tedy radynénpe pal Avimieliehoste, i jov mek te radynélpe pal tuménde; kóli iščo (inké) nad, tedy mek te vydžál jag Avimieliehostyr i mek te shačkirel Sihiemoskire manušén i saró Milloskiro kher, i mek te vydžál jag Sihiemoskire manušéndyr i Milloskire kheréstyr, i mek te shačkirel Avimieliehos.” I prastándyja Iofámo, i nastiá, i gijá dre Bieera, i dživdiá odój, ĥaradyi péskire pšalestyr Avimieliehostyr. Avimieliého iščo (inké) kralindia pe Izrailjo trin berš. I bičhadiá Devél xoliamé duhos maškír Avimieliehoste i maškír Sihiemoskire manušénde, i na lyné te kandén Sihiemoskire manušá Avimieliehos, sob (kaj) adiáke-pac' te othal pale pal eftadešá Iierovaaloskire čhavénde, i rat léngiro te javél pe Avimieliehoste, léngire pšaléste, savó domardiá len, i pe Sihiemoskire manušénde, savé zoraliakirde léskire vastá, sob (kaj) jov te domarel péskire pšalén.” Sihiemoskire manušá čhudé proti léste dre garaiben manušén pe bergengiro vučipén, savé občorenas kažnoné (svakones), kon gijá mamúj lénde pir drom. Pal saró sys rosphendlo Avimielihoske. Javdiá i Gaalo Jeviedoskiro čhavó, péskire pšalénca dro Sihiemo, i psirdé jone pir Sihiemo, i Sihiemoskire manušá čhudé péskiro iló pe léste. I vyginé pe félda, i skedyné péskiro vinagrado (drakh), i tasade múri, i kerdé svénki, psirdé dre péskire devleskiro kher, i xané i piné, i košne Avimieliehos. Gaalo, Jeviedoskiro čhavó, rakirdiá: “Kon isyn Avimieliého, i so isyn Sihiemo, sob (kaj) aménge te dynarinás léske? Ci na Iierovaaloskiro čhavó jov, i ci na Zievulo isyn léskiro šeraló barydyró? Dynarinén fedýr Jemoroskire rodóske, Sihiemoskire dadéske, a léske vaš so aménge te dynarinás? Kóli by kon te del adalé manušén, dre miré vastá, to me protradavas Avimieliehos.” I phendló sys Avimieliehoske: “Ker butydyr tyró xaladybén i vydža.” Zievulo, foróskiro barydyró, šundiá Gaaloskire lavá, Jeviedoskire-čhavéskire, i zahačíia léskiri xolý. Jov mendripnasa bičhavéla manušén ke Avimieliého, sob (kaj) te phenén: “Ake, Gaalo, Jeviedoskiro čhavó, i léskire pšála javné dre Sihiemo, i ĥáda, jone ĥazdéna pe búnto fóro proti túte; i adiáke uštý ratý, tu i manušá, savé isyn túsa, i čhuv dro garaiben manušén pe félda; zlokosa (utrosa), syr javéla te uštel kham, uštý tasiárles (ránes) i džá ke fóro; i kiéli jov i manušá, savé isyn léste, vydžána ke tu, tedy ker lénca, so moginéla tyró vast.” I uštyjá ratý Avimieliého i saré manušá, savé sys lésa, i čhudé dro ĥaraiben pašýl Sihiemo štar otriády. Gaalo, Jeviedoskiro čhavó, vygijá i terdijá pašýl foróskire vudará; i uštyjá Avimieliého i manušá, savé sys lésa, garaibnastyr. Gaalo, dykhciá manušén, i rakiréla Zievuloske: “Ĥáda, isyn manušá, savé zmekenape bergengire vučipnástyr.” A Zievulo phendiá léske: “Bergengiri zer (tien') zdelape túke manušénca.” Gaalo nevés rakiréla, i phendiá: “Ĥáda, e manušá, savé zmekenape vučipnástyr, i jekh otriado džála Mieonimoskire dembostyr.” I phendiá léske Zievulo: “Kaj isyn tyré uštá, savé rakirdé: ‘Kon isyn Avimieliého, sob (kaj) ame te las te dynarinás léske?’ Davá isyn odolé manušá, savén tu bidykhcian; vydža akaná i marpe lénca.” I gijá Gaalo angíl Sihiemoskire manušénde, i mardiápe Avimieliehosa. I tradyjape pal léste Avimieliého, i prastándyja jov léstyr, i but pyné domardé, ke sámo foróskiri pórta (vráty). I jaciápe Avimieliého dre Aruma, a Gaalos i léskire pšalén Zievulo vytradyjá, sob (kaj) jone te na dživén ke Sihiemo. Pe javír dyvés vyginé manušá pe félda, i rosphendlé pal saró Avimieliehoske. Jov lyjá péskire manušén, i roskerdiá (rozdielindia) len pe trin otriády, i čhudiá dro ĥaraiben pe félda. I dykhciá, so manušá vyginé foróstyr, ĥazdyjápe pe lénde i domardiá len. Maškir dová časo, syr Avimieliého i otriády, savé sys lésa, podginé i terdiné pašýl foróskiri pórta, to javír duj otriády pyné pe sarénde, savé sys dre félda, i domarenas len. I mardiápe Avimieliého forosa saró dová dyvés, i lyjá fóro, i domardiá manušén, savé sys dre léste, i rosphagirdiá fóro i počhudia les londesa. Syr šundlé pal dová saré manušá, savé sys dre Sihiemoskiri vučardý (bašnia), to zaginé dre vučardý dre kapišča (mangipnytko štéto) Vaal-Vierifo. Avimieliehoske rosphendlé, so skedynépe odorík saré, savé sys dre Sihiemoskiri vučardý. I gijá Avimieliého pe bérga Sielmon, kokoró i saré manušá, savé sys lésa, i lyjá Avimieliého tovera pésa i vyčingirdia vešeskire senki (randiá), i čhudiá pe péskire psiké, i phendiá manušénge, savé sys lésa: “Tumé dykhné, so me kerdjom; sygnedyr kerén i tumé dová-pac', so me.” I vyčingirdia kažno (sváko) saré manušéndyr senki, i giné pal Avimieliehoste, i čhudé ke vučardý (bašnia), i podhačkirde lénca vučardý jagása, i myné saré, savé sys dre Sihiemoskiri vučardý, pašýl tysjonco muršén i džuvlién. Korigedýr (pozže) gijá Avimieliého dro Tievco, i občhudiá xaladybnasa Tievco, i lyjá les. Maškir fóro sys zoralý vučardý, i našné odorík saré muršá i džuvliá, i saré foróskire manušá, i zaphandlepe, i giné upré pe bašniakiri stréha (čhakín). Avimieliého javdiá ke vučardý i okrenžyndia la, i podgíia ke vučardiakire vudará, sob te shačkirel la jagása. Tedy jekh džuvlý čhurdyjá kotér bar žernovostyr (belediniatyr) pe Avimieliehoskiro šeró i prophagirdia léske čeriepo. Avimieliého dová-pac' časo khardiá ke pe terné-beršengires, péskires oruženoscos, i phendiá léske: “Vytyrde tyrí kurtála i muliakir man, sob (kaj) te na phenén pal mánde: ‘E džuvlý zamardiá les.’ I prophusadia les terné-beršengiro léskiro, i jov myjá. Izrail'tiáni dykhí, so myjá Avimieliého, giné kažno (sváko) pe péskiro štéto. Adiáke otdyjá Devél pale Avimieliehoske pal fuipén, savó jov kerdiá péskire dadéske, syr zamardiá eftadešá péskire pšalén. I saré Sihiemoskire-manušéngire čoré réndy (diély) poriskirdia Devél pe léngiro šeró. I lathiá len Iofamóskiro prokošybén, Iierovaaloskire čhavéskiro. Korigedýr (pozže) Avimieliehoste ĥazdyjápe vaš Izrailjos-kiro zrakhibén o Fola (Tola), Fuiskiro čhavó, Dodovoskiro-čhavéskiro, Isaharoskire rodycóstyr. Jov dživdiá ke Šamiro pe Jefriemóskiri bérga. Jov sys Izrailjoskire sendarisa biš te trin berš, i myjá, i garadó sys dre Šamiro. Korigedýr (pozže) léste ĥazdyjápe Iairo Galaadostyr i sys Izrailjoskire sendarisa biš te duj berš. Léste sys trijánda (trindeša) čhavé, savé tradenas pe trindeše ternen oslende, i trindeša fórja sys lénde; len ke davá dyvés kharéna Iairoskire gavenca, so isyn pe Galaadoskiri phuv. I myjá Iairo, i garadó sys dro Kamono. Izrailjoskire čhavé duredýr kerdé fuipén angíl Ráskire-Devléskire jakhá i dynarindlé Vaalenge i Astartenge, i Aramieiskone devlorénge, i Sidonskone devlorénge, i Moavitskone devlorénge, i Amonitskone devlorénge, i Filistimskone devlorénge; i jačkirdé Ras-Devlés i na dynarindlé Léske. I zahačíia Ráskire-Devléskiri xolý pe Izrailjo, i Jov otdyjá len dre Filistimlianengire vastá i Amonitianengire vastá. Jone tasade i menčyndle Izrailjoskire čhavén dolé beršestyr dešuohto (bidujéngiro biš) berš, sarén Izrailjoskire čhavén pir doiá Iordanoskiri rig pe Amoriejengiri phuv, saví sys dre Galaádo. Pe kónco (jagóro) Amonitiani piriginé Iordáno, sob (kaj) te lydžán maribén Judasa i Vieniaminosa i Jefriemóskire kheresa, i drieván (zbit) tiasno sys Izrailjoskire čhavénge. I zadyne gódla Izrailjoskire čhavé ke Raj Devél, i rakirdé: “Kerdiám ame grého angíl Túte, pal-dová so jačkirdiam amares Devlés i dynarindiam Vaalenge.” I phendiá Raj Devél Izrailjoskire čhavénge: ci na pritasavenas tumen Jegiptiáni, i Amoriei, i Amonitiani, i Filistimliáni, I Sidoniani, i Amalikitiani, i Moavitiani, i, kiéli tumé godlyne ke Me, ci na zrakhcjom Me tumen léngire vasténdyr? A tumé jačkirdé Man i lyné te dynarinén javire devlorénge; pal-dová Me na javáva butýr te zrakhav tumen; džán, godlen ke devloré, savén tumé vykedyné, mek jone te zrakhen tumen dro pharó vaš tuménge časo. I phendlé Izrailjoskire čhavé Ráske-Devléske: “Kerdiám grého ame; ker aménca saró, so Túke isyn pir godý, jekh zrákh amen akaná.” I otčhurdyne péstyr javire devloré, i lyné te dynarinén Ráske-Devléske. I na vyrikirdia Léskiro di Izrailjoskire mén'ki. Amonitiani skedynépe i terdiné stanósa dro Galaádo; skedynépe adiáke-pac' Izrailjoskire čhavé i terdiné stanósa dre Masífa. Manušá i thagárja Galaadóskire phendlé jekh jekhéske: “Kon začninela maribén proti Amonitianende, odová javéla barydyrésa pe saré Galaadskone manušénde.” Iiefajo (Jefajo), Galaaditianino sys manúš murškanó. Jov sys biladžakuné-džuvliákiro čhavó; Galaadostyr bijándyja Jefajo. I Galaadoskiri romný bijandiá léske čhavén. Kiéli vybarine romniakire čhavé, vytradyné jone Jefajos, phení léske: “Tu na san mištypén-prilyibnaskiro (nasliedniko) dro amaré-dadéskiro kher, pal-dová so tu san javire-džuvliákiro čhavó.” I nastiá Jefajo péskire pšaléndyr, i dživdiá pe Tovoskiri phuv; i skedynépe ke Jefajo balvalitka manušá i vydžánas lésa te čoren. Pirdál vari-kicý časo Amonitiani giné maribnása pe Izrailjo. Dro časo maribnaskiro vaš Amonitianenge Izrailitianenca, javné Galaadóskire phurydyrá te len Jefajos phuvjátyr Tov, i phendlé Jefajoske: “Jav, jav aménde šeralesa, i pirimarasape Amonitianenca.” Jefajo phendiá Galaadóskire phurydyrenge: “Ci davá na tumé na kamlé man i vytradyné miré-dadéskire kheréstyr? Sóske javné ke me kakaná, kiéli tumé san dre bída?” Phurydyrá Galaadóskire phende Jefajoske: “Vaš dová ame akaná javdiám ke tu, sob (kaj) tu te džas aménca i te marespe Amonitianenca, i te javes aménde barydyrésa vaš saré Galaadóskire manušénge.” I phendiá Jefajo Galaadóskire phurydyrenge: “Kóli tumé riskirena man, sob (kaj) me te maravpe Amonitianenca, i Raj Devél otdéla mánge len, to tedy ci jačavape me tuménde barydyrésa?” Phurydyrá Galaadóskire phendlé Jefajoske: “Mek te javél Raj Devél jakhitkonesa maškír tuménde, so ame kerása pir tyró lav!” I gijá Jefajo pir Galaadóskire phurydyrende, i čhudé les manušá pe péste barydyrésa i šeralesa, i Jefajo phendiá saré lavá péskire angíl Ráskire-Devléskiro muj dre Masífa. I bičhadiá Jefajo manušén ke Amonitianengiro králi te phenél: “So túke ke me, so tu javdián ke me te marespe pe mirí phuv?” Amonitianengiro králi phendiá Jefajoskire manušénge: “Izrailjo, kiéli gijá Jegiptóstyr, lyjá mirí phuv Arnonostyr ke Iavoko i Iordáno; i adiáke rískir la mánge ramanjosa (mirósa).” Jefajo dre javír mólo bičhadiá manušén ke Amonitianengiro králi, te phenén léske: “Adiáke rakiréla Jefajo: Izrailjo na lyjá Moavitianengiri phuv i Amonitianengiri phuv; pal-dová so kiéli ame gijam Jegiptóstyr, to Izrailjo gijá pe čhučí phuv ke Loló mórjo (derjáv) i gijá dre Kadieso; odothýr bičhadiá Izrailjo manušén ke Edomoskiro králi te phenél: “De vólia (dozvolin) mánge te prodžav tyrí phuv”; ne Edomoskiro králi na kandyjá; i ke Moavititianengiro králi jov bičhadiá, ne i odová na dyjá lav; paldavá Izrailjo jaciápe dro Kadieso. I gijá Izrailjo čhučé phuvjása, i progijá Edomoskiri phuv i Moavitianengiri phuv, i, javi pe Moavitianengiri phuv pe vastočno rig, terdijá stanósa pal Arnono; ne na zagijá dre Moavitianengiri rigá, pal-dová so Arnono isys Moavoskiri miéža. I bičhadiá Izrailjo manušén ke Sigono, Amoriejengiro králi, Jesievonoskiro králi, i phendiá léske Izrailjo: “De vólia (dozvolin) aménge te prodžas tyrí phuv pe péskiro štéto.” Ne Sigono na dyjá vólia te promekel Izrailjo pir péskire rigá, i skedyjá Sigono sarén péskire manušén, i terdijá stanósa dre Iaco, i mardiápe Izrailjosa. I otdyjá Raj Devél, Devél Izrailjoskiro, Sigonos i sarén léskire manušén dre vastá Izrailjoske, i jov domardiá len; i doresciá (dolyja) Izrailjo dro meknó mištypén (nasliedijo) sarí Amoriejengiri phuv, savó dživdiá pe doiá phuv; i doresné jone dro meknó mištypén (nasliedijo) saré Amoriejéngire rigá Arnonostyr ke Iavoko i čhučé phuvjátyr ke Iordáno. I adiáke Raj Devél, Devél Izrailjoskiro vytradyjá Amoriejos Péskire Izrailjoskire manušéngire móstyr, a tu kamésa te les léskiro meknó mištypén (nasliedijo)? Ci nane túte dová, so dyjá túke Xamoso, tyró devloro? I aménde isyn saró dová, so dyjá aménge dro meknó mištypén Raj Devél, amaró Devél. Naúšto tu fedýr Valakostyr, Siepforoskire čhavestyr, Moavitianengire kralístyr? Ci kostiape jov Izrailjosa, ci mardiápe lénca? Izrailjo dživéla trinšelá berš ke Jesievóno i dre fórja, savé zapasjona léstyr, dro Aroiero i dre fórja, savé zapasjona léstyr, i dre saré fórja, savé isyn pašýl Arnono; vaš so tumé dre dová časo na otlyne len? A me na som bangó angíl túte, i tu kerésa mánge fuipén, vygii proti mánde maribnása. Raj Devél, Sendári, mek te javél kakaná sendarisa maškír Izrailjoskire čhavénde i maškír Amonitianende!” Ne Amonitianengiro králi na šundiá Jefajoskire lavá, savénca jov bičhadiá ke jov. I sys pe Jefajoste Devléskiro Dúho (Fáno), i progijá jov Galaádo i Manásija, i progijá jov Galaadoskiri Masífa, i Galaadóskire Masifatyr gijá ke Amonitiani. I dyjá Jefajo sovél Ráske-Devléske i phendiá: “Kóli Tu otdesa Amonitianen dre miré vastá, to tedy pir miro risiben ramanjosa (mirósa) Amonitianendyr, so vydžála miré kheréskire vudarendyr pe strieč mánge, javéla Ráske-Devléske, i me janáva davá pe célo shačkiribén.” I javdiá Jefajo ke Amonitiani – te marélpe lénca, i otdyjá len Raj Devél dre léskire vastá; i domardiá jov len drieván baré maribnása, Aroierostyr ke Minifa biš fórja, i ke Aviel'-Kieramima, i Amonitiani poddynepe angíl Izrailjoskire čhavénde. I javdiá Jefajo dre Masífa dro péskiro kher, i ĥáda, léskiri čhaj vydžála gil léske bubnosa i khelybnasa; joj sys léste jekh, i na sys léste butýr ni čhavés, ni čha. Kiéli jov dykhciá la, roskustia péskiri ídia i phendiá: “Ah, mirí čhaj! Tu domardian man; i tu san dre čyslo odolenca, savé phagirdé ramánjo (miro) miré džiibnáskiro! Me otčhakirdjom pal túte miré uštá angíl Raste-Devléste, i me na mogináva te otphenavpe.” Joj phendiá léske: “Miro dádo! Tu otčhakirdian tyré uštá angíl Raste-Devléste – i ker mánca dová, so phendlé tyré uštá, kiéli Raj Devél kerdiá pir túte zavodo (otomstinyben) tyré vergénge Amonitianenge.” I phendiá joj péskire dadéske: “Ker mánge, jekh, ĥáda so: otmek man pe duj čhoná; me džáva, džáva upré pe bérgi, i me obrovava miro čhaitko miré malnienca.” Jov phendiá: “Džá.” I otmekhcia la pe duj čhoná. Joj gijá péskire malnienca, i obrondia péskiro čhaitko dre bérgi. Pir dujengire-čhonengiro progiiben, joj risijá ke péskiro dad, i jov kerdiá pe láte sovél péskiri, saví dyjá, i joj na udžindiá romes. I zagijá davá dro obyčajo (prisykliaiben) Izrailjo. So kažno berš Izrailjoskire čhaja psirdé te obroven Jefajoskire-Galaaditianinoskirja čha štar dyvesá dro berš. Jefriemliani skedynépe i piriginé Iordáno dre Sievino i phendlé Jefajoske: “Vaš so tu psirdian te marespe Amonitianenca, a amen na khardian pésa? Ame shačkirasa tyró kher jagása i túsa khetané.” Jefajo phendiá lénge: “Me i miré manušá lydžijam Amonitianenca baró košybén; me khardjom tumen, ne tumé na zrakhné man léngire vastéstyr; dykhí, so tumé na zrakhena man, me otdyjom xasibnaske miro džiibén, i gijom pe Amonitianende, i otdyjá len Raj Devél dre miré vastá; sóske tumé javné kakaná te marénpe mánca?” I skedyjá Jefajo sarén Galaadóskire manušén, i mardiápe Jefriemlianenca, i domardé Galaadóskire manušá Jefriemlianen, rakirí: “Tumé, Jefriemóskire znašybnarja, Galaadóskire isyn maškír Jefriemoste i maškír Manasijaste. I piriuhtylde Galaaditiani piriprava pirdál Iordáno Jefriemlianendyr, i, kiéli-kon Jefriemlianendyr, savé jačnépe džidé, rakirdiá: ‘Den vólia (dozvolinen) mánge te piridžav,’ tedy Galaadóskire manušá rakirdé léske: “Ci na Jefriemlianino san tu?” Jov rakirdiá: “Nad.” Jone rakirdé léske: “Phen: ‘Šybboliet,’” a jov rakirdiá: “Sibboliet”, i na mogindiá javirčanes (pe javír) te vyrakirel. Tedy jone lenas les, i muliakirenas pašýl piriprava (forto) pir Iordáno. I pyné dro do časo Jefriemlianendyr štardešá duj tysjoncy. Jefajo sys Izrailjoskiro sendári šov berš, i myjá Jefajo Galaaditianengiro, i garadó sys dro jekh Galaadoskiro fóro. Korigedýr (pozžedýr) léste sys Izrailjoskire sendarisa Jesievóno Vifliejemostyr. Léste sys trijánda (trindeša) čhavén, i trindeša čhajén jov otdyjá kheréstyr paloróm, a trindeša čhajén lyjá rigátyr pal péskire čhavénde, i sys jov sendári Izrailjoskiro eftá berš. I myjá Jesievóno i garadó sys dro Vifliejémo. Korigedýr (pozžedýr) léste Izrailjoskire sendarisa sys Jelono, Zavulonianino, i sendiakirdia Izrailjo deš berš. I myjá Jelono Zavulonianino, i garadó sys dre Aialono, pe Zavulonoskiri phuv. Korigedýr léste sys Izrailjoskire sendarisa Avdono, Gilieloskiro čhavó, Pirafonianino. Léste sys štardešá čhavén i trijánda ŭnuken, savé tradenas pe eftadeše terné oslende. Jov sendiakirdia Izrailjo ohtó (bidujéngiro deš) berš. I myjá Avdono Gilieloskiro čhavó, Pirafonianino, i garadó sys dro Pirafono pe Jefriemóskiri phuv, pe Amalikoskiri bérga. Izrailjoskire čhavé kerdé durydyr fuipén angíl Ráskire-Devléskire jakhá, i otdyjá len Raj Devél dre Filistimlianengire vastá pe štardešá berš. Dre dová časo (cýro) sys manúš Coratyr, Danóskire kheritkoné rodóstyr, lavésa Manojo, romný léskiri sys bičhavengiri i na bijanelas. I javdiá Ráskire-Devléskiro Jangólo romniake, i phendiá láke: “Ĥáda, tu san bičhavorengiri i na bijanesa; ne zapharjosa i bijanesa čhavores; i adiáke rakhpe, na pi mol (vino) i sikiera, i na xa ničý nažužo; pal-dová so, ake, tu zapharjosa i bijanesa čhavés, i britva (muradluny) na kasynelape léskiro šeró, pal-dová so kokoré dákire masestyr davá tyknó bijáto javéla Ráskire-Devléskiro nazoriejo, i jov léla te zrakhél Izrailjo Filistimlianengire vastéstyr.” Romný javdiá i rosphendiá péskire romeske: “Devléskiro manúš sys javi ke me, savó poddžála, sýrby Devléskiro Jangólo, drieván (zbit) rajkano, me na phucjompe léstyr, katýr jov sys, i jov na phendiá mánge léskiro lav; ne jov phendiá mánge: “Ake, tu zapharjosa i bijanesa čhavés; i adiáke na pi mol i sikiera, i na xa ničý nažužo, pal-dová so bijáto (tyknomas) dákire ločoviátyr (utrobatyr) ke péskiro meribén javéla Devléskiro nazoriejo.” Manojo mangdiápe Ráske-Devléske, i phendiá: “Rajo Dévla! Mek te javél nevés (znoko) ke ame Devléskiro manúš, savés bičhadian Tu, i vysykliakirela amen, so aménge te kerés bijatosa (tyknemasesa), savó bijandjola.” I šundiá Devél Manojoskiri zan (glos), i Devléskiro Jangólo nevés javdiá ke romný, kiéli joj sys pe félda, i Manojos, lákire romes, na sys lása. Romný sýges prastándyja, i phendiá péskire romeske, i phendiá léske: “Ĥáda, javdiá mánge manúš, savó sys javi tedy ke me.” Manojo uštyjá i gijá péskire romniása, i javdiá ke odová manúš, i phendiá léske: “Tu san odová manúš, savó rakirdiá lása, džuvliása?” Jangólo phendiá: “Me.” I phendiá Manojo: “I adiáke, kóli kerélape čačipnása (zbuvinelape) lav tyró, syr aménge te kerás adalé bijatosa (tyknemasesa) i so lésa te kerás?” Devléskiro Jangólo phendiá Manojoske: “Mek jov te rakhelpe saréstyr, pal so me phendjom romniake; mek te na xal ničý, so déla vinagradoskiri loza; mek te na p'jel mol i sikiera i te na xal ničý nažužo, i te prirakhel saró, so me priphendjom láke.” I phendiá Manojo Devléskire Jangoloske: “De vólia (dozvolin) te urikiras tut, paka ame keravasa vaš túke buznores (kozljonkos).” Devléskiro Jangólo phendiá Manojoske: “Mek (usajékh) by tu i te urikires man, ne me na javáva te xav tyró maró; kóli kamésa te kerés célo shačkiribén Ráske-Devléske, tedy ĥázde les.” Manojo na džindiá, so davá sys Devléskiro Jangólo. I phendiá Manojo Devléskire Jangoloske: “Syr isyn tyró lav? Sob (kaj) aménge te slavinas tut, kiéli kerélape čačipnása tyró lav.” Devléskiro Jangólo phendiá léske: “So tu phučesa pal miro lav? Jov isyn divno. I lyjá Manojo buznores (kozljonkos) i marunó janybén, i ĥazdyjá Ráske-Devléske pe bar. I kerdiá Jov dívo, savó dykhné Manojo i léskiri romný. Kiéli polymia lyjá te ĥazdelpe altarjostyr ke bolybén, to Ráskire-Devléskiro Jangólo ĥazdyjápe dre polymia žertvienikoskiri. Dykhí davá, Manojo i léskiri romný pyné mósa pe phuv. I na jaciá bicialó Ráskire-Devléskiro Jangólo Manajoske i léskire romniake. Tedy Manojo udžindiá, so davá sys Ráskire-Devléskiro Jangólo. I phendiá Manojo péskire romniake: “Čačes, ame merasa, pal-dová so ame dykhciam Devlés.” Romný léskiri phendiá léske: “Kóli by Raj Devél kamdiá te muliakirél amen, tedy na prilelas by amaré vasténdyr célo shačkiribén i marunó janybén, i na sykadiá by aménge saró dová, i kakaná na otčhakirelas aménge saró.” I bijandiá romný čhavés i dyjá lav léske: Samsóno. I barija tyknomas, i bahtiakirdiá les Raj Devél. I lyjá Ráskire-Devléskiro Dúho (Fáno) te kerél dre léste dre Danoskiro stáno, maškír Cora i Jestaolo. I gijá Samsóno dre Fimnafa, i dykhciá dre Fimnafa džuvliá Filistimijákire čhajendyr. Jov gijá i phendiá péskire dadéske i péskire dáke, i phendiá: “Me dykhcjom dre Fimnafa Filistimijákire čhajendyr džuvliá: len mánge la dre romný (romniáte).” Léskiro dad i daj phendlé léske: “Naúšto nane džuvlién maškír tyré-pšalengire čhajende i dre saré miré manušénde, so tu džása te les džuvliá naobčhindlende Filistimliande?” I phendiá Samsóno péskire dadéske: “Le la mánge, pal-dová so joj isyn mánge pir iló.” Dad léskiro i daj léskiri na džindlé, so davá sys Rástyr-Devléstyr, i so jov rodéla vakancyja (slučajo) te otomstinel (te othal pale) Filistimlianenge. A dro dová časo Filistimliáni sys xulaja pe Izrailjo. I gijá Samsóno dadésa peskiresa i dasa peskirjasa dre Fimnafa, a kiéli podginé ke vinagradniki Fimnafakire, ĥáda, ternó liévo (ščer) ryčyny džála pe strieč léske. I zgija pe léste Ráskire-Devléskiro Dúho (Fáno), i jov roskustia lievos syr buznores; a dro vast léste ničý na sys. I jov na phendiá péskire dadéske i péskire dáke, so jov kerdiá. I javdiá, i rakirdiá džuvliása, i joj iaciá pir iló Samsonoske. Syr proginé vari-kicý dyvesá, nevés gijá jov, sob (kaj) te les la, i zagijá te podykhel lievoskiro trúpo, i ĥáda, rojo berlinen (pčolen) dro lievoskiro trúpo i avgín. Jov lyjá les dre péskire vastá, i gijá, i xaja dromésa; i kiéli javdiá ke péskiro dad i péskiri daj, dyjá i lénge, i jone xané; ne na phendiá lénge, so jov lievoskire trupostyr lyjá davá avgín. I javdiá léskiro dad ke džuvlý, i kerdiá odój Samsóno skamínd, syr isyn prilyno, keréna terné. I syr odój dykhné les, to dyné léske vykedyné trindeša bjavitkone malen, savé by javéna pašýl léste. To tén'či phendiá lénge Samsóno: “Zadava me tuménge šerepharibnytko zadyiben (zagadka); kóli tumé rosphandena (otgadynena) mánge les pal eftá dyvesá pe piró rosphandena i čačunés, tedy me dáva tuménge trindeša sindony i trindeša zmienna ídi; kóli na déna ráda te rosphanden mánge, tedy tumé bangé javéna te den mánge trindeša sindony i trindeša zmienna ídi.” Jone phendlé léske: “Zagadyn (zade) tyró šerepharibnytko, pošunasa.” I phendiá lénge: “Habnaskirestyr vygijá xabnytko, i zoralestyr vygijá gudló.” I na mogindlé jone te otgadynen šerepharibnytko (zagadka) dre trin dyvés. Pe eftáto dyvés phendlé jone Samsonoskire romniake: “Urakir tyré romes, sob (kaj) jov te rosphandel aménge šerepharibnytko (zagadka); a kóli nad, to shačkirasa jagása tut i tyré-dadéskiro kher; naúšto tumé khardé amen, sob (kaj) te obkeden amen?” rondiá Samsonoskiri romný angíl léste i rakiréla: “Tu bidykhesa man, i me na som pir iló túke; tu dyján miré-manušéngire čhavénge šerepharibnytka, a mánge na rosphandesa les.” Jov phendiá láke: “Miré dadéske i miré dáke na rosphandjom les; i túke ci rosphandava?” rondiá joj angíl léste eftá dyvesá, dre savé sys lénde piró. Ke kónco (jagóro) pe eftáto dyvés jov rosphandia láke; pal-dová so joj zoralés mangdiá les. A joj rozgadyndia šerepharibnytka péskire manušéngire čhavénge. I pe eftáto dyvés angíl khameskiro zagiibén phendlé léske manušá: “So isyn gudledyr avginestyr, i so isyn zoraledýr lievostyr!” Jov phendiá lénge: “Kóli by tumé te na den gódla pe miré terné gurumniate, tedy na otgadynenas by miro šerepharibnytko.” I zgija pe léste Devléskiro Dúho (Fáno), i gijá jov dro Askalono, i domardiá odój trindeša manušén, zlyjá léndyr ídi i otdyjá zmiena léngire rizendyr odolénge, kon rosphandia (rozgadyndia) šerepharibnytko (zagadka). I zahačíia léskiri xolý, i gijá jov dre péskire-dadéskiro kher. A Samsonoskiri romný vygijá paloróm pal bjavitkone léskire maleste, savó sys drúgo (mal) pašýl léste. Pir vari-kicý dyvesá, dre dyvesá, kiéli ukedenas pšenica (parnó giv), javdiá Samsóno te dykhelpe péskire romniása, jany pésa buznores; i kiéli phendiá: “Zadžava ke mirí romný dre soibnytko štúba” – lákiro dad na dyjá léske te zadžál. I phendiá lákiro dad: “Me dumindjom, so tu la roskamdian, i me otdyjom la tyré maléske (drugoske); ĥáda, tyknedyršo phen isyn šukaredyr látyr; mek joj te javél túke zamiést láte.” Ne Samsóno phendiá lénge: “Kakaná me javáva čačunó angíl Filistimlianende, kóli keráva lénge fuipén.” I gijá Samsóno, i uhtyldia trijánda lisen (lokhnien), i lyjá fakiely (jagitka), i sphandia pori porjasa, i priphandia pir fakielo maškír duje porja; i zahačkirdia fakiely, i mekciá len pe Filistimlianengiri žatva, i vyhačkirdia i ĥarby (snopy) i naukedyno maró, i vinagradýtka unty (sady) i maslinytka. I rakirdé Filistimliáni: “Kon davá kerdiá?” I phendlé: “O Samsóno, Fimnafianinoskiro ziatjo; pal-dová so davá lyjá léskire romniá i otdyjá léskire maléske.” I giné Filistimliáni, i xačkirdé jagása la i lákire dadés. Samsóno phendiá lénge: “Mek tumé kerdé davá, ne me othava pale (otomstinava) tuménge kokorenge i tedy štyljovava.” I pirimardia jov lénge ikry (golieni) i stacia (biedry), i gijá i bestiá dre uščelija bergakiri Jetamo. I giné Filistimliáni, i terdiné stanósa dre Judéia, i protyrdynepe ke Lieha. I phendlé Judejákire manušá: “Palsó tumé vyginé proti aménde?” Jone phendlé: “Ame javdiám te phandas Samsonos, sob (kaj) te kerás lésa dová, syr jov kerdiá aménca.” I giné trin tysjoncy manušá Judejátyr ke bergakiri uščelija Jetamo, i phendlé Samsonoske: “Naúšto tu na džinésa, so Filistimliáni xulainena pe aménde? So tu kerdián davá aménge?” Jov phendiá lénge: “Syr jone mánca kerdé, adiáke i me kerdjom lénca.” I phendlé léske: “Ame javdiám te phandas tut, sob (kaj) te otdas tut dre Filistimlianengire vastá.” I phendiá lénge Samsóno: “Sovlahan mánge, so tumé na muliakirena man.” I phendlé léske: “Nad, ame jekh so phandasa tut i otdasa tut dre léngire vastá, ne te zamaras, na zamarasa.” I phandle les duje nevoné šelenca, i lydžiné les uščelijatyr. Kiéli jov podgíia ke Lieha, to Filistimliáni godlása strenindle les. I zgija pe léste Ráskire-Devléskiro Dúho (Fáno), i šele, savé sys pe léskire vastá, kerdépe syr pirihačkirdo ljono (ĥandlado), i pyné léskire phandypna léskire vasténdyr. Lathiá jov jalý (sviažo) oslinytko žanda, i ĥazdyjá péskiro vast, lyjá la, i domardiá lása tysjonco manušén. I phendiá Samsóno: “Oslinytkone žandasa tolpa, duj tolpy, oslinytkone žandasa domardjom me tysjonco manušén.” Phení davá, jov čhurdyjá žanda vastéstyr peskirestyr i khardiá dová štéto: Ramaf-Liehi. I počhuindia jov bari smega (žažda), i dyjá gódla ke Raj Devél i phendiá: “Tu kerdián Tyré-pishariskire vastésa baró davá zrakhibén; a kakaná me meráva smegatyr i perava dre naobčhindlengire vastá.” I otčhakirdiá Devél jamina (kula) dre Lieha, i pothadyja látyr paní. Jov pija pherdés, i risijá léskiro dúho, i jov otdžidyjá; doléstyr i khardo lav dalé štetoske “prikharibnaskiri ĥanýng”, saví isyn dre Lieha ke davá dyvés. I sys jov sendári pe Izrailjo dre Filistimlianengire dyvesá biš berš. Javdiá jékhvar Samsóno dre Gaza i, dykhciá odój biladžakunia džuvliá, i zagijá ke joi. Manušénge Gazakirenge phendlé: “Samsóno javdiá adarík.” I psirdé joine trusciál (krugom), i rakhne les sarí rat dre foróskire vudará, i garadyne sarí rat, rakirí: ke dyvesýtko ránko užakirasa i zamarasa les.” A Samsóno sys sutó ke paš rat; dre paš rat uštyjá, suhtyldia vudará foróskire portendyr duje kosiakenca, ĥazdyjá len khetané šyberosa (zaporosa), čhudiá pe péskire psiké i otlydžija len pe bergákiro vučipén, saví isyn pe drom ke Xievróno. Korigedýr (pozže) davá léske jaciá pir iló jekh džuvlý, saví dživdiá pe Soriekoskiro dólo; lav lákiro sys Dalida. Ke joj iavné Filistimijákire xulaja i rakiréna láke: “Urakir les, i udžin, dre so isyn bari léskiri zor, i syr aménge te pirizorjakiras (te zbierdynas) les, sob (kaj) te sphandas les te štyliakiras les; a ame dasa túke pal davá kažno tysjonco šékieli dro rup.” I phendiá Dalida Samsonoske: “‘Phen mánge, dro so’ isyn bari zor tyrí, i sósa te phandes tut, sob (kaj) te štyliakires tut?” Samsóno phendiá láke: “Kóli sphandena man eftá kinde tietivenca, savé isyn na zašut'kirde, tedy me skeravape bizorjákiro i javáva, syr i javír manušá.” I jandlé láke Filistimniakire xulaja eftá kinde tietivy, savé sys na zašutine, i joj phandia les lénca. Maškir dová sys jekh garadó manúš beštó dre štúba, kaj sys suté. I phendiá léske: “Samsóno! Filistimliáni džána pe túte.” Jov roskustia tietivy, syr roskušena thav pakliatyr, kiéli pirihačkirela la jag. I na udžindlé léskiri zor. I phendiá Dalida Samsonoske: “Ĥáda, tu xohadian man i rakirdian mánge xohaibén; phen kakaná mánge, sósa te sphandav tut?” Jov phendiá láke: “Kóli phandena man nevoné šelenca, savé na sys dro réndo, tedy me keravape bizorjákiro i javáva, syr saré manušá.” E Dalida lyjá neve šele, i phandia les, i phendiá léske: “Samsóno! Filistimliáni džána pe túte.” (Maškir davá sys jekh garadó manúš, beštó dre štúba, kaj sys suté). I skustia jov len péskire vasténdyr, syr thava. I phendiá Dalida Samsonoske: “Usa tu xohavesa man i rakirésa mánge xohaibén; phen mánge, sósa by te phanden tut.” Jov phendiá láke: “Kóli tu miré šereskire balendyr skhuvesa eftá čhurja (kosy) dre than (tkan'), i primaresa la cvikosa ke tkal'no kaloda. I prikerdia joj len ke kaloda, i phendiá léske: “Filistimliáni džána pe túte, Samsóno!” Jov džangadyja péskire soibnastyr i vytyrdyja tkal'no kaloda khetané thanesa (tkaniasa). I phendiá léske Dalida: “Syr tu rakirésa: Tu san drógo mánge, a iló tyró nane mánca? Ĥáda, tu trin móly xohadian man i na phendián mánge, dre so isyn bari zor tyrí.” I adiáke joj péskire lavénca tasavelas les kažno dyvés, i menčyndia les, tedy léskire dieske jaciá pharó ke meribén. I jov otčhakirdiá láke saró iló péskiro, i phendiá láke: “Britva (muradluny) na kasyndiape miro šeró; pal-dová so me som Devléskiro nazoriejo miré-dákire ločoviátyr (utrobatyr); kóli te občhines man, to otdžala mirí zor mándyr; me keravape bizorjákiro i javáva, syr saré manušá.” E Dalida, so jov otčhakirdiá láke péskiro saró iló, bičhadiá i khardiá Filistimlianengire xulan, pheny lénge: “Džán kakaná; jov otčhakirdiá mánge saró péskiro iló.” I javné ke joj Filistimlianengire xulaja, i jandlé rup dre péskire vastá. I zasovliakirdia les Dalida pe lákire čangá, i khardiá manušés, i phendiá léske te občhinel eftá čhurja léskire šerestyr. I lyjá jov te našavel zor i otgijá léstyr zor léskiri. Joj phendiá: “Filistimliáni džána pe túte, Samsóno!” Jov džangadyja (prošnindiape) péskire soibnastyr i phendiá: “Džáva, syr i anglydyr, i me javáva vól'no.” A na džindiá, so Raj Devél otgijá léstyr. Filistimliáni lyné les i vyphusade léske jakhá, jandlé les dre Gaza i zakuindle les duje xarkuné zandir'jenca (lancugenca), i jov mielindia dre uznikengiro kher. Ne paló (poslie) davá balá pe léskiro šeró lyné te barjon, kaj jone sys občhindlé. Filistimlianengire xulaja skedynépe, sob (kaj) te janden baró svénto janybén Dagonoske, peskireske devloreske, i te lošaljon (te poviesielinenpe), i phendlé: “Devél amaró otdyjá Samsonos, vergos amares, dre amaré vastá.” Adiáke-pac' i manušá, dykhí les, slavindle péskires devlores, rakirí: “Devél amaró otdyjá dre amaré vastá amaré vergos i amaré phuvjákire čhučiibnaris, savó domardiá buten améndyr.” I kiéli rozviesielindiape léngiro iló, to jone phendlé: “Kharén Samsonos, mek jov te sandiakirel amen.” I khardé Samsonos uznikengire kheréstyr, i jov sandiakirdia len, i čhudé les maškír stýlby. I phendiá Samsóno terné-beršengireske (otrokoske), savó lydžijá les pal vast: “Podlydža man, sob (kaj) te čilavav mánge stýlby, pe savé isyn terdó kher, i te prikasynavpe ke jone.” Muršén i džuvlién sys pherdó kher; odój sys saré Filistimlianengire xulaja, i pe stréha (čhakín) sys ke trin tysjoncy muršén i džuvlién, savé dykhné pe Samsonoste, savó len sandiakirelas. I zadyja gódla Samsóno ke Raj Devél i phendiá: “Rajo Dévla! Priripir man i zorjakir man jékhvar kakaná, o Dévla! Sob (kaj) mánge dre jekh mólo te othav pale Filistimlianenge pal duj miré jakhá.” I zlyjá Samsóno štetóstyr duj maškiratune stýlby, pe savé rikirdiape kher, rikiri pes dre lénde, dre jekh peskiresa čačé (pravone) vastésa, a dre javír zervone (lievone) vastésa. I phendiá Samsóno: “Mer, di miro, Filistimlianenca!” I tasadia saré zorjátyr i pyjá kher pe xulande i pe saré manušénde, savé sys dre léste. I sys mulen, savén muliakirdiá Samsóno angíl meribén péskiro, butydyr, syr ci but jov muliakirdiá dre péskiro džiibén. I javné léskire pšála i saró léskire-dadéskiro kher, i lyné les, i giné, i garadé les maškír Cora i Jestaolo, dre Manojoskiri koplíca, léskire dadéskiri. Jov sys sendári pe Izrailjo biš berš. I sys vari-kon pe Jefriemóskiri bérga, lavésa Miha. Jov phendiá péskire dáke: “Tysjonco šel šékieli rup, savé túte lyné i, pal savé tu pašýl mánde phendián prokošybena, davá rup mánde, me lyjom les.” Daj léskiri phendiá: “Bahtiakirdó te javél miro čhavó Raste-Devléste!” I riskirdiá jov péskire dáke tysjonco šel šékieli rup. I phendiá léskiri daj: “Davá rup me tútyr otdyjom Ráske-Devléske vaš miré čhavéske, sob (kaj) te kerés léstyr i vyčhindlo muj i vyčhudo óbrazo; i adiáke me otdáva les túke.” Ne jov riskirdiá rup péskire dáke. Léskiri daj lyjá dujšelá šékieli rup i otdyjá len vyčhuibnariske. Jov kerdiá léndyr vyčhindlo muj i vyčhudo óbrazo (kumiro), savó i sys dre Mihaskiro kher. I sys Mihaste Devléskiro Kher. I kerdiá jov efódo i tierafimo, i jov vysvencyndia péskire čhavéndyr jekhés, sob (kaj) jov te javél léste rašása. Dre dolé dyvesá na sys kralís pe Izrailjo; kažno (sváko) kerdiá dová, so léske zdyjape čačipnása. Jekh ternó manúš Judejákire Vifliejemostyr, Judáskire rodycóstyr, o Lievito, tedy dživdiá odój; adavá manúš gijá Judejákire Vifliemoskire foróstyr, sob (kaj) te dživél, kaj pridžalape, i, gii dromésa, javdiá pe Jefriemóskiri bérga ke Mihaskiro kher. I phendiá léske Miha: “Katýr tu džása?” Jov phendiá léske: “Me som Lievito Judejákire Vifliemostyr i me džáva te dživáv, kaj pridžalape.” I phendiá léske Miha: “Jačpe mánde, i jav mánde dadésa i rašása; me javáva te dav túke pir deš šékieli rup pe berš, i so trej pe ídia i xabén.” Lievito gijá ke jov i dyjá lav Lievito te jačélpe dalé manušéste, i sys adavá ternó manúš léste, syr jekh léskire čhavéndyr. Miha vysvencyndia Lievitos, i adavá ternó manúš sys léste rašása, i dživdiá dro Mihaskiro kher. I phendiá Miha: “Kakaná me džinóm, so Raj Devél javéla mánge te kerél lačhipén, pal-dová so Lievito mánde jaciá rašása.” Dre dolé dyvesá na sys Izrailjoskire kralís; i dre dolé dyvesá Danoskiro ródyco rodyja péske mištypnáskiri miéra (udielo), kaj by te dživél, pal-dová so paka na vypyja léske pherdý (célo) mištypnáskiri miéra maškír Izrailjoskire ródycy. I bičhadé Danóskire čhavé péskire rodycóstyr pandžé manušén, zoralen muršén Coratyr i Jestaolostyr, sob (kaj) jone te obdykhen phuv i te udžinén la, i phendlé lénge: “Džán, obdykhen phuv.” Jone javné pe Jefriemóskiri phuv ke Mihaskiro kher, i rat'kirde odój. Syr jone sys pašýl Mihaskiro kher, to udžindlé jone terné-Lievitoskiri zan (glos), i zaginé odorík, i phučnepe léstyr: “Kon jandiá tut adarík? So tu adáj kerésa, i palsó tu san date?” Jov phendiá lénge: “Dová i dová kerdiá vaš mánge o Miha, jov lyjá man, i me jacjom rašása léste.” Jone phendlé léske: “Phučpe Devléstyr, sob (kaj) te džinas aménge, ci bahtaló javéla amaró drom, pir savó ame džása.” Rašáj phendiá lénge: “Džán ramanjosa (mirósa); angíl Raste-Devléste tumaró drom, dre savó tumé džána.” I giné odolé pandž muršá, i javné dro Laiso, i dykhné manušén, savé sys dre léste, so jone dživéna štylés, pir obyčajo (prisykliaiben) Sidonianengiro, štyl i bidaripnaskires (biezpiečnes), i so na sys pe doiá phuv, kon kerélas fuj by len te dre vari-so, ci rikirdia zor (vlast'): Sidonianendyr jone dživdé dur, i ni konesa na sys lénde nisavó réndo. I risiné pandždžine ke péskire pšála dre Cora i Jestaolo, i phendlé lénge pšála léngire: “Sósa javné tumé?” Jone phendlé: “Uštasa i džása pe lénde; ame dykhciam phuv, joj isyn drieván lačhí; a tumé zadumindlepe: ĥaljon, sygedýr džán i te len dro meknó mištypén (nasliedijo) doiá phuv; kiéli džána tumé, javéna ke manušá bidaripnytka, i phuv doiá bari. Devél otdéla la dre tumaré vastá; davá isyn dasavo štéto, kaj nane ni dre so nauhtylyben, so doreselape (lélape) phuvjátyr.” I giné odothýr Danóskire rodycóstyr, Coratyr i Jestaolostyr, šovšelá muršá, savé sys podphandle xaladytkone mardytkonenca. Jone giné i terdiné stanósa dre Kiríaf-Jarimo, dre Judéia. Pir saró i kharéna dová štéto Danóskire stanósa ke davá dyvés. Jov isyn palál Kiríaf-Jarimo. Odothýr giné jone pe Jefriemóskiri bérga i javné ke Mihaskiro kher. I phendlé odolé pandž muršá, savé psirdé te obdykhen phuv Laisa, péskire pšalénca: “Ci džinéna tumé, so dre jekh dalé kherendyr isyn efódo, tierafimo, vyčhindlé i vyčhudé obrazy? I adiáke poduminen, so te kerén?” I risiné pe rig, i zaginé dro kher terné-Lievitoskiro, dro Mihaskiro kher, i dyné “dobridim” léske. A šovšelá manušá Danóskire čhavéndyr piriphandle xaladytkone mardytkonenca, sys terdé pašýl pórta (vráty). Pandž manušá, savé psirdé te obdykhen phuv, giné, zaginé odorík, lyné istukano (vyčhindlo muj), i efódo, i tierafimo, i vyčhudo kumiro. Rašáj terdijá pašýl pórta odolenca šovšelenca manušénca, savé sys piriphandle maribnytkoné mardytkonenca. Kiéli jone zaginé dro Mihaskiro kher i lyné vyčhindlo muj (istukano), efódo, tierafimo i vyčhudo óbrazo (kumiro), rašáj phendiá lénge: “So tumé keréna?” Jone phendlé léske: “Jav štyl, čhuv tyró vast pe tyré uštá, i džá aménca; i jav aménde dadésa i rašása. Ci fedýr túke te javes rašása pe jekhe-Manušéskiro kher, syr te javes rašása pe ródyco, ci dro Izrailjoskiro kherítko ródo?” Rašáj obradyndiape, i lyjá efódo, tierafimo i vyčhindlo muj, i gijá manušénca. Jone risiné, i giné, i otmekne čhavén, kheritkoné murdalén (skoto) i pharipena angíl. Kiéli jone otginé Mihaskire kheréstyr, kherengire manušá, savé sys pašýl Mihaskiro kher, skedynépe i tradynepe pal Danóskire čhavénde, i dyné gódla Danóskire čhavénge. Danóskire čhavé risiné i phendlé Mihaske: “So tu adiáke désa gódla?” Miha phendiá: “Tumé lyné miré devloré, savén me kerdjom, i rašás, i giné krig: so iščo (inké) butýr, syr tumé rakiréna: “So túke?” Danóskire čhavé phendlé léske: “Jav štyl (molčyn), sob (kaj) ame te na šunas tyrí zan; javirés vari-savé améndyr, rosholiasovi peréna pe tuménde, i tu xasiakiresa pes i tyrí sém'ia (irí).” I giné Danóskire čhavé péskire dromésa; a Miha dykhí, so jone isyn zoraledýr léstyr, gijá pale i risijá dro péskiro kher. A Danóskire čhavé lyné dová, so kerdiá Miha, i rašás, savó sys léste, i giné dro Laiso, proti štylone i bidaripnaskire manušénde, i domardé len kurtalása, a fóro xačkirdé jagása. Na sys konéske te pomoginel lénge, pal-dová so jov sys dur Sidonostyr i nikonesa na rikirdia réndy. Davá fóro sys dro dólo, so isyn pašýl Bief-Riehovo. I kerdé jone nevéstyr fóro i lyné te dživén dre léste. I dyné lav foroske Dano, pir péskire dadéskiro Danoskiro lav, Izrailjoskire-čhavéskiro; a angledýr dolé-foróskiro lav sys Laiso. I čhudé te terdjon péste Danóskire čhavé vyčhindlo muj (istukano); Ionafáno, Manasijáskire-čhavéskiro, Girsonoskiro čhavó, kokoró i léskire čhavé sys rašanca dro Danoskiro ródyco ke dolé dyvesá, syr manušá pe daja phuv sys piričhude te dživén. I sys lénde vyčhindlo muj (istukano), savó kerdiá o Miha, dro saró dová časo, kiéli Devléskiro Kher sys dro Silómo. Dre dolé dyvesá, kiéli na sys pe Izrailjo kralís, dživdiá jekh Lievito pe Jefriemóskire-bergákiro zgiiben. Jov lyjá péske bisovlahakirja džuvliá (naložnica) Vifliejemostyr dre Judéia. Léskiri naložnica na sys čačuný léske [kosciape lésa] i gijá péske léstyr dro péskire-dadéskiro kher dro Judejákiro Vifliejémo, i sys odój štar čhoná. Lákiro rom uštyjá i gijá pal láte, sob (kaj) te rakirél ke lákiro iló i te riskirél la ke pe. Lésa sys léskiro dynári (sluga) i duj osly (miegárja). Joj zalydžijá les dre péskire-dadéskiro kher. Adalé terné-džuvliákiro dad, dykhí les, radymása strenindia les, i urikirdia les léskiro sastro, terné-džuvliákiro dad. I sys jov léste trin dyvesá; jone xané i piné, i rat'kirde odój. Pe štárto dyvés jone uštyné pe zlóko, i jov uštyjá, sob (kaj) te džal. I phendiá terné-džuvliákiro dad péskire ziatjoske: “Zorjakir tyró iló kotere marésa i tén'či (potom) tumé džána.” Jone jačnépe, i dujdžiné khetané xané i piné. I phendiá terné-džuvliákiro dad odolé manušéske: “Jačpe iščo (inké) pe rat, i mek te poradynelpe tyró iló.” Odová manúš uštyi sys, sob (kaj) te džal, ne léskiro sastro umangdia les, i jov nevés (znoko) rat'kirdia odój. Pe pándžto dyvés uštyjá jov pe zlóko, sob (kaj) te džal. I phendiá odolé terné – džuvliákiro dad: “Zorjakir tyró iló marésa, i užakiren, paka prodžála dyvés.” I dujdžiné xané jone. I uštyjá odová manúš, sob (kaj) te džal, kokoró jov, léskiri naložnica i léskiro dynári. I phendiá léske léskiro sastro, terné-džuvliákiro dad: “Ĥáda, dyvés gijá ke bevel', rat'kiren adái, me mangáva; ĥáda, dyveseske syg kónco (jagóro), rat'kir adái, mek te poradynelpe tyró iló; atasiá pe zlóko (ránko) uštena dre tumaró drom i džása dre kher tyró.” Ne lákiro rom na zdyjape pe léskiri godý te rat'kirel, uštyjá i gijá; i javdiá ke Iievuso, so kakaná isyn Jerusalimo; lésa sys duj nav'iučyna osly (miegárja) i léskiri naložnica lésa. Kiéli jone sys pašýl Iievuso, dyvés drieván syg progijá. I phendiá dynári péskire xuláske: “Zadžasa dre davá fóro Iievusiejengiro i rat'kirasa dre léste.” Léskiro xuláj phendiá léske: “Nad, na džása dro javire-rodoskiro fóro, savé isyn na Izrailjoskire čhavéndyr, ne džása ke Givá.” I phendiá péskire dynaríske: “Dodžasa ke jekh dolé šteténdyr i rat'kirasa dre Givá, ci dre Ráma.” I giné, i džánas, i ĥaradyja kham pašýl Vieniaminoskiri Givá. I riskirdé jone odorík, sob (kaj) te džán te rat'kiren dre Givá. I javdiá jov, i bestiá pe vulíca (gása) dro fóro; ne nikón na khardiá len dre kher te rat'kiren. I ĥáda, džála jekh phuró péskire butiátyr feldatyr, bel'veliakiro; jov rodosa sys Jefriemóskire bergátyr i dživdiá ke Givá. Dalé štetoskire manušá sys Vieniaminóskire čhavé. Jov ĥazdyjá péskire jakhá, dykhciá manušés, savó gijá pir foróskiri gása. I phendiá phuró: “Karik tu džása? I katýr tu javdián?” Jov phendiá léske: “Ame džása Judejákire Vifliejemostyr ke Jefriemóskiri bérga, odothýr me; me psirdjom dro Vifliejémo Judejákiro, a kakaná me džáva ke Ráskire-Devléskiro Kher; i nikón na kharéla man dro kher; aménde isyn i phus, i vaš amaré oslenge xabén; adiáke-pac' maró i mol (vino) vaš mánge i vaš tyré pisharicake i vaš adalé dynaríske, savó isyn tyré dynar'jende; ni dro so nane nauhtylyben.” Phuró phendiá léske: “Jav nadieimo: saró tyró nauhtylyben te javél pe mánde; jekh so na rat'kir pe vulíca (gása).” I zalydžijá les dre péskiro kher, i dyjá léskire oslenge xabén, a kokoré jone obmorde péskire ĥerá, i xané, i piné. Tedy, syr jone obradyndle péskire ile, ĥáda, foróskire manušá, rozmekne manušá, zauhtylde kher, griukindle dre vudará i rakirdé phureske, kheréskire xuláske: “Vylydža manušés, savó zagijá dre tyró kher, ame ĥaljovasa les.” Kheréskiro xuláj vygijá ke jov i phendiá léske: “Nad, miré pšála, na kerén fuipén, kiéli adavá manúš zagijá dro miro kher, na kerén davá dylnypén; ĥáda, mánde isyn napaloromitko čhaj, i léste naložnica, vylydžava me len, len len i kerén lénca, so tuménge trej; adalé manušésa na kerén davá dylnypén.” Ne jone na kamlé te šunén les. Tedy rom lyjá peskirjá naložnica i vylydžijá la ke jone pe gása. Jone udžinde la i sandlepe látyr sarí rat ke ránko. I otmekhne la pe ránko. I javdiá džuvlý angíl ránko, i pyjá pašýl adalé – manušéskire kheréskire vudará, savéste isys lákiro xulái, i pasijá ke svéto. Lákiro xuláj uštyi rankosa, otphandia kheréskire vudará i vygijá, sob (kaj) te džal dre péskiro drom: i ĥáda, léskiri naložnica sys pašty pašýl kheréskire vudará, i lákire vastá pe progo. Jov phendiá láke: “Uštý, javén.” Ne otphenybén na sys, pal-dová so joj myjá. Jov čhudiá la pe osloste, uštyjá i gijá dro péskiro štéto. Javi dro péskiro kher, lyjá čhuri, i, lyjá peskirjá naložnica, rosčhindia la pir lákire koterá pe dešudúj pašá i bičhadiá dre saré Izrailjoskire rigá. Kažno (sváko), kon dykhciá davá, rakirdiá: “Na sys i na sys bicialó dasavo, syr davá isyn, syr Izrailjoskire čhavé vyginé dolé dyveséstyr Jegiptóskire phuvjátyr ke davá dyvés. Dykhén pe davá, obrakiren i phenén.” I vyginé saré Izrailjoskire čhavé, i skedyjape saró skedyibén, syr jekh manúš, Danostyr ke Virsavijo, i Galaadoskiri phuv angíl Raste-Devléste dre Masífa. I skedynépe saré manušéngire barydyrá, saré Izrailjoskire ródycy, pe Devléskire manušéngiro skedyibén, štar tysjoncy pezal, savé vylena kurtála. I Vieniaminóskire čhavé šundlé, so Izrailjoskire čhavé javné dre Masífa. I phendlé Izrailjoskire čhavé: “Phenén, syr vygijá davá fuipén?” Lievito, rom dalja-umardia romniakiro, otphendiá i phendiá: “Me miré naložnicasa javdjom te rat'kirav dre Vieniaminoskiri Givá; i ĥazdynépe pe mánde Givakire manušá, i zauhtylde pal mánde ratý kher. Man skedynépe te zamarén (te umaren) i mirja naložnica zamenčyndle, adiáke, so joj myjá; me lyjom mirja naložnica, rosčhindjom la i bičhadjom la dre saré Izrailjoskire rigá, pal-dová so jone kerdé biladžaipén i magirdó réndo (diélo) dro Izrailjo; ĥáda, saré tumé, Izrailjoskire čhavé, roskeden (rozdykhen) davá réndo i rosphanden (roskeden) les adái.” I ĥazdynépe saré manušá, syr jekh manúš, i phendlé: “Na džála nikón dre péskiri šátra i ame na risjovasa dro péskiro kher; i ĥáda, so ame kerása kakaná Givosa: džása pe léste pir žriébijo; i ame lása pir deš manušén šelendyr saréndyr Izrailjoskire rodycendyr, pir šel tysjoncostyr, i pir tysjonco deše tysjoncendyr, sob (kaj) jone te janén xabnytka zapasy vaš manušénge, savé džána proti Vieniaminoskiri Givá, te čhuvas kára pe láte pal magirdó réndo, savó joj kerdiá dro Izrailjo. I skedynépe saré Izrail'tiáni proti fóro syr jekh manúš. I bičhadé Izrailjoskire ródycy dre saré Vieniaminóskire ródycy te phenén: “Savó davá nálačho réndo kerdiápe tuménde! Vyden adalen biladžaibnytkone manušén, savé isyn dre Givá; ame len muliakirasa i ame vylydžasa fuipén Izrailjostyr.” Ne Vieniaminóskire čhavé na kamlé te šunén péskire-pšalengiri zan, Izrailjoskire-čhavengiri; a skedynépe Vieniaminóskire čhavé for'jéndyr dre Givá, sob (kaj) te džas maribnása proti Izrailjoskire čhavénde. I pirigindle dre dová dyvés Vieniaminóskire čhavén, savé skedynépe for'jéndyr, biš te šov tysjoncy manušén, savé vytyrdena kurtála apríč odolénde, Givakire manušénde gindlo sys eftadešá fedyršonen. Saré dalé manušéndyr sys eftašelá manušén fedyršonen, savé sys lievšy, i saré adalé, kon čhurdéla praščendyr bará pe bal, na čhurdyné ivjá (naprásnes). Izrail'tianén, apríč Vieniaminóskire čhavénde, pirigindlo sys štaršelá tysjoncy manušén, savé vytyrdena kurtála; saré jone sys lačhé ke meribén. I uštyné i giné dro Devléskiro Kher, i phučnepe Devléstyr, i phendlé Izrailjoskire čhavé: “Kon tuméndyr angledýr džála pe maribén Vieniaminóskire čhavénca?” I phendiá Devél: “O Juda džála angíl.” I uštyné Izrailjoskire čhavé pe zlóko (ránko), i terdiné stanósa pašýl Givá; i vyginé Izrail'tiáni pe maribén proti Vieniaminoste, i terdiné Izrailjoskire čhavé dro maribnýtko riado nádur Givatyr. I vyginé Vieniaminóskire čhavé Givatyr, i čhudé pe phuv dre dová dyvés biš te duj tysjoncy Izrail'tianén. Ne Izrailjoskire manušá poduhtyldepe i nevéstyr terdiné dro maribnaskiro riado pe dová štéto, kaj sys terdé pe anglatunó dyvés. I giné Izrailjoskire čhavé, i rondlé angíl Devléste ke bel'vél', i phučnepe Devléstyr: “Ci te terdjovav mánge butýr dro maribén Vieniaminóskire čhavénca, miré pšalesa?” Devél phendiá: “Džán proti léste.” I podginé Izrailjoskire čhavé ke Vieniaminóskire čhavé pe javír dyvés. Vieniamino vygijá proti lénde Givatyr pe javír dyvés, i butýr čhudé pe phuv Izrailjoskire čhavéndyr dešuohto tysjoncy manušén, savé vytyrdenas kurtála. Tedy saré Izrailjoskire čhavé i saré manušá giné, i javné dro Kher Devléskiro, i, bešyndoj odój, rondlé angíl Devléste, i postindle dre dová dyvés ke bel'vél', i jandlé célo shačkiribén i mirna svénta janybená angíl Devléste. I phučnepe Izrailjoskire čhavé Devléstyr dre dová časo Devléskire-zavietóskiro kovčego sys odój, i Finiejeso, Jelizaroskiro čhavó, Aaronóskire-čhavéskiro, sys terdó sys barydyr angíl léste: “Ci te vydžav mánge butýr pe maribén Vieniaminóskire čhavénca, miré pšaléskire, ci nad?” Devél phendiá: “Džán; Me atasiá otdáva les dre tumaré vastá.” I Izrailjo čhudiá manušén te bešes čorahanés pašýl Givá. I giné Izrailjoskire čhavé pe Vieniaminóskire čhavénde dro tríto dyvés, i terdiné dro maribnaskiro riado angíl Givá, syr angledýr. Vieniaminóskire čhavé vyginé proti manušénde i otginé foróstyr, i lyné syr angledýr, te muliakirén manušén pe dromá, savéndyr jekh džála ke Viefíljo, a javír ke Givá feldasa, i dormarde ke trijánda manušén Izrail'tianendyr. I phendlé Vieniaminóskire čhavé: “Jone peréna angíl aménde, syr i angledýr.” A Izrailjoskire čhavé phendlé: “Prastasa léndyr i ottyrdasa len foróstyr pe drom.” I saré Izrail'tiáni uštyné péskire štetóstyr i terdiné dre Vaal-Famara. I Izrailjoskiri zasada gijá péskire štetóstyr, zapadnone Givakire rigátyr. I javné angíl Givá deš tysjoncy fedyršonen manušén saré Izrailjostyr, i lyjape baró maribén; ne Vieniaminóskire čhavé na džindlé, so lénge javéla bída. I domardiá Raj Devél Vieniaminos angíl Izrail'tianende, i čhudé muló dáro dová dyvés Izrail'tiáni Vieniaminóskire čhavéndyr biš te pandž tysjoncy šel manušén, savé vytyrdenas kurtála. Kiéli Vieniaminóskire čhavé dykhné, so jone domardé, tedy Izrail'tiáni dyné štéto Vieniaminóskire čhavénge, pal-dová so jone rosgindle pe zasada, saví jone čhudé nádur Givatyr. Zasada sygniakirdia pes i gijá ke Givá, i zagijá, i domardiá saró fóro kurtalása. Izrail'tiáni dorakirdepe zasadasa pal sykaibén (signalo) ke maribén, syr ĥazdélape thuv (dymo) foróstyr. I adiáke, kiéli Izrail'tiáni otginé maribnaskire štetóstyr, i Vieniamino lyjá te marel, i domardiá Izrail'tianén ke trijánda manušén, i rakirdiá: “Nevéstyr jone peréna angíl aménde, syr i dro anglatunó maribén”, tedy lyjá te ĥazdelpe foróstyr stylbosa thuv. Vieniamino dykhciá pale, i ĥáda, thuv saré foróstyr džála ke bolybén. Izrail'tiáni risiné, a Vieniamino strahadyja, pal-dová so dykhciá, so lathiá les bída. I prastándyne jone Izrail'tianendyr pir drom pe čhučí phuv; ne maribén tradyjá len, i manušá, savé vydžánas for'jéndyr, mardé len odój; jone zauhtylde Vieniaminos, i tradyne les ke Mienuha, i mardé ke sámo vastočno Givakiri rig. I pyné Vieniaminóskire čhavéndyr dešuohto tysjoncy manušén, zoralen manušén. Manušá, savé jačnépe risiné i našné pe čhučí phuv, ke Rimonoskiri skála, i domardé Izrail'tiáni butýr pe dromá pandž tysjoncy manušén; i tradynepe pal lénde ke Gidomo, i butýr Izrail'tiáni domardé léndyr duj tysjoncy manušén. Sarén Vieniaminóskire čhavén, savé pyné dre dová dyvés, sys biš te pandž tysjoncy manušén, savé vytyrdenas kurtála, i saré jone sys zoralé muršá. I risiné manušá, savé jačnépe, i našné pe čhučí phuv, ke Rimonoskiri skála, šovšelá manušá, i jačnépe odój pe baruny Rimonoskiri bérga štar čhoná. Izrail'tiáni nevés giné ke Vieniaminóskire čhavé, i domardé len kurtalása, i manušén dre fóro, i kheritkoné manušén (skoto), i saró, so jone strenindle, i saró, so sys pe foróskiro drom, shačkirdé jagása. I sovlahade Izrail'tiáni dre Masífa, rakirí: “Nikón améndyr te na otdél péskire čha pal Vieniaminóskire čhavénde paloróm.” I javné manušá dro Devléskiro Kher, i sys bešté odój ke bel'vél' angíl Devléste, i ĥazdyné zoralý gódla, i drieván rondlé, I phendlé: “Rajo Dévla, Devél Izrailjoskiro! Vaš so davá kerdiápe dro Izrailjo, so na jaciá kakaná dro Izrailjo jekh ródyco?” Pe javír dyvés uštyné pe zlóko (ránko) manušá, i kerdé odój altárjo, i ĥazdyné célo shačkiribén i ramanjosa (mirna) svénta janybená Ráske-Devléske. I phendlé Izrailjoskire čhavé: “Kon na psirdiá pe skedyibén angíl Raste-Devléste saré Izrailjoskire rodycendyr?” Pal dová so baró prokošybén phendo sys pe odolénde, savé na javné angíl Raste-Devléste dre Masífa, i sys phendló, so odolé javéna otdyné meribnáske. I tangindle (požalindle) Izrailjoskire čhavé Vieniaminos, péskire pšalés, i phendlé: “Kakaná isyn otčingirdo jekh ródyco Izrailjostyr; syr te kerás aménge, savé jačnépe léndyr, so kasynelape džuvlién (romnien), kiéli ame sovlahadiam Rása-Devlésa te na das lénge amaré čhajendyr?” I phendlé: “Ci nane konés Izrailjoskire rodycóstyr, kon na javdiá angíl Raste-Devléste dre Masífa? I vygijá, so Galaadóskire Iavisóstyr nikón na javdiá angíl Raste-Devléste dro stáno pe skedyibén. I obdykhne manušá, i ĥáda, na sys odój ni jekhés Galaadóskire Iavisostyr manušén. I bičhadiá skedyibén odorík dešudúj tysjoncy manušén, zoralé muršén, i dyné lénge priphenybén, rakirí: “Džán i domaren Galaadóskire-Iavisoskire manušén kurtalása, i džuvlién i čhavorén; i ĥáda, so kerén: kažnoné (svakone) muršés i svakona džuvliá, saví udžindiá muršés, otdén prokošybnaske.” I lathné jone maškír Galaadóskire-Iavisoskire manušénde štaršelá čhajor'jen, savé na džindlé muršés, i jandlé len dro stáno dro Silómo, so isyn pe Xanaanóskiri phuv. I bičhadiá saró skedyibén te pirirakiren Vieniaminóskire čhavénca, savé sys pe Rimonoskiri bérga, i phendlé zoralés lénge ramánjo (miro). Tedy risiné Vieniaminóskire čhavé, i Izrail'tiáni dyné lénge džuvlién, savén jačkirdé džiden Galaadóskire Iavisoskire džuvliendyr; ne vygijá, so davá sys nábut. Manušá piridživde pal Vieniaminoste, so Raj Devél na rakhciá kažno ródyco célo saré Izrailjoskire rodycendyr. I phendlé skedyibnaskire phurydyrá: “So aménge te kerás manušénca, savé jačnépe bi džuvliengiro, pal-dová so muliakirdé džuvliá Vieniaminoste?” I phendlé jone: “Phuv mek te jačélpe Vieniaminóskire čhavénge, savé jačnépe džidé, sob (kaj) te na xasjol Izrailjostyr ródyco; ne ame na moginasa te das lénge džuvlién amaré čhajendyr; pal-dová so Izrailjoskire čhavé sovlahade, rakirí: ‘Prokošnó javéla, kon déla džuvliá Vieniaminoske.’” I phendlé: “Ĥáda, kažno berš džála Ráskire-Devléskiro svénko dre Siloma, saví isyn pe paš-rat (sieviero) Viefiljostyr i pe vastóko droméstyr, savó lydžála Viefiljostyr dro Sihiemo, i pe paš-dyvés (jugo) Lievonostyr. I priphendle Vieniaminóskire čhavénge i phendlé: “Džán i garadjon dre vinagradniki, i dykhén, kiéli vydžána te khelen Silomostyr terné patyvalé džuvliá dro krugo, to tedy tumé vydžán vinagradnikostyr, i uhtylén kažno péske romniá Silomskone tyrne patyvalé džuvliendyr, i džán pe Vieniaminoskiri phuv; i kiéli javéna léngire dadá, ci léngire pšála tangipnasa ke ame, ame phenása lénge: ‘Primangen amen pal lénde; paldavá so ame na lyjam vaš svakoneske léndyr romniá pe maribén, i tumé na dyné lénge; kakaná tumé san bangé.’” Vieniaminóskire čhavé adiáke i kerdé, i lyné romnien pir péskiro ginybén, savé sys dro krugo, savén jone čorde, i giné i risiné dre péskiri mištypnáskiri miéra, i čhudé fórja, i lyné te dživén dre lénde. Dre dová-pac' časo Izrail'tiáni rozginepe odothýr kažno (sváko) pir péskiro ródyco i pir péskiro kherítko ródo, i giné odothýr sváko dre péskiri mištypnáskiri miéra. Dre dolé dyvesá na sys pe Izrailjo kralís; kažno (sváko) kerdiá dová, so léske zdyjape čačunesa. Dre dolé dyvesá, kiéli xulaindle sendárja, jaciá bokh pe phuv. I gijá jekh manúš Judejákire Viflieimostyr, péskire romniása i péskire duje čhavénca te dživél pe Moavitoskire féldy. Lav odolé-Manušéskiro sys Jelimielieho, lav léskire romniakiro sys Noemin', a lav léskire dujengire čhavéngiro sys Mahlono i Xilieono; jone sys Jefrafiani Judejákire Vifliejemostyr. I javné jone pe Moavitoskire féldy, i jačnépe odój. I myjá Jelimieho, Noeminjakiro rom, i jaciápe joj duje peskirenca čhavénca. Jone lyné péske džuvlién Moavitiankendyr, jekhakiro lav sys e Orfa, a javirjakiro lav sys Ruf' (Rutá), i dživdé odój pašýl deš berš. Ne korigedýr (poslie) i duj lákire čhavé, Mahlono i Xilieono, myné, i jaciápe doiá džuvlý bi péskire duje-čhavéngiro i bi péskire-romeskiro. I uštyjá joj péskire bor'jenca, i gijá pale Moavitóskire feldendyr, pal-dová so joj šundiá pe Moavitóskire féldy so Devél porisija ke Péskire manušá i dyjá lénge maró. I vygijá joj dolé štetóstyr, pe savó dživdiá, i duj borja lákire lása. Kiéli jone giné pir drom, risjovi pe Judejakiri phuv, to Noemin' phendiá dujenge péskire bor'jenge: “Džán, risjon kažno dre péskire-dákiro kher; mek te kerél Raj Devél tuménca tangipén, syr tumé obginepe mulenca i mánca! Mek te del tuménge Raj Devél, sob tumé te lathén džiibén kažno dre péskire-romeskiro kher!” I čamudia len. Ne jone ĥazdyné gódla i rondlé i phendlé: “Nad, ame túsa risjovasa ke tyré manušá.” Noemin' phendiá: “Risjon, miré čhajale; pal so tuménge te džán mánca? Naúšto butýr isyn mánde čhavé dre miré masá, savé te javén by tuménge romenca? Risjon, miré čhajale, džán, pal-dová so me som phuri, sob (kaj) te javav paloróm. Mek, kóli b me i phendjom: ‘Isyn mánge butýr nadiéia”, i usajékh, kóli by me daja-pac' rat te javav romesa i korigedýr (pozže) te bijanav čhavén, – tedy ci saštý tuménge te užakiren, paka jone vybarjona? Ci saštý tuménge te tyrden i te na vydžán paloróm? Nad, miré čhajale, me drieván piridživava pal tuménde, pal-dová so Ráskire-Devléskiro vast lathiá man.” Jone ĥazdyné gódla i nevéstyr lyné te rovén. I Orfa roziaciape péskire sasiasa, a Ruta jaciápe lása. Noemin' phendiá Rutake: “Ĥáda, tyrí bori risijá ke péskire manušá i ke péskire develá; risjov i tu palál pal tyré borjate.” Ne Ruta phendiá: “Na začhuv man te jačkirav tut i te risjovav tútyr; ne karik tu džása, odorík i me džáva, i kaj tu javésa te dživés, odój i me javáva te dživáv; tyré manušá javéna miré manušénca, i tyró Devél – miré Devlésa; i kaj tu merésa, odój i me meráva i javáva garady; mek dová i dová te kerél mánge Raj Devél, i iščo (inké) butýr keréla; jekh meribén man roziačkirela túsa.” Noemin', dykhí, so joj drieván skedyjape te džal lása, pirijaciá te urakirel la. I giné jone dujdžiné, paka javné dro Vifliejémo. Kiéli jone javné dro Vifliejémo, saró fóro zarakirdia pal lénde, i rakirdé: “Ake, Noemin'?” Joj phendiá lénge: “Na kharén man Noeminjasa, a kharén man Marasa, pal-dová so Sarezorjakire bičhadiá mánge baró kirkipen; me vygijom adathýr barvalypnasa, a riskirdiá man Raj Devél čhučé vasténca. Sóske te kharén man Noeminjasa, kiéli Raj Devél začhudia man te stradynav, i Sarezorjákiro bičhadiá mánge bída?” I risijá Noemin', i lása lákiri bori Ruta Moavitianka, saví javdiá Moavitóskire feldendyr, i javné jone dro Vifliejémo pe kónco (jagóro) dro giveskiro ukedyiben. Noeminjate sys seménca pir lákire romeste, manúš drieván slavútno, Jelimieliehoskire kheritkoné rodóstyr (pliemjostyr), lav léske sys Voozo. I phendiá Ruta Moavitianka Noeminjake: “Džáva me pe félda i javáva te podkedav kolosy pir dolé sliady, konéste lathava láska.” Joj phendiá láke: “Džá, mirí čhaj.” Joj gijá, i javdiá, i podkedyja pe félda kólosy palál ukedybnar'jende. I vygijá, so doiá feldakiro paš sys Voozoskiri, savó sys Jelimieliehoskire kheritkoné rodóstyr (pliemjostyr). I, ĥáda, Voozo (Boaz) javdiá Vifliejemostyr i phendiá ukedybnar'jenge: “Te javél Raj Devél tuménca!” Jone phenlde léske: “Mek te bahtiakirél tut Raj Devél!” I phendiá Voozo péskire dynaríske, savó dykhciá pal ukedybnar'jende (žniecenge): “Konéskiri isyn a daja terný džuvlý?” O dynári, savó dykhciá pal ukedybnar'jende, otphendiá i phendiá: “Adaja terný džuvlý – Moavitianka, saví javdiá Noeminjasa Moavitskone feldendyr; joj phendiá: ‘Me javáva te podkedav i te skedav maškír ĥarby (snopy) palál pal ukedybnar'jende, i javdiá, i isyn adáj samone zlokostyr (ranicatyr) ke davá časo (cýro); kutý joj isyn kheré.’” I phendiá Voozo Rutake: “Pošun, mirí čhaj, na psir te podkedes pe javír félda i na piridža adathýr, ne jav adáj miré dynaricenca; mek dre tyré jakhá te javél doiá félda, kaj jone ukedena, i psir pal lénde; ĥáda, me priphendjom miré dynar'jénge te čilaven (na čepinen) tut; kiéli zakamesa te p'jes, džá ke khoré (sosudy) i pi, katýr léna miré dynárja.” Joj pyjá pe péskiro muj i poklonindiape ke phuv, i phendiá léske: “Sósa lathjom me dre tyré jakhá tangipén, so tu prilesa man, na dykhí, so me javire rigátyr som?” Voozo otphendiá i phendiá láke: “Mánge phendló saró, so tu kerdián vaš péskire sasiake pir tyré-romeskiro meribén, so tu jačkirdian tyré dadés, i tyrja da, i tyrí rig, kaj tu bijandyjan, i javdián ke manušá, savén tu na džindian atasiá i tríto dyvés; mek te del Raj Devél pal davá réndo tyró, i mek te javél túke pherdý mazúri (nagrada) Rástyr-Devléstyr, Izrailjoskire Devléstyr, ke Savó tu javdián, sob te štyljos tel Léskire phaká!” Joj phendiá: “Me javáva dre tangipén angíl tyré jakhá, miro xulájo! Tu štyliakirdian man, i rakirdian pir iló tyré dynaricakiro, maškír dová, syr me na som mol ni jekha tyrja dynárica.” I phendiá láke Voozo: “Kiéli javéla časo (cýro) te xas; jav darik i xa maró, i bolav (makin) tyró kotér dro šut (uksuso).” I bestiá joj pašýl ukedybnar'jende. Jov podyja láke maró; joj xaja, podhaia, i jaciápe. I uštyjá joi, sob (kaj) te podkedel. Voozo dyjá priphenybén péskire dynar'jénge, i phendiá: “Mek te podkedel joj i maškirál ĥarby (snopy), i na dukhaven (na zbidynen) la; mek i snopendyr te otčhurden láke i jačkiren, mek joj te podkedel, i na košen la.” Adiáke podkedyja joj pe félda ke bel'vél', i vymolotindia, so skedyjá, i vygijá pašýl jefa ĥersto (jačmienjo). Lyi davá, joj gijá pe fóro, i sasuj lákiri dykhciá, so joj skedyjá. I vylyja Ruta péskire brekatyr i dyjá láke dová, so jačkirdiá, podhai kokori. I phendiá láke lákiri sasuj: “Kaj tu skedyjan adadyvés, i kaj kerdián butý? Mek te javél bahtiakirdó odová, kon prilyjá tut!” Ruta phendiá péskire sasiake, konéste joj kerdiá butý, i phendiá: “Manušéskire odoleskiro, konéste me adadyvés kerdjom butý, lav isyn Voozo.” I phendiá Noemin' péskire borjake: “Te javél bahtiakirdó jov Rástyr-Devléstyr pal dová, so na obgija péskire tangipnasa ni džiden, ni mulen!” I phendiá láke Noemin': “Adavá manúš isyn pašatuno ke ame; jov isyn amaré semencendyr.” Moavitianka Ruta phendiá: “Jov adiáke i phendiá mánge: ‘Jav miré dynaricenca, paka končynena jone miro ukedyiben.’” I phendiá Noemin' péskire borjake, Rutake: “Šukár, mirí čhaj, so tu javésa te psirés léskire dynaricenca, i na javéna te obkharen tut pe javír félda.” Adiáke joj sys Voozoskire dynaricenca i podkedelas kólosy, paka na progijá ĥerstoskiro (jačmienjoskiro) ukedyiben i parné-giveskiro (pšienicakiro) ukedyiben, i dživdiá ke péskiri sasuj. I phendiá láke Noemin', lákiri sasuj: “Mri čhaja, ci te na porodes túke péske štéto, sob túke te javél šukár?” Ĥáda, Voozo, koneskire dynaricenca tu sánas, isyn amarí seménca; ĥáda, jov dre daja rat vieinela pe šúrna ĥersto (jačmienjo); vymorpe, podmakhpe, uri pe péste goža tyré ídi i džá pe šúrna, ne na sykadjov léske, paka jov na mekéla te xal i te p'jel; kiéli jov pasjola te sovél, udžin štéto, kaj jov pasjola; tedy tu javésa i otčhakiresa pašýl léskire ĥerá, i pasjosa; jov phenéla túke, so túke te kerés.” Ruta phendiá láke: “Keráva saró, so tu phendián mánge.” I gijá pe šúrna (gumno), i kerdiá saró adiáke, syr priphendiá láke sasuj lákiri. Voozo xaja i vypija čalés i rozviesielindia péskiro iló, i gijá i pasijá te sovél pašýl skirda. I joj štylin'kes javdiá, otčhakirdiá péske pašýl léskire ĥerá i pasijá. Dre paš rat jov trinskirdiape, ĥazdyjápe, i, ĥáda, pašýl léskire ĥerá sys pašty džuvlý. I phendiá láke Voozo: “Kon tu san?” Joj phendiá: “Me som Ruta, dynárica tyrí, ĥázde jakh tyrí pe dynaricate tyrjate, pal-dová so tu san seménca.” Voozo phendiá: “Bahtiakirdy tu san Rástyr-Devléstyr, mirí čhaj! Davá palatunó tyró lačhó réndo kerdián tu, pe but fedýr anglatunestyr, so tu na gíian te rodes terné manušén, ni čororen ni barvalen; i adiáke, mirí čhaj, na dar, me keráva túke, saró, so tu phendián; pal-dová so saré miré manušéngire vudará džinéna, so tu san lačhí džuvlý; mek i čačipén, so me som seménca, ne isyn seménca pašyledýr mándyr; rat'kir daja rat; a tasiá, kóli jov priléla tut, tedy šukár, mek te prilel; a kóli jov na zakaméla te prilel tut, tedy me prilava; te javél džidó Raj Devél! Sov ke zlóko (ránko). I sys suty joj pašé léskire ĥerá ke zlóko, i uštyjá angledýr, syr mogindlé jone te uĥaljon jekh jekhés. I phendiá Voozo: “Mek te na džinén, so džuvlý sys javi pe šúrna (gumno).” I phendiá láke: “Pode upratuny ídia, saví pe túte, porikir la.” Joj rikirdia, i jov otmierindia láke šov miery ĥersto (jačmienjo), i čhudiá pe láte, i gijá dro fóro. A Ruta javdiá ke péskiri sasuj. Odoia phendiá láke: “So, mirí čhaj?” Joj piriphendia saró láke, so kerdiá láke odová manúš. I phendiá láke: “Dalé šov miery ĥersto (jačmienjo) jov dyjá mánge i phendiá mánge: ‘Na džá ke péskiri sasuj čhučé vasténca.’” Odoia phendiá: “Užakir mirí čhaj, paka tu udžinesa, sósa vydžála davá réndo; pal-dová so odová manúš na jačélape dro ramánjo (miro), na keri adadyvés réndy.” Voozo vygijá ke pórta i bestiá odój. I ĥáda, džála mamúj seménca, pal savjate rakirdiá Voozo. I phendiá léske Voozo: “Zadžá adarík i beš adái.” Odová zagijá i bestiá. Voozo lyjá foróskire phurydyrendyr deš manušén i phendiá: “Bešén adái.” Odolé zaginé i bešné. I phendiá Voozo semencake: “Noemin', saví risijá Moavitóskire feldendyr, biknela feldakiri paš, saví sys amaré pšaleskiri Jelimieliehoskiri; me skedyjompe te dolydžav ke tyré kaná i te phenáv: kin angíl manušénde, savé isyn bešté adáj i angíl miré manušéngire phurydyrende. Kóli tu kames te vykines, vykin; a kóli na kamésa te vykines, phen mánge, i me javáva te džináv; pal-dová so apríč túte nane konéske te vykinen, a pir túte me.” Odová phendiá: “Me vykinava.” Voozo phendiá: “Kiéli tu kinesa Noeminjatyr félda, tedy trej te kines i Rutatyr Moavitiankatyr, muleskire romniatyr, i trej te les la paloróm, sob (kaj) te riskires muleskiro lav dre léskire mištypnáskiri miéra.” I phendiá odoia seménca: “Na mogináva me te lav la péske, sob (kaj) te na roskerav péskiri mištypnáskiri miéra; prilé la tu, pal-dová so me na moginav te prilav.” Angledýr sys dasavo prisykliaiben (obyčajo) dro Izrailjo, syr vykinena i syr paruvena, vaš vari-savó rendoskiro podrikiribén: jekh zlela péskiri tyrah i délas javireske, i davá sys Izrailjoste jakhitkonesa. I phendiá doiá seménca Voozoske: “Kin péske.” I zlyjá péskiri tyrah. I phendiá Voozo phurydyrenge i saré manušénge: “Tumé san kakaná jakhítka doléske, so me kinava Noeminjatyr saró Jelimieliehoskiro i saró Xilieonoskiro i Mahlonoskiro; adiáke-pac' i Ruta Moavitianka, Mahlonoskirja romniá, me láva paloróm, sob (kaj) te jačkirav muleskiro lav dre léskire mištypnáskiri miéra, i sob (kaj) te na xasjol muleskiro lav maškír léskire pšalénde i pašýl léskire štetoskire vudará: tumé san adadyvés jakhítka daleske.” I phendlé saré manušá, savé sys pašýl vudará, i phurydyrá: “Ame sam jakhítka, mek te sozdel Raj Devél romniá, saví zadžála dro tyró kher, syr Rahíl' i syr Lija, savé dujdžiné sčhude Izrailjoskiro kher; skéde barvalypén dro Jefrafo, i mek te slavinelpe tyró lav dro Vifliejémo; i mek te javél tyró kher, syr Fariesóskiro kher, savés bijandiá Famar' Judáske dolé rodóstyr, savó déla túke Raj Devél adalé terné džuvliatyr.” I lyjá Voozo Ruta, i joj kerdiápe léskire romniása. I zagijá jov ke joi, i Raj Devél dyjá láke te pharjol i joj bijandiá čhavés. I rakirdé džuvliá Noeminjake: “Te javél bahtiakirdó Raj Devél, so Jov na jačkirdiá kakaná tut bi prilyibnaskires pe mištypén (nasliednikoskiro!) I mek te javél slavútno léskiro lav dro Izrailjo! Jov javéla túke radymása i čaraibnarisa vaš tyró phuripen, pal-dová so les bijandiá tyrí bori, savjake isyn drógo tu, saví vaš túke fedýr syr eftá čhavé.” I lyjá Noemin' adalé tyknemases (bijatós), i lydžijá les dro péskiro oblyiben (angalia), i sys léske nian'kasa. Pašatuné (susiedki) dyné léske lav i rakirdé: “Noeminjate bijándyja čhavó”, i dyné léske lav: Ovido. Jov isyn Jesiejoskiro dad, Davidóskire dadéskiro. I ĥáda, isyn ródo Fariesóskiro: Fariesostyr bijándyja Jesromo; Jesromostyr bijándyja Arámo; Aramostyr bijándyja Aminadávo; Aminadavostyr bijándyja Naasóno; Naasonostyr bijándyja Salmóno; Salmonostyr bijándyja Voozo; Voozostyr bijándyja Ovido; Ovidostyr bijándyja Jesiejo; Jesiejostyr bijándyja Davído. Sys jekh manúš Ramafaimo Cofimatyr, Jefriemóskire bergátyr, lav léske sys Jelkana, Jerohamoskiro (Iierohamoskiro) čhavó, Ilijoskire čhavéskiro, Tohaskire čhavéskire, Cufaskire-čhavéskire Jefrafianino; léste sys duj romniá: lav jekhakiro Anna, a lav javirjakiro Fiennana; Fiennanate sys čhavé, Annate na sys čhavé. I psirdiá odová manúš péskire foróstyr dro savé trej dyvesá te mangélpe i te janel svénto dyibén Ráskire-Devléskiri jangoléngire-bolybnaskireske dro Silómo; odój sys Ilijo i duj léskire čhavé, Ofni i Finiejeso, savé sys Ráskire-Devléskire rašaja. Dro dová dyvés, kiéli o Jelkana janelas svénto dyibén, délas Fiennanake, péskire romniake, i sarénge lákire čhavénge i lákire čhajenge pašá; Annake délas paš fededyršo, pal-dová so jov kamdiá Anna, na dykhí pe dová, so Raj Devél zakerdia lákire-dákire masá. Lákire-romeskiri javír romný drieván xoliakirela la, ĥazdyi la ke tangipén xoliása angíl Raste-Devléste pe dová, so Raj Devél zakerdia lákire-dákire masá. Adiáke sys kažno berš, kiéli joj psirdiá dro Ráskire-Devléskiro Kher; doiá la xoliakirdia, a daja rondiá i na xaja. I phendiá láke Jelkana, lákiro rom: “Anna! So tu rovesa, i sóske na xasa, i sóstyr piridživela tyró iló? Ci na fedýr me som vaš túke deše čhavéndyr?” I uštyjá Anna paló (poslie) dová, syr jone xané i piné dro Silómo. O Ilijo rašáj sys beštó tedy pašýl zagiibén dro Ráskire-Devléskiri khangirí. I sys joj dro piridživipnaskiro di, i mangdiápe Ráskire-Devléskiri, i kirkes rondiá, i joj dyjá sovél, rakirí: “Rajo-Dévla, bolybnáskire-jangoléngiro! Kóli tu podykhesa pe Tyré dynaricakiro piridživipen, i priripiresa pal mánde, i na bistresa Tyrja dynárica, i désa Tyré dynaricake čhavores, to tedy me otdáva les Ráskire-Devléskiri pe saré léskire džiibnáskire dyvesá, i britva (muradluny) na čilavéla léskiro šeró. Maškir davá syr joj ĥará (dlúges) mangdiápe angíl Raste-Devléste, Ilijo dykhciá pe lákire uštá; i syr Anna rakirdiá dro péskiro iló, a lákire uštá jekh so otkerenaspe, i na sys šundly lákiri zan (glos), tedy Ilijo pogindia la matiasa. I phendiá láke Ilijo: “Kicyk tu javésa maty? Prosovpe tyré moliátyr.” I otphendiá Anna, i phendiá: “Nad, miro xulájo; me som džuvlý, saví piridživela duhósa, mol (vino) i sikiera me na pijom, ne otčhakirava miro di angíl Raste-Devléste; na gin tyré dynárica xasibnytkone džuvliása, pal-dová so baré miré piridživipnastyr i miré tugatyr me rakirdjom ke davá dyvés.” I otphendiá Ilijo, i phendiá: “Džá ramanjosa (mirósa), i Izrailjoskiro Devél keréla túke pir tyró mangipén, so tu mangdian Léstyr.” Joj phendiá: “Mek te lathel tyrí dynárica tangipén (žalima) dro tyré jakhá! I gijá joj péskire dromésa, i xaja, i lákiro muj na sys butýr smentno, syr angledýr. I uštyné jone pe zlóko (rankosa), i mangnepe angíl Raste-Devléste, i risiné, i javné dro péskiro kher dre Ráma. I udžindiá Jelkana Anna, peskirjá romniá, i priripirdia pal láte Raj Devél. Pirdál vari-kicý časo zapharija Anna i bijandiá čhavés, i dyjá léske lav: “Samuílo, pal-dová so joj rakirdiá: “Rástyr-Devléstyr me vymangdjom les.” I gijá lákiro rom Jelkana i sarí léskiri sém'ia (irí) te kerén beršytko svénto janybén Ráske-Devléske i péskire sovlahá. Anna na gijá, pheny péskire romeske: “Kiéli tyknomas javéla otlyno kolynestyr i podbarjola, to tedy me les lydžáva, i jov terdjola angíl Raste-Devléste, i jačélape odój pe saró džiibén.” I phendiá láke Jelkana, lákiro rom: “Ker, so túke trej; jačpe, paka tu čaliakiresa les kolynesa; jekh mek te kerél tvardo lav Raj Devél, savó vygijá tyré uštendyr. I jaciápe léskiri romný, i čaliakirdia kolynesa péskire čhavés, paka vybarjakirdia. Kiéli vybarjakirdia les, gijá lésa dro Silómo, lyjá trinen guruvorén, i jekh jefa jaržó, gonó mol, i javdiá dro Devléskiro Kher dro Silómo; Ráskire-terné beršengiro (otroko) sys nabaró čhavoró. I začhindlé guruvóres, i jandiá otrokos ke Ilijo, i phendiá: “O, miro xulájo! Mek te dživél di tyró, miro xulájo! Me odoia-pac' džuvlý, saví adáj angíl túte terdijom i mangdiápe Ráske Devléske; pal dalé čhavoreste me mangdjompe, i kerdiá mánge Raj Raj Devél pir miro mangipén, so me mangdjom Léstyr; i me otdáva les Ráske-Devléske pe saré léskire džiibnáskire dyvesá te dynarinél Ráske-Devléske.” I mangdiápe odój Ráske-Devléske. I mangdiápe Anna i rakirdiá: “Obradyndiape miro iló dro Raste-Devléste; ĥazdyi šyng miro dro miré Raste-Devléste; buĥles rosčhakirdepe miré uštá pe miré vergénde (vrogende); pal-dová so me radynavape pal Tyró zrakhibén. Nane dasaves sventones, syr Raj Devél; pal-dová so nane javirés, apríč Túte; i nane tvardedyr, syr amaró Raj Devél. Na rakirén but phut'kirdé lavá; nalačhé lavá mek te na vydžán tumaré uštendyr; pal-dová so Raj Devél isyn dykhib-naskiro Devél, i réndy Léste sykade. Lúko zoralengiro phadjola, a bizorjákire podphandenape zorjása; čale keréna butý marestyr, a bokhalé otkinjona, adiáke-pac' džuvliá, savé na moginéna te mainen čhavorén bijanena eftá móly, a džuvlý, saví moginéla te mainel but čhavén, na moginéla. Raj Devél muliakiréla i otdžidiakirela, zlydžala pe do svéto i vylydžala; Devél keréla čororesa i barvaliakirela, teliakirela i ĥazdéla. Prahostyr Jov podĥazdela čorores, brienijatyr ĥazdéla bogos, čhuvéla te bešél thagar'jenca, i slavakiro štéto déla lénge dro meknó mištypén (nasliedstvo) pal-dová so Raste-Devléste osnovanijo (fundámiento) phuvjákiro, i Jov sozdyjá pe lénde saró svéto. Péskire sventonengire ĥerá (stopy) Jov rakhéla, savé na pir zakóno dživéna, dro kalypén xasjona; pal-dová so na zorjása manúš isyn zoraló. Raj Devél trinskirela krig manušés, savó košelape Lésa; bolybnástyr Jov grymitinela pe lénde. Raj Devél javéla te sendiakirél phuvjákire jagóry (kraí), i Jov déla zor Péskire kralíske, i ĥazdéla Péskire pomakhibnariskiro šyng (rógo).” I gijá Jelkana dre Ráma dro péskiro kher, a ternó manúš jaciápe te dynarinél Ráskire-Devléskiri angíl rašaste Ilijoste. Ilijoskire čhavé sys nalačhé manušá; jone na džindlé Ras-Devlés i so trej rašange te otlydžanpe ke dová manušá. Kiéli, kon janéla svénto dyibén Ráske-Devléske, to rašángiro ternó manúš, dro maseskiro keraibnaskiro časo (cýro), javélas péskiro vast phusadiasa (vilkasa) i obmekela la dro kakávi (kotlo), ci dro čaró, ci pe xič (skoroviéda) ci dre pirí, i so vylela phusady, dová léla péske rašái. Adiáke jone kerdé saré Izrail'tianenca, savé javénas odorík dro Silómo. Kóli angledýr, syr shačkirdé čekén (túko), javélas rašángiro ternó manúš i rakirélas manušéske, savó jandiá svénto dyibén Ráske-Devléske: “De mas pe žarjonka rašáske; jov na léla túte kerado mas, a de syrovo.” I kóli vari-kon rakirdiá léske: “Mek te shačkiren angledýr túko, syr trej te javél i tén'či (potom) lésa péske, ci but zakaméla tyró di.” Tedy jov rakirdiá: “Nad, kakaná de, a kóli nad, tedy Me láva zorjása.” I grého dalé terné-manušéngiro sys drieván baró angíl Raste-Devléste, pal-dová so jone otriskirena manušén sventoné janybnastyr Ráske-Devléske. Ternó-beršengiro Samuílo dynarindiá angíl Raste-Devléste, i sys uridó dro parkalitko efódo. Upratuno tyknó uribén kerdiá léske daj léskiri i janéla léske kažno (sváko) berš, kiéli joj iavéla péskire romesa, vaš savó trej svénto janybén Ráske-Devléske. I bahtiakirdiá Ilijo Jelkana i leskirja romniá, i phendiá: “Mek te del túke Raj Devél čhavén adalé romniatyr zamiést adaleste, savés tu otdyjan Ráske-Devléske!” I giné jone pe péskiro štéto. I javdiá Raj Devél ke Anna, i zapharija joi, i bijandiá trinen čhavén i dujén čhajén; a terneb manušéngiro Samuílo barija Raste-Devléste. Ilijo sys drieván phuró i šundiá saró, syr keréna léskire čhavé saré Izrail'tianenca, i so jone sys suté džuvliénca, savé skedenaspe pašýl zagiibén dro skedyibnáskiri skínija. I phendiá lénge: “Vaš so tumé keréna dasavé réndy? Pal-dová so me šunava nalačhé lavá pal tuménde saré manušéndyr. Nad, miré čhavale isyn nalačhi mavlýn (sláva), saví me šunava; tumé zmarena čačuné droméstyr Ráskire-Devléskire manušén; kóli manúš keréla grého manušéske, tedy pomangenape pal léste Ráske-Devléske; kóli manúš keréla grého proti Raste-Devléste, tedy kon javéla te mangélpe pal léste?” Ne jone na šundlé péskire-dadéskiri zan (glos), pal-dová so Raj Devél skedyjape te otdél len meribnáske. Ternó manúš Samuílo butýr i butýr barjolas i dro láska Raste-Devléste i manušénde. I javdiá Ráskire-Devloskiro manúš ke Ilijo, i phendiá léske: “Adiáke rakiréla Raj Devél: ‘Ci na otčhakirdjompe Me tyré dadéskire kheréske, kiéli jone sys dro Jegípto, dro faraonóskiro kher? I ci na vykedyjom Me les saréndyr Izrailjoskire rodendyr Péske dro rašaste, sob jov te poddžál ke Miro altárjo (žertvieniko), sob (kaj) te xačkirel fimiámo, sob te lydžál efódo angíl Mánde? I ci na dyjom Me tyré dadéskire kheréske saré shačkirdé jagása Izrailjoskire čhavéngiro sventoné dyibnendyr Ráske-Devléske? Vaš so tumé čhurdena ĥerénca Miré svénta janybená Ráskire-Devléskiri i Miro marunó janybén, savé Me phendjom vaš Miro kher, i sóske tu kamésa péskire čhavén butýr syr Man, thuliakiri pes anglatuné načatkenca saré janybnendyr Miré Izrailjoskire manušéngire?’ Paldavá adiáke rakiréla Raj Devél, Raj Devél Izrailjoskiro: ‘Me phendjom tedy: ‘Tyró kher i tyré-dadéskiro kher javéna te psirén angíl Miro muj dro viéko.’ Ne kakaná rakirdiá Raj Devél: ‘Mek te na javél adiáke, pal-dová so Me proslavinava manušén, savé slavinena Man, a kon na slavinela Man, odolé javéna ladžakirdé. Ĥáda, džána dyvesá, dro savé Me podčingirava tyrí myšca (masny) i tyré-dadéskiri kheréskiri myšca adiáke, so na javéla bogos dro tyró kher; i tu javésa te dykhés bída Miré kheréskiri, na dykhí pe saró davá, so Devléske isyn drógo Izrailjo, i na javéla dro tyró kher bogos dro saré dyvesá. Me na tradava krig túte sarén Miré altarjostyr (žertvienikostyr), sob te khiniakires tyré jakhá i te menčynes tyró di; ne saró tyré kheréskiro ródo javéla te merél dro maškiratune beršá. I ĥáda, túke ĥiertýk (znamiénijo), saví džála duje tyré čhavénca, Ofnisa i Finiejesosa: jone dujdžiné meréna dro jekh dyvés. I čhuváva Me Péske čačunés rašás; jov javéla te kerél pir Miro iló i pir Miro di; i léskiro kher Me keráva zoralesa, i jov javéla te psirél angíl Miré pomakhibnariste dro saré dyvesá; i kažno (sváko), kon jaciápe tyré kheréstyr, javéla léske te mangélpe pal giera rup i kotér (kusko) maró, i phenéla: “De mánge vari-saví Lievitengiri butý, sob (kaj) te zakerav pe džiibén.’” Ternó manúš Samuílo dynarindiá Ráske-Devléske angíl Ilijoste; Devléskiro lav sys na často dro dolé dyvesá, dykhibén sys na často. I sys dro dová časo (cýro), kiéli Ilijo sys paštó pe péskiro štéto, léskire jakhá lyné te začhakirenpe, i jov na mogindiá te dykhél, i Ráskire-Devléskiro momolýtko (svietíl'niko) iščo (inké) na murdija, i Samuílo sys paštó dre Ráskire-Devléskiri Khangirí, kaj sys Ráskire-Devléskiro kovčego; I khardiá Raj Devél Samuilos, i jov otphendiá: “Ĥáda, me som!” I jov prastándyja ke Ilijo, i phendiá: “Ĥáda, me! Tu khardian man.” Ne odová phendiá: “Me na khardjom tut, džá pale, pasjov.” I jov gijá i pasijá. Ne Raj Devél dro javír mólo khardiá Samuilos. Jov uštyjá, i javdiá ke Ilijo javír mólo, i phendiá: “Ĥáda, me som!” Ne odová phendiá: “Me na khardjom tut, miro čhavó; džá pale, pasjov.” O Samuílo tedy na džindiá Ráskire-Devléskiri zan (glos), i iščo (inké) na otčhakirelaspe léske Ráskire-Devléskiro lav. I khardiá Raj Devél Samuilos dro tríto mólo. Jov uštyjá, i javdiá ke Ilijo, i phendiá: “Ĥáda, me! Tu khardian man. Tedy ĥalyjá Ilijo, so Raj Devél kharéla terné-beršengires (terné manušés). I phendiá Ilijo Samuiloske: “Džá pale i pasjov, i, kiéli kon kharéla tut, tu phen: ‘Rákir, Rajo Dévla, pal-dová so šunéla Tyró pishári.’” I gijá Samuílo, i pasijá pe péskiro štéto. I javdiá Raj Devél, i terdijá, i khardiá, syr dro dová i javír mólo: “Samuilie, Samuile!” I phendiá Samuílo: “Rákir, Rajo Dévla, pal-dová so šunéla Tyró pishári.” I phendiá Raj Devél Samuiloske: “Ĥáda, Me keráva réndo dro Izrailjo, pal savó, kóli vari-kon šunéla, odoléste kuduniakirela (zvieninela) dre duj kaná; dro dová dyvés Me keráva pe Ilijoste saró dová, so Me rakirdjom pal léskiro kher; Me láva i keráva; Me dyjom te džinél léske, so Me čhuváva kára pe léskiro kher pe viéki pal doiá bang, so jov džindiá, syr léskire čhavé kerénas fujes, i jov na obrikirdia len; i paldavá sovlahava Ilijoskire kheréske, so Ilijaskire-kheréskiri bang na zlelape ni sventoné janybnasa Ráske-Devléske, ni marune janybnasa dro viéko.” I sutia Samuílo ke zlóko, i otčhakirdiá Ráskire-Devléskire Khereskire vudará; i Samuílo dardiape (darandyja) te del te džinél davá dykhibén Ilijoske. Ne Ilijo khardiá Samuilos i phendiá: “Miro čhava, Samuilie!” Odová phendiá: “Ĥáda, me som!” I phendiá Ilijo: “So sys phendló túke? Na garav mándyr; dová i dová keréla túsa Raj Devél, i iščo (inké) butýr keréla, kóli tu garavesa mándyr vari-so saréstyr doléstyr, so sys phendló túke.” I dyjá te džinél léske Samuílo saró, i na garadia léstyr ničý. Tedy phendiá Ilijo: “Jov, Raj Devél; so Léske trej, dová mek te kerél.” I vybarija Samuílo, i Raj Devél sys lésa; i na jaciápe nijékh léskire lavéndyr, savó na kerdiápe dro čačipén. I udžindiá saró Izrailjo Danostyr ke Virsava, so Samuílo sys čhudo te javél Ráskire-Devléskire prorokosa. I paló (poslie) dová Raj Devél duredýr javélas dro Silómo, syr otčhakirdiá [sykadyjá-ju.o.] Samuiloske Pes dro Silómo pirdál Ráskire-Devléskiro lav. I sys Samuiloskiro lav ke saró Izrailjo. I vyginé Izrail'tiáni proti Filistimlianende pe maribén, i terdiné stanósa (lodesa) pašýl Avien-Jeziero, a Filistimliáni terdiné pašýl Afieka. I terdiné Filistimliáni proti Izrail'tianende, i vygijá maribén, i domardé Filistimliáni Izrail'tianén, savén domardé pe félda, kaj mardépe, pašýl štar tysjoncy manušén. I javné manušá dro stáno (lod), i phendlé Izrailjoskire phurydyrá: “Pal so domardiá amen Raj Devél adadyvés angíl Filistimlianende? Lása péske Silomostyr kovčego Ráskire-Devléskire zavietosa, i jov džála maškír aménde, i zrakhéla amen vastéstyr amaré vergéngire (vrogengire).” I bičhadé manušá dro Silómo, i jandlé odothýr Ráskire-Devléskiro jangoléngire-bolybnáskire kovčego zavietosa, savó sys beštó pe xieruvimy; a pašýl Ráskire-Devléskire zavietóskiro kovčego sys i duj Ilijoskire čhavé, Ofni i Finiejeso. I kiéli javdiá Ráskire-Devléskire zavietóskiro kovčego dro stáno, saró Izrailjo ĥazdyjá dasaví zoralý gódla, so phuv dyjá ĥondiá (stonindia). I šundlé Filistimliáni gódla radymakiri, i phendlé: “Sóstyr dasavé bari gódla radymakiri dro Judéngiro stáno?” I udžindlé, so Ráskire-Devléskiro kovčego javdiá dro stáno. I strahádyne Filistimliáni, pal-dová so phendlé: “Odová Devél javdiá ke jone dro stáno.” I phendlé: “Bida aménge! Paldavá so na sys dasavo ni tasiá, ni pe tríto dyvés; bída aménge! Kon zrakhéla amen dalé zoralé Devléskire vastéstyr? Ada odová Raj Devél, Savó domardiá Jegiptianen raznone (svakone) dukhenca pe čhučí phuv; zoraljon i javén murškané (smiala), Filistimliáni, sob (kaj) tuménge te na javén dro dynaribén Judénge, syr jone isyn tuménde dro dynaribén; javén murškané i marénpe lénca.” I mardépe Filistimliáni, i domardé sys Izrail'tiáni, i kažno (sváko) nastiá dro péskiri šátra, i sys maribén drieván baró, i pyné Izrail'tianén trijánda tysjoncy manušén, savé sys pezal. I Devléskiro kovčego sys zalyno, i duj Ilijoskire čhavé, Ofni i Finiejeso, myné. I nastiá jekh Vieniamitianino maribnaskire štetóstyr, i javdiá dro Silómo, dro dová-pac' dyvés; ídia pe léste sys rozkušny i práho pe léskiro šeró. Kiéli javdiá jov, o Ilijo sys beštó pe štéto angíl drom pašýl vudará i dykhciá, pal-dová so léskiro iló trinskirdiape pal Devléskiro kovčego (mohtó). I kiéli odová manúš javdiá i phendiá sarénge dro fóro, tedy zoralés dyjá ĥondiá (uzdyhnindia) saró fóro. I šundiá Ilijo gódla, i phendiá: “Sóstyr dasaví gódla?” I doiá-pac' štúnda podgíia odová manúš, i piriphendia Ilijoske. Tedy Ilijoske sys jeniadeša ohtó berš; i léskire jakhá pirijačne te dykhén, i jov na mogindiá te dykhél. I phendiá odová manúš Ilijoske: “Me javdjom stanostyr, adadyvés me nastjom maribnaskire štetóstyr.” I phendiá Ilijo: “So kerdiápe, míro čháva?” I otphendiá manúš, savó jandiá zan (zvies'), i phendiá: “Našelas Izrailjo angíl Filistimlianende, i maribén baró vygijá dro manušénde, i duj čhavé tyré, Ofni i Finiejeso, myné, i Devléskiro kovčego lynó. Kiéli jov priripirdia pal Devléskiro kovčego, to Ilijo pyjá štetóstyr, pe savó sys beštó pe dumo pašýl vudará, phagirdiá péske dumalo kokalo i myjá; pal-dová so jov jaciá phuró i pharó. I sys jov Izrailjoske sendarisa štardešá berš. Léskiri bori, Fieniejesoskiri romný, sys pharí angíl bijanypén. I kiéli šundiá zan (zvies') pal Devléskiro kovčegoskiro lyiben i pal péskire sastreskiro meribén i péskire romeskiro, to tedy pyjá pe čang i bijandiá, pal-dová so podginé ke joj lákire dukhá. I kiéli merelas joi, džuvliá, savé sys terdé pašýl láte, rakirdé láke: “Na dar, tu bijandian čhavés.” Ne joj na otphendiá i na riskirdiá jakhá. I khardiá tyknemases: Ihavodo, phení: “Otgijá sláva Izrailjostyr” Devléskire kovčegoskire lyibnasa i lákire sastreskire meribnasa i lákire romeskiresa. Joj phendiá: “Otgijá Izrailjostyr sláva, pal-dová so lynó Devléskiro kovčego.” Filistimliáni lyné Devléskiro kovčego i jandlé les Avien Jezierostyr dro Azoto. I lyné Filistimliáni Devléskiro kovčego, zalydžine les dro Dagonoskiro mangipnytko kher, i čhudé les pašýl Dagono. I uštyné Azotiani pe javír dyvés tasiárles (ránes), i ĥáda, Dagono sys paštó péskire mósa ke phuv angíl Ráskire-Devléskiro kovčego. I lyné jone Dagono, i nevéstyr čhudé les pe péskiro štéto. I uštyné jone tasiárles pe zlóko pe javír dyvés, i ĥáda, Dagono sys paštó mósa pe phuv angíl Devléskiro kovčego; šeró Dagonoskiro i duj léskire vastá sys pašté otčingirde, kažno (sváko) rozmardes, pe progo, jaciápe jekh Dagonoskiro štalto (torso). Paldavá Dagonoskire žriecy i saré, savé javénas dro Dagonoskiro mangipnytko kher dro Azoto, na terdjona pe Dagonoskiro progo ke davá dyvés. I obmekciape Ráskire-Devléskiro vast pe Azotianende, i Jov domardiá len, i čhudiá kára pe lénde dukhane ĥerasa, dro Azoto i pašýl léste. I dykhné davá Azotiani, i phendlé: “Mek te na jačélpe Izrailjoskire-Devléskiro kovčego aménde, pal-dová so pharó isyn Léskiro vast i vaš aménge, i vaš Dagono, amaré devleske.” I bičhadé, i skedyné ke pe sarén Filimijakire xulan, i phendlé: “So aménge te kerás Izrailjoskire-Devléskire kovčegosa?” I phendlé: “Mek Izrailjoskire Devléskiro kovčego te piridžal dro Giefo.” I otbičhade Izrailjoskiro Devléskiro kovčego dro Giefo. Paló (poslie) dová syr otbičhade les, to, sys Ráskire-Devléskiro vast pe fóro i dar sys drieván bari, i domardiá Raj Devél foróskire manušén tyknestyr ke baró, i sykadyjá pe lénde ĥer (narosto). I otbičhade jone Devléskiro kovčego dro Askalono; i, kiéli javdiá Devléskiro kovčego dro Askalono, to lyné te den gódla Askalonitiani, rakirí: “Jandlé ke ame Izrailjoskire Devléskiro kovčego, sob (kaj) te muliakires amen i amaré manušén.” I bičhadé, i skedyné sarén Filistimijákire xulan, i phendlé: “Otbičhaven Izrailjoskire Devléskiro kovčego; mek jov te risjol pe péskiro štéto, sob (kaj) te na muliakirél jov amen i amaré manušén”; pal-dová so mulakany dar sys dro saró fóro; drieván pharó sys Devléskiro vast pe lénde. I odolé, savé na myné, sys domardé ĥerasa adiáke, so gódla foróskiri dogijá ke bolybén. I sys Ráskire-Devléskiro kovčego dro Filistimijakiri provincyja eftá čhoná. I khardé Filistimliáni žriecen i zumakiribnaskiren, i phendlé: “So aménge te kerás Ráskire-Devléskire kovčegosa?” Podsykliakiren amen, syr aménge te otmekas les pe péskiro štéto. Odolé phendlé: “Kóli tumé kaména te otmeken Izrailjoskire Devléskiro kovčego, tedy na otmeken les ni sósa, ne janén Léske bangipnaskiro svénto dyibén; tedy vysastjona i udžinena, pal so na otdžala tuméndyr Léskiro vast.” I phendlé jone: “Savó svénto dyibén pal čoripén ame musinas te jandas Léske?” Odolé phendlé: “Pir Filistimijákire-xulangiro ginybén pandž narosty suvnakuné i pandž karmusen (myšen) suvnakunen; pal-dová so xas' (kazn') jekh pe tuménde sarénde i pe tumaré xulande; i adiáke kerén formy tumaren narostengire i formy tumaré karmusengire, savé keréna čhučí phuv, i den Izrailjoskire Devléske sláva; moginéla te javél, Jov keréla lokhedýr Péskiro vast pe tuménde, i pe tumaré devlende, i pe tumarí phuv; i vaš so tuménge te xoliakiren tumaró iló, syr xoliakirde péskiro iló Jegiptiáni i faraóno? Ĥáda, kiéli Raj Devél sykadiá Péskiri zor pe lénde, tedy jone otmekne len, i dolé giné; i adiáke len, kerén jekh nevó vurdén, i len dujén anglatuné bijandlen gurumnien, pe savénde na sys ĥámo, i den andré gurumnien andré vurdén, a léngire terné gurumnien otlydžan léndyr kheré; i len Ráskire-Devléskiro kovčego, i čhuvén les pe vurdén, a suvnakuné vieščy (pribory), savé janéna Léske dro bangipnaskiro svénto dyibén, čhuvén dro tyknori léskire rigátyr, i otmeken les, i mek te džal; i dykhén, kóli jov džála ke péskire rigá, ke Viefsamisa, tedy jov kerdiá aménge bari xolý; kóli nad, tedy ame javása te džinas, so na léskiro vast domardiá amen, a kerdiápe davá aménca pir vakancyja.” I kerdé jone adiáke: “I lyné duje anglatuné bijandlen gurumnien, i dyné andré len dro maribnýtko vurdén, a léngire cielianten urikirde kheré. I čhudé Ráskire-Devléskiro kovčego pe maribnýtko vurdén i mohtó (jaščyko) suvnakuné karmusenca i narostengire formenca. I giné gurumnia mamúj pe drom ke Viefsamiso; jekhe dromésa giné, giné i myčyndle, ne na riskirdé ni pe čačó (pravo), ni pe zérvo (liévo); Filistimijákire xulaja giné pal lénde ke Viefsamisoskiri miéža. Viefsamisoskire manušá tedy ukedenas giv pe dólo, i, podykhi, dykhné Ráskire-Devléskiro kovčego, i obradyndepe, so dykhné les. Maribnýtko vurdén javdiá pe Viefsamitianinoskire Isusoskiri félda i terdijá odój; i sys adáj baró bar, i manušá rosčhingirde vurdén pe kaštá, a gurumnien jandlé dro célo shačkiribén Rask-Devléske. Lievíty zlyne Ráskire-Devléskiro kovčego i mohtó (jaščyko), savó sys pašýl léste, dro savó sys suvnakuné vieščy, i čhudé pe dová baró bar; Viefsamisoskire manušá jandlé dro dová dyvés célo shačkiribén i začhindlé svénta janybená Ráske-Devléske. I pandž Filistimijákire xulaja dykhné davá, i risiné dro dová-pac' dyvés dro Akarono. Suvnakuné dalé narosty, savé jandlé Filistimliáni dro svénto janybén Ráske-Devléske pal bang sys: jekh pal Askalono, jekh pal Giefa, jekh pal Akarono; a suvnakuné karmusa sys pir saré Filistimijákire-foróskiro ginybén pandžé xulangire, for'jéndyr zoralé tynénca i ke otčhakirde gavá, ke baró bar, pe savó čhudé Ráskire-Devléskiro kovčego, i savó isyn ke davá dyvés pe Viefsamitianinoskiri félda. I domardiá Jov Viefsamisoskire manušén pal dová, so jone poddykhenas dro Ráskire-Devléskiro kovčego, i zamardiá manušéndyr pandždešá tysjoncy eftadešá manušén; i zarondle manušá, pal-dová so domardiá Raj Devél manušén baré maribnása. I phendlé Viefsamisoskire manušá: “Kon moginéla te terdjol angíl Raste-Devléste, adalé Sventoné Devléste? I ke kon Jov džála améndyr?” I bičhadé manušén ke Kiríaf-Jarimoskire manušá te phenén: “Filistimliáni riskirdé pale Ráskire-Devléskiro kovčego; javén, len ke pe les.” I javné Kiríaf-Iarimoskire manušá, i lyné Ráskire-Devléskiro kovčego, i jandlé les dro Aminadavóskiro kher, pe bérga, a Jelizaros, léskire čhavés, vysvencyndle, sob (kaj) jov te rakhél Ráskire-Devléskiro kovčego. Dolé dyveséstyr, syr jaciápe kovčego dro Kiríaf-Iarimo, progijá but časo, biš berš. I risijá saró Izrailjoskiro kher ke Raj Devél. I phendiá Samuílo saré Izrailjoskire kheréske, rakirí: “Kóli tumé saré péskire ilésa risjona ke Raj Devél, tedy otčhurden péstyr javire-manušéngire devlen i Astarten, i janén tumaró iló ke Raj Devél, i Léske Jekhéske dynarinén, i Jov zrakhéla tumen Filistimlianengire vastéstyr. I vyčhurdyne Izrailjoskire čhavé Vaalen i Astarten, i lyné jekhe Ráske-Devléske te dynarinén. I phendiá Samuílo: “Skedén sarén Izrail'tianén dro Masífa, i me pomangavape pal tuménde Ráske-Devléske.” I skedynépe dro Masífa, i pherenas paní, i čhuvénas angíl Raste-Devléste, i postindle dro dová dyvés, rakirí: “Kerdiám ame angíl Raste-Devléste grého.” I sendindia Samuílo Izrailjoskire čhavén dro Masífa. Kiéli šundlé Filistimliáni, so skedynépe Izrailjoskire čhavé dre Masífa, tedy giné Filistimijákire xulaja pe Izrailjo. Izrail'tiáni šundlé pal dová, i strahandyne Filistimlianendyr. I phendlé Izrailjoskire čhavé Samuiloske: “Na pirijač te mangespe pal aménde amareske Ráske-Devléske, Devléske, sob (kaj) Jov te zrakhél amen Filistimlianengire vastéstyr.” I lyjá Samuílo jekhe bakrores ciuciatyr, i jandiá les dro célo shačkiribén Ráske-Devléske, i mangdiá zoralés Samuílo Ras-Devlés pal Izrailjo, i šundiá les Raj Devél. I kiéli Samuílo janelas célo shačkiribén, Filistimliáni javné te marénpe Izrailjosa. Ne Raj Devél zagriukindia dro dová dyvés zoralé gromosa pe Filistimlianende, i jandiá dar pe lénde, i jone sys domardé angíl Izrailjo. I vyginé Izrail'tiáni Masifatyr, i tradyne Filistimlianen, i domardé len pe štéto tel Viefhoro. I lyjá Samuílo jekh bar, i čhudiá maškír Masífa i maškír Sienomo, i khardiá les Avien-Jeziero, phení: “Pe davá štéto dyjá vast pomogindia aménge Raj Devél.” Adiáke štyliakirde sys Filistimliáni i na lyné butýr te psirén pe Izrailjoskire miežakire rigá; i sys Ráskire-Devléskiro vast pe Filistimlianende dre saré Samuiloskire dyvesá. I riskirdé sys Izrailjoske fórja, savé lyné Filistimliáni Izrailjostyr, Akaronostyr i ke Giefa, i léngire rigá kerdiá vol'nonenca Izrailjo Filistimlianengire vasténdyr, i sys ramánjo (miro) maškír Izrailjo i Amoriejende. I sys Samuílo Izrailjoske sendarisa dro saré péskire džiibnáskire dyvesá: berš beršestyr jov psirdiá i obdžalas Viefíljo, i Galgálo, i Masífa i sendiakirdia Izrailjo pe saré dalé štéty; tén'či (potom) risijá dro Ráma; pal-dová so odój sys léskiro kher, i odój sendindia jov Izrailjo, i čhudiá odój Ráske-Devléske altárjo. Kiéli phurija Samuílo, tedy čhudiá péskire čhavén sendar'jenca pe Izrailjo. Léskire phurydyršoneske čhavéske lav sys Ioiljo, a javire léskire čhavéske lav sys Avijá; jone sys sendar'jenca dre Virsávija. Ne léskire čhavé na psirdé léskire droménca, a otginé dro péskiro kófo, i lyné počastúnki (podarki), i sendindle xohanés. I skedynépe saré Izrailjoskire phurydyrá, i javné ke Samuílo dro Ráma, i phendlé léske: “Ĥáda, tu phurijan, a tyré čhavé na psiréna tyré droménca, i adiáke čhuv pe aménde kralís, sob (kaj) jov te sendiakir amen, syr isyn javire manušénde.” I na pir iló sys davá lav Samuiloske, kiéli jone phendlé: “De aménge kralís, sob (kaj) jov te sendiakirél amen.’ I mangdiápe Samuílo Ráske-Devléske. I phendiá Raj Devél Samuiloske: “Šun manušéngiri zan (glos) dro saró, so jone túke rakiréna; pal-dová so na tut jone otčhurdyne, ne Man otčhurdyne, sob (kaj) Me te na javav kralísa pe lénde; syr jone kerdé dolé dyveséstyr, dro savó Me vylydžijom len Jegiptóstyr, i ke davá dyvés, jačkirdé Man i dynarindlé javire devlenge, adiáke jone keréna i túsa; i adiáke šun léngiri zan; ne jekh de lénge te džinén i piriphen lénge kralískire pravy, savó javéla kralísa pe lénde.” I piridyja Samuílo saré Ráskire-Devléskire lavá manušénge, savé mangné léstyr kralís, i phendiá: “Ake, savé javéna kralískire pravy, savó javéla kralísa pe tuménde: tumaren čhavén jov léla, i čhuvéla ke péskire maribnýtka vurdyná, i jov keréla péskire uklistenca, i javéna jone te prastan angíl léskire vurdyná; i čhuvéla len barydyrénca péste pe tysjoncy i pe pandždešá, i sob (kaj) jone te kerén butý pe léskire féldy, i te ukeden léskiro maró, i te kerén léske mardytka i častyra ke vurdená vaš maribén; i jov léla tumaré čhajén, sob jone te sčhuven makhibena (masti), te keraven xabén i te peken maró; i tumaré féldy i vinagradoskire i maslična unty (sady) tumaré jov léla fedyrša i otdéla péskire dynar'jénge; i so tumé posieindle i tumaré vinagradoskire untendyr léla déšto paš, i otdéla péskire jevnuhenge i péskire dynar'jénge; i tumaré dynar'jén, i tumaré dynaricen, i tumaré fedyršone terné manušén, i tumaré oslen léla, i léla dre butý pe péskire réndy; tykné tumaré kheritkoné murdaléndyr (skotóstyr) jov léla déšto paš, i tumé kokoré javéna léske dynar'jénca; i zagodlena tedy tumé tumaré kralístyr, savés tumé péske vykedyné; i na javéla Raj Devél te otphenel tuménge.” Ne manušá na sys dre jekh godý te šunén Samuiloskiri zan i phendlé: “Nad, mek králi te javél pe aménde, i ame javása syr javír manušá: jov javéla te sendinel amen syr králi amaró, i te psirél angíl aménde, i te lydžál maribena amaré.” I vyšundia Samuílo saré manušéngire lavá, i piriphendia len vaš Ráskire-Devléskiro šunybén. I phendiá Raj Devél Samuiloske: “Šun léngiri zan (glos) i čhuv lénge kralís.” I phendiá Samuílo Izrail'tianenge: “Džán kažno (sváko) dro péskiro fóro.” Sys vari-kon Vieniaminóskire čhavéndyr, lav léskiro sys Kiso, Aviiloskiro čhavó, Ceronoskire-čhavéskiro, Biehorafoskire čhavéskiro, Afijaskire čhavéskiro, vari-saveskire Vieniamitianinoskire čhavéskire, slavútno manúš. Léste sys čhavó, lav léskiro Sáulo, ternó i šukár; i na sys Izrail'tianendyr nikonés léstyr gožedyr; jov péskire psikendyr sys vučedýr saré manušéndyr. I xasiné oslicy Kisoste, Saulóskire dadéste, i phendiá Kiso Saulóske, péskire čhavéske: “Le pésa jekhés dynar'jéndyr (slugéndyr) i uštý, džá, róde oslicen.” I progijá jov Jefriemóskiri bérga, i progijá Šališaskiri phuv, ne jone na lathné; i proginé Šaalimoskiri phuv, i odój len nane; i progijá jov Vieniaminoskiri phuv, i na lathné. Kiéli jone javné pe Cufaskiri phuv, Sáulo phendiá péskire dynaríske, savó sys lésa: “Javén pale, sob (kaj) miro dad, jačkiri oslicen, na lyjá te del túga (klopotynelpe) pal aménde.” Ne dynári phendiá léske: “Ĥáda, dro davá fóro isyn Devléskiro manúš, patyvalo manúš; saró so jov phenéla, kerélape čačipnása; ame kakaná odorík; moginéla te javél, jov uphenela aménge drom amaró, pir savó aménge te džas.” I phendiá Sáulo péskire dynaríske: “Ĥáda, ame džása, a so ame janasa dolé manušéske? Pal-dová so maró na jaciá dro amaré sakvy, i počastunko (podarko) nane, sob te janas Devléskire manušéske; so aménde? I nevés otphendiá dynári Saulóske i phendiá: Ĥáda, dro miro vast isyn paš šékieljo rup; me otdáva les Devléskire manušéske, i jov sykavéla aménge drom amaró.” Angledýr dro Izrailjo, kiéli vari-kon gijá te phučel Devléstyr, to rakirdé adiáke: “Džása ke magiko (prozorlivco)”; pal-dová so o dová, konés kakaná kharéna prorokosa, angledýr khardiape prozorlivcosa. I phendiá Sáulo péskire dynaríske: “Mištó tu rakirésa; džása.” I giné jone dro fóro, kaj Devléskiro manúš sys. Kiéli jone ĥazdenaspe upré dro fóro, tedy strenindle terné patyvalé džuvlién, savé vyginé te pheren paní, i phendlé lénge: “Ci isyn adáj prozorlivco?” Odolé otphendlé lénge i phendlé: “Isyn; ĥáda, jov isyn angíl túte; jekh so sygniakir, pal-dová so jov adadyvés javdiá dro fóro, pal-dová so adadyvés manušénde svénto janybén Devléske pe vučipén; kiéli javéna dro fóro, to tumé zauhtylena les, paka jov na gijá pe davá vučipén, pe obiado; pal-dová so manušá na léna te xan, paka jov javéla; pal-dová so jov bahtiakiréla svénto janybén Devléske, i paló (poslie) davá léna te xan, manušá, savén khardé; i adiáke, džán, kakaná zauhtylena les.” I giné jone dro fóro. Kiéli zaginé dro paš fóro, tedy ĥáda, i Samuílo gijá pe strieč, sob (kaj) te džal pe vučipén. A Raj Devél otčhakirdiá Samuiloske pal dyvés ke Sauloskiro javiben i phendiá: “Atasiá dro davá časo Me bičhaváva ke tu manušés Vieniaminóskire phuvjátyr, i tu pomakh les dre phuredyreste Miré manušénge Izrailjoske, i jov zrakhéla Miré manušén Filistimlianengire vastéstyr; pal-dová so Me pridykhcjompe pe Miré manušénde, adiáke syr léskiri gódla dogijá ke Me.” Kiéli Samuílo dykhciá Saulos, tedy Raj Devél phendiá léske: “Ĥáda, isyn manúš, pal savéste Me rakirdjom túke; jov javéla te rikirél zor te priphenel Miré manušénge.” I podgíia Sáulo ke Samuílo, dro vudará, i phuciá léstyr: “Phen mánge, kaj isyn kher prozorlivcoskiro?” I otphendiá Samuílo Saulóske, i phendiá: “Me som prozorlivco, džá angíl mánde pe vučipén; i tumé javéna te xan adadyvés mánca, i me otmekáva tut zlokosa (tasiarle), i saró, so túte pe iló, Me phenáva túke; A pal oslicende, savé túte xasiné uže trin dyvés, na dumin but: jone lathnepe. I konéske saró bijandlo dro Izrailjo? Ci na túke i saré tyré dadéskire kheréske?” I otphendiá Sáulo i phendiá: “Ci na čhavó me som Vieniaminoskiro, jekhe tyknedyršone Izrailjoskire kheritkoné rodendyr? I ci na tyknedýr miro kherítko ródo maškír sarén Vieniaminóskire ródy (pliémi)? Ke so tu mánge tu rakirésa davá?” I lyjá Samuílo Saulos i léskire dynarís, i zalydžijá len dre štúba, i dyjá lénge anglatunó štéto maškír manušénde, savé sys khardé, savén sys pašýl trindeša manušén. I phendiá Samuílo manušéske, savó keradia: “Pode daja paš, saví (savó) me dyjom túke, i pal savó me phendjom túke: ‘Otčhuv la krig péste.’” I lyjá manúš, savó keradia psikó i so sys pašýl léste, i čhudiá angíl Sauloste. I phendiá Samuílo: “Ĥáda, davá jačkirdo, čhuv angíl péste i xa, pal-dová so ke davá časo (cýro) zrakhno davá vaš túke, kiéli me skedyjom manušén.” I xaja Sáulo Samuilosa dro dová dyvés. I giné jone vučipnástyr dro fóro, i Samuílo rakirdiá Saulosa pe stréha (čhakín). Zlokosa jone uštyné adiáke: kiéli jaciá te dyvesjol, to Samuílo gijá upré ke Sáulo pe stréha (čhakín) i phendiá: “Uštý, me prolydžava tut.” I uštyjá Sáulo, i vyginé jone dujdžiné kheréstyr, jov i Samuílo. Kiéli jone podginé ke foróskiro jagóro (krajo), Samuílo phendiá Saulóske: “Phen dynaríske, sob (kaj) jov te džal angíl aménde. I jov gijá angíl, a tu terdjov kakaná, i me otčhakirava túke, so phendiá Devél.” I lyjá Samuílo khoró (sasudo) jeliejosa i vyčhudiá pe léskiro šeró, i čamudia les, i phendiá: “Ĥáda, Raj Devél pomakhela tut dro pravitieliende (theméskire barydyrende) pir meknó mištypén (nasliedijo) Péskiro. Kiéli tu kakaná džása mándyr, tedy streninesa duje manušén pašýl Rahiliakiri koplíca (grobo), pe Vieniaminóskire rigá, dre Cielcaha, i jone phenéna túke: ‘Lathnepe oslicy, savén tu psirdian te rodes, i ĥáda, isyn tyró dad, zabistyrdia pal oslicende, déla tugi (klopotynelape) pal tuménde, rakirí: So isyn miré čhavésa?’ I tu džása odothýr duredýr, i javésa ke Favoskiri dembitko, i streninena tut odój trin manušá, savé džána ke Raj Devél, dro Viefíljo: jekh lydžála trinen buznoren (kozliaten), javír lydžála trin maré, a tríto lydžála gonó moliasa (vinosa); i javéna jone te den ‘dobridim’ túke, i déna túke duj maré, i tu lésa léngire vasténdyr. Paló dová tu javésa pe Devléskiri bérgica, kaj isyn Filistimijakiro rakhibnaritko otriado; i kiéli zadžasa odój dro fóro, streninesa tysjonco prorokén, savé zdžanas vučipnástyr, i angíl lénde psaltir' i timpano, i sviriel' i gus'li, i jone angilphenena (proročynena). I zdžála pe túte Ráskire-Devléskiro Dúho, i tu javésa lénca te angilphenes, i keresape javire manušésa. Kiéli dalé znamiénii (ĥiertyká) kerénape dro čačipén túsa, tedy ker, so moginéla tyró vast, pal-dová so túsa isyn Devél. I tu džá angledýr mándyr dro Galgálo, karik i me javáva ke tu, sob (kaj) te janav célo shačkiribén i mírno svénto janybén Devléske. Eftá dyvesá užakir, paka me javáva ke tu, i tedy phenáva túke, so túke te kerés.” Syr syg Sáulo risijá, sob (kaj) te džal Samuilostyr, Devél dyjá léske javír iló, i kerdépe dro čačipén saré dolé znamiénii (ĥiertyká) dro dová-pac' dyvés. Kiéli jone javné ke bérgica, ĥáda, džála tysjonco prorokengiro lénde i zgija pe léste Devléskiro Dúho, i jov angilphendia maškír lénde. Saré, kon džindiá les tasiá i tríto dyvés, syr dykhné, so jov prorokenca angilphenela, rakirdé maškír manušénde jekh jekhéske: “So da jaciá Kisoskire čhavésa? Naúšto i Sáulo isyn dro prorokénde?” I otphendiá jekh manúš, savó sys odój i phendiá: “A odolénde, kon isyn léngiro dad?” Paldavá vygijá dro prorakiriben: “Naúšto i Sáulo dro prorokénde?” I pirijaciá jov te angilphenel, i gijá pe vučipén. I phendiá Sauloskiro kak léske i dynaríske leskireske: “Karik tumé psirdé?” Jov phendiá: “Te rodas oslicen, ne, dykhí, so len nane, zagijam ke Samuílo.” I phendiá kak Sauloskiro: “Rosphen mánge, so phendiá tuménge Samuílo.” I phendiá Sáulo péskire kakeske: “Jov dyjá te džinél aménge, so oslicy lathnepe.” A dová, so phendiá léske Samuílo pal kralipén, na otčhakirdiá léske. I khardiá Samuílo manušén ke Raj Devél dro Masífa i phendiá Izrailjoskire čhavénge: “Adiáke rakiréla Raj Devél, Devél Izrailjoskiro: ‘Me vylydžijom Izrailjo Jegiptóstyr, i zrakhcjom tumen Jegiptianengire vastéstyr i saré kralipnaskire vastéstyr, savé teliakirde tumen. A tumé kakaná mekné tumaré Devlés, Savó zrakhéla tumen saré tumaré bidatyr i tumaré piridživipnastyr, i phendlé Léske: “Kralís čhuv pe aménde.” I adiáke terdjon kakaná angíl Devléste pir tumaré ródycy i pir kherítka ródy (pliémi) tumaré.” I phendiá Samuílo, sob (kaj) te poddžan saré Izrailjoskire ródycy, i sys uphendló Vieniaminoskiro ródyco. I phendiá te poddžál rodycóske Vieniaminoskireske piró kherítka ródy (pliémi), i sys uphendló Matrijoskiro pliemjo; i janéna Matrijoskiro kherítko ródo (pliemjo) pir muršende, i khardo sys Sáulo, Kisoskiro čhavó; i rodyne les, i na lathenas. I phučnepe Rástyr Devléstyr: “Ci javéla butýr jov adarík?” I phendiá Raj Devél: “Ĥáda, jov garadjola maškír pašýl bagažo (obozo) častyrengiro.” I prastándyne, i lyné les odothýr, i jov terdijá maškír manušénde, i sys léskire psiké vučedýr saré manušéndyr. I phendiá Samuílo saré manušénge: “Ci dykhéna, konés vykedyjá Devél? Adasaves, syr jov isyn, nane dro saré manušénde.” Tedy saré manušá dyné gódla i phendlé: “Mek te dživél králi!” I piriphendia Samuílo manušénge kralipnaskire pravy, i začhindiá dro lylvarí, i čhudiá len angíl Raste-Devléste. I otmekhcia saré manušén, kažnones dro péskiro kher. Adiáke-pac' i Sáulo gijá dro péskiro kher, dre Givá; i lésa giné murškané, savengire iló Devél čiladiá. A nalačhé manušá rakirdé: “Léske ci te zrakhél amen?” I na kamlé les, i na lydžiné léske dáry; ne jov sýrby na dykhciá davá. I javdiá Amonitianino Naaso i zauhtyldia Galaadoskiro Iaviso. I phendlé saré Iavisoskire manušá Naasoske: “Ker aménca dorakiribén (sojuzo), i ame javása te dynarinás túke.” I phendiá lénge Amonitianino Naso: “Me keráva tuménca dorakiribén, ne dolesa, sob (kaj) kažnonestyr vyphusavav čačí (pravo) jakh i dolesa te čhuvav magiripén pe saró Izrailjo.” I phendlé léske Iavisoskire phurydyrá: “De aménge eftá dyvesá pir časo, sob (kaj) te bičhavas aménge manušén dro saré Izrailjoskire rigá, i kóli nikón na déla vast aménge, tedy ame vydžasa ke tu.” I javné manušá dro Sauloskiri Givá, i piriphendle dalé lavá dro manušéngiro šunybén; i saré manušá ĥazdyné gódla i zarondle. I ĥáda, javdiá Sáulo palál guruvende feldatyr i phendiá: “So kerdiápe manušénca, so jone rovena?” I piriphendle léske Iavisoskire-manušéngire lavá. I zgija Devléskiro Dúho pe Sauloste, kiéli jov šundiá dalé lavá, i zoralés zahačíia léskiri xolý; i lyjá jov dujén guruvén, i rosčhingirdia len pe pašá, i bičhadiá dro saré Izrailjoskire rigá pir dolé manušénde, piripheny, so adiáke javéla kerdó doleskire guruvenca, kon na džála palál Sauloste i Samuiloste. I pyjá dar Ráskire-Devléskiri pe manušénde, i vyginé saré, syr jekh manúš. Sáulo obdykhcia len dro Viezieka, i lathiape Izrailjoskire čhavén trin šelá tysjoncy, i Judáskire muršén trijánda tysjoncy. I phendlé manušénge, savé javné: “Adiáke phenén Galaadóskire Iavisoskire manušénge: Atasiá javéla ke tumé podrikiribén, kiéli obtat'kirela kham.’” I javné manušá, savén bičhadé, i piriphendle Iavisoskire manušénge, i jone obradyndlepe. I phendlé Iavisoskire manušá Naasoske: “Atasiá vydžasa ke tu, i kerén aménca, syr tuménge isyn pir iló.” Pe javír dyvés Sáulo rosčhudiá (rozdielindia) manušén pe trin otriády, i jone zaginé maškirál stáno dro rakhibnar'jengiro časo pe zlóko, i domardé Amonitianen ke dyveseskiro xačkiribén; manušá, savé jačnépe, rozginepe, adiáke so na jaciápe léndyr dujén khetané. Tedy manušá phendlé Samuiloske: kon rakirdiá: “Ci Saulóske te kralinél pe aménde? Den dalé manušén, i ame muliakirasa len.” Ne o Sáulo phendiá: “Dro davá dyvés nikonés naštý te muliakirél, pal-dová so adadyvés Raj Devél kerdiá zrakhibén dro Izrailjo.” I phendiá Samuílo manušénge: “Javén dro Galgálo, i phenása angíl sarénde odój pal kralipén.” I giné saré manušá dro Galgálo, i čhudé odój Saulos kralísa angíl Raste Devléste dro Galgálo, i jandlé odój mirna svénta janybená angíl Raste-Devléste. I drieván radyndlepe odój Sáulo i saré Izrail'tiáni. I phendiá Samuílo saré Izrailjoske: “Ĥáda, i me kandyjom tumarí zan (glos) dro saró, so tumé rakirdé mánge, i čhudjom pe tuménde kralís, i ĥáda, králi psiréla angíl tuménde; a me phurijom i ssyvindjom; i miré čhavé isyn tuménca; me psirdjom angíl tuménde miré ternypnastyr i ke/žýko ke davá dyvés; ĥáda, me som, mek te dophenen pe mánde angíl Raste-Devléste i angíl Léskire pomakhibnaskireste, ci konéstyr me lyjom guruvés, ci konéstyr lyjom me oslós, konés dukhadjom i konés pritasadjom, ci konéstyr lyjom me myto (vziatka) i začhakirdjom dro léskiro réndo jakhá miré, i me riskiráva tuménge.” I otphendlé: “Tu na dukhadian (na zbidindian) amen i na pritasadian amen, i ničý ni konéste na lyjan.” I phendiá jov lénge: “Jakhítko pe tuménde isyn Raj Devél, i jakhítko Léskiro pomakhibnaskiro dro davá dyvés, so tumé na lathné ničý pal mánde.” I phendlé: “Jakhítka isyn.” Tedy Samuílo phendiá manušénge: “Jakhítko te javél Raj Devél, Savó čhudiá Mojzás i Aaronós i, Savó vylydžyja tumaré daden Jegiptóskire phuvjátyr. Kakaná terdjon, i me javáva te sendiakiravpe tuménca angíl Raste-Devléste pal saré mištypena, savé Jov kerdiá tuménge i tumaré dadénge. Kiéli javdiá Jakovo dro Jegípto, i dadá tumaré zadyne gódla ke Raj Devél, tedy Raj Devél bičhadiá Mojzás i Aaronós, i jone vylydžiné tumaré daden Jegiptóstyr i čhudé len te bešén pe davá štéto. Ne jone bistyrde péskire Ras-Devlés, Devlés, i Jov otdyjá len dro Asoroskire-xaladéngire barydyreskire Sisaraskire vastá, i dro Moavitoskire-kralískire vastá, savé mardépe (giné maribnása) proti lénde. Ne kiéli jone zadyne gódla ke Raj Devél i phendlé: “Ame kerdiám grého, pal-dová so ame jačkirdiam Ras-Devlés i lyjam te dynarinás Vaalenge i Astartenge, kakaná zrákh amen amaré vergéngire vastéstyr, i ame javása te dynarinás Túke”, tedy Raj Devél bičhadiá Iierovaalos, i Varakos, i Iiefajas, i Samuilos, i zrakhciá tumen tumaré vergéngire vastéstyr, savó sys pašýl tuménde, i tumé dživdé bidarakiro. Ne dykhí, so Naaso, Amonitianengiro králi, džála proti tuménde, tumé phendlé mánge: “Nad, mek králi te kralinél pe aménde”, tedy, syr tumaró Raj Devél, Devél tumaró králi. I adiáke, ake isyn králi, savés tumé vykedyné, savés tumé trebindle: ĥáda, Raj Devél čhudiá pe tuménde kralís. Kóli javéna te darén Rástyr-Devléstyr, i te dynarinén Léske, i te šunén Léskiri zan, i na léna te džán proti Ráskire-Devléskiro uphenybén, tedy javéna i tumé i tumaró králi, savó isyn králi pe tuménde, te psirén palál pal Raste-Devléste, tumaré Devléste, a kóli na javéna te šunén Ráskire-Devléskiri zan i džána proti Ráskire-Devléskire uphenybená, tedy Ráskire-Devléskiro vast javéla proti tuménde, syr sys proti tumaré dadende. Kakaná terdjon i podykhen pe baró réndo, savó keréla Raj Devél angíl tumaré jakhá: ci na ukedyiben kakaná dro parnó giv (pšenica)? Ne me risijom ke Raj Devél, i Jov bičhavéla gromo i bryšýnd, i tumé udžinena i dykhéna, syr baró grého, savó tumé kerdé angíl Ráskire-Devléskire jakhá, mangi péske kralís.” I risijá te kharel Samuílo ke Raj Devél i Raj Devél bičhadiá gromo i bryšýnd dro dová dyvés; i javné saré manušá dro bari dar Rástyr-Devléstyr i Samuilostyr. I phendlé saré manušá Samuiloske: “Pomangpe pal tyré pishar'jende angíl Raste-Devléste, tyré Devléste, sob (kaj) te na meras aménge, pal-dová so ke saré amaré gréhi ame čhudiam iščo (inké) grého, kiéli mangdiam péske kralís.” I otphendiá Samuílo manušénge: “Na darén, grého davá kerdé tumé, ne tumé jekh so na otdžan Rástyr-Devléstyr i dynarinén Ráske-Devléske saré tumaré ilésa i na džán palál bibahtalé devlorende, savé na janéna lačhipén i na zrakhena; pal dová so jone – dylnypén. Raj Devél na jačkiréla Péskire manušén vaš baró Péskiro lav, pal-dová so Ráske-Devléske sys lačhó te vykedes tumen Péskire manušénca; i me adiáke-pac' na domekava péske grého angíl Raste-Devléste, sob (kaj) te pirijačav te mangavpe pal tuménde, i javáva te sykliakirav tumen pe lačhó i mamúj drom; iekh darén Rástyr-Devléstyr i dynarinén Léske čačunés, saré tumaré iléstyr, pal-dová so tumé dykhné, savé baré réndy Jov kerdiá tuménca; kóli tumé javéna te kerén fuipén, tedy i tumé, i tumaró králi xasjona.” Berš sys Saulóskire kralipnaske, i javír berš jov kralindia pe Izrailjo, syr vykedyjá Sáulo péske trin tysjoncy manušén Izrail'tianendyr: duj tysjoncy sys Saulosa dro Mihmasa i pe Viefiljoskiri bérga, tysjonco sys Ionafanosa dro Vieniaminoskiri Givá; a javír manušén jov otmekciá pir péskire kherá. I rozmardiá Ionafáno Filistimijákire-rakhibnaritko otriado, savó sys dre Givá; i šundlé pal davá Filistimliáni, a Sáulo phurdyja rogosa (trubasa) pir sarí rig, dyi gódla: “Mek te šunén Judy!” Kiéli saró Izrailjo šundiá, so rozmardiá Sáulo Filistimijakiro rakhibnaritko otriado, i, so Izrailjo kerdiápe na pir iló Filistimlianenge, tedy manušá skedynépe ke Sáulo dro Galgálo. I skedynépe Filistimliáni pe maribén proti Izrailjo: trijánda tysjoncy maribnýtka vurdená i šov tysjoncy uklisté, i but manušén, syr isyn práho pe morjoskiro (derjavéskiro) brégo; i javné i terdiné lodesa (stanósa) dre Mihmasa, Bief-Avienoskire vastočnone rigátyr. Izrail'tiáni, dykhí, so jone sys dro bída, pal-dová so manušá sys stasade, garadyne dro gebara – (pieščery) i dro bergitka loščyny, i maškír bérgi, i dro vučardia (bašni), i dro rovy; a vari-savé Judendyr piriginé pal Iordáno, pe Gadóskiri i Galaadoskiri rigá; Sáulo sys dro Galgálo, i saré manušá, savé sys lésa, sys dro dar. I užakirdia jov eftá dyvesá, ke časo, savó uphendia Samuílo, a Samuílo na javdiá dro Galgálo; i lyné manušá te našén léstyr. I phendiá Sáulo: “Janén ke me, so uphendló vaš svénto janybén i vaš mírno svénto dyibén.” I ĥazdyjá célo shačkiribén. Ne nábut so jov končyndia te ĥazdel celoné-shačkiribnaskiro, ĥáda, džála Samuílo; i vygijá Sáulo ke jov gil, sob (kaj) del ‘“dobridim” léske. Ne Samuílo phendiá: “So tu kerdián?” Sáulo otphendiá: “Me dykhcjom, so manušá našéna mándyr, a tu javdián ke uphendló časo; Filistimliáni skedynépe dro Mihmasa”; tedy mánge javdiá myslia: “Kakaná javéna pe mánde Filistimliáni dro Galgálo, a me iščo (inké) na phucjom Rastyr-Devlestyr”, i pal-dová skedyjompe te janav célo shačkiribén.” I phendiá Samuílo Saulóske: “Dylynes kerdián tu, so tu na spolnindian Ráskire Devléskire, tyré Devléskiro uphenybén, savó sys dynó túke, pal-dová so kakaná zoraliakirelas by Raj Devél tyró kralipén pe Izrailjo pe viéki; ne kakaná te na uterdjol tyré kralipnaske; Raj Devél lathéla Péske muršés pir Péskiro iló, i phenéla léske Raj Devél te javél Péskire manušénge lydžaibnarisa, adiáke syr tu na spolnindian dová, so phendiá túke Raj Devél.” I uštyjá Samuílo i gijá Galgalostyr dro Givá Vieniaminoskiri; a lésa, ke šovšelá manušá. Sáulo péskire čhavésa Ionafanosa i manušénca, savé sys pašýl lénde, bešné dro Vieniaminoskiri Givá; Filistimliáni sys terdé stanósa dre Mihmasa. I vyginé Filistimijákire stanostyr trin otriády te čhučakiren phuv: jekh gijá pirí drom ke Ofra, dro obgiiben Sual', I javír otriado gijá pir drom Vieforoskiro, a tríto gijá pir drom ke kustýk (granica) dro Cevoimoskiro dólo pe čhučí phuv. Petalengiren (kuzniecen) na sys pe sarí Izrailjoskiri phuv; pal-dová so Filistimliáni dardepe, sob (kaj) Judy te na kerén kurtála ci čhurdypnytko bust (kop'jo). I lénge treindiá te psirén sarénge ke Filistimliáni te den čol (vojstrinen) péskire sošniki (plugi), i péskire zastupy (motygi), i péskire tovera, i péskire kirki, kiéli kerélape ščerbina pe čhinybnytko (ostrijo) dro sošniki, i dro zastupy, i pe bustiá (vily), i pe tovera, ci trej te popravinen rožno. Paldavá dro maribnaskiro časo na sys ni kurtála, ni maribnýtko bust saré manušénde, savé sys Saulosa i Ionafanosa, a jekhende jone lathnepe Sauloste i Ionafanoste, léskire čhavéste. I vygijá fedyršo Filistimijakiro otriado ke Mihmasoko pe piriprava. Dro jekh dyvés phendiá Ionafáno, Sauloskiro čhavó, péskire dynaríske, savó lydžalas mardýtko léskiro: “Džá, piridžasa ke Filistimijakiro otriado, so isyn pe doiá rig.” A péskire dadéske na phendiá pal davá. Sáulo sys pe Givakiro jagóro (krajo), tel granatytko veš, so isyn dro Migrono. Lésa sys pašýl šovšelá manušá i o Ahiia, Ahituvoskiro čhavó, Iohaviedoskiro pšal, Finiejesoskire-čhavéskire, Ilijoskire-čhavéskire, Ráskire-Devléskiro rašáj dro Silómo, savó lydžijá efódo. Manušá na džindlé, so Iofano gijá. Maškir pirigiibena, pir savé Ionafáno rodyja te prodžal ke Filistimijakiro otriado, sys vostro bérga jekhe rigátyr i vostro bérga javire rigátyr: jekhakiro lav sys Boceco, a lav javirjakiro sys Sienie. Jekh bérga vydžálas paš-ratiatyr (sievierostyr) ke Mihmaso, javír paš-dyvesostyr (jugostyr) ke Givá. I phendiá Ionafáno péskire dynaríske, savó lydžalas léskiro mardýtko: “Džá, piridžasa ke adalé naobčhindlengiro otriado; moginéla te javél, so Raj Devél pomoginela aménge; pal-dová so vaš Ráskire-Devléske nane pharó te zrakhél pirdál butende, ci nabutende.” I otphendiá manúš, savó lydžalas léskiro mardýtko: “Ker saró, so túte pe iló; džá, ĥáda, me som túsa, karik túke isyn lačhó.” I phendiá Ionafáno: “Ĥáda, ame piridžasa ke dalé manušá, i terdjovasa pe jakhá lénge; kóli jone adiáke phenéna aménge: ‘Terdjon, paka ame džása ke tumé’, tedy ame terdjovasa pe péskire štéty i na zdžasa upré ke jone; a kóli adiáke phenéna: ‘Ĥazdenpe ke ame’, tedy ame zdžasa upré, pal-dová so Raj Devél otdyjá len dro amaré vastá, i davá javéla sykaibnasa vaš aménge.” Kiéli jone dujdžiné terdiné pe jakhá Filistimijákire otriadoste, tedy Filistimliáni phendlé: Ĥáda, Judy vydžána bergitkone loščynendyr, dro savé jone garadyne. I zadyne gódla manušá, savé sys dro otriado, ke Ionafáno i ke léskiro manúš, savó lydžalas mardýtko léskiro, rakirí: “Džán upré ke ame, i ame phenása vari-so.” Tedy Ionafáno phendiá péskire manušéske, savó lydžalas mardýtko: “Džá pal mánde, pal-dová so Raj Devél otdyjá len dro Izrailjoskire vastá.” I lyjá te džal upré Ioanafano, lyipe vasténca i ĥerénca, i léskiro manúš, savó lydžalas mardýtko pal léste. I pyné Filistimliáni angíl Ionafanoste, a manúš, savó lydžijá mardýtko, domardiá len pal léste. I pyné daléstyr anglatuné maribnastyr, savó kerdiá Ionafáno léskire manušésa, savó lydžijá mardýtko, pašýl biš manušén, pe feldakiri paš, pe saví kerénas butý duj guruva dro dyvés. I vygijá bari dar dro stáno (lod) pe félda i dro saré manušénde; anglatuné otriády i, savé čhučakirde phuv, javné dro traš; trinskirdiape sarí phuv, i sys bari dar Rástyr-Devléstyr. I dykhné rakhibnárja Saulos dro Givá Vieniaminoskiri, so tolpa rozdžalape i prastala odorík i adarík. I phendiá Sáulo ke manušá, savé sys lésa: “Piridykhen i udžinén, kon amarendyr vygijá.” I piridykhne, i ĥáda, nane Ionafanos i léskire manušés, savó lydžála mardýtko. I phendiá Sáulo Ahijoske: “Jan Devléskiro kivoto, pal-dová so Devléskiro kivoto dro dová časo sys Izrailjoskire čhavénca.” Sáulo iščo (inké) rakirdiá ke rašái, syr smiatienijo (konfuzo) dro Filistimijakiro stáno butýr i butýr rozdžalaspe i barija. Tedy phendiá Sáulo rašáske: “Sčhuv tyré vastá.” I zadyja gódla Sáulo i saré manušá, savé sys lésa, i javné ke štéto, kaj mardépe, i ĥáda, odój kažnoneskiri (svakoneskiri) kurtála sys riskirdy proti péskire pašatuneste; smiatienijo sys drieván bari. Tedy i Judy, savé tasiá i tríto dyvés sys Filistimlianende i savé ŭsiendzie (viezdié) psirdé lénca dro stáno, podginé ke Izrail'tiáni, savé sys Saulosa i Ionafanosa; i saré Izrail'tiáni, savé garadyne pe Jefriemóskiri bérga, šuny, so Filistimliáni našné, adiáke-pac' prijačne ke péskire dro maribén. I zrakhciá Raj Devél dro dová dyvés Izrailjo; maribén dogijá adiáke-pac' ke Bief-Avieno. Izrailjoskire manušá sys khinyi dro dová dyvés; a Sáulo zasovlahadia manušén, pheny: ‘Prokošnó javéla odová, kon xála maró ke bel'vél', paka me othava pale (otomstinava) miré vergénge.” I nikón manušéndyr na xaja xabén. I giné saré manušá dro veš, odój sys avgín pe veladín (poliana). I zaginé manušá dro veš, rakirí: “Ĥáda, thadéla avgín.” Ne nikón na protyrdyjá péskiro vast ke muj péskiro, pal-dová so manušá darándyne sovlahatyr. Ionafáno na šundiá, kiéli léskiro dad sovlahadiá manušén, i, protyrdyjá kašteskiro jagóro, savó sys dro léskiro vast, obmekcia les dro soto avgineskiro, i podlydžija vastésa ke péskire uštá, i otkerdepe léskire jakhá. I phendiá léske jekh manušéndyr, rakirí: “Tyró dad zasovlahadia manušén, phení: “Prokošnó javéla odová, kon adadyvés xála xabén’, daléstyr manušá khinyne.” I phendiá Ionafáno: “Zlydžija dro konfuzo miro dad phuv; dykhén, mánde prosviatlyndle jakhá, kiéli me xajom nábut davá avgín; kóli by te xan manušá doresybnastyr, savó me lathjom péskire vergénde, tedy ci na butýr javéla by domarden Filistimlianen?” I domardé Filistimlianen dro dová dyvés Mihmasatyr ke Aialono, i manušá drieván khinyne. I čhurdynepe manušá pe doresybén, i lyné bakrén, guruvén i terné gurumnién, i začhindlé len pe phuv, i xané manušá ratésa. I rosphendlé Saulóske, rakirí: “Ĥáda, manušá keréna grého angíl Raste-Devléste: jone xána ratésa.” I phendiá Sáulo: “Tumé kerdé grého, raven ke me kakaná baró bar.” Tén'ci phendiá Sáulo: “Prodžan maškír manušénde i phenén lénge: ‘Mek kažno te janel ke me péskire guruvés, i kažno peskirjá bakriá, i začhinen adáj i xan, i na kerén grého angíl Raste-Devléste, na xan ratésa.’” I jandlé saré manušéndyr, kažno péskire vastésa, péskire guruvés ratý, i začhindlé odój. I kerdiá Sáulo altárjo (žertvieniko) Ráske-Devléske: dová sys anglatunó altárjo, savó jov čhudiá Ráske-Devléske. I phendiá Sáulo: “Javén dro šale (tradypen) pal Filistimlianende ratý, i obkedasa len ke zlóko (ránko), i na jačkirasa lénde ni jekhés manušés.” I phendlé: “Ker saró, so šukár dro tyré jakhá.” Rašáj phendiá: “Javása pašyledýr adáj ke Devél.” I phuciá Sáulo Devléstyr: “Ci te džav mánge dro šale (tradypen) pal Filistimlianende? Ci otdesa len dro Izrailjoskire vastá?” Ne Jov na otphendiá léske dro dová dyvés. Tedy phendiá Sáulo: “Mek te poddžan adarík saré manušéngire barydyrá, i rozĥaljona i udžinena, pe konéste kakaná grého isyn? pal-dová so, te javél džidó Devél, Savó zrakhciá Izrailjo, kóli javéla i pe Ionafanoste, miré čhavéste, tedy i jov usajékh meréla.” Ne nikón léske na otphendiá saré manušéndyr. I phendiá Sáulo saré Izrailitianenge: “Terdjon tumé pir jekh rig, a me i miro čhavó Ionafáno terdjovasa pir javír rig.” I otphendlé manušá Saulóske: “Ker, so isyn šukár dro tyré jakhá.” I phendiá Sáulo: “Rajo Dévla, Devél Izrailjoskiro! De ĥiertýk (znamiénijo).” I sykade sys Ionafáno i Sáulo, a manušá vyginé čačunenca. Tedy phendiá Sáulo: “Čhurdén žriébijo maškír mánde i maškír Ionafanoste, miré čhavéste. I pyjá žriebij pe Ionafanoste. I phendiá Sáulo Ionafanoske: “Rosphen mánge, so kerdián tu?” I rosphendiá léske Ionafáno, i phendiá: me sprobindjom kašteskire jagorosa, savó isyn dro miro vast, nábut avgín; i ĥáda, me musinav te merav.” I phendiá Sáulo: “Mek dová i dová te kerél mánge Raj Devél, i iščo (inké) butýr te kerél; tu, Ionafáno, musinesa adadyvés te meres!” Ne manušá phendlé Saulóske: “Ci Iofanoske trej te merél, savó kerdiá dasavo baró zrakhibén Izrailjoske? Mek na te javél davá! Te javél džidó Raj Devél, so i bal léskire šerestyr na peréla pe phuv, pal-dová so Devlésa jov kerdiá kakaná.” I vyzvolindle manušá Ionafanos, i jov na myjá. I risijá Sáulo Filistimlianengire tradypnastyr; a Filistimliáni giné pe péskiro štéto. I kerdiá zoraledýr Sáulo péskiro kralipén pe Izrailjo, i mardiápe sarénca péskire pašatuné vergenca, Moavomosa i Amonitianenca, i Edomosa i Sovakire kral'jenca i Filistimlianenca, i ŭsády (sak), proti konéste gijá, léske džálas baht. I skedyjá xaladén, i domardiá Amalikos, i otmekciá (vyzvolindia) Izrailjo léskire čorengire vastéstyr. Čhavé Sauloste sys: Ionafáno, Jesui (Iiessui) i Mielhisua; a lavá léskire duje čhajengire sys: lav phuredyršonakiro Mierova, a lav tyknedyršonakiro Mielhola. Lav Saulóskire romniakiro Ahinoam', Ahimaacoskiri čhaj; a lav léskire xaladéngire barydyreskiro Avieníro, Niroskiro čhavó, Saulóskire-kakeskiro. Kiso, Sauloskiro dad, i Niro, Avieniroskiro dad, sys Aviiloskire čhavé. I sys zoraló maribén proti Filistimlianende dro saró Sauloskiro časo. I kiéli Sáulo dykhciá vari-savé zoralés manušés, to lelas jov les ke pe. I phendiá Samuílo Saulóske: “Raj Devél bičhadiá man te pomakhav tut kralísa pe Léskire manušénde, pe Izrailjo; kakaná šun Ráskire-Devléskiri zan (glos). Adiáke rakiréla Raj Devél, jangoléngire-bolybnáskiro: ‘Priripirdjom Me pal dová, so kerdiá Amaliko Izrailjoske, syr jov proti terdijá léske pe drom, kiéli jov gijá Jegiptóstyr; kakaná džá i domar Amalikos, i vymar saró, so léste isyn; i na tangine (žalin) les, ne otdé meribnáske romestyr ke romný, terné manušéstyr ke kolynytko tyknomas, guruvestyr ke bakri, vierbliudostyr ke óslo (miegári).’” I skedyjá Sáulo manušén, i pirigindia len dro Tielaima dujšelá tysjoncy Izrailitianen, savé sys pezal, i deš tysjoncy Judáskire rodóstyr. I dogijá Sáulo ke Amalikoskiro fóro, i kerdiá zasada pe dólo. I phendiá Sáulo Kinejanenge: “Džán, otdžan, vydžán Amalikoskire manušéndyr, sob (kaj) mánge te na vymarav tumen lésa, pal-dová so tumé kerdé baró lačhipén sarénge Izrail'tianenge, kieljo jone giné Jegiptóstyr.” I otginé Kinejani Amalikoskire manušéndyr. I domardiá Sáulo Amalikos Xavilatyr ke Surakire rigá, so isyn angíl Jegípto; i Agagas, Amalikoskire kralís, zauhtyldia džides, a saré manušén domardiá kurtalása. Ne Sáulo i manušá potangindle Agagas, i fedyršone bakréndyr i guruvendyr, i thulen bakrorén, i saró fedyršo, i na kamlé te marén, a saré viešča (vieščy), so na mainena bari znáčyma i nalačhé, jone vymarde. I sys Ráskire-Devléskiro lav ke Samuílo dasavo: “Me tanginava, so Me čhudjom Saulos kralísa, pal-dová so jov otrisija Mándyr i lav Miro na spolnindia.” I zadumindiape Samuílo, i prikharelas Ras-Devlés sarí rat. I uštyjá Samuílo tasiárles (ránes) pe zlóko (ránko), i gijá gil Saulóske. I rosphendlé Samuiloske, so Sáulo psirdiá pe Karmilo, i odój čhudiá péske pomniko (pamiatniko), i gijá dro Galgala. Kiéli javdiá Samuílo ke Sáulo, to Sáulo phendiá léske: “Bahtiakirdó tu san Raste-Devléste: me kerdjom saró pir Ráskire-Devléskiro lav.” I phendiá Samuílo: a so dalé bakrengiri blejanija dro miré kaná i guruvengiri myčanija, savé me šunava?” I phendiá Sáulo: “Jandiam me len Amalikostyr, adiáke, syr manušá potangindle fedyršonen bakréndyr i guruvendyr vaš svénto janybén Ráskire-Devléskiro, Devléske tyréske; javír ame čhindiam.” I phendiá Samuílo Saulóske: “Ne užakir, me phenáva túke, so phendiá Raj Devél mánge ratý.” I phendiá léske Sáulo: “Rákir!” I phendiá Samuílo: “Ci na baresa tu sánas dro tyré jakhá, kiéli kerdianpe šeralesa pe Izrailjoskire ródycy, i Raj Devél pomakhcia tut kralísa pe Izrailjo? I bičhadiá tut Raj Devél dro drom, phení: “Džá i otdé sovlahake naobčindle Amalikitianen, i marpe proti lénde, paka zamaresa len.” Sóske tu na kandyjan Ráskire-Devléskiri zan, i čhurdyjanpe pe doresybén, i kerdián xolý angíl Ráskire-Devléskire jakhá?” I phendiá Sáulo Samuiloske: “Me kandyjom Ráskire-Devléskiri zan i gijom dro drom, karik bičhadiá man Raj Devél, i jandjom Agagos, Amalikitskone kralís, a Amalikos domardjom; manušá doresybnastyr, bakréndyr i guruvendyr, lyné fedyršo sovlahadestyr, vaš svénto janybén Ráskire-Devléskiri, tyré Devléske, dro Galgálo.” I otphendiá Samuílo: “Naúšto célo shačkiribén i svénta janybená Ráskire-Devléskire pe adákicy isyn dróga Ráske-Devléske syr te kandes Ráskire-Devléskiri zan? Kandypen isyn fedýr sventoné janybnastyr i te prišunespe ke Raj Devél isyn fedýr bakreskire masestyr; pal-dová so nakandypen isyn dasavo-pac' grého, syr čovaniakiriben, i búnto isyn dová-pac', so te des patýv xohané devlenge; pal-dová so tu na prilyjan Ráskire-Devléskiro lav, i Jov na prilyjá tut, sob (kaj) tu te na javes kralísa.” I phendiá Sáulo Samuiloske: “Kerdjom me grého, pal-dová so phagirdjom Ráskire-Devléskiro priphenybén i tyró lav; ne me darandyjom manušéndyr i šundjom léngiri zan; kakaná zle mándyr grého miro i risjov mánca, sob (kaj) me te dav patýv Ráske-Devléske. I otphendiá Samuílo Saulóske: “Na risjováva me túsa, pal-dová so tu na prilyjan Ráskire-Devléskiro lav, i Raj Devél na priléla tut, sob (kaj) tu na javes kralísa pe Izrailjo.” I obrisija Samuílo, sob (kaj) te džal, ne Sáulo uhtyldiape pal léskire-idiakiro jagóro i rozkustia la. Tedy phendiá Samuílo: “Kakaná riskirdiá krig Raj Devél Izrailjoskiro kralipén tútyr, i otdyjá les tyré pašatuneske, savó isyn fedýr tútyr; i na phenéla načačipén, i na pokainelape čačunó Izrailjo; pal-dová so Jov isyn na manúš, sob (kaj) te pokainelpe Léske.” I phendiá Sáulo: “Me kerdjom grého, ne sykáv patýv mánge kakaná angíl miré manušéngire phurydyrende i angíl Izrailjo, i risjov mánca, i me dáva patýv Ráske-Devléske, tyré Devléske.” I risijá Samuílo pal Sauloste, i dyjá patýv Ráske-Devléske Sáulo. Tén'ci Samuílo phendiá: “Janén ke me Agagos, Amalikoskiro kralís.” I podgíia ke jov Agago i trinskirdiape, i phendiá Agago: “Bi lavengiro meribnaskiro kirkipen progijá?” Ne Samuílo phendiá: “Syr tyrí kurtála otlelas čhavorén datyr, adiáke daj tyrí maškír džuvliende mek te jačélpe joj bi péskire čhavéskiro.” I rosčingirdia Samuílo Agagos angíl Raste-Devléste dro Galgálo. I gijá Samuílo dro Ráma, a Sáulo gijá dro péskiro kher, dre Sauloskiri Givá. I butýr na dykhciape Samuílo Saulosa ke péskiro meribnaskiro dyvés; ne tugindia Samuílo pal Sauloste, pal-dová so Raj Devél tangindia (žalindia), so čhudiá Saulos kralísa pe Izrailjo. I phendiá Raj Devél Samuiloske: “Kicý tu javésa te tugines pal Sauloste, savés Me na prilyjom, sob (kaj) jov te na javél kralísa pe Izrailjo? Pher tyró šyng (rógo) jeliejosa i džá; Me bičhaváva tut ke Vifliejemlianino Jesiejo, pal-dová so maškír léskire čhavénde Me vydykhcjom Péske kralís. I phendiá Samuílo: “Syr me džáva? Sáulo šunéla i domarla man.” Raj Devél phendiá: “Le dro tyró vast terné gurumnia stadatyr i phen: ‘Me javdjom vaš svénto dyibén Ráskire-Devléskiri’”; i khar Jesiejos ke svénto janybén Ráske Devléske; Me phenáva túke, so te kerés túke, i tu pomakhesa Mánge odolés, pal savéste Me phenáva túke.” I kerdiá Samuílo adiáke, syr phendiá léske Raj Devél. Kiéli jov javdiá dro Vifliejémo, tedy foróskire phurydyrá trašasa vyginé gil léske, i phendlé: “Ci ramanjosa (mirósa) tu javdián?” I otphendiá jov: “Ramanjosa (mirósa) vaš svénto janybén Ráske-Devléske javdjom me; vysvencynenpe i džán mánca ke svénto janybén Ráske-Devléske.” I vysvencyndia Jesiejos (Iiesiejoske) i léskire čhavén, i khardiá len ke svénto janybén Ráske-Devléske. I kiéli jone javné, to jov dykhciá Jeliavos, i phendiá: “Čačó, davá angíl Raste-Devléste Léskiro pomakhibnaskiro!” Ne Raj Devél phendiá Samuiloske: “Na dykh pe léskiri mina i pe léskiro baripén; Me na prilyjom les; Me dykháva na adiáke, syr dykhéla manúš; pal-dová so manúš dykhéla pe muj, a Raj Devél dykhéla pe iló.” I khardiá Jesiejo Aminadavos, i podlydžyja les ke Samuílo, i phendiá Samuílo: “I kadales na vykedyjá Raj Devél.” I podlydžija Jesiejo Samas, i phendiá Samuílo: “I kadales na vykedyjá Raj Devél.” Adiáke podlydžija Jesiejo ke Samuílo eftá péskire čhavén, ne Samuílo phendiá Jesiejoske: “Nikonés dalendyr na vykedyjá Raj Devél.” I phendiá Samuílo Jesiejoske: “Ci saré čhavé isyn adái?” I otphendiá Jesiejo: “Isyn iščo (inké) tyknedyršo jov rakhéla bakrén.” I phendiá Samuílo Jesiejoske: “Bičháv i le les, pal-dová so ame na bešasa te xas, paka jov na javéla adarík.” I bičhadiá Jesiejo, i jandlé les. Jov sys parné balenca, gožone jakhénca i patyvalé mósa. I phendiá Raj Devél: “Uštý, pomakh les, pal-dová so davá jov isyn.” I lyjá Samuílo šyng (rógo) jeliejosa, i pomakhcia les maškír léskire pšalénde i sys Ráskire-Devléskiro Dúho pe Davidóste dolé dyveséstyr i korigedýr (pozže); Samuílo uštyjá i gijá dre Ráma. A Saulostyr otgijá Ráskire-Devléskiro Dúho, i xoliakirdia les xoliamó dúho Devléstyr. I phendlé Saulóskire dynárja léske: “Ĥáda, xoliamó dúho Devléstyr xoliakirela tut; mek amaró xuláj te priphenel péskire dynar'jénge, savé angíl túte, te rodén manušés, savó mištés bašavela pe gusli, i kiéli javéla pe túte xoliamó dúho Rastyr-Devlestyr, tedy jov, bašavi péskire vastésa, javéla te štyliakirel tut.” I otphendiá Sáulo péskire dynar'jénge: “Lathén mánge manušés, savó šukár bašavela, i janén les ke me.” Tedy jekh léskire dynar'jéndyr (slugéndyr) phendiá: “Ĥáda, me dykhcjom Vifliejemlianinoskire čhavéste Jesiejoste, savó džinéla te bašavel, manušés murškanés i maribnytkones, i dro rakiribén god'vares, i kuč kokoró pésa, i lésa isyn Raj Devél. I bičhadiá Sáulo manušén ke Jesiejo, i phendiá: “Bičháv ke me Davidós, tyré čhavés, savó isyn pašýl stada.” I lyjá Jesiejo oslós marésa, i gonó mol, i jekhés buznores, i bičhadiá Davidosa péskire čhavésa ke Sáulo. I javdiá Davído ke Sáulo, i dynarindiá angíl léste, i drieván jaciá pir iló léske, i jaciá léske manúš, savó lydžála mardýtko. I bičhadiá Sáulo te phenén Jesiejoske: “Mek Davído te dynarinél pašýl mánde, pal-dová so jov lathiá láska dro miré jakhá. I kiéli dúho Devléstyr sys pe Sauloste, tedy Davído, léla gusli, bašadia, i lokhedýr i fedýr jačelas Saulóske, i xoliamó dúho otdžalas léstyr. Filistimliáni skedyné péskire xaladén vaš maribén, i skedynépe dro Sokhofo, so isyn dre Judéia, i terdiné stanósa (lodesa) maškír Sokhofo i Azieko dro Jefies-Damima. A Sáulo i Izrail'tiáni skedynépe i terdiné stanósa (lodesa) pe dembitko dólo, i skedynépe ke maribén proti Filistimliande. I terdiné Filistimliáni pe bérga jekhe rigátyr, i Izrail'tiáni pe bérga javire rigátyr, a maškír lénde sys dólo. I vygijá stanostyr Filistimskonestyr maribnýtko pe jekh, pir lav Goliafo, Giefatyr; baripnasa jov sys šov kuniá (lokti) i piadi. Harkuno (miédno) šljomo pe péskiro šeró; i uridó jov sys dro češuitko bron', i léskire-broniakiri vaga pandž tysjoncy šekeli xarkóma; harkuné nakoliénniki pe léskire ĥerá, i xarkuno ščýto pal léskire psiké; i drievko dro léskire čhurdypnytko bust sys dro šovšelá šékieli sastýr, i angíl léste gijá manúš, savó lydžalas mardýtko. I terdijá jov, i dyjá gódla ke Izrailjoskire polki, rakirí lénge: “Sóske tumé vyginé te marénpe? Ci na Filistimlianino me som, a tumé Saulóskire dynárja? Vykeden péste manušés, i mek jov te džal ke me; kóli jov moginéla te marélpe mánca i zamarela man, tedy ame javása tumaré dynar'jénca; kóli me les pirizorjakirava i les zamarava, tedy tumé javéna amaré dynar'jénca i javéna te dynarinén aménge.” I phendiá Filistimlianino: “Adadyvés me ladžakirava Izrailieskire polki; den mánge manušés, i ame marasape dujdžiné.” I šundlé Sáulo i saré Izrail'tiáni dalé Filistimlianinoskire lavá, i drieván strahádyne, i trašandyne. Davído sys čhavó Jefrafianinoskiro Judáskire Vifliejemostyr, pir lav Jesiéjo, savéste sys ohtó (bidujéngiro deš) čhavé. Davá manúš dro Saulóskire dyvesá dodživdia ke phuripen i sys phurydyr maškír muršende. Trin phuredýr čhavé Jesiejoskire giné Saulosa pe maribén, ake, lavá triné-léskire čhavéngire, savé giné pe maribén: phuredýr Jeliavo, javír pal léste Aminadávo, i tríto Sama; Davído sys tyknedýr. Trin phuredýr pšála giné Saulosa, a Davído risijá Saulostyr, sob te rakhél bakrén péskire dadeskiren dro Vifliejémo. I vydžálas dová Filistimlianino pe zlóko (rankosa) i bel'velié, i ladžakirelas len štardešá dyvesá. I phendiá Jesiejo Davidóske, péskire čhavéske: “Le vaš péskire pšalénde jefa šut'kirde ziárki (ziarny) i dalé deš maré, i zalydža sygnedyr dro stáno (lod) ke tyré pšála; a dalé deš kirala (syry) zalydža tysjoncengire barydyréske, i udžin pal tyré pšalengiro sastypen, i udžin pal léngire trebimy.” Sáulo i jone saré, i saré Izrail'tiáni sys pe dembitko dólo, i skedenaspe pe maribén Filistimlianenca. I uštyjá Davído tasiárles (ránes) pe zlóko (rankosa) i dopatiandyja bakrén rakhibnariske, i, lyjá noša, gijá, syr priphendiá léske Jesiéjo, i javdiá ke taboroskiro bagažo (obozo), kiéli xaladé sys vylydžiné dro riado i godlása skedenaspe pe maribén. I čhudé Izrail'tiáni i Filistimliáni xaladén dre linii proti linii. Davído jačkirdiá péskiri noša taboroskire rakhibnariske, i prastándyja dro riady, i, javi, phuciape péskire pšaléndyr pal sastypen. I ĥáda, kiéli jov rakirdiá lénca, maribnýtko pe jekh, pir lav Goliafo, Filistimlianino Giefatyr, vydžálas Filistimijákire riadendyr, i rakiréla dolé lavá, i Davído šundiá len. I saré Izrail'tiáni, dykhí dalé manušés, našenas léstyr i drieván dardepe. I rakirdé Izrail'tiáni: “Ci dykhéna tumé dalé manušés, savó vydžálas te ladžakirel? Jov vydžála, sob (kaj) te salpe dro jakhá Izrailjostyr. Kóli by kon les te zamarél, odoléske králi délas baró barvalypén, i peskirjá čha otdelas by pal léste, i léskire dadéskiro kher keréla by vol'nonesa (psiresa) dro Izrailjo.” I phendiá Davído manušénge, savé sys terdé lésa: “So keréna odoléske, kon muliakiréla dales Filistimlianinos i zlela ladž Izrailjostyr? Paldavá so kon isyn adavá naobčhindlo Filistimlianino, so adiáke jov ladžakirel džidé Devléskire xaladén?” I phendlé léske manušá dolé-pac' lavá, rakirí: “Ĥáda, so javéla kerdó dolé manušéske, savó zamarela les.” I šundiá Jeliavo, phuredýr Davidóskiro pšal, so rakirdiá jov manušénca, i xoliásyja Jeliavo pe Davidóste, i phendiá: “Sóske tu adarík javdián, i pe konéste jačkirdian buten dolen bakrén pe čhučí phuv? Me džinóm tyró phut'kiribén i tyró dylynó iló, tu javdián te podykhes pe maribén.” I phendiá Davído: “So da me kerdjom? Ci isyn davá na lavá?” I otgijá léstyr ke javír, i rakirdiá dolé-pac' lavá, i otphendlé léske manušá, syr angledýr. I šundlé lavá, savé rakirdiá Davído, i piriphendle Saulóske, i odová khardiá les. I phendiá Davído Saulóske: “Mek nikón te na perél duhósa pal léste; tyró pishári džála i marelape pe jekh dalé Filistimlianinosa.” I phendiá Sáulo Davidóske: “Na moginésa tu te džas proti adalé Filistimlianinoste, sob (kaj) te marespe lésa pe jekh, pal-dová so tu iščo (inké) ternó manúš, a jov isyn maribnýtko ternal.” I phendiá Davído Saulóske: “Tyró pishári rakhciá péskire dadéste bakrén, i kiéli, sys, javélas ščer (liévo) ci rič i čordia bakriá stadatyr, to tedy me tradyjompe pal léste, i peravas pe léste, i otlavas bakriá léskire móstyr; a kóli jov čhurdelaspe pe mánde, tedy me lavas les pal kosmy, i mardjom les, i muliakiravas les; i ščeres (lievos) i ričes zamarelas tyró pishári, i adalé Filistimlianinosa naobčhindlesa javéla dová-pac', so sys lénca, paldavá so adiáke jov ladžakirela džidé Devléskire xaladén I phendiá Davído: “Raj Devél, Savó zrakhciá man ščerestyr (lievostyr) i ričestyr, zrakhéla man i adalé Filistimlianinóskire vastéstyr.” I phendiá Sáulo Davidóske: “Džá, i mek te javél Raj Devél túsa.” I uridia Sáulo Davidós dro péskire ídi, i čhudiá pe léskiro šeró xarkuno šliemo, i uridia pe léste bron'. I podphandiape Davído léskire kurtalása uprál ídia i lyjá te psirél, pal-dová so jov na sys prisyljovi ke dasavo mardýtko, tén'či (potom) Davído phendiá Saulóske: “Me na mogináva te psirav dro davá: me na prisyklyjom.” I zlyjá Davído saró davá péstyr. I lyjá péskiro posoho (khija) dro péskiro vast, i vykedyjá péske pandž gladka bará rekicatyr (lenorjatyr), i čhudiá len dro čhupnaritko sakva, saví sys lésa; i sakvasa i praščasa dro péskiro vast vygijá proti Filistimlianende. Vygijá i Filistimlianino, gii i podgii ke Davído, i manúš, savó lydžyja mardýtko, gijá angíl léste. I dykhciape Filistimlianino, i rozdykhcia Davidós, bipatyvakires podykhciá pe léste, paldavá so jov sys ternó, parné-balengiro i šukár mósa. I phendiá Filistimlianino Davidóske: “So tu džása pe mánde destesa? Naúšto me som džukel? I prokostia Filistimlianino Davidós péskire devlorenca.” I phendiá Filistimlianino Davidóske: “Poddža ke me, i me otdáva tyré masá bolybnáskire čiriklienge i feldytkone riskiribnáskire murdalénge (zvieriénge).” A Davído otphendiá Filistimlianinoske: “Tu džása proti mánde kurtalása i čhurdypnytkone bustiasa i ščytosa, a me džáva pe túte dro Ráskire-Devléskiro lav, bolybnáskire-jangolengires, Izrailjoskire-Devléskire xaladéngiro, savén tu kostian; kakaná otdéla tut Raj Devél dro miro vast, i me zamarava tut, i zlava tútyr tyró šeró, i otdáva Filistimskone-xaladéngire trúpy bolybnáskire čiriklienge i phuvjákire zvierienge, i udžinela sarí phuv, so isyn Devél dro Izrailjo; i udžinela saró davá xaladybén, so na kurtalása i čhurdypnytkone bustiasa zrakhéla Raj Devél, pal-dová so davá maribén Ráskire-Devléskiro, i Jov otdéla tumen dro amaré vastá.” Kiéli Filistimlianino ĥazdyjápe i lyjá te poddžál gil (pe strieč) Davidóske, Davído sýges prastándyja ke riado gil Filistimlianinoske. I obmekcia Davído péskiro vast dro sakva (sumka), i lyjá odothýr bar, i čhurdyjá praščasa, i popyja Filistimlianinoske dro čykat, adiáke, so bar upijape dro léskiro čykat, i jov pyjá pe phuv mósa. Adiáke pirizorjakirdia Davído Filistimlianinos praščasa i baresa, i domardiá Filistimlianinos i zamardiá les; kurtála na sys dro Davidóskire vastá. Tedy Davído prastándyja i, terdijá pe Filistimlianinoste, lyjá léskiri kurtála i vylyja la nožnatyr, pekadiá les, i otčhingirdia lésa šeró léskiro; Filistimliáni, dykhí, so léngiro zoraliuko myjá, poprastandyne I ĥazdynépe Izrailjoskire i Judejákire muršá, i zadyne gódla, i tradyne Filistimlianen ke zagiibén dro dólo i ke Akaronoskire vudará. I pyné domardé Filistimliáni pir Šaarimoskiro drom ke Giefa i ke Akarono. I risiné Izrailjoskire čhavé tradypnastyr pal Filistimlianende, i rosčorde léngiro stáno. I lyjá Davído Filistimlianinoskiro šeró, i otlydžyja les dro Jerusalimo, a léskiro mardýtko čhudiá dre péskiri šátra. Kiéli Sáulo dykhciá Davidós, vygii proti Filistimlianinende, tedy phendiá Avieniroske, xaladéngire barydyréske: “Avieníro! Konéskiro isyn adavá čhavó, ternó manúš?” Avieníro phendiá: “Mek te dživél tyró di, králi; me na džinóm.” I phendiá králi: “Adiáke phuč, konéskiro čhavó isyn adavá ternó manúš?” Kiéli Davído risijá, syr jov domardiá Filistimlianinos, to tedy Avieníro lyjá les i jandiá ke Sáulo, i Filistimlianinoskiro šeró sys dro léskiro vast. I phuciá les Sáulo: “Konéskiro tu san čhavó, ternó manúš?” I otphendiá Davído: “Jesiejoskiro Vifliejemostyr, tyré pishariskiro čhavó.” Kiéli mekciá Davído te rakirél Saulosa, to Ionafanoskiro di prijacia ke léskiro di, i Davído jaciá drógo Ionafanoske, syr péskiro di. I lyjá les Sáulo dro dová dyvés, i na dyjá vólia (dozvolindia) léske te risjol dro léskire-dadéskiro kher. Ionafáno kerdiá Davidosa dorakiribén, pal-dová so vykedyjá péske les, syr péskiro di. I zlyjá Iofano péskiri upratuny ídia, saví sys pe léste, i otdyjá la Davidóske, adiáke-pac' i javír péskire ídi, i péskiri kurtála i péskiri čhurdypnytko bust (kop'jo) i péskiri kustýk. I Davído kerdiá saró god'vares, karik na bičhadiá les Sáulo, i kerdiá les Sáulo barydyrésa pe xaladytkone manušénde; i davá sys pir iló saré manušénge i Saulóskire dynar'jénge. Kiéli jone giné, syr risijá Davído domardiá Filistimlianinen, to tedy džuvliá saré Izrailjoskire for'jéndyr vyginé gil Saulóske kralíske gilienca i khelybnasa, timpanenca i kimvalenca. I dyné gódla džuvliá, savé bašade, rakirí: “Sáulo pirizorjakirdia tysjoncy, a Davído deš tysjoncy!” I Sáulo drieván xoliásyja, i na pir iló sys léske davá lav, i jov phendiá: “Davidóske dyné deš tysjoncy, a mánge tysjoncy; léske kakaná nauhtylla jekh (féni) kralipén.” I dolé dyveséstyr, i tén'či (potom) nailytkes (banges) dykhciá Sáulo pe Davidóste. I sys pe javír dyvés: pyjá xoliamó dúho Devléstyr pe Sauloste, i jov bengvalyja dro péskiro kher, a Davído bašadia péskire vastésa pe struny, syr i dro javír dyvesá; dre vast Sauloste sys čhurdypnytko bust (kop'jo). I čhurdyjá Sáulo čhurdybnytko bust, duminy: “Primarava Davidós ke vánta lása”; ne Davído duj móly otrisija léstyr. I jaciá te darel Sáulo Davidostyr, pal-dová so Raj Devél sys lésa, a Saulostyr otgijá. I otbičhadia les Sáulo péstyr i čhudiá les péste barydyrésa pe tysjonco, i jov vydžálas i zadžalas angíl manušénde. I Davído dre saré péskire réndy kerdiá god'vares, i Raj Devél sys lésa. I Sáulo dykhciá, so jov sys drieván god'varó, i darandyja léstyr. A saró Izrailjo i Juda rikirde dro iló Davidós, pal-dová so jov vydžálas i zadžalas angíl lénde. I phendiá Sáulo Davidóske: “Ĥáda isyn phuredýr mirí čhaj, Mierova; me dáva la túke pal romniáte, jekh, jav mánde murškanó i lýdža Ráskire-Devléskire maribena.” Pal-dová so Sáulo dumindia: “Mek te na javél miro vast pe léste, ne Filistimlianengiro javéla pe léste.” Ne Davído phendiá Saulóske: “Kon me som, i so isyn džiibén miro, i miré dadéskiro ródo dro Izrailjo, sob (kaj) mánge te javav kralískire ziatjosa (džamutresa)? A kiéli jaciá časo te otdél Mierova, Saulóskire čha, Davidóske, tedy joj sys vydyny paloróm pal Adrieloste Mieholatyr. Ne Davidós pokamdia javír čhaj Sauloskiri, Mielhola; i kiéli phendlé pal davá Saulóske, tedy davá sys pir iló léske. Sáulo dumindia: “Otdáva me la pal léste, i joj iavéla léske fieliasa (sietkasa), i Filistimlianinoskiro vast javéla pe léste.” I phendiá Sáulo Davidóske: “Pir javirjate tu javésa semencasa kakaná mánca.” I priphendiá Sáulo péskire dynar'jénge: “Phenén Davidóske čorahanés: ‘Ĥáda, králi šukár otlydžalape ke tu, i saré léskire dynar'jénge tu san pir iló; i adiáke jav ziatjosa (džamutresa) kralíske.’” I piridyne Saulóskire dynárja dro kaná Davidóske saré dalé lavá. I phendiá Davído: “Naúšto lokho tuménge zdelape te javes kralíske ziatjosa? Me som manúš čororó i na slavútno.” I rosphendlé Saulóske léskire dynárja, i phendlé: “Ĥáda, so rakiréla Davído.” I phendiá Sáulo: “Adiáke phenén Davidóske: ‘Králi na kaméla vieno (pasago), apríč šel Filistimlianengire občhinybena, sob (kaj) te othal kralískire vergénge (vrogenge).’” Pal-dová so Sáulo maindia dro godý te xasiakirél Davidós Filistimlianinengire vasténca. I piriphendle léskire dynárja Davidóske dalé lavá, i zakamdiape Davidóske te javél ziatjosa (džamutresa) kralíske. Iščo na proginé uphendle dyvesá, syr Davído uštyjá i gijá kokoró i léskire manušá lésa, i zamardiá dujšelá Filistimlianengire manušén, i jandiá Davído léngire jagoroskire občhinybena, i jandiá len saré kralíske, sob (kaj) te javél ziatjosa (džamutresa) kralíske. I otdyjá Sáulo pal léste Mielhola, peskirjá čha, paloróm. I dykhciá Sáulo i udžindiá, so Raj Devél sys Davidosa, i so Mielhola, Sauloskiri čhaj, kamdiá Davidós. I jaciá Sáulo iščo (inké) butýr te darelpe Davidostyr, i kerdiápe léskire vergosa pe saró džiibén. I kiéli Filistimlianinentiro šeralé vyginé pe maribén, o Davído, kokoré léngire vygiibnastyr, kerdiá god'varedyr saré Saulóskire dynar'jéndyr (slugéndyr), i drieván jaciá slavútno léskiro lav. I rakirdiá Sáulo Ionafanoske, péskire čhavéske, i saré péskire dynar'jénge, sob (kaj) te muliakirén Davidós; ne Ionafáno, Sauloskiro čhavó, sykadiá patýv Davidóske. I rosphendiá Ionafáno Davidóske, rakirí: “Dad miro, Sáulo, rodéla tut te muliakirél; i adiáke rakhpe atasiá; garadjov i jav dro garadypnytko štéto. A me vydžava i terdjovava pašýl miré dadéste pe félda, kaj tu javésa, i porakirava pal túte miré dadéske, i so me dykháva, to dová rosphenava túke.” I rakirdiá Ionafáno lačhipén pal Davidóste Saulóske, péskire dadéske, i rosphendiá léske: “Mek na kerél grého králi proti péskire dynariste, Davidóste, pal-dová so jov nisosa na kerdiá grého proti túte, i léskire réndy sys drieván lačhé (kofitka) vaš túke; jov otdyjá pe risko péskiro di, sob (kaj) te domarel Filistimlianinos, i Raj Devél kerdiá baró zrakhibén saré Izrailjoske; tu dykhcián davá i radyndianpe; vaš so tu kamésa te kerés grého proti bibangipnaskiro rat i te muliakires Davidós bi pričynakiro?” I šundiá Sáulo Ionafanoskiri zan (glos), i sovlahadiá Sáulo: “Te javél džidó Raj Devél, a Davído na meréla.” I khardiá Ionafáno Davidós, i rosphendiá léske Ionafáno saré dalé lavá, i jandiá Ionafáno Davidós ke Sáulo, i jov sys pašýl léste, syr tasiá i pe tríto dyvés. Nevéstyr jaciá maribén, i vygijá Davído, i mardiápe Filistimlianenca, i domardiá len zoralés, i jone našné léstyr. I xoliamó dúho Devléstyr pyjá pe Sauloste, i jov sys beštó dro péskiro kher, i léskiri čhurdypnytko bust (kop'jo) sys dro léskiro vast, a Davído bašadia péskire vastésa pe struny. I kamdiá Sáulo te primarel Davidós čhurdypnytkone bustiasa ke vánta, ne Davído otuhcia Saulostyr, i bust zagijá dro vánta; Davído nastiá i zrakhciape dro doiá rat. I bičhadiá Sáulo dynar'jén ke Davído dro kher, sob te rakhén les ke zlóko (ránko). I phendiá Davidóske Mielhola, léskiri romný: “Kóli tu na zrakhésa tyró di dro daja rat, tedy atasiá javésa zamardo.” I zmekcia Mielhola Davidós fenštratyr, i jov gijá, i nastiá i zrakhciape. Mielhola lyjá statula i čhudiá pe čhuibén, a dro lákiro šeró buzniakiri cýpa i učhakirdiá idiasa. I bičhadiá Sáulo dynar'jén, sob (kaj) te len Davidós; ne Mielhola phendiá: “Jov isyn nasvaló.” I bičhadiá Sáulo dynar'jén, sob te obdykhen Davidós, rakirí: “Janén les ke me pe čhuibén, sob te maráv les.” I javné dynárja, i ĥáda, pe čhuibén statula, a dro lákiro šeró buzniakiri cýpa. Tedy Sáulo phendiá Mielholake: “Vaš so tu adiáke xohadian man, i otmekcian miré vergos (vrogos), sob (kaj) jov te našél?” I phendiá Mielhola Saulóske: “Jov phendiá mánge: otmek man, pe javír (javirčanes) me domarava tut.” I nastiá Davído, i zrakhciape, i javdiá ke Samuílo dro Ráma, i rosphendiá léske saró, so kerdiá lésa Sáulo. I gijá jov Samuilosa, i terdiné jone dro Navafo. I rosphendlé Saulóske, rakirí: “Ĥáda, Davído isyn dro Navafo, dro Ráma. I bičhadiá Sáulo dynar'jén te len Davidós, i kiéli jone dykhné sonmo prorokén, savé angilphenenas i Samuilos, savó sys barydyr pe lénde, tedy Devléskiro Dúho zgija pe Saulóskire dynar'jende, i jone lyné te angilphenen. Rosphendlé pal dová Saulóske, i jov bičhadiá javirén dynar'jén, ne i adalé lyné te angilphenen. Paló (poslie) dová bičhadiá Sáulo tritonen dynar'jén, i adalé lyné te angilphenen. Sáulo kokoró gijá dre Ráma, i dogijá ke bari ĥanyngori, so isyn dre Siefa, i phuciá, rakirí: “Kaj isyn Samuílo i Davído?” I phendlé: “Ĥáda, dro Navafo, dre Ráma.” I gijá jov odorík dro Navafo dre Ráma, i pe léste zgija Devléskiro Dúho, i jov gijá i angilphendia, paka javdiá dro Navafo dre Ráma. I zlyjá i jov péskire ídi, i angilphendia angíl Samuiloste, i saró dová dyvés i sarí doiá rat pasijá uridó; paldavá i rakiréna: “Naúšto i Sáulo isyn maškír prorokénde?” Davído nastiá Navafostyr dre Ráma, i javdiá, i phendiá Ionafanoske: “So kerdjom me, dro so isyn miro načačipén, sósa kerdjom grého me angíl tyré dadéste, so jov rodéla miro di (džiibén)?” I phendiá léske Ionafáno: “Nad, tu na merésa; ĥáda, dad miro na keréla ni baró, ni tyknó réndo, na otčhakiri miré kanenge; vaš so trej miré dadéske te čhakirel mándyr davá réndo? Davá na javéla.” Davído sovlahadiá i rakirdiá: “Tyró dad mištó džinéla, so me lathjom láska dro tyré jakhá, i paldavá rakiréla kokoró dro péste: ‘Mek te na džinél pal dová Ionafáno, sob (kaj) jov te na xoliasol, ne te javél džidó Raj Devél i di tyró džidó!’ Jekh šago (štavin) isyn maškír mánde i meribén.” I phendiá Ionafáno Davidóske: “So kaméla tyró di, me keráva vaš túke.” I phendiá Davído Ionafanoske: “Ĥáda atasiá javéla nevó čhon i trej mánge te bešav kralísa pal skamínd; ne otmek man, i me garadjovava pe félda ke bel'vél' pe tríto dyvés. Kóli tyró dad phučelape pal mánde, tu phen: ‘Davído vymangdiape te psirél dro péskiro fóro Vifliejémo; pal-dová so odój isyn beršytko svénto janybén Devléske saré léskire rodóstyr.’ Kóli pe davá jov phenéla: ‘Šukár,’ tedy javéla ramánjo tyré dynaríske; a kóli jov xoliasóla, tedy džin, so xoliamó réndo pe godý léste. Tu sykáv tangipén tyré dynaríske, pal-dová so tu prilyjan tyré dynarís dro Ráskire-Devléskiro zavieto túsa; i kóli sys saví bang pe mánde, tedy tu muliakir man; sóske túke te lydžas man ke tyró dad?” I phendiá Ionafáno: “Ni syr na javéla davá túsa; paldavá so, kóli me čačunés udžinava, so miré dadéste skedynó dro godý xoliamó réndo te kerélpe túte, tedy naúšto me na phenáva túke pal davá?” I phendiá Davído Ionafanoske: “Kon phenéla mánge, kóli tyró dad otphenéla túke pharés?” I phendiá Ionafáno Davidóske: “Džá, džása dro félda.” I vyginé dujdžiné jone pe félda. I phendiá Ionafáno Davidóske: “Te javél džidó Raj Devél, Devél Izrailjoskiro! Me atasiá pašýl davá časo, ci paló (poslie) atasiá vyphučava miré dadéstyr; i kóli jov isyn lačhó ke Davído, i me tedy na bičhaváva ke tu i na otčhakirava angíl tyré kaná, mek dová i dová te kerél Raj Devél Ionafanosa i iščo (inké) butýr keréla. Kóli miro dad skedelape te kerél túke xolý, i me otčhakirava davá dro tyré kaná, i me otmekáva tut, i tedy džá ramanjosa (mirósa): i mek te javél Raj Devél túsa, syr te javél miré dadésa! Ne i tu, kóli me javáva džidó, ker mánge Ráskire-Devléskiro tangipén. A kóli me meráva, to tedy na otle tangipén tyró miré kheréstyr dro viéki, adiáke-pac' i tedy, kiéli Raj Devél protradela phuvjákire móstyr saré Davidóskire vergén (vrogen).” Adiáke kerdiá Ionafáno zavieto Davidóskire kheresa i phendiá: “Mek te Raj Devél Davidóskire vergéndyr!” I nevés Ionafáno sovlahadiá Davidóske péskire ilésa ke jov, pal-dová so sys drógo léske, syr péskiro di. I phendiá léske Ionafáno: “Atasiá javéla nevó čhon i pal túte sphučena, pal-dová so tyró štéto javéla na zalyno; paldavá pe tríto dyvés tu džá, i sygnedyr džá pe dová štéto, kaj garadyjan tu angledýr, i beš pašýl bar Azieljo; a me dro doiá rig mekava trin maribnýtka bustiá (striély), syr by te dav kar'jé dro celjo (mietka) tén'či (potom) me bičhaváva terné-beršengires (otrokos), rakirí: ‘Džá, lath bustiá;’ i kóli me phenáva terné manušéske: ‘Ĥáda, bustiá palál pal túte, le len, to tedy tu jav ke me,’ paldavá so ramánjo (miro) túke, i, te javél džidó Raj Devél, ničý túke na javéla; kóli adiáke phenáva terné-beršengireske: ‘Ĥáda, bustiá isyn angíl túte,’ tedy tu džá krig, pal-dová so otmekéla tut Raj Devél; a doléske, so ame rakirdiam, me i tu, isyn jakhítko Raj Devél maškír mánde i túte dro viéko.” I garadyja Davído pe félda. I jaciá nevó čhon, i bestiá králi te xal. Králi bestiá pe péskiro štéto, pir maniera (obyčajo), pe zedljo pašýl vánta, i Ionafáno uštyjá, i Avieníro bestiá pašýl Sauloste; štéto Davidóskiro jaciápe vól'no (psiro). I na phendiá Sáulo dro dová dyvés ničý, pal-dová so jov podumindia, so davá isyn vakancyja (slučajo), so Davído isyn nažužo, na vyžužakirdiape. I jaciá i javír dyvés dro nevó čhon, a Davidóskiro štéto jaciápe vól'no (psiro). Tedy phendiá Sáulo péskire čhavéske Ionafanoske: “Sóske Jesiejoskiro čhavó na javdiá pe obiado ni tasiá, ni adadyvés?” I otphendiá Ionafáno Saulóske: “Davído vymangdiape mándyr dro Vifliejémo; jov rakirdiá: ‘Otmek man, pal-dová so aménde dro fóro isyn semencakiro svénto janybén Ráske-Devléske, i miro pšal khardiá man; i adiáke, kóli me lathjom láska dro tyré jakhá, džáva me i dykhavape péskire pšalénca;’ paldavá jov i na javdiá ke obiado kralískiro.” Tedy zoralés xoliásyja Sáulo pe Ionafanóste, i phendiá léske: “Čhavó nálačho i nakanduno san tu! Naúšto me na džinóm, so tu zmalyndianpe (združyndianpe) Jesiejoskire čhavésa pe ladž péske i pe ladž dáke tyrjake? paldavá so dro saré dyvesá, paka Jesiejoskiro čhavó javéla te dživél pe phuv, na uterdjosa ni tu, ni tyró kralipén; kakaná bičháv i jan les ke me, pal-dová so jov pir sud'ba (panda) isyn bangó te merél.” I otphendiá Ionafáno Saulóske, péskire dadéske, i phendiá léske: “Pal so te muliakires les? So jov kerdiá?” Tedy Sáulo čhurdyjá maribnýtko bust dro léste, sob (kaj) te zamarél les. I Ionafáno ĥalyjá, so léskiro dad skedyjape te zamarél Davidós. I uštyjá Ionafáno pal skamindestyr dro bari xolý, i na xaja pe javír dyvés dro nevó čhon, pal-dová so piridživdia pal Davidóste, i pal-dová so kerdiá xolý léske dad léskiro. Pe javír dyvés pe zlóko (ránko) vygijá Ionafáno pe félda, dro časo, savó uphendia Davidóske, i ternó manúš (terné-beršengiro) lésa. I phendiá jov terné manušéske: “Prasta, róde maribnýtka bustiá (striély), savé me mekava.” Ternó manúš prastándyja, a jov mekciá bustiá (striély) adiáke, so jone vurniandyne duredýr terné manušéstyr. I prastándyja ternó manúš odorík, karik Ionafáno mekciá bustiá (striély) i zadyja gódla Ionafáno palál pal terné manušéste i phendiá: “Dykh, bust (striela) pyjá angíl túte.” I nevés dyjá gódla Ionafáno palál pal terné manušéste: “Sygnedyr prasta, na terdjov.” I skedyjá Ionafanoskiro ternó manúš bustiá, i javdiá ke péskiro xulái. Ternó manúš na džindiá ničý; jekh Ionafáno i Davído džindlé, dro so réndo sys. I otdyjá Ionafáno péskiro mardýtko (oružyjo) terné manušéske, savó sys pašýl léste, i phendiá léske: “Džá, otlydža dro fóro. Ternó manúš gijá, a Davído ĥazdyjápe paš-dyvesytkoné (južnone) rigátyr, i pyjá péskire mósa pe phuv, i trin móly poklonindiape; i čamude jone jekh jekhés, i rondlé dujdžiné khetané, ne Davído rondiá butýr. I phendiá Ionafáno Davidóske: “Džá ramanjosa (mirósa); a dro so sovlahadiam ame dujdžiné Ráskire-Devléskire lavésa, rakirí: ‘Raj Devél mek te javél maškír mánde i maškír túte i maškír sém'ia (irí) mirí i tyrí sém'ia (irí), tedy mek te javél pe viéko.’” I uštyjá Davído i gijá, a Ionafáno risijá dro fóro. I javdiá Davído dre Nomva ke rašáj Ahimielieho, i zaladžandyja Ahimielieho gil Davidóste, i phendiá léske: “Sóske tu san jekhdžinó, i nikonés nane túsa?” I phendiá Davído rašáske Ahimieliehoske: “Králi dyjá mánge réndo i phendiá mánge, mek nikón te na džinél, pal so me bičhadjom tut i so dyjom túke”, pal-dová so manušén me jačkirdjom pe džindló štéto; i adiáke, so isyn túte tel vast, de mánge, maré pandž, ci so lathelape.” I otphendiá rašáj Davidóske, rakirí: “Nane mánde tel vast prosto maró, a isyn svénto maró, kóli féni (tóka) tyré manušá urikirdepe džuvliendyr!” I otphendiá Davído rašáske, i phendiá léske: “Džuvlién pašýl aménde na sys ni tasiá, ni tríto dyvés, dolé časostyr, syr me vygijom, i sasúdy terné-manušéngire isyn žužé, a kóli drom isyn nažužo, tedy maró jačélape žužesa dre sasúdy. I dyjá léske rašáj svénto maró; pal-dová so na sys léste maró, apríč maré, savé sys te xan syr svénto, savé lyné sys Ráskire-Devléskire móstyr, sob (kaj) pir léngiro lyiben krig te čhuvés tato maró. Odój sys jekh manúš dro dová dyvés angíl Raste-Devléste jekh Saulóskire dynar'jéndyr (slugéndyr), pir lav Doiko, Idumejanino, Saulóskire rakhibnariskiro barydyr. I phendiá Davído Ahimieliehoske: “Ci nane adáj túte tel vast čhurdypnytko bust ci kurtála? Pal-dová so me na lyjom pésa ni kurtála, ni javír mardýtko, adiáke syr kralískiro priphenybén sys sýgno.” I phendiá rašái: “Ĥáda, isyn kurtála Filistimlianinoskire-Goliafoskiri, savés tu zamardian pe dembitko dólo, zakrencyndly dre ídia, palál efódo; kóli kamésa, le la; javír apríč daliatyr nane adái.” I phendiá Davído: “Nane fedýr látyr, de mánge la.” I uštyjá Davído, i nastiá dro dová-pac' dyvés Saulostyr, i javdiá ke Anhuso, Giefoskiro králi. I phendlé Anhusoske léskire dynárja: “Ci na adavá isyn Davído, savó isyn králi dolé rigakiro? Ci na léske bagandle dre xorovody i rakirdé ‘Sáulo domardiá tysjoncy, a Davído deš tysjoncy?’” Davído čhudiá dalé lavá dro péskiro iló, i drieván dardiape Anhusostyr, Giefoskire kralístyr. I parudia péskiro muj angíl lénde, i pričhurdyjape dylynesa dro léngire jakhá, i čhindiá pe vudará, i mekciá slina (salia) pir péskiri čhora (broda). I phendiá Anhuso péskire pishar'jénge: “Dykhéna, jov manúš isyn dylynó; vaš so tumé jandlé les ke me? Naúšto kutý mánde dylyné, so tumé jandlé les, sob (kaj) jov te dylnjol angíl mánde? Naúšto jov zadžála dro miro kher?” I vygijá Davído odothýr, i nastiá dro Adolamóskiri ĥiebár (pieščera), i šundlé léskire pšála i saró léskire-dadéskiro kher, i javné ke jov odorík. I skedynépe ke jov saré, kon sys pritasado, i saré, kon sys bangó, i saré, kon sys pharé diesa, i jaciá jov barydyrésa pe lénde; i sys lésa pašýl štaršelá manušén. Odothýr gijá Davído dro Moavitoskire Masífa, i phendiá Moavitoskiri kralíske: “Mek dad miro i daj mirí te javén vari-kicý tuménde, paka me udžinava, so keréla Devél mánca.” I jandiá len ke Moavitoskiro králi, i dživdé jone léste saró časo, paka Davído sys dro davá znašyben. Ne proróko Gado phendiá Davidóske: “Na jačpe dro davá zrakhibén, ne džá, džá pe Judaskiri phuv.” I gijá Davído i javdiá dro Xierietoskiro veš. I šundiá Sáulo, so Davído javdiá i manušá, savé sys lésa. Sáulo tedy sys beštó dre Givá tel dembo pe bérga, čhurdybnytkone bustiasa dre vast, i saré léskire dynárja sys pašýl léste. I phendiá Sáulo péskire dynar'jénge, savé sys pašýl léste: “Šunén, Vieniaminóskire čhavé: naúšto sarénge tuménge déla Jesiejoskiro čhavó féldy i vinagradniki, i sarén tumen čhuvéla barydyrénca pe tysjoncy i šelá, so tumé saré zrakirdepe proti mánde, i nikón na otčhakirdiá mánge, kiéli miro čhavó zagijá dro malypen Jesiejoskire čhavésa, i nikón tuméndyr na potangindia pal mánde, i na otčhakirdiá mánge, so miro čhavó ĥazdyjá proti mánde dynarís mires te kerél mánge xasibnýtka plany, syr davá kakaná bicialó?” I otphendiá Doiko Idumejanino, savó sys terdó Saulóskire dynar'jénca, i phendiá: “Me dykhcjom, syr Jesiejoskiro čhavó sys javi dro Novma ke Ahimielieho, Ahituvoskiro čhavó, i dová mangdiá pal léste Ras-Devlés, i dyjá léske xabén, i Filistimlianinoskire-Goliafoskiri kurtála otdyjá léske.” I bičhadiá králi te kharén Ahimieliehos, Ahituvoskire čhavés, rašás, i saró léskire dadéskiro rašángiro kher, so sys dro Nomva; i javné jone saré ke králi. I phendiá Sáulo: “Šun, Ahituvoskiro čhavó.” I odová otphendiá: “Ĥáda me, miro xulájo.” I phendiá léske Sáulo: “Vaš so tumé zrakirdepe pe mánde, tu i Jesiejoskiro čhavó, so tu dyján léske maró i kurtála, i mangdian pal léste Devlés, sob (kaj) jov te džal proti mánde i te kerél mánge xasibnýtka plany, syr davá kakaná bicialó?” I otphendiá Ahimielieho kralíske i phendiá: “Kon saré tyré dynar'jéndyr (slugéndyr) isyn adasavó čačunó, syr isyn Davído? Jov i kralískiro ziatjo (džamutro) isyn, i keréla pir tyré priphenybená, i déla patýv léske dro tyró kher. Ci kakaná me lyjom te mangav vaš léske Devlés? Nad, na band'kir dro davá, králjo, tyré dynarís i saró miré-dadéskiro kher, pal-dová so dro saró davá réndo na džinél tyró dynári ni tyknes, ni bares.” I phendiá králi: “Tu san bangó (musines) te meres, Ahimielieho, tu, i saró tyré-dadéskiro kher.” I phendiá králi péskire rakhibnar'jenge, savé sys terdé pašýl léste: “Džán, muliakirén Ráskire-Devliaskire rašán, pal-dová so i léngiro vast Davidosa, i jone džindlé, so jov nastiá, i na otčhakirde mánge.” Ne kralískire dynárja na kamlé te ĥazdén péskire vastá pe Devléskire rašande. I phendiá králi Doikoske: “Džá tu, i muliakir rašán.” I gijá Doiko Idumejanino, i pyjá pe rašande, i muliakirdiá dro dová dyvés ohtodešá (bibišengiro šel) pandž muršén, savé ur'jenas parkaljoskiro efódo; i Nomva, fóro rašángiro, vymardia kurtalása; i muršén i džuvlién, i ternen čhavén i tykné masen, i guruvén i oslen i bakrén vymardia kurtalása. Zrakhciape jekh Ahimieliehoskiro čhavó, Ahituvoskire-čhavéskiro, pir lav Aviafaro, i nastiá ke Davído. I rosphendiá Aviafaro Davidóske, so Sáulo muliakirdiá Ráskire-Devléskire rašán. I phendiá Davído Aviafaroske: “Me džindjom dro dová dyvés, kiéli odój sys Doiko Idumejanino, so jov usajékh rosphenéla Saulóske; me som bangó dro saré dijá tyré dadéskire kheréske; iačpe mánde, na dar; pal-dová so kon javéla te rodél i tyró di, javéla te rodél i tyró di; tu javésa mánde tel rakhiben.” I rosphendlé Davidóske, rakirí: “Ĥáda, Filistimliáni pyné pe Kieiljo, i rostyrdena šurny. I mangdiá Davído Ras-Devlés, rakirí: “Ci te džav mánge, i ci te vymarav me adalé Filistimlianen?” I otphendiá Raj Devél Davidóske: “Džá, tu vymaresa Filistimlianen i zrakhésa Kieiljo.” Ne manušá, savé sys Davidosa phendlé léske: “Ĥáda, ame darása adáj dro Judéia, syr aménge te džas dro Kieiljo proti Filistimijákire xaladénde?” Tedy nevés mangdiá Davído Ras Devlés, i otphendiá léske Raj Devél, i phendiá: “Uštý i džá dro Kieiljo, pal-dová so Me otdáva Filistimlianen dre tyré vastá.” I gijá Davído péskire manušénca dro Kieiljo, i mardiápe Filistimlianenca, i tradyjá péske léngire kheritkoné murdalén (skoto), i vymardia len ke ruíny, i zrakhciá Davído Kieiljoskire manušén. Kiéli Aviafaro, Ahimieliehoskiro čhavó, prastándyja ke Davído dro Kieiljo, tedy jandiá pésa i efódo. I rosphendlé Saulóske, so Davído javdiá dro Kieiljo, i Sáulo phendiá: “Devél otdyjá les dro miré vastá, pal-dová so jov zaphandia pes, zagii dro fóro vudarenca i šyberenca (zaporenca).” I khardiá ke pe Sáulo saré manušén pe maribén, sob te džán pe Kieiljo te občhuven rotasa Davidós i léskire manušén. Kiéli udžindiá Davído, so Sáulo zadumindia proti léste fuipén, to phendiá rašáske Aviafaroske: “Jan efódo.” I phendiá Davído: “O Rajo Dévla, Devél Izrailjoskiro! Tyró dynári šundiá, so Sáulo kaméla te javél dro Kieiljo te phagirel fóro pal mánde. Ci otdena man Kieiljoskire manušá dro léskire vastá? I ci javéla adarík Sáulo, syr šundiá Tyró dynári? Rajo Dévla, Dévla Izrailjoskiro! Otčhakir Tyré pisharíske.” I phendiá Raj Devél: “Javéla.” I phendiá Davído: “Ci otdena Kieiljoskire manušá man i miré manušén dre Saulóskire vastá?” I phendiá Raj Devél: “Otdena.” Tedy uštyjá Davído i léskire manušá, pašel šovšelá manušén, i vyginé Kieiljostyr, i psirdé, kaj mogindlé. Saulóske sys rosphendlo, so Davído nastiá Kieiljostyr, i tedy jov otparudia giiben. Davído sys pe čhučí phuv dro napodgiibnytka štéty i paló (poslie) dová pe bérga pe čhučí phuv Zifa. Sáulo rodyja les kažno dyvés; ne Devél na otdyjá Davidós dro léskire vastá. I dykhciá Davído, so Sáulo, vygijá te rodél léskiro di; o Davído sys pe čhučí phuv Zifa dro veš. I uštyjá Ionafáno, Sauloskiro čhavó, i javdiá ke Davído dro veš, i zoraliakirdia les nadejasa pe Devléste, i phendiá léske: “Na dar, pal-dová so lathéla tut miré dadéskire Sauloskiro vast, i tu javésa te kralines pe Izrailjo, a me javáva javiresa manušésa pal túte; i Sáulo, miro dad džinéla davá. I kerdé jone maškír péste zavieto angíl Ráskire-Devléskiro muj; i Davído jaciápe dro veš, a Ionafáno gijá dro péskiro kher. I javné Zifiéi ke Sáulo dro Givá, rakirí: “Ĥáda, Davído garadjola aménde dro napodgiibnytka štéty, dro veš, pe Gahilaskiri bérgica, so isyn pe čačó (pravo) Jesimonostyr. I adiáke, pir tyré-dieskiro vykedyben, králjo, džá; a amaró réndo javéla te otdas les dro kralískire vastá.” I phendiá lénge Sáulo: “Te javén bahtiakirde tumé Rástyr-Devléstyr pal dová, so potangindle (požalindle) pal mánde. Džán, patiakiren iščo (inké), rozĥaljon i obdykhen léskiro štéto, kaj javéla léskiri ĥerój, i kon dykhciá les odój; pal-dová so mánge rakiréna, so jov drieván mendro; i obdykhen, i rozgaljon pal saré znašybnytka štéty, dro savé jov garadjola, i risjon ke me čačuné džinybnasa, i me džáva tuménca; i kóli jov isyn pe daja phuv, me javáva te rodav les pir saré Judáskire tysjoncy.” I uštyné jone, i giné dre Zifa angledýr Saulostyr. Davído i léskire manušá sys pe čhučí phuv Maono, pe loščýna, pe čačí (pravo) rig Jesimonostyr. I gijá Sáulo péskire manušénca te rodén les. Ne Davidóske phendlé pal davá, i jov pirigija ke skála, i jaciápe pe čhučí phuv Maono. I šundiá Sáulo, i tradyjape pal Davidóste pe čhučí phuv Maono. I gijá Sáulo pir jekh bergakiri rig, a Davído péskire manušénca sys pe javír bergakiri rig. I kiéli Davído sygniakirdia te džal Saulostyr, a Sáulo péskire manušénca gijá trustial Davidóste te i léskire manušénde, sob te uhtylén len; tedy javdiá ke Sáulo manúš zaniása, rakirí: “Sygniakir i jav, pal-dová so Filistimliáni pyné pe phuv.” I risijá Sáulo tra dypnastyr pal Davidóste, i gijá gil Filistimlianenge; pal-dová i khardé davá štéto Siela Gamahliekofo. I vygijá Davído odothýr, i dživdiá dro bidarakire štéty En-Gadi [Engiedi-ju.o.]. Kiéli Sáulo risijá Filistimlianendyr, léske phukavenas, rakirí: “Ĥáda, Davído isyn pe čhučí phuv En-Gadi.” I lyjá Sáulo trin tysjoncy fedyršone muršén saré Izrailjostyr, i gijá te rodél Davidós i léskire manušén pir bérgi, kaj dživénas sierny. I javdiá ke bakrano zatradypen (gražo), pašýl drom; odój sys ĥiebár (pieščera) i zagijá odorík Sáulo vaš trébima; Davído i léskire manušá sys bešté dro xoripén ĥiebarakiro. I rakirdé Davidóske léskire manušá: “Ĥáda, isyn dyvés, pal savó rakirdiá túke Raj Devél: ‘Ĥáda, Me otdáva tyré vergos dro tyré vastá, i kerésa lésa, so túke isyn lačhó.’” Davído uštyjá i štylin'kes otčhindia jagóro (krajo) upratune Saulóskire idiatyr. Ne paló davá saró jaciá dukhano Davidóskire ileske, so jov otčhindia jagóro Sáulo skire idiatyr. I phendiá jov péskire manušénge: “Mek te na domekel man Raj Devél te keráv davá xuláske miréske, Ráskire-Devléskire pomakhibnariske, sob (kaj) te čhuvav vast miro pe léste, pal-dová so jov isyn Ráskire-Devléskiro pomakhibnaskiro.” I urikirdia Davído péskire manušén dalé lavénca, i na dyjá lénge te ĥazdénpe pe Sauloste. A Sáulo uštyjá i vygijá ĥiebaratyr (pieščeratyr) pe drom. Paló dová (poslie) uštyjá i Davído, i vygijá ĥiebaratyr, i zadyja gódla palál Saulóske, rakirí: “Hulájo miro, králi!” Sáulo podykhciá pale, i Davído pyjá mósa pe phuv i dyjá patýv léske. I phendiá Davído Saulóske: “Sóske tu šunesa manušéngire rakiribena, savé rakiréna: ‘Ĥáda, Davído skedéla xolý pe túte?’ Ĥáda, adadyvés dykhéna tyré jakhá, so Raj Devél otdyjá tut kakaná dro miré vastá dro ĥiebár; i mánge rakirdé, sob me te zamarav tut, ne me potangindjom (požalindjom) tut, i phendjom: ‘Na ĥazdáva miro vast pe miré xulaste, pal-dová so jov isyn Ráskire-Devléskiro pomakhibnaskiro.’ Miro dádo! Podykh pe jagóro tyré idiakiro dre miro vast; me otčhindjom jagóro tyré idiatyr, a tut na zamardjom: udžin i propatiakir, so nane dro miro vast xolý, ni xohaibén, i me na kerdjom grého proti túte; a tu rodesa miro di (džiibén), sob te otles les. Mek te rossendiakirel Raj Devél maškír mánde i túte, i mek te othal pale (otomstinel) túke Raj Devél pal mánde; ne vast miro na javéla pe túte, syr rakiréla phurany pritča: ‘Fuipnastyr džála fuipén.’ A miro vast na javéla pe túte. Proti konéste vygijá Izrailjoskiro králi? Pal konéste tu tradesape? Pal mulé džukleste, pal jekhe pušumate. Mek te javél Raj Devél sendarisa, i mek te rossendiakirel maškír mánde i túte. Jov rozdykhela, roskedela miro réndo i zrakhéla man tyré vastéstyr.” Kiéli mekciá Davído te rakirél dalé lavá ke Sáulo, Sáulo phendiá: “Ci tyrí daja isyn zan (glos), čhavó miro, Davído? I ĥazdyjá Sáulo péskiri zan, i rondiá, i phendiá Davidóske: “Tu san čačunydyr mándyr, pal-dová so tu otdyjan mánge lačhipnása, a me kerdjom túke čoripén; tu sykadian davá adadyvés, obgijanpe mánca tangipnasa, kiedy Raj Devél otdyjá man dro tyré vastá, tu na zamardian man. Kon, lathi péskire vergos (vrogos), otmekija by les dro lačhó drom? Devél otdéla túke pal davá lačhipnása, so tu kerdián mánge adadyvés. I kakaná me džinóm, so tu ŭsajekh javésa te kralines, i Izrailjoskiro kralipén javéla tvardo dro tyró vast. I adiáke sovlahá mánge Rása-Devlésa, so tu na vymaresa miro ródo paló mánde i na xasiakiresa miro lav dro miré-dadéskiro kher.” I sovlahadiá Davído Saulóske. I gijá Sáulo dro péskiro kher, Davído i léskire manušá zaginé pe štéto zoraló tynosa. I myjá Samuílo; i skedynépe saré Izrail'tiáni, i rondlé pal léste, i ĥaradé les dro léskiro kher, dre Ráma. Davído uštyjá i gijá pe čhučí phuv Farano. Sys vari-kon dro Maona, a léskiri felatin sys pe Karmilo, drieván barvaló manúš; léste sys trin tysjoncy bakrén i tysjonco buznen; i sys jov pašýl péskire bakrengiro podčhinyben pe Karmilo. Lav dolé-manušéskiro sys Navalo, a lav léskire romniakiro sys Avigeja; a daja džuvlý sys drieván god'vari i šukár mósa, a jov sys manúš pharé-ilytko i xoliamó xaraktierosa; jov sys Xalievoskire rodóstyr. I šundiá Davído pe čhučí phuv, so Navalo občhinela péskire bakrén. I bičhadiá Davído dešen terné manušén, i phendiá Davído terné manušénge: “Džán upré pe Karmilo, džán ke Navalo, i den “dobridim” léske miré lavéstyr, i phenén adiáke: ‘Miro (ramánjo) túke, ramánjo tyré kheréske, ramánjo sareske tyréske; kakaná me šundjom, so túte občhinena bakrén. Ĥáda, tyré bakrarja (pastuhi) sys aménca, i ame na dukhadiam len, i nisó lénde na xasijá dro saró léngiro javibnaskiro časo pe Karmilo; phuč tyré dynar'jéndyr, i jone phenéna túke; i adiáke, mek te lathén terné-beršengire lačhipén dro tyré jakhá, pal-dová so dro lačhó dyvés javdiám ame; de tyré dynar'jénge i tyré čhavéske Davidóske, so lathéla tyró vast.” I giné Davidóskire manušá, i phende Navaloske Davidóskire lavéstyr saré dalé lavá, i štylyne. I Navalo otphendiá Davidóskire dynar'jénge, i phendiá: “Kon isyn dasavo Davído, i kon isyn dasavo Jesiejoskiro čhavó? Kakaná jaciá but dynárja, savé našéna péskire xulandyr; naúšto mánge te lav maró miro i paní miro, i mas, savó me keradjom vaš odolénge, savé občhinena bakrén mánde, i te otdav manušénge, pal savénde na džinóm, katýr jone isyn?” I giné pale Davidóskire manušá péskire dromésa, i risiné, i javné, i piridyne léske saré dalé lavá. Tedy Davído phendiá péskire manušénge: “Obphandenpe kažno (sváko) péskire kurtalása.” I saré obphandepe péskire kurtalenca, i giné pal Davidóste pašýl štaršelá manušén, a duj šelá jačnépe pašýl vurdená. Avigejake že, Navaloskire romniake, dyjá zan jekh dynar'jéndyr (slugéndyr), i phendiá: “Ĥáda, Davído pribičhadia čhučé phuvjátyr poslen te phenén patýv amaré, xuláske, ne jov obgijape lésa xoliása; adalé manušá isyn drieván lačhé ke ame, na pritasade amen, i ničý na xasijá aménde dro saró časo, kiéli ame psirdiam lénca, syr i sámas pe félda; jone sys vaš aménge tynosa i dyvesé i ratý dro saró časo, kiéli ame rakhciam stády pašýl lénde; i adiáke podumin i podykh, so te kerás, pal-dová so na mieninela bída xulás amares i saró léskiro kher; a jov isyn manúš xoliamó, naštý te rakirés lésa.” Tedy Avigeja sýges lyjá dujšelá maré, i duj goné mol (vino), i pandž bakrén keraven, i pandž miéry šut'kirde ziárki, i šel pučki ziumo, i šelá pučki inžyro, i čhudiá pe oslende, i phendiá péskire dynar'jénge: “Džán angíl mánde.” A romeske peskireske Navaloske ničý na phendiá. Kiéli joi, bešyndoj pe osloste, zmekciape pir bergakire vydind'kiribena, ĥáda, gil láke džála Davído i léskire manušá, i joj strenindiape lénca. I Davído phendiá adiáke: “Čačó, ivjá me rakhcjom pe čhučy phuv saró majonko dalé manušéskiro, i ničý na xasijá, so sys léskiro; jov pleskirela mánge fuipnasa pal lačhipén; mek dová i dová te kerél Raj Devél Davidóskire vergenca, i iščo (inké) butýr keréla, kóli ke zlóko, kiéli dyvesjola, saréstyr, so isyn Navaloste, me jačkirava xoc' jekhe džidé muršés.” Kiéli Avigija dykhciá Davidós, tedy sygniakirdia te zdžal oslostyr i pyjá angíl Davidóste pe péskiro muj, i klonindiape ke phuv; i pyjá ke léskire ĥerá, i phendiá: “Pe mánde isyn grého, miro xulájo; de vólia mánge te rakirél dro tyré kaná i pošun tyré dynaricakiro lav.” Mek miro xuláj te na prilel ke godý dalé-xolynakire manušés, Navalos; pal-dová so, savó léskiro lav, dasavó i isyn jov. Navalo isyn léskiro lav, i dylnypén léskiro isyn lésa. A me, tyrí dynárica, na dykhcjom miré xuláskire dynar'jén, savén tu pribičhadian. I kakaná, miro xulájo, “te javél džidó Raj Devél i džidó tyró di”, Raj Devél na domekela tut te džas te pročhuves rat i urikirela tyró vast te othas pale (otomstinybnastyr), i kakaná mek te javén, syr Navalo, vérgi tyré i odolé, savé kaména fuipén miré xuláske. Ĥáda, dalé počastúnki, savé jandiá tyrí dynárica miré xuláske, sob (kaj) te dav len terné manušénge, savé dynarinena miré xuláske. Primang (prostin) bang tyré dynaricakiri; Raj Devél usajékh keréla miré xuláske zoraló kher, pal-dová so Ráskire-Devléskire maribena lydžála miro xulái, i xolý na lathelape dro túte dro saró tyró džiibén. Kóli ĥazdyjápe manúš te tradel tut i te rodél tyró di, tedy di miré xulaskiro javéla sýrby zaphandlo dro džiibnáskiro venzlo Raste-Devléste, tyré Devléste, a di tyré vergengiro čhurdéla Jov sýrby praščasa. I kiéli keréla Raj Devél miré xuláske saró, so rakirdiá lačhipén pal túte, i čhuvéla tut šeralesa pe Izrailjo, to tedy na javéla davá miré xuláskire ileske kirkipnasa i piridživipnasa, so tu na pročhudian ivjá (naprásnes) rat i zrakhcián pes te othas pale (otomstinybnastyr). I Raj Devél otdéla lačhipnása miré xuláske, i priripiresa tyrja dynárica.” I phendiá Davído Avigejake: “Te javél bahtiakirdó Raj Devél Devél Izrailjoskiro, Savó bičhadiá kakaná tut gil mánge, i bahtiakirdy isyn godý tyrí, i bahtiakirdy tu san pal dová, so tu kakaná na domekcian man te džav te pročhuvav i te othav pale (otomstinav) pal péste. Ne, “te javél džidó Raj Devél, Devél Izrailjoskiro, Savó urikirdia man lydžaipnastyr túke fuipén, kóli by tu te na sygniakires i te na javes gil mánge, tedy ke zlóko, kiéli dyvesjola, me na jačkiravav Navaloske xoc' jekhe džidé muršés.” I lyjá Davído lákire vasténdyr dová, so joj iandiá léske, i phendiá láke: “Džá ramanjosa (mirósa) dro tyró kher; ĥáda, me šundjom tyrí zan (glos) i sykadjom patýv tyré moske.” I javdiá Avigeja ke Navalo, i ĥáda, léste pibén sys dro léskiro kher, syr kralítko pibén, i iló Navaloskiro sys xotno (viesjolo); jov sys drieván mato, i joj na phendiá léske ni lav, ni baró ni tyknó, ke zlóko (ránko). Zlokosa, kiéli Navalo jaciá triazvo (nyrno), léskiri romný rosphendiá léske pal davá, i zamyjá dro léste iló léskiro, i jaciá jov syr bar. Pirdál deš dyvesá domardiá Raj Devél Navalos, i jov myjá. I šundiá Davído, so Navalo myjá, i phendiá: “Te javél bahtiakirdó Raj Devél, Savó otdyjá pal ladž, savó kerdiá mánge Navalo, i zrakhciá Péskire pisharís fuipnastyr; Raj Devél obriskirdia xolý Navaloskiri pe léskiro šeró.” I bičhadiá Davído te phenén Avigejake, so jov léla la paloróm. I javné Davidóskire dynárja ke Avigeja pe Karmilo, i phendlé láke adiáke: “Davído bičhadiá amen ke tu, sob (kaj) te las tut léske dro romniáte.” Joj uštyjá, i klonindiape mósa ke phuv, i phendiá: Ĥáda, tyrí dynárica isyn skedyny te javél dynaricasa, sob (kaj) te morel ĥerá miré xuláskire dynaricasa.” I skedyjape Avigeja sýges, i bestiá pe osloste, i pandž dynaricy prolydžanas la; i gijá joj pal Davidóskire bičhaibnaskire (poslende), i jaciá léskire romniása. I Ahinoama Izriejeljostyr lyjá Davído, i dujdžiné jone sys léskire romniénca. Sáulo otdyjá peskirjá čha Mielhola, romniá Davidoskirja, Faltijoske, Laišaskire čhavéske, kon sys Galimostyr. Javné Zifiei ke Sáulo dro Givá i phendlé: “Ĥáda, Davído ĥaradjola aménde pe bérga Gahila, so isyn pe čačí (pravo) rig Jesimonostyr. I uštyjá Sáulo, i gijá telé pe čhučí phuv Zifa, i lésa trin tysjoncy vykedyné fedyrša Izrailjoskire muršá, sob (kaj) te rodén Davidós pe čhučy phuv Zifa. I terdijá Sáulo pe bérgica Gahila, so isyn pe čačí (pravo) rig Jesimonostyr, pašýl drom; Davído sys pe čhučí phuv i dykhciá, so Sáulo gijá pal léste pe čhučí phuv; i bičhadiá Davído poddykhipnaskiren i udžindiá, so Sáulo, čačes, javdiá. I uštyjá Davído, i gijá ke štéto, pe savó Sáulo terdijá stanósa, i dykcia Davído štéto, kaj sys suté Sáulo i Avieníro, Nirovoskiro čhavó, léskire-xaladéngiro barydyró. Sáulo sys sutó dro šátra, a manušá terdiné trusciál léste. I risijá mangipnasa Davído, i phendiá Ahimieliehoske Xietejaninoske i Aviesaske, Saruinoskire čhavéske, Ioavoskire pšaléske, rakirí: “Kon džála telé mánca ke Sáulo dro stáno?” I otphendiá Aviesa: “Me džáva túsa.” I javdiá Davído Aviesasa ke Saulóskire manušá ratý; i ĥáda, Sáulo sys paštó, sutó dro šátra, i léskiro čhurdyipnytko bust (kop'jo) sys čhudý dro phuv pašýl léskiro šeró; Avieníro i manušá sys pašté trusciál léste. Aviesa phendiá Davidóske: “Otdyjá Raj Devél tyré vergos (vrogós) dro tyré vastá; i adiáke de vólia, me primarava les čhurdypnytkone bustiasa ke phuv jekhe pekaibnasa, i javír mólo na pekavava.” Ne Davído phendiá Aviesaske: “Na zamar les; pal-davá so kon ĥazdéla vast, pe Ráskire-Devléskire pomakhibnaskireste, jačélape bangó?” I phendiá Davído: “Te javél džidó Raj Devél! Mek te domarel les Raj Devél, ci javéla léskiro dyvés, i jov meréla, ci džála pe maribén i xasjola; mek te na domekel Raj Devél te ĥazdav miro vast pe Ráskire-Devléskire pomakhibnaskireste; a le léskiri čhurdypnytko bust (kop'jo), saví isyn pašýl léskiro šeró, i sasudo paniésa, i javén ke pe. I lyjá Davído čhurdypnytko bust i sasudo paniésa pašýl Sauloskiro šeró, i giné jone ke pe; i nikón na dykhciá, i nikón na džindiá, i nikón na džangadyja (prošnindiape), ne saré sys suté, pal-dová so soiben pyjá pe lénde Rástyr-Devléstyr. I pirigija Davído pe javír rig, i terdijá durál pe bergákiro vučipén; baró dlengipén sys maškír lénde. I risijá mangipnasa Davído ke manušá i ke Avieníro, Nirovoskiro čhavó, rakirí: “Otphen, Avieníro.” I otphendiá Avieníro i phendiá: “Kon san tu, so godlesa i miešynesa te sovél kralíske? I phendiá Davído Avieniroske: Ci na san murš tu, i kon túke isyn rovnia dro Izrailjo? Vaš so tu na rakhesa tyré xulás? Paldavá so javdiá vari-kon manušéndyr, sob (kaj) te xasiakirén kralís, tyré xulás. Na šukár tu kerésa davá; te javél džidó Raj Devél! Tumé san mol meribnáske pal dová, so tumé na rakhena tumaré xulás, Ráskire-Devleskires pomakhibnaskires. Podykh, kaj čhurdypnytko bust kralískiri i sasudo paniésa, so sys pašýl léskiro šeró? I udžindiá Sáulo Davidoskiri zan, i phendiá: “Ci isyn tyrí daja zan (glos), miro čhavó Davído?” I phendiá Davído: “Mirí zan, xulájo miro, králi!” I phendiá iščo (inké): “Pal so xuláj miro tradelape pal péskire dynariste? So me kerdjom, savó fuipén dro miro vast?” I kakaná, mek te vyšunel xuláj miro, králi, péskire dynariskire lavá: kóli Raj Devél ĥazdéla tut proti mánde, tedy mek te javél davá tútyr syr gudló thuv sventoné dyibnástyr Ráskire-Devléskiro, kóli čhavé manušéngire, tedy prokošne jone javéna angíl Raste-Devléste, pal-dová so jone vytradyné kakaná man, sob (kaj) te na javén mánge ke Ráskire-Devléskiro meknó mištypén, rakirí: ‘Džá, dynarin čužoné devlenge.’ Mek te na pročhuvelpe miro rat pe phuv angíl Ráskire-Devléskiro muj; pal-dová so Izrailjoskiro králi vygijá te rodél jekh pušum, syr tradenape pal kuropatka pir bérgi. I phendiá Sáulo: “Kerdjom grého me; risjov, miro čhavó Davído, pal-dová so me na javáva butýr te keráv túke fuipén, pal-dová so di miro sys drógo kakaná dro tyré jakhá; dylynes kerdjom me, i drieván but kerdjom grého.” I otphendiá Davído, i phendiá: “Ĥáda, čhurdypnytko bust kralískiri; mek jekh terné manušéndyr te javél i te lel les; I mek te del Raj Devél svakoneske pir léskiro patiaibén, i pir léskiro čačipén, adiáke syr Raj Devél otdyjá tut dro miré vastá, ne me na zakamdjom te ĥazdav miro vast pe Ráskire-Devleskireste pomakhibnaskireste; i mek, syr drógo sys tyró džiibén kakaná dro miré jakhá, adiáke te javél drógo miro džiibén dro Ráskire-Devléskire jakhá, i mek te zrakhél man kažnoné bidatyr!” I phendiá Sáulo Davidóske: “Bahtiakirdó tu san, miro čhavó Davído; i réndo kerésa, i te pirizorjakires-pirizorjakiresa.” I gijá Davído péskire dromésa, a Sáulo risijá pe péskiro štéto. I phendiá Davído dro péskiro iló: “Me perava vari-kiéli dre vastá Saulóske, i nane vaš mánge ničý fedýr, syr te našav pe Filistimijakiri phuv; i otiačela mándyr Sáulo, i na javéla te rodél man butýr pir saré Izrailjoskire rigá, i me zrakhavape léskire vastéstyr.” I uštyjá Davído, i gijá kokoró i šovšelá muršá, savé sys lésa, ke Anhuso, Maohoskiro čhavó, Giefakiro králi. I dživdiá Davído Anhusoste dro Giefa, kokoró i léskire manušá, sváko (kažno) péskire sem'iasa (irjasa), Davído i léskire duj romniá Ahinoama Izrail'tianka i Avigeja, saví sys Navaloskiri romný, Karmilitianka. I dolydžine Saulóske, so Davído nastiá dro Giefa, i na lyjá jov butýr te rodél les. I phendiá Davído Anhusoske: “Kóli me lathjom láska dro tyré jakhá, to tedy mek dynó javéla mánge štéto dro jekh tykné for'jéndyr, i me javáva te dživáv odój; vaš so tyré pisharíske te dživél dro kralískiro fóro, khetané túsa?” Tedy dyjá léske Anhuso Siekielago, paldavá Siekielago i jaciápe pal Judejákire kral'jénde ke davá časo. Saró časo, savó dživdiá Davído pe Filistimijakiri rig, sys berš i štar čhoná. I vygijá Davído péskire manušénca, i pyjá pe Giesurianende, i Girzejanende, i Amalikitianende, savé ĥará dživdé pe daja rig ke Sura i adiáke-pac' i ke Jegiptóskiri phuv. I čhučakirdia Davído doiá rig, i na jačkirdiá džiden ni muršén, ni džuvlién, i zakedyja bakrén i guruvén, i oslen, i vierbliuden, i ídia; i risijá, i javélas ke Anhuso. I phendiá Anhuso Davidóske: “Pe konéste pyné kakaná?” Davído phendiá: “Pe paš-dyvesýtko (poludjonno) Judejakiri rig, i pe poludjonno Jerahmiejeloskiri rig, i pe poludjonno Kienejakiri rig. I na jačkirdiá Davído džiden ni muršén, ni džuvlién, i na jandiá dro Giéfa, rakirí: “Jone moginéna te dolydžan pe aménde i te phenén: ‘Adiáke kerdiá Davído, i dasavo óbrazo vaš léskire réndy dro saró časo dro Filistimijakiri rig syr jov sys.” I dopatiandyja Anhuso Davidóske, rakirí: “Jov jaciá džungaló péskire Izrailjoskire manušénge i javéla miré pisharisa pe viéko.” Dro dová časo Filistimliáni skedyné peskiren xaladén vaš maribén, sob (kaj) te marénpe Izrailjosa. I phendiá Anhuso Davidóske: “Mek te javél túke džindló, so tu džása mánca dro opolčenijo (otriado), tu i tyré manušá.” I phendiá Davído Anhusoske: “Kakaná tu udžinesa, so keréla tyró pishári.” I phendiá Anhuso Davidóske: “Paldavá me keráva tut miré šereskire rakhibnarisa pe saró časo.” I myjá Samuílo, i obrovenas les saré Izrail'tiáni, i ĥaradé les dre Ráma dro léskiro fóro. Sáulo vytradyjá čovahanen i zumakiribnaskiren péskire rigátyr (themestyr). I skedynépe Filistimliáni, i giné i terdiné stanósa dro Sonama; skedyjá i Sáulo sarén Izrailjoskire manušén, i terdiné stanósa pe Gielvua. I dykhciá Sáulo Filistimijakiro stáno, i strahadyja, i zoralés zamardiape léskiro iló. I phuciá Sáulo Rástyr-Devléstyr; ne Raj Devél na otphendiá léske ni dro sunó, ni pirdál urimo, ni pirdál prorokénde. Tedy phendiá Sáulo péskire dynar'jénge: “Lathén mánge džuvliá čovahaniakirka, i me džáva ke joj i phučava látyr.” I otphendlé léske léskire dynárja: “Adáj dro Aendora isyn džuvlý čovahaniakirka.” I zlyjá Sáulo péskire ídi péstyr i uridia javír, i gijá kokoró i duj lésa manušá, i javné jone ke džuvlý ratý. I phendiá láke Sáulo: “Mangáva tut, rosčhurde mánge, i udžin mánge, pal konéste me phenáva túke.” Ne džuvlý otphendiá léske: “Tu džinés, so kerdiá Sáulo, syr jov vytradyjá čovahanen i drabakiribnaskire manušén, savé sys péskire rigátyr; vaš so tu čhuvésa siet' (fiely) miré dieske, pe xasibén mánge?” I sovlahadiá láke Sáulo Rása-Devlésa, rakirí: “Te javél džidó Raj Devél! Na javéla túke bída pal davá réndo.” Tedy džuvlý phuciá: “Konés túke te udžinav?” I otphendiá jov: “Samuilos udžin mánge.” I dykhciá džuvlý Samuilos, i zoralés zadyja gódla; i risijá džuvlý ke Sáulo, rakirí: “Sóske tu xohadian man? Tu – Sáulo.” I phendiá láke králi: “Na dar; so tu dykhésa?” I otphendiá džuvlý: “Dykháva sýrby devles, savó vydžálas phuvjátyr.” “Syr jov vydykhela?”, phuciá látyr Sáulo. Joj phendiá: “Vydžála phuvjátyr phuró murš, uridó dro dlengi ídia.” Tedy udžindiá Sáulo, so davá sys Samuílo, i pyjá mósa pe phuv i poklonindiape. I phendiá Samuílo Saulóske: “Vaš so tu čilavesa (rušynesa) man, sob (kaj) me te vydžav?” I otphendiá Sáulo: “Mánge isyn drieván pharó; Filistimliáni giné maribnása proti mánde, a Devél otgijá mándyr i butýr na otphenéla mánge ni pirdál prorokénde, ni dro sunó; paldavá me vykhardjom tut, sob (kaj) tu te podsykliakires man, so mánge te keráv?” I phendiá Samuílo: “Vaš so tu phučesa mándyr, kiéli Raj Devél otgijá tútyr i jaciá tyré vergosa (vrogosa)? Raj Devél keréla dová, so rakirdiá pirdál mánde; otlela Raj Devél kralipén tyré vasténdyr i otdéla les tyré pašatuneske, Davidóske. Adiáke syr tu na šundián Ráskire Devléskiri zan (glos) i na spolnindian pir Léskire bari xolyn pe Amalikoste, tedy Raj Devél i keréla davá pe túte kakaná. I otdéla Raj Devél Izrailjo, khetané túsa, dro Filistimlianengire vastá: tasiá tu i tyré čhavé javéna mánca, i Izrailjoskiro stáno (lod) otdéla Raj Devél dro Filistimlianengire vastá.” Tedy Sáulo jekhátyr pyjá saré péskire masenca pe phuv, pal-dová so drieván strahadyja Samuiloskire lavéndyr; pir saró i zor na jaciá dre léste, pal-dová so jov na xaja maró saró dová dyvés i sarí rat. I podgíia o doiá džuvlý ke Sáulo, i dykhciá, so jov drieván strahadyja, i phendiá: “Ĥáda, tyrí dynárica šundiá tyrí zan, i otdyjá džiibén péskiro darake (darjake), i spolnindia priphenybén, savó tu dyján mánge. Kakaná mangáva tut, pošun i tu, tyré-dynaricakiri zan: me sykaváva te xas túke kotér maró, xa i javéla dro túte zor, kiéli tu džása dro drom.” Ne jov otphendiape i phendiá: “Me na javáva te xav.” I lyné te urakiren les léskire dynárja, i adiáke-pac' i džuvlý; i jov šundiá léngiri zan, i uštyjá phuvjátyr i bestiá pe čhuibén. Džuvliáte sys dro kher thulo guruvoro, i joj sýges začhindiá les, i lyjá jaržó, zamiesindia i pekcia opriesnoki, i joj sykadiá te xan Saulóske i léskire dynar'jénge, i jone xané, i uštyné, i giné péske dro doiá-pac' rat. I skedyné Filistimliáni saré péskire opolčenii dro Afka, a Izrailitiani terdiné stanósa (lodesa) pašýl ĥanyngori, so sys dro Izriejeljo. Filistimijákire khieningi giné šelenca i tysjoncenca, Davído i léskire manušá giné palál Anhusosa. I rakirdé Filistimijákire khieningi: “So da isyn adalé Judy?” Anhuso otphendiá Filistimijákire khieningenge: “Naúšto na džinéna, so davá isyn Davído, Sauloskiro pishári, Izrailjoskire kralískiro? Jov isyn pašýl mánde butýr beršestyr, i me na lathjom dro léste ničý čoripén dolé časostyr, syr jov javdiá ke me ke davá dyvés. I rosholiasyne pe léste Filistimijákire khieningi, i phendlé léske Filistimijákire khieningi: “Otmek tu a dales manušés, mek jov te bešél pe péskiro štéto, savó tu léske dyján, sob (kaj) jov te na džal aménca pe maribén i te na kerélpe proti aménde pe maribén. Sósa jov moginjola te roskovliakirel péskire xulás, syr na šerenca dalé muršengire? Ci na odová davá Davído, savéske bagandle dre xorovody, rakirí: ‘Sáulo domardiá tysjoncy, a Davído deš tysjoncy?’ I khardiá ke pe Anhuso Davidós, i phendiá léske: “Te javél džidó Raj Devél! Tu san čačunó, i miré jakhenge mištó te javél by, sob (kaj) tu te vydžas i te zadžas mánca dro opolčenijo; paldavá so me na dykhcjom dro túte čoripén tyré javibnaskire časostyr ke me ke davá dyvés; ne dro khieningengire jakhá tu san nálačho.” I adiáke risjov kakaná, i džá ramanjosa (mirósa), i na xoliakir Filistimijákire khieningen.” Ne Davído phendiá Anhusoske: “So me kerdjom, i so tu lathian dre tyré dynariste dolé časostyr, syr me som angíl tyró muj, i ke davá dyvés, sóske by mánge te na džav i te na maravpe miré xuláskire vergenca, kraliskirenca?” I otphendiá Anhuso Davidóske: “Jav upatiandlo, so dro miré jakhá tu san lačhó. Syr Devléskiro Jangólo; ne Filistimijákire khieningi phendlé: “Mek jov te na džal aménca pe maribén.’ I adiáke uštý pe zlóko, tu i tyré xuláskire dynárja, savé javné túsa; i uštén pe zlóko, i, kiéli javéla bicialó, džán.” I uštyjá Davído, kokoró i léskire manušá, sob (kaj) te džán zlokosa i te risjon pe Filistimijakiri phuv. A Filistimliáni giné pe maribén dro Izriejeljo. Pe tríto dyvés paló (poslie) dová, syr Davído i léskire manušá giné dro Siekielago, Amalikitiani pyné paš-dyveséstyr (jugostyr) pe Siekielago, i shačkirdé les jagása, a džuvlién i sarén, kon sys dro léste, tyknestyr ke baró, na muliakirdé, ne lydžiné krig dro pliéno, i giné péskire dromésa. I javdiá Davído i léskire manušá ke fóro, i ĥáda, jov sys xačkirdo jagása, a léngire romniá, i léngire čhavé, i léngire čhaja sys lyné dro pliéno. I ĥazdyjá gódla Davído i manušá, savé sys lésa, i rondlé, paka na jaciá dro lénde zor te rovén. Lyné sys dro pliéno i duj Davidóskire romniá, Ahinoama Izriejelitianka i Avigeja, saví sys Navaloskiri romný, Karmilitianka. Davído zoralés zamyjá dro godý, adiáke syr manušá kamne te domaren les barénca; pal-dová so piridživde diesa saré manušá, sváko (kažno) pal péskire čhavénde i péskire čhajende. Ne Davído skedyjá zor nadiéiasa pe Raste-Devléste péskire Devléste, i phendiá Davído Aviafaroske rašáske, Ahimieliehoskire čhavéske: “Jan mánge efódo.” I jandiá Aviafaro efódo Davído. I phuciape Davído Rástyr-Devléstyr, rakirí: “Ci te tradavpe mánge pal davá baró vergengiro xaladybén, i ci dotradava me len? I sys phendló léske: “Tradepe, dotradesa len i otlesa.” I gijá Davído kokoró i šovšelá muršá, savé sys lésa; i javné ke sýgno rékica (lenorí) Vosoro i, khinyi, terdiné odój. I tradyjape kokoró Davído i štaršelá manušá; dujšelá manušá terdiné, pal-dová so sys na dro zor te piridžan sýgno rékica (lenorí) Vosoro. I lathné Jegiptianinos pe félda, i jandlé les ke Davído, i dyné léske maró, i jov xaja, i paniakirde les paniésa; i dyné léske paš pučki inžyro i duj pučki ziumo, i jov xaja, i zoralyja, pal-dová so jov na xaja maró, i na pija pany trin dyvesá i trin ratia. I phendiá léske Davído: “Konéskiro san tu, i katýr tu san?” I phendiá jov: “Me som ternó manúš Jegiptianino, pishári jekhe Amalikitianinoskiro, i čhurdyjá man miro xulái, pal-dová so akaná trin dyvesá, syr me zanasvalyjom; ame zagijam dre paš-dyvesýtko paš Kierieti, i dre Judaskiri provincyja, i dro paš-dyvesýtko paš Xalievoskiri, a Siekielago xačkirdiam jagása.” I phendiá léske Davído: “Ci dolydžasa tu man ke davá baró vergengiro xaladybén. I phendiá jov: “Sovlahá mánge Devlésa, so tu na muliakiresa man, i na otdesa man dro miré xuláskire vastá, i me dolydžava tut ke davá xaladybén.” I jov lydžijá les; i ĥáda, Amalikitiani, ročhuvi pir sarí doiá rig, xána i p'jena, i svenkinena baró doresybén, savó jone lyné Filistimijákire phuvjátyr i Judejákire phuvjátyr. I domarelas len Davído kalypnástyr ke bel'vél' javire dyveseskiri, i nikón léndyr na zrakhciape, apríč štaršelá terné manušénde, savé bešné pe vierbliudende i našné. I otlyja Davído saró, so lyné Amalikitiany, i dujén péskire romnien otlyja Davído. I na xasijá léste ničý, ni tyknestyr, ni barestyr, ni čhavéndyr, ni čhajendyr, ni doresybnastyr, ni saréstyr, so Amalikitiani lyné léndyr, saró riskirdiá Davído, i lyjá saró tykné i baré murda-léndyr (skotóstyr), i tradyne les angíl péskiro skoto, i rakirdé: davá doresybén – Davidóskiro. I javdiá Davído ke dolé dujšelá manušá, savé na sys dro zor te džán pal léste, i savén jov jačkirdiá pašýl sýgno rékica (lenorí) Vosoro, i vyginé jone gil (pe streč) Davidóske i gil manušénge, savé sys lésa. I podgíia Davído ke dalé manušá, i dyjá “dobridim” lénge. Tedy xoliamé i napatyvale manušéndyr, savé psirdé Davidosa, lyné te rakirén: “Pal-dová so jone na psirdé aménca, na dasa lénge doresybnastyr, savó ame otlyjam; mek kažno (sváko) te lel jekha peskirjá romniá i čhavorén i džála.” Ne Davído phendiá: “Na kerén adiáke, miré pšála, paló (poslie) dová, syr Raj Devél dyjá aménge davá, i zrakhciá amen, i otdyjá dro amaré vastá baró vergengiro xaladybén, savó javdiá proti aménde. I kon šunéla tumen dro davá réndo? Saví isyn paš manušénge, savé psirdé pe maribén, dasaví te javél paš i manušénge, savé jačnépe pašýl vurdengiro taboro (lod): pe sarénde bangé (musinen) te rozden.” Adiáke sys dalé časostyr i korigedýr (pozžedýr); i čhudiá jov davá dro zakóno i dro uphenybén vaš Izrailjo ke davá dyvés. I javdiá Davído dro Siekielago i bičhadiá doresyibnastyr phurydyrenge Judaskirenge, péskire malenge, rakirí: “Ĥáda, tuménge počastunko doresybnastyr, lyny Ráskire-Devléskire vergéndyr”, odolénge, savé sys dro Viefíljo, i dre Ramofa paš-dyvesýtko (južno), i dre Iatira, i dro Aroiro, i dro Šyfmofo, i dro Jestiemoa, i dre Rahal', i dre Iierahmieljoskire fórja, i dro Kinejakire fórja, i dre Xorma, i dro Xorašano, i dro Ataha, i dro Xievróno, i dro saré štéty, kaj psirdiá Davído kokoró i léskire manušá. Filistimliáni mardépe Izrailjoskirenca, i prastándyne Izrailjoskire muršá Filistimlianendyr, i pyné domardé pe bérga Gielvuia. I dotradyne Filistimliáni Saulos i léskire čhavén, i domardé Filistimliáni Saulos i léskire čhavén, i domardé Filistimliáni Ionafanos, i Aminadavos, i Malhisuasos, Saulóskire čhavén. I maribén proti Sauloste kerdiápe bikovlypnaskiro, i kar'je-dyibnaskire lukendyr (strielki) domardé les, i jone drieván čhinle les. I phendiá Sáulo péskire manušéske, savó lydžyja mardýtko: “Vyle tyrí kurtála i zaphusav man lása, sob (kaj) te na javén dalé naobčhindle, i te na marén man, i te na sanpe mándyr.” Ne manúš, savó lydžijá mardýtko, na kamdiá. Tedy Sáulo lyjá péskiri kurtála, i pyjá pe láte. Léskiro manúš, savó lydžijá mardýtko, dykhciá, so Sáulo myjá, to kokoró pyjá pe péskiri kurtála i myjá lésa. Adiáke myjá dro dová dyvés Sáulo i trin léskire čhavé, i léskiro manúš, savó lydžála mardýtko, adiáke-pac' i saré léskire manušá khetané. Izrail'tiáni, savé dživdé pe doloskiri rig i pal Iordáno, dykhí, so Izrailjoskire manušá prastándyne i so myjá Sáulo i léskire čhavé, mekné péskire fórja i poprastandyne, a Filistimliáni javné i zabešne dro lénde. Pe javír dyvés Filistimliáni javné te občoren domarden i lathné Saulos i triné léskire čhavén, savé pyné pe Gielvuiakiri bérga. I otčhingirde léske šeró, i zlyne léstyr mardýtko i bičhadé pir sarí Filistimijakiri phuv, sob (kaj) te den zan pal saró pe mangipnytka štéty peskiren xohané devlen i manušénge; i čhudé léskiro mardýtko pe mangipnytko štéto dro Astarta, a léskiro trúpo ublade pe vánta Bief Sano. I šundlé Iavisoskire manušá Galaadostyr pal dová, syr kerdé Filistimliáni Saulosa, i ĥazdynépe saré zoralé manušá, i giné sarí rat, i lyné trúpo Sauloskiro i léskire-čhavéngire trúpy vantatyr Bief Sanoskire, i javné dro Iaviso, i xačkirdé len odój; i lyné léngire kokalý, i garadé tel dembo dro Iaviso, i postindlepe eftá dyvesá. Syr Sáulo myjá, kiéli Davído risijá, paló (poslie) dová, kiéli jov domardiá Amalikitianen i sys dro Siekielago duj dyvesá, to ĥáda, pe tríto dyvés javdiá manúš Saulóskire stanostyr; ídia pe léste sys roskušny i práho sys pe léskiro šeró. Javdiá jov ke Davído, i pyjá pe phuv i poklonindiape léske. I phendiá léske Davído: “Katýr tu javdián?” I phendiá odová: “Me nastjom Izrailjoskire stanostyr (lodestyr).” I phendiá léske Davído: “So kerdiápe, rosphen mánge?” I odová phendiá: “Manušá našné maribnaskire štetóstyr, i but manušén zamardé, i Sáulo, i léskiro čhavó Ionafáno myné?” I phendiá Davído terné manušéske (terné-beršengireske), savó rosphenelas léske: “Syr tu džinésa, so Sáulo i léskiro čhavó Ionafáno myné?” I phendiá adavá ternó manúš, savó rosphenelas léske: “Mánge vygijá te javav pe Gielvuiakiri bérga, i ĥáda, Sáulo pyjá pe péskiri čhurdypnytko bust (kop'jo), a maribnýtka vurdyná i manušá uklisté pe grénde dotradenas les.” Tedy jov risijá pale, to dykhciá man, i khardiá man. I me phendjom: “Ĥáda, me som. Jov phendiá mánge: “Kon tu san?” I me phendjom léske: “Me – Amalikitianino.” Tedy jov phendiá mánge: “Jav pašedyr ke me, i zamar man, pal-dová so meribnaskiri men'ka oblyja man, di miro usá iščo (inké) dre mánde.” I me podgijom ke jov i zamardjom les, pal-dová so me džindjom, so jov na javéla džidó paló (poslie) péskire periben; i lyjom me viánka, saví sys pe léskiro šeró, i braslieto (koro), savó sys pe léskiro vast i jandjom len ke miro xuláj adarík.” Tedy suhtyldia Davído péskire ídi, i roskustia len, adiáke-pac' i saré manušá kerdé, savé sys lésa, i tugindle godlása (golosindle) i rondlé, i postyndle ke bel'vél' pal Sauloste, i pal léskire čhavéste Ionafanoste, i pal Ráskire-Devléskire manušénde, i pal Izrailjoskiro kher, so jone myné kurtalátyr. I phendiá Davído terné-baršengireske, savó rosphendiá léske: “Katýr tu san? I phendiá jov: “Me som čhavó Amalikitianinoskiro, savó javdiá javire rigátyr.” Tedy Davído phendiá léske: “Syr tu na poddarandyjan te ĥazdes vast, sob (kaj) te zamares Ráskire-Devléskire pomakhibnaskires?” I khardiá Davído jekhés terné-beršengires, i phendiá léske: “Jav pašýl, muliakir les.” I dová zamardiá les, i jov myjá. I phendiá ke jov Davído: “Rat tyró isyn pe šeró tyró, pal-dová so tyré uštá dophendle pe túte, kiéli tu rakirdian: ‘Me zamardjom Ráskire-Devléskire pomakhibnaskires.’” I obrondia Davído Saulos i léskire čhavés Ionafanos dalé rovibnytkone giliasa, i phendiá te vysykliakiren Judáskire čhavén luka (roibnytko) gilý, syr sys začhindló dre Lylvarí Čačuneskiri, i phendiá: “Šukaripén tyró, o Izrailjo, domardo pe tyré vučipna! Syr pyné zoralé! Na rosphenén dre Giefa, na rakirén zoralés (na ob'iavinen) pe vulícy (gásy) Askalonoskire, sob (kaj) te na radynénpe Filistimlianengire čhaja, sob (kaj) te na radynénpe zoralés naobčhindlengire čhaja. Bérgi Gielvuiakire! Mek te na zdžal ni rosa (pahlyn), ni bryšýnd pe tuménde, i, mek te na javél pe tuménde féldy baritkonenca (plodenca), pal-dová so odój čhurdynó ščýto zoralengiro Sauloskiro, ščýto, syr by jov te na javél pomakhno jeliejosa. Bi rateskiro ranienendyr, bi tukoskiro (čekenoskiro) zoralengire Ionafanoskiro lúko na risijá pale, i Sauloskiri kurtála na risijá čhučí (pusto). Sáulo i Ionafáno, savé sykade patýv jekh jekhéske i dživdé syr pšála dro péskiro džiibén, i jone na roziačnepe dro meribén péskiro; sygnydyr orlendyr (kidendyr), zoralydyr ščerendyr (lievendyr) jone sys. Čhajale Izrailjoskire! Rovén pal Sauloste, savó uridia tumen dre bagrianica šukarjakiribnasa i doreselas pe tumaré ídi suvnakuné ukedyibena. Syr zoralé pyné pe maribén! Zamardo sys Ionafáno pe péskire vučipna. Piridživava me pal túte, miro pšal Ionafáno; tu i sánas drieván drógo vaš mánge; patýv tyró ke me sys vaš mánge baredýr džuvliakire kamibnastyr. Syr zoralé pyné, syr xasijá maribnaskiro mardýtko (oružyjo)! Paló (poslie) dová Davído phuciape Rástyr-Devléstyr, rakirí: “Ci te džav mánge dro vari-savó Judáskire for'jéndyr? I phendiá léske Devél: “Džá.” I phendiá Davído: “Karik te džav?” I phendiá Jov: “Dro Xievróno.” I gijá odorík Davído i duj léskire romniá Ahinoama Izriejelitianka i Avigeja, saví sys Navaloskiri romný, Karmilitianka. I manušén, savé sys lésa, jandiá Davído, kažnones (svakones) léskire sem'iasa (irjasa), i lyné jone te dživén ke fóro Xievróno. I javné Judáskire manušá, i pomakhne odój Davidós pe kralipén pe Judáskiro kher. I rosphendlé Davidóske, so manušá Galaadóskire Iavisostyr garadé Saulos. I bičhadiá Davído péskire manušén ke Iaviso Galaadóskire manušá, te phenén lénge: “Te javén bahtiakirde tumé Rástyr-Devléstyr, pal dová so kerdé davá lačhipén péskire xuláske Saulóske i ĥaradé les. I kakaná mek te otdél tuménge Raj Devél lačhipnása i čačipnása; i me keráva tuménge mištypén pal dová, so tumé davá kerdé; kakaná mek te zoraljon tumaré vastá, i te javén tumé murškané; pal-dová so tumaró xuláj Sáulo myjá, a man pomakhcia Judáskiro kher kralísa pe péste.” Ne Avieníro, Niroskiro čhavó, barydyró Saulóskire xaladéngiro, lyjá Jevosfiejos, Saulóskire čhavés, i jandiá les dre Mahanaimo, i čhudiá les kralísa pe Galaádo, i Ašuro, i Izriejeljo, i Jefriémo, i Vieniamino, i pe saró Izrailjo. Štardešá berš sys Jevosfiejoske, Saulóskire čhavéske, kiéli jov jaciá kralísa pe Izrailjo, i sys kralísa duj berš.” Jekh kher Judáskiro jaciápe Davidosa. Saró časo, dro savó Davído sys kralísa dro Xievróno pe Judáskiro kher, sys eftá berš i šov čhoná. I vygijá Avieníro, Niroskiro čhavó i Jevosfiejoskire slúgi (dynárja), Saulóskire-čhavéskire, Mahanaimostyr dro Gavaóno. Vygijá i Ioávo, Saruiaskiro éskire, Davidóskire dynar'jénca, i strenindlepe pašýl Gavaonoskiro prudo (venderi), i zabešne odolé pe jekh prudoskiri rig, a adalé pe javír prudoskiri rig. I phendiá Avieníro Ioavoske: “Mek te uštén terné manušá i te pobašaven angíl aménde.” I phendiá Ioávo: “Mek te uštén.” I uštyné, i giné dešudúj Vieniamitiani Jevosfiejoskire rigátyr, Saulóskire-čhavéskire, i dešudúj Davidóskire dynar'jéndyr (slugéndyr). Jone suhtylde jekh jekhés pal šeró, učhude kurtála jekh jekhéske dro pašvaro, i pyné khetané. I sys khardo davá štéto Xielkafo-Xacurimo, so sys dre Gavaóno. I vygijá dre dová dyvés baró maribén, i Avieniros, Izrailjoskire manušénca, domardé Davidóskire dynárja. I sys odój trin Saruiaskire čhavé: Ioávo, i Aviesa, i Asailo. Asailo sys lokho pe ĥerá, syr sierna pe félda. I tradyjape Asailo pal Avieniroste, i tradyjá les, na riskiri ni pe čačí (pra vo) rig, ni pe zérvo (liévo) rig Avieniroskire šperatyr. I obdykhciape Avieníro pale, i phendiá: “Ci tu san adavá, Asailo?” Odová phendiá: “Me som.” I phendiá léske Avieníro: “Rískir pe čačí, ci pe zérvo, i vykede péske jekhés terné manušéndyr, i le péske léskiro mardýtko.” Ne Asailo na zakamdiá te otiačel léstyr. I phendiá Avieníro javír mólo Asailoske: “Otiač mándyr, sob (kaj) me te na čhuvav tut pe phuv; tedy savésa mósa javáva me ke Ioávo, ke tyró pšal?” Ne odová na zakamdiá te otiačel. Tedy Avieníro, riskirdiá čhurdypnytko bust (kop'jo), čhindiá les dre per; čhurdypnytko bust progijá pirdál léste, i jov pyjá odoia-pac', i myjá pe štéto, kaj pyjá i myjá Asailo, saré, kon prodžalas odój terdjonas. I tradyne Ioávo i Aviesa Avieniros. Kham bestiá, kiéli jone javde ke bérgica Ama, so isyn proti Giaha, pe drom ke Gavaonoskiri čhučí phuv. I skedynépe Vieniamitiani pašýl Avieniroste, i kerdé jekh opolčenijo (otriado), i terdiné pe jekhe bergicakiro vučipén. I zadyja gódla Avieníro ke Ioávo, i phendiá: “Ci saró viéko javása te xas kurtála? Ci tu na džinésa, so vygiiben javéla kirko? I paka tu na phenésa manušénge, sob (kaj) jone te pirijačen te tradén péskire pšalén?” I phendiá Ioávo: “Te javél džidó Devél! Kóli by tu te na rakirés pe javír (javirčanes), tedy iščo (inké) zlokosa (rankosa) pirijačenas by manušá te tradén peskiren pšalén.” Zabašadia Ioávo rogosa (trubasa), i terdiné saré manušá, i na tradyne butýr Izrail'tianén; pirijaciá maribén. Avieníro i léskire manušá giné loščynasa sarí daja rat, i piriginé Iordáno, i giné pir saró Bitrono, i javné dro Mahanaimo. I risijá Ioávo Avieniroskire tradypnastyr, i skedyjá saré manušén, i na uhtyldia Davidóskire dynar'jéndyr (slugéndyr) dešujenia manušén apríč Asailoste. Dynárja Davidóskire domardé Vieniamitianen i Avieniroskiren manušén: myné len trin šelá šovdešá manušén. I lyné Asailos, i garadé les dre léskire-dadéskiri koplíca, so sys dro Vifliejémo. Ioávo péskire manušénca gijá sarí rat, i pe zlóko javdiá dro Xievróno. I sys ĥará (dlúges) košybén maškír Sauloskiro kher i Davidóskiro kher. Davído usá butýr i butýr jačelas zoraló, a Sauloskiro kher butýr i butýr bizorjakirelaspe. I bijándyne Davidóste čhavé dro Xievróno. Anglatunó léskiro čhavó sys Amnono Ahinoamatyr Izriejel'tiankatyr, a javír léskiro čhavó – Daluia Avigejatyr, saví sys angledýr Navaloskiri romný, Karmilitianka; tríto – Aviesalómo, Maahakiro čhavó, Falmajoskire-čhakiro, Giesuroskire-kralískiro; štárto – Adonija, Agifaskiro čhavó; pándžto – Safatija, Avitalakiro čhavó; šóvto – Jefieraamo Eglatyr, Davidóskire-romniatyr. Jone bijándyne Davidóste dro Xievróno. Kiéli sys košybén maškír kher Sauloskiro i kher Davidóskiro, tedy Avieníro podrikirelas Sauloskiro kher. Sauloste sys naložnica (bisovlahiri džuvlý), pir lav Ricpa, Aijoskiri čhaj. I phendiá Jevosfiejo (Iievosfiejo) Avieniroske: “Sóske tu zagijan ke miré-dadéskiri naložnica?” Avieníro drieván rosholiasyja pe lavá Jevosfiejoskire i phendiá: “Naúšto me som – džukleskiro šeró? Me proti Judaste kerdjom kakaná lačhipén Saulóskire kheréske, tyré dadéske, léskire pšalénge i léskire malenge (drugenge), i me na otdyjom tut dre Davidóskire vastá, a tu kakaná rodesa pe mánde grého pirdál džuvliáte. Dová i dová mek te kerél Devél Avieniroske, i iščo (inké) butýr keréla léske! Syr sovlahadiá Raj Devél Davidóske, adiáke i me keráva léske: Me otlava kralipén Saulóskire kheréstyr, i čhuváva priestolo Davidóskiro pe Izrailjo i pe Judaste, Danostyr ke Virsavijo.” I na mogindiá Jevosfiejo te otphenel Avieniroske, pal-dová so jov darandyja léstyr. I bičhadiá Avieníro péstyr manušén ke Davído, te phenén: “Konéskiri isyn daja phuv” i iščo (inké) te phenén: “Ker dorakiribén mánca, i miro vast javéla túsa, sob (kaj) te riskires ke tu saré Izrailjoskire manušén.” I phendiá Davído: “Mištó, me keráva dorakiribén túsa, féni (tóka) mangáva me tut pal jekh, tu na dykhésa muj miro, kóli na janesa pésa Mielhola, Saulóskire čha, kiéli tu javésa te dykhespe mánca.” I otbičhadia Davído péskire manušén ke Jevosfiejo, Sauloskiro čhavó te phenén: “Otdé mirja romniá Mielhola, savjá me dorescjom pal šel Filistimlianengire občhinybena pe jagóro (krajo).” I bičhadiá Jevosfiejo, i lyjá la romestyr, Faltijostyr, Laišoskire čhavestyr. Gijá lása i lákiro rom, i rovibnasa prolydžija la ke Bahurima; ne Avieníro phendiá léske: “Risjov pale.” I jov risijá. I risijá lavésa Avieníro ke Izrailjoskire phurydyrá, rakirí: “I tasiá, i tríto dyvés tumé kamlé, sob (kaj) Davído te javél kralísa pe tuménde, kakaná kerén davá, pal-dová so Raj Devél phendiá Davidóske: “Vastésa Miré pishariskiresa Davidoskiresa Me zrakháva Miré manušén, Izrailjo, vastéstyr Filistimlianengirestyr i saré léskire vergéngire vastéstyr.” Dová-pac' rakirdiá Avieníro i Vieniamitianenge. I gijá Avieníro dro Xievróno, sob (kaj) te piriphenel Davidóske saró, so kamlé Izrailjo i Vieniaminoskiro kher. I javdiá Avieníro ke Davído dre Xievróno i lésa biš manušá, i kerdiá Davído baró skamínd vaš Avieniroske i manušénge, savé sys lésa. I phendiá Avieníro Davidóske: “Me uštava, i džáva, i me skedáva ke xulái, miro králjo, saré Izrailjoskire manušén, i jone zadžána dro zavieto dorakiribén túsa, i tu javésa kralísa pe sarénde, syr kaméla tyró di.” I otmekciá Davído Avieniros, i jov gijá ramanjosa (mirósa). I ĥáda, Davidóskire dynárja Ioavosa javné droméstyr, i jandlé pésa but doresybén (dobyča); ne Avieniros na sys Davidosa dro Xievróno, pal-dová so Davído otmekciá les, i jov gijá ramanjosa. Kiéli Ioávo i saré xaladé, savé psirdé lésa, javné, tedy Ioavoske rosphendlé: “Sys Avieníro, Niroskiro čhavó, ke králi, i odová otmekciá les, i jov gijá ramanjosa (mirósa).” I javdiá Ioávo ke králi, i phendiá: “So tu kerdián? Ĥáda, sys ke tu Avieníro; sóske tu otmekcian les, i jov gijá krig? Tu džinésa Avieniros, Nirovoskires čhavés: jov sys javi te xohavél tut, te dodžinelpe vygiiben tyró i zagiibén tyró, i te rozĥaljol saró, so tu kerésa.” I vygijá Ioávo Davidostyr, i bičhadiá péskire manušén palál pal Avieniroste; i riskirdé jone les Siroskire ĥanyngatyr, bi Davidóskire džinybnaskiro. Kiéli Avieníro risijá dre Xievróno, tedy Ioávo otlydžija les andré pórta (vráty), sýrby vaš dová, sob (kaj) te rakirél lésa jekh pe jekh, i jov odój čhindiá les dro per. I myjá Avieníro pal Asailoskiro rat, Ioavoskire pšaleskiro. I šundiá korigedýr (pozže) Davído pal davá, i phendiá: “Me na som bangó i kralipén miro dro viéko angíl Raste-Devléste pal Avieniroskiro rat, Niroskire čhavéskiro; mek te perél jov pe Ioavoskiro šeró i pe saró léskire-dadéskiro kher; mek nikieli te na jačélpe Ioavoskiro kher bi odoleskiro, savó, ci savó obrikirelape pe destó, cji, savó peréla kurtalátyr, ci savéste nane maró. Ioávo i léskiro pšal Aviesa zamardé Avieniros, pal-dová so jov zamardiá léngire pšalés Asailos dro maribén pašýl Gavaóno. I phendiá Davído Ioavoske i saré manušénge, savé sys lésa: “Roskušen tumaré ídi, i ur'jenpe dre kalypén, i rovén pal Avieniroste.” I králi Davído gijá pal léskiro mulykano (grobo). Kiéli garadé Avieniros dre Xievróno, to tedy králi zoralés rondiá pal Avieniroskiro mulykano, rondlé i saré manušá. I obrondia králi Avieniros, rakirí: “Ci dylyné meribnasa te merél Avieniroske?” Vastá tyré na sys sphandle, i ĥerá tyré na sys dre sastyrá, i tu myjan, syr meréna rozmar'ibnar'jendyr.” I saré manušá lyné butýr te rovén pal léste. I javné saré manušá te sykavén te den Davidóske maró, kiéli sys dyvés; ne Davído sovlahadiá, rakirí: “Dová i dová mek te kerél mánca Raj Devél, i iščo (inké) butýr keréla, kóli me ke khameskiro zagiibén xava maró ci vari-so.” I saré manušá udžindlé davá, i pir iló sys lénge davá, syr i saró, so kerdiá králi, jaciá pir iló saré manušénge. I udžindlé saré manušá i saró Izrailjo dro dová dyvés, so na kralístyr vygijá Avieniroskiro meribén, Niroskire čhavéskiro. I phendiá králi péskire dynar'jénge: “Ci džinéna tumé, so dro davá dyvés dre Izrailjo myjá šeraló i baró murš?” Me kakaná iščo (inké) bizorjákiro, mek me(xoc') i som pomakhno pe kralipén, a adalé manušá, Saruiaskire čhavé, zoraledýr mándyr; mek te del Raj Devél manušéske, savó keréla fuipén pir léskiro fuipén!” I šundiá Iievosfiejo, Sauloskiro čhavó, so myjá Avieníro dro Xievróno, i obmeknepe léskire vastá, i saró Izrailjo strahadyja. Iievosfiejoste, Saulóskire čhavéste, sys duj xaladéngire barydyrá; lav jekheskiro – Baana, i lav javireskiro – Rihavo, Biejerofianinoskire-Riemonoskire čhavé, Vieniaminóskire rodóstyr, pal-dová so i Biejerofo otlydžalaspe ke Vieniamino. I našné Biejerofiani dre Gifaima, i jačnépe odój manušénca javire rigátyr ke davá dyvés. Ionafanoste, Saulóskire čhavéste, sys langalo čhavó. Pandž berš sys léske, kiéli javdiá zan (zvies') pal Sauloste i Ionafanoste Izriejeljostyr, i nian'ka léskiri, lyi les, nastiá. I kiéli joj sýges prastándyja, tedy jov pyjá i kerdiápe langalesa. Lav léskiro sys Miemfivosfiejo. I giné Biejerofianinoskire-Riemonoskire čhavé, Rihavo i Baana, i javné dro dyveseskiro baró xačkiribén ke Jevosfiejoskiro kher; a jov sys sutó dre paš dyvés. Rihavo i Baana, léskiro pšal, zaginé andré dro kher, sýrby vaš dová, sob (kaj) te len parnó giv; i čhindlé les dro per, i našné. Kiéli jone zaginé dro kher, Iievosfiejo sys paštó pe péskiro čhuibén, dre soibnytko péskiri štúba; i jone zamardé les, i muliakirdé les, i otčhingirde léskiro šeró, i lyné léskiro šeró pésa, i giné čhučé dromésa sarí rat; i jandlé šeró Iievosfiejoskiro ke Davído dro Xievróno, i phende kralíske: “Ĥáda, isyn Iievosfiejoskiro šeró, Saulóskire čhavéskiro, tyré vergoskiro, savó rodyja tyró di; kakaná Raj Devél otdyjá pal miré xulaste, kralíste, Saulóske i léskire rodóske.” I otphendiá Davído Rihavoske i Baanaske, léskire pšaléske, Biejerofianinoskire-Riemonoskire čhavénge, i phendiá lénge: “Te javél džidó Raj Devél, savó zrakhciá miro di kažnoné bidatyr! Kóli doles, kon jandiá mánge zan (zvies'), phení: “Ĥáda, myjá Sáulo”, i kon gindia pes, so jov jandiá lačhí zvies', to me uhtyldjom i zamardjom les dro Siekielago, zamiést dová, sob (kaj) te dav léske mazúri (nagrada), tedy kakaná, kiedy nalačhé manušá zamardé manušés, savó isyn nabango dro léskiro kher pe léskiro čhuibén, naúšto me na zrodava léskiro rat tumaré vastéstyr i na tradava tumen phuvjátyr?” I priphendiá Davído dynar'jénge, i zamardé len, i otčhingirde lénge vastá i ĥerá, i ublade len pašýl venderi (prudo) dro Xievróno. A šeró Jevosfiejoskiro lyné i garadé dre koplíca Avieniroskiri, dro Xievróno. I javné saré ródycy (kolieny) Izrailjoskire ke Davído dro Xievróno, i phendlé: “Ĥáda, ame – kokalý tyré i mas tyró; iščo (inké) tasiá i tríto dyvés, kiéli Sáulo sys kralísa pe aménde, tu vylydžijan i zalydžijan Izrailjo; i phendiá Raj Devél túke: “Tu javésa te rakhés Miré manušén, Izrailjoskiren, i tu javésa Izrailjoskire šeralesa.” I javné saré Izrailjoskire phurydyrá ke králi dro Xievróno, i kerdiá lénca králi Davído zavieto (dorakiribén) dro Xievróno angíl Raste-Devléste; i pomakhne Davidós dro kralíste pe Izrailjo. Trindeša (trijánda) berš sys Davidóske, kiéli jov jaciá kralísa; jov sys kralísa štardešá berš. Dro Xievróno jov sys kralísa pe Judaste eftá berš i šov čhoná, i dro Jerusalimo sys kralísa trijánda trin berš pe saró Izrailjo i Judaste. I giné králi i léskire manušá pe Jerusalimo proti Jevusiejende (Iievusiejende), odolé-rigakire manušénde: ne jone rakirdé Davidóske: “Tu na zadžasa adarík; tut ottradena kororé i langale”, – ada značyndia: “Na zadžála adarík Davído.” Ne Davído lyjá tvárdyma (diz) Sióno: davá – fóro Davidóskiro. I phendiá Davído dre dová dyvés: “Kažno (sváko) manúš, syr zamarela Iievusiejos, mek te phusavel čhurdypnytkone bustiasa i langalen, i kororen, savénge isyn na pir iló Davidóskiro di.” Paldavá i rakirelape: “Kororó i langalo na zadžála dro Ráskire-Devléskiro Kher.” I lyjá te dživél Davído dre tvárdyma/diz (kriepost'), i khardiá les Davidóskire forosa, i občhude kherá pašýl Millo i andré. I jaciá Davído zoraledýr, i barija dre sláva, i Raj Devél, Devél, bolybnáskire-jangoléngiro, sys lésa. I pribičhadia Xiramo, Tiroskiro králi, peskiren manušén ke Davído i kiedrytka kaštá, i kherá-keribnaskiren (plotniken), barengiren (kamienščyken), i jone kerdé Davidóske kher. I ĥalyjá Davído, so Raj Devél čhudiá les kralísa pe Izrailjo, i so ĥazdyjá léskiro kralipén vaš Izrailjoskire Péskire manušénge. I lyjá Davído butýr naložnicen i romnien Jerusalimóstyr, paló dová, syr javdiá Xievronostyr. I bijándyne iščo (inké) Davidostyr čhavé i čhaja. I ĥáda, isyn lavá, savé bijándyne léstyr dre Jerusalimo: Samuso, i Sovavo, i Nafano, i Solomóno, i Jeviearo, i Jelisuo, i Nafieko, i Iafio, i Jelisamo, i Jelidao, i Jelifaliefo. Kiéli Filistimliáni šundlé, so Davidós pomakhne pe kralipén pe Izrailjo, tedy ĥazdynépe saré Filistimliáni te rodén Davidós. I šundiá Davído, i gijá dre tvárdyma/diz (kriepost'). A Filistimliáni javné, i terdiné pe dólo Riefaimo. I vyphuciape Davído Rástyr-Devléstyr, rakirí: “Ci te džav mánge proti Filistimlianende? Ci otdesa Tu len dre miré vastá?” I phendiá Raj Devél Davidóske: “Džá, pal-dová so Me otdáva Filistimlianen dre tyré vastá.” I gijá Davído dre Vaalo-Pieracymo, i domardiá len odój, i phendiá Davído: “Raj Devél rozmardiá miré vergén angíl mánde, syr rozlydžala paní.” Paldavá i dolé štetoske dynó lav Vaalo-Pieracymo. I jačkirdé odój Filistimliáni péskire vyčhindlé muiá, a Davído péskire manušénca lyjá len. I nevés javné Filistimliáni, i terdiné pe dólo Riefaimo. I phuciape Davído Rástyr-Devléstyr, i Jov otphendiá léske: “Na vydža gil lénge, a zadžá lénge palalestyr i džá ke jone bal'zamitkone-roščakire (veladiniakire) rigátyr; i kiéli šunesa šumo sýrby savó džála pir bal'zamitko-vešengiro vučipén, to tedy džá, pal-dová so tedy gijá Raj Devél angíl túte, sob (kaj) te do marel Filistimoskire xaladén. I kerdiá Davído, syr rakirdiá léske Raj Devél, i domardiá Filistimlianen Gavajatyr ke Gaziero. I nevés skedyjá Davído sarén vykedyné manušén Izrailjostyr, trijánda tysjoncy. I uštyjá, i gijá Davído i saré manušá, savé sys lésa Vaalostyr Judaskirestyr, sob (kaj) te pirilydžas odothýr Devléskiro kovčego, savó kharélape Ráskire-Devléskire, bolybnáskire-jangoléngire lavésa, savó isyn beštó pe xieruvimy. I čhudé Devléskiro kovčego pe nevó maribnýtko vurdén, i vylydžiné les Aminadavoskire kheréstyr, so sys pe bérga. Čhavé Aminadavoskire, Ozo i Ahio, lydžiné nevó maribnýtko vurdén. I lydžiné les Devléskire kovčegosa Aminadavoskire kheréstyr, savó sys pe bérga; i Ahio gijá angíl kovčego. A Davído i saré Izrailjoskire čhavé bašade angíl Devléste pe rázna bašaibnytka strumiénty kiparisoskire vešéstyr, i pe cytry (arfy), i pe psaltiri (luty), i pe timpany (bubny), i pe sistry (gusli), i pe cymbaly. I kiéli doginé ke Nahonoskiri šúrna (gumno), to Oza vytyrdyja péskiro vast ke Devléskiro kovčego i lyjape pal léste, pal-dová so guruva bandiakirde les. Ne Raj Devél rosholiasyja pe Ozaste, i zamardiá les odój Devél pal daja nahrato bang, i myjá jov odój pašýl Devléskiro kovčego. I pyjá duhósa Davído, so Raj Devél muliakirdiá Ozas. Štéto davá i ke/žýko davá dyvés kharélape: “Ozaskiro muliakiriben.” I strahadyja Davído Rástyr-Devléstyr dro dová dyvés, i phendiá: “Syr te zadžál ke me Ráskire-Devléskire kovčegoske?” I na zakamdiá Davído te lydžál Ráskire-Devléskiro kovčego ke pe, dro Davidóskiro fóro, a zalydžijá les dro Giefianinoskire-Aviedaroskiro kher. I sys Ráskire-Devléskiro kovčego dro Giefianinoskire-Aviedaroskiro kher trin čhoná, i bahtiakirdiá Raj Devél Aviedaros i saró léskiro kher. Kiéli rosphendlé kralíske Davidóske, phení: “Raj Devél bahtiakirdiá Aviedaroskiro kher i saró, so sys léste, to gijá Davído i svenkitkes pirilydžija Ráskire-Devléskiro kovčego Aviedaroskire kheréstyr dro fóro Davidóskiro. I kiéli manušá, savé lydžiné Ráskire-Devléskiro kovčego i giné pir šov ĥerunia (šagi), to jov janelas dro svénto dyibén Ráske-Devléske guruvóres i bakrés. Davído uhtelas saré zorjátyr angíl Raste-Devléste, uridó sys Davído dro parkalitko efódo. Adiáke Davído i saró Izrailjoskiro kher lydžiné Ráskire-Devléskiro kovčego radybnaskire godlása i rogoskire bašaibnasa. Kiéli vygijá Ráskire-Devléskiro kovčego dro Davidóskiro fóro, to Mielhola, Sauloskiri čhaj, dykhciá dre fenštra, i, dykhí kralís Davidós, savó uhtelas i khelelas angíl Raste-Devléste, to joj lyjá te na kutiakirel les dro péskiro iló. I jandlé Ráskire-Devléskiro kovčego, i čhudé les pe péskiro štéto maškirál šátra (skínija), saví kerdiá vaš léske Davído; i jandiá Davído célo shačkiribén angíl Raste-Devléste i ramanjona (mirna) svénta dyibená Ráske-Devléske. Kiéli Davído mekciá te janel celoné shačkiribnaskire i ramanjona (mirna) svénta janybená, tedy bahtiakirdiá jov manušén Ráskire-Devléskire, bolybnáskire-jangoléngire lavésa; i rozdyja Davído saré manušénge, saré butenge Izrail'tianenge, syr muršenge, adiáke i džuvlienge, pir jekh maró, i pir kotér pekno mas, i pir jekh marikly kažnonéske. I giné saré manušá, kažno dro péskiro kher. Kiéli Davído risijá, sob (kaj) te bahtiakirél péskiro kher, tedy e Mielhola, Sauloskiri čhaj, vygijá léske pe strieč, i phendiá: “Syr sykadiá pes saréndyr adadyvés Izrailjoskiro králi, sykadiá pes adadyvés angíl péskire dynaricengire i dynar'jengire jakhá, syr sykavéla pes vari-savó čhučó/balvalitko manúš!” I phendiá Davído Mielholake: “Angíl Raste-Devléste, Savó vykedyjá man tyré dadéske i saré léskire kheréske čhuvi man šeralesa pe Ráskire-Devléskire manušénde, pe Izrailjo; angíl Raste-Devléste me javáva te bašavav i te khelav; i me iščo (inké) butýr teliakirava pes, i čhuváva pes teledýr dre miré jakhá, i angíl dynaricende, pal savénde tu rakirésa, me javáva slavútno.” I Mielholate, Saulóskire čhate, na sys bijatén (čhavén) ke lákiro meribnaskiro dyvés. Kiéli králi dživdiá dro péskiro kher, i Raj Devél štyliakirdia les saré léskire pašatuné vergéndyr, tedy phendiá králi prorokoske Nafanoske: “Ĥáda, me dživáva dro kiedrytko kher, a Ráskire-Devléskiro kovčego isyn tel šátra.” I phendiá Nafano kralíske: “Saró, so isyn túte pe iló, džá, ker; pal-dová so Raj Devél isyn túsa.” Ne dre doiá rat sys lav Ráskire-Devléskiro ke Nafano: “Džá, phen Miréske pisharíske Davidóske: ‘Ádiake rakiréla Raj Devél: ci tu kerésa Mánge kher, sob (kaj) Me te javav odój, kiéli Me na dživdjom dolé časostyr dro kher, syr vylydžijom Izrailjoskire čhavén Jegiptóstyr, i ke davá dyvés, ne pirigijom dre šátra i dre skínija? Kaj Me na psirdjom sarénca Izrailjoskire čhavénca, ci rakirdjom Me jekh lav vari-savéske rodóstyr, savéske Me vykedyjom te rakhél Miré, Izrailjoskire manušén: “Sóske na čhuvéna Mánge kiedrytko kher?’” I kakaná adiáke phen Miré pisharíske Davidóske: “Ádiake rakiréla Raj Devél, bolybnáskire-jangoléngiro: ‘Me lyjom tut bakréngire stadatyr, sob (kaj) tu te javes Miré Izrailjoskire manušéngire šeralesa; i Me sómas túsa usiendie (viezdie), karik na psirdianoie tu, i tradyjom krig sarén tyré vergén angíl túte, i kerdjom lav tyró slavutnonesa, syr isyn lav slavutnonengiro pe phuv. I Me keráva štéto vaš Miré manušénge, vaš Izrailjo, i Me čhuváva pe phuv les, i javéla jov štylés te dživél pe péskiro štéto, i na javéla te tuginelpe butýr, i nalačhé manušá na javéna butýr te tradén les, syr angledýr, dolé časostyr (cyrostyr), syr Me čhudjom sendar'jen pe Miré Izrailjoskire manušénde; i Me štyliakirava tut saré tyré vergéndyr. I Me Raj Devél déla lav túke, so Jov keréla túke kher. Kiéli spolninenape tyré dyvesá, i tu pasjosa tyré dadénca, tedy Me čhuváva paló (poslie) túte tyró ródo, savó vydžála tyré maséndyr, i zoraliakirava léskiro kralipén. Jov keréla kher vaš Miré lavéske, i Me čhuváva léskiro kralipén pe viéko. Me javáva léske dadésa, i jov javéla Mánge čhavésa; i kóli (so) jov keréla grého, Me čhuváva xas' (kára) pe léste muršengire khieningoskire destesa i maribnása manušytkoné čhavéndyr; ne tangipén (žalima) Miro Me na otlava léstyr, syr Me otlyjom Saulostyr, savés Me mekcjom angíl túte. I javéla zoralés terdó tyró kher i kralipén tyró pe viéko angíl Mánde, i priestolo tyró terdjola pe viéko.’” Saré dalé lavá i saró davá dykhibén Nafano piriphendia Davidóske. I gijá králi Davído, i terdijá angíl Raste-Devléste, i phendiá: “Kon me som, Rajo Dévla, Rajo Dévla, i so dasavo kher miro, so Tu man adiáke barjakirdian. I davá sykadyjá iščo (inké) nábut dre Tyré jakhá, Rajo Dévla miro, Rajo Dévla; ne Tu rakirdian iščo (inké) pal kher Tyré dynariskiro dro anglypén. Davá isyn pir manušýtko, Rajo Dévla miro, Rajo Dévla! So butýr moginéla te phenél Túke Davído? Tu džinésa pisharís Tyrés, Rajo Dévla miro, Rajo Dévla! Vaš lav Tyró i pir iló Tyró Tu kerésa davá, sykavi saró davá Tyré pisharíske. Pir saró Tu san baró, Rajo Dévla miro, Rajo Dévla! Paldavá so nane Nikón dasavo-pac', syr Tu san, i nane Devlés, apríč Túte, pir saró, so ame šundiám péskire kanenca. I kon isyn ravno Dyre manušénge Izrailjoske, jekhe manušénge pe phuv, vaš savénge javdiá Raj Devél, sob (kaj) te zrakhél les Péske dre manušénde, i te proslavinel Péskiro lav, i te kerél baró i darano angíl Tyré manušénde, savén Tu lyjan Péske Jegiptianendyr, tradyjan krig manušén i léngire devloré? I Tu zorjakirdian pal Péste Tyré Izrailjoskire manušén, syr Péskire manušén, pe viéko, i Tu, Rajo Dévla, jacián léskire Devlésa. I kakaná, Tu, Rajo Dévla, spolnin pe viéki lav, savó rakirdian Tu pal Tyré pishariste, i pal léskiro kher, i ker dová, so Tu rakirdian. I mek te slavinelpe lav Tyró dre viéki, sob (kaj) te rakirén: “Raj Devél, bolybnáskire-jangoléngiro – Devél pe Izrailjo.” I kher pishariskiro, Tyré Davidóskiro mek te javél zoraló angíl Túte. Adiáke syr Tu, Rajo Dévla, bolybnáskire-jangoléngiro, Devél Izrailjoskiro, otčhakirdian pisharíske Tyréske, rakirí: ‘Keráva túke kher, tedy pishári tyró otdyjá péskiro iló, sob (kaj) te mangavpe Túke dasavé patierjasa (molitvasa). I adiáke, Rajo Dévla miro, Rajo Dévla! Tu san Devél, i lavá Tyré isyn na xohané, i Tu dyján Tyré pisharíske dasavo lačhipén! I kakaná lepe i bahtiakir Tyré-pishariskiro kher, sob (kaj) jov te javél viéčno angíl Túte; pal-dová so Tu, Rajo Dévla miro, Rajo Dévla, phendián davá, i bahtiakiribnasa Tyresa jačéla Tyré pishariskiro kher bahtiakirdó dro viéko.” Paló (poslie) davá Davído domardiá Filistimlianen i štyliakirdia len, i lyjá Davído Miefiego-Gaamma Filistimlianengire vasténdyr. I domardiá jov Moavitianen, i zmierindia len šelesa, čhuvi len pe phuv; i otmierindia duj šele pe muliakirdende, a jekh šelo te jačkiren dre džidende. I jačné Moavitiani Davidóste pishar'jénca i pleskirde dan'. I zamardiá Davído Adraazaros, Riehovoskire čhavés, Suvakire kralís, kiéli odová gijá, sob (kaj) te riskirél péskiri zor pe kustýk pašýl reka (len') Jefrato; i lyjá Davído léstyr tysjonco eftašelá manušén uklisté pe grénde i biš tysjoncy pezal, i podčhindia Davído žyly saré grénde, savé sys dyné andré dre maribnýtka vurdyná, a jačkirdiá péske léndyr vaš šel maribnýtka vurdyná. I javné Siriicy Damaskostyr te poden vast Adrazaroske, ke Suvakiro králi; ne Davído zamardiá biš te duj tysjoncy manušén Siriicen. I čhudiá Davído rakhibnariskire xaladén pe Damaskoskiri Sirija, i jačné Siriicy pishar'jénca Davidoske, i pleskirde léske dan'. I rakhciá Raj Devél Davidós usiendie (viezdie), karik jov te na džala.” I lyjá Davído suvnakuné ščýty, savé sys Adraazaroskire pishar'jende, i jandiá len dro Jerusalimo. A dre Biefa i Bierofa, fórja Adraazaroskire, lyjá králi Davído drieván but xarkóma (mied'). I šundiá Fojo, Imafaskiro králi, so Davído zamardiá saré Adrazaroskire xaladén, i bičhadiá Fojo Ioramos, péskire čhavés, ke králi Davído, te prilel les i te parikirel les pal dová, so jov mardiápe Adraazarosa i zamardiá les; pal-dová so Adraazaro lydžijá maribena Fojosa. Dre vastá Ioramoskire sys khoré (sasúdy) rupuvé, suvnakuné i xarkuné. Len adiáke-pac' králi Davído otdyjá Ráske-Devléske, khetané rupésa i suvnakása, savó jov otlyja saré manušéndyr, savén jov pirizorjakirdia (zbierdyndia): Siriicendyr, i Moavitianendyr, i Amonitianendyr, i Filistimlianendyr, i Amalikitianendyr, dová i so otlyja Adraazarostyr, Riehovoskire-čhavés-tyr, kralístyr Suvakirestyr. I ĥazdyjá Davído péskiro lav, syr risijá, kiéli jov domardiá dešuohto tysjoncy manušén Siriicendyr pe Londo dólo. I čhudiá jov rakhibnaskiren xaladén pe Idumeja; pir sarí Idumeja čhudiá jov rakhibnaskiren xaladén, i saré Idumejani sys Davidóske pishar'jénca. I rakhciá Devél Davidós usiendie, karik jov te na psirél. I Davído sys kralísa pe saró Izrailjo, i kerdiá Davído séndo i čačipén pe saré péskire manušénde. Ioávo, Saruiaskiro čhavó, sys xaladéngiro barydyró; i Iosafáto, Ahiludaskiro čhavó – kanceliari; Sadoko, Ahituvaskiro čhavó, i Ahimielieho, Aviafaroskiro čhavó – rašaja, Sierajo – lylá-čhinybnaskiro; i Vaneja, Iodajoskiro čhavó – barydyró pe Xielejamende i Fieliefejamende, i čhavé Davidóskire – anglatuné barydyrá. I phendiá Davído: “Ci jaciápe vari-kon Saulóskire kheréstyr? Me keravas léske lačhipén (tangipén) pal Ionafanoste. Dro kher Sauloskiro sys pishári, pir lav Siva; i khardé les ke Davído, i phendiá léske králi: “Ci san tu Siva?” I odová phendiá: “Me, pishári tyró.” I phendiá králi: “Ci isyn butýr vari-kon kheréstyr Sauloskirestyr? Me keravas léske lačhipén (tangipén) Devléskiro.” I phendiá Siva kralíske: “Isyn Ionafanoskiro čhavó, savó isyn langalo ĥerénca.” I phendiá léske králi: “Kaj isyn jov?” I phendiá Siva kralíske: “Ĥáda, jov isyn dro Mahiróskiro kher, Amieloskire-čhavéskiro, dro Lodievaro.” I bičhadiá králi Davído, i lyné les Mahiroskire kheréstyr, Amieloskire čhavestyr, Lodievarostyr. I javdiá Miefivosfieje! (Miemfivosfieje!) Ionafanoskiro čhavó, Saulóskire-čhavéskire, ke Davído, i pyjá pe péskiro muj, i klonindiape. I phendiá Davído: “Miefivosfiejo!” I phendiá dová: “Ĥáda, pishári tyró.” I phendiá léske Davído: “Na dar; me keráva túke lačhipén (tangipén) pal tyré dadéste Iofanoste i riskiráva túke saré Saulóskire féldy, dadéskire-tyreskire, i tu ŭsády (sak) kažno mólo javésa te xas maró pal miro skamínd.” I klonindiape Miefivosfiejo i phendiá: “So adasavó isyn pishári tyró, so tu dykhcián laskasá pe adasaveste muleste džukleste, syr me som?” I khardiá králi Sivas, Saulóskire dynarís, i phendiá léske: “Saró, so sys Sauloskiro i sar léskire kheréskiro, me otdáva tyré xuláskire čhavéske; i adiáke obker vaš léske phuv tu i čhavé tyré pishárja tyré, i jan lákire baritka (plódy), sob (kaj) tyré xuláskire čhavéste te javél maró vaš xabén; o Miemivosfiejo, xulaskiro čhavó, ŭsády (sak) javéla te xal pal miro skamínd.” Sivaste sys dešupandž čhavé i dešudúj pishárja. I phendiá Siva kralíske: “Saró, so priphenela xuláj miro, králi, pisharíske peskireske, keréla pishári tyró.” Miefivosfiejo xaja pal Davidóskiro skamínd, syr jekh kralískire čhavéndyr. Miefivosfiejoste sys tykné-beršytko čhavó, pir lav Miha. Saré, kon dživdiá dro Sivaskiro kher, sys Miefivosfiejoskire pishárja. I dživdiá Miefivosfiejo ke Jerusalimo, pal-dová so jov xaja ŭsády (sak) pal kralískiro skamínd. Jov sys langalo pe duj ĥerá. Syr progijá vari-kicý časo, myjá Amonitianengiro králi, i jaciá pe štéto liéskiro léste kralísa léskiro čhavó Anono. I phendiá Davído: “Keráva me lačhipén Anonoske, Naasovoskire čhavéske, pal lačhó réndo, savó kerdiá mánge léskiro dad.” I bičhadiá Davído péskire dynar'jén te rakirén pir iló Anonoske pal léskire dadéste, i javné Davidóskire dynárja pe Amonitianengiri phuv. Ne thagárja Amonitianengiro phendlé Anonoske, xuláske peskireske: “Naúšto tu duminesa, so Davído pal patýv ke dad tyró pribičhadia ke tu peskiren manušén te urakiren tut? Ci na vaš davá, sob (kaj) te obdykhel fóro, i te vydykhel dre léste, i paló (poslie) davá te rozmarel les, pribičhadia Davído dynar'jén peskiren ke tu?” I lyjá Anono dynar'jén Davidoskiren, i občhindia kažnonestyr léndyr paš čhora (broda), i občhindia ídi léngire pe paš, ke trušula, i otmekhcia len. Kiéli rosphendlé pal davá Davidóske, tedy jov bičhadiá ke jone pe strieč, adiáke syr jone sys drieván ladžakirdé. I priphendiá králi te phenén lénge: “Jačénpe dro Jerihóno, paka otbarjona čhora (brody) tumaré, i tedy risjon.” I dykhné Amonitiani, so jone kerdépe vergenca vaš Davidóske; i bičhadé Amonitiani te len pal lové Siriicen Biefo-Riefovostyr i Siriicen Suvatyr biš tysjoncy pezal, kralíste Mahaste tysjonco manušén, i Istovostyr dešudúj tysjoncy manušén. Kiéli šundiá pal davá Davído, tedy bičhadiá Ioavos saré murškané xaladenca. I vyginé Amonitiani, i terdiné pašýl pórta ke maribén, a Siriicy Suvakire, i Riehovoskire, i Istovakire, i Maahakire terdiné rigasa pe félda. I dykhciá Ioávo, so vergéngire xaladé sys čhudé proti léste i angíl, i palál, i vykedyjá xaladén saréndyr fedyršonen dro Izrailjo, i čhudiá len proti Siriicende; palatuny paš manušén otdyjá tel zor Aviesaske, péskire pšaléske, sob (kaj) jov te čhuvél len proti Amonitianende. I phendiá Ioávo: “Kóli Siriicy javéna te pirizorjakiren man, tu désa vast mánge; a kóli Amonitiani tut léna te pirizorjakiren, to me javáva ke tu te dav vast; iav murškanó, i javása te terdjovas tvardes pal amaré manušénde i pal fórja amaré Devléskire, a Raj Devél keréla, so Léske javéla trej.” I vygijá Ioávo i manušá, savé sys léste, pe maribén Siriicenca, i jone prastándyne léstyr. Amonitiani, dykhí, so Siriicy našéna, prastándyne Aviesastyr, i giné dre fóro. I risijá Ioávo Amonitianendyr i javdiá dro Jerusalimo. Siriicy, dykhí, so Izrail'tiáni domardé len, skedynépe khetané. I bičhadiá Adraazaro i khardiá Siriicen, savé sys pal reka (len'), i javné jone ke Jelamo; a Sovako, xaladéngiro barydyró, Adraazaroskiro, rikirdia zor pe lénde. Kiéli rosphendlé pal davá Davidóske, tedy jov skedyjá sarén Izrail'tianén, i pirigija Iordáno, i javdiá ke Jelamo. Siriicy terdiné proti Davidóste, i mardépe lésa. I prastándyne Siriicy Izrail'tianendyr. Davído domardiá Siriicende eftašelá maribnýtka vurdyná i štardešá tysjoncy uklisté pe grénde manušén; zamardiá xaladéngire barydyrés Sovakos, savó odój i myjá. Kiéli saré králja, savé sys poddyne Adrazaroske, dykhné, so jone Izrail'tianie domarle len, tedy kerdé ramánjo (miro) Izrail'tianenca i poddynepe lénge. A Siriicy (Sirijani) darándyne butýr te den vast Amonitianenge. Pirdál berš, dre dová dyvés, kiéli vydžána králja dro maribnýtko drom (pohodo), to Davído bičhadiá Ioavos i péskire dynar'jén lésa i saré Izrail'tianén; i jone domardé Amonitianen, i lyné Ravva, Davído jaciápe dro Jerusalimo. Jekhvar tel bel'vél', Davído uštyjá čhuibnastyr, i džálas péske pe stréha (pe bérga) kralískire-kheréskiri, i dykhciá strehatyr džuvliá, saví kommpinelape (nandjóla); a odoiá džuvlý sys drieván šukár. I bičhadiá Davído manušén te udžinén, kon sys adáia džuvlý? I phendlé léske: “Davá isyn Virsávija, Jeliamoskiri čhaj, Urijáskiri-Xietejaninoskiri romný.” Davído bičhadiá dynar'jén te len la, i joj iavdiá ke jov, i jov sutia lása. Kiéli joj vyžužakirdiape péskire magiribnastyr, to risijá dro péskiro kher. Daja džuvlý jaciá pharí, i bičhadiá zvies' (zan) Davidóske, rakirí: “Me som pharí.” I bičhadiá Davído te phenén Ioavoske: “Bičháv ke me Urijas Xietejaninos.” I javdiá ke jov Urija, i rosphuciape léstyr Davído, i pal Iovoste, i pal réndy manušénde, i pal maribnaskiro giiben. I phendiá Davído Urijaske: “Džá kheré i obmor péskire ĥerá.” I vygijá Urija kralískire kheréstyr, a palál pal léste lydžiné i kralískiro xabén. Ne Urija sys sutó pašýl kralískire-kheréskiri pórta saré péskire xuláskire dynar'jénca, i na gijá dro péskiro kher. I rosphendlé Davidóske, rakirí: “Na gijá Urija dro péskiro kher.” I phendiá Davído Urijaske: “Ĥáda, tu javdián droméstyr: sóske tu na gíian dro péskiro kher? I phendiá Urija Davidóske: “Kovčego, i Izrailjo, i Juda isyn dre šátry, i xuláj miro Ioávo, i pishárja miré xuláskire isyn pe félda, a me zadžavas dre péskiro kher te xav, i te pjáv, i te sovav péskire romniása! Sovlahava me tyré džiibnasa i tyré-deskire džiibnasa, so davá me na keráva.” I phendiá Davído Urijaske: “Jačpe adáj i pe davá dyvés, a atasiá me otmekáva tut.” I jaciápe Urija ke Jerusalimo pe davá dyvés ke atasiá. I khardiá les Davído, i xaja Urija angíl léste, i pija, i paniakirdia les Davído. Ne bel'velié Urija gijá te sovél pe péskiro čhuibén péskire xuláskire pishar'jénca, a dro péskiro kher na gijá. Pe zlóko (rankosa) Davído čhindiá lyl Ioavoske, i bičhadiá les Urijasa. Dre lyl jov čhindiá adiáke: “Čhuvén Urijas doj, kaj javéla zoraló maribén, i otdžan léstyr, sob (kaj) jov te javél zamardo i te merél.” Pal-dová, so kiéli Ioávo lelas fóro, tedy jov čhudiá Urijas pe dasavo štéto, pal savó džindiá, so odój javéna murškané manušá. I vyginé manušá foróstyr, i mardépe Ioavosa, i pyné vari-kicý manušéndyr, Davidóskire dynar'jéndyr (slugéndyr); sys zamardo adiáke-pac' i Urija Xietejanino. I bičhadiá Ioávo te rosphenén pal saró maribnaskiro giiben. I priphendiá manušéske, savés pribičhade, rakirí: “Kiéli tu rosphenesa kralíske pal saró maribnaskiro giiben, i dykhésa, so králi xoliasóla i phenéla túke: ‘Sóske tumé adiáke pašýl podginé ke fóro te marénpe? Naúšto tumé na džindlé, so vantatyr javéna te čhurdén pe tuménde? kon zamardiá Avimieliehos, Jerovaaloskire čhavés? Ci na džuvlý čhurdyjá pe léste vantatyr žernoskiro kotér, i jov myjá dro Tievieco? Sóske tumé pašýl podginé ke vánta?” Tedy i phen: ‘I pishári tyró Urija Xietejanino adiáke-pac' myjá.’ I gijá manúš, savó sys bičhadó, i javdiá, i rosphendiá Davidóske pal saró, vaš so bičhadiá les Ioávo, pal saró maribnaskiro giiben. Tedy manúš, savó sys bičhadó, phendiá Davidóske: “Pirizorjakirde amen odolé manušá, i vyginé ke ame pe félda, i ame tradyjam len ke zagiibén dre vudará; tedy dyné kar'je vantatyr pe pishar'jende tyrende, i myné vari-savé kralískire pishar'jendyr; myjá adiáke-pac' i tyró pishári Urija Xietejanino. Tedy phendiá Davído manušéske, savés pribičhade: “Adiáke phen Ioavoske: ‘Mek te na ladžakirel tut pal davá réndo, pal-dová so kurtála marela javír mólo adoles, javír mólo odales; zorjakir maribén tyró proti fóro i rozmar les. Adiáke podrikir les.’” I šundiá romný Urijáskiri, so myjá Urija, lákiro rom, i rondiá pal péskire romeste. Kiéli progijá časo te obrovel les, to Davído bičhadiá i lyjá la dre péskiro kher, i joj iaciá léskire romniása, i bijandiá léske čhavés. I sys davá nálačho réndo, savó kerdiá Davído, dre jakhá Ráskire-Devléskire. I bičhadiá Raj Devél Nafanos ke Davído i odová javdiá ke jov i phendiá léske: “Dro jekh fóro sys duj manušá: jekh barvaló, a javír čororó; barvaleste sys drieván but kheritkoné murdalén (tyknó i baró skoto), a čororeste ničý, apríč jekhe bakriate, savjá jov kindia tyknin'kona i vyčaradia, i joj vybarija léste khetané léskire čhavénca; léskire marestyr joj xaja, i léskire tahtastyr pija, i pe léskiro kolynd sutia, i sys vaš léske, syr čhaj; i javdiá ke barvaló manúš dromeskiro manúš, i odová tangindia (požalindia) te lel péskire bakrén ci guruvén, sob (kaj) te keravel xabén vaš manušéske droméstyr, savó javdiá ke jov, a lyjá bakriá čororeskirja i keradia la vaš manušéske, savó javdiá ke jov.” Zoralés rosholiasyja Davído pe adalé manušéste i phendiá Nafanoske: “Te javél džidó Raj Devél! Mol meribnáske isyn manúš, savó kerdiá davá; i pal bakriate jov isyn bangó te zapleskirel dre štar móly, pal dová, so kerdiá davá, i pal-davá, so jov na tangindia.” I phendiá Nafano Davidóske: “Tu san odová manúš. Adiáke rakiréla Raj Devél, Devél Izrailjoskiro: ‘Me pomakhcjom tut dre kralíste pe Izrailjo, i Me zrakhcjom tut Saulóskire vastéstyr, i dyjom túke tyré-xulaskiro kher i romnien tyré xulaskiren pe lono tyró, i dyjom túke Izrailjoskiro i Judáskiro kher, i kóli (so) davá vaš túke na uhtyléla (nádosi), to Me dočhuvavas túke iščo (inké) butýr; sóske tu na zrakhcián lav Ráskire-Devléskiro, kerdián xolý angíl Léskire jakhá? Urijas Xietejaninos tu zamardian kurtalása; romniá leskirja lyjan péske dre romniáte, a les zamardian Amonitianengire kurtalása; i adiáke na otdžala kurtála tyré kheréstyr dro viéko, pal-dová, so tu na kandyjan man i lyjan romniá Urijaskire Xietejaninoskirja, sob (kaj) joj te javél túke romniása. Adiáke rakiréla Raj Devél: ‘Ĥáda, Me čhuváva pe túte xolý tyré kheréstyr, i lavá romnien tyrén angíl tyré jakhá, i otdáva tyré pašatuneske, i javéla jov te sovél tyré romniénca angíl davá kham; tu kerdián štylés, a Me keráva davá angíl saró Izrailjo i angíl kham.’” I phendiá Davído Nafanoske: “Kerdjom me grého angíl Raste-Devléste.” I phendiá Nafano Davidóske: “I Raj Devél zlyjá tútyr grého tyró, tu na merésa; ne syr tu dalé rendosa dyján primiéro (sykaibén) Ráskire-Devléskire vergénge te košen Les, tedy meréla túte čhavó, savó bijándyja.” I gijá Nafano dre péskiro kher. I zamardiá Raj Devél tyknemases (bijatós), savés bijandiá Urijáskiri romný Davidóske, i jov zanasvalyja. I mangdiápe Davído Devléske pal tyknemaseste, i postindia Davído, i, jekhdžinó sys ratý, pasii pe phuv. I zaginé ke jov léskire-kheréskire phurydyrá, sob (kaj) te ĥazdén les phuvjátyr; ne jov na kamdiá i na xaja lénca maró. Pe eftáto (bitrinéngiro déšto) dyvés tyknomas myjá, i dynárja Davidóskire darándyne te phenén léske, so myjá tyknomas; pal-dová so, jone rakirdé: “Kiéli tyknomas sys džidó, i ame urakirasas les, i jov na šundiá zan amarí; syr phenása léske: ‘Myjá tyknomas?’ Jov keréla vari-savó čoripén.” I dykhciá Davído, so dynárja léskire pirirakirenape štylés maškír péste, i ĥalyjá Davído, so tyknomas myjá, i phuciape Davído péskire dynar'jéndyr (slugéndyr): “Myjá tyknomas?” I phendlé: “Myjá.” Tedy Davído uštyjá phuvjátyr, i vymordiape, i pomakciape, i piriparudia ídi péskire, i gijá dro Ráskire-Devléskiro Kher, i mangdiápe. Risii kheré, phendiá, sob (kaj) te den léske maró, i jov xaja. I phendlé léske dynárja léskire: “So davá značynéla, so tu adiáke kerésa: kiéli tyknomas sys džidó, tu postindianpe i rondian; a kiéli tyknomas myjá, tu uštyjan i xajan maró?” I phendiá Davído: “Paka tyknomas sys džidó, me postindjompe i rondjom, pal-dová so dumindjom: kon džinéla, ci na potanginela (požalinela) man Raj Devél, i tyknomas jačélape džidó? A kakaná jov myjá; sóske mánge te postinav? Naúšto me saštý (mogináva) te riskirav les? Me džáva ke jov, a jov na risjola ke me.” I štyliakirdia Davído Virsávija, romniá peskirjá, i zagijá ke joi, i sutia lása; i jov bijandia čhaves, i dyja leske lav: Solomóno. I Raj Devel vykedyja les Peske, i jov jacia drógo Ráske-Devléske, i bičhadiá prorokós Nafanos, i jov dyjá léske lav: Iiedidia (Devléskiro Drógo), pir Ráskire-Devléskiro lav. Ioávo mardiápe proti Rava Amonitskonate i nábut so jov na lyjá kralipnaskiro fóro. I bičhadiá Ioávo manušén ke Davído te phenén léske: “Me gijom maribnása pe Rava i zalyjom paní foróskiro; kakaná skéde manušén, i džá pašýl ke fóro, i le les; pal-davá so, kóli me láva les, tedy miro lav javéla dynó léske.” I skedyjá Davído saré manušén, savé jačnépe, i gijá ke Rava, i mardiápe proti léste, i lyjá les. I lyjá Davído viánka (koróna) léngire kralískiro, léskire šerestyr, – a dre léste sys suvnakáj i drógo bar, – i čhudiá les Davído pe péskiro šeró, i doresybén drieván but vylydžijá foróstyr. A manušén, savé sys dre léste, jov vylydžijá, i čhudiá len tel pily (rizilia), tel sastruné molotilki (givaobmaribnaskire), tel sastruné tovera, i čhurdyjá len dre obhačkirde bova. Adiáke jov kerdiá saré Amonitianengire for'jenca. I risijá pale Davído i saré manušá dro Jerusalimo. I sys adiáke paló (poslie) davá: Aviesalomoste, Davidóskire čhavéste, sys šukár phen, pir lav Famar', i pokamdia la Amnono, Davidóskiro čhavó. I piridživdia Amnono ke dová, so zanasvalyja pirdál Famarjate, péskire pheniate; pal-dová so joj sys patyvalý čhaj, i Amnoske zdyjape pharés vari-so te kerél lása. Ne Amnonoste sys drúgo (mal), pir lav Ionadavo, Samajoskiro čhavó, Davidóskire-pšaleskiro; i Ionadavo sys drieván mendro manúš. I jov phendiá léske: “Sóstyr tu adiáke šutjosa kažnoné dyvesesa, čhavó kralískiro, – ci na phenésa tu mánge?” I phendiá léske Amnono: “Famar', pheniá Aviesalomoskirja, miré pšaleskirja, me kamám.” I phendiá léske Ionadavo: “Pasjov dre čhuibén tyró i pričhuvpe nasvalesa; i kiéli tyró dad javéla te dykhél tut, phen léske: ‘Mek te javél Famar', mirí phen, i čaliakirela man xabnasa, keravi xabén paš miré jakhá, sob (kaj) me dykháv i te xav lákire vasténdyr.’” I pasijá Amnono i pričhudiape nasvalesa, i javdiá králi te dykhél les; i phendiá Amnono kralíske: “Mek te javél Famar', mirí phen, i te pekel pašýl miré jakhá marikly, ci duj, i me xava lákire vasténdyr.” I bičhadiá Davído ke Famar' dro kher te phenén: “Džá dro kher Amnonoskiro, pšaléskire tyreskiro, i keráv léske xabén.” I gijá joj dre péskire-pšaleskiro Amonóskiro kher; a jov sys paštó. I lyjá joj iaržó, i zatvorindia, i kerdiá angíl léskire jakhá i pekcia mariklia, i lyjá skorovieda (xič) i čhudiá angíl léste; ne jov na kamdiá te xal. I phendiá Amnono: “Mek saré te vydžán mándyr.” I vyginé saré léstyr manušá, i phendiá Amnono Famarjake: “Lýdža adathýr xabén dre andratuný štúba, i me xava tyré vasténdyr.” I lyjá Famar' mariklia, savé joj pekcia, i otlydžija len Amnonoske, péskire pšaléske, dre andratuný štúba. I kiéli joj čhudiá angíl léste, sob (kaj) jov te xal, tedy jov uhtyldia la i phendiá láke: “Džá, pasjov mánca, phen mirí.” Ne joj phendiá: “Nad, miro pšála, na otle patýv mándyr, pal-dová so na kerélape adiáke dro Izrailjo; na ker davá dylnypén. I me karik džáva miré bipatyvasa. I tu, tu javésa jekhe dylynendyr dre Izrailjo. Tu rákir kralísa; jov na otphenéla te otdél man túke.” Ne jov na kamdiá te šunél lákire lavá, i pirizorjakirdia la, i lyjá pe zor la, i pasijá lása. Paló (poslie) dová lyjá zoralés te na kamel la Amnono naj baré nakamibnasa, adiáke, so nakamiben, savésa jov na mogindiá te dykhél pe láte, sys zoraledýr kamibnastyr, savó sys léste ke joi; i phendiá láke Amnono: “Uštý, džá.” I Famar' phendiá léske: “Nad, te trades krig man – davá fuipén isyn butýr anglatunestyr, savó tu kerdián mánca.” Ne jov na kamdiá te šunél la. I khardiá péskire terné manušés, savó dynarindiá léske, i phendiá: “Trade krig mándyr adalja javrí, i phande vudará pal láte.” Pe láte sys cviatisto ídia, pal-dová so dasavé upratune ídi nosindle kralískire patyvalé čhaja. I lydžijá la dynári javrí i phandia pal láte vudár. I čhudiá Famar' pieplosa péskiro šeró, i roskustia cviatytko ídia, saví sys pe péste, i čhudiá péskire vastá pe péskiro šeró, i adiáke gijá i godlyja. I phendiá láke Aviesalómo, lákiro pšal: “Ci na Amnono, tyró pšal, sys túsa? – Ne kakaná jav štyl, mirí phen; jov – pšal tyró; na piridživ tyré ilésa pal davá réndo.” I dživdiá Famar' jekhdžiny dre péskire pšaleskiro Aviesaloskiro kher. I šundiá králi Davído pal saró davá, i drieván rosholiasyja. O Aviesálomo na rakirdiá Amnonosa ni čoripén, ni lačhipén; pal-dová so Aviesalómo na mogindiá te dykhél pe Amnonoste pal dová, so jov obladžakirdia Famar', leskirja pheniá. Pirdál duj berš sys občhinyben bakrén Aviesalomoste dre Vaalo-Gacoro, so isyn pašýl Jefriemoste, i khardiá Aviesalómo saré kraliskiren čhavén. I javdiá Aviesalómo ke králi i phendiá: “Ĥáda, mek te džal králi i léskire dynárja tyré pisharisa.” Ne králi phendiá Aviesalomoske: “Nad, miro čhavó, ame na džása saré, sob (kaj) te na javas túke dro pharipén.” I drieván rakirélas pir iló Aviesalómo léske; ne jov na zakamdiá te džal i bahtiakirdiá les. I phendiá léske Aviesalómo: “Tedy mek te džal aménca Amnono, pšal miro.” I phendiá léske králi: “Sóske léske te džal túsa?” Ne Aviesalómo urakirdia les, i jov otmekciá lésa Amnonos i saré kralískire čhavén; Aviesalómo priphendiá péskire terné manušénge, phení: “Dykhén, syr moliátyr (vinostyr) Amnonoskiro iló javéla xotno (viesjolo), i me phenáva tuménge: ‘Zamarén Amnonos,’ tedy zamarén les, na darén; davá me priphenava tuménge, javén bidaripnaskire i murškané.” I kerdé Aviesalomoskire terné manušá Amnonosa, syr priphendiá Aviesalómo. Tedy uštyné saré kralískire čhavé, bešné kažno (sváko) pe péskire muloste i našné. Kiéli jone sys pe drom, dogijá šunybén ke Davído, so Aviesalómo zamardiá sarén kralískire čhavén, i na jaciápe ni jekhés léndyr. I uštyjá králi, i roskustia péskire ídi, i pasijá pe phuv, i saré dynárja léskire, savé sys terdé pašýl léste, roskušne péskire ídi. Ne Ionadavo, Samajoskiro čhavó, Davidóskire-pšaleskiro, phendiá: “Mek te na duminel miro xulái, so sarén terné manušén, kralískire čhavén, zamardé; jekh Amnono myjá; pal-dová so Aviesalomoste sys daja zadumka dolé dyveséstyr, syr Amnono obladžakirdia leskirja pheniá; i adiáke mek miro xulái, králi, te na piridživel pal dová, sýrby myné saré kralískire čhavé: myjá jekh Amnono. I nastiá Aviesalómo. I ĥazdyjá ternó manúš, savó sys terdó pe rakhiben, péskire jakhá, i dykhciá: ĥáda, but manušá džána pirí drom pir bergákiro zgiiben. Tedy Ionadavo phendiá kralíske: “Ake, džána kralískire čhavé; syr rakirdiá tyró pishári, adiáke i isyn.” I syr jov phendiá davá, ĥáda, javné kralískire čhavé, i ĥazdyné gódla i rondlé. I kokoró králi i saré léskire dynárja rondlé drieván baré rovibnasa. Aviesalómo nastiá i gijá ke Falmajo, Jemiudaskiro čhavó, Giesuroskiro králi. I rondiá Davído pal péskire čhavéste dre saré dyvesá. Aviesalómo nastiá, i javdiá dre Giesuro i jaciápe odój trin berš. I na lyjá králi Davído te rodél Aviesalomos; pal-dová so jov štylyja pal Amnonoskiro meribén. I ĥalyjá Ioávo, čhavó Sarijaskiro, so iló kralískiro risijá ke Aviesalómo. I bičhadiá Ioávo dre Fiekoia, i lyjá odothýr god'varja džuvliá, i phendiá láke: “Pričhuvpe, so tu rovesa, i uri kaly ídia, i vymakhpe jeliejosa, i pričhuvpe džuvliása, saví but dyvesá obrovela pal muleste; i džá ke králi, i phen léske adiáke i adiáke.” I učhudia Ioávo dre lákire uštá, so te phenél. I zagijá džuvlý Fiekoitianka ke králi, i pyjá mósa peskiresa pe phuv, i poklonindiape, i phendiá: “De vast, králjo!” I phendiá láke králi: “So pharjakirela tut?” I phendiá joi: “Me som pivly (udova), rom miro myjá; i tyré dynaricate sys duj čhavé; jone pokošnepe pe félda, i na sys nikonéske te rozlel len, i zamardé jekh jekhés, i muliakirdiá les. I ĥáda, ĥazdyjápe saró ródo pe dynaricate tyrjate, i rakiréla: ‘Otdé péskire pšaléskire umaribnaris; ame zamarasa les pal léskire-pšaleskiro di, savó jov xasiakirdiá, i zamarasa mištypén prilyibnaskires (nasliednikos).’ I adiáke jone murdiakirena palatuny (posliednjo) jag mirí, sob (kaj) te na jačkires romeske miréske lav i ródo pe phuv.” I phendiá králi džuvliáke: “Džá štylés kheré, me dáva priphenybén pal túte.” Ne džuvlý Fiekoitianka phendiá kralíske: “Mek te javél bang pe mánde, miro xulájo, králi i pe miré dadéskiro kher, králi i léskiro priestolo isyn na bangó.” I phendiá králi: “Odolés, kon javéla pe túte, jan ke me, i jov butýr na čilavéla tut.” Joj phendiá: “Me mangáva tut, králjo, rípir, Ras-Devlés, Devlés tyrés, sob (kaj) te na javén butýr, kon othala (otomstinybnari) pal rat i te na domaren miré čhavés.” I phendiá králi: “Te javél džidó Raj Devél! Na peréla i bal čhavéskire tyreskiro pe phuv.” I phendiá džuvlý: “De dazvolo (vólia) tyré pisharicake te phenél jekh lav xuláske miréske, kralíske.” Jov phendiá: “Rákir.” I phendiá džuvlý: “Sóske tu adiáke duminesa proti Devléskire manušénde? O králi, phení davá lav, bangiakirdia kokoró pes, pal-dová so jov na riskiréla péskire čhavés, savés jov tradyjá krig. Ame merasa i javása syr paní, savó isyn vyčhudo pe phuv, savó naštý te skedes; ne Devél na kaméla te xasiakirél di i del godý, syr by te na otriskirel Péstyr i odolés, savés tradyne javrí.” I kakaná me javdjom te phenáv kralíske, xuláske miréske, dalé lavá, pal-dová so manušá strahakirna man; i tyrí pisharka phendiá: “Pirirakirava me kralísa, ci na keréla jov pir lav péskire dynaricakiro; čačes, králi vyšunela i zrakhéla peskirjá pisharica manušytkoné vastéstyr, savé kaména te zamarén man khetané miré čhavésa Devléskire mekné mištypnástyr (Izrailjostyr).” I phendiá dynárica tyrí: ‘Mek te javél lav xuláskire mireskire, kralískire, dro ramánjo (miro) mánge, pal-dová so xuláj miro, králi, isyn syr Devléskiro Jangólo, i jov saštý (moginéla) te vyšunel i lačhipén, i fuipén. I Raj Devél, Devél tyró, javéla túsa.” I otphendiá králi, i phendiá džuvliáke: “Na garav mándyr, pal so me phučavape tútyr.” I phendiá džuvlý: “Rákir, xulájo miro, králi.” I phendiá králi: “Ci isyn Ioavoskiro vast dro saró davá túsa?” I otphendiá džuvlý, i phendiá: “Mek te dživél di tyró, miro xulái, králi; ni pe čačí, ni pe zérvo (liévo) rig naštý te otdžav doléstyr, so phendiá xuláj miro, králi; čačes, tyró pishári Ioávo phendiá mánge, i jov čhudiá dre tyré pisharicakire uštá saré dalé lavá; sob (kaj) pritčasa te des rendoske dasavo vygiiben, o pishári tyró Ioávo vysykliakirdia man; ne xuláj miro isyn godó, syr godó isyn Devléskiro Jangólo, sob (kaj) te džinél saró, so kerélape pe phuv.” I phendiá králi Ioavoske: “Ĥáda, me kerdjom pir tyró lav, džá rískir terné manušés Aviesalomos.” Tedy Ioávo pyjá mósa pe phuv, i poklonindiape, i bahtiakirdiá kralís, i phendiá: “Kakaná džinéla pishári tyró, so doresciá láska angíl jakhá tyré, xuláj miro, králi, adiáke syr králi kerdiá pir lav péskire pishariskiro.” I uštyjá Ioávo, i gijá dro Giesuro, i jandiá Aviesalomos dro Jerusalimo. I phendiá králi: “Mek jov te risjol dro péskiro kher, a muj miro te na dykhél.” I gijá Aviesalómo dro péskiro kher, a muj kralískiro na dykhciá. Na sys dre saró Izrailjo adasavé gožone muršés, syr Aviesalómo, i adákicy šardes pal davá, syr jov; sliadendyr ĥerengirendyr ke léskire-šereskiro vučipén na sys léste doš. Kiéli jov občhinelas péskiro šeró, – a jov občhinelas les kažno (sváko) berš, pal-dová so jone sys pharé léske, – tedy balá léskire šerestyr važyndle dujšelá šékieli pir kralískiro vieso (ubladytko). I bijándyne Aviesalomoste trin čhavé i jekh čhaj, pir lav Famar'; joj sys šukár džuvlý. I dživdiá Aviesalómo ke Jerusalimo duj berš, a kralískiro muj na dykhciá. I bičhadiá Aviesalómo pal Ioavoste, sob (kaj) te bičhaves les ke králi, ne odová na zakamdiá te javél ke jov. Bičhadiá i javír mólo; ne odová na zakamdiá te javél. I phendiá Aviesalómo péskire dynar'jénge: “Dykhéna tumé félda Ioavoskiri pašýl mirí, i léste odój ĥersto (jačmienie); džán, vyhačkiren les jagása.” I vyhačkirde dynárja Aviessalomoskire dová kotér feldakiro jagása. I uštyjá Ioávo, i javdiá ke Aviesalómo dro kher, i phendiá léske: “Sóske tyré dynárja vyhačkirde miro félda jagása?” I phendiá Aviesalómo Ioavoske: “Ĥáda, me bičhadjom pal túte, rakirí: ‘Jav adarík’, i me bičhaváva tut ke králi te phenés: ‘Sóske me javdjom Giesurostyr? Fedýr te javél by mánge te jačavpe odój.’ Me kamám te dykháv kralískiro muj. Kóli me som bangó dre vari-so, tedy zamar man.” I javdiá Ioávo ke králi, i piriphendia léske davá. I khardiá králi Aviesalomos; jov javdiá ke králi, i pyjá péskire mósa pe phuv angíl kralíste; i čamudia králi Aviesalomos. Paló (poslie) davá saró o Aviesalómo zalydžijá péske maribnýtka vurdyná, i gren, i pandždešá manušén, savé sýges prastándyne angíl léste. I uštéla Aviesalómo tasiárles (ránes) pe zlóko, i terdjola pašýl drom ke pórta, i kiéli vari-kon, konéste sys pharipén, gijá ke králi pe séndo, tedy Aviesalómo kharelas les ke pe i phučelaspe: “Savéstyr foróstyr tu san?” I kiéli odová otphenéla: “Dasavestyr Izrailjoskire rodóstyr pishári tyró, to tedy rakirdiá léske Aviesalómo: “Ĥáda, réndo tyró isyn lačhó i čačunó, ne kralíste nane konéske te vyšunel tut.” I rakirdiá Aviesalómo: “O, kóli by man te čhuvén sendarisa pe daja phuv! Ke me javéla by kažno (sváko), konéste sys čingárd (sprečka) i pharipén (phagi), i me sendiakiravas les pir čačipén.” I kiéli poddžála vari-kon te kloninelpe léske, tedy jov protyrdelas péskiro vast, i oblela les, i čamudela les. Adiáke kerdiá Aviesalómo svakone Izrail'tianosa, savó javdiá pe séndo ke králi, i zadžalas Aviesalómo dre ile Izrail'tianengire. Syr progijá štardešá berš tel Davidóskiro kralipén, Aviesalómo phendiá kralíske: “Džáva me, i ker pir lav miro, savó me dyjom Ráske-Devléske, dre Xievróno. Pal-dová so me, pishári tyró, dživi ke Giesuro dre Sirija, dyjom lav: ‘Kóli Raj Devél riskiréla man dro Jerusalimo, tedy me janáva svénto dyibén Ráske-Devléske.’ I phendiá léske králi: “Džá ramanjosa (mirósa).” I uštyjá jov, i gijá dro Xievróno. I bičhadiá Aviesalómo poddykhibnaskire manušén pir saré Izrailjoskire ródy, phení: “Kiéli tumé šunéna zan (glos) rogoskiri, tedy rakirén: “Aviesolomo jaciá kralísa dro Xievróno.” Aviesalomosa giné Jerusalimóstyr dujšelá manušá, savé sys khardé lésa, i giné pir péskiri nadžinyben (prostota), nadžiny, dro so sys réndo (diélo). Dro časo, kiéli janénas svénto dyibén Ráske-Devléske, Aviesalómo bičhadiá i khardiá Ahitofiedos Gilonianinos, sovietnikos (junkaros) Davidoskires, léskire foróstyr Gilostyr. I sys baró rakiribén, i manušá džánas, i jačenas butýr pašýl Aviesalomoste. I javdiá manúš, savó jandiá nevipen ke Davído, i phendiá: “Iló Izrail'tianengiro pirigija pe rig Aviesalomoskiri.” I phendiá Davído saré péskire dynar'jénge, savé sys pašýl léste dre Jerusalimo: “Uštén, našasa, pal-dová so na javéla aménge zrakhibén Aviesalomostyr; sygniakiren, sob (kaj) aménge te džas, sob (kaj) jov te na zajačkirel i te na zauhtylel amen, i te na janel pe aménde bída, i te na domarel jov kurtalása fórja. I phendlé kralískire dynárja kralíske: “Dro saró, so isyn lahčo xuláske amareske, kralíske, ame sam tyré pishárja.” I vygijá králi i saró léskiro kher pal léste pezal. Jačkirdiá králi deš romnien, péskire naložnicen te rakhén kher. I vygijá králi i saré manušá pezal, i terdiné pašýl Bief-Mierhato. I saré dynárja léskire giné pir léskire rigá, i saré Xieliefiei i saré Fieliefiei, i saré Giefiani ke šovšelá manušá, savé javné khetané lésa Giefatyr, giné angíl kralíste. I phendiá králi Jefiejoske Giefianinoske: “Sóske i tu džása aménca?” Risjov i jačpe odolé kralísa; pal-dová so tu – manúš san na amaré phuvjátyr i javdián adarík péskire štetóstyr; tasiá tu javdián, a adadyvés me začhuvava tut te džas aménca? Me džáva, karik pridžalape; risjov i rískir péskire pšalén pésa; láska i čačipén túsa te javén!” I otphendiá Jefiejo kralíske, i phendiá: “Te javél džidó Raj Devél, i mek te dživél xuláj miro, králi: kaj by na javél xuláj miro, králi, ci dro džiibén, ci dro meribén, odój javéla i tyró pishári.” I phendiá Davído Jefiejoske: “I adiáke džá, i psir mánca.” I gijá Jefiejo Giefianino, i saré léskire manušá, i saré čhavoré, savé sys lésa. I rondiá sarí phuv zoralé zaniása. I saré manušá piriginé, i králi pirigija sýgno rékica (lenorí) Kiedrono; i giné saré manušá pir drom pe čhučí phuv. Ĥáda i Sadoko, i saré Lievíty lésa lydžiné Devléskire zavietóskiro kovčego Viefaratyr, i čhudé Devléskiro kovčego; Aviafaro sys terdó pe vučipén, paka saré manušá vyginé foróstyr. I phendiá králi Sadokoske: “Rískir Devléskiro kovčego dro fóro. Kóli mánde te javél láska angíl jakhá Ráskire-Devléskire, tedy Jov riskiréla man i déla mánge te dykháv les i léskiro kher. A kóli Jov phenéla adiáke: ‘Nane Mirí láska ke tu,’ tedy, ĥáda, me; mek te kerél mánca, so Léske isyn lahčo.” I phendiá králi Sadokoske rašáske: “Ci dykhésa tu? Risjov dre fóro ramanjosa (mirósa), i Ahimaaso, tyró čhavó, i Ionafáno, Aviafaroskiro čhavó, duj tumaré čhavé javéna tuménca; dykhén, me užakirava pe loščýna pe čhučí phuv, paka javéla nevipen tuméndyr ke me.” I riskirdé Sadoko i Aviafaro Devléskiro kovčego dro Jerusalimo, i jačnépe odój. A Davído gijá pe Jelieonoskiri bérga, gijá i rondiá; šeró léste sys učhakirdo; jov gijá pirango, i saré manušá, savé sys lésa, učhakirde kažno péskiro šeró, giné i rondlé. Piriphendle Davidóske i phendlé: “I Ahitofieljo khetané zrakhiribnar'jenca Aviesalomosa.” I phendiá Davído: “Rajo Dévla! Phagir dorakiribén Ahitofieljoskiro.” Kiéli Davído gijá upré pe bergákiro vučipén, kaj jov mangdiápe Devléske, ake, gil (pe strieč) léske džála Xusijo Arhitianino, Davidóskiro mal; ídia pe léste sys roskušny, i práho sys pe léskiro šeró. I phendiá léske Davído: “Kóli tu džása mánca, tedy javésa mánge dre pharipén; ne kóli tu risjosa dre fóro i phenésa Aviesalomoske: ‘Králie, me som pishári tyró; angledýr me i sómas tyré dadéskire pisharisa, a kakaná me – tyró pishári’: tedy tu phagiresa vaš mánge dorakiribén Ahitofieljoskiro. Ĥáda, odój túsa isyn Sadoko i Aviafaro, rašaja, i kažno lav, savó šunesa kralískire kheréstyr, piriphen Sadokoske i Aviafaroske rašange. Odój lénca i duj léngire čhavé, Ahimaaso, Sadokoskiro čhavó, i Ionafáno, Aviafaroskiro čhavó; pirdál lénde bičhaven ke me kažno zan (zvies'), saví šunéna.” I javdiá Xusijo, mal Davidóskiro, dro fóro; Aviesalómo zadžalas tedy dro Jerusalimo. Kiéli Davído nábut zgija bergakire vučipnástyr, streninelaspe léske o Siva, dynári Miefivosfiejoskiro, duje oslenca tel zenia (sjodly) gruzosa, i pe lénde dujšelá maré, šel pučki ziumo, šel pučki inžyro i gonó moliasa (vinosa). I phendiá králi Sivaske: “Vaš so davá túte?” I otphendiá Siva: “Osly isyn vaš kralískiro kher te trades, a maró i barjakirdé (plódy) vaš xabén terné manušénge, a mol vaš pibén manušénge, savé jačéna bi zorjakiro pe čhučí phuv.” I phendiá králi: “Kaj isyn čhavó tyré-xulaskiro?” I otphendiá Siva kralíske: “Ĥáda, jov jaciápe dro Jerusalimo i rakiréla: ‘Kakaná kher Izrailjoskiro riskiréla mánge kralipén miré dadéskiro.” I phendiá králi Sivaske: “Ĥáda, túke saró, so isyn Miefivosfiejoste.’ I otphendiá Siva, kloniny: “Mek me te lathav láska dre jakhá miré xuláskire kralískire!” Kiéli dogijá králi Davído ke Bahurimo, ĥáda, vygijá odothýr manúš Saulóskire kheréskire rodóstyr, pir lav Siemiejo, Gieraskiro čhavó; jov gijá i kosciape, i čhurdyjá barénca pe Davidóste i pe saré Davidóskire-kralískire pishar'jende; saré manušá i saré murškané sys pir čačí i pir zérvo kralískiri rig. Adiáke rakirdiá Siemiejo, košyi les: “Džá krig, dža peske, zamaribnari i prahari!” Raj Devél riskirdiá pe túte saró rat Saulóskire kheréskiro, zamiést savéste tu jacián kralísa, i otdyjá Raj Devél kralipén dre Aviesalomoskire vastá, tyré čhavéskire; i ĥáda, tu san dre bída, pal-dová so tu san ratpibnaskiro.” I phendiá Avieso, Saruiaskiro čhavó, kralíske: “Sóske košela davá muló džukel xulás mires, kralís? Džáva me, i zlava léstyr šeró.” I phendiá králi: “So mánge i tuménge, Saruiaskire čhavé? Mek jov te košelpe, pal-dová so Raj Devél phendiá léske te košel Davidós. Kon moginéla te phenél: ‘Sóske tu adiáke kerésa?’ I phendiá Davído Aviesaske i sarénge péskire dynar'jénge: Ĥáda, kóli miro čhavó, savó vygijá miré maséndyr, rodéla di (džiibén) miro, to butýr te kerél Vieniamitianinoskiro čhavó; jačkiren les, mek jov te košelpe, pal-dová so Raj Devél phendiá léske. Moginéla te javél, so Raj Devél dykhela pe miro teliakiriben, i otdéla Raj Devél mánge lačhipnása pal adadyvesatuno léskiro košybén.” I gijá Davído i léskire manušá péskire dromésa, a Siemiejo gijá pir bergákiro zgiiben, rigátyr leskirjatyr, gijá i kosciape, i čhurdyjape barénca pe léskiri rig i pylosa. I javdiá králi i saré manušá, savé sys lésa, khinyi, i otkinyja odój. Aviesalómo i saré Izrailjoskire manušá javné dro Jerusalimo, i Ahitofieljo lénca. Kiéli Xusijo Arhitianino, mal Davidóskiro, javdiá ke Aviesalómo, to tedy phendiá Xusijo Aviesalomoske: “Mek te dživél králi, mek te dživél králi!” I phendiá Aviesalómo Xusijoske: “Dasaví isyn tyrí láska ke tyró drúgo (mal)! Sóske tu na gíian tyré malesa?” I phendiá Xusijo Aviesalomoske: “Nad, konés vykedyjá Raj Devél i adalé manušá i saró Izrailjo, odolesa i me som, i jačavape lésa. I pir saró konéske me javáva te dynarinav? Ci na léskire čhavéske? Syr dynarindjom me dadéske tyréske, adiáke Me javáva te dynarinav i túke.” I phendiá Aviesalómo Ahitofieljoske: “Den godypén, so aménge te kerás.” I phendiá Ahitofieljo Aviesalomoske: “Zadžá ke tyré-dadéskire naložnicy, savén jov jačkirdiá te rakhén péskiro kher; i šunéna saré Izrail'tiáni, so tu kerdianpe nalačhesa vaš tyré dadéske, i zoraljona sarengire manušéngire vastá, savé isyn túsa.” I čhudé vaš Aviesalomoske šátra pe stréha (čhakín), i zagijá Aviesalómo ke naložnicy, léskire-dadéskire, angíl jakhá saré Izrailjoskire. Godypén Ahitofieloskiro, savó jov délas dre dolé dyvesá gindiape, syr kóli by vari-kon phuciape uphenybén Devléstyr. Dasavo sys kažno (sváko) godypén Ahitofieloskiro, syr vaš Davidóske, adiáke i vaš Aviesalomoske. I phendiá Ahitofieljo Aviesalomoske: “Me vykedava dešudúj tysjoncy manušén, i uštava, i džáva, dro tradypen pal Davidóste dre daja rat; i perava pe léste, kiéli jov javéla khino i obmekne vasténca, i me janáva les dre dar; i saré manušá, savé isyn lésa, roznašenape; i me zamarava jekhe kralís i sarén manušén riskiráva ke tu; i kiéli na javéla jekhés, konéskiri di tu rodesa, tedy saré manušá javéna dre ramánjo (miro).” I sys pir iló davá lav Aviesalomoske i saré Izrailjoskire phurydyrenge. I phendiá Aviesalómo: “Kharén Xusijos Arhitianinos, šunasa, so jov phenéla.” I javdiá Xusijo ke Aviesalómo, i phendiá léske Aviesalómo, rakirí: “Ake, so phendiá Ahitofieljo, ci pir léskire lavá te kerás? A kóli nad, tedy rákir tu.” I phendiá Xusijo Aviesalomoske: “Nálačho godypén isyn davá mólo, savó dyjá Ahitofieljo.” I rakirdiá duredýr Xusijo: “Tu džinésa péskire dadés i léskire manušén; jone isyn muršá bidaripnaskire i drieván piridživena, syr ričyha pe félda, savjátyr otlyne čhavorén, i dad tyró – manúš isyn maribnaskiro; jov na terdjola te rat'kirel manušénca. Ĥáda, kakaná jov garadjola dre vari-saví ĥiebár (pieščera), ci dro javír štéto, i kóli vari-kon léndyr peréla angledýr, i šunéna, i phenéna manušá, ‘Isys maribén manušéngiro, savé giné pal Aviesalomoste,’ tedy i kokoró murš bidaripnaskiro, savéste isyn iló, syr ščereskiro (lievoskiro) iló, peréla duhósa; pal-dová so saré Izrailjoske isyn džindló, syr murškanó isyn tyró dad i murškané isyn odolé manušá, savé isyn lésa. Paldavá me radinava: “Mek te skedelpe ke tu saró Izrailjo Danostyr ke Virsávija, manušén javéla but, syr práho isyn pašýl mórjo (derjáv), i tu kokoró džása maškír lénde; i tedy ame džása pe léste, dro savó by štéto jov te na javél, i perasa pe léste, syr peréla pahlyn (rosa) pe phuv; i na jačélape léste ni jekhe manušés saréndyr, savé javéna lésa; a kóli jov zadžála dro vari-savó fóro, tedy saró Izrailjo janéla ke dová fóro šelen, i ame styrdasa les dre reka (len'), adiáke, so na jačélape ni jekhe manušés.” I phendiá Aviesalómo i saró Izrailjo: “Godypén Xusijoskiro Arhitianinoskiro isyn fedýr lavéndyr Ahitofieljoskirestyr.” Adiáke Raj Devél sendiakirdia te rozmarel fedyršo godypén Ahitofieljoskiro, sob (kaj) te janel Ráske-Devléske bída pe Aviesalomoste.” I phendiá Xusijo Sadokoske i Aviafaroske rašange: “Adiáke i adiáke dyjá godypén (radindia) Ahitofieljo Aviesalomoske i Izrailjoskire phurydyrenge, ne adiáke i adiáke dyjom godypén me. I kakaná bičhaven sygnedyr, i phenén Davidóske adiáke: ‘Na jačpe dre daja rat pe loščýna pe čhučí phuv, ne sygnedyr piridža, sob (kaj) te na xasjol kralíske i saré manušénge, savé isyn lésa.’” Ionafáno i Ahimaaso sys terdé pašýl panieskiri ĥanyngori Rogieljo. I gijá dynárica, i rosphendiá lénge, a jone giné i rosphendlé kralíske Davidóske; pal-dová so jone na mogindlé te sykadjon dro fóro. I dykhciá len ternó manúš, i piridyja Aviesalomoske; ne jone dujdžiné sýges giné, i javné dre Bahurima, dre kher jekhe-manušéskiro, savéste pe gréda (dvóro) sys ĥanýng, i zmeknepe odorík. I džuvlý lyjá i rosčhudiá pe brégo (ust'je) ĥanyngakiro cérga, i čhudiá pe léste khurmia (krupy) adiáke, so na sys nisó bicialó. I javné Aviesalomoskire pishárja ke džuvlý dro kher, i phendlé: “Kaj isyn Ahimaaso i Ionafáno?” I phendiá lénge džuvlý: “Jone piriginé reka (len').” I rodyne jone, i na lathné, i risiné dro Jerusalimo. Kiéli jone giné krig, to odolé vyginé ĥanyngatyr, giné i rosphendlé kralíske Davidóske, i phendlé Davidóske: “Uštén i sýges piridžan paní; pal-dová so adiáke i adiáke dyjá godypén pal tuménde Ahitofieljo.” I uštyjá Davído i saré manušá, savé sys lésa, i piriginé Iordáno; ke zlóko na jaciápe ni jekhés manušés, savó te na piridžal by Iordáno. I dykhciá Ahitofieljo, so na kerdiápe (spolnindiape) léskiro godypén (sovieto), i dyjá andré oslós, i skedyjape, i gijá dre péskiro kher, dre péskiro fóro, i kerdiá ráda (godypén) péskire kheréske, i ubladyja, i myjá, i sys garadó dre koplíca péskire dadéskiri. I javdiá Davído dro Mahanaimo, a Aviesalómo pirigija Iordáno, kokoró i saró Izrailjo lésa. Aviesalómo čhudiá Amiesajos, zamiést Ioavoste, pe xaladénde. Amiesajo sys čhavó jekhe manušéskiro, pir lav Iiefiero Izriejeljostyr, savó zagijá ke Avigeja, Naasoskiri čhaj, Saruiaskire pheniake, Ioavoskire dakiri. I Izrailjo Aviesalomosa terdijá stanósa (lodesa) pe Galaadoskiri phuv. Kiéli Davído javdiá dro Manahanaimo, to tedy Sovi, Naasoskiro čhavó, Amonitoskire Ravvatyr, i Mahiro, Aminiloskiro čhavó, Lodavarostyr, i Vierzielijo Galaaditianino Roglimostyr, jone jandlé čhuibena, čaré i glejana khoré, i parnó giv (pšenica), i gersto (jačmienjo), i jaržó, i pšeno, i nuklo (bobo), i čečevica, i pekne ziárki, i avgín (meda), i ksil, i bakrén, i syro (kiral) gurumnytko, jandlé Davidóske i manušénge, savé sys lésa te xan; pal-dová so rakiréna jone, manušá sys bokhalé i khinyi, i vyrikirde smega (žažda) pe čhučí phuv. I piridykhcia Davído manušén, savé sys lésa, i čhudiá pe lénde barydyrén pe tysjoncy i pe šelá. I bičhadiá Davído manušén – pe tríto paš-šeraló Ioávo, pe tríto paš–šeraló Aviesa, Saruiaskiro čhavó, Ioavoskire pšalés, pe tríto paš šeraló Jefiejo Giefianino. I phendiá králi manušénge: “Me kokoró džáva tuménca.” Ne manušá otphendlé léske: “Na džá; pal-dová so, kóli ame i prastasa, tedy manušá na riskirena dykhibén pe davá; kóli i meréna améndyr paš manušá, adiáke-pac' na riskirena dykhibén; a tu jekh dová-pac', so amen deš tysjoncy; i adiáke vaš aménge fedýr, sob (kaj) tu te des vast aménge foróstyr.” I phendiá lénge králi: “So isyn lahčo dre tumaré jakhá, dová i me keráva.” I terdijá králi pašýl pórta, i saré manušá vyginé pir šelá i pir tysjoncy. I priphendiá králi Ioavoske i Aviesaske i Jefiejoske, rakirí: “Rakhén mánge terné manušés Aviesalomos.” I saré manušá šundlé, syr priphendiá králi saré barydyrénge pal Aviesalomoste. I vyginé manušá pe félda gil (pe strieč) Izrail'tianenge, i sys maribén dre veš Jefriemoskiro. I Davidóskire dynárja domardé Izrailjoskire manušén; sys odój baró maribén dre dová dyvés, – domardé biš tysjoncy manušén. Maribén rozgijápe pir sarí doiá rig, i veš domardiá manušén butýr, syr ci but domardiá kurtála dro dová dyvés. I strenindiape Aviesalómo Davidóskire dynar'jénca, jov sys pe muloste. Kiéli mul zaprastandyja lésa tel randiá baré demboskire, tedy Aviesalómo zaplentyndiape péskire balenca dre randiá demboskire i ubladyja maškír bolybén i phuv, a mul, savó sys tel léste, nastiá. I dykhciá davá vari-kon, i phendiá Ioavoske, rakirí: “Gada, me dykhcjom Aviesalomos, ubladyi pe dembo.” I phendiá Ioávo manušéske, savó rosphendiá pal davá: “Ĥáda, tu dykhcián; sóske tu na čhudián telé les odój pe phuv? Me davas túke deš šékieli rup i jekh kustýk.” I otphendiá dová Ioavoske: “Kóli by čhuvénas pe miré vastá i tysjonco šékieli rup, i tedy me na ĥazdavas by vastá pe kralískire čhavéste; pal-dová so dro amaró šunybén králi priphendiá túke i Aviesaske i Jefiejoske, rakirí: ‘Rakhen mánge terné manušés Aviesalomos’”; i kóli by me kerdjom pe javír (javirčanes) daripnasa vaš miro džiibén, tedy davá na sčhakirelaspe kralístyr, i tu kokoró terdjosas proti mánde.” Ioávo phendiá: “Nane so mánge te našavav túsa časo.” I lyjá dre vastá trin maribnýtka bustiá (striély) i phusadia len dro iló Aviesalomoskiro, savó sys iščo (inké) džidó pe dembo. I obgine trusciál Aviesalomoste deš terné manušá, Ioavoskire manušá, savé lydžánas mardytka (oružyjo), i čhindlé, i muliakirdé les. I zaphurdyja Ioávo rogosa (trubasa), i risiné manušá tradypnastyr pal Izrailjo; pal-dová so Ioávo tangindia (žalindia) manušén. I lyné Aviesalomos, i čhurdyné les dro veš dre xor ĥanbín (jama), i čhurdyné pe léste bari kuča bará. I saré Izrail'tiáni rosprastandynepe, kažno (sváko) dre péskiri šátra. Aviesalómo, syr sys džidó, lyjá i čhudiá péske nagrobniko (pomniko) pe kralískiri dólo; pal-dová so phendiá jov: “Nane mánde čhavés, sob (kaj) te zrakhelpe miré laveskiro ripiribén.” I khardiá nagrobniko péskire lavésa. I kharélape davá nagrobniko ‘Aviesalomoskiro’ ke davá dyvés. Tén'ci Ahimaaso, Sadokoskiro čhavó, phendiá Ioavoske: “Prastava me, phenáva zan (zvies') kralíske, so Raj Devél sendosa Peskiresa les zrakhciá léskire vergéngire vasténdyr. Ne Ioávo phendiá léske: “Tu na javésa adadyvés phenybnaskire lačhé zaniása; phen zan (zvies') pe javír dyvés, a na adadyvés; pal-dová so myjá kralískiro čhavó. I phendiá Ioávo Xusijoske: “Džá, rosphen kralíske, so dykhcián tu.” I poklonindiape Xusijo Ioavoske i prastándyja. Ne Ahimaaso, Sadokoskiro čhavó, nevéstyr mangdiá i rakirdiá Ioavoske: “Sob te na javél, ne i me prastava pal Xusijoste.” Ioávo otphendiá: “Sóske te prastas túke, miro čhavó? Tu na janesa lačhí zan (zvies').” I phendiá Ahimaaso: “Mek adiáke te javél, ne me prastava.” I prastándyja Ahimaaso pir mamúj drom, i piritradyja Xusijos. Davído tedy beštó sys maškír duj pórty. I rakhibnari gijá upré pe stréha (čhakín) portengiri dre vánta, i, ĥazdyjá jakhá, i dykhciá: “Ĥáda, prastala jekh manúš.” I zadyja gódla rakhibnari i phendiá kralíske. I phendiá králi: “Kóli jekh, tedy zan (zvies') dre léskire uštá.” A odová džálas usá pašyledýr i pašyledýr. Rakhibnari dykhciá i javire manušés, savó prastalas: i zadyja gódla portengire rakhibnariske: “Ĥáda, iščo (inké) prastala jekh manúš.” Králi phendiá: “I davá isyn manúš, savó lydžála zan (zvies').” Rakhibnari phendiá: “Me dykháva so anglatunó manúš poddžála giibnasa pe Ahimaasoste, Sadokoskire čhavéste.” I phendiá králi: “Davá manúš isyn lačhó i džála lačhé zaniása (zviestiasa).” I zadyja gódla Ahimaaso, i phendiá kralíske: “Ramánjo (miro) túke” I klonindiape kralíske mósa peskiresa ke phuv, i phendiá: “Te javél bahtiakirdó Raj Devél, Devél tyró, otdyi manušén, savé ĥazdyné péskire vastá pe xulaste mireste, kralíste!” I phendiá králi: “Ci isyn džidó ternó manúš Aviesalómo?” I phendiá Ahimaaso: “Me dykhcjom baró piridživipen, kiéli pishári kralískiro Ioávo bičhadiá tyré pisharís; ne me na džindjom, so odój sys.” I phendiá králi: “Džá dre rig, terdjov adái.” Jov otgijá i terdijá. Ĥáda, javdiá i Xusijo. I phendiá Xusijo: “Lačhí zan (zvies') xuláske miréske kralíske! Raj Devél dyjá túke kakaná čačipén te zrakhél vastéstyr saré manušengirendyr, savé ĥazdynépe proti túte.” I phendiá králi Xusijoske: “Ci isyn džidó ternó manúš Aviesalómo?” I phendiá Xusijo: “Mek te javél vergenca xulaskirenca miré kraliskirenca i sarénca, kon kaméla fuipén túke, mek te javél dová-pac', so kerdiápe terné manušésa.” I pyjá dre dúho králi, i gijá dre štúba upré pe pórta, i rondiá, i, kiéli gijá, to rakirdiá adiáke: “Čhavó miro Aviesalómo! Čhavó miro Aviesalómo! Ne, kon te del mánge te merav zamiést túte, Aviesalomie, čhavó miro, čhavó miro!” I phendlé Ioavoske: “Ĥáda, králi rovela i tuginela godlása (golosinela) pal Aviesalomoste. I obrisija zbierdyma (pobieda) dolé dyveseskiri dro roviben vaš saré manušénge; pal-dová so manušá šundlé dre dová dyvés i rakirdé, syr králi piridživelas pal peskireste čhavéste. I vydžánas tedy manušá dre fóro čorahanés, syr podčorenape manušá, savé ladžana, savé dre maribnaskiro časo risiné dro našyben. A králi začhakirdia péskiro muj, i zoralés rondiá: “Čhavó miro, Aviesalomie! Aviesalomie, čhavó miro, čhavó miro!” I javdiá Ioávo ke králi dro kher, i phendiá: “Tu dre ladž jandian adadyvés sarén dynar'jén tyrén, savé zrakhné kakaná tyró džiibén i tyré čhavéngiro i čhajengiro džiibén, i romniengiro džiibén i tyré naložnicengiro džiibén; túke isyn dróga odolé, konéske san drógo tu i túke isyn na dróga odolé, konéske san drógo tu; pal-dová so tu sykadian adadyvés, so nisó vaš túke i xaladéngire šeralé i dynárja, me džindjom, so, kóli Aviesalómo te jačélpe džidó, a ame saré myjam, tedy túke javéla by mištó; i adiáke uštý, vydža i rákir ke iló tyré pishar'jengiro, pal-dová so me sovlahava Rása-Devlésa, so, kóli tu na vydžasa, to dre daja rat na jačélape túte ni jekhe manušés; i davá javéla vaš túke fujedýr saré bidendyr, savé sys pe túte tyré terné beršéndyr ke davá dyvés.” I uštyjá králi i bestiá pašýl pórta; a saré manušénge phendlé, so králi sys beštó pašýl pórta. I javné saré manušá angíl kralískiro muj; Izrail'tiáni roznašnepe pir péskire šátry. I saré manušá dre saré ródy (striečy) Izrailjoskire košnepe i rakirdé: “Králi zrakhciá amen amaré vergéngire vasténdyr, i voliakirdia (vyzvolindia) amen Filistimlianengire vasténdyr, a kakaná kokoró nastiá dalé phuvjátyr, Aviesalomostyr. Ne Aviesalómo, savés ame pomakhciam dre kralíste pe aménde, myjá pe maribén; palsó kakaná tumé tyrdena te riskirén kralís?” I králi Davído bičhadiá te phenén rašange Sadokoske i Aviafaroske: “Phenén Judáskire phurydyrenge: ‘Sóske kaména tumé te javén palatunenca, sob (kaj) te riskires kralís dro léskiro kher, tedy syr lavá saré Izrailjoskire doginé ke králi dro léskiro kher? Tumé san miré pšála, kokalý miré i mas miro; sóske kaména tumé te javén palatunenca dro riskiriben kralískiro dro léskiro kher? I Amiesaske phenén: “Ci na san tu kokalo miro i mas miro? Mek dová i dová te kerél mánca Devél, i iščo (inké) butýr keréla, kóli tu na javésa xaladéngire barydyrésa, pašýl mánde, pe Ioavoskiro štéto, pe saró džiibén!” I bandiakirdia jov iló saré Judejákire manušén, syr jekhe-manušéskiro; i bičhadé jone ke králi te phenén: “Risjov tu i saré tyré dynárja.” I risijá králi, i javdiá ke Iordáno, a Judejákire manušá javné dro Galgálo, sob (kaj) te pirilen kralís i te pirilydžan kralís pirdál Iordáno. I gijá syges Siemiejo, Gieraskiro čhavó, Vieniamitianino Bahurimatyr, i gijá Judejakirenca gil (pe strieč) kralíske Davidóske, i tysjonco manušén Vieniamitianendyr sys lésa, i Siva, Saulóskire-kheréskiro dynári, dešupandže péskire čhavénca i bišé péskire pishar'jénca; i piriginé jone Iordáno angíl kralískiro muj. Kiéli piripravindle sudno (párma), sob (kaj) te pirilydžas kralískiro kher i te dynarinás léske, tedy Siemiejo, Gieraskiro čhavó, pyjá angíl kralíste, syr féni (tóka) jov pirigija Iordáno, i phendiá kralíske: “Na čhuv mánge, xulájo miro, dro grého, so me kerdjom, i na priripir dová, savó kerdiá grého pishári tyró dre dová dyvés, kiéli xuláj miro, králi, vygijá Jerusalimóstyr, i na rikir doiá xolý, králjo, pe iló péskiro; pal-davá so džinéla tyró pishári, so kerdiá grého, i ĥáda, kakaná me javdjom anglatunó (pérvo) saré Iosifóskire kheréstyr, sob (kaj) te vydžav gil (pe strieč) xuláske miréske kralíske.” I otphendiá Aviesa, Saruiaskiro čhavó, i phendiá: “Naúšto Siemiejo na meréla pal davá, so jov kostia Ráskire-Devléskire pomakhibnaskires? I phendiá Davído: “So mánge i tuménge, Saruiaskire čhavé, so tumé kakaná kerénape vergenca (navietnikenca). Ci kakaná te muliakires vari-konés dro Izrailjo? Ci na dykháva me, so kakaná me – králi pe Izrailjo?” I phendiá králi Siemiejoske: “Tu na merésa.” I sovlahadiá léske králi. I Miefivosfiejo, Ionavoskiro čhavó, Saulóskire-čhavéskiro, vygijá gil (pe streč) kralíske. Jov na mordia péskire ĥerá, na občhindia čhora péskire (broda), i na mordia ídi péskire dolé dyveséstyr, syr vygijá králi ke dyvés, kiéli jov risijá ramanjosa (mirósa). Kiéli jov vygijá Jerusalimóstyr gil (pe strieč) kralíske, králi phendiá léske: “Sóske tu Miefivosfiejo, na gíian mánca?” Odová otphendiá: “Hulájo, míro králi! Dynári miro xohadia man; pal-dová so me, pishári tyró, rakirdjom: ‘Me dáva andré péske oslós i bešava pe léste, i tradava kralísa’; odiake syr pishári tyró isyn langalo. A jov obrakirdia tyré pisharís angíl xulaste mireste, kralíste. Ne xuláj miro, králi, syr Devléskiro Jangólo; ker, so túke isyn lačhó; hoc' saró miré-dadéskiro kher isyn bangó sys otdynó meribnáske angíl xulaste, miré kralíste, ne tu čhudián tyré pisharís maškír odolén manušénde te xas pal tyró skamínd; savó mánde isyn pravo te tanginavpe iščo (inké) angíl kralíste?” I phendiá léske králi: “Ke so tu rakirésa saró davá? Me phendjom, sob (kaj) tu i Siva te rosčhuven pe pir maškír péste féldy.” Ne Miefivosfiejo otphendiá kralíske: “Mek jov te lel až saró, paló (poslie) dová, syr xuláj miro, králi, ramanjosa (mirósa) risijá dro péskiro kher.” I Vierzielijo Galaaditianino javdiá Roglimatyr, i pirigija kralísa Iordáno, sob (kaj) te lydžál les pal Iordáno. O Vierzielijo sys drieván phuró, beršá ohtodešá. Jov délas saró kralíske, kiéli odová sys dro Mahanaimo, pal-dová so sys manúš barvaló. I phendiá králi Vierzielijoske: “Jav mánca, i me javáva te čaravav tut dro Jerusalimo.” Ne Vierzielijo otphendiá kralíske: “Ci dlúges (ĥará) mánge jaciápe te dživáv, sob (kaj) te džav kralísa dro Jerusalimo? Mánge kakaná ohtodešá berš; ci roskedava me lačhipén fuipnastyr? Ci džinéla pishári tyró smako dre dová, so me javáva te xav, i so me javáva te pjáv? I ci javáva me dro zor te šunav zan bagaibnaskirengiri i bagaibnarkenkiri? Sóske pisharíske tyréske te javél dro pharipén xuláske, miréske kralíske? Iščo nábut prodžála pishári tyró kralísa pal Iordáno; pal so kralíske te barjakirel man dasavé lačhipnása? Dozvolin (de vólia) pisharíske tyréske te risjol, sob (kaj) me te merav dro péskiro fóro, pašýl miré-dadéskiri koplíca i miré-dakiri. Ne ĥáda, dynári tyró, miro čhavó, Kimgamo, mek te džal xulása miresa, kralísa, i ker lésa, syr túke isyn lačhó.” I phendiá králi: “Mek te džal mánca Kimgamo, i me keráva vaš léske, so túke isyn lačhó; i saró, so by tu te na zakames mándyr, me keráva vaš túke.” I piriginé saré manušá Iordáno, i králi adiáke-pac'. I čamudia králi Vierzielijos, i bahtiakirdiá les, i jov risijá pe štéto péskiro. I gijá králi dro Galgálo, gijá lésa i Kimgamo; i saré Judáskire manušá lydžine kralís, i paš Izrailieskjire manušá. I ĥáda, saré Izrail'tiáni javné ke králi i phende kralíske: “Sóske pšála amaré, Judáskire muršá, mekné tut, i lydžine kralís, i léskiro kher, i sarén manušén Davidoskiren lésa pirdál Iordáno? I otphendlé saré Judáskire muršá Izrail'tianenge: pal-dová so králi isyn seménca aménge; pirdál so tuménge te xoliason pe davá? Naúšto ame vari-so xajam kralíste, ci dolyjam (doresciam) léstyr počastúnki (podarki)?” I otphendlé Izrail'tiáni Judáskire muršenge, i phendlé: “Ame sam deš pašá kralíste, adiáke-pac' i Davidóste ame butýr, syr tumé san; palsó tumé teliakirde amen? Ci na aménge otlydžalaspe anglatunó lav pal dová, sob (kaj) te riskiras amaré kralís? Ne lav Judáskire muršengiro sys zoraledýr, syr lav Izrail'tianengiro. Odój vygijá, so sys jekh nálačho manúš, pir lav Saviejo, čhavó Bihriskiro, Vieniamitianinoskiro; jov phurdyja dro rógo i phendiá: “Nane aménge paš dre Davidóste, i nane aménge bažyn dre Jesiejoskire čhavéste; saré pir šátry péskire, Izrail'tiáni!” I giné dre rig saré Izrail'tiáni Davidostyr, i giné pal Saviejoste, čhavéste Bihriskireste; Judéngire manušá jačnépe pe péskire-kralískiri rig, Iordanostyr ke Jerusalimo. I javdiá Davído dro péskiro kher dro Jerusalimo, i lyjá králi dešen romnien i “naložnicen”, savén jov jačkirdiá te rakhén kher, i mekciá len dro vykedyno kher i čhudiá rakhibnar'jen, i rikirdia len, ne na psirdiá ke jone. I sys jone odój ke péskiro meribnytko dyvés, dživi syr pivlia (udovy). I phendiá Davído Amiesaske: “Skéde ke pe Judengiren manušén pal trin dyvésa i kokoró jav adarík.” I gijá Amiesa te skedel Judéngire manušén, ne progijá butýr časo, savó léske sys uphendló. Tedy Davído phendiá Aviesaske: “Kakaná keréla aménge fuipén Saviejo, čhavó Bihriskiro, butýr, syr Aviesalómo; le tu dynar'jén tyré xuláskire, i trade les, sob (kaj) jov te na lathel péske zoralé tynénca fórja i te na garadjol amaré jakhéndyr.” I vyginé pal léste manušá Ioavoskire, i Xieliefiei i Fieliefiei, i saré muršá giné Jerusalimóstyr te tradén Saviejos, čhavés Bihriskires. I kiéli jone sys pašýl baró bar, so isyn pašýl Gavaóno, tedy strenindle Amiesas. Ioávo sys uridó dre péskiri xaladytko ídia i podphandlo kurtalása, saví ubladyja pašýl ĥerój dre nožny i, saví lokhes vydžála léndyr i zadžála. I phendiá Ioávo Amiesajoske: “Ci san sastó tu, pšal miro?” I lyjá Ioávo čačé vastésa Amiesajos pal čhora (broda), sob (kaj) te čamudel les. Amiesa na zrakhciape kurtalátyr, saví sys dro Ioavoskiro vast; i odová čhindiá les dre per adiáke, so vypyne léskire kužuma pe phuv, i javír mólo les na čhindiá, i jov myjá. Ioávo i Aviesa, léskiro pšal, tradynepe pal Saviejoste, Bihriskire čhavéste. Jekh Ioavoskire terné manušéndyr/terné-beršengiren sys terdó pašyl Amiesaste i rakirdiá: “Odová, kon isyn čačunó Ioavoske i kon isyn pal Davidóste, mek te džal pal Ioavoste!” Amiesa sys paštó dro rat maškír drom; i odová manúš, dykhí, so saré manušá terdjona pe léste, tyrdyja Amiesas droméstyr pe félda, i čhurdyjá pe léste ídia, adiáke, syr jov dykhciá, so kažno (sváko) manúš, savó džala pašyl, terdjola pe léste. Ne kiéli jov sys tyrdyno droméstyr, tedy saré Izrailjoskire manušá giné palál pal Ioavoste te tradén Saviejos, Bihriskire čhavés. A jov progijá pirdál saré Izrailjoskire ródycy ke Aviel-Bief-Maaho i pirdál saró Bierimo; i manušá, savé dživdé daj, skedynépe i giné pal léste. I javné i občhude les trusciál dro Aviel-Bief-Maaho: i čhudé upré valo angíl fóro, i podginé ke vánta, i saré manušá, savé sys Ioavosa, starindlepe te rosphagiren vánta. Tedy jekh god'vari džuvlý zadyja gódla foróskire vantatyr: “Šunén, šunén, phenén Ioavoske, sob (kaj) jov te džal adarík, i me rakirava lésa.” I podgíia ke joj Ioávo, i phendiá džuvlý: “Vyšún lavá tyré dynaricakire.” I phendiá jov: “Šunava.” Joj phendiá: “Angledýr (vagedyr) rakirénas: ‘Kon kaméla te phučelpe, phuč pe Avieljostyr; i adiáke kerénas réndo. Me mirnone, čačuné Izrailjoskire for'jéndyr; a tu kamésa te xasiakires fóro, i savó isyn sýrby daj i for'jengiri pir Izrailjo: vaš so túke te phagires Ráskire-Devléskiro mištypén?” I otphendiá Ioávo, i phendiá: “Mek te na javél davá mándyr, sob (kaj) me te rozmarav ci te rosphagirav!” Davá réndo isyn na dro dová; ne manúš Jefriemóskire bergátyr, pir lav Saviejo, Bihriskiro čhavó, ĥazdyjá péskiro vast pe kralíste Davidóste; vyden mánge les jekhés, i me otdžava foróstyr.” I phendiá džuvlý Ioavoske: “Ĥáda, šeró léskiro javéla túke čhurdynó vantatyr.” I gijá džuvlý pir saré manušénde péskire god'varé lavésa; i otčingirde šeró Saviejoske, Bihrimoskire čhavéske, i čhurdyné Ioavoske. Tedy Ioávo phurdyja dro rógo, i rozginepe foróstyr saré manušá pir péskire šátry; Ioávo risijá dro Jerusalimo ke králi. I sys Ioávo čhudo pe saré Izrail'skone xaladénde, a Vaneja, Iodaskiro čhavó – pe Xieliefejaninende i pe Fieliefejaninende; Adoramo – pe skedyibén taksengiro; Iosafáto, Ahiludaskiro čhavó sys kanceliariskiresa; Susa – lylá-čhinybnaskiresa; Sadoko i Aviafaro rašanca; adiáke-pac' i Ira, Iaritianino, sys rašása Davidóste. Sys bokh pe phuv dre Davidóskire dyvesá trin berš, berš pal berš. I phuciape Davído Rástyr-Devléstyr. I phendiá Raj Devél: “Davá isyn pal Sauloste i pal ratpibnaskiro léskiro kher, pal-dová, so jov zamardiá Gavaonitianen.” Tedy králi khardiá Gavaonitianen i rakirdiá lénca. Gavaonitiani sys na Izrailjoskire čhavéndyr, ne jone sys Amoriejendyr, savé jačnépe; Izrail'tiáni dyné lénge sovél, ne Sáulo kamdiá te zamarél len pir péskiro zevlynypén (rievnost') pal ródo Izrailjoskiro i Judáskiro. I phendiá Davído Gavaonitianenge: “So mánge te keráv vaš tuménge, i sósa te ramaniakirav (te primirinav) tumen, sob (kaj) tumé te bahtiakiren Ráskire-Devléskiro meknó mištypén (nasliedije)?” I phendlé léske Gavaonitiani: “Na trej aménge ni rup, ni suvnakáj Saulostyr, ci léskire kheréstyr, i na trej aménge, sob (kaj) te zamarél konés dro Izrailjo.” Jov phendiá: “So tumé kaména? Me keráva vaš tuménge.” I phendlé jone kralíske: “Odolé manušés, savó xasiakirdiá amen i kamdiá te domarel amen, sob (kaj) te na javél amen ni dre jekh Izrailjoskire phuv'jendyr pir miéžy, – léskire rodóstyr vyde aménge eftá manušén, i ame ublavasa len angíl Raste-Devléste dre Givá Sauloskiri, vykedyno Rása-Devlésa.” I phendiá králi: “Me vydava.” Ne tangindia králi Miefivosfiejos, Ionafanoskire čhavés, Saulóskire čhavés, vaš sovél Ráskire-Devléskire lavésa, saví sys maškír lénde, maškír Davidóste i Ionafanoste, Saulóskire čhavéste. I lyjá králi dujén čhavén Ricpakiren, Aiaskire-čhakiren, saví bijandiá Saulóske Armonos i Miefivosfiejos, i pandžen Mielholakire čhavén, Saulóskire-čhakiren, savén joj bijandiá Adrieljoske, čhavéske Vierzelijoskireske, Mieholatyr, i otdyjá len dre vastá Gavaonitianenge, i jone ublade len pe bérga angíl Raste-Devléste. I myné saré eftá khetané; jone sys muliakirdé dre pervoné-ukedyibnytka dyvesá, dro anglypén ukedyiben ĥerstoskiro (jačmienjo).” Tedy e Ricpa, Aiaskiri čhaj, lyjá kaly cérga i rosčhudiá la péske pe doiá bérga, i bešty sys ukedyibnaskiro anglypnástyr ke dová momiento, paka čhudepe pe lénde Devléskire paniá bolybnástyr, i na domekcia, sob (kaj) te čilaven len čirikliá bolybnáskire dyvesé i murdalá (zvieri) feldýtka ratý. I rosphendlé Davidóske, so kerdiá Ricpa, Aiaskiri čhaj, naložnica Sauloskiri. I gijá Davído, i lyjá kokalý Saulóskire i kokalý Ionafanoskire, léskire-čhavéskire, manušéndyr Iavisostyr Galaadskonendyr, savé čorahanés lyné len gasatyr (foruniátyr/ploščátyr) Bief-Sano, kaj ublade Filistimliáni, kiéli zamardé Filistimliáni Saulos pe Gielvuia. I pirilydžija jov odothýr kokalý Saulóskire i kokalý Ionafanoskire, léskire-čhavéskire; i skedyné kokalý ubladengire. I ĥaradé kokalý Saulóskire i Ionafanoskire, léskire čhavéskire, pe phuv Vieniaminoskiri, dre Céla, dre koplíca Kisaskiri, léskire-dadéskiri. I kerdé saró, so priphendiá králi, i sykadiá láska Devél pe doiá phuv paló (poslie) davá. I nevéstyr jaciá maribén maškír Filistimlianende i Izrail'tianende. I vygijá Davído i léskire dynárja lésa, i mardépe Filistimlianenca; i Davído khinyja. Tedy Jesvijo (Iiesvijo), jekh Riefaimoskire rodóstyr, savéste maribnýtko bust sys pharipnasa (vagasa) dre trinšelá xarkóma i, savó obphandlo sys nevoné kurtalása, kamdiá te zamarél Davidós. Ne léske dyjá vast (pomogindia) o Aviesa, Saruiaskiro čhavó, i domardiá Filistimlianinos, i muliakirdiá les. Tedy manušá Davidóskire sovlahade, rakirí: “Na džása tu butýr aménca pe maribén, sob (kaj) te na murdjol Izrailjoskiro momolýtko (svietíl'niko). Tén'ci sys nevéstyr maribén Filistimlianenca dre Goba; tedy Sovohajo Xušatianino zamardiá Safutos, jekhés Riefaimoskire rodóstyr. Sys i javír maribén dre Goba; tedy domardiá Jelhanano, čhavó Jagarie-Orgimoskiro Vifliejemostyr, Goliafas Giefianinos, savéste kašt (drievko) čhurdypnykone bustiakiro sys, syr navojo tkačende. Sys iščo (inké) maribén dre Giefa; i sys odój jekh manúš vučó, savéste sys pe šov angušta pe vastá i pe ĥerá, saré biš te štar, adiáke-pac' Riefaimoskire rodóstyr. I jov kostia Izrail'tianén; ne les zamardiá Ionafáno, čhavó Safajoskiro, Davidóskire-pšaleskiro. Adalé štar sys Riefaimoskire rodóstyr dre Giefa, i jone myné Davidóskire vastéstyr i léskire dynar'jéndyr (slugéndyr). I lyjá te bagal Davído gilý Ráske-Devléske dre dová dyvés, kiéli Raj Devél rakhciá les vastéstyr saré léskire vergéndyr i Saulóskire vastéstyr, i phendiá: “Raj Devél isyn tvárdyma (diz) mirí, i zor mirí, i Zrakhibnaskiro miro. Devél isyn bérga mirí; pe Léste me rozginava; ščýto miro, šyng (rógo) rakhibnaskiro mireskiro, vučardý (bašnia) mirí i našyben miro; Zrakhibnaskiro miro, bidatyr Tu zrakhcián man! Me kharáva Ras-Devlés, Saves trej te šares i me vergéndyr mirendyr zrakhavape. Oblyne man valny meribnytka, i biezzakonijakire sygna rekicy strahakirde man. Zandirjá (cépi) adoskiro obpentyndle man, i feliá (sieti) meribnaskire obkhude man; ne i dro tasadyiben miro me khardjom Ras-Devlés, i ke Devél miro dyjom gódla, i Jov šundiá Péskire khangirjátyr zan mirí, i gódla mirí dogijá ke Léskiro šunybén. Trinskirdiape, kunindiape phuv, izdrandyne i khardepe (podvinindlepe) bolybnáskire fundamienty (osnovy); pal-dová so xoliásyja pe lénde Raj Devél. Ĥazdyjape thuv xoliátyr Leskirjatyr, i uštendyr Leskirendyr jag, saví xála saró; xačkirdé vangara čhudepe Léstyr. Bandiakirdia Jov bolybén i gijá telé; i kalypén tel Léskire ĥerá; i bestiá pe xieruvimy, i vurniandyja, i tradyjá pe phaká (kryly) balvaliakire; i kalypnasa učhakirdiá Pes, syr šatrasa, i Jov skedyjá paní bolybnáskire oblokendyr; ziainybnastyr angíl Léste roshačonas vangara jagakire. Zagriemindia bolybnástyr Raj Devél, i Naj Vučedyreskiro dyjá zan Péskiri; i mekhcia maribnýtka bustiá (striély) i rostradyja len; zaziaindia bliskavicasa i domardiá len. I otčhakirdepe/sykadyne morjoskire (derjavéskire) istočniki (ĥanyngorja), sčhakirdepe fundamienty phuvjákire xoliamé Ráskire-Devléskire zaniatyr, xoliamé phurdypnastyr Léskire duhóstyr. Protyrdyjá Jov vast vučipnástyr, i lyjá man, i vylyja man buté paniendyr; zrakhciá man vergostyr miré zoralestyr, odolé manušéndyr, savé zoralés bidykhena man, savé sys zoraledýr mándyr. Jone ĥazdynépe pe mánde dro bidakiro dyvés miro; ne Raj Devél sys podrikiribnasa vaš mánge i vylydžijá man na pe darano štéto, zrakhciá man, pal-dová so Jov lačhipnása otlydžalape ke me. I otdyjá mánge Devél pir čačipén miro, pir žužypen miré vastengiro dyjá mazúri (nagrada) mánge. Pal-dová so me rakhcjom dromá Ráskire-Devléskire, i me na sómas zlydnitko angíl Raste-Devléste mireste, pal-dová so saré uphenybená Léskire sys angíl mánde, i statutendyr (ustavendyr) Leskirestyr me na otgijom, i me sómas bidošakiro angíl Léste, i me rakhcjompe, sob (kaj) te na keráv grého mánge. I otdyjá mánge Devél pir čačipén miro, pir žužypen miro angíl jakhá Léskire. Tangipnaskiresa (žalostnonesa) Tu, Dévla, kerésa pir tangipén, muršesa čačunesa Tu kerésa čačunés, žužesa – žužes, a xohanesa – pir xohaibén léskiro. Teliakirde manušén Tu zrakhésa, i dykhibnasa Peskiresa Tu teliakiresa phut'kirden. Tu, Rajo Dévla, san momolýtko miro; Tu, Rajo Dévla, pirikeresa amaró kalypén dro svéto (dud). Túsa me domarava xaladybén; Devlésa miresa me džáva upré pe vánta. Devél! – isyn bidošéngiro drom Léskiro, žužó lav Ráskire-Devléskiro, Jov isyn ščýto vaš sarénge, kon užakiréla lačhipén (nadieinelape) pe Léste. Pal-dová so, kon isyn Devél, apríč Raste-Devléste, i kon isyn skála te garadjol, apríč Devléstyr amarestyr? Devél pherdiakirela man zorjása, Jov sykavéla mánge čačunó drom; Jov keréla ĥerá miré syr olienjoskire, i pe vučipená podrikiréla man; Jov sykliakiréla vastá miré maribnaske, i masá pe psiké miré tyrdela, syr xarkuno (miedno) lúko. Tu désa mánge ščýto te rakhavpe, i kovlypen Tyró barjakiréla man. Tu kerésa buĥlydyr dromoro miro tel mánde, i na kuninenape ĥerá miré. Me tradavape pal vergénde mirende i me marava len, i na risjováva, paka vymarava len; i vymarava len, i domarava len, i jone na uštena, i peréna tel ĥerá miré. Tu désa mánge zor vaš maribén, i čhuvésa angíl mánde vergén miren, savé džána pe mánde. Tu riskiresa meniasa ke me vergén miren, i me vymarava odolén, kon bidykhela man. Jone mangena, ne nane zrakhibnaris, – ke Raj Devél, ne Jov na otphenéla lénge. Me rosčhuvava len, syr práho phuvjákiro, syr bláta pe vulíca (gása) me tasavava len, i štakirava len. Tu rakhcian man manušéndyr mirendyr, savé ĥazdynépe proti mánde; Tu rakhcian man, sob (kaj) te javav mánge šeralesa pe javire-rodengire manušénde, manušén, savén me na džindjom, savé dynarinena mánge. Manušá javire-rodengire šukár rakiréna angíl mánde; pir šunybén pal mánde kandéna man. Manušá javire-rodengire parnjona i trinskirenape dre péskire fórja zoralé tynénca. Te javél Raj Devél i bahtiakirdó Zastempniko (Zaterdyibnaskiro) miro! Mek te javél šardo Devél, Skála zrakhibnaske mireskireske, Devél, Savó othala pale (mstinela) pal mánde i pritasavela vaš mánge manušén, i, Savó zrakhéla man vergéndyr mirendyr! Pe manušénde, savé ĥazdynépe proti mánde, Tu ĥazdyjan man vučés; manušéstyr xoliamestyr Tu zrakhcián man. Paldavá me javáva te slavinav Tut, Rajo Dévla, maškír Najudytkoné manušénde, i me javáva te bagáv lavéske Tyréske, Léske, Kon zrakhéla kralís Péskires i keréla milyma pomakhibnaskireske Peskireske, Davidóske i rodóske leskireskire pe viéki!” Ĥáda, isyn palatuné (posliednia) lavá Davidóskire, Jesiejoskire-čhavéskire, phenybén muršeskiro, savó sys čhudo vučés, pomakhibnaskires Devleskires Jakovoskires i gudlé-bagaibnaskires Izrailjostyr: Ráskire-Devléskiro dúho rakiréla dre mánde, i lav Léskiro sys pe čib mánde. Phendia Devél Izrailjoskiro, i rakirdiá pal mánde bérga Izrailjoskiri: “Jav xulása pe manušénde, jav čačunó, xulain darása (darjasa) Devleskirjasa. I syr pe zlóko (pe ránko), kiéli dyviesjola, syr džála upré kham pe bioblokengiro bolybén, savó ziainela paló (poslie) bryšýnd, syr barjola čhar phuvjátyr, ci na adiáke isyn kher miro Devléste? Pal-dová so dorakiribén viéčno čhudiá Jov mánca, tvardo i naparudo. Ci na adiáke džála Léstyr saró zrakhibén miro i saró lačhipén miro? A nalačhé manušá javéna, syr vyčhurdyno xrústo suv'jenca, savó na léna vastésa; ne kon čilavéla les, odová léla sastýr, ci čhurdypnytkone-bustiakire destesa, i jagása xačkirena les pe štéto. Ĥáda, isyn lav murškanengire Davidóste: Isbosiefo Ahamanitianino, šeraló trinendyr; jov ĥazdyjá péskiro čhurdypnytko bust pe ohtošela manušénde, i zamardiá len pal jekh mólo. Pal léste Jelizáro, čhavó Dodoskiro, Ahohoskire-čhavéskiro, triné murškanendyr, savé sys Davidosa, kiéli jone košybnasa vykharde Filistimlianen, savé skedynépe pe maribén. Izrail'tiáni vyginé proti lénde, i jov terdijá, i mardia Filistimlianen ke dová, so vast léskiro khinyja i prilipnindia ke kurtála. I dyjá Raj Devél dro dová dyvés bari zbierdyma (pobieda), i manušá giné pal léste vaš dová jekh, sob (kaj) te obkeden mulen. Pal léste Šama, čhavó Agiejoskiro, Gararitianino. Kiéli Filistimliáni skedynépe dre Firija, kaj sys félda, so sys počhudy dre phuv čečevicasa, i manušá prastándyne Filistimlianendyr: tedy jov terdijá maškír félda, i zrakhciá la, i muliakirdiá Filistimlianen. I dyjá tedy Raj Devél bari zbierdyma (pirizorjakiriben). Trin adalé murškané trijandendyr šeralendyr giné i zaginé dro časo ukedyibnytko ke Davído dre ĥiebár (pieščera) Odolamo, kiéli but Filistimliáni sys terdé pe Riefaimoskiro dólo. Davído sys tedy pe štéto zoralé tynénca, a otriado Filistimlianengiro – dro Vifliejémo. I zakamdiá Davído te p'jel, i phendiá: “Kon paniakirela man paniésa Vifliejemoskire ĥanyngatyr, so sys pašýl pórta?” Tedy trin adalé murškané manušá promardepe pirdál Filistimlianengiro stáno (lod), i pherdé paní Vifliejemoskire ĥanyngatyr, so sys pašýl pórta, i lyné i jandlé Davidóske. Ne jov na zakamdiá te p'jel les i vyčhudiá les dre sláva Ráske-Devléske, i phendiá: “Zrákh man, Dévla, sob (kaj) me te keráv davá! Ci davá isyn na rat adalé manušéngiro, savé psirdé darása (darjasa) pal péskiro džiibén?’ I na zakamdiá les te p'jel. Ĥáda, so kerdé dalé trin muršarja! I Aviesa, Ioavoskiro pšal, Saruiaskiro čhavó, sys trinendyr šeralesa; jov zamardiá péskire čhurdyibnytkone bustiasa trinšelá manušén i sys dre sláva odolé trinende. Trinendyr jov sys patyvaledyr i sys barydyrésa, ne odolé trinenca na rovnindiape. O Vaneja, Iodajoskiro čhavó, muršari, baró pir réndy, Kavceilostyr; jov muliakirdiá dujén Ariiloskire Moavitskone čhavén; jov gijá i zamardiá ščeres (lievos) dro rovo (xohói) dro ivitko časo; i jov zamardiá jekhe Jegiptianinos, šeralé manušés; dro Jegiptianinoskiro vast sys čhurdyibnytko bust, a jov gijá ke jov kaštesa, i otlyja čhurdypnytko bust Jegiptianinoskire vastéstyr, i domardiá les léskire bustiasa: ĥáda, so kerdiá Vaneja, Iodajoskiro čhavó, i jov sys dre sláva triné murškané manušénde; jov sys slavutnedyr trijandendyr, ne odolenca trinenca na rovnindiape. I čhudiá les Davído pašatunesa fandarisa (spolnitiljosa) pe péskire priphenybená. Asailo, Ioavoskiro pšal – sys maškír adalé trijánda manušénde; Jelhano, Dodoskiro čhavó, Vifliejemostyr, Šama Xaroditianino, Jeliko Xaroditianino, Hierieco Paltitianino, Iro, Ikiešaskiro čhavó, Fiekoitianino, Jevijeziero Anafofianino, Miebunajo Xušatianino, Calmono Ahohitianino, Magarajo Nietofatitianino, Hielievo, Baanoskiro čhavó, Nietofatitianino, Itajo, Ribajoskiro čhavó Givatyr Vieniaminóskire čhavéndyr, Vaneja Pirafonianino, Idajo Nahlie-Gaašostyr, Avi-Albono Arbatitianino, Azmavieto Barhamitianino, Jelijahba Šaalbonianino; Jašenoskire čhavéndyr, Ionafáno, Šama Gararitianino, Ahiamo, Šararoskiro čhavó, Araritianino, Jelifielieto, Ahasbajoskiro čhavó, Magahatoskire-čhavéskire, Jeliamo, Ahitofieljoskiro čhavó, Gilonianino, Hiecrajo Karmilitianino, Paarajo Arbitianino, Igalo, Nafanoskiro čhavó, Cobatyr, Bani Gaditianino, Celieko Amonitianino, Naharajo Bierotianino, manúš, savó lydžalas mardýtko (oružyjo) Ioavoskiro, Saruiaskire čhaveskiri, Iro Itritianino, Gariebo Itritianino, Urijo Xietejanino. Saré sys trindeša (trijánda) eftá. Xolý Raskiri-Devléskiri nevéstyr roshačija pe Izrail'tianende, i ĥazdyjá Jov dre lénde Davidós te phenél: “Džá, pirigin Izrailjo i Judas.” I phendiá králi Ioavoske, xaladéngire barydyréske, savó sys pašýl léste: “Džá pir saré Izrailjoskire ródycy (čangá) Danostyr ke Virsavo, i piriginen manušén, sob (kaj) mánge te džináv, kicý isyn manušá.” I phendiá Ioávo kralíske: “Raj Devél, Devél tyró, mek te barjakirel butýr adákicy manušén, ci but isyn, i butýr dre šel móly adákicy, a jakhá xuláskire mireskire, kralískire, mek te dykhén davá; ne vaš so xuláj miro, králi, kaméla davá réndo?” Ne lav kralískiro Ioavoske i xaladéngire barydyrénge pirizorjakirdia; i gijá Ioávo xaladéngire barydyrénca kralístyr te ginen Izrailjoskire manušén. I piriginé jone Iordáno, i terdiné dre Aroiero, pe čačí (pravo) foróskiri rig, savó sys maškirál dólo Gadoskiro, ke Iaziero; i javné dro Galaádo i pe phuv Tahtim-Xodšy; i javné dro Dan-Jaano, i obgine Sidono; i javné ke fóro zoralé tynosa Tíro i dre saré fórja Xivejanengire i Xananejanengire, i vyginé ke paš-dyvés (jugo) Judejákiro i Virsavijo; i obgine sarí phuv, i javné pirdál jeniá čhoná i biš dyvesá dro Jerusalimo. I podyja Ioávo kicypen (količestvo) pe papiri manušytkoné piričhinybnasa kralíske; i vygijá, so Izrail'tianén sys ohtošela tysjoncy zoralé muršén, savé sys lačhé ke maribén, a Judejakiren sys pandžšelá tysjoncy. I zamardiape iló Davidóskiro paló (poslie) davá, syr jov pirigindia manušén. I phendiá Davído Ráske-Devléske: “Baró grého kerdjom me, keri adiáke; i kakaná mangáva Tut, Dévla, primang (prostin) grého Tyré pishariskiro, pal-dová so sarésa nagod'vares kerdjom me.” Kiéli Davído uštyjá pe javír dyvés pe zlóko, tedy sys lav Ráskire-Devléskiro ke Gado proróko, magiko (prozorlivco) Davidóskiro: “Džá i phen Davidóske: ‘Adiáke rakiréla Raj Devél: Trin xasiá (kary) Me dáva te vykedes túke, vykede péske jekh léndyr, savó Me te keráv pe túte.’” I javdiá Gado ke Davído, i rosphendiá léske, i phendiá léske: “Vykede péske, ci te javél bokh pe tyrí rig eftá berš, ci sob (kaj) tu trin čhoná te našes tyré vergéndyr, i jone te tradén tut, cji, sob (kaj) saré trin dyvesá te javél saró moróvo (fránsy) pe tyrí rig? Kakaná dé godý péske, dumin nábut i phen, so mánge te otphenav Odoléske, Kon bičhadiá man.” I phendiá Davído Gadoske: “Pharó isyn drieván mánge; ne mek te perav me dre Ráskire-Devléskire vastá, pal-dová so baró isyn Léskiro kovlypen; jekh so dre manušéngire vastá te na perav mánge.” I bičhadiá Devél moróvo (fránsy) pe Izrail'tianende zlokostyr ke uphendló časo; i myné manušá, Danostyr ke Virsavo, eftadešá tysjoncy manušá. I gazdyja Jangólo péskiro vast pe Jerusalimo, sob (kaj) te kerél čhučesa les; ne Raj Devél tangindia (požalindia) pal bída, i phendiá Jangoloske, savó muliakirdiá manušén: “Uhtýlla (dósi), kakaná obmek tyró vast.” Jangólo Ráskire-Devléskiro sys tedy pašýl šúrna Ornaskire-Jevusejaninoskiri. I phendiá Davído Ráske-Devléske, syr dykhciá Jangolós, savó muliakiréla manušén, rakirí: “Ĥáda, me kerdjom grého, me kerdjom grého; a adalé bakré, so kerdé jone? I javdiá Gado dro dová dyvés ke Davído i phendiá léske: “Jav, čhuv altárjo Ráske-Devléske pe šúrna Ornanoskiri, kon sys Nievusijanino.” Adiáke gijá Davído pir lav Gadoskiro, syr priphendiá Raj Devél. Kiéli Orna gazdyja jakhá, to dykhciá kralís i léskire manušén [dynar'jén-r.s.], savé džánas ke jov, i jov kerdiá šerésa (klonindiape mósa) kralíske ke phuv. I phendiá Orna: “Pal so javdiá miro raj, králi, ke péskiro pishári (rabo)?” I phendiá Davído: “Te kinav šúrna tyrí te čhuvav altárjo Ráske-Devléske, sob (kaj) te pirijačel xasibén (moróvo) pe manušénde.” I phendiá Orna Davidóske: “Mek te lel miro raj, králi, i te ĥazdel syr svénto dyibén (žértva) dová, so isyn lačhó vaš léske. Ake, isyn guruva vaš célo shačkiribén i ĥliaby (povozki) i ĥamy guruvengire pe kaštá. Saró davá, králi Orna déla sarésa kralíske “I iščo (inké) phendiá Orna kralíske: “Mek Raj Devél, Devél te tanginél tut [te sykavél láska-r.s.]!” Ne králi phendiá Ornaske: “Nad, me pleskirava (pokinava) túke, so davá isyn mol, i my na janáva svénto dyibén Ráske-Devléske, miré Devléske doléstyr so me lyjom bi lovengiro (ivjá).” I kindia Davído šúrna i guruvén pal pandždešá šékieli dro rup. I čhudiá odój Davído altárjo Ráske-Devléske i jov jandiá céla skačkiribena i svénta dyibená (žertvy) pal ramánjo (miro). Kiéli králi Davído phurija, ia javdiá dre phurané beršá, tedy učhakirenas les idiénca, ne jov na mogindiá te statjol. I phendlé léske léskire slúgi (dynárja): “Mek te rodén vaš xuláske amareske, kralíske, patyvalia džuvlorja, sob (kaj) joj te terdjol angíl kralíste, i te psirél pal léste, i te pasjol lésa, – i javéla tato xuláske amareske, kralíske.” I rodyne gožona patyvalia džuvlorja dre saré rigá Izrailjoskire, i lathné Avisaga Sunamitianka, i jandlé la ke králi. Patyvalý džuvlý sys drieván šukár, i psirdiá joj pal kralíste, i dynarindiá léske, ne králi na uĥalyja la. O Adonija, Agifakiro čhavó, zaphutii, rakirdiá: “Me javáva králi.” I zalydžijá péske maribnýtka vurdyná, i manušén, savé tradéna uklisté, i pandždešá manušén, savé sýges prastána. Dad nijékhvar na pritasavelas les phučibnasa: “Vaš so tu davá kerésa?” Jov sys drieván šukár i bijándyja léstyr paló (poslie) Aviesalomoste. I radindiape jov Ioavosa, Saruiaskire čhavésa, i Aviafarosa rašása, i jone pomogindle Adonijaske. Ne rašáj Sadoko i Vaniéia, Iodajoskiro čhavó, i proróko Nafano, i Siemiéjo, i Risijo, i zoralé Davidóskire na sys pe Adonijaskiri rig. I začhindiá Adonija bakrén i guruvén, i guruvorén pašýl bar Zohieliéto, so sys pašýl ĥanyngori Rogiel', i khardiá sarén peskiren pšalén, čhavén kraliskiren, saré Judejakirenca, savé dynarindlé kralíste. A prorokós Nafanos, i Vaniéias, i odolén zoralen, i Solomonos, pšalés péskires, jov na khardiá. Tedy Nafano phendiá Virsavijake, Solomonóskire dáke, rakirí: “Ci šundián tu, so Adonija, čhavó Agifakiro, kerdiápe králi, a xuláj amaró, Davído, na džinéla pal davá? Akaná, ĥáda, me radinava túke: zrákh džiibén tyró, i džiibén tyré čhavéskiro Solomonóskiro. Džá i zadžá ke králi Davído, i phen léske: “A ci na sovlahadian tu, xulájo miro, králi, dynaricake tyrjake, rakirí: ‘A čhavó tyró Solomóno javéla králi paló (poslie) mánde, i jov bešéla pe miro trono?” Sóske jaciá kralísa Adonija.’ I ĥáda, kiéli tu butýr javésa te rakirés odój kralísa, to i me zadžava palál pal túte, i dočhuvava ke tyré lavá.” Virsávija gijá ke králi dre soibnytka štúba, kaj isyn suté: králi sys drieván phuró i Avisaga Sunamitianka dynarindiá kralíske. I zbandija Virsávija i poklonindiape kralíske; i phendiá králi: “So túke trej?” Joj phendiá léske: “Hulájo miro, králi! Tu sovlahadian tyré dynaricake Rása-Devlésa, Devlésa tyresa: “Čhavó tyró Solomóno, javéla králi paló (poslie) mánde, i jov bešéla pe trono miro.” A akaná, ĥáda, o Adonija jaciá kralísa, i tu, xulájo miro, králi, na džinésa pal davá. I začhindiá jov but guruvén, guruvorén i bakrén, i khardiá sarén čhavén kraliskiren, i rašás Aviafaros, i xaladéngire barydyrés Ioavos; a Solomonos, tyré pisharís, na khardiá. Ne tu, xulájo miro, – králi, i jakhá saré Izrail'tianengire, dykhéna pe túte, sob (kaj) kaj tu te des te džinén lénge, kon bešéla pe trono xuláskire-mireskiro, kralískiro paló (poslie) léste. Javirés (pe javír), kiéli xuláj miro, králi, javéla garadó péskire dadénca, to peréla bang pe mánde i pe miré čhavéste Solomonoste.” Kiéli joj rakirdiá kralísa, to javdiá i proróko Nafano. I phendlé kralíske, rakirí: “Ĥáda, Nafano proróko.” I zagijá jov ke králi, i poklonindiape kralíske mósa ke phuv. I phendiá Nafano: “Hulájo miro, králi! Ci phendián tu: ‘Adonija javéla králi paló (poslie) mánde, i jov bešéla pe trono miro?’ Pal-dová so jov akaná javdiá i začhindiá but guruvén, guruvorén i bakrén i khardiá sarén kraliskiren čhavén, i xaladengiren barydyrén, i rašás Aviafaros; i ĥáda, jone xána i p'jena léste, i rakiréna: ‘Mek te dživél králi Adonija!’ A man, tyré pisharís, i rašás Sadokos, i Vanejas, čhavés Iodajoskires, i Solomonos, pisharís tyrés, na khardiá. Ci na jaciá davá pir iló xuláskire mireskire, kralískiro, i vaš so tu na phendián pisharíske tyréske, kon bešéla pe trono xuláskire mireskiro, kralískiro, paló (poslie) léste?” I otphendiá králi Davído i phendiá: “Kharén ke me Virsávija.” I zagijá joi, i terdijá angíl kralíste. I sovlahadiá králi, i phendiá: “Te javél džidó Raj Devél, Savó zrakhéla di (džiibén) miro kažnoné bidatyr! Syr-me sovlahadjom túke Rása-Devlésa (Jahvasa), Devlésa Izrailjoskiresa, rakirí, so Solomóno, čhavó tyró, javéla králi paló (poslie) mánde, i jov bešéla pe trono miro zamiést mander, adiáke me i keráva davá adadyvés.” I poklonindiape Virsávija mósa ke phuv, i poklonindiape kralíske, i phendiá: “Mek te dživél xuláj miro, králi Davído, dro viéko!” I phendiá králi Davído: “Kharén ke me rašás Sadokos, i prorokós Nafanos, i Vanejas, čhavés Iodajoskires.” I zaginé jone ke králi. I phendiá lénge králi: “Len pésa tumaré xuláskire dynar'jén i čhuvén te bešél Solomonos, čhavés mires, pe miré muloste, i lydžán les ke Giono. I mek te makhel les odój Sadoko, rašái, i Nafano, proróko, dre kralíste pe Izrailjo, i zabašaven rogosa (trubasa), i den gódla: ‘Mek te dživél králi Solomóno!’ Paló (poslie) janén les pale, i jov javéla, i bešéla pe trono miro; jov javéla králi zamiést mander; léske me dyjom lav te javél šeralesa pe Izrailjo i dre Judéia.” I otphendiá Vaniéia, čhavó Iodajoskiro, kralíske, i phendiá: “Amín', – mek te phenél adiáke Raj Devél, Devél xulaskiro mireskiro, kralískiro! Syr sys Raj Devél, Devél xulása miresa, králi, adiáke mek te javél Jov Solomonosa i mek te kerél zoraledýr kralipén léskiro butýr xuláskire mireskire kralipnastyr, Davidóskire kralískire!” I giné Sadoko, rašái, i Nafano, proróko, i Vaniéia, čhavó Iodajoskiro, Xieliefiei i Fieliefiei; i čhudé te bešén Solomonos pe muloste kralískire Davidoskireste, i lydžiné les ke Giono. I lyjá Sadoko rašáj šyng (rógo) jeliejosa skinijatyr, i pomakhcia Solomonos. I phurdyne dro rógo (trubasa), i saré manušá dyné gódla: “Mek te dživél králi Solomóno!” I saré manušá lydžiné dur Solomonos, i bašade manušá pe svirol'ka (sviriel'), i drieván radyndlepe adiáke, so phuv trinskirdiape léngire godlendyr. I šundiá Adonija i saré manušá, savé sys khardé lésa, syr mekné te xan; a Ioávo, syr šundiá zan rogoskiri, i phendiá: “Sóstyr davá šumo džála buntuitkone foróskiro? Iščo jov rakirdiá, syr javdiá Ionafáno, Aviafaroskire-rašaskiro čhavó. I phendiá Adonija: “Zadžá; tu san patyvalo manúš, i lydžása lačhí zan (zvies').” I otphendiá Ionafáno, i phendiá Adonijaske: “Čačó, xuláj amaró, králi Davído, čhudiá Solomonos kralísa.” I bičhadiá králi lésa Sadokos, rašás, i Nafanos, prorokós, i Vanejas, Iodajoskire čhavés, i Xieliefiején, i Fieliefiején, i jone čhudé les pe kralískire muloste. I pomakhne les Sadoko, rašái, i Nafano, proróko, syr kralís dro Giono, i odothýr giné radymása, i javné te svenkinen dre fóro. Ĥáda, sóstyr džála šumo, savó tumé šunéna. I Solomóno akaná bestiá pe kralískiro trono. I dynárja kralískire javéna te barjakirén xulás amares kralís Davidós, rakirí: ‘Devél tyró mek te slavinel lav Solomonóskiro butýr tyré lavéstyr, i mek te kerél slavutnedyr léskiro kralipén butýr tyré kralipnastyr. I poklonindiape králi pe péskiro čhuibén.’ I phendiá králi adiáke: “Te javél bahtiakirdó Raj Devél, Devél Izrailjoskiro, Savó adadyvés dyjá manušés, savó javéla beštó pe miro štéto, i jakhá miré dykhéna davá!” Tedy strahádyne i uštyné saré, savé sys khardé, kon sys Adonijaste, i kažno (sváko) gijá péskire dromésa. Adonija, darandyja Solomonostyr, uštyjá i gijá, i uhtyldiape pal šyngá altarjoskire (žertvienikoskire). I rosphendlé Solomonóske, rakirí: “Ĥáda, Adonija daréla kralístyr Solomonostyr; i ĥáda, jov rikirélape pal šyngá altarjoskire (žertvienikoskire), rakirí: ‘Mek te sovlahal mánge akaná králi Solomóno, so jov na muliakiréla pisharís péskires kurtalása.’” I phendiá Solomóno: “Kóli jov javéla patyvalo manúš, tedy ni jekh léskiro bal šerestyr na peréla pe phuv; kóli lathelape dre léste fuipén, tedy meréla.” I bičhadiá králi Solomóno, i jandlé les altarjostyr. I jov javdiá, i poklonindiape kralíske Solomonóske; i phendiá léske Solomóno: “Džá dro kher péskiro.” Javdiá dyvés te merél Davidóske, i priphendiá jov péskire čhavéske Solomonóske, rakirí: “Ĥáda, me otdžava saré-phuvjákire dromésa, tu jav tvardo i jav murškanó. I rakh zaviéto Ráskire-Devléskiro, tyré Devléskiro, psir Léskire droménca i rakh Léskire uphenybená, i priphenybená Léskire, i Léskiro čačipén i uphenybená Léskire, syr isyn čhindló dro Mojzáskiro Zakóno, sob (kaj) te javes túke god'varesa dro saró, so javésa te kerés, i ŭsiendie (viezdie), karik tu džása. Sob (kaj) Raj Devél te spolninel lav Péskiro, savó Jov phendiá pal mánde, rakirí: “Kóli čhavé tyré javéna te dykhén pal dromá péskire, sob (kaj) te psirén angíl Mánde dro čačipén saré péskire iléstyr i saré péskire diéstyr, tedy murš tyré sem' jatyr javéla pe Izrailjoskiro trono.” Iščo: tu džinésa, so kerdiá mánge Ioávo, Saruiaskiro čhavó, syr kerdiá jov dujénca Izrailjoskire xaladéngire šeralenca, Avienirosa, Niroskire čhavésa, i Amiesasa, Iiefieroskire čhavésa, syr jov zamardiá len, i pročhudia rat na dro maribnaskiro časo, loliakirdia ratésa kustýk pe trušula péskire i ĥeritka pe péskire ĥerá. Ker pir godý tyrí, sob (kaj) te na des léskire syvone šereske te merél phuripnastyr. A čhavénge Vierzielijoskirenge Galaaditianinoskirenge ker lačhipén, sob (kaj) kaj jone te javén maškír manušénde, savé xána pal tyró skamínd; pal-dová so jone javné ke me, kiéli me nastjom Aviesalomostyr, tyré pšalestyr. Ĥáda, iščo (inké) túte isyn Siemiéjo, čhavó Gieraskiro, Vieniamitianinoskiro Bahurimostyr; jov kostia man pharé prokošybnasa, kiéli me gijom dro Mahanaimo; ne jov gijá gil mánge pašýl Iordáno, i me sovlahadjom léske Rása-Devlésa, rakirí: “Me na muliakirava tut kurtalása.” Tu na promek léske; pal-dová so tu san manúš god'varó i džinésa, so túke te kerés lésa, sob (kaj) te des léskire syvone šereske te džal dro rat dro liúno (ado).” I myjá Davído dadénca peskirenca, i garadó sys dro Davidóskiro fóro. Dyvesá Davidóskiro syr kralís pe Izrailjo sys štardešá berš: dro Xievróno jov sys králi eftá berš i trijánda trin berš dro Jerusalimo. I bestiá Solomóno pe Davidóskiro štéto, péskire dadéskiro, i kralipén léskiro sys drieván zoraló. I javdiá Adonija, čhavó Agifakiro, ke Virsávija, daj Solomonóskiri. Joj phendiá: “Ci ramanjosa (mirósa) javdián?” I phendiá jov: “Ramanjosa.” I phendiá jov: “Mánde isyn lav ke tu.” Joj phendiá: “Rákir.” I phendiá jov: “Tu džinésa, so kralipén isys miro, i saró Izrailjo dykhciá pe mánde syr pe kralíste; ne kralipén otgijá mándyr i doiaciape pšaléske miréske; pal-dová so Rástyr-Devléstyr davá sys. Akaná me mangáva tut pal jekh, na otphen mánge.” Joj phendiá léske: “Rákir.” I phendiá jov: “Mangáva tut, phen kralíske Solomonóske, pal-dová so jov na otphenéla túke, sob (kaj) jov te del mánge Avisaga, Sunamitianka, dre romniáte. I phendiá Virsávija: “Mištó, me pirirakirava pal túte kralísa.” I zagijá Virsávija ke králi Solomóno te rakirél léske pal Adonijaste. Králi uštyjá angíl láte, i poklonindiape láke, i besciá pe péskiro štéto. Čhudé trono i vaš dáke kraliskirjake, i joj besciá pe čačó (pravo) vast léskiro. I phendiá: “Mánde isyn ke tu jekh nabaró mangipén, na otphen mánge.” I phendiá láke králi: “Mang, daj mirí; me na otphenava túke.” I phendiá joi: “De Avisaga Sunamitianka Adonijaske, pšaléske tyréske, dre romniáte.” I otphendiá králi Solomóno, i phendiá péskire dáke: “Sóske tu mangesa Avisaga Sunamitianka vaš Adonijaske? Mang léske adiáke-pac' i kralipén; pal-dová so jov isyn miro phuredýr pšal, i léskire rašáske Aviafaroske, i Ioavoske, Saruiakire-čhavéske mal.” I sovlahadiá králi Solomóno Rása-Devlésa, rakirí: “Dová i dová mek te kerél mánca Devél i iščo (inké) butýr keréla, kóli na pe péskiro di phendiá Adonija dasavo lav. Akaná, – te javél džidó Raj Devél, Savó zorjakirdia man i čhudiá man pe trono Davidóskiro, miré dadéskiro, i kerdiá mánge kher, syr rakirdiá Jov, akaná Adonija isyn bangó te merél.” I bičhadiá králi Solomóno Vanejas, čhavés Iodajoskires, savó zamardiá les, i jov myjá. A rašáske Aviafaroske králi phendiá: “Džá dro Anafofo pe tyrí félda; tu san bangó te meres, ne adadyvés dro časo me na zamarava tut; pal-dová so tu lydžijan kovčego Baré Ráskire-Devléskiro angíl Davidóste, dadéste mireste, i vyrikirdian saró, so vyrikirdia dad miro.” I durjakirdia Solomóno Aviafaros sventymatyr Raskirjatyr-Devleskirjatyr, i spolnindiape lav Ráskire-Devléskiro, savó phendiá Jov pal kher Ilijaskiro dre Siloma. Šunyben pal davá dogijá ke Ioávo, – adiáke syr Ioávo sys pe Adonijaskiri rig, a na pe Solomonóskiri rig, – i nastiá Ioávo dre skínija Devléskiri, i uhtyldiape pal šyngá altarjoskire (žertvienikoskire). Sys phendló Solomonóske, so Ioávo nascia dre skínija Devléskiri, i so jov sys pašýl altárjo. “Džá, muliakir les!” -phendiá zoralés Solomóno, Vanejaske, savó sys čhavó Iodajoskiro. I javdiá Vaniéia dre skínija (šátra) Ráskire-Devléskiri, i phendiá léske: “Adiáke phendiá králi: ‘Vydža.’” I phendiá dová: “Nad, me kamám te merav javrí.” Vaniéia piridyja davá kralíske, rakirí: “Adiáke phendiá Ioávo i adiáke otphendiá mánge.” Králi phendiá léske: “Ker, syr jov phendiá, i muliakir les, i garav les, i zle nabango rat, savó pročhudia Ioávo, mándyr i miré-dadéskire kheréstyr. Mek te obriskirel Raj Devél rat léskiro pe šeró léskiro pal dová, so jov zamardiá dujén muršén, savé na sys bangé i fedýr léstyr: zamardiá kurtalása, bi džinybnaskiro miré dadéskiro Davidóskiro, Avieniros, Niroskire čhavés Izrailjoskire-xaladéngire barydyrés, i Amiesajos, Iiefieroskire čhavés, Judejákire xaladéngire-barydyrés. Mek te obrisjol rat léngiro pe šeró Ioavoskiro i pe šeró léskire-rodoskiro pe viéko, a Davidóske, i rodóske leskireske, i léskire kheréske, i léskire tronoske, mek te javél ramánjo (miro) pe viéko Rástyr-Devléstyr!” I gijá Vaniéia, Iodajoskiro čhavó, i zamardiá Ioavos, i muliakirdiá les, i jov sys garadó dro péskiro kher pe čhučí phuv. I čhudiá králi Solomóno Vanejas, Iodajoskire čhavés, pe léskiro štéto barydyrésa pe xaladénde: a Sadokos, rašás, čhudiá králi zamiést Aviafaroste. I bičhadiá, králi te kharén Siemiejos i phendiá léske: “Čhuv péske kher dro Jerusalimo, i dživ date, i nikarik na vydža datyr.” I džin, so dro dová dyvés, dre savó tu vydžasa i piridžasa sýgno rékica (lenorí) Kiedrono, usajékh merésa; rat tyró javéla pe šeró tyró.” I phendiá Siemiéjo kralíske: “Mištó; syr priphendiá xuláj miro, králi, adiáke keréla pishári tyró.” I dživdiá Siemiéjo dro Jerusalimo baró časo. Ne pirdál trin berš vygijá, so Siemiejoste duj pishárja našné ke Anhuso, Maahaskiro čhavó, králi Giefakiro. I phendlé Siemiejoske, rakirí: “Ĥáda, pishárja isyn tyré dre Giéfa.” I uštyjá Siemiéjo, i dyjá andré oslós péskires, i gijá dre Giéfa ke Anhuso, te rodél peskiren pishar'jén. I risijá Siemiéjo, i jandiá péskire pishar'jén Giefatyr. I rosphendlé Solomonóske, so Siemiéjo psirdiá Jerusalimóstyr dre Giefa i risijá. I bičhadiá, khardiá králi Siemiejos, i phendiá léske: “Ci na sovlahadjom me túke Rása-Devlésa, i ci na dyjom te džinés túke, rakirí: ‘Džin, so dre dová dyvés, dre savó tu vydžasa i džása karik-libo, usajékh merésa?’ i tu phendián mánge: ‘Šukár.’ Sóske tu na rakhcian priphenybén, savó me dyjom túke angíl Raste-Devléste sovlahasa?” I phendiá králi Siemiejoske: “Tu džinésa i džinéla iló tyró saró fuipén, savó tu kerdián miré dadéske Davidóske; mek te obriskirel Raj Devél xolý tyrí pe šeró tyró! A králi Solomóno mek te javél bahtiakirdó, i trono Davidóskiro mek te javél čhudo angíl Raste-Devléste dro viéko!” I priphendiá králi Vanejaske, Iodajoskire čhavéske, i jov gijá, i zamardiá Siemiejos, i odová myjá. Solomóno jaciá te semencynelpe faraonosa, kralísa Jegiptoskiresa, i lyjá paloróm faraonoskirja čha, i lydžijá la dro fóro Davidóskiro, paka čhudiá péskiro kher, i Ráskire-Devléskiro Kher, i vánty pašýl Jerusalimo. Manušá iščo (inké) janénas svénta dyibená Ráske-Devléske pe vučé štéty, pal-dová so na sys kerdó kher Ráskire-Devléskire lavésa ke/žýko dová časo. I lyjá te rikirél dro péskiro iló Solomóno Ras-Devlés syr Drógima, psirdiá pir uphenybén Davidóskiro, péskire-dadéskiro; ne i jov janelas svénta dyibená Ráske-Devléske i thuvliakirelas drogoné smolenca pe vučé štéty. I gijá králi dro Gavaóno, sob (kaj) te janel odój svénto dyibén Ráske-Devléske, pal-dová so odój sys glavno altárjo. Tysjonco célo shačkiribén lydžijá upré Solomóno pe dová altárjo. Dro Gavaóno javdiá Raj Devél Solomonóske dro suné ratý, i phendiá Devél: “Mang, so te dav túke.” I phendiá Solomóno: “Tu kerdián pisharíske Tyréske, Davidóske, dadéske miréske, baró lačhipén; i pal dová, so jov psirdiá angíl Túte dro patiaibén i čačipén, i čačuné ilésa sys angíl Túte, Tu zrakhcián léske davá baró lačhipén i dyján léske čhavés, savó bešelas by pe léskiro trono, syr davá i isyn akaná.” I akaná, Rajo Dévla, Devél miro, Tu čhudián pisharís Tyrés králi pe štéto Davidóskiro, miré dadéskiro; ne me – ternó manúš tyknó, me na džinóm (na džináv) ni miro vygiiben, ni zagiibén. I pishári Tyró isyn – maškír manušénde Tyrende, savén zrakhcián Tu, manušén adákicy but, so len naštý ni te pirigines, ni te zgines jakhénca. De Tyré pisharíske iló god'varó, sob (kaj) me te sendiniakirav manušén Tyrén i te rozĥaljovav, so isyn lačhipén, i so isyn čoripén; pal-dová so kon moginéla te sendiakirél adalé dakicy but Tyré manušén?” I mištó sys Ráske-Devléske, so Solomóno mangdiá davá. I phendiá léske Raj Devél: “Pal-dová so tu mangdian davá i na mangdian péske dlugo džiibén, na mangdian péske barvalypén, na mangdian péske tyré vergengiro meribén, ne mangdian péske godý, sob (kaj) te džinés te sendiakires, to ĥáda, Me keráva pir lav tyró. Ake, Me dáva túke iló godó i god'varó, adiáke so šerá (rávnes) túke na sys angledýr tútyr, i paló (poslie) túte na javéla rovnia túke. I dová, so tu na mangdian, Me dáva túke, i barvalypén i sláva adiáke, so na javéla šerá (rávnes) túke maškír kral'jénde dre saré dyvesá tyré. I kóli tu javésa te psirés dromésa Miresa, rakhi uphenybená Miré, i priphenybená Miré, syr psirdiá dad tyró Davído, to Me keráva dlugedyr i dyvesá tyré.” I džangadyja (prošnindiape) Solomóno, i ĥáda, davá sys, so Raj Devél rakirdiá lésa dro sunó. I gijá jov dro Jerusalimo, i terdijá angíl Ráskire-Devléskiro zavietóskiro kovčego, i jandiá célo shačkiribén, i jandiá ramanjono (mírno) svénto dyibén Ráske-Devléske, i kerdiá baró svénko vaš saré péskire dynar'jénge. Tedy javné duj biladžakuné džuvliá ke králi i terdiné angíl léste. I phendiá jekh džuvlý: “O, xulájo miro! Me i adáia džuvlý dživasa dro jekh kher; i me bijandjom angíl láte dro davá Kher. Pe tríto dyvés paló (poslie) davá, syr me bijandjom, bijandiá i adáia džuvlý; i sámas ame khetané, i dro kher nikonés javirés aménca na sys; jekh ame dujdžiné sámas dro kher. I myjá čhavó adalé-džuvliákiro ratý; pal-dová so joj prosucia les. I uštyjá joj ratý, i lyjá miré čhavés mándyr, kiéli me, pisharka tyrí, sutjom, i čhudiá les ke péskiro kolýn, a péskire mules čhavés čhudiá ke miro kolýn. Pe zlóko (ránko) me uštyjom, sob (kaj) te čaravav miré čhavés, i ĥáda, jov sys muló; a kiéli me pridykhcjompe dre léste zlokosa, tedy davá sys na miro čhavó, savés me bijandjom.” I phendiá javír džuvlý: “Nad, miro čhavó isyn džidó, a tyró čhavó muló.” A odoia rakirdiá láke: “Nad, tyró čhavó isyn muló, a miro isyn džidó.” I rakirdé jone adiáke angíl kralíste. I phendiá králi: “Adaja rakiréla: ‘Miro čhavó isyn džidó, a tyró čhavó muló’; a odoia rakiréla: “Nad, tyró čhavó isyn muló, a miro čhavó isyn džidó”.” I phendiá králi: “Den mánge kurtála.” I jandlé kurtála ke králi. I phendiá králi: “Rosčingiren džides čhavores pe duj pašá, i otdén paš jekhake i paš javirjake.” I otphendiá odoia džuvlý, savjakiro čhavó sys džidó, kralíske, pal-dová so zatrinskirdiape saró andrál láte tangipnastyr ke péskiro čhavó: “O, xulájo miro! Otdén láke dales čhavoré džides, i na muliakirén les.” A javír rakirdiá: “Mek te na javél ni mánge, ni túke, čingiren.” I otphendiá králi, i phendiá: “Otdén adalé džuvliáke džides čhavores i na muliakirén les; joj isyn léskiri daj.” I šundiá saró Izrailjo pal séndo, syr rozsendiakirdia králi; i lyné te darén kralístyr, pal-dová so dykhné, so godypén Devléskiri sys dre léste, sob (kaj) jov te kerél séndo. I sys králi Solomóno pe saró Izrailjo. I, ĥáda, barydyrá, savé sys léste: Azárija, Sadokoskire-rašaskiro čhavó. Jelihoriefo i Ahiia, Sivaskire čhavé, lylá-čhinybnaskire; Iosafáto; Ahiludaskiro čhavó, manúš, savó začhinelas pir beršá (kanceliari). Vaniéia, Iodajoskiro čhavó, xaladéngiro barydyró; Sadoko i Aviaforo – rašaja. Azárija, Nafanoskiro čhavó, barydyró pe upratunende (pristavnikende), i Zavufo, Nafanoskire-rašaskiro čhavó – mal kralískiro. Ahisaro – barydyró pe kralískiro kher, i Adoniramo, Avdoskiro čhavó, te taksa pe pleskiren manušá. I sys Solomonoste dešudúj barydyrá pe saró Izrailjo, i jone janénas xabén kralíske i léskire kheréske; kažno (sváko) musindia te javél te janel xabén pe jekh čhon dro berš. Ĥáda, isyn lavá léngire: Bien-Xuro – pe Jefriemóskiri bérga; Bien-Diekiero – dro Makaco i dro Šaalbimo, dro Viefsamiso, i dro Jelono, i dro Bien-Xanano; Bien-Xiesiedo – dro Ariubofo; léskiri sys Soko i sarí phuv Xiefier; Bien-Avinadavo – pe saró Nafaf-Doromo; Tafafo, Solomonóskiri čhaj sys léskire romniása; Vaana, Ahiludaskiro čhavó, dre Faanaha, i Miegido, i pir sara Bief-Sano, so isyn pašýl Cartano teledýr Jezriejeljostyr, Bief-Sanostyr ke Abiel-Mieholo, i adiáke-pac' pal Jokmieamo; Bien-Gieviero – dro Ramófo Galaadoskiro; léste sys gavá Iairoskire, Manasijáskire-čhavéskire, so dre Galaádo; léste adiáke-pac' provincyja Argovoskiri dro Vasáno, šovdešá baré fórja vantenca i xarkuné začhakiribnasa (šybierenca) pe pórta. Ahinadavo, Gidoskiro čhavó, dre Mahanaimo; Ahimaaso – pe Niefalimoskiri phuv; jov lyjá péske romniá Vasiemafa, Solomonoskirja čha; Vaana, Xušajoskiro čhavó, pe Asiroskiri phuv i dro Baalofo; Iosafáto, Paruahoskiro čhavó, pe Isaharoskiri phuv; Šymiejo, Jelaskiro čhavó, pe Vieniaminoskiri phuv; Gieviero, Urijaskiro čhavó, pe Galaadoskiri phuv, pe phuv Sigonoskiri, Amorieiskone-kralískiri, i Ogaskire, kralískire Vasanskoneskire. Jov sys upratuno (pristavniko) pe daja phuv. Juda i Izrailjo, dre savé sys but manušá, syr isyn práho pašýl mórjo (derjáv), xané, piné i radyndlepe. Solomóno xulaindia saré kralipnenca rekátyr (leniátyr) Jevfratostyr ke phuv Filistimijakiri i ke miéža rigakiri Jegiptóskiri. Jone janénas dáry i dynarindlé Solomonóske dre saré léskire džiibnáskire dyvesá. Habén Solomonóskiro pe kažno dyvés sys: trijánda korcy jaržó parné givestyr i šovdešá korcy javír jaržó; Deš guruvén, savén čarade dre štála i biš guruvén feldatyr, i šel bakrén, apríč olieniéndyr, i siernatyr, i sajgakostyr, i čiriklién, savén čarade dre šúrna. Pal-dová so jov xulaindia pe sarí phuv pir daja rig rekakiri (leniakiri), Tipsahostyr ke Giza, pe saré kral'jénde pir doiá rig rekakiri (leniakiri), i sys léste ramánjo (miro) sarénca pašatuné rigenca. I dživdé Juda i Izrailjo štylés, kažno (sváko) tel péskiro vinogradniko i tel péskiro inžyro, Danostyr ke Virsávija, dre saré dyvesá Solomonóskire. I sys Solomonoste štardešá tysjoncy štéty dre štaly vaš grenge, savén déna andré i dešudúj tysjoncy vaš grenge, pe savénde tradenas uklisté. I odolé upratune (pristavniki) janénas kralíske Solomonóske saró, so sys trej ke kralískiro skamínd, kažno (sváko) dro péskiro čhon, i na domekenas nauhtylyben ni dre so. I ĥersto (jačmienjo), i phus vaš grenge i vaš mulenge janénas kažno (sváko) dre péskiri stečka (riado) pe štéto, kaj sys králi. I dyjá Devél Solomonóske godypén i drieván bari godý, buĥló iló, syr práho pe morjoskiro (derjavéskiro) brégo. I sys godý Solomonóskiri vučedýr godiatyr saré čhavéndyr Vastokóstyr i saré Jegiptianengire godiatyr. Jov sys god'varedyr saré manušéndyr, god'varedyr i Jefanostyr Jezrahitianinostyr, i Jemanostyr, i Xalkolostyr, i Dardiastyr, Maholaskire čhavéndyr, i lav léskiro sys dre sláva saré pašatuné rigengire manušénde. I rosphendiá jov trin tysjoncy pritčy (masala), i giliá léskire sys tysjonco i pandž. I rakirdiá jov pal vešá kiedrostyr, so sys dro Liváno, ke isopo, savó barjola vantatyr; rakirdiá pal murdalénde (žyvjolende), i pal čirikliende, i pal dolende, savé polzynena pir phuv, i pal mačhende. I javéna saré džine manušéndyr te pošunen godý Solomonóskiri, saré-phuvjákire kral'jéndyr, savé šundlé pal godý léskiri. I bičhadiá Xiramo, králi Tiroskiro, péskire dynar'jén ke Solomóno, kiéli šundiá, so les pomakhne dre kralíste pe léskire-dadéskiro štéto; pal-dová so Xiramo sys mal pir iló Davidóske pir saró džiibén. I bičhadiá adiáke-pac' i Solomóno ke Xiramo te phenén: “Tu džinésa, so Davído, miro dad, na mogindiá te čhuvél Kher vaš lav Ráskire-Devléskiro (Jahvaskiro), péskiro Devléskiro, pirdál (kaj) maribén pašatuné-rigengire manušénca, paka Raj Devél otdyjá len tel léskire ĥerá. Akaná Raj Devél, Devél miro, dyjá mánge ramánjo (miro) saré rigéndyr: nane vergos (vrogos) i nane butýr prigrada. I ĥáda, me skedavape te čhuvav Kher vaš lav Ráskire-Devléskiro, miro Devléskiro, syr phendiá Raj Devél miré dadéske Davidóske, rakirí; “Čhavó tyró, savés Me čhuváva pe tyró štéto pe trono, jov čhuvéla Kher lavéske Miréske.” I adiáke priphen te vyčingiren vaš mánge kiedry Livanostyr; i, ĥáda, pishárja miré javéna khetané tyrenca pishar'jénca, i me javáva te pleskirav túke pal tyré dynar'jende, ci but tu phenésa; pal-dová so tu džinésa, so tuménde nane manušén, savé džindlé by, syr te čingires veš adiáke, syr Sidoniani.” Kiéli šundiá Xiramo lavá Solomonóskire, to drieván obradyndiape, i phendiá: “Te bahtiakiren Raj Devél, Savó dyjá Davidóske čhavés god'vares, sob (kaj) jov te javél králi pe davá baró narodo.” I bičhadiá Xiramo ke Solomóno te phenél: “Me vyšundjom dová, palsó tu bičhadian ke me, i me keráva (spolninava) saró pir iló tyró pal kaštá kiedrytka i kaštá kiparisytka. Pishárja miré lydžána len Livanostyr ke mórjo (derjáv), i me plotenca janáva len morjosa ke štéto, savó tu phenésa mánge, i odój sčhuvava len, i tu lésa. Ne i tu vyker saró (spolnin) pir miro iló, sob (kaj) te janes maró vaš miro skamínd.” I dyjá Xiramo Solomonóske kaštá kiedrytka i kaštá kiparisytka, ci but jov kamdiá. A Solomóno dyjá Xiramoske biš tysjoncy korcy parnó giv, sob (kaj) te čaliakiren léskiro kher, i biš korcy olivítko dzet (ksil), savó sys vykedyno. Adákicy dyjá Solomóno Xiramoske kažno berš. Raj Devél dyjá godý Solomonóske, syr dyjá lav léske. I sys ramánjo (miro) maškír Xiramoste i Solomonoste, i jone kerdé maškír péste dorakiribén (sojuzo). I priphendiá králi Solomóno saré Izrailjoske te den vaš butý trijánda tysjoncy manušén. I bičhadiá len pe Liváno, pir deš šelá pe čhon, te paruven jekh jekhés; čhon jone sys dro Liváno, a duj čhoná dro péskiro kher. Adoniramo sys barydyró pe lénde. Iščo Solomonoste sys eftadešá tysjoncy manušá, savé lydžána pharipena i ohtodešá tysjoncy manušén, savé vyčingirde bará dre bérgi. Apríč trin tysjoncy trinšelá barydyrendyr, savén čhudiá Solomóno te dykhén pal manušéngiri butý, savé kerdé butý. I phendiá králi te janén baré bará, bará dróga, vaš Kheréskiro fundámiento, bará obkerde. I obkerenas len Solomonóskire butiarné, i butiarné Xiramoskire, i Givlitiani, i kerénas veš i bará, sob (kaj) te kerén Kher. Dre štaršelá ohtodešto berš paló (poslie) dová, kiéli vyginé Izrailjoskire čhavé Jegiptóskire phuvjátyr, dro štárto berš Solomonóskiro kralipén pe Izrailjo, dro čhon Zifo, savó isyn javír čhon, lyjá jov te čhuvél Devléske Kher (Khangirí). Khangirí, saví čhudiá králi Solomóno Ráske-Devléske, dlengipnása sys dre šovdešá kuniá, buĥlypnasa dre biš i vučipnása dre trindeša kuniá. I trémo (kryl'co) angíl Khangirí sys dre biš kuniá dlengipnása, dasavo pac', syr buĥlypén Khangirjákiri, i dre deš kuniá sys buĥlypén léskiro angíl Khangirí. I kerdiá jov dro Kher fenštry riešotkenca, savé sys venskedyr ke javrituno projomo. I kerdiá jov štúby pašýl Khangirjákire vánty, trusciál (krugom) Khangirí i daviro; i kerdiá štúby pir rigá trusciál. Telatuno etažo dre pristrojka sys buĥlypnasa dre pandž kuniá, maškiralatuno etažo sys buĥlypnasa dre šov kuniá, a tríto etažo buĥlypnasa dre eftá kuniá; pal-dová so pašýl Khangirí javrí sys kerdé progiibena, sob (kaj) bel'ki dre pristrojka te na prikasynelpe ke vánty Khangirjákire. Kiéli čhudiape Khangirí, pe keriben čhudé féni (tóka) vyčingirde bará; ni mlotko svirind, ni tover, ni savó javír sastruno strumiento na sys šundlo, kiéli kerénas Khangirí. Zagiibén dro maškiralatuno etažo sys čačé Khangirjákire rigátyr. Pir krengla liesvicy (letry) džánas upré manušá dro maškiralatuno etažo (jaruso), a maškiralatunestyr pe tríto. I dokerdia jov Khangirí, i končyndia la, i obsudia Khangirí kiedrytkone phaliénca. I kerdiá jov ke saré-Khangirjákire štúby pir rigá vučipnása dre pandž kuniá; jone sys prikerde ke Khangirí kiedrytkone brevnenca. I sys Ráskire-Devléskiro lav ke Solomóno, i phendiá léske: Ĥáda, tu kerésa Khangirí; kóli tu javésa te psirés pir uphenybená Miré, i te kerés pir zakóny Miré, i te rakhés saré priphenybená Miré, te kerés pir lénde, to tedy Me spolninava pe túte lav Miro, savó Me phendjom Davidóske, dadéske tyréske. I Me javáva te dživáv maškír čhavénde Izrailjoskirende, i Me na jačkirava Miré Izrailjoskire manušén. I čhudiá Solomóno Khangirí, i končyndia la. I občhudiá andré Khangirjákire vánty kiedrytkone phaliénca; Khangirjákire petostyr ke pato (potolko) andré občhudiá vešesa, i učhakirdiá khangirjákiro péto (pólo) kiparisytkone phaliénca. I kerdiá dre Khangirjákire-palatuny rig, dre biš kuniá jagoróstyr (krajostyr), vánta, i občhudiá vánty i pato kiedrytkone phaliénca, i kerdiá daviro (palatuny štúba) vaš Sventoné-sventonende. Štardešá kuniá sys dre Khangirí (Kher), anglatuny paš Khangirjákiri. Pe kiedry andré Khangirí sys vyčhindlé bobirki (gurki) i rozmekne luludiá (cviaty); saró sys učhakirdo kiedrosa, bar na sys bicialó. Daviro andré Khangirí jov kerdiá vaš dová, sob (kaj) te čhuvén odój Ráskire-Devléskiro zavietóskiro kovčego. I daviro sys dlengipnása dre biš kuniá, buĥlypnasa sys dre biš kuniá i vučipnása sys dre biš kuniá; jov občhudiá les žužé suvnakása; občhudiá adiáke-pac' i kiedrytko altárjo. I občhudiá Solomóno Khangirí andré žužé suvnakása, i protyrdyjá suvnakuné zandirjá (cépi) angíl daviro, i občhudiá les suvnakása. Sarí Khangirí jov občhudiá suvnakása, sarí Khangirí ke jagóro (krajo), i saró altárjo (žertvieniko), savó sys angíl daviro, občhudiá suvnakása. I kerdiá jov dro daviro duj xieruvimy maslinitkone vešéstyr, vučipnása dre deš kuniá. Jekh phak sys dre pandž kuniá i javír phak xieruvimoskiri sys dre pandž kuniá; deš kuniá sys jekhe léskire phakeskire jagoróstyr (krajostyr) ke javír, léskire phakakiro jagóro. Dre deš kuniá sys i javír xieruvimo; jekhe dlengipnása i jekhe vydykhibnasa sys duj xieruvimy. Vučipén jekhe xieruvimoskiro sys deš kuniá, adiáke-pac' i javire xieruvimoskiro. I čhudiá jov xieruvimy maškirál andratuný khangirjákiri gréda (dvóro). Phaká xieruvimengire sys rozmekne, i kasyndlepe phak jekheskiro jekh vánta, a phak javireskiri javír vánta kasyndiape; javír phaká léngire maškír Khangirí zdžanaspe phak phakasa. I občhudiá jov xieruvimy suvnakása. I pe saré vánty Khangirjákire trusciál kerdiá jov kažna vyčhindlé muiá xieruvimengire, i pal'mitka vešá, i rozmekne luludiá (cvety), andré i javriestyr. I péto (pólo/mosto) dre Khangirí občhudiá suvnakása dre andratuný i anglatuny paš. Vaš zagiibén dro daviro kerdiá jov vudará maslinitkone vešéstyr, pandžé-venglytka. Pe duj vudarengire pašá maslinitkone vešéstyr jov kerdiá vyčhindlé xieruvimy, i pal'my, i rozmekne luludiá, i občhudiá suvnakása; učhakirdiá suvnakása i xieruvimy, i pal'my. I pašýl zagiibén dre Khangirí kerdiá stýlby maslinitkone vešéstyr štaré-venglytka. I duj vudará kiparisovone vešéstyr; duj pašá jekhe-vudarengire sčhuvenaspe, i duj pašá javire-vudarengire čhuvenaspe. I vyčhindia pe lénde xieruvimy i pal'my, i luludiá, savé rozmeknepe, i občhudiá suvnakása pir riez'ba. I čhudiá andratuný gréda (dvóro) triné riadendyr občingirde barestyr i kiedrytkone brusendyr. Dro štárto berš, dre čhon Zifa, čhudiá jov fundámiento Ráskire-Devléskire Khangirjake. A pe dešujekhto berš, dre čhon Bulo – davá isyn ohtóto čhon, – jov kerdiá Khangirí saré lákire pašenca i pir saré lákire plany; kerdiá jov la eftá berš. A péskiro kher Solomóno kerdiá dešutrin berš, i kerdiá saró péskiro kher. I kerdiá jov kher Livanoskire vešéstyr dlengipnása dre šel kuniá, buĥlypnasa dre pandždešá kuniá, a vučipnása dre trijánda (trindeša) kuniá, pe štar riady kiedrytka stýlby; i kiedrytka berny (bel'ki) sys čhudé pe stýlby. I čhudo sys upralo (potolko) kiedrostyr pe berny pe štardešá pandž stýlby, pe dešupandž dro riado. Fenštrengire ramy sys dre trin riady; i trin riady fenštry, fenštra próti fenštra. I saré vudará, i vudarengire stýlby sys štaré-venglytka, i fenštra proti fenštra, dre trin riady. I trémo stylbendyr kerdiá jov dlengipnása dre trem pandždešá kuniá, buĥlypnasa dre trijánda kuniá, i angíl lénde ĥanko, i stýlby, i progo angíl lénde. Iščo kerdiá jov baró trémo tronosa, savéstyr jov sendiakirdia, trémo vaš séndo kerdiá jov i učhakirdiá saró péto (pólo/mosto) kiedrosa. Dro kher, kaj jov dživdiá, javír gréda (dvóro) palál trémo sys adiáke-pac' kerdy. I dro kher, faraonóskire-čhakiro, savjá lyjá paloróm Solomóno, jov kerdiá dasavo-pac' trémo. Saró davá sys kerdó drogoné barendyr, vyčingirde pir baripén, občhindlé fuksasa (pilkasa), andratuné i javrieskire rigátyr, fundamientostyr ke vystupo (frizo), i javrieskire rigéndyr ke bari gréda (dvóro). I dro fundámiento sys čhudé dróga bará, baré bará, bará dre deš kuniá i bará dre ohtó kuniá. I upré sys dróga bará, občingirde pir baripén, i kiedrytka bel'ki berny. Bari gréda (dvóro) sys oblydžiny tynosa trusciál triné riadenca občingirde barendyr i jekhe riadosa kiedrytkone bernendyr; adiáke-pac' i andratuný gréda Khangirjákire-Ráskire-Devleskirjakiri, i riadosa Khangirjákiro. I bičhadiá králi Solomóno, i lyjá Tirostyr Xiramos, savó sys čhavó jekhe udovakiro (pivliakiro), Niefalimoskire rodóstyr. Dad léskiro, Tirianino, sys manúš, savó kerla butý xarkomasa (miediasa); jov sys godó, odarimo, jov šukár džindiá te kerél kažna butiá xarkomátyr. I javdiá jov ke králi Solomóno, i kerdiá léste kažna butiá. I kerdiá jov duj xarkuné stýlby, kažno dre dešuohtodeša kuniá vučipnása, i linija dre dešudúj kuniá obkrencynelas trusciál dová i javír stýlbo. I duj viency, vyčhudé xarkomátyr, jov kerdiá, sob (kaj) te čhuvés upré pe stýlby: pandž kuniá vučipén dre jekh vienco i pandž kuniá vučipén dre javír vienco, i sys feliá (sietki) khudé-butiakire i šnurki, savé zdenaspe pe zandirorja (lancužki) vaš viency, savé sys uprál pe stýlby: eftá pe jekh vienco i eftá pe javír vienco. Adiáke jov kerdiá stýlby i duj riady granatytka phabá pašýl sietka (kapitaly), sob te učhakiren viency, savé sys uprál dre stýlby; dová-pac' kerdiá jov i vaš javír vienco. A dro trémo viency uprál pe stýlby sys kerdé pir lilijakiri forma, dre štar kuniá. I viency pe duj stýlby upré, mamúj (priámo) pe vygiiben, savó sys pašýl sietka, i pe javír vienco, riadenca trusciál, dujšelá granatytka phabá. I čhudiá stýlby jov ke Khangirjákiro trémo; čhudiá stýlbo pe čačí (pravo) rig i dyjá léske lav Iahino, i čhudiá stýlbo pe zérvo (liévo) rig, i dyjá léske lav Voazo. I pe stýlby čhudiá viency, savé sys kerdé pir lilijakiri forma; adiáke končyndle butý pe stýlby. I kerdiá vyčhudo mórjo (derjáv) xarkomátyr, – khe jagoróstyr (krajostyr) leskirestyr ke javír léskiro jagóro deš kuniá, – sarésa krenglo vučipnása dre pandž kuniá oblelas les trusciál. Formasa sýrby plódy (baritka) tel léskire jagóry obkrencynenas mórjo (derjáv) – saré rigéndyr dre duj; pogiiben léngiro sys vyčhudé lésa jekhe čhuibnasa. Jov, mórjo (derjáv), sys terdó pe dešudujende guruvende; trin guruva dykhné pe paš-rat, trin dykhné pe zapado, trin dykhné pe paš-dyvés i trin dykhné pe vastóko; mórjo (derjáv) sys paštó pe lénde, i léngire paluia riskirdé sys andré tel léste. Grubimasa jov sys dre burnyk (ladon'), i léskire jagóry, savé sys kerdé dasavé-pac' syr tahtaskire jagóry, poddžanas pe lilija, saví rozmekciape. Dre léste zadžalas duj tysjoncy baty. I kerdiá jov deš xarkuné podčhuibena (predki), dlengipén kažnoné podčhuibnaskiro – štar kuniá, buĥlypén – štar kuniá i trin kuniá vučipén. I, ĥáda, syr sys kerdé podčhuibena: lénde sys vantycy, vantycy maškír venglytka ramy. Pe vantycy, savé sys maškír ramy, kerdé sys formy ščerengire (lievengire), guruvengire i xieruvimengire; adiáke-pac' i pe ramy, a vučedýr i teledýr ščerendyr i guruvendyr – viency baré randiénca. Tel kažno podčhuiben sys pir štar xarkuné róty i osi xarkuné. Pe štar véngly sys vygiibena, formasa syr psiké, vygiibena sys vyčhudé telál, tel tahtáj (čaša), pašýl kažno vienco. Kula (otvierstijo) viankatyr ke vučipén sys dre jekh kun'; kula léskiri sys krenglo, saví sys formasa syr stylbengiri osnova dre jekh pašésa kun', i pašýl kula léskiri sys formy; ne rigengire vantycy sys štaré-venglytka, na krengla. Tel vantycy sys štar róty, i osi rotengire sys dre podčhuibena; vučipén kažnoné rotakiro – jekh pašésa kun'. Adiáke-pac' sys kerdé róty, syr sys kerdé róty dre maribnýtko vurdén; léngire osi, i obody léngire, i spicy, i stupicy léngire, saró sys vyčhudo. Štar vygiibena (vystupy) pe štar véngly dro kažno podčhuiben; podčhuibnastyr vydžánas lákire vygiibena. I pe vučipén podčhuibenaskiro krenglo čebotar' (vozvyšenijo) pe paš kun' vučipnása; i pe vučipén podčhuibnaskiro lákire rukoiatki i vantycy lákire sys jekhe lása matierjalostyr. I vyčhindia jov pe phaljorja lákire rukoiatki i pe vantycy lákire xieruvimy, ščerá (lievy) i pal'my, ci but, kaj sys vól'no štéto, i trusciál sys phalorja (viency). Adiáke jov kerdiá deš podčhuibena: sarénde lénde jekh sys vyčhuiben, jekh baripén, jekhés vydykhena. I kerdiá jov deš xarkuné čaré moskire; dro kažno čaró moskiro zadžalas štardešá baty; kažno moskiro čaró sys dre štar kuniá; kažno moskiro čaró sys terdó pe jekh dešendyr podčhuibnendyr. I čhudiá jov podčhuibena – pandž pir čačí rig Khangirjákiri i pandž pir zérvo (liévo) rig Khangirjákiri; a mórjo (derjáv) čhudiá pe čačí (pravo) rig Khangirjákiri, pe vastokitko-paš-dyvesýtko rig. I kerdiá Xiramo čaré moskire, lopatycy, i tahtaja (čašy). I končyndia Xiramo sarí butý, saví kerdiá kralíste Solomonoste vaš Ráskire-Devléskiri Khangirí. Duj stýlby i duj opoiaski pe vianki (viency), savé sys pe vučipén stylbengiro, i duj feliá (sietki) vaš učhakiriben duj opoiaski pir viency, savé sys pe vučipén stylbengiro. I štaršelá granatytka phabá pe duj sietki; duj riady granatytka phabá vaš kažno sietka, te učhakiren duj sietki, savé sys pe stýlby. I deš podčhuibena, i deš čaré moskire pe podčhuibena. Jekh mórjo (derjáv) i dešudúj guruva tel mórjo (derjáv). I baré čaré, i lopatycy, i tahtaja. Saré khoré (sasúdy), savé kerdiá Xiramo kralíske Solomonóske vaš Ráskire-Devléskiri Khangirí, sys polirovane xarkomátyr. Kralíske vyčhuvenas len pe ĥleitko (glinytko) phuv, pašýl Iordáno, maškír Sokhofo i Cartano. I čhudiá Solomóno saré dalé khoré (sasúdy) pe štéto. Pirdál davá, so len sys drieván but, vieso xarkomakiro na sys džindló. I kerdiá Solomóno saré khoré (sasúdy), savé sys dre Ráskire-Devléskiri Khangirí: suvnakunó altárjo i suvnakunó skamínd, pe savó sys svencyndlo maró. I momolytka (svietil'niki) – pandž pir čačí rig i pandž pir zérvo (liévo) rig, angíl palatuny štúba, svénto štéto Khangirjákiro, žužé suvnakástyr, i luludiá; i lampadki, i cymty (ščypcy) suvnakástyr. I baré čaré, i čhurja, i tahtaja, i kadily, žužé suvnakástyr, i fielia pašýl vudará andratuné Khangirjákiro dre Svénto-sventonengiro i pašýl vudará dre Khangirí adiáke-pac' suvnakástyr. Adiáke sys kerdy sarí butý; saví kerdiá králi Solomóno vaš Ráskire-Devléskiri Khangirí. I jandiá Solomóno khoré (sasúdy), savé obsvencyndia Davído, léskiro dad; rup i suvnakáj i khoré otdyjá dre piraliá (sokroviščnicy) Ráskire-Devléskire Khangirjákire. Tedy khardiá ke pe Solomóno Izrailjoskire phurydyren i sarén rodycengire barydyrén, šeralen pe Izrailjoskire-čhavéngire stréčy (pokolienii), ke králi Solomóno dro Jerusalimo, sob (kaj) te pirilydžas Ráskire-Devléskiro zavietóskiro kovčego Davidóskire foróstyr, Sionóstyr. I skedynépe ke králi Solomóno pe svénko saré Izrail'tiáni, dro čhon Afanimo, savó isyn eftáto čhon. I javné saré phurydyrá Izrailjoskire; i ĥazdyné rašaja kovčego. I lydžiné Ráskire-Devléskiro kovčego i skedyibnáskiri skínija i saré svénta priedmiety, savé sys dre skínija; i lydžiné len rašaja i Lievíty. A králi Solomóno i lésa saré Izrailjoskire manušá, savé skedynépe ke jov, giné angíl kovčego, i janénas svénto dyibén Ráske-Devléske tykné i baré skotóstyr, savén naštý te zgines i te udžines, pal-dová so len sys drieván but. I lydžiné rašaja Ráskire-Devléskiro zavietóskiro kovčego pe léskiro štéto, dro Khangirjákiro daviro, dre Svénto-sventonengiro, tel xieruvimengire phaká (kryly). Pal-dová so xieruvimy protyrdenas phaká pe kovčegoskiro štéto, i učhakirde xieruvimy upralestyr kovčego i léskire balandiniá (šosty). I vyginé šosty adiáke, so šerore šostengire biciale sys sventoné štetóstyr angíl daviro, ne na sys biciale javriéstyr; jone odój i ke davá dyvés. Dro kovčego ničý na sys, apríč duj baruné tablicy, savé čhudiá odorík Mójza pe Xorivo, kiéli Raj Devél kerdiá dorakiribén Izrailjoskire čhavénca, pir léngiro vygiiben Jegiptóskire phuvjátyr. Kiéli rašaja vyginé sventoné štetóstyr, to, óbloko pherdiakirdiá Ráskire-Devléskiri Khangirí (Kher). I na mogindlé rašaja te terdjon te dynarinén pirdál óbloko; pal-dová so sláva Ráskire-Devléskiri pherdiakirdiá Ráskire-Devléskiri Khangirí. Tedy phendiá Solomóno: “Raj Devél phendiá, so Jov kaméla te dživél dro kalypén. Me kerdjom Khangirí vaš Túke, Rajo Dévla, te dživés pe štéto, sob (kaj) te javes Túke dro viéko.” I risijá králi péskire mósa, i bahtiakirdiá saró skedyibén Izrailjoskiro; saró Izrailjoskiro skedyibén sys terdó. I phendiá jov: “Te javél bahtiakirdó Raj Devél (Jahvá), Devél Izrailjoskiro, savó phendiá Péskire ušténca Davidóske, miré dadéske, i akaná kerdiá Péskire vastésa! Jov rakirdiá: “Dolé dyveséstyr, syr Me vylydžijom Miré Izrailjoskire manušén Jegiptóstyr, Me na vykedyjom fóro ni dre jekh Izrailjoskire rodycendyr, sob (kaj) te javél Khangirí čhudý, dre savó te javél by lav Miro; i vykedyjom Davidós, sob (kaj) te javav léske pe Miré Izrailjoskire manušénde.” Davidóste, miré dadéste, sys pe iló te čhuvél Khangirí vaš lav Ráskire-Devléskiro (Jahvaskiro), Devléskiro Izrailjoskiro. Ne Raj Devél phendiá Davidóske, miré dadéske: “Túte isyn pe iló te čhuvés Khangirí lavéske Miréske; šukár, so davá túte paštó pe iló. Usajékh tu na čhuvésa Khangirí, a čhavó tyró, savó vygijá tyré maséndyr, jov čhuvéla Khangirí lavéske Miréske.” I spolnindia Raj Devél Péskiro lav, savó dyjá, me terdijom pe miré-dadéskiro Davidóskiro štéto i bescjom pe Izrailjoskiro trono, syr phendiá Raj Devél, i me čhudjom Khangirí vaš lav Ráskire-Devléskiro, Devléskiro Izrailjoskiro. I kerdjom odój štéto vaš kovčego, dro savó isyn Ráskire-Devléskiro zavieto, savó Jov kerdiá amaré dadénca, kiéli Jov vylydžijá len Jegiptóskire phuvjátyr.” I terdijá Solomóno angíl Ráskire-Devléskiro altárjo (žertvieniko) angíl saró Izrail'tianengiro skedyibén, i ĥazdyjá péskire vastá ke bolybén. I phendiá: “Rajo Dévla, Devél Izrailjoskiro! Nane adasaves Devlés syr Tu san, Savó pe bolybén uprál i pe phuv telál; Tu rakhesa zavieto i tangipén ke Tyré pishárja, savé psiréna angíl Túte ilésa peskiresa. Tu spolnindian Tyré pisharíske Davidóske, miré dadéske, so rakirdian léske; so phendián Tu ušténca Tyrenca dová dro dová dyvés kerdián Tyré vastésa. I akaná, Rajo Dévla, Dévla Izrailjoskiro, ker pir lav tyré pisharíske Davidóske, dadéske miréske, dová, so rakirdian Tu léske, phení: “Na pirijačéla túte angíl muj Miro manúš, savó javéla te bešél pe trono Izrailjoskiro, kóli tyré čhavé javéna te rikirenpe péskire dromeske, te psirén angíl Mánde adiáke, syr tu psirdian angíl Mánde. I akaná, Raj Devél Izrailjoskiro, mek te javél čačunó lav Tyró, savó Tu dyján pisharíske Tyréske, Davidóske, miré dadéske! Čačunés, ci Devléske te dživés pe phuv? Bolybén i bolybén bolybnáskiro na moginéla te prilén Tut, Dévla, i Khangirí, saví me čhudjom. Ne dykh pe pátieri (molítva) Tyré pishariskiro i pe mangipén léskiro, Rajo Dévla, Dévla miro: šun mangipén i roviben, savésa Tyró pishári mangéla Tut akaná. Mek te javén Tyré jakhá otčhakirde pe daja Khangirí dyvés i rat, pe davá štéto, pal savó Tu phendián: “Miro lav javéla odój; šun mangipén, savésa javéla te mangélpe Tyró pishári pe davá štéto. Šun mangipén Tyré pishariskiro i Tyré Izrailjoskire manušéngiro, kiéli jone javéna te mangénpe ke davá štéto; šun pe štéto Tyré džiibnáskiro, pe bolybén, šun i primang (prostin). Kiéli kon keréla grého proti pašatuneste peskireste i les začhuvena te sovlahal i vaš sovél jov javéla angíl altárjo Tyró, dre daja Khangirí, to tén'či Tu šun bolybnástyr i ker séndo pe Tyré pishar'jende, čhuv kára pe bangeste, čhuv léskiri bang pe léskiro šeró, i manúš, savó isyn nabango, opravdyn (čačakir) les, otdé léske pir čačipén léskiro. Kiéli Tyré manušá Izrailjostyr javéna domardé vergosa, pal-dová, so kerdé grého angíl Túte, i kiéli jone risjona ilésa ke Tu, i priĥaljona lav Tyró, i javéna te mangén i te pirimangen Tut dre daja Khangirí, to tedy Tu šun bolybnástyr i primang grého Tyré Izrailjoskire manušéngiro, i rískir len pe phuv, saví Tu dyján léngire dadénge. Kiéli začhakirelape bolybén, i na javéla bryšýnd pal dová, so jone keréna grého angíl Túte, i kóli pomangenape pe davá štéto; i slavinena lav Tyró, i otdžana péskire grehostyr, pal-dová so Tu primirindian len, to šun bolybnástyr, i primang (otmek) Tyré pishar'jéngiro grého i Tyré Izrailjoskire manušéngiro, sykáv lénge lačhó drom, pir savó te džán, i bičháv bryšýnd pe Tyrí phuv, saví Tu dyján manušénge Tyrenge dre meknó mištypén. Ci javéla pe phuv bok, ci javéna moroskire fuiá, ci javéla xačkirdy balvál, rža, phakitka skočki (saranča), kirme, ci vérgo javéla te pritasavel les pe phuv léskiri, ci javéla saví bída, ci savó nasvalypen, ci dre kažno pátieri (molítva), ci dre kažno mangipén, savó javéla vari-savé manušéstyr pir saré Tyré Izrailjoskire manušénde, kiéli jone počuinena bída dre péskiro iló i ĥazdéna vastá péskire ke daja Khangirí. Tu pošun bolybnástyr, štetóstyr, kaj Tu dživesa, i primang; ker i otdé kažnonéske pir léskire dromá, syr Tu dykhésa iló léskiro, pal-dová so Tu, Jekh, džinésa saré ile, manušéngire čhavéngire, sob (kaj) jone te darén Tútyr dre saré dyvesá, paka jone dživéna pe phuv, saví Tu dyján amaré dadénge. Kóli manúš javdiá javire rigátyr, savó javélas na Tyré Izrailjoskire manušéndyr, savó javéla durál phuvjátyr vaš lav Tyró, pal-dová so i jone šunéna pal Tyró baró lav, i pal Tyró vast ĥazdynó, – i javéna jone i pomangenape pašýl daja Khangirí. Tu pošun bolybnástyr, Tyré štetóstyr, kaj Tu dživesa, i ker saró, pal so javéna te mangén Tut manušá, savé javné javire rigátyr, sob (kaj) saré manušá phuvjákire te džinén lav Tyró, sob (kaj) te darén Tútyr, syr tyré manušá Izrailjo, sob (kaj) džindlé, so lavésa Tyresa kharélape daja Khangirí, saví me kerdjom. Kóli vydžána Tyré manušá pe maribén pe vergénde peskirende dromésa, savésa Tu bičhavesa len, i javéna te mangénpe Ráske-Devléske, risii ke fóro, savó Tu vykedyjan, i ke Khangirí, saví Me čhudjom lavéske Tyréske. To tedy prišunpe bolybnástyr ke pátieri (molítva) léngiri i mangipén léngiro, i ker, so trej vaš lénge. Kiéli jone keréna grého angíl Túte: (pal-dová so nane manušés, savó na kerdiá by grého), – i Tu xoliasosa pe lénde, i otdesa len vergénge, i manušá zalena len dro pliéno i zalydžana len pe vergoskiri phuv, dur ci pašýl. I kiéli jone javéna pe phuv, pe saví javéna dro pliéno, javéna dre péste i risjona, i javéna te mangénpe Túke pe phuv adalé-manušéngiri, savé lyné len dro pliéno, rakirí: “Ame kerdiám grého, ci kerdiám fuipén, ame sam bangé’, i, kóli risjona ke Tu saré péskire ilésa i saré diesa peskiresa pe vergengiri phuv, pe saví lyné len dro pliéno, i javéna te mangénpe Túke, risii ke phuv péskiri, saví Tu dyján léngire dadénge, ke fóro, savó Tu vykedyjan, i ke Khangirí, saví me čhudjom lavéske Tyréske, to vyšún bolybnástyr, štetóstyr, kaj Tu dživesa, pátieri (molítva) i mangipén léngiro, i ker, so trej vaš lénge. I primang (otmek) manušénge Tyrenge, dre so jone kerdé grého angíl Túte, i sykáv tangipén (žalima) ke jone léngire vergéndyr, sob (kaj) jone te javén kovleilytka ke jone. Pal-dová so jone isyn Tyré manušá i Tyrí mištypnáskiri miéra, savjása Tu vylydžijan Jegiptóstyr, sastruné bovestyr. Mek te javén jakhá Tyré otčhakirde pe pátieri (molítva) Tyré-dynariskiri i pe pátieri Tyré-Izrailjoskire manušéngiri, sob (kaj) te šunés len usady (sak), kiéli jone javéna te kharén Tut. Pal-dová so Tu vykedyjan len Péske dre mištypnáskiri miéra saré manušéngire phuvjátyr, syr Tu phendián pirdál Mojzaste, Tyré pishariste, kiéli vylydžijan amaren daden Jegiptóstyr, Rajo Baró, Rajo Dévla!’” Kiéli Solomóno phendiá saré dalé patierja (molitvy) i mangipén ke Raj Devél, tedy uštyjá čangendyr Ráskire-Devléskire altarjostyr, vastá léskire sys ĥazdyné ke bolybén. I, terdindoj, bahtiakirdiá saró Izrail'tianengiro skedyibén, zoralé zaniása, rakirí: “Lačhó Raj Devél te javél bahtiakirdó, savó dyjá ramánjo (miro) Péskire Izrailjoskire manušénge, syr rakirdiá, na jaciápe na spolnindlo ni jekh lav saré Léskire lačhé lavéndyr, savé Jov phendiá pirdál Péskire pishariste Mojzaste. Mek te javél aménca Raj Devél, Devél amaró, syr sys Jov amaré dadénca, mek te na jačkirel amen, mek te na čhurdel amen. Prityrde ke Pe iló amaró, sob (kaj) ame te psiras pir saré Léskire dromá i te rakhas Léskire priphenybená (zapoviedi) i uphenybená Léskire, zakóny Léskire, savé Jov dyjá amaré dadénge. I mek te javén dalé lavá, savénca me mangdjompe angíl Raste-Devléste, pašýl ke amaró Raj Devél, Devél, rat i dyvés, sob (kaj) Jov te kerél, so trej vaš Péskire pisharíske, i so trej vaš Péskire Izrailjoskire manušénge, dyvés dyveséstyr, sob (kaj) saré manušá udžindlé, so Raj Devél isyn Devél, i nane apríč Léste. Mek te javél iló tumaró saró otdynó Ráske-Devléske, Devléske amareske, sob (kaj) te psiras pir Léskire uphenybená i te rakhav priphenybená Léskire, syr akaná.” I králi i saré Izrail'tiáni lésa jandlé svénto dyibén Ráske-Devléske. I jandiá Solomóno dro ramanjono (mírno) svénto dyibén Ráske-Devléske, saví jandiá jov Ráske-Devléske, biš te duj tysjoncy (bará) baró skoto (kheritkoné murdalén) i šel te biš tysjoncy tyknó skoto. Adiáke obsvencyndle Khangirí Ráske-Devléske králi i saré Izrailjoskire čhavé. Dre dová-pac' dyvés obsvencyndia králi maškiralatuny gredakiri (dvoroskiri) paš, saví sys angíl Ráskire-Devléskiri Khangirí, kerdiá jov odój célo shačkiribén i mareskiro janybén, i ĥazdyjá túko (čekén) vaš mírno svénto janybén; pal-dová so xarkuno altárjo (žertvieniko), savó sys angíl Raste-Devléste, sys tyknó štéto vaš célo shačkiribén i mareskiro janybén i túko (čekén) mirna svénta dyibená. I kerdiá Solomóno dre dalé dyvesá svénko, i saró Izrailjo lésa-baró skedyibén, dre savó javénas manušá, kaj zadžána dro Jemafo ke reka (len') Jegiptóskiri, angíl Raste-Devléste, Devléste amareste; – eftá dyvesá i iščo (inké) eftá dyvesá, dešuštar dyvesá. Pe ohtóto dyvés (bidujéngiro déšto) Solomóno otmekciá manušén. I bahtiakirde jone kralís, i giné dre šátry péskire, radyndoj i viesielindoj (lošalyndoj) dro iló péskiro pal saró lačhipén, so kerdiá Raj Devél Péskire pisharíske Davidóske i Izrailjoskire Péskire manušénge. Paló (poslie) dová, syr Solomóno kerdiá Ráskire-Devléskiri Khangirí i kralískiro kher i saró, so Solomóno kamdiá te kerél, to javdiá dro sunó Solomonóske Raj Devél javír mólo, syr javdiá léske dro Gavaóno. I phendiá léske Raj Devél: “Me šundjom pátieri (molítva) tyrí i mangipén tyró, pal so tu mangdian Man. Me obsvencyndjom daja Khangirí, saví tu kerdián, sob (kaj) te javél lav Miro odój dro viéko; i javéna jakhá Miré i iló Miro odój dre saré dyvesá. I kóli tu javésa te psirés angíl muj Miro, syr psirdiá dad tyró Davído, dro žužó iló i dro čačipén, ker saró, so Me rakirdjom túke, i kóli javésa te rakhés uphenybená Miré i zakóny Miré, to tedy Me čhuváva kralískiro trono tyró pe Izrailjo dro viéko; syr Me phendjom dadéske tyréske, Davidóske, rakirí: ‘Na pirilydžalape túte dro ródo manúš, kon javéla te bešél pe trono Izrailjoskiro.’ Kóli tumé i čhavé tumaré otdžana Mándyr, i tumé na javéna te rakhén priphenybená Miré i uphenybená Miré, savé Me dyjom tuménge, i džána, i léna te dynarinén javire devlorénge i te mangénpe lénge, to tedy Me tradava krig Izrailjo phuvjátyr, saví Me dyjom léske, i Khangirí, saví Me obsvencindjom lavésa Miresa, otriskirava móstyr Mirestyr, i javéla Izrailjo pritčasa i sabnasa saré manušénde. I pal Khangirí daja vučí, kažno, kon javéla te prodžal mamúj la, strahadjola, i déla šolia (svisninela), i phenéla: “Palsó Raj Devél kerdiá adiáke dalé phuvjása i dalé Khangirjasa?” I phenéna: “Paldová, so jone jačkirdé Ras-Devlés, péskire Devlés, Savó vylydžijá léngire daden Jegiptóskire phuvjátyr, i prilyné javire devloré, i mangnepe lénge, i dynarindlé lénge, – pal dová jandiá pe lénde Raj Devél sarí daja bída.” I sys adiáke: syr (nakhle) proginé biš berš, dre savé Solomóno kerdiá duj kherá, – Devléskiro Kher (Khangirí) i kralískiro kher, vaš savé o Xiramo, králi Tiroskire, janelas Solomonóske vešá (drevy) kiedrytka kaštá i vešá kiparisytka i suvnakái, pir léskiro iló, – králi Solomóno dyjá Xiramoske biš fórja pe Galilejakiri phuv. I vygijá Xiramo Tirostyr te obdykhel fórja, savé dyjá léske Solomóno; i jone na sys pir iló léske. I phendiá jov: “So isyn dalé fórja, savé tu, miro pšal, dyján mánge?” I khardian len phuvjása Kavulo, syr kharenape jone ke davá dyvés. I bičhadiá Xiramo kralíske šel te biš talánty suvnakái. Ĥáda, isyn uphenybén pal namirja (podat'), savó čhudiá králi Solomóno, sob (kaj) te kerél Ráskire-Devléskiri Khangirí i kher péskiro, i Milo (kvartalo) dro Jerusalimo, i vánta Jerusalimóskiri, Gacoro, i Miegido, i Gaziero. O faraóno, Jegiptóskiro králi, javdiá i lyjá Gaziéro, i xačkirdiá les jagása, i Xananiejen, savé dživdé dro fóro, muliakirdiá, i otdyjá les dro pasago čhake peskirjake, Solomonóskire romniake. I kerdiá Solomóno Gaziero i telatuno Bieforono; I Valafo i Fadmoro pe čhučí phuv dre Judéia. I saré fórja vaš zapasy, savé sys Solomonoste, i fórja vaš maribnýtka vurdyná, i fórja vaš grenge pe savé tradéna uklisté, i saró dová, so Solomóno kamdiá te kerél, dro Jerusalimo i pe Liváno i pe sarí phuv, pe saví jov sys xulái. Saré manušá, savé jačnépe Amoriejéndyr, Xietiejéndyr, Fierieziejéndyr, Jeviejéndyr i Jevusiejéndyr, savé sys na Izrailjoskire čhavéndyr. Čhavén lengiren, savé jačnépe paló lénde pe phuv, savén Izrailjoskire čhavé na mogindlé te tradén péstyr, Solomóno kerdiá andynarščykenca ke davá dyvés. Izrailjoskire čhavén Solomóno na kerdiá butiarnenca; ne jone sys léskire xaladé, léskire slúgi (dynárja), léskire upratune, léskire xaladéngire barydyrá i šeralé pe léskire maribnýtka vurdená i léskire manušá, savé sys uklisté pe grénde. Ĥáda, sys barydyr upratune (pristavniki) pe Solomonóskire butiá: savé dykhné pal manušénde, savé kerdé butiá, sys pandžšelá pandždešá manušá. Čhaj faraonoskiri pirigija Davidóskire foróstyr dro péskiro kher, savó kerdiá vaš láke Solomóno; pal dová kerdiá jov Milo. I janéla Solomóno trin móly dre berš saró shačkiribén i mirna svénta dyibená Ráske-Devléske pe altárjo, savó jov kerdiá Ráske-Devléske, i xačkirdiá gudlé smóly pe léste angíl Raste-Devléste. I zakončyndia jov te kerél kher. Králi Solomóno adiáke-pac' kerdiá párma (korabljo) dre Jecyon-Gaviero, so isyn pašýl Jelafa, pe Loló morjoskiro (derjavéskiro) brégo, pe Idumejakiri phuv. I bičhadiá Xiramo pe párma péskire otdyné dynar'jén, savé džinenas mórjo (derjáv), Solomonóskire dynar'jénca. I giné jone dro Ofiro, i lyné odothýr suvnakáj štaršelá biš talánty, i jandlé kralíske Solomonóske. Králica Savatyr [Ševatyr-ju.o.], kiéli šundiá mavlýn pal sláva Solomonóskiri vaš lav Ráskire-Devléskiro, to joj iavdiá te sprobinel les pharé phučybnenca. I javdiá joj dro Jerusalimo drieván baré barvalypnasa: vierbliudy sys landade (obublade) aromatytkone čar'jénca i drieván but suvnakása i drogoné barénca; i javdiá ke Solomóno, i rakirdiá lésa pal saró, so sys láte pe iló. I piriphendia láke Solomóno saré lákire lavá, i na sys ničý na džindló kralíske, sob (kaj) jov na piriphenel láke. I dykhciá králica Savakiri sarí godý Solomonóskiri i kher, savó jov kerdiá. I xabén pal léskiro skamínd, i štéto, kaj dživéna léskire pishárja, i butý léskire dynar'jéngiri, i ídia léngiri, i kučikar'jéngiren (vinočerpii) leskiren, célo shačkiribén léskiro, savó jov janelas dre Ráskire-Devléskiri Khangirí. I na mogindiá joj butýr te urikirelpe. I phendiá kralíske: “Čačó, dová, so me šundjom pe péskiri phuv pal réndy (diély) tyré i pal godý tyrí; ne me na patiandyjom lavenge, paka javdjom, i dykhné miré jakhá: i, ĥáda, mánge i dre paš na sys phendló. Godý i barvalypén túte butýr, syr me šundjom. Bahtalé isyn manušá tyré i bahtalé dalé dynárja tyré, savé ŭsády/sak (vsiegda) isyn angíl túte i šunéna god'varé tyré lavá! Mek te javél bahtiakirdó Raj Devél (Jahvá), Devél tyró, Savó zakamdiá te čhuvél tut pe Izrailjoskiro trono! O Raj Devél, pir viéčno láska Péskiri ke Izrailjo, čhudiá tut králi, te kerés séndo i čačipén.” I dyjá dro dáro joj kralíske šel te biš talánty suvnakáj i drieván but aromatytka čarjá i dróga bará; nikiéli butýr na sys adákicy but aromatytka čarjá, kicý dyjá dro dáro králica Savakiri kralíske Solomonóske. I párma (korabljo) Xiramoskiri, saví janéla suvnakáj Ofirostyr, jandiá Ofirostyr drieván but loló veš i dróga bará. I kerdiá králi dalé lolé vešes-tyr parapiéto (pierily) vaš Khangirí Raskiri-Devléskiri i vaš kralískiro kher, i gusli, i psaltiri vaš manušénge, savé baganas. Nikiéli na javdiá adákicy loló veš, i na sys bicialó ke davá dyvés. I králi Solomóno dyjá kralicake Savakirjake saró, so joj kamdiá i so mangdiá, butýr doléstyr, so dyjá dre dáro láke králi Solomóno péskire vasténca. I gijá joj pale pe péskiri phuv, joj i saré lákire dynárja. Dro suvnakái, savó javélas Solomonóske dro kažno berš, pharipén (viéso) sys šovšelá šovdešá šov talánty suvnakuné. Butýr doléstyr, so sys doresno manušéndyr, savé rozlydžanas tovaro, i manušéndyr, savé targindle (timisiakirde), i saré kral'jéndyr Aravijakirendyr, i provincyjakiro barydyrendyr. I kerdiá králi Solomóno dujšelá baré ščýty čikade suvnakástyr, pir šovšelá šykieljo gijá pe kažno ščýto. I trin šelá tyknydyršone ščýty suvnakástyr, pir trin miny suvnakáj gijá pe kažno ščýto, i čhudiá len králi dro kher Livanoskire vešéstyr. I kerdiá králi baró trono kokalostyr, i občhudiá les žužé suvnakása. Ke trono sys šov ĥerunia (stupien'ki) vučipén palál trono sys krenglo, i sys duje rigéndyr pašýl štéty te čhuvés vastá, i duj ščerá (lievy) sys terdé pašýl štéty vaš vastá; I iščo (inké) dešudúj ščerá sys terdé odój pe šov ĥerunia pir duj rigá. Dasavo na sys ni dre jekh kralipén. I saré khoré (sasúdy) vaš pibén kralíste Solomonoste sys suvnakuné, i saré khoré dro kher Livanoskire vešéstyr sys žužé suvnakástyr; rupéstyr ničý na sys; pal-dová so rup dre Solomonóskire dyvesá gindiape ni palsó. Pal-dová so kralíste sys pe mórjo (derjáv) Farsiskire pármy Xiramoskire parmenca; dre trin berš jékhvar javélas Farsiskire pármy, savé janéna suvnakáj i rup, i slonytko kokalo, i porjalen (obiezjanen), i pavlinen. Králi Solomóno sys barvaledyr i god'varedyr saré kral'jéndyr pe phuv. I saré phuvjákire králja kamlé te dykhén Solomonos, sob (kaj) te šunén god'varé lavá léskire, savé čhudiá Devél dre léskiro iló. I jone janéna léske, kažno péstyr, dre dáro: khoré rupuvé i khoré suvnakuné, i ídi i mardýtko (oružyjo), i aromatytka čarjá, gren, mulen, kažno berš. I skedyjá Solomóno maribnýtka vurdyná i manušén uklisté pe grénde; léste sys tysjonco (bar) štaršelá maribnýtka vurdená i dešudúj tysjoncy manušén uklisté pe grénde; i čhudiá te dživén jov len dre fórja, kaj sys vurdyná, i pašýl kralíste dro Jerusalimo. I kerdiá králi rup dro Jerusalimo dasavé-pac' timinasa syr prosta bará, a kiedry, syr len sys drieván but, kerdiá dasavé-pac' timinasa syr sikomory, savé barine pe talatune štéty. Gren kralíske Solomonóske janéna Jegiptóstyr i Kuvatyr; kralískire kúpcy (tylgárja) kinenas len Kuvatyr pal lové. Maribnýtko vurdén Jegiptóstyr lenas i janénas pal šovšelá šykieli rup, a gres pal šel pandždešá. Adiáke-pac' jone péskire vasténca janénas saró davá kral'jenge Xietiejengire i kral'jenge Aramieicengirenge. I kamdiá králi Solomóno buten džuvlen javire rigéndyr, apríč faraonóskire čhate, Moavitianken, Amonitianken, Idumejanken, Sidonianken i Xietejanken. Dolé-manušytkoné nacyiéndyr, pal savénde Raj Devél phendiá Izrailjoskire čhavénge: “Na zadžán ke jone, jone mek te na zadžán ke tumé, sob (kaj) jone te na pirityrden tumaré ile ke péskire devloré.” Ke jone Solomóno priphandiape ilésa. I sys léste eftašelá romniá i trinšelá naložnicy; i lydžiné krig les i léskire romniá čačuné droméstyr iló léskiro. Kiéli Solomóno jaciá phuró, léskire romniá pirityrdyne léskiro iló ke javír devloré, i iló léskiro na sys sarésa otdynó Ráske-Devléske (Jahvaske), péskire Devléske, syr Davidóskiro iló, léskire dadéskiro. I jaciá Solomóno te mangélpe Astartake, devlytkimake Sidonoskireske, i Milhomoske, Amonitoskire magiribnaske. I kerdiá Solomóno fuipén angíl Raste-Devléste, i na sarésa jov gijá pal Raste-Devléste, syr Davído, léskiro dad. Tedy kerdiá Solomóno mangipnytko štéto pe bérgica Xamososke, magiripnaske Moavitoskireske, pe bérga, saví isyn angíl Jerusalimo, i Malahoske, magiripnaske Amonitoskireske. Adiáke jov kerdiá vaš sarénge péskire javire-rigengire romnienge, savé xačkirdé dróga smóly i janénas svénta dyibená péskire devlorénge. I xoliásyja Raj Devél pe Solomonoste pal dová, so jov riskirdiá péskiro iló Rástyr-Devléstyr, Izrailjoskire Devléstyr, savó duj móly sys javi dre sunó léske. I priphendiá léske, sob (kaj) jov te na džal ke javír devloré; ne jov na kerdiá dová, so priphendiá léske Raj Devél. I phendiá Raj Devél Solomonóske: “Pal-dová so adiáke túte kerélape, i tu na zrakhcián zavieto Miro i Miré uphenybená, savé Me priphendjom túke, Me otlava tútyr kralipén i otdáva les tyré pisharíske. Ne paka tu san džidó, Me na keráva davá vaš Davidóske, tyré dadéske; tyré-čhavéskire vastéstyr otlava les. I na saró kralipén otlava; jekh ródyco davá tyré čhavéske vaš Davidóske, Miré pisharíske, i vaš Jerusalimo, savó Me vykedyjom.” I ĥazdyjá Raj Devél vergos (vrogos) pe Solomonoste, Aderos Idumejaninos, kralískire-Idumieiskone rodóstyr. Kiéli Davído sys dre Idumiéia, i xaladéngiro barydyró Ioávo javdiá, sob (kaj) te garavel zamarden manušén, i zamardiá sarén muršén dre Idumeja, pal-dová so šov čhoná dživdiá odój Ioávo i saré Izrail'tiáni, paka zamardé saré muršén dre Idumeja, to tedy davá Adero nastiá dro Jegípto i lésa vari-kicý Idumejanen, savé dynarindlé léskire dadéske; Adero tedy sys tyknó čhavoró. Gii krig Madiamostyr, jone javné dro Farano i lyné pésa manušén faranostyr, i javné dro Jegípto ke faraóno, králi Jegiptóskiro. Jov dyjá léske kher, i dyjá léske lové, i dyjá léske phuv. Adero doresciá faraonostyr bari láska, adiáke so jov dyjá léske dre romniá (romniáte) i péskire romniakire pheniá, kralicakire-Tahpieniesakirja pheniá. I bijandiá léske phen Tahpieniesakiri čhavés Gienuvatos. Tahpieniesa barjakirdia les dre faraonóskiro kher; i dživdiá Gienuvato dre faraonóskiro kher khetané faraonóskire čhavénca. Kiéli Adero šundiá, so Davído myjá i garadó péskire dadénca i so xaladéngiro barydyró Ioávo myjá, tedy phendiá faraonóske: “Otmek man; me džáva pe péskiri phuv.” I phendiá léske faraóno: “Naúšto túte isyn trébima dre vari-so mánde, so tu kamésa te džas pe péskiri phuv?” Jov otphendiá: “Nad, ne otmek man.” I ĥazdyjá Devél proti Solomonoste iščo (inké) vergos, Razonos, Jeliadaskire čhavés, savó nastiá péskire kralístyr Adraazarostyr, Suvakire kralístyr. I jov skedyjá trusciál péste manušén, jaciá barydyrésa pe davá skopo, paló (poslie) dová, syr Davído rozmardiá Adraazaros; i giné jone dro Damásko, i dživdé odój, i xulaindle dro Damásko. I sys jov vergosa Izrailjoske paka sys džidó Solomóno. Apríč xolý, saví kerdiá Adero, jov usady (sak) kerdiá fuipén Izrailjoske i jaciá kralísa dre Sirija. I Jerovoámo, Navatoskiro čhavó, Jefriemlianino Cariedatyr, – lav léskire dákire-udovakiro – Cierua, pishári Solomonóskiro, ĥazdyjá vast pe kralíste. I ĥáda, vygijá, sóske jov gazdyja vast pe kralíste: Solomóno kerdiá Milo, čynindia domardé vánty dre fóro Davidóskiro, péskire dadéskiro. Jerovoámo sys manúš murškanó. Solomóno, dykhí davá, so adavá ternó manúš džinél te kerél réndo, čhudiá les te dykhél pal manušénde, savé sys bangé te pleskiren obroko Iosifóskire kheréstyr. Dre dolé dyvesá prigijape Jerovoamoske te vydžál Jerusalimóstyr: i strenindia les pe drom proróko Ahiia, Silomlianino, i pe léste sys neví ídia. Pe félda jone sys dujdžiné. I lyjá Ahiia neví ídia, saví sys pe léste, i roskustia la pe dešudúj pašá. I phendiá Jerovoamoske: “Le péske deš pašá; pal-dová so adiáke rakiréla Raj Devél, Devél Izrailjoskiro: ‘Ĥáda, Me otlava kralipén Solomonóskire vastéstyr i davá túke deš ródycy. A jekh ródyco jačélape pal léste vaš Miré pisharíske Davidóste i vaš fóro Jerusalimo, savó Me vykedyjom saré Izrailjoskire rodycendyr. Davá pal dová, so jone jačkirdé Man, i lyné te mangénpe Astartake, devlytkimake Sidonskonake, i Xamososke, devloreske Moavitoskireske, i Milhomoske, devloreske Amonitoskireske, i jone na giné Miré droménca, sob (kaj) te kerén lačhipén angíl jakhá Miré i te rakhés uphenybená Miré i priphenybená Miré, syr Davído, léskiro dad. Me na lavá saró kralipén léskire vastéstyr; ne Me jačkirava les thagarisa, paka jov javéla te dživél vaš Davidóske, pisharíske Miréske, savés Me vykedyjom, savó rakhciá Miré priphenybená i uphenybená Miré. Ne Me láva kralipén léskire-čhavéskire vastéstyr, i Me dáva túke léstyr deš ródycy. A čhavéske leskireske jekh ródyco, sob (kaj) te jačélpe momolýtko (svietíl'niko) Davidóskiro, Miré pishariskire, dro saró džiibén angíl Mánde, dro fóro Jerusalimo, savó Me vykedyjom Péske, sob (kaj) te javél odój lav Miro. Tut Me vykedava, i tu javésa te kralines pe saró, so zakaméla di tyrí, i tu javésa králi pe Izrailjo. I kóli tu javésa te rakhés saró, so Me phenáva túke, i javésa te psirés Miré droménca, rakh i uphenybená Miré i priphenybená Miré, syr kerdiá Miro pishári Davído, tedy Me javáva túsa i keráva túke kher tvardo, syr Me kerdjom Davidóske, i otdáva túke Izrailjo. I čhuváva telé Me ródo Davidóskiro pal davá, ne na pe saré dyvesá.” Solomóno kamdiá te zamarél Jerovoamos; ne Jerovoámo uštyjá i nastiá dro Jegípto ke Susakimo [Šyšako-ju.o.], Jegiptóskiro králi, i dživdiá ke Jegípto ke Solomonóskiro meribén. Javír keribena Solomonóskire i saró, so jov kerdiá, i godý léskiri isyn čhindlé dre lylvarí pal réndy (diély) Solomonóskire. Solomóno kralindia dro Jerusalimo štardešá berš. I myjá Solomóno i sys garadó péskire dadénca dro fóro Davidóskiro, péskire-dadéskiro, i jaciá králi (kralísa) pe štéto léskiro, čhavó léskiro, Rovoámo. I gijá Rovoámo dro Sihiemo, pal-dová so dro Sihiemo javné saré Izrail'tiáni, sob (kaj) te čhuvén les kralísa. I šundiá pal dová Jerovoámo, Navatoskiro čhavó, kiéli sys dre Jegípto, karik nastiá kralístyr Solomonostyr, i risijá Jerovoámo Jegiptóstyr. I bičhadé pal léste, i khardé les. Tedy Jerovoámo i saró Izrail'tianengiro skedyibén javné, i rakirdé Rovoamoske, i phendlé: “Dad tyró čhudiá pe aménde pharí butý, tu akaná ker lokhedýr aménge tyré dadéskiri pharí butý, saví jov čhudiá pe aménde, i tedy ame javása te dynarinás túke. I phendiá jov lénge: “Džán i pirdál trin dyvesá nevéstyr (nevés) javén ke me.” I giné manušá. Králi Rovoámo lyjá godypén (radindiape) godé phurenca, savé sys angíl Solomonoste, léskire dadéste, kiéli jov sys džidó, i rakirdiá: “Syr déna godypén (radinena) tumé mánge te otphenav adalé manušénge?” Jone rakirdé léske i phendlé: “Kóli tu pe davá dyvés javésa dynári adalé manušénge, i godinesa lénge, i javésa te rakirés lénge lačhipén, tedy jone javéna tyré pishar'jénca pe saró džiibén.” Ne jov na kandyjá ráda godé phurendyr, so jone radindle léske; i lyjá godypén (radindiape) terné manušénca, savé vybarine khetané lésa i savé sys terdé angíl léste. I phendiá lénge: “So tumé lyjá godypén (radinena) mánge te otphenav adalé manušénge, savé rakirdé mánge i phendlé: ‘Ker lokhedýr aménge butý, saví čhudiá pe aménde tyró dad?’” I rakirdé léske terné manušá, savé vybarine khetané lésa, i phendlé: “Adiáke phen adalé manušénge, savé rakirdé túke i phendlé: “Dad tyró čhudiá pe aménde pharí butý, tu ker lokhedýr aménge’; adiáke phen lénge: miro miezieno angúšt isyn grubedyr trušulendyr miré dadéskire.” I adiáke, kóli dad miro začhuvelas tumen te kerén pharí butý, tedy me keráva pharedyr tumarí butý; miro dad čhuvelas kára pe tuménde karbačosa (bičosa), a me javáva te čhuvav xas' (kára) pe tuménde skorpionenca.” Jerovoámo i saré manušá javné ke Rovoámo pe tríto dyvés, syr priphendiá králi, phení: “Javén ke me pe tríto dyvés.” I otphendiá králi manušénge xoliames, i na kandyjá godypén (sovieto) phuré manušéndyr, so jone radindle léske. I rakirdiá jov pir godypén (ráda) terné manušéngiri, i phendiá: “Miro dad čhudiá pe tuménde pharí butý, a me keráva pharydyr tumarí butý; miro dad sys pe tuménde karbačenca (bičenca), a me javáva te čhuvav kára pe tuménde xudia xas' (kára) skorpionenca.” I na kandyjá králi manušén, pal-dová so adiáke treindiá te javél Rástyr-Devléstyr, sob (kaj) te spolninélpe lav Léskiro, savó rakirdiá Devél pirdál Ahiiaste Silomlianinoste Jerovoamoske, Navatoskire čhavéske. I dykhné saré Izrail'tiáni, so králi na kandyjá len. I otphendlé manušá kralíske, i phendlé: “Saví aménge paš dre Davidóste? Nane aménge bažyn dre Jesiejoskire čhavéste; pir šátry péskire, Izrailjo! Akaná isyn péskiro kher Davído!” I rozgijápe Izrailjo pir péskire šátry. Jekh pe Izrailjoskire čhavénde, savé dživdé dre Judejákire fórja, sys králi Rovoámo. I bičhadiá králi Rovoámo, Adoniramos, barydyrés pe butiarnende; ne saré Izrail'tiáni začhurdyne les barénca, i jov myjá; králi Rovoámo sýges gijá upré pe maribnýtko vurdén, sob (kaj) te našél dro Jerusalimo. I otgijá Izrailjo kheréstyr Davidoskirestyr ke davá dyvés. Kiéli šundlé saré Izrail'tiáni, so Jerovoámo risijá, tedy bičhadé, i khardé les dre skedyibén, i čhudé les kralísa pe saré Izrail'tianende. Pal kher Davidóskiro na jaciápe nikonés, apríč Judejákiro i Vieniaminoskiro ródycy. Rovoámo javdiá dro Jerusalimo, skedyjá saré kheréstyr Judaskirestyr i rodóstyr Vieniaminoskirestyr šel ohtodešá tysjoncy fedyršonen xaladén, sob (kaj) te marénpe Izrailjoskire kheresa vaš davá, sob (kaj) te riskires kralipén Rovoamoske, Solomonóskire čhavéske. I sys lav Devléskiro ke Samiejo, Devléskiro manúš, i phendló: “Phen Rovoamoske, Solomonóskire čhavéske, kralíske Judaskireske, i saré kheréske Judaskireske, i Vieniaminoskireske, i javirén manušénge. Adiáke rakiréla Raj Devél: “Na psirén i na lenpe te džán pe maribén pšalénca tumarenca, Izrailjoskire čhavénca; risjon kažno (sváko) dro péskiro kher, pal-dová so Mándyr davá sys.” I kandyné jone Ráskire-Devléskire lavá, i giné pale pir Ráskire-Devléskiro lav. I kerdiá zoraledýr Jerovoámo Sihiemo pe bérga Jefriemóskiri, i lyjá te dživél dre léste; odothýr gijá i kerdiá Pienuilo. I rakirdiá Jerovoámo dro péskiro iló: “Kralipén moginéla nevéstyr te piridžal ke Davidóskiro kher.” Kóli adalé manušá javéna te psirén dro Jerusalimo vaš svénto janybén Ráske-Devléske dro Kher Devléskiro, tedy iló dalé manušéngiro porisjola ke péskiro králi, ke Rovoámo, králi Judejákiro; i zamarena jone man, i risjona ke Rovoámo, králi Judejákiro. I, lyj godypén (poradiny), králi kerdiá dujén suvnakunen terné guruvén i phendiá manušénge: “Na tuménge te psirés dro Jerusalimo; ĥáda, isyn tyré develá, Izrailjo, savé vylydžiné tut Jegiptóskire phuvjátyr. I čhudiá jekhés dro Viefíljo, a javirés dro Dano. I jandiá davá ke grého; pal-dová so manušá lyné te psirén ke jekh léndyr, adiáke-pac' dro Dano. I kerdiá jov mangipnytko štéto pe vučipén, i čhudiá manušéndyr rašán, savé na sys Lievijoskire čhavéndyr. I kerdiá Jerovoámo svénko dro ohtóto čhon, pe dešupadžto dyvés čhonéskiro, dasavo-pac' svénko, savó sys dre Judéia, i janelas svénta dyibená Devléske pe altárjo; dová-pac' kerdiá jov dro Viefíljo, sob (kaj) te janel svénto janybén terné guruvenge, savé kerdiá. I čhudiá dro Viefíljo rašán pe vučé štéty, savó kerdiá. I jandiá svénta dyibená Ráske-Devléske pe altárjo, savó jov kerdiá dro Viefíljo, dre dešupadžto dyvés ohtotone-čhonéskiro, savó jov kokoró péstyr vykedyjá i kerdiá svénko vaš Izrailjoskire čhavénge, i podgíia ke altárjo, sob (kaj) te xačkirel aromatytka čarjá. I, ĥáda, Devléskiro manúš javdiá Judejátyr pir Ráskire-Devléskiro lav dro Viefíljo, dre dová časo, syr Jerovoámo sys terdó pašýl altárjo, sob (kaj) te xačkirel dróga smóly. I phendiá ke altárjo Ráskire-Devléskiro lav, i phendiá: “Altarie! Altarie! Adiáke rakiréla Raj Devél: Ĥáda, bijandjola čhavó kheréske Davidoskireske, lav léske javéla Iosija, i janéla pe túte dre svénto dyibén rašán vučé šteténdyr, savé xačkirena pe túte dróga smóly, i manušéngire kokalý shačkiréla pe túte. I dyjá jov dro dová dyvés ĥiertýk (znamiénijo), phení: ‘Ĥáda, isyn ĥiertýk odoleskiri, so davá phendiá Raj Devél: “Ĥáda, davá altárjo rosperelape, i pieplo, savó pe léste, rosčhuvelape.’” Kiéli králi šundiá Devléskire-manušéskiro lav, savó jov rakirdiá ke altárjo dro Viefíljo, tedy ĥazdyjá Jerovoámo vast péskiro altarjostyr, rakirí: “Len les.” I kaštalyja vast léskiro, savó jov čhudiá pe léste, i na mogindiá jov te riskirél les ke pe. I altárjo rospyjape, i pieplo altarjostyr rosčhudiape, pir ĥertyk, saví dyjá Devléskiro manúš lavésa Ráskire-Devleskiresa. I phendiá králi Devléskire manušéske: “Kovliakir Ras-Devlés, Devlés tyrés, i mangpe akana pal mánde, sob (kaj) vast miro mogindiá te risjol ke me.” I kovliakirdia Devléskiro manúš muj Ras-Devlés, i vast kralískiro risijá ke jov, i jaciá, syr angledýr. I phendiá králi Devléskire manušéske: “Zadžá mánca dro kher, piriha nábut, i me dáva túke počastunko.” Ne manúš Devléskiro phendiá kralíske: “Mek by tu desas mánge paš kher tyró, me na džáva túsa, i na javáva te xav maró, i na javáva te pjáv paní pe davá štéto. Pal-dová so adiáke sys phendló mánge lavésa Ráskire-Devleskiresa: “Na xa odój maró i na pi paní, i na risjov dolé dromésa, savésa tu gíian.’” I gijá jov javire dromésa, i na gijá pale dolé dromésa, savésa javdiá jov dro Viefíljo. Dro Viefíljo dživdiá jekh proróko-phuró. Čhavó léskiro javdiá i rosphendiá léske saró, so kerdiá adadyvés Devléskiro manúš dro Viefíljo; i savé lavá jov rakirdiá kralíske, isyn piriphendle čhavé léskire dadéske. I phuciape léndyr dad léngiro: “Save dromésa jov gijá?” I sykade čhavé léskire, savésa dromésa gijá Devléskiro manúš, savó sys javi Judejátyr. I phendiá jov péskire čhavénge: “Čhuvén tel zen mánge oslós.” I čhudé tel zen léske oslós, i jov besciá pe léste. I tradyjá jov pal Devléskire manušéste, i lathiá les, bešyndoj tel dembo, i phendiá léske: “Ci tu san Devléskiro manúš, savó javdiá Judejátyr?” I phendiá odová: “Me som.” I phendiá léske: “Zadžá ke me dro kher, i piriha maró.” Odová phendiá: “Me na mogináva te risjovav túsa i te džav ke tu; me na javáva te xav maró i na javáva te pjáv túte paní pe davá štéto. Pal-dová so Ráskire-Devléskire lavésa sys phendló mánge: ‘Na xa maró i na pi odój paní, i na risjov dolé dromésa, savésa tu gíian.’” I phendiá jov léske: “I me som proróko adasavó-pac', syr tu san, i Jangólo rakirdiá mánge Ráskire-Devléskire lavésa, i phendiá: ‘Rískir les ke pe dro kher; mek jov te pohal maró i te vyp'jel paní’”. – Jov xohadia léske. I odová risijá lésa, i xaja maró dre léskiro kher, i pija paní. Kiéli jone iščo (inké) sys bešté pal skamínd, Ráskire-Devléskiro lav sys ke proróko, savó riskirdiá les. I phendiá jov ke Devléskiro manúš, savó javdiá Judejátyr, i phendiá: “Adiáke rakiréla Raj-Devél: ‘Pal dová, so tu na kandyjan Ráskire-Devléskire lavá i na rakhcian uphenybén, savó rakirdiá túke Raj Devél, Devél tyró. Ne tu risijan, xajan maró i pijan paní dro dová štéto, pal savó Jov phendiá túke: Na xa maró i na pi paní, – masá tyré na džána dre koplíca dadengiri tyrengiri.’” Paló dová, syr odová xaja maró i pija, jov čhudiá tel zen oslós vaš prorokoske, savés jov riskirdiá. I gijá odová. I strenindia les pe drom ščer (liévo), i muliakirdiá les. I sys paštó trúpo léskiro, čhurdynó pe drom; óslo (miegári) sys terdó pašýl léste, i ščer sys terdó pašýl trúpo. I, ĥáda, manušá, savé prodžanas mamúi, dykhné trúpo, savó sys čhurdynó pe drom, i ščeres, savó sys terdó pašýl trúpo, i giné i rosphendlé dro fóro, dre savó dživdiá proróko-phuró. Proróko, savó riskirdiá les droméstyr, šundiá davá, i phendiá: “Davá isyn odová Devléskiro manúš, savó na kandyjá Ráskire-Devléskire lavá; Raj Devél otdyjá les ščereske, savó phagirdiá pe kotero les i muliakirdiá les, pir Ráskire-Devléskiro lav, savó Jov rakirdiá léske.” I phendiá péskire čhavénge: “Čhuvén tel zen mánge oslós.” I jone čhudé tel zan oslós. Jov gijá i lathiá léskiro trúpo, savó sys čhurdynó pe drom; óslo (miegári) i ščer sys terdé pašýl trúpo; ščer na xaja trúpo i na phagirdiá oslós. I ĥazdyjá proróko trúpo Devléskire Manušéskiro, i čhudiá les pe osloste, i lydžijá les pale. I gijá proróko-phuró dre péskiro fóro, sob (kaj) te obrovel i te garavel les. I čhudiá trúpo léskiro dre péskiri koplíca, i rondiá pal léste: “Syr tu san, pšal miro!” Paló léskiro garaiben, jov phendiá péskire čhavénge: “Kiéli me meráva, to garaven tumé man dre koplíca, dre saví garadó Devléskiro manúš; pašýl kokalý léskire čhuvén miré kokalý. Paldavá so spolninelape lav, savó jov pir uphenybén Ráskire-Devléskiro phendiá pal altárjo dro Viefíljo i pal saré mangipnytka štéty pe vučipená, dre Samarijakire fórja. I paló (poslie) davá, so vygijá, Jerovoámo na gijá krig péskire nalačhé droméstyr, ne durydyr čhuvelas manušéndyr rašán pe vučipna; kon kamdiá, odolés jov vysvencyndia, i odová jačelas rašása pe vučipna. Davá lydžijá kher Jerovoamoskiro ke grého, i ke xasibén, i ke célo xasibén les phuvjákire móstyr. Dre dová časo zanasvalyja Avijá, Jerovoamoskiro čhavó. I phendiá Jerovoámo (Iierovoamo) péskire romniake: “Uštý i piriuripe, sob (kaj) te na ĥaljon, so tu san Jerovoamoskiri romný, i džá dro Silómo. Odój isyn proróko Ahiia; jov angledýr phendiá mánge, so me javáva králi pe adalé manušénde. I le pésa deš maré, i mariklia, i khoró (gliako) avgín (meda), i džá ke jov: jov phenéla túke, so javéla terné manušésa.” Romný Jerovoamoskiri adiáke i kerdiá: uštyjá, gijá dro Silómo i javdiá dro kher Ahiiaskiro. Ahiia na mogindiá te dykhél; pal-dová so jakhá léskire korine phuripnastyr. I phendiá Raj Devél Ahiiaske: “Ĥáda, džála Jerovoamoskiri romný te phučelpe tútyr pal péskire čhavéste, pal-dová so jov isyn nasvaló; adiáke i adiáke rákir láke, joj iavéla piriuridy.” Ahiia šundiá lákire-ĥerengiro giiben, kiéli joj zagijá dro vudár, i phendiá: “Zadžá, Jerovoamoskiri romný; vaš so sys túke te piriur'jespe? Me som bičhaibnari nalačhé (zaniása) zviesiasa ke tu. Džá, phen Jerovoamoske: ‘Adiáke rakiréla Raj Devél, Devél Izrailjoskiro: ‘Me ĥazdyjom tut prostone manušéndyr i čhudjom Miré šeralesa pe Izrailjoskire manušénde. I otlyjom kralipén Davidóskire kheréstyr, i dyjom les túke; a tu na san adasavó, syr pishári Miro Davído, savó rakhciá priphenybená Miré i, savó gijá pal Mánde saré péskire ilésa, kerdiá jekh lačhipén angíl Miré jakhá. Tu kerdián fujedýr saréndyr, savé sys angledýr tútyr, i gíian, i kerdián péske javire devloré i vyčhindlé muiá, sob (kaj) te rosholiakires Man; Man ža tu otčhurdyjan pale. Pal-dová Me janáva bída pe kher Jerovoamoskiro, i muliakirava Jerovoamoste ke palatunó (posliednjo) murš, bešybnaris, i kon jaciápe dre Izrailjo, i vyšulavava kher Jerovoamoskiro, syr vyšulavena šuma (musoro), ke žužypen (čystota). Kon meréla Jerovoamoste dre fóro, odolés shana džukela, a kon meréla pe félda, odolés dokliuinena čirikliá bolybnáskire; adiáke phendiá Raj Devél.’ Uštý i džá dro kher tyró; i syr syg ĥerój tyrí štavela (stempinela) dre fóro, meréla čhavoró. I obrovena les saré Izrail'tiáni, i garavena les; pal-dová so jov isyn jekh Jerovoamoste, savó zadžála dre koplíca, adiáke syr dre léste, kheréstyr Jerovoamoskirestyr, lathiape vari-so lačhó angíl Raste-Devléste, Devléste Izrailjoskireste. I čhuvéla Péske Raj Devél pe Izrailjo kralís, savó vymarela kher Jerovoamoskiro dre dová-pac' dyvés; i so? Až davá javéla akaná. I domarela Raj Devél Izrailjo, i javéla jov, syr triščyna (trosniko), saví trinskirelape dro paní, i vytradela Izrail'tianén dalé lačhé phuvjátyr, saví dyjá dadénge lengirenge, i rozvieinela len pal reka (len'), pal-dová so jone kerdé péste ídoly (kaštune muiá), xoliakiri Ras-Devlés. I otdéla Raj Devél Izrailjo pal gréhi Jerovoamoskire, savé jov kokoró kerdiá, i savénca zalydžijá dro grého Izrailjo.” I uštyjá Jerovoamoskiri romný, i gijá, i javdiá dre Firca; i syr pirištadia (piristempindia) pirdál progo kheréskiro, to čhavoró myjá. I garadé les, i obrondle les saré Izrail'tiáni, pir Ráskire-Devléskiro lav, savó Jov rakirdiá pirdál pishariste Peskireste, Ahiiaste prorokoste. Javír réndy (diély) Jerovoamoskire, syr jov mardiápe i syr kralindia, isyn začhindlé dre beršýtka arhívy Izrailjoskire-kral'jengire. Jerovoamóskire-kralipnaskire dyvesá sys pe biš te duj berš; i myjá jov péskire dadénca, i Navato jaciá kralísa, léskiro čhavó, pe štéto léskiro. O Rovoámo, Solomonóskiro čhavó, sys králi pe Judéia. Štardešá jekh berš sys Rovoamoske, kiéli jov jaciá králi, i dešuefta berš jov sys králi dro Jerusalimo, dre fóro, savó vykedyjá Raj Devél saré Izrailjoskire rodycendyr, sob (kaj) te javél odój lav Léskiro. Lav léskire-dákiro sys Naama, Amonitianka. I kerdiá Iuda (Juda) fuipén angíl jakhá Ráskire-Devléskire, i xoliakirde Les butýr saréstyr doléstyr, so kerdé dadá léngire péskire grehénca, savénca jone kerdé grého. I kerdé jone péste vučipená, i statuly, i mangipnytka štéty (kapiščy) pe kažno bérgica i tel kažno gensto kašt. I ladžakune réndy sys adiáke-pac' pe daja phuv, i kerdé saré magiripena odolé manušytkoné-nacyiengire, savén Raj Devél tradyjá krig Izrailjoskire čhavéndyr. Pe pándžto berš, syr kralindia Rovoámo, o Susakimo [Šyšako-ju.o.], Jegiptóskiro králi, vygii pe Jerusalimo. I zakedyja jov kučipena Ráskire-Devléskire Khereskir i kučipena kralískire kheréstyr, – saró zalyja; zalyja i saré suvnakuné ščýty, savé kerdiá Solomóno. I kerdiá králi Rovoámo zamiést lénde xarkuné (miédna) ščýty, i otdyjá len pe vastá barydyrénge pe rakhibnar'jende, savé rakhne zagiibén dro kralískiro kher. Kiéli králi zadžalas dro kher Ráskire Devléskiro, to rakhibnárja lydžiné len, i paló (poslie) dová jone nevéstyr (nevés) lydžánas len pale dre komorka rakhibnar'jéngiri. Javír zan (zvies') pal Rovoamoste i pal saró, so jov kerdiá, isyn čhindló dre beršýtka arhívy kral'jéngire dre Judéia. Maškir Rovoamoste i Jerovoamoste sys maribén dre saré léngire džiibnáskire dyvesá. I myjá Rovoámo, i sys garadó péskire dadénca dro Davidóskiro fóro. Lav, léskire-dákiro, sys Naama, Amonitianka. I jaciá kralísa Avijá, léskiro čhavó, pe štéto léskiro. Pe dešuohtoto berš, syr lyjá te kralinél Jerovoámo (Iierovoamo), Navatoskiro čhavó, Avijá jaciá králi pe Judejakirende. Trin berš jov sys králi dro Jerusalimo; lav léskire-dákiro sys Maaha, Aviesalomoskiri čhaj. Jov psirdiá dre saré gréhi léskire dadéskire, savé odová kerdiá angledýr látyr, i iló léskiro na sys sarésa otdynó Ráske-Devléske, léskire Devléske, syr iló Davidóskiro, léskire-dadéskiro. Ne vaš Davidóske Raj Devél, Devél léskiro, dyjá léske momolýtko (svietíl'niko) dro Jerusalimo, čhudiá paló léste králi čhavés leskires i zoraliakirdia Jerusalimo. Pal-dová so Davído kerdiá lačhipén angíl jakhá Ráskire-Devléskire i jov na otgijá saréstyr doléstyr, so Jov rakirdiá léske, dre saré péskire džiibnáskire dyvesá, apríč dová, so vygijá Urijasa Xietejaninosa. I maribén sys maškír Rovoamoste i Jerovoamoste dre saré léngire džiibnáskire dyvesá. Javír réndy (diély) Avijaskire, saró, so jov kerdiá, isyn začhindlé dre beršýtka arhívy kral'jéngire pe Judéia. I sys maribén maškír Avijaste i Jerovoamoste. I myjá Avijá i garadé les dadénca leskirenca dro Davidóskiro fóro. I Asá jaciá králi, léskiro čhavó, pe štéto léskiro. Dro bišengiro berš, syr lyjá te kralinél Jerovoámo, Izrailjoskiro králi, jaciá te kralinél Asá pe Judejakirende. I štardešajekh berš jov sys králi dro Jerusalimo. Lav dákire-leskirjakiro sys Ana [Maha-ju.o.], čhaj Aviesalomoskiri. O Asá kerdiá lačhipén angíl jakhá Ráskire-Devléskire, syr Davído, léskiro dad. Jov tradyjá krig biladžakunen ne manušen phuvjátyr i vyčhurdyja saré ídoly, savé kerdé léskire dadá. I adiáke-pac' datyr peskirjatyr, Anatyr, jov otlyja khariben (titulo) kralicakiro pal dová, so joj kerdiá vyčhindlo muj Astartakiro. I rosčingirdia Asá vyčhindlo muj lákiro, i xačkirdiá les pašýl sýgno rékica (lenorí) Kiedrono. Vučipená na sys phagirdé. Ne iló Asáskiro sys otdynó Ráske-Devléske dre saré léskire džiibnáskire dyvesá. I jandiá jov dro Kher Ráskire-Devléskiro priedmiéty i khoré, savé sys obsvencynde léskire dadésa, i priedmiety, savé jov obsvencyndia: rup, i suvnakái, i khoré. I maribén sys maškír Asaste i Vaasaste, kralíste Izrail'skoneste, dre saré dyvesá léngire. I vygijá Vaasa, králi Izrailjoskiro, proti Judéia, i lyjá te kerél Ráma, sob (kaj) nikón te na vydžál i te na zadžál ke Asá, králi Judejákiro. I lyjá Asá saró rup i suvnakái, savó sys jačkirdo dre piraliá kučipnaskire dro Kher Ráskire-Devléskiro, i dyjá les dre vastá dynar'jénge peskirenge, i bičhadiá len králi Asá ke Vienadado, čhavó Tavrimonoskiro, čhavó Xiezionoskiro, králi Sirijákiro, savó dživdiá ke Damásko, i phendiá: “Dorakiribén (sojuzo) mek te javél maškír mánde i maškír túte, syr sys maškír dadéste mireste i maškír tyré dadéste; ĥáda, me bičhaváva túke dro dáro rup i suvnakái; roskuš dorakiribén tyró Vaasasa, králi Izrailjoskiresa, sob (kaj) jov te otdžal mándyr.” I kandyjá Vienadado kralís Asas, i bičhadiá péskire xaladéngire barydyrén proti Izrailjoskire fórja, i rozmardiá Aino i Dano, i Aviel-Bief-Maaha, i saró Kinierofo, pir sarí phuv Niefalimsko. Syr šundiá pal davá Vaasa, to pirijaciá te kerél Ráma i risijá dre Firca. Králi Asá khardiá sarén Judejakiren, nikonés na promeki, i vylydžiné jone Ramatyr bará i vešá, savé Vaasa mekciá te čhuvél kherá. I kerdiá léndyr králi Asá Givá Vieniaminoskiri i Micpa. Saré javír réndy (diély) Asaskire, i saré slavutna réndy (podvigi) léskire, i saró, so jov kerdiá, i fórja, savé jov kerdiá, isyn začhindlé dre beršýtka arhívy kral'jéngire Judejátyr, apríč dová, so dro phuripen péskiro jov sys nasvaló ĥerénca. I myjá Asá i garadó sys péskire dadénca dre fóro Davidóskiro, péskire dadéskiro. I Iosafáto jaciá králi, čhavó léskiro, pe štéto léskiro. O Navato, čhavó Jerovoamoskiro, jaciá králisa pe Izrailjo dro javír berš Asáskiro, Judejákire kralískiro, i sys králi pe Izrailjo duj berš. I kerdiá jov fuipén angíl jakhá Ráskire-Devléskire, psirdiá péskire dadéskire dromésa i dre gréhi léskire, savénca odová zalydžijá Izrailjo dre grého. I kerdiá zrakiribén proti léste o Vaasa, čhavó Ahijoskiro, kheréstyr Isaharoneskirestyr, i zamardiá les Vaasa pašýl Gavafono Filistimsko, kiéli Navato i saré Izrail'tiáni občhuvenas trusciál Gavafono. I zamardiá les Vaasa pe tríto berš Asáskiro, kralískiro Judejakireskiro, i jaciá králi pe štéto léskiro. Kiéli jov jaciá králi, to tedy vymardia saró kher Jerovoamoskiro, i na jačkirdiá ni jekh di Jerovoamostyr, paka na zamardiá les, pir lav Ráskire-Devléskiro, savó Jov rakirdiá pirdál pishariste Peskireste, Ahiiaste Silomlianinoste. Pal gréhi Jerovoamoskire, savé jov kokoró kerdiá, i savénca lydžijá dro grého Izrailjo, pal kirkipen, savésa jov xoliakirdia Ras-Devlés, Devlés Izrailjoskires. Javír réndy Navatoskire, saró, so jov kerdiá, isyn začhindlé dre beršýtka arhívy kral'jéngire Izrailjoskire. I maribén sys maškír Asaste i Vaasaste, kralíste Izrailjoskireste, dre saré dyvesá léngire. Pe tríto berš Asáskiro, syr kralís Judejakires, jaciá králi Vaasa, čhavó Ahijoskiro, pe saré Izrail'tianende dre Firca, i sys králi biš te štar berš. I kerdiá fuipén angíl jakhá Ráskire-Devléskire, i psirdiá dromésa Jerovoamoskiresa i dre gréhi léskire, savénca odová lydžijá dro grého Izrailjo. I sys lav Ráskire-Devléskiro ke Iujo, čhavó Ananiskiro, pal Vaasaste: “Pal dová, so Me ĥazdyjom tut prahostyr i kerdjom tut Miré Izrailjoskire manušéngire šeralesa, tu gíian dromésa Jerovoamoskiresa i lydžijan dro grého Miré manušén Izrail'tianén, sob (kaj) jone te xoliakiren Man grehénca peskirenca. Ĥáda, Me vymarava kher Vaasaskiro i kher léskire-rodoskiro, i keráva kheresa leskiresa dová-pac', so kerdjom Jerovoamoskire, Navatoskire čhaveskiresa. Kon meréla Vaasaste dro fóro, odolés shana džukela; a kon meréla léste pe félda, odolés roskliuinena bolybnáskire čirikliá.” Javír réndy Vaasaskire, saró, so jov kerdiá, i slavutna réndy léskire isyn začhindlé dre beršýtka arhívy Izrailjoskire kral'jéngire. I myjá Vaasa i garadó sys péskire dadénca dre Firca. I Ila jaciá králi, čhavó léskiro, pe štéto léskiro. Ne pirdál Iujoste, čhavéste Ananiskireste, angíl sys phendló lav Ráskire-Devléskiro pal Vaasaste, i pal kher léskiro, i pal saró fuipén, savó jov kerdiá angíl jakhá Ráskire-Devléskire, xoliakiri Les péskire vastengire rendénca, jov kerdiá dová-pac' so angíl léste kerdiá Jerovoamoskiri sém'ia (irí), palsó jov zamardo sys. Pe biš te šóvto berš Asáskiro, syr Judejákiro králi, jaciá kralísa Ila, čhavó Vaasaskiro, pe Izrailjo dre Firca i jov sys králi duj berš. I kerdiá proti léste zrakiribén dynári léskiro Zamvrijo, savó sys barydyró pe paš maribnýtka vurdená. Kiéli jov dre Firca vypija zoralés dro kher Arsoskiro, savó sys šeritko pe fielatin dre Firca, to tedy zagijá Zamvrijo, i zamardiá les, dre biš te eftáto berš Asáskiro, Judejákire-kralískiro, i jaciá králi, pe štéto léskiro. Kiéli jov jaciá králi i bestiá pe léskiro trono, tedy jov zamardiá sarí Vaasaskiri sém'ia (irí), na jačkirdiá léske ni jekhe muršés ke vánta, ni léskire semencen, ni léskire malen. I zamardiá Zamvrijo sarí Vaasaskiri sém'ia (irí), pir lav Ráskire-Devlaskiro, savó Jov rakirdiá pal Vaasaste pirdál prorokoste Iujoste. Pal saré Vaasaskire gréhi i pal Ilaskire gréhi, léskire čhavéskire, savé jone kokoré kerdé i savénca lydžiné Izrailjo dro grého, xoliakiri Ras-Devlés, Devlés Izrailjoskires, péskire idolenca. Javír réndy Iloskire, saré, so jov kerdiá, isyn začhindlé dre beršýtka arhívy Izrailjoskire kral'jéngire. Pe biš te eftáto berš Asáskiro syr Judejákiro králi, jaciá kralísa Zamvrijo, i sys králi eftá dyvesá dre Firca, kiéli manušá občhuvenas trusciál Gavafono Filistimijakiro. Kiéli manušá šundlé, so Zamvrijo kerdiá zrakiribén i muliakirdiá kralís, tedy saré Izrail'tiáni čhudé kralísa Amvrijos, xaladéngire barydyrés, pe Izrailjo dre dová-pac' dyvés, dro stáno. I otginé Amvrijo i saré Izrail'tiáni lésa Gavafonostyr, i občhude trusciál Firca. Kiéli dykhciá Zamvrijo, so fóro lynó, zagijá dre andratuný štúba, kralískire-kheréskiri, i zahačkirdia pal péste kralískiro kher jagása, i myjá. Pal péskire gréhi, dro so jov kerdiá gréhi, syr jov kerdiá fuipén angíl jakhá Ráskire-Devléskire, psirdiá dromésa Jerovoamoskiresa i dre gréhi léskire, savé dová kerdiá, sob (kaj) te zalydžal Izrailjo dro grého. Javír réndy Zamvrijoskire i zrakiribén léskiro, savó jov sčhudia, isyn začhindlé dre beršýtka arhívy kral'jéngire Izrailjoskirengire. Tedy rozginepe manušá Izrailjoskire pe duj rigá: paš manušá sys terdé pal Famnijoste, čhavéste Gonafoskireste, sob (kaj) te čhuvén les kralísa, a javír paš pal Amvrijoste. I pirilyne zor manušá, savé sys pal Amvrijoste, pe manušénde, savé sys pal Famnijoste, čhavéste Gonafoskireste, i myjá Famnijo, i Amvrijo jaciá králi. Pe trijandatrito berš Asáskiro, syr Judejákiro kralískiro, jaciá te kralinél Amvrijo pe Izrailjo, i kralindia dešudúj beršá. Dre Firca kralindia jov šov beršá. I kindia Amvrijo bérga Siemieron Siemirostyr pal duj talánty rupésa, i lyjá jov te čhuvél kherá, i dyjá lav foroske, so jov kerdiá, Samárija, pir lav Siemiro, konéskiri sys daja bérga. Ne Amvrijo kerélas fuipén angíl jakhá Ráskire-Devléskire, i kerdiá butýr fuipén saréndyr, kon sys králja angíl léste. Jov psirdiá Jerovoamoskire dromésa dro saró, savó sys čhavó Navatoskiro, i dre saré gréhi léskire, savénca odová zalydžijá dro grého Izrail'tianén, sob (kaj) te xoliakires Ras-Devlés, Devlés Izrailjoskires léskire idolenca. Javír réndy (diély) Amvrijoskire, savé jov kerdiá, i muršypen, savó jov sykadiá, isyn začhindlé dre beršýtka arhívy kral'jéngire Izrailjostyr. I gijá te otkhinjol viéčnes Amvrijo péskire dadénca, i garadé les dre Samárija. I lyjá te kralinél Ahávo, čhavó léskiro, pe štéto léskiro. O Ahávo, čhavó Amvrijoskiro, lyjá te kralinél pe Izrailjo, syr sys trijandaohtoto berš, kiéli lyjá te kralinél Asá pe Judéia, i Ahávo kralindia pe Izrailjo dre Samárija biš te duj beršá. I kerdiá Ahávo fuipén angíl jakhá Ráskire-Devléskire butýr saréndyr, savé sys angíl lénde. Léske na uhtylelas (sys nádosi) dová, so jov pyjá dre gréhi Jerovoamoskire, kon sys čhavó Navatoskiro, a jov iščo (inké) lyjá Jezaviel' dre romniáte, čha Jefvaaloskirja, kon sys králi Sidonoskiro, i jov lyjá te dynarinél Vaaloske i te del patýv léske. I čhudiá jov altárjo Vaaloske pe mangipnytko štéto Vaaloske, savó jov ĥazdyjá dre Samárija. I kerdiá Ahávo dembitko vešoro (Astarta), i butýr saréndyr kral'jéndyr Izrailjostyr, savé sys angíl léste Ahávo kerdiá dová, sósa jov xoliakirelas Ras-Devlés, Devlés Izrailjoskires. Dre léskire dyvesá Ahiilo Viefilianino začhudia Jerihóno: pe péskire Pervoneste Aviramoste jov čhudiá fundámiento, i pe péskire ternedyršone čhavéste, Siegubaste, jov začhudia foróskiri pórta, pir lav Ráskire-Devléskiro, savó Jov vyphendia pirdál Isusóste, čhavéste Navinoskireste. I phendiá Ilíia Fiesvitianino, jekh manušéndyr, savé dživdé ke Galaádo, Ahavoske: “Te javél džidó Raj Devél, Devél Izra-iljoskiro, angíl Savéste me som terdó! Dre dalé beršá na javéla ni pahlyn (rosa), ni bryšýnd, kóli féni (tóka) javéla pir miro lav” I sys lav léske Rástyr-Devléstyr: “Džá adathýr, i risjov pe čačí rig (vastóko), i garadjov pašýl sýgno rékica (lenorí) Xorafo, so isyn mamúj Iordáno. Dalé sygnone rekicatyr (lenorjatyr) tu javésa te p'jés, a korakenge (voronenge) Me priphenava, sob (kaj) jone te čaliakiren tut odój.” I gijá jov, i kerdiá pir lav Ráskire-Devléskiro; gijá odorík i jaciápe pašýl sýgno rékica (lenorí) Xorafo, so isyn mamúj Iordáno. I koraki janénas léske maró i mas zlokosa (rankosa), i maró i mas biel'vieliasa, a pija jov sygnone rekicatyr (lenorjatyr). Paló vari-savó časo, daja sýgno rékica (lenorí) vyšutija, pal-dová so na sys bryšýnd pe phuv. I sys léske lav Ráskire-Devléskiro: “Džá dre Siriepta Sidonoskiri, i jačpe odój. Me priphendjom džuvliáke ŭdovake (pivliake) te čaliakirel tut” I uštyjá jov, i gijá dre Sariepta: i syr jov javdiá ke pórta foróskiri, ake, odój e džuvlý pivly kedelas kaštá. I khardiá jov la ke pe, i phendiá: “De mánge nábut paní te pjáv khorestyr.” I gijá joi, sob (kaj) te lel: a jov dyjá gódla pal láte, i phendiá: “De mánge i kotér maró dre vastá tyré.” I phendiá joj “Te dživél Raj Devél, Devél miro pe viéki! – mánde nane ni priesno marikly, a féni burnyk (žmienia) jaržó dre berica (bóčkica) i nábut ksil dro khoró: i, ake, me skedáva nábut kaštá, i me džáva, i me spekava davá vaš péske, i vaš miré čhavéske: ame xasa davá i merasa.” I phendiá Ilíia láke: “Na dar, džá, ker, so tu phendián; ne angíl ker nabari priesno marikly vaš mánge i jan mánge; ne vaš péske i vaš tyré čhavéske kerésa korigedýr (pozže). Pal-dová so adiáke phendiá Raj-Devél, Devél Izrailjoskiro: “Jaržó dro berica (bočkica) na končynelape, i ksil dro khoró na tyknjola angíl dová dyvés, kiéli Raj Devél déla bryšýnd pe phuv.’” I gijá joj i kerdiá adiáke, syr phendiá o Ilíia, i čaliakirdiape joi, i jov, i kher lákiro pe vari-savó časo. Jaržó dro berica na končynelaspe, i ksil dre khoró na tyknjola pir lav Ráskire-Devléskiro, savó Jov phendiá pirdál Ilijaste. Paló dová zanasvalyja čhavó adalia-džuvliákiro, kon sys xulany pe davá Kher, i nasvalypen sys drieván pharó, so na sys dyho léstyr. I phendiá joj Ilijaske: “So túke ke me, manúš Devléskiro? Tu javdián, sob (kaj) te priripires miré gréhi i te muliakires miré čhavés?” I phendiá jov láke: “De mánge tre čhavés.” I lyjá jov lákire angaliatyr, i lydžijá les dro štúba uprál, kaj jov dživdiá, i čhudiá les pe léskiri pasindly. I khardiá zoralés Ras-Devlés, i phendiá: “Rajo, Dévla miro! Naúšto Tu i pivliake, ke saví me dživáva, kerésa fuipén, i muliakiresa čhavés lakires?” I jov vydindija pes pe bijatoste trin móly, i kharelas zoralés Ras-Devlés, i rakirélas: “Rajo Dévla, Dévla miro! Rískir pale di dalé bijatoskiro dre léste.” I šundiá Raj Devél zan Ilijaskiri, i risijá pale di dalé bijatoskiro dre léste, i jov otdžidyjá. I lyjá Ilíia bijatós, i lydžijá pale les ke daj štubatyr dro kher, i otdyjá les léskire dáke, i phendiá Ilíia: “Dykh, tyró čhavó isyn džidó.” I adáia džuvlý phendiá Ilijaske: “Akaná me lyjom te džináv, so tu san manúš Devléskiro, i so lav Ráskiro-Devléskiro isyn čačunó dre muj.” I sys adiáke: syr nakhle (proginé) but dyvesá, to sys lav Ráskire-Devléskiro Ilijaske pe tríto berš: “Džá, sykadjov Ahavoske, i Me dáva bryšýnd pe phuv.” I gijá Ilíia, sob (kaj) te sykadjol Ahavoske. Sys drieván bari bokh dre Samárija. I khardiá Ahávo Avdijas, savó sys šeraló kheratuno pe bari fielatin (kolov). O Avdija sys manúš, savó darandyja drieván Rástyr-Devléstyr. Ake, kiéli e Jezaviél' xasiakirelas prorokén, Raskiren-Devleskiren, to Avdija lyjá šel prorokén, i garavelas len, pir pandždešá manušén, dre ĥiebará (pieščery), i jov čaliakirelas len marésa i paniésa. I phendiá Ahávo Avdijaske: “Džá pir phuvjá ke saré ĥanyngorja panieskire, i ke saré sygna rekicy pe phuv, odój, ame saštý te lathas čar te xahavas (korminas) gren i lošaken, i, sob (kaj) te na začhinas kheritkoné murdalén (skoto).” I jone roskerde phuv maškír péste, sob (kaj) te obdžan la: Ahávo gijá kokoró jekhe dromésa, i Avdija kokoró gijá javire dromésa. Kiéli Avdija džálas dromésa, ĥáda, léske muj ke muj džála Ilíia. Jov ĥalyjá les, pyjá péskire mósa, i phendiá: “Ci davá tu san, miro rajo, Ilíia.” Odová phendiá léske: “Me som, džá, phen tyré ráske: Ilíia isyn adái.” Jov phendiá: “Dre so me som bangó, so tu otdesa tyré pisharís dre vastá Ahavoske, sob (kaj) te muliakirél man? “Te, dživél pe viéki Raj Devél, tyró Devél! Nane ni jekh narodo, i ni jekh kralipén, karik bičhavelas man raj miro te rodél tut: i, kiéli léske rakirdé, so nane tut, to jov lelas sovláh dolé kralipnastyr i rodóstyr, sob (kaj) te na den ráda te lathén tut. I tu akaná rakirésa: “Džá, phen péskire ráske, Ilíia isyn adái.’ Syr me džáva tútyr, tedy Dúho (Fáno), Ráskire-Devléskiro, lydžála krig tut, me na džinóm, karik; i kóli me džáva te phenáv Ahavoske, i jov na lathéla tut, to jov zamarela man; ne pishári tyró daréla Rástyr-Devléstyr terné beršéndyr. Ci na sys phendló miré ráske, so me keravas, kiéli Jezaviel' muliakirelas prorokén Raskiren-Devleskiren, syr me garadjom šel te pandždešá prorokén Raskiren-Devleskiren, pir pandždešá manušá, dre ĥiebará (pieščery), i me čaliakiravas len marésa i paniésa? A tu akaná rakirésa: “Džá, phen tyré ráske: ‘Ilíia isyn adái;’ jov muliakiréla man!” I phendiá Ilíia: “Te dživél pe viéki Raj-Devél, bolybnáskiro-jangoléngiro, angíl Savéste me som terdó! Adadyvés me sykaváva pes léske.” I gijá Avdija te pirilel Ahavos, i phendiá léske. I gijá Ahávo te dykhelpe muj ke muj Ilijasa. Kiéli o Ahávo dykhciá les, Ilijas, to jov phendiá: “Ci na san davá kher tu, kon keréla pharipén Izrailjoske.” I otphendiá Ilíia: “Me na keráva pharipén Izrailjoske; ne davá tu, i tyré-dadéskiro kher keréna davá dalésa, so tumé mekné priphenybená Ráskire-Devléskire i džána pal Vaalo. Akaná, bičháv, i kede khetané pe bérga Karmilo saró Izrailjo, i štaršelá pandždešá prorokén Vaaloskiren, i štaršelá prorokén, savé čaliakirenape Jezavieliakire skamindestyr.” I bičhadiá Ahávo zan (zvies') saré čhavénge Izrailjostyr, i kedyja khetané saré prorokén pe bérga Karmilo. I tedy podgíia ke saré manušá i phendiá: “Ci ĥará (dlúges) tumé javéna te langan pe duj ĥerá? Kóli Raj Devél (Jahvá) isyn Devél, to džán palál pal Léste, ne kóli Vaalo, to džán palál pal léste.” I phendiá Ilíia narodoske: “Me jekhdžinó jacjompe proróko Ráskire-Devléskiro; a isyn štaršelá pandždešá prorokén Vaaloskiren. Mek te den aménge dujén guruvorén, i mek jone te vykeden péske jekhe guruvóres, i mek te rosčingiren les, i mek te čhuvén les pe kaštá, ne mek te na podčhuven jag telé; ne me prigotovinava javire guruvóres, i čhuváva les pe kaštá, ne me na javáva te podčhuvav jag telé. I kharén tumé lav tumaré devloreskiro, a me kharáva lav Ráskire-Devléskiro, miré Devléskiro. Odová isyn Devél, Savó otphenéla jagása.” I otphendlé saré manušá i phendlé: “Mištó.” I phendiá Ilíia prorokenge vaš Vaalo: “Vykeden péske jekhe guruvóres i janén les syr svénto dyibén angíl, pal-dová so tumé san but; i kharén lav tumaré devloreskiro, ne na podčhuven jag telé. I jone lyné guruvóres, savó sys dynó lénge, i jandlé les dro svénto dyibén, i kharenas lav Vaaloskiro zlokostyr (rankostyr) ke pašdyves, rakirí: “Vaalie, šun amen!” Ne na sys ni zan (glos), ni otphenybén. I jone uhtenas pašýl altárjo (žertvieniko), savó jone kerdé. Dre pašdyves Ilíia lyjá te salpe léndyr, i jov rakirdiá: “Den gódla zoralés, pal-dová so jov isyn devloro; jov, xaj, zadumindiape, ci jov isyn zalymo vari-sósa, ci jov isyn dre drom, a saštý te javél, so jov isyn sutó, adiáke jov džangadjola.” I jačné jone te den gódla zoralés, i phusavenas jone pes, pir léngiri maniera, čhur'jenca i čhurdybnytkone bustienca adiáke, so rat thadelas pir lénde. I javdiá pašdyves, ne jone usá iščo (inké) angilphenenas bigodiakires až ke pora, kiéli janénas bel'vieliakiro svénto dyibén; ne na sys ni zan, ni otphenybén, ni šunybén. Tedy Ilíia phendiá saré narodoske: “Javén pašyledýr ke me.” Adiáke saré manušá javné ke jov. I jov pirikerdia altárjo Ráske-Devléske, savó sys phagirdó. I Ilíia lyjá dešudúj bará pir kicypen (čyslo) pe kherítka ródy, savé vyginé Jakovóskire čhavéndyr, konéske Raj Devél phendiá adiáke: “Izrailjo javéla lav tyró.” I čhudiá dalé barendyr jov altárjo vaš lav Ráskire-Devléskiro, i vyĥanadia trusciál altárjo rovo (xohói), baripnasa dre duj saty ziarny. I jov čhudiá kaštá, rosčingirdia guruvóres, i čhudiá upré les pe kaštá, i phendiá: “Pheren štar vedry (nemry) paniésa i čhuvén javrí paní pe célo shačkiribnaskiro svénto dyibén i pe kaštá” I phendiá: “Kerén davá javír mólo, i jone kerdé nevéstyr (nevés) i jov phendiá: “Kerén davá tríto mólo”, i jone kerdé tríto mólo. I paní thadyja trusciál (krugom) altárjo, i rovo (xohói) pherdija paniésa. A kiéli sys pora te janel bel'veliakiro svénto dyibén, javdiá pašyledýr Ilíia, svénto proróko, i phendiá: “Rajo Dévla, Devél Avraamóskiro, Isakóskiro i Izrailjoskiro! Mek te džinén dre davá dyvés, so Tu san Jekh, Devél dro Izrailjo, i so me som pishári Tyró, i so me kerdjom saró pir lav Tyró. Šun man, Rajo Dévla, šun man! Sob (kaj) adalé manušá moginénas te džinén, so Tu, Rajo Dévla, san Devél, i so Tu riskiresa nevéstyr (nevés) léngire ile pale ke Tu.” I spyja telé jag Ráskire-Devléskiri, i pohaia célo shačkiribén, i kaštá i bará, i práho, i nakhadia paní, savó sys dre rovo (xohói). I syr saré manušá dykhné davá, to jone pyné léngire mósa i phendlé: “Raj Devél (Jahvá), Jov isyn Devél, Raj Devél (Jahvá) isyn Devél.” I Ilíia phendiá lénge: “Uhtylén prorokén Vaaloskiren! Na domeken, sob (kaj) jekh léndyr te našél.” I adiáke jone uhtyldé len; i o Ilíia lydžijá telé len ke sýgno rékica (lenorí) Kisono, i jov začhindiá len odój. I phendiá tedy Ilíia Ahavoske: “Džá, xa, i pi, pal-dová so šundlo, syr bryšýnd peréla.” I gijá Ahávo te xal i te p'jel, a Ilíia gijá upré pe bérga Karmilo; tén'či odój jov bandija ke phuv, i čhudiá péskiro muj maškír čangá. I phendiá jov péskire terné dynaríske: “Džá akaná, podykh ke mórjo (derjáv).” I odová gijá, i dykhcia syges, i phendiá: “Ničý nane.” I phendiá Ilíia léske: “Psir odorík ke eftá móly.” I pe eftáto mólo ternó dynári phendiá: “Ake, nabaró óbloko, dasavo syr manušýtko burnyk (ladožka).” Ilíia phendiá: “Džá, de andré maribnýtko vurdén tyró i trade, sob (kaj) te na uhtylel tut bryšýnd.” Pir vari-savó momiento bolybén jaciá kaló xmarenca i balvaliasa, i gijá baró bryšýnd. I sys vast Ráskire-Devléskiro pe Ilijaste. Jov obphandia péskire trušula i prastándyja angíl Ahavoste ke sámo Izriejeljo. I rosphendiá Ahávo Jezavieliake, saró, so kerdiá o Ilíia, i adiáke-pac' dová, so jov muliakirdiá saré prorokén kurtalása. I tedy bičhadiá e Jezaviel' manušés te piridel Ilijaske: “Mek dová i dová te kerén mánge devloré, kóli me ke atasiá na keráva tyré diesa dová, so kerdián tu diesa kažnonesa (svakonesa) léndyr.” Kiéli Ilíia dykhciá davá, to jov uštyjá i gijá, sob (kaj) te rakhél péskiro džiibén, i jov javdiá dre Virsávija, saví isyn dre Judéia, i mekciá léskire terné dynarís odój. I gijá jov pe čhučí phuv pe célo dyvés, i javdiá, i besciá tel veresytko xrústo. I jov mangdiápe Ráske-Devléske, sob (kaj) jov, te merél, i phendiá: “Uhtýlla (dósi) uže mánge, Rajo Dévla, le miro džiibén, pal-dová so me na som fedýr miré dadendyr.” Tén'ci jov pasijá, i zasutia tel veresytko xrústo. I, ake, Jangólo čiladiá les i phendiá: “Uštý, xa.” I Ilíia dykhcia syges, i, ake, pašýl léskiro šeró, sys pekny marikly, i khoró paniésa. Jov xaja, pija čalés, i nevéstyr zasutia. I Jangólo Ráskire-Devléskiro javdiá javír mólo, i čiladiá les i phendiá: “Uštý, xa; pal-dová so baró drom trej te džas túke.” Adiáke jov uštyjá, i xaja, i pija, i syr jov xaja dová xabén, to gijá štardešá dyvesá i štardešá ratia ke bérga Devléskiri, Xorivo. I gijá jov dre ĥiebár (pieščera) odój, i rat'kirdia odój. I, ake, sys lav Restyr-Devléstyr léske, i phendiá léske Raj Devél: “So kerésa tu adái, Ilíia?” Jov phendiá: “Zahačijom me pal Raste-Devléste pal bolybnáskire-jangolengireste; pal-dová so čhavé Izrailjoskire mekné Tyró zaviéto, altári Tyré rosphagirdé i zamardé Tyré prorokén kurtalása; i me jacjompe jekhdžinó, ne jone rodéna te otlen miro džiibén.” I phendiá Raj Devél: “Džá angíl i terdjov angíl Miro muj. I, ake, Raj Devél prodžála, i bari i zoralý balvál, saví javéla te roskušel bérgi, i saví javéla te phagirel skaly angíl Raste-Devléste; ne Raj Devél nane dre balvál. Paló balvál javéla izdrany phuvjákiri, ne Raj Devél nane dre izdrany phuvjákiri. Paló izdrany javéla phuvjákiri jag, ne Raj Devél nane dre jag. Paló jag javéla zanori (glosori) balvaliakiri.” I sys adiáke: kiéli Ilíia šundiá, to jov učhakirdiá péskiro muj léskire plaščosa, i vygijá, i terdijá pašýl zagiibén dre ĥiebár (pieščera). I sys sýrby zanori (glosori) léske, i phendiá léske: “So kerésa tu adái, Ilíia?” I phendiá jov: “Zahačijom me pal Raste-Devléste, pal bolybnáskire-jangolengireste, pal-dová so čhavé Izrailjoskire mekné Tyró zavieto, altári Tyré rosphagirdé i zamardé Tyré prorokén kurtalása; i me jacjompe jekhdžinó, ne jone rodéna te otlen miro džiibén.” I phendiá léske Raj Devél: “Džá pale péskire dromésa dro Damásko; i, kiéli tu javésa odorík, to pomakh Azailos syr kralís pe Sirija.” I tu adiáke-pac' pomakh Iiujos, čhavés Namiesijoskires syr kralís pe Izrailjo, a Jelisiejos, čhavés Safatoskires Avel-Mieholatyr, pomakh syr pe štéto péskiro. Kon našela Azailoskire kurtalátyr, odolés muliakiréla Iiújo, a kon zrakhélape Iiujoskire kurtalátyr, odolés muliakiréla o Jelisiejo. Iščo Me jačkirdjom maškír Izrail'tianende eftá tysjoncy muršén: saré dalé kherítka ródy na pyné pe čangá angíl Vaaloste, i sarengire uštá léndyr na čamudenas les.” I durija jov odothýr, i lathiá Jelisiejos, čhavés Savatoskires, kiéli jov pašyndia; léste sys dešudúj pary oslengire tel ĥámo, i iščo (inké) pašýl léste sys dešudúj pary. I mekciá Jelisiejo guruvén, i prastándyja pal Ilijaste, i phendiá: “De vólia mánge te čamudav miré dadés i miré da, i me džáva pal túte.” Jov phendiá: “Džá i jav pale, pal-dová so me na som pe drom túke.” Adiáke Jelisiejo otgijá léstyr, lyjá para guruvengiri i začhindiá len, i jov zahačkirdia plugo guruvengiro, spekcia mas léngiro, i rozdyja manušénge, i jone xané. A kokoró uštyjá jov i gijá pal Ilijaste, i jaciá te dynarinél léske. O Vienadado, králi pe Sirija, skedyjá saré péskire xaladybena, i lésa sys trijánda duj králja, léngire grenca i maribnytkoné vurdenenca. I gijá jov i občhudiá trusciál xaladybnasa Samárija, i lydžijá maribén proti láte. I bičhadiá jov poslen ke Ahávo, králi pe Izrailjo, dro fóro. I phendiá Vienadado: “Adiáke rakiréla Vienadado: ‘Rup tyró, i suvnakáj tyró-miré, romniá tyré i fedýr čhavé tyré-miré.’” I otphendiá králi pe Izrailjo i phendiá: “Te javél pir lav tyró, rajo miro, králi; me i saró miro isyn tyré.” I nevés javné posly i phendlé: “Adiáke rakiréla Vienadado: ‘Me bičhadjom ke tu te phenáv túke: rup tyró, i suvnakáj tyró, i romnien tyrén, i čhavén otdé mánge; pal-dová me atasiá ke davá časo bičhaváva ke tu miré pishar'jén, sob (kaj) jone te obdykhen tyró kher i kherá tyré dynar'jéngire, i saró, so isyn šukár dre tyré jakhá, sob (kaj) jone te len dre vastá i te lydžán tútyr.’” I khardiá ke pe králi pe Izrailjo phurydyren pe phuv, i phendiá: “Me mangáva tumen, dykhén i obduminen, syr jov priduminela fuipén; kiéli jov bičhavelas ke me pal miré romnende, i miré čhavénde, i pal miro rup, i pal miro suvnakái, me léske na otphendjom.” I phendlé léske, saré phurydyrá i saré manušá: “Na kande len, i na zdepe pe lénde.” I bičhadiá jov paldavá lav poslenge Vienadadostyr: “Phenén miré ráske, kralíske: ‘Saró, pal so tu bičhadian dro pérvo mólo, tyré pisharíske me som skedymo te kerél, ne dová me naštý te keráv.’” I durine posly i jandlé otphenybén Vienadadoske. Tén'ci o Vienadado bičhadiá lav léske te phenél: “Mek dová i dová te kerén mánge devloré, i iščo (inké) butýr te kerén, kóli uhtýlla (dósi) práho Samarijakiro pir burnyk (žmienia) vaš saré manušénge, savé džána pal mánde.” Adiáke králi Izrailjoskiro otphendiá i phendiá: “Phenén léske: ‘Mek te na šarelpe odová, kon podphandiape kurtalása sýrby dová, kon rosphandia kurtála péstyr.’” I sys adiáke: syr šundiá o Vienadado dalé lavá, kiéli jov pija khetané kral'jénca dre budy (šatricy), to phendiá léskire pishar'jénge: “Skedénpe te občhuven fóro.” I jone občhude fóro xaladybnasa. I, ake, jekh proróko, podgíia ke Ahávo, králi pe Izrailjo, i phendiá: “Adiáke rakiréla Raj Devél: ‘Tu dykhésa tu daja bari ke dar banda? Ĥáda, adadyvés Me otdáva len dre vast tyró, sob (kaj) tu te džinés, so Me som Raj Devél.’” I Ahávo phendiá: “Pirdál konéste?” O proróko otphendiá: “Pir dynar'jende barydyrendyr pe provincyi.” I phendiá Ahávo: “Kon pérvo džála pe maribén?” Jov phendiá: “Tu.” O Ahávo pirigindia dynar'jén barydyrengiren pe provincyi, i vygijá, so sys len duj šelá biš te duj; tén'či jov pirigindia saró narodo, sarén čhavén Izrailjoskiren, eftá tysjoncy. I jone vyginé dre pašdyves. A o Vienadado pija ke matyben dre šátry khetané kral'jénca, trijandaduje kral'jénca, savé pomoginenas léske. I vyginé pérva dynárja barydyrengire pe provincyi. I bičhadiá Vienadado rozĥalyiben (razviedka) i piridyne léske, so manušá vyginé Samarijatyr. O Vienadado phendiá: “Kóli javné pal ramánjo (miro), to uhtylén len džidenca; i kóli pe meribén, to uhtylén len adiáke-pac' džidenca.” I vyginé dynárja barydyrengire provincyiéndyr foróstyr, i xaladybén gijá pal lénde. I kažno (sváko) léndyr zamarelas péskire manušés, i lyné te našén Sirijani, a Izrail'tiáni tradynepe pal lénde. O Vienadado, králi Sirijákiro, zrakhciá pes pe greste uklistengirenca. I vygijá králi Izrailjoskiro, i lyjá gren i maribnýtka vurdená, i jov zoralés domardiá len. I podgíia proróko ke králi Izrailjoskiro, i phendiá léske: “Džá, zorjakir pes, i džin, i dykh, so túke te kerés: pal-dová so syr prodžála (nakhel) berš, králi Sirijákiro nevés džála pe túte.” I dynárja Sirijakire kralíste phendlé léske: “Léngire develá isyn develá pir bérgi, pal-dová jone pirizorjakirde amen. Kóli ame javása te maraspe pe loščýna (ravnina), to, čačes, ame pirizorjakirasa len. Adiáke dykh, so ker: mek ke džán péske králja, i pe štéto léngiro čhuv barydyrén pir provincyi, i skéde péske xaladén adákicy, kicý xasijá túte, i kicý sys túte gren, i, kicý sys maribnýtka vurdená, adákicy skéde gren, adákicy skéde maribnýtka vurdená, i džása ame te maraspe pe loščýna lénca, i tedy, čačes, ame pirizorjakirasa len.” Syr progijá (nakhja) berš, to o Vienadado skedyjá Sirijanen (Aramieicen), i jov gijá ke Afieko, sob (kaj) te marénpe Izrail'tianenca. I sys pirigindle čhavé Izrailjoskire i doresné jone xabén, i giné muial (gil) lénge. I terdiné čhavé Izrailjoskire taborosa (lodosa) angíl lénde, sýrby duj nabary stády buzniengire, a Sirijani pherdiakirde sarí phuv. Tén'ci javdiá pašyledýr manúš Devléskiro i phendiá kralíske pe Izrailjo dasavé lavá: “Adiáke rakiréla Raj Devél: ‘Pal-dová, so Sirijani rakiréna: ‘Raj Devél isyn Devél bergicengiro, ne Jov isyn na Devél dolengiro’, to paldavá Me baró ke dar davá baró xaladybén piridava dro vast tyró, i tumé javéna te džinén, so Me som Raj Devél’.” I sys terdé jone taborenca jekh proti javír eftá (bitrinéngiro deš) dyvesá. Pe eftáto dyvés giné jone te marénpe, i čhavé Izrailjoskire zamardé šel tysjoncy xaladén pezalunen Sirijanendyr dro jekh dyvés. Ne javír, savé jačnépe, našné dro fóro Afieko. Odój pyjá telé vánta pe biš te eftá tysjoncy manušénde, kon jaciápe. A o Vienadado gijá krig péske dro fóro i prastalas jekhe štubatyr andrál dre javír. I phendlé léskire dynárja léske: “Ame šundiám, so králja Izrailjoskire kheréstyr isyn lačhé-iléskire. De vólia aménge (dozvolin) te čhuvés upré pe trušula amaré balytka goné i šele pe šeré amaré i te džas ke králi Izrailjoskiro; jov, xaj, mekéla amen džidenca.” I otphandle jone péskire trušula balytkone gonenca, i čhudé upré šele pe šeré léngire, i javné ke králi Izrailjoskiro, i phendlé: “Pishári tyró, o Vienadado, rakiréla: ‘Mek man džidesa.’” O Ahávo phendiá: “Ci jov isyn džidó? Jov isyn miro pšal!” E manušá priléna davá pal lačhí špéra (znako), i sýges jone piriuhtylde lav léskire uštendyr, i phendlé: “Tyró pšal Vienadado.” I jov tedy phendiá: “Džán, janén les.” I gijá ke jov Vienadado, i jov začhudia les te bešél pésa dre maribnýtko vurdén. Tén'ci phendiá léske Vienadado: “Fórja, savé lyjá miro dad tyré dadéstyr, me riskiráva, i tu saštý (moginésa) te čhuvés pale gásy [foruniá-r.s.] vaš péske dro Damásko, syr sys miré dadéste dre Samárija. O Ahávo phendiá: “Me otmekáva tut, syr kerása dorakiribén.” I, syr jov kerdiá dorakiribén lésa, to otmekciá les. A'ke, jekh manúš prorokéngire čhavéndyr phendiá javireske pir lav Ráskiro-Devléskiro: “Mar man, mangáva.” Ne odová manúš otphendiape te marel les. I odová manúš tedy phendiá léske: “Pal-dová so tu na kandyjan zan Raskiri-Devléskiri, ake, syr tu džása mándyr, to ščer (liévo) muliakiréla tut.” I syr jov durija léstyr, to ščer lathiá les i muliakirdiá. I jov lathiá javire manušés, i phendiá: “Mar man.” Kodová manúš adiáke mardia les, so jov došadia léskire masá dabenca. I gijá odová proróko, i terdijá angíl kralíste pe drom, učhakiri phandluniasa (poviazkasa) jakhá péskire. Kiéli králi tradelas pašýl, to jov dyjá gódla kralíske i phendiá: “O pishári tyró gijá pe maribén, i, ake, jekh manúš otgijá dre rig, lydžijá ke me, manušés i phendiá: “Rakh adalé manušés; kóli te na javél jov, to tyró džiibén javéla pal léskiro džiibén, ci tu javésa bangó te ublaves talanto rup. Kiéli pishári tyró zalyjape odolé i javír rendénca, to jov xasijá.” I phendiá léske králi Izrailjoskiro: “Dasavo i séndo isyn túke: tu kokoró sendiakirdian pes.” Jov dre dová momiento zlyjá phandluny (poviazka) péskire jakhéndyr, i pindžkirdia les o králi, so jov sys jekh prorokendyr. I phendiá léske: “Adiáke rakiréla Raj Devél: ‘Pal-dová so tu domekcian, sob (kaj) gíian péske manúš tyré vasténdyr, savés Me otdyjom pe xasibén, to tyró džiibén džála pal léskiro džiibén, a tyré manušá džána pal léskire manušénde.’” I gijá králi Izrailjoskiro kheré, léske léskiro muj sys xoliamó i kirko. I pal odolé saré réndy sys adiáke: Navufiejoste, savó sys Izriejel'tianino, sys vinagrádniko (drakh) pašýl bari felatin/kolov (dvorco) Ahavoskiri, savó sys králi pe Izrailie. I phendiá Ahávo Navufiejoske dasavé lavá: “Otdé mánge péskiro vinagrádniko; sob (kaj) mánge te keráv léstyr šahitko únta (ovošytko sado); pal-dová so jov isyn pašýl miro kher, i me dáva túke vinagrádniko fedýr kadalestyr, ci, kóli davá zdelape mištó túke, to me dáva túke rup, kicý jov isyn mol.” Ne Navufiejo phendiá Ahavoske: “O Raj Devél priphendiá mánge te na otdav túke meknó mištypén miré dadendyr.” I javdiá kheré Ahávo xoliamé i kirke mósa dalé lavéstyr, so phendiá léske Navufiejo, savó sys Izriejel'tianino, rakirí: “Na otdáva me túke meknó mištypén miré dadendyr.” I pasijá jov pe péskiro čhuibén, i otriskirdia muj péskiro, i maró na xaja. I zagijá ke jov léskiri romný e Jezaviel', i phendiá léske: “Sóske tyró dúho xoliamó, so tu na xasa maró?” Jov phendiá láke: “Kiéli me jacjom te rakiráv Navufiejoske Izrail'tianinoske, i phendjom léske: ‘Otdé mánge vinagrádniko tyró pal rup, ci, kóli kamésa, me dáva túke javír vinogradniko pal léste,’ to tedy jov phendiá: ‘Na otdáva túke miro vinagrádniko.’” I Jezaviel', romný léskiri, phendiá léske: “So dasavo kralipén isyn, kóli tu adiáke kerésa? Uštý, xa maró i jav štyl; me dáva túke vinagrádniko Navufiejoskiro Izriejelitianinoskiro.” I čhindiá joj lylá Ahavoskire lavéstyr, i joj zapiečatyndia len Ahavoskire baré angrustiasa, i jej bičhadiá dalé lylá phurydyrenge i lačhé-rodoskire manušénge dro léskiro fóro, savé dživdé Navufiejosa. Dre lylá čhindiá joj adiáke: “Phenén angíl sarénde pal posto, i čhuvén Navufiejos pe pérvo štéto maškír manušénde; i čhuvén dujén manušén, zlydnien, mamúj proti léste, savé dosykavenas pe léste, phení: “Tu kaliakirdian Devlés i kralís; a tén'či lydžán les javrí, i domaren les barénca, sob (kaj) jov te merél.” Adiáke kerdé muršá foróskire, phurydyrá i lačhé-rodoskire manušá, savé dživdé dro léskiro fóro, syr priphendiá e Jezaviel' lénge, adiáke, syr sys čhindló dre lylá, savé joj bičhadiá lénge. Jone phendlé angíl sarénde pal posto, i čhudé Navufiejos baré patyvása maškír manušénde. I duj manušá, zlydni, bešné mamúj léste, i lyné te dosykaven pe léste dalé nalačhé manušá angíl manušénde, i rakirdé: “Navufiejo kaliakirdia Devlés i kralís.” I lydžiné les pal fóro, i domardé les barénca, i myjá jov. I bičhadé tén'či ke Jezaviel', phení: “Navufiejo domardo barénca i jov myjá.” I sys adiáke: kiéli Jezaviel' šundiá, so Navufiejo domardo barénca i myjá, to phendiá joj Ahavoste. “Uštý, le péske vinagrádniko Navufiejoskiro, savó sys Izriejel'tianino, kon na kamdiá te del túke paló rup, pal-dová so Navufiejo isyn nadžido, jov myjá.” Syr šundiá Ahávo, so Navufiejo sys domardo, to uštyjá Ahávo, sob (kaj) te džal dro vinagrádniko Navufiejoskiro, savó sys Jezriejeljostyr, sob (kaj) te lel les péske. I sys lav Ilijaske Rástyr-Devléstyr, kon sys Fiesvonostyr: “Uštý, džá gil Ahavoske kralíske pe Izrailjo, savó isyn dre Samárija; ake, jov akaná isyn dre vinagrádniko Navufiejoskiro, sob (kaj) te lel les péske. I phen léske: ‘Adiáke rakiréla Raj Devél: Tu zamardian, i tu iščo (inké) lésa dro meknó mištypén péske?’ I phen léske: ‘Pe dová štéto, kaj džukela čarde rat Navufiejoskiro, džukela javéna te čaren i tyró rat.’” I phendiá Ahávo Ilijaske: “Lathian tu man, vérgo miro!” Jov phendiá: “Lathjom, pal-dová so tu otdyjan pes adiáke, so tu kerésa fuipén angíl jakhá Ráskire-Devléskire.” Adiáke rakiréla Raj Devél: ‘Ĥáda, Me janáva bari bída, i Me vyšulavava tyró ródo pal túte, i Me xasiakiráva Ahavoste kažnoné muršores dro Izrailjo, i odolés, kon isyn dre navolia i isyn pe vólia. I Me keráva tyré kheresa adiáke, syr Me kerdjom kheresa Jerovoamoskiresa, kon sys čhavó Navatoskiro, i syr kheresa Vaasaskiresa, kon sys čhavó Ahiinoskiro, pal-dová, so tumé sykade bipatyv, savjása tu xoliakiresas Man i sósa tu jandian Izrailjo dro grého.’ Adiáke i pal Jezavieliate phendiá Raj Devél: ‘Džukela xána Jezaviel' pal vánta Izriejeljoskiri.’ Kon meréla Ahavoste dro fóro, odolés shana džukela; a kon meréla pe félda, odolés čirikliá bolybnýtka roskliuinena.” Na sys iščo (inké) adasaves, syr Ahávo, savó otdyjá pes te kerél zlydnitka réndy angíl jakhá Ráskire-Devléskire, ke so les podmarelas léskiri romný Jezaviel'. Jov kerdiá drieván brytka réndy, kiéli džálas pal ídoly, syr kerdé Amoriei, konés o Raj Devél tradyjá krig móstyr čhavéndyr Izrailjoskiren.” I sys adiáke: syr Ahávo vyšundia dalé lavá, to jov roskuscia ídi péskire, i pričhudia gonó praskasa pe masá péskire, i postindia jov, i sys sutó dro gonó, i jov psirdiá pharé minasa. I sys lav Ráskire-Devléskiro Ilijaske Fiesvonostyr; i phendiá Raj Devél: “Ci dykhésa, syr Ahávo tykniakirdia pes angíl Mánde? Pal-dová so o Ahávo tykniakirdia pes angíl Mánde, to Me na javáva te janav bari bída pe kher léskiro, ne Me janáva bari bída dre dyvesá čhavéskire léskire.” I proginé (nakhle) iščo (inké) trin beršá, i na sys maribén maškír Sirija (Arameja) i Izrailie. Pe tríto berš gijá o Iosafáto, králi pe Judéia; ke králi Izrailjoskiro. I phendiá králi pe Izrailjo péskire dynar'jénge: “Ci džinéna tumé, so Ramófo, so isyn pe Galaádo, isyn amaró? Ame adiáke ĥará sam štyl, i ame na otlasa les vastéstyr Sirijakire kralístyr. I phendiá jov Iosafatoske: “Ci džása tu mánca pe meribén proti Ramófo Galaadoskiro?” I phendiá Iosafáto kralíske Izrailjostyr: “Syr tu, adiáke i me, syr tyré manušá, adiáke i miré manušá; syr tyré grajo, adiáke i miré grajo.” I otphendiá Iosafáto kralíske pe Izrailjo: “Phučpe adadyvés, so phenéla Raj Devél?” I kedyja ke pe králi Izrailjoskiro prorokén, pašýl štaršelá manušén, i phendiá lénge: “Ci te džav mánge maribnása pe Ramófo Galaadostyr, ci te obrikirav pes?” Jone phendlé: “Džá, Raj Devél otdéla les dre vastá kralískire.” I phendiá Iosafáto: “Ci isyn adáj iščo (inké) proróko, sob (kaj) aménge te vyphučaspe léstyr?” I phendiá králi Izrailjoskiro Iosafatoske: “Isyn jekh manúš, o Mihiejo, čhavó Jemvlajoskiro [Imlaho-ju.o.], pirdál konéste saštý te phučas Rástyr-Devléstyr, ne me na kamám les, pal-dová so jov angilphenela (proročynela) nalačhipen, a jekh fuipén!” I phendiá Iosafáto: “Na rákir, králjo, adiáke!” Tén'ci králi Izrailjoskiro khardiá ke pe jekhe jevnuhos (kon sys dynári dro kher), i phendiá: “Džá sygedýr pal Mihiejoste, kon isyn čhavó Jemflajoske!” O králi Izrailjoskiro, i Iosafáto, králi Judejákiro, sys bešté kažno pe péskiro trono, i sys uridé dre kralitka ídi (rizy) pe baró otkerdo štéto pašýl pórta te zadžas dre Samárija, i saré proróki angilphenenas angíl lénde. I kerdiá péske o Sedekíia, Xienaanaskiro čhavó, sastruné šyngá (rógi), i phendiá: “Lénca vypihinesa (vyšpulesa) Sirijanen (Aramieicen) paka tu xasiakiresa len.” I saré proróki angilphenenas dová-pac', rakirí: “Džá pe Ramófo, so isyn pe Galaádo, tu pirizorjakiresa, o Raj Devél otdéla les dre vast kralískiro.” O bičhadó manúš, savó gijá te kharel Mihiejos, rakiréla léske: “Akaná proróki so ke jekh angilphenenas lačhipén kralíske; mek i te javél tyró lav dasavo, syr kažno (sváko) lav léndyr, angilphen i tu vari-savó lačhipén.” I phendiá Mihiéjo: “Te javél džidó pe viéki Raj Devél! Me phenáva dová, so phenéla mánge Raj Devél.” Tén'ci javdiá jov ke králi. O králi phendiá léske: “Mihiéie! Ci te džav aménge maribnása pe Ramófo Galaadostyr, ci nad?” I phendiá Mihiéie léske: “Džá, tu pirizorjakiresa, Raj Devél otdéla les dre vast tyró.” I phendiá léske králi: “Kicý móly me te zasovlahav tut, sob (kaj) tu te na rakirés ničý mánge apríč čačipnastyr dro lav Ráskire-Devléskiro.” I phendiá Mihiéjo: “Me dykhciem saré Izrail'tianén, savé sys rosčhurdyne, syr bakré, savénde na sys čhupnaris. I phendiá Raj Devél: “Lénde nane barydyrés, mek jone te džán péske ramanjosa (mirósa) kažno (sváko) dro péskiro kher.’” I phendiá Ahávo, králi Izrailjoskiro, Iosafatoske: “Ci na phendjom me túke, so jov na angilphenela pal mánde lačhipén, a jekh fuipén?” I phendiá Mihiéjo: “Pal-dová šun lav Rástyr-Devléstyr: me dykhcjom Ras-Devlés, Savó sys beštó pal Léskiro trono, i saré jangoly i dúhi bolybnáskire syr xaladypen sys terdé pašýl Léste, pir čačí i pir zérvo (liévo) vast Léstyr. I phendiá Raj Devél: “Kon te urakirel Ahavos, sob (kaj) jov te džal i te perél pe Ramófo Galaadoskiro?” I jekh rakirdiá adiáke, javír rakirdiá javirčanes. I jekh dúho (fáno) gijá angíl, terdijá angíl muj Ráskiro-Devléskiro i phendiá: “Me urakirava les.” I phendiá léske Raj Devél: “Sósa?” Jov otphendiá: “Me vydžava i jačavape xohané duhósa pe uštá saré prorokénde.” O Raj Devél phendiá: “Tu urakiresa les i lésa upralypén pe davá; džá i ker adiáke.” I, ake, akaná Raj Devél čhudiá xohanó dúho (fáno) pe uštá saré daléstyr prorokénde, ne Raj Devél vyphendia bari bibáht pal túte.” I tén'či podgíia Sedekíia, Xienaanaskiro čhavó, i pekadiá Mihiejos dre čam (ščoka), phení: “Kaj, syr davá akaná otgijá mándyr Dúho (Fáno) Rástyr-Devléstyr, sob (kaj) te rakirél tútyr?” I phendiá Mihiejo: “Čačes, tu javésa te dykhés dre davá dyvés, kiéli tu javésa te prastas jekhe štubatyr dre javír, sob (kaj) te ĥaradjos.” I phendiá Ahávo, králi Izrailjoskiro: “Len Mihiejos i lydžán les ke Amáno ke barydyró pe fóro, i ke Ioáso, ke čhavó kralískiro. I phenén, “Adiáke rakiréla králi: ‘Čhuvén dalé manušés dre bešyben i čaliakiren les skempes i paniakiren skempes, paka me risjováva ramanjosa (mirósa).’ I phendiá Mihiejo: “Kóli tu risjosa dro ramánjo, to davá na Raj Devél rakirdiá dre mánde.” I iščo (inké) phendiá jov: “Šunén man, saré manušále!” I gijá králi Izrailjoskiro Ahávo i králi Judejákiro Iosafáto ke Ramófo pe Galaádo. I phendiá králi Izrailjoskiro Iosafatoske: “Me piriurjavape, sob (kaj) te na ĥaljon man, a tu uri péskire kralitka ídi (rizy).” O králi Sirijákiro priphendiá phurydyrenge pe maribnýtka vurdená, savé sys léste trijánda duj, phendiá: “Na marénpe ni tyknesa, ni baresa, a jekhe kralísa Izrailjoskiresa.” E phurydyrá pe maribnýtka vurdená, syr dykhné Iosafatos, podumindle: “Čačó, davá isyn králi Izrailjoskiro” i jone risiné pe léste, sob (kaj) te marénpe lésa. I dyjá gódla Iosafáto. Phurydyrá pe maribnýtka vurdená, dykhí, so davá nane králi Izrailjoskiro, risiné léstyr. I sys adiáke, so jekh manúš ottyrdyja péskiro lúko bi mysliakiro, i jov došadia kralís Izrailjoskires, popyi maškír šovy dre kol'čuga. I phendiá králi péskire furmanoske: “Risjov pale i vylydža man maribnastyr, pal-dová so man dukhade (ranindle).” Ne maribén jaciá zoraledýr dro dová dyvés, i o králi sys terdó dre péskiro maribnýtko vurdén proti Sirija, i myjá bel'velié, i rat fransostyr (ranatyr) thadelas dro maribnýtko vurdén. I syr kham džálas telé, to gódla progijá pir saró xaladybén: “Kažno džá dre péskiro fóro, kažno pe péskiri phuv.” Adiáke myjá králi i les jandlé dre Samárija, i garadé kralís dre Samárija. I vymorde maribnýtko vurdén dre venderi (prudo), i džukela čarde rat léskiro i biladžakuné džuvliá obmorenas vurdén pir lav Ráskiro-Devléskiro, savó Jov vyphendia. Javír réndy Ahavoskire, saró, so jov kerdiá, i kher slonytkone kokalostyr, savó jov čhudiá i saré fórja, so jov čhudiá, isyn začhindlé dre beršýtka arhívy pal kral'jénde Izrailjostyr. I garadé Ahavos péskire dadénca i jaciá te kralinél Ohozija, čhavó léskiro, pe štéto léskiro. O Iosafáto, čhavó Asakiro jaciá te kralinél pe Judéia, kiéli sys štárto berš Ahavoskire kralipnaske, syr jov jaciá králi pe Izrailjo. Iosafatoske sys trijánda pandž berš, syr jov jaciá te kralinél, i jov kralindia biš te pandž berš dro Jerusalimo. Léskire-dákiro lav sys Azuva, čhaj Salailoske. Jov kerdiá saró, syr léskiro dad Asá, jov na risjolas dalé droméstyr, keri so sys lačhó angíl jakhá Ráskire-Devléskire. Jekh so vučipená na sys otparude, manušá iščo (inké) janénas svénta dyibená i xačkirenas dróga smóly pe vučipená. Iosafáto kerdiá dorakiribén Ahavosa, kralísa pe Izrailjo, Javír réndy Iosafatoskire, i léskire slavutna keribena i, syr jov mardiápe, isyn začhindlé dre beršýtka arhívy pal kral'jénde Judejátyr. I odolé sodomitka (bludniki), kon jaciápe džidó dre dyvesá Asaskire, savó sys dad léske, jov tradyjá javrí themestyr. Dre Idumeja (Edómo) na sys králi; ne sys kralískiro čačé-vastytko (namiestniko). Iosafáto kerdiá pármy (korabli) pir mórjo (derjavá), sob (kaj) te plyvinen (te den plima) dro Ofiro pal suvnakái. Ten'cji phendiá Ohozija, čhavó Ahavoskiro Iosafatoske “Mek miré dynárja te džán tyré dynar'jénca pe pármy.” Ne Iosafáto na kamdiá. I čhudé Iosafatos syr jov myjá, léskire dadénca dro fóro Davidóskiro, péskire-dadéskiro. I jaciá te kralinél Iorámo, léskiro čhavó, pe štéto léskiro. Ohozija, čhavó Ahavoskiro jaciá te kralinél pe Izrailjo dre Samárija, syr sys dešueftato berš Iosafatoske, kralíske pe Judéia, syr jov jaciá te kralinél, i kralindia jov pe Izrailjo duj berš. I kerdiá jov nalačhés angíl jakhá Ráskire-Devléskire, i kerdiá saró, syr léskiro dad i syr léskiri daj, i psirdiá Jerovoamoskire dromésa, kon sys čhavó Navatoske, savó zalydžijá Izrailjo dro grého. Jov dynarindiá Vaaloske, i jov délas patýv léske, i xoliakirdia Ras-Devlés, Devlés Izrailjoskires dalésa-pac', so kerdiá dad léskiro. I otgijá Moávo Izrailjostyr paló meribén Ahavoskiro. Ohozija pyjá pirdál riešotka péskire štubatyr, so dre Samárija, i zanasvalyja. I bičhadiá manušén i phendiá lénge: “Džán, phučén Viejel'zievulostyr, Akaronóskire devlytkimatyr: Ci vysastjovava me dalé dukhatyr?” Tedy Ráskire-Devléskiro Jangólo phendiá Ilijaske Fiesvitianinoske: “Uštý, džá gil (muial) manušénge, savén bičhadiá Samarijakiro králi i phen lénge: ‘Naúšto nane Devlés dro Izrailjo, so tumé džána te phučén Viejel'zievulostyr, Akaronoskire devlytkimatyr?’ Pal davá adiáke rakiréla Raj Devél: ‘Čhuibnastyr, pe savó tu pasijan, na zdžasa látyr, ne tu merésa.’” I gijá Ilíia. I risiné ke Ohozija manušá, savén jov bičhadiá. I jov phendiá lénge: “So da tumé risiné?” I phendlé léske: “Gil (pe strieč) aménge vygijá manúš i phendiá aménge: ‘Džán, risjon ke králi, savó bičhadiá tumen, i phenén léske: adiáke rakiréla Raj Devél: “Naúšto nane Devlés dro Izrailjo, so tu bičhavesa te phučes Viejel'zievulostyr, Akaronóskire devlytkimatyr? Paldavá čhuibnastyr, pe saví tu pasijan, tu na zdžasa léstyr, ne merésa.’” I phendiá jov lénge: “Syr vydykhela odová manúš, savó vygijá gil tuménge i rakirdiá tuménge dalé lavá?” Jone phendlé léske: “Manúš odová sys saró dre balá i cypitkone simirisa sys podphandlo pir péskire trušula. I phendiá jov: “Davá isyn Ilíia Fiesvitianino.” I bičhadiá ke jov pandždešytkones léskire pandždešytkonesa. I jov zagijá ke jov, kiéli Ilíia sys beštó pe bergákiro vučipén, i phendiá léske: “Manúš Devléskiro! Králi rakiréla: ‘Džá telé.’” I otphendiá Ilíia, i phendiá pandždešytkoneske: “Kóli me som manúš Devléskiro, tedy mek te zdžal jag bolybnástyr i shačkiréla tut i tyré pandždešá manušén.” I zgija jag bolybnástyr, i shačkirdiá les i léskire pandždešen manušén. I bičhadiá ke jov králi javirés pandždešytkones péskire pandždeše manušénca. I jov jaciá te rakirél léske: “Manúš Devléskiro! Adiáke phendiá králi: ‘Džá sygnydyr.’ I otphendiá Ilíia, i phendiá léske: “Kóli me som manúš Devléskiro, tedy mek te zdžal jag bolybnástyr i shačkiréla tut i tyré pandždešá manušén.” I zgija jag Devléskiri bolybnástyr, i shačkirdiá les i pandždešá léskire manušén. I nevéstyr bičhadiá pe tríto mólo pandždešytkones léskire pandždeše manušénca. I ĥazdyjápe, i javdiá tríto pandždešytko, i pyjá pe péskire čangá angíl Ilijaste, i mangdiá les, i rakirdiá léske: “O Manúš Devléskiro! Mek te na javél di miro i di tyré-pishar'jéngiro – dalé pandždešá manušéngiri – angíl jakhá tyré. Ĥáda, zgija jag bolybnástyr i shačkirdiá dujén pandždešytkonen khetané léskire pandždeše manušénca: ne akaná mek te na javél di miro angíl tyré jakhá!” I phendiá Ráskire-Devléskiro Jangólo Ilijaske: “Džá lésa, na dar léstyr.” I jov uštyjá, i gijá lésa ke králi. I phendiá Ilíia léske: “Adiáke rakiréla Raj Devél: ‘Paldová, so tu bičhadian manušén te phučespe Viejel'zievulostyr, Akaronóskire devlytkimatyr, sýrby dro Izrailjo nane Devlés, sob (kaj) te phučespe pal lav Léskiro, – čhuibnastyr, pe savó tu pasijan, na zdžasa léstyr, a merésa.’” I myjá jov pir Ráskire-Devléskiro lav, savó phendiá Ilíia. I jaciá kralísa Iorámo pe štéto léskiro, pe javír berš Ioramóskiro, Iosafatoskire-čhavéskiro, Judejákire kralískiro, adiáke syr čhavés doleste na sys. Javír pal Ohozijaste, so jov kerdiá, sys začhindló dre beršýtka arhívy Izrailjoskire kral'jéngire. I sys adiáke: kiéli Raj Devél skedelaspe te ĥazdel Ilijas pe bolybén riskiribnáskire balvaliasa, to jov dro dová momiénto džálas Jelisiejosa Galgalostyr. I phendiá Ilíia Jelisiejoske: “Jačpe adáj pal-dová so Raj Devél bičhavéla man dre Viefil'.” Ne Jelisiéjo phendiá: “Te javél džidó Raj Devél pe viéki, i te javél džidó tyró di, so me na mekava tut!” I giné jone dro Viefil'. I vyginé ke Jelisiéjo čhavé prorokéngire, i phendlé léske: “Tu džinésa, so adadyvés Raj Devél ĥazdéla tyré ras upré tyré šerestyr?” Jov otphendiá: “Me adiáke-pac' džinóm (džináv), javén štyl (molčynen!)” Tén'ci Ilíia phendiá léske: “Jelisiejo, jačpe adái, pal-dová so Raj Devél bičhavéla man dro Jerihóno.” I otphendiá Jelisiéjo: “Te javél džidó Raj Devél pe viéki, i te javél džidó tyró di: Me na mekava tut.” I javné jone dro Jerihóno. I čhavé prorokéngire, savé sys dre Jerihóno, podginé ke Jelisiéjo, i phendlé léske: “Ci džinésa tu, so Raj Devél adadyvés ĥazdéla tyré ras upré tyré šerestyr?” I jov otphendiá: “Me adiáke-pac' džinóm, javén štyl (molčynen):” I phendiá léske Ilíia: “Jačpe adái, pal-dová so Raj Devél bičhavéla man ke Iordáno.” I phendiá jov: “Te javél džidó Raj Devél pe viéki, i te javél džidó tyró di: me na mekava tut.” I giné dujdžiné. I pandždešá manušá prorokéngire čhavéndyr, giné i terdiné proti lénde, ne jone sys terdé dujdžiné dro Iordáno. I lyjá Ilíia plaščo péskiro, i skrencyndia, i pekadiá lésa pir paní, i rozgijápe jov odorík i adarík, i piriginé jone dujdžiné pir šukí phuv. Kiéli jone piriginé, Ilíia phendiá Jelisiejoske: “Mang, so te keráv túke, angledýr, syr me javáva lynó tútyr.” I phendiá Jelisiéjo: “Dúho (Fáno), savó isyn dre túte, mek te javél pe mánde dre duj móly.” I phendiá jov: “Pharipén tu mangesa. Kóli dykhésa, syr me javáva lynó tútyr, tedy javéla túke adiáke; a kóli na dykhésa, to na javéla.” Kiéli jone giné i dromésa rakirdé, vari-katýr lyjape maribnýtko vurdén, savó xačolas jagása i graja, savé xačonas jagása, i razlučyndle len dujén, i ĥazdyjápe Ilíia dre vihro (riskiribnaskiri balvál) pe bolybén. Jelisiéjo dykhciá i dyjá gódla: “Dádo miro, dádo miro, vurdén Izrailjoskiro i graja léskire!” I na dykhciá les butýr. I uhtyldia jov ídi péskire, i roskustia len pe duj pašá. I ĥazdyjá plaščo Ilijaskiro, savó pyjá telé léstyr, i gijá pale, i terdijá pe Iordanoskiro brégo. I lyjá plaščo Ilijaskiro, savó pyjá telé léstyr, i pekadiá lésa pir paní, i phendiá: “Kaj isyn Raj, Devél Ilijaskiro, – Jov Kokoró?” I pekadiá pir paní, i jov rozgijápe odorík i adarík, i pirigija Jelisiéjo. I dykhné les prorokéngire čhavé, savé sys dro Jerihóno, durál, i phendlé: “Pasijá dúho (fáno) Ilijaskiro pe Jelisiejoste.” I giné gil léske, i poklonindlepe léske ke phuv. I phendlé léske: “Ĥáda, isyn aménde, pishar'jénde tyrende, manušén pandždešá, manušá zoralé: mek by jone giné i porodyne tyré xulás; moginéla (mo) te javél, so lydžijá les Dúho (Fáno) Ráskire-Devléskiro i jačkirdiá les pe jekh bergendyr, ci pe jekh dólo.” Jov phendiá: “Na bičhaven.” Ne jone prijačenas ke jov ĥará (dlúges) adiáke, so dohane léske, i jov phendiá: “Bičhaven.” I bičhadé pandždešá manušén, i rodyne trin dyvesá, i na lathné les. I risiné ke jov, maškír davá, syr jov jaciápe dro Jerihóno, i jov phendiá léske: “Ci na rakirdjom me tuménge: ‘Na psirén?’” I phendlé manušá, savé dživdé ke fóro Jelisiejoske: “Ĥáda, davá fóro kerdó šukár, syr dykhéla xuláj miro; ne paní isyn nálačho i phuv na bijanéla.” I phendiá jov: “Den mánge nevó tahtáj (čaša) i čhuvén lond odorík.” I dyné léske. I vygijá jov ke paniéskiri ĥanyngori, i čhurdyjá odorík lond, i phendiá: “Adiáke rakiréla Raj Devél: ‘Me kerdjom davá paní zoralesa, na javéla léstyr butýr ni meribén, ni nabijanypen.’” I paní jaciá zoralo ke davá dyvés, pir lav Jelisiejoskiro, savó jov phendiá. I gijá jov odothýr dre Viefil'. Kiéli jov gijá dromésa, tykné bijaty vyginé foróstyr, i sandlepe léstyr, i rakirdé léske: “Džá, pliešytko, džá, pliešytko!” Jov obrisija i dykhciá len, i prokostia len lavésa Ráskire-Devleskiresa. I vyginé duj ričycy vešéstyr, i roskušne léndyr štardešá duje bijatén. Adathýr gijá jov pe bérga Karmilo, a odothýr risijá dre Samárija. Iorámo, Ahavoskiro čhavó, jaciá kralísa pe Izrailjo dre Samárija pe dešuohtoto berš Iosafatóskiro, jov jaciá kralísa Judejakiresa, i sys jov králi dešudúj berš. I kerdiá jov nalačhés dre jakhá Ráskire-Devléskire, mek na adiáke, syr léskiro dad i léskiri daj: jov zlyjá statula Vaaloskiri, saví kerdiá léskiro dad; Usajékh ke gréhi Jerovoamoskire, čhavéskire Navatoskire, savó zalydžijá dre grého Izrailjo, jov rikirdiape, na otgijá léndyr. O Miesa, Moavitoskiro králi, sys barvaló skotosa i bičhavelas Izrailjoskire kralíske pir šel tysjoncy bakrén i pir šel tysjoncy bakrén naobčhindlen. Ne kiéli myjá Ahávo, to Moavitoskiro králi otgijá Izrailjoskire kralístyr. I vygijá králi Iorámo dre dolé dyvesá Samarijatyr, i kerdiá obdykhiben saré Izrail'tianenge; I gijá, i bičhadiá ke Iosafáto, Judejákiro králi, te phenén: “Králi Moavitoskiro otgijá mándyr, ci džása tu mánca pe maribén proti Moávo?” Jov phendiá: “Džáva; syr tu, adiáke i me, syr tyré manušá, adiáke i miré manušá, syr tyré grajo, adiáke i miré graja.” I phendiá: “Save dromésa te džas aménge?” Jov phendiá: “Čhučé phuvjákire, Edomoskire dromésa.” I gijá Izrailjoskiro králi, i Judejákiro králi, i Edomoskiro králi, i giné jone trusciál eftá dyvesá, i na sys paní vaš xaladenge i vaš kheritkone murdalénde (skoto), savó gijá pal lénde. I phendiá Izrailjoskiro králi: “Ah! Khardiá khetané Raj Devél trinen adalen kral'jén, sob (kaj) te otdél len dre Moavoskire vastá.” I phendiá Iosafáto: “Ci nane adáj Ráskire-Devléskire prorokós, sob (kaj) aménge te phučaspe Rástyr-Devléstyr pirdál léste?” I otphendiá jekh dynar'jéndyr (slugéndyr) Izrailjoskire kraliskirendyr, i phendiá: “Adáj isyn Jelisiéjo, čhavó Safatoskiro, savó podelas paní pe vastá Ilijaske.” I phendiá Iosafáto: “Isyn léste lav Ráskire-Devléskiro.” I giné ke jov králi Izrailjoskiro, i Iosafáto, i králi Jedomoskiro. I phendiá Jelisiéjo Izrailjoskire kralíske: “So mánge i túke? Džá ke tyré-dadéskire proróki i ke tyré dákire proróki.” I phendiá léske králi Izrailjoskiro: “Nad, pal-dová so Raj Devél khardiá khetané adarík triné adalen kral'jén, sob (kaj) te otdél len dre Moavoskiro vast.” I phendiá Jelisiéjo: “Te javél džidó pe viéki Raj Devél, Devél bolybnáskire-jangoléngire, angíl Savéste me som terdó! Kóli by me te na kutiakirav Iosafatos, kralís Judejakires, tedy me na podykhava by pe túte i te na dykháv by tut. Akaná kharén mánge manušés, savó bašavela pe gusli.” I kiéli manúš bašadia pe gusli, tedy vast Ráskire-Devléskiro čiladiá Jelisiejos. I jov phendiá: “Adiáke rakiréla Raj Devél: ‘Kerén pe davá dólo (xohoi) rovy (xohoiá) pale’; pal-dová so adiáke rakiréla Raj Devél: “Tumé na dykhéna balvál, i tumé na dykhéna bryšýnd, a davá dólo te pherdjol paniésa, savó javéla te p'jel tumé i tyknó i baró tumaró skoto. Ne davá nábut (kutý) angíl Ráskire-Devléskire jakhá; Jov i Moavos otdéla dre tumaré vastá. I tumé domarena saré fórja zoralé tynénca, i saré, šeritka fórja i saré fedyrša vešá sčingirena, i saré panieskire ĥanyngorja zaprudinena, i saré fedyrša feldýtka štéty začhurdena barénca. Ne zlokosa (rankosa), kiéli ĥazdéna mareskiro janybén, jekhátyr (srázu) lyjá te čhuvél paní pir drom Edomostyr, i perdija phuv paniésa. Kiéli Moavitiani šundlé, so džána králja te marénpe lénca, tedy skedyné sys saré, lyi manušéstyr, savó nosindia simiri i phuredýr, i terdiné pe kustýk (granica). Pe zlóko (ránko) uštyné jone tasiárles (ránes); i, kiéli kham zaziaindia pe paní, Moavitianenge durál sykadyjá davá paní lolesa, syr rat. I phendlé jone: “Davá isyn rat: mardépe králja maškír péste i domardé jekh jekhés; akaná pe doresybén, Moávo!” I javné jone ke Izrailjoskiro stáno. I uštyné Izrail'tiáni, i lyné te marén Moavitianen, i odolé prastándyne léndyr, a jone usajékh na pirijačne te džán pe lénde i te marén Moavitianen. I fórja rosphagirdé, i pe kažno fedyršo pe félda kotér (kusko) čhurdyné kažno pir bar i začhurdyne les; i saré panieskire thadyipena zaprudindle, i saré fedýr vešá čingirde telé, adiáke so jačnépe jekh bará dre Kir-Xariešeto. I obgine léskire xaladé praščasa, i rosphagirdé les. I dykhciá Moavitoskiro králi, so maribén pirizorjakirela (piridolinela) les, i lyjá pésa eftašelá manušén, savé marenaspe kurtalása, sob (kaj) te prodžal ke Jedomoskiro králi; ne na mogindlé. I lyjá jov anglatunes-péskire čhavés, savéske treindiá te javél kralísa pe štéto léskiro, i ĥazdyjá jov les vaš célo shačkiribén pe vánta. Davá kerdiá bari xolý dre Izrail'tianende, i jone otginé léstyr, i risiné pe péskiri phuv. Jekh prorokéngire-čhavengiri džuvlý roibnasa rakirdiá Jelisiejoske: “Pishári tyró, miro rom, myjá. A tu džinésa, so pishári tyró darandyja Rástyr-Devléstyr. Kakaná javdiá lovitko kofari te lel dujén miren čhavén dre pishar'jénde péske.” I phendiá láke Jelisejo: “So mánge te keráv túke? Phen mánge, so isyn túte dro kher?” Joj phendiá: “Nane pisharicate ničý dro kher, apríč khoró (sasudo) jeliejosa.” I phendiá jov: “Džá, pomang péske khoré pe rig, saré tyré susiedendyr (kotar'jendyr), khoré (sasúdy) čhučé; skéde but.” I džá, začhakir vudár pal péste i pal tyré čhavénde, i čhuv dre saré dalé khoré; otčhuv pherdé.” I gijá léstyr, i začhakirdia vudár pal péste i pal péskire čhavénde. Jone podenas láke, a joj čhuvelas. Kiéli pherdiakirde sys khoré, joj phendiá péskire čhavéske: “Pode mánge iščo (inké) khoró.” Jov phendiá láke: “Nane butýr khoré.” I pirijaciá ksil. I javdiá joi, i rosphendiá Devléskire manušéske. Jov phendiá: “Džá, bikin ksil i zapleskir tyré dlugi; so jačélape, dolesa javésa te dživés tyré čhavénca.” Dro jekh dyvés javdiá Jelisiéjo dro Sonamo. Odój jekh barvaly džuvlý mangdiá les ke pe te xal maró; i kiéli jov javélas, usady (sak) zadžalas odorík te xal maró. I phendiá joj péskire romeske: “Ĥáda, me džinóm, so Devléskiro manúš, savó prodžála kažno mólo mamúj aménde, isyn svénto. Kerása nabari štúba uprál pe vánta i čhuvasa léske odój čhuibén (pasindly), i skamínd, i banko (skamus), i momolýtko (svietíl'niko); i kiéli jov javéla te javél ke ame, mek te zadžál odorík.” Dro jekh dyvés jov javdiá odorík, i zagijá dre nabari štúba, i pasijá odój. I phendiá jov Gijezijoske, péskire dynaríske: “Khar adalja Sonamitianka.” I khardiá la, i joj terdijá angíl léste. I phendiá léske: “Phen láke: ‘Ĥáda, tu adiáke duminesa ilytkes pal aménde; so te kerás by túke? Ci na trej te porakiras nábut pal túte kralísa, ci xaladéngire barydyrésa?” Joj phendiá: “Nad, maškír péskire manušénde me dživáva.” I phendiá jov: “So te kerés láke?” I phendiá Gijeziéjo: “Ĥáda, čhavés nane láte, a rom lákiro isyn phuró.” I phendiá jov: “Khar la.” Jov khardiá la, i terdijá joj dre vudará. I phendiá jov: “Pirdál berš, dro davá-pac' časo, tu javésa te rikires pe vastá čhavés.” I phendiá joi: “Nad, xulájo miro, Devléskiro manúš, na xohav tyrja dynarka. I džuvlý jaciá pharí, i bijandiá čhavés pe javír berš, dre dová-pac' časo, syr phendiá láke Jelisiéjo. I podbarija čhavoró, i dro jekh dyvés gijá ke péskiro dad, ke žniécy. I phendiá péskire dadéske: “Šeró miro! Šeró miro dukhala!” I phendiá odová péskire dynaríske: “Lýdža les ke léskiri daj.” I lydžijá les, i jandiá les ke daj léskiri. I jov sys beštó pe čangá láte ke pašdyves, i myjá. I gijá joi, i čhudiá les pe čhuibén Devléskire manušéskiro, i začhakirdia les, i vygijá. I khardiá péskire romes, i phendiá: “Bičháv mánge jekhés dynar'jéndyr (slugéndyr) i jekha oslica; me tradava ke Devléskiro manúš i risjováva.” Jov phendiá: “Palsó túke te trades ke jov? Adadyvés isyn na nevočhon i na sávato.” Ne joj phendiá: “Mištó.” I dyjá joj andré oslica, i phendiá péskire dynaríske: “Lýdža i džá; na terdjov, paka me phenáva túke.” I gijá, i javdiá ke Devléskiro manúš, ke bérga Karmilo. I kiéli dykhciá Devléskiro manúš la durál, to tedy phendiá péskire dynaríske Gijezijoske: “Davá isyn odoia Sonamitianka. Prasta gil láke i phen láke: ‘Ci sasty tu san? Ci sastó tyró rom isyn? Ci sastó čhavoró isyn?’” – Joj phendiá: “Saste.” Kiéli joj iavdiá ke Devléskiro manúš pe bérga, to uhtyldia les pal ĥerá. I podgíia Gijeziejo, sob (kaj) te otlydžal la; ne Devléskiro manúš phendiá: “Jačkir la; di láte dukhala, a Devél garadia davá mándyr i na dyjá zan (zvies') mánge.” I phendiá joi: “Ci mangdjom me čhavés miré xulastyr? Ci na rakirdjom me: ‘Na xohav man?’” I phendiá jov Gijeziejoske: “Obphande tyré trušula, i le destó miro dre tyró vast, i džá. Kóli streninesa vari-konés-to, na de “dobridim” léske, i kóli kon javéla te del “dobridim” túke, na otphen léske. I čhuv mirí khija pe muj čhavoreske.” I phendiá čhavoreskiri daj: “Te javél pe viéki džidó Raj Devél i džidó di tyró! Na otiačava tútyr.” I jov uštyjá, i gijá pal láte. Gijeziéjo gijá angíl lénde i čhudiá destó pe čhavoreskiro muj. Ne na sys ni zan, ni otphenybén. I vygijá pe strieč léske, i rosphendiá léske, i phendiá: “Na prosovelape čhavoró.” I zagijá Jelisiéjo dro kher, i ĥáda, muló čhavoró isyn paštó pe léskiro čhuibén. I zagijá, i začhakirdia vudár pal péste, i mangdiápe Ráske-Devléske. I ĥazdyjápe i pasijá pe čhavoreste i čhudiá péskire uštá ke léskire uštá, i péskire jakhá ke léskire jakhá, i péskire vastá ke léskire vastá, i vydind'kirdia masá péskire pe léste, i statija čhavoreskiro trúpo. I uštyjá, i progijá pir štúba pale i angle; tén'či (potom) nevéstyr ĥazdyjápe i vydind'kirdia masá péskire pe léste. I čihnindia čhavoró eftá móly, i otčhakirdiá čhavoró péskire jakhá. I khardiá jov Gijezijos, i phendiá: “Khar adalja Sonamitianka.” I odová khardiá la. Joj iavdiá ke jov, i jov phendiá: “Le tyré čhavés.” I podgíia, i pyjá léske dre ĥerá, i poklonindiape ke phuv. I lyjá péskire čhavés, i gijá. Jelisiéjo risijá dro Galgálo. I sys bokh pe doiá phuv; i prorokéngire čhavé sys bešté angíl léste. I phendiá jov péskire dynaríske: “Čhuv baró kotlo (kakávi) i keráv pahljobka vaš prorokéngire čhavénge.” I vygijá jekh léndyr pe félda te skedel šaha, i lathiá buso (diko) xrústo, savó krencynelape, i skedyjá léstyr busa bobirki (ĥurki) pherdý péskiri ídia. I javdiá i čhindiá len pe koterá dre kakávi (kotlo), adiáke, syr jone na džindlé len. I čhudé lénge te xan. Ne syr syg jone lyné te xan ĥensto zumi, tedy ĥazdyné gódla i rakirdé: “Meribén dre kakávi, Devléskiro manúš!” I na mogindlé te xan. I phendiá jov: “Den jaržó.” I čhudiá les dre kakávi, i phendiá Gijezijoske: “Čhuv manušénge, mek te xan.” I na jaciá ničý fuipén dre kakávi. Javdiá vari-kon Vaalšališatyr i jandiá Ráskire-Devléskire manušéske pérvo marunó barjakirdó (plódo): biš ĥerstytka (jačmienytka) laby maró i syrova ziarny dre šyluha (lupiny). I phendiá Jelisiéjo: “Otdé manušénge, mek te xan.” I phendiá léskiro dynári: “So date me te dav šele manušénge?” I phendiá jov: “Otdé manušénge, mek te xan; pal-dová so adiáke rakiréla Raj Devél: “Čaljona i jačélape.’” Jov podyja lénge, i jone čalyne, i iščo (inké) jaciápe, pir Ráskiro-Devléskiro lav. Niejemano, xaladéngiro barydyró ke Sirijákiro králi, sys slavútno manúš péskire xulaste i dre patýv, pal-dová so pirdál léste dyjá Raj Devél Sirijanenge te pirizorjakiren. I adavá manúš sys lačhó xalado, ne sys prokazytko. Sirijani jekh mólo giné otriadenca i lyné dre pliéno Izrailjoskire phuvjátyr tyknin'kona raklorja, i joj dynarindiá Niejemanoskire romniake. I phendiá joj péskire xulaniake: “Kóli by miro xuláj te javél ke proróko, savó isyn dre Samárija, tedy jov lela by krig léstyr léskiri prokáza!” I gijá Niejemano, i rosphendiá davá péskire xuláske, rakirí: “Adiáke i adiáke rakiréla raklori, saví isyn Izrailjoskire phuvjátyr. I phendiá Sirijákiro králi Niejemanoske: “Džá, spsir, a me bičhaváva lyl Izrailjoskire kralíske.” Jov gijá i lyjá pésa deš talany rup, i šov tysjoncy šekeli suvnakái, i deš zmieny ídi. I jandiá Izrailjoskire kralíske lyl, dre savó sys phendló: “Khetané dalé lylesa, ĥáda, me bičhaváva ke tu Niejemanos, miré dynarís, sob (kaj) jov te lel krig léstyr léskiri prokáza. Izrailjoskiro králi, progindia lyl, roskustia péskire ídi: “So me Devél som, sob (kaj) te muliakirav i te otdžidiakirav, so jov bičhavéla ke me, sob (kaj) me te lav krig manušéstyr léskiri prokáza. Ĥáda, kakaná džinén i dykhén, so jov rodéla pričyna te džal maribnása proti mánde.” Kiéli šundiá o Jelisiéjo, Devléskiro manúš, so Izrailjoskiro králi roskustia péskire ídi, to bičhadiá manušés te phenél kralíske: “Vaš so tu roskustian péskire ídi? Mek jov te javél ke me, i jov udžinela, so isyn proróko dro Izrailjo.” I javdiá Niejemano pe péskire grénde i pe péskiro maribnýtko vurdén, i terdijá pašýl zagiibén dro Jelisiejoskiro kher. I bičhadiá ke jov Jelisiéjo dynarís te phenél: “Džá, obmorpe eftá móly dro Iordáno, i javéna neve masá túte, i tu javésa žužó.” I rosholiasyja Niejemano, i gijá, i phendiá: “Ĥáda, me dumindjom, so jov vydžála, terdjola, i kharéla Ráskire-Devléskiro, péskire Devléskiro lav, i čhuvéla péskiro vast pe dová štéto, i lela krig prokáza. Naúšto Avana i Farfaro, réki (leniá) Damaskoskire, nane fedýr saré Izrailjoskire paniéstyr? Naúšto me na mogindjom te obmoravpe dre lénde i te vyžužakiravpe?” I risijá, i gijá péske xoliása. I podginé léskire pishárja, i rakirdé léske, i phendlé: “Miro dádo, kóli by vari-so glavno phendiá túke proróko, tedy, ci na kerésa by tu? A iščo (inké) butýr, kiéli jov phendiá túke jekh: “Obmorpe i javésa žužó”.” I gijá jov, i obmordiape dro Iordáno eftá móly, pir Devléskire-manušéskiro lav, i jačné neve léskire masá, syr masá tykné-čhavoreskire, i vyžužakirdiape. I risijá jov ke Devléskiro manúš – jov i saré léskire manušá, savé sys lésa, i javdiá, i terdijá angíl léste, i phendiá: “Ĥáda, me udžindjom, so pe sarí phuv nane Devlés, syr isyn dre jekh Izrailjo; i adiáke prilé dáro tyré pisharistyr.” I phendiá jov: “Te javél džidó pe viéki Raj Devél, angíl muj Saveskiro me som terdó! Na prilava.” I dová začhuvelas les te lel, ne jov na podyjape (na dyjá lav). I phendiá Niejemano: “Kóli so na adiáke, tedy mek tyré pisharíske te den phuv, ci but zlydžana duj muly; pal-dová so na javéla butýr tyró pishári te janel célo shačkiribén i svénta janybená javire devlorénge, apríč Raste-Devléstyr. Jekh, ĥáda dre so mek te primangel (te prostinel) Raj Devél tyré pisharís; kiéli džála miro xuláj dro kher Rimonoskiro vaš mangipén odój i oblokotinelape pe miro vast, i kloninavape me dre Rimonoskiro kher, to tedy, kiéli me kloninavape dró kher Rimonoskiro, mek te primangel Raj Devél pisharís tyrés dre daja vakancyja (davá slučajo).” I phendiá léske: “Džá Devlésa.” I jov tradyjá krig léstyr pe nobaro drom phuvjákiro. Ne phendiá Gijézijo, Jelisiejoskiro dynári, Devléskire-manušéskiro: “Ĥáda, miro xuláj otphendiape te lel Niejemanoskire vastéstyr, dalé Sirijaninostyr dová, so jov jandiá.” “Te javél džidó pe viéki Raj Devél! Prastava me pal léste; i lavá léstyr vari-so.” I potradyjape Gijézijo pal Niejemanoste. I dykhciá Niejemano manušés, savó prastalas pal léste, i zgija maribnytkoné vurdenestyr pe strieč léske, i phendiá: “Ci ramanjosa (mirósa) tu san?” Jov otphendiá: “Ramanjosa (mirósa); miro xuláj bičhadiá man te phenáv: Ĥáda, akaná javné ke me Jefriemóskire bergátyr duj terné manušá prorokéngire čhavéndyr; de lénge taláno rup i duj zmieny ídi.” I phendiá Niejemano: “Le, me mangáva, duj talany.” I mangdiá les. I zaphandia jov duj talany rup dre duj goné i duj zmieny ídi, i otdyjá dujé péskire dynar'jénge, i lydžiné angíl lénde. Kiéli jov javdiá ke bérgica, to tedy lyjá léngire vasténdyr i garadia kheré. I otmekciá manušén, i jone giné péske. Kiéli jov javdiá i javdiá ke péskiro xulái, to Jelisiéjo phendiá léske: “Katýr san tu, Gijeziéjo?” I phendiá jov: “Nikarik na psirdjom, tyró pishári.” I phendiá jov léske: “Naúšto iló miro na pomogindia túke, kiéli risijá gil túke odová manúš péskire vurdenestyr? Ci časo (pora) te les rup i te les ídi, ci ksilytka vešá i vinagradniki, i tyknó ci baró skoto, ci dynar'jén, ci dynaricen?” Mek Niejemanoskiri prokáza te pirijačel ke tu i ke tyró ródo pe viéko.” I vygijá jov léstyr parnó prokazatyr, syr iv. I phendlé čhavé prorokéngire Jelisiejoske: “Ĥáda, štéto, kaj ame dživasa pašýl túte, tiasno (tango) isyn vaš aménge. Džása ke Iordáno, i lása odothýr kažno (sváko) pir jekh berno, i kerása péske odój štéto vaš džiibén.” Jov phendiá: “Džán.” I phendiá jekh: “Ker lačhipén, džá i tu dynar'jénca tyrenca.” I phendiá jov: “Džáva.” I javdiá lénca, i javné ke Iordáno, i lyné te čingiren veš. I kiéli jekh léndyr radia veš, to léskiro tover pyjá dre paní. I zadyja gódla jov, i phendiá: “Ai, miro xulájo! Tover lynó sys pe podrikiribén!” I phendiá Devléskiro manúš: “Kaj jov pyjá?” Jov sykadiá léske štéto. I otčhingirdia jov kotér (kusko) vešéstyr, i čhurdyjá odorík, i vyplyvindia (dyja plíma upre) tover. I phendiá jov: “Le péske.” Jov protyrdyjá péskiro vast i lyjá les. Králi Sirijákiro gijá maribnása pe Izrail'tianende i radindiape péskire dynar'jénca, rakirí: “Dro dasavó i dro dasavo štéto me terdiakirava péskiro xaladybén.” I bičhadiá Devléskiro manúš ke králi Izrailjoskiro te phenén: “Rakhpe te džas dalé štetosa, pal-dová so odój Sirijani zapasine.” I bičhadiá Izrailjoskiro králi pe dová štéto, pal savó rakirdiá léske Devléskiro manúš i prirakhcia les; i zrakhciá pes odój na jékhvar i na duj móly. I lyjá te pharjol Sirijakire-kralískiro iló pir daja vakancyja (davá slučajo), i khardiá jov peskiren dynar'jén, i phendiá lénge: “Phenén mánge, kon amarendyr isyn paló jekh Izrailjoskire kralísa?” I phendiá jekh léskire dynar'jéndyr (slugéndyr): “Nikón, miro xulájo, králi; a Jelisiéjo proróko, savó isyn ke Izrailjo, jov piriphenela Izrailjoskire kralíske i dolé lavá, savé tu rakirésa dre soibnytko tyrí štúba.” I phendiá jov: “Džán, dodžinenpe, kaj jov isyn; me bičhaváva i lavá les.” I rosphendlé léske, i phendlé: “Ĥáda, jov isyn dre Dofaima.” I bičhadiá odorík gren, i maribnýtka vurdená, i but xaladén. I javné ratý, i oblyne trusciál fóro. Pe zlóko (ránko) Devléskire-manušéskiro butiarno uštyjá i vygijá; i ĥáda, xaladé sys trusciál fóro, i grajo, i maribnýtka vurdyná. I phendiá léske dynári léskiro: “Saró, miro xulájo, so aménge te kerás?” I phendiá jov: “Na dar, pal-dová so odolén, savé isyn aménca, butýr syr odolén, savé isyn lénca.” I mangdiápe Jelisiéjo, i rakirdiá: “Rajo Dévla! Otčhakir léske jakhá, sob (kaj) jov te dykhél.” I otčhakirdiá Raj Devél jakhá dynaríske, i jov dykhciá, i ĥáda, sarí bérga isyn pherdý grenca i maribnytkoné vurdynenca dre jag trusciál Jelisiejoste. Kiéli giné ke jov Sirijani, Jelisiéjo mangdiápe Ráske-Devléske i phendiá: “Korjakir len.” I Jov korjakirdia len, pir Jelisiejoskiro lav. I phendiá lénge Jelisiéjo: “Davá isyn na dová drom i na dová fóro; džán pal mánde, me lydžáva tumen ke odová manúš, savés tumé rodéna.” I jandiá len dre Samárija. Kiéli jone javné dre Samárija, Jelisiéjo phendiá: “Rajo Dévla! Otčhakir jakhá lénge, sob (kaj) jone te dykhén.” I otčhakirdiá Raj Devél jakhá lénge, i dykhné, so jone sys maškirál Samárija. I phendiá Izrailjoskiro králi Jelisiejoske, dykhí len: “Ci te na domares len, miro dádo?” I phendiá jov: “Na domar. Naúšto tyré kurtalása i tyré lukosa tu lyjan len dro pliéno, sob (kaj) te domares len? Sykáv lénge maró i paní; mek jone te xan i te p'jen, i mek jone te džán ke péskiro khieningo.” I kerdiá jov lénge baró xabén, i jone xané i piné. I otmekciá jov len, i giné jone ke péskiro khieningo. I na psirdé butýr dolé baré ke dar xaladybena Sirijakire pe Izrailjoskiri phuv. Paló davá (poslie) skedyjá o Vienadado, Sirijákiro králi, sarén péskire xaladén, i vygijá, i občhudiá trusciál xaladybnasa Samárija. I sys bari bokh dre Samárija, kiéli jone občhude trusciál xaladybnasa la, adiáke, so oslytko šeró bikindiape pir ohtodešá šékieli rup, i štárto paš golumboskire ĥneico – pe pandž šékieli rup. Jekhvar Izrailjoskiro králi gijá pir vánta, i džuvlý godlása rakirdiá léske: “Pomógin, xulájo miro, králi.” I phendiá jov: “Kóli na pomoginela túke Raj Devél, ci pomoginava me túke, ci šurnatyr, ci priesostyr?” I phendiá králi láke: “So túke?” I phendiá joi: “Adaja džuvlý rakirdiá mánge: ‘Otdé péskires čhavés, sob (kaj) te xas les adadyvés, a mires čhavés shasa atasiá.’ I keradiam ame miré čhavés, i xajam les. I me phendjom láke pe javír dyvés: ‘Otdé tyré čhavés, i xasa les.’ Ne joj garadia péskires čhavés.” Králi vyšundia lavá džuvliakire, roskustia péskire ídi: i gijá jov pir vánta, i manušá dykhné, so gonó praskasa (zolasa) sys pe kokoré léskire masá. I phendiá jov: “Mek dová i dová keréla mánge Devél, i iščo (inké) butýr keréla, kóli jačélape šeró Jelisiejoskiro, Safatovoskire-čhavéskiro, pe léste adadyvés.” Jelisiéjo sys beštó dro péskiro kher, i godephuré sys bešté léste. I bičhadiá králi manušés péstyr. Angledýr, syr javdiá manúš, savés bičhadé ke jov, jov phendiá godé phurenge: “Ci dykhéna tumé, so adavá manúš, čhavó umaribnariskiro, bičhadiá te zlen mándyr šeró? Dykhén, kiéli javéla manúš, savés bičhadé, zakeren vudár i pritasaven les vudarenca. A ĥáda, i lopotymo léskire xuláskire ĥerengiro pal léste.” Iščo jov rakirdiá lénca, i ĥáda, manúš, savó sys bičhadó, javdiá ke jov i phendiá: “Ĥáda, savó fuipén Rástyr-Devléstyr, so iščo (inké) mánge angíl te užakirav Rástyr-Devléstyr?” I otphendiá Jelisiéjo: “Šunén Ráskire-Devléskiro lav: “Adiáke rakiréla Raj Devél: atasiá dre davá časo miéra fedyršone jaržeskiri javéla pir šékieljo, i duj miery ĥersto (jačmienjo) pir šekielie, pašýl pórta Samarijakiri.” I otphendiá thagariskiro-manúš, pe vast saveskiro králi čhudiá kun', Devléskire manušéske, i phendiá: “Kóli by Devél i te otčhakirel fenštry pe bolybén, i tedy, ci moginéla davá te javél?” I phendiá odová: “Ĥáda, dykhésa tyré jakhénca, ne te xas davá na javésa.” Štar prokazytka manušá sys angíl zagiibén dre pórta i rakirdé jone jekh jekhéske: “So aménge te bešas adái, užakiri meribén? Kóli te skedespe aménge te džas dre fóro, tedy dre fóro isyn bokh, i ame odój merasa; kóli te bešas adái, tedy ame adiáke-pac' merasa. Džása fedýr dro Sirijákiro stáno (lod). Kóli jačkirena jone amen džiden, javása te dživás; a kóli muliakirena, to merasa.” I uštyné jone dro ciamlypén, syr iščo (inké) dyvesjola, sob (kaj) te džán dro Sirijákiro stáno. I javné ke Sirijakire-stanoskiro jagóro (krajo), i ĥáda, nane odój ni jekhe manušés. Raj Devél kerdiá dová, so Sirijakire stanoske pošundiape gruko maribnytkoné-vurdenengiro i grengiri grimityma, šumo buté-xaladéngiro. I phendlé jone jekh jekhéske: “Čačes, lyjá pal lové proti aménde Xietieiskone i Jegiptóskire kral'jén, sob (kaj) te džas pe aménde.” I uštyné, i prastándyne dro ciamlypén, i mekné péskire šátry, i gren peskiren, i oslen peskiren, saró stáno, syr jov sys, i prastándyne, zrakhi pes. I javné odolé (prokazytka) manušá ke stanoskiro jagóro (krajo), i zaginé dre jekh šátra, i xané i piné, i lyné odothýr rup, i suvnakái, i ídi, i giné i garadé. Giné iščo (inké) dre javír šátra, i odój lyné, i giné i garadé. I phende jekh jekhéske: “Na adiáke ame kerása. Dyvés davá – dyvés bahtalé nevipnasa. Kóli ame na sygniakirasa i javása te užakiras zlóko, to tedy peréla pe aménde bang. Džása i rosphenasa kralískire kheréske.” I javné, i khardé foróskire rakhibnar'jén pe pórty, i rosphendlé lénge, rakirí: “Ame psirdiam dro Sirijákiro stáno i rosphendiam lénge, i ĥáda, nane odój ni manušés, ni manušeskiri zan, a jekh grajo priphandle, i osly (miegárja) priphandle, i šátry, syr te javén lénge. I khardé jone rakhibnar'jen i piridyne nevipen dre kokoró kralískiro kher. I uštyjá králi ratý, i phendiá péskire dynar'jénge: “Me phenáva tuménge, so keréna aménca Sirijani. Jone džinéna, so ame pirilydžasa bokh, i vyginé jone stanostyr, sob (kaj) te garadjon dre félda, duminy adiáke; kiéli jone vydžána foróstyr, ame zauhtylasa len džidenca i zadžasa dre fóro.” I otphendiá jekh manúš, savó sys dynarisa pašýl léste, i phendiá: “Mek te len pandžé gren, savé jačnépe dro fóro (saré vol'none otriadendyr Izrail'tianendyr jekh i jaciápe dre léste, – saré vol'na otriády Izrail'tianén, savé xasiné), i bičhavasa i dykhasa. I lyné dujén gren, dyné andré len dre maribnýtka vurdyná. I bičhadiá králi palál Sirijakire xaladénde, phení: “Džán, podykhen.” I tradyne pal lénde ke Iordáno, i ĥáda, saró drom sys zasčhudo idiénca i bagažosa, savé čhurdyné Sirijani, kiéli sygniakirde péskiro našyben. I risiné manušá, savé sys bičhadé, i rosphendlé kralíske. I vyginé manušá, i rosčorde stáno Sirijákiro, i sys miéra jaržó fedyršo pir šékieljo, i duj miery ĥersto (jačmiénjo) pir šékieljo, pir Ráskire-Devléskiro lav. I králi čhudiá odolés thagariskire-pomogibnaskiro (sanovnikos), pe vast saveskiro jov obrikirdiape, pašýl pórta; i rosštakurde les manušá dre pórta, i jov myjá, syr phendiá Devléskiro manúš, savó rakirdiá, kiéli jov ke králi. Kiéli rakirdiá Devléskiro manúš kralíske adiáke: “Duj miery ĥersto (jačmiénjo) pir šékieljo, i miéra fedýr jaržó pir šékieljo javéla atasiá dre davá časo pašýl pórta Samarijakiri”, Tedy i otphendiá davá thagariskiro-pomogibnaskiro (sanovniko) Devléskire manušéske i phendiá: “Kóli by Devél i otčhakirdiá fenštry pe bolybén, i tedy ci moginelas davá te javél?” A jov phendiá: “Dykhésa tyré jakhénca, ne te xas davá na javésa.” Adiáke i kerdiápe lésa; i zatopčyndle (rosštakirde) les manušá dre pórta, i jov myjá. I rakirdiá Jelisiéjo džuvliáke, savjakire čhavés jov otdžidiakirdiá, i phendiá: “Uštý i džá, tu i tyró kher, i dživ odój, kaj moginésa te dživés kutý (nábut); pal-dová so khardiá Raj Devél bokh, i joj iavéla pe daja phuv eftá (bitrinéngiro deš) berš.” I uštyjá odoia džuvlý, i kerdiá pir Devléskire-manušéskiro lav; i gijá joj i lákiro kher, i dživdiá pe Filistijakiri phuv eftá berš. Syr proginé eftá berš, to risijá adáia džuvlý Filistijakiri phuvjátyr, i javdiá te mangél kralís pal péskiro kher i pal péskiri félda. Králi tedy rakirdiá Gijezijosa, dynarisa Devléskire manušeskiresa, i phendiá: “Rosphen mánge saró slavútno, so kerdiá Jelisiéjo.” I maškír davá, syr jov rosphenelas kralíske, so odová otdžidiakirdiá mules, e džuvlý, savjakire čhavés jov otdžidiakirdiá, mangdiá kralís pal péskiro kher i pal péskiri félda. I phendiá Gijeziejo: “Hulájo miro, králi, ada isyn doiá-pac' džuvlý i dová-pac' lákiro čhavó, savés otdžidiakirdiá Jelisiéjo.” I phuciape králi džuvliatyr, i joj rosphendiá léske. I dyjá láke králi jekhe manušés felatinitkones (pridvornones) i phendiá: “Te riskires láke saró, so sys lákiro, i saró so lyné feldatyr, dolé dyveséstyr, syr joj iačkirdiá phuv, ke davá dyvés.” I javdiá Jelisiéjo dro Damásko, kiéli Vienadado, Sirijákiro králi, sys nasvaló. I rosphendlé léske, rakirí: “Javdiá Devléskiro manúš darik.” I phendiá králi Azailoske: “Le dre tyró vast počastunko (podarko), i džá gil Devléskire manušéske, i phučpe Rástyr-Devléstyr pirdál léste, rakirí: “Ci vysastjovava me dalé dukhatyr?”.” I gijá Azailo gil (pe strieč) léske, i lyjá počastunko dro péskiro vast i saró fedyršo dro Damásko, ci but moginéna te lydžán štardešá vierbliudy, i javdiá, i terdijá angíl léskiro muj, i phendiá: “Čhavó tyró Vienadado, Sirijákiro králi, bičhadiá man ke tu te phučavpe: “Ci vysastjovava me dalé dukhatyr?”.” I phendiá léske Jelisiéjo: “Džá, phen léske: vysastjosa; ne usajékh otčhakirdiá mánge Raj Devél, so jov meréla.” I phučibnytkes podykhciá pe léste Jelisiéjo, i adiáke jaciápe ke dová, so zalydžijá les dre ladž; i zarondia Devléskiro manúš. I phendiá Azailo: “Sóstyr xuláj miro rovela?” I phendiá jov: “Doléstyr, so me džinóm, savó kerésa tu fuipén čhavénge Izrailjostyr; tvárdymi (krieposti) léngire tu otdesa jagake, i ternen lengiren manušén kurtalása muliakiresa, i kolynytkone léngire čhavorén domaresa, i peralen lénde džuvlién rosčingiresa.” I phendiá Azailo: “So dasavo dynári tyró isyn džukel, sob (kaj) mogindiá te kerél dasavo baró réndo?” I phendiá Jelisiéjo: “Sykadiá mánge Raj Devél, so tu javésa Sirijákiro králi.” I gijá jov Jelisiejostyr, i javdiá ke péskiro khieningo. I phendiá léske davá manúš: “So rakirdiá túke Jelisiéjo?” I phendiá: “Jov rakirdiá mánge, so tu vysastjosa.” A pe javír dyvés jov lyjá kuri (pohtan), kindiakirdia la paniésa i čhudiá pe léskiro muj, i jov myjá. I jaciá kralísa Azailo pe štéto léskiro. Pe pándžto berš Ioramóskiro, Ahavoskire čhavéste, savó sys králi pe Izrailjo, pal Iosafatoste, Judejákire kralíste, jaciá kralísa Iorámo, Iosafatóskiro čhavó, králi pe Judéia. Trijandaduj beršá sys léske, kiéli jov jaciá kralísa, i ohtó (bidujéngiro deš) berš sys kralísa dro Jerusalimo. I psirdiá jov Izrailjoskire-kral'jéngire dromésa, syr kerdiá Ahavoskiro kher, pal-dová so Ahavoskiri čhaj sys léskire romniása; i kerdiá nalačhés dre jakhá Ráskire-Devléskire. Ne usajékh na kamdiá Raj Devél te xasiakirél Judas, vaš Davidóske, Péskire pisharíske, adiáke syr Jov dyjá lav te del léske momolýtko (svietíl'niko) dre léskire čhavénde pe saré dyvesá. Dre dyvesá léskire vygijá Edómo tel Judáskire vastéstyr, i čhudé jone pe péste kralís. I gijá Iorámo dre Cairo, i saré maribnýtka vurdyná lésa; i uštyjá jov ratý, i domardiá Idumejanen, savé sys trusciál léste, i barydyrén pe maribnýtka vurdyná, ne manušá našné dre péskire šátry. I vygijá Edómo Judáskire vastéstyr ke davá dyvés. Dre dová-pac' časo vygijá i Livna. Javír lav pal Ioramoste i pal saró, so jov kerdiá, isyn začhindló dro beršýtka arhívy Judejákire kral'jéngire. I pasijá Iorámo péskire dadénca, i garadó sys péskire dadénca dro Davidóskiro fóro. I jaciá kralísa Ohozija, čhavó léskiro, pe štéto léskiro. Pe dešuiavir berš Ioramóskiro, Ahavoskire-čhavéskiro, Izrailjoskire kralískiro, jaciá kralísa Ohozija, Ioramóskiro čhavó, savó sys pe Judéia. Biš te duj berš sys Ohozijaske, kiéli jov jaciá kralísa, i jekh berš sys kralísa dro Jerusalimo. Lav léskire-dákiro sys Gofolija, Amvrijoskiri čhaj, savó sys králi pe Izrailjo. I psirdiá Ohozija Ahavoskire kheresa, i kerdiá nalačhés dre Ráskire-Devléskire jakhá, adiáke-pac' syr Ahavoskiro kher, pal-dová so jov sys seménca Ahavoskire kheresa. I gijá jov Ioramosa, Ahavoskire čhavésa, pe maribén Azailosa, Sirijakire kralísa, dro Ramófo Galaadoskiro, i čhindlé Sirijani Ioramos. I risijá králi Iorámo, sob (kaj) te sastiakirelpe dre Izriejéljo čhinybnastyr, savó kerdé léske Sirijani dro Ramófo, kiéli jov mardiápe Azailosa, Sirijakire kralísa. I Ohozija, Ioramóskiro čhavó, králi pe Judéia, javdiá te dykhelpe Ioramosa, Ahavoskire čhavésa, dro Izriejéljo, adiáke syr jov sys nasvaló. Proróko Jelisiéjo khardiá jekhés prorokéngire čhavéndyr i phendiá léske: “Phande truscial tyré trušula, i le davá khoró (sasudo) jeliejosa dro tyró vast, i džá dro Ramófo Galaadoskiro. Javi odorík, lath odój Iiujos, Iosafatoskire čhavés, Namiesijoskire čhavés, i poddža, i phen léske te vydžál péskire pšaléndyr, i zalydža les dre andratuný štúba. I le khoró jeliejosa, i vyčhuv pe léskiro šeró, i phen: ‘Adiáke rakiréla Raj Devél: Me pomakhava tut dre kralíste pe Izrailjo.’ Tén'ci otčhakir vudár, i prasta, i na užakir.” I gijá ternó manúš, prorokengiro čhavó, dre Ramófo Galaadoskiro. I javdiá, i ĥáda, isyn bešté xaladéngire barydyrá. I phendiá: “Mánde isyn lav ke tu, xaladéngiro barydyró.” I phendiá Iiújo: “Ke kon sarén améndyr?” I phendiá jov: “Ke tu, xaladéngiro barydyró.” I uštyjá jov, i zagijá dro kher. I ternó manúš vyčhudiá jeliéjo pe léskiro šeró, i phendiá léske: “Adiáke rakiréla Raj Devél, Devél Izrailjoskiro: ‘Akana Me makhava tut dre kralíste pe Ráskire-Devléskire manušénde, pe Izrailjo. I tu vymaresa kher Ahavoskiro, tyré-xulaskiro, sob (kaj) Mánge te othav pale (otomscinav) pal rat pishar'jéngiro, Miré prorokengiro i pal rat saré pishar'jéngiro, savé sys Ráskire-Devléskire, savé myné Jezavieliakire vastéstyr. I xasjola saró Ahavoskiro kher, i Me zamarava Ahavoste kažnoné muršés, kon kindiakirelape ke vánta, i bešybnaris i kon jaciápe dro Izrailjo. I keráva Me kher Ahavoskiro, syr kher Jerovoamoskiro, Navatoskire čhavéskiro, i syr Vaasaskiro kher, Ahiinoskire čhavéskiro. Jezavielia shana džukela pe Izrailjoskiri félda, i nikón na garavela la.’” I otčhakirdiá vudár, i nastiá. I vygijá Iiújo ke léskire-xuláskire dynári, i phendlé léske: “Ci ramanjosa (mirósa)? Pal so sys javi ke tu davá bigodiakiro.” I phendiá lénge: “Tumé džinéna adales manušés i so jov rakiréla.” I phendlé: “Na čačipén, phen aménge.” I phendiá jov: “Dová i dová jov phendiá mánge, rakirí: ‘Adiáke rakiréla Raj Devél: Pomakhava tut dre kralíste pe Izrailjo.’” I sygniakirde jone, i lyné kažno (sváko) péskiri ídia, i počhude léske pe sama ĥerunia (stupien'ki), i zabašade rogosa, i phendlé: “Iiújo jaciá kralísa!” I gijá Iiújo, Iosafatóskiro čhavó, Namiesijevoskire-čhavéskiro, pe Ioramoste; Iorámo ž sys sarénca Izrail'tianenca dro Ramófo Galaadsko pe rakhiben proti Azailoste, Sirijakire kralíste. Trej te phenas, so kokoró králi Iorámo risijá, sob (kaj) te sastiakirelpe dre Izriejeljo čhinybnastyr, savó kerdé léske Sirijani (Aramiéicy), kiéli jov mardiápe Azailosa, Sirijakire kralísa. I phendiá Iujo: “Kóli tumé san dre jekh godý, tedy mek nikón te na džal peske foróstyr, sob (kaj) te džas te podes zan (zvies') dre Izriejeljo.” I beštia Iiújo pe greste, i tradyjá dre Izriejéljo, kaj sys paštó Iorámo, i karik Ohozija, králi pe Judéia javdiá te dykhelpe Ioramosa. Pe vučardý (bašnia) dro Izriejéljo sys terdó rakhibnari, i dykhciá jov baró ke dar xaladybén Iiujoskiro, kiéli jone giné, i phendiá: “Baró ke dar xaladybén dykháva me.” I phendiá Iorámo: “Le manušés, savó beštó uklisté pe greste, i bičháv gil (pe strieč) lénge, i mek te phenél ci ramanjosa (mirósa)?” I vytradyjá manúš uklisto pe greste gil léske, i phendiá: “Adiáke rakiréla králi: ‘Ci ramanjosa (mirósa)?” I phendiá Iiújo: “So túke ke ramánjo (miro)? Trade pal mánde.’ I rosphendiá rakhibnari, i phendiá: “Uklisto dotradyja ke jone, ne na risjola.” I bičhadé javirés manušés uklisté pe greste, i jov pritradyja ke jone, i phendiá: “Adiáke rakiréla králi: ‘Ci ramanjosa?’” I phendiá Iiújo: “So túke ke ramánjo? Trade pal mánde.” I rosphendiá rakhibnari, i phendiá: “Dotradyja uklisto ke jone, i na risjola; a mina, syr jov džála, isyn sýrby Iiujoskiri, Namiesijoskire čhaveskiri, pal-dová so jov džála sýges.” I phendiá Iorámo: “De andré”: i dyné andré léskiro maribnýtko vurdén. I vygijá Iorámo, Izrailjoskiro králi, i Ohozija, králi pe Judéia, kažno (sváko) pe péskiro vurdén. I vyginé gil Iiujoske, i strenindlepe lésa pe Navufiejoskiri-Izriejel'tianinoskiri félda. I kiéli dykhciá Iorámo Iiujos, tedy phendiá: “Ci ramanjosa san tu, Iiújo?” I phendiá jov: “Savó ramánjo pašýl Jezavieliakiro biladžaipén, tyré-dákiro, i pašýl but lákire čovahaniakiribena?” I riskirdiá Iorámo péskire vastá, i prastándyja, i phendiá Ohozije: “Bikindle amen, Ohozijo!” A Iiújo ottyrdyja lúko péskire vastésa i popyja Ioramoske maškír léskire psiké, i progijá maribnýtko bust pirdál léskiro iló, i pyjá jov pe péskiro maribnýtko vurdén. I phendiá Iiújo Bidekaroske, ráske peskireske pe xaladénde: “Le, čhurde les pe Navufiejoskire-Izriejelitianinoskiro feldakiro kotér; pal-dová so priripir, syr ame túsa tradyjam dujdžiné palál Ahavoste, léskire dadéste, i syr Raj Devél phendiá pe léste dasavo angilphenybén. Čačó, rat Navufiejoskiro i rat, léskire-čhavéngiro, dykhcjom me tasiá, rakiréla Raj Devél, i Me othava pale (otomstinava) túke pe daja félda. I adiáke le, čhurde les pe félda, pir Ráskire-Devléskiro lav.” Ohozija, Judejákiro králi, syr dykhciá davá, to prastándyja pir drom ke kher, so sys dre únta (sado). I tradyjape pal léste Iiújo, i phendiá: “Marén les pe vurdén.” Davá sys pe vučipén Gur, so isyn pašýl Ivlieamo. I prastándyja jov dre Miegidono, i myjá odój. I lydžiné les pishárja léskire dro Jerusalimo, i garadé les dre léskiri koplíca, léskire dadésa, dro Davidóskiro fóro. Pe dešupervo berš Ioramóskiro, Ahavoskire-čhavéskiro, jaciá kralísa Ohozija dre Judéia. I javdiá Iiújo dro Izriejéljo. E Jezaviél', doresciá zan, vymakcia péskiro muj, i prikedyja péskiro šeró, i dykhciá dre fenštra. Kiéli Iiújo zagijá dre pórta, to joj phendiá: “Ci isyn ramánjo Zamvrijoske, péskire khieningoskire zamaribnariske?” I ĥazdyjá jov péskiro muj ke fenštra, i phendiá: “Kon isyn mánca, kon?” I vydykhne ke jov duj, trin jévnuhi. I phendiá jov: “Čhurdén la javrí.” I vyčhurdyne la. I bryznindia lákiro rat pe vánta i pe grénde, i zatopčyndle (štakirde) la. I javdiá Iiújo, i xaja, i pija, i phendiá: “Lathén adalia bibahtalia i garaven la, adiáke, syr joj isyn kralískiri čhaj.” I giné te garaven la, i na lathné látyr ničý, apríč čeriepostyr i ĥerendyr, i anguštendyr pe vastá. I risiné, i rosphendlé léske. I phendiá jov: “Dasavo sys Ráskire-Devléskiro lav, savó Jov phendiá pirdál Péskire pishariste, Ilijaste Fiesvitianinoste, kiéli phendiá jov pe Izrailjoskiri félda “Shana džukela Jezavieliakiro trúpo. I javéla Jezavieliakiro trúpo pe kotér phuv Izriejeljoskiri, syr gnejo pe félda, adiáke so nikón na phenéla: ‘Davá isyn Jezaviel'.’” Ahavoste sys eftadešá (bitrijandengiro šel) čhavé dro Samárija. I čhindiá Iiújo lylá, i bičhadiá dre Samárija ke barydyrá Izriejoljoskire, phurydyrenge i opiekunenge Ahavoskire čhavorengirenge, dasavé lavénca: “Kiéli javéla davá lyl ke tumé, tedy adiáke syr tuménde i čhavé tumaré xuláskire, tuménde i vurdyná, i graja, i fóro zoralé tynosa, i mardýtko (oružyjo), – Vykeden fedyršone i slavutnone čhavéndyr péskire khieningos, i čhuvén les te bešél pe trono léskire dadéskiro, i marénpe pal kher péskire khieningoskiro.” Jone xor strahádyne i phendlé: “Ĥáda, duj králja na vyterdine angíl léste, syr aménge te vyterdjovas?” I bičhadiá barydyró pe kher kralískiro, i foróskiro barydyró, i phurydyrá, i opiekuny ke Iiújo te phenén: “Ame som tyré dynárja, i so phenésa aménge, dová i ame kerása. Ame nikonés na čhuvasa kralísa; so isyn lačhó túke, dová i ker. I čhindiá jov ke jone lyl javír mólo dasavo: “Kóli tumé san miré i lav miro kandéna, tedy len šeré péskire khieningoskire čhavéngire i javén ke me atasiá dre davá časo dro Izriejeljo. (Kraliskiren čhavén sys eftadešá manušén; barjakirdé len slavutna manušá dro fóro). Kiéli javdiá ke jone lyl, jone lyné kraliskiren čhavén, i zaphusade len – eftadešá manušén, i čhudé léngire šeré dre korzíny (khudé), i bičhadé ke jov dro Izriejeljo. I javdiá manúš, savés bičhadé, i rosphendiá léske, i phendiá: “Jandlé šeré kralískire čhavéngire.” I phendiá jov: “Čhuvén len pe duj kučy, pašýl zagiibén dro vudár, ke zlóko (ránko).” Pe zlóko jov vygijá, i terdijá, i phendiá saré manušénge: “Tumé na san bangé. Ĥáda, me terdijom proti miré khieningóste i muliakirdjom les; a len sarén kon zamardiá? Džinén akaná, so na peréla pe phuv ni jekh Ráskire-Devléskiro lav, savó Jov phendiá pal kher Ahavoskiro; Raj Devél keréla dová, so Jov phendiá pirdál Péskire pishariste Ilijaste.” I muliakirdiá Iujo sarén manušén, savé jačnépe Ahavoskire kheréstyr dro Izriejeljo, i saré baré ran leskiren, i pašatuné leskiren, i rašán leskiren adiáke, so na jaciápe léstyr ni jekhés džides manušés. I uštyjá, i gijá, i javdiá dro Samárija. Kiéli jov gijá pirí drom pašýl Bief-Jekiedo, kaj džána čhupnárja, to strenindia Iiújo pšalén Ohozijaskiren, Judejákire-kraliskiren, i phendiá: “Kon san tumé?” Jone otphendlé: “Ame sam Ohozijaskire pšála, džása te udžinas pal sastypen kralískire-čhavéngiro, i khieningicakire-čhavéngiro.” I phendiá jov: “Len len džidenca.” I lyné len džidenca, i zaphusade len – štardešá duj manušá, pašýl ĥanýng Bief-Jekiedo, i na jaciápe nijékh léndyr. I tradyjá jov odothýr, i strenindiape Ionadavosa, Rihavoskire čhavésa, savó gijá gil léske, i dyjá “dobridim” léske, i phendiá léske: “Ci paštó isyn tyró iló adiáke, syr miro iló ke tyró iló?” I phendiá Ionadavo: “Adiáke.” “Kóli adiáke, tedy de tyró vast.” I dyjá jov péskiro vast, i ĥazdyjá jov les ke pe dro maribnýtko vurdén. I phendiá: “Trade mánca i dykh pe miro čačipén pal Raste-Devléste.” I čhudé te bešél les dro maribnýtko vurdén. Syr javdiá Iiújo dre Samárija, jov domardiá sarén manušén, savé jačnépe Ahavoste dre Samárija adiáke, so sarésa vymardia les, pir Ráskire-Devléskiro lav, savó Jov phendiá Ilijaske. I skedyjá Iiújo saré manušén, i phendiá lénge: “Ahávo nábut (kutý) dynarindiá Vaaloske, Iiújo javéla te dynarinél léske butýr. I adiáke kharén ke me sarén Vaaloskire prorokén, sarén léskire butiarnen i sarén léskire rašán, sob (kaj) nikón te na javél iščo (inké) vari-kaj; pal-dová so mánde javéla baró svénto janybén Vaaloske. A kažno (sváko), kon na javéla, na jačélape džidó.” Iiújo kerdiá davá mendrimasa, sob (kaj) te marel Vaaloskire butiarnen. I phendiá Iiújo: “Phenén pal dyvés svenkoskiro vaš skedyibén vaš Vaaloske.” I dyné te džinén pal skedyibén. I bičhadiá Iiújo pir saró Izrailjo; i javné saré Vaaloskire butiarné: na jaciápe nijékh manúš, kon by na javdiá; i zaginé dro Vaaloskiro kher, i jaciá pherdó Vaaloskiro kher jagoróstyr (krajostyr) ke jagóro. I phendiá jov idiéngire rakhibnariske (xranitieljoske): “Jan ídia vaš sarénge Vaaloskire butiarnenge.” I jov jandiá ídia lénge. I zagijá Iiújo Ionadavosa, Rihavoskire čhavésa, dro Vaaloskiro kher, i phendiá Vaaloskire butiarnenge: “Udžinén i rozdykhen, ci nane tuménde vari-kon Ráskire-Devléskire butiarnendyr, adiáke syr adáj musinen te javén jékh Vaaloskire dynárja.” I lynepe jone pal svénto janybén i célo shačkiribén. A Iiújo čhudiá pal kher ohtodešá manušén i phendiá: “Odoleskiro di, savéstyr zrakhélape vari-kon manušéndyr, savén me otdáva tuménge dre vastá, javéla pe štéto odoleskiro, kon zrakhélape.” Kiéli kerdó sys célo shačkiribén, phendiá Iiújo manušénge, savé sýges psiréna i barydyrénge: “Džán, marén len, sob (kaj) nijékh te na džal krig peske.” I domardé len kurtalása, i čhurdyné len manušá, savé sýges psiréna i barydyrá, i giné dro fóro, kaj sys mangipnytko štéto Vaaloskiro. I vylydžiné statuly Vaaloskire mangipnytkone štetóstyr, i shačkirdé len. I rozmarde Vaaloskiri statula, i rosphagirdé Vaaloskiro mangipnytko štéto; i kerdé léstyr štéto vaš šuma, ke davá dyvés. I vymardia Iiújo Vaalos Izrailjoskire phuvjátyr. Usajékh Jerovoamoskire grehéndyr, Navatoskire-čhavéskire, savó lydžijá Izrailjo dro grého, léndyr na otgijá Iiújo, – suvnakuné guruvendyr, savé sys dro Viefíljo, i savé sys dro Dano. I phendiá Raj Devél Iiujoske: “Pal-dová, so tu ilésa kerdián, so sys čačunó dre Miré jakhá, kerdián pe Ahavoskiro kher saró, so sys pe iló Mánde, tyré čhavó ke štárto ródo javéna te bešén pe Izrailjoskiro trono.” Ne Iiújo na starindiape te psirél pir Ráskire-Devléskiro, Devléskire-Izrailjoskiro zakóno, saré iléstyr. Jov na otgijá Jerovoamoskire grehéndyr, savó zalydžijá Izrailjo dro grého. Dre dolé dyvesá lyjá Raj Devél te otčhinel pašá Izrail'tianendyr, i domardiá len Azailo pe sarí Izrailjoskiri rig. Pe vastóko Iordanostyr, sarí phuv Galaadoskiri, ródyco Gadoskiro, Ruvimoskiro, Manasijáskiro, lyi Aroerostyr, savó sys pašýl sýgno rékica (lenorí) Arnono, i Galaádo i Vasáno. Javír lav pal Iiujoste i pal saró, so jov kerdiá, i pal murškané réndy (podvigi) léskire, isyn začhindló dro Izrailjoskire-kral'jéngire beršýtka arhívy. I pasijá Iiújo péskire dadénca, i garadé les dre Samárija. I jaciá kralísa Ioahazo, léskiro čhavó, pe štéto léskiro. Iiújo kralindia pe Izrailjo, dro Samárija, biš te ohtó berš. E Gofolija, Ohozijaskiri daj, dykhí, so lákiro čhavó myjá, uštyjá i vymardia saró kralískiro ródo. Ne e Iosaviéf, Ioramoskire-kralískiri čhaj, Ohozijaskiri phen, lyjá Ioasasos, Ohozijaskire čhavés, i čorahanés lydžijá les krig mulé kralískire čhavéndyr, les i nian'ka leskirja, dre soibnytko štúba; i garadé les Gofolijatyr, i jov na sys zamardo. I sys jov lása garadó dro Ráskire-Devléskiro Kher šov berš, syr Gofolija sys králica pe phuv. Pe eftáto berš bičhadiá Iodajo, i lyjá barydyrén pe šelá rakhibnar'jende i manušén, savé sýges psiréna, i jandiá len ke pe dro Devléskiro Kher, i kerdiá lénca dorakiribén, i lyjá léndyr sovél dro Ráskire-Devléskiro Kher, i sykadiá lénge kralískire čhavés. I dyjá lénge priphenybén, phení: “Ĥáda, so tumé kerén: tríto paš tuméndyr, savé javénas dro sávato (subóta), javéla te rikirél stréga pašýl kralískiro kher. Tríto paš javéla pašýl pórta Suro, i tríto paš pašýl pórta palál rakhibnar'jénde. I rikirén stréga kheréske, sob (kaj) te na javél phagirdó nisó. I duj pašá tuméndyr, saréndyr, savé džána dro sávato (subóta), javéna te rikirén stréga pašé bi Ráskire-Devléskiro Kher vaš kralíske. I zalen muj (obkrengliakiren) kralís saré rigéndyr, kažno (sváko) mardytkonesa (oružyjosa) peskiresa dre péskire vastá; i kon zagijá by dre riady, odová mek te javél zamardo. I javén pašé kralíste, kiéli jov vydžála i kiéli zadžála.” I kerdé šelytka saró, so priphendiá Iodajo rašái, i lyné kažno peskiren manušén, savé sys javi dre sávato i savé giné péske dre sávato, i javné ke Iodajo rašái. I rozdyja rašáj šelytkonenge čhurdybnytka bustiá (kop'i) i ščýty Davidóskire kralískire, savé sys dro Ráskire-Devléskiro Kher. I terdiné manušá, savé sýges psiréna, kažno mardytkonesa (oružyjosa) dro péskiro vast, čačé-kheréskire rigátyr ke zérvo (liévo) kheréskiri rig, pašo altárjo i pašo kher, trusciál kralíste. I vylydžyja jov kralískire čhavés, i čhudiá pe léste kralískiri koróna i šukarjakiriben, i kerdé kralísa les, i pomakhne les, i mardé dre vastá i godlenas radymása: “Mek te dživél králi!” I šundiá Gofolija zan manušéngiri, savé prastándyne, i gijá ke manušá dro Ráskire-Devléskiro Kher. I dykhéla, i ĥáda, králi sys terdó pe vučipén, syr isyn prilyno, i thagárja, i rógi pašýl kralíste; i saré manušá phuv radynénape, i bašavena rogénca. I roskustia Gofolija péskire ídi, i zadyja godly: “Zrakiribén, Zrakiribén!” I dyjá priphenybén rašáj Iodajo šelytkonenge, barydyrénge pe xaladénde, i phendiá lénge: “Vylydžan la pal rakhibnar'jengire riady; a kon džála pal láte, zamarén kurtalása, adiáke syr dumindia o rašái, sob (kaj) te na zamarén la dro Ráskire-Devléskiro Kher. I dyné láke štéto, i joj gijá pirdál zagiibén grengiro ke kralískiro kher, i zamardé la odój. I kerdiá Iodajo zaviéto maškír Raste-Devléste, i maškír kralíste, i maškír manušénde, sob (kaj) jone te javén Ráskire-Devléskire manušénca, i maškír kralíste, i manušénde. I giné saré manušá phuvjákire dro Vaaloskiro kher, i rosphagirdé léskire altári, i léskire figury sarésa rozmarde, i Matfanos, rašás-žriecos Vaaloskires, zamardé angíl altári. I čhudiá rašáj dykhibén pal Kher Ráskire-Devléskiro. I lyjá šelytkonen, i rakhibnar'jen, i manušén, savé sýges psiréna, i saré phuvjákire manušén, i lydžiné kralís Ráskire-Devléskire Kheréstyr, i javné pir drom pir rakhibnar'jéngire pórta dro kralískiro kher; i jov bestiá pe kral'jéngiro trono. I radyndlepe saré phuvjákire manušá, i fóro štylyja. A Gofolija muliakirdé kurtalása dro kralískiro kher. Eftá berš sys Ioasoske, kiéli jov jaciá kralísa. Pe eftáto berš Iiujoskiro, jaciá kralísa Ioáso, i jov štardešá berš sys kralísa dro Jerusalimo. Lav léskire dákiro sys Cyvja, Virsavijatyr. I kerdiá Ioáso dová, so sys lačhés dre Ráskire-Devléskire jakhá dre saré péskire dyvesá, paka sykliakirdiá les rašáj Iodajo. Jekh vučé štéty na sys rozrade; manušá iščo (inké) janénas svénta dyibená i xačkirdé dróga smóly pe vučipená. I phendiá Ioáso rašange: “Saró rup isyn obsvencyndlo, savó janéna dro Ráskire-Devléskiro Kher, rup manušéndyr, savé javénas, rup, savó vylydžana pal kažno (sváko) di pir timín, saró rup, ci but konéske javéla pe iló te janel dro Ráskire-Devléskiro Kher. Mek te len rašaja péske, kažno péskire džindlé manušéstyr, i mek jone te podkeren, so sys phagirdó dre Khangirí; pe kažno štéto usiéndie (viezdie), kaj lathelape phagiriben.” Ne syr ke biš te tríto berš, kiéli lyjá te kralinél Ioáso, rašaja na podkerde phagiriben dro Khangirí, to tedy o králi Ioáso khardiá rašás Iodajos i rašán i phendiá lénge: “Sóske tumé na keréna riemónto pe phagiriben dre Khangirí? Na len akaná rup péskire pindžkirdendyr, a lové te riemontynen phagiriben dre Khangirí otdén pale.” I jačné dre jekh godý rašaja te na len rup manušéndyr te riemontynen phagiriben dre Khangirí. I lyjá rašáj Iodajo jekh mohtó (jaščyko), i kerdiá kula (otvierstijo) upré léstyr, i čhudiá les pašýl altárjo pe čačí (pravo) rig, kaj zadžána dro Ráskire-Devléskiro Kher. I čhudé odorík rašaja, savé sys terdé pe rakhiben pašýl progo, saró rup, savó janénas dro Ráskire-Devléskiro Kher. I kiéli jone dykhné, so but rup sys dro mohtó (jaščyko), to javélas lylá-čhibnaskiro (pisarjo) kralískiro i anglatunó rašái, i zaphandena dre goné, i piriginenas rup, savó sys lathno dro Ráskire-Devléskiro Kher. I otdenas pirigindlo rup dre vastá manušéngire, savé dykhné pal butiá, konés čhudé pe butý ke Ráskire-Devléskiro Kher, a odolé lenas les pe kherá-keribnaskirende (plotnikende) i strojkakirende, savé kerdé butý dro Ráskire-Devléskiro Kher. I pe manušénde, savé kerdé vánty i pe butiarnende, savé vyčingirenas bará, adiáke-pac' pe kinyben veš, i obkerde bará, te riemontynen phagiriben dro Ráskire-Devléskiro Kher, i pe saró, so rozgijápe vaš Khangirjákiro podrikiribén. Ne na sys kerdé vaš Ráskire-Devléskiro Kher rupuvé čaré, čhurja, tahtaja (čašy) te počhuven, rógi (truby), kažna khoré suvnakuné i khoré rupéstyr, savé sys jandlé dro Ráskire-Devléskiro Kher. A manušénge, savé kerénas butý, otdenas les, i čynindle lénge Ráskire-Devléskiro Kher. I na phučné otphenybén odolé manušéndyr, savénge dopatianas rup te rozden manušénge, savé kerdé butý; pal-dová so jone kerdé čačunés. Rup pal svénto janybén Ráske-Devléske pal čoripén i rup pal svénto janybén Ráske-Devléske pal grého na janénas dro Ráskire-Devléskiro Kher: rašange jov sys te otdelpe. Tedy vygijá dro drom Azailo, králi Sirijákiro, i gijá maribnása pe Giéfo, i lyjá les; i skedyjape Azailo te džal pe Jerusalimo. Ne Ioáso, králi Judejákiro, lyjá saró, so sys jandlo syr dáro, so jandlé vaš Khangirí, i Iorámo i Ohozija, dadá léskire, králja Iudejakire, i so jov kokoró jandiá syr dáro, i saró suvnakái, savó sys lathno dre piraliá dro Kher Ráskire-Devléskiro i dro kher kralískiro, i bičhadiá davá Ioáso Azailoske, kralíske Sirijakireske; i jov otgijá Jerusalimóstyr. Javír pal Ioasoste i pal saró, so jov kerdiá, sys začhindló dre beršýtka arhívy kral'jénge Judejakirenge. I ĥazdynépe léskire dynárja, i zrakirdepe, i muliakirdé Ioasos dro kher Miloskiro, pe drom ke Silo. Les zamardé léskire dynárja: Iozakaro, Šymietoskiro čhavó, i Jegozavado, čhavó Šomieroskiro: i jov myjá, i garadé les dadénca leskirenca dro Davidóskiro fóro. I jaciá kralísa Amásija, čhavó léskiro, pe štéto léskiro. Pe biš te tríto berš Ioasoskiro, Ohozijaskire-čhavéskiro, kon sys králi pe Judéia, jaciá kralísa Ioahazo, Iiujoskiro čhavó, pe Izrailjo dre Samárija, i sys kralísa dešuefta berš. I kerdiá jov fuipén dre jakhá Ráskire-Devléskire, i psirdiá dre gréhi Jerovoamoskire, Navatoskire čhavéskire, savó lydžijá Izrailjo dro grého, i na otiacia léndyr. I zahačíia xolý Ráskire-Devléskiri pe Izrailjo, i Jov otdyjá len dre Azailoskiro vast, Sirijákiro-kralískiro, i dro Vienadadoskiro vast, Azailoskire čhavéskiro, dre saré dyvesá. I mangdiápe o Ioahazo Ráske-Devléske, i šundiá les Raj Devél; pal-dová so Jov dykhciá Izrail'tianengiro pritasaiben, syr tasadia len Sirijákiro králi. I dyjá Raj Devél Izrail'tianenge zrakhibnaris, i vyginé jone tel Sirijanengire vastéstyr, i dživdé Izrailjoskire čhavé dre péskire šátry, syr tasiá i pe tríto dyvés. Ne jone usajékh na otginé grehéndyr Jerovoamoskire kheréstyr, savó lydžijá Izrailjo dro grého; psirdé dre lénde, i dembitko vešoro terdijá dro Samárija. Ioahazoste jaciápe xaladén jekh pandždešá manušá, savé sys uklisté pe grénde, deš maribnýtka vurdyná i deš tysjoncy manušá, savé sys pezal, pal-dová so vymardia len Sirijákiro králi i kerdiá léndyr práho te štakiren ĥerénca. Javír lav pal Iohazoste i pal saró, so jov kerdiá, i pal murškané réndy léskire, isyn začhindló dro beršýtka arhívy pal Izrailjoskire kral'jénde. I pasijá Ioahazo péskire dadénca, i garadé les dre Samárija. I jaciá kralísa Ioáso, léskiro čhavó, pe štéto léskiro. Pe trijánda eftáto berš Ioasoskiro, kon sys králi pe Judéia, jaciá kralísa Ioáso, Ioahazoskiro čhavó, pe Izrailjo dro Samárija i sys kralísa dešušov berš. I kerdiá jov fuipén dre jakhá Ráskire-Devléskire; jov na jačkirdiá saré Jerovoamoskire gréhi, kon sys Navatoskiro čhavó, savó zalydžijá Izrailjo dro grého, ne psirdiá dre lénde. Javír lav pal Ioasoste i pal saró, so jov kerdiá, i pal murškané léskire réndy, syr jov mardiápe Amasijasa, Judejákire kralísa, isyn začhindló dre beršýtka arhívy pal Izrailjoskire kral'jénde. I pasijá Ioáso péskire dadénca, a Jerovoámo bestiá pe léskiro trono. I garadó sys Ioáso dre Samárija Izrailjoskire kral'jénca. O Jelisiéjo zanasvalyja nasvalypnasa, savjátyr jov korigedýr (pozže) i myjá. I javdiá ke jov Ioáso, Izrailjoskiro králi, i rondiá pe léste, i rakirdiá: “Dádo miro! Dádo miro! Maribnýtko vurdén Izrailjoskiro i graja léskire!” I phendiá léske Jelisiéjo: “Le lúko i maribnýtka bustiá (striély).” I lyjá jov lúko i maribnýtka bustiá (striély). I phendiá Jelisiéjo Izrailjoskire kralíske: “Čhuv tyró vast pe lúko.” I čhudiá jov péskiro vast. I čhudiá upré Jelisiéjo péskire vastá pe kralískire vastá. I phendiá Jelisiéjo: “Otčhakir fenštra pe vastóko.” I jov otčhakirdiá. I phendiá Jelisiéjo: “De kar'je.” I jov dyjá kar'je. I phendiá: “Daja maribnýtko bust (striéla) isyn zrakhibén Rástyr-Devléstyr i bust vaš zrakhibén proti Sirija, i tu domaresa Sirijanen dro Afieko dro kónco (jagóro).” I phendiá Jelisiéjo: “Le bustiá.” I jov lyjá. I phendiá Izrailjoskire kralíske: “Mar pir phuv.” I pekadiá jov trin móly, i terdijá. I xoliásyja pe léste Ráskire-Devléskiro manúš, i phendiá: “Treindiá te mares pandž, ci šov móly; tedy tu domaresas Sirijanen sarésa, a akaná féni trin móly domaresa Sirijanen.” I myjá Jelisiéjo, i garadé les. I baró ke dar xaladybén Moavitianendyr javdiá pe phuv pe javír berš. I sys adiáke, so, kiéli garadé jekhés manušés, tedy dykhí davá baró ke dar xaladybén, manušá, savé garadé, čhurdyné odolé manušés dre Jelisiejoskiri koplíca; i jov syr pyjá, čiladiape ke Jelisiejoskire kokalý i otdžidyjá, i uštyjá pe péskire ĥerá. O Azailo, Sirijákiro králi, pritasavelas Izrail'tianén dre saré dyvesá Ioahazoskire. Ne Raj Devél sykadiá tangipén (zmilyndiape) pe lénde, i otmekciá lénge, i porisija ke jone vaš zaviéto Péskiro Avraamosa, Isaakosa i Jakovosa, i na kamdiá te protradel len, i na otriskirdia len Péskire móstyr ke davá dyvés. I myjá Azailo, králi Sirijákiro, i jaciá kralísa Vienadado, léskiro čhavó, pe štéto léskiro. I lyjá pale Ioáso, Ioahazoskiro čhavó, Vienadadoskire vastéstyr, Azailoskiro čhavó, fórja, savé jov lyjá maribnása léskire dadéskire vastéstyr Ioahazostyr. Trin móly rozmardiá les Ioáso i riskirdiá Izrailjoskire fórja. Pe javír berš Ioasoskiro, Ioahazoskire-čhavéskiro, kon kralindia pe Izrailjo, jaciá kralísa Amásija, Ioasoskiro čhavó, králi pe Judéia. Biš te pandž berš sys jov, kiéli jov jaciá kralísa, i biš te jeniá berš sys kralísa dro Jerusalimo. Lav léskire-dákiro Iiegoadan', Jerusalimóstyr. I kerdiá jov lačhés dre jakhá Ráskire-Devléskire, sarésa na adiáke, syr léskiro dad Davído. Jov dro saró kerdiá adiáke, syr léskiro dad Ioáso. Jekh vučipená na sys otparude; manušá iščo (inké) kerdé svénta janybená Ráske-Devléske i xačkirdé dróga smóly pe vučipená. Kiéli jaciá zoraló kralipén dre léskire vastá, tedy jov muliakirdiá peskiren dynar'jén, savé zamardé kralís, léskire dadés. Ne čhavén umaribnar'jéngiren jov na domardiá, adiáke, syr isyn čhindló dre Mojzáskire-Zakonoskiri lylvarí, dre saví Raj Devél priphendiá, rakirí: “Naštý te kerés adiáke, sob (kaj) te čhuvén kára dadénge meribnasa pal čhavénde, i čhavénge naštý te den kára meribnasa pal dadende; ne kažno (sváko) pal péskiro réndo (diélo) isyn bangó (musinela) te javél dre xas' (kára) meribnasa.” Jov vymardia deš tysjoncy Idumejanen pe Londo dólo, i lyjá Siela maribnása, i dyjá láke lav Iokofieilo, savó jačélape i ke davá dyvés. Tedy bičhadiá o Amásija manušén ke Ioáso, Izrailjoskiro králi, kon sys Ioahazoskiro čhavó, i Iiujoskiro ŭnuko (niepoto), te phenél: “Vydža, dykhasape jekh pe jekh.” I bičhadiá o Ioáso, Izrailjoskiro králi, ke Amásija, Judejákiro králi, te phenén: “Žylto xrústo phusadiénca, savó sys pe Liváno, bičhadiá ke kiédro, savó sys pe Liváno, te phenén: ‘Otdé peskirjá čha paloróm miré čhavéske.’ Ne proginé busa (dika) murdalá (zvieri), so sys pe Liváno i štakirde davá žylto xrústo phusadiénca (tierno). Tu domardian Idumejanen, i zaphutija tyró iló. Phutjov i beš péske kheré. Ke so túke te kerés košybén pe péskiri bída? Peresa tu i Ju'da túsa.” Ne na kandyjá les o Amásija. I vygijá Ioáso, Izrailjoskiro králi, i dykhnepe, kokoró jov i Amásija, Judejákiro králi, dre Viefsamisa, so sys dre Judéia. I rozmarde Izrail'tiáni Judejakiren, i roznašnepe odolé pir péskire šátry. I Amasijaske, Judejákire kralís, Ioasoskire čhavés, kon sys ŭnuko Ohozijaske, zauhtyldia o Ioáso, Izrailjoskiro králi, dre Viefsamisa, i gijá pe Jerusalimo, i rosphagirdiá vánta Jerusalimóskiri Jefriemóskire portatyr ke venglytko pórta pe štardešá kuniá (lokti). I lyjá saró suvnakáj i rup, i saré khoré (sasúdy), savé lathnepe dro Ráskire-Devléskiro Kher, i dre piraliá, i risijá dre Samárija. Javír lav pal Ioasoste, so jov kerdiá, i pal murškané léskire réndy, i syr jov mardiápe Amasijasa, Judejákire kralísa, isyn začhindlé dre beršýtka arhívy pal Izrailjoskire kral'jénde. I pasijá o Ioáso péskire dadénca, i garadó sys dre Samárija Izrailjoskire kral'jénca. I jaciá kralísa o Jerovoámo, léskiro čhavó, pe štéto léskiro. I dživdiá o Amásija, Ioasaskiro čhavó, králi pe Judéia, paló meribén Ioasoskiro, Ioahazoskire-čhavéskiro, kon sys králi pe Izrailjo, dešupandž berš. Javír lav pal Amasijaskire réndy, isyn začhindló dre beršýtka arhívy pal kral'jénde Judejátyr. I dorakirdepe proti léste dro Jerusalimo, i nastiá jov dro Lahiso. I bičhadé pal léste dro Lahiso, i zamardé les odój. I jandlé les pe grénde, i garadó jov sys dro Jerusalimo péskire dadénca dro Davidóskiro fóro. I lyné saré Judejákire manušá Azarijas, savéske sys dešušov berš, i čhudé les kralísa zamiést léskire dadéste Amasijaste. Jov obkerdia Jelafo i otdyjá les Judáske, paló (poslie) dová, syr králi pasijá péskire dadénca. Pe dešupandžto berš Amasijaskiro, Ioasoskire-čhavéskiro, kon sys králi pe Judéia, jaciá kralísa Jerovoámo, Ioasoskiro čhavó, Izrailjoskiro králi, dre Samárija, i sys jov kralísa štardešá jekh berš. I kerdiá jov fuipén dre Ráskire-Devléskire jakhá: jov na otgijá saré Jerovoamoskire grehéndyr, Navatoskire-čhaveskirendyr, savó zalydžijá Izrailjo dro grého. Jov riskirdiá bregoskire rigá Izrailjoskire, zagiibnastyr dre Jemafo ke mórjo (derjáv) pe čhučí phuv, pir lav Ráskire-Devléskiro, Devléskiro Izrailjoskiro, savó Jov phendiá pirdál Péskire pishariste Ionaste, Amafiinoskire čhavéste, prorokoste Gafhiefierostyr. Pal-dová so Raj Devél dykhciá bída Izrailjoskiri, drieván kirki adiáke, so na jaciápe ni bešybnaris, ni vol'none manušés, savó jaciápe, i na sys nikonés, kon délas by vast Izrailjoske. I na zakamdiá Raj Devél te vylydžal lav Izrail'tianengiro tel bolybnástyr, i zrakhciá len Jerovoamoskire vastésa, Ioasoskire-čhaveskiresa. Javír lav pal Jerovoamoste i pal saró, so jov kerdiá, i pal murškané léskire réndy, syr jov mardiápe i syr riskirdiá Izrailjoske Damásko i Jemafo, saví sys Judaskiri, isyn začhindló dre beršýtka arhívy pal Izrailjoskire kral'jénde. I pasijá Jerovoámo péskire dadénca, Izrailjoskiro kral'jénca. I jaciá kralísa Zahárija, léskiro čhavó, pe štéto léskiro. Pe biš te eftáto berš Jerovoamoskiro, kon sys králi pe Izrailjo, jaciá kralísa o Azárija, Amasijaskiro čhavó, králi pe Judéia. Dešušov berš sys léske, kiéli jaciá jov kralísa, i pandždešá duj berš jov sys kralísa dro Jerusalimo. Lav léskire-dákiro sys e Jehodija, Jerusalimóstyr. Jov kerdiá lačhipén dre Ráskire-Devléskire jakhá dro saró adiáke, syr kerdiá o Amásija, léskiro dad. Jekh vučipená na sys otparude: manušá kerdé iščo (inké) svénta janybená (žertvy) i xačkirdé dróga smóly pe vučipená. I domardiá Raj Devél dukhasa kralís, i sys jov nasvaló prokazasa ke péskiro meribnaskiro dyvés, i dživdiá dro javír kher. A Iofámo, kralískiro čhavó, sys barydyrésa pe kher i rikirdia zor pe phuvjákire manušénde. Javír lav pal Azarijaste i pal saró, so jov kerdiá, isyn začhindlé dre beršýtka arhívy pal Judejákire kral'jénde. I pasijá o Azárija péskire dadénca, i garadé les dadénca leskirenca dro Davidóskiro fóro. I jaciá kralísa Iofámo, léskiro čhavó, pe štéto léskiro. Pe trijánda-ohtóto berš Azarijaskiro, kralískiro Judejátyr, jaciá kralísa o Zahárija, Jerovoamoskiro čhavó, pe Izrailjo dre Samárija, i sys kralísa šov čhoná. Jov kerdiá fuipén dre jakhá Ráskire-Devléskire, syr kerdé léskire dadá: na jačkirdiá Jerovoamoskire gréhi, Navatoskire čhavéskire, savó zalydžijá Izrailjo dro grého. I dorakirdiape proti léste o Sielumo, Iavisoskiro čhavó, dyjá dre léste i mardia les angíl manušénde, i mulakirdia les; i jaciá kralísa pe štéto léskiro. Javír lav pal Zaharijaste isyn začhindló dre beršýtka arhívy pal Izrailjoskire kral'jénde. Dasavo sys lav Ráskire-Devléskiro, savó jov phendiá Iiujoske, phení: “Tyré čhavé ke štárto ródo javéna te bešén pe Izrailjoskiro trono.” I sys adiáke. O Sielumo, Iavisoskiro čhavó, jaciá kralísa dre trijánda jeniáto berš Azarijaskiro, Judejákire-kralískiro, i sys kralísa jekh čhon dre Samárija. I gijá o Mienaimo, Gadijoskiro čhavó, Fircatyr, i javdiá dre Samárija, i čhindiá Sielumos, Iavisoskires čhavés, dre Samárija, i zamardiá les, i jaciá kralísa pe štéto léskiro. Javír lav pal Sielumoste i pal léskiro zrakiribén, savó jov sčhudia, isyn začhindló dre Izrailjoskire-kral'jéngire beršýtka arhívy. I domardiá o Mienaimo fóro Tipsaho i sarén manušén, savé sys dre léste i pašýl léste, lyi Fircatyr, pal-dová so fóro na otčhakirdiá pórta, i rozmardiá les; i saré peralen džuvlién dre léste rosčingirdia [léngire pera-ju.o.]. Pe trijánda jeniáto berš Azarijaskiro, kon sys králi pe Judéia, jaciá kralísa o Mienaimo, Gadijoskiro čhavó, pe Izrailjo; i sys králi jov deš berš dre Samárija. I kerdiá jov fuipén dre Ráskire-Devléskire jakhá; jov na jačkirdiá Jerovoamoskire gréhi, Navatoskire-čhavéskire, savó zalydžijá Izrailjo dro grého, dre saré péskire dyvesá. Tedy javdiá o Fulo [Pul-ju.o.], Asirijákiro (Aramieicengiro) králi, pe Izrailjoskiri phuv. I dyjá Mienaimo Fuloske tysjonco šékieli rup, sob (kaj) vastá léskire te javén sys pal léste, i sob (kaj) te kerél zoraledýr kralipén dre léskiro vast. I rosčhudiá o Mienaimo davá rup pe Izrail'tianende, pe saré barvalé manušénde, pir pandždešá šékieli rup pe kažnoné (svakone) manušéste, sob (kaj) te otdél Asirijákire kralíske. I risijá pale králi Asirijatyr i na jaciápe jov odój pe phuv. Javír lav pal Mienaimoste i pal saró, so jov kerdiá, isyn začhindló dre beršýtka arhívy pal Izrailjoskire kral'jénde. I pasijá Mienaimo péskire dadénca. I jaciá kralísa o Fakija, léskiro čhavó, pe štéto léskiro. Dre pandždešytko berš Azarijaskiro, Judejaskire-kralískiro, jaciá kralísa Fakija, Mienaimoskiro čhavó, pe Izrailjo dre Samárija, i sys kralísa duj berš. I kerdiá jov nalačhés dre Ráskire-Devléskire jakhá; jov na jačkirdiá Jerovoamoskire gréhi, Navatoskire-čhavéskire, savó zalydžijá Izrailjo dro grého. I sčhudia proti léste zrakiribén o Fakiejo, Riemalijaskiro čhavó, barydyró (sanovniko) léskiro, i muliakirdiá les dre Samárija dre štúba kralískire-kheréskiri, khetané Argovosa i Arijemosa, jov jandiá pésa pandždešá manušén Galaaditianen, i zamardiá les, i jaciá kralísa pe štéto léskiro. Javír lav pal Fakiejoste i pal saró, so jov kerdiá, isyn začhindló dre beršýtka arhívy Izrailjoskire kral'jéngire. Pe pandždešá javír berš Azarijaskiro, Judejákire kralískiro, jaciá kralísa Fakiejo, Riemalijoskiro čhavó, pe Izrailjo dre Samárija, i sys kralísa biš berš. I kerdiá jov fuipén dre Ráskire-Devléskire jakhá, jov na jačkirdiá Jerovoamoskire gréhi, Navatoskire čhavéskire, savó zalydžijá Izrailjo dre grého. Dre dyvesá Fakiejoskire, Izrailjoskire-kralískire, javdiá Fieglafielasaro, Asirijákiro králi, i lyjá Iono, i Asoro, i Galaádo, i Galiliéia, sarí phuv Niefalimoskiri, i pirilydžija len te dživén dre Asirija. I sčhudia zrakiribén o Osija, Iloskiro čhavó, próti Fakiejoste, Riemaliinoskire čhavéste, i pekadiá les, i zamardiá les, i jaciá kralísa zamiést léste pe bišengiro berš Ioafamoskiro, Ozijaskire čhavéskiro. Javír lav pal Fakiejoste i pal saró, so jov kerdiá, isyn začhindló dre beršýtka arhívy Izrailjoskire-kral'jéngire. Pe javír berš Fakiejoskiro, Riemaliinoskire čhavéskiro, kon sys Izrailjoskiro králi jaciá kralísa Ioafamo, Ozíiaskiro čhavó, kon sys králi pe Judéia. Biš te pandž berš sys léske, kiéli jov jaciá kralísa, i dešušov berš jov sys kralísa dro Jerusalimo. Lav léskire dákiro sys Jeruša, Sadokoskiri čhaj. Jov kerdiá lačhés dre jakhá Ráskire-Devléskire dre saró, syr kerdiá Ozíia, léskiro dad, adiáke kerdiá i jov. Jekh vučipená na sys otparude: manušá kerdé iščo (inké) svénta janybená (žertvy) i xačkirdé dróga smóly (kurinyben) pe vučipená. Jov čhudiá upratuny pórta pašýl Ráskire-Devléskiro Kher. Javír lav pal Ioafamoste i pal saró, so jov kerdiá, isyn začhindló dre Judejákire-kral'jéngire beršýtka arhívy. Dre dolé dyvesá lyjá Raj Devél te bičhavel pe Judéia Riecynos, Sirijakire kralís, i Fakiejos, Riemaliinoskire čhavés. I pasijá Ioafamo péskire dadénca, i sys garadó péskire dadénca dre Davidóskiro fóro, léskire dadéskiro. I jaciá kralísa Aházo, léskiro čhavó, pe štéto léskiro. Pe dešueftato berš Fakiejoskiro, Riemaliinoskire-čhavéskiro, jaciá kralísa Aházo, Ioafamoskiro čhavó, kon sys králi pe Judéia. Biš berš sys Ahazoske, kiéli jov jaciá kralísa, i dešušov berš jov sys kralísa dre Jerusalimo, i jov na kerdiá lačhés dre jakhá péskire Ráskire-Devléskire, syr Davído, léskiro dad. Ne psirdiá jov dromésa Izrailjoskire kral'jengiresa i adiáke-pac' čhavés péskires lydžijá pirdál jag, kerdiá manušéngire magiribena, savén protradyja Raj Devél móstyr Izrailjoskire-čhavéndyr. I kerdiá svénta janybená (žertvy) i xačkirdiá dróga smóly pe vučipená i pe bérgi i tel kažno zeleno kašt. Tedy gijá Riecyno, Sirijákiro králi, i Fakija, Riemaliinoskiro čhavó, kon sys Izrailjoskiro králi, proti Jerusalimo, sob (kaj) te len les, i rikirde Ahazos dre osada, ne te pirizorjakiren na mogindlé. Dre dová časo Riecyno, Sirijákiro králi, riskirdiá Sirijake Jelafo i vytradyjá Judejákire manušén Jelafostyr; i Idumejani zaginé dro Jelafo, i dživéna odój ke davá dyvés. I bičhadiá Aházo manušén ke Fieglafielasaro [Tiglat-Pilesero-ju.o.], Asirijákiro králi, te phenél: “Pishári tyró i čhavó tyró me som; jav i zrákh man Sirijakire-kralískire vastéstyr i Izrailjoskire-kralískire vastéstyr, savé ĥazdynépe pe mánde. I lyjá Aházo rup i suvnakái, savó sys dre Ráskire-Devléskiro Kher i dre piraliá kralískire-kheréskire, i bičhadiá Asirijaskire kralíske syr dre dáro (počastunko). I kandyjá les Asirijákiro králi; i gijá Asirijákiro králi pe Damásko, i lyjá les, i pirilydžija léskire manušén dre Kiro, a Riecynos zamardiá. I gijá králi Aházo gil (pe striéč) Fieglafielasaroske, kon sys králi pe Asirija, dre Damásko, i dykhciá altárjo (žertvieniko), savó sys dro Damásko, i bičhadiá králi Aházo Urijaske rašáske risunko pal altárjo i plano, syr saró te kerén. I kerdiá rašáj Urija altárjo pir sykaibnytko (primiérno) risunko, savó bičhadiá králi Aházo Damaskostyr; i kerdiá adiáke rašáj Urija ke javiben Ahazóskiro, kralístyr pe Damásko. I javdiá králi Damaskostyr, i dykhciá králi altárjo, i podgíia králi ke altárjo, i jandiá pe léste svénto janybén Ráske-Devléske. I xačkirdiá célo shačkiribén péskiro i marunó janybén, i počhudia čhuibén péskiro, i bryzgindia ratésa péskire mirnone sventoné-dyibnástyr Ráske-Devléske péskiro altárjo. A xarkuno altárjo, savó sys angíl muj Ráskire-Devléskire, jov piričhudia Khangirjákire moskire rigátyr, štetóstyr, savó sys maškirál nevoné altarjostyr i kheresa Ráskire-Devleskiresa, i čhudiá les dalé rigátyr pe šylaly/paš-ratítko (sievierno) rig. I dyjá uphenybén králi Aházo rašáske Urijaske, phení: “Pe baró altárjo xačkir pe zlóko (ránko) célo shačkiribén i bel'velitko marunó janybén, i célo shačkiribén kralístyr i mareskiro janybén léstyr, i célo shačkiribén saré-phuvjákire manušéndyr i marunó janybén léndyr, i čhuibén pe lénde, i kažnoné ratésa célo shačkiribén i kažnoné sventoné janybnaskire Ráske-Devléske ratésa počhuv les; a altárjo xarkuno jačélape ke miro dykhibén.” I kerdiá rašáj Urija saró adiáke, syr priphendiá králi Aházo. I vyphagirdia králi Aházo krengla ramkicy trusciál predki pe róty, i zlyjá léndyr čaré vaš muj, i mórjo (derjáv) zlyjá xarkuné guruvendyr, savé sys tel léste, i čhudiá les pe baruno péto (pólo/mósto). I otparudia učhakirdo savatoskiro (subotakiro) psiriben, savó kerdé pašýl Khangirí, i andratuno kralískiro zagiibén ke Ráskire-Devléskiro Kher, vaš Asirijákire kralíste. Javír lav pal Ahazoste, so jov kerdiá, isyn začhindló dre beršýtka arhívy pal kral'jénde Judejátyr. I pasijá Aházo péskire dadénca, i sys garadó péskire dadénca dre Davidóskiro kher. I jaciá kralísa Jezekíia, léskiro čhavó, pe štéto léskiro. Pe dešuiavir berš Ahazóskiro, Judejákire kralískiro, jaciá kralísa Osija, Iloskiro čhavó, dre Samárija pe Izrailjo, i sys kralísa jeniá (bijekhéskiro deš) berš. I kerdiá jov fuipén dre jakhá Ráskire-Devléskire, ne na adiáke, syr Izrailjoskire králja, savé sys angledýr léstyr. Pe léste vygijá Salmanasaro, Asirijákiro králi, i poddyjape Osija syr vužlo léske i otdelas léske dan' (pritasady). I dykhciá Asirijákiro králi, so Osija parudia léske, adiáke syr jov bičhadiá manušén ke Sigoro, Jegiptóskiro králi i na janelas dan' Asirijákire kralíske kažno berš; i lyjá les Asirijákiro králi tel rakhiben, i zaphandia les dre bešyben. I gijá Asirijákiro králi pe sarí phuv, i podgíia ke Samárija, i rikirdia la dre osada trin berš. Pe jeniáto berš, syr lyjá te kralinél Osija, Asirijákiro králi lyjá Samárija, i lydžijá Izrail'tianén te dživén ke Asirija, i čhudiá len dre Xalaho i dro Xavoro, pašýl reka (len') Gozano, i dre fórja Midijakire. Kiely lyné te kerén grého Izrailjoskire čhavé angíl péskire Raste-Devléste, Savó vylydžijá len Jegiptóskire phuvjátyr, tel faraonóskire vastéstyr, savó sys králi pe Jegípto, i lyné te den patýv javire devlorénge, i lyné te kerén pir manušéngire uphenybená, savé sys Náiudy, i, savén tradyjá krig Raj Devél móstyr Izrailjoskire čhavengirestyr, i pir uphenybená Izrailjoskire kral'jéndyr, syr kerdé jone. I lyné te kerén Izrailjoskire čhavé nalačhé réndy péskire Ráske-Devléske, i kerdé péske vučipená dre saré péskire fórja, lyi rakhibnar'itkone vučardiatyr (bašniatyr) ke fóro zoralé tynénca. I čhudé péste statuly i formy Astartake pe kažno vučí bérga i tel kažno zeleno kašt. I lyné odój te xačkirén dróga smóly pe saré vučipená, syr Najudýtka manušá, savén vytradyjá léndyr Raj Devél, i kerdé nalačhé réndy, savé xoliakirenas Ras-Devlés. I dynarindlé (služyndle) idolénge, pal savénde rakirdiá lénge Raj Devél: “Na kerén davá.” Tedy Raj Devél pirdál saré Péskire prorokénde, pirdál kažnonéste, prirakhelas Izrailjo i Judas, rakirí: “Risjon tumaré fujé dromendyr, i rakhén Miré priphenybená, uphenybená Miré, pir saró sykliaiben, savó Me priphendjom dadénge tumarenge, i savó Me dyjom tuménge pirdál Miré prorokénde.” Ne jone na kandyné i kaštaliakirde meniá péskire, syr sys meniá léngire dadengíre, savé na patiandyné dre péskire Raste-Devléste. I lyné te na prilén Léskire uphenybená, i Zaviéto Léskiro, savó Jov kerdiá léngire dadénca, i prirakhibena Léskire, savénca Jov prirakhcia len, i giné jone palál pal xarnypén (pustota), i palál pal manušénde, savé dživdé pašýl, pal savénde Raj Devél rakirdiá lénge, sob (kaj) te na kerén adiáke, syr jone. I jačkirdé saré priphenybená Ráskire-Devléskire, péskire Devléskire, i kerdé péske vyčhudé muiá dujén guruvén, i kerdé dembitko viešoro, i mangnepe saré duhenge bolybnaskirenge, i dynarindlé Vaaloske. I lydžánas péskire čhavén i čhajén péskire pirdál jag, i drabakirde, i čovahaniakirde, i otdynepe doléske, sob (kaj) te kerén nalačhés dre Ráskire-Devléskire jakhá i te xoliakiren Les. I rosholiasyja Raj Devél zoralés pe Izrail'tianende, i otriskirdia len Péskire móstyr. Na jaciápe nikonés apríč jekhe Judáskiro ródyco. I o Juda adiáke-pac' na rakhciá Ráskire-Devléskire, péskire Devléskire priphenybená, i kerdiá pir Izrailjoskire uphenybená, syr kerdé jone. I otrisija Raj Devél saré Izrailjoskire rodendyr, i primirindia (teliakirdia) len, i otdyjá len dre vastá čorenge, i pe kónco (jagóro) otriskirdia len Péskire móstyr. Syr Izrail'tiáni durine Davidóskire kheréstyr, i čhudé kralísa Jerovoamos, Navatoskire čhavés; to i ottradyja Jerovoámo Izrail'tianén Rástyr-Devléstyr i zalydžijá len dro baró grého. I kerdé Izrailjoskire čhavé pir saré Jerovoamoskire gréhi, savé jov kerdiá, na otiačne léndyr, paka Raj Devél otriskirdia Izrailjo Péskire móstyr, syr rakirdiá pirdál Péskire pishar'jénde, prorokénde. I sys pirilydžinó Izrailjo péskire phuvjátyr dre Asirija, kaj jov i ke davá dyvés. I pirilydžija te dživén králi Asirijákire manušén Vavilonóstyr, i Kutatyr, i Avatyr, i Jemafatyr, i Sieparvaimatyr, i občhudiá te dživén len dre Samarijakire fórja pe štéto Izrailjoskire čhavéngiro. I jone zauhtylde Samárija, i lyné te dživén dre lákire fórja. I syr dre anglatunó péskiro džiibén jone odój na dyné patýv Ráske-Devléske, tedy Raj Devél bičhadiá pe lénde ščerén (lieven), savé muliakirdé len. I rosphendlé Asirijákire kralíske, i phendlé: “Manušá, savén tu piričhudian te dživén, i dyján te dživén len dre Samarijakire fórja, na džinéna zakóno dolé phuvjákire Devléskiro, i pal dová Jov bičhavéla pe lénde ščerén (lieven), i ĥáda, jone muliakirena len, pal-dová so jone na džinéna zakóno Devléskiro dolé phuvjákiro.” I priphendiá Asirijákiro králi, i phendiá: “Bičhaven odorík jekhe manušés rašandyr, savén tumé piričhude zorjása (vysilindle) odothýr; mek te džal i te dživél odój, i jov vysykliakirela len zakonoske dolé phuvjákire pal Devléste.” I javdiá jekh manúš rašandyr, savén vyčhudé Samarijatyr, i dživdiá ke Viefíljo, i sykliakirdiá len, syr te den patýv Ráske-Devléske. Ĥaljon, jone kerdé kažna (svaka) manušá i peskiren devloré, i čhudé len dre mangipnytka štéty pe vučipená, savé kerdé Samariani, – svaka manušá dre péskire fórja, kaj dživénas jone. Vaviloniani kerdé Sukkotbienofenos, Kutiicy kerdé Niergalos, Jemafiani kerdé Ašyma. Aviicy kerdé Nivhazos i Tartakos, a Sieparvaimcy xačkirdé peskiren čhavén dre jag Adramieliehoske i Anamieliehoske, Sieparvaimskone devlorénge. Maškir davá saró jone dénas patýv i Ráske-Devléske, i čhudé péste rašán pe vučipená péskire manušéndyr, i jone dynarindlé lénde dre mangipnytka štéty pe vučipená. Ráske-Devléske jone dénas patýv, i devlorénge peskirenge jone dynarindlé pir maniéra manušéngiri, savéndyr vyčhurdyne len. Ke davá dyvés keréna jone pir anglatuné péskire maniéry: jone na darén Rástyr-Devléstyr, i na keréna pir statúty i pir uphenybená, i pir Zakóno i pir Priphenybená, savé priphendiá te kerén Raj Devél Jakovóskire čhavénge, savéske dyjá Jov Izrailjoskiro lav. Sčhudia Raj Devél lénca Zaviéto i priphendiá šylales lénge, rakirí: “Na den patýv devlorénge javirénge, i na mangénpe lénge, i na dynarinén lénge, i na janén svénta dyibená lénge: Ne Ras-Devlés, Savó vylydžijá tumen Jegiptóskire phuvjátyr baré zorjása barjasa i protyrdyne vastésa, – Léske den patýv, i Léske mangénpe, i Léske janén svénta dyibén. I statúty, i uphenybená, i Zakóno, i priphenybená, savé Jov čhudiá tuménge, pričhuvén zor te spolninen dre saré dyvesá, i na den patýv devlorénge javirénge. I Zaviéto, savó Me čhudjom tuménca, na bistren, i na den patýv devlorénge javirénge. Jekhe Ráske-Devléske (Jahvaske), Devléske tumareske, den patýv, i Jov zrakhéla tumen saré tumaré vergéngire (vrogengire) vastéstyr.” Ne jone na kandyné, a kerdé pir anglatuné péskire maniéry. Dalé manušýtka nácyi dénas patýv Ráske-Devléske, ne i peskirenge vyčhindlé mujénge dynarindlé. Adiáke i čhavé léngire i čhavé léngire čhavéngire ke davá dyvés keréna adiáke-pac', syr kerdé léngire dadá. Pe tríto berš Osijaskiro, Ilaskire-čhavéskiro, kon sys králi pe Izrailjo, jaciá kralísa Jezekíia, Ahazóskiro čhavó, Judejákire-kralískiro. Biš te pandž berš sys léske, kiéli jov jaciá kralísa, i biš te jeniá berš jov sys kralísa dro Jerusalimo; lav léskire-dákiro sys Avi, Zaharijaskiri čhaj. I kerdiá jov lačhés dre jakhá Ráskire-Devléskire dro saró adiáke, syr kerdiá Davído, léskiro dad. Jov otparudia vučipená, rozmardiá statuly, vyčingirdia demby i xarkuné sapes, savés kerdiá Mójza, – pal-dová so ke sama dolé dyvesá Izrailjoskire čhavé thuvaliakirde léske i khardé les ‘Niehuštano.’ Jov patiandyja zoralés dre Raste-Devléste, Izrailjoskire Devléste; i adadysaves, syr jov, na sys maškír sarénde Judeijakire kral'jénde i paló (poslie) léste i angledýr léstyr. I prilipnindia jov ke Raj Devél, i na otgijá Léstyr, i rakhciá Léskire priphenybená, savé priphendiá Raj-Devél Mojzáske. I sys Raj Devél lésa usiéndie (viezdie), i karik jov na psirdiá, to kerdiá jov god'vares. I sčhudia ĥámo jov péstyr Asirijákire kralístyr, i na jaciá te dynarinél léske. Jov tradyjá Filistimlianen ke Gaza i dre lákire miéžy pir rigá, rakhibnarjakire vučardiatyr (bašniatyr) ke fóro zoralé tynosa. Pe štárto berš, syr lyjá te kralinél Jezekíia, dre savó sys pe eftáto berš Osijaskiro, Ilaskire-čhavéskiro, Izrailjoskire kralískiro, gijá Salmanasaro, Asirijákiro khieningo, pe Samárija i občhudiá xaladybnasa la. I lyjá la pirdál trin berš. Pe šóvto berš Jezekijáskiro, savó sys pe jeniáto berš Osijaskiro, Izrailjoskire-kralískiro, Asiriicy lyné Samárija. I piričhudia te dživén Asirijákiro králi Izrail'tianén dre Asirija, i mekciá len te dživén ke Xalaho i dro Xavoro, pašýl reka (len') Gozana, i dre Midijakire fórja. Pal-dová, so jone na šundlé péskire Ráskire-Devléskiri zan (glos), i piriginé Zaviéto Léskiro, saró, so priphendiá lénge Mójza (Moisiejo), Ráskire-Devléskiro pishári; jone i na šundlé, i na spolnindle. Pe dešuštarto berš Jezekijáskiro kralískiro, gijá Sienahirimo, Asirijákiro králi, proti sarénde Judáskire fórja zoralé tynénca i lyjá len. I bičhadiá Jezekíia, králi Judejákiro, ke králi Asirijákiro dro Lahizo te phenél: “Bangó me som; otdža mándyr; so čhuvésa pe mánde, dová me otdáva.” I čhudiá králi Asirijákiro pe Jeziekijaste, Judejákire kralíste trinšelá šékieli rup i trijánda šékieli suvnakái. I otdyjá Jezekíia saró rup, savó lathiape dro Ráskire-Devléskiro Kher i dre piraliá kralískire kheréskiro. Dre dolé dyvesá zlyjá Jezekíia suvnakáj Ráskire-Devléskire Khereskire vudarendyr i stylbengire vudarendyr, savé suvnakuniakirdia Jezekíia, Judejákiro králi, i otdyjá les Asirijákire kralíske. I bičhadiá Asirijákiro králi Tartanos, i Rabsarisos, i Rabsakos Lahisostyr ke králi Jezekíia buté xaladenca dre Jerusalimo. I giné, i javné jone ke Jerusalimo; i giné, i javné, i terdiné pašýl panieskiro prolydžiibnytko (vodoprovodo) upratune venderjátyr (prudostyr), savó sys pe drom ke félda, kaj parniakirenas pohtana. I khardé jone kralís. I vygijá ke jone Jeliakimo, Xielkiinoskiro čhavó, feliatiniakiro/kolovóskiro (dvorcoskiro) barydyró, i Siévna, lylá-čhinybnaskiro (pisco), i Ioaho, Asafoskiro čhavó, kanceliari. I phendiá lénge Rabsako: “Phenén Jezekijaske: ‘Adiáke rakiréla králi baró Asirijákiro králi: saví isyn nadiéia, pe saví tu rozginesa (savó davá isyn tyró lačhó užakiribén, pe savó tu dopatiasa). Tu rakirdian jekh čhučé (pusta) lavá: vaš maribén trej godypén i zor. Kakaná, pe konéste tu čhuvésa nadiéia, so otgijan mándyr? Ĥáda, tu duminesa te rikirespe pal Jegípto, davá destó phagirdó, savó, kóli kon javéla te rikirelpepe pal léste, adole manušéske zadžála jov (destó) léske dro vast i prophusavela les. Davá isyn faraóno, Jegiptóskiro králi, vaš sarénge, kon čhuvéla nadiéia pe léste. A kóli tumé phenéna mánge: ‘Pe Raste-Devléste amareste ame čhuvasa nadiéia,’ tedy ci pe doleste, saveskire vučipená i altarja otparudia Jezekíia, i phendiá Judáske i Jerusalimoske: Angíl davá jékh altárjo (žertvieniko) mangénpe dre Jerusalimo? I adiaka zadžá dre dorakiribén sovlahasa miré xulása Asirijákire kralísa; me dáva túke duj tysjoncy gren, ci tu moginésa te doreses péske manušén, savé bešena uklisté pe lénde? Syr túke te pirizorjakires (te zdolines) i jekhés šerales miré xuláskire tyknedyršonendyr dynarís? I tu čhuvésa nadiéia pe Jegípto vaš vurdyná i grenge? Pir saró akaná, naúšto me bi Ráskire-Devléskire laveskiro gijomas pe davá štéto, sob (kaj) te xasiakiráv les? Raj Devél phendiá mánge: ‘Džá pe daja phuv, i xasiakir la.’” I phendiá Jeliakimo, Xielkiinoskiro čhavó, i Siévna [Šebna-ju.o.], i Ioaho Rabsakoske: “Rákir pishar'jénge tyrenge pir aramieitko čib, pal-dová so ĥaljovasa ame, a na rákir aménca pir judýtko čib dre saró šunybén manušéngiro, savé isyn pe vánta.” I phendiá lénge Rabsako: “Naúšto jékh ke tyró xuláj i ke tu bičhadiá man xuláj miro te phenáv dalé lavá? Nad, adiáke-pac' i ke manušá, savé isyn bešté pe vánta, sob (kaj) te xan nažužypen péskiro i te p'jen mutyra péskire tuménca.” I uštyjá Rabsako, i phendiá sarénge zoralé zaniása pir judýtko, i rakirdiá, i phendiá: “Šunén lav baré kralískiro, Asirijákire-kralískiro! Adiáke rakiréla králi: ‘Mek te na xohavél tumen Jezekíia, pal-dová so jov na moginéla tumen te zrakhél miré vastéstyr.’ I mek te na del nadiéia tuménge Jezekíia Rása Devlésa, rakirí: ‘Zrakhéla amen Raj Devél, i na javéla davá fóro otdynó dre Asirijákire-kralískire vastá.’ Na šunén Jezekijas. Pal-dová so adiáke rakiréla Asirijákiro králi: ‘Kerén dorakiribén (sojuzo) mánca i vydžán ke me, i mek kažno (sváko) te xal múri péskire-vinagradytkone xrustostyr i inžyro péskiro, i mek kažno (sváko) te p'jel paní péskire ĥanyngatyr. Paka me javáva i lavá tumen pe dasaví-pac' phuv, syr i tumarí phuv isyn, pe phuv maritko i molitko mareskiri i moliakiri, pe olivítko phuv i pe avgineskiri phuv, i javéna tumé te dživén, i na meréna. Na šunén Jezekijas, savó xohavela tumen, rakirí: ‘Raj Devél zrakhéla amen.’ Ci zrakhné devloré manušéngire nacyiéndyr, kažno (sváko) pe péskiri phuv, Asirijákire-kralískire vastéstyr? Kaj isyn devloré Jemafoskire i Arpadoskire? Kaj isyn devloré Sieparvaimoskire, Jenaskire i Ivaskire? Ci zrakhné jone Samárija miré vastéstyr? Kon saré devlorendyr dalé phuv'jendyr zrakcja phuv péskiri miré vastéstyr? Adiáke naúšto Raj Devél zrakhéla Jerusalimo miré vastéstyr?’” I molčyndle (sys štyl) manušá, i na otphendlé léske ni lav; pal-dová so sys priphenybén kralískiro: na otphenen léske. I javdiá Jeliakimo, Xielkiinoskiro čhavó, felatiniakiro barydyró, i Siévna, lylá-čhinybnaskiro, i Ioaho, Asafoskiro čhavó, kanceliari (diejepisatieljo), ke Jezekíia dre roskušne ídi, i piriphendle léske lavá Rabsakoskire. Kiéli šundiá králi Jezekíia davá, to tedy roskustia péskire ídi, i učhakirdiape gonesa dre práska (pieplo), i gijá dro Ráskire-Devléskiro Kher. I bičhadiá králi Jeliakimos, felatiniakire barydyrés, i Sievnas, i phuredyršone rašán, učhakirden gonenca dre práska, ke Isajo proróko, Amasoskiro čhavó. I jone phendlé léske: “Adiáke rakiréla Jezekíia: ‘Davá dyvés isyn dyvés vaš túga i vaš naphenyben i vaš ladžaipén pharó, i kaló, i ladžakirdó; pal-dová so doginé tyknemasa ke kula (vygiiben) dre ločoví (utroba) dajéngiri, a te bijanél džuvliáke nane zor. Saštý (moginéla) te javél, so šunéla Raj Devél, Devél tyró, saré Rabsakoskire lavá, savé bičhadiá Asirijákiro králi, léskiro xulái, te košel Devlés džides i te kaliakirel les lavénca, savé šundiá Raj Devél, Devél tyró. Phen upré pátieri (molítva). Mangpe pal manušénde, savé jačnépe, savé isyn iščo (inké) džidé.” I javné dynárja kralískire Jezekijaskire ke Isajo. I phendiá lénge Isajo: “Adiáke phenén tumaré xuláske: ‘Adiáke rakiréla Raj Devél: na dar lavéndyr, savé tu šundián, savénca kaliakirde Man Asirijákire-kralískire dynárja. Ĥáda, Me bičhaváva dre léste dúho (fáno), i jov šunéla zan (zvies'), i risjola pe péskiri phuv, i Me domarava les kurtalása pe léskiri phuv.’” I risijá o Rabsako, i lathiá Asirijákire kralís, savó mardiápe proti Livna; pal-dová so jov šundiá, so odová otgijá Lahisostyr. I šundiá jov zan (zvies') pal Tirgakoste, Jefiopijakire kralíste; syr léske phendlé: “Ĥáda, jov vygijá te marélpe túsa.” I nevés bičhadiá jov manušén ke Jezekíia te phenén. “Adiáke phenén Jeziekijaske, Judejákire kralíske: ‘Mek te na xohavél tut Devél tyró, pe Savéste tu rikiresa nadiéia, duminy: na javéla otdynó Jerusalimo dre Asirijákire-kralískire vastá. Haj, tu šundián, so kerdé Asirijákire králja saré phuv'jénca, čhudé pe lénde prokošybena (armania), – i so, tu zrakhesape? Devloré manušéngire, savén rosphagirdé miré dadá, ci zrakhné len? Ci zrakhné jone Gozanos, i Xaranos, i Riecefos, i Jedienoskire čhavén, savé sys dre Falasara? Kaj isyn králi Jemafoskiro, i králi Arpadoskire, i králi pe fórja Sieparvaimo, Jena i Iva’?” I lyjá Jezekíia lyl vastéstyr manušengirendyr, savé sys pribičhade, i gindia (dyja upre) les, i gijá dro Ráskire-Devléskiro Kher, i rozriskirdia les Jezekíia angíl Ráskire-Devléskiro muj. I mangdiápe Jezekíia angíl Raste-Devléste, i rakirdiá: “Rajo Dévla, Devél Izrailjoskiro, Savó isyn beštó pe xieruvimy! Tu san jékh Devél pe saré phuvjákire kralipená, Tu sozdyjan bolybén i phuv. Rajo Dévla, pričhúv kan Tyró, i šun; otker, Rajo Dévla, jakhá Tyré, i ŭzdykh, i šun lavá Sienahirimoskire, savó bičhadiá te kaliakiren Devlés džides! Čačipén, o, Rajo Dévla, králja Asirijákire rosphagirdé ke ruíny manušén i léngire phuvjá. I čhurdyné lengiren devloré dre jag; ne dalé nane develá, a vyčhindly butý manušéngire-vastengiri, kašt i bar; pal-dová i xasiakirdé len. I kakaná, Rajo Dévla, Devél amaró, zrákh amen léskire vastéstyr, i mek te džinén saré phuvjákire kralipená, so Tu, Rajo Dévla, san Devél Jekh.” Tén'ci bičhadiá Isajo, Amososkiro čhavó zan (zvies'), ke Jezekíia te phenél: ‘Adiáke rakiréla Raj Devél, Devél Izrailjoskiro: Dová, pal so tu mangdiápe Mánge proti Sienahirimoste, Asirijákire kralíste, Me šundjom. Ĥáda, isyn lav, savó vyphendia Raj Devél pal léste: ‘Podykhela vučipnástyr pe túte, i javéla te salpe tútyr patyvalý Sionóskiri čhaj; palál pal túte kuninela šerésa Jerusalimóskiri čhaj. Konés tu kaliakirdian i prokostian? I pe konéste tu ĥazdyjan zan (glos), i gazdyjan adiáke vučés jakhá péskire? Pe Svénto Izrailjo? Pirdál manušénde tyrende, savén tu pribičhadian tu kaliakirdian Ras-Devlés, i phendián: ‘Buté miré maribnytkoné vurdynenca me gijom upré pe bergengiro vučipén, pe pašvare Livanoskire, i čingirdjom baré léskire kiparisy, fedyrša léskire kiparisy i javdjom pe sámo jagoroskiro (krajoskiro) štéto léskiro, dro léskiro untakiro (sadytko) vešoro. I ĥanadjompe me i pijom paní čúžo, i me vyšut'kirava Miré-ĥerengire podešvasa (pirésa) saré Jegiptóskire réki (leniá). Naúšto tu na šundián, so Me ĥarym kerdjom davá, dre ĥaratuné dyvesá pridumindjom davá, a kakaná kerdjom lénge, so tu kerésa čhučé fórja zoralé tynénca, keri léndyr ruíny. I manušá léngire kerdépe bizorjákire, trinskirenape i jačénape dre ladž. Jone jačné syr čar pe félda i niegitko zelenyben, syr zabarino pe strehi (čhakiniá) i piripekno maró angledýr, syr pospieinela. Bešesa ci tu, ci vydžasa, ci zadžasa Me saró džinóm (džináv) i xolý tyrí proti Mánde. Pal tyrí xolý proti Mánde i pal dová, so phut'kiribén tyró dogijá ke kaná Miré, Me čhuváva nangloro Miro dre ruthunia (xrapy) tyré i zamuzdka (cuglia) Miré dre muj tyró, i riskiráva tut pale dolé-pac' dromésa, savésa tu javdián. I ĥáda túke, Jezekíia, ĥiertýk (znamiénijo): xan dre davá berš, so vybarija ziarkatyr, saví pyjá, i pe javír berš – kokoró bijanybnaskiro, a pe tríto berš sieinen i ukeden, i čhuvén dre phuv vinagradýtka unty (sady) i xan léngire barjakirdé (plódy). I manušá, savé jačénape džidé dre Judáskiro kher, kon jaciápe, jone mekéna nevés rukh (kornjo) telál i janéna barjakirde (plódy) upré. Pal-dová so Jerusalimóstyr vydžála jačaibén, i zrakhno Sionoskire bergátyr, Ráskire-Devléskiro, bolybnáskire-jangoléngiro zevlynypén keréla davá. Paldavá adiáke rakiréla Raj Devél pal Asirijákire kralíste: ‘Na zadžála jov dro davá fóro, i na čhurdéla odorík maribnýtka bustiá (striély), i na podžala ke jov ščytosa, i na čhuvéla vučés proti léste valo. Dolé-pac' dromésa, savésa jov javdián, te risjos dolé dromésa jov risjola, i dre davá fóro jov na zadžála,’ – rakiréla Raj Devél. Me javáva te rakhav davá fóro, sob (kaj) te zrakhes les vaš Péske i vaš Davidóske, Miré pisharíske.’” I ake, so kerdiápe dre daja rat: gijá Jangólo Ráskire-Devléskiro i muliakirdiá dre Asirijákiro xaladybén šel ohtodešá pandž tysjoncy manušén. I uštyné jone pe zlóko (pe ránko), i ĥáda, sys saré trúpy. I skedyjape, i gijá, i risijá Sienahirimo, Asirijaskiro králi, i dživdiá ke Niniévija. I kiéli jov mangdiápe dro kher Nisrohoskiro, péskire devloreskiro, tedy Adramieliého i Šariecero, léskire čhavé, zamardé les kurtalása, a kokoré našné pe Araratoskiri phuv. I jaciá kralísa Asardano, léskiro čhavó, pe štéto léskiro. Dre dolé dyvesá zanasvalyja o Jezekíia ke meribén; i javdiá ke jov Isajo, Amososkiro čhavó, proróko, i phendiá léske: “Adiáke rakiréla Raj Devél: ‘Priphen so te kerés tyré kheresa, pal-dová so merésa tu, i na vysastjosa.’” I otrisija Jezekíia péskire mósa ke vánta (sciana), i mangdiápe Ráske-Devléske, rakirí: “O, Rajo Dévla! Priripir, so me psirdjom angíl muj Tyró čačunés i čačunesa ke Tu ilésa, i kerdjom lačhés dre jakhá Tyré.” I zarondia Jezekíia zoralés. Isajo iščo (inké) na vygijá foróstyr, syr sys ke jov Ráskire-Devléskiro lav: “Risjov i phen Jezekijaske, xuláske Miré manušengireske: Adiáke rakiréla Raj Devél, Devél Davidóskiro, tyré dadéskiro: ‘Me šundjom tyró mangipén, dykhcjom tyré jasva. Ĥáda, Me vysastiakirava tut; pe tríto dyvés tu džása dro Ráskire-Devléskiro Kher. I dočhuvava Me ke tyré dyvesá dešupandž berš, i vastéstyr Asirijákire-kraliskirestyr Me zrakháva tut i davá fóro, i zrakháva davá fóro vaš Péske i vaš Davidóske, Miré pisharíske.’” I phendiá Isajo: “Len pučko inžyro.” I lyné, i pričhude ke čyl'čáko (naryvo); i jov vysastija. I phendiá Jezekíia Isajoske: “Saví isyn ĥiertýk (znamiénijo), so Raj Devél vysastiakirela man, i so me džáva pe tríto dyvés dro Ráskire-Devléskiro Kher.” I phendiá Isajo: “Ĥáda, túke isyn ĥiertýk Rástyr-Devléstyr, so rikiréla Raj Devél lav, savó Jov phendiá: “Angíl ci te prodžal zerjáke (tieniake) pe deš ĥierunia (stupien'ki); ci te risjol pe deš ĥierunia.” I phendiá Jezekíia: “Lokhes tieniake (zerjake) te džal angíl (te kharelpe) pe deš ĥierunia; nad, mek te risjol zer (tien') pale pe deš ĥierunia.” I khardiá zoralés Isajo proróko ke Raj Devél, i riskirdiá zer (tien') pale pe deš ĥierunia (stupien'ki), kaj joj zmekelaspe pir stylba (liesvica) Ahazoskiri, pe deš ĥierunia (stupien'ki). Dre dolé dyviesa bičhadiá Bierodaho Baladano, čhavó Baladanoskiro, Vavilonóskiro králi, lylá i počastunko Jezekijaske; pal-dová so jov šundiá, so Jezekíia sys nasvaló. Jezekíia, vyšundia manušén, savé sys bičhadé ke jov, sykadiá lénge piraliá péskire, rup i suvnakái, i aromatytka smóly, i dróga masti, i saró arsienalo (mardiarnia) dro péskiro kher i saró, so isys dre tyknorja i piraliá léskire; na jaciápe nijékh priedmieto (čysa), savó te na sykavél by lénge Jezekíia dro péskiro kher i dro saró péskiro xulaiben. I javdiá Isajo proróko ke králi Jezekíia, i phendiá léske: “So rakirdé adalé manušá, i katýr jone javné ke tu?” I phendiá Jezekíia: “Duratune phuvjátyr jone javné, Vavilonóstyr.” I phendiá Isajo: “So jone dykhné dre tyró kher?” I phendiá Jezekíia: “Saró, so isyn dre kher miro, jone dykhné; na jaciápe ni jekh priedmieto, savó me te na sykavav by lénge dre tyknorja miré.” I phendiá Isajo Jezekijaske: “Vyšún Ráskire-Devléskiro lav: ‘Ĥáda, javéna dyvesá, i lynó javéla saró, so isyn dro kher tyró, i so skedyné tyré dadá ke davá dyvés, dro Vavilóno; ničý na jačélape”, – rakiréla Raj Devél. “Čhavéndyr tyrendyr, savé javéna tútyr, savé tútyr bijandjona, léna, i javéna jone jévnuhi dre Vavilonóskire-kralískiri fielatin/kolov (dvorco).” I phendiá Jezekíia Isajoske: “Lačhó isyn lav Ráskire-Devléskiro, savó tu phendián.” I rakirdiá duredýr: “Mek te javél ramánjo (miro) i lačhipén dre miré dyvesá!” Javír lav pal Jezekijaste i pal saré murškané réndy léskire, i pal dová, so jov kerdiá venderi (prudo) i panitko prolydžiiben i prolydžija paní dro fóro, isyn začhindló dre beršýtka arhívy pal Judejákire kral'jénde. I pasijá viéčnes Jezekíia péskire dadénca, i jaciá kraliska Manásija, léskiro čhavó, pe štéto léskiro. Dešudúj berš sys Manasijaske, kiéli jov jaciá kralísa, i pandždešá berš sys jov kralísa dro Jerusalimo; lav léskire-dákiro sys Xiefcyba. I kerdiá jov fuipén dre jakhá Ráskire-Devléskire, keri pir primiéro (sykaibén) magiripén syr javír manušýtka nácyi, savén protradyja Raj Devél Izrailjoskire čhavéngire móstyr. I nevés kerdiá vučipená, savé rosphagirdiá sarésa léskiro dad o Jezekíia, i čhudiá altári Vaaloske, i kerdiá dembitko vešoro, syr kerdiá Ahávo, Izrailjoskiro králi; i mangdiápe péskire bolybnytkone xaladybnaske, i dynarindiá léske. I kerdiá altári dre Ráskire-Devléskiro Kher, pal savó phendiá Raj Devél: “Dro Jerusalimo čhuváva Me Miro lav.” I kerdiá jov altári saré bolybnytkone xaladybnaske pe duj gredy (dvory) Ráskire-Devléskire Khereskire. I lydžijá péskires čhavés pirdál jag, i drabakirdia, i čovahaniakirdia, i zalydžyja manušén, savé vykharena mulen i čovahanen pir primiéty (špery); but kerdiá fuipén jov dre jakhá Ráskire-Devléskire, sob (kaj) te xoliakirel Les. I čhudiá vyčhindlo muj Astartakiro, savó kerdiá jov dro kher, pal savó rakirdiá Raj Devél Davidóske i Solomonóske, léskire čhavéske: “Dro davá Kher i dro Jerusalimo, savó Me vykedyjom saré Izrailjoskire rodendyr, Me dáva lav Miro pe viéko. I Me na dává butýr, sob (kaj) te vydžál ĥerój manušeskiri Izrail'tianinoskiro phuvjátyr, saví Me dyjom léngire dadénge, kóli jekh jone javéna te pričhuvén zor te kerén dre jekh godý sarésa dolesa, so Me phendjom lénge, i saré Zakonosa, savó priphendiá lénge Miro pishári Mójza. Ne jone na kandyné; i zatyrdyja len Manásija ke dová, so jone kerdé fujedýr dolé manušytkoné nacyiéndyr, savén vymardia Raj Devél Izrailjoskire čhavéndyr. I rakirdiá Raj Devél pirdál Peskirende dynar'jénde, prorokénde, i phendiá: “Pal-dová, so kerdiá Manásija, Judejákiro králi, dasavé magiripena, fujedýr saréstyr doléstyr, so kerdé Amoriéi, savé sys angledýr léstyr, i lydžijá Judas dro grého péskire idolenca, paldavá, – adiáke rakiréla Raj Devél, Devél Izrailjoskiro, – ĥáda, Me janáva dasaví xolý pe Jerusalimo i pe Judaste, pal savéste, kon šunéla, kudunjola (zazvininela) dre duj kaná odoléste. I protyrdava Me pe Jerusalimo šelo te mierinen Samarijatyr i otvieso Ahavoskire kheréstyr, i vykhosava Jerusalimo adiáke, syr vykhosena tahtái, – vykhosena i piririskirena les. I Me otriskirava jačaibén (ostatko) Miré mištypnaskire mieratyr, i Me otdáva len dre léngire vergéngire (vrogengire) vastá, i jone javéna te otkeden saró léndyr saré léngire vérgi.” Paldavá, so jone kerdé fuipén dre jakhá Miré, i xoliakirde Man dolé dyveséstyr, syr vyginé léngire dadá Jegiptóstyr, i ke davá dyvés.” Iščo pročhudia Manásija drieván but rat bibangipnaskire manušéngiro adiáke, so pherdiakirdiá lénca Jerusalimo jagoróstyr ke jagóro, butýr péskire grehostyr, so jov zalydžijá Judas dro grého – te kerél fuipén dre jakhá Ráskire-Devléskire. Javír lav pal Manasijaste i pal saró, so jov kerdiá, i pal léskire gréhi, dro so jov kerdiá grého, isyn začhindló dre beršýtka arhívy pal Judejákire kral'jénde. I pasijá viéčnes Manásija péskire dadénca, i garadó sys dre únta (sado) pašýl kher léskiro, dre únta Uzaskiri. I jaciá kralísa Amono, léskiro čhavó, pe štéto léskiro. Biš te duj berš sys Amonoske, kiéli jov jaciá kralísa, i duj berš jov sys kralísa dro Jerusalimo; lav léskire dákiro sys Miešulliemief, Xarucoskiri čhaj, Jatbatyr. I kerdiá jov nalačhés (fuipén) dre jakhá Ráskire-Devléskire adiáke, syr kerdiá o Manásija, léskiro dad. I psirdiá dolé-pac' dromésa, savésa psirdiá léskiro dad, i dynarindiá idolénge, savénge dynarindiá léskiro dad, i mangdiápe lénge. I jačkirdiá jov Ras-Devlés, péskire dadengíre Devlés, na psirdiá Ráskire-Devléskire dromésa. I sčhude zrakiribén Amonoskire dynárja proti léste, i zamardé kralís dro léskiro kher. Ne manušá dolé-phuvjákire pirimarde sarén manušén, savé sys dre zrakiribén proti kralíste Amonoste; i manušá dolé-phuvjákire čhudé kralísa Iosijas, léskire čhavés, pe štéto léskiro. Javír lav pal Amonoste, so jov kerdiá, isyn začhindló dre beršýtka arhívy pal Judejakire kral'jénde. I garadé les dre léskiri koplíca, dre Uzaskiri únta (sado). I jaciá kralísa Iosija, léskiro čhavó, pe štéto léskiro. Ohtó (bidujéngiro deš) berš sys Iosijaske, kiéli jov jaciá kralísa, i trijandajekh berš jov sys kralísa dro Jerusalimo; lav léskire-dákiro isys Iiedida, Adaijaskiri čhaj, Bockafatyr. I kerdiá jov lačhés dre jakhá Ráskire-Devléskire, i psirdiá dro saró péskire-dadéskire Davidóskire dromésa, i na gijá krig ni pe čačí (pravo), ni pe zérvo (liévo) rig. Pe dešuohtoto berš kralískire Iosijaskire, bičhadiá králi Šafanos, Acalijoskire čhavés, Miešulamoskire čhavés, lylá-čhinybnaskires (piscos), dro Ráskire-Devléskiro Kher, phení: “Džá ke Xielkija, anglatunó rašái, mek jov te piriginel rup, savó sys jandlo dro Ráskire-Devléskiro Kher, savó skedyné manušéndyr, savé sys terdé pe rakhiben, pašýl progo. I mek te otdén les dre vastá manušénge, savé dykhenas pal butiá, savén čhudé ke Ráskire-Devléskiro Kher, a dalé mek te rozden les manušénge, savé keréna butý dro Ráskiro-Devléskiro Kher, sob (kaj) na te podkeren phagiriben kheréskiro. Manušénge, savé keréna butý vešesa (kherá-kheribnaskirenge) i barénca (barunar'jenge), i savé keréna vánty (sciany), i sob (kaj) te kinen kaštá i vyčingirde bará vaš Kher. I sýrby te na phučén léndyr otginyben dro rup, savó sys piridyno dre léngire vastá, pal-dová so jone kerénas čačunés. I phendiá Xielkija, anglatunó rašái, Šafanoske lylá-čhinybnaskireske: “Zakonoskiri lylvarí me lathjom (lastjom) dro Ráskire-Devléskiro Kher.” I podyja Xielkija lylvarí (kniga) Šafanoske, i jov gindia la. I javdiá Šafano, lylá-čhinybnaskiro (pisco) ke králi, i jandiá kralíske otphenybén, i phendiá: “Pishárja tyré lyné tyré dynárja rup, savó lathné (lastne) dro Kher, i piridyne les dre vastá manušénge, savé dykhenas pal butiá, savén čhudé ke Ráskire-Devléskiro Kher. I rosphendiá o Šafano, lylá-čhinybnaskiro kralíske, rakirí: “Lylvarí dyjá mánge Xielkija, rašái.” I gindia la Šafano angíl kralíste. Kiéli šundiá králi lavá Zakonóskire lylvarjatyr, to roskustia ídi péskire. I priphendiá králi Xielkijaske, rašáske, i Ahikamoske, Šafanoskire čhavéske, i Ahboroske, Mihieinoskire čhavéske, i Šafanoske, lylá-čhinybnaskireske, i Asaijoske, kralískire dynaríske, rakirí: “Džán, mangén Ras-Devlés pal mánde, i pal manušénde, i pal sarí Judéia pal lavá dalé lylvarjakire, saví tumé savjá lathné (lastne); pal-dová so bari isyn xolý Ráskire-Devléskiri, saví zahačíia pe aménde pal dová, so na šundlé amaré dadá lavá dalé lylvarjakire, sob (kaj) te kerén adiáke-pac', so sys čhindló aménge.” I gijá Xielkija, rašái, i Ahikamo, i Ahbor, i Šafano, i Asaija ke Aldama, proročyca, Šalumoskiri džuvlý, Tykvoskire-čhavéskire, Xarhasoskire čhavéskire, savó rakhciá ídi, – dživdiá joj ke Jerusalimo, pe javír kvartalo, – i rakirdé lása. I joj phendiá lénge: “Adiáke rakiréla Raj Devél (Jahvá), Devél Izrailjoskiro: Phenén manušéske, savó bičhadiá tumen ke me: ‘Adiáke rakiréla Raj Devél: Me janáva xolý pe davá štéto i pe léskire manušénde, – saré lylvarjakire lavá, saví gindia Judejákiro králi. Pal-dová, so jone jačkirdé Man i thuvaliakirena javire devlorénge, sob (kaj) te xoliakiren Man saré rendénca péskire vastengire, to zahačíia xolý Mirí pe davá štéto, i na murdjola.’ A Judejákire kralíske, savó bičhadiá tumen te mangén Ras-Devlés, phenén: ‘Adiáke rakiréla Raj Devél, Devél Izrailjoskiro, pal lavá, savé tu šundián: Adiáke, syr pokovlyja iló tyró, i tu teliakirdian pes angíl Raste-Devléste, syr šundián dová, so Me phendjom pe davá štéto i pe léskire manušénde, so jone javéna darása i prokošybnasa, i tu roskustian ídi péskire, i rondian angíl Mánde, tedy i Me šundjom tut, – rakiréla Raj Devél. Pal davá, ake, Me čhuváva tut ke tyré dadá, i tu javésa čhudo dre koplíca tyré ramanjosa (mirósa), i na dykhéna tyré jakhá saró dová fuipén, savé Me janáva pe davá štéto.’” I jandlé jone kralíske otphenybén. I bičhadiá králi, i skedyné ke jov sarén Judejakiren i Jerusalimóskire phurydyren. I gijá králi dro Ráskire-Devléskiro Kher, i saré Judejákire manušá i saré manušá Jerusalimóskire lésa, i rašaja, i proróki, i saré manušá, tyknestyr ke baró, i gindia dro šunybén (dyja upre) saré Zavietoskire lylvarjakire lavá, saví lathija (lastia) dro Ráskire-Devléskiro Kher. Paló (poslie) dová králi terdijá pe vučó štéto pašýl stýlbo (čebotar') i kerdiá angíl Ráskire-Devléskiro muj zaviéto – te džas pal Raste-Devléste i te rakhén priphenybená Léskire, i sykadyiben otčhakiriben Léskiro i uphenybená Léskire saré iléstyr i saré diéstyr, sob (kaj) te spolninen dalé Zavietoskire lavá, savé isyn čhindlé dre daja lylvarí. I saré manušá zaginé dro Zaviéto. I priphendiá králi Xielkijaske anglatuné rašáske, i javire rašange, i manušénge, savé sys terdé pe rakhiben pašýl progo te vylydžan Ráskire-Devléskire Khangirjátyr saré khoré (sasúdy), savé kerdé vaš Vaalo, i vaš Astarta, i vaš saró xaladybén bolybnytko, i te xačkirén len pal Jerusalimo, pe dólo Kiedrono, i priphendiá léngiro práho te otlydžan dro Viefíljo. I otčhudia dre rig jov rašán-žriecen, savén čhudé Judejákire králja, sob (kaj) te thuvliakiren pe vučipená dre Judejákire fórja i pašýl Jerusalimo, – i savé thuvliakirde Vaaloske, khameske, i čhoneske, i čergeniénge, i saré xaladybnaske pe bolybén. I vylydžijá Astarta (svénto drévo) Ráskire-Devléskire Khereskir pal Jerusalimo, ke Kiedronoskiri sýgno rékica (lenorí), i shačkirdiá la pašýl Kiedronoskiri sýgno rékica (lenorí), i streindia la dre práho, i čhurdyjá la pe mulýtka (múrsy), kaj garadé saré manušá. I rosphagirdiá jov kherá biladžakuné-džuvliéngire, savé sys pašýl Ráskire-Devléskiri Khangirí, kaj džuvliá khudé ídi vaš Astarta. I vylydžijá sarén rašán-žriecen Judejákire for'jéndyr, i magirdia vučipená, pe savé kerdé xačkiribén, Gievatyr ke Virsávija, i rosphagdia vučipená angíl pórta, – doiá, saví pašýl zagiibén dre pórta Isusoskiri, kon sys foróskiro barydyr, i doiá, saví sys pe zérvo (liévo) rig pašýl foróskiri pórta. Ke saró rašaja pe vučipená na jandlé svénta dyibená Ráske-Devléske pe altárjo Ráskire-Devléskiro dro Jerusalimo, priesna mariklia xané khetané péskire pšalénca. I magirdia jov Tofieto, so isyn pe Jenomoskire-čhavéngiro dólo, sob (kaj) nikón te na prolydžal čhavés péskires i čha peskirjá pirdál jag Molohoske. I otparudia gren, savén čhudé Judejákire králja khameske angíl zagiibén dro Ráskire-Devléskiro Kher pašýl štúby Niefane-Mieliehoskire, kon sys skopco (jévnuho), so sys dre Faruima, maribnýtka vurdyná khameske shačkirdiá jagása. I altári pe štubakiri stréha (čhakín) Ahazovoskiri, savé kerdé Judejákire králja, i altári, savé kerdiá Manásija pe duj gredy (dvory) Ráskire-Devléskire Khereskire, rosphagirdiá králi Iosija, i mekciá telé odothýr, i čhurdyjá práho léngiro dre Kiedronoskiri sýgno rékica (lenorí). I vučipená, savé sys angíl Jerusalimo, pe čačí rig Olivitkone bergátyr, savé kerdiá Solomóno, Izrailjoskiro králi Astartake, džungalypén Sidonoskiro, i Xamososke, džungalypén Moavitoskiro, i Milhomoske, džungalypén Amonitoskiro, magirdia králi. I phagirdiá jekh pal jekh statuly, i vyčingirdia demby vyčhinybnasa, i pherdiakirdiá léngiro štéto manušéngire kokalenca. Adiáke-pac' i altárjo, savó sys dro Viefíljo, i vučipén, savó kerdiá Jerovoámo, Navatoskiro čhavó, savó zalydžijá Izrailjo dro grého, – adiáke-pac' i altárjo dová i vučipén jov rosphagirdiá, i xačkirdiá davá vučipén, streindia dro práho, i shačkirdiá demby vyčhinybnasa. I podykhciá Iosija, i dykhciá mulytka (mursy), savé sys odój pe bérga, i bičhadiá, i lyjá kokalý móĥilkendyr, i xačkirdiá pe altárjo, i magirdia les pir Ráskire-Devléskiro lav, savó rakirdiá angíl sarénde Ráskire-Devléskiro manúš, savó angilphendia (proročyndia) dalé dyvesá. I phendiá Iosija: “So davá za pomniko (obielisko), savó me dykháva?” I phendlé léske foróskire manušá: “Davá isyn Devléskire-manušeskiri koplíca, savó javélas Judejátyr, i savó dyjá te džinél pal dová, so tu kerésa pe altárjo Viefiljoskiro. I phendiá jov: “Jačkiren les dro ramánjo (miro); nikón te na čilavel léskire kokalý?” I zrakhné kokalý léskire i prorokoskire kokalý, savó sys Samarijatyr. Adiáke-pac' i saré mangipnytka štéty vučipnaskire dre Samarijakire fórja, savé kerdé Izrailjoskire králja, xoliakiri Ras-Devlés, rosphagirdiá Iosija, i kerdiá lénca dová-pac', so kerdiá jov dro Viefíljo. I zaphusadia jov sarén rašán-žriecen vučipnaskiren, savé odój sys, pe altári, i xačkirdiá manušéngire kokalý pe lénde, – i risijá dro Jerusalimo. I priphendiá králi saré manušénge, pheni/y: “Kerén Patradí Ráske-Devléske tumareske, syr isyn čhindló dre daja zavietoskiri lylvarí.” Pal-dová so na sys kerdy dasaví Patradí sendar'jéngire dyveséndyr, savé sendiakirde Izrailjo, i dre saré dyvesá Izrailjoskire kral'jéngire i Judejákire-kral'jéngire. A pe dešuohtoto berš kralískire Iosijaskire sys kerdy doiá Patradí Ráske-Devléske dro Jerusalimo. I manušén, savé vykharena mulen, i čovahanen pir primiéty, i kherítka ídoly, i ídoly, i saré brytkimy, savé javné pe Judejakiri phuv i dro Jerusalimo, vytradyjá i rozmardiá Iosija, sob (kaj) te kerél saró pir lavá Zakonóskire, savé isyn začhindlé dre lylvarí, saví lathja (lastia) Xielkija, rašái, dro Ráskire-Devléskiro Kher. Adasaves, syr jov, na sys kralís angledýr léstyr, savó te risjolas ke Raj Devél saré péskire ilésa, i saré diésa peskiresa, i saré péskire zor'jénca, pir saró Mojzáskiro Zakóno; i paló (poslie) léste na terdijá adasavó syr jov. Usajékh Raj Devél na otčhudia Péskiri bari xolý, savjása zahačíia xolý Léskiri na Judaste pal saré teliakiribena, savénca xoliakirdia Les Manásija. I phendiá Raj Devél: “Judas otčhurdava Me Miré móstyr, syr otčhurdyjom Me Izrailjo, i otriskirava davá fóro Jerusalimo, savó Me vykedyjom, i Kher, pal savó Me phendjom: ‘Javéla lav Miro odój.’” Javír lav pal Iosijaste i pal saró, so jov kerdiá, isyn začhindló dre beršýtka arhívy pal kral'jénde Judejátyr. Dre saré léskire dyvesá gijá faraóno Niehao, o Jegiptóskiro králi, proti Asirijákire kralíste, pe reka (len') Jevfrato. I vygijá králi Iosija proti léske, i odová zamardiá les dro Miegidono, kiéli dykhciá les. I léskire pishárja lydžiné les mules Miegidonostyr, i jandlé les dro Jerusalimo, i garadé les dre léskiri koplíca. I lyné manušá dolé phuvjátyr Ioahazos, Iosijaskire čhaveskiri, i pomakhne les i čhudé les kralísa zamiést léskire-dadéste. Biš te trin berš sys Ioahazoske, kiéli jov jaciá kralísa, i trin čhoná jov sys kralísa dro Jerusalimo; lav léskire-dákiro sys Xamutal', Jeriemiejoskiri čhaj, Livnatyr. I kerdiá jov fuipén dre Ráskire-Devléskire jakhá dro saró adiáke, syr kerdé léskire dadá. I zarikirdia les faraóno Niehao dre Rivla, pe Jemafoskiri phuv, sob (kaj) jov te na kralinél dro Jerusalimo, – i čhudiá štrafo pe phuv šel talánty rup i talanto suvnakái. I čhudiá kralísa faraóno Niehao Jeliakimos, Iosijáskiro čhavés, pe štéto zamiést Iosijáskiro, léskire-dadéste, i parudia léskiro lav pe Ioakimoste; Ioahazos lyjá i otlydžija les dro Jegípto, kaj jov i myjá. Jov lelas i rup i suvnakáj i délas Ioakimo faraonóske: jov kerdiá timín phuvjake kažnoné manušéstyr phuvjátyr pir péskiri timín vaš dová, sob (kaj) te otdél faraonóske Niehaoske. Biš te pandž berš sys Ioakimoske, kiéli jov jaciá kralísa, i dešujekh berš sys jov kralísa dro Jerusalimo; lav léskire-dákiro sys Ziebuda, Fiedaijaskiri čhaj, Rumatyr. I kerdiá jov nalačhés dre Ráskire-Devléskire jakhá dro saró adiáke, syr kerdé léskire dadá. Dre léskire dyvesá gijá pe léste Navuhodonosóro, Vavilonóskiro králi, i kerdiápe Ioakimo vužlo léske pe trin berš, ne paló dová (poslie) otgijá léstyr. I bičhadiá pe léste Raj Devél baró ke dar xaladybén Xaldiejéngiro, i xaladybén Sirijanengiro, i xaladybén Moavitianengiro, i xaladybén Amonitianengiro, – bičhadiá len pe Judaste, sob (kaj) te xasiakirél les pir Ráskire-Devléskiro lav, savó Jov phendiá pirdál Péskire pishar'jénde, prorokénde. Pir uphenybén Ráskiro-Devléskiro sys Judasa dová, sob (kaj) te otriskirel les Léskire móstyr pal gréhi Manasijáskire, pal saró, so jov kerdiá. I pal rat, savó sys bibangipnaskiro, savó jov pročhudia, pherdiakirdiá Jerusalimo bibangipnaskire ratésa, Raj Devél na zakamdiá léske te otmekél. Javír lav pal Ioakimoste i pal saró, so jov kerdiá isyn začhindló dre beršýtka arhívy pal kral'jénde Judejátyr. I pasijá viéčnes Ioakimo péskire dadénca, i jaciá kralísa Iiehonija (Jehonija), léskiro čhavó, pe štéto léskiro. Králi Jegiptóskiro na vygijá maribnása butýr péskire phuvjátyr, pal-dová so lyjá králi Vavilonóskiro saró, Jegiptóskire sygnone rekicatyr (lenorjatyr) ke reka (len') Jevfrato, so sys Jegiptóskire-kralískiri. Dešuohto berš sys Jehonijaske, kiéli jov jaciá kralísa, i trin čhoná sys kralísa dro Jerusalimo; lav léskire dákiro sys Niehušta, Jelnafanoskiri čhaj, Jerusalimóstyr. I kerdiá jov fuipén dre Ráskire-Devléskire jakhá dro saró adiáke, syr kerdiá léskiro dad. Dre dolé dyvesá podginé pishárja Navuhodonosoroskire, Vavilonóskire-kralískire, ke Jerusalimo, i oblyne (občhude) trusciál (krugom) xaladybnasa fóro. I javdiá Navuhodonosóro, Vavilonóskiro králi, ke fóro, kiéli léskire pishárja občhuvenas les trusciál (krugom). I vygijá Jehonija, Judejákiro králi, ke Vavilonóskiro králi, jov i daj léskiri, i dynárja léskire, i thagárja léskire, i jevnuhi (skopcy) léskire, i lyjá len Vavilonóskire králi dro pliéno pe ohtóto (bidujéngiro déšto) berš péskire kralipnaskiro. I vylydžijá jov odothýr saré kučipena Ráskire-Devléskire Khereskir i barvalypén kralískire kheréskiro; i phagirdiá, syr vyphendia Raj Devél, saré suvnakuné khoré (sasúdy), savé o Solomóno, Izrailjoskiro králi, kerdiá dre Khangirí Ráskire-Devléskiri. I vybičhadia saró Jerusalimo, i sarén thagar'jén, i sarén murškanen xaladén, – deš tysjoncy sys vybičhade, – i sarén kherá-keribnaskiren (plotniken) i faurnar'jen (petalengiren, kuzniecen); nikonés na jaciápe, apríč čororé manušénde pe doiá phuv. I piričhudia jov te dživél Jehonijas dro Vavilóno; i kraliskirja da, i kralískire džuvlién (romnien), i léskire skopcen, i jov zoralen otlydžija jov, syr pliennonen Jerusalimóstyr dro Vavilóno. I saré xaladén ginybnasa eftá tysjoncy manušén, i grafar'jen (spiecen te risynen) i spiecen te ĥazdén kherá tysjonco, sarén murškanen, savé psirdé pe maribén, zalydžijá Vavilonóskiro králi dro pliéno te dživén ke Vavilóno. I čhudiá Vavilonóskiro králi Matfanijas kralísa, kakes Jehoniijaskires, pe štéto léskiro, i parudia léskiro lav pe Sedekíia. Biš te jekh berš sys Sedekijaske, kiéli jov jaciá kralísa, i dešujekh berš jov sys kralísa dro Jerusalimo; lav léskire dákiro sys Xamutal', Jeriemiejoskiri čhaj, Livnatyr. I kerdiá jov nalačhés dro Ráskire-Devléskire jakhá dre saró adiáke, syr kerdiá Ioakimo. Bari xolý Ráskire-Devléskiri sys pe Jerusalimo i pe Judaste ke dová, so Jov otriskirdia len Péstyr. I otčhudia pes Sedekíia Vavilonóskire kralístyr. Pe jeniáto (bijekhéskiro déšto) berš péskire kralipnaske, dro déšto čhon, dre déšto-čhonéskiro dyvés, javdiá o Navuhodonosóro, Vavilonóskiro králi, saré péskire xaladenca ke Jerusalimo, i zalyja les, i kerdiá trusciál (krugom) léste rovo (xohói). I sys fóro dre osada ke dešupervo berš Sediekijaskiro. Pe jeniáto dyvés čhonéskiro jaciá baredýr bokh dro fóro, i na sys maró phuvjákire manušénde. I lynó sys fóro, i prastándyne saré xaladé ratý pir drom ke pórta, maškír duj vánty, so sys pašýl kralískiri únta (sado); Xaldiéi sys terdé trusciál fóro, i králi gijá dromésa, ke loščýna (ravnina). I tradynepe Xaldiejengire xaladé pal kralíste, i dotradyne les pe Jerihonoskire loščyny, i saré léskire xaladé našné léstyr. I lyné kralís, i lydžiné les ke Vavilonóskiro králi dre Rivla: i kerdé pe léste séndo. I Sedekijaskire čhavén zaphusade angíl léskire jakhá; a kokoreske Sediekijaske vyphusade jakhá, zakuindle les sastyrenca, i lydžiné les dro Vavilóno. Pe pándžto čhon, pe eftatone-čhonéskiro dyvés, (savó sys dro dešujeniato berš Navuhodonosoroskiro), javdiá Navuzardano, pishári Vavilonóskiro kralískiro manušéngire-rakhibnar'jéngiro barydyró, Vavilonóskiro kralískiro dro Jerusalimo. I shačkirdiá Ráskire-Devléskiro Kher i kralískiro kher; i saré kherá dro Jerusalimo, i saré baré kherá xačkirdiá jagása. I vánty trusciál (krugom) Jerusalimo rosphagirdé Xaldiejoskire xaladé, savé sys tel barydyreste pe rakhibnar'jénde. I javír manušá, savé jačnépe dro fóro, savé piriginé ke Vavilonóskiro králi, i javír prostone manušén vybičhadia Navuzardano, barydyró rakhibnar'jéngiro. Jekhe vari-kicý odolé čororé manušén phuvjátyr jačkirdiá barydyr pe rakhibnar'jénde, butiarnenca dre vinagradniki i phuv te pašynen. I stýlby xarkuné (miedítka), savé sys pašýl Ráskire-Devléskiro Kher, i mórjo (derjáv) xarkuno, savó sys dro Ráskire-Devléskiro Kher, phagirdé Xaldiéi, i lydžiné léngiri xarkóma (mied') dro Vavilóno. I xor čaré (myski), i lopatkicy, i čhurja, i roia, i saré xarkuné khoré (sasúdy), savé sys dre butý, kiéli mangnepe Ráske-Devléske, Xaldiéi lyné. I kadily, i tahtaja (čašy), savé sys suvnakuné i so sys rupuvó, lyjá barydyró rakhibnar'jéngiro. Duj stýlby, jekh mórjo (derjáv), i predki pe róty (podstavki) savé kerdiá Solomóno dro Kher Ráskire-Devléskiro, – xarkóma dre saré dalé priedmiéty (čysý) na sys važyndle. Dešuohto kuniá vučipén sys dro jekh stýlbo; viánka pe léste sys xarkuny, a vučipén viankakiro sys trin kuniá, i sietka i granatytka phabá trusciál viánka – saré xarkuné. Dová-pac' i pe javír stýlbo sietkasa. I lyjá barydyró rakhibnar'jéngiro Sieraijas, anglatuné rašás, i Cefanijas, javire rašás, i trinen, savé sys terdé pe rakhiben pašýl progo. I foróstyr lyjá jekhe skopcos, savó sys barydyró pe xaladénde, i pandžé manušén, savé sys terdé angíl kralískiro muj, savé sys dre fóro, i xaladéngire šerales, savó začhinelas dro xaladybén phuvjákire manušén, i šovdešá manušén dolé-phuvjákire manušéndyr, savé sys dre fóro. I lyjá len Navuzardano, barydyró rakhibnar'jéngiro, i lydžijá len ke Vavilonóskiro králi dre Rivla. I zamardiá len Vavilonóskiro králi, i muliakirdiá len dre Rivla, pe Jemafoskiri phuv. I vytradyné Judén dro pliéno péskire phuvjátyr. Pe manušénde, savé jačnépe pe Judejakiri phuv, savén jačkirdiá Navuhodonosóro, Vavilonóskiro králi, – pe lénde čhudiá barydyrésa Godolijas, čhavés Ahikamoskires, Šafanoskires čhavés. Kiéli šundlé saré xaladéngire barydyrá, jone i léngire manušá, so Vavilonóskiro králi čhudiá barydyrésa Godolijas, to tedy javné ke Godolija dre Masífa, i savé: Ismailo, čhavó Niefanijaskiro, i Jehanano, Kariejoskiro čhavó, i Sieraija, Tanhumiefoskiro čhavó Nietofafostyr, i Iiezanija (Jezanija), Maahitianinoskiro čhavó, jone i léngire manušá. I sovlahadiá Godolija lénge i léngire manušénge, i phendiá lénge: “Na darén te javén tel Xaldiejéngiri zor, dživén pe phuv i dynarinén Vavilonóskire kralíske, i javéla tuménge mištés.” Ne pe eftáto čhon javdiá Ismailo, čhavó Niefanijaskiro, Jelišamoskire čhavés, kralískire rodóstyr, deše manušénca, i zamardiá Godalijas, i jov myjá, i Judén, i Xaldiején, savé sys lésa dre Masífa. I uštyné saré manušá, tyknestyr ke baró, i xaladéngire barydyrá, i giné dro Jegípto, pal-dová so darándyne Xaldiejéndyr. Dre trijánda eftáto (bitrinéngiro déšto) berš, syr piričhude te dživél Jehonijas, Judejákire kralís dro dešuiavir čhon, pe biš te eftáto dyvés čhonéskiro, o Jevilmierodaho, Vavilonóskire králi, dro berš péskire kralipnaskiro, jov lydžijá Jehonijas, Judejákire kralís bešybnytkone kheréstyr. I rakirdiá lačhés lésa, i čhudiá trono léskiro vučedýr kral'jéngire tronendyr, savé sys léste dro Vavilóno. I parudia Jehonija léskire bešybnytka ídi, i léste ŭsády (sak) sys xabén léste, dre saré léskire džiibnáskire dyvesá. I podrikiribén (xarčo) léskiro, podrikiribén vaš léske pe saré dyvesá, dynó sys léske kralístyr, dyvés dro dyvés, dre saré léskire džiibnáskire dyvesá. Adamo, Sifo, Jenoso, Kainano, Malielieilo, Iariedo (Jariédo), Jenoho, Mafusalo, Lamieho, Nojo, Simo, Xamo i Iafieto (Jafiéto). Čhavé Iafietoskire sys: Gomiéro, Magogo, Madajo, Iavano, Fuvalo, Miešeho i Firaso. Čhavé Gomieroskire sys: Askienazo, Rifato i Fogarma. Čhavé Iavanoskire sys: Jeliso, Farsiso, Kitimo i Dodanimo. Čhavé Xamoskire sys: Xušo, Micraimo, Futo i Xanaano. Čhavé Xušoskire sys: Siéva, Xavila, Savta, Raama i Savtiéha. Čhavé Raamaskire sys: Ševa i Diedano. Hušostyr bijándyja adiáke-pac' Nimrodo: adavá jaciá pérvo zoraló pe phuv. Micraimostyr bijándyne: Ludimo, Anamimo, Liegavimo, Naftuhimo, Patrusimo, Kasluhimo, savéstyr vyginé Filistimliáni, i Kaftorimy. Hanaanostyr bijándyne: Sidono, anglatunó léskiro, Xiéto, Jevusiéjo, Amoriéjo, Giergiesiéjo, Jeviéjo, Arkiéjo, Siniéjo, Arvadiéjo, Cemariéjo i Xamafiéjo. Čhavé Simaskire sys: Jelamo, Asuro, Arfaksado, Ludo, Arámo, U'co, Xulo, Giefiero i Miešeho. Arfaksadostyr bijándyja Sala, Salastyr bijándyja Jeviéro. Jevierostyr bijándyne duj čhavé: jekheskiro lav sys Faliéko, pal-dová so dre léskire dyvesá rozgijápe (rozdielindiape) phuv sys rosčhudy pe paša (uladiape); lav léskire pšaleskiro sys Ioktano. Ioktanostyr bijándyne Almodado, Šaliéfo, Xacarmaviéto, Iieraho, Gadoramo, Uzalo, Diklo, Jevalo, Avimailo, Ševa, Ofiro, Xavilo i Iovavo. Saré adalé sys čhavé Ioktanoskire. Simo, Arfaksado, Sala, Jeviéro, Faliéko, Ragavo, Sieruho, Nahoro, Fara, Avrámo, jov adiáke-pac' isyn Avraámo. Čhavé Avraamóskire sys: Isaáko i Izmailo. Ĥáda, isyn léngiro ródo: anglatunó Izmailoskiro Navaiofo, pal léste Kiedaro, Adbiejélo, Mivsamo, Mišma, Duma, Masá, Xadado, Fiema, Iieturo, Nafišo i Kiedma. Davá isyn čhavé Izmailoskire. Čhavé Xieturakire, naložnicatyr Avraamoskirjatyr: joj bijandiá Zimranos, Iokšanos, Miedanos, Madianos, Išbakos i Šuahos. Čhavé Iokšanoskire sys: Ševa i Diedano. Čhavé Madianoskire sys: Jefa, Jefiéro, Xanoho, Avido i Jeldago. Saré adalé čhavé sys Xieturakire. I bijándyja Avraamostyr Isaáko. Čhavé Isaakoskire sys: Isávo i Izrailjo. Čhavé Isavóskire sys: Jelifazo, Raguilo, Jeuso, Jeglomo i Koriejo. Čhavé Jelifazoskire sys: Fiemano, Omaro, Cefo, Gafamo, Kienazo, Amaliko. Čhavé Raguiloskire sys: Nahafo, Zieraho, Šama i Miza. Čhavé Sieiroskire sys: Lotano, Šovalo, Cyvieono, Ana, Dišono, Jecero i Dišano. Čhavé Lotanoskire sys: Xori i Giemamo; a phen Lotanoste sys Fimna. Čhavé Šovaloskire sys: Alieano, Manahafo, Jevalo, Šefo i Onamo. Čhavé Cyvieonoskire sys: Aiaja i Ana. Čhavé Anaskire sys: Dišono. Čhavé Dišonoskire sys: Xiemdano, Ješbano, Ifrano i Xierano. Čhavé Jeceroskire sys: Bilgano, Zaavano i Akano. Čhavé Dišanoskire sys: Uco i Arano. Adalé sys králja, savé kralindle pe Edomoskiri phuv, angledýr, syr jaciá kralísa pe Izrailjoskire čhavénde: Bela, čhavó Vieoroskiro, i lav foroske leskireske (Edomoskireske) – Dingava; i myjá Bela, i jaciá kralísa pal léste Iovavo, čhavó Zierahoskiro, Vosoratyr. I myjá Iovavo, i jaciá kralísa pal léste Xušamo, Fiemanitianentire phuvjátyr. I myjá Xušamo i jaciá kralísa pal léste Gadado, čhavó Biedadoskiro, savó domardiá Madianitianen pe Moavoskiri phuv; lav léskire foroske sys Avivo. I myjá Gadado, i jaciá kralísa pal léste Samlo, Masriekatyr. I myjá Sáulo, i jaciá kralísa pal léste Sáulo Riehovofostyr, so sys pašýl reka (len'). I myjá Sáulo, i jaciá pal léste kralísa Baal-Xanano, čhavó Ahboroskiro. I myjá Baal-Xanano, i jaciá pal léste kralísa Gadaro; lav léskire foroske sys Pau; lav léskire romniake sys Miegietaviejel', čhaj Matriedoskiri, čhaj Miezagavoskiri. I myjá Gadaro. I sys phurydyrá pir Edómo: phurydyro Fimna, phurydyro Alva, phurydyro Iietiéfo (Jetiéfo), phurydyro Oliviémo, phurydyro Ela, phurydyro Pinono, phurydyro Kienazo, phurydyro Fiemano, phurydyro Mivcaro, phurydyro Magdiilo, phurydyro Iramo. Ĥáda, sys Idumejakire phurydyrá. Ĥáda, sys Izrailjoskire čhavé: Ruvimo, Simieono, Liévijo, Juda, Isaharo, Zavulono, Dano, Joza (Iosifo), Vieniamino, Niefalimo, Gado i Asiro. Čhavé Judáskire sys: Iro, Onano i Silómo, – trin bijándyne léste Šujevoskire čhatyr, Xananejankatyr. I sys Iro, anglatunó Judáskiro čhavó, nálačho dre Ráskire-Devléskire jakhá; i Jov muliakirdiá les. I Famar', léskiri bori, bijandiá léske Fariesos i Zaras. Sarén čhavén Judaste sys pandžine. Čhavé Fariesoskire sys: Jesromo i Xamulo. Čhavé Zaroskire sys: Zimri, Jefano, Jemano, Xalkolo i Dáro; sarén len sys pandž. Čhavé Xamriskire sys: Aharo, savó jandiá bída pe Izrailjo, i savó otparudia sovél. Čhavé Jefanoskiro sys: Azárija. Čhavé Jesromoskire, savé bijándyne léstyr: Iierahmieilo, Arámo i Xieluvajo. Aramostyr bijándyja Aminadávo; Aminadavostyr bijándyja Naasóno, Judáskire-čhavéngiro thagári (kniazjo); Naasonostyr bijándyja Solomóno, Solomonostyr bijándyja Voozo; Voozostyr bijándyja Ovido, Ovidostyr bijándyja Iiesiéjo (Jesiejo); Jesiejostyr bijándyja anglatunó léskiro čhavó Jeliavaso, javír – Amidavo, tríto – Samu, štárto – Nafanailo, pándžto – Radajo, šóvto – Ocemo, eftáto – Davído. Phenia léngire sys: Saruija i Avigiéia. Čhavé Saruijakire sys: Aviésa, Ioávo i Azailo, trin. Avigiéia bijandiá Amiesas; dad Amiesaskiro – Iiefiero, Izmail'tianino. Halievostyr, kon sys čhavó Jesromoskiro, bijandiá Azuva, léskiri romný, i Jeriofa, i ĥáda, sys léskire čhavé: Ješero, Šovavo i Ardono. I myjá Azuva; i lyjá péske Xaliévo romniá Jefrafa, i joj bijandiá léske Xuros. Hurostyr bijándyja Urijo, Urijostyr bijándyja Viesieliilo. Paló davá Jesromo zagijá ke čhaj Mahiroskiri, Galaadóskire-dadéskiri, i lyjá la, léske sys šovdešá berš; i joj bijandiá léske Sieguvos. Sieguvostyr bijándyja Iairo, i sys léste biš te trin fórja pe Galaadoskiri phuv. Ne Giesuriani i Sirijani lyné léndyr gavore Iairoskire, Kienafo i fórja, savé sys tel léskiri zor – šovdešá fórja. Saré dalé fórja Mahiroskire čhavéngire, Galaadóskire dadéskire. Syr Jesromo myjá dro Xaliev-Jefrafo, Jesromoskiri romný, Avijá, bijandiá léske Ašhuros, Fiekoiaskire dadés. Čhavé Jerahmieiloskire, anglatuné-Jesromoskire čhavéskire sys: anglatunó čhavó Ramo, pal léste Vuno, Oriéno, Ocemo i Ahiia. Sys Jerahmieiloste i javír romný, lav lákiro sys Afara; joj sys daj Onamoskiri. Čhavé Ramoskire, anglatuné Jerahmieiloskire čhavéskire, sys: Maaco, Iamino (Jamino) i Jekiéro. Čhavé Onamanoskire sys: Šamajo i Iada (Jada). Čhavé Šamajoskire: Nadavo i Avišuro. Lav Avišuroskire romniake sys Avihail', i joj bijandiá léske Ahbanos i Molidos. Čhavé Nadavoskire sys: Sieliédo, i Afraimo. I myjá Sieliédo, na sys čhavé léste. Čhavó Afaimoskiro sys: Išyjo. Čhavó Išy'joskiro sys: Šešano; Šešanoskiro čhavó sys Ahlajo. Čhavé Iadoskire, Šamajoskire pšaléskire: Iiefiéro i Ionafáno. Iiefiéro myjá, na sys léste čhavé. Čhavé Ionafanoskire: Pieliéfo i Zaza. Dalé sys Iierahmieiloskire čhavé. Šešanoste na sys čhavé, a jekh čhaja. Šešanoste sys pishári, Jegiptianino, lav léskiro sys Jarha (Iarha); Šešano otdyjá peskirjá čha paloróm Jarhaske, pal péskire pishariste; i joj bijandiá léske Atajos. Atajostyr bijándyja Nafano, Nafanostyr bijándyja Zavado; Zavadostyr bijándyja Jeflalo, Jeflalostyr bijándyja Ovido; Ovidostyr bijándyja Iieujo (Jeujo), Jeujostyr bijándyja Azárija; Azarijastyr bijándyja Xieliéco, Xieliecostyr bijándyja Jelieaso; Jelieasostyr bijándyja Sismajo, Sismajostyr bijándyja Salumo; Salumostyr bijándyja Iiekamija (Jekamija), Iiekamijastyr bijándyja Jelišama. Čhavé Xalievoskire, Jerahmieiloskire pšaléskire sys: Mieša, anglatunó léskiro čhavó, – jov sys Zifaskiro dad; a léstyr bijándyja Mariéša, jov sys dad Xievronoske. Čhavé Xievronoskire sys: Koriéjo i Tapuaho, i Riekiémo i Šema. Šemastyr bijándyja Rahamo, kon sys Jorkieamoskiro dad, a Riekiemostyr bijándyja Šamajo. Čhavó Šamajoskiro sys: Maono, a Maono sys Bief-Curoskiro dad. I Jefa, Xalievoskiri naložnica, bijandiá Xaranos, Mocas i Gaziezos. I Xaranostyr bijándyja Gaziézo. Čhavé Jegdajoskire (Iiegdajoskire) sys: Riegiémo, Iofámo, Giešano, Pieliéto, Jefa i Šaafo. A Maha, javír Xalievoskiri naložnica, bijandiá Šievieros i Firhanos; joj adiáke-pac' bijandiá Šaafos, Madmanaskire dadés, Ševos, Mahbienoskire dadés i Gieviejoskire dadés. Čhaj Xalievoskiri sys Ahsa. Ĥáda, sys čhavé Xalievoskire: čhavó Xuro, anglatunó Jefrafoskiro; Šovalo, Kiríaf-Jarimoskiro dad; Salma, Vifliejemoskiro dad; Xariéfo, Biefgadieroskiro dad. Šovaloste, Kiríaf-Jarimoskire (Iarimoskire) dadéste, sys čhavé: Garoie, [Hacy, Galmieniuhoto-r.s.] [Paš Manahitiicengiri-ju.o.]. Kiríaf-Jarimoskire kherítka ródy (pliémi): Ifrijani, Futijani, Šumafani i Midraitiani. Adalendyr vyginé Coriani i Ještaoliani. Čhavé Salmaskire isyn: Vifliejemliani i Nietofafiani, Ioavovoskire-kheréskiri [viánka-r.s.] i paš Mienuhotianengiro-Coriani, i Sofieriicengire kherítka ródy (pliémi) (jone sys piričhinybnaskire/pisari), savé dživdé ke Iabiéco, Tiriéicy, Šimiéicy, Suhaicy: adalé isyn Kinejani, savé vyginé Xamafostyr, Bietriehavoskire dadéstyr. Čhavé Davidóskire, savé bijándyne léstyr dro Xievróno, sys: anglatunó čhavó-Amnono, Ahinoamatyr Izriejelitiankatyr; javír – Daluija [Danijéljo-ju.o.], Avigejatyr Karmilitiankatyr; tríto – Aviesalómo, Maahiiakiro čhavó, Falmajoskire-čhakire, Giesuroskire kralískire; štárto – Adonija, Agifaskiro čhavó; pándžto – Safatija, Avitalatyr; šóvto – Ifrieamo, Aglajatyr, léskire romniatyr, – adalé šov bijándyne léstyr dro Xievróno; odój jov sys kralísa eftá (bitrinéngiro deš) berš i šov čhoná; a trijánda trin berš sys králi dro Jerusalimo. Adalé čhavé léstyr bijándyne dro Jerusalimo: Šymo, Šovavo, Nafano i Solomóno, štar Virsavijatyr, Amiiloskire čhatyr; Ivharo, Jelišamo, Jelifieliéto, Nogago, Niefiégo, Iafia (Jafia), Jelišama, Jeliada i Jelifieliéto – jeniá (bijekhéskiro deš). Ĥáda, sys saré Davidóskire čhavé, apríč čhavénde naložnicendyr. Phen léngiri sys Famar'. Čhavó Solomonóskiro sys Rovoámo; léskiro čhavó Avijá; léskiro čhavó Asá; léskiro čhavó Iosafáto; Léskiro čhavó Iorámo; léskiro čhavó Ohozija; léskiro čhavó Ioáso; Léskiro čhavó Amásija; léskiro čhavó Azárija; léskiro čhavó Iofámo; Léskiro čhavó Aházo; léskiro čhavó Jezekíia; léskiro čhavó Manásija; Léskiro čhavó Amono; léskiro čhavó Iosija. Čhavé Iosijaskire sys: anglatunó čhavó Ioahazo, javír Ioakimo, tríto Sedekíia, štárto Sielumo. Čhavé Ioakimoskire sys: Jehonija, léskiro čhavó; Sedekíia, léskiro čhavó. Čhavé Jehonijaskire sys: Asiro, Salafiilo, léskiro čhavó; Malkiramo, Fiedaija, Šenacaro, Jezekíia, Gošamo i Savadija. I čhavé Fiedaijaskire sys: Zorovavieljo i Šymiéjo. Čhavé Zorovavieljoskire: Miešulamo i Xananija, i Šielomif, léngiri phen, i iščo (inké) pandž sys: Xašuva, Ogiélo, Bieriéhiia, Xasadija i Iušav (Jušav)-Xiesiédo. I čhavé Xananijaskire sys: Fielatija i Isajo; léskiro čhavó Arnano; léskiro čhavó Ovadija, léskiro čhavó Šehanija. Čhavó Šehanijaskiro sys: Šemaija; čhavé Šiemaijaskire: Xatušo, Igiealo, Bariaho, Niearijo i Šafato, šovdžine. Čhavé Niearijaskire sys: Jelioenajo, Jezekíia i Azrikamo, trindžine. Čhavé Jelioenajoskire sys: Godavjagu, Jelieašyvo, Fielaija, Akuvo, Iohanano, Dielaija i Anani, eftadžine. Čhavé Judáskire sys: Fariéso, Jesromo, Xarmi, Xuro i Šovalo. Reaijastyr, kon sys Šovaloskiro čhavó, bijándyja Iahafo; Iahafostyr bijándyja Ahumo i Lagado: léndyr sys Corianengiro ródyco. I adalé sys čhavé Jetamoskire: Izriejéljo, Išma i Idbašo, i léngiri phen, pir lav sys Gaclielponi, Pienuelo, Giedoroskiro dad, i Jeziéro, Xušanoskiro dad. Ĥáda, isyn čhavé Xuraskire, savó sys anglatunó čhavó Jefrafoste, Vifliejemoskire dadéste. Ahšuroste, Fiekoiaskire dadéste, sys duj romniá: Xiela i Naara. I bijandiá léske Naara Ahuzamos, Xiefieros, Fimnijos i Ahašfaros; adalé sys Naarakire čhavé. Čhavé Xielakire sys: Ceriéfo, Coharo i Jefnano. Kocostyr bijándyja: Anuvo i Coviévo i Aharhieloskire kherítka ródy (pliémi), savó sys Garumoskiro čhavó. Iaviso sys slavutnedyr péskire pšaléndyr. E daj dyjá léske lav Iaviso, phendiá: “Me bijandjom les nasvalypnasa.” I khardiá zoralés Iaviso Devlés Izrailjoskires, i phendiá: “O, kóli by Tu bahtiakirdian man Tyré bahtiakiribnasa, i te kerés baredýr miré rigá, i vast Tyró te javél mánca, te rakhél man fuipnastyr, sob (kaj) me te na perav!” I Devél dyjá léske, so jov mangdiá. Hieluvostyr, Šuhaskire pšalestyr, bijándyja Mahiro; jov sys Ještonoskiro dad. Ještonostyr bijándyja Bief-Rafo, Pasieaho i Tiehina, kon sys dad foroske Naaso; adalé sys manušá Riehatyr. Čhavé Kienazoskire sys: Gofoniilo i Sieraija. Gofoniiloskiro čhavó sys: Xafafo, i Mieonofajo, savéstyr bijándyja Ofra, a Sieraijastyr bijándyja Ioávo, kon sys barydyró pe plotnikengiro dólo, pal-dová so jone sys kherá-keribnaskire (plotniki). Čhavé Xalievoskire, Iiefoniinoskire čhavéskire sys: Iro, Ila i Naamo. Ilaskiro čhavó sys: Kienazo. Čhavé Jegalieleloskire sys: Zifo, Zifa, Firija i Asariejelo. Čhavé Jezraskire sys: Iiefiéro, Mieriédo, Efiéro i Ialono; Iiefierostyr bijándyja Mieromo, Šamajo i Išbaho, kon sys Ješfiemoiaskiro dad. I léskiri romný Judija bijandiá Jeriedos (Iieriedos), Giedoroskires dadés, i Xievieros, Sohoskires dadés, i Jekufiilos, Zanaohaskires dadés. Adalé sys Bifjakire čhavé, faraonóskire čhakire, savjá lyjá paloróm Mieriédo. Čhavé Godijakire, léskire romniakire, kon sys phen Nahamoskiri, Kieiloskire-dadéskiri: Garmo i Ješfiemoa-Maahatianino. Čhavé Simieonoskire sys: Amnono, Rina, Bienhanano i Filono. Čhavé Išyjaskire sys: Zohiéfo i Bienzohiéfo. Čhavé Silomoskire, Judáskire čhavéskire, sys: Iro, Liehoskiro dad, i Lajedo, Mariešaskiro dad, i konéskiri sém'ia (irí) obkerelas visono, Ašbiejoskire kheréstyr, i Iokimo, i manušá Xozievakire, i Ioašo i Sarafo, savénde sys felatiniá dro Moávo, i dre Iašuviliehiemo; ne davá sys drieván ĥará. Jone kerdé pirja i dživdé pašýl unty (sady) i dre barja (ogorody); odój dživdé jone vaš kralíske pašýl léskire butiá. Čhavé Simieonoskire sys: Niemuilo, Jamino (Iamino), Jarivo (Iarivo), Zieraho i Sáulo, I čhavó léskiro Šalumo; i čhavó léskiro Mivsamo; i léskiro čhavó Mišma. Čhavé Mišmaskire sys: Xamuilo, léskiro čhavó; léskiro čhavó Zakuro; léskiro čhavó Šymiéjo. Šymiejoste sys dešušov čhavé i šov čhaja; léskire pšalénde čhavén sys nábut, i saró léngiro kherítko ródo (pliémjo) na adiáke sys baró, syr kherítko ródo Judáskire-čhavéngiro. Jone dživdé ke Virsávija, Molada, Xacaršuala, ke Bilga, ke Jecemo, ke Folado, ke Biefuilo, ke Xorma, ke Ciklago, ke Bief-Markavofo, ke Xacarsusima, ke Bief-Bireja i ke Šaarimo. Ĥáda, sys léngire fórja ke Davidóskiro kralipén, léngire gavenca: Jetamo, Aino, Rimono, Fokiéno i Ašano, – pandž fórja. Saré léngire gavá, savé sys trusciál dalé fórja ke Vaala; ĥáda, sys léngire-džiibnáskire štéty i léngire-rodengiri istorija. Miešovavo, Iamlieho i Iosija, Amasijaskiro čhavó, Ioilo i Jegu (Iiégu), Iošyviskiro čhavó, Sieraijaskire čhavéskiro, Asiilovoskire čhavéskiro, Jelioienajo, Iakova, Išohaija, Asaija, Adiilo, Išymiilo i Vaniéia, i Ziza, Šyfijaskiro čhavó, Alonoskiro čhavó, Iiedaijaskiro čhavó, Šimrijoskiro čhavó, Šemajoskiro čhavó. Adalé manušá, savé isyn čhindlé pir lav, sys thagárja pir péskire kherítka ródy, i léngire-dadéngiro kher, rozbarijape pe but semency, jone doginé ke Gierara i ke vastočno rig doloskiri, sob (kaj) te lathén čaritka féldy vaš péskire kheritkoné murdalénge (skoto): i lathné čaritka féldy ke čalypen i lačhé i phuv bari, štyl i bidarakiri, pal-dová so ke jone dživdé odój jekh nábut Xamitiani. I javné adalé manušá, savé sys začhindlé pir lav, dre dyvesá Jezekijaskire, Judejákire-kralískire, i domardé manušén, savé lodyne i štetytkone manušén, savé odój dživdé, i protradyne len sarésa, i lyné te dživén pe léngiro štéto; pal-dová so odój sys čaritka féldy vaš léngire kheritkoné murdalénge. Léndyr, Simieonoskire čhavéndyr, giné ke bérga Sieiro pandžšelá manušá: Fielatija, Niearija, Riefaija i Uziilo, Išyjaskire čhavé, jone sys léngire šeralé (glavna manušá). I domardé jone Amalikitianen, savé jačnépe džidé odój, i dživéna odój ke davá dyvés. Čhavé Ruvimóskire, anglatuné-Izrailjoskire čhavéskire, – jov sys anglatunó čhavó; ne kiéli jov magirdia péskire-dadéskiro čhuibén, ne léskiro anglatunyben sys otdynó Jozáskire (Iosifóskire) čhavénge, čhavéske Izrailjoskireske dolesa, sob (kaj) te na ginenpe lénge [Jozaskirenge] anglatuné bijanybnytkonenca; pal-dová so Juda sys zoraledýr péskire pšaléndyr, i thagarisa jaciá jov, ne anglatunyben začhindló sys pe Jozaste (Iosifoste). Čhavé Ruvimóskire, anglatuné Izrailjoskire-čhavéskire sys: Xanoho, Falu, Xiecrono i Xarmi. Čhavé Ioiljoskire sys: Šemajo, léskiro čhavó; léskiro čhavó Gogo, léskiro čhavó Šymiejo, léskiro čhavó Miha, léskiro čhavó Rieaija, léskiro čhavó Vaalo, léskiro čhavó Biejera, savés zalydžijá dre pliéno Fieglafielasaro, Asirijákiro králi. Jov sys thagári Ruvimlianenge. I léskire pšála, pir léngire kherítka ródy (pliémi), pir léngire rodoskiro začhinyben sys: šeraló Iieieljo (Uieljo), paló léste Zahárija. I Bela, čhavó Azazoskiro, Šemajoskire-čhavéskiro, Ioiljoskire-čhavéskiro. Jov dživdiá ke Aroero ke Niévo i Vaal-Mieono; a ke vastóko jov dživdiá ke zagiibén pe čhučí phuv (pustynia), saví gijá rekátyr (leniátyr) Jevfratostyr, pal-dová so kheritka murdalá skoto léngiro sys but pe Galaadoskiro phuv. Dre dyvesá Saulóskire lydžiné jone maribén Agarianenca, savé xasiné léngire vastéstyr; a jone lyné te dživén dre léngire šátry, pir sarí Galaadóskire-vastočno rig. Čhavé Gadóskire dživdé proti lénde pe Vasanoskiri phuv ke Salha: dro Vasáno Ioiljo sys šeraló, Šafano javír, paló léste Iaanajo (Jaanajo) i Šafato. Léngire pšalén léngire čekarjatyr [léngire-dadengíre semencatyr-ju.o.] sys eftá: Mihailo, Miešulamo, Ševa, Iorajo, Jakano (Iakano), Zija i Jeviéro. Ĥáda, sys Avihailoskire čhavé, Xurijoskire-čhavéskire, Ioroahoskire (Jaroahoskire) čhavéskire, Galaadóskire čhavéskire, Mihailoskire čhavéskire, Ješyšajoskire čhavéskire, Jahdoskire (Iahdoskire) čhavéskire, Buzaskire čhavéskire. Ahi, čhavó Avdiiloskiro, Gunijokire-čhavéskiro, sys šeraló pe péskiro ródo. Jone dživdé ke Galaádo, ke Vasáno i dre fórja, savé sys tel zor léste i dre saré fórja, savé sys trusciál Sarono, ke/žýko léngiri miéža. Saré jone sys pirigindle dre dyvesá Ioafamoskire, Judejákire kralískire, i dre dyvesá Iierovoamoskire, Izrailjoskire kralískire. Čhavénde Ruvimóskire i Gadoskirende i dro paš kherítko ródo Manasijáskiro sys manušá maribnýtka, muršá, savé lydžánas ščýto i kurtála, savé mardé lukostyr i sys sykliakirdé ke maribén, len sys štardešá štar tysjoncy eftašelá šovdešá manušén, savé vyginé pe maribén. I mardépe jone Agarianenca: Iieturomosa, Nafišosa i Nadavomosa. I dynó sys lénge vast proti lénde, i otdyné sys dre léngire vastá Agariani i saró, so lénde sys. Pal-dová so jone dre maribnaskiro časo (cýro) khardé zoralés Devlés, i Jov šundiá len, pal-dová so jone patiandynepe dre Léste. I lyné jone léngire kheritkoné murdalén: vierbliuden pandždešá tysjoncy, tykné murdaléndyr dujšelá pandždešá tysjoncy, oslen duj tysjoncy, i šel tysjoncy manušén, pal-dová so but léndyr pyné mulenca, adiáke, syr Devléstyr sys davá maribén. I dživdé jone pe léngiro štéto ke piritradypen. Čhavé Manasijáskire pašé-rodycóstyr, dživdé pe doiá phuv, Vasanostyr ke Vaal-Jermono i Sieniro i ke/žýko bérga Jermonoskiri; i len sys but. I ĥáda, sys léngire slavutna šeralé pe stréčy (pokolienii): Jefiero, Išy, Jeliilo, Azriilo, Jeriemieje, Godavija i Jagdiilo (Iagdiilo), muršá zoralé, muršá slavutna, savé sys šeralé pe péskire ródy. Ne kiéli jone kerdé grého proti péskire-dadengíre Devléste i lyné biladžakunes te psirén palál pal dolé-phuvjákire manušéngire devlorende, savén tradyjá krig Devél léngire móstyr, to tedy Izrailjoskiro Devél ĥazdyjá dúho (fáno) Fuloskiro, Asirijákire-kralískiro, i dúho (fáno) Fieglafielasaroskiro, Asirijákire-kralískiro, i jov tradyjá krig Ruvimlianen i Gaditianen i paš ródyco Manasijaskiri/o, i lydžijá len dro Xalaho, i dro Xavoro, i dro Aro, i pe reka (len') Gozano, kaj jone dživéna ke davá dyvés. Čhavé Lievijoskire sys: Girsono, Kaafo i Mierari. Čhavé Kaafoskire sys: Amramo, Icgaro, Xievróno i Uziilo. Čhavé Amramoskire sys: Aaróno, Moisiéjo (Mójza/ Mosia) i Mariam. Čhavé Aaronóskire sys: Nadavo, Aviudo, Jelizáro i Ifamaro. Jelizarostyr bijándyja Finiejéso, Finiejesostyr bijándyja Avišujo; Avišujostyr bijándyja Bukijo, Bukijostyr bijándyja Ozíia; Ozijastyr bijándyja Zerahiia; Zerahiiastyr bijándyja Mieraiofo; Mieraiofostyr bijándyja Amarija, Amarijastyr bijándyja Ahituvo; Ahituvostyr bijándyja Sadoko, Sadokostyr bijándyja Ahimaaso; Ahimaasostyr bijándyja Azárija, Azarijastyr bijándyja Ioanano; Ioananostyr bijándyja Azárija, – ake, sys odová, savó sys rašáj dre Khangirí, saví čhudiá Solomóno dro Jerusalimo. I bijándyja Azarijastyr Amarija, Amarijastyr bijándyja Ahituvo; Ahituvostyr bijándyja Sadoko, Sadokostyr bijándyja Sielumo; Sielumostyr bijándyja Xielkija, Xielkijastyr bijándyja Azárija; Azarijastyr bijándyja Sierajo, Sierajostyr bijándyja Iosiedieko. Iosiedieko gijá dro pliéno, kiéli Raj Devél pirilydžija te dživén Judén i Jerusalimlianen vastésa Navuhodonososkiresa. I adiáke čhavé Lievijoskire sys: Girsono, Kaafo i Mierari. Ĥáda, lavá Girsonovoskire čhavéngire sys: Livni i Šymiéjo. Čhavé Kaafoskire sys: Amramo, Icgaro, Xievróno i Uziilo. Čhavé Mierariskire sys: Mahli i Mušy. Ĥáda, sys ródo Lievijoskiro pir léngiro ródo. Girsonoste sys: Livni, čhavó léskiro; Iahavo, čhavó léskiro; Zima, čhavó léskiro; Ioaho, čhavó léskiro; Ido, čhavó léskiro; Zieraho, čhavó léskiro; Iieafrajo, čhavó léskiro. Čhavé Kaafoskire sys: Aminadávo, čhavó léskiro; Koriejo, čhavó léskiro; Asiro, čhavó léskiro; Jelkano, čhavó léskiro; Jeviasafo, čhavó léskiro; Asiro, čhavó léskiro; Tahafo, čhavó léskiro; Uriilo, čhavó léskiro; Uzija, čhavó léskiro; Sáulo, čhavó léskiro. Čhavé Jelkanoskire sys: Amasa i Ahimofo. Jelkano, čhavó léskiro; Cofajo, čhavó léskiro; Nahafo, čhavó léskiro; Jeliafo, léskiro čhavó; Jerohamo (Iierohamo), čhavó léskiro; Jelkana, čhavó léskiro. Čhavé Samuiloskire: anglatunó Ioiljo, javír Avijá. Čhavé Mierariskire: Mahli, Livni, čhavó léskiro; Šymiéjo, čhavó léskiro; Uza, čhavó léskiro; Šyma, čhavó léskiro; Xagija, čhavó léskiro; Asaija, čhavó léskiro. Ĥáda, isyn odolé, savén Davído čhudiá barydyrénca pe manušénde, savé bagandle dro Ráskire-Devléskiro Kher, dolé dyveséndyr, syr čhudé dre léste kovčego. Jone dynarindlé (služindle) manušénge, savé bagandle angíl skedyibnáskiri skínija, paka Solomóno čhudiá Ráskire-Devléskiro Kher dre Jerusalimo. I jone terdiné pe péskiri butý pir péskiro giiben (poriadko). Ĥáda, isyn, odolé, savé terdiné péskire čhavénca: čhavéndyr Kaafoskirendyr – Jemano bagandia, čhavó Ioiljoskiro, čhavó Samuiloskiro, čhavó Jelkanaskiro, čhavó Jerohamoskiro (Iierohamoskiro), čhavó Jeliiloskiro, čhavó Toahaskiro, čhavó Cufoskiro, čhavó Jelkanaskiro, čhavó Mahafoskiro, čhavó Amasajoskiro, čhavó Jelkanaskiro, čhavó Ioiljoskiro, čhavó Azarijaskiro, čhavó Cefanijaskiro, čhavó Tahafoskiro, čhavó Asiroskiro, čhavó Avisafoskiro, čhavó Koriejoskiro, čhavó Icgaroskiro, čhavó Kaafoskiro, čhavó Lievijoskiro, čhavó Izrailjoskiro; i léskiro pšal Asafo, savó sys terdó pe léskiri čačí (pravo) rig, – Asafo, čhavó Bieriehiiaskiro, čhavó Šymaskiro, čhavó Mihailoskiro, čhavó Vaasejaskiro, čhavó Malhiiaskiro, čhavó Jefnijaskiro, čhavó Zierahoskiro, čhavó Adaijaskiro, čhavó Jefanoskiro, čhavó Zimaskiro, čhavó Šymijoskiro, čhavó Iahafoskiro, čhavó Girsonoskiro, čhavó Lievijoskiro. A čhavéndyr Mierariskirendyr, léngire pšalén, – pe zérvo (liévo) rig: Jefano, čhavó Kišyjoskiro, čhavó Avdijoskiro, čhavó Maluhaskiro, čhavó Xašavijaskiro, čhavó Amasijaskiro, čhavó Xielkijaskiro, čhavó Amcyjoskiro, čhavó Vanijaskiro, čhavó Šemieroskiro, čhavó Mahlijoskiro, čhavó Mušyskiro [Mušyjoskiro-r.s.], čhavó Mierariskiro, čhavó Lievijoskiro. Léngire pšála, adiáke-pac' Lievíty, sys čhudé pe rázna butiá pašýl Devléskiro Kher; Ne Aaróno i léskire čhavé xačkirdé pe altárjo (žertvieniko) célo shačkiribén i pe altárjo kadilenca, i kerdé kažno svénto réndo dre Svénto – sventedyr štéto i vaš žužakiriben Izrailjo dro saró, syr priphendiá pishári Devléskiro Moisiéjo (Mójza). Ĥáda, isyn čhavé Aaronóskire: Jelizáro, čhavó léskiro; Finiejeso, čhavó léskiro; Aviudo, čhavó léskiro; Bukijo, čhavó léskiro; Uzijo, čhavó léskiro; Zerahiia, čhavó léskiro; Mieraifo, čhavó léskiro; Amarija, čhavó léskiro; Ahituvo, čhavó léskiro; Sadoko, čhavó léskiro; Ahimaaso, čhavó léskiro. I ĥáda, isyn kherá léngire pir gavá léngire dre miéžy léngire: čhavé Aaronóskire Kaafovoskire kheritkoné rodendyr, adiáke syr žriébijo vygijá lénge, to dyné lénge Xievróno, pe Judaskiri phuv, i štéty pašýl fóro léskiro trusciál (vokrug) léste; dalé-foróskire féldy i gavá léskire otdyné Xalievoske, čhavéske Jefonijaskireske. Čhavénge Aaronoskireskire adiáke-pac' dyné znašybnytka fórja: Xievróno i Livna léngire štetenca pašýl fóro, Jatiro (Iatiro) i Ještemoa i léskire štéty pašýl fóro, i Xiliéno i léskire štéty pašýl fóro, Daviro i léskire štéty pašýl fóro. I Ašano i léskire štéty pašýl fóro, Viefsamiso i léskire štéty pašýl fóro. A Vieniaminóskire kheréskire rodóske – Gieva i léskire štéty pašýl fóro, i Aliemiefo, i léskire štéty pašýl fóro, i Anafofo i léskire štéty pašýl fóro: saré léngire fórja dre léngire ródy sys trijánda fórja. Kaafoskire čhavénge, savé, jačnépe, dalé čekar'jendyr pir davá ródyco, dynó sys pir žriébijo deš fórja mištypnaskire mieratyr Manasijáskire rodycóstyr. Čhavénge Girsonoskirenge pir léngire ródy, Isaharoskire rodycóstyr i Asiroskire rodycóstyr, i Niefalimoskire rodycóstyr, i Manasijáskire rodycóstyr dro Vasáno, dynó dešutrin fórja. Čhavénge Mierariskirenge pir léngire ródy, Ruvimóskire rodycóstyr, i Gadóskire rodycóstyr, i Zavulonoskire rodycóstyr, sys dynó pir žriébijo dešudúj fórja. Adiáke dyné Izrailjoskire čhavé Lieviténge dalé fórja i léngire štéty pašýl fórja. I dyné jone pir žriébijo Judáskire-čhavéngire rodycóstyr, i Simjonoskire čhavéngire rodycóstyr, i Vieniaminóskire-čhavéngire rodycóstyr dolé fórja, savé jone khardé pir léngire lavá. Vari-savénge Kaafoskire čhavéngire kheritkoné rodénge dyné sys fórja Jefriemóskire rodycóstyr. I dyné sys lénge znašybnytka fórja: Sihiémo i léskire štéty pašýl fóro pe Jefriemóskiri bérga, i Gieziero i léskire štéty pašýl fóro, i Iokmieamo i léskire štéty pašýl fóro, i Bief-Orono i léskire štéty pašýl fóro, i Aialono i léskire štéty pašýl fóro, i Gaf-Rimono i léskire štéty pašýl fóro; pašatyr Manasijáskire rodycóstyr – Aniéro i léskire štéty pašýl fóro, Bilieamo i léskire štéty pašýl fóro. Davá sys Kaafoskire čhavéngire strečake, savé jačnépe. Čhavénge Girsonoskire kheritkoné rodycóstyr Manasijáskire pašé-rodycóstyr dyné sys Golano dre Vasana i léskire štéty pašýl fóro, i Aštarofo i léskire štéty pašýl fóro. Isaharoskire rodycóstyr – Kiediéso i léskire štéty pašýl fóro, Davrafo i léskire štéty pašýl fóro, i Ramófo i léskire štéty pašýl fóro, i Aniémo i léskire štéty pašýl fóro; Asiroskire rodycóstyr – Mašalo i léskire štéty pašýl fóro, i Avdono i léskire štéty pašýl fóro, i Xukoko i léskire štéty pašýl fóro, i Riehovo i léskire štéty pašýl fóro; Niefalimoskire rodycóstyr – Kiediéso dre Galiliéia i léskire štéty pašýl fóro, i Xamono i léskire štéty pašýl fóro, i Kiriafaimo i léskire štéty pašýl fóro. A javire Mierariskire čhavénge – dynó sys Zavulonoskire rodycóstyr Rimono i léskire štéty pašýl fóro, Favoro i léskire štéty pašýl fóro. Pe doiá Iordanoskiri rig, proti Jerihóno, pe vastóko Iordanostyr, Ruvimóskire rodycóstyr dyné sys Vosoro pe čhučí phuv i léskire štéty pašýl fóro, i Iaaca (Jaaca) i lákire štéty pašýl fóro, i Kiediemofo i léskire štéty pašýl fóro, i Miefaafo i léskire štéty pašýl fóro; Gadóskire rodycóstyr – Ramófo dro Galaádo i léskire štéty pašýl fóro, i Mahanaimo i léskire štéty pašýl fóro, i Jesievóno i léskire štéty pašýl fóro, i Iaziéro i léskire štéty pašýl fóro. Čhavé Isaharoskire sys: Fola, Fua, Iašuvo (Jašuvo) i Šymrono, štardžine. Čhavé Folaskire sys: Uzijo, Riefaija, Jeriilo, Jahmajo, Ivsamo i Samuílo, šeralé pe Folaskire stréčy (pokoliénii), manušá, savé dre péskire ródy sys murškané vaš maribén; sys len dre Davidóskire dyvesá biš te duj tysjoncy i šovšelá. Čhavó Uzijoskiro sys: Izrahiia; čhavé Izrahijoskire sys: Mihailo, Ovadija, Ioiljo i Išyja, pandžine. Saré jone sys šeralé manušá. Lénde, pir ródy léngire, pir stréčy léngire, sys skedyné ke maribén xaladén trijánda šov tysjoncy; pal-dová so lénde sys but romnién i čhavén. Léngire pšalén, dre saré Isaharoskire stréčy, manušén, savé psirdé pe maribén, sys ohtodešá eftá (bibišengiro šel) tysjoncy, začhindlé dre rodoskire začhinybena (spiski). Vieniaminoste sys: Bela, Biehiéro i Jediailo, trin čhavé. Čhavé Bielaskire sys: Jecbono, Uzijo, Uziilo, Jerimofo (Iierimofo) i Iri, pandž, šeralé pe stréčy (pokolienii) manušá, savé psirdé pe maribén. Dre rodoskire začhinybena (spiski) jone sys začhindlé: biš te duj tysjoncy trijandaštar. Čhavé Biehieroskire: Ziemira, Ioašo, Jelijezero (Jeliziéro), Jelioenajo, Omri, Iriemofo, Avijá, Anafofo i Aliemiéfo: saré adalé sys čhavé Biehieroskire. Dre rodoskire spiski sys začhindlé jone pir ródy léngire, pir šeralende pe stréčy, manušén, savé sys murškané vaš maribén – biš tysjoncy i dujšelá. Adiáke-pac' čhavó Jedialoskiro sys: Bilgano. Čhavé Bilganoskire sys: Jeuso, Vieniamino, Jegudo, Xienaana, Ziefano, Farsiso i Ahišaharo. Saré adalé Iiediailoskire čhavé sys strečakire šeralé, manušá, savé sys muršá vaš maribén; dešuefta tysjoncy i dujšelá sys, savé vyginé pe maribén. I Šupimo i Xupimo, sys čhavé Iraskire: Xušymo, sys čhavó Ahieroskiro. Čhavé Niefalimoskire sys: Jahceilo (Iahcieiljo), Guni, Jecero i Šiliémo, čhavé Valakire. Čhavé Manasijáskire sys: Asriilo, savés bijandiá léskiri naložnica Aramejanka; joj bijandiá Mahiros, Galaadoskires dadés. Mahiro lyjá paloróm Xupimoskire i Šupimoskire pheniá, – léngire-pheniakiro lav sys Maaha; lav javireske sys Salpaado. Salpaadoste sys jekh čhaja. Maaha, Mahiroskiri romný, bijandiá čhavés i dyjá léske lav Kieriéšo, a lav léskire pšaléske sys Šeriéšo. Čhavé léskire sys: Ulamo i Riekiémo. Čhavó Ulamoskiro sys: Biedano. Ĥáda, sys čhavé Galaadóskire, Mahiroskire-čhavéskire, Manasijáskire-čhavéskire. Léskiri phen Moliehiéf bijandiá Išgodas, Avijezieros i Mahlos. Čhavé Šemidaskire sys: Ahiano, Šehiemo, Likhi i Aniamo. Čhavé Jefriemóskire sys: Šutielaho, i Bieriédo, čhavó léskiro, i Jelieado, čhavó léskiro, i Famafo, čhavó léskiro. I Zavado, čhavó léskiro, i Šutielaho, čhavó léskiro, i Jeziéro i Jelieada. I muliakirdé len manušá Giefoskire, savé bijándyne pe doiá phuv, pal-dová, so jone giné te zalen léngire kheritkoné murdalén. I rondiá pal lénde Jefriémo, dad léngiro, but dyvesá, i javénas léskire pšála te štyliakiren les. Paló (poslie) davá jov zagijá ke péskiri romný, i joj zapharija i bijandiá čhavés, i jov dyjá léske lav: Bierija, pal-dová so bída (bibáht) lathiá kher léskiro. I čhaj léste sys Šiejéra. Joj čhudiá Bief-Orono telatuno i upratuno, i Uzién-Šeiéro. I Riefajo, čhavó léskiro, i Riešefo, i Oslaho, čhavó léskiro, i Fahano, čhavó léskiro, Lajedano, čhavó léskiro, Amiudo, čhavó léskiro, Jelišamo, čhavó léskiro, Nono, čhavó léskiro, Isúso, čhavó léskiro. Majonki léngire i léngire štéty, kaj jone dživdé, sys: Viefíljo (Biet-El') i fórja, savé sys tel léskiri zor; ke vastóko Naarano, ke zapado Gieziéro i fórja, savé sys tel léskiri zor; Sihiémo i fórja, savé sys tel léskiri zor ke Gaza i fórja, savé sys tel lákiri zor. A Manasijáskire-čhavéngire rigátyr: Bief-Sano i fórja, savé sys tel léskiri zor, Faanaho i fórja, savé sys tel léskiri zor, Miegido i fórja, savé sys tel léskiri zor, Doro i fórja, savé sys tel léskiri zor. Dre lénde dživdé Iosifóskire (Jozáskire) čhavé, Izrailjoskire čhavéskire. Čhavé Asiroskire sys: Imna, Išva, Išvi i Bierija, i léngiri phen Sierah. Čhavé Bierijaskire sys: Xieviéro i Malhiilo. Jov sys Birzaifoskiro dad. Hievierostyr bijándyja Jafliéto (Iafliéto), Šomiéro i Xofamo, i Šuia, léngire phen. Čhavé Jaflietoskire sys: Pasaho, Bimgalo i Ašvafo. Ĥáda, sys čhavé Iaflietoskire. Čhavé Šemieroskire sys: Ahi, Rohga, Ihuba i Arámo. Čhavé Gieliemoskire, léskire-pšaléskire sys: Cofaho, Imna, Šeliéšo i Amalo. Čhavé Cofahoskire sys: Suaho, Xarniefiéro, Šualo, Beri, Imra, Biecero, Godó, Šama, Šylšo, Ifrano i Biejéra. Čhavé Jefieroskire sys: Jefunijo, Fispo i Ara. Čhavé Ulaskire sys: Araho, Xaniilo i Ricyja. Saré adalé čhavé Asiroskire sys šeralé pe léngire stréčy (pokoliénii), manušá vykedyné, manušá, savé sys muršá pe maribén, šeralé barydyrá. Začhindlé sys jone dre rodoskire spiski vaš xaladenge, vaš maribén, pir ginybén sys len biš te šov tysjoncy manušá. Vieniaminostyr bijándyja Bela, léskiro anglatunó čhavó, javír Ašbiélo, tríto Ahrajo, Štárto Noha i pándžto Rafa. Čhavé Belaskire sys: Adaro, Giera, Aviudo, Avišua, Naamano, Ahoaho, Giera, Šiefufano i Xuramo. I ĥáda, sys čhavé Jegudoskire, savé sys rodengire šeralé, savé dživdé ke Giéva i piritradyne dro Manahafo: Naamano, Ahiia i Giera, savó vytradyjá len, léstyr bijándyja Uza i Ahihudo. Šiegaraimostyr bijándyne čhavé pe Moavitoskiri phuv paló davá, syr jov otmekciá péstyr Xušima i Baara, péskire romnien. I bijandiá léstyr Xodieša, léskiri romný, Iovavos, Cyvijos, Miešos, Malhamos, Jeucos, Šahijos i Mirmos: ĥáda, sys léskire čhavé, šeralé pe stréčy. Hušyma bijandiá léske Avituvos i Jelpaalos. Čhavé Jelpaaloskire sys: Jeviéro, Mišamo i Šemiéro, savó čhudiá Ono i Lodo i fórja, savé sys tel léskiri zor, – i Bierija i Šema. Jone sys šeralé pe Aialonoskire-manušéngire stréčy. Jone vytradyné Giefoskire manušén. Ahio, Šašako, Iriemofo, Zevadija, Arado, Jediéro, Mihailo, Išfa i Ioha – Bierijaskire čhavé. Zevadija, Miešulamo, Xizkijo, Xieviéro, Išmierajo, Izlija i Iovavo – čhavé Jelpaaloskire. Jakimo, Zihrijo, Zavdijo, Jelijenajo, Cylfajo, Jeliilo, Adaija, Bieraija i Šymrafo – Šymejaskire čhavé. Išpano, Jeviéro, Jeliilo, Avdono, Zihrijo, Xanano, Hananija, Jelamo, Antofija, Ifdija i Fienuilo – Šašakoskire čhavé. Šamšerajo, Šeharija, Afalija, Iariéšyja (Jariéšija), Jelija i Zihrijo, Jerohamoskire čhavé. Adalé sys rodengire šeralé, dre péskire stréčy šeralé. Jone dživdé ke Jerusalimo. Ke Gavaóno dživdé: Gavaonitianengiro dad, – léskire-romniakiro lav sys Maaha, – I léskiro čhavó, anglatunó Avdono, pal léste Curo, Kiso, Vaalo, Nadavo, Giedoro, Ahio, Ziehiéro i Miklofo. Miklofostyr bijándyja Šymeja. I jone dživdé pašýl péskire pšalénde ke Jerusalimo, khetané péskire pšalénca. Nierostyr bijándyja Kiso; Kisostyr bijándyja Sáulo; Saulostyr bijándyja Ionafáno, Mielhisujo, Avinadavo i Ešbaalo. Čhavó Ionafanoskiro sys Mieribaalo, Mieribaalostyr bijándyja Miha. Čhavé Mihaskire: Pifono, Mieliégo, Faariéia i Aházo. Ahazostyr bijándyja Ioiada; Ioiadostyr bijándyja Aliemiéfo, Azmaviéfo i Zamvrijo; Zamvrijostyr bijándyja Moca; Mocastyr bijándyja Binejo. Riefaija léskiro čhavó; Jelieaso, léskiro čhavó; Acelo, léskiro čhavó. Aceloste sys šov čhavé, i, ĥáda, sys léngire lavá: Azrikamo, Bohru, Ismailo, Šearija, Ovadija i Xanano; saré jone sys Aceloskire čhavé. Čhavé Ješekoskire, léskire pšaléskire sys: Ulamo, léskiro anglatunó čhavó, javír Iieušo, tríto Jelifieliéto. Čhavé Ulamoskire sys manušá murškané, savé dénas kar'je lukostyr, lénde sys but čhavé i ŭnuki (niepóty): šel te pandždešá. Saré jone sys Vieniaminóskire čhavéndyr. Adiáke, sys pirigindle pir péskire ródy saré Izrail'tiáni, i, ake, jone sys začhindlé dre beršýtka arhívy Izrailjoskire kral'jénde. Manušá Judejátyr pal péskiro čoripén sys pirilydžine te dživén ke Vavilóno. Anglatuné manušá, savé dživdé pe péskire štéty, pir Izrailjoskire fórja, sys Izrail'tiáni, rašaja, Lievíty i Niefiniei, kon dživdiá ke Jerusalimo. Ke Jerusalimo dživdé vari-savé manušá Judáskire čhavéndyr i Vieniaminóskire čhavéndyr, i Jefriemóskire i Manasijáskire čhavéndyr: Ufajo, čhavó Amiudoskiro, čhavó Omriskiro, čhavó Imrijoskiro, čhavó Vanijoskiro – čhavéndyr Fariesoskirendyr, Judáskire-čhavéskire; čhavéndyr Šylonoskirendyr – Asaija, anglatunó bijáto i léskire čhavé; Čhavéndyr Zaraskirendyr – Iieuilo i léngire pšála, – šovšelá jeniadeša; čhavéndyr Vieniaminoskirendyr, Salu, čhavó Miešulamoskiro, čhavó Godavijoskiro, čhavó Gasienujoskiro; i Ivnija, čhavó Jerohamoskiro, i Ela, čhavó Uzijoskiro, Mihrijoskire-čhavéskiro, i Miešulamo, čhavó Šefatijaskiro, Rieguiloskire čhavéskiro, Ivnijaskire čhavéskiro, i léngire pšála, pir léngire ródy; jeniašela pandždešá šov, – saré adalé muršá sys rodengire šeralé dre péskire stréčy (pokolienii). A rašandyr: Jedaija, Ioiarivo, Iahino, i Azárija, čhavó Xielkijaskiro, čhavó Miešulamoskiro, čhavó Sadokoskiro, čhavó Mieraiofoskiro, čhavó Ahituvoskiro, savó sys barydyrésa dro Devléskiro Kher; i Adaija, čhavó Jerohamoskiro, čhavó Pašhuroskiro, čhavó Malhiiaskiro; i Maasajo, čhavó Adijeloskiro, čhavó Jahzieroskiro, čhavó Miešulamoskiro, čhavó Imieroskiro; i léngire pšála, savé sys šeralé pe péskire ródy: tysjonco eftašelá šovdešá – manušá sama fedýr dre butý syr rašaja dro Devléskiro Kher. A Lievitendyr: Šemaija, čhavó Xašuvoskiro, čhavó Azrikamoskiro, čhavó Xašavijaskiro, – Mierariskire čavendyr; i Vakbakaro, Xieriéšo, Galalo, i Matfanija, čhavó Mihaskiro čhavó Zihrijoskiro, čhavó Asafoskiro; i Ovadija, čhavó Šiemaijaskiro, čhavó Galaloskiro, čhavó Idifunoskiro, i Bieriehiia, čhavó Asáskiro, čhavó Jelkanoskiro, savó dživdiá dre gavá Nietofafoskire. Portengire rakhibnárja (privratniki): Šalumo, Akubo, Talmono i Ahimano, i léngire pšála; Šalumo sys šeraló. I ke dalé dyvesá dalé rakhibnárja isyn pašýl kral'jengiri pórta, ke vastóko, rikiréna stréga vaš Lievijoskire čhavénge. Šalumo, čhavó Korieskiro, čhavó Jeviasafoskiro, čhavó Koriejoskiro, i léskire pšála léskire rodóstyr, Korejani, pir péskiro butiarno réndo, sys rakhibnárja pašýl skinijakire progi, a léngire dadá rakhne zagiibén dro Ráskire-Devléskiro stáno (lod). Finiejéso, čhavó Jelizaroskiro, sys angledýr (vagedyr) barydyró pe lénde, i Raj Devél sys lésa. Zahárija, čhavó Miešeliemijaskiro, sys portengiro rakhibnari pašýl vudará dre skedyibnáskiri skínija. Sarén len, vykedynen dre rakhibnar'jénde pašé pórta ke progi, sys dujšelá dešudúi. Len začhindlé dre rodoskire spiski pir léngire gavá. Len čhudiá Davído i Samuílo – jasnovidco (magiko) pal léngiro čačipén. I jone, i léngire čhavé sys pe rakhiben pašýl Ráskire-Devléskire-Kheréskiri pórta, pašýl skinijakiro kher. Pe štar rigá sys portengire rakhibnárja: pe vastočno, západno (pe pal-paniakiri rig), paš-dyvesýtko (južno). Pšála léngire dživdé dre péskire gavá, jone javénas ke pšála časostyr ke časo pe eftá (bitrinéngiro deš) dyvesá. Adalé štar barydyrá pe portengire rakhibnar'jende, Lievíty, sys dre patýv; jone sys čhudé te rakhén kherá i piraliá Devléskire Khereskir. Trusciál (krugom) Devléskiro Kher jone i rat'kirde, pal-dová so pe lénde sys otphenybén te rakhén, i lénge sys trej kažno zlóko te otčhakiren vudará. Vari-savé léndyr sys čhudé ke khoré (sasúdy) vaš svénto butý, adiáke so ginybnasa jone prilenas khoré i ginybnasa jone vydenas. Javirenge léndyr sys dopatiandle javír khangirjákire čaré i saré svénta xabena: fedýr jaržó, i mol, i jeliéjo, i ladano, i aromatytka čarjá. A vari-savé rašángire čhavéndyr sčhuvenas miro aromatytkone čar'jéndyr. Matafija Lievitendyr, – jov sys anglatunó Sielumoskire-Korejaninoskiro, léske sys dopatiandlo te pekel pe skoroviédy (xiča), Vari-savénge léngire pšaléndyr, Kaafoskire čhavéndyr, sys dopatiandlo te skedén (te prigotovinen) svénta maré, sob (kaj) te janes len kažno sávato (subóta). Manušá, savé baganas, sys šeralé pe Lieviténgire stréčy (pokoliénii), dre khangirjákire štúby, i sys vol'na (psire) zalyibnastyr, pal-dová so dyvés i rat jone sys bangé te zalenpe péskire bagaibnasa. Adalé sys šeralé pe Lieviténgire stréčy, šeralé dre péskire ródy. Jone dživdé ke Jerusalimo. Ke Gavaóno dživdé: dad Gavaonitianengiro Iieilo – lav léskire-romniakiro sys Maaha, – i čhavó léskiro, anglatunó Avdono, pal léste Curo, Kiso, Vaalo, Niéro, Nadavo, Giedoro, Ahio, Zahárija i Miklofo. Miklofostyr bijándyja Šymieamo. I jone dživdé pašýl peskirende pšalénde ke Jerusalimo, khetané péskire pšalénca. Nierostyr bijándyja Kiso, Kisostyr bijándyja Sáulo, Saulostyr bijándyja Ionafáno, Mielhisujo, Avinadavo i Ješbaalo. Čhavó Ionafanoskiro sys Mieribaalo; Mieribaalostyr bijándyja Miha. Čhavé Mihaskire sys: Pifono, Mieliého, Fariéjo i Aházo. Ahazostyr bijándyja Iajéro; Iajerostyr bijándyja Aliemiéfo, Azmaviéfo i Zamvrija; Zamvrijastyr bijándyja Moca; Mocastyr bijándyja Biniéjo: Riefaija, léskiro čhavó; Jelieasa, čhavó léskiro; Acelo, čhavó léskiro. Acelostyr sys šov čhavé, i ĥáda, léngire lavá sys: Azrikamo, Bohru, Ismailo, Šearija, Ovadija i Xanano. Adalé sys čhavé Aceloskire. Filistimliáni mardépe Izrailjosa, i pirizorjakirenas dro maribén Filistimliáni Izrail'tianén, i pyné domardé pe bérga Gielvua. I tradynepe Filistimliáni pal Sauloste i léskire čhavénde, i domardé Filistimliáni Ionafanos, i Avinadavos, i Mielhisujos, Sauloskiren čhavén. Maribén proti Sauloste jaciá zoraledýr, i kar'jé-dyibnaskire (strielki) lukendyr sýges giné pe léste, adiáke so jov sys phusado andre lukenca. I phendiá Sáulo péskire manušéske, savó lydžalas mardýtko (oružyjo): “Vyle tyrí kurtála i phusav pe meriben lása man, sob (kaj) te na javén adalé naobčhindle, i te na zdiekinenpe pe mánde.” Ne manúš, savó lydžála mardýtko, na délas ráda; pal-dová so drieván strahadyja. Tedy Sáulo lyjá kurtála i pyjá pe láte. Léskiro manúš, savó lydžalas mardýtko, dykhciá, so Sáulo myjá, i kokoró pyjá pe kurtála, i myjá. I myjá Sáulo, i trin léskire čhavé, i saró léskiro kher khetané lésa myjá. Kiéli dykhné Izrail'tiáni, savé sys pe dólo, so saré našéna, i so Sáulo i léskire čhavé myné, tedy mekné péskire fórja i roznašnepe; a Filistimliáni javné i lyné te dživén dre lénde. Pe javír dyvés javné Filistimliáni te obkeden mulen i lathné Saulos i léskire čhavén, mulen pe Gielvuiaskiri bérga. I rozuride les, i zlyne léstyr léskiro šeró i léskiri mardýtko, i bičhadé pir Filistimijakiri phuv, sob (kaj) den te džinén pal davá angíl léngire ídoly i angíl manušénde. I čhudé léskiro mardýtko pe mangipnytko štéto (kapišča) péskire devlorengiro, i léskiro šeró čhudé dro Dagonoskiro kher. I šundiá saró Iaviso Galaadoskiro saró, so kerdé Filistimliáni Saulosa. I ĥazdynépe saré zoralé manušá, lyné Sauloskiro trúpo i léskire-čhavéngire trúpy, i jandlé les dro Iaviso, i garadé léngire kokalý tel dembo dro Iaviso, i postyndle eftá dyvesá. Adiáke myjá Sáulo pal péskiro čoripén, savó jov kerdiá angíl Raste-Devléste, pal dová, so na rakhciá Ráskire-Devléskiro lav i obrisija ke čovahany phučybnasa, a na phuciape Rástyr-Devléstyr. Paldavá Jov i muliakirdiá les, i piridyja kralipén Davidóske, Jesiejoskire čhavéske. I skedynépe saré Izrail'tiáni ke Davído dre Xievróno, i phendlé: “Ĥáda, ame sam tyró kokalo i loč (plot') tyrí; i tasiá, i tríto dyvés, kiéli iščo (inké) Sáulo sys kralísa, tu vylydžijan i zalydžijan Izrailjo, i Raj Devél, tyró Devél, phendiá túke: ‘Tu javésa te rakhés Miren Izrailjoskire manušén, i tu javésa Miré-Izrailjoskire manušéngire barydyrésa.’” I javné saré phurydyrá Izrailjoskire ke králi dro Xievróno, i kerdiá lénca Davído zaviéto dro Xievróno angíl Ráskire-Devléskiro muj; i jone pomakhne Davidós dre kralíste pe Izrailjo, pir Ráskire-Devléskiro lav, pirdál Samuiloste. I gijá Davído i saró Izrailjo ke Jerusalimo, ke Jevuso. A odój sys Jevusiei, manušá, savé dživdé pe doiá phuv. I phendlé Jevusoskire manušá Davidóske: “Tu na zadžasa adarík.” Ne Davído lyjá tvárdyma/diz (kriépost') Sióno; davá isyn fóro Davidóskiro. I phendiá Davído: “Kon angledýr saréndyr pirimarela Jevusiején, odová manúš javéla šeralesa i xaladéngire barydyrésa.” I zagijá angledýr saréndyr Ioávo, čhavó Saruiaskiro, i kerdiápe šeralesa. Davído dživdiá dre doiá tvárdyma/diz, paldavá i khardé la Davidóskire forosa. I jov obkerdia fóro trusciál, lyi Milostyr (foróstyr), saró trusciál, i Ioávo, obneviakirdia palatuné (posliédnia) foróskire pašá. Saró gijá lačhés Davidóste, i barjolas jov dre patýv butýr i butýr, i Raj Devél, bolybnáskire-jangoléngiro Devél sys lésa. Ĥáda, isyn šeralé zoralé muršendyr Davidóste, savé zoralés lynepe lésa dro léskiro kralipén, khetané saré Izrailjosa, sob (kaj) te čhuvés les kralísa, pir Ráskire-Devléskiro lav, pe Izrailjo, i ĥáda, ci but isyn zoralé muršá, savé sys Davidóste: Iiesvaalo [Ješobieamo-ju.o.], čhavó Ahamanijaskiro, šeraló pe trijánda manušénde. Jov ĥazdyjá péskiro čhurdyibnytko bust pe trinšelá manušénde i domardiá len pal jékh mólo. Pal léste sys Jelieazaro (Jelizáro), čhavó Dodoskire-Ahohiianinoskiro, jov sys triné zoralendyr. Jov sys Davidosa ke Fasdamimo, karik Filistimliáni skedynépe pe maribén. Odój paš félda sys zasieindly ĥerstosa (jačmienjosa), i manušá našné Filistimlianendyr. Ne jone terdiné maškír félda, zrakhné la i domardé Filistimlianen. I darindia Raj Devél baró zrakhibén! Trindžine adalen šeralen trijandatyr giné upré pe bérga ke Davído, dre ĥiebár (pieščera) Odolamo, kiéli Filistimlianengiro stáno sys terdó pe dólo Riefaimengiro. Davído tedy sys dro zoralé tynénca štéto, a rakhibnytka xaladé Filistimlianengire sys tedy dro Vifliejémo. I zoralés zakamdiape te p'jel Davidóske, i jov phendiá: “Kon paniakirela man paniésa Vifliejemoskire ĥanyngatyr, so isyn pašýl pórta?” Tedy adalé trin promardepe pirdál Filimstimijakiro stáno, i kedyne pherdés paní Vifliejemoskire ĥanyngatyr, so isyn pašýl pórta, i lyné, i jandlé Davidóske. Ne Davído na zakamdiá te p'jel les i vyčhudiá les vaš Ráskire-Devléskiri sláva, i phendiá: “Zrákh man, Rajo Dévla, sob (kaj) me te keráv davá! Ci lavá me te pjáv rat adalengire muršengire, savé otdenas péskire dijá! Pal-davá so jone riskinde péskire džiibnasa, i jone jandlé paní.” I na zakamdiá te p'jel les. Ĥáda, so kerdé trin adalé murškané manušá. I Aviésa, pšal Ioavoskiro, sys šeraló trinendyr; jov domardiá péskire čhurdyibnytkone bustiasa trinšelá manušén, i sys dre sláva odolé trinende. Trinendyr jov sys slavutnedyr i sys barydyrésa; ne odolenca trinenca jov na rovnindiape. O Vaniéia, čhavó Iodajoskiro, murškané-muršeskiro, baró pir réndy, Kavcieilostyr. Jov domardiá dujén Armiloskire Moavitonskiren čhavén; jov zgija i zamardiá ščeres dro rovo (xohoi), dro ivitko časo. Jov muliakirdiá Jegiptianinos, manušés baripnasa dre pandž kuniá. Dre vast Jegiptianinoskiro sys čhurdyibnytko bust, syr navoie tkačoste (katvaleste); a jov podgíia ke jov kaštesa, i, vykuscia čhurdyibnytko bust Jegiptianinoskire vastéstyr, i zamardiá les léskire bustiasa; Ĥáda, so kerdiá Vaneja, čhavó Iodajoskiro. I jov sys dre sláva odolé trinende murškanende; jov sys slavutnedyr trindešendyr, ne pervoné trinenca na rovnindiape. I Davído čhudiá les ordinarcosa, savó spolninelas léskire priphenybená. A šeralé xaladendyr sys: Asailo, pšal Ioavoskiro; Jelhanano, čhavó Dodoskiro, Vifliejemostyr; Šama Garoditianino; Xieriéco Pielonitianino; Ira, čhavó Ikiešoskiro, Fiekoitianino; Jevijeziéro Anafofianino; Sivhajo Xušatianino, Ilajo Ahohiianino; Magarajo Nietofatitianino; Xieliédo, čhavó Vaanaskiro, Xietofafianino; Itajo, čhavó Ribajoskiro, Givatyr Vieniaminovoskirjatyr; Vaniéia Pirafonianino; Hurajo Nagaljo-Gaašostyr; Avijélo Aravatyr; Azmaviéfo Baharumijanino; Jelijahba Šaalbonianino. Čhavé Gašiemoskire Gizonitianinoskire sys: Ionafáno, čhavó Šagiéskiro, Gararitianino; Ahiamo, čhavó Saharoskiro, Gararitianino; Jelifalo, čhavó Uroskiro; Hiefiéro Mahierostyr; Ahia Pielonitianino; Hiecrojo Karmilitianino; Naarajo, čhavó Jezbajoskiro; Ioiljo, pšal Nafanoskiro; Mivharo, čhavó Gagrijoskiro; Celiéko Amonitianino; Naharajo Bierofianino, manúš, savó lydžalas mardýtko (oružyjo) Ioavoske, čhavéske Saruiaskireske; Ira Ifrijanino; Gariébo Ifrijanino; Urija Xietejanino; Zavado, čhavó Ahlajoskiro; Adina, čhavó Šyzaskiro, Ruvimlianino, šeraló Ruvimlianengiro, i léste sys dešutrin; Hanano, čhavó Maahaskiro; Iosafáto Mifnijanino; Uzija Aštierofianino; Šamo i Iieijéljo [Jehieljo-ju.o.], čhavé Xofamoskire Aroierianinoskire; Iiediaelo, čhavó Šimrijaskiro, i Ioha, pšal léskiro Ficyjanino; Jelijéljo Mahavimostyr, i Iierivajo i Iošavija, čhavé Jelnaamoskire, i Ifma Moavitianino; Jelijélo, Oviédo i Iasijeljo Miecovajatyr. I adalé manušá adiáke-pac' javné ke Davído dro Siekielago, kiéli jov iščo (inké) garadjolas (čhakirelaspe) krigal Saulostyr, čhavestyr Kisoskirestyr, i sys murškanendyr, savé podyne vast (pomogindle) dro maribén, lénde sys luki, jone i čhurdenas zervone (lievone) i čačé (pravone) vastésa bará i, jone dénas kar'je lukendyr. Jone sys pšaléndyr Sauloskirendyr, Vieniaminostyr: šeraló sys Ahiieziéro, pal léste sys Ioáso, pal léste sys čhavé Šiemajaskire Givatyr; Jezijélo i Fieliéto; čhavé Azmaviefoskire; Bieraha i Iiegu Anafofostyr; Išmaija Gavaonitianino, muršari trijandendyr i barydyró pe trijandende; Jeriemiéjo, Jahaziilo, Iozavado Giedieratyr. Jeluzajo, Jerimofo, Viealija, Šiemarija, Safatija Xarifijanino; Jelkana, Išyjahu, Azariilo, Ioieziéro i Iošavamo, Korejani; i Ioiela i Zievadija, čhavé Jerohamoskire Giedorostyr. I vari-savé manušá Gaditianendyr piriginé ke Davído dre fórja zoralé tynénca, pe čhučí phuv, manušá murškané, maribnýtka, savénde sys ščýty i čhurdybnytka bustiá (kop'i); lénde sys muiá syr ščerende (lievende) – muiá léngire, i jone sys sygna syr sierny pe bérgi. Šeraló Jeziero, javír Ovadija, tríto Jeliavo, štárto Mišmana, pándžto Jeriemiéjo, šóvto Afajo, eftáto (bitrinéngiro déšto) Jelielo, ohtóto (bidujéngiro déšto) Iohanano, jeniáto Jelzavado, déšto Jeriemiéjo, dešupiérvo Mahbanajo. Jone sys šeralé čhavéndyr Gadoskirendyr pe xaladénde: tyknedýr pe šelá, i barydyró pe tysjoncy. Jone piriginé Iordáno dro pérvo čhon, kiéli jov vydžála péskire bergendyr, i rostradyne sarén manušén, savé dživdé pe dólo, ke vastóko i ke zapado (ke pal-pania). I javné adiáke-pac' vari-savé manušá čhavéndyr Vieniaminoskirendyr i Judaskirendyr dre fórja zoralé tynénca ke Davído. Davído gija angil pe striéč lénge i phendiá lénge: “Kóli ramanjosa (mirósa) javné tumé ke me, sob (kaj) te pomoginen mánge, tedy mek te javél mánde tuménca jekh iló; a kóli vaš dová, sob (kaj) xohaves te otdén man vergénge mirenge, to dykhí, so nane doš pe miré vastá, tedy mek te dykhél Devél amaré dadéngiro i te rozsendiakirel.” Tén'ci zgija dúho (fáno) pe Amasajoste, kon sys šeraló pe trijánda, i phendiá jov: “Ramánjo (miro) túke, Davíde, i te javél túsa, čhavó Jesiejoskiro; ramánjo túke, i ramánjo pomogibnaskirenge tyrenge; pal-dová so pomoginela túke Devél tyró.” Tedy prilyjá len Davído i čhudiá len šeralenca pe xaladénde. I vari-savé manušá Manasijáskire rodóstyr piriginé ke Davído, kiéli jov gijá Filistimlianenca pe maribén pe Sauloste, ne na pomogindia lénge, pal-dová so šeralé Filistimska, poradiny, otbičhade les, rakirí: “Pe amaró šeró jov piridžala ke xuláj léskiro, Sáulo.” Kiéli jov risijá dro Siekielago, tedy piriginé ke jov Manasijanendyr: Adnaho, Iozavado, Iiediaelo, Mihailo, Iozavado, Jeligu i Cyl'fajo, tysjoncengire barydyrá Manasijanende. I jone pomogindle Davidóske proti baré ke dar xaladybena, pal-dová so saré adalé manušá sys muršarja i sys barydyrá pe xaladénde. Adiáke kažnoné dyvesesa javénas ke Davído te poden vast ke dová, so léskiro xaladybén jaciá baró, syr baró xaladybén Devléskiro. Ĥáda, ci but sys šeralé pe xaladénde, savé javné ke Davído dro Xievróno, sob (kaj) te piridén léske kralipén Sauloskiro, pir Ráskire-Devléskiro lav: čhavén Judaskirendyr, savé lydžiné ščýto i čhurdypnytko bust (kop'jo), sys šov tysjoncy ohtošela skedyme pe maribén; čhavéndyr Simieonoskirendyr, manušén murškanen, dre xaladybén sys ohtó tysjoncy i šel; čhavéndyr Lievijoskirendyr sys štar tysjoncy šovšelá, i Iodajo, thagári kheritkoné rodóstyr Aaronoskirestyr, i lésa sys trin tysjoncy eftašelá; i Sadoko, murškanó ternó manúš, i ródo léskiro sys biš te duj barydyrá; čhavéndyr Vieniaminoskirendyr, pšalén Sauloskiren, sys trin tysjoncy, – ne iščo (inké) but léndyr rikirdepe ke kher Sauloskiro; čhavéndyr Jefriemoskirendyr sys biš tysjoncy ohtošela manušén murškanen, manušén slavutnonen pir péskire ródy; pašé-rodycóstyr Manasijaskirestyr sys dešuohto tysjoncy, savé sys pir lav vykharde, sob (kaj) te džán te čhuvén Davidós kralísa; čhavéndyr Isaharoskirendyr javné manušá god'varé, savé džindlé, so, kiéli treindiá te kerén Izrailjoske, – len sys dujšelá šeralen, i saré pšála léngire rikirdepe léngire lavéske; rodycóstyr Zavulonoskirestyr skedyné pe maribén, savé rikirde kažno xaladytko mardýtko, sys pandždešá tysjoncy, dre strojo jekhe-dijéngiro; rodycóstyr Niefalimoskirestyr sys tysjonco šeralé; lénca sys trijánda eftá tysjoncy ščytenca i čhurdybnytkone bustiénca; rodycóstyr (čangatyr) Danoskirestyr, savé sys skedyné pe maribén, sys biš te ohtó tysjoncy šovšelá; Asirostyr xaladén, skedyné pe maribén, sys štardešá tysjoncy; pal Iordanostyr, rodycóstyr Ruvimoskirestyr, Gadoskirestyr i pašýl-rodycóstyr Manasijaskirestyr, sys šel biš tysjoncy, kažno xaladytkone mardytkonenca. Saré adalé xaladé, dro strojo, saré iléstyr javné dro Xievróno te čhuvén kralísa Davidós pe saró Izrailjo. Adiáke i saré javír Izrail'tiáni sys dro jekh dúho (fáno), sob (kaj) te čhuvés kralísa Davidós. I sys jone odój ke Davído trin dyvesá, xané i piné; pal-dová so léngire pšála saró kerdé vaš lénge; adiáke-pac' i pašatuné ke jone, až ke ródyco Isaharoskiro, Zavulonoskiro i Niefalimoskiro, janénas saró xabén pe oslende, i vierbliudende, i guruvende: jaržó, inžyro, i ziumo, i mol (vino), i jeliéjo, i but baré i tykné kherítka murdalá; adiáke, syr rádyma sys vaš Izrailjo. I radindiape Davído barydyrénca pe tysjoncy, barydyrénca pe šelá i sarénca šeralenca, i phendiá Davído saré Izrail'tianengire skedyibnaske: “Kóli trej tuménge, i kóli pe dová javéla vólia amaré Ráskire-Devléskiri, amaré Devléskiri, to bičhavasa pir saró svéto ke javír amaré pšála, pir sarí Izrailjoskiri phuv, i khetané lénca ke rašaja i Lievíty, dre fórja i gavá léngire, ob (kaj) jone te skedénpe ke ame; i janasa ke pe kovčego amaré Devléskiro, pal-dová so dre Saulóskire dyvesá ame na risjovasas ilésa ke jov.” I phendiá saró skedyibén: “Mek te javél adiáke”, pal-dová so davá réndo (diélo) sarénge manušénge zdyjape čačunó. Adiáke skedyjá Davído sarén Izrail'tianén, Šihorostyr Jegiptoskirestyr ke zagiibén dro Jemafo, sob (kaj) te janén Devléskiro kovčego o Kiríaf-Iarimostyr. I gijá Davído i saró Izrailjo dro Kiríaf-Iarimo, so isyn dre Judéia, sob (kaj) te janén odothýr kovčego Ráskire-Devléskiro, Devléskiro, savó isyn beštó pe xieruvimy, pe savó phenélape Léskiro lav. I lydžiné kovčego Devléskiro pe nevó vurdén Avinadavoskire kheréstyr; i Oza i Ahiia lydžiné vurdén. Davído i saré Izrail'tiáni bašade angíl Devléste saré zorjátyr, giliénca, pe luty i arfy, i bubny, i cymbaly i rógi (truby). Kiéli doginé jone ke Xidonoskiri šúrna (gumno), Oza protyrdyjá péskiro vast, sob (kaj) te podrikirél kovčego, pal-dová so guruva band'kirde les. Ne Devél xoliásyja pe Ozaste i muliakirdiá les pal dová, so jov protyrdyjá péskiro vast ke kovčego; i jov daj-pac' myjá angíl Devléskiro muj. I zadumindiape Davído, so Devél muliakirdiá Ozas. I khardiá dová štéto Perec-Ucca “Ozaskiro xasibén’, adiáke jov kharélape ke davá dyvés. I strahadyja Davído Devléstyr dro dová dyvés, i phendiá: “Syr zalydžava me ke pe Devléskiro kovčego?” I na lydžijá Davído kovčego ke pe dro fóro Davidóskiro, a riskirdiá drom lésa ke Aviedaroskire-Giefianinoskiro kher. I jaciápe kovčego Devléskiro Aviedaroste, dro léskiro kher, trin čhoná, i bahtiakirdiá Devél Aviedaroskiro kher i saró, so sys léste. I bičhadiá Xiramo, Tiroskiro králi, ke Davído manušén te rakirén, i kiedrytko veš, i barunar'jen (kamienščyken), i kherá-keribnaskiren (plotniken), sob (kaj) te kerén léske kher. Kiéli udžindiá Davído, so čhudiá les Raj Devél kralísa pe Izrailjo, so sys ĥazdynó vučés léskiro kralipén, vaš léskire Izrailjoskire manušénge; to tedy lyjá Davído butýr džuvlién syr romnien dro Jerusalimo i bijándyne Davidostyr butýr čhavé i čhaja. I ĥáda, isyn lavá, savé bijándyne léstyr dro Jerusalimo: Samuso, Sovavo, Nafano, Solomóno, Jeviearo, Jelisua, Jelfaliéto, Nogaho, Nafiéko, Jafia, i Jelisama, Viejeliada, i Jelifaliéfo. I šundlé Filistimliáni, so pomakhno sys Davído dre kralíste pe saró Izrailjo, i ĥazdynépe saré Filistimliáni te rodén Davidós. I šundiá pal davá Davído, i gijá proti lénde. I Filistimliáni javné, i terdiné pe dólo Riefaimengiro. I phuciape Davído Rástyr-Devléstyr, rakirí: “Ci te džav mánge proti pe Filistimlianende, i ci otdesa Tu len dre miré vastá?” I phendiá léske Raj Devél: “Džá, i Me otdáva len dre tyré vastá.” I giné jone dro Vaal-Pieracymo, i domardiá len adáj Davído; i phendiá Davído: “Phagirdiá Devél vergén miren vastésa miresa, syr prokošybén panieskiro.” Paldavá i dyné lav dolé štetoske: Vaal-Pieracymo. I jačkirdé odój Filistimliáni péskire devloré, i priphendiá Davído, i xačkirdé jone len jagása. I nevéstyr (nevés) javné Filistimliáni, i terdiné pe dólo. I iščo (inké) phuciape Davído Devléstyr, i phendiá léske Devél: “Na džá mamúj pe lénde, risiev krig léndyr i džá ke jone bal'zamitkone vešeskire rigátyr; i kiéli šunesa glumo sýrby šagi (lamnia) pe bal'zamitkone-vešeskire vučipená, tedy džá dro maribén; pal-dová so vygijá Devél angíl túte, sob (kaj) te domarel Filistimlianengiro stáno (lod).” I kerdiá Davído, syr priphendiá léske Devél; i domardé jone Filistimlianengiro stáno, Gavaonostyr ke Gaziéro. I progijá lav Davidóskiro pir saré phuvjá, i Raj Devél kerdiá les syr dar vaš saré manušénge. I kerdiá Davído péske kherá dre Davidóskiro fóro, i skedyjá štéto vaš Devléskiro kovčego i kerdiá vaš léske bari šátra (skínija). Tedy phendiá Davído: “Nikonéske naštý te lydžál Devléskiro kovčego, apríč Lievitende; pal-dová so len vykedyjá pe davá Devél, sob (kaj) te lydžán Devléskiro kovčego i te dynarinén (te služinen) Léske pe viéko.” I skedyjá Davído sarén Izrail'tianén dro Jerusalimo, sob (kaj) te lydžán Devléskiro kovčego pe léskiro štéto, savó jov vaš léske kerdiá. I khardiá ke pe Davído Aaronoskiren i Lievitengiren čhavén: čhavéndyr Kaafoskirendyr, Uriilos barydyrés i léskire pšalén – šel te biš manušén; čhavéndyr Mierariskirendyr, Asaijas barydyrés i léskire pšalén – dujšelá biš manušén; čhavéndyr Girsonoskirendyr, Ioiljos barydyrés i léskire pšalén – šel te trijánda manušén; čhavéndyr Jelisafanoskirendyr, Šemaijas baryderes i léskire pšalén – dujšelá; čhavéndyr Xievronoskirendyr, Jelijelos barydyrés i léskire pšalén – ohtodešá; čhavéndyr Uziiloskirendyr, Aminadavos barydyrés i léskire pšalén – šel tedešuduj. I khardiá Davído rašán: Sadokos i Aviafaros, i Lievitén: Uriilos, Asaijas, Ioiljos, Šiemaijas, Jelijelos i Aminadavos, i phendiá lénge: “Tumé, barydyrá Lieviténgire rodengire, vysvencynenpe kokoré i tumaré pšála, i janén Ráskire-Devléskiro, Izrailjoskire-Devléskire kovčego pe štéto, savó me prigotovindjom vaš léske; pal-dová so syr angledýr na tumé kerdé davá, to tedy Raj Devél, amaró Devél, phagirdiá (domardiá) amen pal dová, so ame na phuciampe Léstyr, syr trej.” I vysvencyndlepe rašaja i Lievíty vaš dová, sob (kaj) te lydžán Ráskire-Devléskiro, Izrailjoskire Devléskiro kovčego. I lydžiné Lieviténgire čhavé Devléskiro kovčego, syr priphendiá Mójza pir Ráskire-Devléskiro lav, pe psiké pe šosty (balandiniá). I priphendiá Davído barydyrénge Lievitengirenge te čhuvén péskire pšalén, savé baganas pe muzykakire strumiénty, arfy, i luty, i cymbaly, sob (kaj) jone zoralés te podden zan radymakiri. I čhudé Lievíty Jemanos, Ioiljoskires čhavés, i léskire pšaléndyr, Asafos, Vieriehiinoskire čhavés, a Mierariskire čhavéndyr, pšalén lengiren, Jefanos, Kušaijaskires čhavés; i lénca pšalén lengiren javirén pir taláno: Zaharijas, Bienos, Iaziilos (Jaaziilos), Šemiramofos, Iiehiilos, Unijos, Jeliavos, Vanejas, Maasejas, Matanijas, Jelifliejos, Mikniejos i Ovied-Edomos i Jeieljos, syr rakhibnar'jen pe pórty. Jemano, Asafo i Jefano bašade zoralas pe xarkuné (miedítka) cymbaly, a Zahárija, Aziilo, Šemiramofo, Jehiilo, Unijo, Jeliavo, Maasiéjo i Vaniéia – pe arfy, sane bašade zaniása. A Matafija, Jeliflieujo, Mikniéjo, Ovied-Edómo, Iieieljo i Azazija – pe luty, sob (kaj) te kerén načalo. A Xienanija, Lievitengiro barydyró, sys bagaibnaskiro sykliakiribnari, pal-dová so jov sys talanytko dre péste. Vieriehiia i Jelkana sys rakhibnárja pašýl kovčego. Ševanija, Iosafáto, Nafanailo, Amasajo, Zahárija, Vaniéia i Elieziero, rašaja phurdyne rogénca angíl Devléskiro kovčego. Ovied-Edómo i Jehiia sys rakhibnárja pašýl kovčego. Adiáke Davído i phurydyrá Izrailjoskire i barydyrá pe tysjoncy giné te janén Devléskire-zavietóskiro kovčego Ovied-Jedomoskire kheréstyr, radymása. I kiéli Devél pomogindia Lieviténge, savé lydžiné kovčego Ráskire-Devléskire zavietóskiro, tedy začhindlé dro svénto dyibén Devléske eftá (bitrinéngiro deš) guruvorén i eftá bakrén. Davído sys uridó dre visonytko ídia, i adiáke-pac' i saré Lievíty, savé lydžiné kovčego, i manušá, savé bagandle, i Xienanija, barydyró manušéngiro, savé bašade i bagandle. Pe Davidóste sys iščo (inké) efódo parkaljostyr. Adiáke saró Izrailjo zalydžalas Ráskire-Devléskire zavietóskiro kovčego radymása, pašýl rogoskiri zan i gornengiri i cymbalengiri, bašavi pe arfy i luty. Kiéli Ráskire-Devléskiro zavietóskiro kovčego zagijá dre fóro Davidóskiro, e Mielhola, e Sauloskiri čhaj, dykhciá dre fenštra i, dykhciá kralís Davidós, savó uhtelas radymákires (radynybnasa), to joj lyjá te teliakirel les dro péskiro iló. I jandlé Devléskiro kovčego, i čhudé les maškír skínija, saví kerdiá vaš léske Davído, i jandlé Devléske célo shačkiribén i mirna (ramanjona) svénta dyibená. Kiéli Davído kerdiá célo shačkiribén i svénto dyibén Devléske, tedy bahtiakirdiá manušén Ráskire-Devléskire lavésa. I rozdyja sarénge Izrail'tianenge, i muršenge, i džuvlienge, pir jekh maró, i pir kotér mas, i pir kučik (kružka) mol (vino). I čhudiá te dynarinén (te služinen) angíl Ráskire-Devléskiro kovčego vari-savén Lievitendyr, sob (kaj) jone te ripirén (te slavinén), te parikirén i te barjakirén Ras-Devlés, Devlés Izrailjoskires: Asafos šeralesa, javirés pal léste Zaharijas, Iieilos, Šemiramofos, Iiehiilos, Matafijas, Jeliavos, i Vanejas, Oviedo-Edomos i Jeielos arfenca i lutenca i Asafos vaš bašaiben pe kimvaly. A Vanejas i Oziilos, rašán, sob (kaj) jone saró časo te trubinen angíl Devléskire-zavietóskiro kovčego. Dre dová dyvés Davído, dre pérvo mólo, dyjá psálmo te parikirén Ráske-Devléske pir Asafoste i léskire pšalénde; “Parikirén Ráske-Devléske, kharén zoralés Léskiro lav; rosphenén manušénge pal Léskire réndy; bagán Léske, bašaven psalmy Léske; rakirén pal saré Léskire dívy; šarenpe Léskire sventoné lavésa; mek te radynélpe iló manušéngiro, savénde isyn Raj-Devél; rodén Ras-Devlés i Léskiri zor, rodén saró časo Léskiro muj; priripiren dívy, savé Jov kerdiá, Léskire znamiénii (ĥiertyká) i sendy Léskire uštendyr, tumé, Izrailjoskiro ródo, san pishárja Léskire, čhavé Jakovóskire, vykedyné Léskire! Jov, Raj Devél, Devél amaró; sendy Léskire džána pir sarí phuv. Ripiren usady (sak) Zavieto Léskiro, lav, savó Jov rakirdiá dre tysjoncy rodénge, Dová, pal so Jov dorakirdiape Avraamosa, i dre so Jov sovlahadiá Isaakóske, I so čhudiá Jakovóske dro zakóno, i Izrailjoske dre zaviéto viekoskiro, rakirí: “Túke Me dáva phuv Xanaoskiri, dre mekny mištypnáskiri miéra tuménge.” Jone sys tedy tykné i nabaré, manušá, savé javné javire rigéndyr pe láte, i jone piriginé manušéndyr ke manušá, jekhe kralipnastyr ke javír manušá; ne Jov nikonéske na dyjá vólia te kerél fuipén lénge i vyrakirdia pal lénde kral'jén: “Na čilaven kasynenpe ke pomakhne Miré, i na kerén fuipén Miré prorokenge.” Bagán Ráske-Devléske, sarí phuv rosphen zoralés dyvés dro dyvés pal Léskiro zrakhibén. Rosphenén Najudénge pal Léskiri sláva, saré manušénge pal Léskire dívy. Pal-dová so baró isyn Raj Devél i isyn mol, sob (kaj) te šarén Les, Jov isyn daranedyr saré javire devlorendyr. Pal-dová so saré manušéngire devloré isyn nisó; a Raj Devél sozdyjá bolybén. Patýv i rajkanypen angíl muj Léskiro, zoralypén i rádyma pe štéto Léskiro. Otdén Ráske-Devléske, ródycy manušéngire, otdén Devléske baripén i patýv. Otdén Ráske-Devléske sláva lavéske Leskireske. Len dáro, džán angíl muj Léskiro, kloninenpe Ráske-Devléske dro šukaripén Léskire sventymakiri. Izdran angíl Léste, sarí phuv, pal-dová so Jov sozdyjá svéto; jov na zdžála štetóstyr. Mek te radynénpe bolybena, mek te viesielinelpe (te lošaljol) phuv, i mek te phenén dre manušénde: ‘Te dživél Raj Devél pe viéki!’ Mek te pleskinel zorjása mórjo (derjáv), i dová, so pherdiakirela les, mek te radynélpe félda i saró, so isyn pe láte. Mek te radynénpe khetané saré vešá dembitka angíl muj Ráskire-Devléskiro; pal-dová so Jov džála te sendiniakirel phuv. Slavinén Ras-Devlés, pal-dová so dre viéko tangipén Léskiro, I phenén: “Zrákh amen, Dévla, Zrakhibnari amaró! Skéde amen i vyrakh (zbavin) amen Najudytkoné manušéndyr, ame barjakirasa svénto lav Tyró i šarasape slavása Tyrjasa! Te javél bahtiakirdó Raj Devél, Devél Izrailjoskiro, viekostyr i ke viéko!” I phendlé saré manušá: “Amín'! Alliluia!” Davído jačkirdiá odój, angíl Ráskire-Devléskire zavietóskiro kovčego, Asafos i léskire pšalén, sob (kaj) jone te dynarinén angíl kovčego saró časo, kažno dyvés, i Ovied-Edomos i léskire pšalén šovdešá ohtó manušén; Ovied-Edomos, čhavés Idifunoskires, i Xosas – rakhibnar'jenca pe pórta. A rašás Sadokos i léskire pšalén rašán – angíl Ráskire-Devléskiri skínija, so sys pe vučipén dre Gavaóno, vaš dová te janén célo shačkiribén Ráske-Devléske pe altárjo, kaj xačkirena saró časo, zlokosa (rankosa) i bel'velié, i vaš saró, so isyn čhindló dre Ráskire-Devléskiro Zakóno, savó Jov priphendiá Izrailjoske; i lénca sys Jemano i Idifuno i javír vykedyné, savén uphendle pir lav, sob (kaj) te slavinén Ras-Devlés, pal-dová so tangipén Léskiro jačélpe pe viéko. Pašýl lénde sys Jemano i Idifuno, i, sob (kaj) te slavinén Devlés, te bašaven pe rógi, cymbaly i javír bašaibnytka strumiénty; a čhavén Idifunoskiren jov čhudiá pašýl pórta. I giné saré manušá, kažno dre péskiro kher; risijá i Davído, sob (kaj) te bahtiakirél péskiro kher. Kiéli Davído dživdiá dro péskiro kher, to tedy phendiá Davído Nafanoske prorokoske: Ĥáda, me dživáva dro kiedrytko kher, a Devléskire-zavietóskiro kovčego isyn tel šátra.” I phendiá Nafano Davidóske: “Saró, so túte isyn pe iló, ker; pal-dová so túsa isyn Devél.” Ne dre doiá-pac' rat sys Devléskiro lav ke Nafano: “Džá i phen Miré pisharíske Davidóske: ‘Adiáke rakiréla Raj Devél: na tu kerésa Mánge kher te dživáv, pal-dová so Me na dživdjom dro kher dolé dyveséstyr, syr vylydžijom Izrailjoskire čhavén, i ke davá dyvés, a psirdjom skinijatyr dre skínija i kheréstyr dro kher. Kaj Me na psirdjom saré Izrailjosa, ci phendjom Me jekh lav vari-savéske Izrailjoskire sendar'jenge, savénge Me phendjom te rakhén Miré manušén: sóske tumé na keréna Mánge kher kiedrytko?’ I akaná adiáke phen Miré pisharíske Davidóske: ‘Adiáke rakiréla Raj Devél, Devél bolybnáskire-jangoléngiro: Me lyjom tut bakréngire stadatyr, sob (kaj) tu javes šeralesa Miré Izrailjoskire manušénge; i Me sómas túsa ŭsiéndie (viezdié), karik tu na psirdian, i vymardjom sarén Tyré vergén angíl tyró muj, i kerdjom lav tyró, syr baren-manušéngire lav, savé isyn pe phuv; i Me keráva štéto vaš Miré Izrailjoskire manušénge i Me zoraliakirava len, i javéna jone štylés te dživén pe péskiro štéto, i na javéla butýr čilado, i nažužé na léna butýr te pritasaven len, syr angledýr, dre dolé dyvesá, kiéli Me čhudjom sendar'jen pe Miré Izrailjoskire manušénde, i Me štyliakirdjom saré tyré vergén, i Me dáva te džinés túke, so Raj Devél keréla túke kher. Kiéli spolninenape tyré dyvesá, i tu otdžasa ke tyré dadá, tedy Me čhuváva ródo tyró paló (poslie) túte, savó javéla tyré čhavéndyr, i čhuváva léskiro kralipén. Jov keréla Mánge kher i čhuváva trono léskiro pe viéko. Me javáva léske dadésa, i jov javéla Mánge čhavésa, – i tangipén (žalima) Miro Me na otlava léstyr, syr Me otlyjom doléstyr, savó sys angledýr tútyr. Me čhuváva les dro Miro kher i dro Miro kralipén pe viéko, i trono léskiro javéla tvardo pe viéko.’” Saré dalé lavá i saré dykhibena ukrat (točnes) piriphendia Nafano Davidóske. I javdiá králi Davído, i terdijá angíl Raste-Devléste, i phendiá: “Kon me som, Rajo Dévla, i so dasavo kher miro isyn, so Tu adiáke čhudián upré man. Ne i davá iščo (inké) nábut sykadyjá dre Tyré jakhá, Dévla; Tu rakirésa pal kher Tyré-pishariskiro durál, i dykhésa pe mánde, syr pe baré manušéste, Rajo Dévla! Dévla! So iščo (inké) moginéla te dočhuvel angíl Túte Davído vaš baripén Tyré pisharíske? Tu džinésa Tyré pisharís! Rajo Dévla! Vaš Tyré pisharíske, pir iló Tyró, Tu kerésa saró davá baró, sob (kaj) te sykaves kažno rajkanypen. Rajo Dévla! Nane javirés, syr Tu san, i nane Devlés, apríč Túte, pir saró, so šundiám ame péskire kanenca. I kon isyn javír, syr Tyré Izrailjoskire manušá, jékh manušá pe phuv, ke savé sys javi Devél, sob (kaj) te vyrakhel len Péske dre manušénde, te kerél Péske lav baré i darane rendosa – manušéngire tradypnasa krig Tyré manušéngire móstyr, savén Tu zrakhcián Jegiptóstyr. Tu kerdián Tyré Izrailjoskire manušén, Peskirenca manušénca pe viéko, i Tu, Rajo Dévla, jacián léngire Devlésa. I adiáke akaná, o, Rajo Dévla, lav, savó Tu phendián pal Tyré pishariste i pal léskiro kher, ker tvardonesa pe viéko i ker, syr Tu phendián. I mek te javél i mek te barjol lav Tyró dro viéko, sob (kaj) rakirdé: “Raj Devél, bolybnáskire-jangoléngiro Devél Izrailjoskiro, isyn Devél pe Izrailjo”; i kher Tyré pishariskiro Davidóskiro, mek te javél tvardo angíl Tyró muj. Pal-dová so Tu, Dévla miro, otkerdian Tyré pisharíske, so Tu kerésa léske kher; paldová Tyró pishári i jačian murškanó te mangélpe angíl Túte. I akaná, Rajo Dévla, Tu Devél, i Tu phendián pal Tyré pishariste dasavo lačhipén. Syr sys lačhó Túke le te bahtiakires kher Tyré pishariskiro, sob (kaj) jov te javél pe viéko angíl Tyró muj. Pal-dová, so kóli Tu, Rajo Dévla, bahtiakiresa, tedy javéla jov bahtiakirdó viéčnes pe viéki.” Paló (poslie) davá Davído pirimardia Filistimlianen, i štyliakirdia len, i lyjá Giéfo i fórja, savé sys tel léskiri zor. Jov pirimardia adiáke-pac' Moavitianen, i kerdépe Moavitiani Davidóskire pishar'jénca, i lydžiné léske dyibén (dan'). I pirimardia Davído Adraazaros, Suvakire kralís, dro Jemafo, kiéli odová gijá te zoraliakirel péskiro vast pašýl reka (len') Jevfrato. I lyjá Davído léstyr tysjonco maribnýtka vurdyná, eftá (bitrinéngiro deš) tysjoncy manušén, savé sys uklisté pe grénde i biš tysjoncy manušén, savé giné pezal, i rosphagirdiá Davído saré maribnýtka vurdyná, (piričhiny žyly grénde) i jačkirdiá léndyr féni šel. Sirijani Damaskostyr javné te poden vast (pe pomoš) Adraazaroske, Suvakire kralíske, ne Davído domardiá biš te duj tysjoncy Sirijanen. I čhudiá Davído rakhibnytkone xaladén dre Sirija Damaskoskiri, i kerdépe Sirijani Davidóskire pishar'jénca, lydžyi léske dyibén. I pomogindia Raj Devél usiéndie (kaj jov te na džal) Davidóske. I lyjá Davído suvnakuné ščýty, savé sys Adraazaroskire pishar'jénde, i jandiá len dro Jerusalimo. A Tivhafatyr i Kunostyr Adraazaroskire for'jéndyr lyjá Davído drieván but xarkóma (mied'). Látyr Solomóno kerdiá xarkuno mórjo (derjáv), i stýlby xarkuné, i khoré (sasúdy) xarkuné. I šundiá Fojo, králi Imafostyr, so Davído domardiá saré xaladén Adraazaroskiren, Suvakiren kraliskiren. I bičhadiá Ioramos, péskire čhavés, ke králi Davído, te vyphenel “šel lačhé dyvesá” léske i te parikirel léske pal dová, so jov mardiápe Adraazarosa i zamardiá les, – pal-davá so Fojo sys dre maribén Adraazarosa, – i jov lyjá pésa kažna (rázna) khoré suvnakuné, rupuvé i xarkuné. I otdyjá len králi Davído Ráske-Devléske khetané rupésa i suvnakása, savó jov lyjá saré Najudytkoné manušéndyr: Idumejanendyr, Moavitianendyr, Amonitianendyr, Filistimlianendyr i Amalikitianendyr. I Aviesa, Saruiaskiro čhavó, domardiá Idumejanen, pe Londo dólo, dešuohto tysjoncy; I čhudiá Davído dre Idumiéia rakhibnar'jéngire xaladén, i kerdépe saré Idumejani Davidóske pishar'jénca. Raj Devél pomogindia Davidóske ŭsiendie, karik jov na psirdiá. I sys kralísa Davído pe saró Izrailjo, i kerdiá séndo i čačipén sarénge péskire manušénge. Ioávo, Saruiaskiro čhavó, sys xaladéngiro barydyró, i Iosafáto, Ahiludoskiro čhavó sys kanceliari (pisarjo), Sadoko, Ahituvoskiro čhavó, i Avimieliého, Aviafaroskiro čhavó – rašaja, a Susa – čhinybnari pe lylá. O Vaniéia, Iodajoskiro čhavó – pe Xieliefiejénde i Fieliefiejénde; a Davidóskire čhavé sys anglatuné šeritka pašýl kralíste. Paló (poslie) davá myjá Naaso, Amonóskiro [Amonitianengiro-r.s.] králi, i jaciá kralísa léskiro čhavó, pe štéto léskiro. I phendiá Davído: “Sykaváva me tangipén Anonoske, Naasoskire čhavéske, pal lačhipén, savó léskiro dad kerdiá mánge.” I bičhadiá Davído manušén te podrikiren (te štyliakiren) les pal léskire dadéste; i javné Davidóskire slúgi (dynárja) pe Amonóskiro phuv, ke Anono, sob (kaj) te te podrikiren (te štyliakiren) les. Ne Amonoskire thagárja (kniázi) phendlé Anonoske: “Naúšto te duminesa, so Davído tangipnastyr (žalimatyr) ke tyró dad pribičhadia ke tu podrikiribnaskiren (obradypnaskiren)? Ci na vaš dová javné dynárja léskire ke tu, sob (kaj) te uĥaljon i te vydykhen phuv i te občhoren la?” I lyjá Anono Davidóskire dynar'jén, i obmuradia len, i občhindia léngire ídi pe paš, ke trušula, i otmekciá len. I giné jone. I rosphendlo sys Davidóske pal dalé manušénde, i jov bičhadiá lénge pe strieč, adiáke syr jone sys drieván magirdé; i phendiá králi: “Jačénpe dro Jerihóno, paka otbarjona tumaré čhora (brody), i, tedy risjon.” Kiéli Amonitiani dykhné, so jone kerdépe namilone Davidóske, tedy bičhadiá Anono i Amonitiani tysjonco talánty dro rup, sob (kaj) te les péske maribnýtka vurdyná i manušén uklisté pe grénde Miesopotamijakire Sirijatyr, i Maahoskire Sirijatyr, i Suvatyr. I lyné péske trindeša duj tysjoncy maribnýtka vurdyná i kralís Maahoskires léskire manušénca, savé javné i terdiné šeriengenca angíl Miedievoia. I Amonitiani skedynépe péskire for'jéndyr, i vyginé pe maribén. Kiéli šundiá Davído pal davá, to bičhadiá Ioavos saré murškané xaladenca. I vyginé Amonitiani, i terdiné ke maribén pašýl foróskiri pórta, a králja, savé javné kokoré, sys pe félda. Ioávo dykhéla, so javéla léske maribén angíl i palál, vykedyjá xaladén saréndyr fedyršone dro Izrailjo i čhudiá len proti Sirijanende. A palatunó (posliédnjo) paš manušén jov dopatiandyja Aviesiejoske, péskire pšaléske, sob (kaj) jone te terdjon proti Amonitianende. I phendiá jov: “Kóli Sirijani (Aramiéicy) javéna te pirizorjakiren man, tedy tu podesa vast mánge; a kóli Amonitiani javéna te pirizorjakiren tut, tedy me dáva vast túke. Jav murškanó, i javása tvardes (bidarakires) te terdjovas pal amaré manušénde i pal amaré Devléskire fórja, – i Devél mek te kerél, so Léske isyn lačhó.” I vygijá Ioávo i manušá, savé sys léste, pe maribén Sirijanenca; i jone prastándyne léstyr. Amonitiani dykhné so Sirijani našéna i kokoré prastándyne Aviesostyr, léskire pšalestyr, i giné andro fóro. I javdiá Ioávo dro Jerusalimo. Sirijani, syr dykhné, so len domardé Izrail'tiáni, to jone bičhadé manušén i vylydžpne Sirijanen, savé sys pe doiá rig rekakiri (leniakiri), i Sovako, kon sys barydyró pe xaladénde Adraazaroste, savó lydžijá angíl len. Kiéli rosphendlé pal davá Davidóske, jov skedyjá sarén Izrail'tianén, pirigija Iordáno i, javdiá ke jone, terdijá proti lénde; i vygijá Davído pe maribén Sirijanenca, i jone mardépe lénca. I Sirijani prastándyne krig Izrail'tianendyr, i phagirdiá Davído Sirijanende eftá tysjoncy maribnýtka vurdyná i štardešá tysjoncy manušén, savé sys pezal, i Sovakos, xaladéngire barydyrés, muliakirdiá. Kiéli dykhné Adraazaroskire dynárja, so len pirimarde Izrail'tiáni, to kerdé Davidosa ramánjo (miro), i poddynepe léske. I na kamlé Sirijani te poden vast butýr Amonitianenge. Pirdál berš, dro dová-pac' časo, kiéli králja vydžána pe maribén, vylydžijá Ioávo xaladén i lyjá te čhučakirel (te opustošynel) Amonitianengiri phuv, i javdiá i občhudiá trusciál xaladybnasa Rava. Davído jaciápe dro Jerusalimo. Ioávo, zalyja Rava, rosphagirdiá la. I lyjá Davído vienco (koróna) léngire kralískiro šerestyr; i dre léste sys talanto suvnakáj pharipnasa, i dróga bará sys pe léste; i sys jov čhudo pe šeró Davidóskiro. I drieván but doresybén vylydžijá foróstyr. A manušén, savé sys dre léste, vylydžijá i muliakirdiá len pilenca (rizilenca), sastruné vymaralkenca i toverenca. Adiáke kerdiá Davído sarénca Amonitianengire for'jenca, i risijá Davído i saré manušá dro Jerusalimo. Paló dová jaciá maribén Filistimlianenca dro Gaziéro. Tedy Sovohajo, Xušatianino, domardiá Safos, jekhés Riefaimoskire rodóstyr. I jone štylyne. I nevéstyr (nevés) sys maribén Filistimlianenca. Tedy o Jelhanamo, Iairoskiro čhavó, domardiá Lahmijos, pšalés Goliafonoskires, Giefianinos, savéste kašt dre čhurdybnytko bust sys syr vešyna dre tkačoskiro stanko. Sys iščo (inké) maribén dre Giefa. Odój sys jekh baró manúš, savéste sys pir šov angušta, sarén biš te štar. I jov adiáke-pac' sys Rafaimoskire rodóstyr. Jov koscia Izrailjo; ne Ionafáno, čhavó Šymaskiro, Davidóskire pšaleskiro, čhindiá les ke maribén. Davá sys odolé, savé bijándyne Riefaimendyr dre Giefa, i jone pyné Davidóskire vastéstyr i léskire-dynar'jéngire vasténdyr. I ĥazdyjápe nálačho (beng) pe Izrailjo, i začhudia Davidós te piriginel manušén Izrail'tianendyr. I phendiá Davído Ioavoske i manušénge, savé sys barydyrá pe manušénde: “Džán, piriginen Izrail'tianén, Virsavijatyr ke/žýko Dano, i phenén mánge, sob (kaj) me te džináv, ci but isyn len.” I phendiá Ioávo: “Mek te kerél butýr Raj Devél manušén Peskiren dre šel móly proti dová, ci but isyn len. Ci na saré jone, rajo miro, králjo, isyn miré-xuláskire pishárja? Vaš so trej davá, miro rajo, xulájo? Sob (kaj) te javél davá dre bang Izrailjoske?” Ne kralískiro lav pirizorjakirdia Ioavos; i gijá Ioávo, i obgija saró Izrailjo, i javdiá dro Jerusalimo. I podyja Ioávo Davidóske manušéngiro piričhinyben; i sys sarén Izrail'tianén tysjonco tysjoncy (miliono), i šel tysjoncy muršén, savé vytyrdenas kurtála, i Judejákire – štaršelá eftadešá tysjoncy, savé vytyrdenas kurtála. A Lievitén i Vieniaminianen jov na pirigindia maškirál lénde, pal-dová so kralískiro lav sys džungaló (brytko) Ioavoske. I na sys lačhó dre Devléskire jakhá davá réndo, i Jov dukhadia Izrailjo. I phendiá Davído Devléske: “Me kerdjom baró grého, so kerdjom davá. I akaná otmek bang Tyré pishariskiri, pal-dová so me kerdjom drieván dylynes.” I rakirdiá Raj Devél Gadoske, magikoske Davidoskireske, i phendiá: “Džá i phen Davidóske: ‘Adiáke rakiréla Devél: Trin dukhá Mánge javné pe godý te vykedes túke, vykede péske jekh léndyr, i Me bičhaváva les pe túte.’” I javdiá Gado ke Davído, i phendiá léske: “Adiáke rakiréla Devél: ‘Vykede péske’: ci trin beršá bokh; ci trin čhoná javéna tut te tradén tyré vérgi, i tyré-vergengiri kurtála javéla te doresel (te doiačel) tut; ci trin dyvesá – kurtála Ráskire-Devléskiri i fránsy pe phuv, i Jangólo Devléskiro, savó javéla te zamarél dre saré Izrailjoskire rigá. I adiáke, rozdykh, so mánge te otphenav Odoléske, Kon man bičhadiá lavésa.” I phendiá Davído Gadoske: “Mánge isyn drieván pharó; ne mek fedýr me te perav dre Ráskire-Devléskire vastá, pal-dová so drieván baró isyn Léskiro tangipén (žalima), jekh by mánge te na perav dre manušéngire vastá.” I bičhadiá Raj Devél fránsy pe Izrailjo; i myné Izrail'tian eftadešá tysjoncy manušá. I bičhadiá Devél Jangolós dro Jerusalimo, sob (kaj) te xasiakirél les. I kiéli jov lyjá te xasiakirél, dykhciá Raj Devél, i potangindia pal dová bari bída, i phendiá Jangoloske, Savó xasiakirdiá: “Uhtýlla (dósi)! Akaná obmek tyró vast.” Jangólo Ráskire-Devléskiro sys tedy terdó pe šúrna Ornaskire-Jevusejaninoskiri. I ĥazdyjá Davído péskire jakhá, i dykhciá Jangolós Ráskire-Devleskires, Savó sys terdó maškír phuv i bolybén, vytyrdynesa kurtalása dro léskiro vast, protyrdyi kurtála pe Jerusalimo; i pyjá Davído i phurydyrá, učhakirde balytkone gonenca pe péskire muiá. I phendiá Davído Devléske: “Ci na me phendjom te pirigines manušén? Me kerdjom grého, me kerdjom fuipén; a dalé bakré so kerdé? Rajo Dévla, Dévla miro! Mek te javél vast Tyró pe mánde i pe kher miré dadéskiro, a na pe Tyré manušénde, sob (kaj) Tu te xasiakires len.” I Jangólo Ráskire-Devléskiro phendiá Gadoske, sob (kaj) odová te phenél Davidóske: “Mek Davído te javél i te čhuvél altárjo Ráske-Devléske pe Ornaskire-Jevusejaninoskiri šúrna, kaj obmarena givá.” I gijá Davído, pir lav Gadoskiro, savó jov rakirdiá lavésa Ráskire-Devleskiresa. Orna obrisija, dykhciá Jangolós, i štar léskire čhavé sčhakirdepe (garadyne) lésa. Orna molotindia tedy parnó giv. I javdiá Davído ke Orna. O Orna, podykhciá i dykhciá Davidós, vygijá šurnatyr i poklonindiape Davidóske mósa ke phuv. I phendiá Davído Ornaske: “Otdé mánge štéto tel šúrna; me keráva pe léste altárjo Ráske-Devléske; pal adákicy, ci but mol otdé mánge les, sob (kaj) te pirijačel xasiakiriben manušéngiro.” I phendiá Orna Davidóske: “Le péske; mek te kerél miro xulái, králi, so léske isyn lačhó; ĥáda, me otdáva i guruvén pe célo shačkiribén, i obmaribnytka strumiénty pe kaštá, i parnó giv pe janybén: saró davá me otdáva bi lovengiro.” I phendiá králi Davído Ornaske: “Nad, me kamám te kinav tútyr pal dasaví timín, ci but mol isyn davá saró; pal-dová so me na lavá te lydžav tyró mištypén Devléske, i me na javáva te janav dová dro célo shačkiribén lynó bi lovengiro (ivjá).” I dyjá Davído Ornaske pal dová štéto šovšelá šékieli suvnakái. I kerdiá odój Davído altárjo Ráske-Devléske, i vyčhudiá célo shačkiribén i mirna (ramanjona) svénta dyibená Ráske-Devléske; i khardiá Ras-Devlés, i Jov šundiá les, bičhadiá jag bolybnástyr pe celoné-shačkiribnaskiro altárjo. I phendiá Raj Devél Jangoloske: “Rískir kurtála tyrí dre léskire nožny.” Dre davá časo Davído, dykhí, so Raj Devél šundiá les pe Ornaskire-Jevusejaninoskiri šúrna, jandiá odój svénto dyibén Ráske-Devléske. Ráskire-Devléskiri skínija, saví kerdiá Mójza pe čhučí phuv (pustynia), i altárjo celoné-shačkiribnaskiro sys dre dová časo pe vučipén dro Gavaóno. I na mogindiá Davído te džal odorík, sob (kaj) te phučelpe Devléstyr, pal-dová so strahado sys Jangoloskire kurtalátyr, Savó sys Rástyr-Devléstyr. I phendiá Davído: “Ĥáda, isyn Kher Ráskire-Devléskiro i ĥáda, altárjo vaš célo shačkiribén Izrailjoskiro. I priphendiá Davído te keden manušén, savé javné javire rigéndyr, savé sys pe Izrailjoskiri phuv, i čhudiá butiarnen, sob (kaj) te občingiren bará vaš Devléskire-Kheréskiro čhuibén. I but sastýr vaš gvozdi (karfina) ke vudará portatyr i vaš sphandypen kerdiá Davído, i but xarkóma (mied'), na ublavi (na važyny), i kiedrytko veš, na giny, pal-dová so Sidoniani i Tiriani jandlé Davidóske but kiedrytko veš. I phendiá Davído: “Solomóno, čhavó miro, isyn ternó i nabaré-zorjakiro, a Kher, savó trej te kerés vaš Ráske-Devléske, musinel te javél drieván baró ke rajkanypen, ke sláva i šukaripén angíl saré phuvjá, i adiáke javáva me te keráv vaš léske.” I kerdiá Davído but ke leskiro meribén. I khardiá Solomonos, čhavés péskires, i phendiá léske te kerél Kher Ráske-Devléske, Izrailjoskire Devléske. I phendiá Davído Solomonóske: “Miro čhavó! Mánde sys pe iló te keráv Kher vaš miré Ráskire-Devléskiro, Devléskiro lav; ne sys ke me lav Ráskire-Devléskiro, i sys phendló: “Tu pročhudian but rat i lydžijan baré maribena; túke naštý (na musinesa) te kerés kherá lavéske Miréske, pal-dová so tu čhudián but rat pe phuv angíl muj Miro. Ĥáda, túte bijandjola čhavó: jov javéla manúš ramanjono (mírno); Me dáva léske ramánjo saré léskire vergéndyr trusciál: paldavá lav léske javéla Solomóno. I Me dáva ramánjo i spokojo Izrailjoske dre léskire dyvesá. Jov keréla Kher lavéske Miréske, i jov javéla Mánge čhavésa, a Me javáva léske Dad (Dadésa), i keráva tvardo trono pir léskiro kralipén pe Izrailjo pe viéko.” “I kakaná, miro čhavó! Mek te javél Raj Devél túsa, sob (kaj) túke te udelpe saró; i, sob (kaj) tu kerdián Kher tyré Ráske-Devléske, tyré Devléske, syr Jov rakirdiá pal túte. Mek te del túke Raj Devél ĥalyibén i godý i te čhuvél tut pe Izrailjo; i tu zrákh tyré Ráskire-Devléskiro, tyré Devléskiro Zakóno. Tedy tu javésa bahtaliakirdo, kóli te javésa te pričhuves zor (te starinespe) te spolnines uphenybená i zakóny, savé rakirdiá Raj Devél Mojzáske vaš Izrailjo. Jav zoralé-voliakiro (tvardo) i murškanó, na dar i na piridživ. I ĥáda, me pharipnasa skedyjom vaš Ráskire-Devléskiro Kher šel tysjoncy talánty suvnakáj i tysjonco tysjoncy talánty rup, a xarkomake (miediake) i sastyreske nane vaga, pal-dová so len sys drieván but; i vešá i bará me adiáke-pac' kerdjom; a tu iščo (inké) dočhuv ke davá. Túte isyn drieván but butiarné, i barunarja (kamienotjosy), i vyčhinybnarja, i kherá-keribnaskire (plotniki), i kažnonen manušén, savé moginéna te kerén kažno butý; suvnakái, rup, i xarkóma, i sastýr naštý te gines (te rahines): le i ker; Raj Devél javéla túsa.” I rakirdiá Davído saré thagar'jenge Izrailjoskirenge te den vast Solomonóske, léskire čhavéske; “Ci nane tuménca Raj Devél, Devél amaró, savó dyjá tuménge ramánjo (miro) saré rigéndyr, pal-dová so Jov otdyjá dre miré vastá manušén phuvjakiren, i poddyjape phuv angíl Raste-Devléste i angíl Léskire manušénde. I adiáke pričhuvén iló tumaró i di tumaró ke dová, sob (kaj) te lathes Ras-Devlés, Devlés tumares. Uštén i kerén svénto štéto Ráske-Devléske, Devléske, sob (kaj) te pirilydžas Ráskire-Devléskiro zavietóskiro kovčego i svénta khoré Devléskire dro Kher, savó javéla kerdó lavéske Ráskire-Devleskireske.” Davído phurija i čalyja džiibnastyr, i čhudiá pe Izrailjo čhavés péskires Solomonos. I skedyjá sarén Izrailjoskire thagar'jen, i rašán, i Lievitén; i pirigindle sys Lievíty trijánda beršéndyr i butýr: i sys čyslo (gin) léngiro, giny pir šeré, trijandaohto tysjoncy manušá. Léndyr čhudé vaš réndo dro Devléskiro Kher biš te štar tysjoncy, lylá-čhinybnaskiren i sendar'jén šov tysjoncy. I štar tysjoncy rakhibnar'jén pe pórta (vráty), i štar tysjoncy manušén, savé slavindle Ras Devlés pe bagaibnytka strumiénty, savé jov kerdiá te slavinén (te barjakirén). I roskerdiá len Davído pir riady (pir stečki/očeriedi) pir čhavénde Lievijoskirende-Girsonoskire, Kaafoskire i Mierariske. Girsonianendyr – Laedano i Šymiejo. Čhavé Laedanoskire: anglatunó Iiehiilo, Ziefamo i Ioiljo, trin. Čhavé Šymiejoskire: Šelomifo, Xaziilo i Garano, trin. Jone sys Laedanoskire-strečakire šeralé. Iščo (inké) čhavé Šymiejoskire: Jahafo (Iahafo), Ziza, Iieušo i Bierija. Dalé sys čhavé Šymiejoskire, štardžine. Iahafo sys anglatunó, Ziza javír; Iieušoste i Bierijaste sys nábut čhavé, i paldavá jone sys dro jekh ginybén pašýl kher dadéskiro. Čhavé Kaafoskire: Amramo, Icgaro, Xievróno i Oziilo, štardžine. Čhavé Amramoskire: Aaróno i Mójza. Aaróno otdynó sys pe svencynyben ke Svénto-sventonengiro, jov i léskire čhavé, pe viéko, sob (kaj) te thuvliakiren (te kerén kurinyben) angíl Ráskire-Devléskiro muj, sob (kaj) te dynarinén (te služynen) Léske i te bahtiakiren Léskire lavésa pe viéko. A Mójza, manúš Devléskiro, i čhavé léskire sys pričhude ke ródyco Lievijoskiro. Čhavé Mojzáskire sys: Girsono i Jeliezero. Čhavé Girsonoskire sys: anglatunó sys Ševuilo. Čhavé Jelijezeroskire sys: anglatunó Riefavija. I na sys Jelijezeroste javír čhavé; Riehavijaste sys drieván but čhavé. Čhavé Icgaroskire sys: anglatunó Šelomifo. Čhavé Xievronoskire sys: anglatunó Iierija i javír Amarija, tríto Jahaziilo i štárto Jekamamo. Čhavé Oziiloskire sys: anglatunó Miha i javír Išyja. Čhavé Mierariskire sys: Mahli, i Mušy. Čhavé Mahliskire sys: Jelizáro i Kiso. I myjá Jelizáro, i na sys léste čhavé, a jekh čhaja: i lyné len pal péste čhavé Kisoskire, pšála léngire. Čhavé Mušyjoskire sys: Mahli, Jedero i Iriemofo-trindžine. Ĥáda, sys čhavé Lievijoskire, pir léngire dadengíre kherá, šeritka pe čékarja (siemieistvy), pir léngire-laveskiro ginybén pir šeré, savé kerdé dynaribnytka (služybnytka) butiá dro Ráskire-Devléskiro Kher, bišé beršéndyr i butýr. Pal-dová so Davído phendiá: “Raj Devél, Izrailjoskiro Devél, dyjá ramánjo Péskire manušénge i čhudiá te dživén len dro Jerusalimo pe viéko, I Lieviténge na trej te lydžán skínija i kažna priedmiety (čysy) lákire te dynarinén dre láte.” Pal-dová so pir palatunó (posliédnjo) rakiribén Davidóskiro sys pirigindle Lievíty bišé beršéndyr i butýr, sob (kaj) jone te javén pašýl Aaronóskire čhavénde te dynarinén Ráskire-Devléskire Kheréske, pe gréda (dvóro) i dre pristrojki, vaš dykhibén pal žužypen (čystota), savó te javél pe svénto štéto i vaš keriben kažno butý pašýl Ráskire-Devléskiro Kher, te pridykhen pal svénto maró, i parné-giveskiro jaržó vaš mareskiro janybén, i priesna mariklia, pal pekno, žarindlo, i pal kažno miéra i vieso, i sob (kaj) te terdjon kažno zlóko (ránko) te parikirén i šarén Ras-Devlés, adiáke-pac' i bel'velié, i pašýl célo shačkiribén, savó janéna Ráske-Devléske dre sávaty (suboty), dre neve čhoná i pe svénki pir čysly (giná), syr čhindló pal lénde, – saró časo angíl Ráskire-Devléskiro muj, i, sob (kaj) te rakhén skínija dosykaibnása (otkrovienijasa) i svénto štéto i čhavén Aaronoskiren, péskire pšalén, kiéli jone keréna svénto butý Ráskire-Devléskire Kheréske. I ĥáda, syr rosčhude pir giiben (poriadko) Aaronóskire čhavé: čhavé Aaronóskire: Nadavo, Aviudo, Jelizáro i Ifamaro. Nadavo i Aviudo myné angledýr péskire dadéstyr, čhavé na sys lénde; i pal-dová Jelizáro i Ifamaro sys rašaja. I rosčhudiá len Davído-Sadokos, Jelizaroskire čhavéndyr, i Ahimieliehos, Ifamaroskire čhavéndyr, jekh pal jekhéste pe léngiro dynaribén (služba). I lathiape, so maškír Jelizaroskire čhavénde maškír strečengire (pokolijengire) šeralende sys butýr, syr maškír Ifamaroskire čhavénde. I jov rosčhudiá len adiáke: Jelizaroskire čhavéndyr dešušov čekar'jengire (siemieistvengire) šeralé, a Ifamaroskire čhavéndyr ohtó. Rosčhudia len pir žriébijo; pal-dová so šeralenca pe svénto štéto i šeralenca angíl Raste-Devléste sys manušá Jelizaroskire čhavéndyr i Ifamaroskire čhavéndyr, i začhindiá len Šemija, čhavó Nafanailoskiro, lylá-čhinybnaskiro (pisco) Lievitendyr, angíl muj kralískiro i thagar'jengiro, i angíl rašaste Sadokoste i Ahimieliehoste, Aviafaroskire čhavéste, i angíl rašángire sem'iengire šeralende i Lievitengirende: lyné, syr te čhurdén žriébijo, jekh čékar' (siemieistvo) Jelizaroskire rodóstyr, paló (poslie) dová lyné Ifamaroskire rodóstyr. I vygijá pérvo žriébijo Jegoiarivoske, javír Jedaijoske, tríto Xarimoske, štárto Sieorimoske, pándžto Malhijoske, šóvto Mijaminoske, eftáto Gakocoske, ohtóto Avijaske, ieniáto (bijekhéskiro déšto) Iiešuaske, déšto Šehanijaske, dešujékto Jeliašyvoske, dešuiavir Jakimoske, dešutrito Xušajoske, dešuštarto Ješevavoske, dešupandžto Vilgaske, dešušovto Imieroske, dešueftato Xieziroske, dešuohtoto Gapicecoske, dešujeniato Pietahiiaske, bišengiro Jezekiiljoske, biš te pérvo Iahinoske, biš te javír Gamuloske, biš te tríto Dielaijoske, biš te štárto Maazijaske. Ĥáda, sys léngiro giiben (poriadko) pašýl dynaribén léngiro, syr lénge te javén dro Ráskire-Devléskiro Kher, pir uphenybén léngiro pir Aaronoste, léngire dadéste, syr priphendiá léske Raj Devél, Devél Izrailjoskiro. Ake, syr rosčhude pir giiben (poriadko) javire čhavén Lievijoskiren: Amramoskire čhavéndyr: Šuvailo; čhavéndyr Šuvailoskirendyr: Iiedija; Riehavijastyr: čhavéndyr Riehavijaskirendyr Išyja sys anglatunó; Icgarostyr: Šelomofo; čhavéndyr Šelomofoskirendyr: Iahavo; čhavéndyr Xievronoskirendyr: anglatunó Iierija, javír Amarija, tríto Jahaziilo, štárto Jekamamo. Čhavéndyr Oziiloskirendyr: Miha; čhavéndyr Mihaskirendyr: Šamiro. Pšal Mihaskiro Išyja; čhavéndyr Išyjaskirendyr: Zahárija. Čhavé Mierariskire: Mahli i Muša; čhavéndyr Iazijaskirendyr: Biéno. Čhavéndyr Mierariskirendyr Iazijate: Biéno i Šogamo, i Zakuro i Ivri. Mahliste-Jelizáro (Elieazaro); léste na sys čhavé. Kisoste: čhavéndyr Kisoskirendyr: Jerahmiilo. Čhavé Mušaskire: Mahli, Jediéro i Jerimofo. Ĥáda, sys čhavé Lieviténgire pir stréčy (pokolienii) léngire. Čhurdyné i jone žriébijo, khetané péskire pšalénca, Aaronóskire pšalénca, angíl muj kralískiro Davidóskiro i Sadokoskiro i Ahimieliehoskiro, i rašángire-šeralengiro i Lievitengiro: čekar'jengire (siemieistvengire) šeralengiro khetané péskire tyknedyršone pšalesa. I otčhudia dre rig (rosčhudiá) Davído i barydyrá xaladéngire pe dynaribén (služynyben) čhavén Asafoskiren, Jemanoskiren i Idifunoskiren, sob (kaj) jone te angilphenen (te proročynen) pe luty, arfy i cymbaly; i sys otmekne jone pe péskiro réndo te dynarinén: čhavéndyr Asafoskirendyr: Zakuro, Iosifo (Joza), Niefanija i Ašarela, čhavé Asafoskire, savé sys tel vast Asafoskiro, savó bašadia pir kralískiro uphenybén. Idifunostyr čhavé Idifunoskire: Giedalija, Ceri, Isajo, Siemiéjo, Xašavija i Matafija, šovdžine, tel vast péskire-dadéskiro Idifunoskiro, savó bašadia pe luta vaš sláva i vaš šaribén Ráske-Devléske. Jemanostyr čhavé Jemanoskire: Bukija, Matfanija, Oziilo, Ševuilo i Iierimofo, Xananija, Xanani, Jeliafa, Gidalti, Romamti-Jeziéro, Iošbiekaša, Malofi, Gofiro i Mahaziofo. Saré adalé sys čhavé Jemanoskire, magikoskire kralískire, pir lavá Devléskire, sob (kaj) te barjakirén sláva Léskiri. I dyjá Devél Jemanoske dešuštar čhavén i trinen čhajén. Saré jone tel vast péskire dadéskiro bagandle dro Ráskire-Devléskiro Kher cymbalenca, arfenca i lutenca dro dynaribén dre Ráskire-Devléskiro Kher, pir uphenybén kralískiro, ci Asafoskiro, ci Idifunoskiro i ci Jemanoskiro. I sys len ginybnasa léngire pšalénca, savé sys vysykliakirde te bagán angíl Raste-Devléste, sarén, savé džindlé davá réndo, dujšelá ohtodešá ohtó (bidujéngiro deš). I čhurdyné jone žriébijo pal stečka (riado) služynybnaskiri (dynaribnaskiri), tyknó rovnes khetané baresa, sykliakiribnarja khetané sykliaibnytkonénca. I vygijá pérvo žriébijo Asafoske, vaš Jozáske (Iosifoske); javír Giedalijaske léskire pšalénca i léskire čhavénca; len sys dešudúi; tríto Zakuroske léskire čhavénca; i léskire pšalénca, len-dešudúi; štárto Icrijoske léskire čhavénca i léskire pšalénca; len-dešudúi; pándžto Nafanijaske léskire čhavénca i léskire pšalénca; len-dešudúi; šóvto Bukijaske léskire čhavénca i léskire pšalénca: len-dešudúi; eftáto (bitrinéngiro déšto) Iiesarieljoske léskire čhavénca i léskire pšalénca; len-dešudúi; ohtóto Isajoske léskire čhavénca i léskire pšalénca; len-dešudúi; ieniáto Matfanijaske léskire čhavénca i léskire pšalénca; len-dešudúi; déšto Šymiejoske léskire čhavénca i léskire pšalénca; len-dešudúi; dešujékhto Azariiloske léskire čhavénca i léskire pšalénca; len-dešudúi; dešuiavir Xašavijaske léskire čhavénca i léskire pšalénca; len-dešudúi; dešutrito Šuvailoske léskire čhavénca i léskire pšalénca; len-dešudúi; dešuštarto Matafijaske léskire čhavénca i léskire pšalénca; len-dešudúi; dešupandžto Jerimofoske léskire čhavénca i léskire pšalénca; len-dešudúi; dešušovto Xananijaske léskire čhavénca i léskire pšalénca; len-dešudúi; dešueftato Iošbiekašoske léskire čhavénca i léskire pšalénca; len-dešudúi; dešuohtoto Xananiske léskire čhavénca i léskire pšalénca; len-dešudúi; dešujeniato Malofijoske léskire čhavénca i léskire pšalénca; len-dešudúi; bišengiro Jeliafoske léskire čhavénca i léskire pšalénca; len-dešudúi; biš te pérvo Gofiroske léskire čhavénca i léskire pšalénca; len-dešudúi; biš te javír Gidaltijoske léskire čhavénca i léskire pšalénca; len-dešudúi; biš te tríto Mahaziofoske léskire čhavénca i léskire pšalénca; len-dešudúi; biš te štárto Romamti-Jezeroske léskire čhavénca i léskire pšalénca; len-dešudúi. Ĥáda, syr rosčhude rakhibnar'jén pe vudará: Korejanendyr Miešelemija, Koriejoskiro čhavó, čhavéndyr Asafoskirendyr. Čhavé Miešelemijaskire sys: anglatunó Zahárija, javír Jedialo, tríto Zievadija, štárto Jafniilo, pándžto Jelamo, šóvto Jegohanano (Iiegohanano), eftáto Jelijegoenajo. Čhavé Oviedo-Edomoskire sys: anglatunó Šemaija, javír Jegozavado (Iiegozavado), tríto Ioaho, štárto Saharo, pándžto Nafanailo, šóvto Amiilo, eftáto Isaharo, ohtóto Pieul'fajo, pal-davá so Devél bahtiakirdiá les. Léskire čhavestyr Šiemaijastyr bijándyne adiáke-pac' čhavé, savé sys barydyrénca dro péskiro ródo; pal-dová so jone sys zoralé muršá. Čhavé Šiemaijaskire sys: Ofni, Riefailo, Oviédo i Jelzavado, pšála léskire, muršá zoralé, Jelija i Siemahiia. Saré jone sys Ovied-Edomoskire čhavéndyr; jone, i léngire čhavé, i léngire pšála sys lačhé manušá ke dová i sys dre zor: len sys Ovied-Edomoste šovdešá duj. Miešeliemijaste sys dešuohto čhavé i pšála, manušá talanytka. Xososte, čhavéndyr Mierarinoskirendyr, čhavé sys: Šimri šeraló (nadykhi pe davá, so jov na sys anglatunó), ne dad les čhudiá šeralesa; Javír Xielkija, tríto Tievalija, štárto Zahárija, sarén čhavén i pšalén Xososte sys dešutrin. Ĥáda, syr rosčhude rakhibnar'jén pe pórty pir čekar'jengiro (siemieistvengiro) šeralypen, kon sys dre zor pe butý khetané léngire pšalénca, te dynarinén dro Ráskire-Devléskiro Kher. I čhurdyné jone žriébijo, syr tyknó, adiáke i baró, pir péskire čékarja (siemieistvy) pe kažna pórty. I vypyja žriébijo pe vastóko Šieliemijaske; i Zaharijaske, léskire čhavéske, god'varé junkaroske (sovietnikoske), čhurdyné žriébijo, i vygijá léske žriébijo pe paš-rat; Ovied-Edomoske pe paš-dyvés, a léskire čhavénge pašýl piraliá. Šupimoske i Xososke pe zapado (pal paniá), pašýl pórta Šieliehiet, kaj drom ĥazdélape, i kaj rakhibnárja proti rakhibnar'jénde. Ke vastóko sys pir šov Lievíty, ke paš-rat sys pir štar, ke paš-dyvés pir štar, a pašýl piraliá pir duj. Ke zapado pašýl trémo sys pe drom pir štar, pašýl sámo trémo pir duj. Ĥáda, syr rosčhude rakhibnar'jén pe pórty čhavéndyr Koriejoskirendyr i čhavéndyr Mierariskirendyr. Lievíty, léngire pšála, dykhné pal kučipena Ráskire-Devléskire Khereskir i pal kučipnaskire piraliá, kaj čhuvénas otdyné dáry. Čhavé Laedanoskire, Giersonoskire čhavéskire – Laedanostyr, čekar'jengire (siemieistvengire) šeralestyr Laedanostyr Giersonskonestyr: Jehielo (Iiehiielo). Čhavé Jehieloskire sys: Ziefamo i Ioilo, léskiro pšal, dykhné pal kučipnaskire piraliá Ráskire-Devléskire Khereskir, khetané Amramoskire rodosa, Icgaroskiresa, Xievronoskiresa, Oziiloskiresa. Šievuilo, čhavó Girsonoskiro, Mojzáskire (Moisiejoskire) čhavéskiro, sys šeraló dykhibnari pe kučipnaskire piraliá. Léskire pšaléste Jelizieroste sys: čhavó Riehavija, léste čhavó Isajo, léste čhavó Iorámo, léste čhavó Zihrijo, léste čhavó Šelomifo. Šelomifo i léskire pšála dykhné pal saré kučipnaskire piraliá vaš otdyné dáry, savé otdyjá králi Davído i šeralé čekar'jengire, i barydyrá pe tysjoncy, i barydyrá pe šelá, barydyrá (komandiry) xaladéngire. Doresybnastyr pe maribén i zauhtylybnastyr (dobyčatyr) jone dénas pe Ráskire-Devléskiro Kher te podrikiren. I saró, so otdyjá proróko Samuílo, i Sáulo, čhavó Kisoskiro, i Avieníro, čhavó Niroskiro, i Ioávo, čhavó Saruiaskiro, saró sys otdynó sys pe vastá Šelomifoske i léskire pšalénge. Icgaroskire rodóstyr: Xienanija i čhavé léskire sys čhudé te dynarinén Izrail'tianenge, lylá-čhinybnar'jénca i sendar'jénca. Hievronoskire kheritkoné rodóstyr (pliemjostyr): Xašavija i léskire pšála, manušá murškané, tysjonco eftašelá manušá, savé dykhné pe Izrailjo pir daja rig Iordanoskiri ke zapado, pir saré réndy pir svénto butý Ráske-Devléske i pir dynaribén kralíske. Hievronoskire kheritkoné radostyr o Jerija (Iierija) sys šeraló Xievronianende, dre léngire ródy, dre stréčy. Dre štardešytko berš Davidóskiro kralipén len zagindle, i lathné maškír lénde manušén murškanen dre Iaziéro Galaadoskiro, I léskire pšála, manušá talanytka sys duj tysjoncy eftašelá, jone sys šeralé čekar'jengire (siemieistvengire). Len čhudiá králi Davído pe Ruvimoskiro ródyco, i Gadoskiro, i pe paš-ródyco Manasijáskiro, pir saré Devléskire réndy i kralískire réndy. Ĥáda, sys čhavé Izrailjoskire pir léngiro ginybén, šeralé čekar'jengire, tysjoncengire barydyrá i šelengire barydyrá, i savé pir otdieliénii dynarindlé (služyndle) kralíske dre saré réndy, javi i otgii kažno čhon, dre saré čhoná beršeskire. Dre kažno otdielienijo [divizija-ju.o.] sys len pir biš te štar tysjoncy. Pe pérvo otdielienijo, vaš pérvo čhon, sys barydyró Iašovamo, čhavó Zavdiiloskiro; dro léskiro otdieliénijo sys biš te štar tysjoncy; jov sys jekh Fariesoskire čhavéndyr, šeraló pe sarénde xaladéngire barydyrende dro pérvo čhon. Pe otdieliénijo javire-čhonéskiro sys barydyró Dodajo Ahohiianino; dro léskiro otdielienijo sys i thagári Miklofo, i dre léskiro otdieliénijo sys biš te štar tysjoncy. Tríto šeraló xaladéngiro barydyró, vaš tríto čhon sys o Vaneja, čhavó rašaskiro Iodajoskiro, i dro léskiro otdielienijo sys biš te štar tysjoncy: adavá Vaneja – jekh trijandendyr murškanendyr (muršar'jendyr) i barydyró pe lénde, i dro léskiro otdieliénijo sys Amizavado, léskiro čhavó. Štárto, vaš štárto čhon, sys barydyró Asailo, pšal Ioavoskiro, i pal léste Zavadia, léskiro čhavó; i dro léskiro otdieliénijo sys biš te štar tysjoncy. Pándžto, vaš pándžto čhon, sys barydyró thagári Šamgufo Izrahitianino; i dro léskiro otdieliénijo sys biš te štar tysjoncy. Šóvto, vaš šóvto čhon, sys barydyró Ira, Ikiešoskiro čhavó, Fiekoianino; i dro léskiro otdieliénijo sys biš te štar tysjoncy. Eftáto, vaš eftáto čhon sys barydyró Xielieco Pielonitianino, Jefriemóskire čhavéndyr, i dro léskiro otdieliénijo sys biš te štar tysjoncy. Ohtóto, vaš ohtóto čhon sys barydyró Sovohajo Xušatianino, Zaraskire rodóstyr, i dro léskiro otdieliénijo sys biš te štar tysjoncy. Jeniáto, vaš jeniáto čhon sys barydyró Avijeziero Anafofianino, Vieniaminóskire čhavéndyr, i dro léskiro otdieliénijo sys biš te štar tysjoncy. Déšto, vaš déšto čhon sys barydyró Magarajo Nietofafianino, Zaraskire rodycóstyr; i dro léskiro otdieliénijo sys biš te štar tysjoncy. Dešujekhto, vaš dešujekhto čhon sys barydyró Vaneja Pirafonianino, Jefriemóskire čhavéndyr, i dro léskiro otdieliénijo sys biš te štar tysjoncy. Dešuiavir, vaš dešuiavir čhon, sys barydyró Xieldajo Nietofafianino, Gofoniiloskire rodóstyr; i dro léskiro otdieliénijo sys biš te štar tysjoncy. A pe Izrailjoskire ródycy, – Ruvimlianende, šeraló barydyró sys Jelieziero [Jelijeziero-r.s.], Zihriskiro čhavó; Simieonoste (Siemjonoste) – Safatija, Maahiskiro čhavó; Lievijoste – Xašavija, Kiemuiloskiro čhavó; Aaronoste – Sadoko; Judaste – Jeliavo, Davidóskire pšaléndyr; Isaharoste – Omri, Mihailoskiro čhavó; Zavulonoste – Išmaija, Ovadijaskiro čhavó; Niefalimoste – Jerimofo, Azriiloskiro čhavó; Jefriemóskire čhavénde – Osija, Azazijaskiro čhavó; dro Manasijáskire paš-ródyco – Ioiljo, Fiedajaskiro čhavó; dro Manasijáskire dro paš-ródyco pe Galaádo – Ido, Zaharijaskiro čhavó; Vieniaminoste – Jaasiilo, Avieniroskiro čhavó; Danoste – Azariilo, Jerohamoskiro čhavó. Ĥáda, sys šeralé pe Izrailjoskire ródy. Davído na pirigindia odolén, savé sys bišé beršéndyr i tyknedýr, pal-dová so Raj Devél phendiá, so Jov ubarjakirela (keréla baredýr) Izrailjo, syr bolybnáskire čergeniá. Ioávo, Saruiaskiro čhavó, lyjá te kerél piriginybén, ne na kerdiá ke kónco (ke jagóro). I sys pal davá xolý Devléskiri pe Izrailjo; i na zagijá dová piriginybén dre Davidóskire-kralískiro beršytko začhinyben. Pe kralitka kučipena sys Azmaviéfo, Adiiloskiro čhavó; a pe zapasy dre félda, dre fórja, i dre ĥava, i dre tvárdymi (bašni) – Ionafáno, Uzziiloskiro čhavó; pe manušénde, savé zalenape feldytkone butienca, savé obkerenas phuv – Jezrijo, Xieluvoskiro čhavó; pe manušénde, savé keréna butý pe vinagradniki (drakhiniá) Šymiéjo, Ramatyr, a pe zapasy mol (vino) dre vinagradniki (drakhiniá) – Zavdijo, Šefamostyr; pe masliny i inžyro pe dólo sys – Baal-Xanano Giedieritianino, a pe zapasy dre vešytko dzet sys – Ioáso; pe baré kheritkoné murdalénde, savó čaravelaspe dre Šarono – Šytrajo Šaronianino; a pe skoto dre dólo – Šafato, Adlajoskiro čhavó; pe vierbliudende – Ovilo Ismail'tianino; pe oslicende – Jehdijo Mieronifianino; pe tykné kheritkoné murdalénde – Jazizo [Iazizo-r.s.] Agaritianino. Saré dalé sys barydyrá pe felatin, saví sys kralíste Davidóste. Ionafáno, Davidóskiro kak, sys junkaro (godý-dyibnaskiro), god'varó manúš i lylá-čhinybnaskiro (pisco); Jehiilo, Xahmoniskiro čhavó, sys pašé kralískire čhavénde; Ahitofiélo sys junkaro (godý-dyibnaskiro) kralískiro; Xusiejo Arhitianino – sys drúgo (mal) kralískiro; Paló Ahitofieloste sys Iodajo, Vanejaskiro čhavó, i Aviafaro; a Ioávo sys xaladéngiro barydyró kralíste. I kedyja Davído ke pe dro Jerusalimo sarén Izrailjoskire thagar'jén [lydžaibnaskiren-ju.o.], barydyrén pe ródy i barydyrén pe družyny [otdiely-r.s.], savé dynarindlé kralíske, i tysjoncengire barydyrén, i šelengire barydyrén, i manušén, savé sys barydyrá pe sarí fielatin i pe stády kralískire, i léskire čhavén skopcenca (jevnuhenca), xaladéngire barydyrén, i sarén murškané muršén. I terdijá králi Davído pe péskiro ĥerá, i phendiá: “Šunén man, miré pšalale i miré manušále! Sys mánde pe iló te keráv kher vaš ramánjo vaš Ráskire-Devléskiro zavietóskiro kovčego i predko tel ĥerá amaré Devléskire, i saró, so trej te čhuvén Kher, me skedyjom vaš butý. Ne Devél phendiá mánge: “Na ker Kherá Miré lavéske, pal-dová so tu san manúš, savó psirdian pe maribén i pročhudian rat.” Usajékh vykedyjá Raj Devél, Devél Izrailjoskiro, man saré miré-dadéskire kheréstyr, sob (kaj) te javav mánge kralísa pe Izrailjo pe viéko, pal-dová so Judas vykedyjá Jov thagarisa, a dro kher Judáskiro isyn kher miré-dadéskiro, a miré-dadéskire čhavéndyr man zakamdiá te čhuvél kralísa pe saró Izrailjo, i saréndyr mirendyr čhavéndyr, – pal-dová so but čhavén dyjá mánge Raj Devél, Jov vykedyjá Solomonos, miré čhavés, te bešél pe Ráskire-Devléskiro kralipnaskiro trono pe Izrailjo, i phendiá mánge: “Solomóno, tyró čhavó, keréla Kher Miro i gredy (dvory) Miré, pal-dová so Me vykedyjom les Péske dre čhavéste, i Me javáva léske Dadésa. I keráva Me léskiro kralipén pe viéko, kóli jov javéla tvardes te kerél saró pir Miré priphenybená i uphenybená Miré, syr ke davá dyvés.” I akaná angíl jakhá saré Izrailjoskire, Ráskire-Devléskire skedyibnaskire, i dre kaná amaré Devléskire rakiráva: “Rakhén i rikirenpe ke saré priphenybená Ráskire-Devléskire, amaré Devléskire, sob (kaj) te zauhtylen tuménge dalé lačhé phuvjá i te jačkiren la paló (poslie) péste dre meknó mištypén péskire čhavénge pe viéko; i tu Solomóno, miro čhavó, džin Devlés tyré dadeskires, i dynarin Léske saré iléstyr i saré diéstyr, pal-dová so Raj Devél sprobinela saré ile i džinéla saré dúmy. Kóli tu javésa te rodes Les, tedy lathesa Les, a kóli jačkiresa Les, Jov jačkiréla tut sarésa. Dykh akaná, kiéli Raj Devél vykedyjá tut te kerés Kher vaš svénto štéto, jav zoralé-voliakiro (tvardo) i ker. I otdyjá Davído Solomonóske, péskire čhavéske, čertjo'žo vaš trémo, i léskire-kherengiro, i vaš štúby uprál, i piraliá léskire, i léskire andratuné komory (xaromy), i kherá vaš kovčego, i čertjožo vaš saró, so sys léste pe di, gredy pašýl Ráskire-Devléskire Kheréskiro i saré štúby trusciál, vaš piraliá Ráskire-Devléskire Khereskire i vaš piraliá, kaj te rikirén svénta khoré; i vaš komory rašángire i Lieviténgire, i vaš kažno réndo, syr te dynarinén dre Ráskire-Devléskiro Kher, i vaš saré khoré, syr te les len dre butý pe Ráskire-Devléskiro Kher; i pal suvnakuné priedmiéty (čysy), uphendle pharipnasa (viesosa), vaš kažno khoró, so sys dre butý, pal saré priedmiéty rupuvé, uphendle vagasa, vaš kažno khoró te dynarinén. I dyjá suvnakáj vaš momolytka (svietil'niki) i vaš suvnakuné léngire lampady, uphendle vagasa vaš kažno momelytko i léskire lampady, adiáke-pac' vaš momolytka rupuvé, uphendle vagasa vaš kažno momolýtko i léskire lampady, dykhí pir uphenybén kažnoné momelytkoneske te les len vaš dynaribén. I suvnakáj dyjá jov vaš skaminda, kaj sys svénto maró, vaš kažno suvnakunó skamínd, i rup vaš skaminda rupuvé, i videlki (bustiá), i tahtaja (čašy), i kučika (kružki) te kropinen žužé suvnakástyr, i suvnakuné čaré uphendle pharipnasa (viesosa) vaš kažno čaró, i rupuvé čaré, uphendle vagasa vaš kažno čaró, i vaš altárjo vyčhudé suvnakástyr te thuvliakires uphendly vaga, i čertjožo, syr te kerés maribnýtko vurdén suvnakuné xieruvimenca, savé rozmekena phaká (kryly) i, savé učhakirenas kovčego Ráskire-Devléskiro Zavietosa. Saró davá isyn dro lyl Rástyr-Devléstyr, rakirdiá Davído, syr Jov sykliakirdiá man pe saré réndy strojkakire.” I phendiá Davído péskire čhavéske Solomonóske: “Jav zoralé-voliakiro (tvardo) i murškanó, i lepe pal réndo; na dar i na strahandjov, pal-dová so Raj Devél, Devél miro, javéla túsa; Jov na otdžala tútyr, i na jačkiréla tut, paka tu kerésa saró réndo, savó trej vaš svénto butý dro Ráskire-Devléskiro Kher. I, ake, otdiély rašángire i Lieviténgire, vaš kažno butý pašýl Kher Ráskire-Devléskiro. I túte isyn vaš kažno réndo lačhé manušá, vaš kažno butý, savé kaména la i isyn spiécy; i barydyrá i saré manušá, kon isyn pir zor i godý pe saré tyré uphenybená.” I iščo (inké) phendiá králi Davído saré skedyibnaske: “Solomóno, miro čhavó, savés jekhés vykedyjá Devél, ternó i nabaré-zorjakiro, a butý daja isyn bari; pal-dová so na vaš manušéske javéla Kher davá, a vaš Ráske-Devléske. Saré zor'jéndyr me skedyjom vaš Kher Devléskiro mireskiro suvnakáj vaš suvnakuné priedmiéty, i rup vaš rupuvé priedmiéty, i xarkóma vaš xarkuné priedmiéty, sastýr vaš sastruné priedmiéty, i veš vaš vešeskire priedmiéty, bará onikso i bará učhude, bará goža i kažnoné mastinengire (cviatengire), i liuba dróga bará, i but mramoro [mramorytka plity-ju.o.]; i iščo (inké): pir miro dová, so me otdyjon pes Kheréske miré Devléskiro, isyn mánde miro kučipén suvnakástyr i rupéstyr; i les me otdáva vaš miré-Devléskiro Kher, uprál saréstyr, so me skedyjom vaš svénto Kher; trin tysjoncy talánty suvnakái, suvnakáj Ofirsko, i eftá tysjoncy talánty žužó rup, te občhuven vánty dre kherá, vaš kažno suvnakunó priedmiéto, i vaš kažno rupuvó priedmiéto, i vaš kažno vykeriben, so keréla spiéco pir vastengiri butý. Ci kaméla iščo (inké) vari-kon te del adadyvés vaš Ráske-Devléske?” I lyné te den čekar'jéngire barydyrá, i barydyrá Izrailjoskire pe ródycy, i barydyrá pe tysjoncy i pe šelá, i barydyrá pe felatin kralískiro. I jone dyné, sob (kaj) te čhuvén Devléskiro Kher pandž tysjoncy talánty i deš tysjoncy drahmy suvnakái, i rup deš tysjoncy, i xarkuné dešuohto tysjoncy talánty, i sastýr šel tysjoncy talánty. I konéste lathnepe dróga bará, to odolé otdyné i len dre kučipnaskiri piralý Ráskire-Devléskire Kheréske, pe vastá Jehiiloske Giersonitianinoske. I radyndlepe manušá zevlypnaske lengireske, pal-dová so jone saré iléstyr otdenas Ráske-Devléske; adiáke-pac' i králi Davído drieván radyndiape. I bahtiakirdiá Davído Ras-Devlés angíl saró skedyibén, i phendiá Davído: “Te javes bahtiakirdó Tu, Rajo Dévla, Izrailjoskiro, amaré dadéskiro, viekostyr i pe viéko! Tyró, Rajo Dévla, rajkanypen, i zoralypén, i sláva, i zbiérdyma (pobiéda), i saró, so isyn pe bolybén i pe phuv, isyn Tyró; Tyró, Dévla, kralipén, i Tu san vučedýr saréstyr, syr Baró Raj, Savó xulainela. I barvalypén, i sláva Tyré móstyr, i Tu xulainesa pe saró; i dro Tyró vast zor isyn zor i zoralypén; i dre Tyrí zor te barjakires i te zoraliakires saró. I akaná, amaró Dévla, ame parikirasa Túke, i šarasa slavútno lav Tyró. Pal-davá so kon me som, i kon miré manušá isyn, so ame mogindiam adiáke te otdas kuč priedmiéty? Ne Tútyr isyn saró, i Tyré vastéstyr doresno, so ame otdyjam Túke, pal-dová so čúža manušá ame sam angíl Túte i syr manušá, savé javdiám javire rigátyr, syr i saré amaré dadá; syr zer (cien') isyn amaré dyvesá pe phuv, i nane ničí, so ĥará (dlúges) tyrdelape (isyn viéčno). Rajo Dévla, Dévla amaró! Saró davá baró zapaso, savó skedyjam ame, sob (kaj) te čhuvas Kher Túke, sventoné Tyré lavéske, Tyré vastéstyr isyn jov, i saró isyn Tútyr. Džinóm, miro Dévla, so Tu sprobinesa iló i kamésa žužeilytkima; me žužé (čystone) iléstyr mirestyr dyjom saró davá, i akaná me dykháva, so i Tyré manušá adiáke-pac', savé adáj isyn, radymása janéna Túke. Rajo Dévla, Dévla Avraamóskiro, Isaakoskiro i Izrailjoskiro, dadengíre-amarengiro! Zrákh davá pe viéko, davá otlydžyiben dumkakiro, pe ile manušéngire Tyrengire, i jan iló léngiro ke Tu. Solomonóske, miré čhavéske, de iló čačunó, sob (kaj) jov te rakhél priphenybená Tyré, otčhakiriben Tyró i uphenybená Tyré, i te kerél saró davá i te kerél kher, vaš savó me kerdjom zapasy.” I phendiá Davído saré skedyibnaske: “Te bahtiakiren saré amares Ras Devlés, Devlés amares.” – I bahtiakirdiá saró skedyibén Ras-Devlés, Devlés péskire-dadengires, i pyné, i poklonindlepe Ráske-Devléske i kralíske. I jandlé svénta dyibená Ráske-Devléske, i ĥazdyné célo shačkiribén Ráske-Devléske, pe javír dyvés paló (poslie) davá dyvés: tysjonco terné guruvén, tysjonco bakrén, tysjonco bakrorén léngire thadune čhuibnasa, i but svénta janybená Ráske-Devléske saré Izrailjostyr. I xané, i piné angíl Raste-Devléste dre dová dyvés, baré radymása, i dre javír mólo čhudé kralísa Solomonos, Davidóskire čhavés, i pomakhne les angíl Raste-Devléste dre šeralé barydyreste, a Sadokos dre rašaste. I bestiá Solomóno pe trono Ráskire-Devléskiro, syr králi, pe štéto Davidóskiro, péskire dadéskiro, i sys mištó saró léste, i saró Izrailjo kandyjá les. I saré barydyrá i manušá dre zor, adiáke-pac' i saré kralískire Davidóskire čhavé poddynepe Solomonóske, kralíske. I ĥazdyjá vučés Raj Devél Solomonos angíl saré jakhá Izrailjoskire, i dyjá léske sláva kralipnaskiri, saví na sys angledýr léstyr ni jekhe kralíste pe Izrailjo. I Davído, čhavó Jesiejoskiro, sys kralísa pe saró Izrailjo. Časo léskire kralipnaske pe Izrailjo sys štardešá berš: dro Xievróno sys kralísa jov eftá berš, i dro Jerusalimo sys kralísa trijánda trin berš. I myjá dro lačhó phuripen, bahtalyi džiibnasa, barvalypnasa i slavása; i jaciá kralísa o Solomóno, léskiro čhavó, pe štéto léskiro. Réndy (diély) kralískire Davidóskire, anglatuné i palatunó (posliédnia), čhindlé dre začhinybena Samuiloskire, i dre začhinybena Nafanoskire-prorokoskire, i dre začhinybena Gadóskire. Adiáke-pac' i saró kralipén léskiro, i murškipen léskiro, i vakancyi (slučai), savé kerdépe lésa, i Izrailjosa, i saré phuvjákire kralipnenca. I jaciá zoraledýr Solomóno, Davidóskiro čhavó, dre kralipén péskiro; i Raj Devél, Devél léskiro, sys lésa, i ĥazdyjá les vučés. I priphendiá Solomóno te skedénpe saré Izrailjoske: barydyrénge pe tysjoncy, i barydyrénge pe šelá, i sendar'jenge, i sarénge, kon sys barydyró pir saró Izrailjo – rodengire (strečengire) šeralenge. I giné Solomóno i saró skedyibén lésa pe vučipén, so sys dro Gavaóno; pal-dová so odój sys Devléskiri skedyibnáskiri skínija, saví kerdiá Mójza (Moisiejo), Ráskire-Devléskiro pishári, pe čhučí phuv. Kovčego Devléskiro jandiá Davído Kiriafiarimostyr [Kiríaf-Jarimostyr-ju.o.] pe štéto, savó prigotovindia vaš léske Davído, kerdiá vaš Léske skínija dro Jerusalimo. A xarkuno (miedno) altárjo, savó kerdiá Viesielieilo, Urijaskiro čhavó, Oraskire-čhavéskiro, jaciápe odój, angíl Ráskire-Devléskiri skínija, i dénas patýv odój Léske Solomóno skedyibnasa. I odój angíl muj Ráskire-Devléskiro, pe xarkuno altárjo, savó sys angíl skedyibnáskiri skínija, ĥazdyjá Solomóno tysjonco célo shačkiribén. Dre doiá rat sykadyjá Devél Solomonóske i phendiá léske: “Mang, so Mánge te dav túke?” I phendiá Solomóno Devléske: “Tu kerdián Davidóske, miré dadéske, baró lačhipén i čhudián man kralísa pe štéto léskiro. Mek te kerélpe ke kónco/iagóro (te spolninélpe), Rajo Dévla, lav Tyró ke Davído, miro dad. Adiáke syr Tu čhudián man kralísa pe buté manušénde, savé isyn syr práho phuvjákiro, to tedy akaná de mánge godý i džinybén, sob (kaj) me te džináv angíl adalé manušénde, syr te vydžav i te zadžav; pal-dová so, kon moginéla te xulainél (te sendiakirél) čačunés dalé Tyré buté manušénca?” I phendiá Devél Solomonóske: “Pal-dová, so davá sys pe tyró iló, i tu na mangdian ni barvalypén, ni fielatin i ni sláva, i ni di vergéngire tyrengire, i adiáke-pac' tu na mangdian péske but dyvesá, a mangdian péske godý i džinybén, sob (kaj) te xulaines (te sendiakires) čačunés Miré manušénca, pe savénde Me čhudjom kralísa tut, godý i džinybén délape túke, a barvalypén, i fielatinia, i sláva Me dáva túke dasavé, rovnia savénge na sys kral'jénde angledýr tútyr, i na javéla paló (poslie) túte.” I javdiá Solomóno vučipnástyr, so sys dro Gavaóno, skedyibnaskire skinijatyr dro Jerusalimo; i sys jov kralísa pe Izrailjo. I skedyjá Solomóno maribnýtka vurdyná i manušén, savé sys uklisté pe grénde; i sys léste tysjonco štaršelá vurdyná i dešudúj tysjoncy manušá, savé sys uklisté pe grénde; i jov rosčhudiá len te dživén dre vurdenytka fórja i pašýl kralíste dro Jerusalimo. I kerdiá králi rup i suvnakáj dro Jerusalimo pir dasaví-pac' timín, syr prosto bar, a kiedry, syr len but, kerdiá dasaví-pac' timín syr sikomorenge, savé isyn pe telatuné štéty. Gren Solomonóske janénas Jegiptóstyr Kuvatyr: kúpcy (tylgárja) kral'jengire Kuvatyr kinenas len pal lové. Maribnýtko vurdén sys doresno i jandlo sys Jegiptóstyr pal šovšelá šékieli rup, a graj pal šel te pandždešá. Adiáke-pac' jone péskire vasténca janénas davá saré kral'jénge Xietiejengirenge i kral'jénge Aramiejengirenge. I prilyjá duma Solomóno te kerél Kher vaš lav Ráskire-Devléskiro i kher kralískiro vaš péske. I otgindia Solomóno eftadešá tysjoncy manušén, savé lydžánas i ohtodešá tysjoncy manušén, savé bará čingirde dre bérgi, i manušén, sob (kaj) te pridykhen pal lénde sys trin tysjoncy šovšelá. I bičhadiá Solomóno ke Xiramo, králi Tiroskiro, te phenél: “Syr kerdián tu Davidosa, miré dadésa, i bičhadian léske kiedry te čhuvél kher vaš léskiro džiibén, adiáke ker i mánca.” Ĥáda, me keráva Kher Ráskire-Devléskiro, miré Devléskire lavéske, te svencynav Léske, sob (kaj) te xačkires angíl Léste dróga smóly, te čhuvés saró časo (cýro) maró pe zlóko (pe ránko) i bel'velié dre sávaty (suboty), i dre nevó čhon, i dre svénki Ráskire-Devléskire, amaré Devléskire, so pe saró džiibén te javél uphendló Izrailjoske. I Kher, savó me keráva, javéla baró-baró, pal-dová so drieván baró isyn Devél amaró, vučedýr saré devlorendyr. I ci uhtýlla (dósi) konéste zor te kerél Léske Kher, kiéli bolybén i bolybena isyn tykné vaš Léske? I kon me som, sob (kaj) te moginav te keráv Léske Kher? Naúšto jekh vaš davá (féni), sob (kaj) te xačkirén dróga smóly angíl muj Léskiro. I adiáke bičháv mánge manušés, savó džinéla te kerél formy suvnakástyr, i rupéstyr, i xarkomátyr, i sastyrestyr, i thavendyr purpurovone, lolé i jahontone mastiniatyr (cviatostyr), i manušés, savó džinelas te vyčhinel vyčhindytko butý, khetané xudožnikenca (grafar'jénca), savé isyn mánde dre Judéia i dro Jerusalimo, savén skedyjá Davído, miro dad. I bičháv mánge kiedrytko veš, i kipariso i sandalytko veš Livanostyr; pal-dová so me džinóm, so tyré pishárja džinéna te čingiren veš Livanoskiro. I ĥáda, miré pishárja džána tyré pishar'jénca, sob (kaj) mánge te skedav but veš, pal-dová so Kher, savó me keráva, te javél baró i divno. I ĥáda, manušénge, savé čingirena veš, tyré pishar'jénge, me dáva vaš xabén: parnó giv biš tysjoncy korovy, i mol biš tysjoncy baty, i olivítko dzet biš tysjoncy baty.” I otphendiá Xiramo, králi Tirostyr, lylesa, savó bičhadiá ke Solomóno: “Pir láska ke manušá Léskire, Raj Devél čhudiá tut kralísa pe lénde.” I iščo (inké) phendiá Xiramo: “Te javél bahtiakirdó Raj Devél, Devél Izrailjoskiro, Savó sozdyjá bolybén i phuv, dyi kralíske Davidóske god'varé čhavés, savéste isyn džinybén i godý, savó kaméla te kerél Kher Ráske-Devléske i kher kralískiro vaš péske. I adiáke me bičhaváva túke manušés god'vares, savéste isyn džinybén, Xiram-Avijos, čhavés jekhe džuvliakires Danóskire čhajéndyr, – dad léskiro Tirianino, savó džinéla te kerél figury suvnakástyr i rupéstyr, xarkomátyr, sastyrestyr, barendyr i vešéstyr, thavendyr purpurone, jahontone mastiniatyr (cviatostyr), i visonóstyr, i lolé pohtanestyr, i te vyčhinel, saví kames vyčhinybnytko butý, i te kerél saró, so javéla phendló léske khetané xudožnikenca tyrenca i xudožnikenca (grafar'jénca) xuláskire mireskire Davidóskire, tyré dadéskire. A parnó giv i gersto (jačmienjo), ksil i mol (vino), pal savénde rakirdian tu, miro xulájo, bičháv tyré pishar'jénge. Ame vyčingirasa veš Livanostyr, ci but trej túke, i pritradasa len plotenca pir mórjo (derjáv) dre Jafa; a tu otlydžasa len dro Jerusalimo. I gindia Solomóno sarén manušén javire rigéndyr, savé sys tedy pe Izrailjoskiri phuv, paló (poslie) léngiro piriginybén, so kerdiá Davído, léskiro dad, – i lathiape len šel pandždešá trin tysjoncy šovšelá. I kerdiá jov léndyr eftadešá tysjoncy manušén, savé lydžánas, i ohtodešá tysjoncy manušén, savé vyčingirenas bará pe bérgi, i trin tysjoncy šovšelá manušén, savé dykhné, sob (kaj) te ĥazdén manušén ke butý. I lyjá Solomóno te kerél Ráskire-Devléskiro Kher dro Jerusa-limo, pe bérga Moria, saví sys uphendly Davidóske, léskire dadéske, pe štéto, savó prigotovindia Davído, pe Ornaskire-Iievusejaninoskiri šúrna. Lyjá jov te kerél pe javír dyvés javire čhonéskiro, dro štárto berš péskire kralipnaskiro. I ake, podmurovka, saví čhudiá Solomóno, kiéli kerénas Ráskire-Devléskiro Kher: dlengipén léskiro sys šovdešá kuniá, pir doiá miéra, a buĥlypén biš kuniá; i trémo, savó sys angíl kher, dlengipnása, pir kheréskiro buĥlypén, sys dre biš kuniá, a vučipnása dre šel te biš. I občhudiá les andré žužé suvnakása. Angluno kher obsudia jov kiparisytkone vešesa i občhudiá les fedyršone suvnakása, i kerdiá pe léste pal'my i zandirorjá (cepočki). I občhudiá Kher drogoné barénca vaš šukaripén; suvnakáj sys Parvaimostyr. I učhakirdiá Kher, brevny, progi, i vánty léskire, i vudará léskire suvnakása, i vyčhindia pe vánty xieruvimy. I kerdiá jov Svénto-sventonengiro: dlengipén léskiro, pir buĥlypén kheréskiro, sys dre biš kuniá, i buĥlypén léskiro dre biš kuniá, i léskiro buĥlypén dre biš kuniá; i učhakirdiá les fedyršone suvnakása, pe šovšelá talánty. Dre gvozdy (karfina) pharipen (vieso) vaga sys pe pandždešá šékieli suvnakái. Zaly adiáke-pac' jov učhakirdiá suvnakása. I kerdiá jov dre Svénto-sventonengiro duj xieruvimy vyčhindytkone butiátyr, i učhakirdiá len suvnakása. Phaká (kryly) xieruvimengire sys dlengipnása dre biš kuniá. Jekh phak dre pandž kuniá doreséla ke Kheréskiri vánta, a javír phak dre pandž kuniá zdžalape phakasa javire xieruvimoskirjasa; dasaví-pac' sys i phak javire xieruvimoskiro dre pandž kuniá i doreséla kheréskire vánty, a javír phak dre pandž kuniá zdžalape phakasa javire xieruvimoskiresa. Phaká dalé xieruvimengire sys rozmekne pe biš kuniá; i jone sys terdé pe péskire ĥerá, péskire mujénca ke Khangirí. I kerdiá jov pologo jahontytkone, purpurone, i jarkone-lolé thanestyr/matier'alostyr (pohtanestyr) i vylydžijá pe léste xieruvimy. I kerdiá jov angíl Khangirí duj stýlby, dlengipnása pir trijánda pandž kuniá, i kapitel' uprál kažno sys dre pandž kuniá. I kerdiá zandirorja (cepočki), syr dre svénto štéto, i čhudiá upré pe stýlby, i kerdiá šel granatytka phabá, i čhudiá len pe zandirorja. I čhudiá stýlby angíl Khangirí, jekh pe čačí (pravo) rig, javír pe zérvo (liévo) rig i dyjá lav čačuneske Iahino (Jahino), a zervoneske lav Voazo. I kerdiá jov xarkuno altárjo: léskiro dlengipén sys biš kuniá, i biš kuniá sys léskiro buĥlypén, i vučipén léskiro sys deš kuniá. I kerdiá jov mórjo (derjáv) vyčhudo, – léskire jagoróstyr ke léskiro javír jagóro sys deš kuniá, – saró krenglo, vučipnása sys dre pandž kuniá; i dre trijánda kuniá oblelas les trusciál (krugosa); i vyčhudé kopii guruvén, so sys terdé tel léste trusciál saré rigéndyr; pe deš kuniá oblenas mórjo (derjáv) trusciál duj riady guruvén, vyčhudé jekhe čhuibnasa lésa. Terdó sys jov pe bišé guruvende: trin dykhné pe paš-rat (pe sieviero), i trin dykhné pe zapado (pal-panitko rig) i trin dykhné pe paš-dyvés (pe jugo), i trin dykhné pe vastóko, – i mórjo (derjáv) uprál pe lénde; léngire paluia sys riskirdé andré tel léste. Grembipnasa jov sys dre burnyk (ladon'); i léskire jagóry (kraí), kerdé sys, syr tahtaskire jagóry (kraí), savé podžanas pe lilija, saví rozmekciape. Dre léste zadžalas ke trin tysjoncy baty. I kerdiá jov deš moskire čaré, i čhudiá pandž pir čačí rig i pandž pir zérvo rig, sob (kaj) dová, so sys priladindlo ke célo shačkiribén te moren dre lénde; mórjo (derjáv) – vaš rašange, sob (kaj) jone te morenpe dre léste. I kerdiá jov deš suvnakuné momolytka (svietil'niki), syr lénge trej te javén, i čhudiá dre Khangirí, pandž pir zérvo rig i pandž pir čačí rig. I kerdiá jov deš skaminda, i čhudiá dre Khangirí, pandž pe čačí rig i pandž pe zérvo rig, i kerdiá šel suvnakuné tahtaja (čašy). I kerdiá jov rašangiri gréda (dvóro), i bari gréda, i vudará ke gréda, i vieriéi léngire občhudiá xarkomasa (miediasa). Mórjo (derjáv) čhudiá pe čačí rig, pe paš-dyvés-vastóko. I kerdiá Xiramo baré čaré (myski) i lopatki, i tahtaja. I kerdiá Xiramo butý, saví kerdiá vaš kralíske Solomonóske dre Ráskire-Devléskiro Kher. Duj stýlby, i duj kustyka viencengire pe stylbengiro vučipén, i duj khudia vaš učhakiriben duj kustyka vencengire, savé sys pe stylbengiro šeró, i štaršelá granatytka phabá pe duj khudia, duj riady granatytka phabá vaš kažno khudý, vaš učhakiriben duj kustyka vencengire, savé sys pe stýlby. I podčhuibena kerdiá jov, i moskire čaré kerdiá pe podčhuibena; iekh mórjo (derjáv), i dešudúj guruva tel léste, i baré čaré (myski), i lopatki, i bustiá, i saré strumiénty léngire kerdiá Xiram-Avijo kralíske Solomonóske, vaš Ráskire-Devléskiro Kher, polirovanone xarkomátyr. Dre štéty pašé-foritka Iordáno vyčhudiá len králi, dre ĥleitko (glinytko) phuv, maškír Sokhofomo i Cerieda. I kerdiá Solomóno saré dalé priedmiety (čýsy) drieván but adiáke, so na džindlé xarkunake (miediakie) vaga. Adiáke-pac' kerdiá Solomóno saré khoré (sasúdy) vaš Ráskire-Devléskiro Kher i suvnakunó altárjo, i skaminda, pe savé svénto maró čhuvénas, i momolytka (svietil'niki), i lampadki léngire, sob (kaj) te zahačkires len pir uphenybén angíl daviro, jone sys žužé suvnakástyr; i luludiá (cvety), i lampadki, i obcugi (ščypcy) suvnakástyr, naj žužé suvnakástyr, i čhurja, i kopanycy, i tahtaja, i lotki suvnakástyr naj žužestyr; i vudará Khangirjákire, – vudará lákire andratuné dre Svénto-sventonengiro, i vudará Khangirjákire pe sámo svénto štéto, suvnakástyr. I zakončyndiape sarí butý, saví kerdiá Solomóno vaš Ráskire-Devléskiro Kher. I jandiá Solomóno dáry, so otdyjá Davído, léskiro dad; i rup, i suvnakái, i saré strumiénty otdyjá dre Devléskire-Khereskire piraliá. Tedy skedyjá Solomóno Izrailjoskire phurydyren i sarén šeralen pe ródycy, barydyrén Izrailjoskiren pe čhavéngire stréčy, dro Jerusalimo, sob (kaj) te lydžán pe javír štéto Devléskire-zavietóskiro kovčego Davidóskire foróstyr, Sionóstyr. I skedynépe ke králi saré Izrail'tiáni pe svénko, pe eftáto čhon. I javné saré Izrailjoskire phurydyrá. Lievíty lyné kovčego; i lydžiné kovčego, i skedyibnáskiri skínija, i saré svénta khoré, savé sys dre skínija, lydžiné len rašaja i Lievíty. Králi Solomóno i saré Izrailjoskire manušá, savé skedynépe ke jov angíl kovčego, janénas svénta dyibená Ráske-Devléske bakréndyr i guruvendyr, savén sys naštý te zgines i te udžines, pal-dová so len sys drieván but. I jandlé rašaja Ráskire-Devléskire zavietóskiro kovčego pe léskiro štéto, dre Khangirjákiro daviro – dre Svénto-sventonengiro, tel phaká (kryly) xieruvimengire. I xieruvimy rosčhude phaká pe kovčegoskiro štéto i balandiniá (šosty) léskire uprál. I vytyrdyne pe balandiniá (šosty) kovčegoskire adiáke, so jagóry (kraí) baladiniéngiro sys biciale angíl daviro, ne na sykadyne javrí, i jone odój ke davá dyvés. Na sys dro kovčego ničý apríč duj skrižáli (tablicy), savé čhudiá Mójza pe Xorivo, kiéli Raj Devél kerdiá zaviéto Izrailjoskire čhavénca, pir léngiro vygiiben Jegiptóstyr. Kiéli rašaja vyginé sventoné štetóstyr, pal-dová so saré rašaja, savé sys odój, vysvencyndlepe, bi dykhibnaskiro pe otdiély, savéndyr sys jone; i Lievíty-bagaibnarja, – savé sys Asafo, Emano, Idifuno, i léngire čhavé, i léngire pšála, – uridé dro parnó pohtan, cymbalenca, i lutenca, i arfenca sys terdé pe vastočno rig altarjoskiri, i lénca sys šel te biš rašaja, trubindle rogénca, i sys, syr jekh trubindle i bagandle, vydyi jekhe zaniása ke šaribén i ke parikiriben Ráske-Devléske; i, kiéli zagriemindia zan rogengiri, i cymbalengiri, i bagaibnytkone-strumientengiri, i šarde Ras-Devlés, i bagandle: “Jov isyn lačhó, pal-dová so dro viéko tangipén Léskiro”, tedy Kher, Ráskire-Devléskiro Kher pherdiakirdiá óbloko, i na mogindlé rašaja te terdjon pe dynaribén (služba) pirdál óbloko; pal-dová so sláva Ráskire-Devléskiri pherdiakirdiá Devléskiro Kher. Tedy phendiá Solomóno: “Raj Devél phendiá, so Jov kaméla te dživél dro kalypén (mrako), 'me kerdjom Kher vaš džiibén Túke, štéto vaš Túke te dživés (te jačes viéčnes).” I risijá králi péskire mósa, i bahtiakirdiá saró Izrailjoskiro skedyibén, saró Izrailjoskiro skedyipen sys terdó, – i phendiá: “Te javél bahtiakirdó Raj Devél, Devél Izrailjoskiro, Savó, so phendiá Péskire ušténca Davidóske, miré dadéske, to kerdiá akaná Péskire vastésa!” Jov rakirdiá: “Dolé dyveséstyr, syr Me vylydžijom manušén Miren Jegiptóskire phuvjátyr, Me na vykedyjom fóro ni dre jekh rodycendyr Izrailjoskirendyr vaš Mánge te kerén kher, dre savó javélas by lav Miro, i na vykedyjom manušés, savó te javél by Miré Izrailjoskire manušéngire kralísa, ne Me vykedyjom Jerusalimo, sob (kaj) odój te javél Miro lav, i Me vykedyjom Davidós, sob (kaj) jov te javél pe Miré Izrailjoskire manušénde.’ I sys pe iló Davidóste, miré dadéste, te kerél Kher vaš lav Ráskire-Devléskiro, Izrailjoskire Devléskiro. Ne Raj Devél phendiá Davidóske, miré dadéske: “Túte isyn pe iló te kerés Khangirí Miré lavéske; šukár, so davá isyn pe iló túte: ne tu usajékh na kerésa Khangirí, a tyró čhavó, savó javéla tyré maséndyr, jov keréla Kher (Khangirí) Miré lavéske. I kerdiá ke kónco/iagóro (spolnindia) Raj Devél Péskiro lav, savó rakirdiá: “Me terdijom pe Davidóskiro štéto, miré dadéskiro, i bescjom pe Izrailjoskiro trono, syr phendiá Raj Devél, i kerdjom Kher Ráskire-Devléskiro, Izrailjoskire Devléskire lavéske. I me čhudjom odój kovčego, dro savó isyn Ráskire-Devléskiro zaviéto, savó kerdé Lésa Izrailjoskire čhavé.” I terdijá Solomóno pašýl Ráskire-Devléskiro altárjo angíl saró Izrailjoskiro skedyibén, i ĥazdyjá péskire vastá, – pal-dová so Solomóno kerdiá xarkuno amvono, dlengipnása dre pandž kuniá i buĥlypnasa dre pandž kuniá, a vučipnása dre trin kuniá, i čhudiá les maškír gréda; i terdijá pe léste, i terdijá pe čangá angíl saró Izrailjoskiro skedyibén, i ĥazdyjá péskire vastá ke bolybén, i phendiá: “Rajo Dévla, Dévla Izrailjoskiro! Nane Devlés, adasaves syr Tu san, ni pe phuv, ni pe bolybén. Tu rakhesa zavieto i tangipén ke Tyré pishárja, savé psiréna angíl Túte saré péskire ilésa. Tu kerdián Tyré pisharíske Davidóske, miré dadéske, so Tu rakirdian léske; so rakirdiá Tu Tyré ušténca, dro dová dyvés kerdián Tu Tyré vastésa. I akaná, Rajo Dévla, Dévla Izrailjoskiro! Ker Tyré pisharíske Davidóske, miré dadéske, dová, so Tu phendián Léske, rakirí: “Na pirijačéla túte murš, savó javéla te bešél angíl Miro muj pe Izrailjoskiro trono, kóli jekh tyré čhavé javéna te dykhén pal péskire dromá, psiri pir Miro Zakóno adiáke, syr tu psirdian angíl Mánde.’ I akaná, Rajo Dévla, Dévla Izrailjoskiro! Mek te javél čačunó Tyró lav, savó Tu rakirdian Tyré pisharíske Davidóske. Ci pir čačipén Devléske te dživés manušénca pe phuv? Kóli bolybén i bolybna bolybnáskire isyn tykné vaš Túke, – dolesa tyknedýr isyn Khangirí daja, saví me kerdjom. Ne podykh pe Tyré pishariskiri pátieri (molítva) i pe léskiro mangipén, Rajo Dévla, Devél miro! Prišunpe ke gódla i ke pátieri, savjása Tyró pishári mangelape angíl Túte. Mek te javén Tyré jakhá otčhakirde pe daja Khangirí dyvesé i ratý, pe štéto, kaj Tu dyján lav te čhuvés Tyró lav, sob (kaj) te šunés pátieri, savjása Tyró pishári javéla te mangélpe pe davá štéto. Vyšún mangipén Tyré-pishariskiro i Tyré-Izrailjoskire manušéngiro, savénca jone javéna te mangénpe pe davá štéto; vyšún Tyré džiibnáskire štetóstyr, bolybnástyr, vyšún i otmek grého! Kiéli vari-kon keréla grého proti péskire pašatuneste i phučela léstyr sovél, sob (kaj) jov te sovlahal, i javéla te kerélpe sovél angíl altárjo Tyró dre daja Khangirí: to tedy Tu vyšún bolybnástyr i ker séndo pe Tyré pishar'jénde, otdé bangeske, čhuvi, so jov kerdiá pe léskiro šeró, i opravdyn (čačakir) čačunés, de léske pir léskiro čačipén. Kiéli javéna domardé manušá Tyré Izrailjoskire vergosa pal dová, so jone kerdé grého angíl Túte, i jone risjona ilésa ke Tu, i priĥaljona lav Tyró, i javéna te mangén i te mangénpe angíl Túte dro dová Kher (dre daja Khangirí), to tedy Tu vyšún bolybnástyr i otmek Tyré Izrailjoskire manušéngiro grého, i rískir len pe phuv, saví Tu dyján lénge i léngire dadénge. Kiéli začhakirlape bolybén, i na javéla bryšýnd pal dová, so jone kerdé grého angíl Túte, i javéna te mangénpe pe davá štéto, i priĥaljona lav Tyró, i otdžana péskire grehostyr, pal-dová so Tu čhudián len telé, tedy Tu vyšún bolybnástyr, i otmek grého Tyré pishar'jengiro i Izrailjoskiro Tyré-manušéngiro, uphen lénge lačhó drom, pir savó te džán lénge, i bičháv bryšýnd pe Tyrí phuv, saví Tu dyján Tyré manušénge dre meknó mištypén. Ci bokh javéla pe phuv, ci moroskire fránsy javéna, ci xačkirdy balvál javéla, ci rža, ci phakitka skočki, ci kirmo, ci javéna te pritasaven les léskire vérgi pe phuv, saví isyn léskiri, ci javéla saví bída, ci savó nasvalypen, to Tu kažno pátieri (molítva), kažno mangipén, savó javéla vari-savé manušéstyr, ci saré Tyré Izrailjoskire manušéndyr, kiéli jone počuinena kažno péskiri bída i péskiro gorjo, i protyrdena péskire vastá ke daja Khangirí, Tu vyšún bolybnástyr – Tyré džiibnáskire štetóstyr, i otmek (prostin), i otdé svakoneske (kožnoneske) pir saré léskire dromá, syr Tu džinésa léskiro iló, – pal-dová so Tu džinésa manušéngire-čhavéngiro iló, – sob (kaj) jone te darén Tútyr i te psirén Tyré droménca dre saré dyvesá, paka jone dživéna pe phuv, saví Tu dyján amaré dadénge.” Ne i manúš javire-rodoskiro, savó isyn na Tyré Izrailjoskire manušéndyr, kiéli jov javéla duratuné phuvjátyr vaš Tyró baró lav, i vaš Tyró vast zoralypnaskiro, i psikó Tyró, so isyn protyrdyno, i javéla i léla te mangélpe dre daja Khangirí: to Tu vyšún bolybnástyr, Tyré džiibnáskire štetóstyr, i ker saró, pal so javéla te risjol ilésa ke Tu javire-rodoskiro manúš, sob (kaj) saré manušá phuvjákire te udžinén Tyró lav, i, sob (kaj) te darén Tútyr, syr Tyré manušá, Izrailjo, i, sob (kaj) džindlé, so Tyré lavésa kharélape davá Kher, savó kerdjom me. Kiéli vydžána Tyré manušá pe maribén pe péskire vergénde dromésa, savénge Tu bičhavesa len, i javéna te mangénpe Túke, risjovi ke davá fóro, savó Tu vykedyjan, i ke Khangirí, saví me kerdjom Tyré lavéske, to tedy Tu vyšún bolybnástyr léngiri pátieri i léngiro mangipén i ker, so trej vaš lénge. Kiéli jone keréna grého angíl Túte, – pal-dová so nane manušés, savó na kerdiá grého, – i Tu rosholiasosa pe lénde, i otdesa len vergoske, i otlydžana len manušá, savé lyné len dro pliéno pe duratuny phuv ci pašatuny, i kiéli jone pe phuv, pe saví jone javéna dro pliéno, zadžána dre péste i risjona ilésa, i javéna te mangénpe Túke pe phuv, pe saví jone javéna dro pliéno, rakirí: “Ame kerdiám grého, kerdiám na pir Zakóno, ame bangé sam, i risjona ke Tu saré péskire ilésa i saré péskire diésa, pe phuv, pe saví jone javéna dro pliéno, karik otlydžana len dro pliéno, i javéna te mangénpe, risii ke péskiri phuv, saví Tu dyján léngire dadénge, i ke fóro, savó Tu vykedyjan, i ke Khangirí, saví me kerdjom Tyré lavéske, – to Tu vyšún bolybnástyr, Tyré džiibnáskire štetóstyr, pátieri (molítva) léngiri i mangipén léngiro, i ker, so trej vaš lénge, i otmek (prostin) Tyré manušénge, dre so jone kerdé grého angíl Túte. Dévla miro! Mek te javén Tyré jakhá otčhakirde i kaná Tyré otkerde ke pátieri pe davá štéto. I akaná, Rajo Dévla, Dévla, terdjov pe štéto, kaj ramánjo Tyró, Tu i kovčego Tyré zoralypnaske. Rašaja Tyré, Rajo Dévla, mek te ur'jenpe dro zrakhibén, i mek svénta Tyré te čaljon lačhipnása. Rajo Dévla! Na otriskir muj Tyré pomakhibnariskiro, rípir tangipén ke Tyró pishári Davído.” Kiéli končyndia Solomóno daja pátieri, to gijá telé jag bolybnástyr i nakhadia (proglynindia) célo shačkiribén i svénta dyibená Ráske-Devléske, i sláva Ráskire-Devléskiri pherdiakirdiá kher. I na mogindlé rašaja te zadžán dro Ráskire-Devléskiro Kher, pal-dová so sláva Ráskire-Devléskiri pherdiakirdiá Ráskire-Devléskiro Kher. I saré Izrailjoskire čhavé, dykhné, syr gijá jag i Ráskire-Devléskiri sláva pe kher, pyné mósa pe phuv, pe čebotar' (pomosto), i poklonindlepe, i šarde i parikirde Ráske-Devléske, phení: “Jov isyn lačhó, pal-dová so dro viéko tangipén Léskiro.” Králi i saré manušá lyné te janén svénta dyibená Ráske-Devléske [angíl muj Raste-Devléste-r.s.]. I jandiá králi Solomóno dro svénto janybén Ráske-Devléske biš te duj tysjoncy guruvorén i šel te biš tysjoncy bakrén: adiáke obsvencyndle Ráskire-Devléskiro Kher králi i saré manušá. Rašaja sys terdé pe péskiro dynaribén (služba), i Lievíty bagaibnytkone strumientenca Devleskirenca, savé kerdiá králi Davído te slavinén (te barjakirén) Devlés, pal-dová so viéčno isyn tangipén Léskiro, adiáke syr Davído rakirdiá pirdál lénde; rašaja phurdyne dre rógi angíl léste i saró Izrailjo sys terdó. Obsvencyndia Solomóno i andratuný paš dre gréda, saví sys angíl Ráskire-Devléskiro Kher, pal-dová so jandiá odój célo shačkiribén i túko (čekén) mirnone sventoné-dyibnástyr Ráske-Devléske, adiáke syr altárjo sys xarkuno, savó kerdiá Solomóno, dro léste na mogindlé te zadžán célo shačkiribén, i marunó janybén, i tuki. I kerdiá Solomóno dre dová časo (cýro) eftá-dyvesýtko svénko, i saró Izrailjo lésa-skedyibén drieván baró, manušá skedynépe zagiibnastyr dro Jemafo ke Jegiptóskiri reka (len'); a pe ohtóto (bidujéngiro déšto) dyvés kerdé palatunó (posliédnjo) svénko, pal-dová so altárjo obsvencyndle eftá dyvesá i svénko eftá dyvesá. I pe biš te tríto dyvés eftatone-čhonéskiro o králi otmekciá manušén pir léngire šátry, radymása i viesielybnasa dro iló pal lačhipén, savó kerdiá Raj Devél Davidóske, i Solomonóske, i Izrailjoske, Péskire manušénge. I kerdiá Solomóno Kher Ráskire-Devléskiro i kher kralískiro; i saró, so čhudiá Solomóno pe iló péskiro te kerél dre Devléskiro Kher i dro péskiro kher, kerdiá jov mištés. I javdiá Raj Devél Solomonóske ratý, i phendiá léske: “Me šundjom pátieri (molítva) tyrí i vykedyjom Péske davá štéto dro Kher, sob (kaj) te janén svénto dyibén. Kóli Me začhakirava bolybén i na javéla bryšýnd, i, kóli phenáva phakitkone skočkenge te xan phuv, ci bičhaváva meribnaskire fránsy pe Miré manušénde, i kóli jačéna štyl (primirinenape) Miré manušá, savé kharenape Miré lavésa, i javéna te mangénpe, i lathéna Miro muj, i otdžana péskire nalačhé dromendyr [čhuvéna teledýr péskiro baripén-r.s.]: to Me šunava bolybnástyr, i otmekáva léngire gréhi, i vysastiakirava phuv léngiri. Akaná jakhá Miré javéna otčhakirde i kaná Miré šunéna rakhunes pátieri (molítva) pe davá štéto. I akaná Me vykedyjom i obsvencyndjom davá Kher, sob (kaj) Miro lav te javél odój dro viéko; i jakhá Miré i iló Miro javéna odój dre saré dyvesá. I kóli tu javésa te psirés angíl Miro muj, syr psirdiá Davído, tyró dad, i tu javésa te kerés saró, so Me rakirdjom túke, i javésa te rakhés Miré uphenybená i Miré zakóny, to Me zorjakirava trono tyré-kralipnaskiro, syr Me dyjom lav Davidóske, tyré dadéske, rakirí: “Na pirijačéla túte murš, savó javéla te xulainél Izrailjosa.” Ne kóli tumé otrisjona i jačkirena Miré uphenybená i Miré priphenybená, savé Me dyjom tuménge, i džána péske, i léna te dynarinén javire devlorénge i te mangénpe lénge: to tedy Me tradava krig Izrailjo Miré phuvjátyr, saví Me dyjom lénge, i daja Khangirí, saví Me obsvencyndjom Miré lavésa, Me otriskirava Miré móstyr i keráva látyr pritča i saben saré manušénde. I pal daja vučí Khangirí kažno (sváko) manúš, savó džála mamúj láte, podelape divoske i phenéla: “Pal so kerdiá adiáke Raj Devél dalé phuvjása i dalé Khangirjasa?” I phenéna: “Pal dová, so jone jačkirdé péskire Ras-Devlés, dadengires Devlés, Savó vylydžijá len Jegiptóskire phuvjátyr, i prijačne ke javír devloré, i mangnepe lénge, i dynarindlé lénge, pal-dová Jov jandiá pe lénde sarí daja bída.’” Syr proginé biš berš, dre savé Solomóno kerdiá Kher Ráskire-Devléskiro i péskiro kher, i obkerdia Solomóno i fórja, savé dyjá Solomonóske Xiramo, i čhudiá te dživén dre lénde Izrailjoskire čhavén, gijá Solomóno pe Jemaf-Suva, i lyjá les. I kerdiá jov Fadmoro pe čhučí phuv, i saré fórja vaš zapasy, savé kerdiá dro Jemafo. Jov obkerdia Vieforono upratuno i Vieforono telatuno, fórja zoralé vantenca, vudarenca i šybierenca (zaporenca), i Vaalafo i saré fórja vaš zapasy, savé sys Solomonoste, i saré fórja vaš maribnýtka vurdená, i fórja vaš grenge, i saró, so kamdiá Solomóno te kerél dro Jerusalimo, i pe Liváno, i pe sarí phuv, saví sys léste. Saré manušá, savé jačnépe Xietiejéndyr, i Amoriejéndyr, i Fierieziejéndyr, i Jeviejéndyr, i Jevusiejéndyr, savé sys na Izrailjoskire čhavéndyr, čhavén lengiren, savé jačnépe paló (poslie) lénde pe phuv, savén na muliakirdé Izrailjoskire čhavé, – kerdiá Solomóno butiarnenca ke/žýko davá dyvés. Izrailjoskire čhavén na kerdiá Solomóno butiarnenca pir péskire réndy, ne jone sys xaladé, i barydyrá léskire pe rakhibnar'jende, i šeralé pe léskire maribnýtka vurdená i pe léskire manušénde, savé sys uklisté pe grénde. I sys šeralé pe barydyrende kralíste Solomonoste, savé xulaindle manušénca, dujšelá pandždešá. A čha faraonoskirja pirilydžija Solomóno Davidóskire foróstyr dro kher, savó kerdiá vaš láke; pal-dová so, rakirdiá jov, naštý te dživél džuvlý mánde dro kher Davidóskiro, Izrailjoskire-kralískiro, pal-dová so svénto jov, štéto, adiáke, syr zagijá dre léste kovčego Devléskiro. Tedy lyjá te čhuvél Solomóno célo shačkiribén Ráske-Devléske pe altárjo Ráskire-Devléskiro, savó jov kerdiá angíl trémo (pritvoro), sob (kaj) pir uphenybén kažno dyvés te janes célo shačkiribén, pir Mojzáskiro priphenybén, dro sávato (subóta), i dro nevó-čhon, i dre svénki trin móly dro berš: dre svénko opriesnoki, i dre svénko eftuno, i dre svénko kuščengiro (budengiro). I čhudiá jov, pir Davidóskiro priphenybén, péskire-dadéskiro, zmieny, (otdiély) rašángire pir léngiro dynaribén, i Lievitén pir léngire stregi, sob (kaj) jone slavindle i parikirde pašýl rašande pir uphenybén kažnoné-dyveseskiro, i rakhibnar'jén pe pórta pir léngire zmiény, ke kažno pórta, pal-dová so dasavo sys priphenybén Davidóskiro, Devléskire Manušéskiro. I, sob (kaj) jone te na otdžan kralískire uphenybnastyr pal rašande i Lievitende ni dre so, ni pal kučipena. Adiáke kerdy sys sarí butý Solomonóskire dyveséstyr, kiéli lyné te kerén Ráskire-Devléskiro Kher ke saró keriben léskiro – kheréskiro Ráskire-Devléskiro. Tedy gijá Solomóno dre Jecyon-Gaviéro i dre Jelafo, savó sys pe morjoskiro (derjavéskiro) brégo, pe Idumiejengiri phuv. I bičhadiá léske Xiramo pirdál péskire dynar'jénde pármy (korabli) i butiarnen, savé džindlé mórjo (derjáv), i giné jone Solomonóskire dynar'jénca dro Ofiro, i jandlé odothýr štaršelá pandždešá talánty suvnakái, i jandlé kralíske Solomonóske. Kiéli Savakiri králica [Šebatyr-ju.o.] šundiá pal Solomonóskiri sláva, to joj iavdiá te sprobinel Solomonos šerepharibnytkonenca (zagadkenca) dro Jerusalimo, i drieván baré barvalypnasa i vierbliudenca, občhude lačhé-khandypnenca (parfunenca) i drieván but suvnakása i drogoné barénca. I javdiá ke Solomóno, i rakirdiá lésa pal saró, so sys pe iló láte. I piriphendia láke Solomóno saré lákire lavá, i na lathiape nisó na džindló Solomonóske, so jov te na piriphenel by láke. I dykhciá Savakiri králica Solomonóskiri godý i Kher, savó jov kerdiá, i xabén pal skamínd léskiro, i léskire pishar'jéngire kherá, i savipen (kačestvo) manušéngiro, savésa léske dynarindlé i léngiri ídia, i kučikengire (vinočerpii) leskiren, i ídia léngiri, i zagiibén, savésa jov psirdiá dro Devléskiro Kher, – i sys joj na dre péste radymátyr. I phendiá kralíske: “Čačó, isyn dová, so me šundjom pe mirí phuv pal tyré réndy i pal godý tyrí; ne me na patiandyjom léngire lavenge, paka me javdjom i dykhcjom péskire jakhénca. I ĥáda, mánge i dre paš na sys phendló pal bari tyrí godý: tu san butydyr slavatyr, saví me šundjom. Bahtalé isyn tyré manušá, i bahtalé isyn adalé tyré dynárja, savé ŭsády (sak) isyn terdé angíl túte i šunéna godý tyrí! Mek te javél bahtiakirdó Raj Devél, Devél tyró, Savó zakamdiá te čhuvél tut pe Péskiro trono dre kralíste pašýl Péste Raste-Devléste, Devléste tyreste. Pir tyré-Devléskiri láska ke Izrailjo, sob (kaj) te čhuvés les pe viéko, Jov čhudiá tut kralísa pe léste, te kerés séndo i čačipén.” I podarindia joj kralíske šel te biš talánty suvnakáj i drieván but lačhé-khandypena i dróga bará; i na sys dasavé parfuny (lačhé-khandypnytka), savé podarindia králica Savakiri kralíske Solomonóske. I dynárja Xiramoskire, i dynárja Solomonóskire, savé jandlé suvnakáj Ofirostyr, jandlé i loló veš, i dróga bará. I kerdiá králi dalé lolé vyšestyr stýlby (liésvicy) ke Ráskire-Devléskiro Kher i ke kralískiro kher, i luty i arfy vaš manušénge, savé bagandle. I na sys dykhno dasavo angledýr pe Judýtko phuv. Králi Solomóno dyjá Savakire kralicake saró, so joj kamdiá i so joj mangdiá, apríč dasavé dáry, savé joj iandiá kralíske. I joj gijá pale pe péskiri phuv, joj i lákire dynárja. Suvnakáj važyndia, savó javélas ke Solomóno dro jekh berš, šovšelá šovdešá šov talánty suvnakása. Butýr doléstyr, posly i kúpcy (tylgárja) janénas, i saré Aravejakire králja, i barydyrá okrugakire janénas suvnakáj i rup Solomonóske. I kerdiá králi Solomóno dujšelá baré ščýty vyčikade (vykuindle) suvnakástyr, – pir šovšelá šékieli suvnakáj gijá pe kažno ščýto, – i trinšelá ščýty tyknedyršonen čikade suvnakástyr, – pir trinšelá šekeli suvnakáj gijá pe kažno ščýto; i čhudiá len králi dre kher Livanskone vešéstyr. I kerdiá králi baró trono slonytkone kokalostyr, i občhudiá les žužé suvnakása, i šov ĥerunia (stupien'ki) ke trono, i suvnakunó tel ĥeritko péto (pólo/phalia) ke trono prikerdo, i ramki tel kuniá pir duj rigá pašýl štéto te bešes, i dujén ščeren (lieven), savé sys terdé pašýl ramki tel kuniá, i iščo (inké) dešudúj ščerá, savé sys terdé odój pe šov ĥerunia (stupien'ki), pir duj rigá. Na sys dasavo trono ni dro jekh kralipén. I saré khoré (korcy) vaš pibén kralíste Solomonoste sys suvnakástyr, i saré khoré dro kher Livanoskire vešéstyr sys fedyršone suvnakástyr; rup dre dyvesá Solomonóskire gindiape ni dre-so. Paldavá so pármy kralískire psirdé dre Farsiso Xiramoskire dynar'jénca, i dre trin berš jékhvar risjona pármy Farsisostyr, i janénas suvnakáj i rup, slonytko kokalo, i porjalen (obiezjanen), i pavlinen. I sys králi Solomóno barvaledyr i god'varedyr saré kral'jendyr pe phuv. I saré králja phuvjákire kamlé te dykhén Solomonos, sob (kaj) te pe šunén léskiri godý, saví Devél čhudiá dro léskiro iló. I kažno (sváko) léndyr janelas péstyr dro dáro rupuvé khoré, i khoré suvnakuné, i ídi, mardytka i, gren i lošaken, berš beršestyr lačhé-khandypnytka (parfuny). I sys Solomonoste štar tysjoncy štaly vaš grenge i vaš maribnýtka vurdyná, i dešudúj tysjoncy manušén, savé sys uklisté pe grénde; i jov rosčhudiá te dživén len dre fórja vurdynengire i pašýl kralíste – dre Jerusalimo; i xulaindia jov pe saré kral'jénde, rekátyr (leniátyr) Jevfratostyr ke Filistimijakiri phuv i ke/žýko Jegiptoskirie-rigakiri miéža. I kerdiá králi rup dre Jerusalimo dasavé-pac' timinasa syr prosto bar, a kiédry, syr sys len but, kerdiá dasavé-pac' timinasa, syr sikomory, savé isyn pe telatuné štéty. Gren janénas Solomonóske Jegiptóstyr i saré phuv'jéndyr. Javír réndy Solomonóskire, anglatuné i palatuné, isyn začhindlé dre Nafanoskire-prorokoskire čhinybena, i dre angilphenybén Ahijoskire-Silomlianinoskire, i dre dykhibén Ioiljoskire magoskiro pal Iierovoamoste (Jerovoamoste), Navatoskire čhavéste. Solomóno sys kralísa dro Jerusalimo pe saró Izrailjo štardešá berš. I pasijá viéčnes Solomóno péskire dadénca, i garadé les dro Davidóskiro fóro, léskiro dadéskiro. I jaciá kralísa Rovoámo, léskiro čhavó, pe štéto léskiro. I gijá Rovoámo dro Sihiémo, pal-dová so dro Sihiémo javné khetané saré Izrail'tiáni, sob (kaj) te čhuvén les kralísa. Kiéli šundiá pal davá Jerovoámo, Navatoskiro čhavó, – jov sys dre Jegípto, karik nastiá kralístyr Solomonostyr, – to tedy risijá Jerovoámo Jegiptóstyr; i bičhadé, i khardé les; i javdiá Jerovoámo i saró Izrailjo, i rakirdé Rovoamoske adiáke: “Tyró dad čhudiá pe aménde pharí butý: ne tu ker lokhedýr pharí tyré dadéskiri butý i pharí butý, saví jov čhudiá pe aménde, i ame javása túke te dynarinás.” I phendiá lénge Rovoámo: “Pirdál trin dyvesá javéna nevéstyr (nevés) ke me.” I rozginepe manušá. I radindiape králi Rovoámo phurydyrenca, savé sys terdé angíl Solomonóskiro muj, léskire dadéskiro, kiéli jov dživdiá, i rakirdiá: “Syr tumé déna godý mánge te otphenav adalé manušénge?” Jone phendlé léske: “Kóli tu javésa lačhó ke adalé manušá, i kerésa pir iló lénge, i javésa te rakirés lénca šukár, tedy jone javéna túke dynar'jénca pe saré dyvesá.” Ne jov jačkirdiá phurydyrengiro godypén, savó jone dénas léske, i lyjá te radinelpe terné manušénca, savé vybarine khetané lésa, savé sys terdé angíl muj léskiro; i phendiá lénge: “So tumé phenéna godes mánge te otphenav adalé manušénge, savé rakiréna mánge adiáke: ‘Ker lokhedýr pharipén, savó čhudiá pe aménde tyró dad?’” I rakirdé léske terné manušá, savé vybarine khetané lésa, i phendlé: “Adiáke phen manušénge, savé rakiréna túke: ‘Dad tyró čhudiá pe aménde baró pharipén, a tu ker lokhedýr aménge’, – adiáke phen lénge: ‘Miro tyknó angúšt grubedyr trušulendyr miré dadeskirendyr. Miro dad čhudiá pe tuménde baró pharipén, a me keráva butýr tumaró jarmo; miro dad dukhavelas tumen čhupniénca, a me javáva te maráv tumen skorpionenca.’” I javdiá Jerovoámo i saré manušá ke Rovoámo pe tríto dyvés, syr priphendiá králi, phení: “Javén ke me nevéstyr (nevés) pirdál trin dyvesá.” Tedy králi otphendiá lénge pharés, pal-dová so jačkirdiá králi, Rovoámo, phurydyrengiri godý i rakirdiá lénge, pir terné-manušéngiro godypén, adiáke: “Dad miro čhudiá pe tuménde pharó ĥámo, a me keráva butýr les; miro dad dukhadia tumen čhupniénca, a me javáva te maráv tumen skorpionenca.” I na kandyjá (na šundiá) králi manušén, pal-dová so adiáke kerdó sys Rástyr-Devléstyr, sob (kaj) te spolninel Raj Devél Péskiro lav, savó Jov rakirdiá pirdál Ahijoste Silomlianinoste Iierovoamoske (Jerovoamoske), Navatoskire čhavéske. Kiéli saró Izrailjo dykhciá, so na šunéla les králi, tedy otphendlé manušá kralíske, rakirí: “Saví aménge paš dre Davidóste? Nane aménge meknó mištypén dre Jesiejoskire čhavéste; džán pir šátry péskire, Izrailjo! Akaná džin péskiro kher, Davído.” I rozginepe saré Izrail'tiáni pir péskire šátry. Jekh féni pe Izrailjoskire čhavénde, savé dživdé ke Judáskire fórja, jaciápe kralísa Rovoámo. I bičhadiá králi Rovoámo Adoniramos, barydyrés te keden manušéndyr dyibén (dan'), i začhurdyne les Izrailjoskire čhavé barénca, i jov myjá. Králi Rovoámo sýges bestiá pe maribnýtko vurdén, sob (kaj) te našél dro Jerusalimo. Adiáke otginé Izrail'tiáni Davidóskire kheréstyr ke davá dyvés. I javdiá Rovoámo dro Jerusalimo, i khardiá Judáskire i Vieniaminaskire kheréstyr šel ohtodešá tysjoncy fedyršone xaladén, sob (kaj) te marénpe Izrailjosa i te riskirén kralipén Rovoamoske. I sys Ráskire-Devléskiro lav ke Samiéjo, savó sys Devléskiro manúš, i sys phendló: “Phen Rovoamoske, Solomonóskire čhavéske, Judejákire kralíske, i saré Izrailjoske dre Judáskiro i Vieniaminoskiro rodycóske: adiáke rakiréla Raj Devél: “Na psirén i na kerén maribén tumaré pšalénca; risjon sváko (kažno) dro péskiro kher, pal-dová so Me kerdjom davá.” Jone šundlé Ráskire-Devléskire lavá i risiné giibnastyr proti Jerovoamoste. Rovoámo dživdiá ke Jerusalimo; jov oblydžija fórja dre Judéia vantenca. Jov kerdiá zoraledýr Vifliejémo, i Jefamo, i Fiekoia, i Viefcuro, i Soho, i Odolamo, i Giéfo, i Mariéšo, i Zifo, i Adoraimo, i Lahiso, i Azieka, i Cora, i Aialono, i Xievróno, savé sys dre Judáskiro i Vieniaminoskiro ródyco. I kerdiá jov dalé tvárdymi (kriéposti), i čhudiá dre lénde barydyrén pe rakhiben vaš maró i vešytko dzet i mol. I dyjá jov dro kažno fóro ščýty i čhurdyibnytka bustiá (kop'i), i kerdiá len drieván zoralé. I jačnépe pal léste Ju'da i Vieniamino. I rašaja, i Lievíty, savé sys pir sarí Izrailjoskiri phuv, skedynépe ke jov saré rigéndyr, pal-dová so jačkirdé Lievíty péskire pašýl-foritka kherá i péskire majonki, i javné dre Judéia i dro Jerusalimo; adiáke syr jačkirdiá len Jerovoámo i léskire čhavé Ráskire-Devléskire rašaibnastyr i čhudiá jov péste žriecen pe vučipená, i ke buzne (kozly), i ke terné guruva, savé jov kerdiá. A pal lénde sarén Izrailjoskire rodycendyr, savé otdyné iló péskiro, sob (kaj) te lathes Ras-Devlés, Devlés Izrailjoskires, savé javénas dro Jerusalimo, sob (kaj) te janes svénto dyibén péskire Ráske-Devléske, dadengíre Devléske. I kerdé jone zoraledýr Judáskiro kralipén, i podrikirenas Rovoamos, Solomonóskire čhavés, trin berš, pal-dová so jone psirdé dromésa Davidoskiresa i Solomonoskiresa dre dalé trin berš. I lyjá péske Rovoámo dre romniáte (paloróm) Mahalafa, čha Jerimofoskirja, Davidóskire-čhavéskire, i Avihailia, Jeliavoskirja čha, Jesiejoskire-čhaveskirja, i joj bijandiá léske čhavén: Iieusos, i Šemarijas, i Zagamos. Paló (poslie) láte jov lyjá Maaha, Aviesalomoskirja čha, i joj bijandiá léske Avijas, i Atajos, i Zizos i Šelomifos. I kamdiá Rovoámo Maaha, Aviesalomoskirja čha, butýr saréndyr romniéndyr i naložnicendyr peskirendyr, pal-dová so sys léste dešuohto romniá i šovdešá naložnicy, i léstyr bijándyne biš te ohtó čhavé i šovdešá čhaja. I čhudiá Rovoámo Avijas, Maahaiakire čhavés, šeralesa i thagarisa (kniazjosa) pe léskire pšalénde; pal-dová so jov kamdiá te čhuvél les kralísa. I kerdiá jov god'vares, i bičhadiá sarén peskiren čhavén pir saré Judáskire i Vieniaminóskire phuvjá, dre saré fórja zoralé tynénca, i dyjá lénge pleskiriben baró, i jov lathiá but romnien vaš lénge. Kiéli Rovoamóskiro kralipén jaciá zoraló, i jov jaciápe zoraló, tedy jov jačkirdiá Ráskire-Devléskiro Zakóno, i saró Izrailjo lésa. Pe pándžto berš kralipén Rovoamóskiro, o Susakimo, Jegiptóskiro králi, gijá pe Jerusalimo, – pal-dová so jone otginé Rástyr-Devléstyr, Léste sys tysjonco duj šelá maribnýtka vurdená i šovdešá tysjoncy manušén, savé sys uklisté pe grénde; i na sys ginybén manušénge, savé javné lésa Jegiptóstyr: Livijanenge, Sukhitamenge i Jefioplianenge; i Susakimo lyjá fórja zoralé tynénca dre Judéia, i javdiá ke Jerusalimo. Tedy Samiéjo, proróko, javdiá ke Rovoámo i thagárja Judejákire, savé skedynépe dro Jerusalimo, zrakhi pes Susakimostyr, i phendiá lénge: “Adiáke rakiréla Raj Devél: ‘Tumé jačkirdé Man, pal dová i Me jačkirava tumen dre vastá Susakimoskire.’” I primirindlepe thagárja Izrailjoskire i králi, i phendlé: “Isyn čačunó Raj Devél!” Kiéli dykhciá Raj Devél, so jone lyné te kandén (primirindlepe), tedy sys Ráskire-Devléskiro lav ke Samiejo, i sys phendló: “Jone jačné štyl (primirindlepe); na muliakirava len i sýges Me dáva lénge zrakhibén, i na pročhuvelape xolý Mirí pe Jerusalimo Susakimoskire vastésa; usajékh jone javéna léskire dynar'jénca, sob (kaj) te džinén, savó te javél dynaribén Mánge i te dynarinén phuvjákire kralipnaske.” I javdiá Susakimo, Jegiptóskiro králi dro Jerusalimo, i jov lyjá péske kučipén Ráskire-Devléskire Khereskir i kralískire-kheréskiro kučipén; saró lyjá jov, lyjá i suvnakuné ščýty, savé kerdiá Solomóno. I kerdiá králi Rovoámo, pe léngiro štéto, xarkuné ščýty, i otdyjá len pe vastá barydyrénge rakhibnar'jéngirenge, savé rakhne zagiibén dro kralískiro kher. Kiéli zadžalas králi dro Ráskire-Devléskiro Kher, to javénas rakhibnárja i lydžiné len, i paló dová nevés otlydžine len dre komorki rakhibnar'jéngire. I kiéli jov jaciá te kandel, tedy otrisija léstyr Ráskire-Devléskiri xolý, i na xasiakirdiá les ke kónco (ke jagóro); pir saró i dre Judéia sys vari-so lačhó. I terdijá zoralés králi Rovoámo dro Jerusalimo, i sys kralísa. Štardešá jekh berš sys Rovoamoske, kiéli jov jaciá kralísa, i dešuefta berš sys kralísa dro Jerusalimo, dre fóro, savó saré Izrailjoskire rodendyr vykedyjá Raj Devél, sob (kaj) odój te javél Léskiro lav. Lav léskire-dákiro sys Naama, Amonitianka. I kerdiá jov fuipén, pal-dová so jov na čhudiá péskiro iló ke dová, sob (kaj) te lathel Ras-Devlés. Réndy (diély) Rovoamoskire, anglatuné i palatuné (posliednia), isyn začhindlé dre arhívy Samiejoskire-prorokoskire i Adaskire-rodengiri istorija. I sys maribén Rovoamoste Jerovoamosa dre saré dyvesá. I pasijá Rovoámo péskire dadénca, i sys garadó dre Davidóskiro fóro. I jaciá kralísa Avijá, léskiro čhavó, pe štéto léskiro. Pe dešuohtoto berš dro Jerovoamoskiro kralipén jaciá kralísa Avijá pe Judéia (Judaste). Trin berš jov sys kralísa dro Jerusalimo; lav léskire-dákiro sys Mihaija, Uriiloskiri čhaj, Givatyr. I sys maribén maškír Avijaste i Jerovoamoste. I vylydžijá Avijá pe maribén xaladén, savé sys murškané manušéndyr, štaršelá tysjoncy manušén fedyršonen; a Jerovoámo vygijá proti léste pe maribén ohtó šele tysjoncenca manušénca, adiáke-pac' fedyršonenca, muršenca. I terdijá Avijá pe bergákiro vučipén Cemaraimoskiro, jekhe Jefriemóskire bergátyr, i rakirdiá: “Šunén man, Jerovoámo i saré Izrail'tiáni! Iščo na džinéna tumé, so Raj Devél, Devél Izrailjoskiro, dyjá kralipén Davidóske pe Izrailjo pe viéko, léske i léskire čhavénge, pir londeskiro zaviéto. Ne ĥazdyjápe o Jerovoámo, Navatoskiro čhavó, Solomonóskiro dynári, Davidóskire-čhavéskiro, i gijá proti péskire xulaste. I skedynépe trusciál (krugom) léste manušá čhučé, manušá rozmekne, i giné proti Rovoamoste, Solomonóskire čhavéste; Rovoámo sys ternó i nabaré-zorjakire ilésa, i na vyterdija proti lénde. I akaná tumé duminéna, sob (kaj) te vyterdjon proti Ráskire-Devléskiro kralipén dre Davidóskire-čhavéngiro vast, pal-dová so tumé san drieván but, i tuménde isyn suvnakuné guruvore, savén Jerovoámo kerdiá devlorenca tuménge. Ci na tumé vytradyné rašán Ráskire-Devleskiren, Aaronoskiren čhavén, i Lievitén, i čhudé vaš péske rašán, savé sys javire-phuvjákire manušénde? Kažno, kon javéla, te vysvencynel pes, guruvoresa i eftá bakrenca, kerélape tuménde xohané-devlengire rašása. A aménde – Raj Devél, Devél amaró; ame na jačkirdiam Les, i Ráske-Devléske dynarinena (služynena) rašaja, Aaronóskire čhavé, i Lievíty pašýl péskiro réndo. I xačkirena jone Ráske-Devléske célo shačkiribén kažno zlóko (ránko) i kažno bel'vél', i lačhé-khandypnytka čarjá, i čhuvéna riadenca maró pe skamínd žužó, i zahačkirena suvnakunó momolýtko i léskire lampady, sob (kaj) te xačon kažno bel'vél'; pal-dová so ame rakhasa uphenybén amaré Ráskire-Devléskiro, a tumé jačkirdé Les. I, ake, aménde dre šeralypen isyn Devél, i Léskire rašaja, i rógi (truby) isyn zoralezaniakire, sob (kaj) te den gódla proti tuménde. Čhavé Izrailjoskire! Na marénpe Rása-Devlésa, tumaré-dadengíre Devlésa; pal-dová so tumé adiáke na doreséna lačhipén.” Maškir davá Jerovoámo bičhadiá otriado te obdžan len dro zabešyben (zasada) lénge palalestyr, adiáke so kokoró jov sys angíl Judénde, a zabešyben palál lénde. I obdykhnepe Judei, i ĥáda, lénge maribén sys angíl i palál; i zadyne gódla jone ke Raj Devél, a rašaja zabašade rogénca. I dyné gódla Judei (Judejákire). I, kiéli zadyne gódla Judei, to Devél pekadiá Jerovoamos i sarén Izrail'tianén angíl muj Avijaskiro i Judáskiro. I prastándyne Izrailjoskire čhavé Judeiéndyr (Judendyr), i otdyjá len Devél lénge dre vastá. I muliakirdé len Avijá i manušá léngire baré maribnása; i pyné mulenca Izrailjoste pandžšelá tysjoncy vykedyné manušá. I jačné štyl tedy Izrailjoskire čhavé, i sys zoralé Judáskire čhavé, pal-dová so jone nadieindlepe pe Raste-Devléste, péskire dadengíre Devléste. I tradyjá Avijá Jerovoamos, i lyjá léstyr fórja: Viefíljo i fórja, savé sys tel léste, i Ješano i fórja, savé sys tel léste, i Jefrono i fórja, savé sys tel léste. I na zagijá (na dogijá) butýr dre zor Jerovoámo dre Avijaskire dyvesá. I muliakirdiá les Raj Devél, i jov myjá. Avijá jaciá zoraledýr; i lyjá péske dešuštar džuvlién (romnien), i bijándyne léstyr biš te duj čhavé i dešušov čhaja. Javír réndy Avijaskire, i léskire dromá džiibnytka, i léskire lavá, isyn začhindlé dre Addaskire-prorokoskiro phenybén. I pasijá viéčnes Avijá péskire dadénca, i ĥaradé les dro Davidóskiro fóro. I jaciá kralísa Asá, léskiro čhavó, pe léskiro štéto. Dre léskire dyvesá otkinyja phuv deš berš. I kerdiá Asá lačhipén i čačipén dre Ráskire-Devléskire, péskire Devléskire jakhá: i phagirdiá jov altári napeskire javire-devlorengire i vučipená, i rozmardiá statuly, i vyčingirdia obsvencyndle vešá; i priphendiá Judeiénge te rodén Ras-Devlés, péskire-dadengíre Devlés, i te spolninen Léskiro zakóno i priphenybená; i jov otparudia (na prilyjá) dre saré Judeiéngire fórja vučipená i statuly khameske. I štyl sys pašýl léste dro kralipén. I kerdiá jov fórja zoralé tynénca dre Judéia, pal-dová so štyl sys pe phuv, i na sys léste maribén dre dolé beršá, adiáke syr Raj Devél dyjá ramánjo léske. I phendiá jov Judeiénge: “Kerása ame dalé fórja i oblydžasa len vantenca vučardienca (bašniénca), portenca i šybierenca (zaporenca); phuv isyn amarí, pal-dová so, ame lathiam Les, – i Jov dyjá aménge ramánjo saré rigéndyr.” I lyné te kerén, i sys baht lénde. I sys Asaste xaladengiri zor: giné pe maribén ščytenca i čhurdybnytkone bustiasa (kop'josa) Judáskire rodycóstyr trin šelá tysjoncy, i Vieniaminóskire rodycóstyr, savé giné ščytenca i, savé mardé lukendyr duj šelá ohtodešá tysjoncy, murškané manušá. I vygijá pe lénde Zarajo Jefioplianino xaladybnasa dre tysjonco tysjoncy i triné šelenca maribnytkoné vurdynenca, i dogijá ke Mariéša. I vygijá Asá proti léste, i terdiné pe maribén pe dólo Cefato, pašýl Mariéša. I khardiá zoralés Asá ke Raj Devél, péskiro Devél, i phendiá: “Rajo Dévla! Ci na dre Tyrí zor te pomogines zoraleske, ci bizorjakireske? Pomogin aménge, Rajo Dévla, Devél amaró: pal-dová so ame Tútyr užakirasa lačhipén, i dre Tyró lav vygijam ame proti dalé butende manušénde. Rajo Dévla! Tu san amaró Devél: mek te na pirizorjakirel Tut manúš.” I muliakirdiá Raj Devél Jefioplianen angíl muj Asáskiro i angíl muj Judáskiro, i prastándyne krig Jefiopliani. I tradyjá len Asá i manušá, savé sys lésa, ke Gieraro, i pyné Jefiopliani adiáke, so lénde nikonés na jaciápe džidendyr, pal-dová so jone sys domardé angíl Raste-Devléste i angíl Léskiro xaladybén. I lyné doresybén drieván but. I rosphagirdé saré fórja trusciál (vokrug) Gieraro, pal-dová so pyjá pe lénde dar Rástyr-Devléstyr; i ročorde jone saré fórja, i vylydžiné léndyr drieván but čordo. Adiáke-pac' i čhupnar'jengire (pastuhengire) šátry rosčorde, i tradyne pésa but kheritkoné murdalén (skoto), tyknó skoto i vierbliuden, i risiné dro Jerusalimo. Tedy pe Azarijaste, Odiedoskire čhavéste, gijá telé Devléskiro Dúho (Fáno), i vygijá jov gil (pe strieč) Asaske i phendiá léske: “Šun man, Asá i saró Ju'da i Vieniamino: te javél Devél tuménca, kiéli tumé javéna Lésa; i kóli javéna te rodén Les, tumé lathéna Les; kóli jačkirena Les, to i Jov jačkiréla tumen. But dyvesá Izrailjo sys bi čačuneskiro Devléskiro i bi rašaskiro, savó sykliakirelas, i bi zakonoskiro; ne kiéli jov risjola godiása dro pharipén péskiro ke Raj Devél, Devél Izrailjoskiro, i lathéla Les, Jov déla lénge te lathén Pes. Dre dolé dyvesá na javéla ramánjo (miro) ni vygiibnytkoneske, ni zagiibnytkoneske, pal-dová so baró piridživipen javéla saré phuvjákire manušénde. Manušá javéna te marénpe manušénca, i fóro forosa, pal-dová so Devél janéla len dre túga raznone bidenca. Ne tumé zoraljon, i mek te na jačen bizorjákire tumaré vastá, pal-dová so isyn nagrada (mazúri) pal tumaré réndy.” Kiéli šundiá Asá dalé lavá i angilphenybén (proročynyben) Odiedoskire-prorokoskire čhavéskire, tedy lyjá pes dre vastá i vyčhurdyja najudýtka magiribena saré phuvjátyr Judaskirjatyr i Vieniaminoskirjatyr i for'ndyr, savé jov lyjá pe Jefriemóskiri bérga, i neviakirdia Ráskire-Devléskiro altárjo, savó sys angíl trémo Ráskire-Devléskiro. I skedyjá sarén manušén Judastyr i Vieniaminostyr i manušén, savé dživdé lésa, savé piriginé Jefriemostyr i Manasijastyr i Simieonostyr; pal-dová so but Izrailjostyr piriginé ke jov, kiéli dykhné, so Raj Devél, Devél léskiro, sys lésa. I skedynépe dro Jerusalimo pe tríto čhon, dre dešupandžto berš, syr Asá lyjá te kralinél; i jandlé dro dová dyvés svénto dyibén Ráske-Devléske doresybnastyr, savó jandlé, baré kheritkoné murdaléndyr eftašelá i tykné eftá tysjoncy; i zaginé dro zaviéto, sob (kaj) te lathes péskire Ras-Devlés, dadengíre Devlés, saré péskire iléstyr i saré péskire diéstyr; a kažno (sváko), kon na léla te rodél Ras-Devlés, Izrailjoskire Devlés, bangó javéla te merél, ci tyknó jov, ci baró, ci murš, ci džuvlý. I sovlahade Ráske-Devléske zoralé zaniása (glosasa) i godlypnasa, i pašýl zan rogengiri i gornoskiri. I radyndlepe saré Judejákire manušá dalé sovlahake, pal-dová so saré péskire iléstyr i saré kamibnasa lathné Les, i Jov dyjá lénge te lathén Pes. I dyjá lénge Raj Devél ramánjo (miro) saré rigéndyr. I Maahatyr, péskire datyr, králi Asá, otlyja kralipnaskiro baripén pal dová, so joj kerdiá idolo vaš dembitko vešoro. I rosčingirdia Asá idolo lákiro, i čingirdia les pe koterá, i xačkirdiá pe Kiedronoskiro dólo. Na dykhí, so vučipyna na sys otparude dro Izrailjo, ne iló Asáskiro sys sarésa otdynó Ráske-Devléske dre saré léskire dyvesá. I jandiá jov obsvencyndle khoré (sasúdy) léskire dadéskire i léskire priedmiéty, savé jov posviencyndia vaš Devléskiro Kher, rup, i suvnakái, i khoré. I na sys maribén ke trijánda pándžto berš dro Asáskiro kralipén. Pe trijánda šóvto berš Asáskiro kralipnaske, gijá o Vaasa, Izrailjoskiro králi, pe Judéia, i lyjá te kerél Ráma, sob (kaj) te na del vólia nikonéske te na džal krig Asatyr, Judejákire kralístyr, ni te na javél ke jov. I vylydžijá Asá rup i suvnakáj kučipnaskire piraliendyr Ráskire-Devléskire Khereskir i kralískire kheréstyr, i bičhadiá ke Vienadado, Sirijákiro králi, savó dživdiá ke Damásko, rakirí: “Mek te javél dorakiribén maškír mánde i túte, syr sys maškír miré dadéste i tyré dadéste; ĥáda, me bičhaváva túke rup i suvnakái: džá, rosphande (otparuv) dorakiribén tyró Vaasasa, Izrailjoskire kralísa, sob (kaj) jov te otdžal mándyr.” I kandyjá Vienadado, kralís Asas, i bičhadiá xaladéngire barydyrén, savé sys léste, proti Izrailjoskire fórja, i jone kerdé čhučé Iiono i Dano, i Avielmaimo, i saré zapasy dre Niefalimoskire fórja. I kiéli šundiá pal davá Vaasa, to tedy pirijaciá te kerél Ráma i mekciá péskiri butý. O Asá, králi, skedyjá sarén Judejákire manušén, i jone vylydžiné Ramatyr bará i veš, savé lyjá Vaasa vaš keriben, – i kerdiá léndyr Gieva i Micfa. Dre dolé dyvesá javdiá Ananijo magiko, ke Asá, Judejákiro králi, i phendiá léske: “Adiáke, syr tu užakirdian lačhipén Sirijakire kralístyr i na nadieindianpe pe Raste-Devléste, tyré Devléste, pal-dová i zrakhnepe xaladé Sirijakire kralískire tyré vastéstyr. Ci na sys Jefiopliani i Livijani baré zorjása, i maribnytkoné vurdynenca, i drieván buté manušénca uklisté pe grénde? Ne syr tu čhudián nadiéia pe Raste-Devléste, to Jov i otdyjá len dre tyré vastá, pal-dová so jakhá Ráskire-Devléskire obdykhena sarí phuv, sob (kaj) te podrikires odolén, konéskiro iló sarésa otdynó Léske. Nagod'vares tu kerdián akaná. Paldavá dalé dyveséndyr javéna túte maribena.” I rosholiasyja Asá pe magikoste, i čhudiá les dre bešyben, adiáke syr pal davá sys dre xolý pe léste; pritasadia Asá i vari-savén javire manušén dre dolé dyvesá. I ĥáda, keribna Asaskire, anglatunó i palatunó (posliednie), isyn začhindlé dre Judejákire i Izrail'skone-kral'jengiri lylvarí. I kerdiápe Asá nasvaló ĥerénca pe trijánda-jeniáto berš péskire-kralipnaskiro, i nasvalypen léskiro ĥazdyjápe ke upratune masengire pašá; ne jov dre péskiro nasvalypen rodyja na Ras Devlés, a sastypnar'jén. I pasijá Asá péskire dadénca, i myjá pe štardešá pérvo berš péskire kralipnaskiro. I ĥaradé les dre koplíca, saví jov kerdiá vaš péske dro Davidóskiro fóro; i čhudé les pe pasindly (odro), saví pherdiakirde lačhé-khandypnytkonenca (parfunenca) i kažnoné gotovime makhibnenca, i xačkirdé len vaš léske drieván but. I jaciá kralísa Iosafáto, léskiro čhavó, pe štéto léskiro; i jaciá jov zoraledýr proti Izrail'tianende. I čhudiá jov xaladén dre saré Judejákire fórja zoralé tynénca, i čhudiá rakhibnar'itkone xaladén pir Judejakiri phuv i pir Jefriemóskire fórja, savénca xulaindia Asá, léskiro dad. I sys Raj Devél Iosafatosa, pal-dová so jov psirdiá anglatuné Davidóskire droménca, péskire dadeskirenca, i na rodyja jov Vaalen, ne rodyja jov Ras-Devlés, péskire Dadeskires i kerdiá pir Léskire priphenybená, a na pir Izrail'tianengire réndy. I kerdiá Raj Devél zoraló kralipén dro léskiro vast, i dyné saré Judy dáry Iosafatoske, i sys léste but barvalypén i sláva. I ĥazdyjápe léskiro iló pe Ráskire-Devléskire dromá; iščo (inké) i vučipená jov otparudia i demby dre Judéia. I pe tríto berš péskire kralipnaske jov bičhadiá peskiren thagar'jén: Bienhailos i Ovadijas, i Zaharijas, i Nafanailos, i Mihiejos, sob (kaj) te sykliakirén pir Judáskire fórja manušén, i lénca bičhadiá Lievitén: Šiemaijas i Niefanijas, i Zievadijas, i Azailos, i Šemiramofos, i Ionafanos, i Adonijas, i Tovijas, i Tov-Adonijas, i lénca rašán: Jelišamos i Ioramos. I jone sykliakirdé dre Judéia, lydžii pésa Ráskire-Devléskire Zakonoskiri lylvarí; i jone obdžanas (obgine) saré Judejákire fórja, i sykliakirdé manušén. I sys dar Ráskire-Devléskiri pe saré phuvjá kralipnaskire, savé sys trusciál Judéia, i na mardépe Iosafatosa. A Filistimlianendyr janénas Iosafatoske dáry i dro dyibén rup; adiáke-pac' Aravitiani pritradenas ke jov tyknó skoto: bakrén eftá tysjoncy eftá šelá i buznen (kozlen) eftá tysjoncy eftašelá. I ĥazdélape Iosafáto usá butýr i butýr, i čhudiá dre Judéia zoralé tyny i fórja vaš zapasy. But léste sys zapasy dre Judejákire fórja, a dro Jerusalimo murškané xaladéngire manušá. I ĥáda, piriginybén léngiro pir stréčy léngire: Judaste sys barydyrá tysjoncengire: Adna, barydyró i léste sys fedyršonen xaladén trinšelá tysjoncy; pal léste sys Iohanano barydyró, i léste sys dujšelá ohtodešá tysjoncy; pal léste sys Amásija, Zihriskiro čhavó, savó otdyjá pes Ráske Devléske, i léste sys dujšelá tysjoncy fedyršone xaladé. Vieniaminoste: fedyršo xalado sys Jeliado, i léste rikirde lúko i ščýto dujšelá tysjoncy; pal léste sys Iiegozavado, i léste rikirde mardytka (mardynia) šel ohtodešá tysjoncy xaladé. Ĥáda, sys manušá, savé dynarindlé kralíske, apríč odolénde, savén rosčhudiá králi dre fórja zoralé tynénca pir sarí Judéia. I sys Iosafatoste but barvalypén i sláva; i semencyndiape jov Ahavosa. I gijá jov pirdál vari-kicý berš ke Ahávo dre Samárija. I začhindiá vaš léske Ahávo drieván but tyknó i baró skoto, i vaš manušénge, savé sys lésa, i podrakirelas les te džal pe Ramófo Galaadoskiro. I rakirdiá Ahávo, Izrailjoskiro králi, Iosafatoske, Judytkone kralíske: “Ci džása tu mánca pe Ramófo Galaadoskiro?” Odová otphendiá léske: “Syr Tu, adiáke i me; syr tyré manušá, adiáke i miré manušá: me džáva túsa pe maribén!” I phendiá Iosafáto Izrailjoskire kralíske: “Phučpe adadyvés, so phenéla Raj Devél.” I skedyjá Izrailjoskiro králi prorokén štaršelá manušén, i phendiá lénge: “Ci te džas aménge pe Ramófo, Galaadoskiro maribnása, ci te užakiras?” Jone phendlé: “Džá, i Devél otdéla les dre kralískire vastá.” I phendiá Iosafáto: “Ci nane adáj iščo (inké) Ráskire-Devléskire prorokós? Phučasape léstyr.” I phendiá Izrailjoskiro králi Iosafatoske: “Iščo isyn jekh manúš, pirdál savéste saštý (možna) te phučespe Rástyr-Devléstyr; ne jov na pir iló mánge, pal-dová so jov na angilphenela (proročynela) pal mánde lačhipén, a kažno mólo angilphenela fuipén; davá isyn Mihiejo, Iiemvlajoskiro čhavó.” I phendiá Iosafáto: “Na rákir adiáke, králi.” I khardiá Izrailjoskiro králi jekhés skopcos (jevnuhos), i phendiá: “Džá i jan sygedýr Mihiejos, Iiemvlajoskire čhavés.” Izrailjoskiro králi i Iosafáto, Judejákiro králi, sys bešté kažno pe péskiro trono, uridé dre kralitka ídi, bešté sys jone pe foritko štéto pašýl pórta Samarijakiri, i saré proróki angilphenenas angíl lénde. I kerdiá péske Sedekíia, Xienaanaskiro čhavó, sastruné šyngá (rógi), i phendiá: “Adiáke rakiréla Raj Devél: ‘Dalenca tu zaphusavesa Sirijanen pe meribén.’ I saré proróki angilphenenas dová-pac', rakirí: “Džá pe Ramófo Galaadoskiro: udelape túke, i otdéla les Raj Devél dre kralískire vastá.” Manúš, savó sys bičhadó, gijá te kharel Mihiejos, i rakirdiá léske: “Ĥáda, proróki dre jekh zan (glos) rakiréna lačhipén kralíske; mek i tyró lav te javél dasavo-pac', syr kažnoneskiro léndyr: phen i tu lačhó lav.” I phendiá Mihiéjo: “Te javél džidó Raj Devél, – so phenéla mánge miro Devél, dová phenáva me.” I javdiá jov ke králi, i phendiá léske králi: “Mihiéjo, ci te džas aménge maribnása pe Ramófo Galaadoskiro, ci te užakiras nábut?” I phendiá odová: “Džán, tuménge udelape te pirizorjakiren, i jone otdyné javéna dre tumaré vastá.” I phendiá léske králi: “Ci but móly mánge te sovlahav túke, sob (kaj) tu te na rakirés mánge ničý, apríč čačipén, dro lav Ráskire-Devléskiro?” Tedy Mihiéjo phendiá: “Me dykhcjom sarén Izrailjoskire čhavén, savé sys rosčhurdyne pir bérgi, syr bakré, savénde nane čhupnaris, – i phendiá Raj Devél: “Nane lénde barydyró, mek te risjon kažno dro péskiro kher ramanjosa (mirósa)”.” I phendiá Izrailjoskiro králi Iosafatoske: “Ci na rakirdjom me túke, so jov na angilphenela pal mánde lačhipén, a jékh fuipén?” I phendiá Mihiejo: “Adiáke šunén Ráskire-Devléskiro lav: me dykhcjom Ras-Devlés, bešyndoj pe Léskiro trono, i saró xaladybén bolybnáskiro sys terdó pir čačó i pir zérvo vast Léskiro. I phendiá Raj Devél: ‘Kon by te xohavél Ahavos, Izrailjoskire kralís, sob (kaj) jov te džal i te perél pe Ramófo Galaadoskiro?’ I jekh rakirdiá adiáke, javír rakirdiá pe javír (javirčanes). I vygijá jekh dúho (fáno), i terdijá angíl Raste-Devléste, i phendiá: ‘Me xohavava les.’ I phendiá léske Raj Devél: ‘Sósa?’ Odová phendiá: ‘Me vydžava i javáva xohané duhósa (fanosa) dre sarengire léskire-prorokéngire uštá.’ I phendiá Jov: ‘Tu utyrdesa les, i tu désa ráda (spravinesape); džá i ker adiáke.’ I akaná, ĥáda, mekciá Raj Devél xohaibnaskiro dúho (fáno) te zadžál dre uštá dalé tyré-prorokéngire, ne Raj Devél rakirdiá pal túte nalačhipen.” I podgíia Sedekíia, Xienaanaskiro čhavó, i pekadiá Mihiejos pir čam (ščoka), i phendiá: “Pir savó da drom otgijá mándyr Ráskire-Devléskiro Dúho (Fáno), sob (kaj) te rakirél dre túte? I phendiá Mihiejo: “Ĥáda, tu dykhésa davá dre dová dyvés, kiéli tu javésa te prastas štubatyr dre štúba, sob (kaj) te garadjos.” I phendiá Izrailjosko králi: “Len Mihiejos i otlydžan les ke Amono, foróskiro barydyró, i ke Ioáso, kralískiro čhavó. I phenén: “Adiáke rakiréla králi: ‘Čhuvén te bešél adales dro bešyben i čaliakiren les marésa i paniésa fujés, paka me risjováva dre ramánjo (miro).’ I phendiá Mihiejo: “Kóli tu risjosa dro ramánjo (miro), tedy na Raj Devél rakirdiá pirdál mánde.” I phendiá: “Šunén davá, saré manušá!” I gijá Izrailjosko králi i Iosafáto, Judejákiro králi, pe Ramófo Galaadoskiro. I phendiá králi Izrailjoskiro Iosafatoske: “Me piriurjavape i vydžava pe maribén, a tu uri péskire kralískire ídi.” I piriuridiape Izrailjoskiro králi; i vygijá pe maribén. I Sirijákiro králi priphendiá barydyrénge pe maribnýtka vurdyná, savé sys léste, phení: “Na marénpe ni tyknesa, ni baresa, a jekhe Izrailjoskire kralísa.” I kiéli dykhné Iosafatos barydyrá vurdenengire, tedy podumindle: “Davá isyn Izrailjoskiro králi”, – i obgine trusciál léste, sob (kaj) te marénpe lésa.” Ne Iosafáto zadyja gódla, i Raj Devél pomogindia léske, i otlydžija len Raj Devél léstyr. I kiéli dykhné barydyrá vurdenengire, so davá na sys Izrailjoskiro králi, tedy riskirdé léstyr. Maškir davá sys jekh manúš, savó nakami vytyrdyja péskiro lúko i ranindia Izrailjoskire kralís pirdál švy dre kal'čuga. I phendiá jov šoliariske: “Rískir pale i lýdža man xaladendyr, pal-dová so me som ranindlo (dukhado).” Ne maribén dre dová dyvés jaciá zoraledýr; i Izrailjoskiro králi sys terdó pe proti Sirijanende ke bel'vél' i myjá, syr zagijá kham. I risijá kanúto (celo) Iosafáto, Judejákiro králi dro péskiro kher dro Jerusalimo. I vygijá gil léske Iiújo, Ananijaskiro čhavó, magiko, i phendiá kralíske Iosafatoske: “Ci treindiá túke te des vast (pomogines) nadyvlytkonenge i te sykaves láska manušénge, savé bidykhena Ras-Devlés? Paldavá pe túte xolý Rástyr-Devléstyr. Ne i lačhipén lathno dre túte, pal-dová so tu phagirdian vyčhindlé muiá pe Judejakiri phuv i otlydžijan péskiro iló ke dová, sob (kaj) te lathes Devlés. I dživdiá Iosafáto ke Jerusalimo. I nevés lyjá jov te obdžal manušén peskiren Virsavijatyr ke Jefriemóskiri bérga, i obriskirdia godý (beršá) léngiri ke Raj-Devél, Devél léngire-dadéngiro. I čhudiá sendar'jén pe phuv pir saré Judejákire fórja zoralé tynénca, dro kažno fóro, i phendiá sendar'jénge: “Dykhén, so tumé keréna, tumé keréna na séndo manušýtko, ne séndo Ráskire-Devléskiro; i Jov javéla tuménca dro réndo sendoskiro. I adiáke mek te javél dar Ráskire-Devléskiri pe tuménde: kerén, obduminy (obdykhi); pal-dová so nane Raste-Devléste, Devléste amareste, ni načačipén, ni dujemuitkima, ni sob (kaj) te prilén dáry. I dro Jerusalimo jandiá Iosafáto vari-savén Lievitendyr i rašandyr i šeralen pe stréčy pir Izrailjo – ke Ráskire-Devléskiro séndo i ke pharipena. I risiné ke Jerusalimo. I dyjá lénge uphenybén, rakirí: “Adiáke kerén darása (darjasa) Rástyr-Devléstyr, čačipnása i žužé ilésa: dro kažno sprečno réndo, savó javéla ke tumé tumaré pšaléndyr, savé dživéna dro péskire fórja, ci pal rateskiro pročhuiben, ci pal Zakóno, priphenybená, uphenybená, i priphenybená, sykliakirén len, sob (kaj) jone te na kerén nisavó fuipén angíl Raste-Devléste, i te na javél by xolý Léskiri pe tuménde i pe pšalénde tumarende; adiáke kerén, – i tumé na keréna grého. I ĥáda, Amarija, savó isyn anglatunó rašái, pe tuménde dro kažno réndo Ráskire-Devléskiro, a Zievadija, Ismailoskiro čhavó, Judáskire-kheréskiro thagári (kniazjo), dro kažno kralískiro réndo, i dykhibnar'jenca javéna Lievíty angíl tuménde. Javén murškané i kerén, i javéla Raj Devél lačhipnása.” Paló poslie (davá) Moavitiani i Amonitiani, i lénca vari-savé Maonitskone rigátyr, giné maribnása pe Iosafatoste. I javné, i rosphendlé Iosafatoske, rakirí: “Džána pe túte drieván but manušén pal morjostyr (derjavestyr), Sirijatyr, i ĥáda, jone javéna dre Xacacono-Famaro, savó isyn dre Jengieddi.” I strahadyja Iosafáto, i riskirdiá péskiro muj te rodél Ras-Devlés, i dyjá te džinél pir sarí Judéia, pal posto. I skedynépe Judei (Judejákire) te mangén vast (pomošč) Rástyr-Devléstyr; i saré Judéngire for'jéndyr javné jone te mangén Ras-Devlés. I terdijá Iosafáto pe skedyibén Judéngiro i Jerusalimlianengiro dro Ráskire-Devléskiro Kher, angíl neví gréda (dvóro), i phendiá: “Rajo Dévla, amaré dadéngiro! Ci na san Tu, Devél pe bolybén? I Tu xulainesa pe sarénde kralipnaskire manušénde, i dro Tyró vast zor i zoralypén, i nikón na uterdjola proti Túte! Ci na Tu, Dévla amaró, vytradyjan manušén dalé phuvjákire angíl muj manušénde, Tyré Izrailjoskirende, i otdyjan la rodóske Avraamoskireske, maléske Tyréske pe viéko? I jone lyné te dživén pe láte, i kerdé Túke pe láte svénto štéto dro lav Tyró, rakirí: “‘Kóli javéla pe aménde bída: kurtála, saví dukhavela, ci fránsy, ci bokh, tedy ame terdjovasa angíl davá Kher i angíl Tyró muj, pal-dová so lav Tyró isyn dre davá Kher; i zagodlasa ke Tu dro amaró pharipén, i Tu šunesa i zrakhésa.’ I akaná, Amonitiani i Moavitiani i manušá, savé dživéna pe Sieiroskiri bérga, pirdál koneskire phuvjá, Tu na dyján vólia te prodžan Izrail'tianenge, kiéli jone giné Jegiptóskire phuvjátyr, i paldavá jone obgine len i na zamardé len, akaná, jone pleskirena aménge dolesa, so javné te vytraden amen mištypnástyr Tyrestyr, savó Tu otdyjan aménge. Dévla amaró! Tu sendiakir len. Pal-dová so nane dre aménde zor proti dakicyk drieván buté manušénde, savé javné pe aménde, i ame na džinása, so te kerás, ne ke Tu isyn jakhá amaré!” I saré Judy sys terdé angíl Raste-Devléste, i tykné léngire čhavé, léngire romniá i léngire čhavé. Tedy pe Ioziiloste, Zaharijaskire čhavéste, Vanejaskire čhavéste, Jeieieloskire čhavéste, Matfanijaskire čhavéste, Lievitoste Asafoskire čhavéndyr, zgija Ráskire-Devléskiro Dúho (Fáno), maškír skedyibén, i phendiá jov: “Šunén, saré Judejákire i Jerusalimóstyr manušá, i králi Iosafáto! Adiáke rakiréla Raj-Devél ke tumé: “Na darén i na strahadjon drieván buté adalé manušéndyr, pal-dová so davá isyn na tumaró maribén, a Devléskiro. Atasiá vydžán gil lénde: ĥáda jone džána upré pe bérgica Cyco, a tumé lathéna len pe doloskiro jagóro (krajo), angíl čhučí phuv Iieruilomo. Na tuménge trej te marénpe davá mólo; tumé terdjon, terdjon i dykhén pe zrakhibén Ráskire-Devléskiro, so javéla bičhadó tuménge. Ju'da i Jerusalimo! Na darén i na strahadjon. Atasiá vydžána gil (pe strieč) lénge, i Raj-Devél javéla tuménca.” I poklonindiape Iosafáto mósa ke phuv, i saré manušá Judejákire i manušá Jerusalimóskire pyné angíl Raste-Devléste, sob (kaj) te pokloninenpe Ráske-Devléske! I uštyné Lievíty Kaafoskire čhavéndyr i Koriejoskire čhavéndyr – te šarén Ras-Devlés, Devlés Izrailjoskires, drieván zoralé zaniása. I uštyné jone tasiárles (ránes) pe zlóko, i vyginé pe čhučí phuv Fiekoiakiri; i kiéli jone vyginé, to terdijá Iosafáto i phendiá: “Šunén man, Judejákire i Jerusalimóskire manušá! Patián Ráske-Devléske, tumaré Devléske, i javén zoralé-voliakire: patián Léskire prorokenge, i javéla šukár tuménge.” I obrakirdia jov manušénca, i čhudiá bagaibnar'n Ráske-Devléske, sob (kaj) jone dre gožypnaskiri sventyma, te vydžán angíl xaladénde, sob (kaj) slavindle i rakirdé: “Barjakirén (slavinén) Ras-Devlés, pal-dová so dro viéko tangipén (žalost') Léskiro!” I dre dová časo (cýro), syr jone lyné te šarén i te barjakirén, Raj Devél ĥazdyjá rozlado maškír Amonitianende, Moavitianende i manušénde, savé dživdé pe bérga Sieiro, savé javné pe Judéia, i sys jone domardé; pal-dová so ĥazdynépe Amonitiani i Moavitiani, savé dživdé pe bérga Sieiro, mardé i tradyne len; a kiéli jone mekné (končyndle) te marénpe manušénca Sieiroskirenca, tedy lyné te marén jekh jekhés. I kiéli Judy (Judejákire manušá) javné pe vučipén pe čhučí phuv i dykhné pe odolé drieván buté manušénde, i ĥáda – trúpy, savé sys pašté pe phuv, i nane nikonés, sob (kaj) te zrakhelpe. I javdiá Iosafáto i léskire manušá te zakeden doresybén, i lathné lénde drieván but barvalypén, i ídi, i dróga bará, i kedyne péske adákicy, so na mogindlé te lydžán. I trin dyvesá jone zakedenas doresybén; dasavo baró sys jov! A pe štárto dyvés skedynépe pe bahtiakiribnaskiro dólo, adiáke syr odój jone bahtiakirde Ras-Devlés. Paldavá i kharéna dová štéto bahtiakiribnaskire dolosa ke davá dyvés. I giné pale saré Judei, Jerusalimliani i Iosafáto angíl lénde, sob (kaj) te risjon dro Jerusalimo viesjolymasa (lošasa), pal-dová so dyjá lénge Raj Devél rádyma pe léngire vergénde. I javné jone dro Jerusalimo arfenca, i lutenca, i rogénca, ke Ráskire-Devléskiro Kher. I sys Devléskiri dar pe saré kralipnengire phuvjá, kiéli jone šundlé, so Kokoró Raj Devél mardiápe proti Izrailjoskire vergénde. I jaciá štyl dro kralipén Iosafatóskiro; i dyjá léske Devél léskiro pokojo (otkhinyben) saré rigéndyr. Adiáke sys kralísa Iosafáto pe Judéia: trijandapandž berš sys léske, kiéli jov jaciá kralísa, i biš te pandž berš sys kralísa dro Jerusalimo. Lav dákiro leskirjakiro sys Azuva, Salailoskiri čhaj. I psirdiá jov péskire dadéskire Asaskire dromésa, i na gijá krig léstyr, kerdiá godnes (lačhés) dre Ráskire-Devléskire jakhá. Jekh vučipená na sys otparude, i manušá na riskirdé zoralés péskiro iló ke péskire-dadéngiro Devél. Javír réndy (diély) Iosafatoskire, anglatuné i palatuné, isyn začhindlé dre Ananijoskire čhavéskire, Iiujoskire čhinybena, pal savé rakirelape dre Izrailjoskire-kral'jengiri lylvarí. Ne paló (poslie) dová zagijá Iosafáto, Judejákiro králi, dro malypen Ohozijasa, Izrailjoskire kralísa, savó kerdiá na pir Zakóno. I khetaniakirdiape lésa, sob (kaj) te kerén pármy (korabli) te plyvinen (te den plima) dro Farsiso; i kerdé jone pármy dre Jecyon-Gaviéro. I phendiá tedy Jelijezero, čhavó Dodavaskiro Mariešatyr, angilphenybén pe Iosafatoste, rakirí: “Adiáke syr Tu zagijan dro malypen Ohozijasa, to rosphagirdiá Raj Devél Tyró réndo.” – I rozmardepe pármy, i na mogindlé jone te džán dro Farsiso. I pasijá viéčnes Iosafáto péskire dadénca, i sys garadó péskire dadénca dre Davidóskiro fóro. I jaciá kralísa Iorámo, léskiro čhavó, pe štéto léskiro. I léste sys pšála, Iosafatoskire čhavé: Azárija, i Iiehiilo (Jehiilo), i Zahárija, i Azárija, i Mihailo, i Safatija: saré dalé Iosafatoskire sys čhavé, Izrailjoskire kralískire. I dyjá lénge dad léngire baré počastúnki (podarki) rupésa, i suvnakása, i drogoné barénca, khetané zoralé-tynengire for'jénca dre Judéia; a kralipén jov otdyjá Ioramoske, pal-dová so jov sys anglatunó. I terdijá Iorámo pe péskire-dadéskiro kralipén i jaciá zoraló, i muliakirdiá sarén péskire pšalén kurtalása i adiáke-pac' vari-savén Izrailjoskire thagar'jéndyr. Trijánda duj beršá sys Ioramoske, kiéli jov jaciá kralísa, i ohtó (bidujéngiro deš) berš jov sys kralísa dro Jerusalimo; i psirdiá jov Izrailjoskire kral'jéngire dromésa, syr kerdiá Ahavoskiro kher – pal-dová so Ahavoskiri čhaj sys léskiri romný, – i kerdiá jov nalačhés dre Ráskire-Devléskire jakhá. Usajékh na kamdiá Raj Devél te xasiakirél Davidóskiro kher vaš Zaviéto, savó kerdiá Jov Davidosa, i pal-dová so jov dyjá lav (obiscindia) te del léske i léskire čhavénge pe saré dyvesá. Dre léskire dyvesá vygijá Edómo Judáskire zorjátyr i čhudé jone pe péste kralís. I gijá Iorámo péskire xaladéngire barydyrénca, i saré maribnýtka vurdyná sys lésa; i, uštyi ratý, domardiá Idumejanen, savé oblyne trusciál les, i barydyrén pe maribnýtka vurdyná. Usajékh vygijá Edómo Judáskire zorjátyr ke davá dyvés. Dre dolé-pac' dyvesá vygijá i Livna léskire zorjátyr, pal-dová so jov jačkirdiá Ras-Devlés, péskire dadengires Devlés. Adiáke-pac' vučipená kerdiá jov pe bérgi dre Judéia, i zalydžijá dro bléndo Jerusalimóskire manušén, i zlydžija Judéia. I javdiá ke jov te lyl Ilijastyr prorokostyr, dro savó sys phendló: “Adiáke rakiréla Raj Devél, tyré dadéskire-Davidóskiro Devél: pal-dová, so tu na gíian tyré dadéskire Iosafatoskire droménca, i Judejákire-kralískire Asaskire droménca, a gíian Izrailjoskire-kral'jéngire dromésa i lydžijan dro bléndo Judéia i Jerusalimóskire manušén adiáke-pac', syr zalydžijá manušén dro bléndo Ahavoskiro kher; iščo (inké) i tyré pšalén, tyré-dadéskiro kher, savé fedýr tútyr, tu muliakirdian len: pal-dová, ĥáda, Raj Devél muliakiréla baré maribnása tyré manušén, i tyré čhavén, i tyré romnién, i saró tyró barvalypén, tut kokores-baré nasvalypnasa, tyré-kužumengire dukhasa ke dová, so javéna te perén javrí tyré kužuma nasvalypnastyr dyvés dyveséstyr.” I ĥazdyjá Raj Devél proti Ioramoste dúho (fáno) Filistimlianengiro i Aravitianengiro (Arabengiro), savé dživdé pašýl Jefioplianende; i jone giné pe Judéia, i pyné maribnása pe láte, i zauhtylde saró mištypén (barvalypén), savó sys dro kralískiro kher, adiáke-pac' i léskire čhavén, i romnien leskiren; i na jaciápe léste čhavés, apríč Ohozijoste, tyknedyršones léskire čhavéndyr. I paló (poslie) saró davá Raj Devél dukhadia léskire kužuma nasvalypnasa, savó sys naštý te vysastiakires. Adiáke sys dyveséstyr pe dyvés, a pe javire-beršeskiro kónco (jagóro) vypyne léskire kužuma nasvalypnastyr leskirestyr, i jov myjá dre baré mén'ki; i manušá léskire na shačkirdé vaš léske lačhé-khandypnytka (parfuny), syr kerdé davá vaš léskire dadénge. Trijánda duj berš sys léske, kiéli jov jaciá kralísa, i ohtó (bidujéngiro deš) berš jov sys kralísa dro Jerusalimo, i myjá na obrondlo, i ĥaradé les dre Davidóskiro fóro, ne na dre kralipnaskire koplicy. I čhudé kralísa Jerusalimóskire manušá Ohozijas, léskire tyknedyršone čhavés, pe štéto léskiro léste, adiáke syr sarén phurydyršonen domardiá baró ke dar xaladybén, savé sys Aravitianenca ke stáno (lod), i jaciá kralísa Ohozija, Ioramóskiro čhavó, savó sys králi pe Judéia. Biš te duj berš sys Ohozijaske, kiéli jov jaciá kralísa, i jekh berš jov sys kralísa dro Jerusalimo; lav léskire-dákiro sys Gofolija, Amvarijoskiri čhaj. Jov adiáke-pac' psirdiá Ahavoskire-kheréskire droménca, pal-dová so léskiri daj dyjá godý léske pal bi-zakonóskire réndy. I kerdiá jov nalačhés dre Ráskire-Devléskire jakhá, adiáke-pac' syr kerdiá Ahavoskiro kher: pal-dová so jov léske délas godý paló (poslie) léskire-dadéskiro meribén, pe xasibén léske. Adiáke-pac', keri pir léngiri godý, jov gijá Ioramosa, Ahavoskire-čhavésa, Izrailjoskire kralísa, pe maribén proti Azailoste, Sirijakire kralíste, dro Ramófo Galaadoskiro. I dukhade (ranindle) Sirijani Ioramos. I risijá jov dro Izriejeljo te drabakirelpe ranendyr (fransendyr), savé kerdé léske dre Ráma, kiéli jov mardiápe Azailosa, Sirijakire kralísa. I Ohozija, Ioramóskiro čhavó, pe Judéia králi, javdiá te dykhelpe Ioramosa, Ahavoskire čhavésa, dro Izriejeljo, pal-dová so dová sys nasvaló. I Devléstyr sys davá pe meribén Ohozijaske, so jov javdiá ke Iorámo: paldová so jov gijá proti Iiujoste, Namiesijoskire čhavéste, savés pomakhcia Raj Devél pe Ahavoskire-kheréskiro xasibén. Kiéli kerdiá Iiújo séndo pe Ahavoskiro kher, tedy jov lathiá Judejákire thagar'jén i Ohozijaskire-čhavéngire-pšalén, savé dynarindlé (služyndle) Ohozijaske, i muliakirdiá len. I priphendiá jov te rodén Ohozijas, i lyné les, kiéli jov garadyja dre Samárija, i jandlé les ke Iiújo, i zamardé les, i ĥaradé les; pal-dová so rakirdé: jov sys Iosafatóskiro čhavó, savó lathiá Ras-Devlés saré péskire iléstyr. I na jaciápe nijékh dro Ohozijaskiro kher, kon by mogindiá te javél kralísa. Pal-dová so Gofolija, Ohozijaskiri daj, syr dykhciá, so myjá lákiro čhavó, to uštyjá i muliakirdiá saró kralískiro ródo Judáskire kheréstyr. Ne Iosavief, kralískiri čhaj lyjá Ioasos, Ohozijaskire čhavés, i čordia les kralískire čhavéndyr, savén zamarenas, i garadia les i odolia džuvliá, saví les barjakirdia dre štúba, kaj sys suté; i adiáke Iosaviéf, Ioramoskire-kralískiri čhaj, romný rašaskiri Iodajoskiri, Ohozijaskiri phen, garadia Ioasos Gofolijatyr; i joj na muliakirdiá les. I sys jov lénde, dro Devléskiro Kher, garadó šov berš; Gofolija sys kralicasa pe phuv. Ne pe eftáto berš ĥazdyjápe dro dúho Iodajo, i prilyjá dro khetaniakiriben pésa šelengire barydyrén: Azarijas, Iierohamoskire-čhavés, i Ismailos, Iiegohananoskire-čhavés, i Azarijas, Oviedoskire-čhavés, i Maasejas, Adaijoskire-čhavés, i Jelišafatos, Zihriskire-čhavés. I jone proginé pir Judéia, i skedyné Lievitén saré Judejákire for'jéndyr i Izrailjoskire šeralen pe stréčy (pokoliénii), i javné dro Jerusalimo. I kerdiá saró skedyibén zaviéto dre Devléskiro Kher (Khangirí) kralísa, i phendiá lénge Iodajo: “Ĥáda, kralískire čhavéske trej te javél kralísa, syr rakirdiá Raj Devél pal Davidóskire čhavénde. Ĥáda, so tuménge trej te kerén: tríto paš tuméndyr, savé javéna dro sávato (subotone), rašandyr i Lievitendyr, javéna rakhibnárja pašýl progi, i tríto paš pašýl kralískiro kher, i tríto paš pašýl Iiesodoskiri pórta; a saré manušá pe Ráskire-Devléskire Khereskire gredy (dvory). I nikón mek te na zadžál dro Ráskire-Devléskiro Kher, apríč rašande i Lievitende butiarnende. Jone moginéna te zadžán, pal-dová so isyn vysvencyndle; saré manušá mek te terdjon pe rakhiben Ráskire-Devléskiro. I mek Lievíty te terdjon trusciál (krugom) kralíste saré rigéndyr, kažno péskire mardytkonésa dro péskiro vast, i kon javéla te zadžál dre Khangirí, mek te javél muliakirdo. I javén tumé pašýl kralíste, kiéli jov javéla te zadžál i te vydžál.” I kerdé Lievíty i saré Judy, so priphendiá Iodajo rašái, i lyné kažno péskire manušén, savé javéna dro sávato i savé udžana dro sávato; pal-dová so na otmekciá rašáj Iodajo manušén, savé parudepe. I rozdyja Iodajo rašáj šelengire barydyrénge čhurdyibnytka bustiá (kop'i) i tykné i baré ščýty Davidóskire kralískire, savé sys dre Devléskiro Kher. I čhudé saré manušá svakones (kažnones) léskire mardytkonesa dro léskiro vast, čačé-khangirjákire rigátyr ke zérvo (liévo) khangirjákiri rig, pašýl altarie i pašýl Kher trusciál kralíste. I vylydžiné kraliskires čhavés, i čhudé pe léste viánka, i gožypena i čhudé les kralísa; i pomakhne les Iodajo i léskire čhavé, i phendlé: “Mek te dživél králi!” I šundiá Gofolija manušéngiri zan (glos), savé prastándyne i rakirdé pal kralíste, i vygijá ke manušá dro Ráskire-Devléskiro Kher, I kiéli dykhciá, i, ake so: sys terdó králi pe péskiro vučipén pašýl zagiibén, i thagárja, i rógi (truby) pašýl kralíste, i saré manušá phuvjákire radynénape, i bašavena rogénca, i manušá, savé baganas bagaibnytkone strumientenca i savé sys lačhé te šarén. I roskustia Gofolija péskire ídi, i zadyja gódla: “Zrakiribén! Zrakiribén!” I vykhardia Iodajo, rašái, šelengire barydyrén, savé sys barydyrá pe xaladénde, i phendiá lénge: “Lydžán la javrí, i, kon džála pal láte, mek te muliakirén kurtalása.” Pal-dová so rašáj phendiá: “Na muliakirén la dre Ráskire-Devléskiro Kher.” I dyné láke štéto, i, kiéli joj iavdiá ke zagiibén dre grengiri pórta kralískire-kheréskiri, odój muliakirdé la. I kerdiá Iodajo zaviéto maškír péste, i maškír saré manušénde, i kralíste, sob (kaj) te javén jone Ráskire-Devléskire manušá. I giné saré manušá pe mangipnytko štéto Vaaloskiro, i rosphagirdé les, i altári léskire, i léskire vyčhindlé muiá phagirdé: i Matfanos, žriecos Vaaloskires muliakirdé angíl altári. I dopatiandyja Iodajo Ráskire-Devléskire Khereskire réndy rašange i Lieviténge, syr len rosčhudiá pir butiá Davído dro Ráskire-Devléskiro Kher, te ĥazdén célo shačkiribén Ráske-Devléske, syr isyn začhindló dro Mojzáskiro Zakóno, radymása i bagaibnasa, pir Davidóskiro uphenybén. I čhudiá jov rakhibnar'jén pašýl Ráskire-Devléskire Kheréskiri pórta, sob (kaj) na mogindiá te zadžál nijékh nažužo pir vari-so. I lyjá Iodajo šelengire barydyrén, i baré ran, i barydyrén pe manušénde, i saré phuvjákire manušén, i prolydžija kralís Ráskire-Devléskire Khereskir, i proginé pirdál upratuny pórta dro kralískiro Kher, i čhudé te bešél kralís pe kralískiro trono. I radyndlepe saré manušá pe phuv, i fóro jaciá štyl. A Gofolija zamardé kurtalása. Eftá berš sys Ioasoske, kiéli jov jaciá kralísa, i štardešá berš jov sys kralísa dro Jerusalimo, lav léskire dákiro sys Cyvja, Virsavijatyr. I kerdiá Ioáso lačhés dre Ráskire-Devléskire jakhá dre saré dyvesá, syr sys rašáj Iodajo. I lyjá léske Iodajo dujén romnién, i léste sys léndyr čhavé i čhaja. I paló davá (poslie) javdiá pe iló Ioasoske te neviakirel Ráskire-Devléskiro Kher; i skedyjá jov rašán i Lievitén, i phendiá lénge: “Džán pir Judejákire fórja, i skedén saréndyr Izrail'tianendyr rup te kerén riemónto pe tumaré Ráskire-Devléskiro Kher berš beršestyr, i sygniakiren dro davá réndo.” Ne na sygniakirde Lievíty vaš podrikiribén. I khardiá králi Iodajos, léngire šerales, i phendiá léske: “Sóske tu na trebinesa Lievitendyr, sob (kaj) jone te janén Judejátyr i Jerusalimóstyr dyibén, savó čhudiá Mójza, Devléskiro pishári, i skedyibén Izrailjoskiro vaš skedyibnáskiri skínija? Pal-dová so nažužy Gofolija i lákire čhavé rosphagirdé (rosčorde) Ráskire-Devléskiro Kher, i saró, so sys obsvencyndlo vaš Devléskiro Kher, sys dre butý vaš Vaaly. I priphendiá králi, i kerdé jekh mohtó (jaščyko), i čhudé les pašýl zagiibén dro Ráskire-Devléskiro Kher javrial. I dyjá te džinén Iodajo pir Judéia i Jerusalimo, sob (kaj) te janén Ráske-Devléske dyibén, savó čhudiá Mójza, Ráskire-Devléskiro pishári pe Izrail'tianende pe čhučí phuv. I obradyndlepe saré barydyrá i saré manušá, i jandlé i čhudé dro mohtó, paka jov jaciá pherdó. Dre dolé dyvesá, kiéli janéna mohtó (jaščyko) ke kral'jengire barydyrá pirdál Lievitende, i kiéli jone dykhné, so sys but rup, to javélas kralískiro začhinybnari i dopatiakirdo anglatuné rašastyr, i jone vyčhuvenas mohtostyr; i otlydžanas les i čhuvénas les pe péskiro štéto. Adiáke kerdé jone dyvés dro dyvés, i skedyné drieván but rup. I otdenas les králi i Iodajo manušénge, savé dykhné pal butiá pir Ráskire-Devléskiro Kher, i jone prilenas manušén, savé bará čingirde i kherá-keribnaskiren (plotniken) te neviakiren Ráskire-Devléskiro Kher, adiáke-pac' faurnar'jén (kuzniecen) i manušén, savé kerdé butý xarkomasa (miediasa) te zorjakiren Ráskire-Devléskiro Kher. I kerdé butý manušá, i kerdé riemónto léngire vastá; i kerdé Ráskire-Devléskiro Kher adiáke, syr léske treindiá te javél, i zoraliakirde les. I syr kerdé jone saró, to jone otdyné kralíske i Iodajoske rup, savó jaciápe. I kerdé léstyr khoré (sasúdy) vaš Ráskire-Devléskiro Kher, khoré te dynarinén i célo shačkiribén, tahtaja i javír khoré suvnakuné i rupuvé. I janénas célo shačkiribén dro Ráskire-Devléskiro Kher kažno mólo dre saré Iodajoskire dyvesá. I phurija Iodajo, čalyja dyvesenca dro džiibén, i myjá: šel trijánda berš sys léske, kiéli jov myjá. I garadé les dro Davidóskiro fóro, pal-dová so jov kerdiá lačhipén dre Izrailjo i vaš Devléske, i vaš Léskiro kher. Ne paló (poslie) Iodajoskiro meribén, javné Judejákire thagárja i poklonindlepe kralíske, i tedy králi lyjá te kandel len. I jone jačkirdé péskire-dadéngiro Ráskire-Devléskiro, Devléskiro Kher, i lyné te den patýv vešenge, savé sys svénta, i idolénge, i sys xolý Ráskire-Devléskiri pe Judéia i Jerusalimo pal daja léngiri bang. I Jov bičhadiá ke jone prorokén, sob (kaj) jone te riskirén pale ke Jov, i jone dosykavenas lénge, ne odolé na šundlé. I Devléskiro Dúho (Fáno) gijá telé pe Zaharijaste, Iodajoskire čhavéste, rašaste, i jov terdijá pe vučipén angíl manušénde, i phendiá lénge: “Adiáke rakiréla Raj Devél: ‘Vaš so tumé piriuštavena uphenybén Ráskire-Devléskiro? Na javéla baht tuménge; i syr tumé jačkirdé Ras-Devlés, to adiáke i Jov jačkiréla tumen.’” I zrakirdepe proti léste, i mardé les barénca, pir kralískiro uphenybén, pe Ráskire-Devléskiri Kheréskiri gréda (dvóro). I na priripirdia králi Ioáso lačhipén, savó kerdiá léske Iodajo, léskiro dad, i zamardiá léskire čhavés. I jov, kiéli merelas, to rakirdiá: “Mek te dykhél Raj Devél i mek te otpleskirel pale!” I, syr progijá berš, vyginé proti léste Sirijakire xaladé, i zaginé pe Judéia i dro Jerusalimo, i vymarde sarén thagar'jén manušengiren; i saró doresybén, savó lyné léndyr, otbičhade ke králi dro Damásko. Mek i jone nábut manušén sys maškír Sirijakire xaladénde, ne Raj Devél otdyjá dre léngire vastá drieván nismietno zor pal davá, so jačkirdé jone Ras-Devlés, dadengíre Devlés. I pe Ioasoste kerdé jone séndo. I kiéli jone giné péske léstyr, jačkiri les dre pharó nasvalypen, tedy sčhude proti léste zrakiribén léskire pishárja, pal rat Iodajoskire-čhavéskiro, rašaskiro, i zamardé les pe léskiro čhuibén, i jov myjá. I garadé les dre Davidóskiro fóro, ne na garadé les dre kralískire koplicy. Manušá, savé zrakirdepe proti léste sys: Zavado, Šimieafakire-Amonitiankakiro čhavó, i Iiegozavado, Šimrifakire-Moavitiankakiro čhavó. Pal léskire čhavénde, i pal but angilphenybena proti léste, i pal pharí butý, so jov lyjá pe péste, syr kerdé butý (riemónto) pe Devléskiro Kher, isyn začhindló dre kral'jéngiri lylvarí. I jaciá kralísa Amásija, léskiro čhavó, pe štéto léskiro. Biš te pandž berš sys Amasijaske, kiéli jov jaciá kralísa i biš te jeniá berš jov sys kralísa dro Jerusalimo; lav léskire dákiro sys Iiegoaadan' Jerusalimóstyr. I kerdiá jov lačhés dre Ráskire-Devléskire jakhá, ne na saré iléstyr. Kiéli jaciá zoraló pal léste kralipén, tedy jov muliakirdiá peskiren pishar'jén, savé zamardé kralís, léskire dadés. Ne lengiren čhavén na muliakirdiá, adiáke syr isyn čhindló dro Zakóno, dre Mojzaskiri lylvarí, kaj priphendiá Raj Devél, rakirí: “Naštý te muliakirén daden pal čhavénde, i čhavén naštý te muliakirén pal dadende; ne kažno (sváko) pal péskiro grého isyn bangó (musinela) te merél.” I skedyjá Amásija Judeiéngiren, i čhudiá len pir stréčy (pokoliénii) tel zor tysjoncengire-barydyrengiri i šelengire-barydyrengiri, sarén Judeién i Vieniaminianen; i pirigindia len bišé beršéndyr i butýr, i lathiá (lastia) léndyr trin šelá tysjoncy manušén fedyršonen, savé psirdé pe maribén, savé rikirde čhurdypnytko bust (kop'jo) i ščýto. I iščo (inké) jov lyjá Izrail'tianendyr šel tysjoncy murškanen xaladén pal šel talánty rup. Ne javdiá ke jov Devlýtko manúš i phendiá: “Králjo! Mek te na džán túsa Izrailjoskire xaladé; pal-dová so Raj Devél nane Izrail'tianenca, saré Jefriemóskire čhavénca. Ne tu džá jekhdžinó, ker réndo, murškanés marpe pe maribén. A pe javír (javirčanes) tut Devél ravela telé angíl muj vergoskiro; pal-dová so isyn zor Devléste te podrikirél i te ravel telé.” I phendiá Amásija Devléskire manušéske: “So te keráv šele talantenca, savé me otdyjom Izrailjoskire xaladenge?” I phendiá Devléskire manúš: “Sašty te javél (moginéla) Raj Devél te del túke butýr daléstyr.” I rosčhudiá pir rigá len Amásija, – xaladén, savé javné ke jov Jefriemóskire phuvjátyr, – sob (kaj) jone te džán pe péskiro štéto. I zahačíia zoralés léngiri xolý pe Judéia, i jone giné pale dre péskiro štéto, dre jag xoliakiri. A Amásija lyjá pes dre vastá, i lydžijá péskire manušén, i gijá pe Londo dólo, i domardiá Sieiroskire čhavén deš tysjoncy; i deš tysjoncy džiden lyné Judáskire čhavé dro pliéno; i jandlé len pe bergákiro vučipén, i čhurdyné tele len bergakire vučipnástyr, i saré jone rozmardepe ke jekh. Haladé, savén Amásija otbičhadia pale, sob (kaj) jone te na džán lésa pe maribén, rozginepe pir Judejákire fórja, Samarijatyr ke Vieforono; i pirimarde léndyr trin tysjoncy, i skedyné drieván but doresybén. Amásija, syr javdiá paló (poslie) Idumejanengiro muliakiriben, to jandiá Sieiroskire čhavéngire devloré, i čhudiá len péste devlorenca, i angíl lénde klonindiape, i lénge kadindia. I zahačíia xolý Ráskire-Devléskiri pe Amasijaste, i bičhadiá Jov ke jov prorokós, i odová phendiá léske: “Sóske tu prastasa ke devloré, dalé-manušéngire, savé na zrakhné peskiren manušén tyré vastéstyr?” Kiéli jov rakirdiá léske, o králi otphendiá: “Naúšto kralískire junkarosa (sovietnikosa) čhudé tut? Pirijač, sob (kaj) te na muliakirén tut.” I pirijaciá proróko, phení: “Džinav, so skedyjape Devél te xasiakirél tut, pal-dová so tu kerdián davá i na šunesa miro radinyben.” I kiéli doresciá godý Amásija, Judejákiro králi, i bičhadiá ke Ioáso, Ioahazoskiro čhavó, Iiujoskire čhavés, Izrailjoskiro králi, te phenél: “Vydža, dykhasape muj ke muj.” I bičhadiá Ioáso, Izrailjoskiro králi, ke Amásija, Judejákiro králi, te phenél: “Tjorno (žylto xrústo suv'jénca), savó sys pe Liváno, bičhadiá ke kiedro, savó sys pe Liváno, te phenél. Otdé péskire čha paloróm pal miré čhavéste.” Ne gine pašyl busa (dika) riskiribnáskire murdalá (zvieri), savé sys pe Liváno, i štakurde (stopčyndle) davá tjorno. Tu rakirésa: Ĥáda, me domardjom Idumejanen, – i ĥazdyjápe tyró iló ke šaribén pes. Beš fedýr péske kheré. Ke so túke te reses dro darano réndo? Xasjosa tu i Judejákire túsa.” Ne na kandyjá les Amásija, adiáke syr Devléstyr sys davá, sob (kaj) te otdén len dre Ioasoskire vastá, pal-dová, so lyné te rodén godypén Idumejakire devlorendyr. I vygijá Ioáso, Izrailjoskiro králi i dykhnepe jone muj ke muj, jov i Amásija, Judejákiro králi, dro Viefsamiso Judejákiro. I rozmarde Izrail'tiáni Judejakiren manušén, i roznašnepe kažno (sváko) dre péskiri šátra. I Amasijas, Judejákire kralís, Ioasoskire čhavés, Ioahazoskire čhavés, zauhtyldia Ioáso, Izrailjoskiro králi, dro Viefsamiso, i jandiá les dro Jerusalimo, i rosphagirdiá Jerusalimóskiri vánta Jefriemóskire portatyr ke vengloskiri pórta, pe štaršelá kuniá; I lyjá saró suvnakái, i rup, i saré khoré (sasúdy), savé sys dre Devléskiro Kher pašýl Ovied-Edómo, i kralískire-kheréskiro barvalypén, i symadytkonen (založniken), i risijá dre Samárija. I dživdiá Amásija, Ioasoskiro čhavó, Judejákiro králi, paló (poslie) Ioasoskiro meribén, Ioahazoskire-čhavéskiro, Izrailjoskire-kralískiro, dešupandž berš. Javír réndy Amasijaskire, anglatuné i palatuné (posliednia), isyn začhindlé dre Judeiéngire i Izrailjoskire-kral'jéngiri lylvarí. I paló (poslie) dolé dyvesá, syr Amásija otgijá Rástyr-Devléstyr, sčhude proti léste zrakiribén, dro Jerusalimo, i jov naštia dre Lahiso. I bičhadé pal léste dre Lahiso, i muliakirdé les odój. I jandlé les pe grénde, i ĥaradé les dadénca leskirenca dre Judáskiro fóro. I lyné saré Judejákire manušá Ozijas, savéske sys dešušov berš, i čhudé les kralísa pe léskire-dadéskiro Amasijaskiro štéto. Jov kerdiá Jelafo i otdyjá les Judénge, paló dová (poslie), syr pasijá králi viéčnes péskire dadénca. Dešušov berš sys Ozijaske, syr jaciá jov kralísa, i pandždešá duj berš jov sys kralísa pe Jerusalimo; lav léskire-dákiro sys Iieholijá, Jerusalimóstyr. I kerdiá jov lačhés dre Ráskire-Devléskire jakhá adiáke-pac', syr kerdiá Amásija, léskiro dad; I risjolas godiása jov ke Devél dre Zaharijaskire dyvesá, savó sykliakirdiá pal Devléskiri dar; i dre dolé dyvesá, kiéli jov risjolas godiása ke Raj Devél, to pomogindia léske Devél. I jov vygijá, i mardiápe Filistimlianenca, i rosphagirdiá Giefoskire vánty, vánty dre Iavniéia, vánty dre Azoto; i kerdiá fórja dre Azotoskiri okruga i Filistimlianende. I pomogindia léske Devél proti Filistimlianende i proti Aravitianende, savé dživdé dro Gur-Vaalo, i proti Mieunitianende; I dénas Amonitiani dan' Ozijaske, i dogijá léskiro lav ke Jegiptóskiri rig; pal-dová so jov sys drieván zoraló. I kerdiá Ozíia vučardia (bašni) dro Jerusalimo pe venglytko pórta i pe doloskiri pórta i pe venglo, i zoraliakirdia len. I kerdiá jov tury pe čhučí phuv (pušča) i ĥanadia but vendarinia (vodojo'my), pal-dová so léste sys but kherítka murdalá, i pe telatuné phuvjá, i pe loščyny, i phuvjákire butiarnen i sadovniken (barjakirén) pe bérgi i pe Karmilo; pal-dová so jov kamdiá, sob (kaj) te obkeren phuv. Sys Ozijaste i xaladé, savé vydžánas pe maribén otriadenca, pir léngiro čyslo (gin) dre čhinybén dre piričhinyben, savó sys čhudo vastésa Iieieloskiresa čhinybnarisa (pisarjo'sa) i Maasejaskire dykhibnarisa (nadziratieljo'sa), tel vast Xananijaskiro, jekhe kral'jéngirendyr ras pe xaladénde. Sarén manušengiren šeralen pe stréčy (pokoliénii), murškané xaladén, sys duj tysjoncy šovšelá, i tel vast léngire xaladéngire-zorjakiro sys trin šelá eftá tysjoncy pandžšelá, savé vyginé pe maribén murškané xaladenca, te den vast kralíske proti vergoste. I skedyjá vaš lénge Ozíia, vaš saré xaladenge, ščýty, i čhurdypnytka bustiá (kop'i) i šljomy, i laty, i luki, i praščy te čhurdén bará. I kerdiá jov dro Jerusalimo godes-pridumindle mašyny, sob (kaj) jone te javén pe tury i pe véngly te čhurdén maribnýtka bustiá (striély) i baré bará. I rozlydžijape léskiro lav dur; pal-dová so jov divnes durjakirdia pes, i kerdiápe zoraló. Ne kiéli jov kerdiápe zoraló, to zaphutija léskiro iló pe léskiro xasibén, i jov kerdiápe zlydarisa angíl Raste-Devléste, Devléste peskireste; pal-dová so jov zagijá dre Khangirí Ráskire-Devléskiri, sob (kaj) te xačkirel fimiámo pe altárjo kadilasa. I gijá pal léste Azárija, rašái, i lésa ohtodešá Ráskire-Devléskire rašaja, fedyršonen manušén. I ĥazdynépe proti Ozijaste, kralíste, i phendlé léske: “Na túke, Ohózije, te kadines Ráske-Devléske; davá réndo isyn rašángiro, Aaronóskire-čhavéngiro, savé isyn vysvencyndle te kadinen; vydža sventoné štetóstyr, pal-dová so tu kerdián na pir Zakóno, i davá na javéla túke dre patýv Raste-Devléste. I rozholiasyja Ozíia, – a dre vast léste sys kadila te thuvliakirel, i, kiéli jov xoliásyja, to prokáza javdiá pe léskiro čekat, angíl muj rašángiro, dre Ráskire-Devléskiro Kher, pašýl altárjo kadilytko. I podykhciá pe léste Azárija, anglatunó rašái, i saré rašaja; i ĥáda, sys léste prokáza pe léskiro čekat. I začhude les te vydžál odothýr, ne i kokoró jov lyjá sygedýr te džal krig, adiáke syr dukhadia les Raj Devél. I sys králi Ozíia nasvaló prokazasa ke péskire-meribnaskiro dyvés, i dživdiá dro osobno kher, i odlyno sys Ráskire-Devléskire Khereskir. A Ioafamo, léskiro čhavó, sys barydyrésa pe kralískiro kher i xulaindia manušénca pe phuv. Javír Ozijaskire réndy, anglatuné i palatuné (posliednia), začhindiá Isajo, Amososkiro čhavó, proróko. I pasijá Ozíia péskire dadénca, i ĥaradé les dadénca leskirenca pe félda kral'jéngiri dre koplicy; pal-dová so rakirdé: jov isyn nasvaló prokazasa. I jaciá kralísa Ioafamo, léskiro čhavó, pe štéto léskiro. Biš te pandž berš sys Ioafamoske, kiéli jov jaciá kralísa, i dešušov berš jov sys kralísa dro Jerusalimo; lav léskire-dákiro sys Iierušá, Sadokoskiri čhaj. I kerdiá jov lačhés dre Ráskire-Devléskire jakhá adiáke-pac', syr kerdiá Ozíia, léskiro dad; jekh so jov na zagijá dre Ráskire-Devléskiri Khangirí; ne i manušá na mekné te kerén gréhi. Jov kerdiá upratuny pórta dro Ráskire-Devléskiro Kher, i but so kerdiá pe Ofieloskiri vánta; I fórja kerdiá jov pe Judejakiri bérga, i dre vešá kerdiá tvárdymi/dizá (kriéposti) i vučardia (bašni). Jov mardiápe Amonitianengire kralísa i pirizorjakirdia len; i dyné léske Amonitiani dre dová berš šel talánty rup i deš tysjoncy kory parnó giv i deš tysjoncy ĥersto (jačmiénjo). Davá dyné léske Amonitiani adákicy, i pe javír berš i pe tríto. Adiáke zoraló sys Ioafamo, pal-dová so kerdiá jov péskire dromá dro džiibén angíl Raste-Devléste, péskire Devléste. Javír Ioafamoskire réndy, i saré léskire maribena, i syr jov xulaindia, isyn začhindlé dre Izrailjoskire i Judejákire-kral'jéngiri lylvarí. Biš te pandž berš sys léske, kiéli jov jaciá kralísa, i dešušov berš jov sys kralísa dro Jerusalimo. I pasijá viéčnes Ioafamo péskire dadénca, i ĥaradé les dre Davidóskiro fóro. I jaciá kralísa Aházo, léskiro čhavó, pe štéto léskiro. Biš berš sys Ahazoske, kiéli jov jaciá kralísa, i dešušov berš jov sys kralísa dro Jerusalimo; i jov na kerdiá lačhés dre Ráskire-Devléskire jakhá, syr kerdiá Davído, léskiro dad; Jov gijá Izrailjoskire-kral'jéngire droménca i adiáke-pac' kerdiá vyčhudé statuly Vaaloske; i jov xačkirdiá dróga smóly pe Jenomoskire-čhavéngiro dólo, i prolydžija péskire čhavén pirdál jag, podrikiri manušéngire magiripena, savén vytradyjá Raj Devél angíl Izrailjoskire-čhavéngiro muj. I janelas jov svénta dyibená i xačkirdiá dróga smóly pe vučipená, i pe bérgi, i tel kažno ĥensto kašt. I otdyjá les Raj Devél, Devél léskiro, dre Sirijanengire-kralískire vastá, i jone muliakirende les, i lyné léste drieván but plienonen, i lydžiné len dro Damásko. Adiáke-pac' i dre Izrailjoskire-kralískiro vast sys otdynó jov, i odová domardiá léste drieván but manušén. I domardiá Fakiéjo, Riemaliinoskiro čhavó, Judén šel te biš tysjoncy dro jekh dyvés, maribnytkoné manušén, pal-dová so jone jačkirdé Ras-Devlés, péskire-dadengíre Devlés. O Zihrijo [Zihri-ju.o.], zoraliuko Jefriemlianendyr, zamardiá Maasiejos, kralískire čhavés, i Azrikamos, savó sys barydyró pe kralískiri fielatin, i Jelkanos, javirés manušés pal kralíste. I lyné Izrailjoskire čhavé dro pliéno péskire pšaléndyr, Judeiéndyr, dujšelá tysjoncy džuvlién, čhavén i čhajén; adiáke-pac' i drieván but doresybén skedyné lénde, i otbičhade doresybén dre Samárija. Odój sys Ráskire-Devléskiro proróko; lav léskiro sys Odiédo. Jov vygijá angíl xaladéngiro muj, savé giné dre Samárija, i phendiá lénge: “Ake, Raj Devél, Devél tumaré-dadéngiro, dre xolý pe Judénde, otdyjá len dro tumaró vast, i tumé domardé len dasavé xoliása, saví dogijá ke bolybén. I akaná tumé duminéna te kerén dynar'jénca Judaskiren i Jerusalimoskiren čhavén dre dynar'jénde i dynaricende péske. A naúšto (sóske) pe tuménde kokorende nane bang angíl Raste-Devléste, tumaré Devléste? I adiáke šunén man i riskirén pale plienonen, savén tumé zakedyne tumaré pšaléndyr; pal-dová so xolynakiri jag isyn Ráskire-Devléskiri pe tuménde.” I uštyné vari-savé barydyrendyr Jefriemóskire čhavéndyr: Azárija, Iiegohananoskiro čhavó, Bieriéhiia, Miešyliemofoskiro čhavó, i Jezekíia, Šalumoskiro čhavó, i Amasá, Xadlajoskiro čhavó, proti manušénde, savé giné (javné) maribnastyr, I phendlé lénge: “Na lydžán adarík plienonen, pal-dová so grého javéla aménge angíl Raste-Devléste. Naúšto tumé duminéna te dočhuven ke tumaré gréhi i ke tumaró čoripén? Bari isyn bang amarí, i jag xolynakiri Ráskire-Devléskiri pe Izrailjo.” I jačkirdé xaladé plienonen i doresybén xaladéngire barydyrénge i saré skedyibnaske. I uštyné muršá, uphendle pir lav, i lyné plienonen, i sarén léndyr nangen, i uridé len doresybnastyr, – i uridé léngire ĥerá, i čaliakirde len, i paniakirde len, i pomakhne len jeliejosa, i čhudé pe oslende sarén, savé sys bizorjákire léndyr, i bičhadé len dro Jerihóno, fóro pal'mengiro; ke léngire pšála, i risiné dre Samárija. Dre dolé dyvesá bičhadiá králi Aházo ke Asirijákiro králi, sob (kaj) jone te den vast (te pomoginen) léske. Pal-dová so Idumejani i iščo (inké) javénas, i buten domardé dre Judéia, i lyné dre pliéno; i Filistimliáni rozginepe pir fórja pe telatuny okruga i paš-dyvés Judeiéngiro, i lyné Viefsamiso i Aialono, i Giedierofo, i Soho i fórja, savé sys tel léskiri zor, i Fimna, i fórja, savé sys tel léskiri zor, i Gimzo i fórja, savé sys tel léskiri zor, i lyné te dživén odój. Adiáke čhudiá telé Raj Devél Judéia pal Ahazoste, Judejákire kralíste, pal-dová so jov lydžija dro bléndo Judéia i pharés kerdiá grého angíl Raste-Devléste. I javdiá ke jov Fieglafielasaro, Asirijákiro králi; ne jov sys dro pharipén léske, zamiést dová, sob (kaj) te pomoginel léske; pal-dová so Aházo lyjá barvalypén Ráskire-Devléskire Khereskir i kralískire kheréstyr i thagar'jéndyr, i otdyjá Asirijákire kralíske; ne odová na pomogindia léske. I dre pharé vaš péske dyvesá jov usajékh kerdiá na pir Zakóno angíl Raste-Devléste, jov – králi Aházo. I janelas jov svénta dyibená Damaskone devlorénge, duminy, so jone dukhade les, i rakirdiá: “Develá Sirijakire-kral'jéngire pomoginena lénge: janáva me svénto dyibén lénge, i jone pomoginena mánge.” Ne jone sys pe xasibén léske i saré Izrailjoske. I skedyjá Aházo khoré (sasúdy) Devléskire Khereskir, i rosphagirdiá pe koterá khoré Devléskire Khereskir zaphandia Ráskire-Devléskire Khereskire vudará, i kerdiá péske altári pir saré véngly dre Jerusalimo; I pir saré Judáskire fórja jov kerdiá vučipená te kadinen javire devlorénge, i xoliakirdia Ras-Devlés, péskire-dadengires Devlés. Javír léskire réndy (diély) i saré léskire keribena, anglatuné i palatuné (posliednia), isyn začhindlé dre Judejákire i Izrailjoskire-kral'jéngiri lylvarí. I pasijá viéčnes Aházo péskire dadénca, i garadé les dre fóro, dro Jerusalimo; ne na lydžiné les dre koplicy Izrailjoskire-kral'jéngire. I jaciá kralísa Jezekíia, léskiro čhavó, pe štéto léskiro. Jezekíia jaciá kralísa, kiéli léske sys biš te pandž berš, i biš te jeniá berš sys jov kralísa dro Jerusalimo; lav léskire-dákiro sys Avijá, Zaharijaskiri čhaj. I kerdiá jov lačhés dre Ráskire-Devléskire jakhá adiáke-pac', syr kerdiá Davído, léskiro dad. Pe anglatunó berš pe péskiro kralipén, dro anglatunó čhon, jov psiradia (otčhakirdiá) Ráskire-Devléskire Khereskire vudará i neviakirdia len; i phendiá te javén rašange i Lieviténge, i skedyjá len pe vastočno foruný [plóšča.-r.s.]. I phendiá lénge: “Šunén man, Lievitále! Akaná vysvencynenpe kokoré, i obsvencynen Kher Ráskire-Devléskiro, tumaré-dadéngiro Devléskiro, i vyčhurden nažužypen (melalypen) Khangirjátyr. Pal-dová so, ake, amaré dadá kerdé na pir zakóno i kerdé nalačhés dre jakhá Ráskire-Devléskire, amaré Devléskire, i jačkirdé Les, i otriskirde jone péskire muiá Ráskire-Devléskire Khereskir, i risiné dumesa; i phandle vudará dro trémo, i mud'kirde momolytka (svietil'niki), i na xačkirdé dróga smóly, i na ĥazdyné célo shačkiribén dre Izrailjoskire-Devléskiri Khangirí. I sys Ráskire-Devléskiri xolý pe Judéia i pe Jerusalimo; i Jov otdyjá len pe ladž, pe čhučypen i pe saben, syr tumé dykhéna jakhénca tumarenca. I, ake, pyné amaré dadá kurtalátyr; a amaré čhavé, i amaré čhaja, i džuvliá amaré, pal davá isyn dro pliéno ke dalé dyvesá. Akaná mánde pe iló – te keráv Zavieto Rása-Devlésa, Izrailjoskire Devlésa, mek te riskirél améndyr Léskire-xoliakiri jag. Čhavále mre! Na javén bišeritka; pal-dová so tumen vykedyjá Raj Devél te terdjon angíl Léskiro muj, te dynarinén Léske i te javén Léste dynar'jénca i te xačkirén dróga smóly. I uštyné Lievíty: Mahafo, Amasajoskiro čhavó, i Ioiéljo, Azarijaskiro čhavó, Kaafoskire čhavéndyr; i Mierariskire čhavéndyr; Kiso, Avdijoskiro čhavó, i Azárija, Jegalielieloskiro čhavó; i Girsonoskire rodycóstyr: Ioaho, Zimmaskiro čhavó, i Jedeno, Ioahoskiro čhavó; Jelicafanoskire čhavéndyr; Šimri i Iieielo, Asafoskire čhavéndyr: Zahárija i Matfanija; I Jemanoskire čhavéndyr: Iiehiiélo i Šymiéjo; i Idifunoskire čhavéndyr: Šiemaija i Uzielo. Jone skedyné peskiren pšalén i vysvencyndlepe; i giné, pir kralískiro priphenybén, te žužakiren (te čystinen) Ráskire-Devléskiro Kher pir lavá Ráskire-Devléskire. I giné andré rašaja dro Ráskire-Devléskiro Kher te žužakiren, i vylydžiné saró nažužo, so lathné dre Ráskire-Devléskiri Khangirí, pe gréda (dvóro) Devléskire Kheréskiro. A Lievíty lyné davá, sob (kaj) te lydžán krig javrí ke Kiedronoskiri sýgno rékica (lenorí). I lyné jone te osvencynen dro pérvo (anglatunó)-čhonéskiro dyvés, i pe ohtóto (bidujéngiro déšto) dyvés dolé-pac' čhonéskiro dyvés zaginé dro Ráskire-Devléskiro gréda (dvóro); i obsvencynenas Ráskire-Devléskiro Kher ohtó dyvesá, i pe dešušovto anglatuné-čhonéskiro dyvés jone kerdé. Tén'ci javné jone dro kher ke králi Jezekíia i phendlé: “Ame vyžužakirdiam Ráskire-Devléskiro Kher, i altárjo vaš célo shačkiribén, i saré léskire khoré (sasúdy), i skamínd vaš svénto maró, i saré léskire khoré. I saré khoré, savé začhurdyja králi Aházo dre péskire kralipnaskire dyvesá, kerí čoripén, ame skedyjam i obsvencyndiam, i, ĥáda, jone isyn angíl Ráskire-Devléskiro altárjo.” I uštyjá králi Jezekíia pe zlóko (pe ránko), i skedyjá foróskire barydyrén, i gijá dro Ráskire-Devléskiro Kher. I jandlé eftá guruvorén i eftá bakrén, i eftá bakrorén, i eftá buznen (kozlen) pe svénto dyibén Ráske-Devléske pal grého pal kralipén, i pal svénto štéto, i pal Judéia; i priphendiá jov Aaronóskire čhavénge, rašange, te ĥazdén célo shačkiribén pe Ráskire-Devléskiro altárjo. I začhindlé guruvorén, i lyné rašaja rat, i počhude ratésa altárjo; i začhindlé bakrén, i počhude ratésa altárjo; i začhindlé bakrorén, i počhude ratésa altárjo. I jandlé buznen pal grého angíl kralískiro muj i skedyibén, i jone čhudé péskire vastá pe lénde. I začhindlé len rašaja, i léngire ratésa vyžužakirde altárjo, sob (kaj) te javén žužé bangipnastyr pal saré Izrailjoskire gréhi, pal-dová so pal saró Izrailjo priphendiá králi te janén célo shačkiribén i svénto janybén Ráske-Devléske pal grého. I čhudiá jov Lievitén dre Ráskire-Devléskiro Kher cymbalenca, arfenca i lutenca, pir Davidóskiro i Gadoskiro uphenybén, savó sys kralískiro magiko, i Nafanos, prorokós, adiáke syr Rástyr-Devléstyr sys davá uphenybén pirdál Léskire prorokénde. I terdiné Lievíty bašaibnytkone strumientenca Davidoskirenca i rašaja rogénca (trubenca). I priphendiá o Jezekíia te ĥazdén célo shačkiribén pe altárjo. I dre dová momiento, syr lyjá célo shačkiribén te xačol, lyné te bagán Ráske-Devléske, tel zan rogoskiri i tel strumiénty Davidóskire, Izrailjoskire kralískire. I saré manušá dro skedyibén mangnepe i manušá bagandle, i rógi bašade, paka xačolas célo shačkiribén. Syr shačija célo shačkiribén, to králi i saré manušá, savé sys pašýl léste, terdiné pe čangá i poklonindlepe (kerde šerésa). I priphendiá králi Jezekíia i thagárja Lieviténge, sob (kaj) i jone te barjakirén (te slavinén) Ras-Devlés Davidóskire lavénca i Asafoskire magikenca; i jone slavindle radymása, i terdiné pe čangá, i klonindlepe. I rakirdiá Jezekíia, i phendiá: “Akaná tumé otdyné pes Ráske-Devléske; džán i janén svénta dyibená i janybén te parikirén dro Ráskire-Devléskiro Kher”, i lydžijá saró skedyibén svénta dyibená i parikiribnaskiro janybén, kažno (sváko), kon sys lydžino ilésa, – célo shačkiribén. I sys célo shačkiribén, savó jandlé manušá, savé skedyné: eftadešá guruvén, šel bakrén, dujšelá bakrorén; saró davá sys vaš célo shačkiribén Ráske-Devléske. Javír svénta dyibená Ráske-Devléske sys šovšelá baré kheritkoné murdaléndyr (skotóstyr) i trin tysjoncy tykné murdaléndyr (skotóstyr). Ne rašaja sys nábut (kutý), i jone na mogindlé te zlen zandirjá (cépi) saréndyr celoné shačkiribnastyr; i protyrdyne vast (pomogindle) lénge léngire pšála, Lievíty, pe rendoskiro kónco i paka vysvencyndlepe javír rašaja; pal-dová so Lievíty sys butýr dobusova te svencynen pes, syr rašaja. Apríč célo shačkiribén, savé sys drieván but čekenesa (tukosa) mirnone sventoné dyibnendyr Ráske-Devléske i rosčhuibnasa pašýl célo shačkiribén. Adiáke nevéstyr kerdó sys dynaribén (služynyben) dro Ráskire-Devléskiro Kher. I radyndiape Jezekíia i saré manušá pal dová, so Devél adiáke riskirdiá manušén; pal-dová so davá kerdiápe naužakiri. I bičhadiá Jezekíia pe sarí Izrailjoskiri i Judejakiri phuv, i čhindiá lylá ke Jefriémo i Manásija, sob (kaj) jone te javén dre Ráskire-Devléskiro Kher dro Jerusalimo, te kerén Patradí Ráske-Devléske, Izrailjoskire Devléske. I obrakirde králi, i léskire thagárja, i saró skedyibén dro Jerusalimo – te kerén Patradí pe javír čhon; Pal-dová so jone na mogindlé te kerén la dro lákiro dyvés, pal-dová so rašaja iščo (inké) na vysvencyndlepe, ci but len trej, i manušá na skedynépe dro Jerusalimo. I sys davá pir iló kralíske i saré skedyibnaske. I skedynépe te den te džinén dro saró Izrailjo, Virsavijatyr ke Dano, sob (kaj) te džán dro Jerusalimo te svenkinen Patradí Ráske-Devléske, Izrailjoskire Devléske, pal-dová so ĥará na svenkindle la, syr isyn začhindló. I giné [prastándyne-ju.o.] manušá lylenca kralístyr i léskire thagar'jéndyr pe sarí Izrailjoskiri phuv i Judejakiri, i dro kralískiro uphenybén rakirdé: “Čhavé Izrailjoskire! Risjon ke Raj Devél, Devél Avraamóskiro, Isaakoskiro i Izrailjoskiro, i Jov risjola ke manušá, savé jačnépe, i savé zrakhnepe tuménde vastéstyr Asirijákire kral'jéndyr. I na javén adasavé, syr tumaré dadá i tumaré pšála, savé na pir Zakóno kerdé angíl Raste-Devléste, péskire dadengíre Devléste; i Jov otdyjá len pe xasibén, syr tumé dykhéna. Akaná na javén pharé-šeritka, syr tumaré dadá, kandén Ras-Devlés i javén dre Léskiri Khangirí, saví Jov obsvencyndia pe viéko; i dynarinén (služynen) Ráske-Devléske, tumaré Devléske, i Jov otriskirela tuméndyr Péskire-xoliakiri jag. Kiéli tumé risjona ilésa ke Raj Devél, tedy tumaré pšalén i tumaré čhavén javéna te tanginen (te žalinen) manušá, savé lyné len dro pliéno, i risjona pe daja phuv; pal-dová so lačhó i lačhé-ilytko isyn Raj Devél, Devél tumaró, i na otriskirela muj tuméndyr, kóli tumé risjona ilésa ke Jov.” I psirdé manušá foróstyr dro fóro pe phuv Jefriemóskiri i Manasijaskiri i ke Zavulonoskiri; ne léndyr sandlepe i kerdé napatyvales (zdikindlepe). Usajékh vari-savé Asiroskire, Manasijáskire i Zavulonoskire rodóstyr kandyné len i javné dro Jerusalimo. I pe Judeiénde sys Devléskiro vast, dyí lénge jekh iló, sob (kaj) te kerén pir uphenybén kralískiro i thagar'jéngiro, pir Ráskire-Devléskiro lav. I skedynépe dro Jerusalimo drieván but manušá te svenkinen svénko opriesnokengiro, pe javír čhon, – skedyibén drieván baró. I uštyné, i vyčhurdyne altári, savé sys dro Jerusalimo; i saró, pe so xačkirdé dróga smóly idolénge, rosphagirdé i čhurdyné len dro Kiedronoskiri sýgno rékica (lenorí). I začhindlé patraditkones bakrores pe dešuštarto dyvés javire-čhonéskiro. Rašaja i Lievíty zaladžandyne, vysvencyndlepe i jandlé célo shačkiribén dro Ráskire-Devléskiro Kher. I terdiné pe péskiro štéto pe uphenybén péskiro, pir Zakóno Mojzáskiro, Devléskire-manušaskiro. Rašaja čhuvénas ratésa altárjo, lyi les Lieviténgire vasténdyr. Adiáke syr but sys pe skedyibén dasaven, savé na vysvencyndlepe, to pal nažužende, Lievíty začhinenas patraditkones bakrores, sob (kaj) te vysvencynen len vaš Ráske-Devléske. But manušéndyr, baredýr paš rodycóstyr Jefriemoskirestyr i Manasijaskirestyr, Isaharoskirestyr i Zavulonoskirestyr na žužakirdepe; usajékh jone xané Patradí, na pir uphenybén. Ne Jezekíia mangdiápe pal lénde, rakirí: “Rajo Dévla! Mek te otmekél pe grého kažnonéske, kon čhudiá péskiro iló ke dová sob (kaj) te lathén Ras-Devlés, Devlés, péskire dadengíre Devlés, mek i bi sventoné žužakiribnaskiro!” I šundiá Raj Devél Jezekijas, i otmekciá grého manušénge. I svenkindle čhavé Izrailjoskire, savé sys dro Jerusalimo, svénko opriesnokengiro eftá dyvesá, baré radymása; kažno dyvés Lievíty i rašaja slavindle Ras-Devlés pe strumiénty, savé kerdé te šarén Ras-Devlés. I rakirdiá Jezekíia pir iló sarénge Lieviténge, savé mištés galjonas dro dynaribén (služynyben) Ráske-Devléske. I xané svenkitka eftá dyvesá, i janénas mirna svénta dyibená Ráske-Devléske i šarde Ras-Devlés, Devlés péskire dadengires. I skedyjape saró skedyibén te svenkinel javír eftá dyvesá i prolydžine dalé eftá dyvés dre rádyma; Pal-dová so Jezekíia, Judejákiro králi, čhudiá vaš manušénge, savé skedynépe, tysjonco guruvorén i deš tysjoncy tykné kheritkoné murdalén, i baré rajo čhudé vaš manušénge, savé skedynépe, tysjonco guruvorén i deš tysjoncy tykné kheritkoné murdalén; i but rašaja vysvencyndlepe. I radyndlepe saré manušá, savé skedynépe Judendyr, i rašaja, i Lievíty, i saré skedyné manušá, savé javné Izrailjostyr, i manušá, savé javné javire rigéndyr, javí Izrail'skone phuvjátyr i savé dživdé ke Judéia. I sys bari rádyma dro Jerusalimo, pal-dová so Solomonóskire dyveséndyr, Davidóskire čhavéskire, Izrailjoskire kralískire, na sys dasavo dro Jerusalimo. I uštyné rašaja i Lievíty, i bahtiakirde manušén; i sys šundly léngiri zan, i zagijá léngiri pátieri (molítva) dre svénto Kher Léskiro pe bolybén. I pe kónco (jagóro) saré daleske, giné saré Izrail'tiáni, savé odój sys, dre Judejákire fórja, i rozmarde statuly, čingirde telé svencona vešá, i rosphagirdé vučipená i altári pe sarí Judéia i pe phuv Vieniaminoskiri, Jefriemóskiri i Manasijaskiri, pe kónco (jagóro). I paló dová risiné saré Izrailjoskire čhavé, kažno dro péskiro xulaiben, dre péskire fórja. I čhudiá Jezekíia zmieny rašángire i Lieviténgire, pe léngiro rosčhuiben, kažnones pašýl péskiro réndo, rašángiro ci Lievitengiro, pašýl célo shačkiribén i pašýl mirna svénta dyibená Ráske-Devléske, vaš služynyben, vaš šaribén i slavinyben, pašýl Ráskire-Devléskiri Kheréskiri pórta. I otdyjá králi péskiri paš barvalypnastyr pe célo shačkiribén; pe zlokoskiro i bel'veliakiro célo shačkiribén, i pe célo shačkiribén dre sávaty i dre nevó čhon, i pe svénki, syr isyn začhindló dre Ráskire-Devléskiro Zakóno. I butýr: priphendiá jov manušénge, savé dživéna ke Jerusalimo, te den léngiri bažyn (pleskiriben) te rikirén rašán i Lievitén, sob (kaj) jone te javén dro zoraló dúho (fáno) pir Ráskire-Devléskiro Zakóno. Kiéli sys phendló zoralés manušénge davá uphenybén, tedy jandlé Izrailjoskire čhavé drieván but anglatuné plódy marestyr, moliátyr (vinostyr), i ksilestyr, i avginestyr, i kažno so barija pe félda; i dešengirja saréstyr jandlé drieván but. I Izrail'tiáni i Judejákire, savé dživéna dre Judejákire fórja, adiáke-pac' jandlé dešengirja (diesiatiny) baré i tykné murdaléndyr (skotóstyr) i dešengirja sventoné janybnastyr, savó sys posvencyndlo Ráske-Devléske, léngire Devléske; i sčhude len dre grudy. Pe tríto čhon lyné te čhuvén grudy, i dro eftáto čhon mekné. I javné Jezekíia i thagárja, i dykhné grudy, i parikirde Ráske-Devléske i Léskire Izrailjoskire manušénge. I phuciape Jezekíia rašandyr i Lievitendyr pal dalé grudy. I otphendiá léske Azárija, anglatunó rašái, Sadoskire kheréstyr, i phendiá: “Dolé dyveséstyr, syr lyné te janén janybén dro Ráskire-Devléskiro Kher, to ame xajam čalés, i but jaciápe; pal-dová so Raj Devél bahtiakirdiá Péskire manušén. Daléstyr, so jaciápe, sys drieván but.” I priphendiá Jezekíia te kerén skedyné štúby pašýl Ráskire-Devléskiro Kher. I kerdé adiáke. I pirilydžine odorík janybén, i dešengirja, i otdyné mištypena saré čačipnása. I sys barydyrésa pe lénde Xonanija, Lievito, i Simiéjo, léskiro pšal, javiresa. A Iiehiilo, i Azazija, i Nahafo, i Asailo, i Iierimofo, i Iozavado, i Jelielo, i Ismahiia, i Mahafo i Bienanija sys dykhibnar'jénca tel vast Xonanijaskiro i Simiejoskiro, léskire pšaleskiro, pir uphenybén kralískiro Jezekijáskiro i Azarijoskiro, savó sys barydyró pe Ráskire-Devléskiro Kher. Korié, Imnaskiro čhavó, Lievito, rakhibnari pe pórta pe vastočno rig, sys pašýl janybená iléstyr Devléske, te vydel dová, so sys jandlo Ráske-Devléske i fedyršone posvencyndle vieščendyr. I tel léskiro vast sys Jedieno, i Miniamino, i Iiešua, i Šemaija, i Amarija, i Šehanija dre svencybnaskire fórja, sob (kaj) čačunés te rozden péskire pšalénge pašá, syr bareske, adiáke i tykneske. Apríč léngiro piriginybén (piričhinyben), sarén muršendyr triné beršéndyr i butýr, sarénge, kon psirdiá dro Ráskire-Devléskiro Kher vaš kažnoné dyveseskiro réndo, vaš léngiro dynaribén (služynyben), pe léngire butiá i pe léngire otdiely (zmiény). I rašange, savén zalydžine dro piričhinyben, pir léngire stréčy (pokoliénii), i Lieviténge bišé beršéndyr i butýr, pe léngire butiá, i pe léngire otdiely (zmiény). I manušénge, savén zalydžine dro piričhinyben saré lengirenca tykné čhavorenca, léngire romniénca, i léngire čhavénca, i léngire čhajénca, – saré skedyibnaske; pal-dová so jone saré čačipnása otdyné pes pe svénto dynaribén (služynyben), syr rašaja. I vaš čhavénge Aaronoskirenge, rašange dre gavá, so sys trusciál fórja léngire, pašýl kažno fóro čhudé sys muršá pir lav, sob (kaj) te rozden pašá phuvjákire saré muršenge, rašange i sarénge, kon sys zalydžino dro piričhinyben Lievitende. Ĥáda, so kerdiá Jezekíia pe sarí Judéia, – i jov kerdiá lačhipén, i čačipén, i patiaibén angíl Raste-Devléste, péskire Devléste. I dre saró, so jov kerdiá te dynarinén (te služynen) Devléskire Kheréske i te rakhén Zakóno i priphenybén i, dumindia pal péskire Devléste, jov kerdiá saré péskire iléstyr i léste sys baht. Paló (poslie) dasavé réndy (diély) i dová čačipén, syr jov otdyjá pes, javdiá Sienahirimo, Asirijákiro králi, gijá pe Judéia, i zauhtyldia fórja zoralé tynénca, i dumindia te zalel len péske. Kiéli Jezekíia dykhciá, so javdiá Sienahirimo i skedyjape te marélpe proti Jerusalimo, to skedyjape thagar'jénca peskirenca i xaladytkone péskire manušénca te začhuven paniéskire ĥanyngorja, savé sys pal fóro; i odolé dyné vast (pomogindle) léske. I skedynépe drieván but manušá, i začhude saré panieskire ĥanyngorja i sýgno rékica (lenorí), saví thadyja pir rig, rakirí: “Mek te na lathén Asirijákire králja, savé javné adarík, but paní. I zoralyja jov, i čhudiá Jezekíia sarí vánta, saví rosphagirdé, i ĥazdyjá la ke vučardý (bašni), i javrí kerdiá javír vánta, i zorjakirdia Milo dro Davidóskiro fóro, i kerdiá drieván but mardytka i ščýty. I jov čhudiá xaladéngire barydyrén pe manušénde, i skedyjá len ke pe foruný (plóšča) pašýl foróskiri pórta, i rakirdiá ke léngiro iló, i phendiá: “Javén zoralé i murškané, na darén, i na strahadjon Asirijákire kralístyr i adalendyr, saré drieván butende manušéndyr, savé isyn lésa; pal-dová so aménca javéla butydyr, syr lésa: lésa isyn psikó manušýtko, a aménca isyn Raj Devél, amaró Devél, sob (kaj) te pomoginel aménge i te marélpe pe amaré maribena.” I zorjakirdepe manušá Jezekijaskire lavéndyr, Judejákire-kraliskirenca. Paló (poslie) davá bičhadiá Sienahirimo, Asirijákiro králi, peskiren dynar'jén dro Jerusalimo, – kokoró jov sys terdó proti Lahiso, i sarí léskiri zor lésa, – ke Jezekíia, Judejákiro králi, i ke saré Judei (Judejákire), savé sys dre Jerusalimo, te phenén: “Adiáke rakiréla Sienahirimo, Asirijákiro králi: Pe so tumé nadieinenape i san bešté dre tvárdyma dro Jerusalimo? Ci na xohavela tumen o Jezekíia, sob (kaj) te otdél tumen meribnáske bokhátyr i smegatyr, rakirí: ‘Raj Devél, Devél amaró, zrakhéla amen Asirijákire-kralískire vastéstyr?’ Ci na davá Jezekíia rosphagirdiá Léskire vučipená i Léskire altári, i phendiá Judáske i Jerusalimoske: “Angíl jekh altárjo kloninenpe (kerén šerésa), i pe léste xačkirén dróga smóly? Naúšto tumé na džinéna, so kerdjom me i miré dadá saré manušénca pe phuv? Ci mogindlé develá, phuvjákire-manušéngire, te zrakhen phuv péskiri miré vastéstyr? Kon saré devlendyr manušengirendyr, savé phagirdé miré dadá, mogindlé te zrakhen péskire manušén miré vastéstyr? Syr moginéla tumaró Devél te zrakhél tumen miré vastéstyr? I akaná, mek te na xohavél tumen Jezekíia i te na otčhurdel tumen adiáke; i tumé na patián léske. Kóli isyn na dre zor sys ni jekh devel, ni jekhe manušéngiro i kralipnaskiro te zrakhél péskire manušén miré vastéstyr i miré-dadengíre vastéstyr, tedy i tumaró Devél na zrakhéla tumen miré vastéstyr.” I iščo (inké) but rakirdé léskire pishárja proti Raste-Devléste, Devléste i proti Jezekijaste, Léskire pishariste. I lylá čhindiá jov, dre savé kostia Ras-Devlés, Izrailjoskire Devlés, i rakirdiá proti Léste dasavé lavá: “Adiáke-pac' syr phuv'jéngire-manušéngire develá na zrakhné peskiren manušén miré vastéstyr, adiáke-pac' Devél Jezekijáskiro na zrakhéla Péskire manušén miré vastéstyr.” I dyné gódla zoralé zaniása (glosasa) pe Judýtko čib ke Jerusalimóskire manušá, savé sys pe vánta, sob (kaj) te strahakiren len, i te trašaven len, i te len fóro. I rakirdé pal Devléste Jerusalimoskireste, syr pal manušéngire devloren pe phuv, savén kerdé manušéngire vastá. I mangdiápe králi Jezekíia i Isajo, Amososkiro čhavó, proróko, i zadyne gódla ke bolybén. I bičhadiá Raj Devél Jangolós, i jov vymardia sarén murškanen, i šerales barydyreskires, i barydyrén pe xaladénde Asirijákire kralískire. I risijá jov ladžasa pe péskiri phuv; i, kiéli javdiá dro kher péskire Devléskiro, to čhavé, savé vyginé léskire maséndyr, phusadé les odój kurtalása. Adiáke zrakhciá Raj Devél Jezekijas i Jerusalimóskire manušén Sienahirimoskire vastéstyr, Asirijákire kralískire, i sarengire vastéstyr; i rakhciá len saréstyr. Tedy but manušá janénas Ráske-Devléske dro Jerusalimo i dróga počastúnki Jezekijaske, Judejákire kralíske. I jov phutija paló (poslie) davá dre jakhá saré manušéngire. Dre dolé dyvesá zanasvalyja Jezekíia ke meribén. I pomangdiape Ráske-Devléske; i Jov šundiá les, i dyjá léske ĥiertýk (znamiénijo). Ne na otdyjá Jezekíia pal kerdó léske lačhipén; pal-dová so zaphutija léskiro iló. I sys pe léste Devléskiri xolý, i pe Judéia, i pe Jerusalimo. Ne, syr čhudiá pes teledýr Jezekíia dro phut'kiribén péskire i léskiro, – kokoró i manušá Jerusalimóskire, to na javdiá pe lénde Ráskire-Devléskiri xolý dre Jezekijaskire dyvesá. I sys Jezekijaste barvalypén drieván but i sláva; i jov kerdiá péste piraliá vaš rup, i vaš suvnakái, i vaš dróga bará, i vaš aromatytka čarjá (parfuny) i ščýty, i vaš kažna dróga khoré (sasúdy). I prosta piraliá vaš dová, so barjola pe phuv, vaš maró, vaš mol i vaš ksil, i štaly vaš kažno kherítko murdál, i gražy (dvory) vaš lénge. I fórja kerdiá péske. I stády tykné i baré kheritkoné murdaléndyr sys léste drieván but; pal-dová so dyjá léske Devél drieván baró mištypén. Jov, Jezekíia, začhudia upratuno Gieonoskiro paniéskiro thadypen i prolydžija len telé ke západno (pal-panítka) rig Davidóskire-foróskiri. I kerdiá mištés Jezekíia dre kažno péskiro réndo. Jekh so vaš Vavilonóskire-kral'jéngiren poslenge savén bičhavenas ke jov te phučenpe pal ĥiertýk, saví sys pe phuv, jačkirdiá les Devél, sob (kaj) te sprobinel les i te otčhakirel saró, so léste sys pe iló. Javír Jezekijaskire butiá i léskire lačhé réndy začhindlé dre Isajoskiro dykhibén, Amosóskire čhavéskiro, prorokoskiro, i dre Judejákire i Izrailjoskire-kral'jéngiri lylvarí. I pasijá pe viéko Jezekíia péskire dadénca, i garadé les upré pe Davidóskire-čhavéngire koplicy; i patýv dyné léske, paló (poslie) léskiro meribén, saré Judejákire i Jerusalimóskire manušá. I jaciá kralísa Manásija, léskiro čhavó, pe štéto léskiro. Dešudúj berš sys Manasijaske, kiéli jov jaciá kralísa, i pandždešá pandž berš sys jov kralísa dro Jerusalimo. I kerdiá jov nalačhés dre Ráskire-Devléskire jakhá, kerdiá magiriben Najudytkoné-manušéngiro, savén tradyjá krig Raj Devél Izrailjoskire čhavéndyr: i nevéstyr (nevés) kerdiá jov vučipená, savé rosphagirdiá Jezekíia, léskiro dad, i čhudiá altári Vaalenge, i kerdiá dembitka vešore, i klonindiape saré bolybnáskire xaladenge, i dynarindiá léske, i kerdiá jov altári dro Ráskire-Devléskiro Kher, pal savó phendiá Raj Devél: “Dro Jerusalimo javéla Miro lav pe viéki”; i kerdiá altári saré bolybnáskire xaladenge pe duj grédy (dvory) dro Ráskire-Devléskiro Kher. Jov adiáke-pac' lydžija peskiren čhavén pirdál jag pe Jenomoskire-čhavéskiro dólo, i sys jov spiéco pe čergeniá, i drabakirdia, i čovahaniakirdia, i čhudiá manušén, savé vykharenas mulen i čovahanen; but jov kerdiá nalačhés dre Ráskire-Devléskire jakhá, pe Léskiri xolý. I čhudiá jov vyčhindlo idolo, savó kerdiá, dro Ráskire-Devléskiro Kher, pal savéste rakirdiá Devél Davidóske i Solomonóske, léskire čhavéske: “Dro davá Kher i dro Jerusalimo, savó Me vykedyjom saré Izrailjoskire rodycendyr, Me čhuváva Miro lav pe viéko; i Me na davá butýr, sob (kaj) te piričhuvelpe [te piridžal-ju.o.] ĥerój Izrailjoskiri dalé phuvjátyr, saví Me kerdjom zoraliasa pal léngire dadende, kóli syr trej jone javéna te pričhuvén zor te kerén saró, so Me rakirdjom lénge, pir saró Zakóno i uphenybená i priphenybená, savé sys dyné Mojzáskire vastésa.” Ne Manásija dolydžija Judéia i manušén Jerusalimoskiren ke dová, so jone kerdé fujedýr dolé Najudytkoné manušéndyr, savén tradyjá krig Raj Devél Izrailjoskire-čhavéngire móstyr. I rakirdiá Raj Devél ke Manásija i ke léskire manušá; ne jone na šundlé. I paldavá jandiá Raj Devél pe lénde barydyrén Asirijákire-kralískire xaladendyr; i zakuindle jone Manasijas dre sastyrá, i zakuindle les zandir'jénca (cepenca), i lydžiné les dro Vavilóno. I syr les pritasade, to jov lyjá te riskirél iló ke Raj Devél, léskire Devél, i xor čhudé pes teledýr (zmirindiape) angíl péskire dadengíre Devléste. I pomangdiape jov Léske, i Devél prišundiape ke jov, i šundiá léskiro mangipén, i riskirdiá les dro Jerusalimo pe léskiro kralipén. I udžindiá Manásija, so Raj Devél isyn Devél. I paló (poslie) davá jov ĥazdyjá Davidóskire foroske javriestyr vánta (sciana), pe západno Gieonoskiri rig, pir loščýna i ke zagiibén dre mačengiri pórta; i oblydžija la trusciál Ofiélo, i vučés la ĥazdyjá. I čhudiá xaladéngire barydyrén pe saré zoralé tynénca fórja dre Judéia. I vyčhurdyja javire phuv'jéngire devloré i idolen Ráskire-Devléskire Khereskir, i saré mangipnytka štéty, savé jov kerdiá pe Ráskire-Devléskiri Kheréskiri bérga i dro Jerusalimo, i vyčhurdyja len pal fóro. I čhudiá jov pale Ráskire-Devléskiro altárjo, i jandiá pe léste svénta dyibená Ráske-Devléske, mirna i šaribnytka, i phendiá Judejakirenge, sob (kaj) jone te dynarinén Ráske-Devléske, Izrailjoskire Devléske. Ne manušá iščo (inké) janénas svénto dyibén pe vučipená, ne féni (tóka) Ráske-Devléske, péskire Devléske. Javír Manasijáskire réndy (diély), i léskiri pátieri (molítva) ke péskiro Devél, i lavá magikéngire, savé rakirdé ke jov Ráskire-Devléskire, Izrailjoskire Devléskire lavésa, isyn začhindlé dre Izrailjoskire-kral'jéngire čhinybena. I léskiri pátieri (molítva), i dová, so Devél prišundiape ke jov, i saré léskire gréhi i léskiro čoripén, i štéty, pe savé jov kerdiá vučipená i čhudiá figury Astartake i vyčhindlé muiá, angledýr, syr jov lyjá te kandel (primirindiape), isyn začhindlé dre Xozajoskire čhinybena. I pasijá pe viéko Manásija péskire dadénca, i garadé les dro léskiro kher. I jaciá kralísa Amono, léskiro čhavó, pe štéto léskiro. Biš te duj berš sys Amonoske, kiéli jov jaciá kralísa, i duj berš jov sys kralísa dro Jerusalimo. I kerdiá jov nalačhés dre Ráskire-Devléskire jakhá adiáke-pac', syr kerdiá Manásija, léskiro dad; i saré vyčhudé mujénge, savé kerdiá Manásija, léskiro dad, janéla Amono svénto dyibén, i dynarindiá lénge. I na čhudiá jov pes teledýr (zmirindiape) angíl Ráskire-Devléskiro muj, syr čhudiá pes teledýr Manásija, léskiro dad; ne pe proti, Amono kerdiá butýr péskire gréhi. I sčhude proti léste léskire dynárja zrakiribén, i muliakirdé les dro léskiro kher. Ne manušá pe doiá phuv domardé sarén manušén, savé sys dre zrakiribén proti kralíste Amonoste; i čhudé dolé-phuvjákire manušá Iosijas, léskire čhavés, pe štéto léskiro. Ohtó berš sys Iosijaske, kiéli jov jaciá kralísa, i trijánda jekh berš sys jov kralísa dro Jerusalimo. I kerdiá jov lačhés dre Ráskire-Devléskire jakhá, i psirdiá Davidóskire droménca, péskire dadeskirenca, i jov na risjolas ni pe čačí rig, ni pe zérvo (liévo) rig. Pe ohtóto berš péskire kralipnaskiro, kiéli sys jov iščo (inké) ternó manúš, jov lyjá te javél ke péskire-dadéskiro Davidóskiro Devél; a pe dešuiavir berš lyjá te žužakirel Judéia i Jerusalimo vučipnendyr i svencone vešéstyr i kažnoné vyčhindlé i vyčhudé idolendyr. I rosphagirdé angíl léskiro muj Vaalengire altári i statuly, savé sys vučés pe lénde; i svencyndle vešá jov vyčingirdia, i kažna vyčhindlé i vyčhudé muiá rosphagirdiá, i rozmardiá dro práho, i rosčhudiá pe koplicy dolengire, savé janénas lénge svénto dyibén. I kokalý žriecengire shačkirdiá pe léngire altári, i vyžužakirdiá Judéia i Jerusalimo. I dre fórja Manasijáskire, i Jefriemóskire, i Simieonoskire, až ke Niefalimoskiro ródyco, i dre léskire čhučé rigá. I jov rosphagirdiá altári i svencona vešá, i vyčhudé muiá rozmardiá dro práho, i saré statuly rosphagirdiá pe sarí Izrailjoskiri phuv; i risijá dro Jerusalimo. Pe dešuohtoto berš péskiro kralipnaskiro, syr Iosija žužakiridia phuv i Devléskiro Kher, jov bičhadiá Šafanos, Acalijaskire čhavés, i Maasiejos, foróskire barydyrés, i Ioahos, Ioahazoskire čhavés, lylá-čhinybnaskiris (pisarjos), te neviakiren Ráskire-Devléskiro, péskire Devléskiro Kher. I javné jone ke Xelkija, anglatunó rašái, i otdyné rup, savó sys jandlo dre Ráskire-Devléskiro Kher, savó Lievíty, savé sys terdé pe rakhiben pašýl progo, skedyné vasténdyr Manasijaskirendyr i Jefriemoskirendyr i saréndyr javire Izrail'tianendyr, i saré Judastyr i Vieniaminostyr, i Jerusalimóskire manušéndyr; I otdyné jone dre vastá manušénge, savé dykhné pal butý, i čhudé len ke Ráskire-Devléskiro Kher, sob (kaj) jone te rozden les butiarnenge, savé kerdé butý dro Ráskire-Devléskiro Kher, i kerdé riemónto i neviakirde Kher. I jone rozdyne kherá-keribnaskirenge (plotnikenge) i manušénge, savé kerdé javír butiá te kinen vyčingirde bará i veš vaš sphandypen, sob (kaj) te učhakiren Kher, savé rosphagirdé Judejákire králja. Adalé manušá kerdé čačunés butiá, i te dykhén pal lénde čhudé sys: Iahafo i Ovadija, Lievíty Mierariskire čhavéndyr, i Zahárija i Miešulam /Kaafoskire čhavéndyr, i saré Lievíty, savé džindlé te bašaven pe bašaibnytka strumiénty. Jone sys čhudé pe manušénde, savé lydžánas i dykhenas pal sarénde butiarnende pašýl kažno butý; vari-savé Lievitendyr adiáke-pac' sys i lylá-čhinybnaskire, i dykhibnarja (nadziratieli), i rakhibnárja pe pórty. Kiéli vylyne jone rup, savó sys jandlo dro Ráskire-Devléskiro Kher, tedy Xielkija, rašái, lathiá (lastia) lylvarí Ráskire-Devléskire Zakonosa, saví sys dyný Mojzáskire vastésa. I lyjá Xielkija, i phendiá Šafanoske lylá-čhinybnaskireske: “Lylvarí Zakonoskiri lathjom me dro Ráskire-Devléskiro Kher.” I otdyjá Xielkija doiá lylvarí Šafanoske. I lydžijá Šafano lylvarí ke králi, i jandiá la dalé nevipnasa: “Saró, so sys dopatiandlo tyré pishar'jénge, jone keréna”; I vyčhudé rup, savó lathné dro Ráskire-Devléskiro Kher, i piridyne les dre vastá dykhibnar'jénge i dre vastá manušénge, savé keréna butý. I adiáke-pac' rosphendiá Šafano, lylá-čhinybnaskiro kralíske, rakirí: “Lylvarí dyjá mánge Xielkija, rašái.” I gindia la Šafano angíl kralíste. Kiéli šundiá králi Zakonóskire lavá, to tedy roskuscia péskire ídi. I dyjá králi uphenybén Xielkijaske i Ahikamoske, Šafanoskire čhavéske, i Avdonoske, Mihiejoskire čhavéske, i Šafanoske, lylá-čhinybnaskireske, i Asaijaske, kralískire dynaríske, rakirí: “Džán, phučenpe Rástyr-Devléstyr pal mánde, i pal manušénde, savé jačnépe dro Izrailjo, i pal Judaste pal lavá dalé, savé lathné lylvarjakire; pal-dová so bari isyn xolý Ráskire-Devléskiri, Savó rosholiasyja pe aménde pal dová, so na rakhne amaré dadá Ráskire-Devléskire lavá, sob (kaj) te kerés pir saró, so isyn začhindló dre daja lylvarí.” I gijá Xielkija i odolé manušá, savé sys kralístyr, ke Oldana, proročyca, Šalumoskiri romný, Tavkiegafoskire čhavéskire, Xasraskire čhavéskire, savó rakhciá ídi, a dživdiá joj dre javír paš Jerusalimóskiri, – i rakirdé lása pal davá. I joj phendiá lénge: “Adiáke rakiréla Raj Devél, Devél Izrailjoskiro: ‘Phenén odolé manušéske, savó bičhadiá tumen ke me: adiáke rakiréla Raj Devél: Ĥáda, Me janáva bída pe davá štéto i pe léskire manušénde saré prokošybena, savé isyn začhindlé dre lylvarí, saví gindlé angíl Judejákire-kralískiro muj. Pal-dová, so jone jačkirdé Man i kadindle javire devlorénge, sob (kaj) te rosholiakiren Man saré péskire vastengire rendénca. I Mirí xolý zahačola pe davá štéto, i na murdjola.’ A kralíske Judejakireske, savó bičhadiá tumen te phučenpe Rástyr-Devléstyr, adiáke phenén: ‘Adiáke rakiréla Raj Devél, Devél Izrailjoskiro, pal lavá, savé tu šundián: adiáke, syr kovlyja iló tyró, i tu čhudián pes teledýr (zmirindianpe) angíl Devléste, kiéli šundián Léskire lavá pal davá štéto i pal léskire manušénde, – i tu čhudián pes teledýr angíl Mánde, i roskustian péskire ídi, i rondian angíl Mánde, tedy i Me šundjom tut, rakiréla Raj Devél. Ĥáda, Me čhuváva tut ke tyré dadá, i tu javésa čhudo dre koplíca tyrí ramanjosa (mirósa), i na dykhéna tyré jakhá doiá bída, saví Me janáva pe davá štéto i pe léskire manušénde.’” I jandlé otphenybén kralíske.’” I bičhadiá králi, i skedyjá sarén Judejakiren i Jerusalimoskiren phurydyren. I gijá králi dro Ráskire-Devléskiro Kher, i lésa saré Judejákire, i Jerusalimóskire manušá, i rašaja, i Lievíty, i saré manušá barestyr ke tyknó; i jov gindia dro šunybén (dyjá upré) léngiro saré zavietoskire lylvarjakire lavá, saví lathné dro Ráskire-Devléskiro Kher. I terdijá králi pe péskiro štéto, i kerdiá zavieto angíl Ráskire-Devléskiro muj – te džán pal Devléste i te rakhén Léskire priphenybená (zapoviedi), i Léskire sykadyipena, i Léskire uphenybená, saré péskire iléstyr i saré péskire diéstyr, sob (kaj) te kerén saró pir zavietoskire lavá, savé isyn čhindlé dre daja lylvarí. I priphendiá králi te dosykaven davá saró manušénge, savé sys dro Jerusalimo i pe Vieniaminoskiri phuv; i lyné te kerén Jerusalimóskire manušá pir péskire dadéngiro Devléskiro, Devléskiro zaviéto. I vyčhurdyja Iosija saré magiribena saré phuvjátyr, savé sys Izrailjoskire čhavénde; i priphendiá sarénge, kon dživdiá pe Izrailjoskiri phuv, te dynarinén (te služynen) Ráske-Devléske, peskireske Devléske. I dre saré léskire džiibnáskire dyvesá jone na otginé péskire dadengíre Rástyr-Devléstyr. I kerdiá Iosija dro Jerusalimo Patradí Ráske-Devléske, i začhindlé patraditkones bakrores pe dešuštarto dyvés, anglatuné-čhonéskiro. I čhudiá jov rašán pe léngire štéty, i dyjá dúho (fáno) lénge te dynarinén dro Ráskire-Devléskiro Kher. I phendiá Lieviténge, savé sykliakirdé sarén Izrail'tianén, savé sys vysvencyndle Ráske-Devléske: “Čhuvén svénto kovčego dre Khangirí, saví kerdiá Solomóno, Davidóskiro čhavó, Izrailjoskiro králi; nane tuménge trébima te lydžán les pe psiké; dynarinén akaná Ráske-Devléske, Devléske amareske, i Léskire manušénge Izrailjoskirenge. Terdjon pir tumaré stréčy (pokoliénii), pir zmiény tumaré, syr uphendia Davído, Izrailjoskiro králi, i syr začhindiá Solomóno, léskiro čhavó; I terdjon pe svénto štéto, pir strečengiro rosčhuiben (dadéngire tituly) tumaré pšalénde, manušéngire čhavénde, i pir dová, syr Lievíty rosčhude pes pe stréčy. I začhinen patraditkones bakrores, i vysvencynenpe, i prigotovinen les vaš tumaré pšalénge, kerén saró Ráskire-Devléskire lavésa pir Mojzaste. I dyjá Iosija dro dyibén sarénge manušéngire čhavénge, savé sys odój, tykné kheritkoné murdaléndyr bakrorén i buznen (kozlen) ternen, saró vaš svénto janybén Devléske patraditko, saró trijánda tysjoncy, i trin tysjoncy guruvén. Davá sys kralískire mištypnástyr. I léskire thagárja (kniázi) iléstyr dyné dro dyibén manušénge, rašange i Lieviténge. Xielkijá, i Zahárija i Iiehiilo, savé isys barydyrénca dro Devléskiro Kher, dyné rašange vaš patraditko svénto janybén Devléske duj tysjoncy šovšelá bakrien, bakrorén i buznen (kozlen) i trinšelá guruvén; I Xonajeija i Šiemaijá, i Nafanaílo, léskire pšála, i Xašavijá, i Iieielo, i Iozavádo, barydyrá Lieviténgire, dyné Lieviténge patraditko vaš svénto janybén Devléske bakrien pandž tysjoncy, i pandžšelá terné guruvén. Adiáke kerdó sys dynaribén (služba). I terdiné rašaja pe péskiro štéto i Lievíty pe péskire zmiény pir kralískiro uphenybén. I začhindlé patraditkone bakrores. I čhuvénas rašaja ratésa, lyí les Lieviténgire vasténdyr, a Lievíty zlyne cýpa. I rosčhude jone dová, so sys priphendlo vaš saró shačkiribén, sob (kaj) te rozden dová pir otdiély dre stréčy manušéngire čhavénde, te janén Ráske-Devléske, syr isyn začhindló dre Mojzaskiri lylvarí. Dová-pac' kerdé i guruvenca. I pekne patraditkone bakrores pe jag, pir uphenybén; i svénta janybená kerade dre pirja, kakavia (kotly) i myski (kastruli), i sýges rozdyne saré manušénge; A tén'či (poslie) kerdé vaš péske i vaš rašange: pal-dová so rašaja, Aaronóskire čhavé sys zalyne (zalyme) janybnasa celoné shačkiribnastyr ke rat; paldavá i kerade Lievíty vaš péske i vaš rašange, Aaronóskire čhavénge. I bagaibnarja, Asafoskire čhavé, jačnépe pe péskire štéty, pir uphenybén Davidóskiro, i Asafoskiro, i Jemanoskiro i Idifunoskiro, kralískire magikoskiro, i rakhibnárja pašýl pórta: na vaš so sys lénge te otdžan péskire dynaribnastyr, adiáke syr léngire pšála kerade vaš lénge. Adiáke sys kerdó saró dynaribén Ráske-Devléske dre dová dyvés, sob (kaj) te svenkinen Patradí i te janén célo shačkiribén pe Ráskire-Devléskiro altárjo, pal Iosijaskire kralískiro uphenybén. I svenkindle Izrailjoskire čhavé, savé sys odój, Patradí dre dová časo (cýro) i svénko opresnokengiro dre eftá dyvesá. I na svenkindle dasaví Patradí Izrailjoste prorokoskire-Samuiloskire dyveséndyr; i saré Izrailjoskire kral'jéndyr nijékh na spravindia dasaví Patradí, saví kerdiá Iosija, i rašaja, i Lievíty, i saré Judejákire, i Izrail'tiáni, savé sys odój, i Jerusalimóskire manušá. Dre dešuohtoto berš Iosijáskiro, syr jov sys králi, svenkindle daja Patradí. Paló (poslie) saró davá, so kerdiá Iosija dro Devléskiro Kher, gijá Niehar, Jegiptóskiro králi, pe maribén ke Karhiemiso pe Jevfrato; i Iosija vygijá gil (pe strieč) léske. I gil bičhadiá ke jov Niehao manušén te phenén: “So mánge i túke, Judejákiro králjo? Na proti túte akaná džáva me, ne odorík, kaj mánde maribén. I Devél priphendiá mánge te sygniakirav; na jav proti Devléste, Savó isyn mánca, sob (kaj) Jov te na xasiakirél tut.” Ne Iosija na otgijá léstyr, a skedyjape, sob (kaj) te marélpe lésa, i na šundiá Niehaoskire lavá Devléskire móstyr, i vygijá pe maribén, pe loščýna Miegido. I dyné kar'jé lukéndyr dre kralíste Iosijaste; i phendiá králi péskire dynar'jénge: “Lydžán man, pal-dová so me pharés čhindló.” I zlyne les dynárja léskire maribnytkoné vurdenestyr, i čhudé te bešél les dre javír vurdén, savó sys léste, i lydžiné les dro Jerusalimo. I myjá jov, i sys garadó dre péskire dadengíre koplicy. I saré Judejákire i Jerusalimo obrondle Iosijas. Obrondia Iosijas i Jeriemiéjo dre roibnaskiri gilý; i rakirdé saré bagaibnarja i bagaibnaricy pal Iosijaste dre roibnytka péskire giliá, savé isyn džindlé ke davá dyvés, i piridyne len dro bagaiben Izrailjoske; i ĥáda, jone isyn začhindlé dre lylvarí, roibnytkone-giliengiri. Javír réndy Iosijaskire i lačhipén léskiro, zdžanape dolesa, so isyn začhindló dro Ráskire-Devléskiro Zakóno, I réndy léskire, anglatuné i palatuné (posliednia), isyn začhindlé dre Izrailjoskire i Judejákire-kral'jéngiri lylvarí. I lyné manušá pe doiá phuv Ioahazos, Iosijaskire čhavés, i čhudé les kralísa, pe štéto léskire dadéskiro, dro Jerusalimo. Biš te trin berš sys Ioahazoske, kiéli jov jaciá kralísa, i trin čhoná sys jov kralísa dro Jerusalimo. I zlyjá les Jegiptóskiro králi dro Jerusalimo, i čhudiá pe phuv pritasady (pienia) šel talánty rup i jekh talanto suvnakái. I čhudiá Jegiptóskiro králi pe Judéia i Jerusalimo Jeliakimos, léskire pšalés, i parudia léskiro lav pe Ioakimo; a Ioahazos, léskire pšalés, lyjá Niehao i zalydžijá les dro Jegípto. Biš te pandž berš sys Ioakimoske, kiéli jov jaciá kralísa, i dešujekh berš jov sys kralísa dro Jerusalimo. I kerdiá nalačhés dre jakhá péskire Ráskire-Devléskire. Proti léste vygijá Navuhodonosóro, Vavilonóskiro králi, i zakuindia les sastyrenca, sob (kaj) te lydžál les dro Vavilóno. I paš khorendyr Ráskire-Devléskire Khereskir pirilydžija Navuhodonosóro dro Vavilóno, i čhudiá len dro péskiro mangipnytko štéto dro Vavilóno. Javír réndy Ioakimoskire i léskire magiribena, savé jov kerdiá i savé lathné dre léste, isyn začhindlé dre Izrailjoskire i Judejákire-kral'jéngiri lylvarí. I jaciá kralísa Iiehonija, léskiro čhavó, pe štéto léskiro. Dešuohto berš sys Jehonijaske, kiéli jaciá jov kralísa, i trin čhoná i deš dyvés jov sys kralísa dro Jerusalimo. I kerdiá jov nalačhés dre Ráskire-Devléskire jakhá. Syr gija berš, bičhadiá králi Navuhodonosóro, i priphendiá te len les dro Vavilóno khetané drogoné khorenca Ráskire-Devléskire Khereskir, i jaciá kralísa pe Judeiénde i Jerusalimo o Sedekíia, léskiro pšal. Biš te jekh berš sys Sedekijaske, kiéli jaciá jov kralísa, i dešujekh berš jov sys kralísa dro Jerusalimo. I kerdiá jov nalačhés dre péskire Ráskire-Devléskire jakhá. Jov na lyjá te kandel prorokós Jeriemiejos, savó rakirdiá Ráskire-Devléskire uštendyr. I otgijá jov kralístyr Navuhodonosorostyr, savó lyjá léstyr sovél Devléskire lavésa, – i kerdiá zoralý péskiri men, xoliakirdia péskiro iló ke dová, so na risijá ilésa ke Raj Devél, Devél Izrailjoskiro. Adiáke i saré barydyrá pe rašande i pe manušénde kerdé but gréhi, dykhí pe saré magiripena Najudytkoné nacyiéndyr, i magirdé jone Ráskire-Devléskiro Kher, savó Jov svencyndia dro Jerusalimo. I bičhadiá ke jone Raj Devél, Devél léngire-dadéngiro, Péskire bičhaibnaskiren tasiárles pe zlóko (pe ránko), pal-dová so Jov tangindia Peskiren manušén i Péskiro Kher. Ne jone sandlepe napatyvales (zdikindlepe) Devléskire bičhaibnaskirendyr, i na šundlé Léngire lavá, i košnepe pe Léskire prorokénde, paka zgija Ráskire-Devléskiri xolý pe Léskire manušénde adiáke, so na sys léske zrakhibén. I Jov jandiá pe lénde Xaldiejengire kralís, – i odová muliakirdiá terné manušén léngire kurtalása dre léngiro sventynybnaskiro kher, i na potangindia ni terné čhavés, ni patyvalia čha, ni phures, ni bogos: saró otdyjá Devél dre léskiro vast. I saré Devléskire Khereskire khoré (sasúdy) baré i tykné, i kučipena Ráskire-Devléskire Khereskire, i barvalypén léskire kralískiro i thagar'jengiro (kniaziengiro), saró jov jandiá dro Vavilóno. I xačkirdé jone Devléskiro Kher, i rosphagirdé Jerusalimóskiri vánta; i saré léskire felatiniá shačkirdé jagása, i saré dróga khoré léskire domardé. I pirilydžija jov manušén, savé jačnépe džidé kurtalátyr dro Vavilóno; i sys jone léskire dynar'jénca i léskire čhavengirenca, ke Piersijakire-kralískiro kralipén. Angíl dová, sob (kaj) te spolninen Ráskire-Devléskiro lav, savó sys phendló Jeriemiejoskire ušténca, syr phuv otsvenkindia péskire sávaty (suboty). Dre saré čhučé dyvesá joj rakhciá sávato ke spolninyben eftadešá berš. I dro anglatunó (pérvo) berš Kiraskiro, Piersijakire kralískiro, sob (kaj) te spolninen Ráskire-Devléskiro lav, savó phendlé Jeriemiejoskire uštá, Raj Devél ĥazdyjá dúho (fáno) Kiraskiro, Piersijakire kralískiro, i jov priphendiá te den te džinén pir saró péskiro kralipén, lavénca i čhinybnasa, i te phenén: “Adiáke rakiréla o Kira, Piersijakiro králi: ‘Saré kralipená pe phuv dyjá mánge Raj Devél, bolybnáskiro Devél; i Jov priphendiá mánge te keráv Léske Kher dro Jerusalimo, so isyn dre Judéia. Kon isyn tuméndyr-saré Léskire manušéndyr, mek te javél léskiro Raj Devél, Devél lésa, i mek jov odorík te džal.’” Dro pérvo berš kralískire Kiraskiro, kiéli Jov lyjá te kralinél pe Piérsija, sob (kaj) te spolninélpe lav Ráskire-Devléskiro, savó rakirdiá proróko Jeriemiéie, o Raj-Devél džangadia dúho (fáno) Kiraskiro, Piersijakire kralískiro, i jov dyjá priphenybén te phenén angíl sarénde pir saró kralipén, i adiáke-pac' te začhinen dalé lavá: “Adiáke rakiréla Kira, králi Piersijakiro: ‘O Raj Devél, Devél bolybnáskiro, dyjá mánge saré kralipená pe phuv. I Jov priphendiá mánge te čhuvav Kher (Khangirí) Léske dro Jerusalimo, pe Judéia. Kon isyn maškír tuménde Léskire manušéndyr, mek te javél Léskiro Devél lésa! Akaná, mek jov te džal dro Jerusalimo, savó isyn pe Judéia, i mek jov te čhuvél Kher (Khangirí) Ráske-Devléske, Savó isyn dro Jerusalimo. I pe kažno štéto, pir savé dživéna Judy dro pliéno, mek štetytka manušá te pomoginen lénge rupésa, suvnakása, i javire darenca, kheritkoné murdalénca, adiáke-pac' syr i te den svénto dyibén, so kon kaméla, vaš Kher (Khangirí) Devléskiro, savó isyn dro Jerusalimo.’” Tén'ci šeralé pe stréčy /dadengíre-ródy (pokolienii) Judastyr i Vienjaminostyr, i rašaja, i Lievíty, kažno manúš, dre savénde Devél džangadia dúho (fáno), ĥazdynépe te džán te čhuvén nevés Kher (Khangirí), Ráskire-Devléskiro, savó isyn dro Jerusalimo. I saré odolé, kon sys pašýl lénde, zorjakirde léngire vastá rupuvé čarenca, priedmietenca (čysénca) suvnakástyr, javire darenca majonkostyr, i kheritkoné murdalénca, i kučipnenca (drogoné priedmietenca), adiáke-pac', syr i saré darenca, so sys jandlo syr svénto dyibén, so kon kamdiá”.” I králi Kira lydžijá khoré (sasúdy). Kheréstyr (Khangirjátyr) Ráskire-Devleskirestyr, savé o Navuhodonosóro lydžijá krig Jerusalimóstyr i čhudiá dro léskire-devloreskiro kher. I o Kira, králi Piersijakiro, lydžijá javrí len Mifriedatoskire vastésa, kon sys rakhibnaskiro (xranitieljo) pe piralý (sokroviščo), savó pirigindia len Šešbacaroske, thagariske Judaskireske. Ake, isyn ginybén, so i kicý sys: trijánda suvnakuné baré čaré, jekh bar (tysjonco) rupuvé baré čaré, biš te jeniá čhurja; trijánda xor tahtaja (čašy) suvnakástyr, štar šelá te deš kadasavé-pac' tahtaja rupéstyr, i bar (tysjonco) javír khoré (sasúdy). Sys pandž bará štar šelá khoré (sasúdy) suvnakástyr i rupéstyr. Saré dalé dáry lyjá o Šešbacaro pliennonenca, savén lydžiné Vavilonóstyr ke Jerusalimo. Akaná, ake, isyn manušá dolé okrugátyr, savé vyginé plienóstyr kodolendyr, savén vylydžijá o Navuhodonosóro, králi Vavilonóskiro, ke Vavilóno, i kon risijá pale ke Jerusalimo i ke Judéia, kažno dro péskiro fóro, kon javdiá khetané Zorovavieljosa, Isusósa (Johošuasa), Nijemijasa, Saraijasa, Riejelajosa, Mardohiejosa (Mordehajosa), Bilšanosa, Misfarosa, Bigvajosa, Riehumosa i Vaanosa. Ake, kicý sys manušá Izrailjostyr: čhavé Parošoskire, duj tysjoncy jekh šel i eftadešá duj; čhavé Safatijaskire (Šefatijaskire), trin šelá i eftadešá duj; čhavé Arahoskire, eftá šelá i eftadešá pandž; čhavé Pahaf-Moavoskire, manušá Isusóskire i Ioavoskire, duj tysjoncy ohtó šelá i dešudúi; čhavé Elamoskire, jekh tysjonuco duj šelá i pandždešá duj; čhavé Zatujoskire, jeniá šelá i štardešá duj; čhavé Zakajoskire, eftá šelá i šovdešá; čhavé Vanijoskire, šov šelá i štardešá duj; čhavé Biebajoskire, šov šelá i biš te trin; čhavé Azgadoskire, jekh bar duj šelá i biš te duj; čhavé Adonikamoskire, šov šelá i šovdešá šov; čhavé Bigvajoskire, duj tysjoncy (bará) i pandždešá šov; čhavé Adinoskire, štar šelá i pandždešá štar: čhavé Ateroskire, Jezekijastyr, jeniadeša ohtó; čhavé Biecajoskire, trin šelá i biš te trin; čhavé Ioraskire, jekh bar i dešudúi; čhavé Xašumoskire, duj šelá i biš te trin; čhavé Gibaroskire, jeniadeša pandž; manušá Vifliejemostyr jekh šel i biš te trin; manušá Nietofatyr pandždešá šov; manušá Amafofostyr jekh šel i biš te ohtó; manušá Azmaviefoskire, štardešá duj; manušá Kiríaf-Jarimatyr, Kiefiratyr i Biejerofostyr eftá šelá i štardešaduj; manušá Ramatyr i Giefatyr šov šelá biš te jékh; manušá Mihmasostyr jekh šel i biš te jékh; manušá Viefiljostyr i ĥajostyr duj šelá i biš te trin; manušá Nievostyr štardešá duj; manušá Magbišostyr jekh šel i pandždešá šov; čhavé javire Elamoskire, jekh tysjonco (bar) duj šelá i štardešaštar; čhavé Xarimoskire trin šelá biš; manušá Lidatyr (Ljodostyr), Xadidostyr i Onostyr eftá šelá te biš te pandž. Manušá Jerihonostyr trin šelá štardešapandž; manušá Sienajatyr trin bará šovšelá trijánda. E Rašaja: čhavé Iiedajaskire Isusóskire (Johošuaskire) kheréstyr, jeniá šelá šovdešá pandž; čhavé Imeroskire jekh tysjonuo (bar) pandždešá duj; čhavé Pašhuroskire jekh tysjonco (bar) duj šelá i štardešá eftá; čhavé Xarimoskire jekh bar dešuefta. E Lievíty: čhavé Isusóskire (Jehošuaskire) i Kadmiiloskire, čhavé Godavijaskire kheréstyr eftadešaduj. E Bagaibnáskire: čhavé Asafoskire šel biš te ohtó. E čhavé stregar'jéngire pašvudarengire: čhavé Šalumoskire, čhavé Ateroskire, čhavé Talmonoskire, čhavé Akuvskire, čhavé Xatitaskire, čhavé Šovajoskire, -saró pe saró jekh šel trijandajenia. E Niefiniéi: čhavé Cyhaskire, čhavé Xasufaskire, čhavé Tabaofoskire; čhavé Kieroskire, čhavé Siagaskire, čhavé Fadonoskire, čhavé Liebanaskire, čhavé Xagabaskire, čhavé Akuvoskire; čhavé Xagavoskire, čhavé Šamlajoskire; čhavé Xananoskire; čhavé Gideljoskire, čhavé Gaharoskire, čhavé Reajoskire; čhavé Riecinoskire, čhavé Niekodaskire, čhavé Gazamoskire; čhavé Uzaskire, čhavé Pasieahoskire, čhavé Biesajokire; čhavé Asnaskire, čhavé Mieunimoskire, čhavé Niefisimoskire; čhavé Bakbukoskire, čhavé Xakufaskire, čhavé Xarhuroskire; čhavé Baclufoskire, čhavé Miehidaskire, čhavé Xaršaskire; čhavé Barkososkire, čhavé Sisraskire, čhavé Famahoskire; čhavé Niecyahoskire, i čhavé Xatifaskire. E čhavé Solomonóskire-pishar'jéngire: čhavé Sotajoskire, čhavé Gasofieriefoskire, čhavé Fierudaskire; čhavé Ialoskire (Jaaloskire), čhavé Darkonoskire, čhavé Gidieloskire; čhavé Siefatijaskire (Šefatijaskire), čhavé Xatiloskire, čhavé Pohieriéf-Gacebaimoskire, i čhavé Amijoskire. Sarén: Niefiniején i čhavén Solomonóskire-pishar'jéngiren sys trin šelá jeniadeša duj. I, ake, sys odolé, savé javné Tel-Mielahostyr, Tel-Xaršystyr, Xierubostyr-Adanostyr-Imerostyr, savé na saštyndle (mogindlé) te dosykaven pal streč/léngire-dadéngiro ródo (pokolienijo) ci pal léngiro kherítko ródo (pliemjo), so jone sys Izrailjostyr: ĥáda, sys čhavé Dielaijaskire, čhavé Tovijaskire, čhavé Niekodaskire, šov šelá pandždešá duj; i rašángire čhavéndyr: čhavé Xabaijaskire, čhavé Gakocoskire, i čhavé Vierzielijoskire (Barcylajoskire), savó lyjá romniá péske Vierzielijoskire čhajéndyr, kon sys Galaadostyr i kadasavó léskiro lav jaciá. Jone rodyne léngire-rodengiro začhinyben dro spisko, ne jone na lathné nisó; paldavá len syr miešyndlen pir ródo, otčhude dre rig rašángire butiátyr. I o Tiršafa, barydyro Piersijakiro, phendiá lénge, sob (kaj) jone te na xan naj svénta janybená xabnastyr angíl dová, syr te javél rašáj Urimosa i Tumimosa (te mangélpe Devléske pal lénde). Saré manušén skedyjape te risjon plienóstyr, sys štardešá bará trin šelá šovdešá manušá, apríč léngire pishar'jénde i štubakire dynaricende, savén sys eftá tysjoncy (bará) trin šelá trijánda manušá. Lénde sys adiáke-pac' dujšelá bagaipnytka muršá i bagaipnytka džuvliá. Lénde sys eftá šelá trijandašov graja; lénde sys duj šelá štardešá pandž lošaki (muly); lénde sys štar šelá trijánda pandž vierbliudy (dromadara); šov tysjoncy (bará) eftá šelá biš osly (miegárja). Vari-savé e šeralé strečengire (pe pokolienii), kiéli jone javné ke Kher (Khangirí) Ráskire-Devléskiro, so isyn dro Jerusalimo, jandlé dáry saré iléstyr vaš Kher (Khangirí) Devléskiro, sob (kaj) te čhuvén pale les pe léskiro štéto; jone dyné davá pir léngiro majonko dre piralý vaš butý te kerén: šovdešá jekh bar suvnakuné drahmy, pandž bará rupuvé miny, i jekh šel rašaitka ídi. I e rašaja, i e Lievíty, i vari-savé javír manušá, i bagaibnaskire, i stregarja pe vudará, i Niefieniei, lyné te dživén dre léngire fórja, i saró Izrailjo dre péskire fórja. I kiéli eftáto čhon javdiá, i čhavé Izrailjoskire sys dre fórja, e manušá skedynépe khetané so ke jekh dro Jerusalimo. Tén'ci uštyjá Johošuá (Isúso), čhavó Iosiediekoskiro (Jozadakoskiro), i pšála léskire, rašaja, i Zorovavieljo, čhavó Šoltiloskiro, i léskire pšála, i kerdé altárjo Izrailjoskire Devléske, sob (khaj) te janén céla shačkiribena, syr čhindló dro Zakóno Mojzáskiro, savó sys manúš Devléskiro. I jone kerdé altárjo pe léskiro fundámiento pal doiá dar, so sys lénde Najudytkoné manušéndyr dolé themendyr, i jone lyné te janén céla shačkiribena Ráske-Devléske, zlokoskire i bel'veliakire céla shačkiribena. Jone adiáke-pac' kerdé Svénko Kuščengiro (Šatrytko), syr isyn čhindló, i janénas kažno dyvés céla shačkiribena adákicy, kicý treindiá pir uphenybén vaš kažno dyvés; i paló davá jone jandlé bipirijačibnaskire svénta dyibená te xačkirén, i odolé, syr nevó čhon isyn i vaš saré uphendle svénki vaš Ráske-Devléske, so léske sys posvencyndle, i vaš kažno dáro, so javélas saré iléstyr, syr janéna svénto dyibén, konéske pir iló te del Ráske-Devléske. Pervoné dyveséstyr dro eftáto čhon jone lyné te janén céla shačkiribena Ráske-Devléske. Ne fundámiento tel Kher (Khangirí) Ráskire-Devléskiro na sys čhudo. Tén'ci jone adiáke-pac' dénas lové barengire spiecenge i kherá-keribnáskirenge, i xabén, i pibén, i maslinitko dzet manušénge Sidonostyr i Tirostyr, sob (kaj) jone te janén kiedrytko veš Livanostyr pir mórjo (derjáv) pašýl Jafa pir otmekibnaskiri (razriešenijo), saví sys lénde Kirastyr, kralístyr Piersijakirestyr. Pe javír berš, syr jone javné ke Kher (Khangirí) Ráskire-Devléskiro dro Jerusalimo dro javír čhon, o Zorovavieljo, čhavó Salafiiloskiro [Šaltiloskiro-ju.o.], o Johošuá (Isúso), čhavó Iosiedekoskiro (Jozadakoskiro), i javír léngire pšála: e rašaja i Lievíty, i kodolé saré, kon risijá plienóstyr ke Jerusalimo, i jone lyné te kerén butý i čhudé Lievitén, savénge sys biš berš i phuredýr te dykhén pal butý pe Kher (Khangirí) Ráskire-Devléskiro. I o Johošuá (Isúso), léskire čhavé i léskire pšála; o Kadmiilo léskire čhavénca; čhavé Judáskire, so ke jekh manúš lyné khetané te dykhén pal butiarnende pe Kher (Khangirí) Devléskiro; adiáke-pac' čhavé Xienanadoskire, léngire čhavé, i léngire pšála, Lievíty. Kiéli kherá-keribnaskire manušá čhudé fundámiento tel Kher (Khangirí) Ráskire-Devléskiro, e rašaja terdiné dre léngire uribená rogénca i Lievíty, čhavé Asafoskire, cymbalenca, te šarén Ras-Devlés pir statutno uphenybén kralístyr Davi-dostyr dro Izrailjo. I jone bagandle jekh pal javiréste, parikiri Ráske-Devlske: “Jov isyn lačhó, vaš dová so Léskiro drógo lačhipén rikirélape pe saré viéki pe Izrailjo.” I saré manušá dyné gódla baré godlása, kiéli jone šarde Ras-Devlés, vaš odová so sys čhudo fundámiento tel Kher (Khangirí) Ráskire-Devléskiro. Ne, but rašaja, i Lievíty, e šeralé pe stréčy /dadengíre-ródy (pokolienii), savé sys phurané manušá, i dykhné pérvo Khangirí, rondlé zoralés, kiéli čhudé fundámiento angíl léngire jakhá, i but dyné gódla radymátyr. I manušá na mogindlé te rozĥaljon lačhés šumo godlatyr radymakire šumostyr; pal-dová so manušá dyné gódla zoralés, i šumo sys šundlo durál. I šundlé namala Judáskire i Vienjaminoskire, so kodolengire čhavé, kon sys dro pliéno, kerénas Kher (Khangirí) Ráskire-Devléskiro, Devléskire-Izrailjoskiro, jone javné ke Zorovavieljo, i ke šeralé pe stréčy/dadengíre-rodengire (pokoliénii) i phendlé lénge: “Lása ame te kerás kher khetané, pal-dová so ame rodasas te das patýv tumaré Devléske, syr i tumé, i ame janasas svénta dyibená Léske Asardanoskire dyveséndyr, kralístyr Sirijakirestyr, savó jandiá amen adarík.” Ne Zorovavieljo i Johošuá, i javír šeralé pe stréčy /dadengíre-rodengire (pokolienii) Izrailjoskire, phendlé lénge: “Tuménge nane pričyna, sob (kaj) aménca khetané te kerás Kher (Khangirí) vaš amaré Devléske, ne ame kokoré javésa te kerás kher, Ráske-Devléske, Izrailjoskire Devléske, syr králi Kira, králi Piersijakiro, priphendiá aménge.” I manušá dolé phuvjákiri starindlepe te otlen zor manušéngire vasténdyr Judejátyr i jone na dénas lénge te kerén Kher (Khangirí); i jone kinenas sovietniken (junkaren) proti lénde, sob (kaj) te rozmaren lénge léngiro plano dre saré Kiraskire dyvesá Piersijakire kralískire až ke Darijoskire dyvesá, syr jov lyjá te rainel pe Piérsija. I dro kralipén Ahašvierošoskiro, pe sámo anglypén léskire raipnastyr, jone čhindlé bangiakiribnaskiro lyl pe manušénde Judejátyr i Jerusalimóstyr. I dre Artaksierksoskire dyvesá čhindlé o Bišlamo, o Mifriedato, o Tabiejélo, i javír léskire malá pir butý lyl Artaksierksoske, kralíske Piersijakireske, i lyl sys čhindló pe Siriicytko (Aramieítko) čib, i pirilydžino pe Siriicytko (Aramieítko) čib. O Riehumo, kralískiro sovietniko (junkaro) [šeraló-ju.o.], i o Šymšajo, lylá-čhinybnaskiro (pisarjo) manúš čhindlé lyl pe Jerusalimo, kralíske Artaksierksoske, dro savó jone bangiakirde: Riehumostyr, kralískire šeralestyr, i Šymšajostyr, savó sys lylá-čhinybnaskiro manúš (pisarjostyr), i javire léngire malendyr pir butý: e Dinei, i e Afarsafhiéi, i e Tarpieliei, i e Aparsy, i e Ariehjani, e Vaviloniani, e Susancy, e Dagi, e Jelamitiani; i javire manušéndyr, savén baró i lačhé-rodoskiro Asnafaro jandiá i čhudiá te dživén dre fórja Samarijakire i pe javír štéty dre provincyja pale reka (len') Jefrato, i adiáke duredýr.” Ake, isyn lyleskiri kopija, so jone bičhadé léske: “E Kralíske Artaksierksoske – tyré pishar'jéndyr, manušéndyr, savé dživéna dro daja provincyja pale reka (len'), i adiáke duredýr: Mek te javél džindló kralíske, so Judy, savé javné tútyr ke ame dro Jerusalimo, i savé keréna kadavá buntuítko i bibahtaló fóro, i dokončynena léskire vánty i pirikirena fundámiento. Mek te javél džindló kralíske, pal-dová so, kóli davá fóro te javél kerdó nevés i te končynen léskire vánty, to tedy jone na javéna te pleskiren ni namirja (podat'), ni myto, ni taksa, i kralískiri piralý javéla tykniakirdy. Akaná, pir-dová so ame xasa lond kralískire baré felatiniatyr/kolovostyr (dvorcostyr), to davá javéla namištes, kóli ame dykhasa, so isyn uriéža vaš kralíske, paldavá ame bičhadiam i dyjam zan (zvies') kralíske; sob (kaj) te rozroden dre tre-dadengíre začhinybnytko lylvarí: sob (kaj) te lathén dre začhinybnytko lylvarí i te udžines, so davá fóro isyn buntuítko, savó kerdiá doš kral'jénge i provincyiénge, i so jone terdjonas proti kral'jénde iščo (inké) dre ĥaratuné beršá, pir dová davá fóro sys phagirdó ke ruíny. Ame dasa zan kralíske, so kóli javéla davá fóro nevés kerdó, i léskire vánty te zakončynen, tedy dová značynelas, so na javéla butýr paš phuvjákiri pe daja rig rekakiri (leniakiri).” O králi bičhadiá otphenybén Riehumoske, kralískire šeraleske i Šymšajoske, lylá-čhinybnaskireske, i javire léngire malenge pir butý, kon dživéla ke Samárija, i pe javír štéty, so isyn pale reka (len'): “Ramánjo pe saré viéki. Lyl, savó bičhadé tumé aménge, gindlé saro, lav pir lav, angíl mánde. I me dyjom priphenybén, i kerdé rodyiben, i lathné, so dro dová fóro ĥaratuné beršéndyr manušá terdjonas proti kral'jénde, ĥazdenas bunty i xolý dre manušénde. I odój sys adiáke-pac' králja dre zor pe Jerusalimo, savé xulaindle pir saré provincyi pal Reka, i myto, i namirja, i taksa pleskirde lénge. Akaná priphenen manušénge te pirijačen te kerén butý, sob (kaj) jone te na dokeren dová fóro angíl dová, syr javéla priphenybén mándyr. Dykhén rakhibnýtkes, sob (kaj) te na denpe dukhá, sóske bibahtiake te javél butedýr te kerél doš kralíske?” I, ake, kiéli lyleskiri kopija, savó čhindiá Artaksiérkso, progindle angíl Riehumoste, Šymšajoste, lylá-čhinybnaskireste, i angíl léngire malende pir butý, jone giné sýges ke Jerusalimo proti Judénde, i zoralé maribnytkoné vastésa terdiakirde léngiri butý. Adiáke terdijá butý dro Kher (Khangirí) Devléskiro, Savó isyn dro Jerusalimo i daja butý sys terdy ke javír berš, syr lyjá te kralinél Darijo, králi Piersijakiro.” Tén'ci proróko Agiéjo (Xagajo), i proróko Zahárija, čhavó Idoskiro, rakirdé Judénge, so javéla angíl Devléskire Izrailjoskire lavéstyr, Savó sys pe lénde. I o Zorovavieljo, čhavó Šaltiloskiro, i Johošuá (Isúso), čhavó Jozadakoskiro, giné i lyné te kerén butý pe Kher (Khangirí) Devléskiro, savó isyn dro Jerusalimo, i sys lénca proróki Devléskire, savé pomoginenas lénge. Dro do sámo cýro (časo) javné Fafnaje [Tatenajo-ju.o.], themeskiro barydyró pe doiá rig okrugakiri i Šefar-Boznajo, i léngire malá pir butý, i phučnepe léndyr: “Kon priphendiá tuménge te kerén Kher (Khangirí), i te dokončynen dalé vánty?” Tedy, syr trej, ame phendiam [phuciam-ju.o.] manušéngire lavá, savé kerénas butý pe kher. Ne jakhá Devléskire sys pe Judéngire phurydyrende, i Piersijakire raja na začhude len te terdiakiren léngiri butý angíl dová, syr réndo javdiá ke Darijo, i tén'či angíl dová, syr jone doresné otphenybén lylesa pe davá réndo Ake, isyn lyleskiri kopija, savó bičhadé o Fafnajo, themeskiro barydyró pe doiá rig okrugakiri (pašýl Reka Jevfrato), i o Šefar-Boznajo, i léngire malá pir butý, kralíske Darijoske. Jone bičhadé davá dophenybnytko lyl léske, dro davá lyl jone čhindlé adiáke: “Te javél ramánjo (miro) Kralíske Darijoske dro saró! Te javél džindló Kralíske, so ame gijam dre okruga Judéia, ke Kher (Khangirí), Baré Devléskiro, savó obkerelape pharé barénca, i kaštuno matierialo čhuvélape dre vánty, i daja butý kerélape kučes, i džála ke mištypén dre léngire vastá. Tén'ci ame phutiampe kodolé phurydyrendyr, i ame adiáke phendiam lénge: “Kon priphendiá tuménge te kerén davá Kher (Khangirí) i te dokončynen dalé vánty?” Ame adiáke-pac' phuciampe léndyr pal léngire lavá, sob (kaj) aménge te začhinas lavá manušéngire, savé sys barydyrá pe lénde. Ake, so jone phendlé dro otphenybén: “Ame sam pishárja Devléskire, Savó isyn pe bolybén i pe phuv, i ame kerása nevés kher, savó čhudé but beršá pale, savó čhudiá baró králi Izrailjoskiro i jov dokončyndia les. Ne paló dová, syr amaré dadá xoliakirde Devlés bolybnaskires, Jov vydyja len dro Navuhodonosoroskiro vast, savó sys králi Vavilonóskiro, kon rozmardiá pe koterá davá Kher (Khangirí) i lydžijá manušén krig ke Vavilóno. Ne pe pérvo berš Kiraskiro, kralískiro Vavilonóskiro, o králi Kira dyjá uphenybén te kerél davá Kher (Khangirí) Devléskiro. I adiáke-pac' khoré (sasúdy) suvnakuné i rupuvé kheréstyr Devleskirestyr, savé o Navuhodonosóro lyjá kheréstyr Devleskirestyr, savó sys dro Jerusalimo, i savé jov jandiá dro Vavilóno-kodolé sama khoré o Králi Kira lyjá khangirjátyr dro Vavilóno; i jone sys dyné jekhe manušéske pir lav Šešbacaro, savés králi čhudiá barydyrésa pe doiá okruga. I phendiá králi léske: “Le kadalé khoré, džá i lýdža len dre Khangirí, so isyn dro Jerusalimo, i kerén nevés Kher (Khangirí) Devléskiro pe léskiro štéto.” Tén'ci odová sámo Šešbacaro javdiá i čhudiá fundámiento tel Kher (Khangirí) Devléskiro, savó isyn dro Jerusalimo; i dolé poratyr ke akaná keréna Kher (Khangirí) Devléskiro, i jov nane iščo (inké) dokončyndlo.” I akaná paldavá, kóli davá te javél mištó vaš kralíske, mek te rodén dre piralý, saví isyn dro kralískiro kher, odój dro Vavilóno, ci davá isyn čačó, so o králi Kira priphendiá te kerén davá Kher (Khangirí) Devléskiro ke Jerusalimo, i, kóli te javél lačhó kralíske, te bičhavel Léskiro lav aménge pal davá réndo. Tén'ci o králi Darijo dyjá priphenybén i obrodyne kher, dro savó rakhne arhivna svitki, kaj sys čhudé kučipena ke Vavilóno. I dro Aktabano, pe štéto, savó sys dre Midijakiri okruga, lathné dasavo začhinyben dro svítko: “Pe pérvo berš, syr o Kira jaciá kralísa, jov dyjá priphenybén pal Kher (Khangirí) Devléskiro ke Jerusalimo: “Mek te kerén Kher (Khangirí) Devléskiro pe štéto, ke savó jone janéna svénta dyibená; i mek lačhé fundamienty te čhuvén pir kadasavé baripena: léskiro vučipén te javél šovdešá kuniá, i léskiro buĥlypén te javél šovdešá kuniá; te javén trin riady baré barendyr, i jekh riado kaštune matier'ialostyr, sob (kaj) te pleskiren pal davá kralískire kheréstyr. I adiáke-pac' suvnakuné i rupuvé khoré Kheréstyr Devleskirestyr, savé o Navuhodonosóro lyjá Kheréstyr i jandiá ke Vavilóno, sob (kaj) te otdén pale i te janén pale dro kher, savó isyn ke Jerusalimo, pe léngiro štéto i, sob (kaj) te čhuvén pale len dro Kher (Khangirí) Devléskiro. Akaná, paldavá, Fafnajo (Fafnajo), themeskiro barydyró pe okruga pal Reka, i Šefar-Boznajo, i tumaré dromeskire malá Piérsy, savé isyn pale Reka, rikirenpe durál odothýr. Mek butý pe Kher (Khangirí) Devléskiro te kerélpe duredýr; mek Judéngire-themeskiro šeraló i Judéngire phurydyrá te čhuvén davá Kher (Khangirí) Devléskiro pe léskiro štéto. I me adiáke-pac' davá priphenybén pal dová, so tuménge trej te kerén vaš Judéngire phurydyrenge pe Kher (Khangirí) Devléskiro: mek te pleskiren pal daja butý kralískire bažyniatyr, saví skedelape manušéndyr dre provincyja pale Reka, davá jekhátyr trej te den kodolé manušénge, sob (kaj) te na terdjol daja butý. I sob (kaj) te den adákicy, kicý trej – terné guruvorén, bakrén i bakrorén te janén céla xačkiribna Devléske bolybnaskireske, i givny (parnó giv), i lond, i mol (vino). Maslinitko dzet, syr phenéna rašaja, savé isyn dro Jerusalimo, sob (kaj) te den lénge so dyvés bi zarikiribnaskiro, sob (kaj) jone mogindlé te janén gudlé-khandypnaskire svénta dyibená Devléske bolybnaskireske, i sob (kaj) jone te mangénpe Devléske pal kralískiro sastypen i léskire-čhavéngiro. Me adiáke-pac' priphendjom, so, kóli vari-kon paruvela miro čhindló priphenybén, mek te vytyrden berno léskire kheréstyr, i te čhuvén les upré, i mek te kerén dalé kheréstyr gruda phagirdé-koterengiri. I mek Devél, Savó kerdiá adiáke, sob (kaj) Léskiro Lav te jačélpe odój, te ravel telé kažnoné kralís ci manušén, kóli vari-kon léndyr te ĥazdel angíl vast te paruvel ci te phagirel daja Khangirí, saví isyn dro Jerusalimo. Me, Darijo, dyjom davá priphenybnytko statúto, te kerén dobusóves (kučes) saró pir léste”.” Tén'ci o Fafenajo, themeskiro barydyró, pir okruga, so sys pale reka (len'), o Šefar-Boznajo, i léngire malá dobusoves kerdé saró pir dová, so bičhadiá te kerén králi Darijo. Adiáke kerdé butý phurydyrá Judéngire, i lénge udelaspe ke mištypén pir Agiejoskiro angilphenybén, kon sys proróko, i syr angilphenelas o Zahárija, čhavó Idoskiro. I jone kerdé butý i končyndle la, syr i priphendiá Devél Izrailjoskiro, i syr priphendle Kira, Darijo, Artaksierkso-králja Piersijakire. I ake, Kher (Khangirí) sys dokerdo pe tríto dyvés dro čhon Adaro, savó sys dro šóvto berš, syr lyjá te kralinél králi Darijo. I čhavé Izrailjoskire, rašaja i Lievíty, i saré javír manušá, kon risijá plienóstyr, svenkindle radymása, so sys obsvencyndlo Kher (Khangirí) Devléskiro. I jandlé jone svénta dyibená, kiéli svencynenas Kher (Khangirí) Devléskiro šel guruva, dujšelá bakré štaršelá bakrore, dešudúj buzne (kozly), syr svénto dyibén pal Izrailjo pir dová, so isyn dešudúj ródycy Izrailjoskire. I jone čhudé rašán pir léngire-butiakire štéty i Lievitén pir butiá dre léngire grupy te kerén butý vaš Devléske dro Jerusalimo, syr čhindló dre Mojzaskiri lylvarí. I svenkindle Patradí čhavé Judéngire, kon sys dro pliéno, pe dešuštarto dyvés dro pérvo čhon. Pal-dová so e rašaja i Lievíty žužakirdé (čystindle) pes so ke jékh manúš: jone saré sys žužé. I jone zamardé Patraditkone bakrorén pal manušéngire čhavénde, savé sys dro pliéno, pal léngire pšalénde, pal rašande, i pal péste. I xané čhavé Izrailjoskire, savé risiné plienóstyr, khetané saré odolenca, kon durija vaš péske magiribnastyr, savó gijá Najudytkoné nacyiéndyr pe phuv, sob (kaj) te rodén drieván Ras-Devlés, Devlés Izrailjoskires. I jone kerdé opriesnokengiro Svénko pe eftá dyvesá radymása, pal-dová so Raj Devél obradyndia len, i Jov riskirdiá iló kralískiro Asirijatyr ke jone, te zoraliakiren léngire vastá dre butý pe Kher (Khangirí) Devléskiro, Devléskire Izrailjoskiro. Akaná, paló (poslie) vari-kicý beršá, syr davá kerdiápe, kiéli kralindia Artaksiérkso, králi Piersijakiro, o Jézdra, čhavó Seraijaskiro, čhavó Azarijaskiro, čhavó Xielkijakiro, čhavó Šalumoskiro, čhavó Sadokoskiro, čhavó Ahituvoskiro, čhavó Amarijaskiro, čhavó Azarijaskiro, čhavó Marajofoskiro, čhavó Zaharijaskiro, čhavó Uzijaskiro, čhavó Bukijoskiro, čhavó Abišujoskiro, čhavó Finiehasoskiro, čhavó Jelizaroskiro, čhavó Aronoskiro, kon sys barydyr rašáj dová sámo Jézdra gijá Vavilonóstyr. Jov sys sykliakirdo syr lylvarítko pir Mojzáskiro Zakóno, savó Raj Devél Izrailjoskiro dyjá. O králi dyjá saró léske, so jov mangdiá, pir dová, so Ráskire-Devléskiro vast sys pe léste. I giné lésa vari-savé čhavé Izrailjoskire, i rašaja, i Lievíty, i bagaibnaskire, i stregarja paš-vudarengire, i Niefiniéi dro Jerusalimo dre eftáto berš, syr kralindia Artaksiérkso. I o Jézdra javdiá dro Jerusalimo dro pándžto čhon, dro eftáto (bitrinéngiro deš) berš kralískiro. Pal-dová so jov dyjape dro drom Vavilonóstyr pe pérvo dyvés dro pándžto čhon, i jov javdiá dro Jerusalimo pe pérvo dyvés pe pérvo čhon, pir dová so lačhó vast Devléskiro sys pe léste. Pal-dová so o Jézdra riskirdiá péskiro iló te sykljol Zakóno Devléskiro, i te rikirelpe ke Zakóno, te sykliakirél dro Izrailjo. Davá isyn kopija lyleskiri, savó dyjá králi Artaksiérkso Jezdraske, rašáske, kon sys lylvarítko, kon sykliakirdiá lavenge Ráskire-Devléskire priphenybendyr (zapoviédiendyr) i léskire zakonendyr dro Izrailjo: “Artaksierksostyr, savó isyn králi kral'jéndyr, Jezdraske rašáske, savó isyn lylvarítko pir Zakóno Devléskire bolybnáskiro: ramánjo (miro) tuménge akaná. Me priphenava, sob (kaj) saré odolé, savé isyn manušá Izrailjoskire, i rašaja, i Lievíty dro miro kralítko them, kon kaméla pir péskiri vólia te džal dro Jerusalimo, -mek jone te džán túsa. I pal-dová, so tut bičhavéla králi i léskire eftá soviétniki (junkary), sob (kaj) te rosphučen pal réndy dre Judéia i dro Jerusalimo pir tyré Devléskiro Zakóno, saví kopija isyn dro tyró vast; i sob (kaj) te janes rup i suvnakái, savé o králi i léskire junkary dyné péskire iléstyr Devléske Izrailjoskireske, Saveskiro kher isyn ke Jerusalimo; i saró rup, i suvnakái, so tumé moginéna te lathén dre okruga Vavilonoskiri, na giný svénta dyibená, savé dyné péskire iléstyr e manušá, i rašaja, kon janéla péskire iléstyr vaš Kher (Khangirí) léngire Devléskiro ke Jerusalimo, akaná paldavá kin sýges pe dalé lové guruvén, bakrén i bakrorén khetané léngire sventoné dyibnasa givestyr i léngire thadune sventoné dyibnasa, i jan len pe altárjo dro Kher (Khangirí) tumaré Devléskiro ke Jerusalimo. I so javéla lačhés pir tyrí godý i tyré-pšaleskiri te kerén odolé rupésa i suvnakása, so jačélape, kerén pir vólia tumaré Devléskiri. I khoré (sasúdy), so dyné túke, sob (kaj) lénca te dynarinén dro Kher (Khangirí) Devléskiro, jan angíl Devléste Jerusalimoskireste. I dová javír, so javéla trej vaš Kher (Khangirí) tyré Devléskiro, i so tu janesa pir Péskiri godý, otdé/pleskir piraliatyr dro kher Kralískiro. I me, králi Artaksiérkso, akaná davá priphenybén saré rakhibnaskirenge pe piralý, savé isyn pale reka (len'), so kóli Jezdraske, kon isyn rašáj i lylvarítko pir Zakóno Devléskiro, Savó isyn pe bolybén, javéla vari-so trej, sob (kaj) te den léske saró, ke jekh šel talánty rup, ke jekh šel miéry parnó giv ke jekh šel baty mol (vino), ke jekh šel baty olivítko dzet, i lond bi mierakiro. So te na priphenel Devél bolybnáskiro, sob (kaj) te kerén syr trej vaš Kher (Khangirí) Devléskiro, Savó isyn pe bolybén. Vaš odová, sob (kaj) te na javél Léskiri bari xolý pe kralískiri them, i léskire čhavénde. Adiáke-pac' ame phenása tuménge, so davá javéla na pir zakóno te začhuven te pleskiren namirja, myto i taksa rašán, Lievitén, bagaibnaskiren, stregar'jén pašvudarengiren, Niefiniején, ci vari-savé dynar'jén dro Kher (Khangirí) Devléskiro. I tu, Jézdra, pir godypén, so Devél dyjá túke, čhuv dre zor barydyrén [baré sendar'jén-ju.o.], sendar'jén, savé moginénas te sendiakiren pir čačipén saré manušén, kon isyn dre okruga pale reka (len'), sarén kadasaven, kon džinéla zakóny tumaré Devléskire, i sykliakirén odolén, savé na džinéna len. Kóli vari-kon na javéla te kerél saró pir Zakóno tumaré Devléskiro, i pir zakóno kralískiro, mek te sendiakiren pharés les, ci pe meribén, ci te tradén les javrí themestyr (stranatyr), ci pe konfiskacyja majonkoske, ci dro štaribén.” “Mek te javél bahtiakirdó Raj Devél, Devél amaré-dadéngiro, Savó čhudiá kadasavi duma dro kralískiro iló, sob (kaj) te šukarjakiren Kher (Khangirí) Ráskire-Devléskiro, savó isyn ke Jerusalimo; I Savó riskirdiá lačhé-ilýtkima ke me angíl kralíste i léskire sovietnikende (junkarende), i angíl zor thagar'jénde kralískire. I me, Jézdra, jacjom zoraledýr dro dúho (fáno), adiáke syr vast Ráskire-Devléskiro, miré Devléskiro sys pe mánde, i me skedyjom saré Izrailjoskire šeralé muršén, sob (kaj) jone te džán mánca.” Ake, i syn šeralé pe stréčy /léngire-dadengíre ródy (pokolienii), i, ake, isyn začhinyben pal ródo dre rodengiri matrija (lylvarí pal ródo) pal kodolende, kon gijá mánca Vavilonóstyr, kiéli kralindia o králi Artaksiérkso: o Girsono [Gierša-ju.o.], Finhasoskire čhavéndyr; o Danijéljo, Ifamaroskire čhavéndyr, o Xatušo, Davidóskire čhavéndyr; o Zahárija, Šehanijaskire, Parošoskire čhavéndyr, i lésa sys šel te pandždešá muršá, savé sys začhindlé dre rodengiri matrija; o El'jegoenajo, čhavó Zerahiiaskiro, Pahav-Moavengire čhavéndyr, i lésa sys duj šelá muršá; o čhavó Jahaziiloskiro, Šeha-nijaskiro čhavéndyr, i lésa sys trin šelá muršá; o Jeviédo, čhavó Ionafanoskiro, Adinoskire čhavéndyr, i lésa sys pandždešá muršá; o Iiešaija, čhavó Afalijaskiro, Jelamoskire čhavéndyr i lésa sys eftadešá muršá; Zevadeja, čhavó Mihailoskiro, Šefatijaskire čhavéndyr, i lésa sys ohtodešá muršá; o Ovadija, čhavó Jehiieljoskiro, Iavoskire čhavéndyr, i lésa sys dujšelá te dešuohto muršá; o čhavó Šelomifoskiro, čhavó Jozafajoskiro, i lésa sys šel te ohtodešá muršá; o Zahárija, čhavó Bievajoskiro, Biebajoskire čhavéndyr, i lésa sys beš te ohtó muršá; o Iohanano, čhavó Gakatanoskiro, Azgadoskire čhavéndyr, i lésa sys šel te deš muršá; Adonikamoskire čhavéndyr – palatuné, koneskire lavá isyn: o Jelifieliéto, o Iieiljo, i o Šemaja – i lénca sys šovdešá muršá; Bigvajoskire, Ufajoskire, i Zabudoskire čhavéndyr, i lénca sys eftadešá muršá: I me, Jézdra, skedyjom len khetané pašýl reka (len'), saví thadéla dre Agava; i odój ame rosčhudiam taboro (lod) pe trin dyvesá: i me obdykhcjom saré manušén i rašán, i me na lathjom nijekhes Lievijoskire čhavéndyr. Tén'ci me bičhadjom, sob (kaj) te kharén Jeliezeros, Arieljos, Šemajas, Binafanos, Jarivos, Elnafanos, Nafanos, Zaharijas, i Miešulamos, savé sys šeralé manušá; i te kharén Ioiarifos, i Elnafanos, savé sys baré-godiakire manušá. I me bičhadjom len miré lavésa ke Ido, savó sys šeraló pir štéto Kasifija, i me phendjom lénge, so te phenén Idoske, i léskire pšalénge Niefiniejénge pe štéto Kasifija, sob (kaj) jone te janén pomogibnaskiren rašaskiren te dynarinén dro Kher (Khangirí), amaró Devléskiro. Adiáke, syr amaré-Devléskiro lačhó vast sys pe aménde, to jone jandlé aménge baré – godiakire manušés Mahlijaskire čhavéndyr, čhavés Lievijaskires, čhavés Izrailjoskires pir lav Šeriévija; i léskire čhavénca, i léskire pšalénca, dešuohto manušá; i Xašavijas, i lésa Iiešaijas, Merariskire čhavéndyr, léskire pšalén i léskire čhavén, biš manušá; i adiáke-pac' Niefiniejéndyr, konés o Davído i šeralé čhudé dre zor te dynarinén (te služynen) Lieviténge, duj šelá te biš Niefiniéi: kažno manúš léndyr sys vykhardo pir lav. I phendjom me zoralés angíl manušénde, sob (kaj) te postinas pašýl reka (len') Agava, sob (kaj) te tykniakiras pes dre amaré ile angíl amaré Devléste, te vymangas Léstyr bahtaló drom aménge i amaré tyknenge, i vaš saró amaró mištypén. Pal-dová so me ladžandyjom te mangav kralístyr stréga xaladendyr i uklistengire ruldéndyr te rakhén amen dromésa proti vergénde, pal-dová so ame phendiam kralíske, rakirí: “Amaré-Devléskiro vast isyn vaš lačhipén sarengiro, kon rodéla Les, ne Léskiri zor i Léskiro mižehipen peréna pe odolénde, savé mekéna Les.” I ame postindiam i ame mangdiam Les, i Jov otphendiá pe amaró mangipén. I me vykedyjom dešudujen barydyrén pe rašande Šerievijas, i Xašavijas, i deš pšalén lengiren – i me ubladjom (otvažyndjom) lénge rup, suvnakái, i xor khoré (sasúdy), svénta dyibená vaš Kher (Khangirí) Devléskiro, so jandlé králi, i léskire junkary (sovietniki), i léskire thagárja (kniázi), i saré manušá Izrailjostyr, kon sys. I me ubladjom dre léngire vastá šov šelá te pandždešá talánty rup, rupuvé khoré (sasúdy), savé važyndle šel talánty, jékh talanto suvnakái, biš suvnakuné xor tahtaja (čašy), so sys mol jekh bar drahmy, duj khoré šukarone xarkomátyr, saví xačolas, i sys drógo syr suvnakái. I me phendjom lénge: “Tumé san vysvencyndle Ráske-Devléske; i khoré adiáke-pac' isyn obsvencyndle; i rup i suvnakái, so jandlé iléstyr Ráske-Devléske, Devléske tumaré dadengireske. Dykhén ciamkes (duje jakhénca) i rakhén len angíl dová, syr tumé ublavena (otvažynena) len angíl šeralende rašangirende, Lievitende, i angíl šeralende pe stréčy /tumaré-dadengíre ródy (pokolienii) Izrailjostyr dro Jerusalimo, dre piralýtka komóry dro Kher (Khangirí) Ráskire-Devléskiro.” I rašaja i Lievíty doresné rup, suvnakái, i khoré pir ublaiben, sob (kaj) te janén len ke Jerusalimo dre amaré Devléskiro Kher (Khangirí). Tén'ci ame dyjampe dro drom rekátyr (leniátyr) Agavatyr pe dešudujto dyvés dro pérvo čhon, te džas pe Jerusalimo. I sys vast Devléskiro pe aménde, i Jov zrakhelas amen vergoskire vastéstyr, i kadasavé manušéndyr, savé podrakhenas te zamarén pe drom. I ame javdiám dro Jerusalimo i jaciampe odój trin dyvesá. I pe štárto dyvés rup, suvnakái, i khoré (sasúdy) sys ublade pe ubladýtka (viesy) Mieriemofoskire vastésa, kon sys čhavó rašaskire-Urijaskiro; i sys lésa Jelizáro (Jelieazaro), čhavó Finiehasoskiro, i sys lénca Lievíty: Jozavado, čhavó Jošuaskiro, Noadija, čhavó Vinujoskiro; Saró sys pirigindlo, piriublado, i saró pharipén (viéso) dre talánty sys začhindló pe štéto adái. E čhavé kodolengire, koneskiren daden lydžiné dro pliéno, savé javné plienóstyr, jandlé céla shačkiribnaskire svénta dyibená Izrailjoskire Devléske: dešudúj guruvén pal saró Izrailjo, jeniá deša šov bakré, eftadešá eftá bakrore i dešudúj buzne (kozly) syr svénto dyibén pal grého. Saró davá sys celones te xačkirén syr svénto dyibén Ráske-Devléske. I jone podyne kralískire priphenybená kralískire baredyrenge dre okruga, i šeralé range dre doiá phuv, so isyn pe daja rig rekakiri (leniakiri). I jone kerdé patýv manušénge i Kheréske (Khangirjake) Devleskireske. Akaná, kiéli saré dalé réndy sys kerdé, javné ke me, ke Jézdra, e lydžaibnáskire (šeré manušá), pheny: “Izrailjoskire manušá, i rašaja, i Lievíty, na mekné péskire Najudytkoné manušén khetané léngire džungalypnasa (brytkimasa): Xananiejéndyr Xietiejendyr, Fierieziejendyr, Jevusiejéndyr, Amonitianendyr, Moavitianendyr, Jegiptianendyr i Amoriejéndyr. Jone lyné péske léngire čhajén i vaš péskire čhavénge, i svénto rat dre Devléskiro ródo zmiešyndiape javire-manušytkoné nacyiénca pe dolé phuvjá, i čačes, thagar'jéngiro i theméskire-barydyrengiro vast lydžijá javirén ke čoripén.” I kiéli me šundjom davá, to me kuscjom mirí ídia, i šalníro (pal'to), i me riskirdjom balá miré šerestyr i čhorendyr (brodatyr), i me sómas beštó dre bari dar. Tén'ci kažno manúš, kon izdrandyja lavéstyr Izrailjoskire Devléstyr, pal-dová so napatiaibnytka sys odolé, savé sys dro pliéno, i me sómas beštó dre bari dar angíl dová, syr jandlé bel'veliakiro svénto dyibén. Pe bel'veliakiro svénto dyibén me uštyjom postostyr, i dre roskušny ídia i šalniro, me pyjom pe čangá i dind'kirdjom miré vastá ke Raj Devél, miro Devél, i phendjom me: “O miro Dévla! Me ladžava i mánge nane murškipen te ĥazdav miro muj ke Tu, miro Dévla; pal-dová so amaró čoripén ĥazdyjápe vučedýr amaré šerendyr, i amarí bang barija ke bolybén. Amaré-dadéskire dyveséndyr ke davá dyvés aménde isyn bari bang. Pal amaró čoripén ame, amaré králja, amaré rašaja, pyjam dre Kral'jéngire vastá javire themendyr, kon tel kurtála, kon dro pliéno, konés rosčorde, konés ladžakirdé, syr isyn adadyvés. I, akaná, pe nabaró cýro (časo) amaró Raj Devél, amaró Devél sykadiá láska, so Jov dyjá aménge, jačkirdé manušénge, te jačaspe džidé, i so Jov dyjá aménge bidaripnaskiro štéto te skedas zor pe Léskiro svénto štéto, sob (kaj) Jov, amaró Devél, moginelas te del dud (sviéto) amaré jakhenge, sob (kaj) te del aménge nábut te otdžidjovav dre amarí navolia. Na dykhí pe dová, so ame sam pishárja, saroiékh Jov, amaró Devél, na mekciá amen dre amarí navolia; ne Jov riskirdiá ke ame láska Piersijakire Kral'jéndyr, sob (kaj) aménge te otdžidjovas te ĥazdas Kher (Khangirí), amaré Devléskiro, te podkeras lákire ruíny, i te del aménge vánta te zrakhaspe dre Judéia i dro Jerusalimo. I akaná, so aménge te phenas, Dévla amaró, pal saró davá? Pal dová, so ame ž mekciam Tyré uphenybená, savé Tu priphendian aménge pir Tyré prorokénde, pheny: ‘Phuv, pe saví tumé zadžána te len péske la, isyn magirdy džungalypnasa, savjá magirdé javír manušýtka nácyi léngire nakuč rendénca, savénca jone pherdiakirde la jekhe jagoróstyr (krajostyr) ke javír pal léngiro biladžakuno keriben.” Tedy phendián ža Tu pir Tyré prorokénde, sob (kaj) ame te na das amaré čhajén syr romnién pal lénde, i, sob (kaj) ame te na las ame léngire čhajén vaš amaré čhavénge. Sob (kaj) ame nikieli i te na rodas léngiro ramánjo (miro) ci léngiro lačhipén vaš dová, sob (kaj) ame moginasas te javas zoralé, i te čaliakiraspe lačhipnása léngire phuvjátyr, i te jačkiras la syr meknó mištypén amaré čhavénge pe saré viéki.’ I paló saró (poslie) davá, so javdiá pe aménde pal saré amaré čoré réndy, i pal sarí amarí bari bang, dykhí, so Tu, Dévla amaró, sendiakirdian amen na adiáke pharés, kicý ame sámas bangé, i Tu zrakhcián aménge adákicy manušén, – Naúšto (nieuželi) ame nevéstyr javása te na kandas Tyré priphenybená, i javása te khetaniakiraspe kadalé nakučone manušytkoné nacyiénca? Ci na xoliasosa Tu pe aménde pe adákicy, so Tu xasiakiresa amen, sob (kaj) nijékh te na zrakhelpe, i nikón te na jačélpe džidó? O, Rajo Dévla! Dévla Izrailjoskiro, Tu san čačipnáskiro! Tu ž jačkirdian amen te dživás, syr davá isyn ke adadyvés. Ake, ame sam angíl Túte amaré čoripnasa; pal-dová so pal dová saró aménge naštý te terdjovas angíl Túte.” Akaná, syr o Jézdra mangelaspe Devléske, i syr Jov pridžinelas léngire gréhi, roví i peri šerésa angíl Kher (Khangirí) Devléskiro drieván but manušá skedynépe: muršá, džuvliá i bijaty Izrailjoskire, jone terdiné jekh pašýl jekhéste, jone adiáke-pac' rondlé kirkes. I o Šehanija, jekh čhavó Iiehiiloskiro, Jelamoskire čhavéndyr, otphenélas, i phendiá Jezdraske: “Ame kerdiám čoripén angíl amaré Devléste, i ame lyjam džuvlién péske Najudytkoné nacyiéndyr, savé sys čužoné-manušytkoné nacyiéndyr, ne akaná usajékh isyn nadiéia vaš Izrailjo dro davá réndo.” I akaná sčhuvasa Zaviéto amaré Devlésa, sob (kaj) te mekén krig saré džuvlién, i kodolén, kon bijándyja léndyr pir lav amaré Devléskiro i pir odolengire lavá, savé daréna amaré Devléskire priphenybnendyr, i mek te javél kerdó pir zakóno. Terdjov pe ĥerá! Pal-dová so kadavá réndo isyn dre tyré vastá: ame adiáke-pac' javása túsa. Rikirpe murškanés i ker davá.” Tén'ci terdijá pe ĥerá Jézdra i začhudia šeralen pe rašande, pe Lievitende, i pe saró Izrailjo te den sovláh, so jone keréna pir davá lav. I jone dyné sovláh. I terdijá pe ĥerá Jézdra angíl Kher (Khangirí) Devléskiro, i gijá dro kher Iohananoskiro, kon sys Jelijašyvoskiro čhavó. I kiéli jov sys odój, jov na xaja, i na pija, pal-dová so jov tugindia jasvénca pal odolengiri bang, savé sys dro pliéno. I phendlé jone daja zvies' (zan) zoralés angíl manušénde dre Judéia, i dro Jerusalimo sarénge, kon sys dro pliéno, sob (kaj) jone te kedenpe dro Jerusalimo, i so, kóli vari-kon na javéla pir trin dyvesá, to, sob (kaj) saró léskiro mištypén te javél konfiskovindlo pir lav thagar'jéndyr i phurydyrendyr, a khetanypen manušéngiro, kon sys dro pliéno, te čhuvél les javrí. I kedenape saré manušá Judejátyr i Vienjaminoskire phuvjátyr pal trin dyvesá. Davá sys dro jeniáto čhon, pe bišengiro dyvés dro dová čhon, i saré manušá sys bešté javrí pe foruný (plóšča) angíl Kher (Khangiri), Devléskiro, izdraindoj dalé bangipnastyr i baré bryšyndestyr. I Jézdra, o rašái, uštyjá i phendiá lénge: “Tumé kerdé napatiaibnytkes i tumé lyné péske džuvlién javire-theméskire nacyiéndyr, i dalésa tumé kerdé baredýr bang Izrailjoskiri. I akaná pridžinenpe angíl Raste-Devléste tumaré-dadengíre, i kerén pir Léskiri vólia. Durjakiren pes javire-manušytkoné nacyiéndyr i javire-theméskire džuvliéndyr.” I otphendiá saró léngiro skedyibén zoralé zaniása: “Čačó! Ame som bangé te kerás, syr tu phendiam. Ne isyn adákicy but manušá; i, ĥáda, isyn časo (cýro) te del zoraló bryšýnd, i davá naštý te terdjon javrí. Apríč davá, davá réndo na kerélape pal jekh ci duj dyvesá, pal-dová so ame sam adákicy but manušá, savé kerdé čoripén pir davá réndo. Mek akaná amaré barydyrá te terdjon pal sarénde, i mek odolé saré, kon lyjá javire-theméskire džuvlién pir amaré fórja, te javén ke uphendló časo, i te javén lénca phurydyrá kažnoné foróstyr, i te javén adiáke-pac' sendárja pe adákicy but angíl dová, syr bari xolý amaré Devléskiri te risjol améndyr pal davá réndo.” Féni (tóka) o Ionafáno, čhavó Asailoskiro, i o Jahzeija, čhavó Fihvaskiro, terdiné proti davá, i o Miešulamo, i o Lievito Šamfajo [Šabietajo-ju.o.], podrikirde len. I odolé, kon javdiá plienóstyr, kerdé adiáke. I o Jézdra, rašái, khetané šeralenca pe stréčy /léngire-dadengíre ródy (pokolienii), savé sys vykedyné pir dadengíre ródy (stréčy), kažno sys khardo pir lav. Pe pérvo dyvés dro déšto čhon bešné jone te vyphučen jékh javirestyr pal davá réndo. I pe pérvo dyvés dro pérvo čhon jone končyndle te phučenpe manušéndyr, kon lyjá péskire džuvlién javire-manušytkoné nacyiéndyr. I lathné maškír rašángire čhavénde kodolén, savé lyné džuvlién Najudytkoné nacyiéndyr: Isusóskire (Johošuaskire) čhavéndyr, kon sys Iosiedekoskiro čhavó, i léskire pšaléndyr: Maasiéia, Jelijezero, Jarivo i Giedalija. I jone dyné vastá syr sovláh, so bičhavena krig léngire džuvlién, i so jone janéna bakrés stadatyr syr léngiro svénto dyibén pal čoré réndy. I Imeroskire čhavéndyr: Xananijo i Zievadija; I Xarimoskire čhavéndyr: Maaseja, Jelija, Šemaija, Iiehiilo, i Uzija; Pašhuroskire čhavéndyr: Jelioenajo, Maasiéia, Ismailo, Nafanailo, Iozavado i Elasa. I Lievitendyr: Iozavado, Šymiéjo, Kielaija (jov adiáke-pac' sys Klita); Pafahiia, Juda, i Jelijezero. I bagaibnaskirendyr: Jelijašyvo. I paš-vudarengire stregar'jéndyr: Šalumo, i Tieliémo, i Urijo. I javír Izrailjoskirendyr: Parošoskire čhavéndyr: Ramaija, i Izija, i Malhiia, i Mijamino, i Jelizáro (Jelieazaro), i Malhiia, i Vienaija. I Jelamoskire čhavéndyr: Matfanija, Zahárija, Iiehieljo, i Avdijo, i Jeriemofo, i Jelija. I Zafuskire čhavéndyr: Jelioenajo, Jelijašyvo, Matfanija, i Iriemofo, i Zavado, i Aziza. I Bievajoskire čhavéndyr: Iohonano, Xananija, Zabvajo, i Aflajo. I Vanijoskire čhavéndyr: Miešulamo, Maluho, Adaja, Jašuvo, Šealo, i Iieramofo. I Pahaf-Moavoskire čhavéndyr: Adna, Xielalo, Vienaija, Maasiéia, Matfanija, Viesielieilo, Binujo, i Manásija. I Xarimoskire čhavéndyr: Jelijezero, Išyja, Malhiia, Šemaija, Simieono (Siemjono), Vieniamino, Maluho, Šemarija. I Xašumoskire čhavéndyr: Mafnajo, Mafafa, Zavado, Jelifieliéto, Jeriemajo, Manásija, i Šymiéjo. Vanijoskire čhavéndyr: Maadajo; Bienaija, Bidja, Kielugi; Vaneja, Mieriemofo, Jeliašyvo, Matfanija, Mafnajo, Jasajo, – Vanijo, Binujo, Šymiéjo; Šelemija, Nafano, Adaija; Mahnadbajo, Šašajo; Azarieljo, Šelemijagu, Šemarija; Šalumo, Amarija, i Joza (Iosifo); I Nievoskire čhavéndyr: Iieiljo, Matfija, Zavado, Zievina, Iajedajo, Ioeljo, i Bienaija. Saré kadalé lyné péske džuvlién javire-theméskire nacyiéndyr, i sys maškír lénde džuvliá, savénde sys bijaty (čhavoré). Lavá Nijemijaskire, Ahaliinoskire čhavéskire. Dro čhon Kisliev, dro bišto berš, sómas me ke Suzy, dro šerutno fóro [kralískiri felatin-ju.o.]. I javdiá o Xanani, jekh miré pšaléndyr, jov i vari-kicý manušá Judejátyr. I phucjompe me léndyr pal Judénde, savé jačnépe džidé plienóstyr, i pal Jerusalimo. I phendlé jone mánge: “Jačade manušá, savé jačné džidé plienóstyr, isyn odój, dro léngiro them, dre bari bída i dre napatyv; vánta Jerusalimóskiri isyn phagirdy, i pórty léskire isyn xačkirdé jagása. Syr me šundjom, me bescjom i zarondjom, i sómas me dre túga adákicy dyvesá, rikirdjom me bokhalo posto i mangdjompe angíl bolybnáskire Devléste, i rakiravas me: “Rajo Dévla, bolybnáskiro, Dévla baró i trašado, Savó rakhéla zavieto i láska ke saré, savénge Tu san drógo, i savé rikirna Tyré priphenybená! Te javén Tyré kaná i jakhá Tyré otkerde, sob (kaj) te šunés pátieri (molítva) Tyré pishariskiri, savjása me mangavpe angíl Túte akaná rat i dyvés pal Izrailjoskire čhavénde, Tyré pishar'jende, i priĥaljovavpe me dre gréhi Izrailjoskire čhavéngire, savénca kerdiám ame grého angíl Túte, griešyndiam – i me i miré-dadéskiro kher. Ame jaciám došalé angíl Túte, i na zrakhciam priphenybená i statúty (ustavy) i sykliakiribén, savé Tu priphendian o Mojzáske, Tyré pisharíske. Ne rípir lav, savó Tu dyján dro priphenybén Mojzáske, Tyré pisharíske, rakirí: “Kóli tumé te kerenpe prahar'jenca, to Me rosčhurdava te dživén tumen pir manušénde; a kóli risjona tumé ke Me, i léna te rakhén Miré priphenybená, i te kerén pir lénde, tén'či, mek te javén vytyrdyne ke bolybnytko jagóro (krajo), i odothýr Me skedáva tumen i lydžáva pe štéto, savó Me vykedyjom, sob (kaj) te čhuvén odój Miro lav. Jone isyn Tyré pishárja i narodo Tyró, savó Tu vykindian Tyré baria zorjása i Tyré zoralé vastésa. Me mangáva zoralés Tut, Rajo Dévla! Te javél Tyró kan otkerdo te šunél pátieri (molítva) Tyré pishariskiro i pátieri Tyré pishar'jengiro, savé kaména te len šukaripén angíl Tyró Lav. I te des Tu lačhypen Tyré pisharíske akaná, i te des léske láska kadasavé manušéste. Me sómas moliákiro dyibnári (kučikári) kralíste. Dro čhon Nisano, dro bišto berš, syr kralindia Artaksierkso, sys angíl léste mol (vino). I me lyjom mol, i podyjom e kralíske, i, sykadyjá, so me na sómas smentno (skučno) angíl léste. Ne o králi phendiá mánge: “Palsó túte isyn smentno muj; na san tu nasvaló, davá nane, aj, ĥaljov, túga isyn pe iló?” Me drieván darandyjom, i phendjom kralíske: “Mek te dživél o králi dro viéko! Syr te na javél túga mre moske, kóli fóro, kher, kaj isyn dadengíre koplicy, dro čhučipen (zapustienijo), i pórty léskire xačkirdé jagása!” I phendiá mánge o králi: “So že tu kamesas?” Me pomangdjompe e Devléske bolybnaskireske, i phendjom me kralíske: “Kóli kralíske isyn mištó pe iló mándyr, i, kóli dro lačhipén isyn o pishári tyró angíl tyró muj, to bičháv man dre Judéia, dro fóro, kaj isyn koplicy miré dadengíre, sob (kaj) me te keráv riemónto lénge.” I phendiá mánge o králi i e králica, saví sys bešty pašýl léste: “Kicý dyvesá tyrdelape tyró drom, kiéli tu risjosa?” I lačhé voliatyr sys kralíske te bičhavel man paló davá, syr me dyjom léske časo. Me phendjom kralíske: “Kóli králi adiáke šukár kaméla, mek te del mánge lylá ke palé-rekítka barydyrá okrugéngire, sob (kaj) jone te den mánge otmekibnytko (propusko), paka me dodžava ke Judéia; i lyl ke Asafo, kralískiro vešytko rakhibnari, sob (kaj) jov te del mánge kaštá vaš pórta tvardymakiri (dizákiri), saví isyn pašýl Devléskiro Kher, i vaš vánta foritko, i vaš kher, dro savó me láva te dživáv.” I dyjá mánge králi adiáke, syr bahtiakirdó vast miré Devléskiro sys uprál mánde. I javdjom me ke pale-rekitka barydyrá pe okrugi, i otdyjom lénge kralískire lylá. Bičhadiá o králi mánca o xaladytkone barydyrén uklistenca. Kiéli šundiá davá o Sanavalato, o Xoronito i o Tovija, Amonytko pishári, to sys lénge drieván pharó, so javdiá o manúš, i isyn nasvaló paló lačhipén Izrailitkone čhavéngiro. I javdjom me dro Jerusalimo. I sómas me odothe trin dyvesá, i uštyjom me ratiákiro nabute manušénca, kaj sys pašýl mánde, i nikonéske na phendjom, so Miro Devél čhudiá mánge pe iló te keráv vaš Jerusalimo; murdales nisaves na sys mánca, féni kodová, pe savéste tradyjom me. I tradyjom peske me ratiákiro pirdál pórty Dolinakire angíl Drakonoskiri ĥanýng ke pórta Gnejoskiri, i obdykhcjom me, so Jerusalimóskire vánty sys phagirdé, i léskire pórty shačkirdé jagása. I podtradyjom me ke pórty Fontanoskire, i ke kralískiri kolban' (vodojomo), ne odój na sys štéto te prodžal o murdaleske, savó sys tel mánde. I me ĥazdyjompe palál piró teluny félda ratiákiro, i obdykhtjom vánta, i tradyí anglé iščo (inké), kaj sys Dolinakiri pórta, risijom pale. I e barydyrá na ĥalyné, karik me psiravas, ni so na odkeravas: ani Judénge, ani rašange, ani slavutnonenge, ani barydyrénge, ani javire butiar'jenge me ke časo ničí na odkeravas. I phendjom me lénge: “Tumé dykhéna bída, dre saví ame-da sam; Jerusalimo isyn čhučó i pórta léskiri xačkirdy jagása; javén, i kerasam vánta Jerusalimóskiri, i ame na javása dro anglypén dro dasavo obrakiriben.” I me rosphendjom lénge paló lačhó vast vaš mánge miré Devléskiro, i iščo (inké) lavá kralitka, savé jov rakirdiá mánge. I phendlé jone mánge: “Lasam ame te kerás”, – i zorjakirde léngire vastá pe davá lačhó réndo. Šuný davá, o Sanavalato, o Xoronito i o Tovija, Amonytko pishári, i o Giešemo, Aravitiano, sandlepe améndyr, i phutibnasa rakirénas: “Savó davá isyn réndo tumaró, savó tumé keréna? Xabis', tumé duminéna te buntuinen proti kralíste?” Me dyjom lénge otphenybén, i rakirdjom lénge: “O Devél bolybnáskiro, Jov šukár déla aménge, i ame, Léskire pishárja, lasam te kerás butý, tuménge nane ni kotér, ni pravo, ni ripiribén dro Jerusalimo. I uštyjá o Jelijašyvo, baró rašái, i e pšála léskire, i rašaja, i kerdé Bakrengiri pórta: jone obsvenciakirde la i čhudé vudará léngire, i vučardiatyr (bašniatyr) Miea ke/žýko vučardý Xananela obsvenciakirde len. I pašýl léste kerénas kherá Iierihoncy (Jerihonytka), pašýl lénde kerélas kherá o Zakhuro, Imrijoskiro čhavó. Mačhengire pórty kerénas manušá, savé bijandle dre Sienaja: jone učhakirde len, i čhudé vudará léngire, o klydyna léngire, i šybiery (zasovy) léngire. Pašýl lénde kerélas riemónto pe vánta o Mieriemofo, Urijaskiro čhavó, Gakocoskiro čhavó; pašýl lénde kerélas riemónto o Miešulamo, Bieriehiiaskiro čhavó, Miešyzabieloskiro čhavó; pašýl lénde kerélas riemónto o Sadoko, Baanaskiro čhavó; pašýl lénde kerénas riemónto Fiekoitka; ne sama slavutna léndyr na band'kirde péskiri men, sob (kaj) te kerél butý vaš péskire Ráske-Devléske. Pe Phurané pórty kerdé riemónto o Ioida, Pasieahoskiro čhavó, i o Miešulamo, Biesodijaskiro čhavó: jone učhakirde len, i čhudé léngire vudará, i klydyna, i šybiery léngire. Pašýl lénde kerélas riemónto o Mielatija Gavaonitianino, i o Iodono Mieronofostyr, Gavaonytkenca, i Micfitkonenca, savé sys tel zor pe pale-rekitka barydyréske okrugi. Pašýl léste kerélas riemónto o Uzilo, Xargaijaskiro čhavó, rupunari (sieriebrianiko), i pašýl léste kerélas riemónto o Xananija, Garakahimoskiro čhavó. I šukár neviakirde Jerusalimo ke buĥly vánta. Pašýl lénde kerélas riemónto o Riefaija, Xuraskiro čhavó, o barydyró pe paš-okruga Jerusalimóskiri. Pašýl lénde i proti péskiro kher kerélas riemónto o Iiedaija, Xarumafoskiro čhavó, i pašýl léste kerélas riemónto o Xatušo, Xašavnijaskiro čhavó. Pe vtoro štéto kerélas riemónto o Malhiia, Xarimoskiro čhavó, i o Xašuvo, Pahaf-Moavitko čhavó; jone-pac' kerénas riemónto pe Bovitko vučardý (bašnia). Pašýl lénde kerélas riemónto o Šalumo, Galohiešoskiro čhavó, barydyró pe paš-okruga Jerusalimóskiri, jov sys i léskire čhaja. Dolinakire portake kerélas riemónto o Xanuno, i e Zanoahoskire manušá: jone ĥazdyné len, i čhudé vudará léngire, i klydyna, i šybiery léngire, i iščo (inké) kerénas riemónto jone pe bar (tysjonco) kuniá vantakire ke pórta Gnejoskiri. Gnejoskire portake kerélas riemónto o Malhiia, Riehavoskiro čhavó, barydyró pe Biefkariemoskiri okruga: jov neviakirdia la i čhudiá vudará léngire, klydyna léngire, i šybiery léngire. Ĥanyngakire pórty kerélas riemónto o Šalumo Kolhoziejoskiro čhavó, barydyró pe Micfakiri okruga: jov ĥazdyjá len, i učhakirdiá len, i čhudiá vudará léngire, klydyna léngire, i šybiery léngire, – jov i kerélas riemónto pe vánta pašýl venderín (vodojomo) Sielaho, proti kralískiri únta (sado) ke ĥerunia (stupien'ki), kaj zmekenape Davidóskire foróstyr. Pal léste kerélas riemónto o Nijemíia, Azbukoskiro čhavó, barydyró pe paš-okruga Biefcuroskiri, ke koplíca Davidoskiri, i ke vyganady venderín (prudo), i ke kher muršengiro. Pal léste kerénas riemónto Lievíty: o Riehumo, Vanijaskiro čhavó; pašýl léste kerélas riemónto o Xašavija, barydyró pe paš-okruga Kieiljoskiri, paló péskiri okruga. Pal léste kerénas riemónto o pšála léngire: o Bavajo, Xienadadoskiro čhavó, barydyró pe Kieiljoskiri paš-okruga. I pašýl léste kerélas riemónto o Jeziero, Isusóskiro čhavó, barydyró pe Micfa, pe vtoro štéto, angíl syr te džas andré mardiárnia (oružejnia) pe venglo. Pal léste dobusóves (staratiel'nes) kerélas riemónto o Varuho, Zabvajoskiro čhavó, pe vtoro štéto, venglostyr ke vudará, ke Jelijašyvoskiro kher, baré-rašaskiro. Pal léste kerélas riemónto o Mieriemofo, Urijaskiro čhavó, Gakocoskiro čhavó, pe vtoro štéto, vudarendyr dre Jelijašyvoskiro kher ke jagóro pe Jelijašyvoskiro kher. Pal léste kerénas riemónto e rašaja, savé sys trusciál manušá dolostyr. Pal lénde kerélas riemónto o Vieniamino, i o Xašuvo, angíl léngiro kher; pal lénde kerélas riemónto o Azárija, Masiejoskiro čhavó, Ananijaskiro čhavó, pašýl péskiro kher. Pal léste kerélas riemónto o Binujo, Xienadadoskro čhavó, pe vtoro štéto, Azarijoskire kheréstyr ke venglo, ke zbangipen dromeskiro. Pal léste sys o Falalo, Uzajoskiro čhavó, angíl venglo i ke vučardý (bašnia), so vyterdjola kralískire-upratune kheréstyr, kaj isyn pašýl gréda (dvóro) tiemnicakiri (štaribnaskiri). Pal léste sys Fiedaija, Parošoskiro čhavó. E Niefiniei, xači, savé dživdé ke Ofieljo, kerdé riemónto anglal Panitka pórty ke vastóko i ke vytyrdyny vučardý. Pal lénde kerénas riemónto Fiekoitka manušá, pe vtoro štéto, štetóstyr angíl bari vytyrdyny vučardý ke Ofielytko vánta. Duredýr Grengire portendyr kerénas riemónto e rašaja, kažno mamúj péskiro kher. Pal lénde kerélas riemónto o Sadoko, Imieroskiro čhavó, mamúj péskiro kher, i pal léste kerélas riemónto o Šiemaija, Šiehanijaskiro čhavó, stregari pe vastokitko pórta. Pal léste kerélas riemónto o Xananija, Šieliemijaskiro čhavó, i Xanuno, šóvto čhavó Calafoskiro, pe vtoro štéto. Pal léste kerélas riemónto o Miešulamo, Bieriehiiaskiro čhavó, mamúj péskiri štúba. Pal léste kerélas riemónto o Malhiia, Gacorfijoskiro čhavó, ke kher Niefinieitko i bikibnar'jengiro, mamúj Gamifkadytka pórta i ke venglytka džiibnytka štúby. A maškír venglytka džiibnytka štúby ke Bakréngire pórty kerénas riemónto rupunarja i bikibnarja/kofarja (torgovcy). Kiéli šundiá o Sanavalato, so ame kerasas vánta, to xoliásyja jov i but túgi lyjá, i jov salaspe Judendyr; i rakirlas pašýl péskire pšalénde i pašýl Samaritka xaladénde, i phendiá: “So keréna adalé čororé Judei? Naúšto (nieuž) lénge dová domekena? Naúšto léna jone te janén svénto dyibén? Naúšto jone vari-kiéli skerna saró? Naúšto jone ĥazdéna prahostyr, otdžidiakirena xačkirdé bará?” O Tovija Amonitianino, kon sys pašýl léste, phendiá: “Mek te kerén lénge, džála lokhny (lisa), i phagiréla léngiri baruny vánta. Šun, amaró Dévla, dre saví napatyv ame sam, obriskir košybén léngiro pe léngiro šeró, otdé lénge dre napatyv pe plienytko phuv; i na učhakir léngire bizakonytka réndy, i, mek grého léngiro te na vykhoselape angíl Tyró muj, pal-dová so jone kerdé kirkipen butiar'jenge! Ake, adiáke ame kerdiám vánta, i sys sarí vánta ke paš vučipén lákiro. I e manušá kamenas te kerén butý mištés. Kiéli šundiá i Sanavalato, i o Tovija, i Aravitiani, i Amonitiani, i Azotiani, so Jerusalimóskire vánty (sciany) ĥazdyné isyn upredyr, so phagirdé štéty zakernape, to vaš lénge sys bari túga. Dorakirdepe jone saré khetané te džán maribnása pe Jerusalimo, i te phagiren telé les. I ame mangdiampe Devléske amareske, i čhudián proti lénde e stréga dyvesýtko i ratítko, sob (kaj) te zrakhaspe aménge léndyr. Ne Judei phendlé: “Tyknyja zor lydžaibnar'jengirende i šuma (musoro) isyn but; aménde nane zor te kerás vánta. Amaré vérgi rakirénas: “Na uĥaljona i na dykhéna, syr ame jekhátyr (srázu) zadžasam maškír lénde, i pirimarasam len, i terdiakirasam butý. Kiéli javénas Judejákire, savé dživdé pašýl lénde, i rakirénas aménge dešvar saré šteténdyr, so kodolé perna pe aménde: Tén'ci pe telutune štéty pašýl fóro, pale vánta, pe šuké štéty čhuvavas me o narodo pir dadéskiri-seménca (pliémi) kurtalenca lengirenca, e čhurdyibnytkone bustienca, i lukenca lengirenca. I obdykhcjom me, i uštyjom, i me phendjom e slavutnenge, i barydyrénge, i javire manušénge: “Na daran léndyr; ripirén Ras-Devlés bares i trašades i marénpe pale péskire pšalénde, pal péskire čhavénde, i pale čhajende, pal péskire džuvliende i pal péskire kherá.” Syr davá šundlé amaré vérgi (vrogi), so aménge sys džindlé léngire plany, to tén'či o Devél phagirdiá léngiro godypén, i saré ame risijam ke vánta, kažno ke péskiri butý. Kodolé dyveséstyr paš terné muršendyr mánde kerdé butý, i javír paš léndyr rikirenas čhurdyibnytka bustiá (kop'i), ščýty i luki i pancyri (laty); i barydyrá sys palál pal saró Judáskiro kher. Kon kerdiá vánta i kon janelas pharipena pe péste, savé čhudé pe lénde, jekhe vastésa jone kerdé butý, i javiresa rikirde o čhurdyibnytko bust (droto). Kažno butiar'jendyr rikirelas kurtála pe kustýk pašýl péste, i adiáke jone kerdé butý. Pašýl mánde sys o rogoskiro (trubačo). I me phendjom slavutnenge i barydyrénge i javire manušénge: butý isyn bari i buĥly, ame sam dur jekh javirestyr pir vánta; paldavá, katýr tumé šunéna zniko (zvuko) rogoskiro, dro dová štéto kedenpe ke ame; o Devél amaró javéla te marélpe pal aménde. Adiáke ame kerdiám butý; i paš améndyr rikirdia čhurdyibnytka bustiá (druty) zoricakire ĥazdypnastyr ke čergenengiro javiben. Uprál daléstyr, dro dová časo me phendjom manušénge, sob (kaj) jone te rat'kiren dro Jerusalimo saré péskire pishar'jénca, i te javén jone aménde ratiákiro pe stréga, a dyvesé pe butý. Ni-da me, ni-da miré pšála, ni-da dynárja miré, ni-da stregarja, savé sys mánca, na zlenas péstyr uribén léngiro, každoneste sys telo vast kurtála i paní. I kerdiápe bari gódla maškír manušénde, i e džuvliende léskire pe da péskire pšalénde Judeiende. Sys adasavé, savé rakirénas: “Amen, o čhavén amaren, i čhajén isyn but; i ame kamasas te doresas maró, i te čaliakiraspe i te dživás. Sys i kadasavé, savé rakirénas: “E féldy amaré, vinagradniki amaré, kherá amaré, ame dasas dro symadý (zalogo), sob (kaj) te uhtylas maró bokhátyr.” Sys i kadasavé, savé rakirénas: “Ame zalasam e rup dro dyibén, kralíske tel sumady pe amaré féldy i pe amaré vinagradniki; aménde isyn dasavé-pac' masá, savé masá isyn amaré pšalénde, i o čhavé amaré isyn kadasavé-pac', syr léngire čhavé isyn; ake, ame sam bangé te otdas amaren čhavén i amaren čhajén dre pishar'jende, i adákicy amaré čhajendyr uže isyn dre pisharima. Nane nisave lové te vykinen len dre amaré vastá; i féldy amaré i vinagradniki amaré isyn javirende.” Kiéli me šundjom léngiro godlytko rakiribén i dasavé lavá, me drieván xoliasyjom. Miro iló ĥazdyjápe xoliása, i me nartes (šylales) vyphendjom lačhé-rodoskirenge i barydyrénge, i phendjom lénge: “Tumé léna drieván but načačuno kófo tumaré pšaléndyr.” I khardjom me pe lénde baró skedyibén. I phendjom lénge: “Ame vykindiam amaré pšalén, Judejaskiren, savé sys bikindle narodenge, kicý aménde sys zor, a tumé, xači, biknena tumaré pšalén, i jone biknenape aménge?” Jone cytjonas (mol(ŭ)čynenas) i na lathné otphenybén. I me phendjom: “Našukar tumé adiáke keréna. Naúšto na dre dar Devléskire amareskiri tuménge trej te psirén, sob (kaj) te obdžan napatyv narodendyr, amaré vergéndyr: I me adiáke-pac', o pšála miré i dynárja, pašýl mánde dénas lénge dro vužlypén i rup i maró; jačkirasam lénge dlugo dasavo. Otdén pale lénge akaná léngire féldy, vinagradýtka i maslinitka unty (sady) léngire, i načačuno kófo moliátyr i olivitkone dzetestyr (jeliejo), pal savénde tumé dyné lénge dro dlugo.” I jone phendlé: “Otdasas pale i na lása léndyr te vytyrdas; i kerasam adiáke, syr tu rakirdian.” I me khardjom rašán, i phendjom lénge te den sovlahá, so jone adiáke kerna. I trinskirdjom me miro uribén i phendjom: “Mek te vytrinskirel o Devél kažnoné manušés, savó na zrikirla davá lav, – léskire kheréstyr i léskire fielatiniatyr, i te javél léste vytrinskirdo i čhučó!” I saró skedyibén phendiá: “Amín'.” I šardiam ame Devlés; i o narodo zrikirdia davá lav. Iščo (inké): dolé dyveséstyr, syr sómas me bičhadó syr barydyró léngiro pe okruga pe Judýtko phuv, bištone beršestyr ke/žýko trijánda javír berš ke králi Artaksierkso, saré dešudúj berš i me, i miré pšála na xajam maró barydyreskiro pe daja okruga. Javír barydyrá okrugakire, savé sys vagedyr (ĥaredyr) mándyr, pharjakirde o narodo, i lenas léndyr maró i mol (vino), apríč štardešá šékieli rupuvé; iščo (inké) e dynárja léngire xulaindle pe manušénde. Me-da na keravas adiáke piró dar Devléstyr. Adiáke-pac' butiá pe daja vánta me podrikiravas; i féldy ame na zakindiamas, i saré miré dynárja skedenaspe odorík pe butý. O Judejakiren i barydyrén sys pir šel i pandždešá pal miro skamínd, i iščo (inké) javénas ke ame truialytkone narodendyr. Ake, so sys kerado pe jekh dyvés: jekh guruv, šov vykedyme bakré i čirikliá keradjonas mánde; i dre deš dyvesá but sys piny mol (vino) vari-saví. Ne na dykhí pe davá, me na mangavas maró barydyreskiro pe okruga, adiáke syr pharó dynaribén sys paštó pe davá narodo. Rípir, miro Dévla, dro lačhipén mánge saró, so me kerdjom vaš dalé manušénge (narodoske)! Syr dogijá ke Sanavalatoskire kaná i ke Tovija i ke Giešemo Aravitianino, i ke saré javír amaré vérgi, so me neviakirdjom vánta, i so na jaciápe dre láte doša – ake, mek ke/žýko dová časo me iščo (inké) na čhudjom vudará dre pórta i, tén'či bičhadiá o Sanavalato i o Giešemo ke me te phenén: “Jav adarík, zdžasape dro jekh gav pe Onoskiro štéto.” Jone zadumindle te kerén mánge fuipén. Ne me bičhadjom ke jone e poslen te phenén: “Me som zalyno baré rendosa, me na mogináva te džav; i terdjolas by réndo, kóli me mekavas o réndo i džavas ke tumé.” Štar móly bičhavenas jone ke me kadasavé-pac' kharibnasa, i me odphenavas lénge adiáke-pac'. Tedy bičhadiá ke me o Sanavalato dro pándžto mólo péskire pisharís, savéste dro vast sys odkerdo lyl. Dro léste sys čhindló: “Vurniala malva narodende, i o Giešemo rakírla, so, xači, tu, i e Judejákire zadumindle te otperen, vaš kodová tu kerésa vánta, so kamésa te javes lénde kralísa, pir kodoia-pac' málva; o prorokén tu čhudián upré, sob (kaj) jone te godliakiren pal túte dro Jerusalimo i te rakirén: ‘Judejákiro králi!’ I dasavé lavá dodžana ke králi. Adiáke jav, obrakirasa khetané.” Ne me bičhadjom léske te phenén: “Niči na sys, pal so tu rakirésa – tu pridumindian saró péskire godiása.” Pal-dová saré jone trašavenas amen, dumini: “Obmekenape telé vastá léngire dalé rendostyr, i na vydžála jov”; ne me-dalésa butedýr zoraliakirdjom miré vastá. Javdjom me dro Šemaijáskiro kher, ke Delaijaskiro čhavó, Miegietavieloskiro čhavó, i jov phandia vudará i phendiá: “Javén dro Devléskiro Kher, andré Khangirí, phandasa pal péste saré Khangirjákire vudará, pal-dová so javéna te muliakirén tut, i javéna te muliakirén tut ratý.” Ne me phendjom: “Saštý (moginéla) te našél adasavó manúš, syr me som?” Saštý adasavó te javél, so, syr dasavo syr me som, te džal andré Khangirí (Svento-sventonengiro), sob (kaj) te jačél džidesa? Na džáva.” Me džindjom, so na Devél bičhadiá les, na dykhí, so jov rakirélas mánge syr o proróko, ne so les podkindle o Tovija, i o Sanavalato. Jov vaš dová sys podkindlo, sob (kaj) me te strahadjovav, i te keráv adiáke, i te perav dro grého, i sob (kaj) jone mogindlé te duminen fuipén pal mánde i te obrakiren man. Rípir, miro Dévla, Tovijas i o Sanavalatos pir dasavé léngire réndy, i iščo (inké) e proročica Noadija i javire prorokén, savé kamlé te trašaven man! Vánta sys kerdy dre biš te pándžto dyvés, dro čhon Jelulo, pal pandždešaduj dyvesá. Kiéli šunenas pal davá saré amaré vérgi, i dykhné davá saré narody, savé sys trusciál aménde, to jone but pyné dre léngire jakhá, i ĥalyné, so davá réndo sys kerdó amaresa Devlésa. Apríč dová dre dolé dyvesá slavutna Judei čhinenas but lylá, savé bičhavenas ke Tovija; lylá Tovijaskire džánas ke jone. Pal-dová so butdžine pe Judeitko them sys dre sovlahá lésa, pal dová so jov sys Šehanijaskiro ziatjo (džamutro), Arahoskiro čhavó, i léskiro čhavó Iohanano lyl pal péste čhajorja Miešulamoskirja, Vieriehiiaskire-čhaveskiri. Angíl mánde jone až šarenas léskiro lačhipén dieskiro, i miré lavá jone lydžánas ke jov. I o Tovija bičhavelas lylá, sob (kaj) te trašavel man. I sys adiáke: kiéli ĥazdyné vánta, i me čhudjom vudará, i sys čhudé te dynarinén (te služynen) rakhibnárja pe pórta, i bagaibnaskire, i Lievíty, to tén'či me priphendjom miré pšaléske Xananiske i barydyréske pe tvárdyma (diz) Xananijaske, savó sys dro Jerusalimo, pal-dová so jov sys patiaibnýtko manúš butýr javirendyr i jov darandyja Devléstyr butýr javirendyr. I phendjom me lénge: “Mek te na psiraven pórta Jerusalimóskiri, paka kham te na tat'kirel la; i kiéli joj isyn terdy, mek te zaphanden la.” I me čhudjom stregar'jenca manušén Jerusalimóstyr každones pe péskiri stréga, i, sob (kaj) každo te javél terdó pe stréga proti péskiro kher. Ne fóro sys baró i dro léste sys baró štéto: ne manušá sys nábut odój, i kherá na sys čhudé. I čhudiá miro Devél dro miro iló, sob (kaj) me te skedav lačhé-rodoskire manušén, i barydyrén i javire manušén, sob (kaj) mánge te piričhinav len pir léngiro ródo. I me lathjom rodengiro piričhinyben (spisko) odolén, savé javné pale pérva, i dro spisko sys začhindló: Ake, isyn manušá okrugatyr, savé giné plienóstyr odoléndyr, savén lydžijá dro pliéno Navuhodonosóro, králi Vavilonóskiro, i savé risiné dro Jerusalimo, i dre Judéia, kažno dro péskiro fóro. Ake, isyn odolé, savé giné Zorovavieljosa, Isusósa (Johošuasa), Nijemijasa, Azarijasa, Raamijasa, Nahmanijosa, Mardohiejosa, Bilšanosa, Misfieriefosa, Bigvajosa, Niehumosa, Vaanasa. I, ake, kicý, sys manušá Izrailjoskire: Čhavé Parošoskire, duj tysjoncy, šel te eftadešaduj; Čhavé Safatijaskire, dujšelá, eftadešá duj; Čhavé Arahoskire, šovšelá pandždešá. Čhavé Pahat-Moavoskire, čhavéndyr Isusoskiren i Ioavoskirendyr, duj tysjoncy, ohtošela dešuohto; Čhavé Elamoskire, tysjonco dujšelá pandždešá štar. Čhavé Zatoskire, ohtó šelá pandždešá pandž: Čhavé Zakhajoskire, eftašelá šovdešá; Čhavé Binujoskire, eftašelá šovdešá; Čhavé Bievajoskire, šovšelá biš te ohtó; Čhavé Azgadoskire, duj tysjoncy, trinšelá biš te duj; Čhavé Adonikamoskire, šovšelá šovdešá eftá; Čhavé Bigvajoskire, duj tysjoncy šovšelá eftá; Čhavé Adinoskire, šovšelá pandždešá duj; Čhavé Ateroskire, Jezekijaskire kheréstyr sys jeniadeša ohtó; Čhavé Xašumoskire, trinšelá biš te ohtó; Čhavé Viecajoskire, trinšelá biš te štar; Čhavé Xarifoskire, šel te dešudúi; Save bijándyne dre Gavaóno, jeniadeša pandž; Save dživdé ke Vifliejémo i ke Nietofa, šel te ohtodešá ohtó; Save dživdé ke Anafofo, šel te biš te ohtó; Save dživdé ke Bief-Azmaviefo, štardešá duj; Save dživdé, ke Kariafiarimo, ke Kiefira i ke Biejerofo eftašelá štardešá trin; Save dživdé ke Fama i ke Gieva, šovšelá biš te jekh; Save dživdé ke Mihmaso, šel te biš te duj; Save dživdé ke Viefíljo i ke Gajo, šel te biš te trin; Save dživdé ke javír Nievo, pandždešá duj, Čhavé javire Elamoskire, tysjonco dujšelá pandždešá štar; Čhavé Xarimoskire, trinšelá biš; Save dživdé ke Jerihóno, trinšelá štardešá pandž; Save dživdé ke Lodo, Xadido i Ono, eftašelá biš te jekh; Save bijándyne ke Sienajo, trin tysjonco jeniašela trijánda; Rašaja, Iodaijaskire čhavén, Isusóskire kheréstyr (Johošuaskire), jeniašela eftadešá trin; Čhavé Imieroskire, tysjonco pandždešá duj; Čhavé Pašhuroskire, tysjonco dujšelá štardešá eftá; Čhavé Xarimoskire, tysjonco dešuefta. Lievíty, čhavé Isusóskire (Johošuaskire), Kadmiiloskire kheréstyr, kheréstyr, savó sys Godievaskire čhavénde, eftadešá štar; Bagaibnaskire: čhavé Asafoskire, šel te štardešá ohtó; Rakhibnárja pe pórta: čhavé Šalumoskire čhavé Ateroskire, čhavé Galmonoskire, čhavé Akuvoskire, čhavé Xatitoskire, čhavé Šovajoskire, – šel te trijánda ohtó. Niefiniei: čhavé Cyhaskire, čhavé Xasufaskire, čhavé Tabaofoskire: Čhavé Kirososkire, čhavé Sijaskire, čhavé Fadonoskire; Čhavé Lievanaskire, čhavé Xagavaskire, čhavé Salmajoskire; Čhavé Xananaskire, čhavé Gidieloskire, čhavé Gaharoskire; Čhavé Rieaijaskire, čhavé Riecynoskire, čhavé Niekodoskire; Čhavé Gazamoskire, čhavé Uzaskire, čhavé Pasieahoskire; Čhavé Viesajoskire, čhavé Mieunimoskire, čhavé Niefišsimoskire; Čhavé Vakvukoskire, čhavé Xakufaskire, čhavé Xarhuroskire; Čhavé Vaclifoskire, čhavé Miehidaskire, čhavé Xaršaskire; Čhavé Varkososkire, čhavé Sisaraskire, čhavé Famahoskire; Čhavé Niecyahoskire, čhavé Xatifaskire. Čhavé Solomonóskire pishar'jendyr: čhavé Sotajoskire, čhavé Sofieriefoskire, čhavé Fieridaskire; Čhavé Ialoskire, čhavé Darnonoskire, čhavé Gideloskire; Čhavé Safatijaskire, čhavé Xatiloskire, čhavé Pohierief-Gacevaimoskire, čhavé Amonoskire. Saré Niefiniei i pishárja Solomonóskire sys trinšelá jeniadeša duj. I, ake, sys odolé, savé adiáke-pac' vyginé Tielmielahostyr, Tielharatyr, Xieruv-Adonostyr i Imierostyr; ne jone na mogindlé te dosykaven pal péskiro ródo, ni pal péskiri seménca, so jone sys Izrailjostyr. Maškir lénde sys: čhavé Dielaijaskire, čhavé Tovijaskire, čhavé Niekodaskire – šovšelá štardešá duj. Rašandyr: čhavé Xovaijaskire, čhavé Gakocoskire, čhavé Vierzielijoskire, savó lyjá paloróm jekha čhajendyr Vierzielijoskire Galaadoskirendyr i les jačné te kharén léngire lavésa. Jone rodyne léngire-rodengiro piričhinyben, i na lathné, i paldavá len vyčhurdyne rašandyr. I Tiršafo phendiá lénge, sob (kaj) jone te na xan sama svénta xabena angíl dová, syr javéla rašáj urimosa i tumimosa. Saré manušén khetané sys štardešá duj tysjoncy, trinšelá šovdešá. Na giný davá, lénde sys eftá tysjoncy trinšelá trijánda eftá pishárja i pisharicy i pašýl lénde sys dujšelá štardešá pandž bagaibnaskire i bagaibnarki. Lénde sys eftašelá trijandaefta šov grajo, i sys dujšelá štardešá pandž lošaki. Lénde sys štaršelá trijandapandž vierbliudy, i sys šov tysjoncy eftašelá biš osly (miegárja). Vari-savé barydyrá pe stréčy (pokolienii) dyné kokoré péstyr pašá, sob (kai) te kerén butiá. O Tiršafo dyjá dre piralý bar drahmy suvnakása, pandždešá tahtaja, pandžšelá trijánda rašaitka ídi. I vari-savé barydyrendyr pe stréčy dyné dre piralý, sob (kaj) te kerén butiá biš tysjoncy drahmy suvnakása. I javír manušá dyné biš bará drahmy suvnakása, i duj bará miny (1300 kilo) rupésa, i šovdešá eftá rašaitka ídi. I jačné te dživén rašaja, i Lievíty, i rakhibnárja pe pórta, i bagaibnaskire i javír manušá, i, Niefiniei i saró Izrailjo dre péskire fórja. Kiéli jaciá eftáto čhon, i dživdé Izrailjoskire čhavé pir péskire fórja, tedy skedynépe saré manušá, so ke jekh manúš, pe foruný (plošča), savó sys angíl Panitko pórta, i phendlé lylvaritkoneske (knižnikoske) Jezdraske, sob (kaj) jov te janel Mojzáskire-Zakonoskiri lylvarí, saví priphendiá Raj Devél Izrailjoske. I jandiá rašáj Jézdra Zakóno angíl skedyibén muršengiro i džuvliengiro i saré manušéngiro, savé mogindlé te ĥaljon, dro pérvo (anglatunó) dyvés eftatone-čhonéskiro; i gindia léstyr pe foruný (plošča), savó sys angíl Panitko pórta, zlokóstyr ke pašdyves, angíl muršende i džuvliende i sarénde, savé mogindlé te ĥaljon: i saré manušéngire kaná šundlé Zakonoskiri lylvarí. Lylvaritko Jézdra terdijá pe kaštuno vučipén, savó vaš dová manušá kerdé: pašýl léste, pir léskiro pravo (čačó) vast, terdiné Matifija, i Šema, i Anaija, i Urija, i Xielkija, i Maaseja, a pir léskiro liévo (zérvo) vast Fiedaija, i Masailo, i Malhiia, i Xašumo i Xašbadano, i Zahárija, i Miešulamo. I otčhakirdiá lylvarí Jézdra angíl saré-manušéngire jakhá, pal-dová so jov sys terdó vučedýr saré manušéndyr. I kóli jov otčhakirdiá la, saré manušá uštyné. I Jézdra bahtiakirdiá Ras-Devlés, Devlés vučés. I saré manušá otphendlé: “Amín', amín'”, ĥazdyi upré péskire vastá, – mangnepe i dyné paklono angíl Raste-Devléste mósa ke phuv. Isúso (Johošuá), Vanaija, Šerievija, Iamino, Akuvo, Šavtajo, Godija, Maseja, Klito, Azárija, Jozavalo, Xanano, Fielaija i Lievíty piriphenenas manušénge Zakóno, maškír dová, syr manušá sys terdé pe péskiro štéto. I gindlé (dyne upre) lylvarjatyr, Devléskire Zakonóstyr, jasnes, i pričhuvenas smyslo, i manušá ĥaljonas, so sys progindlo. Tedy Nijemíia, jov že Tiršafo, i lylvarítko Jézdra, rašái, i Lievíty, savé sykliakirdé manušén, phendlé saré manušénge: “Dyvés davá isyn svénto Ráske-Devléske, tumaré Devléske; na piridživen i na rovén”; pal-dová so saré manušá rondlé, šuny Zakonóskire lavá. I phendiá lénge: “Džán, xan thulo, i p'jen gudló, i bičhaven xabnytka koterá (kuski) odolénge, konéste ničý nane zagotovindlo; pal-dová so dyvés davá isyn svénto amaré Ráske-Devléske. I na piridživen, pal-dová so rádyma Raskiri-Devléskiri déla zor tuménge. Lievíty štyliakirde saré manušén, rakirí: “Pirijačen, pal-dová so davá dyvés isyn svénto, na piridživen.” I giné saré manušá te xan, i te p'jen, i te bičhaven xabnytka pašá (koterá), i te svenkinen baré radymása; pal-dová so jone ĥalyné lavá, savé phendlé lénge. Pe javír dyvés skedynépe strečengire (rodoskire) barydyrá saré manušéndyr, rašaja i Lievíty ke lylvarítko Jézdra, sob (kaj) jov te piriphenel lénge Zakonóskire lavá. I lathné začhindló dro Zakóno, savó dyjá Raj-Devél pir Mojzaste, sob Izrailjoskiro čhavé pe eftáto bitrinéngiro déšto čhon, pe svénko, dživdé dre šátry (kuščy). I paldavá dyné te džinén pir saré péskire fórja dro Jerusalimo, rakirí: “Džán pe bérga i lydžán kheritkoné maslinakire randiá, i lydžán dikone (busoné) maslinakire randiá, i mirtakire randiá, i pal'makire randiá, i javire randiá buĥle-listiengire vešendyr, sob (kaj) te kerén kuščy (šátry), syr isyn začhindló.” I giné manušá, i jandlé, i kerdé péske šátry, kažno pe péskiri stréha (čhakín), i pe gredy (dvory) péskire, i pe Devléskire-Khereskire gredy (dvory), i pe foruný (plóšča), pašýl Panitko pórta, i pe markplaco pašýl Jefriemóskiri pórta. Saré manušá, savé risiné plienóstyr kerdé šátry, i dživdé dre šátry. Dyveséstyr Isusoskirestyr (Johošuaskirestyr), Navinoskire čhaveskirestyr, na kerdé adiáke Izrailjoskire čhavé. Rádyma sys drieván bari. I gindlé Devléskire-Zakonóskire lylvarjatyr kažno dyvés, anglatuné dyveséstyr ke palatunó (posliednjo) dyvés. I svenkindle svénko eftá dyvesá, a ohtóto dyvés svenkindle pir statúto (ustavo). Pe biš te štárto dyvés dro davá čhon skedynépe saré čhavé Izrailjoskire, savé postynena dre balýtka goné (pieplosa) pe šeró. Siemjo (ródo) Izrailjoskiro gijá dre rig (uladyjape/otdielindiape) saréndyr javirendyr i uštyné jone i mangné te otmeken gréhi pal gréhi péskire i péskire dadengíre. I jone sys terdé pe péskire štéty i štárto častyr (čas') dyvesýtko gindlé Devléskiro lav i mangné te otmeken gréhi štárto častyr (čas') manušéndyr i mangnepe Devléske. Terdiné upré pe Lievitengiro štéto: Isúso (Johošuá), Vaneja, Kadmiilo, Ševanija, Vunijo, Šerievija, Vanija, Xenani, i zoralés mangnepe ke Raj Devél, léngiro Devél. Lievíty phendlé: “Isúso (Johošuá), Kadmiilo, Vaneja, Xašavnija, Šerievija, Godija, Ševanija, Pietahiia: “Uštén i barjakirén Ras-Devlés, Devlés tumares pe saré beršá. Tu, Rajo Dévla, san Jekh, Tu sozdyjan bolybén, bolybén pe bolybén i xaladén lengiren, phuv i saró, so isyn pe láte, mórjo (derjáv) i saró, so isyn dre léste, i Tu désa džiibén daleske sareske i bolybnýtka xaladybena déna patýv Túke. Tu Kokoró, Rajo Dévla, vykedyjan Avraamos, vylydžijan les Urostyr Xaldiejengirendyr i dyján léske lav Avraámo, i Tu ĥalyjan les čačunesa angíl Péste i dyján léske zavieto, sob (kaj) te des léskire čhavénge phuv Xananiejengiri, Xietiejengiri, Amoriejengiri, Fierieziejengiri, Jevusiejengiri, Giergiesiejengiri. I Tu kerdián pir Péskiro lav, pal-dová so Tu san čačunó. Tu dykhcián bída amaré-dadengiri dro Jegípto, i Tu šundián léngiri godlyma pašýl Loló mórjo (derjáv). Tu kerdián znamiénii (ĥiertyká) i dívy angíl faraonoste i angíl sarénde peskirende pishar'jende, i angíl saró léskiro narodo, pal-dová so Tu džindian, so jone kerdé nakuč lénca i kerdián péske malva ke adadyvesatuno dyvés. Tu rostyrdyjan angíl lénde mórjo (derjáv) i jone maškír paní giné, syr pir šukí phuv, i odolén, kon tradyjape pal lénde, Tu tasadiakirdian len syr bar dre baré paniá. Dro stýlbo oblokengiro Tu lydžijan len-dyvesé i dro stýlbo jagalo – ratý, sob (kaj) te pir léngiro drom te javél bitialo. Tu javdián pe bérga Sinajo i rakirdian lénca bolybnástyr i dyján lénge čačuné sendy, patiaibnytka zakóny, lačhé uphenybená i priphenybená. Phendián lénge pal svénto Tyró sávato, i priphenybená, i uphenybén i sendy piridyjan lénge pir Péskire pishariste, Mojzaste. Tu dyján lénge maró bolybnástyr, syr jone sys bokhalé, i paní barestyr Tu dyján, kiéli jone kamlé te p'jen, i phendián lénge, sob (kaj) jone te džán, i te len phuv, pal saví Tu sovlahadian lénge te des, syr Tu ĥazdyjan vast Péskiro. Ne jone i dadá amaré sys nahrata i rikirde péskiri men vučés, i na šundlé Tyré priphenybená. Jone na zakamle te poddenpe, na priripirde dívy tyré, savé tu kerdián lénca, i rikirde men upré i pir péskiri vólia pale čhudé angíl péste šerales, sob (kaj) te javén pishar'jénca. Ne Tu, san Dévla, Savó vykedéla te otmekél gréhi, Savó dlenges vyrikiréla, i Tu na jačkirdian len. Na dykhí, so jone kerdé péske suvnakunó vyčhudo guruvoro i phendlé: “Davá isyn amaró devel, savó vylydžijá tut Jegiptóstyr, i na dykhí, so jone kerdé baró obrakiriben. Ne Tu pir Péskiri láska na čhurdyjam len pe čhučí phuv, stýlbo oblokengiro na gijá kig léndyr dyvesé, sob (kaj) te lydžál len pir drom i stýlbo látyr, savó lydžijá len ratý, sob (kaj) lénge te javél bicialó, pir savó drom te džán. I Tu dyján lénge Péskiro lačhó Dúho, sob (kaj) te sykliakires len i mana péskiri na otlesas léngire móstyr i paní dyján lénge te p'jen. Štardešá berš Tu dyján lénge te xas pe čhučí phuv, jone ni dro so na maindle trébima; ídia léngiri na phurija, i ĥerá na šulyne. I Tu dyján lénge kralipená i narody i rosčhudian len pe pašá i phuv Sigonoskiri jaciá léngiri, i phuv Jesievoneskiri, i phuv Ogoskiri, kralískire Vasanoskiri. Čhavén lengiren Tu ubarjakirdian pe but syr čergeniá pe bolybén i lydžijan len pe phuv, pal saví Tu rakirdian léngire dadénge, so joj iavéla léngiri. I zaginé čhavé léngire i phuv jaciá léngiri. Tu otdyjan Xananiejengire manušén lénge dre vastá i králja léngire jačné tyré i manušén, sob (kaj) jone te kerén lénca, so zakamena. I zalyne jone zoralé fórja i lačhí phuv i lyné jone péske kherá saré barvalypnasa, kolbáni (vodojomy), savé sys barestyr, vinagradýtka i maslinitka unty (sady) i but drevy plodenca vaš xabén. Jone xané, čalyne, thulyne i koštyndle pir Tyrí láska. I kerdépe jone nahrata (upriama), i na lyné te kutiakiren Tut i jačkirdé Zakóno, zamardé prorokén, savé dénas lénge godý te patias dre Túte, i kerdé baré kaliakiribena. Tu otdyjan len léngire vergénge, savé pritasavenas len. Ne, syr dro pharó časo, jone khardé Tut, Tu šundián len bolybnástyr, pir Péskiri láska Tu desas lénge zrakhibnaskiren, i jone zrakhenas len vergéndyr. Syr saró sys kuč i štyl, nevés jone lenaspe pal nalačhipen, i Tu otdesas len vergénge dre vastá i vérgi sys xulaja pe lénde. Ne syr jone nevés khardé tut, Tu šundián len i bronindian len (zaterdijan pal lénde) but móly pir Tyrí lačhé-ilýtkima. Tu priripiresas lénge te dživén pir Zakóno, ne jone na lydžiné péskiro džiibén adiáke, i na šundlé Tyré priphenybená i giné na dolé dromésa, syr Tyró statúto (ustavo) rakirdiá, savénca te javél džidó manúš, kóli kerdiá by pir statúto (ustavo), i dumo péskiro kerdé tvardo i men péskiri rikirde vučés i na kandenas Tut. Užakiri léngiro risiben ke Tu, Tu učhakirdian but bérgi i priripiresas lénge Péskire Duhósa pir prorokénde, ne jone na šundlé. I tu piridyjan len te vastá javire narodenge. Ne, pir Péskiri lačhé-ilýtkima Tu na zamardian len ke kónco, i na mekcian len, pal-dová so Tu san Devél lačhó i lačhé-dieskiro. Akaná, amaró Dévla, Dévla baró, Savó isyn, zoraló, trašalo, Savó rakhéla Zavieto i láska! Mek te na javél nabaripnasa sarí men'ka, saví kerdiápe aménca, amaré kral'jenca, thagar'jenca amarenca, rašanca amarenca, prorokenca amarenca i amaré dadénca i saró narodo tyró, dyveséndyr Asirijakir kral'jendyr ke adadyvesatuno dyvés. Dro saró, so aménca kerdiápe, Tu san čačuno (pravo), pal-dová so Tu kerden pir čačipén i ame sam bangé. Amaré králja, thagárja amaré, rašaja i dadá amaré na dživdé pir Zakóno i na šundlé Tyré priphenybená i priripiribena Tyré. I dro léskiro kralipén jone na dynarindlé Túke, pir Tyró baró lačhipén, savó Tu dyján lénge, i pe buĥly i thuly phuv, saví Tu otkedyjan vaš lénge, i jone na risjonas péskire fujé rendéndyr. I, ake, ame sam pishárja akaná, pe daja phuv, saví Tu dyján amaré dadénge, sob (kaj) te xas lákire barjakirdé (plódy), i te čaravaspe lákire lačhipnása, ake, ame sam pishárja pe daja phuv. I lákire barjakirdé joj déla buté kral'jenge, pir savénde Tu lyjan zor pe aménde pal gréhi amaré. I jone rikirna zor pe amaré masá i pe amaré kheritkoné murdalénde (skoto) pir péskiro iló, i ame sam pritasade. I pir saró davá ame dasa zoraló otphenybnytko lav, i podčhinasa, i pe davá podčhinyben javéla čergen amaré thagar'jendyr, i amaré Lievitendyr, i amaré rašandyr.” Manušá, savé čhudé čergenorja (piečati), sys: Nijemíia-Tiršafa, Gahalijaskiro i Siedekijaskiro čhavó, Sieraija, Azárija, Jeriemiéjo, Pašhuro, Amarija, Malhiia, Hatušo, Ševanija, Maluho, Harimo, Mieriemofo, Ovadija, Danijéljo, Giniefono, Varuho, Miešulamo, Avijá, Mijamino, Mazija, Vilgajo, Šemaija: adalé sys rašaja. Lievíty: Isúso (Johošuá), Azanijaskiro čhavó, Binujo, Xienadadoskire čhavéndyr, Kadmiilo, i léngire pšála: Ševanija, Godija, Klita, Fielaija, Xanano, Miha, Riehovo, Xašavija, Zakhuro, Šerievija, Ševanija, Godija, Vanijo, Vieninujo. Manušéngire šeralé: Parošo, Pahavor-Moávo, Elamo, Zafu, Vanija, Vunijo, Azgado, Bievajo, Adonija, Bigvajo, Adino, Atiero, Jezekíia, Azuro, Godija, Xašumo, Biecajo, Harifo, Anafofo, Nievajo, Magpiašo, Miešulamo, Xieziro, Miešezaviedo, Sadoko, Jadujo, Fielatija, Xanano, Ananija, Osija, Xananija, Xašuvo, Lohiešo, Pilha, Šovieko, Riehumo, Xašavna, Maaseja, Ahiia, Xanano, Anano, Maluho, Xarimo, Vaana. I javír manušá, rašaja, Lievíty, i manušá, savé rakhne pórta, bagaibnaskire Niefiniei, i saré manušá, savé otginé dre rig javire-theméskire manušéndyr ke Devléskiro Zakóno, léngire džuvliá, léngire čhavé i léngire čhaja, saré, savé mogindlé te ĥaljon, jone prijačne ke péskire pšála, ke lačhé-rodoskirenge (patyvaledyrša) léndyr, i giné dro otphenybén sovlahasa i prokošybnasa – te kerén pir Devléskiro Zakóno, savó sys dynó Mojzasa Devléskire-pishariskire vastésa, i te zrakhen, i te spolninen amaré Ráskire-Devléskire, Devléskire saré zaphenybena, i Léskire priphenybená, i Léskire uphenybená, i te na otdén peskiren čhajén manušénge javire themestyr, i léngire čhajén te na len pal péskire čhavénde; i kóli javéna manušá javire themestyr te janén tovary (arcíkuly) i saró vaš biknyben dro sávato (subóta), te na len léndyr dro sávato, i dro svénto dyvés, i pe eftáto berš te jačkiren vužlipena (dlugi), savé te na javén. I čhudiam ame péske dro Zakóno te das péstyr pir trin šékieli dro berš vaš trébima vaš amaré-Devléskiro Kher: vaš svénta maré, vaš kažno-dyvesýtko marunó janybén i vaš kažno-dyvesýtko célo shačkiribén, vaš sávaty, vaš nevočhon, vaš svénki, vaš svénta réndy i vaš svénta dyibená, sob (kaj) te žužakirenpe Izrailjoske grehostyr, i vaš saró, so kerélape dro amaré-Devléskiro Kher. I čhurdyjam ame žriébijo, konéske te janén kaštá: rašaja, Lievíty i manušá, kiéli, i savéske amaré rodóske dre uphendló časo kažno berš, te janes len ke amareskire-Devléskiro Kher, sob (kaj) jone te xačon vaš amaré Ráske-Devléske svénto dyibén, syr isyn začhindló dro Zakóno. I dyjam ame lav kažno berš te janas dro Ráskire-Devléskiro Kher pérva (anglatuné) barjakirdé (plódy) kažnoné drevostyr (kaštéstyr); adiáke-pac' te janas dro amaré-Devléskiro Kher ke rašaja, ke manušá, savé dynarinena dre amaré-Devléskiro Kher, amaré anglatunen čhavén amaren čhavéndyr i amaré kheritkoné murdaléndyr (skotóstyr), syr isyn začhindló dro Zakóno, i anglatuné amaré baré i tykné murdaléndyr (skotóstyr). I te janas anglatunó amaró maró, i svénto janybén amaró i barjakirdé (plódy) kažnoné vešéstyr mol (vino) i ksil ame javása te janas rašange vaš amaré Ráskire-Devléskiri piralý i dešengiri amaré phuvjátyr Lieviténge. Jone, Lievíty, javéna te len dešengiri dre saré fórja, kaj aménde isyn phuv. Pašýl Lievitende, kiéli jone javéna te len dešengiri, javéla te javél rašái, Aronoskiro čhavó, sob (kaj) Lievíty te lydžán dešengiri péskire dešengirjatyr dro amaré-Devléskiro Kher, dre štúby, savé vykedyné vaš piralý; pal-dová so dre dalé štúby syr Izrailjoskire čhavé, adiáke i Lievíty isyn bangé te janén svénto dyibén; maró, mol (vino) i ksil. Odój svénta khoré (sasúdy), i rašaja, savé dynarinena, i manušá, savé isyn terdé pašýl pórta, i bagaibnaskire. I ame na jačkirasa amaré-Devléskiro Kher. I dživdé barydyrá manušéngire ke Jerusalimo, i javír manušá narodóstyr i čhurdenas žriébijo, sob (kaj) jekh paš léndyr dešé pašendyr lengirendyr te džal te dživél ke svénta fóro Jerusalimo, a jeniá (bijekhéskiro deš) pašá léndyr te jačénpe te dživén dre javír fórja. I bahtiakirde manušá sarén javire manušén, savé doginé ke jekh godý kokoré péstyr te dživén ke Jerusalimo. Ake, isyn šeralé dre okruga, savé dživdé ke Jerusalimo, a dre fórja dre Judéia dživdé kažno dre péskiri fielatin, pir péskiro fóro: Izrail'tiáni, rašaja, Lievíty, i Niefiniei, i čhavé pishar'jengire Solomonoskirendyr. Ke Jerusalimo dživdé vari-savé čhavéndyr Judaskiren, vari-savé čhavéndyr Vieniaminostyr. Judáskire čhavéndyr: Afaija, Uzijaskiro čhavó, Zaharijaskiro čhavó, Amarijaskiro čhavó, Safatijaskiro čhavó, Malielieiloskiro čhavó, Fariesóskiro čhavó. I o Maaseja, čhavó Varuhoskiro, čhavó Kolhoziejoskiro, čhavó Xazaijaskiro, čhavó Adaijaskiro, čhavó, Jarivoskiro čhavó, Zaharijaskiro, čhavó Šelonijaskiro. Saré čhavén Fariesoskiren, savé dživdé ke Jerusalimo, sys štaršelá šovdešá ohtó, manušá sys murškané. I, ake, isyn čhavé Vieniaminóskire: o Salu, čhavó Miešulamoskiro, čhavó Ioiedoskiro, čhavó Fiedaijaskiro, čhavó Kolaijaskiro, čhavó Maasejaskiro, čhavó Ifiiloskiro, čhavó Isajoskiro, i pal lénde Gabajo, i Salajo – jeniašela biš te ohtó. Ioiljo, čhavó Zihriskiro sys barydyró pe lénde, a Juda, čhavó Sienuiaskiro, sys javír manúš pir fóro. Rašandyr: Jedaija, čhavó Joarivoskiro, Jahino, Sieraija, čhavó Xielkijaskiro, čhavó Miešulamoskiro, čhavó Sadokoskiro, čhavó Mieraiofoskiro, čhavó Ahituvoskiro, savó sys barydyró pe Kher Devléskiro, i pšalén lengiren, savé kerdé svénto butý dro Kher Devléskiro, sys ohtošela biš te duj, i Adaija, čhavó Iierohamoskiro, čhavó Fielalijakiro, čhavó Amcyjoskiro, čhavó Zaharijaskiro, čhavó Pašhuroskiro, čhavó Malhiiaskiro, i léskire pšála, savé sys šeralé pe stréčy (pokolienii) – sys dujšelá štardešá duj, i Amašsajo, čhavó Azariiloskiro, čhavó Ahzajoskiro, čhavó Miešyliemofoskiro, čhavó Imieroskiro, I pšála léskire, manušá murškané – šel te biš te ohtó, i léngiro barydyró sys Zavdiilo, čhavó Gagiedolimoskiro. Adiáke-pac' Lievitendyr: o Šiemaja, čhavó Xašuvoskiro, čhavó Xašavijoskiro, čhavó Vunijaskiro, I Šavgajo, i Jozavado, savé sys barydyrá pe Lievitende, i savé lydžiné réndy svetosa dro Kher Devléskiro. I Matanija, čhavó Mihaskiro, čhavó Zavdijoskiro, čhavó Asafoskiro, sys lydžaibnaskiro (vieduščo) te parikirel Devléske dre pátieri (molítva): i Bakbukija, kon sys javír manúš pal léste, i Avda, čhavó Šamujoskiro, čhavó Galaloskiro, čhavó Jedutinoskiro; Saré Lievitén dro svénto fóro sys dujšelá te ohtodešá štar. I iščo (inké), rakhibnárja pe pórta, Akuvo, Talmono, i léngire pšála, savé rakhne pórta, sys šel te eftadešá duj. I javír manušá Izrailjostyr, rašaja i Lievíty, sys pir saré fórja dre Judéia, kažno pe péskiro mištypén. A Niefiniei dživdé ke Ofieljo. I Cyha i Gišfa sys šeralé pe lénde. I barydyró pe Lievitende dro Jerusalimo sys Uzijo, čhavó Vanejaskiro, čhavó Xašavijaskiro, čhavó Matanijaskiro, čhavó Mihaskiro, Asafoskire čhavéndyr, savé bagandle, syr dynarindlé jone dro Kher Devléskiro, pal-dová so králi priphendiá, sob (kaj) te čaliakiren bagaibnaskiren kažno dyvés. I Pietahiia, čhavó Miešazavadoskiro, jekh čhavó, čhavéndyr Zaraskirendyr, kon sys čhavó Judáskiro, sys kralískiro čačó vast pir saré réndy (diély) manušéngire. A pal odolénde, savé dživdé dre gavá, péskire feldenca, čhavé Judáskire dživdé ke Kiríaf-Arba i dre léskire foricy, savé sys tel léskiri zor, i dro Divono, i dre foricy, savé sys tel léskiri zor, dro Iiekavceiljo, i dre léskire gavá; dre Ješuia, dro Molado, dro Bief-Palieto, dro Xacar-Šualo, dre Virsávija, i dre foricy; savé sys tel lákiri zor dro Siekielazo, i dro Miehono, i dre foricy, savé sys tel léskiri zor, dro En-Rimono, dre Cora, i dro Iarmufo, dro Zanoaho, dro Adalamo, i dre léskire gavá, dro Lahiso, i pe féldy léskire, dro Azeka i dre lákire gavá. Jone dživdé Virsavijatyr ke/žýko dólo Enomoskiro. I čhavé Vieniaminóskire, kóli te les Gievatyr, dživdé ke Mihmaso, ke Gajo, ke Viefíljo, i dre léskire foricy, savé sys tel léskiri zor; ke Anafofo, ke Nomva, ke Ananija; ke Gacoro, ke Ráma, ke Gifaimo; ke Xadido, ke Cevoimo, ke Nievolato, ke Lodo, ke Ono, i pe dólo Xarašymoskiro. I vari-savé Lievíty dživdé pe phuvjákire paša dielianki Judáskire i Vieniaminóskire. Ĥáda, isyn rašaja i Lievíty, savé javné Zorovavieljosa, Salafiloskire čhavésa i Isusósa (Johošuasa): Sieraija, Jeriemiéjo, Jézdra, Amarija, Maluho, Xatušo, Šehanija, Riehumo, Mieriemofo, Ido, Giniefojo, Avijá, Mijamino, Maadija, Vilga, Šemaija, Ioarifo (Jeiarivo), Iiedaja, Salu, Amoko, Xielkija, Jedaija. Ake, jone sys rašángire šeralé i léngire pšála dre Isusóskire (Johošuaskire) dyvesá. A Lievíty: Isúso (Johošuá), Binujo, Kadmiilo, Šerievija, Juda, Matfanija, šeraló te parikirén Devléske psalmenca, jov i léskire pšála, I Bakbukija i Unijo, léngire pšála, kon adiáke-pac', syr jone, rakhne pórta. Isusóstyr bijándyja Ioakimo, Ioakimostyr bijándyja Jeliašyvo, Jeliašyvostyr bijándyja Iouada, Ioaidastyr bijándyja Ionafáno, Ionafanostyr bijándyja Iadujo. Dre Ioakimoskire dyvesá sys rašaja, rodoskire (strečakire) šeralé: Sieraijaskire kheréstyr Mierajoskire, i Jeriemiejoskire, kheréstyr Xananija, Jezdraskire kheréstyr Miešulamo, Amarijaskire kheréstyr Iohanano, Mielihoskire kheréstyr Ionafáno, Ševanijaskire kheréstyr Iosifo (Joza), Harimoskire kheréstyr Adna, Mieraiofoskire kheréstyr Xielkija, Idoskire kheréstyr Zahárija, Giniefonoskire kheréstyr Miešulamo, Avijoskire kheréstyr Zahárija, Miniaminoskire kheréstyr, Moadijoskire kheréstyr Piltajo, Vilgaskire kheréstyr Šamujo, Šemaijaskire kheréstyr Ionafáno, Ioiarivoskire kheréstyr Mafnajo, Jedaijaskire kheréstyr Uzijo, Salajoskire kheréstyr Kalajo, Amokoskire kheréstyr Jeviero, Hielkijaskire kheréstyr Xašavija, Niedaijaskire kheréstyr Nafanailo. Ake, isyn Lievíty, šeralé pe stréčy dre dyvesá Jeliašyvoskire, Ioiadaskire, Jehananoskire i Iadujoskire, savé zalydžine sys dre začhinyben, i adiáke-pac' rašaja, kiéli kralindia Darijo Piersijatyr. Čhavé Lievijoskire, savé sys šeralé pe stréčy, sys začhindlé dre rodoskiri lylvarí ke dyvesé Iohananoskire, kon sys čhavó Jelišyvoskiro. Šeralé Lieviténgire sys: Xašavija, Šerievija, i Isúso (Johošuá), čhavó Kadmiiloskiro, i pšála léngire, jone sys čhudé te bahtiakiren, kiéli parikirena, pir Davidóskiro uphenybén, kon sys manúš Devléskiro – jekh zmiena pal javír zmiena. Matfanija, Bakbukija, Ovadija, Miešulamo, Talmono, Akuvo-stregarja, rakhibnárja pe progi ke pórta. Jone dživdé dre dyvesá, kiéli sys Ioakimo, čhavó Isusóskiro, čhavó Josiedekoskiro, i dre dyvesá, kiéli barydyró pe okruga sys Nijemíia, i lylvarítko sys Jézdra, rašái. Akaná, syr obsvencynena vánty Jerusalimóskire, to lénge treindiá te lathén Lievitén pir saré štéty, sob (kaj) te janén len dro Jerusalimo, sob (kaj) te svenkinen, kiéli obsvencynena i vaš rádymakiro svénko, parikiribnasa i bagaibnasa tel zan cymbalengiri, psaltiriengiri i arfakiri. I skedynépe čhavé bagaibnaskire okrugatyr Jerusalimskonatyr i gavendyr Nietofafoskirendyr, i Bief-Gagilgalostyr i feldendyr dre Gieva i Azmavieto; pal-dová bagaibnaskire čhudé péske gavá trusciál Jerusalimo. I žužakirdé (očistindle) pes rašaja, i Lievíty, i žužakirdé javire manušén, i pórta, i vánta. Adiáke me lydžijom barydyrén Judejátyr pe vánta, i me čhudjom duj baré xory te džán parikiribnasa, i jekh xoro gijá pe čačí rig vantakiri ke/žýko Gnejoskiri pórta. Pal lénde gijá Gašaija, i paš barydyrá pe Judéia; Azárija, Jézdra i Miešulamo, Juda, i Vieniamino, i Šemaija, i Jeriemiéjo; i vari-savé čhavé rašángire rogénca (trubenca): Zahárija, čhavó Jonafanoskiro, čhavó Šemaijaskiro, čhavó Matfanijaskiro, čhavó Mihiejoskiro, čhavó Zakuroskiro, čhavó Asafoskiro; i pšála léskire: Šemaija, Azariilo, Milalajo, Gilalajo, Maajo, Nafanailo, Juda, i Xananijo muzykal'none strumientenca Davidostyr, savó sys Devléskiro manúš, i lylvarítko Jézdra gijá angíl lénde. Pašýl folaharoskiri (fontanoskiri) pórta angíl lénde, jone giné upré pir ĥerunia (stupien'ki) ke fóro Davidóskiro, pe stylba/uklani (liesvica), saví sys pe vánta pal kher Davidóskiro adiáke dur, syr ke Panieskiri pórta ke vastóko. Javír xoro, savó parikirelas, gijá dre javír rig, i pal lénde me, i paš narodoskiri pir vánta Boveskire vučardiatyr (bašniatyr) i ke buĥly vánta. I Jefriemóskire portatyr, pašýl phurany pórta, pašýl Mačhengiri pórta, i Xananieloskiri portatyr, Mejaskire portatyr, ke Bakrengiri pórta, i terdiné pašýl Štaribnaskiri pórta. Tén'ci duj dalé xory parikiribnytka terdiné proti Kher Devléskiro, me i pašýl mánca paš barydyrén. I rašaja: Jeliakimo, Maaseja, Miniamino, Mihiejo, Jelioenajo, Zahárija, Xananija rogénca, i adiáke-pac': Maaseja, i Šiemaija, i Jelizáro, i Uzijo, i Johanano, i Malhiia, i Jelamo, i Jeziero. I bagandle zoralés bagaibnaskire: léngiro barydyró sys Izrahiia. I janénas dro dová dyvés baré dyibená, i radyndlepe, pal-dová so Devél dyjá lénge bari rádyma. Radyndlepe lošasa (radymása) i džuvliá, i bijaty, i rádyma (loš) Jerusalimóskiri sys šundly dur. I dro dová-pac' dyvés sys čhudé manušá pir štúby dre piralý (kladovka) te janén svénta dyibená, sob (kaj) te skedén feldendyr trusciál fórja pašá, savé treindiá rašange i Lieviténge pir Zakóno vaš rašange i Lieviténge; pal-dová so Judeienge sys radypnytkes te dykhén pe rašande, i pe Lievitende, savé sys terdé. Save kerdé svénto butý péskire Devléske, i savé žužakirdé manušén, i jone sys bagaibnaskire i rakhibnárja pe pórta pir uphenybén Davidóskiro i léskiro-čhavéskiro Solomóno. Pal-dová so ĥará dre dyvesá Davidóskire i Asafoskire, sys čhudé šeralé pe bagaibnaskirende, i šaribnytka giliá i giliá Devléske, te barjakirén i te parikirén. Dre dyvesá, kiéli dživdé Zorovavieljo i Niejemija, saré Izrail'tiáni dénas léngire xabnytka porcyi bagaibnaskirenge pe kažno dyvés, i jone otdenas obsvencyndle priedmiety (čýsy) Lieviténge, a Lievíty piridenas obsvencyndle priedmiety Aaronóske. Dro dová dyvés gindlé maškír manušénde lylvarí Mojzaskiri i ĥalyné dre láte: “Amonitianino i Moavitianino na moginéna te zadžán dro Devléskiro khetanypen nikieli, pal-dová so jone na strenindle Izrailjoskire čhavén marésa i paniésa i lyné pe lénde Valamos, sob (kaj) te magires len; no Devél amaró pirikirdia magiriben dro bahtiakiribén.” Syr jone šundlé davá Zakóno, jone vylydžiné saró narodo, savó na sys Izrailjoskire manušéndyr. Angíl davá rašáj Jeliašyvo, savó sys tyrdo paš štúby (komnaty) dro amaró Devléskiro Kher, savó sys pašatuny seménca Tonijaske, kerdiá vaš léske bari štúba, dre saví angledýr čhuvénas dáry marestyr, ladano i štekly i dešengiri (miéra) marestyr, moliátyr (vinostyr) i ksilestyr, savé trej te javén pir Zakóno vaš Lieviténge, bagaibnaskirenge i rakhibnar'jenge, i dáry vaš rašange. Syr saró davá sys, me na sómas dro Jerusalimo, pal-dová so dro trijánda javír berš Vavilonóskire kralískire Artaksierkoskire me psirdjom ke králi i pir vari-savé dyvesá nevés vymangdjompe kralístyr. Syr me javdjom dro Jerusalimo i udžindjom pal nálačho réndo, savó kerdiá Jeliašyvo, savó kerdiá štúba vaš Tonijaske dro Devléskiro Kher, to mánge sys zoralés pharés (na pir iló), i me vyčurdyjom saré kherítka priedmiety (čýsy) Tonijaskire javrí štubendyr. I phendjom, sob (kaj) te vyžužakiren štúby, i čhurdyjom lav (proponindjom), sob nevés te zalydžan khoré (sasúdy) Devléskire Khereskir odorík, dáry marestyr i ladano. Ke saró udžindjom me, so Lieviténge na otdenas léngiri paš, i so Lievíty i bagaibnaskire roznašnepe kažno pir péskiri félda. Me kostjom pal davá šeralen, i phendjom: “Pal so jačkirdiam ame Devléskiro Kher?” I me skedyjom len i čhudjom len pe péskiro štéto. Saré Judei jačné te janén déšto paš pir maró, mol (vino), ksil dre piralý. Me čhudjom paš piraliá rašás Šelemijas i Sadokos lylvaritkones, i o Fiedanijas Lievitendyr i paš lénde sys Xanana, čhavó Matfanijaskiro, pal dová, so jone sys čačuné. I pe lénde sys zor te rozden davá léngire pšalénge. Rípir man pal davá, miro Dévla, i na bistyr miré lačhé réndy, savé me kerdjom vaš miro Devléskiro Kher i vaš rašángire réndy (diély) paš léste. Dre dolé dyvesá dykhcjom me dre Judéia, so dro sávato (subóta) tasavena dro prieso, lydžána ĥarby (snopy) i čhuvéna mol, vinagrado, inžyro i kažno pharipén i lydžána dro sávato dro Jerusalimo. I me zoralés vyphendjom lénge dro dová dyvés, syr jone biknenas xabnytko. Tiriani dživdé ke Judéia i janénas mačhé i razno tovaro (arcikulo) i biknenas les dro sávato manušénge Judejátyr i Jerusalimóstyr. I me kostjom barydyrén Judejatyr i phendjom lénge: “Pal so tumé keréna dasavo nalačhipen i magirena sávato? Haj, na adiáke-pac' kerdé tumaré dadá i pal davá Devél amaró jandiá pe aménde i pe davá fóro sarí daja bída? Tumé xoliakirena butýr Devlés pe Izrailjo, magiri sávato (subóta). Paló (poslie) davá, syr kerdiápe ciamlo (kaló) pašýl Jerusalimóskiri pórta, angíl sávato, me priphendjom te zakeren vudará i phendjom, sob (kaj) te na psiraven (otphanden) len angíl zloko paló (poslie) sávato. Bikibnarja i kofarja kažnoné tovarosa (arcikulosa) rat'kirde na dro Jerusalimo i jékhvar i butýr. Me šylales vyphendjom lénge, i phendjom: “Pal so tumé rat'kirna paš daja vánta? Kóli tumé iščo (inké) jékhvar adiáke kerna, to me čhuváva vast pe tuménde.” Dalé dyveséstyr jone butýr na javénas dro sávato. Me priphendiem Lieviténge, sob (kaj) jone te kerenpe žužé (čysta) i te javén te rikirén stréga pe pórta, vaš dová, sob (kaj) te svenkinen dyvés savatytko. I pal davá, “Rípir pal mánde, Dévla, i primang man pir Péskiri lačhé-ilýtkima.” Iščo dre dolé dyvesá me dykhávas Judén, savé lyné péske bor'jen Azotiankendyr, Moavitianendyr i Ammonitianendyr, I pal dová čhavé léngire rakirna paš pir pir-azotytko, ci pe čibá javire-manušéngire i na džinéna te rakirén Judytkes. Me kostjom len pal dová i magirdjom len, i vari-savén muršén léndyr mardjom, kostjom pal léngire balá i mangdjom len Devlésa, sob (kaj) jone te na otdén peskiren čhajén pal léngire čhavénde, i te na len čhajén lengiren pal péskire čhavén i pal péste. Ci na pal lénde, – rakirdjom me, – kerdiá gréhi Solomóno, králi Izrailjoskiro? Na sarénde manušénde sys dasavo králi, syr Solomóno. Léske sykadiá léskiro Devél i Devél čhudiá les kralísa pe sarénde Judénde: i javire phuvjátyr džuvliá zalydžine les dro bléndo. I saštý li aménge te šunés pal aménde, so tumé kerna saró davá nalačhipen angíl amaré Devléste, kóli lása javire džuvlién?” Ioidaskiro čhavéndyr, čhavés baré rašás Jeliašyvos, léskiro dad sys džamutresa (ziatjosa) Sanavalatoskiresa, Xoronitkonesa. Me vytradyjom les péstyr. “Rípir lénge, miro Dévla, pal-dová so jone magirdé rašaiben i zavieto rašángiro i Lievitengiro.” Adiáke, me vymordjom len saré manušéndyr na Izrailjoskire manušéndyr i kerdjom dynaribén rašángiro i Lievitengiro, kažnoneskiro pir léskiro réndo. I kaštá te janén ke péskiro časo i anglatuné barjakirdé (plódy). Rípir man, Dévla miro, vaš miro mištypén! I sys davá dre Artaksierksoskire dyvesá, adavá Artaksiérkso sys králi pe jekh šel te biš te eftá provincyi, Indijatyr ke/žýko Jefiopija. Dre dolé dyvesá, syr králi Artaksiérkso bestiá pe péskiro kralítko trono, so sys dre Suzy [Šušan-ju.o.], dre léskiri kralískiri felatin [šerutno fóro-r.s.]. To dro tríto berš léskire-kralipnaskiro jov kerdiá svénko vaš sarénge péskire theméskire barydyrénge i vaš manušénge, savé sys dynárja pašýl léste, vaš baré Piersijakire i Midijakire – xaladéngire barydyrénge, vaš péskire theméskire range, i thagar'jénge. Sykadiá jov drieván baró péskiro kralipnaskiro barvalypén i drieván lačhó ziainyben léskire rajkanypnastyr. Manušá svenkinenas but dyvesá, pal šel te ohtodešá (180) dyvesá. Kiéli proginé (nakhle) dalé dyvesá, to králi kerdiá svénko vaš péskire manušénge, savé sys dre únta (sado) Suzy, barestyr ke tyknó eftá dyvesengiro pe kralískire, felatiniakiri pe gréda (dvóro). Parné papirjátyr i jahontovone-cviaténgiro vylnátyr sys thaná (tkani), savé sys prikerde visonytkoné i purpurovoné šnurenca (dor'jenca), jone sys ublade pe rupuvé brén'čy pir mramorytka stýlby. Suvnakuné i rupuvé čhuibena sys pe péto (pólo), savó sys začhudo zelene barénca, i mramorosa, i pierlamutrosa, i kalé barénca. Pibén sys podyno dre suvnakuné vučé tahtaja, savé sys rázna pir šukarjariben timinasa trijánda deša bará talánty. Mol kralískiro sys drieván but, pir kralískiro barvalypén. Pibén gijá štylés, pir réndo (zakóno), nikón na začhuvelas te p'jen; pal-davá so králi dyjá dasavo uphenybén sarénge, kon lydžijá réndy dro léskiro kher, sob (kaj) te kerén pir iló kažnoné manušéske. I králica Astin' [Vašty-ju.o.] adiáke-pac' kerdiá svénko vaš džuvliénge dro Artaksierksoskire-kralískiro kher. Pe eftáto (bitrinéngiro déšto) dyvés, kiéli pherdija moliátyr (lolé bravintatyr) kralískiro iló radymása, jov phendiá Miegumanoske, Bizfaske, Xarbonaske, Bigfaske i Avagfaske, Ziefaroske i Karkasoske eftá (efte) – jevnuhenge, savé dynarindlé angíl Artaksierksoskire-kralískiro muj. Sob (kaj) jone te janén králica Astin' angíl kralískiro muj dre kralítko koróna vaš dová, sob (kaj) te sykavél manušénge i theméskire range lákiri gožyma (šuk); pal-davá so joj sys drieván šukár. Ne králica Astin' na zakamdiá te javél pir kralískiro uphenybén, savó sys piriphendlo pir jevnuhenge, pal-davá drieván rosholiasyja králi, i xolý léskiri zahačíia dre léste. I phendiá králi manušénge, savé džindlé ĥaratuné dyvesá, – pal-davá so kralískire réndy kerdé angíl sarénde manušénde, savé džindlé Zakóno i lydžiné sendy. Pašatuné (približonna) manušá ke jov tedy sys: Karšena, Šefaro [Šetaro-ju.o.], Admafa, Farsiso [Paršyšo-ju.o.], Mieriéso, Marsiéna, Miemuhano-eftá Piersijakire i Midijakire thagárja, savé mogindlé te dykhén kralískiro muj i sys anglatuné manušá dro kralipén: “So te kerén pir Zakóno kralicasa Astiniasa pal dová, so joj na kandyjá Artaksierksoskiro kralískiro lav, savó sys phendló pir jevnuhende?” I phendiá Miemuhano angíl kralískiro i thagar'jéngiro muj: “Králica Astin' isyn bangi na angíl jekhé kralíste, a angíl saré thagar'jénde i angíl saré manušénde, savé dživéna pir saré Artaksierksoskire-kralískire provincyi. Paldavá so dová lav, syr lydžijá pes králica, dodžála ke saré džuvliá, i jone javéna te na kandén péskire romen i te rakirén: ‘Králi Artaksiérkso priphendiá te janén králica Astin' angíl léste, a joj na gijá’. Akaná thagaricy Piersijakire i Midijakire, savé syr šunena, syr lydžijá pes králica, javéna dová-pac' te rakirén sarénge kralískire thagar'jénge; i nakandypen i phut'kiribén javéna drieván baré. Kóli trej kralíske, mek te vydžál léstyr kralískiro uphenybén, i te začhinen dre Piersijakire i Midijakire zakóny, i te na otparuvelpe, pal-dová, so Astin' na javéla te zadžál angíl Artaksierksoskiro kralískiro muj, a lákiro kralískiro štéto králi piridelape javirjake, saví javéla fedýr látyr. Kiéli šunéna pal davá kralískiro uphenybén, savó rozdžalape pir saró léskiro baró kralipén, tedy saré džuvliá javéna te kutiakiren peskiren romen, barestyr ke tyknó.” I lačhó sys davá lav dre kralískire i thagar'jéngire jakhá; i kerdiá králi pir Miemuhanoskiro lav. I bičhadiá jov dre saré kralískire provincyi lylá, čhindlé dre kažno provincyjakiro štéto lákire čhinybnasa i ke saré manušá pe léngiri čib, sob (kaj) kažno (sváko) murš te javél xuláj dre péskiro kher, i sob (kaj) davá te javél phendló kažnonéske manušéske pe léskiri rodno čib. Paló (poslie) davá, kiéli štylyja Artaksierksoskire-kralískiri xolý, jov priripirdia pal Astiniate i paldová, so joj kerdiá, i so sys priphendlo pal láte. I phendlé terné-beršengire (otroki), savé dynarindlé pašýl kralíste: mek te rodén kučes kralíske ternen gožonen patyvalé džuvlién. I mek králi te čhuvél dykhibnaskiren dre saré péskire kralipnaskire-provincyjakire štéty, savé skedéna sarén terné patyvalé džuvlién, savé sys goža mósa, ke kralískiri felatin [šerutno-r.s.] Suzy, dre džuvliéngiro kher tel Giegajoskire – kralískire-jevnuhoskiro rakhiben, savó sys džuvliéngiro rakhibnari, i mek lénge te vyden makhlunia vaš šukaripén. I terný patyvalý džuvlý, saví javéla lačhí kralískire jakhenge, mek te javél kralicasa zamiést Astiniate. I lačhó sys davá lav dre kralískire jakhá, i jov adiáke i kerdiá. Sys dre kralískiri felatin dre Suzy, jekh Judo; lav léskiro sys Mardohiéjo, Naroskiro čhavó, Šymaskiro čhavó, Kišoskiro čhavó, Vieniaminóskire rodóstyr. Jov sys Jerusalimóstyr vybičhado khetané javire plienonenca, savén vylydžijá o Jehonija, Judejákiro králi, savén vybičhadia Navuhodonosóro, Vavilonóskiro králi. I barjakirdia jov Gadassa, – joj isyn adiáke-pac' Estéra, – léskire-kakeskiri čhaj, adiáke syr láte na sys ni da, ni dadés. Terný daja Judyca sys šukár stemása (stanósa) i šukár mósa. I kiéli myné lákire daj i dad, Mardohiéjo lyjá la ke pe zamiést čhate. Kiéli sys phendló sarénge kralískiro priphenybén i léskiro uphenybén, i kiéli sys skedyné but terné patyvalé džuvliá ke kralískiri felatin dre Suzy tel Giegajoskiro rakhiben, to tedy sys lyny i Estéra dro kralískiro kher tel Giegajoskiro rakhiben, kon sys džuvliéngiro rakhibnari. I jaciá lačhí léskire jakhenge adáia terný patyvalý džuvlý, i jaciá léste láska ke joi, i jov sygniakirdia te del láke makhlunia vaš gožyma i saró, so sys uphendló (naznačyndlo) pe lákiri paš, i te čhuvén ke joj eftá patyvalé džuvlién, savé sys mol te javén pašýl láte, kralískire kheréstyr; i pirilydžija la i lákire patyvalé džuvlién dre naj fededýr džuvliéngire-kheréskiri paš. Na rakirdiá Estéra ni pal péskire manušénde, ni pal péskiro ródo; pal-dová so Mardohiéjo dyjá láke uphenybén, sob (kaj) joj te na rakirél davá. I kažno dyvés Mardohiéjo javélas ke džuvliéngire-kheréskiri gréda (dvóro), sob (kaj) te udžinel pal Esterakiro sastypen, i pal-dová, so kerélape lása. Kiéli javdiá časo kažnoné terné patyvalé džuvliáke te zadžál ke králi Artaksiérkso, paló dová, syr dre proginé (nakhle) dešudúj čhoná saró kerdó sys pe láte, so trej džuvliénge, – pal-dová so adákicy dyvesá treindiá te prodžas léngire makhlunienca: šov čhoná mirrovone ksilesa i šov čhoná khandypnenca i javirenca džuvlitkone makhluniénca. Tedy adiáke prigotovindly terný patyvalý džuvlý te zadžál ke králi. Sob (kaj) joj te na potriebinel, láke dénas saró vaš vygiiben džuvlitkone kheréstyr dro kralískiro kher. Bel'vielié joj zadžalas, i pe zlóko (ránko) risjolas dre javír džuvlitko kher, tel Šaazgazokiro rakhiben, kralískire jevnuhoskiro, kon sys kralískire-džuvliéngiro rakhibnari; i butýr na vydžála ke králi, kóli féni králi zamangela la, i joj kharélaspe pir lav. Kiéli podgíia časo Esterakiro, Abihailoskire čhake, Mardohiejoskire-kakeskire, savó lyjá la ke pe zamiést čhate – te džal ke králi, tedy joj na mangdiá ničý, apríč dová, pal so phendiá láke Giegajo, kralískiro jevnuho, džuvliéngiro rakhibnari. I lathiá Estéra lačhó otlydžaiben ke pe dre saré manušéngire jakhá, kon dykhciá la. I lyné Estéra ke králi Artaksiérkso, dre léskiro kralískiro kher, dre déšto čhon, dre čhon Tiebiéfo, dro eftáto (bitrinéngiro déšto) berš léskire kralipnaskiro. I pokamdia králi Estéra butýr péskire saré džuvliéndyr, i joj iaciá drógo léske i lačhó otlydžaiben butýr saréndyr terné patyvalé džuvliéndyr; i jov čhudiá kralítko koróna pe lákiro šeró, i kerdiá la kralicasa pe Astiniakiro štéto. I kerdiá králi baró svénko vaš sarénge péskire theméskire range i vaš manušénge, savé dynarindlé pašýl léste, – svénko vaš Esterake, i kerdiá l'góta provincyiénge i rozdyja dáry kralitkone nažalimatyr. I, kiéli javír mólo skedyné sys terné patyvalé džuvliá, i Mardohiéjo sys beštó pašýl kralískire vudará. Estéra usá na rakirdiá pal péskiro ródo i pal péskire manušénde, syr priphendiá láke Mardohiéjo; a lav Mardohiejoskiro Estéra kerélas ke kónco (ke jagóro) i akaná adiáke-pac', syr i tedy, kiéli joj barija ke kak. Dre dová časo, syr Mardohiéjo sys beštó pašýl kralískire vudará, duj kralískire jevnuhi, Gavafa [Bigtano-ju.o.] i Fara [Terešo-ju.o.], savé rakhne progo, rosholiasyne i zadumindle te ĥazdén vast pe Artaksierksoste kralíste. To udžindiá pal dová réndo, Mardohiéjo, i piridyja Esterake kralicake, a Estéra phendiá kralíske Mardohiejoskire lavéstyr. Réndo sys rozĥalyno i lathno čačunesa, i len dujén, ublade pe kašt. I sys začhindló pal Mardohiejoskiro lačhó réndo dre lylvarí kralíste angíl léste. Paló (poslie) davá Artaksiérkso králi dyjá baró pravo Amanoske, Amadafoskire čhavéske, Vugejaninoske, i ĥazdyjá les, i čhudiá léskiro štéto, kaj jov sys beštó, vučedýr saréndyr thagar'jéndyr, savé sys léste. I saré, kon dynarindiá pašýl kralíste, savé sys pašýl kralískire vudará, klonindepe i pyné mósa pe phuv angíl Amanoste; pal-dová so adiáke priphendiá králi. A Mardohiéjo na klonindiape i na pyjá mósa pe phuv. I rakirdé manušá, savé dynarindlé pašýl kralíste, savé sys pašýl kralískire vudará Mardohiejoske: “Sóske tu phagiresa kralískiro uphenybén?” I syr jone léske rakirdé kažno dyvés, a jov na kandyjá len, tedy jone rosphendlé Amanoske, sob (kaj) te dykhén, ci vyterdjola dre péskiro lav Mardohiéjo, pal-dová so jov phendiá lénge, so jov sys Judo. I kiéli dykhciá Amáno, so Mardohiéjo na kloninelaspe, i na perelas mósa pe phuv angíl léste, tedy pherdija xoliása Amáno. I sykadyjá léske, so nisó na mol te čhuvél vast pe jekhéste Mardohiejoste; ne adiáke, syr phendlé léske, savéndyr manušéndyr Mardohiéjo, tedy zadumindia Amáno te muliakirén Judén, savé sys dre saró Artaksierksoskiro kralipén, syr Mardohiejoskire manušén. Dro pérvo čhon, savó isyn čhon Nisano, dre dešuiavir berš kralískiro Artaksierksoskiro čhurdyné žriébijo, angíl Amanoskiro muj dyvés dro dyvés i čhonestyr dro čhon, i pyjá žriébijo pe dešuiavir čhon, pe čhon Adaro. I phendiá Amáno Artaksierksoske, kralíske: ‘Isyn jekh manušá, savé rosčhurdyne i vybičhade maškír manušénde pir saré tyré-kralískire provincyi; i léngire zakóny na zdžanape saré manušytkoné zakonenca, i kralískire zakóny jone na spolninena; i kralíske naštý adiáke te jačkires len. Kóli kralíske javéla pir iló, tedy mek te javél začhindló syr priphenybén te muliakirén len; i deš bará talánty rup me pleskirava dre manušéngire vastá, kon kerdiá daja butý, sob (kaj) te lydžán dre kralískiri piralý (kazna).’ Tedy králi zlyjá péskiri angrusty čergenorjasa péskire vastéstyr i otdyjá la Amanoske, Amadafoskire čhavéske, Vugejaninoske, savó sys vérgo Judénge. I phendiá králi Amanoske: “Me dáva túke davá rup i manušén; i ker lénca adiáke, syr túke zdelape.” I sys khardé kralískire lylá-čhinybnaskire dro pérvo čhon, pe léskiro dešutrito dyvés, i sys čhindló, syr phendiá Amáno, kralískire barydyrénge dre provincyi theméskire i barydyrénge pe kažno provincyja i thagar'jénge kažnoné manušéngire; dre kažno provincyja lákire čhinybnasa i saré manušénge pe léngiri čib. Saró sys čhindló Artaksierksoskire kralískire lavéstyr i sphandlo kralískire angrustiasa čergenorjasa. I bičhadé sys lylá pir manušénde dre saré kralískire provincyi, sob (kaj) te zamarén, (te xasiakirén) i te muliakirén sarén Judén, tyknen i phuranen, bijatén i džuvlién, dro jékh dyvés, pe dešutrito dyvés dešuiavir-čhonéskiro, dro Adaroskiri čhon, i barvalypén léngiro te zalen. Piričhinyben dalé uphenybnastyr sys te otdén dre kažno provincyja syr zakóno, savó sys phendló (ob'iavindlo) vaš saré manušénge, sob (kaj) jone te javén skedyné ke dová dyvés. Manušá, savén bičhadé, sýges giné kralískire priphenybnasa, i uphenybén sys phendló i dre kralískiri felatin Suzy. I králi i Amáno sys bešté i piné, a fóro Suzy sys dre baró piridživipen. Kiéli Mardohiéjo udžindiá saró, so kerdiápe, jov roskustia péskire ídi, i čhudiá pe péste balytko gonó (vriétiščo) i práska; i jov vygijá pe maškirál fóro baré i kirkone jasvénca, i zadyja gódla. I dogijá ke kralískire vudará; adiáke syr naštý sys te zadžál dre kralískire vudará dro balytko gonó. Adiáke-pac' i dro kažno provincyja i štéto, karik dogijá kralískiro priphenybén i léskiro uphenybén, sys baró piridživipen Judénge, i posto, i roviben, i gódla; balytko gonó i práska sys čhuibnasa vaš butenge manušénge. I javné butiarné Esterakire i lákire jévnuhi, i rosphendlé láke, i drieván zoralés lyjá te piridživel králica. I joj bičhadiá ídia, sob (kaj) Mardohiéjo te urjavel len i te zlel péstyr péskiro balytko gonó; ne jov na prilyjá. Tedy Estéra khardiá Gafahos, jekhe kralískire jevnuhendyr, savés králi čhudiá ke joi, i bičhadiá les ke Mardohiéjo te udžinel: so sys dasavo i sóstyr davá gijá? I gijá Gafaho ke Mardohiéjo pe foróskiri foruný (plóšča), saví sys angíl kralískire vudará. I rosphendiá léske Mardohiéjo pal saró, so lésa kerdiápe, i pal ci but rup, pal savó dyjá lav Amáno te pleskirel dre kralískiri piralý (kazna) pal Judénde, sob (kaj) te muliakirén len. I podyja léske manušéngiro piričhinyben priphenybnastyr, savó sys phendló dre Suzy, i pal muliakiriben léngiro, sob (kaj) te sykavél Esterake i te del džinybén láke pal saró; apríč davá jov phendiá láke, sob (kaj) joj te džal ke králi i drieván te mangél les te potanginel (te žalinel) len i, sob (kaj) joj mangdiá les pal péskire manušénde. I javdiá Gafaho, i piriphendia Esterake Mardohiejoskire lavá. I phendiá Estéra Gafahoske, i bičhadiá les te phenél Mardohiejoske: “Saré manušá, savé keréna butý pašýl kralíste i dre kralískire provincyi džinéna, so kažnonéske manušéske, i muršeske i džuvliáke, kon zadžála ke králi dre andratuný gréda, i kon na sys khardo, jekh séndo – meribén; jekh odová, ke kon protyrdela králi péskiro suvnakunó destó, kodová jačélape džidó. A me na som khardy ke králi, ĥáda, až trijánda dyvesá.” I piriphendle Mardohiejoske Esterakire lavá. I phendiá Mardohiéjo dre otphenybén Esterake: “Na dumin, so tu jekhdžiny zrakhesape dro kralískiro kher saré Judendyr. Kóli tu dro davá časo javésa štyl (promolčinesa), tedy vast (pomošč) i zrakhibén javéna vaš Judénge javire štetóstyr, a tu i tyré – dadéskiro kher, xasjona. I kon džinéla, ci na vaš davá časo tu i dorescian (dolyjan) kralískiri patýv?” I phendiá Estéra adiáke dro otphenybén Mardohiejoske: “Džá, skéde saré Judén, savé isyn dre Suzy, i postinen vaš mánge, i na xan i na p'jen trin dyvesá, ni dyvesé, ni ratý, i me péskire butiarnenca adiáke-pac' javáva te postinav, i korigedýr (pozže) me džáva ke králi, xoc' davá isyn proti zakóno, i kóli trej javéla te xasjovav, to xasjovava.” I gijá Mardohiéjo, i kerdiá, syr priphendiá léske Estéra. Pe tríto dyvés Estéra uridiape dre kralítko ídia, i terdijá joj pe andratuné kralískire-kheréskiri gréda, angíl kralískiro kher; králi tedy sys beštó pe péskire-kralískiro trono, dro kralískiro kher, mamúj (proti) dro zagiibén dro kher. Kiéli králi dykhciá králica Estéra, saví sys terdy pe gréda; joj lathiá tangipén (žalima) dre léskire jakhá. I protyrdyjá králi ke Estéra suvnakunó destó, savó sys dre léskire vastá, i podgíia Estéra, i lyjape pal destoskiro jagóro (konco). I phendiá láke králi: “So túke trej, králica Estere, i savó isyn mangipén tyró? Až ke paš miré kralipnastyr javéla dynó túke.” I phendiá Estéra: “Kóli kralíske javéla pir iló, mek te javél králi Amanosa adadyvés pe svénko, savó me kerdjom léske.” I phendiá králi: “Džán sygedýr pal Amanoste, sob (kaj) te kerén pir Esterakiro lav.” I javdiá králi Amanosa pe svénko, savó kerdiá Estéra. I phendiá králi Esterake, syr jone piné mol (vino): “So javéla pir iló túke? Jov javéla spolnindlo; i savó isyn tyró mangipén? Mek ke paš kralipén, joj iavéla spolnindlo.” I otphendiá Estéra, i phendiá: “Ĥáda, isyn pe iló mánde i miro mangipén: kóli me lathjom láska dre kralískire jakhá, i kóli javéla pir iló kralíske, sob (kaj) te spolnines pir iló mánge i miro mangipén, tedy mek králi Amanosa te javén pe svénko, savó me keráva vaš lénge, i atasiá me spolninava lav kralískiro.” I vygijá Amáno dre dová dyvés lošalo (viesjolo) i lačh-dieskiro. Ne kiéli dykhciá Amáno Mardohiejos pašýl kralískire vudará, i odová na uštyjá, i štetóstyr na ĥazdyjápe angíl léste, tedy pherdija Amáno baré xoliása pe Mardohiejoste. Ne Amáno zrikirdiape. A kiedy javdiá dre péskiro kher, tedy bičhadiá te kharén peskiren malen, i peskirjá romniá Zereša. I rosphendiá lénge Amáno pal drieván baró péskiro barvalypén, i pal drieván but péskire čhavénde, i pal saró dová, syr les králi ĥazdyjá vučés i syr čhudiá les pe theméskire rande i butiarnende kraliskirende. I phendiá Amáno: “I králica Estéra nikonés na khardiá kralísa pe svénko, savó joj kerdiá, apríč mánde; adiáke i pe atasiá me som khardo ke joj kralísa. Ne saró davá na uhtýlla vaš mánge, paka me dykháva Mardohiejos, Judos, bešyndoj pašýl kralískire vudará.” I phendiá léske Zereš, léskiri romný, i saré léskire malá: “Mek te kerén vešyna (kašt) vučipnása dre pandždešá kuniá (lokti), i pe zlóko (ránko) phen kralíske, sob (kaj) te ublaven Mardohiejos pe léste: i tedy lošales džá pe svénko kralísa.” I sys pir iló davá lav Amanoske, i jov kerdiá vešyna. Dre doiá rat kralíske na sovelaspe, i jov phendiá te janén dyvesengire-začhinybnaskiri lylvarí vaš ripiribén; i gindlé la angíl kralíste. I lathno sys, so sys čhindló odój, syr dophendia Mardohiéjo pe Gavafoste (Bigtenoste) i Faraste (Terešoste), dujénde kralískire jevnuhende, savé rakhne progo, savé zadumindle te čhuvén vast pe kralíste Artaksierksoste. I phendiá králi: “Saví dyné patýv i sláva Mardohiejoske pal davá?” I phendlé terné manušá kralískire, savé sys butiarné pašýl léste: “Nisó na sys kerdó léske.” I phendiá králi: “Kon isyn pe gréda (dvóro)?” Amáno tedy javdiá pe andratuné kralískire-kheréskiri gréda te rakirél kralísa, sob (kaj) te ublaven Mardohiejos pe vešyna, savó jov prigotovindia vaš léske. I phendlé terné manušá kralíske: “Ĥáda, Amáno isyn terdó pe gréda.” I phendiá králi: “Mek jov te zadžál.” I zagijá Amáno. I phendiá léske králi: “So trej te kerén odolé manušéske, savés králi drieván kaméla te patyvakires slavása?” Amáno podumindia dre péskiro iló: “Konéske ž javireske zakaméla králi te kerél sláva, apríč mánde?” I phendiá Amáno kralíske: “Kodoléske manušéske, savés králi kamel te patyvakirel slavása, mek léske te janén kralískiri ídia, dre saví ur'jelape králi, i janéna gres, pe savéste tradéla králi, te čhuvén kralískiri koróna pe greskiro šeró, i mek te poden ídia i gres dre vastá jekhe anglatuné-kralískire thagar'jéndyr, i ur'jena odolés manušés, savés králi kaméla te patyvakirel slavása, i vylydžan les pe greste pe foritko gásy [peforuný (plóšča)-r.s.], i phenéna angíl léste: adiáke keréna kodolé manušéske, savés králi kaméla te patyvakirel slavása!” I phendiá králi Amanoske: “Dro davá-pac' momiénto le ídia i gres, syr tu phendián, i ker davá Mardohiejoske Judoske, savó isyn beštó pašýl kralískire vudará; nisó na promek saréstyr, so tu rakirdian.” I lyjá Amáno ídia i gres, i uridia Mardohiejos, i vylydžijá les pe foritko markplaco (foruný/plóšča), i phendiá angíl léste: “Adiáke keréna odolé manušéske, savés králi kaméla te patyvakirel slavása!” I risijá Mardohiéjo ke kralískire vudará. Amáno sygedýr gijá dre péskiro kher, smentno i začhakirdia šeró. I piriphendia Amáno Zerešake, péskire romniake, i sarénge péskire malenge, so kerdiápe lésa. I phendlé léske léskire godé manušá i léskiri romný Zereš: “Kóli Mardohiéjo isyn Judéngire rodóstyr, pir savéste tu lyjan te peres, tedy tu na pirizorjakiresa les, a sygedýr peresa angíl léste.” Jone iščo (inké) rakirdé lésa, syr javné kralískire jévnuhi, i lyné te sygniakiren Amanos te džal pe svénko, savó kerdiá Estéra. I javné králi Amanosa pe svenkitko xabén ke králica Estéra. I phendiá králi Estere i dre davá javír dyvés pe svénko (bankiéto): “So isyn pe iló túte, králica Estéra? Davá javéla kerdó pir lav. I savó isyn mangipén tyró? Mek ke paš kralipén, davá javéla kerdó pir lav.” Tén'ci otphendiá králica Estéra, i phendiá: “Kóli me lathjom tangipén (žalima) dre tyré jakhá, o Králi, i kóli kralíske javéla pir iló, tedy mek te javél darindlo miro džiibén mánge, pir iló miro, i miré manušénge, pir miro mangipén! Paldavá so bikindle amen, man i miré manušén, pe tradypen krig, umariben i xasibén. Kóli ame te javas bikindle syr pishárja i pisharicy, to me javáva štyl, usajékh vérgo na riskiréla uriéža kralískiri.” I otphendiá králi Artaksiérkso, i phendiá kralicake Esterake: “Kon isyn adasavó, i kaj isyn kodová, savó sys tromalo (murškanó) dre péskiro iló te kerél adiáke?” I otphendiá Estéra: “Vérgo i nálačho manúš – kadavá isyn zahalo Amáno!” I Amáno strahadyja angíl kralíste i kralicate. I králi uštyjá dre bari xolyn péskiri svenkostyr moliasa, i gijá dre felatiniakiri únta (sado); ne Amáno jaciápe te mangél pal džiibén péskiro králica Estéra, pal-dová so jov dykhciá, so užakiréla les pánda (fuj sud'ba) kralístyr. Kiéli králi risijá felatiniakire untatyr pe štéto dro kher, kaj sys svénko, Amáno sys pyi ke čhuibén, pe savó sys Estéra. I phendiá králi: “Až kaméla i te lel pe zor králica dre kher mánde, kiéli me som!” Lav vygijá kralískire uštendyr, i začhakirde muj Amanoske! I phendiá Xarbona, jekh jevnuhendyr, savó sys pašýl kralíste: “Ĥáda, i vešyna (kašt) isyn”, savó kerdiá Amáno vaš Mardohiejoske, savó rakirdiá lačhipén vaš kralíske, isyn terdó pašýl kher Amanoskiro, vučipnása dre pandždešá kuniá. I phendiá králi: “Ublaven les pe léste.” Adiáke jone ublade Amanos pe kašt, savó jov kerdiá Mardohiejoske. Tén'ci bari xolyn kralískiri štylyja. Dro do-pac' dyvés králi Artaksiérkso otdyjá kralicake Esterake Amanoskiro kher, Judéngire-vergoskiro; a Mardohiéjo zagijá angíl muj kralískiro, pal-dová so jov sys lákiro kak. I zlyjá králi péskiri angrusty čergenorjasa, saví jov otlyja Amanostyr, i otdyjá Mardohiejoske; Estéra čhudiá Mardohiejos dykhibnaskiresa pe Amanoskiro kher. I duredýr Estéra rakirdiá angíl kralíste, i pyjá ke léskire ĥerá, i rondiá, i mangdiá les te riskirél xolý Amanoskiri Vugejaninoskiri i plano léskiro, savó jov zadumindia pe Judénde. I protyrdyjá králi ke Estéra suvnakunó destó; i ĥazdyjápe Estéra, i terdijá angíl muj kralískiro. I phendiá: “Kóli kralíske javéla pir iló, i kóli me lathjom tangipén angíl muj léskiro, i čačunó davá réndo angíl muj kralískiro, i so milo som me jakhenge leskirenge; tedy mek te javél čhindló, sob (kaj) te javén riskirdé lylá pir zaduminyben Amanoskiro, čhavéskire Gamiedatoskire, Vugejaninoskire, savé jov čhindiá pal Judéngiro zamariben dre saré provincyi kralískire. Pal-dová so, syr me mogináva te dykháv bída, saví javéla pe miré manušénde, i syr me mogináva te dykháv meribén miré manušéngiro?” I phendiá králi Artaksiérkso kralicake Esterake i Mardohiejoske Judoske: “Ĥáda, me Amanoskiro kher otdyjom Esterake, i kokores les ublade pe vešyna pal dová, so jov čhudiá péskiro vast pe Judénde. Čhinen i tumé uphenybén pal Judénde, so isyn tuménge lačhó, kralískire lavéstyr, i phandián kralískire angrustiasa čergonorjasa: pal-dová so lylá, savé sys čhindlé kralískire lavéstyr i phandián kralískire angrustiasa, naštý te otparuven.” I khardé tedy kralískire lylá-piričhinybnaskiren dro tríto čhon, dro čhon Sivano, pe léskiro biš te tríto dyvés, i sys čhindló saró adiáke, syr priphendiá Mardohiéjo, ke/žýko Judy, i ke/žýko barydyrá pe provincyi i theméskire barydyrénge, i ke/žýko thagárja provincyjakire Indijatyr ke/žýko Jefiopija, šel te biš te eftá provincyi dre kažno provincyja lylenca lakirenca i ke/žýko saré manušá pe léngiri čib, i ke/žýko Judy léngire čhinybnasa i pe léngiri čib. I čhindiá Mardohiéjo kralískire Artaksierksoskire lavéstyr, i phandia kralískire angrustiasa čergonorjasa, i bičhadiá lylá pir manušénde, savé tradéna pe grénde, pe vierbliudende (dromadarende), i oslende kraliskirende. Pal-dová, so dalé lylá dyné vólia Judénge, savé dživdé dro kažno fóro, te skedénpe i te zaterdjon pal péskiro džiibén – te tradén krig, te zamarén i te xasiakirén sarén zoralen dre manušénde i dre provincyja, savé isyn dre xolý lénca: bijatén i džuvlién i barvalypén léngiro te zalen. Dro jekh dyvés pir saré kralískire Artaksierksoskire provincyi pe dešutrito dyvés dešudujengire čhonéskiro, Adaroskiro čhon. Piričhinyben dalé uphenybnaskiro te otdén dre kaažno provincyja syr zakóno, dyno te džinen (ob'iavindlo) vaš saré manušénge, sob (kaj) Judy te javén skedyné ke dová dyvés te othan pale péskire vergénge. Tén'ci manušá, savé tradyne uklisté pe kralískire prastybnytkone grénde, tradyne syg i sygedýr kralískire uphenybnasa. Davá uphenybén sys ob'iavindlo (phendló) i dre kralískiri felatin [šerutno fóro-r.s.] tvárdyma Suzy. I, ake, Mardohiéjo vygijá kralístyr dre kralískiro uribén jahontovone i parné cviatosa, i baré suvnakuné koronasa, i dre mantija, visonytko i purpurytko. I fóro Suzy otdžidyjá i zoralés obradyndiape. A Judénde sys tedy svencynyben, i rádyma, i loš (viesiélijo), i svénko. I dre kažno provincyja i dro kažno fóro, i pe kažno štéto, karik dogijá priphenybén kralískiro i léskiro uphenybén, sys rádyma Judénde i loš (viesielijo), svénko i svenkitko dyvés. I but manušá rigátyr jačné Judenca, pal-dová so pyjá pe lénde dar angíl Judénde. Ake, dro dešuiavir čhon, dro čhon Adaro, pe léskiro dešutrito dyvés, dre savó javdiá časo te spolninélpe kralískiro priphenybén i léskire uphenybén, dro dová dyvés, kiéli myslindle dro iló Judéngire vérgi te pirizorjakiren len, a vygijá pe javír, so kokoré Judy lyné zor pe léngire vergénde. Skedynépe Judy dre péskire fórja, pir saré provincyi Artaksierksoskire kralískire, sob (kaj) te čhuvén vast pe peskirende vergénde; i nikón na mogindiá te vyterdjol angíl léngiro muj, pal-dová so dar angíl lénde pyjá pe saré manušénde. I saré theméskire (gosudarstvale) raja dre provincyi, i šeralé i theméskire barydyrá, i manušá, savé spolninena kralískire réndy podrikirenas Judén, pal-davá so pyjá pe lénde dar angíl Mardohiejoste. Pal-dová so Mardohiéjo baré manušésa jaciá dre kralískiri felatin, i mavlýn (malva) pal léste psirdiá pir saré provincyi, adiáke syr davá manúš, Mardohiéjo, ĥazdelaspe vučés i vučés. I mardé Judy sarén peskiren vergén, čingirde kurtalása, muliakirdé i tradyne, i kerdé péskire vergenca so sys lénde pe godý. Dre Suzy, šerutno fóro, zamardé Judy i muliakirdé pandžšelá manušén. I Paršandafos, i Dalfonos, i Asfafos. I Porafos, i Adaljas, i Aridafas, I Parmašfas, i Arisajos, i Aridajos, i Vaijezafos, – Dešen Amanoskire čhavén Amadafoskire [Gamiedatoskire-ju.o.] čhavés, Judéngire vergos, zamardé jone, a pe čoriben jone na čhudé péskiro vast. Dre dová-pac' dyvés rosphendlé kralíske, kicý manušén zamardé dre kralískiri felatin Suzy. I phendiá králi kralicake Esterake: “Dre kralískiri felatin Suzy Judy zamardé i muliakirdé pandžšelá manušén i dešen Amanoskire čhavén; so kerdé jone dre javír provincyi kralískire? Savó isyn mangipén tyró? I jov javéla kerdó. I savó iščo (inké) mangipén isyn tyró? I jov javéla kerdó.” I phendiá Estéra: “Kóli kralíske javéla pir iló, tedy mek te javél deny vólia Judénge, savé isyn dre Suzy, te kerén dová-pac' i atasiá, so adadyvés, i sob (kaj) te ublaven dešen Amanoskire čhavén pe kašt.” I priphendiá králi te kerén adiáke; i dynó pe davá uphenybén dre Suzy, i dešen Amanoskire čhavén ublade. I skedynépe Judy, savé sys dre Suzy, adiáke i pe dešuštarto dyvés čhonéskiro Adaroskiro, i zamardé dre Suzy trinšelá manušén, a pe čoriben na čhudé péskiro vast. I javír Judy, savé sys dre kralískire provincyi, skedynépe, sob (kaj) te zaterdjon pal péskiro džiibén i, sob (kaj) te javél ramánjo (miro) péskire vergéndyr, i jone zamardé péskire vergéndyr ohtodešá pandž tysjoncy (bará), a pe čoriben na čhudé péskiro vast. Davá sys pe dešutrito dyvés čhon Adaroskiro; a pe dešuštarto dyvés dová-pac' čhon jone štylyne i kerdé les svenkitkone dyvesesa i radymása. Judy, savé sys dre Suzy, skedynépe pe léskiro dešutrito dyvés i pe léskiro dešuštarto dyvés; a pe léskiro dešupandžto dyvés štylyne, i kerdé les svenkitkone dyvesesa i radymása. Paldavá Judy gavitka, savé dživdé dre otčhakirde gavá, prolydžana dešuštarto čhonéskiro dyvés Adaro dre rádyma i svénko, syr svenkitko dyvés, bíčhavi počastúnki jekh jekhéske. I začhindiá Mardohiéjo daja vakancyja (slučajo), i bičhadiá lylá ke saré Judy, savé dživdé pir Artaksierksoskire-kralískire provincyi, ke pašatuné i ke duratuné, vaš dová, sob (kaj) jone te kerén kažno berš svénko péste pe dešuštarto dyvés čhonéskiro Adaro i pe léskiro dešupandžto dyvés. Adiáke dasavé dyvesá, dre savé Judy kerdépe štyl péskire vergéndyr, i adiáke dasavo čhon, dre savó piririsija lénde smentnyma dre rádyma, i pharipén – dro svenkitko dyvés, sob (kaj) te kerén léngire manušá svénko i rádyma (loš), bičhavi jekh jekhéske počastúnki i dyibén čororenge. I prilyné Judy dová prisykliaiben, so kokoré lyné te kerén, i pal so Mardohiéjo čhindiá ke jone. Syr Amáno, Gamiedatoskiro čhavó, Vugejanino, saré-Judéngiro vérgo, dumindia te zamarél Judén i čhurdyjá Pur, so isyn kokalko (žrebijo) pal léngiro tradypen krig i zamariben. Ne syr Estéra dogijá ke králi, i syr králi priphendiá nevoné lylesa, sob (kaj) kalé zadumki Amanoskire, savé jov pridumindia pe Judénde, obrisine pe léskiro šeró, i sob (kaj) les i čhavén leskiren te ublaven pe vešyna (kašt). Paldavá i khardé dalé dyvesá Purim, lavéstyr “pur.” Paldavá, pir saré dalé lyleskire lavá i dolesa, so kokoré dykhné i ke so lénde dogijá, začhude Judy i prilyné pe péste i pe čhavénde peskirende i pe sarénde, kon khetaniakirelape lénca, na otparuvi, sob (kaj) te svenkinen dalé duj dyvesá, pir čhinybnaskiro uphenybén pal lénde i dre péskiro vaš lénge časo, kažno berš. I, sob (kaj) dalé dyvesá te ripirén i te svenkinen dre saré ródy, dre kažno čékar' (kherítko ródo), dre kažno provincyja i dro kažno fóro; i sob (kaj) dalé dyvesá Purim te na otparuvenpe Judénde, i ripiribén pal lénde te na xasjol léngire čhavénde. Adiáke-pac' začhindiá králica Estéra, Abihailoskiri čhaj, i Mardohiéjo Judo, saré zorjása, sob (kaj) te spolninen davá javír lyl pal Purimo. I bičhadiá Mardohiéjo lylá ke saré Judy, ke šel te biš te eftá Artaksierksoskire-kralipnengire provincyi, miroskire i čačipnaskire lavénca, sob (kaj) jone zoralés te rakhén dalé dyvesá vaš Purimo dre péskiro časo, savó čhudiá pal lénde Mardohiéjo Judo i králica Estéra, i syr jone kokoré uphendle vaš péske i vaš péskire čhavénge dre pharé dyvesá, kiéli jone postinenas i rovenas godlenca. Adiáke Esterakiro uphenybén kerdiá zoraledýr davá lav pal Purimo, i jov sys začhindló dre lylvarí. Paló (poslie) dová čhudiá taksa králi Artaksiérkso te poden pe phuv i pe morjoskire (derjavéskire) ostrovy (džipá). Ake, saré léskire baré réndy, i ukratuno (točno) sykaibén pal Mardohiejoskiro baripén, savésa ĥazdyjá les králi, čhindló dre lylvarí vaš dyvesengire čhinybén Midijakire i Piersijakire kral'jéngire. Adiáke-pac', syr i dová, so Mardohiéjo Judo sys javír manúš pal kralíste Artaksierksoste i sys baró manúš vaš Judénge i jov sys pir iló vaš butenge peskirende pšalénge, pal-dová so jev rodyja lačhipén péskire manušénge i rakirdiá pal ramánjo (miro) saré péskire rodóske. Jekh manúš sys pe phuv Uc, léskiro lav sys Ióvo, jov sys bibangipnaskiro i devlýtko manúš. Jov darandyja (dardiape) Devléstyr i obrikirelas pes te kerél bibáht. I léste lathnepe eftá čhavé, i trin čhaja. I léste sys dasavo mištypén: eftá bará (tysjoncy) bakré, trin bará vierbliudy, pandž šelá guruvengire pary tel ĥámo, pandž šelá oslicy i drieván but dynárja. I jov sys naj baredýr manúš pe Vastóko. I léskire čhavé javénas i svenkinenas kažno (sváko) dro péskiro kher, dro dyvés, syr léske trej, i jone bičhavenas i kharenas ke pe péskire triné phenien te xan i te p'jen lénca. I sys adiáke: syr svenkitka dyvesá končynenaspe, odová Ióvo bičhavelas pal čhavénde, sob (kaj) te osvencynen len. Jov uštelas tasiárles (ránes) pe zlóko (pe ránko), i jov xačkirelas svénto janybén pal kažnoné (svakone) čhavéste; pal-dová so Ióvo rakirdiá: “Miré čhavé, xaj, mogindlé te kerén gréhi i te košen Devlés dre péskire ile.” Adiáke ŭsády (sak) kerdiá Ióvo. I, ake, sys dyvés, kiéli Devléskire čhavé (Jangóly) javné te sykadjon angíl Raste-Devléste, i nálačho javdiá adiáke-pac' lénca. I phendiá Raj Devél nalačheske: “Katýr tu javdián?” I nálačho otphendiá i phendiá: “Me psirdjom odorík i pale pir phuv i štadjom pir phuv upré i telé.” I phendiá Raj Devél nalačheske: “Ci pridykhcianpe tu ke Miro pishári Ióvo? Nane manušés pe phuv, kon isyn adasavó bidošéngiro i devlýtko, savó daréla Devléstyr i obrikirela pes te kerél bibáht?” I nálačho otphendiá Ráske-Devléske i phendiá: “Ci prostes Ióvo daréla Devléstyr? Ci na Tu kerdián tyno trusciál léste, i trusciál léskiro kher, i trusciál kažno mištypén, so isyn léste? Tu bahtiakirdian léskire-vastengire butiá i léskiro barvalypén adiáke but, so rozbarija pe phuv. Ne Tu, ĥáda, féni (tóka) le Péskire vastésa i zakede saró, so isyn léste, i jov, čačes, na javéla te bahtiakirél Tut!” I phendiá Raj Devél nalačheske: “Ake, saró léskiro isyn dro tyró vast, féni na čilav Iovos kokores.” Tén'ci nálačho gijá krig odothýr, kaj sys Raj Devél. I sys dro jékh dyvés, kiéli léskire čhavé i čhaja xané i piné mol (vino) ke jekhe-pšaleskiro kher, savó sys pérvo (anglatunó) dadéste. I, ake, javdiá jekh bičhadó manúš ke Ióvo i phendiá: “Guruva xané čar i oslicy pal lénde, syr Sabakire manušá (Savejani) pyné pe lénde i lyné len – dykhén, jone muliakirdé tyrne-beršeskiren kurtalakire (miečoskire) čhinybnasa: i me jekhdžinó nascjom te phenáv túke.” Kiéli jov iščo (inké) rakirdiá, javír bičhadó manúš javdiá i phendiá: “Devléskiri jag – bliskavica, pyjá bolybnástyr i shačkirdiá bakrén i terné-beršeskiren i vyhaia len, i me jekhdžinó jacjompe džidó te phenáv túke!” Kiéli jov iščo (inké) rakirdiá, javír bičhadó manúš javdiá i phendiá: “E Xaldiéi kerdé trin šajki, pyné pe vierbliudende i lyné len, i čačó, – zamardé kurtalakire čhinybnaskiresa dynar'jén, i me jekhdžinó jacjompe džidó te phenáv túke!” Kiéli jov iščo (inké) rakirdiá, tríto bičhadó manúš javdiá i phendiá: “Tyré čhavé i čhaja xané i piné mol ke léngiro pšal, kon isyn anglatunó; i, ĥáda, jaciá bari balvál, so javdiá čhučé prahendyr i pekadiá pir štar kheréskire kunty i kher pyjá pe terné manušénde, i jone isyn mulé, i me, jekhdžinó, jacjompe džidó te phenáv túke!” I uštyjá Ióvo i riskirdiá péskiro uribén, i muradia sarésa péskiro šeró, i pyjá pe phuv, dyjá paklono, i phendiá jov: “Nango me risjováva odorík pale: Raj Devél dyjá i Raj Devél lyjá krig; te javél šardo Ráskire-Devléskiro lav!” Paló saró davá so kerdiápe, Ióvo na phendiá grehítko lav, ci adiáke-pac' jov na bangiakirdia Ras-Devlés ni dro so. I sys dyvés, kiéli Devléskire čhavé (Jangóly) javné te sykadjon angíl Raste-Devléste, i nálačho adiáke-pac' javdiá maškír lénde te sykadjol angíl Raste-Devléste. I phendiá Raj Devél nalačheske: “Katýr tu javdián? I nálačho otphendiá Ráske-Devléske i phendiá: “Me psirdjom odorík i pale pir phuv i štadjom pir phuv upré i telé.” I Raj Devél phendiá nalačheske: “Ci pridykhcianpe tu pe miro dynári Ióvo? Nane nijékh manúš pe phuv, kon te javél adasavó bidošéngiro i devlýtko, savó daréla Devléstyr i obrikirela pes te na kerél bibáht? I savó saroiékh rikirélape zoralés dro péskiro bibangipen, na dykhí pe dová, so tu podhačkirdian man pe léste, sob (kaj) Me te xasiakiráv les bi pričynakiro.” I nálačho otphenélas Ráske-Devléske i phendiá: “Cýpa pal cýpa, i, čačó, manúš saró otdéla pal péskiro džiibén. Ne tu protyrde angíl Tyró vast i čilav léskire kokalý, i, léskire masá, i podykh, ci bahtiakiréla jov tut [jov, čalés, keréla prokošybén (arman) pe túte ke muj Tyró-ju.o.].” I phendiá Raj Devél nalačheske: “Ake, jov isyn dro tyró vast, ne tu zrákh léskiro džiibén.” I nálačho gijá krig Rástyr-Devléstyr, i jov dukhadia Iovos xoliamé prokazasa (dukhane fransenca) ĥerjakire podešvatyr ke léskiro šeró. I lyjá Ióvo vaš péske kotér (kusko) čeriepičnone pirjatyr, sob (kaj) lésa te randel kokoró pes; i besciá jov maškír práska (piéplo). I phendiá léskiri romný léske: “Tu saroiekh rikiresape zoralés dro péskiro bibangipen. Prokoš (ker armania) Devlés i mer.” Ne jov phendiá láke: “Tu rakirésa syr jékh pharé-šereskire džuvliendyr, saví phenelas: ame adiáke-pac' doresciam lačhipén Devléstyr, i ci aménge adiáke-pac' te na prilas bibáht?” Paló saró davá Ióvo na phendiá grého péskire ušténca. I javné trin Iovoskire drúgi (malá), kiéli jone šundlé pal sarí bibáht, so pyjá pe léste. I kažno (sváko) léndyr javdiá péskire štetóstyr: O Elifazo Fiemanostyr, o Vildado Savhejatyr [Šuahostyr-ju.o.], o Sofaro (Cofaro) Naamitostyr; i jone dorakirdepe te javén, sob (kaj) te tuginen lésa, i sob (kaj) te podrikiren les dro dúho (fáno). I syr jone ĥazdyné péskire jakhá durál, tedy jone na pindžkirde (na ĥalyné) les; jone dynepe te rovén zoralés. Kažno léndyr riskirdiá péskiro uribén, čhurdyjá práho upré pe bolybén pe péskiro šeró. I jone bešné khetané lésa pe phuv pe eftá (bitrinéngiro deš) dyvesá i eftá ratia, i nijékh léndyr na phendiá lav léske, pal-dová so jone dykhné, so léske sys drieván pharó. Paló davá Ióvo psiradia péskiro muj i prokostia (kerdiá armania) dyvés, dro savó jov bijándyja. I otphendiá Ióvo lavénca: “Mek te xasjol dyvés, dro savó me bijandyjom, i rat, so rakiréna tedy: ‘O muršoro lathelape.’ Dová dyvés – mek jov te javél ciamlo; mek Devél te na ripirel pal dová dyvés, ci mek dud te na ziainel pe dová dyvés. Mek kalypén i meribnaskiri zer (tien') te učhakirel dová dyvés, mek óbloki te jačénpe ŭsády (sak) pe léste, mek dyvesengiro kalypén te strahakirel dová dyvés. I pe kodoia rat, sob (kaj) cjomnyma te zauhtylel la, mek te na čhuvén andré kodoia rat khetané beršeskire dyvesenca; mek joj te na zadžál dro čhonengiro ginybén. Mek te javél čhučí (pusto) kodoia rat, mek radymakiri gódla te na javél nijékhvar dro kodoia rat. Mek odolé, kon prokošela (keréla armania) dyvés, te prokošen (te kerén armania) pe doiá rat, savé isyn skedyné te ĥazdén Lieviafanos; mek te murdjon tasiarlakire (rankoskire) čergeniá; mek kodoia rat te užakirel dud (svéto), ne les nane, i mek joj te na dykhél rankoskire cymbly (riesnicy): pal-dová, syr joj na zaphandia pe klydyn vudará miré-dákire ločoviátyr, so lydžiné man, syr i na garadia pharipén miré jakhéndyr. Sóske me na myiem dre dákire masá, – syr me vydžavas dákire ločoviátyr i te na pharadjovav? Sóske, mirí daj lyjá man pe čangá? I vaš so treindiá mánge te žuiskirav dakiri ciuci? Vaš dová, sob (kaj) me te pasjovav štylés péske, me javavas sutó péske: me otkhinjovavas péske, khetané kral'jenca i godý-dyibnaskirenca, kon sys pe phuv, savé ĥazdyné fielatinia péske pe naobdživdle štéty, ci thagar'jenca, konéste sys suvnakái, savé pherdiakirde péskire kherá rupésa: ci sóske me na jacjom sýrby vyčhurdypnytko čhavoró ci sýrby tyknomas, savó nijékhvar na dykhciá dud (svéto). Odój bibahtalé pirijačena te kerén doš, i odój khiniakirde otkhinjona (otphurdena). Odój štaribnaskire manušá otkhinjona khetané, jone na javéna te šunén zan, kon pritasavelas len. Tykné i drieván baré isyn odój, i pishárja isyn vol'na péskire randyr. Vaš so isyn manušéske dud (svéto), savéste isyn bari bída, i džiibén odolénge, konéske isyn kirko pe di, i odolénge, kon tyrdelape, sob (kaj) te merén, ne meribén na javéla, i odolénge, kon rodéla meribén zoraledýr syr rodéna garadé barvalypena, i savé zoralés radynenaspe i javénas ráda, kóli jone lathenas kónco (maĥila)? – ci konéskiro drom isyn garadó, i konés Devél učhakirdiá javriéstyr, syr tynosa. Pal-odová me dáva gondia angíl, syr te xav, i miré godlia, syr me dáva gondia (uzdyhinava), čhuvenape syr paniá. Pal-odová so doiá-pac' dar, – sóstyr me darandyjom, i pyjá pe mánde i dová-pac', – sóstyr me trašadyjom, – dová javdiá ke me. Me som dre dar, me na som štyl, me na otkhinyjom, i bari bída javdiá.” O, Elifazo Fiemaninostyr, otphendiá i rakirdiá: “Kóli javéna te rakirén lav ke tu, sob (kaj) tu tedy te na peres dro dúho (fáno)? Ne kon sataki moginéla te obrikirel javirés te rakirél? Čačó, so tu sykliakiresas buten, i tu zoraliakirdian bizorjákire vastá. Tyré lavá podrikirenas odolén, kon obštavelape, i tu zoraliakirdian kodolén, savénde čangá bandine. Ne akaná bibáht pyjá pe túte, i tu peresa dro dúho (fáno); joj čiladiá tut i túke akaná isyn pharó. Ci tyrí vaga (bari patýv) ke Devél na déla túke zoraló patiaibén; ci tyré bidošengire džiibnastyr naštý te užakires lačhipén? Priripir péske, ci xasijá vari-kon, kon sys bibangipnaskiro? I, ci sys adiáke, sob (kaj) devlytkoné manušén te čhurdén te xasjon. So me mogindjom te dykháv, sys dová, so kon pharavela fuj phuvjá, i kon rosčhurdela bibáht syr ziárki dre phuv, odolé-pac' manušá i odová-pac' čhinena telé. Jone xasjona Devléskire phurdypnastyr, Léskire-duhoskiri xolý pohala len sarésa. Mek jone te rykinen syr ščerá (liévy), i te rykinen jone syr drieván mižeh ščericy, saroiekh terné – ščerenčire dandá phadjona. Phuranó ščer muljola, pal-dová so léske na uhtyléla (nádosi) so te riskirél dandenca, a ščericakire ščenken rosčhurdena. Akaná jekh lav čorahanés javdiá ke me, i miro kan šundiá, so jov gundiarindia (šepčyndia) mánge: dre nábut trašane zdanki, so manúš dykhéla dro sunó ratý, kiéli xor soiben léla manušés: dar pyjá pe mánde, i me izdrava adiáke, so saré miré kokalý trinskirenape; i o dúho progijá pašýl mánde, i miré balá pe šeró terdiné. Jov uštyjá i me na mogindjom te rozdykhav, syr jov vydycjola: léskiro stáno sys angíl miré jakhá; i me šundiem lokhi zan (glos), so phendiá: Ci saštý te javél sob (kaj) manúš te javél čačunedyr Devléstyr? Ci saštý te javél, sob (kaj) manúš te javél butýr bibangipnaskiro syr Devél? Dykh, Jov na dopatiala Péskire (bolybnáskire) dynar'jénge, i, Jov ginéla, so Léskire Jangóly isyn nagode, i pe kicý butýr Jov na dopatiala manušénge, kon dživéla dre kherá blatatyr, so kirnjona, kon vyginé prahostyr, kon rospharavelape syr mol' (mel')! Jone pharadjona maribnastyr pe koterá zlokostyr (rankostyr) ke bel'vél', jone xasjona pe-usady (pe sak), so nijékh i na podykhela pe davá. Ci na košenape léngire šatrakire šele (ci na xasjola léngiro lačhipén)? Jone meréna, i na džinéna godypén. Khar, Ióvo, kóli isyn odová te otphenel túke? I ke savé svénta, tu risjosa? Pal-dová so xoliakiribén xasiakiréla dylyné manušés, i zevlynypén (zavist') marela prostone-godiakire manušés. Me dykhcjom, syr dylynin'ko mekéla kórni (rukhá), ne me jekhátyr prokostjom (kerdjom armania) léskiro kheratuno štéto. Léskire čhavé isyn dur, sob (kaj) te javén bahtalé, len domarena pašýl pórta, i nane nijékh, kon te zrakhél len: o bokhalo pohala léskiro umaloto, až léla i phusadytkone xrustostyr i bokhalé ke xabén manušá rozuhtylena saró, so isyn léste. Pal-dová so bibáht na javéla prahostyr (phuvjátyr), syr i pharipén na džála upré phuvjátyr; i manúš bijandjola vaš mén'ki syr tykné jagorja, so vurniana upré. Ne me, pe tyró štéto, rodavas Devlés i me čhuvavas miro réndo angíl Devléste. Kon keréla drieván baré réndy, so manušéske naštý te ĥaljol, i but dívna réndy, so naštý te pogines. Jov déla bryšýnd phuvjake, i Jov bičhavéla paniá pe féldy, Jov čhuvéla pe vučé štéty odolén, kon isyn teliakirde, Jov ĥazdéla pe bidarakire štéty odolén, savé zoralés tuginena. Jov rozmarela dová, so frenta manušá priduminena adiáke, so léngire vastá te na dokeren léngire réndy. Jov uhtyléla but-godiakire manušén dre léngiri frentyma adiáke, so mendrone – manušéngire khetané dúmy obrisjona fuipnasa pe lénde: jone dykhenape kalypnasa dyvesé, i jone psiréna, čilavi vasténca syr kororé dyvesé, sýrby jone isyn ratý. I Jov vyrakhela kurtalátyr odolén, kon isyn dre trébima, zor-manušéngire rakiribnastyr i léngire vastéstyr. I čororé javéna te užakiren lačhipén, i načačune phandena péskiro muj. Ake, bahtaló isyn odová manúš, savés Devél zoralés sykliakiréla, paldavá na otphenpe Sarezoralypnaskire Devléskire sykliakiribnastyr ke dukhá. Pal-dová so Jov pekavela ke kalé masá (siniaki), i Jov piriphandela len; Jov dukhavela i Léskire vastá sastiakirena. Jov zrakhéla tut šove bidendyr i dre eftáto bibáht na čilavéla tut. Jov vyrakhela tut bokhátyr, meribnástyr, i kurtalakire zorjátyr pe maribén. Tu javésa garadó bibahtalé čibendyr (čib'jendyr), i tu na javésa te dares xasiakiribnastyr, kiéli jov javéla. Tu javésa te saspe bokhátyr i xasiakiribnastyr, i tu na javésa te dares murdaléndyr, savé isyn pe phuv. Pal-dová so túte javéla dorakiribén barénca feldatyr i feldakire murdalá javéna dro ramánjo (miro) túsa. I tu javésa te džinés, so tyrí šátra isyn zrakhny, i tu obdykhesa péskire-bakrengiri šopa, so saró odój isyn pe péskiro štéto. I tu javésa te džinés, so tyré palál-javibnaskire čhavoré (patomki) javéna but, i tyré-rodoskire čhavé javéna adákicy but, kicý isyn čarinki pe phuv. Tu dodživesa ke baré beršá sýrby parné-giveskire ĥarby (snopy) dodžana ke spialyma, so len čhuvéna telé dro péskiro uliago (pora). Ĥáda, davá isyn saró, so ame rozĥalyjam, davá isyn čačipén, šun davá i džin, so davá isyn vaš tyró lačhipén.” I otphendiá Ióvo lavénca: “O, te čhuvén pe ubladýtka (viésy) miro saró kalypén, i te čhuvén sarí mirí bari bída pe biz'mieny? Pal-odová so akaná daja bída javélas pharedyr morjoskire (derjavéskire) prahostyr, paldavá miré lavá isyn dasavé sygna. Pal-odová so Sarezorjakire–Devléskire maribnýtka bustiá (striély) isyn andrál mánde, miré masá p'jena léngiri truta (otrava): trašaibén angíl Devléste terdijá dre stonka pe mánde. Ci godlela buso (diko) óslo (miegári) pašýl čar, ci brylinela guruv paš léskiro xahaiben (miesivo)? Ci saštý te xas bi smakoskiro xabén bi londeskiro? Ci isyn vari-savó smako dro parnoreskiro bialtko? Dová, so miro di otphenelape te xal, paldavá isyn miro namišto xabén; O, sob (kaj) féni me mogindjomas te pomangav, i sob (kaj) Devél te javél dro jekhipén miré mysliasa: sob (kaj) féni te zakamel Devél, sob (kaj) Jov te rostasavel man, sob (kaj) Jov te protyrdel Péskiro vast i te xasiakirél man. Tedy javélas mánge ramanipen (spokojstvijo); i me zoralés radynavaspe až dre mirí dukh, so na žalinela man, so me na otphendjompe Sventoné Devléskire lavéndyr. Kaj te lav zor mánge, sob (kaj) te užakirav lačhipén? I savó isyn miro kónco (jagóro), sob (kaj) mánge iščo (inké) te vyrikirav? Ci isyn mirí zor dasaví, syr zoralé bará isyn? Ci isyn miré masá dasavé, syr xarkóma (mied')? Ci davá ráda me kokoró péske? Ci godypén jačkirdiá man? Kodoléske, kon isyn zamenčyndlo, trej te užakirel lačhipén malendyr? Kóli jov féni (tóka) te na jačkirel dar angíl Sarezorjakire Devléste. Miré pšála obginepe mánca xohanés sýrby rékica (lenorí), sýrby rekicengiro thadyipen, so lydžála paní duredýr, savó isyn ciamlo ljodostyr, i dro savó iv garadjola: kiéli jone vyšucjona, tedy jone tyknjona; kiéli xačkiribén déla dre lénde, jone xasjona péskire šteténdyr: jone bandjona pir bergakire rigá, jone thadena pe čhučí phuv i xasjona. Femanakire karavany dykhéna pe lénde, a lodyipnaskire manušá Savejatyr (Šebatyr) rozginena (rikiréna nadiéia) pe lénde: jone ladžana péskire patiaibnastyr; jone javéna odój, i lénde saró piripentyndiape dre godý. Adiáke-pac' i tumé akaná san sýrby kodolé rekicy: tumé dykhéna vari-so darano i tumé akaná daréna. Ci phendjom me: “Janén vari-so mánge!” Ci: – “Kerén dáro mánge tumaré barvalypnastyr!” Ci: – “Zrakhen man vergoskire vastéstyr!” Ci: – “Vyrakhen man pritasaibnaskire vastéstyr!” Sykliakirén man i me javáva te rikirav čib, i kerén adiáke, sob (kaj) me te ĥaljovav, dro so me dyjompe dukhá (xohadjompe). Saví zor isyn dre čačuné lavá! Ne savó ž isyn lačhipén, so tumé čingardenape mánca? Ci tumé priduminena, sob (kaj) te bangiakiren man dre lavá, džinén – balvalitka isyn manušéskire lavá, konéske isyn pharó. Dykhén: tumé čhurdena žriébije, sob (kaj) sirota (piroto) te javél tumaró pishári, i ganavena ĥanbín (jama) tumaré maléske. Akaná, dykhén pe mánde: i angíl tumaré muiá, sob (kaj) me te xohavav? Risjon, me mangáva tumen, fuj na javéla; risjon iščo (inké), sob (kaj) tumé te dykhén miro čačipén. Ci isyn savó načačipén miré čibatyr? Ci na rozĥaljovava me lačhés, kaj isyn fuipén? Ci manušéskiro džiibén nane saró dre pharí butý pe daja phuv? Ci manušéskire dyvesá isyn na sýrby andynarščykoskire (porobkoskire) dyvesá? Syr pishári xačkirdes vykedéla zer (tien'), adiáke-pac' i, andynarščyko užakiréla péskiri mazúri (nagrada). Adiáke-pac' i mánge dyné xartytka (sujetna) čhoná i khiniakirde ratia uphendle mánge. Kiéli me pasjovava, tedy me phenáva: “Kiéli da me uštava, i rat džála krig? I me piririsjovava sarí rat angíl zlóko (ránko). Miré masá isyn čhakirde kirmenca i prahosa, mirí cýpa pharadyja i kirnjola. Miré dyvesá prastána sygedýr thačoskire rotatyr, i prodžána adiáke, so nane sóstyr te užakirav lačhipén. Rípir, Dévla, so miro džiibén isyn balvál, miré jakhá butýr nijékhvar na dykhéna lačhipén. Kodoia jakh, kon dykhciá man, na udykhéla butýr man: kiéli Tyré jakhá risjona pe mánde, man na javéla butýr. Syr óbloko rozdžalape i našadjola, adiáke-pac' i dová, kon džála telé dro liúno (ado), na javéla pale. Jov butýr na risjola dro péskiro kher, nijékh léskire štetóstyr butýr na javéla te džinél les. Pir daja pričyna me na javáva te phandav péskiro muj: me javáva te rakiráv miré-duhóskire tugatyr; me javáva te žalinavpe miré iléskire kirkipnasa. O, Dévla! Ci me som mórjo (derjáv), ci me som morjoskiro (derjavéskiro) rupučo (čudoviščo), so Tu čhuvésa stréga pe mánde? Kiéli me phenáva péske: “Miro čhuibén ramaniakirela man, i mirí pasindly (krovat') lokhiakirela mirí žaloba; to tedy Tu trašakiresa man sunenca, i strahakiresa dykhibnaskire zdankenca; paldavá Miro di vykedyjá, sob (kaj) te zatasaven man; meribén javélas fedýr dasavé džiibnastyr miré kokalenge. Mánge jaciá džungaló (brydindia) miro džiibén, me na javáva ŭsády (sak) te dživáv, mek man jekhdžines, pal-dová so miré dyvesá isyn čhučé sýrby phurdypen. So dasavo isyn manúš, so Tu adiáke barjakiresa léskiro štéto, so Tu riskiresa iló pe léste, so Tu javésa ke jov kažno zlóko (ránko), so Tu sprobinesa les kažno menta (minuta)? Sóske ĥará Tu na riskiresa Péskire jakhá mándyr, i mek man jekhdžines angíl, syr me nakhavava (glytynava) péskire salia (slina). Kóli me kerdjom gréhi, tedy so kerdjom me túke, o Manušéskiro Stregari, sóske Tu vykedyjan man syr bakrés, adiáke so me sýrby ĥámo uridjom pe péste. Sóske tedy Tu na otmekesa miro čoripén, i na lésa krig mirí bibáht? Pal-dová so me javáva te pasjovav dro práho, i Tu zoralés javésa te rodes man rankosa (zlokosa), ne man butýr na javéla.” I otphendiá Vildado Šuahostyr i phendiá: “Syr ĥará tu javésa te rakirés adiáke? I tyré lavá, so tu rakirésa, isyn sýrby zoralý balvál? Ci Devél piririskirela séndo, ci Sarezorjákiro Devél piririskirela čačipén? Kóli tyré čhavé kerdé gréhi proti Léste, tedy Jov i sendiakirdia len pal léngiro čoripén. Kóli tu javésa te rodes xačkirdes Devlés, i te čhuvés péskire mangipena angíl Sarezorjakireste; kóli tu san bibangiakiro i devlýtko, tedy, čačó, Jov uštéla pal túte, i Jov keréla adiáke, sob (kaj) te javél mištypén tyré kheréske. Mek vagedyr (angledýr) túte sys nábut (kutý), ne dro jagóro (dro kónco) túte javéla drieván but. Paldová phučpe, me mangáva tut, pal ródy, so sys vagedyr i obdumin dová, so léngire dadá lathné, pal-dová so, ame sam adasavé, sýrby tasiá bijandyjam, i ame nisó na džinása, i amaré dyvesá pe phuv prastána syr zer (tien'). Ci na sykliakirdé prapapy tut, ci na phendlé túke, ci na vyphendle lavá léngire iléstyr? Ci moginéla papiruso te barjol bi dričakiro (bi bolotoskiro)? Ci moginéla sil (kamyšo) te barjol bi panieskiro? Kiéli daja raslina iščo (inké) zeleny i nany čingirdy, jej vyšutjola sygedýr kažnoné čarjatyr. Adiáke-pac' i kodolengire dromá, kon bistrel Devlés i fujé-manušéngiro užakiribén pe lačhipén, adiáke-pac' xasjola, léngiro zoraló patiaibén xasjola, i dová pe so jov rozginela, isyn syr mizgirjoskiri (paukoskiri) thava (plieva). Jov podrikiréla pes pal péskiro kher, kher na terdjola, jov uhtylelape pal léste, ne kher na vyrikiréla les. Kadasavó manúš barjola sýrby dylyny čar tel kham, i lákire randiá piribarjona bar; lákire kórni (rukhá) khuvenape trusciál barengiri bérgica, jone promarena štéto maškír bará. Ne kóli Devél vykošela len léngire štetóstyr, tedy pe dová štéto otphenenape léndyr, phení: “Me na dykhcjom tumen!”” Ake, saví isyn rádyma kadalé fujé-manušéngiri dalé džiibnastyr, i prahostyr javír barjona. Ake, Devél na otčhurdela Péstyr bidošengire manušés, syr Jov i na podrikiréla paló vast odolés, kon keréla bibáht. Iščo Jov pherdiakirela tyró muj sabnasa, i tyré uštá baré radymása, Jov učhakiréla ladžasa tyré vergén, i šátry, kaj dživéna fuj manušá, xasjona!” Tén'ci Ióvo otphendiá lavénca: “Me džinóm (džináv), so davá isyn čačipén; ne syr o manúš saštý te javél čačunó angíl Devléste? Kóli jov vykedéla te čingirelpe lavénca Devlésa, jov naštý te otphenel až ni pe jekh Léskire tysjoncy phučibena. Devél isyn godó ilésa i zoralypnasa: kon terdjolas dre stonka mamúj Léste, ci kodová jačélape dro ramánjo (pokojo)? Kon piričhuvela bérgi, so nikón na džinéla davá, kiéli Jov len ravela telé dre xolý. Kon trinskirela phuv lákire štetóstyr, i lákire stýlby izdrana; Kon priphenela khameske, i kham na uštéla, i Jov čhuvéla čergeniá pe jakhítko čergenorí (piečat'). Devél Kokoró čhudiá bolybén, i Jov štavela pir vučé-morjoskire (derjavéskire) valny: Jov sozdyjá pe bolybén Asos, Kiesiljos i Ximos i pašýl-dyvesytka čergeniá. Kon keréla drieván baré réndy, so nijékh na ĥaljola, i dívy, so naštý te poginen. Ake, Jov prodžála pašýl mánde, i me na dykháva Les, i Jov džála pašýl duredýr, i me naštý te rozdykhav Les. Ĥáda, Jov léla krig i kon moginéla (saštý) te miešynel Léske? Kon phenéla Léske: “So Tu kerésa?” Devél na léla kri Péskiri xolý; Šuahostyr pomogibnaskire bandjona tel Léste: pe kicý tedy me som tyknedýr, sob (kaj) mánge te otphenav Léske, te vykedav lavá te čingiravpe lavénca Lésa? Mek me i sómas čačipnáskiro, me na mogindjomas te otphenav Léske, ne me féni (tóka) pomangavas miré Sendaris te tanginél man. Kóli me kharavas by, i Jov otphenélas by mánge, me na patiandyjom, so Jov šundiá mirí zan, – Jov-Kon lučkirelas (lut'kirelas) man sýrby zoralý balvál, i dukhavelas man butýr i butýr bi pričynakiro. Jov na domekela, sob (kaj) me te vydyhinav, ne Jov déla čalés kirkipen mánge. Te javél davá réndo pal zor, dykhén, savó Jov isyn zoralypnaskiro; a te javél davá réndo pal čačipén, kon saštý te del miro dyvés te sendinavpe Lésa? Mek i te javél čačipén pal mánde, Jov zoralés sendiakirelas man miré lavénca; mek me i te javav bibangipnaskiro, Jov dophenéla, so me som načačuno. Me na som bangó, me na kamám te džináv kokoró pes, a miro džiibén jaciá džungaló (brydindia) mánge. Sarenca isyn jekh; paldavá me phendjom: Jov xasiakiréla syr bidošengires, adiáke-pac' i fujé manušés. Kóli čhupny muliakiréla jekhátyr (vniezapnes), Jov salape bibangipnaskirendyr, savé piridživena ke mén'ki. Phuv isyn dyný dre bibahtalé-manušéngire vastá; Jov učhakirdiá sendar'jéngire muiá. Kóli davá nane Jov, to kon iščo (inké) davá saštý te kerél? Miré dyvesá prastána sygedýr prastaibnaskirestyr: jone našéna krig, jone na dykhéna lačhipén. Dyvesá prodžána syr sygna triščynitka pármy (korabli), sýrby órlo (kído), savó čhurdelape naužakirdes pe čordo doresybén. Kóli me phenáva: “Me bistrava pal miro kalypén, so me žalindjompe, me paruvava péskiro rondlo muj i me podrikirava pes sabnasa: me izdrava saré miré men'kendyr, me džinóm, so Tu na pridžinesa man, so Me som bibangipnaskiro. Kóli me te javav dasavo bibahtaló, sóske tedy me keráva pharí butý ivjá? Kóli me vymoravape ivune paniésa, i te keráv miré vastá, so jene nijékhvar na sys; ne Tu i tedy tasadiakiresa man andré bláta i miré ídi javéna sýrby te durjon mándyr.” “Pal-dová so Devél isyn na manúš, syr me som, sob (kaj) mánge te otphenav Léske, i sob (kaj) aménge te džas khetané Lésa pe séndo. Nane maškiratuno-manúš maškír aménde, kon moginelas by te čhuvél léskiro vast pe aménde. Mek Devél te lel krig Péskiri ran mándyr, i mek te javél, sob (kaj) Léskiro trašaibén te na darakirel man. Tén'ci me javáva te rakiráv, i me na javáva te darav Léstyr, ne me na som dasavo, so tumé duminéna.” Miro di khinyja miré džiibnastyr: me dáva vólia péske te tanginavpe (te žalinavpe), me javáva te rakiráv miré dieskire kirkipnastyr. Me phenáva Devléske: “Na sendiakir zoralés man. Sykáv mánge, pal so Tu lydžása čingárd (sora) mánca.” Savó ž lačhipén isyn Túke, so Tu tasavesa, so Tu dykhésa vyčipnastyr pe davá, so Tyré vastá sozdyne? I Tu ziainesa manušéngire skedyniatyr? Ci isyn Túte jakhá, syr aménde? Ci dykhésa Tu, syr manúš? Ci isyn Túte, dasavé-pac' dyvesá, syr manušéste, kon meréla? So Tu rodesa doš dre mánde, i so Tu vyphučesa pal grého dre mánde? Kon – syr na Tu, džinésa, so me na som fuj, i nane nijékh te zrakhél man Tyré vastéstyr? Tyré vastá khudé khetané man i sozdyne man – savó me som; i akaná Tu xasiakiresa man! Rípir, so Tu sozdyjan man syr gleja (glina), i Tu ž pirikiresa man pale dro práho. Ci na Tu vyčhudian man syr thud? I ci na Tu vytolčindian man syr ĥensto kiral? Tu učhakirdian man cypasa i masenca, i Tu pirikhudian man kokalenca i žylenca; Tu darindian (podyjan) mánge džiibén i Tyrí láska, i dová, so Tu pekesape pal mánde, rakhcian miro dúho (fáno). I saró davá Tu garadian dro péskiro iló, me džinóm: davá isys Túte pe godý. Kóli me keráva gréhi, tén'či Tu zarikiresa len dre godý. I Tu na otčhakiresa man miré čoripnástyr. Kóli me som fuj manúš, tedy bída pe mánde! Rovnes syr i kóli čačipén isyn pal mánde, me naštý te ĥazdav miro šeró. Me som, dre bipatyv, mánde isyn pherdó bibahtia. Mirí bibáht barjola: Tu tradesape pal mánde sýrby drieván mižeh ščer (liévo); i nevéstyr Tu sykavesa péskiro zoralypén ke dar pe mánde. Tu bičhavesa ŭsa nevoné jakhitkonen pe mánde, i Tu barjakiresa péskiri xolý pe mánde, Tu ŭsa paruvesa Péskiro maribén pe mánde. I vaš so Tu domekhcian, sob (kaj) me te vydžav dákire ločatyr? Mánge javélas kónco (jagóro) i nijékh jakh te na dykhélas man. Me javavas sýrby me i na sómas nijékhvar, man pirilydžanas ločoviátyr ke mulykano (ke ĥrobo). Ci nábut (kutý) dyvesá, so jačnépe vaš mánge? Pirijač, Dévla! Jačkir man jekhdžines, sob (kaj) mánge nábut te otdžidjovav. Angíl dová, syr me džáva i nijékhvar na risjováva pale, – ke c'makiro them (strana) i tel meribnaskiri zer (tien'); ke tugitko them kalypnasa, savó isyn syr kalypén kokoró, so kaj nane giiben, kaj dud isyn syr ĥensto kalypén.” Tén'ci Sofaro Naamostyr otphendiá lavénca: “Ci naštý te otphenes pe but phučibena? Ci buté-rakiribnytkone manušénge javír manušá isyn bangé te phenén, so léskiro isyn čačipén? Ci so tyró xohanó rakiribén začhuvela manušén te javén dro ramánjo (miro)? Ci syr tu sasape xoliames, tedy so ž naštý te ladžakiren tut? Pal-dová so tu ž phendián: “Miré-patiaibnaskiro sykliakiribén isyn bibangiakiri, i me som bidošéngiro dre tumaré jakhá.” Ne, sob (kaj) Devél te lel te rakirél i te otkerel Péskire uštá pe túte; i, sob (kaj) Jov te sykavél túke godypnaskire čorahanybena, syr davá isyn, so jone dre duj móly piridžana dová, so Tyrí godý saštý te poduminel. Džin, so Devél otmekéla túke but tyré čoripnástyr. Ci moginésa tu te rozĥaljos saró xoripén, Savó Devél isyn? Ci moginésa tu te ĥaljos Sarezorjakire Devlés ke pherdypen? Džinybén pal Devléste isyn dlengedyr phuvjátyr i isyn buĥledyr morjostyr (derjavestyr). Kóli Jov prodžála pašýl, Jov phandela dre zandirjá (cépi/kovy) i Jov kharéla pe séndo, kon moginéla (saštý) te terdjol proti Léste? Pal-dová so Jov džinéla godiakire manušén; Jov adiáke-pac' dykhéla fuipén tedy, kiéli manúš naštý až i te poduminel; ne bigodypnaskiro manúš naštý te javél godytko, rovnes adiáke-pac' syr i manúš saštý te bijandjol dasavo sýrby khuroro busone (dikone) oslicatyr. Kóli tu riskiresa mištés tyró iló i protyrdesa péskire vastá ke Jov, i čhuvésa čoripén dur péskire vasténdyr i tu na domekesa, sob (kaj) fuipén te dživén dre tyré šátry, tedy tu bi kunipnaskiro moginesas te ĥazdes péskiro bidošéngiro šeró, i tu javésa nabadiakiribnytko, i tu na daresas nisostyr, pal-dová so tu bistresa pal tyrí bari bída, i pririkiresa pal láte sýrby pal paniá, so našné krig, i tyró džiibén javéla jasnedyr parné dyveséstyr, mek i sys ciamlo túte dre jakhá, na javéla jasno syr zlóko (ránko). I javéla túte zoraló patiaibén, pal-dová so túte javéla nadiéia, i kaj tu na rozdykhesa paš péste, javésa te otkhinjos bi darákiro. I javésa tu te pasjos, i nijékh na javéla te darakirel tut, i but manušá javéna te phenén pomija (pljotki), sob (kaj) te pokerenpe túke. Ne fujé-manušéngiro dykhibén xasjola, i jone na našéna bidatyr, i léngiri nadiéia pirijačéla te dyhinel syr i léngiro džiibén.” I otphendiá Ióvo lavénca: “Čačó, tumé san manušá i godypén meréla tuménca. Ne me adiáke-pac' but ĥaljovava, syr i tumé, me na som teledýr tuméndyr; i, čačó, kon na džinéla saró davá, so tumé phendlé? Me som jekh manúš, pe konéste drúgo (mal) dykhéla bangé mósa, – me, kon kharéla Devlés, i konéske Jov otphenéla: Me, devlýtko i čačunó manúš, jacjom sabnasa vaš javirénge. Vol'na manušá dre godý sýrby dykhéna bangé mósa pe odolénde, savengire ĥerá bandine sýrby bída. Rozmaribnytkonengire šátry ziainena mištypnasa, i kodolé, savé prezentynena Devlés, dživéna bidarakiro, – davá déla lénge Devél Péskire vastésa. Ne akaná phučenpe kheritkoné murdaléndyr (skotóstyr), i jone javéna te sykliakirén tumen i bolybnáskire čirikliendyr, i jone phenéna tuménge; ci rakirén phuvjása, i joj vysykliakirela tumen, ci morjoskire (derjavéskire) mačhé phenéna tuménge. Kon džinéla davá, so Devléskiro vast sozdyjá len; so Léskiro vast rikiréla džiibén pe kažno (sváko) džidó di. Ci na sprobinena tumaré kaná lavá, syr i muj čuinela xabén? Godypén isyn phuré manušénde, i manúš léla te ĥaljol butýr džiibnáskire dyveséndyr. Ne Devléste isyn godypén i zoralypén, Jov déla godý i ĥaljola. Ĥáda, Jov phagiréla, i dová uže na kerésa nevéstyr (znoko): Jov phandela manušés dro štaribén i nane otmekiben pe vólia. Ĥáda, Jov pririkirela paniá, i jone vyšutjona: i Jov bičhavéla len angle, i jone riskirena telé phuv. Devléste isyn zoralypén i godypnaskiro džinybén, xohade manušá i xohaibnaskire isyn dre Léskiri zor. Jov lydžála godý-dyibnaskiren te kerén doša, Jov keréla sendar'jen dylynenca. Jov léla krig zor kral'jéndyr, Jov phandela kustyka pe léngire trušula (čriéslo). Jov lydžála rašán te kerén doša, i ravela telé zoralypnaskiren, Jov léla krig čib šukár-rakiribnaskirendyr (vielieriečyvonendyr) i keréla adiáke, so phuré pirijačena lačhés te rozĥaljon; Jov vyčhuvela nakutiakiriben pe thagar'jénde i Jov rozvastakirela zoralypnaskiren; Jov rosčhakirela xor koterá ciamlypnastyr i Jov janéla meribnaskiri zer (tien') pe dud; Jov pribarjakirela manušýtka nácyi i vymarela len; Jov rosčhurdela manušýtka nácyi i kedela len khetané. Jov léla krig godý manušéngire šeralendyr pe phuv, i keréla adiáke, so jone psiréna adiáke, syr pir bidromeskiri čhučí phuv. Jone psiréna, čilavi vasténca dro kalypén, kaj dud nane, i Jov keréla adiáke, so jone kuninenape (šatynenape) syr mate. Ake, miré jakhá dykhné saró davá, miré kaná šundlé i ĥalyné davá. So tumé džinéna i me adiáke-pac' (džináv): me na som teledýr tuméndyr. Ne me kamamas te rakiráv Sarezorjakire Devlésa, i me drieván kamám te pirirakirav pričyna Lésa pal mirí bída. E tumé, čačes, san xohané-podkeribnaskire, tumé ž san bilačhipnaskire sastypnarja. O, sob (kaj) tumé te javén štyl khetané! I davá javélas tumaró godypén. Šunén, akaná miré dúmy, i prilén ke godý, pal so miré uštá javéna te zaterdjon. So ž tumé javéna te rakirén načačipén vaš Devléske? I vaš Léske tumé javéna te xohaven? Ci tumé kaména te prilén Léskiri rig? Ci javéna tumé te lydžán čingárd manušá, sob (kaj) te javél lačhó (godno) Léske? Ci javéla mištó, kóli Jov propatiakirela tumen? Ci (moginéna) saštý tumé te sanpe Léstyr sýrby tumé sanape manušéstyr? Jov bi kunipnaskiro (šylales) sykavéla tumarí bang, kóli tumé čorahanés javéna te prilén vari-konéskiri rig. Ci na javéla Léskiro rajkanypen te strahakirel tumen, ci so trašaibén angíl Léste na peréla pe tuménde? Tumaro sykliakiribén isyn sýrby godypnytka lavá praskatyr (pieplostyr), a lavá, savénca tumé zaterdjona pal péste, isyn sýrby kerdé blatatyr. Javén štyl, i šunén man, so me phenáva, – mek te javél dová, so javéla. Sóske mánge te rikirav péskire masá (loč) dandenca ke dar? I te čhuvav miro džiibén dro vast? Ĥáda, kóli Jov i muliakiréla man, ne me saroiekh javáva zoralés te patiav dre Léste, ne i me javáva te zaterdjovav pal péste miré lavénca angíl Léste. Davá pe sámo nábut (kutý) adiáke-pac' javéla miro zrakhibén, pal-dová so duje-mujengiro (licemiéro) manúš na javéla angíl Léste. Šunén važlives miro rakiribén, i dová, so me statečnes (oficial'nes) phenáva, šunén kanenca. Ĥáda, akaná, me rosčhudjom jekh pal jekh miré dúmy dro miro réndo, me džinóm, so čačipén javéla pal mánde. Kon javéla murškanó te lydžál čingárd mánca? Pal-dová so, kóli me javáva štyl akaná, tedy javéla saró mánge. Féni mánde isys duj mangipena ke Tu, Dévla, te na kerés mánge; tén'či me na javáva te garadjovav Tútyr. Le Tyró vast dur mándyr; i mek Tyró trašaibén te na strahakirel man; tén'či khar i me otphenava; – ci me javáva te rakiráv, i Tu javésa te otphenes mánge. Kicý mánde isyn čoripena i gréhi? Ker adiáke, sob (kaj) me te džinóm (džináv) miré čoré réndy i miro grého. Sóske Tu, Dévla, rikiresape rigasa mándyr, i ginesa man pal tyré vergoste? Ci na zatrašavesa Tu patrín (listo), so kuninelape odorík i pale? I ci na tradesape Tu pal šuké-giveskiri tietiva? Pal-dová so Tu čhinesa kirkipen pal mánde, i kerésa adiáke, sob (kaj) me te prilav čoripén miré tyrnypnastyr syr miro mištypén. Tu čhuvésa miré ĥerá dre kaloda i Tu dykhésa rakhibnýtkes pal saré miré dromore; i Tu čhuvésa špery pal miré – ĥerengire piré (podešvy). Ne, o manúš, syr i me, roskirnjolape syr kirno kotér, sýrby uribén, so mol' (mel') xála. O manúš, savés džuvlý bijandiá, dživéla naĥara, i léste isyn but pharipena pe iló. Jov vybarjola syr luludí (cveto) i les čingirena telé; i jov našela krig syr zer (tien') i butýr les nane. Ci otkeresa Tu Péskire jakhá, Dévla, pe jekhéste kadasaveste, syr me; i ci lydžása Tu man pe séndo Pésa? Ci saštý te bijandjol bidošéngiro manúš manušéste došenca? Nijékh! Kóli léskire dyvesá angilphendle, i léskire-džiibnáskire dyvesá isyn džindlé Túke; i Tu ĥazdyjan vučés léske miéžy, sob (kaj) jov naštý te piridžal len, tedy Tu risjov léstyr; i mek jov te otkhinjol angíl davá, syr jov končynela, syr andynarščyko (najomniko) péskiro dyvés. Pal-dová so isyn nadiéia vaš kašt: kóli jov čingirdo telé, jov barjola nevéstyr, i léskire senki (sučki) na xasjona; i mek léskiro kornjo (rukh) phurjola dre phuv, i léskiro korčo kirnjola dre phuv; ne kóli jov čhuindia (šundiá) paní, tedy jov mekéla butony, i léskire randiá vybarjona syr nevó vybarjakiriben. Ne manúš meréla i rosperelape; ĥáda-léske kónco (jagóro), i kaj jov isyn? Paniá našadjonape zierostyr, i reka (len') pirijačéla te thadel: adiáke-pac' i manúš pasjola i na uštéla pale. Angíl davá, syr končynenape davá bolybén, jone na džangadjona, na uštena péskire soibnastyr. O, sob (kaj) Tu, Dévla, te garavesas man dro liúno (prieispodnia), sob (kaj) Tu te rikires man čorahanés, paka Tyrí xolý džála péske, sob (kaj) Tu te angilphenes mánge časo, so Tu dyján mánge, i te ripires man. Kóli manúš meréla, ci otdžidjola jov nevés? Me užakiravas saré dyvesá, dre savé me kerdjom pharí butý adiáke ĥará, syr javéla lokhedýr mánge: Tu kharesas man, i me otphenavas Túke; sob (kaj) Túte drieván kamesas te dykhés man, konés Tu sozdyjan. Pal-dová so akaná Tu ginesa miré šagi (lamnia): sob (kaj) tu te na dykhés rakhibnýtkes pe miré gréhi? Miré čoré réndy isyn phandle pe jakhítko (čergenorí) dro kapšuko, i Tu zaphandesa saró miro čoripén. I, čačó; syr bérgi peréna i rospharadjona sarésa, i skála kharélape (zdžála) péskire štetóstyr, a paniá roskerena pe nábut (kutý) bará, i baré paningá vymorena pylo phuvjátyr, adiáke-pac' tu xasiakiresa manušeskiri nadiéia. Tu prilesa upralypén pe léste pe ŭsády (sak), i jov udžala sarésa; Tu paruvesa léskiro muj i bičhavesa krig les. Te jačen léskire čhavé dre patýv, – jov na džinéla, ci kóli tieliakirena léskire čhavén, – jov na rozdykhela davá. Ne adiáke ĥará (dlúges), syr léskire masá (loč) isyn džidé, adákicy javéna i dukhá léste, i léskiro di javéla zoralés te tuginel.” Tén'ci Elifazo Femanostyr otphendiá lavénca: “Ci javéla godó manúš te otphenel čhučé lavénca, i te pherdiakirel péskiro kolýn balvaliasa vastokóstyr; i ci javéla jov te lydžál čingárd lavénca, sóstyr nane lačhipén, ci rakiribnenca, so nisó na déna? Tu, xaj, domekcian péske te na dares Devléstyr, i tu zaphandian muj, sob (kaj) te na rozles zaniása pátieri (molítva) Devléske. Pal-dová so tyró čoripén sykliakiréla tut adiáke te rakirés, i tu vykedyjan péske te rakirés xohané čibása. Tyró muj kokoró zoralés obsendinela tut, a na me, i tyré uštá kokoré dosykavena pe túte. Ióvo! Ci na san tu pérvo manúš pe svéto (lot), kon bijándyja? Ci so sozdyjá Devél tut angíl, syr Jov kerdiá bérgicy? Ci, xaj šundián tu, syr Devél lydžijá skedyny? Ci, xaj, san tu jekhoro manúš pe svéto (lot), kon isyn godó? So isyn dasavo, so džinésa tu, so ame na džinása? So dasavo ĥaljosa tu jekhdžinó, so aménge na džindló? Maškir aménde isyn dujdžiné: o syvone-balengiro manúš i phuró, savé isyn but phuredýr tyré dadéstyr. Ci na uhtýlla (nádosi) túke, so Devél podrikiréla tut, ci lavá, so ame lokhes phendiam túke? Ke so ĥazdyjá tut tyró iló? Sóske tyré jakhá dykhéna xoliása, so tu riskirdian dúho (fáno) pe Devléste, i syr kadasavé lavá vydžána tyré móstyr? Savó ž trej te javél manúš, sob (kaj) jov te javél bidošéngiro? Ci na kodová, savés džuvlý bijandiá, sob (kaj) jov saštý te javél čačipnáskiro? Kóli Devél na dopatiala Léskire sventonenge, i bolybén nane bidošéngiro angíl Léskire jakhá: – pe adákicy butýr o manúš isyn džungaló (brytko) i rozmekne-godiákiro, kon keréla čoripén adiáke-pac', sýrby jov p'jel paní: “Me phenáva túke, šun man; dová, so me dykhcjom, – pal dová me podava zvies' (zan), so godé manušá phendlé, savé šundlé péskire dadendyr, savé nisó na garadé léndyr, konéske jekhdžinenge sys dyný phuv, i nijékh, javire-themeskiro manúš, na gijá maškír lénde. Fuj manúš bandjola dukhasa péskire bangiatyr saré péskire dyvesá, i kon pritasavela javirén, léskire beršá isyn garadé. Dre léskire kaná isyn darakune zniki (zvuki): kiéli isyn saró mištó léste, tedy rozmaribnytko džála pe léste. Jov na patiála, so jov na risjola ciamlypnastyr, i dykhéla, so les užakiréna kurtalása. Jov psiréla odorík i pale pal maró, phení, – “Kaj isyn jov?” Jov džinéla, so kaló dyvés isyn dro léskiro vast. Pharipén i bída rikiréna les dre dar, jone sýrby pirizorjakirena les, sýrby králi, kon isyn skedynó ke maribén. Pal-dová so jov dind'kirdia (protyrdyjá) vast pe Devléste, i so jov kedyja zor pe Sarezorjakire Devléste, i jov prastándyja pe Léste dzindz'kirde meniasa tel grembone-priažkengiro ščýto. Pal-dová so jov učhakirdiá péskiro muj péskire thulypnasa, i kedyja thulypen paš péskiri kustýk. I jov dživéla dre naobdživdle fórja, dre kherá, kaj nikón na dživéla, savé sys angíl-prisendindle, sob (kaj) léndyr te jačen ruíny. Jov na javéla barvaló, adiáke-pac' i léskiro mištypén pirijačéla te barjol, i léskiro majonko na rozbuĥliakirelape pir phuv. Jov na udžala ciamlypnastyr, bari jag vyšut'kirela léskire randiá sýrby balvaliasa, i Devléskiro phurdypen košela krig les štetóstyr, syr balvál luludí (cveto). Mek jov te na patial zoralés dre čhučé réndy, sýrby xohaindoj pes, pal-dová so čhučé réndy jov doreséla pale syr pleskiriben. Jov sýrby kašt vyšutjola angíl léskiro dyvés, i léskiri rand' na javéla nevés zeleny. Jov trinskirela telé péstyr nadogine vinagradýtka múri sýrby vinagradýtko kašt, i jov čhurdéla telé péskire luludiá (cvety) sýrby maslinitko kašt. Kher, dro savó dživéna nadevlytka, javéla čhučó, i jag vyhala šátry, so jone doresné pal podkindytko myto. Jone zadumindle bibáht, i začhude čhučé réndy (diély), léngiri ločoví (utroba) barjakiréla xohaibén.” I otphendiá Ióvo lavénca: “Me šundjom but kadalé čačipená; tumé san bedytka podrikiribnaskire.” Ci javéla kónco (jagóro) pe dalé balvalitka lavá? Ci, so špulela (pihinela) tut te otphenes adiáke mánge? Me adiáke-pac' moginavas te rakiráv, syr tu: kóli te javes pe miro štéto. Me moginavas te skedav lavá pe túte, i te trinskirav šerésa pe tuménde; ne me podrikiravas miré lavénca, i miré-uštengiro ramanipen (miro) lokhiakirelas tyré-ileskiri dukh. Mek me i rakiráva, miré-ileskiri dukh na lokhija, i mek me pirijačava, ci mánge isyn lokhedýr? Ne akaná Devél kerdiá adiáke, so me som khiniakirdo; Tu, Dévla, xasiakirdian sarí mirí sém'ia (irí); Tu kerdián adiáke, so me som saró dre morški i davá isyn dosykaiben pe mánde. Tu vyšut'kirdian man dre pietrjonka (izmoždjono) – i davá adiáke-pac' isyn dosykaiben, kon dophenéla pe mánde. Devél kušela man Péskire xoliakiribnastyr i Jov bidykhela man; Jov riskiréla skriežetasa Péskire dandá pe mánde. Miro vérgo vostrinela péskire dandá pe mánde. E manušá putravena péskire jakhá pe mánde, jone pekavena man pir čhama (ščoki), bangiakiri, jone kedenape khetané pe mánde. Devél piridyja man nadevlytkonenge, i čhurdyjá man dre fujé-manušéngire vastá. Me dživdjom štylés, ne Devél zaphagirdia man, Jov adiáke-pac' lyjá man pal men i rostrinskirdia man pe koterá, i Jov čhudiá man syr bakrés te den kar'je. Léskire kar'jé-dyibnaskire (striel'cy) obgine trusciál mánde, Jov promardia miro iló, i Jov na tanginela man. Jov vyčhuvela miro želučo pe phuv. Jov phagiréla man riskiribnasa dre masá jekh pal jekh; Jov prastala pe mánde, sýrby Jov isyn zoralypnaskiro maribnýtko. Me sydjom péske žalobno gonó pe mirí cýpa, i čhudjom péskiro šeró dro práho. Miro muj isyn loló jasvendyr, i pe miré cymbly isyn meribnaskiri zer (tien'), mek i nane nahrata réndy pe miré vastá, i mirí pátieri (molítva) isyn bidošengiri.” E phuv! Na čhakir miro rat, i me te javél šundly mirí gódla. Ĥáda, akaná, isyn miro Jakhítko pe bolybén, i davá isyn Jov, Kon zaterdjola pal mánde. Miré malá sanape xoliames mándyr, miré jakhá čhuvéna jasva ke Devél. O, sob (kaj) te javél vari-kon te mangél zoralés pal manušéste angíl Devléste, syr i manúš mangéla zoralés pal léskire pašatuneste. Pal-dová so syg javéla kónco (jagóro) pe kadalé beršá, Me džáva dromésa odorík, katýr nane risiben.” Mánde nane dúho (fáno), miré dyvesenge isyn kónco (jagóro), maĥila (kula) isyn skedyny vaš mánge [mulykane/groby-r.s.]. Pašýl mánde isyn manušá, kon salape xoliames, ne miré jakhá dykhenas, syr jone bimanušytkes peréna pe mánde. Dévla! Jav miro dudvalo! Čhuv symadý (zalogo) pal mánde Péske. Kon ža javír saštý te marel pir vastá pal mánde? Pal-dová so Tu garadian léngire-malengire ile te ĥaljon, paldavá Tu na domekesa, sob (kaj) jone te ĥazdénpe. Kon rakiréla xohanés péskire malenca, kodolé-čhavéngire jakhá pirijačena te dykhén. I Devél kerdiá adiáke, so me jacjom syr pritča vaš manušénge; me jacjom kadasavó manúš, pe konéste čungardena dro muj. Miré jakhá pirijačne te dykhén miré tugatyr, i saré miré kokalý jačné syr zer (tien'). Čačuné manušá divinenape daléstyr, i bibangipnaskiro ĥazdélape xoliása pe mánde sýrby pe dujé-mujéngireste. Ne čačunó javéla te rikirelpe ke péskiro drom, i konéste isyn žužé vastá, odová manúš javéla zoraledýr dro péskiro dúho. Ne, me mangáva, javén saré pale, pale-dová so me na lathjom maškír tuménde jekhe godé manušés. Miré dyvesá proginé, miro kamiben dro džiibén biladyja (rastopindia), adiáke-pac' i miré-iléskire dúmy. Miré malá parude rat dro dyvés, i kiéli javéla kalypén, jone rakiréna, so syg dud javéla. Kóli vari-so isyn mánge te užakirav, davá isyn liúno (prieispodnia), sob (kaj) jov te javél syr kher mánge, i sob (kaj) mánge te keráv miro čhuibén dro kalypén: tedy me dáva gódla maĥilake: “Tu san syr dad mánge!” I kirmeske: “Tu san syr daj i phen mánge.” Sóstyr mánge tedy te užakirav lačhipén? O, mirí nadiéia, ci vari-kon džinéla pal davá? Ci joi, mirí nadiéia saštý te džal telé pal mánde ke liunoskiri pórta (vráty), sob (kaj) aménge khetané te otkhinjovas dro práho.” O Vildado Savhejanino (Šuahostyr) rakirélas javír mólo, i otphendiá lavénca: “Kiéli končynesa tu te čingirespe lavénca? Jav godypnaskiro, i tén'či (poslie) ame javása te rakiras. Sóske tu dykhésa pe aménde syr pe murdalénde (žyvotnonende)? Ióvo, sóske ame sam nažužé dre tumaré jakhá? Tu roskušesa pes péskire xoliátyr, ci so tedy pal túte manušénge te jačaven phuv? Ci, so skála kharélape péskire štetóstyr? Ne fujé-manušéngiro dud murdjola, i momoly léskire jagatyr na javéla te ziainel. Dud jačéla ciamlo dre léskiri šátra, i léskiro momolýtko (svietíl'niko) murdjola. Zor javéla te udžal léskire šagendyr (lamniéndyr), a léskiro plano lydžála les kokores te perél. Pal-dová so léskire ĥerá kokoré lydžána les dre khudý (miriéža), i jov štavela ke feliá. Čirikliengiri felý podtyrdela les pal pienta (khur), a felý pe phuv uhtyléla les pal ĥerój. Šoškengiro (xorjoskiro) kapkano isyn garadó léstyr, i felý sietkasa isyn pe drom. Trašaibén pal trašaibén darjakirena les kažnoné rigátyr, i pal léste tradenape palál léskire piénty (khurja). Bokh sýrby vyhaia léskiro zoralypén, i bari bída, isyn paš léste, užakiréla pe léste. Meribnytko nasvalypen shala sarésa léskire masá, jov pohaia sarésa léskire ĥerá i vastá. Meribén vyriskirela les léskire šatratyr, kaj jov sys bi darákiro, i lydžála les telé ke králi pe baré bidy. Dre léskiri šátra javéna te dživén čúža manušá, a siéra (dzevélia) počhuvena pir léskiro kheratuno štéto: léskire kórni (rukhá) vyšutjona telalestyr, a léskire randiá zašutjona uprál. Ripiribén pal léste xasjola pe phuv, i léskiro lav bistrena pe vulícy (pe gásy). Les tradéna krig dudéstyr (svetóstyr) dro kalypén, les vytradena phuvjátyr, kaj manušá dživéna. Léste na javéla ni čhavó, ni plimieniko maškír léskire manušénde, nijékh na jačélape pe léskiro kheratuno štéto. Dívo ke dar uhtyléla manušén zapadostyr dolé dyveséstyr, a manušá vastokóstyr trašadjona. Adiáke isyn kheratune štetosa, kaj dživdiá načipnaskiro manúš, dasavo-pac' isyn drom kodoléske, kon na džinéla Devlés.” I otphendiá Ióvo dasavé lavénca: “Ci but ža javéna tumé te menčynen miro di, i te phagiren man pe koterá lavénca. Kadavá uže isyn deš móly, so tumé obrakirena man, tumé na ladžana te durjakiren man. I mek te javél, so me dyjompe dukhá, i mek mirí dukh te jačélpe mánca. Kóli tumé, čačes, kaména te barjakirén pes angíl mánde, i tumé čhuvéna angíl mirí bipatyv proti mánde, to tedy džinén, so adavá Devél čhurdyjá telé man, i davá Jov obgija trusciál mánde Léskire khudiasa (miriežasa). Ĥáda, me dáva gódla: “Nahratyma pe mánde”, man na šunéna; kóli me dáva gódla saré zorjátyr, tedy nane séndo. Devél čhudiá tyno pe miro drom, so me naštý te prodžav, i Jov rosčhudiá kalypén pe miré dromá. Jov čorjakirdia telé mándyr miro baripén, i Jov zlyjá mirí kralítko stadyk miré šerestyr. Jov rosphagirdiá man saré rigéndyr, i mánge javéla saró, a miro užakiribén pe lačhipén Jov vyriskirdia syr kašt. Jov adiáke-pac' zahačíia xoliása pe mánde, i Jov ginéla man pal jekhe vergoste. Léskire xaladybena javné khetané, jone rosčhuvena lagierjo (lod) trusciál mirí šátra. Jov durjakirdia miré pšalén mándyr, i miré pindžkirde manušá durjakirde pes sarésa krig mándyr. Mirí seménca jačkirdiá man, i miria malá bistyrde man. Miré-kheréskire manušá, i miré-štubakire dynaricy (slugicy) ginéna pal čužoné manušéste, me sýrby som javire-themeskiro manúš dre léngire jakhá. Me kharáva miré dynarís, i jov na otphenéla mánge, i me tedy štylés mangáva les péskire mósa. Mirí romný brydinela miré duhóstyr i syr me dyhinava, davá isyn džungaló miré pšalénge. Rovnes i tykné čhavoré dykhéna pe mánde bangé mósa, me ĥazdavape te phenáv, i jone rakiréna pe mánde. Saré miré pašatuné malá durjona krig mándyr, i kodolé, konés me prilyjom ilésa, risiné xoliása pe mánde. Miré kokalý zoralés uhtyldepe pal mirí cýpa, i miré masá, i jekh cýpa jaciápe mándyr ke miré dandá. Potanginen man, potanginen man, o – tumé, miré malá! Dykhén, Devléskiro vast pekadiá man. Sóske tumé tradéna man, syr Devél keréla adiáke, i so tumé, – riskiribnáskire murdalá, – so na čalyne miré maséndyr? O, sob (kaj) te začhinen miré lavá! Te včhinen andré len vaš ripiribén dre lylvaria! Sob (kaj) te vyčhinen len sastruné poresa (riezcosa) i mulovisa (olovosa) pe bar pe saré viéki! Ne me džinóm miré džides, Vyrakhibnaskires, i dro sámo kónco (jagóro), Jov zaterdjola pal mánde pe phuv; i kóli, paló dová mirí cýpa rosperelape, ne me usajékh dro miré masá dykháva Devlés, me kokoró javáva te dykháv Les, i, ĥáda, davá javéna miré jakhá, nikoneskire javír, syr miro iló našavela zor! Kóli tumé phenenas: “Syr ame javása te tradas les?” Pal-dová so pričyna dre léste kokoreste, so jov menčynelape; – ne darén tumé kurtalátyr! Vaš tumarí bari xolý kurtála javéla pe tuménde, syr rospleskiriben, sob (kaj) tumé te džinén, so isyn čačipén.” I Sofaro Noamostyr otphendiá lavénca: “Ake, sóske miré dúmy déna otphenybén mánge, i vaš dová me sygniakiravape. Me šundjom, syr man zoralés bangiakirde, i ladžakirdé, i miro dúho (fáno) otphenéla pal mánde adiáke, syr me ĥaljovava. Ci na džinésa tu, so davá isyn ĥaratuné beršéndyr tedy, syr manúš javdiá pe svéto (lot), so fuj manušá svenkinena ke vučipén naĥara (nadluges), i so fujé-manušéngiri rádyma urikirelape féni (tóka) minuta (menta)? Mek léskiri pyšnyma te ĥazdelpe ke bolybén, i léskiro šeró te tyrdelpe ke óbloki, ne jov xasjola pe saré viéki sýrby léskire otbrosy, sósa jov psiréna javrí. I kodolé, kon dykhciá les, phenéna: “Kaj isyn jov?” Jov vurniala krig syr godengiro sunó, i les na lathéna; i jov vari-kaj xasjola, sýrby zdanki ratý. Jakhá, so dykhné les, na dykhéna butýr, adiáke-pac' i léskiro štéto. Léskire čhavé javéna te den pale lové čororenge, a léskire vastá riskirena pale saró péskiro barvalypén. Léskire kokalý isyn pherdé léskire-ternypnaskire grehénca, ne jone xasjona lésa khetané dro práho. Mek te kerél bibáht isyn sýrby gudló xabén dro léskiro muj, i jov garavela la tel péskiri čib, mek jov i te prigaravel la, i te na mekel la: a jov rikiréla la dro péskiro muj; davá léskiro xabén dre vindyrja jačéla šutlo, i pirikerelape dre sapeskiri truta andrál léste. Jov nakhadia (glytyndia) barvalypén, ne jov čadela lésa pale: o Devél tyrdela javrí zorjása davá barvalypén, až perestyr. Jov javéla te žuinel meribnytkone sapeskiri truta; ne saplyniakiri čib muliakiréla les. Jov na javéla te dykhél rekicy, réki (leniá) so thadena avginesa i thuliasa. Jov déla pale dová, so jov doresciá pharé butiátyr, jov naštý te nakhavel la; jov na javéla te radynélpe kofostyr, so jov doresciá péskire rendostyr. Pal-dová so jov pritasadia i mekciá čororen, so jov nahrates zauhtyldia kher, savó jov na gazdyja. Vaš léskiri ĥalkima jov na otkhinjolas, jov nisó na zrakhciá, sob (kaj) jov te zakamel. Jov isys prohaibnaskiro, i nisosa zrakhciape léstyr: vaš-dová so léskiro mištypén na javéla ĥará te urikirelpe. Na dykhí, so léste isyn pherdó mištypén, jov javéla dre bari traš; kažnoné – Manušéskiro vastá, konéske jov kerdiá bari bída, javéla pe léste. I javéla adiáke: jov javéla pe nábut (kutý) skedynó te pherdiakirel péskiro per, to tedy Devél bičhavéla pe léste Péskiri xačkirdy xolý, so délape syr bryšýnd pe léste. Kóli jov i našela krig maribnytkoné sastyrendyr, tedy bronzytko lúko pusavela les pirdál (skroz'). Jov potyrdela sastruny bust javrí maséndyr, joj vydžála, i adiáke-pac' vydžála ziaindly ostrima pe bustiakiro jagóro (kónco) pirdál želučytko buko: trašaibén peréla jekh pal jekh pe léste. Pherdó kalypén čhakirela léskiro barvalypén: jag, saví nikón na murdiakirela, xála sarésa saró, so jačélape dre léskiri šátra. Bolybén sykavéla léskiro čoripén, i phuv ĥazdélape pe léste. Léskire-kheréskiro pribaripen xasjola, a léskiro mištypén lydžána krig baré paningá dro dyvés, syr Devél xoliasóla te sendinel. Kadasavi isyn fujé-manušeskiri dólia Devléstyr; ĥáda, isyn léskiro mištypén, so Sarorikiribnaskiro Devél otčhindia léske.” I otphendiá Ióvo lavénca: “Šunén važlives (rakhibnýtkes) ilésa miro rakiribén, i mek davá te javél tumaró ramanipen (utiešenijo) mánge.” Vyrikiren (potierpinen) dalésa, so me phenáva: i paló dová, syr me vyphenavape, tedy tumé saštý te sanpe xoliamas mándyr. Me na žalinavape pe manušéste, čačó? Ci, kóli i isyn davá adiáke tedy i mánde, xaj, moginéla te na uhtylel miro dúho (fáno)? Pridykhenpe pe mánde, i mek dívo te uhtylel tumen; pričhuvén vast te zaphanden péskiro muj. Adiáke-pac' i syr me féni duminava pal davá, tedy mánde trašaibén ke meribén, i saré miré masá izdrana. Ĥáda, sóske fuj manušá ĥará (dlúges) dživéna, i jačéna phuré, i jačéna zoralypnaskire maškír manušénde? A léngire palál – javibnaskire čhavé (unuki) začhuvena péskiro džiibén pašýl lénde, i léngiro ródo barjola pe léngire jakhá. Dre léngire kherá nane dar, adiáke-pac' i nane Devléskiri ran te sykliakirél len pe lénde. Léngire guruvestyr lotjona mištés, cielianty bidošakires, léngire gurumnia isyn ciel'na, i na našavena tyknen. Jone vymekena péskire bijatén syr bakrorengiro gurtyco, i léngire čhavoré khelena. Jone bagana zoralés tel bubno i luta, i jone radynénape péske tel svirol'ka. Léngire dyvesá džána dro mištypén, i pirdál menta jone džána telé dro liúno (prieispodnia). I jone phenéna Devléske: “Durjov améndyr. Pal-dová so ame na kamasa zoralés te džinas Tyré dromá! Kon isyn Sarezorjákiro, sob (kaj) ame te dynarinás Léske? I savó lačhipén aménge, so ame javása te mangaspe Léske? Ĥáda, léngiro mištypén isyn dre léngire vastá: ne me na psirava pe kadalé bede-manušéngiri skedyny. Kicý móly tumé dykhné, so bede-manušéngiro momolýtko (svietíl'niko) murdjola? Kicý móly bari bída peréla pe lénde? Ci xasiakiréla Devél bibahtalé manušén dre péskiri xolý? Ci so, xaj, balvál rosphurdela krig len syr phuv, i so, xaj, bari balvál uhtyléla krig len sýrby čhučó phus? Tumé phenéna: “Devél prirakhela léngire čoré réndy vaš léngire čhavénge?’ Nad: mek Devél te otpleskirel pale dadéske, sob (kaj) jov te džinél davá: ake, mek léskire jakhá te dykhén péskiro xasibén, mek jov te p'jel tahtái, so isyn pherdó Sarezorjakire baré xoliása? Saví ž zabota javéla léske léskire čhavéndyr paló dová, syr končynenape léskire čhoná te dživén? Ci manúš saštý te sykliakirél Devlés? I davá ž isyn Jov, Kon sendinela kodolén, savé isyn pe vučé štéty. Jekh manúš meréla dre sarí péskiri zor, savó dživdiá, vol'nes i bidarakiro; léskire masá andrál isyn pherdé thulypnasa, i čekén (thulypen) dre léskire kokalý isyn sapano. Javír manúš meréla kirkipnasa pe léskiro di, jov nijékhvar na xaja čalés: ne jene dujdžiné khetané pasjona dro práho, i kirme čhakirena len. Ake, me džinóm tumaré dúmy, i plany, sob (kaj) te bangiakiren man. Tumé ž rakiréna: “Kaj isyn thagariskiro kher? I kaj isyn šátra, dre saví dživéna beda manušá?” Ci na phučné tumé manušéndyr, savé tradéna droménca? I so tumé na šundlé léngire dophenybena? So fuj manúš isyn prigarado dro dyvés, syr javéla bari bída, i les lydžána dre rig, syr javéla Devléskiri xolý. Kon bangiakirela mamúj ke léskiro muj, so jov kerélas? Kon skušela xolý pe léste? A manušá lydžána les ke maĥila, i stréga javéla pašýl leskir koplíca. Phuvjákire koterá dre ĥanbín javéna gudlé léske, kažno manúš džála pal léskiro mulykano (ĥrobo) pe garaiben, i but manušá, so naštý te pogines, džána angíl léste. Syr tedy tumé podrikirena miro dúho (fáno) čhučé lavénca? Save načačune isyn tumaré otphenybena!” I otphendiá Elifazo Fiemanostyr lavénca: “Ci moginéla manúš te janel kófo (l'góta) Devléske? Davá isyn vaš léske kokoreske kófo, kóli o manúš isyn godó. Saví rádyma (loš) isyn Sarezoralypnaskire Devléske, kóli tu san čačunó? Ci, so Jov léla daléstyr, so tu dživesa bidošengires? Ci, so Jov sýrby daréla tútyr, i paldavá Jov lydžála čingárd túsa, i paldavá Jov lydžála tut pe séndo? – Nad. Ci, na kerdián tu but bibáht, i so naštý až te pogines tyré čoré réndy? Pal-dová so tu lesas symadý (zalogo) Tyré pšaléndyr ni palsó, i tu lučkirdian ídia nange manušéndyr. Tu na desas paní khiniakirde manušénge, i tu žalinesas maró bokhalé manušénge. Ne tu dyján vast zoralypnaskire manušénge te len phuv i manušénge dre patýv te dživén pe daja phuv. Tu bičhavesas pivlién (udoven) čhučé vasténca, i tu piriphagesas vastá pirotenge (sirotenge). Paldavá felý isyn trusciál túte, i meribnytko dar menčynela tut; ci davá ciamlypén (t'ma), so tu na moginésa nisó te dykhés, i but paniá čhakirde tut. Ci so, – nane Devél naj vučedýr saréstyr pe bolybén? Dykh ža pe čergeniá: syr jone isyn vučés. Ne tu iščo (inké) rakirésa: “So džinéla Devél? Ci Jov te sendinel pir xor ciamlypén, Pharé óbloki čhakirde les adiáke, so Jov naštý te dykhél, i Jov psiréla trusciál (krugom) pir bolybnáskiro krugo. Ci javésa tu te rikirespe ke phuranó drom, savésa fuj manušá psirdé? I savé sys muliakirdé angíl léngiro časo, i sýrby fundámiento, savó tasadypnaskiro paning zmordia krig sarésa. Jone phendlé Devléske: “Džá krig améndyr! I so aménge Sarezoralypnaskiro Devél moginéla te kerél?” Ne Jov pherdiakirdiá léngire kherá mištypnasa, a me durjovava bede-manušéngire skedyniatyr. Čačuné manušá dykhéna, i jone radynénape, i nabange manušá sanape, kiéli Devél sendiakiréla bede manušén, rakirí: “Ĥáda, amaré vérgi xasiakirdé, i jag pohaia saró, so jaciápe léndyr:” Akaná kovliakir péskiro iló angíl Devléste i jav dro ramánjo (miro) Lésa: paldavá javéla lačhipén túke. Prilé godiása, me mangáva, dová, syr Jov sykliakiréla čačipnaske tut Léskire uštendyr i čhuv Léskire lavá dro tyró iló. Kóli riskiresa tu péskiro iló ke Sarezorjákiro Devél, tedy nevéstyr tu javésa baró manúš. Kóli durjakiresa tu čoripén péskire vasténdyr, to tedy javésa tu te gines suvnakáj syr práho, i Ofiroskiro suvnakáj syr barore dre rekicy. Tén'ci Sarezorjákiro Devél javéla tyró suvnakáj i Jov javéla syr bari bérga rupéstyr vaš túke; i javésa ž tu drieván te radynespe Sarezoralypnaskire Devléske, i tu ĥazdesa tyró muj ke Devél. I tu javésa te mangespe Léske, i Jov javéla te šunél tut, i tu désa péskire sovlahá angíl Léste, i tu phenésa statečnes vari-so, i davá réndo risjola dro čačipén; i dud javéla te ziainel pe tyré dromá. Kóli manušén čhurdena telé, tu phenésa: “Ĥazdenpe!” I Devél zrakhéla naphut'kirde manušén. I adiáke-pac' Jov vyrakhela i kodolén, kon isyn bibangipnaskire, i Jov vyrakhela tumen, kóli tuménde nane bang (vina) pe vastá” I otphendiá Ióvo lavénca: “Adiáke-pac' i ke adadyvés me iščo (inké) žalinavape; miré mén'ki isyn pharedyr miré gondiéndyr (uzdohendyr). O, sob (kaj) mánge te džináv, kaj me moginavas te lathav Les, sob (kaj) mánge te javav ke Léskiro štéto! Me čhuvavas angíl miro réndo angíl Léste i miro muj javélas pherdó zoralé lavénca; sob (kaj) me te džináv lavá, savénca Jov otphenélas mánge, i sob (kaj) me te ĥaljovav, so Jov phenéla mánge. Naúšto Jov javélas te lydžál čingárd mánca saré Léskire baré zorjátyr? Nad. Ne Jov risjola te šunél man. Odój devlýtka manušá moginénas te pirirakiren pričyny Lésa, i me vyrakhavaspe ŭsády (sak) miré sendaristyr. Ake, – me džáva angíl, ne Jov nane odój, i me pale, ne me naštý te rozdykhav Les; syr Jov keréla butý pe zérvo (liévo) rig, me naštý te dykháv Les; kiéli Jov risjola pe čačí (pravo) rig, me na mogináva te dykháv Les. Ne Jov džinéla drom, savésa me džáva, i Jov propatiakirdia man i me vydžava syr suvnakái. Mirí ĥerój rikirdiape zoralés pe Léskire dromá; me gijom ukrat (točnes) Léskire dromésa, i me na risijom dre rig. Me na čhurdyjom pe rig priphenybená Léskire uštendyr, me rakhcjom dre godý syr suvnakáj Léskire – uštengire lavá fedýr miré xabnastyr, so trej mánge. Ne Léskiri godý na parudjola, kon saštý te riskirél Les Léskire droméstyr? Dová, so Léskiro di kaméla, kodová Jov i keréla. I Jov vypherdiakirdia dová, so isyn priphendlo mánge, i kadasavé priphenybená isyn but Léste. Paldavá mánde trašaibén ke meribén angíl Léste: syr me obduminava davá, tedy me darava Léstyr. Pal-dová so Devél kerdiá miro iló kovlo, i davá Jov, Sarezoralypnaskiro Devél, strahakirela man; syr Jov na čhurdyjá man te xasjovav angíl, syr javdiá kalypén, i Jov na garadia túga kalypnasa miré jakhéndyr.” Sóske Sarezorjákiro Devél na uphendia časy te sendiakirél? Sóske kodolé, kon džinéla Les, na dykhéna Léskire dyvesá, so Jov vykedyjá vaš séndo? E manušá piričhuvena špery pe phuv te len butýr, jone nahrates zauhtylena bakréngire gurty i jone čaravena len ke pe. Jone tradéna zorjása ke pe pirotengire (sirotengire) oslen, jone léna pivliengire (udovengire) guruvén syr symadý (zalogo). Jone špulena (pihinena) bogen krig droméstyr: čororenge pe daja phuv trej te garadjon. Ake, jone isyn sýrby busa (dika) osly (miegárja) pe čhučé prahi, jone džána pe butý, i jone rodéna tasiárles (ránes) xabén: čhučé stiépi (malia) déna xabén lénge i léngire čhavorenge. Čororé čhinena telé na péskiro xahaiben pe félda, jone kedena vinagradýtka múri ke fuj manušá; jone rat'kirena nange, bi uribnaskiro, lénde nane sósa te čhakirenpe dre šyl. Jone kindjona bergitkone bryšyndendyr, i jone oblena skaly syr garavipnaskiri (ubiežyšča) péske. A kadalé fuj manušá otlena krig piroten (siroten) kolynestyr i jone léna symadý čororendyr: a kadalé čororé psiréna nange, bi idiakiro, i bokhalé, lydžána ĥarby (snopy); jone tasavena olivítko dzet maškír vánty, i jone štavena vinagradýtka múri dro tasavil'nia (prieso) i jone menčynenape trušatyr (smegatyr). E manušá déna ĥondiá godlása foróstyr, i dukhade dijá godliakirena; – ne Devél na pričhinela bang fujé manušénge pal grehítka réndy. Odolé fujé-manušéndyr isyn kadasavé vérgi, kon buntuinena sýrby pe dud; jone na džinéna ni Léskire dromá, jone na jačénape pe drom dudesa (svietosa). Syr dyvesjola, uštéla zamaribnaskiro, jov muliakiréla čororen i bogen, a ratý jov čorela. Biladžakuneskire jakhá užakiréna bel'vél', phení péske: “Nijékh na dykhéla man”, i jov garavela péskiro muj. Dro kalypén jone podganavenape tel kherá, pe savé jone čhudé špéra dyvesé, jone na džinéna dud. Zlóko (ránko) isyn vaš lénge sýrby meribnaskiri zer (tien'), pal-dová so jone džinéna ratiakiri zer, saví na trašavela len. Tumé rakiréna! Jov, xači, isyn sýrby koterore pe paní, so valny (velny) sýges lydžána krig len, ne léngiri phuv isyn tel prokošybén (armania), i nijékh na risjola pe drom ke léngiri bar vinagradosa. Šut'kiriben i xačkiribén vyhala ivitka paniá, adiáke-pac' i liúno (prieispodnia) keréla kodolé manušénca, savé kerdé gréhi. Dakiri ločoví (utroba) bistrela les, kirmo javéla te čaradjol léstyr: les butýr na javéna te ripirén manušá, i fuj manúš phadjola syr kašt. Pal-dová so jov pritasavela bičhavorengirja džuvliá, saví na bijanéla, i jov na keréla lačhipén pivliake (udovake). Ne Devél tyrdela zoralypnaskire manušén Péskire zorjása, manúš ĥazdélape, ne nijékh manúš zoralés na patiála dro péskiro džiibén. Devél déla lénge rakhiben, pe savó jone rozginena, ne Léskire jakhá dykhéna pe léngire dromá. Jone ĥazdénape pe nabaró časo, tén'či jone našadjona. Tén'ci Devél čhuvéla len telé; jone džána krig droméstyr syr i javír manušá, jone vyšutjona syr giveskire šerore (kolosy). Kóli na adiáke džála akaná, kon dophenéla, so me xohavava, i so miro rakiribén nisó nane mol?” O Vildado Savhejanino (Šuahostyr) rakirélas tríto mólo, i otphendiá jov dasavé lavénca: “Devél kralinela i sarénde isyn dar angíl Léste, Jov rikiréla ramánjo (miro) pe Léskire vučé štéty. Ci saštý te pogines Léskire Jangolen (xaladén), savé dynarinena syr xaladé (voiny)? I pe konéste na ĥazdélape Léskiro dud? Syr manúš moginéla te javél čačunó angíl Devléste? Ci syr moginéla vari-kon te javél žužó, kon bijándyja džuvliatyr? Ake, i čhon adiáke-pac' na ziainela syr trej, i čergeniá isyn na žužé angíl Léskire jakhá. Pe kicý tyknedýr isyn manúš, kon isyn syr kirmo, i Manušéskiro čhavó, kon isyn syr mol' (mel')?” I otphendiá Ióvo lavénca: “Syr tu podyjan vast odoléske, konéste nane zor? Syr tu prirakhcian kodoleskiro vast, so izdrala? Syr tu dyján godý odoléske, savéste nany godypén? I syr pherdés tu podyjan zan i godý léske pal čačipén? Konéske tu vyphendian lavá? I konéskiro dúho (fáno) rakirdiá tyré ušténca? Riefaimy (mulé-manušéngire tieni) izdrana tel paní i saró, so dživéla odój. Liúno isyn psirado angíl Devléste, i Abadono nane učhakirdo Léskire jakhéndyr. Devél rozdind'kirela paš-ratiakiri rig pir čhučé štéty; Jov ublavela phuv pe nisó. Jov phandela khetané paní dre ĥensta óbloki, pharadjona paniéndyr, Jov čhudiá Péskiro trono, i Jov rosčhuvela Léskiro óbloko uprál pe léste. Jov otčertindia krugo pe panieskire jagóry, kaj kustýk (granica) maškír dud i kalypén. Bolybnáskire stýlby izdrana, i jone daréna Léskire trašaibnastyr. Jov roskuniakirela paniá dro mórjo (derjáv) Péskire zorjása i Jov phagiréla pe koterá morjoskire (derjavéskire) drakonos Rahabos. Péskire duhósa Jov vyšukarjakirela bolybén i Léskiro vast prokurdia sygnone sapes. Ake, davá isyn jagóry Léskire dromendyr, i ame šunasa Léskiro lav adiáke nábut (kutý), sýrby lokho gundiakiriben! Ne kon saštý te ĥaljol Léskire-zoralypnaskiro grumo?” I rakirdiá Ióvo duredýr péskiri pritča (masal) kadasavé lavénca: “Me sovlahava džidé Devlésa, Savó lyjá krig mándyr čačipén, i Jov Sarezorjákiro, Savó kirniakirdia miro di, adiáke ĥará (dlúges), paka miro dúho (fáno) isyn mánde i Devléskiro phurdypen džála miré ruthuniendyr (nozdriendyr), adákicy ĥará miré uštá na javéna te rakirén bibáht, i mirí čib na vyphenela xohaibén! Me som dur daléstyr, sob (kaj) me te čačakirav tumen, paka me som džidó, me na durjakirava péstyr miro bidošengiriben. Me rikirdjompe zoralés ke miro čačipén, i me na mekava davá péstyr: miro iló na bangiakirela man ni dro savó dyvés miré džiibnastyr. Mek te javél miré vergénge syr bibahtalenge, i kodoléske, kon ĥazdélape pe mánde, mek te javél léske, syr načačune manušénge. Pal-dová so savó lačhipén užakiréla fujemujengires, mek jov i te skedel but, kóli Devél otlela léstyr džiibén? Ci javéla te šunél Devél léskiri gódla, syr bari dar peréla pe léste? Ci javéla jov te radynélpe zoralés Sarezorjakire Devléstyr? Ci javéla jov usady (sak) te kharel Devlés? Me javáva te sykliakirav tumen, so Devléskiro vast keréla, me na javáva te garavav tuméndyr Sarezoralypnaskire Devléskire dromá. Adiáke, tumé ž saré dykhné davá, sóske ž tumé vyphenena adákicy ivjá (darmes)?” “Kadasavi isyn fujé-manušéngiri dólia Devléstyr, i meknó mištypén Sarezorjakire Devléstyr, so doreséla odová manúš, kon pritasavela javirén: kóli but čhavoré javéna léste, tedy jone džána tel kurtála; i léskire palál-javibnaskire čhavé na javéna čale marésa, Kodolén, kon jačénape pal léste, len garavena pharé nasvalypnendyr, i léskire pivlia (udovy) na javéna te rovén pal lénde. Mek jov javéla te kedel rup syr práho, i mek jov te otčhuvel khetané ídi syr ĥleja (glina); jov prigotovinela davá, ne čačipnáskiro manúš javéla te ur'jel les; i bibangipnaskiro javéla te roskerél len. Jov čhuvéla kher syr mol', i syr rakhipnaskiro keréla péskiro kheroro (šalášo). Jov pasjola syr barvaló manúš, ne butýr jov na javéla kadasavó, jov otkerela jakhá, i nane ničý pašýl léste. Trašaibén javéla naužakirdes pe léste, syr tasadyipnaskiro paning, baró štormo čorela les ratý. Vastočno balvál lydžála krig les, i sýrby riskiribnaskiri balvál jov riskiréla javrí les léskire štetóstyr. I Devél čhurdelape pe léste bi tangipnaskiro, jov na déla ráda te našél Léskire vastéstyr. Manušá javéna te marén dre vastá pe léste xoliamé radymátyr, i jone déna šolia pe léste krig léskire kheréstyr.” “Tumé džinéna so isyn šahta vaš rup, i isyn štéto, kaj biliakirena suvnakái. Sastýr lélape phuvjátyr, i xarkóma (mied') biladjola (plavinelape) barestyr. Manúš xačkiréla jag dro kalypén, i jov pirirodela syr naj fedýr saró ke jagóry (kraí): bará dro kalypén, kaj isyn meribnaskiri zer (tien'). Jov ganavela šahtytko ĥanýng krig manušéndyr: kaj Manušéskiro ĥerój bistrela, jone podublavena pes pe šele, jone kuninenape pe lénde upré i telé. Dre phuv barjola maró, ne phuv telé isyn sýrby piririskirdy jagása. Dre phuvjákire bará isyn but sapfiry i dre phuv isyn práho suvnakása. Nijékh riskiribnaskiri čirikly na džinéla dromore dre šahty, i koršunoskiri jakh na dykhciá davá. Phut'kirdé ščerá (lievy) na štade pir dová, i šakalo na psirdiá pir dová. Manúš čhuvéla péskiro vast pe kriemnitko bar, jov riskiréla bérgi upré fundamientenca. Jov čingirela angíl progiibena dre skaly, i léskiri jakh dykhéla kažno kuč bar. Jov piričhakirela rekicy, sob (kaj) jone te na thaden, i jov lydžála pe dud (svéto) saró, so isyn garadó tel phuv. Ne kaj saštý te lathel godypén? I kaj saštý te sykljol, sob (kaj) xor te ĥaljol? Manúš na džinéla timín daleske, i godypén naštý te lathes pe phuv, kaj dživéna. Xor paniá rakiréna: “Mánde na lathesa godypén,” i mórjo (derjáv) rakiréla: “Mánde na lathesa godypén.” Godypén naštý te kines pal vykedyno suvnakái, ci te ublaves (te važynes) rup syr timín (cymin) pal godypén. Ne godypén naštý te des čol (timín) Ofisoskire suvnakása, kučoné oniksosa, ci sapfirosa. Ni suvnakái, ni kristalo naštý te roŭniakires ke godypén; adiáke-pac' i khoré (sasúdy) suvnakástyr. Pal mirikle (koraly) i mutin (žemčugo) i na rakiréna; adiáke syr i timín (cymin) pal godypén isyn kučedyr rubinendyr. Topazo Efiopijatyr naštý te roŭniakires ke godypén, adiáke-pac' i naštý te čhuvés timín pe godypén žužé suvnakása. I, kaj saštý te lathes godypén? I kaj saštý te sykljos, sob (kaj) xor te ĥaljos? Davá isyn garadó manušéngire jakhéndyr, savé dživéna, davá garavelape čirikliendyr dro fáno (vozduho). Has' i meribén rakiréna: “Ame šundiám dophenybén péskire kanenca.” Devél ĥaljola drom ke godypén, Devél džinéla štéto te lathes godypén. Pal-dová so Jov dykhéla phuv ke sama jagóry (koncy), i Léske bicialó saró, so isyn tel bolybén. Syr Jov čhuvelas vieso balvaliake, i Jov vyginelas paniá mierasa, i kiéli Jov čhuvelas statúto bryšyndeske i dromoro gromoskire bliskavicake; to tén'či Jov dykhciá godypén i Jov phendiá statečnes; Jov začhudia godypén i Jov sprobindia godypén, i phendiá Devél manušéske: “Ake, godypén isyn dro dová, sob (kaj) te dares Rástyr-Devléstyr, i ĥalyibén isyn dro dová, sob (kaj) te durjos bibahtalé rendéndyr.” Ióvo zaterdjola pal péste palatunó (posliédnjo) mólo. “O, sob (kaj) mánge te javav kadasavesa syr dre proginé čhoná, syr dre dyvesá, kiéli Devél prirakhelas man; i kiéli Léskiro momolýtko (svietíl'niko) svencynelas angíl miro šeró, i kiéli Léskire dudesa me gijom pirdál kalypén (ciamlypén): syr davá sys dre miré bahtalé beršá, kiéli Devél nabiciales dykhciá pal mirí šátra, kiéli Sarezorjákiro Devél sys paš mánde, syr miré tyrne manušá sys paš mánde, kiéli miré ĥerá kompindlepe dro thud, i kiéli skála čhuvelas pal mánde olivítko dzet rekenca! Kiéli me džavas ke foróskiri pórta, kiéli me bešavas pe péskiro štéto javrí pe foruný (plóšča); to terné manušá dykhenas man i garadjonas, i muršá dre beršá uštenas i sys terdé, thagárja pirijačenas te rakirén, i jone čhuvénas vastá pe péskire muiá, manušéngiri zan, saví sys rajkane rodóstyr, cycija (zniknindia), i léngiri čib prijačelas ke taloj (njobo) dre léngire muiá. Kažno (sváko), kon šundiá man, šarelas man; a kažno, kon dykhciá man, pridžinelas vagasa man; pal-dová so me vytyrdavas čorores, syr jov dyjá gódla, i adiáke-pac' pirotos (bidadeskire čhavés), savéste na sys nijékh te podel vast. Odová, kon xasjolas, šarelas man, i me keravas adiáke, so iló pivliate (udovate) bagalas radymátyr. Me urjavas čačipén pe péste: i jov učhakirelas man, miro čačipén sys syr ponča i syr turbano. Me sómas sýrby jakhá vaš kororeske, i sýrby ĥerá langaleske. Me sómas dad odoléske, konéste sys trébima; i me rozĥaljovavas saró pal réndo, kóli me na džindjom les. Me phagavas žandy načačipnaskirende, i me tyrdavas javrí čordo doresybén léngire dandendyr. Tén'ci me phendiem: “Me meráva dre péskiri gniázda, i me javáva te dživáv adákicy but dyvesá, kicý prahinki isyn; miro kornjo (rukh) dind'kirelape (vytyrdelape) ke paniá, i pahlyn (rosa) isyn pašty sarí rat pe miré randiá, miro baripén na phurjola andrál mánde, i miro lúko zoralés rikirélape dro miro vast. Manušá šundlé man i užakirde, i jone prilenas štylés, syr me davas gódla: pale miré lavá jone na rakirdé nevéstyr i miro rakiribén perelas pe lénde syr kapli (čulynia) bryšyndestyr, Jone užakirde man syr bryšýnd, i jone otphandenas péskire muiá buĥles syr pe poznjo bryšýnd. Kóli me sandjompe xoliames léndyr, kiéli jone na patiandyné mánge, tedy miré-moskiri mina podrikirelas len. Me vykedavas drom lénge, i me sómas beštó syr šeraló, i me jačavaspe syr králi dro xaladybén, syr kodová, kon podrikirelas manušén, savé tuginena. Ne akaná terné manušá sanape xoliames mándyr, savengire daden me vyčhurdavas iléstyr fedýr, syr te čhuvav pašýl džuklende, so rakhenas miré – bakrengiri stada. Dykhén, savó ž kófo isyn mánge léngire – vastengire zorjátyr? Léngiro časo (cýro) xasijá. Jone vyšutine bokhátyr i nauhtylybnastyr; jone našné pe čhučé prahi, kaj nane manušá, i kaj isyn čhučó; jone, kon obkedyne londe čarjá pašýl xrústy, i kon xála rakitytka múri. Len tradyne krig péstyr manušá, i pe lénde dyné gódla syr pe čorende. Jone sys bangé te dživén dre cjomna ryc'viny, dre ĥiebará (pieščery) maškír phuv, i dre skaly, jone godlyne sýrby osly (miegárja) maškír xrústy, jone pritasadjonas jekh ke jekh te tatjon tel phusadytka xrústy. Jone sys čhavé dylynendyr, čhavé nalačhé-irjakire manušéndyr; len tradyne krig phuvjátyr. I akaná me jacjom sýrby sabnytko gilý; ĥaljon, me jacjom sýrby sabnytko sykaibén (primiéro). Jone drieván na kaména man, jone isyn terdé krigal mándyr; jone i na prigaravenape, sob (kaj) te čungarden mánge dro muj. Pal-dová so Devél rozmekcia šelo miré lukostyr i kerdiá adiáke, so me jacjom naphut'kirdo. Jone čhurdyné krig péstyr sýrby savari, sob (kaj) te kerén, so kaména. Miré čačé rigátyr léndyr pirangačy (isčadii) ĥazdénape, jone podčhuvena ĥerój mánge, i jone ĥazdénape pe mánde péskire xasibnytkone prijemenca, Jone ĥeraliakirde miro drom, jone kerdé, sob (kaj) me te perav, i nijékh nane te podel vast mánge léndyr. Jone džána mamúj pe mánde, syr pirdál buĥló vypharipen, jone katynenape pe mánde sýrby štormo čhuvélape barénca. Trašaibena risjona pe mánde, jone tradenape pal mirí patýv sýrby balvál, i miro mištypén prourniandyja pašýl mánde syr óbloko pe bolybén. Ne akaná miro di čhuvélape krig mándyr xor tugatyr; dyvesá men'kasa lyné trusciál man. Miré kokalý promarde dre mánde ratý, i miré dukhá xána man bi otkhinybnaskiro Drieván pharó isyn mánge te zlav mirí ídia, miré dukhá phandle man pal miré-šalniroskiro (xitonoskiro) menitko. Devél čhurdyjá man dre drič (boloto), i me jacjom syr práho i práska (pieplo). Dévla! Me zoralés kharáva Tut, ne sóske Tu na otphenesa mánge; me uštava i Tu féni dykhésa pe mánde. Tu jacián biilytko, i Tu rikiresape proti mánde saré Tyré zorjátyr. Tu ĥazdyjan man, i Tu adiáke kerésa, sob (kaj) me te vurniavav pe balvál; Tu kerésa bibáht miré kučipnaske. Pal-dová so me džinóm, so Tu janesa man ke meribén, i ke uphendló kher, kaj skedénape saré džidé. Čačó, kažno mangipén ke Devél nane ivjá (naprásnes), kiéli Jov protyrdela Péskiro vast pe manušéste dre ruíny; kóli jone javéna te den gódla, syr Jov vymarela len. Ci na rondjom me pal manušéste, konéske sys pharó? Ci na tuginelas miro di pal čororende? Pal-dová so me užakirdjom lačhipén, ne bibáht javdiá, i me užakirdjom dud (svéto), ne javdiá kalypén. Saró andrál mánde kirjola, i na otkhinjola; dyvesá men'kasa javné ke miro muj. Me kalyjom, psirindoj, ne davá na khamestyr, me uštava pe skedyibén i me dáva gódla te pomoginen mánge. Me jacjom pšalesa šakalenge, i malesa strausenge. Mirí cýpa kaljola i peréla mándyr, miré kokalý pekenape xačkiribnastyr. Mirí luta (arfa) parudyja te tuginel rovibnasa i mirí svirol'ka jaciá zaniása, saví rovela. Me kerdjom zavieto miré jakhénca. Sóske tedy me javáva te dykháv pe terné patyvalé džuvliáte? Paldavá, saví javéla mirí dólia Devléstyr vučipnástyr, i, savó javéla mištypén Sarezorjakire Devléstyr, Savó isyn pe vučipená? Ci so, nane bari bída pe načačunende? Ci so, nane bibáht odolénge, kon keréla čoripén? Ci na dykhéla Jov miré dromá, ci na ginéla Jov miré šagi (lamnia)? Kóli psirdjom me načačune dromésa, kóli džálas sygedýr mirí ĥerój, sob (kaj) mánge te xohavav, to tedy mek te ublaven (te važynen) man pe roŭna ubladýtka (viesy), sob (kaj) Devél te moginel te džinél pal miro čačipén. Kóli miré piré (stópy) risiné krig droméstyr, cji, kóli miro iló gijá pal miré jakhá, ci kóli vari-saví doš prijacia ke miré vastá, to tedy mek mánge te čhuvav ziárka dre phuv, ne javireske te xal dová, so barjola, ci tén'či mek miro ródo te riskirén krig korniénca (rukhénca). Kóli vari-saví džuvlý te zaterdel miro iló, cji, kóli me te garadjovav paš miré-pašatuneskiro vudár, tedy, mek te del, sob (kaj) mirí romný te mielinel vaš javireske, i, sob (kaj) javír muršá te bandiakiren šeré angíl láte. Pal-dová so davá javélas proštaviben (trašany doš ke kára), i davá isyn fuipén te sendinel sendariske. Pal-dová so davá javélas syr jag, saví xalas saró ke xas', i saví riskirelas krig rukhénca (korniénca) saró miro mištypén. Kóli me dykhávas vučipnása pe miré-štubakire dynariste ci dynaricate, kiéli jone lydžiné čingárd mánca; so ž tedy treindiá mánge te keráv, kiéli Devél léla te sendinel? I kóli Jov phučela mándyr, so ž tedy mánge javélas te otphenav Léske? Ci odová, Kon sozdyjá man dre dakiri loč, ci na Jov sozdyjá kodolé pishar'jén? Ci na Jov vysozdyja dujén dre loč? Kóli me na davas dová, so čororé kamenas, ci kóli me keravas adiáke, so pivliengire (udovengire) jakhá občhuvenaspe jasvénca; ci kóli me xavas kokoró miro kotér, i sob (kaj) piroto (sirota) te na xal mánca; – pal-dová so piroto miré ternypnastyr barija paš mánde, syr paš dadéste, i me lydžavas pir džiibén adalia pivlia, syr féni me vygijom dákire ločatyr, ci kóli me dykhávas, so vari-kon xasjolas pir dová, so na sys léste so te ur'jel, ci čorores, konéste na sys sósa te učhakirelpe; ci kóli léskiro trušúl na bahtiakirdiá man, i ci miré-bakrengiri výlna (šers') na tat'kirdia les, ci kóli me ĥazdavas péskiro vast pe pirotoste, mek me i dykhávas miré manušén paš pórta, tedy mek te perél krig miro vast miré psikestyr, mek te riskirdjol javrí miro vast kokalostyr. Pal-dová so xas' Devléstyr zoralés trašakirelas man, i pir dová me na moginavas te vyrikirav Léskiro fedyripen. Ci, kóli me te užakirav lačhipén suvnakástyr, cji, kóli me te phenáv vykedyné suvnakaske: “Dre túte me zoralés patiáva.” Ci, kóli me drieván te radynavpe doléstyr, so me sómas drieván barvaló, ci pir dová, so miro vast doresciá but; cji, kóli me te dykháv putrade jakhénca pe kham, syr jov délas dud, ci pe čhon, syr jov džal štetóstyr pe štéto pir bolybén, ziaindoj, i kóli kham i čhon čorahanés te zatyrden miro iló, cji, kóli me te čamudav péskiro vast sýrby te dav patýv léske; tedy davá adeke-pac' javélas čoripén, so isyn mol pe séndo; pir dová, so me tedy sýrby otphenavaspe Devléstyr, Savó isyn pe vučipén. Kóli me te radynavpe zoralés, so xasibén pyjá pe léste, cji, kóli me te ĥazdavpe radymátyr, syr bibáht pyjá pe léste; cji, kóli, čačipnása, me te menčynav miro muj te phenél grého, cji, sob (kaj) me kamamas prokošybén (armania) pe léskiro di; cji, kóli te phenén manušá miré šatratyr: “Ci isyn vari-kon, savó na xaja čalés léskiro mas?” cji, kóli vari-savó čúžo manúš te rat'kirel pe vulíca (gása), cji, kóli me te na psiravav miré vudará dromeskireske (prohožoneske); kóli, me te čhakirav miré čoré réndy syr Adamo, garavi miro čoripén pal brek, pal-dová so me daravavas manušéngire skopostyr, i sem'iengiro nakutiakiriben ke me trašavelas man, tedy me javavas štyl, i me na džavas javrí pal vudár. O, kóli te javél vari-kon mánde te šunél man! Ĥáda, isyn miro podčhinyben: mek Sarezorjákiro Devél te otphenel mánge! I sob (kaj) miro proti – terdypnaskiro manúš te čhinel miro band'kiriben! Čačipnása, me lydžavas davá band'kiriben pe miro psikó; i me phandavas les pe šeró syr kralítko stadyk; me pridžinavaspe Devléske pal kažno miro šago (lamny), me sýrby thagári džavas pašedyr ke Jov. Kóli mirí phuv te del gódla pe mánde, i kóli lákire lies'ni (borozdy) te rovén khetané pe mánde, kóli me xajom lákire barjakirdé (plódy) bilovengiro, i kóli me menčyndjom ke meribén dijá, konéskiri phuv daja sys, to mek te barjon kanrale rasliny pe giveskiro štéto, i mek te barjol dylyny čar (kukol') pe ĥerstoskiro (jačmienjoskiro) štéto (Iovoskire lavá končyndlepe). I kadalé trin manušá pirijačne te otphenen Iovoske, pal-dová so Jov sys čačunó dre péskire jakhá. Tén'ci zahačíia Eliujoskiri xolý, kon sys Varahoskiro čhavó Vuzitendyr, savé isyn Ramoskire sem'iatyr: léskiri xolý zahačíia pe Iovoste; pal-dová so jov čačakirdia pes butýr Devléstyr. Léskiri xolý roshačija adiáke-pac' pe triné malende, pal-dová so lénde nisó na sys te otphenen, i so jone sendindle zoralés les. Ne, Eliujo (Eliujo), Varahoskiro čhavó, užakirdia, paló dová, syr Ióvo končyndia te rakirél, pal-dová so léskire trin malá sys phuredýr léstyr. I dykhciá Eliujo, so na sys lav dre léngire muiá adalé triné manušénde, to léskiri xolý roshačija butýr. I Eliujo, Varahoskiro čhavó Vuzitendyr, otphendiá lavénca: “Me som ternó, ne tumé san dre beršá, paldová me sómas ladžakuno, i me darandyjom te sykavav, so me džinóm.” Me phendjom: “Mek dyvesá te rakirén, i beršengiro butypen te sykliakirél godypnaske.” Ne dre manušéste isyn dúho (fáno), savó déla Sarezorjákiro Devél, Savó déla godý manušénge te ĥaljol. Na baré-beršengire manušá isyn ŭsády (sak) naj godedyr, adiáke-pac', i manúš dre beršá na ŭsády (sak) ĥaljola čačipén. Paldavá me phenáva: “Šunén man mištés, me adiáke-pac' sykaváva, so me džinóm. Ake, – me užakirdjom tumaré lavá, me šundjom otkerde kanesa pričyny, so tumé pirirakirenas, syr akaná tumé rodenas, so te phenén. Čačó, me riskirdjom iló ke tumaré lavá, i, ake; nijékh tuméndyr na piripatiakirela Iovos, i nijékh na otphendiá pe léskire lavá, – tedy tumé na rakirén: “Ame lathiam godypén. Devél otphenéla, syr trej Léske, ne na manúš. Ióvo na rakirdiá péskire lavá mamúj ke me, i me na otphenavas léske tumaré lavénca. Tumé akaná xokine divostyr, i na otphenena nisó; tuménde i lavá xasiné. I me užakirdjom, pal-dová so tumé na rakirdé, ne tumé sánas štyl, i tumé butýr na otphendlé. I akaná me adiáke-pac' otphenava miré rigátyr: pal-dová so mánde isyn pherdó lavá, dúho (fáno) andrál mánde začhuvela man te rakiráv. Ĥáda, saró andrál mánde isyn syr mol (vino), saví isyn naotphandly, saví, ake, akaná pharadjola. Me javáva te rakiráv, sob (kaj) mánge te javél lokhedýr, me otphandava péskiro muj i me otphenava. Me mangavape Devléske, sob (kaj) mánge te na javav pe vari-konéskiri rig, i sob (kaj) mánge te na xohavav gudles vari-konés. Pal-dová so me na džinóm, syr te xohavav gudles; kóli me te keráv adiáke, to miro Sozdyibnaskiro ukedela krig man.” Ne me mangáva tut, Ióvo, šun, so me phenáva túke, i prišunpe mištés ke saré miré lavá. Ĥáda, akaná, me otphandava péskiro muj, mirí čib javéla rakirél dro miro muj. Miré lavá džána miré-iléskire čačipnastyr, i miré uštá vyphenena jekh džinybén. Devléskiro Dúho sozdyjá man, i Sarezorjakirere Devléskiro phurdypen dyjá džiibén mánge. Kóli tu naštý te otphenes mánge, phen péskire lavá jekh, pal javír angíl mánde: terdjov angíl mánde. Ake, me som dasavo-pac' angíl Devléste syr tu, me adiáke-pac' som sozdynó prahostyr. Šun, na andarša (na dar) miré minatyr, i miré vastéstyr, so javéla pharó túke. Ĥáda, so miré kaná šundlé, i me šundjom tyré-lavengiri zan: “Me som bidošéngiro, me na kerdjom čoripén. Ne Devél lathéla bang dre mánde, Jov ginéla man pal Léskire vergoste, Jov čhuvéla miré ĥerá dre kalodki, Jov dykhéla pal saré miré dromá!” Dykh! Dro davá tu na san čačikano (opravdano), – me phenáva túke: Devél isyn vučedýr manušéstyr. Sóske tu lydžása čingárd Lésa? Jov, xaj, na déla otphenybén pal Léskire réndy! Pal-dová so Devél rakiréla jékhvar, duj móly, ne manúš na ĥaljola angíl; Devél sýrby phenéla dro sunó, dre zdanki (dykhibén) ratý, syr xor soiben peréla pe manušéste, ci syr manúš lindrela (drieminela) pe čhuibén, tedy Devél otphandela manušéngire kaná i Jov čhuvéla sýrby jakhítko pe Péskiro uphenybén, sob (kaj) te obrikirel manušés te kerél čoré réndy, sob (kaj) te garavel phut'kiribén manušéstyr. Jov rakhéla Manušéskiro di maĥilatyr, i léskiro džiibén kurtalátyr. Devél adiáke-pac' pirisykliakirela manušés nasvalypnasa dro léskiro čhuibén, i zoralé dukhasa dre léskire but kokalý adiáke, so léste butýr nane kamiben te xal maró, i léskiro di butýr na kaméla smašno xabén. Léskire masá xasjona pe jakhá, i léskire kokalý, so na dykhné sygedýr, akaná biciale javrí. I léskiro di džála pašedyr ke mulytko ĥanbín, i léskiro džiibén ke meribén. Kóli te javél bičhaibnaskiro Jangólo vaš léske, manúš, kon rozlela godiása, jekh tysjoncendyr, sob (kaj) te sykavél adalé manušéske léskiro mamúj drom, tén'či Devél potanginela manušés i phenéla: “Vyrakh les, sob (kaj) jov te na džal dre maĥila (kula); Me lathjom vykinybén pal léste.” Léskire masá javéna zoraledýr syr dre léskire terné beršá, jov sýrby risjola tedy ke léskire terné beršá. Jov javéla te mangélpe Devléske, i Devél priléla les laskasa, i jov javéla te del patýv angíl Léste baré radymása, pal-dová so Devél riskiréla pale léskiro čačipén. Jov javéla te dykhél pe javire manušénde, i te rakirél: “Me kerdjom gréhi, i me piririskirdjom čačipén. I me na dorescjom dab pale. Devél vyrakhcia miro di mulytkone ĥanbinatyr, i miro džiibén udykhéla dud!” Ake, Devél keréla saró davá duj trin móly manušésa, sob (kaj) te janel pale Manušéskiro di maĥilatyr (kulatyr), sob (kaj) te obsvencynel les džiibnáskire dudesa (svetosa). Dykh mištés, Ióvo, šun otkerde kanenca man, jav štyl, i me javáva te rakiráv. Kóli isyn vari-so túte te phenés, to otphen mánge: rákir, pal-dová so me drieván kamám te čačakirav (te opravdynav) tut. Kóli nad, tedy šun man: jav štyl, i me javáva te sykliakirav tut godypnaske.” I otphenélas Eliujo (Eliujo) duredýr i phendiá: “Šunén miré lavá tumé, kon san godé; pričhuvén kan ke me, tumé, kon džinéla but. Pal-dová so kan sprobinela lavá, syr taloj (gortan') koštynela xabén. Javén, vykedasa péske čačipén; javén, džinása butýr khetané, so isyn lačhipén. Pal-dová so Ióvo phendiá: “Me som čačunó, ne Devél lyjá krig miro čačipén.” So ž mánge te xohavav pe miro čačipén? Mirí dab (rana) na sastija, mek me i som bičoripnaskiro. Kaj isyn dasavo manúš syr Ióvo isyn? Kon p'jela xoliamipen sýrby jov p'jela paní? I kon kumplinelape adasavé manušénca, kon keréla čoripén, i kon psiréla fujé manušénca? Pal-dová so jov phendiá: “Nane lačhipén manušéske, so jov zoralés radynélape Devléstyr.” Paldavá šunén mištés man, tumé, kon san godé: naštý te javél, sob (kaj) Devél te duminel, te kerél fuipén, i naštý te javél čoripén Sarezorjakire Devléstyr. Pal-dová so Jov otdéla pale manušéske pir léskiri butý, sob (kaj) kažno manúš te doresel mazúri (nagrada) pir dová, so Jov kerdiá. Saré džinéna, so Devél nijékhvar na keréla fuipén, i Sarezorjákiro Devél na piririskirela čačipén. Kon dyjá zor dre Léskiri vastá pe sarí phuv? Nikón ža i dyjá zor Léske te rainel pe saró svéto. Kóli Jov féni te duminel pal Péste, i te kedel krig Péskiro Dúho (Fáno) i Péskiro phurdypen te dživén; to saró džidó xasjolas, i manúš risjolas dro práho. Kóli tumé san godé, šunén davá; prišunenpe ke miré-lavengire zaniá (glosiá): “Ci saštý te rainel odová, kon zoralés na kaméla čačipén? Ci saštý tu te obsendiakires zoralés kodolés, Kon isyn Sarečačipnaskiro? Ci isyn lačhés te phenél kralíske: “Tu san zlydnia!” Ci lačhé-rodoskire ráske: “Tu san bibáht.” Devél na priléla thagar'jengiri rig, adiáke-pac' Jov na ginéla barvalen vučedýr čororendyr, pal-dová so Jov sozdyjá i jekhés i javirés. Ĥáda, jone meréna i dre paš-rat, i manušá izdrana i xasjona, i zoralypnaskire muršá pirijačena te javén dro svéto bimanušeskire-vasteskiro. Pal-dová so Devléskire jakhá isyn pe dromá, savénca manúš psiréla, i Jov dykhéla saré léskire šagi (lamnia). Ni dro kalypén (ciamlypén), ni dre meribnaskiri zer (tien') naštý te garadjon Devléstyr manušá, kon keréla čoripén. Devléske na trej, sob (kaj) manúš te obduminel, syr léske te terdjol pe séndo angíl Raste-Devléste. Jov phagela pe koterá zoralypnaskire muršén, i Jov čhuvéla javire manušén pe léngire štéty. Davá isyn čačipén, so Devél džinéla léngire réndy, Jov ravela telé len ratý, adiáke, so jone xasiné. Jov pekavela len syr fujé manušén angíl javire-manušéngire jakhá, pal-dová so jone risiné pale Léstyr, i jone na obduminenas Léskire dromá ke dasaví miéra. Pal-dová so čororé-manušéngire roibén dogijá ke Jov, pal-dová so Jov šunéla, syr pritasade manušá rovena. Kóli Jov isyn štyl, kon tedy saštý te kerél šumo? I kóli Jov ĥaravela Péskiro muj, tedy, kon saštý te dykhél Les? Ci te javél davá vaš sarí nacyja, ci vaš jekhe manušéske? sob (kaj) te na rainen duje-mujengire manušá, sob (kaj) te na javén manušá xohade syr feliasa. Ci phendián tu, Ióvo, syr i javír manúš Devléske: me na javáva butýr te keráv gréhi! So me na dykháva, daleske sykliákir man; kóli me kerdjom načačunes, me na javáva butýr. Ci javéla Devél te otdél pale pir tyrí godý? Pal-dová so tu otphendianpe Léskire sendostyr!? Davá túke trej te vykedes, na mánge, phen akaná aménge, syr tu džinésa. God'varé, i godé manušá phenéna mánge, savé šunéna man: “Ióvo phendiá adiáke, syr léste nane džinybén, léskire lavá isyn nagode.” O, sob (kaj) Ióvo te javél piriprobindlo ke kónco (jagóro)! Pal-dová so jov otphendiá adiáke, syr fuj manušá! Pal-dová so Jov dočhuvela búnto pe Devléste ke léskire gréhi, jov marela dre vastá maškír aménde i jov butedyrjakirela péskire lavá pe Devléste.” O Eliujo (Eliujo) duredýr rakirdiá i phendiá: “Ci duminesa tu, so davá isyn čačipén, syr tu phendián: me som čačunedyr Devléstyr! Pal-dová so tu phucian Devléstyr: “Savó lačhipén javéla mánge [túke-r.s.]? Saví butýr l'góta javéla mánge, kóli me i kerdjom gréhi angíl davá?” Me otphenava túke i tyré drogoné malenge, kon isyn túsa. Podykh upré pe bolybén, i dykh, i ake, isyn óbloki (xmary), so isyn uprál tútyr. Kóli tu kerésa gréhi, so kerésa tu Léske? Ci, kóli tu butedyrjakiresa péskiro čoripén, so tu kerésa Léske? Kóli tu san čačunó, so désa tu Léske? Ci so Jov doreséla tyré vastéstyr? Tyró fuipén keréla doš adasavé manušéske, syr tu san kokoró, i tyró čačipén isyn dasavo-pac', syr kažnoné javire manušéste. E manušá godlena, kóli len but pritasavéna, jone godlena, sob (kaj) lénge te poden vast zoralypnaskire manušá. Ne nijékh na phenéla: “Kaj isyn Devél, miro Sozdyibnaskiro, Kon déla gilý syr nadiéia ratý? Kon sykliakiréla amen butedýr murdaléndyr, i kon keréla amen godedyr čirikliendyr pe bolybén? Jone godlena roibnasa, ne Devél na otphenéla lénge pir-dová, so jone isyn bibahtalé i phut'kirdé. Ne Sarezorjákiro Devél na šunéla čhučó (pusto) rakiribén, i na déla vaga lénge. Mek tu, Ióvo, phendián, so tu na dykhésa Les, ne tyró čačipén isyn angíl Léste i túke trej te užakires Les. I akaná, pal-dová so Jov na sendindia pharés tut dre péskiri xolý, i so Jov sýrby na dykhciá pe tyró dylnypén; paldavá tu, Ióvo, otphandesa péskiro muj ivjá (naprásnes), i tu butedyrjakiresa péskire nagode lavá.” I nevéstyr lyjá te phenél lav Eliujo (Eliujo) i phendiá: “Vyrikir (potierpin) man nábut i pošun, i me sykaváva túke, so mánde iščo (inké) isyn lavá Devléskire rigátyr. Me sýrby janáva miro džinybén duripnastyr, i me dosykavava čačipén pal miré Sozdyibnaskireste. Pal-dová so, čačipnása, miré lavá isyn na xohané; i angíl túte isyn murš, kon isyn bidošéngiro dro džinybén. Ake, Devél isyn zoralypnaskiro, ne Jov na dykhéla bipatyvakires ni pe konéste. Jov isyn drieván zoralypnaskiro, i Jov isyn drieván baré-godiákiro. Jov na rakhéla bibahtalé-manušéngiro džiibén, ne Jov keréla pir čačipén kodolenca, konés pritasavéna. Jov na riskiréla krig Péskire jakhá čačuné manušéndyr, ne jone isyn pe trono kral'jenca, pal-dová so Jov bešliakirela len pe ŭsády (sak), i lénge déna bari čol (timín). I kóli jone isyn phandle dre sastyrá, i len rikiréna i pritasavéna sýrby šelenca; to tedy Devél sykavéla léngiri bibáht, i léngiro čoripén, pal-dová so jone kerdé len but; tén'či Jov otphandela léngiro kan te sykliakirél len, i Jov priphenela lénge, sob (kaj) jone te risjon čoripnástyr. Kóli jone prišunenape i javéna te dynarinén Léske, léngiro džiibén javéla dro mištypén, i léngire beršá prodžána dre rádyma (loš). Ne kóli jone na javéna te kandén, tedy jone xasjona kurtalátyr, i jone meréna dro nadžinyben. Ne fujé-mujengire manušá skedéna xolý dro iló; jone godlena jasvénca, kiéli Devél phandela len dre sastyrá. Jone meréna terné, i léngiro džiibén končynelape maškír nadevlytkone manušénde. Devél vyterdela čororé manušés men'kendyr, i Jov otphandela jakhá lénge, kiéli len pritasavéna. Jov adiáke-pac' vytyrdelas i tut darakune bibahtiatyr, pe buĥló štéto, kaj javéla vól'no; i dová, so isyn čhudo pe skamínd, javéla pherdó thule xabnasa. Ne akaná pherdó séndo pyjá pe túte, so isyn vaš fujé manušénge, Ióvo, – séndo i čačipén rikiréna tut. Mek Devléskiri xolý te na marel tut telé jekhe pekaibnasa; pal-dová so baró myto na zrakhéla tut. Ci déla patýv Devél tyré barvalypnaske? Nad, – ni suvnakaske, ni savé kučipnaske. Na kam zoralés doiá rat, syr manušá, xasjona pe péskire štéty. Rikirpe na risjov ke čoripén, pal-dová so ž tu ĥaredyr vykedyjan čoripén péske syr te stradynes. Ake, Devél isyn drieván baró pir Péskiri zor! Kon sykliakiréla amen syr Jov? Kon dyjá léske réndo adiáke te kerél? Ci kon phendiá: “Tu kerdián namištes? Rípir te barjakires Léskiri butý, pal saví manušá bagana. Kažno manúš dykhciá davá, ne manúš saštý te dykhél pe Léskiri butý duripnastyr. Ake, Devél isyn drieván baró, i ame naštý te ĥaljovas xor Les, adiáke-pac' naštý te phenés Léskire beršá. Gada, Jov skedéla kapli (čolynia) paniésa, savé pirikerenape dro bryšýnd miglatyr; savé óbloki mekéna telé i čhuvéna drieván but pe kažnoné manušéste. Čačó, ci moginéla vari-kon te ĥaljol, syr Devél rozdind'kirela bolybena, ci syr lélape bliskavica Léskire garadé šatratyr? Dykh, Ióvo, syr Jov rozčhurdela Péskiro dud pe láte, i Jov učhakiréla morjoskiro (derjavéskiro) dugno (dno). Odothýr Jov sendiakiréla manušýtka nácyi; Jov déla xabén drieván but. Jov garavela bliskavica dre Péskire vastá, i Jov priphenela láke, kaj te pekaven. Ne gromo podela zan, so javala bliskavica, adiáke-pac' i kheritkoné murdalengiro (skotoskiro) iló šunéla; syr joj iavéla. Daléstyr miro iló adiáke-pac' izdrala, i kharélape (dviginelape) léskire štetóstyr. Šunén, šunén gromo Léskire glosatyr, i gromo, so marela Léskire móstyr. Jov bičhavéla gromo telál tel saró bolybén, i Léskiri bliskavica, prastala ke sama jagóry (kraí) pe phuv Paló davá, ake, Léskiri zan ĥrieminela: Jov déla gromosa Péskire rajkanypnytkone zaniatyr (glosatyr), i Jov déla vólia bliskavicake te xačol adiáke ĥará, syr šunelape Léskiri zan. Devléskiro gromo adiáke divnes grieminela, Jov keréla baré réndy, so aménge naštý te ĥaljovas xor len. Pal-dová so Jov phenéla iveske: “Pherdiakir phuv”, adiáke-pac' Léskiri zor isyn pe bryšyndore i pe baré bryšynda. Jov čhuvéla jakhítko / čergenorí (piečat') pe vast kažnoné manušéske, sob (kaj) saré manušá te džinén Léskiri butý. Murdalá džána dre péskire garavipnaskirja (ubiežyščy), i jone jačénape dre péskire venty (ložyščy). Riskiribnaskiri balvál javéla paš-dyvesytkoné xaromatyr, i šyl džála balvaliendyr, so phurdena paš-ratiakire rigátyr. Ljodo jačélape Devléskire phurdypnastyr, i baré paniá mrazjona. Jov sapaniakirela ĥensta óbloki paniésa, i Jov rosčhuvela len pir bolybén bliskavicasa, i jone risjona i kharenape (dviginenape) Léskire vastésa adiáke, sob (kaj) te kerén dová, so Jov priphenela lénge pir saró phuvjákiro buĥlypén. Devél bičhavéla bryšýnd, sob (kaj) te pirisykliakirel manúš ci vaš phuv, sob (kaj) te sykavél Péskiri láska. Šun davá, Ióvo, jav štyl i obdumin Devléskire dívna butiá. Ci džinésa tu, syr Devél rozbičhavela óbloki, i keréla adiáke, sob (kaj) te ziainel dud Léskire oblokendyr? Ci džinésa tu, syr rikirenape óbloki – kadalé dívna butiá Léste, Kon isyn bidošéngiro dro džinybén? Sóske tyré ídi jačénape xačkirdé, kiéli Devél štyliakirela phuv balvaliasa paš-dyvesytkoné rigátyr? Ci tu Lésa rosčhudian pir rigá óbloki, so isyn zoralé syr vyčhudo ĥindalo? Sykliákir amen, Ióvo, so te phenas Léske! Pal-dová so ame naštý te rosčhuvas péskire lavá jekh pal jekh pir dová, so ame sam dro kalypén. Ci moginéla vari-kon te phenél Devléske, so me kamamas te rakiráv Lésa? Ci phenelas vari-kon Léske, i te xasjol? I akaná manušá na dykhéna dud, syr jov ziainela, kiéli jov isyn garadó dre óbloki. Syr balvál prodžála, jov žužakirela bolybén. Devél javéla paš-ratiakire rigátyr sýrby suvnakunó šukaripén ke dar. Ame naštý te ĥaljovas sarésa Sarezorjakire Devlés: Jov isyn Naj Zoraledýr, Jov isyn naj kučedyr pe séndo, i Jov isyn drieván čačunó, Jov na pritasavela nikonés. Paldavá manušá daréna Léstyr, Jov na léla odolengiri rig, savé isyn godé dre péskire ile.” I otphendiá Raj Devél Iovoske riskiribnáskire balvaliatyr (buriatyr) lavénca: “Kon isyn kadavá, kon kaliakirela Miré zadumy nagod'vare lavénca? Podphandepe i jav skedynó, Ióvo, syr murš, i Me javáva te phučav tútyr, tu javésa te otphenes Mánge. Kaj sánas tu, syr me začhuvavas phuv? Phen Mánge, kóli tu san baré-godiákiro? Kon priphendiá baripén phuvjake? Ci džinésa tu davá? I kon rozdindkirdia pe láte šelo te mierinel? Ke so phuvjákiro fundámiento pričhudo zorjása? I kon čhudiá lákiro venglytko bar; kiéli bagandle khetané čergeniá pe zlóko (pe ránko), i saré Devléskire čhavé dénas gódla radymátyr? Ci kon zaphandia mórjo (derjáv) vudarenca, kiéli jov pharadjolas baré paningesa, sýrby jov džálas javrí ločatyr; kiéli me kerdjom oblokendyr léske ídi i pherdé cjomnymatyr pat'kiribnaskire pherne (pieljonki). Kiéli me čhudjom mirí miéra morjoske, i kiéli me čhudjom štaby i vudará; kiéli me phendjom: ‘Féni adiáke dur túke saštý te džas, ne, na duredýr, i adáj tyré phut'kirdé valny isyn bangé te terdjon.’ Ci priphenesas tu zlokoske (rankoske), syr tu lyjan te dživés, i ci keresas tu adiáke, sob (kaj) ránko te džinél péskiro štéto, sob (kaj) zlokoskiro dud te dodžal ke phuvjákire jagóry, i, sob (kaj) fujé manušén te trinskiren látyr, sob (kaj) joi, phuv, te risjol syr ĥleja tel jakhítko (piečat'), i sob (kaj) joj te paruvel péskiri mastin (cviato) syr ídia, te pririkirel dud angíl fujé manušénde, i sob (kaj) te phagirel ĥazdynó vast. Ci sánas tu adiáke dur, kaj morjoskire (derjavéskire) ĥaningore lenape? Ci psirdian tu pir morjoskiro (derjavéskiro) dugno te rozĥaljos xoripén? Ci psiradiape angíl túte meribnaskiri pórta? Ci dykhcián tu vudár ke meribnaskiri zer (tien')? Ci ĥalyjan tu xor phuvjákiro buĥlypén? Phen zoralés Mánge, kóli tu džinésa saró davá? Kaj isyn drom ke štéto, katýr dud džála? I kaj ciamlypén jačélape, sob (kaj) tu moginesas te lydžas len ke léngire kustyka (granicy), i te bičhaves len ke léngire kherá? Ci džinésa tu davá, pal-dová so tedy tu uže sánas pe svéto, ci pal-dová so túte isyn baré beršá pir dyvesá? Ci sánas tu vari-kiéli odój, kaj isyn piralý vaš iv? Ci dykhcián tu piralý vaš grado, so Me rakhcjom vaš davá časo (cýro); syr javéla pharipén, syr javéna dyvesá vaš maribén i vojna? Save dromésa dud (svéto) roskerelape pe pašá, ci balvál vastokóstyr (bel'velitkonestyr) rozurnialape pir phuv? Kon keréla drom baré paningeske te čhuvelpe duredýr, ci kon sykadiá drom vaš gromoskiri bliskavica? Ci kon keréla adiáke, sob (kaj) te džal bryšýnd pe phuv, kaj nikón nane, pe čhučí phuv, kaj nane manušés, sob (kaj) te paniakirel ke čalypen naobdživdle štéty, i te kerél adiáke, sob (kaj) čarinki te barjon ke ĥensto čar. Ci isyn bryšyndeskiro dad? Ci kon jandiá pe svéto pahlyniakire (rosakire) kapki? Dre konéskiri loč (črievo) lathelape ljodo? I kon jandiá mrazo pe svéto? Paniá kerénape sýrby bará, i saró panieskiro buĥlypén, kaj isyn xor telál, mrazjola dro jekh kova? Ci moginésa tu te phandes čergengiro riado, so kharélape Plejady, i ci moginésa tu te rosphandes vol'nedyr Orionoskire-čergeniengiri kustýk? Ci moginésa tu te lydžas angíl čergeniengiro zodiako dro péskiro časo (cýro), i ci moginésa tu te lydžas ričyha ričorenca? Ci džinésa tu bolybnáskire–statutno uphenybén? Ci moginésa tu te čhuvés les te rainel pe phuv? Ci moginésa tu te ĥazdes péskiri zan ke bolybén, sob (kaj) but – but paniá te čhakiren tut? Ci désa ráda tu te bičhaves bliskavícy, sob (kaj) jone te džán, i sob (kaj) jone te phenén túke: “Ake, ame sam.” Kon dyjá godypén manušéskire godiake? I kon dyjá god'varipen ileske. Kon déla ráda te poginel óbloki péskire godypnasa? Ci, kon déla ráda, sob (kaj) óbloki te vyčhuven paniá bolybnástyr sýrby gonestyr, kiéli práho kerdiápe dre tvarda komki, a phuvjákire koterá lipnindlepe khetané. Ci tu, Ióvo, staresa vaš ščericake (l'vicake), sob (kaj) joj te riskirél vari-so dandenca, ci tu désa čalés xabén terné ščerorenge? kiéli jone podčorjona dre péskire venty (logovy), ci podrakhena, pasindoj, vari-so dre léngire čorahane štéty (zasady)? Kon doreséla xabén korakoske (voronoske), kiéli léskire čhavrinia (ptiency) godlena ke Devél i psiréna trusciál pir dová, so lénde nane mas. Ci džinésa tu časo (cýro) kiéli busa bergitka buznia (kozy) lot'kirena tyknen? Ci désa ráda tu te dykhés, kiéli mirgi (lani) lot'kirena? Ci moginésa tu te pogines, kicý čhoná jone isyn pharé tyknenca? Ci džinésa tu časo, kiéli mirgi daja lot'kirena len? Jone vybandjona, kiéli jone lot'kirena: jone čhurdena javrí péskire dukhá péskire palál-javibnaskirenca (patomkenca). Léngire terné isyn zoralé, jone barjona pe giv, jone udžana, i jone na risjona ke jone. Kon vymekcia pe vólia busone (dikone) oslós? Kon rosphandia pienty onageroske? Kon léske kerdiá kher čhučé phuvjátyr, i džiibnytko štéto londe šteténdyr? Adavá murdál dykhéla vučipnástyr pe foróskiri gódla, jov na šunéla, so pe léste déla gódla potradypnaskiro. Jov čaradjola pe sama vučipená pe bérgi, jov rodéla kažno zelenyben. Ci zakaméla leskaro guruv te dynarinél túke? Ci javéla jov te rat'kirel pašýl tyrí jasla? Ci désa ráda tu šelenca te priphandes busone guruvés ke liés'ni (borozny)? Ci javéla jov te pharavel phuv pal túte? Ci javésa tu te dopatias léske, pal-dová so léste isyn bari zor? Ci mekesa tu pe léste péskiri butý? Ci dopatiasa tu léske, sob (kaj) jov te janel kheré tyró giv? I, sob (kaj) jov te skedel giv dre tyrí šúrna (gumno)? Strausica marela péskire phakenca radymátyr, ne láte nane adasavé phaká i šukár pora syr pavlinoste, joj jačkiréla péskire parnore pe phuv, i joj tat'kirela len pe phuv. Joj bistrela, so ĥerój moginéla te tasavel len, cji, so feldytko murdál (zviérjo) moginéla te phagirel len. Strausica pharjakirela péskiro iló ke lákire tykné, sýrby jone isyn na lákire, joj na daréla, so lákire pharé butiá isyn ivjá. Pal-dová so davá Me, Devél, lyjom krig godypén látyr, i me na dyjom godý láke. Kiéli joj ĥazdélape vučés, joj dykhéla vučipnása pe greste, i pe manušéste, kon isyn uklisto pe greste. Ci davá tu, Ióvo, dyján zor greske i uridian griva pe léskiri Men? Ci moginésa tu te zatrašaves gres syr skočkos? Jov adiáke daranes fyrskinela, so ĥazdéla traš. Jov ĥanavela kopytenca phuv i drieván radynélape péskire zorjátyr; jov prastala ĥaloposa odorík, kaj manušá zdžanape mardytkonenca (oružyjosa). Jov sýrby salape, i na džinéla dar; jov na ĥaljola traš, jov na risjola pale kurtalátyr; kolčano briazginela scial léste, maribnýtko bust i čhur'je – čhurdypnytko (drotiko) ziainena angíl. Jov nakhavela phuv sýges i xoliása, i jov na moginéla te terdjol pe štéto, kiéli jov šunéla rógo (truba). Syr rógo zabašavela, graj déla zan “Aga”; jov sungavela maribén duripnastyr, syr rajo déna gódla zoralé zanienca (zanienca). Ci tyré godypnastyr kagniengiro (jastriebo) vurniala, i rozdind'kirela péskire phaká ke paš-dyvesýtko rig? Ci tyré lavéstyr ĥazdélape mamúj upré (órlo) kído i keréla péskiri ĥniazda pe vučipén? Jov dživéla pe skaly i jov rat'kirela pe skalengire vostrime, štéty, so na dodžasa, odothýr jov vyrodela so te riskirél dandenca; jov čhuvéla péskire jakhá pe vari-so duripnastyr; i léskire tyknore p'jena rat; – kaj isyn mulypen, odój isyn léskire tyknore.” [40.1-ju.o.] I otphendiá duredýr Raj Devél Iovoske dasavé lavénca: [2] “Ci javéla odová manúš, kon lydžála čingárd Sarezorjakire Devlésa, te pirisykliakirel Les? Mek jov, kon bangiakirela Devlés, te otphenel Léske!” [3] I otphendiá Ióvo Ráske-Devléske i rakirdiá: [4] “Dykhén me som telatuno, so mánge te otphenav Túke? Me čhuváva miro vast pe uštá. [5] Me jekh mólo phendjom, ne me na javáva te otphenav akaná: čačó, javír mólo, ne me butýr na javáva te rakiráv. [6] Tén'ci otphendiá Raj Devél Iovoske riskiribnáskire balvaliatyr (vihrostyr) i phendiá: [7] “Podphandepe i jav skedynó syr murš; Me javáva te phučav tútyr, a tu javésa te otphenes mánge: [8] Ci phagiresa tu, čačes, Miro čačipén? Ci javésa tu zoralés te obsendines Man, sob (kaj) tu te javes čačakirdo? [9] Ci san tu zoraló adiáke, syr Me som? Ci isyn túte dasaví zan syr gromostyr? [10] Tén'ci gožakir pes baripnasa i kučipnasa, uripe dro rajkanypen i šuk. [11] Vyčhuv sarí péskiri xolý, podykh pe kažnonéste, kon isyn phut'kirdo i teliakir les; [12] Podykh pe svakoneste, kon phucjola, čhuv telé les; štakur telé fujé manušén pe léngire štéty. [13] Garav len khetané dro práho, i čhakir léngire muiá čorahanés, [14] tedy Me adiáke-pac' pridžinava tut, so tyró čačó vast moginéla te rakhél tut. [15] Dykh akaná pe biegiemotoste, savés Me sozdyjom syr i tut: jov xála čar syr guruv. [16] Ĥáda, dykh, savó zoralypén isyn dre léskire ĥerjakire stacia, i saví zor isyn dre léskire-pereskire masá. [17] Jov band'kirela porjasa syr kiedrosa, a žyly pe léskiro per zoralés khode. [18] Léskire kokalý isyn sýrby bronzytka truby, a léskire pašvare isyn sýrby sastyriny (želieziny). [19] Jov isyn naj zoraledýr, konés Devél sozdyjá: jekh Jov, Savó sozdyjá les, déla ráda te janel pašedyr Péskiri kurtála ke jov. [19] Bérgi, kaj broinena saré feldýtka murdalá, déna xabén léske. [20] Jov pasjola tel lotoskire kaštá, kaj garavena les triščyna (trosniko) i drič (boloto). [21] Lotoskire kaštá učhakirena les péskire zerjasa, les občhuvena vierby paš rekicy. [22] Mek reka (len') ĥazdélape paniésa, ne jov isyn štyl: jov isyn zoralés terdó, mek kokoró Iordáno (Jordano) te čhuvelpe dro léskiro muj. [23] Kon déla ráda te lel les angíl léskire jakhá? Ci kon pusavela léske dro nakh feliakire spicasa? [24] Ci vyterdesa tu Lieviafanos nanglesa, i ci pritasavesa tu léskiri čib šelesa? [41.1-ju.o.] Ci désa ráda tu te včhuves šelo triščynatyr dre léskire ruthunia (nozdri)? [2] Ci javéla davá Lieviafano but te mangél tut, sob (kaj) tu te potangines Les? Ci javéla jov te rakirél kovles túsa? [3] Ci javéla jov te kerél štama (dorakiribén) túsa? Ci lésa tu les syr pisharís pe usady (sak)? [4] Ci javésa tu te broines lésa syr čirikliasa? Ci désa ráda tu te phandes les vaš péskire-štubakire raklor'jenge? [5] Ci javéna te kofarinen lésa tyré dróga malá? Ci javéna te roskeren les kúpcy (tylgárja) maškír péste? [6] Ci désa ráda tu te pusaves dre léskiri cýpa maribnytkoné bustiasa? Ci čilavesa tu léskiro šeró mačhar'jengire bustiasa? [7] Čhuv péskiro vast jékhvar pe léste; rípir davá maribén; na ker butýr davá. [8] Dykh! Nane mol te užakirel, so manúš léla les. Ci na peréla manúš féni jekhe léskire dykhibnastyr? [9] Nijékh nane dasavo murškanó, sob (kaj) te džangavel Lieviafanos: i, kon tedy déla ráda te terdjol angíl Mánde? [10] Kon phenelas mánge, sob (kaj) Me léske te pleskirav pale? Saró tel bolybén isyn féni (tóka) Miro. [11] Me na javáva štyl, sob (kaj) te na phenáv pal léskire ĥerá i vastá, ci pal Lieviafanoskiri bari zor ci pal léskire gožone-masengire baripén? [12] Kon déla ráda te otlel léskiri upratuny ídia (flika) javriéstyr? Kon déla ráda te javél pašýl ke jov duitkone savarisa (uzdiečkasa)? [13] Kon saštý moginéla te psiravel Léskiro muj, so isyn sýrby vudará léskire trašane dandenca trusciál? [14] Léskiro dumo sýrby phutjola ščytendyr, savé isyn phandyne zoralés sýrby čergenorjasa (piečatiasa): [15] adiáke so jekh isyn pašýl javiréste, so fáno (vozduho) na prodžála maškír lénde; [16] jone isyn dro jekhipén jekh jekhésa adiáke zoralés, so naštý te roskeres pe pašá len. [17] Kiéli davá Lieviafano déla čiha (čyhinela), dud ziainela syr bliskavica, a léskire jakhá isyn sýrby zlokoskire cymbly (riesnicy). [18] Léskire móstyr džána duda, so xačona, i tykné jagorja vurniana sýges syr karedyniatyr. [19] Léskire ruthuniendyr (nozdriendyr) džála thuv sýrby keraibnaskire pirjatyr i kakaviatyr (kotlostyr). [20] Léskiro phurdypen roshačkirela vangara, i baré jaga vurniana léskire uštendyr. [21] Bari zor rakhelape dre léskiri men, i traš khelela angíl léste. [22] Léskire masengire musnia (myščy) isyn čhudé khetané; jone isyn bilade pe léste, i naštý te čhuvés len štetóstyr. [23] Léskiro iló isyn pharó syr bar, mek i tvardo isyn syr telatuno siavitko bar (beledin). [24] Syr jov ĥazdélape, zoraliuki (silačy) izdrana; pir léskire-phagipnaskiri zor jone našavena dúho (fáno). [25] Mek vari-kon i doreséla les kurtalása; joj nisó-léske, adiáke-pac' ni čhurdybnytko bust (kop'jo), ni phusaibnytko bust (drotiko), ni čhur'je–čhurdybnytko [laty]. [26] Jov déla čol sastyreske syr phuseske i bronzake syr kirne kašteske. [27] Maribnýtka bustiá (striély) naštý te začhuven Lieviafanos te našél, maribnýtka bará jačénape syr giveskire tietivy. [28] Bulavy jačénape léste sýrby phus; jov salape, syr strahakirena phusabnytkone butiasa. [29] Tel léskire pašvare isyn ostra bará; jov kharélape (dviginelape) pir dalé ostra bará sýrby pir bláta. [30] Jov keréla adiáke, so xor štéto keradjola syr pirí; jov keréla adiáke, so mórjo (derjáv) pirikerelape dre pirí makhibnasa (maziasa). [31] Jov jačkiréla dromore pal péste, so ziainena; saštý te dumines, so xoripén isyn sýrby syvo bal. [32] Pe phuv nane nijékh, syr Lieviafano isyn, kon isyn sozdynó bitrašakiro. [33] Jov dykhéla vučipnástyr pe kažnoné baré džidaleste, jov isyn králi pe saré phut'kirdé murdalénde.” I otphendiá Ióvo Ráske-Devléske kadasavé lavénca: “Me džinóm, so tu moginésa saró te kerés, i nane nisó, sob (kaj) te obrikirel Tut te kerés dová, so Tu obdumindian.” Tu phucian: “Kon isyn kadavá, savó ciemniakirela Miré lavá bigodypnasa?” Ne me phendjom davá, so me na ĥalyjom. Saré dalé lavá isyn dívna vaš mánge, savé me na džindjom. Šun, Dévla, me mangáva Tut, de te phenáv mánge, Tu phendián: “Me javáva te phučav tútyr, ne Tu javésa te ĥaliakires mánge.” Me šundjom pal túte, so féni javír miré kaná šundlé javire manušéndyr, ne akaná miré jakhá dykhéna tut. Paldavá me davape pale miré lavéndyr, me pridžinava miro grého dro práho i práska.” I sys adiáke: paló dová, syr Raj Devél phendiá dalé lavá Iovoske, tén'či phendiá Jov Elifazoske Fiemanostyr kadasavé lavá: “Mirí bari xolý ĥazdyjápe pe túte i pe tyré malende, pal-dová so tumé na phenenas čačipén pal Mánde, syr phendiá miro pishári Ióvo. Paldavá len akaná eftá guruvén i eftá bakrén i džán ke Miro pishári Ióvo i janén len syr svénto xačkiribnaskiro dyibén, i mek Miro pishári Ióvo te mangélpe pal tuménde. Pal-dová so me prilava léskiro mangipén, i sob (kaj) Mánge te na sykavav Péskiri zor pe tuménde pal tumaró dylnypén, pal-dová so tumé rakirdé na čačipén pal Mánde, syr miro pishári Ióvo phendiá.” O Elifazo Fiemanostyr, o Vildado Šuahostyr, i o Cofaro Naamitianino giné i kerdé adiáke, syr Raj Devél phendiá lénge; pal-dová so Raj Devél prilyjá Iovoskiri pátieri (molítva). I Raj Devél dyjá pale Iovoskiro mištypén, kiéli jov mangdiápe pal léskire malende. I Raj Devél dyjá Iovoske duj móly butedýr, syr sys léste. I saré léskire pšála, saré léskire pheniá, i saré léskire pindžkirde manušá, kon sys léste, javné ke jov i jone xané maró dro léskiro kher, i jone ramaniakirenas (spokoinenas) les lačhé lavénca i podrikirenas les dro dúho (fáno) pal dová čoripén, so Raj Devél bičhadiá pe léste. Kažno léndyr dyjá Iovoske lovore i suvnakuný angrusty. I bahtiakirdiá Raj Devél Iovos dro džiibnáskiro kónco (jagóro) butýr syr vagedyr; i sys Iovoste dešuštar bará bakré, šov bará vierbliudy dro ĥámo i jekh bar oslicy. I sys adiáke-pac' Iovoste eftá čhavé i trin čhaja. I dyjá lav Ióvo pervonake Emima, javirjake Kezija, tritonake Kerengapuh. Pir sarí doiá phuv na sys kadasavja šukarnia džuvliá, syr Iovoskire čhaja i léngiro dad dyjá mištypén lénge maškír pšalénde. Tén'ci i dživdiá Ióvo šel te štardešá berš; i jov dykhciá péskire čhavén i unuken léskire štaré rodóstyr. I myjá Ióvo, phuranó i čalo dyveséndyr. Bahtaló isyn odová manúš, savó na psiréla te skedelpe nadevlytkone manušénca, savó isyn na terdó pe drom grehitkoné manušénca, i savó isyn na beštó dre kampanija, kaj sanape Devléstyr. A léskiri rádyma isyn dre Devléskiro Zakóno i jov rozlela léskiro Zakóno dyvesé i ratý. I jov javéla syr kašt (drévo), so isyn čhudo paš panigvale réki (leniá), savó déla péskiri phabaj dro aplodoskiro uliago (pora). Léskire patria (listy) nijékhvar na zašutjona i saró, so jov te na kerél, javéla te džal bahtiasa. A čoré manušá na adasavé isyn sarésa. Jone isyn sýrby čhučó phus, so balvál rostradela. Paldavá nadevlytka manušá na prodžána Devléskiro Séndo, a grehítka manušá na javéna te skedénpe patiaibnytkone manušénca. Pal-dová so Devél džinéla drom, pir savé čačuné manušá psiréna, a nadevlytka dromá xasjona. Sóske Najudýtka nácyi buntuinena, i rozlena čhučé (pusta) réndy? Léngire králja gazdenape proti i léngire theméskire barydyrá zrakirenape proti Raste-Devléste i Odoléste, Konés Jov pomakhcia, rakirí: “Javén, rozriskirasa pe pašá léngire sastyrá i čhurdasa péstyr léngire zandirjá (cépi/kovy).” Odová, Kon dživéla dro Bolybnáskiro Raj, javéla te salpe i Raj Devél javéla te prosal len. Tén'ci Jov phenéla lénge dre Péskiri xolý i Jov strahakirela len Péskire baré xolynasa: “Čačó, me čhudjom Péskire kralís pe mirí Svénto bérga Sióno.” “Me phenáva Zakóno manušénge te džinén: Raj Devél phendiá mánge: ‘Tu san Miro Čhavó. Me adadyvés jacjom Dadésa Túke. Mang Mándyr, i Me dáva túke manušypnaskire rasy syr meknó mištypén i sarí phuv javéla tyrí: Tu rozmaresa len sastruné destesa (žezlosa) i tu rozmaresa len pe koterá (kuski) syr piritkoneskiro khoró (sasudo).’” I kakaná, kraljále, javén god'varé, sykljon, tumé san sendárja pe phuv. Dynarinén Ráske-Devléske darása i radynénpe izdraniasa. Kutiakiren Čhavés, sob (kaj) tumé te na xasjon dromésa, a Léskiri xolý saštý te roshačol sýges. Bahtalé isyn odolé, savé patiána dre Léste. Davidóskiro Psálmo, syr Jov nascia péskire Čhavestyr Aviesalomostyr. Rajo Dévla! Syr butýr miré vérgi jačné, syr butýr léndyr ĥazdénape proti miro džiibén! But phenéna miré ileske: “Nane zrakhibén léske Devléstyr!” Séla. Ne Tu, Rajo Dévla, san ščýto pašýl mánde; mirí sláva i Tu ĥazdesa miro šeró. Me kharáva zoralés Devlés miré zaniása, i Jov šunéla man Péskire sventoné bergátyr. Séla. Me pasijom i sómas sutó: me uštyjom, pal-dová so Raj Devél podrikiréla man. Me na javáva te darav tysjoncone manušéndyr, savé oblyne man trusciál. Terdjov angíl, Rajo Dévla, zrákh man; miro Dévla! Pal-dová so Tu pekadian sarén miré vergén dre žanda, Tu vymardian dandá bede manušengirende. Zrakhibén Tútyr, Rajo Dévla! Te javél Tyró, bahtiakiribén pe Tyré manušénde. Séla. Xoróskire Dirižoróske. Pe balytka Strumiénty. Davidóskiro Psálmo. Kiéli me kharáva, otphen mánge, Dévla pal miro čačipén: mánge sys pharó. Tu pomogindian mánge: potangine man i pošun miro mangipén Devléske. Manušýtka čhavale! Ci but javéna tumé te obrakiren mirí sláva? Ci but tumé javéna te vykeden xohanó čačipén? Ci but tumé javéna te terdenpe ke frentyma? Séla. Ne džinén, so Raj Devél čhudiá dre rig vaš Péske devlytkoné manušén: Raj Devél šunela man, kiéli me kharáva Les. Izdran i na kerén gréhi; rozlen péskire ilésa pe tumaró čhuibén i javén štyl (tiha). Séla. Janén svénta dyibená čačipnastyr i dopatian Ráske Devléske. But manušá rakiréna: “Kon sykavéla aménge vari-savó lačhipén?” Ĥazde Péskre-Moskiro dud pe aménde, Rajo Dévla! Tu dyján rádyma miré ileske butýr, syr jone radynénape aplodostyr pe giv i vinagrado. Me pasjovava dro spokojo i so som sutó, pal-dová so Tu san Jekhdžinó, Rajo Dévla, Savó désa mánge te dživáv bidarakires. Xoróskire Dirižoróske. Pe balytka Strumiénty. Davidóskiro Psálmo. Šun nábut miré lavá, Rajo Dévla, obmierkin miré xor dumki. Šun mirí zan, kiéli me dáva gódla jasvénca, miro Králjo i miro Dévla, me mangavape Túke. Rajo Dévla! Tu šunesa mirí zan zlokostyr (rankostyr), Me janáva miro mangipén pe zlóko, Me užakirava nábut (kutý), kiéli Tu otphenasa. Tu na san Devél, Savó drieván radynélape, kiéli keréna fuipén. Phut'kirdé na vyterdjona angíl Tyré jakhá. Tu bidykhesa odolén, savé keréna na pir čačipén. Tu xasiakiresa odolén, kon rakiréla xohané lavá: Raj Devél drieván na kaméla manušén, savé isyn nahrata ke rat i xohané. A me zadžava dro Tyró kher pal Tyrí lačhé-ilýtkima, Me javáva te kloninavpe patyvása angíl Tyrí Svénto Khangirí miré darátyr. Rajo Dévla! Lýdža man pir Tyró čačipén angíl miré vergénde, ker Tyró drom mamúj angíl mánde, Pal-dová so nane patiaibén léngire čibatyr; léngiro iló isyn jekh ĥálko te xasiakirél javirén. Léngiro kirlo isyn sýrby otphandly maĥila. Jone féni gudles rakiréna čibása. Dévla! Sendiákir len, mek jone kokoré te perén dre feliá, so jone kerdé, trade len pal léngire beda réndy, pal-dová so jone buntuinena pe Túte. Mek saré, kon sarésa patiála Túke, te radynénpe saré zorjátyr. Mek jone kažno mólo te godlen radymátyr, pal-dová so Tu san terdó palál te zrakhes len. Mek saré, konéske isyn drógo Tyró lav, te radynénpe Tútyr. Pal-dová so Tu, Rajo Dévla, bahtiakiresa čačuné manušén. Tu občhuvesa len Péskire lačhé radymása syr ščytosa. Xoróskire Dirižoróske. Pe balytka Strumiénty. Pe ohtó-balytko Gitara. Davidóskiro Psálmo. O, Rajo Dévla, na bangiakir man, kiéli Tu drieván xoliasosa pe mánde, na čhuv kára pe mánde, kiéli Tu san xolynakiro pe mánde. Potangine man, o Rajo Dévla, me ž som dasavo bizorjákiro, sastiakir man, Rajo Dévla, pal-dová so miré kokalý izdrana. Miro di adiáke-pac' izdrala, Tu, Rajo Dévla, syr ĥará te užakirav Tyró podrikiribén? Risjov, Rajo Dévla, i zrákh man meribnástyr, prirakh miro di vaš Tyrí lačhé-ilýtkima. Pal-dová so muló na javéla te ripirel Tut. Kon javéla te parikirel Túke maĥilatyr? Me adiáke zoralés khinyjom miré piridživipnastyr ĥondienca (ŭzdohenca), miro čhuibén isyn kindo pal rat miré roibnastyr, mirí cérga isyn pherdý sarí paniésa miré jasvendyr. Miré jakhá nábut dykhéna miré kalypnástyr. Jone phuranyne miré vergéndyr. Džán krig mándyr saré čoré manušá. Pal-dová so Raj Devél šundiá miro roibén. Raj Devél šundiá, syr me zoralés mangdjom Les, Raj Devél priléla, syr me mangavape Léske. Mek saré miré vérgi te javén ladžakirdé i te izdran. Mek jone te risjon pale i te javén ladžakirdé jekhátyr (srázu). Davidoskiri-Mangipnytko gilý, saví Jov bagandia Ráske-Devléske pal Xusoskiro Réndo, Kon sys Vien'iaminoskiro Čhavó. Miro Tu, Rajo Dévla, Mro Dévla, Dre Savéste me patiáva; zrákh man meribnástyr miré vergéndyr, i prirakh man. Sob (kaj) jone te na syr ščer (liévo) rozriskiren miro di, savé lučkirela man pe koterá, kiéli nane nikonés te prirakhel. Rajo Dévla, Mro Dévla, kóli me kerdjom vari-so dasavo, so isyn načačipén pe miré vastá; kóli me otdyjom pale fuipnasa odoléske, kon sys dro ramánjo (miro) mánca, ci čordjom odoléstyr, kon mánge isyn pir iló. Mek vérgi te ĥazdénpe proti miro džiibén, i mek te uhtylén man, mek jone te domaren man dre bláta ke liúno (ado), mek te pasjol Miro baripén dro pylo. Séla. Uštý, Rajo Dévla, dro Péskiri xolý. Sykáv Pes i pomogin Mánge vergéndyr! Tu sendiakiresa pir čačipén. Mek saré manušá te skedénpe tel Tyró vast. Lýdža Séndo Tre vučé štetóstyr. Raj Devél javéla te sendiakirél nácyi. Sendiákir man, Rajo Dévla, pir miro čačipén, pir dová, so nane bang mánde. Sob (kaj) čoripén fujé–manušéngiro te končynelpe, podrikir patyvalé manušés: pal-dová so čačunó Devél propatiakirela iló i godý. Devél isyn syr ščýto vaš mánge, Savó zrakhéla čačipnaskire manušén. Devél isyn čačipnáskiro Sendári, i Devél xoliasóla kažno dyvés pe fujé manušénde. Kóli vari-kon na risjola pale, to Jov déla čol (vojstrinela) Péskiri kurtála (miečo); Jov bandiakirela Péskiro lúko i Jov isyn skedynó te del kar'je. Jov adiáke-pac' skedéla pe kodoleste meribnaskire strumiénty, Jov keréla Péskire bustiendyr (strielendyr) desté, savé xačona jagása. Ake, jov pharés pričhuvela zor te kerél čoripén, jov lathéla frentyma i janéla načačipén. Jov ĥanadia rovo (xohoi) i vyganadia ĥanbín (jama), i jov pyjá dro daja ĥanbín, saví jov kerdiá. Léskiri frentyma risjola pale pe léskiro šeró, i léskire nahrata réndy peréna pe léskiri fiélia (makuška) (gutup). Ne Me javáva te šaráv Ras-Devlés pal léskiro čačipén, i me javáva te bagáv šaribén, Ráskire-Devléskire lavéske, Naj Vučedyreskireske. Xoróskire Dirižoróske. Pe Giefoskiro Strumiento Giefostyr. Davidóskiro Psálmo. Rajo Dévla, amaró Devél! Syr šukár i vučó Tyró lav isyn bicialó, pir sarí phuv. Tu, Kon pherdiakirdian saró šukarone slavása vučedýr bolybnástyr. Čhavoré i tyknemasore bagana šaribén Túke, sob (kaj) te džinén vérgi, so Tu phandesa čib vergoske i odoléske, kon isyn xolynakiro. Kiéli me dykháva bolybén, so Tu sozdyjan, čhon i čergeniá, so Tu čhudián, to so isyn o manúš, pal savéste Tu dykhésa? I čhavó manušéskiro, so Tu dykhesape lésa? Tu kerdián les nábut tyknedýr Péstyr, Devléstyr. I Tu dyján léske sláva i patýv. Tu čhudián les xulása pir saró, so Tu kerdián, i čhudián telé saró angíl léskire ĥerá: Bakrorén i guruvén sarén, adiáke-pac' i riskiribnáskire murdalén (zvierien), so isyn pe félda. Čiriklen bolybnástyr, mačhen morjostyr (derjavestyr), i sarén, kon dživéla dro morjoskiro (derjavéskiro) paní. Rajo Dévla, amaró Devél, syr šukár Tyró lav isyn bicialó pir sarí phuv Xoróskire Dirižoróske. Pe Mielodija pe Gilý. Pal Labienoskiro Meribén. Davidóskiro Psálmo. Me parikirava Ráske-Devléske saré miré iléstyr, Me piriphenava pal saré Tyré dívna butiá, Me javáva lošalo (viesjolo) i javáva te radynavpe dre Túte, Me javáva te šaráv Tyró lav, O Sámo Vučedýr. Kiéli vérgi denape pale, tedy jone peréna i xasjona angíl Tyró muj. Tu sendiakirdian pir miro réndo i lathian miro čačipén: Tu san beštó pe trono i sendiakiresa čačunés. Tu štyliakirdian Najudýtka nácyi, Tu xasiakirdian beden (biden), Tu khoscian krig léngire lavá pe saré viéki. A vérgi xasiné sarésa, Tu xasiakirdian adiáke-pac' fórja, so až bistyrde pal lénde. Ne Raj Devél isyn beštó pe saré viéki, Jov čhudiá Péskiro trono te sendiakirél. I Jov javéla te sendiakirél svéto čačipnása, Jov javéla te sendiakirél manušén, syr trej te javél. Jov javéla te zrakhél dro Péskiro baró kher odolén, konés tasavena, kaj javéna te ĥaradjon dre pharé dyvesá. A odolé, savé džinéna Tyró lav, javéna te patián dre Túte, so Tu, Rajo Dévla, na mekcian ni jekhés, kon rodéla Tut. Bagán i šarén Ras-Devlés, Savó kralinela pe Sióno! Phenén saré nacyienge, so Jov kerdiá. So Jov čhuvéla kára pal manušýtko rat, Jov ripirela odolén, kon stradynela. Tangine (požalin) man, Rajo Dévla; dykh rakhunes saré iléstyr pe miro stradico (bída) vergéndyr, zrákh man meribnástyr, so saštý te javél rigátyr, Sob (kaj) me te terdjovav angíl manušénde Sionóstyr, i te rosphenav pal so trej te šarén Tut. Me javáva te radynavpe, so Tu zrakhcián man. Najudýtka nácyi peréna dre ĥanbín, so jone vyĥanade, léngire ĥerá peréna dre felý, so jone garadé. Raj Devél sykadiá Pes, Kon Jov isyn, kiéli Jov lydžijá sendytka réndy čačipnása; fuj manušá xasjona daléstyr, so jone kerdé péskire vasténca. Štyl (tiho) mielodija. Séla. Fuj manušá džána pir drom te xasjon, i saré Najudýtka nácyi, savé bistrena pal Devléste. Devél na bistrela kodolén, savé isyn bizorjákire, i na xasiakiréla čororengiri nadiéia, savé ŭsády (sak) užakiréna Les. Terdjov angíl, Rajo Dévla, sob (kaj) manušá te na len upralypén, mek Najudýtka nácyi te na našén Tyré sendostyr. Čhuv sendaris pe lénde, Rajo Dévla, mek kadalé Najudýtka manušá te džinén, so jone isyn féni manušá i, savé adiáke-pac' meréna. Séla. [9.22-r.s.] Sóske, Rajo Dévla, Tu san adiáke durál? Sóske Tu ĥaradjosa améndyr dre pharé dyvesá? [23] Fuj manušá, savé phutjona pes, tasavena čororé manušés, mek jone kokoré te perén zrakiribnastyr, so jone pridumindle. [24] Fuj manušá phutjona péskire nalačhé kamibnasa dro iló. I manušá, savé isyn ĥalka (korysna) ke čúžo mištypén, košena i tykniakirena Ras-Devlés. [25] Fuj manušá pal péskire phut'kiribén na dykhéna pe Léste, dre léngiri godý nane štéto vaš Devléske. [26] Jone dodžana ke saró dro péskiro džiibén, lénge nane pir godý te ĥaljon, syr Tu sendiakiresa, jone dykhena bipatyvákires pe péskire vergénde. [27] Jone duminéna péske: “Me nijékhvar na perava, me pir saré ródy na davape dukhá.” [28] Kiéli jone rakiréna, jone košena, xohavena i trašakirena manušén, léngiri čib rakiréla čoripén i došakirela manušén. [29] Kadasavó manúš garadjola pašýl gavoro; jov zamarela bibangipnáskire manušés pe čorahane štéty. Léskire jakhá poddykhena pal bizorjákire manušéste. [30] Jov garadjola i užakiréla syr ščer (liévo) dre xašča (logovo); jov garadjola i užakiréla odolén, kon isyn bizorjákiro. Jov uhtyléla les i tyrdela les dre péskiri felý (pietlia). [31] Jov bandjola ke phuv, jov pasjola, sob (kaj) te perél pe čororeste saré zorjátyr. [32] Jov duminéla péske: “Devél bistyrdia. Jov garadia Péskire jakhá, Jov na dykhéla davá.” [33] Terdjov angíl, Rajo Dévla, pekav fujé manušén. Pridykh pal odolénde, savé stradynena. [34] Sóske fuj manúš tykniakirela Devlés? Sóske jov rakiréla péske: ‘Jov na čhuvéla kára pe mánde.’ [35] Ne Tu dykhcián davá, pal-dová so Tu kokoró dykhésa ciamkes pe odolénde, konéske isyn pharó i kon stradynela. I kažno mólo Tu san skedynó te podel vast. Bizorjákire manúš tyrdelape ke Tu, Tu ŭsády (sak) desas vast bidadeskireske. [36] Phagir zor dre vastá fujé i čoré manušénde. Čhuv kára pe lénde, paka jone pirijačena te kerén čoripén. [37] Raj Devél isyn Králi pe saré beršá i viéki. Najudengire nácyi xasjona Léskire phuvjátyr. [38] Rajo Dévla, Tu šunesa, pal so mangnepe Túke odolé, savé stradynena javirendyr, Tu zorjakirdian léngiro iló. [39] Tu šunesa mangipén iléstyr – bidadeskiren i čororen, sob (kaj) nijékh manúš pe phuv te na trašakirel. Xoróskire Dirižoróske. Davidóskiro Psálmo. Dre Raste-Devléste me garadjovava, syr saštý (moginéna) manušá te phenén mánge: “Vurniav(ŭ) štylés (tihes) syr čirikly dre bérgi.” Dykh! Fuj manušá gazdyne péskire luki. Jone pričhude maribnýtka bustiá (striély) ke ciecivitko šelo, sob (kaj) te den kar'je dro iló čačuné manušéngiro, kiéli isyn ciamlo. Kóli manušýtko džiibén gijá bizakonoskiro, so ž te kerél čačuné manušéske? Raj Devél isyn pe léskiro svénto štéto dro Bolybnáskiro Rajo. Léskiro trono isyn dro bolybén. Léskire jakhá dykhéna, Léskire cymbly (riesnicy) rozdykhena manušytkoné čhavén. Raj Devél propatiakirela čačuné manušés, i fujé manušés; Jov na sykavéla láska odoléske, savó isyn vergitko. Jov keréla, so bolybnástyr peréna bryšýnd, xačkirdé vangara i zevelytka (sierna) bará i xačkirdy balvál, so pekela, ake, so javéla lénge Devléstyr. Pal-dová so Raj Devél isyn čačunó. Léske trej čačuné réndy manušéndyr, savé javéna te dživén, kaj Devél isyn. Xoróskire Dirižoróske. Pe balytka Strumiénty. Davidóskiro Psálmo. Pode vast, Rajo Dévla, devlýtka manušá otginé sarésa, patiaibnytkone manušén butýr nane. Jone rakiréna xohané lavá jekh jekhéske, nane patiaibén léngire čibatyr, biladžaipnytka isyn léngire dúmy. Raj Devél zaphandela napatiaibnytka muiá; čib, so rakiréla phut'kirdé lavá, Odolénge, kon phendiá: “Ame lása upralypén amaré čibása, amaré lavá džána pal aménde: Kon da isyn raj aménge.” Pal-dová so manušá stradynena i len tasavena, pal-dová so manušá dre trébima déna ĥondiá. “Me terdjovava angíl” – phenéla Raj Devél, Me prirakhava len, syr jone drieván kaména te uhtylén, Ráskire-Devléskire lavá isyn čačuné sarésa syr rup, so isyn probindlo dre ĥleja (glina), i so žužakirdo eftá (bitrinéngiro deš) móly. Tu, Rajo Dévla, javésa te rakhés len, Tu prirakhesa amen dasavé manušéndyr pe saré viéki, Fuj manušá psiréna pe kažno štéto, a bidytka manušýtka čhavé ĥazdénape. Xoróskire Dirižoróske. Davidóskiro Psálmo. Ci but, Rajo Dévla, Tu javésa te bistres man? Ci but Tu javésa te otrisjos mándyr? Ci but mánge te garavav kalypén pe miro di? Túga isyn dro iló so dyvés? Ci ĥará (dlúges) miro vérgo javéla te rikirél lofo pe mánde? Podykh i pošun! Ker, syr me mangáva, O Rajo Dévla, miro Dévla! Ker, sob (kaj) mre jakhá te dykhén, i sob (kaj) man te na lel soiben ke meribén, I sob (kaj) miro vergari te na phenél: “Me lyjom upralypén pe léste!” Sob (kaj) vergitka manušá te na radynénpe, kóli me perava. Me ž saró mólo patiáva dro Tyró bahtalypén; miro iló radynélape Tyré zrakhibnastyr. Me javáva te bagáv Ráske-Devléske, pal-dová so Jov kerdiá but mištypén mánge. Xoróskire Dirižoróske. Davidóskiro Psálmo. Dylynó phendiá péske: “Nane Devlés!” Manušá jačné rozmekne, jone kerdé zlydnitka réndy: nane nijékh, kon keréla pir čačipén. Raj Devél dykhciá bolybnástyr pe manušéskire čhavénde te dykhél, ci isyn vari-kon, savó ĥaljola i rodéla Devlés. Saré giné krig čačé droméstyr, jone saré jačné čoré manušá: nane nijékh, kon keréla pir čačipén, nane ni jekhores! Naúšto čoré manušénde nane godý, so jone xána miré manušén sýrby jone xána maró. A jone na kharéna Ras-Devlés. Ĥáda, jone javéna te izdran darátyr, pal-dová so Devél javéla odolenca, savé kandéna Les. Tumé sandlepe čororestyr, pal-dová so jov rakhelape dre Raste-Devléste. O, sob (kaj) te javél zrakhibén vaš Izrailjo Sionóstyr! Kiéli Raj Dévla janéla pale Léskire manušén Sionóstyr, sob (kaj) Jakovo but te radynélpe, i, sob (kaj) Izrailjo te javél lošalo (viesjolo). Rajo Dévla! Konéske saštý te javél dre Tyrí Svénto Šátra? Kon javéla te dživél pe Tyrí Svénto Bérga? Odová, kon dživéla bi došengiro, i savó isyn čačipnáskiro iléstyr pir saró, i rakiréla čačipén sarénge. Kon na rakiréla čoré lavá pe javirende, i na keréla fuipén péskire maléske (drugoske), i na obrakirela péskire pašatuné manušés. Kon dykhéla vučipnástyr pe odoléste, konés Devél na priléla, i kon déla patýv odoléske, kon daréla Rástyr-Devléstyr. Kon déla lové dro vužlypén bi kofoskiro, kon na léla myto (vziatka) te rakirél proti kodoleste, kon isyn nabango. Kon keréla adiáke, odová manúš nijékhvar na zmarelape péskire droméstyr. Davidoskiri Gilý. Davidoskiri Pátieri (Molítva). Prirakh man, Dévla, pal-dová so me garadjovava dre Túte. Me phendjom Ráske-Devléske “Tu san miro Raj Devél, saró miro kučipén isyn Tútyr.” Svénta devlýtka manušá pe phuv, savé isyn patiaibnytka, – lénge isyn mirí bari patýv, Odolé, savé risjona sýges ke javír devloré, barjakirena péskiri túga: Me na javáva te janav lénge svénto dyibén ratestyr, i me na javáva te vyphenav tituly léngire devlorengire. Rajo Dévla! Túte isyn saró, so me doresava, Tu désa saró sýrby kučikatyr, Tu rikiresa miré-džiibnáskiro taláno. Mirí phuv sys mierindly šelesa pir šukár štéty čačó, miro meknó mištypén radynela man. Me javáva te slavinav tut, Rajo Dévla, Savó sykliakiréla man; miro iló ratý podphenela mánge, karik me džáva, Me kažno mólo ripirava, so Tu san nádur; pal-dová so Tu san čačé rigátyr, me na javáva bi radymakiro. Paldavá miro iló isyn lošalo, i miro di radynélape; i mirí loč (plot') otkhinjola dre nadiéia. Daleske, so Tu zrakhésa man liunostyr (adostyr), Tu na désa patiaibnytkone dynaríske te kirnjol dre maĥila. Tu sykavesa mánge drom ke džiibén: pal-dová so Tu san pašýl mánde, me drieván radynavape, mirí bari rádyma isyn dre Tyró čačó vast. Davidoskiri Pátieri (Molítva). Šun man, Rajo Dévla, miro čačipén, prišunpe, syr me kharáva zoralés Tut jasvénca. Šun miro mangipén Túke, jov vydžála miré nahohane uštendyr. Mek Tu te sendiakires man pir miro čačipén, mek Tyré jakhá te dykhén pe dová, so isyn čačipnáskiro! Tu sprobindian miro iló, Tu javdián ke me ratý: Tu rozĥalyjan man i Tu na lahtian nisó: miro muj na phenéla čoripén. Dre manušéngire réndy me prirakhcjom Tyró priphenybén, sob (kaj) te na džav pir drom zahale manušénca. Kiéli Tu rikirdian, sob (kaj) me te džav pir Tyró drom, me na pyjom miré pirendyr (stopendyr). Me khardjom Tut, pal-dová so Tu šunesa man, o Dévla: Risjov ke me i pošun miré lavá. Sykáv Tyrí lačhé-ilýtkima, pal-dová, so Tu san Zrakhibnaskiro vaš odolénge, savé javéna ke Tyrí čačí rig te garadjon odoléndyr, savé buntuinena proti lénde. Rakh man, syr jakhakiri lial'ka (zračko); garav man dre zer (tienjo) Tyré phakengiri, čoré manušéndyr, savé tasavena man, vergéndyr ke meribén, savé obdžana trusciál man. Jone zaphandle jakhá thulypnastyr, péskire mujenca rakiréna phut'kirdes i nahrates. Jone isyn kakaná trusciál aménde, kaj te na risjovas, jone féni dykhana, syr te peran pe aménde, Jone isyn sýrby ščer, so isyn ĥálko (korysno) te roskušel i syr ščeroro (lievico), so garadjola dre xášča. Terdjov angíl, Rajo Dévla, te strenines miré vergén, rav len telé: zrákh miro di fujé manušéndyr Péskire kurtalása, manušéndyr Tyré vastésa, Rajo Dévla, manušéndyr svetóstyr, konéste isyn saró, so jone kaména. Léngiro per Tu pherdiakiresa Péskire piraliatyr, jone radynénape péskire čhavorendyr, i jone jačkirena péskiro mištypén čhavorenge. A me javáva te dykháv Tyró muj dre čačipén, kiéli me džanĥadjovava, me javáva te radynavpe, sob (kaj) te javav pašýl Túte. Xoróskire Dirižoróske. Davidóskiro Psálmo, kon isyn Ráskire-Devléskiro Pishári, savó vyphendia bagaibnytka lavá Ráske-Devléske dro dyvés, kiéli Raj Devél zrakhciá Les léskire-vergéngire vergéngire vasténdyr i Saulóskire vastéstyr. I phendiá jov: “Me rikirava syr Drógima Tut dro iló, Rajo Dévla, Tu désa zor mánge. Rajo Dévla, Tu san mirí bérga i mirí” tvárdyma/diz (kriepost'). Kon zrakhéla man, Miro Dévla, Tu désa zor mánge; i dre Túte me ĥaradjovava. Tu san miro ščýto, Savó zrakhéla man, Savó zaterdjola pal mánde. Me kharáva Ras-Devlés, Savó zrakhéla man miré vergéndyr, Saves trej te šarén. Meribnaskiri dar isyn trusciál mánde, pal-dová so baré nadevlytka valny (velny) trašade man. Darja (dara) isyn liunostyr (adostyr) trusciál mánde, meribnaskire feliá oblyne man. Kiéli mánge jaciá pharó, me khardjom Ras-Devlés i rondjom zaniása angíl miré Devléste: Jov šundiá mirí zan telál Péskire štetóstyr dro Bolybnáskiro Rajo, Jov šundiá mirí godlyma. Tén'ci phuv trinskirdiape i izdrandyja, telatuné bará bergendyr khardepe (dvigindlepe) i izdrandyne, pal-dová so Devél xoliásyja. Thuv ĥazdyjápe Léskire ruthuniéndyr (nozdriendyr), jag i vangara, so roshačonas usá butýr Léskire móstyr. I Jov bandiakirdia bolybén i gijá telé, kalypén (ciamlypén) sys angíl Léskire ĥerá. Jov besciá pe xieruvimo i vurniandyja, i Jov vurnialas pe bel'veliakire phaká. I Jov zakerdia ciamlypnasa ĥensta bolybnáskire óbloki, so sys pherdé paniésa, savé sys trusciál Léste. Jarko dud ziainelas angíl Léste, grado barénca i vangara, so xačonas, vyuhtenas oblokendyr. I Raj Devél adiáke-pac' phendiá dro gromo, i Naj Vučedyreskiro vyphendia péskire zaniása, gradoskire barénca i vangarenca, so xačonas. Jov vymekcia péskire maribnýtka bestiá i rosčhurdyja miré vergén, i Jov dyjá kar'je bliskavicenca i rosčhurdyja vergén, so jone našéna. Tedy panieskire dugny (dniščy) jačné dyc'le (bicialé), i tel-phuvjákiro fundámiento otčhakirdiape, kiéli Tu, Rajo Dévla, dyjá gódla darakunes, syr Tu phurdyjan zoralés Péskire ruthuniendyr. Raj Devél dogijá vyčipnastyr, uhtyldia man, Jov tyrdyja javrí man baré paniendyr; Jov zrakhciá man miré zoralé vergostyr, i odoléndyr, savé drieván na vyrikirde man, pal-dová so jone sys zoraledýr mándyr. Jone terdiné angíl mánde dro dyvés, syr sys bibáht mánge, ne Raj Devél sys pe mirí rig. Jov vylydžijá man pe buĥló štéto, Jov zrakhciá man, pal-dová so Léske isyn drógo me. Jov otdyjá pale lačhipnása pal miro čačipén; Jov bahtiakirdiá man pal dová, so me sómas bibangipnaskiro. Pal-dová so me rikirdjompe ke čačipén, so Raj Devél phendiá, me na otrisijom Devléstyr te keráv fuipén. Me kerdjom pir saré Léskire priphenybená, me na otphendjompe Léskire statutendyr, Pal-dová so me som bidošéngiro angíl Léste, i me rakhcjom pes, sob (kaj) te na keráv fuipén. Raj Devél bahtiakirdiá man pal miro čačipén, pal dová, so me sómas bibangipnaskiro angíl Léskire jakhá. Lačhé-ileskirenca Tu san lačhé-iléskiro, bidošengirenca Tu san bidošéngiro; Čystone-ileskirenca Tu san lačhó; frentonenca Tu san godiása pe stréga, pal-dová so Tu zrakhésa odolén, kon stradynela. Ne Tu bandiakiresa odolén, kon ĥazdéla nakh. Tu zahačkiresa mirí lampa: Raj Devél, miro Dévla, Tu zaziainesa jagása i ciamlypén udžala. Tu désa zor mánge te džav angíl maribnytkoné xaladénde, Miré Devlésa me piriuhtava foritko bar. Miro Devél isyn bidošéngiro, Ráskire-Devléskiro lav isyn propatiakirdo. Jov isyn ščýto vaš sarénge, kon garadjola dre Léste. Kon tedy isyn Devél apríč Raste-Devléste. Ci, kon ža isyn Bérga te zrakhelpe apríč amaré Devléste? Devél déla mánge zor i keréla mánge mamúj (priámo) drom, Jov keréla miré ĥerá syr olienieste, Jov čhuvéla man pe vučé štéty; Jov sykliakiréla miré vastá vaš maribén, sob (kaj) miré vastá te nadtyrden xarkuno lúko. Tu dyján adiáke-pac' mánge ščýto te zrakhavpe i Tyró čačó vast podrikiréla man, i Tyró lačhipén dyjá mánge zor. Tu kerdián buĥló drom mánge te štavav. Me tradyjompe dre šale (pagonia) pal miré vergénde i uhtyldjom len; i me na risijom, angíl, syr me te xasiakiráv len. Me pirimardjom len, so jone naštý te uštén: i jone perenas tel miré ĥerá. I Tu dyján mánge zor vaš maribén. Tu bandiakirdian miré vergén angíl mánde. I Tu poriskirdian meniasa miré vergén te našén, sob (kaj) me te xasiakiráv odolén, savé bidykhena man. Jone dyné gódla, ne nikón na sys te zrakhél, jone dyné gódla Ráske-Devléske, ne Jov na otphendiá lénge. Tén'ci me rostasadjom len syr práho angíl balvalia, štakurdjom len syr bláta pe gásy. Tu zrakhcián man manušéndyr, savé buntuinena, Tu čhudián man šeré manušésa pe Najudýtka nácyi. Manušá, savén me na džindjom angíl, javéna te dynarinén mánge. Syr féni jone šunéna pal mánde, jone kandéna man, čhavé, namire-manušéngire, bandiakirena šeré angíl mánde. Čužone-manušéngire čhavé jačéna zlomka i jone vydžána péskire baruné rikiribnendyr, izdraindoj. Te dživél Raj Devél! Te javél bahtiakirdy mirí Bérga te zrakhavpe! Te šarel vučés saró, so isyn džidó, Devlés, Savó zrakhéla man. Jov isyn Devél, Savó otdéla pale vergénge pal mánde, Savó pomoginela te lav upralypén pe manušénde; Jov zrakhéla man miré vergéndyr: čačó, odoléndyr, savé džána proti mánde. Tu zrakhcián man nahratone (nahal'none) manušéndyr. Paldavá me parikirava, but móly Túke, Rajo Dévla, angíl Najudýtka nácyi i me javáva te bagáv giliá Tyré lavéske. [r.s.] Davá isyn Jov, Kon zrakhéla Péskire kralís, Savó sykavéla láska odoléske, konés Jov pomakhcia Davidóske, i léskire rodóske pe saré viéki”. Xoróskire Dirižiroske. Davidóskiro Psálmo. Bolybén dudvaliakirela (rosphenéla) pal Devléskiri bari sláva i svetoskiro buĥlypén (svódo) sykavéla, so Devél sozdyjá. Kažno dyvés piriphenela lavá javire dyveseske, i rat piridela lavá te džinél javire ratiake. Nane čib, nane lavá, sob (kaj) te na javél jekhori zan šundly, Léngire-glosakiri miéra rozdžalape pir sarí phuv i léngire lavá až ke jagóry (ke priediely) phuvjákire. Devél čhudiá štéto te dživél khameske dre lénde, savó vydžála syr ternó bjavitkone štubatyr. Jov radynélape syr prastaibnaskiro manúš angíl dová, syr te prastal pe prizo. Jov (kham) léla te džal bolybnáskire jagoróstyr i léskiro krugo dodžála ke javír Bolybnáskiro jagóro (krajo) i nisó naštý te garadjol Léskire xačkiribnastyr. Ráskire-Devléskiro Zakóno isyn bidošéngiro, so déla zor dieske. Ráskire-Devléskiro dophenybén isyn čačunó, so déla godý odoléske, konéske davá trej. Ráskire-Devléskire uphenybená isyn čačuné, jone lošakirena (viesielinena) iló; Ráskire-Devléskire dophenybena isyn čystone-iléskire, jone déna jasnyma jakhenge. Dar angíl Raste-Devléste isyn čačuný sarésa, joj iačélape pe saré viéki. Ráskire-Devléskiro séndo isyn čačunó, jone isyn saré čačipnastyr. Jone isyn mol butýr suvnakástyr, až butýr čačuné suvnakástyr i gudledyr avginestyr i sotengire kropliendyr avginestyr. Uphenybená adiáke-pac' podsykliakirde man, Tyré dynarís, me dorescjom but lačhipén, kiéli me prirakhcjom len. Konéske saštý te ĥaljol péskire doša? Otmek mánge miré gréhi, savé me na ĥaljovava, Rikir dre rig, Tyré pisharís, nartone grehéndyr; mek jone te na len lofo pe mánde: tén'či me javáva bidošéngiro, i me javáva bibangipnaskiro angíl Zakóno. [r.s.] Mek miré moskire lavá i léskiro rozlyiben te javén lačhé Túke, Miro Rajo Dévla. Tu san mirí Bérga te ĥaradjovav i Miro zrakhibnaskiro. Xoróskire Dirižoróske. Davidóskiro Psálmo. Mek Raj Devél te šunél tut dro dyvés, kiéli isyn pharó; mek Jakovóskire-Devléskire lav te zrakhél tut vergéndyr; Mek Jov te bičhavel túke zor Léskire Sventoné Štetóstyr i te podrikirél tut Sionoskire Bergátyr. Mek Jov te ripirel saré tyré Svénta dyibená, i mek Jov te prilel Tyré xačkiribnaskire janybená. Séla. Mek Jov te del túke, so tyré ileske trej i, sob (kaj) te spolninélpe saré tyré plany. Ame javása te radynaspe Tyré zrakhibnastyr, i ame čhuvasa amaré sciagi amaré Devléskire lavésa. Mek Raj Devél te spolninel saró, pal so tu mangesa. Akaná me džinóm, so Raj Devél zrakhéla Péskire pomakhnes; Jov otphenéla léske Léskire sventoné Bolybnástyr, Léskire čačuné-vasteskire zorjása, so zrakhéla les. Vari-savé patiána dre maribnýtka vurdená i vari-savé dre grénde, ne ame javása te ripiras amaré Ráskire-Devléskiro lav, amaré Devléskiro. Jone bandine telé i pyné; ne ame uštyjam i sam terdé mamúj (priámes). [r.s.] Rajo Dévla! Ker, sob (kaj) králi te lel upralypén dro maribén. Šun amen, kiéli ame kharasa Tut. Xoróskire Dirižoróske. Davidóskiro Psálmo. O králi radynélape Tyré zoralypnastyr, o Rajo Dévla, i jov isyn drieván lošalo (viesjolo) zrakhibnasa Tútyr. Tu dyján léske saró, so léskiro iló kamdiá, i Tu na otphendianpe doléstyr, so léskire uštá mangné. Séla. Pal-dová so Tu prilyjan les bahtiakiribnasa vaš lačhipén; Tu uridian viánka (koróna) čačuné suvnakástyr pe léskiro šeró. Jov mangdiá džiibén Tútyr, – Tu dyján léske dlengo džiibén pe saré viéki. Léskiri sláva isyn bari, pal-dová so Tu zrakhcián les; Tu dyján léske patýv i bari sláva. Pal-dová so Tu bahtiakirdian les pe saré viéki; Tu obradyndian les radymása, so Tu san lésa. Pal-dová so, králi patiála dre Raste-Devléste i pir Naj Vučedereskiri láska jov jačélape pe trono. Tyró vast dodžála ke saré léskire vérgi; Tyró čačó vast uhtyléla sarén, kon bidykhela Tut. Tu kerésa léndyr xačkirdo bov jagása, syr Tu javésa; Rajo Dévla nakhavela len dre Léskiri xolý i jag xála ke xas' len. Tu xasiakiresa léngire čhavorén, kon isyn pe phuv, i odolén, kon džála pal lénde manušéndyr. Pal-dová so jone zrakirdepe te kerén čoripén Túke; jone obmierkindle péskire fuj mysli; savé jone na déna ráda te kerén, pal-dová so Tu riskiresa ke jone dumesa; Tu riskiresa maribnýtka bustiá (striély) pe Péskiro lúko pe léngire muiá. [r.s.] Te javél Túke bari patýv, Rajo Dévla, pal Tyró zoralypén; ame javása te bagas i te šaras tyrí zor. Xoróskire Dirižoróske. Pe zlóko (ránko), angíl, syr Dyvesjola. Davidóskiro Psálmo. Miro Dévla, Mro Devlale! Sóske Tu mekcian man, sóske Tu san durál te des vast mánge, kiéli Me dáva ĥondiá (ŭzdyhinava) pharipnastyr. O, Miro Dévla! Me dáva gódla dyvesé, ne Tu na otphendian mánge, i ratý – nane spokojo mánge. Ne Tu san Svénto, Tu san beštó pe Izrailjoskiro trono syr Králi. Amaré dadá patiandyné dre Túte; jone patiandyné i Tu zrakhcián len. Jone dyné gódla ke Tu te pomogines, i jone sys zrakhné. Jone patiandyné dre Túte, i jone na sys ladžakirdé. Me som kirmo, a na som manúš; manušá xoliames obrakirena man, manušýtka nácyi ginéna man pal bláta. Saré, kon bidykhela man, sanape xoliames mándyr; jone kuniakirena (kačynena) šerenca i rakiréna: “Jov dopatiandyja péskiro džiibén Ráske-Devléske, mek Jov te podel vast léske bidatyr: mek Jov te zrakhél les, pal-dová so Jov radynélape Lésa.” Ne davá ž san Tu, Kon vylyja man dákire ločoviátyr (perestyr), davá Tu čhudián man te javav kuč pašýl dákire ciucia. Me sómas otdynó Túke tedy, kiéli me lahtjompe, Tu san miro Devél dákire perestyr. Na jav dur mándyr, syr me piridživava, syr nane nikón te del vast mánge. But vérgi syr guruva terdiné trusciál mánde; zoralé guruva Vasanostyr obštade man. Jone porade péskire muiá pe mánde, syr ščerá (lievy), so isyn ĥalka (korysna) te roskušen. Me vyčhudjom péskiri zor syr paní, i saré miré kokalý rospynepe pe koterá, miro iló isyn syr mom, so rozbiladyja andrál miro kužum (želudko). Mirí zor vyšutija syr kotér ĥlejatyr (glinatyr), i Mirí čib prilipnindia ke miré žandy. Tu čhudián man dre meribnaskiri bláta. Pal-dová so džukela obgine trusciál mánde; xievra čoré-manušéngiri obgija man rigéndyr; jone prophusade miré vastá i ĥerá. Me poginava saré miré kokalý; vergarja ž dykhéna, jone putravena jakhá pe mánde. Jone roskerena miré ídi (rizy) maškír péste, jone čhurdena žrebijo pe miré uribená. Rajo Dévla! Tu na durjov mándyr – Zoralypén miro, jav sygedýr te del vast mánge! Zrákh miro di kurtalátyr, miro jekhoro džiibén džuklengire lapendyr. Na domek man ke ščerengire pasti; vyle man busone (dikone) guruvengire šyngendyr (rogendyr). Me javáva te vyphenav Tyró lav miré pšalénge, Me javáva te šaráv Tut maškirál manušénde, savé skedénape te kloninenpe patyvása Túke. Tumé, savé daréna Rástyr-Devléstyr, kloninenpe patyvása Léske! Jakovóskiro ródo, slavinén Les. Saró Izrailjoskiro ródo, darén Léstyr. Pal-dová so Jov na dykhciá vučipnástyr, i risija ke stradyndle manušá, kiéli sys pharó; i Jov na otrisija léndyr, ne kiéli jone dyné gódla Léske, te del vast, Jov šundiá. Me javáva te šaráv Tut pe baró skedyibén; me keráva dová, pal so me sovlahadjom angíl odolénde, savé daréna Léstyr. Mek te xan čalés odolé, savé xána mén'ki, a odolé, savé rodéna Ras-Devlés, javéna te šarén Les, mek te dživén tumaré ile pe saré viéki! Saré jagóry (kraí) phuvjákire javéna te ripirén, i te risjon ke Raj Devél, i saré Najudýtka ródy pokloninenape patyvása Túke. Pal-dová so saró kralipén isyn Ráskire-Devléskiro; i Jov kralinela pe manušýtka nácyi. Saré thule barvalypnastyr pir phuv javéna, te xan i pokloninenape patyvása; a saré odolé, savé zdžana dro práho, javéna te bandjon šerenca angíl Léste. Manušéngire ródy, so javéna angíl, javéna te dynarinén Léske: manušá javéna te rakirén pal Raste-Devléste vaš javír ródy. [r.s.] Jone javéna i phenéna pal léskiro čačipén manušénge, savé iščo (inké) lathenape, so Jov kerdiá. Davidóskiro Psálmo. Rajo Dévla, miro Čhupnári; mánde na javéla trébima ni dro so, Jov čhuvéla man te pasjovav pe zelena čarjá i lydžála man ke lienta (nasygna) paniá, Jov zorjakirela nevéstyr miro di, lydžála man pir mamúj dromoro vaš Péskiro lav. Mek me džáva pir dólo darása ke meribén, me na strahadjovava čoripnástyr, pal-dová so Tu san mánca: Tyró kašt i Tyró destó-jone podrikirena man. Tu kerésa skamínd vaš mánge angíl miré vergénde; Tu pomakcian miro šeró olivitkone dzetesa (aliejosa), miro tahtáj (čaša) isyn pherdó. Čačó, Tyró lačhipén i Tyrí lačhé-ilýtkima javéna mánca pe saré dyvesá dro miro džiibén, i me javáva te bešav dro Ráskire-Devléskiro Kher pe adakicyk, kicý me javáva te dživáv. Davidóskiro Psálmo. Sarí phuv isyn Devléskiri i saró, so isyn dro svéto, isyn Léskiro, i saré, kon dživéla pe davá svéto (lot). Pal-dová so Jov čhudiá phuvjákiro fundámiento, pe xor móri (derjavá) i čhudiá davá-pac' pe paniá. Kon saštý te džal upré pe Ráskire-Devléskiro vučipén? Kon saštý te terdjol pe Léskiro svénto štéto? Kodová, konéste vastá isyn žužé (čysta), konéste isyn lačhó iló. Kon na sovlahadiá péskire ilésa ivjá, i kon na sovlahadiá xohanés. Kodová doreséla bahtiakiribén Rástyr-Devléstyr i čačipén Devléstyr, Savó zrakhéla. Davá isyn odolé manušá, savé rodéna Les, davá isyn Jakovóskiro ródo, kon rodéla Tyró muj. Séla. Psiraven (otkeren) buĥles pórty te javén ĥazdyné ĥaratuné vudará dro Khangirí. Slavútno Králi zadžála dre lénde. Kon isyn Bolybnáskiro Králi? Raj Devél, Savó isyn zoraló i dro zoralypén? Raj Devél isyn zoralypnaskiro ke meribén! Psiraven buĥles pórty! I te javén ĥazdyné vudará dro viéčno džiibén! Bolybnáskiro Králi zadžála dre lénde. Kon isyn Bolybnáskiro Králi? Raj Devél, Savó isyn pe bolybnáskire Jangolende, Jov isyn Bolybnáskiro Králi. Séla. Davidóskiro Psálmo. Túke, Rajo Dévla, me kloninavape patyvása. O miro Dévla! Me patiáva dre Túte; na domek, sob (kaj) te javél ladžavo mánge, sob (kaj) miré vérgi (vrogi) te na len vučipén pe mánde! Te na javén adiáke-pac' ladžakirdé odolé, savé rikiréna nadiéia pe Túte. Ne te javén ladžakirdé odolé, savé buntuinena bi pričynakiro. Rajo Dévla, sykáv mánge Tyró drom, sykliákir man Tyré čačipnaske. Lýdža man te keráv pir Tyró čačipén, sykliákir man, pal-dová so Tu san Devél, Savó zrakhéla; pe Túte isyn nadiéia so dyvés mánde. Priripir, Rajo Dévla, Péskiro tangipén i lačhé-ilýtkima, pal-dová so jone džána viekenca. Na priripir, syr me ternó phagirdjom Devléskiro Zakóno i kerdjom gréhi, pal-dová so Tu san lačhó ke manušá, priripir pal mánde, Rajo Dévla, Tyré lačhé-ilytkimatyr. Raj Devél isyn lačhó i čačipnáskiro; paldavá Jov javéla te sykliakirén grehitkoné manušén te džán čačuné dromésa: Jov lydžála ke čačipén odolén, savé xána mén'ki, Jov sykliakiréla len te džán čačuné dromésa: Raj Devél lydžála péskire dromésa odolén, savé prirakhena Léskiro Zakóno i priphenybená, lačhé-ilytkimasa i čačipnása. Vaš Tyró lav, Rajo Dévla, otmek mirí bang, pal-dová so joj isyn drieván bari. Savó isyn manúš, kon daréla Rástyr-Devléstyr! Léstyr jov vysykljola drom, so léske trej te vykedel. Léskiro di jačélape bahtaló, a Léskire čhavénge javéla phuv syr meknó mištypén. Raj Devél Péskiri sykavéla garady láska odolénge, savé daréna Léstyr. Jov sykliakiréla len pal Péskiro Zakóno. Me kažno mólo dykháva pe Raste-Devléste, pal-dová so Jov vyterdela miré ĥerá feliatyr. Podykh pe mánde i tangine (požalin) man, pal-dová so me som jekhdžinó i xava mén'ki. Pharipén pe iló jaciá butedýr: vylydža man miré baré darátyr. Podykh, syr me xava mén'ki i pe miré dukhá, i otmek saré miré gréhi! Podykh, syr but isyn vérgi pašýl mánde, syr jone bidykhena man kalé ilésa. Prirakh miro di i zrákh man, sob (kaj) me te na javav ladžakirdó, pal-dová so me garadjovava pal Túte. Mek miro lačhipén i čačipén te prirakhen man, pal-dová so mánde isyn nadiéia pe túte. Zrákh, Dévla, Izrailjo saré léskire pharipnendyr. Davidóskiro Psálmo. Priĥaljov miro nabangipen pe séndo, Rajo Dévla, pal-dová so me lydžijom lačhó džiibén, me adiáke-pac' patiandyjom dre Raste-Devléste i me na obštavavaspe. Propatiakir man, o Rajo Dévla, i sprobin man, žužakir mirí godý i miro iló. Pal-dová so Tyrí lačhé-ilýtkima isyn angíl miré jakhá. I me dživdjom pir Tyró čačipén. Me na sómas beštó xohané manušénca, i me na sómas khetané dujemujengirenca. Mánge sys na pir iló, kaj skedénape fuj manušá, i me na sómas beštó khetané fujé manušénca. Me vymorava vastá te sykavav, so me na som bangó, sob (kaj) mánge te obdžal trusciál Tyró altárjo, o Rajo Dévla, te parikiráv zoralés Túke i te phenáv pal Tyré dívna butiá. O, Rajo Dévla, mánge jaciá pir iló gožypen, kaj Tu dživesa i štéto, kaj Tyrí sláva isyn. Na xasiakir miro di khetané grehitkoné manušénca, ci miro džiibén khetané odolenca, savé pročhuvena manušéngiro rat, koneskire vastá kerdé bidy, i dro konéskiro čačó vast isyn but myty. Ne me javáva te lydžav džiibén; zrákh man i tangine man. Mirí ĥerój isyn terdy pe vórto (roŭno) štéto, me javáva te slavinav i te parikiráv Ráske-Devléske, kaj manušá skedénape te mangénpe Devléske. Davidóskiro Psálmo. Raj Devél isyn miro dud (svéto) i Jov zrakhéla man; konéstyr mánge te strahadjovav? Raj Devél prirakhela man Léskire zoralypnasa; konéstyr me te darav? Kiéli čoré manušá, miré vérgi i miré namala javéna pe mánde te roskošen miré masá, jone obštavenape i peréna. Kóli xaladé obdžana trusciál proti mánde, miro iló na strahadjola; kóli maribén ĥazdélape pe mánde, me usajékh javáva te užakirav lačhipén Rástyr-Devléstyr. Me rodavas te phučav Rástyr-Devléstyr pal jekh baht, sob (kaj) me te bešav dro Ráskire-Devléskiro Kher pe adákicy, kicý me javáva te dživáv, te dykháv Ráskire–Devléskiri šuk, i te mangavpe dro Léskiro Kher. Dre pharé dyvesá Jov garavela man dro Péskiro Štéto, Jov garavela man dre Péskiri garady Šátra; Jov ĥazdéla man pe bérga. I kakaná miro šeró javéla ĥazdynó vučedýr miré vergéndyr, odolén, savé isyn trusciál mánde, Me javáva te janav svénta dyibená radymátyr dre Léskiri Šatra. Me javáva te bagáv i me javáva te bagáv maribnýtko gilý Ráske-Devléske. Šun, Rajo Dévla, kiéli me kharáva Tut zoralé zaniása, tangine man i otphen mánge. Miro iló phendiá mánge: “Risjov i pokloninpe (ker šerésa) patyvása Mánge.” Me risjováva te rodav Tyró muj, Rajo Dévla.” Na garadjov, mándyr; na trade péstyr Tyré pisharís dre xolý. Tu pomogindian mánge! Na jačkir man i na mek man, Dévla, Savó zrakhéla man. Kiéli miro dad i mirí daj mekéna man, usajékh Raj Devél priléla man. Sykliákir man, O Rajo Dévla, te džav Tyré dromésa i lýdža man čačipnaskire dromésa, pal-dová so but vérgi dykhéna ciamkes pal mánde. Na jačkir man pe miré-vergengiri vólia: pal-dová so xohané jakhítka uštyné proti mánde i odová, kon phurdela xohané xoliása pe mánde. Ne me patiáva, so me dykháva Ráskire-Devléskiro lačhipén dro davá džiibén. Rikirén nadiéia pe Raste-Devléste, javén murškané i Jov zorjakirela Tumaro iló; čačó, rikirén nadiéia pe Raste-Devléste. Davidóskiro Psálmo. Me dáva gódla ke Tu, o Rajo Dévla, mirí Bérga, na jav štyl pe miro khariben. Kóli Tu na otphenesa mánge, me javáva syr kodolé, savé džána telé dre maĥila (kula). Šun vrakhunes mirí zan, kiéli me mangavape Túke, syr me dáva gódla ke Tu, kiéli me ĥazdáva vastá ke Tyró Svénto Štéto. Na xasiakir man khetané fujé manušénca, ci savé keréna čoripén; ci savé pe jakhá rakiréna pal ramánjo pašatuné manušénca, ne savénde isyn čoripén dro iló. Otdé pale lénge pir léngire réndy i pir čoripén, savó jone kerdé; pir dová, so léngire vastá kerdé, otpleskir pale lénge pal léngire réndy. Pal-dová so jone na dyné patýv Ráskire-Devléskire butienge i odoléske, so kerdé Léskire vastá, Jov xasiakiréla len i butýr na déla zor lénge. Te javél bahtiakirdó Raj Devél, pal-dová so Jov šundiá mirí zan, kiéli me mangdjompe Léske. Raj Devél isyn miro zoralypén i miro ščýto; miro iló patiandyja dre Léste i Jov dyjá vast mánge – pal-dová miro iló obradyndiape zoralés i me javáva te parikiráv Léske miré giliasa. Raj Devél prirakhela zoralypnasa Péskire manušén, i Jov zrakhéla Péskire Pomakhnes. Zrákh Péskire manušén i bahtiakir Tyró meknó mištypén, čarav len i lýdža len pe saré viéki. Davidóskiro Psálmo. Šarén Ras-Devlés, tumé, bolybnýtka zorja, šarén Ras-Devlés pal Léskiri sláva i zoralypén; Šarén Ras-Devlés pal Léskiro slavútno lav. Pokloninenpe (kerén šerésa) patyvása Ráske-Devléske dro Léskiro mangipnytko šukaripén. Ráskire-Devléskiri zan isyn uprál pe paniá; Slavútno Devél grukinela; Raj Devél isyn uprál pe vučé paniá. Ráskire-Devléskiri zan isyn zoralypnaskiri, Ráskire-Devléskiri zan isyn rajkany. Ráskire-Devléskiri zan phagiréla kiedry; čačó, Raj Devél phagiréla Livanoskire kiedry. I Jov začhuvela len te uhten syr cieliantos, Liváno i Siriono syr terné guruvóres. Ráskire-Devléskiri zan roskerela bliskavica jagása. Ráskire-Devléskiri zan trinskirela čhučí phuv; Raj Devél triinskirela čhučí phuv Kadesoskiri. Ráskire-Devléskiri zan začhuvela mirgen (siernen) te janén tyknin'konen, i vešá te čhurdén telé patria (listy) i saró dro léskiro štéto dro Bolybnáskiro Rajo rakiréla: “Sláva!” Raj Devél isyn beštó uprál pe tasadypnaskiro paning; čačó, Raj Devél isyn beštó syr Králi pe saré viéki. Raj Devél déla zor Péskire manušénge; Raj Devél bahtiakiréla Péskire manušén ramanjosa (mirósa). Davidóskiro Psálmo. Gilý, kiéli bagandle, syr Svencyndle Davidóskiro Kher. Me javáva te šaráv Tut, o Rajo Dévla; pal-dová so Tu ĥazdyjan man i na dyján vólia miré namalenge te radynénpe xoliása mándyr. O Rajo Dévla, Devél miro, me dáva gódla ke Tu te pomogines, i Tu sastiakirdian man. O Rajo Dévla, Tu vylydžijan miro di liunostyr (adostyr) i Tu zrakhcián miro džiibén, sob (kaj) me te na džav dre maĥila. Bagán šaribnytka giliá Ráske-Devléske, o, tumé saré Léskire manušá, i parikirén Léske, i ripirén léskiro Svénto Lačhipén. Pal-dová, so Léskiri xolý isyn féni (tóka) pe menta (minuta), a Léskiri láska isyn pe saró džiibén. Jasva saštý te javén bel'velié, a zlokosa (rankosa) javéla rádyma. Me phendjom péske dro mištó džiibén: “Me nijékhvar na perava.” Rajo Dévla, Tu Péskire laskatyr čhudián man, syr zoralypnaskiri bérga te terdjovav; ne Tu garadyjan mándyr i me strahadyjom. Me dyjom gódla ke Tu, o Rajo Dévla, te pomogines i me javáva te mangavpe Ráske-Devlske. Savó lačhipén, kóli me meráva, kiéli me džáva dre maĥila? Ci javéla práho te šarel tut? Ci javéla muló te rakirél pir saró pal Tyró čačipén? Šun, o Rajo Dévla, sykáv Péskiri láska. O, Rajo Dévla, pode Péskiro vast te zrakhes man. Tu parudian miro roviben dro khelyben vaš mánge; Tu zlyjan miro žalobno balytko gonó (vrietiščo) praskasa (pieplosa) i Tu uridian man adiáke, so radynela man, [r.s.] sob (kaj) me te šaráv Tut saré iléstyr i te na javav štyl. Rajo Dévla, miro Devél, me javáva te parikiráv Túke pe saré viéki. Xoróskire Dirižoróske. Davidóskiro Psálmo. Dre Túte, O Rajo Dévla, me rodava garadyipen, mek me nijékhvar te na javav ladžakirdó: zrákh man pir Tyró čačipén. Bandjov i šun rakhunes man: zrákh man sýges. Prirakh man sýrby dro zoralý skála, zrákh man sýrby dre baruny tvárdyma (diz). Pal-dová so Tu san vaš mánge syr mirí skála i mirí baruny tvárdyma (diz). Lýdža man i sykáv drom mánge vaš Tyró lav. Vytyrde man feliatyr, so jone čorahanés čhudé pe mánde, pal-dová so Tu san miro zoralypén te prirakhes man. Dre Tyré vastá me otdáva péskiro dúho (fáno): Tu vykindian (zrakhcián), Rajo Dévla, Tu san čačipnáskiro Devél. Me bidykhava odolén, savé kutiakirena xartytka (pusta) ídoly; a me ž zoralés patiáva dre Raste-Devléste. Me javáva lošalo (viesjolo) i javáva te radynavpe Tyré lačhé-ilytkimatyr; so Tu pridykhcianpe, syr me xava mén'ki, so Tu udžindian, sóstyr miro di strahandjola, Tu na zaphandian man dre miré-vergéngire vastá: Tu vylydžijan man pe buĥló štéto. Tangine (požalin) man, o Rajo Dévla, pal-dová so me strahadjovava. Miré jakhá vyšutine kalypnástyr, miro di i miré masá. Miro džiibén končynelape kalypnasa, i miré beršá ĥondienca, mirí zor xasijá miré čoripnástyr i miré kokalý xasiné. Saré miré namala obrakirena man, so až miré pašatuné manušá, me som darakuno odolénge, savé džinéna man: kon dykhéla man pe vulíca (pe gása), odová našela mándyr. Kažno manúš bistyrdia dro iló man sýrby me som muló; me som sýrby phagirdy pirí. Me šundjom, syr but manušá bangiakirenas xohanés man; trašaibén isyn trusciál, pal-dová so vérgi zrakirenaspe khetané pe mánde; jone merkinenas te zamarén man. Ne me zoralés patiáva dre Túte, o Rajo Dévla. Me phendjom: “Tu san miro Devél.” Miré dyvesá isyn dre Tyró vast: zrákh man miré-vergéngire vasténdyr i odolén, savé tradéna man. Mek Tyré-moskiro dud ziainela pe Tyré pishariste; zrákh man pir Tyrí lačhé-ilýtkima, Mek me te na javav ladžakirdó, o Rajo Dévla; pal-dová so me kharáva Tut; mek fuj manušá te javén ladžakirdé, mek jone te javén štyl dre maĥila. Mek xohané uštá te cycjon, kiéli jone rakiréna nahrates (nahal'nes) pe čačuneste, phut'kiribnytkes i bipatyvákires. Kicý but isyn Túte lačhipena, savé Tu čhudián dre rig vaš odolénge, konéste isyn trašaibén angíl Túte; so Tu skedyjan len vaš odolénge, savé zoralés patiána dre Túte angíl saré manušytkoné čhavénde. Tu garavesa len dro čorahano štéto, kaj Tu Kokoró san, manušéndyr, savé zrakirenape pe lénde. Tu rakhesa len dre Péskiri garady šátra košybnytkone čibendyr. Te javél bahtiakirdó Raj Devél, Savó sykadiá Péskiri divno lačhé-ilýtkima dro fóro, savo so xaladé oblyne trusciál! Me phendjom dro péskiro konfuzo: “Me som čhurdynó krig Tyré jakhéndyr.” Ne Tu šundián mirí zan, syr me mangdjompe Túke; kiéli me khardjom Tut te pomogines. Rikirén syr Drógima Ras-Devlés dro péskiro iló, saré léskire manušá, Raj Devél rakhéla patiaibnaskiren i pherdés sendiakiréla phut'kirden. [r.s.] Javén murškané, i Jov zorjakirela tumaré ile – sarénge tuménge, konéste isyn nadiéia pe Raste-Devléste. Davidóskiro Psálmo. Sykliakiribén. Bahtaló isyn kodová manúš, saveskiro čoripén isyn primanglo, konéskiro grého isyn otmekno. Bahtaló isyn manúš, konéske Raj Devél na zaginela léskiro fuipén, konéste nane xaranypen (želučo) pe iló. Kiéli me sómas štyl pal miré gréhi, miré kokalý vyšutine pir miro roibén gondienca i dlengone godlenca saró dyvés. So dyvés i rat Tyró vast pekavelas pharés man: miro kljoko (eniergija) pirikerdiape dro šukipen sýrby dro xačkirdo lynaj. Séla. Me priĥalyjom péskiro grého angíl Túte, i Me na garadjom péskiro čoripén Tútyr. Me phendjom: “Me javáva te priĥaljovavpe angíl Raste-Devléste; kiéli me phagirava Léskiro Zakóno”, i Tu otmekesa miré-grehoskiro čoripén. Séla. Paldavá kažno devlýtko manúš javéla te mangélpe Túke dro časo, kiéli jov saštý te lathel Tut; čačó, syr baré paniá rosčhuvenape, jone na dodžana ke dasavo manúš. Tu san Štéto te garadjovav vaš mánge: Tu prirakhesa man pharipnastyr; Tu obdžasa trusciál mánde radymakire gilienca, so Tu zrakhcián Man. Me, Raj Devél, javáva te sykliakirav tut čačipnaske i sykaváva drom, savésa trej túke te džas. Me dáva godypén túke, Mirí jakh javéla pe túte. Na jav syr graj, ci syr lošako, so lénde nane “galyiben, so len trej te den andré cugliénca i savarísa, sob (kaj) jone te podenpe Túke. Fuj manúš but móly peréla duhósa, ne kodová, Savó zoralés patiála dre Raste-Devléste, Raj Devél oblela lačhé-ilytkimasa. Javén viesiéla (lošalé) dre Raste-Devléste i zoralés radynénpe, tumé, savé san čačipnaskire, i saré, kon isyn čačunó ilésa, radynénpe zoralés. Tumé, saré čačipnaskire, radynénpe i bagán Ráske-Devléske; davá isyn mištó, sob (kaj) čačipnaskire te šarén Les. Bašaven Ráske-Devléske pe gusli te parikirén Léske; bagán Léske pe dešé-balytko arfa. Bagán Léske neví gilý; bašaven rangires i lošaljon (radynénpe) zoralés. Pal-dová so Ráskire-Devléskiro lav isyn čačunó, i Jov keréla saró pir čačipén. Jov radynélape čačipnastyr i sendostyr: Ráskire-Devléskire čačipnása isyn pherdý phuv. Bolybén sys sozdynó Ráskire-Devléskire lavéstyr, bolybnáskiro svéto sys sozdynó phurdypnasa Léskire móstyr. Jov skedéla mor'jengire paniá dro jekh štéto, Jov čhuvéla paniengiro xoripén sýrby dre kheltra (pogriebo). Mek sarí phuv te strahadjol Rástyr-Devléstyr; mek saré džiibnáskire pe phuv te izdran angíl Léste. Kiéli Jov phendiá, i saró kerdiápe; jov dyjá priphenybén i saró jaciá. Raj Devél na déla vólia Najudytkoné nacyienge te kerén, so jone zaduminena péske: Jov na domekela manušén te kerén pir péskire plany. Devléskire dúmy jačénape pe saré viéki, léskiro zadumiben saré rodénge. Bahtalý isyn nacyja, konéskiro Devél isyn Raj Devél; bahtalé isyn manušá, savén Jov vykedyjá syr Péskire čhavén. Raj Devél rozdykhela bolybnástyr: Jov dykhéla saré manušytkoné čhavén. Jov dykhéla pe saré džiibnaskirende pe phuv Léskire štetóstyr. Jov čhuvéla godý i vólia dro léngiro iló, Jov dykhéla saró, so jone keréna. Nijékh králi na léla upralypén, kóli léste isyn but xaladé, nijékh zoraló manúš na léla upralypén, kóli léste isyn bari zor, Graj isyn xartytko nadiéia te javes bidarakiro; léskiro baró zoralypén na moginéla te zrakhél. Čačes, Ráskire-Devléskiri jakh isyn pe odolénde, savénde isyn trašaibén angíl Léste i pe odolénde, konéste isyn nadiéia pe Léskiri lačhé-ilýtkima, so Raj Devél zrakhéla Léngiro di meribnástyr i Jov javéla te rakhél len džidenca, syr javéla bokh. Amaró di rikiréla nadiéia pe Raste-Devléste; Jov déla vast aménge i Jov isyn amaró ščýto. Amaró iló javéla te radynélpe Léstyr, pal-dová so ame zoralés patiása dro léskiro svénto lav. Mek te javél Tyrí lačhé-ilýtkima pe aménde, o Rajo Dévla, so ame užakirasa lačhipén Tútyr. Davidóskiro Psálmo, kiéli Jov parudia pes pe bigodiakire Manušéste angíl Avimieliehoste, savó tradyjá les krig i Davído gijá péske. Me javáva te slavinav, te parikiráv Ráske-Devléske saró časo, me javáva ŭsády/sak (usiegda) te šaráv Les miré ušténca. Miro di javéla te šarelpe Rása-Devlésa. Manušá, savé xána mén'ki, šunéna pal davá i javéna te radynénpe. Šarén i slavinén Ras-Devlés mánca, javása khetané te barjakiras Léskiro lav. Me mangdjompe Ráske-Devléske i Jov otphendiá mánge, i Jov zrakhciá man miré trašaibnendyr. Jone, savé stradyndle, dykhné pe Léste i jone ziaindle radymátyr, i léngire muiá na sys ladžakirdé. Čororó manúš khardiá Les i Raj Devél šundiá, i zrakhciá les saré léskire pharipnendyr. Léskiro Jangólo obdžala trusciál i rakhéla sarén, konéste isyn trašaibén angíl Raste-Devléste i zrakhéla len. Šunén, sob (kaj) te udžinén, syr Raj Devél isyn lačhó; te javél bahtiakirdó adavá manúš, kon garadjola pal Léste. O, tumé svénta, mek te javél trašaibén tuménde angíl Raste-Devléste, pal-dová so odolénde, savénde isyn trašaibén angíl Léste, na javéla trébima ni dro so. Terné ščerorende (lievicende) isyn trébima i jone xána mén'ki bokhátyr, ne odolé manušénde, savé garadjona pal Raste-Devléste, na javéla trébima ni dro so. Javén, miré čhavale, šunén man. Me sykliakirava tumen pal dová, sob (kaj) te javél dasavo trašaibén angíl Raste-Devléste. Konéske isyn drógo džiibén i konéske isyn drógo te dykhél lačhé dyvesá? To obrikires péskiri čib fujé lavéndyr i péskire uštá xohané lavéndyr; rakh pes te kerés fuipén, ker lačhipén; róde ramánjo (miro) i prilé zor te lathes Les. Ráskire-Devléskire jakhá dykhéna pal čačipnaskire manušénde, i léskiro kan isyn otphandlo, syr jone déna gódla ke Jov. Raj Devél otriskirela Péskiro muj odoléndyr, kon keréla čoripén, sob (kaj) te otčingirelpe ripiribén pal lénde phuvjátyr. Patiaibnaskire manušá kharéna Ras-Devlés i Jov šunéla, I Jov zrakhéla len saré léngire pharipnastyr. Raj Devél isyn pašýl odolénde, savénde isyn pharó pe iló, i Jov zrakhéla odolén, kon dandyrela péskiro iló pal grého. Čačipnaskire manušá stradynena but, ne Raj Devél pomoginela lénge dro saró davá. Jov rakhéla saré léngire kokalý, nijékh léndyr isyn na phagno. Fuipén muliakiréla fujé manušén, i odolé, savé bidykhena čačipnaskiren, peréna tel kára. [r.s.] Raj Devél zrakhéla léskire-dynar'jengire dijá i odolé, savé garadjona pal Léste, na javéna bangé. Davidóskiro Psálmo. O terdjov dro miro réndo, Rajo Dévla, odolenca, savé čingardenape mánca; džá maribnása pe odolénde, savé marenape mánca. Le ščýto i sastruny zbroia (laty), uštý i jav te des vast mánge. Gazde kurtála (miečo) i terdjov pe drom odolénde, savé tradenape pal mánde. Phen miré dieske: “Me zrakháva tut.” Mek odolé, savé rodéna miro di, te javén ladžakirdé i te na javél patýv lénge. Mek jone te risjon pale i te perén jekh pe jekhéste-odolé, kon zrakirelape proti mánde. Mek jone te javén syr čhučó phus tel balvál, i mek Ráskire-Devléskiro Jangólo te tradéla krig len. Mek léngiro drom te javél ciamlo i sklizko, i mek Ráskire-Devléskiro Jangólo te javél te tradelpe pal lénde. A kóli jone garadé léngiri felý pe mánde dre ĥanbín, saví jone vyĥanade ni palsó, mek te javél xasibén pe kadasavé manušéste, sob (kaj) jov te na džinél i mek daja felý te uhtylel les kokores, so jov garadia; mek jov te perél pe xasibén. I miro di javéla obradyndlo Rástyr-Devléstyr. Miro di javéla te radynélpe Rástyr-Devléstyr, Savó zrakhciá man. Saré miré kokalý sýrby phenéna khetané mánca: “Rajo Dévla, kon ža isyn dasavo, savó poddžála pe Túte. Tu zrakhésa bizorjákire manušés odoléstyr, kon isyn zoraledýr léstyr; Tu zrakhésa odolés, savó xalá dukhá i savés tasavena; kodolés, savó isyn dre trébima odoléstyr, kon čorela léstyr.” Načačune jakhítka (svidietieli) ĥazdéna proti mánde, jone dophučena mándyr pal dová, so me na džinóm (na džináv). Jone otdena pale čoripnasa pal miro lačhipén; jone janéna kalypén miré dieske. Ne kiéli jone sys nasvale, me sómas uridó dro dzarano gonó praskasa (pieplosa); me teliakirdjom péskiro di postosa i miro mangipén Devléske risijá ke miro iló. Me lydžijom pes sýrby davá sys miro drúgo (mal) ci miro pšal, me sómas syr manúš, savó rovela pal date; Me bandiakirdjom šeró syr odová, kon rovelas pal date. Ne kiéli me langandyjom, jone obradynlepe i skedynépe khetané: xoliamé pljotkarja skedynépe pe mánde. Me na džinóm, sóske jone phal'kirenas (ponižynenas) man i na pirijačenas. Jone skriežynenas dandenca pe mánde khetané odolenca, savé sánas xoliames mándyr. O, Rajo Dévla! Syr ĥará Tu javésa te na dykhés pe davá? Zrákh miro di xasibnastyr léngire vasténdyr, miro jekhoro dijoro ščerendyr (lievendyr). Me javáva te parikiráv Túke pe baró skedyibén, me javáva te šaráv Tut angíl buté manušénde. Mek miré vérgi te na radynénpe xoliása mándyr, kiéli isyn namišto mánge, mek odolé, savé bidykhena man, te na marén jakhasa pe mánde. Jone na rakiréna, syr lénge trej ramánjo; ne jone priduminena xohané lavá pe odolénde, savé dživéna štylés pe daja phuv. Jone rosputravena buĥles péskire muiá pe mánde, i rakiréna: “Ĥáda, ĥáda! Amaré jakhá dykhné davá.” Tu dykhcián davá, Rajo Dévla. Na jav štyl, Rajo Dévla, na durjov mándyr. Džangadjov i uštý Kokoró te zaterdjos pe miro séndo pal miro réndo, miro Dévla i miro Raj Devél. Sendiákir man pir Tyró čačipén, i na domek, sob (kaj) jone te radynénpe xoliása mándyr, kiéli isyn namišto mánge. Mek jone te na rakirén dro péskiro iló: “Gada! Léskiro isyn amaró.” Mek jone te na rakirén: “Ame proglytyndiam (nakhadiam) les.” Mek jone te javén ladžakirdé i te perén jekh pe jekhéste-odolé, savé radynénape čoripnástyr; mek te ur'jen jone pe péste ladž i bipatyv, kon ĥazdéla pes šaribnasa pe mánde. Mek te radynénpe zoralés i te javén viesiéla (lošalé) odolé, savé drieván mangena, sob (kaj) me te javav bibangipnaskiro, mek jone te rakirén ŭsády (sak): “Mek te javél ĥazdynó šaribén Ráske-Devléske, Savó žyčynela kučipén Péskire pisharíske.” I mirí čib javéla te rakiral pal Tyró čačipén, i javéla te šarel Tut so dyvés. Xoróskire Dirižoróske. Davidóskiro Psálmo, Ráskire-Devléskiro Pishári. Kiéli fuj manúš keréla čoripén, léskiro iló sýrby rakiréla miré ileske: “Na trej miré jakhenge te darén Devléstyr.” Pal-dová so jov šarela pes xohané lavénca, jov sýrby rodéla péskiro čoripén, xaj, davá vykharela xolý dre léste. Léskire-moskire lavá isyn nalačhé i xohané; jov pirijaciá te javél godó i te kerél lačhipén. Jov priduminela čoripén, kiéli jov isyn paštó pe péskiro čhuibén, jov isyn terdó pe nálačho drom, jov na jačéla džungaló (brydinela) čoripnástyr. Rajo Dévla! Tyrí lačhé-ilýtkima dodžála ke bolybén, i tyró patiaibén isyn až ke óbloki. Tyró čačipén-davá isyn syr Devléskire bérgi. Tu sendiakiresa čačunés manušén, syr xor isyn mórjo (derjáv). Tu zrakhésa manušén i murdalén. Syr drógo isyn Tyrí lačhé-ilýtkima, o Rajo Dévla! I manušýtka čhavé garadjona dre zer (tien') Tyré phakendyr. Tu čaliakiresa len barvalé skamindestyr dro Tyró kher, Tu désa te p'jen lénge rekátyr (leniátyr) Péskire kučoné mištypnástyr. Pal-dová so Tu san Jekh, Kon déla džiibén sareske, Tyró dud déla dud amaré džiibnaske. Mek te javél butedýr Tyrí lathe-ilýtkima pe odolénde, savé džinéna Tut, mek te javél butýr Tyró čačipén odolenca, konéste isyn čačipnaskire ile. Na domek, sob (kaj) phut'kirdé manušá te čhuvén péskiri ĥerój pe mánde, sob (kaj) fuj manušá te tradén man péskire vasténca. [r.s.] Dykhén! Pyné odolé, savé keréna čoripén i na moginéna te uštén. Davidóskiro Psálmo. Na de jakhalo (na zavidyn) zoralés odolénge, savé keréna čoripén, na zevlyn kodolénge, kon keréla pefromi fuipén, pal-dová so jone zašutjona syr čar, i jone murdaljona (zavianinena) syr zeleny raslina. Dopatia Ráske-Devléske i ker lačhipén, dživ pe phuv i prirakh čačipén. Bahtaljov kuč mištypnasa Rástyr-Devléstyr, sob (kaj) Jov te del tuménge, so tyró iló drieván užakiréla. Dopatia péskiro Ráske-Devléske i garadjov pal Léste i Jov keréla saró, I Jov vylydžala tyró čačipén pe dud (svéto) te ziainel, i tyró patiaibén syr kham dro paš-dyvés. Jav štyl angíl Raste-Devléste, užakir, paka Raj Devél zaterdjola, na xoliasov zoralés pe odoléste, savéske isyn mištó te dživél, i pe odoléste, kon duminéla te kerél fuipén. Rakh pes dre rig xoliátyr i jačkir xoliakiribén, na xačov xoliása te kerés čoripén. Odolén, savé keréna čoripén, na javéla syg, a kodolé, savé užakiréna Ras-Devlés, doreséna phuv syr dáro. Iščo nábut, i na javéla odolén, savé keréna fuipén. Dykhena nábut pe léngiro štéto i nane len. A kovlé-ilýtka manušá doreséna phuv syr dáro, i jone javéna te bahtaljon ramanjóstyr (mirostyr), so na končynelape. Fuj manúš duminéla fuipén pe čačuneste i skriežynela dandenca pe léste. Raj Devél salape léstyr, pal-dová so fujé-manušéskiro dyvés javéla sýges vaš xasibén. Fuj manušá vytyrdyne péskiri kurtála i bandiakirde péskiro lúko te den kar'je, sob (kaj) te raven čororen i odolén, savé stradynena, sob (kaj) te zamarén odolén, kon džála pir čačipnáskiro drom: léngiri kurtála promarela léngiro iló i léngire luki phadjona. Dová nábut, so isyn čačuné manušéste, fedýr barvalypnastyr, so isyn fujé manušénde; pal-dová so léngire mardytka javéna phagirdé, a Raj Devél podrikiréla čačuné manušén. Raj Devél dykhéla pal bidošengire manušénde i léngiro mištypén javéla pe saré viéki: jone na javéna ladžakirdé dre pharé dyvesá, jone javéna čale dre bokhalé beršá. Ne fuj manušá xasjona i Ráskire-Devléskire vérgi syr feldakiro šukaripén, syr thuv xasjona. Fuj manúš léla lové dro dlugo i nijékhvar na déla pale, čačipnáskiro manúš tanginela (žalinela) i déla. Pal-dová, so odolé, savén Devél bahtiakirdiá, léna phuv syr meknó mištypén, a odolé, savén Devél prokoscia, javéna vyčhurdyne te xasjon. Raj Devél zorjakirela manušés te štavel pirenca (stopenca), Jov drieván radynélape, syr adavá manúš dživéla: mek jov i obštavelape, ne saroiekh jov na javéla čhurdynó te xasjol, pal-dová so Raj Devél podrikiréla Les pal vast. Me sómas ternó i kakaná me som phuró i me nijékhvar na dykhcjom, sob (kaj) Raj Devél te mekel čačuné manušés, ci sob (kaj) léskire čhavoré te mangén maró syr bógi. Jov žalinela i déla dro dlugo (vužlypén) manušénge, a léskire čhavoré isyn bahtiakirde. Risjov krig čoripnástyr i ker lačhipén, i tu javésa te dživés manušanes pe phuv; pal-dová so Ráske-Devléske isyn drógo čačipén i Jov na mekéla Péskire devlytkonen. Jov usady (sak) rakhéla len, a fujé-manušéngire čhavoré javéna čhurdyné te xasjon. Čačuné manušá doreséna phuv syr meknó mištypén i javéna te dživén pe láte saré viéki. God'varé-manušéskiro muj rakiréla godypén i léskiri čib rakiréla čačipén, léskire-Devléskiro Zakóno isyn dro léskiro iló, léskire piré (stópy) na obštavenape (slizninenape). Fuj manúš dykhéla ciamkes pal čačuné manušéste i rodéla te zamarél les: Raj Devél na jačkiréla čačunés dre léskire vastá, Jov na déla te bangiakiren les, kiéli jov javéla pe séndo. Rikir nadiéia pe Raste-Devléste i prirakh Léskire uphenybená i Jov barjakiréla ke vučipén tut, sob (kaj) tu te priles phuv syr meknó mištypén: tu dykhésa, kiéli fuj manušá javéna čhurdyné te xasjon, Me dykhcjom fujé manušés baré zorjása, savó rozbarjolaspe sýrby zeleno kašt (drévo) pe péskiri kuč phuv: ne javdiá časo léskiro i, ĥáda, nane butýr les. Me rodavas les i na lathjom. Pridykhpe vaš primiéro (sykaibén) ke bidošéngiro manúš i dykh pe čačuné manušéste, pal-dová so štyle manušéste, savó tyrdelape ke ramánjo (miro), javéna patomki. Odolé, savé phagirena Devléskiro Zakóno, javéna muliakirdé khetané, a čoré-manušéngire čhavoré, javéna čhurdyné te xasjon. Raj Devél zrakhéla čačipnaskire manušén: Jov déla zor lénge, kiéli isyn pharó. I Raj Devél déla vast lénge i zrakhéla len: Jov vytyrdela len fujé manušéndyr i zrakhéla len, pal-dová so jone garadjona pal Léste. Davidóskiro Psálmo. Manušénge te ripirén. O, Rajo Dévla, na bangiakir man dre Péskiri xolý, na sykliákir man xoliakiribnasa. Pal-dová so Tyré maribnýtka bustiá (striély) promarde man i Tyró vast tasavela pharés pe mánde. Nane lačhó štéto dro miré masá pal Tyrí xolý, nane saste kokalý mánde pal miro grého. Pal-dová so miro čoripén barija vučedýr miré šerestyr; jov isyn syr pharó ĥámo, so tasavela zoralés pe mánde. Pal miro dylnypén miré fránsy (rany) khandena i kirnjona. Mánge isyn pharó, me som band'kirdo vučedýr mieratyr, Me psirava i rovava saró dyvés. Miré trušula (pajasnica) dukhana jagása, nane sastó štéto dre miré masá. Me našadjom pes, me som phagirdó, so nane butýr; me dáva ĥondiá godlása pharipnastyr pe miro iló. Miro Rajo Dévla, angíl Túte dová, so mánge isyn pir iló, Tútyr isyn na garadó, syr me dáva ĥondiá (uzdyhinava). Miro iló marelape dukhanes, mirí zor mekéla man; až miré jakhá na dykhéna butýr jasnes. Manušá, savénge sómas drógo me, i miré drúgi (malá) isyn terdé krig miré dukhatyr, miré semency durjona mándyr. I odolé, savé rodéna miro di te xasiakirén, čhuvéna feliá te uhtylén; i kodolé, savé rodéna čoripén pe mánde, rakiréna pal miro xasibén, i jone pherdé dyvesenca rossendinena pal xohaibén pe mánde. Ne me som syr kašuko, me ničý na šunava, i me som syr laló manúš, kon na otphandela péskiro muj. I me som syr manúš, savó na šunéla, i saveskiri čib na déla ráda te otphenel. Ne Me užakirava lačhipén Tútyr, Rajo Dévla, Tu otphenesa mánge, Rajo Dévla, Devél miro! I me phendjom: “Mek te na radynénpe odolé, kiéli mirí ĥerój obštavelape. Me syg perava i mirí dukh nijékhvar na mekéla man. Pal-dová so me pridžinava mirí bang, mirí godý phadjola pal miro grého. Ne miré vérgi isyn džidé i zoralé, i isyn dasavé, savé bidykhena man ni palsó: davá isyn jone, kon otdéla pale čoripnasa pal miro lačhipén; pal-dová so me rodava džidó lačhipén. O, Rajo Dévla, na mek man! O, Miro Dévla, na durjov mándyr. [r.s.] Jav sygedýr te des vast mánge, o Miro Rajo Dévla, Savó zrakhéla man. Xoróskire Dirižoróske. Idifimoske (Jeducynoske). Davidóskiro Psálmo. Me phendjom: “Me javáva te dykháv, so me keráva, sob (kaj) mánge te na keráv grého miré čibása (čibjasa): me javáva te rakhav miro muj kagancosa (namordnikosa), paka fuj manúš terdó angíl mánde”. Me jacjom laló (niémo), me som štyl, me až sómas štyl pal lačhipén, i miro dúho (fáno) pyjá butýr dro konfuzo. Miro iló roshačija dre mánde, kiéli me dyjom godý péske (xor dumindjom), zahačíia jag dre mánde, me phendjom miré čibása; O, Rajo Dévla, phen mánge, kiéli miro džiibén končynelape i pal kicý dyvesá me meráva. So isyn dasavo: phen mánge, kicý beršá mánge iščo (inké) te dživáv? Ĥáda, féni pe buĥlypén miré-vasteskiro Tu dyján mánge dyvesá te dživáv i miro džiibén isyn krotko časo, sýrby nisó angíl Túte. Davá isyn patiaibén, so kažno (sváko) manúš, mek jov te terdjol vučés, isyn balvaliakiro phurdypen. Séla. Davá isyn čačó, so manúš psiréla sýrby jekh zer (tienjo), čačó, jov čhurdelape ivjá (naprásnes); jov skedéla péske, a na džinéla, kon zalela davá. A kakaná, so mánge te užakirav, Rajo Dévla? Me užakirava lačhipén Tútyr. Zrákh man saré miré čoripnástyr, na domek, sob (kaj) dylynó manúš te obrakirel man. Me sómas laló, me na otphandjom miro muj pal-dová, so Tu adiáke kerdián. Le mándyr krig dukhá, so Tu čhudián pe mánde: me meráva, syr Tu marésa man Tyré vastésa. Tu sykliakiri i désa kara (xas') i sykavesa bang manušente pal léngiro čoripén, Tu xasiakiresa, syr mol' dová, so jov kaméla; čačó, kažno manúš isyn syr balvalitko phurdypen. Séla. Šun mirí pátieri (molítva), o Rajo Dévla, i pričhúv kan, so me rovava, na jav štyl miré jasvendyr, so me som čúžo manúš Túke, savó lodela, syr sys miré dadá. [r.s.] Otriskir mándyr Péskire strénga jakhá, i me javáva te radynavpe angíl, syr me džáva krig péske i man na javéla butýr. Xoróskire Dirižoróske. Davidóskiro Psálmo. Me drieván užakirdjom Ras-Devlés, i Jov bandija ke me i šundiá, so me rovava godlenca. I Jov vytyrdyja man xasibnytkone rovóstyr (xohóstyr), artapieliatyr (bolotostyr) tinasa i Jov čhudiá mirí ĥerój pe bar; i Jov dyjá zor miré pirénge (stopénge). Jov čhudiá neví gilý dro miro muj, sob (kaj) te šarén amaré Devlés. But manušá dykhéna davá i javéna te darén i javéna te garadjon pal Raste-Devléste. Te javél bahtaló odová manúš, kon užakiréla lačhipén Rástyr-Devléstyr, i savó na risjola ke phut'kirdé i ke odolé, savé risjona ke xohaibén. O, Rajo Dévla, miro Dévla, Tu kerdián but: Tyré dívna butiá i zaduminybena pal aménde nikón na moginéla te ĥaljol, sob (kaj) te phenél vari-so pal davá i te rakirél sarénge. Me na mogináva až te phenáv – len isyn adákicy but. Tu na vykedyjan ni svénta dyibená (žertvy), ni janybená; Tu otphandian miré kaná. Xačkiribnaskire svénta dyibená i svénta dyibená pal grého Tu na drieván mangesa. Tén'ci me phendjom: “Ake, me džáva, dre lylvarjakiro (knigakiro) svítko, kaj isyn čhindló pal mánde: ‘Me drieván kamám te keráv Tyrí vólia, o miro Dévla, i Tyró Zakóno isyn dro Miro iló. Me phendjom zoralés pal Tyró čačipén angíl buté manušénde, savé skedénape: ĥáda, me na zaphandjom péskire uštá, o Rajo Dévla, Tu Kokoró saró džinésa. Me na ĥaradjom Tyró čačipén dro miro iló, me phenavas sarénge pal Tyró patiaibén, i so Tu zrakhcián man: me na ĥaradjom pal Tyrí lačhé-ilýtkima i Tyró patiaibén angíl buté manušénde. O Rajo Dévla, na otdé, pririkir Tyrí milo lačhé-ilýtkima, mek Tyró lačhipén i Tyró patiaibén usady (sak) te rakhén man. Pal-dová so adákicy but čoripena pe mánde saré rigéndyr, so naštý te podginav. Miré čoré réndy (diély) doginé pe mánde, so me na mogináva te dykháv pal lénde, a len isyn butýr syr isyn balá pe miro šeró: miro iló na vyrikirala man. O, Rajo Dévla! Jav lačhó te zrakhes man, o, Rajo Dévla, jav sygedýr te des vast mánge. Mek odolé, savé rodéna te xasiakirén miro di, te javén ladžakirdé i teliakirde (xasiakirdé patýv). Mek kodolé, savé vyphenena myslia pe xasibén mánge, te javén čhurdyné pale dre napatyv. Mek jone te jačénpe kokoré pésa pe xasibén pal léngiro ladžaipén, savé rakiréna mánge: “Dykh! Mištó!” Mek saré, kon rodéla Tut, te radynénpe i javén viesiéla (lošalé) Tútyr i ŭsády (sak) te phenén: “Te javél ĥazdynó šaribnasa Raj Devél” – saré, savé kaména te zrakhenpe Túte. [r.s.] Ne me som čororó i som dre trébima, Raj Devél javéla te del túga (te zabotisol) pal mánde. Tu désa vast mánge i zrakhésa man, o, Miro Dévla, jav sygedýr. Xoróskire Dirižoróske. Davidóskiro Psálmo. Bahtaló isyn odová manúš, kon ĥaljola čororen, Raj Devél zrakhéla les dro pharó dyvés. Raj Devél javéla te dykhél ciamkes pal léste i prirakhela Léskiro džiibén i bahtiakiréla les pe daja phuv i na otdéla les dre vergéngire vastá. Raj Devél zorjakirela les, kiéli jov nasvaljola: Jov ĥazdéla les čhuibnastyr léskire dukhendyr. Me phendjom: “O, Rajo Dévla, jav tangipnaskiro (žalibnytko) ke me, sastiakir miro di, pal-dová so me kerdjom grého angíl túte”. Miré vérgi rakiréna čoripén pe mánde, phení: “Kiéli davá jov meréla, i léskiro lav xasjola?” I kiéli vari-kon javéla te dykhelpe mánca, tedy jov rakiréla syr balvalitko phurdypen, léskiro iló skedéla čoripén: jov džála javrí i rosphenéla pal davá. Saré, kon bidykhela man, gundiarinena (xomzynéna) khetané proti mánde; jone zrakirenape pe čoripén pe mánde: “Čoripén Vieliarostyr pyjá pe léste i jov pasijá i butýr jov na uštéla”, – jone rakiréna. Až miro lačhó mal, savéske me patiandyjom, savó xaja miro maró, ĥazdyjá péskiri piénta (khur) pe mánde. Ne Tu, Rajo Dévla, jav tangipnaskiro ke me i ĥázde man, a me otpleskirava pale lénge. Pir davá me džinóm (džináv), so Tu kamésa mištypén mánge, so miro vérgo na ĥazdélape radypnasa pe mánde. Tu podrikiresa man, pal-dová so nane bang mánde i Tu čhuvésa man angíl Péskiro muj pe saré viéki. [r.s.] Te javél bahtiakirdó Raj Devél, Izrailjoskiro Devél viekendyr i pe saré viéki. Amín' i Amín'. Xoróskire Dirižoróske. Sykliakiribén Kariejeskire Čhavéndyr. Syr mirga (lan') drieván kaméla paní, savó thadéla, adiáke-pac' dro miré dúho (fáno) isyn smega / truš (žažda) ke Tu, o Dévla. Miro dúho (fáno) isyn dre truš (smeginela) pal Devléste Zoraleste, Džiibnáskire Devléste: kiéli me džáva i sykadjovava angíl Devléste? Miré jasva sys mánge syr xabén dyvés i rat, kiéli jone rakirdé mánge so dyvés: “Kaj isyn tyró Devél?” Kiéli me priripirava davá, tedy me phagirava peskro iló: syr me psirdjom maškír buté manušénde, syr me lydžavas len ke Devléskiro Kher i davas gódla radymátyr i šaribnastyr manušytkoné skopostyr, savé svenkinenas. O miro di, sóske tu tuginesa i izdrasa dre mánde? Užakir lačhipén Devléstyr; i me javáva te parikiráv Léske, Kon zrakhciá man. O, miro Dévla, miro di isyn dre túga dre mánde; me priripirava pal Túte Iordanoskire phuvjátyr, Garmonoskire vučipnendyr, Mizaroskire bergátyr. Xoripén prikharela xoripén lopotymasa, syr paniá peréna, saré Tyré valny (velny) i paningá, so kuniakirenape, giné upré vučedýr mándyr. Raj Devél déla Léskiri lačhé-ilýtkima dyvesé, a ratý me bagava gilý Léske i me mangavape Devléske, miré Džiibnaskireske. Me phenáva Devléske, miré Bergake: “Sóske Tu bistyrdian pal mánde? Sóske me psirava i izdrava, kiéli vérgo tasavela man. Miré vérgi obrakirena man adiáke, so až miré kokalý pharadjona, kiéli jone rakiréna mánge so dyvés: “Kaj isyn tyró Devél? [r.s.] Sóske tu tuginesa, miro iló? Sóske tu izdrasa andré mánde? Užakir lačhipén Devléstyr, i me javáva te šaráv Les, Kon zrakhciá man. Pátieri (Molítva) Devléske dro Pharó Časo. Sendiákir man, o Dévla, i zaterdiev pal miro réndo (diélo) angíl bidevlytka nácyi, zrákh man xohané i načačune manušéndyr. Pal-dová so Tu san Devél miré zorjakiro, sóske Tu gíian krig mándyr? Sóske me psirava i izdrava, kiéli vérgo tasavela man? Bičháv Tyró dud i Tyró čačipén, mek jone te lydžán man i te janén pe Tyrí svénto bérga i pe štéto, kaj Tu san. Tedy me džáva ke Devléskiro altárjo, ke Devél miré radymátyr, miré bahtalypnastyr: čačó, me javáva te parikiráv Túke i te bašavav pe gusli, o Dévla, miro Dévla! Sóske tu tuginesa, miro iló? Sóske tu izdrasa andrál mánde? Užakir lačhipén Devléstyr, i me javáva te šaráv Les, Kon zrakhciá man. Xoróskire Dirižoróske. Sykliakiribén Kariejeskire Čhavéndyr. Ame šundiám péskire kanenca, o Dévla, amaré dadá rosphendlé pal dívna butiá, savé Tu kerdián dre léngire dyvesá, dre dyvesá ĥaratuné (vaguné). Tu tradyjan krig Péskire vastésa Najudýtka nácyi, a čhudián péskire manušén te dživén; Tu tasadian Najudýtka nácyi, a dyján Peskirenge te roskhuvenpe. Tyré manušá na doresné phuv péskire kurtalása i jone na zrakhné pes péskire vastésa, ne davá sys Tyrí zor i Tyró vast i dud Tyré moskiro, pal-dová so Túke jačné dróga jone. Tu san miro Králi! Miro Dévla! De priphenybén, sob (kaj) Jakovo te lel upralypén. Túsa ame pirizorjakirasa amaré vergén, Tyré lavésa ame javása te štakiras odolén, savé ĥazdénape pe aménde. Me na javáva te dopatiav miré lukóske, ci miré kurtaláke te zrakhél man. Ne Tu zrakhcián amen amaré vergéndyr, i Tu ladžakirdian odolén, savé drieván na kamlé amen. Ame javása te ĥazdas šaribén pal Devléste so dyvés i ame javása te šaras Tyró lav pe saré viéki. Séla. Ne Tu sataki (usajékh) jačkirdian amen i ladžakirdian amen, i Tu na gíian angíl amaré xaladypnenca. Tu kerdián adiáke, so ame dyjampe pale vergéndyr i kodolé, savé bidykhne amen, lučkirenas amen. Tu dyján amen syr bakrén pe xabén, i Tu rosčhudian amen maškír Najudýtka nácyi. Tu bikindian Péskire manušén ni pal so, Túke nane nisaví l'góta (kófo) dalé timinatyr. Tu kerdián adiáke, so amaré pašatuné obrakirena amen; sanape xoliames i prosana amen odolé, savé isyn pašýl aménde. Tu kerdián améndyr sabnytko primiéro (sykaibén) maškír Najudýtka nácyi, manušá kuniakirena šerenca paš aménde. Mirí ladž isyn usady (sak) angíl mánde, miré-moskiro ladžaipén sýrby garadia man zaniatyr odolengirendyr, savé bangiakirena xohanés i kaliakirena man, vergéndyr i odolén, savé isyn xolynakire. Saró davá javdiá pe aménde, ame usajékh na bistyrdiam Tut, ci ame phagirdian Tyró Zavieto: Amaró iló na risijá pale, i amaré piré (stópy) na štade dre rig Tyré droméstyr; mek Tu rospharadian amen syr kára dre pe štéto, kaj isyn šakaly, i garadian amen dre meribnaskiri zer (tienjo). Kóli ame bistyrdiamas lav amaré Devléskiro i dind(z)'kirdiamas amaré vastá ke čúžo devloro, ci Devél na udžindiá davá? Pal-dová so Jov džinéla, so isyn garadó dro iló. Čačó, pal Túte amen zamarena so dyvés, amen ginéna syr bakrén, savén čhinena. Uštý! Sóske Tu san sutó, o Rajo Dévla? Jav pašyledýr! Na džá krig sarésa. Sóske Tu ĥaravesa Péskiro muj, bistresa, so amen tasavena, so aménde isyn bari dar? Pal-dová so amaró di isyn bandiakirdo ke phuvjákiro práho, amaró kužúm (želudko) rikirlape zoralés pale phuv. [r.s.] Ĥazdepe te des vast aménge, i zrákh amen Tyré lačhé-ilytkimasa. Xoróskire Dirižoróske. Sykliakiribén. Kariejoskire Čhavéndyr. Bjaveskiri Gilý. Miro iló isyn pherdó bahtalé lavénca: me rakiráva pal kralískire réndy, mirí čib isyn syr lačhé-čhinybnariskiro destoro (trost'). Tu san naj šukaredyr manušypaskire čhavéndyr, bahtalypén vyčhudiape tyré uštendyr: pal-dová so Devél bahtiakirdiá tut pe saré viéki. Phande trusciál péskiri kurtála ke péskiri ĥerój (bjodro), murš baró, péskire slavása i baré vučedyripnasa, i trade uklisté mištés péskire baré vučedyripnasa te zaterdjos pal patiaibén, kovlé-ilýtkima i čačipén, a tyró čačó vast javéla te sykliakirél tut te kerél dová, sóstyr dar léla. Tyré maribnýtka bustiá (striély) isyn vostra (čolalé) dro iló tyré vergéngire, manušypnaskire nácyi peréna tel Túte. Tyró trono, so Devél dyjá túke, javéla pe saré viéki, tyró kralískiro destó sykavéla, so tu kralinesa čačipnytkes. Túke isyn drógo čačipén i tu bidykhesa fuipén, paldavá Devél, tyró Devél, pomakhcia tut te svenciakirel bahtiakirde dzetesa (jeliejosa) angíl tyré malende. Saré tyré uribená šukár khandena mirósa, alojosa i kasjasa, felatiniendyr, so isyn kerdé slonytkone kokalostyr, bašaiben pe balytka strumiénty radynena tut. Kral'jengire čhaja isyn maškír Tyré patyvalé terné džuvliende, králica isyn terdy pašýl Tyró čačó vast dro suvnakáj Irostyr. Šun man, čhájo, i dykh, šun rakhunes, so me phenáva: i bistyr péskire manušén i kher tyré dadéskiro. Kralís drieván prityrdela tyró šukaripén; pal-dová so jov isyn tyró raj i tu javésa te kloninespe patyvása léske. Tiroskiri čhaj javéla darenca, naj barvaledyr manušá javéna te domarenpe ke tyré–iléskiro tatypen. Kralískiri čhaj isyn naj slavutnedyr saré bare felatiniatyr (kolovóstyr), lákiro uribén isyn khudo suvnakástyr. La janéna dre sane sude ídia; čhajén, lákire malnien (podrugen) pal láte janéna ke králi. Syr len janéna, jone javéna viesiéla (lošalé) i te radynénpe, kiéli zadžána dro kralískiro bari felatin/kolóv (dvorco). Tyré čhavé pe štéto tyré dadéngiro; Tu čhuvésa len thagar'jenca te kralinen, [r.s.] sob (kaj) te javél džindló Tyró lav saré rodénge, paldavá manušýtka nácyi javéna te šarén tut pe saré viéki. Xoróskire Dirižoróske. Kariejoskire Čhavéndyr pe Čhajengiri Zan (Alamoto). Devél isyn amaró garadyipen i zoralypén, Jov déla vast, kiéli isyn pharó. Paldavá ame na strahadjovasa, mek phuv kharélape i mek bérgi te perén telé dre móri (derjavá). Mek paniá te brilinen (te rievinen) i te kerdjon pienasa, mek bérgi te trinskirenpe péskire zorjátyr. Séla. Isyn jekh reka (len'), savjákire paniá obradynena Devléskiro fóro, svénto štéto, kaj dživéla Sámo (Naj) Vučedýr. Devél isyn dro davá fóro, jov na peréla: Devél podela vast dalé foroske tasiarlatyr. Nácyi rosholiasyne, kralipená khardepe krig (zgine) štetóstyr, a Devél phendiá Péskire zaniása i phuv biladyja. Raj Devél, bolybnáskire-jangoléngiro, isyn aménca, Jakovóskiro Devél isyn amaró garadyipen. Séla. Javén, dykhén Ráskire-De-vleskire butiá, Kon kerdiá zamekiben pe phuv; Kon keréla adiáke, so maribena ke phuvjákire jagóry (kraí) končynenape, Jov phagiréla lúko i phagiréla čhurdypnytko bust (kop'ie) pe koterá; Jov xačkiréla sarésa jagása maribnýtka vurdená. Javén štyl i udžinén: so me som Devél. Man javéna te barjakirén ke vučipén nácyi, Man javéna te barjakirén ke vučipén saré, kon isyn pe phuv. [r.s.] Raj Devél, bolybnáskire-jangoléngiro, isyn aménca, Jakovóskiro Devél isyn amaró garadyipen. Xoróskire Dirižoróske. Kariejoskire Čhavéngiro Psálmo. Saré, manušýtka nácyi, marén dre vastá, radynénpe zoralés Devléske vučone zaniása. So Raj Devél, Sámo (Naj) Vučedýr, dela dar, Jov isyn baró Králi pir sarí phuv! Jov teliakirela saré manušýtka rasy tel aménde i Najudýtka nácyi tel amaré ĥerá. Jov vykedyjá amaró meknó mištypén vaš aménge, baró vyčedyripen Jakovóskiro, kon isyn drógo Léske. Séla. Devél gijá upré pe trono godlypnasa, rogoskire (trubakire) bašaibnasa, Raj Devél. Bagán šaribnytka giliá Devléske, bagán šaribnytka giliá amaré Kralíske, bagán šaribnytka giliá. So Devél isyn Králi pir sarí phuv; bagán psálmo god'vares. Devél kralinela pe Najudýtka nácyi; Devél isyn beštó pe Léskiro svénto trono. [r.s.] Baré raja manušytkoné nacyiéndyr kedenape khetané, syr manušá Avraamóskire Devléstyr. Pal-dová so ščýty pe phuv isyn Devléskire; Jov isyn ĥazdynó vučedýr saréstyr. Xoróskire Dirižoróske. Kariejoskire-Čhavéndyr Psálmo. Devél isyn baró i Les drieván šarena dro amaró Devléskiro fóro, pe Léskiri svénto bérga. Bérga Sióno isyn šukár i vučí, joj isyn saré-phuvjákiri rádyma, i isyn pe paš-ratitka (sievierna) jagóry (krái), fóro, kaj isyn baró králi. Devél sykadiá, so saštý te garadjos dre Léskire-foróskiro rikiriben bidatyr: ĥáda, strenindlepe králja i giné péske, jone dykhné i jone drieván divindlépe, jone strahádyne i našné, jone lyné te izdran dukhasa sýrby džuvlý, saví bijanéla. Tu phagiresa Farsisoskire pármy (korabli) vastočnone balvaliasa. Syr ame šundiám, adiáke-pac' ame dykhciam dro fóro amaré Ráskire-Devléskiro, bolybnáskire-jangoléngiro, dro fóro amaré Devléskiro, savó Devél začhudia pe saré viéki. Séla. Ame dumindiam pal Tyró drógo lačhipén, o Dévla, maškír Tyrí Khangirí. Syr Tyró lav isyn, adiáke-pac' i šaribena pal Túte džána ke phuvjákire jagóry (kraí), Tyró čačó vast kralinela čačipnása. Mek te javél lošaly (viesjolo) Sionóskiri bérga, mek te javén viesiéla (lošalé) Judejákire čhaja, so Tu sendiakiresa čačunés. Džán trusciál Sióno i obdžan, pašýl léste; podginen léskire vučardia (bašni), riskirén Péskiro iló ke foróskire valy, pridykhenpe ke léskire gredy (dvory), sob (kaj) tuménge te phenén manušéngire rodénge, savé javéna, [r.s.] so davá Devél isyn amaró Devél pe saré viéki i ŭsády (sak): Jov javéla te lydžál amen až ke meribén. Xoróskire Dirižoróske. Psálmo Kariejoskire Čhavéndyr. Šunén davá, saré manušále: prišunenpe saré, kon dživéla pe svéto: tumé, manušýtka čhavé: barvalé i čororé khetané. Miro muj phenéla god'varó lav, miro iló déla duma te ĥaljol. Me pričhuvava péskiro kan ke primiéro (sykoiben) te phenáv, me rozlava miré-giliengiri garady myslia pe gusli. Sóske mánge te darav, kiéli isyn čoré dyvesá, kiéli čoré vérgi javéna trusciál miré piénty (khurjá)? Save risjona ke péskiro barvalypén te zrakhenpe i šarena pes odolesa, sósa jone isyn barvalé. Nikonéske naštý te vykinel péskire pšalés, ci te del vykinybnytko symadý (vykupo) pal léste, pal-dová so te vykines manušýtko džiibén isyn mol baré lové i len nijékhvar na uhtyléla (nádosi), sob (kaj) manúš te dživél pe saré viéki i, sob (kaj) jov nijékhvar te na džinél meribén. Jov dykhéla, syr godé manušá meréna, adiáke-pac' syr dylyné khetané bigodiakirenca xasjona, i mekéna péskiro barvalypén javirénge. Jone duminéna péske, so léngire kherá javéna pe viéki, so léngire štéty te dživén saré rodénge; mek jone kharéna péskire phuvjá péskire lavénca. Ne manúš na jačélape dre vučí patýv; jov isyn sýrby murdál (žyvotno), savó muljola. Davá isyn drom dylyné manušéngiro i vaš odolénge, kon radynélape péskire lavéndyr. Séla. Syr bakrén len vykedena vaš liúno (ado), meribén javéla te čaravel len, čačipnaskire manušá javéna te rikirén lofo (vierho) pe lénde zlokostyr i léngiro masá javéna te kirnjon; maĥila javéla léngiro štéto. Ne Devél vykinela miro di liunoskire (adoskire) zorjátyr, pal-dová so Jov Kokoró léla man. Séla. Na dar, kiéli manúš jačéla barvaló, syr sláva pal léskiro kher barjola; pal-dová so jov na léla pésa nisó, a léskiri sláva na džála pal léste; mek jov šardia péskiro di pal péskiro džiibén, mek jone šarde les, so jov kerdiá mištés péske, ne jov džála ke léskire-dadengíre ródy te merél, savé butýr na dykhéna dud. [r.s.] O manúš, savó isyn dre bari patýv, ne savó na ĥaljola, isyn sýrby murdál (žyvotno), savó xasjola. Asafoskiro Psálmo. Devél devlengiro, Sarezorjákiro Raj Devél phendiá i kharéla sarí phuv jagoróstyr, kaj kham uštéla i ke jagóro (krajo), kaj kham džála telé. Sionóstyr, bidošengire šukaripnastyr, Devél zaziaindia. Amaró Devél javéla i Jov isyn na štyl; jag, saví xála saró, džála angíl Léste i javéla drieván štormitko balvál. Jov prikharela Bolybnáskiro Rajo vučipnástyr i phuv te sendiakirél Léskire manušén: “Skéde Miren sventonen khetané ke Me, savé kerdé Zavieto Mánca sventoné dyibnasa (žertvasa).” Mek te phenél Bolybnáskiro Rajo sarénge pal léskiro čačipén, so Devél Kokoró isyn sendári! Séla. “Šunén, Miré manušále; i Me javáva te rakiráv. Me javáva te dophenav pe túte, o Izráilie, Me som Devél, som tyró Devél! Me na javáva drieván te bangiakirav tut pal tyré svénta dyibená, ci pal xačkiribnaskire svénta janybená, savé isyn usady (sak) angíl Mánde. Me na javáva te lav guruvén tyré kheréstyr ci buznen (kozlen) tyré ĥurtendyr, pal-dová so kažno riskiribnáskiro murdál (zvierjo) dro veš isyn miro, i murdál pe bérgi, savé isyn tysjoncy. Me džinóm (džináv) saré čiriklien bergendyr i saré murdalén (žyvotnonen) pir Miré féldy jone isyn Miré: “Kóli me javavas bokhalo, me na phenavas Túke: pal-dová so svéto isyn Miro i saró, sósa jov isyn pherdó. Ci Me xava guruvengiro mas, ci Me pjava buznengiro rat? Jan svénto dyibén parikiribnasa Devléske i otdé pale Naj Vučedyreskireske, pal so tu dyján sovláh. I khar Man dre dyvesá, kiéli Túte isyn bari dar, i Me zrakháva tut, i tu barjakiresa ke vučipén Man.” Ne Devél rakiréla fujé manušéske: “Sóske tu rakirésa sarénge pal Miré statúty, i rakirésa péskire mósa pal Miro Zavieto? a usajékh túke drieván isyn na pir iló Miro sykliakiribén pal čačipén i tu čhurdesa Miré lavá pal péste? Kiéli tu dykhésa čores, tedy tu zdžasape lésa i tu sánas khetané odolenca, savé keréna biladžaipén. Tu désa vólia péskire moske te rakirél čoripén i péskire čibake (čibjake) te sčhuvel xohaibén. Tu san beštó i rakirésa pe péskire pšaléste: tu bangiakiresa xohanés tyré-dákire čhavés. Tu kerdián Davá i Me sómas štyl (tiho); tu dumindian, so Me som adasavó, syr tu san. Ne Me sykaváva tyrí bang i čhuváva davá jekh pal jekh angíl tyré jakhá. Poduminen pal davá tumé, kon bistrela Devlés, sob (kaj) Me te na roskušav tumen, so na javéla nikonés te zrakhél tumen. Kon parikirela Devléske sventoné janybnasa, kodová slavinela Man i Me sykaváva léske, syr Devél zrakhéla les, i savó pridykhela pal péste te dživél pir čačipén. Xoróskire Dirižoróske. Davidóskiro Psálmo, kiéli proróko Natano (Nafano) javdiá ke Jov, syr Jov zagijá ke Virsávija. Jav tangipnaskiro (požalin) ke me, o Dévla, pir Tyró drógo lačhipén, khos krig miré čoré réndy (diély) pir Tyrí bari milo lačhé-ilýtkima. Vymór (xaláv) man sarésa miré čoripnástyr i žužakir man miré grehostyr. Pal-dová so me priĥalyjom miré fuj réndy (diély) i miro grého isyn ŭsády (sak) angíl mánde. Angíl Túte, Jekhéste, me kerdjom grého i kerdjom fuipén angíl Tyré jakhá. I čačunó javéla Tyró rakiribén i patiaibnýtko javéla Tyró séndo. Ĥáda, me bijandyjom dro čoripén i mirí daj bijandiá man grehitkonesa. Ĥáda, Tu kamésa, sob (kaj) me te javav čačunó dro iló i Tu sykliakiresa man, sob (kaj) me te javav godó dre garadé mysli. Vyžužakir man isoposa i me javáva žužó, vymor man i me javáva parnedyr ivestyr. De mánge, sob (kaj) me te šunav rádyma i te javav lošalo (viesjolo), sob (kaj) te radynénpe miré kokalý, savé Tu phagirdian. Ĥarav Péskiro muj miré grehéndyr i khos krig saró miro fuipén. Ker andrál mánde žužó iló, o Dévla, neviakir miro dúho (fáno) zorjása. Na mek man dre rig Tútyr, na le krig Tyró Svénto Dúho (Fáno) mándyr. De pale mánge te radynavpe, so Tu zrakhésa man, podrikir man lačhé duhósa. Me javáva te sykliakirav odolén, kon keréla čoré réndy, i grehítka manušá parudjona, kóli jone risjona ke Tu. Rákh man bangiatyr, pir saví rat sys pročhudo, o Dévla! O Devlale, Savó zrakhéla man: i mirí čib javéla te bagal pal Tyró čačipén. O, Rajo Dévla, otker miré uštá i otphande miro muj te šaráv Tut. Tu na kamésa svénta janybená – me dávas Túke. Tu i na radynesape, sob (kaj) me te janav xačkiribnaskire svénta dyibená. Svénto dyibén (žértva) isyn lačhó Túke, Devléske, tedy, kiéli amaró dúho (fáno) isyn riskirdo ke Devél. O, Dévla, Tu ž san dre patýv ke iló, savó dandyrela pes pal grého i riskirdo ke Tu. [r.s.] O, Dévla, bahtiakir Tyré kučoné laskatyr Sióno. Ĥazde Jerusalimóskire vánty (sciany). [r.s.] Tedy javéna lačhé Túke svénta dyibená (žertvy) čačuné iléstyr, svénta dyibená ĥazdyibnasa (voznošenijosa) i céla shačkiribnytka svénta dyibená, so manúš vykedéla, tedy janéna guruvén syr svénto dyibén pe tyró altárjo. Xoróskire Dirižoróske. Sykliakiribén. Davidóskiro Psálmo, kiéli Dong Edumijatyr javdiá i rosphendiá Saulóske, phení: ‘Davído zagijá dro Ahimieliehoskiro kher.’ Sóske tu šaresape fuipnasa, tu, muršari? Devléskiri lačhé-ilýtkima isyn usady (sak) mánca pe saré viéki. Tyrí čib priduminela xasibén syr vostro (čolalý) čhuri, joj keréla butý vaš xohaibén. Túke isyn pir iló fuipén butýr lačhipnastyr, tu butýr xohavesa, syr rakirésa čačipnytkes. Séla. Túke isyn pir iló lavá ke xasiakiriben, čib xohany. Devél xasiakiréla tut adiáke pe saré viéki i čhurdéla tut krig i vykušela tut šatratyr i vyriskirela tut korniénca (rukhénca) phuvjátyr, kaj dživéna manušá. Séla. Čačipnaskire manušá javéna te dykhén i na javéna te strahadjon i te sanpe léndyr, phení: “Dykhén! Ake, isyn manúš, savó na čhudiá péskiri nadiéia pe Devléste, ne jov risjolas ke péskiro barvalypén i jačelaspe zoraledýr te xasiakirél” [r.s.] Ne me som sýrby zeleno maslinitko drévo dro Devléskiro Kher, me risjováva ke Devléskiri lačhé-ilýtkima pe saré viéki. [r.s.] Me javáva ŭsády (sak) te parikiráv Devléske pe saré viéki, so Tu kerdián davá, Dévla! Me javáva te užakirav lačhipén Tyré lavéstyr, pal-dová so Tyró lav isyn lačhó. Xoróskire Dirižoróske pe Dudka. Sykliakiribén. Davidóskiro Psálmo. Dylynó phendiá péske: “Nane Devlés!” Manušá jačné rozmekne: jone kerdé fuipén, sóstyr manušénge jaciá džungaló, nane ni jekhés, kon keréla pir čačipén. Devél podykhciá bolybnástyr pe manušéskire čhavénde, sob (kaj) te dykhél, ci isyn vari-kon, savó ĥaljolas i rodelas Devlés. Saré risiné krig, jone saré jačné čoré manušá: nane ni jekhés, kon keréla pir čačipén, nane ni jekhores! Naúšto čoré manušénde nane godý, so jone xána miré manušén sýrby jone xána maró? A jone na kharéna Devlés. Odój jone javéna dro baró trašaibén, kaj nane trašaibén, pal-dová so Devél rosčhurdela kokalý odolengire, savé obdžana trusciál (krugom) maribnása pe Léskire manušénde. Jone javéna ladžakirdé, pal-dová so Devél čhudiá len dre bipatyv. [r.s.] Kon javéla Sionóstyr te zrakhél Izrailjo! Kiéli Devél janéla pale Léskire manušén plienóstyr, tedy Jakovo javéla te radynélpe, i Izrailjo javéla bahtaló. Xoróskire Dirižoróske pe Balytka Strumiénty. Sykliakiribén. Davidóskiro Psálmo, kiéli Zifiei javné i phendlé Saulóske: “Ci na garadjola Davído maškír aménde?” Dévla, zrákh man Tyré lavésa i sendiakir man Tyré zoralypnasa. Dévla! Vyšún mirí pátieri (modla), pričhúv kan ke lavá miré moskire. Čuža manušá ĥazdynépe pe mánde i biileskire manušá rodéna miro di. Nane Devlés angíl léngire jakhá. Séla. Ake, Devél déla vast mánge. Raj Devél isyn odolenca, kon podrikiréla miro di. Jov otdéla pale čoripnasa miré vergénge, Jov čhurdéla len dre rig Péskire patiaibnása. [r.s.] Me lokhes janáva svénto dyibén, Túke me javáva te šaráv Tyró lačhó lav, o Rajo Dévla! [r.s.] Pal-dová so Tu zrakhcián man saré pharipnendyr i me dykhcjom, syr miré vérgi pyné. Xoróskire Dirižoróske pe Balytka Strumiénty. Sykliakiribén. Davidóskiro Psálmo. O, Dévla, pričhúv kan ke mirí pátieri (modla) i na garadjov, syr me rovava: šun man i otphen mánge: me psirava péske i ladžava péstyr vergéngire zaniendyr i fujé manušéndyr, savé tasavena man. Jone čhuvéna bang pe mánde i bidykhena man dre xolý. Miro iló dukhala andrál mánde i meribnaskiri dar pyjá pe mánde, me izdrava i trašaibén javdiá pe mánde, i man obuhtyldia bari dar. I me phendjom: “Kon délas phaká (kryly) mánge syr golumboske? Me tedy vurniavas krig i otkhinjovavas, ake, me durjovavas dur, i me jačavavpe te dživáv pe čhučí phuv (pustynia). Séla. Me sygnjovava te zrakhavpe zoralé balvaliatyr i baré štormostyr.” Phagir len, o Rajo Dévla, roskér léngire čibá (čibjá); pal-dová so me dykhcjom, savé jone isyn nahráta (nasil'niki) i košenape; jone psiréna pir fóro pir léskire vánty, dyvesé i ratý jone keréna čoripén i pharipén jekh jekhéske, hasibén isyn maškirál davá fóro, xohaibén i tasaiben isyn usady (sak) pe léskire vulícy (gásy). Pal-dová so davá isyn na vérgo, savó obrakirela man, me davas ráda te lydžav davá: ci javélas adasavó manúš, savó bidykhela man i ĥazdéla pes šaribnasa pe mánde, me garadjovavas léstyr, ne davá tu san, kadasavó syr me som, miro mal i miro pindžkirdo manúš, konesa ame gudles rakirdiam saré iléstyr i savésa ame psirdiam khetané javire skoposa manušengiresa dro Devléskiro Kher. Mek meribén te uhtylel len. Mek jone džidé te džán telé ke štéto, kaj isyn liúno (ado). Čoripén isyn dro léngiro kher i iló. Ne me kharáva Devlés te pomoginel mánge i Raj Devél zrakhéla man. Bel'veliénca, tasiarlénca i dyvesénca me javáva te žalinavpe i te izdrav roibnasa, i Jev javela te šunél mirí zan, i Jov vyrakhela miro di ramanjosa maribnastyr, so lydžiné pe mánde, so isyn but len proti mánde. Devél javela te šunél i otphenéla lénge, davá Jov, Savó isyn pe trono pe saré viéki. Séla. Ne jone na parudjona, nane lénde trašaibén Devléstyr. Jone ĥazdyné vast pe odolénde, savé sys dro ramánjo lénca; jone phagirdé péskiro dorakiribén; lavá léngire móstyr sys ĥladkedyr ksilestyr, léngire phenybena sys kovledyr maslinitkone dzetestyr (jeliejostyr), ne palál pal lande sys vostra (čolale) kurtaly. Mek péskiro kaló pharipén pe Raste-Devléste, i Jov prirakhela tut. Jov na domekela nijékhvar, sob (kaj) čačipnaskire manušá te obštavenpe. [r.s.] Ne Tu, Dévla, janesa telé len dre xasibnýtko ĥanbín (jama); a manušá, savé pročhude rat i savé xohavenas, na prodživena péskire paš dyvesá. Ne me risjováva ke Tu, Dévla, te zrakhavpe. Xoróskire Dirižoróske pe Mielodija: “Golumbica, saví isyn štyl pe duratuné Štéty.” Davidoskiri Nadiéia, kiéli Filistimliáni uhtyldé Les dro Gato. Jav tangipnaskiro (žalostno) ke me, o Dévla, pal-dová so manušá xasiakirena man, manušá tasavena man saró dyvés. Miré vérgi čorjona pal mánde saró dyvés; isyn len drieván but, kon džála maribnása pe mánde. Kiéli me som dre dar, tedy me risjováva ke Tu te zrakhavpe. Me risijom ke Devél te zrakhavpe, me javáva te šaráv Léskiro lav pir Léste, me na javáva te darav, so keréla manúš mánge? Miré vérgi piririskirena miré lavá célo dyvés, saré léngire dumki isyn proti mánde te kerén čoripén. Jone skedénape khetané, jone garadjona, jone poddykhena pal miré špery (sliady), kiéli užakiréna te zamarén man. Ci jone našéna karatyr pal péskiro čoripén? Devlale! Pharáv ke phuv dalé-manušýtka nácyi dre Péskiri xolý. Tu ž gindian miré špery (sliady); kicý me psiravas bikhereskiro, čhuv miré jasva dre Péskiro khoró (sasudo), ci nane jone dre Tyrí lylvarí? Kiéli me dáva gódla Túke te des vast, tedy miré vérgi risjona pale: davá me džinóm, so Devél isyn pal mánde. Pir Devléste me javáva te šaráv Léskiro lav, pir Raste-Devléste me javáva te šaráv Léskiro lav; Me risijom ke Devél te zrakhavpe, me na strahandjovava; so keréla manúš mánge? Túke, Dévla, me sovlahadjom, Túke, me parikirava syr svénto dyibén mándyr, [r.s.] so Tu zrakhcián miro di meribnástyr, prirakhcian miré ĥerá peribnastyr, sob (kaj) mánge saštý (možna) te psirav angíl Devléste pe dud (svéto), savó déla džiibén. Xoróskire Dirižoróske. Na xasiakir. Davidoskiri Nadiéia, kiéli Jov nascia Saulostyr dre Ĥiebar (Pieščera). Jav tangipnáskiro (požálin) ke me, o Dévla, jav tangipnaskiro: so miro di risijá ke Tu te zrakhelpe: me javáva te garadjovav dre zer (tienjo) Tyré phakengiri, paka bari bída prodžála (nakhela). Me dáva gódla Devléske, Naj Vučedyreskireske, Devléske, Savó keréla saró vaš mánge. Jov otphenéla mánge bolybnástyr i zrakhéla man; Jov ladžakirela odolés, kon phagiréla man. Séla. Devél bičhavéla Péskiri lačhé-ilýtkima i čačipén. Miro di isyn maškír ščerende (lievende), me som paštó maškír odolénde, savé xačona jagása, – manušýtka čhavé, koneskire dandá isyn sýrby čhurdybnytka bustiá (kop'i) i maribnýtka bustiá (striély), léngiri čib isyn sýrby vostro (čolalý) kurtála. Te šarel Tut vučedýr bolybnástyr, o Dévla, mek te javél Tyrí sláva pir sarí phuv. Jone čhudé felý (siet') tel miré ĥerá, miro di isyn bandiakirdo telé. Jone vyganade ĥanbín angíl mánde: jone kokoré pyné dre láte. Séla. Miro iló zoralés patiála: Dévla, miro iló zoralés patiála; me javáva te bagáv i šaráv Tut. Džagadjov, miro barikanypen! Džangadjov, gusli i arfa. Me džangavava kham, syr dyvesjola. Me javáva te šaráv Tut maškír manušénde, o Rajo Dévla, me javáva te bagáv Túke maškír kherítka ródy (pliémi). Tyrí lačhé-ilýtkima isyn vučedýr bolybnástyr i Tyró patiaibén dodžála ke óbloki. [r.s.] Te šarel saró Tut vučedýr bolybnástyr, o Dévla, mek te javél Tyrí sláva pir sarí phuv. Xoróskire Dirižoróske. “Na xasiakir.” Davidoskiri garady Nadiéia. So sykavéla, so tumé rakiréna čačipén? Ci čačunés tumé sendiakirena, čhavé manušýtka? Nad, tumé keréna fuipén dro tumaró iló; tumé sýrby važynena pe ubladýtka (viesy) nahrata réndy tumaré vasténca pe phuv. Fuj manušá džána krig Devléskire droméstyr iščo (inké) dákire ločoviátyr, jone keréna blendy tedy, kiéli jone sys dro dákiro per, xohaí. Jone isyn pherdé trutasa (jadosa) sýrby sapeskire trutasa, ci sýrby kašuke ĥadoste, so zakerela péskire uštá, savó na šunéla čovahaneskiri (čaraŭnikoskiri) zan, kon adiáke rangires čovahaniakirela. Dévla, vyphagir lénge dandá dro muj, pophagir sarésa klyki terné ščerengire, o Rajo Dévla! Mek jone te rozbiladjon syr paní, so thadéla, mek te phadjon léngire maribnýtka bustiá (striély) lukostyr, kiéli nadtyrdena len. Mek jone te javén sýrby slimaki (ulitki), so rozbiladjona dre péskiri s'liz', mek jone te javén sýrby sčhurdyno bijáto džuvliáte, savó na udykhéla kham. Angíl dová, syr ke pirja dodžála kodríljo ci te javél jov zeleno, ci šuko te xačol, Devél ukedela len krig riskirdone balvaliasa (vihrosa). Čačipnáskiro manúš javéla te radynélpe, kiéli jov čhuvéla kára pe čoré manušénde, i jov vymorela péskire piré (stópy) dro fujé-manušéngiro rat: [r.s.] i phenéla manúš: “Čačó, isyn lačhó otdyibén pale pal čačipnaskireste. Čačó, Devél isyn Odová, Savó sendiakiréla pe phuv.” Xoróskire Dirižoróske. “Na xasiakir” pe Mielodija, Davidoskiri garady Nadiéia, kiéli Savlo bičhadiá Manušén i jone dykhné ciamkes pal Kher, sob (kaj) te zamarén les. Dévla miro! Zrákh man miré vergéndyr, čhuv man pe vučipén odoléndyr, savé ĥazdénape pe mánde. Zrákh man manušéndyr, savé keréna čoripén i zrákh man odoléndyr, kon isyn nahrata ke rat. Pal-dová so ĥáda, jone podrakhena te zamarén man; zor manušá skedénape pe mánde: na pal miré čoré réndy ci pal miro grého, o Rajo Dévla! Jone prastána i sykliakiréna jekh jekhés, na dykhí, so nane bang mánde. Džanĥadjov te pomogines mánge i podykh. I Tu, o Rajo Dévla, bolybnáskire-jangoléngiro, Izrailjoskiro Devél, uštý i jav te dykhés saré nácyi, na tangine ni jekhés, kon zrakirelape te kerél čoripén. Séla. Bel'velienca jone risjona pale, jone vyinena sýrby džukela i obdžana trusciál fóro, ake, léngire mujendyr čadela, léngire uštendyr džána lavá sýrby vostro (čolalý) kurtála, i jone duminéna péske: “Kon davá šunéla?” Ne Tu javésa te saspe léndyr, Rajo Dévla, Tu javésa te prosas javír nácyi. Tu san miro Zoralypén, pe Túte me javáva te rikirav nadiéia; Tu, Dévla, san mirí tvárdyma te garadjovav mánge. Miro Devél, Savó tanginela man, javéla te dykhelpe mánca, Devél déla mánge te dykháv, syr miré vérgi peréna. Na zamar len, sob (kaj) miré manušá te na bistren len, rosčhurde len Tyré zorjása i rav telé len, amaró Rajo Dévla, Tu san ščýto amaró. Léngire móstyr džána grehítka lavá, mek jone te denpe dukhá (te xohavenpe) péskire phut'kiribnastyr pal dová, so jone prokošenas i xohavenas. Hasiakir len dre Péskiri xolý, xasiakir, sob (kaj) jone te na javén, sob (kaj) jone te džinén, so Devél kralinela Jakovostyr až ke jagóry (ke kraí) phuvjákire. Séla. I jone javéna pale bel'velienca, i mek jone te vyinen sýrby džukela i te psirén trusciál fóro; mek jone te psirén odorík i pale pal xabén, mek jone te rykinen, kóli te na javén čale. Ne me javáva te bagáv pal Tyró zoralypén; čačó me javáva te bagáv zoralés pal Tyrí lačhé-ilýtkima zlokostyr (rankostyr): so Tu sánas vaš mánge sýrby zoralý tvárdyma (diz) te garadjovav i nadiéia dre pharé dyvesá. [r.s.] Me javáva te bagáv: “Tu san mirí Zor, Tu san miro Devél, Savó prirakhela man. Miro Dévla, Savó tanginela man.” Xoróskire Dirižoróske. Pe Mielodija “Lilijakiro Dophenybén.” Davidoskiri Nadiéia. Vaš Sykliakiribén, kiéli jov mardiápe Sirijasa Miesopatamijatyr i Sirijasa Covanostyr i, kiéli Ioávo (Džoaba) risijá, syr jov zamardiá dešudúj tysiency Idumijanen pe Londytko Dólo. Dévla! Tu gíian krig améndyr i phagirdian amen; Tu sánas xoliamó pe aménde: akaná prilé pale amen. Tu trinskirdian phuv: Tu rozriskirdian la: sastiakir lákire riskiribena (povrieždienii), pal-dová so joj kuninelape (koliebinelape). Tu čhudián Péskre manušén angíl pharipén, Tu dyján aménge mol te izdras. Tu dyján sciago (znamjo) odolénge, savénde isyn trašaibén angíl Túte, te ĥazdén les vaš patiaibén, sob (kaj) te zrakhenpe odolé, kon jaciá drógo Túke. Pomogin te zrakhenpe Tyré čačé vastésa i otphen mánge. Séla. Devél phendiá Péskire sventymatyr: Me ĥazdavape radymása, Me roskerava Sihiemo i Me rozmierinava Sukotoskiro dólo. Miro isyn Galaádo, i miro isyn Manásija, Efriemo isyn sýrby šliemo te rakhél miro šeró, Juda isyn sýrby miro trono te kralinél. Moávo isyn mirí kopána (umyval'nica), pir Edómo me čhurdava mirí škornia; Filistija (Filisteja), ci na désa tu gódla zoralés radymátyr pal mánde. Kon janéla man dro zoraló fóro? Kon lydžála man dro Edómo? Ci Tu čhurdyjan dre rig, čačes, Dévla? Ci Tu na džása angíl amaré xaladybena. [r.s.] De vast aménge proti amaré namaleste, pal-dová so xartýtko isyn podyno vast manušéndyr. [r.s.] Devlésa ame kerása baré réndy; Jov rostasavela amaren namalen (nadrugen). Xoróskire Dirižoróske. Pe Balytka Strumiénty. Davidóskiro Psálmo. Šun, Dévla, so me rovava, i prišunpe ke mirí pátieri (modla). Jagoréndyr (krajéndyr), so isyn pe phuv, me kharáva Tut, kiéli miro iló isyn telé: zalydža man pe bérga, so isyn vučedýr mándyr. Pal-dová so Tu sánas syr garadyipen mánge, sýrby zoralý vučardý (bašnia) miré vergéndyr. Me javáva te dživáv dre Tyrí šátra pe saré viéki; me javáva te garadjovav i te rikirav nadiéia tel Tyré phaká. Séla. Pal-dová so, Tu, Dévla, šundián miré sovlahá; Tu dyján mánge meknó mištypén odolengiro, kon strahadjola Tyré lavéstyr. Tu désa butýr džiibnáskire dyvesá kralíske, sob (kaj) te javén léskire beršá pe butýr viéki, sob (kaj) jov te bešél pe trono angíl Devléste, mek lačhé-ilýtkima i čačipén te prirakhen les. [r.s.] Paldavá me javáva te bagáv šaribnytko gilý pal Tyró lav pe saré viéki, sob (kaj) mánge te keráv ke kónco (jagóro) te spolninav miré sovlahá so dyvés. Xoróskire Dirižoróske. Jeducynoske. Davidóskiro Psálmo. Dre Jekhéste Devléste miro di isyn štyl, Léstyr džála miro zrakhibén. Jov, Jekh, isyn mirí skála te zrakhavpe, i mirí tvárdyma (diz); me ž na perava. Kicý tumé javéna te perén pe jekhe manušéste? Tumé rodéna sarén te zaraven syr doiá vánta, so bandija, syr tyno, so izdrala. Jone jekh zrakirenape te zraven les léskire rajkane štetóstyr; jone bahtaljona xohaibnendyr. Jone šarena péskire mósa, ne jone prokošena dre péskire ile. Séla. Jekh dre Devléste Jekhéste miro di isyn štyl, pal-dová so me užakirava lačhipén Léstyr. Jov, Jekhdžinó, zaterdjola pal mánde i zrakhéla man, Jov isyn miro garadyipen, me na perava, Miro zrakhibén i mirí sláva Devléstyr, Savó isyn sýrby zoralý vučardý (bašnia), ke Kon me risjováva te garadjovav. Risjon ke Jov te garadjon kažno mólo, tumé, manušále, phenén saró, so isyn pe iló, angíl Léste. Ke Devél me risjováva te garadjovav. Séla. Čačó: manušýtka čhavé isyn sýrby bel'veliakiro phurdypen, manušéngire čhavé isyn xohaibén. Kiéli tu považynesa len pe ubladýtka (viesy), tedy jone isyn lokhedýr bel'veliakire phurdypnastyr (dunovienijostyr). Na rískir iló te tasaven manušén, na phutjov čoribnasa. Kóli rozbarvaljosa, usajékh na otdé péskiro iló barvalypnaske. Devél phendiá jékhvar; me šundjom duj móly davá, so sarí zor isyn Devléstyr. [r.s.] Adiáke-pac' Tútyr, Rajo Dévla, sarí lačhé-ilýtkima, Tu otdesa pale kažnoné manušéske pir dová, so jov kerdiá. Davidóskiro Psálmo, kiéli Jov sys pe čhučí Phuv ke Judéia Dévla! Tu san miro Devél, me samone tasiarlatyr (rankóstyr) rodava Tut. Miro di syr pal paní, savó tyrdelape ke Tu, dre mirí loč (plot') isyn sýrby truš/smega (žažda) pal Túte, syr dre šukí i došaly phuv, so isyn bi panieskiro, sob (kaj) te dykháv zor i sláva Tyrí, syr me dykhcjom Tut dro Svénto Štéto. Tyrí lačhé-ilýtkima isyn mištedyr džiibnastyr, miré uštá javéna te šarén Tut. Paldavá me javáva te slavinav i te parikiráv Túke dro miro džiibén, me javáva te ĥazdav vastá vaš Tyró lav. Miro di javéla čaly sýrby čekenesa (tukosa) i thulypnasa i miré uštá javéna te slavinén Tut obradyndle zaniása, kiéli me priripirava Tut pe miro čhuibén, tedy me duminava pal Túte ratý, kiéli džangadjovava, so Tu ŭsády (sak) desas vast mánge, a me javáva te radynavpe tel Tyré-phakengiri zor. Miro di prijacia ke Tu, a Tyró čačó vast podrikiréla man. I odolé, savé rodéna, sob (kaj) te xasiakirél miro džiibén, jone džána dre xoripena tel phuv; len otdena tel kurtála, jone javéna sýrby xabén šakalenge. [r.s.] Ne králi javéla te radynélpe Devléstyr, kažno manúš javéla te šarelpe, kon sovlahala Léskire lavésa, pal-dová so xohaibnaskire muiá javéna zaphandle. Xoróskire Dirižoróske. Davidóskiro Psálmo. Šun, Dévla, mirí zan, kiéli me žalinavape, prirakh miro džiibén vergostyr, savó trašakirela man, garav man čorahane zrakiribnastyr, savó lydžála ke bída, buntostyr, so keréna čoré manušá, savé točynena (déna čol) péskire dandá sýrby kurtála; jone čhudé kirke lavá sýrby bustiá pe lúko, sob (kaj) te den kar'je dre bidošengire manušéste, kiéli jone garadjona. Jekhátyr (srázu) jone déna kar'je dre léste i jone na strahadjona. Jone podmarena pes pe čoré réndy, jone zrakirenape te čhuvén feliá čorahanés, jone rakiréna: “Kon javéla te dykhél?” Jone priduminena te kerén čoripén: “Ame skedyjampe te kerás dová, so pridumindiam bidošéngiro.” Godý i iló manušéngire isyn xor garadé. Ne Devél javéla te del kar'je dre lénde, so léngire fránsy (rany) jekhátyr sykadjona, sob (kaj) jone te perén jekh pe jekhéste péskire čibatyr, kažno manúš udykhéla, kiéli jone našéna krig. Saré manušá strahadjona i jone javéna te rakirén sarénge pal Devléskiri butý; čačó, jone javéna te ĥaljon Léskiri butý godiása. [r.s.] Čačipnaskire javéna te radynénpe Devléstyr i jone javéna te risjon ke Jov te zrakhenpe i saré čačuné ilésa javéna te šarenpe. Xoróskire Dirižoróske. Psálmo i Gilý Davidóskire. Tu, Dévla, san mol, sob (kaj) te šarén Tut pe Sióno i Túke manušá déna sovláh. Tu šunesa pátieri (molítva), ke Tu javéla kažno džidó manúš, amaró čoripén isyn zoraledýr améndyr: tu primangesa (prostinesa) aménge amaré čoré réndy. Bahtaló isyn kodová, konés Tu vykedyjan i čhudián pašyledýr ke Pe: jov javéla te dživél dre tyré gredy (dvory), ame javása čale lačhipnastyr dro Tyró Kher, dre tyrí Khangirí. Tu otphenesa aménge péskire drieván baré divnone rendénca Péskire čačipnastyr, Dévla, Savó zrakhéla amen, Savéstyr zoralés užakiréna lačhipén saré phuvjákire jagorendyr (krajendyr) i duratuné mor'jendyr (derjavendyr), Tu čhudián bérgi Péskire zorjása, Tu podphandianpe Péskire zoralypnasa; Tu štyliakires morjoskiri grukima, valnengiri grukima i manušéngiro búnto. Jone, savé adiáke-pac' dživéna dre duratuné štéty pe phuv, daréna Tyré ĥiertykendyr (znakendyr). Tu kerésa adiáke, so jagóry (kraí) phuvjákire radynénape tasiarlatyr ke rat. Tu dykhésa pal phuv i paniakiresa la, Tu drieván (zbit) thuliakiresa phuv: Devléskiri reka (len') isyn pherdý paniésa, Tu barvaliakiresa lákiro giv – ake, syr Tu kerésa davá: Tu paniakiresa lákire lies'ni (borozny), Tu roŭninesa (kerésa vortes) lákire ĥarbyli, Tu kovliakiresa len sporkone bryšyndenca, Tu bahtiakiresa ŭzbarjakiribena te barjon; Tu bahtiakiresa aplodo tyré mištypnasa, tyré dromá spialymasa; požni pe čhučé phuvjá isyn kindle, i tykné bérgicy isyn sýrby podphandle radymása; [r.s.] požni isyn pherdé bakréngire ĥurtenca, doly isyn čhakirde givesa; jone sýrby zoralés radynénape i bagana. Xoróskire Dirižoróske. Gilý. Psálmo. Den gódla radymása Devléske, sarí phuv, bagán pal patýv Léskire lavéske, bagán slavása, kiéli šarena Les. Phenén Devléske: “Save baré ke dar isyn Tyré butiá! Tyré vérgi jačéna te kandén Tut pal Tyró zoralypén. Mek sarí phuv te bandjol šeró patyvása ke Tu, i te bagal Túke, mek jone te šarén Tyró lav.” Javén i dykhén pe Devléskire butiá! Savó zoralypén isyn Tyré butiendyr, so Tu kerdián manušéskire čhavénge, sóstyr až vérgi strahadjona. Jov pirikerdia mórjo (derjáv) dre šukí phuv; jone piriginé mórjo (derjáv) pirenca (stopenca), odój ame javása te radynaspe Léstyr. Jov kralinela Péskire zorjása pe saré viéki; Léskire jakhá dykhéna ciamkes (rakhipnytkes) pal Najudýtka nácyi, sob (kaj) odolé, kon buntuinela, te na ĥazdénpe radymása. Séla. Parikirén i šarén amaré Devlés, o manušále, pe phuv, phenén zoralés šaribén Léske; Kon déla džiibén amaré dieske, i na domekela amaré ĥerenge te zdžan štetóstyr. Pal-dová so Tu, Dévla, propatiakirdian amen, Tu vyprobindian amen syr rup vyžužakirena (vyčystinena). Tu jandian amen dre felý, Tu čhudián tasaiben pe amaré dume; Tu kerdián, sob (kaj) manušá te psirén pir šeró pe aménde; ame progijam pir jag i pir paní; ne Tu vylydžijan amen, sob (kaj) te des but. Me zadžava dre Tyró Kher xačkiribnaskire sventoné dyibnenca; me keráva, syr me sovlahadjom pal dová, so miré uštá vyphendle i miro muj phendiá, kiéli sys pharó mánge. Me janáva Túke xačkiribnaskire svénta dyibená thule murdaléndyr, kučoné khandybnasa bakréndyr, me janáva guruvén buznienca. Séla. Javén, šunén rakhunes, saré, konéste isyn trašaibén angíl Devléste i me phenáva tuménge, so Jov kerdiá miré dieske. Me dyjom gódla Léske te pomoginel miré mósa i šardjom Les miré čibása (čibjasa). Kóli me duminavas pal čoripén dro péskiro iló, tedy Raj Devél na šunelas man. Ne Devél šundiá, prišundiape ke mirí zan, syr me mangdjompe, Te javél bahtiakirdó Devél, Savó na risijá krig miré patierjatyr (molitvatyr), Savó na riskirdiá Léskiri lačhé-ilýtkima mándyr. Xoróskire Dirižoróske. Pe Balytka Strumiénty. Psálmo. Gilý. Mek Devél te javél lačhé-iléskiro te primangel gréhi aménge i te bahtiakirél amen i, sob (kaj) Léskire-moskiro dud (svéto) te svencynel pe aménde. Séla. Sob (kaj) saré pe phuv te džinén Tyró drom, saré Najudýtka nácyi te džinén, so Tu zrakhésa. Mek saré manušypnaskire nácyi te parikirén Túke, Dévla, mek saré nácyi te parikirén Túke. Mek te javén viesiéla (lošalé) saré nácyi i, mek te šarén giliasa, so Tu sendiakiresa manušén pe phuv pir čačipén. Séla. Mek te parikirén Túke, Dévla, saré nácyi, mek te parikirén Túke saré nácyi. Phuv dyjá péskiro aplodo: Dévla, amaró Devél bahtiakir amen. [r.s.] Mek te bahtiakirél amen Devél, mek saré ke phuvjákire jagóry (koncy) te darén Léstyr. Xoróskire Dirižoróske. Davidóskiro Psálmo. Gilý. Mek Devél te terdjol i te rosčhurdel Péskire vergén, i mek odolé, savé bidykhena Les, javéna te našén Léskire móstyr. Syr thuv rosphurdelape krig, adiáke-pac' Tu rosphurdesa len; syr mom biladjola jagatyr, adiáke-pac' fuj manušá biladjona odój, kaj Devél isyn. Ne patiaibnaskire manušá javéna bahtalé; jone javéna te radynénpe zoralés, i jone javéna te ĥazdénpe radymása. Bagán Devléske, bagán šaribnytka giliá Léskire lavéske, ĥazdén šaribnasa Les, Savó tradéla uklisto pir óbloki pe bolybén: Léskiro lav isyn Raj Devél, ĥazdénpe šaribnasa odój, kaj Jov isyn. Devél, Savó isyn dre Péskiro Svénto Štéto, Dad pirotengiro (sirotengiro), Sendári pivliengiro (udovengiro). Devél déla kher te dživén odolénge, kon isyn jekhdžine, Jov mekéla pe vólia odolén, kon isyn dre sastyrá: buntuítka manušá jačénape pe šukí phuv. O, Dévla! Kiéli Tu vydžasas angíl Péskire manušénde, kiéli Tu gíian pir čhučí phuv, tedy phuv kunindiape i bolybén čhudiá adiáke-pac' paní bryšyndestyr, i bérga Sióno trinskirdiape angíl Devléste, Izrailjoskire Devléste. O, Dévla! Tu bičhadian baró bryšýnd pe Péskiro meknó mištypén te podrikires les, kiéli jov lyjá te došvaljol i Tu dyján zor léske, Tyré manušá dživdé odój. Tu, Dévla, kerdián davá vaš čororenge Tyré lačhipnastyr. Raj Devél déla priphenybén i isyn but džuvliá, kon piridela daja lačhí zan (zvies'). Králja xaladybnengire našéna, jone prastána krig, a džuvliá, savé isyn kheré, roskerena maškír péste mazúri (nagrada), so doresné. Mek tumé te otkhinjon maškír zagony (gražy), kaj isyn bakré, saroiekh tumé javéna sýrby golumbica, savjate phaká (kryly) čhakirde rupésa, a porá čačuné suvnakása. Kiéli Sarezorjákiro Devél rosčhurdyja kral'jén pe bérga Selmono, joj iaciá parny syr iv. Bérga Vasan (Bašan) isyn Devléskiri bérga; pe bérga Vasan isyn but vučipená. Sóske tumé dykhéna zevlynypnasa, bergengire vučipená pe bérga, kaj Devél vykedyjá te dživél? Čačó, Raj Devél dživéla pe láte, pe saré viéki. Devléste isyn biš bará (tysjoncy) maribnýtka vurdená, až len isyn bará maškír bará: Raj Devél isyn maškír lénde, syr Jov isyn pe Péskiro Svénto Štéto pe Sinajo. Jov gijá pe vučipená, Jov lyjá plienonen dre navolia. Jov doresciá dáry manušéndyr, až buntiar'jendyr, pal-dová so Raj Devél javéla te dživél odój. Te javél bahtiakirdó Raj Devél, Savó lydžála amaré pharipena so dyvés, Jov isyn Devél, Savó zrakhéla amen. Amaró Devél isyn Devél, Kon zrakhéla amen. Jov isyn Raj Devél, Devél, Savó zrakhéla amen meribnástyr, Čačó, Devél rospharavela Léskire vergéngire šeré, balengire čekata odolengire, savé dživéna dre gréhi. Raj Devél phendiá: “Me janáva len pale Vašanostyr, Me janáva len morjoskire (derjavéskire) xore šteténdyr, sob (kaj) tumarí ĥerój te psirél xor dro léngiro rat, sob (kaj) tumaré-džuklengiri čib te čarel davá rat, kicý lénge trej. Jone dykhné, kiéli Tu gíian, o Dévla, syr Tu gíian, Miro Dévla, Miro Khieningo ke Svénto Štéto. Bagaibnaskire giné angíl, tén'či bašaibnaskire pe strumiénty vydžánas, maškír lénde sys patyvalé terné džuvliá, savé marenas dre bubny. Slavinén i parikirén Devléske odój, kaj manušá skedénape vaš Ráske-Devléske, tumé, kon san Izrailjoskire rodóstyr. Pérvo džála ternedyr Vien'iamino, léngiro barydyró, thagárja Judejátyr péskire manušénca, thagárja Zavulonostyr, thagárja Niefalimostyr. Dévla, sykáv Tyrí zor: zoraliakir dalé réndy (diély), so Tu kerdián vaš aménge. Sob (kaj) králja te janén dáry Túke dre Tyrí Khangirí ke Jerusalimo. Štyliakir riskiribnáskire murdalén (zvierien) dre triščyna, guruvengire ĥurty, savé isyn manušytkoné cieliantenca, paka jone bandjona šerenca angíl rupeskire koterá. Rosčhurde manušypnaskire nácyi, so drieván radynénape maribnastyr. Vykedyné manušá javéna Jegiptóstyr, Efioptiani vyterdena péskire vastá ke Devél. Bagán Devléske, phuvjákire kralipená, bagán šaribnytka giliá Ráske-Devléske. Séla: Savó tradéla uklisto pe bolybén, viéčno bolybén! Gada, Jov déla gódla Péskire zoralé zaniása. Priĥaljon šaribnasa Devléskiro zoralypén! Léskiro fedyripen isyn pir Izrailjo i Léskiri zor dre óbloki. [r.s.] O, Dévla, Savó isyn zoraló ke dar pe Léskire svénta štéty. Izrailjoskiro Devél! Jov déla zoralypén i zor Léskire manušénge. Mek te slavinelpe Devél! Xoróskire Dirižoróske. Pe Lilijakiri Mielodija. Davidóskiro Psálmo. Zrákh man, Dévla, paningá doginé ke mirí men. Me tasadyjom dre xor artapiel' (boloto) i, nane kaj te terdjovav pe ĥerá. Me gijom andré xor paniá, so thadena pe mánde, i savé začhuvena man. Me khinyjom ke men'ka godlymatyr jasvénca, miro kirlo šutija, dre miré jakhá kalyja, syr me užakirava miré Devlés. Len, savé bidykhena man ni palsó, isyn butydyr miré balendyr pe šeró. Jone, savé keréna xasibén pe mánde, isyn zoralé i isyn xohané vérgi. Syr mánge te otdav pale dová, so me na lyjom pe zor? Tu, o Dévla, džinésa miro dylnypén, a miré gréhi isyn na garadé Tútyr. Na domek, Rajo Dévla, Devél bolybnáskire-jangoléngiro, sob (kaj) odolé, savé užakiréna Tut, te javén ladžakirdé pal mánde, na domek, sob (kaj) odolé, savé rodéna Tut, te javén dre ladž pal mánde, o Dévla Izrailjoskiro. Pal Túte man obrakirenas, ladžaipén čhakirdia miro muj. Me jacjom čúžo péskire pšalénge, i nákhetanó (postoronnjo) pšal miré-dákire čhavénge. Miro zevlynypén ke Tyró Kher shačkirdiá man syr jag i odolé, savé obrakirenas Tut, pyné obrakiribnasa pe mánde. Kiéli me teliakirdjom pes i lyjom te postinav, pal davá jone adiáke-pac' man obrakirde, me adiáke-pac' uridjom balytko gonó praskasa syr mirí ídia: tén'či jone adiáke-pac' sandle xoliames mándyr. Odolé, savé isyn bešté pašýl pórta, rakiréna pal mánde, a matymarja bagana giliá pal mánde. Ne me féni pal jekh mangavape Túke, o Rajo Dévla, kiéli isyn lačhó uliago (pora): o Dévla, otphen mánge Tyré lačhé-ilytkimatyr i zrákh man pir Péskiro čačipén; zrákh man dričatyr (tinatyr), sob (kaj) me te na tasadjovav, sob (kaj) mánge te zrakhavpe odoléndyr, savé bidykhena man i xor paningendyr. Mek paningá, so thadena, te na začhuven man cji, sob (kaj) xoripén te na garavel man, i, sob (kaj) ĥanbín bidugnoskiri/kolban' (propast') te na zatyrdel péskiro ziavo (zievo) uprál mánde. Šun man, o Rajo Dévla, pal-dová so Tyrí lačhé-ilýtkima isyn bari. Risjov ke me pir Tyrí bari kovly lačhé-ilýtkima. Na garav Pes Tyré pisharistyr, pal-dová so mánge isyn pharó; vyšún man sýges, iav pašyledýr ke miro di, vyrakh man grehéndyr, mek pe vólia man miré vergéndyr. Tu džinésa, so man obrakirena. Tu džinésa pal mirí ladž, i so manušá na déna patýv mánge, i so miré vérgi saré isyn angíl túte. Vyrakiriben vyhaia miro iló, i me som bizorjákiro, i me užakirdjom, sob (kaj) vari-kon te tanginél (te žalinel) man, ne nikonés na sys, sob (kaj) vari-kon te podrikirél man, ne nijekhes me na lathjom (lastiem). Jone adiáke-pac' dyné mánge želučo dro miro xabén; i kiéli me kamdjom te pjáv, jone dyné šut (uksuso) mánge. Mek léngiro skamínd te kerdjol khudiasa (sietkasa) vaš lénge, mek léngiro mištypén te javél dukhasa te uhtylel len. Mek te kaljon léngire jakhá, sob (kaj) jone te na dykhén lénca i mek léngiro trušúl pe dumo ŭsády (sak) te izdral. Vyčhuv pe lénde Tyrí xolý, i mek Tyré-xoliakiri jag te doresel len. Mek te mekén manušá léngiro kher, mek nijékh te na dživél dre léngire šátry. Pal-dová so, konés Tu pekadian, kodolén jone tradéna, i jone rakiréna pal kalypén pe iló odolengiro, konés Tu dukhadian. Pričhúv čoripén ke léngiro čoripén, i na domek len te dodžan ke Tyró čačipén. Khos krig len Džiibnáskire Lylvarjatyr, čačó, mek jone te na javén začhindlé odój khetané patiaibnytkonenca. Ne me som čororó i mánde saró dukhala, o Dévla! Zrákh man i terdiakir man pe ĥerá. Me javáva te šaráv Devléskiro lav giliasa i me javáva zoralés te šaráv ke vučipén Les i te parikiráv Léske. Davá javéla lačhó Léske butýr, syr te janav guruvén ci guruvorén vaš xačkiribnaskiro svénto dyibén, savénde isyn šyngá (rógi) i ĥerá. Štyl (tiha) manušá dykhéna davá i javéna te radynénpe, i odolé, savé rodéna Devlés, javéna te dživén bahtales. Pal-dová so Raj Devél šunéla čororen, i Jov na čhuvéla dre napatyv, savé popyne dro štaribén. Mek te šarén Devlés bolybén phuv, i móri (derjavá), i saró, so psiréla dre lénde. Devél zrakhéla Sióno i pirikerela Judejákire fórja i Léskire manušá javéna te dživén odój i phuv javéla léngiri. [r.s.] I Léskire-pishar'jengire čhavénge piridžala daja phuv i odolé, savénge isyn drógo Jov, javéna te dživén odój. Xoróskire Dirižoróske. Davidóskiro Psálmo. O, Dévla, zrákh man! O, Rajo Dévla, jav sygedýr te des vast mánge. Mek odolé, savé rodéna te zamarén man (te muliakirén), te javén ladžakirdé, mek te našén i te javén dre ladž odolé, savé kaména čoripén mánge. Mek te risjon pale i te perén dre ladž odolé, kon rakiréla: “Mištó, mek te javél.” Mek te radynénpe i te javén bahtalé Tútyr odolé, savé rodéna Tut. Mek odolé, savénge drógo san Tu, so Tu zrakhésa len, usady (sak) te rakirén: “Mek te šarén zoralés Devlés.” [r.s.] Ne me som čororó i mánde isyn trébima: jav sygedýr ke me, o, Dévla! Tu zrakhésa man, i désa vast mánge. O, Rajo Dévla, na mek man gara (dlúges) te užakirav. Pal Túte, Rajo Dévla, me garadjovava, sob (kaj) Tu te zrakhes man: na domek nijékhvar, sob (kaj) me te javav ladžakirdó. Zrákh man pir Tyró čačipén i pode vast mánge bidatyr; pričhúv kan, so me rakiráva i de zor mánge. Jav vaš mánge skalasa, pal saví mánge ŭsády (sak) te garadjovav. Tu dyján priphenybén te zrakhen man, pal-dová so Tu san sýrby mirí skála i tvárdyma (diz) te prirakhen man. Miro Dévla, zrákh man fujé-manušéngire vasténdyr, napatiaibnaskire i biileskire manušéskire vastéstyr. Pal-dová so Tútyr me užakirava lačhipén, o, Rajo Dévla, Dévla, ke Tu me riskirdjom péskiro iló terné beršéndyr. Tu san mánca, kiéli me iščo (inké) sómas dre dakiri ločoví (utroba). Tu vylyjan man pe svéto dákire ločoviátyr, pal-dová me ŭsády (sak) javáva te šaráv Tut. But manušá dykhéna pe mánde syr pe dívo; ne Tu san mirí zoralý vučardý te ĥaradjovav. Mek te šarén Tut miré uštá, mek jone te slavinén Tut saré dyvesá. Na džá krig mándyr akaná, syr me som phuró, na mek man, kiéli mirí zor tyknjola. Pal-dová so miré vérgi rakiréna pe mánde, a odolé, savé užakiréna te zamarén man, priduminena fuipén khetané, rakirí: “Devél mekciá les. Rodasa les i lása les, pal-dová so nijékh na javéla te zrakhél les’. O, Dévla! Na durjov mándyr. Miro Dévla! Jav sygedýr te des vast mánge. Te javén ladžakirdé, te javén čhakirde bipatyvasa odolé, savé isyn vérgi pe miro di, te čhakiren manušéngiro obrakiriben, i te na den patýv odolénge, kon rodéla čoripén pe mánde. Ne me javáva ŭsády (sak) te užakirav lačhipén Tútyr, i me javáva te šaráv Tut butýr i butýr. Miro muj phenéla pal Tyró čačipén i pal dová, so Tu kerdián te zrakhes amen saré dyvesá, pal-dová so me až na džinóm (džináv) te ginav saró davá. Me javáva Ráskire-Devléskire, miré-Devléskire zorjása, me rosphenava pal Tyró čačipén, féni (tóka) pal Tyró O, Dévla! Tu sykliakirdian man miré ternypnastyr i ke akaná me rakiráva sarénge pal Tyré dívna butiá. O, Dévla! Na mek man, kiéli me som phuró i syvone-balengiro, paka me rosphenava pal Tyrí zor, pal Tyró zoralypén kadalé rodóske, i Savó trej te javél. O, Dévla! Tyró čačipén isyn až ke bolybén, pal-dová so Tu kerdián baré réndy. O, Dévla! Kon isyn dasavo-pac', syr Tu san? Tu dyján mánge te piridživav pharé i fuj dyvesá; ne Tu i džidiakiresa man nevéstyr i Tu vylydžasa nevéstyr man phuvjákire xoripnastyr. Tu désa butýr zor mánge i tu podrikiresa man kažnoné rigátyr. Me adiáke-pac' javáva te šaráv Tut, drieván pal Tyró patiaibén pe luta. O, Miro Dévla! Me javáva te bagáv Túke pe gusli, o Svénto Dévla Izrailjostyr! Miré uštá javéna te radynénpe zoralés, kiéli me javáva te šaráv Tut, bagindoj Túke, i adiáke-pac' miro iló, Savó Tu vyrakhcian grehéndyr. Mirí čib javéla adiáke-pac' te rakirél pal Tyró čačipén pe saré dyvesá; pal-dová so odolé manušá, kon rodéla fuipén pe mánde, ladžakirdé i našade patýv. Solomonóskiro Psálmo. O Dévla! Sykliákir kralís te sendiakirél i kralískire čhavés Péskire čačipnaske. Jov javéla te sendiakirél Tyré manušén pir čačipén, a Tyré čororen pir Zakóno. Bérgi janéna ramánjo (miro) manušénge, a bérgicy čačipén. Jov javéla čačunés te sendiakirél čororé manušén i Jov déla zor odolénge, kon isyn dre trébima i Jov rospharavela kodolés, kon pritasavelas len. Lénde javéla trašaibén angíl Túte, paka kham i čhon isyn pir saré manušýtka ródy. Králi javéla syr bryšýnd pe félda čarjasa, syr baró paning, so čhuvélape pe phuv. Dre léskire dyvesá čačipén i ramánjo javéna pe naj šukaredyr štéto ŭsiendie (viezdie), paka čhon isyn pe bolybén. Léskiro kralipén javéla jekhe morjostyr (derjavestyr) ke javír, Jevfratone rekátyr (leniátyr) ke phuvjákire jagóry (kraí). Kodolé, savé dživéna pe čhučí phuv, javéna te bandiakiren čangá angíl Léste, i Léskire vérgi javéna te čaren práho. Farsisoskire králja, i savé isyn pir ostrovy (džipá), janéna dan', a Arabijakire i Abisinijakire králja čhuvéna angíl dáry: čačó, saré králja peréna pe čangá angíl Léste, saré nácyi javéna te dynarinén Léske. Pal-dová so jov déla zor odoléske, kon isyn dre trébima i kon davá mangéla, rovi; adiáke-pac' i čororeske, i odoléske, konéske nikón na pomoginela. Jov prirakhela čorores i bedones, jov déla zor odoléske, kon isyn dre trébima. Jov vyrakhela léngire džiibena, kiéli len pritasavéna i nahratone manušéndyr, a léngiro rat isyn drógo angíl léskire jakhá. I jov javéla te dživél, i léske javéna te den Arabijakiro suvnakái, i pal léste ŭsády (sak) javéna te mangénpe Devléske, Devél javéla te bahtiakirél les pe saré dyvesá. Givá javéna pherdé i but pir sarí phuv, pe vučipén bergengiro; léngiro baritka javéna te trinskirenpe syr veš pe Liváno; manušá dre fórja javéna te luludjon (te cvetinen) syr čar pe phuv. Kralískiro lav javéla ŭsády (sak): léskiro lav javéla džindló paka isyn kham: léskire manušá javéna bahtalé Devléstyr, saré Najudýtka nácyi javéna te šarén les. Te javél bahtiakirdó Raj Devél, Izrailjoskiro Devél, Savó Jekhdžinó keréla dívna butiá. Mek te javél bahtiakirdó Léskiro lav pe saré viéki! Mek te javél pherdý sarí phuv Léskire slavása. Amín' i amín'. Davidóskire patierja (molitvy) Devléske, Jesiejoskire čhavéskire, končyndlepe. Asafoskiro Psálmo. Davá isyn patiaibén, so Devél isyn lačhó ke Izrailjo, ke kodolé Manušá, savengiro iló isyn žužakirdo ke Jov. Ne miré ĥerá liedz' (nábut so) na obštadepe, miré piré (stópy) iščo (inké) rozdžanaspe dre rigá. Pal-dová so me zevlyndjom phut'kirdé manušénge, kiéli me dykhcjom, syr mištés dživéna fuj manušá. Lénde nane dukhá až ke meribén, léngire masá isyn zoralé. Lénde nane pharipena, syr javire manušénde, lénde nane kalypena, so javír manušá piridživena: paldavá phut'kiribén pe léngire muiá isyn syr miriklia (busy) trusciál men, jone sýrby uridepe dre nahratyma, syr dre ídi; léngire jakhá rosšulyne thulypnastyr, jone duminéna fuipén dro péskiro iló syr trej. Jone sana pe xoliames i rakiréna nahrátes, jone zadenape, kiéli rakiréna. Jone rakiréna fuipén až ke bolybén, léngire čibá (čibjá) psiréna pir manušénde pe phuv. Pal-dová i Devléskire manušá poriskirena ke jone i sýrby vyp'jena pherdó tahtáj (čaša) léngire lavéndyr, syr paní, i phenéna jone: “Syr džinéla Devél? Ci udžinela pal davá amo (Naj) Vučedýr?” Dykh, syr isyn bidevlytkar'jenge; lénge dživelape mištés, jone skedéna butýr i butýr péskire barvalypena. Naúšto (nieuželi) ivjá me prirakhcjom péskiro iló dre žužypen i me vymoravas vastá, sob (kaj) te sykavav, so nane bang mánde? Saró časo mánge sys pharó i kažno zlóko (ránko) Devél pharés sykliakiréla man. Kóli me phenavas: “Ake, syr me javáva te rakiráv, dykhén, tedy me davas dukhá (xohavavas) Tyré-čhavéngire ródo. I mek me dumindjom, so me, xači, galjovavas davá, davá sys dukhano dre miré jakhá, paka me na gijom pe Sventoné-Devléskiro Štéto, féni, tedy me ĥalyjom kónco (jagóro) fujé manušénge. Čačó, Tu čhuvésa léngire ĥerá pe sklizka štéty, Tu čhuvésa len telé te xasjon. Syr adiáke sýges jone jekhátyr xasjona, džána krig sarésa ke xas' meribnytkone darása. Syr sunó pe zlóko (ránko), kiéli manúš džangadjola, adiáke-pac' Tu, Rajo Dévla, kiéli Tu džangadjosa, tén'či Tu bistresa pal adalé fujé manušénde. Kiéli miro iló sys dro kirkipen, a mirí godý sys dukhady, i me sómas dylynó i me na ĥaljovavas but, me sómas syr murdál angíl Túte. Ne saroiekh me ŭsády (sak) sómas Túsa, Tu rikirdian man pal čačó vast. Tu sykliakiresa i lydžása man, tén'či Tu prilesa man lačhé lavésa. Kon iščo (inké) pe bolybén isyn mánde apríč Túte? Mánde nikón nane drógo pe phuv apríč Túte. Mirí loč i miro iló xasjona so dyvés: ne miro Devél isyn skála miré ileske i Tu san saró, so mánde isyn. Pal-dová so, ĥáda, kodolé, savé isyn dur Tútyr, xasjona, Tu xasiakiresa sarén, savé giné krig Tyré droméstyr. Ne vaš mánge isyn mištés te javav pašyledýr ke Devél: Me riskirdjom péskiro iló te zrakhavpe ke Raj Devél, sob (kaj) te rakiráv sarénge pal saré Tyré réndy. Asafoskiro Sykliakiribén. Sóske, Dévla, Tu sarésa gíian krig améndyr? Sóske Tyrí xolý syr thuv ĥazdélape pe bakrende Tyré čaritkone feldatyr? Rípir Tyró skedyibén, so Tu dorescian ĥaredyr, savó isyn sýrby dólia Tyré mištypnástyr. Rípir bérga Sióno, pe saví Tu dživesa. Ĥazde Péskire piré (stópy) pe štéty, so isyn pharade pe viečnyma: vérgo xasiakirdiá saró pe Svénto Štéto. Tyré namala rykinena maškír Tyré Svénta Štéty: jone čhudé péskire znamiénii (ĥiertyká). Pe lénde isyn sykado manúš, savó vučés ĥazdéla tovera maškír ĥensto veš; i kakaná jone phagirena šukár vyčhinyben toveresa i čokanénca (mlotkenca). Jone zahačkirde Tyró Svénto Štéto; jone magirdé štéto ke phuv, kaj manušá skedénape te den patýv Túke. Jone phendlé dro péskiro iló: “Javén, xasiakirasa saró khetané”: jone zahačkirde saré štéty pe phuv, kaj manušá skedénape vaš Devléske. Ame na dykhasa amaré znamiénii (ĥiertyká), nane butýr proróko, i nijékh maškír aménde na džinéla, kicý adiáke javéla? O, Dévla, kicý vérgo javéla te rakirél čoripén? Ci ŭsády (sak) javéla vérgo te kaliakirel Tyró lav? Sóske Tu obrikiresa Tyró vast i až Tyró čačó vast? Tyrde javrí les Tyré brekatyr te xasjol jov. Ne Tu, Dévla, san miro Raj samone anglypnástyr, Savó zrakhéla manušén pe phuv. Tu roskerdian pe pašá mórjo (derjáv) Tyré zorjása, Tu rospharadian šeré morjoskire (derjavéskire) rupučénge (čudoviščenge) dre paniá. Tu pharadian šeré Lieviafanoske (rupučéske), i Tu dyján len te xan manušénge, savé dživéna pe čhučí phuv. Tu začhudian te thaden folahara (fontany) i baré paningá. Tu šut'kirdian baré réki (leniá). Dyvés isyn Tyró, rat isyn adiáke-pac' Tyrí: Tu čhudián čhon i kham. Tu učhudian saré kustyka (granicy) pe phuv, Tu kerdián lynaj i ivant (zima). Rípir davá: vérgo kaliakirdia Tut, Ras-Devlés, i dylyné manušá čhudé dre bipatyv Tyró lav. Sykáv patýv Tyré Zakonoske, pal-dová so pe ciamle štéty pe phuv isyn pherdó kherá nahratone manušénca. Na de riskiribnáskire murdalénge (zvierienge) di, a Tyré manušéngiro, Savó isyn sýrby golumbica! Na bistyr nijékhvar džiibén Tyré pritasade manušéngiro. Na domek, sob (kaj) pritasade manušá te risjon pale pe ladžaipén. Mek čororé i manušá, savé isyn dre trébima, te šarén Tut. Uštý, o Dévla, terdjov pal Tyró čačipén: rípir, syr dylyné manušá obrakirena Tut so dyvés. Na bistyr zan Tyré-vergengiri: Tyré-namalengiro šumo ĥazdélape kažnoné molostyr, savé isyn buntiarja. Xoróskire Dirižoróske. “Na xasiakir” pe Mielodija, Asafoskiro Psálmo. Gilý. Ame parikirasa Túke, o Dévla, ame šarasa i parikirasa Túke, pal-dová so Tyré dívna butiá sýrby rakiréna sarénge, so Tu san pašýl.” “Kiéli Me vykedava lačhó časo – rakiréla Devél, Me javáva te sendiakirav pir čačipén. Phuv i saré lákire džiibnarja kuninenape, ne Me čhudjom stýlby zoralés.” Séla. Me phendjom phut'kirdenge: “Na phutjon!” I fujé manušénge: “Na ĥazdén šyngá (rógi). Na ĥazdén vučés šyngá, na rakirén nahrates, pharé-ilytka manušále.” Pal-dová so séndo džála na odothýr, kaj kham uštéla, ci kaj džála telé, ci čhučé phuvjátyr: Ne Devél isyn sendári, Savó čhuvéla telé jekhen, i Savó ĥazdéla upré javirén. Tahtáj isyn dre Devléskire vastá, i mol (vino) pieninelape, dre saví isyn but so miešyndlo. Jov rosčhuvela la: čačó, saré fuj manušá isyn bangé te p'jen i te smokčynen žyža, so jačélape. Ne me javáva jakhítko (svidietieljo) ŭsády (sak), me javáva te šaráv Jakovóskire Devlés. [r.s.] I Jov čhinela telé saré fujé-manušéngire šyngá (rógi), ne me ĥazdáva zor patiaibnaskire manušéngiro. Xoróskire Dirižoróske. Pe Balytka Strumiénty. Asafoskiro Psálmo. Gilý. Devél isyn džindló dre Judéia, léskiro lav isyn pe baripén dro Izrailjo. I Léskiri Šátra isyn dre Salima, i Léskiro kher pe Sióno. Odój Jov phagirdiá sygna maribnýtka bustiá (striély) pe lúko vergénde, ščýto, kurtála i maribén. Séla. Tu san slavútno, Tu san zoraledýr viečnone bergendyr. Muršén lyné krig zorjása, jone pyné dre soiben; nijékh zoraliukendyr na lathiá butý péskire vastenge. Tyré darátyr, Jakovóskiro Devél, meribnytko vurdén, adiáke-pac' i graj sýrby tasadyne te soven. Tu trašavesa ke meribén, i konéske isyn pir zor te terdjol proti Túte? Tu sendiakiresa bolybnástyr manušénge te šunén, phuv strahadyja i zamyjá; kiéli Tu uštyjan te sendiakires, sob (kaj) te zrakhes saré kovlé-ilytkone manušén. Pal-dová so až manušá dre xolý javéna te šarén Tut, i Tu podphandesape xoliása, saví jačélape. Sovlahán Devléske i mangénpe Ráske-Devléske, tumaré Devléske, mek saré, kon isyn pašýl Léste, te janén dáry Léske, Samone (Naj) Baredyreske ke dar. [r.s.] Jov čhurdéla dre rig thagar'jengiro dúho (fáno), Jov isyn darakuno vaš kral'jenge pe phuv. Xoróskire Dirižoróske. Pir Idifumoste Jeducinoste (Jedutunoste). Asafoskiro Psálmo. Mirí zan isyn ke Devél i me javáva te ĥodlav ke Devél miré zaniása i Jov šunéla man. Me rodyjom Ras-Devlés dre pharé miré dyvesá, miro vast sys ĥazdynó ratý i na obmekelape, miro di otphendiape, sob (kaj) te tanginél Les. Me priripirdjom Devlés, kiéli mánge jaciá pharó, me lyjom te žalinavpe i miro dúho (fáno) pyjá. Jov rikiréla miré jakhá te javén otkerde, mánge isyn pharó i me na mogináva te rakiráv. Me dumindjom (dávas gody péske) pal phurané dyvesá, ĥaratuné dyvesá. Me priripirava mirí gilý ratý, me ripirava miré ilésa i miro dúho (fáno) dobusoves dophučelas: “Ci Raj Devél jačkiréla amen pe saré viéki? Ci Léskiri láska na risjola pale? Ci Léskiri lačhé-ilýtkima končyndiape? Ci léskiro phendló lav na javéla butýr ke ame? Ci Devél bistyrdia te tanginél? Ci Jov parudia Péskiro milo lačhé-ilýtkima pe xolý?” Séla. I phendjom me: “Kadavá isyn mirí ilytko dukh, so Naj Vučedyreskiro čačó vast parudyja.” Me javáva te ripirav Ráskire–Devlekire butiá; čačó, me javáva te ripirav Tyré šukár dívy, so Tu ĥará kerdián, i Me javáva te rozlav ĥodiasa saré Tyré butiá i javáva liéntes te rosphenav pal dová, so Tu kerdián. Dévla! Saró, so Tu kerésa, isyn svénto: kon isyn dasavo baró, syr Tu san, Dévla? Tu san Devél, Savó keréla dívy, Tu sykadian Péskiri zor maškír manušýtka nácyi. Tu vyrakhcian grehéndyr Tyré manušén Péskire zorjása, Jakovóskire i Jozáskire čhavén. Séla. Paniá dykhné Tut, Dévla! Paniá dykhné Tut i jone trinskirdepe. Čačó, xor paniá izdrandyne. Pherdé óbloki pe bolybén dyné telé paniá, bolybén phendiá zaniása, i Tyré maribnýtka bustiá (striély) vurniandyne krig; Tyré-gromoskiri zan (glos) sys baré štormasa, bliskavícy kerdé ziaindlo dud pir saró svéto, phuv izrandyja i trinskirdiape. Tyró drom sys pir mórjo (derjáv) i Tu pirigijan baré paniá i Tyré špery (sliady) na džindlé. Tu lydžijan Tyré manušén syr bakrengiro isyn gurto, Mojzáskire i Aronoskire vasténca. Asafoskiro Sykliakiribén. O, miré manušále! Šunén miro sykliakiribén, pričhuvén kaná ke lavá miré. Me otphandava miré uštá te phenáv priphenybén (pritča) tuménge; me javáva te rakiráv šerepharibnytka (zagadki) ĥalyibnasa, so rakirdé ĥará, savé ame šundiám, i so ame džinása, i so amaré dadá rosphendlé aménge. Dalé lavá ame na garavasa léngire čhavéndyr, sob (kaj) te piriphenas rodénge, so javéna angíl, savé javéna te šarén Ras-Devlés, pal léskiro zoralypén i Léskire baré dívna réndy, so Jov kerdiá. Pal-dová so Jov čhudiá Léskiro dophenybén dro Izrailjo, dyjá Zakóno Jakovóske, pal savó Jov priphendiá amaré dadénge, sob (kaj) jone te sykliakirén léngire čhavén; sob (kaj) ródo, so javéla angíl, te moginel te džinél, i, sob (kaj) čhavé, savé angíl bijandjona, adiáke-pac' te rosphenén Zakóno péskre čhavénge, sob (kaj) jone zoralés te užakiren lačhipén Devléstyr, i te na bistren Devléskire butiá, a te kandén Léskire priphenybená. Mek te na javén jone syr léngire dadá, savengiro ródo sys nakanduno i buntiaritko, i konéskiro ródo na sarésa riskirdiá Peskro iló Devléske, i konéskiro dúho (fáno) na sys patiaibnýtko Devléske. Jefriemóskire čhavé, savénde sys dre vastá luki, risiné pale dro maribnaskiro dyvés. Jone na kandyné Devléskiro Zakóno i otphendlepe te dživén pir Léskiro Zakóno; i jone bistyrde pal dová, so Jov kerdiá i Léskire baré dívy, savé Jov sykadiá lénge. Angíl léngire-dadengíre jakhá Jov kerdiá dívy pir Jegiptóskiri phuv, pe Coanoskiri félda. Jov roskerdiá pe duj pašá mórjo (derjáv) i pirilydžija len pir paní. Jov kerdiá adiáke, so paniá terdiné syr vánta. I Jov lydžijá len bolybnáskire oblokosa dyvesé, a jagakire dudesa (svetosa) ratý. Jov roskerdiá pe duj pašá skaly pe čhučí phuv i paniakirdia len čalés léndyr, syr baré paningendyr; i Jov kerdiá adiáke, so sygna paniá thadyne skalendyr, i so paniá thadyne sýges syr baré paningá. Ne jone saroiekh butýr kerdé gréhi proti Léste i ĥazdenas búnto pe čhučí phuv pe Naj Vučedyreskireste, i jone propatiakirenas Devlés dro péskiro iló, kiéli jone mangné xabén pir péskiro di; i jone rakirdé pe Devléste, phení: “Ci déla ráda Devél te kerél skamínd pe čhučí phuv?” Dykhén! Jov pekadiá dre skála i paniá dynepe te thaden i baré paningá pherdiakirde saró. Ci déla ráda Jov adiáke-pac' te del maró? Ci doreséla Jov mas Péskire manušénge? Paldavá Raj Devél šundiá davá, i Jov drieván xoliásyja, Léskiri xolý roshačija pe Izrailjoskire manušénde i adiáke-pac' xoliakiribén ĥazdyjápe pe lénde, so jone na patiandyné dre Devléste i na rikirde nadiéia, so Jov déla vast lénge. Ne Jov priphendiá oblokenge, so isyn uprál, i Jov psiradia (otkerdia) bolybnáskire vudará, i Jov čhudiá syr bryšýnd pe lénde (manna) te xan i Jov dyjá lénge bolybnáskiro giv. Manušá xanas Jangoléngiro xabén: Jov bičhadiá lénge xabén čalés. Jov kerdiá te phurdel vastokitko balvál te phurdel dro bolybén i lydžijá angle te phurdel balvál zervone (lievone) rigátyr, I Jov kerdiá te perél mas pe lénde syr práho i čiriklen phakenca, syr práho pe morjoskiro (derjavéskiro) brégo. I Jov kerdiá adiáke, so jone pyné maškír péskiro taboro (lod), trusciál péskire šátry; i jone xané i čalyne pherdés i Jov dyjá lénge dová, so jone bitukoskiro kamlé. Jone na giné krig péskire xabnastyr, so sys lénde bitukoskiro, léngiro xabén usá sys dre léngire muiá, kiéli Devléskiri xolý javdiá pe lénde i muliakirdiá naj thuledyronen léndyr i, ake, zaradia vykedyné manušén Izrailjostyr. Ne na dykhí pe davá, jone ŭsa kerdé gréhi, i jone na patiandyné dre Léskire baré dívna butiá, paldavá Jov i domekcia, so léngire dyvesá sys syr balvaliakiro phurdypen, a léngire beršá džánas dre dar ke meribén. Kiéli Jov zamarelas len, tedy jone rodenas Les, i jone riskirenas péskiro iló i zoralés rodenas Devlés, i jone ripirenas nevéstyr, so Devél isyn léngiri skála, i so Naj Vučedyreskiro Devél isyn Odová, Kon zrakhéla len. Jone šarenas Les na iléstyr péskire mujenca, i léngire čibá xohavenas Léske, a léngiro iló na zoralés patialas dre Léste i jone na sys patiaibnytka angíl Léskiro zavieto. Ne Jov isyn lačhé-iléskiro: Jov otmekciá čoripén i na phagirdiá len. But móly Jov riskirelas krig Péskiri xolý, i Jov na džangavelas Péskiri bari xolyn. Pal-dová so Jov ripirdia, so jone sys féni (tóka) manušýtko loč (plot'), saví isyn na viéčno, sýrby balvaliakiro phurdypen, so džála krig i na risjola pale. Syr but móly jone na kandenas Les pe čhučí phuv, jone xoliakirenas Les pe bimanušengiro štéto. I jone nevéstyr i nevéstyr risjonas pale, propatiakirenas Devlés i dukhavenas Sventoné Devlés Izrailjostyr. Jone na ripirde Léskiro vast dro dová dyvés, kiéli Jov rakhciá len vergostyr, savó tasadia len, syr Jov sykadiá Péskire znamiénii (ĥiertyká) dro Jegípto, syr kerdiá Péskire dívy pe Coanoskire féldy; i pirikerdia léngire réki (leniá) i rekicy dro rat, sob (kaj) jone na moginénas te p'jen. Jov bičhadiá dukhane matlien (nasiekomonen) te xan léngire masá i capnien (žamben), savé xasiakirenas len; Jov adiáke-pac' otdyjá léngire-givengiro umaloto raupénge (gusinicénge) te xan, a léngire butiá skočkenge; Jov xasiakirdiá léngire vinagrady (drakhá) ĥradosa i léngire sikamorytka drevy mrazosa. Jov otdyjá léngire murdalén tel ĥrado i léngire ĥurty tel baré bliskavícy Jov bičhadiá pe lénde sýrby jag Péskire xoliátyr, xoliakiribén, xoliakiri, zor i pharipén, kiéli meribnaskire Jangóly pyné pe lénde. Jov vymekcia Péskiri xolý, Jov na vyrakhelas léngire dijá meribnástyr, a Jov otdyjá len meribnytkone fransenge (morovóske). I Jov muliakirdiá kažnoné pervoné bijatós dro Jegípto, pervoné rodoskires, savéstyr lélape zor pe Xamoskire šátry, I Jov kerdiá, so Léskire manušá giné angíl syr bakré i Jov lydžijá len pir čhučí phuv syr ĥurto; i Jov lydžijá len bidarakires, jone na strahadjonas, a mórjo (derjáv) čhakirdia upralestyr léngire vergén. I Jov dolydžija len ke kustýka (ke granícy) Péskire Sventoné-Phuvjakiri, ke bérga, so léskiro čačó vast doresciá; I Jov tradyjá krig Najudýtka nácyi angíl lénde, i Jov roskerdiá pe pašá phuv maškír lénde, syr meknó mištypén pir čerta, i Jov kerdiá, sob (kaj) Izrailjoskire ródy te dživén pe péskire šátry. Ne jone propatiakirenas Naj Vučedyreskire Devlés, prezentynenas Les i jone na rikirenaspe ke Léskire dophenybena. I jone dynepe pale i sys napatiaibnytka syr léngire dadá: jone vyrisjonas syr bangó lúko. I jone xoliakirde Les péskire štetenca pe bérgicy, kaj jone dénas patýv i jone prezentynenas (dražninenas) Les léngire vyčingirde idolenca. Devél šundiá davá, Jov xoliásyja, i Jov tradyjá krig Izrailjo dur Péstyr: Jov mekciá Péskiro Štéto Silómo, šátra, kaj Jov dživdiá maškír manušénde, I Jov otdyjá Péskiro zoralypén dro pliéno i Péskiri sláva dre vergéngire vastá; I Jov adiáke-pac' otdyjá tel kurtála Léskire manušén i sys xoliamó pe Léskire čhavénde: iag shaia Léskire-tyrne manušén i Léskire patyvalé džuvlién na bagandle bjavitka giliá. Léngire rašaja xasjonas kurtalátyr, léngire pivlia (udovy) na mogindlé te rovén. Tén'ci Raj Devél džangadyja sýrby soibnastyr, sýrby kodová zoralypnaskiro manúš, savó radynélape ĥodlasa moliátyr (vinostyr); I Jov tradyjá krig Péskire vergén, Jov čhudiá len pe ladž, so nijékhvar na končynelape. I Jov otphendiape Jozáskire šatratyr, i Jov na vykedyjá Jefriemoskiro ródo, ne Jov vykedyjá Judáskiro ródo, Sionóskiri bérga, saví Jov vykedyjá Péske; I Jov ĥazdyjá Péskiro Svénto Štéto vučés syr bérgi, syr phuv, saví Jov začhudia pe saré viéki. I Jov vykedyjá Davidós, Péskire pisharís, i Jov lyjá les bakréngire gredatyr (dvorostyr): Jov lyjá les bakréndyr, Savó dénas ciuci (kolýn) tyknorenge, Jov lyjá les te čaravel Péskire manušén, Jakovoskiren i Izrailjoskiren, Péskire čhavengiren. I Jov čaliakirdia len sarén Péskire iléstyr, i lydžijá len Péskire god'varé vastésa. Asafoskiro Psálmo. O Dévla! Najudýtka nácyi giné andré dro Tyró meknó mištypén. Jone magirdé Tyrí Svénto Khangirí, jone kerdé Jerusalimóstyr rade bará. Jone dyné Tyré-dynar'jengire trúpy, syr xabén bolybnáskire čiriklenge, Tyré-sventonengire masá murdalénge pe phuv: Jone pročhude léngiro rat syr paní trusciál Jerusalimo i nani nijékh, kon garavelas len. Amaré susiédy (kotárja) obrakirena amen. Manušá, savé isyn trusciál aménde, sanape xoliames i sanape xoliames améndyr. Syr ĥará, o Rajo Dévla! Ci Tu ŭsády (sak) javésa te xoliasos pe aménde? Ci javéla Tyró zevlynypén (rievnost') te xačol syr jag? Vymek Péskiri bari xolyn pe Najudýtka nácyi, savé na džinéna Tut, i pe kralipená, so na prikharena Tyró lav. Pal-dová so jone xané Jakovóskiro ródo i rosphagirdé ke phuv štéto, kaj jov dživdiá. Na rípir gréhi, amaré prapapengire, mek Tyrí bari lačhé-ilýtkima te pirilel amen naj sygedýr: pal-dová so ame dogijam sarésa ke phuv. Pode vast, o Dévla, Savó zrakhésa amen vaš sláva Tyré lavéske, zrákh i otmek aménge amaré gréhi vaš Tyró lav. Sóske Najudýtka nácyi rakiréna: “Kaj isyn léngiro Devél? Mek amaré jakhá te dykhén, syr Tu otdesa pale Najudytkoné nacyienge, so jone pročhude rat Tyré pishar'jengiro. Mek Tu te šunés, syr phandlo manúš déla ĥondiá (ŭzdyhinela) godlása. Rakh čhavén, savé džána pe meribén Tyré baré-vasteskire zorjása. I otdé pale dre eftá (bitrinéngiro deš) móly fujedýr obrakiriben amaré kotar'jenge (susiedenge) dro léngiro breg pal dová, so jone obrakirenas Tut, o Rajo Dévla. Tedy ame, savé sam Tyré manušá i bakré Tyré ĥurtoskire, ame javása ŭsády (sak) te parikiras Túke, ame javása te sykavas angíl ródo ke ródo Tyrí sláva. Xoróskire Dirižoróske. Dophenybén pe Lilijakiri Mielodija. Asafoskiro Psálmo. Pričhúv kan, Izrailjoskiro Čhupnári! Tu, Savó lydžijan Jozas (Iosifos) syr ĥurto; Tu, Savó san beštó maškír Xieruvimende, sykadjov Pes. Sykáv Péskiro zoralypén angíl Jefriemoste, Vienijaminoste i Manasijaste, jav te zrakhes amen. O, Dévla! Zoraliakir pale amen i mek te ziainel Tyré-moskiro dud i ame zrakhasape. Rajo Dévla, bolybnáskire-jangoléngiro Devél! Ci but javésa Tu te xoliasos pe mangipén Tyré-manušéngiro? Tu čaliakirdian len marésa jasvénca i Tu kerdián, sob (kaj) jone te p'jen jasva baré mierasa? Tu kerdián, sob (kaj) amaré susiédy (kotárja) te marénpe pal aménde i amaré vérgi te sanpe améndyr maškír péste. O, Dévla, bolybnáskire-jangoléngiro! Zoraliakir pale amen i mek te ziainel Tyré-moskiro dud, i ame zrakhasape. Tu jandian vinagradoskiro xrústo (loza) Jegiptóstyr, Tu tradyjan krig javír nácyi i čhudián davá xrústo dre phuv: Tu žužakirdian štéto angíl davá, léskire kórni (rukhá) giné xor i jov rozbarija pir sarí phuv. Bergicy sys učhakirde léskire zorjása i léskire randiá sys syr baré kiedry. Jov rozmekcia péskire randiá (vétki) ke mórjo (derjáv), a péskire senki (suki) ke reka (len'). Sóske Tu phagirdian tyny (ogrady), so sys trusciál daja bar, sob (kaj) kažno, kon prodžála mamúi, te obkošel lákire múri? Vešytko baličo podĥanavela kórni (rukhá) i feldytko murdál (zvierjo) obhala les. O, Dévla, bolybnáskire-jangoléngiro, ame drieván mangasa Tut te risjos pale. Dykh telé bolybnástyr pe aménde i, ake, jav te dykhés Péskire-vinagradoskiri bar; iav i rozdykh dalé vinagradoskire kaštore, savé Tyró čačó vast počhudia i léskiro terné randiá (otbaripen), so Tu kerdián zoraledýr Jone shačine jagása, vyčingirde; mek te xasjon jone Tyré-moskiri xoliátyr. Mek Tyró čačó vast te javél upredyr vastéstyr Tyré manušeskirestyr, konéske Tu dyján zor vaš Péske. Tedy ame na dasape pale Tútyr, džidiakir amen nevéstyr (nevés) i ame prikharasa Tyró lav. [r.s.] Zorjakir amen nevéstyr, o Rajo Dévla, Devél bolybnáskire-jangoléngiro; ker, sob (kaj) te ziainel Tyró muj i ame zrakhasape. Xoróskire Dirižoróske pe Gatoskiro Strumiento. Asafoskiro Psálmo. Bagán radymása Devléske, amaré Zoralypnaske, bagán zoralés Jakovóskire Devléske; len te bagán gilý, janén bubno (tamburino) adarík, i milone-bašaibnaskire gusli lutasa. Phurdén dro rógo (truba) pe nevó čhon, pe pherdó čhon, dro dyvés amaré svenkoskiro. Pal-dová so davá isyn Izrailjoskiro statúto (ustavo), Jakovóskire-Devléskiro Zakóno. Jov dyjá davá syr dophenybén vaš Jozáske (Iosifoske), syr Jov vydžálas Jegiptóskire phuvjátyr. Me šundjom čib, saví me na ĥalyjom: “Me vylyjom léskiro psikó ĥamostyr; léskire vastá jačné vol'na khudendyr (korzinendyr). Tu prikhardian man dro pharipén i me podyjom vast túke bidatyr, me otphendjom túke gromoskire garadé štetóstyr, me propatiakirdjom tut pašýl Mierivaskire paniá. Séla. Šunén, miré manušále, i me dophenava tuménge, o Izrailjo, kóli tu šunesas man: Na javéna čúža devloré tuménde, i tumé na dénas patýv čužoné devloreske. Me som Raj Devél, Tyró Devél, Savó vylydžijá tut Jegiptóskire phuvjátyr: otphande buĥles Tyró muj i Me pherdiakirava les. Ne miré manušá na šundlé Mirí zan (glos), i Izrailjo na kandyjá man. I Me jačkirdjom len, sob (kaj) jone te dživén pir péskiro pharó iló, sob (kaj) jone te psirén syr lénge duminelape. O, kóli miré manušá te šunén rakhunes man, kóli Izrailjo te dživél miré dromésa. Me sýges teliakiravas léngire vergén tel ĥerá i me riskiravas Miro vast pe léngire namalende. Odolé, savé bidykhena Ras-Devlés, bandiakirenas šeré angíl Léste, a léngiri kára javélas usady (sak).” [r.s.] I Jov čaravelas len pherdés naj fededyršone parné givesa i jone javénas čale feldytkone avginestyr (medatyr). Asafoskiro Psálmo. Devél isyn terdó pe Devléskiro skedyibén, Jov sendiakiréla maškír devlende. Ci but javésa Tu te sendiakires načačunes i te priles fujé manušén? Sendiákir čačunés čororen i bidadeskiren, ker čačipén odolénge, savén tasavena i kodolénge, savénde isyn trébima. Pode vast čororenge i odolénge, savé isyn dre trébima, zrákh len fujé-manušéngire vastéstyr. Jone na džinéna, na ĥaljona, jone dživéna dro kalypén (ciamlypén): saré sventoskire-fundamienty zatrinskirdepe. Me phendjom: “Tumé san Develá i san čhavé Naj Baredyreskire. Ne tumé meréna syr saré manušá, i peréna syr i thagárja (kniázi).” Terdjov angíl, o Dévla, sendiakir phuv, pal-dová so saré manušýtka nácyi javéna Tyré, syr Tyró meknó mištypén. Gilý. Asafoskiro Psálmo. O, Dévla! Na beš štyl, i na jav muto (niemo), na jav štyl, o Dévla: pal-dová so, ake, Tyré vérgi godlena, i odolé, savé bidykhena Tut, ĥazdéna péskire šeré, Jone zrakirenape frentes pe Tyré manušénde, jone zaduminena fuipén proti odolénde, savén Tu prirakhesa; jone rakiréna: “Javén te kerás, sob (kaj) te vyčhurdas len syr nacyja, sob (kaj) butýr Izrailjoskiro lav te na ripirelpe.” Pal-dová so jone zrakirdepe dre jekh godý, jone khetaniakirdepe proti Túte. Šátry Jedomoskire i Ismail'tianengire, Moávo i Agaro, Ĥievalo i Amono i Amaliko, Filistimliáni i Tiroskire džiibnáskire, Asirija adiáke-pac' gijá lénca; jone dyné vast Lotoskire čhavénge. Séla. Ker adiáke-pac' Midianenge syr Sisaraske, syr Iadinoske pašýl sýgno paning Kisono, savé xasiné pašýl Jendoro, savé jačné syr phuvjákiro gnejo (gnojo). Ker léngire thagar'jenca (kniaz'jenca) syr Orievosa (Ariebosa), Zivosa i saré léngire kralískire semencenca, syr Zebosa i Salmanosa, pal-dová so jone phendlé: “Javén, lása péske Devléskire čaritka phuvjá.” O, mro Dévla! Ker léndyr vihroskiro pylo, piriker len dre čhučó phus angíl balvál. Syr jag xačkiréla veš, syr bari jag podhačkirela bérgi, adiáke-pac' trade len baré štormosa i trašakir len Tyré-xoliamé balvaliasa. Rajo Dévla! Učhakir léngire muiá ladžakiribnasa, sob (kaj) jone te rodén patýv Tyré lavéske. Te javén jone ladžakirdé i trašakirde pe saré viéki, te našaven jone patýv i te xasjon: [r.s.] sob (kaj) jone te džinén, so Tu san Jekhdžinó, Konéskiro lav isyn Raj Devél, Sámo Baredýr pe sarí phuv. Xoróskire Dirižoróske pe Giedoskire Strumiénty. Psálmo Kariejoskire-Čhavéngiro. Save kučoné isyn Tyré šátry, o Rajo Dévla, bolybnáskire-jangoléngiro. Dro miro di isyn smega/truš (žažda) i jov až našavela zor, sob (kaj) mánge te javav dre miré Ráskire-Devléskiri gréda (dvóro), miro iló i mirí loč, xaj, kharéna radymakire zaniása džidé Devlés. Dykh! I čirikly lathiá kher péske i bahirka (lastočka) kúfo (ĥniazda) péske, kaj joj čhuvéla péskire tyknoren pe Tyré altári, o Rajo Dévla, bolybnáskire-jangoléngiro, miro Králi i miro Devél. Bahtalé isyn odolé, savé dživéna dro Tyró kher: jone kažno mólo javéna te šarén Tut. Séla. Bahtaló isyn kodová manúš, konéskiri zor isyn Tútyr, konéskiro iló isyn pe drom ke Sióno; syr jone džána duredýr pir Rovibnaskiro dólo, jone pirikerena les dre panieskire ĥanyngorja, bryšýnd učhakiréla daja phuv bahtiakiribnasa. Jone džána jekhe zorjátyr ke javír zor, kažno léndyr javéla pe bérga Sióno angíl Devléste. Rajo Dévla, Devél bolybnáskire-jangoléngiro, šun mirí pátieri, prišunpe Jakovóskiro Devél. Séla. Ĥáda, Dévla, Tu san amaró ščýto, podykh pe muiá Tyré manušéngiro, konés Tu pomakhcian. Pal-dová so jekh dyvés pe Tyrí gréda isyn fedýr, syr bar (tysjonco) dyvesá. Me vykedyjom fedýr te terdjovav pašýl vudár Devléskire-Kheréskiro, syr te dživáv dre šátry, kaj fuj manušá. Pal-dová so Raj Devél, Devél, isyn kham i ščýto: Raj Devél déla bahtalypén i sláva. Jov na javéla te zarikirel lačhipén odolénge, savé dživéna čačipnaskires. [r.s.] Raj Devél, bolybnáskire-jangoléngiro, te javél bahtaló manúš, savó drieván patiála dre Túte. Xoróskire Dirižoróske. Psálmo Kariejoskire-Čhavéngiro. O, Rajo Dévla! Tu potangindian Péskiri phuv; Tu riskirdian pale Izrailjo plienóstyr: Tu primangdian saró čoripén Tyré manušénge, Tu otmekcian saré léngire gréhi. Séla. Tu skedyjan ke Pe sarí Péskiri bari xolyn, Tu porisijan Tyré-xolynakire jagatyr. Dévla! Tu, Savó zrakhésa amen. Rískir pale amen, ker adiáke, sob (kaj) Tyré xoliakiri zor te pirijačel pe aménde, Ci javésa Tu ŭsády (sak) te xoliasos pe aménde. Ci javéla Tyrí xolý duredýr te javél pe saré ródy? Ci otdžidiakiresa Tu nevéstyr amen, sob (kaj) miré manušá moginénas te radynénpe dre Túte? Sykáv aménge Tyró tangipén, o Rajo Dévla, i de aménge Tyró zrakhibén. Me javáva te šunav, so Raj Devél, Devél phenéla: pal-dová so Jov javéla te rakirél pal ramánjo (miro) Péskire manušénge i Péskire devlytkonenge, sob (kaj) jone te na perén nevéstyr dro dylnypén. Čačó, léskiro zrakhibén javéla pašýl odolénde, savénde isyn trašaibén angíl Léste, sob (kaj) Devléskiri sláva te javél pir amarí phuv. Lačhé-ilýtkima i patiaibén džána khetané, čačipén i ramánjo (miro) čamudenape jekh jekhésa. Patiaibén uhtela krig phuvjátyr, a čačipén javéla te dykhél telé Bolybnástyr. Čačó, Raj Devél déla lačhipén aménge i amarí phuv otdéla péskiro aplodo. [r.s.] Čačipén džála angíl Léste i keréla drom Léskire pirénge (stopénge). Davidoskiri Pátieri (Molítva). O, Rajo Dévla, pričhúv telé Tyró kan, otphen mánge, pal-dová so me som čororó i dre trébima. Rakh miro di, pal-dová so me som devlýtko. Tu san, miro Dévla, Savó zrakhéla Péskire pisharís, kon risjola ke Tu te zrakhelpe. Jav tangipnaskiro ke me, o Rajo Dévla, pal-dová so, me so dyvés prikharava Tut saré zorjátyr. Obradyn Tyré-pishariskiro di, pal-dová so me ĥazdáva péskiro di ke Tu, Rajo Dévla. Pal-dová so Tu, Rajo Dévla, san lačhó i Tu kamésa te primanges: Tu san barvaló lačhé-ilytkimasa sarénge, kon prikharela Tut. Pričhúv kan, o Rajo Dévla, syr me mangavape Túke, prišunpe ke mangipén, syr manušá prikharena Tut. Me javáva te prikharav Tut dro dyvés, syr isyn pharó mánge, pal-dová so Tu otphenesa mánge. Nane nijékh dasavo maškír devlorende, syr Tu san, Rajo Dévla, nijékh na keréla dasavé butiá, syr Tu. Saré nácyi, savé Tu sozdyjan, javéna i déna patýv Túke. O, Rajo Dévla, jone déna sláva Tyré lavéske. Pal-dová so Tu san baró ke vučipén i kerésa baré dívna butiá: Tu san féni (tóka) Jekh Devél. Sykliákir man te psirav Tyré dromésa, Rajo Dévla. Me javáva te dživáv pir Tyró patiaibén: ker adiáke, sob (kaj) dro miro iló te javél trašaibén angíl Devléste. Me javáva te šaráv Tut saré miré iléstyr, o Rajo Dévla, miro Devél, i me javáva te slavinav Tyró lav pe saré viéki. Pal-dová so Tyrí lačhé-ilýtkima isyn bari ke vučipén i Tu vytyrdyjan miro di samone telatuné liunostyr (adostyr). O, Dévla! Phut'kirdé manušá ĥazdynépe pe mánde i nahratone-manušéngiro skopo rodelas te zamarén man, i jone na rikiréna Tut dre godý angíl péste. Ne Tu, o Rajo Dévla, san lačhé-iléskiro Devél, tangipnaskire i vyrikiribnytko, Tu san barvaló pe lačhé-ilýtkima i patiaibén. Risjov ke me i jav tangipnaskiro ke me, piride Tyró zoralypén Tyré pisharíske i rakh Tyré-pisharicakire čhavés. Sykáv Tyré-lačhipnaskiri ĥiertýk (znamiénijo), sob (kaj) odolé, savé na kaména man zoralés, moginénas te dykhén i jone javénas ladžakirdé, pal-dová so Tu, Rajo Dévla, dyján vast mánge i podrikirdian man. Kariejoskiro Čhavéngiro. Psálmo. Gilý. Raj Devél začhudia Péskiro fóro pe svénta bérgi. Ráske-Devléske isyn drógo Jerusalimóskiri pórta (vrata) butýr saré Jakovóskire šatrendyr. Slavutka lavá ke baró šaribén phenéna pal túte, Devléskiro fóro. Séla. Me javáva te ripirav Jegípto i Vavilóno odolénge, savé džinéna Man: Ĥáda, Filistija i Tíro Jefiopijasa phenéna-kadavá manúš bijándyja odój. I jone javéna te rakirén pal Sióno: “Kadavá manúš bijándyja odój i Naj Vučedyreskiro začhudia davá fóro.” Raj Devél čhuvéla nangloró (zakovyčka) mamúj lavá dalé manušéngire, kiéli Jov javéla te piriginel dalé manušén: “Kadavá manúš bijándyja adái.” Séla. I bašaibnaskire i bagaibnaskire phenéna: “Saró lačhipén džála tútyr, Sióno.” Gilý i Psálmo Kariejoskire Čhavéngiro. Xoróskire Dirižoróske. Mielodija Tugasa. Emanakire-Ezrahitoskiro Sykliakiribén. O, Rajo Dévla, Devlale, Savó zrakhéla man. Me rovava godlása dyvés i rat angíl Túte. Mek te dodžal mirí pátieri (molítva) ke Tu, pričhúv telé kan, syr me rovava. Pal-dová so miro di isyn pherdó pharipnenca i miro džiibén dodžála ke maĥila. Man ginéna akaná khetané odolenca, savé džána ke ĥanbín (jama); me som manúš, savéste nane zor: Savó isyn meknó maškír mulende, sýrby odolé, so isyn zamardé i pašté dre ĥanbín, konés Tu butýr na ripiresa, i savé isyn čhurdyné te xasjon Tyré vastésa. Tu čhudián man dre sámo telatuny ĥanbín dre kalé (ciamle) štéty, dro sámo xoripén. Tyró xoliakiribén čhudo pe mánde i Tu tasavesas man saré Tyré valnenca. Séla. Tu durjakirdian miré malen (drugen), Tu kerdián, sob (kaj) jone te jačen džungalé mánca: me som zaphandlo, me na mogináva te džav javrí. Mirí jakh kerdjola fujedýr rovibnastyr. O, Rajo Dévla! Me so dyvés kharavas Tut jasvénca, me tyrdava Péskire vastá ke Tu. Ci javésa Tu te kerés dívy mulenge? Ci uštena mulé i parikirena Túke. Séla. Ci javéla phendló sarénge dre ĥanbín pal Tyrí lačhé-ilýtkima? Ci pal Tyró patiaibén dro štéto, kaj xasjona? Ci javéla džindló pal Tyré dívy dro kalypén (ciamlypén), ci pal Tyró čačipén pe phuv, kaj bistresa? Ne me dáva gódla ke Tu, Rajo Dévla i pe zlóko (ránko) miro mangipén angíl Túte. O, Rajo Dévla, sóske Tu jačkirdian miro di? Sóske Tu garavesa Péskiro muj mándyr? Miré čhavoripnastyr man tasavena i me nábut so na meráva. Me menčynavpe darátyr ke meribén, Me sarésa pyjom dro dúho (fáno). Tyrí jaguny bari xolyn gijá pir mánde; Tu darakirdian man ke xasibén: Jone oblenas trusciál man syr baró paní; jone tasavenas man khetané saré rigéndyr. [r.s.] Tu durjakirdian mándyr males (drugos) i manušvare manušés, miré džindlé manušés. Kalypén (ciamlypén) isyn pe léngiro štéto. Sykliakiribnaskiri Gilý Jefanostyr Ezrahitostyr. Me ŭsády (sak) javáva te bagáv pal Ráskire-Devléskiri lačhé-ilýtkima miré mósa, ne me javáva te rosphenav sarénge pal Tyró patiaibén rodóstyr ke ródo. Pal-dová so me phendjom: “Lačhé-ilýtkima javéla te jačélpe pe saré viéki.” Tu zorjakirdian Péskiro patiaibén až ke sámo bolybén. Me sčhudjom zavieto Miré vykedyné manušénca. Me sovlahadjom Davidóske, miré pisharíske. Me dáva zor Tyré rodóske pe saré viéki, i ĥazdáva Tyró trono pe saré ródy. Séla. I bolybnáskire Jangóly javéna te šarén Tut pal Tyré dívy, Rajo Dévla, adiáke-pac' pal Tyró patiaibén pe sventonengiro skedyibén. Kon pe bolybén isyn ravno Ráske-Devléske? Konés maškír bolybnáskire Jangolende saštý te priparuven Rása-Devlésa. Devél isyn baró ke dar pe sventonengiro skedyibén, Jov isyn zoralypnaskiro, sob (kaj) saré, kon isyn pašýl Léste, te den bari patýv Léske. O, Rajo Dévla, Devél bolybnáskire-jangoléngiro! Konéste isyn dasavo zoralypén syr Túte, Rajo Dévla? Tu san patiaibnýtko dro saró. Tu rikiresa zor pe mórjo (derjáv), syr jov xoliames ĥluminela: kiéli léskire valny ĥazdénape vučés, Tu štyliakiresa len. Tu pharadian Jegípto pe koterá, syr kodolés, kon isyn muliakirdo; Tu rosčhurdyjan Tyre vergén Tyre zoralypnaskire vastésa. Tyró isyn bolybén i Tyrí isyn phuv, svéto i saró, sósa jov isyn pherdó. Tu začhudian len. Tu sozdyjan paš-ratítko i paš-dyvesýtko rig, Favoro i Jermono radynénape Tyré lavéstyr. Tyró psikó isyn zoralypnaskiro; zoraló isyn Tyró vast, vučó isyn Tyró čačó vast. Čačipén i čačunó séndo rikiréna Tyró trono, lačhé-ilýtkima i patiaibén džána angíl Túte. Bahtalé isyn manušá, savé džinéna rádyma Tyré zaniátyr (glosiátyr): jone dživéna pir dud (svéto), savó džála Tútyr. Jone célo dyvés radynénape Tyré lavéstyr; i jone ĥazdénape radymása Tyré čačipnastyr. Pal-dová so Tu désa sláva léngire zorjake, i Tu ĥazdesa amen vučés Tyré laskasa. Pal-dová so Raj Devél isyn amaró ščýto, i amaró Králi isyn Sventoné Izrailjostyr. Vari-syr Tu rakirdian dro sunó Péskire Sventoneske i Tu phendián: “Me dyjom vast jekhe murškaneske, Me ĥazdyjom les pe trono, savés Me vykedyjom manušéndyr. Me lathjom Miré pisharís Davidós, me pomakhcjom les Miré sventoné olivitkone dzetesa (jeliejosa): Me čhuváva Péskiri burnyk (ladožka) te podrikirav les, i Miro vast javéla te zorjakirel les. Vérgo na déla dukhá les i čoro manúš na pritasavela les. I me pharavava léskire vergén angíl léskiro muj, i Me ravava odolén, savé bidykhena les. I Miro patiaibén i drógo lačhipén javéna lésa i léskiro ródo javéla ĥazdynó šaribnasa Miré lavésa. Me čhuváva léskiro vast pe mórjo (derjáv) i léskiro čačó vast pe réki (leniá). Jov javéla te del gódla Mánge! Tu san miro Dad, miro Devél i Skála te zrakhavpe.” Me keráva les Miré pervonesa (anglatunesa), savó javéla sámo vučó phuvjákire kral'jendyr. Me javáva te rakhav Mirí lačhé-ilýtkima pe saré viéki, i Miro zavieto jačélape tvardes lésa. I me ŭsády (sak) javáva te zorjakirav léskire čhavén i léskiro trono javéla adákicy dyvesá, kicý isyn bolybén. Kóli léskire čhavé mekéna Man, i na javéna te dživén pir Miré priphenybená; pal-dová so jone javéna te phagiren Miré statúty (ustavy) i na javéna te rakhén Miré priphenybená: tedy Me čhuváva kára destesa pe lénde pal léngire čoré réndy, i Me pekavava len pal léngire gréhi. Ne me na lavá krig Mirí lačhé-ilýtkima Davidostyr i Me na domekava, sob (kaj) miro patiaibén te xasjol; Me na phagirava Miro zavieto, Me na paruvava dová, so vygijá Miré móstyr. Jekhvar me sovlahadjom Miré Sventymasa, so me nijékhvar na xohavava Davidós: léskiro ródo ŭsády (sak) jačélape i léskiro trono javéla ĥará (dlúges), syr kham, so svencynela angíl Mánde. Jov javéla ŭsády (sak) syr čhon i syr patiaibnýtko jakhítko pe bolybén. Séla. Ne Tu, Rajo Dévla, jačkirdian i na prilyjan Les, Tu sánas drieván xoliamó pe Tyré pomakhne pishariste, Tu risijan krig Zavietostyr, so Tu dyján Tyré dynaríske, Tu čhurdyjan viánka (koróna) pe phuv. Tu phagirdian saré léskire foróskire ogrady, Tu pirikerdian saré foróskire rikiribena dre rade bará. Saré, kon džála mamúi, občorena les, a saré pašatuné obrakirena les. Tu dyján zor manušéskire čačé vasteske; savó pritasavelas les, Tu kerdián, sob (kaj) saré léskire vérgi te radynénpe: ĥáda, Tu tempiakirdian léskire-kurtalakiri vóstrima (čolypén), i Tu na ĥazdyjan les dro maribén. Tu kerdián, so léskiri sláva pirijaciá te ziainel i Tu čhurdyjan pe phuv léskiro trono; Tu kerdián tyknedýr léskire tyrne beršá, Tu učhakirdian les ladžasa. Séla. O, Rajo Dévla! Kicý javésa Tu te garadjos? Ci javéla Tyrí bari xolyn te xačol syr jag? Rípir, me mangav Tut: savó miro džiibén isyn. Vaš savó xarnypén (sujéta) Tu sozdyjan manušytkoné čhavén? Savó manúš saštý te dživél i te na dykhél meribén? Ci zrakhéla jov péskiro di liunoskire zorjátyr? Séla. O, Rajo Dévla, kaj isyn Tyró drógo lačhipén, savó ĥaredyr sys Túte, so Tu sovlahadian Davidóske Tyré patiaibnása? Rípir, o, Rajo Dévla, syr obrakirena Tyré dynarís! So me pirilydžijom pal brek, syr but manušá obrakirena, sósa Tyré vérgi prokošena Tut, o Rajo Dévla, sósa jone prokošena pienty (khurjá) Tyré pomakhneske? [r.s.] Te šarén usady (sak) Ras-Devlés. Amín' i amín'. Mojzaskiri Pátieri (Molítva), Savó sys Devléskiro Manúš. O, Rajo Dévla! Tu sánas usady (sak) aménge syr amaró kher vaš saré ródy! Angíl, syr Tu sozdyjan bérgi, ci syr Tu začhudian phuv i svéto i až viekostyr ke viéko Tu san Devél. Tu kerésa, so manúš pirikerelape dro práho i rakirésa: “Risjon, manušéngire čhavé.” Pal-dová so bar (tysjonco) berš vaš Túke isyn syr atasiatuno dyvés, so progijá (nakhcia), i syr stréga (straža) ratiakiri. Tu lydžása krig amaré beršá syr tasadypnaskiro paning (navodnienijo); jone isyn syr lindra (driemota): tasiarlatyr jone isyn syr čar, so barjola: i zlokostyr (rankostyr) joj luludjola (cvetinela) i jačélape zeleno, a bel'velié joj murdaljola (vianinela) i vyšutjola. Pal-dová so ame xasjovasa Tyré xoliátyr, i aménge isyn pharó, syr Tu zoralés xoliasosa. Tu čhudián amaré čoré réndy angíl Péste, amaré garadé gréhi te dykhén len. Pal-dová so saré amaré dyvesá džána krig Tyré xoliakiribnastyr: amaró džiibén prastala ke kónco (ke jagóro) syr jekh phurdypen ĥondiasa (ŭzdohosa). Amaré-džiibnáskire dyvesá džána ke eftadešá (bitrijandengiro šel) berš, a kóli ame sam zoralé, to ke ohtodešá (bibišengiro šel) berš. Ne naj fedýr pora amaré džiibnastyr isyn doiá, syr ame sam nasvale ci khine butiátyr-davá prodžála (nakhela) sýges i ame vurniasa krig. Kon džinéla Tyré-xoliakiri zor? Kon uĥaljola dar, so javéla Tyré xoliakiribnastyr? Sykliákir amen te ginas amaré dyvesá, sob (kaj) te javél godypén dro amaró iló? Risjov, o Rajo Dévla: kicý saštý te xoliasos? Jav lačhé-iléskiro ke Tyré pishárja. Čaliakir amen tasiarlatyr Péskire lačhé-ilytkimasa i ame javása viesiéla (lošalé) i javása te radynaspe saré amaré dyvesá. Obradyn amen pe adákicy dyvesá, kicý Tu pritasavesas amen, pe adákicy beršá, kicý ame piridživdiam čoripén. Mek te dykhén Tyré butiá Tyré pishárja, mek te dykhén Tyrí rajkany sláva amaré čhavé. I mek šukaripén amaré-Ráskire-Devléskiro, amaré Devléskiro te javél pe aménde: de zor amaré-vastengire butienge, zorjakir amaré vastá, so keréna butiá. Kodová, Savó dživéla dro Naj Vučedyreskiro štéto, javéla te dživél tel Sarezorjakiri zer (tienjo). I jov te phenél Ráske-Devléske: “Miro garadyipen i mirí tvárdyma (diz). Miro Dévla! Me risjováva ke Tu te zrakhavpe.” Čačó, Jov vytyrdela tut čiriklariskire (lovcoskire) feliatyr, xasibnytkone fransendyr. Jov učhakiréla tut Péskire porenca i tu lathesa garadaipen tel Léskire phaká: léskiro čačipén javéla te broninel i te zaterdjol pal Túte. Tu na javésa te dares trašaibnastyr ratý, i maribnytkoné bustiatyr (strielatyr), so vurniala dyvesé; i fransendyr (jazvatyr), so psiréna ratý, ci xasiakiribnytkone morovostyr (zarazatyr), so čorjola dyvesé. Mek tysjonco (bar) manušén te perén pašýl tyrí rig, i deš bará paš tyrí čačí (pravo) rig, ne nisó na poddžála pašyledýr ke tu. Tu féni javésa te dykhés péskire jakhénca i dykhésa otpleskiriben fujé manušénge. Pal-dová so tu phendián “Rajo Dévla, Tu san miro ĥaradyipen”, tu vykedyjan Naj Vučedyreskires te zaterdjol (te broninel) tut. Ĥáda, čoripén na pirilela tut i moróvy na javéna pašýl Tyrí šátra. Pal-dová so Devél déla priphenybén Léskire Jangolenge te dykhén pal Túte: jone javéna te lydžán tut pe péskire vastá, sob (kaj) tu te na pekaves Péskiri ĥerój pir bar. Tu javésa te štaves (te stempines upré) pe ščereste (lievoste) i sapeste ci tu štakiresa (te topčynes) ščerores i drakonos. “Pal-dová so léske jacjom drógo Me”, – rakiréla Raj Devél, – “Me zrakháva les, Me čhuváva vučés les, pal-dová so jov džinéla Miro lav. Jov prikharela Man i Me otphenava léske, Me javáva lésa, kiéli javéla pharó léske, Me zrakháva les i Me javáva te kutiakirav les. Me dáva čalés džiibén léske i sykaváva léske, syr Me zrakháva les.” Psálmo Gilý vaš Sávato. Davá isyn mištó te parikiras Ráske-Devléske, i te bagas šaribnytka giliá Tyré lavéske, o Naj Vučedyreskiro; tasiarlatyr te rakiras sarénge pal Tyrí lačhé-ilýtkima, i kažno rat pal Tyró patiaibén, bašavi pe deše-balytko strumiento, i pe luta i pe gusli dieskire mielodijasa. Pal-dová so Tu obradyndian man Péskire butienca, me javáva te bagáv zoralés i radymákires, so Tyré vastá kerdé. O, Rajo Dévla! Save baré isyn réndy (diély), so Tu kerdián! Save xor isyn Tyré dúmy! Nabaré-godiákiro manúš na džinéla davá, dylynó na galjola: kiéli fuj manušá barjona syr čar i mek kodolé, savé keréna čoripén, mek jone te javén naj šukaredyr dro džiibén, saroiekh Devél xasiakiréla len pe ŭsády (sak). I Tu, Rajo Dévla, san vučedýr saréstyr pe saré viéki. Pal-dová so, ake, Tyré vérgi, Rajo Dévla: ake, Tyré vérgi xasjona i saré, kon keréla čoripén, javéna rosčhurdyne. Ne Tu ĥazdesa mirí zor sýrby šyngá (rógi) riskiribnáskire guruveste: i me som pomakhno jalune (sviažone) olivitkone dzetesa (jeliejosa). Miré jakhá javéna te radynénpe, dykh, so kerélape vergenca; miré kaná javéna te šunén radymása, so kerélape fujé manušénca, savé ĥazdynépe pe mánde. Čačunó manúš javéla naj šukaredyr, syr pal'ma jov javéla te barjol, syr kiedro dro Liváno. Jov isyn sýrby rand' (vetka), so isyn čhudý dre Ráskire-Devléskiro Kher, pe Devléskire gredy (dvory) jov javéla naj šukaredyr. Jov javéla dre zor dre phurané beršá, jov javéla sokósa (xumésa) i zeleno, [r.s.] sob (kaj) te sykavén sarénge, so Raj Devél isyn čačipnáskiro, i Jov isyn sýrby skála, nane načačipén dre Léste. Raj Devél kralinela, Jov uridia pe Péste rajkany sláva: Raj Devél uridiape i podphandiape zoralypnasa i Jov začhudia svéto, Savó na trinskirlape. Tyró trono isyn začhudo ĥaratuné (vaguné) beršéndyr, Tu san viéčno. Baré paningá ĥazdynépe, o Rajo Dévla, baré paningá ĥazdyné péskire zaniá (glosiá), baré paningá ĥazdyné péskire valny. Raj Devél, Savó isyn pe vučipén, isyn zoraledýr buté-paniengire šumostyr, zoralé valnendyr, so džána pir mórjo (derjáv). Tyré dophenybena na parudjona; sventyma gožakirela Tyró kher, o Rajo Dévla, pe saré viéki. O, Rajo Dévla, Savó čhuvéla kára, Devlale, Savó čhuvéla kára (xas'), sykadjov Kokoró. Gazde Pes, Tu, Sendári, pir sarí phuv, sendiakir čačunés phut'kirden. O, Rajo Dévla, kicý javéna fuj manušá, kicý javéna fuj manušá te radynénpe? Jone vyphenenape, jone rakiréna barikanes, saré, kon keréla čoripén, phutjona pésa. Jone rospharavena Tyré manušén pe koterá (kuski), o Rajo Dévla, jone pritasavéna Tyró mištypén; jone zamarena pivlien (udoven) i čužoné manušén i muliakirena piroten (siroten). I jone rakiréna: “Raj Devél na dykhela davá, ci Izrailjoskiro Devél na riskiréla godý pe davá. Ĥaljon tumé, xrustengire (bigodiakire), maškír manušénde; tumé san dylyné, kiéli tumé javéna godé? Ci na došunela Odová, Kon čhudiá kan? Ci na dodykhela Odová, kon kerdiá jakh? Ci na javéla te sendiakirial Odová, Kon sykliakiréla nácyi? Kodová, Savó déla godý manušénge? Raj Devél džinéla manušéngire dúmy, so jone isyn xartytka (sujetna). Bahtaló isyn manúš, savéske Tu désa godý, o Rajo Dévla, savés Tu sykliakiresa Tyré Zakonoske, sob (kaj) Tu te des léske te otkhinjol pharé dyveséndyr, paka ĥanbín (jama) javéla te ĥanavelpe vaš fujé manušénge. Pal-dová so Raj Devél na jačkiréla Péskire manušén, i Jov na mekéla odolén, savé isyn sýrby léskiro meknó mištypén; ne Léskiro séndo javéla nevéstyr čačunó, a odolé, konéste isyn čačunó iló, javéna te džán pal davá duredýr. Kon javéla te zaterdjol pal mánde angíl odolénde, savé keréna čoripén? Kon javéla te rikirél mirí rig proti odolénde, savé keréna beda réndy (zlydnitka diély)? Kóli na délas vast mánge Raj Devél, tedy miro di ĥará javélas odój, kaj isyn meribnytko štylypen. Syr me phenáva: “Mirí ĥerój kuninelape, tedy Tyrí lačhé-ilýtkima, o Rajo Dévla, podrikiréla man, Kiéli miré dúmy pherdiakirena miro šeró, butýr i butýr, tedy Tu podrikiresa i obradynesa miro dúho (fáno). Tu na javésa khetané čoré ranca, savé priduminena fuipén zamiést odová, so isyn dro Zakóno. Jone skedénape khetané te muliakirén čačipnaskire manušés, jone bangiakirena bibange manušés, sob (kaj) te pročhuven léskiro rat. Ne Raj Devél javéla te zaterdjol pal mánde te broninel man; i miro Devél isyn syr bérga mánge te ĥaradjovav. Jov riskiréla pe lénde léngiro čoripén, i Jov xasiakiréla len léngire fuipnasa, Raj Devél, amaró Devél, čhurdéla len te xasjon. Javén te bagas zoralés Ráske-Devléske, javén te bagas zoralés radymátyr bergake, saví zrakhéla amen; iavén te zadžán angíl Léste šaribnasa, javén te radynaspe zoralés psalmenca angíl Léste. Pal-dová so Raj Devél isyn baró Devél i baró Králi, Savó isyn vučedýr saré devlorendyr. Jov isyn xuláj pe xor štéty pe phuv, i adiáke-pac' pe vučipená bergengire. Jov isyn xuláj pe mórjo (derjáv), i Jov sozdyjá les i Léskire vastá sozdyne phuv. Javén te das patýv Léske i te bandiakiras telé šeré, javén te peras pe čangá angíl Raste-Devléste, Savó sozdyjá amen. Pal-dová so Jov isyn amaró Devél: i ame sam manušá čaritkone phuvjátyr, ame sam bakré Léskire vastéstyr. Adadyvés, syr tumé šunéna Léskiri zan: “Na otriskiren péskire ile, syr dre Meriva, syr dro dyvés pal patiaibén (Masá) pe čhučí phuv; kiéli tumaré dadá propatiakirenas man, jone sprobinenas Man i jone dykhné mirí butý. Štardešá berš davá ródo kaliakirdia Miro iló i Me phendjom: ‘Adalé isyn manušá, savé zablendyndlepe, i jone na džinéna Miré dromá. Paldová me i sovlahadjom dre Péskiri xolý: “Jone na zadžána pe Miro štéto te otkhinjon.’” Bagán Ráske-Devléske neví gilý: bagán Ráske-Devléske sarí phuv. Bagán Ráske-Devléske, parikirén i šarén Léskiro lav; rosphenén angíl sarénde so dyvés, so Jov zrakhciá amen. Rosphenén sarénge pal Léskiri sláva maškír Najudýtka nácyi, pal Léskire dívna ke baripén butiá maškír ródy (pliémi). Pal-dová so Raj Devél isyn baró i isyn mol, sob (kaj) te šarén Les, sob (kaj) te darén Léstyr butýr saré devlorendyr. Pal-dová so javire-nacyiengire devloré isyn xohané ídoly, a Raj Devél sozdyjá bolybén. Patýv i rajkany sláva isyn angíl Léste, zoralypén i šukaripén isyn dre Léskiri Khangirí. Slavinén Ras-Devlés, narody, slavinén Ras-Devlés i Léskiri zor. Slavinén Ras-Devlés pal Léskiro lav, janén svénto dyibén i javén pe Léskire gredy (dvory): den patýv Ráske-Devléske dre Léskiri Svénto Khangirí, izdran angíl Léste, sarí phuv. Phenén maškír Najudýtka nácyi, so Raj Devél kralinela! Jov adiáke-pac' zoralés začhudia svéto, so na kharélape krig (na zdžála) štetóstyr. Devél javéla te sendiakirél manušén pir čačipén. Te javén ráda saré nácyi i mek te radynélpe phuv, mek te rievinel mórjo (derjáv) radymátyr, i saró, so dživéla andré. Mek te obradynelpe félda i saró, so isyn pe láte. Mek te radynénpe kaštá (drevy) dro veš, angíl Raste-Devléste, Savó džála te sendiakirél phuv. Jov javéla te sendiakirél svéto čačunés, i Jov javéla te sendiakirél manušén Péskire patiaibnása. Raj Devél kralinela: mek te radynélpe phuv, mek te radynénpe but but ostrovy (džipá). Obloki i kalypén isyn trusciál Léste; čačipén i čačunó séndo rikiréna léskiro trono. Jag džála angíl Léste i xačkiréla sarésa Léskire saré vergén, savé isyn trusciál Léste Léskire bliskavícy jekhátyr (srázu) déna dud (svéto) trusciál svéto: phuv dykhéla i izdrala. Bérgi biladjona, syr mom angíl Raste-Devléste, saré phuvjakireste. Bolybén rakiréla sarénge pal léskiro čačipén i saré manušá dykhéna Léskiri sláva. Saré, kon dynarinela devlorénge, so manušá vyčhindlé, javéna ladžakirdé i odolé, savé šarenape idolenca – saré devloré déna patýv Léske. Manušá Sionóstyr šunéna i isyn ráda, i čhaja Judejátyr radynénape Tyré sendostyr, o Rajo Dévla. Pal-dová so Tu, Rajo Dévla, san Sano (Naj) Vučedýr saréstyr pir phuv; Tu san ĥazdynó drieván vučedýr saré devlorendyr. Tumé, kon rikiréla Ras-Devlés syr Drógima dro iló, bidykhen čoripén: “Jov prirakhela dijá Péskire Sventonengiro, Jov zrakhéla len vastéstyr čoré manušéndyr.” Dud džála telé pe čačipnaskirende, i rádyma pe odolénde, konéste isyn čačunó iló. Radynénpe Rástyr-Devléstyr, tumé čačipnaskire; parikirén i slavinén léskiro Svénto Lav. Psálmo. O, bagán Ráske-Devléske neví gilý! Pal-dová so Jov kerdiá dívna réndy (diély). Léskiro čačó (pravo) vast i léskiro čačó psikó pomogindle Léske te pirizorjakirel. Raj Devél sykadiá, so Jov zrakhéla. Jov otčhakirdiá Péskiro čačipén angíl saré manušéngire jakhá. Jov dyjá te ripirel pal Péskiri lačhé-ilýtkima i léskiro čačipén Izrailjoskire kheréske: saré phuvjákire jagóry (kraí) dykhné, syr amaró Devél zrakhéla Péskiro manušén. Bagán i radynénpe zoralés angíl Raste-Devléste, saré manušá phuvjátyr, lošaljon (viesielinenpe) i radynénpe, šarén psalmenca Les. Bagán psalmy Ráske-Devléske pe gusli; pe gusli i zaniengire (glosiengire) bagaibnasa. Bašaven pe rógo (truba) i gorno, radynénpe angíl Khieningóste, Raste-Devléste. Mek te brilinen (te rivinen) móri (derjavá) i saró, so dživéla dre léste. Mek te pekaven dre vastá réki (leniá), mek te ĥazdénpe radymátyr bérgicy. Angíl Raste-Devléste, pal-dová so Jov džála te sendiakirél phuv: Jov javéla te sendiakirél svéto pir čačipén i Jov čačunés javéla te sendiakirél manušypnaskire nácyi. Raj Devél kralinela: mek te izdran manušýtka nácyi. Jov isyn beštó pe Péskiro trono maškír Xieruvimende: mek te kuninelpe phuv. Raj Devél isyn baró pe Sióno i Jov isyn vučedýr saré manušytkoné nacyiéndyr. Mek te slavinén jone léskiro lav, so Jov isyn drieván slavútno ke dar – Jov isyn Svénto! Tu san zoralypnaskiro Králi, Savéske trej čačunó séndo. Tu začhudian čačipén: davá isyn Tu, Savó keréla pir čačipén i patiaibén dre Jakovoste. Barjakirén ke vučipén Ras-Devlés, amaré Devlés i den patýv Léske angíl Léskire ĥerá. Jov isyn Svénto. Mójza i Arono sys maškír Léskire rašande i Samuílo sys maškír odolénde, savé prirakhenas léskiro lav: jone kharenas Ras-Devlés, i Jov otphenélas lénge. Jov rakirdiá lénge dro stýlbo oblokendyr: jone rikirenaspe ke Léskiro dophenybén i ke statúto, so Jov dyjá lénge. O, Rajo Dévla, amaró Devél, Tu otphendian lénge: Tu sánas vaš lénge Devél, Savó primangela lénge, ne Savó čhuvéla kára pal fuipén, so jone kerdé. Slavinén zoralés Ras-Devlés, amaré Devlés i den patýv Léske pašýl Léskiri Svénto bérgica, pal-dová so Raj Devél isyn amaró Svénto Devél. Parikirasa Devléske dalé Psalmosa. Bagán i radynénpe zoralés, sarí phuv, Ráske-Devléske! Den patýv Ráske-Devléske radymása: javén angíl Léste zoralé bagaibnasa. Džinén, so Raj Devél isyn amaró Devél! Jov sozdyjá amen, ne ame na kokoré péstyr javdiám pe davá svéto; ame sam Léskire manušá i ame sam bakré Léskire ĥurtostyr. Džán andré dre Léskire pórty i parikirén i dre Léskire gredy (dvory) šaribnasa; parikirén Léske, slavinén zoralés Léskiro lav: pal-dová so Raj Devél isyn lačhó, Léskiri lačhé-ilýtkima jačélape ŭsády (sak), i Léskiro patiaibén isyn rodóstyr ke ródo. Davidóskiro Psálmo. Me javáva te bagáv pal lačhé-ilýtkima i čačunó séndo: Túke, Rajo Dévla, me javáva te bagáv psalmy. Me javáva te rikiravpe god'vares ke bidošakiro džiibén. Kiéli Tu javésa ke me? Me javáva te dživáv dro miro kher čačuné ilésa. Me na domekava, sob (kaj) miré jakhá te dykhén pe fuipén, so keréna manušá; mánge isyn ná pir iló odolé réndy, so keréna manušá, kiéli risjona krig Devléstyr, i jone na prijačena ke me. Rozmekno iló javéla te durjol mándyr, me na kamám te džináv čoré manušés. Kodolés, kon čorahanés čhuvéla patarava (pljotki) pe péskire pašatuné manušéste, Me xasiakireva. Me naštý te dykháv pe kodoleste, savó dykhéla baripnasa pe javirende i savó phutjola. Miré jakhá javéna te dykhén pe patiaibnaskirende, savé isyn pe daja phuv, sob (kaj) jone mogindlé te javén mánca dre miro kher. Kodová, savó dživéla bidošéngiro, odová javéla te dynarinél mánge. Kon že xohavela (déla dukhá) manušén, na javéla te dživél andré miro kher; nijékh, savó xohavela, na javéla zoraló angíl miré jakhá. Tasiarlatyr me javáva te xasiakiráv fujé manušén, savé isyn pe daja phuv, sob (kaj) mánge te občhinav drom fujé manušénge ke Ráskire-Devléskiro fóro. Pritasado Manúš mangelape Devléske, kiéli léskiro Dúho (Fáno) phadija i jov vyphenela péskiro Kalypén pe Iló angíl Raste-Devléste. O, Rajo Dévla, pošun mirí pátieri (molítva), mek miro roviben te dodžal ke Tu. Na garadjov mándyr, kiéli mánge isyn pharó; risjov pale i šun rakhunes miré lavá. Dro dyvés, kiéli me prikharava Tut, sýges vyšún man. Pal-dová so miré dyvesá prodžána (nakhéna) syr thuv, i miré kokalý obhačine syr ĥloŭnji. Miro iló isyn dukhado i vyšutija syr čar, so me až bistrava te xav miro maró, Miré kokalý pripyne ke mirí cýpa, pal-dová, so me dáva ĥondiá. Me som syr pielikano pe čhučé prahi, me jacjom syr sova pe čhučó štéto Me som paštó džangado, Me som sýrby čirikly pe kheréskiri stréha (čhakín). Miré vérgi obrakirena man so dyvés, i kodolé, savé sanape xoliames mándyr, prokošena man. Me xajom práska syr maró, i dová, so me pijom, sys pherdó miré jasvénca. Tu péskire xoliátyr i baré xolynatyr, ĥazdyjan man i čhurdyjan dro xmáro (tuča), Miré dyvesá prodžána (nakhena) sýrby zer (tienjo), saví xasjola, Me vyšutijom sýrby čar. Ne Tu, Rajo Dévla, javésa viéčnes, i saré ródy ripirena Tyró lav. Tu uštesa i sykavesa lačhé-ilýtkima pe Sióno; pal-dová so javdiá časo te javes tangipnaskiro ke jov, pal-dová so uphendló časo javdiá. Tyré pishar'jénge jačéna dróga Tyré bará, i jone žalinena práska, so jaciápe foróstyr. I maškír Najudýtka nácyi javéla trašaibén angíl Raste-Devléste, i saré králja pe phuv javéna te darén Léskire slavatyr. Kiéli Raj Devél ĥazdéla Sióno, tedy Jov sykavéla Péskiri sláva. Jov javéla te del patýv bizorjákire manušénge, savé mangénape Léske, i Jov na javéla te dykhél vučipnástyr, syr jone mangénape Léske. Pal davá javéla čhindló rodóske, so javéla, sob (kaj) manušá, savé bijandjona, te slavinén Ras-Devlés. Pal-dová so Jov dykhciá sýges vyčipnastyr Péskire Sventoné Štetóstyr, Raj Devél obdykhcia phuv bolybnástyr; sob (kaj) te šunél, syr déla ĥondiá godlása odová, kon isyn dro štaribén, sob (kaj) Jov te mekel pe vólia odolé čhavén, savén meribén užakiréla, sob (kaj) te rakirén sarénge pal Ráskire-Devléskiro lav pe Sióno, sob (kaj) te šarén Les dro Jerusalimo, kiéli Najudýtka nácyi i kralipená zdžanape khetané, te den patýv jone Ráske-Devléske. Jov tykniakirdia mirí zor dre miré lačhé beršá, Jov krotkedyr kerdiá miro džiibén. Me phendjom: “Miro Dévla! Na zakéde man džiibnastyr akaná, paka me na som phuró. O, Rajo Dévla! Saré ródy dykhéna, so Tu viéčnes dživesa. Tu čhudián phuv ĥarym-ĥará, Tu sozdyjan bolybén Péskire vasténca: jone xasjona, ne Tu javésa, jone saré jačéna phurané syr ídia, i syr uribén Tu paruvesa len, i jone parudjona. Ne Tu san Kadasavó pe saré viéki, i Tyré beršá na končynenape. [r.s.] Tyré-manušéngire čhavé javéna te dživén duredýr, i Tu zorjakiresa léngiro ródo. Davidóskiro Psálmo. Slavin i parikir Ráske-Devléske, miro di, mek miro iló i dúho (fáno) te slavinén Les. Slavin i parikir Ráske-Devléske, miro di, i na bistyr léskiro baró lačhipén. Raj Devél primangela saró miro čoripén, Jov vysastiakirela saré miré dukhá. Jov vyrakhela tyró džiibén xasibnastyr, Jov čhudiá viánka (koróna) pe túte lačhipnastyr i lačhé-ilytkimatyr, Jov déla dová, so tu kamésa, sob (kaj) tu te dživés syr ternó órlo (kído). Raj Devél keréla saró i sendiakiréla pir čačipén odolén, savé isyn pritasade. Jov sykadiá Péskire dromá Mojzáske, Péskire keribena Izrailjoskire čhavénge. Raj Devél isyn lačhé-iléskiro i tanginela sarén, Jov nasyges xoliasóla i isyn barvaló te sykavél Léskiri lačhé-ilýtkima. Jov na sykliakiréla xoliása saró časo, Jov na rikiréla ŭsády (sak) Léskiri xolý. Jov na kerdiá adiáke, sob (kaj) ame te javas bangé pal amaré gréhi, Jov na otdyjá pale fuipnasa aménge pal amaró čoripén. Pal-dová so syr vučés isyn bolybén phuvjátyr, adákicy-pac' but isyn lačhé-ilýtkima Devléste vaš odolénge, savé daréna Léstyr. Adákicy dur isyn čačé rigátyr ke zérvo (liévo) rig pe phuv, adákicy-pac' dur jov čhuvéla krig amaré gréhi. Syr adákicy but dad tanginela péskire čhavorén, adiáke-pac' zoraló Raj Devél tanginela odolén, savé daréna Léstyr. Pal-dová so Jov džinéla, sóstyr ame sam sozdyne, Jov ripirela, so ame sam féni (tóka) práho. Manušéskire dyvesá isyn sýrby čar, syr luludí (cveto), so isyn pe félda, adiáke-pac' i manúš dživéla: sýrby balvál, so sýges provurniala i nane les i nikón na udžinela léskiro štéto. Ne Ráskire-Devléskiri lačhé-ilýtkima isyn bijagoroskiro vaš odolénge, savé daréna Léstyr, a léskiro čačipén vaš čhavéngire čhavénge, vaš odolénge, savé rikirenape ke Léskiro Zavieto, savé ripirena i keréna adiáke-pac' pir Léskire priphenybená. Raj Devél začhudia trono Péske pe bolybén i léskiro kralipén rikiréla zor pir saró. Slavinén i parikirén Ráske-Devléske, saré Léskire Jangóly, savé isyn drieván zoralypnaskire, savé keréna pir léskiro lav, savé kandéna léskiro lav. Slavinén i parikirén Ráske-Devléske, saré Léskire bolybnáskire Jangóly, saré tumé, kon dynarinela Léske, kon keréla pir Léskiri vólia. Slavinén i parikirén Ráske-Devléske, saré Léskire butiá, dre saré Léskire štéty, kaj Jov rikiréla zor! Slavin i parikir Ráske-Devléske, miro di. Slavin i parikir Ráske-Devléske, miro di. O, Rajo Dévla, miro Devél, Savó baró Tu san! Tu učhakirdian Pes patyvása i rajkane slavása. Tu san učhakirdo dudesa (svetosa) syr uribnasa, Tu rosčhudian trusciál (krugom) bolybén syr šatrakire rigá. Tu čhudián bel'ki (strapily) tel stréha (čhakín) vaš šukár štúby (komóry), so isyn tel paniá, Tu kerdián oblokendyr Péske maribnýtko vurdén, Tu psiresa ŭsiendzie (viezdie) pe balvaliakire phaká, Tu sozdyjan Tyré Jangolen duhéndyr, Tu sozdyjan Péske butiarnen jagakire čibendyr. Tu čhudián phuv pe fundámiento adiáke, so joj na čilavelape štetóstyr nijékhvar. Tu učhakirdian phuv xore štetenca syr uribnasa; paniá terdiné vučedýr bergendyr. Syr Tu bangiakiresa len, jone našle, jone denape te prastan Tyré-gromoskire zaniatyr (glosiatyr), Jone piridžana bérgi, jone zmekenape pe doly, pe štéty, so Tu začhudian vaš lénge. Tu čhudián kustýk (granica), so jone na piridžana, sob (kaj) jone na mogindlé nevéstyr (nevés) te čhakiren phuv. Tu kerésa ĥanyngá paniésa dre doly, jone thadena maškír bérgicy, jone paniakirena kažnoné riskiribnáskire murdales (zvierjos), so isyn pe félda, xrustytko búso óslo (miegári) jačéla vól'no péskire trušatyr (smegatyr). Bolybnáskire čirikliá dživéna odój pašýl lénde, jone javéna te den gódla péskire randiendyr (vetkendyr). Tu paniakiresa bérgi Péskire upratune šukarone štubendyr, phuv isyn čaly dalé phabenca, so Tu barjakiresa. Tu kerésa adiáke, so čar barjola kheritkoné murdalénge (skotoske), i rasliny vaš manušéngiro lačhipén, sob (kaj) te bijandjol xabén phuvjátyr, i mol (vino), saví viesielinela (lošakirela) manušéskiro iló, i olivítko dzet, sob (kaj) te ziainel manušéskiro muj, i maró, so keréla manušés zoralesa. Livanoskire zoraledýr kiedry, so Tu počhudian, Tyré, Ráskire–Devléskire kaštá, isyn pherdé sokósa (xumésa) i sanape, Kaj čirikliá keréna peskire gniázdy (kúfy), kaj buslo kerdiá péske kheroro pe egli (jolki). A vučé bérgi isyn vaš mirgenge (sarnienge), baruné krutymy garaiben vaš šušujenge (zajcenge), Tu sozdyjan čhon te sykavén uliaĥi (pory); kham džinéla, kiéli léske trej te zadžál. Tu kerdián kalypén (ciamlypén) i davá isyn rat, kiéli saré vešytka riskiribnáskire murdalá (zvieri) čorjona. Terné ščerá (lievy) rykinena pal péskiro doresybén, i rodéna péskiro xabén Devléstyr. Kham uštéla: jone denape pale i isyn pašté dre péskire pasibnia (liéžycy). Manúš vydžála pe péskiri butý i keréla butý pharés, paka javéla bel'vél'. O, Rajo Dévla, kicý but Tu sozdyjan! Tu kerdián len sarén baré godypnasa, a phuv isyn pherdý Tyré barvalypnenca. Ĥáda, isyn baró i buĥló mórjo (derjáv), pe duj rigá, kaj isyn rázna capniá (priesmykajuščy), so tu na désa ráda te gines; rázna tykné i baré murdalá, Ake, pármy (korabli) džána pir davá mórjo (derjáv), i, ĥáda, Lieviafano, so Tu sozdyjan, sob (kaj) léske te broinel odój. Saré jone užakiréna, sob (kaj) Tu te des xabén lénge dro péskiro časo (cýro): Tu désa lénge, jone priléna, tu roskeresa Péskiro vast i jone xána čalés. Tu risjosa léndyr i jone strahadjona; Tu otlesa léndyr dúho (fáno), jone meréna i risjona ke péskiro práho. Tu bičhavesa Tyró dúho (fáno) i jone sozdenape, i Tu kerésa adiáke, so Tu neviakiresa džiibén pe phuv. Ráskire-Devléskiri sláva jačélape zoralés pe saré viéki, Raj Devél javéla te radynélpe Péskire butiendyr. Jov podykhela pe phuv i joj izdrala, Jov čilavéla bérgicy i léndyr thuv džála. Me javáva te bagáv Ráske-Devléske saró péskiro džiibén; me javáva te bagáv miré Devléske, paka me som džidó. Mek te javén šukár i lačhé Léske miré dúmy, me javáva te radynavpe Léstyr. Mek te xasjon grehítka manušá phuvjátyr, mek te na javén butýr pe svéto čoré manušén. Vyšar i parikir Ráske-Devléske, miro iló. Alliluia. Parikirén, tumé, Ráske-Devléske! Kharén Léskiro lav! Rosphenén manušénge, so Jov kerdiá. Bagán Léske, bagán psalmy Léske, rozlen saré Léskire dívna butiá. Sláva Léskire sventoné lavéske; mek te radynélpe iló do manušéngiro, kon rodéla Ras-Devlés. Rodén Ras-Devlés i Léskiri zor, rodén Les usady (sak): ripirén Léskire dívy, so Jov kerdiá, Léskire drieván baré dívy i lavá, savénca Jov sendiakirdia Péskire mósa. O, tumé san Avramoskiro ródo, Léskire-pishariskire, tumé, Jakovóskire čhavé, savés Jov vykedyjá. Jov isyn Raj Devél, amaró Devél, Jov sendiakiréla pir sarí phuv. Jov usady (sak) ripirela Péskiro Zakóno, lavá, savé Jov priphendiá barenge (tysjoncenge) rodénge, savé Jov dyjá Avraamóske, i pal savé Jov dyjá sovláh Isakoske, i Jov čhudiá zor pe dalé lavá, syr pe statúto Jakovóske, syr viéčno Zakóno Izrailjoske, phení: “Me dáva Xanaanóskiri phuv túke, syr paš tumaré mekné mištypnástyr”, kiéli len sys nábut, manušén odój, drieván nábut, i jone sys čúža manušá odój. I tumé džánas jekhe nacyjatyr ke javír, jekhe kralipnastyr ke javír manušá. Devél na dyjá vólia nikonéske te tasavel. Devél vyrakirelas zoralés kral'jén pal lénde, rakirí: “Na čilaven Miren, Savén Me pomakhcjom. Na kerén čoripén Miré prorokenge.” I Jov vykhardia bokh pe phuv, Jov xasiakirdiá kažno raslina, so déla maró. Jov bičhadiá manušés angíl lénde: Joza (Iosifo) sys bikindlo syr pishári. Jone dukhade Léskire ĥerá zandir'jenca, a léskiro di gijá dre sastyrá, angíl davá časo, syr léskiro lav javdiá: Ráskire-Devléskiro lav sprobindia les, Králi bičhadiá i vymekcia les pe vólia, čhudiá les barydyrésa pir manušénde i mekciá les pe vólia. Jov kerdiá les rása pir léskiro kher i barydyrésa pe saró, so sys léste, sob (kaj) jov te uphenel léskire kralískire semencenge, syr trej léske, i te sykliakirél godypnaske léskire phuren. Izrailjo adiáke-pac' javdiá dro Jegípto i Jakovo adiáke-pac' pritradyja pe Xamoskiri phuv. I Devél dyjá but čhavén léskire manušénge, i Jov kerdiá adiáke, so jone jačné zoraledýr péskire vergéndyr. Jov riskirdiá Jegiptóskire-manušéngire ile zoralés te na den patýv Léskire manušénge, te otlydžanpe frentymasa Léskire dynar'jénca. Devél bičhadiá Mojzás, Péskire pisharís, i Aronos, konés Jov vykedyjá, jone sykade Léskire znamiénii (ĥiertyká) maškír lénde dro Jegípto, i kerdé dívy pe Xamoskiri phuv. Devél bičhadiá kalypén (ciamlypén) i kerdiápe kales i jone na kerdé búnto proti Léskire lavá. Jov pirikerdia paní ratésa i xasiakirdiá léngire mačhen. Phuv sys pherdý capnienca až dre kralískire štúby. Devél dyjá priphenybén i javné but dukhane matlia (nasiekoma) i dzyndzarja (komary) pe sarí doiá phuv. Jov dyjá grado zamiést bryšýnd, bičhadiá jag, so saró xalas, pe léngiri phuv. Jov adiáke-pac' xasiakirdiá léngire-vinagradoskire kaštá i léngire inžyritka kaštá i rospharadia vešá pe léngiri phuv. Jov phendiá i javné phakitka skočki (saranča) i but skočkengire kirmore, so naštý te piriginen. I jone xané upré saré rasliny pe kadaja phuv i pohane sarésa dová, so bijándyja pe léngire féldy. Devél adiáke-pac' muliakirdiá sarén pervoné bijatén, savé bijándyne dro Jegípto, rádyma i zor sem'iakiri. Tén'ci Jov lydžijá len krig rupésa i suvnakása, i na sys nikón, savó te javél bizorjákiro maškír kadalé jekhé-čibákire / čangá (kolieny). Jegípto sys rado, so jone giné, pal-dová so pe lénde pyjá dar Judendyr. Devél rosčhudiá óbloko te garaven len, i jag te javél losása (svéto čhonestyr) lénge ratý. Jone pomangne i Jov dyjá pieriepjolen lénge i čaliakirdia čalés len marésa bolybnástyr. Jov otčhakirdiá bérga-skála, i paniá dynepe te thaden, pothadyne syr reka (len') pir šuké štéty. Pal-dová so Jov ripirdia léskiro svénto lav, Savó Jov dyjá Avramoske, Léskire dynaríske; i Jov vylydžijá Léskire manušén radymása, Léskire vykedyné manušén radymása; Jov dyjá lénge phuvjá Najudytkoné nacyiéndyr i jone doresné syr meknó mištypén dalé manušéngire obkerde féldy: sob (kaj) jone moginénas te rikirenpe zoralés ke Léskire statúty (ustavy), i te rikirenpe ke Léskire zakóny. Alliluia Ráske-Devléske. Alliluia. Šarén Ras-Devlés, parikirén Ráske-Devléske pal Léskiro lačhipén, i so Léskiri lačhé-ilýtkima jačélape pe saré viéki. Kon moginéla te vyphenel Devléskiro zoralypén, te piridel lavénca saró šaribén Léske. Bahtalé isyn odolé, savé kandéna Léskire priphenybená i savé keréna pir čačipén kažno mólo. Rípir man, Rajo Dévla, pir Tyrí láska ke Tyré manušá, na bistyr man, syr Tu javésa te zrakhes len: sob (kaj) mánge te dykháv lačhipén Tyré manušéngiro, sob (kaj) mánge te radynavpe Tyré-manušéngire radymátyr, sob (kaj) me te javav barikano Tyré manušénca. Ame dadénca kerdiám gréhi, ame kerdiám čoripén, ame sámas fuj manušá. Amaré dadá na ĥalyné ilésa Tyré dívy dro Jegípto, jone na ripirde Tyrí bari lačhé-ilýtkima; ne jone ĥazdyné búnto pe Túte, pašýl Loló mórjo (derjáv). Ne Tu zrakhcián len vaš Tyró lav, sob (kaj) jone te udžinén Tyró zoralypén. Tu priphendian Lolé morjoske, i jov vyšutija, i Tu kerdián adiáke, so jone giné pir xor štéty sýrby pir čhučé prahi. I Tu zrakhcián len odoleskire vastéstyr, kon zoralés na vyrikirdia len, i Tu vyrakhcian len vergéngire vastéstyr. Paniá začhakirde manušén, savé pritasavenas len: nikón léndyr na jaciápe džidó. Tén'ci jone patiandyné Léskire lavenge, jone šarde Les, bagaindoj giliá. Ne jone bistyrde pal Léskire butiá, jone na užakirde, paka javéla Devléskiri godý pe davá: i jone bitukoskiro (bimierakiro) kerdé pir péskiro nálačho tyrdypén pe čhučé prahi i propatiakirenas Devlés pe čhučó štéto. Ne Devél dyjá lénge dová, so jone mangné, ne tén'či Jov bičhadiá dukhá pe lénde. I jone zevlyndle Mojzáske pe štéto javrial foróstyr Aronoske, sventoné Ráskire-Devleskireske. Tén'ci phuv otphandiape i nakhadia Dafanos i začhakirdia Avironoskiri kampanija, i roshačija jag maškír léngiri kampanija i bari jag pohaia fujé manušén. Jone kerdé guruvóres dro Xorivo (Xariebo) i dyné patýv dalé idoloske, so jone vybilade, i jone zamiést dová, sob (kaj) te slavinén Devlés, parudyne te slavinén guruvóres, so xála čar. Jone bistyrde Devlés, léngire Zrakhibnaskires, Savó kerdiá baré réndy dro Jegípto, dívy pe Xamoskiri phuv, slavutna ke dar vakancyi (slučai) pašýl Loló mórjo (derjáv). I Jov phendiá, so Jov xasiakirelas len, te na javél Mójza, savés Devél vykedyjá, savó terdijá murškanés te urakirel Devlés, i te riskirél léskiro xasiakiriben, sob (kaj) Jov te na xasiakirél len. Ne jone na prilyné barvaly phuv, jone na patiandyné Devléskire lavéske, a jone zembindle xoliames dre péskire šátry; jone na šundlé Ráskire-Devléskiri zan. I Jov ĥazdyjá Léskiro vast pe lénde, syr sovláh, so Jov pekavela len pe čhučé prahi, i so Jov rosčhuvela léngiro ródo maškír Najudýtka nácyi, i so Jov rosčhurdela len maškír thema (strany). I jone adiáke-pac' skedynépe khetané pašýl Fiegoro te den patýv Vaaloske, jone xané svénta janybená (žertvy), so kerdé mulé idolénge, jone prezentyndle Les odolesa, so jone kerdé, i fránsy pyné pe lénde. Tén'ci uštyjá Pinehaso i sendiakirdia odolén, kon sys bangó, i fránsy pirijačne. I adalé manušá zagindle léske, so jov kerdiá pir čačipén i saré ródy javéna ŭsády (sak) te ripirén davá. I jone xoliakirde Ras-Devlés pašýl paniá ke Meriva i paldavá Mójza doresciá pharipén pal lénde, jone adiáke xoliakirde Mojzáskiro dúho (fáno), so jov drieván sýges rakirdiá. Jone na muliakirdé Najudýtka nácyi, syr Raj Devél priphendiá lénge, a jone lyné te len léngire džuvlién paloróm, i vysyklyne léngire butiá, jone dénas patýv léngire idolénge, savé jačné syr felý (pietlia) vaš lénge: i jone janénas péskire čhavén i čhajén syr svénto dyibén (žértva) vaš nalačhé dúhi, i jone pročhuvenas bibangipnaskiro rat péskire čhavéngiro i čhajengiro, konés jone janénas idolénge dro Xanaano i jone magirdé phuv dalé ratésa. Adiáke jone magirdé pes dasavé rendénca, i jone lydžiné pes i kerdé sýrby biladžakuny džuvlý. Paldavá Ráskire-Devléskiri xolý roshačija pe Léskire manušénde i jone jačné džungalé (zbrydindle) Léske, syr léskiro meknó mištypén. I Jov otdyjá len dre Najudengire-nacyiengire vastá, i odolé, savé zoralés na vyrikirde len, rikirde zor pe lénde: i léngire vérgi pritasavenas len i jone péskire vasténca čhuvénas ĥámo pe lénde. But móly Jov vyrakhelas len; ne jone buntuinenas proti Léste dre péskire dúmy, i jone perenas telé pal péskiro fuipén. I Devél prilyjá dro iló, so pritasade Léskire manušén, kiéli Jov šundiá, so jone rovena godlása; i Jov priripirdia Péskiro Zavieto, so Jov dyjá lénge, i Jov potangindia len Léskire baré lačhé-ilytkimatyr; I Jov kerdiá adiáke, so odolé, savé pritasavenas len, lyné te tanginen len. Zrákh amen, o Rajo Dévla, amaró Devél i skéde amen khetané saré Najudengire nacyiéndyr, sob (kaj) te parikiras i te vyšaras zoralés Tyró svénto lav, mek saró te parikirel i te vyšarel Ras-Devlés, Izrailjoskire Devlés, dre saré viéki i mek saré manušá te phenén: “Amín'! Alliluia.” Parikirén Ráske-Devléske, pal-dová so Jov isyn lačhó i Léskiri lačhé-ilýtkima jačélape pe saré viéki. Mek saré, konés vyrakhcia Raj Devél, te phenén adiáke, konés Jov vyrakhcia vergoskire vastéstyr, i skedyjá khetané Jov phuv'jendyr: čačé rigátyr (vastokóstyr) i zervoné / pal-panitkoné (zapadóstyr), paš-ratitkoné (sieviernone) rigátyr i paš-dyvesytkoné (južnone) rigátyr. Jone psirdé pir čhučé prahi (pustyni) pir čhučó drom, jone na rakhne fóro, kaj te dživén manušá, jone sys bokhalé i trušale (žaždyndle), léngiro di zamyjá; jone rondlé godlása angíl Raste-Devléste dro pharipén i Jov vyrakhcia len baré darátyr, i Jov lydžijá len lačhé dromésa te dodžan ke fóro, sob (kaj) te dživén odój. Mek saré te parikirén Ráske-Devléske pal Léskiri lačhé-ilýtkima i saré Léskire dívna butiá manušéngire čhavénge, pal-dová so Jov dyjá čalés odolengire dijenge, kon sys trušalo (smegitko) i pherdiakirdiá bokhalo di lačhipnása. Adasavé manušá dživdé dro kalypén (ciamlypén) i dre meribnaskiri zer (tienjo), jone sys phandle i pritasade, pal-dová so jone ĥazdyné búnto proti Devléskire lavá i na prilyné ke godý Samone (Naj) Vučedyreskire-Devléskiri duma; i Jov bandiakirdia léngire ile pharé butiasa; jone pyné i na sys nikón te podel vast: tén'či jone dyné gódla jasvénca ke Raj Devél dre péskiri bari dar, i Jov zrakhciá len léngire baré darátyr, Jov vylydžijá len kalypnástyr i meribnaskire zerjatyr (tienjostyr) i Jov phagirdiá pe koterá (kuski) léngire sastyrá, mek jone te parikirén Ráske-Devléske pal Léskiri lačhé-ilýtkima, i Léskire dívy manušéngire čhavénge, pal-dová so Jov phagirdiá xarkuny (miedno) pórta i roskuscia sastruné šybiery (zapory). Dylyné manušén pritasavenas pal léngire gréhi i pal léngiro čoripén; léngiro iló otriskirdiape kažnoné xabnastyr, i jone džánas pašýl ke pórta meribnaskiri: tén'či jone dyné gódla jasvénca ke Raj Devél, kiéli sys pharó lénge, i Jov zrakhciá len baré darátyr. Jov bičhadiá Péskiro lav i vysastiakirdiá len i vyrakhcia len léngire xasibnastyr. Mek jone te parikirén Ráske-Devléske pal Léskiri lačhé-ilýtkima i pal Léskire dívna butiá manušéngire čhavénge. I mek jone te parikirén Ráske-Devléske sventoné dyibnasa te parikirén, i mek jone te rosphenén sarénge pal Léskire butiá radymakire giliasa. Odolé, savé plyvinenas (dénas plíma) pir móri (derjavá) pe pármy, ci savé keréna kófo (pol'za) pir baré paniá, jone dykhéna Ráskire-Dev-léskire butiá i Léskire dívna réndy pe xor štéty. Pal-dová so Jov phenéla i ĥazdélape štormitko balvál, saví vučés ĥazdéla morjoskire (derjavéskire) valny: pármy (korabli) manušénca džána upré ke bolybén, tén'či jone peréna telé ke xor štéty; a manušénde, so odój bešté, di biladjola baré darátyr; jone krenžynena odorík i pale i jone kuninénaspe (šatynenape) syr mate, a léngiro godypén nisó na mol: tén'či jone déna gódla jasvénca Ráske-Devléske, kiéli sys pharó lénge i Jov zrakhéla len léngire pharipnastyr; Jov štyliakirela štormo adiáke, so léngire valny (velny) jačéna štyl (tiha), i jone isyn ráda, pal-dová so paniá jačéna štyl i Jov vylydžala len ke prijačytko (pristan'), ke so jone tyrdynepe. Mek adalé manušá te parikirén Ráske-Devléske pal Léskiri lačhé-ilýtkima i Léskire dívna butiá vaš manušéngire čhavénge; mek jone te barjakirén ke vučypen Les adiáke-pac' pe manušéngiro skedyibén i te šarén Les pe godephurengiro rakiribén. Raj Devél pirikerela réki (leniá) pe čhučé prahi i panieskire ĥanyngorja pe šukí phuv: umalotna phuvjá pe londo šuko štéto – pal dolé manušéngiro fuipén, kon dživéla odój. Jov piriskirela šuké phuvjá dre ziero (oziero) i šukí phuv dre panieskiri ĥanyngori (krynica). Jov čhuvéla bokhalen te dživén odój, sob (kaj) jone mogindlé te ĥazdén fóro te dživén, i sob (kaj) jone te počhuven ziárki dre féldy i te čhuvén vinagradýtka unty (sady), sob (kaj) jone te den umalotno pribaripen (aplodo). Jov adiáke-pac' bahtiakirdiá len, sob (kaj) jone te rozbarjon zoralés, i Jov na domekela, sob (kaj) te javél tyknedýr murdalén lénde. Ne kiéli len jaciá tyknedýr, i jone jačné štyl (tiha) – len teliakirenas, pritasavenas i kaliakirenas, tedy Raj Devél čhudiá ladž pe baré rande Najudytkoné nacyiéndyr i kerdiá adiáke, so jone giné te psirén odorík, pale pe čhučí phuv, kaj nane drom. Ne Jov ĥazdyjá čororé manušén pritasaibnastyr i začhudia Léngire sem'i (irjá) te javén syr gurty. Patiaibnaskire dykhéna davá i radynénape, a saré čoré manušá phandena péskire muiá. Kon isyn godó, mek jov te rikirelpe ke saró davá, mek jov te ĥaljol Ráskire-Devléskiri lačhé-ilýtkima. Gilý Davidóskiro Psálmo. Miro iló isyn skedymo: o Dévla! Me javáva te bagáv i te šaráv Tut. Džangadjon gusli i arfa: me džangavava kham, syr dyvesjola. Me javáva te šaráv Tut maškír manušénde, o Rajo Dévla, me javáva te bagáv Túke maškír manušypnaskire nácyi: pal-dová so Tyrí lačhé-ilýtkima isyn vučedýr bolybnástyr i Tyró patiaibén dodžála ke óbloki. Te barjakirel Tut saró vučedýr bolybnástyr, o Dévla, mek te javél Tyrí sláva vučedýr phuvjátyr, sob (kaj) te zrakhenpe odolé, konés Tu vykedyjan Péske. Pomógin (posóbin) te zrakhenpe Tyré čačé vastésa i otphen mánge. Devél phendiá pe Péskiro Svénto Štéto: “Me ĥazdavape radymása, Me roskerava pe pašá Sihiemo, i Me rozmierinava Sukotoskiro dólo. Miro isyn Galaádo, i Miro isyn Manásija, Jefriémo isyn tvárdyma te rakhél Miro šeró; Juda isyn Miré–kralískiro destó (žezlo). Moávo isyn Miro čaró moske (umyval'nica), Me čhurdava Mirí škornia pir Edómo: pir Filistimija Me javáva te dav gódla radymása. Kon janéla Man dro zoraló fóro? Kon lydžála Man ke Edómo? Ci Tu čhurdyjan amen dre rig, čačes, Dévla? Ci Tu na džása angíl amaré xaladybnendyr? De vast te terdjovav proti pharipén, paldova so xartytko (podhalimo) isyn, kiéli manušá déna vast te zrakhen. [r.s.] Devlésa ame kerása murškané réndy; Jov rostasavela amaré vergen (vrogen) Xoróskire Dirižoróske. Davidóskiro Psálmo. Na jav štyl, o Dévla, sláva Túke! Pal-dová so čoré i xohané manušá rakiréna pe mánde: jone rosphenena pal mánde xohané čibása (čibjasa), jone občhuvena man, kaj kaména, xohané lavénca i xoliása, i jone džána maribnása pe mánde bi pričynakiro. Pal miro iló jone jačné mánge miré vérgi, ne me mangavpe Devléske pal lénde. I me dorescjom léndyr fuipén pal miro lačhipén, i jone bidykhena man pal mirí patýv ke javír. Čhuv čoré manušés pe miré vergoste, mek nálačho te terdjol pe léskiri čačí rig; kiéli les javéna te sendiakiren, mek te pridžinen les, so jov isyn bangó; mek léskiro mangipén te jačél grehosa; mek léskire dyvesá te javén krotka, sob (kaj) javír manušá te len léskiri butý; mek léskire čhavé ŭsády (sak) te mangén dyibén i te psirén bi štetoskiro, i te rodén maró dur šteténdyr, kaj vytradyné len; mek odová, kon zalela lové léske, te čhuvél felý (pietlia), sob (kaj) te otlel saró léstyr, i mek čúža manušá te občoren saró, so jov zakerdia, mek nikón te na sykavél lačhé-ilýtkima angíl léste, mek nikón te na otlydžalpe ilésa ke léskire piróty (siroty), mek léskiri seménca te xasjol, mek te na javén léngire vurmy (familii) maškír javír ródo. Mek Raj Devél te ripirel čoripén, so kerdé léngire dadá, mek gréhi, so kerdé léngire daja, te na javén bistyrde. Mek Raj Devél te ripirel léngire gréhi, sob (kaj) Jov te xasiakirél ripiribén pal lénde pe phuv: pal-dová so jone na dumindle te javén lačhé-iléskire, a jone pritasavenas čororen i manušén dre trébima; i domarenas odolén, konéste kalypén sys pe iló. Kadavá manúš sys skedynó te prokošel, i mek léskiro prokošybén te jačélpe pe léste. Jov, kadasavó manúš, na vyphendia bahtiakiribén, mek kokoró bahtiakiribén te džal krig léstyr. I dasavo manúš sýrby uridia pe péste prokošybén syr thalík / kúl'ko (pidžako), mek léskiro prokošybén te džal andré léskire vindyrja syr paní, i syr dzet (aliejo) dre léskire kokalý; mek te javél léskiro prokošybén syr uribén, so jov čhuvéla pe péste, i syr kustýk, sósa jov podphandelape. Mek saró davá te javél syr mazúri (nagrada) Rástyr-Devléstyr miré vergénge i javirénge, kon rakirdiá čoripén pe mánde. Ne Tu, Dévla, Raje Dévla, pomógin mange vaš Tyró lav, zrákh man: pal-dová so Tyrí láska isyn drógo. Pal-dová so man pritasavéna i mánge isyn pharó, i miro iló isyn dukhado dre mánde. Syr zer (tienjo) me xasjovava, kiéli joj kerlape dind'kirdedyr, man tradéna syr skočkos. Miré čangá jačné bizorjákire, pal-dová so mirí loč (plot') vyšucija bi thulypnaskiro. I kadalé manušá obrakirena man: jone dykhéna pe mánde i kuninena šerenca. Pomogin mánge, Rajo Dévla, miro Dévla; zrákh man pir Tyrí lačhé-ilýtkima: sob (kaj) jone te džinén, so davá isyn Tyró vast, so Tu, Rajo Dévla, kerdián davá. Mek jone te prokošen, ne Tu javésa te bahtiakires: jone ĥazdénape pe mánde i javéna ladžakirdé, i Tyró pishári javéla te radynélpe. Mek miré vérgi te ur'jen pe péste ladž syr ídia, i učhakiren pes ladžasa syr kul'kosa (thalikosa). Me javáva zoralés te parikiráv Ráske-Devléske miré mósa i me javáva te šaráv Les maškír manušénde. Pal-dová so Jov javéla te terdjol pir čačí rig pašýl čororende, Jov javéla te zrakhél odolé manušés, savés sendiakirena. Davidóskiro Psálmo. Raj Devél phendiá miré Ráske-Devléske: “Beš pašýl mánde čačé rigátyr, paka me čhuváva telé Tyré vergén tel ĥerá.” Raj Devél bičhavéla Tyré-zorjakiro kralítko destó Sionóstyr: “Tu xulain maškír Tyré vergénde.” Tyré manušá janéna pes dro Tyré-zoralypnaskiro dyvés sventoné rajkane slavása: Tyré terné bijandjona syr pahlyn (rosa), saví sys pe zlóko (pe ránko). Raj Devél sovlahadiá, i Jov najavela te tanginél (na požalinela): “Tu san rašáj pe saré viéki, dasavo-pac' syr Mielhisedeko.” Raj Devél isyn pašo Tyró čačó vast i Jov phagiréla kral'jén dro dyvés, kiéli Jov xoliasóla. Jov javéla te sendiakirél maškír Najudýtka nácyi; Jov jačkiréla pe saré štéty pir phuv trúpy; Jov zlela šeré barydyrende, kon xulainela pir bari phuv. Jov vyp'jela paní sygnone rekicatyr (lenorjatyr) pir drom, i Jov ĥazdéla šeró. Alliluia. Me javáva te slavinav i te parikiráv Ráske-Devléske saré miré ilésa maškír čačipnaskirende i pe skedyibén. Save baré butiá kerdiá Raj Devél. Saré, konéske jačné dróga jone, kaména davá te ĥaljon. Saró, so keréla Raj Devél, isyn patyvalo i slavútno, i Léskiro čačipén jačélape pe saré viéki. Jov kerdiá adiáke, so Léskire dívy ripirena. Raj Devél isyn lačhé-dieskiro i tanginela sarén. Jov déla xabén odolénge, kon daréla Léstyr, Jov usady (sak) ripirela Léskiro Zakóno. Jov sykadiá zor Léskire manušénge Péskire butiendyr, sob (kaj) te den lénge Najudengire-nacyiengiro meknó mištypén. Jov saró keréla pir patiaibén i čačipén; saré Léskire priphenybená isyn patiaibnytka: jone čhudé khetané pe saré viéki, jone dyné pir patiaibén i čačipén. Jov vyrakhcia Péskire manušén, Jov dyjá Péskiro Zakóno pe saré viéki: svénto až ke dar isyn Léskiro lav. Kon léla te darel Rástyr-Devléstyr, odová léla godý péske, a sarénde, kon dživéla i keréla pir Léskire priphenybená, isyn lačhí godý. Te šarén Les pe saré viéki. Alliluia. Bahtaló isyn manúš, Savó daréla Rástyr-Devléstyr, Savó bahtaljola zoralés Léskire priphenybnendyr. Léskire čhavé dživéna mištés pe daja phuv, a čačipnaskire ródy, so javéna duredýr, javéna bahtalé. Mištypén i barvalypén javéna dro léskiro kher i léskiro čačipén jačélape pe saré viéki. Dud (svéto) ĥazdélape dro kalypén (ciamlypén) vaš čačipnaskirenge, i kadavá manúš isyn lačhé-dieskiro i čačipnáskiro, i jov tanginela lačhé manušén. Lačhó manúš i déla pe patýv lové lénge, jov lydžála péskire réndy pir Zakóno. Pal-dová so jov na peréla, čačipnaskire manušés javéna ŭsády (sak) te ripirén. Jov na javéla te darel čoré malvendyr, dro léskiro iló isyn zoraló patiaibén dre Raste-Devléste. Léskiro iló isyn tvardo, jov na daréla, paka jov dykhéla vergén, so jone isyn tel ĥerá. Jov rozdyja saró iléstyr, jov dyjá odolénge, konéste isyn trébima, léskiro čačipén usady (sak) jačélape: léskiri zor usá butýr skedéla patýv. Fuj manúš javéla te dykhél i léskiro iló javéla te kaljol; jov javéla te skriežynel dandenca i te našavel zor; a dová, so jov užakirdia, xasjola krig. Alliluia. Šarén Ras-Devlés! Šarén Ráskire-Devléskire pishárja, šarén Ráskire-Devléskiro lav. Te javél bahtaló Ráskire-Devléskiro lav dalé dyveséstyr i duredýr pe saré viéki! Mek te šarén Ráskire-Devléskiro lav dolé časostyr, syr kham uštéla ke/žýko dová časo, kiéli kham bešéla. Raj Devél isyn vučedýr saré Najudytkoné nacyiéndyr, Léskiri sláva isyn vučedýr bolybnástyr. Kon isyn dasavo-pac' syr Raj Devél, amaró Devél, Savó xulainela vučipnástyr; Savó bandija telé te dykhél bolybén i pe phuv. Jov ĥazdéla bogos prahostyr i ĥnejostyr (ĥnojostyr). Jov vučés čhuvéla odolés, konéste isyn trébima, sob (kaj) jov te bešél maškír thagar'jende, thagar'jende Léskire manušéndyr. Jov keréla adiáke, sob (kaj) bičhavorengiri daj te dživél dro kher i te radynélpe (te lošaljól) lákire čhavorendyr. Alliluia. Kiéli Izrailjoskire manušá giné krig Jegiptóstyr, a Jakovóskiro ródo gijá dolé manušéndyr, savé rakirdé pe čúžo čib, Judéia jaciá Léskire sventoné štetosa, a Izrailjo Léskire kralipnasa. Mórjo (derjáv) dykhciá i nascia, Iordáno risijá pale; bérgi uhtyne syr bakré, tykné bérgicy syr bakrore. So dukhadia tut, morie (derjáv), so tu našesa? O, Iordánie, so tu risjosa pale? Tumé, bergijále, so tumé uhtena syr bakré? Ci tumé, bergicále, syr bakrore? Izdra phuv angíl Raste-Devléste, angíl Jakovóskire Devléste, Kon pirikerdia skála dro panieskiro ziero (oziero), kriemnjo dre panieskiri ĥanyngori? [9] Na amen, o Rajo Dévla, na amen, ne jekh Tyró Lav trej te šarén, pal-dová so Tu san lačhé-iléskiro, pal Tyró patiaibén. [10] Sóske Najudýtka nácyi rakiréna? “Kaj isyn kakaná léngiro Devél?” [11] Ne amaró Devél isyn pe bolybén: Jov kerdiá saró, so Jov kamdiá. [12] Ne léngire ídoly (xohané devloré) isyn rupéstyr i suvnakástyr, savé manušéngire vastá kerdé: [13] lénde isyn muj, ne jone na rakiréna; lénde isyn jakhá, ne jone na dykhéna; [14] lénde isyn kaná, ne jone na šunéna; lénde isyn nakh, ne jone na sungena; [15] lénde isyn vastá, ne jone nisó na moginéna te kerén lénca; lénde isyn ĥerá, ne jone na psiréna; i jone na phenéna nisó péskire kirlesa; [16] mek saré, kon kerdiá len, te javén bizorjákire, syr jone isyn; adiáke-pac' i saré odolé, kon patiála dre dalé ídoly. [17] O, Izráilie! Patia zoralés Ráske-Devléske; Jov pomoginela i zaterdjola pal tuménde. [18] Aronoskiro kher, patia zoralés Ráske-Devléske: Jov pomoginela i zaterdjola pal tuménde. [19] Tumé, savé darén Rástyr-Devléstyr; patián zoralés Ráske-Devléske, Jov pomoginela i zaterdjola pal tuménde. [20] Raj Devél ripirela pal aménde: Jov bahtiakiréla amen; Jov bahtiakiréla Izrailjoskiro kher, Jov bahtiakiréla Aronoskiro ródo. [21] Jov bahtiakiréla odolén, savé daréna Rástyr-Devléstyr, tyknen i baren. [22] Raj Devél javéla te del butedýr i butedýr čhavorén túke i tyré čhavénge. [23] Raj Devél, Kon sozdyjá bolybén i phuv, bahtiakiréla tut. [24] Bolybén isyn Ráskire-Devléskiro bolybén, ne Jov dyjá phuv manušéngire čhavénge. [25] Mulé na šarena Ras-Devlés, adiáke-pac' ni odolé, savé džána dro štéto, kaj isyn štyl. [26] Ne ame javása te bahtiakiras Ras-Devlés adadyvesatune dyveséstyr i pe saré viéki. Alliluia. Me rikirava syr Drógima Ras-Devlés dro iló, pal-dová so Jov šunéla mirí zan i miro mangipén Léske: pal-dová so Jov pričhudia kan ke me; me javáva te kharav Les dre dyvesá, paka me dživáva. Meribén sýrby šelenca občhudiá trusciál mánde, i liunoskire dukhá pyné pe mánde, mánge jaciá pharó i me pyjom dro dúho (fáno): tén'či me khardjom Ráskire-Devléskiro lav: ‘Me zoralés mangáva Tut, Rajo Dévla, zrákh miro di.’ Raj Devél isyn lačhé-dieskiro i čačipnáskiro, i amaró Raj Devél isyn lačhé-iléskiro. Raj Devél prirakhela prostonen: me jacjom bizorjákiro; i Jov zrakhciá man. Risjov te otkhinjos péske, miro di; pal-dová so Raj Devél bahtiakirdiá tut. Pal-dová so Raj Devél vyrakhcia miro di meribnástyr, miré jakhá jasvendyr, i miré ĥerá peribnastyr. Me javáva te psirav angíl Raste-Devléste pe phuv, kaj dživéna. [PSALMO 115-r.s.] [1] Me patiandyjom, paldavá me i phendjom: “Man zoralés pritasavenas” [2] Me sýges phendjom péske: “Saré manušá isyn xohané.” [3] Sósa me otdáva pale Ráske-Devléske pal saró léskiro baró lačhipén mánge? [4] Me ĥazdáva tahtáj (čaša) pal dová, so Jov zrakhciá man i kharáva Ráskire-Devléskiro lav. [5] Me keráva pir péskiri sovláh angíl Raste-Devléste kakaná, syr Léskire manušá skedénape. [6] Pharó isyn Ráskire-Devléskire jakhenge te dykhén meribén Léskire sventonengiro. [7] O, Rajo Dévla, me čačes, som Tyró pishári, me som Tyró pishári, Tyré-butiarnengiro čhavó: Tu rosphandian miré piénty (khurjá). [8] Me janáva Túke svénto dyibén (žértva) parikiribnasa, sob (kaj) te parikirén Túke, i me javáva te kharav Ráskire-Devléskiro lav. [9] Me keráva pir péskiri sovláh Ráske-Devléske akaná, syr Léskire manušá skedénape, [10] dre tremy Ráskire-Devléskiro Kher maškír túte, Jerusalimie. Alliluia! Šarén Ras-Devlés, saré Najudýtka nácyi, šarén zoralés Les, saré manušá. Pal-dová so Léskiri lačhé-ilýtkima isyn zoralypnaskiri ke ame, i Ráskire-Devléskiro čačipén jačélape pe saré viéki. Alliluia! Parikirén Ráske-Devléske, pal-dová so jov isyn lačhó! Pal-dová so Léskiri láska javéla pe saré viéki. Mek Izrailjoskiro kher te phenél akaná: “Léskiri láska jačélape pe saré viéki.” Mek Aronoskiro kher te phenél kakaná, so Léskiri lačhé-ilýtkima jačélape pe saré viéki. Mek odolé, savé daréna Rástyr-Devléstyr te phenén kakaná, so Léskiri lačhé-ilýtkima jačélape pe saré viéki. Me khardjom Ras-Devlés baré darátyr (darjatyr), Jov otphendiá mánge i vylydžijá pe baró štéto. Raj Devél isyn pal mánde, Me na javáva te darav, so manúš moginéla te kerél mánge. Raj Devél isyn pal mánde maškír odolénde, savé déna vast mánge: me dykháva, syr peréna odolé, savé bidykhena. Davá isyn fedýr te ĥaradjos te zrakhespe pal Raste-Devléste, syr te ĥaradjos te zrakhespe pal manušéste. Davá isyn fedýr te ĥaradjos te zrakhespe ke Raj Devél, syr te risjos te zrakhespe ke thagárja. Saré Najudýtka nácyi obgine trusciál mánde, ne me xasiakiráva len Ráskire-Devléskire lavésa. Jone obgine trusciál mánde, čačó, obgine trusciál mánde; ne me xasiakiráva len Ráskire-Devléskire lavésa. Jone obgine trusciál mánde syr byrlinia (pčoly), i jone murdine syr jag dre xrústy suv'jenca; ne me xasiakiráva len Ráskire-Devléskire lavésa. Jone špulde (tolkindle) man i pekade te perav; ne Raj Devél dyjá vast mánge. Raj Devél isyn miro zoralypén i mirí gilý radymása i Jov zrakhciá man. Šunén zaniá radymása pal zrakhibén dre šátry, kaj isyn Devléskire manušá. Čačó vast Ráskire-Devléskiro ĥazdynó, čačó vast Ráskire-Devléskiro pirizorjakirela. Me na meráva, ne me javáva te dživáv i te rosphenav pal Ráskire-Devléskire butiá. Raj Devél pharés sykliakirdiá man, ne Jov na dyjá man meribnáske. Otphanden (psiravén) mánge pórta, kaj zadžána čačipnaskire, me džáva andré, i me javáva te šaráv zoralés i te parikiráv Ráske-Devléske. Davá isyn pórta ke Raj Devél: čačipnaskire zadžána pir láte. Me javáva te parikiráv Túke, pal-dová so Tu otphendian mánge i Tu zrakhcián man. Bar, Savó na prilyné butiarné, jaciá šeralé baresa vaš keriben kherítko: davá jaciá Devléstyr, davá isyn divno dre amaré jakhá. Davá isyn dyvés, dro savó Raj Devél adiáke kerdiá, ame javása te radynaspe i ame javása bahtalé. Zrákh man, Rajo Dévla, me zoralés mangáva Tut! Rajo Dévla, me zoralés mangáva Tut, bahtaliakir amaró džiibén. Bahtaló isyn odová, savó javéla Ráskire-Devléskire lavéstyr. Ame bahtiakirdiam tumen Ráskire-Devléskire Khangirjátyr. Raj Devél isyn amaró Devél i Jov dyjá dud aménge: phanden svénta dyibená šelenca ke altarjoskire šyngá (rógi). Tu san miro Devél i me javáva te šaráv ke vučipén Tut, Miro Dévla! Me javáva te parikiráv Túke. Parikirén Ráske-Devléske, pal-dová so Jov isyn lačhó: pal-dová so Léskiri lačhé-ilýtkima jačélape pe saré viéki. Bahtalé isyn odolé, savengiro džiibén isyn bi došengiro, savé dživéna pir Ráskire-Devléskiro Zakóno. Bahtalé isyn odolé, savé rikirenape ke Léskire dophenybena, savé rodéna Les saré iléstyr. Jone adiáke-pac' na keréna načačipén: jone psiréna Léskire droménca. Rajo Dévla! Tu priphendian rakhipnytkes te rakhén Tyré uphenybená, sob (kaj) te lydžán man miré dromá pir Tyré statúty (ustavy). Tén'ci me na javáva ladžakirdó, kiéli me javáva te dykháv iléstyr pe Tyré priphenybená. Kiéli me udžinava Tyró čačipnáskiro séndo, tedy me javáva te parikiráv Túke saré iléstyr. Me javáva te rakhav Tyré statúty: na mek man sarésa. Syr moginéla ternó manúš te dživél bi došengiro? Kiéli jov javéla te rikirelpe ke Tyró lav. Me rodyjom Tut saré miré ilésa: na domek, sob (kaj) me te psirav krigal Tyré priphenybnendyr. Me garadjom Tyró lav dro péskiro iló, sob (kaj) mánge te na keráv gréhi proti Túte. Te šarén zoralés i te parikirén Túke, o Rajo Dévla! Sykliákir man Tyré priphenybnenge. Miré ušténca me phendjom sarénge pal saré čačipená, so Tu phendián. Me radyndjompe džiibnastyr pir Tyré naripiribena adiáke-pac', syr baré barvalypnastyr. Me javáva te rozlav Tyré uphenybená i me javáva te duminav zoralés pal Tyró sykliakiribén. Me javáva te bahtaljovav Tyré statutendyr, me na bistrava Tyró lav. Ker lačhipén Tyré pisharíske, sob (kaj) mánge saštý te javél te dživáv, i me javáva te rakhav Tyró lav. Otphande miré jakhá i me javáva te dykháv dívna réndy Tyré Zakonóstyr. Me som čúžo manúš pe phuv, na garav Tyré priphenybená mándyr. Miro di pharadjola baré patyvása ke Tyró čačipén dyvesé i ratý. Tu sykadian bang phut'kirdenge, Tu prokoscian odolén, kon gijá dre rig Tyré priphenybnendyr. Le krig mándyr bang i ladž, pal-dová so me prirakhcjom Tyró priripiriben. Thagárja (kniázi) adiáke-pac' bešné i rakiréna pe mánde, ne Tyró pishári rozlela Tyré zakóny. Tyró priripiriben adiáke-pac' radynela man i déla godypén mánge. Miro di pririkirdo zoralés ke práho; džidiakir man pir Tyró lav. Me phendjom angíl sarénde, so me kerdjom i Tu otphendian mánge. Ker, sob (kaj) me te ĥaljovav Tyré uphenybená i me javáva te rozlav Tyré dívna butiá. Miro di kaljola, zoraliákir man Tyré lavésa. Le krig mándyr xohaibén i sykáv Tyrí láska pir Tyró Zakóno. Me vykedyjom čačipnáskiro drom, i me riskirdjom godý ke Tyró čačipén. Me pririkiravpe ke Tyró dophenybén, o Rajo Dévla, na ladžakir man. Me prastava dromésa pir Tyré priphenybená, kiéli Tu dyján zor miré ileske. Sykliákir man, Rajo Dévla, Tyré statúty, i me javáva te riskirav godý ke jone ke (kónco) jagóro. Ker, sob (kaj) me te ĥaljovav len i me javáva te rikiravpe zoralés ke Tyró Zakóno i me javáva te prirakhav les saré miré ilésa. Ker, sob (kaj) me te psirav dromésa pir Tyré priphenybená, pal-dová so léndyr me bahtaljovava. Bandiakir miro iló ke Tyró naripiriben, a na ke ĥalkima. Rískir miré jakhá te na dykháv mánge pe xartytka (fal'šyva) réndy, de mánge džiibén te džav Tyré dromésa. De zor Tyré lavéske vaš Tyré pisharíske, lav, savó sys dynó odolénge, savé daréna Tútyr. Rískir krig mándyr mirí ladž, savjátyr me darava, pal-dová so Tyró séndo isyn čačunó. Ĥáda, me tyrdavape ke Tyré uphenybená, de mánge džiibén pir Tyró čačipén. Mek te javél ke me Tyrí lačhé-ilýtkima, Rajo Dévla, zrákh man pir Tyró lav. I me otphenava odoléske, kon obrakirela man, pal-dová so me zoralés patiáva Tyré lavéske. Na otle sarésa čačipnáskiro lav miré móstyr, pal-dová so me drieván užakirdjom lačhipén Tyré sendostyr. I me ŭsády (sak) javáva te rakhav Tyró Zakóno i pe saré viéki. I me ŭsády (sak) javáva te psirav pir vólia, pal-dová so me rodava Tyré uphenybená. I me javáva te rakiráv pal Tyré dosykaibena angíl kral'jénde, i me na javáva ladžakirdó. I me javáva te bahtaljovav Tyré priphenybnendyr, savé jačné. I me ĥazdáva péskire vastá ke Tyré priphenybená, savé isyn dróga mánge, i me javáva te rozlav Tyré statúty. Rípir Tyró lav vaš Tyré pisharíske, savó Tu dyján mánge te užakirav lačhipén. Davá podrikiréla man, kiéli man pritasavéna, pal-dová so Tyró lav déla džiibén mánge. Phut'kirdé džiné xoliamés sanape bi mierakiro, ne me na risijom dre rig Tyré Zakonóstyr. Me ripirava Tyré sendy ĥaratuné beršéndyr, o Rajo Dévla, adiáke me podrikirava pes. Xoliakiri zor léla upralypén pe mánde, kiéli me dykháva, syr fuj manušá mekéna Tyró Zakóno. Pal Tyré statúty me bagava giliá dro kher, pašýl savó me lodava. Me ripiravas Tyró lav ratý, o, Rajo Dévla, i me rakhcjom Tyró Zakóno. Davá isyn dynó mánge, sob (kaj) me te rikiravpe zoralés ke Tyré priphenybená. Mirí dólia Tútyr, o Rajo Dévla, syr me phendjom, isyn dro dová, sob (kaj) mánge te rikiravpe zoralés ke Tyré lavá. Me rodyjom Tyrí láska saré miré ilésa: jav lačhé-dieskiro ke me pir Tyró lav. Me rozdumindjom xor pal dová, syr me dživavas i me riskirdjom miro piró (stopa) ke Tyré dosykaibena. Me starindjompe sygedýr, sob (kaj) mánge te na otčhuvav duredýr te spolninav Tyré priphenybená. Fuj manušá sýrby šelenca obphandlé trusciál man, ne me na bistyrdjom Tyró Zakóno. Dre pašrat me uštava te parikiráv Túke pal Tyró čačunó séndo. Me som drúgo (mal) sarénge, kon daréla Tútyr, i kodolénge, savé rikirenape ke Tyré uphenybená. O, Rajo Dévla! Phuv isyn pherdý Tyré drogoné lačhipnása: sykliákir Man Tyré statutenge. Tu kerdián lačhipén Tyré pisharíske, o Rajo Dévla, pir Tyró lav. Sykliákir man kučes te sendiakirav pir Tyró, pal-dová so me patiáva Tyré priphenybnenge. Angíl dová, syr Tu pritasadian man, me xohadjompe, ne kakaná me rakhava Tyró lav. Tu san lačhó i kerésa lačhipén, sykliákir man Tyré statuténge. Phut'kirdé pefromi xohade pe mánde: me ž javáva te rikiravpe ke Tyré uphenybená saré miré iléstyr. Léngiro iló isyn thulo, na šunéla nisó, ne mánge isyn drieván drógo Tyró Zakóno. Tu pririkirdian man vaš miro lačhipén, sob (kaj) mánge te vysykljovav Tyré statúty. Tyró Zakóno isyn but fedýr mánge, syr bará koterá suvnakástyr ci rupéstyr. Tyré vastá sozdyne man i čhudé man, de mánge godý te sykljovav Tyré priphenybnenge. Odolé, savé daréna Tútyr, javéna zoralés te radynénpe, syr dykhéna man, pal-dová so me užakirava lačhipén Tyré lavéstyr. Me džinóm (džináv), o Rajo Dévla, so Tyró séndo isyn čačunó, i so Tu tasadian man pir Tyró čačipén. Mek te javél Tyrí lačhé-ilýtkima te podrikirél man, Tyré pisharís, pir Tyró lav. Mek te javél ke me Tyrí lačhé-ilýtkima, sob (kaj) me moginavas te dživáv, pal-dová so me bahtaljovava Tyré Zakonóstyr. Mek phut'kirdé te javén ladžakirdé, pal-dová so jone pefromi kerdé xohaibén pe mánde: ne me ž javáva te rozlav Tyré uphenybená. Mek odolé, savé daréna Tútyr, te javén ke me, i saré odolé, kon džinéla Tyré dosykaibena. Mek te javél miro iló bidošéngiro dre Tyré statúty, sob (kaj) mánge te na javél ladžavo. Miro di muljola pal Tyró zrakhibén, me užakirava lačhipén Tyré lavéstyr. Miré jakhá xasjona so dyvés bi – Tyré laveskiro, sýrby kaména te phenén: “Kiéli Tu podrikiresa man?” Pal-dová so me som sýrby cypitko gonó pe phuv, ne me na bistyrdjom Tyré statúty. Kicý dyvesá Tu désa Tyré pisharíske? Kiéli Tu sendiakiresa odolén, savé tradéna man? Phut'kirdé manušá, savé na rikirenape ke Tyró Zakóno, vyĥanade ĥanbiniá (jamy) mánge. Saré Tyré priphenybená isyn patiaibnytka, manušá tradéna man na pir čačipén: de vast mánge. Jone nábut so na xasiakirdé man pe phuv; ne me na mekcjom Tyré uphenybená. Zoraliakir man pir Tyrí lačhé-ilýtkima, i me javáva te rikiravpe ke uphenybená Tyré móstyr. O Rajo Dévla! Pe saré viéki Tyró lav jačélape pe bolybén! Tyró patiaibén piridžala jekhe rodóstyr ke javír: Tu začhudian phuv i joj usady (sak) jačélape adiáke. Saró isyn terdó pir Tyró statutno uphenybén ke/žýko adadyvés, pal-dová so jone saré dynarinena Túke. Te na bahtaljovavas me Tyré Zakonóstyr, tén'či me xasjovavas dro miro kalypén. Me nijékhvar na bistrava Tyré uphenybená, pal-dová so Tu podrikirdian man lénca. Me som Tyró, zrákh man; pal-dová so me rodyjom Tyré uphenybená. Fuj manušá užakirde pe mánde te xasiakirén man, ne me javáva te rozlav Tyré priripiribena. Me dykhcjom kónco (jagóro) sareske, so isyn bidošéngiro, ne Tyró priphenybén isyn bi mierakiro. O, mánge pir iló Tyró Zakóno. Me rozlava les dyvesé i ratý. Tu kerdián man godedyr miré vergéndyr pir Tyré priphenybená, pal-dová so jone isyn usady (sak) mánca. Me ĥaljovava butýr sykliakiribnaskir'jendyr, pal-dová so me rozlava Tyré priripiribena. Me ĥaljovava butýr phuré manušéndyr, pal-dová so me riskirdjom godý ke Tyré uphenybená. Me rikirdjom dre rig mirí ĥerój kažnoné čoré droméstyr, sob (kaj) te prirakhav Tyré uphenybená. Me na risijom krig Tyré sendostyr, pal-dová so Tu sykliakirdian man. Syr gudló isyn dro miro muj Tyré lavéndyr. Jone isyn gudledyr avginestyr miré moske. Tyré uphenybnendyr me lyjom te ĥaljovav, pal-dová so me bidykhava kažno načačuno drom. Tyró lav isyn momolýtko (svietíl'niko) miré ĥerjake, i dud pe miro drom. Me sovlahadjom i me dophenava davá, so me rikiravape zoralés ke Tyró čačunó séndo. Me som drieván pritasado, o Rajo Dévla, džidiakir man pir Tyró lav. Me mangáva, o Rajo Dévla, te priles Miré-moskiro parikiriben Túke syr svénto dyibén; i sykliákir Man Tyré sendoske. Miro džiibén isyn usady (sak) dro miro vast, ne me na bistrava Tyró Zakóno. Čoré manušá kerdé felý pe mánde, ne me na risijom dre rig Tyré uphenybnendyr. Me prilyjom Tyró dosykaiben syr mištypén pe saré viéki, pal-dová so jone radynena miro iló. Me prilyjom miré ilésa te kerél usiéndie (viezdie) saró pir Tyré statúty ke sámo kónco (jagóro). Me bidykhav dujemujengire manušén, ne mánge isyn drógo Tyró Zakóno. Pal Túte me garadjovava, i me zrakhavape syr pal ščýto, me užakirava lačhipén Tyré lavéstyr. Durjon krig mándyr, tumé-čoré manušále. Me javáva te rikiravpe ke Devléskire priphenybená. Podrikir man Tyré lavésa, sob (kaj) mánge saštý te javél te dživáv, sob (kaj) me te na javav ladžakirdó doléstyr, sóstyr me užakirava lačhipén. Podrikir zoralés man i me zrakhavape, i me ŭsády (sak) javáva te riskirav godý ke Tyré statúty. Tu na prilesa odolén, savé giné dre rig Tyré statutendyr, pal-dová so léngiro xohaibén nisó na déla. Tu ginesa pal ĥnejo (gnojo) sarén čoré manušén pe daja phuv, paldavá mánge isyn dróga Tyré priripiribena. Mirí loč (plot') izdrala darátyr angíl Túte; mánde isyn trašaibén angíl Tyró séndo. Me kerdjom pir Zakóno i čačipén, na mek man pe odolénde, savé tradenape pal mánde. Zaterdjov pal Tyré dynariste vaš léskiro lačhipén, na mek, sob (kaj) phut'kirdé te pritasaven man. Miré jakhá muljona so dyvés, kiéli Tu zrakhésa man, i jone mahtynena pal Tyró čačipnáskiro lav. Otlydžape Tyré pisharisa pir Tyrí lačhé-ilýtkima i sykliákir man Tyré statutenge. Me som Tyró pishári, de godý mánge te džináv Tyré priripiribena. Davá isyn Tyró časo, Rajo Dévla, te kerés vari-so, pal-dová so manušá phagirdé Tyró Zakóno. Paldavá Tyré priphenybená isyn drogedyr suvnakástyr, fedýr čačuné suvnakástyr. Paldavá me gindjom Tyré uphenybená pir saró, syr naj čačunedyr: me bidykhava kakaná načačuno drom. Tyré dosykaibena isyn drieván dróga, paldavá miro di rikirélape zoralés ke jone. Dová, so sykavéna Tyré lavá, déla dud i sykliakiréla manušén, savé iščo (inké) nábut džinéna. Me otphandjom muj i dre smega/truš (žažda) davá ĥondiá, pal-dová so me tyrdavape ke Tyré priphenybená. Risjov mósa ke me i jav lačhé-dieskiro ke me, syr Tu but móly kerésa odolénge, savénge isyn drógo Tyró lav. Mamuiakir (vypriamin) miré piré (stópy) te džav pir Tyró lav i na domek, sob (kaj) čoré manušá te xulainen pe mánde. Vyrakh man manušéndyr, savé pritasavéna man, i me javáva te rikiravpe ke Tyré uphenybená. Mek te ziainel Tyré-moskiro dud pe Tyré pishariste, i sykliákir man Tyré statutenge. Jasva syr paningá thadena miré jakhéndyr, pal-dová so manušá na rikirenape ke Tyró Zakóno. Tu san čačipnáskiro, o Rajo Dévla, i Tyré sendy isyn čačuné. Tu dyján Péskire čačuné dosykaibena; jone isyn drieván patiaibnytka. Miro zevlenypen xačkirdiá syr jag man, pal-dová so miré vérgi bistyrde Tyró lav. Tyró lav isyn drieván propatiakirdo, i Tyró pishári vykedéla les. Me som tyknó i som dre tykny patýv, ne me na bistyrdjom Tyré uphenybená. Tyró čačipén javéla ŭsády (sak) čačipnáskiro, i Tyró Zakóno isyn čačunó. Pharipén i bída pirilyne man: ne me bahtaljovava Tyré priphenybnendyr. Tyré dosykaibena isyn čačipnaskire pe saré viéki: de godý mánge, i me javáva te dživáv. Me kharáva zoralés saré miré iléstyr, o Rajo Dévla, otphen mánge: me javáva te rikiravpe zoralés ke Tyré statúty. Me kharáva Tut: zrákh man i me javáva te rikiravpe ke Tyré priphenybená. Me ĥazdavape pe sámo zlóko tasiarlákiro angíl dyvés i me dáva gódla te pomoginen: me užakirava lačhipén Tyré lavéstyr. Miré jakhá isyn džangade angíl ratítko stréga, sob (kaj) mánge te rozlav Tyró lav. Vyšún mirí zan pir Tyrí lačhé-ilýtkima: o Rajo Dévla, džidiakir man pir Tyró séndo. Odolé, savé čorjonape xoliása pal mánde, javné pašyledýr: jone isyn dur Tyré Zakonóstyr. Tu san pašýl, o Rajo Dévla, i saré Tyré priphenybená isyn čačuné. Ĥara me udžindjom Tyré dophenybnendyr, so Tu učhudian len pe saré viéki. Dykh rakhunes, syr mánge isyn pharó i zrákh man, pal-dová so me na bistyrdjom Tyró Zakóno. Zaterdjov zoralés pal miro čačipén i vyrakh man, džidiakir man pir Tyró lav. Čoré manušá isyn dur zrakhibnastyr, pal-dová so jone na dykhéna ciamkes pe Tyré statúty. O Rajo Dévla, Tyrí lačhé-ilýtkima isyn zoralý; džidiakir man pir Tyró čačipén! Kodolé, savé tradenape pal mánde i isyn miré vérgi, len isyn but; ne me na risijom dre rig Tyré dophenybnendyr. Me dykhcjom kodolén, savé denape pale i miro iló kalyja, pal-dová so jone na rikirenape ke Tyró lav. Pridykhpe, syr isyn dróga mánge Tyré dophenybena! Rajo Dévla, džidiakir man pir Tyrí lačhé-ilýtkima. Tyré laveskiro kučipén isyn dro čačipén, kažno Tyró čačipnáskiro séndo jačélape pe saré viéki. Thagárja (kniázi) resena vergítkes ke me bi pričynakiro, ne miro iló daréla Tyré lavéstyr. Me bahtaljovava Tyré lavéstyr sýrby kodová manúš, kon lathiá bari bažyn. Me bidykhava i dykháva vučipnástyr pe kodolende, savé xohavena, ne mánge isyn drógo Tyró Zakóno. Me vyšarava Tut eftá móly pe dyvés pal Tyró čačipnáskiro séndo. Pherdó ramánjo (miro) isyn kodolende, savénge isyn drógo Tyró Zakóno i jone na obštavenape pir bar. O, Rajo Dévla! Me užakirdjom, sob (kaj) Tu te zrakhes man i pir Tyré uphenybená. Miro di rikirélape ke Tyré dophenybena, savé isyn drieván dróga mánge. Me rikiravape ke Tyré priphenybená i ke Tyré dophenybena, i saré miré dromá isyn angíl Tyré jakhá. Mek te džal pašyledýr ke Tu miro roibén, o Rajo Dévla: de godý mánge pir Tyró lav. Mek te javél mirí pátieri (molítva) ke Tu: zrákh man pir lav, so Tu dyján. Mek te šarén miré uštá Tut, kiéli Tu sykliakiresa man Tyré statutenge. Mek te vyphenel zoralés mirí čib pal Tyró lav, pal-dová so Tyré priphenybená isyn čačipnaskire. Mek te pomoginel Tyró vast mánge, pal-dová so me vykedyjom Tyré uphenybená. Me tyrdavape ilésa, sob (kaj) Tu te zrakhes man, o Rajo Dévla i me bahtaljovava Tyré Zakonóstyr. Mek te dživél miro di i jov javéla te šarel Tut; mek te del vast mánge Tyró čačipén. Me gijom dre rig syr bakri, saví našadyja: pridykhpe pašyledýr ke Tyró pishári; pal-dová so me na bistrava Tyré priphenybená. Gilý angíl Khangirí. Kiéli mánge sys pharó, me khardjom zoralés Ras-Devlés, i Jov otphendiá mánge. O Rajo Dévla, zrákh miro di xohané uštendyr, frentone čibatyr. So déla túke? Savó lačhipén janéla túke načačuny čib? Haladeskire vostra (čolalé) maribnýtka bustiá (striély) jagakire vangarenca jadloŭcostyr? Bida mánge, so me som manušénca ke Masoho, so me dživáva maškír Kiedaroskire šátry. Miro di drieván but dživdiá maškír odolénde, kon bidykhela ramánjo (miro). Me som pal ramánjo (miro); ne kiéli me rakiráva, tedy jone pal maribén. Gilý angíl Khangirí. Me ĥazdáva jakhá miré pe bérgicy, katýr déna vast mánge. Raj Devél pomoginéla mánge, Savó sozdyjá bolybén i phuv. Jov na domekela, sob (kaj) tyrí ĥerój te perél; Jov, Savó rakhéla tut, isyn na lindralo (na drieminela). Ĥáda, Jov, Savó rakhéla Izrailjo, na javéla te sovél ci te del lindra (drieminel). Raj Devél rakhéla tut, Raj Devél javéla te prirakhel tut pašýl tyrí čačí rig. Kham na pekavela tut dyvesé ci čhon ratý. Raj Devél zrakhéla Tut saré čoripnástyr, Jov javéla te rakhél Tyró di. Raj Devél javéla te rakhél tut, kiéli tu džása javrí i džása andré, kakaná i duredýr pe saré viéki. Gilý angíl Khangirí Davidoskiri. Me sómas rado, kiéli jone phendlé mánge. Javén dre Ráskire-Devléskiri Khangirí. Amaré ĥerá javéna te terdjon dre Tyrí pórta, o Jerusalimo! Jerusalimie, so isyn ĥazdynó syr fóro, savó isyn čhudo khetané, kaj javéna Izrailjoskire ródy pir Izrailjoskiro lado/réndo (poriadko), sob (kaj) te parikirén Ráskire-Devléskire lavéske. Pal-dová so začhude trony vaš séndo odój, trony Davidóskire kheréstyr. Mangén Devlés pal ramánjo dro Jerusalimo: “Mek te dživén mištés odolé, savénge drógo isyn tu, te javél ramánjo maškír tyré vánty (sciany), i mištypén dre Tyré baré felatiniá (kolová)” Vaš miré pšalénge i malenge me phenáva kakaná: “Te javél ramánjo (miro) tuménge.” Vaš Ráskire-Devléskiro Kher (Khangirí), amaré Devléskiri, me kamám mištypén tuménge. Gilý angíl Khangirí. Me ĥazdáva miré jakhá pe Túte, Savó dživéla pe bolybén. Ĥáda, syr pishariskire jakhá dykhéna pe léskire-ráskiro vast, syr pisharicakire jakhá dykhéna pe lákire-raniakiro vast, adiáke-pac' amaré jakhá užakiréna Ras-Devlés, amaré Devlés, paka Jov potanginela amen. Jav lačhé-dieskiro ke ame, o Rajo Dévla, jav lačhé-dieskiro ke ame! Pal-dová so améndyr drieván xoliames sanape. Amaró di zoralés čalyja odoléndyr, savé na déna patýv aménge ci phut'kirdendyr, savé sanape xoliames améndyr. Gilý angíl Khangirí. Davidoskiri. So javélas, te na javél by Raj Devél pe amarí rig, mek te otphenel Izrailjo: “Te na javél Raj Devél aménca, kiéli manušá ĥazdynépe pe aménde, tedy jone proglytninenas (nakhavenas) amen pir adákicy, kiéli léngiri xolý roshačija pe aménde; tén'či paniá začhuvenas amen, a baró paning tasadiakirelas amen; tén'či sygna paningá začhuvenas telé amaré dijá. Mek te vyšaren, te parikirén Ráske-Devléske, Savó na dyjá amen vergénge pe dandá te doresen. Amaró di nascia syr čirikly feliatyr, so manušá čhuvénas te uhtylén: felý isyn phagirdy i ame nasciam. Davá isyn Raj Devél, Kon pomoginéla aménge, Savó sozdyjá bolybén i phuv. Gilý angíl Khangirí. Kodolé, savé patiána zoralés dre Raste-Devléste, isyn sýrby bérga Sióno, Savó na džála krig štetóstyr, a jačélape pe saré viéki. Bérgi isyn trusciál Jerusalimo, i Raj Devél isyn adiáke-pac' trusciál Léskire manušénde, kakaná i pe saré viéki. Čoré-manušéngiro destó na javéla te rikirél zor pe phuv, kaj isyn čačipnaskire manušá, sob (kaj) čačipnaskire manušá te na riskirén péskire vastá ke čoripén. Ker lačhipén, Rajo Dévla, lačhé manušénge, i odolénge, savénde isyn čačunó iló. I kodolé, savé risjona dre rig pe bangé dromá, len Raj Devél lydžála krig khetané odolenca, savé keréna čoripén. Te javél ramánjo pe Izrailjo! Gilý angíl Khangirí. Kiéli Raj Devél jandiá pale Sionoskire manušén plienóstyr, ame sámas sýrby odolé, savé dykhéna suné. Tedy amaró muj sys pherdó sabnasa i amarí čib bagalas radymása, i rakirdé tedy maškír Najudengire nácyi: “Raj Devél kerdiá baré réndy lénge.” Raj Devél kerdiá baré réndy aménge, i ame sam ráda. Jan pale amaré manušén plienóstyr, syr ručai janéna paní pe paš-dyvesýtko (južno) rig. Odová, kon čhuvéla ziárka dre phuv jasvénca, javéla te čhinel umaloto radymása. Odová, kon lydžála péskire ziárki jasvénca, javéla te lydžál pale ĥarby (snopy) péskire radymása. Gilý angíl Khangirí. Solomonóskiri. Kóli Raj Devél te na ĥazdel Kokoró Kher, ivjá (naprásnes) tedy kerénas butý odolé, savé čhuvéna les; kóli Raj Devél te na rakhelas fóro, tedy stregari (ohraniko), savó rakhéla, ivjá kerélas davá. Davá te javél ivjá réndo vaš túke, so tu uštesa tasiárles (ránes), so tu san beštó ke korigipén (ke póznyma), so tu xasa maró pale pharé butiátyr. Raj Devél déla xabén kodoléske, savés Jov kaméla, dre suné. Ake, čhavé isyn syr meknó mištypén Rástyr-Devléstyr; jone isyn bahtalypén dákire ločoviátyr. Syr maribnýtka bustiá (striély) dro xaladeskiro vast, adiáke-pac' isyn čhavé terné dadéskire. Bahtaló isyn manúš, savéste isyn but dasavé bustiá dro kolčano. Jone na javéna ladžakirdé, kiéli jone javéna te xaspe namalenca pašýl pórta, kaj sendy džána. Gilý angíl Khangirí. Bahtaló isyn kažno manúš, Savó daréla Rástyr-Devléstyr, Savó psiréla pir Léskire dromá. Tu javésa te xas maró butiátyr péskire vasténdyr, tu javésa bahtaló i saró mištypén javéla túsa. Tyrí romný javéla sýrby umalotno vinagradýtko kašt dro kher i pašýl kher, tyré čhavé javéna sýrby olivitka randiá (vietki), so javéna trusciál Tyró skamínd. Ĥáda! Te javél adiáke-pac' bahtaló manúš, Savó daréla Rástyr-Devléstyr. Raj Devél bahtiakiréla Tut Sionóstyr, i tu saštý te dykhés lačhipén dro Jerusalimo pir saré dyvesá dro Tyró džiibén, i sob (kaj) tu te dykhés čhavén péskire čhavengiren. Te javél ramánjo (miro) pe Izrailjo! Gili angíl Khangirí. But móly jone pritasavenas man miré ternypnastyr, mek te phenél Izrailjo: “Jone pritasavenas man miré ternypnastyr but móly, ne jone na lyné upralypén pe mánde. Odolé, savé pharavena (pahinena) phuv, pahindle pe miro dumó, jone kerdé dind(z)'kirde lies'ni (borozny). Raj Devél isyn čačipnáskiro: Jov rosčhinela pe paš fujé manušéngire šele. Mek te javén ladžakirdé i te risjon pale odolé, savé bidykhena Sióno; mek te javén jone syr čar pe kheréskiri stréha (čhakín), so vyšutjola angíl dová, syr te vybarjol láke, savjása odová, kon sčhinela la, te na pherjakirel péskiro vast, ci odová, kon phandela ĥarby (snopy), te na pherjakirel péskiri brek. I odolé, kon džála pašýl, te na phenén nijékhvar: “Te bahtiakirél Raj Devél tumen; ame bahtiakirasa tumen Ráskire-Devléskire lavéstyr.” Gilý angíl Khangirí. Siré xor bidátyr me kharáva Tut, Rajo Dévla. Rajo Dévla! Šun mirí zan, i pričhúv kan ke mirí zan, syr me mangáva Tut te podel vast mánge. Kóli Tu, o Rajo Dévla, javésa te ripires saró čoripén, tedy kon, Rajo Dévla, moginéla te terdjol pe čačipén. Ne Tu otmekesa gréhi aménge, sob (kaj) ame te daras Tútyr. Me užakirava lačhipén Rástyr-Devléstyr, miro di užakiréla i rikiréla nadiéia pe Léskiro lav. Miro di užakiréla Ras-Devlés butýr, syr stregari užakiréla tasiarla, butýr syr stregari užakiréla tasiarla. Mek te užakirel lačhipén Izrailjo Rástyr-Devléstyr, pal-dová so Raste-Devléste isyn lačhé-ilýtkima, i Jov vyrakhela buten, i Jov vyrakhela Izrailjo saré léskire čoripnástyr. Gilý angíl Khangirí. Davidoskiri. Rajo Dévla! Miro iló na phutjola i miré jakhá na dykhéna baripnasa. I me adiáke-pac' na zalavape rendénca, so isyn na pir zor mánge ci dolesa, so isyn divno mánge. Ne me obrikirava pes i štyliakirava péskiro di syr čhavoró, savés otlenas dákire kolynestyr. Miro di isyn adiáke-pac' štyl sýrby čhavoró, savés otlyne dákire kolynestyr. O, Izráilie! Patia zoralés dre Raste-Devléste kakaná i pe saré viéki. Gilý angíl Khangirí. Rajo Dévla! Rípir Davidós i saró léskiro pharipén, syr jov sovlahadiá Ráske-Devléske i dyjá sovláh, Jekhoreske Jakovoskireske, Zoralypnaskire Devléske: “Me na džáva dre šátra miré kheréskiri, me na pasjovava upré miré-čhuibnaskiri pe cérga, me na dáva miré jakhenge te soven, me adiáke-pac' na dáva líndra (te na drieminav) miré cymblenge (riesnicenge), angíl dová, syr me lathava štéto Ráske-Devléske, šátra, Jakovóskire Zoralypnaskire Devléske. Ame šundiám pal léste ke Jefrafo, ame lathiam les pe Iarimoskire (Jarimoskire) féldy. Javén, dasá patyv pe čangá pašyl Léskire šátry, javén dasa patýv pe čangá pašýl Léskire ĥerá. Jav, Rajo Dévla, pe Tyró štéto te otkhinjos, Tu, i Tyró kovčego (mohtó) Zakonosa, so sykavéla Tyró zoralypén. Mek te ur'jen Tyré rašaja pe péste čačipén, mek te radynénpe zoralés Tyré svénta. Na risjov krig Péskire Pomakhne manušéstyr pal Davidóste, Tyré pishariste. Tu sovlahadian čačipnása Davidóske, so Tu na risjosa krig Léstyr: “Me čhuváva pe trono Tyré čhavés. Kóli Tyré čhavé javéna te rikirenpe ke Miro Zakóno i ke Miré dophenybena, savénge Me javáva te sykliakirav len, tedy i léngire čhavé adiáke-pac' javéna te bešén pe trono pe saré viéki.” Raj Devél vykedyjá bérga Sióno, saví jaciá drógo Léske, sob (kaj) te dživél odój: “Davá isyn Miro štéto te otkhinjovav pe saré viéki, me javáva te dživáv adái, pal-dová so joj iaciá drógo Mánge. Me, čačes, bahtiakirava lákiro xabén, Me dáva čalés čororé manušénge; i Me urjavava lákire rašán zrakhibnasa i lákire svénta javéna te den gódla radymása. Me keráva adiáke, so vybarjola Davidoskiri zor dre čhavéste, Me keráva momolýtko (svietíl'niko) Miré Pomakhneske. Me urjavava léskire vergén ladžaipnasa; ne léskiri viánka (koróna) javéla te ziainel pe léste.” Khangirjákiri Gilý. Davidoskiri. Dykhén! Syr lačhés i droges isyn te dživén maškír pšalénde dro jekhipén! Davá isyn sýrby kuč olivítko dzet (jeliejo) pe šeró, so thadéla telé pe Aronoskire čhorá (bróda), savó prastala telé pe léskire-idiakiro jagóro (krajo); davá isyn sýrby Jermonoskiri pahlyn (rosa), so džála telé pe Sionóskiri bérga, pal-dová so odój phendiá bahtiakiribén, džiibén pe saré viéki. Gilý angíl Khangirí. Tumé vyšaren Ras-Devlés, saré Ráskire-Devléskire pishárja, savé isyn terdé ratý dre Ráskire-Devléskiro Kher (Khangirí). Ĥazden péskire vastá pe Svénto štéto i vyšaren Ras-Devlés. Raj Devél, Savó sozdyjá bolybén i phuv, te bahtiakirél tumen Sionóstyr. Alliluia! Šarén Ras-Devlés! Šarén tumé Ráskire-Devléskire pishárja, savé isyn terdé dro Ráskire-Devléskiro Kher dre gredy (dvory) ke amaré Devléskiro Kher. Šarén Ras-Devlés; pal-dová so Jov isyn lačhó! Bagán psalmy Léskire lavéske, pal-dová so Jov isyn drógo. Jov vykedyjá Jakovós vaš Péske, a Izrailjo syr Péskiro mištypén. Pal-dová so me džinóm, so Raj Devél isyn baró i amaró Raj Devél isyn vučedýr saré devlorendyr. Raj Devél keréla saró, so Léske zakamelape, ci pe bolybén, ci pe phuv, ci dre móri (derjavá), ci dre saré xor štéty. Jov keréla adiáke, so óbloki ĥazdénape phuvjákire jagorendyr; Jov keréla adiáke so džána bliskavícy bryšyndesa, Jov janéla balvalia Péskire skladendyr. Jov xasiakirdiá pervones, kon bijandjola ci manušénde ci kheritkoné murdalénde (maškír skoto) dro Jegípto; Jov bičhadiá znamiénii (ĥiertyká) i dívy maškír Túte, o Jegípto, pe Faraonoste i saré Léskire dynar'jende? Jov xasiakirdiá baré Najudýtka nácyi i muliakirdiá but kral'jén: Sigonos, Amoriejéngire kralís, Ogos, Vasanoskire kralís i saré Xanaanoskire kralipená. I Jov dyjá léngiri phuv syr meknó mištypén Péskire manušénge Izrailjostyr. O, Rajo Dévla! Tyró lav jačélape pe saré viéki! O, Rajo Dévla! Ripiribén pal Túte isyn rodóstyr ke ródo. Pal-dová so Raj Devél javéla te sendiakirél Péskire manušén, i Jov javéla lačhé-dieskiro ke Péskire pishárja. Najudytkoné-nacyiengire ídoly isyn rupéstyr i suvnakástyr, manušéngire vastá kerdé len: lénde isyn muiá, ne jone na phenéna nisó, lénde isyn jakhá, ne jone na dykhéna; lénde isyn kaná, ne jone na šunéna, i nane phurd (dyhanijo) léngire móstyr. Mek odolé, savé kerdé len, te javén dasavé-pac' syr léngire ídoly; i saré javír manušá, savé užakiréna lačhipén dalé statuléndyr (statujendyr). Manušále Izrailjoskire kheréstyr! Tumé te vyšaren i te parikirén Ráske-Devléske! Aronoskiro kher! Te vyšaren tumé i te parikirén Ráske-Devléske! Manušále Lievijoskire kheréstyr! Te vyšaren tumé i te parikirén Ráske-Devléske! Tumé, savé daréna Rástyr-Devléstyr, te vyšaren i te parikirén Ráske-Devléske! Te vyšaren i te parikirén Ráske-Devléske Sionóstyr, Savó dživéla ke Jerusalimo! Alliluia! Parikirén Ráske-Devléske, pal-dová so Jov isyn lačhó, pal-dová so Léskiro drógo lačhipén jačélape pe saré viéki; parikirén Devléske, Savó isyn Sámo (Naj) Vučedýr pe saré devlorende; pal-dová so Léskiro drógo lačhipén jačélape pe saré viéki. Parikirén Ráske-Devléske, Savó isyn Baredýr saré randyr, pal-dová so Léskiro drógo lačhipén jačélape pe saré viéki, Léske, Savó Kokoró keréla baré dívy, pal-dová so Léskiro drógo lačhipén jačélape pe saré viéki: Léske, Kon sozdyjá godypnasa bolybén, pal-dová so Léskiro drógo lačhipén jačélape pe saré viéki; Léske, Kon rosčhudiá phuv uprál paniendyr, pal-dová so Léskiro drógo lačhipén jačélape pe saré viéki; Léske, Kon kerdiá baré duda (svietily), pal-dová so Léskiro drógo lačhipén jačélape pe saré viéki; – kham, sob (kaj) te rikirén zor pe phuv dyvesé, pal-dová so Léskiro drógo lačhipén jačélape pe saré viéki, čhon i čergeniá, sob (kaj) te rikirén zor pe phuv ratý, pal-dová so Léskiro drógo lačhipén jačélape pe saré viéki: Léske, Kon muliakirdiá saré pervoné bijandle bijatén Jegiptóstyr, pal-dová so Léskiro drógo lačhipén jačélape pe saré viéki, i Savó vylydžijá Izrailjo maškír lénde, pal-dová so Léskiro drógo lačhipén jačélape pe saré viéki, zoralé vastésa i ĥazdyné psikesa, pal-dová so Léskiro drógo lačhipén jačélape pe saré viéki. Léske, Kon roskerdiá pe pašá Loló mórjo (derjáv), pal-dová so Léskiro drógo lačhipén jačélape pe saré viéki, Kon kerdiá adiáke, so Izrailjo progijá (nakhja) maškirál davá štéto, pal-dová so Léskiro drógo lačhipén jačélape pe saré viéki, ne piririskirdia Faraonos i léskiro xaladybén dro Loló mórjo (derjáv), pal-dová so Léskiro drógo lačhipén jačélape pe saré viéki; Léske, Kon lydžijá angíl péskire manušén pir čhučé prahi, pal-dová so Léskiro drógo lačhipén jačélape pe saré viéki; Léske, Kon muliakirdiá baré kral'jén, pal-dová so Léskiro drógo lačhipén jačélape pe saré viéki; i zamardiá slavutnone kral'jén, pal-dová so Léskiro drógo lačhipén jačélape pe saré viéki; Sigonos, Amoriejéngire Kralís, pal-dová so Léskiro drógo lačhipén jačélape pe saré viéki; i Ogos Vasanoskire kralís, pal-dová so Léskiro drógo lačhipén jačélape pe saré viéki, Jov dyjá léngiri phuv syr meknó mištypén, pal-dová so Léskiro drógo lačhipén jačélape pe saré viéki, meknó mištypén Izrailjoske, Léskire pisharíske, pal-dová so Léskiro drógo lačhipén jačélape pe saré viéki; Jov ripirdia amen syr ame sámas pe telatuno štéto, pal-dová so Léskiro drógo lačhipén jačélape pe saré viéki; i Jov vyrakhcia amen amaré vergéndyr, pal-dová so Léskiro drógo lačhipén jačélape pe saré viéki: Kon déla xabén kažnoné ločake (plotiake), pal-dová so Léskiro drógo lačhipén jačélape pe saré viéki. Parikirén bolybnáskire Devléske, pal-dová so Léskiro drógo lačhipén jačélape pe saré viéki. Pašýl réki (leniá) ame sámas bešté ke Vavilóno, ame rondiam, kiéli ame ripirasas Sióno. Ame ubladiam amaré luty pe vieiba (vierba) pašýl davá. Pal-dová so odolé, savé lyné amen dro pliéno, mangenas gilý améndyr; i odolé, savé občorde amen, zamangenas améndyr rádyma, rakirí: “Bagán aménge Sionoskire giliá.” Syr javása ame te bagasa Ráskire-Devléskire giliá pe čúžo rig? Kóli me bistrava tut, o Jerusalímie, mek te otšutjol miro čačó vast; kóli me na javáva te ripirav tut, mek mirí čib te prijačel ke miro taluj (njobo) i, kóli me na javáva te šaráv tut butýr saréstyr, Jerusalímie. O, Rajo Dévla! Rípir Edomoskire čhavénge pal Jerusalimoskiro dyvés, savé phendlé: “Phagiren sarésa! Phagiren sarésa ke sámo phuv.” O, čhájo Vavilonóstyr, tut muliakirena. Te javél bahtiakirdó dová, kon otpleskirela palé tuménge, pal dová, so tumé kerdé aménge: te javél bahtiakirdó odová, kon uhtyléla tumaré tyknen i te pharavel len pir bará. Davidóskiro Psálmo. Me javáva te parikiráv Túke saré miré iléstyr, me javáva te bagáv psalmy túke angíl devlorende. Me javáva te kloninavpe patyvása ke Tyrí svénto Khangirí i te vyšarav Tyró lav pal Tyró drógo lačhipén, i pal Tyró patiaibén, pal-dová so Tu ĥazdyjan vučedýr saréstyr Tyró lav. Tu otphendian mánge dro dyvés, kiéli me dyjom gódla jasvénca: Tu kerdián murškanedyr man, kiéli Tu dyján zor miré dieske. Saré králja pe phuv javéna te vyšaren Tut, o Rajo Dévla, pal-dová so jone šundlé lavá, so Tu phendián. I jone javéna te bagán pal Ráskire-Devléskire dromá, pal-dová so Raskiri-Devléskiri sláva isyn vučy. Mek Raj Devél isyn vučés, ne Jov dykhéla telé pe odolénde, savé kandéna Les, a phut'kirdes Jov pindžkirela duripnastyr. Kóli javéla pharó mánge saré rigéndyr, Tu džidiakiresa nevéstyr man: Tu dind(z)'kiresa (tyrdesa) Tyró vast, kiéli vérgi zoralés xoliasona i Tyró čačó vast vyterdela man bidatyr. Raj Devél keréla adiáke, so me javáva bidošéngiro: Tyrí lačhé-ilýtkima, o Rajo Dévla, jačélape pe saré viéki; na mek butiá, so kerdé Tyré vastá. Xoróskire Dirižoróske. Davidóskiro Psálmo. O, Rajo Dévla, Tu rozdykhcian lačhés man, i Tu džinésa man. Tu džinésa, kiéli me bešava i uštava; tu ĥaljosa duripnastyr, so me duminava. Tu dykhésa pirdál (skroz') miro drom i miro pasiben i saré miré dromá isyn džindlé Túke; pal-dová so iščo (inké) nane lav pe mirí čib, sob (kaj) Tu akaná te na džinesas mištés les. Tu oblyjan man palál i angíl, i Tyró vast isyn čhudo pe mánde. Dasavo Tyró džinybén pal mánde divinela man, davá isyn vučó godypén, mirí godý na dodžála ke davá. Karik me džáva krig Tyré Duhóstyr? Ci karik me keravpe Tyré jakhéndyr? Kóli me džáva ke Bolybnáskiro Rajo, Tu san odój; cji, kóli me keráva čhuibén dro liúno (prieispodnjo), ake, Tu san odój; Kóli me lávas zlokoskire phaká (krýly) i vurniavava te dživáv pe sámo morjoskiro (derjavéskiro) jagóro (krajo), až i odój Tyró vast lydžála man, i Tyró čačó (pravo) vast rikiréla man. Kóli me phenavas: “Mek te učhakirel kalypén (ciamlypén) man, i mek te javél dud (svéto) ratiasa trusciál mánde; až i ciamlypén na garavela man Tútyr, i rat ziainela dyc'les syr dyvés: ciamlypén isyn dasavo – pac', syr dud. Pal-dová so Tu sozdyjan miré andratuné pašá, Tu čhudián khetané man dre miré-dakiri ločoví. Me javáva te parikiráv Túke, pal-dová so me som sozdynó divnes ke dar. Drieván dívna isyn Tyré butiá, i miro di džinéla mištés davá. Miré kokalý na sys ĥaradé Tútyr, kiéli me barijom te javav pe svéto dro garadó štéto, i kiéli man khuvenas dro jekhipén dro xor štéto. Tyré jakhá dykhné man, kiéli me sómas tyknó džidó i saré miré masengire pašá sys začhindlé dre Tyrí lylvarí; adiáke-pac' odój sys saré miré dyvesá, kiéli iščo (inké) ni jekh dyvés na sys. Ne syr dróga isyn mánge Tyré dúmy, o Dévla! Kicý but isyn len. Kóli me piriginavas len, len javélas butýr syr prahinki dro práho. Syr me džangadjovava, me saroiekh som Túsa. O, Dévla! Te muliakires Tu fujé manušén! Te džán krig mándyr tumé, savé isyn nahrata ke čúžo rat. Jone rakiréna kirkes pal Túte, Tyré vérgi, jone ivjá (naprásnes) pričhuvena fuipén ke Tyró lav. O, Rajo Dévla! Ci me bidykhava odolén, savé bidykhena Tut? Ci na jačné džungalé (na brydindle) mánge odolé, kon ĥazdélape pe Túte? Me bidykhava len saré iléstyr, jone jačné miré vergenca. Rozdykh lačhés man, o Dévla i udžin miro iló; sprobin man i udžin, so me duminava; i dykh, ci isyn, savó ž fuipén dre mánde, i lýdža man dro viéčno džiibén. Xoróskire Dirižoróske. Davidóskiro Psálmo. Zrákh man, o Rajo Dévla, čoré manušéndyr, rakh man fujé manušéndyr: savé priduminena čoripén dro léngiro iló, jone saró dyvés skedénape vaš maribén. Jone keréna dukhanedyr léngire dandá syr sapeste, mižeh sapeskiri truta (jado) isyn tel léngire uštá. Séla. Rakh man, Rajo Dévla, fujé-manušéngire vasténdyr, rakh man nahratone manušéstyr, savé priduminena te raven piré (stópy). Phut'kirdé garadé šele i felý vaš mánge, jone rosčhude khudý paš drom; jone čhudé feliá sietkasa pe mánde. Séla. Me phendjom Ráske-Devléske: “Tu san miro Devél!” O Rajo Dévla! Pričhúv kan ke miro mangipén Túke. O, Devlale! Rajo Dévla, Zoralypén, Savó zrakhéla man: Tu učhakirdian miro šeró dro maribnaskiro dyvés. O, Rajo Dévla! Na domek, sob (kaj) te javél, syr kaména fuj manušá, na pode vast angíl léngire zrakiribnaske vaš fuipén, sob (kaj) jone te na phutjon ke vučipén. Mek odolengire šeré, so isyn trusciál mánde, te učhakiren ža pes léngire košybnenca, so džána léngire uštendyr. Mek xačkirdé vangara te perén pe lénde, mek jone te perén dre jag, dre bidugnóskire ĥanbiniá (jamy), sob (kaj) jone te na uštén pale. Mek fujé-čibalo manúš te na zoraljol pe phuv, mek fuj manušá te uhtylén nahratone (nahal'none) manušén ke sámo xasibén. Me džinóm, so Tu, Rajo Dévla, javésa te zaterdjos pal odolengiro réndo, savén pritasavéna, pal čororengiro čačipén. [r.s.] Paldavá čačuné manušá javéna te parikirén Tyré lavéske, čačipnaskire javéna te dživén, kaj Tu san. Davidóskiro Psálmo. O, Rajo Dévla! Me kharáva jasvénca Tut: jav sygedýr ke me; pričhúv kan ke mirí zan, kiéli me kharáva jasvénca Tut. Mek miro mangipén (modlo) te dodžal ke Tu sýrby fimiámo, a kiéli me ĥazdáva vastá sýrby bel'veliakiro svénto janybén. Čhuv stregaris, Rajo Dévla, pašýl miro muj, te rikirél vudár pe miré uštá. Na domek, sob (kaj) miro iló te risjol krig ke vari-savó čoro réndo, sob (kaj) me te keráv duredýr fuipén. Na domek, sob (kaj) me te xav manušéngire miziuli (slasti), savé keréna čoripén. Mek čačipnaskire manušá te pekaven man, davá javéla kuč. I mek jov te sykavél mirí bang, davá javéla sýrby olivítko dzet (jeliejo), savéstyr miro ramánjo (miro) na risjola krig; ne saroiekh me javáva te mangavape, sob (kaj) jone te na kerén čoripén. Kiéli léngire sendar'jen rozmarde pir bará, jone šunéna miré lavá, pal-dová so jone isyn gudlé. Amaré kokalý rosčhurdyne pašýl zagiibén dre maĥila (kula), sýrby, kiéli vari-kon pharavela phuv (pahinela) i čhinela kaštá pe phuv. Ne miré jakhá isyn pe Túte, o, Rajo Dévla, miro Raj Devél, dre Túte me zoralés patiáva: na domek, sob (kaj) miro di te xasjol. Rakh man vasténdyr, so čhudé feliá pe mánde, i feliá sietkása, savé keréna čoré manušá. Mek čoré manušá te perén dre léngire feliá pal jekh mólo, a me obdžava len. Davidóskiro Sykliakiribén. Syr Jov mangdiápe Devléske, kiéli jov sys dre Ĥiebar (Pieščera). Me mangdjompe zoralés Ráske-Devléske miré zaniása. Me vyphendjom miré xor dúmy angíl Léste; me sykadjom Léske miro pharipén. Kiéli miro dúho (fáno) zamyjá dre mánde, tedy Tu džinésa, savé dromésa me psirava. Jone čorahanés čhudé felý pe drom, kaj me psirava. Me dykhcjom sýges pe čačí rig mándyr i dykhcjom, so nijékh na pidžkirela (na prigaljola) man, nane, kaj te garadjovav mánge, nijékh pekelape / na déla túga (zabotinelpe) pal mánde. Me dyjom gódla jasvénca ke Tu; Rajo Dévla me phendjom: “Tu san miro garadyipen, mirí dólia pe phuv, kaj dživéna.” Prišunpe, so me rovava, pal-dová so me dogijom sarésa ke phuv, zrákh man odoléndyr, savé tradéna man, pal-dová so jone isyn zoraledýr mándyr. Jan miro di pe vólia štaribnastyr te parikiráv i te vyšarav Tyró lav. Čačipnaskire skedénape trusciál mánde, pal-dová so Tu barvales bahtiakirdian man. Davidóskiro Psálmo. Rajo Dévla, šun mirí pátieri (molítva) Túke, pričhúv kan ke dová, pal so me mangáva! Otphen mánge Tyré patiaibnastyr, Tyré čačipnastyr. I na terdjov te sendiakires Tyré pisharís; pal-dová so nijékh nane bidošéngiro angíl Tyrí godý. Pal-dová so vérgo (vrogo) tradelape pal miro di: jov pritasadia miro džiibén dre phuv; jov začhudia man te dživáv dro kalypén (ciamlypén), i me som sýrby muló. Paldavá miro dúho (fáno) zamyjá dre mánde, mánge isyn drieván pharó pe iló. Me ripirava ĥaratuné beršá, me rozlava saré Tyré butiá; me rozduminava xor pal Tyré-vastengire butiá. Me tyrdava miré vastá ke Tu: miro di isyn trušaló (žaždynela) pal Túte sýrby phuv, savi isyn trušaly (žaždynela) pal bryšýnd. Séla. Otphen sýges mánge, o Rajo Dévla! Miro dúho (fáno) zamerela; na garav Tyró muj mándyr, sob (kaj) mánge te na javav sýrby kodolé, savé džána telé dre ĥanbín (jama). Ker, sob (kaj) me te šunav pal Tyrí lačhé-ilýtkima tasiarlatyr (rankostyr), pal-dová so me zoralés patiáva dre Túte. Ker adiáke, sob (kaj) me te džináv drom, savésa te psirav, pal-dová so me ĥazdáva miro di ke Tu. O, Rajo Dévla! Zrákh man miré vergéndyr: pal-dová so me ke Tu našava te garadjovav. Sykliákir man te keráv pir Tyrí vólia, pal-dová so Tu san miro Devél; mek Tyró lačhó Dúho (Fáno) te lydžál man pe čačipnaskiri phuv. O, Rajo Dévla! Vaš Tyró lav, džidiákir nevéstyr man. Lýdža man krig pharipnastyr pir Tyró čačipén. Tyré lačhé-ilytkimatyr rosčhurde dre rig miré vergén te xasjon i xasiakir saré odolén, savé pritasavéna miro di, pal-dová so me som Tyró pishári. Davidóskiro Psálmo. Mek te vyšaren Ras-Devlés, Savó isyn mirí Bérga te zrakhavpe, Kon sykliakiréla miré vastá vaš maribén, miré angušta (pal'cy) te maravpe; Jov isyn lačhé-dieskiro ke me i zaterdjola pal mánde. Jov isyn mirí vučí vučardý (bašnia) i miro Zrakhibnaskiro, miro ščýto, dre Konéste me zoralés patiáva, Savó teliakirdia miré manušén tel mánde. Rajo Dévla! So isyn manúš, so Tu džinésa les, manušéskiro čhavó, so Tu kutiakiresa les? Manúš isyn sýrby balvaliakiro phurdypen, léskire dyvesá isyn sýrby zer (tienjo), so prodžála (nakhela). Rajo Dévla! Bandiakir Tyró bolybén i džá telé bérgi, sob (kaj) te džal thuv léndyr; zaziain bliskavicasa i rosčhurde len; bičháv Tyré maribnýtka bustiá (striély) i pritasav len: protyrde Tyró vast vučypnastyr; pode vast mánge bidatyr i zrákh man paningendyr, čužoné-čhavéngire vastéstyr, savengiro muj rakiréla frenta lavá i léngiro čačó vast isyn xohaibnaskiro. O Dévla! Me javáva te bagáv neví gilý Túke, me javáva te bagáv psalmy pe deše-strunengiri luta Túke, Jekhéske, Kon zrakhéla kral'jén, Kon vyrakhela Péskire pisharís Davidós meribnytkone kurtalátyr. De voliá mánge i vyrakh man čužoné-manušéngire vasténdyr, savengire muiá rakiréna frenta lavá i léngiro čačó vast isyn xohaibnaskiro. Mek te javén amaré čhavé sýrby rasliny, so vybarine dro léngiro ternypen, mek te javén amaré čhaja sýrby šeralé stýlby, so isyn vyčingirde dre bari felatin (kolov): mek te javén pherdé amaré piraliá (žytnicy) kažnoné givesa, mek te bijanen amaré bakriá bará i deš bará (tysjoncy) tyknoren pe amaré čaritka phuvjá; mek te javén masune amaré guruva, mek te na javél ni savó pharipén, ni savó xasiakiriben, ni savó roviben pe amaré vulícy (gásy). Te javén bahtalé dasavé manušá, savénde saró davá isyn. Te javén bahtalé manušá, konéskiro Devél isyn Raj Devél! Davidóskiro Šaribnytko Psálmo. Me javáva te šaráv ke vučipén Tut, miro Dévla, o Králi i me javáva te vyšarav Tyró lav usady (sak) i pe saré viéki. So dyvés me javáva te vyšarav Tut, i me javáva te šaráv Tyró lav usady (sak) i pe saré viéki. Drieván baró isyn Raj Devél i isyn mol, sob (kaj) zoralés te šarén Les, i léskiro baripén naštý te ĥaljon. Ródo rodóstyr javéna te šarén Tyré butiá i javéna te vyphenen statečnes (te ob'iavinen) pal Tyré-zoralypnaskire keribena. Me javáva te rakiráv pal slavútno patýv Tyré rajkané slavatyr i Tyré dívna ke dar butiá. I manušá javéna te rosphenén i pal Tyró zoralypén ke dar, Tyré butiendyr, i me javáva te vyphenav statečnes pal Tyré drieván baré réndy. I jone javéna te vyphenen i te ripirén pal Tyró baró lačhipén i me javáva te bagáv zoralés pal Tyró čačipén. Raj Devél isyn lačhedieskiro (milosno) i tangipnaskiro i, Jov nasyg xoliasóla, i isyn drieván lačhé-iléskiro. Raj Devél isyn lačhó ke saré, i léskiro drógo lačhipén isyn pe saró, so Jov sozdyjá. Saró, so Tu kerdián, javéla te parikirel Túke, o Rajo Dévla, i Tyré svénta javéna te šarén Tut. Jone javéna te rosphenén pal Tyré-kralipnaskiri sláva i te rakirél pal Tyró zoralypén, sob (kaj) te džinén manušéngire čhavé pal Tyré-zoralypnaskire réndy i pal slavútno rajkany sláva Tyré kralipnastyr. Tyró kralipén – kralipén pir saré viéki, i Tu rikiresa zor pir saré ródy. Raj Devél podrikiréla sarén, kon peréla, i ĥazdéla saré odolén, savé bandine pharipnastyr. Saré manušéngire jakhá užakiréna lačhipén Tútyr, i Tu désa xabén lénge tedy, kiéli trej lénge. Tu roskeresa Tyró vast i désa čalés sareske, so isyn džidó. Raj Devél isyn čačipnáskiro dro saró, so Jov keréla i Jov isyn lačhó dro saré Léskire réndy (diély). Raj Devél isyn pašýl sarénde odolénde, savé kharéna Les čačipnása. Jov keréla pir odolengiro lav, pe iló, savénde isyn trašaibén angíl Léste i Jov javéla te šunél léskiro roviben i zrakhéla len. Raj Devél prirakhela sarén, savénge isyn drógo Jov; ne Jov xasiakiréla sarén fujé manušén. Miro muj javéla te šarel Ras-Devlés i mek kažno loč (plot') te šarel léskiro Svénto lav usady (sak) i pe saré viéki. Alliluia! Šar miro di Ras-Devlés! Kicý me javáva te dživáv, adákicy me javáva te šaráv Ras-Devlés, me javáva te bagáv psalmy miré Devléske, paka me som džidó. Na patián zoralés dre thagar'jende (dre kniaz'jende), ci dre manušéskire čhavéste, pal-dová so nane zrakhibén léndyr. Syr jone meréna, léngiro dúho (fáno) džála krig, jov risjola dro práho, dro dová-pac' dyvés saré léngire dúmy xasjona. Bahtaló isyn kodová manúš, konéske podela vast Jakovóskiro Devél, kon užakiréla lačhipén Rástyr-Devléstyr, Léskire Devléstyr. Jov sozdyjá bolybén i phuv, móri (derjavá) i saró, so isyn dre lénde. Jov usady (sak) rikiréla patiaibén. Jov keréla čačipnáskiro séndo vaš odolénge, savén pritasavenas. Jov déla xabén bokhalénge: Raj Devél mekéla pe vólia štaribnaskiren (bešybnaskiren). Raj Devél otphandela jakhá kororenge, Raj Devél ĥazdéla odolén, savé bandine telé pharipnastyr, Ráske Devléske trej čačipnaskire. Raj Devél rakhéla čužoné manušén; Jov léla krig pharipén piroténdyr (sirotendyr) i pivliéndyr (udovendyr), ne Jov bandiakirela drom fujé manušénge. Raj Devél javéla te kralinél usady (sak)! O Sióno, Tyró Devél javéla pir saré ródy. Alliluia. Šarén Ras-Devlés! Pal-dová so isyn lačhés te bagán psalmy amaré Devléske; pal-dová so isyn drógo te šarén Les! Raj Devél ĥazdéla Jerusalimo, Jov kedela khetané odolén, savén vylydžiné Izrailjostyr. Jov sastiakirela odolén, konéste isyn pharó pe iló, i Jov piriphandela léngire fransy (rany). Jov ginéla, kicý isyn čergeniá, Jov kharéla len pir léngire lavá. Amaró Raj Devél isyn baró i drieván zoralypnaskiro, nane miéra pe Léskiro godypén. Raj Devél ĥazdéla kovlé-iléskire manušén, Jov čhurdéla telé fujé manušén ke phuv. Bagán Ráske-Devléske i parikirén Léske, bagán psalmy pe luta amaré Devléske: Kon učhakirdiá bolybén oblokénca, Kon kedela bryšýnd vaš phuv, Kon keréla adiáke, so čar barjola pe bérgi. Jov déla kheritkoné murdaleske léngiro xabén, i tykné korakénge (voroniatenge), savé déna gódla (ke Jov). Jov na radynélape zoralés greskire zorjátyr, Léske isyn na drógo muršeskiri zor dre ĥerá. Léske isyn dróga odolé, savé daréna Léstyr, kodolé, savé užakiréna lačhipén Léskire kovlé-ilytkimatyr. [1] Šar Ras-Devlés, o Jerusalímie! Šar Tyré Devlés, o Siónie! [2] Pal-dová so Jov kerdiá zoralé šybiery pe tyrí pórta, Jov bahtiakirdiá tyré čhavén maškír Túte; [3] Jov déla ramánjo (miro) pe tyré kustyka (granicy), Jov déla čalés túke naj fedýr parnó giv. [4] Jov bičhavéla Péskire priphenybená pe phuv, léskiro lav prastala drieván sýges. [5] Jov déla iv syr pošom / výlna (šers'), Jov rosčhurdela iv syr práska (popielo). [6] Jov čhurdéla péskiro grado koterenca (kuskenca): kon saštý te pirilydžal léskiro šyl? [7] Jov bičhavéla léskiro lav i biladjola saró; Jov keréla adiáke, so Léskiri balvál phurdela i paniá thadena. [8] Jov phenéla statečnes Léskiro lav Jakovóske, Léskire, statúty (ustavy) i Léskiro čačipén Izrailjoske. [9] Jov na kerdiá adiáke ni jekhe Najudytkoné nacyjake, pal-dová so jone na džinéna Léskire čačipená. Alliluia! Alliluia! Šarén Ras-Devlés bolybnástyr; šarén Les, Kon dživéla uprál. Mek te šarén Les saré Léskire Jangóly, mek te šarén Les saré bolybnáskire Jangóly. Šarén Les, kham i čhon, mek te šarén Les saré čergeniá, so xačona. Šarén Les, naj vučedýr bolybén i paniá, so isyn uprál (upré) bolybnástyr. Mek jone te šarén Ráskire-Devléskiro lav, pal-dová so Jov priphendiá i jone kerdépe: I Jov dyjá zor lénge ŭsády (sak) i pe saré viéki; Jov dyjá priphenybnytko statúto, so jone na obdžana les. Mek te šarén Ras-Devlés phuvjátyr: morjoskire (derjavéskire) rúpučy i saré xor štéty; iag i ĥrado, iv i thuv, zoralý balvál, savé keréna pir léskiro lav; bérgi i saré bérgicy, phabakire kaštá (drevy) i saré kiedry; riskiribnáskire murdalá (zvieri) i saré kherítka murdalá, capniá i čiriklé/iá phakénca (krylenca); králja pe phuv i saré manušá, thagárja i saré sendárja pe phuv. Tyrne manušá i adiáke-pac' patyvalé terné džuvliá, phuré manušá ternenca, mek jone te šarén Ráskire-Devléskiro lav; pal-dová so jekh Léskiro lav trej te šarén ke vučipén; Léskiri sláva isyn vučedýr phuvjátyr i bolybnástyr. I Jov ĥazdyjá Léskire-manušéngiro destó, Savó déla zor, sob (kaj) te šarén Les Léskire svénta Izrailjoskire čhavé, savé isyn pašyledýr ke Jov. Alliluia. Alliluia! Bagán Ráske-Devléske neví gilý; bagán psalmy Léske pe skedyibén, kaj devlýtka manušá isyn. Mek Izrailjo te radynélpe Kadalestyr, Kon sozdyjá les, mek čhavé Sionóstyr te viesielinenpe (te lošaljon) léngire Kralístyr. Mek jone te šarén Léskiro lav khelybnasa, mek jone te bagán psalmy Léske bubnosa i pe luta (tykné gusli). Pal-dová so Raj Devél zoralés radynélape Léskire manušéndyr, Jov šukarjakirela kovlé-iléskire manušén zrakhibnasa. Mek svénta te javén ráda slavatyr, mek jone te bagán zoralés pe léngire čhuibena. Mek léngire muiá te šarén zoralés ke vučipén Devlés, mek dujé-rigítko kurtála te javél dre léngire vastá: sob (kaj) te otdén fuipnasa pale Najudengiré nacyiénge, te kerén kára manušypnaskire nacyienge, te phanden khetané léngire kral'jén zandir'jenca (uzenca) i léngire baré ran sastruné pientenca; te kerén kára pe lénde, so isyn začhindly. Davá isyn patýv saré sventonenge. Alliluia. Alliluia! Šarén Devlés dre Léskiri Khangirí: šarén Les dro Léskiro bolybnáskiro fáno (vozduho). Šarén Les pal Léskire drieván zoralé réndy; šarén Léskiro bidošéngiro baripén. Šarén Les rogóskire bašaibnása, šarén Les pe luta i gusli. Šarén Les pe bubno i khelybnasa, šarén Les balytkoné strumienténca i pe rógo. Šarén Les pe zoralé cymbály, šarén Les zoralé-zaniákire cymbalénca. Mek saró, so phurdéla (dyhinéla), te šarel Ras-Devlés. Alliluia. Solomonóskire pritčy, Davidóskire čhavéskire, Izrailjoskire-kralískire tuménge, sob (kaj) tumé te džinén godypén, i te sykljon čačipnaske, sob (kaj) tumé te ĥaljon xor lavá rakiribnastyr; sob (kaj) tumé te doresen (te ĥaljon) godypén, čačipén, čačipnytko otlydžaiben i čačunó séndo. Te den godý prostone-ileskirenge džinybén i rozlyiben terné manušéske. Kon isyn godó (god'varó) manúš, javéla te šunél i te sykljol butýr; manúš baré godiása doreséla péske lačhó godypén (sovieto), sob (kaj) te ĥaljol pritča i čorahano vyphenyben, godé-manušéngire lavá i léngire šerepharibnytka (zagadki). Angíl saréstyr trej te dares Devléstyr, sob (kaj) te javél davá džinybén, ne bigodiakire manušá na priléna ke godý godypén i uphenybén. Šun, míro čhavó, so tyró dad uphenela i na prilé bi patyvakiro (na steliakir) dová, pal so daj sykliakiréla; pal-dová so jone javéna sýrby bahtalypnaskiri viánka pe tyró šeró i sýrby miriklia trusciál tyrí men. Míro čhavó; kóli grehítka manušá tyrdena tut ke pe, na zdžape (na malynpe) lénca. Kóli jone phenéna: “Jav aménca, javén, podrakhasa te zamaras ke rat, javén, užakirasa bibangeskire manušés, konéste nane doš; iavén, nakhavasa len džidenca syr liúno (ado), i sarén kodolén, savé džána pročhuven telé dre maĥila (kula). Ame lathasa (zalasa) saró kuč barvalypén, ame pherdiakirasa amaré kherá čorde mištypnasa; tu čhurde péskiro žrebijo pe baht khetané aménca i aménde sarénde javéla jekh traminengiro (košel'ko).” Míro čhavó! Na psir jekhe dromésa lénca. Rakh krig péskiri ĥerój léngire dromorestyr; pal-dová so léngire ĥerá prastána te kerén čoripén, i jone prastána sýges te pročhuven manušéngiro rat. Ne ivjá (naprásnes) jone čhudé felý angíl jakhá saré čirikliende. I kadalé manušá isyn pašté, i sýrby užakiréna pe léngiro rat, jone ĥaradjona čorahanés i rodéna meribén péske. Kadasavó isyn taláno manušénge, savé isyn ĥalka (alčna) ke manušéngiro barvalypén, ke xohanó kófo (pribyl'), jone sýges phagirena péskiro šeró. Godypén godlela javrí pe vulíca (gása): jov ĥazdéla péskiri zan (glos) pe foruniá (plóščy); godypén prikharela pe trušulytka dromá, pašýl foróskiri pórta i dro fóro rakiréla: “Ci but tumé, búra manušá (nievieždy), javéna te tyrdenne ke napatyvalypen (biladžaipén)? Ci but odolé, kon salape xoliames, javéna te bahtaljon xoliamé sabnastyr? Ci but (kicý) dylyné javéna drieván te na prilén džinybén? Risjon mósa ke me, kiéli me bangiakirava xoliames tumen: ake, me vyphurdava miro dúho (fáno) pe tuménde, me keráva adiáke, sob (kaj) tumé te džinén miré lavá. Paldavá so me khardjom, i tumé na kandyné (otphendlepe); me protyrdyjom péskiro vast i nijékh na prilyjá ke iló. Pal-dová so tumé na prilyné saré godypena (soviety) i na riskirdé ile, kiéli me sykadjom tumarí bang, me javáva te savpe tumaré baré bidatyr (xasibnastyr), me javáva te prosav tumen, syr javéla trašaibén (bari dar). Kiéli trašaibén peréla pe tuménde syr sýgno xasiakiriben i tumaró xasibén javéla syr vihro, kiéli bari dar i bída peréna pe tuménde, to tedy tumé kharéna man, ne me na javáva te otphenav tuménge, i tumé javéna te rodén man saré zorjátyr, ne tumé na lathéna man. Pal-dová so tumé na vyrikirenas džinybén, i na vykedyné vaš péske (na zakamle te kutiakires ke dar) Ras-Devlés, i tumé nijékhvar na prilyné miro godypén i tumé na prilyné ke godý, syr me sykadjom tumarí bang, pal-dová tumé javéna te xan dová, so tumé san mol, i tumé javéna te čaljon doléstyr, so tumé pridumindle. Pal-dová so jone xasjona, kiéli jone risjona krig godypnastyr i dylyné-manušéngiri nahratyma kokori xasiakiréla len. Ne kon šunéla miré lavá, kodová javéla te dživél bi darákiro, i jov javéla bi trašaibnaskiro (štylés), jov na javéla te darel fuipnastyr.” Míro čhava! Kóli tu prilesa miré lavá, i garavesa (zrakhésa) mištés miré priphenybená andré péste; adiáke, so tu prišunesape ke godypén, i riskiresa iló, sob (kaj) te ĥaljos; i, kóli tu javésa te manges zoralés péske godypén i tu riskiresa iló, sob (kaj) te ĥaljos; kóli tu javésa te pričhuves zor te lathes godypén syr rup, i tu javésa te rodes godypén syr kučipén: to tedy tu ĥaljosa, sóske trej te kutiakires ke dar Ras-Devlés, i te udžines butedýr pal Devléste. Pal-dová so Raj Devél déla džinybén, Léskire lavéstyr javéla džinybén i ĥalyibén. Jov prigaravela zrakhibén (baró godypén) devlytkonenge, Jov isyn ščýto vaš odolénge (dykhéla pal odolénde), savé dživéna pir čačipén; Jov prirakhela dromore, kaj isyn čačipén manušénde, i Jov rakhéla dromá vaš Péskire sventonenge. Tén'ci tu ĥaljosa čačipén, čačipén maškír manušénde, i čačunó drom. Syr godypén zadžála dro tyró iló, i džinybén javéla te radynel tyró di; to tedy xor rozĥalyiben javéla te zrakhél tut, a ĥalyibén javéla te dykhél rakhibnýtkes pal túte. Sob (kaj) te vyrakhel tut čoré droméstyr, manušéstyr, savó rakiréla fuipén pefromi (narošnes), odoléndyr, savé mekéna čačuné dromá, sob (kaj) te psirén kalé droménca dro grého; savé isyn ráda te kerén čoripén i drieván te radynénpe fuipnaske (zahale biladžaipnaske), savengire dromá isyn bangé (xohané), i savé keréna frentes (xohanés) saró. Sob (kaj) te zrakhél tut javire-romeskire romniatyr (čužonatyr), saví gudliakirela péskire lavénca, saví mekciá drogoné males péskire tyrnypnastyr, i bistyrdia péskire-Devléskiro zavieto. Pal-dová so lákiro kher lydžála ke meribén, a lákire dromore džán ke mulé; nijékh, kon džála ke joi, na risjola pale, i jov adiáke-pac' na terdjola pe džiibnáskiro drom, paldavá psir lačhé dromésa, i ríkirpe ke čačipnaskire dromore. Pal-dová so čačipnaskire javéna te dživén pe phuv, i bidošengire jačénape pe láte, a fuj manušá javéna čhurdyné phuvjátyr, i napatiaibnaskire vykušenape látyr syr dylyny čar. Miro čhava! Na bistyr, syr me sykliakirava tut, mek tyró iló te rakhél (te rikirelpe) ke miré priphenybená, pal-dová so butýr dyvesá te dživés, dlengo džiibén i ramánjo (miro) javéna upralestyr dyné túke. Mek te na mekén tut lačhé-ilýtkima i čačipén; phande len trusciál men, začhin len pe tyró iló sýrby pe tablicy tyré iléskire; i tu javésa drógo i dre bari patýv Devléste i manušénde. Patia zoralés dre Raste-Devléste saré tyré iléstyr, na drieván dopatia péskire godypnaske. Rípir pal Raste-Devléste, sob (kaj) tu te na keresas, i Jov mamuiakirela (keréla priamonesa) tyró drom. Na sykáv pes godedyr, syr tu san: dar Rástyr-Devléstyr i durjov čoripnástyr. Davá javéla sastypen tyré masenge ločake i drab tyré kokalenge. De patýv Ráske-Devléske saré tyré mištypnástyr, i pervoné barjakirdendyr (plodendyr), so túte vybarjona; i tyré šurny javéna pherdé pherdés i tyré priesy javéna te piričhuvenpe moliasa (vinosa). Míro čhava! Na dykh vučipnástyr, kiéli Raj Devél pharés sykliakiréla tut, adiáke-pac' i na xoliasov zoralés, syr Jov sykliakiréla dukhanes pal doša: pal-dová so Raj Devél sykliakiréla dukhanes pal doša (promekibena) kodolés, kon isyn drógo Léske, adiáke-pac' sýrby dad čhavés, savéske Jov zoralés radynélape. Bahtaló isyn kodová manúš, savó jaciá godó, i manúš, kon jaciá but te ĥaljol. Davá isyn fededýr syr te doreses rup, davá isyn kofitkedyr (pribyl'nedyr) suvnakástyr. Godypén isyn drogedyr kuč barendyr, i saré kučipena, so tu ke isyn dróga, nane rávna (šerá) godypnaske. Godypén rikiréla dlenga beršá dro čačó vast, a barvalypén i patýv isyn dro léskiro zérvo (liévo) vast. Godypnaskire dromá isyn lačhé, a léngire dromá déna ramánjo (miro) túke. Godypén isyn sýrby džiibnáskiri phabelyn kodoléske, kon xála léskire phabá: bahtaló isyn kodová manúš, savó rikirélape ke davá kašt. Raj Devél Péskire godypnasa sozdyjá phuv, Jov Péskire ĥalyibnasa sozdyjá bolybén. Léskire džinybnastyr xor ĥanyngá otkerdepe i bolybén počhudia pahlyniasa (rosasa). Míro čhavó! Na mek len, sob (kaj) te džán krig tyré jakhéndyr: rakh sastó godypén i xor rozlyiben: i jone déna džiibén túke, i jone javéna te gožakiren tyrí men. Tedy tu džása péskire dromésa bidarakiro, i tyrí ĥerój na obštavelape. Syr tu pasjosa te soves, tu na javésa te dares, syr tu zasovesa, tyró soiben javéla gudló. Na dar trašaibnastyr ke meribén, ci pharipnastyr, so javéla pe fujé manušénde. Pal-dová so dre Raste-Devléste javéla tyró zoraló patiaibén, i Jov javéla te rakhél tyrí ĥerój te na obštavelpe. Na depe pale te kerés lačhipén kodolénge, savénge trej te kerés, kóli davá isyn pir zor tyré vasteske. Na phen tyré pašatuné manušéske: “Džá, tén'či, risjov pale. Atasiá me dáva túke, kóli túte isyn davá.” Na pridumin čoripén pe tyré pašatuneste, pal-dová so jov dživéla bi darákiro pašýl túte. Na košpe manušésa ni palsó, kóli jov na kerdiá čoripén (bedypen) túke. Na zevlyne nahratone manušéske, na vykede péske vari-so léskire droméstyr. Pal-dová so manúš, kon džal krig čačuné droméstyr, javéla džungaló (brydinela) Ráske-Devléske, a léskiro garadó khetanypen isyn čačuné manušénca. Raj Devél prokošela kher, kaj isyn fuj manúš, ne Jov bahtiakiréla štéto, kaj čačipnáskiro manúš dživéla. Jov salape xoliames odoléndyr, kon salape xoliames javirendyr, ne Jov déla bahtalypén odolénge, savé isyn na phut'kirdé. Godé manušá doreséna (dolena) sláva syr mištypén, ne ladž javéla te učhakirel dylynen. Šunén, tumé čhavále, syr dad sykliakiréla tumen i riskirén godý, sob (kaj) xor i buĥles te ĥaljon. Dová, so me sykliakirava tumen, isyn lačhipén: na mek miro zakóno (sykliakiribén). Kiéli me, Solomóno, sómas miré dadéskiro, (Davidóskiro) čhavó, drógo i jekhoro angíl miré dákire jakhá, to miro dad adiáke-pac' sykliakirdiá man i phendiá mánge: “Mek tyró iló te ripirel miré lavá: ríkirpe ke miré priphenybená i dživ. Sykljov te javes godedyr, sykljov xor i bugles te ĥaljos, na bistyr davá, na risjov krig miré lavéndyr, so me rakiráva. Na mek godypén, i jov javéla te rakhél tut; rikir syr drógima les i godypén javéla te dykhél rakhibnýtkes pal túte. Godypén isyn baró réndo, sykljov te javes godedyr, i sykljov te ĥaljos saró, so túte isyn. De bari čol (timín) godypnaske i jov ĥazdéla tut: godypén janéla patýv, syr tu prilesa ilésa les. Godypén čhuvéla pe tyró šeró bahtalypnaskiri šukár viánka, janéla patyvakiri koróna túke.” Šun, miro čhavó, prilé miré lavá, i tu javésa te dživés but berš. Me sykliakirdjom tut godé dromeske, me lydžijom tut čačuné dromorenca. Syr tu džása, tyré ĥerá na javéna te štaven pharipnasa; i, kiéli tu prastasa, to tu na javésa te obštavespe. Rikirpe zoralés ke čačunó sykliakiribén, na bistyr pal léste: rakh les, pal-dová so davá sykliakiribén isyn tyró džiibén. Na terdjov pe dromoro, kaj isyn bidevleskire; na psir čoré-manušéngire dromésa: ríkirpe rigasa, na lode dalé dromoresa, risjov krig léstyr i džá mamúi. Pal-dová so soiben na léla fujé manušén, angíl, syr jone te kerén čoripén, i léngiro sunó džála krig léndyr angíl, syr jone te kerén adiáke, sob (kaj) vari-kon te perél (te xasjol). I jone xána maró fujé rendéndyr, jone p'jena mol (vino), so doresné nahrates (zorjása). Ne čačuné-manušéngiro drom isyn sýrby dud (svéto), so ziainela, savó svencynela i ziainela jarkedyr angíl parnó dyvés. Ne drom fujé-manušéngiro isyn sýrby ciamlypén; jone na džinéna, pir so jone obštavenape. Míro čhavó! Prilé ilésa dová, so me phenáva; pričhúv tyró kan (prišunpe) ke miré lavá. Mek jone te na džán krig tyré jakhéndyr, rakh len maškirál tyró iló. Pal-dová so jone isyn sýrby džiibén kodolénge, kon lathéla len i sastypen saré léngire masenge (ločake). Rakh péskiro iló butedýr saréstyr, so isyn drógo túke. Pal-dová so léstyr thadéla ĥanýng, saví déla džiibén. Rískir péstyr xohany čib, i uštá, so isyn frenta. Mek tyré jakhá te dykhén mamúi, mek tyré cymbly (riesnicy) te dykhén mamúj angíl túte. Produmin mištés, karik tyrí ĥerój džála (lydžála), mek saré tyré dromá te lydžán tut bi darákiro. Na rískir (na risjov) nji pe čačí (pravo) nji pe zérvo (liévo) rig; le (otlydža) krig tyrí ĥerój čoripnástyr. Míro čháva! Rikir iló ke miro godypén i band'kir kan ke dová (prišunpe ke miro lavá), syr me ĥaljovava, sob (kaj) tu moginésa xor te rozles, sob (kaj) tyré uštá te zrakhen (te rikirenpe) ke džinybén. Pal-dová so čužoné-romniakire uštá občhuvenape avginesa i lákire lavá isyn kovledyr olivitkone dzetestyr (aliejostyr), ne pe kónco (pe jagóro) joj isyn kirkedyr palynostyr i vostro syr duje-rigitko kurtála (sablia). Lákire piré (stópy) lydžána ke meribén, joj štavela angíl ke liúno (ado). Sob (kaj) te ĥaljos mištés lákire džiibnáskire dromá, tu nijékhvar na udžinenas len, jone na čačuné (stala). Akaná šunén man, čhavé, na džán krig miré moskire lavéndyr. Durjon krig dasavé džuvliatyr, na džán pašýl vudár lákire kheréskiro. Sob (kaj) tyrí patýv (tyró sastypen) te na piridžal pe javirende, i tyré beršá biileskire manušéske. I sob (kaj) javire-theméskire manušá te na pherdjon tyré mištypnasa, i tyré butiarné te na džán dro kher ke čúžo manúš. I tu javésa zoralés te tugines pe kónco (pe jagóro), syr tyrí loč i tyré masá jačénape šuké (bizorjákire) i tu phenésa: “Syr davá sys, so me bidykcjom sykliakiribén (miro iló na kamdiá), kiéli sykliakirdé man čačipnaske!” Syr me na kandyjom miré sykliakiribnaskiren, na pričhudjom kan ke odolé sykliakiribnaskire, savé sykliakirdé man čačipnaske! Me sómas pe sámo kónco (jagóro), syr kerdjom fuipén maškír devlytkonende, kaj jone skedenaspe. Pi paní péskire venderjatyr (vodojomostyr), i paní, savó thadéla tyré ĥanyngatyr. Ci isyn bangé tyré folahara (fontany) te čhuvén javrí paní? Ci isyn bangé-paniengire valny (velny) te thaden javrí pir vulícy (pir gásy)? Mek jone te javén jekhdžineskire tyré, mek jone te na javén khetané čužoneske i túke. Mek tyrí ĥanýng te javél bahtiakirdy i rádynpe drieván romniása, saví isyn žužy tyré ternypnastyr, saví isyn sýrby drógo mirga (lan') i šukár ĥazel', savjakire goža masá te radynen čalés tut usady (sak), saví gudliakirela tyró kamiben. Vaš so túke, miro čhavó, te gudliakirespe čužoné džuvliása i te obles čúža masá? Raj Devél dykhéla manušéskire dromá, i Jov ublavela dre godý (važynela) saré léskire dromore. Fuj manúš kokoró xasjola péskire čoripnástyr, a léskiro grého sýrby šelenca phandela les kokores. Jov meréla, pal-dová so léske na uphendle, jov džála krig droméstyr pir péskiro baró dylnypén. Míro čhávo! Kóli tu jacián sýrby symadý (zalogo) / porenčyndianpe pal tyré maleste (drugoste), ci kóli tu mardian pir vastá sovlahasa pal čužoné manušéste, tedy tu pyjan dre felý péskire lavéndyr, tyré-moskire lavá uhtyldé tut. Ake, miro čhavó, syr te vyterdes pes, kóli tu pyjan dre péskire maleskire vastá: džá i per ke léskire ĥerá (bandjov telé), mang zoralés te mekel tut tyró mal. Mek te na soven tyré jakhá, i mek te na den lindra (na drieminen) tyré cymbly (riesnicy). Zrákh pes syr gazel' karedynitkonéskire (ohotnikóskire) vastéstyr, i syr čirikly manušéskire vastéstyr, savó uhtyléla (starela) čiriklen. Džá ke kiri (muraška), tu kirne-maséngiro, pridykhpe, syr i so joj keréla, jav godó: kirjate nane ni ras, ni dykhibnaskires, ni barydyrés, ne joj keréla zapasy lynaskiro, i joj kedela xabén, kiéli sčhinyben džála. Kicý tu javésa te pasjos, kirne-maséngiro! Kiéli tu uštesa soibnastyr? Kóli nábut sovesa, nábut désa lindra, nábut butýr sčhuvesa vastá te otkhinjon, tedy tyró čoripén javéla syr rozmaribnaskiro, savó lodela i javéla tyrí trébima syr maribnaskiro manúš. Frento (xartytko) manušoro isyn fuj manúš, savó psiréla rozmekne mósa, Jov marela (mirginela) péskire jakhénca, jov sýrby rakiréla péskire ĥerénca, jov sykavéla péskire anguštenca (pal'cenca). Léskiri godý isyn rozmekny, jov usady (sak) priduminela čoripén, jov keréla adiáke, sob (kaj) manušá te čingardenpe. Paldavá jekhátyr léske javéla bari bída: jekhátyr jov javéla dukhado bi drabakiribnaskiro. Ake, isyn šov čačipená, so Raj Devél drieván na kaméla; ĥáda, eftá (bitrinéngiro deš) čačipená, savé isyn džungalé Léske: phut'kirdé jakhá, xohany čib i vastá, so pročhuvena bibangipnaskiro rat; godý, saví priduminela fuj réndy; ĥerá, savé sýges prastána ke čoripén; načačuno dudvalo /iakhítko (svidietieljo), savó xohavela, i manúš, kon podhačkirela xolý maškír pšalénde. Miro čhavó! Rikirpe zoralés ke tyré-dadéskiro priphenybén, na mek dová, vaš so daj sykliakiréla tut: priphande len ke tyró iló pe ŭsády (sak), i phande len trusciál men. Kiéli tu džása vari-karik, léngire lavá javéna te lydžán tut; i jone javéna te rakhén tut, kiéli tu javésa sutó; kiéli tu džangadjosa (prošninesape), jone javéna te rakirén túke, so te kerés. Pal-dová so dadéngiro priphenybén isyn momolýtko (svietíl'niko), i léngiro sykliakiribén isyn dud. Kóli jone sykliakiréna dukhanes tut, davá jekh isyn vaš dová, so trej dro džiibén: te rakhél tut krig fujé džuvliatyr, čužoné-džuvliakire xohané čibatyr. Na tradepe pal lákiro šukaripén, na domek, sob (kaj) joj te zatyrdel tut lákire cymblenca (riesnicenca). Pal-dová so biladžakuny džuvlý péskire biladžaipnasa čorjakirela manušés ke labo maró, a džuvlý, saví keréla biladžaipén, sýrby čorjola pe léskiro drógo džiibén. Ci moginéla manúš te čhuvél jag pal péskiri brek i, sob (kaj) léskire ídi te na prohačon? Ci moginéla manúš te džal pir xačkirdé vangara i, sob (kaj) léskire ĥerá te na obhačon? Dová-pac' isyn kodolé manušésa, savó psiréla ke péskire-pašatuneskiri romný: kóli vari-kon čilavéla (čepinela) la, kodová na jačélape bibangipnaskiro (na javéla na bangó). Manušá na primangena čoreske, kóli jov čorela, sob (kaj) te javél čalo, kiéli jov bokhaljola: ne kóli lathéna les, ten'cji jov javéla bangó te del pale eftá móly butedýr; léske prijavelape te otdél saró léskire kheréstyr. Kodoleste, kon keréla biladžaipén javire džuvliása, isyn nábut godý. Kóli manúš keréla davá, jov sýrby xasiakiréla kokoró pes. Jov doreséla daba (maribén) i bipatyv (ladžakiriben), i léskiro obrakiriben jačélape pe léste. Pal-dová so zevlynypén vykharela lákire-romeskiro xoliakiribén, i jov na javéla te tanginél (te žalinel) dro dyvés, syr javéla te dukhavel pale. Jov na priléla ni savó vykinybén, jov na javéla štyl, mek tu i désa léske but dáry. Míro čháva! Rípir miré lavá, i rakh len dre godý syr barvalypén miré priphenybená. Rikirpe ke miré priphenybená i rakh dre godý miro zakóno syr lial'ka (zračko) dre jakh. Priphande len ke tyré angušta (pal'cy), čhin len pe iló syr pe tablicy. Phen godypnaske: “Tu san mirí phen, i khar godý syr tyrí sámo fedýr seménca: sob (kaj) jone te rakhén tut čužoné džuvliatyr, odoliatyr, saví prityrdela ke pe gudlé lavénca. Ĥáda, jekh mólo me dykhávas pir rišotka (kraty) dre fenštra miré kheréskiri; ĥáda, me maškír balvalitkone manušénde, rozdykhcjom terné manušénde, terné manušores nabaré godiása, savó piridžalas vulíca (gása) pašýl venglo, kaj dživelas jekh džuvlý. I jov gijá dromoresa ke lákiro kher, dre pacjomki, bel'velié, kalé i ciamle ratiasa. I, ake, adáia džuvlý pirilyja les; joj sys uridy syr biladžakuny džuvlý frentone ilésa. Joj zoralés rakirdiá i kerdiá, so joj kamdiá. Lákire ĥerá na jačenaspe kheré. Jekh mólo joj sys javrí, javír mólo joj sys pe štéto, kaj manušá skedenaspe, užakiri čorahanés pašýl kažno venglo. I joj uhtyldia kadalé terné manušores i čamudia les; joj phendiá léske biladžaipnytkone mósa: “Mánde isyn svénta janybená te parikiras Devléske, adadyvés me dyjom péskire sovlahá Devléske. Paldavá me javdjom te pirilav tut, me dobusoves (staratiel'nes) rodyjom tyró muj i me lathjom tut. Me prikedyjom miro čhuibén paringenca (kovrenca), cviatnone cergenca Jegiptóskire ĥandlestyr (ljonostyr). Me počhudjom (podušyndjom) miro čhuibén mirósa, alojosa, koricasa. Jav, javása te kamas jekh jekhés but ke tasiarla (ke zlóko), javása te bahtaljovas kamibnasa čalés. Miro rom isyn na kheré, jov tradyjá dro baró drom. Jov lyjá mujengiro (košel'ko) lovenca pésa, jov javéla pale dro dyvés, syr javéla pherdó čhon. Joj utyrdelas dro grého (bizo) les péskire lavénca adiáke, so jov poddyjape, joj xohané, gudlé lavénca prityrdyja les. Jekhátyr (srázu) jov gijá pal láte, syr guruv, savó džála pe péskiro čhinybén, ci syr dylynó, sob (kaj) les pharés te sykliakirén pe zan'dir [cji syr alienjo, sob (kaj) te den kar'je les-r.s.]; angíl, syr maribnýtko bust (striela) promarela pir léskiro kaló buko (piečonka). Davá manúš isyn sýrby čirikloro, so sýges prastala dre felý (pietlia). Jov na džinéla, so saró davá xasiakiréla les. Paldavá, čhavale, šunén man, riskirén iló ke lavá, so me phenáva: na domeken, sob (kaj) kadaja džuvlý te riskirél ke pe tumaró iló, sob (kaj) tumé te džán lákire dromorenca: but manušá dukhandyne pal láte, i saré, savé isyn muliakirdé, sys zoralé manušá. Lákiro kher lydžála ke liúno (ado), léstyr džána telé ke meribnaskire štéty. Ci godypén na déla gódla zoralés? Ci ĥalyibén na ĥazdéla péskiri zan? Godypén isyn terdó pe sámo vučó štéto pe vučipená, pašýl drom, pe trušulytka dromá. Godypén déla gódla portatyr (vratendyr), syr te džas andré dro fóro, kiéli džása pirdál vudár: “O muršale. Me kharáva tumen; i mirí zan (glos) kharéla tumen, manušéngire čhavé: Tumé, prostone-godiakire, sykljon te javén baré-godiakire! Tumé, dylynin'ka, sykljon te javén godé. Šunén! Me javáva te rakiráv naj fededýr lavá, i miré uštá phenéna jekh čačipén. Pal-dová so miré-moskiro taloj (njobo) phenéla patiaibén, fuipén isyn džungaló (brydko) uštenge. Saré lavá miré móstyr isyn čačipnaskire, ni savó xohaibén, ci čoripén pefromi (naročnes) nane dre miré lavá. Len prostes te ĥaljon, jone isyn čačuné odolénge, savé džinéna pal davá. Šunén, so me sykliakirava, savó vaš tuménge isyn fedýr rupéstyr, i vykedeno džinybén vaš tuménge isyn drogedyr čikade suvnakástyr. Pal-dová so godypén Devléstyr isyn fedýr rubinendyr, i saró, so manúš kamdiá, naštý te priparuves (te priravnines) ke godypén. “Me, godypén Devléstyr, dživáva baré godiása, mánde isyn džinybén, sob (kaj) xor te rozlav (te rozĥaljovav). Sob (kaj) te des patýv ke dar Ráske-Devléske, trej drieván te na kames fuipén, phut'kiribén, i odolén, kon pes barjakiréla, čoré réndy (diély) i, kon pefromi rakiréla čoripén – me drieván na kamám. Me dáva godý i čačunó godypén: mánde isyn xor ĥalyibén i mánde isyn zor. Mánca králja kralinena; theméskire barydyrá (viel'možy) keréna čačuné statúty (ustavy). Mánca thagárja rikiréna zor, i baré rajo, i saré sendárja pe phuv. Me kamám te sykavav patýv odolénge, savé sykavav patýv mánge, i kodolé, kon dobusoves rodéla man, jone lathéna man. Mánde isyn barvalypena i patýv; drógima, saví na xasjola, čačipén; mánde barjakirdó (plódo) isyn fedýr čikade rupéstyr i mándyr l'góta butýr čikade (vykedyné) rupéstyr. Me psirava čačuné droménca, maškír dromore, kaj isyn čačipén, sob (kaj) mánge te keráv adiáke, sob (kaj) odolé, savé kaména man, te doresen meknó mištypén; sob (kaj) me te pherdiakirav léngiri piralý (sokroviščnica). Raj Devél sozdyjá man dro sámo anglypén, angíl, syr Jov sozdyjá saró ĥarym ĥará. Me, godypén, sómas pomakhno samone viekendyr, anglypnástyr, angíl dová, syr phuv sys čhudý. Kiéli iščo (inké) na sys xor štéty, Me lotijom (bijandyjom), i kiéli iščo (inké) na sys panieskire ĥanyngorja pherdé paniésa: angíl dová, syr bérgi sys začhude, angíl dová, syr sys bérgicy, me ŭže lotijom (bijandyjom); angíl dová, syr Raj Devél sozdyjá phuv, ci féldy, ci pérva prahitka častyra (časticy) dro svéto (lot). Kiéli Jov kerélas bolybén, me, godypén, sómas odój; kiéli Jov prolydžija krugo uprál xore šteténdyr: kiéli Jov čhudiá óbloki upralestyr, kiéli Jov zorjakirdia panieskire ĥanyngorja xore šteténdyr; kiéli Jov uphendia morjoske kustýk, sob (kaj) paniá te na pirithaden léskiro priphenybén; kiéli Jov čhudiá phuvjákiro fundámiento; tén'či me, godypén, sómas, pašýl Ráskire-Devléskiri rig, syr Léskiro pomogibnaskiro dre butý: Jov radynelaspe mándyr; me sómas usady (sak) bahtaló angíl Léste. Me bahtalyjom dre Léskire-phuvjákiri paš, i me, godypén, zoralés radyndjompe manušéngire čhavénca. I akaná, čhavé, šunén man, pal-dová so bahtalé isyn odolé, savé džána pir miré dromá: šunén, so me sykliakirava, i javén godé i na vyčhurden iléstyr miré lavá. Bahtaló isyn odová manúš, savó kandéla man; savó dykhéla ciamkes so dyvés pašýl mirí pórta; savó užakiréla pašýl vudará. Manúš, savó lathéla man – godypén, lathéla džiibén i Raj Devél javéla te bahtiakirél les; ne manúš, kon bistrela pal mánde, kodová keréla čoripén péskire dieske; saré, konéske me na som pir iló, sýrby užakiréna meribén. Godypén čhudiá péskiro kher, jov vyčingirdia péske eftá (bitrinéngiro deš) stýlby; jov čhindiá péskire murdalén (žyvotnonen), jov zmiešyndia péskiri mol (vino), jov adiáke-pac' kerdiá péskiro skamínd (xabén). Godypén bičhadiá angíl péskire dynaricen, jov kharéla ke pe naj vučedyršone šteténdyr dro fóro: “Kon isyn nabaré – godiákiro, risjov adarík.” Odoléske, savó but na ĥaljola, godypén phendiá: “Javén, xan miro maró i p'jen mol (vino), saví me zmiešyndjom. Mekén dylnypén, sob (kaj) te dživén, psirén god'varé dromésa.” Manúš, kon sykavéla bang javire manušéske, savó sykavéla napatyv ke javír manušá, priléla ladžaipén pe péste; kodová manúš, kon bangiakirela čoré manušés, doreséla doš péske. Na sykáv bang kodoléske, savó sykavéla napatyv ke javír manušá, sob (kaj) jov te na bidykhel tut: sykáv bang godé manušéske i jov javéla te sykavél patýv túke. Podsykliakir godé manušés, i jov javéla godedyr, sykliákir čačuné (vorte) manušés i léste javéla butedýr džinybén. Angledýr trej te dares Rástyr-Devléstyr, sob (kaj) te javes godó: i džinybén pal Sventoné Raste-Devléste, déla xor rozlyiben (rozĥalyiben). Me, godypén Rástyr-Devléstyr, davá butýr dyvesá túke te dživés, i davá butedýr beršá ke tyró džiibén. Kóli tu san godó, tu san godó vaš péske, kóli tu sykavesa bipatyv ke manušá, tu kokoró javésa te tugines (te piridžives) pal davá. Dylynin'ko džuvlý nahrates rakiréla; joj isyn prostone-godiakiri, i na džinéla nisó. I joj isyn bešty pašýl vudár lákire kheréskiro, ci pe banko pe vučé štéty dro fóro, sob (kaj) te kharel ke pe odolén, savé džána pašýl, savé džána mamúj péskire dromésa: Kon isyn nabaré-godiákiro, risjov adarík. Kodoléske, savó nábut ĥaljola, joj rakiréla: “Čordo paní isyn gudló, i maró, savó xána čorahanés, isyn drógo.” Ne kadalé manušá na džinéna, so myné manušá, kon gijá ke joi, so lákire gosti isyn xor pašté dro liúno (ado). Solomonóskire pritčy. Godó čhavó radynela péskire dadés, ne dylynin'kone čhavestyr kaljola iló léskire date. Kučipena (sokroviščy), so doreséna čoré rendéndyr, na janéna lačhipén, ne čačipén zrakhéla meribnástyr. Raj Devél na domekela, sob (kaj) čačunó manúš te bokhaljol, ne Jov na priléla dová, so drieván trej nadevlytkone manušénge. Odová manúš, savéste isyn kirnačo (lienivo) vast, javéla čororó, ne dobusovo (staratiel'no) vast barvaliakirela manušés. Kon ukedela lynaskiro, isyn godó čhavó, ne kodová manúš, savó isyn sutó, kiéli ukedena ubijandypen, isyn balvalitko čhavó. Bahtiakiribén učhakiréla šeró čačipnaskire manušéskiro, ne nahratyma garavela muj fujé-manušéngiro. Bahtaló isyn ripiribén pal čačuné manušéste, ne čoré-manušéngiro lav kirnjola. Godé manušá priléna ke godý priphenybená, ne nabaré-godiákiro manúš peréla. Kodová manúš, savó keréla bidošengires, psiréla bidarakiro; ne kodová manúš, savó psiréla bangé dromésa, javéla uhtyldo vaš kára. Manúš, savó marela jakhasa, kiéli keréla čoripén, janéla kalypén, a phut'kirdo manúš peréla. Čačuné-manušéskire lavá isyn džiibnáskiri ĥanýng, ne nahratyma garavela muj fujé-manušéngiro. Zoraló nakamiben ĥazdéla košybén, patýv ke javír manušá začhakirela saré gréhi. Godypén džála godypnaskire manušéstyr, a ran kedelape te marel pir dumo kodoléske, savó na ĥaljola godypén. Godé manušá skedéna (zrakhena) džinybén, ne dylynó rakiréla ke xasibén. Barvalé-manušéskiro mištypén isyn syr zoraló fóro, ne čororó manúš peréla dro dúho (fáno) péskire bogipnastyr. Čačipnaskire-manušeskiri pharí butý lydžála ke džiibén, ne bažyn (prirosto), saví doreséla načačuno (čoro) manúš, lydžála ke grého. Odová, savó rikirélape ke sykliakiribén, isyn pe drom ke džiibén, ne kodová, kon na priléla ke godý, kiéli léske sykavéna bang, džála dre rig dalé droméstyr. Kon garavela javirendyr dová, so jov drieván na kaméla, isyn xohanó, i kon rozmekela čib (kalé-keribnaskire) lavá, isyn dylynó. Kaj rakiréna but lavá, odój i čoripén phenéna: ne kon obrikirela péskire uštá, odová isyn godó manúš. Čačuné-manušéskire lavá isyn sýrby vykedyno rup, a fujé-manušéngiro iló na mol nisó. Čačuné-manušéskire uštá déna godý buté manušénge, ne dylynin'ka meréna pir dová, so lénge na uhtýlla (nádosi) godypén. Ráskire-Devléskiro bahtiakiribén barjakiréla manušés, jov nisó na moginéla te pričhuvel ke davá, keri butý pharés. Dylyné manušéske te kerél čoripén sýrby te broinel, ne manušéste, savó ĥaljola, isyn but godypén. Dová, sóstyr daréla fuj manúš, peréla pe léste, ne dová, so drieván isyn drógo čačuné manušénge, javéla otmekno lénge. Riskiribnaskiri balvál (vihro) prodžála i fuj manušá butýr na javéna, ne čačunó manúš isyn pe viéčno fundámiento. So isyn šut (uksuso) vaš dandá, ci thuv vaš jakhá, adiáke-pac' isyn kirne-maséngiro manúš vaš odolénge, savé bičhadé kadasavé manušés. Kon daréla Rástyr-Devléstyr, kodová dživéla ĥaredyr (dlugedyr), ne fuj manušá meréna sygedýr. Čačuné-manušéngiro užakiribén isyn rádyma, ne fujé-manušéngiri nadiéia xasjola. Raj Devél isyn zoralypén vaš čačuné manušénge, ne Jov xasiakiréla kodolén, [i dar vaš odolénge-r.s.], savé keréna čoripén. Čačuné manušá nijékhvar na kuninenape, ne fuj manušá na javéna te dživén duredýr pe phuv. Čačuné manušá rakiréna godé lavá, ne xohany čib čingirena krig. Čačuné-manušéngire uštá džinéna, so te phenén, ne muj fujé-manušéngiro féni (tóka) xohavela. Načačune ubladýtka (viesy) isyn džungalé Ráske-Devléske, ne čačunó pharipén vaš vieso zoralés radynela Les. Kiéli javéla phut'kiribén, javéla i ladž, ne naphut'kirde manušénde isyn godypén. Devlytkoné-manušéngiro lačhipén javéla te prirakhel len, ne napatiaibnaskire-manušéngiro čoripén xasiakiréla len. Barvalypén na déla ni savó lačhipén dro xasibnýtko dyvés, ne čačipén zrakhéla meribnástyr. Čačipén sykavéla drom bidošakire manušéske, ne fuj manušá peréna péskire fuipnastyr. Čačipén zrakhéla devlytkoné manušén, ne napatiaibnaskire peréna dre felý péskire frentymatyr, pal saví jone tradenape. Syr fuj manúš meréla, léskiro lačhó užakiribén (léskiri nadiéia) xasjola, i načačune-manušéngiro lačhó užakiribén bidatyr xasjola. Čačipnáskiro isyn zrakhno bidatyr, a fuj manúš peréla odorík pe štego léskiro. Duje-mujengiro manúš péskire lavénca xasiakiréla péskire pašatunes, ne čačunó zrakhélape péskire džinybnasa. Syr saró džála lačhés čačipnaskirenca, fóro drieván radynélape; i syr fuj manušá xasjona, fóro déla gódla radymátyr. Devlytka bahtiakirena (blagoslovinena) i ĥazdéna ke vučypen fóro, ne fuj-manušéngire muiá ravena telé les. Nabaré-godiákiro dykhéla vučipnástyr pe péskire pašatuné manušéste, ne manúš, savó ĥaljola, kodová rikiréla ramánjo/ miro [isyn štyl-r.s.]. Phukaibnaskiro (pierienosčyko) rosphenéla čorahanyben, ne kodová, savéste isyn patiaibnýtko dúho (fáno), garavela réndo. Kaj na déna godypén manušénge, manušá peréna, ne kaj isyn but manušá te den godý, tedy odój nane dar. Odová, kon isyn dudvalo (jakhítko) pal čužoné manušéste, keréla fuj péske, ne kodová, kon drieván na kaméla te javél dudvalesa (poručytieljosa), isyn bidarakiro. Lačhé-ilytko džuvlý doreséla patýv, ne pharé-butiakire manušá doreséna barvalypén. Lačhé-iléskiro manúš keréla lačhipén péskire dieske, a biileskiro [holiamó-r.s.] manúš keréla doš péskire ločake (plotiake). Fuj manúš keréla došvaly butý, ne odová, kon rosčhuvela čačipén, doreséla mištó mazúri (nagrada). Čačipén lydžála ke džiibén, ne odová, kon rodéla čoripén, rodéla les vaš péskiro meribén. Raj Devél rikirlape krig odoléndyr, savé keréna čoripén pefromi (narošnes), ne bidošengire dre saré dromá zoralés radynena Les. Mek jone i khetaniakirenpe vasténca, ne fuj manušá na jačénape nabange; ne čačuné-manušéngiro ródo (mištypén) javéla rakhno. Suvnakuný angrusty dro balyčengiro nakh (piatako) isyn dová-pac', syr isyn šukár džuvlý, saví but na ĥaljola. Čačuné manušá drieván tyrdenape ke lačhipén, ne lačhó užakiribén (nadiéia) fujé-manušéngiri lydžála ke bari xolyn. Jekh manúš déla drieván but, ne i léske pribarjakirelape butýr, ne javír drieván pririkirela péske, i jov jačéla čororedyr. Kon rozdela but, odová javéla barvaló, kon paniakirela javirén, odová adiáke-pac' javéla paniakirdo. Manušá prokošena odolés, kon pririkirela giv, ne bahtaló javéla odoleskiro šeró, kon biknela les. Manušés, savó dobusoves (staratiel'nes) rodéla lačhipén, odová rodéla láska Devléstyr, ne pharó javéla kodoléske, savó rodéla čoripén. Kon zoralés patiála dro péskiro barvalypén, odová peréla, ne čačuné manušá javéna naj šukár syr patria (listy) pe kašt (drévo). Kon keréla doš (čoripén) péskire kheréske, odová doreséla balvál syr meknó mištypén, ne dylynin'ko manúš javéla pishári godé-iléskire manušéske. Čačipén isyn džiibnáskiro kašt (drévo) sýrby phabaj i godó manúš prityrdela dijá. Kóli čačunó manúš doreséla mazúri (nagrada) pe phuv, tedy butýr doreséla grehítko i fuj manúš. Kon kaméla, sob (kaj) les te sykliakirén, odoleska trej džinybén, a kon drieván na kaméla, syr sykavéna léskiri bang, odová isyn nagodo. Ráske-Devléske isyn drógo lačhó manúš, ne Jov bangiakirela manušés, savó priduminela fuipén. Manúš nane terdó zoralés fuipnastyr, ne rukh (kornjo) čačuné-manušéngiro na kharélape (na piričhuvelape) krig. Kuč romný isyn sýrby koróna pe romeskiro šeró, ne kodoia, saví ladžakirela les, isyn sýrby kirnypen dre léskire kokalý. Čačuné manušá duminéna pal čačipén, ne fuj manušá khetané déna xohanó godypén. Fuj manušá rakiréna lavá: “Podrakhasa te zamaras”, ne devlytkonengire lavá vyrakhena len. Fuje manušén ravena telé i jone nane butýr, ne kher čačuné-manušéngiro javéla te terdjol. Manušés šarena pal léskiri godý, ne manušá javéna te dykhén vučipnástyr pe odoléste, konéste isyn xohanó iló. Nabaró manúš, savéste isyn dynári, fedýr kodolestyr, savó isyn dre patýv féni péste, ne léste na uhtýlla (nádosi) maró. Čačunó manúš pekelape (zabotisola) pal léskire kheritkoné murdalénde, ne fujé-manušéngiro iló isyn bimanušytko (bitangipnaskiro). Kon keréla butý pe péskiri phuv, odová javéla te xal maró čalés, ne kodová, savó džála pal balvalitkone manušénde, nábut ĥaljola. Fuj manúš isyn ĥálko te uhtylel čoripnasa, ne čačuné manušénde isyn zoralý phuv tel ĥerá. Fuj manúš peréla dre felý čoripnasa péskire uštendyr, ne čačunó manúš džála krig pharipnastyr. Manúš javéla čalo lačhipnastyr syr phabatyr, so vydžála léskire uštendyr, i javéla dynó manušéske pir butiá léskire-vastengire. Dylyneskiro drom isyn čačunó dre léskire jakhá, ne odová, savó kandéla, syr léske déna godypén, isyn godó. Dylynin'ko manúš jekhátyr zoralés xoliasóla, ne baré-godiákiro sčhakirela xolý. Kon rakiréla dová, so jov džinéla, odová phenéla čačipén, ne načačuno dudvalo /iakhítko (svidietieljo) xohavela. Kon rakiréla, i na duminéla, odová promarela javirés syr kurtála (sablia), ne godé-manušéngiri čib sastiakirela les. Patiaibnytka lavá javéna te rikirenpe ŭsády (sak), ne xohany čib pe momiento. Frentyma isyn dro iló odolénde, savé keréna čoripén, ne kon déla godypén pal ramánjo (miro), kodová radynélape. Čačuné manušés obdžala rigasa meribnytko dar, ne fuj manušá javéna pherdé čoripnasa. Raj Devél rikirlape dre rig xohané uštendyr, ne odoléndyr, savé keréna pir patiaibén, Jov bahtaljola. Baré-godiákiro manúš garavela džinybén, ne dylynó rosphenéla angíl sarénde dylnypén. Dobusovo vast javéla te xulainél, ne nabutitko vast začhuvena ke butý zorjása. Kalypén pe iló pritasavela manušés, ne lačhó lav radynela les. Čačuneske trej te vykedel malen (drugen), pal-dová so fuj manušá lydžána krig droméstyr. Nabutitko manúš na pekela mas, so jov doresciá pe stariben (ohota), ne dobusovo manúš barjakiréla mištypén. Čačunó drom lydžála ke džiibén, pe léskire dromore nane meribén. Godó čhavó šunéla, syr dad sykliakiréla les čačipnaske, ne kon isyn napatyvakiro ke javír, jov na šunéla, syr sykavéna bang léske. Manúš čaliakirela lačhipnása sýrby phabatyr péskire uštendyr, ne napatiaibnaskire dijá čaliakirenape nahratymatyr. Kon pririkirela péskiro muj, odová rakhéla péskiro džiibén, ne kodová, savó otphandela buĥles péskiro muj, odová xasjola. Kirne-maséngiro manúš tyrdelape te xal, ne nisó na doreséla, ne dobusovengiro (staratiel'no) di javéla barvaló. Čačunó manúš drieván na kaméla xohaibén, ne nadevlytko manúš lydžála pes namištes i doreséla ladž. Čačipén rakhéla odolén, savengiro drom isyn bidošéngiro, ne fuipén ravela telé [hasiakiréla-r.s.] grehitkoné manušés. Isyn manúš, savó sykavéla pes, xaj, jov isyn barvaló, ne nisó nane léste. Isyn manúš, savó sykavéla pes sýrby jov isyn čororó, ne léste isyn baró barvalypén. Manúš moginéla te del péskiro barvalypén pal džiibén syr symadý (zalogo), ne čororó na šunéla, syr sykavéna bang léske. Čačuné-manušéskiro dud (svéto) xačola radymása, a fujé-manušéskiro momolýtko (svietíl'niko) murdjola. Phut'kiribnastyr džála čingárd, ne, kon kandéla, syr léske déna godypén, odová isyn godó. Mištypén, so manúš doreséla bipatyvakire rendéndyr, tyknjola, ne kon kerdiá butý pharés, odoleskiro mištypén barjola. Užakiribén, so na janéla nisó, keréla adiáke, so iló dukhala, ne kiéli zoraló mangipén kerélape dro čačipén, tedy džiibén pherdjola radymása. Kon na priléla ke godý lav, isyn xasibnýtko, ne kon kutiakirela ke dar priphenybén, odová doreséla mazúri (nagrada). Godé-manušéskiro lav isyn džiibnáskiri ĥanýng, sob (kaj) te risjon krig meribnaskire feliatyr. Kon ĥaljola mištés, kodová isyn manušénge pir iló, ne napatiaibnytko manúš pharés dživéla. Baré-godiákiro manúš keréla saró džinybnasa, ne dylynó sykavéla mamúj péskiro dylnypén. Fuj manúš, savó bičhadó zaniása (viestiasa), peréla dro pharipén, ne patiaibnýtko viestia-bičhaibnaskiro (poslo) janéla sastypen. Čororipen i ladž peréna pe manušéste, savó vyčhurdela iléstyr dová, pal so sykliakiréna les. Ne kodová, savó priléla les, kiéli les bangiakirena zoralés, javéla dre patýv. Kiéli zoralý myslia ke vari-so kerélape ke kónco (ke jagóro), davá gudliakirela iló, ne dylyneske na pir iló te džal krig fuipnastyr. Kon kumplinelape (malynelape) godé manušénca, javéla godó, ne kampanija (malypen) dylynin'konenca xasiakiréla les. Fuipén rodéla grehitkoné manušén, ne čačuné manušénge otpleskirelape pale lačhipnása. Lačhó manúš jačkiréla meknó mištypén (nasliedstvo) léskire-čhavéngire čhavénge, ne barvalypén grehitkoné-manušéngiro prirakhelape vaš čačuné manušénge. But maró isyn pe čhučé féldy čororé manušéngire, ne, kaj na uhtýlla (nádosi) čačipén maškír manušénde, odój javéla xasibén. Kon žalinela péskiri ran, odoléske nane drógo drieván čhavó, ne konéske isyn drógo jov, odová sykliakiréla ke dukhá tyknal les. Čačunó manúš xála čalés, kicý léskiro di kaméla, ne fujé-manušéngiro kužum (želudko) javéla te bokhaljol. Godý džuvlý rikiréla kher, ne nabaré-godiakiri džuvlý phagiréla les péskire dylnypnasa. Kon keréla saró pir čačipén, kodová kutiakirela ke dar Ras-Devlés, ne kon keréla čoripén pefromi, odová na priléla ke godý Les. Dylynó rikiréla phut'kirdes ke ran pe péskiro dumo, ne godé uštá rakhena manušén. Kaj nane guruvén, odój jasla (khurly) isyn čhučí, ne baró pribytko (umaloto) javéla guruveskire zorjátyr. Patiaibnýtko jakhítko na javéla te xohavél, ne načačuno jakhítko javéla te phenél xohaibén. Bipatyvakiro manúš rodéla godypén, i na lathéla nisó, ne džinybén lokhes délape kodoléske, savó isyn godypnaskiro (god'varó). Durjov (naš krig) dylyné manušéstyr, saveskire uštendyr tu na šunesa džinybén (god'varé lavá). Baré-godiákiro manúš džinéla, so jov keréla akaná i duredýr, ne dylynó garavela péskiro dylnypén dro léskiri frentyma, sob (kaj) te xohavél. Dylynin'ka prosana péskire gréhi, ne maškír devlytkonende isyn jekh godý. Jekh iló džinéla péskiro kirkipen, ne čúžo na phenéla javireske pal péskiri rádyma. Fuje-manušéngiro kher ravena telé, ne devlytkonengiri šátra javéla naj šukaredyr. Isyn drom, savó zdelape manušéske, so jov isyn mamúj (priámo), ne pe kónco (pe jagóro) jov lydžála ke meribén. Mek manúš i salape, ne pe iló léste saštý te javél dukh; i bari rádyma javír mólo piridžala dro kalypén. Bede-iléskiro manúš čaljola péskire fujé butiendyr, ne lačhó manúš javéla čalo peskirendyr. Prostone-godiakire manušá patiána kažnoné lavéske, ne baré-godiákiro manúš obduminela lačhés kažno šago (lamny). Godó manúš daréla i durjola čoripnástyr, ne dylynó sýges xoliasóla i zoralés patiála dre péste. Hačkirdo manúš keréla nagod'vares, ne manušés, savó priduminela fuipén, zoralés na kaména. Prostone-godiakire manušá doreséna dylnypén syr meknó mištypén, ne baré-godiakirenge manušénge džinybén délape sýrby koróna. Čoré manušá bandiakirena šeró angíl lačhende, i fuj manušá angíl čačuné-manušéngiri pórta (vráty). Čororé manušés zoralés na kaména až léskire pašatuné manušá, ne barvaleste isyn but drúgi (malá). Kon dykhéla vučipnástyr pe péskire pašatuneste, kodová keréla grého; ne bahtaló isyn kodová manúš, kon isyn lačhé-iléskiro (žalinela) ke kodolé, savén pritasavéna. Ci na xohavenape odolé, savé priduminena čoripén? Ne kodolé, savé priduminena lačhipén, dykhéna javire manušéndyr drógo lačhipén i patiaibén. Kažnoné pharé butiátyr manušéske javéla kófo (pribyl'), ne čhučé (pustone) rakiribnastyr manúš javéla čororó. Godé manušá doreséna barvalypén syr koróna, ne dylynin'ko féni péskiro dylnypén. Čačunó jakhítko vyrakhela manušéngiro džiibén, ne frento jakhítko rakiréla xohaibén. Kon daréla Rástyr-Devléstyr, kodová manúš isyn zoralés terdó, i léskire čhavénge javéla štéto te garadjon. Kon daréla Rástyr-Devléstyr, kodová p'jela džiibnáskire ĥanyngatyr, sob (kaj) te riskires krig meribnaskire feliatyr. Kralískiro baripén rikirlape pe dová, syr but isyn léste manušá, ne kiéli kralíste isyn nábut manušá, tedy jov našavela saró. Manúš, savó liéntes (na sýges) xoliasóla, isyn baró godiari, ne kodová, savéste isyn xačkirdo dúho (fáno), sykavéla pe jakhá péskiro dylnypén. Lačhó iló déla džiibén masenge, ne zevlynypén kirniakirela kokalý. Kon pritasavela čorores, kodová sýrby obrakirela Ras-Devlés, Savó sozdyjá les. Ne kodová keréla patýv Léske, Savó isyn lačhé-dieskiro ke manušá, kon isyn dre trébima. Fuj manušá peréna péskire fuipnastyr, ne čačunó isyn zoralés terdó až dro sámo léskiro meribén. Godypén otkhinjola štylés dre baré-godiákiro iló, ne dová, so isyn dre dylynin'konengiro iló, džindló sarénge. Čačipén ĥazdéla manušén (narodo), ne grého léla krig patýv kažnoné manušéndyr. Králi sykavéla patýv godé dynaríske, ne jov zoralés xoliasóla pe odoléste, savó ladžakirela les. Kovlo otphenybén štyliakirela xolý, ne pharó lav vykharela baredýr xolý. Čib godé-manušéngiri isyn pherdý džinybnasa, ne čib dylyneskiri vyčhuvela duredýr dylnypén. Ráskire-Devléskire jakhá isyn pe kažno štéto i dykhéna ciamkes pal fujé i lačhé manušénde. Lačhí čib isyn sýrby džiibnáskiri ĥanýng, ne mižeh čib phagiréla dúho (fáno). Dylynó dykhéla vučipnástyr, kiéli les dad sykliakiréla, ne kon priléla bang, kiéli léske sykavéna, isyn baré-godiákiro. Dre čačuné-manušéskiro kher isyn but kučipena, ne fujé-manušéngire kofostyr jekh tugipen (piridživipen). Godé-manušéngire uštá déna džinybén, ne dylynin'kone-manušéngiro iló na keréla adiáke. Raj Devél rikirlape dre rig svénto dyibén, so fuj manušá janéna, ne jov zoralés radynélape mangipnastyr, savó keréna devlýtka manušá. Raj Devél na priléla fujé-manušéngiro drom, ne Léske isyn dróga kodolé, savé rodéna i džána duredýr pir čačipén. Drieván pharés sykliakiréna odolés, kon jačkiréla lačhó drom, i kodová, savó bidykhela (savéske na pir iló), kiéli les sykliakiréna, meréla. Kóli isyn džindló Ráske-Devléske, so kerélape dro liúno (ado) i Abadono, to tedy pe kicý butedýr Jov džinéla manušéngire ile. Kon sykavéla bipatyv [rozmekne manušéske na pir iló-r.s.], kiéli léske vyrakirena zoralés, kodoléske isyn na drógo kadavá manúš; adiáke-pac' jov na džála ke godé manušá te den godý léske. Radymakiro (lošalo) iló keréla bahtaló muj, ne kalypén pe iló phagiréla dúho (fáno). Godypnaskiro iló rodéla džinybén, ne dylyneskire uštá čaravenape dylnypnasa. Saré pritasade-manušéskire dyvesá isyn bibahtalé, ne manušéste radymakire ilésa ŭsády (sak) isyn svénko. Te javes čororó i te dares Devléstyr isyn fedýr, syr te javes baré barvalypnasa, ne pharipnasa pe iló. Fedýr te xas šaha dro čaró, ne kaj túke sykavéna patýv, syr te xas thule tieliantos, ne kaj tut bidykhena. Xolynakiro manúš vykharela košybén, ne kon rikiréla pes xoliátyr, odová kovliakirela čingárd. Kirne-maséngiro drom isyn syr tyno phusadytkone (tiernytkone) xrustendyr, ne devlytkonengiro drom isyn mamúj (priámo). Godó čhavó radynela péskire dadés, ne dylynin'ko manúš dykhéla vučipnástyr pe péskire date. Nabaré-godiákiro manúš radynélape léskire dylnypnastyr, ne god'varó manúš psiréla mamúj (priames). So manúš priduminela bi godé-lavengiro, savé déna but manušá, odová délape dukhá, ne kaj but manušá déna godý, odój saró isyn zoraló (mištó). Manúš radynélape péskire lačhé otphenybnastyr, lačhó lav rakirlape, kiéli jov trej. Godé-manušéskiro drom dro džiibén džála upré, sob (kaj) jov te risjol krig liunostyr (adostyr), so isyn telé. Raj Devél xasiakiréla kher, kaj phut'kirdé isyn, ne Jov déla zor pe kustyka, kaj pivlia (udovy). Raj Devél isyn džungaló doléstyr, so bibahtalé manušá priduminena, ne bidošengire-manušéngire lavá isyn lačhé Léske. Kon isyn ĥálko (žadno) ke kófo, kodová keréla pharipén péskire kheréske, ne kon bidykhela (konéske na pir iló) myty (vziatki), javéla te dživél. Čačuné-manušéngiro iló obduminela (sykljola), syr te otphenel, ne fujé-manušéngiro muj pyrskinela bibahtiasa. Raj Devél durjola fujé manušéndyr, ne Jov šunéla čačuné-manušéngiri pátieri (molítva). Jakhengiro dud radynela iló, i lačhí zan (zvies') thuliakirela kokalý. Kon šunéla, kiéli léske sykavéna bang dro džiibén (les sykliakiréna džiibnaske), jačélape maškír godé manušénde. Kon vyčhurdela iléstyr dová, sósa les sykliakiréna, odová na priléla ke godý péskiro dúho (fáno), ne odová, kon šunéla sykliakiribén, isyn god'varó. Kon daréla Rástyr-Devléstyr, odová sykljola godypnaske, i angíl, syr te doresel patýv, trej te javél naphut'kirdesa. Manúš priduminela péskire ilésa, ne dová so jov Rástyr-Devléstyr pe davá otphenelape čibása (čibjasa). Dre manušéskire jakhá saré léskire dromá isyn bidošengire, ne Raj Devél roskedela (važynela) tumaró dúho (fáno). Dopatia Tyrí butý Ráske-Devléske, i tyré dúmy risjona dro čačipén. Raj Devél kerdiá saró vaš Péskiro zaduminyben; i, až fujé manušés vaš xasibnýtko dyvés. Kažno (sváko) phut'kirdo ilésa manúš isyn džungaló (brydinela) Ráske-Devléske, mek jone isyn dro jekh vast jekh jekhésa, me sovlahava: nijékh na našela bibangipnaskiro. Lačhé-ilytkimasa i čačipnása otmekelape bang pal čoripén, kon daréla Devléstyr, kodová otdžala (durjola) bibahtiatyr (čororipnastyr). Kóli manušéskire dromá isyn lačhé Ráske-Devléske, Jov keréla adiáke, so až léskire vérgi isyn dro ramánjo lésa. Fedýr te javél nábut, ne doresno čačipnása, syr te javél baró kófo, ne načačipnasa. Manušéskiro iló obduminela péskiro drom, ne Raj Devél sykavéla (mamuiakirela) léskiro drom. Kralískire uštá isyn devliakirde, léskire moske naštý te obdžal čačipén (te xohavél) pe séndo. Čačuné ubladýtka (viesy) i ubladýtka čašy isyn Rástyr-Devléstyr; saré tyrdyne (giri) dro gonó isyn Léskiro keriben. Kral'jenge isyn stetka (drieván džungalé) kodolé, kon keréla čoripén, pal-dová so trono rikirlape čačipnása. Čačuné uštá zoralés radynena kralís, i léske isyn drógo odová, kon rakiréla čačipén. Kralískiro xoliakiribén sykavéla pe meribén, ne godó manúš kovliakirela kralís. Syr kralískiro muj ziainela, to džiibén déla sarénge, i léskiri láska isyn syr óbloko vesnakire bryšyndesa. Pe but fedýr isyn suvnakástyr te jačes godedyr, i te jačes baré-godiakiresa isyn fedýr rupéstyr. Čačunó drom vaš devlytkonenge isyn dre dová, sob (kaj) te durjon čoripnástyr. Kon rikirlape ke péskiro [rakhéla-r.s.] drom, odová rakhéla péskiro dúho (fáno). Phut'kiribén isyn usady (sak) ke xasibén, manúš, savó zadelape, syg peréla. Fedýr isyn te javes naphut'kirde duhósa maškír kandune / prostone manušénde, syr te roskeren čordo doresybén maškír phut'kirdé manušénca. Kon priléla lav godiása, odová lathéla lačhipén, i kon risjola ke Raj Devél te zrakhelpe, odová isyn bahtaló. Konéste isyn godó iló, kodová kharélape baré-godiákiro, gudlé uštá barjakirena sykliakiribén. Konéste isyn godypén, davá isyn džiibnáskiri ĥanýng (istočniko); ne te sykliakires dukhanes pal doša dylynen-davá isyn dylnypén. Godé-manušéskiro iló sykliakiréla les, so te rakirél, i déla butýr džiibén léskire uštenge. Kuč lavá isyn syr avgín (meda): gudló vaš di, i sastypen vaš kokalý. Isyn drom, syr zdelape manušéske, sob (kaj) jov isyn čačunó, ne jov ladžala ke meribén. Manúš, savó keréla butý pharés, keréla butý pharés vaš péske, pal-dová so bokhalo muj začhuvela les. Bidevlytkari [frentari-r.s.] ĥanavela bibáht, i léskire uštá isyn sýrby jag, saví xačkiréla. Načačuno manúš rozlydžala čingárd, kon gundiarinela (šepčynela), odová roskerela fedyršone malen. Nahrato manúš prityrdela ke pe léskire pašatunes, i lydžála les nalačhé dromésa. Kon marela jakhasa (priščurinélape), odová priduminela čoripén; kon dandyrela péskire uštá, odová keréla čoripén. Syvo šeró isyn sýrby kralískiri stadyk (koróna) baripnasa, savó isyn pe drom ke čačipén. Kon povolin'kes (liéntes) xoliasóla, isyn fedýr zoralé manušéstyr, i odová, kon rikiréla zor pe péskiro dúho (fáno), isyn fedýr odoléstyr, savó léla fóro. Žrebijo čhurdelape dre angalia (poly), ne kažno mólo saró kerélape Devléskire godiása. Fedýr isyn šuko maró, ne te javél ramánjo (miro), syr isyn pherdó kher sventoné masesa, ne kaj isyn košybén. Godó dynári (sluga) rikiréla zor pe čhavéste, savó keréla ladž, i jov roskerela (rozdela) meknó mištypén maškír pšalénde. Dre kakávi (kotlo) bilavena (plavinena) rup, a dre bov suvnakái, ne Raj Devél propatiakirela ile. Bibahtaló manúš priléla ke godý, so rakiréna načačune uštá, ne xohanó manúš šunéla bedo čib, saví lydžála pe xasibén. Kon salape čororestyr, odová obrakirela Ras-Devlés, Savó sozdyjá les. Kon radynélape baré bidake, kodoléske javéna viečna mén'ki. Čhavéngire čhavoré isyn sýrby kralískiri stadyk (koróna) phurané manušénge, čhavé isyn barikane léngire dadendyr. Syr nahrata manušá na phenéna nisó fededýr, adiáke-pac' i patiaibén isyn, so kralískiri seménca na javéla te xohavél. Dáro isyn kuč bar dre kodoleskire jakhá, konéste jov isyn: karik xuláj te na risjol, dáro janéla léske mištypén. Kon učhakiréla nalačhé réndy, odová rodéla ramánjo (miro): ne kon rakiréla pale pal dová, kodová durjakirela fedýr malen (drugen). Fedýr isyn xor te bangiakiren godé manušés, syr šel móly te pekaves dylynes. Bibahtaló manúš rodéla jekh, sob (kaj) te buntuinel, paldavá biilytko Jangólo javéla bičhadó pe léste. Fedýr isyn te dykhespe ričyhasa (miedviedicasa), savjátyr čorde ričoren, syr dylynesa léskire dylnypnasa. Kon pleskirela pale čoripnasa pal lačhipén, bibáht na javéla te durjol (na otdžala) léskire kheréstyr. Syr léna te košenpe, davá isyn sýrby paní, so mekelape telé, paldavá mek te čingardespe angíl, syr xoliamó košybén lélape. Kon čačakirela (opravdynela) [promekela bang-ju.o.] fujé manušénge, kon bangiakirela čačuné manušés-dalé duje rendéndyr (dielendyr) dur'jela Raj Devél. Vaš so barvalypén dre vastá dylyneste, sob (kaj) te javél godó? Léskiro iló na džinéla, so te kerél lésa. Maleske trej léskire mal dro kažno časo (cýro), čačunó pšal javéla, syr peréla bibáht. Nagod'varo manúš marela pir vastá syr dre symadý (zalogo) i jačélape jakhítko (svidietieljo) pal péskire pašatuneste. Konéske pir iló isyn čoripén, odová vykedéla košybén. Kon ĥazdéla péskiri pórta, odová rodéla xas'kiriben. Xohané-iléskiro manúš na lathéla lačhipén; pe manušéste, savéste isyn mižeh čib, peréla bibáht. Konéste lathelape čhavó, savó isyn bi patyvakiro ke javír manušá, odoléske manušéske javéla kalypén. Dad, konéste isyn dylynin'ko čhavó, na radynélape. Radymakire iléstyr džála sastiakiriben syr drabestyr, ne phagirdó dúho (fáno) šut'kirela kokalý. Fuj manúš čhuvéla myto (vziatka) pale brek, sob (kaj) te risjol čačipnastyr pe séndo. Godypén džála angíl jakhá god'varé manušéste, ne dylyneskire jakhá roznašenape pe phuvjákire jagóry (koncy). Dylyné čhavestyr kaljola iló dadéste, kirkipen odolé džuvliáke, saví bijandiá les. Te sendiakires čačuné manušés isyn namišto, i te mares kralískire barydyrén pal léngiro patiaibén. Kon isyn god'varó, odová rakhibnýtkes rakiréla, kon ĥaljola godes, kodoleste dúho (fáno) na kuninelape. Až dylynes ginéna pal godeste, kiéli jov isyn štyl; ci kodolés, savó zaphandela péskiro muj, les ĥaljona pal godé-šereskire manušéste. Manúš, savó durjola javirendyr, rodéla dová, so jov jekh kokoró drieván trebinela, jov isyn scial (proti) saró godó čačipén. Dylynin'ko drieván na kaméla te ĥaljol džinybén; ne sob (kaj) jekh te sykavél, so isyn léste pe iló (pe godý). Jekhátyr paló fuipén džála bipatyv; a kiéli na déna patýv, tedy i obrakirena. Manušéskire lavá isyn sýrby xor paningá, i sýrby godypnaskiri ĥanyngori, saví isyn sýrby sýgno thaduno ručajo. Davá isyn nalačhés te javes pe fujé-manušéngiri rig, ci te raves telé čačuné manušén pe séndo. Dylyneskire uštá vykharena čingárd, i léskiro muj lydžála ke maribén. Dylyneskiri čib isyn xasibén vaš léske, i léskire uštá isyn sýrby felý vaš léskiro di. Kon gundiarinela (šepčynela) pe kan, léskire lavá isyn syr lačhó xabnoro, i jone džána andré dre masá. Kon isyn nabutitko pe péskiri butý, kodová isyn pšal kodoléske, savó isyn xasiakiribnaskiro. Ráskire-Devléskire lav isyn syr zoralý vučardý (bašnia), čačunó manúš našela dre láte, i tén'či jov isyn bidarakiro. Barvalé-manušéskiro mištypén isyn léskiro zoraló fóro, i jov isyn sýrby vučí vánta dre léskire-godiakiri patýv. Manúš zadelape angíl xasiakiriben, i naphut'kiriben janéla patýv. Kon otphenéla angíl, syr te šunél, kodová isyn dylynó i ladž léske. Manušéskiro dúho (fáno) rikiréla džides les, kiéli jov isyn nasvaló, ne kon saštý (moginéla) te ĥazdel (te podrikirél) phagirdó dúho (fáno)? Baré-godiákiro iló doreséla džinybén, i godé-manušéskiro kan rodéla džinybén. Manušéskiro taláno keréla dromá manušéske, i janéla les angíl baré manušénde. Pervoneste, kon rakiréla pe séndo, isyn baripén angíl, syr javéla léskiro pašatuno i zumavela (propatiakirela) les phučibnenca. Trej te čhurdén žriébijo, sob (kaj) te terdjol (te pirijačel) čingárd, kiéli zoralé manušá kaména te pirizorjakiren jekh jekhés. Kóli tu dukhavesa (rosholiakiresa) pšalés, tedy isyn pharedyr te riskires pale les, syr te lel zoraló fóro; i čingárd isyn sýrby sastýr pe vudár dre thagaritko tvárdyma (buklo), savjása pšal zaphandelape tútyr. Manušéskiro kužum čaljola daléstyr, so rakiréla léskiro muj, jov jačélape čalo péskire uštendyr. Dre čib isyn zor vaš džiibén, ci vaš meribén. Kon kaméla te rakirél, odoléske trej te užakirel ci jekh, ci javír. Kon lathiá lačhia romniá, kodová lathiá lačhipén i doresciá drógima Rástyr-Devléstyr. Čororó manúš rakiréla sýrby jov mangéla, ne barvaló manúš otphenéla bipatyvakires (dierzkes). Manušéske, savéste isyn but drúgi (malá), kokoreske trej te javél malytko (drugitko) ke javír, ne isyn mal, savó isyn butýr pašyledýr túke tyré pšalestyr. Fedýr te javél čororó manúš, savó dživéla pir čačipén, syr te javél xohané-čibakiro (čibjakiro) manúš i dylynó. Isyn namišto, kiéli manušéste nane džinybén, adiáke-pac' i kon sýges psiréla, odová obštavelape (obstempinelape). Manušéskiro dylnypén bandiakirela léskiro drom, i léskiro iló ĥazdélape xoliása pe Raste-Devléste. Barvalé manušéste jačénape but butýr malá, ne čororestyr durjola léskiro malá. Načačuno jakhítko javéla sendiakirdo, i kodová, kon xohavela, na zrakhélape. But manušá pekenape pal láska baré randyr, i kažno manúš isyn mal odoléske, kon déla. Saré pšála čororé-manušéskire drieván na kaména les, pe kicý butýr léskire malá durjona léstyr! Jov moginéla te mangél len pale lavénca, ne jone usajékh mekéna les. Kon sykljola te javél godedyr, odová pekelape (zabotisola) pal péskiro di; kon jačélape god'varó, odová lathéla lačhipén. Načačuno jakhítko (svidietielie) javéla sendiakirdo, i kodová, kon xohavela, xasjola. Pes'tima (pyšnyma) na poddžála dylynin'koneske, pe but butýr adiáke-pac' i dynaríske na poddžála te xulainél pe thagar'jende. Kon xor rozlela, odová nasyges (povolin'kes) xoliasóla, i kodová keréla baripén péske, kon sýrby na dykhéla, kiéli léske keréna čoripén. Králi, savó xoliasóla, isyn sýrby ščer (liévo), savó rykinela, léskiri láska isyn sýrby pahlyn (rosa) pe čar. Dylynó čhavó keréla bari bída dadéske; romný, saví čingardelape, isyn sýrby paní, so peréla i ŭsády (sak) čhinela dre kaná. Kher i barvalypén isyn meknó mištypén dadendyr, ne baré-godiakiri romný isyn dáro Rástyr-Devléstyr. Nabutiakiriben (kirne-masengiripen) lydžála manušés dro xor soiben, i bitalanytko manúš javéla te stradynel bokhátyr. Kon rikirlape ke priphenybén, odová zrakhéla péskiro di. Kon na dykhéla, so jov keréla, kodová meréla. Kon isyn lačhé-dieskiro ke čororé, kodová sýrby déla dro dlugo (pokerela) Ráske-Devléske, Jov pleskirela pale odoléske, kon dyjá. Sykliákir ke dukhá péskire čhavés paka isyn nadiéia i na ker davá pir miéra, sob (kaj) jov te na merél i na dykh pe léskiri gódla. Drieván-xolynakiro manúš javéla te stradynel sendostyr; kóli tu vyrakhesa (potanginesa) les, tedy túke trej javéla te kerés davá nevéstyr. Šun, syr déna godý túke, i prilé dová, kóli sykliakiréna tut, sob (kaj) tu moginésa te javes godó dre palatuné (posliednia) dyvesá. Manúš duminéla but pal saró [manušéste isyn but mysli dro iló-r.s.], ne javéla jekh, pal so Raj Devél déla godý, i jone javéna te kerenpe čačipnása. Manušéskiro kučipén isyn léskiro lačhipén, i čororó manúš isyn fedýr xohanestyr. Kon daréla Devléstyr, kodová dživéla. Konéste isyn dar, odová jačélape čalo, i bibáht na peréla pe léste. Nabutitko (kirne-maséngiro) manúš čhuvéla telé péskiro vast dro čaró, i jov až na ĥazdéla vast pale dro péskiro muj. Pekav odolés, kon sykavéla bipatyv ke javír, i prostone-godiakire javéna godedyr, vyrakir god'varé manušés i jov javéla te dživél. Kon isyn bibahtaló ke péskiro dad, i tradéla javrí péskire da, kodová isyn biladžaipnytko i bipatyvakiro čhavó. Pirijač, miro čhavó, te šunés sykliakiribén, savó durjakirela tut godypnaskire lavéndyr. Frento jakhítko salape xoliames pe séndo, i fujé-manušéngiro muj nakhavela (glytynela) čoripén (xohaibén). Pe odolénde, savé isyn bipatyvakire ke javír manušá, isyn séndo, i pe dylyneskire masá pekaibena (vast te marel). Mol (vino) sýrby salape, sikiera (zoraló pibén) ĥazdéla šumo, i konés davá zlydžala droméstyr, kodová isyn nagodo manúš. Xolynakiro králi isyn sýrby ščer (liévo), savó rykinela, kon les xoliakirela, kodová keréla grého pe péskiro džiibén. Manúš keréla patýv péske, kóli jov terdiakirela košybén, ne kažno dylynin'ko manúš délape te čingardelpe. Kirne-maséngiro manúš na pharavela (na pašynela) phuv ivanta(tes)kiro (zimakiro), jov javéla te mangél, kiéli javéla sčhinyben i nane nisó léste. Manušéskire godiakire dúmy isyn sýrby xor paní, ne god'varó manúš pharela (vylela) len javrí. But isyn manušá, savé rosphenena sarénge pal léngiro lačhipén, ne kon lathéla patiaibnytkone manušés? Čačunó manúš dživéla bi došengiro: léskire čhavé isyn bahtalé paló (poslie) léste. Králi, kon isyn beštó pe sendariskiro štéto, rosčhurdela sarí xolý (bibáht) péskire jakhénca. Kon saštý (moginéla) te phenél: “Me kerdjom žužó iló, me som bigrehengiro?” Naroŭna ubladýtka (viesy) i naroŭna miery (tyrdyne) isyn saré duj načačipena, savé isyn džungalé (brydka) Ráske-Devléske. Adiáke-pac' i bijatós [terné-beršengires-r.s.] udžinena pir léskire keribena, ci pir léskiri butý, ci joj te javél bidošengiri, ci čačuný. Kan, so šunéla, i jakh, so dykhéla-isyn dalé duj l'goty, so Raj Devél sozdyjá. Na kam te soves, sob (kaj) te na javes čororó: otker péskire jakhá i tu javésa čalo marésa. “Bibáht, bibáht!” – rakiréla manúš, kon kinela; ne kiéli jov džála krig, tén'či jov šarelape. Isyn suvnakái, i but kuč bará, ne naj drogedyr kučipén isyn god'varé uštá. Le krig ídia kodoleskiri, kon isyn jakhítko (dudvalo) pal čužoné manušéste i rikir davá, syr symadý pal manušéste rigátyr. Maro, so doreselape xohaibnasa, isyn gudló vaš manušéske, ne tén'či (pozžie) léskiro muj javéla pherdó prahosa barorenca. Kažno godý (duma), so te kerés, risjola dro čačipén, ne jekh, kiéli tu godytkes rozlesa, tén'či džá maribnása. Kon phukavela (piridela), kodová otčhakirela garadé dúmy, paldavá na jav khetané adasavesa, kon otkerela buĥles péskire uštá. Kon prokošela péskire dadés, ci péskire da, léskiro momolýtko (svietíl'niko) murdjola maškír xor kalypén. Mištypén, so doreselape sýges dro anglypén, na javéla bahtiakirdó pe kónco (pe jagóro). Na rákir: “Me adiáke-pac' keráva bibáht pale léske.” Užakir Ras-Devlés i jov déla zor túke. Naroŭna ubladýtka (viesy) isyn džungalé (brydka) Ráske-Devléske, i xohané tyrdyne (giri) davá isyn nalačhipen. Raj Devél déla zor manušéngire ĥerenge, karik te džán, syr tén'či manušéske saštý te ĥaljol péskiro drom? Davá isyn sýrby felý vaš manušéske te phenél sýges (te del sovél), so davá isyn svénto, i tén'či (pozžie) te piriduminel péskiri sovláh. Godó králi rosčhurdela fujé manušén, i janéla pe lénde siavitko (miel'nicytko) rota. Manušéskiro dúho (fáno) isyn Devléskiro momolýtko, so piridykhela saró, so isyn andrál manušéste. Lačhé-ilýtkima i patiaibén rakhena kralís, i jov rikiréla péskiro trono lačhipnása. Terné-manušéngiro baripén isyn léngiri zor; i phuré-manušéngiri gožyma isyn léngiro syvo šeró. Dukhane daba [kalé masá maribnastyr-r.s.] žužakirena bibahtalé manušés, adiáke-pac' i pekaibena (daba) žužakirena xor štéty dre manušéste. Kralískiro iló isyn dre Ráskire-Devléskire vastá sýrby panitka ručai, so thadena: Jov riskiréla len, syr Léske isyn trej. Kažnoné-manušéskiro drom isyn čačunó dre léskire jakhá, ne Raj Devél ublavela (važynela) ile. Te kerén čačipén i čačunó séndo isyn kučedyr Ráske-Devléske syr svénta dyibená. Jakhá, savé zadenape, phut'kirdo iló-davá isyn momolýtko (svietíl'niko) fujé-manušéngiro, savó isyn grého. Dobusovo manúš priduminela dová, so déla pribaripen, ne kodová, savó keréla sygnymasa, javéla dre urieža (ubytko). Kon kedela kučipén xohané čibása (čibjasa), odová isyn sýrby sýgno balvál, saví rodéla meribén. Nahratyma fujé-manušéngiro xasiakiréla len, pal-dová so jone na kaména te kerén čačó séndo. Zlydnia manúš skedelape te kerél čoripén pefromi (smyslosa), ne bidošengire-manušéngire butiá isyn čačuné. Fedýr isyn te dživés dro kunto pe kheréskiri stréha (čhakín), syr te javes dro jekh kher džuvliása, saví čingardelape. Fuje-manušéngiro di drieván prityrdela bibáht: léskiro pašatuno na lathéla láska dre léskire jakhá. Kiéli manúš, savó isyn bipatyvakiro ke javír manušá, sendiakirdo, tedy prostone-godiakire manušá jačénape godedyr, i kiéli sykliakiréna godé manušés, jov kedela džinybén. Čačunó manúš pridykhelape ke kher, kaj isyn fuj manúš; ne Devél ravela telé fujé manušén pal léngiro fuipén. Kon zaphandela kan, kiéli čororó manúš déla gódla, kodová adiáke-pac' javéla te del gódla čororipnastyr i les na javéna te šunén. Dáro, savó délape, sob (kaj) nikón te na dykhél, štyliakirela bari xolý, i myto (vziatka), so délape paló dumo, keréla baró xoliakiribén. Davá isyn rádyma vaš čačuné manušéske te kerél pir čačipén, ne xasiakiriben vaš fujé manušéske. Kon džála dre rig čačuné droméstyr, kodová javéla te otkhinjol mulenca pe skedyibén. Kon kaméla lokho džiibén, kodová javéla čororó manúš; konéske isyn pir iló mol i olivítko dzet (jeliejo), kodová na javéla barvaló. Fuj manúš javéla syr vykinybén pal čačuneste, i napatiaibnaskiro pal devlytkoneste. Fedýr te dživás pe čhučí phuv, syr xoliamé džuvliása, saví čingardelape. Kaj dživéla godó manúš, odój isyn kučipén i olivítko dzet, ne dylynó rozmekela len. Kon rodéla i džála duredýr pir čačipén i lačhé-ilýtkima, odová manúš lathéla džiibén, čačipén i patýv. Godó manúš ublavela (važynela) fóro, kaj zoralé manušá isyn, i phagiréla telé foróskiro rikiriben, dro savó jone zoralés patiána. Kon prirakhela péskiro muj i čib, odová manúš rakhéla péskiro džiibén pharipnastyr. Phut'kirdo manúš, i manúš, savó zadelape, kharélape bipatyvakiro, jov keréla saró xoliamé phut'kiribnasa. Dová, so zoralés trej kirne-masengire manušéske, muliakiréla les, pal-dová so léskire vastá otphenenape te kerén pharí butý; jov isyn ĥálko i skempo saró dyvés, ne čačunó manúš déla i na tanginela. Fuje-manušéngiro svénto dyibén vykharela džungalypén (brytkima), pe kicý džungaledyr (brytkedyr) isyn davá čuin, kiéli jov janéla svénto dyibén, fujes dumindoj. Xohanó jakhítko xasjola (peréla), ne manúš, savó rakiréla saró, so jov džinéla, javéla te rakirél usady (sak). Fuj manúš kaštaliakirela péskiro muj, ne devlýtko zoralés džinéla péskiro drom. Ni godypén, ni ĥalyibén, i ni savó godypén na terdjona proti Raste-Devléste. Gres skedéna vaš maribnýtko dyvés, ne zrakhibén javéla Rástyr-Devléstyr. Lačhó lav isyn drogedyr (kučedyr) baré barvalypnastyr, i lačhí mavlýn (malva) isyn kučedyr rupéstyr i suvnakástyr. Barvaló i čororó manúš dykhenape jekh jekhésa: Raj Devél sozdyjá len dujén. Baré-godiákiro manúš dykhéla angíl bibáht (bída) i garadjola, ne prosto džála angíl i javéla sendiakirdo. Kon kandéla, i daréla Rástyr-Devléstyr, kodová doreséla barvalypén, patýv i džiibén. Phusadytka xrústy (tierny) i feliá isyn pe drom, kaj isyn mižeh manúš; a kon prirakhela péskiro di, kodová javéla te durjol léndyr. Sykliákir terné čhavés adiáke, syr léske trej duredýr te dživél, i, kiéli jov javéla phuró, jov na džála krig dalé droméstyr. Barvaló rikiréla zor pe čororeste: i kon isyn vužlo, odová isyn dynári kodoléske, savó pokerdia (konéske jov isyn bangó). Kon počhuvela (sieinela) načačipén syr giv pe félda, kodová keréla bibáht (bída) péske, i léskiri zor dre xolý končynelape. Kon isyn barvalé-iléskiro, kodová javéla bahtiakirdó, pal-dová so jov déla péskiro maró čororenge. Trade krig adasaves, savó isyn bipatyvakiro ke javír manušá, i čingárd durjola; i košybén, i obrakiriben pirijačena. Kon tyrdelape ke žužó iló, i konéste isyn bahtalypén pe léskire uštá, kadasavé manušéske králi isyn léskiro mal. Ráskire-Devléskire jakhá rakhena džinybén, ne Jov ravela telé lavá, savé isyn napatiaibnaskire manušéndyr. Nabutitko (kirne-maséngiro) manúš phenéla: “Ščer (liévo) isyn javrí! Me javáva muliakirdo, pe vulícy (pe gásy).” Fuje-džuvliengiro muj isyn xor ĥanbín (jama); peréla odorík kodová manúš, pe konéste Raj Devél xoliasóla. Dylnypén priphandiape ke čhavéskiro iló, ne ran (rozga), savjása sykliakiréna pharés, tradéla dylnypén krig. Kon tasavela (dukhavela) čorores te barjakirel péskiro barvalypén; i kodová, kon déla barvaleske, kadasavó manúš javéla čororó. Pričhúv péskiro kan i pošun god'varé-manušéngire lavá, i bandiakir tyró iló ke miro džinybén; pal-dová so kuč javéla, kóli tu javésa te rikirespe ke jone péskire ilésa, sob (kaj) jone te javén adiáke-pac' skedyné pe tyré uštá. Sob (kaj) túte te javél zoraló patiaibén dre Raste-Devléste, me sykliakirava tut i adadyvés, i tu rípir. Ci me na čhindjom túke trin móly naj kučedyr godé i džinybnytka lavá, sob (kaj) me moginavas te piridav túke patiaibnytka lavá pal čačipén, sob (kaj) tu moginesas te otphenes pale patiaibnytkone lavénca kodolénge, savé bičhavena tut. Na čor čororestyr, pal-dová so jov isyn čororó, na tasav odolén, savén pritasavéna pašýl pórta: pal-dová so Raj Devél zaterdjola pal léngiro réndo, i léla krig kodolengiro di, savé občorena len. Na jav mal (na družyn) xolynakire manušéske, na rákir [na džá-ju.o.] jaglune manušésa, sob (kaj) tu te na sykljos, syr jov keréla, i sob (kaj) tu te na čhuvés felý vaš tyró di. Na jav kadasavé manušésa, savó marela pir vastá dre symadý (zalogo), ci savó isyn dudvalo/iakhítko (svidietieljo) pal vužlypena (dlugi); pal-dová so, kóli nane túte sósa te pleskires, to tedy tútyr otlena tyrí pasindly (postiel'). Na piričhuv ĥaratuny špéra pe phuv, saví tyré dadá čhudé. Ci tu dykhésa manušés, savó dobusoves keréla péskiri butý? Jov javéla te terdjol angíl kral'jénde; jov na javéla te terdjol angíl prostone (napatyvale) manušénde. Syr tu bešesa te xas barydyrésa, to pridykhpe šukár, kon isyn angíl túte; i čhuv čhuri ke péskiro kirlo, kóli tu san manúš, savó isyn ĥálko ke xabén. Na xa drieván but léskire bonbony (prismaki), pal-dová so jone isyn xohanó xabén. Na ker butý pir miéra, sob (kaj) te javes barvaló, ne jav pe adákicy godó, sob (kaj) te mekes dasavé dúmy: kiéli tu riskiresa péskire jakhá pe davá – i akaná nane les? Pal-dová so barvalypén keréla phaká péske i syr órlo (kído) vurniala krig ke bolybén. Na xa maró ke manúš bibahtalé jakhasa, na jav ĥálko (žadno) ke léskire bonbony (prismaki). Pal-dová so jov isyn adasavó, savó jov isyn dro péskiro iló. “Ha i pi”, – jov phenéla túke, ne léskiro iló nane túsa. Kotér (kusko) mareskiro, so tu xajan, tu vyčhadesa, i tu našavesa tyré kuč lavá. Na rákir dre dylynin'koneskire kaná, pal-dová so jov dykhéla vučipnástyr pe tyré-lavengiro godypén. Na piričhuv ĥaratuny špéra pe phuv, na res pe félda, kaj dživéna bidadengire čhavé. Pal-dová so léngiro Vyrakhibnaskiro [Zaterdyipnaskiro-r.s.], Raj Devél isyn zoraló, Jov zaterdjola pal léngiro réndo pe túte. Bandiakir tyró iló, kiéli sykliakiréna tut, i tyré kaná ke god'varé lavá. Na tangine (na žalin) čhavés, kiéli tu marésa les raniasa, daléstyr jov na meréla: tu marésa les raniasa i zrakhésa léskiro di liunostyr (adostyr). Mro čháva! Kóli tyró iló isyn godó, tedy miro iló javéla te radynélpe. I miré buke (nutria) javéna zoralés te radynénpe, kiéli tyré uštá phenéna čačipén. Mek tyró iló te na zevlynel (te na zavidynel) grehitkoné manušénge, mek tyró iló te jačélpe ŭsády (sak) dre dar angíl Raste-Devléste; pal-dová so isyn anglypén i tyró lačhó užakiribén na javéla našado. Mro čháva! Šun, i jav godó, i prirakh péskiro iló pe mamúj drom. Na jav khetané manušésa, kon p'jela drieván but mol (vino), ci kon xála but mas. Pal-dová so matymari (matiari) i buté-xabnaskiro manúš (obhaiačo) jačéna čororé, i manúš, kon sovela but, javéla uridó dre melale patave. Šun péskire dadés, konéstyr tu lathianpe, i na dykh vučipnástyr pe péskire date, kiéli joj iavéla phuri. Kin (dores) patiaibén, i na otdé les nikonéske; adiáke-pac' godypén, sykliakiribén i ĥalyibén. Čačuné-manušéskiro dad javéla drieván te radynélpe, adiáke-pac' i kodová, konéste godó čhavó lathiape, javéla te bahtaljol léstyr: mek te javén ráda tyró dad i daj, i mek kodoia, saví bijandiá tut, zoralés te radynélpe. Mro čháva! Otdé mánge tyró iló, i mek tyré jakhá te rikirenpe zoralés (te pridykhenpe) ke miré dromá. Pal-dová so nalačhi džuvlý isyn xor ĥanbín (jama), i čúžo džuvlý isyn vensko ĥanýng. Joj adiáke-pac' podrakhela doresybén (manušén) syr rozmaribnytko, i barjakiréla butýr napatiaibnaskiren maškír manušénde. Konéste isyn roibén? Konéste isyn dukh? Konéste isyn košybén? Kon isyn bída, i kon žalinelape? Konéste isyn daba (kalé masá) ni palsó? Konéste isyn lolypen dre jakhá? Davá isyn kodolénde, savé ke korigunó (pozno) uliágo (pora) isyn bešté pašýl mol i kodolende, savé džána te rodén zmiešyndly mol (vino). Na dykh pe mol, syr joj loljola, syr joj gožes ziainela jagása dre kučyk, syr joj lokhes čhuvélape dro kirlo: dro kónco (dro jagóro) joj dandyrela tut syr sap, i dukhavela syr saplyn (aspido). Tyré jakhá javéna te dykhén pe javire džuvliende, i tyró iló javéla te vyphenel nakuč lavá. I tu javésa syr kodová, savó isyn paštó maškirál mórjo (derjáv), syr kodová, savó isyn paštó [sutó-r.s.] vučés pe mačta, i savó phenéla: I phenésa: “Jone pekade man, ne me na som dukhado, jone špulde (pihindle) man, i me na džindjom. Kiéli me džangadjovava? Me javáva te rodav usajékh te vypjav nevéstyr (nevés).” Na zevlyne (na rievnin) bibahtalé manušénge, i na mang zoralés te javes lénca; pal-dová so léngiro iló priduminela nahratyma (nasilijo), i léngire uštá rakiréna, sob (kaj) te kerén doš (fuipén). Kher ĥazdéna (čhuvéna) godypnasa, i les rikiréna godiása; i léskire štúby (komnaty) isyn pherdé drogoné i kučoné barvalypnasa. Godó manúš isyn zoraló; i god'varó manúš pribarjakirela zoralypén ke péskiri zor. Pal-dová so gódla god'varé-dyibnasa tumé lydžána péskiro maribén; i kaj but isyn manušá, savé déna gódla, odój javéla zrakhibén. Godypén isyn drieván vučés dylynin'konestyr: jov na otphandela péskiro muj dre pórta. Kon priduminela te kerél bibáht, odová javéla khardo bibahtiariskiro. Dylynó priduminela jekh grého, i manušéstyr, savó isyn bipatyvakiro ke javír manušá, rikirnape dre rig (brydinena) javír manušá. Kóli tu peresa dro iló dro trašakiro dyvés, to túte isyn nabari zor. Zrákh odolén, savén lydžána pe meribén, i zarikir odolén, savé obštavenape angíl muliakiriben [isyn sendiakirde te merén-r.s.]. Kóli tumé phenéna: “Čačó, ame na džindiam davá”, tedy Kodová, Savó ublavela (važynela) ile, ci na ĥaljola davá? Kodová, Savó rakhéla tyró iló, ci na džinéla Jov davá? I Jov otdéla kažnoné manušéske adákicy, kicý jov isyn mol pal léskire réndy. Mro čháva? Xa avgín, pal-dová so jov isyn lačhó, i avginytko soto, savó isyn gudló vaš tyró kirlo [smako-ju.o.]: adiáke-pac' javéla vaš tumaró di džinybén pal godypén; kiéli tumé lathné les, tedy isyn anglypén, i tumarí nadiéia na xasjola. Na podrakh te zamares (na pridumin bibáht), pašýl kher, kaj isyn čačunó manúš, tu san fuj manúš, na phagir léskiro otkhinybnytko štéto; pal-dová so čačunó manúš saštý (moginéla) te perél eftá (bitrinéngiro deš) móly i jov uštéla, ne fuj manúš peréla dre bari bída. Na rádynpe zoralés, kiéli tyró vérgo peréla, mek tyró iló te na javél rado, kiéli jov obštavelape, sob (kaj) Raj Devél te na dykhél davá, i te na javél xoliamó, i, sob (kaj) jov te na riskirél péskiri xolý dolé manušéstyr. Na ĥazdepe xoliása pe bibahtalé manušénde, i na zevlyne (na zavidyn) fujé manušénge: pal-dová so na javéla anglypén vaš bibahtalé manušénge, fujé-manušéngiro momolýtko (svietíl'niko) murdjola. Mro čháva! Dar Rástyr-Devléstyr i kralístyr; na jav khetané manušénca, savé zrakirenape te ĥazdén búnto. Pal-dová so jekhátyr (srázu) bari bída javéla pe lénde, i kon džinéla, savó bedypen (bída) javéla léndyr. Ĥáda, isyn godé-manušéngire lavá: “Davá isyn namišto te javes pe vari konéskiri rig pe séndo.” Kon rakiréla bangé manušéske: “Tu rakirésa čačipén”, odolés manušypnaskire nácyi javéna te prokošen; Najudýtka manušá javéna fujes te rakirén pal léste; pe kodolende, savé bangiakirena fujé manušén, javéna zoralés te radynénpe i drógo bahtiakiribén javéla pe lénde. Čačunó otphenybén isyn sýrby čamudypen dre uštá. Angledýr ker péskiri butý javriestyr, i počhuv giv pe félda; tén'či ĥázde péskiro kher. Na jav xohanó jakhítko (lžesvidietieljo) pe péskire pašatuneste bi pričynakiro, sóske te xohaves péskire ušténca. Na rákir: “Me keráva adiáke léske, syr jov kerdiá mánge. Me otdáva pale manušéske pal léskiri butý.” Me gijom nabutitkone-manušéskire feldasa i pir vinagradýtko félda, kaj nabaré-godiákiro manúš isyn; i odój jov sys zabarino phusadytkone bustienca. Léskiri félda sys učhakirdy cuknudiasa (strakivasa), léskiri baruny vánta sys phagirdy telé. Kiéli me dykhcjom, me ĥalyjom, so davá sys kuč, me podumindjom i dorescjom sykliakiribén: nábut soiben, nábut lindra (drjoma), nábut sčhuv vánta te otkhinjon! I tyró čororipen javéla sýrby maribnýtko pirangačo i tyrí trébima javéla sýrby manúš mardytkonesa. Adalé isyn adiáke-pac' Solomonóskire pritčy, savé začhindlé Jezekijaskire manušá. Jezekíia sys králi pir Judéia. Davá isyn baripén Devléske te garavel dová réndo, so na trej te džinén manušénge; ne baripén kral'jengiro isyn dre dová, sob (kaj) te rozĥaljol saró pal davá réndo. Syr bolybén dro vučypen, i xor isyn phuv, adiáke-pac' i kralískiro iló naštý te rozĥaljos. Le krig tufta rupéstyr, i léstyr vydžála khoró (sasudo), so javéla lačhó rupunariske (rupeskire mastieroske). Le krig fujé manušén kralístyr, i léskiro trono javéla te rikirelpe čačipnása. Na sykáv pes baré manušésa angíl kral'jénde, i na terdjov pe štéto, savó isyn vaš baré manušénge; pal-dová so isyn fedýr, kiéli phenéna túke: “Jav vučedýr adarík,” syr tut čhuvéna teledýr angíl kralískire barydyrende, konés tyré jakhá dykhné. Na džá sýges pe séndo, pal-dová so tu na džinésa, so javéla dro kónco (dro jagóro), kiéli tyró pašatuno ladžakirela tut. Pirirakir tyró réndo tyré pašatunesa kokoresa, i na vyphen čorahanyben javireske, sob (kaj) odová, kon šunéla les, te na sykavél sarénge tyrí ladž, i mavlýn (malva) pal túte te na javél bedytko (nalačhi). Lav, so phendló ke štéto, isyn sýrby suvnakuné phabá dre rupeskire khoré (sasúdy). Lav, savésa godó manúš sykavéla bang odoléske, kon kandéla les, isyn sýrby suvnakuný čen i gožakiriben vykedyné suvnakástyr. Syr šylypen ivesa dro časo (cýro), kiéli ukedena giv, isyn adiáke-pac' patiaibnaskiro bičhadó manúš vaš odolénge, savé bičhadé les; pal-dová so jov sýrby paniakirela di péskire ráskiro. Syr óbloki i balvál isyn bibryšyndeskire, adiáke-pac' isyn odová, savó šarelape, so jov déla xohanó dáro. Kon dlúges (ĥará) vyrikiréla, odová saštý te patiakirel barydyrés, i kovly čib phagiréla kokalý. Ci lathian (lastian) tu avgín (meda)? Na adákicy, kicý túke trej, sob (kaj) tu te na pirihas, i te na čhades. Na psir but móly ke tyró pašatuno kheré, sob (kaj) jov te na khinjol tútyr, i, sob (kaj) jov te na lel drieván te na kamel tut. Manúš, savó dophenéla xohaibén pe péskire pašatuneste, isyn sýrby kilo, kurtála i maribnýtko bust (striela). Zoralés te patias dre napatiaibnytkone manušéste isyn sýrby nálačho dand ci langaly ĥerój. Te bagas giliá smentnone ileske isyn sýrby te les krig léstyr ídia, ci te čhuvés šut (uksuso) pe dab (rana). Kóli tyró vérgo isyn bokhalo, de léske maró te xal; ci kóli jov kaméla te p'jel, de léske paní te p'jel: paldavá, keri davá, tu kedesa xačkirdé vangara pe léskiro šeró i Raj Devél otdéla mazúri (nagrada) pal dová, so tu sánas lačhó ke vérgo. Paš-ratiakiri (šylale-rigakiri) balvál lydžála ke bryšýnd, i bedytko (čorahany) čib lydžála ke xoliamó muj. Fedýr isyn te dživés pe kunto pe kheréskiri stréha (čhakín), syr te javes khetané džuvliása, saví čingardelape. Syr šylalo paní vaš di, savéste sys truš (smega), adiáke-pac' isyn lačhí zan (zvies') duratuné themestyr. Čačunó manúš, savó peréla angíl fujé manušénde, isyn syr melaly ĥanyngori, i blatuny ĥanýng. Davá isyn namišto te xas but avgín, adiáke-pac' i baripén, so manúš kokoró rodéla péske, nane baripén. Kon na rikiréla zor pe péskiro dúho (fáno), odová isyn sýrby fóro, so isyn phagirdó telé, i savó isyn bi vantengiro. Syr iv lynaskiro, i syr bryšýnd, kiéli čhinena giv, adiáke-pac' na poddžála te kerés patýv dylyné manušéske. Syr čirikly, saví vurniala odorík i pale i syr bahirka (lastočka), saví vurniala, i saví na bešéla, adiáke-pac' i bipričynakiro prokošybén na risjola dro čačipén. Čhupny trej greske, a švar (uzda) trej osloske, i ran (rand') trej vaš dylyneskiro dumo. Na otphen dylyneske pir léskiro dylnypén, sob (kaj) tu te na javes dasavo, syr jov isyn. Otphen dylyneske pir léskiro dylnypén, sob (kaj) jov te na javél godó dre péskire jakhá. Kon bičhavéla dylyné manušés te piridel zan (zvies'), odová sýrby podčhinela ĥerá péske i keréla bibáht (nalačhipen). Sýrby ĥerá langale manušéske, savé na psiréna mamúj (roŭnes), adiáke-pac' isyn godophenyben dro dylynineskiro muj. Te kerés patýv dylyneske, isyn dová-pac' syr te phandes kuč bar dre maribnýtko raĥatka. Godophenyben dre dylyneskire uštá isyn dová-pac', syr phusadytko xrústo (tierno) dre matymariskire uštá. Raj [zoraló manúš-r.s.] keréla pir péskiri godý i léla pe butý dujén: i dylynes, i svakone manušés, savó džála pašýl. Baró Devél, Savó sozdyjá saró, déla dujenge mazúri (nagrada): i dylyneske i odoléske, kon keréla fuipén. Syr džukel risjola ke péskire čhadypen, adiáke-pac' i dylynó keréla nevéstyr péskiro dylnypén. Ci dykhcián tu manušés, savó ginéla pes godé manušésa? Dylynin'kone manušéstyr butýr saštý te užakires lačhipén, syr kadasavé manušéstyr. Kirne-maséngiro manúš rakiréla: “Xolynakiro ščer (liévo) isyn pe drom. Mižeh ščer isyn pe vulícy (gásy).” Syr vudár risjola pe péskire zaviesy (začhude), adiáke-pac' i kirne-maséngiro risjola pe péskiro čhuibén. Kirne-maséngiro manúš čhuvéla péskiro vast dro čaró, ne léske isyn pharó te lydžas pale vast ke péskiro muj. Kirne-maséngiro manúš duminéla péske, so jov isyn godedyr eftá (bitrinéngiro deš) manušéndyr, savé otphenena baré godypnasa. Kon čhuvéla péskiro nakh dre čúžo čingárd, odová isyn sýrby manúš, savó uhtyléla džukles pal kaná. Sýrby bigodiakiro manúš, kon čhurdéla jag (jagune gloŭni), maribnýtka bustiá (striély) i meribén, isyn adasavó manúš, savó xohavela péskire pašatunes, i rakiréla: “Me féni (tóka) keráva perasa (šutki).” Kaj butýr kaštá nane, odój jag murdjola; i kaj nane manúš, savó isyn bi-patyvakiro ke javír, košybén pirijačéla (štyljola). Syr vangar čhuvéna dre jag te xačol, i kaštá vaš jag, adiáke-pac' isyn čingarduno manúš, kon roshačkirela košybén. Lavá, savé rakiréla manúš, savó ĥundiarinela, isyn sýrby bonbony (prismaki), i jone džána xor andré masá. Ĥalka isyn uštá, i fuj iló isyn sýrby khoró (sasudo), savé isyn šukarjakirde tuftone (xohané) rupésa. Odová, kon bidykhela (zoralés na kaméla) javire manušés sýrby garavela davá péskire ušténca, adasavó manúš sčhuvela frentyma (mendrima) dro péskiro iló: kiéli jov rakiréla lačhé zaniása (glosasa), ne tu na patia, pal-dová so isyn eftá (bitrinéngiro deš) nalačhé mysli dro léskiro iló. Mek léskiri zoralý namilyma isyn učhakirdy léskire frentymasa, ne léskiro fuipén sykadjola angíl saró skedyibén. Kon ĥanavela ĥanbín (jama), odová kokoró peréla dre láte, i kon katynela upré bar, pe odoléste bar risjola pale. Xohany čib zoralés na vykedéla odolén, savén jov dukhavela, i načačuno muj keréla fuipén. Na šarpe atasiatune dyvesesa, pal-dová so tu na džinésa, so dyvés janéla túke. Mek javír manúš te šarel tut, a na tyró muj; mek te javél čúžo manúš, a na tyré uštá. Bar isyn pharó i práho isyn pharovato, ne kiéli dylynó zoralés xoliasóla, davá isyn pharedyr dujendyr. Baró xoliakiribén isyn bimanušytko, i xolý isyn trašany, ne kon saštý (moginéla) te terdjol proti baró zevlynypén? Te sykaves bang manušéske angíl jakhá isyn fedýr, syr te sykaves patýv čorahanés. Dabá (pekaibena) patiaibnytkone malestyr (drugostyr) isyn fedýr vergoskire čamudypnastyr. Čalo di na dykhéla i pe avgín, ne bokhalé dieske kažno kirko kotér isyn gudló. Syr čirikly, saví lodela péskire gniazdátyr (kufóstyr), adiáke-pac' isyn i manúš, savó lodela péskire štetóstyr. Makhiben (mazilki) i gudló thuvliakiriben (kurinyben) zoralés radynena iló, i gudló isyn kažno mal, kon déla godý iléstyr. Na mek péskire males, ci tyré-dadéskire males; na džá ke tyré-pšaleskiro kher dro dyvés, kiéli túte isyn bari bída. Fedýr isyn pašatuno, kon isyn pašyledýr ke tu, syr pšal, savó isyn dur. Mro čháva! Jav godó i radyn miro iló, sob (kaj) mánge saštý te javél te otphenav kodoléske, savó obrakirela man. Baré-godiákiro manúš dykhéla angíl bibáht (bída), i garadjola, a balvalitko manúš džála duredýr i doreséla kára. Le ídia kodolestyr, savó jacián jakhitkonesa (poručitieljosa) pal čužoné manušéste; i rikir la syr symadý, kiéli jov isyn jakhítko pal javire džuvliáte rigátyr. Kon ĥazdéla šarindoj péskire males zoralé zaniása (glosasa) tasiárles (ránes) pe zlóko (pe ránko), davá moginéla te zaginelpe syr prokošybén léske. Pani, so ŭsády (sak) peréla dro bryšyndytko dyvés, i džuvlý, kon usady (sak) čingardelape, isyn šerá (rávnes): kon sučhakirela la; odová sýrby obrikirela balvál, i sýrby léskiro čačó vast rikiréla olivítko dzet (jeliejo). Sastýr vostrinela sastýr, adiáke-pac' manúš vostrinela lačhipén péskire maleste. Kon rakhéla inžyritko kašt (smokovnica), kodová javéla te xal léskiri phabaj; adiáke-pac', kon prirakhela péskire xulás, odová javéla dre patýv. Syr dro paní muj sykavéla, savó jov isyn; adiáke-pac' i manušéskiro iló sykavéla, savó manúš isyn. Liúno (ado) i Avvadono (mulykano štéto) nijékhvar nane pherdé, adiáke-pac' i manušéskire jakhá nijékhvar nane čale. Dre kakávi (kotlo) bilavena rup, a dro bov suvnakái, ne, savó manúš isyn, sykavéla mavlýn (malva), saví phenéna javír manušá. Mek tu te toŭčynes (te kures) dylynes dre stupa toŭkačosa, ne usajékh léskiro dylnypén na durjola léstyr, Dykh kučes pal péskiro bakrengiro gurto, i pridykh mištés pal péskiri kherítko stada: pal-dová so barvalypén nane pe saré viéki, i, kralítko stadyk (koróna) ža na jačélape pe saré ródy? Khas ukedena krig i jalý (sviážo) čar sykadjola, i bergitka zelena čarjá skedéna. Bakré isyn túke vaš uribén, i buzne (kozly) isyn vaš túke, sob (kaj) te den lové pe feldakiri timín; túke javéla te uhtylel (te javél dósi) buznytko (kozlytko) thud vaš tyró xabén, vaš xabén tyré kheritkonenge, i te čaliakiren tyré dynaricen. Fuj manúš našela krig, kiéli nikón na tradelape pal léste, ne čačunó manúš isyn murškanó syr ščer (liévo). Kóli fuj réndy (diély) isyn pe daja phuv, tedy kralískire barydyrá paruvena jekh jekhés. Ne godiákiro barydyró, savéste isyn džinybén, javéla te kralinél duredýr. Čororó manúš, kon pritasavela javire čororé manušés, isyn sýrby zoraló bryšýnd, so na jačkiréla patria (listy) pe kaštá (drevy): [savó zmorela maró pe félda-r.s.]. Odolé, savé mekéna Devléskiro Zakóno, šarena fujé manušén, ne kodolé, savé rikirenape ke Zakóno, isyn proti lénde. Bibahtalé manušá na ĥaljona čačipén; ne odolé, savé rodéna Ras-Devlés, ĥaljona saró. Fedýr isyn čororó manúš, kon keréla saró lačhés, syr jekh manúš, kon keréla fuipén pefromi (naročnes), mek jov i te javél barvaló. Kon rikirélape ke Zakóno, kodová isyn god'varó čhavó, ne kon isyn čhučé-šereskiro manúš, odová ladžakirela péskire dadés. Kon pribarjakirela péskiro mištypén načačune kofosa (rostosa) i xohaibnasa, kodová sýrby kedela lové kodoléske, savó javéla te tanginél čororen. Kodoleste, kon riskiréla krig péskiro kan, sob (kaj) te šunél Zakóno, adasaveste až i léskiro mangipén Devléske isyn džungaló (brydko). Kon keréla adiáke, so devlýtka džána dre rig pe bibahtaló drom, kodová kokoró peréla dre ĥanbín (jama), so jov vyĥanadia, a bidošengire manušá doreséna lačhipén dro mištypén. Barvaló duminéla péske, so jov isyn godó, ne god'varó čororó manúš rozĥaljola les. Kiéli čačuné manušá zoralés radynénape, tedy sýrby baró svénko isyn. Kiéli fuj manušá ĥazdénape, to manušá garadjona. Kon garavela péskire gréhi, odoléske na javéla mištó, ne kon pridžinela gréhi i mekéla te kerél len, kodolés Devél tanginela. Bahtaló isyn manúš, kon usady (sak) patyvása daréla Devléstyr, ne kon pharjakirela péskiro iló, kodová peréla dre bari bída. Syr ščer (liévo), savó rykinela, i syr rič, savó isyn xolynakiro, isyn fuj barydyró, savó xulainela pe čoré manušénde. Themeskiro barydyró, kon isyn na god'varó, pritasavela péskire manušén: ne kon na vyrikiréla ĥalkima (žadnyma) ke lové, odová javéla ĥará (dlúges) te dživél. Manúš, kon pročhudia javire-manušéskiro rat, isyn bangó, jov javéla te našél ke ĥanbín: i nikón na jačélape pašýl léste. Kon dživéla bi došakiro, kodová javéla zrakhno, ne kon psiréla čoré droménca pefromi, kodová peréla pe jekh léndyr. Kon keréla butý pe péskiri phuv, odová javéla čalo marésa; ne kon džála pal lokhe-godiakire manušénde, kodová javéla drieván čororó. Patiaibnýtko manúš isyn barvaló bahtiakiribnasa, ne kon kaméla sýges te rozbarvaljol (te javél barvaló), odová na udžala karatyr. Davá isyn namišto te javes pe vari-konéskiri rig, pal-dová so i pal kotér maró adasavó manúš keréla čoripén. Manúš bibahtalé mysliasa kaméla sýges te rozbarvaljol, i jov na džinéla, so čoripén peréla pe léste. Kon sykavéla bang javire manušéske, kodová lathéla butýr láska parikiribnasa, syr kodová manúš, kon šarela javire manušés na iléstyr. Kon čorela dadéstyr ci datyr i rakiréla: “Davá nane grého”, kadasavó manúš isyn drógo drúgo (mal) kodoléske, savó xasiakiréla saró. Phut'kirdé-iléskiro manúš vykharela košybén, ne kon zoralés patiála dre Raste-Devléste, kodoléske javéla mištypén. Kon zoralés patiála péskire ileske, kodová isyn dylynó, ne kon godes dživéla, kodová javéla zrakhno. Kon déla čororeske, kodoleste na javéla nauhtylyben/na javéla nádosi (kodová na čorjola), ne kon zakerela léskire jakhá, pe kodoleste javéna but prokošybena. Kiéli fuj manušá ĥazdénape, tedy manušá kokoré garadjona, a kiéli jone xasjona, tedy čačuné manušá jačéna butýr. Manúš, savó pharjakirela (žestočynela) péskiri men, na dykhí pe dová, so léske but móly sykavéna léskiri bang, jekhátyr (srázu) xasjola, i na javéla sastiakiriben léske. Kiéli čačuné manušá rikiréna zor dro kralipén, to manušá zoralés radynénape; ne kiéli fuj manúš kralinela, to tedy manušá rovena. Konéske trej godypén, kodoleskiro dad, radynélape, ne kon isyn drógo mal nalačhé džuvlienge, kodová našavela péskiro mištypén. Králi rikiréla zor pe phuv čačuné sendosa, ne kon léla myty (vziatki), kodolés péskiri phuv ravela telé. Kon šarela na iléstyr péskire pašatunes, kodová rosčhuvela felý léskire ĥerenge. Bibahtaló manúš peréla dre felý péskire čoré rendéndyr; ne čačunó manúš javéla te radynélpe. Čačunó manúš roskedela (rozlela) čororé-manušéngiro réndo, ne fuj manúš na ĥaljola davá. Manúš, kon salape nahrates, sýrby phandela fóro feliasa, ne godé manušá riskirena xolý dre rig [biladžaipnytka manušá ĥazdéna búnto dro fóro, a god'varé štyliakirena búnto-r.s.]. Kiéli godó manúš isyn proti dylyneste pir réndo, ci dylynó salape, ci xoliasóla usajékh nane ramánjo (miro). Manušá, savé isyn ĥalka (žadna) te pročhuven javireskiro rat, lénge zoralés na pir iló bidošengire manušá, ne čačipnytka (praviedna) manušá pekenape (zabotisona) pal adasavé manušénde. Dylynó vyphenela sarí xolý, so léste isyn pe godý; ne godó manúš pririkirela la dre péste. Kóli themeskiro barydyró riskiréla iló (šunéla) ke xohaibén, tedy saré dynárja jačéna xohané léste. Čororó manúš i léskiro pritasaibnaskiro poddžana jekh pe jekhéste dro jekh: Raj Devél déla dud (svéto) jakhenge dujenge. Kralískiro trono, kon sendiakiréla čororen pir čačipén, javéla ŭsády (sak) te rikirél zor. Kóli čhavores sykliakiréna pharés i raniasa (rozgasa), tedy jov jačélape godedyr. Ne kóli čhavoró meknó kokoró péske, to jov ladžakirela péskire da. Kiéli fuj manušá javéna usá butýr i butýr, tedy fuipén barjola, ne čačuné manušá javéna te dykhén, syr jone peréna. Sykliákir ke dukhá čhavés, i jov déla túke otkhinyben, i jov obradynela tyró di. Kaj nane sykadyipen upralestyr, odój manušá na obrikirena pes, ne bahtaló isyn odová, kon rikirélape ke Zakóno. Tu na vysykliakiresa pisharís pal doša (promekibena) lavénca, mek jov i ĥaljola, ne usajékh jov na javéla te kandel. Ci dykhcián tu manušés, savó sýges vyphenela lavá? Butýr lačhipén saštý te užakires dylynestyr, syr kadasavé manušéstyr. Kon bučynela (piestinela) péskire dynarís tyknal, tén'či kadasavó pishári zakaméla te lydžál pes syr čhavó. Xoliamó manúš vykharela (zalydžala) košybén, i xolynakiro manúš keréla but čoré réndy (grého). Kon phutjola, kodová peréla telé, ne naphut'kirdo dro dúho (fáno) manúš doreséla patýv. Kon isyn khetané čoresa, odová manúš sýrby zoralés isyn na pir iló kokoró péske: jov šunéla syr prokošena les, ne jov na sykavéla les. Kon daréla manušéndyr, kodová sýrby čhuvéla felý péske, ne kon zoralés patiála dre Raste-Devléste, odová javéla bidarakiro. But manušá rodéna, sob (kaj) te javén kuč theméskire barydyrésa, ne kažno manúš doreséla čačipén Rástyr-Devléstyr. Čačuné manušá džána krig (brydinena) načačune manušéndyr, ne devlýtka manušá rikirnape dre rig fujé manušéndyr. Aguroskire godypnytka lavá, Iakiejoskire [Jakejaskire-ju.o.] čhavéskire, savé phendiá adavá manúš Ifiiloske, Ifiiloske i Ukaloske. Čačó, me som butedýr nabaré-godiákiro manúš, syr saré bura manušá (nievieždy), i me na som god'varó manúš. Me na vysyklyjom godypnaske, i mánde nane džinybén, syr sventonende. Kon ĥazdyjápe pe bolybén i gijá telé? Kon skedyjá balvál dre Péskire burnyka (žmieni)? Kon učhakirdiá paniá idiasa? Kon začhudia phuvjákire jagóry (kraí)? Savó isyn Léskiro lav; i savó isyn Léskire-Čhavéskiro lav, kóli tu džinésa? Kažno Devléskiro lav isyn žužó: jov isyn ščýto odolénge, kon risjola ke Jov te zrakhelpe. Na pričhúv butýr ke léskire lavá, sob (kaj) Jov te na bangiakirel tut, sob (kaj) tu te na javes xohanó. Pal duj čačipená me mangavas tut, na otphenpe angíl mánde angíl, syr me meráva: le krig mándyr frenta lavá i xohaibén, na de mánge ni čoripén, ni barvalypén, čaliakir man marésa, so trej mánge pe kažno (sváko) dyvés: sob (kaj) me te na javav drieván čalo, i te na otphenavpe Tútyr, i te na phenáv: “Kon isyn Raj Devél?” Ci, sob (kaj) me te na javav čororó i te na čorav, sob (kaj) me te na propatiakirav miré-Devléskiro lav. Na kaliakir lavésa dynarís angíl léskire raste, sob (kaj) jov te na prokošel tut, i sob (kaj) tu te na javes bangó. Isyn ródo, savó prokošela dadés, i na šarela péskire da. Isyn ródo, savó isyn žužó angíl péskire jakhá, ne jov isyn na mordo péskire meliatyr. Isyn ródo, kaj lákire manušénde, isyn phut'kirdé jakhá. Syr vučés ĥazdénape léngire cymbly (riesnicy)? Isyn ródo, dre savó manušénde dandá isyn syr kurtála, i koneskire žandy isyn syr čhurja i skedyné te pohan sarésa čororen pe phuv i bogen maškír manušénde. Ratpibnaskireste (pijavkate) [dro načalypen-r.s.] isyn duj čhaja, savé déna gódla: ‘De! De!’ Isyn trin čačipená, savé nijékhvar nane čale. Isyn štar vieščy, so nijékhvar na phenéna: ‘Uhtýlla (dósi).’ Davá isyn: maĥila (kula), i bibijatengiri džuvlý; phuv, saví nane čaly paniéstyr, i jag, saví te phenél: ‘Uhtýlla.’” Manušéste, kon prosala dadés, i kon salape xoliames, sob (kaj) te na kandel péskire da, to léske koraki, so isyn pe dólo, vyhana léskire jakhá, i terné orly (kidore) shana len sarésa. Isyn trin čačipená, so isyn drieván dívna vaš mánge, i isyn štar čačipená, so me na ĥaljovava: syr órlo (kído) vurniala pir bolybén; syr sap kharélape (dviginelape) pir bérga, syr párma (korabljo) kharélape (plyvinela) pir mórjo (derjáv), syr murš keréla drom ke patyvalý čhaj. Ake, syr nalačhi džuvlý keréla: joj xála, i khosela péskiro muj, i joj rakiréla: “Me na kerdjom ni savó fuipén.” Isyn trin čačipená, so léndyr phuv izdrala, i štar čačipená, so joj naštý te vyrikirel (te pirilydžal): kóli pishári léla te kralinél, i kiéli dylynó isyn čalo marésa; kóli bipatyvakiri džuvlý džála paló rom, i kóli dynárica (služanka) léla lákire-raniakiro štéto. Áke, štar tykné džidale, ne jone isyn drieván godé: kirja (muraški), jone isyn nazorale; ne jone lynaskiro kedena xabén péske; bergitka karmusa (myšy), savé isyn nabaré-zorjakire, ne jone keréna péske kherá pe skaly. Skočkende (sarančate) nane králi, ne jone džána angíl saré pir linija. Mizgirjo (pauko), sava džinéla te uhtylelpe péskire lapkenca, ne jov javéla dre kralískire felatiniá. Isyn trin džidale, savé štavena rajkanes, i štar, savé pir linija džána angíl: ščer, savó isyn naj (sámo) zoraledýr maškír saré murdalénde, i savó na risjola krig ni konéstyr; graj, i buzno (kozlo), i králi, proti konéste nijékh naštý (na moginéla) te ĥazdelpe. Kóli tu bigodiakires šardian pes ke vučipén, ci pridumindian bibáht, čhuv péskiro vast pe muj. Kon zmarela thud, kodová keréla ksil, ci kon tasavela nakh, kodová ratvaliakirela nakh; i adiáke-pac' kon ĥazdéla xolyn, kodová zalydžala košybén. Kralískire-Liemuiloskire lavá. Uphenybén, savésa léskiri daj sykliakirdiá les: So, mro čháva? So čháva, savó san miré ločoviátyr? So čhavó, miré sovlahatyr? Na otdé sarésa tyrí zor džuvlienge, ci na otdé pes odoléske, so xasiakirdiá kral'jén. Davá isyn na vaš kral'jenge, o Liemuilo, davá isyn na vaš kral'jenge te p'jen mol, ci theméskire barydyrénge te phučén: “Kaj isyn zoraló pibén?”: sob (kaj) jone te na matjon, i sob (kaj) jone te na bistren pal zakóno, i sob (kaj) jone te na riskirén čačipén odoléndyr, savén pritasavéna. De zoraló pibén kodoléske, kon isyn xasibnýtko, i mol kodoléske, savéske isyn kirko pe iló: mek jov te p'jel, i te bistrel pal péskiro čororipen, mek jov te na ripirel butýr pal péskiri bari bída. Rákir pal manušénde, savé na rakiréna, i pal réndo odolengiro, savén mekné. Rákir pal odolénde, savén pritasavéna, i pal bogénde; sendiakir len pir čačipén i risjov ke léngiro čačipén. Kon lathéla bidošengirja (lačhé-ilytkona) džuvliá? Lákiro kučipén isyn drogedyr rubinendyr. Lákire-romeskiro iló javéla te patial dre láte bi darákiro; i léste na javéla nauhtylyben (nádosi) ni dro so. Joj keréla lačhipén léske, a na bibáht, dre lákire džiibnáskire saré dyvesá. Joj rodéla [doreséla-r.s.] pošom (šers') i ĥandlado (ljono), i joj keréla butý iléstyr péskire vasténca. Joj isyn sýrby tylgariskire pármy (korabli): joj ianéla péskiro xabén duripnastyr. I joj uštéla, kiéli iščo (inké) rat isyn, i joj déla te xan péskire kheratunenge, i dyvesýtko butý péskire dynaricenge. Joj duminéla pal félda i kinela la; joj mierkinela te kinel vinagrádniko pal kófo, so jandlé lákire vastá. Láte isyn bari zor, i joj pharés keréla butý vasténca. Joj ĥaljola angíl, so lákiro réndo isyn lačhó, i so lákiro momolýtko na murdjola ratý. Joj protyrdela vastá ke prialka (katlý), i lákire vastá rikiréna khuvitko rota. Joj podela péskiro vast čororenge, i joj tyrdela péskire vastá ke bógi. Joj na daréla ivestyr pal péskiri semia (iri), pal-dová so sarí lákiri semia uridy dre taty ídia. Joj keréla péske cergi pe čhuibén; joj ur'jelape dro kuč than (matier'ialo) i dro purpuro. Lákire romes džinéna pašýl foritko pórta, kiéli jov isyn beštó maškír godephurende pe doiá phuv. Joj keréla cergi (pokryvaly) i biknela len, i joj doreséla baré kustyka tylgar'jenge (kupcenge) Finikijakirenge. Joj sýrby isyn uridy dro zoralypén i patýv; joj radynélape dyveséstyr, so javéla angíl. Joj rakiréla godes, i lákiri čib déla lačhó godypén. Joj dykhéla pal péskiri semia (iri), i joj na xála maró, so joj na zakerdia. Lákire čhavé šarena i bahtaliakirena la; adiáke-pac' i lákiro rom, kon šarela la. But džuvliá keréna adiáke, ne tu san fedýr saréndyr. Gožyma xohavela i šukaripén isyn pe menta (minuta), ne džuvliá, saví daréla Rástyr-Devléstyr, javéna te šarén. Den láke dová, so joj isyn mol pal lákire vastá; i mek lákire butiá te šarén la pašýl pórta (vráty)! Jekliesiastoskire Davidóskire–čhavéskire lavá, Jerusalimóskire kralískire, kon sykliakirdiá pal Devléste. “Harnypén (sujéta) xarnypnastyr”, – rakiréla Jekliesiasto (Sykliakiribnáskiro) pal Devléste-xarnypén xarnypnastyr. Saró isyn xarnypén.” Savó kófo (l'ĥota) isyn manušéske saré léskire pharé butiátyr, so jov keréla butý pharés tel kham. Jekh ródo džála péske, i javír ródo javéla, ne phuv jačélape pe saré viéki. Kham uštéla, i kham džála telé, i sýges risjola ke dová štéto, katýr jov uštyjá. Balvál phurdela ke paš-dyvesýtko (taty) rig, i joj risjola pe paš-ratítko (šylaly) rig: balvál usady (sak) obrisjola trusciál, i joj risjola pale pe péskire krugi. Saré réki (leniá) thadena dro mórjo (derjáv), ne mórjo (derjáv) usajékh nane pherdó: ke dolé štéty, karik réki (leniá) thadena, i odothýr rekakire (leniakire) paniá risjona, sob (kaj) nevéstyr te thaden. Saró, so isyn dro svéto (lot), isyn pharé butiátyr: nijékh manúš naštý te vyphenel saró. Jakh isyn na čaly dykhibnastyr, i kan isyn na pherdó šunybnastyr. Dová, so sys, javéla nevéstyr; i dová, so kerdiápe, javéla nevéstyr te kerélpe: i nane nisó nevó tel kham. Ci isyn vari-so, pal so saštý te phenés: “Dykh, ci davá isyn nevó?” Davá sys dre ĥaratuné beršá, so sys angíl aménde. Nijékh manúš na ripirela dová, so sys angíl léste, nijékh, kon iščo (inké) javéla, na javéla te ripirel pal dová, so iščo (inké) javéla angíl. Me, Jekliesiasto, Devléskiro sykliakiribnáskiro, sómas králi pe Izrailjo dro Jerusalimo. Me riskirdjom péskiro iló te rodav, i te rozĥaljovav godypnasa saró, so kerélape tel bolybén: dasavo pharó zadyiben Devél dyjá manušéngire čhavénge, sob (kaj) jone dalésa te zalenpe pharés. Me dykhcjom saré butiá, so kerénape tel kham, i, ake – saró isyn ivjá i tradelape balvaliasa. So isyn bangó, naštý te javél mamúj (priames); i dová, so nane, naštý te gines. Me phendjom péskire ileske: “Dykh! Me jacjom baré manušésa i jacjom godedyr saré manušéndyr, kon sys angíl mánde dro Jerusalimo. Mánde isyn baró godypén i džinybén.” I me riskirdjom péskiro iló te džináv butýr pal godypén; so isyn bigodiakiriben i dylnypén. Me ĥalyjom angíl, so davá isyn adiáke-pac', sýrby te tradespe pal balvál. Pal-dová so, kaj isyn baró godypén, odój isyn baró kalypén pe iló i kon pribarjakirela džinybén, kodoleskiro dúho (fáno) butýr peréla. Me phendjom dro péskiro iló: “Jav! Me sprobinava tut radymakire sabnasa, paldavá jav lošalo (viesjolo) pherdés. Ne, ake, davá isyn adiáke-pac' xarnypén. Me phendjom pal saben: “Bigodiakiriben!” I pal rádyma sabnasa: “So davá déla?” Me rozĥaljovavas péskire ilésa, syr te lošakirav (te usladinav) miré masá moliasa (vinosa), ne, sob (kaj) miro iló te jačél godedyr, i adiáke-pac' te rikiravpe ke dylnypén pe adákicy, kicý trej, sob (kaj) te dykháv, savó lačhipén isyn vaš manušéngire čhavénge te kerén tel bolybén dre saré dyvesá dro léngiro džiibén. Me kerdjom péske baré butiá, me ĥazdyjom péske kherá, i me začhudjom péske vinagrádniko (drakhin). Me kerdjom péske unty (sady) i parki, i me začhudjom saré-sortengire fruktytka kaštá (drevy). Me kerdjom péske sažalki (venderiniá), savéndyr me počhuvava paniésa rošča (veladín), kaj kaštá (drevy) barjona. Me kindjom péske dynar'jén i dynaricen, i sys mánde dynárja, kon bijándyja dro miro kher. Čačó, mánde adiáke-pac' isys but ĥurty i bakréngire stády; butedýr saréndyr, savé sys dro Jerusalimo angíl mánde. Me skedyjom adiáke-pac' rup i suvnakái, i drieván vykedyné kučipena (sokroviščy) kral'jendyr i phuvjákire rigéndyr. Mánde sys bagaibnaskire i bagaibnaskirja-dová, so drieván radynela manušéngire čhavén, i saré bašaibnaskire strumiénty. I me jacjom baró i piribarijom sarén, kon sys angíl mánde dro Jerusalimo. Saró miro godypén adiáke-pac' jaciápe mánca. I saró, sob (kaj) miré jakhá zoralés te prityrdenpe, me na rikirdjom dre rig péstyr: me na dyjompe pale miré ilésa kažnoné radymátyr, pal-dová so miro iló drieván radyndiape miré pharé butiátyr, i davá isyn mirí bažyn saré miré pharé butiátyr. Tén'ci me podykhcjom pe saré butiá, so miré vastá kerdé, i pe sarí pharí butý, so me kerdjom pharés, i, čačó, saró isyn xarnypén i, syr te tradespe pal balvál. Na sys kófo tel kham. I me riskirdjom godý ke davá-pac' godypén, bigodiakiriben i dylnypén: xačy, so manúš javéla králi, saštý te kerél pal kralíste, isyn kakaná? Ci jekh dová, so uže sys kerdó? I me dykhcjom, so godypén isyn fedýr dylnypnastyr, so dud (svéto) isyn fedýr kalypnástyr (ciamlypnastyr). Godé manušéste jakhá isyn dro léskiro šeró, ne dylynin'ko psiréla dro ciamlypén; ne me adiáke-pac' kokoró ĥalyjom xor, so jekh kónco (jagóro) užakiréla i jekhés, i javirés. Me phendjom dro péskiro iló: “Syr davá kerélape dylynin'konesa, davá adiáke-pac' javéla te kerélpe i mánca, i, sóske tedy me som godó?” Tén'ci me phendjom dro péskiro iló, so saró davá adiáke-pac' isyn xarnypén. Pal-dová so manušá na javéna te ripirén godes pe saré viéki, syr i dylynin'kones; pal-dová so saró uže bistrena dre beršá, so javéna. I syr davá isyn, so godó manúš meréla adiáke-pac', syr i dylynin'ko? I me lyjom zoralés te na dav čol (te na ceninav) džiibén. Pal-dová so butý, so sys kerdy tel kham, pharjakirdia miro iló; pal-dová so saró isyn xarnypén i sýrby te tradespe pal balvál. I me lyjom zoralés te na dav čol saré miré pharé butiake, so me kerdjom pharés tel kham, pal-dová so me ž jačkirava manušéske, kon javéla pal mánde. I kon džinéla, ci jov javéla godó ci dylynin'ko? Ne jov ža javéla te xulainél pe mirí sarí pharí butý, so me kerdjom butý pharés, i dro so me sykadjom péskiro godypén tel kham. Davá isyn adiáke-pac' xarnypén. Tén'ci me riskirdjom péskiro iló i lyjom te otphenavpe saré pharé butiátyr, so me kerdjom butý pharés tel kham. Isyn manúš, kon kerdiá butý pharés godypnasa, džinybnasa i kerdiá, i jov jačkiréla péskiro mištypén manušéske, savó na kerdiá butý pharés pašýl léste. Davá isyn adiáke-pac' xarnypén i bari bibáht. So ž manušéske javéla saré léskire pharé butiátyr i iléskire tugatyr, kiéli jov kerdiá butý pharés tel kham. Pal-dová so saré léskire dyvesá isyn dukhane, i saré léskire butiendyr isyn túga pe iló, až dro rat léskiro iló na otkhinjola. Davá isyn adiáke-pac' xarnypén. Nane nisó fedýr vaš manušéske, sob (kaj) jov te xal, i te p'jel, i, sob (kaj) léskiro iló te radynélpe zoralés léskire butiátyr. Davá isyn adiáke-pac', me ĥalyjom, Devléskire vastéstyr. Pal-dová so, kon saštý te xal, ci kon saštý te radynélpe butýr bi Léskiro? Devél déla godypén, i džinybén, i rádyma odolé manušéske, kon isyn lačhó vaš Léske; ne Jov déla butý i grehitkoné manušéske, te skedel i te čhuvél khetané, sob (kaj) jov moginelas te otdél kodoléske, savó isyn lačhó vaš Devléske. Davá isyn adiáke-pac' xarnypén i, sýrby te tradespe pal balvál. Vaš saró, so kerélape dro davá svéto (lot), isyn péskiro uliago (pora), i isyn časo (cýro) kažnoné rendoske tel kham; i časo te obkošen dová, so isyn počhudo; časo te bijandjon, i časo te merén; te počhuven dre phuv, časo te muliakirén, i časo te sastiakiren; časo te phagiren telé, i časo te ĥazdén kher; časo te tuginen zoralés, i časo te khelen; časo te rovén, i časo te sanpe; časo te oblen, i časo te obrikirenpe oblyibnastyr; časo te čhurdén krig bará: i časo te ukeden bará; časo te rodén, i časo te našaven; časo te rakhén, i časo te čhurdén krig; časo te riskirén, i časo te syven; časo te javén štyl, i časo te rakirén; časo vaš maribén, i časo vaš ramánjo (miro); časo te sykavén patýv, i časo zoralés te bidykhen. Savó kófo isyn butiarneske daléstyr, pašýl so jov kerdiá butý pharés. Me dykhcjom namilo pharí butý, so Devél dyjá manušéngire čhavénge te kerén pharés. Jov kerdiá saró šukár dro péskiro časo, adiáke-pac' Jov dyjá džinybén pal svéto (lot) dre léngire ile; ne saroiekh manúš naštý te ĥaljol dová keriben, so Devél keréla anglypnástyr ke kónco (ke jagóro). Me džinóm, so nisó nane fedýr vaš lénge, syr te radynénpe zoralés te kerén lačhipén dro léngiro džiibén; i adiáke-pac', sob (kaj) manúš te xal, i te p'jel, i te radynélpe zoralés lačhipnastyr saré léskire butiátyr-davá isyn taláno Devléstyr. Me džinóm so, sob (kai) Devél te na kerél, davá javéla pe saré viéki. Nisó naštý te dočhuves ke dová, i nisó naštý te otles daléstyr. Devél džinéla te kerél adiáke, sob (kaj) ame te daras angíl Léste. Davá, so isyn, uže sys ĥarym-ĥará, i dová, so javéla, tež uže sys, i Devél janéla pale dová, so sys. Adiáke-pac' me dykhcjom tel kham: odój, kaj sendytko štéto, odój isys fuipén. I odój, kaj štéto vaš čačipén, odój sys bibáht. Me phendjom dro miro iló: “Devél javéla te sendiakirél čačunó i fujé manušén, pal-dová so odój javéla časo vaš kažno vykedyiben i vaš kažno butý.” Me phendjom dro miro iló: “Adiáke isyn manušéngire čhavénca, so Devél sprobinela len, sob (kaj) jone moginénas te dykhén, so jone isyn sýrby murdalá (žyvotna). Pal-dová so, so kerélape manušéngire čhavénca, adiáke-pac' kerélape murdalénca: jekh dólia: syr jekh meréla, adiáke-pac' javír muljola. Saré džána dro jekh štéto: saré isyn prahostyr, i saré risjona dro práho. Kon džinéla, ci manušéngire-čhavéngiro dúho (fáno) džála upré? I ci murdalengiro dúho (fáno), ci jov džála dre phuv? I me dykhcjom, so nisó nane fedýr, syr manušéske te radynélpe zoralés léskiro butiendyr, pal-dová so davá isyn léskiri dólia, ne kon janéla les te dykhél, so javéla pal léste? I me risijom i dykhcjom, syr pritasavéna manušén, i davá kerélape tel kham: i dykh! Manušéngire jasva, konés pritasavéna, ne lénde nane nikón te podrikirél léngiro dúho (fáno), ne pe kadalengiri rig, kon pritasavela sys zor, ne lénde nane nikón te podrikirél léngiro dúho (fáno). Paldavá me šardjom mulen, savé uže myné, butýr dalendyr, savé isyn džidé. Ne, čačes, fedýr, kadalé dujendyr isyn kodová manúš, kon iščo (inké) na sys pe svéto (lot), kon na dykhciá bibahtaly butý, so kerélape tel kham. I me dykhcjom, so pal kažno pharí butý i kažno rangiri butý, manúš zevlynela javire manušéske. Davá isyn adiáke-pac' xarnypén i sýrby te tradespe pal balvál. Dylynin'ko isyn beštó, sčhuvi vastá khetané i xála kokoró pes. Davá isyn fedýr te doreses burnyk (prigoršnia) ramanjosa (mirósa), syr pherdé duj vastá namile pharé butiátyr i tradypnasa pal balvál. I me risijom i dykhcjom xarnypén tel kham. Isyn jekhdžinó manúš i léste nijékh nane te javél pašýl léste; léste nane ni pšal, ni čhavó: ne nane kónco (jagóro) léskire pharé butiake i léskire jakhá nane čale barvalypnastyr i phučela jov: “Vaš konéske me keráva butý pharés i otphenava péske lačhipnastyr.” Davá isyn adiáke-pac' xarnypén i butý, so pharjakirela iló. Dujenge isyn fedýr, syr jekhéske: pal-dová so lénge javéla lačhí mazúri (nagrada) pal léngiri khetaný butý: kóli jekh dujendyr peréla, tedy javír 'gazdela péskire drogoné males. Ne bída javéla odoléske, kon isyn jekhdžinó: kiéli jov peréla, léste nane javír manúš te pod 'gazdel ĥodlel les. Adiáke-pac', kóli dujdžiné pasjona khetané, tedy jone tatjona jekh jekhestyr, i syr jekhdžinó moginéla te tatjol? Ne kóli manúš saštý te pirizorjakiren jekhdžines javirés, tedy dujdžiné saštý te otmarenpe, i triné – thavengiro šelo nasyg i košelape. Čororó i godó ternó manúš isyn fedýr phurestyr, ne dylynin'ko isyn králi, savés naštý butýr te sykliakires te prirakhelpe. Pal-dová so davá ternó manúš saštý te javél kadasavó, kon gijá javrí bešybnastyr pe kralipén, mek jov i te bijandjol čororó dro péskiro kralipén. Me dykhcjom, syr saré džidé, kon isyn tel kham, sys pal javire manušéste, savó terdijá pe léskiro štéto. Nane kónco (jagóro) manušénge, angíl konéste jov jaciá kralísa, ne odolé, kon javdiá korigedýr (pozžedýr), na javéna zoralés te radynénape léstyr. Pal-dová so saró davá isyn xarnypén i sýrby te tradespe pal balvál. [Dykh kučes pal ĥerój, kiéli tu džása andré dro Devléskiro Kher, i rískir kan butýr te šunés, so rakiréna, syr te des svénta janybená, i dylynin'ka keréna dová-pac': pal-dová so jone na džinéna, so jone keréna bibáht.-r.s.] [2-ju.o.] Na jav sýgno te phenés péskire mósa, i mek tyró iló te na vyphenel sýgno lav angíl Devléste: pal-dová so Devél isyn pe bolybén, ne tu san pe phuv, paldavá na rákir but. [3] Paldová so manúš dykhéla suné, kiéli léste isyn but réndy, i dylynin'koneskiri zan pindžkiresa (udžinesa) pir but lavá. [4] Kiéli tu sovlahasa Devléske, na tyrde te kerés pir sovláh, pal-dová, so Léske isyn na dróga dylynin'ka: ker, syr tu dyján sovláh. [5] Isyn fedýr te na sovlahas, syr te sovlahas, i te na kerés pir sovláh. [6] Na domek, sob (kaj) tyré uštá te lydžán loč (plot') te kerél grého, ci, sob (kaj) tedy te phenés Devléskire Jangoloske [bičhaibnaskireske-ju.o.]: “Dro davá me dyjompe dukhá.” Vaš so davá trej, sob (kaj) Devél te xoliasol pe tyrí zan, i, sob (kaj) te xasiakirél tyré-vastengiri butý? [7] Pal-dová so odój, kaj but suné dykhéna, odój i but lavá rakiréna, ne saró davá isyn xarnypén. Ne tu dar Devléstyr. [8] Kóli tu dykhésa, syr pritasavéna čorores pe phuv, i nahrates riskirena Zakóno i čačipén dre mižeh rig, tedy na divinpe pe davá, pal-dová so vučedýr barydyró dykhéla pal vučé barydyrende, i iščo (inké) vučedýr barydyrá isyn pe lénde. [9] I kófo (l'ĥota) phuvjátyr isyn vaš sarénge, i králi kokoró džidjola feldatyr. [10] Konéske pir iló isyn rup, odová na javéla čalo rupéstyr, ci, konéske pir iló baró barvalypén, kodoleste na javéla adákicy, kicý léske trej. Saró davá adiáke-pac' isyn xarnypén. [11] Syr barjola mištypén, javéla butedýr manušá, kon čaravelape léstyr, i, savó kófo isyn odolénge, konéskiro isyn davá mištypén, syr jekh féni te dykhén pe léste? [12] Butiarno isyn sutó gudles, ci jov xála but, ci nábut (kutý): ne baró barvalypén na déla te sovél léske. [13] Isyn pharí bibáht, so me dykhcjom tel kham: barvalypén, so manúš prirakhela péske, dukhavela les, [14] ci davá barvalypén moginéla te xasjol bibahtalé vakancyjatyr (slučajostyr). A kiéli čhavoró lathelape, jov nisó na doreséla dro vast. [15] Syr jov javdiá pe svéto (lot) nango dákire štetóstyr, dasavo-pac' nango jov risjola pale, syr jov javdiá. I jov nisó na léla péskire pharé butiátyr, so jov moginelas te lydžál krig péskire vastésa. [16] I davá isyn adiáke-pac' pharí bibáht: dro saró savó manúš javdiá, reh (ukrat) dasavo-pac' jov jačkiréla davá svéto (lot), i, savó kófo javéla léske, so jov kerdiá pharí butý vaš balvál? [17] Jov xaja dro ciamlypén dre saré péskire dyvesá buté dukhenca, nasvalypnasa i baré xoliása. [18] Ake, so me dykhcjom: davá isyn lačhés i mištés te xal, i te p'jel, i zoralés te radynélpe lačhipnastyr, so isyn saré léskire pharé butiátyr, so jov kerdiá butý pharés tel kham dre saré dyvesá léskire džiibnastyr, so Devél dyjá léske, pal-dová so davá isyn léskiri paš mištypnástyr. [19] I adiáke-pac' kažno manúš, konéske Devél dyjá barvalypén i mištypén, i dyjá zor léske te lel davá, i te lel péskiri paš mištypnástyr i zoralés te radynélpe péskire pharé butiátyr-davá isyn léskiro taláno Devléstyr. [20] Pal-dová so jov na javéla ŭsády (sak) te ripirel dyvesá léskire džiibnastyr, paldavá Devél i obradynela léskiro iló. Davá isyn bibáht, so me dykhcjom tel kham, i davá isyn sýrby so dyvés maškír manušénde: manúš, konéske Devél dyjá adákicy barvalypén, mištypén i patýv, so léske uhtyléla (dósi) saró, sob (kaj) jov te na zakamel; ne Devél na déla zor léske te lel kófo dalé saréstyr, ne čúžo manúš léla kófo péske léstyr: davá isyn xarnypén i bibahtaly dukh. Kóli manušéste lathenape šel čhavoré, i jov prodživela baré beršá, so javéna but but dyvesá dro léskiro džiibén, ne kóli léskiro di na javéla čalo lačhipnastyr, ci les garavena nakučes, tedy me phenavas, so muló tyknomas, savó isyn dro dákiro per, isyn fedýr kadasavé manušéstyr; pal-dová so jov javéla vaš nisó, i jov džála krig dro kalypén (ciamlypén), i léskiro lav isyn čhakirdo ciamlypnasa; i mek jov na dykhciá kham, i mek jov na džindiá nisó, usajékh léske isyn butýr ramánjo (pakojo), syr kodolé manušéste, konéste sys saró. Ne mek jov i te dživél duj móly pir tysjonco berš, ne kóli jov na dykhciá lačhipén, tedy so léske daléstyr? Ci na saró džála dro jekh štéto? Manúš keréla pharí butý vaš péskiro muj, ne léskiro di nijékhvar isyn na čalo. Pal-dová so saví l'góta (lačhipén) isyn godé manušéste angíl čororé manušéste, i saví l'góta isyn čororé manušéste, kon féni džinéla, syr te lydžál pes pe manušénde? Isyn fedýr te lel lačhipén doléstyr, so jakhá dykhéna, syr ŭsa te tyrdespe diesa ke vari-so javír. Davá isyn adiáke-pac' xarnypén i sýrby te tradespe pal balvál. Sareske, so kakaná isyn, ĥará angíl sys dynó lav i davá isyn džindló, savó kažno manúš isyn, i so jov naštý te lydžál réndo proti odoléste, kon isyn zoraledýr léstyr. Pal-dová so isyn but réndy i lavá, sóstyr isyn butýr xarnypén; savó ž lačhipén isyn manušéske? I kon džinéla, so dasavo isyn lačhipén vaš manušéske dro léskiro džiibén, dre saré dyvesá léskire džiibnastyr, so prodžála syr zer (tienjo)? I kon saštý te phenél manušéske, so javéla paló léste tel kham? Lačhó lav isyn fedýr kučoné drabestyr te khosen, i meribnaskiro dyvés isyn fedýr dyveséstyr, kiéli vari-kon bijandjola. Davá isyn fedýr te džas dro kher, kaj rovena pal muleste, syr te džas dro kher, kaj svenkinena, pal-dová so davá isyn kónco (jagóro), so užakiréla saré manušén, i džidé manušéske trej davá te prilel ke iló. Túga isyn fedýr sabnastyr, pal-dová so, kóli muj isyn smentno (skučno), tedy iló jačélape fedýr. Godé-manušéskiro iló isyn dro kher, kaj rovena pal muleste, ne dylynin'konengiro iló isyn dro kher, kaj radynénape sabnasa. Davá isyn fedýr vaš manušéske te šunén, kóli godé manušá sykavéna bang túke, syr te šunés dylynin'konengiri gilý. Pal-dová so dylynin'konengiro saben isyn fedýr syr phusadytka xrústy, so pharadjona dre jag tel pirí. Davá isyn adiáke-pac' xarnypén. Čačó, kóli godó manúš pritasavela javire manušés, tedy jov dylnjola, i počastunko (podarko) [myto-ju.o.] xasiakiréla manušéskiro iló. Kónco (jagóro) isyn fedýr anglypnástyr dro kažno réndo, a manúš, savó zrikirela péskiro dúho (fáno) isyn fedýr kodolestyr, kon isyn phut'kirdo dro dúho (fáno). Na xoliasov sýges dro tyró iló, pal-dová so dylynin'ko manúš rikiréla xolý dro kolýn. Na rákir: “Syr davá isyn, so vagedyr (ĥaredyr) dyvesá sys fedýr, syr kakaná?” Paldová so davá nane godó phučiben. Godypén isyn adiáke-pac' lačhó syr mištypén, i kofitko (poliezno) vaš odolénge, kon dykhéla kham. I godypén, adiáke-pac' i lové zaterdjona pal manušéste, ne džinybén isyn fedýr dro dová, so godypén déla džiibén odoléske, konéste jov isyn. Pridykhpe ke dová, so Devél kerdiá: kon saštý te kerél rovno dová priedmieto, so Devél kerdiá bangó. Kiéli tyré dyvesá isyn mište, rádynpe zoralés, ne kiéli dyvesá isyn fuj, tedy obdumin jekh: Devél čhudiá jekh pal javiréste, sob (kaj) dro kónco (jagóro) manúš te na džinél, so javéla pal léste. Me dykhcjom saré dalé načačipena dre miré xarnypnaskire dyvesá: čačunó manúš, kon xasjola péskire čačipnása, i bibahtaló manúš, kon dživéla ĥará (dlenges) péskire bibahtalé rendénca. Na jav čačunó butýr mieratyr; na jav godó butýr mieratyr: vaš so túke te xasiakires pes? Na jav dylynin'ko butýr mieratyr, vaš so túke te meres angíl uliago (pora)? Davá isyn lačhés, sob (kaj) tu te rikirespe ke jekh, i adiáke-pac', sob (kaj) tu te durjakires tyró vast javirestyr: pal-dová so kon daréla Devléstyr, odová javéla te lel kófo dujendyr koterendyr. Godypén zorjakirela godé manušés, i jov isyn baredýr deše foróskire barydyrendyr. I nijékh nane čačuné manušés pe phuv, kon keréla lačhipén i kon na keréla gréhi. Adiáke-pac' i na prilé ilésa saré lavá, so manušá phenéna, sob (kaj) tu te na šunés tyré dynarís te košel tut. Pal-dová so adiáke-pac' i tyró iló but móly džindiá, syr tu adiáke-pac' koscian javirén. Saró davá me sprobindjom pir miro godypén, i me phendjom: “Me javáva godó”, ne davá sys durál mándyr. Saró, sob (kaj) te na javél, isyn durál i drieván xor, kon saštý te uĥaljol davá? Me riskirdjom péskiro iló, sob (kaj) te džináv, te rozĥaljovav, i te vyrodav godypén i pričyna, sóske saró adiáke kerélape? I te udžinav, saví bibáht lydžála dylnypén, i duredýr bigodypen, i tedy manúš sýrby zdžála godiatyr. I me lathjom (lastjom), so džuvlý isyn kirkedyr meribnástyr, savjate iló isyn sýrby felý, ci khudý (siet'), savjate vastá isyn sýrby zandirjá (cépi) pe ĥerá. Ne manúš kon keréla, syr isyn lačhó Devléske, zrakhélape látyr, ne grehítko manúš javéla lynó dre lákire feliá. Dykh! Se me lathjom”, – phendiá Sykliakiribnáskiro pal Devléste, – syr me dočhuvava jekh čačipén ke javír, sob (kaj) te uĥaljovav, sóske saró davá kerélape. So iščo (inké) miro iló rodéla, ne so me naštý te lathav, davá isyn: maškír baré manušénde me lathjom jekhe muršés, ne me na lathjom ni jekha džuvliá maškír kadalé sarénde. Dykh! So me lathjom: Devél sozdyjá manušés devlytkonesa; ne manušá lathné javír i but so pridumindle péske. Kon isyn godó manúš? I kon džinéla te rosphenel pal saré réndy, syr len trej te kerén? Manušéskiro godypén začhuvela léskiro muj te ziainel, i nakovlo léskiro muj parudjola. Me phenáva: “Kande, so králi priphenela te kerés vaš patýv pal tyrí sovláh Devléske.” Na jav sýgno te džas krig Léskire jakhéndyr. Na terdjov dre stonka pal bibahtaló réndo, pal-dová so králi keréla dová, so isyn lačhó léske, pal-dová so kralískiro lav isyn zoraló, i kon saštý te phenél léske: “So tu kerésa?” Kon rikirélape ke léskiro priphenybén, kodoléske na javéla bibáht i godé-manušéskiro iló rozĥaljola časo (cýro) i drom, syr trej te kerél? Pal-dová so vaš kažno réndo isyn péskiro časo i drom, syr trej te kerél? Bari bída tasavela manušés; pal-dová so jov na džinéla, so javéla; kon moginéla te phenél léske, kiéli, i, syr saró davá javéla? Nijekheste nane zor pe dúho (fáno), sob (kaj) manúš te rikirél zoralés dúho (fáno), i nijekheste nane zor dro dyvés, syr meréna. Naštý nisyr i te otphandespe maribnastyr proti meribén, adiáke-pac' i bibáht na vyrakhela odolén, kon prisyklyne te kerén adiáke. Saró davá me dykhcjom i riskirdjom péskiro iló ke kažno butý, so kerélape tel kham: isyn časo, kiéli manúš rikiréla zor pe javiréste i dukhavela les. I me adiáke-pac' dykhcjom, syr garavenas fujé manušén, savé javénas i džánas krig adiáke, sýrby jone kerénas pir čačipén, i, kiéli manušá udžanas sventoné štetóstyr i, tedy jone bistrenas pal lénde dro fóro, kaj jone kerdé bibáht. Davá adiáke-pac' isyn xarnypén. Syr séndo pe odolénde, kon keréna bibahtalé butiá, nasyges kerélape, adiáke-pac' pal-davá manušéngire-čhavéngiro iló isyn xor zalymo, sob (kaj) te kerél bibáht. Mek grehítko manúš te kerél bibáht šel móly i te dživél ĥará, ne me džinóm mištés, so javéla lačhés odolénge, kon daréla Devléstyr, kon daréla angíl Léste. Ne na javéla lačhés fujé manušénge, ci sýrby zer (tienjo) jov na javéla ĥará te dživél, pal-dová so jov na daréla angíl Devléste. Davá isyn xarnypén, so kerélape pe phuv: čačuné manušénca kerélape dová, so trieindia te javél fujé manušénca pir léngiri butý; i isyn fuj manušá, konesa kerélape dová, so treindiá te javél čačuné manušénge pir léngiri butý. Me phendjom, so davá isyn adiáke-pac' xarnypén. I me šardjom, sob (kaj) manušá te sanpe radymása, pal-dová so nisó nane fedýr tel kham syr te xan, te p'jen, i te javén radymakiresa, pal-dová so davá pomoginela léske dre léskiri pharí butý, so Devél dyjá léske tel kham. Kiéli me riskirdjom miro iló te udžinel godypén, i te rozdykhel namilo pharí butý, so kerélape pe phuv: i adiáke-pac' nijékh manúš nane, sob (kaj) te sovél ci dyvesé, ci ratý; tedy me dykhcjom Devléskiri sarí butý, so manúš naštý te ĥaljol sarésa, so kerélape tel kham. Mek manúš i te kerél butý pharés, i te džinél butýr, ne saroiekh jov na ĥaljola sarésa; adiáke-pac', kóli godó manúš duminéla, so jov džinéla davá, ne jov naštý davá te ĥaljol sarésa. Pal saró davá, me rozdumindjom péskire ilésa, sob (kaj) te rozgaljovav butýr saró davá: čačó, i čačuné, i godé manušá, i léngire butiá isyn dro Devléskiro vast: nijékh manúš na džinéla, ci javéna te sykavén patýv léske, ci javéna te bidykhen les pal davá: saró davá isyn angíl lénde. Saró adiáke kerélape sarénca pir jekh drom: jekh taláno vaš čačunenge i vaš fujé manušénge; vaš lačhé, i vaš bibahtalé, žužé i nažužé manušénge. Vaš odoléske, kon janéla svénto dyibén, i vaš odoléske, kon na janéla svénto dyibén: adiáke lačheske, adiáke-pac' i grehitkoné manušéske; adiáke odoléske, kon sovlahala, adiáke-pac' i kodoléske, kon na sovlahala. Davá isyn bibáht maškír sarénde, so kerélape tel kham – so jekh taláno (sud'ba) užakiréla sarén: čačó, manušéngire-čhavéngire ile isyn pherdé bibahtiasa, i bigodypen isyn dre léngire ile, paka jone dživéna, a paló (poslie) dová jone džána krig odorík, kaj mulé isyn. Ne odová, kon isyn maškír džidende, iščo (inké) užakiréla lačhipén angíl, pal-dová so džidó džukel isyn fedýr mulé ščerestyr (lievostyr). Džidé manušá džinéna, so jone meréna, ne mulé na džinéna nisó, i adiáke-pac' nane lénge butýr mazúri (nagrada), i manušá bistyrde sarésa pal lénde. Adiáke-pac' i léngiri patýv ke javír manušá, i odová, so jone zoralés bidykhne, i léngiro zevlynypén kakaná xasiné – adiáke-pac' lénge nane butýr i bažyn dro dová, so kerélape tel kham. Džá i xa péskiro maró radasa, i pi mol radymakire ilésa; pal-dová so Devléske ĥará jačné lačhé tyré butiá. Mek tyré ídi te javén parné, mek te uhtylel (te javél dósi) olivítko dzet (jeliejo) pe tyró šeró. Dživ i rádynpe romniása, savjá tu kamésa saré dyvesá dro tyró xarnypnytko džiibén, so Devél dyjá túke tel kham pe saré dyvesá dro tyró xarnypnytko džiibén; pal-dová so dasaví isyn tyrí bažyn dro džiibén i dre butý, so tu kerésa tel kham. Saró, so tyró vast lathéla te kerél, ker davá saré tyré zoralypnastyr, pal-dová so nane ni butý, ni priduminesa nisó, ni džinybén, ni godypén dre maĥila (dre kula), karik tu kedesape te džas. Me risijom i dykhcjom, so kerélape tel kham: so prizo vykhelela na odová, kon isyn naj sygedýr, ci maribén na odová, kon isyn naj zoraledýr, ci maró na odová, kon isyn naj godedyr, ci barvalypén na odová, kon isyn naj god'varedyr, ci láska, na odová, kon isyn naj fededýr; ne isyn časo i vakancyja (slučajo) vaš kažnoné manušéske. Pal-dová so manúš adiáke-pac' na džinéla péskiro časo: jov poperelape syr mačhé dre bibahtaly khudý (siet'), syr čirikliá dre felý, adiáke-pac' i manušéngire čhavé isyn dre feliá dro bibahtaló časo, kiéli jekhátyr bari bída peréla pe lénde. Ake, adiáke-pac' isyn jekh godypén, so me adiáke-pac' dykhcjom tel kham i so sykadyjá baró vaš mánge: ĥáda, sys jekh forico, kaj isys nábut (kutý) manušá, i baró králi gijá maribnása pe davá forico, i jov obgija trusciál davá forico xaladenca, i jov ĥazdyjá baré vánty te lel davá forico. Ne, ĥaljov, jekh čororó, ne godó manúš lathiape dro forico, i jov vyrakhcia davá forico péskire godypnasa. Ne nijékh manúš na ripirelas kadalé čororé manušores. Tén'ci phendjom me: “Godypén isyn fedýr zoralypnastyr”, ne saroiekh – čororé-manušéngiro godypén isyn na dre patýv i léskire lavá na šunéna. Godé-manušéngire lavá šunéna butýr, so štylés phenenape syr odoleskiri gódla, kon xulainela pe dylynin'konende. Godypén isyn fedýr maribnytkoné sastyrendyr; ne jekh grehítko manúš xasiakiréla but lačhipén. Mulé matlia (muhi) došakirena aptiekaroskiro drab te khosen adiáke, so davá kuč drab léla te khandel kirnypnasa; adiáke-pac' i jekh tyknó dylnypén keréla patyvalé manušésa, kon isyn godó i savés javír manušá kutiakirena. I davá adiáke-pac' isyn: kiéli dylynin'ko manúš džála vari-savé dromoresa; léske saroiekh na uhtyléla (nádosi) godypén, i jov sykavéla kažnoné manušéske, so jov isyn dylynin'ko. Kóli theméskire-barydyreskiro dúho (fáno) ĥazdélape proti túte, na jačkiv (na jačav) péskiro štéto, pal-dová so ramánjo (miro) barydyrésa čhakirela štylés baré gréhi. Davá isyn bibáht, so me dykhcjom tel kham, syr themeskiro barydyró délape dukhá. Dylnypén čhuvélape angíl baré patyvása; barvalé manušá isyn bešté pe telatuné štéty. Me dykhcjom dynar'jén pe grénde, i kralískire čhavén, savé psiréna pezal pir phuv syr dynárja. Kon ĥanavela ĥanbín, odová peréla dre láte, i kon phagiréla telé tyno, odolés sap dandyrela. Kon vyphagirela bará, odolés bar moginéla te pekavel pale; kon pharavela kaštá, odolés kašt moginéla te dukhavel. Kóli tover isyn tempo, i kóli kon na vostrinela čhinybnytko (liezvijo), to manušéske trej butýr te pričhuvel zor. Fedýr godypnasa te dumines pal davá angíl. Kóli sap dandyrela manušés angíl, syr te zarakires les, tedy ukrotitieljo uže na trej. Lavá godé-manušéngire uštendyr isyn bahtalypén, ne dylynin'koneskire uštá sýrby nakhavena les kokores. Léskiro muj léla te rakirél nagode lavá, ne dro kónco (dro jagóro) jov rakiréla sýrby bišereskiro. I rakiréla but lavá dylynin'ko, ne nijékh manúš na džinéla, so javéla angíl, kon moginéla te phenél léske? Dylynin'ka manušá khiniakirena pes pharé butiasa adiáke, so jone na džinéna, syr te džán pe fóro. Bida túke, phuv, kóli tyró králi isyn terné-beršengiro i, kiéli tyré thagárja (kniázi) [kralískire čhavé-ju.o.] xána tasiárles (ránes). Bahtalý tu san, phuv, kóli tyró králi isyn baré-rangire rodóstyr i tyré thagárja (kniázi) xána tedy, kiéli trej vaš zoralypén, a na vaš matyben. Pal drieván kirne-masengire vastá kheréskiro karkaso peréla, i pir čuče vastá kher thadéla. Habén isyn kerdó, sob (kaj) te sanpe, i mol rozradynela džiibén, pe pal lové saštý te les saró davá. Na prokoš kralís až i dre godý, na prokoš barvalen dre štúba, kaj sovesa; pal-dová so čirikly dro fáno (vozduho) moginéla te lydžál tyró lav [zan-ju.o.], i vurniaibnytko phakenca sozdyiben (krylato) phenéla pal davá réndo. De tyró maró buté manušénge, pal-dová so tu doresesa dáry pale but dyvesá. Rosker, so isyn túte, maškír eftá (eftane) manušénde, ci adiáke-pac' maškír ohtó (bidujéngiro deš) manušénde, pal-dová, so tu na džinésa, savó bedypen javéla pe phuv. Kóli óbloki isyn pherdé bryšyndesa, tedy jone čhuvéna telé paniá péstyr; i kóli kašt (drévo) peréla ke paš-dyvesýtko rig, ci ke paš-ratítko rig, tedy pe štéto kašt peréla, jov javéla te pasjol. Kon dykhéla pe balvál, odová na javéla te počhuvel ziárka dre phuv, i kon dykhéla patyvása pe óbloki, odová na javéla te sčhinel giv. Syr tu na džinésa, savé dromésa dúho (fáno) džála, i dová, syr tykné-masengire kokalkicy barjona dre léskire-dákiro per, adiáke-pac' tu i na ĥaljosa Devléskiri butý, Kon keréla davá saró. Tasiarlatune (rannjone) zlokostyr počhuv péskiri ziárka dre phuv, ne bel'veliatyr na tangine (na žalin) tyró vast vaš butý, pal-dová so tu na džinésa, so udelape ke mištypén, ci davá réndo, ci dová réndo, ci duj dalé réndy, javéna lačhé. Kakaná, dykh. Dud isyn gudló, i gožes isyn jakhenge te dykhén kham; ne kóli manúš dživéla but berš, tedy mek jov te radynélpe zoralés kažnoné beršestyr, ne mek jov i te ripirel pal kalé dyvesá, pal-dová, so jone javéna but: saró, so javéla, isyn xarnypén. Rádynpe (lošaljov), ternó manúš, tyré ternypnastyr, i mek tyró iló te ĥazdel tyró dúho (fáno) dre dyvesá, kiéli tu san ternó; i psir odój, kaj tyró iló podphenela, i odorík, karik tyré jakhá tyrdenape, ne tu jekh džin, so pal davá saró Devél vykharela tut pe séndo. Tén'ci, na tugin dro péskiro iló, i čhuv krig bibáht tyré maséndyr [ločatyr-ju.o.], pal-dová so čhavoripen i ternypen isyn xarnypén. I rípir tyré Sozdyibnaskires dre tyré ternypnaskire dyvesá angíl dová, syr javéna pharé dyvesá ke phuripen, i syr javéna dasavé beršá, so tu phenésa pal lénde: “Mánde nane loš (viesjolyma) léndyr.” Angíl davá, syr kham i dud, čhon i čergeniá jačéna ciamle, i angíl davá, syr óbloki risjona pale bryšyndestyr; angíl dyvesá, syr kherítko rakhibnaskiro javéla te izdral, i syr zoralé muršá javéna te kerén telé šerenca; angíl, syr siavitka (miel'nicytka) bará terdjona dre butý pal dová, so jone javéna kutý manušá, i syr manušá, kon dykhéna pir dalé dudalia (stavni), javéna sýrby dre migla (mrako) te dykhén; angíl dová, syr i vudará zaphandena pe vulíca (pe gása), kiéli siavitkoneskiri (phurteskiri) butý na javéla šundly; i kiéli jone javéna te uštén čirikliakire bagaibnastyr, i kiéli saré bagaibnytka čhaja javéna štyl. I adalé manušá adiáke-pac' javéna te darén vučipnástyr, i jone javéna te strahandjon te džán pir drom, i léngire balá javéna parné adiáke, syr mindalitko kašt luludjola (cvecinela), i syr skočko (grastoro) na javéla dre rádyma, i syr patýv xasjola sýrby kapiersytko kašt šutjola; pal-dová so manušá javéna te džán ke léngiro viéčno kher, i tén'či léngire rovibnaskire javéna te psirén pir gásy (pir vulícy). [Rípir tyré Sozdyibnaskires-ju.o.], angíl dová, syr rupuno šelo košelape, ci syr suvnakunó čaró phadjola, ci syr khoró pharadjola pašýl folahar (fontano), ci syr rota phadjola pašýl ĥanýng; i risjola práho dre phuv, kaj sys jov, a dúho (fáno) risjola ke Devél, Kon dyjá les manušéske. Harnypén xarnypnastyr”, – phendiá Sykliakiribnáskiro pal Devléste. “Saró isyn xarnypén.” I ke dová, so Sykliakiribnáskiro pal Devléste sys godó, jov usajékh sykliakirdiá manušén džinybnaske, i jov rozdykhelas kučes, i rodyja, i jov čhuvelas jekh pal jekh syr trej pritčy. Sykliakiribnáskiro pal Devléste rodyja te lathel goža lavá i te začhinel pir čačipén patiaibnytka lavá. Godé-manušéngire lavá isyn sýrby suvja [phusadytka bustiá/striély-ju.o.], a léngire pritčy isyn sýrby gvozdi (karfina), so xor zamarnape: jone isyn saré jekhe čhupnaristyr I iščo (inké): prirakhpe jekhestyr, míro čháva: džinésa, nane kónco (jagóro) manušéndyr te čhinen lylvaria, i kóli tu drieván but javésa te sykljos, tedy tu khiniakiresa péskire masá. Javén, vyšunasa ke kónco (ke jagóro) čačipén pal saró davá: “Dar Devléstyr i ríkirpe ke Léskire priphenybená; pal-dová so dre dalé duj čačipená isyn saró, so trej manušéske. Paldová so Devél janéla kažno butý te sendiakirél, i khetané kažnoné garadé keribnasa, ci jov te javél lačhó, ci jov te javél bibahtaló. Gilý giliendyr, saví sčhudia o Solomóno. Mek jov te čamudel man péskire ušténca; pal-dová so léskiro piramnipén (kamiben) isyn fedýr, syr mol (vino). Pal-dová so, syr kuč drab te khosen déla gudlý sung(aromáto); tyró lav isyn kuč drab te khosen, so čhuvélape angíl, paldavá patyvalé terné džuvliá otdena iló pal túte. Pritýrde man ke pe, i ame našasa túsa. Králi jandiá man dre péskire-kralitka komory (xaromy), sob (kaj) ame te javas ráda i zoralés te radynaspe; ame javása te ripiras tyró piramnipén (kamiben) butýr, syr mol. Nane dívo, so patyvalé čhaja otdena iló pal túte. Jerusalimóskire čhajale! Me som c'miano, ne me som šukarni džuvlý, me som syr Kidaroskire šátry, me som syr začhude (zaviesy) Solomonóskire. Na dykhén adiáke pe mánde, so me som kaljori, pal-dová so khamoro pekcia man. Miré-dákire čhavé xoliasyne pe mánde; jone čhudé man te rakhav vinagradýtko únta [(drakhin)] (sado), ne me na rakhcjom mirí vinagradýtko únta. Phen tu mánge, konés me kamám, kaj tu čaravesa péskire bakrengiri stády, kaj jone javéna te otkhinjon dro paš dyvés? Sóske mánge trej te čaravav pale tyré drogoné-malengire (drugengire) stády. Kóli tu na džinesas, naj gožedyr maškír džuvliende, džá pir bakréngire špery (sliady), i čarav péskire buznoren (kozloren) pašýl čhupnar'jengire šátry, Me priravnindjom (priparudjom) tut, mirí piramníje (kamly), miré naj drogedyr grasniasa dro Faraonóskiro maribnýtko vurdén. Tyré čhama (ščoki) isyn gožedyr mirikliendyr, Tyrí men isyn ĥožakirdy suvnakuné zandiror'jenca. Ame kerása túke šukár suvnakuný vierigori (podviazka) rupuvé jakhor'jenca.” Kiéli králi isyn beštó pal léskiro skamínd, miro nardo déla lačhé-sungakiro khandypen. Sýrby drógo bužoro mirostyr vaš mánge, miro piramnó (kamlo), kiéli jov isyn paštó ratý pašýl miré kolyna. Miro piramnó vaš mánge isyn sýrby randjori xnatyr (kipierostyr), saví luludjola (cvecinela), dre vinagradýtko únta [(drakhin)] Jengieda (En-Gieda). O, saví gožo-šukár tu san, mirí piramníje, – tyré jakhorja isyn syr golumbicate. O, savó gožo-šukár tu san, miro piráno, savó gudló i amaró čhuibén isyn adiáke-pac' syr vyčhudo zelenyben. Amaré kheréskire strehi isyn syr kiedrytko veš, i amaré-bergakire bel'ki (stropily) isyn syr kiparisoskire kaštá! Me som Šaronoskiro narcyso, me som lilija maškír doly. Syr lilija isyn maškír phusadýtka xrústy, adiáke-pac' isyn mirí piramni maškír patyvalé terné džuvliende. Syr phabelyn, saví isyn maškír vešytka kaštá (drevy), adiáke-pac' isyn miro piramnó maškír ternende. Mánge isyn pir iló te bešav dre lákiri zer (tien'), i lákire barjakirdé (plódy) isyn gudlé vaš miro muj. Jov jandiá man dro kher, savó sys pherdó moliása (vinosa), jov sýrby čhudiá sciago, so léske drógo som me. Podrikér man te na perav moliása (vinósa), neviakirén man phabénca, pal-dová so me nábut so na meráva piramnipnástyr (kamlypnastyr). Léskiro zérvo (liévo) vast isyn tel miro šeró, i léskiro čačó (pravo) vast oblela man. Me zasovlahava tumen, Jerusalimóskire čhajale, gazelienca ci feldakire mirgénca (siernenca), sob (kaj) tumé te na džangaven, te na ĥazdén rat angíl dová, syr javéla lačhó léske. Ake, miré piramnéskiri zan. Ĥáda, jov džála? Jov piriuhtela pir bérgi? Jov uhtela pir bérgicy. Miro drúgo (mal) isyn syr gazel', ci syr ternó šynguno (olienjo). Ake, jov isyn terdó pal vánta, Jov dykhéla pirdál feštry, Jov prodykhela pirdál sastruné ratnícy (stavni). Miro piramnó lyjá te rakirél i phendiá mánge: “Uštý, mirí piramníje, mirí šukarni, i jav javrí. Dykh ža! Ivant (zima) progijá (nakhtija), bryšýnd pirijaciá i nane butýr: luludiá sykadjona pe phuv, i čirikliá lyné te bagán, lákiro bagipen šunéla amarí phuv. Inžyritkone-kaštengire zelena phabá loljona, i vinagradýtko kaštoro luludjola i déla lačhé-sungakiro khandypen. Uštý, mirí piramníje, mirí šukarni, i jav ke me. Mirí golumbica isyn dre skalengire nišy, dre garadé štéty pir sámo krutyma, mánge te dykháv tyró muj, mánge te šunav tyrí zanori, pal-dová so tyrí zan (glos) isyn gudly, tyró mujoro isyn šukár.” Uhtylén lokhnien (lisicen), tykné lokhnor'jen, savé xasiakirena vinagradýtko bar; pal-dová so amaré vinagradýtka barja luludjona. Miro piramnó isyn miro, i me som léskiri. Jov čaravela (léskire-bakrengiri stada) maškír lilii, Angíl, syr dyviesjola, i zerjá (tieni) našéna, risjov, miro pirámnie: jav syr gazel', ci syr ternó šynguno maškír bérgi. Pe miro čhuibén me rodyjom ratý kodolés, ke savó miro di prityrdela: me rodyjom les, ne me na lathjom (lastjom) les. Me uštava fedýr i obprastava fóro, vulícy (gásy) i štéty, kaj manušá kedenape; me javáva te rodav les, ke savó miro di prityrdela; me rodyjom les, ne me na lathjom (lastjom) les. Rakhibnaskire (stražy), savé psiréna pir fóro, lathné man – me phucjompe: “Ci dykhné tumé kodolés, ke savó miro di tyrdelape.” Nábut me gijom krig léndyr, kiéli me lathjom (lastjom) kodolés, ke savó me tyrdavape: me rikirdjom les i me na mekavas les, angíl, syr me lydžáva les dre miré-dákiro kher, i dre lákire kherítka komory (xaromy), kon bijandiá man. Zasovlahava tumen, Jerusalimóskire čhajale, gazelienca i feldytkone mirgenca (lanienca), sob (kaj) tumé te na džangaven, te na ĥazdén miro iló angíl, syr javéla lačhó léske.” “Kon adavá isyn, savó uštéla čhučé prahendyr, sýrby baró thuv ĥazdélape, savó isyn thuvliakirdo mirósa i gudlé smolasa, i kažnoné lačhé-sungakire drabenca tylgar'jendyr (kupcendyr). Dykhén! Ake, isyn Solomonóskire-kralítko čhuibén: bidaripnaskire šovdešá muršá isyn pašýl léste, jone isyn naj zoraledýr dro Izrailjo. Lénde sarénde isyn kurtála, jone isyn spiecy te marénpe; kažnoné manušéste isyn kurtála pašýl léskiri ĥerój, sob (kaj) te na darén ratý. Králi Solomóno kerdiá péske trono, so sčhuvelape. Jov kerdiá rupuvé stylbicy dro trono, léskiri phalia te čhuvél kuniá (lokotniki) isyn suvnakástyr, léskiro štéto te bešél isyn purpurostyr; Jerusalimóskire čhaja vykhude andrál davá trono péskire ilésa. Džán te dykhén, Sionóskire čhajale, ake, isyn králi Solomóno, dre kralítko stadyk (viánka), saví léskiri daj čhudiá pe šeró, dro dyvés, kiéli jov lyjá sovláh, dro dyvés, kiéli léskiro iló radyndiape. O, saví šukarni tu san, mirí piramníje, o saví šukarni tu san; syr golumbicate tyré jakhá dykhéna tel krenco čhur (kosa); tyré balá isyn sýrby buznengiri stada, saví džála telé bergátyr Galaadoskirjatyr. Tyré dandá isyn dasavé parné syr občhindlé bakriá, savé ziainena, i savé javné moribnastyr, kažno léndyr janéla pir duj blizniatki (dujore), i nijékh nane jalovo (nakhabný) maškír lénde. Tyré uštá isyn syr jarko loló thavoro, i tyró muj isyn dasavo šukár. A tyré čhamá (ščoki), so isyn tel krenco čhur, isyn syr kuskicy granatytkone phabendyr. Tyrí men isyn syr Davidóskiro stýlbo, so kerdó te čhuvén sastyrá maribnýtka: odój ublade bar sastruné ščýty, syr isyn zoralypnaskire-muršeskire ščýty. Tyré kolyna isyn sýrby duj tyknore-blizniatki date-gazeliate, saví čaravela len maškír lilii. Angíl dová, syr javéla dyveseskiro ránko, i syr zerja (tieni) našéna krig, me džáva péske pe mirroskiri bérga, i pe gudlé-smolákiri (fimiamoskiri) bérgica. Saví šukarni tu san, mirí piramníje, i nisaví doš nane dre túte. Jav mánca Livanostyr, mirí terný, jav mánca Livanostyr; jav sygedýr telé Amanoskire vučipnástyr, Sieniroskire i Jermonoskire vučé šteténdyr, jav xaščéndyr/venténdyr (logovéndyr), kaj ščerá (lievy) dživéna, bergendyr, kaj isyn lieopardy. Tu zadivakirdian miro iló, mirí phen, mirí terný; tu zadivakirdian miro iló dykhibnasa tyré jakhéndyr, jekhe zandirorjasa tyré mirikliendyr. Syr šukár tyrí láska isyn, mirí phen, mirí terný! I pe kicý fedýr lačhé-sungakiro khandypen saré aromatytkone makhibnendyr. Tyré uštendyr, mirí terný, thadéla žužó avgín, avgín i thud isyn tel tyrí čib; i lačhí sung tyré idiendyr isyn sýrby lačhí sung Livanostyr. Mirí phen, mirí terný, isyn sýrby zaphandly únta (sado), sýrby pitomniko, so isyn pe klydyn, sýrby ĥanýng, so isyn pe čergenorí (piečat'). Jone barjona syr luludiá dre raitko únta, kaj isyn granatytka phabelynia vykedyné phabenca i lačhé-sungakire xnasa i nardoskire randjorjasa. Odój isyn nardo i šafrano, ajero i karica, i saré xrústy gudlé smolasa, mirro i aloe, saré rangire aromatytkone makhibnenca. Fontano (folahár), dre únta džidé-panieskiri ĥanýng, i sygna rekicy Livanostyr.” “Džangadjov, paš-ratiakiri balvál, i jav, paš-dyvesýtko balvál! Phúrde pe mirí únta, sob (kaj) te rozdžanpe lákire aromatýtka sungá. Mek te javél miro piramnó dre léskiri únta (sado) i mek jov te xal gudlé phabá léskire.” “Me javdjom dre péskiri únta (sado), mirí phen, mirí terný; me skedyjom miro mirro miré pripravenca; me xajom péskiro avginytko soto miré avginesa; me pijom péskiri mol (vino) thudesa.” “Han, míre malóre, p'jen, i p'jen čalés, miré piramne [dróga míre manušále-ju.o.]!” “Me som suty, ne miro iló isyn na sutó. Ĥáda, isyn zan, miré piramnéskiri! Jov marela dro vudár: “Otphande mánge, mirí phen, mirí piramnoríje, mirí golumbica, mirí naj fededýr. Pal-dová so miro šeró isyn učhakirdo pahlyniasa (rosasa), miré krenca balá isyn ratitkoné sapanypnasa. Me zlyjom miro uribén kustykasa syr me saštý te urjavav pale les? Me mordjom péskire ĥerá, syr me saštý te meliakirav len? Miro piramnó čhudiá péskiro vast dre vudareskiri ščel'; i miro iló andrál mánde potyrdyjape ke jov. Me uštyjom te otphandav miré piramneske, i miré vastá sapaniné mirrósa, i miré angušta (pal'cy) jačné kindle mirrosa pe klydynéskiro vastoró. Me otphandjom miré piramneske; ne miro piramnó dyjape pale, jov gijá krig: miro di košelaspe javrí, kiéli jov rakirdiá, me rodyjom les, ne me na lathjom les; me khardjom les, ne jov na otphendiá mánge. Rakhibnaskire (stražy), savé obdžana fóro, lathné man; jone pekade man, jone dukhade man; rakhibnaskire pe foritko vánta lyné krig mándyr mirí dlengi cérga [saví rakhelas vánta-r.s.]. Me zasovlahava tumen, Jerusalimóskire čhajale! Kóli tumé lathéna miré piramnes, so tumé phenéna léske? So Me meráva piramnipnástyr!” Sósa fedýr isyn tyró piramnó (kamlo) javire piramne manušéndyr, Tu, kon san naj šukaredyr maškír džuvliende? Sósa ž fedýr isyn tyró piramnó javire piramne manušéndyr, so tu adiáke zasovlahasa amen? Miro piramnó isyn parnó i lolé-čhamengiro (ščokengiro), jov isyn raj manúš maškír dešé tysjoncy manušénde, léskiro šeró isyn sýrby vykedyno suvnakái, léskire krenca balá kuninenape, jone isyn kalé syr korakoste (voronoste). Léskire jakhá isyn syr golumbicate, so isyn pašýl sygna rekicy, savé isyn syr morde dro thud, savé isyn zor i zoralés bešté. Léskire čhama isyn syr bétki (griady), kaj pripravy barjona, syr vučé betki gudlé-sungákire čar'jenca, léskire uštá isyn syr lilii, savéndyr thadéla thaduno mirro. Léskire vastá isyn syr suvnakuné desté, so isyn počhude xrizolitenca; léskiro per isyn ziaindlone slonoskire kokalostyr, savó isyn piričhudo sapfirenca. Léskire ĥerá isyn syr stýlby mramorostyr, so čhudé pe fundámiento vykedyné suvnakástyr; léskire-moskiri mina isyn sýrby Livanoskiro baripén, naj kučedyr, syr kiedry. Léskiro muj isyn naj gudledyr; čačó, jov isyn šukár pir saró. Ake, savó isyn miro piramnó, ĥáda, isyn miro mal, – tumé, Jerusalimóskire čhajale! Karik da gijá tyró piramnó, tu, kon san naj šukaredyr maškír džuvliende? Dre saví rig risijá tyró piramnó, sob (kaj) ame te rodas Les túsa? Miro piramnó gijá telé dre péskiri únta, ke betki [cvietniki-r.s.] pripravenca, te čaliakirelpe dre unty (sady) i te kedel lilii. Me som jekh miré piramnéskiri, i miro piramnó isyn jekh miro: jov čaravela péskiri stada maškír lilii. Tu san šukár syr Tarza (Firca), tu san gožo-šukár syr Jerusalimo, tu san trašany syr xaladybena (polki) sciagenca! Rískir krig péskire jakhá mándyr, pal-dová so jone léna upralypén pe mánde, tyré balá isyn syr buznorengiri (kozengiri) stády, savé džana telé Galaadóskire navuče bergicatyr. Tyré dandore isyn syr bakrorengiri stada, saví akaná javdiá moribnastyr, kažno léndyr bijanéla blizniaten, i nijékh léndyr isyn na jalovo. Tyré čhamore isyn syr pašorja (koterore) granatytkone phabendyr, so isyn tel dlengo dykhlo. Isyn šovdešá kralicy, i ohtodešá bisovlahakire džuvliá, i isyn but patyvalé čhaja, so naštý te gines: ne tu, míri golúmbica, san mirí jekhori, mirí naj fededýr, tu san jekhori péskire date, tyrí daj, kon bijandiá tut, otdéla iló butýr túke. Saré patyvalé džuvliá dykhné la, i jone khardé tut bahtaliasa. Kon ža isyn joi, saví ziainela syr zlóko (ránko), saví isyn šukarni syr čhon, jasno syr kham, isyn trašany syr xaladybena sciagenca? Me gijom telé dre peĥengéngiri únta (sado), te dykháv čarjá pir dólo, te dykháv, ci rozmekciape vinagrado (drakh), ci granatytka phabelynia luludine. Angíl davá, syr me ĥalyjom, miro di čhudiá man dre baré-rangire maribnýtka vurdená miré narodóstyr. Risjov, risjov, Sulamítie, risjóv, risjóv, sob (kaj) ame moginasas te dykhas pe túte. [7.1-r.s.] Sóske tuménge isyn pir iló te dykhén pe mánde, syr pe duiá-riadéngiro (Manaimoskire/haladytko) khelyben. [2] Save šukár isyn tyré ĥerá dre curúlia (cendali), o, kralískire-semencakiri čhaj! Tyré stacia (bjodry) adiáke bandjona trusciál (krugom), so jone isyn syr mirikle, so jone isyn sýrby len sozdyne spiecoskire vastá. [3] Tyró per isyn syr truiuno (krenglo) tahtái, dro savó uhtyléla (dósi) miešyndly mol (vino); tyrí kustýk pe stáno syr givniakiri stogo, pašýl savó isyn trusciál lilii. [4] Tyré duj ciucia isyn syr duj buznore, dujore (dvojniaty) gazeliate. [5] Tyrí men isyn syr vučardý (bašnia) slonytkone kokalostyr; Tyré jakhá isyn syr ziericy (ozierkicy) dro Jesievóno (Gešbono), so isyn pašýl Batrabimoskiri pórta; tyró nakh isyn syr Livanoskiri vučardý (bašnia), so dykhéla javrí ke Damásko. [6] Tyró šeró dykhelape syr bérga Karmil, i tyré krenca balá isyn syr purpuro; o králi isyn sýrby phandlo dre sastyrá tyré krencone čhur'jenca. [7] Saví šukarni i saví gožo-manušvari tu san, o, syr but me radynavape tyré piranipnástyr (kamlypnastyr). [8] Tyrí stéma (stáno) isyn syr pal'ma, tyré kolyna isyn syr lákire [vinagradýtka-r.s.] randjorja. [9] Me dyjom godý peské (dumindjom): “Me zaresava upré pe pal'ma, me uhtylavape pal lákire randiá” mek te javén tyré kolyna syr vinagradoskire randjorja, i mek te javél lačhí sung tyré nakhestyr syr phabendyr, [10] i tyré uštá isyn syr naj fededýr mol, saví thadéla rovnes miré piramneske (kamleske), I dodžála povolin'kes (liéntes) ke suté-manušéngire uštá. [11] Me som miré piranéskiri, i dová, so léske trej, risjola ke me. [12] – Jav, miro piramnó, javén, džása péske pir félda; javén, dživasa nábut (kutý) dre gavá. [13] Ame rankosa (zlokosa) džása dre vinogradytko únta, dykhása ci rozmekciape vinagradýtko xrústyco, ci otkerdepe bukoré (počki), ci lyné te luludjon granatytka phabelynia; odój me sykaváva miro iló túke. [14] Mandragorytka phabá khandena dena sung (pahnisona) adiáke gudles i pašýl amaré vudará isyn adákicy but barjakirdé (plódy): dalé beršýtka i dolé-beršengire phabá, savé me prirakhcjom vaš túke, míro piráno (kamlo). O, sob (kaj) tu te javes miré pšalesa, konéske mirí daj te del kolýn te p'jel! Kóli me lathavas tut pe vulíca (pe gása), to me čamudavas tut, i nikón na dykhélas pe mánde vučipnása. Me lydžavas tut, i me janavas tut dro kher miré-dákiro. Tu sykliakiresas man, a me paniakiravas tut sokósa (xumésa) granatytkone phabendyr. Léskiro zérvo (liévo) vast isyn tel miro šeró, a čačó (pravo) vast oblela man. Me zasovlahava tumen, čhajale Jerusalimóskire, na džangaven i na pharjakiren iló piramniáke (kamliake), paka joj džangadjola kokori. Kon davá džála upré čhučé phuvjátyr, i kon davá pririkirelape pal péskire piramneste? Me džangadyjom tut tel phabelin. Odój tyrí daj bijandiá tut. Odój tyrí rodno daj bijandiá tut. Pričhúv man pe tyró iló syr čergenorí, syr angrusty pe tyró vast, pal-dová so piramnipén (kamlypen) isyn zoraló syr meribén: piramnipén zevlynela syr maĥila (kula); lákire maribnýtka bustiá (striély) isyn syr jagitka bustiá, syr jag, saví na murdjola. Baré paniá naštý te murdiakirel piramnipén, i réki (leniá) na začhuvena les. Kóli te del o manúš saró péskiro barvalypén pal piramnipén, to davá prilenas by jov bangé ilésa. Aménde isyn phen, i láte nane kolynore; so aménge te kerás amaré pheniasa, syr javéna te svatynen la? Kóli joj te javél vantasa (scianasa), to ame kerasas komory (xaromy) rupuvé; kóli te javél joj vudaresa, to ame obsyvasa les kiedrytkone phalienca. Me som vánta, i miré ciucia isyn sýrby vučardia (bašni); pal-davá me javáva dre léskire jakhá syr dasaví, kon lathiá ramánjo (miro). Solomonoste sys vinagradýtko únta (sado) dro Vaal-Gamono: joj otdyjá daja únta rakhibnar'jenge; kažno isyn bangó te janel pal dalé barjakirdé (plódy) bar rupuvé lové. Ne mirí vinagradýtko únta isyn pašýl mánde. Túke, o Solomóne, mek te javél bar (tysjonco), a duj šelá odolénge, savé rakhena barjakirdé (plódy). Tu, kon dživéla dre únta! Tyré malá kandéna tyrí zan (glos), mek i man te šunav tyrí zan. Naš, piramne míro; jav syr mirga (sierna) ci jav syr ternó šyngunó (olienjo) pe bérgi bal'zamitka! Ake, isyn Isajoskiro, Amosóskire-čhavéskiro dykhibén, savó jov dykhélas pal Judéia i Jerusalimo, dre dolé dyvesá, kiéli Ozíia, Iofámo, Aházo i Jezekíia sys Judejákire králja. Šunén, bolybena, pošun, phuv, pal-dová so phenéla Raj Devél: “Me barjakirdjom, ĥazdyjom čhavén, a jone ĥazdynépe pe Mánde. Gurúv džinéla péskire xulás, a óslo (miegári) – péskire-ráskiri štála, ne Izrailjo na džinéla Man, na ĥaljola Miro narodo.” Ai, grehítka manušále, narodo, savó isyn pherdó péskire grehénca, nálačho ródo, xasibnýtka čhavé! Tumé jačkirdé Ras-Devlés, čhurdyné sventoné Izrailjoskire Devlés, risiné pale. Syr iščo (inké) te maráv tumen, kóli tumé usajékh na kandéna? Saró šeró isyn nasvaló, saró iló zamyjá. Ĥeréndyr ke šeró nane léste sastó štéto: fuiá (jazvy), šuvlypená, čyl'čáki (narývy) isyn na žužakirdé, na obphandlé, na kovliakirdé jeliejosa. Tumarí phuv isyn čhučí (pusto), tumaré fórja isyn shačkirdé jagása; tumaré féldy xána čúža manušá angíl tumaré jakhá; saró isyn čhučó syr tén'či, kóli čúža manušá rosčorénas. I jaciápe Sionóskiri čhaj, syr šátra dre vinogradóskiri únta (sado), syr šalášo dre bar (ogorodo), syr fóro, pe savó ĥazdynépe (zauhtylde) vérgi. Kóli b na jačkirdiá Raj Devél, bolybnáskire-jangoléngiro, aménge nabaró jačaibén, to sámas by ame, syr Sodómo, ame zdžásas (podžásas) by pe Gomóra. Thagárja (kniázi) Sodomóskire! Šunén Ráskire-Devléskiro lav! Narodo Gomorátyr, pričhuvén kan ke amaré-Devléskiro Zakóno! “Pe so trej Mánge but tumaré svénta dyibená? – rakiréla Raj Devél, – Me čalyjom bakréngire xačkiribnasa, čalyjom thulypnastyr, Me na kamám butýr guruvorengiro, bakrorengiro i buznengiro rat. Kiéli tumé javéna te sykavenpe angíl Mánde, kon mangéla tumen, sob (kaj) tumé te štaven (te topčynen) ĥerénca Miré gredy (dvory)? Na janén butýr dáry, – davá isyn ivjá (naprásnes), – tumaré kadilakire thuva isyn džungalé (brydka) Mánge; neve čhoná i sávaty (suboty), svenkitko skedyibén Me naštý (na mogináva) te vyrikirav: čoripén i svénko! Na priléla Miro di tumaré neve čhoná i uphendle svénki; davá isyn pharipén vaš Mánge, pharés te lydžav len. I kóli tumé protyrdena tumaré vastá te mangénpe, Me zakerava tuméndyr Miré jakhá; kóli tumé mangénape, Me na šunava: tumaré vastá isyn pherdé dro rat. Vymorenpe, javén žužé; zalen tumaré nalačhé réndy Miré jakhéndyr; pirijačen te kerén čoripén. Vysykljon te kerén lačhipén, rodén čačipén, zrakhen čorores, uštén (zaterdjon) pal bidadeskireste / pirotoste (sirotaste), podrikiren pivlia (udova). “Tén'ci javén, javása te sendiakiras (te roskedaspe),” – rakiréla Raj Devél. “Kóli javéna tumaré gréhi lolé, syr rat, jačéna parné, syr iv, kóli javéna lolé, syr jag jačéna parné, syr výlna (šers') Me parniakirava. Kóli tumé zakamena i javéna te kandén, to tumé javéna te xan lačhipén phuvjákiro. Ne kóli tumé otphenenape, i javéna narta (uporna), to kurtála pohala tumen,” pal-dová so uštá Ráskire-Devléskire phenéna adiáke. Syr biladžakunes parudiape čačipnáskiro šerutno fóro, savó sys pherdó čačuné sendosa! Čačipén dživelas dre léste, a akaná dživéna zamaribnarja (rozmaribnarja). Rup tyró jaciá blatasa, tyrí mol (vino) isyn khetané paniésa. Thagárja (kniázi) tyré na keréna pir čačipén, léngire drúgi (malá) isyn čora. Saré jone kaména myto, prastána pal lové. Jone na uštena (zaterdjona) pal pirotende (sirotende) i pivliakiro (udovakiro) réndo na dodžála ke jone. Paldavá adiáke phenéla Raj Devél, bolybnáskire-jangoléngiro, Zoraló Izrailjoskiro: “O, ĥazdáva Me Pes pe odolénde, kon nane Mánca, Me sykaváva Miré vergénge! I Me protyrdava ke tu Miro vast, Me žužakirava tut šlakostyr, zlava tútyr sarí bláta. I javáva te dav sendar'jen túke, syr angledýr i junkaren/godý-dyibnaskiren (sovietniken), syr sys angledýr; tén'či javéna te rakirén pal túte: Fóro, kaj isyn čačipén; davá baró fóro isyn patiaibnýtko.” Zrakhélape Sióno čačuné sendosa, a čhavé léskire, savé javné ke Devél, čačipnása. A sarénge, kon gijá krig Rástyr-Devléstyr, kon isyn grehítko-xasibén; odolé, kon jačkirdiá Ras-Devlés – xasjona. “Jone javéna ladžakirdé pal dembitka vešá, savé adiáke tuménge isyn pir iló, i tumé loljona pal unty (sady), savé tumé vykedyné péske. I javéna tumé, syr dembo, kóli spyne telé léstyr patria (listy), syr únta (sado), kaj nane paní. Zoraló javéla syr šmata, i léskiro réndo syr jag; javéna te xačon khetané i nikón na murdiakirla.” Lav, savó sys dynó dro dykhibén Isajoske, Amosóskire čhavéske, pal Judéia i Jerusalimo. I javéla dro palatuné (posliednia) dyvesá: Devléskire-Kheréskiri bérga javéla čhudý uprestyr, syr javír bérgi, i javéla ĥazdyny vučedýr, syr javír nabaré bérgicy i vydžána ke joj saré narody. I džána but narodengire manušá i phenéna: “Javén, ĥazdasape pe Ráskire-Devléskiri bérga, dro Jakovóskire-Devléskiro Kher, Jov vysykliakirela amen, i ame javása te psiras Léskire droménca,” pal-dová, so vydžála Zakóno Sionóstyr, a lav Ráskire-Devléskiro – Jerusalimóstyr. Jov javéla te sendiakirél but narody, Jov sykavéla sendariskiro lav ke but ródy; pirikerena péskire kurtaly (miečy) pe plugi (pharadia) i čhurdypnytka bustiá (kop'i) pe čhindlé (sierpy), na javéna te sykljon syr, te lydžán maribén. O, Jakovóskiro kher! Javén, javása te psiras dro Ráskire-Devléskiro dud (svéto). Ne tu jačkirdian tyró narodo, kher Jakovóskiro, pal-dová so jone but pirilyne vastokóstyr: manušá, savé isyn čorahane-podphenybnaskire, isyn lénde, syr ke Filistimliáni, čužoné čhavénca jone keréna khetané réndy. Pherdija léngiri phuv rupésa i suvnakása; na piriginesa léngiro barvalypén; pherdija léngiri phuv grenca i na piriginesa léngire vurdená. Pherdija léngiri phuv idolenca: jone mangénpe doléske, so kerdé léngire vastá, doléske, so kerdé léngire angušta. Pyjá manúš pe čangá, prilyjá murš ladž, i Tu na primangesa lénge. Džá ke bérga, garadjov dre phuv Ráskire-Devléskire darátyr i Léskire šaribnastyr. Prodžála manušéskiro phut'kiribén, peréla manušéngiro vučipén, jekh Raj Devél javéla vučó dro dová dyvés. Pal-dová so džála dyvés Ráskire-Devléskiro, bolybnáskire-jangoléngiro pe saró phut'kirdo i pe saró ĥazdynó, saró ĥazdynó, saró davá javéla ladžakirdó. Pe saré kiedry Livanoskire, so isyn vučé i ĥazdyné, pe saré demby Vasanoskire, – pe saré vučé bérgi, pe saré nabaré bérgicy, so isyn ĥazdyné. Pe kažno vučó kher, pe kažno zoralý vánta. Pe saré pármy (korabli) Farsisososkire, pe saré léngire ukedybena. Peréla manušéskiro phut'kiribén, peréla manušéngiro vučipén, jekh Raj Devél javéla vučó dre dová dyvés. A ídoly sarésa xasjona. I ĥazdénape manušá, dre ĥiebará (pieščery) maškirál skaly te garavenpe Ráskire-Devléskire darátyr i Léskire šarde baripnastyr, kóli ĥazdélape Jov te xasiakirél phuv. Dro dová dyvés manúš vyčhurdela péskire ídoly, rupuvé i suvnakuné, savé kerdiá, sob (kaj) te mangélpe lénge, sob (kaj) te ĥazdelpe (te zadžál) pe bérgi Ráskire-Devléskire darátyr i šarde Léskire baripnastyr, kóli Jov ĥazdélape te xasiakirél phuv. Pirijačen te duminen, so podrikirla tumen manúš, konéste dúho (fáno) isyn dre léste kokoreste, so keréla adavá manúš? Ake, Raj Devél, Raj Devél bolybnáskire-jangoléngiro, zalela Jerusalimóstyr i Judejátyr khija i destó, podrikiribén marésa i podrikiribén paniésa. Ras i xalades, sendaris i prorokós, manušés, savó isyn čorahano (magiko) i phures, Pandždešengire, šerales i baré ras, i god'varé manušés, manušés, savó keréla šukaripén, i odolés, kon džinéla, syr kuč te rakirél. I Me dáva lénge terné-beršengiren dre barydyrende, čhavoré javéna te rossendiakiren (te xulainen) maškír lénde. Jekh javéla tasado javiresa dro narodo, kažno javéla zatasado péskire pašatunesa; ternó čhavó ĥazdélape pe phureste, butiarno – pe raste. Tén'ci uhtyléla manúš péskire pšalés, dre péskiri čékar' (siemieistvo), i phenéla léske: “Isyn túte uribén, jav amaré rása, mek te javén dalé rosphagirdé kherá telo tyró vast.” A jov sovlahala i phenéla: “Naštý te vysastiakirav narodoskire fránsy (dukhá), nane mánde maró i uribén, na kerén man narodoskire xulása” Adiáke phadija Jerusalimo, pyjá Juda, pal-dová so léngiri čib i léngire réndy (diély) nane pal Raste-Devléste, jone na vyrikirena Devléskiro baripén. Mina léngire moskiri dosykavela pal lénde, pal péskiro grého jone rosphenena saró čačipén, syr Sodomliani, jone na garavenape: bída lénge! Kokoré péske jone janéna bibibaht (fuipén). Phenén devlytkoné manušéske: kuč léske, jov priléla barjakirdé (plódy) péskire rendostyr. Ne bída isyn nalačhé manušéske: jov priléla xolý pal péskire réndy. Bijaty tasavena miro narodo, džuvliá xulainena pe léste. Narodo Miro! Tyré xulaja xohade tut, lydžiné krig tut čačuné droméstyr. Uštyjá Raj Devél pe séndo, Jov isyn terdó, sob (kaj) te sendiakirél narody. Devél sendiakirelpe phuredyrenca Péskire narodóstyr, léskire ranca: “Tumé občorde vinagrádniko; dre tumaré kherá rakhelape dová, so tumé čorde čororestyr. So tumé oblena Miro narodo, tasavena čororen?” – rakiréla Raj Devél, Raj Devél bolybaskiro-jangoléngiro. I phendiá Raj Devél: “Pal-dová so čhaja Sionoskire isyn phut'kirdé, gazdena vučés péskiro šeró, kharéna ke pe jakhénca, bašavena lénge ĥerengire ukedeibenca. Občhinela Raj Devél léngire balá pe fiélia makuška (gutup), léla krig léngiro uribén.” Dro dová dyvés otlela Raj Devél lancore ĥerendyr, čergenorja, čhonore. Čenia, miriklia, šeritka dykhlore, vastytka, kustyka, dušlorja (šteklycy) kučoné makhibnasa, čorahane priphandybena. Angrustiá pe angušta i angrustiá dre nakh. Upratuno uribén, telatuny ídia, dykhle, traminengire / muitka (košel'ki). Gindaly, sane gada i dykhle. Gudly sung paruvelape pe nakuč sung; šelo javéla syr kustýk, krenca balá parudjona pe nango šeró, buĥle gada – pe šmaty, šukaripén paruvelape pe tavra. Muršá tyré peréna kurtalátyr, zoralé tyré xasjona pe maribén. Javéna te tanginen, javéna te rovén pašýl šeralé-foróskiri pórta (vráty); i javéla joj te bešél pe sarésa čhučí phuv. I uhtylenape dro dová dyvés eftá (bitrinéngiro deš) džuvliá pal jekhe muršeste i phenéna: “Péskiro maró javása te xas, dre péskiro uribén javása te psiras, ne de, sob (kaj) te kharaspe pir tyró lav, le krig ladž améndyr.” Dro dová dyvés sykavelape dro šukaripén i dre patýv otbaripen Ráskire-Devléskiro, a phuvitko barjakirdó (plódo) – dre baripén i šaribén vaš odolé Izrail'skone čhavénge, savé zrakhnepe. Tén'ci odolé, kon jaciápe pe Sióno i zrakhciape dro Jerusalimo, javéna te kharenpe sventonenca, davá javéna saré, kon isyn začhindló dre lylvarí vaš džiibén dro Jerusalimo. Kóli morela krig Raj Devél Sionoskire čhajengiro magiriben i žužakirela Jerusalimoskiro rat maškír léste sendytkone diesa i jagakire duhósa. I sozdela (keréla) Raj Devél uprál pe kažno štéto, savó isyn pe Sionóskiri bérga, i uprál pe lákiro skedyibén óbloko i thuv dyvesé, i jagitko dud ratý; pal-dová so uprál saró, so isyn patyvalo, javéla učhakirdo. I javéla šátra, sob (kaj) te zrakhespe dyvesé tatypnastyr, vaš dová, sob (kaj) te garadjos, kóli džála bryšýnd. Bagava Me Miré-Drogoneske gilý Mirí, saví isyn drogonoskiri pal Léskiro vinagrádniko. Sys vinagrádniko Miré-Drogoneskiro pe bergitko vučipén. Jov obkerdia (oblydžija) les tynosa, žužakirdia les barendyr, čhudiá dre léste lačhé vinagradoskire kaštá, kerdiá kher dre léste, vyĥanadia odój štéto, sob (kaj) te tasaven vinagrado, i užakirelas, so janéla jov lačhó barjakirdó (plódo), a jov jandiá barjakirdó nálačho. “Kakaná, rossendiakiren Man, manušále, savé dživéna ke Jerusalimo, muršá Judejákire Miré vinagradnikosa. So iščo (inké) treindiá te keráv vaš léske, so Me léske na kerdjom? Sóske jov jandiá nalačhé múri, kóli užakiravas léstyr lačhó barjakirdó? Paldavá phenáva tuménge, so keráva Me Miré vinagradnikosa: Me lav Péske léstyr tyno, i javéla jov čhučó, Me rosphagirava léskire vánty, i javéna te phagiren les. Dasavesa Me les jačkirava: na javéna te občhinen les, na javéna te obĥanaven les, zabarjola jov nalačhé čarjasa, Me priphenava bolybnaske, sob (kaj) jov te na del bryšýnd léske.” Ráskire-Devléskiro, bolybnáskiro-jangoléngiro vinagrádniko isyn kher Izrailjoskiro, a muršá Judejátyr – drógo Léskiro barjakirdó, savó Jov barjakirdia. Užakirelas Jov, so javéla čačunó séndo, ne ake – rat čhuvélape, užakirelas čačipén, ne ake – godlena. Bida tuménge, kon kinela jekh kher pal javír, jekh félda pal javír félda, adiáke, so nane štéto vaš javire manušénge, adiáke, so, sýrby tumé san jekhdžine pe phuv. Raj Devél, bolybnáskiro-jangoléngiro, phendiá dre miré kaná: “Dalé kherá javéna čhučé (pusta), baré i goža javéna, ne nikón na javéla te dživél odój. Deš dielianki dro vinagrádniko janéna jekh bato ziárki, ne jekh xomiero, ziárki, so čhuvenape dre phuv nábut so (liedz') janéla jekh efa.” Bida odolénge, kon tasiarlatyr pe zlóko (pe ránko) rodéla bravinta i ke rat xačkiréla pes moliasa (vinosa). Isyn bašaiben i mol pe léngire svénki, a pe Ráskire-Devléskire réndy jone na dykhéna, na duminéna pal dová, so keréna Léskire vastá. Pal saró davá džála miro narodo dro pliéno, kóli nikón léstyr davá na užakirelas; léskire rajo javéna bokhalé, léskire barvalé zakamena te p'jen (javéna trušale). Pal saró davá buĥlyja liúno (ado), i otkerdia péskiro muj; zdžála odorík léngiro phut'kiribén, léngiro barvalypén, léngiro šumo i saró, so radynela len. Peréla manúš pe čangá, poddelape murš, phut'kirdengire jakhá zmekenape telé začhakirenape. A Raj Devél, bolybnáskire-jangoléngiro, ĥazdélape pe séndo, Svénto Devél sykavéla dro čačipén, so Jov isyn svénto. Bakriá javéna te čaravenpe kokoré pir péste, čúža manušá javéna te xan barvalengire feldatyr. Bida odolénge, savé tyrdena ke pe grého bi rakhibnaskire šelenca, tyrdena ke pe grého sýrby simirienca pe rota. Save rakiréna: “Mek Jov te džal sygedýr, mek te kerél Péskiri butý, sob (kaj) ame te dykhas. Mek te javél, mek te sykavél, so davá isyn – Sventoné-Izrailjoskiro godypén, sob (kaj) ame te ĥaljovas!” Bida odolénge, savé nalačhipen kharén lačhipnása, a lačhipén – nalačhipnasa; i phenéna pe kalypén, so davá isyn dud, a pe svéto – so davá isyn kalypén; phenéna pe kirko, so davá isyn gudló, a pe gudló phenéna – kirkipen! Bida odolénge, savé isyn god'varé dre péskire jakhá, god'varé kokoré angíl péste. Bida odolénge, savé na daréna te p'jen mol (vino), i savé isyn zoralé te kerén la. Save pal lové otmekena odolés, kon isyn bangó, a manušés, savó isyn čačunó, občorena. Pal-dová, so syr jag xála phus i syr xála jag khas, adiáke kirnjola léngiro kašt, luludí (cveto) léngiro rosphurdelape syr práho, pal-dová, so jone začhurdyne Ráskire-Devléskiro, bolybnáskire-jangoléngiro Zakóno, i na šundlé jone lav Sventoné Izrailjoskiro. Pal dová zahačola Ráskire-Devléskiri xolý pe Léskiro narodo, protyrdela Jov Péskiro vast pe lénde, i Jov čilavéla len adiáke, so bérgi izdrana, a léngire trúpy javéna vyčhurdyne pe vulícy (gásy) syr gnejo. I na pirijačéla Léskiri xolý, i vast Léskiro javéla protyrdyno. I Jov ĥazdéla sciago (déla priphenybén) ke narody, savé dur dživéna, vykharela odolés, savó dživéla pe phuvjákiro jagóro (krajo), i, ake – jov lokhes i sýges javéla. Na javéla léste odolés, kon khinyja, kon isyn bizorjákiro, ni jekh na zasovela, na zakerela péskire jakhá; na zlelape léstyr kustýk, na riskirnape léskire triviki. Kurtála léskiri kerdy vaš maribén, petaly léskire grénde isyn syr bar, róty léskire – syr balvál. Godlela jov, syr ščerica (lievica), godlela syr ščer (liévo); zagodlela, uhtyléla doresybén, i nikón na otlela. Zagodlela pe léste dro dová dyvés sýrby mórjo (derjáv), savó xoliásyja; podykhela jov pe phuv, ake: – kalypén, bída, murdija dud (svéto) pe bolybén. Dro dová berš, kóli myjá králi Ozíia, me dykhcjom Ras-Devlés, Savó bešelas pe vučó kralítko štéto, a jagóro (krajo) pe uribén Léskiro pherdiakirdiá sarí Khangirí. Pašýl Léste sys terdé sierafimy: kažnonéste léndyr sys šov phaká (kryly); duje phakenca kažno zakerelas péskiro muj, iščo (inké) duje phakenca zakerelas péskire ĥerá, a duje phakenca vurnialas. Jone kharenas jekh jekhés i rakirénas: “Svénto, Svénto isyn Raj Devél, bolybnáskire-jangoléngiro, sarí phuv isyn pherdý Léskire baripnasa!” Zaizdranas vudará léngire zaniendyr, kher pherdija kučoné thuvesa. Me phendjom: “Bida mánge! Xasijom me, pal-dová, so me som manúš nažužé ušténca, me dživáva maškír manušénde nažužé ušténca, i jakhá miré dykhenas Kralís, Ras-Devlés, bolybnáskire-jangolengires.” Tén'ci vurniandyja ke me jekh sierafimendyr, a dro léskiro vast sys xačkirdo vangar, savó jov lyjá altarjostyr. Jov čiladiá miré uštá i phendiá: “Ake, davá čiladiá tyré uštá, nálačho réndo tyró isyn lynó krig tútyr, i grého tyró isyn žužakirdo.” Me šundjom Ráskire-Devléskiri zan. Jov phenelas: “Konés Mánge te bičhavav? Kon poddžála vaš Aménge?” Me phendjom: “Ake, me som, bičháv man.” Jov phendiá: “Džá, phen dalé narodoske: ‘Javéna te šunén – i na ĥaljona, javéna te dykhén jakhénca – i na rozdykhena [dykhéna-r.s.].’ Pal-dová so nakovlo jaciá dalé-narodoskiro iló, pharés lénge te šunén zakerde jakhénca, i na dykhéna jakhénca, i na šunéna kanenca, i na ĥaljona ilésa, i na obrisjona, sob (kaj) Me te vysastiakirav len.” Me phendjom: “Ci ĥará (dlúges) davá javéla, Rajo, Dévla?” Jov phendiá: “Pirijačéla, kóli dalé fórja javéna čhučé, nikón na javéla te dživél dre lénde, kóli džána manušá dalé kherendyr, kóli daja phuv javéla sarésa čhučí. Otbičhavela Raj Devél manušén, nikonés na jačkiréla pe daja phuv. I kóli jačélape déšto paš pe láte i risjola, usajékh javéla phuv čhučí, ne syr tierievinfostyr i dembostyr, kóli jone isyn čingirde telé, isyn jačaibén, adiáke svénto jačaibén jačélape.” Sys dre dolé dyvesá, kóli Aházo, Iofamóskiro čhavó, Ozíiaskiro čhavó sys králi pe Judéia, o Riecyno, Sirijákiro králi, o Fakiejo, Riemalijoskiro čhavó, králi Izrailjoskiro, giné maribnása pe Jerusalimo, ne na lyné les. Sys phendló ke Davidóskiro kher, sys otkerdo: “Sirijani isyn terdé pe Jefriemóskiri phuv”, izdrandyja léskiro iló, léskire-narodoskiro iló, syr izdrana kaštá dro veš, kóli phurdela balvál. I phendiá Devél Isajoske: “Vydža péskire čhavésa, Šeariasuvosa ke Aházo, odorík, kaj léna paní, pe drom ke félda, kaj makhena bakrengiri výlna (šers'). Phen léske: ‘Dykh i jav štyl, na andyrša, mek te na darel tyró iló duje dalendyr destendyr, savé xačona, Riecynoskire i Sirijanengire i Riemalijaskire čhavéskire xoliátyr, saví lyjá te xačol pe túte.’ Sirija, Jefriémo i Riemaliinoskiro čhavó kaména te kerén túke čoripén, jone phenéna: “Džása maribnása pe Judéia, gazdasa la, zalasa, čhuvasa Tavieiloskire čhavés lákire kralísa. Ne Raj Devél phenéla adiáke: “Na javéla pir tumaró. Sirijákiro šeró isyn Damásko, Damaskoskiro šeró isyn Riecyno, a kóli prodžána šovdešá i pandž berš, Jefriémo pirijačéla te javél narodosa. A Jefriemoskiro šeró isyn Samárija, a Samarijakiro šeró isyn Riemalijaskiro čhavó. Kóli tumé na patiána, to tumé kerene adiáke, paldová, so tumé na upatiándyne.” Iščo (inké) rakirélas Raj Devél ke Aházo i phendiá: “Mang péske ĥiertýk (znamiénijo) tyré Rástyr-Devléstyr, mang dro xoripén ci dro vučipén.” Phendia Aházo: “Me na javáva te mangav, na javáva te propatiakirav Devlés.” Tén'ci phendiá Isajo: “Šun, kher Davidóskiro! Manušá keréna vaš tuménge pharé butý, a tumé kaména, sob (kaj) miro Devél adiáke vaš tuménge te kerél? Ne kokoró Raj Devél déla ĥiertýk/ dosykaiben tuménge: ake, e patyvalý terný džuvlý priléla i bijanéla čhavés, i déna Léske lav: Emanuilo. Jov javéla te xal thud i avgín ke dolé dyvesá, kóli vysykljola, syr te otčhurdel nalačhipen i te vykedel lačhipén. Pal-dová, so angledýr, syr davá čhavoró vysykljola te otčhurdel nalačhipen i te vykedel lačhipén, phuv, savjátyr tu daresa, jačkirena duj lákire králja. Ne janéla Raj Devél ke tu, ke tyró narodo, ke tyré-dadéskiro kher dasavé dyvesá, savé na sys, dolé časostyr (cyrostyr), syr otgijá Jefriémo Judejátyr; Jov janéla Asirijákire kralís.” I javéla dro dová dyvés: vykharela Raj Devél matlia (muha), saví vurniala pašýl Jegiptóskire reka (len') i byrlia (pčola), saví vurniala pe Asirijakiri phuv. Jone privurniana, bešena saré jone pe lengi, savé isyn čhučé, pe bérgi, pe saré phusadytka čarjá; pe saré kaštá (drevy). Dro dová dyvés obmuravela Raj Devél muradluniasa (britvasa), saví Jov zalyja dolé butiarnende pale reka (len'), Asirijákire kralíste šeró i balá pe ĥerá, občhinela čhora (broda). I javéla dro dová dyvés: konéste isyn guruvny i duj bakriá, odová javéla te xal ksil, pal-dová so jone déna but thud; ksil i avgín javéna te xan saré, kon jaciápe pe doiá phuv. Javéla dro dová dyvés: pe kažno štéto, kaj barjolas tysjonco (bar) vinagradoskire kaštá pe tysjonco rupuvé mardé, javéna te barjon phusadytka čarjá. Javéna te psirén odorík maribnytkoné bustienca (strielenca) i lukenca, pal-dová, so sarí phuv javéla učhakirdy phusadé čar'jenca. Na pe jekh bérga, savé angledýr obkerenas motygasa, tu na poddžasa, pal-dová so tu javésa te dares phusadytkone čar'jendyr: odorík javéna te vytraden guruvén, tyknó murdál javéla te marel (te tasavel) ĥerénca dalé čarjá.” I phendiá mánge Raj Devél: “Le péske bari papiria (svítko), čhin odój manušytkoné čhinybnasa: Magier – šielal (šalal) – xaš – baz.” Me lyjom péske čačuné jakhitkonen (svidietielien), savé sys: Urijas, rašás, i Zaharijas, Varahiinoskire čhavés. Lyjom péske džuvliá proročyca dre romniáte, joj bijandiá mánge čhavés. I phendiá mánge Raj Devél: “De léske lav ‘Magier – šielal – xaš – baz.’ Pal-dová so angledýr, syr bijáto vysykljola te phenél: ‘Dádo Miro, Dajo Mirí’ – barvalypén Damaskostyr, doresybén Samarijatyr lydžána angíl Asirijákire kralíste.” Iščo rakirélas ke me Raj Devél i phendiá: “Pal dová, isyn na pir iló dalé narodoske isyn paní Siloamoskiro, savó štylés thadéla, a šarela Riecynos i Riemaliinoskire čhavés, to janéla ke jov Raj Devél baró paní – Asirijákire kralís léskire baripnasa; i ĥazdélape davá paní, vydžála péskire bregendyr. I prodžála jov pir Judéia, vučés doj ĥazdélape, dodžála ke men i rosčhurdela péskire phaká (kryly) dro saró Tyré-phuvjákiro buglypen, Emanuilie!” Marénpe, narody, ne darén, šunén, saré phuvjá, savé isyn dur adathýr! Len kurtála pe maribén, ne darén, len kurtála, ne darén! Zaduminen vari-so te kerén, ne zaduminyben rosphagirelape, rakirén lav, ne ničí na vydžála daléstyr, pal-dová so Devél isyn aménca!” Adiáke rakirélas mánge Raj Devél, kiéli rikirelas pe mánde zoraló vast, i Jov priphenelas, sob (kaj) me te na džav dalé-narodoskire dromésa, i adiáke phendiá: “Na kharén čorahane zrakiribnasa davá, so dová narodo kharéla čorahane zrakiribnasa, na darén doléstyr, sóstyr jov daréla, i na strahadjon. Den svénto patýv Ráske-Devléske, bolybnáskire-jangolengireske, Jov isyn tumarí dar, Jov isyn tumaró trašaibén! Jov javéla sventonesa vaš tuménge, i baresa, savéstyr peréna, bergasa, savjátyr pirijačena te patián duj kherá Izrailjoskire, feliasa (pietliasa) i khudiasa (sietiasa), savénca uhtylena Jerusalimoskiren manušén. But kon léndyr peréla, rozmarelape, zapentynelape i javéna uhtyldé adasavé manušá.” Zaphande dophenybén i garav pe čergenorí (piečat') davá sykadyipen (otkeriben) angíl Miré sykliaibnytkonende. Paldavá me dopatiava Ráske-Devléske, Savó garadia Péskiro muj Jakovóskire (Izrailjoskire) kheréstyr, me patiáva Léske. Ake, me péskire čhavorenca, savén dyjá mánge Raj Devél, syr priphenybén i angilphenybén dro Izrailjo Rástyr-Devléstyr, bolybnáskire-jangoleskirestyr, Savó dživéla pe bérga Sióno. I kóli phenéna tuménge: “Džá ke odolé, kon vykharela mulen, kon isyn čovahano, kon zumavela”, – tén'či tumé phenén: “Ci na trej, sob (kaj) narodo te rodél péskire Devlés? Ci phučena muléndyr pal džidé manušénde?” Propatiakiren len pir sykadyipen dro Zakóno i otkeriben. Kóli jone (kon vykharela mulen) na rakiréna adiáke, syr davá lav, tén'či nane dre lénde dud (svéto). Jone javéna te psirén pir phuv, občorde i bokhalé, a dre bokhalé dyvesá javéna te xoliason, javéna te košen péskire kralís i péskire Devlés. Javéna te dykhén upré i podykhena pe phuv: ake, bída, kalypén; javéna čhurdyné dro kalypén, ne na javéla kalypén saré dyvesá odój, kaj jov akaná skedyjape. Dro anglatunó časo (cýro) sys teliakirdy Zavulonoskiri phuv i phuv Niefalimoskiri; ne dová časo, savó javéla, ĥazdéla baripnasa drom pašýl mórjo (derjáv), pal Iordanoskiri phuv, Galiliéia, kaj Najudýtka manušá dživéna. Narodo, savó psiréla dro kalypén, javéla te dykhél dud; ke odolé, kon dživelas dre kalypén (cjomnyma) syr meribén, zahačola dud. Tu ĥazdesa dúho (fáno) dro narodo, i désa léske bari rádyma. Radypnytko Jov javéla te radynélpe angíl túte, syr radynénape manušá, kóli skedéna maró, kóli rozlena doresybén. Pal-dová so ĥámo, pharipén léskiro, destó, savó les marelas, Tu phagiresa syr dro Madiamoskiro dyvés.” Pal-dová, so kažnoneskire-xaladeskire tyraha maribnastyr, uribén léskiro, savó isyn dro rat, shačkirena, otdena, sob (kaj) jag te shal len. Pal-dová so Bijáto bijándyja aménge, čhavó isyn dynó aménge; Jov léla zor dro Péskiro vast, i déna Léske lav: Lačhó Godypnari, zoraló Devél, Dad, konéste isyn viéčno džiibén, dalé-svetoskiro Thagári (Kniazjo). Zor Léskiri i ramánjo (miro) na pirijačéla pe Davidóskiro trono dro Léskiro kralipén, sob (kaj) Jov (Devél) te podrikirél les sendosa i čačipnása dalé dyveséstyr i pe saró viéko. Zevlynypen Ráskire-Devléskiro keréla davá. Raj Devél bičhavéla lav ke Jakovo, i pe Izrailjo Jov zdžála. Sob (kaj) te džinél saró narodo, Jefriémo i Samarijakire manušá, savé rakiréna baripnasa i isyn phut'kirdé ilésa: “Pyné bará – lása javír bará, isyn vyčhingirde sikomory – zaparuvasa len pe kiedry.” Ĥazdela Raj Devél pe léste (Jefriemoste) Riecynoskire vergén, i Jov déla kurtála odolénge, savé xoliasona pe léste. Sirijani vastokóstyr, Filistimliáni zapadostyr; i jone javéna te xan Izrailjo pherdé mósa. I na prodžála iščo (inké) Léskiri xolý, i vast Léskiro isyn protyrdyno. Ne narodo na obrisjola ke Odová, Kon marela les, na rodéla Ras-Devlés, bolybnáskire-jangolengires. Otčingirela Devél Izrailjostyr šeró i pori, pal'ma i destó dro jekh dyvés. Phuró i barvaló – davá isyn šeró, a proróko – xohaibnari – davá isyn pori. Dalé-narodoskire šeralé xohavena odolén, i kon isyn khetané lénca, odolé xasjona. Paldavá na javéla te radynélpe Raj Devél pal léskire terné manušénde, na potanginela léskire bidadeskiren i biromeskiren pal dová, so saré jone isyn xohaibnarja i čora, uštá léngire phenéna nalačhé lavá. Paldavá na prodžála Léskiri xolý i vast Léskiro isyn protyrdyno. Pal-dová so grého roshačija, syr jag xála phusadé čarjá, xačola dre vešá, i thuv ĥazdélape stylbosa. Ráskire-Devléskiri, bolybnáskire-jangolengiri xolý xačkiréla phuv, narodo kerélape sýrby xabén vaš jag, na potanginela manúš péskire pšalés. Javéna te čhinen pir čačí rig – a bokhalé jačénape, javéna te xan pir liévo (zérvo) rig – na čaljona; kažno javéla te xal kokoró pes. Manásija xála Jefriemos, Jefriémo xála Manasijas, a khetané jone xána Judas. I na pirijačéla Léskiri xolý, i vast Léskiro isyn protyrdyno. Bida odolénge, savé déna na čačuné zakóny, savé začhinena zahale priphenybená. Sob (kaj) te zalen čororendyr čačunó séndo, sob (kaj) te občoren podrikiribén nazorale manušéndyr Miré narodóstyr, sob (kaj) te zalen vaš péske džuvlién, savé isyn biromeskire (pivlien), sob (kaj) te občoren bidadeskire čhavorén (piroten). So tumé javéna te kerén dro dyvés, savó javéla, kóli javéla durál tumaró xasibén? Ke kon poddžana tumé te poden vast, kaj jačkirena tumaró barvalypén? Bi Miro tumé bandjona maškír manušénde, savén zalyne dro bešyben, peréna maškír domardé manušénde. Pir saró davá, Léskiri xolý na pirijačéla i vast Léskiro isyn protyrdyno. “O, Asurie, destó Miré xoliátyr! Čhupny dro léskiro vast isyn Mirí xolý! Me bičhaváva les pe grehoskiro narodo, pe narodo, so prilyjá Mirí xolý; Me dáva léske priphenybén, sob (kaj) te čorel baré čoribnasa, sob (kaj) te doresel doresybén, sob (kaj) te kerél dalé narodóstyr bláta pe vulíca (gása). Ne jov na adiáke poduminela, na adiáke javéla te myslinel léskiro iló léste: ‘Syr by te občorel, te zamarél but narody?’ Jov phenéla: ‘Ci na saré králja isyn miré thagárja (kniázi)? Ci na Xalnjo, ci na dová, so isyn Karhiemiso, ci Jemafo na dová, so isyn Arpado? Ci Samárija na dová, so isyn Damásko? Kóli zalyja Miro vast idolytka kralipená, kaj butýr isyn ídoly, syr isyn dro Jerusalimo i dre Samárija. Ci na keráva Me adiáke Jerusalimosa i léskire kerdé mujenca (izvajanijenca), syr kerdjom Me Samarijasa i lákire idolenca?’” Javéla adiáke: kóli Raj Devél keréla saró Péskiro réndo pe bérga Sióno, i dro Jerusalimo, jov phenéla: “Podykhava Me pe Asirijákire kralíste, pe phut'kirdo léskiro iló, pe jakhá léskire, savé isyn vučés ĥazdyné. Jov phenéla: “Miré zorjása, miré godiása kerdjom me dáva, pal-dová, so me som god'varó: Me paruvava narodonengire rigá (miéžy), čorava léngiro kučipén, Me čhurdava telé tronostyr, syr zoraló manúš.” Vast miro zauhtyldia narodonengiro barvalypén, syr zalena čiriklengire parnore, adiáke me zalyjom sarí phuv, i nikón na ĥazdyjá phak, na otkerdia muj, na phendiá ničí.” Ci šarelape pésa tover angíl odoléste, kon čingirela lésa? Ci phutjola rizil (pila) angíl odoléste, kon čhinela lása? Ci ĥazdélape destó pe odoléste, kon les ĥazdyjá, ci ĥazdélape destó pe odoléste, kon isyn na kašt? Paldavá keréla Raj Devél, bolybnáskire-jangoléngiro adiáke, so thule vyšutjona, a maškír baré léskire manušénde roshačkirela jag, xačkiréla sýrby jag. Dud (svéto) Izrailjoskiro javéla jagása, i Svénto léskiro – dolé jagása, saví shačkiréla i shala léskire phusadé čarjá dro jekh dyvés. Lačhó veš léskiro, léskiri únta (sado), shala joj sarésa, di i masá, i javéla jov, syr isyn nasvaló, savó meréla. Adiáke nábut jačélape kaštendyr, so bijáto len poginela. Javéla dro dová dyvés: Izrailjoskiro jačaibén i odolé; kon zrakhciape Jakovóskire kheréstyr, na javéna te dopatian butýr odoléske, kon domardiá len, ne jone javéna te patián Ráske-Devléske, Sventoné-Izrailjoskire Devléske saré ilésa. Jačaibén obrisjola, Jakovóskiro jačaibén risjola ke zoraló Devél. Kóli b te javél túte, Izrailie, adákicy manušén, kicý isyn práho pe mórjo (derjáv), obrisjola jekh jačaibén: xasibén javéla pir čačipén, pir čačipén phendló, so javéla xasibén. Hasibén déla Raj Devél, Devél, bolybnáskire-jangoléngiro, pe sarí phuv. Paldavá adiáke phenéla Raj Devél, Raj Devél, bolybnáskire-jangoléngiro: “Narodo Miro, savó dživéla pe Sióno, na dar Asurostyr. Jov vydžála pe túte, ĥazdéla pe túte péskiro destó, syr Jegípto. Iščo (inké) nábut, sarésa nábut i prodžála Mirí xolý, obrisjola Mirí xolý, sob (kaj) te xasiakirél len.” Ĥazdela Raj Devél, bolybnáskire-jangoléngiro, čhupny pe léste, syr tén'či, kóli sys rozmardo Madiamo pašýl bérga Oriva, ci kóli sys destó protyrdyno pe mórjo (derjáv), i Jov ĥazdéla les syr pe Jegípto. Javéla dro dová dyvés – zlelape pharipén tyré meniatyr, peréla pharipén thule masestyr. Jov džála pe Aiafo, prodžála Migrono, jov čhuvéla péskiro doresybén dro Mihmaso. Jov prodžála venskone dromésa, dre Gieva jone rat'kirena; izdrala Ráma, prastándyja ke Givá Sauloskiri. Ĥodle de tyré zaniása, Galimoskiri čhaj, mek te šunél tut Laiso, čororó Anafofo! Madmiena rosprastandyjape, odolé, kon dživéla ke Gievimo, sýges udžana. Iščo (inké) dyvés javéla terdó jov ke Nova [Nob-ju.o.]; sykavéla péskire vastésa bída Sionoske, Jerusalimóskire bergake. Ake, Raj Devél, Raj Devél, bolybnáskiro-jangoléngiro, sčhinela darane zorjása vétki kaštendyr, phut'kirdé javéna čingirde, vučé peréna pe phuv. I Jov počingirela vešytko ĥenstyma sastyresa, peréla Liváno Sarezorjakirestyr, Konéste isyn zor saró te kerél. I vybarjola otbaripen Jesiejoskire kornjostyr (rukhestyr); kadavá rukh vybarjakirela neví rand'. Javéla čhudo pe léste Ráskire-Devléskiro Dúho (Fáno), dúho, savó déla Devléskiri godý i godypén phuvitko; savó déla podphenyben i zor, dúho pir džinybén i pir svénto džiibén. Ráskire-Devléskire darása pherdjola Jov, i javéla Jov te sendiakirél na adiáke, syr dykhéna Léskire jakhá, na adiáke, syr šunéna Léskire kaná. Jov javéla te sendiakirinel čororen čačipnása; kodolengire, kon stradynela pe phuv, réndy čačipnása rossendiakirela; Jov Péskire vuštengire destesa marela phuv, Péskire vuštengire duhósa zamarela grehitkoné manušés. I obphandelape Jov čačipnása pir trušula (čriesly), čačipén javéla Léskiro obphandypen upré pir ĥerá. Tén'ci ruv javéla te dživél khetané bakroresa, rič javéla paštó khetané buznoresa; guruvoro, ternó ščer (liévo) i ruv khetané javéna; tyknó bijáto javéla len te lydžál. Gurumny javéla te čaravelpe ričihasa, čhavoré léngire javéna pašté khetané; ščer (liévo) javéla te xal phus, sýrby guruv. Bijáto javéla te khelel (te broinel) pašýl sapeskiri nora, jov protyrdela péskiro vast ke saplyniakiri gniázda (kúfo). Na javéna te kerén xolý ci doš pe Mirí svénto bérga, pal-dová so phuv pherdjola Devléskire džinybnasa, syr mórjo (derjáv) pherdjol paniésa. I javéla dro dová dyvés: ke kornjo (rukh) Isiejoskiro, savó jačéla syr sciago te prikharel narody, obrisjona Najudýtka nácyi, i baripnasa javéla léskiro otkhinyben. Javéla dro dová dyvés adiáke: iščo (inké) protyrdela Raj Devél Péskiro vast, sob (kaj) te riskirél jačaibén Péskire narodóstyr, savó jačélape ke Asuro, dro Jegípto, ke Patroso, ke Xuso, ke Jelamo, ke Sienaaro, ke Jemafo, pe ostrovy, savé isyn pir mórjo (derjáv). I kharéla ke Pe Najudýtka nácyi i skedéla Jov vytradyné manušén Izrailjostyr, i rosčhurdyne Judén skharela štaré jagorendyr pe phuv. Jefriémo pirijačéla te del jakhalo (te zavidynel), saré, kon ĥazdyjápe pe Judaste, javéna xas'kirde; Jefriémo na javéla te del jakhalo Judáske, Juda na gazdelape pre Jefriemoste. Priurniana pe Filistimlianengire psiké ke zapado (ke pal-panitko rig); občorena sarén čhavén vastokóstyr, protyrdena péskiro vast ke Jedomo ke Moávo; Amonoskire čhavoré javéna léngire butiarnenca. I vyšut'kirla Raj Devél reka (len'), so isyn pašýl mórjo (derjáv) Jegiptóskiro, protyrdela Jov Péskiro vast ke reka (len') dre zoralý balvál, rozmarla la pe eftá javír rekicy, adiáke, so dre triviki javéna la te piridžan. Tén'ci vaš jačaibén Léskire narodóstyr javéla baró drom, syr davá sys vaš Izrailjo, kóli jov vydžálas Jegiptóskire phuvjátyr. I phenésa dre dová dyvés: “Barjakirava me Tut, Rajo Dévla; Tu xoliasosa pe mánde, ne pirijaciá Tyrí xolý, Tu potangindian man. Ake, Devél isyn Miro zrakhibén; dopatiav Léske i na darav, pal-dová, so Raj Devél isyn zor mirí, bagaiben miro – Raj Devél; Jov sys Miro zrakhibén.” Dre tumarí rádyma javéna te len paní, kaj ganyng déla zrakhibén. I phenéna tumé dro dová dyvés: “Barjakirén Ras-Devlés, prikharen Léskiro lav, rosphenén dre narody pal Léskire réndy (diély); ripirén, so baró isyn Léskiro lav. Bagán Ráske-Devléske, Jov kerdiá baró, te džinén davá pir sarí phuv. Jav lošaly (viesjolo), rádynpe, manušny Sionóstyr, pal-dová so baró isyn maškír túte Svénto Izrailjoskiro.” Angilphenybén pal Vavilóno, savó phendiá Isajo, Amososkiro čhavó. Ĥazden sciago (prikhariben) pe otkerdy bérga, godlen, sykavén lénge vastésa, sob (kaj) jone te džán dre rangiri pórta (vráty). Me dyjom priphenybén kodolénge, konés vykedyjom, prikhardjom, sob (kaj) te vykerelpe (te spolninélpe) Mirí xolý Miré zoralengiri, savé radynénape Miré baripnastyr. Baró šumo isyn pe bérgi, sýrby buté narodóstyr; šumo, savó ĥazdyné kralipená i narodo, skedynó khetané: Raj Devél, bolybnáskire-jangoléngiro, obdykhela xaladéngiro strojo. Jone džána duratuné rigátyr, bolybnáskire jagoróstyr (krajostyr) Raj Devél i strumiénty Léskire xoliátyr, sob (kaj) te xasiakirén sarí phuv. Rovén, džála Ráskire-Devléskiro dyvés, džála, syr zor, saví phagiréla saró, Sarezorjakirestyr. Paldavá vastá sarénde obmeknepe i zamyjá iló kažnoné manušéste. Piridarandyne, zanasvalyne darátyr, menčinenape, syr džuvlý, kóli joj bijanéla; ničí na ĥaljona, dykhéna jekh pe jekhéste, muiá léngire xačona. Ake, javéla Ráskire-Devléskiro dyvés, zahalo, baré xačkirdé xoliamipnasa, sob (kaj) te kerél phuvjátyr čhučí phuv, te xasiakirél pe láte lákire grehitkoné manušén. Bolybnáskire čergeniá butýr na xačona, kham murdija, kóli gazdelape, čhon na sykavéla péskiro dud (svéto). Me othava (otdáva) pale svetoske pal nalačhé réndy, a grehitkoné manušénge – pal léngire gréhi; Me xasiakiráva phut'kiribén kodolengiro, kon drieván zadelape, Me xasiakiráva phut'kiribén kodolengiro, kon pritasavela čororen. Me keráva adiáke, so manušá javéna kučedyr (drogedyr), syr isyn mol žužó suvnakái, i muršá – kučedyr Ofiroskire suvnakástyr. Vaš davá Me čilavava bolybén, i phuv zdžála péskire štetóstyr, kóli xoliasóla Raj Devél, bolybnáskire-jangoléngiro, dro dyvés, kóli zahačola Léskiri xolý. Tén'ci kažno, syr zatradyny sierna, syr čhurdyné bakriá, risjola ke péskiro narodo i kažno prastala pe péskiri phuv. Ne kon poperelape, odolés zamarena, konés uhtylena, odová perla kurtalátyr. Léngire čhavoré javéna rozmarde angíl léngire jakhá, léngire kherá javéna rozčorde, léngire romniá javéna ladžakirdé. Ake, Me ĥazdáva pe lénde Midianen, konéske na trej rup, i kon isyn na skempo (kon naĥalko ke suvnakái). Léngire luki domarena ternen, na potanginena (na požalinena) bijatén, léngiri jakh na potanginela čhavorén. Vavilóno, šukaripén pir saró kralipén, Xaldiejoskiro phut'kiribén, Devél xasiakiréla syr Sodómo i Gomóra. Nikón odój na javéla te dživél, na javéna te dživén manušá odój nikoli; na čhuvéla Aravitianino péskiri šátra, čhupnárja bakrenca na javéna odój te otkhinjon. Ne javéna te dživén odój riskiribnáskire murdalá (zvieri) čhučé phuvjátyr; kherá javéna pherdé čiriklienca; čirikliá i murdalá javéna te uhten odój. Šakaly javéna te vyinen dre léngire thagaritka komory, gijeny zabešena dre kherá, kaj ĥaredyr radynenaspe. Pašyledýr isyn léskiro časo, na javéna te tyrdenpe léskire dyvesá, pal-dová so potanginela Raj Devél Jakovós, iščo (inké) javéla pir iló Léske Izrailjo, i Jov déla, sob (kaj) te dživén jone pe Léskiri phuv, javéna ke jone javire-rigátyr manušá, priphandenape ke kher Jakovóskiro. Zalena len narody, janéna pe léngiro štéto, i kher Izrailjoskiro priléla len ke pe Ráskire-Devléskiri phuv dynar'jénca i dynaricenca, zauhtylela odolén, kon uhtyldia dro pliéno Izrailjos, javéla raj maškír odolénde, kon les tasavelas. Javéla adiáke dro dová dyvés: kóli Raj Devél zalela tútyr tyrí dukh, tyrí dar, tyró pharipén, dre savó tu sánas, to tu bagasa phut'kirdy gilý pal Vavilonóskire kralíste i phenésa: “Nane odolés, kon man menčynelas, pirijaciá čoriben! Phagirdiá Raj Devél grehitkoné-manušéngiro destó, destó kralítko, savó xoliása zamarelas narody, xoliása isys baró Raj dre kherítka ródy, i tradelas len. Sarí phuv otkhinjola, jaciá štyl, godlela bahtiatyr. Kiparisy radynénape pal túte i kiedry Livanoskire; jone rakiréna: “Kóli tu zasutian, nikón na javélas te čingirel amen.” Liúno (ado), savó isyn telál, ĥazdyjápe vaš túke, sob (kaj) jone te dykhés tut, kiéli tu zadžasa; džangadia vaš túke Riefaimen, sarén phuvitkonen ran, ĥazdyjá sarén Najudytkoné-nacyiengire kral'jén thagaritkone šteténdyr. Saré léna te rakirén túke: “Tu jacián bizorjákiro, syr ame, tu zdžasa pe aménde! Dro liúno (ado) isyn čhurdynó tyró phut'kiribén saré tyré šumosa, telé túte paštó isyn kirmo, kirme tut učhakirena. Syr pyjan tu bolybnástyr, dyvesýtko čergen, čhavó zorjakiro! Rozmardianpe pir phuv, kon pe narody ĥazdelaspe. A phenesas tu dro péskiro iló: “Ĥazdavape pe bolybén, vučedýr, syr čergeniá Devlytka, me ĥazdáva miro thagaritko štéto (trono), bešava pe bérga maškír péskire devlende, odój, kaj končynelape paš-dyvés (sieviero). Ĥazdavape me pe bolybnytko vučipén, javáva me te zdžav (poddžav) pe Sarevučedyreskire Devléste.” Ne tu san čhurdynó dro liúno (ado), dro léskiro xoripén. Kon tut dykhciá, rozdykhena tut, duminéna pal túte: “Ci kodová isyn jov, kon trinskirelas phuv, konéstyr kralipená izdranas? Kon kerdiá dalé baré svetóstyr čhučí phuv, kon phagirelas fórja, kon uhtylelas manušén dro pliéno i kheré na mekelas?” Saré králja manušéngire, saré isyn pašté patyvása, kažno dre péskiri koplíca [dro péskiro kher-ju.o.]. A tu san čhurdynó koplicatyr (grobnicatyr), syr nalačhi rand', syr uribén kodolengiro, konés zamardé, zamardé kurtalása, konés garadé dre phuv, tu san syr vyčhurdyno trúpo. Ne tu javésa khetané lénca dre maĥila (kula), pal-dová so tu občordian péskiri phuv, zamardian tyró narodo, nikoli na priripirelape lačhipnása čorengiro ródo. Skedén léskire čhavén pe meribén, pal léngire dadéngiro grého, sob (kaj) jone te na ĥazdénpe, te na zalen phuv, te na bijanen vergén (vrogen) pe svéto. “Ĥazdavape Me pe lénde, – phenéla Raj Devél, bolybnáskire-jangoléngiro, – Me xasiakiráva, Vavilonóskiro lav, i saró jačaibén, i čhavés i léskire ŭnukos,” – rakiréla Raj Devél. “Me keráva adiáke, sob (kaj) te javén doj sapa i bláta, i Me vyšulavava les xasibnytkone vienikasa (šuladiasa)”, – rakiréla Raj Devél, bolybnáskiro-jangoléngiro. Sovlahala Raj Devél, bolybnáskire-jangoléngiro: “Syr Me podumindjom, adiáke javéla, syr Me phendjom, adiáke kerélape. Sob (kaj) Me te rozmarav Asuro pe Mirí phuv, te rostasavav les pe Miré bérgi; i perla léndyr léskiro ĥámo, zlelape pharipén léngire psikendyr.” Dasavo isyn priphenybén pal sarí phuv, ake, isyn vast, protyrdyno ke saré narody. Paldová, so Raj Devél, bolybnáskire-jangoléngiro priphendiá, i kon saštý (moginéla) te otparuvel davá? Léskiro vast isyn protyrdyno, te kon les otriskirela.” Dro dová berš, kiéli myjá králi Aházo, sys dasavo lav prorokostyr: “Na rádynpe Filistijakiri phuv, so phadjola destó, savó tut marelas, pal-dová so sapitkone rodóstyr vydžála sap, a dalé sapestyr – sap, savó javéla te vurnial. Tén'ci čororé javéna čale, kon mangelas lové – kuč zadživena, a tyró ródo Me xasiakiráva bokhasa, bokh domarela tyró jačaibén. Rov, pórta (vráty)! Gódla de, fóro! Rosperesape tu, sarí phuv Filistimijakiri, pal-dová so thuv džála paš-ratitkoné (šylale) rigátyr (sievierostyr), nikón na jačélape pe léngire skedyibena. So ž phenéna odolé, savé janéna nevipená vaš narodoske? – Dová, so Raj Devél kerdiá Sióno zoralesa, odój zrakhenape čororé Léskire narodóstyr.” Angilphenybén pal Moavoste. – Adiáke! Ratiákiro javéla občordo i xasiakirdo Ar-Moávo; adiáke! Ratiákiro-Kir-Moávo javéla občordo i xasiakirdo! Jov ĥazdélape ke Baito i Divono, ĥazdélape pe vučé štéty, sob (kaj) jov te rovel; rovela Moávo pal Nevó i Miedieva, lénde sarénde isyn občhindlé balá, sarénde isyn vymurade čhora (broda). Pe vulícy (gásy) léngire obphandenape balytkone gonesa, pe léngire baré dromá [pe foruniá-r.s.] i pe strehi saré rovena, saró isyn dre jasva. Godlela Jesievóno i Jelieala, zan léngiri isyn šundly ke Iaaca, pal lénde lyné te rovén xaladé Moavostyr, di léskiro ĥazdyjápe dre léste. Rovela miro iló paló Moávo; prastána léstyr ke Sigoro, ke tríto Egla, ĥazdénape pe Luhito roibnasa; daranes godlena pir drom Xoronaimoskiro. Pal-dová so pirijaciá te thadel Nimrimoskiro paní, vyšutine féldy, vyhačija čar, nane zelenyben. Pal-dová jone isyn jačaibén barvalypnastyr; so zrakhné jone – dová pirilydžana pale reka (len') Aravijakiri. Godlena pir saró Moávo ke miéžy, ke Eglaimo isyn léskiro roibén, ke Bieer-Elimo isyn léskiro roibén. Pal-dová so dro paní Dimonoskiro thadéla rat, a Me lydžáva pe Divono iščo (inké) nevipen-ščeren (lieven), pe odolénde, kon nastiá Moavostyr i jaciápe pe daja phuv. Bičhaven bakrorén ráske, konéskiri isyn daja phuv, Sielatyr bičhaven pe čhučí phuv pe Sionoskire-čhakiri bérga. Syr zabludno (zablendyndly) čirikly, vyčhurdyny pe phuv, javéna čhaja Moavitoskire pašýl brody Arnonoskire. “Čhuv sovieto (skedyibén), obdumin, so te kerén, učhakir amen dyvesé, syr ratý tyré uribnasa, prilé vytradynen, na vyde bikhereskiren. Mek te dživén nábut túte miré vytradyné Moavitiani, zrákh len čorestyr, pal-dová so javéla časo, kóli na jačéla bitangipnaskires, pirijačéla čoriben, odolé, kon ĥazdyjápe pe túte, xasjona dalé phuvjátyr.” Kralítko štéto javéla zoraló lačhipnása, i bešéla pe léste dro čačipén, dre šátra Davidoskiri, sendári, savó rodéla čačipén, keréla čačó séndo. Ame šundiám pal Moavoskiro phut'kiribén, pal baró léskiro phut'kiribén, pal léskire šaribena i xolý, jov phenéla xohané lavá. Paldavá zarovela Moávo pal Moávo, saré léna te rovén pal kherá Kirhariešetoskire: jone isyn sarésa phagirdé. Feldy Jesievonoskire vyšutine, adiáke isyn Sievamoskire vinagradnikosa, narodengire rajo vyčhindlé léskire lačhé kaštá, savé barjonas ke Iajeziero, tyrdenaspe pir čhučí phuv léskire randiá (vétki) buĥljonas, jone piridžanas paló mórjo (derjáv). Paldavá i me javáva te rovav pal kašt Sievamoskiro Jazieroskire roibnasa, me vyčhuvava Miré jasva pe túte, Jesievóno i Jelieala, pal-dová so kóli skedéna tyró vinagrado (drakh), syr skedéna tyró maró, nane butýr rádyma. Hasijá dalé lačhé phuvjátyr saben radymása, na bagana, na radynénpe dre vinagradniki; na keréla vinagradari mol (vino) dro prieso: Me kerdjom adiáke. Paldová tanginela miro iló syr bašady (gusli) pal Moávo, i iló Miro – pal Kirhariešeto. I adiáke javéla: kiéli javéla bicialó, so Moávo khinjola pe vučé štéty, tén'či jov javéla pe svénto štéto te mangélpe Devléske, ne léste nisó na vydžála. Ake, isyn lav, so phendiá Raj Devél pal Moávo iščo (inké) dre ĥaratuné dolé dyvesá: Ne akaná, ake, so Raj Devél phendiá: “Pir dalé trin beršá sýrby butiarneste, konés lyné pe butý, but manušá javéna te dykhén vučipnása pe sláva Moavoskiri, i nábut bizorjákire manušá jačénape.” Phenybén pe Damásko. – “Ake, Damásko pirijačéla te javél forosa, i jov javéla gruda ruinendyr. Aroeroskire fórja mekéna manušá, jone javéna štetosa vaš ĥurty bakréngire, so javéna te pasjon odój, i nijékh na javéla te trašavel len. Tvardyma Jefriemóskiri i Damaskoskire-kralipnaskiri i khetané Sirijakire jačaibnasa, javéla dasaví-pac' syr i sláva Izrailjoskire čhavéndyr”, – rakiréla Raj Devél, bolybnáskire-jangoléngiro. “I javéla adiáke dro dová dyvés, so tyknjola sláva Jakovoskiri, i thulypen léskire maséndyr javéla šukedyr. I javéla adiáke-pac', sýrby givá-čhinybnaskiro manúš, savó skedéla ziárki i čhinela kolosy givengire péskire vastésa i sýrby javír manúš, savó skedéla kolosy pe doloskiri phuv Jefraimoskiri. I jačénape léste sýrby duj ci trin olivitka múri pe sámo upratuny rand', ci štar ci pandž pe sámo phabitko rand' paló dová, syr vymarena (ukedena) umaloto olivitkone kaštéstyr”, – rakiréla Raj Devél, Devél Izrailjoskiro. Dro dová dyvés o manúš javéla te dykhél pe Sozdyibnaskireste, i léskire jakhá javéna te sykavén patýv Sventoné Izrailjoskireske, Jov na javéla te dykhél pe altári, so isyn butý léskire vastengiri, jov na javéla te del patýv, so kerdé léskire angušta (pal'cy), ci pe kaštune ídoly Astartakire ci khamitka (Vaaloskire). Dro dová dyvés zoraliakirde fórja javéna syr meknó štéto dro veš i pe bergakire vučipená, so javéna mekné angíl čhavénde Izrailjoskirende: i javéna ruíny (čhučó štéto). Pal-dová so tu, Izrailjo, bistyrdian Devlés, tyrés Zrakhibnaskires, i tu na rikirdian dre godý, skála tyré – foróskire ripiribnastyr; paldavá tu počhudian kamibnytka unty (sady) i vyčhudian na tumaré phuvjákire-raslinakire randjorja. Dro dová dyvés tu kerésa saró adiáke, sob (kaj) tyrí raslina te barjol, i, sob (kaj) tasiárles (ránes) pe zlóko (ránko), tyrí ziárka te luludjol (te cvietinel); ne dro sčhinybnaskiro (skedyibnaskiro) dyvés javéla túga smentnymasa pe ruinengiri gruda. Bida i šumo buté-manušéngiro, jone šuminena syr mórjo (derjáv) brilinela (rievinela), pe sýgno šumo manušytkoné-nacyiéngiro, savé našéna šumosa syr šumo buté-paniengiro! Manušýtka nácyi brilinena (rievinena) syr šumo buté-paniengiro, ne Devél darjakirdia, i jone javéna te našén dur, i len javéna te tradén syr práho pe bérgi balvaliasa, syr prahinka (pylo), so krencynelape riskiribnáskire balvaliasa. Tén'ci, ake, bel'velié bari dar! I angíl zlóko (ránko), les butýr nane. Kadasavi isyn dólia odolengiri, kon občorela amen, i žriebije (taláno) kodolengiro, savé otkedena zorjása amaró mištypén. Bida phuvjake, saví učhakiréla phakenca pir doiá rig Jefiopijakire rekendyr (lenor'jendyr). Saví bičhavéla manušén (poslen), sob (kaj) jone te rosphenén nevipen, pir mórjo (derjáv) i pir paní dre papirusytka lad'i. Džán sygedýr, sygna bičhaibnaskire te rosphenén, džán ke narodo, zoraló i sastó, ke narodo, so isyn darano angledýr saréstyr ke adadyvés, ke narodo vučó, savó pe saró ĥazdelpe; léskiri phuv rosčhinena réki (leniá). Saré tumé, kon dživéla pe svéto i pe phuv! Dykhén, kóli špéra maribnýtko ĥazdélape pe bérgi, i kóli bašady zabašavela, to šunén! Pal-dová, so adiáke phendiá mánge Raj Devél: “Me štylés dykháva Miré kheréstyr, syr lačhó tatypen dro momiento, kóli progijá bryšýnd, syr oblako pahlyniasa (rosasa), kóli skedéna maró i pekela kham. Angledýr doléstyr, syr vybarjola vinagrado (drakh) i léna les te skedén, Jov otčhinela randiá čhurjasa, i otlela i otčingirela. I jačkirena saró davá čiriklienge pe bérgi i feldytkone murdalénge (zvierienge), čirikliá javéna te dživén odój lynaskiro, a saré feldýtka murdalá (zvieri) javéna te dživén odój ivantakiro (zimakiro). Dro dová dyvés janéna Ráske-Devléske bolybnáskire-jangoleskireske, dáro zoralé i saste manušá narodóstyr, vučé i darane narodóstyr, savó pe saró ĥazdelpe te tasavel, a léskire réki (leniá) rosčhinena phuv, janéna dáro pe štéto, kaj isyn Ráskire-Devléskiro, bolybnáskire-jangoléngiro lav, pe bérga Sióno. Angilphenybén pal Jegípto. – Ake, Raj Devél isyn beštó pe bolybén i javéla dro Jegípto. I izdrana Léskire móstyr ídoly Jegiptóskire, i iló Jegiptóskiro biladjola (rostainela) dre léste. “Me ĥazdáva Jegiptianen pe Jegiptianende, javéna te marénpe pšal pšalesa, mal malesa, fóro forosa, kralipén kralipnasa. I dúho (fáno) Jegiptóskiro xasjola, Me rozmarava léskiro godypén (sovieto) i prastána jone ke ídoly, ke manušá, savé isyn čovahane (magi), savé vykharena mulen, savé zumavena. I otdáva Me Jegiptianen dre zahale kralískire vastá; zahalo králi javéla xuláj léngiro”, – rakiréla Raj Devél, Raj Devél, bolybnáskiro-jangoléngiro. I vyšutjola paní dro mórjo (derjáv), i reka (len') pirijačéla te thadel i vyšutjola. I zašutjona réki (leniá), i dre kanaly Jegiptóskire, kaj paní thadelas saró vyšutjola; zašutjona sil (kamyšo) i triščyna (trosniko). Félda pašýl reka (len'), piró bregi pašýl reka (len') i saró, so pašýl reka (len') barjolas, zašutjola, rosphurdelape i xasjola. I zarovena mačhibnarja, zarovena odolé, kon začhurdelas vendka dre reka (len') i odolé, kon čhuvelas khudia (sietki) dro paní, peréna péskire diesa. I javéna te ladžan odolé, kon barjakiréla čar, savjátyr syvena i odolé, kon keréla (khuvela) parné pohtana. I javéna roskušne khudia i saré, konéste isyn miriežy te uhtylén džidé mačhen, peréna dro dúho (fáno) [r.s.] Adiáke! Zgine godiatyr thagárja (kniázi) Coanoskire; godypén (sovieto) god'varé manušéngiro, savé podphenenas Faraonóske, jaciá dylynó. Syr tumé phenéna Faraonóske: “Me som čhavó god'varé-manušéngiro, ĥaratuné-kral'jengiro čhavó.” Kaj isyn jone? Kaj isyn tyré god'varé manušá? Mek jone te phenén túke akaná; mek te ĥaljon, so Raj Devél, bolybnáskire-jangoléngiro, priphendiá pal Jegípto. Zgine godiatyr thagárja (kniázi) Coanoskire, xohade isyn thagárja (kniázi) Miemfisostyr, domardé šeralé manušés pe kherítka ródy Jegiptóskire droméstyr. Raj Devél bičhadiá dre léste dúho (fáno) matybnaskiro; jone xohade Jegípto dre saré léskire réndy, adiáke, syr mato psiréla pir bláta, savjása jov čhadyja. I na javéla dre Jegípto dasaví butý, saví b kerénas šeró i pori, pal'ma i destó. Dro dová dyvés jačéna Jegiptiáni syr džuvliá, izdrana i javéna te darén (daran) Ráskire-Devléskire, bolybnáskire-jangoléngire vastéstyr, savó Jov ĥazdéla pe lénde. Phuv Judaskiri javéla darása vaš Jegípto; kon priripirela pal láte, odová izdrala Rástyr-Devléstyr, Léskire priphenybnastyr, savó Raj Devél otdyjá pal Jegípto. Dro dová dyvés pandž fórja pe phuv Jegiptóskiro javéna te rakirén Xanaanytkone čibása i te sovlahan Rása-Devlésa, bolybnáskire-jangolengiresa; jekh léndyr kharlape khamitkone forosa. Dro dová dyvés štéto, kaj janéna dyibená Ráske-Devléske javéla maškír phuv Jegiptóskiri i ripiribnytko štéto pal Raste-Devléste – pašýl phuvjákire rigá. Jov javéla syr ĥiertýk (znamiénijo) i syr dosykaiben pal Raste-Devléste, jangoléngire-bolybnaskireste, pe phuv Jegiptóskiri; pal-dová so jone prikharena Ras-Devlés, kóli javéna vérgi, i Jov bičhavéla lénge zrakhibnaris i zaterdypnaskires (zastempnikos) i zrakhéla len. I Raj Devél sykavéla Pes dro Jegípto: i Jegiptiáni dro dová dyvés udžinena Ras-Devlés, i janéna svénta dyibená i déna lav (sovláh) Ráske-Devléske i spolninena. I lélape Raj Devél pal Jegípto meribnytkone dukhasa, lélape i vysastiakirela; jone obrisjona ke Raj Devél i Jov šunéla len i vysastiakirela. Dro dová dyvés javéla baró drom Jegiptóstyr ke Asirija; i zadžála Asuro dro Jegípto, a Jegiptiáni dre Asirija, i Jegiptiáni khetané Asirijanenca javéna te dynarinén Ráske-Devléske. Dro dová dyvés Izrailjo javéla tritone Jegiptosa i Asirijasa; bahtiakiribén javéla maškír phuv, saví bahtiakiréla Raj Devél, bolybnáskire-jangoléngiro i phenéla: “Bahtiakirdó isyn Miro narodo – Jegiptiáni, i Miré vastengiro réndo – Asirija, i Miro meknó mištypén – Izrailjo.” Dro dová berš, kóli Tartano javdiá ke Azoto, a les bičhadiá Sargono, králi Asirijákiro, jov i marelaspe Azotosa i lyjá les. Dro dová dyvés phendiá Raj Devél Isajoske, Amosóskire čhavéske: “Džá, zle tyró uribén, zle triviki tyré ĥerendyr.” Jov kerdiá adiáke; psirdiá nango i pirango. I phendiá Raj Devél: “Syr Miro pishári (rabo) Isajo psirelas nango i pirango trin berš, sob (kaj) te sykavél i te del angilphenybén pal Jegípto i Efiopija, adiáke lydžála Asirijákiro králi zauhtylde manušén plienonen Jegiptóstyr, manušén, savé piritradyne Jefiopijatyr; lydžála ternen i phuren, jone džána nange i pirange, sob (kaj) te ladžakiren Jegípto. Tén'ci javéna te darén i te ladžan Jefiopijatyr, péskire nadejatyr, i Jegiptóstyr, savésa jone šarenaspe. I phenéna dro dová dyvés manušá, savé odój dživénas: “Ake, savé isyn odolé, pe konéste isys amarí nadiéia, ke kon prastandyjam pal podrikiribén, sob (kaj) te zrakhaspe Asirijákire kralístyr! I sýrby ame zrakhasape?” Angilphenybén pal šukí phuv pašýl mórjo (derjáv), pal Vavilóno. – Syr zoralé balvalia vurniana pe paš-dyvés (jugo), adiáke džála jov šuké phuvjátyr, darane i čhučé phuvjátyr. Darano dykhibén sykade mánge: o čor čorela, o prahari otlela; zadžá, Jelamo, ĥazdepe, Mido, saré jasva me zalava. Daléstyr izdrana miré, Isajoskire, masá pe trušúl; me menčynavape, syr džuvlý, kóli joj bijanéla, me na lathava štéto doléstyr, so me šunava; me piridživava doléstyr, so me dykháva. Izdrala miro iló; marela man izdrany; mirí lačhí rat jaciá vaš mánge darása. Keréna skamínd, rosčhuvena pohtana, xána, p'jena. Uštén, rajole-thagárja, vydžán po maribén! Adiáke phendiá mánge Raj Devél: “Džá, čhuv rakhibnaris, mek jov te rosphenel, so jov dykhéla.” Jov dykhciá, so tradéna uklisté manušá pe grénde, manušá pe oslende, manušá pe vierbliudende, tradéna piró duj, i zoralés jov prišunelaspe. I zagodlyja syr ščer (liévo): “Rajo miro! Me rakhavas saró dyvés, i ratienca pe miro štéto me jačavaspe. Ake, tradéna manušá, tradéna uklisté pe grénde, pir duje manušénde.” Tén'ci jov zagodlyja i phendiá: ‘Pyjá, pyjá Vavilóno, i saré léskire ídoly, saré devloré isyn pašté pe phuv rozmarde.’” O, domardo miro, čhavó miré feldatyr! So šundjom Rástyr-Devléstyr, bolybnáskire-jangolengirestyr, Izrailjoskire Devléstyr, dová i phendjom me tuménge. Angilphenybén pal Duma. – Godlena mánge, Sieirostyr: “Rakhibnari! Kicý časo ratiatyr jaciápe? Rakhibnari! Kicý časo ratiatyr jaciápe?” Phenéla rakhibnari: “Syg javéla zlóko (ránko), ne iščo (inké) isyn rat, kóli tumé adiáke domarenpe te phučenpe, tén'či obrisjon i javén.” Angilphenybén pal Aravija. – Rat'kiren dro veš Aravijakiro, karavany Diedanostyr! Manušále Fiemaskirne phuvjátyr! Lydžán paní odolénge, kon isyn dre smega (trušalo), vydžán marésa ke odolé, kon prastala. Pal-dová, so jone kurtalátyr našéna, kurtalátyr i lukostyr i zahale maribnastyr. Adiáke phendiá mánge Raj-Devél: “Iščo (inké) berš dasavo, syr berš butiariste (butiarneste), savó keréla butý pal lové, i saró baripén Kidaroskiro xasjola. I jačélape nábut (kutý) kurtaly nadarane Kidaroskire čhavénde; adiáke phendiá Raj Devél, Devél Izrailjoskiro.” Angilphenybén pal dólo [félda-ju.o.], kaj sys dykhibén. – So túsa, fóro, so tu saró ĥazdyjanpe pe stréha (čhakín) [kher-r.s.]? Fóro, savó šuminela, savó godlela, savó radynélape. Tyré mulen na kurtála domardiá, na pe maribén jone myné. Saré tyré phurydyrá prastanas khetané, ne xaladé len sphandle; saré, kon túte lathiape, phandle khetané, sýrby dur jone na prastanas. Paldavá Me, Isajo, rakiráva: ‘Jačkiren man, me láva te rovav kirke jasvénca, na podrikiren man, kóli občhordy isyn čhaj miré-narodoskiri.’ Paldavá, so isyn dyvés, kóli na džinéna, so te kerén, kóli phagirena saró i ĥazdélape gódla pe dólo dykhibnaskiro Rástyr-Devléstyr. Phagirena vánta, i ĥazdélape gódla pe bérgi. I Jelamo lydžála kurtála. Manušá isyn bešté pe vurdená i Kiro doreséla ščýto. Ake, tyré lačhé féldy isyn pherdé vurdenenca; manušá, savé isyn bešté uklisté, skedynépe paš vudará. I léna krig Judejátyr učhakiriben; i tu dro dová dyvés dykhésa, so isyn dro kher kiedrostyr (mardiarnia) dová, sósa vydžána pe maribén. Ne tumé dykhéna, so but móly isyn rosphagirdy vánta dro fóro Davidóskiro i tumé skedéna paní dre telatuny venderín (prudo). I tumé pridykhena te ripirén (léna pe jakh) kherá dro Jerusalimo, i sphagirena telé kherá, sob (kaj) te zorjakiren vánta; i keréna maškír duj vánty venderín [rovo (xohói)-ju.o.], sob (kaj) te rakhén paní phurané venderiniátyr. A pe Odoléste, Kon keréla davá, tumé na javéna te dykhén; i tumé na dykhéna pe Odoléste, Kon ĥará priphendiá, sob (kaj) adiáke te javél. I Raj Devél, Raj Devél, bolybnáskire-jangoléngiro, kharéla ke Pe tumen, sob (kaj) tumé te rovén, te godlen dro davá dyvés, sob (kaj) tumé te občhinen balá, sob (kaj) te obphandenpe gonesa praskasa, savó ur'jena dre bibáht. Ne, ake, isyn rádyma (loš) i saben! Zamarén guruvén, čhinen bakrén, xan mas i p'jen mol (vino): “Lása te xas i te pjas, pal-dová, so atasiá merasa!” I otkerdia ke miré kaná Raj Devél, bolybnáskire-jangoléngiro: “Na otmekelape tuménge davá grého, paka tumé na meréna”, – phendiá Raj Devél, bolybnáskire-jangoléngiro. Adiáke phendiá Raj Devél, Raj Devél, bolybnáskire-jangoléngiro: “Džá, zadžá ke adavá kralískiro dynári, ke Sievna, savó isyn phurydyro pe kralískiro kher i phen léske: So túte isyn adái, kon túte isyn adái, sóske tu kerésa adáj koplíca vaš péske? Jov keréla péske koplíca po vučó štéto, pe bérga keréla péske kher. Ake, Raj Devél čhurdéla tut, syr zoraló manúš čhurdéla, pritasavela tut. Jov skrencynela tut, čhurdéla tut pe buĥly phuv i odój tu merésa, odój tyré lačhé maribnýtka vurdená ladžakirena kher, tyré-xulaskiro. I čhurdava telé Me tut tyré štetóstyr, i tu peresa péskire phut'kiribnastyr. I javéla dro kodová dyvés: Me kharáva Miré dynarís Jeliakimos, Xielkiinoskire čhavés. Urjavava les dro tyró uribén, obphandava Me les tyré kustykasa, zor tyrí otdáva dre léskire vastá; jov dadésa javéla vaš manušénge dro Jerusalimo i vaš kher Judáskiro. I klydyn Davidóskire kheréstyr Me čhuváva dre léskire vastá: jov otkerela (psiravela) i nikón na zakerela (na phandela); jov zakerela i nikón na otkerla (psiravela). Me keráva les zoralesa, syr gvozdjo (karfin) dro nakovlo (tvardo) štéto; javéla jov vaš péskire-dadéskiro kher syr xulaitko piralý (kladovaja). Javéla te ublavelpe léste saró baripén kheréstyr, léskire-dadéskiro; saró kherítko xulaiben, ke saré palatuné (posliednia) bašadia. “Dro dová dyvés,” – rakiréla Raj Devél, bolybnáskire-jangoléngiro, – “kuninelape gvozdjo (karfin), primardo pe nakovlo (tvardo) štéto, i javéla vymardo, i peréla, i peréla saró pharipén, so isyn pe léste”, pal-dová, so adiáke rakiréla Raj Devél. Angilphenybén pal Tíro. – Rovén, pármy (korabli) Farsisostyr, pal-dová, so jov isyn rosphagirdo; nane kherá, nikón dre kherá na zadžála. Adiáke phendló lénge Kitimoskire phuvjátyr. Javén štyl, manušále, kon dživéla pe phuv maškír mórjo (derjáv), kaj pherdó sys Sidonoskire tylgar'jenca (kupcenca), savé pir mórjo (derjáv) tradenas. Pir baró paní janénas léske ziárki (siemiany) Sihoroskire, umaloto (urožajo) baré rekátyr (leniátyr), sys daja phuv štetosa, kaj narody biknenas. Ladža, Sidono, pal-dová so adiáke rakiréla mórjo (derjáv), zoralypén morjoskiro (derjavéskiro): “Sýrby me na menčynavaspe, kóli me i na bijanavas, i na barjakiravas čhavén i čhajén, i me na davas pale patyvalé džuvlién.” Kóli šunéna nevipen (viestia) Jegiptiáni, kóli šunéna pal Tíro, to strahadjona jone! Piritraden dro Farsiso, rovén, manušále, savé dživéna pe ostrovy! Ci davá isyn tumaró fóro, fóro, savó ziainelas radymátyr, fóro ĥaratuno? Léskire ĥerá lydžána les te stien'kinelpe (te psirél bi rendoskiro) pe čúžo rig. Kon priphendiá, sob (kaj) te javél adiáke Tirosa, savó rozdelas vianki, léskire kúpcy (tylgárja) sys thagárja (kniázi), kofarja (torgovcy) pir manušénde, savé odój biknenas, i sarí phuv džinelas len. Raj Devél, bolybnáskire-jangoléngiro, priphendiá davá, sob (kaj) te na phutjol nisavó baripén, sob (kaj) te ladžan saré, kon priléla patýv pe phuv. Psir pir tyrí phuv, čhaj Farsisoskiri, psir, syr reka (len'): nikón butýr pe tyró drom na terdjola. Jov protyrdyjá Péskiro vast pe mórjo (derjáv), Jov piritrinskirdia kralipená; Raj Devél priphendiá pal Xanaano, sob (kaj) te rosphagiren léskire tvárdymi (krieposti). I phendiá: “Na javésa tu butýr te radynespe, patyvalý terný džuvlý, saví sys ladžakirdy, čhaj Sidonoskiri! Uštý, džá dre Kitimo, ne i odój tu na otkhinjosa.” Ake, isyn phuv Xaldiejengiri. Na sys angledýr davá narodo; Asuro kerdiá les manušéndyr, savé dživénas pe šukí phuv. Jone čhuvéna péskire vučardia (bašni), rosphagirena léskire rajkane kherá, phagirena len sarésa. Rovén, pármy Farsisoskire! Rovén, pal-dová so zor tumarí isyn phagirdy. I javéla dro dová dyvés: bistrena Tíro pe eftadešá berš, pe adákicy, syr jekh králi dživéla. A kóli prodžána dalé dyvesá, javéla Tirosa dová, so bagana pal biladžakuné džuvliáte. “Le bašady, psir pir fóro, bistyrdy biladžakuny džuvlý! Bašav kuč, baga but giliá, sob (kaj) te priripiren pal túte.” I javéla: kóli eftadešá berš prodžána, to Raj Devél zadžála ke Tíro, jov léla péskiri bažyn, jov léla nevés te kerél biladžakire réndy saré kralipnenca pir sarí phuv. Ne léskiro biknyben i léskiri bažyn javéna otdyné Ráske-Devléske; jone na javéna garadé, pal-dová so ke odolé, kon dživéla angíl Devléskiro muj, piridžala bažyn, sob (kaj) te xan i te čaljon, sob (kaj) te javél lénde zoraló uribén, savó ĥará saštý te ur'jel. Ake, Raj Devél xasiakiréla phuv ke čhučipen (pusto), keréla adiáke, sob (kaj) te na janel joj barjakirdó (plódo), i piriparuvela, rosphurdela kodolén, kon dživéla pe láte. I so javéla narodosa, dová-pac' (tože) javéla rašása; so javéla dynarisa, dová-pac' javéla léskire xulása; so javéla dynaricasa, dová-pac' javéla lákire xulaniasa; so javéla odolesa, kon kinela, dová-pac' javéla odolesa, kon biknela; so javéla manušésa, savó zalela lové, dová-pac' javéla odolesa, kon déla léske lové. Phuv isyn občordy sarésa i čhučí, phuv sarésa isyn rosčordy, pal-dová so Raj Devél phendiá davá lav. Tanginela, rovela phuv; pyjá duhósa, na radynélpe baró svéto, dre bibáht (bída) isyn manušá, savé ĥazdenaspe pe phuvjákiro narodo. Phuv isyn magirdy manušéndyr, savé dživéna pe láte, pal-dová so jone otčhurdyne zakóny, parude statúto (ustavo), jone phagirdé viéčno zavieto. Paldavá prokošybén xála phuv, priléna bibáht manušá, savé pe phuv dživéna; shačkirdé isyn manušá, savé dživéna pe phuv i nabutka len jaciápe. Rovela sóko (xum) (neví mol) nevoné-mur'jengiro pe senko (suko); dukhala rand' vinagradoskiri; ĥazdéna di pharés saré, kon radynelaspe ilésa. Pirijaciá rádyma (loš) bašaibnasa pe bubny, na radynénpe butýr manušá, kon radynelaspe, jone na bašavena butýr pe cymbaly. Na p'jena butýr mol (vino) i na bagana, kirki isyn bravinta vaš odolénge, kon p'jela la. Rosphagirdo isyn čhučó fóro, saré kherá zakerde pe klydyn, naštý te zadžas. Rovena pe vulícy (gásy) pal mol (vino), gijá krig rádyma, vytradyné viesjolyma (loš) phuvjátyr. Čhučó isyn fóro i pórty isyn rosphadine. A maškír phuv, maškír narody, javéla adiáke, syr sys, kiéli obmarenas masliny i skedenas vinagrado, kóli saró ukedenas. Zagodlena zoralé zaniása, javéna te radynénpe dro Ráskire-Devléskiro rajkanypen, i javéna te godlen morjostyr (derjavestyr). Šarén Ras-Devlés pe vastóko, pe ostrovy, šarén Ráskire-Devléskiro, Izrailjoskire-Devléskiro lav! Phuvjákire jagoróstyr (koncostyr) šunasa ame gilý: “Te slavinelpe Čačipnáskiro Devél!” I phendjom me: “Bida mánge, bída mánge! Čora čorena, čora čorena zlydnitkes.” Dar, ĥanbín (jama) i felý uhtylena tut, manúš, savó dživéla pe phuv! Tén'ci odová, kon prastándyja, kóli zagodlyne darátyr, peréla dro xor štéto, a kon vydžála odothýr, poperla dre felý, pal-dová so fenštry bolybnáskire vučipnástyr psiradjona (roskernape) i phuv izdrala. Phuv izdrala, phuv rosperelape, phuv izdrala baré zorjása. Kuninelape (kačynelape) phuv, syr mato manúš, kuninelape i grého lákiro pe láte: joj peréla i butýr na uštéla. I javéla dro dová dyvés: zdžála Raj Devél te kerél kára pe nalačhé dúhi, savé isyn dro bolybén i pe phuvitkone kral'jénde, savé isyn pe phuv. I javéna jone skedyné khetané dro rovo (xohói), i javéna zakerde dro bešyben, i priléna kára, kóli prodžána but dyvesá javéna te sendinén. I čhon loljola, i kham ladžala, kóli javéla Raj Devél, bolybnáskire-jangoléngiro kralísa pe bérga Sióno i dro Jerusalimo, i angíl léskire phurydyrende javéla baripén (sláva). Rajo Dévla! Tu san miro Devél, me láva te šaráv Tut, me šarava ke vučipén Tyró lav, pal-dová so Tu kerdián dívo; dová, so priphendian ĥará, davá isyn čačipén, amín'. Tu rosphagirdian zoralý tvárdyma sarésa, rajkano kher (xaromo), savó kerdé manušá, butýr nane dro fóro, butýr nikoli les na ĥazdéna. Paldavá javéna te šarén Tut zoralé narody; fórja, kaj darane kherítka ródy dživéna, javéna te darén Tútyr. Tu sánas zrakhibnasa vaš čororeske, zrakhibnasa vaš čororé manušéske, syr sys pharó léske; zrakhibnasa zoralé balvaliatyr, i khamestyr. A xoliamó phurdypen nalačhé manušéndyr sys syr balvál, kóli joj pe vánta ĥazdélape. Syr xačkiribén pe štéto bipanieskiro, Tu rozmardian vergengiro šumo; syr čačipén pirijačéla bryšyndestyr, adiáke Tu pritasadian rádyma odolengiri, savé pritasavéna. I keréla Raj Devél, bolybnáskire-jangoléngiro pe daja bérga lačhó xabe vaš saré narody; odój javéla žužy mol (vino), thulypen kokalendyr; sámo žužy (čysto) mol. I xasiakiréla pe daja bérga učhakiriben, savó učhakiréla saré narody, savó pe saré ródy isyn pašlo. Meribén xasjola sarésa, i vykhosela Raj Devél, Devél jasva saré mujendyr i zlela ladž Péskire narodóstyr pir sarí phuv, pal-dová so adiáke rakiréla Raj Devél. I phenéna dre dová deves: “Ake, Jov isyn amaró Devél! Pe Léste sys amaró lačhó užakiribén i Jov zrakhciá amen! Kadavá isyn Raj Devél; pe Léste sys amaró lačhó užakiribén; lása te radynaspe Léskire Zrakhibnastyr.” Vast Ráskire-Devléskiro pasjola pe daja bérga i Moávo javéla domardo pe péskiro štéto, syr phus zmarena ĥerénca dro gnejo. Mek te protyrdel jov péskire vastá, syr manúš, savó plyvinela (déla plima) akaná, rostyrdela vastá te plyvinel (te del plima), ne čhuvéla telé Devél pal léskiro phut'kiribén, pal xohaibén, savó léskire vastá kerénas. I tvárdyma, tyré zoralé i vučé vantendyr rosphagirela, Jov rozmarela, čhurdéla pe phuv, dro práho.” Dro dová dyvés javéna te bagán daja gilý pe phuv Judaskiri: “Zoraló fóro isyn aménde; na dyjá Jov aménge vánty i valo, a dyjá zrakhibén. Odkeren (psiraven) pórta (vráty), mek te zadžál narodo patyvalo, narodo, savó rakhéla čačipén. Manušés, zoralé duhósa Tu rakhesa dre pherdó ramánjo (miro), pal-dová so pe Túte isyn léskiri nadiéia, Na jačkiren (na jačaven) Ras-Devlés nikoli, pal-dová so Raj Devél isyn zoralypén viéčno. Jov čhudiá telé odolén, kon pe vučó štéto dživéla, čhurdyjá telé fóro, savó vučés terdjolas, čhurdyjá telé pe phuv, čhurdyjá dro práho. Ĥerá les (davá fóro) marena, gera čororeskire-manušéngire, i odolengire piré (stópy), savé lové vymangena. Drom Devlytkoné-manušéskiro isyn čačunó; Tu kerésa vaš léske čačunó drom. I pe drom, kaj isyn Tyró séndo, Rajo Dévla, sys aménde lačhó užakiribén pe Túte; ke Tyró lav, ke ripiribén pal Túte tyrdela amen amaró di. Miré diesa tyrdavas me ke Tu te javav ratý, miré duhósa lavá me te rodav Tut dre péste tasiárles (ránes) pe zlóko (rankosa); pal-dová so, kóli séndo Tyró kerélape pe phuv, tén'či odolé, kon dživéla dro svéto, sykljona čačipnaske. Kóli grehitkoné manušés potanginena, tén'či na ĥaljola jov čačipén: jov javéla te kerél nakuč duredýr pe phuv patyvalengiri i na podykhela pe Ráskire-Devléskiro baripén. Rajo Dévla! Tyró vast sys vučés ĥazdynó, ne jone les na dykhné; dykhéna i ladžana, kon bidykhela (naštý te dykhél) pe Tyró narodo; jag xála Tyré vergén. Rajo Dévla! Tu podesa aménge ramánjo (miro), i saré amaré réndy Tu kerésa vaš aménge. Rajo Dévla, Dévla amaró! Sys ke ame i javír thagárja, ne pir Túte ame šarasas Tyró lav. Mulé na otdžidjona, Riefaimy na uštena, pal-dová, so Tu javdián i xasiakirdian len; xasiakirdian ripiribén pal lénde. Tu barjakirdian narodo, Rajo Dévla, barjakirdian narodo, šardian Kokoró Pes; buĥliakirdian saré rigá phuvjákire. Rajo Dévla! Dre bibáht bída jov Tut rodelas; mangelaspe, kóli xolý Tyrí sys pe léste. Syr pharí džuvlý godlela i rovela péskire dukhatyr, kóli joj bijanéla, kadasavé ame sámas angíl Túte, Rajo Dévla! Pharé ame sámas, stradynasas ame i bijandiam sýrby balvál; ame na zrakhciam davá svéto, i na bijándyne pe svéto neve manušá. Otdžidjona Tyré mulé, mulé masá uštena! Ĥazdenpe, radynénpe, tumé, savén čhurdyné dro práho, pal-dová so pahlyn (rosa) Tyrí sastiakirela i phuv čhurdéla javrí mulen. Džá, miro narodo, zadžá dro tyró kher, zaker vudará pal péste, garadjov pe nábut, angíl syr prodžála xolý. Ake, Raj Devél vydžála Péskire štetóstyr te čhuvél kára pe manušénde, savé dživéna pe phuv, pal léngire gréhi, i phuv otkerela rat, savó prilyjá dre péste i na garavela péskire zamarden. Dro dová dyvés čingirela Raj Devél péskire kurtalása, saví isyn pharí, bari i zoralý Lieviafonos (drakonos), sapes, savó mamúj (priames) prastala, i Lieviafonos, sapes, savó vykrencynelpe (dind'kirelape), i muliakiréla Raj Devél dolé darane rupučos, savó dživéla dro mórjo (derjáv). Dro dová dyvés “Bagán pal léste pal vinagrádniko, savó isyn pir iló mánde. Me, Raj Devél, rakhava les; kažno menta (minuta) Me dáva léske paní; ratý i dyvesé Me rakhava les, sob (kaj) nikón odorík te na džal. Nane Mánde xolý. Ne kóli vari-kon čhuvéla proti Mánde dre léste phusadé čarjá, to Me džáva pe léste maribnása, sarésa les shačkirava. Ne kóli jov/joj pomangela Miro zrakhibén, i javéla te mangél ramánjo (miro) Mánca, mek tén'či jone te prilén ramánjo (miro) Mánca.” Dre dyvesá, savé javéna, zoraló javéla Jakovo, vybarjola i rozmekelape luludienca (cvetenca) Izrailjo, baró svéto javéla pherdó barjakirdesa (plodosa). Ci marelas les Raj Devél adiáke syr javire manušén? Ci zamarelas les adiáke, syr javirén zamarelas? Tu phucian léstyr, syr trej, kóli Tu, Dévla, otgijan léstyr; vyčhurdyjan les Péskire zoralé phurdypnasa, syr dro dyvés, kóli phurdela vastočno balvál. I dalésa zlelape (vykhoselape) grého Jakovóskiro, zlelape grého léstyr, kóli jov rozmarela saré bará altarjostyr (žertvienikostyr) dre koterá zvjoskakire, na javéna terdé dembitka veladinia (roščy) i ídoly khameske. Pal-dová so zoraló fóro čhučó javéla, kherá javéna čhurdyné, syr čhučí phuv. Odój guruvoro javéla te čaravelpe, odój jov javéla te pasjol i te xal léskire randiá. Kóli léskire randiá zašutjona, len obphagirena; javéna džuvliá (manušnia) i shačkirena len. Pal-dová so jone isyn narodo bigodiakiro, Jov na potanginela len, Odová, Kon saró sozdyjá. Ne javéla dre dová dyvés adiáke: Raj Devél lélape paló saró, baré rekátyr (leniátyr) ke reka (len') Jegiptóskiri, i tumé, čhavé Izrailjoskire, skedénape jekh ke jekh. I javéla dre dová dyvés: baró roĥo (truba) zabašavela i javéna odolé, kon našadiape pe phuv Asirijakiri, konés vytradyné pe phuv Jegiptóskiri. Saré jone peréna angíl Raste-Devléste te den patýv pe svénto bérga dre Jerusalimo. Bida phut'kirdé kralitkone viankake [koronake-ju.o.], saví isyn pe mate Jefriemlianende, luludiake (cvetoske) léskire gožone uribnastyr, savó zašutija, savó isyn pe lačhí félda, kaj pasjona mate moliátyr (vinostyr). Ake, sastó i zoraló isyn Raste-Devléste syr baró bryšýnd barénca, syr xasiakiribnytko balvál, syr šumno paní, savó ĥazdyjápe i zorjása čhurdéla pe phuv. Marena manušá ĥerénca phut'kirdy viánka mate Jefriemlianendyr. I zašutine luludiasa léskire gožone uribnastyr, saví isyn pe lačhí félda, keréna adiáke, syr smokvasa, saví sýges vybarija angíl sroko, i paldavá, kon dykhéla la, jekhátyr (srázu) léla vastésa i xála jekhe ĥlytankosa. Dro dová dyvés Raj Devél, bolybnáskire-jangoléngiro, javéla gožone viankasa i šukarone diademasa vaš jačaibén Léskire narodóstyr. I duhósa, savó sendinela pir čačipén vaš kodoléske, kon bešéla pe séndo, i muršypnasa vaš odolénge, kon marelape vergenca. Ne kadalé peréna moliátyr (vinostyr), zmarenape droméstyr, pal-dová so piné sikiera (bravinta); rašáj i proróko matine, zgine godiatyr; na dykhéna dykhibén, jone na sendiakirena, syr trej. Saré skaminda jone zamakhne, isyn nažužo (čysto) štéto. I iščo (inké) rakiréna: “Konés kaméla jov te sykliakirél, konéske isyn pir iló te rakirél lav? Odolénge, kon naĥara pirijaciá te p'jel dákiro thud?” Ake: priphenybén paló priphenybén, priphenybén paló priphenybén jekh zakóno paló javír zakóno, adáj nábut i odój nábut. Paló dová javire ušténca i javire čibása (čibjasa) léna te rakirén ke davá narodo. Lénge rakirénas: “Ake, isyn otkhinyben, den, sob (kaj) te otkhinjol khino manúš, ake, isyn štylypen.” Ne jone na zakamle te šunén. I jaciá lénge lav Ráskire-Devléskiro: “Priphenybén paló priphenybén, priphenybén paló priphenybén, jekh zakóno paló javír zakóno, jekh zakóno paló javír zakóno,” pal-dová jone džána i peréna, i rozmarnape, i jone javéna uhtyldé. Šunén Ráskire-Devléskiro lav, košybnarja, dalé rajo načačipnaskire narodoskire, savé dživéna ke Jerusalimo. Pal-dová, so tumé rakiréna: “Ame dorakirdiampe xore štetosa tel phuv liunosa (adosa) i meribnasa: kóli prodžála čhupny, saví xasiakirla saró, ke ame joj na dodžála, pal-dová so xohaibnasa ame zrakhasape i načačipnasa pes zakerasa (phandasape).” Adiáke rakiréla Raj Devél: “Ake, Me čhuváva bar po Sióno, bar vyrikirdo, drógo (kuč), bar zoraló: kon patiála dre léste, na javéla te ladžal. Me keráva adiáke, so javéna te mierinen sendosa i čačipnása; bará xasiakirena štéto, kaj xohaibén garadiape, paní začhuvela davá štéto. Tumaro dorakiribén meribnasa rosperelape, dorakiribén liunosa (adosa) na vyterdjola. Kóli džála čhupny te xasiakirél, to domarela tumen ke ĥerá. Kóli syg joj (čhupny) javéla to uhtylel tumen; javéla te psirél kažno dyvés i kažno rat, syr šunéna pal láte, to léla dar.” Nabaró javéla čhuibén, sob (kaj) te pasjon, nabugly učhakirdy javéla, sob (kaj) lása te zapat'kiraspe (te zakrencynaspe). Ĥazdelape Raj Devél, syr pe bérga Pieracymo, xoliasóla syr pe félda Gavaoskiri, sob (kaj) te kerél Péskiro réndo (diélo), baró réndo, sob (kaj) te kerél Péskiri butý, bari butý. Na kerén perasa / šutki (na prezentynenpe), sob (kaj) te na prilén iščo (inké) butýr, pal-dová so me šundjom Rástyr-Devléstyr, Rástyr-Devléstyr bolybnáskire-jangolengirestyr, so xasibén pe sarí phuv javéla, adiáke priphendlo. Prišunen kanenca, pošunen mirí zan, vyšunen i lav, so me phenáva tuménge. Ci saré dyvesá keréla butý manúš, savó obkerela phuv te čhuvél ziárka, savó rozriskirela (rozmarela) komki i randela phuv? Nad, kóli jov rozroŭninela phuv, to jov čhuvéla dre láte vika, ci rosčhuvela kmino, jov barjakiréla giv riadenca, barjakiréla džov dro štéto, savó vaš davá vykedyjá, barjakiréla pašýl léste proso. Adiáke isyn, syr sykliakiréla Devél léskiro; Devél déla godý léske. Pal-dová so na vymarena vika rotasa, i ukedybnytka róty na katynena pir kmino, a kaštesa vymarena giv i kmino. Vymielinena maró, ne na rozmarena les i lydžána pir léste obmaribnytka róty léngire grenca i na roskhosena (na rostrinskirena) les. Saró davá – Rástyr-Devléstyr, bolybnáskire-jangoleskirestyr, dívna dúmy Léskire, bari isyn Léskiri godý! Bida Ariiloske, Ariiloske, foroske, kaj dživdiá Davído! Pričhuvén berš ke berš, mek te zamarén dová, so džála, sýrby svénto dyibén. Ne Me tasavava Ariilo, javéna te godlen, javéna te rovén, i jov jačélape Mánde, syr Ariilo. Me ĥazdavape pe Túte trusciál (krugom) maribnytkoné taborosa, i Me stasavava tut stregasa te dykhén pal túte, i Me čhuváva zoralý vučardý (bašnia) proti túte. Tu javésa tykniakirdo ke ladž, tu lésa te rakirés phuvjátyr, zan tyrí na šunéna prahostyr, zan tyrí javéla syr zan muleskiri; prahostyr javéla te šepčynel (te zembinel) tyrí čib. Tyré-vergengiro butypen jačéla syr drobno práho, i zahalo; baró ke dar xaladybén rosphurdelape, savó syr phusa, saró davá javéla, kóli na užakiréna, jekhátyr, dre jekh menta (minuta). Raj Devél, bolybnáskire-jangoléngiro, javéla ke tu gromosa i zoralé zaniása, so phuv javéla te izdral, zoralé balvaliasa, jagása, saví saró shačkiréla. Syr sunó, syr dykhibén ratiákiro, jačéla narodonengiro butypen, savé javéna te marénpe Ariilosa, savé javéna te ĥazdénape pe léste i stasavena les. I syr bokhalé manušéske, savó dykhéla suné, so jov xála, a uštyjá – ničí nane, syr savó drieván kaméla te p'jel manušéske, savó dykhéla suné, so jov p'jela, ne uštyjá i ničí nane, di léskiro mlieinela (isyn trušalo), adiáke javéla narodo léngire butypnasa, savé marenape bergasa Sionosa. Prilén davá pal dívo: jone korjakirde javirén i kokoré korine, jone isyn mate, ne na pal-dová, so piné mol (vino), jone kuninenape (kačynenape), ne na paldová, so sikiera (bravinta) piné. Dyjá tuménge Raj Devél soibnytko, zakerdia tumaré jakhá, proróki, zakerdia tumaré šeré, džinybnarja (magi). I kažno angilphenybén vaš tuménge isyn syr lavá dre zakerdy lylvarí. La podena manušéske, savó ginéla i rakiréna: “Gin la!” Ne jov phenéla: “Na proginava, pal-dová so joj isyn zakerdy (phandly).” Tén'ci piridena lylvarí odoléske, kon na džinéla te ginel i rakiréna: “Gin la!”, – ne jov rakiréla: “Me na džináv te ginav.” I phendiá Raj Devél: “Paldová so davá narodo džála ke Me péskire ušténca i šarela Man péskire čibása, ne iló léskiro dur otgijá Mándyr, i dová, so jone ĥazdéna Mánge patýv dre dar dolesa, so sykliakiréna manušéngire uphenybená, to, ake, Me adiáke keráva dalé narodosa divnes, syr nikoli na sys; xasjola godý léskire god'varé manušénde, zalelape (na javéla) godý godé manušénde.” Bida kodolénge, kon duminéla te garadjol dro xor štéto, sob (kaj) te na džinél Raj Devél léngire dúmy, savé keréna péskire réndy dro kalypén i rakiréna: “Kon dykhéla amen? Kon ĥaljola pal aménde?” Savó dylnypén! Ci priléna butiaris pir ĥleja (glina) pal léskiri butý ĥlejatyr? Ci phenéla sozdynó priedmieto pal Kodoleste, Kon les sozdyjá: “Na Jov sozdyjá man”, – ci phenéla pal péskire xulaste: “Jov na ĥaljola?” Iščo (inké) nábut, sarésa nábut, i ci na pirikerelape Liváno dre únta (sado), na javéna ci te šarén únta, syr veš? Dro dová dyvés kašuke manušá šunéna lavá lylvarjatyr, kororengire jakhá léna te dykhén. I ramanjona (mirna) manušá iščo (inké) butýr javéna te radynénpe pal Raste-Devléste, čororé manušá javéna zoralés te radynénpe pal Sventoné-Izrailjoskire Devléste. Pal-dová so nikón butýr lénge na javéla te kerél bibáht, košybnari xasjola, i xasiakirena sarén, kon na keréla pir čačipén. Ci kon zapentynela manušés dre lavá, ci uhtyléla manušés, savó mangéla séndo pašýl pórta, kon na priléla čačuné manušés. Paldavá adiáke rakiréla pal kher Jakovóskiro Raj Devél, Savó vykindia Avraamos: “Tén'ci Jakovo na javéla te ladžal i muj léskiro na parnjola. Kóli dykhéla jov péste péskire čhavorén, savén dyjom Me léske, jone déna patýv Miré lavéske, déna patýv Sventoné Izrailjoskire Devléske, i jone javéna te darén radymása Izrailjoskire Devléstyr. Tén'ci odolé, kon blendynela duhósa, priléla godý, a kodolé, kon na kandéla, sykljona, syr te kandén.” “Bida čhavénge, savé na kandéna,” – rakiréla Raj Devél, – “savé obrakirena réndy (diély) bi Miro, dorakirenpe na pir Miro dúho (fáno), a sob (kaj) te pričhuvén grého ke grého. Na phučenape Mándyr, a džána dro Jegípto, sob (kaj) te podrikiren pes faraonóskire zorjása i te garadjon dro Jegípto. Ne zor faraonoskiri jačéla vaš tuménge ladžasa, i kóli tumé garadjona dro Jegípto, to ladžavo tuménge javéla. Pal-dová, so thagárja (kniázi) léskire isyn dro Coano, bičhadé manušá (posly) léskire doginé ke Xanieso. Saré jone javéna ladžakirdé pal narodo, savó lénge na trej, nisavó podrikiribén léstyr na javéla, jekh ladž i bizlado.” Pharipén pasjola pe grénde, savé džána pe paš-dyvés (jugo), pir phuv, kaj tasavena i pritasavéna, katýr vydžána saplynia i karmusa (myšy), savé vurniana; jone lydžána pe oslende péskiro barvalypén i pe vierbliudende péskiro kučipén, lydžána ke narodo, savéstyr ničí lačhó na priléna (nisavó lačhipén na javéla). Na podrikiréla len Jegípto, paldavá Me phendjom lénge: “Léngiri zor – štylés te bešén.” Akaná poddža, začhin saró davá pe phal, začhin dre lylvarí, sob (kaj) te jačélpe davá pe dyvesá, savé javéna, pe saró časo (cýro). Pal-dová, so jone isyn buntiaritko narodo, (savó nikonés na kandéla), xohané čhavoré, savé na kaména te šunén Ráskire-Devléskiro Zakóno. Save rakiréna odolénge, kon dykhéla čačipén: “Pirijačen te dykhén!”, – a ke proróki: “Na angilphenen aménge čačipén, rakirén aménge lačhé lavá. Zdžan droméstyr, udžan droméstyr, zalen amaré jakhéndyr Sventoné-Izrailjoskire Devlés.” Paldavá adiáke rakiréla Svénto Izrailjoskiro Devél: “Kóli tumé na priléna ke godý davá lav, a isyn tumarí nadiéia pe xohaibén i načačipén, so davá tumen podrikiréla, to tén'či davá grého javéla vaš tuménge, syr rosphagirdy vánta, saví phadjola, kóli na užakiréna. Jov rosphagirela la, syr rozmarena khoró, rozmarena i na tanginena te rozmaren adiáke, so na jačélape koteroro, so butýr na lésa, vangar jagatyr ci paní ganyngatyr.” Adiáke rakiréla Raj Devél, Devél Svénto Izrailjoskiro: “Kóli b tumé jačnépe pe jekh štéto, tén'či by tumé zrakhnepe; štylypen i nadiéia isyn zor tumarí, ne tumé na zakamle. I rakirénas: “Nad, ame pe grénde našasa”, – pal davá i našéna”, “Našasa pe lačhé grénde”, – paldavá potradenape pal tuménde sýges. Jekhe manušéstyr, darátyr našela tysjonco, pandžé manušéndyr našéna adiáke, so jačaibén tumaró javéla syr destó pe vučí bérga, syr maribnýtko špéra pe bérgica. Paldavá Raj Devél iščo (inké) ničí na keréla (užakiréla), sob (kaj) Jov te potanginel tumen, užakiréla, sob (kaj) te tanginél tumen; Raj Devél isyn Devél čačipnáskiro; bahtalé saré, konéste isyn nadiéia pe Léste! Narodo javéla te dživél pe Sióno ke Jerusalimo, tu but na javésa te roves, – Jov potanginela (požalinela) tut, kóli tu zagodlesa, Jov šunéla tyrí zan i otphenéla túke. I déla tuménge Raj Devél maró dre bibáht i paní dre bída; tyré sykliaibnarja na javéna te garavenpe i jakhá tyré javéna len te dykhén. I kaná tyré šunéna lav, savó rakiréla palál túte: “Ake, isyn drom, džán pir léste”; kóli tu zdžasa droméstyr pe čačí (pravo) rig ci pe zérvo (liévo) rig. Tén'ci tumé ĥaljona, so nálačho isyn idolengiro ukedyiben tyré rupéstyr i tyré suvnakástyr; tu čhurdesa péskire ídoly, syr magiripén, i phenésa lénge: “Džán krig adathýr.” I Jov déla túke bryšýnd, kóli zasieinesa félda i maró, savó janéla phuv syr barjakirdó (plódo), lačhó maró déla túke; tyré guruva léna te čaravenpe dro dová dyvés pe lačhé féldy. Guruva i grajo, savé keréna butý pe félda, léna te xan londo xabén, xabén žužakirdo i pirivieindlo ĥandladiasa (lopatasa). I pe kažno bérga, pe kažno bérgica thadéla paní, davá javéla dre baró maribnýtko dyvés, kóli vučé kherá peréna. Čhon javéla te xačol syr kham, a khamitko jag javéla dre eftá móly jasnedyr (zoraledýr); saró davá javéla dro dová dyvés, kóli obphandela Raj Devél dukhano štéto léskire narodoskiro, vysastiakirela léskire dukhá. Ake, lav Ráskire-Devléskiro džála durál, xačola Léskiri xolý, xačola zoralés; uštá Léskire pherdé xoliása, čib Léskiri syr jag, saví saró shala. Léskiro phurdypen – syr paní, savó iščo (inké) ke men ĥazdélape, sob (kaj) te rozphurdel narody sarésa; dre léngiro muj javéla savari, so lydžála ke xohaibén (bléndo). A ke tumé javéna giliá syr ratiákiro pe svénto svénko, i javéla radypnytko (lošalo) / te radynélpe iló syr odoléste, kon bašavela i ĥazdélape pe bérga Ráskire-Devléskiri svirol'kasa, ke zoralypén Izrailjoskiro. I déla Raj Devél, sob (kaj) te šunén bari zan Léskiri i sykavéla vast Péskiro, savó zmekelpe dre zoralý xolý, dre jag, saví saró shala, dre xoliami balvál, dro paní, savó ĥazdelpe pe phuv, dro bryšýnd barénca. Ráskire-Devléskire zaniatyr izdrala Asuro, savés marena destesa. I pekavela les davá destó, destó, savó Raj Devél vylydžala pe léste bubnenca i arfenca; i Jov javéla pe Léste baré maribnása. Pal-dová so Tofieto ĥará kerdó; jov sys kerdó vaš kralíske, jov isyn xor i buglo; dre jag léskiri but kaštá čhudé; phurdypen Ráskire-Devléskiro les zahačkirela les syr xačkirdy siéra (dzevélia). Bida odolénge, savé džána dro Jegípto pal podrikiribén, nadiéia léngiri pe grénde i pe maribnýtka vurdená, pal-dová so but len isyn, pe manušénde, savé tradéna uklisté pe grénde, savé isyn zoralé, a pe Svénto Izrailjo jone na dykhéna, i ke Raj Devél jone na džána! Ne Jov isyn sámo god'varó, i janéla bibáht (bída), i Jov na otparuvela Péskire lavá; ĥazdélape pe grehitkoné-manušéngiro kher, pe podrikiribén odolengiro, kon keréla gréhi. Jegiptiáni isyn manušá, a na Devél, dre grénde lengirende nane dúho (fáno), a jekh masá. I protyrdela Raj Devél Péskiro vast, i javéla te langal zrakhibnari i peréla odová, konés zrakhena i xasjona saré khetané. Pal-dová so adiáke phendiá mánge Raj Devél: “Syr ščer (liévo), syr léskiro tyknoro, savó na otdéla péskiro doresybén (dobyča), mek i godlen pe léste čhupnárja, adiáke Raj Devél, bolybnáskire-jangoléngiro, džála te marélpe pal bérga Sióno, pal bérgica léskiri. Syr čirikliá učhakirena péskire čhavrinen (ptiencen), adiáke Raj Devél, bolybnáskire-jangoléngiro, učhakiréla Jerusalimo, zrakhéla i potanginela (požalinela) les.” Risjon ke Odová, Konéstyr tumé otginé péske, čhavé Izrailjoskire! Dro dová dyvés vyčhurdela kažno manúš péskire rupove i suvnakuné ídoly, savé vastá tumaré kerdé pe grého tuménge. “I Asuro peréla na manušéskire kurtalátyr, na manušeskiri kurtála les xasiakirla; jov zrakhélape kurtalátyr, terné čhavé léskire jačéna pishar'jénca (rabenca). I darátyr piriprastala jov pašýl péskiri tvárdyma (kriepost'), i rajo léskire daréna sykaibnastyr” – rakiréla Raj Devél, Konéskiri jag isyn pe Sióno, Konéskiro bov isyn dro Jerusalimo. Ake, králi javéla te kralinél pir čačipén i thagárja (kniázi) javéna te xulainen pir zakóno. Kažno léndyr javéla syr zrakhibén balvaliatyr, syr zrakhibén bryšyndestyr, syr paní pe šukí (čhučí) phuv, syr bérga, saví zakerela khamestyr čhučí phuv. I jakhá odolengire, kon dykhéla, na zakernape, i kaná odolengire, kon šunéla, javéna te šunén. Iló odolengiro, kon ni palsó na duminéla, priléla godý; bičibakire (kon fujes rakiréla) léna te rakirén jasnes. Odoléske, kon ničí na džinéla na déna butýr patýv, pal xohaibnariste [zahaleste-r.s.] na phenéna, so jov keréla pir čačipén. Pal-dová so buro manúš (nieviežda), rakiréla dylnypén, léskiro iló duminéla pal čoripén, sob (kaj) te kerél xohaibnasa, te kaliakirel Ras-Devlés, te lel maró bokhalestyr i pibén manušéstyr, savó kaméla paní. Frento (xoliamó) manúš keréla xasibnýtka réndy: jov duminéla, pal fuipén, sob (kaj) te xasiakirél čorores xohané lavénca i tedy, kóli čororó keréla pir čačipén. A patyvalo manúš duminéla pal patýv; jov tvardes terdó dro čačipén. Džuvliale (manušniale) balvalitka! Uštén, šunén kutý (nábut) mirí zan! Čhajale, savé ni palsó na duminéna! Šunén miré lavá! Iščo vari-kicý dyvesá butýr beršestyr i jačéna te darén, balvalitka (birakhibnaskire)! Pal-dová so na javéna te skedén vinagrado, na javéna te keden maró. Darén, balvalitka (birakhibnaskire), darén odolé, kon ni palsó na duminéla (narakhibnytka)! Zlen ídia, rozur'jenpe, obphanden péskire masá pe trušúl. Dro kolýn javéna pes te marén pal lačhé féldy, pal lačhí rand' vinagradoskiri. Pe miré-narodoskiri phuv javéla te barjol phusady čar i xrústy suv'jenca, syr i pe saré radymakire kherá dro fóro, savó radynélape. Rajkane kherá (xaromy) jačkirena, fóro, savó šuminela, jov čhurdynó javéla. Ofielo i vučardý (bašnia) javéna štetosa, kaj garavenape osly (miegárja) i stády, savé čaravenape. Ke dová dyvés, kóli čhuvélape pe aménde Dúho (Fáno) upralestyr i čhučí phuv pirikerlape dre únta (sado), a únta (sado) na javéna te prilén (te ginen) pal veš. Tén'ci séndo javéla te rikirél zor pe kadaja čhučí phuv, i čačunó séndo javéla te dživél pe lačhí félda. I javéla ramánjo (miro) kažnoné čačipnaskire rendostyr, a čačunó séndo janéla štylypen, i na javéna te darén nikonestyr dre saré dyvesá (viéki). Tén'ci miro narodo javéla te dživél pe štéto, kaj isyn ramánjo (miro), pe štéto, kaj na daréna, pe bahtalé štéty, kaj otkhinjona. Na dykhí, so grado peréla pe veš, fóro pe dólo telé zmekelape. Bahtalé isyn tumé, kon sieinela pašo paní, i kon bičhavéla odorík guruvés i oslós. Bida túke odová, kon isyn mižeh čor, konéstyr na otlenas, i čor, konéstyr na čorenas! Kóli občoresa saró [mekesa te čores-r.s.], tútyr otlena, kóli pirijačesa te čores, tútyr čorena. Rajo Dévla! Zrákh amen! Pe Túte isyn amarí nadiéia. Jav tasiárles (ránes) amaré vastésa, amaré zrakhibnasa dro pharó časo. Tyré darane zaniatyr našéna narody, kóli uštesa, rosprastanape kherítka ródy (pliémi). I javéna te keden tumaró doresybén, syr kirmo skedéla, čhurdenape pe léste, syr phakitka skočki (saranča) čhurdenape. Baró isyn Raj Devél, savó dre vučipén dživéla; Jov pherdiakirela Sióno sendosa i čačipnása. I javéla časo, kóli na javéna te darén nikonestyr, kóli javéla baró zrakhibén, godý i džinybén, a dar Devléskiri javéla tyré kučipnasa. Ake, léngire zoralé muršá godlena pe vulícy (gásy); bičhadé vaš ramánjo (miro) rovena kirke jasvénca. Nane nikonés pe dromá, nikón odój na tradéla; jov otgijá dorakiribnastyr, rosphagirdiá fórja, jov nikonés na ginéla pal manušénde (ni dro so čhuvéla manušén). Phuv sýrby tuginela, šutjola. Liváno ladžakirdó, zašutija, Sarono jaciá syr čhučí phuv, Vasáno i Karmilo sčhurdyne péskire patria (listy). “Akaná Me ĥazdavape, – rakiréla Raj Devél, – “Me ĥazdavape akaná. Tumé san pharé khasesa, tumé bijanena phus; tumaró phurdypen-jag, saví tumen shala. I javéna narody syr xačkirdy zvjoska, syr phusady čar, saví sčhindle; i javéna zhačkirde jagása. Šunén, duratuné, so Me keráva, i tumé, pašatuné, galjon Miro zoralypén.” Piridarandyne (strahádyne) grehítka manušá pe Sióno, daréna i izdrana bidevlytkarja! “Kon améndyr vydživela paš jag, saví saró pohala, kon vydživela paš jag, saví xačola viéčnes?” Odová, kon psiréla dro čačipén i rakiréla čačunó lav, kon na kaméla te otlel péskire pšalestyr, kon obrikirela péskire vastá, sob (kaj) te na lel myto (dáro) manušéndyr pal nalačhé réndy, kon zakerela péskire kaná, sob (kaj) te na šunél, syr rat čhuvélape, i zakerela péskire jakhá, sob (kaj) te na dykhél, syr kerélape fuipén. Odová zadživela pe vučipén; garadjola pe bérgi, karik nikón na ĥazdélape; maró léske délape, paní léste na pirijačéla te thadel. Tyré jakhá dykhéna Kralís dro Léskiro gožypen, jone javéna te dykhén duratuny phuv. Iló javéla te priripirel jekh pal dar, saví butýr na dykhésa: “Kaj odová, savó piriginelas manušén dre lylvarí? Kaj isyn odová, savó važynela pritasady (dan')? Kaj isyn odová, savó vučardia (bašni) obdykhelas?” Na dykhésa butýr xoliamó narodo, narodo, čib konéskiri tu na ĥaljosa, i na rozlesa. Podykh pe Sióno, fóro, kaj prodžála amaró svenkitko skedyibén; tyré jakhá javéna te dykhén Jerusalimo, štéto, kaj nane maribén, šátra, saví na peréla, beranda lákire nikoli na rosphadjona, i ni jekh šylo na čhinelape [na roskušelape-r.s.]. Odój javéla ke ame baró Raj Devél syr réki (leniá), syr paní: odorík na zatradela ni jekh bari párma (korabljo). Pal-dová so Raj Devél isyn amaró Sendári, Raj Devél déla aménge Zakóno, Raj Devél isyn amaró Králi, Jov zrakhéla amen. Rosphandenape tyré šyle, Asuro, na vyrikirna mačty. Tén'ci javéna te roskeren doresybén, i langale džána te čoren. I nikón manušéndyr, savé odój dživéna, na phenéla: “Me som nasvaló”, – manušénge, savé odój dživéna, otmekenape saré gréhi. Javén, narody! Šunén i prilén, kherítka ródy (pliémi)! Mek te šunél phuv i saró, so isyn pe láte, baró svéto (lot) i saró, so bijandjola dre léste! Xolý Ráskire-Devléskiri ĥazdyjápe pe saré narody, pe saré léngire xaladybena (xaladénde). Jov sovlahadiá pal lénde, otdyjá len pe xasibén. Léngire zamardé manušá javéna rosčhurdyne, i zakhandena léngire trúpy, bérgi javéna kindle léngire ratestyr. Hasjola bolybnytko xaladybén (bolybnýtka xaladé), i bolybén zakerelape (phandelape), syr lylvarí; čergeniá peréna, syr patrín (listo) vinagradoskire randiatyr, syr šukí patrín smokovnytkone kaštéstyr. Skedyny isyn pe bolybén Mirí kurtála, ake, vaš séndo zmekelpe joj pe Jedomo, i pe narodo, konés Me otdyjom prokošybnaske. Kurtála Ráskire-Devléskiri pherdjola ratésa, thuljola bakreskire i buzneskire ratestyr, bakreskire thulypnastyr, pal-dová so svénto dyibén (žértva) isyn ke Raj Devél dre Vosoro, baró zamariben isyn pe Jedomoskiri phuv. Guruva peréna lénca, i guruvore khetané guruvenca; čaliakirelape (paniakirelape) phuv léngire ratésa; práho čaljola léngire thulypnasa. Javdiá dyvés, kóli othala (otdéla) pale Raj Devél, kóli phučelape Jov pal Sióno. Réki léskire syr smola jačéna, práho léskiro jačéla dzeveliasa (sierasa) i javéla phuv léskiri syr xačkirdy smola. Na pirijačena te xačon ni dyvesé, ni ratý; viéčnes javéla te ĥazdelpe (te džal) thuv látyr, javéla phuv čhučé phuvjása saró časo, nikón odój na prodžála nikoli. Čirikliá odój javéna te dživén xulanca, filino i korako javéna te dživén pe doiá phuv i protyrdena pir láte xasibnaskiro šylo i xasiakiribnytko otvieso (urovnjo). Na jačélape pe láte nikonés lačhé-rodoskire manušéndyr, konés kharéna, sob (kaj) te javén jone kral'jenca saré thagárja (kniázi) lákire javéna syr čhučó štéto. Lákire baré felatiniá / kolova (dvorcy), lákire tvárdymi (krieposti) zabarjona phusadé čar'jenca; javéla phuv štetosa, kaj šakaly javéna te dživén i javéla gredasa (dvorosa) vaš strausenge. Riskiribnáskire murdalá (zvieri), so dživéna pe šukí phuv, javéna te dykhenpe vešytkone mycenca; odój benga javéna te godlen, sozdyiben (sykaibén) ratítko odój javéla te otkhinjol, poperla péske štéto. Sap phakenca (krylenca) odój javéla te dživél, dre gniázda (kúfo) javéla te barjakirel péskire tyknydoren, javéla te skedel len ke pe tel phaká, i odój skedénape kaĥniale (koršuny). Poroden dre Ráskire-Devléskiri lylvarí i proginen. Saró davá javéla, ničí na otparuvelape i nijékh na paruvelape javiresa, pal-dová so uštá Léskire priphendle i dúho (fáno) Léskiro len skedéla. Jov Kokoró vykedyjá len pir žrebijo, Jov rozdyja lénge daja phuv pir mierakiri miéža; jone zalena la i javéna te dživén odój viéčnes. Obradynelape čhučí phuv, i phuv šukí, i obradynelape rig, kaj nikón na dživéla, i rozmekelape (rozcvetinela), syr luludí (cveto) narcyso. I javéla phuv gožes te rozmekelpe i te radynélpe, javéla radymása i godlenca baripén Livanoskiro láke délape, Karmiloskiro i Saronoskiro barikanypen; jone javéna te dykhén Ráskire-Devléskiro, amaré Devléskiro baripén. Ĥazden zorjása vastá, savé obmeknepe, mek te na izdran tumaré čangá! Phenén odolénge, kon daréla ilésa: “Javén zoralé, na darén! Ake, isyn tumaró Devél, Jov othala (otdéla) pale, Devél sphučela. Jov javéla i zrakhéla tumen.” Tén'ci otkernape jakhá kororengire i kaná kašukengire javéna te šunén. Tén'ci langalo syr olienjo javéla te uhtel, bičibakiro (niemo) zabagala, pal-dová, so promarlape paní pe čhučí phuv i pe mal (stiep) promarnape sygna rekicy. Odój, kaj na sys paní, ziero (oziero) javéla; dre phuv šukí but paní skedelape; pe štéto, kaj šakaly dživénas, javéna vučé čarjá i sil (kamyšo) te barjon. I javéla odój baró drom, jov javéla te kharelpe sventoné dromésa. Nažužo odój na javéla te psirél, javéla davá drom féni (tóka) vaš odolénge, kon patiála, i kon na džinéla nisó; nikón léndyr dalé droméstyr na zmarlape. I ščer (liévo) na javéla odój, i januro (xiščno murdál) na zadžála odorík, les na lathéna odój, a zrakhné manušá javéna te psirén. I risjona odolé, konés zrakhéla Raj Devél i javéla pe Sióno radymakire godlása; rádyma javéla lénca saró časo (cýro); i loš (viesielijo) jone lathéna, a bibáht bidasa léndyr otdžala. I sys davá pe dešuštarto berš, kóli dživelas králi o Jezekíia. Gijá o Sienahirimo, králi Asirijákiro pe saré zoralé Judejákire fórja i lyjá len. I bičhadiá Asirijákiro králi Lahisostyr dro Jerusalimo ke králi Jezekíia, Rabsakos xaladenca; jov terdijá odój, kaj thadelas paní paniprolydžaibnytkonestyr upratune venderinjatyr (prudostyr), pe drom pašýl félda, kaj parniakirenas pohtana. I vygijá ke jov Jeliakimo, Xielkijaskiro čhavó, phurydyro pe kralítko kher, i Sievna, čhinybnari, i Ioaho, Asafoskiro čhavó, kanceliari (savó začhinelas saró, so kerdiápe). I phendiá lénge Rabsako: “Phenén Jezekijaske: adiáke rakiréla baró králi, králi Asirijákiro: ‘Saví nadiéia isyn túte, i konéstyr tu užakiresa lačhipén? Me duminava, so davá isyn čhučé lavá, a vaš maribén trej godý i zor, pe konéste isyn tyrí nadiéia, so tu otgijan mándyr? Ake, tu duminesa, so tut podrikirla Jegípto, phagirdó destó, kóli léla les vari-kon dro vast, jov vast phusavela. Adasavó isyn faraóno, králi Jegiptóskiro vaš odolénge, konés jov podrikiréla, i kon čhuvéla nadiéia pe léste. A kóli tu phenésa mánge: “Pe Raste-Devléste isyn amarí nadiéia”, – Ci nane odová devel, koneskire vučé štéty i altári otparudia Jezekíia i phendiá Judejake i Jerusalimoske: “Mangénpe angíl jekh davá altárjo, angíl javír na mangénpe?” Dorakirpe miré rása, Asirijákire kralísa, me dáva túke duj tysiency gren, ci doresesa tu adákicy manušén, sob (kaj) te bešén pe lénde? I tu kamésa, sob (kaj) te otdžal barydyró, jekh tykné pishar'jendyr Miré xulaskiren, kóli túte isyn nadiéia pe jekh Jegípto, pe léskire grénde i maribnýtka vurdená? Tu duminesa, so na sys Devléskiri vólia te džav mánge pe daja phuv, sob (kaj) te xasiakiráv i občorav la? Raj Devél phendiá mánge: “Džá pe daja phuv i občor ke xasibén (xasiakir) la.’” I phendiá Jeliakimo, i Sievna i Ioaho Rabsakoske: “Rákir tyré pishar'jénge pir aramieitko (siriitko) čib, ame ĥaljovasa daja čib, a pir judýtko čib aménca na rákir, pal-dová so manušá šunéna, savé skedynépe pe vánta. I phendiá Rabsako: “Ci man bičhadé jekh/ féni (tóka) ke tu i ke tyró raj, sob (kaj) te phenáv dalé lavá? Nad, me som bičhadó i ke manušá, savé isyn bešté pe vánta, sob (kaj) jone te prilén ladžaipén i magiripén khetané tuménca.” I uštyjá Rabsako i phendiá zoralé zaniása pir judýtko čib: “Šunén lav baré-kralískiro, Asirijákire kralískiro lav! Adiáke rakiréla králi: ‘Mek te na xohavél tumen o Jezekíia, pal-dová so jov tumen na zrakhéla.’ Mek te na podrikirél tumen Jezekíia Rása-Devlésa, kóli jov rakiréla: ‘Zrakhéla amen Raj Devél, na otdena davá fóro dre Asirijákire-kralískire vastá.’ Na šunén Jeziekijas, pal-dová so adiáke rakiréla Asirijákiro králi: “Javéna bahtalé tumé mánca dro ramánjo (miro), vydžán ke me i, mek kažno manúš tuméndyr te xal péskire vinagradoskire kaštéstyr i smokovnytkone kaštéstyr, mek kažno te p'jel paní péskire ĥanyngatyr. A tén'či me javáva i lavá tumen pe dasaví phuv, saví zdžála (poddžála) pe phuv tumarí, pe phuv, kaj isyn maró i mol (vino), kaj barjola vinagrado (drakh) i javír barjakirdé (plódy). Mek te na xohavél tumen Jezekíia, kóli rakiréla: ‘Raj Devél amen zrakhéla.’ Ci zrakhné javire-narodoskire develá péskiri phuv Asirijákire-kralískire vastéstyr? Kaj isyn Jemafoskire i Ariadoskire develá? Kaj isyn develá Sieparvaimoskire? Ci zrakhné jone Samárija miré vastéstyr? Kon saré dalé devlorendyr zrakhciá péskiri phuv miré vastéstyr? I tumé duminéna, so Raj Devél zrakhéla mándyr Jerusalimo?” Ne jone ničí na phendlé léske, pal-dová so králi priphendiá: “Niči léske na rakirén.” I javné Jeliakimo čhavó Xielkijaskiro, phurydyro pe kralítko felatin i Sievna, čhinybnari, Ioaho, čhavó Asafoskiro, kanceliari, (savó začhinelas saró, so kerdiápe) ke Jezekíia dre rozriskirde ídi i piriphendle léske Rabsakoskire lavá. Kóli šundiá davá králi o Jezekíia, to roskuscia péskire ídi, uridiape dro balytko gonó praskasa i gijá dro Kher (Khangirí) Ráskire-Devléskiro. I bičhadiá Jeliakimos, phurydyres pe kralítko kher i Sievnas, čhinybnaris i phuredyršone rašán, uriden, dre roskušne ídi syr dre bibáht ke proróko Isajo, čhavó Amososkiro. I jone phendlé léske: “Adiáke rakiréla Jezekíia: ‘Bibahtaló isyn dyvés, dyvés, kóli javné bída, kára i ladžaipén, sýrby, kiéli čhavoré kaména te vydžán dákire ločoviátyr, ne nane zor date te bijanél. Mek te šunél tyró Raj Devél lavá Rabsakostyr, konés bičhadiá králi Asirijákiro, xuláj léskiro, sob (kaj) jov (Rabsako) te kaliakirel džidé Devlés, sob (kaj) te košel Les lavénca, savé šundiá tyró Raj Devél, pomangpe pal manušénde, savé jačnépe, savé iščo (inké) džidé.’” I javné kralískire-Jezekijaskire dynárja ke Isajo. I phendiá lénge Isajo: “Adiáke phenén tumaré xuláske: ‘Phendia Raj Devél: ‘Na dar lavéndyr, savé tu šundián, savénca košenas Man Asirijákire kralískire dynárja. Ake, Me bičhaváva dre léste dúho (fáno), so jov šunéla lav i risjola pe péskiri phuv i Me domarava les odój kurtalása.’” I risijá Rabsako, i dykhciá, so Asirijákiro králi marelape Livnasa, pal-dová so odová otgijá Lahisostyr. I šundiá jov pal Tirgakoste, Jefiopijakire kralíste. Léske phendlé: “Ake, jov gijá te marélpe túsa.” Syr jov šundiá davá, to jov bičhadiá ke Jezekíia i phendiá: “Adiáke phenén Jezekijaske, Judejákire kralíske: ‘Mek te na xohavél tut tyró Devél, pe Konéste isyn Tyrí nadiéia, kóli tu duminesa’: ‘Na otdena Jerusalimo dre Asirijákire-kralískire vastá.’ Ake, tu šundián, so kerdé králja Asirijákire saré phuv'jenca, kóli čhudé pe lénde sovlahaibnytko lav; i tu dumenesa, so tu zrakhesape? Ci zrakhné devloré odolé narodengire, savén občorde ke xasibén Miré dadá? Ci zrakhné Gozano i Xarano, i Riecefo i Jedienoskire čhavén, savé isyn dro Falasaro? Kaj isyn Jemafoskiro králi i králi Arpadoskiro, králi foróstyr Sieparvaimostyr, Jenatyr i Ivatyr?” I lyjá Jezekíia lyl bičhadé-manušéngire vastéstyr i gindia les i gijá dro Kher Ráskire-Devléskiro, i otkerdia (psiradia) les Jezekíia angíl Raste-Devléste. I mangelaspe Jezekíia angíl Raste-Devléste i rakirélas: “Rajo Dévla, bolybnáskire-jangoléngiro, Devél Izrailjoskiro, Savó isyn beštó pe xieruvimy! Tu san jekh Devél pe saré phuvitka kralipená, Tu sozdyjan phuv i bolybén. Odker, Rajo Dévla, Tyró kan i pošun, odker, Rajo-Dévla, Tyré jakhá i podykh, vyšún lavá Sienahirimoskire, savó bičhadiá, sob (kaj) te kaliakiren Tut, Džidé Devlés. Čačó, Rajo Dévla! Králja Asirijákire občorde ke xasibén saré rigá i léngire phuvjá. I čhurdyné dre jag léngire devloré, ne dalé sys na develá, a butý, saví kerdé vastá manušéskire, kašt i bar, paldavá xasiakirdé len. A akaná, amaró Rajo Dévla, Devél amaró, zrákh amen léskire vastéstyr, te džinén saré kralipená pe phuv, so Tu, Rajo Dévla, isyn jekh Devél.” I bičhadiá Isajo, Amososkiro čhavó, ke Jezekíia, sob (kaj) te phenén: “Adiáke rakirél Raj Devél, Devél Izrailjoskiro: ‘Tu mangdianpe Mánge proti Sienahirimoste, Asirijákire kralíste.’ Ake, isyn lav, savó Raj Devél phendiá pal léste: ‘Na podykhela pe túte, javéla te salpe tútyr patyvalý čhaj, terný čhaj Sionóskiri, pokrencynela šerésa, kóli tut dykhéla čhaj Jerusalimóskiri.’ Konés tu košesas i kaliakiresas? Pe konéste godlesas i pe konéste ĥazdyjan tyré jakhá adiáke vučés? Pe Sventoné Izrailjoskire Devléste. Tyré pishar'jénca tu kaliakiresas Ras-Devlés i phendián: ‘Miré vurdenenca, savé but isyn, me ĥazdyjompe pe vučé bérgi, pe rig Livanoskiri i phagirdjom léske baré kiedry, léskire lačhé kiparisy, javdjom pe léskiro vučipén, dre léskiri únta (sado). Me ĥanavavas i paní pjavas, i vyšut'kirava miré ĥerénca saré réki (leniá) dro Jegípto.’ Ci tu na šundián, so Me ĥará kerdjom davá, dre ĥaratuné dyvesá priphendjom pal dová, a akaná kerdjom, pal-dová so tu phagiresas zoralé fórja ke xasibén i jekh bará léndyr jačkiresa? Manušá, savé odój dživéna, xasiakirdé péskiri zor, izdran, prilén ladžaipén, jone kerdépe, syr čar pe félda, syr zeleny kovly čar, syr čar, so pe kher barjola, syr shačkirdo maró angíl dová, syr jov gijá dre kolosy. Bešesa tu, ci vydžasa, ci zadžasa, me saró džinava, džinava i dová, syr tu ĥazdyjanpe proti Mánde. Pal-dová so tu pe Mánde ĥazdyjanpe xoliamipnasa, pal-dová so tumé šundlé Miré kaná, syr tu phutjosa, Me čhuváva Mirí angrusty dro Tyró nakh i Miro savari dro Tyró muj i riskiráva tut pale dolé dromésa, savésa tu javdián. Ake, túke, Jezekíia, ĥiertýk (znamiénijo): Xan dro davá berš maró, savó vybarija ziarkatyr, so pyjá pe phuv, pe javír berš xan maró, savó kokoró péstyr vybarija, a pe tríto berš barjakirén maró, barjakirén vinagradýtko únta (sado) i xan léndyr. Jačaibén, savó isyn dro Judáskiro kher, zrakhciape i vybarjola telé, i janéla barjakirdó (plódo) uprál. Pal-dová so Jerusalimóstyr vydžála jačaibén, a zrakhibén javéla bergátyr Sionóstyr. Raj Devél keréla adiáke léskire zevlynypnastyr (rievnostiatyr). Adiáke rakiréla Raj Devél pal kralíste Asirijakireste: “Na zadžála jov dre davá fóro, na ĥazdénape pe léste maribnýtka bustiá (striély), jov na džála angíl ščytosa, jov na ĥazdéla (na čhuvéla) phuvjátyr valo. Risjola pale dolé dromésa, pir savó javdiá, a dre davá fóro jov na zadžála’, – rakiréla Raj Devél. ‘Me zrakháva davá fóro, zrakháva les vaš Péske i vaš Davidóske, Miré pisharíske.” I vygijá Jangólo Devléskiro i zamardiá dro Asirijákire-xaladéngiro stáno šel ohtodešá pandž tysjoncy manušén. Uštyné pe sámo zlóko (zoria) i, ake, – saré manušá isyn mulé. I otgijá, i gijá, i risijá Sienahirimo, Asirijákiro králi i dživdiá ke Ninievija. I kóli jov mangelaspe dro Nisrohoskiro, péskire-Devléskiro Kher, Adramielieho i Šariecero, léskire čhavé, zamardé les kurtalása, a kokoré našné pe phuv Araratoskiri. I jaciá kralísa Asardano, léskiro čhavó, pe léskiro štéto. Dre dolé dyvesá zanasvalyja Jezekíia i skedelaspe te merél. I javdiá ke jov proróko Isajo, čhavó Amososkiro, i phendiá: “Adiáke rakiréla Raj Devél: ‘De palatuné uphenybená pal saré réndy dro tyró kher, pal-dová so tu na vysastjosa, a merésa.” Tén'ci Jezekíia risijá mósa ke vánta i mangelaspe Ráske-Devléske i rakirélas: “O, Rajo Dévla! Priripir, so me psiravas angíl Túte dro čačipén, saré ilésa, i keravas me angíl Tyré jakhá lačhé réndy.” I zarondia Jezekíia zoralés. Sys Ráskire-Devléskiro lav ke Isajo, i sys phendló: “Džá, phen Jeziekijaske: adiáke rakiréla Raj Devél, Davidóskiro, tyré-dadéskiro Devél: ‘Me šundjom tyrí pátieri (molítva), dykhcjom tyré jasva i, ake, Me dáva túke, sob (kaj) tu te dživés iščo (inké) dešupandž berš. Me zrakháva tut i davá fóro Asirijákire-kralískire vastéstyr, Me na jačkirava davá fóro. Ake, isyn túke ĥiertýk (znamiénijo) Rástyr-Devléstyr, so kerla Raj Devél pir lav, savó Jov phendiá: Ake, me riskiráva pale khameskiri zer (tien'), saví progijá pir ĥerunia (stupieni) Ahazoskire. I risijá kham pe deš ĥerunia (stupieni) pale, pir savé jov džálas telé. Jezekijáskiro, Judejákire kralískiri pátieri (molítva) dre dyvesá, kóli jov sys nasvaló i vysastija nasvalypnastyr. Me phendjom péske: na proginé iščo (inké) miré dyvesá dro džiibén, a mánge trej te džav dre adoskiri pórta, zalyne mándyr miré beršá. Me rakiravas: “Me na dykháva Ras-Devlés, butýr me na dykháva Ras-Devlés pe phuv, kaj dživéna, me na javáva te dykháv manušés maškír odolénde, kon dživéla pe svéto. Kher miro zalelape štetóstyr, otlydžalpe mándyr, syr šátra čhupnariskiri, me som bangó te otčhinav péskiro džiibén syr tkačo. Jov otčhinela man; dyvés i rat me užakiravas, so bičhavesa mánge meribén. Užakiravas ke zlóko (ránko); syr liévo (ščer) Jov rosphagirela saré miré kokalý, dyvés i rat užakiravas, so Tu bičhavesa mánge meribén. Syr žuravo (bus'ko) me bagavas, syr bahirka (lastočka) me ščebičynavas, syr golumbo me tuginavas, jasvénca ĥazdavas jakhá ke bolybén: Rajo Dévla! Pharó isyn mánge, zrákh man!” So me phenáva? Jov phendiá mánge i Jov kerdiá. Dro štylypen prodživava me saré miré beršá, ripiri miro kirkipen pe iló. Rajo Dévla! Adiáke dživéna dalé manušá, dro saró davá dživéla miro dúho (fáno), Tu sastiakiresa man, i désa mánge džiibén. Ake, syklyjom miré bidatyr, Tu zrakhcián miro iló xasibnastyr, Tu čhurdyjan pal Péskiro dumo miré gréhi. Na liúno (ado) šarela Tut, na meribén tut šarela, nane nadiéia pe Tyró čačipén odolénde, kon myjá. Džidó, jekh džidó manúš Tut šarela, syr akaná me som: dad rosphenéla čhavorenge Tyró čačipén. Raj Devél man zrakhéla, saré amaré dyvesá ame lása te bagas giliá dro Kher Ráskire-Devléskiro bašaibnasa pe strunytka strumiénty.” I phendiá Isajo: “Mek te janén smokva i te občhuven lása čyl'čako (naryvo), tén'či jov vysastjola.” A Jezekíia phendiá: “Sósa Tu dosykavesa, so me javáva te psirav dro Kher Ráskire-Devléskiro?” Dro dová časo (cýro) o Mierodaho, čhavó Valadonoskiro, králi Vavilonskiro šundiá, so Jezekíia sys nasvaló i vysastija i bičhadiá léske lyl i dáry. Sys bahtaló radymása daléstyr Jezekíia i sykadiá bičhadé manušénge kher, kaj rakhelas péskire kučipena (sokroviščy), rup, suvnakái, kuč khandypena, saré maribnýtka (arsienalo), saró, so sys léste dre piraliá kučipnaskire, saró, so léste sys, lénge sykadiá, ničí na jaciápe léskire mištypnástyr. I javdiá proróko Isajo ke králi Jezekíia i phendiá léske: “So rakirénas adalé manušá? Katýr jone javné?” Jezekíia phendiá: “Dural javné jone ke me, javné Vavilonóstyr.” I phendiá Isajo: “So jone dykhné dro tyró kher?” Jezekíia phendiá: “Saró dykhné, saró miro barvalypén me sykadjom lénge, ničí na jaciápe dre miré kučipnaskire piraliá, so me na sykadjom lénge.” I phendiá Isajo Jezekijaske: “Šun lav Rástyr-Devléstyr, bolybnáskire-jangolengirestyr.’ ‘Ake, javéna dyvés i saró, so isyn dre tyró kher, so skedyné tyré dadá, lydžána krig dro Vavilóno, ničí na jačélape, – rakiréla Raj Devél. Otlena tyré čhavén, kon túte lathéla, jone javéna jevnuhenca dre Vavilonóskire-kralískiro kher.’ I phendiá Jezekíia Isajoske: “Lačhó isyn Ráskire-Devléskiro lav, savó tu phendián, pal-dová so dre Miré dyvesá Jov bičhavéla iščo (inké) ramánjo (miro) i zrakhibén”. “Podrikiren, podrikiren dúho (fáno) dro Miro narodo,” – rakiréla tumaró Devél. Rakirén ke Jerusalimoskiro iló, phenén léske, so pirijaciá léskiro maribén, so na otdelape pale léske pal grého, pal-dová so jov prilyjá Ráskire-Devléskire vastéstyr pal saré gréhi dre duj móly butýr, syr treindiá. Zan, saví godlela pe čhučí phuv: “Kerén drom Ráske-Devléske, kerén pe mal (stiep) mamúj dromá vaš amaré Devléske. Kažno dólo mek te pherdjol, kažno bérga i bérgica mek te perén, dová, so isyn bangó, te jačél roŭno (vórto), i bangé dromá te kerenpe gladkone droménca. I sykadjola Ráskire-Devléskiro baripén, i kažno loč' (plot') dykhéla zrakhibén Ráskire-Devléskiro, pal-dová, so adiáke phendlé Ráskire-Devléskire uštá.” Zan rakiréla: “Phen!” “Ne so mánge te phenáv?” “Kažno loč (plot') – čar, a gožypen lákiro – syr luludí (cveto) feldytko. Čar zašutjola, luludí (cveto) zašutjola, a kóli phurdela pe léste Raj-Devél, adiáke i narodo – jov isyn čar. Čar zašutjola, luludí zašutjola, a lav amaré Ráskire-Devléskiro jačélape viéčnes.” Džá pe vučí bérga, Sióno, savó mištó phenéla Devléskiro lav! Ĥazde zorjása zan tyrí, Jerusalimo, savó rakiréla lav Devléskiro! Ĥazde zan, na dar! Phen ke fórja Judáskire: “Ake, isyn tumaró Devél!” Ake, Raj Devél, Devél javéla zorjása i Léskiro vast isyn zorjása. Ake, mazúri (nagrada) Léskiri isyn Lésa, Jov otdéla pale sarénge angíl Péskiro muj. Syr čhupnári Jov rakhéla Péskire bakrén; a bakrorén léla Jov pe vastá i javéla te lydžál pe Péskiro kolýn, i savé déna thud te lydžál. Kon vyčhudiá paní péskire vastésa, vygindiá bolybén i práho phuvjákiro, zvažyndia pe ubladýtka (viesy) bérgi i bérgicy pe ubladýtka čaré? Kon ĥalyjá dúho (fáno) Ráskire-Devléskiro, kon podphenelas Léske i sykliakirelas Les? Konéstyr mangéla Jov godypén (sovieto), i kon déla godý Léske, čhuvéla Les po drom čačunó, kon déla Léske džinybén i sykavéla drom, kaj isyn godý. Ake, narody – syr čolynia (kapli) paní vedratyr i ginenape syr práho pe ubladýtka (viesy). Ake, ostrovy (phuvjá maškír mórjo (derjáv)), Jov ĥazdéla syr práho. Na uhtýlla (nádosi) Livanos, sob (kaj) te kerél jag vaš svénto dyibén, na uhtýlla (nádosi) murdalén pe léste, sob (kaj) te janel dyibená vaš célo shačkiribén. Saré narody, syr nisó isyn angíl Léste, syr ničí, syr čhučó štéto Léste ginenpe. Pe konéste zdžála (podžala) Devél, so tumé phenéna? I so pe Léste zdžála (podžala)? Spieco te vyčhinel keréla idolo, suvnakunari učhakiréla les suvnakása, prikerela ke jov rupove zandirorja (cepočki). A kon isyn čororó, odová vykedéla kašt, savó na kirnjola, rodéla sykliakirdé manušés-spiecos te vyčhinel gožes, sob (kaj) te kerél idolo, savó b tvardes te terdjol. Ci tumé na džinéna? Ci tumé na šundlé? Ci na rakirénas tuménge angledýr saréstyr, ci na ĥalyné tumé phuvjákire sozdyibnastyr? Jov isyn Odová, Kon bešéla uprál pe krenglypen phuvjákiro i pe manušénde, savé pe phuv dživéna, i, savé isyn syr kirme angíl Léste. Jov protyrdyjá bolybén, syr sano pohtan, čhudiá len syr šátra. Dro nisó Jov pirikerela thagar'jen (kniaz'jen), syr vari-so čhučó keréla jov phuvjákire sendar'jen. Ake, jone naĥara čhudé, naĥara barjakirdé, naĥara dre phuv pridživdepe, ne syr Jov phurdyja pe lénde, i jone vyšutine, i balvál lydžijá len krig, syr phus. So ž tumé phenéna pal Mánde, pe konéste Me zdžava (podžava)? Konesa tumé priroŭninena (priparuvena) Man,” – rakiréla Svénto. Ĥazden tumaré jakhá ke vučó bolybén i podykhen? Kon les sozdyjá? Kon vylydžala Péskire čergeniá i ginéla len? Saré čergeniá Jov kharéla pir lav, ničí na xasjola Léste, pal-dová so isyn léste bari zor i zoralypén. Sóske ž tu rakirésa, Jakovo, sóske tu vyphenesa, Izrailjo: “Ĥarado isyn miro drom Rástyr-Devléstyr, bistyrdo isyn miro réndo Miré Devléste”? Ci tu na džinésa, ci tu na šundián, so viéčno isyn Raj Devél, Savó sozdyjá phuv, nikoli na khinjola, i na našavela zor, ne tu na ĥaljosa Léskiri godý. Kon khinyja – odoléske Jov déla zor, i kon isyn bizorjákiro – odolés Jov podrikiréla. I terné čhavé khinjona, xasiakirena zor, i terné manušá peréna. A odová, konéste pe Raste-Devléste isyn nadiéia, priléna neví zor, ĥazdéna phaká (kryly), syr kidy (orly), našéna i na javéna khine, prastána i na khinjona. “Javén štyl angíl Mánde, ostrovy, i mek manušýtka nácyi te keden nevéstyr péskiro zoralypén! Mek jone te javén pašýl, i mek jone te phenén: ‘Terdjovasa khetané pašyledýr pe séndo.’ Kon ĥazdyjá čačipnaskire manušés vastokóstyr? Kon khardiá les te džal pal péste? Kon dyjá léske tel vast manušéngire nácyi i kerdiá les, jekhés te xulainél pe kral'jénde? Kon otdyjá len sýrby práho vaš léskiri kurtála, sýrby phus, so vurniala, vaš léskiro lúko? Jov tradéla len, i džála bidaripnaskire dromésa, pir savó Jov na psirdiá nijékhvar péskire ĥerénca. Kon sozdyjá i kerdiá saró davá? Kon kharelas ke Pe manušýtka ródy anglypnástyr! Me som Raj Devél, Pérvo, i dre palatuné (posliednia) Me adiáke-pac' Som.” Ostrovy dykhné davá i trašandyne, jagóry (kraí) phuvjákire strahádyne, jone podtyrdenape pašyledýr i javné. Kažno délas vast péskire pašatuné manušéske, i rakirélas péskire pšaléske: “Rikirpe murškanés.” O petalengiro (kovaljo) poddela dúho (fáno) suvnakuné spiecoske, i jov, kon, roŭninela baré mlotkosa listy ĥazdéla dúho (fáno) kodoléske, kon marela pe kavadlo (amoni), savó rakiréla pal spajka: “Isyn mištó,” tén'či jov zoraliakirela gvozdenca (karfinenca), sob (kaj) te javél saró zoraló pe štéto.’ Ne tu, Izrailjo, san Miro pishári, Jakovo, konés Me vykedyjom, Avramos, Miré males (drugos). Tu, konés Me vykedyjom phuvjákire jagorendyr, i konés khardjom Me ke pe samone duratuné šteténdyr, i konéske Me phendjom: ‘Tu san Miro pishári,’ Me vykedyjom tut i na durjakirdjom tut krig.” Na dar, pal-dová so Me som túsa: na našadjov dro dúho (fáno), pal-dová so Me som Devél tyró. Me javáva te zorjakirav tut, i, Me podava vast túke, Me podrikirava tut Miré čačipnaskire čačé vastésa.” Ake, saré, kon gijá xoliása pe túte, javéna ladžakirdé i peréna patyvatyr, javéna syr nisó, i odolé, kon čingardyjape túsa, odolé xasjona. Tu javésa te rodes len, i tu na lathesa len, kodolé, savé kamlé te marénpe túsa, savé giné maribnása pe túte – jone javéna syr nisó, syr dová, so butýr na dživéla. Pal-dová so Me, Raj Devél, Devél tyró, javáva te rikirav tut pal čačó vast, i phenáva túke: “Na dar, Me dáva vast (pomoginava) túke.” “Na dar, tu san kirmo Jakovóskiro, tumé, nábut, manušále Izrailjoskire! Me podava vast túke”, – rakiréla Raj Devél, i Me som tyró Vykinybnaskiro (Vyrakhibnaskiro), Svénto Izrailjoskiro. Ake, Me keráva tútyr neví obmaribnaskiri (molotilka) vostrone dandenca, tu javésa te obmares bérgi i tu rozmaresa len pe koterá, i tu pirikeresa bérgicy dre šprija (miakina). Tu javésa te pirikedes (te vieines) len pe balvál, i balvál lydžála krig len, i riskiribnaskiri balvál syr vihro rosphurdela len, tu javésa drieván te radynespe pal Raste-Devléste, i tu javésa barikano (te šarespe) Sventonesa Izrailjosa. Kiéli čororé i bógi (manušá dre trébima) javéna te rodén paní, i nane paní, i léngire čibá (čibjá) javéna te šutjon trušatyr (smegatyr), to Me, Raj Devél, javáva te šunav len; Me Devél Izrailjoskiro, na mekava len. Me otkerava réki (leniá) pe čhučé bergicakire vučipená i ĥanyngorja maškír doloskire féldy Me keráva čhučé phuvjátyr ziero (oziero), Me keráva šuké phuvjátyr ĥanyngorja paniésa. Me čhuváva te barjol kiedro, akacyja, mirta i olivítko kašt dre čhučí phuv, i Me čhuváva te barjol dre prahitko phuv kipariso, sosna i buko khetané, sob (kaj) jone te dykhén i te dodžinenpe (te ĥaljon), te riskirén péskiro iló i te ĥaljon, so vast Ráskire-Devléskiro sozdyjá davá, i so Svénto Izrailjoskiro sozdyjá davá. “Sykavén (phenén) pal péskiro réndo (diélo)”, – rakiréla Raj Devél. “Poden (janén) tumaré dophenybena”, – rakiréla Králi Jakovóskiro. “Mek jone te phenén i te sykavén aménge, so javéla mek jone te sykavén anglatuné (pérva) pričyny, savé isyn, sob (kaj) ame te rozlas (te roz ĥaljovas) len, i sob (kaj) ame te džinas, sósa končynelape kadavá réndo, ci so te phenén angíl sarénde, so javéla angíl. Phenén aménge dová, so javéla angíl, sob (kaj) ame te džinas, so tumé san develá, ci kerén lačhipén ci fuipén, sob (kaj) ame te kerás baré jakhá (te divinasape) i te dykhas davá khetané tuménca. Čačes, nane nisavó lačhipén tuméndyr, i tumarí butý ničý na mol; džungaló (brydko) isyn kodová, kon vykedéla tumen. Me ĥazdyjom les paš-ratitkoné (sieviernone) rigátyr, i jov javéla, jov javéla te kharel Miro lav pe ránko (pe zlóko), kiéli kham ĥazdélape, i jov javéla te tasavel thagar'jen sýrby bláta (rastvoro), sýrby piritkonengiro tasavela ĥleja (glina). Kon phendiá angíl sarénde samone anglypnástyr, sob (kaj) te džinas aménge, i ĥará angíl davá, sob (kaj) aménge saštý te phenas: “Davá isyn čačipén.” Ne nane nikonés, kon te phenél angíl sarénde, ci vari-kon te šunél tumaré lavá. Me pérvo phendjom Sionoske: “Dykhén, kaj jov isyn!” I Me dyjom Jerusalimoske jekhés, kon janéla bahtalý zan (zvies'). Pal-dová so Me dykhcjom, i na sys nijékh manúš, i Me lyjom te dykháv maškír lénde, ne na sys junkaro (sovietniko), savó, kiéli Me phučavas léndyr, to te del ráda te otphenel pe lav. Čačes, jone saré ničý na mol; léngire butiá nisó, a léngire vybilade muiá (istukany), isyn balvál i čhučipen. “Ake isyn Miro pishári, Konés Me rikirava pal vast, Konés Me vykedyjom, ke Kon pasjola Miro iló, Me čhuváva pe Léste Miro dúho (fáno), i Jov phenéla pal séndo ke narody. Jov na zagodlela, na ĥazdéla Péskiri zan, i Jov na déla te šunén la pe vulícy (gásy). Sphagirdo destó Jov na phagiréla, jag saví, syg murdjola, Jov na murdiakirela, Jov javéla te kerél séndo čačipnása. Na peréla Jov bizorjakoro, na khinjola ke dová časo, syr Jov keréla séndo phuvjake; i pe Zakóno Léskiro užakiréna lačhipnása ostrovy.” Adiáke rakiréla Raj Devél, Savó sozdyjá bolybén i štéty léngire, Savó sozdyjá phuv lákire džiibnasa, Savó déla, sob (kaj) te dživél lákiro narodo, Savó déla dúho (fáno) odolénge, kon pir phuv psiréla. Me, Raj Devél, prikhardjom Tut pir čačipén, Me láva te rikirav Tut pal vast, Me láva te rakhav Tut, i Me čhuváva Tut syr zavieto vaš manušénge, sob (kaj) te dykhén dud (svéto) Najudýtka manušá (jazyčniki), sob (kaj) te otkeres jakhá kororenge, sob (kaj) te vylydžas pe vólia odolén, kon dre navolia isyn beštó, a odolén, kon isyn beštó dro kalypén, Me vylydžava léngire bešybnastyr. Me som Raj Devél, davá isyn Miro lav, i Me na davá patýv Miré javire manušénge, i baripén Miro Me na davá idolénge. Ake, kerdiápe dro džiibén, so phendlé angledýr, i nevó lav Me phenáva; angíl dová, syr jov kerélape čačipnása, Me otkerava tuménge.” Bagán Devléske neví gilý, šarén Les saré phuvjákire jagorendyr; tumé, kon tradéla pir mórjo (derjáv), saré, kon dživéla odój, ostrovy i odolé, kon pe lénde dživéla! Mek te ĥazdel péskiri zan čhučí phuv lákire for'jenca, kaj Kidaro dživéla; mek te radynénpe odolé, kon dživéla pe bérgi, mek te šarén bergakire upralypnastyr! Mek te den patýv Ráske-Devléske, mek te šarén Les pe ostrovy. Raj Devél vydžála syr drieván zoraló murš, syr murš maribnýtko, Jov ĥazdéla zevlynypén, Jov kharéla ke Pe i déla gódla maribnytkes, Jov sykavéla Léskire vergénge, so Jov isyn zoraló. Dlúges (ĥará) Me ničí na rakiravas, Me vyrikiravas saró, akaná Me láva te godlav, syr džuvlý (manušny), kóli joj bijanéla, lavá te rozmarav, Me láva te phagirav saró. Šut'kirava Me bérgi i bérgicy, vyšut'kirava sarí čar, so barjola pe lénde; vyšut'kirava réki (leniá) i ĥanyngá. I lydžáva Me kororen dolé dromésa, savó jone na džinéna; Me lydžáva len dolé dromorenca, kaj na psirenas. Me pirikerava kalypén dro dud (svéto) i bangé dromá Me keráva čačé droménca; ake, so Me keráva vaš lénge i Me na jačavava len. Tén'ci risjona pale i drieván ladžana odolé, konéskiri nadiéia sys pe ídoly, kon rakiréla ke kerdé devloré: “Tumé – amaré develá.” Šunén, kašuke, dykhén, kororé, sob (kaj) te dykhén. Kon isyn iščo (inké) adasavó kororó, syr Miro pishári, isyn adasavó isyn kašuko, syr odová, konés Me bičhadjom? Kon isyn adasavó kororó, syr odová, kon jaciá pir iló Mánge, syr pishári Ráskire-Devléskiro? Tu but dykhesas, ne na dykhcián, so trej; kaná sys otkerde, ne tu na šundián. Ráske-Devléske sys pir iló vaš Péskiro čačipén te ĥazdel Zakóno i te del léske patýv. Ne kadalé manušá isyn občorde i oblyne ke xasibén, saré jone isyn sphandle i garadé dro bešyben; len oblyne i nikón len na zrakhéla; občorde, i nikón na rakírla: “Otdé pale!” Kon tuméndyr šundiá mištés pal davá péskire kanenca, ĥalyjá i vyšundia vaš anglypén? Kon otdyjá Jakovós čorenge te xasiakirén, Izrailjo, sob (kaj) te rosčoren? Ci na kerdiá Raj Devél, pal-dová so ame kerdiám gréhi angíl Léste? Jone na kamenas te psirén Léskire droménca i jone na šunenas Léskiro Zakóno. I Jov vyčhudiá pe lénde Péskiri xolý i maribnýtko xoliamipen; joj xačola jagása saré rigéndyr, ne jone na dykhné; xačolas lénde, ne jone na ĥalyné davá ilésa. Akaná adiáke rakiréla Raj Devél, Savó sozdyjá tut, Jakovo, i Savó dyjá džiibén túke, Izrailjo: “Na dar, pal-dová so Me vykindjom tut, khardjom tut tyré lavésa, tu san Miro. Kóli tu javésa te piridžas pir paní, Me som túsa; ci pir réki (leniá) – jone tut na tasadiakirena; poddžasa ke jag – joj tut na shačkirla. Pal-dová so Me som Raj Devél, tyró Devél, Svénto Izrailjoskiro, Zrakhibnari tyró; Me Jegípto, Jefiopija, Saveja (Šeba) otdyjom pal túte, sob (kaj) te vykinav tut. Pal-dová so tu san drógo dre Miré jakhá, i jacián drieván kuč i Mánge tu jacián pir iló, to Me otdáva javire manušén pal túte i narody pal tyró di. Na dar, dykh, Me som túsa; vastokóstyr Me janáva tyró kherítko ródo, zapadostyr skedáva tut. Ke paš-rat (sieviero) phenáva: “Otdé!” – i ke paš-dyvés (jugo): “Na rikir, lýdža duralypnastyr Miré čhavorén i Miré čhajén phuvjákire jagorendyr (krajendyr); kažnones, kon kharélape Miré lavésa, konés Me sozdyjom vaš Miro baripén, konéske Me dyjom džiibén.” Vylydža narodo, konéste isyn jakhá, ne jov kororó, isyn kaná, ne jov isyn kašuko. Mek saré narody te skedénpe khetané, i saré kherítka ródy te javén khetané. Kon maškír lénde davá angíl phendiá? Mek te phenén, so sys angledýr saréstyr, mek te den kherítka péskire manušén te dosykaven (te dophenen) pal davá, mek te phenén pal péste čačipén, sob (kaj) te šunés i te phenés: “Čačó!” A Miré manušá, savé dophenena, pal čačipén, – phenéla Raj Devél, – tumé i Miro pishári, konés Me vykedyjom, sob (kaj) tumé te džinén i te patián Mánge, so davá Me som; angledýr na sys nikoli javire Devlés i na javéla. Me, Me som Raj Devél i nane javirés Zrakhibnaris apríč Mánde. Me angilphendjom, i zrakhcjom i phendjom pal davá, a javirés nane ke tumé, i tumé – Miré manušá, savé dophenena, so Me – Devél, – rakirél Raj Devél. Angledýr saréstyr Me sómas adasavó, nikón na zrakhéla Miré vastéstyr; Me keráva, i kon davá otparuvela? Adiáke rakiréla Raj Devél, Savó vykindia (vyrakhcia) tumen, Svénto Izrailjoskiro: “Vaš tuménge Me bičhadjom ke Vavilóno, rosphagirdjom saró, so sys zakerdo i Xaldiejen, savé sys phut'kirdé péskire parmenca (korablienca). Me som Raj Devél, tumaró Svénto, Kodová, Kon sozdyjá Izrailjo, tumaró Králi. Adiáke rakiréla Raj Devél, Savó otkerdia drom pe mórjo (derjáv), Savó otkerdia drom pir zoralé paniá. Savó vylydžijá gren i maribnýtka vurdená, xaladén i zor; saré pasine khetané, na uštyné, murdine, syr momolytka (svietil'niki), xasiné. Ne tumé na priripirena pal proginé dyvesá, na duminéna pal dová, so sys ĥará. Ake, Me keráva neví butý, akaná joj sykadjola, ci tumé na kaména te džinén pal davá? Me keráva drom pe félda, réki (leniá) pe čhučí phuv. Feldytka murdalá (zvieri) pe félda Man vyšarena, šarena šakaly i čirikliá (strausy), pal-dová so Me pe čhučí phuv davá paní, Me keráva réki (leniá) pe šukí mal (stiep), sob (kaj) te p'jel Miro narodo, savó Me vykedyjom. Davá narodo Me sozdyjom vaš Péske; jov déla patýv Mánge. A tu, Jakovo, na khardian Man, tu, Izrailjo, na kerdián ničý vaš Mánge. Tu na jandian mánge bakrorén vaš célo shačkiribén, na vyšardian Man tyré sventoné dyibnasa. Me na začhuvavas tut, sob (kaj) te dynarines (služynes) Mánge mareskire janybnasa, na priphendjom, sob (kaj) te janes fimiámo. Tu na kindian Mánge destó lačhé sungasa pal rup, Tu na čaliakirdian Man thulypnasa tyré sventoné dyibnástyr, ne tyré grehénca kerdián Mánge pharipén; Mánge isyn pharó tyré nalačhé rendostyr. Me, Me Kokoró, otmekáva tyré gréhi vaš Péske Kokoreske, Me na priripirava gréhi tyré butýr. De Mánge te priripirav; ame javása te kerás séndo (te sendiakiraspe); rákir tu, sob (kaj) te dophenes tyró čačipén. Tyré-dadéskiro dad kerdiá grého i odolé, kon mangdiápe pal túte, otginé Mándyr. Paldová Me rašángire barydyrendyr pe svénto štéto zalyjom léngiri butý, i otdyjom pe xasibén Jakovós, i otdyjom Izrailjo, sob (kaj) les te magirén. “Akaná šun, Jakovo, Miro pishári, šun, Izrailjo, savó Me vykedyjom. Adiáke rakiréla Raj Devél, Savó sozdyjá tut, Savó podrikirelas tut dákire ločoviátyr: ‘Na dar, Miro pishári, Jakovo, na dar, drógo Izrailjo, savó Me vykedyjom. Me vyčhuvava paní pe odoléste, kon drieván kaméla paní, i baré paningá pe dová, so vyšutija; Me vyčhuvava Miro dúho (fáno) pe tyró kherítko ródo i bahtiakiribén Miro pe tyré čhavorende, savé iščo (inké) javéna angíl. I javéna jone te barjon maškír čar, syr vierby (ivy) pašýl paní. Jekh manúš phenéla: ‘Me som Ráskire-Devléskiro’, javír kharéla pes Jakovóskire lavésa, tríto čhinela péskire vastésa ‘Me som Ráskire-Devléskiro,’ i les kharéna Izrailjoskire lavésa.” Adiáke rakiréla Raj Devél, Králi Izrailjoskiro, Savó vykindia les. Raj Devél, bolybnáskire-jangoléngiro: “Me som pérvo i Me som palatunó (posliednjo), nane javire Devlés, apríč (kromie) Mánde. Kon isyn iščo (inké) adasavó, syr Me som? Mek jov te phenél, mek te rosphenel Mánge jekh pal jekh saró dolé časostyr, syr Me sozdyjom ĥaratuno narodo, ci mek jone te angilphenen pal dová, so javéla. Na darén, i na trašan: ci na phendjom Me túke ĥará, ci na angilphendjom? I tumé dosykavena (dophenena) pal Mánde. Ci isyn javír Devél apríč Mánde? Nane ni saví javír skála [nane javír Devél-ju.o.], ni so butýr Me na džináv. Odolé, kon keréla ídoly, odolé keréna dylnypén, i dolé ídoly, savé isyn dróga vaš lénge, ke savé jone tyrdenape, na janéna lénge nisavó lačhipén; adalé manušá ĥaljona davá dre péste. Jone na dykhéna, na ĥaljona, paldavá javéna ladžakirdé. Kon kerdiá javire devlores, kon vyčhudiá idolo, savéstyr nane ni savó lačhipén? Saré, kon keréla davá, javéna ladžakirdé, pal-dová so spiecy te vyčhinen pe kašt, savé keréna ídoly, isyn kokoré féni manušá. Mek saré jone te skedénape, mek te javén terdé: jone piridarena (strahadjona) i javéna ladžakirdé. Faurnari (kovaljo) keréla sastyrestyr tover, i jov obkerela pe vangara les; vykerela les baré mlotenca i obkerela les péskire zoralé vastésa; adiáke keréla butý, so jov jačéla bokhalo i bizorjákiro, jov na p'jela paní, i jov khinjola. Kherá-keribnaskiro (plotniko), syr vykedyjá kašt, i protyrdela pir léste mamuitko (linija) i otčertinela les jarjasa, občhinela vostrone strumientosa, obkrengliakirela les i keréla léstyr gožone manušores, sob (kaj) te čhuvél les dro kher. Adavá manúš phagiréla péske kiedry, vykedéla maškír kaštá dro veš egli i dembo; čhuvéla jasienjo, dre phuv, a bryšýnd davá kašt barjakiréla. Dalé kaštéstyr manúš tatjola, xačkiréla les dre jag i pekela maró. I dalé kaštéstyr keréla devlores i mangelape léske; keréla idolo i peréla angíl léste pe čangá. Jov xačkiréla pašýl kašt dre jag, pe javír paš jov keravela mas, čaljola i tatjola, i rakiréla: “Kuč tatijom, lačhí jag.” A doléstyr, so kaštéstyr jaciápe, keréla devlores, keréla péskire idolo, mangelape léske, peréla angíl léste pe čangá i rakiréla léske: “Zrákh man, tu san miro devla!” Jone ničí na džinéna i na ĥaljona: Raj Devél zakerdia léngire jakhá, sob (kaj) te na dykhén i léngire ile, te na ĥaljon. I na priléla manúš ke iló, i nane léste godý, sob (kaj) te phenél: “Me shačkirdjom kašt pe jag i pe vangara pekcjom maró, keradjom mas ci trej mánge te keráv nalačhipen kaštéstyr, so jaciápe? Ci trej te mangavpe kašteske?” Jov xála, xohavelape, xohado iló lydžála javire dromésa les; i nisyr jov na vyriskirela péskiro iló, na phenéla: “Ci nane xohaibén dro Miro čačó vast?” Ripiren davá, i Izrailjo, tumé san Miré pishárja. Me sozdyjom tut, Izrailjo, tu san Miro pishári, na bistyr pal Mánde. Me skhosava (zlava) tyró čoripén syr migla (tumano), tyré gréhi syr óbloko, obrisjov ke Me, pal-dová so Me vykindjom tut. Mek te radynélpe ke bagaipen bolybén, pal-dová so Raj Devél kerdiá davá! Mek te godlel phuvitko xoripén, mek te šuminen bahtiatyr bérgi, veš, saré kaštá dro veš, pal-dová so Raj Devél vykindia Jakovós, Jov ĥazdéla Péskiri patýv dro Izrailjo. Adiáke rakiréla Raj Devél, Savó vykindia tut, i Savó sozdyjá tut dre dakiri ločoví: “Me som Raj Devél, Savó sozdyjá saró, Me jekhdžinó protyrdyjom bolybén i Péskire zorjása rosčhudjom phuv. Me, Devél, Savó keréla adiáke, so giertyka (znamiénii), savé déna xohané angilphenybnarja, ne saró ivjá (naprásnes), Savó sykavéla, syr zdžana godiatyr čovahane manušá, savé keréna čorahano phenybén, Savó vytradela god'varen manušén (magen) i léngiro džinybén keréla dylnypnasa. Me, Devél, Savó déla zor lavéske, so phendiá Miro pishári, Savó keréla pir lavá, so phenéna bičhadé manušá Léske, Savó rakiréla ke Jerusalimo: “Javéna te dživén dre túte”, – i ke fórja Judáskire: “Tumé na javéna butýr rosphagirdé, Tumé javéna nevéstyr čhudé, i Me neviakirava tumaré ruíny.” Me, Devél, Savó rakiréla ke panieskiro xoripén (biezdna): “Vyšutjov, i tyré réki (leniá) Me vyšut'kirava.” Savó rakiréla pal Kiraste: “Miro čhupnári; jov keréla saró pir Mirí vólia, jov phenéla ke Jerusalimo. “Tu na javésa butýr rosphagirdo, phenéla ke Khangirí: “Tu javésa čhudý pe štéto!” Adiáke rakiréla Raj Devél ke Kira, savés Jov pomakhcia: Me rikirava tut pal čačó vast, sob (kaj) te otdav túke narody, Me zlava kustyka, so sys pe trušula kral'jénde, sob (kaj) te otkeren túke vudará, i sob (kaj) pórta te na zaphandelpe. ‘Me džáva angíl túte, bérgi rosphagirava, xarkuné (miedítka) vudará rozmarava, i štaby (zapory) sastruné piriphagirava. I Me otdáva túke garadé dro kalypén (cjomnyma) kučipena (sokroviščy) i prirakhne barvalypena, sob (kaj) tu te ĥaljos, so Me som Raj Devél, Savó kharéla tut pir lav, Savó isyn Devél Izrailjoskiro. Vaš Jakovóske, Miré pisharíske, vaš Izrailjo, Konés Me vykedyjom, Me khardjom tut pir lav, dyjom túke patýv, mek (xot') tu na džindian Man. Me som Raj Devél i javirés nane; nane Devlés apríč Mánde, Jekh Me som. Me vykedyjom tut, kóli tu na džindian Man, sob (kaj) te džinén vastokóstyr, kaj kham ĥazdélape i ke zapado (pal-panitko rig), kaj kham bešéla, so nane javire Devlés: Me som Raj Devél i javirés nane. Me keráva dud (svéto) i keráva kalypén (cjomnyma), Me dáva ramánjo (miro) i keráva bari bída (bibáht); Me, Raj Devél, keráva davá. Mek bolybén te del bryšýnd, mek te čhuvelpe čačipén bolybnástyr, mek te otkerelpe phuv, sob (kaj) te del zrakhibén, mek khetané te barjol čačipén. Me, Raj Devél, keráva saró davá. Bida kodoléske, kon čingardelape Devlésa: Savó sozdyjá les, kon isyn čeriepko čerepkendyr pe phuv. Ci phenéla ĥleja (glina) péskire mastieroske: “So tu kerésa?”, ci phenéla tyrí butý pal túte: “Léste nane vastá?” Bida odoléske, kon phenéla péskire dadéske: “Sóske tu dyján mánge džiibén?”, a dáke ci phenéla jov: “Sóske tu bijandian man?” Adiáke rakiréla Raj Devél, Svénto Izrailjoskiro, Savó sozdyjá les: “Tumé phučena Mándyr, so javéla Miré čhavénca? I tumé kaména te podphenen, so trej Mánge te keráv?” Me sozdyjom phuv i manušés pe láte; Me – Miré vastá protyrdyne bolybén i Me dyjom priphenybén ke saré bolybnýtka čergeniá (bolybnytko xaladybén). Me čhudjom les dro čačipén, Me keráva saré léskire dromá mamúj (Me mamuiakirava). Jov keréla Miro fóro, otmekéla pe vólia Miré manušén plienóstyr, na léla léndyr nisavó vykinybén, ni dáry”, – rakiréla Raj Devél, bolybnáskire-jangoléngiro.” Adiáke rakiréla Raj Devél: “Jegiptiáni, savé keréna butý, i Jefiopliani, savé biknena, i Savieicy, vučé manušá, javéna tyré manušénca; jone pal túte javéna te džán phandle zandir'jenca (cepenca), javéna, peréna pe čangá, léna te mangén tut, rakirí: “Jekh (féni) túte isyn Jekh Devél, i javire nane Devlés.” Čačó, Tu san, Devél garadó? Devél Izrailjoskiro, Zrakhibnari. Saré jone javéna ladžakirdé; khetané lénca džána ladžasa i odolé, kon keréla ídoly. A Izrailjo javéla zrakhno pir viéčno zrakhibén dro Raste-Devléste; tumé na javéna ladžakirdé nikieli. Adiáke rakiréla Raj Devél, Savó sozdyjá bolybén; Jov – Devél, Savó sčhudia phuv i dyjá zor láke; na ivjá (naprásnes) sčhudia la, a sob (kaj) te dživén pe láte; Me som Raj Devél i javirés nane. Na čorahanés Me rakiravas, Me na rakirdjom pe kaló (tjomno) phuvjákiro štéto; Me na rakirdjom ke kherítko ródo Jakovóskiro: “Ivjá (naprásnes) tumé Man rodéna.” Me som Raj Devél, Savó rakiréla čačipén i sykavéla čačipén. Skedénpe, javén, poddžan saré, kon zrakhciape narodóstyr. Mek te javén odolé dylyné i bura, kon lydžála kaštuno idolo, kon mangelape devloreske, savó na zrakhéla. Den te džinén manušénge i phenén: “Kon phendiá davá dro ĥaratuno časo, kon angilphendia davá? Ci na Me, Raj Devél, i nane javire Devlés apríč Mánde, a isyn jekh Devél – Me som Devél čačunó, Savó zrakhéla i nane nikonés javirés apríč Mánde. Ke Me obrisjon i tumé zrakhenape, saré jagóry (kraí) pe phuv, pal-dová so Me som Devél i nane javirés. Me Kokoró Pésa sovlahava: Miré uštendyr vydžála čačipén, lav, savó na parudjola, so angíl Mánde peréla pe čangá kažno ródyco, pe Mánde sovlahala kažno jekhe-čibakiri iri (čib). I javéna te rakirén pal Mánde adiáke: “Féni (tóka) Jekhe Raste-Devléste isyn zor i čačipén; ke Jov javéna i javéna te ladžan saré Léskire vérgi. Raj Devél zrakhéla i pir Léste javéla te slavinelpe kherítko ródo Izrailjoskiro. Pyjá Vilo [Bel-ju.o.], pyjá Nievo; léngire ídoly pasjona pe grénde i guruvende, pharó lénge davá te lydžán khine murdalénge! Pyné, pyné khetané, na zrakhné odolén, kon len lydžalas, i kokoré giné dro pliéno. Šunén man, kher Jakovóskiro, saré, kon jaciápe Izrailjoskire kheréstyr, konés Me prilyjom bijanypnastyr i Me lydžavas dákire ločoviátyr. Tumé phurjona, a Me adasavó javáva; parnjona tumaré balá, a Me javáva te lydžav tumen. Me sozdyjom tumen i lavá te lydžav, Me láva te podrikirav, Me javáva te rakhav tumen. Pe konéste Me zdžava (podžava), syr tumé duminéna, kon isyn Adasavó, syr Me som? Manušá doreséna suvnakáj kisykatyr, ublavena rup i kharéna manušés, sob (kaj) jov te kerél léstyr devles; mangénpe devleske i perén pe čangá angíl léste. Jone léna les pe psiké, lydžána les, čhuvéna pe léskiro štéto, jov isyn terdó, jov na zdžála štetóstyr; manušá godlena, ne jov ničí na phenéla, na rakhéla bidatyr. Priripiren davá i sykavén pes muršenca; prilén davá ke iló, manušále, savé otginé čačuné Devléstyr. Priripiren dová, so sys angledýr saréstyr, pal-dová so Me som Devél i nane javire Devlés, nane nikonés, kon zdžála (podžala) pe Mánde. Me phenáva angledýr saréstyr, so tén'či dro kónco (dro jagóro) javéla, ĥaratuné časostyr Me rakiráva pal dová, so iščo (inké) na kerdiápe: Javéla pir Miro godypén (sovieto); Me keráva saró, so Mánge isyn pir iló. Me khardjom orlós (kidós) vastokóstyr; duratuné rigátyr Me khardjom odolés, kon keréla pir Miro priphenybén. Me phendjom i keráva ke kónco (jagóro); angilphendjom i javéla adiáke. Pošunen Man, manušá xoliamé ilésa, savé otginé čačipnastyr. Podgíia Miro čačipén, jov isyn nádur, sýges javéla Miro zrakhibén; Me dáva zrakhibén Sionoske, a Izrailjoske – Mirí patýv. “Džá, beš pe práho, patyvalý terný džuvlý, čhaj Vavilonoskiri, beš pe phuv. Nane trono (kralítko štéto), čhaj Xaldiejengiri, na phenéna pal túte butýr, so tu san šukár i barvaly. Le žorny (veledin) i mielin jaržó, zle tyró dykhlo, ĥázde tyrí podia (truiuny), sykáv tyré ĥerá, džá pir réki (leniá). Odkerlape tyró nangipén, javéla bicialy tyrí ladž. Keráva Me séndo, Me na potanginava nikonés.” Amaró Zrakhibnari isyn Svénto Izrailjoskiro, Léskiro lav – Raj Devél, bolybnáskire-jangoléngiro. Beš, na rákir ničí, džá dre kalypén (cjomnyma), čhaj Xaldiejengiri, butýr na javéna te kharén tut raniasa dro kralipén. Xoliasyjom Me pe Miro narodo, xasiakirdjom Miré čhavén, otdyjom len dre tyré vastá, Vavilóno, a tu na potangindian len; phuró manúš lydžijá tyró pharipén. Tu rakiresas: ‘Saró džiibén me javáva raniasa,’ – a tu na prilyjan tyré godiása, na dumindian, so duredýr javéla. Akaná vyšún davá, rospiestindly, birakhibnaskiri, saví rakiréla dro péskiro iló: ‘Me som jekh adasavi, javirja nane; me na jačavape biromeskiri (pivliasa), me na xasiakiráva čhavorén.’ Ne kóli tu na užakiresa, to saró ke tu javéla: i romes xasiakiresa i čhavorén dro jekh dyvés; javéla ke tu bibáht pherdés, na zrakhéla tut čorahano džinybén i bari zor čorahany. Túte sys nadiéia pe tyré nalačhé réndy, tu phendián: ‘Nikón man na dykhéla.’ Tyrí godý i tyró džinybén zmarde tut droméstyr; tu rakiresas dro tyró iló: ‘Me som, i butýr nane nikonés apríč Mánde.’ Javéla ke tu čoripén (bibáht); tu na ĥaljosa, savé rigátyr joj ĥazdélape; javéla ke tu bída, i tu látyr na našesa; javéla xasibén, pal savó tu na duminesa. Jačpe tyré čorahane džinybnasa, savó tu lyjan te kerés iščo (inké) dro ternypen, zrakhpe lésa bidatyr. Tu khinyjan, pal-dová so prilyjan but godypén (soviety); mek te javén odolé, kon angilphenela pir bolybén, pir nevó čhon i čergeniá, mek te zrakhen jone tut doléstyr, so javéla. Ake, jone isyn syr phus, jag shačkirdiá len, na zrakhné jone péskiro džiibén jagatyr; ničí na jaciápe – ni vangar, sob (kaj) te tatjos, ni jag, sob (kaj) te bešes nábut paš láte. Ake, savé jačné odolé, konesa tu keresas butý, konesa tu timisiakiresas (targinesas) iščo (inké) dro tyré terné beršá. Kažno gijá pe péskiri rig; nikón na zrakhéla tut. Šunén davá, kher Jakovóskiro, saré, kon kharélape Izrailjoskire lavésa, kon bijándyja Judáskire rodóstyr, kon sovlahala Ráskire-Devléskire lavésa i patiála Izrailjoskire Devléske, mek (xoc') jov na patiála na pir patiaibén i čačipén! Jone phenéna, so jone isyn sventoné foróstyr, so Devél Izrailjoskiro, Konéskiro lav isyn Raj Devél, bolybnáskire-jangoléngiro, podrikiréla len. Me phenavas angledýr (vagedyr), ĥará angíl davá, syr saró javéla; Miré uštendyr vydžálas lav, i Me angilphenavas, i keravas, kóli na užakirnas, i saró davá kerdiápe (sys). Me džindjom, so tu na kamésa te kandes, dre tyrí men isyn sastruné žyly, tyró čekat isyn xarkuno (miedno). Paldavá Me phenavas túke ĥará (vago) angíl dová, syr davá kerelaspe, Me sykavavas túke, sob (kaj) tu te na phenés: ‘Miro idolo kerdiá davá, miro devloro, savó vastá kerdé, priphendiá, sob (kaj) adiáke te javél.’ Tu šundián; na dykhí pe saró davá, so isyn: ci tumé davá na pridžinena? Akaná Me phenáva túke nevó i garadó, i tu na džindian davá. Akaná davá kerdiápe, a naĥara na pir dyvés, i; tu na šundián pal davá, sob (kaj) te na phenés: ‘Ake, me džindjom davá.’ Tu na šundián, i na džindian pal davá, tyró kan na sys otkerdo, pal-dová so Me džindjom, so tu otperesa: tu xohavesa i tu san buntiari (otgiibnari) iščo (inké) dákire ločoviátyr. Vaš Miro lav Me pirijačavas te xoliasovav, vaš Mirí patýv Me obrikiravas Pes te xasiakiráv tut. Ake, Me biladjom (rosplavindjom) tut, ne na adiáke, syr rup; Me propatiakirdjom tut syr dro bov pir baré mén'ki. Vaš Péske Kokoreske, vaš Péske Kokoreske Me keráva davá, sob (kaj), syr te na kaliakiren Miro lav! Mirí patýv i baripén Me nikonéske na otdáva. Pošun Man, Jakovo, šun, Izrailjo, khardo Miro: Me som Odová, Savó sys, Me som pérvo (anglatunó) i palatunó (posliednjo). Miro vast sozdyjá phuv; Miro čačó (pravo) vast protyrdyjá bolybén; kóli Me kharáva len, to jone khetané javéna. Skedénpe saré, pošunen! Kon maškír lénde angilphendia davá? Ráske-Devléske jaciá pir iló jov, (Kira); jov keréla pir Devléskiri vólia dro Vavilóno, sykavéla Devléskiro vast maškír Xaldiejende. ‘Me, Me phendjom i khardjom les; Me les jandjom, i léskiro drom javéla bahtaló. Javén ke me, šunén davá lav: ‘Me nikoli na rakiravas čorahanés i samone anglypnástyr; dolé časostyr, syr saró davá kerelaspe, Me odój sómas, i akaná bičhadiá Man Raj Devél, Devél i Léskiro Dúho (Fáno).’ Adiáke rakiréla Raj Devél, Savó vykindia tut, rakiréla Svénto Izrailjoskiro: “Me som Raj Devél, Devél tyró. Me sykliakirava tut, Me lydžáva tut dolé dromésa, kaj trej túke te džas. Ne kóli b tu šundián Miré lavá! Tén'ci b ramánjo (miro) tyró te javél syr reka (len'), čačipén tyró – syr réki (leniá) baré. I ródo b tyró te javél, syr práho; vydžánas by tútyr but manušá; na vykhoselaspe, na xasjolas b tyró lav angíl Mánde.” Vydžán Vavilonóstyr, našén: javné Xaldiei; radynénpe i phenén pal davá; phenén davá lav pir sarí phuv, rakirén: “Raj Devél vykindia Péskire pisharís, Jakovós. Jov lydžála len pe čhučé phuvjá, a jone te p'jen na kaména. Jov déla lénge paní barestyr; Jov phagiréla bérga i paní čhuvélape. A grehitkoné manušénge nane ramánjo (miro)”, – rakiréla Raj Devél. Šunén Man, ostrovy (phuvjá pe mórjo (derjáv)). Šunén, duratuné narody: Raj Devél prikhardia man, (Izrailjo), dákire ločoviátyr; Me iščo (inké) na bijandyjom, a Jov kharelas Man pir lav. I sozdyjá Jov Miré uštá syr vostro kurtála; Léskire vastésa Jov učhakirelas Man; Jov kerdiá Mándyr vostro maribnýtko bust (striela), Jov rakhelas Man dro Péskiro kolčano. I phendiá Mánge: “Tu san pishári Miro, Izrailjo, Tu désa Mánge patýv i baripén: A Me phendjom: “Ivjá (naprásnes) Me keravas butý, Me našadjom (xasiakirdjom) péskiri zor. Ne miro čačipén ke Raj Devél; Devél miro otparikirela Mánge.” Akaná rakiréla Raj Devél, Savó khardiá Man iščo (inké) dre dakiri ločoví, sob (kaj) te javav Me Léskire dynarisa, sob (kaj) Me te prikharav ke Jov Jakovós, i, sob (kaj) Izrailjo ke Jov te skedelpe. Me prilyjom patýv dre jakhá Ráskire-Devléskire; Devél Miro isyn Mirí zor. I Jov phendiá: “Davá isyn nabaró réndo vaš Túke, so tu javésa Miro pishári, sob (kaj) te dživél ródyco Jakovóskiro, sob (kaj) te risjol jačaibén Izrailjoskiro; ne davá iščo (inké) nane saró. Ne keráva Me Tut dudesa (svetosa) vaš manušénge, sob (kaj) te džinén Miro zrakhibén saré jagóry (koncy) pe phuv.” Adiáke rakiréla Raj Devél, Izrailjoskiro Svénto, Savó vykindia Izrailjo, adiáke rakiréla ke narodo, savés saré košena i tradéna, savó isyn pishári baré rande: “Králja dykhéna i uštena; thagárja (kniázi) pe čangá perna vaš Ráske-Devléske, Savó isyn čačunó, vaš Svénto Izrailjoskiro, Savó Tut vykedyjá.” Adiáke rakiréla Raj Devél: “Dre lačhé dyvesá Me tut šundjom; dro dyvés, kóli isyn zrakhibén, Me podrikirdjom Tut. Me javáva te rakhav Tut, keráva Tútyr zavieto vaš manušénge, sob (kaj) phuv te otdžidiakires; sob (kaj) te otles pale rosčordo meknó mištypén, te riskires la (phuv) prilyibnaskirenge (nasliednikenge); sob (kaj) te phenés manušénge dre bešyben: ‘Vydžán!’ – manušénge, savé isyn dro kalypén (ciamlypén): ‘Sykavén pes!’ Jone pašýl drom javéna te čaraven, pir saré bérgicy javéna léngire čaritka féldy. Na javéna jone te bokhaljon, na javéna jone bi panieskiro (trušale), kham len na pekela; Kodová, Kon tanginela (žalinela) len, lydžála len i janéla ke paní. I saré Miré bergendyr Me keráva dromoro; i dromá Miré ĥazdénape (javéna ĥazdyné). Ake, javéna manušá duripnastyr, javéna paš-ratiatyr (sievierostyr) i morjostyr (derjavestyr), a javír javéna Sinimoskiro phuvjátyr.” Rádynpe, bolybén, jav lošaljov (viesielinpe), phuv; bérgi, godlen bahtiatyr: podrikirdia Raj Devél Péskiro narodo, potangindia Péskire manušén, savé stradynenas. A Sióno rakiréla: “Jačkirdiá man Raj Devél; bistyrdia man Devél miro!” Ci zabistrela džuvlý (manušny) péskire bijatós, ci na potanginela péskire čhavés? Ne kóli joj bistrela, Me tut na bistrava. Ake, Me čhindjom tut pe Miré vastá; vánty tyré saró časo isyn angíl Mánde. Tyré čhavé javéna te prastan ke tu, džána tútyr odolé, kon phagirelas i občorelas tut. Ĥazde tyré jakhá, podykh pir rigá, – saré jone skedénape, džána ke tu. Te dživáv Me, – rakiréla Raj Devél: – lénca sarénca tu ukedesape, syr gožone uribnasa; ukedesape lénca, syr terný. Dre tyré rosphagirdé kherá, pe tyré čhučé phuvjá i pe tyrí občordy phuv na javéla štéto, sob (kaj) te dživén odolé, kon xalas tut, džána krig tútyr. Bijaty, savé vybarjona túte, kóli javire čhavorén tu xasiakiresa, phenéna túke: ‘Nane mánge štéto, de mánge les, sob (kaj) me te dživáv.’ I phenésa tu dro péskiro iló: “Kon bijandiá len vaš mánge? Mánde na sys čhavoré, me na bijanavas, zalyne man dro pliéno dur adathýr, a kon len barjakirdia? Ake, me sómas jekhdžiny kokori, a kaj jone sys?” Adiáke rakiréla Raj Devél: “Ake, Me ĥazdáva Miro vast ke narody, Me sykaváva Miro stiago (flago) rodycenge i janéna pe vastá tyré čhavén, a čhajén tyrén – pe psiké. I javéna králja te čaliakiren tut; kralicy léngire tut čaliakirena. I javéna te perén angíl túte pe čangá i te xan práho tyré ĥerendyr. Tén'ci udžinesa tu, so Me som Raj Devél; so na ladžana manušá, konéste isyn pe Mánde nadiéia.” Ci otlena zoralestyr dová, so jov dorestia? Ci zalena zoralé manušéstyr odolén, konés jov zalyja dro pliéno? Adiáke rakiréla Raj-Devél: “I otlena pliennone manušén, konés lyjá dro pliéno zoraló xalado; otlena doresybén tiranostyr (zobarostyr) i zrakhena len, pal-dová so Me láva te maravpe, tyré vergenca, i Me zrakháva tyré čhavén. I odolé, kon pe túte ĥazdyjápe, javéna te xan péskiri loč (plot'); i javéna te p'jen péskiro rat, syr terný mol (vino), i kažno loč (plot') ĥaljola, so Me som Raj Devél, Zrakhibnari tyró, Savó Tut vykindia, Zoraló Jakovóskiro.” Adiáke rakiréla Raj Devél: “Kaj isyn lyl pal dová, so tumarí daj rozgijápe romesa, kaj isyn davá lyl, savésa Me otmekcjom la? I konéske Me bikindjom tumen? Ake, bikindle tumen pal tumaré gréhi, pal čoripén tumaró sys otmekny tumarí daj. Sóske na sys nikonés, kóli Me javavas, i nikón na otphendiá, kiéli Me khardjom? Ci Miro vast butýr na zrakhéla, ci nane Mánde zor, sob (kaj) te zrakhav? Ake, Miré strahasa Me šut'kirava mórjo (derjáv), keráva čhučí phuv rekendyr (lenor'jendyr); mačhé dre lénde kirnjona i meréna, pal-dová so nane paní. Me učhakirava bolybén kalypnasa i syr žalobnone gonestyr praskasa Me keráva učhakiriben vaš bolybén.” Raj Devél dyjá mánge čib god'varé manušéndyr, sob (kaj) Me lavésa te podrikirav kodolés, kon butýr na vyrikiréla; tasiárles (ránes) Jov džingavela Man, džingavela kan Miro, sob (kaj) Me te šunav, syr sykliaibnýtko. Raj Devél otkerdia Mánge kan, i Me na sómas proti, Me na gijom pale. Me otdyjom Miro dumo, sob (kaj) te marén Man; Miré čama (ščoki), sob (kaj) te pekaven; muj Miro Me na zakerdjom košybnastyr i čungardypnastyr. I Raj Devél déla vast (pomoginela) Mánge, paldavá Me na ladžava, paldavá Me rikirava Miro muj syr bar, i Me džinóm (džináv), so Me na jačavape ladžakirdó. Pašyledýr isyn odová, kon phenéla čačipén pal Mánde: kon kaméla te marélpe Mánca? Terdjovasa khetané! Kon kaméla te sendiakirelpe Mánca? Mek jov te poddžál ke Me. Ake, Raj Devél déla vast (pomoginela) Mánge: kon sendiakiréla Man? Ake, saré jone isyn, syr ídia: phurjona, xasjona. Kon tumender daréla Rástyr-Devléstyr, kandéla Léskire-Pishariskiri (Raboskiri) zan? Kon psiréla dro kalypén (mrako) bi dudeskiro (bi svetoskiro), mek jov te rikirelpe Ráskire-Devléskire lavésa, mek jov te čhuvél péskiro iló dre péskire Devléste. Ake, saré tumé, kon xačkiréla jag, konéstyr džána xačkirdé iskry syr maribnýtka bustiá (striély)! Džán dre jag i iskry tumaré strielendyr! Davá priléna tumé Miré vastéstyr, dre mén'ki (bibáht) tumé xasjona (meréna). ““Šunén Man odolé, kon rodéla čačipén, rodéla Ras-Devlés! Dykhén akaná pe bérga, savjátyr tumen vyčingirde, pe xoripén dro rovo (xohói), katýr tumen doresné. Podykhen pe Avraamoste, tumaré dadéste i pe Sarate, saví tumen bijandiá! Me khardjom les jekhés, dyjom léske bahtiakiribén, dyjom léske but čhavorén. Čačó, Raj Devél podrikirla Sióno, podrikirla léskire rosphagirdé kherá; a čhučí phuv léskiri Jov keréla syr rajo, i mal (stiep) léskiri pirikerela syr únta (sado) Raskiri-Devléskiri; rádyma i viesjolyma (loš) odój javéna, parikiriben i bagaiben. Pošunen Man, Miro narodo i kherítko ródo Miro! Pošunen Man tumaré kanenca! Mándyr vydžála Zakóno, i séndo Miro čhuváva syr dud (svéto) vaš narody. Pašyledýr isyn Miro čačipén; i džála upré Miro zrakhibén i vast Miro sendiakiréla narody. Ostrovy javéna te rikirén nadiéia pe Mánde, i javéla nadiéia pe Miro vast. Ĥazden tumaré jakhá ke bolybén i podykhen telé pe phuv: bolybén xasjola syr thuv, a phuv kerlape syr phurany ídia, manušá pe láte vymerena, a Miro zrakhibén isyn viéčno; čačipén Miro na xasjola. Pošunen Man, kon džinéla čačipén, narodo, savéste dro iló isyn Miro Zakóno! Na darén, kóli tradéna tumen manušá, na darén léngire nalačhé lavéndyr! Pal-dová so jone xasjona; kirmo shala len, syr výlna (šers'), a čačipén Miro javéla viéčno, zrakhibén Miro nikoli na pirijačéla.” Ĥazdepe, ĥazdepe, jav zoraló, vast Ráskire-Devléskiro! Ĥazdepe syr dre phurané beršá, kóli ĥaratuno ródo dživelas! Ci na tu xasiakirdian Raavos, xasiakirdian krokodilos? Ci na tu vyšut'kirdian mórjo (derjáv); šut'kirdian paní, savó isyn dro liúno (ado) xor telál; kerdián mórjo (derjáv) dromésa, sob (kaj) te džán manušá, savén vykindia Raj Devél? I risjona odolé, savén zrakhciá Raj Devél, i javéna pe Sióno bagaibnasa, rádyma léngiri nikoli na pirijačéla; jone javéna bahtalé i viesiéla (lošalé); jasva i bibahtalé ĥondiá (ŭzdohi) otdžana. “Me, Me Kokoró podrikirava tumen. Kon tu san, kóli daresa manušéstyr, savó meréla, daresa manušéskire čhavestyr, savó isyn adasavó, syr čar? Kon tu san, kóli bistresa Ras-Devlés, Savó tut sozdyjá, Savó protyrdyjá bolybén i dyjá džiibén phuvjake? Kažno dyvés tu daresa tyré-vergoskire xoliátyr, adiáke, sýrby vérgo isyn pašýl túte, savó kaméla te xasiakirél tut. Ne kaj isyn léskiri xolý? Sýges vydžála zaphandlo manúš (dro pliéno) pe vólia, i jov na meréla dre ĥanbín (jama), i javéla léste maró. Me som Raj Devél, Devél tyró, Savó ĥazdéla mórjo (derjáv) adiáke, so jov godlela (rievinela); Raj Devél, bolybnáskire-jangoléngiro isyn Léskiro lav. Me čhuváva andré Miré lavá dre tyré uštá, zerjasa (tienjosa) Péskire vastéstyr Me učhakirava tut, sob (kaj) te keráv bolybén, i te dav zor phuvjake, i te phenáv ke Sióno: ‘Tu san Miro narodo.’” Uštý, uštý, ĥazdepe, Jerusalimo, tu, savó vypijan Ráskire-Devléskire vastéstyr tahtáj (čaša) xoliása, tu vypijan tahtáj pibnasa, savó matiakirela, vypijan les sarésa. Na sys konéske te lydžál les, saré čhavéndyr, savé bijándyne léstyr, na sys konéske te podrikirél pal vast, saré čhavéndyr, savén jov barjakirdia. Javné ke tu duj bidy, kon tut potanginela (požalinela): čhučipen (pustota) i xasiakiriben, bokh i kurtála; konesa Me tut te podrikirav? Tyré čhavé jačné bizorjákire, jone isyn pašté pe saré vulícy (gásy), phandle syr mirga (sierna) dre felý (pietlia); pe lénde pherdija Tyré Ráskire-Devléskiri xolý; Tyré-Devléskiro godlypen. Paldavá, vyšún davá, bibahtaló, i mato na moliátyr (vinostyr)! Adiáke rakiréla tyró Raj Devél, i Devél tyró, Savó othala (otdéla pale) pal Péskiro narodo: “Ake, Me láva tyré vastéstyr tahtáj (čaša) pibnasa, savó mat'kirela; roščyna (droždžy) Miré tahtastyr xoliása; Tu butýr odothýr na p'jesa. I Me dáva les (tahtái) tyré vergénge, savé tut menčynenas; Me dáva tahtáj dre léngire vastá. Me dáva les odolénge, savé rakirnas: ‘Per tyré mósa, sob (kaj) te džas pir túte”, – i dumo tyró javélas sýrby phuv i gása, sob (kaj) te džán.’” Uštý, uštý, prilé tyrí zor, Sióno! Uri tyré ídi, Jerusalimo, ídi, savé déna túke patýv, svénto fóro! Butýr na zadžála ke tu naobčhindlo i magirdó manúš. Trinskir péstyr práho, uštý, Jerusalimo, savó sys dre navolia, zle zandir (lanco) tyré meniatyr, čhaj Sionóskiri dro pliéno! Adiáke rakiréla Raj Devél: “Bilovengiro tumen bikindle, birupeskiro tumen vykinena.” Adiáke rakiréla Raj Devél: “Miro narodo psirelas angledýr dro Jegípto, sob (kaj) te dživél odój; Asuro (Asiriicy) ni palsó pritasavelas len. Kakaná, so isyn Mánde adái?” – rakiréla Raj Devél: “Dová, so ivjá (naprásnes) zalyne Miro narodo; léngire baré raja xoliasona,” – rakiréla Raj Devél, – “i kažno mólo, kažno dyvés jone na déna patýv Miré lavéske. Paldavá udžinela Miro narodo Miro lav, paldavá udžinela dro dová dyvés, so Me som Odová, Kon phendiá: Ake, Me som!” Save lačhé, savé goža isyn pe bérgi odolé-manušéskire ĥerá, savó phenéla lačhí zan (zvies'), savó phenéla pal rádyma, rosphenéla pal zrakhibén, savó rakiréla Sionoske: “Prilyjá kralipén tyró Devél!” Ake, ĥazdyné zan tyré rakhibnárja, ĥazdyné zan, jone radynénpe khetané, pal-dová, so dykhéna péskire jakhénca, syr Raj Devél risjola dro Sióno. Radynénpe, bagán khetané, štéty Jerusalimóskire: podrikirdia Raj Devél Péskiro narodo, vykindia Jerusalimo. Sykadiá sarénge Raj Devél Péskiro svénto vast, sob (kaj) te dykhén saré narody; saré phuvjákire jagóry (koncy) dykhéna amaré Devléskiro zrakhibén. Džán, džán, vydžán odothýr, na lenpe pal magirdó, udžan léstyr, žužakiren pes odolé, kon lydžála khoré (sasúdy) Ráskire-Devléskire. Tuménge na javéla trej sýges te džán, tumé na poprastana; pal-dová so Raj Devél angíl tuménde javéla, Devél Izrailjoskiro javéla tumaré rakhibnarisa palál pal tuménde. Ake, pishári Miro bahtiakirdó javéla, ĥazdélape dre patýv, javéla šardo, i priléla baripén. Kicý manušá divinenaspe, kiéli dykhné pe Túte! Jov adiáke parudiape maribnastyr, so na sys Léste manušýtko muj, adiáke Jov vydykhelas, so i na sys Léste manušýtko patrín (óbrazo)? Adiáke but narody divinenaspe Léstyr; králja zakerna (phandena) péskire uštá angíl Léste, pal-dová so jone dykhéna i džinéna dová, so jone na šundlé, so nikoli lénge na rakirdé. Kon patiandyja lavéske, savó šundlé améndyr, konéske otkerdiape Ráskire-Devléskiro vast? Jov vybarija angíl Léste syr čarori, syr otbaripen šuké phuvjátyr; Jov na vydykhelas, syr manúš patyvalé minasa, na sys dre Léste baripén; ame Les dykhciam, i Léste na sys dasavo, so b prityrdyja amen ke Jov. Jov sys, syr nisó angíl manušénde, Léske na dyné patýv manušá; Murš, Savó prilyjá dukhá amaré i nasvalypen; ame otrisijam Léstyr péskire mósa; ame na kamdiam te dykhas pe Léste, ame na prilasas Les. Ne Jov lyjá pe Péste amaró bizorjakiriben, Jov lydžijá amaró nasvalypen, a ame dumindiam, so davá Devél dukhadia Les, čhudiá kára pe Léste i čhudiá pharipén pe Léste. Ne Jov stradynelas pal amaré gréhi, pal amaró čoripén Les menčinenas; kára, saví jandiá svéto pe aménde, sys pe Léste, Léskire fransostyr (dukhatyr) ame jaciám saste. Saré ame, syr bakriá psirasas, gijam kažno péskire dromésa, i Raj Devél čhudiá pe Léste gréhi, savé saré ame kerdiám. Les marenas, i pritasavenas, ne Jov vykedyjá te stradynel, Jov na otkerelas Péskire uštá; syr bakri Jov gijá pe meribén; syr bakroró ničí na phenéla, kóli zlenas léskiri výlna, adiáke Jov Péskire uštá na otkerelas. Les lyné sendostyr i bešybnastyr, ne pal ródo Léskiro, kon phenéla? Jov sys otčurdyno džidé manušéngire phuvjátyr; myjá pal grého, savó kerdiá Miro narodo. Les kamlé te garaven khetané prahar'jenca, ne Jov sys garadó ke barvaló manúš, pal-dová so Jov na kerdiá grého, i na sys xohaibén dre Léskire uštá. Ne sys Ráskire-Devléskiri vólia, sob (kaj) Les te marén ke kalé masá; Jov otdyjá Les pe mén'ki; kóli ž Léskiro di janéla svénto dyibén, sob (kaj) te otmekenpe gréhi, to Jov udykhéla Péskiro ródo angíl, i Ráskire-Devléskiri vólia javéla te kerélpe Léskire vastésa. Bahtaló javéla Jov odoléstyr te dykhél, so kerdiá Léskiro di; Péskire ĥalyibnastyr Jov, čačipnáskiro, pishári Miro, zrakhéla but manušén i gréhi léngire lydžála pe Péste. Paldavá Me dáva Léske kotér (paš) maškír barende, i zoralenca Jov doresybén roskerela (rozdielinela), pal-dová so Jov otdyjá Pes pe meribén. Les gindlé pal prahariste, ne Jov lydžijá pe Péste buté-manušéngiro grého i pal prahar'jende adiáke mangelas. Rádynpe, nakhabný (bieplodno) džuvlý, saví nijékhvar na bijandiá, ĥázde tyrí zan radymása, i rádynpe kodoia, saví nikoli na bijanelas! Džuvliáte, savjá jačkirdiá rom butýr čhavorén, syr odoljate, saví dživéla romesa, – rakiréla Raj Devél. Ker butýr štéto vaš tyrí šátra; ker šátra baredyre pologenca, na ladža! Protyrde šyle dlugedyr, zamar tyré kilore (konki). Tu bugljosa pe saré rigá; čhavoré tyré zalena dro pliéno narody, i jone javéna te dživén dre jačade fórja. Na dar, tu na javésa ladžakirdy; na ladža, nikón tut na ladžakirela; Tu bistresa ladžaipén, savó prilyjan dre terné beršá; i tu na javésa te ripires pal ladž, saví tu prilyjan, syr sánas biromeskiri. Kodová, Kon sozdyjá tut, isyn tyró rom; Raj Devél, bolybnáskire-jangoléngiro isyn Léskiro lav; Svénto Izrailjoskiro tut vykinela; Jov kharlape saré-phuvjákire Devlésa. Sýrby romniá, saví rovela, i saví isyn jačkirdy, kharéla tut Raj Devél; syr ternia romniá, saví nikonéske na sys trej”, – rakiréla tyró Devél. Me jačkirdjom pe nábut tut, ne baré tangipnasa (žalimasa) Me prilava tut pale. Xoliasyjom Me pe túte, garadjom tútyr Miro muj pe nábut, ne Me potanginava tut baré lačhipnása, – rakiréla Raj Devél, Savó vykindia tut. Davá isyn vaš Mánge syr paní dre Nojoskire dyvesá; syr sovlahadjom, tén'či, kóli dživelas Nojo, so paní butýr na javéla pe phuv, adiáke sovlahadjom, so Me na lavá te xoliasovav pe túte. Bérgi zdžana péskire štetóstyr, bérgicy izdrana, Miro lačhipén tútyr na otdžala, Zavieto, dre savó isyn Miro ramánjo (miro) na parudjola”, – rakiréla Raj Devél, Savó tanginela tut. “Čorori, čhurdyny riskiribnáskire balvaliasa, saví rovela i na pirijačéla! Ake, Me čhuváva tyré bará pe rubino, Me láva te keráv tut sapfirostyr. Me keráva tyré fenštry rubinendyr i tyrí pórta mutinendyr (žemčužynendyr), i saró tyró tyno drogoné barendyr. Saré Tyré čhavé javéna te sykljon Rástyr-Devléstyr; javéla lénde baró ramánjo (miro). Tu javésa zoralý čačipnása, na trej túke te dares, pal-dová so nikón túke butýr na déla pharipén, tu na javésa te dares, pal-dová so jov ke tu na poddžála. Ake, javéna te ĥazdénpe pe túte, ne davá nane Mándyr; kon ĥazdélape pe túte, odová peréla (xasjola). Ake, Me kerdjom faurnaris (kovaljos), jov roshačkirela vangar dre jag, sob (kaj) te kerél strumiento vaš péskiri butý; a Me sozdáva vergos, sob (kaj) jov te xasjol. Kon by na ĥazdelaspe pe túte vari-sósa, ničí túsa na kerélape; so b na rakirénas pal túte pe séndo, jone javéna bangé, a na tu. Davá isyn dáro syr meknó mištypén, so priléna Ráskire-Devléskire pishárja, jone javéna otmekne i davá isyn Mándyr,” – rakiréla Raj Devél. “Kon drieván kaméla te p'jel (isyn trušalo), mek te džal ke paní! Kóli nane tuménde lové, usajékh džán, kinen i xan! Kinen bilovengiro mol (vino) i thud! Sóske tuménge otdén lové pal dová, so nane maró; sóske te otdén lové pal dová, so na čaliakerela? Šunén akaná Man i xan lačhipén; mek tumaró di te javél čalo thulypnasa. Otkeren tumaré kaná, javén ke Me; pošunen i javéla te dživél tumaró iló; i Me dáva tuménge viéčno zavieto, Me dáva lačhipén, pal savó dyjom lav Davidóske. Ake, Me čhudjom les, sob (kaj) jov te dosykavel (te dophenel) čačipén narodenge, sob (kaj) te sykliakirél len. Ake, tu kharesa narodo, savés Tu na džindian; narody, i savé tut na džinéna, savé džána ke tu vaš Tyré Ráske-Devléske, vaš Svénto Izrailjo, pal-dová so Jov dyjá túke bari patýv. Rodén Ras-Devlés, kóli saštý te lathén Les; kharén Les, kóli Jov isyn pašýl. Mek grehítko manúš te mekel péskiro drom i péskire nalačhé dúmy, mek te javél jov ke Raj Devél, i Devél otmekéla léskiro grého; mek jov te javél ke Devél amaró, Savéske saré isyn dróga. Miré dúmy – nane tumaré dúmy; Miré dromá – nane tumaré dromá, – rakiréla Raj Devél. Ne syr bolybén isyn vučedýr phuvjátyr, adiáke-pac' i Miré dromá: jone isyn vučedýr tumaré dromendyr, i dúmy Miré isyn vučedýr tumarendyr. Syr iv i bryšýnd peréna bolybnástyr, ne pale na risjona, a peréna pe phuv, sob (kaj) joj te bijanél i te barjakirel; sob (kaj) te del giv (ziárka) odoléske, kon čhuvéla dre phuv, i maró odoléske, kon xála: adiáke i lav Miro, savó vydžála Miré uštendyr, – jov na risjola ke Me pale nisosa, ne keréla dová, so Mánge trej pir Mirí vólia, i keréla dová, vaš so Me bičhadjom les. A tumé vydžána radymása, i lačhipnása tumen prolydžana; bérgi i bérgicy javéna te bagán gilý angíl tuménde, i saré kaštá pe félda javéna sýrby radymása manušá, savé marena dre vastá. Vybarjola kipariso pe štéto, kaj xrústo suv'jenca, pe štéto cuknudiakiro vybarjola mirto; saró davá javéla vaš baripén Devléskiro, davá isyn dosykaiben viéčno.” Adiáke rakiréla Raj Devél: “Rakhén séndo i kerén čačipén, pal-dová so podgíia Miro zrakhibén i Miro čačipén sykadjola (otkerlape). Bahtaló isyn murš, savó keréla davá, i manušéskiro čhavó, savó davá rikiréla, savó rakhéla sávato (subóta), sob (kaj) te na javél magirdó, rakhéla péskiro vast, sob (kaj) te na kerél nisavó čoripén. Te na phenél čhavó javire narodóstyr, savó lyjá te patial Ráske-Devléske: “Raj Devél na prilyjá Man dro Péskiro narodo, i te na rakirél manúš jevnuho: “Ake, me som šuko kašt.” Pal-dová so Raj Devél adiáke rakiréla pal adasavé manušénde (jevnuhende): “Kóli jone rakhena Miré sávaty (suboty), vykedena dová, so isyn lačhó Mánge, rikiréna Miro zavieto. Odolénge Me dáva štéto dro Miro kher i dre Miré vánty; Me dáva lav fedýr lénge, syr čhavénge, i syr čhajenge; Me dáva viéčno lav, savó na xasjola. I čhavén javire narodóstyr, savé javné ke Raj Devél, sob (kaj) te kerén léske butý i te rikirén dro iló Ráskire-Devléskiro lav, i te javén Léskire pishar'jénca, sarén, kon rakhéla sávato (subóta) te na javél magirdó i zoralés te rikirelpe ke Miro zavieto. Me janáva len pe Mirí svénto bérga, Me obradynava (lošakirava) len dro Miro kher, kaj mangénape; léngire céla shačkiribena i svénta dyibená lačhé javéna pe Miro altárjo (žertvieniko), pal-dová so Miro kher kharélape kheresa, kaj mangénape saré narody. Raj Devél, Savó skedéla rostradynen manušén Izrailjostyr, rakiréla: “Ke vykedene léskire Me iščo (inké) lavá te skedav javirén.” Džán te xan, saré riskiribnáskire murdalá (zvieri) feldýtka, saré murdalá vešytka džán te xan! Léngire rakhibnárja saré riskiribnáskire isyn kororé i bura (nahrata) manušá nasykliakirde; saré jone sýrby džukela bičibakire, džukela, savé na bašena, džukela nasvale, len tyrdela te soven. Kadalé isyn džukela zahale ilésa, jone nisyr na čaljona, kadalé isyn čhupnárja (pastyri) bigodiakire; saré dykhéna pe péskiro drom; kažno léndyr rodéla kófo péske, nane javire manušén. Jone rakiréna: “Javén, me doresava mol (vino); ame bravinta vypjasa ke kirlo, atasiá javéla dová, so i adadyvés; i iščo (inké) butýr javéla.” Meréla devlýtko manúš, i nikón na priléla davá ke iló; patiaibnytka muršá zalenape phuvjátyr, i nikón na duminéla, so devlýtko zalelape pe phuv nalačhipnastyr. Jov džála krig dro ramánjo (miro); kon psiréla čačé dromésa, odolé bahtalé javéna. Ne javén adarík, tumé, džuvliakire čhavé, saví čorahanypen keréla; o ródo odolengiro, kon isyn biladžakuno i nane patiaibnýtko semjake (irjake)! Konéstyr tumé sanape? Pe konéste otkerena muj, konéske sykavéna čib? Ci na tumé san čhavoré čoripnástyr, ródo xohaibnaskiro. Save xačkiribnasa, tyrdenape ke ídoly tel kažno kašt baré randienca; savé zamarena čhavorén pašýl sygna rekicy, maškír bérgi. Dre gladka barore sygnone rekicakire isyn tyrí dólia (bažyn); jone otkerena anglypén; lénge tu čhuvésa thaduno rozmekno janybén i te janes svénta dyibená; ci phenáva Me, so davá javélas kuč vaš Mánge? Pe bari, vučí bérga isyn tyró pasiben; odorík tu ĥazdesape, sob (kaj) te janes svénto dyibén. Paló vudará, paló stýlby progoskire tu čhuvésa ripiribnytka špery; kóli tu otdžasas Mándyr, tén'či tu zlesas tyré ídi i ĥazdesaspe; tu dorakiresaspe odolenca léndyr, savénca tu kamésa te pasjos; tu vydykhesa štéto. Tu psirdian ke králi kučoné-khandypnytkone makhibnasa; tu but kerdián dasavé makhibena; tu bičhavesas tyré manušén dur, sob (kaj) jone te lydžán lav; tu san drieván ladžakirdy. Tu khinyjan baré droméstyr, ne tu na phendián: “Hasiakirdjom nadiéia!” – tyró vast iščo (inké) sys džidó, i zor túte iščo (inké) sys. Konéstyr tu darandyjan, kon tut darjakirdia (strahakirdia), so tu jacián xohany, pirijacian te ripires Man, tu na rakhesa Man dro iló? Na pal dová ci adiáke kerdián, so Me ĥará (dlúges) ničí na rakiravas, i tu pirijacian Mándyr te dares? Me sykaváva tyró čačipén i tyré réndy (diély); daléstyr na javéla túke mištó. Kóli tu zagodlesa, ci zrakhéla tut tyró skedyibén? Len sarén balvál lydžála krig, rosphurdela phurdypnasa, a konéste isyn nadiéia pe Mánde, odová priléla phuv dro meknó mištypén, priléla Mirí svénto bérga.” I phendiá: “Ĥazden, ĥazdén, kerén čačó drom; kerén mamúj (priámo) drom vaš Miro narodo.” Pal-dová so adiáke rakiréla Vučó, Vučés ĥazdynó, Savó dživéla viéčnes, Léskiro lav isyn “Svénto”: “Me dživáva pe vučó bolybén i pe svénto štéto i adiáke-pac' odolé manušénca, konéskiro dúho (fáno) isyn phagirdó, i kon isyn na phut'kirdo, sob (kaj) te otdžidiakirav dúho (fáno), kon na phut'kirdo, i te otdžidiakirav ile, konéste dúho (fáno) isyn phagirdó. Pal-dová so na saró časo Me javáva te sendiakirav i te xoliasovav, sob (kaj) te na xasjol angíl Mánde kažno dúho (fáno) i kažno phurdypen, savó Me sozdyjom. Paldová, so jov duminéla pal mištypén vaš péske kokoreske, Me xoliasovavas i dukhavavas les, garavavas muj i Me sómas xoliamó, ne jov otrisija i gijá pir drom, savésa lydžijá léskiro iló. Me dykhcjom léskire dromá; Me sastiakirava les, Me javáva te lydžav les, Me láva te podrikirav les i odolén, kon tuginela lésa. Me keráva saró pir Miro lav: “Ramánjo (miro), ramánjo pašatuné manušéske i duratuné manušéske,” – rakiréla Raj Devél, i Me sastiakirava les. A grehítko manúš isyn syr mórjo (derjáv), savó ĥazdyjápe i nisyr na pirijačéla, i paní léskiro vyčhurdela iló i bláta. “Nane ramánjo (miro) grehitkoné manušénge,” – rakiréla Miro Devél. “Khar zoralé zaniása, na andyrša; ĥázde tyrí zan syr rógo (truba), sykáv Miré narodoske pe léskire nalačhé réndy, sykáv Jakovóskire kheréske pe léskire gréhi. Jone rodéna Man kažno dyvés, jone kaména te džinén Miré dromá sýrby narodo, savó keréla pir čačipén, savó na jačkiréla Péskire Devléskire uphenybená; jone phučena Mándyr pal čačuné sendy, jone kaména te javén pašyledýr ke Devél. “Sóske ame rikirasa posto, a Tu na dykhésa? Ame obrikirasa péskire ile [amaré ile na phutjona-ju.o.], a Tu na džinésa?” Ake, dro dová dyvés, kóli rikiréna posto, tumé keréna pir tumarí vólia, triebinena, sob (kaj) javír manušá te kerén pharí butý. Ake, tumé rikiréna posto, sob (kaj) te xanpe i te košenpe, i sob (kaj) te marén manušén; tumé na postinena adiáke, sob (kaj) šundly sys pe vučipén tumarí zan. Ci dasavo isyn posto, savó Me vykedyjom? Dyvés, kóli manúš te zrikirel pes? Manúš péskiro di, kóli bandiakirel pes, syr triščyna (trostniko), péskiro šeró; syr jov ur'jelape dre phurané ídi, bešéla dro práho. Ci kadavá kharesa tu postosa, phenésa, so davá dyvés javéla lačhó Ráske-Devléske? Ake, isyn posto, savó Me vykedyjom: rosphagir xohaibnaskire sastyrá, rosphandle šyle, otmek pe vólia phandle manušén, zle pharipén léndyr. De tyró maró bokhalé manušéske; mek čororé, savé psiréna pir svéto te zadžán dro tyró kher; kóli dykhésa, so džála nango – de léske ídia; i jekhe-rateskire tyrestyr na garadjov. Tén'ci otkerlape, syr tasiarluno zlóko (zoria), tyró dud, i javéla ke tu sastiakiriben; čačipén tyró angíl túte džála, i patýv Raskiri-Devléskiri javéla túsa. Tén'ci kharesa, i Raj Devél šunéla, zagodlesa, i Jov phenéla: “Ake, Me som!” Kóli zlesa pharipén péstyr, tu pirijačesa te ĥazdes angúšt i te rakirés zlydnitka lavá. Otdesa tu bokhaleske péskiro iló; tu čaliakiresa manušéskiro di, savó stradynela, tén'či dud (svéto) tyró xačola dre ciamlypén, kalypén tyró javéla syr paš-dyvés. I Raj Devél javéla te lydžál tut saró časo (cýro), kóli na javéna bryšynda i phuv šutjola, Raj Devél čaliakirela tyró iló i masá, tu javésa syr šukár únta (sado), syr ĥanýng, kaj paní, savó nikoli na šutjola. Pe čhučé phuvjá javéna te kerén butý tyré čhavé, kon javéla angíl; tu désa zor ke baré ródy; pal túte phenéna, so tu ĥazdyjan rosphagirdo, te kerdián neve dromá vaš manušénge. Kóli tu vyrikires sávato (subóta), sob (kaj) te na kerés pir tyró iló dro Miro svénto dyvés; tu javésa te khares sávato radynypnasa, sventoné Ráskire-Devléskire dyvesesa, patyvalé dyvesesa; kóli tu désa patýv léske, na javésa te kerés tyré réndy i te kerés pir péskiri godý i te phenés čhučé (pusta) lavá. Tén'ci tu javésa radymakiro (te radynespe dre Raste-Devléste), Me ĥazdáva tut pe phuvjákiro vučipén, Me dáva túke dová, so prilyjá Jakovo, tyró dad! Uštá Ráskire-Devléskire phendlé davá.” Ake, vast Ráskire-Devléskiro na tyknyja, sob (kaj) te zrakhél i kan Léskiro nane kašuko, sob (kaj) te šunél. Ne tumaró čoripén (nalačhé réndy) isyn maškír tuménde i Devléste; tumaré gréhi isyn dro dová, so Léskiro muj otrisjola tuméndyr, i sob (kaj) Devél te na šunél. Pal-dová, so tumaré vastá magirdé ratésa, a tumaré angušta (pal'cy) – grehénca; tumaré uštá xohavena, tumarí čib na phenéla čačipén. Nikón na ĥazdéla péskiri zan pal čačipén, nikón pal čačipén na zadžála (na zaterdjola); léngiri nadiéia isyn xohany; jone xohavena; jone léna te kerén fuipén i nalačhé réndy janéna pale. Jone vybešena sapeskire parnore, khuvena pautina? Kon xála léngire parnore – meréla, a kóli rostasavela len – to odothýr sap vydžála. Léngiri pautina na ur'jesa, i kokoré jone na ur'jena len, so jone ssude; léngire réndy isyn načačune; léngire vastá isyn pherdé xoliása. Léngire ĥerá prastána ke nalačhé réndy, sob (kaj) te pročhuven rat manušéskiro, savó isyn nabango; léngire dúmy – dúmy zlydnitka; našaiben i xasibén isyn pe léngire dromá. Jone na džinéna drom ke ramánjo (miro), nane séndo pe léngire dromá; dalé dromá isyn bangé, i odová, kon džála lénca, odová na džinéla ramánjo. Paldavá séndo isyn dur améndyr, nane i aménde čačunó séndo; užakirasa dud (svéto), ne, ake – ciamlypén; jarkima, ne ame psirasa dro kalypén (mrako). Rodasa drom, syr kororé rodéna, vánta, psirasa, sýrby nane aménde jakhá; perasa dyvesé sýrby ratiákiro; maškír džidende ame sam syr mulé. Saré ame brilinasa (rievinasa) syr riča, ĥazdasa pharó di, syr golumby; užakirasa séndo, ne les nane; užakirasa zrakhibén, ne jov isyn dur améndyr. Pal-dová so but čoripén ame kerdiám angíl Túte; amaré gréhi dophenena (dosykavena) pal aménde; amaré nalačhé réndy isyn aménca, amaró čoripén ame džinása. Ame parudiam Ráske-Devléske i xohadiam; otgijam amaré Devléstyr; ame rakirasas xohaibén i pal paruiben; amaré iléstyr vydžánas xohané lavá. I séndo gijá pale, čačipén dur terdijá, pal-dová, so čačipén pyjá pe gása [foruný/plóšča.-r.s.], i patýv nisyr na zadžála. Nane čačipén; odolés, kon rakhelape čoripnástyr, les jone košena. Dykhciá davá Raj Devél i namišto jaciá angíl Léskire jakhá, so nane séndo. I Jov dykhciá, so nane manušés, divno jaciá Léske, so nane odolés, kon by te zaterdjol, pomogindia by Léske Léskiro vast, i čačipén Léskiro Les podrikirdia. Jov čhudiá pe péste čačipén, syr bronia (maribnýtka ídi); zrakhibnaskiro šliemo pe Péskiro šeró; uridiape dre xolý, syr dre ídia, učhakirdiá pes zevlynypnasa syr uribnasa. Jov otdéla pale fuipnasa, kicý trej, kicý trej javéla dre xolý ke Péskire vérgi, Jov othala (otdéla) pale Péskire vergénge; ostrovenge Jov otdéla pale. I javéna te darén Ráskire-Devléskire lavéstyr pe zapado (pe pal-panitko rig), daréna Léskire baré patyvatyr pe doiá rig, kaj kham ĥazdélape. Kóli vérgo javéla, syr reka (len'), to phurdypen Ráskiro Devléskiro les vytradela.” “I javéla Odová, Kon vykinela Sióno i Jakovóskire čhavén, savé otginé čoripnástyr”, – rakiréla Raj Devél. “Ake, isyn Miro Zavieto lénca, – rakiréla Raj Devél: Miro Dúho (Fáno), savó isyn pe túte i Miré lavá, savé čhudjom dre tyré uštá, na otdžana tyré uštendyr, na otdžana tyré čhavorendyr, i na otdžana léngire-čhavorengire uštendyr,” – rakiréla Raj Devél, nikoli na otdžana. “Uštý (ĥazdepe), xačov syr dud (svéto), Jerusalimo; javdiá tyró dud (svéto) i bari patýv Ráskire-Devléskiri gijá upré pe túte. Ake, kalypén (ciamlypén) zakerela phuv, i kalypén učhakiréla narody, a upralestyr pe túte Raj Devél zaziainela, i bari patýv Léskiri sykadjola upré pe túte. Najudýtka narody javéna ke tyró dud (svéto), králja javéna ke ziainyben, savó isyn upré pe túte. Gazde tyré jakhá, podykh trusciál (pir saré rigá): saré jone skedénape, džána ke tu; tyré čhavé džána durál, lydžána pe vastá tyré čhajén. Tén'ci dykhésa i obradynesape, izdrala, buĥljola tyró iló: barvalypén morjoskiro (derjavéskiro) javéla ke tu, barvalypén manušéngiro, javéla tyró. But vierbliudy ke tu javéna, dromadary Madiamostyr i Jefatyr; saré jone Savatyr javéna, janéna suvnakáj i ladano, phenéna sarénge pal baripén Ráskiro-Devléskiro. Saré Kidaroskire bakré skedyné javéna ke tu; Nievaifoskire bakré javéna te dynarinén túke; džána upré pe altárjo Miro lačhé sventoné dyibnasa, i Me proslavinava kher Miré baripnasa. Kon davá vurniala, adiáke syr óbloki, syr golumbo vurniala ke péskiro kher? Čačó, Man ostrovy užakiréna, i angíl lénde isyn pármy Farsisoskire, sob (kaj) te pirilydžan dur tyré čhavén, léngiro rup i suvnakáj vaš tyró Ráskire-Devléskiro lav, pal-dová so Jov dyjá túke bari patýv. Tén'ci čhavé javire narodoskire manušéndyr javéna te čhuvén tyré vánty, králja léngire léna te kerén butý túke; pal-dová, so dre Mirí xolý Me dukhavavas tut, ne dre Mirí lačhí vólia Me potanginava tut. Tyrí pórta (vráty) saré dyvesá javéna otkerde; ni dyvesé, ni ratý na zakernape (na phandenape), sob (kaj) te janén ke tu Najudytkoné-manušéngiro mištypén, te janén léngire kral'jén. Narodo i kralipená, savé na zakamena te kerén butý túke, xasjona; kadasavé narody xasjona sarésa. Baripén Livanoskiro ke tu javéla; kipariso, sosna i kiedro javéna khetané, sob (kaj) te ukeden (te šukarjakiren) štéto, kaj isyn Miro svénto štéto; Me dáva bari patýv štetoske, kaj isyn terdé Miré ĥerá. I javéna ke tu čhavé odolé-manušéngire, savé tut pritasavenas; jone bandjona tel tyró vast, i peréna ke tyré ĥerá saré, kon pe túte dykhciá vučipnása, i kharna tut Ráskire-Devléskire forosa, Sventoné Izrailjoskire Sionosa. Zamiést dová, so tu sánas jačkirdo, i manušá tut na vyrikirenas, i, sob (kaj) nikón pir túte te na prodžal, Me keráva tútyr baripén pe saré viéki; radymása (lošasa), saví nikoli na pirijačéla. Tu javésa te p'jes ke čalypen narodoskiro thud; i te p'jes (te sosines) kralískire kolynendyr, i ĥaljosa, so Me som Raj Devél, tyró Zrakhibnari, Odová, Kon vykindia tut, Zoraló Jakovóskiro. Harkóma (mied') Me zaparuvava túke pe suvnakái, sastýr – pe rup, kaštá Me paruvava pe xarkóma, a bará – pe sastyrá; tyré thagarisa (kniazjosa), savés Me čhuváva, javéla ramánjo (miro), a čačipén javéla te pridykhel pal túte. Na javéna te šunén butýr, so pe tyrí phuv isyn nahrata réndy, so tyré rigá oblena i keréna čhučé; tu kharesa tyré vánty zrakhibnasa i tyré pórty-baripnasa. Kham túke butýr na javéla te del dud (svéto), čhon na jačéla te svencynel, ne Raj Devél javéla tyré dudesa (svetosa) viéčnes, Devél javéla tyré baré patyvása. Kham tyró butýr na zadžála, čhon na garadjola, pal-dová so Raj Devél javéla vaš túke viečnone dudesa (svetosa), džána krig tyré bibahtalé dyvesá. Saró tyró narodo javéla čačunó, pe saré beršá priléla phuv syr meknó mištypén – davá isyn otbaripen, so Me barjakirdjom, Miré-vastengiro réndo; saró davá javéla, sob (kaj) te šarén Man. Tykné manušéstyr tysjonco bijandjola, samone bizorjakirestyr manušéstyr bijandjola zoraló narodo. Me, Raj Devél, sýges keráva davá, kóli javéla léskiro časo.” Ráskire-Devléskiro Dúho (Fáno) isyn pe Mánde, pal-dová so Raj Devél pomakhcia Man te phenáv bahtaló lav (bahtalý zan) čororenge; bičhadiá Man, sob (kaj) te sastiakirav manušén rozmarde ilésa, te phenáv pal vólia odolénge, kon isyn dre navolia (bešyben); te phenáv manušénge dre bešyben, so vudará bešybnytka isyn psirade (otkerde). Sob (kaj) te phenáv pal lačhó berš Ráskire-Devléskiro, pal dyvés, kóli pherdjola xolý amaré Devléskiri, te podrikirav sarén, dre konéste isyn túga (tuginela). Te phenáv odolénge, kon isyn bibahtaló pe Sióno, so práho zaparuvelape šukarone ukedyibnasa; roviben radymakire (lošalé) jeliejosa; pharó (smentno) dúho (fáno) zaparuvelape šukarone uribnasa i kharna len zoralé čačipnása, Ráskire-Devléskire butiasa dre Léskiro baripén. I jone javéna te ĥazdén phuvjá, savé ĥará isyn čhučé; ĥazdéna ĥaratuné rosphagirdé kherá i občorde fórja, savé ĥaratuné dyveséndyr sys čhučé. Javéna manušá javire narodóstyr i javéna te čaraven tumaré kheritkoné murdalén (skoto); čhavé léngire javéna te kerén butý pe phuv i dre vinagrádniko vaš tuménge. A tumé javéna te kharenpe Ráskire-Devléskire rašanca, tumen kharna amaré Ráskire-Devléskire dynar'jénca; tumé javéna te len kófo barvalé narodengire barvalypnastyr, tumé javéna šarde léngire baripnasa. Pal dová, so tumen ladžakirenas, tumé priléna dre duj móly butýr patýv; pal-dová, so košenas tumen, tumé javéna te radynénpe, so dasaví isyn léngiri vólia, pal-dová so duj móly tumé doreséna (dolena) pe péskiri phuv butýr; viéčno rádyma (loš) javéla lénde. Pal-dová so Me, Raj Devél, davá patýv čačuné sendoske, Me na kamám, kóli čorena, kóli pritasavéna; Me otdáva pale lénge pir čačipén; Me čhuváva lénca viéčno zavieto. I ĥaljona maškír Najudýtka narody pal ródo léngiro, léngire čhavorén ĥaljona maškír ródy; saré, kon dykhéla len, javéna te džinén, so jone isyn ródo, savó bahtiakirdiá Devél. Radymása me láva te radynavpe pal Raste-Devléste; javéla te radynélpe zoralés miro dúho (fáno) pal miré Devléste, pal-dová so Jov uridia man dre ídi zrakhibnytka, uridia man čačipnaskire uribnasa; syr pe terneste Jov čhudiá viánka, syr ternia ukedyja. I syr phuv barjakirel péske čarjá, syr únta (sado) barjakiréla dová, so dre lákiri phuv čhudé, adiáke i Raj Devél sykavéla čačipén i patýv angíl saré narody. Na pirijačava Me (Isajo) te phenáv pal Sióno, me na javáva štyl pal Jerusalimo. Kóli gazdelape, syr jag, léskiro čačipén i zrakhibén léskiro syr xačkirdo momolýtko (svietíl'niko) ĥazdélape, tén'či me láva te rakiráv. I dykhéna narody tyró čačipén, i saré králja dykhéna tyrí patýv, i kharna tut nevoné lavésa, savó déna túke Devléskire uštá. Tu javésa šaribnytkone viankasa dro vast Ráskire-Devléskiro, syr kralískire diademasa tu javésa pe tyré-Devléskiro vast. Tut na kharna butýr “iačkirdo (jačado)”, pe tyrí phuv na phenéna “čhučí”, ne kharéna tut “isyn ke jov Mirí lačhí vólia”, a phuv tyrí kharlape “paloromitko”, pal-dová so Ráskire-Devléskiri vólia isyn lačhí ke tu, i phuv Tyrí sýrby paloróm džála. Syr ternó čhavó léla péske patyvalia čha, adiáke keréna túsa tyré čhavé; syr ternó radynélape terniatyr, adiáke radynélape pal túte tyró Devél. Jerusalimo! Me čhudjom pe tyré vánty rakhibnar'jen, savé ni dyvesé ni ratý na pirijačena te phenén lav. Tumé, kon phenéla pal Devléste, na pirijačen te rakirén! Na pirijačen te rakirén angíl Léste, poka Jov ĥazdéla Jerusalimo i na keréla Les baripnasa (šaribnasa) pe phuv. Raj Devél sovlahadiá Péskire vastésa, Péskire zoralé vastésa: “Me na davá butýr giv, sob (kaj) te xan les tyré vérgi, čužoné manušéngire čhavé na p'jena mol (vino), saví tu kerdián. Ne odolé, kon skedéla, javéna te xan les i Ras-Devlés te šarén; kon skedéla vinagrado (drakh), odová p'jela mol léstyr dre gredy (dvory), kaj isyn Miro svénto štéto. Džán andré, džán duredýr dre pórta, kerén drom narodoske! Kerén, kerén drom, ukeden bará, ĥazdén stiago vaš narody! Ake, Raj Devél phenéla ke sarí phuv: “Phenén patyvalé čhake Sionóstyr: ake, džála tyró Zrakhibnari, Léskiri mazúri (nagrada) isyn Lésa, i otdyibén Léskiro isyn angíl Léste. I kharéna len sventoné narodosa, savó Raj Devél vykindia, a tut kharéna forosa, savó Raj Devél zrakhciá, na jačkirdé forosa.” Kon davá džála Jedomostyr, džála dre lolé ídi Vosorostyr, adasavó baró dro Péskiro uribén, Savó vydžála dro Péskire-zorjakiro pherdypen? “Me som Odová, Kon phenéla čačipén, zoraló, sob (kaj) te zrakhav.” Sóske ž isyn loló Tyró uribén, i ídi Tyré isyn dasavé, syr odoléste, kon tasadia dro prieso (tačylo). “Me tasadjom ĥerénca jekhdžinó, na sys Mánca nikón narodóstyr. Me tasadjom len dre Mirí xolý, dro Miro xoliamipen, Me pe lénde ĥazdavaspe; léngiro rat pročhudiape pe Miré ídi, Me zamakhcjom saró Péskiro uribén. Pal-dová so dyvés, kóli xolý pherdija, isyn dro Miro iló; javdiá berš odolengiro, konés Me vykindjom. Me dykhcjom, ne na sys nikonés, kon by dyjá vast (pomogindia); divindjompe, so na podrikirdia nikón, ne pomogindia Mánge Miro vast, i Mirí xolý podrikirdia Man. Tel ĥerá Me čhudjom narody dre Mirí xolý, xasiakirdjom len de Mirí xolý, i vyčhudjom pe phuv léngiro rat.” Priripirava me lačhipén Ráskire-Devléskiro i baripén Ráskire-Devléskiro pal saró, so Raj Devél dyjá aménge, priripirava baró bahtalypén Léskiro vaš kher Izrailjoskiro, savó Jov kerdiá pir Léskiro lačhipén, pir Léskiro baró kučipén. Jov phendiá: “Čačó, jone isyn Miré čhavoré, savé na xohavena”, i Jov sys vaš lénge Zrakhibnarisa. Saví b na sys bibáht (bída), Jov len na jačkirelas i Jangólo Léskiro len zrakhelas; Jov vykindia len, pal-dová so jone isyn dróga Léske i Léskiro iló isyn lačhó; Jov lyjá len i lydžalas saré ĥaratuné dyvesá. Ne jone na kandenas, pharés sys daléstyr Sventoné Duhoske; paldavá Jov jaciá léngire vergosa: Kokoró Jov marelaspe lénca. Tén'ci Léskiro narodo priripirdia ĥaratuné Mojzáskire dyvesá: “Kaj isyn Odová, Savó vylydžijá len morjostyr (derjavestyr) čhupnarisa, Savó čaravela Léskire bakrén? Kaj isyn Odová, Savó čhudiá Péskiro Svénto Dúho (Fáno) dro léskiro iló? Savó lydžijá Mojzás pal čačó vast, Jov lydžalas Péskire zoralé vastésa, Jov rozlydžija (ukedyja) angíl lénde paní, sob (kaj) te kerél Péske viéčno lav? Savó lydžijá len pir xoripena, syr gres pir félda, i jone na perenas (na obštavenaspe) péskire ĥerénca? Syr bakriá zmekenape pe dólo, adiáke Devléskiro Dúho (Fáno), lydžalas len ke štylypen. Adiáke Tu lydžasas Tyró narodo, sob (kaj) te kerén Péske slavútno lav. Dykh telé bolybnástyr, podykh štetóstyr, kaj isyn Tyró Svénto štéto i baripén Tyró: kaj isyn zevlenypen i zoralypén Tyró? Kaj isyn Tyró lačhipén? Nane Túte tangipén ke Me. Tu san Jekh amaró Dad Devél; pal-dová so Avraámo na džinéla amen, Izrailjo na pridžinela amen pal péskire manušénde. Tu, Rajo Dévla, san amaró Dad, Tyró lav viekostyr isyn dasavo: “Odová, Kon vykindia amen.” Sóske, Rajo Dévla, Tu domekcian, sob (kaj) ame te džas péske Tyré droméstyr, sob (kaj) amaró iló jaciá xoliamó, sob (kaj) te na daras Tútyr? Obrisjov vaš Tyré pishar'jénge, vaš ródycy (čangá), savénge Tu dyján Tyró mištypén. Naĥara (nadluges) sys Jov ke Tyré-khangirjákiro narodo, amaré vérgi ĥazdynépe pe Tyró svénto štéto. Ame kerdiampe adasavé manušá, syr odolé, savé Tut na džinenas; zdelape, so na kharlaspe Tyró lav maškír aménde. O, kóli b Tu rosčhindian bolybén i gíian telé! Bérgi shačine b Tyré móstyr. Syr xačkirdé jagatyr, saví bilavela (plavinela), syr paniéstyr, savó keradjola, sob (kaj) te džinén Tyró lav džindló Tyré vergénge; sob (kaj) te izdran angíl Túte narody. Kiéli Tu keresas darane réndy, savé ame na užakirasas, i Tu džasas telé – bérgi biladjonas (tainenas) Tyré móstyr. Pal-dová so nikoli manušá na šunenas kanenca, i nisaví jakh na dykhciá javirés devlores. Tu san Jekh Devél, Savó but kerdiá vaš odolénge, konéste isyn nadiéia pe Túte. Tu lačhipnása prilesas odolés, kon radynelaspe i kerélas pir čačipén, kon ripirelas pal Túte pe Tyré dromá. Ne, ake, Tu xoliasyjan, pal-dová so ame gara (dlúges) lyjam te kerás gréhi; i syr žie ame zrakhasape? Saré ame kerdiampe-syr nažužo priedmieto, amarí patýv – syr zamakhny ídia, ame šutijam syr patrín (listo); amaré nalačhé réndy lydžiné amen, syr balvál. Na sys odolés, Kon by khardiá Tyró lav, kon zakamdiá b te rikirelpe pal Túte; paldavá Tu garadian Tyró muj améndyr, Tu jačkirden amen te xasjovas grehéndyr. Ne kakaná, Rajo Dévla, Tu san amaró Dad; ame sam ĥleja (bláta), savjátyr keréna khoré, a Tu – Odová, Kon sozdyjá amen; saré ame – Tyré-vastengiri butý. Na xoliasov ĥará (dlúges), Rajo Dévla! Na rípir viéčnes pal gréhi! Dykh akaná – saré ame sam Tyró narodo. Tyré foróskire svénta štéty kerdépe čhučé phuvjása; Sióno – čhučí phuv, Jerusalimo isyn občordo. Kher, kaj ame sventiakirasaspe, kaj sys amarí patýv i kaj amaré dadá slavinenas Tut, isyn shačkirdo jagása; amaró barvalypén isyn rosčordo. Kóli saró davá pherdija, ci javésa iščo (inké) tu te zrikires Pes améndyr, Rajo Dévla? Ci javésa Tu ničí te na rakirés, te xoliasos pe aménde butýr, syr trej? “Me sykadjom Pes na odolénge, kon phučelas pal Mánde; Man lathné na odolé, kon rodelas: “Ake Me, ake”, Me phenavas narodoske, savó na kharélaspe Miré lavésa. Kažno dyvés protyrdavas Miré vastá ke narodo, savó na kandéla, savó psiréla nalačhé dromésa, savó dživéla pir léskiri godý. Ke narodo, savó dre jakhá kaliakirelas Man: janéla svénta dyibená dro veš, xačkiréla fimiámo pe bará. Bešela dre koplicy (grobnicy) i rat'kirela dre ĥiebár (pieščera); xála balyčano mas i nálačho (nažužo) xabén isyn dre léskire čaré. Savó rakiréla: ‘Terdjov, na džá ke me, pal-dová so me som svénto vaš túke.” Jone isyn thuv, savó trej Mánge te sungav, jag, saví kažno dyvés xačola. Ake, so isyn čhindló angíl Miro muj: “Na lavá Me te vyrikirav, Me otdáva pale, otdáva pale lénge. Tumaré gréhi i khetané tumaré-dadengíre gréhi, – rakiréla Raj Devél; pal-dová tumaré dadá xačkirenas fimiámo pe bérgi, pe tykné bérgicy košenas Man; Me otmierinava lénge pal saré léngire réndy.’ Adiáke rakiréla Raj Devél: “Kóli barjola vinagrado, tén'či rakiréna: ‘Na čhin les, paka jov vybarjola, dre léste isyn bahtiakiribén; adiáke Me keráva vaš Miré pishar'jénge, sob (kaj) te na xasiakiráv sarén. I vylydžava Me ródo Jakovostyr, Juda priléla Mándyr Miré bérgi, davá priléna Miré vykedyné; Miré pishárja (raby) odój javéna te dživén. Pe Sarono javéna te čaravenpe bakriá; pe Akhoro guruva javéna te otkhinjon, Miré narodoskire, savó lathiá Man. A tumen, kon jačkirdiá Ras-Devlés, bistyrde pal Mirí svénto bérga, kon keravela xabén vaš Gadoske, čhuvéla pherdó čaró vaš Mieni (Sud'ba). Me tumen otdáva kurtalake; tumé peréna pe čangá i tumen zamarna, pal-dová so Me khardjom i tumé na otphendlé, rakirdjom – tumé na šunenas, a kerénas nakuč angíl Miré jakhá i vykedenas dová, so sys Mánge na pir iló.’” Paldavá adiáke rakiréla Raj Devél: “Ake, Miré pishárja xána, a tumé bokhalé javéna; Miré pishárja javéna te p'jen – a tumé javéna bi panieskiro. Miré pishárja javéna te radynénpe, a tumé javéna ladžakirdé; jone javéna te bagán iléskire radymátyr, a tumé javéna te godlen iléskire dukhatyr, i zarovena phagirdé duhóstyr. I jačkirena tumaró lav, sob (kaj) te prokošen les Miré vykedyné manušá; i zamarla tut Raj Devél, a Péskire pishar'jén kharéla javire lavésa. Kóli vari-kon bahtiakiréla pes Lésa pe daja phuv, javéla bahtiakirdó čačuné Devlésa, i kon sovlahala pe phuv, javéla te sovlahal čačuné Devlésa, pal-dová so ĥaratuné bidy bistrenape, javéna garadé Miré jakhéndyr. Ake, Me keráva nevó bolybén i neví phuv; pal doiá phuv bolybnasa, savé sys angledýr vagedyr (ĥaredyr) butýr na priripirna. A tumé javéna bahtalé, javéna te radynénpe saré beršá pal dová, so Me keráva. Ake, Me keráva Jerusalimo bagaibnasa i léskiro narodo radymása. I Me láva te radynavpe pal Jerusalimo; Me javáva radypnytko pal Miro narodo; odój butýr nikón na šunéla roviben i godlypen. Odój butýr na javéla tykné čhavés i phures, savó na dživdiá saré péskire beršá, pal-dová so šelberšengiro manúš meréla ternesa; ne šelberšengiro grehítko javéla prokošnó? I javéna te kerén kherá, i javéna te dživén dre lénde; te barjakirén vinagradniki, i javéna te xan léndyr. Na javéna te kerén, sob (kaj) javír manúš odój te dživél; na javéna te barjakirén, sob (kaj) javír te xal, pal-dová so Miré-narodoskire dyvesá javéna, syr dyvesá ke kašt; i vykedyné Miré ĥará (dlúges) javéna te rikirenpe ke dová, so kerdé léngire vastá. Na javéna te kerén butý ivjá (darmes), na javéna te bijanen čhavorén pe men'ka, pal-dová so javéna rodosa, bahtiakirde Devléstyr, i léngire čhavoré lénca. Adiáke javéla: angíl dová, syr jone kharéna Man – Me phenáva; jone iščo (inké) javéna te rakirén, i Me šunava. Ruv i bakroró javéna khetané te čaravenpe; ščer (liévo) javéla te xal phus, syr guruv, a sap xála práho. Jone na javéna te zamarén, na javéna te xasiakirén (te kerén čoripén) pe Mirí svénto bérga”, – rakiréla Raj Devél. Adiáke rakiréla Raj Devél: “Bolybén isyn Miro trono, a phuv isyn štéto vaš Miré ĥerá; kaj tumé keréna kher vaš Mánge, kaj isyn štéto, sob (kaj) Me te otkhinjovav? Pal-dová so saró davá kerdiá Miro vast, i saró davá sys, – rakiréla Raj Devél. “Ake, pe konéste Me podykhava: pe odoléste, kon isyn na phut'kirdo, phagne duhósa, kon izdrala angíl Miro lav. Odová, kon začhinela guruvés isyn sýrby odová, kon zamarela manušés. Kon janéla bakrores vaš svénto dyibén isyn sýrby odová, kon zatasavela džukles; kon janéla dáro isyn sýrby odová, kon čhuvéla balyčano rat; kon xačkiréla fimiámo, isyn sýrby odová, kon mangelape idoloske; syr jone vykedyné péskiro drom i davá nalačhipen isyn drógo léngire ileske. Tén'ci Me adiáke-pac' keráva lénca pir léngiro xohaibén, i Me janáva dar vaš lénge, pal-dová so Me khardjom – i nikón na otphendiá; Me rakiravas – jone na šunenas, a kerénas nalačhé réndy angíl Miré jakhá i vykedenas dová, so Mánge na sys pir iló. Šunén Ráskire-Devléskiro lav odolé, kon izdrala angíl Léskiro lav! Tumaré pšála na rikiréna dro iló tumen, jone tradéna tumen pal Miro lav i rakiréna: “Mek Raj Devél te sykavél Pes dro Péskiro baripén, i ame podykhasa, syr tumé javéna te radynénpe.” Ne jone javéna ladžakirdé. Ake, šuminen dro fóro, ake, isyn zan khangirjátyr: Ráskire-Devléskiri zan; Devél otpleskirela Léskire vergénge. Na menčynelaspe joi, kóli bijanelas, ne bijandiá; iščo (inké) na poddgija dukh lákiri, a joj bijandiá čhavés. Kon šundiá dasavo? Kon dasavo dykhciá? Ci kerdiápe phuv pal jekh dyvés? Ci narodo sys adiáke sýges bijandlo – pal jekh mólo; syr Sióno? Sióno nábut vyrikirdia dukh i bijandiá péskire čhavén. “Ci Me som Adasavó, so Me dolydžava, sob (kaj) džuvlý te bijanél i Me na davá zor vaš davá, – rakiréla Raj Devél. “Ci Me dáva zor, a na davá, sob (kaj) te bijanél?” – rakiréla Devél tyró. “Radynénpe Jerusalimosa, radynénpe pal léste saré, konéske drógo isyn Jov! Radynénpe radypnasa khetané Lésa saré, kon tanginelas (žalinelas) pal Léste; sob (kaj) te xan i te čaljon Léskire radymátyr, te p'jen i te radynénpe baré Léskire baripnastyr.” Adiáke rakiréla Raj Devél: “Ake, Me dáva léske svéto, syr reka (len'); manušéngiro barvalypén isyn syr reka (len'), saví čhuvélape vaš tumarí baht; pe vastá tumen lydžána, pe čangá javéna te laščynen. Syr daj podrikiréla dre bibáht, adiáke Me tumen podrikirava; tumé bahtalé javéna dro Jerusalimo.” I tumé dykhéna davá, i obradynelape tumaró iló; kokalý tumaré sýrby neve jačéna, syr zeleny čar, i odkerlape Ráskiro-Devléskiro vast ke Léskire pishárja, a pe péskire vergénde Jov xoliasóla. Ake, dre jag Raj Devél javéla, i léskire vurdená – syr zoralý balvál. I javéla, sob (kaj) te sykavél Péskiri xolý zorjása te sykavél Péskire lavá pal xolý xačkirdé jagása. Raj Devél javéla te sendinel kažno loč (plot'), jagása i xoliása, but manušén Jov xasiakiréla. “Odolé, kon sventiakirela i žužakirel pes dro vešá, i xána balyčano mas, magiripén i karmusen (myšen) – saré jone xasjona”, – rakiréla Raj Devél. “Pal-dová so Me džinóm léngire réndy i dúmy; ake, Me javáva te skedav saré narody i jekhe-čibjakire ródy; jone javéna i dykhéna Mirí patýv. I Me čhuváva pe lénde ĥiertýk (dosykaiben), Me bičhaváva zrakhné manušén léndyr ke narody: dro Farsiso, dre Pula i Luda, ke odolé, kon léla dro vast lúko te nadtyrdel, dre Tubala i dre Javana, pe duratuné ostrovy, savé na šundlé pal Mánde i na dykhné Mirí patýv; i jone phenéna dre narody pal Miro baripén. I jone janéna tumaré pšalén saré manušéndyr syr dáro Ráske-Devléske, i lydžána len pe grénde i pe maribnýtka vurdená, pe guruvende, pe sygnone vierbliudende – lydžána len pe Mirí svénto bérga dro Jerusalimo, – rakiréla Raj Devél, – adiáke syr čhavé Izrailjoskire janéna dáro dro Ráskire-Devléskiro Kher, janéna les dro žužó (čysto) khoró. I léndyr Me láva rašán i Lievitén”, – rakiréla Raj Devél. “I syr nevó bolybén i neví phuv, savé Me sozdáva, saró časo javéna angíl Miro muj, – rakiréla Raj Devél, – adiáke javéla i tumaré rodosa i tumaré lavésa. Tén'ci kažnoné čhonestyr dro čhon, kažnoné savatostyr dro sávato (subóta) javéla te džal kažno loč (plot'), angíl Miro muj, sob (kaj) te den patýv Mánge”, – rakiréla Raj Devél. “I jone javéna te vydžán i javéna te dykhén odolé-manušéngire trúpy, kon otgijá Mándyr; pal-dová so kirmo léngiro na xasjola, i jag léngiri na murdjola; jone javéna syr džungalypén (magiripén) vaš kažno loč (plot').” Dalé isyn Jeriemiejoskire lavá, kon sys Xielkiinoskiro [Hilkijaskiro-ju.o.] čhavó, rašángire rodóstyr, savé sys dre Anafofa pe Vieniaminoskiri phuv. Léske bičhadiá Raj Devél Péskiro lav, dre dyvesá Iosijaskire (Josijaskire), kon sys Judejákiro králi dro dešutrito berš, syr jov sys králi. Raj Devél adiáke-pac' bičhadiá Léskiro lav dre dyvesá Ioakimoskire (Jakimoskire), kon sys Josijakiro čhavó i Judejákiro králi ke/ žýko/ dešupervo berš, syr Sedekíia, Josijaskiro čhavó sys králi pir Judéia angíl dová, syr dro pándžto čhon Jerusalimóskire manušén lydžiné dro pliéno. I sys ke me, Jeriemiejoske, lav Rástyr-Devléstyr i phendiá: “Angíl dová, syr Me sozdyjom tut dre dákire masá, Me vykedyjom tut. Angíl dová, syr tu javdián pe svéto, Me vysvencyndjom tut. I Me čhudjom tut syr prorokós vaš Najudénge.” Tedy phendjom me: “Ah! Dévla! Rajo Dévla! Dykh, me na džinóm te rakiráv, pal-dová so me som bijáto.” Ne Raj Devél phendiá mánge: “Na rákir: ‘Me som bijáto’; – pal-dová so tu džása ke saré, ke kon Me bičhaváva tut, i so Me priphenava túke, dová tu phenésa. Na dar léndyr, pal-dová so Me som túsa te rakhav tut”, – phendiá Raj Devél. I tén'či ĥazdyjá angíl Raj Devél Léskiro vast i čiladiá miro muj. I phendiá Raj Devél mánge: “Ake, me čhuváva Miré lavá dro tyró muj. Dykh! Me čhudjom tut adadyvés syr barydyrés pe manušýtka nácyi i pe kralipená: te riskires krig korniénca (rukhénca), te phagires ke phuv, te rozmares pe koterá, i te čhurdes telé; te ĥazdes kherá, i te počhuves giv dre phuv.” I iščo (inké) sys ke me Ráskire-Devléskiro lav, i phendiá: “Jeriemiéjo, so dykhésa tu?” I me phendjom: “Me dykháva rand' (vetka) mindalitkone drevostyr (kaštéstyr).” Tedy phendiá Raj Devél mánge: “Tu mištés dykhésa. Me rakhava, sob (kaj) miro lav te kerélpe (spolninélpe) dro čačipén.” I sys ke me Ráskire-Devléskiro lav javír mólo, i phendiá: “So dykhésa tu?” Me otphendjom: “Me dykháva kakávi (kotlo), so keradjola, i so sýrby risjola pe paš-ratiakiri (sievierno) rig. Tén'ci phendiá Raj Devél mánge: “Paš-ratiakire rigátyr javéla bída, pe saré manušénde pe phuv.” Pal-dová so, ake, Me kharáva te javén saré sem'i (irjá), savé isyn dre kralipená pe paš-ratiakiri rig, – phendiá Raj Devél, – i jone javéna te čhuvén kažno (sváko) péskiro trono angíl Jerusalimóskiri pórta, i mamúj saré vánty, so isyn trusciál (krugom), i mamúj saré fórja, so isyn dre Judéia. I Me vyphenava Miro pharó-sendiakiriben pe lénde pal saró léngiro fuipén, pal-dová so jone jačkirdé Man, i jone thuvliakirde dróga smóly javire devlororenge, i jone dyné patýv idolénge, so kerdé léngire vastá. Paldavá, jav skedynó i uštý, i phen lénge saró, so Me priphenava túke. Na zamer darátyr léngire mujendyr, sob (kaj) Me te na zaphagirav tyró dúho (fáno) angíl lénde. Pal-dová so Me, ake, kerdjom tútyr sýrby zoraliakirdo fóro, sýrby sastruno stýlbo, sýrby bronzytka vánty proti sarí phuv, proti Judejákire kral'jénde, proti thagar'jende, proti rašande, proti kadalé phuvjákire manušénde. I jone javéna te marénpe túsa, ne jone na pirizor'kirena tut, pal-dová so Me som túsa, – phendiá Raj Devél, – sob (kaj) te rakhav tut.” I sys ke me, Ráskire-Devléskiro lav, i phendiá: “Džá i phen jasvénca dre manušéngire [čhakire-r.s.] kaná Jerusalimóstyr, phení: ‘Adiáke rakiréla Raj Devél: ‘Me ripirava tut, Izrailjo, savé lačhé sys tyré manušá ternal, tumarí patýv, so sys sýrby ternende angíl sovél, syr tumé giné pal Mánde pe čhučé prahi, pe phuv, so na čhudé givá iščo (inké). Tu, Izrailie, sánas svénto Mánde, tu sánas pérvo barjakirdó (plódo) Miré umalotostyr. Me pharés sendiakirdjom sarén, kon dukhavelas tut, me bičhavavas bída pe lénde,’’” – phendiá Raj Devél. Šunén Ráskire-Devléskiro lav tumé, kher Jakovóskiro, i saré sem'i (irjá) [kherá-r.s.] Izrailjoskire kheréstyr! Adiáke rakiréla Raj Devél: ‘Savó čoripén tumaré dadá lathné dre Mánde, so jone durine Mándyr, so jone giné pal xartytka ídoly, i so jone kokoré jačné xartytka (sujetna)? I na phendlé jone: “Kaj isyn Raj Devél, Kon lydžijá krig amen Jegiptóskire phuvjátyr, Kon lydžijá amen pirdál čhučé phuvjá, pirdál čhučé prahi, pirdál ĥanbiniá, pirdál šut'kirdy phuv, kaj isyn zer (tien') sýrby meribnástyr, pirdál phuv, pe saví nijékh na progijá, i nikón na dživdiá.” I Me jandjom tumen pe barvaly phuv, sob (kaj) tumé te xan lákire barjakirdé (plódy), i lákiro mištypén, ne syr tumé zaginé pe daja phuv, tumé magirdé kadaja phuv, i tumé magirdé Miro mištypén. E rašaja na phendlé: ‘Kaj isyn Raj Devél?’, – kodolé, kon rikiréla zor pe Zakóno, jone na džindlé Man: pastyri adiáke-pac' kerdé čoripén Mánge, i proróki angilphenenas Valaaloskire lavésa, i jone psirdé pal ídoly, savéndyr na sys ni savó lačhipén lénge. Paldavá Me javáva butýr te sendiakirav tumen’, – rakiréla Raj Devél, – “Me javáva te sendiakirav tumaré-čhavorengire čhavorén. Džán pal Xitimoskire ostrovy, bičhaven manušén pe Kidaro i obduminen mištés, ci sys vari-so kadasavó, syr kerdé manušá: sob (kaj) manušýtko nacyja te paruvel péskire devlen, mek jone i na sys develá? Ne Miré manušá parude léngiri sláva (Devléskiro Baripén) pe ídoly, savéndyr na sys nisavó lačhipén. Divinenpe zoralés, bolybén kadalestyr, i trinskirenpe’, – phendiá Raj Devél. Pal-dová so miré manušá kerdé čoripén duj móly: jone jačkirdé Man, Kon isyn džidé-panieskiri ĥaningori i jone vyganade péske vendarinia (sažalki), phagirdé len, so na moginéna te rikirén paní. So Izrailjoskire manušá jačné dynar'jénca? Ci so jone isyn kherítka pishárja? Sóske les vérgi občorena? Terné ščerá (lievy) rykinena pe Izrailjo i jone brilinena; jone kerdé Izrailjostyr čhučí (pusto) phuv; léskire fórja xačkirdé i nikón na dživéla odój. I adiáke-pac' terné manušá Tafnatyr i Miemfisostyr phagirdé tyré-šereskiri kralítko stadyk. Ci na jandian tu kokoró, Izrailie, saró davá pe péste, syr tu jačkirdian Man, Ras-Devlés, Devlés, kiéli Me lydžijom tut dromésa. I akaná, vaš so túke, Izrailie, trej te kerés drom ke Jegípto i te p'jes Sihoroskire (Nilostyr) paniá, ci te kerés drom ke Asirija; i te p'jes lákire rekátyr (leniátyr). Fuipén, so tu kerdián, pirisykliakirela tut, i tyró otphenybén Mándyr bangiakirela tut: paldavá džá i dykh, syr kirko i bibáht túke, so tu jačkirdian Man, Ras-Devlés, i so túte nane dar angíl Mánde”, – phendiá Raj Devél, Raj Devél bolybnáskire-jangoléngiro. ‘Pal-dová so Me ĥará phagirdjom ĥámo tyré meniatyr, Me roskuscjom Tyré penty, i tu phendián: ‘Me na javáva te keráv čoripén: ne tu tel kažno bérgica i tel kažno zeleno drévo tu désa patýv idolénge, sýrby nalačhi džuvlý. I Me počhudjom tut dre phuv syr lačhé-rodoskiro vinagrado, lačhé-siemjoskire ziarkatyr: syr da tu pirikerdianpe dre xasibnýtko (vierutno) otbaripen dikone vinagradostyr angíl Mánde. Paldavá, mek tu i te vymorespe akaná sodasa, i te les but sapuni, saroiekh tyró čoripén sykado angíl Mánde,’ – phendiá Raj Devél, Raj Devél. Syr da tu mogindian te phenés: ‘Me na som magirdó, me na gijom pal Vaaloste’? Dykh, so tu kerdián pe dólo: tu san sýrby čvytko vierbliudiha (dromadariha), saví usá paruvela péskire dromá; tu san sýrby xrustengiri oslica, so prisykljola ke čhučí phuv, so sungela ke pe balvál [glytynela fáno-r.s.] vaš péskiro tyrdypén? Kon déla ráda te obrikirel la, syr joj isyn nasvaly pal oslende? Saré, kon rodéla la, lathéla la bi-pharipnaskiro dro lákiro čhon. Pririkir, Izrailie, péskire ĥerá, sob (kaj) jone te na javén dukhade, i péskiro kirlo, sob (kaj) jov te na javél trušalo (pirišut'kirdo). Ne tu phendián: ‘Nad, sóstyr te užakirav lačhipén. Nad! Pal-dová so mánge kerdépe (pokamlepe) čúža devloré i me džáva pal lénde. Syr čor, savés ladžakirdé, syr uhtyldé les, adákicy ladžakirdé pes tumé, – manušá Izrailjostyr: tumaré králja, tumaré thagárja, i tumaré rašaja, i tumaré proróki, savé phenéna kašteske: ‘Tu san miro dad’, – bareske: ‘Tu jandian man pe svéto! ‘Tumaré manušá risiné dumesa ke Me, a na mósa: ne syr javéla pharó, tedy jone phenéna: ‘Uštý i zrákh amen.’ Ne kaj isyn tumaré devloré, so tumé kerdé vaš péske? Mek jone te uštén, i mek jone te zrakhen tumen, syr isyn pharó tuménge! Pal-dová so túte, Judéia, isyn adákicy devloré, kicý isyn fórja! Sóske tumé javéna te čingardenpe Mánca? Saré tumé kerdé grého proti Mánde!’ – phendiá Raj Devél. Ivjá (naprásnes) muliakirdjom Me tumaré čhavorén, jone na prilyné dová, pal so me pirisykliakirdjom len. Tumé kokoré začingirde kurtalása péskire prorokén, sýrby ščer (liévo), so pohala saró. O, Izrailjoskiro ródo! Šunén miré lavá Rástyr-Devléstyr! Ci sómas Me sýrby pe čhučí phuv Izrailjoske? Ci sýrby kaly (tjomno) phuv? Sóske tedy Miré manušá rakiréna: ‘Ame kokoré sam raja péske! Ame butýr na javása ke Tu!’ Ci moginéla čhaj te bistrel lákiri šukarni viánka (šukár ukedyiben)? Ci terný te bistrel lákiro šukarno uribén? Ne Miré manušá bistrenas Man adákicy but dyvesá, so naštý te poginas. Syr tumé šukarjakirena (xohanés podkerena) péskiri maniera, sob (kaj) te lathén kamiben? Paldavá tumé až vysykliakirde péskire manierenge samone bedone džuvlién. Adiáke-pac' manušá lathné pe truiuny (pe podia) rat, so bibangipnaskire manušá pročhude: ‘Me na lathjom davá, čorahanés rodyi, ne adiáke uprál saró bicialó.’ Ne tumé iščo (inké) rakiréna: ‘Pal-dová so ame na sam bangé, Léskiri xolý risjola rigasa améndyr!’ Dykhén ža! Me javáva te lydžav čingárd (te sendinavpe) tuménca, pal-dová so tumé phendlé: ‘Ame na kerdiám grého.’ Sóske tumé drieván but psiréna čhučes, i paruvena tumaré dromá? Tumé javéna ladžakirdé dro Jegípto, adiáke-pac' syr tumé sánas ladžakirdé dre Asirija. Ne tumé džána krig Jegiptóstyr, i tumaré vastá javéna pe tumaré šeré: pal-dová so Me, Raj Devél, na prilyjom dová, ke so tumaré ile risiné, i davá na udelape ke tumaró mištypén.” Iščo rakiréna jone: ‘Kóli manúš rozdžalape péskire romniása, i joj džála krig léstyr i joj iačéla romný javire manušéske, ci saštý, sob (kaj) joj te risjol pale ke jov? Ci na javéla kodoia phuv xor magirdy? Ne tumé, manušá Izrailjostyr, kamlé but javire devloré sýrby nalačhi džuvlý, ne saroiekh (usajékh) risjov ke Me’, – rakiréla Raj Devél. Ĥazden péskire jakhá pe vučé bimanušengire štéty i Dykhén akaná, kaj tumé sykade patýv javire devlorénge. Paše dromá tumé sánas bešté vaš lénge, sýrby o Arabo pe čhučí phuv, i tumé magirdé péskiri phuv nalačhé kamibnasa i fuipnasa. Paldavá paningá sys pririkirde, i na sys vesnakire bryšynda i tuménde čikata jačné sýrby nalačhé džuvliáte, ne tumé na prilyné ladžakiriben. Ci javéna tumé te kharén jasvénca Man: ‘Miro Dádo! Tu san Lydžaibnaskiro amaré ternypnastyr? Ci jačesape Tu xoliamó pe saré viéki? Ci javésa Tu te rikires xolý ke sámo kónco (ke jagóro)?’ Dykhén, tumé phendlé davá, ne tumé kerdé čoripén adákicy but, kicý tumé féni mogindlé!” I phendiá Raj Devél mánge, Jeriemiejoske, dre dyvesá, kiéli Iosija (Josija) sys králi: ‘Ci dykhcián tu, so kerdiá čhaj Izrailjoskiri, saví otgijá patiaibnastyr? Lákire manušá psirenas tel kažno vučí bérga, i kažno zeleno drévo i jone sykade patýv ke javír devloré sýrby nalačhi džuvlý. I paló dová, syr Izrailjo kerdiá saró davá, Me phendjom: “Risjov ke Me.” Ne jov na risijá. I léskiri zdyibnaskiri phen Judéia dykhciá davá. I dykhciá Judéia davá, kiéli pir pričyna, so Izrailjo otgijá patiaibnastyr i léskire manušá usá sykavenas kamiben ke javír devloré sýrby nalačhi džuvlý, to Me bičhadjom Izrailjoskire manušén krig Péstyr, i dyjom léske rozginybnytko lyl (foda), ne léskiri zdyibnaskiri phen Judéia na darandyja, ne joj gijá i joj adiáke-pac' sykadiá patýv ke javír devloré. I sys adiáke, so Judéia magirdia phuv péskire nahratone kamibnasa, i joj délas patýv barenge i kaštenge. Ne usajékh (saroiekh) Izrailjoskiri zdyibnaskiri phen Judéia na risijá ke Me saré iléstyr, ne joj féni pefromi (pemisni), – phendiá Raj Devél. Tén'ci phendiá Raj Devél mánge, Jeriemiejoske: “Izrailie, savó otgijá patiaibnastyr, sykadiá pes čačunedyr, syr zdyibnaskiri Judéia. Džá i rosphen (obzaniakir) sarénge dalé lavá odój ke paš-ratiakiri (šylaly) rig, kon isyn odój dro pliéno, i phen: ‘Risjov, otgiibnytko Izrailie!’ -rakiréla Raj Devél, – ‘Me na javáva te dykháv xoliames pe túte, pal-dová so Me som lačhé-diéskiro i Me na javáva te rikirav xolý pe saré viéki. Féni (jekh) priĥaljov péskiri bang, so tu phagirdian Ráskire-Devléskiro, Devléskiro Zakóno, i tu čhurdesape jekhe rigátyr pe javír angíl čužoné devlorende, tel kažno zeleno drévo, i so tu na šundián Mirí zan’, – phendiá Raj Devél. “Risjon tumé, otgiibnytka čhavé”, – phendiá Raj Devél, – pal-dová so Me som tumaró Xulái. Me láva jekhés kažnoné foróstyr, i dujén kažnoné semjostyr (rodóstyr), i Me janáva tumen pe Sióno. I Me dáva tuménge čhupnar'jen [pastyrien-r.s.] pir Miro iló, savé javéna te čaliakiren tumen džinybnasa, i ĥalyibnasa. I javéla adiáke: kiéli tuménde bijandjona but-but manušá i javéna butýr i butýr manušá tuménde, dro dolé dyvesá, – phendiá Raj Devél, – tuménde na javéna te rakirén butýr: kovčego (mohtó) Devléskire Zavietosa.’ Manušénde na javéla davá pe godý: jone na javéna ni te ripirén davá, ni te javén ke kovčego ni na podkeren les. Dro davá časo (cýro) jone javéna te kharén Jerusalimo Ráskire-Devléskiro tronosa, i saré manušéngire nácyi kedenape khetané ke Jerusalimo i butýr na javéna te psirén nakandunes pir léngire pharé ile. Dre dolé dyvesá manušá Judejákire kheréstyr javéna ke Izrailjoskiro kher, i jone javéna khetané te džán phuvjátyr, so isyn pe paš-ratítko (šylaly) rig ke phuv, so Me dyjom tumaré dadénge syr meknó mištypén. I phendjom Me, Raj Devél: ‘Syr Me prilava tumen syr Miré čhavorén i Me dáva tuménge lačhí phuv, naj šukaredyr mištypén saré manušéngire nacyiéndyr!’ – i iščo (inké) Me phendjom: ‘Tedy tumé javéna te kharén Man ‘Amaró Dad’, i tumé na otdžana krig Mándyr. Ne tu, Izrailie, sýrby napatiaibnytko romný, saví durjola péskire romestyr, adiáke-pac' tyré manušá mekné Man! Šunén zaniá pe vučé štéty, syr rovena i mangénape Izrailjoskire čhavoré, pal-dová so jone piririskirde péskire dromá dro džiibén, i jone bistyrde Ras-Devlés, péskire Devlés. Risjon tumé, otgiibnytka čhavorale, i Me sastiakirava tumaró načačipén. I jone phendlé: ‘Ake, ame džása ke Tu, pal-dová so Tu san, Raj Devél, amaró Dad.’ Čačipén, so ame ivjá patiandyjam, so bérgicy vyrakhena amen, so buté-bergengiri zor podela vast aménge: čačipnása Raj Devél, amaró Devél féni vyrakhela amen. Pal-dová so ladž, so kerdé amaré dadá ternypnastyr, pohalas léngire-bakréngire stády i tedy, léngire čhavén i čhajén. Ame sam pašté dre amarí ladž, i amaró biladžaipén čhakirdia amen: pal-dová so ame kerdiám grého proti Raste-Devléste, amaré Devléste: ame i amaré dadá, amaré tyrnypnastyr ke adadyvés, i ame na kandyjam Ráskire-Devléskiri, amaré-Devléskiri zan!” ‘Kóli tu risjosa, Izrailie’, – phendiá Raj Devél, – ‘risjov ke Me. I kóli tu vyčhurdesa péskire džungalé (brydka) devloré Miré jakhéndyr, tén'či tu na javésa te paruves péskiro drom. I tu javésa te sovlahas: “Te javél džidó Raj Devél patiaibnása, sendosa i čačipnása, sob (kaj) Me te bahtiakirav sarén Najuden, sob (kaj) Mándyr jone te barjakirén pes!” I adiáke phendiá Raj Devél manušénge Judejátyr i Jerusalimóstyr: ‘Rospharaven (rospašynen) načilade phuvjá (čhučé phuvjá), i na čhuvén giv dre phuv maškír phusadytka xrústy. Občhinen pes vaš Mánge, Ráske-Devléske, i zlen cýpa tumaré ilendyr, tumé, manušále Judejátyr, i kon dživéla ke Jerusalimo, sob (kaj) te na perél Miro xoliakiribén syr jag, i sob (kaj) te zahačol adiáke, so nikón na mud'kirela, pal-dová so tumé kerdé bibáht. Poden zan (zvies') dre Judéia, obzaniakiren dro Jerusalimo i phenén: ‘Phurdén dre rógi (truby) pir phuv: rovén, kedenpe khetané i phenén: ‘Skedénpe i džása andré fórja maribnytkoné (zoralé) vantenca.’ Ĥazden sciago karing Sióno: našén, na jačénpe (na terdjon). Pal-dová so Me janáva bibáht paš-ratitkoné (šylale) rigátyr i bari xas' (baró xasibén). Ščer (liévo) vydžála péskire xaščatyr i xasiakiribnaskiro pe Najudytkoné manušénde: jov džála péskire, štetóstyr te čhučakirel Judejakiri phuv, sob (kaj) fórja dre Judéia te javén čhučé, bi manušéngiro. Paldavá podphandenpe žalobnone gonesa, obroven i rovén godlása: pal-dová so Ráskire-Devléskiro xoliakiribén, na risijá améndyr. ‘I javéla adiáke dre dová dyvesá’, – rakiréla Raj Devél, – ‘so kralískiro i thagar'jengire ile zamerena, i dívo darása uhtyléla rašán, i prorokénde kerénape baré jakhá trašatyr (darátyr)! I phendjom tedy Me, Jeriemiéjo: “Ah, Dévla, Rajo-Devlale! Naúšto Tu zalydžijan dre frotyma kadalé manušén Jerusalimóstyr, phení: ‘Tuménde javéla ramánjo!’ Ne kiéli čačunés kurtála isyn pašýl léngire dijá.” Dro dová časo javéla phendló kadalé manušénge i Izrailjoske: “Šukí balvál džála vučé šteténdyr, so isyn pe čhučé prahi, pe Miré manušénde, na, sob (kaj) te žužakiren, ci, sob (kaj) te vieinel syr giv; ne daja balvál dolé šteténdyr javéla zoraledýr pir Miro priphenybén: akaná Me phenáva miré lavá te sendiakirav len. Ake, vérgo džála telé sýrby óbloki i léskire maribnýtka vurdená javéna syr riskiribnaskiri balvál, a léskire grajo isyn sygedýr orlendyr (kidendyr). “Bida aménge! Pal-dová so ame xasijam!” Vymoren tumaré ile fuipnastyr, sob (kaj) tuménge te zrakhenpe. Syr ĥará bibahtalé dúmy javéna dre tumaré šeré? Pal-dová so zan džála Danostyr, šylale rigátyr, i pal bedypen (xasibén) zaniakirena Jefraimoskire bergátyr: “Den te džinén pal davá Najudénge, – mek Jerusalimo te šunél, so vérgi džána duratuné phuvjátyr te oblen trusciál fóro, i jone gazdena péskiri gódla pe Judejákire fórja. Sýrby rakhibnaskire pe félda, jone saré obdžana trusciál Jerusalimo, pal-dová so davá fóro gazdyja búnto pe Mánde’, – phendiá Raj Devél. Dová, syr tumé dživdé i so tumé kerdé, manušá Judejátyr, sys pričyna, so kerdiápe tuménca. Miro di kaljola! Miro di kaljola, saró miro iló dukhala tugatyr! Syr izdrala miro iló roibnastyr, mánge naštý te javav štyl, pal-dová so tu šunesa, miro di, syr bašavela rógo (truba), syr déna gódla, kaj džála maribén. Has' (bída) džála pal xas' (bída), dykhén, syr saró pe phuv isyn rozmardo, miré šátry (budy) pe jakhá rosphagirdé, i angíl jakhá xasiakirdé šatrakiro pologo. Syr ĥará (dlúges) mánge te dykháv pe sciago (pe flago), i te šunav rogoskiri zan? ‘Pal-dová so Miré manušá isyn nalačhé, jone na džinéna Man, – rakiréla Raj Devél – ‘jone isyn na god'varé, jone isyn godé te kerén bibáht (čoripén), ne jone na džinéna te kerén lačhipén.” Me, Jeriemiéjo, dykháva pe phuv sýrby dro sunó, i, ake, – joj isyn našady i čhučí; i, ake, pe bolybén – nane dud (svéto) pe léste. Me dykháva pe bérgi, i, ake, – jone izdrana, i saré bérgicy trinskirnape odorík i pale. Me dykháva duredýr, i, ake, – nane nijékh manúš, i saré bolybnáskire čirikliá vurniandyne krig. Me dykháva duredýr, i ake, – Karmilo (phabuny félda) kerdiápe syr čhučí phuv; i saré lákire fórja isyn phagirdé pe bará angíl Raste-Devléste, Léskire baré xoliátyr. Pal-dová so adiáke phendiá Raj Devél: “Sarí phuv javéla čhučakirdy (čhučí), ne Me na sarésa xasiakiráva phuv. Daléstyr phuv javéla te tuginel zoralés, i bolybén uprál javéla kaló, pal-dová so Me, Raj Devél phendjom davá, Me čhudjom dre godý davá; Me na kovljovava, Me na risjováva pale. Kažno (sváko) manúš javéla te našél krig godlatyr, so ĥazdéna uklistengire xaladé, i kar'je-dyibnarja lukostyr. Vari-savé džána krig dre xaščy (zarosli), i javír zaresena pe bérgi. Kažno fóro javéla meknó, i nijékh manúš na javéla te dživél odój. I tu, rosčordo Jerusalimo, so tu javésa te kerés? Mek tu i te ur'jéspe dro kuč loló plaščo, mek tu i te šukarjakires pes gožone viankenca suvnakástyr, mek tu i te podmakhes péskire jakhá makhluniasa (kraskasa), ne ivjá (naprásnes) tu saró gožakiresa pes, Tyré dróga malá dykhéna vučipnástyr pe túte, jone rodéna te muliakirén tut. Pal-dová so me, Jeriemiéjo, šundjom gódla sýrby džuvliatyr, kon pharés bijanéla, davá isyn džuvliakire pharé ĥondiá sýrby kodoliate, kon bijanéla pérvo mólo lákire bijatós, Jerusalimóskiri gódla isyn sýrby kodoliate, saví menčynelape zoralés i protyrdela vastá, phení (rakirí): “Bida mánge! Miro di našavela zor angíl muliakiribnaskirende!” Džán upré i telé pir vulícy (gásy) dro Jerusalimo, i dykhén akaná, i dodžinenpe, i rodén pe anglune štéty dro fóro, ci tumé déna ráda te lathén jekhe manušés, sob (kaj) jov te kerél saró pir čačipén, ci, savó te rodél patiaibén, i, – ‘Me otmekavas bang Jerusalimoske’, – rakiréla Raj Devél. I kóli manušá Jerusalimóstyr rakiréna: “Te javél džidó Raj Devél!” Jone sovlahana načačunes. Rajo Dévla! Ci na dykhéna Tyré jakhá pal patiaibén? Tu pekavesa len pe meribén, ne lénge na dukhana daba (udary) (nane dukhano); Tu domaresas len, ne jone otphendepe, sob (kaj) Tu te pirisykliakires len: jone kerdé péskire muiá zoraledýr skalatyr, jone otphendepe te risjon pale ke Tu. I phendjom me péske: ‘Kadalé manušá isyn sýrby čororé, jone isyn nagode; jone na džinéna ni Ráskire-Devléskiro drom, ni Zakóno péskire-Devléskiro. Džáva me fedýr ke baré manušá, i phenáva me lénge: pal-dová so jone isyn bangé te džinén Devléskiro drom, Zakóno Péskire-Devléskiro. Ne kadalé manušá khetané saré phagirdé ĥámo, jone roskušne vieringa, sob (kaj) te na kandén. Paldavá vešytko ščer (liévo) muliakiréla len, i ruv, so peréla bel'velié, mekéla len čhučé vasténca; lieopardo javéla te užakirel čorahanés len pašýl fórja; kažno (sváko), kon vydžála, javéla riskirdo pe koterá; pal-dová so léngiro čoripén javéla butýr, i jone butýr otperena Devléstyr. Pir daja pričyna syr Mánge, Ráske-Devléske te otmekav bang túke? Tyré čhavé, mekné Man, i jone sovlahade idolenca, savé isyn na develá. Me dyjom te xan čalés lénge, ne jone kerdé marki Mánge, sýrby nalačhi džuvlý, i jone ĥurtosa psirén ke viertiepo (biladžakuno kher). Jone psirdé trusciál sýrby čale ĥenšty, i kažno léndyr grymitynelas (iržynelas) pe péskire-pašatuneskire romniáte. “Syr Me te na sendiakirav pharés len pal saró davá?” – rakiréla Raj Devél. “Syr Me te na otdav pale xolyn dasavé manušytkoné nacyjáke syr kadalé manušá? Džán upré pe Jerusalimóskire vánty i rosphagiren len pe koterá, ne tumé na xasiakirén len sarésa. Keden krig léngire xrústy [špili-r.s.],, pal-dová so jone isyn na Ráskire-Devléskire! Saré džinéna, so Izrailjoskiro kher i Judejákiro kher jačkirdé Man syr napatiaibnytka, – rakiréla Raj Devél. Jone otphendepe Rástyr-Devléstyr i phendlé: “Raj Devél nisó na keréla aménge. Bibáht (bída) na javéla pe aménde. Ame na dykhasa ni kurtála, ni bokh. I proróki jačné [iačéna-r.s.] sýrby balvál i nane lav lénde Rástyr-Devléstyr. Lénca javéla dová-pac', so i aménca.” Paldavá adiáke rakiréla Raj Devél mánge, Jeriemiejoske, bolybnáskire-jangoléngiro Devél: “Pal-dová so tumé phendlé dasavé lavá, ake, Me keráva miré lavéndyr jag dre tumaré muiá. I Me keráva tuméndyr kaštá, so daja jag pohala. Ake, Me janáva manušýtko nacyja pe tuménde duripnastyr, Izrailjoskiro kher”, – rakiréla Raj Devél! “Davá isyn zoralý nacyja, daja nacyja isyn ĥaratuny, savengiri čib na džinéna tumé, i tumé na ĥaljona, so jone phenéna. Léngiro [léskiro-r.s.] kolčano isyn syr otphandly maĥila; jone isyn saré muršarja. I jone pohana tumaré givá i tumaró maró, i jone pohana tumaré čhavén i tumaré čhajén. Jone pohana tumaré bakréngire ĥurty i tumaré tabuny. Jone pohana tumaré vinagradýtka barja, i tumaré inžyritka kaštá; jone rosphagirena bará pe tumaré fórja zoralé tynosa kurtalása, dre savé tumé riskirena ile te zrakhenpe. Ne saroiekh (usajékh) dre dolé dyvesá’, – phendiá Raj Devél, – ‘Me na xasiakiráva sarésa tumen.’ I javéla adiáke: kóli tumé phenéna, sóske Raj Devél, amaró Devél kerdiá saró davá aménge? Tedy tu, Jeriemiéjo, otphenesa lénge: “Syr tumé mekné Les, i dynarindlé čužoné devlorénge pe tumarí phuv, adiáke-pac' tumé javéna te dynarinén čužoné manušénge pe phuv, so javéla na tumarí.” Poden daja zan (zvies') dro Jakovóskiro kher, i obzaniakiren (obiavinen) davá dre Judéia, phení (rakirí): “Šunén davá akaná, tumé, nagode manušá, savé isyn biileskire, konéste isyn jakhá, ne savé na dykhéna, konéste isyn kaná, ne savé na šunéna”, – phendiá Raj Devél. So da tumé, na daréna Mándyr? – phendiá Raj Devél. “So da tumé, na javéna te trinskirenpe angíl Mánde? Mándyr, Kon kerdiá prahostyr miéža morjoske viečnone statutosa, sob (kaj) mórjo (derjáv) te na piridžal? I mek léskire valny čhurdéla upré, ne jone na léna upralypén, jone rivinena, ne jone naštý (na moginéna) te piridžan pirdál daja miéža. Ne kadalé manušénde isyn buntytko i pharó iló; jone risiné dre rig i mekné Man. I jone na phenéna dro péskiro iló: “Trej te daras Rástyr-Devléstyr, amaré Devléstyr, kon bičhavéla bryšýnd, vesnakiro i vosieniakiro (pal-lynaskiro), dre péskiro časo (cýro), Kon rakhéla vaš aménge uphendle kurke te čhinen givá.” Tumaro čoripén durjakirdia saró davá tuméndyr, i tumaré gréhi pririkirde saró davá lačhipén tuméndyr. Pal-dová so isyn bibahtalé manušá maškír Miré manušénde: jone podrakhena te zamarén sýrby kodolé, so starena (uhtylena) čiriklién; jone čhuvéna felý sietkasa, jone uhtylena manušén. Léngire kherá isyn pherdé xohaibnasa i jone isyn syr klietka, so isyn pherdý čirikliénca; paldavá jone jačné baré i jone rozbarvalyne. Jone jačné thule, jone ziainena i, ĥaljon, so jone piriginé liubo miéra te kerén fuipén, jone na sendiakirena pir réndo syr trej, pirotoskiro (sirotengiro) réndo, ne lénge udelape ke mištypén. Jone na zaterdjona pal odolengiro čačipén, kon isyn dre trébima. Syr davá Me te na sendiakirav pharés len pal saró davá? – rakiréla Raj Devél. Syr Me te na otdav pale xolyn kadasavé manušytkoné nacyjáke syr isyn kadalé manušá? Darane i trašane réndy kerénape pe phuv: proróki angilphenena xohaibén, rašaja xulainena léngire lavénca, i Miré manušá kaména davá. Ne so jone javéna te kerén dro kónco (dro jagóro)?” O, Vieniaminóskire čhavé, kedenpe te našén krig Jerusalimóstyr! Phurdén dre rógi (truby) dre Tiekuia i kerén jag, syr signalo dro Bec-Xaceremo; bari bibáht džála paš-ratiakire rigátyr (sievierostyr) i bari bída. Tumé san góža i bučindle čhaja Sionóstyr, bari bída javéla pe tuménde. Čhupnárja péskire bakréngire gurtenca javéna ke tumé, ke Jerusalimo. Jone rosčhuvena péskire šátry trusciál fóro; kažno (sváko) léndyr javéla te čaliakirel peskiren pe péskiro štéto. “Javén skedyné te marénpe dalé forosa!” – kadalé vérgi godlena. “Uštén, i javén, džása pe lénde dyvesé.” Bida pe aménde, syg dyvés končynelape, dykhén syr bel'velitka zerja (tiéni) barjona. Uštén, džása pe lénde ratý, i javén, rozmarasa léngire felatiniá.” I phendiá adiáke Raj Devél, bolybnáskire – jangoléngiro: “Čingiren telé kaštá, i čhuvén phuv te javél valo trusciál Jerusalimo. Davá fóro te džal tel pharó-sendiakiriben: manušá tasavena jekh jekhés dro davá fóro. Syr ĥanyngatyr čhuvélape krig lákiro paní, adiáke-pac' dalé foróstyr čhuvélape krig léskiro fuipén: manušá isyn nahrata jekh ke jekh, isyn šundlo isyn, syr jone tasavena jekh jekhés. Saró časo džála ke Me túga i dukhaiben”, – rakiréla Raj Devél. “Sykljon (obduminenpe) tumé, Jerusalimóskire manušá, sob (kaj) Miro di te na durjol (te na otdžal) tuméndyr, sob (kaj) Me te na čhučakirav tumen adiáke, so phuv javéla bimanušengiri.” Adiáke rakiréla Raj Devél – bolybnáskiro-jangoléngiro: “Jone javéna zoralés te obtrinskiren manušén Izrailjostyr, kon jačnépe sýrby vinagradoskiri rand', rískir pale péskiro vast sýrby vinagradone–obkedyibnaskiro (obiratieljo), kon čhuvéla múri dre korzíny (khudé). Konéske me, Jeriemiéjo te phenáv, i te dosykavav, sob (kaj) jone mogindlé te šunén? Ake, léngiro kan isyn naobčhindlo i jone naštý te šunén. Ĥáda, Ráskire-Devléskiro lav nane dre patýv lénde; jone na radynénape léstyr. Me som pherdó xoliása Rástyr-Devléstyr, Me som khiniakirdo te pririkirav daja xolý.” Phendia Raj Devél mánge: “Vyčhuv la pe bijatende pe ĥasy (vulícy), i pe skedyni (sobranijo), kaj isyn khetané terné manušá: pal-dová so až romes romniása léna dro pliéno, manušés dre beršá i phurané manušés. I léngire kherá déna javire manušénge, léngire romnién i féldy khetané; pal-dová so Me ĥazdáva Miro vast pe manušénde pe kodoia phuv”, – phendiá Raj Devél. Pal-dová so kažno (sváko) léndyr, naj tyknedýr manušéstyr ke naj baredýr isyn prisyklyno ke ĥalkima, i, kažno (sváko) léndyr, prorokostyr ke rašáj keréla načačunes. Jone sastiakirde [sastiakirena-r.s.] čhindló fránso (rana) miré-manušéngiri vari-syr, phení: “Ramánjo, ramánjo (miro)!” Kiéli nane ramánjo. “I ci ladžandyne jone, syr jone kerdé džungalé réndy (diély)? Nad, jone na ladžandyne, i jone na džinéna, so isyn dasavo te loljon. Paldavá jone peréna maškír odolénde, savé peréna pe meribén”, – phendiá Raj Devél. Raj Devél rakiréla adiáke: “Terdjon pe dromá, i dykhén, i phučén pal phurané dromá, kaj isyn lačhó drom i džán pir davá drom, i tumé lathéna diéske te otkhinjon. Ne jone otphendlé: “Ame na džása pir davá drom.” Raj Devél adiáke-pac' čhudiá stregar'jen (rakhibnar'jen) vaš adalé manušénge: “Šunén rogoskiri zan!” Ne jone phendlé: “Ame na javása te šunas.” Paldavá šunén tumé, Najudýtka nácyi, i džinén, so javéla Miré-manušytkoné skedyibnasa. Šun, phuv! Ake Me janáva bibáht (xasibén) pe adalé manušénde, i pe dová, so jone priduminena; pal-dová so jone na šundlé Miré lavá, i so jone otphendepe Miré Zakonóstyr. Vaš so Mánge aromatytkone-smolengiro (ladonoskiro) thuv, so džála Sabatyr, i gudly triščyna (trasniko) duratuné themestyr? Me na prilava Tumaré xačkiribnaskire janybená i tumaré – svénta dyibená na radynena Man.” Paldavá rakiréla Raj Devél adiáke: “Ake, Me čhuváva bar te obštavenpe angíl kadalé manušénde: dadá i čhavé khetané peréna pir davá bar. Pašatuno manúš i léskiro mal xasjona.” Haladé (manušá) paš-ratiakire themestyr (sievierostyr) džána pe Jerusalimo. I ake, rakiréla Raj Devél: “Ake, bari manušýtko nacyja ĥazdélape duratuné jagorendyr pe phuv. Jone lydžána lúko i maribnýtko bust te phusaven, jone isyn bidiéskire i na lačhé-ilytka, léngire zaniá ĥryminena sýrby mórjo (derjáv), jone tradéna uklisté pe grénde, jone isyn kedyne te marén tumen, čhajo Jerusalimóstyr. “Ame šundiám zvies' pal lénde, – amaré vastá jačné bizorjákire, bari túga uhtyldia amen, dukh, sýrby dre džuvliáte, kon isyn dre pharí men'ka. Ame na vydžasa pe félda, i ame na psirasa droménca, pal-dová so vergoste isyn kurtála, saví doreséla saré rigéndyr i traš pe kažno rig.” “Miré-manušéngiri čhajo, čhuv pe péste žalobno gonó, i katynpe dre práska! Zoralés tugin sýrby pal jekhore čhavoreste, kirkes obrov pal-dová so jekhátyr peréla (javéla) pe aménde zamaribnari”, – phendiá Raj Devél. Me čhudjom tut, Jeriemiéjo, sýrby rakhibnaskiri vučardý (bašnia) pe Miré manušénde, sýrby tvárdyma, sob (kaj) tu te džinés, i te propatiakires léngiro drom; Saré jone isyn pharé-šeritka (nahrata) buntiarja, i jone isyn kalia–keribnaskire (klievietniki); jone isyn pharé sýrby xarkóma (mied') i sastýr; saré jone isyn biladžakire. Mieho (pišot) kutý (nábut) so na shačija sarésa, molovi (svinco) pohaia jag; biliakeribnaskiro (plavil'ščyko) biladia ivjá (naprásnes), pal-dová so šlaki [nalačhé manušén-r.s.] na ukedyne. Manušá javéna te kharén len “čhurdynó rup”, pal-dová so Raj Devél na prilyjá len.” Lav, savó sys mánge, Jeriemiejoske, Rástyr-Devléstyr, so phenelas: “Terdjov dre pórta angíl Ráskire-Devléskiro Kher (Khangirí), i phen zoralés angíl manušénde davá lav i phen: “Šunén Ráskire-Devléskiro lav saré tumé, kon isyn Judejátyr, savé zadžána pirdál daja pórta te otdén patýv Ráske-Devléske. Adiáke rakiréla bolybnáskire-jangoléngiro Raj Devél; Izrailjoskiro Devél: “Paruven te javél čačunedyr dová, syr tumé dživéna, i so tumé keréna, i Me keráva adiáke, so tumé javéna te dživén pe davá štéto. Na dopatian zoralés xohané lavenge, so phenéna: ‘Davá isyn Ráskire-Devléskiri Khangirí, Ráskire-Devléskiri Khangirí, Ráskire-Devléskiri Khangirí.’ Ne kóli tumé iléstyr paruvena te javél čačunedyr tumaró džiibén i dová, so tumé keréna; kiéli tumé javéna čačipnása te kerén pir čačipén séndo maškír jekhe manušéste i léskire pašatuneste; kóli tumé na javéna te pritasaven čužoné manušés, pirotos (sirotas) i pivlia (udova), i tumé na javéna te pročhuven nabango rat pe davá štéto, i tumé na javéna te psirén te otdén patýv javire devlorénge pe tumarí doš (bída); tén'či Me keráva adiáke, so tumé javéna te dživén pe davá štéto, pe daja phuv, so Me dyjom tumaré dadénge až pe saré viéki. Ake, tumé zoralés dopatiana xohané lavenge, savé na déna kófo. Syr da tumé iščo (inké) čorena, zamarena, keréna biladžaipén, sovlahana xohanés, xačkirena dróga smóly Vaaloske, i tumé psiréna te otdén patýv javire devlorénge, konés tumé na džinéna, i tén'či tumé javéna i terdjona angíl Mánde dro kher, savéske dyné tumé Miro lav, i tumé phenéna: ‘Ame sam zrakhné, sob (kaj) i duredýr tumé te kerén dalé džungalé réndy? Ci so, Miro kher, savéske tumé dyné Miro lav, jaciá virtasa (viertieposa) prahar'jenge angíl tumaré jakhá? Ake, Me dykhcjom davá”, – rakiréla Raj Devél. Ne tumé akaná džán pe Miro štéto, so sys dro Silómo, kaj Me kerdjom adiáke, sob (kaj) Miro lav angledýr saréstyr te jačélpe odój, i tumé podykhen, so Me kerdjom odój pal fuipén, Miré-manušéngiro Izrailjostyr. I akaná, pal-dová so tumé kerdé saré dalé butiá, – phendiá Raj Devél, – i mek Me i rakirdjom tuménge, syr Me uštavas tasiárles (ránes) pe zlóko (fránso) i Me phendjom, ne tumé na šundlé Man, i Me khardjom tumen, ne tumé na otphendlé Mánge: paldavá Me keráva dalé Miré kheresa, savéske tumé zoralés dopatiana, i štetosa, so Me dyjom tuménge i tumaré dadénge, dová-pac', syr Me kerdjom Silomosa. I Me tradava krig tumen Miré jakhéndyr, syr Me tradyjom krig sarén tumaré pšalén, – saró Jefriemoskiro (Jefraimoskire) javibnaskiro ródo. Paldavá tu, Jeriemiéjo, na mangpe pal adalé manušénde, i na phen patierja (molitvy), i na mang Man pal lénde, pal-dová so Me na javáva te šunav tut. Ci na dykhésa tu, so jone keréna dre fórja pir Judéia, i pe Jerusalimóskire vulícy (gásy)? Bijaty skedéna kaštá, i dadá roshačkirena jaga, i džuvliá miešynena xumer (tiasto), sob (kaj) te kerén paramore bolybnytkone kralicake, i te vyčhuven thadune svénta dyibená javire devlorénge, sob (kaj) te xoliakiren (dukhaven) Man te xoliasovav. Ci davá jone Man dukhavena te xoliasovav?”, – rakiréla Raj Devél. “Ci davá jone na kokoré pes dukhavenas pe našukaripen péske? Paldavá adiáke rakiréla Raj Devél, Devél: “Ake, Mirí xolý i Miro xoliakiribén vyčhuvenape pe davá štéto – pe manušéste, i pe kheritkoné murdalénde (skoto); pe feldýtka kaštá, i pe phabá, so barjona pe phuv. Mirí xolý javéla te xačol sýrby jag, i na murdjola. Adiáke rakiréla bolybnáskire-jangoléngiro Raj Devél, Izrailjoskiro Devél: ‘Dočhuven xačkiribnaskire janybená ke tumaré svénta dyibená i xan davá mas. Me ž na phendjom tumaré dadénge, i Me na priphendjom lénge dro dová dyvés, kiéli Me jandjom len Jegiptóskire phuvjátyr, nisó pal xačkiribnaskire janybená i svénta dyibená. Ne, ake, so Me priphendjom lénge, phení: “Šunén mirí zan i Me javáva tumaró Devél, i tumé javéna Miré manušá. I dživén adiáke, syr Me priphendjom tuménge, sob (kaj) te javél mištés tuménge.” Ne jone na kandyné, i jone na pričhude kan te šunén, ne jone dživdé pir péskiri godý, pir péskire pharé, bibahtalé ile, i jone risiné dumesa, a na mósa ke Me. Dalé dyveséstyr syr tumaré dadá vyginé Jegiptóskire phuvjátyr ke adadyvés, Me bičhavavas ke tumé saré Miré pishar'jén, Miré prorokén, Me bičhavavas len kažno dyvés tasiárles (ránes) pe ránko; ne jone na kandyné Man, i jone na pričhude kan te šunén, ne jone pharjakirde péskire menia. Jone kerdé fujedýr péskire dadendyr. I paldavá tu, Jeriemiéjo, phenésa saré dalé lavá lénge, ne jone na javéna te kandén tut. Tu javésa te khares len, ne jone na otphenena túke. I tu phenésa lénge: “Daja isyn manušýtko nacyja, saví na kandéla péskiri Ráskire-Devléskiri zan, i saví na sykljola pharé sykliakiribnastyr: nane patiaibén lénde, jov sýrby lynó krig léngire móstyr. Občhin tyré balá, šukarni Jerusalimóstyr, i čhurde krig len, i rov pe vučé štéty, pal-dová so Raj Devél na prilyjá i mekciá ródo, savó zoralés xoliakirdia Les. Pal-dová so manušá Judejátyr kerdé bibáht pe Miré jakhá’, – rakiréla Raj Devél, – ‘jone čhudé péskire džungalé ídoly dro kher, so isyn khardo pir Miro lav, sob (kaj) te magirén les. I jone kerdé vučé štéty ke Tofieto, so isyn pe Xinomoskire-čhavéngiro dólo te xačkirén Péskire čhavén i čhajén dre jag – so Me priphendjom te na kerén, i so na javdiá ke Me pe godý. ‘Paldavá, ake, javéna dyvesá’, – rakiréla Raj Devél; – ‘kiéli davá štéto na javéna te kharén “Tofitoskiro”, ci “Hinomoskire–čhavéngiro dólo”, ne joj iačéla “Meribnaskiro dólo”; – pal-dová so javéna te garaven dro Tofito ke dová dyvés, syr na javéla butýr štéto odój. Kadalé-manušéngire trúpy javéna syr xabén bolybnytkone čiriklienge i murdalénge pe phuv. I nijékh na javéla te strahakirel len krig (na javéla konéske te ottradel len). I tén'či Me keráva adiáke, so pirijačena te sanpe radymátyr, i na javéna radypnytka (xotna), i na javéla zan terneskiri i zan terniakiri dre fórja ke Judéia i pe ĥasy (vulícy) dro Jerusalimo. Pal-dová so daja phuv javéla čhučakirdy/ čhučí (pusto).’ “‘Dro dolé dyvesá’, – rakiréla Raj Devél’, – vergitka xaladé vytyrdena [vyčhurdena-r.s.] kokalý maĥilendyr: Judejákire-kral'jengire kokalý, thagar'jengire kokalý, rašángire kokalý, prorokéngire kokalý, i javire-manušéngire kokalý Jerusalimóstyr. Jone rosčhuvena [rosčhurdena-r.s.] len angíl kham, i angíl čhon, i angíl saré bolybnáskire xaladybena (jangoly), savén jone kamlé, i savénge jone dynarindlé; pal savénde jone giné, i savéndyr jone mangné te den godý: savén jone rodyne i savénge jone otdyné patýv. Dalé kokalý na javéna te ukeden, i na javéna te garaven, ne jone javéna sýrby ĥnejo uprál pe phuv. I saré manušá, savé jačénape džidé dalé bibahtalé-kheritkoné rodóstyr vykedena péske fedýr te merén, syr te dživén pe saré dolé štéty, pe savé Me tradyjom [vytradava-r.s.] len,’ – rakiréla bolybnáskire-jangoléngiro Raj Devél. “I tu, Jeriemiéjo, phen adiáke lénge: ‘Adiáke rakiréla Raj Devél: ‘Ci manušá peréna i butýr na uštena, Ci kon risjola dre rig droméstyr, na risjola pale? Sóske kadalé Miré manušá Jerusalimóstyr peréna butýr [otdžana-r.s.] i zoraledýr čačipnastyr? Jone rikirenape zoralés ke xohaibén, jone na kaména te risjon. Me prišundjompe i na šundjom, so jone rakiréna čačipén. Nikón léndyr na priĥalyja péskiro fuipén, sob (kaj) te phenél: ‘So ž da me kerdjom?’ Kažno léndyr risjola čačipnastyr péskire dromésa sýrby graj, savó čhurdelape pe maribén. I až butiano (bus'ko) pe bolybén džinéla péskiro uphendló časo, i cuglica, i bahirka (lastočka), i žuravo dykhéla duje jakhénca pal časo, syr lénge te javén [te priurnian-r.s.]. Ne Miré manušá na džinéna Ráskire-Devléskiro čačipén. Syr tumé saštý te phenén: “Ame sam baré-godiakire (godymarja), i Ráskire-Devléskiro Zakóno isyn aménca? Dykhén: xohané-sykliakiribnaskiri khija (trost') te čhinel dro Zakóno kerdiá adiáke, so Zakóno jaciá xohanó. Kadalé baré-godiakire manušá isyn ladžakirdé, léngiro dúho (fáno) isyn phagirdó i jone dynepe dukhá. Ake, jone otphendepe Ráskire-Devléskire lavéstyr; i savó ž godypén isyn lénde? Paldavá Me dáva léngire romnién javirénge, i léngire féldy kodolé manušénge, savé javéna xulaja pe lénde. Pal-dová so kažno léndyr tyknestyr ke sámo baredýr isyn prisyklyno i ĥálko ke barvalypén: prorokostyr ke rašáj – kažno léndyr keréla načačunes. I jone sastiakirde abysyr dykhady (fránso/rana), saví kerdiápe Miré-manušéngire čhate, phení: ‘Ramánjo, ramánjo (miro)’! Kiéli nane ramánjo. Ci ladžandyne jone, syr jone kerdé džungalé devloré? Nad! Jone na ladžandyne sarésa, i jone na džindlé te loljon. Paldavá jone peréna maškír odolénde, savé pyné, dro léngire-sendoskiro časo (cýro) jone obštavena,’ – rakírla Raj Devél. ‘Me, čačes, otkedava saró léndyr’ – rakírla Raj Devél. ‘Na javéna múri pe vinagradýtko kašt, i na javéna figi pe finikitko kašt; i patrín pe drévo (kašt) zašutjola; i saró, so Me dyjom lénge, na javéla butýr lénde. Sóske ame sam bešté štyl? Kedenpe tumé, i javén, džása dre fórja zoralé tynosa, i ame merasa odój. Pal-dová so Raj Devél kerdiá, sob (kaj) ame te xasjovas, i Jov dyjá aménge želučo paniésa te pjas, doléske, so ame kerdiám gréhi angíl Raste-Devléste. Ame užakirdiam ramánjo, ne nisavó lačhipén na javdiá daléstyr; ame užakirdiam te sastjovas, ne dykhén: isys jekh trašaibén! Danóskire for'jéndyr sys šundlo, syr déna pyrski (xrapinena) vergéngire grajo: sarí phuv izdrala léngire-grengire zorjátyr, syr jone ĥrymitynena; i jone javéna i pohana (zniščynena) sarí phuv, i saró, so isyn pe láte, i fóro, i sarén, savé isyn džidé dro dová fóro. ‘Paldavá, dykhén: Me bičhaváva maškír pe tuménde sapen, saplynien, savén naštý te zarikiren, i jone javéna te dandyren tumen’, – rakiréla Raj Devél. Me, Jeriemiéjo, podrikirava miro dúho (fáno), kiéli me tuginava, miro iló našavela zor andré mánde. Šunén! Ake, šundly isyn miré manušéngire-čhakiri zan, syr joj déla gódla drieván duratuné themestyr?: ‘Ci isyn davá Raj Devél pe Sióno? Ci isyn davá Sionoskiro králi odój?’ Raj Devél, léngiro Králi, otphenéla: ‘Sóske jone dukhavenas Man, sob (kaj) Me te xoliasovav pe lénde pal léngire vyčhindlé ídoly, savé isyn čúža i (ničý namol) xartytka?’ Ukedyiben mareskiro sys, lynaj končyndiape (progijá), i ame na zrakhciampe!’” – godlena manušá. ‘Miro iló xasijá (zamyjá) pal-dová, so miré manušá xasiné, me, Jeriemiéjo, zoralés tuginava: bari dar (dívo trašasa) uhtyldé Man. Ci isyn davá bal'zamo dro Galaádo? Ci nane da sastypnari odój? Sóske na sastiakirde čha mirja, miré manušengirja? O, te javél Miro šeró pherdó paningenca, sob (kaj) te javén Miré jakhá sýrby jasvengiri ĥanýng, sob (kaj) Me moginavas te rovav dyvés i rat pal Miré-manušéngiro-čhakiro xasibén. O, te javél Mánge štéto pe čhučí phuv syr dromeskireske (putnikoske), sob (kaj) Me moginavas te mekav Miré manušén, i te džav péske léndyr. Jone saré isyn biladžaipnarja, biladžaipén-keribnaskire (prieliubodiei), jone isyn skedyné vaš zdyibnaskire manušénge. I jone bandiakirena péskire čibá te xohaven sýrby lúko, ne jone na bidaripnaskire vaš patiaibén pe phuv: pal-dová so jone piridžana jekhe bibahtiatyr (xoliátyr) ke javír, ne jone na džinéna Man, – rakiréla Raj Devél. Kažno (sváko) te rikirélape rigasa péskire malestyr, i na dopatia zoralés dre péskire pšaléste, pal-dová so kažno pšal zadžála frotymasa pe drom javireske, i kažno mal isyn kalia-keribnaskiro (pljotkari). Kažno léndyr xohavela péskire pašatunes, i na rakiréla patiaibén: jone vysykliakirde péskire čibá te rakirén xohaibén, i jone khiniakirena pes, keri čoripén. Odój, kaj jone dživéna, maškirál isyn xohaibén, jone otphenenape te džinén Man pir péskiro xohaibén’, – rakiréla Raj Devél. ‘Paldavá rakiréla bolybnáskire-jangoléngiro Raj Devél: ‘Ake, Me biliakirava len i Me sprobinava len; pal-dová so iščo (inké) Mánge te keráv miré-manušéngire čhasa? Léngiri čib isyn muliakiribnaskiri bust (striéla), joj rakiréla xohaibén. O manúš rakiréla kučes (ramanjosa) ke péskiro pašatuno péskire čibása, ne jov andrál péste sýrby podrakhela te zamarél les. Ci Me na sendiakirava pharés len pal saró davá, – rakiréla Raj Devél. ‘Ci Me na otdáva pale xolynasa dasavé nacyjake syr daja?’ Me, Jeriemiéjo, ĥazdáva roibén pal bérgi, i me obrovavape pal čaraibnytka féldy pe čhučé malia (stiepi), i me javáva te rakiráv jasvénca pal-dová, so čhučé malia xačine adiáke, so nikón na déla ráda te džal pirdál lénde. Zan kheritkoné-žyvjolengiri (murdalengiri) isyn na šundly. Syr bolybnýtka čirikliá, adiáke-pac' i kherítka murdalá (skoto) xasiné, jone giné krig. Me keráva Jerusalimóstyr ruíny, štéto, dro savó dživéna šakaly. Me keráva Judejákire for'jéndyr čhučó štéto, so nikón na dživéla. Kon isyn godó manúš, sob (kaj) jov te del ráda te ĥaljol saró davá? I konéske Ráskire-Devléskire uštá phendlé, sob (kaj) jov moginelas te phenél statečnes sarénge? Sóske daja phuv xasijá, shačija sýrby šukí čhučí phuv mal adiáke, so nikón na džála pir láte?’ I otphendiá Raj Devél: “Pal-dová, syr jone mekné Miro Zakóno, savó Me dyjom lénge, i syr jone na šundlé Mirí zan, i jone na kerdé pir Miro Zakóno, a jone kerdé pir péskire pharé ile, i otdenas patýv Vaaloske, syr léngire dadá sykliakirdé len;” paldavá adiáke rakiréla bolybnáskire-jangoléngiro Raj Devél, Izrailjoskiro Devél: “Ake, Me čaliakirava kadalé manušén palynosa i Me paniakirava len paniésa želučosa.” I Me rosčhuvava len te dživén maškír Najudénde, konés na džindlé ni jone, ni léngire dadá. I Me bičhaváva kurtála pal lénde, angíl dová, syr Me sarésa xasiakiráva len.’ Adiáke rakiréla bolybnáskire-jangoléngiro Raj Devél: “Obduminen i kharén džuvlién, savé tuginena roibnasa, sob (kaj) jone moginen te javén; i bičhaven pal džindlé džuvliende, sob (kaj) jone moginénas te javén. Mek te javén jone sygedýr, i me te ĥazdén jone roibén pal aménde adiáke, sob (kaj) te prastan (te čhuvenpe) jasva amaré jakhéndyr, i sob (kaj) amaré cymblendyr te thaden (čhuvenpe) paniá. Pal-dová isyn šundly zan, syr tuginela zoralés džuvlý Sionóstyr: “Syr amen občorde! Syr ame sam ladžakirdé, pal-dová so ame mekciam phuv pir-dová, so amen tradyne krig amaré kherendyr! Džuvliale! Šunén Ráskire-Devléskiro lav, i mek tumaré kaná te prilén Léskiro lav; sykliakirén tumaré čhajén te tuginen roibnasa, i te bagán roibnytka giliá jekh jekhéske. Pal-dová so meribén džála pirdál amaré fenšry i džála dre amaré felatiniá te muliakirél amaré čhavorén pe ĥasy (vulícy), i terné manušén pe foruný (plóšča) dro fóro. Phen, Jeriemiéjo: ‘Adiáke rakiréla Raj Devél: “Manušéngire trúpy javéna te ravenpe (te pasjon) syr ĥnejo pe otkerdy félda, i syr ĥarby palál pal givačhinybnaskireste, i na javéla butýr nikón te skedel len.” Adiáke, rakiréla Raj Devél: “Mek godó manúš te na barjakirel pes péskire godypnasa (godiása), mek zoraló manúš te na barjakirel pes péskire (šarelpe) zorjása; i mek barvaló manúš te na barjakirel pes (te na šarelpe) péskire barvalypnasa: ne mek jov, kon barjakiréla pes, te šarelpe (te barjakirel pes) dalésa, so jov ĥaljola i, so jov džinéla Man; pal-dová so davá Me som, Raj Devél, Kon sykavéla drógo láska, čačunó séndo i čačipén pe phuv. Pal-dová so Me zoralés radynavpe saréstyr daléstyr”, – rakiréla Raj Devél. “Ake, syg javéna dyvesá”, – rakiréla Raj Devél, – kiéli Me pharés sendiakirava kodolén, savé isyn občhindlé i savé isyn naobčhindle: dro Jegípto, i dre Judéia i dro Jedomo čhavorén Amonostyr i Moavostyr, savénde jagóry (kraí) pe balengire piéisy isyn občhindlé i savé dživéna pe čhučí phuv. Pal-dová so saré dalé Najudýtka nácyi isyn naobčhindle i, saró Izrailjoskire-kheréskire-manušéngiro iló isyn na občhindlo.” Šunén lav, savó Raj Devél rakiréla túke, Izrailjoskiro kher. Adiáke rakiréla Raj Devél: “Na sykljon dromenge, savénca Najudýtka nácyi psiréna, i na zameren darátyr dykhí pe bolybnýtka ĥiertyká (znamiénii), sóstyr zamerena Najudýtka nácyi. Pal-dová so dalé manušýtka statúty nisó nane mol. Ake, jekh manúš vyčingirela kašt dro veš, skamindariskire vastá obkerena les toveresa. Jone gožakirena les suvnakása i rupésa, jone prikerena les gvozdenca (karfinenca) i čokanenca (mlotkenca), sob (kaj) jov te na rosphadjol pe koterá. Dalé ídoly isyn sýrby vyčhindlo stýlbo pe félda, jone na rakiréna, len lydžána, pal-dová so jone na psiréna. Na dar léndyr, pal-dová so jone na moginéna te kerén vari-saví bibáht (čoripén), adiáke-pac' jone na keréna ni savó lačhipén.” Nane nijékh, kon isyn kadasavó, savó Tu san, Rajo Dévla! Tu san baró i Tyró lav isyn baró pir Tyró zoralypén. Ci isyn vari-kon, savó na daréla Tútyr, manušéngire Kralístyr? Pal-dová so čačipén isyn dro dová, sob (kaj) te darén Tútyr; pal-dová so maškír saré godé manušénde dre manušýtka nácyi, i saré léngire kralipená nane nijékh, savó te javél kadasavó, syr Tu san, Rajo Dévla! Jone isyn so ke jekh bigodiakire i dylynin'ka, léngiro sykliakiribén isyn čhučó, sob (kaj) te den patýv kaštenge. Rup, savéstyr isyn čikade čaré, jandlé Taršynostyr, suvnakáj Ufazostyr, saré jone isyn butiá mastieroskire pir suvnakái: golubovo i purpurno uribén isyn pe kadalé ídoly: jone isyn džindlé-manušéngire butiá. Ne Raj Devél isyn čačunó Devél: Jov isyn džidó Devél i Králi pe saré viéki. Léskire xoliátyr izdrala phuv i manušýtka nácyi na déna ráda te vyrikiren, syr Jov xoliasóla zoralés. Tumé, manušále, phenén lénge: “Devloré, so tuménde isyn, na kerdé bolybén i phuv, jone xasjona phuvjátyr i tel bolybnástyr.” Jov sozdyjá phuv Péskire zorjása, i Jov čhudiá svéto Péskire godypnasa, i Jov rozdin'd'kirdia (rostyrdyja) bolybén Péskire godiása. Kiéli Jov phenéla Péskire zaniása, tedy pe bolybén šuminena paniá: i Jov keréla adiáke, so óbloki paniésa ĥazdénape jagorendyr pe phuv; jov keréla bliskavícy maškír bryšýnd, i jov lydžála angíl balvál Léskire kučoné-piral'jendyr. Kažno manúš jačéla buro [dylynó-r.s.] bidžinybnaskiro, kažno suvnakengiro mastiero javéla ladžakirdó vyčhudé idolostyr, pal-dová so davá bilado idolo isyn xohanó, i nane dúho (fáno) dre léste. Saró davá isyn čhučipen (pustota), butý pe saben, jone xasjona, kiéli Raj Devél javéla te sendiakirél. Jakovoskiri dólia nane kadasavi syr léngiri, pal-dová, so Jov, Kon sozdyjá saró, i Kon vykedyjá Izrailjo syr Léskiro mištypén, isyn bolybnáskire-jangoléngiro Raj Devél i davá isyn Léskiro lav. Keden krig péskire klunki phuvjátyr, konés vérgi obkrenžyndle (zauhtylde) dro Jerusalimo. Adiáke rakiréla Raj Devél: “Ake, Me čhurdava manušén dro davá uliago (pora), savé dživéna pe daja phuv, i lénge javéla bari traš (dar), sob (kaj) te uhtylén (lathén) len. Bida mánge, pal-dová so bibáht dukhavela man, miro (fránso/rana) isyn dukhano. Ne me, Jeriemiéjo, phendjom péske: “Kuč, miro iló pharjola, i me vyrikirava davá. Mirí šátra isyn zarady, i saré miré šele isyn roskušne. Miré čhavoré giné dur mándyr, i jone adáj butýr nane. Nane nijékh, sob (kaj) nevéstyr te rozdin'd'kirel (rosčhuvel) mirí šátra, i te prikerel pologi. Pal-dová so čhupnárja [pastyri-r.s.] jačné pharé-ilytka, i jone na rodyne Ras-Devlés, paldavá jone na kerdé godes, i saró léngiro ĥurto isyn rosčhurdyno. Šunén zan, saví dyjá zvies': “Ake, džála baró ĥlumo godlenca paš-ratitkoné (sieviernone) rigátyr, sob (kaj) te čhučakirel fórja dre Judéia, i te kerél adiáke, sob (kaj) odój šakaly te dživén. Me džinóm, Rajo Devlale, so manúš na déla ráda te xulainél péskire sud'basa (džiibnasa), i nane kadasavó manúš, savó psiréla i savó rikiréla zor pe dová, karik ĥerá lydžána les. Rajo Dévla, pirisykliakir man ke dukhá pir čačipén, ne na pir Péskiro xoliakiribén, sob (kaj) te na javél saró mánge. Vyčhuv Péskiro xoliakiribén pe Najudytkoné manušénde, savé na džinéna Tut, i pe ródy, savé na prikharena Tyró lav; pal-dová so jone xasiakirdé Jakovós, jone dukhade les, i jone domardé les. Jone kerdé léskire kheréstyr čhučó štéto. Ĥáda, isyn lav, savó phendiá Raj Devél Jeriemiejoske: “Šunén lavá dalé Zavietoskire i phenén manušénge Judejátyr i manušénge, kon dživéla ke Jerusalimo. I phen lénge: ‘Adiáke rakiréla, Raj Devél, Izrailjoskiro Devél: ‘Te javén prokošybena (armania) pe manušéste, savó na šunéla lavá zavietostyr. Savó Me priphendjom tumaré dadénge te kerén dro dyvés, kiéli Me lydžijom len krig Jegiptóskire phuvjátyr, sastruné bovestyr, phení: ‘Kandén Mirí zan i kerén dová saró, syr Me priphendjom tuménge, sob (kaj) tumé te javén Miré manušá, i, sob (kaj) Me te javav tumaró Devél; sob (kaj) Me te vypherdiakirav (te spolninav) sovláh, saví Me dyjom tumaré dadénge te dav phuv, pir saví te thadel thud i avgín, syr isyn adadyvés. I Me, Jeriemiéjo otphendjom i phendjom: “Amín', Rajo Dévla.” Tén'ci phendiá Raj Devél mánge: ‘Phen zoralés angíl manušénde saré kadalé lavá dre Judejákire fórja, i pe Jerusalimóskire vulícy (gásy) kadasavé lavénca: “Šunén kadalé Zavietoskire lavá i vypherdiakiren len.” Pal-dová so Me baré laskasa dophenávas te rakhénpe tumaré dadénge dro dyvés, syr Me lydžijom len krig Jegiptóskire phuvjátyr až ke adadyvesatuno dyvés, uštyi tasiárles pe zlóko (pe ránko) i dophenávas lavénca: “Kandén mirí zan.” Ne jone na kandyné, jone na pričhude kan, a kažno (sváko) léndyr kerdiá pir nahratyma léngire bibahtalé ilendyr: i Me janáva pe lénde saré lavá kadalé Zakonóstyr, savé Me priphendjom lénge te vypherdiakiren (te spolninen), ne jone davá na kerdé. I phendiá Raj Devél mánge: “Zrakiribén isyn lathno maškír Judejákire manušénde i kodolende, savé dživéna ke Jerusalimo. Jone risiné pale ke čoripén, savó kerdé léngire prapapy, i jone giné pal javír devlorende te dynarinén lénge. Izrailjoskiro kher i Judejákiro kher phagirdé Miro zavieto, savó Me sčhudjom léngire dadénca.” Paldavá adiáke rakiréla Raj Devél: “Ake, Me janáva bari bída pe lénde, savjátyr jone na našéna: i mek jone javéna te den gódla ke Me, Me na javáva te šunav len. Tén'ci Judejákire fórja i Jerusalimóskire manušá javéna i jone javéna te den gódla javrí ke devloré; vaš savénge jone xačkirdé dróga smóly, ne jone na vyrakhena len tedy, kiéli javéla bibáht pe lénde. Pal-dová so kicý isyn túte tyré fórja, Judéia, adákicy túte isyn tyré devloré; kicý isyn vulícy (gásy) dro Jerusalimo, adákicy tumé čhudé altári pe ladž, altári, sob (kaj) te xačkirén dróga smóly Vaaloske. Paldavá, Jeriemiéjo, na mangpe Mánge pal adalé manušénde, i adiáke-pac' na ĥázde patierja ci mangipén pal lénde, pal-dová so Me na javáva te šunav len dro časo (cýro), kiéli jone javéna te den gódla javrí ke Me, syr javéla bibáht (bída) lénge. So ž trej miré piramneske (kamleske) dro Miro kher, kóli joj adákicy but keréla biladžakuné réndy? I svénto mas vaš janybén gijá krig tútyr? Kóli tu kerésa bibáht, tedy tu radynesape.” Raj Devél dyjá lav túke: “Zeleno maslinitko kašt, savó isyn gožo, lačhé phabasa!” Ne akaná zoralé godlása i ĥlumosa Jov, Raj Devél, roshačkirdia jag pe láte i lákire randiá (vétki) phadine. Pal-dová so bolybnáskire-jangoléngiro, Raj Devél, Savó čhudiá dre phuv tut, vyphendia rozpleskiriben pe túte pal fuipén (bibáht), saví kerdé Izrailjoskire i Judejákire kherá. Jone kerdé davá pe péste i dalésa jone dukhade Man ke xolý, syr jone xačkirdé dróga smóly Vaaloske.” Akaná Raj Devél dyjá mánge, Jeriemiejoske, te džináv pal davá, i Me džinóm davá; pal-dová so Jov sykadiá mánge léngire keribena pe miro šeró. Ne me sómas syr rahmano bakroró, savés lydžiné te čhinen; i me na džindjom, so jone pridumindle fuipén (bibáht) pe mánde, rakirí: “Javén, xasiakirasa kašt léskire phabenca, i javén, čingirasa davá kašt krig džidé phuvjátyr, sob (kaj) butýr te na ripirén léskiro lav.” Ne Tu, bolybnáskire-jangoléngiro Raj Devél, Savó sendinela pir čačipén; Savó sprobinela godý i iló, mek me te dykháv, syr Tu otdesa pale lénge: pal-dová so Túke, Rajo Dévla, me dopatiandyjom miro réndo. Paldavá adiáke rakiréla Raj Devél pal muršende Anatotostyr [Anafofostyr-r.s.], savé kaména te muliakirén man, phení (rakirí): “Tu butýr na angilphen Ráskire-Devléskire lavéstyr, sob (kaj) túke te na meres amaré vastéstyr.” Paldavá adiáke rakiréla bolybnáskire-jangoléngiro Raj Devél: “Ake, Me pharés sendiakirava len: terné manušá meréna kurtalátyr, léngire čhavé i čhaja meréna bokhátyr; so butýr nijékh na jačélape léndyr; pal-dová so Me janáva xasibén (bibáht) pe manušénde Anafofostyr [Anatotostyr-ju.o.] dro dová berš, kiéli Me javáva te sendiakirav len.” Čačunó san Tu, Raj Devél, kóli me javáva te lydžav miro réndo Túsa, mek me te rakiráv pal Tyró čačipén. Sóske da zlydnitkone manušénge udelape ke mištypén? Sóske isyn kuč odolénge, savé isyn bikiibnarja [nahrata-r.s.]? Tu čhudián dre phuv len, léngire ĥerorja barine: jone barjona butýr, čačó, i jone déna phabá: Tu san lénde pe čib, ne Tu san durál léngire godiendyr (ilendyr). Ne Tu, Rajo Dévla džinésa man: Tu dykhcián man i Tu sprobindian miro iló ke Tu. Tyrde krig len syr bakrén te začhinen, i čhuv dre rig len vaš dyvés te začhinen len. Syr ĥará (dlúges) phuv javéla te tuginel, i čharja pe félda te šutjon? Murdalá i čirikliá xasiné pal adalé zlydnia (fujé) manušénde, savé dživéna odój, pal-dová so jone rakiréna: “Devél na dykhéla amaró kónco (jagóro).” Raj Devél otphendiá: “Kóli tu, Jeriemiéjo, prastandyjan psiribnaskirenca, i jone khiniakirde tut, syr tedy tu javésa te sprobines zorja grenca? I kóli pe phuv, kaj isyn ramánjo (miro) tu sánas bidaripnaskiro, tén'či so tu javésa te kerés, syr ĥazdénape paningá dro Iordáno? Pal-dová so rovno (adiáke-pac') i tyré pšála, i tyré-dadéskiro kher, adiáke-pac' i jone obginepe túsa syr bikiibnaskirja (bikinybnarja), mek jone i déna gódla javrí pal túte. Na patia lénge, mek i rakiréna jone lačhin'ka lavá túke. Me mekcjom Miro kher, Izrailjo, Me čhurdyjom Miro mištypén, Me otdyjom Miré drogoné manušés dre vastá vergénge. Miro mištypén – Miré manušá, jačné syr ščer (liévo) dro veš, jone ĥazdyné péskiri zan pe Mánde, paldavá Me naštý te dykháv pe lénde. Miro mištypén jaciá syr čirikly, savjá saštý te rozriskires, riskiribnáskire čirikliá kružynenape (krenžynenape) te perén pe láte. Džán, skedénpe, saré murdalá pe félda, janén len te xan. But šeralé čhupnárja xasiakirdé Mirí vinaĥradytko bar, jone vyštakirde (vytopčyndle) Miré-feldakiri paš ĥerénca, jone kerdé Miré ĥožone pašatyr (pašestyr) bimanušengiri čhučí phuv! Jone kerdé látyr zamekno bimanušengiro štéto; saró, so isyn zamekno, zoralés tuginela angíl Mánde: sarí phuv isyn zamekny, pal-dová so nane nikón, sob (kaj) te čhuvél davá pe iló péske. Mižeh čora javéna pe vučé štéty pir čhučé prahi, pal-dová so Me, Raj Devél, bičhaváva kurtála jekhe jagoróstyr pe phuv ke javír; so na javéla ramánjo ni jekhe džidé dieske. Jone čhudé dre phuv giv, ne jone sčhindle phusadytka xrústy, jone khiniakirde pes ke dukhá, i lénge na udelape ke mištypén. Ladžan dasavé tumaré čororé umalotostyr, pal-dová so javéla bari xolý Rástyr-Devléstyr. Adiáke rakiréla Raj-Devél pe saré bibahtalé Izrailjoskire susiedende (kotar'jende): “Save xasiakirena phuv, saví Me syr mištypén dyjom manušénge Izrailjostyr. Ake, Me riskiráva javrí len Izrailjoskire phuvjátyr i Me vyriskirava Judáskiro kher léndyr. I javéla adiáke: paló (poslie) saró davá, syr Me vyriskirava len, Me risjováva pale, i tedy Me potanginava (požalinava) len, i Me janáva pale len – kažnones ke péskiro mištypén, i kažnones ke péskiri phuv. I javéla adiáke: kóli jone, susiédy (kotárja) mištés vysykljona te psirén pir dromá Miré-manušéngire te sovlahan Miré lavésa: “Te javél džidó Raj Devél”, adiáke-pac' syr jone sykliakirdé Miré manušén te sovlahan Vaalosa, tedy jone jačénape maškirál Miré manušénde. Ne kóli jone na javéna te kandén, tedy Me vykušava len krig i Me xasiakiráva kadalé manušén”, – phendiá Raj Devél. Adiáke phendiá mánge Raj Devél: “Džá i kin péske kustýk ĥandladestyr (ljonostyr), i pričhúv la pašýl péskiro trušúl (masá); ne na bol la dre paní. I me, Jeriemiéjo, kindjom dasaví kustýk pir Ráskire-Devléskiro lav i pričhudjom la pašýl péskiro trušúl. I javdiá ke me Ráskire-Devléskiro lav javír mólo, i phendiá: “Le kustýk, so tu kindian, saví isyn pe tyró trušúl, ĥazdepe i džá ke Jefrato i garav kustýk odój dre xoripén maškír skaly.” Adiáke me gijom i garadjom pašýl Jefrato [Jevfrato-r.s.], syr Raj Devél priphendiá mánge. I sys adiáke, syr proginé (nakhle) but dyvesá, to Raj Devél phendiá mánge: “Ĥazdepe (uštý) i džá ke Jevfrato, i le odothýr kustýk, saví Me priphendjom te garaves túke odój. Tén'ci me gijom ke Jevfrato i ĥanadjom, i me vylyjom kustýk dolé štetóstyr, kaj me garadjom la; i, ĥáda, kustýk jaciá nalačhi. Látyr na sys uže ni savó lačhipén. I javdiá ke me Ráskire-Devléskiro lav, i phendiá: “Adiáke phendiá Raj Devél: ‘Pir dová Me xasiakiráva Judejákiro phut'kiribén, i adiáke-pac' Jerusalimoskiro zoraló (baró) phut'kiribén. Kadalé bibahtalé manušá otphendlepe te šunén Miré lavá, jone dživéna pir péskire pharé ile, i jone psiréna te kerén patýv javire devlorénge i te dynarinén lénge, i lénca javéla dová, so kerdiápe dalé kustykasa. Pal-dová so syr kustýk uhtylelape zoralés (isyn paštó) ke pe manušéskiro trušúl, adiáke-pac' Me kerdjom, sob (kaj) saró Izrailjoskiro kher i saró Judejákiro kher te uhtylenpe zoralés ke Me, sob (kaj) jone moginénas te javél Miré manušá, Miro lav te šarén i te barjakirén Man; ne jone na šundlé. “I tu, Jeriemiéjo, phen lénge davá lav: ‘Adiáke rakiréla Raj Devél, Devél Izrailjoskiro: ‘Kažno gonó pherdiakirena moliasa (vinosa).’’ Jone phenéna túke: ‘Ci ame na džinása, so kažno gonó pherdiakirena moliasa’? Ne tu phenésa lénge: ‘Adiáke rakiréla Raj Devél: “Ake Me matiakirava saré manušén, kon dživéla pe kodoia phuv, i kral'jén, savé isyn bešté pe Davidóskiro trono, i rašán, i saré prorokén, i saré manušén, kon dživéla ke Jerusalimo. I Me čikavava (pekavava) len jekh pir jekhéste, syr daden, adiáke-pac' i čhavén khetané, – rakiréla Raj Devél, – i Me na javáva lačhé-iléskiro ke jone, i Me na javáva te tanginav (te žalinav) len, i Mándyr na javéla tangipén (láska) lénge, a Me xasiakiráva len.’” Šunén tumé, i pričhuvén kan, na phutjon (na barjakirén pes), pal-dová so adiáke phendiá Raj Devél. Barjakirén (slavinén) Ras-Devlés, tumaré Devlés, angíl dová, syr Jov janéla kalypén (cjomnyma), i angíl dová, syr tumaré ĥerá obštavenape (obstempinenape) pir bérgi dre paš-kalypén! I tumé javéna te rodén dud (svéto), ne Jov riskiréla les dre meribnytko zer (tien'), i Jov pirikerela les dre xor kalypén. Ne kóli tumé na javéna te kandén davá, to tedy me, Jeriemiéjo, javáva te rovav dre garadé štéty pal tumaró phut'kiribén, i miré jakhá javéna te rovén kirkes, pal-dová so Ráskire-Devléskiro ĥurto lydžino krig dre navolia (pliéno). ‘Na javén phut'kirdé, bešén teledýr; pal-dová so pyjá kralítko stadyk tumaré slavatyr, saví sys pe tumaré šeré’, – phendiá Raj Devél te phenáv kralíske i kralískire dáke. Fórja pe paš-dyvesýtko (južno) rig javéna zaphandle i na javéla nikón te psiravel (otphandel) len; sarí Judéia lydžána krig dro pliéno, saré Judejákire manušén zalydžana dro pliéno. Ĥazden tumaré jakhá i dykhén, so džála pe tuménde paš-ratitkoné (sieviernone) rigátyr. Kaj tyró ĥurto, šukár ĥurto, savó sys dynó túke? So tumé phenéna, kiéli Raj Devél javéla ke tumé, pir-dová so tumé sykliakirdé len, sob (kaj) jone te javén šeralé thagárja pe tuménde? Ci na uhtylena (nádosi) tut dukhane tugi sýrby džuvliá, saví isyn bangi te bijanél? I kóli tumé phučena (phenéna) dro péskiro iló: ‘Sóske davá saró pyjá pe mánde?’ Pal tumaró baró čoripén, savé otčhakirde tumaré ídi pe ladž, i pal dová, so tyré khurja (piénty) jačné nange? Ci moginéla (saštý) Efiopo te paruvel péskiri cýpa, ci saštý lieopardo te paruvel péskire piet'my (piatny)? Tedy, ci moginéna tumé adiáke-pac' te kerén lačhipén, savé prisyklyne te kerén bibáht? ‘Paldavá Me rosčhurdava len sýrby phusakire tietivy [práho-r.s.], savé rozlydžala balvál čhučé prahendyr’, – rakiréla Raj Devél. Davá isyn tumarí dólia, bažyn, saví Me vykedyjom (dyjom) tuménge, pal-dová so tumé bistyrde Man i zoralés dopatiandyne dro xohaibén. Paldavá Me adiáke-pac' riskiráva tumaré truiunia (podi) pe muj, i tumarí ladž javéla bicialy. Me dykhcjom tumaró biladžaipén, i dová, syr tumé grymitindle, syr tumé tradenaspe pal čužoné devlorende pe bérgicy i pe féldy, dolé džungalé réndy. Bida pe tuménde, manušá Izrailjostyr! Naúšto tumé na javéna žužé? Ci ĥará tumé iščo (inké) adiáke javéna?’” Ráskire-Devléskiro lav, savó javdiá ke Jeriemiéjo pal baró šukipen: “Judéia tuginela zoralés, i lákiri pórta rospyjape, joj kalyja ke phuv; i Jerusalimóskiri gódla ĥazdyjápe. Léngire lačhé-rodoskire raja [upratune-r.s.] bičhavena péskire kheritkoné dynar'jén pal paní: jone džána ke panitka ĥanbiniá, ne jone na lathéna paní; jone risjona pale čhučé pir'jénca: jone isyn ladžakirdé, jone isyn zaphagirde dre godý, i jone učhakirde péskire šeré. Pal-dová so phuv pharadyja, syr na sys bryšýnd pe phuv, phuvjavire-butiarné isyn ladžakirdé, jone učhakirde péskire šeré. Pal-dová so mirga (lan') adiáke-pac' bijanéla pe félda, i joj mekéla péskire tyknen, pal-dová so nane čar. I busa (dika) osly (miegárja) isyn terdé pe vučé štéty, jone sungena balvál syr šakaly: léngire jakhá pyné (kalyne), pal-dová so nane čar. ‘Rajo Dévla! Mek amaró čoripén te dophenel pe aménde, ker vari-so Tyré lavéstyr; pal-dová so ame but otpyjam Tútyr – ame kerdiám gréhi proti Túte. O, Tu san odová, Konéstyr Izrailjo užakiréla lačhipén [zrakhibén-r.s.], Tu san amaró Zrakhibnari (Zrakhibnaskiro) dre pharé dyvesá! Sóske Tu san sýrby čúžo manúš pe amarí phuv, ci sýrby tradypnaskiro (putniko), savó risijá pe rig, sob (kaj) te jačélpe pe jekh rat? Sóske Tu san sýrby manúš, savó divinelape trašasa, sýrby zoraló murš, savó naštý (na moginéla) te zrakhél? Ne Tu, Rajo-Dévla, san maškír aménde, i ame kharasa Tyró lav: na mek amen.’ Adiáke phendiá Raj Devél pal kadalé manušénde: “Jone adiáke pokamle te psirén, so jone na obrikirenas péskire ĥerá; i Raj Devél na radynélape léndyr: Jov ripirela léngiro čoripén i Jov javéla te sendiakirél len pal léngire gréhi.” I Raj Devél phendiá mánge: “Na mangpe Mánge pal kadalé manušénde vaš léngiro lačhipén. Kiéli jone javéna te postynen, Me na javáva te šunav léngiri gódla; i kiéli jone janéna céla xačkiribena, i svénta dyibená givestyr, Me na prilava len: pal-dová so Me xasiakiráva len kurtalása, baré bokhasa i fransenca.” Ne me phendjom: “O, Rajo Dévla, Devlale! Ĥáda, proróki rakiréna lénge: ‘Tumé na dykhéna kurtála, ni bari bokh, pal-dová so Tu désa čačunó ramánjo pe davá štéto. I phendiá Raj Devél mánge: “Proróki angilphenena xohaibén Miré lavéstyr; Me na bičhadjom len, i Me na priphendjom lénge, i Me na phendjom lénge: jone angilphenena tuménge xohanó dykhibén (sunyben), i čhučé čary; dová, so na mol ničý, i xohaibén, so džála léngire ilendyr. Paldavá adiáke rakiréla Raj Devél pal prorokénde, savé angilphenena Léskire lavéstyr, savén Jov na bičhadiá, i savé rakirna: ‘Kurtála i bari bokh na javéna pe kadaja phuv’: Kadalé proróki xasjona kurtalátyr i baré bokhátyr! I manušá, konéske jone javéna te angilphenen, javéna čhurdyné javrí pe Jerusalimóskire vulícy (gásy), pal-dová so javéla bari bokh i kurtála; i odój na javéla nikón te garavel len, ci léngire romnién, ci léngire čhavén, ci léngire čhajén, i Me vyčhuvava léngiro fuipén pe lénde. I tu, Jeriemiéjo, phenésa davá lav lénge: mek te thaden jasva Miré jakhéndyr rat i dyvés, i jone na pirijačena, pal-dová so patyvalý terný džuvlý, Miré-manušéngiri čhaj, isyn zoralés dukhady pharé pekaibnasa. Kóli Me džáva pe félda, ake, isyn pašté manušá, savén kurtála muliakirdiá! I kóli Me džáva andré fóro, ake, isyn manušá, savé našavena zor ke meribén baré bokhátyr! Pal-dová so dujdžiné: i proróko, i rašáj psiréna pir phuv, so jone kokoré na džinéna palsó.’” Rajo Dévla! Ci sarésa Tu otphendiampe Judejátyr? Ci Tyré dieske jaciá džungaló Sionóstyr? Sóske Tu adiáke pekadian amen, so nane sastiakiriben aménge? Ame rodasa ramánjo, ne nane lačhipén, časo te sastiakiraspe, i, ake, jekh trašaibén (dar). Rajo Dévla! Ame pridžinasa amaró fuipén, i čoripén, so kerdé amaré dadá; pal-dová so ame kerdiám grého proti Túte. Na durjov améndyr vaš Tyró lav, na tykniakir patýv Tyré-slavakire tronoske, Jerusalimoske, rípir Péskiro zavieto, so Tu dyján aménge i na phagir les. Ci isyn maškír Najudýtka ídoly odolé, savé déna bryšýnd? Ci moginéla (saštý) kokoró bolybén te del baré paningá? Ci davá nane Raj Devél, amaró Devél? Paldavá ame javása te užakiras Tut, pal-dová so Tu kerdián saró davá. I phendiá Raj Devél mánge: “Mek Mójza i Samuílo te terdjon angíl Mánde, ne Miro di na risjola ke adalé manušá. Bičháv len krig Miré jakhéndyr, i mek jone te džán péske. I javéla adiáke: kóli jone phenéna túke: ‘Karik aménge te džas?’, tedy tu phenésa lénge: ‘Adiáke rakiréla Raj Devél: ‘Kon isyn prisendindlo pe meribén – džá pe meribén, kon isyn prisendindlo pe kurtála – pe kurtála, konéske prisendindlo bari bokh – bari bokh, konéske prisendindlo pliéno – dro pliéno. Me javáva ke jone i Me dáva lénge štar rázna kary’ – rakiréla Raj Devél: Kurtála te muliakirél, džukela te riskirén, bolybnýtka čirikliá, i riskiribnáskire murdalá (zvieri) pe phuv, te pohan i te xasiakirén. I Me otdáva len, sob (kaj) saré kralipená pe phuv te tradén len odorík i pale pal Manasijaste, Jezekijaskire čhavéste, pal-dová so jov kerdiá dro Jerusalimo. Pal-dová so, kon potanginela tut, Jerusalimo? Kon sykavéla lačhé-ilýtkima túke? Kon zadžála ke tu te phučes, syr tu san? Tyré manušá mekné Man!’, – rakiréla Raj Devél, – tumé dynepe pale. Paldavá Me protyrdava (ĥazdáva) Péskiro vast pe tuménde, i Me xasiakiráva tumen: Me khinyjom te otmekav (te prostinav) tuménge. I Me rosčhurdava len viejelosa (baré lopatasa) pal pórty pe phuv; i Me láva krig sarésa léngire čhavorén, i Me xasiakiráva Miré manušén: pal-dová so jone na risjona péskire dromendyr. Mánde javéla léngire pivlien (udoven) butýr syr práho dro mórjo (derjáv): Me janáva pe lénde pe terné-manušéngire date praharis – čores dro paš-dyvés: Me keráva adiáke, so jekhátyr ilytko dukh i trašaibén (dar) peréna pe lénde. E daj, saví bijandiá eftá tyknen, joj vyphurdyja palatunó dúho (fáno); lákiro kham gijá telé, mek davá iščo (inké) isyn dyvés; joj isyn ladžakirdy i zaphagirdy dre godý. I kon jačélape, kodolén Me piridava kurtalake angíl léngire vergénde’, – phendiá Raj Devél. Bida mánge, Jeriemiejoske, mirí daj, so tu bijandian man te košavpe, i te čingardavpe saré phuvjása! Me na dyjom nikonéske lové tel kófo, i jone adiáke-pac' na dyné mánge tel kófo, ne kažno (sváko) léndyr prokošela man (keréla armania pe mánde). Raj Devél phendiá: “Čačipnása Me mekava pe vólia tut vaš lačhipén, čačipnása Me keráva adiáke, so vérgo javéla te mangél tut dro bibahtaló časo i tedy, kiéli javéna te tradén tut. Ci moginéla (saštý) vari-kon te phagirel sastýr, paš-ratítko (sievierno) sastýr i xarkóma (mied') [pirdo (bronza)-ju.o.]? Saró tyró mištypén i saré tyré kučipena Me otdáva te čoren bilovengiro pal Tyré gréhi, so kerdián pir saré tyré phuvjá ke kustyka (granicy); i Me keráva adiáke, so tu džása péskire vergenca pe phuv, saví tu na džinésa: pal-dová so Mirí xolý xačola syr jag: joj iavéla te xačol pe tuménde.” Tén'ci Me phendjom: “Rajo Dévla! Tu džinésa saró: rípir man i pode vast mánge, otdé pale xolynasa odolénge, savé tradéna man: na zakede man krig pir Tyrí baró vyrikiriben (tiérpima): džin, so Me lydžáva ladž pe péste pal Túte. Tyré lavá lathné miro iló, i me xajom len. Tyró lav jaciá syr rádyma mánge i radymakirdia (obradyndia) zoralés miro iló, pal-dová, so Tyró lav isyn pe Mánde, Rajo Dévla, bolybnáskire-jangoléngiro Devél. Me na sómas beštó pe skedyipen, kaj sys prosaibnaskire i me na radyndjompe ke vučipén; Me sómas beštó jekhdžinó: pal-dová so Tu pherdiakirdian man xoliása. Sóske mirí dukh ĥará (dlúges) tyrdelape, sóske miro riskiriben pe masá na sastjola, savó Tu otphendianpe te sastiakires? Naúšto Tu javésa vaš mánge sýrby xohany ĥanyngori, sýrby nálačho paní.” Paldavá adiáke rakiréla Raj Devél: “Kóli tu risjosa, tén'či Me riskiráva tut pale, tén'či tu terdjosa angíl Mánde; i, kóli tu vykedesa kučipén bedypnastyr (čoripnástyr), tén'či tu javésa te rakirés Miré móstyr. Mek kadalé manušá risjona ke tu, ne túke na trej te risjos ke jone. I Me keráva tútyr zoralý xarkuny (miédno) vánta pe kadalé manušénde, i jone javéna te marénpe proti túte, ne jone na léna uprál pe túte, pal-dová so Me som túsa te zrakhav, i te prirakhav tut,” – phendiá Raj Devél. “Čačes, Me javáva te prirakhav tut bibahtalé vastéstyr, i Me zrakháva tut darakune vastéstyr.” I sys phendló Ráskire-Devléskiro lav ke me: “Na le péske romniá, mek te na javén túte ni čhavé – ni čhaja pe davá štéto. Me phenáva túke pal čhavénde i čhajénde, savé bijandjona pe dová štéto; i pal dajénde, savé bijanena len, i pal dadende, savéndyr jone bijandjona: jone meréna dukhane meribnástyr, nikón na javéla te obrovel len: nijékh léndyr na javéla garadó, ne jone javéna syr gnejo pe phuv. Jone xasjona kurtalátyr i bokhalypnastyr, i léngire trúpy javéna sýrby xabén bolybnytkone čiriklienge i riskiribnáskire murdalénge (zvierienge) pe phuv. Paldavá Me adiáke phenáva túke: na zadžá dro kher, kaj tuginena roibnasa, adiáke-pac' na džá te obroves mulen, ci na tangine khetané lénca; pal-dová so Me otlava Miro ramánjo kadalé manušéndyr, Me iščo (inké) phenáva túke, – i drógo lačhipén i lačhé-ilýtkima (tangipén). Syr baré, adiáke-pac' i tykné meréna pe daja phuv. Len na javéna te garaven, adiáke-pac' i nikón na javéla te obrovel len; ci te čhinel pes, ci te občhinel balá pal lénde. Nikón na javéla te phagirel maró vaš lénge dre smentnyma tugitko, ci te podrikirél dro dúho (fáno) pal mulénde, i nikón na déla tahtáj lénge te vyp'jén, sob (kaj) te ramaniakirel (štyliakirel) léngiro iló pal dadéste ci pal date. I na džá dro kher, kaj jone svenkinena, i na beš lénca te xas, te p'jes. Paldavá adiáke rakiráva Me, bolybnáskire-jangoléngiro Raj Devél, Izrailjoskiro Devél: ‘Ake, Me keráva adiáke, so angíl tyré jakhá dre tyré dyvesá na javéna šundlé radymakire i sabnytka zaniá, terneskire i terniakire zaniá.’ I javéla adiáke: kiéli tu rosphenesa saré dalé lavá odolé manušénge, tén'či jone phenéna túke: ‘Pal so davá vyphendia Raj Devél sarí daja bari bibáht (bída) pe aménde? Dro so isyn amaró čoripén? Ci savó grého ame kerdiám proti Raste-Devléste, amaré Devléste?’ Tén'ci tu phenésa lénge: ‘Pal-dová so tumaré dadá jačkirdé Man, – davá Me, Raj Devél, rakiráva: jone giné pal javire devlorende i iščo (inké) tumé dyné patýv lénge, i tumé jačkirdé Man, i na rikirde Miro Zakóno. I tumé kerdé fujedýr tumaré dadendyr, i so kažno (sváko) tuméndyr dživéla pir péskiro pharó i bibahtaló iló adiáke, so tumé na pričhude kan ke Me [sob (kaj) te na šunén Man-r.s.]. Paldavá Me vyčhurdava tumen dalé phuvjátyr pe phuv, so tumé na džinéna, i saví na džindlé tumaré dadá, kaj tumé javéna te dynarinén javire devlorénge dyvés i rat: pal-dová so Mándyr na javéla ni savó tangipén (žalima) tuménge.’ “Paldavá, ake, javéna dyvesá, – davá Me, Raj Devél, rakiráva, – so na javéna butýr te rakirén: ‘Te dživél Raj Devél, Savó jandiá Izrailjoskire čhavén Jegiptóskire phuvjátyr’; ne javéna te rakirén: ‘Te dživél Raj Devél, Savó jandiá Izrailjoskire čhavén paš-ratitkoné (sieviernone) phuvjátyr, i, saré phuv'jendyr, karik Jov vytradyjá len. ‘Pal-dová so Me janáva pale len pe phuv, saví Me dyjom léngire dadénge. “Ake, Me bičhaváva pe lénde but mačhibnar'jén, – davá Me, Raj Devél, rakiráva, – i jone javéna te uhtylén (te staren) len, a tén'či Me bičhaváva pe lénde but karedynitkonen (ohotniken), i jone tradéna krig len kažnoné bergátyr, i kažnoné bergicendyr i ščeliendyr dre skaly. Pal-dová so Miré jakhá isyn pe saré léngire dromá; jone na garavenape Miré móstyr, i léngiro čoripén nane garadó Miré jakhéndyr. Ne angíl Me otpleskirava pal léngiro čoripén i léngiro grého duj móly, pal-dová so jone magirdé Mirí phuv trupenca džungalé (brydkone) idolendyr, savénca jone pherdiakirde Miro mištypén.” Rajo Dévla! Tu san miro zoralypén i mirí tvárdyma, i pal Túte Me garadjovava dre trašane (darakune) dyvesá, ke Tu javéna but manušá saré jagorendyr (krajendyr) pe phuv i phenéna: “Amaré dadá, čačes, doresné (dolyne) meknó mištypén, savó isyn xohanó i xartytko (nikčemno), i léstyr nane ni savó lačhipén. Ci moginéla (saštý) manúš kokoró te kerél devloré, savé isyn na develá sarésa?” Paldavá, ake, Me keráva adiáke, sob (kaj) jone te džinén Miro vast i Miro zoralypén, i jone javéna te džinén, so Miro lav isyn Raj Devél.” “Judejákiro grého isyn čhindló sastruné daltasa (riezcosa), diamantytkone (almazytkone) čhinybnytkonesa isyn vyčhindlo pe léngiri tablica pe iló i pe altarjoskire šyngá. Pal-dová so léngire čhavoré ripirena léngire altári i léngire dembitka veladinia (roščy) [i léngire ídoly Ašerahi -ju.o.], savé isyn pašýl zelena drevy pe vučé bérgicy, to Mirí bérga pe félda, mištypén tyró, saró barvalypén Me otdáva te čoren, i adiáke-pac' vučé štéty pal gréhi pe phuv ke jagóry. I tumé kokoré otdena meknó mištypén, savó Me otdyjom tuménge: i Me keráva adiáke, so tumé javéna te dynarinén tumaré vergénge pe phuv, saví tumé na džinéna: pal-dová so tumé roshačkirde Miré – xoliakiri jag; joj iavéla te xačol pe saré viéki. I davá Me, Raj Devél, rakiráva: “Te javél prokošybén (arman)” pe manušéste, savó dopatiala zoralés dre manušéste, i savó keréla péskire ločiatyr (plotiatyr) čačó vast, i saveskiro iló durjola Rástyr-Devléstyr. Jov javéla sýrby jaloŭco (vieriesko) pe čhučé prahi, i jov na udykhéla, kiéli javéla lačhipén. Ne jov javéla te dživél pe šuko štéto pe xačkirdy mal (stiep), londy phuv, kaj nane manušá. Te javél bahtaló manúš, savó dopatiala zoralés dre Raste-Devléste i konéskiro patiaibén isyn dre Raste-Devléste. Pal-dová so jov javéla syr drévo, so isyn počhudo pašýl paniá, i savó rozdzindz'kirdia péskire kórni (rukhá) pašé rékica (lenorí). I jov na javéla te darel, kiéli javéla xačkiribén, ne léskiri patrín (listo) javéla zeleno, i léske na javéla trej te darel dro šuko berš, adiáke-pac' jov na pirijačéla te del phabá. Iló isyn xohanedyr saréstyr i drieván bibahtaló, kon saštý te džinél les? Me, Raj Devél, rozĥaljovava kažno iló, Me propatiakirava andrál manušés, sob (kaj) te dav kažnonéske (svakoneske) pir léskire dromá, pir dová, so jov kerdiá. Syr kuropatka, saví bešéla pe parnore, so joj na čhudiá, adiáke-pac' isyn manúš, kon doreséla barvalypén na pir čačipén: dro sámo maškirál léskire dyvesá barvalypén mekéla les i dro kónco (dro jagóro) jov javéla dylynó. Amaró Svénto štéto isyn slavútno trono, savó čhudo anglypnástyr pe vučé štéty. Rajo Dévla! Tútyr užakiréla lačhipén Izrailjo! Saré, kon mekné Tútyr, javéna ladžakirdé. Saré, kon durine (otginé) Tútyr, javéna čhindlé pe phuv. Pal-dová so jone jačkirdé Ras-Devlés, Savó isyn džidé-paniéskiri ĥanýng. Sastiakir man, Rajo Dévla, i me javáva sastiakirdo; zrákh man, i me javáva zrakhno, pal-dová so pal Túte isyn miro šaribén. Ake, jone phenéna mánge: ‘Kaj isyn Ráskire-Devléskiro lav! Mek Jov te javél!’ Ne me na sómas sygo te javav čhupnarisa (pastyrjosa), sob (kaj) te džav pal Túte. Adiáke-pac' me na kamdjom, sob (kaj) te javél xasibnýtko dyvés: Tu džinésa davá, so vygijá miré uštendyr, saró sys angíl Túte. Na trašakir man: pal Túte me garadjovava dro bibahtaló dyvés. Mek te javén ladžakirdé kodolé, savé tradéna man, mek jone te zameren darátyr, ne na domek, sob (kaj) me te javav ladžakirdó. Ne na domek, sob (kaj) mánge te zamerav darátyr. Jan pe lénde bibahtaló dyvés. Phagir len ke xasibén duj móly.” Adiáke phendiá mánge Raj Devél: “Džá i terdjov dre pórta, kaj isyn manušéngire čhavé, pirdál saví Judéngire králja džána andré i pirdál saví jone vydžána, i jav dre saré Jerusalimóskire pórty, i phen lénge: ‘Šunén Ráskire-Devléskiro lav, tumé, Judejákire králja i sarí Judéia, saré džiibnarja Jerusalimóstyr, savé džána andré pirdál kadaja pórta. Adiáke rakiréla Raj Devél: “Rakhén péskiro di i te na lydžán ke pe ničí dro savatytko (subotnjo) dyvés pirdál Jerusalimóskiri pórta; I te na vylydžan nisavó pharipén dro savatytko dyvés, i te na kerén nisaví butý, ne svenciakiren savatytko dyvés, syr Raj Devél priphendiá tumaré dadénge.” Ne jone na kandyné, i jone na pričhude péskiro kan, a jone štyvakirde péskire menia, sob (kaj) jone na mogindlé te šunén ci te prilén sykliakiribén. I javéla adiáke, kóli tumé mištés javéna te prišunenpe – rakiráva Me, Raj Devél, – i tumé na javéna te lydžán pharipén andré pirdál daja foróskiri pórta dro savatytko dyvés, ne sob (kaj) tumé te svenciakiren, savatytko dyvés, i te na kerén ni saví butý dro davá dyvés, to tedy tumé javéna te zadžán pirdál daja foróskiri pórta králja i thagárja, savé isyn bešté pe Davidóskiro trono, jone javéna te tradén pe maribnýtka vurdená (koliesnicy) i uklisté jone i léngire thagárja, pašýl savénde manušá Judejátyr i džiibnarja Jerusalimóstyr, i manušá usady (sak) javéna te dživén dro davá fóro. I jone javéna Judejákire for'jéndyr i pašylatune phuvjátyr pašýl Jerusalimo i Vieniamonoskire phuvjátyr (jugostyr), i feldendyr i phuvjátyr, kaj isyn bérgicy, i paš-dyvesytkoné phuvjátyr jone javéna te janén xačkiribnaskiro dyibén, ratvalo dyibén, i svénto dyibén givestyr, i drogoné-smolengiro thuv, i parikiribnytko svénto dyibén dro Ráskire-Devléskiro Kher. Ne kóli tumé na javéna te prišunenpe ke Me te svenciakiren [te svenkinen-r.s.] savatytko dyvés, i te na lydžán pharipén, syr tumé zadžána pirdál Jerusalimóskiri pórta dro savatytko dyvés, tedy Me roshačkirava jag dre doiá pórta, i jag pohala sarésa Jerusalimóskire baré felatiniá, i daja jag na murdiakirena.’” Ĥáda, isyn lav, savó phendiá Raj Devél mánge, Jeriemiejoske: “Uštý i džá ke pir'jengiro kher, i odój Me keráva adiáke, so tu šunesa Miré lavá.” I me gijom ke pir'jengiro kher, i, ake, jov kerélas butý pe pir'jengiri rota. I pirí, saví jov kerdiá ĥlejatyr (glinatyr), pharadyja dre léskire vastá, i jov kerdiá javír pirí, saví zdelaspe mištés pir'jengireske te kerél. Tén'ci javdiá Ráskire-Devléskiro lav ke me: “O, Izrailjoskiro kher. Ci naštý Mánge te keráv adiáke-pac' tuménca, syr kadalé pir'jengiresa?” – rakiréla Raj Devél. “Dykh, syr isyn ĥleja dre pir'jéngire vastá, i adiáke-pac' tumé san dro Miro vast, tumé – Izrailjoskiro kher! Ake, pe jakhá, kiéli Me rakiráva pal manušýtko nacyja, i pal kralipén, so Me vyriskirava len, so Me phagirava len, so Me xasiakiráva len, ne kóli daja manušýtko nacyja risjola péskire čoripnástyr, tedy Me otčhuvava bibáht, saví Me dumindjom te janav pe lénde. I, ake, pe jakhá, kiéli Me rakiráva pal manušýtko nacyja, i pal kralipén, so Me ĥazdáva len, so Me zoraliakirava len, Ne kóli jone javéna te kerén čoripén angíl Miré jakhá, i jone na prišunenape ke Mirí zan, to tedy Me otparuvava (požalinava) lačhipén, pal savó Me phendjom, so Me dáva lénge. I paldavá akaná phen manušénge Judejátyr i Jerusalimóskire džiibnar'jénge: ‘Adiáke rakiréla Raj Devél: ‘Ake Me akaná skedáva (podkerava) fuipén tuménge, i Me priduminava plano pe tuménde: ‘Risjon fedýr akaná kažno (sváko) tuméndyr, tumaré bibahtalé droméstyr, fedyrjakiren tumaré dromá i dová, so tumé keréna’” Ne kadalé manušá phenéna: ‘Adalestyr na javéla ni savó lačhipén! Paldavá ame javása te dživás pir amaré plany, i, kažno (sváko) améndyr, javéla te dživél pir péskiro pharó i bibahtaló iló.’” Paldavá, adiáke rakiréla Raj Devél: “Phuč akaná Najudendyr: ‘Kon šundiá dasavé nalačhipena? Izrailjoskiri patyvalý džuvlý kerdiá drieván nálačho (trašano) réndo. Ci mekéla iv dro Liváno péskire-bergakiri skála? Ci moginéna te vyšutjon šylale paniá, so thadena dur javire šteténdyr? Ne Miré manušá mekné Man: jone xačkirena drogoné-smolakiro thuv idolénge, savé namol ničý, i jone kerdé adiáke, so jone obštadepe pe péskire dromá, jone mekné ĥaratuné dromore, sob (kaj) te psirén nadžindle dromorenca, a na otkerde buĥle dromésa, sob (kaj) te kerén péskire phuvjátyr dívo trašasa, te kerén štéto ŭsády (sak) te sanpe manušénge adiáke, so kažno (sváko) manúš, savó prodžála pašýl, javéla uhtyldo divosa, i jov kuniakirela (kačynela) šerésa. Me rosčhurdava len sýrby vastočnone balvaliasa angíl vergoste, i Me risjováva dumesa ke jone, a na mósa dro dová dyvés, syr javéla bari bída.” Tén'ci jone phendlé: “Javén, priduminasa vari-savó plano pe Jeriemiejoste; pal-dová so Zakóno na otperela rašastyr ci godó lav manušéndyr ci lav prorokostyr. Javén, zamarasa čibása les, i mek nikón améndyr te na prišunelpe ke léskire lavá.” Rajo Dévla! Prišunpe ke me, i šun lavá, so rakiréna kodolé, savé čingardenepe mánca! Ci otdena pale fuipnasa pal lačhipén? Paldová so jone vyĥanade ĥanbín (jama) vaš miro di. Rípir, syr me sómas terdó angíl Túte te rakiráv lačhipén pal lénde, sob (kaj) Tu te riskires krig Péskiri bari xolý léndyr. Paldavá otdé léngire čhavorén pe bokhalypen, i mek léngire čhavorén pe kurtalakiri zor, i mek léngire džuvliénde te na javén čhavoré, i mek jone te javén pivlia (udovy), i mek léngire muršá te javén muliakirdé, i mek léngire terné manušén te xasiakirél kurtála pe meribén. Mek gódla te šunelpe léngire kheréstyr, kiéli Tu jekhátyr janesa polko rulden (maribnytkonen) pe lénde; pal-dová so jone vyĥanade ĥanbín te uhtylén (len) man, i jone te garadé feliá (čhudé čorahanés) pe miré ĥerá. I Tu, Rajo Dévla, džinésa saró léngiro zrakiribén, sob (kaj) te muliakirén man. Na otmek lénge léngiro čoripén, na khos krig léngiro grého Tyré jakhéndyr, ne mek jone te perén angíl Túte, roskedepe lénca, syr Tu xoliasosa pe lénde.’” Adiáke phendiá Raj Devél mánge, Jeriemiejoske: “Džá i kin khoró ĥlejatyr, i le pésa manušéngire phurydyren i phurydyre rašán, I džá ke Jenomoskiro [Gienomoskiro-ju.o.] dólo, savó isyn pašýl Pir'jéngiri pórta (Xaršyfo) i phen zoralés angíl sarénde lavá, savé Me phenáva túke. Phen lénge: ‘Šunén Ráskire-Devléskiro lav: Judejákire králja, džiibnarja Jerusalimóstyr. Adiáke rakiréla bolybnáskire-jangoléngiro Raj Devél, Izrailjoskiro Devél: ‘Ake Me janáva bibáht (bída) pe davá štéto adiáke, so kažnonéste, kon šunéla davá, javéla te kuduniakirel (te zvieninel) dre léskire kaná. Pal-dová so jone mekné Man, i jone kerdé čúžo davá štéto vaš Mánge, i jone thuvaliakirde drogoné smolenca javire devlorénge, savén jone na džindlé, i léngire dadá, i Judejákire králja, i jone pherdiakirde davá štéto bibangipnaskire ratésa; i jone adiáke-pac' čhudé vučé štéty Vaaloske te xačkirén péskire čhavén dre jag syr xačkiribnaskiro svénto dyibén Vaaloske, so Me priphendjom te na kerén, pal so Me na rakirdjom, davá na sys i Mánde pe godý. Paldavá ake, javéna dyvesá, – rakiráva Me, Raj Devél, – kiéli davá štéto na javéla te kharelpe Tofiéto, ci Ginomeskire-čhavéngiro dólo, a javéla te kharelpe muliakiribnaskiro (umaribnytko) dólo. I Me keráva adiáke, so ničý na javéla mol zrakiribén pe skedyny ke Judéia i ke Jerusalimo pe dová štéto, i Me keráva adiáke, so jone peréna kurtalátyr angíl péskire vergénde, i kodolengire vastéstyr, savé rodéna léngiro džiibén, i Me keráva adiáke, so léngire trúpy Me dáva syr xabén bolybnytkone čiriklenge i murdalénge pe phuv. I Me keráva dalé foróstyr štéto te sanpe, i te divinenpe trašasa manušénge, kažno (sváko) manúš, kon pašýl prodžála, javéla uhtyldo divosa, i jov javéla te del šolia sabnasa, dykhí dolé saré fránsy (jazvy). I Me keráva adiáke, so jone javéna te xan loč (plot') péskire čhavén i čhajén, i, kažno (sváko) léndyr, javéla te xal péskire-malengire džidé masá, kiéli občhuvena vérgi saré rigéndyr, kiéli lénge javéla pharó vergéndyr, i kodolendyr, savé javéna te tasaven len, i te rodén léngiro džiibén. I tu phagiresa khoró angíl manušéngire jakhá, savé javéna túsa, i tu phenésa lénge: – ‘Adiáke rakiréla bolybnáskire-jangoléngiro Raj Devél: ‘Adiáke-pac' Me phagirava kadalé manušén i davá fóro, syr phagirena khoró, so naštý les nevéstyr te kerén, i jone javéna te garaven péskire mulen dro Tofiéto ke dasavo časo (cýro), so na javéla butýr štéto te garaven. Adiáke Me keráva kadalé štetosa, – rakiráva Me, Raj Devél, – i léskire manušénca, i Me keráva kadalé foróstyr sýrby Tofiéto. I kherá dro Jerusalimo i kral'jengire kherá dre Judéia javéna magirdé sýrby Tofiéto, – saré kherá, kaj pe léngire strehi thuvaliakirde drogoné smolenca, i vyčhuvenas thadune svénta dyibená javire devlorénge.’” Tén'ci javdiá Jeriemiéjo Tofietostyr, karik les bičhadiá Raj Devél te angilphenel, i jov terdijá pe gréda (dvóro), savó sys dro Ráskire-Devléskiro Kher, i jov phendiá saré manušénge: Adiáke rakiréla bolybnáskire-jangoléngiro Raj Devél, Izrailjoskiro Devél: “Ake, Me janáva bibáht [bari bída-r.s.] pe davá fóro i saré léskire foricy, pe savé Me priphendjom bibáht, pal-dová so jone pharjakirde péskire menia, sob (kaj) lénge te na šunén miré lavá.” Ĥáda, Pashoro, Imeroskiro čhavó, rašáj – i jov sys phuredýr dykhibnaskiro (nadziratieljo) pir Ráskire-Devléskiro Kher, šundiá, syr Jeriemiéjo angilphenelas (proročynela) kadalé lavá. Tedy Pashoro pekadiá Jeriemiejos prorokós i bešliakirdia les dre kalodki zaphandle vasténca i ĥerénca, savé sys dre upratuny Vienjaminoskiri pórta, so sys pašýl Ráskire-Devléskiro Kher. I adiáke sys pe javír dyvés: Pashoro vymekcia Jeriemiejos kalodkendyr, i Jeriemiéjo phendiá léske: “Raj Devél na javéla te kharel tut lavésa ‘Pashoro, a Magor-Misavivo. Pal-dová so adiáke rakiréla Raj Devél: ‘Ake, Me keráva adiáke, so Tu, Pashoro, javésa te dares kokoró péstyr, i adiáke-pac' saré Tyré drúgi (malá), i jone peréna vergéngire kurtalátyr i tyré jakhá javéna te dykhén davá. I Me otdáva sarí Judéia dre Vavilonóskire-kralískire vastá i jov lydžála krig len dro pliéno ke Vavilóno, i odój jov muliakiréla len kurtalása. I Me otdáva saró foróskiro barvalypén, i sarí léskiri bažyn, i saré léskire dróga priedmiéty (čysy), i saró kučipén, so sys Judejákire kral'jénde, i saró léndyr čorena, i otlena, i lydžána len ke Vavilóno. I tu, Pashoro, i saré, kon dživéla dro tyró kher, saré tumé džána dro pliéno. Tumé džána ke Vavilóno, i odój meréna tumé, i odój garavena tumen, tut i saré tyré malen, konéske tu xohanés angilphenesas.’” O, Rajo Dévla! Tu prityrdyjan man, i me som prityrdyno; Tu san zoraledýr mándyr, i Tu lyjan upralypén pe mánde. Mándyr lyné te sanpe javrí; kažno (sváko) manúš prosala man. Pal-dová so, kóli me vari-kicý rakiráva, tedy, me dáva gódla, me godlava: ‘Nahratyma i xas'’ pal-dová so pal Ráskire-Devléskiro lav sanape javrí i prosana man, tén'ci phendjom [podumindjom-r.s.] me: ‘Me na javáva butýr te ripirav Léskiro lav, ci te rakiráv butýr Léskire lavéstyr, ne Léskiro lav isyn syr xačibnaskiri jag, saví isyn phandly dre miré kokalý; i Me khinyjom te rikirav les, i me na mogindjom. Pal-dová so Me šundjom, syr but rozlydžana bedo sláva: ‘Traš isyn pe kažno rig’: ‘Mek jov phenéla vari-so’, – jone rakiréna, – i ame zdasa (phukavasa) les.’ Saré, kon sys sýrby pe mirí rig, dykhéna ciamkes, sob (kaj) me te obštavavpe, i phenéna: ‘Ame, xači, zatyrdasa les, tén'či ame lása upralypén pe léste, i ame othasa (otdasa) pale léske (kušasa xolý pe léste!)’” Ne Tu, Rajo Dévla, san zoralypnaskiro i trašano (bi darákiro), i Tu san pe mirí rig; paldavá vérgi, savé tradéna man, obštavenape, i jone na léna upralypén pe mánde: jone javéna ladžakirdé, pal-dová so léngire plany na udenape lénge ke mištypén [iene kerdé nagod'vares, ladž javéla lénge pe saró viéko i nijékhvar na bistrelape-r.s.], Ne Tu, bolybnáskire-jangoléngiro Raj Devél, Kon sprobinela čačunen, Kon dykhéla godý i iló, de mánge te dykháv, syr Tu dukhavesa pale len, pal-dová so Túke me vyphendjom (dopatiandyjom) miro réndo. Bagán Ráske-Devléske, šarén Ras-Devlés, pal-dová so Jov zrakhéla čororé-manušéngire dijá bibahtalé vasténdyr. Te xasjol dyvés, dro savó me bijandyjom! Mek te na javél bahtiakirdó dyvés, dro savó mirí daj bijandiá man! Te xasjol manúš, savó jandiá zvies' (zan) miré dadéske, phení: ‘Muršoro lathiape túte!’ I dalésa (sósa) jov drieván obradyndia miré dadés.’ I mek te javél dová manúš syr fórja, savé Raj Devél phagirdiá pe koterá, i Jov na potagindia (požalindia) pal dová; i mek odová manúš te šunél gódla pe zlóko (pe ránko), i godlyma [roibén-r.s.] dre paš-dyvés. Pal-dová so Jov na muliakirdiá man dre dakiri ločoví, sob (kaj) te javén miré-dákire masá syr maĥila mánge, i sob (kaj) te javél lákiri ločoví pharí ŭsády (sak). Vaš so me vygijom dákire ločov'tyr te dykháv pharí butý i túga, i sob (kaj) miré dyvesá te džán péske dre ladž. Lav, savó javdiá ke Jeriemiéjo Rástyr-Devléstyr, kiéli králi Sedekíia bičhadiá ke jov Pashoros, Molhinoskire čhavés, i Sofonijas (Zefanijas), Maasejahoskire čhavés, rašás, te phenél léske: “Vyphuč, me mangáva tut, Rástyr-Devléstyr pal aménde, pal-dová so o Navuhodonosóro, Vavilonóskiro králi, džála maribnása pe aménde: kóli te javél adiáke, sob (kaj) Raj Devél te kerél lésa pir saré Léskire dívna butiá, sob (kaj) králi Navuhodonosóro te džal krig améndyr.” Tén'ci phendiá Jeriemiéjo lénge: “Adiáke tumé phenén Sedekijaske: ‘Adiáke rakiréla Raj Devél, Izrailjoskiro Devél: ‘Áke, Me riskiráva pale mardytka, so isyn dre tumaré vastá, savénca tumé marenape Vavilonóskire kralísa i Xaldiejénca, savé občhude trusciál tumen xaladenca javrí, pal baruné vánty, i Me skedáva len maškirál davá fóro. I Me Kokoró javáva te maravpe tuménca din'd'kirde vastésa i zoralé masniasa (myšcasa) dre xolý, dro mižehipen, i dro baró xoliakiribén; i Me muliakirava manušén, savé dživéna dro davá kher fóro i kheritkoné murdalén: jone meréna fransendyr. I paló (poslie) davá, – rakiráva Me, Raj Devél, – Me otdáva Sedekijas, Judejákire kralís, i léskire dynar'jén, i javír manušén kadalé foróstyr, savé jačénape džidé fransendyr, kurtalátyr i bokhalypnastyr dre Navuhodonoskire vastá, Vavilonóskire kralíste, dre tumaré-vergéngire vastá, i dre kodolengire vastá, savé rodéna tumaró džiibén. I jov muliakiréla tumen kurtalakire jagorosa. Jov na javéla te tanginél (te žalinel) tumen, te tanginél, i jov na javéla lačhé-ilytko ke tumé.” ‘Akaná tu, Jeriemiéjo, phen kadalé manušénge: ‘Adiáke – rakiráva Me, Raj Devél, – ‘Áke, Me čhuváva angíl tuménde džiibnáskiro drom, i meribnaskiro drom. Kon jačélape dro davá fóro, meréla kurtalátyr, ci bokhalypnastyr, ci fransendyr, ne kon vydžála i zdelape Xaldiejénge, savé občhude trusciál tumen, kodová jačélape džidó i léskiro džiibén javéla léske dáro. Pal-dová so, Me riskirdjom Péskiro iló pe davá fóro pe bibáht (čoripén), a na pe lačhipén, – rakiráva Me, Raj Devél. ‘Davá fóro javéla otdynó dre kralískire-Vavilonóskiro vast, i jov shačkiréla les jagása.’” A kralískire Judejákire kheréske phen adiáke: ‘Šunén Ráskire-Devléskiro lav, O, Davidóskiro kher! Adiáke’, – rakiráva Me, Raj Devél: ‘Sendiakiren čačipnása tasiárles (ránes) pe zlóko, i rakhén občorde manušés vastéstyr, savó tradéla les, sob (kaj) Miro mižehipen te na vydžál syr jag, i te na roshačol adiáke, so nikón na murdiakirela la pal dová, so tumé kerénas bibáht (nalačhé réndy). Ake, Me som proti túte doloskiri džiibnáskiri, skála loščynakiri’, – rakiréla Raj Devél, – tuménge, kon rakiréla: ‘Kon javéla pe aménde? Ci zadžála dre štéty, kaj ame dživasa?’ I Me sendiakirava tumen pir tumaré barjakirdé (plódy), savé sykavéna, so kerdé tumé’, – rakiréla Raj Devél, – i Me roshačkirava jag dro tumaró veš, i joj pohala saró, so isyn trusciál léste.’” Adiáke phendiá Raj Devél, mánge, Jeriemiejoske: “Džá dro kher Judejákire kralískiro, i odój phen davá lav, i phen: “O, Králi Judejákiro! Šun Ráskire-Devléskiro lav, tu, kon isyn beštó pe Davidóskiro trono, tu i tyré dynárja, i manušá, savé zadžána pirdál daja pórta! Adiáke rakiráva Me, Raj Devél: Kerén čačunó séndo i pir čačipén, i rakhén občorde manušés vastéstyr, savó tradéla les: i na kerén namištes, na kerén nahrates čužoné manušéske, pirotoske (sirotaske), pivliake (udovake), i na pročhuven bibangipnaskiro (nabango) rat pe davá štéto. Pal-dová so, kóli tumé čačunés javéna te kerén adiáke, tén'či králja, savé isyn bešté pe Davidóskiro štéto pe léskiro trono, javéna te zadžán pirdál pórta dalé kheréskiri, kon tradéla pe maribnýtka vurdená i uklisté, králja i léskire manušá. Ne kóli tumé na šunéna dalé lavá, tedy Me sovlahava pe Péste’, – rakiréla Raj Devél, – so davá Kher javéla čhučó.” Pal-dová so adiáke phendiá Raj Devél pal Judejákiro kher: “Tu san šukár vaš Mánge syr Galaádo, syr vučipén pe Livanoskiri bérga: ne Me, čačes, keráva tútyr čhučí phuv, fóro, dro savó nikón na dživéla. I Me prirakhava/ skedáva vymaribnaskiren (istriebitielién) pe túte, kažnones péskire maribnytkoné sastyresa; i jone čingirena telé vykedyné (fedyrša) kiedry, i jone čhurdena len dre jag. I but javír manušá javéna te džán pirdál davá fóro, i kažno léndyr phenéla jekh jekhéske: ‘Pal so da Raj Devél kerdiá adiáke kadalé baré forosa?’ I jone phenéna: ‘Pal-dová so foritka manušá mekné Ráskire-Devléskiro Zakóno, léngire Devléskiro, i jone dyné sovláh dynarindlé javire devlorénge.’ Na rovén pal muleste, i na tuginen khetané pal léste, ne rovén kirkes pal odoléste, savó gijá dro pliéno, pal-dová so jov butýr na risjola pale, i jov na dykhéla butýr péskire-dadengiri phuv; paldavá adiáke rakiréla Raj Devél pal Salumoste (Šalumoste), Iosijakire čhavéste, kon sys králi Judejákiro, savó kralindia paló Iosijaste, léskire dadéste, savó gijá péskire phuvjátyr: ‘Jov butýr na risjola pale; ne jov meréla pe dová štéto, karik les zalydžana dro pliéno, i jov butýr na javéla te dykhél daja phuv: Bida léske, kon ĥazdéla léskiro kher načačipnasa, i léskire upratune kralitka komory namištes, pe konéste susiédo (kotári) keréla butý bi lovengiro; Kon phenéla: ‘Me čhuváva péske buĥló kher i baré upratune kralitka komory, i jov vyčingirela fenštry péske i obsuvela kiedrosa, i makhela lolé mastiniasa (kraskasa). Ci tu duminesa te javes kralísa pir dová, so Tu učhakirdian pes kiedrosa? Dad tyró xaja i pija, i ci na kerdiá jov čačunó séndo i saró pir čačipén? I vaš davá sys mištó léske. Jov lydžijá pe séndo réndo čororeskiro i kodoleskiro, savó sys dre trébima; tedy i paldavá sys mištó léske. “Ci na davá saró sykavéla, so tu džinésa Man?” – rakiréla Raj Devél. Ne tyré jakhá i tyró iló isyn riskirdo vaš tyrí ĥalkima ke barvalypén i te pročhuves bibangipnaskiro (nabango) rat, i vaš dová, sob (kaj) te pritasaves, i te les pe zor. Paldavá adiáke rakiréla Raj Devél pal Ioakimoste (Jahakimoste), Iosijakire (Josijaskire) čhavéste, kralíste pe Judéia: ‘Na javéna te obroven les “so ž Miro pšal? I so ž Mirí phen?” Na javéna te obroven les: “So ž, tu san, miro Khieningo?” i “So ž léskiro baripén?” I garavena les syr oslós, vytyrdena les, i čhurdena léskiro trúpo pal Jerusalimóskiri pórta.’ ‘Džán upré pe Liváno, manušále Jerusalimóstyr, i den gódla, i godlen pe Bašano, i den gódla pe Avarimoskire vučé štéty, pal-dová so saré tumaré kamlé drúgi (malá) isyn muliakirdé. Me rakiravas tuménge tedy, syr tuménde saró gijá lačhés, ne tumé phendlé, so tumé na šunéna. Adiáke kerénas tumé ternal (smolodu), so tumé na pričhuvenas kan ke Mirí zan. Balvál javéla te vyphurdel sarén tumaré čhupnar'jen, i tumaré malá džána dro pliéno; tedy, čačes, tumé javéna ladžakirdé i phagirdé dre péskiri godý pal sarí tumarí bibáht [saré tumaré bibahtalé réndy-r.s.]. O tumé, kon dživéla pe Liváno, kon keréla gniázdy (kúfy) pe kiedry, [syr javéla tut tango-r.s.] kiéli peréna dukhá pe túte, sýrby pe džuvliáte, savjake trej te bijanél.’ “Me som džidó”, – rakiréla Raj Devél, – mek Iiehonija [Koniah-ju.o.], čhavó Ioakimoskiro, králi Judejákiro, te javél sýrby angrusty jakhitkonesa (piečatka) pe Miro čačó vast, ne Me i odothýr vytyrdavas tut, i Me otdáva tut dre odolengire vastá, savé kaména te zamarén tut, i dre kodoleskire vastá, koneskire móstyr tu daresa – vastá Navuhodonosoroskire, kralíste Vavilonóstyr, i – vastá Xaldiejengire. I vyčhurdava Me tut, i tyré da, saví jandiá tut pe svéto, ke javír them, dro savó nijékh tuméndyr na javdiá pe svéto, i odój tumé meréna. Ne pe phuv, ke saví tumaré dijá tyrdenape [iavéna te kamen te risjon-r.s.], tumé na risjona pale. Ci isyn Iiehonija adasavó manúš, sob (kaj) te dykhén pe léste vučipnástyr syr pe phagirdó khoró? Ci isyn jov sýrby khoró, savó na radynela jakhá? Pal so jov i léskiro ródo vyčhurdyne, i čhurdyné pe phuv, saví jone na džinéna? O phuv, phuv, phuv! Šun Ráskire-Devléskiro lav! Adiáke rakiréla Raj Devél: “Začhinen (zapisynen) kadalé manušés, Iiehonijas, syr bičhavorengires, syr manušés, saveskiro džiibén na javéla mištó; pal-dová so nijékh léskire kheritkoné rodóstyr na javéla te dživél mištés, i na javéla te bešél pe Davidóskiro trono, i na javéla te xulainél butýr pir Judéia.” “Bida čhupnar'jenge (pastyrienge), savé muliakirena i rosčhurdena (rostradena) bakrén Miré čaritkone phuvjátyr!” – rakiréla Raj Devél. Paldavá adiáke rakiréla Raj Devél, Izrailjoskiro Devél pal čhupnar'jende (pastyriende), kon čaliakirela Léskire manušén: “Tumé rosčhurdyne (rostradyne) Miro gurto i tradyne len krig, i tumé na dykhné pal lénde. Ake, Me javáva te sendiakirav tumen pal bibáht (tumaré fuj réndy), so tumé kerdé”, – rakiréla Raj Devél. “Ne Me skedáva otiačiben (odolén, kon jaciápe) Miré ĥurtostyr saré themendyr, ke savé Me protradyjom len, i Me janáva len pale pe léngire čaritka phuvjá, i lénde javéna but čhavoré, i len javéla but. I Me čhuváva čhupnar'jen pe lénde, i jone javéna te čaliakiren len; i jone na javéna te darén butýr, i jone na javéna zaphagirde dro dúho (fáno), i nikón na xasjola léndyr”, – rakiréla Raj Devél. “Ake, javéna dyvesá”, – rakiréla Raj Devél, – kiéli Me čhuváva upré nevéstyr Davidóske Rand' (Otbaripen) čačuný, Kralís, jov javéla te rainel i te kerél saró godes. Jov javéla te kerél čačunó séndo i pir čačipén pe phuv. Dre dolé dyvesá Judéia javéla zrakhny, i Izrailjo javéla te dživél bi darákiro. Jov javéla te kharelpe: ‘Raj Devél isyn amaró Čačipén.’ “Paldavá, ake, javéna dyvesá’, – rakiréla Raj Devél – so butýr na javéna te rakirén: ‘Te javél džidó Raj Devél, Savó vylydžijá Izrailjoskire čhavén Jegiptóstyr; ne: ‘Te javél džidó Raj Devél, Savó vylydžijá i jandiá pale ródo Izrailjoskire kheréstyr paš-ratitkoné (sieviernone) rigátyr, i saré themendyr, ke savé Me vytradyjom len. I jone jačénape (javéna) te dživén pe léngiri phuv.” So pal prorokénde: ‘Miro iló dre mánde pharadjola, saré miré kokalý izdrana. Me som sýrby mato manúš, i syr manúš, savés mol (vino) pirizorjakirdia (mat'kirdia) angíl Raste-Devléste, vaš svénta lavá Léskire Sventomatyr. Pal-dová so phuv isyn pherdý manušénca, savé kaména javire devloren, pal-dová so joj zoralés tuginela (rovela) prokošybnastyr. Čaritka féldy (pastbiščy) pe čhučí phuv šutine; pal-dová so prorokengiro drom isyn bibahtaló, i léngiri zor isyn dro načačipén. Dujdžiné: i proróko, i rašáj isyn bidyvlytka: adiáke syr i dro Miro kher Me lathjom léngiri zlydnima”, – rakiréla Raj Devél. “Paldavá léngiro drom javéla vaš lénge syr slizko štéto dro kalypén (cjomnyma), len špulena (pihinena) odój i jone peréna odorík. Me janáva bibáht (bari bída) – pe lénde dro berš, kiéli Me javáva te sendiakirav len”, – rakiréla Raj Devél. “Maškir prorokénde dre Samárija Me dykhcjom dasavo bigodypen (dylnypén): jone angilphenas Vaaloskire lavésa, i jone kerénas adiáke, so Miré manušá Izrailjoskire, dynepe dukhá. I Me dykhcjom trašane (darane) réndy maškír prorokénde dro Izrailjo: jone kaména javire devloré i jone psiréna xohaibnasa. Jone zoraliakirena odolengire vastá, kon keréla bibáht, sob (kaj) nikón te na risjol krig péskire zlydnimatyr. Jone jačné vaš Mánge syr Sodómo, i manušá léskire syr manušá dre Gomóra.” Paldavá adiáke rakiréla jangoléngire-bolybnáskiro Raj Devél pal prorokénde: “Ake Me javáva te čaravav len palynosa, i Me začhuvava len te p'jen paní želučostyr, pir dová, so Jerusalimóskire prorokendyr bidevlytkima rozgijápe pir sarí phuv” Adiáke rakiréla jangoléngiro-bolybnáskiro Raj Devél: “Na pričhuvén kan ke lavá, so proróki angilphenena tuménge. Jone dylniakirena tumen; jone rakiréna pal godengiro sunó, savó isyn pe iló lénde, a na dová, so Raj Devél rakiréla. Jone kažno mólo rakiréna odolénge, savé dykhéna vučipnástyr pe Mánde: ‘Adiáke phendiá Raj Devél: ‘Tuménde javéla ramánjo.’ I iščo (inké) jone rakiréna odolénge, savé psiréna pir péskire pharé šeré: ‘Na javéla bibáht pe tuménde.’ Pal-dová so kon sys terdó pe skedyibén, kaj Raj Devél délas godý, sob (kaj) te ĥaljol angíl Léskiro lav? Kon pričhudia péskiro kan ke Léskiro lav i šundiá les? Dykhén! Baró štormo Rástyr-Devléstyr, Léskire xoliakiribnastyr, javdiá riskiribnáskiro štormo; jov peréla pe fujé-manušéngiro šeró. Ráskire-Devléskiri xolý na risjola krig angíl dová, syr Jov keréla saró dová, so Jov kamdiá te kerél: tumé ĥaljona davá dro kónco (jagóro) dyvesengiro (palatuné dyvesá). Me na bičhadjom kadalé prorokén, ne jone prastándyne péskire lavésa. Me na rakirdjom lénge, ne jone angilphendle. Ne kóli jone te terdjon pe skedyibén, kaj Raj Devél délas godý i te kerén adiáke, sob (kaj) Miré manušá te šunén Miré lavá, sob (kaj) te riskirén len bibahtalé droméstyr i fuipnastyr, so jone kerdé. ‘Ci som Me Devél, Savó isyn féni (tóka) pašýl? Ci na som Me Devél, Savó isyn durál?’ – rakiréla Raj Devél. “Ci moginéla (saštý) manúš te garadjol dre čorahane štéty, sob (kaj) Me te na dykháv les?” – rakiréla Raj Devél. “Ci na som Me pe bolybén i pe phuv?” – rakiréla Raj Devél. Me šundjom, so proróki rakiréna, kon angilphenela xohanés Miré lavéstyr. Jone rakiréna: “Me dykhcjom suné! Me dykhcjom suné!” Syr ĥará (dlúges) javéla davá dro iló prorokengiro, savé angilphenena xohaibén léngire iléstyr? Save duminéna te kerén adiáke, sob (kaj) Miré manušá te bistren Miro lav pal léngire suné, savé jone rosphenena so ke jekh péskire susiedoske (kotariske): adiáke-pac' léngire dadá bistyrde Miro lav pal Vaaloste. O proróko, savéste isyn sunó, mek jov te rosphenel sunó, ne kodová, savéste isyn Miro lav, mek jov te rosphenel Miro lav čačunés. Savó isyn khetanypen maškír phus i ziárka?” – rakiréla Raj Devél. “Ci nane Miro lav sýrby jag, i sýrby čokano (mlotko), savó phagiréla skaly pe koterá?”, – rakiréla Raj Devél. “Paldavá, ake, Me som proti prorokénde – rakiréla Raj Devél, savé čorena Miré lavá, jekh jekhestyr, léngire susiediéndyr (kotar'jendyr). Ake, Me som proti prorokénde”, – rakiréla Raj Devél, savé rakiréna péskire čibása i phenéna: “Davá Jov rakiréla.” “Ake, Me som proti lénde, savé angilphenena xohané suné, – rakiréla Raj Devél, – savé piriphenena len manušénge adiáke, so jone denape dukhá xohaibnastyr i léngire šaribnastyr. Ne Me na bičhadjom len, i Me na priphendjom lénge te kerén, i jone sarésa na janéna ni savó lačhipén kadalé manušénge”, – rakiréla Raj Devél. “Paldavá, kiéli adalé manušá, ci proróko, ci rašáj phučena tútyr, phení: ‘Saví isyn pharí zvies' (zan) Rástyr-Devléstyr?’ – tedy tu, Jeriemiéjo, phenésa lénge: ‘Tumé kokoré san pharí zvies' (zan) Raste-Devléste adiáke, so Raj Devél kaméla te otphenelpe tuméndyr.’ I kóli proróko, ci rašái, ci manušá phenéna: ‘Davá isyn pharipén Raste-Devléste.’ Me adiáke-pac' i sendiakirava pharés kadalé manušés i léskiri sém'ia (irí). Paldavá tumé, so ke jekh, rakirén péskire susiedoske (kotariske), i, so ke jekh, péskire pšaléske: ‘So otphendiá Raj Devél? So phendiá Raj Devél? I tumé na rakirén butýr: ‘Pharí zvies' (zan) Rástyr-Devléstyr, pal-dová so kažno adasavó lav manušéste javéla pharí zvies' (zan) vaš léske, kon adiáke rakiréla, pal-dová so tumé piririskirde lavá džidé Devléskire, amaré Ráskire-Devléskire, jangoléngire-bolybnáskire, amaré Devléskire. Adiáke, Jeriemiéjo, phen prorokoske: ‘So otphendiá Raj Devél túke? So phendiá Raj Devél túke? Ne kóli jone iščo (inké) phenéna: ‘Pharí zvies' (zan) Rástyr-Devléstyr’, tedy tu phen lénge, so Me, Raj Devél, adiáke rakiráva: ‘Pal-dová so tumé rakiréna’ pharí zan (zvies') Rástyr-Devléstyr’, ne Me bičhadjom lav tuménge te na rakirén: ‘Pharí zvies' (zan) Rástyr-Devléstyr’, paldavá, ake, Me adiáke-pac' i bistrava tumen, i Me mekava tumen sarésa, i fóro, Jerusalimo, savó Me dyjom tuménge i tumaré dadénge, i Me vyčhurdava tumen Miré móstyr. I Me janáva pe tuménde viéčno bipatyv, viéčno ladž adiáke, so davá na bistrelape.” O, Raj Devél sykadiá mánge, i, ake, duj korzíny (khudé) inžyrosa čhudé angíl Ráskire-Devléskiri Khangirí. Davá sys paló (poslie) dová, kielo Navuhodonosóro, králi Vavilonóskiro, zalydžijá dro pliéno Jerusalimóstyr Iiehonijas, čhavés Iohakimoskires, kralís Judejakires, i Judejakiren thagar'jén, i spiecen dre vastytka butiá kaštesa (kherá-keribnaskiren), i petalengiren (kovalién), i jov jandiá len dro Vavilóno. Jekh khudo (korzina) sys drieván lačhé inžyrosa syr pérva spiéla múri, i javír khudo sys drieván adasavé nalačhé inžyrosa, so léskire múri sys naštý te xas. I phuciá mándyr Raj Devél: “So dykhésa tu, Jeriemiéjo?” I otphendjom me: “Inžyritka múri.” Lačhé múri isyn drieván lačhé, nalačhé múri isyn dasavé bibáht, so len naštý te xas.” Nevéstyr (nevés) javdiá ke me lav Ráskire-Devléskiro, i phendiá: ‘Adiáke rakiréla Raj Devél, Izrailjoskiro Devél: “Syr davá lačhó inžyro, adiáke i Me javáva te ginav pal lačhende manušénde, savén zalydžine dro pliéno Judejátyr, konés Me bičhadjom krig dalé štetóstyr pe phuv Xaldiejengiri. I Me javáva te dykháv pal lénde vaš léngiro lačhipén, i Me janáva pale len pe daja phuv, i Me ĥazdáva len, i Me na javáva te phagirav (te teliakirav) len ke phuv, i Me na vyriskirava len. Tén'ci Me dáva léngire ileske láska te džinél Man, so Me som Raj Devél, i so jone javéna Miré manušá, i so Me javáva léngiro Devél, pal-dová so jone risjona ke Me saré iléstyr. A so pal dová bibáht inžyro, so les naštý te xas, šunén: ‘Adiáke rakiréla Raj Devél: ‘Dasaví bibáht Me keráva Sedekijaske, kralíske Judejátyr, i léngire thagar'jénge, i manušénge Jerusalimóstyr, savé jačnépe pe daja phuv, i kodolénge, savé jačnépe pe Jegiptóskiri phuv.’ I Me zdava len, sob (kaj) len te tradén odorík i pale pir saré kralipená pe phuv pe bibáht, sob (kaj) te obrakiren len sýrby priphenybén, sob (kaj) te vysan len syr prokošybén (arman) pir saré štéty, ke savé Me tradyjom len. I Me bičhaváva kurtála pe lénde, bokh i fránsy adiáke ĥará (dlúges), angíl, syr Me xasiakiráva len phuvjátyr, saví Me dyjom lénge i léngire dadénge.’” Ake, isyn lav, savó javdiá ke Jeriemiéjo pal saré manušénde Judejátyr dro štárto berš, syr Ioakimo, čhavó Iosijáskiro – králi pir Judéia, lyjá te kralinél. Davá sys pérvo berš, syr Navuhodonosóro, lyjá te kralinél pir Vavilóno. Davá lav proróko Jeriemiéjo phendiá saré manušénge Judejátyr i saré manušénge Jerusalimóstyr, rakirí: “Biš te trin berš – dešutritone beršestyr, syr kralindia Iosija, čhavó Amonóskiro, králi Judejákiro ke adadyvés javélas ke me lav Rástyr-Devléstyr, i me, Jeriemiéjo, rakirdjom tuménge, uštyi pe zlóko (ránko) i rakirí, ne tumé na šundlé. I bičhavelas Raj Devél tuménge saré Léskire dynar'jén-prorokén, pe zlóko (pe ránko) bičhavelas Jov, ne tumé na šundlé, i tumé na pričhude kan te šunén. E proróki rakirdé tuménge: “Risjon nevéstyr akaná, so ke jekh tuméndyr, péskire bibahtalé dromendyr, fuipnastyr, so tumé kerénas, i jačénpe te dživén pe phuv, saví dyjá Raj Devél tuménge, i tumaré dadénge ĥará viekendyr i pe viéki. I na džán palál pal javire devloré te dynarinén lénge, i te kerén patýv lénge, i na den jag xoliake andré Mánde te xoliasovav pe tuménde pal butiá, so kerdé tumaré vastá, sob (kaj) Me te na keráv doš tuménge.” Ne tumé na šundlé Man, – rakiréla Raj Devél, – sob (kaj) tuménge te na den jag xoliake andrál Mánde te xoliasovav pe tuménde pal butiá (nalačhé réndy), so kerdé tumaré vastá vaš doš [holý-r.s.] péske.” Paldavá adiáke rakiréla jangoléngiro-bolybnáskiro Raj Devél: “Pal dová, so tumé na šundlé Miré lavá, ake, Me bičhaváva, i Me láva saré sem'i (irjá) paš-ratitkoné (sieviernone) rigátyr’, – rakiréla Raj Devél, – ‘i Me bičhaváva len ke Navuhodonosóro, králi pir Vavilóno, Miro pishári, i Me janáva len proti daja phuv, i proti manušénde, kon dživéla pe daja phuv, i proti saré dalé Najudýtka nácyi, savé isyn trusciál, i Me sarésa xasiakiráva len, i Me keráva adiáke, so manušá javéna te divinenpe trašatyr (darátyr) pe lénde, te den šolia sabnasa i lénge javéla viéčno xas'/ xasibén. I iščo (inké) Me keráva adiáke, so butýr na javéla lénde radymakiro saben, i radymakiri zan, zan terneskiri, i zan terniakiri, i grukoto žornendyr (beledinendyr) pe siav (phurt), i dud (svéto) momolytkonestyr. I sarí daja phuv javéla čhučí i syr traš (dar), i saré dalé nácyi javéna te dynarinén kralíske dro Vavilóno eftadešá berš. Korigedýr (pozžedýr) javéla adiáke: kiéli prodžána eftadešá beršá, tedy Me láva te sendiakirav Vavilonóskire kralís i daja nacyja’, – rakiréla Raj Devél, – ‘pal léngiro čoripén, i phuv Xaldiejéngiri, i Me keráva adiáke, so joj iavéla viéčnes čhučí. I Me janáva pe daja phuv saré Miré lavá, so Me vyphendjom pe lénde, – saró davá isyn čhindló dre daja lylvarí, saví Jeriemiéjo angilphenelas pal saré nácyi. Pal-dová so but nácyi i baré králja keréna léndyr, kokorendyr Xaldiejendyr, pishar'jén, i Me otdáva fuipnasa pale lénge pal léngire réndy i butiá, so kerdé léngire vastá.” I iščo (inké), so Raj Devél, Devél Izrailjoskiro, phendiá mánge: “Le tahtáj (čaša) moliasa (vinosa), so isyn pherdý xoliása Miré vastéstyr, i ker adiáke, sob (kaj) saré Najudýtka nácyi, ke savé Me bičhadjom tut, te p'jen léstyr. I jone vyp'jéna, i jone javéna te kuninenpe (šatynenpe), i jone javéna te dylnjon, kiéli dykhéna kurtála, saví Me bičhaváva pe lénde.” I Me, Jeriemiéjo, lyjom tahtáj (čaša) Ráskire-Devléskire vastéstyr, i me začhudjom te p'jén saré Najudýtka nácyi, ke savé Raj Devél bičhadiá man: ke Jerusalimo i ke saré fórja Judejátyr, léngire kral'jén i léngire thagar'jen, sob (kaj) te keráv léndyr čhučó štéto, sob (kaj) pe lénde te divinenpe trašasa [darátyr-r.s.], te sipinen, Me keráva léngire lavéstyr košybén (arman), syr davá isyn až i ke davá dyvés; Faraonos, kralís Jegiptoskires, léskire dynar'jén, léskire thagar'jen, i saré léskire manušén: i sarén miešanone manušén, saré králja Uzoskire phuvjátyr, saré-kral'jén Filistimengire phuvjátyr: Aškielonostyr, Gazatyr, Ekronostyr, i kon jaciápe Azotostyr [Ašdodatyr-ju.o.]; manušén Edomostyr, Moavostyr i Amonoskire čhavé; i saré kral'jén pir Tíro i saré kral'jén pir Sidono, i saré králja pir ostrovy, savé isyn pal paningá morjoskire (derjavéskire). Ke Diedano, Tiéma i Buzo, savénde jagóry pe balengire piéisy isyn občhindlé; i saré kral'jén pir Aravija i saré kral'jén pe miešanone manušénde, savé dživéna pe čhučé prahi; i saré kral'jén Zimrijatyr, i ke saré králja Elamostyr, i ke saré králja Midijatyr; i saré kral'jén paš-ratitkoné (sieviernone) rigátyr, durál i pašýl jekh javirestyr, i saré kralipená pe svéto, savé isyn pir phuvjákiro baripén, i králi Siesaha [Šešaho-ju.o.] vyp'jéla paló lénde. I tu phen lénge: ‘Adiáke rakiréla bolybnáskire-jangoléngiro Raj Devél, Izrailjoskiro Devél: ‘P'jén i matjon, i čhaden, i perén, i na uštén butýr angíl kurtála, saví Me bičhadjom pe tuménde. I adiáke javéla: kóli jone otphenenape te len tahtáj tyré-vastéstyr te p'jén, tedy tu phen lénge: ‘Adiáke rakiréla Raj Devél bolybnáskire-jangoléngiro: ‘Tumé san bangé te p'jén.’ I dykhén! Me láva te janav bibáht (bari bída) pe fóro, pe savó isyn Miro lav, i so tumé, xaj, jačénape nasendiakirde pharés? Nad, tumé javéna pharés sendiakirde, pal-dová so Me kharáva kurtála pe sarénde, kon dživéla pe phuv, rakiréla Raj Devél bolybnáskire-jangoléngiro. Paldavá tu, Jeriemiéjo, angilphen (proročyn) lénge saré kadalé lavá i phen lénge: “Raj Devél zagriminela vučipnástyr, i Jov phenéla Péskire zaniása Péskire sventoné štetóstyr; Jov zagriminela zoralés pe Péskiri phuv, sýrby kodolé, savé tasavena vinagrado, pe sarénde, kon dživéla pe phuv. Glumo (šumo) dodžála ke jagóry (ke kraí) phuvjákire: pal-dová so Raste-Devléste isyn čingárd (sporo) Najudytkoné nacyiénca, Jov javéla te lydžál séndo kažnoné ločasa (plotiasa), ne fujé manušén Jov bičhavéla sarén tel kurtála,” – adiáke rakiréla Raj Devél. Adiáke rakiréla Raj Devél bolybnáskire-jangoléngiro: ‘Ake, bibáht (bari bída) javéla te džal jekhe nacyjatyr ke javír, i baró štormo ĥazdélape duratuné jagorendyr (krajendyr) pe phuv.’” I bari xas' (xasibén) pe manušénde javéla Rástyr-Devléstyr dro dová dyvés jekhe jagoróstyr pe phuv až ke javír jagóro pe phuv: nikón na javéla te obrovel len, nikón na ukedela len, nikón na javéla te garavel len, jone javéna syr gnejo, pir sarí phuv. Tuginen roibnasa, čhupnárja (pastyri), i rovén! Katynenpe dre práska, baré šeré pir ĥurto! Pal-dová so podginé dyvesá, sob (kaj) tumen te xasiakirén, i te rosčhurden; tumé peréna syr kuč khoré (sasúdy). I čhupnar'jenge na javéla štéto te garadjon, i baré šerenge pir ĥurto te našén. Čhupnar'jengiri zan, syr jone rovena, i baré-šerengiri pir ĥurto zan javéna šundlé, pal-dová so Raj Devél xasiakirdiá léngire čar'itka féldy, i štyl (tiha) féldy vyčingirde pal bari xolý Rástyr-Devléstyr. Jov mekciá Péskire manušén sýrby ščer (liévo) péskiri garavipnaskiri (logovo), paldová léngiri phuv jaciá čhučí pir dová, so vérgo isyn drieván mižeh i pal Raskiri-Devléskiri bari xolý.” Dro sámo anglypén (načalo), kiéli kralindia Ioakimo, čhavó Iosijáskiro, králi pir Judéia, javdiá dasavo lav Rástyr-Devléstyr mánge, Jeriemiejoske, phení: “Adiáke rakiréla Raj Devél: ‘Terdjov pe gréda (dvóro) Khangirjákiri Ráskire-Devléskiri i phen saré for'jenge Judejátyr, so javéna te den patýv dre Khangirí Ráskire-Devléskiri, saré lavá, so Me priphenava túke te phenés lénge: Na garav ani jékh lav. Kažno léndyr, xaj, javéla te kandel i te riskirél péskire bibahtalé droméstyr, sob (kaj) Me te obriskirav (te otparuvav) Pes čoripnástyr, savó Me duminava te keráv lénge pal fuipén, so jone keréna.’” I tu phenésa lénge: ‘Adiáke rakiréla Raj Devél: ‘Kóli tumé na kandéna Man, sob (kaj) te psirén pir Miro Zakóno, savó Me dyjom tuménge; sob (kaj) te pričhuvén kan ke Miré dynar'jengire, Miré prorokéngire lavá, savén Me bičhadjom ke tumé, pe zlóko (ránko) Me bičhavavas, ne tumé na pričhude kan; tedy Me keráva dalé Khangirjátyr javír Silómo (Šylo), i Me keráva adiáke, so pe léste javéna te kerén prokošybena (armania) saré Najudýtka nácyi pe phuv.’” I saré rašaja, i proróki, i saré manušá šundlé, syr Jeriemiéjo rakirélas dalé lavá dre Khangirí Ráskire-Devléskiri. I jaciá adiáke: kiéli Jeriemiéjo končyndia (pirijaciá) te rakirél saró, so Raj Devél priphendiá léske te phenél saré manušénge, tedy rašaja, i proróki, i saré javír manušá uhtyldé les, rakirí: “Tu, čačes, merésa [bangó te meres-r.s.]! Sóske tu angilphenesa Ráskire-Devléskire lavéstyr, rakirí: ‘Davá kher javéla sýrby Silómo (Šylo), i davá fóro javéla čhučó, bi manušéngiro?’” I saré manušá skedynépe proti Jeriemiejoste dre Khangirí Ráskire-Devléskiri. Kiéli thagárja Judejákire šundlé saré kadalé lavá, jone giné Kralískire kheréstyr ke Khangirí Ráskire-Devléskiri, i jone bešné ke zagiibén dre neví pórta dre Khangirí Ráskire-Devléskiri.” I rašaja, i proróki phendlé thagar'jenge, i saré manušénge, rakirí: “Adavá manúš domardiape (mol) te merél! Pir dová, so jov angilphenelas proti davá fóro, syr tumé šundlé péskire kanenca.” Tén'ci phendiá Jeriemiéjo saré thagar'jenge i saré manušénge, phení: “Raj Devél bičhadiá man te angilphenav proti davá Kher i proti davá fóro saré lavénca, so tumé šundlé. Ake, paldavá paruven ke fedýr tumaré dromá, i dová, so tumé keréna, i kandén zan Raskiri-Devléskiri, tumaré Devléskiri, tedy Raj Devél potanginela (požalinela) pal doiá bibáht, so Jov vyphendia pe tuménde. Ne so pal mánde, ĥáda, Me som dre tumaré vastá; kerén mánca dová, so zdelape (sykavelape) tuménge čačunés i lačhés. Ne tumé džinén čačes, so kóli tumé muliakirena man, tumé džinén, so tumé léna bibangipnaskiro rat pe péste, pe davá fóro, i pe léskire manušénde; pal-dová so, čačunés, Raj Devél bičhadiá man te phenáv saré dalé lavá dre tumaré kaná.” I thagárja i saré manušá phendlé rašange i prorokenge: “Davá manúš na domardiape (namol) te merél; pal-dová so jov phendiá aménge Ráskire-Devléskire lavéstyr, amaré Devléstyr.” Tén'ci vari-savé phurydyrá pe phuv ĥazdynépe i phendlé saré manušénge, savé skedynépe, phení: “Mihaj Morašostyr angilphenelas dro dyvés, kiéli o Jezekíia sys králi pir Judéia, i phendiá saré manušénge Judejátyr, rakirí: ‘Adiáke rakiréla bolybnáskire-jangoléngiro Raj Devél: “Sióno javéla pharado syr phuv pluĥostyr (pharadiatyr), Jerusalimóstyr jačénape ruíny [bará-r.s.], I bérga, kaj isyn Khangirí, javéla syr bérgica maškír veš. Ci Jezekíia, králi Judejákiro, i sarí Judéia muliakirdé les? Ci so jov, Jezekíia, na darelas i na rodelas Devléskiri láska. I Raj Devél potangindia (požalindia) pal bibáht, so Jov vyphendia pe lénde. Ne ame kerása baró čoripén proti amaré dijá.” Dykhén, sys adiáke-pac' jekh manúš, savó angilphenelas Ráskire-Devléskire lavésa, o Urija, čhavó Šemajaskiro Kirjat-Jarmostyr, kon angilphenelas proti davá fóro i proti daja phuv dasavé-samone lavénca, so Jeriemiéjo. I kiéli králi Ioakimo, i saré léskire zormanuša, i saré thagárja šundlé léskire lavá, tedy králi rodyja, syr te muliakirél les. Ne syr Urija šundiá davá, jov darandyja, i jov nascia i gijá ke Jegípto. Tedy králi Ioakimo bičhadiá manušén ke Jegípto: Jelnatanos, čhavés Ahboroskires, i javire manušén lésa ke Jegípto, savé lydžiné pésa Urijas Jegiptóstyr, i jandlé les ke králi Ioakimo; i jov muliakirdiá les kurtalása i čhurdyjá javrí léskiro trúpo dre maĥily, kaj sys narajkane (čororé) manušá. Ne saroiekh (usajékh) Ahikamoskiro vast, čhavéskire Šafanoskiro, sys pal Jeriemiejoste, sob (kaj) te na otdén les dre vastá manušénge te zamarén les. Angíl, kiéli o Sedekíia; čhavó Iosijáskiro sys králi pe Judéia, dasavo lav javdiá Jeriemiejoske. Adiáke rakiréla Raj Devél mánge: “Ker péske sastruné pienty i ĥámo, i čhuv len péske pe men, i bičháv len Idumejakire (Edomoskire) kralíske, Moavoskire kralíske, Amonitengire-čhavéngire kralíske, Tiroskire kralíske, Sidonoskire kralíske bičhaibnaskirengire vastésa, savé javéna ke Jerusalimo, ke králi Sedekíia pir Judéia. I priphen lénge te phenén léngire range: ‘Adiáke rakiréla bolybnáskire-jangoléngire Raj Devél, Devél Izrailjoskiro – adiáke tumé phenén tumaré range: Me kerdjom phuv, sozdyjom manušés i murdalén, savé isyn pir sarí phuv Miré baré zorjása i Miré vydindz'kirde psikesa, i Me otdáva davá kodoléske, kon isyn lačhó Mánge. I akaná Me dáva saré dalé phuvjá dro vast Navuhodonosoroskiro, kralíske pe Vavilóno, Miré pisharíske, i Me dáva adiáke-pac' feldytkone murdalén léske te dynarinén léske. I saré Najudýtka nácyi javéna te dynarinén léske, léskire čhavéske, i léskire-čhavéskire čhavéske angíl dová, syr javéla adiáke-pac' xasibnýtko dyvés léskire phuvjake. I tedy but Najudýtka nácyi i baré králja tykniakirena Vavilóno te dynarinén léske. I javéla adiáke: kažno Najudytko nacyja i kralipén, savó na javéla na dynarinél Navuhodonosoroske, kralíske pe Vavilóno, i savó na čhuvéla péskiri men dro ĥámo kralískiro pe Vavilóno, daja nacyja Me pharés sendiakirava, – rakiréla Raj Devél, – kurtalása, bokhasa i fransenca akaná angíl dová, syr Navuhodonosoroskiro vast xasiakiréla sarésa len. I tumé paldavá na kandén tumaré prorokén, tumaré zumakiribnaskiren, tumaré suné-phenybnaskiren, tumaré čovahanen, tumaré džinybnaskiren pir čergeniá, savé rakiréna tuménge, phení: ‘Tumé te na dynarinén kralíske Vavilonoskireske’ Jone angilphenena xohanés tuménge, sob (kaj) te durjakiren tumen dur tumaré phuvjátyr, i, sob (kaj) Me te tradav krig tumen, sob (kaj) tumé te xasjon. Ne nacyja, saví čhuvéla péskiri men dro ĥámo kralískiro Vavilonóstyr, i saví javéla te dynarinél léske, Me dáva vólia lénge te jačénpe pe léngiri phuv’, – rakiréla Raj Devél, – ‘i jone javéna te obkeren daja phuv, i jone javéna te dživén pe láte.’” I me phendjom Sedekijaske, kralíske pe Judéia, saré dasavé-sama lavá, rakirí: “Čhuvén tumaré menia dro ĥámo kralískiro Vavilonóstyr, i tumé dynarinén léske, i léskire manušénge i te dživén’ javéna tumé: palsó te meres túke, i tyré manušénge kurtalátyr, bokhátyr, i meribnytkone fransendyr, syr i rakirélas Raj Devél pal Najudytko nacyja, so na javéla te dynarinél kralíske Vavilonoskireske? I na šunén lavá prorokéngire, savé rakiréna tuménge: ‘Tumé na javéna te dynarinén kralíske Vavilonoskireske, pal-dová so jone angilphenena xohaibén tuménge; pal-dová so Me na bičhadjom len’, – rakiréla Raj Devél, – ‘ne jone angilphenena xohanés Miré lavéstyr, sob (kaj) Me te tradav krig tumen, sob (kaj) tumé te xasjon – tumé, i tumaré proróki, kon angilphenela tuménge!’” I me, Jeriemiéjo, rakirdjom ke rašaja, i ke saré manušá: ‘Adiáke rakiréla Raj Devél!’: Na pričhuvén kan ke lavá tumaré-prorokéngire, savé angilphenena tuménge, rakirí: ‘Áke, syr janéna pale khoré (sasúdy) Ráskire-Devléskire Khangirjátyr’, – pal-dová so jone angilphenena xohanés tuménge. Na šunén len. Dynarinén kralíske Vavilonóstyr, i dživén péske! Sóske te javél čhučó štéto dalé foróstyr? Ne kóli jone isyn proróki, i, kóli isyn Devléskiro lav lénde, mek jone te mangén zoralés Ras-Devlés, jangoléngire-bolybnaskires, sob (kaj) khoré (sasúdy), savé jačnépe dre Ráskire-Devléskiro Khangirí, i dro kher Kralískiro Judejákiro, i dro Jerusalimo te na piridžan ke Vavilóno. Pal-dová so, ake, so rakiréla jangoléngiro-bolybnáskiro Raj-Devél pal stýlby, i pal xarkuno (miédno) mórjo (derjáv), i pal skamindore pe rotycy, i pal javír khoré (sasúdy), so jačnépe dro davá fóro, saré dolé kuč priedmiéty, savé na lyjá Navuhodonosóro pésa, kiéli lydžijá dro pliéno Iiehonijas, Jehakimoskire čhavés, kralís pir Judéia, Jerusalimóstyr ke Vavilóno, i saré lačhé-rodoskiren manušén Judejátyr i Jerusalimóstyr, čačó, adiáke rakiréla bolybnáskire-jangoléngiro Raj Devél, Izrailjoskiro Devél pal khoré (sasúdy), so jačénape dre Khangirí Raskiri-Devléskiri, i dro kher kralískiro Judejátyr i dro Jerusalimo: len lydžána krig dro Vavilóno, i odój javéna jone ke dyvés, kiéli Me javáva ke jone’ – rakiréla Raj Devél.’ Tedy Me janáva len i Me čhuváva pale len pe davá štéto.’” I sys davá dro dová-sámo berš, angíl, kiéli o Sedekíia kralindia pe Judéia, dro štárto berš, dro pándžto čhon, so Ananija, Azuroskiro čhavó, proróko Gavaonostyr, rakirdiá mánge dre Khangirí Ráskire-Devléskiri angíl rašande i saré manušénde, i phendiá: “Adiáke rakiréla bolybnáskire-jangoléngiro Raj Devél; Izrailjoskiro Devél: ‘Me phagirdjom [phagirava-r.s.] ĥámo kralískiro Vavilonóstyr.’ Pir duj berš Me janáva pale pe davá štéto saré khoré (sasúdy), Ráskire-Devléskire Khangirjátyr, savé o Navuhodonosóro, králi Vavilonóskiro, lyjá krig kadalé štetóstyr i lydžijá ke Vavilóno. I Me janáva pale pe davá štéto Iiehonijas, čhavés Joakimoskires, kralís pe Judéia, saré Judejákire plienonen, kon gijá ke Vavilóno’, – rakiréla Raj Devél – pal-dová so Me phagirava ĥámo kralískiro Vavilonóstyr”.’ Tén'ci proróko o Jeriemiéjo rakirélas ke proróko Ananija angíl rašande, i angíl saré manušénde, savé sys terdé dre Khangirí Ráskire-Devléskiri. I phendiá proróko Jeriemiéjo: “Amín'! Mek Raj Devél te kerél adiáke! Mek Raj Devél te kerél dro čačipén tyré lavá, so tu angilphendian te janén khoré (sasúdy) Khangirjátyr Ráskire-Devleskirjatyr i saré plienonen Vavilonóstyr pe davá štéto! Ne féni šun akaná davá lav, so me phenáva zoralés túke i saré tyré manušénge: E proróki, savé sys angledýr mánde i angledýr túte, angilphenenas adiáke-pac' pal but thema (strany) i pal baré kralipená, pal maribén, pal bibáht [bari bída-r.s.] i pal fránsy. O proróko, savó angilphenelas ramánjo, kiéli léskiro lav te angilphenel dová, so javéla, kóli kerelaspe dro čačipén, tedy les pridžinenas pal prorokoste, savés Raj Devél, čačes, bičhadiá.” I proróko Ananija zlyjá ĥámo prorokoskire Jeriemiejoskire meniatyr i phagirdiá les. I phendiá Ananija angíl jakhá saré manušénde dalé lavá: “Adiáke rakiréla Raj Devél: ‘Adiáke Me phagirava ĥámo kralískiro Navuhodonosoroskiro Vavilonóstyr pir duj berš krig meniatyr saré nacyiéndyr!” I gijá proróko Jeriemiéjo péskire dromésa. I sys lav Rástyr-Devléstyr ke Jeriemiéjo paló (poslie) dová, kiéli proróko Ananija phagirdiá ĥámo krig meniatyr prorokoskire Jeriemiejoskire: “Džá i phen Ananijaske, rakirí: ‘Adiáke rakiréla Raj Devél: ‘Tu phagirdian kaštuno ĥámo, ne tu kerésa sastruno ĥámo pe léskiro štéto.’ Pal-dová so adiáke rakiréla bolybnáskire-jangoléngiro Raj Devél, Devél Izrailjoskiro: “Me čhuváva sastruno ĥámo pe men saré Najudytkoné nacyienge, sob (kaj) jone te den ráda te dynarinén Navuhodonosoroske, kralíske Vavilonóstyr; i jone javéna te dynarinén léske: Me adiáke-pac' i feldytkone murdalén (zvierien) dyjom léske!’” I phendiá proróko Jeriemiéjo ke proróko Ananija: “Šun akaná, Ananija: Raj Devél na bičhadiá tut, ne tu kerésa adiáke, sob (kaj) adalé manušá te patián dro xohaibén. Paldavá adiáke rakiréla Raj Devél: ‘Áke, Me čhurdava tut krig phuvjákire štetóstyr: tu merésa, davá berš, pal-dová so tu sykliakiresas te ĥazdén búnto proti Raste-Devléste!” I Ananija, proróko, myjá dro dová-pac' berš pe eftáto (bitrinéngiro déšto) čhon. I, ake, isyn lavá lylestyr, savó proróko Jeriemiéjo bičhadiá phurydyrenge Jerusalimóstyr, savé jačnépe maškír pliennonende, i rašange, i prorokenge, i saré manušénge, savén lydžijá dro pliéno o Navuhodonosóro Jerusalimóstyr ke Vavilóno. Davá sys paló (poslie) dová, kiéli o Jehonija králi i králica, i jevnuhi, i thagárja Judejákire i Jerusalimóstyr, i spiécy dre vastytka butiá pir kašt (kherá-kheribnaskire) i petalengire (kovali) vyginé Jerusalimóstyr. O Jeriemiéjo piridyja davá lyl dro vast Jeliasoske (Eljasoske), čhavéske Šafanoskireske, i Ĥemarijaske, čhavéske Xielkijaskireske, savén o Sedekíia, králi Judejákiro, bičhadiá ke Navuhodonosóro, králi Vavilonóskiro. Dro lyl rakirdiape: Adiáke rakiréla bolybnáskire-jangoléngiro Raj Devél, Devél Izrailjoskiro, saré pliennone manušénge, savén Me piričhudjom [pirilydžijom-r.s.] te dživén Jerusalimóstyr ke Vavilóno: “Čhuvén kherá i dživén dre lénde, čhuvén pe phuv unty (sady) i xan phabá léndyr. I sob (kaj) te javén čhavé, i čhaja tuménde, len romnién péskire čhavénge i otdén péskire čhajén paloróm, sob (kaj) jone te janén pe svéto čhavén i čhajén, sob (kaj) tumen te javél butedýr odój, sob (kaj) te na javél kutedyr tumen. I prihčuven zor saré zorjátyr, sob (kaj) te javél ramánjo (miro) dro fóro, ke savó Me piričhudjom [pirilydžijom-r.s.] tumen te dživén dro pliéno, i mangénpe Ráske-Devléske pal davá, pal-dová so ramánjo dro dová fóro javéla tumaró ramánjo. Pal-dová so adiáke rakiréla bolybnáskire-jangoléngiro Raj Devél: ‘Mek tumaré proróki, savé isyn maškír tuménde, i tumaré drabakiribnaskire te na xohaven tumen. Na riskirén tumarí godý ke tumaré suné, so tumé dykhéna. Pal-dová so jone angilphenena xohanés tuménge Miré lavéstyr: Me na bičhadjom len’, – rakiréla Raj Devél. ‘Ake, so rakiréla Raj Devél: ‘Kiéli končynenape [prodžána-r.s.] tumaré eftadešá berš dro Vavilóno, tedy Me javáva ke tumé, i Me spolninava Miro lačhó lav vaš tuménge, sob (kaj) te janav pale tumen pe davá štéto. I Me Kokoró džinóm (džináv) Miré plany vaš tuménge’ – rakiréla Raj Devél’, – plany, sob (kaj) te javél ramánjo (miro), a na čoripén, sob (kaj) tuménde te javél lačhó užakiribén (nadiéia) pe dyvesá, so iščo (inké) javéna. I tumé javéna te kharén Man i tumé javéna, i tumé javéna te mangénpe Mánge, i Me javáva te šunav tumen, I tumé javéna te rodén Man, i tumé lathéna Man, kóli tumé javéna te rodén Man saré iléstyr’, – i Tumé lathéna Man’, – rakiréla Raj Devél, – i Me janáva pale tumen tumaré plienóstyr: i Me skedáva tumen saré Najudytkoné nacyiéndyr i saré šteténdyr, ke savé Me tradyjom tumen’, – rakiréla Raj Devél, – ‘i Me janáva tumen pale pe štéto’, savéstyr Me tumen lydžijom dro pliéno. Pal-dová so tumé phendlé: “Raj Devél čhudiá prorokén aménge dro Vavilóno”, – paldavá adiáke rakiréla Raj Devél pal kralíste, savó isyn pe Davidóskiro trono pal saré manušénde, savé dživéna dro davá fóro, pal tumaré pšalénde, savé na giné tuménca dro pliéno, – adiáke rakiréla bolybnáskire-jangoléngiro Raj Devél: ‘Ake, Me bičhaváva pe lénde kurtála, bokh i meribnytka fránsy, i Me keráva len sýrby kirmale inžyritka múri, savé naštý te xas, jone isyn drieván fuj. I Me javáva te tradav len kurtalása, bokhasa, i meribnytkone fransenca, i Me otdáva len, sob (kaj) te tradén len odorík i pale pe bída dre saré kralipená pe phuv, – sob (kaj) te vyphenen prokošybena (te armaniakiren len), te divinenpe trašasa pe lénde, te sipinen, i te obrakiren xoliása len manušá Najudytkoné nacyiéndyr, ke savé Me tradava len: pal-dová so jone na šundlé Miré lavá’, – rakiréla Raj Devél, – savé Me piriphendjom pir Miré pishar'jende, Miré prorokénde, pe zlóko (pe ránko) bičhavavas Me, ne jone na šundlé’, – rakiréla Raj Devél. Ne tumé saré, kon isyn dro pliéno, savén Me bičhadjom Jerusalimóstyr ke Vavilóno, šunén Ráskire-Devléskiro lav. Ake, isyn lavá – savé rakiréla bolybnáskire-jangoléngiro Raj Devél, Izrailjoskiro Devél pal Ahavoste, Kolijaskire čhavéste, i pal Sedekijaste, Masejaskire čhavéste, savé angilphenena xohaibén tuménge Miré lavéstyr: “Ake, Me vydava len dro vast Navuhodonosoroskiro, kralíske Vavilonóstyr, i Jov muliakiréla len pe tumaré jakhá. I pal lénde léngire lavá javéna syr prokošybén (arman) maškír saré Judejákire pliennonende dro Vavilóno, syr jone javéna te rakirén: ‘Mek te kerél adiáke túke Raj Devél syr Sedekijaske i Ahavoske, savén Vavilonóskiro králi pekcia pe jag; pal dová, so jone kerdé džungalypén (brydkima) dro Izrailjo, i jone kerdé biladžaipén léngire-susiediengire (kotar'jengire) džuvliénca, i jone rakirdé xohanó lav Miré lavéstyr, so Me na priphendjom lénge te kerén: i Me džinóm davá, i Me som Jakhítko,” – rakiréla Raj Devél. I tu phenésa Šemijaske Niehielamostyr, rakirí: “Adiáke rakiréla bolybnáskire-jangoléngiro Raj Devél, Izrailjoskiro Devél: ‘Pal dová, so tu bičhadian lylá tyré lavéstyr, savé isyn dro Jerusalimo rašáske Sofonijaske (Zefanijaske), čhavéske Maasejaskireske, i saré rašange, rakirí: ‘Raj Devél čhudiá tut syr rašás pe rašaskire – Iodajoskire (Jegoiadaskiro) štéto, sob (kaj) tu te javes dykhibnaskiresa (bliustitieljosa) pe Khangirí Ráskire-Devléskiri, pir kažnoné bigodiakire manušéste i kažnonéste, kon dylnjola i kharélape prorokosa, sob (kaj) te čhuvén les dre kalodki i dro štaribén. Sóske tu na vyrakirdian Jeriemiejoske Anafofostyr, savó kerdiá péstyr prorokós ke tumé? Pal-dová so jov piriphendia lav aménge dro Vavilóno, phení: “Davá pliéno javéla ĥará (dlúges) te tyrdelpe; čhuvén kherá i dživén dre lénde, i čhuvén pe phuv unty (sady), i xan léngiro frukto (plódo)!’” I rašáj Sofonija (Cefanija) gindia zoralés (dro saró šunybén) davá lyl prorokoskiro Jeriemiejoskiro. Tén'ci sys Ráskiro-Devléskiro lav ke Jeriemiéjo, “Bičháv sarénge, kon isyn dro pliéno te phenén: – ‘Adiáke rakiréla Raj Devél pal Šemaijaste, Niehielamostyr, pal dová, so Šemaija angilphendia tuménge, ne Me na bičhadjom les, i jov kerdiá adiáke, sob (kaj) tumé te užakiren lačhipén xohaibnastyr; paldavá, adiáke rakiréla Raj Devél: ‘Áke, Me javáva pharés te sendiakirav Šemaijas Niehielamostyr, i léskiro ródo. Léste na javéla ni jekh manúš te dživél maškír adalé manušénde, i nijékh na javéla te dykhél lačhipén, savó Me javáva te keráv vaš Miré manušénge’, – rakiréla Raj Devél, – pal-dová so jov sykliakirdiá te buntuinel proti Mánde, Raste-Devléste!’” Lav, savó javdiá ke Jeriemiéjo, Rástyr-Devléstyr, rakirí: “Adiáke rakiréla Raj Devél, Izrailjoskiro Devél: “‘Čhin dre lylvarí péske, saré lavá, so Me phendjom túke. Ake javéna dyvesá’, – rakiréla Raj Devél, – ‘Kiéli Me janáva pale plienóstyr Miré manušén Izrailjostyr i Judejátyr’, – rakiréla Raj Devél. ‘I Me keráva adiáke, sob (kaj) jone te risjon pe phuv, saví Me dyjom léngire dadénge, sob (kaj) jone te javén xulaja pe láte.’” I, ake, isyn lavá, so phendiá Raj Devél pal Izrailie i pal Judéia: “Adiáke rakiréla Raj Devél: ‘Ame šundiám zan (glos), saví izdralas, isyn dar, nane ramánjo (miro).’ Phučén i ĥaljon, ci moginéla (saštý) murš te bijanél? Sóske tedy Me dykháva, so kažnonéste muršeste vastá isyn pašýl trušula, sýrby džuvliáte, saví skedelpe te bijanél, i muiá léngire jačné parné? Pe bibáht (bari bída), javéla baró davá dyvés, so butýr dasavo nane i na javéla, I adiáke-pac' javéla pharó Jakovóske, ne jov javéla zrakhno; I javéla adiáke dro dová dyvés’, – rakiréla bolybnáskire-jangoléngiro Raj Devél – so Me phagirava léskiro ĥámo léskire meniatyr, i Me roskušava léskire sastyrá, i čúža manušá na javéna butýr te rikirén les syr pisharís. Ne Miré manušá javéna te dynarinén Ráske-Devléske, péskire Devléske, i Davidóske, péskire kralíske, savés Me čhudjom lénge. I tu, Miro pishári, Jakovo, na dar’, – rakiréla Raj Devél’, – na zamer darátyr, o Izrailjo: Ake, Me zrakháva tut duratuné themestyr, i tyró kherítko ródo šteténdyr, kaj sys jone dro pliéno. O Jakovo risjola pale i javéla ramánjo, Jov javéla te dživél bi darákiro. Pal-dová so Me som túsa’, – rakiréla Raj Devél, – sob (kaj) te zrakhav tut, mek Me xasiakiráva sarésa saré Najudýtka nácyi, maškír savénde Me čhudjom te dživés tut. Ne Me na xasiakiráva sarésa tut, ne Me javáva te pirisykliakirav tut pir čačipén, i Me na domekava, sob (kaj) tu, te na džas péske sarésa bi sendiakiribnaskiro.’ ‘Pal-dová so adiáke rakiréla Raj Devél: ‘Tyró kaló mas (siniako) isyn nasastiakiribnytko, i tyré fránsy (rany) isyn pharé. Nikón na pekelape (na del túga), pal túte, sob (kaj) te piriphanden tyré-maséngiro fránso (rana); túte nane draba te sastiakirespe. Saré tyré drúgi (malá) bistyrde pal túte; jone na rodéna tut. Me ž pekadjom tut vergitkone dabasa syr bidiéskiri kára pal baró tyró čoripén, pal-dová so tyré gréhi vybarine. Sóske rovesa tu pal tyré fránsy (rany)? Tyrí dukh isyn nasastiakiribnytko. Pal tyró baró čoripén, i pal dová so tyré gréhi vybarine, Me kerdjom davá saró túke. Pal-dová so saré, kon dukhavela tut, jone kokoré javéna dukhade, i saré tyré vérgi, kažno léndyr džála dro pliéno. Saré, kon čorela mištypén tútyr, jone kokoré javéna občorde; i saré, kon riskiréla tyró mištypén, lénde kokorende javéla riskirdo mištypén.’ I Me piriphandava tut [plastyrjosa-r.s.], i Me sastiakirava tut tyré-masengire fransendyr’, – rakiréla Raj Devél, – pal-dová so jone khardé tut ‘bikhereskiro’: davá isyn Sióno, pe savó nikón na dykhéla. ‘Adiáke rakiréla Raj Devél: “Ake, Me janáva pale plienóstyr Jakovóskire šátry, i Me sykaváva láska pe léskiro štéto šatrenca; i fóro nevéstyr javéla čhudo pe péskiro štéto, i Khangirí javéla kerdy syr sys. I dolé foróstyr manušá javéna te parikirén zoralés, i jone javéna drieván te radynénpe. I Me keráva adiáke, so len javéla butedýr, i jone na javéna te tyknjon. I Me barjakirava léngiri patýv, sob (kaj) jone te na dykhén pe lénde vučipnástyr. Léngire čhavé javéna adiáke-pac' syr angedyr (angledýr) i léngiro skedyibén javéla zoraló angíl Mánde; i Me pharés sendiakirava kodolén, savé pritasavéna len. Léngiro thagári javéla léndyr kokorendyr/ lačhé-rodoskirendyr, i léngiro baró raj (vladyka) javéla léngire manušéndyr, i Me keráva adiáke, sob (kaj) jov te javél pašedyr; i Jov poddžála ke Me. Pal-dová so, kon isyn adasavó murškanó, sob (kaj) te začhuvel péskiro iló te javél pašedyr ke Me?’, – rakiréla Raj Devél. Tumé javéna Miré manušá, i Me javáva tumaró Devél.’” “Ake, baró štormo džála angíl xoliása Rástyr-Devléstyr, riskiribnaskiri balvál (vihro); joj peréla zorjása pe bibahtalengiro šeró. Xoliakiribnaskiri (xoliakiri) jag Rástyr-Devléstyr na pirijačéla angíl dová, syr Jov vypherdiakirela saró, so Jov kaméla. Tumé ĥaljona saró davá dre dyvesá pe sámo kónco (jagóro).” “Dro dolé dyvesá’, – rakiréla Raj Devél,’ – Me javáva Devél vaš saré kherítka ródy (pliémi) Izrailjostyr i jone javéna Miré manušá.” Adiáke rakiréla Raj Devél: “Manušá, savé jačnépe džidé kurtalátyr, lathné tangipén (láska) Mándyr pe čhučí phuv, Me džáva te dav ramánjo Izrailjoske’” Raj Devél sykadyjá Izrailjoske, duripnastyr, i phendiá: “Tu jacián drógo Mánge pe saré viéki, paldavá Me sykadjom túke tangipén (láska).” “Me nevéstyr javáva te ĥazdav tut, Tu javésa ĥazdyny, o patyvalý džuvlý Izrailjoskiri’! Tu nevéstyr javésa ĥožakirdy bubnenca, i tu džása angíl te kheles kodolenca, savé radynénape. Tu nevéstyr (nevés) počhuvesa vinagradýtka unty (sady) pir bérgi dre Samárija, vinagradarja javéna te počhuven i te xan múri.” I javéla dyvés, kiéli e rakhibnaskire (stražy) pe bérga Jefriémo, javéna te den gódla: ‘Uštén, džása pe Sióno ke Raj Devél, amaró Devél’” Ake, so, Raj Devél rakiréla: – “Bagán zoralés, radymása Jakovóske i den gódla anglatuné (pervoné) šeraleske pir nácyi. Phenén zoralés sarénge, šarén i rakirén: “O Rajo Dévla! Zrákh Tyré manušén, savé jačnépe, Izrailjostyr!” Dykhén, Me janáva pale len paš-ratitkoné themestyr, i Me skedáva len samone jagorendyr pe phuv. Maškir lénde javéna: korori, i langaly, pharí džuvlý, i džuvlý, savjake, trej te bijanél-khetané; baró skedyibén (sonmo) javéla pale [risjola-r.s.] adái! Jone giné roibnasa, i Me lydžáva len mangipnenca. Me džáva angíl lénde pašýl panitka réki (leniá) pir mamúj drom, sob (kaj) jone te na obštavenpe. Pal-dová so Me som Dad Izrailjoskiro, i Jefriémo isyn Miro anglatunó čhavoró. Šunén lav Ráskire-Devléskiro, o manušále nacyiéndyr, i phenén davá zoralés sarénge pe ostrovy, so isyn dur, i phenén: “Jov, Kon rosčhudiá te dživél Izrailjo, skedéla les, i Jov javéla te rakhél Péskire manušén, syr čhupnári (pastyrjo) Péskiro ĥurto. Pal-dová so Raj Devél vykinela Jakovós, i Jov zrakhéla les kodoleskire vastéstyr, kon isyn zoraledýr léstyr. Paldavá jone javéna te bagán pe bérga Sióno, i jone priprastana khetané pe Ráskire-Devléskiro lačhipén; – pe parnó giv, pe mol (loly bravinta), pe maslinitko dzet (jeliejo), pe tyknorende ĥurtostyr i stadatyr; i léngiro di javéla syr únta (sado), saví drieván počhudy paniésa, i jone butýr na javéna te tuginen. Tén'ci patyvalý džuvlý javéla te radynélpe, khelyndoj: i terné i phurané manušá khetané; pal-dová so Me riskiráva léngiri túga dre rádyma, i Me podrikirava léngiro dúho (fáno), i Me dáva rádyma lénge pe štéto léngire-dukhakiro pe iló. I Me dáva čalés čekén rašángire dijenge, i Miré manušá čaljona Miré lačhipnastyr”, – rakiréla Raj Devél. Láska vaš Izrailjo ‘Ake, so rakiréla Raj Devél: “Zan šunelape dre Ráma, zoralé i kirke rovibnasa. E Rahíl' rovela pal lákire bijatende, joj na kaméla, sob (kaj) te podrikiren lákiro dúho (fáno), pal-dová so láte nane butýr bijatén.” Adiáke rakiréla Raj Devél: “Obrikirpe roibnastyr, i tyré jakhá jasvendyr; pal-dová so dová, so tu kerdián péskire bijatenge, risjola lačhipnása, – rakiréla Raj Devél: ‘Tyré bijaty javéna pale vergoskire phuvjátyr. Isyn vaš so te užakires lačhipén odoléstyr, so iščo (inké) javéla angíl, – rakiréla Raj Devél, – ‘pal-dová so tyré bijaty javéna pale pe péskire miéžy pe phuv. Me šundjom, syr o Jefriémo tuginelas jasvénca kokoró péske: “Tu sykliakirdian ke dukhá man, i, me som pirisykliakirdo sýrby nasykliakirdo guruv: rískir man ke lačhipén, i me risjováva, pal-dová so Tu, Raj Devél, san miro Devél. Dykhén: paló (poslie) dová, syr me risijom ke lačhipén, me riskirdjom džiibén ke Devél i pale dová, syr man pirisykliakirde, me pekadjom pes pir statia (scjogny). Me jacjom ladžakirdó, i až mirí godý zaphadija, pal-dová so me lydžijom bang miré terné beršéndyr.” ‘Ci na san tu, Jefriémo, drógo čhavó Mánge? Ci na san tu Miro kamibnytko čhavó? Pal-dová so syr Me rakirdjom pal túte, Me ŭsády (sak) ripirdjom tut. Paldavá Miro andrypen rakiréla péske pal léste: Mánge syr te na sykavav tangipén (láska) léske’, rakiréla Raj Devél. Čhuv stýlby šperenca, ker špery pir phuv; rískir iló ke baró drom, ke drom, savésa tu gíian. Risjov pale, o patyvalý džuvlý Izrailjoskiri, risjov nevéstyr ke dalé tyré fórja. Syr ĥará (dlúges) tu javésa te psirés péske tu, čhajo, saví otpyja? Pal-dová so Raj Devél kerdiá vari-so nevó pe phuv” – e džuvlý zrakhéla romes. Adiáke rakiréla bolybnáskire-jangoléngiro Raj Devél, Izrailjoskiro Devél: “Kiéli Me janáva len plienóstyr, jone nevéstyr javéna te rakirén davá lav pe Judejakiri phuv i dre lákire fórja: ‘Te bahtiakirél Raj Devél tut, o čačipnáskiro kher, o svénto bérga!’ I odój pe lénde jačéna te dživén manušá Judejátyr, i dre saré léngire fórja, phuvjákire xulaja i kodolé javír manušá, savé psiréna ĥurtenca. Pal-dová so Me dyjom čalés kažnoné khiniakirde diéske, i Me dyjom pherdés te xal kažnoné diéske, so sys dre túga.” Dalésa me, Jeriemiéjo, džangadyjom (prošnindjompe) i dykhcjom pašýl péste: miro sunó sys gudló mánge. “Ake, javéna dyvesá’, – rakiréla Raj Devél’, – so Me keráva adiáke, sob (kaj) dro Judejákiro i dro Izrailjoskire kherá te bijandjon (lotjon) manušá, i te bijandjon kherítka murdalá (skoto). I javéla adiáke: syr kučes Me dykhcjom Pal lénde, sob (kaj) te vyriskirav len, i te phagirav len i te piririskirav len i te xasiakiráv len i te pritasavav; akaná adiáke-pac' Me javáva te dykháv rakhunes (rakhibnasa) pal lénde, sob (kaj) te občhuvav léngiro džiibén, i te počhuvav len pe phuv’, – rakiréla Raj Devél. I dre odolé dyvesá jone na javéna butýr te rakirén: “E dadá xané šutlo (kislo) vinagrado (drakh), a dre dandá čhavengiri jaciá askoma” Ne kažno manúš javéla te merél pal péskiro čoripén; kažno manúš, savó xála šutlo vinagrado (drakh), dre léskire dandá javéla oskoma.” “I javéna dyvesá’, – rakiréla Raj Devél, – ‘kiéli Me sčhuvava Nevó Zavieto Izrailjoskire kheresa i Judejákire kheresa – ne na kadasavó-pac' zaviéto, savó Me sčhudjom dadénca dro dyvés, kiéli Me lyjom len paló vast te lydžav len Jegiptóskire phuvjátyr, – kodová zaviéto jone phagirdé, na dykhí pe dová, so Me sómas Xuláj vaš lénge’, – rakiréla Raj Devél. ‘Ake, isyn Zaviéto, savó Me sčhuvava Izrailjoskire kheresa i Judejákire kheresa. Pale dolé dyvesá’, – rakiréla Raj Devél’, – ‘Me čhuváva Miro Zakóno andré lénde i Me čhináva davá dro léngire ile, i Me javáva léngiro Devél, i jone javéna Miré manušá. I jone butýr na javéna te sykliakirén, kažno manúš léskire susiedos (kotaris), i kažno manúš léskire pšalés, rakirí: ‘Džinén Ras-Devlés’, – pal-dová so jone džinéna Man: naj tyknestyr ke naj baró’, – rakiréla Raj Devél. ‘Pal-dová so Me otmekáva léngiro čoripén, i Me butýr na javáva te ripirav léngiro grého.’ Ake, so rakiréla Raj Devél, Savó déla kham dyvesé, i Kon déla uphenybén vaš čhon i vaš čergeniá te den dud (svéto) ratý; Savó kuniakirela mórjo (derjáv), so valny léskire brilinena (rievinena) – léskiro lav isyn bolybnáskire-jangoléngiro Raj Devél: ‘Kóli dalé uphenybená džána krig Miré jakhéndyr’, – rakiréla Raj Devél – tedy ródo Izrailjoskiro pirijačéla te javél Miré manušénca pe saré viéki. Adiáke rakiréla Raj Devél: “Kóli saštý te mierines bolybén uprál, i te pirirodes phuvjákiro fundámiento telál, Me adiáke-pat' otčhurdava Péstyr saró kherítko ródo Izrailjoskiro pal dová saró, so jone kerdé, – rakiréla Raj Devél: “Ake, javéna dyvesá,” – rakiréla Raj Devél, – so fóro javéla čhudo vaš Ráske-Devléske Anamieiloskire (Xananiloskire) vučardiatyr (bašniatyr) ke Vangarytko pórta [Venglytko-ju.o.]. I šelo te mierinel protyrdelape nevéstyr mamúj ke Garivoskiri bérgica; tedy jov porisjola ke Goafo [obdžala Goafo-r.s.]. I saró dólo, kaj isyn pašté trúpy i pieplo, i saré féldy až ke sýgno rékica (lenorí) Kiedrono, ke venglo dre Grengiri pórta pe čačí rig, – saró javéla svénto Ráske-Devléske: fóro nijékhvar butýr na javéla riskirdo ci čhurdynó dre ruíny.” Lav, savó sys ke Jeriemiéjo Rástyr-Devléstyr pe déšto berš Sedekijaskiro-kralískiro dre Judéia, davá sys dešuohtoto berš, syr o Navuhodonosóro lyjá te kralinél. Dro dolé dyvesá Vavilonóskiro xaladybén (armija) občhudiá trusciál Jerusalimo i o Jeriemiéjo, proróko, sys phandlo dre gréda (dvóro) štaribnaskiri, so sys dro kher kralískiro Judejákiro. O Sedekíia, králi Judejákiro, phandia les dro štaribén, rakirí: “Sóske tu angilphenesa i rakirésa: ‘Adiáke rakiréla Raj Devél: ‘Áke, Me otdáva davá fóro dro vast kralískiro Vavilonóskiro, i jov léla les’; i Sedekíia, králi Judejákiro, na zrakhélape Xaldiejéngire vasténdyr, ne jov adiáke peréla dro vast kralískiro Vavilonóskiro, i jov javéla te rakirél lésa muial (muj pe muj), i te dykhél les jakh pe jakh; tén'či Navuhodonosóro lydžála Sedekijas ke Vavilóno, i odój jov javéla angíl davá, syr Me javáva ke jov, – rakiréla Raj Devél; mek tumé risjona i javéna te marénpe Xaldiejénca, tuménge na javéla baht.’ I phendiá Jeriemiéjo: “Lav Ráskire-Devléskiro sys ke me dasavo: Ake, Anamieilo (Ganamieilo), Tyré-kakeskiro Salumoskiro čhavó, javéla ke tu, phení: ‘Kin mándyr félda, saví isyn dro Anafofo, pal-dová so túte isyn vykinybnytko pravo te kines la.’” Tén'ci Anamieilo, miré-kakeskiro čhavó, javdiá ke me pe gréda (dvóro) štaribnaskiri pir lav Ráskire-Devléskiro i phendiá mánge: “Me mangav tut te kines félda, saví isyn dro Anafofo, savó isyn pe Vienjaminoskiri phuv; pal-dová so vykinybnytko pravo isyn túte, i vykinybén tyró; kin félda péske.” Tén'ci me ĥalyjom, so davá sys lav Ráskire-Devléskiro. Adiáke me kindjom félda Anamieilostyr, miré-kakeskire čhavestyr, savó sys dro Anafofo, i me otvažyndjom léske lové – eftadešá (šekeli) rup. I me podčhindjom kinybnytko lyl i čhudjom čergen (štampo) pe léste, lyjom jakhitkonen (svidietielién) i Me otvažyndjom lové pe ubladýtka (viesy). I me lyjom kinybnytko lyl dujenca papir'jenca, pérvo lyl, kaj sys čergen čhudý pir zakóno i pir statúto, i javír lyl bi čergeniakiro (bi štemposkiro), i me dyjom javír kopija pe kinybnytko lyl Varuhoske, Nirijaskire čhavéske, čhavéske Maasijaskireske angíl Anamieiloskire jakhá, miré-kakeskire čhavéskire i pe jakhá jakhitkengire, savé podčhindlepe pe kinybnytko lyl angíl saré Judénde, kon sys bešté pe gréda (dvóro), kaj stréga sys. Tén'ci me priphendjom šylales Varuhoske angíl lénde, phení: “Adiáke rakiréla bolybnáskire-jangoléngiro Raj Devél, Izrailjoskiro Devél: ‘Dalé lylá vaš kinyben, duj papirja: le jekh, pe saví isyn kinybnytko lyl čergeniasa, i javír, pe saví nane čergen, i čhuv len dro khoró ĥlejatyr (glinatyr), sob (kaj) jone te pasjon odój but dyvesá.’ ‘Adiáke rakiréla bolybnáskire-jangoléngiro Raj Devél, Izrailjoskiro Devél: “Kherá, féldy i vinagradniki javéna te kinenpe nevéstyr (nevés) pe daja phuv.” I paló dová (korigedýr) me dyjom kinybnytko lyl Varuhoske (Baruhoske), Nirijaskire čhavéske, i me mangdjompe Ráske-Devléske, rakirí: “O Rajo Dévla, Rajo Devlale! Ake, Tu sozdyjan bolybén i phuv Péskire baré zorjása i Péskire vytyrdyne psikesa, vaš Túke nisó nane pharó! Tu sykavesa tangipén (láska) but e tysjoncenge manušénge, i Tu otdesa pale Péskire sendosa čhavénge pal čoripén léngire-dadéngiro pal lénde. Dévla! Tu san baró i zoralypnaskiro, Rajo Dévla, bolybnáskire-jangoléngiro, – ake, isyn Tyró lav! Tu san baré-godiákiro te des godý i zor te kerés réndy. Tyré jakhá otkerde pe saré dromá, savénca čhavé manušéngire psiréna, sob (kaj) te den kažnonéske (svakoneske) pir léskiro drom, i pir barjakirdé (plódy) léskire keribnastyr/ rendéndyr. Tu kerdián ĥertyka i dívy pe phuv Jegiptóskiri, i kerésa ke adadyvés i dro Izrailjo i maškír javire manušénde, i Tu kerdián Péske lav, savó jov isyn adadyvés. I Tu vylydžijan manušén Izrailjoskiren Jegiptóskire phuvjátyr pir znamiénii (ĥiertyká) i dívy Péskire zoralé vastésa i Péskire vydindz'kirde psikesa i baré trašaibnasa (darása). Tu dyján phuv lénge, pal saví Tu dyján sovláh léngire dadénge te des la-phuv, pir saví thadéla thud i avgín. I jone zaginé i uhtyldé daja phuv, ne jone na kandyné Tyrí zan, i jone na kerdé pir Tyró Zakóno. Jone sarésa na kerdé nisó daléstyr, so Tu priphendian lénge te kerén. Paldavá Tu i kerdián adiáke, sob (kaj) sarí daja bibáht te javél pe lénde. ‘Ake, isyn vučé valy phuvjátyr, so vérgi dočhude! Jone doginé ke fóro te len les, i fóro otdelape dre vastá Xaldiejéngire, savé marenape te len fóro kurtalása, bokhasa i meribnytkone fransenca: so Tu phendián, Dévla, davá vypherdiakirelape (spolninelape), i, ake, Tu dykhésa davá. I na dykhí pe davá, so fóro otdelape dre vastá Xaldiejéngire, Tu, Rajo Dévla, Devlale, phendián mánge: “Kin péske félda pal lové i le jakhitkonen i khar jakhitkonen, pal-dová so davá fóro otdelape dre vastá Xaldiejengire.” I javdiá ke me, Jeriemiejoske, lav Rástyr-Devléstyr, rakirí: “Ake, Me som Raj Devél, Devél kažnoné ločake (plotiake): ci isyn vari-so pharó, so naštý te keráv Mánge?” Paldavá, ake, so, – rakiréla Raj Devél: “Ake, Me dáva davá fóro dro vast Xaldiejengiro dro vast Navuhodonosoroskiro, kralíske, Vavilonoskireske, i jov léla davá fóro. I Xaldiei, savé marénpe proti davá fóro, javéna i zahačkirena davá fóro i shačkirena les, i kherá, pe savengire strehi Judy thuvaliakirde drogoné smolenca Vaaloske i kaj jone vyčhuvenas thadune svénta dyibená javire devlorénge, sob (kaj) te den jag Miré xoliake pe lénde. E čhavé Izrailjoskire i e čhavé Judejákire kerdé jekh čoripén angíl Mánde tyknal/ sternal (smolodu); čačó, čhavé Izrailjoskire, féni dénas jag Miré xoliake pal butiá, so kerdé léngire vastá’, – rakiréla Raj Devél. ‘Dolé dyveséstyr, kiéli davá fóro sys čhudo ke adadyvés, jov délas jag Miré xoliake i Miré xoliakiribnaske, so Me durjakirdjom dalé-foróskire manušén Péstyr, pal saró čoripén, so kerdé čhavé Izrailjostyr, i čhavé Judejátyr, so jone dyné jag Miré xoliake pe lénde: jone, léngire králja, léngire thagárja, léngire rašaja i léngire proróki, muršá Judejákire i džiibnáskire (žytieli) Jerusalimóskire. I jone risiné ke Me dumesa, a na mósa; mek Me i sykliakirdjom len tasiarlune (rannjone ne) zlokostyr (rankostyr) sykliakiravas Me len, ne jone na šundlé (na kamlé) te prilén uphenybén. I jone až čhudé péskire džungalé (brydka) ídoly dro Miro kher, savéske lav Miro sys dynó, sob (kaj) te magirén les. I jone čhudé vučé štéty Vaaloske pe dólo Jenomoskire [Ginomoskire-ju.o.] čhavéngiro, sob (kaj) te lydžán pirdál jag léngire čhavén i čhajén te den patýv Molohoske: so Me priphendjom te na kerén lénge, so na javdiá Mánge pe godý, sob (kaj) jone te kerén dalé džungalé réndy, sob (kaj) manušá Judejákire te kerén grého.” Akaná paldavá adiáke rakiréla Raj Devél, Izrailjoskiro Devél, – “Pal davá fóro, so tumé rakiréna: ‘Jov javéla otdynó dro vast kralíske Vavilonoskireske kurtalása, i bokhasa i meribnytkone fransenca,’ – Ake, Me javáva te kedav len saré themendyr (stranendyr), ke savé Me tradyjom len dre Mirí xolý, i dro Miro xoliakiribén, i dro Mirí xor xolý, i Me janáva pale len pe davá štéto, i Me dáva lénge te dživén bi darákiro. I jone javéna Miré manušá, i Me javáva léngiro Devél. I Me dáva lénge jekh iló, i jekh drom, sob (kaj) jone te darén Mándyr saré dyvesá: vaš lačhipén péske, i vaš lačhipén léngire bijatenge, savé javéna pal lénde te dživén. I Me sčhuvava viéčno Zavieto lénca, so Me na otrisjovava léndyr, sob (kaj) te keráv lačhipén lénge, i Me čhuváva Mirí traš dre léngire ile, sob (kaj) jone te na dur'jen [otdžan-r.s.] Mándyr. I Me javáva zoralés te radynavpe pal lénde te keráv lačhipén lénge, i Me počhuvava len pe daja phuv saré Miré iléstyr i saré Miré diestyr. Ake, – so rakiréla Raj Devél: “Adiáke, syr Me jandjom pe manušénde sarí daja bari bída, adiáke-pac' Me janáva saró lačhipén vaš lénge, pal savó Me dyjom lav lénge. I javéna te kinenpe féldy pe daja phuv, pal saví tumé rakiréna: ‘Joj isyn čhučí, bi manušéngiro, bi murdalengiro’, joj isyn otdyny dre vastá Xaldiejengire.” E manušá javéna te kinen féldy pal lové (rup), i te podčhinen lylá (brify), i te čhuvén čergen pe lénde, i te len jakhitkonen pe phuv Vienjaminoskiri, i pe štéty, i so isyn pašýl Jerusalimo, i dre fórja Judejákire, i dre fórja pe bérgi, i dre fórja pe telatuné štéty, i dre fórja paš-dyvesytka (južna), pal-dová so Me riskiráva len plienóstyr”, – rakiréla Raj Devél. I sys lav ke Jeriemiéjo Rástyr-Devléstyr javír mólo, kiéli jov sys beštó pe gréda (dvóro) štaribnaskiri, rakirí: “Adiáke rakiréla Raj Devél, Savó sozdyjá saró davá; Raj Devél, Savó sozdyjá phuv, sob (kaj) joj te terdjol, Raj Devél, isyn Léskiro lav: ‘Khar Man Miré lavésa, i Me otphenava túke, i Me sykaváva túke baré i garadé réndy (diély), i savé tu na džinésa!’ Pal-dová so, ake, so rakiréla Raj Devél, Izrailjoskiro Devél, pal kherá dro Jerusalimo i pal kral'jengire kherá, so isyn dre Judéia, savé phagirena pir dová, sob (kaj) te javén maribnýtka valy léndyr i kurtála vaš maribén: kadalé Judy Jerusalimóstyr javné te marénpe Xaldiejénca, sob (kaj) te pherdiakiren kherá trupenca manušéndyr, konés Me muliakirava dre Mirí xolý, i dro Miro xoliakiribén pal sarí léngiri bibáht, pal so Me otrisijom dalé foróstyr. Ake, Me pričhuvava sastiakiribnytko šmata (plastyrjo) i Me vydrabakirava len, i Me sastiakirava len, i Me sykaváva lénge but móly ramánjo i patiaibén. I Me keráva adiáke, so risjona pale emanuša dro pliéno Judejátyr i Izrailjostyr, i Me pirikerava dolé štéty, syr jone sys ĥaredyr (ĥará). I Me vyžužakirava len saré léngire čoripnástyr, savésa jone kerdé gréhi proti Mánde, i Me otmekáva saró čoripén léngiro, savésa jone kerdé gréhi proti Mánde, i savénca jone phagirdé [parude-r.s.] Miro Zakóno. Tén'ci lav ‘Jerusalimo’ javéla te radynel manušén, jone javéna te šarén les, i te den patýv angíl saré Najudytkoné nacyiende pir phuv, savé javéna te šunén pal saró lačhipén, so Me kerdjom lénge: i jone javéna te darén, i te izdran saré lačhipnastyr i saré mištypnástyr, so Me keráva dalé foroske.” Adiáke rakiréla Raj Devél: “Adadyvés nevéstyr javéla te šunelpe pe davá štéto, pal savó tumé rakiréna: ‘Davá štéto isyn čhučó, ni manušá, ni kherítka murdalá’ – dre Judejákire fórja, pe Jerusalimóskire pe vulícy (gásy) isyn čhučó, ni manušá, ni savó džiibnáskiro, ni kherítko murdál, iavéla nevéstyr zan radymása, javéla viesjolo (bagaibnytko) zan, javéla zan terneskiri i zan terniakiri, zan odolé manušéngiri, savé phenéna: ‘Parikirén bolybnáskire-jangoléngiro Ráske-Devléske, pal-dová so Raj Devél isyn lačhó, pal-dová so Léskiri láska (tangipén) jačélape pe saré viéki’, – i zan kodolengiri, savé janéna svénta dyibená parikiribnasa ke Ráskire-Devléskiri Khangirí. Pal-dová so Me riskiráva [davá-r.s.] lačhipén plienonenge dalé phuvjátyr, syr sys angledýr,” – rakiréla Raj Devél. Ake, so rakiréla Raj Devél, bolybnáskire-jangoléngiro: “Pe davá štéto, savó isyn čhučó, i pe savó nane ni manušá, ni kherítka murdalá, – dre saré dalé – štetoskire fórja, javéla nevéstyr (nevés) džiibnytko štéto čhupnar'jenge (pastyriénge), pir savé jone javéna te rakhén péskire ĥurty. Dre fórja bergitka, dre fórja pe dólo, i dre fórja paš-dyvesytka (južna), pe phuv Vienjaminoskiri, i pe štéty trusciál Jerusalimo, i dre fórja Judejákire, ĥurty javéna te džán péske nevéstyr tel manušéskiro vast, savó ginéla len, – rakiréla Raj Devél. ‘Ake, javéna dyvesá,” – rakiréla Raj Devél, – “so Me saró keráva pir lačhó lav, savó Me phendjom pal kher Izrailjoskiro, pal kher Judáskiro: ‘dre dolé dyvesá i dro dová časo Me keráva adiáke, so čačipnaskiri Rand' [Otbaripen-r.s.] vybarjola Davidóske, i Jov javéla te sendiakirél i te kerél pir čačipén pe phuv. Dre dolé dyvesá Juda zrakhélape, i Jerusalimo javéla te dživél bi darákiro. Ake, isyn lav, savésa jov javéla te kharelpe: ‘Raj Devél – amaró čačipén. Pal-dová so, ake, so rakiréla Raj Devél: “E Davidóste ŭsády / sak (vsiegda) javéla manúš te bešél pe trono Davidóskire kheréstyr, i javéna rašaja Lieviténgire rodóstyr; javéla te uhtylel manušén te xačkirén svénto janybén angíl Mánde, te roshačkiren mareskire janybená, i te janén len kažno dyvés.” Davá lav sys Rástyr-Devléstyr ke Jeriemiéjo, i phendiá: “Adiáke rakiréla Raj Devél: ‘Kóli tumé déna ráda te phagiren Miro zaviéto pal dyvés, i Miro zaviéto pal rat adiáke, sob (kaj) te na javél dyvés i rat dro péskiro časo, to tedy moginéla (saštý) adiáke-pac' te javél phagirdó Miro zaviéto Davidosa, Miré pisharisa, kóli te na javél čhavó léste te kralinél pe léskiro trono, i adiáke-pac' Lievitenca, rašanca, Miré pomogipnaskirenca. Syr naštý te gines saré čergeniá pe bolybén, ci prahinki morjoskire (derjavéskire), adiáke Me barjakirava ródo Davidóskiro, Miré čhavéskiro, i ródo Lievitengiro, savé pomoginena Mánge.” I iščo (inké) sys lav Rástyr-Devléstyr ke Jeriemiéjo, i phendiá: ‘Adiáke rakiréla Raj Devél: ‘Ci ĥalyjan tu dová, so adalé manušá rakiréna: ‘Ci dalé duj kherítka ródy (pliémi): Judáskiro i Izrailjoskiro durjakirdia Raj Devél Péstyr, savé Jov vykedyjá Péske?’ Paldavá jone lyné te dykhén vučipnástyr pe Miré manušénde sýrby jone akaná na ginéna len butýr syr nacyja.’ ‘Adiáke rakiréla Raj Devél: ‘Kóli Me na kerdjom by zaviéto pal phuv i phenybén, i, kóli te na javél Miro zaviéto pal dyvés i rat, to tedy Me durjakirava by krig Péstyr kherítko ródo (pliémjo) Jakovóskiro i kherítko ródo Davidóskiro, Miré pishariskiro adiáke, sob (kaj) te na lav butýr léskire kheritkoné rodóstyr theméskire barydyrén pe ródo Avraamóskiro, Isakóskiro i Jakovóskiro. Pal-dová so Me janáva pale len plienóstyr i Me sykaváva tangipén (láska) pe lénde.’” Ake, lav, so sys ke Jeriemiéjo Rástyr-Devléstyr, kiéli o Navuhodonosóro, králi Vavilonóskiro, i saró xaladybén léskiro, i saré kralipená pe phuv tel léskiri zor, i saré manušá, mardépe proti Jerusalimo, i proti saré léskire fórja, i phendiá: ‘Adiáke rakiréla Raj Devél, Devél Izrailjoskiro: “Džá i rákir Sedekijasa, kralísa pe Judéia i phen léske: ‘Adiáke rakiréla Raj Devél: Áke, Me otdáva davá fóro dro vastá kralíske Vavilonóstyr, i jov xačkiréla les jagása. I tu na zrakhesape léskire vastéstyr, ne tut mamúj léna i piridena dro vast léskiro; i tyré jakhá dykhéna jakhá kralískire Vavilonóstyr, jov javéla te rakirél túsa muial (muj pe muj) i tu džása ke Vavilóno.’ Féni šun lav Ráskiro-Devléskiro, o Sedekíia, králi Judejákiro! Ake, so rakiréla Raj Devél pal túte: ‘Tu na merésa kurtalátyr, ne tu merésa dro ramánjo (spokojnyma) garaibnaskire jagása, adiáke syr kerdé i Tyré dadénge, anglatuné (pervoné) kral'jénge, savé sys angíl túte, adiáke so javéna te thuvliakiren (te xačkirén) drogoné smolenca vaš túke, i javéna te obroven tut, priginy (prirakiri): ‘Ake, khieningie!’ Pal-dová so Me vyphendjom davá lav.’” I proróko Jeriemiéjo phendiá saré dalé lavá Sedekijaske, kralíske Judejakireske, dro Jerusalimo, kiéli kralískire-Vavilonóskiro xaladybén marelaspe proti Jerusalimo, i proti saré fórja dre Judéia, so jačnépe: proti Lahiso i Azeka; pal-dová so féni dalé fórja zoralé vantenca jačnépe Judejákire for'jéndyr. Ĥáda, isyn lav, savó sys ke Jeriemiéjo Rástyr-Devléstyr paló dová, syr o králi Sedekíia sčhudia zaviéto manušénca, kon sys dro Jerusalimo, sob (kaj) te obzaniakirel (te ob'iavinel) vol'nyma lénge: sob (kaj) kažno (sváko) manúš te otmekél pe vólia péskire murškané i džuvlikane pisharís – Judos, ci Judyca, sob (kaj) nijékh léndyr te na rikirél Judejos (Judos) pšalés dre navolia. I saré thagárja i saré manušá, savé prilyné zaviéto, kandyné, sob (kaj) kažno (sváko) te otmekél pe vólia péskire pisharís i péskire pisharica, sob (kaj) te na rikirél nijékh butýr len dre navolia, jone kandyné i mekné len pe vólia. Ne kutý (nábut) paló (poslie) dová jone dynepe pale zavietostyr i riskirdé péskire pishar'jén i pisharicen, konés jone mekné pe vólia, jandlé len pale syr pishar'jén i pisharicen. Paldavá sys lav Rástyr-Devléstyr ke Jeriemiéjo, i phendiá: “Adiáke rakiréla Raj Devél, Izrailjoskiro Devél: “Me sčhudjom zaviéto tumaré dadénca dro dyvés, kiéli Me jandjom (vylydžijom) len Jegiptóskire phuvjátyr, štetóstyr, kaj jone sys dre navolia, i phení: ‘Pale kažna eftá berš mekén pe vólia kažnoné (svakone) péskire Judos pšalés, savó bikindia pes túke. Kiéli jov otkerela butý pe túte šov berš, bičhaven les péstyr pe vólia’” Ne tumaré dadá na kandyné Man, i jone na pričhude péskiro kan. Tén'ci javdiá dyvés naĥara i tumé risiné ke Me, i kerdé čačunés angíl Miré jakhá – kažno (sváko) manúš tuméndyr te phenél angíl sarénde pal vol'nyma péskire pašatuneske (susiedoske/kotariske) i tumé sčhude zaviéto angíl Mánde dro Miro Kher, savó kharélape Miré Lavésa. Paló (poslie) dová tumé risiné pe javír rig, i tumé magirdé Miro lav, i kažno (sváko) tuméndyr riskirdiá pale péskire pisharís i peskirjá pisharica, konés tumé mekné pe vólia pir léngiro iló, i tumé jandlé len pale dre navolia syr pishar'jén, i syr pisharicen.” “Paldavá adiáke rakiréla Raj Devél: ‘Tumé na kandyné Man, sob (kaj) tumé te mekén pe vólia, kažno (sváko) tuméndyr péskire pšalés, kažno tuméndyr péskire pašatunes / susiedos (kotaris): Áke, Me dáva vol'nyma tuménge – te merén, ci kurtalátyr, ci meribnytkone fransendyr, ci bokhátyr! I Me keráva adiáke, sob (kaj) te xoliason pe tuménde (tuméndyr te čurinenpe) saré kralipená pe phuv. I Me otdáva (vydava) manušén, savé piriginé Miro zaviéto, savé na kerdé saró pir lavá Miré-zavietoskire, so jone sčhude angíl Mánde, kiéli jone rosčhindle cieliantos pir paš i proginé maškír pašá cieliantoskire – thagar'jen Judejátyr, thagar'jen Jerusalimóstyr, jevnuhen, rašán, i saré manušén dolé phuvjátyr, savé proginé maškír pašá cieliantoskire, Me otdáva (vydava) len dro vastá léngire-vergéngire i dro vastá odolénge, savé rodenas léngiro di. Léngire trúpy javéna syr xabén (mas) čirikliénge bolybnaskirenge i riskiribnáskire murdalénge pe phuv. I Me dáva Sedekijas, kralís Judejakires, i léskire thagar'jén dro vastá léngire vergéngire, dro vastá odolénge, savé rodéna léngiro di, i dro vastá kralískire-Vavilonóskire xaladybnaske, so risiné pale tuméndyr. Ake, Me priphenava, – rakiréla Raj Devél, – ‘i Me keráva adiáke, so jone risjona ke davá fóro. Jone džána maribnása pe davá fóro i shačkirena les jagása; i Me keráva fórja dre Judéia čhučé, bi manušéngiro’” Lav, savó sys ke Jeriemiéjo Rástyr-Devléstyr dre Ioakimoskire dyvesá, čhavéskire Iosijaskire (Josijaskire), kon sys králi pir Judéia, rakirí: “Džá dro kher Rehavitengiro i phen lénge, i jan len dro Kher Ráskire-Devléskiro, dre jekh komora, i de lénge mol (vino) te p'jen.” Tén'ci lyjom me Iazanijas (Jazanijas), javire čhavés Jeriemiejoskires, savó sys Avacynijaskiro (Xabacynijaskiro) čhavó, i léskire pšalén i sarén léskire čhavén, i saró kher (čékar') Rehavitengiro, i jandjom me len dro Kher Ráskire-Devléskiro, dre komory Ananoskire čhavéngire, kon sys Ĥodolijaskiro čhavó, savó sys manúš Devléstyr. Dalé komory sys pašýl komory thagar'jengire, uprál Maasejaskiri komora (kon sys Sielumoskiro čhavó), savó sys rakhibnaskiro pašýl vudár. Tén'ci me čhudjom angíl čhavénde Rehavitengirende kučyka pherdé moliasa (vinosa), i musera (stakany), i phendjom me lénge: “P'jén mol (vino).” Ne jone otphendlé: “Ame na lása te pjas mol, pal-dová so amaró dad Ionadavo (čhavó Rehavoskiro) priphendiá aménge, rakirí: ‘Tumé na javéna te p'jén mol, ni tumé, ni tumaré čhavé, nijékhvar dro džiibén. I tumé na čhuvén kherá, i na počhuven giv dre phuv, na rozlydžan vinagradýtko bar, i te na javél tuménde nisó daléstyr, ne tumé javéna te dživén saré péskire dyvesá dre šátry, sob (kaj) tuménge te dživén but dyvesá pe phuv, pe saví tumé javéna te loden.” Adiáke ame kandyjam zan Ionadavoskiri (čhaveskiri Rehavoskiri), amaré-dadéskiri dro saró, so jov priphendiá šylales (strenges) aménge: te na pjas mol dre amaré saré dyvesá: – ame, amaré romniá, amaré čhavé ci amaré čhaja, i te na čhuvas kherá te dživás, ci, sob (kaj) te na javén aménge vinagradýtka barja, ci féldy, ci giv te počhuvas. Ne ame jaciampe te dživás dre šátry, ame kandyjam i kerása saró adiáke, syr o Ionadavo (amaró dad) priphendiá aménge te kerás. I syr sys adiáke so o Navuhodonosóro, králi Vavilonóskiro, javdiá pe daja phuv, tedy ame phendiam: “Javén, džása ke Jerusalimo, darane Xaldiejéngire xaladybnastyr, darane Siriicengire xaladybnastyr”, i ame dživasa ke Jerusalimo.” Tén'ci sys lav ke Jeriemiéjo Rástyr-Devléstyr, rakirí: ‘Adiáke rakiréla bolybnáskire-jangoléngiro Raj Devél, Devél Izrailjoskiro: “Džá i phen manušénge Judejátyr i odolénge, kon dživéla ke Jerusalimo: ‘Ci na priléna tumé uphenybén te šunén Miré lavá?’”, – rakiréla Raj Devél. Lavá Ionadavoskire (čhavéskire Rehavoskire), so jov priphendiá péskire čhavénge – te na p'jen mol (vino) vypherdiakirenape (spolninenape), i ke adadyvés jone na p'jéna, i jone kandéna priphenybená léngire dadengíre. Ne saroiekh (usajékh) so Me i rakirdjom tuménge tasiárles (ránes) zlokostyr (rankostyr), ne tumé na kandyné Man. I Me bičhavavas ke tumé saré Miré dynar'jén, prorokén, Me bičhavavas tasiárles (ránes) zlokostyr len, rakirí: “Risjon akaná, kažno (sváko) jekh tuméndyr péskire bibahtalé droméstyr, lačhakiren (kerén fededýr) péskire réndy, i na psirén te kerén patýv javire devlorénge, tedy tumé javéna te dživén pe phuv, so Me dyjom tuménge i tumaré dadénge.” Ne tumé na pričhude péskiro kan, i na kandyné Man. Dykhén: čhavé Ionadavoskire (čhavó Rehavitoskiro) vypherdiakirde priphenybén péskire dadéskiro, so jov dyjá lénge, ne kadalé manušá na kandyné Man. Paldavá adiáke rakiréla bolybnáskire-jangoléngiro Raj Devél, Izrailjoskiro Devél: “Ake, Me janáva pe Judéia, i pe saré manušénde, kon dživéla ke Jerusalimo, saró fuipén, so Me khardjom len, ne jone na otphendlé Mánge.’” I phendiá Jeriemiéjo kheréske (čekarjake) Riehavitoskireske: “Adiáke rakiréla Raj Devél, bolybnáskire-jangoléngiro, Devél Izrailjoskiro: ‘Pal-dová so tumé šundlé priphenybén Ionadavoskiro (tumaré-dadéskiro), i tumé rakhne (rikirdepe ke saré léskire uphenybená) i kerdé saró, so jov priphendiá tuménge, to paldavá adiáke rakiréla bolybnáskire-jangoléngiro Raj Devél, Devél Izrailjoskiro: ‘Ionadavoste, čhavéste Rehavitoskireste’, dre saré dyvesá javéla manúš te terdjol angíl Mánde.’” I sys adiáke dro štárto berš Ioakimoskiro (čhavó Iosijáskiro), kon sys králi pe Judéia, sys dasavo lav Jeriemiejoske Rástyr-Devléstyr, phení: “Le svítko lylvarjatyr, i začhin pe davá svítko saré lavá, so Me phendjom túke pal Izrailjo, pal Judaste i pal Najudýtka nácyi, dolé dyveséstyr, kiéli Me lyjom te rakiráv tuménge: Iosijaskire dyveséndyr ke davá dyvés. Davá, xaj, (moginéla) te javél, so kher Judáskiro javéla te šunél pal sarí bída, so Me kamamas te janav pe lénde, sob (kaj) kažno (sváko) léndyr moginelas te risjol krig léskire bibahtalé droméstyr, sob (kaj) Me saštý te otmekav (te prostinav) lénge léngiro čoripén i léngiro grého.” Tén'ci Jeriemiéjo khardiá ke pe Varuhos (čhavés Nierijaskires); i o Varuho čhindiá pe svítko lylvarjatyr saré lavá Ráskire-Devléskire, savé sys čibatyr Jeriemiejoskirjatyr, savé Raj Devél phendiá Jeriemiejoske. I priphendiá Jeriemiéjo Varuhoske, i phendiá: “Me som phandlo [čhudo dro bešyben-r.s.], mánge naštý te džav dro Kher Ráskire-Devléskiro. Paldavá tu džá i gin zoralés (de upré) svitkostyr lavá, so tu začhindian miré čibatyr (lavéndyr). De upré lavá Ráskire-Devléskire dro dyvés, kiéli postinena, dre kaná manušénge Judejátyr, savé javéna péskire for'jéndyr. Davá saštý te javél, so jone vyphenena péskire patierja (molitvy) angíl Raste-Devléste, i so jone risjona péskire kažnoné bibahtalé droméstyr. Pal-dová so bari xolyn isyn i mižehipen (mižeh lavá), savé Raj Devél phendiá pe dalé manušénde.” I Varuho (čhavó Nierijaskiro) kerdiá saró pir dová, so proróko Jeriemiéjo priphendiá te kerél léske, syr jov délas upré lylvarjatyr lavá Ráskire-Devléskire dro Kher Ráskiro-Devléskiro. I sys adiáke, so dro pándžto berš Ioakimoskiro (čhavó Iosijáskiro), kon sys králi pe Judéia, dro jeniáto (bijekhéskiro déšto) čhon, so posto isyn phendló te rikirén sarénge manušénge Jerusalimóstyr i saré manušénge, savé javné for'jéndyr dre Judéia ke Jerusalimo, tén'či o Varuho gindia zoralés (délas upré) lylvarjatyr lavá Jeriemiejoskire dro Kher Ráskire-Devléskiro dre komora Giemarijaskiri (unuko Šafanoskiro), savó sys lylá-čhinybnaskiro (lylengiro čhinybnari / pisco) pe upratuny gréda, syr te džán andré neví pórta dro Kher Ráskire-Devléskiro, zoralés saré manušénge. Kiéli o Mihiejo (Mihna), čhavó Giemarijaskiro, (unuko Šafanoskiro) šundiá saré lavá Ráskire-Devléskire, lylvarjatyr, to jov gijá telé dro kralískiro kher, dre komora lylá-čhinybnaskireskiri vaš kralíske; i odój sys bešté saré thagárja – Elisamo (Elišama), lylá-čhinybnaskiro; – Delaija, čhavó Semaijaskiro, – Jelnafano, čhavó Ahboroskiro; – Giemarija, čhavó Safanoskiro, – Sedekíia, čhavó Ananijaskiro, i saré javír thagárja. Tén'ci Mihiejo (Mihna) piriphendia lénge saré lavá, so jov šundiá, kiéli Varuho ginelas zoralés (délas upré) lylvarjatyr saré manušénge. Paldavá saré thagárja bičhadé Iiegudis (Jegudis), čhavés Nafanijaskires (ŭnukos Šeliemejaskires), (praŭnukos Xusijaskires) ke Varuho, te phenél léske: “Le péskire vastésa svítko, sóstyr tu ginesas zoralés saré manušénge i jav.” I Varuho, čhavó Nierijaskiro, lyjá svítko dro vast i javdiá ke jone. I phendlé jone léske: “Beš akaná i gin zoralés aménge.” I ginelas Varuho zoralés lénge. I syr sys, so, kiéli jone šundlé saré dalé lavá, tedy jone podykhne jekh pe jekhéste darása, i jone phendlé Varuhoske: “Aménge syr te na phenas (te na piriphenas) kralíske saré dalé lavá.” I jone phučnepe Varuhostyr, phení: “Phen tu akaná aménge, syr tu začhindian (zapisyndian) saré dalé lavá léskire, Jeriemiejoskire čibatyr (čibjatyr)?” I phendiá Varuho lénge: “O Jeriemiéjo phendiá saré dalé lavá péskire čibása, i me začhindjom len černilasa dre lylvarí.” Tén'ci thagárja phendlé Varuhoske: “Džá i garadjov, tu i Jeriemiéjo; i mek nijékh (nikón) te na džinél, kaj tumé san” I giné jone ke králi pe gréda baré felatiniakiri (kolovoskiri), ne jone angledýr čhudé svítko dre komora Jelisamoskiri, lylá-čhinybnaskireskiri, i jone piriphendle saré lavá dro kan kralískiro. I o králi bičhadiá Jegudis te janel svítko i jov jandiá les komoratyr Jelisamoskirjatyr, kon sys lylá-čhinybnaskiro vaš kralíske. I o Jegudi ginelas les zoralés te šunél králi, i te šunén thagárja, savé sys terdé palál [pašýl-r.s.] kralíste. Pe dová časo o králi syn beštó dro ivantytko (zimitko) kher, sys jeniáto (bijekhéskiro deš) čhon, i xačolas jag dre sastruny pirí angíl léste. I sys adiáke: kiéli o Jegudi pirigindia trin ci štar riady (kolonki), o králi čhindiá len čhurjasa lylá-čhinybnaskirjasa, i čhurdyjá dre jag, saví sys dro sastruny pirí až syr jag pohaia saró svítko, savó sys dre pirí. I jone na darándyne, i na riskirdé péskire ídi: ni králi, nijékh léskire dynar'jéndyr (slugéndyr), kon šundlé dalé lavá. Na dykhí pe dová, so Elnafano, Delaija i Giemarija mangné kralís te na xačkirel svítko, ne jov saroiekh (usajékh) na kandyjá len. I priphendiá králi Iieramieiloske kralískire čhavéske, Seraijaske, Azrieljoskire čhavéske, i Selemijaske, Avdiloskire čhavéske, te uhtylén Varuhos, lylá-čhinybnaskires i Jeriemiejos, prorokós, ne o Raj Devél garadia len. I paló (poslie) dová, syr králi xačkirdiá svítko lavénca, savé o Varuho začhindiá Jeriemiejoskire čibatyr, javdiá lav Ráskire-Devléskiro ke Jeriemiéjo, i sys phendló léske: “Le javír svítko i začhin pe léste saré lavá, so sys angledýr pe pérvo svítko, savó Ioakimo, králi Judejákiro, xačkirdiá. I tu phen Ioakimoske, kralíske pe Judéia, – ‘adiáke rakiréla Raj Devél: ‘Tu xačkirdian davá svítko, phení: ‘Sóske tu čhindian pe léste, so o králi Vavilonóskiro, čačes, javéla i xasiakiréla daja phuv, i jov keréla adiáke, so na javéla ni manúš, ni murdál (žyvotno) odój.’” Paldavá adiáke rakiréla Raj Devél pal Ioakimoste, kralíste pe Judéia: ‘Léstyr na javéla nijékh te bešél pe Davidóskiro trono, i léskiro trúpo čhurdena pe xačkiribén dyvesé, i pe mrazo ratý. I Me javáva te sendiakirav les, i léskiro kherítko ródo i léskire dynar'jén pal léngiro čoripén, i Me janáva bibáht (bída) pe lénde, i pe džiibnaskirende dro Jerusalimo, pe muršende dre Judéia, so Me phendjom pe lénde, ne jone na pričhude kan.’” Tén'ci Jeriemiéjo lyjá javír svítko i dyjá les Varuhoske, lylá-čhinybnaskireske, čhavéske Nierijaskire, savó čhindiá pe svítko saré lavá Jeriemiejoskire čibatyr, saré dolé lavá lylvarjatyr, so xačkirdiá dre jag o Ioakimo, králi pe Judéia; i odój sys but dočhude lavá, savé sys dasavé-pac' syr i pérva lavá. I lyjá te kralinél o Sedekíia, čhavó Iosijáskiro, pe štéto Iiehonijaskiro, savó sys čhavó Ioakimoskiro, konés Navuhodonosóro králi Vavilonóskiro čhudiá syr kralís pe phuv Judejakiri. I ni jov, ni Sedekíia, i nijékh léskire dynar'jéndyr (slugéndyr), ni manušéndyr dolé phuvjátyr na pričhude kan ke lavá Ráskire-Devléskire, so Jov rakirdiá pir mánde, Jeriemiejoste. I o Sedekíia, králi bičhadiá Iieguhalos, čhavés Selemijakires i Sofonijas, čhavés Maasejaskires, kon sys rašái, ke proróko Jeriemiéjo te phenén: “Pomangpe pal aménde Ráske-Devléske, amaré Devléske.” Ne Jeriemiéjo tedy javélas i psirelas vol'nes maškír manušénde, pal-dová so jone na čhudé les iščo (inké) dro štaribén. Tedy faraonóskiro xaladybén vygijá Jegiptóstyr, i kiéli e Xaldiéi, savé občhude trusciál Jerusalimo, šundlé daja zan (zviés') pal lénde, to tedy jone giné krig Jerusalimóstyr. I sys lav Ráskire-Devléskiro ke proróko Jeriemiéjo, rakirí: “Adiáke rakiréla Raj Devél, Devél Izrailjoskiro: Adiáke tumé phenén Judejákire kralíske, kon bičhadiá tumen ke Me, sob (kaj) te phučén Mándyr: ‘Áke, isyn faraonóskiro xaladybén, so vygijá te podel vast tuménge, javéla te risjol pale pe péskiri phuv. Ne javéna pale e Xaldiéi, i javéna te marénpe proti davá fóro, i jone léna les, i jone shačkirena les jagása.’ Adiáke rakiréla Raj Devél: ‘Na xohaven pes’, rakirí: ‘Haldiéi, čačes, giné améndyr péske’, ne jone na džána péske. Pal-dová so na dykhí pe dová, so tumé i domarenas saró xaladybén Xaldiejengiro, savé marenaspe proti tuménde, i odój te jačénpe féni dukhade (raniena) manušá léndyr, tedy saroiekh uštelas kažno (sváko) manúš dre péskiri šátra, i xačkirelas fóro jagása.’” I sys adiáke: kiéli Xaldiejéngiro xaladybén mekciá osada Jerusalimo pir dová, so sys xaladybén Faraonóskiro, to o Jeriemiéjo gijá krig Jerusalimóstyr pe phuv Vienjaminoskiri, sob (kaj) te garadjol maškír manušénde. I kiéli jov sys dre Vienjaminoskiri pórta, odój sys barydyró pe stréga (rakhibnar'jénde), kon kharélaspe Irija, čhavó Selemejaskiro (čhavó Xananejaskiro), i jov uhtyldia Jeriemiejos, prorokós, i phendiá: “Tu našesa ke Xaldiéi.” Tedy o Jeriemiéjo phendiá: “Davá isyn načačo! Me na našava ke Xaldiei.” Ne Iiereja [Irija-ju.o.] na šundiá les, i jov uhtyldia Jeriemiejos i jandiá les ke thagárja. I thagárja drieván xoliasyne pe Jeriemiejoste, i jone šuliakirenas (marenas) les i jone čhudé les dro štaribén dro kher Ionafanoskiro, lylá-čhinybnaskireske. Pal-dová so jone kerdé štaribén dro dová kher. Kiéli Jeriemiéjo zagijá dre štaribén ĥanbinasa (jamasa), so sys dre kheltra (podvalo), kaj jov jaciápe odój but dyvesá, to králi Sedekíia bičhadiá te janel les javrí. O králi phučelas čorahanés léstyr dro péskiro kher i phendiá: “Ci isyn vari-savó lavoro Rástyr-Devléstyr?” I otphendiá Jeriemiéjo: “Isyn.” Tén'ci jov phendiá: “Tut vydena dre vastá kralískire Vavilonóstyr!” I phendiá Jeriemiéjo kralíske Sedekijaske: “Savó čoripén me kerdjom túke i tyré dynar'jénge, ci tyré manušénge, so tu čhudián man dro štaribén?” I kaj isyn tyré proróki, savé angilphenelas, rakirí: “O králi Vavilonóskiro na javéla te džal pe tuménde ci proti daja phuv? Paldavá me mangáva te šunés akaná: ‘Miro Rajo, králjo! Mek te priles tu miro mangipén, na rískir man dro Ionafanoskiro lylá-čhinybnaskiro kher, sob (kaj) te na merav me odój.’” Tén'ci králi Sedekíia priphendiá, sob (kaj) te čhuvén Jeriemiejos dre gréda, kaj sys stréga, i jone dénas léske kotér (kusko) maró pekibnaskire gasatyr (vulicatyr) až ke dová, syr maró dro fóro končindiape. I Jeriemiéjo jaciápe dre gréda, kaj sys stréga. I šundiá Safatija [Šefatija-ju.o.], čhavó Matanoskiro, i o Godolija [Gedalija-ju.o.], čhavó Pashuroskiro, i Juhalo, čhavó Selemijaskiro (Šelemejaskiro), i Pashoro, čhavó Malhiiakiro’, – lavá, so phendiá proróko Jeriemiéjo saré manušénge, rakirí: ‘Adiáke rakiréla Raj Devél: “Kon jačélape dro davá fóro, odová meréla kurtalátyr, bokhátyr i meribnytkone fransendyr, ne kon džála ke Xaldiéi, odová javéla te dživél: i léskiro džiibén javéla syr počastunko léske, i jov javéla džidó.” ‘Adiáke rakiréla Raj Devél: “Davá fóro, syr phendló, otdelape dre vastá kralískire Vavilonóskire xaladenge, savé léna les.” Paldavá e thagárja phendlé kralíske: “Ame mangasa tut, sob (kaj) te muliakirén adalé manušés, pal-dová so, sóske jov bizorjakirela vastá manušéngire, savé marenape, sob (kaj) te jačénpe dro davá fóro, i vastá saré manušénge, kóli jov rakiréla dasavé lavá lénge? Kadavá manúš na rodéla [na kaméla-r.s.] lačhipén dalé manušénge, a bibáht (bída).” O králi Sedekíia tedy phendiá: “Dykhén, jov isyn dre tumaré vastá. Kralíske naštý ničý te kerél proti tuménde.” Tén'ci jone lyné Jeriemiejos i čhurdyné les dre štaribnytko ĥanbín, saví sys ke Malhiia, kralískiro čhavó, pe gréda (dvóro) štaribnaskiri i jone mekné Jeriemiejos telé šelenca. Dre ĥanbín štaribnaskiri na sys paní, ne jékh bláta (blatany artapiél' ). I lyjá te tasadjol Jeriemiéjo dre bláta. I Avdiemieliého (Ebed-Mieliého) Efioplianino, o jevnuho dro kralískiro kher, šundiá, so jone čhudé Jeriemiejos dre štaribnytko ĥanbín (jama). Kiéli o králi sys beštó pašýl pórta Vienjaminoskiri, to o Avdiemieliého gijá javrí kralískire kheréstyr i phendiá kralíske, rakirí: “Miro Rajo králjo! Kadalé manušá kerdé fuipén dro saró, so jone kerénas, Jeriemiejoske, prorokoske, savés jone čhurdyné dro štaribnytko ĥanbín, i jov meréla pir dová, so isyn bokh pe dová štéto, kaj jov isyn: pal-dová so nane butýr maró dro fóro.” I priphendiá králi Avdiemieliehoske, Efioplianinoske, phení: “Le adathýr trijánda manušén pésa, i ĥazdén upré Jeriemiejos prorokós, štaribnytkone ĥanbinatyr angíl dová, syr jov meréla.” I lyjá Avdiemieliého manušén tel péskiri zor, i jov zagijá dre kralískiro kher tel piralý, i lyjá odothýr phurané patave i phurané idiéngire koterá (kuski), i mekciá len telé pe šele dre štaribnytko ĥanbín. I phendiá Avdiemieliého, Efioplianino, Jeriemiejoske: “Podčhuv phurané patave i phurané idiengire koterá tel phaká, i tel šele.” I kerdiá, Jeriemiéjo adiáke. I jone lyné te tyrden upré Jeriemiejos šelenca i ĥazdyné les javrí štaribnytkone ĥanbinatyr: i jaciápe Jeriemiéjo pe gréda (dvóro) štaribnaskiri. I králi Sedekíia, bičhadiá, sob (kaj) te janén prorokós Jeriemiejos ke pe ke tríto zagiibén dro Kher Ráskire-Devléskiro. I phendiá králi Jeriemiejoske: “Me phučava tútyr vari-so. Na garav nisó mándyr.” I Jeriemiéjo phendiá Sedekijaske: “Kóli me podava zan (zvies') túke, ci na muliakiresa tu man? I kóli me dáva godý túke, ci tu javésa te kandes man?” I králi o Sedekíia dyjá sovláh čorahanés Jeriemiejoske, rakirí: “Te javél džidó Raj Devél, Kon sozdyjá amaré dalé dijá, so me na muliakirava tut, i so me na vydava tut dre vastá manušéngire, savé rodéna tyró di.” Tén'ci phendiá Jeriemiéjo Sedekijaske: ‘Adiáke rakiréla Raj Devél: bolybnáskire-jangoléngiro, Devél Izrailjoskiro: “Kóli tu kokoró péstyr džása muj pe muj ke Vavilonóskire thagárja, to tyró di javéla džidó, i davá fóro na javéla xačkirdo jagása; i tu javésa džidó, i tyró kher. Ne kóli tu na džása muj pe muj ke Vavilonóskire thagárja, to tedy davá fóro javéla dynó dre vastá Xaldiejéngire, i jone xačkirena les jagása, i tu nikaj na keresape (na desape) léngire vasténdyr.’” I o králi Sedekíia phendiá Jeriemiejoske: “Me darava Judeiendyr (Judendyr), savé našné (piriginé) ke Xaldiéi, sob (kaj) e Xaldiei te na vyden man dre vastá léngire, i sob (kaj) jone te na kerén mánca, so jone zakamena.” Ne Jeriemiéjo phendiá: “Jone na vydena tut. Šun, me mangáva tut, zan Ráskire-Devléskiri dro dová, so me phenáva túke, i tyró di javéla te dživél. Ne kóli tu otphenesape te zdespe, to, ake, isyn lav, so Raj Devél sykadiá mánge: ‘Áke, saré džuvlién, savé jačnépe dro kher kralískiro pe Judéia, janéna ke Vavilonóskire thagárja, i kodolé džuvliá phenéna túke: ‘Tyré malá podrakirde tut, i jone lyné upralypén pe túte, tyré ĥerá tasadyne dre bláta (artapiel') I jone risiné krig tútyr.’ I jone lydžána krig tútyr tyré džuvlién i tyré čhavorén Xaldiejenge, i tu nikaj na keresape léngire vasténdyr, ne kralískiro vast Vavilonóstyr léla tut. I tu kerésa adiáke, so davá fóro shačkirena jagása.’” I Sedekíia phendiá Jeriemiejoske: “Mek nijékh te na džinél dalé lavá, i tu na merésa.” Ne kóli te šunén thagárja, so me rakirdjom túsa, i jone javéna ke tu, i phenéna túke: ‘Piride aménge so tu akaná phendián kralíske, i adiáke-pac' dová, so králi phendiá túke; na garav ničý améndyr, i ame na dasa tut pe meribén’, to tu tedy phenésa lénge: ‘Me čhudjom miro mangipén angíl kralíste, sob (kaj) jov te na riskirél man dro Ionafanoskiro kher te na merav odój.’” I saré thagárja javné ke Jeriemiéjo i jone phučné léstyr, i jov phendiá lénge saré odolé lavá, so o králi priphendiá. I jone giné krig léstyr štylés, pal-dová so jone na šundlé, pal so sys rakiribén kralísa. I Jeriemiéjo jačelaspe pe gréda (dvóro) štaribnaskiri angíl/ ke dová dyvés, syr Jerusalimo lyné. I sys jov odój, kiéli lyné Jerusalimo. I sys adiáke: dro déšto čhon, dro jeniáto (bijekhéskiro déšto) berš, kiéli o Sedekíia sys Judejákiro králi, javdiá o králi Navuhodonosóro Vavilonóstyr i saró léskiro xaladybén proti Jerusalimo, i jone občhude trusciál (krugom) fóro. I dro dešupervo berš Sedekijaskiro dro štárto čhon, pe jeniáto (bijekhéskiro déšto) dyvés čhonéskiro, fóro lyné, i saré thagárja Vavilonóskire kralístyr giné andré fóro i bešné pašýl Maškiratuny pórta: o Niergal-Šariecero, o Samgar-Nievo, o Sarsiehimo, šeraló jevnuho, o Niergal-Šariecero, šeraló tanuka, i saré javír thagárja kralískire Vavilonóstyr. I sys adiáke: kiéli o Sedekíia, králi Judejákiro, i javír muršá xaladéngire (maribnýtka) dykhné len, tedy jone lyné te našén, i jone giné javrí foróstyr ratý, kralískire untasa (sadosa) pirdál pórta maškirál duj vánty. I jone giné dromésa pir dólo Jordanoskiro. I xaladybén Xaldiejengiro tradyjape pal lénde dre šale i jone dotradyne les pe loščyny (malia) Jerihonoskire. I kiéli jone lyné les, to jandlé les ke králi Navuhodonosóro Vavilonóskiro ke Rivla pe phuv Jemafo (Xamato), kaj Navuhodonosóro sendiakirdia les. I králi Vavilonóskiro muliakirdiá čhavén Sedekijaskiren angíl léskire jakhá dre Rivla, i králi Vavilonóskiro adiáke-pac' muliakirdiá lačhé-rodoskire ran Judejátyr; i jov phusadia jakhá Sedekijaske i jov phandia les dre sastyrá zandir'jenca te lydžán les ke Vavilóno. I e Xaldiéi xačkirdé kralískiro kher i kherá manušéngire jagása, i jone phagirdé vánty telé Jerusalimóskire. I o Navuzardano, o raj pe kralískiri stréga, lydžijá krig dro pliéno ke Vavilóno manušén, savé jačnépe dro fóro, i kodolén, kon pirigija ke jov javire manušénca, savé jačnépe. Ne o Navuzardano, raj pe kralískiri stréga, mekciá čororé manušén, konéste ničý na sys, pe phuv Judejakiri, i jov dyjá lénge vinagradýtka barja i féldy dro dová-pac' časo. I Navuhodonosóro, králi Vavilonóskiro, priphendiá adiáke pal Jeriemiejoste Navuzardanoske, ráske pe kralískiri stréga: “Le les i dykh pal léste i na ker čoripén léske, ne ker vaš léske adiáke, syr jov priphenela túke.” I bičhadiá o Navuzardano, raj pe kralískiri stréga, i o Navuzardano, šeraló jevnuho, i o Nergal-Šariecero, šeraló tanuka, i saré thagárja Vavilonóskire kralískire, i jone bičhadé i lyné Jeriemiejos štaribnaskire gredatyr (dvorostyr) i jone dyné les Godolijaske, čhavéske Ahakimoskireske (ŭnuko Šafanoskiro), sob (kaj) jov te lel (otlydžal) les kheré. Adiáke jov jaciápe te dživél maškír manušénde. I sys lav Ráskire-Devléskiro Jeriemiejoske, kiéli jov sys phandlo pe štaribnytko gréda (dvóro), rakirí: “Džá i phen Avdiemieliehoske (Eviéd-Mieliehoske), Efioplianinoske: ‘Adiáke rakiréla bolybnáskire-jangoléngiro Raj Devél, Devél Izrailjoskiro: ‘Ake, Me janáva Miré lavá pe davá fóro vaš traš (dar), a na vaš lačhipén, i jone kerénape dro čačipén dro dová dyvés angíl túte! Ne Me zrakháva tut dro dová dyvés,’ – rakiréla Raj Devél, – ‘i tut na vydena dre vastá manušéngire, konéstyr tu daresa. Pal-dová so Me čačes zrakháva tut, i tu na peresa kurtalátyr, ne tyró džiibén javéla syr doresybén (dyibén) túke, pal-dová so tu riskiresa ke Me péskiro iló te zrakhespe’”, – phendiá Raj Devél. Lav, savó sys Jeriemiejoske Rástyr-Devléstyr paló (poslie) dová, syr o Navuzardano, raj pe kralískiri stréga, mekciá les te džal Ramatyr, kiéli jov lyjá les, savó sys phandlo zandir'jénca maškír sarénde, konés lydžiné dro pliéno Jerusalimóstyr i Judejátyr, savén lyné dro pliéno ke Vavilóno. I lyjá raj pe kralískiri stréga Jeriemiejos i phendiá léske: “Raj Devél, tyró Devél phendiá bibáht pe davá štéto. Akaná Raj Devél jandiá daja bibáht i kerdiá adiáke, syr jov phendiá. Pal-dová so tumaré manušá kerdé grého angíl Raste-Devléste i na kandyné Léskiri zan, paldavá davá saró kerdiápe tuménca. I akaná dykh: me mekava pe vólia tut zandir'jendyr, so sys pe tyré vastá. Kóli isyn mištó pir tyrí godý te džas mánca ke Vavilóno, to jav, i me javáva te dykháv pal túte. Ne kóli isyn namišto pir tyrí godý te džas mánca ke Vavilóno, to jačné adái. Dykh, sarí phuv isyn angíl túte; karik túke zdelape mištés i kučes te džas, džá odorík.” Akaná, kiéli Jeriemiéjo iščo (inké) na otphendiá (na gijá krig), o Navuzardano phendiá: “Džá pale ke Godolija [Gedaliah-ju.o.], čhavó Ahikamoskiro (ŭnuko Safanoskiro), konés králi Vavilonóskiro, čhudiá syr barydyrés pe fórja Judejákire, i jačpe te dživés maškír manušénde; ci džá vari-karik te javél kučes túke pir tyrí godý.’ I raj pe kralískiri stréga dyjá léske xabén pe drom, počastunko i mekciá les te džal. I gijá Jeriemiéjo ke Godolija, čhavó Ahikamoskiro, ke Masífa [Micpa-ju.o.] i dživdiá lésa maškír manušénde, savé jačnépe pe doiá phuv. I saré raja pe xaladybena, savé sys pe félda, jone kokoré i léngire manušá, syr šundlé, so králi Vavilonóskiro čhudiá Godolijas, čhavés Ahikamoskires, syr barydyrés pe doiá phuv, i dopatiandyja léske muršén, džuvlién i čhavorén i kodolén naj čororedyr dolé phuvjátyr, savén na lydžiné dro pliéno ke Vavilóno, to jone javné ke Godolija dre Masífa [Micpa-ju.o.]: Ismailo, čhavó Nafanijaskiro, Ioanano i Ionafáno, čhavé Kariejoskire, Seraija, čhavó Fanasmiefoskiro [Tanhumietoskiro-ju.o.]: čhavé Ofiskire (Efajaskire) Nietofafitostyr; i Jezonija, čhavó Maahafitoskiro, jone kokoré i léngire muršá. I o Godolija, čhavó Ahikamoskiro (čhavó Safanoskiro), sovlahadiá angíl lénde i léngire manušénde, rakirí: “Na darén te dynarinén Xaldiejenge. Jačénpe te dživén pe phuv i dynarinén kralíske Vavilonóstyr i saró javéla lačhés tuménca. Ne, ake, me javáva te jačavpe dre Masífa [Micpa-ju.o.], sob (kaj) te rakiráv vaš tuménge angíl Xaldiejende, savé javéna ke ame. Ne tumé keden mol (vino) i lynaskire baritka i maslinitko dzet, čhuvén len dre tumaré pirja, i dživén dre tumaré fórja, savé tumé zalyne.” I adiáke-pac' i saré Judei (Judy), kon sys dro Moávo i maškír Amonitianende, dre Idumeja (Edómo), i dre javír thema, šundlé, so králi Vavilonóskiro mekciá paš Judén, i so jov čhudiá pe lénde Godolijas, čhavés Ahikamoskires (čhavés Safanoskires), i tedy saré adalé Judy risiné saré šteténdyr, ke savé len tradyne, i jone javné ke phuv Judejakiri, ke Godolija dre Masífa, i jone skedyné mol (vino), i lynaitka barjakirdé (plódy) drieván but. I o Ioanano, čhavó Kariejoskiro, i saré rajo xaladéngire, savé sys pe félda, javné ke Godolija dre Masífa, i phendlé léske: “Ci džinésa tu čačipén, so o Vaaliso, králi Amonoskire čhavéngiro, bičhadiá Ismailos, čhavés Nafanijaskires te muliakirél tut?’” Ne o Godolija, čhavó Ahikamoskiro, na patiandyja lénge. Tedy o Iohanano, čhavó Kariejoskiro, phendiá čorahanés Godolijaske dre Masífa, rakirí: “Me mangáva tut te otmekes man te džav te muliakirav Ismailos, čhavés Nafanijaskires, i nijékh (nikón) na javéla te džinél davá. Sóske te des vólia léske te muliakirél tut, sob (kaj) saré Judy, savé kedynepe ke tu, te roznašenpe, i sob (kaj) te xasjol davá otiačyben Judáskire manušéndyr?” Ne Godolija, čhavó Ahikamoskiro, phendiá Ioananoske, čhavéske Kariejoskireske: “Na ker davá réndo; so tu rakirésa pal Ismailoste, – xohaibén!” I sys adiáke, so dro eftáto čhon o Ismailo, čhavó Nafanijaskiro (čhavó Elisamoskiro) kralitkone rodóstyr, i jekh kralískiro baró raj javdiá ke Godolija, čhavó Ahikamoskiro dre Masífa deše manušénca. I odój jone xané maró khetané dre Masífa. I o Ismailo, čhavó Nafanijaskiro, i deš manušá, savé sys lésa, uštyné i pekade pe meribén Godolijas, čhavés Ahikamoskires (ŭnukos Safanoskiros) kurtalása, i zamardé les, konés Vavilonóskiro králi čhudiá šeralé rása pir dová them (strana). I o Ismailo adiáke-pac' pekadiá pe meribén saré Judén, savé sys Godolijasa dre Masífa (Micpa), i Xaldiején, konés jov lathiá odój: maribnytkoné (xaladytkone) manušén. I sys pe javír dyvés paló dová, syr o Ismailo muliakirdiá Godolijas, kiéli iščo (inké) nijékh na džindiá davá, to, kiéli javné manušá Sihemostyr, Silomostyr (Šilostyr) Samarijatyr, ohtodešá manušá muradé čhorenca (brodenca), riskirdé upré idienca, savé počhindle pes. Lénde sys dre vastá svénta dyibená, i dróga smóly, sob (kaj) te janén len dre Kher Ráskire-Devléskiro. I o Ismailo, čhavó Nafanijaskiro, gijá angíl Masifatyr te pirilen len, rovindoj saró drom i, kiéli jov gijá. I sys adiáke: kiéli jov dykhciape lénca, tedy phendiá lénge: “Džán ke Godolija, čhavó Ahikamoskiro.” I sys adiáke: kiéli jone zaginé maškír fóro, o Ismailo, čhavó Nafanijaskiro – jov i manušá, kon sys lésa, muliakirdé len i čhurdyné len maškirál rovo (xohói). Ne deš manušá lathnepe maškirál lénde, savé phendlé Ismailoske: “Na muliakir amen, aménde sys piraliá parné givesa, ĥerstytkone (jačmienytkone) marésa, maslinytkone dzetesa (ksilesa), i javginesa pe félda.” I jov obrikirdia pes i na zamardiá len maškír léngire pšalénde. I rovo (xohói) dro savó Ismailo čhurdyjá trúpy manušéngire, savén jov muliakirdiá pal Godolijaste, isyn dová, so králi Asá kerdiá pir dar Vaasatyr, kralístyr Izrailjoskirestyr: o Ismailo, čhavó Nafanijaskiro pherdiakirdiá rovo (xohói) mulenca. I Ismailo lyjá dro pliéno saré manušén, savé jačnépe dre Masífa, kralískire čhajén, i saré manušén, savé jačnépe dre Masífa, konés Navuzardano, raj pe kralískiri stréga, dopatiandyja Godolijaske, čhavéske Ahikamoskireske: Ismailo, čhavó Nafanijaskiro lyjá dro pliéno len, i gijá péske, sob (kaj) te piridžal ke Amonoskire čhavé. Ne, kiéli Iohanano, čhavó Kariejoskiro (Karieahoskiro), i raja xaladéngire, savé sys lésa, šundlé pal sarí bibáht, so kerdiá Ismailo, čhavó Nafanijaskiro, to jone lyné saré manušén i giné te marénpe Ismailosa, čhavésa Nafanijaskiresa; i jone lathné les pašýl baré paniá, so syn dro Gavaóno. I sys adiáke: kiéli saré manušá, kon sys Ismailosa, dykhné Iohananos, čhavés Kariejoskires, i saré ran xaladengiren, savé sys lésa, jone jačné ráda. Tén'ci saré manušá, savén o Ismailo lydžijá dro pliéno Masifatyr, risiné krig i javné pale, i giné ke Iohanano, čhavó Kariejoskiro. Ne Ismailo, čhavó Nafanijaskiro, nascia Iohananostyr ohtone manušénca i gijá krig ke čhavé Amonoskire. Tén'ci Iohanano, čhavó Karejaskiro, i saré raja xaladéngire, savé sys lésa lyné sarén, konés jov riskirdiá pe vólia Ismailostyr, čhavestyr Nafanijaskirestyr, paló dová, syr jov muliakirdiá Godolijas, čhavés Ahikamoskires muršén maribnytkonen, džuvlién i bijatén, i jevnuhen, savén jov jandiá pale Gavaonostyr. I giné jone i jačnépe te dživén dro gav Ximamo, savó isyn pašýl Vifliejémo, sob (kaj) te javél pe drom lénge te našén ke Jegípto, Haldiejendyr, pal-dová so jone darándyne léndyr, pir dová, so Ismailo, čhavó Nafanijaskiro, muliakirdiá Godolijas, čhavés Ahikamoskires, konés králi Vavilonóskiro čhudiá šeralé rása pe doiá phuv. I saré raja xaladéngire, i Iohanano, čhavó Karejaskiro, i Iiezanija (Jezanija), čhavó Gošaijaskiro, i saré manušá tyknestyr ke sámo baredýr giné pašýl, i phendlé Jeriemiejoske, prorokoske: “Ame mangasa zoralés tut, sob (kaj) te perél angíl túte amarí pátieri (molítva), i, sob (kaj) tu te pomangespe pal aménde Ráske-Devléske, tyré Devléske, pal sarénde, savé jačnépe, pal-dová so butendyr jaciápe drieván nábut (kutý) améndyr, syr tu dykhésa, sob (kaj) Raj Devél, tyró Devél, mek te sykavél aménge drom, savésa trej te džas i dová, so aménge te kerás.” I phendiá lénge proróko Jeriemiéjo adiáke: “Me šundjom. Ake, me javáva te mangavpe Ráske-Devléske, tumaré Devléske pir tumaré lavá: i sob (kaj) te na javél, so Raj Devél otphenéla tuménge, dová me phenáva angíl sarénde tuménge: me nisó na garavava tuméndyr.” Tén'ci jone phendlé Jeriemiejoske: “Mek Raj Devél te javél čačunó i patiaibnaskiro jakhítko maškír aménde, kóli ame na javása te kerás pir lav, savó Raj Devél, tyró Devél, bičhavéla ke ame. Sob (kaj) te na javél: lačhó ci bibáht, ame javása te šunas zan Ráskire-Devléskiri, amaré Devléskiri, ke Kon ame bičhadiam tut, sob (kaj) te javél saró mištó aménca, kiéli ame javása te kandas zan Ráskire-Devléskiri, amaré Devléskiri.” I davá sys paló deš dyvesá, so lav Ráskiro-Devléskiro javdiá ke Jeriemiéjo. I jov khardiá ke pe Ioananos, čhavés Kariejoskires, i saré ran xaladengiren, kon sys lésa i saré manušén naj tyknestyr ke naj baredýr (sámo baró), i phendiá lénge: “Adiáke rakiréla Raj Devél, Devél Izrailjoskiro, ke Savó tumé bičhadé man te čhuvav tumaró mangipén angíl Léste: Kóli tumé jačénape pe daja phuv, tedy Me ĥazdáva pe phuv tumen i občhuvava tumaró džiibén i Me na vyriskirava [muliakirava-r.s.] tumen: pal-davá so Me piridživava pal doiá bída, saví Me kerdjom tuménge. Na darén Vavilonóskire kralístyr, savéstyr tumé daréna, na darén léstyr’, – rakiréla Raj Devél, – pal-dová so Me som tuménca te zrakhav tumen i te vyrakhav tumen léskire vastéstyr. I Me sykaváva tuménge tangipén (láska), sob (kaj) jov, xaj, te potanginel tumen, i te riskirél tumen pe tumarí phuv.’ Ne kóli tumé phenéna: ‘Ame na lása (kamasa) te dživás pe daja phuv’, sob (kaj) te na kandén zan Ráskire-Devléskiri, tumaré Devléskiri, rakirí: ‘Nad, ame fedýr džása ke phuv Jegiptóskiri, kaj ame na javása te dykhas maribén, i te na šunas rogoskiri zan, i te na javas bokhalé pe maró, i, odój ame javása te dživás,’ to akaná šunén lav Rástyr-Devléstyr, tumé, savé jačnépe Judastyr! ‘Adiáke rakiréla bolybnáskire-jangoléngiro Raj Devél, Izrailjoskiro Devél: Kóli tumé sarésa riskirdé péskire muiá te džán dro Jegípto, i džána te dživén odój, to javéla adiáke, so kurtála, savjátyr trašavena (daréna) tumé, doreséla (lathéla) naužakirdes tumen odój pe phuv Jegiptóskiri; baró bokhalypen, savéstyr tumé daréna, javéla te džal pal tuménde pal psiké odój, dro Jegípto, i odój tumé meréna. I javéla adiáke, so saré manušá, savé riskirena péskire muiá te džán ke Jegípto, sob (kaj) te dživén odój, meréna kurtalátyr, bokhátyr i meribnytkone fransendyr, i nijékh léndyr na jačélape, i nikaj na kerlape baré bibahtiatyr (bidatyr), so Me janáva pe lénde.’ Paldave adiáke rakiréla bolybnáskire-jangoléngiro Raj Devél, Izrailjoskiro Devél’: ‘Syr mirí xolý i miro xoliakiribén čhuvélape pe manušénde Jerusalimóstyr, adiáke-pac' vyčhuvelape Mirí xolý pe tuménde, kiéli tumé džána andré Jegípto; pe tuménde javéla prokošybén (arman), bari dar [čhučipen-ju.o.], košybén, bipatyv; i tumé butýr na dykhéna davá štéto’” Raj Devél phendiá tuménge: “Tumé, savé jačnépe Judastyr: na džán ke Jegípto:” Saré džinéna, so me, Jeriemiéjo, sykliakirdjom tumen te prirakhenpe pal davá dyvés. Pal-dová so tumé xohade pes dre tumaré ile, kiéli tumé bičhadé man ke Raj Devél, tumaró Devél, phení: “Pomangpe pal aménde Ráske-Devléske, amaré Devléske: i saró, so Raj Devél, amaró Devél phenéla, to tu phenésa angíl sarénde – i dová ame javása te kerás.” I me phendjom davá akaná adadyvés tuménge, ne tumé na kandyné zan Ráskire-Devléskiri, tumaré Devléskiri i saró dová, sósa Jov bičhadiá man ke tumé. Akaná paldavá džinén adiáke, so tumé meréna kurtalátyr, bokhátyr i meribnytkone fransendyr pe dová štéto, ke savó tumé kaména te džán te dživén.’” I sys adiáke: kiéli Jeriemiéjo pirijaciá (končyndia) te rakirél angíl saré manušénde saré lavá Ráskire-Devléskire, léngire Devléskire, savénca Raj Devél, léngiro Devél, bičhadiá les ke jone – saré dalé lavá, to Azárija, čhavó Osaijaskiro (Gosaijaskiro); Iohanano, čhavó Kariejoskiro i saré phut'kirdé manušá, phendlé Jeriemiejoske: “Tu rakirésa načačipén! O Raj Devél, amaró Devél, na bičhadiá tut te phenés: ‘Na džán ke Jegípto te dživén odój!’ Ne davá isyn Varuho, čhavó Nirijaskiro, kon podrakirela tut proti aménde, sob (kaj) te vydes amen dre vastá Xaldiejengire, sob (kaj) jone, te muliakirén amen, ci te lydžán krig dro pliéno ke Vavilóno.” Ake, o Iohanano, čhavó Kariejoskiro, i saré raja xaladéngire i saré manušá, na kandyné zan Ráskire-Devléskiri, sob (kaj) te jačénpe te dživén pe phuv Judejakiri. Ne Ioanano, čhavó Karejaskiro i saré raja xaladéngire, lyné sarén, savé jačnépe Judejátyr, kon na risiné te jačénpe te dživén pe Judejakiri phuv, saré Najudytkoné nacyiéndyr, ke savé len tradyne – muršén, džuvlién, bijatén, kralískire čhajén i kažnoné (svakone) manušés, konés o Navuzardano, raj pe kralískiri stréga, jačkirdiá Godolijasa, čhavésa Ahikamoskiresa (unukosa (niepotosa) Šafanoskiresa), i Jeriemiejos, prorokós, i Varuhos, čhavés Nierijaskires. I jone giné ke phuv Jegiptóskiri, pal-dová syr jone na kandyné zan Ráskire-Devléskiri. I jone doginé ke Tafniso [Tafanhiéso-ju.o.]. I sys dro Tafniso lav Rástyr-Devléstyr ke Jeriemiéjo, rakirí: “Le baré bará dre vastá péskire i garav len dre ĥleja (glina) dro bar, savó isyn pe štéto, syr džása andré kher Faraonóskiro pe jakhá saré Judéngire, i phen lénge: ‘Adiáke rakiréla bolybnáskire-jangoléngiro Raj Devél, Devél Izrailjoskiro: Áke, Me bičhaváva i lavá Navuhodonosoros, kralís Vavilonoskires, Miré pisharís, i Me čhuváva léskiro trono pe kadalé bará, savé Me garadjom. I jov rosčhuvela pir rigá péskiri kralítko bari šátra uprál pe lénde. I javéla jov i rozmarela phuv Jegiptóskiri, kon isyn bangó te merél, džála pe meribén, kon bangó dro pliéno, džála dro pliéno, kon bangó tel kurtála, džála tel kurtála. Me roshačkirava jag dre kherá, pe mangipnytka štéty, kaj devloré Jegiptóskire, i o Navuhodonosóro shačkiréla len i léla len dro pliéno. I jov vykedéla mištypén phuvjátyr Jegiptoskirjatyr syr o čhupnári vykedéla (ur'jéla) pe péste péskiro uribén, i jov džála krig odothýr ramanjosa (spokojosa). Jov phagiréla telé obsvencona stýlby (statuly) dro Befsamiso (Bef-Semesa), so isyn pe phuv Jegiptóskiri, i mangipnytka (devlorengire) štéty dro Jegípto jov xačkiréla sarésa jagása.’” Lav, savó sys Jeriemiejoske pal saré Judénde, kon dživdiá pe phuv Jegiptóskiri, savé jačné te dživén ke Magdola [Migdola-ju.o.], i dro Tafniso (Tafaniesa), dro Nofo, i pe phuv Pafrososkiri, rakirí: “Adiáke rakiréla bolybnáskire-jangoléngiro Raj Devél, Devél Izrailjoskiro: ‘Tumé dykhné sarí bibáht (bída), so Me jandjom pe Jerusalimo i pe saré fórja Judejákire; i, ake, dalé fórja isyn čhučé (pusta), i nijékh (nikón) na dživéla odój, pal léngire fuj réndy, savé jone kerdé, sob (kaj) te den jag Miré xoliake pir dová, so jone psirdé te xačkirén dróga smóly i te dynarinén javire devlorénge, savén jone na džindlé, ni tumé, ni tumaré dadá. Ne Me bičhavavas ke tumé saré Miré pishar'jén, prorokén, tasiárles (ránes) zlokostyr Me bičhavavas len, sob (kaj) te phenén tuménge: ‘Na kerén dalé džungalé réndy, so Me drieván na kamám!’ Ne tumé na kandyné, i na pričhude péskiro kan, sob (kaj) te risjon krig péskire fuipnastyr, sob (kaj) te na xačkirén dróga smóly javire devlorénge. Paldavá Miro xoliakiribén i Mirí xolý vyčhudepe i roshačine dre fórja Judejákire i pe vulícy (gásy) Jerusalimóskire; i jone isyn čhučé i bi manušéngire, syr isyn davá adadyvés. I akaná – adiáke rakiréla Raj Devél, bolybnáskire-jangoléngiro Devél, Devél Izrailjoskiro: ‘Vaš (pal) so tumé keréna daja bari bibáht proti péste, sóske tumé keréna adiáke, sob (kaj) te xasjon tumaré muršá i džuvliá, bijaty i tyknemasa, sob (kaj) te na jačélpe nijékh Judejátyr, vaš so tumé déna jag Miré xoliake (xoliakirena Man) butiénca tumaré-vastengire, kiéli tumé xačkirena dróga smóly javire devlorénge pe phuv Jegiptóskiri, pe saví tumé giné te dživén, sob (kaj) te xasjon tumé (xasiakirén pes) i, sob (kaj) maškír saré nácyi pe phuv te javél prokošybén (arman) i bipatyv ke tumé? Ci bistyrde tumé fuipén tumaré-dadéngiro, fuipén kral'jéngiro Judejátyr, fuipén léngire-romniengiro do-sámo fuipén, so tumé kokoré kerdé, i fuipén, so tumaré džuvliá kerdé pe phuv Judejakiri i pe vulícy (gásy) dro Jerusalimo. Tumé ke adadyvés na tykniakirde pes, na lyné te darén, tumé na kerdé pir Miro Zakóno ci pir Miré statúty, savé Me dyjom tuménge i tumaré dadénge. Paldavá – ake, so rakiréla bolybnáskire-jangoléngiro Raj Devél, Devél Izrailjoskiro: “Ake, Me riskiráva Miro muj proti tuménde vaš bibáht, i vaš xasiban Judejákiro. I Me láva kodolén, savé jačénape Judejátyr, sob (kaj) jone te riskirén péskire muiá te džán pe phuv Jegiptóskiri te dživén syr čúža; odój jone xasjona saré i lénge javéla xasibén pe phuv Jegiptóskiri. Jone xasjona kurtalátyr i bokhátyr. Jone meréna, tyknestyr ke naj baredýr kurtalátyr, bokhátyr, i pe tuménde javéla prokošybén i dívo trašasa (trašaibén), prokošybén i bipatyv. I Me pharés sendiakirava len, savé dživéna pe phuv Jegiptóskiri, adiáke-pac' syr Me pharés sendiakirdjom Jerusalimo kurtalása, bokhasa, i meribnytkone fransenca; sob (kaj) nijékh, kon jačélape Judejátyr, savé javné pe phuv Jegiptóskiri te dživén odój syr čúža, te na kerenpe nikaj, i te na vydžidjon, sob (kaj) te risjon pale pe phuv Judejakiri, ke saví léngiro iló marelape te risjon pale i te dživén: nikón na risjola pale apríč odolénde, savé našéna.” Tén'ci saré muršá, savé džindlé, so léngire romniá, xačkirdé dróga smóly javire devlorénge, i saré džuvliá, kon sys terdé pašýl, but len, i saré manušá, savé dživdé pe phuv Jegiptóskiri ke Pafroso, otphendlé Jeriemiejoske i phendlé: “So kasynelape lav, so tu phendián aménge Ráskire-Devléskire lavéstyr, ame na javása te šunas davá lav tútyr! Ne ame, čačes javása te kerás pir kažno lav, so ame phendiam péskire čibása: te xačkiras dróga smóly bolybnytkone devlorjake i te čhuvas láke thadune svénta dyibená, syr ame kerdiám: ame i amaré dadá, amaré králja i amaré thagárja dre fórja Judejákire i pe vulícy (gásy) Jerusalimóskire. Paldavá aménde sys but maró, aménge sys mištés, i ame na dykhciam bibáht. Ne syr féni (tóka) ame mekciam te xačkiras dróga smóly bolybnytkone devlorjake, i te čhuvas láke thadune svénta dyibená, aménge jaciá te na uhtylel (te na javél dósi) saró, i ame xasjovasa kurtalátyr i baré bokhátyr.” E džuvliá iščo (inké) phendlé: “I kiéli ame xačkirdiam dróga smóly devlorjake bolybnytkonake i čhudiam láke thadune svénta dyibená; ci ame kerdiám mariklia lákire mósa, ci čhudiam thadune svénta dyibená láke, sob (kaj) te na džinén amaré romá?” Tén'ci phendiá Jeriemiéjo angíl saré manušénde-muršende, džuvliénde, i saré javír manušénde, savé léske otphendlé adiáke, rakirí: “Ci davá isyn na dróga smóly, so tumé xačkirdé dre fórja Judejákire i pe vulícy (pe gásy) Jerusalimóskire, tumé i tumaré dadá, tumaré králja i tumaré thagárja, manušá dalé phuvjákire? Ci so davá Raj Devél na ripirdia len, ci xaj, na javdiá davá Léske pe godý? I Raj Devél butýr na délas ráda te vyrikirel davá pir doiá bibáht, so tumé kerdé i pir džungalé (brydka) réndy, so tumé kerdé. Paldavá tumarí phuv isyn čhučí, dívo trašasa, prokošybén (arman), bi manušéngiri, syr davá isyn ke adadyvés.” Pal-dová so tumé xačkirdé dróga smóly i pal-dová so tumé kerdé gréhi proti Raste-Devléste, i tumé na kandyné zan Ráskire-Devléskiri, i na kerdé pir Léskiro Zakóno, ci pir Léskire statúty, ci Léskire uphenybená, paldavá daja bari bibáht (bída) kerdiápe tuménca, syr davá isyn ke adadyvés.” I phendiá Jeriemiéjo saré manušénge, i saré džuvliénge: “Šunén lav Ráskire-Devléskiro, saré – Judejákire manušá, savé dživéna pe Jegiptóskiri phuv: adiáke rakiréla Raj Devél, Devél Izrailjoskiro, phení: ‘Tumé i tumaré džuvliá rakirdé péskire ušténca i kerdé péskire vasténca, phení: ‘Ame čačes, lása te kerás pir amaré sovlahá, so ame dyjam – te xačkiras dróga smóly bolybnytkone devlorjake i te čhuvas thadune dyibená láke.’ Tumé zoralés rikirenape ke tumaré sovlahá i keréna pir tumaré sovlahade lavá.’ Pal-davá šunén lav Ráskire-Devléskiro, saré Judejákire manušá, savé dživéna pe Jegiptóskiri phuv: ‘Ake, Me sovlahadjom Miré baré lavésa’, – rakiréla Raj Devél –, sob (kaj) Miro lav te na phenél butýr nijékh manúš Judejátyr, kon dživéla pe Jegiptóskiri phuv, phení: ‘Te dživél Raj Devél, Devél.” Ake, Me javáva te dykháv pe tuménde ke bibáht, a na vaš lačhipén: saré manušá Judejátyr, savé isyn pe phuv Judejakiri javéna te xasjon kurtalátyr, i baré bokhátyr angíl dová, syr javéla kónco (jagóro) lénge. Ne kodolé nábut manušá, savé našéna kurtalátyr, risjona pale ke phuv Judejakiri phuvjátyr Jegiptóstyr, i saré, kon jačélape Judejátyr, savé giné pe phuv Jegiptóskiri te dživén odój syr čúža, udžinena, koneskire lavá risjona dro čačipén, Miré ci léngire. “I javéla ĥiertýk (znamiénijo) tuménge’, – rakiréla Raj Devél – so Me pharés sendiakirava tumen pe dová štéto, sob (kaj) tumé te džinén, so Miré lavá risjona dro čačipén pal tuménde pe bibáht tumarí.’ ‘Adiáke rakiréla Raj Devél: ‘Áke, Me vydava faraonos Vafrijos [Xofras-ju.o.], kralís Jegiptoskires dro vastá léngire-vergéngire, savé rodéna léngiro di, syr Me vydyjom Sedekijas, kralís Judejakires, dro vast Navuhodonosoroskire, kralíske Vavilonoskireske, savó sys vérgo Sedekijaske i, kon rodyja léskiro di.’” Lav, savó rakirdiá proróko Jeriemiéjo Varuhoske, čhavéske Nirijaskireske, kiéli o Varuho čhindiá dalé lavá dre lylvarí Jeriemiejoskire čibatyr pe štárto berš Ioakimoskiro (čhavó Iosijáskiro), kon sys králi pe Judéia, phení: “‘Adiáke rakiréla Raj Devél, Devél Izrailjoskiro’ – túke, Varuho: ‘Tu phendián: ‘Bida pe mánde akaná! Pal-dová so Raj Devél dočhudia dukh tugasa ke iló. Me som khiniakirdo miré ĥondiendyr (ŭzdohendyr) i me naštý (na mogináva) te lathav otkhinyben.’” Ne tu phen Varuhoske adiáke: “Adiáke rakiréla Raj Devél: ‘Ake, so Me čhudjom, dová Me phagirava telé, i so Me počhudjom dre phuv, dová Me vyriskirava, – davá isyn sarí daja phuv.’ Tu mangesa (rodesa) baré l'goty vaš péske? Na mang len, pal-dová so, ake, Me janáva bibáht (bída) pe kažno (sváko) loč (plot'), – rakiréla Raj Devél: Ne Me dáva tyró džiibén (otmekáva tut džidesa) túke syr doresybén pe saré štéty, karik tu na džása.’” Lav Ráskire-Devléskiro, savó javdiá Jeriemiejoske, prorokoske, pal Najudýtka nácyi. Pal Jegípto, pal xaladybén Faraonóskiro Niehajoskiro, kralískiro Jegiptóskiro, savó o Navuhodonosóro, králi Vavilonóskiro rozmardiá pašýl reka (len') Jevfrato dro Karhamiso dro štárto berš Ioakimoskiro (čhavó Iosijáskiro), kon sys králi pe Judéia: “Kerén ščýty i čhurdypnytka bustiá (kop'i) i džán pašyledýr ke maribén! Den andré i bešén uklisté, xaladé pe grénde! Terdjon angíl dre péskire šljomy, den čol (vojstrinen) čhurdypnytka bustiá, ur'jen pe péste sastruno kolynd. Sóske, Me dykháva, jone pyné dro dúho (fáno) i risiné pale? Léngire zoralé muršá domardé; jone adiáke sýges našéna krig, so jone na risjona mósa pale? Pal-dová so isyn dar pe kažno rig,” – rakiréla Raj Devél. I na našela krig sýgno xalado, i na kerélape nikaj zoraló murš. Jone obštavenape i peréna odój, kaj paš-ratítko (sievierno) rig, pašýl reka (len') Jevfrato. “Kon davá uštéla syr reka (len') Nilo, a léskire paniá vučés kuninenape syr sygna rekicy? Davá isyn Jegípto, so uštéla syr reka (len'), i léskire paniá vučés kuninenape syr sygna rekicy; i Jegípto rakírla: ‘Me uštava i učhakirava phuv, me rozmarava pe koterá fóro i manušén, kon dživéla dre davá fóro.’ Bešén pe grénde, i tradén so isyn zor maribnytkoné vurdenenca, i mek zoralé muršá te džán angíl: zoralé manušá, Jefiopliani (Kušytka) i Livijani (Putitka) manušá, savénde isyn ščýty, i Lidiani (Ludimitka) manušá, savé rikirna lúko i nadtyrdena les. Pal-dová so davá isyn dyvés Ráskire-Devléskiro, bolybnáskire-jangoléngiro dyvés, so Raj Devél riskiréla (otdéla) pale fuipén, sob (kaj) te othal (otdél) pale (riskirél fuipén) pe Péskire vergénde. E kurtála javéla te čhinel i joj čaljola, i joj matjola léngire ratestyr. Pal-dová so Raj Devél, bolybnáskire-jangoléngiro Devél priléla svénto dyibén dre paš-ratítko (sieviérno) phuv pašýl reka (len') Jevfrato. Džá upré pe Galaádo (Gilieado), i le pésa bal'zamo, e patyvalý terný džuvlý, čhaj Jegiptóskiri! Ivjá (naprásnes) tu butýr prilesa draba: tu na javésa sastiakirdy. Najudýtka nácyi šundlé pal tyrí ladž, i tyró roviben pherdiakirdiá phuv: pal-dová so zoralé muršá obštadepe (pekadepe) jekh pir javiréste: jone pyné khetané.” Ake, isyn lav, so Raj Devél phendiá prorokoske Jeriemiejoske, pal kralíste Navuhodonosoroste Vavilonóstyr, savó javéla i rozmarela phuv Jegiptóskiri: “Poden zan (zvies') dro Jegípto, i phenén sarénge dre Migdola; phenén sarénge dre Nofa i dro Tafniso; phenén lénge: ‘Terdjon murškanés i javén skedyné (skedénpe), pal-dová so kurtála čingirela saró pašýl túte.’ Sóske bidaripnaskire muršá pyné domardé? Jone na déna ráda te terdjon dre stonka, pal-dová so Raj Devél tradyjá krig len. Raj Devél kerdiá adiáke, so but lyné te obštavenpe, čačó, i te perén jekh pe javiréste, i jone phendlé: ‘Uštén, i javén risjovasa ke amaré manušá, i pe amaré-manušéngiri phuv kurtalátyr, saví domarela amen.’ Odój jone déna gódla: ‘Faraóno, králi Jegiptóskiro, jekh šumo isyn léstyr: jov promekcia uphendló časo.’ “Te dživáv Me,” – rakiréla Králi, Konéskiro lav isyn bolybnáskire-jangoléngiro Raj Devél, “syr adiáke-pac' isyn Favoro maškír bérgi, i syr isyn Karmilo pašýl mórjo (derjáv), adiáke javéla králi Vavilonóskiro. Tu, čhaj Jegiptóskiri, kon dživéla dre léste, skéde péske klunki te džas dro pliéno, pal-dová so Novo (Nofa) jačélape čhučó, adiáke so nijékh manúš na javéla te dživél dre léste. “Jegípto isyn sýrby drieván ĥožo reca (tjolka), ne javéla xasibén, paš-ratitkoné rigátyr javéla, Adiáke-pac' Jegiptóskire rulde (prilyme xaladé) isyn maškír daja phuv sýrby thule guruva, jone adiáke-pac' risiné pale, jone našné khetané, jone na vytyrdine dre stonka. Léngiro xasibnýtko (bibahtiakiro) dyvés javdiá, javdiá séndo pe lénde. Jegiptóskiri zan javéla šundly syr pašaibnaskiro sap, savó sipinela, pal-dová so léskire vérgi džána xaladybnasa, i jone javéna pe léste toverenca – sýrby čingiribnaskiro (drovosiéko) dro veš. Jone vyčingirena léskiro veš,” – rakiréla Raj Devél, – “savó ĥensto jov te na javél, pal-dová so len naštý te poginen, i len isyn butýr syr phakitka skočki (grastore). E čhaj Jegiptóskiri isyn ladžakirdy, la vydena dre vastá manušéngire paš-ratitkoné (sieviernone) rigátyr.” Bolybnáskiro-jangoléngiro Raj Devél, Devél Izrailjoskiro rakiréla: “Ake, Me janáva pharó séndo pe Amono dro No, i pe Faraonoste dro Jegípto léngire devlorenca i léngire kral'jénca – faraonos i kodolén, savé garadjona pal léste. I Me vydava len dro vastá odolengire, savé rodéna léngiro di, dro kralískiro Navuhodonosoroskiro Vavilonóstyr i dro vastá léskire dynar'jengire. Ne paló davá manušá javéna te dživén dro Jegípto syr dre ĥaratuné dyvesá”, – rakiréla Raj Devél. “Ne tu na dar, o Miro pishári, Jakovo, I tu na zaphadjov dro dúho (fáno), o Izrailie! I, ake, Me zrakháva tut duripnastyr i tyró ródo phuvjátyr, kaj jone isyn dro pliéno; Jakovo risjola, otkhinjola i javéla vól'no; i nikón na trašakirela les.’ Na dar, Miro pishári, Jakovo’, – rakiréla Raj Devél, – ‘Me som túsa; pal-dová so Me xasiakiráva saré nácyi, ke savé Me tradyjom tut; ne Me na xasiakiráva tut, ne Me pirisykliakirava tut pir miéra, i Me saroiekh na mekava tut bi sendoskiro.” Lav Ráskire-Devléskiro, savó sys prorokoske Jeriemiejoske pal Filistimijákire manušénde angíl dová, syr faraóno pyjá (rozmardiá) Gaza. Adiáke rakiréla Raj Devél: “Ake, paniá ĥazdénape paš-ratitkoné (sieviernone) rigátyr i jačénape syr tasadypnaskiro paning; jone začhuvena paniésa phuv i saró, so isyn pe láte: fórja, i odolén, kon dživéna dre lénde. Manušá javéna te rovén, i saré džiibnáskire pe phuv javéna te tuginen (te rovén) jasvénca. Kiéli javéla šundlo lopotymo (topoto) petalendyr zoralé-grengiren, kiéli javéna te grukinen léskire maribnýtka vurdená, kiéli javéna te gryminen léskire róty, so dadá až na podykhena pale pe péskire bijatende, pir dová, so léngire vastá isyn bizorjákire. Pal-dová so javéla dyvés te vymaren saré Filistimlianen, te jačkiren Tíro i Sidono sarésa bi pomogibnaskiro, savé jačénape. Raj Devél jačkiréla nisosa Filistimlianen, savé jačnépe ostrovostyr Kaftorostyr. Gaza jačéla bibalengiri, Askalono [Aškielono-ju.o.] xasjola, – dová, so jačélape léngire dolostyr? Syr ĥará tu javésa te čhines pes dre túga? O, kurtála Ráskire-Devléskiri? Syr ĥará (dlúges) tu na javésa te pasjos tiho (štyljos)? Risjov pale dre péskiri nožna? Pirijač (otkhinjov) i jav štyl! Ne syr joj moginéla te pirijačel (otkhinjol)? – Kóli Raj Devél priphendiá proti Askalono i proti brégo morjoskiro (derjavéskiro)? Odój Jov priphendiá kurtalake te čingirel.” Proti Moávo. Adiáke rakiréla bolybnáskire-jangoléngiro Raj Devél, Devél Izrailjoskiro: “Bida foroske Niévo: Pal-dová so jov isyn phagirdó, Kariafaimo isyn ladžakirdó i lynó; Mizgavo isyn ladžakirdó i phagirdó. Butýr na javéna te šarén Moávo, a dro Jesievóno [Hieševono-ju.o.] priduminena bibáht proti davá štéto, rakirí: ‘Javén, sob (kaj) aménge te xasiakiras les syr manušýtko nacyja.’ I tu adiáke-pac', Madmiéna, xasjosa [pirijačesa te javes-r.s.], kurtála dotradela tut. Zan roibnaskiri javéla šundly Oronaimostyr: ‘Bedypen (bída) i xasibén’ isyn baró! Moávo isyn phagirdó dre ruíny, léskire bijaty (čhavoré) godlena, so isyn šundlo. Pal-dová so roibén džála lénca, kiéli jone džána upré pe štéto Luhito; kiéli jone džána telé Oronaimostyr, jone rovena pal bedypen (čororipen). Našén, zrakhen péskiro džiibén! Javén sýrby dová xrústo pe čhučí mal (stiep). Pir dová so tu, Moávo, dopatiandyjape zoralés dre péskire butiá i péskire kučipena, tut adiáke-pac' léna, i Xamoso džála dro pliéno, léskire rašaja i léskire thagárja khetané. Rozmaribnaskiro javéla pe kažno fóro, so nisavó fóro na jačélape célo (zrakhno), i dólo xasjola, i rovno félda xasiakirena [iavéla čhučí-r.s.]: – adiáke, syr i phendiá Raj Devél. Den phaká Moavoske, sob (kaj) jov moginelas te vurnial krig, pal-dová so léskire fórja javéna čhučé, nijékh na javéla te dživél dre lénde. “Te javén prokošybena (armania) pe kodoleste, kon keréla Ráskire-Devléskiri butý biileskiro, te javél prokošybén pe kodoleste, kon obrikirela Péskiri kurtála ratestyr! Moávo sys usady / sak (vsiegda) vol'none péskire ternypnastyr i jov sys čhudo pe péskiro xumer (droždžy); les na piričhuvenas jekhe pirjatyr dro javír; sýrby mol (vino); – jov nijékhvar na sys dro pliéno: paldavá léskiro smako jačélape dre léste, i léskiro lačhó khandypen na parudiape. Paldavá, ake, javéna dyvesá’, – rakiréla Raj Devél, – ‘so Me bičhaváva manušén ke Moávo te piričhuven les syr mol (loly bravinta). Jone čhučakirena Léskire khoré (sasúdy) i phagirena pe koterá léskire štekly. I javéla Moávo ladžakirdó pal Xamoso, syr i kher Izrailjoskiro sys ladžakirdó pal Viefil', dro so manušá Izrailjostyr zoralés patiandyné.’ Syr da tumé rakiréna: ‘Ame sam zoralé, i ame sam muršá te maraspe?’ Moávo ž isyn rozmardo dre ruíny, i léskire for'jéndyr džála thuv, a léskire vykedyné manušá giné tel kurtála pe meribén te čhinen len, – rakiréla Králi, Konéskiro Lav isyn Raj Devél, bolybnáskire-jangoléngiro. Bari bída peréla syg pe Moávo, i bibáht (xasibén) prastala sýges pe léste. Tanginen jasvénca les, saré, kon isyn pašýl léste, i saré, kon džinéla léskiro lav, phenén: ‘Savó zoraló destó isyn phagirdó, saví šukár khija sys!’ Džá telé slavutnone štetóstyr, i beš smegasa te p'jel, čhaj Divonoskiri, kon dživéla dro dová fóro. Rozmaribnaskiro pe Moávo javdiá pe túte, jov rozmarela pe koterá tyré zoralé vánty (tvárdymi). Tu, saví dživesa ke Aroiéro, terdjov pašýl drom i dykh ciamkes. Phučpe léstyr, savó našela, i phučpe látyr, saví rakhelape, i phen: ‘So kerdiápe?’ Moávo ladžakirdó, pal-dová so jov phagirdó pe bará, rov zoralés i de gódla! Phen davá dro Arnono, so Moávo isyn phagirdó ke phuv. I séndo javdiá pe loščyny, savó isyn pe roŭno félda: pe Xalono, pe Jaca, pe Mofafo (Miefa), i pe Divono, i pe Novo, i pe Biet-Divlafaimo; i pe Kariafaimo, i pe Biet-Gamulo; i pe Biet-Maono; i pe Kieriofo, i pe Vosoro (Bocra), i pe saré fórja pe phuv Moavoskiri, duratuné i pašatuné! Moavoskiri zor syr šyng (rógo) isyn čhurdynó te xasjol, i léste vast sýrby isyn phagirdó” – rakiréla Raj Devél. “Matiakiren les, pal-dová so jov ĥazdyjá pes pe Raste-Devléste; i Moávo javéla te ravelpe dre péskiro čhadypen i manušá léna davá štéto pe dand te sanpe (kokoró javéla prosandlo).’ Ci tu, Moávo, na lyjan Izrailjo pe dand, sob (kaj) te saspe? Ci na otlydžasaspe tu ke Izrailjo, sýrby ke čor? So tu kuninesa šerésa but móly, kiéli rakirésa pal léste? Tumé, savé dživéna ke Moávo, jačkiren fórja i dživén pe skaly. Javén sýrby golumby, savé keréna gniázdy (kúfy) pe skalakire rigá, kaj zadžána dre gebar (pieščera). Ame šundiám pal phut'kiribén Moavoskiro: jov isyn drieván phut'kirdo – léste isyn vučí mina pe muj, – jov barjakiréla pes, – jov phutjola, – i jov duminéla vučés pal péste dro péskiro iló. Me džinóm léskiro xoliakiribén’ – rakiréla Raj Devél, – ‘léskiro rakiribén isyn čhučó, léstyr nisó na vydžála čačunó. Paldavá Me javáva te rovav zoralés pal Moávo, i Me javáva te dav gódla pal sarénde Moavostyr; Me javáva te tuginav jasvénca pal manušénde Kir-Xariesostyr. O vinagrádniko dre Siévma! Me javáva te rovav butýr pal túte syr pal Iaziéro (Jazero): tyré otbarjakiribena piribarine mórjo (derjáv), jone doginé ke ziero Iaziéro (Jazero). O rosčoribnaskiro pyjá pe tumaré lynaitka múri i pe tumaré-moliakiro (vinoskiro) obkedypen. Rádyma i viesjolyma (loš) lyné krig phabune feldatyr i Moavoskire phuvjátyr; Me kerdjom adiáke, so nisó na javéla dro priéso vaš mol (vino), jone butýr na javéna te štakiren (te topčynen) radymitkone godlása, na javéla butýr gódla radymása.’ Pal léngiri gódla Jesievonostyr (Xieševonostyr) ke Jelieala (Jelaleja), ke Jaaca (Jahazo) jone ĥazdyné gódla Siorostyr ke Oronaimo, ke tríto Eĥla (Eĥla-Šelišyja); pal-dová so adiáke-pac' i paniá Nimrimoskire pirišutjona. I iščo (inké) Me keráva adiáke, so dro Moávo pirijačena te janén svénta janybená pe vučé štéty i Me muliakirava kodolés, savó xačkirelas dróga smóly péskire devlorénge’, – rakiréla Raj Devél. ‘Paldavá Miro iló javéla te obrovelpe pal Moávo sýrby svirol'ka, i Miro iló javéla te obrovelpe pal manušénde Kir-Xariesostyr; pal-dová so baró barvalypén, so jone kedyne xasijá. Kažno šeró isyn murado i kažna čhora (broda) isyn muradé, pe kažno vast isyn počhinybena, i pe trušula isyn balytksa goné. Saré rakiréna jasvénca pe saré kheréskire strehi (čhakinia), i pe gásy dro Moávo, pal-dová so Me rozmardjom Moávo sýrby pirí, saví na trej” – rakiréla Raj Devél. Jone rovena zoralés – syr da Moávo rozmardo? Syr da Moávo riskirdiá paluj ladžasa! I javéna te sanpe Moavostyr, i léstyr javéna te trašadjon saré, kon isyn pašýl léste. Pal-dová so rakiréla Raj Devél: “Ake, Vavilóno javéla te vurnial syr órlo (kído), i jov rosčhuvela péskire phaká pir rigá upralestyr pe Moávo. Fórja javéna lyné i tvárdymi (kriéposti) zauhtylena. Dro dová dyvés iló zoralé-muršengire Moavostyr javéla syr iló džuvliákiro, savjá menčynena dukhá te bijanél. I javéla Moávo vymardo syr nacyja pir dová, so jov barjakirdia pes [gijá-r.s.] proti Raste-Devléste. Dar, ĥanbín i felý javéna pe túte, manúš Moavoskiro!” – rakiréla Raj Devél. ‘Kon našela darátyr, odová peréla dre ĥanbín, i kon vydžála ĥanbiniatyr, odolés uhtyléla felý, pal-dová so Me javáva ke Moávo,” – rakiréla Raj Devél. “Odolé, savé našné, terdiné tel Jesievóno (Xieševono), pal péskiro bizorjakiriben. Ne javéla jag Jesievonostyr, javéla bari jag maškiralypnastyr Sigonostyr i pohala miéža Moavoskiri i šereskiro gutup (tiemjo) pe čhavénde buntar'jénde. Bida pe túte, Moavie! Manušá Xamosostyr xasiné; pal-dová so tyré čhavén lyné dro pliéno, i tyré čhaja isyn dre navolia. Ne Me riskiráva pale Moavoskire plienonen dre palatuné (posliednia) dyvesá’”, – rakiréla Raj Devél. Ake, dasavo isyn séndo pe Moávo. Adiáke rakiréla Raj Devél pal Amonoskire čhavénde: “Ci nane čhavén dro Izrailjo? Ci nane léste prilyibnaskiro (nasliedniko) pe meknó mištypén? Sóske tedy o Malhomo prilyjá meknó mištypén Gadostyr, i léskire manušá dživéna dre Gadoskiro fórja? Paldavá, ake, javéna dyvesá,” – rakiréla Raj Devél, – “so javéla šundly maribnaskiri zan (glos) dre Rava Amonoskire-čhavengiri. I dalé foróstyr jačénape ruinengire bérgicy, i Ravakire gavá javéna xačkirdé jagása. Tén'ci Izrailjo léla pale daja phuv syr péskiro mištypén odoléndyr, kon lyjá léstyr,” – rakiréla Raj Devél. “Tugin jasvénca, Jesievonie, pal-dová so Gajo (Ajo) isyn rosčordo, den gódla, čhaja Ravaskire, podphanden pes balytkone gonenca! Rakirén jasvénca i prastan odorík i pale pir vánty; pal-dová so Malhomo džála dro pliéno khetané léskire rašanca i péskire thagar'jenca. Sóske tu barjakiresa pes dolenca? Džin, so jone rosthadenape ratésa, tu, buntuítko čhaj Amonoskiri! Saví garadjola pal péskiro kučipén te zrakhelpe, phení: ‘Kon javéla proti mánde?’ Ake, Me janáva dar (traš) pe tuménde,” – rakiréla bolybnáskire-jangoléngiro Raj Devél, Devél. “Kažno (sváko) tuméndyr, kon isyn tuménde, javéla tradyno krig te našél péske, kon karik: i na javéla nijékh manúš te kedel khetané kodolén, kon našné. Ne paló (poslie) dová Me janáva pale pliennone manušén Amonostyr,” – rakiréla Raj Devél. Pal Edómo adiáke rakiréla bolybnáskire-jangoléngiro Raj Devél: “So nane butýr godypén dro Fiemano? Ci so baré-godiakire manušá pirijačne te den godý javirénge? Ci so godypén našadyja? Našén, riskiri péskire dume, bešén dre xor ĥanbiniá (jamy), manušále, savé dživéna ke Diedano, pal-dová so Me janáva Isavoskiro xasibén pe lénde, – davá časo Me javáva te sendiakirav len. Kóli javné vinagrado-skedyibnaskire ke tu, to naúšto jone te na mekén vari-kicý céla múri? Kóli javénas čora ratý, to jone čorenas péske adákicy, kicý lénge trej?! Ne Me rosčhudjom [ročhuvava-r.s.] Isavos ke nangipén: Me otkerdjom [otkerava-r.s.] saré léskire čorahane štéty, i jov na déla ráda te garadjol. Léskire palál-javibnaskire čhavé pir kherítko ródo (pliémjo) xasjona, léskire pšála i léskire susiédy (kotárja), i jov butýr na javéla. Mekén péskire piroten (siroten) Mánge, i Me javáva te rakhav len, i mek tyré pivlia (udovy) te patián zoralés dre Mánde. Pal-dová so-adiáke rakiréla Raj Devél: “Áke, kodolé javír Judy, savénge na sys prisendindlo te p'jen tahtáj (čaša), dykhén, javéna te p'jen tahtái. I so da tu, Edomie, džása krig, bi sendoskiro? Nad, tu na keresape nikaj, sob (kaj) te vyrakhespe sendostyr, i tu, čačes [usajékh-r.s.], javésa te p'jes davá tahtái. Pal-dová so Me sovlahadjom Miré Lavésa”, – rakiréla Raj Devél, “so pe Vosoro (Xacoro) javéna te divinenpe trašasa, léske javéla bipatyv, prokošybén (arman) i jov jačéla čhučó. I saré léskire for'jéndyr javéna ŭsády / sak (vsiegda) čhučé štéty.” Me šundjom šunybén Rástyr-Devléstyr i poslo sys bičhadó ke Najudýtka nácyi te phenél: ‘Kedenpe khetané, džán proti léste, i terdjon pe maribén!’ “I, ake, Me keráva tútyr, Edomie, tyknes maškír Najudýtka nácyi, so javéna te dykhén vučipnása pe túte. Trašaibén tyró xohadia tumen i phut'kiribén tyré-iléskiro prityrdyne tut, savó dživéla maškír skalakire ščelji, i savó zalela vučipén bergicengiro! Mek tu kerdián péskiri gniázda (kúfo) adiáke vučés, syr órlo (kído), ne Me i odothýr tyrdava [sčhurdava-r.s.] tut telé,” – rakiréla Raj Devél. ‘I javéla Edómo syr dívo trašasa; i kažno (sváko) manúš, kon javéla te džal pašé, javéla te divinelpe trašasa, i jov léla te del šolia (te svistinel), syr dykhéla saré léskire meribnytka fránsy, syr sys rade telé Sodómo i Gomóra i léngire pašatuné foricy’ – rakiréla Raj Devél, so nijékh manúš na javéla te dživél odój, so nijékh čhavó Manušéskiro na jačélape te dživél dre léste. Ake, o Navuhodonosóro ĥazdélape syr ščer (liévo) Iordanoskire bergicendyr proti zorjakirde kheratune štéty, i Me začhuvava Edómo te našél léskire šteténdyr. I kon isyn vykedyno manúš, savés Me ĥazdyjom upré pe lénde? Pal-dová so kon isyn adasavó syr Me som? I kon phučelape otphenybén Mándyr? Kon vykharela Man? I kon isyn adasavó čhupnári (pastyrjo), kon déla ráda te terdjol angíl Mánde? Paldavá šunén godó lav Rástyr-Devléstyr, savó Jov čhudiá tedy pe Edómo, so Jov kamdiá te priduminel pe manušénde, kon dživéna ke Fiemano: až tykné-zorjakire Xaldiejéngire gurtostyr javéna te tyrden len krig; čačes, jone keréna léngire kheratune štéty čhučé. Phuv javéla te izdral šumostyr, kiéli jone peréna, i zan léngire godlatyr javéla šundly pe Loló mórjo (derjáv). Ake, o vérgo ĥazdélape syr órlo (kído) i jov javéla te vurnial i te rosčhuvel péskire phaká upralestyr pe Vosoro (Bocra). Dre davá dyvés jačélape iló zoralé-muršengiro sýrby iló džuvliákiro, savjá menčynena dukhá te bijanél. Pal Damásko. – “Jemafo [Hamato-ju.o.] i Arpado ladžakirdé, pal-dová so jone šundlé fuj nevipen. Léngiro iló biladyja (zamyjá) krig; mórjo (derjáv) kuninelape tugatyr; jov na déla ráda péske te javél štyl. Damásko jaciá bizorjákiro, i risijá te našél, dar (traš) uhtyldia les. Ilytko dukh i tugi lyné zor pe léste sýrby pe džuvliáte, savjá menčynena dukhá te bijanél. Syr da slavútno fóro na jaciápe célo, fóro, savéstyr radynenaspe manušá! Paldavá terné manušá dalé foróstyr peréna pe léskire vulícy (gásy), i saré maribnaskire muršá xasjona dro davá dyvés, – rakiréla bolybnáskiro-jangoléngiro Raj Devél. ‘Me roshačkirava jag pe vánta Damaskoskiri, i joj pohala saré felatiniá Vienadadoskire [Ben-Xadadoskire-ju.o.].” Pal Kidaro i pal kralipená Asoroskire, savé o Navuhodonosóro, králi Vavilonóskiro, rozmardiá. Adiáke rakiréla Raj Devél: “Uštén, džán upré proti Kidaro i lučkiren manušén [čhavén-r.s.] vastokóstyr. Léna léngire šátry i bakréngire ĥurty, léngire pologi (pokrovy) dre šátry i saré léngire pirja, i léngire vierbliuden lydžána péske Xaldiei. Jone javéna te godlen: ‘Dar kažnoné rigátyr!’” “Našén, prastan duredýr adathýr, garadjon xor, manušále, kon dživéla ke Asoro,’” – rakiréla Raj Devél. ‘O Navuhodonosóro, králi Vavilonóskiro, čhudiá pe godý te perél pe tuménde, i jov pridumindia plano proti tuménde. Uštý, Navuhodonosóro, džá pe barvaly nacyja, so dživéla bi darákiro’, – rakiréla Raj Devél, – ‘konéste nane ni pórty, ni štaby, savé dživéna kokoré péske. Léngire vierbliuden saštý javéla te len syr doresybén, i but-but léngire murdalá javéna čorde. I Me rosčhuvava te dživén pe saré balvalia odolén, savénde jagóry (kraí) pe balengire piéisy isyn občhindlé, i Me janáva bibáht (bída) pe lénde saré rigéndyr’, – rakiréla Raj Devél. ‘Asoro javéla štéto vaš šakalenge te dživén, i jov usady (sak) (vsiegda) javéla čhučó, i nijékh manúš na javéla te dživél odój i nijekhe-manušéskiro čhavó na terdjola te dživél odój’” Ráskire-Devléskiro lav, so sys Jeriemiejoske, prorokoske proti Jelamo, kiéli o Sedekíia, králi Judejákiro, lyjá te kralinél: Adiáke rakiréla Raj Devél, bolybnáskire-jangoléngiro: “Ake, Me phagirava lúko Jelamoskiro, sámo-glavnyma léngire-zorjakiri. Me janáva štar balvalia štaré jagorendyr pe bolybén, i Me rosčhuvava te dživén len pir saré dalé balvalia; i na javéla nijékh nacyja, ke saví, sob (kaj) te na javén bikhereskire Jelamostyr. Me keráva adiáke, sob (kaj) manušá Jelamostyr te zameren darátyr angíl léngire vergénde, i angíl odolénde, kon rodéla léngiro di. Me janáva bari bibáht (bída) pe lénde, Mirí zoralý xolý” – rakiréla Raj Devél, – ‘i Me bičhaváva kurtála pal lénde adiáke ĥará (dlúges), angíl Me domarava len. I Me čhuváva Miro trono dro Jelamo, i Me muliakirava léngire kral'jén i thagar'jen’ – rakiréla Raj Devél. ‘Ne dro sámo kónco (jagóro) dyvesengiro Me janáva pale plienonen Jelamoskiren’” – rakiréla Raj Devél. Ake, isyn lav, so Raj Devél phendiá proti Vavilóno, i proti phuv Xaldiejéngiri pir Jeriemiejoste, prorokoste: “Poden zan (den te džinén) maškír nácyi, i obzaniakiren (rosphenén) sarénge, i ĥazdén sciago (flago); obzaniakiren, i na garaven davá, – phenén: ‘Vavilóno lynó, Vilo ladžakirdó. Mierodaho isyn phagirdó pe koterá, léskire ídoly magirdé, léngire vyčhudé muiá phagirdé pe koterá. Vaš odová so paš-ratitkoné (sieviernone) rigátyr džála pašyledýr Midianengiri nacyja proti Vavilóno, jone keréna léngire phuvjátyr čhučó (pusto) štéto, i nijékh (nikón) na javéla te dživél odój: i manušá i murdalá (žyvotna) našéna i džána krig. Dre dolé dyvesá i dro dová časo’, – rakiréla Raj Devél, – ‘čhavé Izrailjoskire i saré čhavé Judáskire javéna khetané, i jone javéna, rovi, sob (kaj) te rodén Ras-Devlés, péskires Devlés. Jone javéna te phučenpe drom pe Sióno, i jone javéna te riskirén péskire muiá ke jov, rakirí: ‘Javén i lása te khetaniakiraspe ke Raj Devél viečnone zavietosa, savó na bistrelape. Miré manušá našadyne syr bakré: léngire čhupnárja (pastyri) lydžiné len krig droméstyr, jone riskirdé len droméstyr pe bérgi. Jone giné te psirén bergátyr pe bérgica i jone bistyrde péskiro štéto te otkhinjon. Saré, kon lathelas len, xanas len, i léngire namala (vérgi) rakirdé: ‘Ame na sam bangé, pal-dová so jone kerdé gréhi proti Raste-Devléste, dre Savéste dživéla čačipén, Raj Devél, Savéstyr užakirde lačhipén léngire dadá. Izrailjoskire manušále, prastan Vavilonóstyr, džán krig Xaldiejengire phuvjátyr; i javén syr buzne angíl péskiro ĥurto. Pal-dová so, ake Me ĥazdáva i janáva pe Vavilóno i kedava khetané proti léste baré nácyi paš-ratitkoné themestyr, i jone javéna te kedenpe te marénpe proti léste, i jone léna Vavilóno. Léngire maribnýtka bustiá (striély) javéna sýrby odolengire, kon isyn maribnaskire spiécy, savé na risjona pale ivjá (darmes). I phuv Xaldiejéngiri javéla phagirdy; saré, kon rosčorela la, javéna čale”, – rakiréla Raj Devél. ‘Pal-dová so tumé, manušá Vavilonóstyr, radyndlepe, i tumé svenkindle ke vučipén, tumé, savé rosčorde Miro meknó mištypén – Mirí nacyja. Tumé radyndlepe, uhne (uhtyne) péske syr reca (tjolka) pe čar, i tumé grymityndle sýrby ĥenšta (grajo). Tumarí daj, Vavilóno, javéla xor ladžakirdy (dre bari ladž), joi, saví jandiá tumen pe svéto, javéla te loljol ladžatyr [ladžakirdy-ju.o.]: joj iavéla naj tyknedýr saré nacyiéndyr: javéla sýrby čhučí mal (stiep), šukí phuv i čhučé prahi. Pir Ráskire-Devléskiro xoliakiribén, pe láte nikón na javéla te dživél, i joj iavéla sarésa čhučí. Kažno (sváko) manúš, kon džála pir Vavilóno, javéla te putravel jakhá trašatyr (te divinelpe) i javéla te del šolia (te svistinel), syr dykhéla maribnýtka fránsy. Terdien tumé te marénpe proti Vavilóno, trusciál léste, saré, savé odtyrdena lúko; den kar'jé dre léste, na tanginen (na žalinen) bustiá, pal-dová so jov kerdiá grého (bizo) proti Raste-Devléste. Godlen proti léste saré trusciál, pal-dová so jov ĥazdyjá vast te poddelpe, fundamienty léskire pyné, léskire vánty rade telé, pal-dová so davá Raj Devél dukhavela pale, syr jov kerdiá adiáke, adiáke-pac' kerén i tumé léske. Čingiren te xasjol odolés, kon čhuvéla giv dre phuv dro Vavilóno, i kodolés, savó rikiréla sierpo (čhindló), syr te čhinel giv, kurtalakire darátyr, saví javéla te pritasavel, mek so jekh manúš te risjol ke péskire manušá, mek so jekh manúš te našél pe péskiri phuv.’ ‘Manušá Izrailjoskire isyn sýrby bakré, savé rosčhurdyne, kaj jakhá dykhéna, ščerá (lievy) rostradyne len krig: angledýr králi Asirijákiro pohaia len, i akaná, palatunó (posliédnjo) kadavá Navuhodonosóro, králi Vavilonóskiro, phagirdiá léngire kokalý.’ Paldavá adiáke rakiréla bolybnáskire-jangoléngiro Raj Devél, Devél Izrailjoskiro: ‘Ake, Me pharés sendiakirava kralís Vavilonoskires i léskiri phuv, syr Me pharés sendiakirdjom kralís Asirijakires. Ne Me janáva pale Izrailjo pe léskiri čaritko félda (pažyt') i léskire manušá javéna te čaravenpe pe Karmilo i Vasáno; i léskiro di javéla čalo pe bérga Jefraimo i Galaádo. Dro dolé dyvesá i dro dová časo’, – rakiréla Raj Devél, – ‘iavéna te rodén čoripén dro Izrailjo, ne nisó na lathéna, i javéna te rodén gréhi Judaste, ne jone ničý na lathéna, ne Me otmekáva bang kodolénge, savén Me jačkirava džidenca (rakhava te dživén).’ ‘Džán proti phuv Merataim i koneskire manušá giné krig droméstyr. Čhučakir (pustošyn) i rozmar sarésa len, – rakiréla Raj Devél, – ‘i ker saró, so Me priphendjom túke. Grukato [šumo-r.s.] maribnaskiro šundlo pe phuv i baró xasibén.’ Syr davá mloto (svirind/hamlo), so sys pir sarí phuv, jaciá čhindló pe koterá i phagirdó! Syr da Vavilóno jaciá divosa trašasa maškír nácyi?! Me rosčhudjom felý (siet') pe túte, Vavilóno, i tut adiáke-pac' léna, i tu na džindian davá. Tut lathné i lyné dro pliéno pir dová, so tu terdijan proti Raste-Devléste. Me, Raj Devél, otkerdjom Mirí piralý, i Me lydžijom javrí maribnýtka. Miré xoliátyr – pal-dová so Me, Sarezorjákiro Raj Devél, bolybnáskire-jangoléngiro, lydžáva Mirí butý pe phuv Xaldiejéngiri. Džán maribnása pe láte saré jagorendyr (krajéndyr) pe phuv, psiraven (otkeren) lákire piraliá, sčhuven jekh pe jekh syr ĥarby, rozmaren sarésa daja phuv: mek nisó te na jačélpe. Čhinen saré lákire guruvén: mek jone saré te džán tel čhuri! Bida pe lénde! Léngiro dyvés javdiá, sob (kaj) len pharés te sendiakiren. Šunén manušéngiri zan (glos), savé našéna i rakhenape Vavilonóskire phuvjátyr. Jone podena zan (zvies') dro Sióno, so Raj Devél, amaró Devél dukhavela pale, Jov dukhavela pale pal Léskiri Khangirí. Kharén khetané saré kar'jé-dyibnaskiren pe lúko proti Vavilóno. Terdjon khetané (taborosa) saré trusciál, kon odtyrdela lúko: sob (kaj) nijékh te na kerélpe nikaj. Kerén čoripén pale léske pir dová, syr jov kerdiá; pal sarí léskiri butý, so jov kerdiá, kerén i tumé adiáke-pac' léske. Pal-dová so jov jaciá phut'kirdo proti Raste-Devléste, proti Svénto Izrailjo. Paldavá léskire terné manušá peréna pe gásy, i saré léskire maribnaskire muršá xasjona dro davá dyvés, – rakiréla Raj Devél. ‘Ake, Me som proti túte, phut'kirdo Vavilóno!’, – rakiréla Raj Devél, bolybnáskire-jangoléngiro; pal-dová so tyró dyvés javdiá, sob (kaj) Me pharés te sendiakirav tut. Naj phut'kirdé obštavenape (obstempinenape) i peréna, i nijékh naĥazdela pes. Me roshačkirava jag dre léskire fórja, i joj pohala saró trusciál léste.’ Adiáke rakiréla bolybnáskire-jangoléngiro Raj Devél: “Čhavé [bijaty-ju.o.] Izrailjoskire isyn pritasade, adiáke syr i čhavé [bijaty-ju.o.] Judáskire. Saré, kon lyné dro pliéno len, rikiréna len zoralés; jone otphenenape te mekén len pe vólia. Léngiro Vyrakhibnaskiro isyn zoraló; bolybnáskire-jangoléngiro Raj Devél isyn Léskiro lav: Jov dobusoves (staratiel'nes) obsendiakirela (roskedela) léngiro réndo, sob (kaj) jov saštý (moginel) te del otkhinyben phuvjake, so isyn tel Xaldiejénde, i napokojo (dar) manušénge, kon dživéla ke Vavilóno. Kurtála džála pe Xaldiejénde, – rakiréla Raj Devél, – i pe manušénde, kon dživéla ke Vavilóno, i pe léskire thagar'jénde i pe léskire godé manušénde. Kurtála pe podphenybnaskirende [zumakiribnaskirende-r.s.], i jone javéna dylynin'ka. Kurtála pe saré maribnaskire muršende, i jone zamerena darátyr. Kurtála pe léngire grénde, i pe maribnaskire vurdená, i pe saré javire-rodengire (miešanone) manušénde, savé isyn maškír lénde, i jone jačéna syr džuvliá. Kurtála pe léngire kučipena, i léndyr len čorena. Baró šukipen te javél pe léskire paniá, sob (kaj) jone te vyšutjon. Pal-dová so daja isyn phuv vyčhindlé mujenca, i manušá odój jačné bigodiakire péskire darakune idolendyr. Paldavá riskiribnáskire murdalá maliatyr/ stiepatyr [čhučé prahendyr-ju.o.] javéna te dživén pe daja phuv khetané šakalenca, i strausy javéna te dživén pe daja phuv. Pe daja phuv butýr nijékh manúš na javéla te dživél, i nikón na javéla pe daja phuv rodendyr ke ródo. Syr Devél radia telé Sodómo i Gomóra i léngire pašatuné fórja, adiáke-pac' nijékh manúš na javéla te dživél adái, i nijékh čhavó manušéskiro na jačélape te dživél syr čúžo dro davá fóro. Ake, manušá džána paš-ratitkoné (sieviernone) rigátyr, daja isyn bari nacyja i but králja, savé ĥazdénape jagorendyr (krajendyr) pe phuv. Jone rikiréna lúko i pika (lonho), jone isyn bidieskire, i jone na potanginena. Léngiri zan isyn syr mórjo (derjáv) brilinela (šuminela), jone tradéna uklisté pe grénde, jone kedenape te marénpe so ke jekh manúš ke saré pe túte, e čhaj Vavilonoskiri. O králi Vavilonóskiro šundiá daja zan (zvies'), syr phukade (piriphendle) pal lénde, i léskire vastá jačné bizorjákire. Ilytko dukh uhtyldia les, dukhá, sýrby džuvliáte, savjá menčynena dukhá te bijanél. Ake, vérgo Vavilonóskiro, javéla syr ščer (liévo) Iordanoskire bergicendyr [haščatyr/logovostyr-ju.o.] proti zorjakirde kheratune štéty, ne Me keráva adiáke, so jov jekhátyr našela krig Vavilonóstyr. Kon isyn odová vykedyno manúš, sob (kaj) Me saštý (moginavas) te ĥazdav les upré pe léste? Kon isyn kadasavó syr som Me? Kon isyn murškanó te phučelpe Mándyr otphenybén? I kon isyn adasavó čhupnári (pastyrjo), savó javéla te terdjol proti Mánde?’” Paldavá šunén godó lav Rástyr-Devléstyr, savó Jov čhudiá pe godý proti Vavilóno i so Jov kamdiá te priduminel proti phuv Xaldiejéngiri: naj tyknedýr léngire čhavéndyr [stadatyr-r.s.] Midianengire xaladé lydžána krig i, čačes, Jov – Raj Devél – čhučakirela (opustošynela) léngiro kheratuno štéto (kherá) khetané lénca. Phuv javéla te izdral godlatyr Vavilonóstyr, kiéli les léna, i godlypen javéla te šunelpe maškír Najudýtka nácyi. Ake, isyn lav, so rakiréla Raj Devél: “Ake, Me ĥazdáva pe Vavilóno léngire vergén (xasiakiribnytko balvál) i pe odolénde, savé dživéna pe phuv Xaldiejengiri. I Me bičhaváva pe Vavilóno manušén, savé balvaliakirena fóro i jone vybalvaliakirena les, i čhučakirena léskiri phuv: pal-dová so dro dyvés, syr javéla bibáht (bída), jone saré javéna proti léste [saré rigéndyr-r.s.]. Mek te odtyrdel kar'jé-dyibnaskiro péskiro lúko proti javiréste, mek te barjakirel pes odová, konéste isyn sastruno kolýn (kol'čuga) angíl javiréste. Na žalinen (tanginen) léskire terné manušén; xasiakirén saró léskiro xaladybén. I muliakirdé mek te perén pe phuv Xaldiejéngiri, i kodolé, savén prophusade, pe léskire gásy. Pal-dová so Raj Devél, bolybnáskire-jangoléngiro, na jačkirdiá Peskiren: ni Judas, ni Izrailjo, na dykhí pe davá, so léngiri phuv isys pherdý grehénca proti Izrailjoskire Sventoneste. Našén Vavilonóskire maškiralypnastyr, i so ke jekh manúš mek te rakhél péskiro džiibén, sob (kaj) te na xasjol pal Vavilonóskiro čoripén. Ĥáda, isyn časo, so Raj Devél dukhavela pale, Jov otdéla pale léske. Vavilóno sys suvnakunó tahtáj dre vastá Ráskire-Devléskire, savó matiakirdia sarí phuv: nácyi matine léskire moliátyr (lolé bravintatyr); paldavá nácyi jačné bigodiakire. Vavilóno jekhátyr (srázu) pyjá i rozmardiape. Rovén godlenca pal léste; len bal'zamo pe léskire riskiribena (rany), saštý (moginéla) te javél, so jov sastjola. Ame drabakirasas Vavilóno, ne jov na sastija: jačkiren les i mek kažno (sváko) manúš améndyr te džal pe péskiro them: pal-dová so séndo pe léste dogijá ke bolybén, i ĥazdyjápe ke óbloki. O Raj Devél sykadiá amaró čačipén: javén i podasa zan/dasa te džinén pe Sióno pal Ráskire-Devléskiri butý, amaré Devléskiri. Vojstrinen (den čol) maribnýtka bustiá (striély) te ziainen, O Raj Devél ĥazdyjá dúho (fáno) Midijakire kral'jénge. Pal-dová so Jov pridumindia te xasiakirél Vavilóno. O Raj Devél dukhavela pale, Jov otdéla pale pal Léskiri Khangirí. Čhuvén upré sciago (znamjo) pe vánty Vavilonóskire, zorjakiren stréga, rosčhuven rakhibnaskiren, kerén čorahane štéty (zasady) te marénpe. O Raj Devél vypherdiakirela (spolninela) dová, so Jov phendiá pe manušénde, kon dživéla ke Vavilóno. Tu, Vavilóno, san pašýl but baré paningá, konéste isyn baró kučipén, tyró kónco (jagóro) javdiá, i miéra tre skvapnymake. O bolybnáskire-jangoléngiro Raj Devél sovlahadiá pe Péste: ‘Čačes Me pherdiakirava tut manušénca syr phakitkone skočkenca, i jone ĥazdéna gódla proti túte.’ Jov sozdyjá phuv Léskire zaniása (glosasa), i Jov čhudiá svéto Léskire godypnasa, i Jov rozdzin'dz'kirdia (rostyrdyja) bolybén Léskire godiása. Kiéli Jov phenéla péskire zaniása, tedy paniá pe bolybén ĥazdéna ĥlumo, Jov keréla adiáke, so óbloki ĥazdénape phuvjákire jagorendyr (krajendyr); Jov keréla adiáke, so javéna bliskavícy bryšyndesa, Jov janéla balvál Léskire piraliendyr. Kažno (sváko) manúš jačéla buro [dylynó-r.s.] péskire džinybnastyr, kažno suvnakunengiro mastiero javéla ladžakirdó vyčhudé idolostyr, pal-dová so davá bilado idolo isyn xohanó, i nane dúho (fáno) dre léste. Davá nisó na mol, sabnytko butý: syr javéla dyvés vaš séndo, jone xasjona. Ne Jakovoskiri dólia nane dasaví syr léngiri, pal-dová so Jov, Devél, Kon sozdyjá saró, i, Izrailjo isyn syr Léskiro mištypén, bolybnáskire-jangoléngiro Raj Devél isyn Léskiro lav. Tu san Mánde mloto (svirind/hamlo), miro maribnýtko prilado (mardýtko), túsa Me rozmaravas pe koterá nácyi, i túsa Me rozmaravas pe koterá kralipená; túsa Me rozmaravas pe koterá gres i uklisteskires (manušés, savó sys beštó uklisté) pe léste, túsa Me rozmaravas pe koterá maribnýtko vurdén i léskire manušés, kon tradéla; túsa Me rozmaravas pe koterá muršés i džuvliá, túsa Me rozmaravas pe koterá phures i ternes; túsa Me rozmaravas pe koterá terné manušés i ternorja (terné čha); túsa Me rozmaravas pe koterá čhupnaris (pastyrjos) i léskiro ĥurto; túsa Me rozmaravas pe koterá phuvjákire xulás i léskire guruvén dro ĥámo; i túsa Me rozmaravas pe koterá šeralé ran i theméskire barydyrén. I Me otdáva Vavilonoske i sarénge, kon dživéla ke Xaldeja, angíl tumaré jakhá, sarí léngiri bibáht (fuipén), so jone kerdé pe Sióno”, – rakiréla Raj Devél. “Ake, Me som proti túte, o bérga, saví xasiakiréla”, – rakiréla Raj Devél, – “saví xasiakiréla sarí phuv. Me dindz'kirava Miro vast pe túte, i Me čhurdava telé tut skalendyr, i Me keráva tútyr shačkirdy bérga. I manušá na léna tútyr bar pe venglo, ni bar pe fundámiento, ne tu, Vavilóno, usady / sak (vsiegda) javésa čhučó”, – rakiréla Raj Devél. “Čhuvén upré sciago (znamjo) pe phuv, phurdén dre rógi (truby) maškír nácyi! Skedén nácyi proti léste, kharén khetané kralipená proti léste: Ararato, Minija, Askienaz. Čhuvén ras te lydžál maribén proti léste; kerén adiáke, sob (kaj) grajo te vurnian sýrby phakitka skočki (saranča). Skedén nácyi proti léste Midijakire kral'jénca, léngire baré ranca i theméskire barydyrénca, saré themenca, savé isyn tel léngiri zor. Phuv izdrala i trinskirlape: pal-dová so kažno duma Ráskire-Devléskiri javéla te kerélpe dro čačipén proti Vavilóno, sob (kaj) te kerél čhučí (pusto) phuv Vavilonoskiri bi jekhe manušéskiro. E zoralypnaskire [zoralé-r.s.] muršá Vavilonóstyr pirijačne te marénpe, jone jačnépe te bešén dre péskire zoralé vánty (tvárdymi); léngiri zor xasijá, jone jačné syr džuvliá. Léngire kheratune štéty isyn xačine, štaby (zatvory) pe léngiri pórta isyn phagirdé. E kur'jéro prastala te dykhelpe kur'jerosa, i bičhaibnaskiro (manúš lylenca) te dykhelpe javiresa te poden zan (zvies') kralíske Vavilonóstyr, so léskiro fóro lynó jekhe jagoróstyr ke javír. Štéty te piridžan réki (leniá) (brody) uhtyldé (zalyne), zaĥrady (zoralé tyny) xačine jagása, i maribnaskire muršá strahakirde. Ĥáda, isyn lav, so rakiréla bolybnáskire-jangoléngiro Raj Devél, Devél Izrailjoskiro: “Čhaj Vavilonoskiri isyn sýrby givaobkeribnaskiri šúrna, kiéli isyn pora te ukeden [štakiren-ju.o.] giv: ne iščo (inké) nábut i javéla časo te sčhinen (ukeden) lákire givá.” “O Navuhodonosóro, králi Vavilonóskiro, pohaia man, i jov rozlučkirdia man: jov kerdiá mándyr, Judastyr dre Vavilonóskiro pliéno, čhučí pirí, jov nakhadia man syr trašano sap, jov pherdiakirdiá péskiro per miré bonbonenca (gudlypnenca), jov čungardyja man javrí. Mek nahratyma i dukh, so kerdé mánge i miré masenge (ločake) te javén pe Vavilóno”, – phenéna manušá, kon dživéla pe Sióno, – “I mek miro rat te javél pe manušénde, kon dživéla dre Xaldiéia”, – phenéla Jerusalimo. Paldová, adiáke rakiréla Raj Devél: “Ake, Me obsendiakirava tyró réndo i Me dukhavava pale pal túte. Me šut'kirava Vavilonóskiro mórjo (derjáv) i keráva adiáke, so léskire ĥanyngá pirišutjona. Vavilonóstyr jačénape ruíny, džiibnáskiro štéto vaš šakalenge, dívo trašasa, so féni te sanpe i bi manušéngiro. Jone, Xaldiei, javéna te brilinen (te rievinen) syr ščerá (lievy), jone javéna te ryčynen sýrby ščerengire tyknore. Syr léngiro dúho (fáno) ĥazdélape, Me keráva lénge svénko i Me matiakirava len, sob (kaj) jone te radynénpe zoralés i te soven saró viéko i te na džangadjon (te na prosovenpe)”, rakiréla Raj Devél. “Me janáva len syr bakrorén tel čhuri, syr bakrén buznenca (kozlenca). Syr da Siesaho [Šešaho-ju.o.] lyné? I syr da saré-phuvjákiri sláva zauhtylde? Syr da pe Vavilóno divinenape trašasa javír nácyi? Mórjo (derjáv) sýges thadéla upré pe Vavilóno, jov učhakirdiá fóro péskire valnenca. Léskire for'jéndyr, jaciá zamekno bimanušengiro štéto, šukí phuv, i čhučí mal (stiep), phuv, pe saví nijékh manúš na dživéla, pir saví na džála nijékh čhavó manušéskiro. I Me pharés javáva te sendiakirav Vilos dro Vavilóno, i Me vytyrdava léskire móstyr dová, so jov nakhadia (proglytyndia): nácyi na javéna butýr te prastan ke jov sýrby réki (leniá), i vánta Vavilonoskiri peréla. Miré manušále, džán krig dalé foróstyr, i mek kažno (sváko) manúš tuméndyr te rakhél péskiro di Ráskire-Devléskire baré xoliátyr. Mek tumaró iló te na zamerel, i mek tumé te na darén mavlyniatyr (malvatyr), so javéla šundly pe phuv; mavlýn javéla jekh berš, i paló dová pe javír berš. Pe phuv javéna nahrates te kerén manušá, jekh themeskiro barydyró javéla proti javiréste. Paldavá, ake, javéna dyvesá, so Me keráva pharó séndo pe vyčhindlé muiá (ídoly) Vavilonóskire, léskiri sarí phuv javéla ladžakirdy, i saré léskire muliakirdé peréna maškír davá fóro. I bolybén i phuv, i saró, so isyn pe lénde, javéna te den gódla radymása pe Vavilóno, pal-dová so mižeh čora (opustošytieli) javéna pe léste paš-ratitkoné (sieviernone) rigátyr”, – rakiréla Raj Devél. “Syr Vavilóno kerdiá adiáke, so muliakirdé Izrailjoskire manušén i jone perenas, adiáke-pac' i dro Vavilóno javéna te perén muliakirdé saré léskire phuvjátyr. Tumé, kon zrakhné pes kurtalátyr, džán krig! Na terdjon štyl! Ripiren Ras-Devlés durál Vavilonóstyr, i mek te javél Jerusalimo pe tumaró iló.” “Aménge isyn ladžavo, pal-dová so ame šundiám, syr bipatyvaliakirde [košne-r.s.] amen; ladž učhakirdiá amaré muiá: pal-dová so čúža manušá javné dre svénta štéty dre Khangirí Raskiri-Devléskiri.” “Paldavá javéna dyvesá”, – rakiréla Raj Devél, – “so Me pharés sendiakirava léngire vyčhindlé muiá, i pir sarí phuv, léngire dukhade (raniena) manušá javéna te den ĥondiá (te stogninen) godlása. Na dykhí pe davá, so Vavilóno ĥazdelaspe ke bolybén, i na dykhí pe davá, so jov zoraliakirelas péskiri vučí vánta, ne saroiékh (usajékh) mižeh čora javéna ke jov Mándyr” – rakiréla Raj Devél. “Vavilonóstyr šunelape gódla i zan (zvies') pal baró xasibén phuvjátyr Xaldiejéngirjatyr. Ĥáda, Raj Devél xasiakiréla Vavilóno i murdiakirela léskiri zoralý zan. But valny (velny) sýrby vergitka xaladé javéna te ĥazdén gódla syr vučé paningá, i léngiri zoralý zan javéla te šunelpe. Pal-dová so mižeh čor (opustošytieljo) džála pe davá fóro, proti Vavilóno; léskire zoralypnaskire muršén phandle, kažno léngiro lúko javéla phagirdó; pal-dová so Raj Devél, Savó otdéla pale pal čoripén, Jov dukhavela pale. Me, Raj Devél, matiakirava léngire thagar'jén i manušén, kon déla godý, léngire-theméskire barydyrén, léngire baré ran, i léngire xaladén: i jone javéna te soven viéčnes, i jone na džangadjona (na prošninenape)”, – rakiréla o Králi, Léskiro Lav isyn bolybnáskire-jangoléngiro Raj Devél. Adiáke rakiréla bolybnáskire-jangoléngiro Raj Devél: “Buĥle (gruba) vánty Vavilonóskire javéna sarésa phagirdé, i léskire vučé pórty javéna xačkirdé jagása; a léskire manušá javéna te kerén butý ivjá (naprásnes), i adiáke-pac' i sarí nacyja féni (tóka) vaš jag khiniakirdia (menčyndia) pes.” Ĥáda, isyn lav, so proróko Jeriemiéjo priphendiá Sieraijaske, čhavéske Nirijaskireske (kon sys unuko Maasejaskiro): kiéli jov gijá Siedekijasa, kralísa Judejátyr ke Vavilóno dre štárto berš, syr jov lyjá te kralinél. O Sieraija sys kheratuno phurydyro. I Jeriemiéjo začhindiá dre lylvarí sarí bibáht (bída), so treindiá te javél pe Vavilóno – saré dalé sama lavá, so isyn začhindlé pe Vavilóno. I phendiá Jeriemiéjo Sieraijaske: “Syr tu javésa ke Vavilóno, dykh ža, progin zoralés saré dalé lavá: i phen odój: ‘O Rajo Dévla! Tu phendián saré dalé lavá proti davá štéto, so Tu xasiakiresa les adiáke, so nikón na javéla te dživél pe davá štéto, ni manúš, ni murdál, ne jov jačélape čhučó pe saré vki.’ I saró javéla adiáke: syr tu končynesa (pirijačesa) te gines zoralés daja lylvarí, tedy phande bar ke lylvarí, i čhurde la dro maškirál Jevfrato. I phen lénge: ‘Adiáke i Vavilóno tasadjola i na ĥazdélape bibahtiatyr (bidatyr), saví Me janáva pe léste. I jone javéna sarésa khiniakirde (bizorjákire).’” I, ake, savé akaná isyn lavá Jeriemiejoskire. Sedekijaske sys biš te jékh berš, syr jov jaciá kralísa, i jov sys kralísa dešujékh berš dro Jerusalimo. Léskire-dákiro lav sys Xamutal', saví sys Jeriemiejoskiri čhaj Livnatyr. I Sedekíia kerdiá fuipén angíl jakhá Ráskire-Devléskire, saró dová, so i Ioakimo kerdiá. Davá sys pal Ráskire-Devléskiri xolý, so kerdiápe dro Jerusalimo i Judéia i Jov riskirdiá Péstyr léngire manušén. Tén'ci Sedekíia ĥazdyjápe proti kralíste Vavilonóstyr. I sys adiáke: pe jeniáto (bi trinengiro déšto) berš, syr o Sedekíia sys králi, Navuhodonosóro, králi Vavilonóskiro, javdiá dro déšto čhon, pe déšto dyvés dolé čhonéskiro, jov i léskiro xaladybén pe Jerusalimo, jov občhudiá fóro trusciál xaladenca: i jone kerdé valo trusciál fóro proti léste. I fóro sys dro občhuiben trusciál ke dešujékho berš, syr králi Sedekíia lyjá te rainel (te kralinél). Dre štárto čhon pe jeniáto dyvés dalé-čhonéskiro bari bokh ĥazdyjápe, i na sys maró manušénde dolé-phuvjakirende. Tedy foróskiri vánta phagirdé andré: i saré maribnaskire muršá našné, i ratý giné krig foróstyr, pašé pórta maškír duj vánty, so sys pašýl dre kralískiri únta, na dykhí pe dová, so Xaldiéi sys trusciál pašýl fóro. I Judy giné dromésa pir mal (stiep). I xaladé Xaldiejéngire tradynepe šale pal kralíste, i jone uhtyldé Sedekijas pe malia (loščyny) Jerihonoskire; i saró léskiro xaladybén nastiá, kon péske léstyr. I jone lyné Sedekijas, i jandlé les ke králi Vavilonóskiro dre Rivla pe Jemafoskiri [Hamafoskiri-ju.o.] phuv i o Navuhodonosóro kerdiá séndo (čačipén) pe léste. I čhindiá králi Vavilonóskiro čhavén Sedekijaskiren angíl léskire jakhá; i jov adiáke-pac' čhindiá saré thagar'jén Judejátyr dre Rivla. I jov vyphusadia jakhá Sedekijaske, i jov phandia les xarkuné zandir'jenca (kandalenca), i jov lydžijá les ke Vavilóno i čhudiá les dro štaribén angíl dyvés, syr jov myjá. I dro pándžto čhon, pe jeniáto dyvés dalé čhonéskiro, so sys dro jeniáto berš, syr králi Vavilonóskiro o Navuhodonosóro lyjá te kralinél, o Navuzardano, raj pe kralískiri stréga, kon sys čačó vast kralískiro, javdiá dro Jerusalimo, i jov xačkirdiá Khangirí Ráskire-Devléskiri, i kher kralískiro, i saré kherá dro Jerusalimo, i saré kherá baré manušéngire, jov xačkirdiá jagása. I saré xaladé Xaladiejéngire, savé sys rása pe kralískiri stréga, phagirdé telé saré vánty trusciál (krugom) Jerusalimo. Tén'ci o Navuzardano, raj pe kralískiri stréga, lydžijá dro pliéno vari-savé čororé manušén, i javír manušén, kon jaciápe dro fóro, i kodolén, savé (našné) Judendyr ke králi Vavilonóskiro, i kodolén, savé jačnépe spiecendyr dre vastytka butiá. Ne Navuzardano, o raj pe kralískiri stréga, mekciá vari-savé čororé manušén dolé phuvjakiren, syr vinagradytkone-barjakiribnaskiren, i syr phuvjákire butiar'jen. I bronzytka [harkuné (miédna)-r.s.] stýlby, so sys dre Khangirí Ráskire-Devléskiri: skamindore pe rotycy (podstavy), i xarkuno mórjo (derjáv) (bari cysciérna paniésa), saró so sys dre Khangirí Ráskire-Devléskiri, Xaldiéi phagirdé i lydžiné sarí bronza (xarkóma) ke Vavilóno. Jone adiáke-pac' lydžiné krig vučé pirja i šuhlicy, i čhurja, i kučyka i baré roia, i saré bronzytka sudinki, savénca rašaja kerdé Devléskiri butý dre Khangirí. I baré čaré, i cymty (ščypcy), i tahtaja, i pirja, i šandale, i baré roia, i kučyka, saró so sys čačuné suvnakástyr i so sys rupéstyr, – saró raj pe kralískiri stréga leja péske. Adiáke-pac' duj stýlby, jekh bari cysciérna paniésa (mórjo (derjáv)), dešudúj bronzytkone guruvorén, so sys telál, i skamindore pe rotycy, so králi Solomóno kerdiá vaš Khangirjake Ráskire-Devleskirjake – xarkóma sys phagirdy saré, so sys naštý te ublaves (te važynes). Akaná pal stýlby: kažno stýlbo sys vučipnása dešuohto kuniá (lokti), buĥlypnajea, trusciál (vokrug) te pričhuves mieribnytko šelo, sys dešudúj kuniá dlengipnása, i grubipnasa (grembipnasa) sys štar angušta (pal'cy), i iščo (inké) sys čhučó maškirál dre léste. I frizo (vienco) pe stýlbo sys bronzytko, i kažno frizo sys pandž kuniá vučipnása, khudo uzoro i granatytka phabá sys pir saró stýlbo trusciál, saró sys xarkuno. Javír stýlbo granatytkone phabenca sys dasavo-pac'. Pe kažno rig stylboskiri sys jeniá deša šov granatytka phabá, saré granatytka phabá, so ke jekh sys xarkuné pir khudo uzoro, sys len šel frukty. O raj pe kralískiri stréga lyjá Sieraijas, šeralé rašás, i Cefanijas, javire rašás, i triné pašvudarengire stregar'jén (rakhibnar'jén). I jov lyjá jevnuhos, kon sys barydyró pe maribnaskire muršende, i iščo (inké) eftá manušén, savé sys kralískire pomogipnaskire, i savén lathné dro fóro, šeralé lylá-čhinybnaskires pe xaladénde, kon začhinelas manušén dolé phuvjátyr dro xaladybén i šovdešá javire manušén, savén lathné maškír fóro. I o Navuzardano, raj pe kralískiri stréga, lyjá len i jandiá len ke králi Vavilonóskiro dre Rivla. I králi Vavilonóskiro pekadiá len i zamardiá len dre Rivla pe phuv Jemafoskiri. Ake, syr Judáskire manušén lydžiné dro pliéno léskire phuvjátyr. Ake, isyn ginybén manušéngiro, savén o Navuhodonosóro lydžijá dro pliéno: pe eftáto (bitrinéngiro déšto) berš 3023 Judén; dro dešuohtoto berš Navuhodonosoroskiro jov lydžijá dro pliéno Jerusalimóstyr 832 manušén; dro beš te tríto berš Navuhodonosoroskiro, o Navuzardano, raj pe kralískiri stréga lydžijá krig dro pliéno 745 Judén. Saré manušá, konés lydžiné dro pliéno, sys 4600. I sys adiáke: dro trijánda-eftáto berš, syr Judejákire kralís Ioakimos lyné dro pliéno, dro dešuiavir čhon, pe biš te pándžto dyvés čhonéskiro, so Jevil'-Mierodaho, králi Vavilonóskiro, ĥazdyjá angíl manušénde Ioakimos, kralís Judejakires, i mekciá pe vólia les štaribnastyr. I o Jevil'-Mierodaho kučes rakirdiá lésa i dyjá léske patyvaledyr štéto, syr javire kral'jéngiro, savé sys lésa dro Vavilóno. I Ioakimo parudia péskiri štaribnytko ídia, i jov xaja maró saró časo angíl kralíste dre saré dyvesá léskire džiibnáskire. I králi Vavilonóskiro na pirijačelas te del xabén léske, kažno dyvés léske delaspe léskiri paš ke léskiro dyvés te merél, dre saré dyvesá, syr jov sys džidó. Pharó isyn dro Jerusalimo: jov (fóro) isyn bi manušéngiro, sýrby pivly (udova), saví sys rany maškír manušypnaskire nácyi! Ake, kon sys thagári pe phuvjákire rigá, odová manúš, jaciá dynarisa. Jov rovela kirkes ratý, i jasva isyn pe léskire čhama (ščoki): nane nijékh podrikiribnaskiro maškír sarénde, konéske sys drógo davá fóro. Saré foróskire malá bikindle les, i jone jačné léskire vergenca (vrogenca). Judejákire manušá giné dre navolia, kaj menčynena len i jene isyn pharé – butiakire andynarščyki. Jone dživéna maškír Najudénde, jone na otkhinjona. Saré, kon tradyne len, javné naŭžakirdes pe lénde, syr lénge jaciá pharó te dživén. Sionoskire dromá tuginena, pal-dová so nijékh na javéla te svenkinel. Saré léskire pórty isyn čhučé, léskire rašaja déna ĥondiá, léskire patyvalé tyrne džuvlién pritasavéna, Sionoske, kokoreske, isyn pharó. Léskire namala jačné raja (ranca), léskire vérgi ziainena mištypnasa, pal-dová so Raj Devél pritasadia Sionoskire manušén pir dová, so jone kerdé but čoripén. Léskire čhavoré giné dro pliéno angíl namaleste. Sarí šuk Sionoskire čhatyr xasijá, lákire thagárja jačné sýrby mirga (olienjo), savjate nane čaritko phuv, savé giné bizorjákire angíl tradypnaskireste. Dre dyvesá, kiéli jone menčyndlepe i len tradenas, tedy Jerusalimo ripirdia saré kuč réndy, so sys ĥaredyr léste, syr xasiné léskire manušá vergoskire vasténdyr i nijékh na dyjá vast léske. Namala dykhné les i jone sandlepe xoliames léskire bedypnastyr. Jerusalimo kerdiá baró grého, paldavá jov jaciá magirdó. Saré, kon kutiakirde les, mekné te kerén patýv; pal-dová so jone dykhné léskiro nangipén. Jov, čačó, dyjá ĥondiá i gijá krig. Léskiro magiripén isyn pe léskire ídia, jov na dumindia pal péskiro džiibnáskiro kónco (jagóro), paldavá jov pyjá adiáke namištes, léste nane podrikiribnaskiro. Rajo Dévla! Dykh miré mén'ki, pal-dová so vérgo barjakirdia pes. Vérgo (vrogo) dind'kirdia péskiro vast pir kučipén, so sys léste; Jerusalimo dykhciá syr Náiudy giné andré Svénto Štéto, konéske Tu priphendian te na džán andré Tyrí Khangirí. Saré léskire manušá déna ĥondiá, jone radena maró; jone dyné suvnakaja i kuč bará pal xabén, sob (kaj) te rakhén džiibén. “Dykh, Rajo Dévla, obdumin, syr sanape xoliames mándyr!” – rakiréla Jerusalimo. “Sarénge tuménge davá nisó, kon džála péske (nakhela) mamúi! Ĥáda, dykhén: ci isyn iščo (inké) vari-konéste dasaví dukh syr mánde – so pyjá pe mánde, – savjása Raj Devél pritasadia man dro dyvés, kiéli Jov xoliásyja zoralés. Vučipnástyr Jov bičhadiá jag pe miré kokalý, i jag lyjá zor pe miro fóro; Jov rosčhudiá felý vaš mirí ĥerój i riskirdiá man pale; Jov kerdiá adiáke, sob (kaj) me te javav čhučó (pusto), sob (kaj) me te mlosnjovav (te našavav zor) saró dyvés. Raj Devél phandia zoralés Péskire vastésa ĥámo miré čoripnástyr; joj isyn khudý i zarescia pe mirí men. Jov kerdiá adiáke, so mirí zor zamyjá. Jov zdyja man dre vastá, savéndyr me na mogináva te ĥazdavpe. Raj Devél štakirdia tel ĥerá saré miré zoralypnaskire manušén maškirál miro fóro, Jov khardiá khetané skedyibén pe mánde te zatasaven saré miré tyrnen manušén: Raj Devél štakirela sýrby dro prieso patyvalia ternia džuvliá, kon isyn Judejakiri čhaj. Paldavá me i rovava, mirí jakh čhuvélape paniésa, pal-dová so miro podrikiribnaskiro, kon moginelas te del pale džiibén miré dieske, isyn dur mándyr. Miré čhavé našadyne, pal-dová so vérgo pirilyja upralypén.” Sióno d(z)ind(z)'kirela péskire vastá, ne nane nijékh te podrikirél léskiro dúho (fáno). Raj Devél priphendiá adiáke, sob (kaj) te javén léskire malá trusciál Jakovoste (Jakuboste), ne me, Jerusalimo, jacjom magirdó maškír lénde. Raj Devél isyn čačipnáskiro, pal-dová so da me kerdjom búnto pe Léskire priphenybená. Šunén, kakaná, saré manušypnaskire nácyi, i, ĥáda, me pyjom dro dúho (fáno), a me, miré čhaja i miré tyrne manušá giné dro pliéno. Me khardjom odolén, kon sys miré drúgi (malá), ne jone xohade man; miré rašaja i miré phuré phurdyne péstyr palatunó (posliednjo) dúho (fáno) dro miro fóro, rodyi péske maró te rakhén džiibén. Dykh, Rajo Dévla, syr bari bibáht pyjá pe mánde; miro di isyn dre traš, miro iló riskirdiape upré dre mánde, pal-dová so me keravas dová, so me kamamas. Javriestyr kakaná kurtála (miečo) čingirela šeró, ne kheré isyn sýrby meribén. So me dáva ĥondiá, so nane kon te podrikirél man. Saré miré vérgi šundlé pal mirí bari bída, jone radynénape daléstyr, so Tu kerdián davá. Bičháv dová dyvés, so Tu, Rajo Dévla, phendián statečnes, mek jone te jačénpe dasavé-pac', syr me som. Mek saró léngiro fuipén te sykadjol angíl Túte, i ker lénge dová, so Tu kerdián mánge pal miro čoripén, pal-dová so me pharés davá ĥondiá, i miro iló našavela zor.” Syr čhakirdia Raj Devél Sionoskirja Čha cjomnone oblokosa, dre Péskiri xolý! Jov čhurdyjá telé bolybnástyr Izrailjoskiri gožyma i na ripirdia pal Péskire-ĥerengiro predkico dro dyvés, syr Jov xoliásyja. Raj Devél xasiakirdiá i na potangindia saré Jakovóskire kherá: Jov čhurdyjá telé xoliátyr Judejákire-čhakire tvárdymi [zoralé štéty-r.s.], Jov phagirdiá sarésa len pe phuv, Jov čhudiá magiripén pe kralipén i léskire thagar'jende. Jov čingirdia te xasjol kažno Izrailjoskiro maribnýtko šyng Péskire baré xoliátyr; Jov dyjape pale Péskire vastésa angíl dová, syr javdiá vérgo, Jov roshačkirdia bari jag mamúj Jakovoste, sob (kaj) te xal saró, so sys trusciál. Jov ĥazdyjá Péskiro lúko pe aménde syr vérgo, Jov terdijá dro stonka Péskire čačé vastésa sýrby vérgo, i Jov muliakirdiá saró, so sys šukár Léskire jakhenge. Jov vyčhudiá Léskiri xolý sýrby jag pe šátra, kaj sys Sionóskiri čhaj. Raj Devél jaciá syr vérgo: Jov phagirdiá telé Izrailjo, Jov phagirdiá telé saré léskire felatiniá, Jov vymardia pe koterá léskire tvárdymi i Jov dyjá butedýr roibén i túga Judejákire Čhake. I Jov xoliames rosphagirdiá Péskiri Khangirí sýrby xrústy untatyr (sadostyr), Jov mardia pe koterá štéto, kaj kedenaspe te den patýv Léske. Raj Devél kerdiá adiáke, sob (kaj) te bistren uphendle svénki sávaty i dro Izrailjo, Jov jaciá te na del patýv kralíske i rašáske. Jov otphendiape ladžasa Péskire altarjostyr, Jov mekciá Péskiro Svénto Štéto; Jov otdyjá felatiniakire vánty Jerusalimóstyr dre vergoskire vastá. Jone ĥazdyné dasaví gódla dro Ráskire-Devléskiro Kher, syr dro svenkengiro dyvés. Raj Devél priduminde te xasiakirél Sionoskire-Čhakiri vánta: Jov dind'kirdia šelo, Jov na obrikirdia Péskiro vast, sob (kaj) te na xasiakirél, Jov kerdiá adiáke, so valo i vánta lyné te rovén tugatyr, i isyn pašté koterenca khetané. Foróskire pórty bešné dre phuv: Raj Devél xasiakirdiá i phagirdiá foróskire štaby, foróskire králi i thagárja isyn bičhadé maškír Najudénde. Zakóno butýr nane, i foróskiri proróki na dykhéna suné Rástyr-Devléstyr. Godephuré Sionoskire isyn bešté štylés pe phuv; i isyn jone čhurdena práho pe péskire šeré i jone podphandenape žalobnone gonesa. Jerusalimóskire patyvalé tyrne džuvliá bandiakirena šeré ke phuv. Miria jakhá xasjona jasvendyr, saró andrál mánde isyn dre traš, miro kaló buko (piečonka ) čhuvélape javrí pe phuv, pir-dová so xasjona miré – manušéngiri čhaj, pal-dová so čhavoré i bijaty našavena zor pe vulícy (gásy) dro fóro. Jone rakiréna péskire dajenge: ‘Kaj isyn giv i kaj isyn mol?’ Jone meréna [našavena sodžinyben-ju.o.] sýrby dukhade pir foróskire gásy, i jone otdena péskiro di pal léngire – dakiri breg. Sósa mánge te ramaniakirav tut? Sósa mánge te porovninav tut, Jerusalimóskiri čhaj? Sósa te rovniakirav tut, sob (kaj) mánge te dav lačhó lav túke, patyvalý terný džuvlý, čhaj Sionóstyr? Pal-dová, so tyró bedypen rosčhudiape buĥles syr mórjo (derjáv), kon moginéla te sastiakirel tut? Tyré proróki dykhné vaš túke čhučé i nagod'vare suné; jone na sykade tyró čoripén, sob (kaj) te riskirén pale tumen plienóstyr, ne jone dykhné vaš túke xohané angilphenybena; paldová i vybičhade tumen. Saré, kon džála pašýl, pekavena pir vastá pe túte; jone sipinena i kuninena šerenca pe Jerusalimóskire čhate: “Ci davá isyn fóro, so khardiape Gožymakiro pherdypen, saré – phuvjákiri rádyma?” Saré tyré vérgi psirade péskire muiá pe túte: jone sipinena i jone skriežynena péskire dandenca. Jone rakiréna: “Ame xasiakirdiam davá fóro! Ake, isyn dyvés, so ame užakirdiam, ame lathiam dová, ame dykhciam davá.” Raj Devél kerdiá dová, so Jov pridumindia: Jov vypherdiakirdia Péskiro lav, so Jov priphendiá dre ĥaratuné dyvesá. Jov čhurdyjá telé Jerusalimo, i Jov na potangindia, Jov kerdiá adiáke, sob (kaj) tyró vérgo drieván te radynélpe tyré bibahtiatyr, Jov barjakirdia zor tyré namalenge. Jerusalimóskire – manušéngiro iló lyjá te del gódla roibnasa ke Devél: o Sionoskire-Čhakiri vánta! Mek te prastan tyré jasva syr reka (len') dyvés i rat; na otkhinjov, na de péskire jakhenge te otkhinjon. ĥazdepe, de gódla javrí ratý, kiéli kažno stréga džála, vyčhuv syr paní péskiro iló angíl Raste-Devléste, ĥázde péskire vastá ke Jov vaš džiibén tyré tyrne bijatengiro, savé našavena zor bokhátyr pe kažnoné-gasakiro venglo. “Dykh, Rajo Dévla, i obdumin, konéske Tu kerdián adiáke? Sob (kaj) džuvliá te xan péskiro barjakirdó (plódo), konés jone barjakirdé? Sob (kaj), xaj, te muliakirén rašás i prorokós pe Ráskire-Devléskiro Svénto Štéto? Tyrne i phurané isyn pašté pe phuv pe gásy, i jone miré patyvalé džuvliá i miré terné manušá pyné kurtalátyr; Tu muliakirdian len dro dyvés, syr Tu xoliasyjan, Tu zamardian len i Tu na tangindian (na požalindian). Tu khardian khetané sýrby pe svenkitko dyvés traša, so obgine trusciál man; dro dyvés, syr Tu xoliasyjan, nijékh na nascia, na jaciápe. Kodolén, konéske me davas kolýn i konés me barjakirdjom, miré vérgi vyhane.” Me som manúš, konés Devél pritasadia destesa Léskire xoliátyr, Jov lydžijá man i jandiá te psirav dro kalypén (ciamlypén), kaj nane dud. I Jov riskirelas Péskiro vast pe mánde nevés i nevéstyr dyvesenca. Jov kerdiá adiáke, so miré masá i mirí cýpa tyknyne, i Jov phagirdiá miré kokalý. Jov ĥazdyjá vánta pe mánde, i Jov obgija trusciál man kirkipnasa i pharipnasa. Jov čhudiá man dre ciamle štéty, sýrby me ĥará myjom. Jov občhudiá man tynosa, sob (kaj) me na moginav te džav angíl: Jov pharjakirdia mirí zandir. Adiáke-pac', kiéli me khardjom roibnasa i dyjom gódla, tedy Jov zarikirdia mirí pátieri (molítva). Jov zakerdia miré dromá vyčingirde barénca; Jov popentyndia miré dromore. Jov jaciá vaš mánge sýrby rič, so isyn paštó, užakiri te zamarél, sýrby ščer, savó isyn dro čorahano štéto. Jov piririskirdia miré dromá i kuscia man pe koterá: Jov pirikerdia man dro nisó. Jov ĥazdyjá Péskiro lúko, i Jov čhudiá man syr celjo vaš Péskire maribnýtka bustiá (striély). Jov kerdiá adiáke, so bustiá Léskire kolčanostyr phusadé miré bukore. Me jacjom kadasavó, so saré manušá sanape xoliames mándyr, me jacjom sýrby léngiri gilý pe dyvés. Jov dyjá čalés mánge kirkipen i paniakirdia man palynosa. Jov phagirdiá miré dandá graviljosa i čhakirdia man pieplosa. Jov lydžijá mándyr dur ramánjo (miro) miré diestyr, me bistyrdjom pal mištó džiibén. I me phendjom: ‘Mirí zor i mirí nadiéia pe Raste-Devléste xasiné.” Me ripirava miré mén'ki i mirí bari bída, kirki čar (polyno) i želučo. Miro di ŭsa ripirela len i isyn paštó štylés dre mánde. Davá me otphenava miré godiake i paldavá isyn nadiéia mánde: ame na xasijam pal Ráskire-Devléskiri láska, pal-dová so Léskiri žalima na končyndiape; jone sykadjona nevés kažno zlóko (ránko): savó baró isyn Tyró patiaibén! “Mirí dólia isyn dre Devléste” – rakírla miro di – “paldavá me užakirava lačhipén Léstyr.” Raj Devél isyn lačhó vaš odolénge, kon užakiréla Les, vaš kodolengiro di, savó rodéla Les. Davá isyn mištó, sob (kaj) manúš te rikirél nadiéia, i sob (kaj) te užakirel štylés, syr Raj Devél rakhéla Les. Davá isyn mištó vaš manušéske, sob (kaj) jov te lydžál ĥámo Devléstyr péskire tyrnypnastyr. Me jov te bešél jekhdžinó i te javél štyl, pal-dová so davá Raj Devél čhudiá davá pe léste; mek jov te čhuvél péskiro muj dro práho, – mo, te javél iščo (inké) nadiéia. Jov podčhuvela péskiri čham (ščoka) kodoléske, kon marela les; mek te obrakiren les pherdés. Pal-dová so Raj Devél na jačkiréla pe ŭsády (sak). Ne kóli Jov bičhavéla ileskiri dukh, tedy Jov adiáke-pac' sykavéla i žalima, pir-dová so barvaly isyn Léskiri láska: pal-dová so Jov na pritasavela ci kaliakirela manušéngire-čhavéngire ile, pir-dová so Léske trej adiáke. Kóli tasavena ĥerénca sarén, kon isyn dro štaribén, pir phuv, kóli riskirena pe rig čačipén, so isyn pal manušéste angíl Naj Vučedyreskire Devléste; kóli načačunes sykavéna manušés dro léskiro réndo, – ci Raj Devél pridžinela čačipén pe davá? Kon isyn kadavá, kon phenéla: ‘Davá kerélape adiáke, – mek Raj-Devél i na priphendiá. Ci na Naj Vučedyreskire-Devléskire lavéstyr, so javéla čoripén i lačhipén? Sóske tedy džidó manúš žalinelape, kóli Raj Devél sendiakiréla les pal léskire gréhi. Javén, rozĥaljovasa xor i vyphučasa pes pal amaré dromá i risjovasa pale ke Raj Devél. Javén, ĥazdasa ame amaró iló i vastá ke Raj Devél, Savó isyn pe bolybén. Ame kerdiám čoripén i búnto: Tu na otmekcian amarí bang. Tu čhakirdian Pes xoliása i Tu tradyjan amen, Tu muliakiresas amen i Tu na tanginesas. Tu čhakirdian pes oblokosa, sob (kaj) amarí pátieri te na prodžal pir léste. Tu kerdián améndyr šuma i džungalypén (gidota) maškír manušénde. Saré amaré vérgi psirade péskire muiá pe aménde. Dar i felý isyn pe amaró drom, čhučipen i xas'. Miré jakhéndyr prastána panieskire réki (leniá) pal miré manušénde [terné patyvalé džuvliáte-r.s.], savé xasjona. Miré jakhá thadena, i jone na pirijačena, jone na zarikerenape, angíl dová, syr Raj Devél na podykhela telé vučipnástyr i, ake, na udykhéla. Miré jakhéndyr džána dukhá dro miro iló pal saré manušénde miré foróstyr. Miré vérgi tradenaspe pal mánde bi-pričynakire sýrby pal čirikliate. Jone zatradyne ke meribén man dre ĥanbín i čhurdyné bará pe mánde, paniá ĥazdynépe vučedýr miré šerestyr, tén'či me phendjom: “Me xasijom.” Me khardjom Tyró lav, Rajo Dévla, telatuné ĥanbiniatyr. Tu šundián mirí zan: “Na garav Tyró kan, syr me dáva 'gondia, syr me rovava.” Tu javesas pašyledýr dro dyvés, syr me khardjom Tut. Tu phendián: “Na andarša.” Rajo Dévla! Tu lydžijan miro réndo; Tu vykindian miro džiibén. Rajo Dévla! Tu dykhcián, syr načačunes isys mánca. Rossendin miro réndo. Rajo Dévla! Tu dykhcián saró léngiro fuipén, so jone keréna mánge, i so jone pridumindle pe mánde. O Rajo Dévla! Tu šundián, syr jone obrakirenas man, so sarí léngiri fantazija isys pe mánde; syr miré-vergéngire uštá ĥundiarinenas pe mánde dyvesenca. Podykh, syr jone bešena, i syr jone uštena; Me jacjom sýrby léngiri gilý. Otdé pale lénge, O Rajo Dévla, pir dová, so léngire vastá kerdé. Bičháv lénge kalypén pe iló, mek te javén Tyró prokošybén (armania) pe lénde! Trade len angíl xoliása, i muliakir len Tyré bolybnástyr, Rajo Dévla! Syr kalyja suvnakái! Syr parudyja žužó suvnakái! Bará sventoné štetóstyr rosčhurdyne pir kažno venglo, kaj gásy rozdžana. Dróga Sionoskire čhavé, savé isyn mol syr žužó suvnakái, syr da lénge déna patýv sýrby ĥlejakire sudinkenge, so kerdiá kučikengiro (goršečniko). Až i rupuči [čudoviščy / šakalihi-ju.o.] déna ciucia te čaraven péskire tyknen, ne miré – manušéngire čhaja jačné pharé-iléskire sýrby strausy čhučé prahendyr. Tykné-masengiri čibori uhtylelape zoralés pal taloj dro léngiro mujoro, syr kaména paní: tykné bijaty mangena maró, ne nijékh na phagiréla (na déla) koteroro lénge. Kodolé, kon xaja delikatesy, isyn nábut so džidé pe vulícy (pe gásy); kodolé, konés barjakirdé dro loló plaščo, oblena kučy ĥnejo. Pharó-sendiakiriben pal čoripén, so kerdé miré-manušéngire čhaja, isyn zoraledýr pharé-sendiakiribnastyr, so doresné pal Sodomoskiro grého. Dová fóro sys rado telé pal jekh menta (minuta) adiáke, so nijékh na dyjá ráda te podel vast. Jerusalimóskire thagárja sys jasnedyr ivestyr i parnedyr thudestyr; jone sys lolikanedyr, dre masá rubinendyr; jone vydycjonas sýrby sapfiry. Kakaná jone vydycjona kaledyr boveskire meliatyr, jone džána pir gásy, len na pindžkirena. Léngiri cýpa uhtylelape zoralés ke léngire kokalý, joj vyšutija i jaciá syr kašt. Kodolenge, konés muliakirdé kurtalása, isyn bahtaledyr adalendyr, savé meréna bokhátyr. Pal-dová so jone našavena povolin'kes (liéntes) zor i kljoko, pir dová, so na uhtyléla (nádosi) feldýtka aplody. Vastá lačhé-iléskire džuvlién kerade péskire bijatén: jone sys mas lénge, kiéli pyjá bedypen pe Jerusalimóskire manušénde. Raj Devél vypherdiakirdia péskiri bari xolý, Jov vyčhudiá Péskire-xoliakiri jag. Jov xačkirdiá jag pe Sióno, i joj pohaia sarésa foróskire fundamienty. Králja pe phuv i saré džiibnarja pe svéto na patiandyné, so namal i vérgo zadžála dre Jerusalimóskiri pórta, – saró davá pal foróskire prorokénde i pal léngiro – rašángiro čoripén, kon pročhude čačuné – manušéngiro rat maškír davá fóro. Jone psirdé syr kororé pir gásy, jene magirdé pes ratésa adiáke, so nijekhe manušéske sys naštý te čilavel léngire ídi. Manušá dénas gódla pe lénde: “Džán krig, magirdé! Džán krig! Džán krig! Džán! Na čilaven amen.” Syr jone psirdé trusciál Najudénde, isys phendló maškír lénde: “Jone na dživéna butýr adái!” Ráskire-Devléskiri xolý roskerdiá len pe pašá. Jov na javéla te kerél patýv lénge. Nikón na kutiakirdia ni rašán, ni sykadiá láska ke godephuré. Amaré jakhá khinyne te dykhén ivjá (darmes), so vari-kon podela vast aménge. Ame dykhciam amaré vučardiatyr (bašniatyr) pal manušénde, savé na dyné ráda te zrakhen amen. Amaré vérgi tradynepe pal aménde pir amaré špery (sliady), so ame na mogindiam te džas javrí pe gása. Amaró kónco (jagóro) isyn pašýl, amaré dyvesá syg končynenape, pal-dová so javdiá amarí xas'. Amaré šale sys sygedýr kidendyr (orlendyr) pe bolybén, jene tradynepe pal aménde dre bérgi; jone užakirde čorahanés amen pe čhučé prahi. Amaré kralís, savó isyn sýrby maró dre amaró džiibén, konés Raj Devél pomakhcia syr kralís, uhtyldé dre léngire ganbinia. Pal léste ame phendiam: “Ame javása te dživás maškír Najudénde tel léskiri zer (tienjo).” Rádynpe i jav viesjolo (xotno), Edomoskiri Čhaj, kon dživéla pe phuv Uz. Tahtáj adiáke-pac' javéla pirdál ke tu: tu matjosa, i tu nangiakiresa pes. O, Sionóskiri Čhaj, pharó sendiakiriben končyndiape: Raj Devél na javéla te lydžál tut krig dro pliéno. Ne Jov sendiakiréla tut pal Tyró čoripén, Edomoskiri Čhaj. Jov otčhakirela tyré gréhi. Rípir, Rajo Dévla, so javdiá pe aménde: obdumin i dykh amarí bipatyv! Amaró mištypén gijá rigasa čužoné manušénge, a amaré kherá javire-themeskirenge. Ame jaciám siroty, bidadeskire, amaré daja jačné sýrby pivlia (udovy). Ame pjasa amaró paní pal lové, ame pleskirasa lové pal amaré kaštá lové. Vérgi tradenape pal aménde pir pienty [dre men-r.s.], ame kerása butý pharés, i aménde nane otkhinyben. Ame tyrdasa vastá ke Jegiptiáni, i Asiriicy, sob (kaj) te xan maró čalés. Amaré dadá kerdé gréhi, ne len nane butýr, ne pe aménde rikirélape bang pal léngiro čoripén. Dynárja xulainena pe aménde, i nijékh nane te vyrakhel amen léngire vastéstyr. Ame doresasa amaró maró, kóli ame lydžása šeró pe risko, pal-dová so isyn but praharja. Amarí cýpa kalyja sýrby bov baré bokhátyr, so xačkiréla. Vérgi léna pe zor Sionoskire džuvlién, a patyvalé terné džuvlién dre Judejákire fórja. Thagar'jen ublavena pal vastá, i godephurenge na keréna patýv. Jone čhudé tyrne manušén te mielinen giv pe siav/ phurt; terné-beršengire peréna kaštendyr, so jone lydžána dre angalia. Godephuré pirijačne te kedenpe pašýl foróskiri pórta, a tyrne manušá na bašavena butýr. Amaró iló pirijaciá te radynélpe, amaró khelyben pirikerdiape dre zoralý túga. Kralítko stadyk pyjá amaré šerestyr. Bida aménde! Palsó ame kerdiám gréhi! Paldavá amaró iló našavela zor, amaré jakhá lyné najasnes te dykhén, pal-dová so Bérga Sióno jaciá čhučí, i šakaly psiréna pir láte. Ne, Tu, Rajo Dévla, jačesape viéčnes, i Tyró trono rainel pe saré ródy. Sóske Tu sarésa bistresa amen? Sóske Tu jačavesa amen pe dasavo baró časo (cýro)? Rískir amen ke Pe, o Rajo Dévla, i ame risjovasa ke Tu! Neviakir amaré dyvesá, syr sys ĥaredyr. Naúšto Tu sarésa otčhurdyjan pe rig amen, ci so Tu adiáke zoralés xoliasyjan pe aménde! I sys: dro (dešutrito) berš, dro štárto čhon pe pándžto čhonytko dyvés, kóli me sómas maškír odolénde, konés tradyne dro pliéno, pašýl reka (len') Xovar – otkerdiape bolybén, i me dykhcjom dykhibena Devléstyr. Pe pándžto čhonytko dyvés davá sys pándžto berš, kiéli zalyne dre navolia kralís Ioakimos (Jahimos). Sys Ráskire-Devléskiro lav ke Jezekiljo, Vuzijaskire čhavéske, rašáske pe Xaldiejengiri phuv, pašýl reka (len') Xovar, i sys pe léste odój Ráskire-Devleskro vast. I me dykhcjom: ake, riskiribnaskiri balvál džálas paš – ratiatyr (sievierostyr), baró óbloko, i jag ĥazdelaspe dre léste, i davá ziainelaspe pašýl léste. A maškír saró sys sýrby dud (svéto) jagatyr maškirál: i maškír léste sys dykhné sýrby štar murdalá (žyvotna), i adiáke jone vydykhenas, a lengro muj sys, syr muj manušéste. Kažnonéste sys štar muiá, i kažnonéste léndyr sys štar phaká (kryly). Ĥerá lengre sys roŭna (vorta), a piré/podešvy (stupni) sys syr guruvoreste, i ziainenenaspe, syr žužakirdy (čysto) xarkóma (mied'). A tel léngire phaká sys manušýtka vastá pir štar rigá, sarénde štarende sys muiá i phaká. Muiá lénde i vastá lénde – sarénde štarende pritasavenaspe jekh ke javír: kóli jone džánas, jone na obrisjonas, a giné, karik dykhélas léngiro muj. Dová, so zdžála pe muj léngiro, kažno sys dasavo sýrby manušéskiro muj i ščereskiro muj jekh rigátyr lénde sarénde. A javire rigátyr sys guruvoreskiro muj i orlóskiro (kidóskiro) muj lénde sarénde. Muiá i phaká léngire upré sys roskerde, ne kažnonéste duj phaká pritasavenaspe jekh ke javír, a duj phaká učhakirenas léngire masá. I džánas jone, kažno dre doiá rig, saví sys angíl léskiro muj; karik kamelas te džal dúho (fáno), odorík jone džánas, a kóli džánas, to na obrisjonas. I vydykhenas dalé murdalá, syr xačkirdé vangara, syr momolia (sviečki) dre khangirí. Jag psirelas maškír lénde, i dud jagatyr, i bliskavica vydžálas jagatyr. Murdalá sýges psirenas angle i pale, syr bliskavica. Me dykhcjom pe dalé murdalénde: ake, pe phuv, pašýl lénde sys piró jekh rota angíl štar léngire muiá. Róty vydykhenas, i sys kerdé syr kuč bar topazo, saré štar vydykhenas, syr jekh, i sykavelaspe: syr jone vydykhenas, i syr jone sys kerdé, so isyn rota andré dre javír rota. Jone džánas pe péskire štar rigá, ne kóli jone džánas, to na obrisjonas. A léngire obody jone sys vučé i darane; sys pherdé jakhénca sarénde štarende. I kóli džánas murdalá, to džánas pašýl lénde róty, a kóli murdalá ĥazdenaspe phuvjátyr, tén'či ĥazdenaspe róty. Karik kamelas dúho (fáno) te džal, odorík jone džánas, i jone karik by te na džal dúho (fáno), i róty ĥazdenaspe lénca, pal-dová so murdalengiro dúho sys dre róty. Kóli džánas murdalá (žyvotna), to džánas i róty; kóli murdalá sys terdé, sys terdé róty, a kóli murdalá ĥazdenaspe phuvjátyr, tén'či róty ĥazdenaspe lénca khetané, pal-dová so murdalegiro dúho (fáno) sys dre róty. Uprál murdalengire šeré sys syr svódo pe bolybén, savó vydykhelas, syr darano bar kristalo. Jov sys rostyrdyno uprál léngire šeré. A tel svódo pe bolybén sys léngire phaká, savé obrisjonas mamúj iekh ke javír. Kažnonéste sys duj phaká, savé učhakirenas len, kažnonéste duj phaká učhakirenas léngire masá. I kóli jone džánas, me šunavas, syr šuminenas léngire phaká, kodová sys sýrby buté-panieskiro šumo, sýrby zan Sarezorjakireskiri, zoraló šuminyben, sýrby šuminyben dro xaladéngiro skedyibén; a kóli jone sys terdé, to jone zmekenas péskre phaká. I sys zan svodostyr pe bolybén, savó sys uprál léngire šeré; kóli jone sys terdé, tén'či zmekenas péskire phaká. A upré dolé svodostyr pe bolybén, savó sys uprál lengre šeré, sys sýrby trono, savó vydykhelas sýrby kuč bar sapfirostyr, a uprál pe štéto sys dová, so sys sýrby manúš pe léste. I me dykhcjom sýrby xačkirdy xarkóma, sýrby jag, saví sys dre léste i pašýl léste, léskire trušulendyr, i léskire trušulendyr, i vučedýr, i teledýr dykhcjom me sýrby jag i ziainyben sys pašýl léste. Syr vydykhela bangi (raduga) pe bolybén dro bryšyndeskiro dyvés, adiáke vydykhelas dasavo ziainyben, savó sys pašýl léste. Adiáke vydykhelas Ráskire-Devléskiri sláva. Kóli me dykhcjom davá, to me pyjom pe péskiro muj i šundjom Odoleskiri zan (glos), Savó rakirdiá mánca. Jov phendiá mánge: “Manušéskiro čhava! Uštý pe tyré ĥerá, Me javáva te rakiráv túsa.” A kóli Jov rakirélas, to zagijá dre mánde Dúho (Fáno) i čhudiá man pe miré ĥerá, i me šundjom Odolés, Savó rakirélas mánca. Jov phendiá mánge: “Manušéskiro čhava! Me bičhaváva tut ke Izrailjoskire čhavé, ke manušá, savé nikonés na kandéna, savé ĥazdynépe pe Mánde. Jone i léngire dadá otginé Mándyr ke/ žýko adadyvés. Adalé čhavé isyn biladžakirde mósa i zahale ilésa; Me bičhaváva tut ke jone, a tu phenésa lénge: “Adiáke rakiréla Raj Devél, Devél! Javéna jone te šunén ci na javéna, pal-dová so jone isyn buntuítka manušá, – ne, sob (kaj) jone te džinén, so maškír lénde sys proróko. A tu, Manušéskiro čhavó, na dar léndyr, i na dar lengre lavéndyr, kóli jone javéna vaš túke nalačhé čarjasa (phusadytkone drevicosa) i žyltone phusadytkone xrustenca, kiéli tu javésa te dživés maškír lénde (syr maškír skorpionende). Na dar lengre lavéndyr, na dar lengre móstyr, pal-dová so jone isyn kher, kaj nikonés na kandéna. Rákir lénge Miré lavá, javéna jone te šunén, ci na javéna, pal-dová, so jone isyn kher, kaj nikonés na kandéna. A tu, Manušéskiro čhavó, šun, so Me javáva te rakiráv túke: na jav dasavo narto (upriamo), syr davá Kher, kaj nikonés na kandéna, otker péskre uštá, i xa, so Me dáva túke.” Me dykhcjom: ake, isyn protyrdyno vast ke me, a dre vast sys lylvarí (svítko). I Jov otkerdia la angíl mánde, i sys lylvarí začhindly angle i pale, i sys začhindló dre lylvarí: “Roviben, i tugipen jasvénca, i bibáht.” I phendiá Devél mánge: “Manušéskiro čhava! Xa dová, so isyn angíl túte, xa kadaja lylvarí (svítko), i džá, rákir Izrailjoskire kheréske!” Tén'ci me otkerdjom péskire uštá, i Jov dyjá mánge, sob (kaj) me te xav kadaja lylvarí. I phendiá mánge: “Manušéskiro čhava! Čaliakir peskro per, pherdiakir les lylvarjasa (svitkosa), saví Me dáva túke.” Me xajom, i sys gudló dre miré uštá syr avgín (meda).” I Jov phendiá mánge: “Manušéskiro čhava! Uštý, džá ke Izrailjoskiro kher, – rákir lénca Miré lavénca. Me bičhaváva tut na ke narodo, savó rakiréla naĥalyibnytkes, konéste isyn pharí čib, a ke Izrailjoskiro kher. Na ke but narody, savé rakiréna naĥalyibnytkes, i konéste isyn pharí čib, konés tu na galjosas by; ne kóli b Me te bičhavav Tut ke jone, to jone na kandenas tut. A Izrailjoskiro kher na zakaméla te šunél tut, pal-dová so jone na kaména te šunén Man, pal-dová so saró Izrailjoskiro kher isyn pharé-šeritka, i zahale ilésa. Ake, Me keráva tyró muj i dúho zoraledýr, syr léngire muiá isyn, i čekat tyró zoraledýr, syr léngire čekáta isyn. Syr almazo (diamanto), so isyn zoraledýr barestyr, kerdjom Me tyró čekat, na dar léndyr, na dar te javes angíl léngiro muj, pal-dová so jone isyn kher, kaj na kandéna nikonés.” I phendiá Jov mánge: “Manušéskiro čhava! Saré Miré lavá, savé Me javáva te rakiráv túke, prilé tyré ilésa i vyšún tre kanenca. Uštý, džá pašyledýr ke odolé, konés tradyne dro pliéno, ke čhavé tyré narodóstyr, rákir lénge, i phen lénge: “Adiáke rakiréla Raj Devél, Devél: Ci javéna jone te šunén ci na javéna.” I ĥazdyjá man Dúho (Fáno), i šundjom me pal péste zoralý zan sýrby gromo: “Te javél bahtiakirdy Ráskire-Devléskiri sláva dalé štetóstyr!” I adiáke-pac' šundjom me šumo murdalengire phakendyr, savé pritasavenaspe jekh ke javír. I syr šuminena róty palál pašýl lénde, i zoraló gromo. I ĥazdyjá man Dúho (Fáno), i lyjá man. I džavas me pharé ilésa, xoliása, i Ráskire-Devléskiro zoraló vast sys pe mánde. I javdjom me dro Tiel'-Avivo ke odolé, konés vytradyné péskre phuvjátyr, savé dživdé pašýl reka (len') Xovar, i Me sómas maškír lénde eftá (bitrinéngiro deš) dyvesá, i zoralés divinavaspe. Kóli ž proginé eftá dyvesá, sys ke me Ráskire-Devléskiro lav: “Manušéskiro čhava! Me čhudjom tut rakhibnarisa Izrailjoskire kheréske. Tu javésa te šunés lav Miré uštendyr, a tén'či tu javésa te sykliakires len Mándyr. Kóli Me phenáva grehitkoné manušéske: ‘Tu merésa!’, a tu na sykliakiresa les, na phenésa, sob (kaj) te zrakhes grehitkoné manušés leskre grehitkoné droméstyr, sob (kaj) te javél jov džidó, adavá grehítko manúš meréla dre péskre gréhi, a tu javésa bangó angíl Mánde pal léskiro rat. Ne kóli tu sykliakiresas grehitkoné manušés, a jov na jačadia péskiro grého (bedypen) i péskiro grehítko drom: to jov meréla dro péskiro čoripén, a tu zrakhcián tyró di. I nevéstyr, kóli devlýtko manúš otdžala péskre čačipnastyr i skerla čoripén, to Me čhuváva angíl léste vari-so, sóstyr jov peréla, i meréla devlýtko manúš, pal-dová so tu na sykliakiresas les. Jov meréla pal péskiro grého, i na priripirlape léskiro čačipén, so jov kerélas, a tu javésa bangó angíl Mánde dro léskiro rat. Kóli ž tu javésa te sykliakires devlytkoné manušés, sob (kaj) jov te na kerél grého, i na kerla jov grého, tén'či jov javéla džidó, pal-dová so sys sykliakirdo, a tu zrakhcián tyró di.” I sys pe mánde odój Ráskire-Devléskiro vast. Jov phendiá mánge: “Uštý, vydža pe félda. Me javáva te rakiráv túsa.” Me uštyjom, i gijom pe félda. Ake, odój sys terdy Ráskire-Devléskiri sláva, syr sláva, saví me dykhcjom pašýl reka (len') Xovar. Me pyjom pe péskiro muj. I zagijá dre mánde Dúho (Fáno), i čhudiá man pe miré ĥerá. I Jov rakirlas mánca, i phendiá mánge: “Džá, zaphandepe dro tyró kher. Manušéskiro čhava! Ake, léna šele i phandena tut lénca, i tu na javésa te psirés maškír lénde. Čib tyrí Me otlava tútyr, i tu javésa bičibakiro, i na phenésa čačipén pal lénde, pal-dová so jone isyn kher, kaj na kandéna nikonés. A kóli Me javáva te rakiráv túsa, tén'či me otkerava tyré uštá. Tén'ci tu phenésa lénge: “Adiáke rakiréla Raj Devél, Devél! Kon kaméla te šunél-šun, a kon na kaméla te šunél-na šun, pal-dová so kadavá isyn kher, kaj na kandéna nikonés.” Tu, Manušéskiro čhavó, le péske kirpičo (ceglo), čhuv les angíl túte. Ker pe léste čertjožo (patrín) foroske Jerusalimoske. I ker adiáke, sob (kaj) te javén terdé manušá xaladybnasa, so občhude trusciál léskire vánty, sob (kaj) te javél vyčhudo phuvjátyr valo, rosčhuv xaladengirjo táboro (lod (lagierjo)) i rosčhuv mašyny, so phagirena vánty. Le péske sastruny phal i čhuv la syr sastruny vánta maškír túte i maškír fóro, i dykh pe fóro. Pe fóro ĥazdénape vérgi, a akaná tu ker, syr jone. Kadavá javéla ĥiertýk (sykaibén) Izrailjoskire kheréske. A tu pasjov pe tyró zérvo pašvaro, čhuv pe léste Izrailjoskire-kheréskiro čoripén. Kicý dyvesá tu javésa te pasjos, adákicy dyvesá tu javésa te lydžas léngiro čoripén. Me vykedyjom túke beršá, so tu javésa te lydžas léngiro čoripén (kára): trinšelá te dešujenia dyvesá tu javésa te lydžas čoripén kheréskiro Izrailjoskiro. Kóli tu kerésa saró adiáke, to javír mólo pasjov pe čačó (pravo) pašvaro, i štardešá dyvesá lýdža pe péste Judáskire-kheréskiro čoripén, dyvés pal berš, dyvés pal berš, syr Me vykedyjom túke. Ĥazde tyró muj i tyró nango čačó vast pe Jerusalimo, i angilphen (proročyn) pe léste. Ake, Me phandava tut, sob (kaj) tu te na risjos jekhe rigátyr pe javír dakicy but, syr tu končynesa dyvesá. Le péske parnó giv (givny), gersto (vorzo), nukle (boby), linsa (čečevica), proso i vika, i čhuv len dro jekh khoró, i ker léndyr péske maró. Tu javésa te xas les adákicy dyvesá, kicý javésa tu te pasjos: trin šelá te jeniadeša dyvesá. Tu javésa te xas tyró xabén pir biš šekeli pharipnasa (viesosa) dro dyvés, xa les dro péskiro uliago (pora). I paní pi nábut, pi paní dro péskiro uliago (pora). I xa peskro xabén syr gerstytko maró, i pek len pe manušéngiro nažužypen, adiáke, sob (kaj) manušá te dykhén. Tén'ci phendiá Raj Devél, Devél: “Adiáke Izrailjoskire čhavé javéna te xan peskro nažužo maró maškír kodolé narody, ke savé Me vytradava len.” Me phendjom: “O, Rajo Devlale! Nikoli me na sómas magirdó miré ternypnastyr, me na xavas mulé-murdaleskiro mas, me na xavas i dová, so roskuscia riskiribnáskiro murdál (zvierjo). Nisavó nažužo mas me na xajom.” Tén'ci Raj Devél, Devél phendiá mánge: “Ake, Me domekava, sob (kaj) tu te pekes péskiro maró pe guruvniakiro nažužipen” I phendiá iščo (inké) Jov mánge: “Manušéskiro čhava! Ake, Me otlava Jerusalimóstyr maró, so déla džiibén. Javéna te xan maró pir koterá (kuski) i jasvénca, javéna te p'jen paní pir tahtáj (čaša) i darása. Pal-dová so na javéla lénde maró i paní. Jone darása javéna te dykhén jekh pe javiréste, i jone xasjona dre péskire čoripena. A tu, manušéskiro čhava, le péske vostro (čolaly) kurtála, lýdža lása pir tyró šeró i pir tyré čhora (broda) syr muradluny (britva), le péske ubladýtka (viesy), i rosker balá pe časti (častyra). Tríto čast' (častyr) xačkir jagása maškír fóro, syr pherdiakirenape dyvesá, syr vérgi oblyne trusciál (rotasa) fóro, tríto častyr le i počingir kurtalása pašýl fóro, i rosčhurde tríto častyr pir balvál. A Me vytyrdava kurtála pal lénde. Le daléstyr nevés nábut, zaphande len dre brinda péskre uribnaskiri. A tén'či le iščo (inké) da léstyr, so isyn dre uribén, i čhurde dre jag, shačkir kadavá dre jag. Odothýr vydžála jag pe saró Izrailjoskiro kher” Adiáke rakiréla Raj Devél, Devél, Sarezorjákiro: “Kadavá isyn Jerusalimo! Me čhudjom les maškír narody, a pašýl léste-phuvjá. A Jerusalimo kerdiá Miré priphenybnenca fujedýr Najudytkoné nacyiéndyr. Jov kerdiá Miré zakononenca nakučedyr, sósa phuvjá, savé isyn pašýl léste. Jone otphendlepe Miré uphenybnendyr, jone na dživénas pir Miré statúty.” Paldavá adiáke rakiréla Raj Devél, Devél: “Pal dová, so tumé kerénas tumaré gréhi butýr syr Najudýtka nácyi, savé dživénas pašýl tuménde; i na keréna syr isyn priphendlo dre Miré priphenybená, na dživéna pir Miré zakóny, i tumé na dživéna pir zakóny, savé isyn maškirál Najudýtka nácyi, savé isyn trusciál tuménde, paldavá adiáke rakiréla Raj Devél, Devél: “Ake, čačes, Me vydžava pe túte, Me Kokoró, i keráva maškír túte séndo angíl jakhá Najudytkoné-nacyiengire. I Me keráva túsa dová, so Me nikoli na keravas, i so butýr Me na javáva te keráv pal saré tyré džungalé (brydka) réndy. Pal dová dadá javéna te xan maškír túte čhavén, a čhavé javéna te xan daden. A Me javáva te sendiakirav tut, a tyró jačaibén rosphurdava pir saré balvalia. Paldová, – “Te dživáv Me, – rakiréla Raj Devél, Devél. – “Pal dová, so tu magirdian Miro svénto štéto saré péskire džungalypnasa, i saré tyré nakuč rendénca Me keráva tut tyknesa, i na potanginela tut Mirí jakh, i Miro iló na kovljola pe túte. Tríto paš túte meréla fujendyr (jazvendyr) i xasjola bokhátyr maškír túte; tríto paš javéla za-mardy kurtalása pašýl tyró fóro, a tríto paš Me rosphurdava pir saré balvalia i Me vytyrdava (doresava) pal lénde kurtála te tradavpe. I pirijačéla Mirí xolý, i štyljola Miro xoliakiribén pe lénde, i javéla Mánge pir iló, i ĥaljona, so Me, Raj Devél, Devél, rakiravas dro Péskiro zevlynypén, kóli končynelape Mirí xor xolý pe lénde. I me keráva adiáke, so tu javésa čhučí phuv i ladž, obrakiribnasa maškír narody, savé isyn pašýl túte, angíl jakhá kažnoneskire, kon javéla te prodžal pašýl. I javésa tu sabnasa, i ladžasa, sykaibnasa, i javéna te divinenpe darása pe túte narody, savé isyn pašýl túte, kóli Me javáva te sendiakirav tut baré xoliása i men'kasa. Me, Raj Devél, Devél, phendjom davá. I kóli bičhaváva Me pe tuménde baré bokha, savé javéna te xasiakirén tumen, syr mižeh matlia, i kóli bičhaváva len pe tumaró xasibén keráva maškír tuménde bokh iščo (inké) zoraledýr, Me otlava tuméndyr marunó zapaso, to bičhaváva pe tuménde bokh, zahale, riskiribnáskire murdalén (zvierien); jone otlena tuméndyr čhavorén. Meribnytka fránsy / fuiá (jazvy) i rat peréna pe túte, kurtála javéla pe tuménde. Me, Raj Devél, Devél, phendjom davá.” I sys ke me Ráskire-Devléskiro lav dasavo: “Manušéskiro čhava! Risjov tyré mósa ke Izrailjoskire bérgi, angilphen pe lénde. Phen: ‘Bérgi Izrailjoskire! Šunén Ráskire-Devléskiro lav. Adiáke rakirél Raj Devél, Devél pe bérgi, bérgicy, rovy i doly: ake, Me keráva adiáke, so kurtála javéla pe tuménde i rosphagirava tumaré vučé štéty. Altári tumaré javéna rosphagirdé, stýlby tumaré, savé tumé ĥazdenas khameske, javéna rozmarde, Me rosčhurdava tumaré mulen angíl tumaré ídoly. I Me čhuváva trúpy Izrailjoskire čhavén angíl léngire ídoly, i rosčhuvava tumaré kokalý pašýl tumaré altári. Dre saré štéty, kaj tumé dživéna, fórja javéna čhučé, vučé štéty javéna rosphagirdé vaš dová, sob (kaj) te aven čhučé i rosphagirdé tumaré altári, sob (kaj) te javén začhurdyne tumaré ídoly, sob (kaj) te javén rosphagirdé stýlby khameske, sob (kaj) te javén bistyrde tumaré butiá. I javéna te perén maškír tuménde domardé, i ĥaljona, so Me som – Raj Devél, Devél. Ne Me zrakháva jačaibén (ostatko), i javéna tuménde maškír narody odolé, savé jačénape džidé kurtalátyr, kóli tumé javéna rostradyne pir javír phuvjá. I javéna te ripirén pal Mánge kodolé, savé jačénape džidé maškír narody, karik len tradyne. Priripirna, kóli začilavava léngiro biladžakiro iló, so otpyja Mándyr, i léngire jakhá, savé paruvenas Mánge angíl ídoly. I jačéla lénge nakuč dre léngire ile pal dová čoripén, savó jone kerénas dre saré péskre džungalé réndy (diély). I ĥaljona, so Me som Raj Devél, Devél. Na ivjá rakiravas Me, so Me janáva lénge bari bída.” Adiáke rakiréla Raj Devél, Devél: “Mar vasténca, malav tyré ĥerénca, i phen: ‘Bida pal saró Izrailjoskire kheréskire čoripén i džungalypén! Jone xasjona kurtalátyr, bokhátyr i meribnytkone fransendyr. Kon isyn dur, kodová meréla meribnytkone fransendyr, a kon jačélape, odová meréla bokhátyr. Adiáke Me vypherdiakirava pe lénde Mirí bari xolý. I ĥaljona, so Me som Raj Devél, Devél, kóli domardé javéna te pasjon maškír léngire ídoly trusciál léngire altári, pe kažno berĥica, pe saré sama vučé berĥi, tel kažno zeleno kašt, tel kažno ĥensto dembo, pe dová štéto, kaj jone xačkirenas kučoné-khandypnytka smóly saré idolénge. I protyrdava Me ke jone Miro vast, i keráva adiáke, so phuv jačéla čhučí, čhučedyr štetóstyr, kaj čhučé phuvjá Divlaf ke saré štéty, kaj jone dživéna. I tén'či jone ĥaljona, so Me som Raj Devél, Devél.” I sys ke me Ráskire-Devléskiro lav dasavo: “Tu, manušéskiro čhava, phen: “Adiáke rakiréla Raj Devél, Devél. ‘Kónco (jagóro) isyn Izrailjoskire phuvjake, kónco (jagóro) javdiá pe saré štar rigá. Ake, kónco javdiá túke. Bičhaváva Me pe túte Mirí xolý, Me javáva te sendiakirav tut pir tyré dromá, i Me čhuváva bang pe túte pal saré tyré džungalypena. I na potanginela tut Mirí jakh, i Miro iló na kovljola ke tu. Me otdáva pale túke pir tyré dromá, i džungalypena tyré javéna túsa, i ĥaljona, so Me som Raj Devél, Devél.’ “Adiáke rakiréla Raj Devél, Devél: ‘Bari bibáht jekhdžiny, ake, džála bibáht. Kónco (jagóro) javdiá, javdiá kónco (jagóro), ĥazdyjápe pe túte, ake, javdiá.” Javdiá tyrí kirki dólia ke tu, manúš, savó dživéla pe phuv! Javéla časo (cýro), džála pharó dyvés, na javéla te rozmekelpe rádyma pe bérgi. Ake, sýges Me čhuváva pe túte Miro xoliamipen, i Me vypherdiakirava pe túte xolý Mirí. Javáva Me te sendiakirav tut pir tyré dromá, Me čhuváva bang pe túte pal saré tyré džungalé réndy. I na potanginela tut Mirí jakh, i Miro iló na kovljola ke tu. Me otdáva pale túke pir tyré dromá, i čoripena tyré javéna túsa, i tumé ĥaljona, so Me som Raj Devél, Devél, Savó pharés sendiakiréla. Ake, isyn dyvés! Ake, javdiá jov, vybarija destó, rozbarija phut'kiribén. Ĥazdelape nahrates zor pe čoripnengiro destó. Niči na jačélape léndyr (Izrailjostyr) i léngire barvalypnastyr, léndyr kokorendyr, léngire šuminybnastyr, léngire gožypnastyr. Javdiá časo, podgíia dyvés. Kon kindia – na rádynpe, kon bikindia – na rov, pal-dová so xoliamipen Devléskiro isyn pe lénde sarénde. Odová, kon bikindia, na risjola ke dová, so jov bikindia, kóli jačélape džidó, pal-dová so prorokoskiro dykhibén vaš saró léngiro butypen na otparuvelape; i nikón péskire čoripnasa na zrakhéla péskiro džiibén. Zabašavena dro rógo (truba), saró kedelape, sob (kaj) te džal pe maribén, ne nikón na javéla pe maribén, pal-dová so Miro xoliamipen isyn pe saró léngiro butypen. Paló kher-kurtála, a dro kher-fuiá i bokh. Kon isyn pe félda, odová meréla kurtalátyr, a kon isyn dre fóro, kodolés shana bokh i fránsy. A kon zrakhélape, odolé našéna, i javéna pe bérgi syr golumby pe dólo. Saré jone javéna te rovén, kažno (sváko) pal péskiro čoripén. Sarénde obmekenape vastá, i čangá sarénde izdrana syr paní. Tén'ci jone ur'jenape dro balytko guno praskasa, i učhakiréla len trašaibén, ladž javéla pe muiá i jone občhinena péskire balá. Péskiro rup vyčhurdena jone pe vulíca (gása), suvnakáj na javéla lénge trej. Léngire rup i suvnakáj na zrakhena len dro dyvés, kóli javéla Ráskire-Devléskiro xoliamipen. Jone na čaravena lénca léskiro di, i na pherdiakirena lénca péskiro per, pal-dová so rup i suvnakáj dolydžine len ke čoripén. I sys jone phut'kirdé, so sys lénde rup i suvnakáj pe uribén, jone kerénas léndyr vyčhindlé muiá péskire džungalé devlorénge. Pal davá Me keráva adiáke, so rup i suvnakáj iavéna syr ĥnejo. Otdáva Me rup i suvnakáj dre vastá syr doresybén čužoné manušénge, grehitkoné manušénge, so isyn pe phuv, jone čorena les, i javéla rup, suvnakáj magirdé léndyr. I risjováva Me léndyr Miré mósa, i jone magirena Miro svénto štéto. Javéna rozmaribnarja te magirén les. Ker zandir (cepo), pal-dová so pe adáia phuv čhuvélape rat, i dro fóro kerélape nahratyma (nasil'stvy). Me janáva javire narodóstyr dasavé manušén, savé isyn naj fujedýr Najudytkoné nacyiéndyr. Jone zalena léngire kherá. I zakončynelape zoralengiro phut'kiribén, i javéla magirdó léngiro svénto štéto. Džála xasibén: javéna te rodén ramánjo (miro), i na lathéna. Bari bída javéla pal bari bída, šunybén paló šunybén. Javéna te mangén dykhibén prorokostyr, na javéla sykliaiben rašaste i lačhó lav godé – phurende/phurydyrende. O králi javéla te tuginel, thagaris učhakirna balá, manušénde, so isyn pe phuv, javéna te izdran vastá. Me keráva lénca pir léngire dromá, Me javáva te sendiakirav len pir léngire sendy, i jone ĥaljona, so Me som Raj Devél, Devél.’” I sys dro šóvto berš, dro šóvto čhon, pe pándžto dyvés. Me bešavas dre miro kher, i Judejákire phurydyrá bešenas angíl mánde i pyjá pe mánde odój Ráskire-Devléskiro, Devléskiro vast. Me dykhcjom: ake, vari-saví patrín(óbrazo) sýrby manúš, leskre ĥerendyr sys sýrby jag, vučedýr léstyr sýrby dud, sýrby dud jagatyr. Jov protyrdyjá sýrby vast, i lyjá man pal balá pe miro šeró. I ĥazdyjá man Dúho (Fáno) maškír phuv i bolybén, i lydžijá man dre Devléskire dykhibena ke fóro Jerusalimo ke zagiibén pašýl vudár, savó sys čhudo pe paš-rat (sieviero), kaj sys čhudo idolo; savó vykharela zevlynypén. Ake, odój sys Izrailjoskire-Devléskiri sláva, syr odoia, saví me dykhcjom pe félda. I phendiá Dúho mánge: “Manušéskiro čhava! Ĥazde tyré jakhá ke paš-rat (sieviero).” Me ĥazdyjom miré jakhá ke paš-rat, ake, dolé rigátyr pašýl altarjoskiri pórta, pašýl zagiibén sys dová zevlenypnaskiro idolo. I phendiá Jov mánge: “Manušéskiro čhava! Dykhésa li, so jone keréna? Baró džungalypén, savó keréla adáj Izrailjoskiro Kher (Khangirí), sob (kaj) Me te džav krig Miré sventoné štetóstyr? Ne obrisjov, i dykhésa džungalypén (brytkima) iščo (inké) butýr. I Jov jandiá man ke zagiibén dre gréda (dvóro), me podykhcjom: ake, dre vánta sys prophagiriben. I phendiá mánge: “Manušéskiro čhava! Proganav vánta” Me proganadjom. Ake, isyn vari-savó vudár. I phendiá Jov mánge: “Zadžá, podykh pe bedo džungalypén, savó jone keréna adái.” Me zagijom i dykhcjom. Ake, kažno patrín (risunko) capniengiro, i nažuža murdalá i kažna ídoly Izrailjoskire kheréskire sys čhindlé pe vánty. A eftadešá (bitrijandengiro šel) muršá, Izrailjoskire-Kheréskire godé-phurendyr (phurydyrendyr) sys terdé angíl lénde, i Jezanijá (Iiezanija), Safanoskiro čhavó sys terdó maškír lénde. Kažnonéste dro vast isyn péskiri kadila thuvipnaskiri, baró oblako kučoné-khandypnaskiro ĥazdelaspe upré. I phendiá Jov mánge “Dykhés cji, so keréna Izrailjoskire kheréskire baredyra dro kalypén (tjomnyma) rat, so keréla kažno léndyr dre péskiri štúba, kaj isyn ídoly? Jone rakiréna: “Na dykhéla amen Raj Devél, Devél, jačadia Raj Devél, Devél daja phuv” I phendiá mánge: “Obrisjov i iščo (inké) butýr dykhésa džungalypén, savó jone keréna” I jandiá man ke zagiibén dre Ráskire-Devléskire Kheréskiri (Khangirjákiri) pórta, saví isyn pe paš-rat (sieviero). Ake, odój bešenas manušnia, savé rovenas vaš Famuzo (Tamuzo). I phendiá mánge: “Dykhésa ci, manušéskiro čhavó? Obrisjov, i iščo (inké) butýr džungalypén dykhésa, savó jone keréna.” I jandiá Jov man dre gréda (dvóro), saví sys andrál Ráskire-Devléskiro Kher. Ake, pašo vudár Ráskire-Devléskiri Kher (Khangirí) maškír tremy (koridory) i altárjo sys terdé biš te pandž phurydyrá. Lengre muiá dykhenas pe vastóko, a ke Ráskire-Devléskiri Kher jone dumesa risiné, i mangenaspe (molinenaspe) khameske pe vastóko. I phendiá mánge: “Dykhésa ci, manušéskiro čhavó? Naúšto/haj iščo (inké) nábut Judakire kheréske dolé džungalypena, savé jone kerdé adái, ne jone inké (iščo) pherdiakirde phuv nahratymasa, i jone risiné te košenpe Mánca. Ake, jone podlydžana randiá (vétki) ke péskire nakha. Pal dová Me javáva te keráv xoliamipnasa: na potanginela Mirí jakh, i na pokovljola Miro iló. Mek jone te godlen dre Miré kaná zoralé zaniása, ne Me na šunava len.” I phendiá Jov, sob (kaj) te šunén miré kaná, zoralé zaniása: “Mek te džán pašyledýr odolé, savé javéna pharés te sendiakiren fóro, kažnonéste dre vast sys dová, so xasiakiréla ke mulypen. Ake, šov manušá džána upratune portatyr, so isyn ke paš-rat (sieviero). Kažnonéste (svakoneste) dro vast isyn dová, so xasiakiréla ke mulypen, a maškír lénde sys jekh, savó sys uridó dro pohtanytko uribén, konéste pašýl leskro simiri sys dová, sósa čhinena lylá (priboro). I javné jone, i sys terdé pašýl altárjo. I Izrailjoskire-Devléskiri sláva zgija xieruvimostyr, pe konéste joj sys, ke Kheréskiro progo. I khardiá Jov manušés dro pohtanytko uribén, konéste pašýl leskro simiri, sys dová, sósa čhinena lylá. I phendiá léske Raj Devél, Devél: “Džá péske maškír fóro, maškír Jerusalimo, i ker špéra (znako) pe čekat odolé manušéngire, savénge isyn pharó pal saró džungalypén, i savé piridživena, so kerélape maškír lénde.” A javirénge phendiá adiáke, sob (kaj) me te šunav: “Džán pal léste pir fóro te muliakirén, mek te na tanginél tumarí jakh, mek te na kovljol tumaró iló. Phuren i terné manušén, patyvalé terné džuvlién i bijatós i džuvlién muliakirén, ne na čilaven ni jekh manušés, pe konéste isyn špéra (znako). Len (začninen) te kerén Miré sventoné štetóstyr.” Jone lyné te muliakirén dolé godé-phurendyr (phurydyrendyr), savé sys angíl Kher. I phendiá Dúho (Fáno) lénge: “Magirén Kher (Khangirí), i pherdiakiren gréda (dvóro) domardé manušénca, i vydžán.” Jone giné javrí, lyné te zamarén dro fóro. Kóli jone zamarenas len, a me jacjompe, tén'či me pyjom pe péskiro muj, i dyjom gódla, i phendjom: “Rajo Dévla, Dévla! Tu čhuvésa Tyró xoliamipen pe Izrailjo, so Tu xasiakiresa saró Izrailjoskiro jačaibén?” Tén'ci phendiá Jov mánge: “Izrailjoskire-kheréskiro i Judejákiro čoripén isyn baró, drieván baró, i adáia phuv isyn pherdý ratésa, i fóro isyn pherdó čoripnasa, so kerénas pehromi, doléstyr, so jone rakiréna: “Mekciá Raj Devél, Devél adáia phuv, i na dykhéla Raj Devél, Devél.” Pal dová na potanginela len Mirí jakh, i na kovljola Miro iló; ne Me dáva lengre réndy pale pe lengre šeré. Ake, manúš, uridó dro pohtanytko (ĥandladytko) uribén, konéste pašýl simiri sys dová, sósa čhinena lylá, dyjá otphenybén i phendiá: “Me kerdjom, syr Tu priphendian mánge.” I me dykhcjom, ake, pe svódo, savó sys uprál xieruvimonengire šeré, sys vari-so sýrby kuč bar sapfiro, sýrby vari-so, syr trono (priestolo), so sys upré léndyr. I rakirélas Jov manušéske, savó sys uridó dro pohtanytko uribén, i phendiá: “Džá andré maškír róty tel xieruvimy, le pherdé vastá xačkirdé vangara i čhurde len pe fóro.” Jov gijá andré pe miré jakhá. Hieruvimy sys terdé pir čačí rig Kheréstyr, kóli zagijá odová manúš, i óbloko pherdiakirelas gréda (dvóro), saví sys andrál. I ĥazdyjápe Ráskire-Devleskri sláva xieruvimostyr i dogijá ke Kheréskiro prógo, i Kher pherdiakirdiape oblokosa, i sys dud pe gréda, saví ziainelas Ráskire-Devléskire slavatyr. Šunyben xieruvimonengire phakendyr sys šundlo pe gréda, saví sys javrí, sýrby zan Sarezorjakire-Devléskiri, kóli Jov rakiréla. I sys adiáke, kiéli Jov priphendiá manušéske, savó sys uridó dro pohtanytko uribén, i phendiá: “Le jag maškír róty, maškír xieruvimy”, i zagijá i sys terdó pašýl róty. Tén'ci protyrdyjá jekh xieruvimo péskiro vast ke jag, saví sys maškír xieruvimy, i lyjá, i dyjá manušéske, urideske dro pohtanytko uribén. Jov lyjá i gijá javrí. I sys dykhno tel xieruvimengire phaká dová, so sys sýrby manušéngire vastá. I me dykhcjom: ake, štar róty pašýl xieruvimy, pir jekh rota pašýl kažno xieruvimo, i vydykhenas róty, i ziainenas sýrby kerdé kučoné barestyr topazostyr. I vydykhenas saré štar syr jekh rota, sýrby jekh rota čhudý dre javír rota. Kiéli džánas jone, to džánas pe péskire štar rigá, syr jone džánas, to jone na obrisjonas doléstyr, karik jone džánas, a jone džána odorík, karik dykhélas šeró. Jone džánas odorík, a kiéli džánas, to na obrisjonas. Saré léngire masá, i lengro dumo, i lengre vastá, i róty sys pherdé jakhénca, saré lengre štar róty. Ke dolé róty, syr me šundjom, sys phendló lav “galgal”. Kažnonéste murdalénde (žyvotnende) sys štar muiá. Pérvo muj sys xieruvimoskiro muj, javír muj – Manušéskiro muj, tríto muj – ščereskiro (lievoskiro), štárto muj orlóskiro (kidóskiro). Hieruvimy ĥazdynépe. Kadalé sys odolé sama murdalá/džidale (žyvotna), savén me dykhcjom pašýl reka (len') Xovar (Kiebar). Kiéli džánas xieruvimy, tedy džánas pašýl lénde i róty. Kiéli xieruvimy ĥazdenas péskire phaká, sob (kaj) te ĥazdénpe phuvjátyr, to róty na otrisjonas léndyr. Kiéli xieruvimy sys terdé, sys terdé i róty; kiéli xieruvimy ĥazdenaspe, gazdenaspe i jone doléstyr, so dre lénde sys murdalengiro (žyvotnengiro) dúho (fáno). I otgijá Ráskire-Devléskiri sláva Kheréskire progóstyr, i jaciá upré xieruvimendyr. I ĥazdyné xieruvimy péskire phaká (kryly) i ĥazdynépe pe miré jakhá phuvjátyr. Kiéli jone džánas, to i róty sys pašýl lénde, i jačné jone pašo zagiibén dre vastočno Ráskire-Devléskiro Kheréskiro vudár. I Izrailjoskire-Devléskiri sláva sys upré léndyr. Kadavá sys odolé murdalá (žyvotna), konés me dykhcjom tel Izrailjoskire Devléste pašýl reka (len') Xovar. Me ĥalyjom, so kadalé sys xieruvimy. Kažnonéste sys štar muiá, i kažnonéste sys štyr phaká. A telé phaká sys kole, savé sys sýrby manušéngire vastá. A dová, so vydykhelas sýrby léngiro muj, sys kadasavó, sýrby muiá, savé me dykhcjom pašýl reka (len') Xovar. Kažno džálas mamúj dre odoia rig, ke saví sys angíl léskiro muj. I ĥazdyjá man Dúho (Fáno), i jandiá man ke vastočno pórta (vráty) dro Ráskire-Devléskiro Kher, savó sys čhudo pe vastóko. Ake, pašo zagiibén dro pórta sys biš te pandž manušá. Maškir lénde me dykhcjom Iiezanijas (Jazanijas), Azuroskire čhavés, i Faltijas, Vaniejoskire čhavés. Kadalé sys thagárja maškír manušénde. I phendiá Jov mánge: “Manušéskiro čhava! Ake, isyn manušá, savé priduminena čoripén, savé déna beda godypena (soviety) dro davá fóro. I rakiréna: Iščo dur. Javása te kerás kherá, jov isyn kakávi (kotlo), ame sam mas. Phen pe lénde angilphenybén, phen angilphenybén, Manušéskiro čhavó.” I zgija pe mánde Ráskire-Devléskiro Dúho (Fáno), i phendiá mánge: “Phen,’ adiáke rakiréla Raj Devél, Devél: ‘So da rakiréna tumé, Izrailjoskiro kher, pal-dová so me džinóm, so tuménde isyn pe godý. Tumé but počhude zamardé manušén dro davá fóro, i tumé pherdiakirde tumaré vulícy (gásy) zamardé manušénca.’ Paldavá adiáke rakiréla Raj Devél, Devél: ‘Tumaré zamardé manušá, savén tumé čhudé, isyn masá, i kadavo fóro isyn kakávi, ne Me janáva tumen krig dalé-foróskire maškiralypnastyr. Tumé daréna kurtalátyr, ne Me janáva kurtála pe tuménde’, – rakiréla Raj Devél, Devél. ‘I Me lydžáva krig tumen foróskire maškiralypnastyr i Me otdáva tumen dre vastá čužonengire, i Me keráva séndo pe tuménde. Tumé peréna kurtalátyr. Me javáva te sendiakirav tumen pe phuvjákiri miéža Izrailjoskiri. Tén'ci tumé ĥaljona, so Me som Raj Devél, Devél. Jov na javéla butýr syr kakávi, i tumé na javéna butýr syr masá vaš léske, Me javáva te sendiakirav tumen pe miéža phuvjákiri dro Izrailjo. I tumé ĥaljona, so Me som Raj Devél, Devél, pal-dová so tumé na psirdé pir Miré statúty (ustavy), i tumé na kerdé pir Miré statutna uphenybená, ne tumé kerdé pir prisykliaibena, Najudytkoné nacyiengire, savé isyn pašýl tuménde.’” I kerdiápe adiáke, so syr me angilphenavas, to Faltija, čhavó Vanejaskiro, myjá. Tén'ci Me pyjom péskire mósa i dyjom gódla zoralés i phendjom: “O, Rajo Dévla! Naúšto Tu kamésa te muliakires manušéndyr ke kónco (jagóro)?” Nevéstyr sys ke me lav Rástyr-Devléstyr, savó phenelas: “Čhavó manušéskiro! Tre pšalénge, tre semencake, tre rodóske i saré kheréske Izrailjoskireske, sarénge, konéske phendlé džiibnáskire manušá dro Jerusalimo: ‘Durjon Rástyr-Devléstyr, kadaja phuv dyné aménge syr meknó mištypén.’ Paldavá phen: Adiáke rakiréla Raj Devél, Devél: “Mek Me rosčhudjom te dživén len maškír Najudýtka nácyi, i mek Me piričhudjom len te dživén dre javír thema, ne Me usajékh javáva vaš lénge syr tyknó Svénto Štéto pe odolé phuvjá, karik jone giné.” Tén'ci phen adiáke: “Me skedáva tumen javire nacyiéndyr, Me janáva khetané tumen themendyr, ke savé Me rosčhudjom te dživén tumen, i Me dáva túke phuv Izrailjoskiri.’” “I jone javéna odój, i jone léna krig saré magirdé vieščy (čysy) i saré džungalé priedmiety. I Me dáva lénge jekh iló, i Me čhuváva nevó dúho (fáno) dre tuménde, i Me láva krig baruno iló tumaré ločatyr (plotiatyr), i Me dáva lénge iló ločatyr, sob (kaj) jone te psirén pir Miré statúty, i te rikirenpe ke Miré uphenybená, i te kerén pir lénde i jone javéna Miré manušá, a Me javáva léngiro Devél. A kodolénge, saveskire ile tyrdenaspe pale magirdé i džungalé priedmiety, Me otdáva pale pal léngire réndy pe léngire šeré”, – rakiréla Raj Devél, Devél. Tén'ci xieruvimy ĥazdyné péskire phaká (kryly), i róty sys pal lénde, i sláva Izrailjoskire-Devléskiri sys uprál vučé lénde. I sláva Ráskire-Devléskiri gazdyjape foróskire maškiralypnastyr i terdijá pe bérga, so sys pe vastokoskiri rig dro fóro. Tén'ci Dúho (Fáno) ĥazdyjá man i jandiá man ke Xaldeja dro dykhibén Devléskire Duhóstyr ke odolé manušá dro pliéno. I, ake, dykhibén, so me dykhcjom, gijá krig mándyr. I adiáke me rosphendjom dykhibén kodolénge, kon sys dro pliéno, pal saré čačipená, so Raj Devél, Devél sykadiá mánge. I sys ke me Ráskire-Devléskiro lav dasavo: “Manušéskiro čhava! Tu dživesa maškír odolénde, savé nikonés na kandéna. Isyn lénde jakhá, sob (kaj) te dykhén, ne jone na dykhéna; isyn lénde kaná, sob (kaj) te šunén, ne jone na šunéna, pal-dová so jone isyn kher, kaj na kandéna nikonés. A tu, manušéskiro čhava, ker péske dová, so trej vaš piritradypen, i piritrade dyvesé angíl léngire jakhá. Piritrade jekhe štetóstyr pe javír štéto angíl léngire jakhá, sob (kaj) jone te ĥaljon. Ne jone isyn kher, kaj na kandéna nikonés. I vylydža tyró mištypén syr dová, so trej vaš piritradypen, dyvesé, angíl lengre jakhá, i kokoró vydža bel'velié angíl léngire jakhá, syr vydžána manušá, kóli tradéna dre navolia. Angíl lengre jakhá phagir vygiiben dre vánta, i lýdža tro mištypén pir davá prophagiriben. Angíl léngire jakhá le mištypén pe psikó, lýdža krig les ratý, zaker tyró muj, sob (kaj) te na dykhés phuv, doléstyr, so Me čhudjom tut ĥiertykasa Izrailjoskire kheréske pal bída.” Me kerdjom, syr Jov priphendiá mánge. Vylydžyjom dyvesé miro mištypén, syr dová, so trej vaš piritradypen, a bel'velié syr kaljola, Me prophagirdjom péske vastésa vygiiben dre vánta, vylydžijom mištypén ratý i ĥazdyjom les pe psikó angíl lengre jakhá. I sys ke me Ráskire-Devléskiro lav pe zlóko (pe ránko): “Manušéskiro čhava! Na rakirlas li túke Izrailjoskiro kher, kher, kaj nikonés na kandéna: ‘So tu kerésa?’ Phen lénge: ‘Adiáke rakirél Raj Devél, Devél: “Kadavá isyn angilphenybén pal pharipén ráske dro Jerusalimo i vaš saró Izrailjoskiro kher, savó isyn odój. Phen: ‘Me som ĥiertýk vaš tuménge. So me keráva, kadavá javéla lénca. Javéna te tradén len dre navolia’. I thagári, savó isyn maškír lénde, léla angíl syr kaljola léskiro mištypén pe psikó i džála krig. Prophagirena vánta, sob (kaj) jov te vydžál odothýr; jov zakerela peskro muj adiáke, sob (kaj) te na dykhél adáia phuv jakhénca. I Me čhurdava pe léste Mirí khudý (sietka), i uhtylava les feliasa, i lydžáva les ke Vavilóno, pe Xaldiejengiri phuv. Ne jov, thagári na dykhéla la, i meréla odój. A sarén, savé isyn lésa, i kodolén, savé podrikirenas les i leskre xaladén, Me rostradava pir saré balvalia, i Me ĥazdáva kurtála pal lénde. I jone ĥaljona, so Me som Raj Devél, Devél, kóli Me rosčhuvava te dživén len ke javír narody i rostradava len pir phuvjá. Ne nábut manušén léndyr Me zrakháva kurtalátyr, bokhátyr i fransendyr, sob (kaj) jone te rosphenén Najudytkoné manušénge, ke savé jone javéna, vaš saré péskire nalačhipena, tén'či jone ĥaljona, so Me som Raj Devél, Devél.” I sys ke me Ráskire-Devléskiro lav dasavo: “Manušéskiro čhava! Xa tyró maró darása, pi tyró paní te izdras, i mek te javél túke pharó pe iló. I phen manušénge pe phuv: “Adiáke rakiréla Raj Devél, Devél vaš Jerusalimóskire manušénge, vaš Izrailjoskiri phuv: ‘Jone javéna te xan peskro maró jasvénca, javéna te p'jen peskro paní pharé trašasa, pir dová, so na javéla butýr pe phuv barvalypén pal manušéngiro načačipén, savé dživénas pe láte. Tén'ci rosphagirena fórja, i phuv javéla čhučí, i jone ĥaljona, so Me som Raj Devél, Devél” I sys ke me Ráskire-Devléskiro lav dasavo: “Manušéskiro čhava! So za phenybnytko lav rakiréna tumé, pe Izrailjoskiri phuv: ‘Prodžána (nakhena) but dyvesá i xasjola angilphenybnaskiro dykhibén?’ Paldavá phen lénge: ‘Adiáke rakiréla Raj Devél, Devél: Me xasiakiráva dalé lavá, butýr na javéna te rakirén dasavé lavénca dre Izrailjo. Phen lénge: ‘Javéna syg dyvesá i pherdiakirelape kažno angilphenybnaskiro dykhibén.” Na jačélape ivjá (naprásnes) nisavó angilphenybnaskiro dykhibén; na javéla xohanó nisavó angilphenybén dro Izrailjoskiro kher. Pal-dová so Me som Raj Devél, Devél, Me rakiráva, i pherdiakirelape lav, savó Me rakiráva, i Me na paruvava les. Dre tumaré dyvesá, tumé san kher, kaj na kandéna nikonés, Me phendjom lav i Me keráva, so Me kamám”, – rakiréla Raj Devél, Devél.’” Nevéstyr sys ke me Ráskire-Devléskiro lav, so rakirélas: “Manušéskiro čhava! Ake, Izrai-ljoskiro kher rakiréla: ‘Angilphenybnaskiro lav, savó jov dykhciá, pherdiakirelape (spolninelape), kóli prodžána but dyvesá adadyvesestyr; jov rakiréla vaš anglypén.’ Paldavá phen lénge: ‘Adiáke rakiréla Raj Devél, Devél: nijékh Miré lavéndyr na javéla parudo butýr, ne lav, savó Me phenáva, pherdiakirelape,” – rakiréla Raj Devél, Devél. I sys ke me Ráskire-Devléskiro lav dasavo: “Manušéskiro čhava! Phen angilphenybén pe Izrailjoskire prorokonende, savé rakiréna angilphenybena, i phen odolénge: šunén Ráskire-Devléskiro lav!” “Adiáke rakiréla Raj Devél, Devél: ‘Bida bigodiakire prorokenge, savé džána pal peskro dúho (fáno) i nisó na dykhenas! Tyré proróki, Izrailjo, isyn sýrby lokhnia (lisy) dre rosphagirdé kherá. Dre prophagiribena (prolomy) dre vánta tumé na džána, i na čhudé vánta angíl Izrailjoskiro Kher, sob (kaj) te javén terdé tumé dro maribén dro Ráskire-Devléskiro dyvés. Jone dykhné dykhibén, so na mol, angilphendle xohaibén, rakirí: “Raj Devél, Devél phendiá”, – a Raj Devél, Devél na bičhavelas len; ne jone déna duma péske, so pherdiakirelape lav. Ci na došvalo dykhibén tumé dykhenas? Ci na xohanó lav angilphenybén tumé rakirénas, phení: “Raj Devél, Devél phendiá”, – a Me na rakiravas? Paldavá adiáke rakirelo Raj Devél, Devél: “Paldová, so tumé rakirdé čhučipen, i dykhné xohaibena, paldavá, ake, Me som proti tuménde,” – rakiréla Raj Devél, Devél.” I javéla Miro vast pe dalé prorokonende, savé dykhéna dová, so nisó na mol (čhučó), i savé angilphenena xohaibén. Dre Miré manušéngiro skedyibén jone na javéna; dre Izrailjoskire-kheréskiro začhinyben dre lylvarí sčhinybnytko (spisko) jone na začhinenape, pe Izrailjoskiri phuv na zadžána. I jone ĥaljona, so Me som Raj Devél, Devél. Pal dová, so jone zlydžana droméstyr Miré manušén, kóli rakiréna ramánjo (miro), a ramánjo nane, i kóli jone keréna vánta, jone makhen la blatasa. Phen kodolénge, savé makhena vánta blatasa, so joj peréla. Javéla tasadypnaskiro paning, i peréna tumé, baruné gradiny, i zoralý balvál roskušela vánta pe koterá (kuski). Ake, peréla vánta, na phenéna, xačy, tén'či tuménge: “Kaj isyn dová obmakhiben, savésa tumé makhenas?” Paldavá adiáke rakiréla Raj Devél, Devél: “Mekava Me riskiribnaskiri balvál dro Miro xoliakiribén, javéla zoraló bryšýnd dre Miro xoliamipen, i peréna bará gradostyr dre Mirí bari xolý te xasiakirél davá. Me phagirava telé vánta, saví tumé obmakhenas blatasa, čhurdava la pe phuv, i otkerelape lákiro fundámiento, i joj peréla. Tumé xasjona lása, i tumé ĥaljona, so Me som Raj Devél, Devél. Vyčhuvava Me Miro xoliamipen pe vánta i pe odolénde, savé obmakhenas la blatasa, i Me phenáva tuménge: nane butýr vánta, nane odolén, savé makhenas la, Kadalé Izrailjoskire prorokén, savé angilphenenas Jerusalimoske i rakirénas léske, so dykhné ramánjo (miro) dre dykhibena, kóli nane ramánjo, – rakiréla Raj Devél, Devél. Tu, manušéskiro čhava, risjov ke čhaja tyré manušéndyr, savé angilphenena péskre iléstyr, phen pe lénde angilphenybén. Phen: “Adiáke rakiréla Raj Devél, Devél:’ Bida kodolé džuvlienge, savé suvena čovahane posotia (gonore) telé phaká, savé keréna dykhle vaš kažno šeró, sob (kaj) te uhtylén ile. Tumé duminéna, so zrakhenape, kóli javéna te uhtylén manušéngire ile Miré manušéndyr? Tumé magirena Man angíl Miré manušénde pal kutý (nábut) ĥersto (jačmienjo), pal koterá maró, kóli muliakirena ile, konéske na trej te merén, i kóli jačavena džiibén ilenge, konéske na trej te dživén, kóli xohavena Miré manušénge, savé šunéna xohaibén. “Paldavá adiáke rakiréla Raj Devél, Devél: “Ake, Me som proti tumaré čovahane posotia, savénca tumé uhtylena manušéskiro di, syr čiriklien. Me čhináva gonore tumaré phakendyr, Me otmekáva pe vólia ile, savé tumé uhtylena, sob (kaj) jone te vurnian tuméndyr. I Me adiáke-pac' rosčhinava tumaré dykhle, i zrakháva Miré manušén tumaré vasténdyr. I kadalé manušá na javéna butýr syr doresybén dre tumaré vastá, i tumé ĥaljona, so Me som Raj Devél, Devél. Pal-dová so tumé phenéna xohaibén devlytkoné manušéske te kerélpe pharó léske pe iló (a Me na kamamas, sob (kaj) te javél pharó pe leskro iló), i podrikirena fujé-manušéskire vastá, sob (kaj) jov te na risjol péskre bedytkone droméstyr, i te na zrakhél péskiro džiibén. Paldavá na javéla tuménde butýr čhučé dykhibena, so nisó na mol, na javéna tumé te kerén čary. Me zrakháva Miré manušén tumaré vasténdyr, i tumé ĥaljona, so Me som Raj Devél, Devél.’” I javné ke me vari-kicý manušá Izrailjoskire phurydyrendyr, i sys bešté angíl mánde. I sys ke me Ráskire-Devléskiro lav dasavo: “Manušéskiro čhava! Adalé manušá mekné péskre kerdé devloré (ídoly) dre péskre ile, čhudé péskire kerdé devloré angíl péste: syr že saštý (moginen) jone Mándyr te phučén? Paldavá rákir lénca i phen lénge: ‘Adiáke rakiréla Raj Devél, Devél: kóli vari-kon Izrailjoskire kheréstyr domekela péskre kerdé devloré (ídoly) dro peskro iló, i čhuvéla péskre kerdé devloré angíl léste te obštavelpe i jov javéla ke proróko, to cji, phenáva li Me, Raj Devél, Devél, léske, kóli isyn but léste leskre kerdé devloré? Mek te ĥaljon Izrailjoskiro kher dre péskiro iló, so pal saré jone péskre kerdé devloré kerdépe jone čúža vaš Mánge.’ Paldavá phen Izrailjoskire kheréske: “Adiáke rakiréla Raj Devél, Devél: ‘Risjon ke Devél risjon krig tumaré kerdé devlorendyr, riskirén tumaré muiá saré tumaré džungalypnastyr (brytkimatyr)! Kóli vari – kon Izrailjoskire kheréstyr i čužoné manušéndyr i, savé dživéna dro Izrailjo, durjola kokoró Mándyr, i domekela péskre kerdé devloré dro péskiro iló, i čhuvéla péskre kerdé devloré angíl péskiro muj i javéla ke proróko te phučelpe léstyr pal Mánde, to Me, Raj Devél, Devél, otphenava léske? Me risjováva Miré mósa pe odolé manušéste, Me keráva adalé manušésa adiáke, sob (kaj) javír manušá te dykhén, i te rakirén, Me zalava les Miré manušéndyr, Izrailjostyr, i Me tedy tumé ĥaljona, so Me som Raj Devél, Devél. A kóli proróko domekela te xohavél pes, i phenéla lav adiáke, sýrby Me, Raj Devél, Devél, vysykliakirdjom les, to Me protyrdava pe léste Miro vast, xasiakiráva les Miré manušéndyr, Izrailjostyr. I jone léna pharó sendiakiriben pal péskre čoripena: savó bangó javéla dová, so phučela, kadasavó bangó javéla i proróko, sob (kaj) te na durjol butýr Izrailjoskiro kher Mándyr, i te na kerén pes magirdesa péskre čoripnástyr, ne, sob (kaj) te javén jone Miré manušá, i sob (kaj) Me te javav Léngiro Raj Devél, Devél.’” I sys ke me Ráskire-Devléskiro lav: “Manušéskiro čhava! Kóli vari-saví phuv te kerél gréhi angíl Mánde, i te javél usá napatiaibnytko ke Me, to Me protyrdyjomas pe léste Miro vast, Me zalyjom by léstyr saró maró, savó déla džiibén, Me bičhadjom pe léste bokh i lyjom te xasiakiráv pe léste manušén i kheritkoné murdalén. Kóli b te lathenpe pe doiá phuv dalé trin manušá: Nojo, Danila i Ióvo, to jone féni (tóka) péskre sventoné džiibnasa, to rakhenas by peskro di i butýr ničí”, – rakiréla Raj Devél, Devél. Ci, kóli b Me bičhadjom pe daja phuv zahale murdalén te prodžan pir láte, savé zalenas by látyr (phuvjátyr) čhavorén, i te kerélpe daja phuv murdaléndyr čhučí (pusto), i nijékh te na prodžal pir daja phuv pal zahale murdalénde. Kadalé trin manušá te javén maškír láte, – te dživáv Me, – rakiréla Raj Devél, Devél, to na zrakhenas jone ni péskre čhavén, ni péskre čhajén, a jone, trindžine jone, zrakhenaspe, ne phuv javélas čhučí. Ci, kóli Me te janav kurtála pe daja phuv i te phenáv: “Kurtála, prodža pir phuv!” I lyjom te xasiakiráv manušén i murdalén, to kadalé trin manušá maškír te javén te láte, – te dživáv Me – rakiréla Raj Devél, Devél na zrakhné by ni péskre čhavén, ni péskre čhajén, a jone féni trindžine zrakhnepe. Kóli Me te bičhavav pe doiá phuv meribnytka fránsy, i te vyčhuvav pe láte Miro xoliamipen te čhuvelpe dro rat, sob (kaj) te xasiakiráv pe phuv manušén i kheritkoné murdalén (skoto), to až Nojo, Danijéljo i Ióvo te javén pe láte, – te dživáv Me, – rakiréla Raj Devél, Devél, – to te na zrakhenas ni péskre čhavén, ni péskre čhajén; ne péskre sventoné džiibnasa jone féni zrakhenas by trindžine peskro di.’ Adiáke rakiréla Raj Devél, Devél: kóli štar pharé bidy Miré: kurtála, bokh, zahale riskiribnáskire murdalá (zvieri), meribnytka fránsy te bičhavav Me pe Jerusalimo, sob (kaj) te xasiakiráv dre léste manušén i murdalén, I tén'či jačénape dre léste manušá, čhavé i čhaja, konés vylydžana odothýr. Ake, jone vydžána ke tumé, tumé dykhéna, so jone keréna i, savé isyn léngire réndy, i tumé bistrena pal doiá bibáht, saví Me jandjom pe Jerusalimo, pal saró, so Me jandjom pe léste. Jone keréna adiáke, so tumé bistrena pal bibáht, kóli dykhéna, so jone keréna i, savé isyn léngire réndy. I ĥaljona, so Me na ivjá (naprásnes) kerdjom saró dová, so Me kerdjom dro Jerusalimo”, – rakiréla Raj Devél, Devél. I sys ke me Ráskire-Devléskiro lav dasavo: “Manušéskiro čhava! Sósa fedýr isyn vinagradoskiro kašt javire kaštéstyr i rand' (vetka) vinagradoskire randiatyr javire drevendyr dro veš. Ci léna léstyr kotér (kusko), sob (kaj) te kerén léstyr vari-so? Léna li léstyr pe gvozdjo (karfin), sob (kaj) te ublaven pe léste vari-so? Ake, jov otdelpe pe jag, sob (kaj) jag te xal les. Xaja les jag pe duj jagóry (koncy), i maškír léste saró isyn shačkirdo; trej li jov akaná, sob (kaj) te kerén léstyr vari-so javír? Kóli iščo (inké) jov sys célo, i naštý sys te kerén léstyr vari-so, ne kiéli jag shaia les, so jov shačija, kerésa li léstyr vari-so lačhó vaš butý? Paldavá adiáke rakiréla Raj Devél, Devél: syr vinagradoskiro kašt maškír vešytka kaštá Me otdyjom, sob (kaj) jag les te xal, adiáke Me otdáva jagake manušén, savé dživéna ke Jerusalimo. I risjováva Me ke jone Miré mósa. Jekhe jagatyr jone vydžána, a javír jag pohala len. Tén'ci tumé ĥaljona, so Me som Raj Devél, Devél, kóli risjováva Me ke jone Miré mósa. I adiáke kadaja phuv javéla čhučí pal dová, so jone narjoves (vierolomnes) kerénas napatiaiben”, – rakiréla Raj Devél, Devél. I sys ke me Ráskire-Devléskiro lav dasavo: “Manušéskiro čhava! Rosphen Jerusalimoske pal saré leskre džungalé réndy (diély). “Phen: ‘Adiáke rakiréla Raj Devél, Devél, Jerusalimóskire patyvalé čhake: tyró ródo i tyré dadéskiro kher isyn pe Xanaanóskiri phuv; tyró dad isyn Amoriejo, tyrí daj isyn Xietejanka. Kóli te phenas pal tyró bijanypén, dro dyvés, kiéli tu bijandyjan, túte na otčingerenas pupko (buryk). Paniésa tu na sánas vymordy vaš žužakiriben; londesa tu na sánas londiakirdy, phernenca tu na sánas pat'kirdy. Nikón na sykadiá iló ke tu, sob (kaj) tangipnastyr ke tu te kerél túke vari-so daléstyr, ne tu sánas vyčhurdyny pe čhučí (pusto) félda, pal-dová so tu nikonéske na sánas trej, dro dyvés, kiéli tu bijandyjan. A kiéli Me džavas pašýl odój, kaj sánas tu, dykhcjom tut, so tu san vyčhurdyny, so tu sánas dro tyró rat, i phendjom túke: “Dživ dro tyró rat!” Adiáke me phendjom: “Dživ dro tyró rat.” Me ubarjakirdjom tut, Izrailjo adiáke but, syr but isyn feldýtka čarjá. Tu vybarijan, jacián bari, jacián drieván šukár baré čhasa, balá túte vybarine, ne tu sánas nangi, naučhakirdy. Te prodžavas Me odój, kaj tu sánas, i Me udykhavas tut. Ake, davá sys tyró časo, kamlypnaskiro časo. Lyjom Me Miré uribená, učhakirdjom tyró nangipén; dyjom sovél túke, kerdjom dorakiribén túsa, – rakiréla Raj Devél, Devél, – tu jacián Mirí. Tén'ci vymordjom Me tut paniésa, mordjom Tútyr tyró rat, Me makhcjom tut olivitkone dzetesa (jeliejosa). Me uridjom pe túte vysudy ídia; Me dyjom túke candali bobritkone cypatyr, obphandjom tut pohtanesa, Me učhakirdjom tut pharune dykhlesa. I iščo (inké) uridjom Me tut dro uribená šukarjakiribnasa, čhudjom pe tyré vastá kore (vastytka), a pe tyrí men-miriklia [zandirori-ju.o.]. I čhudjom Me túke angrusty ke dro tyró nakh, čenia dre tyré kaná, a pe tyró šeró – šukár koróna. Adiáke sánas tu šukarjakirdy dre rup i suvnakái; tyró uribén sys kedyno pohtan, phar, rossude thana. Tu xajan maró kučoné jaržestyr, agvin i olivítko dzet, te sánas drieván šukár, tu jacián usá fedýr syr thagarica. I rozgijápe pir Najudytkoné manušénde bari malva pal tyró šukaripén, pal-dová so jov sys pherdó dro dová šukár uribén, dro savó Me uridjom tut”, – rakiréla Raj Devél, Devél. ‘Ne tu drieván patiandyjan dro tyró šukaripén, tu jacián biladžakuny i paruvesas kažnonesa, kon džála pašýl odój, kaj tu sánas, i otdesas patýv léske. Tu adiáke-pac' lyjan tyré uribnendyr, šukarjakirdian péske rázna cviatna vučé štéty, tu keresas biladžaipén pe lénde adiáke, so nikoli butýr na kerlape, i na javéla. I tu lyjan tyré ukedybena Miré suvnakástyr i Miré rupéstyr, savé Me dyjom Túke, tu kerdián péske figury sýrby muršén, i kerdián biladžaipén lénca. Tu lyjan tyré rossude uribená, i tu uridian len pe lénde, tu čhuvesas angíl lénde Miro olivítko dzet (jeliejo) i drogoné-smolakiro thuvipen. “I Miro xabén, savó Me davas túke, i maró kučoné jaržestyr i olivkitko dzet, i avgín (meda), savénca Me čaliakiravas tut, tu čhuvesas angíl lénde, sob (kaj) te javél gudló thuvipen, i davá sys,’” – rakiréla Raj Devél, Devél. Tu lyjan tre čhavien, tre čhajén, savén tu bijandian Mánge, i tu otdesas len vaš svénto dyibén (žértva), sob (kaj) jone, ídoly, te xan. Ci na uhtýlla (nádosi) li túke te kerés biladžaipén? Ne tu i Miré čhavén muliakiresas i janesas len lénge, kiéli tu prolydžasas len maškír jag. I kóli keresas saré tyré džungalypena i biladžakuné réndy, tu na ripirdian tyré terné beršá, kiéli tu sánas nangi, naučhakirdy i čhurdyny dro tyró rat. Kóli prodžanas saré tyré beda réndy – ‘Bida, bída túke!’ – rakiréla Raj Devél, Devél, tu kerdián péske mangipnytko štéto, i kerdián péske vučé štéty pe kažno gása [foruný/plóšča-r.s.], pašýl zagiibén pe kažno drom tu kerdián péske vučé štéty, i tu ladžakiresas tyró šukaripén. Tu na sánas patiaibnýtko tre romeske kažnonesa, kon by te na prodžalas, inké (iščo) butýr keresas tyré biladžakuné réndy. Tu adiáke-pac' keresas biladžaipén Jegiptóskire čhavénca, savé dživénas pašýl túte, drieván vučé manušénca, iščo (inké) butýr keresas tyró napatiaiben, i xoliakiresas Man. Ake, paldavá Me protyrdyjom pe túte Miro Vast, tykniakirdjom kotér doléstyr, so sys tyró, otdyjom Filistimijákire čhajenge, savé bidykhenas tut, savé ladžanas doléstyr, so tu kerdián, sob (kaj) te kerén jone túsa dová, so kaména. Tu adiáke-pac' kerdián ladžaipén Asuroskire čhavénca, ne tu na čalyjan, čačes tu keresas ladžaipén lénca, i na uhtyllas (nádosi) túke davá. Tu butýr keresas tyró ladžaipén pe Xanaanoskiro phuv ke Xaldeja i, dykh ža, na uhtyllas (nádosi) túke. Syr khinija, ĥaljov, tyró iló, – rakiréla Raj Devél, Devél, kóli tu keresas saré kadalé réndy (diély), syr biladžakiri manušny, savjá nane konéske te štyliakirel! Kóli tu keresas péske mangipnytka štéty vaš tyré biladžakire réndy pašýl zagiibén pe kažno drom, keresas péske vučé štéty pe kažno vulíca (gása). Ne tu na sánas tén'či biladžakuné džuvliása, pal-dová so tu na kamdian te priles pleskiriben. A tu san, syr džuvlý, saví nane patiaibnýtko romeske, saví rodéla na péskre romes, a čužoné manušén. Sarénge biladžakuné džuvlienge muršá déna počastúnki (lovore), a tu kokori desas počastúnki saré tyré kamlenge, tu podkinesas len, sob (kaj), jone saré rigéndyr te javén te kerén biladžaipén túsa. Túte dre tyré biladžakuné réndy na sys dasavo, so isyn javire džuvliende: na pal túte prastanas, a tu desas počastúnki (lovore), a túke nijékh na délas počastúnki, paldavá tu keresas na adiáke, syr javír. Paldavá vyšún, biladžakuny džuvlije, Ráskire-Devléskiro lav! Adiáke rakiréla Raj Devél, Devél: ‘Pal dová, so tu adiáke čhurdesas tyré lové i dre tyré biladžakuné réndy, sys otkerdo tyró nangipén angíl tyré kamlytkonende, angíl saré tyré nalačhé ídoly, i pal tyré-čhavéngiro rat, savén tu otdesas lénge, paldavá, ake, Me skedáva saré tyré kamlytkonen, savén tu kamesas i sarén odolén, savén tu drieván na kamesas. Me kedava len saré rigéndyr pe túte, i Me otkerava angíl lénde tyró nangipén, sob (kaj) jone te dykhén sarí tyrí ladž. I Me javáva te sendiakirav pharés tut sendosa, savésa sendiakirena kodolén, savé paruvena péskire romeske; sendosa, savésa sendiakirena kodolén, kon pročhuvela manušéngiro rat, Me otdáva tut pale zoralé xolynasa i zevlynypnasa. Me otdáva tut dre léngire vastá, jone rosphagirena mangipnytka štéty vaš tyré biladžakuné réndy, jone rosphagirena tyré vučé štéty, riskirena krig tútyr tyró uribén, jone léna tyró šukarjakiriben, jone jačavena tut i tu javésa nangi, naučhakirdy. Jone adiáke-pac' kharéna pe túte skedyibén, jone domarena tut barénca, i rosčingirena tut péskire kurtalenca. I jone xačkirena sarésa tyré kherá jagása, javéna te sendiakiren tut angíl buté-džuvlengire jakhá. Me keráva adiáke, so tu na javésa te kerés butýr tyré biladžakuné réndy, i tu na javésa duredýr te des počastúnki. Adiáke Me pirijačava te xoliasovav drieván pe túte, i otdžala tútyr Miro zevlynypén, i Me pirijačava te xoliasovav. Pal dová so tu na priripirdian pal tyré terné beršá, ne xoliakiresas Man sarésa kadalesa, ake, Me otdáva túke pir tyré dromá pe tro šeró, – rakiréla Raj Devél, Devél sob (kaj) tu te na keresas butýr saré Tyré biladžakuné réndy, kiéli proginé (nakhle) saré Tyré džungalypena (brytkimy). Ake, kažno (sváko), kon rakiréla pritčenca (primierenca), phenéla pal túte: “Saví isyn daj, adasavi isyn čhaj!” Tu san dasaví, syr tyrí daj, saví čhurdyjá péskire romes i péskire čhavorén, – tu san tyré-pheniengiri phen, a tyrja pheniá čhurdyné péskire romen i péskire čhavorén. Tumarí daj isyn Xietejanka, tumaró dad isyn Amoriejo. Phuredýr tyrí phen – Samárija, saví dživéla péskire čhajenca pe zérvo (liévo) rig tútyr, a tyknedýr isyn tyrí phen, saví dživéla pe čačí (pravo) rig tútyr, saví isyn Sodómo lákire čhajenca. Ne tu na psiresas léngire droménca, i tu na keresas léngire džungalypena, nad, odová sys sýrby nábut, ne túte tre biladžakuné réndy pe saré tyré dromá isyn butedýr léndyr. ‘Te dživáv Me!’ – rakiréla Raj Devél, Devél tyrí phen lákire čhajenca na kerélas dová, so kerénas tu i tyré čhaja. Ake, savó isyn Sodomoskiro čoripén, tyré-pheniakiro i lákire-čhajengiro bedypen: joj sys phut'kirdy, joj xalas na dre péste, na kamelas te kerél nisaví butý; joj na podrikirelas čororé-manušéskiro vast ci kodolés, savó sys dre trébima. I jačné jone te zadenpe, i kerdé džungalypén angíl Mánde. Me dykhcjom kadavá i gijom léndyr. Samárija na kerdiá paš adákicy gréhi, kicý tu kerdián; tu butedýr léndyr lyjan te kerés džungalypén; tyré džungalé rendéndyr, savé tu keresas, tyré pheniá vyginé čačunedyr tútyr. Lýdža tyrí ladž, tu, saví obsendiakiresas péskire phenien. Tu ladžakirdian pes tyré džungalypnasa butýr léndyr, jone isyn čačunedyr tútyr. Jav loly adiáke-pac' ladžatyr, lýdža tyrí ladž, tu kerdián tyré phenien čačunedyr tútyr. Me keráva adiáke, so risjona manušá léngire plienóstyr, Sodomóskire i lákire-čhajengiro pliéno, a maškír lénde Me riskiráva odolengiro pliéno, konés tu zauhtyldian dro pliéno, sob (kaj) tu te lydžas tyrí ladž, te ladžas patýv saréstyr odoléstyr, so tu kerdián, sob (kaj) te javes podrikiribnasa vaš lénge. Tyré pheniá, Sodómo [Sodóma-r.s.] i lákire čhaja, javéna adasavé, savé sys angledýr; Samárija i lákire čhaja javéna adasavé, savé sys angledýr; i tu i tyré čhaja javéna adasavé, savé sys angledýr. Pal tyré pheniate Sodomate tu na priripiresas dre kodolé dyvesá, kiéli sánas drieván phut'kirdy. “Kóli na sys iščo (inké) otkerdo tyró načačipén, syr dro časo, kiéli lyjan tu ladž Sirijakire čhajendyr i saréndyr, kon dživelas pašýl láte, Filistimijákire čhajendyr, savé obsendiakiribnasa dykhenas pe túte saré rigéndyr. Pal tyré biladžakirde réndy, pal tyré džungalypena (brytkimy) tu doresesa’”, – rakirél Raj Devél, Devél. Adiáke rakiréla Raj Devél, Devél: “Me keráva túsa, syr kerdián tu: na zrikirdian sovél, rosphagirdian dorakiribén. Ne Me priripirava Miro dorakiribén túsa, savó Me čhudjom dre tyré terné beršá; iščo (inké) keráva Me viéčno dorakiribén (sojuzo) túsa. A tu priripiresa pal tyré dromá, i jačéla ladžavo túke, kóli javésa te priles ke péskire pheniá phuredýr tútyr i tyknedýr tútyr, kóli Me javáva te dav len dre čhaja túke, ne na tyré dorakiribnastyr. Me ĥazdáva Miro dorakiribén túsa, tu dykhésa, so Me som Raj Devél, Devél, sob (kaj) tu te ripires i te ladžas, sob (kaj) naštý sys túke lav te phenés ladžatyr, kóli Me otmekáva túke saró, so tu kerdián”, – rakiréla Raj Devél, Devél. I sys ke me Ráskire-Devléskiro lav dasavo: “Manušéskiro čhava! De, sob (kaj) jone šeré te phagiren i phen pritča Izrailjoskire kheréske. Phen: ‘Adiáke rakiréla Raj Devél, Devél: “Baró órlo (kído), baré phakenca, dlugone porenca, šukár, cviatno, priurniandyja pe Liváno, i zlyjá upralypén kiedrytkone kaštéstyr. Čhindiá upratuny rand' (vetka) léskire terné vetkendyr, jandiá la pe Xanaanóskiri phuv, čhudiá la dro timisiar'jengiro fóro. I lyjá kadalé-phuvjákire ziarkatyr, i čhurdyjá pe ziarkakiri phuv, pašýl baró paní, syr barjakirena ivakiro kašt. Joj vybarija, kerdiápe vinagradoskire kaštesa, buĥlesa, navučesa. Lákire randiá (vétki) zmekenaspe ke jov, telo léste sys lákire kórni (rukhá); jaciá vinagradoskire kaštesa, lyjá te barjol, mektia vétki. I iščo (inké) sys órlo (kído) baré phakenca i porenca. Ake, kadavá vinagradoskiro kašt potyrdyjape ke jov péskire korniénca, protyrdyjá ke jov péskire vétki, sob (kaj) joj te počhuvel les paniésa. Kašt barjolas pe lačhí félda, pašýl baró paní, adiáke, so moginelas te mekel vétki i te janel barjakirdó (plódo), i te kerélpe šukarone kaštesa.” Phen: ‘Adiáke rakiréla Raj Devél, Devél: “Javéla li léske baht? Na vyčhinena li léskire kórni (rukhá), na občhinena li léskire baritka (plódy) adiáke, so kašt zašutjola? Saré terné vétki, savé vybarine léstyr, zašutjona. I ci na baredýr zorjása, ci na butedýr manušénca sčhinena les léskire kornjostyr. I, ake, čhudo dre phuv kašt, ne javéla li baht léske? Na zašutjola li jov, kóli čilavéla les vastočno balvál? Ci na zašutjola dre únta (sado), kaj vybarija.” I sys ke me Ráskire-Devléskiro lav dasavo: “Phen kheréske, kaj nikonés na kandéna: ‘Na džinéna xaj, so isyn davá?’ Phen: Ake, javdiá Vavilonóskiro králi dro Jerusalimo, lyjá léskire kralís i léskire ran, jandiá len ke pe dro Vavilóno. I Jov lyjá javire semencas kralitkone rodóstyr, zagijá lésa dro dorakiribén, phendiá, sob (kaj) javír te del léske sovél, lyjá pésa zoralen dolé phuvjátyr, sob (kaj) te kandel les kralipén, sob (kaj) te na ĥazdelpe, sob (kaj) te zrakhelpe dorakiribén, sob (kaj) te terdjol jov tvardes. Ne kodová (Judejákiro králi) ugija léstyr, bičhadiá péskire poslen dro Jegípto, sob (kaj) te den léske but gren i but manušén. Ci javéla léske baht? Vydživela, xaj, kodová, kon kerél davá? Jov phagirdiá dorakiribén, zrakhélape li jov? ‘Te dživáv Me’, – rakiréla Raj Devél, Devél. “Pe štéto, kaj dživéla králi, savó čhudiá les (Judejákire kralís) kralísa, a jov na zrikirdia sovél, saví dyjá kralíske, rosphagirdiá péskiro dorakiribén lésa, jov meréla léste ke Vavilóno. Baré zorjása, buté manušénca faraóno ničí na keréla vaš léske dro davá maribén, kóli ĥazdénape vérgi, sob (kaj) te xasiakirén but manušén. Jov na zrikirdia sovél, sob (kaj) te rosphagirel dorakiribén. Ake, jov dyjá péskiro vast, kerdiá saró davá; jov na zrakhélape.” Paldavá adiáke rakirél Raj Devél, Devél: ‘Te dživáv Me!’ Mirí sovél, saví jov na zrikirdia i Miro dorakiribén, savó jov rosphagirdiá, Me riskiráva pe léskiro šeró. Me čhurdava pe léste Mirí khudý (siet'), jov javéla uhtyldo pir Mánde; Me janáva les dro Vavilóno; javáva te sendiakiravpe lésa pal dová, so jov xohadia Man. A saré léskire manušá, savé našéna saré léskire xaladéngire skedybnendyr, peréna kurtalátyr, a kodolé, savé jačénape, javéna rosphurdyne pir saré balvalia i ĥaljona, so Me, Raj Devél, Devél, phendjom davá.” Adiáke rakirél Raj Devél, Devél: “Lavá Me rand' (vetka) vučé kiedroskire upralypnastyr, Me čhuváva la dre phuv. Léskire upratune vetkendyr Me otčhinava terný vetka, čhuváva la dre phuv pe vučí i šukár bérga. Pe vučí Izrailjoskiri bérga Me čhuváva la dre phuv, i Joj mekéla vétki, i janéla barjakirdó (plódo), i kerlape baré kiedroskire kaštesa; javéna te dživén tel léste čirikliá; čirikliá porenca javéna te dživén tel léskire vétki. I ĥaljona saré feldýtka kaštá, so Me, Raj Devél, Devél, vučó kašt teliakirava, a navučo kašt Me keráva upredyr; zeleno kašt keráva šuké kaštesa, a šuko kašt keráva kaštesa cvetenca. Me, Raj Devél, Devél, phendjom i keráva.” I sys ke me Ráskire-Devléskiro lav dasavo: “Sóske tumé rakiréna dasaví pritča (primiéro) pe Izrailjoskiri phuv: ‘Dadá xanas šutlo vinagrado (drakh), a pe čhavorengire dandá jaciá askoma?’ ‘Te dživáv Me!’ – rakiréla Raj Devél, Devél, – na javéna te rakirén butedýr dasaví pritča (primiéro) dro Izrailjo. Ake, kažnoné-manušéskiro di isyn Miro: syr dadéskiro di, adiáke i čhavéskiro di. O di, savó keréla grého, meréla. Kóli vari-kon isyn čačunó manúš, i jov keréla pir zakóno, kóli jov na xála pe bérgi svénto dyibén (žértva), pe Izrailjoskire-kheréskire kerdé devloré na obrisjola péskire jakhénca. Na magirelape javire romniása, na čilavéla péskire romniá, kóli joj isyn nažuži. Na pritasavia nikonés; a manušéske, savó sys léske bangó, otdelas léskiri symadý; na čorelas, délas péskiro maró čororé manušéske, učhakirelas nanges uribnasa; jov zrakhelas péskiro vast načačune kofostyr, na lelas barydyr bažyn péske, obrikirelas péskiro vast čoripnástyr, a jov kerélas čačunó séndo manušéske manušésa; kóli jov kerélas pir Miré uphenybená, zrakhéla Miré zakóny patiaibnytkes; to jov, čačipnáskiro isyn devlýtko, to džin, so kadasavó javéla te dživél’, – rakiréla Raj Devél, Devél. Ne kóli léste bijándyja (lotija) čhavó-rozmaribnari, savó pročhuvela rat, savó keréla vari-so saréstyr kodolestyr, so na kerélas sarésa léskiro dad, devlýtko manúš: xála pe bérgi dyibnytko xabén (žértva), ci magirelaspe javireskire romniása, kóli jov pritasavelas čorores i kodolé manušés, savó mangéla, kóli jov zalela zorjása, na otdéla symadý, kóli jov obrisjola péskire jakhénca pe kerdé devloré, keréla džungalypén (brytkima). Kóli jov léla xohanó kófo, ci léla péske baredýr bažyn, ci javéla jov te dživél? Nad, jov na javéla džidó! Kon kerélas saré dasavé džungalé réndy, kodová meréla, léskiro rat javéla pe léste. Akaná, ake, kóli vari-konéste bijandjola (lotjola) čhavó, savó dykhéla saré gréhi, so kerdiá léskiro dad, i obduminelas, ne na kerélas len: kon na xalas pe bérgi dyibnytko xabén, pe Izrailjoskire-kheréskire kerdé devloré na obrisjolas péskire jakhénca, na magirelaspe javireskire romniása, savó na pritasadia nikonés, i savó keréla mištés manušéske, savó na lyjá symadý, na otlyja zorjása, ne jov dyjá péskiro maró bokhaleske, učhakirdiá nanges uribnasa; kon zrakhciá péskiro vast, sob (kaj) te na kerél namištes čororeske, ne jov kerdiá pir Miré priphenybená, kerdiá saró pir Miré uphenybená – kadavá manúš pal péskire – dadéskiro čoripén na meréla; tumé džinéna, so jov javéla džidó! Ne a léskiro dad, pal-dová, so jov pritasavelas biilytkes, čorelas pšalestyr, i kerélas namištes maškír péskire manušénde, ake, jov meréla pal péskiro čoripén.” Tumé rakiréna: “Sóske žie čhavó na lydžála péskire – dadéskiri bang?” Pal-dová, so čhavó kerélas čačunés i pir zakóno; i jov gijá pir miré uphenybená i kerdiá, syr trej pir lénde? Tumé džinéna, so jov javéla džidó.’” O di, savó keréla gréhi, meréla. O čhavó na javéla te lydžál dadéskiri bang, i dad na lydžála čhaveskiri bang; devlytkoné-manušéskiro čačipnáskiro čačipén jačélape lésa, a zlydnima fujé-manušéskiro jačélape lésa. I fuj manúš, kóli risjola krig saré péskire grehéndyr, savé jov kerélas, i kóli jov javéla te dživél pir saré Miré uphenybená, i javéla te kerél pir zakóno i čačunés, džidó javéla, na meréla. Saró léskiro čoripén, savé jov kerélas, na javéla te ripirelape léske: pal péskiro čačipén, savó jov javéla te kerél, jov džidó javéla. Ci kamám Me grehitkoné – manušéskiro meribén?” – rakiréla Raj Devél, Devél. I ci na dová isyn, sob (kaj) jov te risjol krig péskire dromendyr i te javél džidó? I čačipnáskiro manúš, kóli jov risjola krig péskire čačipnastyr, i javéla te kerél saró davá čoripén, so keréla čoro manúš, ci javéla jov džidó? Saré lačhé léskire réndy, savé jov kerélas, na javéna te ripirenpe; pal péskiro čoripén, savó jov keréla i dro savó jov isyn bangó i pal grého, jov meréla.” Ne tumé phenéna: “Nane čačipén dro Ráskire-Devléskiro drom!” Šunén akaná, Izrailjoskiro kher! So dro miro drom nane čačipén? Dre tumaré dromá nane čačipén: kóli čačunó manúš risjola krig péskre čačipnastyr, keréla čoripén i pal dová meréla; jov meréla pal péskiro čoripén, savó kerdiá jov. I nevéstyr, kóli fuj manúš risjola krig péskire fuipnastyr, savó jov kerélas, i léla pir zakóno te kerél séndo i čačunés-risjola péskire diesa ke džiibén, jov na meréla. Pal-dová, so jov dykcia, i risijá krig saré péskire čoripnástyr, savó kerélas jov, javéla jov džidó, jov na meréla.” Ne Izrailjoskiro kher rakiréla: “Nane čačipén dro Ráskire-Devléskiro drom!” Ci dre Miré dromá nane čačipén, Izrailjoskiro kher? Ci na dre tumaré dromá nane čačipén? Paldavá Me javáva te sendiakirav tumen, Izrailjoskiro kher, kažnones (svakones) pir léskire dromá, – rakiréla Raj Devél, Devél; jačkiren péskire gréhi, risjon kokoré saré tumaré čoré rendéndyr, sob (kaj) te na perén tuménge tumaré čoripnástyr. Otčhurden péstyr saré tumaré čoré réndy, savé tumé kerdé, kerén péske nevó iló i nevó dúho (fáno); i sóske trej tuménge te merén, Izrailjoskiro kher? “Paldavá, so Me na kamám meribén manušéskiro, savó meréla, – rakiréla Raj Devél, Devél, – i paldavá risjon pale (javén ke Me) i dživén!” “A tu le te roves pal Izrailjoskire thagar'jende. I phen: ‘So za ščerica (l'vica) isyn tyrí daj? Dživelas joj maškír ščerende, i maškír terné ščerende barjakirelas péskire tyknen. Vybarjakirdia joj iekh péskire tyknendyr, jov kerdiápe terné ščeresa, vysyklyja te doresel xabén, xalas manušén. I šundlé pal léste manušýtka nácyi (narody); jov sys uhtyldo lénca, les phandle telé dre zandirjá (cépi), lydžiné pe Jegiptóskiro phuv. Kóli daj užakirdia, dykhciá, so xasijá saró, pal so joj duminelas, tén'či lyjá javirés péskire tyknendyr, kerdiá les terné ščeresa. Jov kerdiápe terné ščeresa, kiéli jov lyjá te psirél maškír ščerende, vysyklyja te doresel xabén, i xalas manušén, jov rosphagirelas čhučes léngire štéty/magirdia pivliengire (udovengire) kherá, i kerdiá léngire fórja čhučé (pusta), čhučé jačné phuv i saré gavá léskire rykostyr. Tén'ci ĥazdynépe pe léste narody, savé dživénas pir kodoia phuv pe duj rigá, i čhurdyné pe léste péskiri khudý (siet'), i jov sys uhtyldo dre léngiri khudý. Jone čhurdyné les dre klietka pe zandir (cepo), i lydžiné les ke Vavilonóskiro králi, jone jandlé les dre tvárdyma (kriepost'), sob (kaj) te na javél šundly léskiri zan pe bérgi Izrailjoskire. Tyrí daj sys syr vinagradoskiro kašt, savó barjolas pašýl paniá; pe léste sys but randiá, joj ianelas but phabá, pal-dová so odój sys but paniá. Sys léste zoralé randiá vaš barydyrengire desté (skipietry), vučés ĥazdyjápe joj maškír gensta randiá; joj sys dykhny pir péskiro vučipén, péskire ĥenstone vetkicenca. Ne xoliamipnasa joj sys vyriskirdy, čhurdyny pe phuv, vastočno balvál vyšut'kirdia lákire phabá (plódy); phadine, zašutine lákire zoralé vétki, jag pohaia len. A akaná joj barjol pe čhučí phuv (pustynia), dre phuv šukí, saví mangéla paní. I vygijá jag lákire stvolostyr vetkenca, i pohaia lákire phabá adiáke, so na jačnépe zoralé randiá vaš desté barydyrénge. Davá isyn roibnytko gilý féni te rovén tel láte.’” Dro eftáto berš (bitrinéngiro déšto), dro pándžto čhon, pe déšto čhonytko dyvés, javné muršá Izrailjoskire phurydyrendyr te phučén Rástyr-Devléstyr. Jone sys bešté angíl miré jakhá. I sys ke me Ráskire-Devléskiro lav dasavo: “Manušéskiro čhava! Rákir Izrailjoskire phurydyrenca, phen lénge: ‘Adiáke rakiréla Raj Devél, Devél: ‘Tumé javné te phučén Mándyr? Te dživáv Me, na phenáva tuménge ničí’, – rakiréla Raj Devél, Devél. Ci kamésa tu te sendiakirespe lénca, ci kamésa te sendiakirespe, Manušéskiro čhavó? Rosphen lénge pal saró džungalypén (sarí brytkima), saví kerénas léngire dadá. Phen lénge: ‘Adiáke rakiréla Raj Devél, Devél: ‘Pe kodová dyvés, kóli Me vykedyjom Izrailjo, ĥazdyjom Miro vast te sovlahav pe kherítko ródo Jakovóskire kheréstyr, Me otkerdjom lénge Pes pe Jegipietóskiri phuv, ĥazdyjom Miro vast i phendjom lénge: ‘Me som tumaró Raj Devél, Devél.’ Pe kodová dyvés Me ĥazdyjom Miro vast te sovlahav lénge, so Me lydžáva krig len Jegiptóskire phuvjátyr pe phuv, saví Me vydykcjom vaš lénge, pe doiá phuv, kaj čhuvenape thud i javgin (meda), sar'jengire-phuv'jengiro šukariben. I phendjom Me lénge: ‘Mek kažno (sváko) tuméndyr te čhurdel krig péstyr saró džungalypén péskire jakhéndyr, sob (kaj) te na magirén pes Jegiptóskire idolenca, Me som tumaró Raj Devél, Devél.’ Ne jone ĥazdynépe pe Mánde, jone na kamenas te kandén Man, nikón na otčhurdyja džungalé ídoly péskire jakhéndyr, nijékh na mekciá Jegiptóskire ídoly. I Me phendjom: “Vyčhuvava me pe lénde Miro xoliamipen i Me othava Mirí xolý pe lénde pe phuv. Ne Me kerdjom davá vaš Miro lav, sob (kaj) jov te na magirelpe angíl Najudýtka nácyi, kaj jone dživénas, i kaj Me otkerdjom/sykadjom Pes lénge, sob (kaj) te vylydžav len Jegiptoskkire phuvjátyr. I Me vylydžijom len Jegiptóskire phuvjátyr, jandjom len pe čhučí phuv. I Me dyjom lénge Miré uphenybená, sykadjom lénge Miré zakóny, savénca dživelas by manúš, kóli jov te kerél, syr Me phendjom. I Me adiáke-pac' dyjom lénge Miré sávaty (suboty), sob (kaj) te javén jone giertykasa (sykaibnasa) maškír Mánde i lénde, sob (kaj) jone saštý (moginénas) te džinén, so Me som Raj Devél, Devél, Savó keréla len sventonenca. Ne Izrailjoskiro kher ĥazdyjápe pe Mánde pe čhučí phuv, jone na kerénas syr Me phendjom zoralés, jone otčhurdyne Miré lavá, pir savé dživelas by manúš, kóli kerélas, syr Me phendjom, jone zoralés magirenas Miré sávaty, i Me phendjom: Me vyčhuvava pe lénde Miro xoliamipen pe čhučí phuv, sob (kaj) te xasiakiráv len. Ne Me kerdjom davá vaš Miro lav, sob (kaj) jov te na magirelpe angíl Najudýtka nácyi, savé dykhenas, syr Me vylydžijom len. Paldavá Me ĥazdyjom Miro vast pe lénde pe čhučí phuv sovlahasa angíl lénde, so Me na janáva len pe phuv, saví Me lathjom, pe phuv, kaj čhuvenape thud i avgín, sarengire-phuv'jengiro šukariben. Pal dová, so jone jačné te dykhén vučipnástyr pe Miré lavá, i jone na kerénas, syr Me phendjom zoralés, a jone magirdé Miré sávaty, pal-dová so léngiro iló tyrdelaspe ke léngire ídoly. Ne usajékh Mirí jakh jaciá kovly te na xasiakiráv len; Me na xasiakirdjom len pe čhučí phuv. I rakiravas Me léngire čhavénge pe čhučí phuv: ‘Na psirén, syr sykliakirenas tumaré dadá, na kerén, syr jone rakirénas, na magirén pes léngire idolenca.’ ‘Me som tumaró Raj Devél, Devél: Kerén, syr Me uphenava, rakhén Miré lavá, kerén, syr Me priphendjom. Kerén sventonenca Miré sávaty, sob (kaj) te javén jone ĥiertykasa (sykaibnasa) maškír Mánde i tuménde, sob (kaj) tumé te džinén, so Me som tumaró Raj Devél, Devél.’ Ne čhavé ĥazdynépe pe Mánde, na kerénas pir Miré uphenybená, na rakhenas, sob (kaj) te rikirenpe ke Miré zakóny, so kóli jone te kerén dová, sóstyr dživelas by manúš, ne jone magirdé Miré sávaty, i Me phendjom, so Me vyčhuvava pe lénde Miro xoliamipen, keráva pir Mirí xolý i Me xasiakiráva len pe čhučí phuv. Ne Me obrikirdjom Miro vast i kerdjom vaš Miro lav, sob (kaj) jov te na magirelpe maškír Najudýtka nácyi, savé dykhenas, syr Me vylydžijom len. Adiáke-pac' Me ĥazdyjom Miro vast pe čhučí phuv sovlahasa angíl lénde, so Me rosčhuvava te dživén len maškír Najudýtka nácyi, i rostradava len pir phuvjá. Pal dová, so jone na kerénas, syr Me priphendjom, otčhurdyne, a jačné te dykhén vučipnása pe Miré uphenybená, magirdé Miré sávaty, i léngire jakhá tyrdenaspe ke léngire – dadengíre ídoly. I domekcjom Me iščo (inké), sob (kaj) jone te dživén pir péskire uphenybená, savé na sys lačhé, i pir zakóny, savéndyr lénge naštý sys te dživén. I domekcjom, sob (kaj) jone te magirenpe péskire prisykliaibnytkone dyibnástyr, kiéli jone jačné te lydžán pir jag péskire pervoné bijatén, savé vydžána ločoviátyr (utrobatyr), domekcjom, sob (kaj) jone te javén čhučé, sob (kaj) jone te džinén, so Me som Raj Devél, Devél. Paldavá rákir Izrailjoskire kheréske, Manušéskiro čhavó, phen lénge: Adiáke rakiréla Raj Devél, Devél: “‘Ake, sósa kaliakirde Man tumaré dadá, kiéli jone sys napatiaibnytka angíl Mánde. Pal-dová so, kiéli Me jandjom len pe phuv, pal saví dre sovláh te dav lénge, Me ĥazdavas Miro vast, a jone vydykhne vaš péske kažno vučí bérgica, kažno kašt baré ĥenstone randienca (vetkenca), i jone lyné te janén odój péskire dyibená, savénca vykharenas Mirí xolý; i janénas odój péskire thuva gudlé, i vyčhuvenas odój péskire thadune svénta dyibená (žertvy). I Me rakiravas lénge: “So za vučé štéty, karik tumé psiréna? Paldavá “Bama” kharén la iščo (inké) ke/ žýko adadyvés.” Paldavá phen Izrailjoskire kheréske: adiáke rakiréla Raj Devél, Devél: ‘Na magirén tumé pes, syr tumaré dadá prisyklyne, na kerén léngiro džungalypén! Kiéli tumé janéna tumaré dáry, i lydžána pir jag tumaré čhavorén, dalésa tumé magirena pes saré tumaré idolenca až ke/ žýko adadyvés i kaména te phučien Mándyr, Izrailjoskiro kher? Te dživáv Me, – rakiréla Raj Devél, Devél, – na phenáva tuménge ničí.” I dová pal so tumé duminéna, na javéla, kóli tumé rakiréna: “Javása, syr Najudytkoné – nacyiengire manušá, syr kherítka ródy dre javír thema (strany), javása kašteske i bareske te das patýv.” Te dživáv Me, rakiréla Raj Devél, Devél! – zoralé burnykasa, protyrdyne vastésa, zoralé xoliása javáva Me te rainav pe tuménde. I vylydžava Me tumen narodendyr, themendyr (stranendyr), pir savé tumé san rosčhude te dživén, skedáva tumen zoralé vastésa, masniasa (myšcasa) xoliamipnasa, so vyčhuvelape. Me janáva tumen pe čhučí phuv, kaj dživéna manušá, odój javáva te sendiakirav mósa ke muj. Syr Me sendiakiravas réndo tumaré dadénca pe Jegiptóskire phuvjákiri čhučí phuv, adiáke Me javáva te sendiakirav tumaró réndo (diélo), – rakiréla Raj Devél, Devél. Me lydžáva tumen telo kralítko destó (žezlo), janáva tumen dro Zavieto, phandava tumen zavietoskire zorjása. Me vykedava tuméndyr manušén, savé ĥazdynépe pe Mánde, i savé kerdé čoripén proti Mánde. Vylydžava Me len kodolé phuvjátyr, kaj jone dživénas, ne pe Izrailjoskiri phuv jona na zadžána, i ĥaljona, so Me som Raj Devél, Devél. A tumé, Izrailjoskiro kher, – adiáke rakiréla Raj Devél, Devél, džán kažno (sváko) ke péskire ídoly, dynarinén (služynen) lénge, kóli Man na šunéna, ne na magirén butedýr Miro svénto lav tumaré darenca i tumaré idolenca. Pal-dová, so pe Mirí svénto bérga, pe vučí Izrailjoskiri bérga, – rakiréla Raj Devél, Devél, – odój javéla te dynarinél Mánge saró Izrailjoskiri kher, saré manušá léstyr, kicý isyn len pe phuv, odój Me prilava len radymása, odój phenáva Me, sob (kaj) te janén tumé tumaré dyibená pervoné phabendyr, saré tumaré sventoné dyibnenca. Me prilava tumen syr gudló thuv smolendyr, kiéli vylydžava Me tumen javire nacyiéndyr, skedáva Me tumen themendyr, kaj tumé san rosčhude te dživén, Me javáva Svénto maškír tuménde, sob (kaj) te dykhén Najudýtka nácyi. I ĥaljona tumé, so Me som Raj Devél, Devél, kiéli Me janáva tumen pe phuv Izrailjoskiri, dro them (strana), pal savó Me ĥazdyjom Miro vast sovlahasa te dav tumaré dadénge. I javéna te ripirén odój pal tumaré dromá, pal saré tumaré réndy (diély), savénca tumé magirenas pes, so tumé javéna te na den patýv kokoré péske pal saré tumaré namište réndy, savé tumé kerdé. I ĥaljona, so Me som Raj-Devél, kóli javáva te keráv tuménca vaš Miro lav na pir fuj tumaré dromá, i tumaré biladžakuné réndy, Izrailjoskiro kher, – rakiréla Raj Devél, Devél.’” I sys ke me Ráskire Devléskiro lav dasavo: “Manušéskiro čhava! Risjov tyré mósa pe drom ke paš-dyvés (jugo), phen lav pe paš-dyvés, phen pir lav angilphenybén pe veš, savó isyn pe paš-dyvesýtko félda. Phen paš-dyvesytkoné vešeske: “Šun Ráskire-Devléskiro lav; adiáke rakirél Raj Devél, Devél: Ake, Me roshačkirava jag dre túte, joj zhala dre túte kažno zeleno kašt i kažno šuko kašt; zoralý jag, saví na murdjola, a shačkirla saró pe paš-dyvés i paš-rat, i saré muiá obhačona. I dykhéla kažno loč (plot'), so Me, Raj Devél, zahačkirdjom la, i joj na murdjola.’” Tén'ci me phendjom: “O, Rajo Dévla, Dévla! Jone rakiréna pe mánde: “Na rakiréla, xaj, Jov primiéro (pritča).” I sys ke me Ráskire-Devléskiro lav dasavo: “Manušéskiro čhava! Risjov tyré mósa ke Jerusalimo, phen lav pe svénto štéto, rákir angilphenybén pe Izrailjoskiri phuv. Phen Izrailjoskire phuvjake: “Adiáke rakiréla Raj Devél, Devél: ‘Ake, Me vydžava pe túte, Me doresava Mirí kurtála (miečo) nožnatyr, xasiakiráva túte čačuné manušés i grehitkoné manušés. A vaš dová, sob (kaj) te xasiakiráv túte čačuné manušés i grehitkoné manušés, Mirí kurtála vydžála nožnatyr pe kažno loč, so isyn pe paš-dyvesýtko, i paš-ratítko rigá. I ĥaljola kažno loč (plot'), so Me, Raj Devél, Devél, dorescjom Mirí kurtála, pale joj na risjola.’ A, tu, Manušéskiro čhavó, dyhine pharé diesa i ilésa, so pašvare te pharadjon, rov kirkes angíl léngire jakhá. I javéla adiáke, so phenéna túke: ‘Sóske tu rovesa?’ phen: ‘Šunybnastyr, savó džála, i rozmarelape kažno iló, i mekenape telé saré vastá, pharó javéla kažnoné dieskire duhoske, i saré čangá izdrana, syr paní. Ake, davá javéla i pherdiakirelape”, – rakiréla Raj Devél, Devél. I sys ke me Ráskire-Devléskiro lav dasavo: “Manušéskiro čhava! Phen angilphenybén, phen: ‘Adiáke rakiréla Raj Devél, Devél: Phen: “Kurtála, kurtála isyn kerdy vostro, isyn žužakirdy (vyčystindly). Kerdy vostro (čolaly) vaš dová, sob (kaj) but te muliakirél, žužakirdy, sob (kaj) te xačol, syr bliskavica. Ci trej aménge te radynaspe, so Miré – čhavéskire destó isyn vučedýr kažnoné kaštéstyr? Me dyjom te žužakiren (te vyčystinen) la, sob (kaj) te lav la dro vast; kadaja kurtála kerdy vostro (čolaly), žužakirdy, sob (kaj) te lel la muliakiribnariskiro vast. Rov i tugin jasvénca, manušéskiro čhava, pal-dová so joj iavéla pe Miré manušénde, pe saré Izrailjoskire thagar'jende, len otdena kurtalake khetané miré manušénca, paldavá mar pes pir stacia (scjogny). Kurtála isyn propatiakirdy. I so kóli joj ĥazdélape pe kralítko destó? To destó na vyrikirla,’ – rakiréla Raj Devél, Devél. A tu, manušéskiro čhava, angilphen i mar vasténca, kurtála kerélape iščo (inké) javír i tríto mólo zoraledýr; kurtála poddžála pe manušéngiro muliakiriben, pe baré – manušéskiro muliakiriben, savó zadžála dre léngire kherá. Pašýl saré léngire pórty (vráty) i Me čhuváva darany kurtála, sob (kaj) te rozmarenpe léngire ile, sob (kaj) te javél iščo (inké) butedýr zamardé manušén. Kurtála xačola, syr bliskavica, saví kerdy vostro te muliakirél. Skedepe kurtalása, džá pe čačí (pravo) rig, ci džá pe zérvo (liévo) rig, karik te na risjol tyró muj. Me javáva te maráv dre vastá, i pirijačéla Mirí xolý. Me, Raj Devél, Devél”, – phendjom kadavá. I sys ke me Ráskire-Devléskiro lav dasavo: “Tu, manušéskiro čhava, ker adiáke, so isyn sýrby duj dromá, kaj trej te džal Vavilonóskire-kralískire kurtalake; trej, sob (kaj) duj dromá te vydžán jekhe phuvjátyr; ker špéra (znako) [vast-r.s.] pašýl dromá, savé džána dre fórja. Vykede drom, pir savó kur-tala džálas pe Rava, Amonoskire-čhavéngire fóro i pe Judéia, dro zorjakirdo Jerusalimo. Pal-dová so Vavilonóskiro králi isyn terdó pe duj dromá, sob (kaj) te zumavel: trinskirela maribnýtka bustiá (striély), phučelape tierafimendyr, dykhéla pe kaló buko (piečonka). Dro čačó vast léste isyn drabakiriben: “Dro Jerusalimo”, kaj trej te čhuvén maribnýtka tarany proti vánty, te kharén te muliakirén, te ĥazdén zan godlypnasa te čhuvén phuv vaš valo, te ĥazdén foritko vánta. Kadavá drabakiriben sykadyjá dre Jerusalimóskire – manušéngire jakhá xohaibnasa, ne pal-dová, so jone sovlahade, králi priripirdia pal léngiro čoripén, sob (kaj) te len fóro maribnása.” Paldavá adiáke rakiréla Raj Devél, Devél; Pal-dová so tumé kokoré priripiren tumaró čoripén, kerén adiáke, sob (kaj) tumaró čoré réndy te javén dykhné, sob (kaj) te sykadjon tumaré gréhi pir saré tumaré réndy; pal-dová so tumé kokoré priripirena pal davá, – tumen léna vasténca. I tu, magirdó, nálačho Izrailjoskiro thagári, savó keréla grého, tyró dyvés javdiá adadyvés, tu na javésa te kerés tyró čoripén butedýr. Adiáke rakiréla Raj Devél, Devél: ‘Ukede diadema, le telé péstyr tyrí koróna, kadales butýr na javéla; telatuno javéla te barjol, a upratuno te teliakirelpe. Me čhuváva telé les tronostyr čhuváva, čhuváva telé les, les na javéla; ne, kiéli javéla Odová, Konéske trej te javél, Me otdáva Léske.’ “Tu, manušéskiro čhava, phen angilphenybén, phen: ‘Adiáke rakiréla Raj Devél, Devél pal Amonoskire čhavénde pal dová, so javéla lénca. Phen: Kurtála, kurtála vytyrdyny, žužakirdy pe muliakiriben, sob (kaj) te čingirel, sob (kaj) te domarel, sob (kaj) te xačol, syr bliskavica, sob (kaj), kiéli déna túke čhučé (pusta) dykhibena, zumavena túke i xohavena tut, sob (kaj) tut te čhuvén ke domardé nakuč manušá, savengiro dyvés javdiá, na javéna butedýr te kerén čoripén. Ci te riskirav kurtála dre lákiri nožna? Pe štéto, kaj tu sánas sozdynó pe phuv, kaj tu bijandyjan (lotijan), Me javáva te sendiakirav pharés tut. Vyčhuvava pe túte Mirí zoralý xolý, Me phurdava pe túte Miré-xoliamipnaskire jagása, otdáva tut dre biileskire-manušéngire vastá, manušénge, savé džinéna, syr trej te zamarén. Tut pohala jag; tyró rat jačélape dro maškirál pe phuv, na javéna te ripirén pal túte, pal-dová, so Me, Raj Devél, Devél, phendjom davá.’” I sys ke Me Ráskire-Devléskiro lav dasavo: “A tu, manušéskiro čhava, ci kamésa tu te sendiakires? Kamésa tu te sendiakires fóro, kaj čhuvélape rat? Phen léske pal saró léskiro džungalypén (sarí léskiri brytkima). Phen: ‘Adiáke rakiréla Raj Devél, Devél: o, fóro, savó čhuvéla rat maškír péste, sob (kaj) te javél léskiro časo, i savó keréla péste ídoly, sob (kaj) te magirel pes! Ratestyr, savó tu pročhudian, tu san bangó, idolendyr, savén tu kerdián, tu san magirdó. Podginé tyré dyvesá, javdiá tyrí štúnda (ĥodina). Pal kadavá Me otdáva tut pe manušéngiro saben, pe saré – phuv'jengiro prosaiben. Kodolé, savé isyn pašýl túte, i kodolé, savé isyn dur tútyr, javéna te košenpe pe túte, kon magirdia tyró lav, proslavindepe dolesa, so dro búnto na kandenas nikonés. Ake, Izrailjoskire thagárja: kažno (sváko) péskire zorjása sys túte, sob (kaj) te čhuvén rat. Túte namišto rakiréna pal date i dadéste: keréna namištes manušésa, savó javdiá javire phuvjátyr; maškír túte nakuč keréna pirotosa (bidadeskire čhavésa), pivliasa (biromeskire manušniasa). Tu na désa patýv miré sventoneske, i phagiresa Miré sávaty (suboty). Manušá, savé namištes rakiréna pal javire manušénde, isyn dre túte, sob (kaj) te čhuvén rat; pe bérgi xána túte sventoné – dyibnytko xabén idolénge, maškír túte keréna fuipén. Dadéskiro nangipén otkerena túte, jone javéna zorjása ke džuvlý, kóli joj žužakirelpe lákire nažužipnastyr. Javír keréla biladžaipén čužoné romniása, javír magirela peskirjá borja, javír keréla biladžakiro grého pheniasa, péskire – dadéskire čhasa. Ke tu manušá léna myto (vziatka), sob (kaj) te čhuvén rat, tu desas lové telo kófo (procento), i lesas baredýr bažyn (lihva) tu zorjása otlesas mištypén tyré pšalestyr, a pal Mánde bistyrdian, – rakiréla Raj Devél, Devél. Ake, paldavá Me divinavpe, so až mardjom pes pir vastá tre načačipnastyr, syr tut tyrdela ke barvalypén, syr rat čhuvélape maškír túte. Ci vyrikirla tyró iló, ci na obmekenape Tyré vastá dre kodolé dyvesá, kóli Me vydžava pe túte? Me, Raj Devél, Devél, phendjom i keráva davá. I Me rosčhurdava tut pir narody te dživés, rosphurdava tut pir phuvjá, i tu na javésa te kerés butýr sarésa džungalypén maškír péste. Tu kokoró pes magiresa angíl manušéngire jakhá, i tu ĥaljosa, so Me som Raj Devél, Devél.’” I sys ke me (Jezekiljo) Ráskire-Devléskiro lav dasavo: “Manušéskiro čhava! Izrailjo kerdiápe Mánge syr šlako, syr nažužo rup, saré jone isyn – volyvo (olovo), xarkóma (mied'), sastýr, molovi (svinco) – kerdépe dro bov, syr šlako rupéstyr. Paldavá adiáke rakiréla Raj Devél, Devél: ‘Kóli saré tumé kerdépe šlakosa rupéstyr, ake, Me skedáva tumen dro maškirál Jerusalimo.’ Syr dro bov manušá čhuvéna saró khetané rup, i xarkóma, i sastýr, i molovi, i volyvo, sob (kaj) te rosphurden jag pe lénde, sob (kaj) te rozbilaven (te rostopinen) len, adiáke Me, dre Miro xoliamipen, skedáva i čhuváva i rozbilavava tumen. Ake, Me skedáva tumen, i Me phurdava pe tuménde Miré xoliamipnaskire jagása, i tumé rozbilavenape maškír láte. Syr rup rozbilavelpe dro maškirál bov, adiáke i tumé rozbiladjona, i ĥaljona tumé, so Me, Raj Devél, Devél, vyčhudjom pe tuménde Miro xoliamipen.” I sys ke me Ráskire-Devléskiro lav: “Manušéskiro čhava! Phen léske: “Tu san nažuži phuv, pe saví na džála bryšýnd dro dyvés, kiéli peréla xoliakiri zor! Lákire proróki zrakirenape maškír láte, syr ščer (liévo), savó rykinela, riskiréla péskiro doresybén: jone xána manušéngiro di, zalena mištypén i drógima, jačkirena džuvlién biromeskiro. Lákire rašaja phagirena Miro Zakóno, magirena Miro svénto, jone na dykhéna, kaj isyn svénto, kaj isyn nasvento; na sykavéna, kaj isyn žužó, a kaj isyn nažužo; pe Miré sávaty (suboty) jone zakerde jakhá; Me som sýrby magirdó maškír lénde. Lákire thagárja isyn syr ruvá, savé rodéna xabén, čhuvéna rat, xasiakirena manušéngiro di, sob (kaj) te lathén barvalypén napatyvales. A lákire proróki makhena saró blatane obmakhibnasa, jone dykhéna čhučipen (pustota), angilphenena xohaibén i rakiréna: ‘Adiáke rakiréla Raj Devél, Devél”, – a Raj Devél, Devél ničí na rakirélas. A manušá narodóstyr keréna namištes jekh javireske; čorena, zalena čororestyr i manušéstyr, savó mangéla, keréna namištes manušésa, savó javdiá javire phuvjátyr. Rodyjom Me lénde manušés savó čhuvelas vánta i terdielas dro prophagiriben angíl Mánde pal daja phuv, sob (kaj) Me te na rasphagirav la, ne Me nalathjom. Adiáke javéla: Me vyčhuvava pe lénde Miré xoliakiri jag, Miré xoliakire jagása Me xasiakiráva len, i Me otdáva pale pal léngire réndy pe léngiro šeró” – rakiréla Raj Devél, Devél. I sys ke me Ráskire-Devléskiro lav dasavo: “Manušéskiro čhava! Sys duj manušnia, jekhe – dákire duj čhaja. I kerénas jone biladžakire réndy dro Jegípto, jone kerénas davá grého dre péskire terné beršá; odój našade jone čhakiri ladž, odój léngire kolyna čalade muršá. Ake, isyn léngire lavá: phuredyrja kharenas Ogolá, a lákire pheniá – Ogolivá. Jone sys Miré, bijanenas (lot'kirenas) čhavén i čhajén. Ogolá – davá sys Samárija, Ogolivá – davá sys Jerusalimo. I lyjá Ogolá te kerél biladžakire réndy, i te durjol Mándyr ke péskire kamlé, ke Asiriicy, savé dživénas pašýl láte. Ke kodolé, savé ur'jenaspe dre šukár fiolietova thana (tkani), ke okrugakire barydyrá, ke barydyrá theméskire, ke saré šukár čhavé, ke kodolé, savé tradenas pe grénde. Konéske otdelas joj pes dre biladžakire réndy, sarénca vykedyné Asuroskire čhavénca, magirelas pes saré léngire idolenca, pal savénde tradelaspe joi. Joj na pirijačelas te kerél grého i Jegiptianenca, pal-dová so jone džinenaspe lása, kóli joj sys terný, jone čilavenas lákire kolyna, jone kerénas lása biladžakiro grého. Paldavá Me otdyjom la dre lákire-kamlengire vastá, dre Asuroskire–čhavéskire vastá, pal savénde tradelaspe joi. Jone otkerde lákiro nangipén, zalyne lákire čhavén i lákire čhajén, a la muliakirdé kurtalása. Joj kerdiápe ladžakune lavésa maškír džuvliende, kiéli jone kerdé séndo pe láte. Na dykhí pe dová, so lákiri phen, e Ogolivá, dykhélas saró davá, joj iščo (inké) butedýr kerélas biladžakiro grého, i pyjá butedýr dro lákiro biladžaipén, syr lákiri phen. Joj potyrdyjape Asuroskire čhavén, okrugakire barydyrén i barydyrén themeskiren, manušén, savé ur'jenaspe dro drieván šukár uribén, manušén, kon tradelas pe grénde, sarén gožone terné manušén. Me dykhcjom, so joj magirdia pes, i so lénde dujende, pheniende, sys jekh drom. Ne kadaja, Ogolivá, kerélas grého iščo (inké) butedýr, pal-dová so dykhciá manušén, so sys vyčindle pe vánta, dykhciá Xaldiejengiro portrieto, dykhciá muiá Xaldiejengire, savé sys makhne jarkone mastiniasa (kraskasa). Save sys obphandlé simirisa pašýl kustyka, pe léngire šeré sys šukár phandlunia (poviazki); i vydykhenas Xaldiei, sýrby xaladéngire raja, sýrby Vavilonóskire čhavé Xaldiejengire phuvjátyr. Syr joj dykhciá len, i joj sýges potyrdyjape ke jone, bičhadiá ke jone ke Xaldeja vykedyné bičhaden, sob (kaj) te kharén len. Javné ke joj Vavilonóskire terné muršá pe lákiro čhuibén, magirdé la péskire biladžakuné rendosa, joj magirdia pes lénca i durija léndyr lákiro iló. Kiéli ž joj otkerdés (javnes) lyjá te kerél péskiro biladžakiro réndo, i otčhakirdiá péskiro nangipén, tén'či otgijá látyr Miro iló, syr otgijá Miro iló lákire pheniatyr. Joj iščo (inké) butedýr kerélas péskiro biladžakuno réndo, syr priripirlas péskire terné beršá, kiéli kerdiá biladžakuno réndo pe Jegiptóskiri phuv. Pal-dová so joj tyrdelaspe ke péskire kamlytka, konéste sys syr oslengiri loč (plot'), konéste sys baró nálačho kamiben, syr ĥenštoste. Adiáke tu priripirdian tyró nálačho kamiben dre tyré terné beršá, kiéli Jegiptiáni čilavenas tut pal tyré patyvalé-čhakire kolyna. “Paldavá, Ogoliváie, adiáke rakiréla Raj Devél, Devél: ‘Ake, Me ĥazdáva pe túte tyré kamlen, savéndyr tu kokori durijan, Me skedáva len pe túte saré rigéndyr. Vavilonóskire terné muršén i sarén Xaldiejen: Piehodostyr, Šoatyr i Koatyr, a lénca – saré Asuroskire manušén, gožone terné muršén, okrugakire barydyrén, theméskire barydyrén, ran xaladengiren, barvalé manušén i slavutnone, sarén, kon kučes tradelas uklisto (uklisté). Jone javéna pe túte kurtalenca, grenca, maribnytkoné vurdenenca, manušéngire butypnasa; jone javéna pe túte trusciál dro maribnýtko uribén, sastruné ščytenca i dre šljomy, i Me otdáva tut lénge pe séndo, i javéna jone te sendiakiren tut péskire sendosa. I Me javáva te zevlynav tut; jone javéna te kerén túsa baré xoliása, otčingirena tyró nakh i kaná, a saró tyró javír peréla kurtalátyr, jone zalena tyré čhavén i tyré čhajén, a saró tyró javír, so jačélape, xačkirena jagása; i jone zlena tútyr tyró uribén, zalena tyré šukarjakiribena kuč-barore. Me keráva adiáke, so tu pirijačes te kerés tyró biladžakiro grého, i tyré biladžakuné réndy, savé tu jandian Jegiptóskire phuvjátyr, so tu na risjosa ke jov tyré jakhénca, tu na javésa te ripires butedýr pal Jegípto. Pal-dová so adiáke rakiréla Raj Devél, Devél: ‘Ake, Me otdáva tut dre vastá kodolengire, konés tu zoralés na kamésa dre vastá kodolengire, konéstyr otgijá tyró iló. Tu dykhésa léngiri bari xolý, jone zalena tútyr saró mištypén, pal savó tu pharés kerdián butý, jone mekéna tut, so tu javésa nangi, naučhakirdy. I javéla otkerdo tyró nangipén, tyró biladžakuno réndo, tyró biladžakiro grého. Ĥáda, jone keréna túsa adiáke kole pal tyré biladžakuné réndy Najudytkoné nacyienca, koneskire idolenca tu magirdian pes. Tu psiresas tyré-pheniakire dromésa, paldavá Me dáva túke dro vast lákiro tahtáj (čaša).’ Adiáke rakiréla Raj Devél, Devél: “Tu javésa te p'jes tyré-pheniakiro tahtái, xor i buĥló, i javéna te sanpe tútyr, tu lésa ladž pe péste, pal-dová so baró isyn davá tahtái! Tu javésa syr maty tugatyr, tahtastyr, kaj isyn dar i čororipen, ĥáda, isyn tyré – pheniakire Samarijakiro tahtái! Tu javésa te p'jes, i dop'jesa saró, so javéla dre léste; rozmardo tahtáj tu čilavesa tyré ušténca, tu rosčhinesa tyró kolýn, pal-dová so Me phendjom davá, – rakiréla Raj Devél, Devél. Paldavá adiáke rakiréla Raj Devél, Devél: ‘Pal-dová so tu bistyrdian Man, riskirdian tyró dumó pe Mánde, mek te javél túte bibáht pal tyró tyrdypén ke grého, pal tyré biladžune réndy.’” I phendiá mánge Raj Devél, Devél: “Manušéskiro čhava! Kamésa tu te sendiakires Ogola i Ogoliva? Piriphen lénge léngiro džungalypén (brytkima). Pal-dová so jone kerénas biladžaipén, i rat isyn pe léngire vastá: jone kerénas biladžaipén péskire idolenca, i až janénas syr svénto dyibén péskire čhavén, savén jone bijandle (lot'kirde) vaš Mánge, i čhuvénas len dre jag, sob (kaj) ídoly te xan len. Ake, so jone kerénas: jone magirenas Miro svénto štéto pe kodová že dyvés, jone phagirenas Miré sávaty. Pal-dová so, kiéli jone muliakirenas péskire čhavorén vaš léngire ídoly, pe kodová že dyvés javénas jone pe Miro svénto štéto, sob (kaj) te magirén les, ake, syr jone kerénas maškirál Miro kher! I iščo (inké): jone bičhavenas pal muršende, savé dživénas dur, bičhavenas pal lénde péskire dynar'jén. Ake, javné kadalé muršá, tu vaš lénge vymoresaspe, makhesas tyré jakhá, ur'jesas šukár uribén. Bešesas tu pe rangiro čhuibén (pasindly), angíl savó sys skedynó skamínd, pe savé tu desas lénge Miro kuč thuvipen drogoné smolendyr, Mirí zan buté-manušéngiri i olivítko dzet. Sys šundly zan narodoskiri, savó radynenaspe bidumakires láte; ke kodolé manušá narodóstyr javénas matymarja čhučé phuvjátyr; a jone ur'jenas vastytka (kore) (brasliety) pe léngire vastá, a pe léngire šeré šukár korony. Tén'ci phendjom Me pal kodoliate, saví phurija dre peskiré biladžakuné réndy: ‘Ci javéna jone duredýr te kerén biladžaipén lása i joj lénca? Ne ŭsajekh džánas jone ke joi, syr džána ke biladžakiri manušny, adiáke syr džánas ke Ogola i Ogoliva, ke džuvliá, kon tyrdelape te kerél ladž. Ne devlýtka muršá javéna te sendiakiren len; syr džuvlién, savé parude romeske, syr kodolén, savé pročhuvena manušéngiro rat, pal-dová so jone isyn biladžakuné džuvliá, rat isyn pe léngire vastá. Paldavá adiáke rakiréla Raj Devél, Devél: “Kharén manušén pe lénde, otdén len pe pharipén i čoriben. Manušéngiro skedyibén domarla len barénca, i čingirela len péskire kurtalenca, jone zamarena léngire čhavén i čhajén, a léngire kherá xačkirena jagása. I Me keráva adiáke, sob (kaj) te pirijačen te tyrdenpe te kerén biladžakuno réndo pe daja phuv, sob (kaj) saré džuvliá te sykljon daléstyr te na kerén biladžakire réndy, syr tumé. A tumé priléna bibáht pal tumaró biladžakiro réndo pal gréhi tumaré idolenca i tumé i ĥaljona, so Me som Raj Devél, Devél.” I sys ke me Ráskire-Devléskiro lav, dro jeniáto (bijekhéskiro déšto) berš, dro déšto čhon, pe deštone-čhonytko dyvés dasavo: “Manušéskiro čhava! Začhin péske syr kharelpe davá dyvés, dro kadavá dyvés Vavilonóskiro králi javéla te obdžal trusciál xaladybnasa Jerusalimo. Phen pritča (sykaibén) kheréske, kaj na kandéna nikonés, phen lénge: ‘Adiáke rakiréla Raj Devél, Devél: “Čhuv pirí (kakávi), čhuv, čhuv odorík paní. Čhuv odorík koterá masytka, saré fededýr koterá, kumpjoskire i psikeskire fedýr kokalý čhuv pherdés. Vykede lačhé bakrén stadatyr, xačkir jag pe kokalý, keráv vaš xabén mas adiáke, sob (kaj) kokalý te javén kovlé.’ Paldavá adiáke rakiréla Raj Devél, Devél: “Bida foroske, kaj čhuvélape rat, bída kakavjake (pirjake), saví obhačija i savjátyr obhačkirdo štéto na zdžála! Vyčhurden látyr kotér pir kotér, na vykede léndyr pir žriébijo. Pal-dová so rat isyn maškír fóro, jov jačadia les pe sámo nangi bérga, na čhudiá les pe phuv, sob (kaj) práho te učhakirel rat, sob (kaj) te ĥazdelpe xoliamipen te kerél zavodo (te othal pale) pe fóro, Me jačadjom léskiro rat pe sámo nangi bérga, sob (kaj) jov te na učhakirelpe. Paldavá adiáke rakiréla Raj Devél, Devél: “Bida foroske, kaj čhuvélape rat! Me roshačkirava baredýr jag. Čhuv vučedýr kaštá, roshačkir jag, keráv mas; mek saró te vykeravelpe, i mek kokalý te pirihačon. A kiéli pirí (kakávi) javéla čhučí, to čhuv la pe vangara, sob (kaj) joj te rostat'kirelpe, sob (kaj) te rostat'kirelpe léskiri xarkóma, savjátyr isyn kerdy pirí, sob (kaj) te rozbilavelpe saró pirjakiro nažužypen, sob (kaj) te na javél dre pirí obhačkirde štéty. Ĥáda, javéla pharí butý vaš láke; ne pirjakiro nažužypen na zdžála látyr, i dre jag usajékh jov jačélape. Dro tyró nažužypen isyn tyrdypén te kerél džungalypén, ne pal-dová, so Me žužakirdjom tut, a tu usajékh san nažužo. Kóli vyčhuvava Me pe túte saró Miro xoliamipen, tén'či tu javésa žužakirdy. Me som Raj Devél, Devél, Me rakiráva: kadavá saró javéla, i Me keráva so trej. Me na obrikirava Pes, Me na potanginava, Me na požalinava. Pir tyré dromá, pir tyré réndy javéna te sendiakiren tut”, – rakiréla Raj Devél, Devél. I sys ke me Ráskire-Devléskiro lav, phení: “Manušéskiro čhava! Ake, Me otlava tútyr dová, sóstyr tyré jakhá radynénape, tyrí baht fuiasa (jazvasa), ne tu na tangine, na rov, mek te na čhuvenpe tyré jasva. Piridživ saró davá dre péste pharé diesa, na rov pal romniáte, ne obphande tyró šeró, uri tyré triviki, na zaker tyré uštá, na xa maró čužoné manušéndyr.” I kiéli rakiravas me tasiárles (ránes) lav ke manušá, myjá bel'velié mirí romný, i pe javír dyvés Me kerdjom adiáke, syr sys priphendlo. I phendiá mánge narodo: “Ci phenésa tu aménge, so saré kodolé kole sykavéna aménge, i syr te ĥaljos aménge dová, so tu kerésa?” Tén'ci me otphendjom lénge: “Ke me sys Ráskire-Devléskiro lav dasavo: ‘Phen Izrailjoskire kheréske: adiáke rakiréla Raj Devél, Devél: ‘Ake, Me otdáva pe magiripén Miro svénto štéto, savó pherdés délas tuménge zor, savó radynelas tumaré jakhá i tumaró iló, a tumaré čhavé i tumaré čhaja, savén tumé jačade, xasjona kurtalátyr. I tumé javéna te kerén dová, so me keravas: tumé na javéna te zakeren čhora (broda), tumé na javéna te xan maró čužoné manušéndyr. Šeró tumaró javéla obphandlo, triviki javéna pe tumaré ĥerá, tumé na javéna te tuginen jasvénca, i na javéna te rovén, ne javéna te šutjon tumaré čoripnástyr, te tuginen rovibnasa jekh angíl javiréste. A Jeziekiljo javéla vaš tuménge sýrby ĥiertýk (znamiénijo); saró, so jov kerélas, tumé javéna te kerén, i syr davá saró kerélape, to tumé ĥaljona, so Me som Raj Devél, Devél. A túsa, ake, so javéla, manušéskiro čhavó: dro kodová dyvés, kiéli Me otlava léndyr léngiri sláva, dová, sóske radynenaspe léngire jakhá i léngiro di, léngire čhavén i čhajén: dro dová dyvés javéla ke tu manúš, savó zrakhciape odothýr, sob (kaj) te del túke kan; dro kodová dyvés, kiéli tu dykhesape zrakhné manušésa, otkernape tyré vastá, i tu javésa te rakirés, na javésa tu butýr bičibakiro, a javésa sykaibnasa vaš lénge, i jone ĥaljona, so Me som Raj Devél, Devél.” I sys ke me Ráskire-Devléskiro lav dasavo: “Manušéskiro čhava! Risjov tyré mósa pe Amonoskire čhavénde, rákir pe lénde angilphenybén. Phen Amonoskire čhavénge: ‘Šunén Ráskire-Devléskiro lav: adiáke rakiréla Raj Devél: ‘Kóli tu rakirésa pal Miro svénto: “A!”, paldová so jov isyn magirdó, rakirésa pal Izrailjoskiri phuv, pal dová, so joj isyn čhučí, rakirésa pal Judáskiro kher, pal dová so len tradyne dre navolia, paldavá, ake, Me otdáva tut čhavénge, savé javéna vastokóstyr syr mištypén; jone javéna te kerén túte péskire bakréngire gražy (zagony), jone čhuvéna túte péskire šátry, – i javéna te xan Tyró xabén, javéna te p'jen tyró thud. Me keráva adiáke, so dre Rava javéla štála vaš vierbliudenge, a Amonoskire čhavé javéna te čaraven bakrén. I tén'či tumé galjona, so Me som Raj Devél, Devél.’ Adiáke rakiréla Raj Devél, Devél: pal dová, so tu maresas dre vastá, štavesas ĥerénca, radynesaspe ilésa, so na kamesas te dykhés pe Izrailjoskiri phuv, paldavá, ake, Me protyrdava ke tu Miro vast, Me keráva adiáke, sob (kaj) te občoren tut Najudýtka nácyi, Me čhurdava krig tut saré manušéndyr, vyčhinava tut phuv'jengiro ginybnastyr, rosphagirava tut i tu ĥaljosa, so Me som Raj Devél, Devél.” Adiáke rakiréla Raj Devél, Devél: “Pal-dová so Moávo i Sieiro (Edómo) rakiréna: ake, Judáskiro kher jaciá dasavo, syr saré narody (manušýtka nácyi), to pal davá Me láva te keráv for'jéndyr, saré léskire for'jéndyr, savé isyn pašýl miéža (granica), phuvjákiro šukaribnastyr, Bien-Ješymofostyr, Vaal-Mieonostyr i Kiriafaimostyr, i Me otkerava Moavoskiri rig, vaš manušénge, savé javné vastokóstyr, Me otdáva les lénge khetané Amonoskire manušénca, sob (kaj) te na ripirén butedýr Amonoskire manušén maškír narody. I Me javáva te sendiakirav Moávo, i jone ĥaljona, so Me som Raj Devél, Devél.’” Adiáke rakiréla Raj Devél, Devél: ‘Pal-dová so Edómo xoliása ĥazdyjápe pe Judáskiro kher, i kerdiá baró grého, kiéli othalas xolý pe léste. Paldavá adiáke rakiréla Raj Devél, Devél: “Me protyrdava Miro vast ke Edómo, Me xasiakiráva léste manušén i murdalén; Me keráva léstyr čhučí phuv; dro Fiemano, dro Diedano, saré peréna kurtalátyr. Me othava xolý pe Edómo Miré narodoskire, Izrailjoskire vastésa; jone javéna te kerén dre Idumeja pir Mirí xolý i Miro xoliamipen, i jone ĥaljona, syr Me vyrodava léndyr,” – rakiréla Raj Devél, Devél. Adiáke rakiréla Raj Devél, Devél: “Paldová, so Filistimliáni ĥazdenaspe pe lénde xoliása, na ginenas len dre péskiro iló pal manušénde, te xasiakirén len pir ĥaratuno nakamiben te dykhén pe lénde, paldavá, adiáke rakiréla Raj Devél, Devél: Áke, Me protyrdava Miro vast ke Filistimliáni, Me xasiakiráva Kritianen, xasiakiráva pe morjoskiro (derjavéskiro) brégo léngiro jačaibén (ostatko). Me othava bari xolý pe lénde i baré xoliása vyrodava léndyr, – i jone ĥaljona, so Me som Raj Devél, Devél, kiéli Me vyrodava léndyr.’” I sys adiáke dro dešujekhto berš, dro pérvo čhon, pe pérvo čhonytko dyvés, so sys ke me Ráskire-Devléskiro lav: “Manušéskiro čhava! Paldová, so Tíro rakiréla pal Jerusalimo: ‘A! Jov isyn rosphagirdo – narodengiro vudár; jov obrisjola ke me; me pherdiakiravape, jov isyn čhučó (pusto).’ Pal dová, – adiáke rakiréla Raj-Devél, Devél – ake, Me som proti túte, Tíro, Me ĥazdáva pe túte but nácyi, syr mórjo (derjáv) ĥazdéla péskire valny (velny). I jone rozmarna Tiroskire vánty (sciany), i rosphagirena léskire vučardia (bašni) i Me vyšulavava léstyr léskiro práho, keráva Léstyr nangi bérga. Jov javéla maškír mórjo (derjáv) štetosa, kaj rosčhuvena khudia, pal-dová so Me phendjom davá, – rakiréla Raj Devél, Devél, les občorena javír narody. Léskire čhajén, savé isyn pe félda, – muliakirena kurtalása, – i tén'či ĥaljona, so Me som Raj Devél, Devél.” “Adiáke rakiréla Raj Devél, Devél: “Áke, Me janáva pe Tíro paš-ratiatyr Navuhodonosoros, Vavilonóskire kralís, kral'jengire kralís; Me janáva les grenca, maribnytkoné vurdenca, manušénca, savé tradéna uklisté, xaladybnasa buté manušénca. Tyré čhajén pe félda jov muliakiréla kurtalása, keréla maribnýtka tury, čhuvéla valo proti túte, javéla pe túte maribnása. Jov čhuvéla maribnýtka tarany te rosphagirel tyré vánty, rosphagirela tyré tury péskire toverenca. Léskire-grengire butypnastyr tu učhakiresape prahosa, kiéli zašuminena léskire manušá, savé tradéna uklisté, rotendyr i maribnytkoné vurdenendyr, to léna te izdran tyré vánty, syr jov zadžála dre tyré pórty (vráty), sýrby zadžána manušá dro rozmardo fóro. Péskire grengire petalenca jov pirištavela saré Tyré vulícy (gásy); tyré manušén jov muliakiréla kurtalása; ripiribén tre zoralé stylbendyr jov čhurdéla pe phuv. Jone rosčorena tyró barvalypén, dová, so tu biknesas, jone rosphagirena pe koterá (kuski) tyré vánty, rozmarna tyré goža kherá, tyré bará, tyró veš, tyrí phuv čhurdena dro paní. Me keráva adiáke, so tu na javésa te bagas butedýr Tyré giliá, na javéla šundlo, sob (kaj) tu bašavesas pe luty (cytry). Me keráva tútyr nangi bérga; tu javésa syr štéto, kaj rozčhuvena khudia (sieti), tu na čhuvésa butedýr tyré kherá, pal-dová so Me, Raj Devél, Devél, phendjom kadavá”, – rakiréla Raj Devél, Devél. Adiáke rakiréla Raj Devél, Devél Tiroske: “Tyré peribnaskire šuminybnastyr, manušéngire roibnastyr, kiéli javéna te muliakirén maškír túte, ci na javéna te izdran ostrovy? Zdžana saré morjoskire (derjavéskire) thagárja péskire tronendyr, zlena péstyr léskire uribená, zlena péstyr rozsude rizy, ne jone ur'jenape darása, bešena pe phuv, javéna te izdran, javéna te divinenpe trašasa pal túte. I jone ĥazdéna roibén pal túte, jone phenéna túke: “Syr xasijan tu fóro, kaj dživénas manušá, savé tradenas piró mórjo (derjáv), slavútno fóro, savó sys zoraló pe mórjo (derjáv), sys zoraló jov kokoró i léskire manušá, konéstyr saré darenas! Kakaná, dro dyvés, kóli tu pyjan, izdrandyne ostrovy; ostrovenge pe mórjo (derjáv) jaciá pharó pal tyró xasibén.’” Adiáke rakiréla Raj Devél, Devél: “‘Kóli Me keráva tútyr čhučó fóro, syr fórja, kaj nikón na dživéla, kiéli ĥazdáva Me pe túte morjoskiro (derjavéskiro) xoripén, to učhakirena tut baré valny. Tén'ci Me janáva telé tut khetané kodolenca dre maĥila, ke narodo, savó sys ĥará, Me čhurdava tut dro phuvjákiro xoripén, dre viečna čhučé phuvjá xor tel phuv mulé manušénca, sob (kaj) tu te na dživés butýr; i sykaváva Me baripén pe phuv, kaj isyn džidé. Me keráva tútyr traš, na javéla tut butedýr; mek i javéna te rodén tut, ne na lathéna nikoli,” – rakiréla Raj Devél, Devél. I sys ke me Ráskire-Devléskiro lav dasavo: “I tu akaná, Manušéskiro čhavó, rov pal Tíro, phen Tiroske, Tu, savó dživesa maškír mórjo (derjáv), kon timisiakirela (targinela) narodenca buté ostrovendyr” adiáke rakirél Raj Devél, Devél: ‘Tíro! Tu rakirésa nane nikonés gožedyr mándyr!’ Miéžy tyré isyn dro morjoskiro (derjavéskiro) iló; kodolé, kon kerélas tut, kerdé tut gožedyr šukaripnastyr. Sieniroskire – kiparisone kaštendyr kerdé jone Tyró ĥeristo (pomosto) jone lenas kiedro Livanostyr, sob (kaj) te kerén pe túte mačty; Vasanoskire dembendyr kerénas tyré rovlia (vjosly), predki (skamieiki) tyré, kerénas manušá Ašurostyr bukitkone kaštéstyr, i ukedenas len slonytkone kokalosa Kitimskone ostrovendyr. Rossude pohtana (polotny) Jegiptóstyr mekenas pe tyré balvaluné (párusy), jone sys tyró sciago (flago); sinia i lolé thana (tkani) Jelisakire ostrovendyr učhakirenas tut. Manušá Sidonostyr i Arvazostyr kerénas túte butý rovlienca (vjoslenca); péskire džinybnarja sys túte, Tíro, jone lydžánas Tyré pármy (korabli). Phurydyrá Gievalostyr, i léskire godé manušá sys túte, sob (kaj) te zakeren paklasa promarde štéty. Rázna pármy i léngire kodolé manušá, savé kerénas butý rovlienca, sys túte, sob (kaj) te džal Tyró biknyben. Piersijani, Lidijani, Liviicy sys dro tyró xaladybén; jone sys maribnaskire túte, jone ublavenas pe túte ščýto i šliemo; léndyr tu sánas baró. Arvadoskire manušá tyré xaladybnasa sys terdé trusciál pe tyré vánty, Gamadimy sys terdé pe tyré vučardia (bašni); pe tyré vánty jone ublavenas péskire ščýty/kolčany; jone dopherdiakirenas Tyró šukariben. Farsiso, Tyró timisiari (torgovco), konéste sys baró barvalypén, pleskirelas pal dová, so tu biknesas, rupésa, sastyresa, molovisa (svincosa), volyvosa (olovosa). Javano (Iavano), Tuvalo, Miešeho timisiakirenas túsa, paruvenas dová, so tu biknenas, pe manušénde i xarkuné pirja. Fogarmoskire kheréstyr lydžánas túke gren, ĥenšten i lošaken pal dová, so tu biknesas. Diedamoskire manušá timisiakirenas túsa; but ostrovy kerénas túsa paruiben. Jone janénas túke slonytko kokalo i kaló veš. Kuč džálas tyró biknyben; timisiakirenas túsa Aramejani, pal-dová so tu but biknesas, jone pleskirenas túke emieral'dosa (karbunkolosa), lolé, rozsude thanenca, visonytkone rizenca, koralenca i rubinenca. Judeja i Izrailjoskiri phuv timisiakirenas túsa. Paldová, so tu biknesas, pleskirenas Minifoskire parné givesa, gudlypnasa, jagvinesa, kaštune ksilesa i bal'zamosa. Kuč džálas Tyró biknyben Damaskosa, konéste sys baró barvalypén, jov biknelas túke Xielbonoskiri mol (vino) i parny výlna (šers'). Dano i adiáke-pac' Javano Uzalostyr pleskirenas túke, psiri odorík-pale, pal dová, so tu biknesas, vykerde sastyresa; kassija, duhmiano triščyna džánas pe paruiben. Diedano timisiakirelas (kofinelas) túsa kučoné cergenca (dekenca) te tradén uklisté. Aravija, saré Kidaroskire thagárja, paruvenas túsa: paruvenas bakror'jenca, bakrenca, buznenca (kozlenca). Tylgarja (kúpcy) Savatyr i Rajematyr timisiakirenas túsa. Kučone khandypnenca, raznone kučoné barénca i suvnakása pleskirenas túsa pal dová, so tu biknesas. Harano, Xané, Jedieno, Savakire tylgárja, Asuro i Xilmado timisiakirenas túsa. Jone timisiakirenas túsa kučoné vykedyme uribnenca – pharune i rossude thanenca, savé jone janénas pe tyró targo dre kuč mohte (jaščyki), so sys kerdé kiedrostyr, savé sys mištés pritasade. Parmy (korabli) Farsisostyr lydžánas saró, sob (kaj) te džal Tyró biknyben; tu jacián barvaló, rozgijápe tyrí sláva maškír mórjo (derjáv). Ne kodolé manušá, savé kerénas butý pe rovlia pe túte, lydžiné tut dro baró paní, ne vastočno balvál rozmardiá tut maškír mórjo (derjáv). Tyró barvalypén, tyré tovary, tyré baré piraliá (sklady) – dová, so tu rakhesas; manušá, savé kerénas tyré barki (lodki), manušá, savé zakerenas tyré promarde štéty, savé lydžánas tyró biknyben, saré xaladé tyré, savé sys túte; saré tre but manušá, kon sys túte, dro tyró peribnaskiro dyvés, peréna dro morjoskiro (derjavéskiro) xoripén. Locmanengire godlatyr, savé lydžánas tyré pármy, léla te izdral phuv. I zdžana pe brégo tyré parmendyr saré manušá, savé griebinenas rovlienca, savé plyvinenas pe lénde, i savé lydžánas len, štavena pe phuv. I zarovena pal túte zoralé zaniása, i javéna te rovén kirkes pal túte, čhuvéna práska (pieplo), pe péskire šeré i javéna te ravenpe dro práho. Jone občhinena péskire balá sarésa pal túte, ur'jena pe péste balytka goné praskasa, i zarovena pal túte iléskire dukhatyr baré roibnasa. Dre péskiro tugipen (žalost') jone zabagana roibnytko gilý pal túte, adiáke jone javéna te obrovenpe pal túte: ‘Savó sys fóro, syr Tíro, so sys rosphagirdo maškír mórjo (derjáv)!’ Kiéli javélas morjostyr (derjavestyr) dová, so tu biknesas, to tu čaliakiresas buté manušén tyré barvalypnaskire butypnasa, tyré biknybnasa tu barvaliakiresas phuv'jengire kral'jén. A kiéli tut rozmardiá baró paní pe sámo xoripén, to saré tovary, so tu biknesas, saró; so pherdés sys dre túte, pyjá dro sámo xoripén. Saré manušá, savé dživénas pe ostrovy, divindlépe trašasa tútyr, léngire králja zaizdrandyne, parudiape léngiro muj pharipnastyr. Timisiarja (torgovcy) javire narodendyr, dyné šolia (svistindle) pal túte, tu kerdianpe syr traš, i tu na javésa te dživés butedýr.” I sys ke me Ráskire-Devléskiro lav dasavo: “Manušéskiro čhava! Phen thagariske pe Tíro: adiáke rakiréla Raj Devél, Devél: pal-dová, so drieván phut'kirdo jaciá tyró iló, i tu rakirésa: “Me som Devél, bešav pe devlýtko štéto dro morjoskiro (derjavéskiro) maškiralypen”, pal-dová so tu san manúš, a na Devél, ne tu duminesa, so tu san dasavo godiaver, syr Devél: ake, tu san god'varedyr Danijeljostyr, nane čorahanyben, so tu na džinesas. Tyré šerésa, tyré godiása tu zauhtyldian dasavo barvalypén, i skedyjan péske rup i suvnakái. Tyré godiása, tyré biknybnastyr, tu kerdián, sob (kaj) te javél Tyró barvalypén iščo (inké) butedýr, i tyrí godý jaciá te phutjol tyré barvalypnasa. Paldavá adiáke rakiréla Raj Devél, Devél: “Kóli tu duminesa dro péskiro iló, so tu san dasavo godiaver, syr Devél, to, ake, Me janáva pe túte manušén javire phuv'jendyr, savé isyn drieván zahale; jone vydžána péskire kurtalenca pe tyré – godiákiro šukariben, jone magirena tut, sob (kaj) tu na javes butedýr dasavo šukár rajkanytkes, syr sánas. Jone zalydžana tut dre maĥila i tu merésa dro morjoskiro (derjavéskiro) iló, syr meréna muliakirdé manušá. Phenesa ci tu tedy tyré muliakiribnaskireske: ‘Me som devel’, – kóli dre léskiro vast, kon muliakiréla, tut tu javésa syr manúš, a na syr devel? Tu merésa naobčhindle-manušéngire vastéstyr, tu merésa syr meréna manušá, pal-dová so Me phendjom davá”, – rakiréla Raj Devél, Devél.” I sys ke me Ráskire-Devléskiro lav dasavo: “Manušéskiro čhava! Rov pal Tiroskire kralíste, phen léske: ‘Adiáke rakiréla Raj Devél, Devél: Nane god'varedyr tútyr, nane gožedyr tútyr. Tu sánas ke Edómo, dre Devléskiri únta (sado), pe tyró uribén sys kuč bará: rubino, topazo i miriklo (almazo), xrizolito, onikso, jaspiso, sapfiro, karbunkulo i jakhori (izumrudo) suvnakása, saró davá, kuč kerdó, sys uridó pe túte; saró davá sys kerdó dro dyvés, kóli tu sánas sozdynó. Tu sánas pomakhno xieruvimo, sob (kaj) te rakhés, i Me čhudjom tut vaš davá. Tu sánas pe svénto Devléskiri bérga, psiresas maškír xačkirdé bará jagása. Tu sánas pherdés sozdynó: lačhó dre tyré dromá, dyveséstyr, kiéli tu sánas sozdynó, ne lathiape dre túte čoripén. Baré tyré biknybnastyr dre tyró andrypen zagijá načačipén, tu kerdián grého; Me čhurdyjom tut telé, syr magirdes Devléskire bergátyr, Me xasiakirdjom tut, rakhno xieruvimo, xačkirdé barendyr dre maškiralypen. Tyré gožypnastyr phutija tyró iló; Tyré phut'kiribnastyr pal tyrí šuk tu xasiakirdian Tyrí godý, paldavá Me čhurdava tut telé pe phuv, Me otdáva tut pe ladž angíl kral'jénde, sob (kaj) jone te dykhén palál. Tyré but-molytkone čoripnasa, Tyré xohané biknybnastyr Tu magirdian Tyré svénta štéty; Me doresava jag odothýr, kaj tu dživesa, jag, saví zhala tut; Me keráva tútyr práska (pieplo) pe phuv angíl sarengire jakhá, kon dykhéla tut. Saré, kon džinelas tut maškír manušénde, javéna te divinenpe trašasa pal túte, tútyr javéla dar, tu na javésa butedýr te dživés.’” I sys ke me Ráskire-Devléskiro lav dasavo: “Manušéskiro čhava! Risjov tyré mósa ke Sidono, rákir pe léste angilphenybén, Phen: ‘Ake, Me vydžava pe túte, Sidono, te proslavinavape maškír túte, i ĥaljona, so Me som Raj Devél, Devél, kiéli Me javáva te sendiakirav les, i kiéli Me sykaváva Pes pir léste, so Me som Svénto. Pal-dová so Me bičavava pe léste meribnytka fránsy (fuiá), rat javéla te čhuvelpe pe vulícy (gásy), gásy, peréna maškír léste domardé kurtalátyr, saví domarela les saré rigéndyr, i tén'či jone ĥaljona, so Me som Raj Devél, Devél.’ Na javéla jov butedýr vaš Izrailjoskiro kher syr phusadytko xrústo, syr žylto xrústo suv'jenca dykhady čar? Na javéla nijékh te ĥazdelpe pe Izrailjoskiro kher butedýr javire manušéndyr, savé dživéna pašýl Izrailjo, i tén'či jone ĥaljona, so Me som Raj Devél, Devél. Adiáke rakiréla Raj Devél, Devél: Kóli Me skedáva Izrailjoskiro kher narodendyr, maškír savé jone isyn rostradyne; to Me sykaváva pe lénde, so Me som Svénto, sob (kaj) te dykhél manušéngiro ródo; jone javéna te dživén pe péskiri phuv, saví Me dyjom Miré pisharíske, Jakovóske. Tén'ci jona javéna te dživén pe phuv, na javéna te darén nikonestyr, keréna kherá, javéna te barjakirén vinogradoskire unty (sady); na javéna te darén nikonestyr, pal-dová so Me javáva te sendiakirav saré léngire vergén, i ĥaljona, so Me som Raj Devél, engiro Devél.” Dro déšto berš, dro déšto čhon, pe dešudujengiro čhonytko dyvés sys ke Me Ráskire-Devléskiro lav dasavo: “Manušéskiro čhava! Risjov Tyré mósa ke Faraóno, Jegiptóskiro králi, phen pir lav angilphenybe pe léste i pe saró Jegípto. Rákir i phen: ‘Adiáke rakiréla Raj Devél, Devél: “Ake, Me vydžava pe túte faraóno, Jegiptóskiro králi, baró krokodilo, savó pasjola maškír réki (leniá) i rakiréla: “Mirí isyn daja reka (len'), Me kerdjom la vaš péske.” Ne Me čhurdava nanglo (kriuko) dro tyró kirlo, ke Tyrí cýpa prityrdava mačhen Tyré rekendyr (lenor'jendyr), vytyrdava tut Tyré rekendyr (lenor'jendyr) saré mačhenca, savé isyn prilipindle ke tyré luski (češuia). I čhurdava Me tut pe čhučí phuv, tut i saré mačhé tyré rekendyr (lenor'jendyr), tu peresa pe otkerdy félda, na zalena, na ĥazdéna, Me tut otdáva, sob (kaj) te xan phuvitka riskiribnáskiro murdalá (zvieri), bolybnýtka čirikliá. I ĥaljona saré, kon dživéla ke Jegípto, so Me som Raj Devél, Devél, pal-dová so jone sys vaš Izrailjoskiro kher, syr triščynytko (trostnikitko) destó te podrikirél. Kóli jone uhtyldepe pal túte vastésa, tu rospharadyjanpe, rospusadian saró péskiro psikó, kóli jone lyné te rikirenpe pal túte, tu phadijan, rozrandyjan saré léngire masá.” Paldavá adiáke rakirél Raj Devél, Devél: “Áke, Me janáva pe túte kurtála, xasiakiráva túte manušén i guruvén. I skerlape Jegiptóskiri phuv čhučé phuvjása i ĥaljona, so Me som Raj Devél, Devél. Paldová so jov rakiréla: ‘Mirí isyn reka (len'), Me sozdyjom la,’ Ake, Me poddžava pe tyré réki (leniá), Me keráva Jegiptóskire phuvjátyr čhučí phuv, so na javéla čhučedyr látyr; miéžy Migdolostyr ke /žýko, Sijena, ke Jefiopijakire miéžy. Na javéna te psirén odój manušá, na javéna te psirén odój kherítka murdalá (skoto); na javéna te dživén pe láte štardešá berš. I Me keráva Jegiptóskiri phuv čhučé phuvjása maškír občorde phuvjá, lákire fórja, maškír fórja, katýr giné manušá, javéna čhučé štardešá berš; Me rostradava Jegiptianen pir narody, rosphurdava len pir phuvjá.” Adiáke rakirél Raj Devél, Devél: “Kóli prodžána (nakhena) štardešá berš, Me skedáva Jegiptianen narodendyr, maškír savé jone javéna vytradyné. Me riskiráva Jegípto navoliatyr, Me janáva len pe phuv Parfos, pe phuv, kaj jone sys bijandle, odój javéna jone nazorale kralipnasa. Kralipén javéla bizorjákiro, na javéla dasavo, syr javír kralipená, na javéla butedýr te ĥazdelpe pe narody. Me teliakirava len, sob (kaj) te na priphenen jone narodenge, i na javéna butedýr podrikiribnasa Izrailjoskire kheréske, a savó ripirlas léngiro grého, i ĥaljona, so Me som Raj Devél, Devél.” Dre biš te eftáto berš, dro pérvo čhon, pe pérvo čhonytko dyvés, sys ke me lav Rástyr-Devléstyr dasavo: “Manušéskiro čhava! Navuhodonosóro, Vavilonóskiro králi, khiniakirdia péskire xaladén baré butiasa pašo Tíro; pe saré šeré vypyne balá, saré psiké isyn skhosne, a ni léske, ni léngire xaladenge nane lové Tirostyr pal butý, saví jov keréla. Paldavá adiáke rakiréla Raj Devél, Devél: “Áke, Me dáva Navuhodonosoroske, Vavilonóskire kralíske, Jegiptóskiri phuv, sob (kaj) jov te zalel lákiro barvalypén, te občorel la te čorel dová, so joj čordia, davá javéla nagrada (mazúri) léskire xaladenge. Syr mazúri pal butý, saví jov kerdiá, Me otdáva léske Jegiptóskiri phuv, paldavá so jone kerdé davá vaš Mánge”, – phendiá Raj Devél, Devél. “Dro dová dyvés Me keráva zoralesa Izrailjoskiro kher (riskiráva šyng/ rógo Izrailjoskire kheréske), i túke otkerava uštá maškír lénde, i ĥaljona so Me som Raj Devél, Devél.” I sys ke me Ráskire-Devléskiro lav dasavo: “Manušéskiro čhava! Phen pir lav angilphenybén i phen: adiáke rakirél Raj Devél, Devél: ‘Rovén! O! bibahtaló dyvés, aj! Poddžála dyvés, poddžála dyvés Ráskire-Devléskiro, kaló dyvés, javdiá narodonengiro časo (cýro). Kurtála javéla pe Jegípto, traš javéla dre Jefiopija, kóli javéna te perén dro Jegípto domardé manušá, kóli zalena léskiro barvalypén, rosphagirena léskire fundamienty tel vánty. Jefiopija i Livija, i Lidija, i saró skedynó khetané narodo, i Xubo (Kuvija), i čhavé zavietoskire phuvjátyr peréna khetané lénca kurtalátyr.’ Adiáke rakiréla Raj Devél, Devél: “Perla Jegiptóskiro podrikiribén, jov na javéla te phutjol péskire zorjása, perla Léskiro phut'kiribén. Migdolostyr ke/ žýko Sijena javéna te perén dre léste kurtalátyr”, – phendiá Raj Devél, Devél. “Javéla jov čhučó maškír čhučé phuvjá; léskire fórja javéna maškír čhučé fórja. I jone ĥaljona, so Me som Raj Devél, Devél, kóli bičhaváva Me jag pe Jegípto i perla saró léskiro podrikiribén. Dro kodová dyvés javéna Mándyr manušá, savé lydžána zvies' (nevipen), jone potradena pe pármy (korabli), sob (kaj) te strahakiren birakhibnaskire, Jefioplianen, javéla lénde traš, syr dre Jegiptóskiro dyvés, ake, jov džála.” Adiáke rakiréla Raj Devél, Devél: “Navuhodonosoroskire, Vavilonóskire kralískire vastésa, Me keráva, so na javéla dro Jegípto manušéngiro butypen. O Navuhodonosóro, i lésa léskiro narodo, zahalo narodo, javéna, sob (kaj) te xasiakirén daja phuv, vylena péskire kurtaly (miečy) pe Jegípto, pherdiakirena phuv domardé manušénca. I Me vyšut'kirava réki (leniá), i otdáva phuv dre zahale-manušéngire vastá, javire-phuv'jengire manušéngire vastésa Me keráva, sob (kaj) te javél kadaja phuv i saró, so isyn pe láte, čhučé (pusto). Me, Raj Devél, Devél, phendjom davá. Adiáke rakiréla Raj Devél, Devél: “Me zalava ídoly, Me xasiakiráva xohané devloré dro Miemfiso, na javéla butedýr thagaris Jegiptóskire phuvjátyr; Me janáva dar pe Jegiptóskire phuv. Me keráva adiáke, so Pafroso javéla čhučó, Me bičhaváva jag pe Coano, Me javáva te sendiakirav No. I vyčhuvava Me Mirí xolý pe Sióno, Jegiptóskiro zoralypén, i xasiakiráva dre léste manušéngiro butypen. I bičhaváva Me jag pe Jegípto: zaizdrala Sin, i No peréla, pe Miemfiso javéna vérgi (vrogi) dyvesé. Terné manušá Onostyr i Bubastyr peréna kurtalátyr, a javír džána dre navolia. Dro Tafniso javéla kaló dyvés, kóli Me rosphagirava odój Jegiptóskiro ĥámo, na javéla butedýr dre léste phut'kirdo zoralypén. Obloko zakerla les, léskire čhaja džána dre navolia. Adiáke javáva Me te sendiakirav Jegípto, i jone ĥaljona, so Me som Raj Devél, Devél.” Dro dešupervo berš, dro pérvo čhon, pe eftáto (bitrinéngiro déšto) čhonytko dyvés sys ke me Ráskire-Devléskiro lav dasavo; “Manušéskiro čhava! Me phagirdjom psikó faraonóske, Jegiptóskire kralíske. Ake, psikó na iščo (inké) isyn obphandlo, sob (kaj) léske te vysastjol, na iščo (inké) zaphandlo vaš sastiakiriben, savéstyr lelas by jov zor te rikirél kurtála (miečo). Paldavá adiáke rakiréla Raj Devél, Devél: “Ake, Me vydžava pe faraonoste, Jegiptóskire kralíste, Me phagirava léskire psiké, sastó i phagirdó, i vyperela kurtála léskire vastéstyr. I rostradava Me Jegiptianen pir narody, i rosphurdava len pir phuvjá. A Vavilonóskire-kralískire psiké keráva Me zoralé psikesa, Me dáva léske dre vast Mirí kurtála. Faraonóskire psiké rosphagirava, jov isyn nasvaló, jov javéla te rovel angíl Léste. Me keráva Vavilonóskire-kralískire psiké zoralé psikenca, a Faraonóskire vastá mekenape, i jone ĥaljona, so Me som Raj Devél, Devél, kóli Me dáva Mirí kurtála Vavilonóskire kralíske, i jov ĥazdéla la pe Jegiptóskiro phuv. I rostradava Me Jegiptianen pir narody, i rosphurdava len pir phuvjá, i jone ĥaljona, so Me som Raj Devél, Devél.” Dro dešupervo berš, dro tríto čhon, pe pérvo čhonytko dyvés sys ke me Ráskire-Devléskiro lav dasavo: “Manušéskiro čhava! Phen faraonóske, Jegiptóskire kralíske i léskire narodoske: ‘Konesa tu kerésa pes ravnonesa dro tyró baripén?’ Ake, Asuro sys kiedro pe Liváno, šukarone randienca (vietkenca), buté patrienca (listenca); sys vučó kašt; léskiro upralypén sys maškír baré vétki. Pani les barjakirelas, phuv les ĥazdelas, lákire réki (leniá) sys pašýl léste; joj bičhavelas péskiro paní ke saré feldýtka kaštá (drevy). Paldavá léskiro vučipén sys vučedýr saréndyr feldytkone kaštendyr; sys pe léste but senkicy; barjonas léskire randiá (vétki), senki léskire kerenaspe dlugonenca panieskiro butypnastyr, kóli rozbarjolas davá kašt. Pe léskire senkicy kerénas péske gniázdy (kúfy) rázna bolybnýtka čirikliá; telál léskire vétki barjakirenas tyknoren (čhavrinen) rázna feldýtka murdalá (zvieri); telo kadalé-kašteskiri zer (tien') dživénas rázna narody, konés sys but. Jov sykavelas péskiro gožypen péskiro vučipnástyr, péskire dluga vétki, pal-dová so léskiro kornjo (rukh) sys pašýl baró Jegiptóskire paní. Kiedry dre Devlýtko únta (sado) na zakerenas les pésa, kiparisy na sys ravna léskire senkicenge, ni jekh kašt (drévo) dre Devlýtko únta na sys dasavo šukár, syr jov. Me ukedyjom les buté léskire randienca, saré Edemoskire kaštá dre Devlýtko únta (sado) dykhenas pe léste. Paldavá adiáke phendiá Raj Devél, Devél: “Pal dová, so jov vybarija drieván vučó, i čhudiá tyró upralypén maškír baré senki, i léskiro iló phutija léskire slavatyr, paldavá Me otdyjom les dre narodonengire-kralískire vastá; jov kerdiá lésa, syr trej; pal léskiri zlydnima Me otgijom léstyr. I sčindle les javire-phuv'jengire manušá, dasavé zahale, so nane butedýr dasaven dre narody, i jone čurdyne les pe bérgi, pe saré féldy pyné léskire vétki, léskire, senki obphagirdepe pe saré lengi; giné krig zerjatyr (tienjostyr) saré phuvitka narody, i jačiade les. Pe léskire rophagiribena lyné te dživén rázna bolybnýtka čirikliá, dre léskire senki sys rázna feldýtka murdalá (zvieri). Vaš dová, sob (kaj) nisave kaštá pašýl paní te na phutjonas, so vybarine jone dasavé baré, na ĥazdenas péskiro upralypén baré senkicendyr, sob (kaj) na tyrdenaspe ke jone, pal-dová so jone isyn dasavé baré kaštá, savé p'jena paní; saré jone meréna, džána péske pe dová svéto khetané manušéskire čhavénca, savé myné.” Adiáke rakiréla Raj-Devél, Devél: “Dro dová dyvés, kóli jov myjá, Me kerdjom roibén pal léste, zakerdjom vaš léske phuv, na dyjom, sob (kaj) te thaden lákire réki (leniá), zakerdjom baró paní, i dyjá tangipén pal léste Liváno, i saré feldýtka kaštá tanginenas Les. Šumibnasa léskire peribnastyr Me dyjom dar narodenge, kóli otlydžijom les pe dová svéto, ke manušá, savé myné, i radynenaspe pe dová svéto saré Edemoskire kaštá, saré lačhé Livanoskire, saré, kon p'jela paní. I jone giné lésa pe dová svéto ke domardé kurtalása, i kodolé, savé sys lésa dro dorakiribén, savé dživénas tel léste, maškír narody. Adiáke, konesa Edemoskire kaštendyr tu ravninesa dre Tyrí sláva, dro Tyró baripén? Ne akaná khetané Edemoskire kaštenca tu džása pe dová svéto, tu javésa te pasjos maškír naobčhindlende, khetané domardé kurtalása. Kadavá isyn faraóno i léskire-narodoskiro butypen,” – rakiréla Raj Devél, Devél. Dro dešuiavir berš, dro dešuiavir čhon, pe pérvo čhonytko dyvés sys ke me Ráskire-Devléskiro lav dasavo: “Manušéskiro čhava! Rov pal faraonoste, Jegiptóskire kralíste, phen léske: ‘Tu san syr ternó ščer (liévo) maškír narody, syr darano murdál (zvierjo) dro mórjo (derjáv), tu čhurdesape dre tyré réki (leniá), ĥazdesa paní tyré ĥerénca.” Adiáke rakiréla Raj Devél, Devél: “Me začhurdava pe túte Mirí khudý (siet') dre buté-narodonengiro skedyibén, jone vytyrdena tut lása. I vyčhurdava Me tut pe phuv, čhurdava Me tut pe otkerdy félda, i javéna te bešén pe túte rázna bolybnýtka čirikliá, javéna te xan tut riskirbnaskire murdalá (zvieri) saré phuvjátyr. I rosčhurdava Me tyró mas pir bérgi, i doly, i pherdiakirava Me tyré doly trupenca. Phuvjake, kaj tu plavinesas (desas plima), Me dáva, sob (kaj) te p'jel Tyró rat ke /žýko lákire bérgi, saré rovy odój javéna pherdé túsa. Kóli tu murdjosa, Me zakerava bolybén, Me murdiakirava léngire čergeniá, Me zakerava kham oblokosa, čhon na javéla te xačol. Saré duda (svietily), so xačona pe bolybén, Me murdiakirava, Me janáva rat pe tyrí phuv,’ – rakiréla Raj Devél, Devél Začilavava Me iló buté-narodonengiro, kóli rosphenava pal tyró periben maškír narody, pir phuvjá, savé tu na džinesas. I piritrašavava Me túsa but narody; léngire králja izdrana dre dar pal túte, kóli ĥazdáva Me Mirí kurtála angíl léngiro muj, javéla te izdral kažno léndyr kažno menta (minuta) pal péskiro di dre tyré-peribnaskiro dyvés. Adiáke rakiréla Raj Devél, Devél: “Vavilonóskire-kralískiri kurtála javéla pe túte. Zoralé manušéngire kurtalátyr peréla Tyró narodo, saré jone isyn drieván zahale; jone xasiakirena Jegiptóskiro phut'kiribén; i xasjola saró léskiro butypen. I Me xasiakiráva saré Léskire kheritkoné murdalén (skoto), pašýl baró paní; na ĥazdéla bláta butedýr dro paní manušeskiri ĥerój, na ĥazdéla bláta dro paní guruvengiro kopyto (naj/khurval). Tén'ci davá Me štylypen léngire panieske, keráva adiáke, so pothadena léngire réki (leniá), syr ksil, – rakiréla Raj Devél, Devél. Kiéli Me keráva Jegiptóskiri phuv čhučé phuvjása, kóli našavela phuv saró, so pherdiakirela la, kiéli xasiakiráva sarén, kon dživéla pe phuv, tén'či jone ĥaljona, so Me som Raj Devél.’ Ake, isyn roibnytko gilý, saví javéna te bagán: narodonengire čhaja javéna te bagán la; pal Jegípto, pal saró Léskiro butypen zbagana la”, – rakiréla Raj Devél, Devél. Dro dešuiavir berš, dre dešupandžto čhonytko dyvés sys ke me Ráskire-Devléskiro lav dasavo: “Manušéskiro čhava! Zarov pal Jegiptóskiro narodo, čhurde les, les i slavutnone-narodengire čhajén dre xor štéty tel phuv/odová svéto khetané odolenca, kon skedyjape te merél, kon džála dre maĥila. Fedýr konéstyr tu san? Džá telé, pasjov khetané odolenca, savé isyn naobčhindle. Jone peréna maškír manušénde, savé isyn domardé kurtalása, i jov isyn otdynó kurtalake; terden les i péskiro butypen. Pe dová svéto javéna te rakirén pal léste i pal manušénde, savé sys lésa dro dorakiribén pérva muršarja-manušá; jone pyné, jone isyn pašté odój maškír odolénde, savé isyn naobčhindle, kurtála domardiá len. Odój isyn Asuro i saró léskire-xaladéngiro skedyibén paš léste, odój isyn léngire mulykane (groby), saré domardé, kon pyjá kurtalátyr. Léskire mulykane čhudé dre dolé-svetoskiro xoripén; léskire-xaladéngiro skedyibén isyn pašýl léskiri koplíca, saré domardé, kon pyjá kurtalátyr, saré odolé, savé janénas dar pe džidé-manušéngiri phuv. Jelamo saré péskire butypnasa isyn pašýl léskiri koplíca, saré jone isyn domardé, saré pyné kurtalátyr, saré na sys občhindlé i adiáke giné pe dová svéto; odolé sys manušá, savé janénas dar pe džidé-manušéngiri phuv i lydžána péskiri ladž khetané manušénca, savé myné. Maškir domardende dyné čhuibén léske Jelamoske i saré léskire butypnaske; pašýl léste isyn léngire mulykane, saré isyn naobčhindle, pyné kurtalytyr, pal-dová so jone janénas pésa dar pe džidé-manušéngiri phuv, jone lydžána pe péste ladž khetané odolenca, kon myjá; len čhudé maškír domardende. Odój isyn Miešefo i Fuvalo saré léngire butypnasa; pašýl léste isyn léngire mulykane (groby), saré isyn naobčhindle, domardé kurtalása, pal-dová, so jone janénas dar pe džidé-manušéngiri phuv. Ci na trej lénge te pasjon slavutnone muršar'jenca-manušénca, savé na sys občhindlé, savé péskire xaladytkone skedyibnasa giné pe dová svéto/liúno, čhudé péskire kurtaly péske telo šeró, i jaciápe léngiro čoripén pe léngire kokalý, pal-dová so jone, syr zoralé, sys darása pe džidé-manušéngiri phuv. I tu javésa domardo maškír naobčhindlende, tu javésa te pasjos odolenca, kon sys domardo kurtalása. Odój isyn Edómo, i léskire králja, i saré léskire thagárja, savé na darenas nikonestyr, ne čhudé len maškír odolénde, kon sys domardo kurtalása; jone pasjona khetané odolenca, kon sys nabčhindlo, kon myjá. Odój isyn odolé, kon sys thagárja pe paš-rat (sieviero), saré jone i saré Sidoniani, savé giné odorík khetané domardé manušénca. Jone lyné ladž péskire zoralypnastyr, savó strahakirelas saré manušén, i isyn pašté jone khetané, naobčhindle manušénca, savé pyné kurtalátyr, i lydžána péskiri ladž khetané odolenca, kon myjá. Dykhéla len faraóno, i na javéla te tanginél pal péskiro butypen, savó pyjá kurtalátyr, faraóno i saró léskire-xaladéngiro skedyibén, – rakirél Raj Devél, Devél. Me rozbuĥliakirava Mirí dar pe džidé-manušéngiri phuv, javéla čhudo faraóno i saré léskiro butypen maškír naobčindlende, khetané domardé kurtalása manušénca”, – rakiréla Raj Devél, Devél. I sys ke me Ráskire-Devléskiro lav dasavo: “Manušéskiro čhava! Phen lav ke čhavé Tyré narodóstyr, phen lénge: ‘Kóli Me janáva kurtála pe vari-saví phuv, i dolé-phuvjákiro narodo léla péstyr manušés, i čhuvéla les péste rakhibnarisa (stražosa). Jov dykhéla kurtála, saví džála pe phuv, zabašavela dro rógo (truba), phenéla pal davá narodoske. I kóli vari-kon javéla te šunél bašaibnytko zan, ne na zrakhéla pes, tén'či, kiéli kurtála javéla i zauhtylela les, léskiro rat javéla pe léskiro šeró. Bašaibnytko zan jov šunelas, ne na rakhelaspe, léskiro rat javéla pe léskiro šeró, a kon rakhelaspe, odová zrakhciaia péskiro džiibén. Kóli ž rakhibnaskiro dykhciá, so džála kurtála, ne na zabašadia, na phendiá pal davá narodoske, tén'či, kiéli javéla kurtála i zalela džiibén vari-konés léndyr, kadavá javéla uhtyldo pal péskiro grého, ne léskiro rat Me vyrodava rakhibnariskire vastéstyr. Tut, manušéskiro čhava, Me čhudjom rakhibnaskiresa Izrailjoskire kheréske, tu javésa te šunés lav Miré uštendyr, te javésa te sykliakires len Mándyr. Kóli Me phenáva zlydnitkone manušéske: ‘Zlydnia manúš! Merésa meribnasa’, – a tu na javésa te rakirés ničí, sob (kaj) te zrakhes zlydnitkone manušés léskire droméstyr, kodová manúš meréla pal péskiri zlydnima, ne léskiro rat Me vyrodava Tyré vastéstyr. Kóli ž tu zrakhesas zlydnitkone manušés léskire droméstyr, sob (kaj) jov te džal krig odothýr, ne jov na gijá péskire droméstyr, tén'či jov meréla pal péskiro grého, a tu zrakhcián Tyró di. Tu, manušéskiro čhava, adiáke phen Izrailjoskire čhavénge: “Tumé rakiréna adiáke: amaré nalačhé réndy, amaré gréhi isyn pe aménde, ame xasjovasa dre lénde, syr že aménge te dživás? Phen lénge: ‘Te dživáv Me’, – rakirél Raj Devél, Devél: – na kamám grehitkoné-manušéskire meribén, ne sob (kaj) te džal krig grehítko manúš péskire droméstyr i te javél džidó. Džán krig, džán tumaré nalačhé dromendyr, sóske trej te merén tuménge, Izrailjoskiro kher?’ Tu, manušéskiro čhava, phen čhavénge tyré narodóstyr: patiaibén devlytkoné-manušéskiro na zrakhéla les dro dyvés, kiéli jov keréla grého; grehítko manúš na xasjola pal peskro grého dro dyvés, kiéli gijá péskire grehostyr, a devlýtko manúš na jačélape džidó pal péskiro lačhó džiibén dro dyvés, kóli kerdiá grého. Kóli Me phenáva devlytkoné manušéske, so jov javéla džidó, a jov poduminela, so na jačkiréla les léskiro devlýtko džiibén i jov keréla xohaibén – to na priripirnape saré léskire devlýtka réndy, jov meréla péskire xohaibnastyr, savó kerdiá. A kóli Me phenáva grehitkoné manušéske: ‘Merésa meribnasa’, i jov jačkiréla péskire gréhi, i javéla te kerél séndo i čačipén. To kóli adavá grehítko manúš otdéla symadý (zalogo), i jov zapleskirela pal péskiro čoriben, i jov javéla te psirél pir džiibnáskire zakóny, i na javéla te kerél čoripén, – kadavá manúš javéla džidó, na meréla. Nijékh léskire grehéndyr, savé jov kerdiá, na priripirlape léske; jov jaciá te kerél séndo i čačipén, jov javéla džidó. A čhavé tyré narodóstyr rakiréna: ‘Nane čačunó Ráskire-Devléskiro drom’, kóli davá léngiro drom isyn xohanó. Kóli devlýtko manúš gijá péskire sventoné džiibnastyr, i lyjá te kerél čoripén – jov meréla pal dová. I kóli zlydnia manúš jačadia péskiri zlydnima, lyjá te kerél séndo i čačipén, to jov javéla džidó paló davá. A tumé rakiréna: ‘Nane čačunó Ráskire-Devléskiro drom!’ Me javáva te sendiakirav tumen, Izrailjoskiro kher, kažnones pir péskire dromá.” Dro dešuiavir berš, kóli amen piričhude te dživén ke Vavilóno, dro déšto čhon, pe pándžto čhonytko dyvés, javdiá ke me jekh manúš, savó zrakhciape Jerusalimóstyr i phendiá: “Fóro isyn rosphagirdo!” Ne jov iščo (inké) na javdiá ke me, a bel'velié sys pe mánde Ráskire-Devléskiro vast. Jov otkerdia mánge uštá angledýr, sósa odová manúš javdiá ke me zlokosa (rankosa). Otkerdepe Miré uštá, Me na sómas bičibakiro.” I sys ke Me Ráskire-Devléskiro lav dasavo: “Manušéskiro čhava! Odolé, kon dživéla pe štéty, savé jačné čhučé, pe Izrailjoskiri phuv, rakiréna: “Avraámo sys jekhdžinó i léske doresciape adáia phuv, amen isyn but; paldavá aménge sys dyný daja phuv” Paldavá phen lénge: Adiáke rakiréla Raj Devél, Devél: “Tumé xána ratésa, i gazdena tumaré jakhá ke tumaré ídoly, čhuvéna rat, i kaména, sob (kaj) adáia phuv te javél tumarí?” Tumé duminéna, so kurtála podrikiréla tumen, tumé keréna džungalé réndy, jekh tuméndyr magirela – javireskire romniá, i kaména, sob (kaj) phuv te javél tumarí? Ake, so phen lénge: Adiáke rakiréla Raj Devél, Devél: ‘Te dživáv Me!’ Odolé, kon isyn pe občorde štéty, peréna kurtalátyr, a odolés, kon isyn pe félda, Me otdáva, sob (kaj) te xan les riskibnaskire murdalá (zvieri), a odolé, savé isyn dre tvárdymi, dre ĥiebará (pieščery), jone meréna meribnytkone fujendyr. Me keráva daja phuv čhučedyr saréndyr čhučé phuv'jendyr, na javéla butydyr lákiro phut'kirdo zoralypén; bérgi Izrailjoskire jačéna čhučé, nikón na prodžála odój. I jone ĥaljona, so Me som Raj Devél, Devél, kóli piriskirava phuv čhučedyr saré čhučé phuv'jendyr, pal saré léngire džungalé réndy, savé jone kerénas. A pal túte, manušéskiro čhava, rakiréna čhavé Tyré narodóstyr pašýl vánta, dre kherítka vudará, rakiréna jekh jekhéske, pšal pšaléske: ‘Džán pašýl, pošunen, savó lav vygijá Rástyr-Devléstyr.’ Jone javéna ke tu syr pe manušéngiri skedyny (shodka): bešena angíl tyró muj, Miro narodo, šunéna Tyré davá, ne jone na dživéna pir lénde. Jone sýrby khelenape lénca dre péskire uštá; léngiro iló tyrdelpe pal barvalypén. Ake, tu san vaš lénge syr bagibnaskire kučoné zaniása, savó kuč bašavela: jone šunéna tyré lavá, ne na dživéna pir lénde. Ne kóli pherdiakirelape – ake, kakaná pherdiakirelpe, tén'či jone ĥaljona, so sys maškír lénde proróko.” I sys ke me Ráskire-Devléskiro lav dasavo: “Manušéskiro čhava! Phen pir lav angilphenybén pe Izrailjoskire čhupnar'jende (pastyriende), phen pir lav angilphenybén, phen len, čhupnar'jenge: Adiáke rakiréla Raj Devél, Devél: ‘Bida Izrailjoskire čhupnar'jenge, savé kokoré pes čaravenas! Ci na bakrén trej te čaraven čhupnar'jenge? Tumé xanas bakrengiro mas, ur'jenaspe dre výlna bakréndyr, čhinenas lačhé bakrén, a javirén bakrén na čaravenas. Nazoralen na podrikirenas, nasvalia bakriá na sastiakirenas, na piriphandenas bakriá, savjá dukhade, na riskirenas bakriá, savjá utradyne, na rodén bakriá, saví našadiape, a sys vaš zahale lénge i bikovlypnaskire xulanca. I rosprastyndynepe jone bi čhupnariskiro, a kóli rosprastyndynepe, to kerdépe kažnoné feldytkone murdaleske (zvierjoske) xabnasa. Psiréna Miré bakriá pir saré bérgi, pir kažno vučí bérgica, pir sarí phuv rosprastandynepe Miré bakriá, i nikón na rosphučelpe pal lénde, nikón na rodéla len. Paldavá, čhupnarjale, šunén Ráskire-Devléskiro lav! “Te dživáv Me!” – rakiréla Raj Devél, Devél; pal dová, so jačade Miré bakrén, sob (kaj) te čoren len, bi čhupnariskiro kerdépe Miré bakriá xabnasa vaš kažno feldytkone riskiribnáskire murdaleske (zvierjoske) i Miré čhupnárja na rodenas Miré bakrén, čaravenas čhupnárja kokoré pes, a Miré bakrén na čaravenas, – paldová, čhupnarjale, pošunen Ráskire-Devléskiro lav. Adiáke rakiréla Raj Devél, Devél: ‘Ake, Me vydžava syr vérgo pe čhupnar'jende, zalava Miré bakrén léngire vastéstyr, Me na davá, sob (kaj) te čaraven jone bakrén duredýr, na javéna butedýr čhupnárja te čaraven kokoré pes; Me zalava Miré bakrén léngire dandendyr, i na javéna jone léngire xabnasa.’ Adiáke rakiréla Raj Devél, Devél: ‘Ake, Me Kokoró lathava Miré bakrén i obdykhava len. Syr čhupnári propatiakirela péskire bakrén dro dová dyvés, kóli jone rosprastandynepe, adiáke Me piridykhava saré Miré bakrén, Me zrakháva len saré šteténdyr, karik jone sys rostradyne dro kaló dyvés oblokénca. I Me vylydžava len narodendyr, Me skedáva len rigéndyr, Me janáva len pe léngiri phuv, Me javáva te čaravav len pe Izrailjoskiri bérgi pašýl panieskiro potoko, pe saré adalakire-phuvjákiro štéty. Me javáva te čaravav len pe lačhé féldy, léngiri štála javéla pe vučé Izrailjoskire bérgi; odój jone javéna te otkhinjon dre lačhí štála, jone javéna te čaravenpe pe lačhí félda, pe bérga Izrailjoskiri. Me javáva te čaravav Miré bakrén, Me javáva te rakhav len,” – rakiréla Raj Devél, Devél. “Saví našadiape – odolia lathava, saví sys utradyny – odolia riskiráva, saví sys dukhady – odolia piriphandava, a odolia, saví jaciá drieván thuly i odolia, saví na kandéla – len xasiakiráva Me; Me javáva te čaravav len čačipnása. A tumen, Miré bakrén, – adiáke rakiréla Raj Devél, Devél, – ake, Me javáva te sendiakirav maškír jekhe bakriate i javire bakriate, maškír bakriate i buzneste (kozloste). Nauhtylla (nádosi), xaj, tuménge, so tumé čaravenpe pe lačhí félda? Ne tumé vymaren ĥerénca dová, so jaciápe pe tumarí félda; p'jen žužó paní, a dová, so jaciápe, tumé ĥazdéna tumaré ĥerénca dre bláta. A Miré bakrenge pridžalpe te xan dová, so vyštade (vytopčyndle) tumaré ĥerá; pridžalpe te xal dová, so tumaré ĥerá meliakirde.” Paldavá adiáke rakiréla Raj Devél, Devél: “Ake, Me Kokoró javáva te sendiakirav maškír thule bakriate i maškír šuké bakriate. Kóli tumé špulena (pihinena) ĥerénca i psikenca, i bodynena (marena) saré nazorale (bakrén) péskire šyngenca (rogénca), sob (kaj) te vytraden len javrí, to tén'či Me zrakháva Miré bakrén, na javéna butedýr te čoren len; Me keráva séndo maškír jekhe bakriate i javire bakriate. I Me čhuváva lénge jekhe čhupnaris, savó javéla te čaravel len, Miré pisharís Davidós, jov javéla te čaravel len, jov javéla léngiro čhupnári. I Me, Raj Devél, Devél, javáva léngiro Devél, i Miro pishári Davído javéla rása maškír lénde. Me, Raj Devél, phendjom davá. “I keráva Me lénca ramanjono (mírno) zavieto, i vytradava Me phuvjátyr zahale murdalén (zvierien), sob (kaj) jone te dživén bidarakires pe félda (mal), te soven dre vešá. Me bahtiakirava len i phuvjá, savé isyn pašýl Mirí bérgica; Me javáva te bičhavav bryšýnd, kóli trej, kadalé javéna bahtiakiribnaskire bryšynda. I feldytko drévo (kašt) janéla péskiro barjakirdó (plódo); phuv déla saró, so barjola pe láte; jone na javéna te darén pe péskiri phuv, i jone ĥaljona, so Me som Raj Devél, Devél, kiéli Me rosphandava len ĥamostyr, i Me zrakháva len odolengire vastéstyr, savé zalyne len dre navolia. Narody na javéna te uhtylén len butedýr, feldýtka riskiribnáskire murdalá (zvieri) na javéna len te xan; jone javéna te dživén bi darákiro, nikón na strahakirela len. I Me počhuvava dre phuv únta (sado) vaš lénge, na javéna jone te merén bokhátyr pe phuv; na javéla lénge ladžavo javire narodendyr. I ĥaljona, so Me, Raj Devél, som léngiro Raj Devél, Me som lénca, a jone, Izrailjoskiro kher isyn Miro narodo,” – rakiréla Raj Devél, Devél. “I so tumé san Miré bakré, bakré Miré skedyibnástyr, tumé san manušá, a Me som tumaró Devél”, – rakiréla Raj Devél, Devél. I sys ke me Ráskire-Devléskiro lav dasavo: “Manušéskiro čhava! Risjov Tyré mósa ke bérga Sieiro, phen pe láte angilphenybén. Phen láke: ‘Adiáke rakiréla Raj Devél, Devél: Ake, Me vydžava pe túte, bérga Sieiro, Me protyrdava pe túte Miro vast, Me keráva tut čhučé štetosa, kaj nikón na dživéla. Me rosphagirava Tyré fórja; tu kokori javésa čhučí i ĥaljosa, so Me som Raj Devél, Devél. Pal-dová, so tu na pirijačesa te xoliasos, tu otdesas Izrailjoskire čhavén dre vergéngire vastá, kóli javdiá pe lénde dasaví bibáht, kóli javdiá léngiro xasibén. Pal davá – ‘Te dživáv Me’, – rakiréla Raj Devél, Devél, Me keráva tut ratésa, rat javéla te tradelpe pal túte; tu naštý te dykhés, kóli čhuvelaspe rat, paldavá rat i tradelape pal túte. Me keráva bérga Sieiro čhučí, bimanušengiro maliasa (stiepjasa), xasiakiráva pe láte kažnones, kon te na prodžalas, kon te na risjolas. Pherdiakirava Me lákire vučé štéty domardé manušénca; pe tyré bérgicy, pe Tyré doly, pe saré Tyré xor štéty javéna te perén domardé kurtalása. Me keráva tútyr čhučí phuv, pe saré beršá, so na javéna te dživén dre Tyré fórja, i ĥaljona, so Me som Raj Devél, Devél. Pal-dová, so tu rakiresas: Kadalé duj narody, kadalé duj phuvjá javéna Miré, ame zalasa len, na podykhasa, so Raj Devél, Devél sys odój, – Pal dová – ‘Te dživáv Me’ – rakiréla Raj Devél, Devél, – Me keráva túsa pir tyrí xolý ke jone, pir tyró zevlynypén, savó tu sykavesas, pal-dová so xoliasosas pe lénde; Me sykaváva Pes lénge, kóli Me javáva pharés te sendiakirav tut. I ĥaljosa, so Me, Raj Devél, Devél, šundjom saré tyré nalačhé lavá, savé tu rakiresas pe bérgi Izrailjoskire, kóli phenesas: “Čhučé (pusta) kakaná! Otdyné, sob (kaj) ame te xas len!” Tumé šarenaspe angíl Mánde tumaré čibása (čibjasa), but rakirénas pe Mánde: Me šunavas davá. Adiáke rakiréla Raj Devél, Devél: “Kóli sarí phuv javéla te radynélpe, Me keráva tútyr čhučí phuv. Syr tu radynesaspe, so čhučí jaciá Izrailjoskire-kheréskiri phuv, adiáke i Me keráva túsa: tu javésa čhučí, bérga Sieiro, khetané saré Idumejasa, i saré ĥaljona, so Me som Raj Devél, Devél.’” “Tu, manušéskiro čhava, phen pir lav angilphenybén, pe Izrailjoskire bérgi, phen: ‘Bérgi Izrailjoskire! Šunén Ráskire-Devléskiro lav. Adiáke rakiréla Raj Devél, Devél: “Kóli vérgo rakiréla pal tuménde: A! a! aĥ garatune vučé štéty doresnepe aménge.” Phen pir lav angilphenybén, phen: “Adiáke rakiréla Raj Devél, Devél: “Pal dová, so jone čhučakirena tumen, xan saré rigéndyr, sob (kaj) te otdžan tumé ke javír narody, sob (kaj) košenas i sendiakirenas tumen manušá, – pal davá, Izrailjoskire bérgi, pošunen Ráskire-Devléskiro lav: Adiáke rakiréla Raj Devél, Devél pe bérgi i bérgicy, pe doly, pe rosphagirdé i čhučé kherá, pe jačade fórja, savé zalyne, i savéndyr sanpe naroy, so dživéna pašýl daja phuv. Paldavá adiáke rakiréla Raj Devél, Devél: “Dre Mirí zevlynypnaskiri jag Me phendjom lav pe javír narody, pe sarí Idumeja, pe narody, savé duminenas te zalen Mirí phuv péske; iléskire radymása i nalačhé dykhibnasa dro di kamenas te zalen la péske.” Pal davá phen pir lav angilphenybén pal Izrailjoskiri bérga, phen pe bérgi, bérgicy, féldy i doly: “Adiáke rakiréla Raj Devél, Devél: Áke, Me phendjom davá dro Miro zevlynypén, dre Mirí xolý, pal-dová, so sanpe tuméndyr narody.” Paldavá adiáke rakiréla Raj-Devél: “Me ĥazdyjom Miro vast, sovlahavas, so narody, savé isyn pašýl tuménde, kokoré lydžána péskiri ladž. A tumé, Izrailjoskiri bérga, rozmeken tumaré vétki, i tumé javéna te janén tumaré barjakirdé (plódy) vaš Miro narodo, Izrailjo, jone sýges javéna. Ake, Me risjováva ke tumé; pe tuménde javéna te barjakirén, pe tuménde javéna te sieinen. I Me bičhaváva, sob (kaj) te dživél tuménde but manušá, saró Izrailjoskiro kher, saró, i javéna te dživén dre fórja, i gazdena rosphagirdé kherá. I Me keráva adiáke, so javéna but manušá, i murdalá ke tumé; lénde javéla but tyknore; Me bičhaváva tumen odorík, syr sys davá dro tumaró ĥaratuno časo: Me javáva te keráv tuménge lačhipén butýr, syr dro tumaró ĥaratuné dyvesá, i tumé ĥaljona, so Me som Raj Devél, Devél. Me janáva pe tuménde manušén, Miro narodo, Izrailjo, jone zalena tut, phuv tu jačesa léngiro meknó mištypén, tu butedýr na javésa te kerés léndyr bičhavorengire manušén.” Adiáke rakiréla Raj Devél, Devél: “Pal-dová, so rakiréna pal tuménde: ‘Tu san phuv, saví xála manušén, saví na déla čhavorén péskire narodoske?’” Pal dová, tu na javésa te xas manušén, tu na javésa te kerés, sob (kaj) te javél Tyró narodo bičhavorengiro: i tu na javésa te šunés butedýr, syr sanpe tútyr narody; košybén manušéngire rodóstyr Tu na vyrikiresa; tu na javésa te kerés butedýr, sob (kaj) te javél tyró narodo bičhavorengiro”, – rakiréla Raj Devél, Devél. I sys ke me Ráskire-Devléskiro lav dasavo: “Manušéskiro čhava! Kóli Izrailjoskiro kher dživelas pe péskiri phuv, jov magirelas la péskire džiibnasa, péskire rendonenca; léngiro drom angíl Miro muj sys sýrby by džuvliákiro nažužypen, dro časo, kóli joj žužakirelpe. Me vyčhudjom Mirí xolý pe lénde paló rat, savó čhuvelaspe lénca pe kadaja phuv, pal dová, so jone magirenas phuv péskire idolenca. Me rostradyjom len pir narody, jone isyn rosphurdyne pir phuvjá; Me sendiakiravas len pir léngire dromá i léngire réndy (diély). I javné jone ke narody, giné ke Najudýtka nácyi (narody) i zalyne sláva Miré sventoné lavéstyr, pal dová, so pal lénde rakiréna: ‘Jone isyn Ráskire-Devléskiro narodo, jone vyginé Léskire phuvjátyr.’ I potangindjom (požalindjom) Me Miro svénto lav, savéstyr otlyja sláva Izrailjoskiro kher Najudytkoné nacyiéndyr (narodonendyr), karik jone javné. Paldavá phen Izrailjoskire kheréske: “Adiáke rakiréla Raj Devél, Devél: ‘Na vaš tuménge Me keráva davá, Izrailjoskiro kher, a vaš Miro svénto lav. Léstyr tumé otlyne sláva maškír narody, karik javné tumé. Me svenciakirava Miro baró Lav, savéste nane sláva maškír Najudénde. Maškir javír narody tumé otlyne sláva Léstyr i ĥaljona narody, so Me som Raj Devél, Devél, – rakiréla Raj Devél, Devél, kóli Me sykaváva, so Me som svénto, pe tuménde, angíl léngire jakhá. Me láva tumen Najudytkoné nacyiéndyr (narodendyr), kedava tumen saré rigéndyr, Me janáva tumen pe tumarí phuv. I Me bryzginava tumen žužé paniésa, tumé žužakirenape saré tumaré magiripnastyr, Me žužakirava tumen saré tumaré idolendyr. Me dáva tuménge nevó iló; nevó di Me dáva tuménge; Me láva tumaré ločatyr (plotiatyr) baruno iló, i Me dáva tuménge džidó iló. I Me čhuváva dro tuménde Miro dúho (fáno), Me kedava dová, so tumé javéna te psirén pir Miré priphenybená; tumé javéna te kerén pir Miré lavá. I javéna tumé te dživén pe phuv, saví Me dyjom tuménge, i tumé javéna Miro narodo, a Me javáva tumaró Devél. I vyrakhava Me tumen saré tumaré nalačhipnastyr, Me prikharava maró, i ubarjakirava maró, Me na davá, sob (kaj) tumé te merén bokhátyr. Me vybarjakirava barjakirdé (plódy) pe kaštá i barjakiriben pe féldy, sob (kaj) te na merén bokhátyr, sob (kaj) te na košen tumen narody. Tén'ci priripirena tumé pal zahale tumaré dromá, pal nalačhé tumaré réndy, i javéla džungaló (brytko) dro tumaró iló pal čoripén i biladžakuné réndy, savé tumé kerénas. ‘Na vaš tuménge Me keráva davá,’ – rakiréla Raj Devél, Devél. – “Mek te loljol tumaró muj, mek te ladžan tumé tumaré dromendyr, Izrailjoskiro kher.” Adiáke rakiréla Raj Devél, Devél: ‘Dro dová dyvés, kóli Me žužakirava tumen saré tumaré čoripnástyr, Me bičhaváva manušén dre fórja, sob (kaj) te dživén odój, kóli ĥazdéna rosphagirdé kherá. I javéna te barjakirén pe phuv, saví sys čhučí, i kažno, kon odój džálas, dykhélas, so joj sys čhučí. Tén'ci phenéna: “Kadaja čhučí phuv kerdiápe syr Edemoskiri únta (sado); so i dre kadalé rosphagirdé, čhučé, občorde fórja dživéna manušá?” I ĥaljona Najudýtka nácyi (narody), savé dživéna pašýl tuménde, so Me, Raj Devél, ĥazdáva rosphagirdo, Me barjakirava pe čhučó štéto, Me, Raj Devél, phendjom i kerdjom. Adiáke rakiréla Raj Devél: “Ake, iščo (inké) Me sykaváva Miro kamlypen ke Izrailjoskiro kher dre dová, so keráva adiáke, sob (kaj) te javél adiáke but manušén syr pe bakrengiri stada. Syr but isyn dyibnytka bakré dro Jerusalimo, pe svénki, adiáke javéla pherdó manušénca dre čhučé fórja, i jone ĥaljona, so Me som Raj Devél, Devél.” Sys pe mánde Ráskire-Devléskiro vast. O Raj Devél, Devél vylydžijá man duhósa i čhudiá man maškír félda, saví sys pherdý kokalenca. Oblydžija man pašýl lénde, ake, drieván but sys kokalý pe félda, ake, jone isyn drieván šuké. I phendiá mánge: “Manušéskiro čhava! Otžidjona li kadalé kokalý?” Me phendjom: “Rajo Dévla! Tu džinésa davá.” I phendiá mánge: “Phen pir lav angilphenybén pe kadalé kokalý, phen lénge: ‘Šuké kokalý! Šunén Ráskire-Devléskiro lav! Adiáke rakiréla Raj Devél, Devél pe kadalé kokalý: ‘Ake, Me čhuváva dúho (fáno) dre tuménde, tumé otdžidjona. I Me občhuvava tumen žylenca, vybarjakirava pe tuménde masá, učhakirava tumen cypasa, zalydžava dre tuménde dúho (fáno); i tumé otdžidjona, i ĥaljona, so Me som Raj Devél.’” Me phendjom angilphenybén, i syr sys mánge priphendlo, i kiéli Me angilphenavas, to ĥazdyjápe šumo, i ake, ĥazdynépe, jačné te poddžan jekh kokalo ke javír, kokalo ke kokalo. I Me dykhcjom! Ake, žyly sys pe lénde, vybarine masá, cýpa učhakirdiá len upralestyr, ne dúho (fáno) na sys dre lénde. Tén'ci Jov phendiá mánge: “Phen pir lav angilphenybén duhoske, manušéskiro čhava, phen duhoske: ‘Adiáke rakiréla Raj Devél, Devél: Jav, dúho (fáno), štaré balvaliendyr, phurde pe kadalé domardende, i jone otdžidjona.’” I me phendjom angilphenybén, syr Jov priphendiá mánge, i zagijá dre lénde dúho (fáno), i jone džidyne, uštyné pe péskire ĥerá, drieván baró, ke dar baró skedyibén. I phendiá Jov mánge: “Manušéskiro čhava! Kadalé kokalý isyn saró Izrailjoskiro kher. Ake, jone rakiréna: “Vyšutine amaré kokalý, xasijá amaró patiaibén (nadiéia), ame sam otriskirde kaštéstyr.” Paldavá phen pir lav angilphenybén, phen lénge: “Adiáke rakiréla Raj Devél, Devél: Ake, Me otkerava tumaré mulykane (ĥroby), vylydžava tumen, Miro narodo, tumaré mulykanendyr, zalydžava tumen dro Izrailjoskiri phuv. I tumé ĥaljona, so Me som Raj Devél, Devél, kóli Me otkerava tumaré mulykane, i vylydžava Me tumen, Miro narodo, tumaré mulykanendyr. Me čhuváva dre tuménde Miro dúho (fáno), i tumé otdžidjona, zalydžava tumen pe tumarí phuv, i galjona, so Me Raj Devél, Devél, phendjom davá i kerdjom,’” – rakiréla Raj Devél, Devél. I sys ke Ráskire-Devléskiro lav dasavo: “Tu, manušéskiro čhava, le péske jekh kralítko destó (žezlo), začhin pe léste: ‘Judáske i Izrailjoskire čhavénge, savé isyn khetané lésa.” Le iščo (inké) destó, začhin pe léste: “Jozáske, davá isyn Jefriemoskiro i saré Izrailjoskiro kheréskiro, savó isyn khetané Jefriemosa, kralítko destó.’ Čhuv len khetané jekh ke javír, dro jekh destó, sob (kaj) jone te javén jekh dro tyró vast. A kóli phučenape tútyr čhavé Tyré narodóstyr: “Ci na rosphenesa Tu aménge, so davá isyn túte?” Tén'ci phen lénge: ‘Adiáke, rakiréla Raj Devél, Devél: Ake, Me láva Jozaskiro i Izrailjoskire – kralítko destó, savó isyn dro Jefriemoskiro vast, Me čhuváva len ke Judáskiro destó, Me keráva léndyr jekh destó, i javéla jekh dro Miro vast. Kóli ž duj desté, pe savé tu začhinesa, javéna dro tyró vast angíl léngire jakhá, to phen lénge: ‘Adiáke rakiréla Raj Devél, Devél: Ake, Me láva Izrailjoskire čhavén narodendyr, maškír savé jone dživénas, Me kedava len khetané saré rigéndyr, Me janáva len pe léngiri phuv. Pe kadaja phuv, pe Izrailjoskire bérgi, Me keráva léndyr jekh narodo, jekh králi javéla králi vaš lénge sarénge; na javéna butedýr duj narody, na javéna te rozmarenpe pe duj kralipená. Na javéna te magirén pes idolenca i péskire džungalé rendénca i péskire čoripnasa, ne Me zrakháva len saré šteténdyr, kaj jone dživénas dre gréhi, žužakirava len, i jone javéna Miré manušá, a Me javáva léngiro Devél. A Miro pishári, Davído, javéla léngiro králi i Čhupnári (Pastúho), jone javéna te psirén dre Miré priphenybená, javéna te kerén pir Miré lavá. Tén'ci jone javéna te dživén pe phuv, saví Me dyjom Miré pisharíske Jakovóske, pe saví dživénas léngire dadá; odój jone javéna viéčnes te dživén jone, léngire čhavoré, léngire – čhavorengire čhavoré; i Miro pishári Davído javéla thagári pe lénde pe saré viéki. I butýr Me keráva lénca ramanjono (mírno) zavieto; viéčno zavieto javéla lénca. Me dáva lénge lačhó džiibén, adiáke, sob (kaj) but len te javél, Me čhuváva maškír lénde Miro svénto štéto pe saré beršá. Mirí šátra javéla lénde; i Me javáva léngiro Devél, a jone javéna Miro narodo. I ĥaljona narody, so Me som Raj Devél, Devél, Savó obsvencynela Izrailjo, kiéli Miro svénto štéto jačélape maškír lénde pe saré beršá.’” I sys ke me Ráskire-Devléskiro lav dasavo: “Manušéskiro čhava! Risjov Tyré mósa ke Goga, savó dživéla pe phuv Magog, Rošaskiro, Miešehoskiro i Fuvaloskiro thagári, phen pir lav pe léste angilphenybén. Phen: ‘Adiáke rakiréla Raj Devél, Devél: Ake, Me vygijom pe túte, Goga, Rošaskiro, Miešehoskiro i Fuvaloskiro thagári (kniazjo). Me riskiráva tut, urjavava savari pe túte, vylydžava tut, saró tyró xaladybén, xaladén pe grénde i manušén, savé tradéna uklisté, sarén, kon isyn dro xaladéngiro uribén sastruné ščytkenca i ščytenca sarén, kon rikirelas kurtaly. Piersen, Jefioplianen, Liviicen, savé isyn lénca, sarén dro ščýto i šliemo. Gomieros léskire saré léskire-xaladéngire skedyibnasa; Fogarmoskiro kher paš-ratitkoné rigátyr léskire-xaladéngire skedyibnasa, but narody javéna túsa. Uripe, skedénpe dro drom, tu, i saró tyró xaladéngiro skedyibén, savó javdiá ke tu, jav léngiro lydžaibnaskiro (voždjo). Kiéli prodžána (nakhena) but dyvesá, tut vykharena, tu javésa pe phuv, so isyn zrakhny kurtalátyr, skedyny buté narodendyr, pe Izrailjoskiri bérga, savé sys čhučé, ne akaná risjona manušá, savé dživéna pe kadaja phuv, javire narodendyr, saré jone javéna te dživén duredýr bi darákiro. Jone javéna te ĥazdénpe sýrby xoliami balvál, so poddžála, syr óbloko, sob (kaj) te učhakiren phuv, tu i saró tyré-xaladéngiro skedyibén, i but narody túsa.” Adiáke rakiréla Raj Devél, Devél: “Dre kodolé dyvesá javéla túke dro iló duma, tu zaduminesa bibahtaló réndo. Tu phenésa: ‘Džáva me pe phuv, saví na rakhelpe, me džáva pe manušénde, savé nisó na duminéna, lénde sarénde nane vánty, nane vudár, nane pórta štabasa. Me džáva, sob (kaj) te občorav len, sob (kaj) te zalav péske léngiro barvalypén, sob (kaj) te javén pale miré kherá, savé isyn ĥazdyné rosphagirdé kherendyr, narodo, savó isyn skedynó narodendyr, savó zalelape xulaibnasa i bikinybnasa, savó dživéla pe phuvjákiro maškiripen [vučipén-r.s.].’ Sava i Diedano, Farsisoskire kúpcy (tylgárja) saré léngire terné ščerorenca phenéna túke: “Tu javdián, sob (kaj) te čores? Tu skedyjan Tyré – xaladéngiro skedyibén, sob (kaj) te zales saró léngiro barvalypén, sob (kaj) te zales rup i suvnakái, sob (kaj) te otles kheritkoné murdalén (skoto) i majonko i mištypén, sob (kaj) saró davá te doreselpe túke?” Paldavá phen pir lav angilphenybén, manušéskiro čhava, phen pe Gogaste: ‘Adiáke rakiréla Raj Devél, Devél: Čačó, dro kodová dyvés, kóli miro narodo, Izrailjo, javéla te dživél bi darákiro, tu ĥaljosa davá. I tumé javéna péskire štetóstyr paš-ratitkoné (sieviernone) rigátyr, tu i but narody túsa, saré, kon bešéla pe grénde, baró skedyibén, i baró xaladybén. I tu ĥazdesape pe Miro narodo, pe Izrailjo, syr óbloko, sob (kaj) te učhakires phuv, davá javéla dre palatuné (posliednia) dyvesá, i Me janáva tut proti Mirí phuv, sob (kaj) te ĥaljon Man narody, kóli Me pe túte, Goge, sykaváva, so Me som Svénto angíl léngire jakhá. Adiáke rakiréla Raj Devél, Devél: “Ci san tu kodová, pal konéste Me rakiravas dre ĥaratuné dyvesá, kóli Miré pishárja, Izrailjoskire proróki angilphenenas, so Me janáva tut pe lénde?” Ake, javéla dro dová dyvés, kóli Goga javéla pe Izrailjo, ĥazdélape Mirí xolý. Dro Miro zevlynypén, dre Mirí xolý, Me phendjom: “Čačó, zoralés javéla te izdral Izrailjoskiri phuv. Zaizdrana Miré glosatyr baré panieskire mačhé, bolybnýtka čirikliá, feldýtka murdalá (zvieri) saré sapa, saré manušá, savé isyn pe phuv; i peréna bérgi, peréna bérgicy, saré vánty peréna pe phuv. Saré Miré bergendyr prikharava kurtála, sob (kaj) te vydžál pe léste; kažnoné-manušeskiri kurtála poddžála pe léskire pšaléste. I Me javáva Te sendiakirav pharés les; Me vykharava pe léste meribnytka fránsy i ratvalo domariben, i Me vyčhuvava pe léste, pe léskire xaladéngire polki, pe but narody, savé isyn lésa tasadypnaskiro bryšýnd, savó sarén xasiakiréla, baruno grado, jag i siéra (dzevélia). I Me sykaváva, so Me som Baró i Svénto, Me sykaváva Pes angíl buté-narodengire jakhá, i jone ĥaljona, so Me som Raj Devél, Devél.” “Paldavá tu, manušéskiro čhava, phen pir lav angilphenybén pe Gogaste, phen: ‘Adiáke rakiréla Raj Devél, Devél: Ake, Me som proti túte, Goge, Rošoskiro Miešehoskiro i Fuvaloskiro thagári! I Me riskiráva pale tut, i Me lydžáva tut, i lydžáva Me tut paš-ratitkoné (sieviernone) rigátyr, Me janáva tut pe Izrailjoskire bérgi. Me vymarava Tyró lúko tyré zervone (lievone) vastéstyr, Me vyčhurdava tyré maribnýtka bustiá (striély) tyré čačé (pravone) vastéstyr. Tu peresa pe Izrailjoskire bérgi, tu i saré tyré xaladéngire polki, saré narody, savé isyn túsa; Me otdáva, sob (kaj) te xan tut riskiribnáskire (xiščna) čirikliá i feldýtka riskiribnáskire murdalá. Peresa tu pe otkerdy félda pal dová, so Me phendjom davá, – rakiréla Raj Devél, Devél. Me bičhaváva jag pe phuv ‘Magog’, pe manušénde, savé dživéna pe ostrovy bi daripnaskiro, i nisó na duminen pal péste, i jone ĥaljona, so Me som Raj Devél, Devél. I sykaváva Me Miro svénto lav maškír Miro narodo, Izrailjo, Me na davá butedýr, sob (kaj) te magirén Miro svénto lav, i ĥaljona narody, so Me som Raj Devél, Devél, Svénto pe Izrailjo. Ake, davá javéla, pherdiakirelape, rakiréla Raj Devél, Devél: davá isyn kodová dyvés, pal savó Me phendjom. Tén'ci vydžána manušá, savé dživéna dre Izrailjoskire fórja, zahačkirna jag, javéna te xačkirén mardýtko (oružyjo), ščýty, ščytki sastruné, luki i maribnýtka bustiá, bulavy i čhurdybnytka bustiá (kop'i) i jone javéna te xačkirén kadalé eftá (bitrinéngiro deš) berš. Na javéna jone te janén kaštá feldatyr, na javéna te keden len dro veš, ne javéna te xačkirén jekh mardytka; jone občorena dolen, kon léndyr čorelas, zalena odoléndyr, kon léndyr zalelas”, – rakiréla Raj Devél, Devél. “Javéla dro dová dyvés: Me dáva Gogaske štéto vaš meribén dro Izrailjo: dólo, kaj prodžána manušá, pe vastóko morjostyr (derjavestyr); davá štéto javéla te zarikirel kažnones, kon te na džálas pašýl odój; garavena odój Gogas i saró léskiro-xaladybén; javéna te kharén davá štéto, Gogaskire xaladéngiro taboroskiro dólo. Eftá čhoná javéla te garavel len Izrailjoskiro kher, sob (kaj) te žužakirel phuv. Narodo saré phuvjátyr javéla te garavel len; baró javéla dová dyvés, kóli Me sykaváva Péskiri sláva, – rakiréla Raj Devél, Devél. I vykedena manušén, savé javéna te obdžan phuv bi terdypnaskiro, i savé javéna te garaven kodolén, savé jačnépe pe phuv khetané manušénca, savé javéna te prodžan odój, sob (kaj) phuv te žužakirelpe; jone léna te rodén davá, kóli prodžála eftá čhoná. A kóli vari-kon odoléndyr, savé javéna te obdžan phuv, dykhéla manušéskiro kokalo, tén'či čhuvéla pašýl léste špéra (znako), sob (kaj) odolé, savé garavena, te garaven les dro dólo, kaj sys Gogaskiro baró ke dar xaladybén. Foróskiro lav javéla: Ĥamona. Adiáke žužakirena (vyčystinena) jone phuv.” “A tu, manušéskiro čhava, adiáke rakiréla Raj Devél, Devél: Phen saré čiriklenge i sarénge feldytkone murdalénge: ‘Skedénpe, džán, skedénpe saré rigéndyr ke Miro vysvencindlo xabén, savó Me keráva vaš tuménge; ke baró sventytko xabén pe Izrailjoskire bérgi; tumé javéna te xan mas, javéna te p'jen rat. Zoralé-muršengiro mas javéna te xan; javéna te p'jen rat thagar'jengiro (kniaziengiro) pe phuv, bakrengiro, bakrorengiro, buznengiro (kozlengiro) guruvengiro, sarengiro, konés čaravenas pe Vasáno. Tumé javéna te xan i javéna čale; tumé javéna te p'jen rat i javéna mate Miré vysvencyndle xabnastyr, savó Me začhinava vaš tuménge. I javéna tumé čale paló Miro skamínd grenca, manušénca, savé tradéna uklisté, zoralé muršenca maribnaskire, i javire xaladytkone manušénca” –, rakiréla Raj Devél, Devél. “I sykaváva Me Mirí sláva maškír Najudýtka nácyi (narody); saré narody dykhéna Miro séndo, savó Me keráva; dykhéna Miro vast, savó Me čhuváva pe lénde. Paldavá javéla te džinél Izrailjoskiro kher, so Me som léngiro Raj Devél, Devél, léngiro Devél dalé dyveséstyr i duredýr. I ĥaljona Najudýtka nácyi, so kher Izrailjoskiro sys vytradyno péskire phuvjátyr pal léngiro xohaibén, pal-dová, so jone xohavenas Man, Me zakerdjom léndyr Miro muj, otdyjom len dre léngire-vergéngire vastá, saré jone myné kurtalátyr. Pal léngiro nažužypen, pal léngiro čoripén Me kerdjom dalenca davá, i zakerdjom léndyr Miro muj. Paldavá adiáke rakiréla Raj-Devél, Devél: ‘Akaná riskiráva Me Jakovós plienóstyr, i potanginava (požalinava) saró Izrailjoskiro kher, Me javáva te zevlynav pir Miro svénto lav. I ĥaljona jone péskiro biladžakiriben, i saré péskire napatiaiben, savó kerénas angíl Mánde, kóli javéna te dživén pe peskri phuv bi darákiro, nikón na javéla te strahakirel len. Kóli Me riskiráva len narodonendyr, skedáva len léngire vergéngire phuv'jendyr, i Me sykaváva Pes dre lénde, so Me som Svénto angíl but narodonengire jakhá. I ĥaljona, so Me som léngiro Raj Devél, Devél, kóli rostradava len maškír narody, a tén'či skedáva len pe léngiri phuv, i Me na jačavava (jačkirava) odój nikonés léndyr. Me na javáva te zakerav léndyr Miro muj, pal-dová, so Me čhuváva Miro di pe Izrailjoskiro kher”, – rakiréla Raj Devél, Devél. Dro biš te pándžto berš, kóli ame vytradyjam, kóli lyjape berš, pe déšto čhonytko dyvés, dro dešuštarto berš, kóli sys rosphagirdo fóro, dro dová-pac' dyvés sys pe mánde Ráskire-Devléskiro vast, i Jov lydžijá man odorík. Dro dykhibén Devléstyr Jov lydžijá man pe Izrailjoskiro phuv, čhudiá man pe drieván vučí bérga, i pe láte kažnoné rigátyr sys sýrby patrín (risunko) pe foritka kherá. I lydžijá man odorík. Ake, sys manúš, savó vydykhelas sýrby xarkóma (mied'), kóli joj xačola, dro léskiro vast sys šelo ljonostyr (ĥandladestyr) i destó, savésa ginéna; jov sys terdó pašýl pórta. I phendiá mánge adavá manúš: “‘Čhavó manušéskiro! Dykh péskre jakhénca i šun péskre kanenca, i prilé ilésa saró, so Me javáva te sykavav túke, pal-dová so tut jandlé vaš odová, sob (kaj) me te sykavav túke davá saró, so tu dykhésa, phen zoralés Izrailjoskire kheréske.” Ake, paló khangirí sys vánta saré léskire rigéndyr, a dro kodolé – muršeskiro vast sys destó vaš ginybén, dre šov kuniá; kažno kun' ginelaspe baripnasa syr burnyk (ladoška): jov vygindiá dro kadavá Kher jekh destó buĥlypén, jekh destó vučipén. Tén'ci gijá jov ke pórta, saví sys riskirdy ke vastóko; zagijá dre láte, vygindiá dre jekh portakiro progo sys jekh destó buĥlypén, i dro javír progo sys jekh destó buĥlypén. Dre každo štúba pe rigá vaš rakhibnar'jenge sys jekh destó dlugipén, jekh destó buĥlypén, maškír štúby sys pandž kuniá, i dro portakiro progo, pašýl portakiro trémo (koridoro) sys jekh destó! I vygindiá jov andrál dre portakire tremy jekh destó. A pašýl pórta, dre tremy, vygindiá ohtó (bidujéngiro deš) kuniá (lokci) i duj kuniá dre stýlby. Kadavá trémo sys pašýl pórta, saví sys khangirjákire rigátyr. Štubicy vaš rakhibnar'jenge pašýl vastočno pórta sys: trin jekhe rigátyr i trin javire rigátyr; jekh miéra (vyginyben) dre saré trin štubicy, jekh vyginyben pir stýlby jekhe i javire rigátyr. Portakiro buĥlypén jov vygindiá deš kuniá, a portakiro dlugipén sys dešutrin kuniá. A angíl štúby sys vystupo dre jekh kun', i vánta dre jekh kun' javire rigátyr; dre dalé štúby sys šov kuniá jekhe rigátyr i šov kuniá javire rigátyr. Tén'ci vygindiá jov dre pórta jekhe štubakire upralypnastyr ke javír štubakiro upralypén biš te pandž kuniá buĥlypén; vudár sys terdó angíl javír vudár. A pir stýlby vygindiá jov šovdešá kuniá, dre kažno stýlbo pašýl gréda i pašýl pórta. I anglatuné rigátyr dro zagiibén rigátyr ke anglatuny portakiri rig sys pandždešá kuniá. Fenštry riešotkenca sys dre štúby vaš rakhibnar'jenge, pe léngire stýlby andrál pórty jone sys terdé; dre trémo sys fenštry, jone lydžánas pe andralatuny rig, a pe stýlby sys pal'my. Jov jandiá man dre gréda, so sys javrí, ake, odój sys štúby trusciál, gréda sys kerdy geristosa (dromoresa); trijánda štúby sys dro dová kher, so vydžánas pe baruno ĥeristo. Davá ĥeristo (dromoro) sys pašýl pórta pir portakiro dlugipén, kodová ĥeristo sys telydyr. I vygindiá jov dlugipén telatuné portatyr ke andralatuny portakiri rig, saví sys javrí, šel kuniá ke vastóko i paš-ratítko (sievierno) rig. Jov vygindiá dlugipén i buĥlypén portakiro, saví sys dre gréda, so javrí, saví sys riskirdy ke paš-ratítko rig. I sys štúby pir rigá (boki), savé sys pašýl láte; trin štúby jekhe rigátyr, trin štúby javire rigátyr, léngire stýlby, léngiro trémo sys dasavé-pac', syr pórta, saví sys angledýr; léngiro dlugipén sys pandždešá kuniá, a buĥlypén – biš te pandž kuniá. Léngire fenštry (dudalia), i léngiro svody syr vystupy, léngire pal'my sys dasavé-pac' baripnasa (mierasa), syr sys pórta, saví vydžálas pe vastóko, dre lénde zadžanas pir eftá ĥerunia (stupieni) i angíl lénde sys trémo. Pórta vydžála ke andralatuny gréda angíl paš-ratítko (sievierno) vastočno pórta; jov vygindiá (vymierindia) portatyr ke pórta šel kuniá (lokci). I jandiá jov man pe paš-dyvesýtko (južno) rig, ake, odój sys paš-dyvesýtko pórta; jov vygindiá pir stýlby i ĥerunia (stupien'ki) adákicy, syr sys angledýr. Dre lénde angíl léngire vudará sys fenštry dasavé, syr sys kodolé fenštry: dlugipnasa sys jone pandždešá kuniá, a buĥlypnasa – biš te pandž kuniá. Sob (kaj) te ĥazdespe ke jone, treindiá te prodžas eftá ĥerunia, angíl lénde sys vudará, ukedyiben pal'mendyr – jekh dolé rigátyr, jekh javire rigátyr pe léngire stýlby. Sys paš-ratítko pórta dre andratuný gréda, jov vygindiá jekhe portatyr ke javír pórta šel kuniá. Jov lydžijá man ke paš-dyvesýtko (južno) pórta, a odothýr – pe anglatuny gréda; vygindiá jov dre paš-dyvesýtko (južno) pórta adákicy, syr sys angledýr. Léngire štúby pir rigá, savé sys pašedyr ke jagóro, léngire stýlby i tremy (vystupy) – sys dro dasaví-pac' miéra; i fenštry sys dre lénde, i dre léngire tremy trusciál (krugom); saró sys dlugipnasa pandždešá kuniá, buĥlypnasa biš te pandž kuniá. Tremy sys trusciál; léngiro dlugipén sys biš te pandž kuniá, a buĥlypén sys pandž kuniá. Sys lénde tremy, savé vydžánas pe andratuný gréda; pal'my sys pe léngire stýlby; sob (kaj) te ĥazdénpe ke jone, treindiá te prodžan ohtó ĥerunia (stupieni). I jandiá jov man ke vastočno pórta, a odothýr – dre andratuný gréda (dvóro); vygindiá jov dre daja pórta dasaví-pac' miéra. Léngire štúby pir rigá, savé sys pašedyr ke jagóro (krajo) léngire stýlby, léngire tremy sys dro dasaví-pac' miéra; i fenštry dre lénde, i dre léngire tremy sys trusciál; dlugipén sys pandždešá kuniá, a buĥlypén – biš te pandž kuniá. Léngire tremy vydžánas pe gréda (dvóro), so sys javrí, pe léngire stýlby sys pal'my jekhe i javire rigátyr; sob (kaj) te ĥazdénpe ke jone, treindiá te prodžan ohtó ‘gerunia (stupieni). Tén'ci o manúš lydžijá man ke paš-ratítko (južno) pórta; vygindiá odój saví-pac' miéra. Štúby pir rigá (boki), savé sys pašýl lénde; léngire stýlby i léngire tremy; i fenštry dre lénde sys trusciál; sarengiro dlugipén sys pandždešá kuniá, a buĥlypén biš te pandž kuniá. Léngire tremy vydžánas pe gréda (dvóro), so sys javrí; pal'my sys pe léngire stýlby jekhe i javire rigátyr, sob (kaj) te ĥazdénpe ke jone, treindiá te prodžan ohtó ‘gerunia. Sys adiáke-pac' štúba zagiibnasa pašýl portakire stýlby: odój vymorena shačkiribnytka svénta dyibená (žertvy). A dro trémo, savó sys pašýl pórta, sys duj skaminda: jekhe rigátyr i duj skaminda javire rigátyr, sob (kaj) te začhines pe lénde shačkiribnytka svénta dyibená, svénto dyibén paló grého, svénto dyibén paló čoripén. I pašýl odoia rig, saví vydžálas javrí, pašo zagiibén pir paš-ratítko pórta sys duj skaminda; i pašýl javír rig, pašýl portakiro trémo sys duj skaminda. Štar skaminda sys jekhe rigátyr, štar skaminda-javire rigátyr, – pašýl pórta; khetané-ohtó skaminda, pe savé začhinenas svénta dyibená. Sys štar skaminda vyčingirde barendyr vaš dová, sob (kaj) te xačkires svénta dyibená; léngiro dlugipén sys jekh te paš kuniá, buĥlypén sys jekh te paš kuniá, a vučipén jekh kun'; pe lénde čhuvénas dolé strumiénty, sósa začhinenas svénta dyibená te xačkirén i vaš javír dyibená. Sastruné nangle dre jekh burnyk (ladoška) buĥlypnasa sys primarde ke kherítka vánty trusciál, a pe skaminda čhuvénas dyibnytko mas. Paló andratuný pórta sys štúby vaš bagibnaskirenge; pe andratuný gréda, pašýl paš-ratítko pórta, jekh vydžálas pe paš-dyvesýtko rig, a javír, pašýl paš-dyvesýtko (južno) pórta, vydžálas pe paš-ratítko (sievierno) rig. Jov phendiá mánge: “Kadaja štúba (komora), saví vydžála pe paš-dyvesýtko rig, isyn vaš rašange, savé rakhenas Khangirí. A štúba, saví vydžála pe paš-ratítko rig, isyn vaš rašange, savé rakhenas altárjo: kadalé isyn Sadokoskire čhavé, jekhdžine manušá Lievijoskire čhavéndyr, savé javénas pašyledýr ke Raj Devél, Devél, sob (kaj) te kerén butý vaš Léske. I vygindiá jov dre gréda (dvóro) šel kuniá dro dlugipén i šel kuniá dro buĥlypén, joj (gréda) sys štaré-venglytko (láte sys štar véngly), a angíl Khangirí sys terdó altárjo. Jov jandiá man ke Khangirjákiro trémo; vygindiá pir tremitka stýlby pandž kuniá jekhe rigátyr i pandž kuniá javire rigátyr, a dre pórta sys trin kuniá buĥlypén jekhe rigátyr i trin kuniá javire rigátyr. Tremitko buĥlypén – biš kuniá, a dlugipén – dešujekh kuniá, sob (kaj) te ĥazdénpe ke jov, treindiá te prodžan deš ĥerunia (stupieni); stýlby rikirnas trémo jekhe i javire rigátyr. Tén'ci lydžijá jov man dre Khangirí i vygindiá pir stýlby šov kuniá buĥlypén jekhe rigátyr i šov kuniá buĥlypén javire rigátyr – davá sys skinijakiro (šatrakiro) buĥlypén. Dre vudará sys deš kuniá buĥlypén, pir vudaritka rigá sys pandž kuniá jekhe rigátyr i pandž kuniá javire rigátyr; vygindiá dlugipén dre Khangirí – štardešá kuniá, a buĥlypén biš kuniá. Zagijá jov andré, vygindiá pir stýlby pašýl vudár duj kuniá, i dro vudár šov kuniá, a vudaritko buĥlypén – sys eftá kuniá. Vygindiá dre léste biš kuniá dro dlugipén i biš kuniá dro sventoné-štetoskiro buĥlypén, i phendiá mánge: “Davá isyn Svénto-sventonestyr štéto” Vygindiá jov dre Khangirjákiri vánta šov kuniá, a buĥlypén dre štúby, savé sys pašyledýr, trusciál Khangirí, pir štar kuniá. Sys trijánda te trin štúby (komory) pe rigá, štúba pašýl štúba; jone zadžána dre vánta, saví sys pašýl Khangirí vaš štúby, trusciál adiáke, so jone sys khetané kadalé vantasa, ne dre khangirjákiri vánta jone na zadžanas. Ne Khangirí butýr i butýr buĥljolas trusciál i uprál štubenca, savé sys pir rigá, dre Khangirí krenglypen buĥljolas upré, telatuné etažostyr štúby ĥazdenaspe dro upralatuno pir maškiratuno etažo. I me dykhcjom Khangirjákire upralypén pir saró krenglypen (okružnost'), štúby, savé sys pir rigá pe phuv, sys pherdó destó, šov pherdé kuniá. Vantytko buĥlypén dre štúby, savé sys pir rigá i vydžánas javrí, sys pandž kuniá sys otkerdo štéto, pašýl štúby pir rigá dre Khangirí. Duripen maškír štúby sys biš kuniá, trusciál sarí Khangirí. Vudará dre štúby, savé sys pir rigá, vydžánas pe otkerdo štéto: jekh vudár – pe paš-ratítko, a javír vudár – pe paš-dyvesýtko rig; kadalé otkerde-štetoskiro buĥlypén sys pandž kuniá trusciál. Khangiritko buglypen angíl foruný (plóšča) pe západno rig sys eftadešá kuniá; sarí daja Khangiritko vánta sys dre pandž kuniá buĥlypnasa, a lákiro dlugipén sys jeniadeša kuniá. Jov vygindiá dre Khangirí šel kuniá dlugipén – dro dová anglatunó štéto, dro dová kher, so sys prikerdo, dre léskire vánty sys šel kuniá dlugipén. Khangiritko buĥlypén pir odoia rig, saví isyn dykhny, lydžála ke javrituny gréda, saví vydžálas pe vastóko, sys šel kuniá. Dro saró Khangirjakiro dlugipén angíl foruný (plóšča) pe léskiri palatuny rig, štubenca, savé sys pir rigá, jekhe i javire rigátyr jov vygindiá šel kuniá khetané dolesa, so sys andrál Khangirí i tremenca, savé sys dre gréda (dvóro). Vudarengire stýlby, fenštry rišotkenca (kratenca), štúby savé sys pir rigá trusciál, dre saré trin etažy angíl progi sys občhude kaštesa, petostyr (polostyr) ke fenštry; fenštry sys zakerde. Vudaritkone upralypnastyr, syr andrál Khangirí, adiáke-pac' i javrí, pir sarí vánta trusciál, andré i javrí sys vyčhindlé formy kaštéstyr. Sys kerdé xieruvimy i pal'my: pal'ma maškír duj xieruvimy; dro kažno xieruvimo sys duj muiá. Jekhe rigátyr dykhélas pe pal'ma manušéskiro muj, a javire rigátyr – ščeroskiro (lievoskiro) muj, adiáke sys kerdó dre sarí Khangirí trusciál. Petostyr (polostyr) ke vudaritko upralypén sys vyčhindlé xieruvimy i pal'my, adiáke sys i pir Khangirjákiri vánta. Dre Khangirí sys štar venglytka vudarengire stýlby, svénto štéto vydykhelas adiáke, syr me les dykhcjom. Altárjo sys kaštuno, léskiro vučipén – trin kuniá, dlugipén – duj kuniá, léskire véngly, dová pe so jov sys terdó; léskire vánty – kaštéstyr. I phendiá manúš mánge: “Kadavá isyn skamínd, savó sys terdó angíl Raste-Devléste.” Dre Khangirí i dro svénto štéto sys pir duj vudará. Dre dalé vudará sys pir duj phalia pe zaviesy (začhude), dalé phalia ĥazdenaspe; duj phalia sys pašo jekh vudár, duj phalia sys pašo javír vudár. Pe lénde, pe Khangirjákire vudará, sys vyčhindlé xieruvimy i pal'my, dasavé-pac', syr pe vánty, a angíl trémo javrí sys kaštuno ĥieristo (pomosto). Fenštry pal'menca jekhe i javire rigátyr sys pašýl trémo i dre Khangirjákire štúby, savé sys pir rigá, pe kašt, savésa sys odój občhudo. Tén'ci vylydžijá jov, adavá-pac' manúš, man pe gréda, saví sys javrí paš-ratitkoné droméstyr, jandiá man ke štúby, savé sys angíl foruný (plóšča), angíl kher Khangirjákiro pe paš-ratítko (sievierno) rig. Ke dová štéto, savó pašo paš-ratítko vudár sys dro dlugipén šel kuniá, a dro buglypen – pandždešá kuniá. Angíl andratuný gréda (dvóro), saví sys biš kuniá, angíl geristo (pomosto) sys kerdé barestyr, savó sys pe odoia gréda, saví vydžálas javrí, sys trémo angíl trémo dre trin etažy. Angíl štúby sys zagiibén, léskiro buĥlypén sys deš kuniá, a andré – dre jekh kun'; léngire vudará vydžánas pe paš-ratítko rig. Upralatune štúby na sys dasavé buĥle, syr telatuné i maškiratune, pal-dová, so odój sys tremy. Jone sys kerdé dre trin etažy, ne dasavé-pac' stýlby, savé sys pe gréda, lénde nane; pal-dová so jone na sys dasavé buĥle, syr telatuné i maškiratune štúby. Vánta angíl kadalé štúby javritune gredatyr (dvorostyr), saví sys javrí, sys dro buĥlypén pandždešá kuniá. Pal-dová, so štubengiro dlugipén, savé sys pe gréda, so vydžánas javrí, sys pandždešá kuniá; ake, angíl Khangirí sys šel kuniá. Telé sys zagiibén andré dalé štúby vastočnone rigátyr, kóli te poddžan ke jone gredatyr, saví sys javrí. Ke vantakiro buglypen, saví sys pe gréda, ke vastóko angíl gása, angíl kher sys štúby. Dromoro angíl lénde sys dasavo syr pašýl kodolé štúby, savé vydžánas pe paš-ratítko rig, dasavo dlugipén syr lénde, dasavo buĥlypén, saré léngire vygiibena, saró léngiro ukedyiben, léngire vudará sys dasavé, syr lénde. Kadasavé vudará sys syr dre štúby, savé vydžánas pe paš-dyvesýtko (južno) rig, vaš dová, sob (kaj) te zadžas dre lénde, sys vudár pašýl drom, savó džálas pir vánta pe vastóko. I phendiá jov mánge: “Štúby pe paš-ratítko (sievierno) i pe paš-dyvesýtko (južno) rigá, savé sys angíl anglatunó štéto, isyn svénta štúby, kaj rašaja isyn, savé javéna ke Raj Devél, Devél, i kaj jone xanas svénta dyibená (žertvy), odój jone čhuvéna svénta dyibená, i janéna marunó svénto dyibén, i dyibén paló grého, i dyibén pal čoripén, pal-dová so kadavá isyn svénto štéto. Kóli zadžána odorík rašaja, lénge treindiá te jačaven (jačkiren) odój péskiro uribén, dro savó jone dynarinénas (služynénas), a tén'či (pozže) te vydžán dalé-sventoné štetóstyr pe gréda (dvóro), so sys javrí; pal-dová, so kadavá uribén isyn svénto, lénge treindiá te ur'jen javír uribén, a tén'či te vydžán ke manušá. Kóli jov vygindiá andratuný Khangirí, jov vylydžijá man pir pórta, saví vydžálas pe vastóko, i jov lyjá te vyginel la trusciál (krugom). Jov vygindiá vastočno rig mierindytkone destesa, i vygindiá jov destesa pandž šelá desté. Pe paš-ratítko (sievierno) rig vygindiá jov dalé mierindytkone destesa pandžšelá desté. Dre paš-dyvesýtko rig vygindiá jov mierindytkone destesa pandžšelá desté. Porisija jov ke západno rig i vygindiá mierindytkone destesa pandžšelá desté. Saré štaré rigéndyr vymierindia la; trusciál (krugom) sys vánta, lákiro dlugipén – pandžšelá desté, lákiro buĥlypén, – sys pandž šelá desté, sob (kaj) te na javél svénto štéto khetané nasventone štetosa. I lydžijá kadavá manúš man ke pórta (vráty), ke odoia pórta, saví vydžálas pe vastóko. I, ake, Izrailjoskire-Devléskiri sláva džálas vastokóstyr, Léskiri zan – syr buté-panieskiro šumo, pe phuv ziaindia Léskiri sláva. Davá dykhibén sys dasavo-pac', syr me dykhcjom, kóli Me javavas te phenáv, so xasjola fóro, i dykhibena sys sýrby dolé dykhibena, savé Me dykhcjom pašýl reka (len') Xovar. Me pyjom mósa pe phuv. Ráskire-Devléskiri sláva zagijá dre Khangirí pir pórta, saví vydžálas pe vastóko. I ĥazdyjá man Ráskire-Devléskiro Dúho, i lydžijá man dre andratuný gréda, i, ake, Ráskire-Devléskiri sláva zmekciape pir sarí Khangirí. I me šundjom vari-konés, savó rakirlas mánge Khangirjátyr, a odová manúš sys terdó pašýl mánde. I phendiá jov mánge: “Manušéskiro čhava! Kadavá isyn Miro štéto, štéto vaš Miré ĥerá, kaj Me javáva te dživáv maškír Izrailjoskire čhavénde saró džiibén. Izrailjoskiro kher na javéla te magirel butýr Miro svénto lav; ni jone, ni léngire králja na javéna te kerén kadavá biladžaipén trupenca, léngire kral'jengire, pe vučé štéty. Jone čhuvénas péskiro progo pašýl Miro progo, péskiro vudár pašýl Miro vudár, adiáke, so jekh vánta sys maškír Mánde i lénde; jone magirenas Miro svénto lav péskire džungalé rendénca, savé kerénas, pal-dová Me xasiakirdjom len dre Mirí xolý. A akaná jone zalena Mándyr péskiro biladžaipén, péskire-kral'jengire trúpy, i Me javáva te dživáv maškír lénde pe saré beršá. Tu, manušéskiro čhava, rosphen Izrailjoskire kheréske pal kadaja Khangirí, sob (kaj) jone te ladžan péskire grehéndyr i, sob jone te kerén Khangirjákiri miéra. Kóli jone javénas te ladžan doléstyr so jone kerénas, to sykáv lénge, syr vydykhela Khangirí, kaj i syr joj sys terdy, lákire vygiibena, lákire zagiibena, saré lákire priphenybená, saré lákire zakóny, začhin davá angíl léngire jakhá, sob (kaj) jone te rakhén, syr vydykhela kadaja Khangirí, saré lákire uphenybená, sob (kaj) jone te kerén pir lénde. Ake, isyn Khangirjákiro zakóno; uprál, pe bérga saró lákiro štéto, saró trusciál lákiro štéto isyn Svénto sventonestyr. Ake, isyn Khangirjákiro zakóno!” Ake, savó isyn altarjoskiro baripén dre kuniá, kóli te gines jekh kun' syr jekh kun' i jekh burnykakiro buĥlypén; dová, pe so jov isyn terdó (fundamientyco) isyn jekh kun', buĥlypnasa jekh kun' isyn dre kustýk trusciál (vokrug) pir saré léskire rigá; ake, isyn altarjoskiri palatuny rig. Doléstyr, pe so jov isyn terdó pe phuv (fundamientycostyr) ke telatuno ĥazdyiben sys duj kuniá, a buĥlypén – jekh kun'. Tykné ĥazdyibnastyr ke baró, gazdyiben štar kuniá, a buĥlypén léskiro – jekh kun'. Altarjoskiro vučipén – štar kuniá, léstyr ĥazdénape upré štar šyngá (rógi). Altarjoskiro dlugipén – dešujekh kuniá, a buĥlypén – diešujekh kun', jov isyn štarvenglytko pe saré štar rigá. A léskiro vystupo sys dešuštar kuniá dro dlugipén, dešuštar kuniá dro buĥlypén pe saré štar rigá, trusciál léste sys kustýk (polosa) dre paš kun', lákiro fundamientyco sys – dre kun' trusciál, zagiibén ke altarie sys vastokóstyr. I phendiá jov mánge: “Manušéskiro čhava! Adiáke rakiréla Raj Devél, Devél: ‘Ake, isyn uphenybená pal altárjo ke dová dyvés, kóli jov javéla kerdó, sob (kaj) te janén pe léste shačkiribnytka svénta dyibená (usasoženni) te čhuvén pe léste rat. Rašange Lievijoskire rodycóstyr, savé isyn Sadokoskire-kheritkoné rodóstyr, savé javéna ke Me, sob (kaj) te kerén butý vaš Mánge, rakiréla Raj Devél, Devél – te janén guruvóres syr svénto dyibén paló grého. Le léskiro rat, čhuv pe saré léskire štar šyngá, pe štar véngly pir vystupo pe kustýk (polosa) trusciál, adiáke žužakir les, ker les sventonesa. Le guruvóres, syr svénto dyibén paló grého, shačkir les pe skerdo vaš dová štéto dro kher, paló svénto štéto. A pe javír dyvés jan syr svénto dyibén paló grého bidošakire buznés, mek te žužakiren altárjo adiáke, syr žužakirenas (čystinenas) guruvesa. Kóli tu mekesa te žužakires, jan bidošakire guruvóres, a bakréngire stadatyr – bidošakire bakrés. Jan len angíl Ráskire-Devléskiro muj, rašaja mek te čhurdén pe lénde lond, i janéna len pe célo shačkiribén Ráske-Devléske syr svénto dyibén. Jan eftá dyvesá, syr svénto dyibén paló grého pir buzneste dro dyvés; mek te janén, syr svénto dyibén pir guruvoreste i pir bakreste bakréngire stadatyr, sob (kaj) te javén bidošakire. Eftá dyvesá trej lénge te žužakiren altárjo i te kerén les sventonesa, i adiáke posvencynen lésa vastá péskire. Kiéli ž prodžána (nakhena) kadalé dyvesá, pe ohtóto (bidujéngiro déšto) dyvés i duredýr, rašaja javéna te janén pe altárjo tumaré céla shačkiribnytka i parikiribnytka svénta dyibená, i Me prilava len,’ – rakiréla Raj Devél, Devél. Tén'ci jov, kadavá manúš, jandiá man pale, ke svénto štéto, kaj sys pórta (vráty), saví vydžálas pe vastóko, ne joj sys zaphandly. I phendiá mánge Raj Devél, Devél: “Kadaja pórta javéla zaphandly, na psiravelape (na otkerelape), nisavó manúš na zadžála pir láte, pal-dová so Raj Devél, Devél Izrailjoskiro zagijá dre láte; joj iavéla zaphandly. A thagári (kniazjo), savó iščo (inké) javéla bešéla dre pórta, syr thagári, sob (kaj) jov saštý te xal maró angíl Raste-Devléste. Jov zadžála dre kadalé – portakiro trémo: dalé dromésa zadžála i dalé dromésa vydžála.” Tén'ci jov lydžijá man dromésa pir paš-ratítko (sievierno) pórta angíl Khangirjákiro anglypén, i Me dykhcjom: ake, Ráskire-Devléskiri sláva pherdija Kher Devléskiro (Khangirí), i Me pyjom pe phuv mósa. I phendiá mánge Raj Devél, Devél: “Manušéskiro čhava! Prilé saró tyré ilésa, dykh tyré jakhénca, šun tyré kanenca saró, so Me rakiráva túke pal saré Devléskire-Ráskire Khangirjákire uphenybená, pal saré léskire zakóny, prilé tyré ilésa dová, kon zadžála dre Khangirí, i kon vydžála sventoné štetóstyr. Phen Izrailjoskire kheréske, kaj nikón na kandéla Devlés: Adiáke rakiréla Raj Devél, Devél: “Uhtýlla (dósi) te kerén tuménge, Izrailjoskiro kher, saré tumaré džungalé réndy. Te lydžán andré javire-manušniakire čhavén, konéste nane občhindlo iló, nane občhindly loč (plot'), sob (kaj) te javén pe Miro svénto štéto, savé magirenas Mirí Khangirí; te janén Miro maró, čekén i rat; sob (kaj) te phagiren Miro zavieto tumaré džungalé rendénca. Tumé na rakhenas Miro svénto štéto, a čhuvéna len, sob (kaj) te rakhén pe Miro svénto štéto.” Adiáke rakirél Raj Devél, Devél: “Naštý te zadžál dro Miro svénto štéto čužoné-manušniakiro čhavó, savó naobčhindle ilésa, naobčhindle ločasa (plotiasa), mek i dživél jov maškír Izrailjoskire čhavénde, ne ŭsajekh naštý léske te zadžál odorík. Ne Lievíty, savé durine mándyr, dro dová časo, kiéli durija saró Izrailjo, savé jačade (jačkirdé) Man, kon psirelas ke péskire ídoly, léndyr phučenape pal dová, so jone kerdé. Jone javéna te dynarinén pe Miro svénto štéto syr rakhibnárja pašýl Khangirjákiri pórta i posobniki (pomogibnaskire) pašýl Khangirí, jone javéna te začhinen vaš narodo céla shačkiribnytka i javír svénta dyibená; jone javéna terdé angíl lénde, sob (kaj) lénge te dynarinén (te služynen). Pal-dová, so jone dynarinénas (služynénas) lénge angíl léngire ídoly, jone prityrdnenas Izrailjoskiro kher te kerén čoripén, Me ĥazdyjom pe lénde Miro vast, – rakiréla Raj Devél, Devél – so phučelape léndyr pal léngiro čoripén. Jone na javéna pašýl ke Me, sob (kaj) te kerén angíl Mánde svénto butý syr rašaja, i jone na javéna ke saré Miré, svénta vieščy (čysy), ke Svénto-sventonengiro, ne pe lénde javéla léngiri ladž i džungalé réndy, savé jone kerdé. Me keráva léndyr Khangirjákire rakhibnar'jen, vaš sarí Khangiritko butý, vaš saró, so kerélape odój.” A rašaja Lievijoskire rodycóstyr, Sadokoskire čhavé, savé dro dová časo, kiéli durine Izrailjoskire čhavé, savé rakhenas Miro štéto (sventyma), javéna ke Me, sob (kaj) te kerén butý vaš Mánge, jone javéna te terdjon angíl Miro muj, sob (kaj) te janén Mánge čekén i rat,” – rakiréla Raj Devél, Devél. Jone javéna te zadžán pe Miro svénto štéto, jone javéna ke Miro xabén, sob (kaj) te kerén butý vaš Mánge, sob (kaj) te rakhén Mirí stréga. I javéla adiáke, so kiéli jone javéna pe andratuný gréda (dvóro), ke pórta, tén'či jone čhuvéna pe péste ĥandladytko (ljonytko) uribén, ne naštý, sob (kaj) te javél pe lénde thanuno (vylnytko) uribén, kiéli jone javéna te dynarinén pe andralatuny gréda pašýl pórta i andrál Khangirí. Pe léngire šeré trej, sob (kaj) te javén ĥandladytka (ljonytka) turbany; trej, sob (kaj) telatuno uribén te javél pe lénde ĥandladestyr (ljonostyr), na trej, sob (kaj) te obphandenpe, kóli jone khamljona. Kiéli javéla trej te vydžán pe gréda so javrí, pe gréda, so javrí ke narodo, lénge trej te zlen péskiro uribén, dro savó jone kerénas svénto butý, trej te jačkiren (te jačaven) len dre svénta štúby, i te ur'jenpe dro javír uribén, sob (kaj) te na čilaven jone narodo péskire sventoné uribnasa. I adiáke-pac' naštý lénge te muraven (te briinen) šeró, naštý lénge te barjakirén balá, a trej, sob (kaj) te javén podčhindle léngire balá. Naštý, sob (kaj) te p'jel rašáj mol (vino), kiéli jov džála pe andratuný gréda. Naštý lénge te len dre romniá pivlia/biromeskire manušnia (udova), džuvliá, saví rozgijápe romesa, a trej, sob (kaj) te len péske patyvalé džuvlién Izrailjoskire – kheréskire rodóstyr, ci pivlia, konéskiro rom sys rašái. Trej lénge te sykliakirén Miro narodo, so isyn svénto, a so nane, te phenén lénge, so isyn žužó, a so-nane. Kiéli isyn narozlyne réndy (diély), lénge trej te javén sendar'jenca pir Miré uphenybená i te sendiakiren len Miré sendosa, te rakhén Miré zakóny, Miré statúty pal saré Miré svénki, te rakhén dre sventyma Miré sávaty (suboty). Naštý lénge te magirén pes, sob (kaj) jone te poddžan ke muló manúš, ne, sob (kaj) jone te javén ke dad i daj, ke čhavó i čhaj, ke pšal i phen, savjate na sys rom; jone saštý te javén nažužé. A kiéli kadasavó Lievito žužakirelape, to trej, sob (kaj) te otginel rašáj iščo (inké) eftá (bitrinéngiro deš) dyvesá.” Dro dová dyvés, kiéli léske trej te javél pe svénto štéto pe andratuný gréda (dvóro), sob (kaj) te dynarinél pašo svénto, jov isyn bangó te janel svénto dyibén paló grého,” – rakiréla Raj Devél, Devél. A kóli trej te phenés pal udielo (kotér phuv lénge) syr meknó mištypén, to Me som léngiro udielo (meknó mištypén). I nisavó mištypén na den lénge dro Izrailjo: Me som léngiro mištypén. Jone javéna te xan mareskire janybnastyr, sventoné dyibnástyr paló grého, sventoné dyibnástyr paló čoripén, saró svencyndlo xabén dro Izrailjo isyn rašángiro. Kažno pérvo phabaj/plódo doléstyr, so barjola pe phuv, kažno svénto janybén, savé by jone te na javén, isyn rašángire, saró pérvo tumaré marestyr otdén rašáske, sob (kaj) te javél bahtiakirdó tyró kher. Naštý, sob (kaj) te xan rašaja mulé-murdalengiro ci čirikliengiro mas, naštý sob (kaj) te xan dová, so riskiribnáskiro murdál (zvierjo) zahaia. Kiéli javéna tumé te rozginen phuv pe koterá (pe učastki) syr meknó mištypén, den tén'či Ráske-Devléske svénto kotér phuv, konéskiro dlugipén te javél biš te pandž tysjoncy desté, a buglypen – deš tysjoncy, saró te javél svénto ke sama jagóry (kraí) trusciál (krugom). Saré dalé phuvjátyr ke štéto (sventyma) javéla štarvenglytko kotér (kusko) phuv, pir pandžšelá desté trusciál, a trusciál léste – vól'no (psiro) štéto dre pandždešá kuniá. Dalé saré mieratyr vygin biš te pandž tysjoncy desté, ĥáda javéla dlugipén, a deš tysjoncy javéla buĥlypén, kaj te javél svénto štéto (ventyma), Svénto-sventonestyr. Davá sventoné-phuvjákiri kotér phuv javéla vaš rašange, sventoné-štetoskire dynar'jénge (služytielienge), savé léna te kerén butý vaš Ráske Devléske, davá javéla štéto vaš léngire kherá, i kaj javéla obsvencyndlo kotér vaš svénto štéto. Dlugipén dre biš te pandž tysjoncy desté, buglypen dre deš tysjoncy – saró davá javéla vaš Lieviténge, Khangirjákire dynar'jénge, davá javéla léngiro mištypén bišé štubenca te dživén. Den dro foróskiro mištypén phuv pandž tysjoncy desté buĥlypnasa, biš te pandž tysjoncy dlugipnasa angíl sventoné-phuvjákiro kotér phuv, saví otdyny Ráske-Devléske; davá javéla saré Izrailjoskire – kheréskiro mištypén. Den thagariske (kniazjoske) kotér phuv pe odoia i javír rig, pašýl sventoné-phuvjákiri paš, saví otdyny Ráske-Devléske, i saví isyn pe miéža foróskire mištypnasa, ke zapado, zapadnone rigátyr i ke vastóko, vastočnone rigátyr, léskiro dlugipén javéla dasavo, syr jekh dolé-rodoskire koterendyr, zapadnone rigátyr ke vastočno miéža. Davá isyn léskiri phuv, léskiro mištypén dro Izrailjo; sob (kaj) Miré thagárja te na tasavenas butýr Miro narodo, sob (kaj) jone te den phuv Izrailjoskire kheréske pir léskire ródycy. Adiáke rakiréla Raj-Devél: “Uhtýlla (dósi), Izrailjoskire thagarjale (kniázi). Pirijačen te kerén nahrata réndy te občoren. Kerén séndo i čačipén, pirijačen te vytraden Miro narodo léskire phuvjátyr, – rakiréla Raj Devél, Devél. Mek te javén tuménde čačuné ubladýtka (viesy), čačuný efa, čačunó bato. Efa i bato bangé te javén dre jekhori-pac' miéra, adiáke, sob (kaj) dro bato te zadžál – déšto miéra xomierostyr, i dre efa déšto xomieroskiri miéra; léngiro vyginyben dykhén pir xomiero. Dro šékieljo isyn biš giery, a biš šékieli, biš te pandž šékieli i dešupandž šékieli javéna tuménde syr jekh mina. Ake, isyn dan' (dyibén), savó trej te den thagariske: šovtone efakiri miéra givitkone xomierostyr, šóvto jefakiro miéra ĥerstytkone xomerostyr. Ake, isyn uphenybén pal olivítko dzet (jeliejo); jeliejoskire korostyr den déšto miéra batostyr deš baty – davá isyn xomer, pal-dová, so dro xomero isyn deš baty. Jekha bakriá duj šelengire-bakréngire stadatyr lačhé Izrailjoskire feldatyr – saró davá vaš célo shačkiribnytko i marunó svénto dyibén, svénto dyibén te parikirén, sob (kaj) te javén žužé,” – rakiréla Raj Devél, Devél. “Narodo saré phuvjátyr isyn bangó te janel davá svénto dyibén thagareske dro Izrailjo. A thagariskiro bangipen javéla te del célo shačkiribnytko, marunó svénto dyibén, jov javéla te janel thaduno svénto dyibén pe svénki, dre neve čhoná, dre sávaty, dre saré Izrailjoskire-kheréskire bahtalé dyvesá. O thagári isyn bangó te janel svénto dyibén (žértva) paló grého, marunó svénto dyibén, célo shačkiribnytko parikiribnytko svénto dyibén vaš Izrailjoskire-kheréskiro žužipen. Adiáke rakiréla Raj Devél, Devél: Dro pérvo čhon, pe pérvo čhonytko dyvés le guruvendyr bidošakire guruvóres te žužakirel svénto štéto. Mek te lel rašáj rat dalé sventoné dyibnástyr paló grého, mek te počhuvel les pe vudará dre Khangirí pe štarvenglytko učhakiriben pašýl altárjo (žiertvieniko), pe vystupo, kaj portakire stýlby dre andratuný gréda. Adiáke ker pe eftáto čhonytko dyvés pal odolénde, savé keréna gréhi na džiný, so jone keréna i pal kodolende, savé keréna gréhi pir naivo, i adiáke žužakiren khangirí. Dro pérvo čhon, dro dešuštarto dyvés javéla Patradí tuménde, kiéli trej te xan bi-droždžengiro maró. Dro davá dyvés o thagári janéla pal péste i paló narodo saré phuvjátyr guruvóres, syr svénto dyibén paló grého. Dre dalé eftá dyvesá jov bangó te janel Ráske-Devléske dro célo shačkiribén kažno dyvés pir eftá guruvorende, pir eftá bakrende bidošakire, a syr svénto dyibén paló grého – kažno dyvés pir buzneste (kozloste). Marunó svénto dyibén jov isyn bangó te janel pir efa pe guruvoreste, pir efa pe bakreste, pir olivitkone-dzetoskiro gino pe efa. Dro eftáto čhon, pe dešupan-džto-čhonytko dyvés, pe svénko, kiéli džána kadalé eftá dyvesá, jov bangó te janel dová, so sys kadasavó svénto dyibén adákicy, syr sys olivítko dzet.” Adiáke rakiréla Raj Devél, Devél: “Andratune-gredakiri pórta, saví vydžála pe vastóko, mek te javél zakerdy (zaphandly), kiéli džána šov butitka dyvesá, a dro dyvés sávato (subóta), dro dyvés, kiéli lyjape nevó čhon, mek te javél otkerdy (otphandly). O thagári zadžála pir portakiro trémo, so vydžála javrí, jov javéla terdó pašýl kadalé portytka stýlby. E rašaja keréna léskiro célo shačkiribnytko i léskiro parikiribnytko svénto dyibén. Pašýl portakiro progo jov déla patýv Ráske-Devléske i vydžála, a pórta mek te na zakeren (na zaphanden) bel'velié. I adiáke-pac' narodo phuvjátyr javéla te del patýv (te kloninelpe) angíl Raste-Devléste pašýl zagiibén dre pórta, dre sávaty (suboty), dre neve čhoná. Ake, isyn shačkiribén, savó thagári janéla Ráske-Devléske dro dyvés sávato: šov bakrore bidošakire, i jekh bidošakiro bakro. Marunó svénto dyibén bangó te javél efa pal bakreste, pe bakroreste javéla dasavo marunó svénto dyibén, kicý déla léskiro vast, gino olivítko dzet (jeliejo) javéla pe efa. Dro neve čhonytko dyvés jov janéla guruvengires gurtostyr, bidošakire guruvóres; šov bakrore, bidošakire bakrores. Jov janéla marunó svénto dyibén jekh efa pe guruvoreste, efa pe bakreste, a pe bakrorende-kicý déla léskiro vast, gino olivítko dzet pe efa. Kiéli javéla thagári, jov isyn bangó te i zadžál pir portakiro trémo, bangó te vydžál dalé-pac' dromésa. A kiéli narodo phuvjátyr javéla pe svénki angíl Ráskire-Devléskiro muj, odoléske, kon zagijá pir paš-ratítko (sievierno) pórta, sob (kaj) te del patýv Devléske, trej te vydžál paš-dyvesytkoné portasa, a odoléske, savó zagijá pir paš-dyvesýtko (južno) pórta, trej te vydžál paš-ratitkoné portasa; naštý léske te vydžál dolé-pac' portasa, savjása jov zagijá, jov isyn bangó te vydžál pir javír pórta. O thagári isyn bangó te javél maškír lénde: kiéli jone zadžána, zadžála i jov, kiéli jone vydžána, vydžála i jov. Pe svénki, i dre uphendle bahtalé dyvesá marunó svénto dyibén léstyr bangó te javél kadasavó: efa pal guruvoreste, efa pal bakreste, a pe bakrorende-kicý déla léskiro vast, i olivítko dzet piró gino pe efa. A kiéli thagári péskire iléstyr zakaméla te janel célo shačkiribnytko ci parikiribnytko svénto dyibén (žértva) Ráske-Devléske, stregarja (stražniki) isyn bangé te otkeren (te psiraven) léske pórta, saví vydžála pe vastóko, i jov keréla péskiro célo shačkiribén, péskiro parikiribnytko svénto dyibén adiáke, syr kerdé dre sávaty, a tén'či jov vydžála, i kiéli vydžála, to pórta zakerlape (zaphandelape). Kažno dyvés janén (tumé rašaja) Ráske-Devléske syr célo shačkiribnytko svénto dyibén jekhe-beršeskire – bidošakire bakrores, janén les kažno zlóko (ránko). A marune janybnastyr pričhuvén ke jov kažno zlóko šóvto miéra efatyr olivítko dzet tríto miéra ginostyr, sob (kaj) te javél davá khetané jaržesa; kadasavó isyn viéčno priphenybén pal marunó janybén Ráske-Devléske pe saré beršá. Adiáke mek te janén dro célo shačkiribnytko bakrores, marunó janybén i olivítko dzet kažno zlóko (ránko) saró časo.” Adiáke rakiréla Raj Devél, Devél: “Kiéli o thagári déla dáro vari-konéske péskire čhavorendyr, davá javéla vaš meknó mištypén léskire čhavorenge (bijatenge), davá javéla léngiro meknó mištypén. Kiéli ž jov déla péskire mištypnástyr dáro vari-konéske péskire pishar'jendyr, to davá dáro javéla pishariskiro, a kiéli javéla vól'no berš, to dáro risjola pale ke thagári. Féni (tóka) pale ke léskire čhavé bangó isyn te piridžal léskiro meknó mištypén. Naštý, sob (kaj) te lel thagári narodoskire-mekné mištypnástyr, kóli jov otlela léndyr; jov isyn bangó te del péskire mekné mištypnástyr péskire čhavorenge (bijatenge), sob (kaj) nikón miré narodóstyr te na javél vytradyno péskire mištypnástyr.” Tén'ci lydžijá jov man zagiibnasa, savó sys pašýl pórta, ke svénta štúby vaš rašange, savé vydžánas pe paš-ratítko (sievierno) rig, ake, odój isyn jekh štéto, savó vydžála pe západno jagóro (krajo). I phendiá mánge: “Adavá isyn štéto, kaj rašaja isyn bangé te keraven svénto dyibén (žértva) pal čoripén, i svénto dyibén pal grého, i kaj isyn bangé te peken marunó svénto dyibén i naštý te janes les pe gréda (dvóro), saví sys javrí, vaš dová, sob (kaj) narodo te javél svénto.” I vylydžijá jov man pe gréda, saví sys javrí, prolydžija man pir štar gredytka véngly, ake, dro kažno gredytko venglo sys iščo (inké) pir jekh gréda. Dre saré štar gredytka véngly sys začhakirde gredy, dlugipén léngiro sys štardešá kuniá, a buĥlypén trindeša, jekh baripén (miéra) vaš saré štar véngly. Trusciál (krugom) lénde sarénde – vánty, a pašýl vánty, kerdé trusciál keraibnytka štéty (očagi). I phendiá jov mánge: “Ake isyn keraibnytka štúby, kaj Khangirjákire (Xramoskire) dynárja keravena svénta dyibená (žertvy) narodóstyr.” Tén'ci jov (davá-pac' manúš) jandiá man (Jezekiljos) pale ke Khangirjákiro vudár; ake, Khangirjákire progostyr thadéla paní pe vastóko, pal-dová, so Khangirí sys terdy fasadosa pe vastóko. I paní thadelas čačé-Khangirjákire rigátyr pe paš-dyvesýtko rig, kaj sys altárjo. I vylydžijá jov man paš-ratitkoné portakire dromésa, savó sys javrí, lydžijá ke pórta, saví sys javrí, dromésa, savó vydžála pe vastóko; ake, paní thadéla pir čačí (pravo) rig. Kiéli odová-pac' manúš gijá pe vastóko, jov rikirelas dro vast šelo, i jov vymierindia tysjoncy (bará) kuniá (lokci), i lydžijá jov man piró paní; paní sys ke miro kokalkico (ladyžka). Nevéstyr (nevés) jov vygindiá iščo (inké) jekh tysjonco, i lydžyja man piró paní; paní sys ke čang. Vygindiá jov nevés tysjonco, i lydžijá man; paní podgíia ke mirí kustýk (trušula). Vygindiá iščo (inké) tysjonco, adáj sys dasavo sýgno panyng, so naštý sys mánge te piridžav, pal-dová so paní sys adiáke xor, so treindiá te plyvinav te piridžav davá panyng sys naštý. I phendiá jov mánge: “Dykh tu davá, manušéskiro čhavó?” I lydžijá man pale ke brégo rekakiro (leniakiro). Kiéli me javdjom pale, ake, pe bregi pašýl sýgno rékica (lenorí) (patoko) sys but drevy jekhe i javire rigátyr. I phendiá jov mánge: “Davá paní thadéla pir vastočnone-phuvjákiri rig, džála pe félda, a syr zadžála dro mórjo (derjáv), i kerélape léskiro paní sastiakiribnytko (liečebno). Kažno džidó sozdyiben, savó kharélape (dvižynelape) odój, kaj zadžána duj rekicy, javéla te dživél, odój javéla but mačhé, pal-dová, so zadžála odorík dová paní i kerélape paní dre mórjo (derjáv) sastiakiribnytko, i karik zadžála daja sykno rékica (lenorí), saró odój javéla džidó. Javéna terdé pašýl léste manušá, savé uhtylena mačhen En-Gadiatyr (Jen-Gaddiatyr) ke Jeglaimo, jone javéna te začhurden khudia (sieti). Odój javéla mačhé, javéna but mačhé syr dro Baró Mórjo (derjáv). Léskire artapieli (xor boloty) i čhuviny (lužy), savé na vysastjona, javéna jačade (jačkirdé) vaš lond. Pašýl brégo sýgno rékica (lenorí) (patoko), pir rekicakire bregi, jekhe i javire rigátyr javéna te barjon rázna drevy, savé déna xabén: léngire patria (listy) na javéna te zašutjon, i na pirijačena te janén phabá (plódy). Každo nevó čhon javéna te vybarjon neve, pal-dová, so paní vaš lénge thadéla sventoné štetóstyr; léngire phabá/plódy javéna te xan, a patria (listy) te sastiakirenpe.” Adiáke rakiréla Raj Devél, Devél: “Ake isyn rozginyben, pir savó tumé san bangé te roskeren phuv, sob (kaj) te doreselpe joj dešudujenge Izrailjoskire rodycenge: duj pašá Jozáske (Iosifoske). Len daja phuv syr meknó mištypén jekh i javír manúš, pal-dová, so Me ĥazdyjom Miro vast sovlahasa te dav daja phuv tumaré dadénge, kadaja phuv isyn tumaró meknó mištypén. Ake, isyn phuvjákiri miéža: pe paš-ratítko jagóro (krajo), lyi Baré Morjostyr pir drom ke Xieglono, syr te džas ke Cedado. Jemafo, Bieroto, Sivraimo, ke Gacar Tihono, savó isyn maškír Damásko i Jemafoskire štéty, savó isyn pe Avranoskiri miéža. I javéla miéža morjostyr (derjavestyr) ke Gacar-Jenono, miéža pašýl Damásko, a duredýr pe paš-ratítko isyn štéto Jemafo, ake, isyn paš-ratítko rig. Špéra (čerta) vastočnone rigátyr lydžán maškír Avrano i Damásko, maškír Galado i Izrailjoskiri phuv, pir Iordáno, paš-ratitkoné rigátyr, ke vastočno mórjo (derjáv), davá isyn vastočno rig. Paš-dyvesýtko rig isyn paš-dyvesytkoné rigátyr Tamarostyr ke paní, kaj xanaspe pir lavá pašýl Kadiso, kaj thadéla ručajo ke Baró Mórjo (derjáv), davá isyn paš-dyvesýtko rig pe paš-dyvesýtko rig. Západno miéža – Baró Mórjo (derjáv), paš-dyvesytkoné miežatyr ke štéto angíl Jemafo, davá isyn západno rig. Roskeren daja phuv manušénge maškír tuménde pe pašá pir Izrailjoskire ródycy. Roskeren (rozdielinen) la piró žriébijo, sob (kaj) te javél davá tumaró meknó mištypén javire – phuv'jengire manušénge, savé dživéna maškír tuménde, i savé bijanena čhavorén. Jone isyn bangé te ginenpe maškír Izrailjoskire čhavénde syr tumaré manušá, savé dživéna, jone zadžána khetané tuménca dre dólia (bažyn) maškír Izrailjoskire ródycy. I javéla adiáke: so kóli dživéla maškír vari-savó ródyco javire-phuv'jengiro manúš, odój den léske meknó mištypén léskiro”, – rakiréla Raj Devél, Devél. Ake, syr kharenpe ródycy (čangá/kolieny). Pe paš-ratítko rig piró drom Xietlonostyr, savó lydžála dre Jemafo, Gacar Jenono, paš-ratitkoné miežatyr Damaskostyr piró drom ke Jemafo, sarí daja phuv vastokóstyr ke mórjo (derjáv), isyn jekh phuvjákiri paš Danoske. Pašýl Danoskiri miéža vastočnone rigátyr ke západno jagóro (krajo) isyn jekh Asiroskiro paš. Pašýl Asiroskiri miéža vastočnone rigátyr ke západno jagóro isyn jekh Niefalimoskiri paš. Pašýl Niefalimoskiri miéža vastočnone rigátyr ke západno jagóro isyn jekh Manasijáskiro paš. Pašýl Manasijaskiri miéža, vastočnone rigátyr ke západno jagóro isyn jekh Jefriemóskiri paš. Pašýl Jefriemóskiri miéža vastočnone rigátyr ke západno jagóro isyn jekh Ruvimoskiri paš. Pašýl Ruvimoskiri miéža, vastočnone rigátyr ke západno jagóro isyn jekh Judaskiri paš. Pašýl Judaskiri miéža vastočnone rigátyr ke západno jagóro isyn sventoné – phuvjákiro kotér. Léskiro buĥlypén isyn biš te pandž tysjoncy desté, a dlugipén kadasavó, syr javire-pašengiro dlugipén, vastočnone rigátyr ke západno jagóro maškír léste javéla svénto štéto. Phuvjákiro kotér, savó tumé otdena Ráske-Devléske, syr svénto štéto, javéla dro dlugipén biš te pandž tysjoncy desté, a léskiro buĥlypén javéla deš tysjoncy desté. Kadavá svénto phuvjákiro kotér isyn bangó te javél rašángiro, ke paš-ratítko rig biš te pandž tysjoncy desté dro dlugipén, ke mórjo (derjáv) dro buĥlypén deš tysjoncy, ke vastóko dro buĥlypén deš tysjoncy, a ke paš-dyvesýtko rig dro dlugipén biš te pandž tysjoncy, maškír léste javéla svénto štéto Ráskire-Devléskiro. Kadavá otdén rašange Sadokoskire čhavéndyr, savé sys terdé pe Mirí stréga (straža), savé dro časo, kóli durjonas Mándyr Izrailjoskire čhavé, na giné krig Mándyr, syr giné krig javír Lievíty. Kadavá phuvjákiro kotér sventoné koterestyr javéla léngiro, Svénto-sventonestyr pašýl Lievitengiro jagóro. Lievíty léna pašo rašángiro jagóro (krajo) paš dre biš te pandž tysjoncy desté dro dlugipén i deš tysjoncy desté dro buĥlypén; saró dlugipén isyn biš te pandž tysjoncy, a buĥlypén – deš tysjoncy desté. Kadalé phuvjákire koterestyr naštý lénge te biknen, naštý te paruven, saró pérvo phuvjátyr na piridžala ke javire pal-dová, so davá isyn svénto Ráskire-Devléskiro. A javír pandž tysjoncy, so jačnépe dro buĥlypén biš te pandž tysjoncy dro dlugipén – vaš fóro, vaš sarénge, sob (kaj) te dživén odój, sob (kaj) te javén fóro maškirál. Ake, savó javéla foróskiro baripén: paš-ratitkoné rigá štar tysjoncy te pandžšel desté, i paš-dyvesýtko rig javéla štar tysjoncy te pandžšel, vastočno rig – štar tysjoncy pandžšelá, západno rig – štar tysjoncy pandžšelá desté. Štéty pašo fóro – ke paš-ratítko rig duj šelá te pandždešá ke vastóko duj šelá te pandžšelá, ke paš-dyvesýtko rig duj šelá te pandždešá, ke západno duj šelá te pandždešá desté. Dová, so jačélape dlugipnastyr angíl svénto štéto – deš tysjoncy ke vastóko i deš tysjoncy ke zapado, angíl svénto štéto, dová, so barjola pe daja phuv – saró davá vaš dová, sob (kaj) te čaliakires butiarnen, kon keréla butý dro fóro. Saré Izrailjoskire ródycy saštý (moginéna) te kerén butý dro fóro. Saró otdynó štéto dro biš te pandž tysjoncy desté dlugipnasa, buĥlypnasa biš te pandž tysjoncy desté, štarvenglytko kotér, otdén dro svénto kotér, khetané foróskire mištypnasa. A saró, so jačélape-thagariske: sventoné-kotereskiro rigátyr, foróskire-mištypnaskire rigátyr angíl biš te pandž tysjoncy desté ke kotereskiro vastočno miéža i pe zapado angíl biš te pandž tysjoncy lašyl západno miéža phuvjákiri paš vaš thagariske, paldavá svénto kotér phuv i svénto štéto javéna maškír léste. Ne odová, so jačélape Lieviténgire mištypnástyr i foróskire mištypnástyr maškirál, javéla adiáke-pac' vaš thagariske a štéto maškír Judaskiri miéža i maškír Vieniaminoskiri miéža javéla thagariskire mištypnasa. A saró javire rodycendyr vastočnone rigátyr ke západno rig-jekh paš Vieniaminoske. Pašýl Vieniaminoskiri miéža, vastočnone rigátyr ke západno rig jekh paš Simjonoske. Pašýl Simjonoskiri miéža vastočnone rigátyr ke západno rig-jekh paš Isaharoske. Pašýl Isahoroskiri miéža vastočnone rigátyr ke západno rig-jekh paš Zavulonoske. Pašýl Zavulonoskiri miéža, vastočnone rigátyr ke západno rig-jekh paš Gadoske. A pašýl Gadoskiri miéža pe paš-ratítko rig džála paš-ratítko miéža Tamarostyr ke paní, kaj čingardenape pašo Kadiso, ručajostyr ke Baró Mórjo (derjáv). Ake, isyn phuv, saví tumé pir žriébijo roskedena Izrailjoskire rodycenge, ake isyn léngire pašá rakiréla Raj Devél, Devél. Ake, isyn foritka vyginybena: paš-ratitkoné rigátyr isyn vyginyben štar tysjoncy te pandžšelá desté. Foritko pórta kharelpe, pir Izrailjoskire rodycengire lavá: ke paš-ratítko rig isyn trin pórty: jekh Ruvimoskiri pórta, jekh Judaskiri pórta, jekh Lievijoskiri pórta. Vastočnone rigátyr isyn vyginyben pe štar tysjoncy pandždešá desté, i trin pórty: jekh Jozaskiri pórta, jekh Vieniaminoskiri pórta, jekh Danoskiri pórta. Paš-dyvesytkoné rigátyr isyn vyginyben pe štar tysjoncy pandždešá desté i trin pórty: jekh Simieonoskiri pórta, jekh Isahoroskiri pórta, jekh Zavulonoskiri pórta. Morjostyr isyn vyginyben pe štar tysjoncy pandždešá, desté adáj isyn trin pórty: jekh Gadoskiri pórta, jekh Asiroskiri pórta, jekh Niefalimoskiri pórta. Saró trusciál (krugom) isyn dešuohto tysjoncy desté. A foritko lav dolé dyveséstyr javéla: “O Raj Devél isyn odój”! Pe tríto berš Ioakimoskire (Jakimoskire) kralipnaskiro, Judejákire kralískiro, javdiá o Navuhodonosóro, Vavilonóskiro králi, ke Jerusalimo i obgija les trusciál xaladybnasa. I dyjá o Raj Devél dro léskiro vast e Iokimos, Judejákire kralís, i adákicy khoré (sasúdy) Devlytkoné kheréstyr, i jov bičhadiá len pe phuv Sienoar, ke léskire Devléskiro kher, i jandiá adalé saré khoré dre piralý vaš kazna léskire devleskiri. I phendiá o králi Asfienazoske, kon sys barydyró léskire jevnuhengiro, sob (kaj) jov te janel Izrailjoskire čhavén, savé te javén kralitkone i thagaritkone rodóstyr, terné-beršengiren (otroken), savénde nane nisave doša dre masá (štalto), gožone mósa, sob (kaj) jone te ĥaljon te sykljon dro kažno godypén, dro džinybén i sýges te ĥaljon, savé moginénas (dénas ráda) te dynarinén (te služynen) dre kralískiri felatin (kolóv), i, sob (kaj) te sykliakirén len Xaldieitkone lylvaripnaske (gramotake) i čibake (čibjake). I vydyja lénge králi sodyvesytko xabén kralískire skamindestyr i mol (vino), saví jov kokoró p'jelas, i phendiá len te sykliakirén trin berš, sob (kaj) dro kónco (dro jagóro) sykliakiribnaske (učobake) jone moginénas (dénas ráda) te terdjon te dynarinén angíl kralíste. Maškir lénde sys Judáskire čhavéndyr o Danijéljo, o Ananija, o Misailo i o Azárija. I pirikhardia len barydyró jevnuhengiro – o Danijéljo jaciá o Valtasaro, o Ananija – o Siedraho, o Misailo – o Misaho i Azárija o Avied-Niego. O Danijéljo čhudiá dro peskro iló, sob (kaj) te na magirelpe xabnasa kralitkone skamindestyr i moliasa, saví p'jelas o králi, i paldavá mangdiá e barydyrés jevnuhengires pal dová, sob (kaj) javélas saštý léske te na magirelpe. Dyjá o Devél Danijeljoske láska i lačhipén jevnuhengire barydyrestyr; i o jevnuhengiro barydyró phendiá Danijeljoske: “Me darava miré rástyr kralístyr, savó kokoró priphendiá tuménge xabén i pibén. I paldavá, syr dykhéla o králi tumaré muiá sanedyr, syr terné manušénde tumaré jekhe-beršengirendyr, to javéla miro šeró bangó angíl kralíste pale tuménde.” Tén'ci phendiá o Danijéljo Amielsaroske, dykhibnaskireske, savés jevnuhengiro barydyró pričhudia ke Danijéljo, Ananija, Misailo i Azárija: “Me mangáva tut: propatiakir tyré pishar'jén pir deš dyvesá; i mek te den aménge te xas šahá (ovoščy) i paní te pjas; tén'či te javén angíl túte amaré muiá i e muiá odolé terné-beršengire, savé xanas kralítko xabén, korigedýr (pozžedýr) ker tyré pishar'jénca dová, so tu dykhésa lačhés.” Jov kandyjá len dro dová i propatiakirdia len pir deš dyvesá. Ake, pe kónco (jagóro) kadalé deš dyvesengire mina pe léngire muiá jaciá gožedyr, i jone sys zoraledýr odolén terné-beršengirendyr, savé xanas kralítko xabén. I Amielsaro, léngiro dykhibnaskiro, lelas krig léngiro xabén i mol vaš pibén léndyr, i délas lénge šaha. I dyjá o Devél štarenge adalé terné-beršengirenge džinybén i ĥalyibén dre kažno lylvarí i godý, a Danijeljoske iščo (inké) dyjá ĥalyibén dro kažno dykhibén, i dre suné. Pe kónco (jagóro) dolé dyvesengiro, kiéli o králi priphendiá te sykavén len, o barydyró jevnuhengiro sykadiá len Navuhodonosoroske. I rakirlas lénca o králi, i saréndyr terné-beršengiren na lathiape kadasaven, syr Danijéljo, Ananija, Misailo i Azárija, i lyné jone te dynarinén angíl kralíste. I dro kažno godó réndo i léngiro rozĥalyiben, pal so phučelas léndyr o králi, jov lathelas len dro deš mol fedýr sarén čovahanendyr i magendyr, savé sys dro saró kralipén léskiro. I sys odój o Danijelio ke/žýko pérvo berš o Kiraskire kralískiro. Pe javír berš kralipnaskiro Navuhodonosoroskiro, o Navuhodonosóro dykhciá (dyjá) suné, i zalyjape dúho (fáno) léskiro, i soiben gijá léstyr. Priphendiá o králi te skedén sarén čovahanen, i magen, i džinybnaskiren pir planiety, i Xaldiejen, sob (kaj) jone te rosphenén e kralíske léskiro sunó. Jone javné, i terdiné angíl kralíste. I phendiá lénge o králi: “Dykhávas suné me, trašadjola o dúho (fáno) miro; mánge trej te džináv davá sunó.” I phendlé e Xaldiei kralíske Aramieitkes ke: “Králjo! Jav džidó dre viéki! Phen sunó tyré pishar'jénge, i me roskedasam, saví znáčyma isyn dre léste.” Otphendiá o králi i phendiá Xaldiejenge: “Lav otgijá mándyr; kóli tumé te na phenén miro sunó, i so jov značynéla, to mek te čingiren tumen pe koterá (kuski), i kherá tumaré javéna rosphagirdé. Ne kóli tumé rosphenena sunó i léskiri znáčyma, tedy te len mándyr dáry, počastúnki, i javéla tuménge bari patýv. Adiáke phenén mánge sunó i léskiri znáčyma.” Jone nevéstyr (nevés) otphendlé i rakirdé: “Te phenél o králi péskire pishar'jénge sunó, i ame phenása léskiri znáčyma.” Otphendiá o králi i phendiá: “Čačes, džinóm me, so tuménge trej te vybašaven časo, pal-dová so tumé dykhéna, so lav otgijá mándyr. Adiáke so, kóli tumé na rosphenenas miro sunó, to tuménde jekh isyn pe godý: tumé skedynépe te phenén mánge xohaibén i načačune lavá, sob (kaj) te džal duredýr (nakhela) o časo; adiáke, rosphenén mánge sunó, i tedy me ĥaljovava, so tumé saštý (moginéna) te rosphenén mánge léskiri znáčyma.” E Xaldiei otphendlé kralíske i rakirdé: “Nane pe phuv e manušés, savó moginelas (délas ráda) te otkerel davá réndo (diélo) kralíske, i paldavá ni jekh králi, ni jekh thagári, ni jekh themeskiro barydyró (pravitieljo), na phuciá dasavo ni savé čovahanestyr, ni astrologostyr, ni Xaldiejostyr. Réndo (diélo), pal savó phučela o králi, isyn pharó, so nikón javír na saštynela (na moginéla (dela ráda)) te otkerel les kralíske, apríč devlende, savé dživéna na dre manušany loč (plot').” Rosholiasyja o králi i drieván pherdija xoliamipnasa pal dová, i priphendiá te muliakirén sarén godypnaskiren dro Vavilóno. Kiéli vygijá adasavó priphenybén, i lyné te muliakirén godypnaskiren, to rodenas Danijeljos, i malen (drugen) leskiren, sob (kaj) te muliakirén len. Tén'ci Danijéljo otphendiá iléstyr i godypnasa Ariohoske, barydyréske pe kralitkone stregar'jende, savé vyginé te zamarén Vavilonytkone godypnaskiren; i phuciá Ariohostyr, kralískire barydyrestyr: “Palsó dasavo zorjása priphenybén isyn kralístyr?” Tén'ci Arioho rosphendiá saró réndo Danijeljoske. I Danijéljo zagijá, i mangdiá kralís te del léske časo, sob (kaj) jov te phenél kralíske suneskiri znáčyma. Danijéljo javdiá ke pe kheré, i rosphendiá saró réndo Ananijaske, Misailoske i Azarijaske, leskre malenge, sob (kaj) jone mangné láska bolybnáskire Devléstyr pal dasavo garadó čačipén, sob (kaj) o Danijéljo léskire malenca te na xasjon sarénca javirenca godypnaskirenca dro Vavilóno. I tén'či sys sykado garadó čačipén Danijeljoske dro ratiákiro dykhibén, i o Danijéljo bahtiakirdiá bolybnáskire Devlés. O Danijéljo otphendiá i phendiá: “Mek te javél bahtaló Lav Ráskire-Devléskiro viekostyr pe saré viéki! Pal-dová so Léste isyn godý i zor. I jov paruvela časy i beršýtka pory, Jov teliakirela kral'jén i Jov čhuvéla kral'jén; déla godypén godypnaskirenge i džinybén godenge, Jov otkerela xoralo i garadó čačipén, Jov džinéla, so isyn dro kalypén (cjomnyma), i dud isyn Lésa. Me parikirava i me šarava Tut, Dévla, miré dadéngiro, so Tu dyján mánge godý i zor i otkerdian mánge odová, pal so mangenas Tut; pal-dová so Tu otkerdian aménge réndo kralískiro.” Paló dová gijá Danijéljo ke Arioho, savéske o králi priphendiá te muliakirél e Vavilonytkone godypnaskiren, javdiá i phendiá: “Na muliakir Vavilonytkone godypnaskiren; le man ke králi, me phenáva léske znáčyma sunoskiri.” Tén'ci Arioho sýges lydžijá Danijeljos ke králi i phendiá léske: “Me lathjom plienone Judytkone čhavéndyr manušés, savó otkerela kralíske sunoskiri znáčyma.” O králi phendiá Danijeljoske, savó khardo sys Valtasaro: “Ci saštý tu, xaj, te phenés mánge sunó, savó me dykhcjom, i léskiri znáčyma?” Danijéljo otphendiá angíl kralíste i rakirdiá: “Garadó čačipén, pal savó phučela o králi, naštý te otkeren ni godypnaskire (tanuki), ni čovahane. Ne isyn pe bolybén o Devél, Savó otkerela garadé čačipená; i Jov otkerdia kralíske Navuhodonosoroske, so javéla dre palatuné (posliednia) dyvesá. Tyró sunó i dykhibena tre šereskire piró tyró čhuibén sys dasavé: “Tu, králjo, pe tyró čhuibén dumindian pal-dová, so javéla paló davá, i Jov, Otkeribnytko (Otkryvajuščo) garadé-čačipnengiro, sykadiá túke dová, so javéla. Ne mánge dasavo garadó čačipén sys sykado na paldová, so me sómas god'varedyr saré džidendyr, ne vaš dová, sob (kaj) te javél sykado sunoskiri znáčyma kralíske, i, sob (kaj) tu ĥalyjan dúmy tyré iléskire. Túke, králjo, sys dasavo dykhibén: ake, savó-to baró vyčhindlo muj idolo! Drieván baró sys odová idolo, léskiri šuk drieván ziainelas, jov sys terdó angíl túte, i darany sys léskiri forma. Dro dová idolo sys šeró žužé suvnakástyr, kolýn i vastá léskire-rupuvé, per léskiro i stacia (bjodry) léskire-xarkuné (miedítka), lytki léskire-sastruné, ĥerá léskire-paš sastruné, paš-glejana (glinytka). Tu dykhcián les angíl dová momiento, syr kokoró bar otkusciape bergátyr na čilado vastésa, pekadiá dro idolo, dre sastruné i glejana léskire ĥerá, i rozmardiá len pe koterá (kuski). Tén'ci saró sys pirimardo pe jekh tykné koterore: sastýr, ĥleja, xarkóma, rup i suvnakáj kerdépe syr o práho pe lynaskire givá-obkeribnaskire šurny, i balvál lydžijá krig len, i špéra (sliado) léndyr na jaciápe; i bar, kaj pharadia idolo, kerdiápe baré bergasa i pherdija sarí phuv. Ake, isyn sunó! Phenasam akaná angíl kralíste i léskiro ĥalyibén. Tu, králjo, san kral'jengiro králi, savéske o Devél bolybnáskiro dyjá o kralipén, zor, zoralypén i sláva, i sarén čhavén manušengiren, kaj by jone te na dživén, e riskiribnáskire murdalén (zvierien) pe phuv i čiriklien pe bolybén, otdyjá dre tyré vastá i čhudiá tut xulása uprál sarénde lénde. Tu san – davá suvnakunó šeró! Ne paló túte ĥazdélape javír kralipén, teledýr tyrestyr, i iščo (inké) tríto kralipén, xarkuno, savó léla te rainel pe sarí phuv. A štárto kralipén javéla zoraló, syr sastýr, pal-dová so, syr sastýr rozmarela i keréla xurdedyr (drobnedyr) saró, adiáke i jov, javéla te pharavel i te rozmarel pe koterá. Ne dová, so tu dykhcián-ĥerá i angušta ĥerengire nábut piritkone glejatyr, nábut sastruné, to adiáke javéla roskerdo kralipén, i dre léste jačélape nábut sastruno zoralypén, adiáke syr tu dykhcián sastýr, zmiešyme melale ĥlejasa. I syr 'gerengire angušta sys paš-sastruné, paš-glejana, to adiáke o kralipén javéla paš zoraló, paš bizorjákiro. I so tu dykhcián sastýr, zmiešymo glejasa melaliasa, davá sykavéla, so jone javéna te zmiešynenpe manušéngire rodenca, ne jone na prityrdenape jekh javiresa, syr sastýr na miešynelape ĥlejasa. I dro dyvesá kodolé kralipnaskire o Devél Bolybnáskiro čhuvéla kralipén, savó dro viéki na phadjola, i kodová kralipén na javéla piridyno javire narodoske; jov pharavela i phagiréla saré kralipená, i jov kokoró javéla te terdjol dro viéki, adiáke, syr tu dykhcián, so bar kusciape bergátyr sýrby načilade vastésa, savó rozmardiá pe tykné kotorore sastýr, xarkóma, ĥleja, rup i suvnakáj – adiáke Baró Devél dyjá te džinél kralíske, so javéla paló saró davá. Čačunó isyn davá sunó, i patiaibnýtko isyn znáčyma!” Tén'ci králi Navuhodonosóro dyjape muial péske i bandija angíl Danijeljoste, i priphendiá te janén léske počastúnki (dáry), i te thuvliakiren drogoné smolenca léske. I otphendiá i rakirdiá o králi Danijeljoske: “Čačes, tumaró Devél isyn Devél devlengiro i Baró Raj kral'jengiro, Savó otkerela garadé čačipená, kiéli tu dyján ráda te otkeres davá garadó čačipén!” Tén'ci ĥazdyjá upré o králi Danijeljos i dyjá léske but baré počastúnki, i čhudiá les upré pe sarí Vavilonytko phuv i anglune barydyrésa upré sarénde godypnaskirende dro Vavilóno. Ne Danijéljo mangdiá kralís, i jov čhudiá Šedrahos, Mišahos i Avied-Niegos upré pe réndy Vavilonytkone-theméskire, i o Danijéljo jaciápe pašýl kralískiri gréda (dvóro). O králi Navuhodonosóro kerdiá idoloskiro muj (statula) suvnakástyr vučipnása šovdešá kuniá (logti), šov kuniá buĥlypnasa i čhudiá les pe félda Dieir, davá dre Vavilonytkone – themeskiri provincyja. I bičhavelas o králi Navuhodonosóro te skedel satrapen, štetoskire barydyrén (namiestniken), šeralé ran, sovietniken (junkaren), rakhibnaskiren pe kučipén (sokroviščo), sendar'jen, šeratune sendar'jen, i sarén barydyrén provincyjakiren, sob (kaj) jone te javén pe vysvencynybnaskiro momiento vaš idolo, savó čhudiá o králi Navuhodonosóro. I skedynépe e satrapy, léngire štetoskire barydyrá, šeralé raja, junkary, rakhibnaskire pe piralý vaš kazna, sendárja, šeratune sendárja, i saré barydyrá pir okruga pe vysvencynybnaskiro vaš idoloske, i jone terdiné angíl idolo, savó čhudiá o Navuhodonosóro. Tén'ci o nevipe-phenybnaskiro (glašatajo) zadyja gódla: “Te phenélape tuménge, e manušýtka nácyi (narody), kherítka ródy (pliémi) i jekhe-čibakire irjá (čibá/ čibjá), so dro dová časo, syr tumé šunéna zan (glos) rogoskiri (trubakiri), svirol'kakiri, lutakiri, gusliengiri, psaltirjakiri, cymbalengiri i saré javír-muzykakiri, sob (kaj) tumé te perén telé i te den patýv suvnakuné idoloske, savés čhudiá o králi Navuhodonosóro; i kon na peréla telé, i na déla patýv, to jekhátyr (srázu) javéla čhurdynó dro bov, roshačkirdo jagása.” Paldavá, kiéli saré manušá šundlé zan rogoskiri, svirol'kakiri, lutakiri, gusliengiri, psaltirjakiri i saré javír-muzykakiri, to pyné saré manušýtka nácyi, kherítka ródy, jekhe-čibakire irjá (čibá/ čibjá), i dyné patýv suvnakuné idoloske, savó čhudiá o Navuhodonosóro králi. Paldavá dro dasavo časo podginé vari-savé Xaldiejendyr i dophendle pe Judénde. Jone phendlé kralíske Navuhodonosoroske: “Dživ dre veki, o králjo! Tu, králjo, dyján priphenybnytko statúto, sob (kaj) kažno manúš, kon šunéla zan rogoskiri, svirol'kakiri, lutakiri, gusliengiri, psaltirjakiri, cymbalengiri i saré javír-muzykakiri, te perél odová manúš telé, i te del patýv suvnakuné idoloske; i kon na pyjá telé i na dyjá patýv, mek te javél čhurdynó dro bov roshačkirdo jagása. Ne muršá Judytka, savén tu čhudián uprál pe réndy Vavilonytkone-theméskire: Šedraho, Miešaho i Avied-Niego; kodolé muršá na kandyné tyró priphenybén, o králjo, jone na dynarinena tyré devlorénge i na déna patýv suvnakuné moske (idoloske), savó Tu čhudián.” Tén'ci Navuhodonosóro dre xolý i dro mižehipen phendiá te janén Šedrahos, Miešahos i Avied-Niegos. I jandlé odolé muršén ke králi. O Navuhodonosóro phendiá lénge: “Ci isyn čačó davá, so tumé, o Šedraho, Mešaho i Avied-Niego, na dynarinena miré devlenge, i na déna patýv suvnakuné moske, savó Me čhudjom? Akaná, kóli tumé skedyné san, syr sygo tumé šunéna zan rogoskiri, svirol'kakiri, lutakiri, gusliengiri, psaltirjakiri, cymbalengiri i saré javír-muzykakiri, te perén tumé telé, i te den tumé patýv suvnakuné moske, so me kerdjom. Mištó. Ne kóli tumé na déna patýv, to tumen jekhátyr (srázu) čhurdena dro bov, roshačkirdo jagása. I savó devel ža zrakhéla tumen miré vastéstyr?” I otphendlé Šedraho, Mešaho, Avied-Niego i rakirdé e kralíske Navuhodonosoroske: “Ame na sam bangé te otphenas túke pe davá. Amaró Devél, Savéske ame dynarinás, isyn zoraló i zrakhéla amen bovestyr, roshačkirde jagása, i tyré vastéstyr, o králjo, Jov zrakhéla. Kóli te na javél dová, to javéla túke ĥalyno, o králi, so tyré devlenge ame na lasam te dynarinás i suvnakuné moske (idoloske), savó tu čhudián, te na bandiakirasape.” Tén'ci o Navuhodonosóro pherdija xoliása, e mina moskiri léste parudiape pe Šedrahoste, Miešahoste i Avied-Niegoste, so jov zamangdia te xačkirén bov dro eftá (bitrinéngiro deš) móly zoraledýr, syr ĥaredyr roshačkirenas les, a samone zoralé muršenge péskre xaladendyr priphendiá te phanden Šedrahos, Miešahos, i Avied-Niegos i te čhurdén len dro bov roshačkirde jagása.” Tén'ci sys phandle sys adalé muršá dro telatuno i upratuno uribén léngiro, dre šereskire tiurbany i dre javír léngiro uribén, i sys čhurdyné andro bov, roshačkirdo jagása. I syr zorjása sys kralískiro priphenybén, i bov sys roshačkirdo sys drieván, paro jagakiro zamardiá odolé manušén, savé čhurdenas Šedrahos, Miešahos i Avied-Niegos. A kadalé trin muršá, Šedraho, Miešaho i Avied-Niego, pyné phandle dro bov roshačkirde jagása. O králi Navuhodonosóro divindiape i uštyi sygo, phendiá sendar'jenge peskirenge: “Ame čhurdasas trinen manušén sphandlen dro jag? Jone otphendlé o kralíske: “Adiáke čačó, o králjo! Pe kadavá jov rakírla: “Ake, me dykháva štaren nasphandlen muršén, savé psirna maškirál jag, nane lénge doš; e mina štartoneskiri poddžála syr Devlikane Čhaveskiri.” Tén'ci podgíia o Navuhodonosóro ke jagóro (krajo) boveskiro, savó sys roshačkirdo jagása, i phendiá: “Šedraho, Miešaho i Avied-Niego, pishárja Devléskire Naj Vučedyreskire! Džán javrí i javén pašyledýr!” Tén'ci Šedraho, Miešaho i Avied-Niego vyginé andrestyr jagatyr. I skedynépe satrapy, e štetoskire barydyrá, e šeralé raja xeladengire, i sendárja kralískire, i dykhné, so muršengire masá jag na čiladiá, balá na obhačine pe šeré, uribén na parudiape, i nisavó pohtan xačkirdo léndyr na khandelas. Tén'ci Navuhodonosóro phendiá: “Bahtiakirdó te javél o Devél Šedrahoskiro, i Miešahoskiro i Avied-Niegoskiro, Savó bičhadiá Jangolós Péskires, i zrakhciá pishar'jén Peskiren, savé rikirde patiaibén dre Léste i na kandenas o priphenybén kralískiro, i otdyné léngire masá jagake, sob (kaj) te na dynarinén i te na bandiakirenpe nisave devleske, apríč léngire Devléste! I mándyr délape priphenybén, sob (kaj) kažnoné nacyjatyr, kheritkoné rodóstyr i jekhe-čibakire irjatyr (čibatyr / čibjatyr), kon phenéla nálačho lav pe Devléste Šedrahoskire, Miešahoskireste i Avied-Niegoskireste, te javél kodová manúš čingirdo pe koterá, i kher léskiro te kerdjolpe dre ruíny, pal-dová so nane javire Devlés, Savó adiáke saštý te zrakhél.” Tén'ci o králi ĥazdyjá upredyr Šedrahos, Miešahos i Avied-Niegos dro Vavilonytko them. [4.1-ju.o.] O Navuhodonosóro králi saré manušytkoné nacyiénge, kheritkoné rodénge i jekhe-čibakire ir'jenge (čibenge/ čib'jenge), kon dživéla pe sarí phuv: “Te javél butedýr ramánjo (miro) tuménge! [4.2] ‘Giertyka (znamiénii) i dívy, savé kerdiá uprál mánde Naj Vučedyreskiro Devél, saštý te phenáv me tuménge. [4.3] So syr baré Léskire ĥiertyká i syr zoralé isyn Léskire dívy! O Kralipén Léskiro – kralipén viéčno, i zoralypén Léskiro – rodóstyr dro ródo.” [4] Me, Navuhodonosóro, sómas dro miro kher i bahtalé sys dyvesá dre xaromy dre mirí bari felatin (kolov). [5] Ne me dykhcjom suné, savó trašakirdia man, i godypena miré pe miro čhuibén i dykhibena miré šereskire kerdé mánge pharés. [6] Sys dynó uphenybén mándyr te janén sarén godypnaskiren Vavilonóstyr, sob (kaj) jone te piriphenen mánge, pal so sys dová sunó. [7] Tén'ci javné e čovahane, e astrologi, e Xaldiei i e drabakiribnaskire pir planiety; i me rosphendjom lénge sunó, ne jone na dyné ráda te rozĥaljon léskiri znáčyma. [8] Ne dro kónco (jagóro) zagijá ke me o Danijéljo, savéske lav sys Valtasaro, piró miré-devlýtko lav, i dre savéste sys Dúho (Fáno) sventoné Devléskiro; léske rosphendjom me sunó. [9] Valtasarie, šeraló čovahanengiro! Me džinóm, so andrál túte isyn Dúho (Fáno) sventoné Devléskiro, i nisavó garadó čačipén vaš túke isyn na pharó; piriphen mánge o dykhibén miré suneskiro, savó me dykhcjom, i léskiri znáčyma. [10] O dykhibén miré šereskiro, savó me dykhávas pe miro čhuibén sys dasavo: me dykhávas, ake, maškír phuv kašt (drévo) vučó. [11] Baró sys kašt davá i sastó, vučipén léskiro dolydžalas ke / žýko / bolybén, i jov dykhno sys ke saré phuvjákire jagóry (kraí). [12] Patria (listy) léste sys šukár, i phabá pe léste sys but, xabén pe léste vaš sarénge, tel léste lathenas e zer (tien') feldýtka murdalá (zvieri), pe randiá (vétki) léskire sys gniázdy (kúfy) bolybnáskire čiriklengire, i léstyr čalo sys kažno loč (plot'). [13] I dykhávas me dro dykhibén miré šereskiro pe čhuibén miro, i, ake, gijá telé bolybnástyr Svénto Rakhibnari (Jangólo) [14] Zoralés Jov godliakirdia, i phendiá: “Čingiren davá kašt, občhinen randiá (vétki) léskire, i trinskiren léskire patria (listy), rosčhurden léskire phabá; mek te durjon riskiribnáskire murdalá (zvieri), so isyn tel léste i čirikliá leskre randiendyr; [15] jačkiren léskiro pienjo (kopiči) pe kórni (rukhá) dre phuv, mek jone te jačénpe dre pienty sastruné i xarkuné maškirál čar pe félda te obmorenpe bolybnáskire pahlyniasa (rosasa), i murdalénca mek te javél léskiri paš dre phuvjákiri čar. [16] I mek iló manušéskiro te otlelpe léstyr i te delpe léske o iló riskiribnáskire murdaleskiro (zvierjoskiro), i te džán (nakhen) uprál léste eftá časy (cyry). [17] Rakhibnar'jengire uphenybnasa kadavá sys kerdó, i pir lav dro prirakiriben Sventonengiro sys sykado, sob (kaj) te džinén saré džindlé, so Naj Vučedyreskiro isyn xuláj uprál manušéngiro kralipén, i Jov déla les, kon isyn drógo Léske, i čhuvéla upré lénde teliakirdes maškír manušénde.” [18] Dasavé suné dykhávas me, o Navuhodonosóro, králi; i tu san, Valtasarie, phen mánge léskiri znáčyma, adiáke syr nikón čovahanendyr dro miro kralipén na dyjá ráda te piriphenel léskiri znáčyma, i tu, xaj, moginésa (saštynesa), pal-dová so Dúho (Fáno) Sventoné Devléskiro isyn dre túte.” [19] Tén'ci Danijéljo, savés khardé Valtasaro, pašýl jekh mardó (štúnda) sys divindlo, léskire dúmy kerdé léske smentnyma. O králi lyjá te rakirél i phendiá: “Valtasáre! Mek te na smentinel tut davá sunó i léskiri znáčyma.” O Valtasaro otphendiá i phendiá: “Rajo miro! Mek te javél dová sunó tyré vergénge, i tyré namalenge léskiri znáčyma! [20] Kašt (drévo), savó tu dykhcián, savó sys baró i sastó vučipnása, i sys ke bolybén i dykhno sys pe sarí phuv, [21] pe savó patria (listy) sys šukár i but sys phabá i xabén vaš sarénge, tel savó dživénas murdalá feldýtka i dre saveskire randiá čirikliá bolybnýtka kerdé gniázdy (kúfy), [22] adavá san tu, králjo, vučó i zoraló, i baripén tyró vybarija i doresciá ke bolybén, i rajkanypen – ke phuvjákire jagóry. [23] I dová, so králi dykhciá Rakhibnaris i Jangolós, kon zdžalas bolybnástyr, Savó phendiá: “Čingiren kašt i xasiakirén les, féni kórni (rukhá) léskire mek te jačénpe dre phuv i te javél jov dre penty sastruné i xarkuné (miedítka), maškír feldakiri čar, te morelape e pahlyniasa (rosasa) bolybnástyr, i feldytkone murdalénca (zvierienca), mek te javél léskiri paš, ke dová, syr te džán duredýr eftá (bitrinéngiro deš) časo uprál léste.” [24] Ake, znáčyma kadaleskiri, králjo, i ake, uphenybén Vučipnaskireskiro, savó peréla pe miré raste, kralíste: [25] tradéna krig tut manušéndyr, i džiibén tyró javéla feldytkone murdalénca; čaravena tut čarjasa, syr guruvés, tu javésa mordo bolybnytkone pahlyniasa (rosasa), i eftá časy džána duredýr uprál túte, ke/ žýko dová, syr tu ĥaljosa, so Sámo Vučedýr xulainela uprál kralipén manušéngiro i déla les, kon Léske trej. [26] A so priphendlo sys te jačkiren pienjo (kopíči) pe kórni (rukhá) kašteskire, davá značynéla, so kralipén tyró jačélape pašýl túte, kiéli te ĥaljosa, so bolybén xulainela. [27] Paldavá, králjo, te javél mištó lynó túke miro godypén: žužakir tyré gréhi čačipnása i bizakonytka réndy tyré-iléskire milymasa ke čororé; ake, sósa saštý (možna) te javél dlengedyr tyró ramánjo (miro)!” [28] I saró dová kerdiápe pe kralíste Navuhodonosoroste. [29] Syr giné (nakhle) dešudúj čhoná, psirindoj pirí bari felatin (kolóv) kralískiro dro Vavilóno, [30] o králi phendiá: “Hači, nane ci davá rangiro Vavilóno, savó me čhudjom syr kher kralískiro miré zorjása ke baripén i vaš patýv miré rajkanypnaskiri!” [31] I iščo (inké) sys dro vušta kralískire, syr sys zan bolybnástyr: “Túke rakirlape, králjo Navuhodonosóro: tyró kralipén otgijá tútyr! [32] I tradéna krig tut manušéndyr, i javéla džiibén tyró feldytkone murdalénca; čarjasa léna tut te čaraven, syr guruvés, i džána iščo (inké) eftá časy pe túte, ke/ žýko dová, syr tu ĥaljosa, so Sámo Vučedýr xulainela uprál manušýtko kralipén i déla les, kon Léske trej.” [33] Pe štéto kerdiápe davá lav pe Navuhodonosoroste, i jov sys tradyno krig manušéndyr, xaja čar, syr guruv, morde sys léskiro masá e bolybnytkone pahlyniasa (rosasa) adiáke, so vybarine léskire balá syr pora kidoste (orloste), i naja sys syr čirikleskire naja (kogci). [34] Pe kónco (jagóro) kodolé-pac' dyvesengire, me, o Navuhodonosóro, ĥazdyjom miré jakhá pe bolybén, i mirí godý risijá ke me; bahtiakirdjomas me Naj Vučedyreskires, šardjom i me davas patýv léske, Saveskiro rajkanypen isyn viéčno, i Saveskiro kralipén – rodóstyr dro ródo. [35] I saré, kon dživéla pe phuv, ničí namol; pir Léskiri vólia Jov keréla, so Léske trej, syr dro bolybnytko xaladybén, adiáke i pe džidengirende pe phuv; nane nikón, kon saštý te obrikirel Léskiro vast i te phenél Léske: “Tu so kerdián?” [36] Dro dová časo risijá ke me mirí godý, i sláva miré-kralipnaskiri risijá ke me, raipen i ĥaratuny mirí patýv; tén'či lathné man miré sovietniki (junkary) i thagárja (kniázi) miré, i me sómas pale čhudo pe miro kralipén, i miro rajkanypen iščo (inké) butýr ĥazdyjápe vučedýr. [37] Akaná me som, o Navuhodonosóro, šarava, ĥazdáva i patyvakirava Kralís Bolybnaskires, Saveskire réndy saré isyn čačuné i dromá čačipnaskire, i Savó zoraló isyn, sob (kaj) te čhuvél telé kodolén, savé psiréna phut'kiribnasa. O Valtasaro králi kerdiá baró skamínd vaš péskire tysjoncenge i angíl tysjoncengire jakhá pija mol (vino). Koštyi mol, o Valtasaro priphendiá te janén suvnakuné i rupuvé khoré (sasúdy), savé Navuhodonosóro, léskiro dad, vylydžijá Jerusalimóskire Khangirjátyr, sob (kaj) te p'jel léndyr kralíske, leskre range, léskire džuvlienge i léskire-bisovlahakire džuvlienge. Tén'ci jandlé suvnakuné khoré, savé sys lyné sventoné Devlikane Khangirjátyr dro Jerusalimo; i piné léndyr o králi i thagárja léskire, e džuvliá léskire i léskire-bisovlahakire džuvliá. Piné mol, slavindle develá (devloren), suvnakuné, rupune, xarkuné, sastruné, kaštune i baruné. Dre kodoia-pac' mardó (štúnda) vyginé angušta (pal'cy) manušytkoné-vasteskire i čhindlé proti lampada pe zvjoska pe parniakirdy vánta dre felatin (kolov) kralískiri, i o králi dykhciá burnyk (kist') vastytko, saví čhinelas. Tén'ci kralískiro muj parudiape dre léskiri mina; e dúmy léskire pharjakirde les adiáke, saré trušula (čriesly) našade zor, čangá léskire lyné te marénpe jekh pir javír. Zoralés zadyja godly o králi, sob (kaj) te janén kalé-magitkonen, e Xaldiejen, i e drabakiribnaskiren pe planiety. O králi lyjá te rakirél, i phendiá godypnaskirenge dro Vavilóno: “Kon ginéla, so davá čhindló isyn i piriphenela mánge, kodová javéla uridó dro loló phar, i suvnakuný zandir (cepka) javéla pe léskiri men, i tritonesa barydyrésa javéla jov pe lydžino them dro kralipén.” I zaginé saré kralitka godypnaskire, ne na dyné ráda te proginen čhindló i te piriphenen kralíske znáčyma léskire sunestyr. O králi Valtasaro sys drieván darano; e mina moskiri léste parudiape; léskire thagárja (kniázi) sys smentna. Králica, xači, pe kralískire lavá i rangire péskire, zagijá dre štúba xabnaskiri, lyjá te rakirél kralísa i phendiá: “Králjo, te dživés tu dre viéki! Mek te na ladžakiren tut tyré mysli, mek te na parudjol mina pe tyró muj! Isyn dro tyró kralipén o murš, savéste isyn Dúho (Fáno) sventoné Devlengiro; dro dyvesá tyré dadéskire sys lathno dre léste dud, godý i ĥalyibén, savé sys syr devlýtko god'varipen, i o králi Navuhodonosóro, tyró dad, čhudiá les barydyrésa pe čovahane-podphenybnaskirende, pe kalé-magitkonende, pe Xaldiejende, pe čovahanende i pe drabakiribnaskirende pe planiety, pal-dová so dre léste, dre Danijeljoste, savés o králi pirikhardia dre Valtasaroste, sys vučó dúho (fáno), džinybén i godý, te piriphenel suné, te rozlel šerepharibnytka zadyibena (te piriphenel dová, kaj isyn ĥarado ĥalyibén) i te rosčhuvel venzly. Adiáke mek te kharén Danijeljos, i te piriphenel jov túke znáčyma.” Tén'ci sys jandlo Danijéljo angíl kralíste, i o králi lyjá te phenél i rakirdiá Danijeljoske: “Ci san tu o Danijéljo, jekh pliennone Judytkone čhavéndyr, savén miro dad, o králi jandiá Judejátyr? Me šunavas pal túte, so Dúho (Fáno) Devléskiro isyn dre túte i dud (svéto), i godý, i vučó ĥalyibén lathno dre túte. Ake, sys lydžiné sys ke me godypnaskire i kalé-magitka, sob (kaj) te proginen dasavo čhinybén i te rosphenén mánge znáčyma suneskiri; ne jone na dyné ráda te ĥaljon vaš mánge dová. I me šundjom pal túte, so tu moginésa te piriphenes znáčyma i te roskhuves venzly; adiáke, kiéli tu désa ráda te progines davá čhindló i te ĥaljos vaš mánge léskiri znáčyma, to tu javésa uridó dro loló phar, i suvnakuný zandir (cepka) javéla pe men túte, tritone barydyrésa javésa dro kralipén.” Tedy otphendiá Danijéljo, i phendiá kralíske: “Počastunki tyré mek te jačénpe túte, i mazurja (počesti) otdé javireske; čhindló me proginava kralíske i rosphenava znáčyma léskiri. Králjo! Sámo Vučedýr Devél dyjá tyré dadéske Navuhodonosoroske kralipén, baripén, rajkanypen i patýv. Angíl rajkanypen, savó Jov dyjá léske, saré manušýtka nácyi (narody), kherítka ródy (pliémi) i jekhe-čibakire irjá (čibá/ čibjá) (jazyki) izdrandyne i darándyne léstyr; kon sys na trej léske, kodolés jov zamarelas, i kon sys trej léske, jov jačkirdiá te dživél; konés vykedyjá, to čhudiá vučés, konés jov vykedyjá, odolés čhudiá telé. Ne kiéli léskiro iló jaciá barikano i dúho (fáno) léskiro kaštalyja phut'kiribnasa, jov sys čhurdynó telé kralískire skamindestyr, i léskiro baripén sys lynó léstyr. Tén'ci jov sys manušéngire čhavéndyr, i iló léskiro kerdiápe syr riskiribnáskire murdaléste, i sys tradyno krig jov xrustytkone oslenca te dživél. Les čarade čarjasa, syr guruvés, i masá léskire sapane sys bolybnytkone pahlyniasa (rosasa), ke/ žýko dová, syr jov ĥalyjá, so upredyr manušytkoné kralipnastyr isyn xuláj Naj Vučedyreskiro Devél i Jov čhuvéla upré, konés Jov vykedéla. I tu san, léskiro čhavó Valtasaro, na tykniakirdian phut'kiribén tyró, na dykhí, so tu džinesas pal saró dová, ne tu ĥazdyjanpe proti Raste-Devléste bolybnaskireste i khoré (sasúdy) Léskire kheréstyr lydžiné ke tu i tu i tyré thagárja, e džuvliá tyré i bisovlahire džuvliá tyré piné léndyr mol (vino) i tu šardian devloren rupéstyr i suvnakástyr, xarkomátyr (miediatyr), sastyrestyr, kaštéstyr i e barestyr, savé na dykhéna, na šunéna, na ĥaljona; a Devlés, dre Konéskiro vast isyn tyré phurdypen (dyhinyben) i Konéste isyn saré dromá tyré, Odolés tu na barjakirdian. Paldavá bičhady Léstyr e burnyk (kist') vastytko, i čhindló sys dová čhinybén. Ake, so isyn čhindló: mienie, tiekiel, uparsin. Ake, i znáčyma lavengiri: mienie – vygindiá o Devél tyró kralipén i čhudiá léske kónco (jagóro); Tiekiel – tu važyndlo san pe ubladýtka (viesy) i tu san drieván lokho; Pieries – rosčhudo pe pašá tyró kralipén i otdynó Midianenge i o Piersenge.” Tén'ci piró priphenybén Valtasaroskiro uridé Danijeljos dro loló phar i čhudé suvnakuný zandir (ciep') pe léskiri men, i khardé angíl sarénde les tritone barydyrésa pir kralipén. Dre kodoia rat, xači, o Valtasaro, Xaldiejengiro králi, sys zamardo, i o Darijo Midianengiro, prilyjá kralipén, i sys léske šovdešá duj berš. Pir iló sys Darijoske te čhuvél upré pe kralipén šel te biš e satrapen, sob (kaj) jone te javén pir saró kralipén, i uprál lénde trinen theméskire barydyrén – savéndyr jekh sys o Danijéljo, sob (kaj) jone satrapy dénas lénge otphenybén, i, sob (kaj) kralíske te na javél ni savó pharipén. Danijéljo sys čhudo baredýr sarén javire i satrapendyr i thagad'jendyr i pal-dová so sys dre léste vučó dúho (fáno), to o králi myslinelas, sob (kaj) te čhuvél les upraledyr pir saró kralipén. Tén'ci e thagárja i satrapy lyné te rodén vari-saví bang, sob (kaj) te došakiren Danijeljos dro xulaiben kralipnaskiro; ne nisaví bang (doš) na mogindlé te lathén, pal-dová so jov sys čačipnáskiro, nisavó promekiben (pogrieho) i doš dre léste na lathiape. I kodolé manušá phendlé: “Ame na lathasam bang pe Danijeljoste, kóli ame te na lathasam vari-so proti léste dro Zakóno léskire Devléskiro.” Adiáke, so adalé thagárja i satrapy podginé ke králi i adiáke léske phendlé: “Králjo Darijo! Jav džidó pe viéki! Saré thagárja kralipnaskire, e barydyrá štetytka, e satrapy, e junkary i barydyrá xaladéngire dorakirdepe maškír lénde, sob (kaj) te vyden kralítko statúto i te den zoraló uphenybén, sob (kaj) kóli vari-kon dre dalé trijánda dyvesá léla te mangélpe var-savé javire devleske ci manušéske, apríč túte, králjo, kodolés te čhurdén dro rovo (xohói) ščerengiro (lievengiro). Adiáke, králjo, de zor pe dasavo statúto i podčhin zaphenyben, sob (kaj) te na paruven les, syr Zakóno Midianytko i Piersytko, sob (kaj) jov te na javél phagirdó.” O králi Darijo podčhindia statúto i dasavo phenybén. O Danijéljo, xači, ĥalyí, so sys podčhindlo dasavo zaphenyben, gijá dro péskiro kher; e fenštra, xaj, dre upratuny štúba sys psirady (otphendly) angíl Jerusalimo, i jov trin móly dro dyvés bandgiakirdia čangá, i mangdiápe péskire Devléske, i bahtiakirelas Les, syr kerélas jov davá i angíl dová. Tén'ci e manušá odolé skedynépe i lathné Danijeljos, so jov phenelas patierja (molitvy) i mangipén angíl péskire Devléste, i jone javné i dophendle kralíske pal kralítko uphenybén: “Ci na tu, xači, podčhindian o statúto, sob (kaj) kažnoné manušés, savó pal trijánda dyvesá léla te mangélpe vari-savé javire devleske ci manušéske, apríč túte, o králjo, te čhurdén dro rovo (xohói) ščerengiro? O králi otphenéla i phenéla: “Davá lav isyn sastó, o Zakóno Midianytko i Piersytko, naštý te paruven.” Paló dová jone otphendlé i rakirdé kralíske: “Kadavá Danijéljo, savó isyn plienone Judytkone manušéndyr, na sykavéla patýv ni pe túte, králjo, ni pe uphenybén, savó sys podčhindlo túsa, ne trin móly pe dyvés jov mangelape péskire patier'jenca (molitvenca).” O králi, šuny davá, drieván pyjá dro dúho (fáno) i čhudiá dro iló péskiro te zrakhél Danijeljos, i ke/žýko khameskiro pasiben zoralés pričhuvelas zor te vyrakhel les. Ne odolé manušá podginé ke králi i phendlé léske: “Džin, králjo, pir Zakóno Midianytko i Piersytko nisavó uphenybén ci statúto, so zorjakirdia králi, te na javél parudo.” Adiáke, o králi priphendiá, i jandlé Danijeljos, i čhurdyné les dro ščerengiro rovo (xohói); pašýl o králi phendiá Danijeljoske: “Tyró Devél, Savéske tu san naparundlo dynári, Jov tut zrakhéla!” Tén'ci sys lydžino sys bar i čhudo pe štéto, kaj zadžána dro rovo (xohói), i králi piečatyndia les péskre angrustiasa čergenorjasa, i angrustiasa čergenorjasa péskre thagar'jengirjasa, sob (kaj) nisó te na parudjol dro priphenybén pal Danijeljoste. Paló dová gijá o králi dre péskiri bari felatin/kolov (dvorco), pasijá te sovél, postinyi sarí rat, i až na zaphendia muzyka, i sunó prastalas léstyr. Tasiárles (pe zlóko) uštyjá o králi, kiéli dyvesjola i sýges gijá ke ščerengiro rovo (xohói), i, podgii ko rovo (xohói), sanore zaniása khardiá Danijeljos, i phendiá králi Danijeljoske: “Danijélie, o pishári, džidé Devléskiro! Tyró Devél, Savéske tu naparundles dynarinesa, mogindiá (saštyndia) te zrakhél tut ščerendyr?” Tén'ci Danijéljo phendiá Kralíske: “Te dživél o králi pe saré viéki.” O Devél miro bičhadiá Péskires Jangolós i zagaradia ščerengiro muj, i jone ničí na kerdé mánge, paldavá i me som angíl Léste žužó, i angíl túte, králjo, me na keravas namištes.” Tén'ci o králi but radyndiape pal léste i priphendiá te ĥazdén Danijeljos rovostyr; sys ĥazdynó Danijéljo rovostyr, nisaví doš na sys léste, pal-dová so jov patialas dro péskire Devléste. I dyjá o králi, i sys lydžiné ke jov odolé manušá, savé bangiakirde Danijeljos, i jone sys čhurdyné dro ščerengiro rovo (xohói), syr kokoré, adiáke-pac' léngire čhavoré i léngire džuvliá; na doginé jone ke rovoskiro dno (dugno), syr xané len ščerá (lievy) i phagirdé léngire kokalý. Paló dová o králi Darijo čhindiá saré manušytkoné nacyiénge, kheritkoné rodénge i jekhe-čibakire ir'jenge (čibenge/ čib'jenge) (jazykenge), savé dživdé pe sarí phuv: “Ramánjo (miro) tuménge mek te barjol!” Mándyr délape priphenybén, sob (kaj) dre kažno rig miré kralipnaskiri, manušá te izdran i te den patýv ke dar angíl Danijeljoskire Devléste, pal-dová so Jov isyn Devél džidó i viéčno, o Kralipén Léskiro na pharadjola, i Léskire rajkanypnaskiro kralipén – pe saré viéki. Jov zrakhéla i podela vast bidatyr, keréla znamiénii (ĥiertyká) i dívy pe bolybén, i pe phuv; Jov zrakhciá Danijeljos ščerengire zorjátyr.” I sys Danijeljoske drieván mištó i dro kralipén Darijoskiro, i dro kralipén Kiraskiro, Piersoskiro. Pe pérvo berš Valtasaroskiro, Vavilonytkone-Kralískiro, Danijéljo dykhciá (dyjá) suné i prorokéngire (proročýtka) dykhibena péskre šerestyr, kiéli jov sys pe péskiro čhuibén. Tén'ci jov začhindiá dová sunó, rospheni pervoné lavá. Lyi te phenél, o Danijéljo rakirdiá: “Dykhávas me dro miro sunó, ake, štar bolybnýtka balvalia mardépe pe baró mórjo (derjáv), i štar baré riskiribnáskire murdalá (zvieri) vyginé e morjostyr (derjavestyr), savé na zdenas (na poddžanas) jekh pe javiréste. Pérvo sys syr ščer (liévo), ne sys léste phaká (kryly) syr orloste (kidoste); me dykhávas džangales (pristal'nes), paka vyriskirde sys léstyr phaká, i jov sys ĥazdynó phuvjátyr, i uštyjá pe ĥerá, syr o manúš, i sys dynó léske manušýtko iló. I jekhátyr (srázu) javír riskiribnáskiro murdál, savó zdelas pe ričeste, terdijá jekhe rigátyr, i sys trin pašvare [klyki-r.s.] léste, maškír dandá léste, léske sys adiáke phendló: “Uštý, xa but mas!” Paló davá dykhávas me, ake, iščo (inké) riskiribnáskiro murdál, syr lieopardo [barso-r.s.], pe dumo léste sys štar čiriklytka phaká, i sys štar šeré murdaléste adaleste, i kadalé murdaleske sys dynó baró pravo. Paló davá dykhávas me dro ratítko dykhibén, i, ake, štárto riskiribnáskiro murdál trašado i strahano, i drieván zoraló. Léste sys baré sastruné dandá; jov xalas i phagirelas, i so jačélape, dová jov tasavela ĥerénca. Jov sys javirčano saréndyr javire murdaléndyr, i deš šyngá (rógi) sys léste. Me dykhávas pe dolé šyngá, i, ake, vygijá maškír lénde iščo (inké) nabaró šyng, i trin kodolendyr anglune šyngendyr sys korniénca vyriskirde angíl léste, ake, dro dová šyng sys jakhá, syr manušýtka jakhá, i vušta, savé rakirénas phut'kirdes. Dykhávas me džangales, ake, čhudé sys tronytka skaminda, i besciá Phurydyr, ĥaratuné-dyvesengiro (sýrby Sendári); uribén pe Léste sys parnó, syr iv, i balá pe Léskiro šeró – syr žužy výlna; skamínd Léskiro – syr čib jagitko, e róty Léskire – syr xačkirdy jag. Jagitko reka (len') vydžálas i džálas pašýl Léste; tysjoncy tysjoncendyr dynarindlé Léske, i tysjonco ke baré šelá tysjoncy angíl Léste, sendárja bešné, i roskerdepe lylvaria (knigi). Dykhávas me tén'či, so paló rangire lavá, savé phendiá šyng, odová riskiribnáskiro murdál sys muliakirdo pašýl miré jakhá, i trúpo léskiro sys pharado i otdynó pe xačiben jagakiro. I javirendyr murdaléndyr sys otlyno léngiro baró pravo, i te dživén lénge jaciápe féni (tóka) pe adákicy časo i pe sroko. Dykhávas me dro ratítko dykhibén, ake, bolybnytkone oblokénca džálas o Čhavó manušéngiro, dogijá ke Phurydyr, ĥaratuné-dyvesengiro i sys lydžino ke Jov. I Léske, Čhavéske manušengireske, sys dynó baró pravo, sláva i kralipén, sob (kaj) saré manušýtka nácyi (narody), kherítka ródy (pliémi) i jekhe-čibakire irjá (čibá/ čibjá) (jazyki) te dynarinén Léske, saró Léskiro baró pravo na prodžála pe saré viéki, i Kralipén Léskiro na pharadjola. Lyjá te pharjol miro dúho (fáno) andrál mánde, Danijeljoste, dro miré masá, i dykhibén miré šereskiro kerdiá mánge pharipén. Me podgijom pašyledýr ke jekh, savé sys terdé pašýl trony i phučavas léstyr pal čačunó smyslo sareskiro odoleskiro, i jov lyjá te rakirél mánca, i rosphendiá ĥalyibén, kaj sys phendló: “Adalé baré riskiribnáskire murdalá (zvieri), savén isyn štar, sykavéna, so štar králja uštena phuvjátyr. Ne priléna kralipén svénta manušá Naj Vučedyreskire i léna te xulainen pe davá kralipén pe viéko i pe saré viéki.” Tén'ci potyrdyjape miro iló te 'galjovav čačipén paló štartone riskiribnáskire murdaléste, savó sys javirčano javirendyr i jov sys drieván trašado, sastruné dandenca i xarkuné (mieditkoné) najenca (koĥcienca), jov xalas i phagirelas, a so jačelaspe, to dová jov ĥerénca tasavelas, i pal deš šyngá (rógi), savé sys pe leskro šeró, i paló javír, savó sys nevés vybarino, angíl savó vypyne trin, paló kadasavó šyng, dro savó sys jakhá i o vušta, savé rakirénas phut'kirdes, i savó sys pe mina baredýr saréndyr. Me dykhávas, syr dová šyng mardiápe sventonenca i pirizorjakirelas len, paka javdiá Phurydyr, ĥaratuné-dyvesengiro, i sys dynó séndo sventonenge manušénge Naj Vučedyreskirenge, i jaciá časo, sob (kaj) svénta manušá te zalen kralipén. Paló davá jov phendiá: “O riskiribnáskiro murdál štárto – štárto kralipén javéla pe phuv, javirčano saréndyr kralipnendyr, savó léla te xal sarí phuv, te tasavel i te pharavel la. A deš šyngá sykavéna, so kodolé kralipnastyr ĥazdénape deš králja, tén'či léndyr ĥazdélape javír, nane syr ĥaratuné, i léla telé péste triné kral'jén, i pe Naj Vučedyreskireste (Devléste) jov javéla te phenél šardytka lavá i te pharjakirel sventonen manušén Naj Vučedyreskiren, i jov priduminela te otphenel lénde svenkitka časy i Zakóno, i javéna jone otdyné dro léskiro vast ke / žýko časo, i ke časy, i ke paš časo. Paló (poslie) dová bešena e sendárja i otlena léstyr pravo te xasiakirél i te muliakirél ke kónco. O kralipén, i baró pravo, i kralítko baripén tel saró bolybén délape manušytkoné nacyjáke (narodoske), kaj javéna svénta Naj Vučedyreskire; Léskiro kralipén javéla pe saré viéki, a baré rajo léna te dynarinén i te kandén Les. Ake, isyn kónco laveskiro. Mánde, Danijeljoste, drieván smentna (grusna) kerdépe miré dúmy, i mina pe muj miro parudyja; ne lav me zrakhcjom dro miro iló.” Pe tríto berš kralipnaskiro, syr Valtasaro jaciá kralísa, to javdiá mánge, Danijeljoske, dykhibén paló dová, savó javdiá mánge pérvo mólo. I dykhávas me dová dykhibén, i kiéli dykhávas, me sómas dre Suza, šerutno fóro kaj sys tvárdyma/diz [kriepost'-ju.o.], kaj isyn Elamoskiri okruga, i dykhávas me dro dykhibén, sýrby me sómas pašýl reka (len') Ulaj. ‘Gazdyjom Me jakhá miré, i dykhcjom: ake, jekh bakro terdó pašýl reka (len'); léste sys duj šyngá (rógi), i šyngá sys vučé, ne jekh sys vučedýr javirestyr, i dová, so sys vučedýr, ĥazdyjápe korigedýr (pozže). Dykhávas me, syr kodová bakro pharavelas šerésa ke západno (pal-panitko) rig i ke paš-ratítko (sievierno) rig, i ke paš-dyvesýtko (južno), so nisavó riskiribnáskiro murdál (zvierjo) na sys te terdjol proti léste, i nikón na mogindiá te zrakhelpe léstyr; jov kerdiá, so sys pe godý léske, i phutjolas. I syr me pridykhavaspe ke davá, i, ake, zapadnone rigátyr džálas buzno (kozlo) pir sarí phuv, na čilavi phuv; adalé buzneste (kozloste) sys dykhno šyng maškír léskire jakhá. Jov gijá pe kodolé bakreste, savéste sys duj šyngá, savés me dykhávas, so jov sys pašýl reka (len'), i jov čhurdyjape pe léste baré léskire xoliása. I dykhávas me, syr jov buzno (kozlo), gijá pašyledýr ke bakro, rosholiasyja pe léste i pekadiá bakrés; i phagirdiá léske duj šyngá: i na sys zor bakreste te terdjol proti léste, i jov (buzno) radia les pe phuv tel ĥerá i rostasadia les, i na sys nikonés, kon délas ráda te zrakhél bakrés. Paldavá kadavá buzno rozbarijape; ne kiéli jov zoralyja, tedy phadija baró šyng, i pe léskiro štéto vyginé štar šyngá, savé sys obrisine pe štar balvalia bolybnýtka. Jekhestyr léndyr vygijá nabaró šyng (rogico), savó drieván rozbarijape ke paš-dyvesýtko (južno) rig i ke vastóko i ke šukár them, i ĥazdyjápe davá šyng ke bolybnytko xaladybén (Jangóly bolybnýtka), i čhurdyjá telé pe phuv paš bolybnytko xaladybén i čergeniá, i tasadia len, i ĥazdyjápe, xači, pe Thagariste [Kniazjoste-ju.o.] pe davá bolybnytko xaladybén, i otlyno sys Léstyr svénto janybén pe kažno dyvés, i magirdó sys štéto, kaj sventyma sys Léskiri. I davá bolybnytko xaladybén piridyno sys khetané kažnoné-dyvesengire sventoné janybnasa pal čoripén, i jov, kadavá šyng, peradoj čačipén pe phuv, kerdiá davá i udelaske léske. I tén'či šunavas me jekhores sventones, kon rakirdiá, i phendiá kadavá svénto javire vari-konéske, savó phučelas: “Pal kicý dyvesá dodžála davá dykhibén ke čačipén pal svénto janybén i, paló savó čhučakirela (pustošynela) grého, kiéli sventyma i davá xaladybén javéna tasade?” I phendiá jov mánge: “Pe duj bará (tysjoncy) trin šelá bel'velia i zloki (ranki); i tén'či žužakirelape sventyma.” I sys: “Kiéli me, Danijéljo, dykhcjom kadavá dykhibén i rodavas léskiri znáčyma; ake, uštyjá angíl mánde odová, savó vydycjolas sýrby o džino muršytko. I šunavas me zan maškirál Ulajaskire bregi, zan manušýtko, saví kharelas i phendiá: “Gabrielie! Piriphen léske davá dykhibén!” I jov podgíia pašyledýr ke štéto, kaj me terdijom, i, kiéli jov javdiá, to me strahadyjom i dyjompe muial pe phuv; i jov phendiá mánge: “Džin, o čhava manušéskiro, so dykhibén sykavéla pe kónco (pe jagóro) časo!” I kiéli jov rakirélas mánca, me bizorjákiro pasijom telé mósa pe phuv; ne jov čiladiá man i čhudiá man pe miro štéto, i phendiá: “Ake, me otkerava (sykaváva) túke, so javéla dre palatuné (posliednia) xoliakire dyvesá; pal-dová so dová dykhibén otlydžalape ke uphendló kónco pir časo. O bakro, savés tu dykhcián duje šyngenca, davá isyn králja Midianytka i Piersytka. O buzno (kozlo) balytko-králi Griecyjakiro (Balamijakiro), i šyng baró, savó maškír jakhá léste, davá isyn léngiro pérvo králi; a paló dová šyng, savó phadija, vyginé štar šyngá-davá isyn štar kralipená, so uštena adalé manušytkoné nacyjátyr (narodóstyr), ne nane léskire zorjása. Angíl kónco (jagóro) lengre kralipnaske, kiéli čoripnaskire/fuj – keribnaskire (otstupniki) dodžana ke mierka bizakonytko, to uštéla nahrato (naglo) králi i god'varó dre xohaibena; i jov zorjakirelape pe but, mek i na léskire zorjása, i jov javéla te xasiakirél saró ke dívo i sýges javéla te udelpe léske i te xasiakirél zoralen i manušýtko nacyja (narodo) sventonengiro, i pal-dová so jov javéla godó vaš xohaibén péskire frentymatyr, jov javéla te rikirél lofo dro péskiro vast, i jov péskre ilésa ĥazdélape vučés, i jov xasiakiréla buten, kon javéla dro ramánjo, i proti Thagariste-thagar'jengirende uštéla, ne javéla phagirdó na manušytkoné vastésa. O dykhibén pal bel'velia i zloki (ranki), pal savé sys dyvesá angíl phendló, isyn čačipén; ne tu garav davá dykhibén, pal-dová so jov kasynelape ke duratuné časy.” I me, Danijéljo, khinyjom, vinasvalyjom adákicy dyvesá; tén'či me uštyjom i lyjom te keráv kralitka réndy (diély); ne me divindjompe naužakirdes dalé dykhibnaske i nijékh na ĥaljolas les. Pe pérvo berš Darijoskiro, čhavéskire Asuiroskiro [Ahašvierošoskiro-ju.o.], Midianytkone rodóstyr, savó sys čhudo kralísa pe Xaldieitko kralipén, pe pérvo berš léskire kralipnaskiro, me-da, Danijéljo, ĥalyjom lylvar'jendyr čyslo (gin) beršuno, pal savó sys lav Ráskiro-Devléskiro ke proróko Jeriemiéjo, so pal eftadešá berš Jerusalimo javéla čhučó (pusto). I riskirdjom me muj miro Ráske-Devléske patierjasa i mangipnasa dro posto i dro balytko gonó praskasa. I mangdjompe me Ráske-Devléske miréske i otkeravas me iló i rakiravas: “Mangáva Tútyr, Rajo Dévla, baró i divno ke dar, Kon rakhéla zavieto i láska kodolenca, savé rikiréna Tut syr Drógima dro iló i rikirenape ke priphenybená Tyré! Kerdiám grého ame, bizakonytka réndy, kerasas bipatyvales, kerdiám búnto i otgijam Tyré priphenybnastyr i Tyré uphenybnastyr, so kandasas pishar'jén Tyrén, e prorokén, savé Tyré lavéstyr rakirdé amaré kral'jenge, i amaré thagar'jenge, i amaré dadénge, i saré manušénge dolé themestyr. Túte, Rajo, isyn čačipén, i aménde pe muiá isyn ladž; syr akaná, kažnoné Judoste, syr Jerusalimóskire džiibnaskir'jende, i ke saró Izrailjo, dre pašatunende i duranende, dre saré thema, karik Tu tradyjan len paló léngiro otgiiben, savésa jone otginé Tútyr. Rajo Dévla! Aménde ladž isyn pe muiá, amaré kral'jénde, amaré thagar'jende i amaré dadende, pal-dová so ame grého kerdiám angíl Túte. I amaré Raste-Devléste isyn láska, otmekiben grehengiro, pal-dová so ame sámas buntuítka proti Léste. I ame na kandyjam zan Ráskire-Devléskiri, amareskiri, sob (kaj) te kerás pir Léskire zakóny, savé Jov dyjá aménge pir Léskire dynar'jende, prorokénde. I saró Izrailjo phagirdiá Zakóno Tyró, i otrisija, sob (kaj) te na kandel zan Tyrí; i paldavá vythadyja pe aménde prokošybén i sovláh, savé isyn začhindlé dro Mojzáskiro Zakóno, Devlykane dynariskiro, pal-dová so ame kerdiám grého angíl Túte. I Tu pherdiakirdian Péskire lavá, savé Tu rakirdian pe aménde, i pe amaré sendar'jende, savé sendiakirenas amen, bičhavi pe aménde bari bída, saví na sys tel bolybén, i saví kerdiápe pe Jerusalimo. Syr čhindló isyn dro Mojzáskiro Zakóno, adiáke sarí kadaja bída mardia amen; ne ame na mangdiam dre pátieri (molítva) Ras-Devlés amares, sob (kaj) aménge te risjovas amaré bizakonytkone rendéndyr, i te ĥaljovas čačipén Tyró. Paldavá prirakhcia o Raj Devél kadasavi bída i bičhadiá la pe aménde; pal-dová so čačunó isyn Raj Devél amaró dro saré Léskire réndy, Save keréla, ne ame na kandyjam zan Léskiri. Akaná, Rajo Dévla amaró, Savó lydžijá Tyré manušén Jegiptóskire phuvjátyr zoralé vastésa i sykaví Tyrí sláva, syr adadyvés! Kerdiám grého ame, kerdiám napatyvales. Rajo Dévla! Piro saró Tyró čačipén, mek te risjol Tyrí xolý i Tyró baró xoliakiribén Tyré foróstyr, Jerusalimóstyr, sventoné Tyré bergátyr, pal-dová so pal amaré gréhi i bizakonytka réndy (diély) amaré dadengíre, o Jerusalimo i Tyré manušén obrakirena saré, savé isyn pašýl aménde. Akaná šun, amaró Dévla, e pátieri (molítva) tyré pishariskiri i mangipén léskiro, i, mek te ziainel Tyró muj piró čhučakirdo Tyró sventypnaskiro štéto, savó isyn čhučakirdo (pustošono) Túte, Rajo Dévla. Pričhúv, miro Dévla, kan Tyró i šun, otker Tyré jakhá i dykh pe amaré čhučipena i pe fóro, savó khardo pir lav Tyró; pal-dová so ame kedasam amaré mangipena angíl Túte, amaré čačuné réndy, ne pir Tyrí bari lačhé-ilýtkima. Rajo Dévla, šun! Primang (prostin) aménge, Rajo Dévla! Kande i ker sygedýr vaš Túke Kokoreske, Dévla miro, Tyró Lav dynó Tyré foroske i Tyré manušénge.” I kiéli me rakiravas i mangavaspe, i otkeravas iló pal miré gréhi i pal gréhi miré narodoskire Izrailjostyr, i pašliakiravas mangipén miro angíl Raste-Devléste mireste pal svénta bérga miré Devléskiri; kiéli iščo (inké) me rakiravas pátieri (molítva), o murš Gabrieljo, savés me dykhávas dro sámo anglypén dro dykhibén, sygo priurniandyja, čiladiá man, kiéli sys pašýl časo vaš bel'veliakiro svénto dyibén, i jov délas godý mánge, rakirdiá mánca i phendiá: “Danijelie! Akaná me gijom telé, sob (kaj) te sykliakirav tut te ĥaljos. Angíl, syr tyró ilytko mangipén dyjá o lav, i me javdjom te phenáv túke, so tu san murš pir iló (želanno): adiáke te ĥaljos davá lav i te ĥaljos dykhibén: eftadešá kurke sys gindlé vaš tyró narodo i tyró svénto fóro, Jerusalimo, sob (kaj) učhakirdo te javél čoripén i te končynenpe gréhi i te javén vykhosle bizakonytka réndy (bizakonii), i, sob (kaj) te javél lydžino viéčno čačipén, te javén zapiečatyme dykhibén i proróko, i te javél pomakhno Svénto-sventonengiro. Adiáke džin i ĥaljov: so dolé dyveséndyr, kiéli vydžála priphenybén te ĥazdén nevés Jerusalimo, ke/žýko o Miesija/Thagári [Hristóso, Baró Raj-r.s.] isyn eftá eftytka (sied'miny) i šovdešá duj eftytka, i ĥazdéna nevéstyr vulícy (gásy) i vánty, ne dre pharé časy. Syr prodžána šovdešá duj eftytka, to javéla otdynó pe meribén o Miesija/Thagári [Hristóso-r.s.], i na javéla Les; javír thagári léskire manušénca rosphagirena i fóro i svénto štéto, savó javéla, i kónco léstyr javéla syr da baré-tasadypnaskire paningestyr, i ke kónco maribnaskiro javéna čhučakiribena (spustošenii). Tén'ci jov čhuvéla zor pe zavieto vaš butenge pe jekh eftytko, i dre paš eftytko pirijačelape svénto janybén, i marunó svénto dyibén, i pe phak (krylo) sventoné štetoskiro javéla čhučakirdo džungalypén (brytkima) i angíl dová, syr sykadyno xasibén peréla pe čhučibnariste (spustošytieljoste).” Pe tríto berš o Kiraskiro, Piersytkone Kralískiro, sys sykado čačipén Danijeljoske, savés khardé pir lav Valtasaro; i čačunó sys davá sykadyipen i drieván zoraló. Jov ĥalyjá davá čačipén i uĥalyja dykhibén. Dre kodolé dyvesá me sómas, Danijéljo, dre túga jasvénca trin eftytka (sied'miny) dyvesá. Lačhó maró me na xavas; mas i mol (vino) na giné dre miré uštá, i makhibnasa me na khosavas man ke/žýko dová, syr pherdine (spolnindlepe) trin eftytka dyvesá. Pe biš te štárto dyvés pervoné-čhonéskiro sómas me pe brégo baré-rekakiro (leniakiro) pašýl Tigro, i ĥazdyjom me miré jakhá, i dykhcjom: ake, jekh murš, uridó dro ĥandladytko (ljonytko) uribén, i kustýk pe léste sys suvnakástyr Ufazostyr. E masá léste – syr kuč bar topazo, o muj léskiro – syr o bliskavicakiro dykhibén; léskire jakhá – syr xačkirdé jagengire (fakiely), vastá léskire i ĥerá léskire sys syr ziaindly xarkóma (mied'), i zan léskire rakiribnaskiri – syr zan buté-manušéngiri. Féni (tóka) me jekhdžinó, Danijelie, dykhávas dasavo dykhibén, e manušá, savé sys mánca, na dykhné dasavo dykhibén; ne pyjá pe lénde bari dar i jone našné, sob (kaj) te garavenpe. Paldavá jacjompe me jekhdžinó, i dykhávas me dáva baró dykhibén, ne dre mánde na jaciápe zor, mina pe miro muj drieván parudiape darátyr, na jaciápe mánde nisavó sastypen. I šundjom me zan léskire lavengiri; i féni šunavas me zan (glos) léskire lavengiri, syr kaštaluno dyjompe (zamyjom) me muial i sómas paštó telé mósa ke phuv. Ne ake, čiladiá man o vast i čhudiá man pe mre čangá i pe burnyka (ladoni) mre vastengire. I phendiá jov mánge: “Danijelie, murš pir iló! ‘Galjov lavá, savé me phenáva túke, uštý mamúj (rovnes) pe ĥerá tyré; pal-dová so me som bičhadó akaná ke tu.” Kóli jov phendiá mánge dalé lavá, to me uštyjom, izdrandoj. Ne jov phendiá mánge: “Na andyrša, Danijelie; pervoné dyveséstyr, syr tu čhudián tyró iló, sob (kaj) te doreses ĥalyibén, i te teliakires pes angíl tyré Devléste, lavá tyré sys šundlé, i me javavas pal tyré lavá. Ne thagári (kniazjo) Piersytkone kralipnastyr terdjolas proti mánde biš te jekh dyvesá; ne, ake, Miha, jekh pervoné thagar'jendyr, javdiá te del vast mánge, i me jacjompe odój pašýl Piersytka kral'jénde. Akaná me javdjom te phenáv džiný (zvies') túke, saró, so javéla tyré manušénca dre dyvesá, so javéna angíl, adiáke, syr dykhibén sykavéla pe duratuné dyvesá.” Kiéli jov rakirélas mánge dasavé lavá, me pyjom mósa ke phuv i jacjom muto (niemo). Ne, ake, vari-kon, kon zdela (poddžála) pe manušytkoné čhavéste, čiladiá miré uštá, i me otkerdjom miré uštá, lyjom te rakiráv i phendjom odoléske, so sys terdó angíl mánde: “Rajo miro! Kadalé dykhibnastyr saré bidytka tugi miré obrisine pe mánde, i na jaciá mende zor. I syr saštý te rakirél o pishári kadasavé miré ráskiro, syr me, Danijéljo, syr tu san? Pal-dová so adral mánde nane zor, i phurdypen (dyhinyben) zamyjá dre mánde.” Tén'ci nevéstyr čiladiá man odová džino, savó sys dre patrín (óbrazo) manušýtko i sastiakirdia man, i phendiá: “Na andarša, o murš pir iló! Ramánjo (miro) te javél túke; lýdža pes murškanés, jav murškanó!” I kiéli jov rakirélas mánca, me sastijom i phendjom: “Rákir, Rajo miro; pal-dová so tu sastiakirdian man.” I jov phendiá: “Ci džinésa, palsó me javdjom ke tu? Akaná me risjováva, sob (kaj) te maravpe Piersytkone thagarisa; i kiéli me vydžava, to, ake, javéla Griekítko (Balamítko) thagári. Ne angíl me phenáva túke, so isyn čhindló dro čačunó čhinybén. I nane nikón, kon podrikirelas by man dre dová, apríč Mihaste, tumaré thagariste.” Adiáke me pervoné beršestyr Midijakire Darijos jacjom me te zorjakirav les i te podrikirav les. Akaná phenáva túke čačipén: ake, iščo (inké) trin králja ĥazdénape dre Piersija; paló dová štárto králi pirizorjakirela sarén baré barvalypnasa, i, kiéli zorjakirela pes péskire barvalypnasa, to tedy jov ĥazdéla sarén proti Griekítko (Balamítko) kralipén. Paló lénde ĥazdélape o králi drieván zoralypnaskiro, savó javéla te xulainél baré rajkanypnasa i léla te kerél pir péskiri vólia. Ne kiéli jov uštéla, to kralipén léskiro rosperelape i roskerelape pe štar bolybnýtka balvalia, nikonéske leskre semencáke na piridžala dová kralipén, i kadasavé zorjása, savjása jov xulainelas; xasjola kralipén léskiro i doreselape javirénge, apríč kodolende. Zorjakirelape králi paš-dyvesytkoné (južnone) rigátyr i adiáke-pac' jekh thagári léskiro, savó pirizorjakirela les i léla te xulainél, i javéla léste drieván baró rajkanypen. Léskire-rajkanypnaskiro thagaripen javéla baró. Ne pir vari-kicý beršá jone javéna kučedyr jekh jekhésa, i čhaj paš-dyvesytkoné kralískiri javéla ke králi paš-ratitkoné rigátyr, sob (kaj) jone te javén dre jekh godý; ne joj na vyrikiréla zor dre péskire vastá, i na vyterdjola lákiro ródo, ne joj iavéla vydyny te merél, adiáke i pašatuné lákire, i odolé, kon barjakirdia la, i kodolé, kon láke dyjá zor dro kodolé časy. Ne ĥazdélape jekh rand' (vetka) lákire rukhestyr (kornjostyr) pe lákiro štéto i javéla te marélpe xaladenca i jov zadžála dro tvárdyma/diz (kriepost') paš-ratitkoné kralískiro, i pe lákiro štéto léla te kerél andré lénde, i jov léla bari zor. Iščo jov léla dro pliéno ke Jegípto i léngire develá, vyčhudé léngire mujenca, a léngire kučoné khorenca, suvnakuné i rupuvenca, i jov, i pe vari-kicý berš jov javéla te terdjol vučedýr paš-ratitkoné kralístyr. Tén'ci adavá-pac' králi i javéla pe paš-ratítko (sievierno) them, ne jov risjola pe léskiri phuv. I léna mardýtko (oružyjo) čhavé léskire i skedéna but xaladén, i jekh léndyr sýges javéla, pherdiakirela saró i prodžála, i tén'či, risii, léla te marélpe lésa paš-ratitkoné kralísa pašýl léskiri tvárdyma. I rosholiasola sarésa paš-dyvesýtko (južno) králi, i vydžála te marélpe lésa, paš-ratitkoné kralísa, savó vyčhuvela baró xaladybén, ne otdynó javéla davá xaladybén dre léskire (vergoskire) vastá. I kiéli lydžána xaladybén, to kralískiro iló ĥazdélape; jov teliakirela but tysjoncy, ne jov zoraledýr kodolestyr na javéla. Pal-dová so paš-ratítko (južno) králi risjola i terdiakirela te marélpe e xaladén butydyr, syr sys léste, i pir vari-kicý beršá sygo javéla baré xaladybnasa i baré barvalypnasa. Dre kodolé dyvesá butdžine ĥazdénape pe kralíste paš-dyvesytkoneste, i nahrata (nahal'na) manušá tyré narodóstyr, Danijelie, ĥazdénape, sob (kaj) te kerdjol čačipnása, ne jone peréna. I javéla paš-ratítko králi, i ĥazdéla valo phuvjátyr i xaladybén léskiro léla zoraliakirdo fóro, a ni paš-dyvesytka zorja na vyterdjona, ni vykedyno xaladybén léskiro; na uhtyléla zor te terdjol proti. I kodová, kon vydžála ke jov, ke paš-ratítko králi, leskre voliatyr, i nikón na vyterdjola angíl léste. Jov terdjola taborosa pe Slavútno Phuv, i joi, sarí phuv, doreséla čoripén leskre vastéstyr. I kadavá králi (paš-ratítko) zakaméla te vydžál saré zor'jenca péskire kralipnastyr, i léskire čačipnaskirenca, i keréla davá. I čhajén léskire džuvliengir'jen otdéla léske (kralíske paš-dyvesytkoneske), sob (kaj) te xasiakirél len, ne dasaví duma na risjola čačipnása, i na javéla léske kófo odoléstyr. Paló dová jov obriskirela péskiro muj ke phuvjá pašyl morie (derjav)-ke ostrovy (džipá-r.s.) i léla péske but len; ne vari-savó thagári čhuvéla kónco pe léngiri ladž, i iščo (inké) péskiri ladž čhuvéla pe léste, kralíste, paš-ratitkoneste. Tén'ci jov délape péskire mósa ke tvárdymi pe péskiri phuv; ne jov obštavelape, peréla i na javéla les butýr. Pe léskiro štéto javéla vari-kon, kon bičhavéla mytaris/myta-skedyibnaskires, te džal duredýr pir slavútno kralipén; ne i jov pale adákicy dyvesá xasjola, i na mižehipnastyr, i na maribnastyr. I ĥazdélape pe léskiro štéto o bedo (poniženo) manúš, i na déna léske patýv kralítko, ne jov javéla bigodliakires i frentymasa jov zalela kralipén. Haladybena javéna tasade sýrby potoposa i pharade angíl léste, i o kokoró thagári zavietóskiro, javéla rostasado. I dolé dyveséstyr, syr keréna dorakiribén lésa, i jov ĥazdélape, léla zor nabute manušénca. I zadžála jov drie ramanjona (mirna) i barvalé štéty dro them, Jegípto, i jov keréla dasavo, so na kerénas leskre dadá i dadengíre-dadá léskire: doresybén/ čordo mištypén i barvalypén javéla jov te rozdel peskirenge, jov léla te priduminel péskire plany i pe tvárdymi, ne féni (tóka) pe nabaró časo. Tén'ci jov džangavela péskiri zor i dúho (fáno) péskiro butdžinenca xaladenca proti kralíste paš-dyveséstyr, i o králi paš-dyvesýtko vydžála pe maribén iščo (inké) butedýr zoralé xaladybnasa, jov na terdjola proti, pal-dová so proti léste javéla pridumindlo xohaibén. I kodolé, kon lésa xaja, zakamena te xasiakirén les, i xaladybén léskiro rosthadelape, i peréna but zamardé xaladé. Dujdžinende adalé kral'jénde pe iló javéla xohaibén, i paló jekh skamínd jone léna te xohaven, rakirí, ne na javéla kófo, pal-dová so kónco (jagóro) otčhuvelape pe časo. I délape jov (králi) pe péskiri phuv (paš-ratítko) baré barvalypnasa i léskire ilésa proti svénto zavieto, i jov keréla doš, syr jov vykedyjá, i jov risjola, kaj isyn léskiri phuv. Dro uphendló/gindlo časo risjola jov ke paš-rat (jugo); ne davá dro jagóro (dro kónco) na javéla psiriben dasavo, syr sys angledýr. Pal-dová so dro jekh časo javéna pe léste pármy (korabli) Kitimostyr; i jov peréla duhósa, i risjola pale i jov keréla, syr jov pridumindia i nevéstyr (nevés) džála, dorakirelpe kodolenca, kon otgijá Sventoné Zavietostyr. I xaladybena, so jov bičhavéla, magirena Svénto Štéto dre Khangirí i tvárdyma, i terdiakirena kažnoné-dyvesytka svénta dyibená (žertvy), i janéna dalésa džungalypén čhučipnastyr (pustotatyr). Kodolén, kon keréla bipatyvales proti Zavieto, jov prikharela ke pe gudlé lavénca; ne e manušá, kon ginéla Devlés, léna zor i javéna te kerén, syr trej. Ne god'varé manušá manušytkoné nacyjatyr (narodóstyr) déna godý butenge, na dykhí pe dová, so jone javéna te stradynen adákicy dyvesá jagatyr i kurtalátyr, plienóstyr i mištypnytkone čoribnastyr. Kiéli léna te xan len dukhá, to javéla lénge vari-savó podrikiribén, butdžine khetaniakirenape lénca, ne pefromi (nailytkes). Lathenape doša vari-savé i god'varende, sob (kaj) te sprobinen len te žužakiren i te parniakiren ke dyviesa dro kónco (jagóro); pal-dová so iščo (inké) isyn časo ke uphendló sroko. I javéla te kerél o králi (paš-ratítko) pir péskiri vólia, i ĥazdélape ke vučipén i barjakiréla pes vučedýr kažnoné Devléstyr, i pal Devléste devlykaneste jov léla te rakirél kalé lavá, i javéla te udelpe léske, paka kerdjolape xolý: pal-dová so sys priphendlo, odová kerélape. I pal devlende péskre dadengíre jov na poduminela, ni pal dová, so isyn pe iló džuvliengiro, ni xaj devlypnaske nisaveske jov na déla patýv; pal-dová so jov féni (tóka) pes ĥazdéla vučedýr saréndyr. Ne devleske, savó dykhéla pal tvárdymi (dizá) piró štéto léskiro, jov javéla te del patýv, i kodolé devles, savés na džindlé léskire dadá, jov léla te del patýv suvnakása i rupésa i kuč barénca, i raznone drogoné darenca, i čhuvéla jov zoralý tvárdyma/diz (kriepost') čužoné devlesa: ne kodolé, savé prigaljona les, odolénge jov déla zor pe butende, i jov rozdela phuv syr mazúri (nagrada). Pe kónco (jagóro) dyvesengiro javéla te marélpe lésa o králi paš-dyveséstyr (jugostyr), i o králi paš-ratítko čhurdelape syr riskiribnaskiri balvál (vihro) pe léste maribnytkoné vurdenenca, uklistenca (vsadnikenca) i buté parmenca (korablienca), i jov peréla pe dalé thema, pherdiakirela len, i prodžála pir lénde. I zadžála adiáke-pac' jov pe Slavútno Phuv, i but thema (strany) peréna i zrakhenape léskire vastéstyr féni (tóka) Edómo, Moávo i baredýr paš Amonengiren čhavengiri. I tyrdela jov vast léskiro pe javír thema; na zrakhélape i Jegiptóskiri phuv. I zalela jov piraliá suvnakása i rupésa i javire kučipnenca Jegiptóstyr; e Liviitka i Jefiopiitka džána pal léste. Ne malvy (nevipená) vastokoskire i paš-ratitkoné rigátyr strahakirena les, vydžála jov baré mižehipnasa, sob (kaj) te zamarél i te vymarel sarésa buten. I čhuvéla jov kralitka šátry péskire fielatiniatyr maškír mórjo (derjáv) i slavútno svénto bérga; javéla jov ke péskiro kónco (jagóro) i nikón na podela vast léske. I uštéla dro dolé dyvesá o Miha, thagári baró, kon javéla terdó pal čhavénde tyré narodóstyr; i javéla časo pharó, savó na sys dolé dyveséndyr, syr javné manušá pe svéto ke/žýko akaná; ne zrakhenape dro dová časo saré manušá tyré narodóstyr, konés lathéna dre lylvarí. I but kodolé, savé isyn suté dro phuvjákiro práho, džangadjona, jekh vaš viéčno džiibén, javír pe viéčno ladžaipén i obrakiriben. I god'varé javéna te ziainen, syr duda (svietily) pe bolybnáskiro svódo, i kodolé, savé riskirena buten ke čačipén – syr čergeniá dro viéko, pe saré viéki. Ne tu, Danijelie, garav dalé lavá i zapiečatyn lylvarí ke palatunó (posliednjo) časo; but manušá proginena la, i javéla te barjol džinybén.” Tén'ci me, Danijéljo, dykhcjom, i, ake, terdé sys duj javír Jangóly, jekh pe davá brégo rekakiro (leniakiro), javír pe javír brégo rekakiro (leniakiro). I phendiá jekh Jangólo muršeske dro ĥandladytko (ljonytko) uribén, savó sys terdó uprál rekitka paní: “Kiéli javéla kónco (jagóro) dalé divenge?” I šunavas me, syr o murš dro gandladytko uribén, savó sys uprál rekitko paní, ĥazdyjá čačó i zérvo (liévo) vast ke bolybén, sovlahadiá viečnone Džidesa, so ke dyvesengiro kónco (jagóro) i ke časy i ke paš-časy, i, syr končynelape sarésa zor sventoné narodoskiri, to saró davá kerélape, čačipnása syr treindiá. Me šundjom davá, ne me na’ galyjom, paldavá phendjom: “Rajo miro! So isyn te javél paló davá?” I otphendiá jov: “Džá, Danijelie; pal-dová so isyn zakerde i zapiečatyme dalé lavá ke palatunó časo. Butdžine žužakirenape (čystinenape), parniakirenape i javéna piribilade vaš propatiakiriben; e fuj manušá javéna te kerén bipatyvales, i na ĥaljola nikón adalestyr lav bipatyvalendyr (fujé manušéndyr), ne e god'varé ĥaljona. Kodolé časostyr, syr pirijačena kažnoné-dyvesytka svénta dyibená, i syr javéla čhudo džungalypén čhučipnaskiro, prodžála (nakhela) tysjonco te dujšelá jeniadeša dyvesá. Bahtaló isyn odová, kon užakiréla i dodživela tysjonco te trinšelá trijánda pandž dyvesá. I tu, Danijelie, džá ke tyró kónco (jagóro) i tu javésa te otkhinjos, i te uštes, sob (kaj) te doreses tyró meknó mištypén pe kónco (jagóro) dyvesengiro.” Ake, isyn lav Ráskire-Devléskiro, savó javdiá Osijáske, čhavéske Biejeroskiréske dre dolé dyvesá, kiéli raindlé štar králja Judejákire: Ozíia, Ioafámo (Jofamo), Aházo, i Jezekíia i dre dolé sáma dyvesá, kiéli kralindiá pe Izrailjo o Jerovoámo (Iierovoamo), čhavó Joasoskiro (Ioasoskiro). Ake, syr Raj Devél lyjá te rakirél pir Osijáste. I phendiá Raj-Devél Osijaske: “Džá, le péske biladžakunia džuvliá, i te javén tyré čhavoré biladžakuné. Pal-dová so daja phuv drieván keréla biladžaipén (marki), syr léngire manušá durjona (otginé) Rástyr-Devléstyr.” I jov gijá i lyjá Gomierjá, čha Divlaimoskirja, i joj iaciá pharí i bijandiá léske čhavores. I phendiá Raj-Devél léske: “De lav léske Izriejeljo, pal-dová so iščo (inké) nábut i prodžála i Me dukhavava pale pal rat dro Izriejelie, so pročhudiape dro kher Iiujoskiro (Igujoskiro), i Me keráva adiáke, so pirijačena te javén králja kheréstyr Izrailjoskirestyr. I javéla adiáke: Me phagirava lúko Izrailjoskiro pe dólo Izriejeljoskiro.” I joj nevéstyr jaciá pharí i joj bijandiá čhajorja. I Devél phendiá Osijaske: “De lav láke Loruhama, pal-dová so Me butýr na javáva te sykavav láska pe kher Izrailjoskiro, sob (kaj) te otmekav bang lénge. Ne Me sykaváva láska pe kher Judáskiro, i Me, Raj Devél, léngiro Devél, vyrakhava len, ne ná lukósa, ná kurtalása, ná maribnása, ná grénca, ná uklistengire xaladenca.” I, ake, paló (poslie) dová, syr Gomier' dyjá kolýn Loruhamake, joj iaciá pharí i bijandiá čhavores. I phendiá Raj-Devél Osijaske: “De lav léske Lo-ammí, pal-dová, so tumé na san Miré manušá, i Me na javáva tumaró Devél.” Ne čhavé Izrailjoskire javéna adákicy but, kicý isyn práho pe mórjo (derjáv), so naštý te vymierines i te gines. I javéla adiáke: pe štéto, kaj rakirdé lénge: “Tumé na san Miré manušá,” akaná odój phenéna lénge: “Tumé san čhavé džidé Devléskire.” Tedy čhavé Judáskire i čhavé Izrailjoskire kedenape khetané i jone čhuvéna péske jekhe šerales, i jone džána krig čužoné phuvjátyr, pal-dová so baró javéla dyvés Izrailjoskiro. Rakirén tumaré pšalénge: ‘Miré manušále,’ i rakirén tumaré phenienge: ‘Potangindly’ (požalindly).’ Bangiakirén [sendinén-r.s.] tumaré da, bangiakiren la: pal-dová so joj butýr na javéla Mirí romný, i Me na som lákiro rom! Mek joj te durjakirel lákire móstyr lákiro biladžaipén, i lákiro nálačho kamiben krig lákire kolynendyr; sob (kaj) Me te na rosčhakirav lákiro nangipén, i te na čhuvav la angíl, syr dro dyvés, kiéli joj bijándyja; i sob (kaj) Me na keráv látyr čhučí (pusto) félda, i sob (kaj) Me te na pirikerav la dre šukí phuv, i te na pekavav la smegasa te p'jel. Me na sykaváva láska vaš lákire čhavorenge (bijatenge), pal-dová so jone isyn bijaty biladžakuné džuvliatyr. Pal-dová so léngiri daj kheldia biladžakunes; joj sys pharí lénca napatyvalés: pal-dová so joj phendiá: “Me džáva pal miré kamlytkonende, savé déna mánge miro maró, i miro paní, i mirí výlna (šers'), miro ĥandlado (ljono), miro olivítko dzet (jeliejo) i miro pibén.” Paldavá, ake, Me zakerava drom láke phusaibnytkoné xrusténca (tiernienca), i Me občhuvava la vantasa, sob (kaj) joj te na del ráda te lathel péskire dromore. I joj tradelape pal lákire kamlytkonende, ne joj na dotradela len; i joj iavéla te rodél len, ne joj na lathéla len: I tedy phenéla joi: ‘Ne, džáva me i risjováva pale ke miro pérvo rom, pal-dová so sys fedýr mánge syr akaná isyn mánca.’ Joj na džindiá, so davá sómas Me, Raj Devél, Kon délas láke giv (maró), mol (vino), i dzet, i Kon kerdiá butedýr (butedyrjakirdia) lákiro rup i suvnakái, savéndyr jone kerdé Vaalo. Pal-davá Me risjováva pale, i Me láva pale Miro giv (maró) dro umalotno časo, i Mirí mol (vino) dro lákiro siezono, i Me láva pale Mirí výlna i Miro ĥandlado (ljono), so dynó sys láke te učhakirel joj péskiro nangipén. Akaná Me otkerava lákiro biladžaipén angíl jakhá lákire kamlytkone muršende, i nijékh manúš naštý na vyrakhela la Miré vastéstyr. I Me keráva adiáke, so láte pirijačéla (končynelape) saben radymása, butýr na javéna svénki lákire, lákire-čhoneskire svenkicy, i lákire sávaty-saré lákire skaminda. I Me čhučakirava lákire vinagradýtka barja (posadki) i lákire inžyritka drevicy, pe savé joj rakiréla: ‘Ĥáda, kadalé isyn miré mazúrja (nagrady), so miré kamlytka muršá dyné mánge.’” I Me keráva léndyr veš, sob (kaj) feldýtka murdalá (zvieri) te xan len. I Me pharés sendiakirava la pal kodolé dyvesá, pe savé joj thuvaliakirdia dróga smóly Vaalenge. Joj šukarjakirdia pes čenienca i miriklienca, i joj gijá pal lákire kamlytkone muršende, i tedy joj bistyrdia Man”, – rakiréla Raj Devél. “Paldavá Me zatyrdava (urakirava) la i janáva la pe čhučí phuv, i Me javáva te rakiráv ilytkes lása. I Me dáva láke vinagradýtka barja odothýr i dólo Ahoroskiro, syr vudár te užakirel lačhipén. Odój joj iavéla te bagal, syr dre dyvesá lákire ternypnaskire, i syr dro dyvés, kiéli joj gijá krig Jegiptóskire phuvjátyr. I javéla adiáke pe dro dová dyvés, – rakiréla Raj Devél, – ‘so tu javésa te khares Man: ‘Miro rom,’ i tu na javésa butýr te khares Man ‘Vaali’, pal-dová so Me keráva adiáke, so lákire uštá butýr na javéna te phenén lavá Vaalengire, i kadalé kharibena (lavá) butýr na javéna te ripirenpe pe godý manušéngire Izrailjostyr. Pe dová dyvés Me čhuváva zavieto vaš lénge feldytkone murdalénca (zvierienca), bolybnytkone čiriklienca i capnienca (polzučone džidypnenge), savé polzynena pir phuv. I Me phagirava lúko i kurtála, sob (kaj) jone te na javén pe doiá phuv, i Me keráva adiáke, sob (kaj) jone te pasjon bi darákiro, i sob (kaj) te na javél maribén. I Me javáva te angrustynav (obrenčynava) tut Mánca usady (sak); i Me angrustynava (obrenčynava) tut Mánca pir čačipén i čačunó séndo, i pir drógo lačhipén, i pir lačhé-ilýtkima; i Me angrustynava (obrenčynava) tut Mánca, so tu javésa patiaibnýtko ke Me, i Tu javésa te džinés Man, Ras-Devlés. I javéla adiáke dro dová dyvés, so Me ušunava [otphenava-ju.o.], – rakiréla Raj Devél, – i Me šunava bolybén, i jov javéla te šunél phuv. Phuv šunela i déla giv (maró), i mol (vino), i dzet (jeliejo), i adalé ušunena Izriejeljos [Izrailjoske-ju.o.]. I Me počhuvava la vaš Péske pe phuv, i Me sykaváva láska pe ‘Loruhamate,’ i Me phenáva ke ‘Loami’ (na Miré manušá): tumé san Miré manušá’! I jone phenéna: ‘Tu san amaró Devél!’” I phendiá Raj Devél mánge: “Džá nevéstyr, kam džuvliá, saví isyn kamly (piramni) romný romeste, ne saví kaméla i javire muršén. Ne tu kam la, adiáke-pac', syr Raj Devél sykavéla láska čhavorenge Izrailjoskirenge, savé dykhéna pal javire devlorende i vykedena mariklia ziumosa, so pekena lénge Najudýtka nácyi. Ĥáda, me kindjom la vaš péske pal dešupandž šékieli rup, i pal jekh pašésa xomiero ĥersto (jačmienjo).” I phendjom me láke: “Tu jačesape mánca but dyvesá; i tu butýr na javésa te kames javire muršén, i tu na javésa butýr nikoneskiri, i me javáva kadasavó-pac' vaš túke.” Pal-dová so čhavé Izrailjoskire jačénape but dyvesá bi kralískiro, bi thagarískiro, bi sventoné-dyibnáskiro, bi obsvencyndlé-stylbóskiro, bi efodóskiro, bi tierafimóskiro. Paló (poslie) davá čhavé Izrailjoskiro risjona, i jone javéna te rodén Ras-Devlés, léngire Devlés, i léngire kralís Davidós: i jone javéna te darén Rástyr-Devléstyr i te risjon ke Léskiro lačhipén dre palatuné (posliednia) dyvesá. Šunén lav, Ráskire-Devléskiro, čhavé Izrailjoskire, pal-dová so Raj Devél bangiakirela manušén, kon dživéla pe doiá phuv: ‘Nane patiaibén, nane lačhipén, i nane džinybén pal Devléste pe kodoia phuv. Manušá sovlahana, xohavena, muliakirena, i čorena, muršá i džuvliá keréna biladžakuné réndy, jone phagirena saré miery, i manušéngiro rat čhuvélape jekh pal jekh. Paldavá phuv javéla te tuginel zoralés, i kažno (sváko) manúš, kon dživéla pe láte, javéla te xasjol (te properel) khetané feldytkone murdalénca (zvierienca), bolybnytkone čiriklienca, adiáke-pac' i mačhé morjoskire (derjavéskire) xasjona.” Sob (kaj) nijékh manúš te na lydžál čingárd javiresa, ci te na vyrakirel javireske, pal-dová so tumaré manušá isyn sýrby kodolé, savé lydžána čingárd (čingardenape) rašása. Tumé javéna te obštavenpe dyvesé, i proróko adiáke-pac' obštavelape tuménca ratý: i Me xasiakiráva tumarja da. Miré manušá xasjona pir dová, so lénde na uhtyléla (nádosi) džinybén Ne pal-dová, so tumé, rašajale, otphendlepe džinybnastyr, Me adiáke-pac' otphenava tuménge, sob (kaj) tumé butýr te na javén syr rašaja angíl Mánde, i pir dová, so, tumé bistyrde Devléskiro Zakóno, Me bistrava tumaré čhavorén (bijatén). So butedýr isyn rašaja, to butedýr jone keréna gréhi proti Mánde, i Me riskiráva léngiro baripén dre ladž. Jone čaliakirenape Miré-manušéngire grehénca, so janéna Miré manušá, a léngiro iló tyrdelape ke kerél čoripén. I javéla adiáke: so javéla manušénca, dová-pac' javéla rašanca. I Me pharés sendiakirava len pal dová, so jone kerdé, i Me otdáva pale pal léngire réndy (diély). Jone javéna te xan, ne jone na javéna čale, jone javéna te kerén ladžakune réndy (diély), ne jone na rozbarjonape, pal-dová so jone pirijačne te kandén Ras-Devlés. Biladžaipén, mol (vino), neví bravinta [napitko-r.s.] – ĥáda, so isyn lénde pe iló te kerén. Miré manušá phučena kaštune idolendyr, sob (kaj) te den godý lénge, i léngiro destó sýrby phenéla lénge, so te kerén. Biladžakuno dúho (fáno) lydžála adiáke, so jone denape dukhá, i jone giné te kerén biladžakuné réndy i durine Mándyr, léngire Devléstyr. Jone janéna svénta dyibená pe vučipená bergakire (feli), i jone thuvaliakirena drogoné smolenca pe bérgicy, tel demby, tel topoli, i tel terebinto pir dová, so léngiri zer (zasienka) isyn bari, paldavá léngire čhaja keréna biladžaipén i léngire borja kaména javire muršén. Me na javáva pharés te sendiakirav léngire čhajén, kóli jone keréna biladžaipén i léngire bor'jen, kóli jone kaména javire muršén, pal-dová so léngire muršá kokoré khetaniakirenape nalačhé džuvliénca, i jone janéna svénta dyibená biladžakuné džuvliénca, a manušá, savé na džinéna but, xasjona. Na dykhí pe davá, so tumé, Izrailjoskire manušále, keréna biladžaipén, xoc' by te na kerén čoripén Judáskire manušá. Sob (kaj) jone te na džán pe Galgálo, i te na ĥazdénpe pe Bier-Avien, i sob (kaj) jone te na sovlahan: ‘Te javél džidó Raj Devél’ Paldavá Izrailjoskire manušá isyn pharé-šerítka (narta) sýrby pharé-šerítko réca (tjolka) isyn; akaná syr davá, Me, Raj Devél, javáva te čaravav len sýrby bakrores pe bari félda. Jefraimo (Izrailjo) risijá ke ídoly, mekén les kokores, jekhdžines. Léngiro matyben isyn džungaló (brydko), jone duredýr keréna biladžakuné réndy, léngire thagar'jenge (kniazienge) trej iléstyr bipatyv. Balvál učhakiréla len péskire phakenca, i jone javéna ladžakirdé léngire sventoné dyibnendyr.’ ‘Šunén davá, rašajale! Pričhuvén kan, kher Izrailjoskiro! Rikirenpe ke dová, so šunéna, o kher kralískiro! Pal-dová so séndo javéla proti tuménde, pir-dová so tumé sánas sýrby felý (pietlia) dre Masífa (Micpa) i sýrby khudý (siet') pe Favoro. Jone xor zaginé dro bléndo [buntyibnarja but zamarena vaš svénta dyibená-ju.o.], ne Me bangiakirava len sarén. Me džinóm Jefriemos, i Izrailjo isyn na garadó Mándyr, i akaná, Jefriémo, tu kerésa biladžakuné réndy, a Izrailjo isyn magirdó. Dová, so jone keréna, na domekela len te risjon ke léngiro Devél, pal-dová so dúho (fáno) te kerél biladžaipén, isyn maškír lénde, i jone na džinéna Ras-Devlés. Phut'kiribén Izrailjoskiro tykniakirdo dre léngire jakhá [dophenéla léskire manušénge dro muj-ju.o.], na dykhí pe dová, so Izrailjo i Jefriémo obštavenape (peréna) dro léngiro čoripén; i Juda obštavelape adiáke-pac' lénca. Jone javéna te rodén Ras-Devlés léngire bakréngire stadenca i tabunenca, ne jone na lathéna Les; Jov risijá (otgijá) krig léndyr. Jone jačkirdé (parude) napatiaibnytkes Ras-Devlés; pal-dová, so lénde lathnepe khelby (niezakonna bijaty): akaná nevó-čhonytko svénko pohala len i léngiro mištypén. Phurdén dro bakrano rógo dre Givá, phurdén dro rógo (truba), dre Ráma; den gódla zoralés dro Bief-Aveno, dykh ža palál pal péste, o Vieniamino! Jefriemostyr jačélape golotýnia (čhučipen) dro dyvés, syr Me bangiakirava len; maškír ródycy Izrailjoskire Me phendjom, so davá javéla čačes. Thagárja Judáskire isyn sýrby kodolé, kon durjakirdia špery (znaki) pe phuv: Me vyčhuvava Miro mižehipen (mižeh xolý) i pe lénde syr paní. O Jefriémo, pritasado, séndo pekadiá zoralés les, pir-dová, so jov iléstyr lyjá te psirél pir manušýtko uphenybén. Me javáva sýrby mol' (mel') vaš Jefriemoske, i sýrby kirmo [kirnypen-ju.o.] vaš kher Judáskiro. Kiéli Jefriémo dykhciá péskiri dukh, i Juda dykhciá péskiro fránso (rana), tedy gijá Jefriémo ke Asuro, i bičhadiá pal kralíste Iarievoste (Jarievoste), ne jov na déla ráda te sastiakirel tumen, ci te drabakirel tumen tumaré riskirdé fransostyr (ranatyr). Pal-dová so Me javáva sýrby ščer (liévo) pe Jefriemoste, i syr ternó ščeroro pe Judáskiro kher. Me až roskušava len i džáva krig, i Me lydžáva krig len, i odój na javéla nijékh te rakhél len. Me džáva krig, Me risjováva pe Miro štéto angíl dová, syr jone pridžinena péskiri bang [léngiro čoripén-ju.o.] i javéna te rodén Miro muj: kiéli len pritasavéna, jone javéna dobusóves te rodén Man. Dre smentnyma péskiri jone pe zlóko (ránko) javéna te rodén Man i te rakirén: ‘Javén, i risjovasa ame ke Raj Devél: pal-dová so Jov dukhadia, i Jov sastiakirela amen; Jov pekadiá amen, i Jov piriphandela amaré fránsy (rany). Paló duj dyvesá Jov džidiakirela amen; pe tríto dyvés Jov čhuvéla pe ĥerá amen, sob (kaj) aménge te dživás angíl Léskiro dykhibén. Aménge trej te džinas butýr, aménge trej te pričhuvas te džinas butýr Ras-Devlés, Léskiro javiben javéla syr zlóko, Jov javéla syr bryšýnd, syr ĥaratuno bryšýnd (pozdnjo), so paniakirela phuv.’ ‘O, Jefrieme, so Mánge te keráv túsa? O, Juda, so Mánge te keráv túsa? Pal-dová so tumarí patýv ke Me isyn sýrby tuča pe zlóko (ránko), i sýrby pahlyn (rosa) pe zlóko, saví syg xasjola (prodžála). Paldavá Me vyčingiravas len pir prorokénde, Me muliakiravas len Miré lavénca; i Miro séndo pe lénde javéla sýrby dud (svéto), so ĥazdélape. Pal-dová so Mánge isyn drieván pir iló lačhé-ilýtkima, a na svénto dyibén, i džinybén pal Mánde, Devléste, butýr, syr célo shačkiribén. Ne jone syr Adamo phagirdé Zavieto; odój jone jačade xohanés Man. Galaádo isyn fóro, dro savó dživéna bibahtalé, i jov isyn magirdó ratésa. Syr rozmaribnarja [rozmaribnytko šajka-ju.o.], kon podrakhela manušés te zamarél, adiáke-pac' i kampanija rašangiri zapasjola te zamarél pir drom ke Siehemo; čačes, jone keréna stetka (džungalé) réndy. Dro kher Izrailjoskiro Me dykhcjom trašano: odój kerélape Jeframoskiro biladžaipén; Izrailjo isyn magirdó. Adiáke-pac', vaš túke, Jude, sykado dyvés vaš givengiro sčhinyben, kiéli Me riskiráva Miré – manušéngire plienonen. Kiéli Me sastiakiravas Izrailjo, tedy xohaibén [čoripén-ju.o.] Jefriemoskiro otkerdiape / sykadyjá i fuipén Samarijakiro. Pal-dová so jone keréna xohanés, lénde isyn čora, savé phagirena kherá, i rozmaribnari (šajka rozmaribnytko) peréla javrí pe manušénde. Jone na duminéna dre péskire ile, so Me ripirava saró léngiro fuipén; akane léngire réndy isyn trusciál (vokrug) lénde; jone isyn saré angíl Mánde. Jone radynena kralís léngire fuipnasa, i thagar'jen léngire xohaibnasa. Jone xačona te kerén biladžaipén sýrby bov, savó roshačkirdia pekibnaskiro (piekarjo) – ĥáda, jov pirijaciá te kerél butedýr jag paló dová, syr zamiešyndlo xumer (tiasto) ĥazdélape. Pe svenkitko dyvés amaré kralíste, e thagárja (kniázi) nasvaliakirde les, matiakirde moliasa (vinosa); i jov lyjá te tyrdel péskiro vast ke odolé, savé xoliames sanape léstyr. Jone roshačkirena péskiro iló sýrby bov, kiéli jone podrakhena te zamarén: léngiro pekibnaskiro (piekarjo) sovela sarí rat, ne tasiárles (pe zlóko) jov xačola syr bari jag. Jone isyn xačkirdé syr bov, i jone pohane péskire sendar'jen. I léngire králja pyné, nane nijékh manúš maškír lénde te kharel Man. O Jefriémo khetaniakirdiape (zmiešyndia pes) maškír Najudytkoné manušénde; Jefriémo isyn sýrby paramo [maró-r.s.], so pekelape napiriskirdo. Javiré – theméskire (čúža) manušá pohane léskiri zor, ne jov na džinéla dová. Léste isyn syva balá adáj i odój, ne jov na džinéla davá. Izrailjoskiro phut'kiribén dophenéla dro muj léskire manušénge, ne jone na risiné pale ke Raj Devél, léngiro Devél, i jone na rodéna Les dro saró davá. Jefriémo adiáke-pac' isyn sýrby dylynin'ko golumbo, savéste nane godý: jone kharéna Jegípto, ne jone džána ke Asirija. I kiéli jone džána, Me čhurdava Mirí khudý (siet') te uhtylav len; Me tyrdava telé len syr bolybnytkone čiriklien, savé isyn dro fáno (vozduho). Me pirisykliakirava len ke dukhá, kiéli léngiro skedyibén šunéla pal davá. Bida pe lénde, pal-dová so jone otginé [našné-ju.o.] Mándyr! Xasibén pe lénde, pal-dová so jone kerdé čoripén proti Mánde! Na dykhí pe dová, so Me vyrakhcjom len, usajékh jone rakirdé xohaibén proti Mánde. Jone na khardé zoralés Man saré léngire iléstyr, kiéli jone tugindle jasvénca pe péskire čhuibena. Jone kedenaspe khetané pal maró (givá) i mol (vino), i jone keréna búnto proti Mánde. Na dykhí pe dová, so Me sykliakirdjom len ke dukhá, i zoraliakirdjom Me léngire vastá, ne jone priduminenas čoripén proti Mánde. Jone risiné pale, ne na ke Sámo Barydyr; jone isyn syr došvalo lúko. Léngire thagárja peréna kurtalátyr pal péskiri čib, so rakirdiá xoliamipen (dierzosti). Pe phuv Jegiptóskiri léndyr javéna te sanpe. Pričhuvén rógo (truba) ke uštá tumaré. Jov, vérgo, javéla syr órlo (kído) proti Kher Ráskire-Devléskiro, pal-dová so jone phagirdé Miro Zavieto i kerdé búnto proti Miro Zakóno. Izrailjo javéla zoralés te kharel Man: ‘Miro Dévla, ame džinésa tut!’ Izrailjo čhurdyjá saró lačhipén: o vérgo javéla te tradelpe pal léste. Jone čhuvéna kral'jén kokoré, ne na Mándyr (by Miro); jone čhuvéna thagar'jen (kniaz'jen) bi Miré-laveskiro. Léngire rupéstyr i suvnakástyr jone keréna péske ídoly pe péskiro xasibén. Tyró guruvoro jačkirdiá tut, e, Samárija! Mirí xolý ĥazdyjápe proti lénde. Syr ĥará (dlúges) javéla ke dová, kiéli jone jačénape bibangipnaskire. I davá guruvoro adiáke-pac' Izrailjostyr: grafári (spieco te risynel) vyčhindia davá, i paldavá jov isyn na devel. Kadavá guruvoro Samarijakiro javéla phagirdó pe koterá. Jone posieindle balvál, i jone sčhinena štormo: syr givá lénde sarésa na javéna pe ĥerój (koloso); na javéla pribaripen dro jaržó. Kóli i vybarjola lénde vari-so, to e čúža manušá nakhavena (proglyninena) jaržó (giv). Izrailjo adiáke-pac' isyn nakhado (proglynindlo): akaná jone jačné maškír Najudýtka nácyi sýrby khoró (sasudo), so na pir iló nikonéske. Pal-dová so jone giné ke Asuro (Asirija) sýrby buso (diko) óslo (miegári), so jekhdžinó psiréla, a Jefriémo zmiešynelaspe počastunkenca (pal lové) javire – manušytkoné nacyienca, sob (kaj) te den patýv léske. Na dykhí pe dová, so jone bičhavenas (pokindle) počastúnki (dáry) maškír Najudýtka nácyi, akaná Me kedava len i jone léna te čuinen (te piridživen) pharés tel ĥámo kralístyr, thagar'jengirestyr. Pal-dová so Jefrieimo kerdiá but altári (žertvieniki) vaš grého, jone jačné vaš léske syr altári te kerén gréhi. Me čhindjom vaš léske baré lavá Miré Zakonóstyr, ne jov pogindia len pal čúža [dívna-ju.o.] phenybena. Jone janéna džidó mas syr svénto dyibén Mánge, i jone xána les, ne Me, Raj-Devél, na prilava len.’ Akaná Me javáva te ripirav léngiro čoripén i te sendiakirél len pal léngire gréhi: jone risjona pale ke Jegípto. Izrailjo bistyrdia pal Léskire Sozdyibnaskireste, i jone čhudé péske mangipnytka štéty (kapiščy), i o Juda adiáke-pac' butedýr kerdiá péske fórja zoralé vantasa: ne Me bičhaváva jag pe léskire fórja, i joj pohala léngire baré felatiniá / kolová (dvorcy). Na rádynpe drieván (but), Izráilie ke vučipén, syr javír manušýtka nácyi (narody), pal-dová so tu durijan tyré Devléstyr pir biladžakuné réndy (diély). Túke jaciá pir iló pleskiriben pal biladžaipén pe kažno šúrna (gumno). Šurna givaobkeribnaskiri i prieso na čaliakirena len, i neví mol / sóko (xum) xohavela len. Jone na javéna te dživén pe phuv Ráskire-Devléskiri, a Jefriémo risjola pale ke Jegípto, i jone javéna te xan nažužé xabena dre Asirija. Jone na javéna te čhuvén vaš Ráske-Devléske mol (vino) syr svénto dyibén, adiáke-pac' i léngire svénta janybená na javéna lačhé Léske: jone javéna syr maró pe garaiben, i saré, kon xála, les, javéna magirdé. Davá maró javéla jekh lénge te javén čale, ne jov na javéla vaš Kher Ráskire-Devléskiro. So javéna tumé te kerén dro dyvés, kiéli trej te javél skedyibén, dro dyvés svenkitko Ráskire-Devléskiro? Pal-dová so, ake, jone džána krig, syr javéla xasibén. O Jegípto kedela len khetané; O Miemfiso javéla te garavel len. Cuknuda (striekava) léla lofo pe léngire rupuvé barvalypena (kučipena); a phusadytka xrústy javéna dre léngire šátry. Javné dyvesá te dykhén len, javné dyvesá vaš séndo: tu, Izrailie, javésa te džinés pal davá! O magiko isyn na bare-godiákiro; a manúš, savó rossendiakirelas dro dúho (fáno), isyn bigodiakiro, pir dová, so drieván xor isyn tyró čoripén, i drieván zoraló isyn tyró namalypen (vrogima). Ci isyn Jefriemoste rakhibnaskiro (stražo) te dykhél pal javirende palál miré Devléste? Ne léskiro proróko isyn sýrby felý čirikle-uhtylybnaskireste (pticelovste) pe saré léskire dromá, i isyn sýrby khudý (sietka) dro kher léskiro Devléskiro. Jone xor pyné dro biladžaipén, syr dre dyvesá Givakire. O Devél javéla te ripirel léngiro čoripén, Jov javéla pharés te sendiakirél pal léngire gréhi. Me lathjom tut, o Izrailie, sýrby vinagradýtko (drakhitko) mura pe čhučí (pusto) félda; Me dykhcjom tumaré daden sýrby pérva baritka (plódy) pe inžyritko drévo dro péskiro pérvo siezono. Ne kiéli jone giné ke Vaalfiegoro, tedy jone otdyné pes ladžaipnaske; jone jačné džungalé sýrby ídoly, so jone kamlé. Jefriemoskiro baripén, syr čirikly vurniala krig – na javéla ni bijanypén, ni pharipén, nane ni khabnypen (začatijo). Na dykhí pe davá, so jone barjakirena péskire čhavorén (bijatén), ne Me láva krig len ke palatunó (posliednjo) manušoro. Čačó, bída peréla pe lénde, kiéli Me otdžava (durjovava) léndyr!’ Ne adiáke-pac' me, Osija, dykhcjom Jefriemos, savó sys syr Tíro, savó sys počhudo pe šukár štéto. Ne Jefriémo lydžála angíl péskire bijatén te zamarén len. De lénge, Rajo Dévla, – dová, so Tu désa? De lénge ločoví/ džuvliá bičhavorengirja, i šuké ciucia!’ Raj Devél rakiréla: ‘Saró léngiro fuipén isyn dro Galgálo, pal-dová so odój Me lyjom zoralés te na vyrikirav len: pir dová fuipén, so jone kerdé, Me tradava krig len Miré kheréstyr, Me na javáva butýr te prilav len. Léngire saré thagárja (kniázi) buntynena. Jefriemóskire manušá isyn dukhade: léskire kórni (rukhá) vyšutine, jone na déna phabá. Čačó, lénde butýr na javéna čhavoré, Me muliakirava drogoné bijatén léngire ločoviátyr (utrobatyr). Miro, Osijaskiro Devél, čhuvéla len krig Péstyr, pal-dová so jone na kandyné Les; i jone javéna psiribnáskire manušá (skital'cy) maškír Najudýtka nácyi (narody). Izrailjo isyn pyšno vinagradýtko kaštoro, savó butedýr janéla múri péske. So butedýr jov déla múri, to butedýr jov keréla altári; so fededýr jačélape léskiri phuv, to jone butedýr gožakirena (šukarjakirena) stýlby vyčhudé mujenca / patrienca (obrazenca). Léngiro iló rosčhudo pe paš, akaná Raj Devél phagiréla telé léngire altári (žértva), Jov phagiréla pe koterá léngire stýlby vyčhudé mujenca / patrienca (obrazenca). Pal-dová so akaná jone rakiréna: ‘Aménde nane Králi, pal dovaa so ame na darandyjam Rástyr-Devléstyr. Kóli te javél králi aménde, so jov keréla aménge?’ Jone rakiréna xartytka (pusta) lavá, xohanés sovlahana, kiéli sčhuvena zavieto. Paldavá pharó séndo ĥazdélape pe lénde sýrby trutitko čar (jadovito), so isyn pe lies'ni (borozny) feldengire. Manušá, kon dživéla ke Samárija, daréna vyčhindlé guruvorestyr Bief-Avienostyr. Léngire manušá tuginena zoralés pal lénde, i léngire biladžakuné rašaja javéna te trinskirenpe pal lénde, pal léngiro baripén, savó jačkirdiá len. Kadavá idolo kokoró javéla lydžino ke Asirija, syr dáro kralíske Iarievoske (Jarievoske); ne Jefriemos obuhtylela ladž, i Izrailjo javéla ladžakirdó godé lavéstyr, pal savó jone giné. Ne so rakirelape pal Samárija, to lákiro králi xasjola krig sýrby piena/vetkica uprál pe thadune paningá. I adiáke-pac' javéna rozmarde pe koterá vučé štéty pe Avieno, grého Izrailjoskiro. Xrústy suv'jenca i žylta xrústy phusadienca vybarjona pe léngire altári; jone phenéna bergenge: ‘Čhakiren amen,’ i bergicenge: ‘Peren pe aménde.’ O, Izrailjo Tyré manuše kerdé butýr gréhi syr i dro dolé dyvesé dre Givá, – odój tumé jačnépe. Ci so maribén dre Gavaóno (Givá) proti čhavénde, savé keréna čoripén, na dogijá ke jone? Kóli te javél Miro vykedeiben, to Me vysykliakirava len. Manušýtka nácyi (narody) javéna te kedenpe proti lénde, kiéli jone bangiakirena len pal duje-molytko čoripén. O Jefriemie, savó isyn sýrby vysykliakirdy reca (tjolka), savjake kamelape te štakirel givá, ne Me čhuváva ĥámo pe léskiri thuly men: Me začhuvava Jefriemos te tyrdel plugo, a Juda javéla te pašynel (te pharavel) phuv, a Jakovo javéla te randel (te rozmarel) komki. Počhuven dre phuv vaš péske pir čačipén; sčhinen telé pir lačhé-ilýtkima, i ĥazdén tumarí napočhudy félda; pal-dová so isyn časo te rodén Ras-Devlés angíl dová, syr Jov javéla i počhuvela čačipnása syr bryšyndesa pe tuménde. Tumé pharade phuv vaš fuipén, tumé sčhindle čoripén. Tumé xané xohanó baritko (plódo), pal-dová so tumé dopatiandyne zoralés dre péskire dromore, dro butypen tumaré zoralypnaskire muršende. I ĥazdélape búnto maškír tumaré manušénde, i saré tumaré tvárdymi / diz (krieposti) javéna phagirdé – syr Salmano phagirdiá Biet-Arbielo dro maribnýtko dyvés: e daj sys čingirdy pe koterá lákire bijatenca. Adiáke keréla tuménca, o Viefíljo, pir-dová so tumé but kerdé fuipén. Pe zlóko (pe ránko) králi Izrailjoskiro xasjola! ‘Syr Izrailjo sys bijáto, jov jaciá drógo Mánge, i Me khardjom Miré čhavés Jegiptóstyr. Jone, Miré proróki, khardé les, ne jov durija léndyr. Léskire manušá janénas Vaaloske svénta dyibená, i thuvaliakirde drogoné smolenca vyčhindlé mujenge barestyr. Me sykliakirdjom Jefriemos te psirél, Me lyjom (lydžijom) les pe vastá; ne jone na džindlé, so Me sastiakirdjom len. Me prityrdavas len kovlé dor'jénca (šylorenca) manušytkoné laskasa, i Me sómas vaš lénge sýrby kodová, kon léla krig ĥámo léngire žandendyr, i Me kovles čaliakirdjom len. Jov na risjola pale pe phuv Jegiptóskiri, ne Asuro (Asirijatyr) javéla králi lénge: pal-dová so jone otphendlepe te risjon ke Me. I kurtála peréla (javéla te risjol odorík i pale) pe fórja léskire, i joj iavéla te čingirel telé léngire štaby, i xasiakiréla len pal léngiri godý. Miré manušá bandine, sob (kaj) te durjon krig Mándyr. Na dykhí pe dová, so jone kharna Man te pomoginav, Naj Vučedyrones, nijékh léndyr na barjakiréla Les. So Mánge te keráv túsa, Jefriemie? Syr Me vydava tut, Izrailie? Syr Me te keráv túsa syr Admasa [Adamasa-r.s.]? Syr Me saštý te keráv túke odová, so kerdjom Sevoimoske [Cevoimoske-ju.o.]? Miro iló risijá dre Mánde, Mirí láska (žalost') roshačija. Me na javáva te keráv pir saró zoralypén Miré xolynakiro, Me na javáva te xasiakiráv Jefriemos. Pal-dová so Me som Devél, a na manúš, Jekh Svénto maškír tuménde; i Me na javáva trašasa dro fóro. Jone džána palál pal Raste-Devléste; Jov javéla te rykinel sýrby ščer (liévo). Syr Jov léla te rykinel, tén'či Léskire bijaty javéna te džán sygedýr trinskiribnasa pal-paniendyr (zapadostyr). Jone javéna sýges trinskiribnasa sýrby čirikliá Jegiptóstyr, sýrby golumby Asirijákire phuvjátyr. Ne Me dáva vólia lénge te dživén dre léngire kherá,’ – rakiréla Raj Devél. Jefriémo občhudiá Man xohaibnasa, i kher Izrailjoskiro frentymasa. Ne Juda duredýr psirelas Devléskire dromésa i sys patiaibnytkone sventonenca. Jefriémo čaravelape balvaliasa i tradelape pal balvál vastokóstyr: jov so dyvés pribarjakirela xohaibén i golotýnia (razorienijo). Jone adiáke-pac' kerna dorakiribén (zavieto) Asurosa (Asirijasa), i maslinitko dzet lydžána ke Jegípto. O Raj Devél adiáke-pac' lydžála čingárd (séndo) proti Judaste, i Jov pharés javéla te sendiakirél Jakovós pal léskire réndy (diély), pal dová, so jov kerdiá, Raj Devél dukhavela pale les. Jov uhtylelas péskire pšalés pal khur (pienta) dro dakiri ločoví (črievo), i jov sprobindia zorja Devlésa. Čačó, jov sprobindia zorja Jangolosa, i jov pirizorjakirdia Les; jov rondiá i jov rodyja bahtiakiribén Léstyr. Jov, Devél, lathiá les dre Viefíljo i odój Jov rakirdiá aménca. Davá isyn Raj Devél, jangoléngire – bolybnáskiro Devél, Sarezorjákiro, – Léskiro Lav Iiegova (Jahvá). I tu, Jakovóskiro ŭnuko (niepoto), risjov pale ke Devél tyró: rakh (dykh) tangipén (lačhé-ilýtkima) i čačunó séndo, i ŭsády (sak) užakir lačhipén tumaré Devléstyr. Mendro isyn Xananejanino, savéste isyn xohané ubladýtka (viesy) dro léskiro vast, léske isyn pir iló te pritasavel (te dukhavel). I phendiá Jefriémo: “Me, čačes, jacjom barvaló, me lathjom saró mištypén vaš péske: dre saré miré pharé butiá jone na lathéna dre mánde nisavó čoripén, so isyn grého.” Ne Me, Raj Devél, tyró Devél phuvjátyr Jegiptoskirjatyr; Me nevéstyr (snova) keráva adiáke, so tumé javéna te dživén pe budy (kuščy), sýrby dre dyvesá, savé isyn uphendle syr svénki. Me rakirdjom prorokenge, Me pribarjakirdjom dykhibena syr suné vaš tuménge: Me dyjom but godé-phenybnýtka (pritčy) pir prorokénde. Na dykhí pe dová, so Galaádo keréla namištes (ídoly) syr Avieno, i léskire manušá jačénape (končynena) nisosa, na dykhí pe davá, so jone janéna guruvén syr svénto dyibén dro Gilgalo, ne léngire altar'jendyr javéna ruíny maškír lies'ni feldengire. I nastiá Jakovo pe phuv Sirijakiri, i Izrailjo sys dynári pal romniáte, i pal romniáte jov rakhciá bakrén. O Raj Devél vylydžijá (jandiá) Izrailjo Jegiptóstyr pir prorokoste, i Jov prirakhcia les pir prorokoste. O Jefriémo dyjá jag Ráskire-Devléskire xoliake kirkipnastyr (rosholiakirdia Ras-Devlés); paldavá Jov mekciá pe léste rateskiri bang i Jov dukhavela pale les i sykavéla léske daja bang. Kiéli rakirdiá Jefriémo (manušá Jefriemóskire rodycóstyr), to saré izdrandyne. Jov sys barjakirdó dro Izrailjo, ne syr jov kerdiá čoripén angíl Vaaloste (Vaalo), to jov xasijá. Akaná jone keréna gréhi butedýr i baredýr, i jone kerdé vaš péske vyčhudé muiá, ídoly rupéstyr pir péskiro džinybén, saré kadalé statuly kerdé grafarja (spiecy te risynen) dre vastytka butiá. I jone phenéna: ‘mek manušá, kon janéla svénto dyibén, te čamuden guruvorén.’ Paldavá jone javéna syr migla (tumano) pe zlóko, syr pérvo pahlyn, saví sýges xasjola, syr šprija (miakina), so rosčhurdela riskiribnaskiri balvál krig givaobkeribnaskire šurnatyr (gumnostyr), syr thuv, so džála trubátyr (thuvalestyr). Ne Me som Raj-Devél, tyró Devél Jegiptóskire phuvjátyr, túke na trej te džinés javire devloren apríč Mánde: pal-dová so nane nijékh apríč Mánde, Savó zrakhéla. Me dykhcjom pal túte pe čhučí phuv, pe štéty, kaj sys baró šukipen. Kiéli lénde isys čaritka féldy, jone sys čale, jone sys pherdés čale i léngiro iló jačelas barikano, pal-dová so jone bistyrde pal Mánde. I Me javáva vaš lénge sýrby ščer (liévo), sýrby lieopardo pašýl drom javáva Me te dykháv ciamkes pal lénde. Me javáva te pirilav len sýrby ričyha (miedviedica), savjate xasiné tyknore; Me javáva te riskirav léngire-pašvarengiro kokalyco ke iló i Me javáva te pohav len sýrby ščeriha, a feldýtka murdalá (zvieri) javéna te roskušen len. Tu xasiakirdian pes, Izrailie, so tu san proti Mánde, proti Kodoleste, Savó podela vast túke. Kaj ža isyn dová sendári (králi), savó déla ráda te zrakhél tut dre saré tyré fórja? I kaj isyn tyré sendárja, pal savénde tu phendián: ‘De mánge kralís i thagar'jen?’ Kaj isyn tyró králi akaná? Mek jov te zrakhél tut dre saré tyré fórja? Kaj isyn tyré sendárja, pal savénde tu phendián: “De aménge kralís i barydyrén.” Me dyjom túke kralís dre Mirí xolý, i Me lyjom les krig dro Miro isyn xoliakiribén. Čoripén Jefriemoskiro zaphandlo dro venzlo, a léskiro grého prirakhno. Dukh džuvliáte, savjake trej te bijanél, javéla pe léste: jov isyn čhavó na o baré-godiákiro, pal-dová so jov tedy te na javél odój, syr javéla cýro (časo) te bijandjol. Me vykinava len liunoskire/adoskire (Šeoloskire) zorjátyr, Me vyrakhava len meribnástyr. O Meribén! Kaj isyn Tyró žalo (meribnytko truta/iado)? O liúno (ado)? Kaj isyn tyrí zbierda (pobieda) [tyró xasibén-ju.o.]? Miré jakhéndyr garadó, sob (kaj) Me te sykavav iló vaš lénge. Mek Jefriémo i te luludjol maškír pšalénde, javéla balvál vastokóstyr: balvál Rástyr-Devléstyr javéla čhučé phuvjátyr, i Léskiri ĥanyngori javéla šukí, i léskiro folahar (fontano) pirijačéla (terdjola) te čhuvelpe. Jov keréla čhučó khoró (sasudo) kažnoné piraliatyr, kaj isyn kažno kuč khoró. [13.16-ju.o.] Manušá Samarijatyr javéna bangé paldová, so jone kerdé búnto proti léngire Devléste. Jone peréna kurtalátyr, léngire bijaty javéna rosčingirde (pekade) pe koterá, i léngire pharé džuvliatyr otlena tyknemasen.’ O Izrailie! Risjov pale ke Raj Devél, tyró Devél, pal-dová so tu obštadianpe ĥerjasa pal péskiro čoripén. Len pésa mangipnytka lavá i risjon pale ke Raj Devél, rakirén Léske: “Otmek aménge saró čoripén i prilé amen laskasa, sob (kaj) aménge te janas svénta dyibená amaré uštendyr.” Asuro (Asirija) butýr na javéla te rakhél amen, ame na javása te tradas uklisté, i ame na javása butýr te rakiras pe butý amaré vastengiri: ‘Tumé san amaré develá’; pal-dová so i piroty (bidadengire čhavoré) lathéna láska Túte.” Me sastiakirava len daléstyr, so jone otpyne (durine) Mándyr, Me sykaváva láska lénge iléstyr; pal-dová so Mirí xolý risijá krig léndyr. Me javáva sýrby pahlyn (rosa) vaš Izrailjo i jov javéla te luludjol syr lilija, i jov mekéla péskire kórni (rukhá) sýrby drevy pe Liváno. Léskire randiá (vétki) rozbugljona (rozmekenape), i léskiri šuk (gožyma) javéla sýrby maslinitko kašt i léskiro lačhé – sungakiro khandypen (parfuny) javéla sýrby kiedrendyr pe Liváno. Jone, savé javéna te dživén tel Mirí zer (zasienka), risjona i jone javéna te otdžidjon sýrby giv, i javéna te barjon sýrby vinagradýtko kašt. Jone javéna lačhés te pahnison sýrby mol (vino) Livanostyr.” Jefriémo phenéla: ‘So mánge iščo (inké) trej idolendyr?’ Me otphenava léske: ‘Me javáva te šunav, i te dykháv pal túte? Me javáva syr kipariso, savó rozmekcia, Raj Devél, patria (listy). Mándyr javéna túte baritka (plódy).’ Kon isyn godó, sob (kaj) jov te ĥaljol saré dalé lavá? Kon isyn baré-godiákiro, sob (kaj) jov te džinél davá saró? Pal-dová so Ráskire-Devléskire dromá isyn čačuné, i čačipnaskire manušá psiréna pir lénde, ne čoripén-keribnaskire obštavenape pir lénde. Lav Ráskire-Devléskiro, so javdiá Ioiljoske, čhavéske Vafuiloskireske [Petuiloskireske-ju.o.] Šunén davá, tumé phurydyrá (godephuré), i pričhuvén kan saré, kon dživéla pe daja phuv! Ci sys dasavo dre tumaré dyvesá, ci dre dyvesá tumaré-dadengíre? Phenén tumaré čhavorenge pal davá, mek tumaré čhavoré te phenén léngire čhavorenge, i léngire čhavoré javire rodóske: dová, so mekciá listengiro kirmo (gusienica), pohaia phakitko skočko (saranča), ne dová, so mekciá phakitko skočko, pohaia kirmo, ne dová, so mekciá kirmo, pohaia bambula (žuko). Džangadjon, matymarjale, i rovén kirkes, i tuginen rovibnasa, saré, kon p'jela mol (vino) pal brodno (vinagradýtko) sóko (xum), pal-dová so jov isyn otlyno tumaré uštendyr. Pal-dová so but zoralé manušá javné pe Mirí phuv, so naštý len te pogines; léngire dandá isyn syr ščereste (lievoste), i léngire žandy isyn syr ščerihate (lievicate). Jone kerdé Miré-vinagradytkone bar'jendyr čhučí phuv, i jone phagirdé Miro inžyritko drévo, jone lučkirde cýpa léstyr i čhurdyné la javrí: léskire randiá jačné parné. Rovén zoralés, manušále, i podphandenpe žalobnone balytkone gonesa, sýrby patyvalý terný džuvlý, kon tuginela pal romeste péskire ternypnastyr. Butýr na janéna marune svénta dyibená i thadune svénta dyibená dre Khangirí Ráskire-Devléskiri. E rašaja, kon keréla butý vaš Ráske-Devléske, zoralés tuginena. Félda čhučakirdy (pustošono), i phuv zoralés tuginela, pal-dová so givá občorde, vyšutija brodno sóko (xum), i maslinitko dzet (maslina) xasijá. Ladžan tumé, kon san phuvjákire butiarné, tuginen rovibnasa, tumé, kon san vinagradarja, pir parnó giv i ĥersto (jačmienjo), pal-dová so feldakire givá xasiné. Vinagradýtko bar šutija, i inžyritko drévo zašutija, i granatytko drévo, i pal'ma adiáke-pac', i phabalin – saré drevy pe félda zašutine, dykhén, nane butýr rádyma manušéngire čhavénde. Podphandenpe žalobnone balytkone gonesa, i rovén zoralés tumé, kon san rašaja: tuginén rovibnasa, tumé kon keréla Devléskiri butý angíl altárjo. Javén, pasjon sarí rat, dre žalobna balytka goné tumé, kon keréla butý miré Devléske; pal-dová so butýr na janéna svénto dyibén givestyr i thaduno svénto dyibén dre Khangirí tumaré Devléskiri. Poden zvies' (zan) pal svénto posto, kharén te javén pe svénto skedyibén, keden phurydyren (godephuren) i saré manušén dalé phuvjátyr dre Khangirí Ráskire-Devléskiri, tumaré Devléskiri i prikharen zoralés Ras-Devlés. Dévla! Savó Dyvés ž da javéla! Pal-dová so Ráskire-Devléskiro dyvés isyn pašýl; jov javéla sýrby xasibén Sarezorjakirestyr. Ci da na xasjola xabén aménde pe jakhá, i rádyma i viesjolyma (loš) kheréstyr amaré Devleskirestyr? Ziárki kirnyne tel léngire komki, piraliá (kladovki) jačné čhučé; šurny phagirdé, pal-dová so giv vyšutija. Syr pharés murdalá (žyvotna) dyhinena! Gurty guruvén isyn sýrby nasvale; pal-dová so lénde nane čaritka félda, adiáke-pac' i stády bakréngire menčynenape. O Rajo Dévla! Me zoralés kharáva Tut, pal-dová so jag pohaia čaritka féldy pe čhučí phuv, i xačkiribén xačkirdiá saré drevicy pe félda. Murdalá pe félda adiáke-pac' kharéna Tut, pal-dová so rekicy (lenorjá) paniésa vyšutine, i jag pohaia čaritka féldy pe čhučí phuv. Phurdén dro rógo (dre truba) pe Sióno, i ĥazdén gódla pe svénto Devléskiri bérga; mek saré manušá, kon dživéla pe phuv – te izdran, pal-dová so javéla pašedyr Ráskire-Devléskiro dyvés, ake, jov otkerlape: iavéla davá dyvés kaló i tugitko, xmurýtko dyvés ĥenstone kalypnasa (ciamlypnasa), syr óbloki pe zlóko (pe ránko) rozdžanape pale bérgi, adiáke-pac' i javéna manušá, baré i zoralé, savé na sys viekendyr: i kadasavé-pac' butýr na javéna nijékhvar pal lénde maškír manušéngire ródy. Angíl lénde džála jag, so pohala saró, a palál pal lénde xačkiribén, so pekela saró. Angíl lénde phuv isyn sýrby únta (sado) Edemoskiri, a palál pal lénde jačélape čhučakirdy mal (stiep), nisó nikaj na kerélape léndyr. Jone javéna vydycjon sýrby graja: i jone javéna te prastan syr uklisté pe grénde-celdar'jende. Jone tradéna uklisté pir bergengire fiéli (makuški) ĥrukatosa sýrby maribnytkoné vurdenendyr, sýrby bari jag, saví pharadjola, kiéli pohala phusa, sýrby zoralé manušá, kon isyn skedynó te marélpe. Angíl lénde darátyr javéna te bandjon dukhasa manušá, a saré léngire muiá jačéna parné. Jone prastána syr zoralypnaskire muršá, i jone piriresena pir vánta syr maribnaskire manušá; kažno (sváko) léndyr džála angíl péskire dromoresa, i jone na zmarenape dro strojo. Jone na špulena (pihinena) jekh jekhés, kažno (sváko) léndyr džála dre léngiri kolona. I kiéli jone peréna pe maribnýtka [kop'i-r.s.], jone na dukhavena pes. Jone prastána odorík i pale pir fóro; jone ĥazdénape pe vánty prastaindoj: jone zaresena dre kherá, jone zadžána dre kherá pir fenštry syr čor. Phuv javéla te izdral angíl lénde, i bolybén te riskirelpe kham i čhon pokaljona, i čergeniá pirijačena te ziainen. I phenéla zoralés Raj Devél Péskire zaniása (glosasa) sýrby grumo angíl Léskiro xaladybén: pal-dová so isyn zoralypnaskire Léskire maribnaskire muršá. Dyvés Ráskire-Devléskiro isyn baró i drieván trašano, i kon déla ráda te vyrikirel les? “Paldavá akaná”, – rakiréla Raj Devél, – “risjon ke Me saré tumaré iléstyr postosa, rovibnasa i tugasa?” I riskirén tumaró iló, a na uribén, risjon ke Raj Devél, tumaró Devél, pal-dová so Jov isyn lačhé-diéskiro i but isyn láska Léste. Jov liéntes (nasyges) xoliasóla, i Jov isyn lačhé-ilýtko; i Jov tanginela (žalinela) angíl dová, syr te kerél bibáht. Kon džinéla, ci Jov požalinela, i mekéla bahtalypén pal Péste, sob (kaj) tumé te janén svénto dyibén givestyr, i thaduno svénto dyibén Ráske-Devléske, tumaré Devléske? Phurdén zoralés dro rógo (trambura) pe Sióno, poden zvies' (zan) pal svénto posto, kharén te javén pe svénto skedyibén, keden manušén, keden khetané godephuren (phurydyren), keden bijatén i kolynytkone tyknemasen; mek te džal javrí ternó léskire komoratyr, i terný lákire štubatyr. Mek rašaja, dynárja Ráskire-Devléskire, te rovén maškír trémo i altárjo, i mek jone te phenén: Požalin Tyré manušén, o Rajo-Dévla, i na de Tyró mištypén te bipatyvakiren, sob (kaj) Najudýtka nácyi te xulainen pe lénde, savé javéna te rakirén: Kaj isyn léngiro Devél?’” Tén'ci Raj Devél jačéla te zevlynel pal Léskiri phuv, i Jov sykavéla Péskiro iló pal Léskire manušénde. O Raj Devél otphenéla i phenéla Péskire manušénge: “Ake, Me bičhaváva tuménge giv, mol (vino), i maslinitko dzet, i tumé javéna čale léndyr; i Me keráva adiáke, sob (kaj) Najudýtka nácyi butýr te na bipatyvaliakiren tumen. I Me durjakirava tuméndyr xaladybén paš-ratitkoné (sieviernone) rigátyr, i Me tradava len krig pe bipanieskiri i čhučí phuv, léngire mujenca te risjon ke vastočno mórjo (derjáv), i léngire dumenca te risjon ke pal-panitko (západno) mórjo (derjáv). Léngiri khan javéla te ĥazdelpe, i džungaló (brydko) khandypen léndyr džála upré, pal-dová so jone kerdé baré dívy. Na strahadjov, o phuv, rádynpe i viesielinpe (lošaljov): pal-dová so Raj Devél javéla te kerél baré dívy! Na darén, murdalá feldýtka: čaritka féldy pe čhučí phuv déna péskiri čar, phabalyn déla péskiri phabaj; inžyritka drevy i vinagradýtka drevicy déna múri i pribaripen. Tumé, čhavoré Sionoskire, radynénpe, i viesielinenpe (lošaljon) Rástyr-Devléstyr, tumaré Devléstyr, sob (kaj) Jov te del lačhó vesnakiro bryšýnd čačipnása, i Jov keréla adiáke, so javéla bryšýnd, syr sys bryšýnd: vesnakiro i pal-lynaskiro (osieniakiro) dro pérvo čhon. Givaobkeribnaskire šurny javéna pherdé givesa, i priesy javéna te občhuvenpe vinagradytkone sokósa (xumésa) i maslinitkone dzetesa. I Me dáva pale tuménge saró dová, so xaja phakitko skočko, kirme, bambuly (žuki) i listengiro kirmo – Miro baró xaladybén, so Me bičhadjom pe tuménde. I tumé javéna te xan, kicý kaména i javéna čale, i tumé javéna te šarén Ras-Devlés, tumaré Devlés, Kon kerdiá divnes tuménca. I Miré manušén butýr na javéna te ladžakiren. I tumé javéna te džinén, so Me som maškír Izrailjo i so Me som Raj Devél, tumaró Devél, i butýr nane javire Devlés. Miré manušén butýr nijékhvar na ladžakirena. I paló (poslie) davá javéla adiáke, so Me dáva pherdés Miro Dúho kažnoné ločake (plotiake); tumaré čhavé i tumaré čhaja javéna te angilphenen, tumaré phurané manušá javéna te dykhén suné, i tumaré terné manušá javéna te dykhén dykhibena. I až rovno adiáke-pac' Miré pishar'jénge i Miré pisharicenge Me dáva Miro Dúho dre dolé dyvesá. I Me sykaváva dívy pe bolybén i pe phuv, rat i jag i thuvale stýlby. Kham parudjola pe kalypén, i čhon parudjola pe rat, – angíl, syr javéla baró i trašano Dyvés Ráskire-Devléskiro. I javéla adiáke dre dolé dyvesá, so, kóli vari-kon javéla te kharel lav Ráskire-Devléskiro, to odová zrakhélape; pal-dová so zrakhibén javéla pe bérga Sióno dro Jerusalimo syr Raj Devél phendiá: i vaš kodolénge, savé jačnépe, kon javéla te kharel Ras-Devlés. Pal-dová so, ake, dre dolé dyvesá i dro davá časo, kiéli Me janáva pale plienone manušén Judejátyr i Jerusalimóstyr, tedy Me adiáke-pac' kedava saré Najudýtka nácyi, i Me janáva len telé pe dólo Iosafatóskiro, i Me láva te sendinavpe lénca odój pal Miré manušénde, Miro mištypén – Izrailjo, savén jone rosčhude te dživén maškír Najudýtka nácyi, i jone roskerde Mirí phuv. Jone čhurdenas žriébijo pal Miré manušénde, i jone dénas terné manušés te paruven pe biladžakuniate, i jone biknenas patyvalia džuvliá pal mol (vino) i jone piné. Čačes, so tumé Mánge, Tíro i Sidono, i bregitka štéty pe Filistimakiri phuv? Ci javéna tumé te otdén pale fuipnasa proti Mánde? Ne kóli tumé javéna te otdén pale fuipnasa proti Mánde, Me drieván sýges otdáva pale fuipén pe tumaró šeró. Pal-dová so tumé lyné Miro rup i Miro suvnakái, i lydžiné pésa dro tumaré mangipnytka kherá Miré naj fededýr šukár mištypna; i manušén Judejátyr i manušén Jerusalimóstyr biknenas tumé Griekénge (Balaménge), sob (kaj) te durjakiren len miežendyr pe léngiri že phuv. Ake, Me ĥazdáva len odolé štetóstyr, ke savó tumé bikindle len, i Me riskiráva pale syr otdyibén dová, so tumé kerdé, pe tumaró šeró. I Me biknava tumaré čhavén i čhajén dre vastá manušéngire Judejátyr, i jone biknena len Saviejenge, duratuné manušénge – adiáke phendiá Raj Devél. Te den daja zan (zvies') maškír Najudytkoné nácyi: kedenpe pe maribén. Džangaven zoralypnaskire muršén adiáke, sob (kaj) te javén saré maribnaskire muršá pašyledýr, mek jone te javén. Pirikeren tumaré plugi (pharadia) pe kurtaly i tumaré sierpy (čhindlé) pe čhurdybnytka bustiá, mek b nazoralo te phenél: “Me som zoraló.” Javén sygedýr kedenpe khetané i, tumé, saré Najudýtka nácyi, i kedenpe saré khetané trusciál. O Rajo Dévla, lýdža Tyré muršar'jen te javén odój. “Mek Najudýtka nácyi te džangadjon, i mek te javén pe dólo Iosafatóskiro: pal-dová so odój Me, Raj Devél, bešava te sendiakirav saré Najudýtka nácyi, so isyn trusciál (krugom). Mek te čhinel sierpo (čhindló), pal-dová so givá isyn spiala pherdé. Javén, džán telé: pal-dová so tasavil'nia isyn pherdý, prieso piričhuvelape – pal-dová so jone kerdé but bibáht.” But, but manušá isyn pe dólo, pe savó prisendinena! Pal-dová so dyvés Ráskire-Devléskiro isyn pašýl pe dólo, pe savó prisendinena. Kham i čhon javéna kalé (ciamle), i čergeniá pirijačena te ziainen. I Raj Devél adiáke-pac' zagriminela Sionóstyr, i Jov phenéla Péskire zaniása Jerusalimóstyr; bolybén i phuv javéna te trinskirenpe; ke Raj Devél javéla garavibnaskiro štéto vaš Léskire manušénge, i Jov javéla syr tvárdyma / diz (kriepost') čhavorenge Izrailjoskirenge. “I tumé javéna te džinén, so Me som Raj Devél, tumaró Devél, Savó dživéla pe svénto bérga pe Sióno. Tén'ci Jerusalimo javéla svénto, i nijékh javire-themeskiro manúš nijékhvar na javéla te džal pir davá fóro nevéstyr. I javéla adiáke dro dová dyvés, so neví mol (vino) javéla te thadel bergendyr, i thud javéla te čhuvelpe bergicendyr, i panieskire rovicy (xohojoré) dre Judéia javéna pherdé paniésa, a fontano (folahar) javéla te čhuvél pherdés paní Ráskire-Devléskire Khereskir i jov javéla te del paní pe dólo Sitimo. Jegípto javéla syr golotýnia, i Edómo syr čhučí mal (sciep), pal nahratyma, so jone kerdé proti čhavorende Judaskirende, pal-dová so jone pročhude bibangipnaskiro rat pe léngiri phuv. Ne Juda javéla te dživél pe saré viéki, i dro Jerusalimo saré rodendyr ke javír ródo javéna te dživén manušá. I Me, Raj-Devél, morava krig léndyr rat (bang pal rat), savó Me iščo (inké) na mordjom: pal-dová so Me, Raj Devél, dživáva pe Sióno.” Lavá Amosóskire, kon sys jekh čhupnári (pastuho) dre Fiekoia [Tekoa-ju.o.], savé léske Raj Devél sykadiá dre suné, dre odolé dyvesá, kiéli o Ozíia sys králi pe Judéia, i dre dyvesá, kiéli o Iierovoamo, čhavó Ioasoskiro, sys králi pe Izrailjo duj berš angíl phuvjákiro trinskiriben. I jov phendiá: “O Raj Devél javéla te ĥrieminel Sionóstyr, i Jov phenéla Péskire zaniása Jerusalimóstyr; i javéna te tuginen zoralés sane budi (xižyny) čhupnar'jengire, i vyšutjola fiélia (makuška) pe vučipén Karmiloskiro.” Adiáke rakiréla Raj Devél: “Pal trin čoripena i štar, so kerdiá Damásko, Me na otmekáva pharó séndo lénge, paldová so jone molotindle Galaádo sastruné givaobkeribnytkonénca (molotilkenca). I Me bičhaváva jag pe Azailoskiro kher i joj xačkiréla Vienadadoskire [Ben-Xadadoskire-ju.o.] baré felatiniá (kolová). I Me adiáke-pac' phagirava šýbiero (zasóvo) pe pórta Damaskoskiri i Me xasiakiráva manušén, kon dživéla pe dólo Avienoskiro i kodolés, kon rikiréla thagaritko destó dro Jedeno (Ben-Xadado). Manušá Sirijatyr džána dro pliéno ke Kira”, – rakiréla Raj Devél. Adiáke rakiréla Raj Devél: “Pal trin čoripena, so kerdé manušá Gazatyr i pal štar čoripena, Me na otmekáva pharó séndo lénge, pal-dová so jone lydžiné saré Judén dro pliéno, sob (kaj) te biknen len syr pishar'jén ke Edómo. I Me bičhava jag pe vánta Gazakiri, i joj xačkiréla lákire baré felatiniá (kolová) [komory-r.s.]. I Me xasiakiráva manušén, kon dživéla ke Azoto, i kodolés, kon rikiréla thagaritko destó pe Askalono, i Me riskiráva Miro vast proti Ekrono (Jekrono), i manušá, kon jačélape Filistimlianendyr, xasjona” – rakiréla Raj Devél. Adiáke rakiréla Raj Devél: “Pal trin čoripena, so kerdé manušá Tirostyr, i pal štar čoripena, Me na otmekáva pharó séndo lénge, pal-dová so jone lydžiné sarén pliennonen ke Edómo, i jone na ripirde pšalýtko dorakiribén (sojuzo). Ne Me bičhava jag pe vánta Tiroskiri, i joj xačkiréla léskire baré felatiniá (kolová) [komory-r.s.].” Adiáke rakiréla Raj Devél: “Pal trin čoripena, so kerdé manušá Edomostyr, i pal štar čoripena, Me na otmekáva lénge bang, pal-dová so jone tradenaspe pal péskire pšaléste kurtalása i jone na tangindle len syr seménca, i léngiri xolý xačolas bipirijačybnaskiro, i jone ŭsády (sak) rikirenas xolý (mižehipen). I Me bičhaváva jag pe Fiemano, i joj shačkiréla baré felatiniá (kolová) dre Vosora [Bocra-ju.o.].” Adiáke rakiréla Raj Devél: “Pal trin čoripena, so kerdé čhavé Amonoskire, i pal štar čoripena, Me na otmekáva pharó séndo lénge, pal-dová so jone rosčingirenas (putravenas) perá pharé džuvliende, sob (kaj) lénge te buĥliakiren kustyka (miéžy) pe phuv. Ne Me roshačkirava jag dre vánta Ravakiri, i joj xačkiréla saré lákire baré felatiniá (kolová), godlypnasa dro maribnýtko dyvés, baré štormosa dro dová dyvés, syr javéla riskiribnaskiri balvál. I léngiro králi džála dro pliéno, jov i léskire thagárja khetané”, – rakiréla Raj Devél. Adiáke rakiréla Raj Devél: “Pal trin čoripena, so kerdé manušá Moavostyr, i pal štar čoripena, Me na otmekáva pharó séndo lénge, pal-dová so jone xačkirdé kokalý kralískire Edemoskire vaš zvjoska (izviest'): Ne Me bičhaváva jag pe Moávo, i joj shačkiréla baré felatiniá (kolová) dro Kieriofo, i Moávo xasjola maškír maribnaskiri gódla, manušéngire godlypnasa i rogoskire bašaibnasa. I Me xasiakiráva sendaris maškír lénde, i Me muliakirava saré léngire thagar'jen khetané lésa”, – rakiréla Raj Devél. Adiáke rakiréla Raj-Devél: “Pal trin čoripena, so kerdiá Juda i pal štar čoripena, Me na otmekáva pharó séndo lénge, pal-dová so jone na prilyné (dykhné vučipnástyr) pe Zakóno Ráskire-Devléskiro, i jone na rakhne Léskire priphenybená i léngire xohané devloré, pal savé léngire dadá giné te kerén patýv, lydžiné len droméstyr. Ne Me bičhaváva jag pe Judéia, i joj xačkiréla baré felatiniá dro Jerusalimo.” Adiáke rakiréla Raj Devél: “Pal trin čoripena, so kerdé manušá Izrailjoskire i pal štar čoripena, Me na otmekáva pharó séndo, pal-dová so jone bikindle čačipnaskiren manušén pal rup, i čororen pal para curuli (candali). Jone drieván tyrdenape ke práho phuvjákiro, te javél pe šeró čororeskiro, i jone piririskirena drom, savésa psiréna naphut'kirde manušá, a dad i čhavó psiréna ke jekh džuvlý, sob (kaj) te magirén svénto Miro lav. Jone pasjona pašýl kažno altárjo dre ídi, so lyné dre symadý (zalogo), i p'jena mol (vino) bangiakirde-manušénca dro kher, kaj isyn léngiro devloro. Ne davá sys Me, Kon xasiakirdiá Amoriejen angíl lénde, Miré manušénde, savé isys vučé sýrby kiedry, i jone sys zoralé sýrby demby, ne Me xasiakirdjom léngire barjakirdé (plódy) uprál, i léngire kórni (rukhá) telál. I davá sys Me, Kon vylydžijá tumen Jegiptóskire phuvjátyr, i Kon lydžijá tumen štardešá berš pir čhučí phuv, sob (kaj) te zauhtylen tuménge phuv Amoriejengiri. Me vykedyjom vari-savé tumaré čhavén syr prorokén, i vari-savén tumaré terné manušén syr Nazariejen. Ci na sys davá adiáke tumé, čhavé Izrailjoskire” – rakírla Raj Devél. “Ne tumé dyné Nazariejenge mol (vino) te p'jen, i tumé priphendle prorokenge, rakirí: ‘Na angilphenen!’ Ake, Me pritasavava tumen, sýrby vurdén, so isyn pherdó ĥarbénca (snopenca). Paldavá sýgno manúš na kerlape nikaj, a zoraló na javéla te rikirél péskiri zor, i muršari na zrakhéla kokoró pes; i kon rikiréla lúko, na vyrikiréla, a sýgno pe ĥerój manúš, na našela, i odová, kon tradéla uklisté, na zrakhéla péskiro di. Ne sámo murškanó manúš, našela nango krig dro dová dyvés”, – rakiréla Raj Devél. Šunén davá lav, so Raj Devél phendiá proti tuménde, čhavorále Izrailjoskire, proti saró kherítko ródo, savó Me vylydžijom Jegiptóskire phuvjátyr, rakirí: “Tumé san jekh kherítko ródo saré rodendyr pe phuv, savéske Me kerdjom patýv, paldavá Me pharés sendiakirava tumen pal saró tumaró čoripén.” Ci saštý duj manušá te džán khetané, kóli jone na dorakirenape? Ci javéla ščer (liévo) te brilinel dro veš, kóli jov na dykhéla vari-so te roskušel dandenca? Ci javéla te vydel ščer zan péskire xašhátyr (logovostyr) –, kóli jov ničý na uhtyldia. Ci saštý čirikly te perél dre felý (pietlia) pe phuv, kóli te na javél felý sietkasa pe láte. Ci ĥazdélape felý phuvjátyr, kóli te na uhtylén nisó lása? Kóli te na bašavel zoralés rógo (truba) dro fóro, ci javéna manušá te darén? Kóli isyn bari bída dro fóro, ci davá isyn na Devléstyr, Kon domekcia davá? Čačó, Raj Devél na keréla nisó angíl dová, syr Jov sykavéla dová, so Jov pridumindia, Léskire pishar'jénge, prorokenge. Ščer lyjá te rykinel – kon na javéla te darel? O Raj Devél phendiá – kon na javéla te angilphenel? Poden zvies' (zan) dre baré felatiniá i pe strehi kherengire dro Azoto (pe Filistimija), i dre baré felatiniá (kolová) pe phuv Jegiptóskiri i phenén: “Kedenpe khetané pe bérgi Samarijakire: dykhén pe baró búnto godlenca maškír lénde, i syr pritasavéna manušén odój.” “Pal-dová so jone na džinéna, syr te kerén čačunés, – rakiréla Raj Devél, – ‘jone, savé zagaravena kučipén, so jandlé jone dre čori, so jone nahrates čorde, dre léngire baré felatiniá (kolová).’ Paldavá adiáke rakiréla Raj Devél: ‘Namal javéla trusciál daja sarí phuv! Jov otlela zor léndyr i jov rosčorela léngire baré felatiniá (kolová).” Adiáke rakiréla Raj Devél: “Syr o čhupnári (pastyrjo) vytyrdela javír mólo i zrakhéla ščeroskire (lievoskire) móstyr duj kokalý ĥerengire i kotér kaneskiro, adiáke-pac' nábut čhavorén Izrailjoskiren vytyrdena xasibnastyr, savé dživéna ke Samárija pe jagóro (pe krajo) čhuibnaskiro, i savé isyn bešté pe jagóro drogoné pasindliakiro (pe kušetka). Šunén i dophenen dro kher Jakovóskiro:” – rakiréla Raj Devél, jangoléngiro-bolybnáskiro Devél, “so Me dro dová dyvés pharés sendiakirava Izrailjo pal léskire čoripena, i Me pharés sendiakirava pal altári dre Viefil', i javéna občingirde šyngá (rógi) pe altárjo, i jone peréna pe phuv. I Me rozmarava pe koterá ivantytko (zimitko) kher khetané lynaitkone kheresa; i peréna kherá šukaribnasa slonytkone kokalestyr, i na javéna butýr baré kherá”, – rakiréla Raj Devél. “Šunén davá lav, tumé-džuvliále Vasanostyr, savé jačné thule sýrby recy (tielicy), savé isyn pe bérgi dre Samárija, savé pritasavéna čororen, savé na déna te dživén kodolénge, kon isyn dre trébima i, savé rakiréna péskire xulange: ‘Janén mol (vino), javása te pjas la!’” O Raj Devél sovlahadiá Péskire sventymasa: “Ake, javéna dyvesá pe tuménde, so tumen javéna te tyrden baré nanglenca (kriukenca), i tumaré javibnaskire čhavorén nanglorenca pe vendka pe mačhende. Tumé džána javrí pir phagirdé vánty, kažno (sváko) tuméndyr mamúj péste, i tumen vyčhurdena saró ukedyiben dre xaromy dro Jermono”, – rakiréla Raj Devél. “Javén dre Viefil', i kerén gréhi, a dro Gilgalo kerén butedýr butedyrjakiren čoripena; janén péskire svénta dyibená kažno zlóko (ránko), tumaré dešengirja kažna trin dyvesá, ianén svénta dyibená parikiribnasa pe roščyna, poden zvies' (zan) i den te džinén sarénge pal vól'no janybén: davá isyn pir iló tuménge, čhavé Izrailjoskire”, – rakiréla Raj Devél. “I Me dyjom adiáke-pac' tuménge nange dandá, bi xabnaskiro dre saré tumaré fórja, i na javéla te uhtylel maró pe saré tumaré štéty, ne tumé na risiné ke Me”, – rakiréla Raj Devél. “Me adiáke-pac' na davas bryšýnd tuménge, kiéli sys iščo (inké) trin čhoná ke ukedyiben givengiro. Me bičhavavas bryšýnd pe jekh fóro, i Me na bičhavavas bryšýnd pe javír fóro: jekh kotér phuv sys počhudo bryšyndesa, a javír, so sys počhudo bryšyndesa, zašutija. Paldavá duj, ci trin fórja giné ke javír fóro te p'jen paní, ne jone na piné čalés, ne usajékh tumé na risiné ke Me”, – rakiréla Raj Devél. “Me dukhavavas tumen šuké nasvalypnasa (iržasa) i zelene kirnypnasa pe giv; listengire kirme (gusienicy) pohanas but tumaré unty (sady), i tumaré vinagradniki (drakhitka), i tumaré inžyritka kaštá, tumaré maslinitka kaštá, ne tumé na risiné ke Me”, – rakiréla Raj Devél. “Me bičhavavas pe tuménde meribnytka fránsy, syr i pe Jegípto: Me muliakiravas tumaré terné muršén kurtalása khetané grenca, savén lenas dro pliéno; Me keravas adiáke, doiá khan (smrado) ĥazdelaspe pir tumaré stany (tabory) dre tumaré ruthunia, ne tumé na risiné ke Me”, – rakiréla Raj Devél. “Me ravavas telé tumaré fórja, syr Me, tumaró Devél, radjom telé Sodómo i Gomóra, i tumen syr ĥlomnia vyuhtylen jagatyr, so xačija, ne tumé usajékh na risiné ke Me”, – rakiréla Raj Devél. ‘Paldavá adiáke Me keráva túke, o Izrailjo: i pir dová, so Me adiáke keráva túke, jav skedynó te dykhespe Mánca, tyré Devlésa, o Izrailjo.” Paldavá, ake, Jov, Kon vykerdia bérgi, Kon sozdyjá balvál, Kon déla zvies' (zan) manušéske, pal so jov duminéla, Kon keréla adiáke, so zlóko (ránko) parudjola pe kalypén javrí, i Kon štavela (stempinela) pir vučé štéty pe phuv, – Raj Devél, jangoléngire-bolybnáskiro Devél, isyn Léskiro lav.’ Šunén davá lav, savésa me, Amoso, javáva te tuginav jasvénca pal tuménde, manušále Izrailjoskire kheréstyr. Pyjá terný patyvalý džuvlý (dieva) Izrailjoskiri: joj butýr na ĥazdélape. Joj isyn pašty, i nane nijékh manúš te ĥazdel la. Paldavá adiáke rakiréla Raj Devél: “Dro fóro, savó délas tysjoncy manušén pe maribén, jačénape šel muršá, dro fóro, savó délas šel manušén, jačénape deš muršá vaš kheréske Izrailjoskireske.” Paldavá adiáke rakiréla Raj Devél kheréske Izrailjoskireske: “Tumé rodén Man i javéna džidé. Na rodén Viefil', i na zadžán dro Galgálo i na psirén ke Virsávija (Bieršeba), pal-dová so Gilgaloskire manušá džána dro pliéno, a Viefiliator nisó na jačélape.” Rodén Ras-Devlés i tumé javéna te dživén, sob (kaj) Jov te na kerél adiáke, so jag peréla sýges pe kher Jozaskiro, i xačkiréla sarésa les adiáke, so na javéla nijékh te murdiakirel jag dre Viefil'. Tumé, kon pirikerela čačunó séndo pe truta (otrava), a čačipén čhurdena pe phuv, rodén Les, Kon sozdyjá čergeniengiri grupa Plieady (Eftá-čergenitko) i Oriono (Čergeniá pe Vastóko). Kon paruvela zer (tien') meribnaskiri pe jasno zlóko (ránko), Kon keréla adiáke, so dyvés jačéla syr kaly rat. Kon kharéla ke Pe paningá morjoskire (derjavéskire), i Jov rosčhuvela len pir sarí phuv, – Raj Devél isyn Léskiro lav. Jov keréla adiáke, so xasibén sýges peréla pe zoraleste, i Jov janéla xasibén pe dijá. Tumé naštý te dykhén pe kodoleste, kon sykavéla bang tuménge pašýl pórta i tumé dykhéna vučipnása pe kodoleste, kon rakiréla čačipén. Paldavá, so tumé štakirena (pritasavéna) čorores, i tumé léna léstyr počastúnki givesa; na dykhí pe dová, so tumé čhudé kherá vyčingirde barestyr, tumé usajékh na javéna te dživén dre lénde; tumé počhude dre phuv šukár vinagradýtka unty (sady), ne tumé na javéna te p'jen mol (vino) léndyr. Pal-dová so Me džinóm, so tumé kerdé but čoripena, i tuménde isyn but gréhi: tumé pritasavéna čačuné manušén i léna myty (vziatki); tumé riskirena pe rig čačipén čororé-manušéngiri pe séndo [pašýl foróskiri pórta-ju.o.]. Paldavá baré-godiákiro manúš javéla štyl dro dalé dyvesá, pal-dová so davá isyn bibahtaló časo. Rodén lačhipén, a na fuipén, sob (kaj) tumé te dživén, i paldavá Raj Devél, jangoléngire-bolybnáskiro Devél, javéla tuménca, syr tumé i rakiréna. Bidykhen tumé čoripén (bibáht), ne vykeden lačhipén, i tumé kerén adiáke, sob (kaj) te javél čačipén pašýl pórta (vráty) foróskiri, saštý te javél, so Raj Devél, jangoléngire-bolybnáskiro Devél, javéla te tanginél odolén, kon jačélape manušéndyr Jezaskirendyr (Iosifostyr).” Paldavá adiáke rakiréla Raj Devél, jangoléngire-bolybnáskiro Devél Sarezorjákiro: “Zoraló roviben javéla pe saré vulícy (gásy), i manušá javéna te priphenen pe saré dromá: ‘Dévla! O Devlale!’ I jone javéna te kharén phuvjákire butiar'jen te tuginen zoralés, i kadasaven, kon isyn spiecy te tuginen rovibnasa. Dre saré vinagradýtka unty (sady) javéla zoraló roviben, pal-dová, so Me prodžava maškír lénde,” – rakiréla Raj Devél. Bida javéla pe tuménde, kon drieván kaméla, sob (kaj) te javél dyvés Ráskire-Devléskiro! Savó lačhipén tumé užakiréna dyveséstyr Ráskire-Devléstyr? Davá ž javéla kalypén, a na dud. Davá javéla sýrby dová, kóli manúš nascia ščerestyr (lievostyr), i rič pirilyja les, ci sýrby manúš, savó gijá andré kher, pričhudia péskiro vast ke vánta, i sap dandyrdia les. Naúšto dyvés Ráskire-Devléskiro isyn na kalypén, a dud? Xor kalypén, nane ni saví jasnyma, i na ziainela. Me bidykhava, Me dykháva vučipnása pe tumaré svenkitka dyvesá, i Me na sungava (na sungavava) gudló khandypen (parfuny), so jačéla tuménde pe skedyibena. Na dykhí pe dová, so tumé janéna céla shačkiribnaskire svénta dyibená i svénta dyibená givestyr, Me na prilava len. I Me na keráva patýv tumaré sventoné dyibnenge te parikirén tumaré thule guruvorenca Durjakiren Mándyr šumo (glumo) tumaré giliendyr, pal-dová so Me na javáva te šunav mielodija tumaré guslienca (arfengiri), ne mek čačunó séndo te čhuvelpe sýrby paniá, i čačipén syr sýgno rékica (lenorí). Ci janénas tumé Mánge svénta janybená i marune janybená pe čhučí phuv štardešá berš, o kher Izrailjoskiro? Ne tumé adiáke-pac' (tože) janénas pésa šátra Molohoskiri i čergen tumaré devloreskiri, Riemfanos mujenca, so tumé kerdé vaš péske. Paldavá Me bičhaváva tumen dro pliéno pal Damásko”, – rakiréla Raj Devél, Kon kharélape jangoléngire-bolybnáskiro Devél. Bida tuménge, kon priléla džiibén lokhes, i savé isyn narakhibnytka (biespiečna) dro patiaibén pe bérga dre Samárija, – tumé, slavutna manušá baré nacyjatyr, ke savé javéla kher Izrailjoskiro. Džán duredýr ke Kalne, i dykhén, odothýr džán ke baró Jemafo, i odothýr ke Giefo Filistimlianengiro: ci jone isyn fedýr kadalé tumaré kralipnendyr? Ci léngire miéžy isyn buĥledyr tumaré-phuvjákire miežendyr? Bida pe tuménde, savé otčhuvena bibahtaló dyvés, i, savé janéna pašyledýr ke pe, syr javéna te pritasaven tumen. Tumé, savé san pašté pe čhuibena, so isyn ĥožakirde slonytkone kokalosa, i tumé potyrdenape pe tumaré dróga pasindlia (ložy). Tumé xána vykedyné bakrén tumaré stadatyr, i thule guruvorén ĥurtostyr. Tumé bagana tel gusliengiri (arfakiri) zan (glos), i priduminena vaš péske muzykakire strumiénty syr Davído. Tumé p'jena mol (vino) tahtajendyr, i makhenape naj fedyršone makhlunienca (mazienca), ne tumé na piridživena pal dová, so Joza (Iosifo) isyn pritasado. Paldavá tumé akaná džána pérva dro pliéno angíl plienonende i, savé tuméndyr akaná isyn bešté pal svenkitka skaminda paš-pasindoj, javéna štyl. Raj Devél sovlahadiá Pésa, jangoléngire-bolybnáskiro Devél, Raj Devél i rakiréla adiáke: “Mánge isyn džungaló (brytko), so phutjola Jakovo, i Me bidykhava léskire baré felatiniá (kolová); paldavá Me vydava léskiro fóro i saró, so isyn dre léste.” I tén'či javéla adiáke: so kóli deš manušá jačénape dro jekh kher, to i jone meréna. I seménca mulengiri, léla javire manušés, savó javéla te xačkirel trúpy, i jov phenéla kodoléske kheréstyr, kon jaciápe džidó: “Ci isyn iščo (inké) vari-kon dro kher?” Tén'ci kodová manúš kheréstyr phenéla: “Nane ‘nikonés.” I daja seménca tedy phenéla: “Rikir péskiri čib! Pal-dová so aménge naštý te priripiras lav Ráskire-Devléskiro.” Pal-dová so, ake, Raj Devél priphenela, so Jov phagiréla baró kher (kralipén Izrailjoskiro) ke ruíny, i tyknó kher (kralipén Judejákiro) pe koterá. Ci prastána graja pir bérgi? Ci pahinela phuv manúš, odój, pe guruveste? A syr ža tumé piririskirde čačipén dre želučoskiri truta (jado), a bar'iakirdo (plódo) čačipnáskiro dro kirkipen (palyno)? Tumé, savé radynénape nisostyr, savé phenéna: “Ame, ž, xaj, na péskire zorjása doresciam péske zoralypén?” “Ne, ake, Me, – rakiréla Raj Devél, jangoléngiro-bolybnáskiro Devél, Me ĥazdáva Najudytko nacyja proti tuménde, kher Izraljoskiro, i adalé vérgi tumaré javéna te pritasaven tumen štetóstyr, kaj te džán andré Jemafo, ke sýgno rékica (lenorí) pe čhučé prahi (Aravija).” Adiáke Raj Devél sykadiá mánge: ‘Ake Jov sozdyjá but phakitkone skočken (saranča), kiéli léla te barjol atava (pozdnjo čar); i, ake, daja atava jaciá paló dová, syr progijá sčhinyben kralískiro. I sys adiáke: kiéli skočki pohane nábut so na sarí čar, pe phuv, tén'či me, Amoso, phendjom: “O Rajo Dévla! Otmek, me mangavape Túke! Syr Jakovo déla ráda te terdjol proti? Pal-dová so jov isyn tyknó.” Raj Devél tangindia pal dová, so Jov kerdiá. “Te na javél davá”, – phendiá Raj Devél. Adiáke Raj Devél sykadiá mánge: ake, Raj Devél khardiá jag te sendinel, i joj xačkirdiá bari (xor štéty) tel phuv kolban' i sarí mekny phuv. Tén'ci Me phendjom “O Rajo Dévla! Terdjov! Me mangav Tut! Syr Jakovo déla ráda te terdjol proti? Pal-dová so jov isyn tyknó!” Paldavá Raj Devél požalindia pal dová, so Jov kerdiá. “Te na javél davá”, – phendiá Raj Devél. Adiáke Raj Devél sykadiá mánge: ake, Raj Devél, sys terdó pe jagóro (pe krajo) vantakiro, i sys molovano otvieso dro Léskiro vast. I phendiá Raj Devél mánge: “Amose! So dykhésa tu?” Me phendjom: “Molovanó otvieso.” Tén'ci Raj Devél phendiá: “Ake, Me čhuváva otvieso maškír Miré manušénde Izrailjostyr: Me butýr na javáva te otmekav bang lénge. I vučé štéty, pe savé janéna dyibená, javéna čhučé (pusta), i svénta štéty Izrailjoskire javéna pašté dre ruíny. I Me ĥazdáva kurtála pe Jerovoamoskiro kher.” Tén'ci o Amásija, rašáj Viefiliatyr, bičhadiá lav Iierovoamoske, kralíske Izrailjoske, phení: “O Amoso zrakirdiape pe túte maškír kher Izrailjoskiro: phuv naštý te šunél saré léskire lavá. Pal-dová so Amoso adiáke phendiá: “O Iierovoamo meréla kurtalátyr, a Izrailjo javéla, čačipnása, lydžino krig dro pliéno léskire phuvjátyr.” Tén'ci o Amásija phendiá Amososke: “Džá tu, angildykhibnaskiro (magiko), naš pe phuv Judaskiri. Odój xa maró, i odój angilphen, ne butýr tu te na angilphenes dre Viefil', pal-dová so davá isyn svénto štéto kralískiro, i davá isyn kher kralískiro.” Tén'ci Amaso otphendiá, i phendiá Amasijaske: “Me na sómas proróko, i me na som čhavó prorokoskiro. Ne me sómas čhupnári (pastuho) pe stada, i me kedyjom múri pe sikomoritka kaštá. Tén'ci o Raj Devél lyjá man, kiéli me gijom pal stada, i Jov phendiá mánge: ‘Džá i angilphen Miré manušénge Izrailjostyr.’ I akaná šun lav Ráskire-Devléskiro: tu rakirésa: ‘Na angilphen pe Izrailjo, i na vyphen lavá pe kher Isakóskiro’ “Paldavá adiáke rakiréla Raj Devél: ‘Tyrí romný javéla biladžakuny džuvlý dro fóro, a tyré čhavé i čhaja peréna kurtalátyr, tyrí phuv roskerena pe pašá šelesa mierinytkonesa, i tu merésa pe magirdy phuv; i Izrailjo, čačipnása, lydžána krig dro pliéno léskire phuvjátyr.” Ake, isyn davá, so Raj Devél, sykadiá mánge: ake, khudo (korzina) spialone barjakirdonenca (fruktenca). I Jov phendiá: “Amoso! So dykhésa tu?” I phendjom me: “Khudo lynaitkone (spialone) barjakirdenca.” Tén'ci phendiá Raj Devél mánge: “Kónco (jagóro) javdiá pe Miré manušénde Izrailjostyr; i Me butýr na otmekav bang lénge. ‘I giliá, so bagandle dre felatiniá, jačéna syr zoraló roviben dro dová dyvés’, – rakiréla Raj Devél. But trúpy javéna pir saré štéty, manušá čhurdena javrí len bi lavengiro.” Šunén davá, tumé, kon čorjola te nakhavel manušén dre trébima, i te xasiakirél saré čororen pe phuv, tumé, savé rakiréna: “Kiéli davá Nevoné-Čhonytko svénko prodžála (končynelape), sob (kaj) aménge javélas saštý (moginelas) te biknas maró, i davá sávato (subóta), sob (kaj) aménge javélas saštý te kofinas amaré parné givesa. Sob (kaj) aménge te tykniakiras efa, i te barjakiras šékieljo, i ame podkerasas ubladýtka (viesy) frentymasa. Sob (kaj) aménge javélas saštý te kinas čorores pal rup, i manušés dre trébima pal para curuli (candali), sob (kaj) te biknas nálačho parnó giv?” O Raj Devél sovlahadiá Jakovóskire phut'kiribnasa: “Me čačipnása nijékhvar na bistrava pal léngire nalačhé butiá.” Ci na léla te izdral phuv pal davá, i kažno (sváko) manúš javéla te tuginel zoralés, kon dživéla pe daja phuv. Ci na ĥazdélape syr šuvlypen sarí daja phuv sýrby reka (len'): so javéla te ĥazdelpe valnenca i te mekel telé jekhátyr (srázu) sýrby reka (len') Jegiptóskiri.’ “I javéla adiáke dro dová dyvés’, – rakiréla Raj Devél – ‘so Me keráva adiáke, so kham zadžála dro paš-dyvés, so javéla kaló (ciamlo) pe phuv dro jasno dyvés. Me paruvava tumaré svénki pe zoralý túga i saré tumaré giliá pe zoraló roviben; i Me janáva žalobna balytka goné pe kažno trušúl, i plieha pe kažno šeró. Me keráva dro da dyvés bari túga pe phuv, savjása obrovena jekhore čhavés, i kónco (jagóro) daleske javéla syr kirko dyvés. ‘Ake, javéna dyvesá’, – rakiréla Raj Devél, so Me bičhaváva bokh pe daja phuv, na bokh bi mareskiro, na smega pal paní, a javéla truš (žažda) pal lavá Ráskire-Devléskire. I manušá javéna te psirén jekhe morjostyr (derjavestyr) ke javír, paš-ratitkoné (sieviernone) rigátyr ke vastóko; jone javéna te prastan odorík i pale te rodén lav Ráskire-Devléskiro, i jone na lathéna les.” Dro dová dyvés šukár patyvalé terné čhaja i zoralé tyrne manušá javéna te našaven zor smegatyr, savé sovlahana grehosa Samarijaskiresa, savé rakiréna: “Te javél džidó tyró devel, Danjo!” I iščo (inké): “Te javél drom célo ke Virsávija!” Jone peréna i nijékhvar na uštena nevéstyr! Me dykhcjom Ras-Devlés, Savó sys terdó pašýl altárjo, i phendiá Jov: “Pekav pir vudareskiro berand (stojka), sob (kaj) te trinskirenpe progi tel stýlby, i rozmar len pe šeré léngire sarengire. Me muliakirava kodolén, savé jačénape léndyr kurtalása: nijékh na našela léndyr, kon prastala krig; i kodová, kon kedelape, na zrakhélape. Na dykhí pe dová, so jone ĥanavenape dro liúno (ado), odothýr Miro vast vytyrdela len. I te resen jone pe bolybén, i odothýr janáva Me len telé. I te garadjon jone kokoré pe Karmiloskiro vučipén, odothýr Me vyrodava len i lavá len. Mek jone i te garadjon Miré jakhéndyr pe dugno (dno) morjoskiro (derjavéskiro), i odothýr priphenava Me sapeske i jov dandyrela len. I te džán jone dro pliéno angíl léngire vergénde, i odothýr priphenava Me kurtalake i te pekaven len. Me javáva te rikirav Miré jakhá pe lénde vaš bibáht, a na vaš lačhipén.” I Raj Devél, jangoléngire-bolybnáskiro Devél, isyn Kodová, Kon čilavéla phuv i joj biladjola, i saré, kon dživéla pe láte, javéna zoralés te rovén; sarí phuv ĥazdélape syr šuvlypen sýrby reka (len')(Nilo), i joj mekelape telé jekhátyr sýrby reka (len') Jegiptóskiri, davá isyn Jov, Kon kerdiá Péskire upratune komory pe bolybén, i Kon začhudia bolybnáskiro svódo uprál pir phuv; Kon prikharela paniá morjoskire (derjavéskire), i vyčhuvela len pir sarí phuv: Raj Devél isyn Léskiro lav. “Ci na kadasavé – sama tumé san, čhavé Izrailjoskire, syr čhavé Efiopijengire?”, – rakiréla Raj Devél. “Ci davá na Me jandjom Izrailjo Jegiptóskire phuvjátyr, i Filistimlianen Kaftorostyr, i Sirijanen Kirostyr? Ake, jakhá (Miré) Ráskire-Devléskire dykhéna pe grehítko kralipén, i Me xasiakiráva les sarésa phuvjátyr, ne Me sarésa na xasiakiráva kher Jakovóskiro”, – rakiréla Raj Devél. “Pal-dová so Me priphenava, i Me rosčhuvava manušén Izrailjoskire kheréstyr, maškír saré nácyi sýrby giv rosčhuvelape dro porizén (rošóto); ne i sámo tyknedýr ziárka na peréla pe phuv. Saré grehítka Miré manušéndyr meréna kurtalátyr, savé rakiréna: ‘Bari bída na doreséla amen i na pirilela amen.” Dro dová dyvés Me nevéstyr ĥazdáva šátra Davidoskiri, so pyjá. I Me zakerava phagirdé štéty, i Me čhuváva nevéstyr saró dre láte, syr sys dre ĥaratuné dyvesá; sob (kaj) manušá Izrailjoskire te zakeden dová, so jačélape Jedomostyr, i saré Najudýtka nácyi, savé kharéna Miro lav”, – rakiréla Raj Devél, Savó keréla saró davá. “Ake, javéna dyvesá’, – rakiréla Raj Devél, – kiéli manúš, kon pahinela phuv, pirilela manušés, kon sčhinela givá, i manúš, kon štakirela vinagrado, pirilela kodolés, kon čhuvéla dre phuv ziárki; sóko (xum) (gudly mol) javéla te thadel bergendyr, i te čhuvelpe telé bergicendyr. I Me janáva pale Miré manušén Izrailjoskiren plienóstyr, i jone občhuvena kherenca čhučé (pusta) fórja, i jone javéna te dživén dre lénde, i jone čhuvéna dre phuv vinagradýtka (drakhitka) barja, i jone javéna te p'jen mol (vino) léndyr; i jone čhuvéna unty (sady), i jone javéna te xan léngire phabá. I Me občhuvava léngiro džiibén pe léngiri phuv, i butýr nikón na vykušela len phuvjátyr, saví Me dyjom lénge” – rakiréla Raj Devél, tumaró Devél. Dykhibén Avdijoskiro. Adiáke rakiréla Raj Devél pal Edómo: ame šundiám zvies' (zan) Miré bičhaibnaskire manušéstyr, savés Me, Raj Devél, bičhadjom maškír nácyi te phenél: “Uštén, javén te ĥazdaspe pe maribén proti léste.” Ake, Me kerdjom adiáke, so tu jacián tyknó ródo maškír nácyi; tu javésa dre bari napatyv. Tyró phut'kirdo iló xohadia tut, kon dživéla maškír ščéli pe bérgi, konéskiro kher isyn vučó; tu, savó rakiréla dro péskiro iló: ‘Kon sčhurdela telé man?’ Na dykhí pe dová, so tu ĥazdesa pes syr órlo (kído), i so tu kerésa péskiro gniázda (kúfo) maškír čergeniá, ne i odothýr Me čhurdava telé tut”, – rakiréla Raj Devél. “Kóli javénas čora ke tu, ci rozmaribnaskire čora ratý, – so adiáke zoralés občorde tut. Ci na lenas jone féni (tóka) adákicy, kicý lénge treindiá? Kóli javénas vinagradone-kedybnaskire (sborščyki), so ž jone na mekenas túke vari-kicý muriny? Syr ke Isávo saró sys pirirodyno? Syr saré léskire čorahane štéty piridykhne! Saré tyré drúgi (malá) pir dorakiribén (sojuzo) tradéna tut až ke kustyka (granicy); a manušá, kon sys dro ramánjo (miro) túsa, xohavena tut, i jone léna upralypén proti túte; kodolé, savé xané tyró maró, čhuvéna felý pe túte”, – nikón na ĥaljola davá. “Dro dová dyvés javéla adiáke, – rakiréla Raj-Devél, – so Me xasiakiráva i godé manušén Edomostyr, i baré godiar'jen Isavóskire bergátyr. I tyré zoralé muršá, o Fiemánie, phadjona dro dúho, so ke jekh, ne kažno (sváko) manúš, kon isyn Isavóskire bergendyr, xasjola – muliakirena les. Pal-dová so tu sánas nahrato ke tyró pšal Jakovo, ladžaipén učhakiréla tut, i tu xasjosa pe saré viéki. Dro dová dyvés, so tu sánas terdó pe javír rig, dro dová dyvés, kiéli čúža manušá lydžánas dro pliéno Jakovóskire zoralé xaladén, syr javire-phuvitka manušá giné andré léskire pórty, i čhurdenas žriébijo pal Jerusalimo, i tu sánas jekh léndyr. Ne túke na treindiá te dykhés xoliames palál pal tyré pšaléste dro dyvés, syr lenas les léskire phuvjátyr; i te na radynespe xasibnastyr Judáskire-čhavorengirendyr, i te na otkeres bu'gles muj sabnasa dro dová bibahtaló dyvés. Túke na treindiá te džas andré pórta (vráty) dro dová dyvés, kiéli bari bibáht pyjá pe Miré manušénde. Čačes, na treindiá túke te dykhés xoliames palál pe léngire mén'ki, ci te pričhuves vastá ke léngiro mištypén, syr sys bari bída lénde. Túke na treindiá te tyrdjos pe trušulytka dromá (pieriekrjostki), sob (kaj) te zamares (te muliakires) kodolén, savé našenas; i te na vydes kodolén, savé jačnépe, syr sys bari dar lénge. Pal-dová so syg javéla Dyvés Ráskire-Devléskiro pe saré Najudýtka nácyi: syr tu kerdián, adiáke i túke javéla kerdó; tyré réndy risjona pe tyró šeró. Pal-dová so syr tumé piné pe Mirí svénto bérga, adiáke-pac' i saré Najudýtka nácyi javéna ŭsády (sak) te p'jen; jone javéna te p'jen, i te nakhaven (te glytynen), i len xasiakirena sýrby na sys len. Ne pe bérga Sionóskiri manušá zrakhenape, i joj iavéla svénto štéto. Kher Jakovóskiro léla péske léngiro meknó mištypén. Manušá Jakovóskire javéna syr jag, a manušá Jozáskire javéna syr bari jag, ne manušá Isavóskire javéna syr phus: len podhačkirena i shana jagása, i nijékh na piridživela, sob (kaj) te jačélpe Isavóskire kheréstyr,” – pal-dová so davá phendiá Raj Devél. I manušá paš-dyvesytkoné (južnone) rigátyr léna péske bérgi Isavóskire, i manušá pe dólo léna péske Filistimija, i féldy Jefraimoskire i Samarijakire. E manušá Vienjaminoskire léna péske Galaádo. I xaladé Izrailjoskire čhavéndyr, savé sys dro pliéno, javéna te len péske Xanaanóskiri phuv až ke Sariepta, a manušá Izrailjoskire, savé isyn dro pliéno dro Siefarado, javéna te len péske fórja pe paš-dyvesýtko (južno) rig. I javéna zrakhibnaskire pe bérga Sióno te sendiakiren bérga Isavoskiri, i javéla kralipén Ráskire-Devléskiro.” I, ake, javdiá lav Ráskire-Devléskiro Jonaske (Ionaske), čhavéske Amafijoskireske, phení: “Uštý, džá ke Ninievija, davá baró fóro, i rákir zoralés proti léste: pal-dová so dalé foróskire-manušéngire zlydnitka réndy (fuj diély) javné angíl Mánde.” I Jona uštyjá, sob (kaj) te našél ke Farsiso Rástyr-Devléstyr (syr Léskiro proróko). Jona gijá telé ke Iopija, pleskirdia lové pal párma (korabljo), besciá pe láte, i tradyjá lénca ke Farsiso, sob (kaj) te našél Ráskire-Devléskire jakhéndyr. Ne o Raj Devél bičhadiá bari balvál pe mórjo (derjáv), i odój jaciá zoraló štormo pir mórjo (derjáv) adiáke, so sys bicialó, so párma phadjola. I matrosy darándyne, i kažno (sváko) manúš dyjá gódla ke péskiro devloro. I jone čhurdyné gpharipén (gruzo), so sys pe párma, dro mórjo (derjáv), sob (kaj) te javél lokhedýr párma. Ne o Jona (Iona) gijá telé dro telatuno štéto pe párma, pasijá i syg sys sutó. I o barydyró podgíia ke jov, i phendiá léske: “So davá značynéla, soibnaskiro? Uštý, khar tyré Devlés; xaj Tyró Devél priripirela pal aménde, sob (kaj) aménge te na xasjovas.” I phendlé jone jekh jekhéske: “Javén, čhurdasa žriébijo, sob (kaj) ame saštý te džinas, pir konéste davá pharipén pyjá pe aménde?” I ĥáda, jone čhurdyné žriébijo, i kokalko sykadiá pe Jonaste. Tén'ci jone phendlé léske: “Ame mangasa tut, phen aménge! Pir konéste davá pharipén pyjá pe aménde? Savó isyn réndo túte? Katýr tu san? Save themestyr tu san? Save manušéndyr tu san?” I otphendiá jov lénge: “Me som Judo; i me darava Rástyr-Devléstyr; Devléstyr bolybnaskirestyr, Kon sozdyjá mórjo (derjáv) i phuv šukí.” Tén'ci manušá strahádyne baré trašasa, i phendlé léske: “Sóske davá tu kerdián?” Pal-dová so adalé manušá džindlé, so jov nascia Ráskire-Devléskire jakhéndyr, syr jov uže rosphendiá lénge. Tén'ci jone phendlé léske: “So trej te kerás aménge túsa, sob (kaj) mórjo (derjáv) te štyljol vaš aménge?”, – pal-dová so mórjo (derjáv) usá ĥazdelaspe vučedýr štormostyr. I jov phendiá lénge: “Len te ĥazdén man upré, i čhurdén man dro mórjo (derjáv); tedy mórjo (derjáv) javéla štyl vaš tuménge. Pal-dová so, me džinóm, so davá štormo jaciá pir mánde.” Na dykhí pe dová, so manušá ĥriebindle zoralés, sob (kaj) te janel párma ke phuv, ne jone na dyné ráda, pal-davá so mórjo (derjáv) duredýr ĥazdélape štormosa pe lénde. Paldavá jone dyné gódla te pomoginel ke Raj Devél, i phendlé: “Ame mangasape, o Rajo Dévla, ame mangasa drieván, sob (kaj) te na xasjovas pal davá manušéskiro džiibén, i sob (kaj) te na zaginen bang aménge pal davá rat bibangipnaskiro: pal-dová so Tu, Raj Devél, kerdián adiáke, syr Túke isyn kuč” I jone ĥazdyné Jonas i čhurdyné les dro mórjo (derjáv), i mórjo (derjáv) jaciá štyl Léskire baré xoliátyr. Tén'ci manušá strahádyne Rástyr-Devléstyr baré darása, i jone jandlé svénto dyibén Ráske-Devléske i jone sovlahade. Ĥáda, o Raj Devél vykedyjá baré mačhes (kitos), sob (kaj) jov te nakhavel (te proglyninel) Jonas. I Jona sys dro per kitoskiro trin dyvesá i trin ratia. Tén'ci mangdiápe o Jona Ráske-Devléske, léskire Devléske kitoskire perestyr. I phendiá jov: “Me dyjom gódla te pomoginel ke Raj Devél, syr pritasade man, i Jov otphendiá mánge. Me dyjom gódla te pomoginel samone xoripnastyr tel phuv, i Tu šundián mirí zan (glos). Pal-dová so Tu čhurdyjan man dro xoripén pe sámo morjoskiro (derjavéskiro) iló. I paningá občhude man trusciál; i tyré baré paningá, so kuninenape, i valny proginé pirdál mánde.” Tén'ci me phendjom: “Man vyčhurdyne Tyré jakhéndyr, ne me nevéstyr javáva te dykháv pe Tyrí Svénto Khangirí. Paniá občhude trusciál man, až ke miro di; bidugnoskiro xoripén (biezdna) učhakirdiá man; morjoskire (derjavéskire) čarjá zakhudepe trusciál miro šeró. Me dogijom ke bergengiro dugno (dno): phuv péskire štabenca zakerdiape pal mánde; ne Tu, Rajo Dévla, miro Dévla, lydžijan džides miro di javrí liunostyr (adostyr). Kiéli miro di zamyjá dro mánde, me priripirdjom Ras-Devlés, i miro mangipén gijá upré ke Tu, dre Tyrí Svénto Khangirí. Kodolé, kon keréla patýv idolénge, savé nisó na mol, jačkirdé Tut, Kon déla bahtalypén. Ne Me janáva svénto dyibén Túke miré zaniása te parikiráv túke; Me keráva dová, so Me sovlahadjom. Zrakhibén isyn Rástyr-Devléstyr.” I priphendiá Raj Devél kitoske, i jov vyčadyja Jonas pe šukí phuv. I, ake, javdiá lav Ráskire-Devléskiro javír mólo, phení: ‘Uštý, džá ke Ninievija, drieván (zbit) baró fóro, i phen zoralés Devléskiro lav adiáke, syr Me priphenava túke.” I uštyjá Jona, i gijá ke Ninievija pir lav Ráskire-Devléskiro. Džinén, so Ninievija sys koptaram baró fóro Devléste, treindiá trin dyvesá te obdžas les. I lyjá Jona te psirél pir fóro pe pérvo dyvés, i jov mištophenelas. Jov dyjá gódla i phendiá zoralés: “Iščo štardešá dyvesá, i Ninievija phagirena ke ruíny!” I e manušá Ninievijatyr patiandyné Devléske, i jone phendlé sarénge (obzaniakirde) pal posto, i čhudé pe péste žalobna balytka goné, naj baredyrestyr ke naj tyknedýr manúš léndyr. Tén'ci dogijá lav ke králi Ninievijakiro, i jov uštyjá léskire tronostyr, i čhudiá dre rig péskiro uribén, čhakirde pes žalobnone-balytkone gonesa i besciá dre práska (pieplo). I o králi kerdiá adiáke, so daja zvies' (zan) phendlé angíl sarénde i o králi i léskire baré raja vydyne priphenybnytko statúto, phení: “Mek nijékh ni manúš, ni murdál, ni ĥurto, ni stada, te na xan ničý; na domeken, sob (kaj) jone te xan, te p'jen paní. Ne mek manušá i murdalá te učhakiren pes žalobnone balytkone gonesa, i te prikharen zoralés Devlés; adiáke, sob (kaj) kažno léndyr te risjol péskire bibahtalé droméstyr i nahratymatyr (nasilijostyr), so kerdé léskire vastá. Kon saštý te phenél, ci risjola ke Devél, i ci požalinela (tanginela), i ci, mo (xaj), riskiréla dre rig Léskiri bari xolý adiáke, sob (kaj) aménge te na xasjovas.” Tén'ci Devél dykhciá léngire butiá, so jone risiné krig léngire bibahtalé dromendyr, i Devél potangindia (požalindia) pal bari bibáht, so Jov phendiá te janel pe lénde, i jov na jandiá pe lénde. Ne Jenaskiro iló zoralés phadija daléstyr, i jov xoliásyja. I jov mangdiápe Ráske-Devléske i phendiá jov: “O Rajo Dévla! Saró davá na pir miré lavá, so me phendjom, kiéli me iščo (inké) sómas pe péskiri phuv? Paldavá me i nascjom vagedyr (ĥaredyr) ke Farsiso: pal-dová so me na džindjom, so Tu san lačhé-dieskiro Devél, Savó sykavéla láska, Savó liéntes xoliasóla i keréla but-but lačhipén, Kon žalinela te kerél bedypen. Paldová akaná, Rajo Dévla, le, me zoralés mangáva Tut, miro džiibén mándyr, pal-dová so fedýr isyn vaš mánge te merav, syr te dživáv.” Tedy Raj Devél phendiá: “Naúšto davá isyn mištó vaš túke te xoliasos?” I gijá krig Jona foróstyr i besciá pe vastokitko rig pe fóro, i odój jov kerdiá péske buda (kušča) i besciá tel léste dre zer (zasienka), sob (kaj) te dykhél, so javéla forosa. I Raj Devél barjakirdia xrústo i kerdiá adiáke, so jov ĥazdyjápe upredyr Jonastyr adiáke, sob (kaj) jov te moginel (te saštynelas) te del zer (zasienka) pe léskiro šeró te rakhél les léskire pharipnastyr.” I Jona drieván jaciá rado dalé xrustostyr. Pe javír dyvés pe zlóko, o Devél sozdyjá kirmes, i jov podčhindia xrústo, i xrústo zašutija. I sys adiáke: syr kham ĥazdyjápe, o Devél jandiá xačkirdy balvál vastokóstyr: i kham lyjá te pekel pe šeró Jonaskiro adiáke, so léskiro iló zamyjá. Tén'ci jov zakamdiá mulypen pe péste, i phendiá jov: ‘Fedýr isyn vaš mánge te merav, syr te dživáv’. Tén'ci Devél phendiá Jonaske: “Naúšto davá isyn mištó vaš túke te xoliasos pe xrústo až ke meribén!” O Jona otphendiá: “Me mištés keráva, so xoliasyjom až ke meribén.” I phendiá Raj Devél: “Tu tangindian (požalindian) xrústo, pašýl savó tu na keresas pharí butý, i tu na barjakirdian les. Jov sykadyjá célo pal rat, i zašutija dro javír rat. I syr davá mánge treindiá te na tanginav Ninievija, kadasavó baró fóro, dre savó butýr syr šel te biš tysjoncy manušá, savé naštý te phenén, kaj isyn lénde čačó, i léngiro zérvo (liévo) vast, i adiáke-pac' butypen (množestvo) kheritkoné-murdalengiro (skotengiro).” Ake, sys lav Ráskire-Devléskiro, savó javdiá Mihiejoske Morasfiejostyr dre dolé dyvesá, kiéli sys trin králja Judejákire: Iofámo, Aházo i Jezekíia. Davá lav Devél sykadiá léske dre suné, so javéla Samarijasa i Jerusalimosa. ‘Šunén, saré manušýtka nácyi (narody), phuv i saró, so isyn pe láte! Mek te javél Raj Devél syr jakhítko (svidietieljo) proti tuménde, o Raj Devél Léskire sventoné Khangirjátyr. Dykhén! Ake, Raj Devél vydžála Léskire štetóstyr; Jov džála telé, i Jov javéla te štavel (te terdjol) pir vučé štéty pe phuv. Bérgi javéna te bilaven tel Léste, i doly javéna te pharadjon, sýrby mom angíl jag, sýrby paniá, so čhuvenape krutymatyr (vučipnástyr). Saró davá pal Jakovóskiro čoripén, i pal gréhi, so kerdiá kher Izrailjoskiro. Savó isyn čoripén Jakovóskiro? Ci davá na pal Samárija? Save dalé isyn vučé štéty dre Judéia? Ci davá saró isyn na Jerusalimóstyr? “Paldavá Me keráva Samarijatyr gruda ruinendyr pe félda, – štéto, sob (kaj) te počhuven vinagrado: Me vyčhurdava lákire bará pe dólo, i Me otčhakirava lákire fundamienty. Saré lákire vyčhindlé muiá javéna phagirdé pe koterá (kuski), i saré lákire dáry, syr biladžakuné džuvliakire, javéna xačkirdé jagása. Me xasiakiráva saré lákire ídoly, pal-dová so joj (Samárija) kerdiá len pal dáry, so denape biladžakuné džuvliáke, i kadalé dáry risjona vaš dáry javire biladžakuné džuvliáke.” Paldavá me, Mihiejo, javáva te obrovav i te tuginav jasvénca, me džáva obriskirdo i nango; Me javáva i te vyinav syr šakaly, i te tuginav rovibnasa syr strausy. Pal-dová so Samarijakire fránsy (rany) isyn nasastiakiribnytka, pal-dová so jone doginé ke Judéia; jone doginé ke pórta miré manušéngiri, ke Jerusalimo. Na phenén davá dre Giefo, na rovén zoralés odój, ne učhakiren pes prahosa dro forico Ofra. Džán te dživén pe javír štéto, kon dživéla ke Šafiro, nange ke ladž; na našela, kon dživéla ke Caano (Caanano), Ecel' (Bet-Ecel') tuginela zoralés; davá roviben na mekéla tumen te terdjol dre léste. Kon dživéla ke Marofa (Marat), zanasvalyne pal lačhipén, ne bibáht javdiá telé Rástyr-Devléstyr ke pórta Jerusalimóskiri. Kon dživéla ke Lahiso, de andré ĥenšten dro vurdén maribnýtko; pal-dová so čoripén Izrailjoskiro lathné dre túte. Paldavá tu javésa te des počastúnki (dáry) ke Moriešef-Gief: ne kherá dro Ahzivo javéna xohanés te prityrden kral'jén Izrailjostyr. Ne Me janáva mištypén-prilyibnaskires (nasliednikos) ke tu, manušnije Moriešoskiri; i baripén Izrailjoskiro piridžala ke Odolamo. Ker péske plieška [zle péstyr balá-r.s.] i občhin péskire balá, kiéli iló tyró javéla te dukhal pal drogoné čhavénde tyrende. Barjakir péskiri plieška sýrby órlo (kído), pal-dová so jone džána dro pliéno tútyr. Bida pe odolénde, savé priduminena čoripén i savé vyduminena bibáht pe péskire čhuibena! Pe zlóko, kiéli dyvesjola, jone keréna dová, pal-dová so saró davá isyn dro léngiro vast. Jone isyn ĥalka (skempa) ke féldy, i jone léna len zorjása. Jone isyn ĥalka ke kherá, i jone otkedena len manušéndyr. I jone pritasavéna (obkedena) manušés i léskiro kher, i manušés kokores, i léskiro meknó mištypén. Paldavá adiáke rakiréla Raj Devél: “Ake, Me priduminava kadasavi bibáht proti kadaja sém'ia (irí), so tumé na moginéna (na saštynena) te durjakiren (te zlen) dalé bibahtiatyr tumaré menia; i tumé na javéna te zadenpe, (te psirén mamúi); pal-dová so davá časo isyn bibahtaló. Dro dová dyvés manušá javéna te rakirén pritča pal tuménde, i jone javéna te rakirén zoralés kirke jasvénca, i te phenén: ‘Ame xasijam sarésa, o Devél parudia amarí dólia [otdyjá javirénge-r.s.]: syr te risjol amarí dólia? Jov roskerdiá amaré féldy maškír amaré vergénde.’” Paldavá tuménde na javéla nijékh manúš, sob (kaj) te čhurdel žriébijo i te obmierinel šelesa tumaré miéžy pe skedyibén angíl Raste-Devléste. “Na angilphenen, proróki, – tumé rakiréna kodolénge, savé angilphenena, na angilphenen lénge, sob (kaj) ladžaipén te na jačélpe [te na lathel tumen-r.s.]. Tumé, savé kharenape kher Jakovóskiro: ‘Ci Ráskire-Devléskiro Dúho tyknyja? Ci saró davá čoripén léstyr? Ci na keréna lačhipén Léskire lavá kodoléske, savó dživéla devlytkes [kon keréla čačunés-r.s.]?” “Na'gara tumé, kon sánas Miré manušá, ĥazdynépe syr vérgi proti Mánde – tumé zlena zorjása upratuno uribén i telatuny ídia manušéndyr, savé džána pašýl bidarakires, savé risjona maribnastyr. Tumé tradéna javrí džuvlién Miré manušengiren léngire jekhore kherendyr, savé isyn lénge pir iló, tumé otkedena léngire čhavorendyr bahtalypén Miro. Uštén i džán adathýr; pal-dová so adáj tumé na otkhinjona. Kadavá štéto isyn magirdó, i xasiakiréla tumen, i davá xasiakiriben javéla ke kónco (ke jagóro). Kóli te javél balvalitko manúš, i te phenél xohaibén kadasavé lavénca: ‘Me javáva te angilphenav pal mol (vino) i pal zoraló pibén (sikiera), až i jov javélas kuč proróko vaš kodolé manušénge. Ne Me, čačes, kedava khetané sarén tumen, o Jakovo, Me čačipnása skedáva jačkirdé manušén Izrailjoskiren; Me čhuváva khetané (khetaniakirava) len syr bakrén dre Vosora (Bocra) sýrby stada maškír léngire čar'itka féldy: jone javéna zoralés te den gódla, pal-dová so len adákicy but manušá isyn.” Angíl lénde xalado phagiréla vánty (sciany): i jone phagirena dová, so sys pe drom lénde, i jone dodžana ke pórta i džána péske duredýr. Léngiro králi javéla te džal angíl lénde, i Raj Devél javéla angíl lénde. I phendjom me, (Mihiejo): “Šunén akaná tumé, šeralé Jakovóskire, i tumé, thagárja Izrailjoskire kheréstyr: ci da na tuménge trej te džinén čačipén? Ne tumé san manušá, kon bidykhela lačhipén te kerél, ne tuménge isyn pir iló bibáht (čoripén): tumé, savé lučkirena cýpa manušéndyr, i léngiri loč (džidé masá) léngire kokalendyr; savé xána loč (džidé masá) miré manušéndyr, savé lučkirena cýpa léndyr, i phagirena léngire kokalý, i čingirena len pe koterá syr mas vaš pirí, syr loč (džidé masá) vaš kakávi (kotlo).” Tén'ci jone javéna te prikharen zoralés Ras-Devlés, ne Jov na otphenéla lénge [na javéla te šunél len-r.s.], i Jov garavela péskiro muj léndyr pe dová časo, pal dová, so jone kerdé bibahtalé réndy. Paldavá adiáke rakiréla Raj Devél pal prorokénde, savé kerdé adiáke: “So miré manušá dynepe dukhá; savé dandyrenape i déna gódla: ‘Ramánjo.’ Ne kon na déla ničý lénge dro muj, tedy jone džána maribnása proti léste: Paldavá javéla tuménge rat zamiést dykhibén, i javéla tuménge ciamlypén zamiést dová, sob (kaj) tumé te rosphenén suné; kham džála telé pe prorokénde, a dyvés jačéla ciamlo vaš lénge.” I magiki (prozorlivcy) javéna ladžakirdé, i drabakiribnaskire javéna obsandle (dylniakirde); jone čačipnása phandena péskire uštá; pal-dová so na javéla otphenybén Devléstyr. Ne mánde, Mihajoste, isyn pherdý zor, saví dyjá Raj Devél pir Svénto Dúho, čačipén i zoralypén, sob (kaj) mánge te priphenav (te sykavav) Jakovóske léskiro čoripén, i Izrailjoske léskiro grého. Akaná, šunén davá tumé, šeralale kheréstyr Jakovoskirestyr, i barydyrá theméskire kheréstyr Izrailjoskirestyr, savénge isyn džungaló (brydko) čačipén, i savé piririskirena patiaibnýtko otlydžaiben ke čačipén; savé ĥazdéna Sióno pe manušýtko rat i Jerusalimo pe načačipén: léngire šeralé sendinena pal počastúnki (podarki), léngire rašaja sykliakiréna pal pleskiriben (pokinyben), i léngire proróki sykliakiréna pal lové, na dykhí pe dová, so jone rikirenape Ráske-Devléske i phenéna jone: “Ci nane Raj Devél maškír aménde? Na javéla bibáht (bída) aménge.” Pal tuménde paldavá Sióno javéla pharado syr félda, i Jerusalimóstyr jačélape bérgica ruíny, a bérga tel Kheréskiro fundámiento jačélape syr bérgica dro veš. I javéla adiáke dre palatuné (posliednia) dyvesá, so bérga Devléskire Kheréstyr javéla čhudý pe bergengiro naj vučedýr štéto i joj iavéla vučedýr saré bergicendyr, i manušá javéna te džán ke joj syr réki (leniá). But nácyi javéna i phenéna: “Javén, i, ĥazdasape pe Ráskire-Devléskiri bérga, dro kher Jakovóskire-Devléskiro, sob (kaj) Jov te sykliakirél amen, syr te dživás pir Léskiro, i sob (kaj) ame te psiras pir Léskire špery (sciežki).’ Pal-dová so Sionóstyr vydžála Zakóno, i Jerusalimóstyr lav Ráskire-Devléskiro.” I javéla Jov te sendiakirél but manušýtka nácyi i sykavéla Jov bang zoralé-nacyiengiri, savé isyn dur, jone pirikerena kurtaly pe plugi (pharadia), i léngire čhurdybnytka bustiá (kop'i) pe sierpy (čhindlé); sob (kaj) nacyja te na ĥazdel kurtála proti javír nacyja, i sob (kaj) jone te na sykljon butýr te marénpe. Ne kažno (sváko) manúš javéla te bešél tel vinagradýtko xrústo i tel léskire-inžyritko kašt (drévo), i nikón na javéla te trašavel len, pal-dová so jangoléngire-bolybnáskiro Raj Devél dyjá lav pal davá. Saré manušá psiréna i mangénape lavésa léngire devlorendyr, ne ame javása te psiras, i mangaspe Ráskire-Devléskire lavésa, amaré Devleskiresa pe saré viéki. “Dro dová dyvés”, – rakiréla Raj Devél, – “Me kedava khetané kodolén, savé isyn langale, i Me skedáva kodolén, savén lydžiné dro pliéno, i kodolén, savén Me pritasadjom (jandjom bída). I Me keráva langalendyr Miro otiačiben, i Me keráva odoléndyr, savén tradyne dur, zoralý nacyja.’ I javéla Raj Devél te rainel pe bérga Sióno, adadyvesatune dyveséstyr i pe saré viéki.” I tu, vučardý, (bašnia) sob (kaj) te dykhén pal bakréngire stády, bérgica Sionoskire-čhakiri, ke tu javéla i risjola pale raipen, savó sys vagedyr (angledýr), kralipén Sionoskire-čhakiri. Akaná sóske tu désa gódla zoralés? Naúšto nane králi maškír tuménde? Ci so, xasijá tyró junkaro (godý-dyibnaskiro)? Pal-dová so dukhá uhtyldé tut sýrby džuvliá, savjake trej te bijanél. Jačpe dre dukhá, i krencynpe pharipnastyr, sýrby džuvlý, saví syg bijanéla, čhaj Sionóskiri, pal-dová so akaná túke trej te džas krig foróstyr, i tu jačesape te dživés pe félda, i tu dodžasa ke Vavilóno. Odój zrakhena tut, odój Raj Devél vyrakhela tut vastéstyr tyré-vergengirendyr. Akaná but nácyi skedynépe proti túte, savé rakiréna: “Mek joj te javél magirdy, i mek amaré jakhá te dykhén pe Sióno.” Ne jone na džinéna, so duminéla Raj Devél, i jone na ĥaljona, kiéli Jov déla lačhí godý lénge, so Jov kedyja khetané len syr ĥarby (snopy) pe givaobkeribnaskiri šúrna. “‘Gazdepe i obker giv, o čhajo Sionóskiri, pal-dová so Me keráva túke sastruno šyng (rógo), i Me keráva túke xarkuné (miedítka) naja (kopyty), i tu rozmaresa pe koterá but manušýtka nácyi,’ i tu otdesa syr obsvencyndle léngiro doresybén Ráske-Devléske, so jone lyné javirendyr, i léngiro mištypén Baré Ráske pir sarí phuv.” Akaná skéde khetané xaladén, e čhaj xaladengiri, pal-dová so amen občhude trusciál vérgi, i jone pekavena Izrailjoskire sendaris khijasa (trostiasa) pir čham (ščoka). “Ne tu, Vifliejémo-Jefrafe! Na dykhí pe dová, so tu syr fóro san tyknó maškír tysjoncy štéty pe Judaskiri phuv, tútyr javéla Mánge Odová, Savéske trej te javél Baré Rása pe Izrailjo; Saveskiro ródo džála ĥaratuné anglypnástyr, viečnone dyveséndyr.” Paldavá Raj Devél jačkiréla Izrailjo ke/žýko dasavo časo, kiéli joi, savjake trej te bijanél, bijanéla, tedy kodolé Léskire pšale, kon jaciápe, risjona pale ke Izrailjoskire čhavé. I Jov terdjola i Jov javéla te čaravel Léskire-bakrengiri stada Ráskire-Devléskire zoralypnasa, laveskire rajkanypnasa Rástyr-Devléstyr, Léskire Devléstyr. I jone jačénape te dživén bi darákiro, pal-dová so Jov javéla Baró pe jagóry (pe kraí) phuvjákire. I kadavá Manúš janéla ramánjo (miro). Kiéli o Asirijákire xaladé javéna pe daja phuv, i kiéli jone léna te štaven pir amaré felatiniá, tén'či ame čhuvasa angíl lénde eftá čhupnar'jen (pastyr'jen), i ohtó thagar'jen (kniaz'jen) manušengiren. I jone javéna te xulainen pe Asirijakiri phuv kurtalása i phuv Niemvrodoskiri pašýl sámo léngiri pórta; i Jov, Miesija, zrakhéla amen Asuroskire (Asirijákire) xaladendyr, kiéli jone javéna pe amarí phuv, i kiéli jone léna te štaven amaré miéžy. I otiačiben Jakovóskire manušéndyr javéla maškír but manušýtka nácyi sýrby pahlyn (rosa) Rástyr-Devléstyr, sýrby sporko bryšýnd pe čar, savé na javéna te užakiren manušéngire (Adamoskire) čhavén, savénca na javéla te xulainél manúš. I otiačiben Jakovóskire manušéndyr javéla maškír Najudýtka nácyi, dro maškirál buté-kherítka ródy (pliémi) sýrby ščer (liévo) maškír vešytkone murdalénde (zvieriende), sýrby ternó ščer maškír bakrengiro ĥurto; savó, kóli zadžála, to javéla te štakirel ĥerénca pe xasibén, te roskušel pe koterá, i nikón na zrakhéla léstyr. Tyró vast javéla ĥazdynó pe tyré vergénde, i saré tyré vérgi xasjona. “I javéla adiáke dro dová dyvés”, – rakiréla Raj Devél, – “so Me xasiakiráva Tyré gren tyrén maškiralypnastyr, i Me rozmarava pe koterá tyré maribnýtka vurdená. I Me xasiakiráva fórja pe tumarí phuv, i Me ravava ke ruíny saré tyré zoralé vánty (forty) (ukrieplienii). Me xasiakiráva čovahanypen tyré vastéstyr, i tuménde na javéna butýr džinybnaskire/drabakiribnaskire pir čergeniá. Me adiáke-pac' xasiakiráva tyré vyčhindlé muiá (istukany), i tyré vyčhudé obrazy tyré maškiralypnastyr: tu butýr na javésa te bandiakires šeró telé angíl dolé priedmiety, so tyré vastá kerdé. Me vyriskirava tyré kaštune muiá tyré vešorestyr, i Me rozmarava pe ruíny tyré fórja. I Me vypherdiakirava te otdav fuipén pale xoliása i xoliakiribnasa pe Najudýtka nácyi, savé na šundlé Man.’ Šunén akaná, so Raj Devél rakiréla: “Terdjov pe ĥerá, obsendiakir tyró réndo (diélo) angíl bérgi, i mek bérgicy te šunén tyrí zan. Šunén, bérgi, pal so Raj Devél sendiakiréla [žalinelape-ju.o.], i šunén tumé, zoralé-phuvjákire rikiribnytka (fundamienty), pal-dová so Raste-Devléste isyn séndo Léskire manušénca, i Jov lydžála réndo proti Izrailjo.” O Raj Devél rakiréla: “O Miré manušále! So Me kerdjom tuménge? I syr davá sys, so sýrby Me menčyndjom tumen? Dosykaven [otphenen-r.s.] Mánge. Pal-dová so Me vylydžijom tumen Jegiptóskire phuvjátyr, Me vyrakhcjom tumen pishar'jengire sastyrendyr; i Me bičhadjom angíl tuménde Mojzás, Aronos i Miriam. O Miré manušále! Priripiren akaná, syr o Valáko, králi Moavitoskiro, priduminelas čoripén, i so otphenélas léske Valaámo, čhavó Vieoroskiro, i so kerdiápe pe malia (stiepi) maškír Sitimo i Galgálo, sob (kaj) tumé moginénas saštý te udžinén čačipén Ráskire-Devléskiro.” Sósa te javav mánge angíl Raste-Devléste, i syr mánge te bandiakirav šeró angíl Bolybnáskire Devléste? Ci te javav mánge angíl Léste xačkiribnaskire sventoné dyibnenca? Ci jekhe-beršeskire cieliantenca? Ci javéla lačhó Ráske-Devléske, kóli me janáva but (tysjoncy) bakrén? Ci deš bará (tysjoncy) réki (leniá) maslinitkone dzetesa? Ci mánge trej te dav miré pervones, kon bijandjola mánde pal miro čoripén, bijatós miré maséndyr paló grého miré-dieskiro?’ O Raj Devél sykadiá túke, o manuše, so isyn lačhipén, i so trej Ráske-Devléske tútyr: te kerés pir čačipén, te vykedes te kerés lačhipén, i te dživés naphut'kirdes angíl tyré Devléste! Ráskire-Devléskiri zan déla gódla foroske Jerusalimoske, i godypén déla patýv Léskire lavéske: “Šunén, khija, i Kodolés, Savó čhudiá les. Ci isyn iščo (inké) savé kučipena (sokroviščy) dro zlydnitko kher, dro savó zlydni manušá jandlé; i tykniakirdy (krotko) miéra, saví isyn džungaly Mánge, Ráske-Devléske. Syr Mánge te ginav pal čačunende kodolén, savénde isyn načačune (fuj) ubladýtka (viesy), i xohané phurdyne (giri) dro jekh gonó? Barvalé manušá dalé foróstyr isyn drieván načačune [nahrata-ju.o.], i kodolé saré, kon dživéla dro davá fóro, xohavenas, i čib léngiri isyn xohany dro léngire uštá. Paldavá Me adiáke-pac' keráva, so tu javésa ĥará nasvaly, kiéli Me pekavava tut, kiéli Me keráva, so jačélape golotýnia (čhučipen) tútyr pal tyré gréhi. Tu javésa te xas, ne tu na javésa čaly; bokh (čhučipen) javéla andré tyró kužum (želudko). Tu javésa te lydžas krig vari-so [otčhuvesa péske-r.s.], ne tu na zrakhésa dová, i kodová, so tu zrakhésa, Me dáva tel kurtála. Tu javésa te počhuves dre phuv, ne tu na javésa te sčhines givá; tu javésa te tasaves (te štakires) maslinitka múri, ne tu na javésa te makhespe maslinitkone dzetesa; i tu vytasavesa vinagradýtko sóko (xum), ne tu na javésa te p'jes mol (vino). Pal-dová so tumé rikirdepe ke statúty Amvrijaskire, i ke saré butiá Ahavoskire kheréstyr, i tumé keréna saró pir léngiri godý, so Me keráva tuméndyr golotýnia (pustota), sob (kaj) te den šolia tumaré manušá, i jačélape pe tuménde bipatyv Miré-manušéngiri.” Bida mánde! Pal-dová so me, som sýrby manúš, kon kedela lynaitka múri, sýrby kodolé, kon podkedela vinagrado (drakh), nane nijékh grozno (vetka múri) te xav, nane nijékh spialo murina, so miro di kaméla. E patiaibnytka manušá lačhé ilésa xasiné pe phuv, i nane čačuné manušén maškír muršende. Jone saré podrakhena te pročhuven rat, kažno (sváko) manúš čorjolape pal péskire pšaléste feliasa (sietkasa). Léngire vastá riskirdé te kerén bibáht (fuipén): o thagári phučela počastunko (dáro), o sendári (najengiro) rodéla myto (vziatka), i baré raja vyphenena léngiri bibahtaly myslia pe godý, so jone kaména; i jone adiáke khetané piririskirena čačipén. Naj fededýr manúš léndyr isyn sýrby kanralo xrústo, a naj čačunedyr manúš isyn vostredyr (čolaledyr) tynostyr phusadytkone xrustendyr; javdiá dyvés Tyré-rakhibnar'jengiro, so Tu javésa te sendines, akaná javéla léngiro konfuzo (búnto). Na patia maléske, na dopatia dromeskire maléske (drugoske), rakh lavá tyré-moskire kodoliatyr, saví isyn pašty pašýl tyró kolýn. Pal-dová so o čhavó ladžakirela dadés (na déla patýv dadéske), e čhaj ĥazdélape pe lákire date, e bori pe sasiate, manušéskire vérgi isyn manušá léskire kheréstyr. Ne me kokoró javáva te dykháv pe Raste-Devléste, me javáva te užakirav Devlés, Savó rakhéla man; Miro Devél šunéla man. Na rádynpe zoralés mándyr, mirí vergica! Kóli perava me, me usajékh ĥazdavape. Kóli me som beštó dro kalypén, ne Raj Devél déla dud (svéto) mánge. Me vyrikirava xoliakiri zor Ráskire-Devléskiri, pal-dová so me kerdjom gréhi proti Léste, angíl dová, syr Jov obsendiakirela miro réndo i keréla pir čačipén mánge. Jov vylydžala man pe dud, i me dykháva Léskiro čačipén. Tén'ci i mirí vergica javéla te dykhél davá, i ladž čhakirela la, saví phendiá mánge: “Kaj isyn Raj Devél tyró Devél?” Miré jakhá javéna te dykhén la, akaná zaštakirena ĥerénca la, syr bláta pe vulícy (gásy). Dro dová dyvés, kiéli tyré vánty, Jerusalimo, nevéstyr javéna te kerén, dro dová-sámo dyvés statúto pal Izrailjo bu'gledyr otčhuvela miéža Izrailjoskiri. Dro dová-sámo dyvés, jone javéna plienóstyr ke tu, manušále Izrailjoskire, Asirijatyr i Jegiptóskire for'jéndyr; Jegiptóstyr až ke reka (len') Jevfrato, morjostyr (derjavestyr) ke mórjo (derjáv), bergátyr ke bérga. Ne doiá phuv javéla čhučí (pusto) pal bang kodolegiri, kon dživéla pe láte, i pal dová čoripén, so jone kerdé. (Dévla!) Čarav destesa Tyré manušén, kon isyn dro ĥurto Tyré-mištypnaskiro, savé dživéna kokoré péske dro veš, maškír Karmilo: mek jone te čaravenpe pe Vasáno i pe Galaádo, syr sys dre ĥaratuné dyvesá. Syr sys dre dyvesá, kiéli jone vydžánas Jegiptóskire phuvjátyr, sykáv lénge Tyré dívna réndy. E nácyi javéna te dykhén, i jone javéna te ladžan saré léngire zoralypnastyr, jone čhuvéna vast pe muj péske; léngire kaná javéna kašuke. Jone javéna te čaren (te lizinen) práho syr saplyn; jone javéna te resen javrí léngire garadé šteténdyr syr kirme, so isyn pe phuv. Jone javéna te darén Rástyr-Devléstyr, amaré Devléstyr. Lénde javéla trašaibén angíl Túte, Dévla.” Kon isyn Kadasavó, Dévla, syr Tu san? Kon otmekéla čoripén i promekela čoré réndy manušénge Léskire mekné mištypnástyr, savé jačnépe? Tu na javésa ŭsády (sak) te rikires xolý, pal-dová so Tu radynesape te sykaves láska. Tyró iló nevéstyr peréla pal aménde, i Tu štakiresa (zlesa) amaró čoripén, i Tu čhurdesa saré amaré gréhi dro xoripén morjoskiro (derjavéskiro). Tu sykavesa čačipén Jakovóske, i láska Avraamóske (Abramoske), pal so Tu sovlahadian amaré dadénge dre dyvesá ĥaratuné. Angilphenybén proti Ninievija. Lylvarí pal Naumoskiro dykhibén, savó sys Jelkosostyr. O Raj-Devél isyn zevlynypnaskiro Devél, i Jov otdéla pale sendosa. Raj Devél otdéla pale sendosa, i Jov isyn drieván darano dre xolý. Raj Devél otdéla pale sendosa Léskire namalenge, i Jov na potanginela Leskirire vergén [prigaravela Léskiri bari xolyn pe Léskire vergénde-ju.o.]. Raj Devél nasyges xoliasóla (ĥará / dlúges užakiréla) i Léste isyn baró zoralypén. I Jov na kovliakirela iló angíl bibahtalende: syr o Raj Devél psiréla, tedy ĥazdénape riskiribnaskiri balvál i štormo, i óbloki syr práho vurniana tel Léskire ĥerá. Jov štyliakirela mórjo (derjáv) i šut'kirela les, i Jov pirišut'kirela saré réki (leniá): Vasáno i Karmilo zašutjona i luludí (cvéto) pe Liváno našavela mastín (cviato). Bérgi izdrana angíl Léste, i bérgicy biladjona; phuv kuninelape angíl Léskiro javiben [muj-r.s.]; svéto, i saró, so dživéla pe svéto. Kon déla ráda te terdjol štylés, kiéli Raj Devél zoralés xoliasóla? Kon déla ráda te vyrikirel mižehipen Léskire xoliátyr? Léskiro xoliakiribén vyčhuvelape syr jag, i skaly (bérgi) pharadjona pe koterá angíl Léste. O Raj Devél isyn lačhó, i sýrby kher te garadjol, syr isyn pharó manušéske: Jov džinéla kodolén, savé dopatiana Léske. Ne baré-tasadypnaskire panienca, savé isyn syr potopo, Jov janéla xasibén ke kónco (ke jagóro) dalé štetoske Ninievijake, i kalypén učhakiréla Léskire vergén. So tumé priduminena proti Raste-Devléste? Jov xasiakiréla tumen sarésa, pharipén na javéla javír mólo. Na dykhí pe dová, so tumé spentyndlepe khetané syr phusadytka xrústy, i spinepe syr matymarja, tumé javéna te xačon syr phuseskiri cieciva (šuko phus). Tútyr vygijá odová manúš, savó priduminela bibáht (xolý) proti Raste-Devléste, jov javéla sovietniko (junkáro), savó déla godý te kerél fuipén. Adiáke rakiréla Raj-Deviel Judejake: “Na dykhí pe dová, so jone, Asirijákire xaladé, isyn bidaripnaskire i isyn but len, saroiekh, len čingirena pe koterá, i jone xasjona. Syr Me pritasavavas tut, to butýr Me na javáva te keráv davá túke. Akaná Me phagirava ĥámo tyré meniatyr, so jone čhudé pe túte, i Me pharavava (roskušava) tyré sastyrá pe pašá.” O Raj Devél dyjá priphenybén pal túte, Asuro: “Butýr na javéla ródo tyré lavésa; Me xasiakiráva vyčhindlé muiá kheréstyr, kaj isyn tyré devloré, i tyré vyčhudé muiá. Me ĥanavava túke maĥila (kula), pal-dová so tu san bedo?’ Ake, dykhén kodoleskire piré (stópy) pe bérga, savó phenéla bahtalý zvies' (zan), savó rakiréla zoralés pal ramánjo (miro)! “O Judeije! Ker svenkitka skaminda, vypherdiakiren péskire sovlahá, pal-dová so butýr nijékh fuj manúš na prodžála pir túte: jov isyn sarésa xasiakirdo.” Muliakiribnaskiro džála pe túte, Ninievije! Rakh foróskire zorjakirde vánty! Dykhén ciamkes paló drom, zorjakiren tumaré flangi! Skedén butedýr tumarí zor! Pal-davá so Raj Devél čhuvéla dro zor nevéstyr baripén Jakovóskiro, syr baripén Izrailjoskiro, pal-dová so vérgi jačkirdé čhučé štéty lénde, i jone xasiakirdé dre ruíny léngire vinagradýtka randiá. Ščyty Léskire zoralé-muršengire isyn lolé, Léskire bidaripnaskire muršá (xaladé) isyn dro jarko loló uribén, a maribnýtka vurdená javéna ziaindle sastyrenca dro dová dyvés, kiéli saré skedénape pe maribén, i čhurdybnytka bustiá (kop'i) kuninenape. Maribnýtka vurdená vurniana godlása pir gásy [foruný/plóšča-r.s.], jone špulena jekh jekhés i kharenape jekh angíl javiréste pe buĥle dromá: jone ziainena i otmarnape jagása, jone prastána sýges syr bliskavica. Léngiro barydyró kharéla ke pe léskire vykedyné muršén, jone obštavenape, gii pir drom; jone prastána sýges pe foróskire vánty, i jone jačné skedyné te otmarenpe. Pórta pe réki (leniá) otphandelape, i bari felatin/kolov (dvorco) rosphadjola. I isyn kadasavó uphenybén: čúža xaladé rosčhuvena králica i lydžána la dro pliéno. Lákire-štubakire pisharicy javéna te tuginen zoralés pal láte golumbicengire zanor'jenca, marindoj (pekavi) pes dro kolýn. Ninievija sys syr venderín (prudo) paniésa samone pervoné dyveséndyr, ne akaná, manušá našéna foróstyr. “Terdjon, terdjon!” – vari-savé godlena, ne nijékh (nikón) na risjola pale. ‘Čoren rup! Čoren suvnakái! Nane miéra mištypnaske i barvalypnaske dro kažno vučy pirí! Látyr jaciá čhučó štéto i xasiakirdo štéto; iló biladjola i čangá izdrana; zoralý dukh isyn dro kažno pašvaro, i muiá sarénde kalyne. Kaj isyn akaná xašča (logovo) ščerengiro, i terné-ščerengiro čaraibnytko štéto; pir savó psirdé ščer, ščerica, i ščeroro, i nikón na trašavelas len? Ščer (liévo) kuscia pe koterá, kicý trej mas vaš léskire ščerorende, i, tasadia vaš péskire ščericate. Jov pherdiakirdiá ĥiebará (pieščery) masesa dre dandá, i léskire xaščy (logovy) džidé masesa. “Ake, Me džáva proti túte, Ninievije!”, – rakiréla jangoléngire-bolybnáskiro Raj Devél. “Me xačkirava tyré maribnýtka vurdená dro thuv, i kurtála počingirela tyré terné ščeren; Me čhuváva kónco (jagóro) pe tyró doresybén pe phuv, i butýr na javéla šundly zan tyré-bičhaibnaskirendyr.” Bida pe ratvalo fóro! Jov isyn pherdó xohaibnasa i čoribnasa, dro savó na pirijačena te čoren. Šunelape zoralés, syr marela čhupny, i čhinela kan, syr róty prastána (griukinena), syr uklisté graja grymitynena, syr maribnýtka vurdená poduhtena! Uklistengire xaladé sýges vurniana ziaindle kurtalenca, maribnýtka bustiá otmarnape ziaindle kurtalenca; but isyn zamardé, but but isyn mulé trúpy, so naštý te pogines: – jone obštavenape pir trúpy. Davá pal biladžakuné-džuvliakire but gréhi, saví isyn xulany pe čovahano džinybén; saví zdelas nácyi pal péskiro biladžaipén, i kherítka ródy i pal lákiro čovahano džinybén. “Ake, Me som proti túte”, – rakiréla jangoléngire-bolybnáskiro Raj Devél: “Me ĥazdáva tyrí podia pe tyró muj, Me sykaváva nacyienge tyró nangipén, i kralipnenge tyrí ladž. I Me javáva te čhurdav te prijačel ke tu džungaly mel, Me keráva tut adiáke, so tu jačesa bedytko, i Me čhuváva tut pe saben sarénge. I javéla adiáke, so kažno (sváko) manúš, kon javéla te dykhél tut, javéla te našél tútyr, i te rakirél: ‘Ninievíia isyn pašty čhučí! Kon ža javéla te tanginél jasvénca la? Kaj te lathav manušén te podrikiren dúho dre túte, Ninievíje?” Ci tu fedýr san No-Amonostyr, savó sys maškír réki (leniá) pašýl Nilo, pašýl savó thadenas paniá, saveskiro valo isys syr mórjo (derjáv), i mórjo (derjáv) sys syr vánta trusciál davá fóro? Efiopija i Jegípto sys da bimierakiro foróskiro zoralypén, Kopty i Liviicy sys léskire pomogipnaskire. Ne les lydžiné krig, i jov gijá dro pliéno, léskire bijatén adiáke-pac' rozmarde pe koterá pe trušulytka ĥasy (vulícy). Jone, Asiriicy, čhurdyné žriébijo pal léskire manušénde, savé sys dre patýv i saré léskire baré raja sys phandle zandir'jenca. Tu adiáke-pac' javésa maty, garadjosa, tu adiáke-pac' javésa te rodes garadyiben vergostyr. Saré foróskire rikiribena isyn sýrby inžyritka kaštá (drevy) spialone inžyrosa: kóli trinskiresa len, tedy jone peréna dro muj odoleskiro, kon kaméla te xal len. Dykhén! Maškir tyré xaladénde isyn muršá syr džuvliá: pórta pe tyré phuvjá psirady buĥles angíl vergénde: jag pohala štaby pe tyrí pórta. Pher paní vaš občhuviben foróskiro! Zorjakir tyré foróskire rikiribena! Džá pal ĥleja (glina), i štakir rastvoro, podker bov te obhačkiren bará! Odój jag pohala tut, a kurtála čingirela tut; joj xasiakiréla (xála) tut sýrby skočko. Na dykhí pe dová, so te jačen tumé butedýr-adákicy but, syr listengire kirme; te jačen tumé butedýr-adákicy but, syr phakitka skočki (saranča)! Túte jaciá butedýr tylgar'jen syr čergeniá pe bolybén ne dalé syr phakitka skočki (saranča): rozvurnianape i vurniana krig. Tyré thagárja isyn syr phakitka skočki, tyré xaladéngire barydyrá isyn syr grastore (kuzniečyki), savé keréna gniázdy (kúfy) dre vantakire ščeli, a syr kham ĥazdélape, to jone vurniana péske krig, i na džindló štéto, kaj sys jone. Tyré čhupnárja (pastyri) isyn suté, králjo Asirijákiro, a tyré lačhé-rodoskire raja (upratune) otkhinjona štylés. Tyré manušá rosčhurdyne te dživén pe bérgi, i nijékh na skedéla len. Tyró fránso (rana) naštý te sastiakires, tyré-masengire fuiá (jazvy) isyn xor. Saré, kon šunéla daja zvies' pal túte, javéna te marén dre vastá radymátyr; pal-dová so nane nijékh manúš, konés tyró fuipén te obdžal rigasa. Anglatunó dykhibén, savó proróko Avakumo dykhciá. Kicý, me javáva te kharav Tut, Rajo Dévla, i Tu na šunesa, kicý me javáva te godlav Túke pal “nahratyma!” Ne Tu na désa vast te rakhés amen. Sóske Tu désa mánge te dykháv čoripén, i kerésa adiáke, sob (kaj) me te dykháv mén'ki? Pal-davá so čorja i nahrata réndy isyn angíl miré jakhá, manušá košenape i čingardenape. Pir dová Zakóno jaciá bizorjákiro (našadia zor), i nane čačunó séndo. Fuj manúš pirizorjakirela čačuné manušés, a séndo riskirena, syr kaména. “Dykhén maškír narody, i pridykhenpe, i ake – tumé keréna baré jakhá!”, – rakiréla Raj Devél. Pal-dová so Me keráva dasavo réndo dre tumaré dyvesá, dro savó tumé na javéna te patián, na dykhí pe dová, so tuménge rosphenena. Pal-dová so Me, ake, ĥazdáva Xaldiejen, kirki i sýgno nacyja, saví kharélape (dviginelape) pir phuvjákiro buĥlypén, sob (kaj) te zauhtylen džiibnáskire štéty, savé isyn na léngire. Jone isyn darakune i trašane manušá: pharó séndo keréla léngiri zor, léndyr kokorendyr vydžála séndo. Léngire grajo isyn sygedýr lieopardendyr i jone isyn xoliamedyr bel'velitkone ruvendyr. Léngire uklistengire xaladé tradéna baripnasa; léngire graja javéna duripnastyr; jone prastána sýrby vurniala órlo (kído), savó sygedýr javéla te xal doresybén. Jone saré javéna te odlen nahrates, mina pe léngire muiá riskirdy pe vastóko, jone skedéna pliennonen sýrby práho. Jone sykavéna bipatyv ke králja, jone sanape xoliames thagar'jendyr, jone prosana kažno tvárdyma (diz), pal-dová so jone čhuvéna valy phuvjátyr i zauhtylena len. Tén'ci léngiro dúho (fáno) parudjola i jone džána syr balvál, i jone keréna čoripén: léngiro zor jačélape vaš lénge syr léngiro devloro. Ci na san Tu viekendyr i pe saré viéki, O, Rajo Dévla, miro Dévla, miro Jekh Svénto, – ame na merasa. Tu, Rajo Dévla! Tu vykedyjan len, Xaldiejen, vaš pharó séndo pe aménde. E, Skála! Tu dyján zor lénge te pirisykliakiren amen. Tyré jakhá isyn drieván svénta, sob (kaj) te dykhén pe daja bibáht, i lénge naštý te dykhén fuipén. Sóske Tu dykhésa kodolén, savé keréna zlydnitkes, i Tu na rakirésa nisó, syr bibahtaló manúš xasiakiréla odolés, savó isyn čačunedyr léstyr? Sóske Tu kerésa adiáke, so manušá jačénape syr morjoskire (derjavéskire) mačhé, syr capnia, pe savénde nane barydyró? Jone, Xaldiei, starena manušén vendkasa, jone uhtylena len dre léngiri khudý (siet'), i jone skedéna len dro léngiro nievodo, paldavá jone drieván radynénape, i jone isyn viesiéla (lošalé). Paldavá jone janéna svénta dyibená léngire khudiake i jone xačkirena dróga smóly léngire nievodoske; pal-dová so khudiatyr léngiri dólia (paš) isyn barvaly, i pe léngiro skamínd isyn but xabena. Ci javéna jone iščo (inké) te čhučakiren péskiri khudý, i duredýr te marén (te muliakirén) manušýtka nácyi bi tangipnaskires? I me javáva te terdjovav pe stréga, i me javáva pe valo te dykháv, so Jov otphenéla mánge, sob (kaj) mánge te otphenav pe miro žalinyben pe Léste. Tén'ci otphendiá mánge Raj Devél i phendiá: “Začhin dykhibén i ker biciales (jasnes) davá pe tablicy, sob (kaj) kodová, kon javéla te ginel, saštý lokhes te ginel. Pal-dová so davá dykhibén sykavéla pe časo (cýro), savó iščo (inké) javéla, ne jov javéla te rakirél pal kónco (jagóro), i jov na javéla te xohavél. Na dykhí pe davá, so jov zarikirelape, užakir les. Pal-dová so jov javéla, sob (kaj) te na javél, jov na zarikirelape (na otparuvelape). Dykhén: phut'kirdo manúš kaméla namištypen i xasjola, ne čačunó manúš javéla te dživél pir léskiro patiaibén.” Phut'kirdo manúš keréla čoripén syr moliátyr (vinostyr), saví zdela les, i léske usá nane štylypen (spokojo). Pal-dová so léskiro tyrdypén barjola dre léste syr štéto dro liúno (ado), i jov isyn na čalo syr meribén, jov, Xaldiejo, kedela ke pe saré manušýtka ródy, i jov zatyrdela (zauhtylela) ke pe saré manušýtka ródycy. Ci na léna saré kadalé manušá (konés jov rosčordia) te rakirén pritča proti léste, i te vysan lavénca les, phení: “Bida pe léste, kon pribarjakirela ke pe dová, so nane léskiro – pe kicý duredýr davá javéla? Bida pe kadaleste, kon občhuvela pes symadienca (zalogenca)?” Ci na ĥazdénape jekhátyr (srázu) odolé, savé užakiréna te dandyren tut? Ci na džangadjona (na ĥazdénape) odolé, savé javéna te pritasaven tut adiáke, so tu jačesa vaš lénge sýrby léngiro doresybén? Pal-dová so tu občordian but narody (manušýtka nácyi), saré, kon jaciápe kadalé manušéndyr, javéna te občoren tut pal manušéngiro rat, i pal nahratyma pe phuv i dro fóro, pal saré manušénde, savé dživéna pe daja phuv. Bida pe léste, kon doreséla barvalypén bibahtalé rendéndyr péskire kheréske, sob (kaj) léske te kerél gniázda (kúfo) vučés, sob (kaj) jov saštynelas te zrakhelpe bibahtalé zorjátyr. Tu pridumindian ladž péskire kheréske, kiéli tu xasiakirdian but narody (manušýtka nácyi), i paldavá tu lyjan grého pe péskiro di. Pal-dová so až bará javéna te den gódla zoralé zaniása vantatyr, i beranda (pieriekladiny) kaštéstyr javéna te otphenen: “Bida pe léste, kon čhuvéla fóro pe rat, i kon začhuvela tvárdyma/ fóro načapipnasa (čoripnasa)!” Ake, davá nane jangoléngire-bolybnáskire Rástyr-Devléstyr, so manušýtka nácyi keréna butý pharés vaš jag, so kherítka ródy (pliémi) khiniakirena pes ivjá (naprásnes)? Pal-dová so phuv javéla pherdý džinybnasa pal Ráskire-Devléskiri sláva, syr paniá učhakirena (pherdiakirena) mórjo (derjáv). Bida pe léste, kon déla te p'jel péskire susiedoske (kotariske/pašatuneske) i vyčhuvela péskiri xolý, sob (kaj) te matiakirel les, sob (kaj) jov sys saštý (mogindiá) te dykhél léskiro nangipén. Tu san pherdó ladžaipnasa, a na slavása. Akaná Tu adiáke-pac', pi! Mek te javél otčhakirdo tyró naobčhinyben! Tahtáj čačuné-vasteskiro Rástyr-Devléstyr risjola proti túte, i ladžaipén (ladžakuno čadyipen) peréla pe tyró baripén (sláva). Pal-dová so čoripén, so tu kerdián Livanoske, učhakiréla tut (peréla pe túte); murdalá (žyvotna), so tu trašadian len, javéna te trašaven tut, pal manušéngiro rat, pal čoripén, so kerdián phuvjake, foroske, i sarénge, kon dživéla dro fóro. Savó lačhipén isyn vyčhindlé móstyr, so vyčhinybnaskiro (riezčyko) kerdiá. Vyčhindlo muj na sykliakiréla nisoske, na dykhí pe dová, so léskire keribnaskiro manúš patiála dre léste, kiéli jov keréla muta (niema) ídoly? Bida pe léste, kon rakiréla pe kašt: “Džangadjov (uštý)!”, kašuke (mutone) bareske: “Uštý!” Ci javéla jov te sykliakirél? Ake, jov isyn piričhudo suvnakása i rupésa, ne nane džidó dúho (fáno) dre léste. Ne Raj Devél isyn dro Léskiri svénto Khangirí. Mek sarí phuv te javél štyl angíl Léste [Léskiro muj-r.s.].” Pátieri (molítva) Avakumoskiri, prorokoskiri, te bagán tel balytko strumiento. Rajo Dévla! Me šundjom Tyrí zan i darandyjom. Rajo Dévla! Ker nevéstyr Tyré réndy dro amaré časy, ker adiáke, sob (kaj) te džinén tyré réndy maškirál amaré časy. Na dykhí pe dová, so Tu xoliasyjan pe aménde, sykáv Tyrí láska. O Devél javéla Fiemanostyr, o Svénto Devél bergátyr Faran. Léskiro baripén učhakirdiá bolybén, Léskire slavása pherdija phuv (i phuv isyn pherdý šaribnasa Léske). Léstyr ziainypen otmarela syr khamitko dud (svéto), Léskire vasténdyr lučy (lunki) ziainena jagása, [i dro dová, Léskiri zor isyn garady!-ju.o.] Angíl Léste [Léskiro muj-r.s.] progijá meribnytko fránso, a pal Léskire piré (stópy) sliady džála xačkirdy balvál. Jov terdijá, i phuv trinskirdiape, Jov podykhciá, i manušá izdrandyne i ĥaratuné bérgi pharadyne pe koterá, a viekitka bérgicy bandine. Léskire dromá isyn viečna. Me dykhcjom, syr šátry Efiopiitka (Kušanoskire) pyné dro dúho (fáno), i syr budy pe Midijakiri phuv izdrandyne. O, Rajo Dévla! Ci Tu xoliasyjan pe réki (leniá), Ci sys Tyrí xolý proti réki (leniá), Ci sys Tyrí bari xolý proti mórjo (derjáv), so Tu tradesas uklisto (uklisté) pe tyré ĥrende, Tyré maribnýtka vurdená, savé zrakhena. Tyró lúko isyn otkerdo te den kar'je pir sovlahá, so Tu phendián Tyré rodycenge. Séla. Tu roskerdian phuv rekicenca. Bérgi dykhné davá i lyné Te izdran, sygna paningá dynepe te thaden potokosa. Xor paniá phendlé léngire zaniása, i ĥazdyné vučés léngire valny syr vastá. Kham i čhon terdiné pe léngiro štéto pe bolybén, kiéli Tyré maribnýtka bustiá (striély) dynepe jagása, i lyné te ziainen Tyré čhurdybnytka bustiá (kop'i), so otmarena ziainybnasa. Tu gíian sýrby xaladybén pir phuv dre xolý, Tu štakirdian manušýtka ródy dre naradyma. Tu gíian angíl te zrakhes Tyré manušén, sob (kaj) te zrakhes Tyré Pomakhnes, Tu pekadian šerales kheréstyr, kaj isyn bibahtalé, Tu rosčhudian (rozuridian) les ke nangipén šerestyr ke ĥerá. Séla. Tu pharadian léske šeró léngire šeralen čhurdybnytkone bustienca, kiéli léskire xaladé ĥazdynépe syr riskiribnaskiri balvál te rosčhurden amen, jone radyndlepe sýrby pe svénko, so nakhavena (glytynena) čorahanés čororengire masá Izrailjostyr. Tu štadian (pročhudian drom) pir mórjo (derjáv) péskire grenca pirdál baré-paniengiro vučipén, so otmarelape pienasa. Kiéli me šundjom, miré masá lyné te izdran, miré uštá lyné te izdran lokhes dalé zaniatyr: kirnypen zagijá dre miré kokalý; i me jacjom te trinskiravpe pe péskiro štéto. Ne mánge trej te javav štyl dro dyvés darano, kiéli javéla vérgo pe miré manušénde péskire xaladenca. Kóli i inžyritko drévo (kašt), xači, na javéla te luludjol (te cvecinel), i na javéna múri pe vinagradýtka xrústy; kóli maslinitkone barjatyr na javéla ničý, i pe féldy na vybarjola nisó; kóli stády bakréngire xasjona javrí gražostyr (zagonostyr), i na javéna kherítka stády dre štaly, ne me usajékh drieván javáva te radynavpe Rástyr-Devléstyr, i me javáva te radynavpe Devléstyr, Savó zrakhéla man. Rástyr-Devléstyr lélape mirí zor, i Jov keréla miré ĥerendyr sýrby olienjoskire sygna ĥerá i Jov ĥazdéla man te psirav pir miré vučé bérgicy. (Xoróskire Dirižoróske pe balytka strumiénty). Ake, isyn lav, savó javdiá Sofonijaske, čhavéske Xusijaskireske [unukoske Godolijaskireske, praŭnukoske Jezekijaskireske] dre dyvesá Iosijaskire, Amonoskire čhavéskire, kon sys králi pe Judéia. “Me xasiakiráva saró, so isyn pe sarí phuv”, – rakiréla Raj Devél, “Me xasiakiráva manušén i murdalén (žyvotnonen), Me xasiakiráva bolybnytkone čiriklen, mačhen dro mórjo (derjáv), Me xasiakiráva bará, savénge fuj manušá mangénape”. Me xasiakiráva manušén, so nijékh na jačélape pe phuv”, – rakiréla Raj Devél. “Me pharés sendiakirava Miré vastésa Judéia, i saré manušén, savé dživéna ke Jerusalimo, i Me xasiakiráva saró, so jaciápe Vaalostyr pe davá štéto. Me xasiakiráva lavá rašángire khetané Najudytkoné-mangipnaskirenca idolénge; i kodolén, kon keréla patýv kodolénge, savé isyn dro bolybnytko svéto, pe kheréskire fiéli (makuški), i kodolén, savé keréna patýv Mánge, Ráske-Devléske i sovlahana Miré lavésa, i savé adiáke-pac' sovlahana Molohosa; i kadasaven, savé risiné krig droméstyr pal Raste-Devléste, i javirén, savé na rodéna Ras-Devlés, na phučena Rástyr-Devléstyr te lydžál Les”. Jav štyl angíl Raste Devléste, pal-dová so Ráskire-Devléskire Dyvés isyn pašýl, pal-dová so Raj Devél isyn skedynó te janel svénto dyibén, Jov posvencyndia Léskire manušén, savén Jov zamangdia. I javéla adiáke dro dová dyvés, kiéli janéna svénto dyibén: Me, Raj Devél, javáva pharés te sendiakirav thagar'jen (kniaz'jen) i kralískire čhavén i sarén, savé uridepe dre čúža ídia. Dro dová sámo dyvés Me pharés sendiakirava odolén, savé piriuhtena pir kherítko progo, savé pherdiakirena léngire-raskire kherá nahratymasa (nasilijosa) i xohaibnasa. I javéla dro dová dyvés adiáke, – rakiráva Me, Raj Devél, – so javéla godlyma pašýl mačhitko pórta, i javéna gara (dlúges) te rovén zoralés pašýl javír pórty, i so javéla baró grukato phagiribnastyr pe bérgicy”. Rovén zoralés, manušále telatuné foróstyr (Mahtešostyr), pal-dová so kúpcy (tylgárja) xasjona, i saré, kon timisiakirela rupésa, xasjona. I javéla adiáke dro dová dyvés, so Me pirirodava Jerusalimo momolytkonenca (svietil'nikenca), i Me pharés sendiakirava manušén, savé kaštalyne pe léngiro jačaibén moliátyr (vinostyr), savé phenéna péske: ‘O Raj Devél na keréla lačhipén, i Jov na keréla bibáht’. Paldavá rosčorena léngiro barvalypén, i léngire kherendyr jačélape golotýnia; jone javéna te čhuvén kherá, ne jone na javéna te dživén dre lénde: jone javéna te počhuven vinagradýtka xrústy dre phuv, ne jone na javéna te p'jen mol (vino). Baró Dyvés Ráskire-Devléskire drieván sýges javéla, jov syg javéla i jov pričhuvela zor sýges te javél. Šundlo isyn kirki zan dro dová Dyvés Ráskire-Devléskiro: odój zoraló murš javéla te del gódla. Davá Dyvés javéla syr baré-xolynakiro dyvés; pharó i trašano dyvés; dyvés, kiéli pe phuv jačéna ruíny i golotýnia: dyvés kaló i cjomno, davá dyvés javéla občhudo oblokénca i ĥenstone ciamlypnasa; dro dová dyvés javéna te phurdén dro rógo (truba) i javéla maribnýtko godlyma proti fórja zoralé vantenca i proti vučé vučardia (bašni). I Me janáva bari dar pe manušénde, i jone javéna te psirén syr kororé manušá; jone kerdé grého proti Raste-Devléste, léngiro rat javéla rosčhudo syr práho, i léngiri loč (plot') javéla te kirnjol syr gnejo”. Ni léngiro rup, ni suvnakáj naštý (na zmoginena) te zrakhen len dro dová dyvés baré Ráskire-Devléskire xolynatyr. Léskire-zevlynypnaskiri jag xála sarésa sarí phuv, pal-dová so Jov janéla sýges kónco (jagóro) pe sarénde, kon dživéla pe phuv. Skedénpe tumé te obduminen, skedén tumé khetané, o biladžakuno manušýtko ródo; angíl dová, syr javéla Ráskire-Devléskiro uphenybén, angíl dová dyvés, so prourniala syr čhučó phus, angíl dová, syr te javél pe tuménde bari xolý Ráskire-Devléskiri; angíl dová dyvés, syr te javél pe tuménde Ráskire-Devléskiri xolý; rodén Ras-Devlés saré, savé isyn kovlé-iléskire pe phuv, kon rikirdia Léskiro čačunó Zakóno, rodén čačipén, rodén te javén rahmana (spokojna); saštý te javél, so tumé garadjona dro dyvés, syr javéla Ráskire-Devléskiri xolý. Pal-dová so manušá mekéna Gaza, i Askolonostyr jačélape čhučó (pusto) štéto; Xaldiei vytradena manušén Azotostyr dyvesé až dro paš-dyvés, i jone vyriskirena krig Ekrono. Bida pe manušénde, savé dživéna pe brégo morjoskiro (derjavéskiro); bída pe manušénde Kritostyr! Ráskire-Devléskiro lav isyn proti tuménde, o Xananiei, phuv Filistimijakiri: “Me rozmarava pe koterá tut; so na jačélape nijékh te dživél.” Morjoskire bregostyr jačénape čaritka phuvjá budénca (šalašenca) vaš čhupnar'jenge, i graženca (ovčarnikenca) vaš bakréngire ĥurty. Brégo javéla štéto manušénge, kon jačélape Judáskire kheréstyr; jone javéna te čaraven léngire-bakréngire ĥurty odój, bel'velienca jone javéna te pasjon dre kherá Askalonoskire: pal-dová so o Raj Devél, léngiro Devél, zaterdjola pal lénde, i riskiréla pale léngire manušén plienóstyr”. Me šundjom, syr obrakirelas Moávo, i syr rakirdé fuj lavá manušá Amonostyr, savénca jone obrakirenas Miré manušén, i syr jone šardepe nahrates (nahal'nes) te zauhtylen léngire miéžy”, Paldavá “Te dživáv Me”, – rakiréla jangoléngire-bolybnáskiro, Raj Devél, Devél Izrailjoskiro, – “Moavostyr jačélape dová, so sys Sodomasa, manušá Amonostyr javéna syr Gomóra, – syr phuv, saví zabarija cuknudása (striekavasa) i ĥanbiniénca (jamenca) vaš lond, i saví javéla ŭsády (sak) čhučí: Miré manušá, kon jaciápe džidó, rosčorena la, i Miré manušá, savé jačnépe pe štéto, len daja phuv syr péskiro meknó mištypén. Davá saró lénge javéla pal léngiro phut'kiribén, adiáke syr jone obrakirenas i ĥazdynépe xoliása proti manušénde, savé isyn jangoléngire-bolybnáskire, Ráskire-Devléskire. O Raj Devél javéla trašano vaš lénge; pal-dová so Jov rozmarela saré devloren pe phuv; manušá javéna te den patýv Léske, kažno manúš pe péskiro štéto, i pe ostrovy (džipá) saré manušéngire-rodengire. Tumen, Efiopy, adiáke-pac' pekavela Mirí kurtála. Jov pharés sendiakiréla Léskire vastésa paš-ratítko (sievierno) rig, i Jov rozmarela dre ruíny Asirija, i Jov keréla Ninievijatyr šukí golotýnia syr prahitko phuv. Kherítka stády, i kažno murdál (žyvotno), so isyn pe svéto, javéna te pasjon maškirál davá foróskiro štéto. Pielikano i nyglo/buzno (jožo) javéna te dživén pe gožakirde vyčhinybena, so isyn pe foróskire stýlby, léngire zaniá javéna te bagán dre fenštry (dudaliá); obriskirdo javéla léngiro progo; obsyiben pe kiedrytko kašt javéla lučkirdo. Kadavá javéla radymakiro fóro, savó dživdiá bi daripnaskires, konéskiro manúš phendiá dro péskiro iló: “Me som kadasavó, i nane butýr, baredýr mándyr!” Dykhén! Syr čhučó jaciá davá fóro, – štéto murdalénge te pasjon! Kažno manúš džála pašýl, déla šolia, i čhurdéla vastésa. Bida pe davá fóro, dro savó manušá buntuinena proti Devléste i, savénge naštý te dopatias, savé pritasavéna javirén. Dro davá fóro na kandéna zan Ráskire-Devléskiri, na kaména, sob (kaj) Jov te pirisykliakirel len. Adalé manušá na dopatiana Ráske-Devléske, jone na džána pašyledýr ke Devél. Léskire thagárja (kniázi) maškír lénde isyn sýrby ščerá (lievy), so rykinena; léngire sendárja isyn sýrby bel'velitka ruvá, savé na jačkirena ni jekh kokalkico vaš atasiatuno dyvés. Léskire proróki isyn balvalitka, savénge naštý te patias, léskire rašaja magirena svénto štéto; jone phagirena Mojzáskiro Zakóno, syr kaména. Ne čačipnáskiro Raj Devél isyn maškír davá fóro, Jov na keréla pir načačipén. Kažno zlóko Jov janéla Péskiro čačipén pe dud, les uhtýlla (dósi): ne načačune manušá na džinéna ladžaipén. “Me xasiakirdjom manušýtka nácyi (narody)”, – rakiréla Raj Devél, – “léngire zoralé vánty fenštrorenca phagirdé dre ruíny; Me kerdjom adiáke, so pe léngire vulícy (gásy) jaciá čhučó, i nikón na džála pašýl. Léngire fórja isyn phagirdé, so nijékh manúš nane, so nijékh manúš na dživéla”. Me phendjom foróskire manušénge: “Čačes, tumé féni (tóka) darén Mándyr, sob (kaj) Me te pirisykliakirav tumen”, sob (kaj) tumaré kherá te na javén xasiakirdé, sob (kaj) Me na sendiakirav pharés tumen. Ne jone tasiárles (ránes) uštyné, i kerdé saró bipatyvakires. “Paldavá užakiren Man”, – rakiréla Raj Devél, – “ke/ žýko davá dyvés, dro savó Me javáva te bangiakirav. Miro priphenybén isyn dasavo, sob (kaj) te kedav khetané kralipená te vyčhuvav pe lénde Mirí xolý, sarí Mirí bari xolyn; pal-dová so Miré-zevlynypnaskiri jag pohala sarí phuv. Tén'ci Me dáva pale manušénge žužé (čysta) uštá i godý, sob (kaj) jone moginénas te kharén lav Ráskire-Devléskiro, te dynarinén Léske dro jekh psikó. Duripnastyr pal réki (leniá) dre Jefiopija, Miré mangipnaskire (poklonniki), Miré čhaja Miré rosčhurdyne manušéndyr, janéna Mánge svénta dyibená. Dro dová Dyvés tumé, Miré manušále, na javéna te ladžan ni savé tumaré rendéndyr, dre savé tumé kerdé čoripén proti Mánde; adiáke, syr tén'či Me láva krig tumaré maškiralypnastyr kodolén, kon drieván radynélape péskire phut'kiribnastyr, i butýr tumé na javéna te zadenpe pe Mirí svénto bérga. I Me mekava maškír tuménde kovlé-iléskire i naphut'kirde manušén, i jone javéna te dopatian dro lav Ráskire-Devléskiro. Manušá, kon jaciápe Izrailjostyr, na javéna te kerén načačipén i te rakirén xohaibén, i na lathelape xohany čib dro léngiro muj. Jone javéna te čaravenpe i te pasjon, i nijékh na javéla te trašavel len. Rádynpe i bága, čhájo Sionóskiri! De gódla, o Izrailie! Drieván rádynpe i ker rádyma péskire ileske, o čhaj Sionóskiri! O Raj Devél lyjá krig pharó séndo pe túte, Jov tradyjá krig tyré vergos. Králi Izrailjoskiro, o Raj Devél isyn maškír tuménde, tumé butýr na javéna te dykhén bari bibáht. Dro dová dyvés javéla phendló Jerusalimoske: “Na dar, Sióno, mek te na perén telé tyré vastá syr bizorjákire”. O Raj Devél, tyró Devél, isyn túsa, Jov isyn Zoralypnaskiro te zrakhél tut; Jov javéla drieván te radynélpe radymása, Jov déla ramánjo (miro) túke Léskire laskatyr, Jov javéla te radynélpe tútyr viesjolymasa (lošasa). “Me javáva te skedav len”, – rakiréla Raj Devél, – “savé tuginena pal uphendle svénki, kon isyn maškír tuménde, pe savénde bang isyn syr ĥámo. Ake, dre davá časo Me roskedavape kodolenca sarénca, Kon pritasadia tumen, Me zrakháva langalen, i Me kedava khetané adalen, savé tradyne krig. Me barjakirava i Me dáva patýv lénge pe kažno phuv, pe saví ladžakirdé len. Dro davá časo Me janáva tumen pale, i adiáke-pac' Me skedáva tumen. Me dáva patýv tuménge i ĥazdáva tumen maškír saré manušénde pe phuv, kiéli Me janáva pale tumaré plienonen angíl tumaré jakhá”, – phendiá Raj Devél. Pe javír berš, syr lyjá te rainel Králi Darijo, dro šóvto čhon, pérvo dyvés čhonéskiro, sys lav Ráskiro-Devléskire prorokoske Agiejoske vaš Zorovavieljoske, čhavéske Salafiiloskireske [Šaltiloskireske-ju.o.], kon sys šeraló raj pe Judéia, i vaš Ješuaske [Isusóske-r.s.], čhavéske Iosedekoskireske, kon sys pérvo rašái, phení: “Adiáke rakiréla jangoléngiro-bolybnáskiro Raj Devél, phení: ‘Kadalé manušá rakiréna: iščo (inké) na javdiá časo te čhuvél Kher (Khangirí) Ráskire-Devléskiro.’” Tén'ci sys lav Ráskire-Devléskiro prorokoske Agiejoske, i phendiá: “Ci isyn časo tuménge te dživén dre obsyde kherá, a Kheréske (Khangirjake) te pasjol dre ruíny? Paldavá akaná adiáke rakiréla jangoléngire-bolybnáskiro, Raj-Devél: “Risjon ilésa pe dalé réndy (diély)! Tumé but čhuvéna dre phuv, ne nábut léna tumé: tumé xána, ne tumé na san čale; tumé p'jena, ne tumé na vyp'jena čalés, tumé ur'jenape, ne tuménge isyn na tato; i kon keréla butý te zakerel, zakerela, sob (kaj) te čhuvél dro mijengiro (košel'ko) ljohenca (dyrkenca)” Adiáke rakiréla jangoléngire-bolybnáskiro, Raj Devél: “Risjon ilésa pe dalé réndy!” Džán upré pe bérga i janén veš, i čhuvén Khangirí, i Miré ileske javéla lačhó, i tumé keréna patýv Mánge”, – rakiréla Raj Devél. “Tumé užakiréna but, ne čačipnása daléstyr javéla nábut, i kiéli tumé janéna davá kheré, Me rosphurdava krig. Sóske? – rakiréla jangoléngire-bolybnáskiro, Raj Devél: ‘Vaš dová, so Miro kher isyn dre ruíny, ne kažno (sváko) tuméndyr prastala ke péskiro kher. Paldavá bolybén, so isyn uprál tuménde, zarikirdia pahlyn (rosa), i phuv zarikirdiape te del barjakirdé (plódy). Pal-dová so Me vykhardjom šut'kiriben pe phuv, i pe bérgi, pe giv i pe neví mol (vino), i pe maslinitko dzet (jeliejo), pe saró, so phuv bijanéla, pe manušénde, i pe kheritkoné murdalénde, i pe sarí butý tumaré vastengiri.” Tén'ci o Zorovavieljo, čhavó Salafiiljoskiro (Šaltiloskiro), i Ješua, čhavó Iosedekoskiro (Jehozadakoskiro), pérvo rašái, i saré manušá, kon jaciápe, kandyné Ráskire-Devléskiri zan, léngire Devléskiri, i prorokoskire Agiejoskire lavá, pir dová, so o Raj Devél, léngiro Devél bičhadiá les, i manušá trašandyne angíl Raste-Devléste. Tén'ci o Agiejo, Ráskire-Devléskiro viestia-janybnaskiro (viestniko), phendiá daja zvies' Rástyr-Devléstyr manušénge, phení: “Me som tuménca”, – rakiréla Raj Devél.” I džangadia o Raj Devél dúho (fáno) Zorovavieljoskiro, čhavéskire Salafiiljoskiro, kon sys šeraló raj pe Judéia, i dúho (fáno) Ješuaskiro, čhavéskire Iosiedekoskiro (Jehozadakoskiro), kon sys pérvo rašáj i saré-manušéngiro dúho (fáno), kon jaciápe, i jone javné i kerdé butý pe jangoléngire-bolybnáskiro, Ráskire-Devléskiro Kher (Khangirí), léngire Devléskiro, davá sys pe beš te štárto dyvés, dro šóvto čhon, pe javír berš, kiéli raindia o Králi Darijo. Dro eftáto (bitrinéngiro déšto) čhon, pe biš te pérvo dyvés dalé čhonéskiro javdiá lav Ráskire-Devléskiro prorokoske Agiejoske, phení: “Phen akaná Zorovavieljoske, čhavéske Salafiiljoskireske, kon sys šeraló raj pe Judéia i Ješuaske, čhavéske Jehozadakoskireske, kon isyn pérvo rašái, i manušénge, kon jaciápe, rakirí: ‘Ci jaciápe vari-kon maškír tuménde, kon dykhciá davá Kher (Khangirí) dre léskiro baripén, so sys vagedyr ('garedyr)? I savó tumé dykhéna les akaná? Ci davá, so tumé dykhéna, nane dukh tumaré jakhenge? Ne akaná jav murškanó, Zorovavielie,’ – rakiréla Raj Devél; jav murškanó, Ješuaje, Čhavó Jehozadakoskiro pérvo rašái, i javén murškané, saré manušále dalé phuvjátyr,’ – rakiréla Raj Devél i kerén butiá, pal-dová so Me som tuménca,’ – rakiréla jangoléngire-bolybnáskiro, Raj Devél. Pir davá lav, savésa Me čhudjom Zavieto tuménca, kiéli tumé vydžánas Jegiptóstyr, i Miro dúho (fáno) jačélape tuménca: Na darén. Iščo jékhvar nábut prodžála, i Me trinskirava bolybén, i phuv, i mórjo (derjáv), i šukí phuv; i Me trinskirava saré manušýtka nácyi (narody), i javéla Miesija i vaš saré, manušýtka ródy, i Me pherdiakirava davá Kher (Khangirí) baripnasa,’ – rakiréla jangoléngire-bolybnáskiro, Raj Devél. Rup isyn Miro, i suvnakáj isyn Miro,’ – phendiá jangoléngire-bolybnáskiro, Raj Devél. “Neví Khangirí javéla bari syr kodoia, so sys vagedyr (ĥaredyr),’ – rakiréla jangoléngire-bolybnáskiro, Raj-Devél. “I pe davá štéto Me dáva ramánie (miro)”, – rakiréla jangoléngire-bolybnáskiro, Raj-Devél. Pe biš te štárto dyvés dro jeniáto (bijekhéskiro déšto) čhon, pe javír berš, kiéli raindia Darijo, sys lav Ráskire-Devléskiro Agiejoske, prorokoske, phení: “Adiáke rakiréla jangoléngire-bolybnáskiro, Raj Devél: ‘Akaná phučén rašandyr pal Zakóno, i phenén: ‘Kóli vari-kon lydžála mas dre brinda (skladka) léskire uribnaskiri, i idiakiro jagóro (krajo) čilavéla maró ci vari-savó kerado xabén, ci mol (vino), ci olivítko dzet (jeliejo), ci vari-savó javír xabén, ci so da saró jačélape (posvencynlo)? Tén'ci rašaja otphendlé i phendlé: “Nad.” Tén'ci phendiá Agiejo: “Kóli vari-kon jaciá nažužo pir dová, so jov čiladiá trúpo, i čilavéla vari-so kodolé kokalendyr, ci jačéla jov isyn nažužo?” Pe dová rašaja otphendlé i phendlé: “Jov javéla nažužo.” Tén'ci Agiejo otphendiá i phendiá: “Adiáke, isyn daja manušýtko nacyja (narodo) i adiáke isyn kadavá kherítko ródo (pliemia) angíl Mánde”, – rakiréla Raj Devél, – “i dová, so jone janéna syr svénto dyibén, kodová isyn nažužo.” I akaná, risjon ilésa ke davá dyvés i ke dová časo, so javéla angíl: angíl dová, syr sys čhudo bar pe bar dre Khangirí Ráskire-Devléskiri – kodolé samone dyveséndyr, kiéli tumé psirdé ke kopna, saví sys biš giveskire miery, to tumé lathenas deš. Kiéli tumé psirdé ke moliakiro (vinoskiro) prieso te pheren pandždešá presengire miery priesoskire čanostyr, odój sys féni biš. Me bičhavavas šukipen, kirnypen pe giv, grado pe butiá, so tumaré vastá kerdé, ne tumé usajékh na risiné ke Me”, – rakiréla Raj Devél. Akaná, (Me mangáva tumen), risjon ilésa ke davá dyvés i pe dová, so javéla, biš te štartone dyveséstyr jeniatone (bijekheskire deštone) čhonéskiro, kadasavé dyveséstyr, kiéli sys čhudo fundámiento dre Khangirí Ráskire-Devléskiri, risjon tumé ilésa ke davá. Ci isyn iščo (inké) ziárka te čhuvén dre phuv dre šúrna (žytnica)? Pal-dová so, syr iščo (inké) ni vinagradýtko xrústo, ni inžyritko drévo, ni granatytko drévo, ni maslinitko drévo na dénas péskire barjakirdé (plódy), to adadyvesatune dyveséstyr i angíl Me javáva te bahtiakirav tumen.” I nevéstyr sys lav Ráskire-Devléskiro Agiejoske pe beš te štárto dyvés dro jeniáto čhon, phení: “Phen Zorovavieljoske, šeralé barydyréske pe Judéia, rakirí: ‘Me trinskirava bolybén i phuv. Me ravava dre ruíny trono kralipnengiro, Me xasiakiráva Najudytkoné – kralipnengiri zor. Me piriravava maribnýtka v urdena kodolenca, savé tradéna pe lénde: grajo i léngire uklistengire (vsadniki) peréna, so ke jekh léndyr peréla kurtalátyr léskire pšaleskirjatyr.’ “‘Dro dová dyvés,’ – rakiréla jangoléngire-bolybnáskiro, Raj Devél, ‘Me láva tut, Zorovavielie, Miro pishári, čhavó Salafiiloskiro,’ – rakiréla Raj-Devél, – ‘i Me keráva tútyr angúšt čergenorjasa, pal-dová so Me vykedyjom tut,’ – rakiréla jangoléngire-bolybnáskiro Raj Devél.” Pe ohtóto (bidujéngiro déšto) čhon, pe javír berš Darijoskiro, sys lav Ráskire-Devléskiro ke Zahárija, Varahiiaskiro čhavó, Idoskire-čhavéskiro, kon sys proróko; pheny: “Xoliasyja drieván Raj Devél pe dadende tumarende baré xolynasa, ne tu phen lénge: ‘Adiáke rakiréla Raj Devél jangoléngire-bolybnáskiro: risjon ke Me’, – rakiréla Raj Devél jangoléngire-bolybnáskiro Devél’, i Me risjováva ke tumé’, – rakiréla Raj Devél, jangoléngire-bolybnáskiro. Na javén adasavé, syr dadá tumaré, ke savé phenenas lav angledýr phurané proróki, rakirí: ‘Adiáke rakiréla Raj Devél, jangoléngire-bolybnáskiro: Riskirén tumé kakaná tumaré fujé dromendyr i tumaré fujé butiendyr; ne jone na kandyné i na šundlé Man’, – rakiréla Raj Devél. ‘Dadá tumaré-kaj jone isyn? Ne i proróki, ci léna jone te dživén bi koncoskiro? Ne lavá Miré i statúty Miré, savé Me priphendjom Miré pishar'jénge prorokenge, ci na doginé jone ke dadá tumaré? Ne jone risjonas i rakirénas: ‘So zadumindia jangoléngiro-bolybnáskiro Raj Devél te kerél aménge pal amaré dromá i amaré butiá, adiáke Jov i kerdiá aménge’.” Pe biš te štárto dyvés dro dešujekhto čhon – davá isyn čhon Ševat – pe javír berš Darijoskiro, sys lav Ráskire-Devléskiro ke Zahárija, Varahiiaskiro čhavó, Idoskire-čhavéskiro, prorokoske: “Dykhcjom (dyjom) suné me ratý: ake, murš uklisto pe lolé greste isyn terdó maškír mirty, savé isyn nábut paledyr, ne pal léste grajo lolé, syva i parné. Tén'ci phendjom me: “Kon isyn jone, Rajo miro?” I phendiá mánge Jangólo, savó rakirdiá mánca: “Me sykaváva túke, kon jone isyn.” I otphenélas murš, savó sys terdó maškír mirty, i phendiá: “Davá isyn kodolé, savén Raj Devél bičhadiá te obdykhen phuv.” I jone otphenenas Ráskire-Devléskire Jangoloske, savó sys terdó maškír mirty, i phendlé: “Obdykhciám ame phuv, i, ake, sarí phuv isyn pherdý manušénca i ramánjono (spokójno).” I otphenélas Jangólo Ráskire-Devléskiro i phendiá: “Rajo Dévla, jangoléngire-bolybnáskiro! Kiéli kovljola Tyró iló ke Jerusalimo i ke fórja Judáskire, pe savé Tu xoliasosa uže eftadešá berš?” Tén'ci, otpheny Jangoloske, savó rakirdiá mánca, vyphendia Raj Devél lavá bahtalé, lavá ilýtka. I phendiá mánge Jangólo, savó rakirdiá mánca: “Uštý i phen: ‘Adiáke rakiréla jangoléngiro-bolybnáskiro Raj Devél: ‘Rosholiasyjom Me pe Jerusalimo i pe Sióno baré xoliása; i baré xolynasa xoliamó som Me pe manušénde, savé sys džidé isyn dro spokojnyma: pal-dová so syr Me sómas nábut xoliamó, jone kerdé butýr. Vaš-dová adiáke rakiréla Raj Devél: “Me risjováva ke Jerusalimo kovlé ilésa; dre léste javéla ĥazdynó Kher Miro (Khangirí Mirí)”, – rakiréla, jangoléngiro-bolybnáskiro Raj Devél, i šelo, savésa obmierinelape pes phuv, protyrdelape pir Jerusalimo. Iščo uštý i phen: ‘Adiáke rakiréla, jangoléngiro-bolybnáskiro Raj Devél: ‘Nevéstyr (nevés) pherdiakirenape fórja Miré lačhipnása i obrisjola kovlé ilésa Raj Devél ke Sióno, i nevéstyr (nevés) Jov vykedéla Jerusalimo.” I ĥazdyjom me jakhá miré i dykhcjom: ake, štar šyngá. I phendjom me Jangoloske, savó rakirdiá mánca: “So isyn davá? I jov otphendiá mánge: “Davá isyn šyngá (rógi), savé rosčhurdyne Judas, Izrailjo i Jerusalimo.” Paldavá sykadiá mánge Devél štaren butiarnen (spiecen dre vastytka butiá). I phendjom me: “So léna jone te kerén?” Jov phendiá mánge adiáke: ‘Adalé šyngá, savé rosčhurdyne Judas adiáke, so nikón naštý (na moginéla): te ĥazdel šeró péskiro; ne adalé javné te darjakiren len, te zmaren telé šyngá manušéngire, savé ĥazdyné šyng péskiro pe Judaskiri phuv, sob (kaj) te rosčhuven la’.” I nevéstyr (nevés) ĥazdyjom me jakhá miré i dykhcjom: ake, murš, dre saveskiro vast sys šelo, savésa mierinelape phuv. Me phucjom: ‘Karik tu džása?” I jov phendiá mánge: “Te obmierinav Jerusalimo, sob (kaj) te dykháv, savó isyn léskiro buĥlypén i savó isyn léskiro dlengipén.” I ake, Jangólo, savó rakirdiá mánca, vydžála ne javír Jangólo džála mamúj léste. I phendiá jov adaleske: “Džá sygedýr, phen adalé terneske: ‘Jerusalimo bičhavéla péskire manušén pe phuvjá pašýl fóro, pal-dová so drieván but isyn dre léste manušén i but kheritkoné murdalén (skoto). I Me javáva’, – rakiréla Raj Devél, syr jekh jagitko vánta (sciana) trusciál léste, i barjola sláva Mirí dre léste andrál.” “Ei! Ei! Našén paš-ratitkoné (sieviernone) rigátyr, – rakiréla Devél: ‘pal-dová so pir štar balvalia bolybnýtka Me rosčhudjom tumen”, – rakiréla Raj Devél. Naš krig, Sióne, savó san ke Vavilonoskiri čhaj. Pal-dová so adiáke rakiréla, jangoléngire-bolybnáskiro Raj-Devél: ‘Vaš sláva Jov bičhadiá man ke Najudýtka nácyi, savé občorenas tumen; pal-dová so savó čilavéla tumen, dočilavelpe ke lial'ka (zračko) dre jakh Léskiri. Ake, Me trinskirava Miré vastésa pe lénde, i jone perna tel ĥerá péskire pishar'jengire, i tén'či tumé dodžinenape, so jangoléngire-bolybnáskiro, Raj Devél, bičhadiá Man. Jav bahtalý i rádynpe, Sionóskiri čhajo! Pal-dová so, ake, Me javáva i lavá te dživáv dre túte andrál’, – rakiréla Raj Devél. – I priprastana ke Raj Devél butdžine manušá dre dová dyvés i jone javéna Léskire manušá; i Jov léla te dživél dre tuménde andrál, i tumé dodžinepe, jangoléngire-bolybnáskiro Raj Devél bičhadiá Man ke tu. Tén'ci Raj Devél léla dro xulaiben Judas, sýrby Péskiri miéra dro mištypén pe svénto phuv, i nevéstyr (nevés) vykedéla Jerusalimo. ‘Mek štyl te javél každo loč (plot') angíl muj Devléskiro! Pal-dová so Jov ĥazdélape Péskire sventoné štetóstyr!” I sykadiá jov mánge Isusós (Johošuás/Ješuás), baré rašás, savó isys terdó angíl Jangoloste Ráskire-Devleskireste, i nalačhés (satanas), savó sys terdó pe léskiro čačó (pravo) vast, sob (kaj) te kerél saró proti Léste. I phendiá Devél nalačheske: “Raj Devél, mek te na domekel tut, nálačho, Savó vykedyjá Jerusalimo! Jov rašáj isyn glomnia (golomnia), vylyný jagátyr?” Isúso že sys uridó dre meliakirde ídi i sys terdó angíl Jangoloste, Savó otphenélas i phendiá odolénge, kon sys terdó angíl léste, adiáke: “Zlen Léstyr meliakirde ídi”; ne Léske kokoreske phendiá: “Dykh! Me zlyjom tútyr čoripén Tyró, i urjakirav tut dre ídi svenkítka. I Me phendjom: “Čhuvén po šeró léskiro žužó kidaro.” I jone čhudé žužó kidaro po šeró léskiro i urjakirde les dre ídi. Jangólo že Devléskiro sys terdó. I lyjá te buntuinel Jangólo Ráskire-Devléskiro i phendiá Isusóske: “Adiáke rakiréla jangoléngire-bolybnáskiro Raj Devél: ‘Kóli lésa te psirés pir Miré dromá i kóli tu javésa pe stréga Mirí, tedy tu lésa te sendines Kher Miro, i te dykhés pale Miré gredy (dvory). Me dáva vólia túke te psirés maškír odolénde, savé isyn terdé adái. Vyšún, Isúsie, baró rašái, tu i khardé pšála tyré, savé bešena angíl túte, muršá, savé isyn slavutna: ake, Me lydžáva dynarís Mires, otbarjakiriben. Pal-dová so ake, dová bar, savó Me čhuváva angíl Isusóste; pe davá jekh bar isyn eftá (bitrinéngiro deš) jakhá; ake, Me vyčhinava pe léste léskire čhinybna, – rakiréla jangoléngire-bolybnáskire, Raj Devél, i Me khosava krig adalé – phuvjákiro grého dro jekh dyvés. Dro dová dyvés, – rakiréla jangoléngire-bolybnáskire Raj Devél, – léna jekh javirés te kharén tel vinagrado (drakh) i tel inžyro. I risijá dová Jangólo, savó rakirdiá mánca, i džangadia man, syr džangavena manušés soibnastyr leskirestyr. I phendiá jov mánge: “So tu dykhésa?” I otphenavas me: dykháva momolýtko (svietíl'niko) saró suvnakástyr i tahtajoro (čašečka) vaš maslinitko dzet uprál léste, i eftá momolengire (lampady) pe léste, i pe eftá trubkicy ke momolengire, savé isyn uprál léste; I duj maslinki pe léste, jekh pe čačí rig tahtajorestyr, javír pe zérvo (liévo) rig léskiri. I otphenavas me i phendjom Jangoloske, savó rakirdiá mánca: “So davá isyn, Rajo miro?” Tén'ci Jangólo, savó rakirdiá mánca, otphenélas i phendiá mánge: “Ci tu na džinésa, so davá isyn?” I phendjom me: “Na džinóm, Rajo miro.” Tedy otphenélas jov i phendiá mánge: “Adiáke: davá isyn lav Ráskire-Devléskiro ke Zorovavieljo, savó rakiréla: ‘Na muršypnasa i na zorjása, ne Duhósa Miresa’”, – rakiréla jangoléngire-bolybnáskiro, Raj Devél. “Kon san tu, bari bérga angíl Zorovavieljoste! Tu san plosko phuv (loščýna), i vylydžala jov venglytko bar, i saré zadena gódla: ‘Bahtalypén, bahtalypén pe léste!” I sys ke me lav Ráskire-Devléskiro, pheny: “Zorovavieljoskire vastá kerdé fundámiento dalé Kheréske (Khangirjake); léskire vastá i končinena les, tedy tu dodžinesape, so jangoléngire-bolybnáskiro, Raj Devél, bičhadiá Man ke tumé. Pal-dová so, kon moginéla te duminel; so dyvés davá isyn na drieván važno, kiéli dasavé radymása dykhéna pe urovnjo dre vastá Zorovavieljoskire, odolé eftá (bitrinéngiro deš), davá isyn jakhá Ráskire-Devléskire, savé obuhtylena dykhibnasa sarí phuv?’” Tedy otphenavas me i phendjom léske: “So sykavéna dolé duj maslinki pe čačí rig šandaloskiri i pe zérvo rig léskiri?” Javír mólo lyjom me te rakiráv i phendjom léske: “So sykavéna duj maslinitka randiá (vétki), savé pirdál duj suvnakuné trubkicy čhuvéna péstyr suvnakái?”. I phendiá jov mánge: “Ci tu na džinésa, so davá isyn? Me otphenavas: “Me na džinóm, Rajo miro.” I phendiá jov: “Davá isyn dujdžiné manušá, savén makhne maslinitkone dzetesa, i savé isyn otphenybnaskire angíl saré-phuvjákire Raste-Devléste.” I nevéstyr (nevés) gazdyjom me jakhá miré i dykcjom: ake, vurniala svítko (skrencly papira). I phendiá jov mánge: “So dykhésa tu?” Me otphenavas: “Me dykháva svítko, savó vurniala; dlengipén léskiro isyn biš kuniá (logci), buĥlypén léskiro isyn deš kuniá.” Jov phendiá mánge: “Davá isyn prokošybén (arman), savó jačéla pe rig saré phuvjákiri; pal-dová kažno (sváko), kon čorela, javéla xasiakirdo, syr isyn čhindló pe jekh rig, i kažno, kon déla xohany sovél, xasiakirdo javéla, syr isyn čhindló pe javír rig.” ‘Me zalydžijom les’, – rakiréla jangoléngire-bolybnáskiro, Raj Devél, – i davá javéla dro čoreskiro kher i dro kher odoleskiro, kon déla xohany sovél Miré lavésa i jačéla dro kher léskiro i xasiakirla les, i kaštá léskire, i bará léskire. I vygijá Jangólo, savó rakirdiá mánca, i phendiá mánge: “Ĥazde iščo (inké) jakhá tyré i dykh, so da vydžála?” Kiéli že me phendjom: “So davá isyn? Jov otphenélas: “Davá vydžála efa (khudo), i phendiá: “Davá isyn patrín (óbrazo) léngiro pir sarí phuv.” I ake, kotér molovi (svinco) ĥazdyjápe, i odój isys bešty jekh džuvlý maškír efa. I phendiá jov: “Adaja džuvlý – kokoró bipatyvalypen”, i čhurdyjá la dre efa maškirál, ne pe otvierstijo (pe kula) lákiri čhurdyjá kotér molovanó (svincovo). I gazdyjom me jakhá miré, i zadykhcjom: ake, javné duj džuvliá, balvál phurdelas dre léngire phaká (kryly), i phaká lénde – syr phaká boc(t)ianoskire; i ĥazdyné jone efa i lydžiné la maškír phuv i bolybén. I phendjom me Jangoloske, savó rakirdiá mánca: “Kaj lydžána jone daja efa?” Tén'ci phendiá jov mánge: “Sob (kaj) te kerén vaš láke kher pe phuv Senaar, i, kiéli saró javéla kerdó, tedy joj čhuvélape odój pe péskiro fundámiento.” I nevéstyr (nevés) ĥazdyjom me jakhá miré i dykháva: ake, štar maribnýtka vurdená (koliesnicy) vydžánas maškír duj bérgi; ne bérgi dolé isys bérgi xarkuné (miedítka). Dro pérvo vurdén andré dyné grajo lolé, ne dro javír vurdén – grajo kalé. Dro tríto vurdén grajo parné, ne dro štárto vurdén graja syva, zoralé. I lyjom me te rakiráv, i phendjom Jangoloske, savó rakirdiá mánca: “So davá isyn, Rajo miro?”. I otphenélas Jangólo i phendiá mánge: “Davá isyn štar bolypnaskire dúhi, savé isyn otphenybnaskire angíl Raste-Devléste saré phuvjakireste. Kalé grajo odój vydžána pe rig paš-ratítko (sievierno), i parné našéna pale lénde, ne syva džána pe rig paš-dyvesýtko (južno). I zoralé vyginé i kamlé te džán, sob (kaj) te džán duredýr pir phuv; i jov phendiá: “Džán i džán pir sarí phuv”, – i jone giné pir sarí phuv. Tedy khardiá jov man i phendiá mánge: “Adiáke, dykh, savé vyginé pe paš-ratítko (sievierno) phuv, kovliakirdé Miro dúho (fáno) pe phuv paš-ratítko.” I sys Ráskire-Devléskiro lav ke me, pheny: “Le odoléndyr, savé javné plienóstyr, ke Xieldajo, ke Tovija i ke Iiedajo, i džá dro dová kokoró dyvés, džá dro kher Iosijáskiro-Sofonijoskire čhavéskiro, kaj jone javné Vavilonóstyr, Le léndyr rup i suvnakáj i ker kralítka stadyká (korony) i čhuv po šeró Isusóskiro, Iosiediekoskire čhavéskiro, baré rašaskiro, i phen léske: – “Adiáke rakiréla jangoléngire-bolybnáskiro Raj Devél: ‘Ake, Murš, – lav Léskiro Otbarjakiriben, Jov barjola Péskire kornjostyr (rukhestyr) i keréla Khangirí Devléskiri. Jov keréla Khangirí Ráskire-Devléskiri i priléla sláva, i léla te bešél syr barydyró pe Péskiro trono; javéla i rašáj pe Péskiro trono, i lavengiro ramánjo (miro) javéla maškír dová i javír. A dolé kralitka stadyka javéna Xieliemoske i Tovijaske, Iiedajoske i Xienoske, Sofronijaskire čhavéske, vaš ripiribén dro Devléskiri Khangirí. Duralypnastyr javéna i khetané javirenca léna te ĥazdén Khangirí Ráskire-Devléskiri, i tumé dodžinenape, so jangoléngiro-bolybnáskiro, Raj Devél, bičhadiá man ke tumé, i davá javéla, kiéli tumé zoralés léna te kandén zan tumaré Ráskire-Devléskiri.” Dro štárto berš kralískiro Darijoskiro sys lav Ráskire-Devléskiro ke Zahárija, pe štárto dyvés jeniáto (bijekhéskiro déšto) čhon, Xaslievo. Syr Viefil' bičhadiá Sariecieros i Riegiem-Mieliehos i malen pir drom (sputniken) leskiren te mangénpe Ráske-Devléske angíl muj Léskiro, i te phučén rašandyr, savé sys dre Khangirí, Ráskire-Devléskiri, jangoléngire-bolybnaskiri i prorokendyr, rakirí: “Ci trej mánge te rovav dro pándžto čhon i te rikirav posto, so me keravas uže but berš?” I sys ke me láva jangoléngire-bolybnáskiro Ráskire-Devléskiro: “Phen sarénge phuvjákire manušénge i rašange adiáke: ‘Kiéli tumé rikirenas posto i rovenas dro pándžto i eftáto čhon, i davá uže eftadešá berš, – ci vaš Mánge tumé rikirde posto? Ci vaš Mánge? I kiéli tumé xána, i kiéli tumé p'jena, ci na vaš péske tumé xána, ci na vaš péske tumé p'jena? Ci na ‘dasavé kokoré lavá phenelas Raj Devél angledýr pirdál ĥaratuné prorokénde, syr dro Jerusalimo sys iščo (inké) but manušá i pokojnyma, i dre pašylatune fórja, dre paš-dyvesýtko (južno) rig i pe Telatuny Phuv dživénas but manušá?’” I sys lav Ráskire-Devléskiro ke Zahárija: “Adiáke rakirélas Raj Devél jangoléngire-bolybnáskiro: ‘Kerén séndo čačipnytko i sykavén láska i (žalima) kažno vaš péskire pšaléske; Pivlién (udoven), pirotén (siroten), čužones i čorores te na pritasaven i te na rikirén xolý jekh pe javiréste dro iló tumaró.” Ne jone na kamlé te kandén, otrisine Mándyr, i kaná péskire ottyrdyne, sob (kaj) te na šunén. I iló péskiro zakerde baresa, sob (kaj) te na šunén Zakóno i lavá, savé bičhavelas jangoléngire-bolybnáskiro Raj Devél, Duhósa Peskiresa pirdál ĥaratuné prorokénde; vaš dová i doresciá len bari xolý jangoléngire-bolybnáskire Rástyr-Devléstyr. I sys: syr Jov obrisjolas, a jone na šunenas, adiáke i jone obrisjonas, a Me na šunavas,” – rakiréla jangoléngire-bolybnáskiro Raj-Devél. I Me rosčhurdyjom len riskiribnáskire balvaliasa pir saré manušénde, savén jone na džindlé. I daja phuv čhučija bi léngiro, so nikón na psirdiá pirdál láte ni angle, ni pale, i jone kerdé dalé bahtalé rigátyr čhučí phuv.” I sys lav jangoléngire-bolybnáskiro, Ráskire-Devléskiro: “Adiáke rakiréla jangoléngire-bolybnáskiro Raj Devél: ‘Rosholiasyjom Me pe Sióno baré xolynása, i baré xoliása xoliasyjom Me pe léste’. Adiáke rakiréla Raj Devél: ‘Obrisjovava Me ke Sióno i Me láva te dživáv dro Jerusalimo, i léla te kharelpe Jerusalimo ‘čačipnáskiro fóro’, i bérga jangoléngire-bolybnáskire Ráskire-Devléskiri – Sventymakiri Bérga.’ Adiáke rakiréla jangoléngire-bolybnáskiro, Raj Devél: ‘Nevéstyr phuré i phurja léna te bešén pe vulícy (gásy) dro Jerusalimo, kažno kaštoresa dro vast pir dová, so baré beršá lénge. I vulícy (gásy) dalé foróskire javéna pherdé terné-baršengirenca i terné-beršengir'ienca, savé léna te broinen pe léskire gásy. Adiáke rakiréla jangoléngire-bolybnáskiro Raj Devél: ‘Kóli davá vaš narodo, savó jaciápe, sykadjola divno dre dyvesá dalé, tedy naušto davá isyn divno i vaš Mánge?’ – rakiréla Raj Devél, jangoléngire-bolybnáskiro. Adiáke rakiréla jangoléngire-bolybnáskiro Raj Devél: ‘Ake, Me vyrakhava Miré manušén vastokoskire rigátyr i rigátyr, kaj peréla kham; Me janáva pale len, i jone léna te dživén ke Jerusalimo, i javéna Miré manušá (manušénca), i Me javáva léngiro Devél, pir patiaibén i dro čačipén.’ Adiáke rakiréla jangoléngire-bolybnáskiro Raj Devél: ‘Zoraliakiren tumé vastá tumaré, kon šunéla akaná lavá dalé prorokéngire vuštendyr, savé sys pašýl, syr sys kerdó Kher (Khangirí) jangoléngire-bolybnáskiro Ráskire-Devléskiro, sob (kaj) te ĥazdelpe Khangirí. Pal-dová so angledýr odolé dyveséndyr na sys pleskiriben vaš manušéske, na sys pleskiriben vaš butý guruvengiri, ni odoléske, kon javéla, ni kodoléske, kon džála, na sys ramánjo (miro) vergéndyr; i domekavas Me, sob (kaj) kažno manúš te javél vérgo javireske. I kaná vaš Miré manušénge, savé jačnépe, Me na som adasavó, syr sómas ĥaredyr,’ – rakiréla Devél, jangoléngire-bolybnáskiro. Pal-dová so sieindlo giv javéla te del pribaripen, vinagradýtko xrústo déla péskire muricy, ne phuv déla, so joj barjakirdia, i bolybén déla pahlyn (rosa) péskiri: i saró davá Me dáva adákicy manušénge, savé jačénape. I javéla: syr tumé, Judáskiro kher i Izrailjoskiro kher, sánas prokošle, maškír Najudytkoné nácyi, adiáke Me zrakháva tumen, i tumé javéna vaš javirénge bahtalé; na andyršan, mek te javén tumaré vastá zoralé!” Pal-dová so adiáke rakiréla, jangoléngire-bolybnáskiro Raj Devél: “Syr Me dyjom godý Péske te sendiakirav pharés tumen, kiéli tumaré dadá xoliakirenas Man, – rakiréla Raj Devél, – i Me na otphendjompe adalestyr, adiáke nevéstyr zadumindjom Me dre dalé dyvesá te keráv lačhipén Jerusalimoske i Judáskire kheréske; na andyršan! Ake, butiá, savé tumé san bangé te kerén: phenén čačipén jekh jekhéske, piró čačipén i ramánjo (miro) sendiakiren ke pórta tumarí. Nikón tuméndyr, mek te na rikirél dro iló péskiro xolý pe semencende peskirende, na kerén xohany sovél; pal-dová so saró davá Me bidykhava,’ – rakiréla Raj Devél. I sys ke me lav jangoléngire-bolybnáskire, Ráskire-Devléskiro: Adiáke rakiréla jangoléngire-bolybnáskiro Raj Devél: Posto dro štárto čhon i posto dro pándžto čhon, i posto dro eftáto čhon i dro déšto, mek te javél vaš kher Judáskiro radymakiro i bahtaló svénko; féni tumé san bangé te rikirén čačipén i ramánjo.’ Adiáke rakiréla jangoléngire-bolybnáskiro Raj Devél: “Iščo (inké) javéna te javén javír manušá i džiibnáskire buté for'jéndyr; I javéna manušá jekhe foróstyr ke manušá javire foróstyr i phenéna: “Javén te mangaspe angíl Raste-Devléste i te rodas jangoléngire-bolybnáskire Ras-Devlés”; i kažno phenéla: “džáva i me.” I javéna but nácyi i zoralé narody, sob (kaj) te lathén Ras-Devlés, jangoléngire-bolybnaskires, dro Jerusalimo i te mangenpe patier'iasa angíl muj Raste-Devléste. Adiáke rakiréla jangoléngire-bolybnáskiro Raj Devél: “Javéla dre dolé dyvesá, so dešdžine javire-čib'jengire Najudytkoné nacyiéndyr, lenape pal jagóro (pal pódia) pe ídi Judaskiri i phenéna: ‘Ame džása túsa, pal-dová so ame šundiám, so tuménca isyn Devél.’” Angilphenybén Ráskire-Devléskiro pe phuv Xadrah, pe Damásko jov adiáke-pac' (tež) jačélape; pal-dová so jakh Ráskire-Devléskiri isyn pe saré manušénde, syr i pe saré Izrailjoskire, – I pe Jemafo, savó isyn pašýl léste, pe Tíro i Sidono, pal-dová so jov isyn drieván godó. I kerdiá péske Tíro vučardý (bašnia), skedyjá rup, syr práho, i suvnakái, syr mel javrí pe gása. Ake, Raj Devél keréla les čororesa i xasiakiréla zor léskiri dro mórjo (derjáv), a kokoró jov javéla xasiakirdo jagása. Syr dykhéla la da Askalono i léla te darel, i Gaza adiáke-pac' léla te trinskirelpe, i Ekrono; pal-dová so na vykerlape e nadiéia léskiri: na javéla králi dre Gaza, ne Askalono jačéla bi manušéngiro. “Čužo nacyja léla te dživél ke Azoto, i Me xasiakiráva phut'kirdé Filistimlianen. Me vytyrdava rat léskire móstyr i džungalypén léskire dandendyr, i jov perela tel zor Devléske amareske, i javéla syr barengiro dre Juda, ne Jekrono javéla, syr Jevusiejo. I Me čhuváva lod (stáno) pašýl Kher Miro muial xaladénde, muial odolénde, so psirén angle i pale, i na javéla butýr adáj te psirél vérgo; pal-dová so akaná Miré jakhénca Me láva te dykháv pe davá. Rádynpe zoralés bahtiatyr, Sionóskiri čhaj, de gódla radymátyr, Jerusalimóskiri čhaj: ake, králi tyró javéla ke tu, čačipnáskiro i zrakhibnaskiro, kovlé-ilytko, uklisto pe oslicate i pe terné osloste, saveskiri daj psirdiá telo ĥámo. Tén'ci Me xasiakiráva maribnýtka vurdená dro Jefriémo i gren dro Jerusalimo, Me xasiakiráva maribnýtko lúko; i Jov phenéla pal ramánjo manušénge, i Léskiro kralipén javéla morjostyr (derjavestyr) ke mórjo (derjáv), i rekátyr (leniátyr) ke/žýko phuvjákiro jagóro (ke kónco). Akaná pal túte – vaš rat miré phenybnaskiro zavietostyr Me mekava pe vólia tyré starde manušén dalé xoripnastyr, dro savó nane paní. Risjon ke tvárdyma (diz) tumé, starde manušále, savénde isyn iščo (inké) nadiéia! Dová, pal so akaná rakiráva, Me otpleskirava túke (duj móly). Pal-dová so Me syr lúko nadtyrdava Péske Judas i pherdiakirava lúko Jefriemosa, i ĥazdáva čhavén tyrén, Sióne, pe čhupnar'iande, Ionija, i Me keráva tútyr maribnýtko kurtála zoralé-manušeskiri. I javéla uprál lénde Raj Devél, i syr bliskavica vurniala javrí maribnýtko bust (striela) Léskiri, i zagriminela Raj Devél dro rógo (truba) i sykadjola maškír paš-dyvesýtko (južno) riskiribnaskiri balvál. Raj Devél jangoléngire-bolybnáskiro, léla te zaterdjol pal lénde, i jone léna te xasiakirén i te štakiren bará, savé čhurdenpe, jone léna te p'jen i te den gódla sýrby moliátyr (vinostyr) i pherdjona tahtaja (čašy) vaš svénta dyibená, syr altarjoskire véngly. I zrakhéla len Raj Devél, léngiro Devél dro dová dyvés, syr bakrén Péskire ĥurtostyr; pal-dová so syr kuč bará pe kralítko stadyk (koróna), jone javéna te ziainen pe Léskiri phuv. O, syr baró isyn Léskiro lačhipén i savó isyn šukaripén, gožyma Léskiri! Maro rosphandela čib terné manušénge, i mol (vino) – tyrne džuvlienge! Mangén Rástyr-Devléstyr bryšýnd, kiéli vesnakiro jov trej te javél; Devél zaziainela bliskavicasa i déla tuménge ĥensto bryšýnd, čar pe félda. Pal-dová so terafimy bašena čibása, a zumakiribnaskire (vieščuny) dykhéna xohanés i rosphenena suné xohané; jone kovliakirena ile čhučipnasa (pustotasa); vaš-dová jone psiréna syr bakré, savénge isyn pharó, pal-dová so nane čhupnaris (pastyrjos). Pe čhupnar'jende zahačíia xolyn Mirí, i buznen (kozlen) Me javáva te maráv; pal-dová so javéla jangoléngire-bolybnáskiro Raj Devél ke ĥurto Péskiro, Judáskiro kher, i čhuvéla len, syr thagaritkone gres péskires pe maribnýtko félda. Léstyr javéla venglytko bar, léstyr – kiloro vaš šátra, léstyr – lúko te marélpe, léstyr javéna theméskire barydyrá (pravitieli). I jone javéna zoralé muršá, savé javéna te štakiren vergén, kóli isyn maribén, syr mel pe gása, i marénpe, pal-dová so Raj Devél isyn lénca, i zadena jone bari ladž odolénge, savé isyn uklisté pe grénde. Me zoraliakirava kher Judáskiro i zrakháva kher Jozaskiro, i Me riskiráva len pale, pal-dová so kovlyja iló Miro pal lénde, i jone javéna, sýrby Me na mekavas len: pal-dová so Me Raj-Devél léngiro, i Me vyšunava len. Syr zoraló murš javéla Jefriémo; tedy javéla te zradynelape iló léngiro, syr moliátyr (vinostyr); i dykhéna davá čhavé léngire i jone javéna te radynénpe; rádyma javéla dro léngiro iló vaš Ráske-Devléske. Me dáva šolia, lénge i skedáva len, pal-dová so vyrakhcjom len; jone javéna adákicy butdžine, syr sys angledýr. I Me rosčhuvava te dživén len maškír manušénde, i dre duratuné phuvjá, jone léna te ripirén pal Mánde, i jone léna te dživén péskire čhavorenca (bijatenca), i risjona pale. Me adiáke-pac' riskiráva len pale Jegiptóskire phuvjátyr i Asirijatyr, skedáva len, i Me lydžáva len pe Galaadoskiri phuv i pe Liváno adiáke pe ĥará, syr na uhtýlla (nádosi) štéto vaš lénge. I jone džána pir bari bída pir mórjo (derjáv) i Me xasiakiráva valny moritka adiáke, so terdjona saré xoripna rekakire (leniakire), tyknjola Asuroskiro phut'kiribén i otlena skipietro Jegiptóstyr. I Me zoraliakirava len dre Raste-Devléste, i jone léna te psirén dro lav Léskiro”, – rakiréla Raj Devél. Otker (psirav), Liváno, pórta tyrí, sob (kaj) te pohal jag tyré kiedry. Rov, kipariso, pal-dová so pyjá kiedro, pal-dová so i baré kaštá podynepe; rovén, demby Vasanoskire, pal-dová so pyjá ĥensto veš. Zan čhupnar'jengiri (pastyr'jengiri) isyn šundly rovibnasa, pal-dová so čhučija léngiri vol'nyma; šunelpe xoliam zan terné-ščerengiri, pal-dová so xasijá Iordanoskiro šukaripén. Adiáke rakiréla Raj Devél, Devél miro: “čarav bakrén, savé džána tel čhuri, savén xulaja čhinena bi darákiro, a odolé, savé len bikindle, rakiréna: ‘Parikiriben Devléske; me barvalyjom!” I léngire čhupnárja (pastuhi) na tanginena pal lénde. Pal-dová so Me na lavá butýr te tanginav manušén dalé – phuvjakiren’, – rakiréla Raj Devél; – ake, Me otdáva manušén, kažnones dre vastá léskire semencake, i dre vastá léskire kralíske. Jone léna te xasiakirén phuv, ne Me na zrakháva len léngire vasténdyr’.” I Me čaradjom bakrén, savé džána tel čhuri, bakrén, čačes, čororen. Me lyjom Péske duj sastruné desté (žezly) i Me lyjom te kharav jekh ‘Šuk’, a javír – ‘Sastruné Penty, i čaradjom bakrén. I Me xasiakirdjom trinen čhupnar'jen dro jekh čhon; i odrisija di Miro léndyr, syr léngiro di odrisija Mándyr. Tien'ci Me phendjom: “Me na lavá te čarav tumen. Savó isyn te merél, mek te merél, i xasibnaskiro – mek te xasjol, a savé jačénape, mek te xan masá jekh javirestyr. I Me lyjom Miro sastruno destó – Šuk – i Me phagirdjom les pe paš, sob (kaj) te khosav krig zavieto, so sčhudjom Me saré manušénca. I sys destó phagirdó dro do dyvés. I tén'či ĥalyné čororé maškír bakrende, savé užakirde Man, so davá sys lav Ráskire-Devléskiro. I Me phendjom lénge: “Kóli tumé kaména, den Mánge Miro pleskiriben; kóli nad – na den; i jone važyndle Mánge syr pleskiriben trijánda rupuvé lovore. I phendiá mánge Raj Devél: “Čhurde len dre pirí khangirjákiri, – kadasavi vučí timín, saví jone dyné pal Mánde! I lyjom Me trijánda rupuvore i čhurdyjom len dro Kher Ráskire-Devléskiro vaš manušéske, kon lipinel pirja glinatyr (glejatyr). I phagirdjom Me javír sastruno destó Miro – Sastruné Penty, sob (kaj) te rosphandav pšalypen maškír Judaste i Izrailjoste. I Raj Devél phendiá mánge: “Le iščo (inké) péske strumiento jekheskire dylyné čhupnar'jendyr. Pal-dová so, ake, Me jačavava pe daja phuv čhupnaris, savó na léla te pekelpe pal xas'kiribnaskirende, i jov na léla te rodél našaden, na léla te sastiakirel nasvalen, i sasten jov na léla te čaravel, ne jov javéla te xal mas thulengiro, i kopyty (naja) léngire roskušne pe koterá. Mek te javél bída pe džungalé pastyrjoste, savó jačkiréla péskire bakrén! Mek te čhinel čhuri vast léskiro i čačí jakh léskiri! Mek te šutjol sarésa léskiro vast, i mek léskiri čačí jakh sarésa te korjol.” Angilphenybén Rástyr-Devléstyr paló Izrailjo. Adiáke rakiréla Raj-Devél, Savó rozbuĥliakirdia bolybén, Savó kerdiá phuv i dyjá manušéske di andré léste, rakiréla: “Ake, Me keráva Jerusalimóstyr tahtáj (čaša) te matjon vaš saré manušénge, kon isyn trusciál, syr jone léna te občhuven trusciál Judas i Jerusalimo. I javéla dro dová dyvés, so Me keráva Jerusalimóstyr drieván pharó bar vaš saré manušénge; saré, kon kaméla te ĥazdel les, pharjola pe koterá, mek te skedénpe proti léste saré manušá dalé-phuvjákire. Dro dová dyvés, – rakiréla Raj Devél, – ‘Me keráva kažnoné gres bengalesa i odolés, kon javéla uklisto pe léste, dylynesa, pe kher Judáskiro otkerava jakhá Miré; kažnoné gres manušengires Me korjakirava’. I phenéna baré raja Judáskire dre ile péskire: ‘Zor mirí – Jerusalimóskire manušá dre jangoléngire-bolybnáskire Raste-Devléste, léngire Devléste.” Dro dová dyvés Me keráva ran Judaskiren – syr xič (skorovieda) jagása maškír kaštá i syr momolýtko (svietíl'niko) maškír ĥarby (snopy), i jone povymarna sarén pašylatunen manušén čačé i zervone (lievone) rigátyr, i nevéstyr javéna dro Jerusalimo manušá pe léskiro, Jerusalimoskiro štéto. I zrakhéla Raj Devél angíl sareste Judáskire šátry, sob (kaj) Davidóskire-kheréskiro baripén i baripén Jerusalimóskire manušéngiro te na javél vučedýr Judastyr. Dro dová dyvés léla te zaterdjol Raj Devél pal manušénde Jerusalimoskiren, te naj bizorjákiro léndyr dro do dyvés javéla syr Davído, ne kher Davidóskiro javéla syr Devél, syr Devléskiro Jangólo angíl lénde. I javéla dro dová-dyvés, so Me láva te rodav, sob (kaj) te xasiakiráv saré Najudýtka nácyi, savé javéna te marén Jerusalimosa. Ne pe kher Davidóskiro i pe Jerusalimóskire manušénde Me čhuváva bahtalypnaskiro i mangipaskiro dúho (fáno), i jone dykhéna pe Léste, Konés phusadé, i jone léna te rovén pal Léste, syr pal jekhoreste čhavéste i léna te tanginen pal Léste, syr tanginen pervoné čhavores. Dro dová dyvés ĥazdélape bari túga jasvénca dro Jerusalimo, syr Gadadrimonoskiro roibén pe Miegidonoskire féldy. I léla te tuginel jasvénca phuv, kažno kherítko ródo ke pe: manušá Davidóskire-kheritkoné rodóstyr ke pe, a džuvliá léngire ke pe; manušá Nafanoskire kheritkoné rodóstyr ke pe, i džuvliá léngire ke pe; Manušá Lievijoskire kheritkoné rodóstyr ke pe, i džuvliá léngire ke pe; Simieonoskire manušá ke pe, i džuvliá léngire ke pe. Saré javír kherítka ródy, savé jačénape – kažno ródo ke pe, i džuvliá léngire ke pe. Dro dová dyvés psiravelape (otkerelape) ĥanyngori vaš Davidóskiro kher i Jerusalimóskire manušénge, sob (kaj) te vymoren (te xalaven krig) léndyr grého i kažno melalypen. I javéla dro dová dyvés’, – rakiréla Raj Devél, jangoléngire-bolybnáskiro, – ‘Me čhináva krig idolengire lavá dalé phuvjátyr, i pal lénde nikón butýr na léla te ripirel. Me adiáke keráva, so kokoré xohané prorokén i nažužo dúho Me tradava krig phuvjátyr. I javéla adiáke: syr kon léla te angíl phenél pal dová, so javéla, to dad i daj léskire, so jandlé les, pe svéto, phenéna léske: ‘Túke naštý te dživés, pal-do so tu xohaibén rakiresas Ráskire-Devléskire lavéstyr.’ I muliakirena les dad léskiro i daj léskiri, savé bijandle les, syr jov léla te angilphenel’. I javéla dro dová dyvés, so zaladžanape kadasavé proróki, kažno péskire dykhibnastyr, syr jov léla te angilphenel, i jone na léna te ur'jen pe léste balytka goné, sob (kaj) te xohaven. Ne jov phenéla: Me na som proróko, Me som gavitko manúš, pal-dová so sys vari-kon te kerél mándyr dynarís miré čhavoritkone beršéndyr. Léske phenéna: “Sóske isyn túte kárby (rubcy) pe vastá?” I jov otphenéla: “Vaš dová, so marenas man dro kher, kaj sys miré drúgi (malá).” O, Kurtália! Ĥazdepe pe pastyrjoste Mireste i pe semencate Mirjate, rakiréla jangoléngire-bolybnáskiro Raj Devél. Zamar pastyrjos, i rosprastanape bakré! I Me protyrdava vast Miro ke tykné. I javéla adiáke pe sarí phuv, – rakirél Raj-Devél, – ‘Duj trita pe láte javéna xasiakirdé, vymerna, a tríto paš jačélape pe láte. I lydžáva Me do tríto paš dre jag, biliakirava les, syr biliakirena rup, i vyžužakirava les, syr žužakirena suvnakái: jone léna te kharén lav Miro. I Me vyšunava len i otphenava: ‘Davá isyn Miré manušá,’ ne jone phenéna: ‘Raj Devél isyn Devél miro!’” Ake, javéla dyvés Ráskire-Devléskiro, i roskerena mištypén, čordo tútyr, maškír túte. I Me skedáva sarén manušén pe maribén proti Jerusalimo, i léna fóro i občorna kherá i kerna ladž džuvlienge, paš-fóro džála dro pliéno; ne javír manušá, savé jačénape, na xasjona foróstyr. Tén'ci javéla Raj Devél i xoliasóla pe Najudýtka nácyi, syr xoliásyja pe lénde dro maribnaskiro dyvés. I terdjona ĥerá Léskire dro dová dyvés pe Olivítko (Jelieonoskiri) bérga, so angíl Jerusalimo ke/žýko vastóko; i rospharjola pe paš bérga Olivítko vastokóstyr ke/žýko zapado (ke pal-pania) drieván baré feldasa, i paš bérga otdžala ke paš-ratítko rig, a javír paš-ke paš-dyvesýtko (južno) rig pe drieván baró dólo. I tumé našéna dre félda maškír bérgi Miré; pal-dová so félda protyrdelape ke Asilo; i tumé prastána, syr našenas phuvjákire trinskiribnastyr dre dyvesá Ozijaskire, Judejákire kralískire; i javéla Raj Devél, Devél miro i saré svénta Lésa. I javéla dro dová dyvés: na javéla dud, kham, čhon i čergeniá durjona. Dová dyvés javéla jekh jekhoro, pal léste džinéla féni jekh Raj Devél: ni rat, ni dyvés, féni bel'velié javéla dud. I javéla dro dová dyvés: džidé paniá léna te thaden Jerusalimóstyr, paš léndyr ke vastočno mórjo (derjáv). I paš léndyr ke západno mórjo (derjáv): lynáskiro i ivantéskiro (zimakiro) javéla adiáke. I Raj Devél javéla králi pir sarí phuv; dro dová dyvés javéla féni (jekh) Raj Devél, i lav Léskiro-féni jekh. Sarí daja phuv javéla, syr rovno (vórto) félda, Gavaonostyr ke Rima, pe paš-dyvés Jerusalimóstyr, savó vučés léla te terdjol pe péskiro štéto i léna te dživén dre léste manušá Biendžminoskire Portatyr ke štéto, kaj isyn pérvo pórta (vrata), ke Vengloskiri pórta, i Xananieiloskire vučardiatyr ke kralitka priesy. E manušá léna te dživén dre léste, i na javéla butýr lavitko prokošybén, ne Jerusalimo javéla te terdjol bidarakiro. I, ake, savé javéna xasibnýtka fránsy, savénca xasiakiréla Raj Devél saré manušén, so marenaspe Jerusalimosa: kažnonéste vyšutjona masá léskire, syr jov iščo (inké) javéla terdó pe péskire ĥerá, i jakhá léskire biljona dre péskire jamicy, i čib léskiri vyšutjola dro muj léste. I javéla dro dová dyvés: javéla maškír lénde bari panika Rástyr-Devléstyr adiáke, so javéla te uhtylel pal javireskiro vast, i ĥazdélape vast léskiro pe vast léskire semencakiro. Ne i kokoró Juda léla te marélpe Jerusalimosa, i skedynó javéla mištypén sarengiro pašylatune Najudytkoné-nacyiengiro: suvnakái, rup i ídi but butendyr. Javéla dasavo kokoró xasiakiriben grengiro i lošakengiro, xasjona i vierbliudy, i osly (miegárja), i saré murdalá kherítka (skoto), savé javéna pašýl léngire budy dro lod (stáno). Paló dová saré javír Najudytkoné nacyiéndyr, savé javénas te marélpe Jerusalimosa, léna berš beršestyr te javén te kerén šerésa angíl Kralíste Raste-Devléste jangoléngire-bolybnaskireste, i te kerén budengiro (kuščengiro) Svénko. I javéla: so kóli vari-savó kherítko ródo (pliemjo) pe daja phuv na džála dro Jerusalimo te bandiakirel péskiro šeró angíl Kralíste, Raste-Devléste, jangoléngire-bolybnaskireste, tedy na javéna lénde bryšynda. I kóli Jegiptóskiro kherítko ródo (pliemjo) na ĥazdélape do drom i na javéla, tedy i lénde na javéla bryšýnd, i uhtýlla (dósi) len xas', savjása xasiakirla Raj Devél manušén, savé na javéna te kerén šatrengiro Svénko. Ake, so javéla pal Jegiptóskiro grého i pal grého saré manušéngiro, savé na javéna te svenkinen budengiro Svénko – pharó sendiakiriben! Dro dolé dyvesá i po grengiro ĥámo kudunienca javéla čhindló: “Sventyma Ráske-Devléske”, i kakavja (kotly) dro Kher Ráskire Devléskiro javéna syr čaré (čašy) angíl altárjo. I saré pirja (kakavja) dro Jerusalimo i dre Judéia javéna syr sventyma Ráskire-Devléskiri. I saré, kon javéla te janel svénto dyibén, léna len i keravena dre lénde. I na javéla butýr ni jekh Xananiejo dro Kher Ráskire-Devléskiro, jangoléngiro-bolybnáskiro dro dová dyvés. Angilphenybén Ráskire Devléskiro Izrailjoske, savó piridyja o Malahiia. “Tumé jačné dróga Mánge”, – phendiá Raj Devél. – Ne tumé rakiréna: “Syr Tu sykadian láska amen?” “Ci na sys Isávo Jakovóskiro pšal?” – phendiá Raj Devél. “Ne Me usajékh vykedyjom Jakovós, ne Me lyjom te bidykhav Isavos, i Me kerdjom léskire bergendyr čhučó štéto, i Me otdyjom léskiro mištypén šakalenge pe čhučí phuv.” Kóli Edómo (Isavóskire radostyr) phenéla: “Ame sam rosphagirdé dre ruíny, ne ame nevés čhuvasa phagirdé štéty”, – adiáke phenéla jangoléngire-bolybnáskiro Raj Devél: “Jone nevés čhuvéna phagirdó, ne Me phagirava telé davá. E manušá javéna te kharén davá štéto ‘Zlydnitko Phuv,’ i pe kadalé manušénde Raj Devél ŭsády (sak) javéla dre naradyma.” I tumaré jakhá dykhéna davá, i tumé phenéna: ‘Baripén Ráskire-Devléskiro piridžala miéža Izrailjoskiri’. “O čhavó keréla patýv péskire dadéske, i o pishári léskire ráske: kóli Me som Dad, kaj ža isyn xor patýv Mánge? Kóli Me som Raj Devél, kaj ža isyn patýv Mánge?”, – rakiréla jangoléngire-bolybnáskiro Raj Devél tuménge, rašaja, savénde nane dre patýv Miro lav. Ne tumé phenéna: “Dro so ame na sykavasa patýv Tyré lavéske?” Tumé janéna došvalo (magirdó) maró pe Miro altárjo, i iščo (inké) tumé phenéna: “Dro so ame došvaliakirdiam Tut?” Dro dová, so tumé rakiréna: “Skamínd Ráskire-Devléskiro isyn bipatyvakiro.” “I kóli tumé janéna korores syr svénto dyibén, ci nane davá bibáht? I kóli tumé janéna langales i nasvales syr svénto dyibén, ci nane davá bibáht? Janén kadasavó dáro akaná tumaré thagariske (kniazjoske): ci javéla jov te radynélpe tuméndyr? Ci priléla jov tumen ilésa?”, – rakiréla jangoléngire-bolybnáskiro Raj Devél. Ne akaná me, Malahiia, mangáva tumen, sob (kaj) tumé zoralés te mangénpe Devléske, sob (kaj) te sykavél Jov láska (tangipén) tuménge. “Kóli dasavo svénto dyibén došvale murdaléndyr (žyvjolendyr) keréna tumaré vastá, tedy ci prilava Me les ilésa?”, – rakiréla jangoléngire-bolybnáskiro Raj Devél. “Ci isyn vari-kon maškír tuménde, sob (kaj) jov fedýr te phandel vudará, i te na roshačkiren tumé jag ivjá (naprásnes) pe Miro altárjo? Me na radynavape tuméndyr”, – rakiréla jangoléngire-bolybnáskiro Raj Devél. I Me na prilava svénto dyibén tumaré vasténdyr. Miré lavéske javéla bari patýv maškír Najudýtka nácyi (narody), odothýr, kaj kham uštéla i ke dová štéto, kaj kham zadžála. Pe kažno štéto drogoné-smolakiro thuvipen javéla Mánge, žužó svénto dyibén; vaš dová, so Miré Lavéske javéla bari patýv maškír Najudýtka nácyi,” – rakiréla jangoléngire-bolybnáskiro Raj Devél. “Ne tumé teliakirena Man, adiáke rakirí: ‘Skamínd Ráskire-Devléskiro isyn nažužo, i nane lačhipén léstyr, léskiro xabén isyn bipatyvakiro.’ Tumé iščo (inké) rakiréna: ‘Ake, kicý isyn butý!’ I tumé sungena bipatyvakires pašýl léste” – rakiréla jangoléngire-bolybnáskiro Raj Devél. “I tumé janéna čordo, langalo i nasvaló; adiáke-pac' tumé janéna i mareskiro svénto dyibén! Ci mogináva Me ilésa te prilav davá tumaré vastéstyr?”, – rakiréla Raj Devél. “Te xasjol xohanó manúš, konéste isyn lačhó bakro dre stada, i savó sovlahala, ne savó janéla došvale bakrés Ráske-Devléske, – pal-dová so Me som baró Králi”, – rakiréla jangoléngire-bolybnáskiro Raj Devél, – i “Miro lav trašavela Najudýtka nácyi.” “I akaná, rašajale, davá priphenybén isyn tuménge. Kóli tumé na javéna te šunén, i kóli tumé na priléna ilésa, sob (kaj) te barjakirén Miro lav,” – rakiréla jangoléngire-bolybnáskiro Raj Devél, – tedy Me bičhaváva prokošybena (armania) pe tuménde, i Me keráva prokošybena (armania) pe tumaró bahtiakiribén: čačó, Me akaná kerdjom prokošybén (arman), pal-dová, so tumé na priléna ilésa Miro lav. Ake, Me otlava psikó tuméndyr [štyliakirava tumaró ródo-ju.o.], i Me rosčhurdava ĥnejo pe tumaré muiá, ĥnejo tumaré svenkendyr; i tumen lydžána krig khetané ĥnejosa. I tumé tedy javéna te džinén, so Me bičhadjom davá priphenybén tuménge, sob (kaj) Miro Zavieto Lievijosa/te rikirelpe (te zrakhelpe) duredýr”, – phendiá jangoléngire-bolybnáskiro Raj Devél. “Miro Zavieto lésa sys vaš džiibén i ramánjo, i Me dyjom davá zavieto léske, sob (kaj) jov te poddarel Mándyr, i sob (kaj) jov te rikirél xor patýv angíl Miro lav. Te javél Zakóno čačipnáskiro, pe léskiri čib, i sob (kaj) te na lathén načačipnaskire lavá pe léskire uštá, ne sob (kaj) jov te psirél pir Miro lav dro ramánjo i rovnone (vortone) dromésa, i, sob (kaj) jov te riskirél buten dre rig grehéndyr. Pal-dová so rašaskire uštenge trej te prirakhen džinybén, sob (kaj) manušá te rodén džinybén pal Devléste léskire uštendyr; pal-dová so jov isyn zvies'/zaniá – janybnaskiro (viestniko), jangoléngire-bolybnáskire Rástyr-Devléstyr. Ne tumé durine (otginé) droméstyr; tumé kerdé adiáke, so but manušá dynepe dukhá pir Zakóno, tumé otlydžinepe bipatyvakires Lievijoskire Zavietosa”, – rakiréla jangoléngire-bolybnáskiro Raj Devél. “Paldavá Me adiáke kerdjom tumen nakutiakirde (priezriennone) i džungalé manušénca angíl saré manušénde, adiáke syr tumé na rakhne Miré dromá, i tumé prilenas manušéngiri rig dro Zakóno Devléskiro.” Ci nane Jekh Dad tuménde? Ci na Jekh Devél sozdyjá amen? Sóske da ame kerása nahratyma (jačasa syr napatiaibnytka jekh proti jekhéste), kiéli ame magirasa zavieto dadéngiro? Juda kerdiá nahrates (napatiaibnytkes), i džungalé réndy (diély) kerénape dro Izrailjo i Jerusalimo: O Juda kerdiá bipatyv Ráskire-Devléskire sventoné štetoske, savó les prityrdyja, kiéli jov lyjá džuvliá péske rodóstyr, savó keréla patýv čužoné devloreske. Mek te xasiakirél Raj Devél manušén Jakovóskire šatrendyr, kon keréla davá: odolés, savó isyn pe stréga (kon sykliakiréla davá, i odolés, savó sykljola léstyr); i kodolés, kon janéla svénto dyibén jangoléngire-bolybnáskire Ráske-Devléske. I so iščo (inké) tumé keréna: tumé učhakirena Ráskire-Devléskiro altárjo jasvénca, rovi i dyi gódla, pal-dová so Jov butýr na kutiakirela svénto dyibén, i na priléla janybén laskasa tumaré vasténdyr. Ne tumé rakiréna: “Pal so?” Davá isyn paldová, so o Raj Devél isys jakhítko (svidietieljo) maškír túte i romniáte tyré ternypnastyr, konés tu jačkirdian bipatyvakires; ne joj isyn tyrí malny (podruga) džiibnáskire-dromeskiri, joj isyn tyrí romný pir zakóno. Ci na sozdyjá Devél tut i tyré romniá syr jekh, savénde isyn jekh dúho? Sóske že jekh? Jov kamdiá, sob (kaj) léste te javél ródo Devlikane čhavéndyr. Paldavá rikirén tumaró dúho, i mek nijékh te na kerél napatiaibnytkes romniása péskire ternypnastyr. “Pal-dová so Me naštý te dykháv pe rozlydžaiben [kóli tu na kamésa la, to otmek-r.s.],’ – rakiréla Raj Devél, Devél Izrailjoskiro,” – ‘pal-dová so kadasavó manúš učhakiréla pes nahratymasa syr idiasa, paldavá rikirén tumaró dúho, sob (kaj) tumé te na kerén napatiaibnytkes. Tumé khiniakirde [holiakirena-r.s.] ke xolý Ras-Devlés tumaré lavénca, kiéli phučena tumé: “Sósa ame khiniakirdiam Les?” Ake, kiéli tumé rakiréna: “Kažno (sváko), kon keréla bibáht (xolý), isyn lačhó vaš Ráske-Devléske, i Jov drieván radynélape léndyr,” cji, “Kaj isyn čačipnáskiro Devél?” “Ake, Me bičhaváva Miré Jangolós (zvies'-janybnaskires), i jov keréla drom angíl Mánde. O Raj Devél, Saves rodéna tumé, javéla ke Péskiri Khangirí, i Jangólo (zvies'-janybnaskiro) pe davá zavieto, Saves kaména tumé: ake, Jov džála”, – rakiréla jangoléngire-bolybnáskiro Raj Devél. Ne kon vyrikiréla [saštý te vyrikirel-ju.o.] davá dyvés, kiéli Jov javéla? Kon vyterdjola [saštý te vyrikirel-ju.o.], kiéli Jov sykadjola? Jov javéla sýrby jag, saví rozbilavela (rosplavinela), sýrby šutlo sapuni (ščolko), savó žužakirela rup. Jov bešéla sýrby spieco, savó piribilavela (piriplavinela) i žužakirela rup, i Jov žužakirela čhavén Lievijoskiren i piribilavela len syr suvnakáj i rup, sob (kaj) jone saštý te janén Ráske-Devléske svénto dyibén dro čačipén. Tén'ci svénto dyibén Judáskiro i Jerusalimoskiro javéla lačhó Ráske-Devléske, syr dre garatune beršá, syr dre beršá vagedyr (angledýr). I Me javáva pašyledýr ke tumé te sendiakirav pharés tumen; Me javáva syr sýgno dudvalo (obličytieljo) proti džinybnaskiren pir čergeniá (čaradiejen), proti biladžakuneskiren (blendar'jen), proti odolénde, kon xohanés sovlahala; proti odolénde, kon xohavela lavénca butiarnen, i proti odolénde, kon pritasavela pivlien (udoven), i piroten (siroten), i proti odolénde, kon risjola dumesa ke javire – theméskire-manušéskiro pravo, – adiáke syr jone na daréna Mándyr”, – rakiréla jangoléngire-bolybnáskiro Raj Devél. “Pal-dová so Me, Raj Devél, na parudjovava, paldavá tumé, čhavé Jakovóskire, na xasiné. Ne tumé risiné krig Miré statutendyr (ustavendyr) dolé dyveséndyr, kiéli sys tumaré dadá, i tumé na rakhne len. Risjon ke Me, i Me risjováva ke tumé”, – rakiréla jangoléngire-bolybnáskiro Raj Devél. Ne tumé rakiréna: ‘Syr aménge te risjovas?’ Ci saštý manušéske te xohavél Devlés? Ne tumé ž xohavena Man! Ne tumé phučena: ‘Dro so ame xohadiam Tut?’ – Dre dešengirja i dre svénta dyibená. Pe tuménde phendlé armania (tumen prokošne), ne tumé xohade Man, tumé – sarí tumarí nacyja. Janén céla dešengirja dre piralý, sob (kaj) te javél xabén dro Miro kher, i sprobinen Man dalésa akaná, – rakiréla jangoléngire-bolybnáskiro Raj Devél, – ci psiravava (otkerava) Me fenštry pe bolybén i bičhaváva tuménge adákicy bahtiakiribena, sob (kaj) te na uhtylel štéto te prilén len. I Me keráva adiáke, so kirme butýr te na xan sarésa barjakirdé (plódy), so tumarí phuv déla, i sob (kaj) vinagradýtko xrústo te na pirijačel te del múri pe félda,” – rakiréla jangoléngire-bolybnáskiro Raj Devél; I saré manušýtka nácyi javéna te kharén tumen bahtalenca, pal-dová so tumarí phuv javéla kamly, – rakiréla jangoléngire-bolybnáskiro Raj Devél. Tumé phendlé xoliamé lavá pe Mánde, – rakiréla Raj Devél, – Ne tumé phučena: So dasavo ame rakirasa pe Túte? Tumé ž phendlé: “‘Nane mol te dynarinás Devléske; i savó kófo (pol'za) isyn daléstyr, so ame rakhasa Léskire statutna uphenybená, i so ame psirasa tugasa (piečaliasa) angíl jangoléngire-bolybnáskire Raste-Devléste? I akaná ame dykhasa i rakirasa, so phut'kirdé manušá isyn bahtalé, pal-dová so odolé, kon keréla zlydnima (fuipén), dživéna fedýr dyvés dyveséstyr, i, čačó, kodolé, savé propatiakirena Devlés, jačénape džidé [bidošakire-ju.o.].’” Tén'ci odolén, savé darándyne Rástyr-Devléstyr i rakirdé jekh jekhéske: “Len o Raj Devél léla te šunél i pošunela; i adiáke čhindiape lylvarí ripiribnytko angíl Léste pal kodolende, kon daréla Rástyr-Devléstyr i rozlela godiása [rikiréla dro iló-r.s.] Léskiro lav.” Jone javéna Miré, – rakiréla jangoléngire-bolybnáskiro Raj Devél, – dro dová dyvés, syr Me keráva léndyr Miro kučipén. I Me javáva te tanginav (žalinav) len, syr o manúš tanginela Péskire čhavés, savó dynarinela léske. Tén'ci tumé nevéstyr rozĥaljona lačhés maškír patiaibnaskirende i fujé manušénde; maškír kadalende, kon dynarinela Devléske i odolénde, kon na dynarinela Léske. Pal-dová so, ake, syg javéla dyvés, savó javéla te xačkirel saró sýrby bov, i saré phut'kirdé i načačune (zlydnia) manušá javéna syr čhučó phus; i davá dyvés, so javéla, pohačkirela len adiáke, – rakiréla jangoléngire-bolybnáskiro Raj Devél, – “So na jačélape ni rukh (kornjo), ni rand' (vetka). Ne vaš tuménge, kon daréla Miré lavéstyr, ĥazdélape Kham čačipnáskiro, so javéla te sastiakirel lučenca, i tumé džána javrí i tumé javéna te uhten, khelyndoj, sýrby thule cielianty. I tumé javéna te tradén načačunen (zlydnien), pal-dová so jone javéna syr práska [práho-r.s.] tel piré (podešvy) tumaré ĥerengire, dro do dyvés, syr Me keráva davá,” – rakiréla jangoléngire-bolybnáskiro Raj Devél. Ripiren Mojzáskiro Zakóno, Miré pishariskiro, savó Me priphendjom léske pe Xorivo vaš saró Izrailjo: statúty i zakóny. Ake, Me bičhaváva tuménge prorokós Ilijas angíl, syr javéla baró dyvés, i trašano (darano) Ráskire-Devléskiro. I jov riskiréla dadéngiro iló ke čhavé, čhavéngiro iló ke dadá, sob (kaj) Me, syr javáva, te na občhuvav phuv prokošybnasa. Lylvarí (kniga) pal Isusóskiro Xristosóskiro ródo, Davidóskire Čhavéskiro, Avramoskire Čhavéskiro. Avrámo sys Isakóskiro dad, Isako sys Jakovóskiro dad, Jakovo sys dad Judáske i léskire pšalénge; Juda sys Fariesóskiro i Zaróskiro dad (léngiri daj sys Támar'); Fariéso sys Esromóskiro dad, Esrómo sys Aramóskiro dad; Arámo sys Aminadavóskiro dad, Aminadávo sys Naasonóskiro dad, Naasóno sys Salmonóskiro dad; Salmóno sys Vaozóskiro dad (Vaozóskiri daj sys Raháv), Vaózo sys Avidóskiro dad (Avidóskiri daj sys Ruf'); Avido sys Jesiejoskiro dad, Jesiejo sys kralískire – Davidóskiro Dad; Davído sys Solomonóskiro dad (Solomonóskiri daj sys Urijáskiri romný); Solomóno sys Rovoamóskiro dad, Rovoámo sys Avijákiro dad, Avijá sys Asáskiro dad; Asá sys Iosafatóskiro dad, Iosafáto sys Ioramóskiro dad, Iorámo sys Ozíiaskiro dad; Ozíia sys Iofamóskiro dad, Iofámo sys Ahazóskiro dad, Aházo sys Jezekijáskiro dad; Jezekíia sys Manasijáskiro dad, Manásija sys Amonóskiro dad, Amono sys Iosijáskiro dad; Iosija sys Iokimoskiro dad, Iokimo sys dad Jehonijaske i léskire pšalénge angíl dová, syr Judén lydžiné dro pliéno (pe zor) te dživén ke Vavilóno. Paló davá, syr len lydžiné dro Vavilóno, Jehonija sys Salafiiloskiro dad; Salafiilo sys Zorovavieljoskiro dad; Zorovavieljo sys Aviudoskiro dad, Aviudo sys Jeliakimoskiro dad, Jeliakimo sys Azoroskiro dad; Azoro sys Sadokoskiro dad, Sadoko sys Ahimoskiro dad, Ahimo sys Jeliudoskiro dad; Jeliudo sys Jelieazaroskiro dad, Jelieazaro sys Matfanoskiro dad, Matfano sys Jakovóskiro dad; Jakovo sys Iosifoskiro (Jozaskiro) dad, savó sys Marijakiro rom, saví bijandiá Isusós, Savéske lav dyné Xristóso. Adiáke sys dešuštar ródy Avramostyr angíl Davidóste; Davidostyr angíl dová, syr Judén lydžiné dro Vavilóno isyn dešuštar ródy; i dolé dyveséndyr, syr Judén lydžiné dro Vavilóno angíl Xristosóskiro bijanypén isyn dešuštar ródy. Adiáke, syr Isúso Xristóso bijándyja: paló (poslie) dorakiribén te lenpe, syr Léskire dáke Marijake treindiá te vydžál paloróm pal Jozaste, ne angíl, syr lénge te zdžanpe (te lenpe), vygijá, so Joj sys pharí Sventoné Duhóstyr (Fanostyr). A Joza (Iosifo), rom Lákiro, sys patyvalo manúš i na kamdiá te ladžakirel La, i kamdiá čorahanés te otmekél La. Ne syr jov podumindia davá, Devléskiro Jangólo javdiá ke jov dre suné i phendiá: “Joze, Davidóskiro čhavó, na andyrša te priles Maríia syr romniá, pal-dová so Kodová, Saves joj bijanéla, isyn Sventoné Duhóstyr (Fanostyr); joj bijanéla Čhavés, tu désa Léske lav Isúso, pal-dová so Jov zrakhéla Péskire manušén grehéndyr.” Ne saró davá sys, sob (kaj) te kerélpe dová, so Devél phendiá pir prorokoste: “Ake, patyvalý terný džuvlý javéla pharí, i bijanéla Čhavés, i Léskiro lav javéla Emanuilo” (so značynéla: “Devél isyn aménca”). Kiéli Joza uštyjá soibnastyr, jov kerdiá, syr Devléskiro Jangólo priphendiá léske; jov prilyjá romniá peskirjá, i jov na džindiá La syr romniá, angíl dová, syr Joj bijandiá Čhavés; i jov dyjá lav Léske Isúso. Kiéli Isúso bijándyja dro Vifliejémo pe phuv Judéia, kaj Irodo sys králi, javné tanuki (magi) vastokóstyr dro Jerusalimo i rakiréna: “Kaj ža isyn Judéngiro Králi, Savó bijándyja? Syr ame dykhciam čergen Léskiri pe vastóko, javdiám te pokloninaspe Léske.” I kiéli králi Irodo šundiá davá, jov drieván zadumindiape (lyjá péske dro šeró), i saró Jerusalimo khetané lésa. I skedyjá králi sarén rašángire barydyrén i lylvaritkonen (knižniken), i phuciá léndyr, kaj treindiá te bijandjol Xristóso? I jone phendlé léske: “Dro Vifliejémo pe phuv Judéia”; syr i čhindiá proróko: “I tu, Vifliejémo, phuv Judaskiri, tu na san tyknedýr Xulandyr Judejátyr; pal-dová so tútyr vydžála Šeraló, Savó javéla te xulainél pe Izrailjoskire manušénde.” Tén'ci Irodo čorahanés prikhardia tanuken te vyĥaljol léndyr časo (cýro), dro savó čergen sykadyjá; i jov bičhadiá len dro Vifliejémo i phendiá: “Džán i lačhés rozĥaljon pal Bijatoste; i, syr tumé lathéna Les, tedy piridén mánge, sob (kaj) i me adiáke-pac' te javav te pokloninavpe Léske.” Kiéli jone vyšundle kralís, giné jone péskire dromésa, i ake, čergen, saví jone dykhné pe vastóko, džálas angíl lénde, paka na terdijá pe štéto, kaj sys Bijáto. Kiéli jone dykhné čergen, jone drieván obradyndlepe. I jone zaginé dro kher i dykhné Bijatos Marijasa, dasa Leskirjasa, pyné pe čangá i poklonindlepe Léske; tén'či otčhakirde péskire kučipena (sokroviščy) i dyné Léske dáry: suvnakái, ladano i smirna. I syr jone doresné priphenybén te rakhénpe dro sunó, i te na risjon ke Irodo, to durine jone pe péskiri phuv javire dromésa. Kiéli jone giné, ake, Devléskiro Jangólo, javdiá dro sunó Jozáske i phendiá: “Uštý, le Bijatos i Da Leskirja, naš dro Jegípto, i jav odój angíl davá, syr te phenáv túke: pal-dová so Irodo kaméla te rodél Bijatos, sob (kaj) te muliakirél Les.” I jov uštyjá, lyjá Bijatos i Da Leskirja ratiákiro, i gijá dro Jegípto, i sys odój angíl dová, syr te merél Irodoske, sob (kaj) te spolninélpe Devléskiro rakiribén pir prorokoste: “Jegiptóstyr Me khardjom ke Pe Mires Čhavés.” Tén'ci Irodo, kiéli dykhciá, so tanuki (magi) xohade les, drieván xoliásyja i bičhadiá te muliakirén sarén bijatén-muršoren dro Vifliejémo i dre saré pašatuné štéty, dujendyr beršéndyr i tyknedýr pir časo, savó jov vyĥalyja tanukendyr. Tedy spolnindiape prorokoskire-Jeriemiejoskiro rakiribén: “Zan (glos) sys šundly dre Ráma, roibén, jasva i bari godlyma; Rahíl' rovela pal péskire bijatende, joj na kaméla, sob (kaj) te podrikiren la, pal-dová so len nane butýr.” Ne kiéli myjá Irodo, ake, Devléskiro Jangólo javdiá dro sunó ke Joza dro Jegípto, i rakírla: “Uštý, le Bijatos i Da Leskirja, i džá pe phuv Izrailjoskiri; pal-dová so myné odolé, savé rodenas te muliakirén Bijatos.” Jov uštyjá i lyjá Bijatos i Da Leskirja, i gijá pe Izrailjoskiri phuv. Ne kiéli jov šundiá, so Arhielajo sys králi pirí Judéia paló léskire dadéste Irodoste, tedy pyjá dar pe léste dorik te džal; i, syr Devél podphendia léske te rakhelpe angíl dro sunó, Joza gijá pe štéty Galilejakire. I javdiá jov i lyjá te dživél ke fóro Nazarieto, sob (kaj) te kerélpe pir dová lav, so proróko phendiá: “So Léskiro lav javéla Nazariejo.” Dre dolé dyvesá javéla Iáno Boldeipnari te phenél lav pir čhučí (pusto) phuv dre Judéia, i rakírla: “Priĥaljon péskire gréhi (bizy), kakaná javdiá pašyledýr Kralipén dro Bolybnáskiro Rajo.” Pal-dová so jov isyn odová, pal konéste phendiá proróko Isajo: “Davá isyn zan, saví déla gódla pir čhučí phuv: ‘Kerén drom Ráske-Devléske, čhuvén Léske mamúj drom.’” Kokoreste Ianoste sys uribén vierbliudytkone balendyr; cypitko kustýk pe léskire masá; léskiro xabén sys akridy i avgín (meda) feldytko. Tedy džánas ke jov saró Jerusalimo i sarí Judéia i saré štéty Iordanoskire, i jov boldia len dro Iordáno, paló dová, syr jone priĥaljonas péskire gréhi. Ne syr jov dykhciá, so but Farisiéi i Sadukiei džánas te bolenpe ke jov, phendiá lénge: “Tumé san sapitko ródo! Kon sykliakirdiá tumen te našén Devléskire xoliátyr, so javéla syg? Kerén vari-so, sob (kaj) te dophenen, so tumé mekné te kerén gréhi i risiné ke Devél. I na duminen te rakirén péske: ‘Avraámo sys dad amaró;’ pal-dová so me rakiráva tuménge, so Devél moginéla dalendyr barendyr te ĥazdel bijatén Avraamóske. Ake, uže tover paštó isyn pašýl kašteskiro kornjo (rukh): kažno kašt (drévo), so na lydžála lačhó barjakirdó (plódo), čingirena telé i čhurdena dre jag. Me bolava tumen paniésa pal tumaró pri ĥalyibén dre gréhi, ne Jov, Savó džála pal mánde, isyn zoraledýr mándyr, Konéske ĥeritka me na som mol te zlav; Jov javéla te bolel tumen Sventoné Duhósa (Fanosa) i jagása. Léskiro ĥanadytko (lopata) isyn dre Léskiro vast, i Jov žužakirela (čystinela) Péskiro šúrna i skedéla Péskiro parnó giv dre piralý, a phus xačkiréla jagása, saví na murdjola.” Tén'ci javéla Isúso Galilejatyr ke reka (len') Iordáno ke Iáno, sob (kaj) Iáno te bolel Les. Iáno ža terdiakirelas Les, rakirí: “Mánge trej te bolavpe Túte, a Tu javésa ke me?” Ne Isúso otphendiá léske: “Mek adiáke kakaná te javél; pal-dová so adiáke aménge trej te kerás pir kažno čačipén.” Tedy jov domekela Les. I syr Isúso boldiape, Jov gijá javrí jekhátyr (srázu) paniéstyr, i, ake, bolybén psiradyja (otčhakirdiape), i Iáno dykhciá Devléskiro Dúho (Fáno), Savó džálas telé syr golumbo, i mekelaspe telé pe Isusóste; I ake, zan bolybnástyr, saví rakirdiá: “Kadavá isyn Miro drógo Čhavó, dre Savéste isyn Mirí bari rádyma.” Tén'ci lydžijá Dúho (Fáno) Isusós pe čhučí phuv, sob (kaj) te propatiakirel Les nálačho. I kiéli Jov postindia štardešá dyvesá i štardešá ratia, Jov zakamdiá te xal. I nálačho podgíia ke Jov i phendiá: “Kóli Tu san Devléskiro Čhavó, phen, sob (kaj) dalé bará te jačen marésa.” Ne Jov otphendiá léske: “Isyn čhindló: ‘Na marésa jekhésa dživéla manúš, a kažnoné lavésa, so džála javrí Devléskire uštendyr’” Tén'ci léla Les nálačho dro svénto fóro i čhuvéla Les pe Khangirjákiri stréha (čhakín), i rakírla Léske: “Kóli Tu san Devléskiro Čhavó, uhty Kokoró telé; pal-dová so isyn čhindló: “Jov déla priphenybén Jangolenge Peskirenge pal Túte i pe vastá jone lydžána Tut, sob (kaj) Tu te na obštavespe (te na obstempinespe) pir bar ĥerjasa Peskirjasa.” Isúso phendiá léske: “Isyn adiáke-pac' čhindló: ‘Na propatiakir Ras-Devlés, Devlés péskires.’” Nevéstyr léla Les nálačho pe drieván vučy bérga i sykavéla Léske saré svetóskire kralipená i léngire baripena, i rakírla Léske: “Saró me dáva Túke, kóli peresa i pokloninesape mánge.” Tén'ci rakiréla léske Isúso: “Džá Mándyr, nálačho, isyn čhindló: ‘Devléske tyréske kloninpe i Léske jekhéske dynarin.’” Tén'ci mekéla Les nálačho, i ake, Jangóly javné i dynarindlé Léske. Syr šundiá Isúso, so Ianos lyné, to durija dre Galiliéia; i gii Nazarietostyr, javdiá i jaciá te dživél ke Kapiernaumo pašýl mórjo (derjáv), pe štéty Zavulonoskire i Niefalimoskire, sob (kaj) te spolninélpe dová, so phendiá proróko Isajo: “Phuv Zavulonoskiri i phuv Nafalimoskiri, so isyn pe drom pašýl mórjo (derjáv), pale Iordáno, Najudengiri Galiliéia, ake, manušá, savé sys bešté dro kalypén, dykhné baró dud (svéto); i pe odolénde, savé isyn sýrby mulé, – pal-dová so jone dživéna bi Devléskiro, zasvencyndia dud.” Dalé časostyr Isúso lyjá te rakirél: “Riskirén péskiro džiibén ke Devél, pal-dová so javdiá pašyledýr Kralipén dro Bolybnáskiro Rajo.” Gii pašýl Galilejakiro mórjo (derjáv), Jov dykhciá duje pšalén, Simonos, savés khardé Pétri, i Jendris (Andriejos), léskire pšalés, savé začhurdenas khudia (sietki) dro mórjo (derjáv), pal-dová so jone sys mačhibnarja. I Jov rakiréla lénge: “Javén Mánca, i Me keráva tuméndyr manušéngire mačhibnar'jen” I jone jekhátyr (srázu) mekné péskire khudia i giné pal Léste. I otgii odothýr duredýr, Jov dykhciá duje pšalén, Jakovós čhavés Zaviediejoskires i Ioanos, pšalés leskires, savé sys dre bárka (lodka) léngire dadésa Zaviediejosa, savé kerénas péskire khudia: i Jov khardiá len Pésa; i jone jekhátyr mekné bárka i péskire dadés i giné Lésa. I Isúso psirelas pir sarí Galiliéia, sykliakiri manušén pal Devléste dre léngire sinagogi i phení bahtalý zan (zvies') pal Kralipén i sastiakiri kažno nasvalypen i dukh dre manušénde. I gijá mavlýn (malva) pal Léste pir sarí Sirija: i janénas ke Jov sarén manušén, savé sys nasvale i men'čindlepe nalačhé Duhóstyr i čhonytkone nasvalypnastyr, praličostyr, i Jov sastiakirdia len. I giné pal Léste but manušá Galilejatyr, Dešufor'jendyr (Diesiatigradijatyr), Jerusalimóstyr, Judejátyr i pal Iordanostyr. Kiéli Isúso dykhciá manušén, Jov gijá pe bérga, i, syr besciá, sykliaibnýtka Léskire podginé ke Jov, i Jov otkerdia Péskire uštá i lyjá te sykliakirél len, rakirí: “Bahtalé isyn odolé, savé džinéna, so léngire duhoske trej Devél; léngiro sys Kralipén dro Devléskiro Rajo. Bahtalé isyn odolé, savé rovena, pal-dová so Devél podrikiréla léngiro dúho (fáno). Bahtalé isyn kovlé-ilýtka, pal-dová so phuv javéla léngiri. Bahtalé isyn odolé, konéskiro iló isyn bokhalo pal Devléskiro lav i syr paní drieván rodéla čačipén. Devél čaliakirela léngiro iló. Bahtalé isyn odolé, savé primangena bang manušénge, pal-dová so lénge javéla primanglo. Bahtalé isyn odolé, savénde isyn žužó iló, pal-dová so jone dykhéna Devlés. Bahtalé isyn odolé, savé keréna ramánjo (miro), pal-dová so javéna te kharén len ‘Devléskire čhavé.’ Bahtalé isyn odolé, konés tradéna pal čačipén; léngiro isyn Kralipén dro Devléskiro Rajo. Bahtalé san tumé, kiéli manušá javéna te košen tumen i te tradén, i javéna te rakirén nalačhé lavá pe tuménde pal Mánde. Javén bahtalé i radynénpe, pal-dová so baró otdyibén Devléstyr užakiréla tumen dro Bolybnáskiro Rajo: adiáke tradenas i prorokén, savé sys angíl tuménde. Tumé isyn syr lond vaš saré manušénge. Kóli ž lond našavela péskiro londypen, nisyr naštý te kerés, sob (kaj) nevéstyr lond te javél londo; léste butýr ni savó lačhipén nane, jekh so te vyčhurdes les javrí te štaven manušá ĥerénca. Tumé isyn syr jag vaš saré manušénge. Fóro, so isyn pe bérga pe vučipén, na moginéla te ĥaradjol. I kiéli zahačkirena momoly, na čhuvéna la tel pirí, a dro šandalo (podsviečniko) te svencynel jag pir saró kher. Adiáke mek te svencynel tumarí jag angíl manušénde, sob (kaj) jone te dykhén tumaré lačhé réndy i te slavinén Dadés tumares Bolybnaskires. Na duminen, so Me javdjom te otparuvav Zakóno ci prorokén, ne te keráv ke kónco/iagóro (te spolninav). Čačes, Me rakiráva tuménge: paka na javéla kónco (jagóro) bolybnaske i phuvjake, ni jekh tykny bukvica ni čerta bukvakiri na otlelape Zakonóstyr angíl, syr Zakóno te kerélpe. Adiáke, kóli vari-kon otparuvela xoc' jekh lav priphenybnastyr i sykliakiréla adiáke manušén, odová javéla naj tyknedýr dro Kralipén dro Bolybnáskiro Rajo. Ne kon kandéla i keréla pir lav, javéla naj baredýr dro Kralipén dro Bolybnáskiro Rajo. Paldová Me rakiráva tuménge: kóli čačipén tumaró nane butedýr syr lylvaritkonengiro i Farisiejengiro čačipén, tumé nikieli na zadžána dro Kralipén dro Bolybnáskiro Rajo. Tumé šundlé, so rakirdé dro phuranó časo: ‘Na zamar (na umar), kon ža zamarela, tel séndo džála.” Ne Me rakiráva tuménge: ‘Kažno, kon xoliasóla pe péskire pšaléste ni palsó, džála tel séndo. Kon ža phenéla péskire pšaléske ‘dylynó’, javéla dre dar Siniedrionostyr. I kon phenéla ‘bigodiakiro’, javéla dre dar, so džála dro liúno (ado) jagása. Adiáke, kóli tu janesa péskiro dáro ke altárjo, i odój priripiresa, so tyró pšal isyn xoliamó pe Túte, mek péskiro svénto dyibén angíl altárjo i džá, angíl ker ramánjo (miro) péskire pšalesa, tén'či džá i jan péskiro svénto dyibén. Ker ‘ramánjo’ (miro) péskire manušésa sygedýr, paka tu iščo (inké) san pe drom lésa, sob (kaj) manúš te na otdél tut sendariske, a sendári te na otdél tut dynaríske, i odová te na čhurdel tut dro štaribén. Čačes, Me rakiráva túke: tu na vydžasa odothýr, paka otdesa ke naj tyknedýr ĥasprin’ Tumé šundlé, syr sys phendló dro ĥaratuno časo: ‘Na ker biladžaipén.’ Ne Me rakiráva tuménge, so kažno, kon dykhéla pe džuvliáte nalačhé kamibnasa, odová uže keréla biladžaipén dro péskiro iló. Kóli ž čačí jakh zlydžala tut ke grého, rískir la javrí i vyčhurde; pal-dová so fedýr vaš túke te našaves jekh jakh, syr saró te džal dro liúno (ado). Kóli ž čačó vast lydžála tut ke grého, otčingir les i vyčhurde; pal-dová so fedýr vaš túke te našaves jekh vast, syr saré masá te džán dro liúno. Adiáke-pac' sys phendló: ‘Kóli vari-kon rozdžalape péskire romniása, mek te del láke lyl pal rozgiiben.’ Ne, Me rakiráva tuménge: ‘Kon mekéla péskire romniá apríč syr pal napatiaibnytko bang, odová jačélape bangó, kóli joj keréla biladžaipén; a kon léla pal péste džuvliá, saví isyn rozlydžiny romesa, odová sýrby kokoró isyn bangó dro napatiaiben. Iščo šundlé tumé, so sys phendló dro ĥaratuno časo: ‘Na sovlahá, kóli tu na san tvardo; ne ker pir sovlahá péskire angíl Devléste! Ne Me rakiráva tuménge: ‘Na sovlahá sarésa; ni bolybnasa, pal-dová so jov isyn Devléskiro priestolo; ni phuvjása, pal-dová so joj isyn štéto tel Léskire ĥerá, ni Jerusalimosa, pal-dová so jov isyn fóro baré Kralískiro; na sovlahá péskire šerésa, pal-dová so ni jekh bal na moginésa te kerés ni parnesa, ni kalesa. Mek te javél tumaró lav ‘ny, ny’, ‘nad, nad’, a so upredyr daléstyr, dová isyn nalačhestyr.’ Tumé šundlé, so sys phendló: ‘Jakh pal jakh, i dand pal dand.’ Ne Me rakiráva tuménge: na ker fuipén pale odoléske, kon kerdiá fuipén túke; ne kon pekavela tut dre tyrí čačí (pravo) čam (ščoka), tén'či rískir ke jov javír. Ne kon zakaméla te sendinelpe túsa i te lel tútyr gad, otdé léske i upratuno uribén. Ne kon začhuvela tut te džal lésa jekh versta, džá lésa duj. Kon mangéla tútyr, de, i na otrisjov odoléstyr, kon kaméla te zalel tútyr. Tumé šundlé, so sys phendló: ‘Sykáv patýv péskire pašatuné manušéske i na sykáv patýv péskire vergénge.’ Ne Me phenáva tuménge: sykavén patýv péskire vergénge, i mangénpe Devléske pal odolénde, savé košena tumen, kerén lačhipén odolénge, savé drieván na kaména tumen i mangénpe Devléske pal odolénde, savé našukar otlydžanape ke tumé i tradéna tumen; sob (kaj) tumé moginénas te javén ‘čhavé Bolybnáskire Dadéskire’, i Jov začhuvela Péskiro Kham te svencynel pe lačhé i nalačhé manušénde, i bičhavéla bryšýnd pe odolénde, kon keréla lačhipén i kon keréla fuipén. Paldová, kóli tumé sykavéna patýv odolénge, savénge tumé san dróga, savó otdyibén Devléstyr javéla tuménge? I mytoskire skedyibnarja keréna adiáke. Ne kóli tumé déna ‘dobridim’ péskire pšalénge, so dasavo tumé keréna? Až Náiudy keréna adiáke. Paldová javén bidošakire, syr bidošakiro isyn tumaró Bolybnáskiro Dad. Dykhén, i na sykavén péskiro patiaibén pe jakhá manušénge; kóli na adiáke, na javéla tuménge otdyibén Bolybnáskire Dadéstyr. Ne kóli tu désa odolénge, savénde isyn trébima, na phurde zoralés šaribnasa dro rógo (truba) angíl péste, syr keréna dujemuitka manušá dre sinagogi i pe vulícy (gásy), sob (kaj) te slavinén len manušá. Čačes, rakiráva tuménge: jone uže doresné péskiro otdyibén. Ne kiéli tu désa odolénge, savénde sys trébima, mek tyró zérvo (liévo) vast na džinéla, so keréla čačó (pravo). Sob (kaj) tyró dyibén te na javél dyc'lo; i Dad tyró, Savó dykhéla saró, otdéla túke tyró otdyibén. Kiéli tu mangesape, na jav syr kadalé dujemuitka, savé kaména te terdjon pe véngly javrí i dre sinagogi, sob (kaj) len te dykhén manušá. Čačes, Me rakiráva tuménge: jone uže doresné péskiro otdyibén. Kiéli tu mangesape, zadžá dre andratuný štúba péskiri, phande vudár, i mangpe Dadéske tyréske, Savó isyn nadyc'lo; i Dad tyró, Savó dykhéla tut, so javirénge na dyc'lo, otdéla túke. Kiéli tu mangesape, na rákir but lavá, syr Náiudy, savé duminéna, so len ušunena pal léngire dlenge mangipena. Na javén, syr jone isyn, pal-dová so Dad tumaró džinéla, so tuménge trej angíl, syr tumé pomangena Léstyr. Mangénpe že adiáke: ‘Dad amaró Bolybnáskiro, Savó isyn dro Bolybnáskiro Rajo! Mek te slavinelpe Tyró lav; Mek te javél Tyró Kralipén, Mek te spolninélpe Tyrí vólia pe phuv, Syr i pe bolybén; Pode aménge maró so dyvés; I primang aménge dlugi amaré, Syr ame primangasa odolénge, Save isyn vužle aménge; I na domek amen ke čoripén; ne zrákh amen nalačhestyr; pal-dová so isyn Tyró Kralipén i zor i sláva pe viéki. Amín'.’ Pal-dová, kóli tumé primangena manušénge pal léngire gréhi, tumaró Bolybnáskiro Dad primangela tuménge, ne kóli na javéna te primangen gréhi manušénge, tumaró Bolybnáskiro Dad na primangela gréhi tumaré. Kiéli tumé postinena, na kerén rondlé muiá, syr keréna dujemuitka, pal-dová so jone garavena péskire čačuné muiá, sob (kaj) manušá te dykhén, so jone postinena. Čačes, Me rakiráva tuménge: ‘Jone uže doresné péskiro otdyibén.’ Kiéli tu postinesa, pomakh péskiro šeró i vymor muj péskiro, sob (kaj) te na sykavespe javirénge, so tu postinesa, ne jekhe Dadéske tyréske, Savó isyn nadyc'lo; i Dad tyró, Savó dykhéla dová, so na dykhéna javír manušá, otdéla túke lačhipnása. Na keden péske kučipena pe phuv, kaj mol' i orža xasiakirena, i čora podĥanavenape i čorena; ne keden péske kučipén vaš Bolybnáskiro Rajo, kaj ni mol', ni orža na xasiakiréla, ni čora na podĥanavenape; i na čorena; pal-dová so, kaj tyró kučipén isyn, odój tyró iló javéla. Jakhá isyn syr momolýtko (svietíl'niko) vaš masá. Paldavá, kóli jakh tyrí javéla žužy (čysto), tedy tyré masá javéna žužé. Kóli jakh tyrí na javéla žužy, tedy saré masá tyré javéna dro ciamlypén. Paldavá, kóli jag, saví isyn dre túte, jaciá ciamlypnasa, savó ž baró tedy isyn davá kalypén (ciamlypén). Nikón na moginéla te dynarinél duje range, ci jekhéske javéla te sykavél patýv, ne javír javéla na pir iló; ci javéla čačunó ke jekh, a ke javír javéla na pir iló. Tuménge naštý te dynarinén (te služynen) Devléske i barvalypnaske. Paldavá Me rakiráva tuménge: na piridživen pal tumaró džiibén, so tuménge te xan ci te p'jen; ci pal tumaré masá, so te ur'jen. Naúšto (xaj) džiibén isyn na drogedyr xabnastyr, naúšto masá isyn na drogedyr uribnastyr? Podykhen pe bolybnytkone čirikliende; jone na sieinena, na sčhinena, na čhuvéna sčhindlo dre šúrna; i Dad tumaró Bolybnáskiro čaravela len. Naúšto tumé na san pe but drogedyr léndyr? Ne kon tuméndyr, piridživi pal džiibén, moginéla te kerél dlengedyr pe nábut péskiro džiibén? Ne so tumé piridživena pal uribén? Dykhén pe feldýtka lilii, syr jone barjona; na keréna butý, na khuvena thava, ne Me phenáva tuménge, so i Solomóno péskire barvalypnasa na ur'jelaspe adiáke, syr kažno léndyr. Kóli ž dasavo uribén Devél déla feldytkone čarjake, saví adadyvés isyn, ne atasiá javéla čhurdyi dro bov, tedy so ž na fedýr Jov déla tuménge uribén, tumé ž san nabaré – patiaibnaskire manušá? Tedy na piridživen, i na rakirén: ‘So aménge te xas?’ ci ‘So te pjas, ci dro so te urjavaspe?’ Pal-dová so saró davá rodéna Náiudy, i pal-dová so Dad tumaró Bolybnáskiro džinéla, so tuménde isyn trébima dro davá saró. Rodén ža angíl Devléskiro Kralipén dro Bolybnáskiro Rajo i čačipén Léskiro, saró javír javéla dynó tuménge upralestyr. Paldová na piridživen pal atasiatuno dyvés, pal-dová so atasiatuno dyvés kokoró javéla te duminel pal péste; uhtýlla (dósi) pharipén vaš kažno dyvés. Na sendinén, i tumen na javéna te sendinén, pal-dová so, syr tumé sendinena, adiáke-pac' i tumen javéna te sendinén; savé mierasa tumé mierinena, dasavé-pac' mierasa tumen javéna te mierinen. Sóske tu dykhésa pe tykny phusinka dre jakh tyré pšaleskiri, a baró berno na dykhésa dre péskiri jakh? Ci, syr tu phenésa pšaléske peskireske; ‘de, me vylava phusinka tyré jakhatyr; a berno isyn dre tyrí jakh? Dujemuitko, vyle angledýr berno péskire jakhatyr, tedy dykhésa, syr te vyles phusinka tyré pšaléskire jakhatyr. Na den dová, so isyn svénto, džuklenge, na čhurdén mutinia (žemčugi) angíl balyčende, sob (kaj) jone te na štakiren len ĥerénca, i te na risjon, i te na roskušen tumen. Mangén, i javéla dynó tuménge; rodén, i lathéna; marén dro vudár, i psiravena (otphandena) tuménge. Pal-dová so kažno, kon mangéla, doreséla péskiro; kažno, kon rodéla, lathéla; kažnonéske, kon marela dro vudár, javéla psirado (otphandlo). Ci isyn vari-kon tuméndyr, kóli léskiro čhavó mangéla léstyr maró, te del čhavéske bar? I kiéli mangéla mačho, te del léske sapes? Kóli tumé san nalačhé, i džinéna te kerén lačhipén péskire čhavénge, pe kicý butýr tuméndyr tumaró Bolybnáskiro Dad keréla lačhipén odolénge, savé mangena Léstyr. Kerén dová javirénge, so tuménge isyn pir iló, sob (kaj) i javír te kerén tuménge; Zakóno i proróki sykliakiréna davá-pac'. Zadžán dro ciasno (tango) pórta, pal-dová so buĥly isyn pórta i otphandlo isyn drom, savó lydžála dro xasiakiriben, i but džána dro davá vudár. Pal-dová so ciasno isyn pórta i nabuĥlo isyn drom, savó lydžála dro džiibén, i nábut lathéna les. Rakhénpe xohané prorokendyr, savé javéna ke ame dre bakrany ídia, ne andrál jone isyn xoliamé ruvá; tumé ĥaljona len pir léngire barjakirdé. Ci skedéna dylyné čarjatyr vinagrado (drakh) ci inžyro kodriljostyr (diedoŭnikostyr)? Adiáke-pac' kažno lačhó kašt déla lačhé barjakirdé (plódy) i dylynó kašt déla dylyné barjakirdé. Lačhó kašt na moginéla te del dylyné barjakirdé, i dylynó kašt na déla lačhé barjakirdé. I kažno kašt, so na déla lačhé barjakirdé, čingirena telé i čhurdena dre jag. Adiáke pir léngire barjakirdé tumé ĥaljona xohané prorokén. Na kažno, savó rakiréla Mánge: ‘Dévla, Dévla!’ – zadžála dro Kralipén dro Bolybnáskiro Rajo; ne kodová, savó keréla pir vólia Miré Dadéskiri, Savó isyn dro Bolybnáskiro Rajo. But manušá phenéna Mánge dro dová dyvés, kiéli javéna te sendinén: ‘Dévla, Dévla! Ci na Tyré lavésa ame angilphendiam? Ci na Tyré lavésa ame vytradasas nalačhé dúhi? Ci na Tyré lavésa but dívy kerasas?’ Tén'ci Me phenáva lénge: ‘Me nikieli na džindjom tumen; džán krig Mándyr tumé, savé keréna čoripén.’ Kažno, kon šunéla lavá Miré i kandéla len, isyn syr god'varó manúš, kon čhudiá péskiro kher pe bar. I giné bryšynda, i ĥazdynépe réki (leniá), i lyné te phurdén balvalia, i saró pyjá pe davá kher; i jov na pyjá, pal-dová so sys čhudó pe bar. Ne kažno, kon šunéla lavá Miré, i na kandéla len, isyn syr balvalitko manúš, kon čhudiá péskiro kher pe práho; i giné bryšynda, i ĥazdynépe réki (leniá), i lyné te phurdén balvalia, i saró pyjá pe davá kher. I pyjá kher, i rospyjape sarésa.’” I sys adiáke: kiéli Isúso končyndia dalé lavá, manušá divindlépe Léskire sykliakiribnastyr, pal-dová so Jov sykliakirdiá, syr Odová, Savéste isyn pravo, a na syr lylvarítka. I kiéli Jov gijá telé bergátyr, but manušá giné pal Léste. I ake, prokazytko manúš podgíia i pyjá pe čangá angíl Léste, rakirí: “Rajo Dévla, kóli Túke isyn pir iló, vysastia'kir man” Isúso protyrdyjá vast, čiladiá (čypindia) les i phendiá: “Pir iló isyn, tu kakaná san žužó (čysto).” I adáj že jov sys vysastiakirdo prokazatyr. I rakírla léske Isúso: “Dykh že; ni konéske na rákir, ne džá, sykáv pes rašáske, jan dáro, so priphendiá Mójza, syr dophenybén manušénge.” Syr Jov gijá dro Kapiernaumo, podgíia ke Jov šelengire-xaladytko barydyró i mangdiá Les te pomoginel, i phendiá: “Rajo Dévla miro dynári (sluga), isyn paštó rozmardo praličosa kheré i drieván men'čynelape dukhendyr.” Isúso rakiréla léske: “Me javáva i vysastiakirava les.” Ne šelengiro otphendiá: “Rajo Dévla, me na som mol, sob (kaj) Tu te zadžas dro miro kher, ne Tu jekh phen lav i javéla miro dynári nevéstyr sastó. I me adiáke-pac' som manúš, pe konéste isyn barydyrá, mánde isyn xaladé, savé kandéna man, i me phenáva jekhéske: ‘Džá’, i džála; i javireske: ‘Jav’, i javéla, i kadaleske dynaríske miréske: ‘Ker davá’, i keréla.” I syr Isúso šundiá davá, divindiape i phendiá manušénge, savé giné pal Léste: “Čačes, Me phenáva tuménge: Me na lathjom dasavo patiaibén i dro Izrailjo. Me phenáva tuménge, so but javír javéna vastokóstyr i zapadostyr (pal-paniendyr) i bešena pal skamínd Avraamosa, Isakosa i Jakovosa dro Kralipén dro Bolybnáskiro Rajo, ne manušén, savén vykedyné vaš Kralipén, Devél tradéla javrí dre kalypén; odój javéla roibén i dandengiri skriežyma” I phendiá Isúso šelengireske: “Džá, pal tyró patiaibén javéla túke kerdó” I dynári vysastija dre kodová-pac' mardó (štúnda). I javdiá Isúso dro Petriskiro kher, i dykhciá, so léskiri sasuj sys pašty xačkiribnasa: i Jov čiladiá lákiro vast, i xačkiribén jačkirdiá la, i joj uštyjá i dynarindiá lénge. Kiéli javdiá bel'vél', janénas ke Jov buté manušén, savénde sys nálačho dúho (fáno), i Jov tradyjá javrí dúhi (fany) laveskire zorjása, i Jov vysastiakirdiá sarén, savé sys nasvale; sob (kaj) te kerélpe dová, so phendiá proróko Isajo: “Jov lyjá pe Péste amaró bizorjakiriben i lydžijá saré amaré nasvalypena.” Kiéli Isúso dykhciá but manušén pašýl Péste, Jov priphendiá Péskire sykliaibnytkonénge te džán pe javír brégo. I podgíia ke Jov jekh lylvarítko i phendiá: “Sykliakiribnáskiro (Učytieljo)! Me džáva Túsa, karik i Tu džása.” I rakiréla léske Isúso: “Lokhniende (lisende) isyn nory, bolybnáskire čirikliende isyn gniázdy (kúfy), a Manušéskire Čhavéske nane kaj šeró te čhuvél.” Ne javír phendiá Léske: “Rajo Dévla, mek man angíl te garavav miré dadés.” Ne Isúso rakiréla léske: “Jav Mánca; mek mulé te garaven péskire mulen.” Kiéli gijá Isúso andré bárka, but Léskire sykliaibnýtka giné pal Léste i, ake, ĥazdyjápe baró štormo adiáke, so bárka začhuvelaspe valnenca; ne Jov sys sutó. Ke Jov podginé sykliaibnýtka, džangade Les, rakirí: “Rajo Dévla, zrákh, ame tasadjovasa.” I Jov rakiréla lénge: “Sóske tumé san darandytka, tumé san manušá nabaré patiaibnása!” Tén'ci uštyi, Jov priphendiá balvaliake i morjoske, i kerdiápe baró štylypen. I manušá divindlépe i rakirdé: “Kon adavá Manúš isyn, so až balvál i mórjo (derjáv) Les kandéna?” I kiéli Jov javdiá pe javír brégo pe Gadarinoskiri phuv, pirilyne Les duj manušá nalačhé duhenca (fanenca), savé džánas javrí maĥilytkone pieščerendyr (ĥiebarendyr) dasavé xoliamé, so nikón na moginelas te džal pir dová drom. I, ake, jone dénas gódla, rakirí: “So Túke trej améndyr, Čhavó Devléskiro? Javdian Tu adarík angíl uphendló mardó (štúnda) te men'čynes amen?” Sys ĥurto balyčen, savé xanas čar nádur léndyr. I nalačhé dúhi (fany) mangenas Les: “Kóli Tu tradesas javrí amen, bičháv amen dro ĥurto balyčengiro” I Jov phendiá lénge: “Džán.” I jone mekné manušén i zaginé dre balyčende, i, ake, saró ĥurto balyčengiro čhurdyjape bregoskire krutymatyr dro mórjo (derjáv) i jone tasadyne dro paní. Čhupnárja (pastúhi) balyčengire našné, i javné dro fóro, i rosphendlé saró, i pal manušénde nalačhé duhenca. I, ake, saró fóro vygijá te pirilel Isusós, i, syr dykhné Les, mangné Les te durjol léngire phuvjátyr. I zagii dre bárka, Jov tradyjá pale i javdiá dro Péskiro fóro. I, ake, lydžánas ke Jov nasvale manušés, savó sys paštó pe matraco. I syr Isúso dykhciá léngiro patiaibén, phendiá nasvaleske: “Jav murškanó, čhavó Miro, otmekne gréhi tyré!” Tedy phendlé lylvarítka jekh jekhéske: “Kadavá manúš teliakirela Devlés!” I Isúso, džiný, so jone dumindle, phendiá: “Sóske iščo (inké) tumé duminéna fuipén dre péskire ile? ne so lokhedýr te phenés: ‘Tyré gréhi otmekne’, ci: ‘Uštý i psir?’ A sob (kaj) tumé te džinén, so Čhavéste Manušeskireste isyn zor pe phuv te otmekél gréhi,” tedy Jov rakiréla nasvaleske: “Uštý, le matraco péskiro, i džá dro péskiro kher.” I jov uštyjá, i gijá dro péskiro kher. Kiéli manušá dykhné davá, jone divindlépe i slavindle Devlés, so Jov dyjá dasaví zor manušénge. I syr Isúso džálas pašýl odothýr, Jov dykhciá manušés, savó sys beštó dro mytytko (nalogitko) kher, Matfiejos, i rakírla Léske: “Jav Mánca”, i jov uštyjá i gijá pal Léste. I syr prigijape Léske te bešél pal skamínd i, ake, but mytoskire skedyibnarja i grehengire javné i bešné pal skamínd Lésa, i Léskire sykliaibnytkonénca. I kiéli Farisiéi dykhné davá, to phendlé Léskire sykliaibnytkonénge: “Sóske Sykliakiribnáskiro tumaró xála grehengirenca i mytoskire skedyibnar'jenca?” Ne Jov šundiá davá i phendiá: “Na saste manušénge trej sastypnari, a nasvalenge, ne džán, sykljon, so davá značynéla, so Biblija rakírla: “Mánge trej lačhé-ilýtkima dre manušénde, a na svénta dyibená”, paldavá Me javdjom te kharav ke Pe na čačuné manušén, a grehengiren” Tén'ci javné ke Jov Ianoskire sykliaibnýtka i rakirna: “Sóske ame i Farisiéi postinasa, ne Tyré sykliaibnýtka na postinena?” I phendiá lénge Isúso: “Naúšto moginéna Terneskire gosti te javén smentna (piečal'na) dre bjavitko štúba, paka Ternó isyn lénca? Dyvesá javéna, kiéli Ternó javéla lynó léndyr, i tedy jone javéna te postinen. Nikón na čhuvéla kotér (kusko) nevó than pe phuranó uribén; pal-dová so prisudo kotér rozriskirla i ljoha (dira) javéla iščo (inké) baredýr. Nikón na čhuvéla neví mol (vino) dre phurané goné, pal-dová so kušenape phurané, i mol vyčhuvelape i goné xasjona. Ne neví mol čhuvéna dre neve goné, i zrakhenape jekh i javír.” Syr Jov rakirdiá davá, Judýtko barydyró podgíia, i, pyi pe čangá, phendiá: “Čhaj mirí akaná myjá; ne Tu jav, čhuv vast Tyró pe láte, i joj otdžidjola.” I uštyjá Isúso i gijá pal léste, i adiáke-pac' Léskire sykliaibnýtka. I, ake, džuvlý, saví sys drieván nasvaly dešudúj berš thadune ratvalypnasa, zagii palál léstyr, joj čiladiá jagóro (krajo) Léskire uribnaskiro, pal-dová so joj rakirdiá kokori péske: “Kóli me féni (tóka) čilavavas uribén Léskiro, to me sastjovavas.” I Isúso risijá pale, dykhí la, phendiá: “Jav murškany, čháie, tyró patiaibén zrakhciá tut.” I jekhátyr (srázu) adáia džuvlý jaciá sasty. Kiéli Isúso zagijá dro barydyreskiro kher, dykhciá bašaibnaskiren pe svirol'ki i but javire manušén, savé šumindle godlenca, I Jov phendiá: “Džán javrí, saré! Terný patyvalý džuvlý isyn namuly, ne joj isyn suty.” I jone sandlepe Léstyr. I kiéli manušá sys bičhadé javrí, Jov gijá dre štúba, lyjá la pal vast, i uštyjá terný patyvalý džuvlý. I mavlýn (malva) pal davá rozgijápe pir sarí doiá phuv. I kiéli Isúso džálas odothýr, duj kororé manušá giné pal Léste, dyi gódla: “Potangine (požalin) amen, Čhavó Davidóskiro!” I kiéli Jov zagijá dro kher, kororé manušá podginé ke Jov, i Jov phendiá lénge: “Iščo patiána, so Me mogináva davá te keráv?” Jone rakirna Léske: “Čačó, Rajo Dévla.” Tén'ci Jov čiladiá jakhá léngire i phendiá: “Mek te javél tuménge pir tumaró patiaibén.” I otkerdepe léngire jakhá. I Isúso zorjása uphendia lénge: “Sob (kaj) nikón te na džinél.” Ne kiéli jone giné péske, rosphendlé pal Léste pir sarí kodoia phuv. Kiéli ž jone džánas, javrí ke Jov jandlé niemone (mutone) manušés nalačhé duhósa. I kiéli nálačho dúho sys tradyno javrí, niemo (muto) lyjá te rakirél. I divindlépe manušá, rakirí: “Nijékhvar na sys dasavo dro Izrailjo!” Ne Farisiéi rakirénas: “Davá isyn nalačhé-duhengiro xulái, savjása zorjása Jov tradéla javrí nalačhé dúhi.” I psirelas Isúso pir fórja i gavá, sykliakiri dre léngire sinagogi Devléskiri bahtalý zan (zvies') i sastiakirdia kažno nasvalypen i dukh dre manušénde. Kiéli Jov dykhciá but manušén, tedy drieván potangindia len, pal-dová so jone pyné dro dúho i sys kažno péske, syr bakriá bi čhupnariskiro. Tén'ci Jov rakiréla Péskire sykliaibnytkonénge (učenikenge): “Čačó, ubijandypen isyn barvaló, a butiarné isyn nábut; mangén paldavá Ras-Devlés, Kon isyn Xuláj pe féldy, sob (kaj) jov te bičhavel butiarnen pe ubijandypen Péskiro.” I kiéli Isúso khardiá dešudujen sykliaibnytkonén ke Pe, Jov dyjá lénge zor pe nalačhé dúhi, sob (kaj) te tradén javrí len manušéndyr i sastiakiren kažno nasvalypen i dukh. Ake, dešudujengire – Apostolengire lavá: pérvo Símono, savés khardé Pétri, i Jendri (Andriejo), pšal léskiro, Zaviediejoskiro Jakovo, i Iáno, pšal léskiro. Filipo i Varfalamiejo; Tamašo i Matfiejo, mytoskiro skedyibnari, Alfiejoskiro Jakovo i Fadiejo, Símono Kananito i Juda Iskarioto, savó zdyja Les. Isúso bičhadiá adalen dešudujen i dyjá lénge stroga uphenybená: “Na zadžán dre štéty, kaj Náiudy dživéna, na zadžán dro Samaritianengiro fóro; a džán fedýr ke manušá Izrailjoskire kheréstyr, savé isyn xasiakirdé syr bakré. I kiéli tumé zadžána, phenén lav pal Devléste, rakirí: ‘Javdiá pašyledýr Kralipén dro Bolybnáskiro Rajo, Savésa xulainela Devél.’ Sastiakiren nasvalen, žužakiren prokazytkonen, otdžidžiakiren mulen, tradén javrí nalačhé dúhi (fany); bi lovengiro doresné, bi lovengiro otdén. Na len pésa ni suvnakái, ni rup, ni xarkóma (mied') dre kisyka pe kustýk, ni sakva (sumka) pe drom, ni duj ĥáda, ni ĥeritka, ni destó. Pal-dová so butiarno isyn mol te xal. I dro vari-savó fóro ci gav tumé te na zadžán, udžinén, kon isyn patyvalo manúš dro davá fóro, i jačénpe odój angíl, syr te džán. I syr zadžána dro kher, phenén ‘ramánjo’ (miro) manušéske, rakirí: ‘Te javél ramánjo tumaré kheréske’; i kóli tumen lačhés priléna dro davá kher, mek ramánjo (miro), so tumé mangné Devléstyr, te jačélpe dro kher; kóli nad, mek tumaró lav mangipnasa Devléske te risjol pale ke tumé. Ne kon na priléla tumen i na šunéla lav tumaró, triinskiren pylo tumaré ĥerendyr, syr javéna te džán javrí kheréstyr ci foróstyr. Čačes, Me rakiráva tuménge: lokhedýr javéla manušénge Sodomostyr i Gomorátyr dro dyvés, kiéli Devél javéla te sendinel, syr kadalé foroske. Ake, Me bičhaváva tumen syr bakrén maškír ruvende; javén god'varé syr sapa, i bibangipnaskire syr golumby. Ne rakhénpe manušéndyr: pal-dová so javéna te zden tumen pe séndo, i javéna te marén tumen čupniasa dre léngire sinagogi; i tyrdena tumen ke theméskire barydyrá i ke králja pal Miro lav, sob (kaj) te dophenen pal Mánde lénge i Najudénge. Ne syr jone zdena tumen, na piridživen, syr i so te phenén tuménge: pal-dová so javéla dynó tuménge, so te phenén dre dová-pac' mardó (štúnda); pal-dová so davá na tumé javéna te rakirén, ne tumaró Bolybnáskire-Dadéskiro Dúho (Fáno) javéla te rakirél dre tuménde. I pšal zdela pšalés pe meribén, i dad péskire čhavés; i čhavé ĥazdénape pe dadende i muliakirena len. I saré manušá javéna te na sykavén patýv tuménge pal lav Miro, ne kon javéla te terdjol tvardes ke kónco (ke jagóro), kodová zrakhélape. I kiéli javéna te tradén tumen dro jekh fóro, našén dro javír; pal-dová so Me, čačes, rakiráva tuménge: na končynena tumé te obdžan saré fórja Izrailjoskire, syr javéla Čhavó Manušéskiro. Sykliaibnýtko (učeniko) isyn na baredýr sykliakiribnaristyr, pishári na baredýr péskire rástyr. Uhtýlla (dósi) vaš sykliaibnytkoneske, sob (kaj) jov te javél dasavo, syr léskiro sykliakiribnáskiro (učytieljo), i pishári dasavo, syr léskiro raj. Kóli semiakire xulás prokharde Viel'zevulo, syr butedýr nalačhé lavénca kharna xuláskire kheritkonen?’ Na andyršan kadalé manušéndyr: pal-dová so nane nisó čorahano, sob (kaj) te javél garadó, i garadó, sob (kaj) te na javél džindló. So Me phenáva tuménge jekh pe jekh, rakirén sarénge, i so tuménge manušá phenéna pe kan, phenén pe kherítko bérga. Na andyršan kodolendyr, savé muliakirna masá, ne savé na moginéna te muliakirén tumaró dúho (fáno); ne darén kodolendyr, savé moginéna te muliakirén i dúho (fáno) i masá dro liúno (ado). Ci na duj špaki (vorob'i) biknenape pal jekh asarijo? I ni jekh léndyr na peréla pe phuv bi voliakiro tumaré Dadéskiro. Tuménde až i balá pe šeró saré gindlé. Na andyršan ža: tumé san but móly kučedyr, syr kadalé but špaki. Paldavá kažnones, kon priĥaljola Man i rosphenéla pal Mánde angíl manušénde, kodolés Me priĥaljovava angíl Miré Dadéste, Savó isyn dro Bolybnáskiro Rajo; i vari-savéstyr, kon otphenelape Mándyr angíl manušénde, kodolestyr Me adiáke-pac' otphenavape angíl Miré Dadéste, Savó isyn dro Bolybnáskiro Rajo. Na duminen, so Me jandjom ramánjo (miro) pe phuv; Me javdjom te janav na ‘ramánjo’, a maribén. Pal-dová, so Me javdjom te durjakirav manušés léskire dadéstyr, i čha lákire datyr, i borja sasiatyr, manušéskire vérgi isyn kodolé, savé isyn léskire kheréstyr. Konéske isyn drógo léskiro dad ci butýr, syr Me, kodová isyn nálačho Mánge, i kodová, savéske isyn drógo čhavó ci čhaj butýr, syr Me, kodová isyn nálačho Mánge, i vari-kon, kon na léla trušúl péskiro i na džála Mánca, kodová isyn nálačho Mánge, i vari-kon, kon rakhéla péskiro džiibén, kodová xasiakiréla les; i vari-kon, kon meréla pal Mánde, doreséla viéčno džiibén. I vari-kon, kon priléla tumen, xaj, Man priléla, i jov, savó priléla Man, priléla Kodolés, Savó bičhadiá Man. I vari-kon, kon priléla prorokós syr prorokós, kodová doreséla (dolela) otdyibén syr proróko i vari-kon, kon priléla patiaibnytkone manušés syr patiaibnytkones, kodová doreséla otdyibén syr patiaibnýtko manúš. I vari-kon, kon déla xoc' tahtáj (čaša) šylalo paní jekhéske adalé tyknendyr syr sykliaibnytkoneske, čačes, Me rakiráva tuménge: jov na xasiakiréla péskiro otdyibén.” I sys adiáke: kiéli končyndia Isúso te del uphenybená dešudujenge Péskire sykliaibnytkonénge, Jov gijá krig odothýr te sykliakirél i te phenél lav dre léngire (Galilejakire) fórja. Ne kiéli Iáno šundiá dro štaribén pal Isusoskiri butý, jov bičhadiá lav péskire sykliaibnytkonénca te phenél Léske: “Tu san Kodová, Savéske trej te javél, ci javirés aménge te užakiras?” I otphendiá lénge Isúso, rakirí “Džán i piriphenen Ianoske, so tumé dykhné i šundlé. Kororé manušá dykhéna nevéstyr i langale psiréna; prokazytka jačéna žužé, i kašuke manušá šunéna, mulé otdžidjona, i bogenge phenélape bahtalý zan (zvies'); bahtaló sys kodová, kon na xasiakiréla patiaibén dre Mánde. A kiéli jone giné péske, Isúso lyjá te rakirél manušénge pal Ianoste: “So psirdé tumé te dykhén pe čhučí phuv? Syr triščynytko kašt (drévo) trinskirlape balvaliatyr? So tumé psirdé odorík te dykhén? Manušés, savó sys uridó dre šukár ídia? Nad; manušá, savé uridé dre šukár ídia, dživéna dre kralitka felatiniá (kolová). Ne, so ž tumé psirdé te dykhén? Prorokós? Čačó, Me rakiráva tuménge: jov isyn baredýr prorokostyr: davá isyn kodová, pal savéste isyn čhindló: ‘Ake, Me bičhaváva Miré vykedyné Manušés angíl Túte, Savó keréla drom Tyró angíl Túte.’ Čačes, Me rakiráva tuménge: nane baredýr Ianóstyr Boldeipnaristyr maškír odolénde, savén džuvliá bijanena, ne naj tyknedýr dro Bolybnáskiro Rajo isyn baredýr Ianóstyr. Ianoskire Boldeipnariskire dyveséndyr ke/žýko kakaná Kralipén dro Bolybnáskiro Rajo zorjása lélape, narta (uporna) manušá léna les zorjása. Pal-dová so saré proróki i Zakóno angilphenenas angíl Ianoste. I kóli tumé zakamena te prilén les, Iáno isyn sýrby Ilíia, savéske treindiá te javél. Konéste isyn kaná, mek te šunél. So Me te phenáv, savé kadalé manušá isyn? Jone isyn sýrby čhavoré, savé isyn bešté pašýl targi i kiéli déna gódla maškír péste, to jone rakiréna: ‘Ame bašadiam tuménge pe svirol'ka, tumé na khelde; ame bagandiam roibnytka giliá, a tumé na rundle.’ I Iáno javdiá, na xála, na p'jela, i jone rakiréna: ‘Léste isyn nálačho dúho (fáno).’ Javdiá i Čhavó Manušéskiro, xála, i p'jela, i jone rakiréna: ‘Davá isyn manúš, savéske isyn pir iló te xal, te p'jel, isyn drúgo (mal) mytoskire skedyibnar'jenge i grehengirenge.’ Ne Devléskiro god'varipen sykavéla péskiro čačipén manušéngire rendénca (dielenca), savé priléna davá čačipén.” Tén'ci Jov lyjá te ladžakirel fórja, dre savé Jov kerdiá butýr javirendyr Péskire dívy, pal-dová so jone na riskirdé péskiro džiibén ke Devél: “Bida túke, Xorazino! Bida túke, Vifsaida! Pal-dová so, kóli dasavé dívy, so sys kerdé dre tuménde, te javén kerdé dre Tíro i Sidono, jone ĥará riskirenas péskiro džiibén ke Devél dro uribén balytkone gonestyr i dro pieplo. Ne Me phenáva tuménge, so javéla lokhedýr dro sendoskiro dyvés Tiroske i Sidonoske, syr javéla tuménge. I tu, Kapiernaumo, ke bolybén ĥazdesape? Dro liúno (ado) tu javésa čhurdynó telé: pal-dová so, kóli dasavé dívy te javén kerdé dro Sodómo, syr dre túte, jov jačelaspe ke adadyvés. Me rakiráva tuménge, so javéla lokhedýr dro sendoskire dyvés Sodomoske, syr túke.” Dro do-pac' časo, kiéli Isúso otphenélas lénge, phendiá Jov duredýr: “Me slavinava Tut, Dádo, Raj Devél Bolybnáskiro i phuvjákiro, so Tu ĥaradian davá god'varendyr i baré-godiakirendyr, i otkerdian davá bijatorenge; Čačó, Dádo, pal-dová so sys adiáke, syr Túke treindiá. Saró džinybén pal Péste Dad Miro dyjá Mánge, i nikón sarésa na džinéla Čhavés apríč Dadéste i nikón na džinéla Dadés apríč Čhavéste, i Jov vykedéla odolés, konéske Čhavó kaméla te otkerel Dadés. Javén ke me saré, savé khinyne pharé butiátyr i pharipnastyr, – i Me dáva otkhinyben tuménge. Len pe péste pharipén Miré džiibnáskiro i sykljon Mándyr, pal-dová so Me som kovlé-ilytko i kanduno, i tumé lathéna otkhinyben vaš tumaró iló; pal-dová so Miro džiibnáskiro pharipén lokhes te lydžán.” Dro dová-pac' časo džálas Isúso savatoné (subotoné) pirdál féldy, so sys počhude ziarkasa; Léskire sykliaibnýtka bokhalyne i lyné te kušen kolosy i te xan. Ne kiéli Farisiéi dykhné davá, to phendlé Léske: “Dykh, Tyré sykliaibnýtka keréna dová, so naštý te kerén savatoné (subotoné).” I Jov phendiá lénge: “Na gindlé tumé, so Davído kerdiá, kiéli jov bokhalyja i manušá, savé sys lésa? Syr jov zagijá dro Devléskiro Kher, i jov i manušá léskire xané svencyndlo maró, savó naštý sys te xan ni léske, ni manušénge, savé sys lésa, ne jekhe rašange? Naúšto na gindlé tumé dro Zakóno, so rašaja magirena savatytko (subotytko) Zakóno dre Khangirí i jačénape bi bangipnaskiro? Ne Me phenáva tuménge: kadavá, so isyn adái, isyn butedýr Khangirjátyr. Ne kóli tumé džinenas, so davá značynéla: ‘Kovle-ilýtkima trej mánge, a na dáro’, tedy tumé na bangiakirenas manušén, savénde nane bang. Pal-dová so Manušéskiro Čhavó isyn xuláj i pe sávato.” I pirigii pe javír štéto, Isúso javdiá dre léngiri sinagoga. I, ake, sys manúš šuké vastésa. I phučné Léstyr, sob (kaj) te bangiakiren Les: “Ci saštý (možna) te sastiakires savatoné (subotoné)?” Jov phendiá lénge adiáke: “Kóli vari-konéste tuméndyr peréla jekhori bakri dre xoraly ĥanbín (jama) savatoné (subotoné), naúšto adavá manúš na uhtyléla la i na tyrdela javrí la? Pe kicý manúš isyn drogedyr bakriatyr? Saštý te kerén lačhipén savatoné (subotoné)!” Tedy rakiréla manušéske: “Vytyrde péskiro vast!” I jov vytyrdyja vast, i vast jaciá sastó, syr javír. Ne Farisiéi giné javrí, jačné te zrakirenpe pe Léste, syr te muliakirén Les. Ne syr Isúso ĥalyjá pal dová, Jov gijá péske odothýr. I but manušá giné Lésa, i Jov vysastiakirdiá len sarén, i priphendiá šylales lénge te na rakirén javirénge pal Léste; sob (kaj) te spolninélpe dová, so Devél phendiá pirdál prorokoste Isajoste, savó rakiréla: “Ake, isyn, Miro dynári, Konés Me vykedyjom, Miro Drógo, dre Savéste isyn Mirí rádyma; Me dáva Léske zor Miré Duhoskiri (Fanoskiri), i Jov phenéla Najudénge pal čačunó séndo. Jov na zakošelape, na zadela gódla, i nikón na javéla te šunél zan (glos) Léskiri javrí; Na phagiréla telé čar, so isyn nadphagirdy, i na murdiakirela jagitko čibori, savjátyr jekh thuv (dymo) džála, paka čačipén pirizorjakirela saró. I Léskire lavéske saré nácyi javéna te patián.” Tén'ci jandlé ke Jov kororé i kašuke manušés nalačhé duhósa i Jov vysastiakirdiá les adiáke, so kororó i kašuko lyjá te rakirél i te dykhél. I divindlépe saré manušá i rakirdé: “Naúšto davá isyn Davidóskiro Čhavó?” Ne kiéli Farisiéi šundlé davá, jone phendlé: “Kadavá manúš tradéla nalačhé dúhi jekhe Viel'zevuloskire zorjása, savó isyn xuláj pe nalačhé dúhi.” Ne Isúso džindiá, so jone dumindle i phendiá lénge: “Kažno kralipén, kaj nane jekhipén andrál, javéla syr čhučí phuv, i kažno fóro ci kher, kaj nane jekhipén andrál, na javéla te terdjol. I kóli nálačho vytradela nalačhés, tedy nane léste jekhipén andrál, syr léskiro kralipén javéla te terdjol? I kóli Me tradava javrí nalačhé dúhi Viel'zevulosa, tedy savé zorjása tumaré čhavé tradéna? Paldavá jone javéna sendárja tuménge, so tumé rakiréna načačipén. Ne kóli Me tradava javrí nalačhé dúhi Devléskire Duhósa (Fanosa), tedy Devléskiro Kralipén javdiá ke tumé. I syr vari-kon moginéla te zadžál dre zoralé-manušéskiro kher i te čorel léskiro mištypén, kóli angíl jov na sphandela zoralé xulás. I tedy jov zalela saró léskire kheréstyr. Kon isyn na Mánca, odová isyn pe Mánde, i kon na skedéla Mánca, odová rosčhurdela. Paldová Me phenáva tuménge: kažno grého i teliakiriben pe Devléste javéna otmekne manušéske, ne kaliakiriben pe Dúho (Fáno) na javéla otmekno ni dro davá viéko, ni dro viéko, savó javéla. I kóli vari-kon phenéla lav pe Čhavéste Manušeskireste, léske grého javéla otmekno, ne kodová, savó phenéla lav pe Svénto Dúho (Fáno), léskiro grého na javéla otmekno ni dro davá viéko, ni dro viéko, savó javéla. Kóli kašt (drévo) isyn lačhó, lačhó isyn barjakirdó (plódo) léstyr; kóli kašt isyn dylynó, dylynó isyn barjakirdó léstyr, pal-dová so kašt ĥaljosa pir léskire barjakirdé. Tumé san sapitko ródo! Syr tumé moginéna te rakirén lačhipén, kóli tumé san nalačhé? Pal-dová so, so isyn dro iló pherdó, dová uštá rakiréna. Lačhó manúš lydžála péske lačhipén lačhé piraliatyr; čoro manúš lydžála čoré piraliatyr čoripén. Ne Me phenáva tuménge, so kažno manúš déla otphenybén pal kažno čhučó lav dro sendoskiro dyvés: pal-dová so pir tyré lavá Devél phenéla pal tyró nabangipen i pir tyré lavá tyró bangipen.” Tedy otphendlé Léske vari-savé lylvaritkonendyr i Farisiejendyr, phení: “Sykliakiribnáskiro, ame kamasa te dykhas Tútyr ĥiertýk (znamiénijo).” Ne Jov otphendiá lénge, rakirí: “Ake, isyn pes'cjono i napatiaibnytko ródo, savó rodéla ĥiertýk; na javéla tuménge ĥiertýk apríč Ionaskire ĥiertykatyr. Adiáke, syr Iona sys dro kitoskiro per trin dyvesá, adiáke-pac' javéla Čhavó Manušéskiro dro phuvjákiro xoripén trin dyvesá i trin ratia. Manušá Ninievijatyr ĥazdénape pe séndo kadalé manušénca i dophenena pe lénde, pal-dová so jone risiné péskire grehéndyr ke Devél, kiéli o Iona phenelas, i, ake, adáj isyn Jekh, Savó isyn butýr Ionastyr. Králica Paš-Dyvesytkone (Jugoskire) Rigakiri ĥazdélape pe séndo manušénca dalé rodóstyr i dophenéla pe lénde: pal-dová so joj iavélas phuvjákire jagoróstyr (krajostyr) te šunél Solomonóskiro god'varipen, i, adáj isyn Jekh, Savó isyn baredýr Solomonostyr. Kiéli nálačho dúho (fáno) džála javrí manušéstyr, tedy jov psiréla pir bipanieskire štéty, rodéla štéto te otkhinjol i na lathéla. Tén'ci dúho rakiréla: ‘Risjováva me dro miro kher, katýr me javdjom’; i kiéli jov javéla, lathéla, so kher isyn na zalyno, vyšulado i ukedyno. To tén'či jov džála i léla pésa eftá javír dúhi, so isyn fujedýr léstyr, i jone zadžána i dživéna odój, i jačélape vaš adalé manušéske fujedýr, syr sys angíl davá. Adiáke javéla kadalé nalačhé manušénca.” Kiéli Jov rakirdiá manušénge, ake, daj Léskiri i pšála Léskire sys terdé dre rig manušéndyr, i lénge treindiá te rakirén Lésa. I vari-kon phendiá Léske: “Ake, Daj Tyrí i pšála Tyré javné i isyn terdé dre rig, i lénge trej Túsa.” I Jov otphendiá odoléske, kon rakirdiá: “Kon isyn Mirí Daj, i kon isyn pšála Miré?” I sykadiá Péskire vastésa pe Péskire syklytkonende, phení: “Ake, isyn daj Mirí i pšála Miré. Pal-dová so, kon keréla saró pir Miré Dadéskiri vólia, Savó isyn dro Bolybnáskiro Rajo, kodová isyn Mánge pšal i phen i daj.” Dro dová-pac' dyvés Isúso gijá javrí kheréstyr i sys beštó pašýl mórjo (derjáv). I skedynépe pašýl Léste but manušá, paldavá jov gijá andré bárka i sys beštó, a saré manušá sys terdé pe brégo. I rakirdiá lénge but sykliaibnytkone primierenca, rakirí: “Ake, sieinybnaskiro gijá javrí te čhuvél ziárka dre phuv: i, syr jov sieindia, vari-savé ziárki pyné pašýl drom, i privurniandyne čirikliá i shane len; ne javír ž pyné pe baruné štéty, kaj na sys but phuv, i jekhátyr (srázu) giné upré, pal-dová so phuv na sys xor, a syr uštyjá kham, šut'kirdia len; pal-dová so, syr na sys lénde kórni (rukhá), jone zašutine; ne javír pyné dre xrústy suv'jenca, i vybarija čar i zamardiá len; i javír pyné pe lačhí phuv, i dyné pribaripen dre šel móly, javír dre šovdešá, i javír dre trijánda. Konéste isyn kaná, mek te šunél.” Tén'ci sykliaibnýtka giné pašyledýr i phendlé Léske: “Sóske Tu rakirésa lénca primierienca (sykaibnenca)?” I Jov otphenélas lénge: “Tuménge isyn dynó te džinén garadó čačipén pal Kralipén dro Bolybnáskiro Rajo, a lénge na dynó; kodoléske, savéste isyn, javéla dynó i javéla léste but but, a konéste nane, kodolestyr lélape krig kodová nábut, so isyn léste. Paldavá Me rakiráva lénca primierenca (sykaibén), pal-dová so, syr jone dykhí, na dykhéna, i šuny, na šunéna, i na ĥaljona; i spolninelape pe lénde angilphenybén Isajoskiro, savó rakiréla: ‘Javéna te šunén kanenca, i na ĥaljona; te dykhén jakhénca, i na dykhéna; pal-dová so adalé manušéngiro iló kaštalyja, i jone šunéna fujes péskire kanenca i jakhá péskire zakerde, sob (kaj) te na dykhén jakhénca, i te na šunén kanenca, i te na ĥaljon ilésa, i te na risjon ke Me, sob (kaj) Me te vysastiakirav len.’ Tumaré ž jakhá isyn bahtalé, so dykhéna, i kaná tumaré, so šunéna, Čačes, Me rakiráva tuménge: but proróki i čačuné manušá kamlé drieván te dykhén dová, so tumé dykhéna, i na dykhné, i te šunén dová, so tumé šunéna, i na šundlé. Paldavá šunén, pal so isyn kadavá sykaibén (primiéro) pal sieinybnaskireste. Kiéli vari-kon, kon šunéla lav pal Devléskiro Kralipén, i na ĥaljola, tedy javéla nálačho i čorela léskire iléstyr kodová, so sys počhudo: kadasavó manúš isyn sýrby ziárka, saví sys čhudý pašýl drom. Ne savé sys čhudé pe baruné štéty, sykavéna manušés, savó šunéla lav, priléla les jekhátyr (srázu) dro iló radymása; ne syr davá lav na zadžála xor dro iló i patiaibén isyn krotko, tedy, kiéli javéna mén'ki i tradypen pal lav, jekhátyr jov mekéla te patial. Ne savé sys čhudé dre dylyny čar, sykavéna kodolés, savó šunéla lav, ne viekoskiri sujéta, tyrdypén ke barvalypén pirizorjakirena dro léngiro iló, i jov jačéla bi barjakirdeskiro. Ne savé sys čhudé pe lačhí phuv, sykavéna manušés, savó šunéla lav i ĥaljola les, jone déna barjakirdeskiro (plodoskiro) i pribaripen jekh dre šel móly, javír dre šovdešá, ne javír dre trijánda móly.” Javír sykliaibnýtko sykaibén rosphendiá Isúso manušénge, rakirí: “Kralipén dro Bolybnáskiro Rajo isyn sýrby manúš, savó čhudiá lačhí ziárka pe péskiri félda. Kiéli manušá sys suté, javdiá vérgo i čhudiá dylyny čar maškír giv i gijá krig. Ne kiéli lačhí ziárka ŭzgija i dyjá pribaripen, dylyny čar adiáke-pac' sykadyjá. I xuláskire pishárja javné i phendlé léske: ‘Rajo, tu ž čhudián lačhí ziárka pe félda? Katýr lyjape dylyny čar?’ I jov otphendiá lénge: ‘Vérgo manúš kerdiá davá.’ Léskire pishárja rakirna léske: ‘Kóli kamésa, ame džása i vykedasa len javrí.’ Jov rakírla: ‘Nad, sob (kaj) te na vyriskiren khetané dylyné čarjasa giv, syr tumé javéna te vyriskiren javrí dylyny čar. Mek te barjon khetané ke sčhinyben; i dro časo, syr te sčhinen, me phenáva žniecenge: ‘Skedén angledýr dylyny čar i phanden len dre pučki, sob (kaj) te xačkirén; a giv te skedén dre Mirí šúrna.’” Javír sykliaibnýtko sykaibén rosphendiá Isúso lénge, rakirí: “Kralipén dro Bolybnáskiro Rajo isyn sýrby garčyčno ziárka, saví manúš lyjá i počhudia pe péskiri félda, joj isyn tyknedýr saré ziarkendyr, ne kiéli vybarjola, jačélape baredýr saré javire xrustendyr i jačélape syr kašt, adiáke so čirikliá bolybnýtka khuvena gniázdy (kúfy) dre léskire randiá.” Javír sykliaibnýtko primiéro rosphendiá lénge Isúso: “Kralipén dro Bolybnáskiro Rajo isyn sýrby droždžy (rožčyna), savé džuvlý lyjá i zamiešyndia dre viadra (nemra) jaržesa, paka saró xumer (ciasto) jaciá šutlo.” Ake, saró Isúso phendiá manušénge primierenca (sykaibnenca); i nisó Jov na rakirdiá lénge bi primierengiro, sob (kaj) te spolninélpe, so sys phendló pir prorokoste: “Me otkerava uštá Miré dre primiery (sykaibena); vyphenava dová, so garadó odoléstyr, syr svéto sys sozdynó.” Tén'ci Jov mekciá manušén i gijá dro kher. I podginé ke Jov sykliaibnýtka Léskire i phendlé: “Piriphen aménge primiéro (sykaibén) pal dylyny čar pe félda.” I Jov phendiá dro otphenybén: “Kon sieinela (čhuvéla) dre phuv lačhí ziárka isyn Čhavó Manušéskiro; félda isyn svéto; lačhí ziárka-davá isyn čhavé Kralipnaskire, kaj xulainela Devél; dylyny čar-davá isyn čhavé nalačheskire, vérgo, savó počhudia len-davá isyn nálačho, sčhinyben-davá značynéla viekoskiro kónco (jagóro), žniecy isyn Jangóly. Paldavá, syr vykedena dylyné čarjá i shačkirena jagása, adiáke-pac' javéla dro viekoskiro kónco (jagóro): bičhavéla Čhavó Manušéskiro Péskire Jangolen, i skedéna Léskire Kralipnastyr saró, so zlydžala manušén ke grého, i sarén, kon keréla na pir Zakóno; i čhurdena len dro bov jagása; odój javéla roibén i dandengiri skriežyma. Tén'ci patiaibnytka javéna te ziainen syr kham dro léskire Dadéskiro Kralipén. Konéste isyn kaná, mek te šunél. Kralipén dro Bolybnáskiro Rajo isyn sýrby drógima dro kučipén, so isyn garady pe félda, savó manúš, syr lathiá, garadia, i radymátyr džála i saró biknela, so léste isyn, i kinela kodoia félda. Iščo Kralipén dro Bolybnáskiro Rajo isyn sýrby kúpco (tylgári), savó rodelas drieván goža mutinia; i syr lathiá jekh kuč mutin (žemčugo), gijá i bikindia saró, so léste isyn i kindia la. Iščo Kralipén dro Bolybnáskiro Rajo isyn sýrby bari khudý (sietka), so čhurdyné dro mórjo (derjáv) i saví skedyjá rázna mačhé, i syr khudý sys pherdý, manušá tyrdyne javrí la pe brégo i bešné, skedyi lačhé mačhé dre pirja, a nalačhé čhurdyné javrí. Adiáke-pac' javéla dro viekoskiro kónco (jagóro): džána telé Jangóly i roskedena nalačhen patiaibnytkonendyr, i čhurdena len dro bov jagása; odój javéla roibén i dandengiri skriežyma.” “Ci ĥalyné tumé davá saró?” Jone phendlé Léske: “Adiáke, Rajo.” i Jov phendiá lénge: “Paldavá kažno lylvarítko (knížniko), savó syklyja pal Kralipén dro Devléskiro Rajo, isyn sýrby manúš, savó isyn kheréskiro xulái, kon lydžála javrí péskire kučipnaskire piraliatyr saró nevó i phuranó.” I isyn adiáke: kiéli končyndia Isúso dalé primiery (sykaibena), Jov gijá péske odothýr. I syr Jov javdiá dro Péskiro fóro, sykliakirdiá len dre sinagoga adiáke, so jone drieván divindlépe, rakirí: “Katýr adalé manušéste isyn dasavo godypén i zoralypén? Na Jov isyn skamindariskiro Čhavó? Na Léskire Da kharéna Maríia, i pšalén Leskiren Jakovo i Joza i Símono i Juda? i pheniá Léskire nane saré maškír aménde? Katýr ža Léste saró davá?” I na patianas Léske. Ne Isúso phendiá lénge: “Saré manušá kutiakirena prorokós, féni na dro Léskiro fóro i na dro léskiro kher” I Jov na kerdiá but dívy odój, pal-dová so jone na patiandyné Léske. Dro dolé dyvesá šundiá daja zan (zvies') pal Isusóste Irodo, savó sys xuláj pe štárto paš Judéngire Kralipnastyr, i phendiá péskire dynar'jénge: “Davá isyn Iáno Boldeipnari; jov otdžidyjá muléndyr, i paldavá léste bari zor te kerél dívy.” Pal-dová so Irodo lyjá Ioanos, phandia les zandir'jenca i čhudiá les dro štaribén pal Irodiadate, péskire pšaléskire Filiposkire romniáte, pal-dová so Iáno rakirdiá léske: “Túke naštý te les la.” I jov dumindia (dyja gody peske) te muliakirél les, ne darandyja manušéndyr, pal-dová so jone gindlé les pal prorokoste. Ne kiéli sys Irodoskiro bijanypnytko dyvés, Irodiadakiri čhaj kheldia angíl gostiende i khelyben drieván sys pir iló Irodoske; so jov dyjá lav sovlahasa te del láke saró, sob (kaj) joj te na pomangel. Joj ža, syr la daj sykliakirdiá, phendiá: “De mánge pe čaró šeró Ianoskiro Boldeipnariskiro.” I králi pyjá dro dúho (fáno), ne pal sovláh i manušénde, savé sys bešté lésa, priphendiá te del láke, i jov bičhadiá te otčingiren šeró Ianoske dro štaribén, i jandlé léskiro šeró pe čaró i dyné rakliake, i joj iandiá péskire dáke. I javné léskire sykliaibnýtka i lyné trúpo i garadé les; i giné i phendlé zan (zvies') Isusóske. I syr Isúso šundiá daja zan, to durija odothýr pe bárka jekhdžinó pe čhučó štéto; i kiéli manušá šundlé pal davá, jone giné pal Léste pezal for'jéndyr. I syr Jov gijá angíl, dykhciá but manušén; i Jov potangindia len i vysastiakirdiá nasvalen. Kiéli javdiá bel'vél', jone giné pašyledýr ke Jov; i Léskire sykliaibnýtka phendlé: “Čhučó (pusto) davá isyn štéto i uže but mardé, mek manušén, mek te džán jone dre gavá te kinen péske xabén.” Ne Isúso phendiá lénge: “Lénge na trej te džán: den tumé te xan lénge.” Ne jone phendlé Léske: “Adáj aménde isyn jekh pandž maré i duj mačhé.” I Jov phendiá lénge: “Janén len Mánge.” i Jov priphendiá manušénge te bešén pe čar, lyjá kadalé pandž maré i duj mačhé, ĥazdyjá jakhá pe bolybén, bahtiakirdiá xabén parikiribnasa Devléske, phagirdiá, i dyjá maró sykliaibnytkonénge, kodolé ž manušénge. I saré xané i čalyne, i skedyné koterá, so jačnépe, dešudúj pherdé korzíny (khudé) I xané pandž tysjoncy muršá, apríč džuvliende i čhavorende. I jekhátyr Isúso začhudia sykliaibnytkonén te bešén dre bárka te plyvinen (te den plima) angíl Léste pe dová brégo, angíl syr Jov otmekéla manušén. I kiéli Jov otmekciá manušén, jekhátyr Jov gijá upré pe bérga te mangélpe Devléske. I sys odój jekhdžinó, syr javdiá bel'vél'. Ne bárka uže sys maškír mórjo (derjáv), i valny (velny) čhurdenas la, pal-dová so balvál sys pe lénde. Maškir tríto i šóvto mardó (štúnda) ratiákiro, pe štárto stréga Jov javdiá ke jone, psiri pir mórjo (derjáv). Ne sykliaibnýtka, syr dykhné, so Jov džála pir paní, strahádyne, rakirí: “Davá isyn zdanki (dykhibena).” I dyné gódla darátyr. I jekhátyr Isúso lyjá te rakirél lénca i phendiá: “Rikirenpe murškanés, davá Me som, na andyršan.” I Pétri Léske otphendiá: “Rajo Dévla! Kóli davá Tu san, de priphenybén mánge te džav ke Tu pir paní” Jov phendlia: “Džá!” I gii barkatyr, Pétri gijá pir paní i podgíia ke Isúso. Ne syr jov dykhciá balvál, strahadyja, i lyjá te tasadjol, zadyja gódla: “Rajo Dévla! Zrákh man!” I jekhátyr Isúso vytyrdyja vast, uhtyldia pal léste, i rakiréla léske: “Túte nane baró patiaibén, sóske tu lyjan te kuninespe?” I syr jone bešné dre bárka, balvál štylyja. I kodolé, savé sys Lésa dre bárka, poklonindlepe Léske i phendlé: “Čačes, Tu san Devléskiro Čhavó.” I syr jone piriplyvindle (dyja plima pirdal), javné pe Gienisarietoskiri phuv. I kiéli manušá dolé štetóstyr ĥalyné Les, tedy bičhadé pir saré pašatuné štéty manušén, sob (kaj) te janén sarén nasvalen ke Jov, i mangné Les, sob (kaj) lénge féni (tóka) te čilaven Léskire uribnaskire jagóry (kraí), i kodolé, savé čilavenas, jačenas saste. Paló davá javné ke Isúso Farisiéi i lylvarítka Jerusalimóstyr i phendlé: “Sóske Tyré sykliaibnýtka na kandéna godephurengire priphenybená? Pal-dová so na morena péskire vastá, angíl syr te xan maró.” I Jov otphendiá lénge, rakirí: “Sóske ž tumé na kandéna Devléskire priphenybená pal péskiro prisykliakiriben? Paldová so Devél ž phendiá: ‘Kutiakir dadés i da’, i, ‘Kon rakiréla čoripén pe péskire Dadéste i date, te merél adavá manúš.’ Ne tumé rakiréna: Kóli manušéste isyn dáro, savó jov moginelas te del dadéske ci dáke, tedy jov na déla, ne jov rakiréla: ‘Davá isyn Devléskiro’, adasavó manúš na kutiakirela péskire dadés ci peskirjá da. Adiáke tumé parude lav Devléskiro pe péskiro prisykliakiriben. Tumé san, dujemuitka! Šukár angilphendia pal tuménde Isajo: ‘Kadalé manušá kutiakirena Man ušténca peskirenca, ne iló léngiro isyn dur Mándyr; ne ivjá (naprásnes) kloninenape Mánge, pal-dová so jone sykliakiréna priphenybená, so manušá pridumindle.’ I khardiá Jov manušén ke Pe, i phendiá lénge: “Šunén i ĥaljon: ‘Na dová, so zadžála dre manušéskire uštá, keréla Les magirdesa angíl Devléste, ne dová, so džála javrí léstyr, ake, isyn, davá, so keréla Les magirdesa.” Tén'ci podginé sykliaibnýtka i rakiréna Léske: “Tu na džinésa, so Farisiéi, syr šundlé davá lav, mekné te patián Túke?” Jov ža otphendiá: “Kažno raslina, saví Miro Bolybnáskiro Dad na čhudiá dre phuv, javéla riskirdy korniénca (rukhénca). Mek len; jone isyn kororé lydžaibnáskire. Kóli kororó manúš lydžála korores, dujdžiné peréna dre ĥanbín (jama).” Ne Pétri otphendiá Léske: “Rosphen aménge, so davá primiéro značynéla” Jov ža phendiá: “Naúšto i tumé adiáke-pac' na ĥaljona? Na ĥaljona tumé, so saró, so zadžála dro muj, džála duredýr dro per i čhurdelape javrí? Ne so džála javrí móstyr, dová-pac' džála iléstyr, i kadavá keréla manušés magirdesa. Paldová so čoré dúmy, zamariben, biladžaipén, bléndo, čoribena, xohanó dophenybén, kaliakiriben. Kadavá saró keréla manušés magirdesa angíl Devléste, ne te xal namorde vasténca na keréla manušés magirdesa.” I gijá péske Isúso odothýr i durija pe Tiroskire i Sidonoskire štéty; i, ake, Xananiejengiri džuvlý, saví sys do-pac' štetóstyr, gijá angíl i zadyja gódla: “Potangine (požalin) man, Rajo Dévla, Čhavó Davidóskiro, nálačho dúho (fáno) drieván rikiréla zor pe miré čhate.” Ne Jov nisó na otphendiá láke. I Léskire sykliaibnýtka podginé ke Jov i pomangne Les: “Otmek la, pal-dová so joj adiáke déla gódla pal aménde.” Ne Jov otphendiá: “Me som bičhadó féni ke xasibnýtka bakré Izrailjoskire kheréstyr.” Ne joj podgíia i poklonindiape Léske i rakirdiá: “Rajo Dévla! Pomogin mánge!” Ne Jov otphendiá: “Namišto te les maró čhavorendyr i te čhurdes džuklenge.” Ne joj phendiá: “Čačó, Rajo Dévla; ne i džukela xána krohendyr, so peréna léskire-xuláskire skamindestyr.” Tén'ci Isúso otphendiá láke: “Džuvlíje, baró isyn tyró patiaibén; mek te javél, syr tu kamésa.” I jekhátyr lákiri čhaj jaciá sasty. I gii odothýr, Isúso džálas pašýl mórjo (derjáv) Galilejakiro i gijá upré pe bérga i besciá odój; i but manušá javné ke Jov, jandlé pésa langalen, kororen, kaliečnonen, bičibitkonen i javire nasvalen, i čhudé len telé angíl Isusóskire ĥerá, i Jov vysastiakirdiá len; adiáke, so manušá drieván divindlépe, kiéli dykhné, so bičibitka rakiréna, kalieki saste, langale psiréna, i kororé dykhéna; i jone slavindle Devlés Izrailjoskires. I Isúso khardiá ke Pe Leskiren sykliaibnytkonén i phendiá: “Mánge isyn tango (žalko) adalé manušén: pal-dová so uže trin dyvesá jone jačenaspe Mánca, i nane nisó lénde te xan, i Me na kamám te mekav Péstyr len dro drom bokhalenca, sob (kaj) jone te na zden zorjátyr dro drom.” I sykliaibnýtka rakiréna Léske: “Kaj te las aménge adákicy laby maró pe čhučí phuv, sob (kaj) te čaliakiras adákicy manušén?” I phendiá lénge Isúso: “Kicý laby maró tuménde isyn?” I jone phendlé: “Eftá (bitrinéngiro deš) i nábut mačhore.” I priphendiá manušénge te bešén pe phuv; i lyjá kadalé eftá laby maró i mačhore, i bahtiakiri parikiribnasa Devlés, rosphagirdiá, i délas sykliaibnytkonénge, a sykliaibnýtka dyné manušénge. I jone saré xané, i čalyne; i jone skedyné koterá, so jačnépe, eftá pherdé korzíny (khudé); i xané štar tysjoncy muršá, apríč džuvliende i bijatende. Tén'ci Jov rozmekcia manušén, besciá dre bárka i javdiá pe štéty Magdalinoskire. I Farisiéi i Sadukiei podginé, i, sob (kaj) te propatiakiren Isusós, paldavá jone mangné te sykavél lénge ĥiertýk (znamiénijo) bolybnástyr. Ne, Jov otphendiá lénge, phení: “Kiéli da bel'vél', tumé rakiréna, ‘Javéla lačhí vedra (pogoda), pal-dová so bolybén isyn loló;’ i pe zlóko: ‘Adadyvés javrí isyn vihura, pal-dová so bolybén isyn loló i začhakirdo oblokénca.’ Tumé džinéna, syr te ĥaljon pir bolybén, ne tumé na džinéna te ĥaljon ĥiertyká (znamiénii) pir razno časo. Tumé san bibahtaló i biladžaipnytko ródo, savó rodéla ĥiertýk, na javéla tuménge ĥiertýk, apríč Ionaskiri giertyk.” I Jov mekciá len i gijá péske. I kiéli sykliaibnýtka javné pe javír brégo, jone bistyrde te len pésa laby maró. I Isúso phendiá lénge: “Dykhén ža, rakhénpe Farisiejengire i Sadukiejengire sykliakiribnastyr, savó isyn sýrby roščyna (zakvaska).” Ne jone lyné te pirirakiren maškír péste: “Ame na lyjam laby maró.” Isúso džindiá, so lénde sys pe godý, phendiá: “Tumé san manušá na baré patiaibnása, sóske ž tumé obrakirena maškír péste, so tuménde nane maró? Naúšto tumé iščo (inké) na ĥaljona i na ripirena pal pandž laby maró vaš pandž tysjoncy, i kicý khudé tumé skedyné? I pal eftá (bitrinéngiro deš) laby maró vaš štar tysjoncy, i kicý khudé tumé skedyné? Syr tumé na ĥaljona, so Me phendjom na pal maró: ‘Rakhénpe Farisiejengire i Sadukiejengire roščynatyr?’” Tén'ci jone ĥalyné, so Jov phendiá lénge te rakhénpe na marune roščynatyr, a Farisiejengire i Sadukiejengire sykliakiribnastyr. I kiéli Isúso javdiá pe phuvjá Kiesarija Filiposkiri, Jov phučelas Péskire syklytkonendyr, rakirí: “Pal Konéste manušá ginéna Man, Manušéskire Čhavés?” I jone phendlé: “Vari-savé pal Ianoste Boldeipnariste, javír pal Ilijaste, javír pal Jeriemiejoste ci pal jekhéste prorokendyr” Jov ža rakiréla lénge: “Ne tumé pal konéste Man ginéna?” I Símono Pétri otphendiá i phendiá: “Tu san Xristóso, Čhavó Džidé Devléskiro, Savó dživéla viéčnes” I Isúso otphenélas léske i phendiá: “Bahtaló tu san, Símono Ioninoskiro, pal-dová so na manúš, konéste isyn rat i masá, dyjá davá čačipén dre tyrí godý, ne Miro Dad, Savó isyn dro Bolybnáskiro Rajo. I Me phenáva túke: Tu san Pétri, pe davá bar Me keráva Khangirí Mirí, i liunoskiri zor (meribén) na léla upralypén pe láte. Me dáva túke klydyna vudarendyr, savé isyn Kralipnastyr dro Bolybnáskiro Rajo, Savésa xulainela Devél; i so tu zaphenesa pe phuv, dová javéla zaphendlo dro Bolybnáskiro Rajo, i so domekesa pe phuv, dová javéla domekno dro Bolybnáskiro Rajo.’” Tén'ci Jov priphendiá šylales sykliaibnytkonénge ni konéske te na rakirén, so Jov isyn Xristóso. Dolé časostyr lyjá Isúso te rakirél jasnes Léskire sykliaibnytkonénge, so Léske trej te džal dro Jerusalimo i but mén'ki te piridživel godephurendyr i rašangirendyr i lylvaritkonendyr, i javéla Jov zamardo, i pe tríto dyvés Jov otdžidjola. I khardiá Pétri Les dre rig, i lyjá te otrakirel: “Potangine Pes, Rajo Dévla! Mek te na javél davá Túsa.” Ne Jov risijá ke Pétri i phendiá: “Džá krig Mándyr, nálačho; tu Mánge san, syr bar pe drom, pal-dová so tu duminesa na pal Devlýtko, a pal manušýtko.” Tén'ci Isúso phendiá Péskire sykliaibnytkonénge: “Kóli vari-konéske pir iló te džal Mánca, mek te na duminel butýr pal péste, i mek te lel trušúl péskiro, i mek te džal pal Mánde.” Ne kóli vari-kon, savéske isyn drógo džiibén péskiro te zrakhél, kodová xasiakiréla les, i vari-kon, savó otdéla péskiro džiibén vaš Mánge, kodová lathéla Les. Savó lačhipén isyn manušéske, kóli léste javéla saró, so léske trej dalé svetóstyr, a jov xasiakiréla péskiro viéčno džiibén? Ne so manúš moginéla te otdél kučedyr dro paruiben pal péskiro džiibén? Pal-dová so javéla Čhavó Manušéskiro dre zorjakiri sláva Péskire Dadéskire Jangolenca, i tedy kažno (sváko) doreséla, so javéla mol pal péskiro dová, so kerdiá jov dro džiibén. Čačes, Me rakiráva tuménge: adáj isyn vari-savé manušá, savé na meréna, kóli angíl javéna te dykhén Čhavés Manušéskire, savó javéla syr Králi dro Kralipén Péskiro.” Pir šov dyvesá lyjá Isúso Petris i Jakovós i Ianos, léskire pšalés, i lydžijá len trindžinen pe vučí bérga. I Jov parudyja sarésa angíl lénde. Léskiro muj lyjá te ziainel, syr kham, i Léskire uribená jačné parné syr dud (svéto). I, ake, sykadyne lénge Mójza Ilijasa, savé rakirdé Lésa. I Pétri zarakirdia i phendiá Isusóske: “Rajo Dévla! Syr isyn šukár aménge te javas adái. Kóli Tu kamésa, me keráva adáj trin šátry: jekh Túke, jekh Mojzáske, i jekh Ilijaske.” Kiéli jov iščo (inké) rakirdiá, ake, sviatlo óbloko čhakirdia len, i, ake, zan oblokostyr, saví rakirdiá: “Kadavá isyn Miro Drógo Čhavó, dre Savéste isyn Mirí rádyma, Les šunén.” I kiéli sykliaibnýtka šundlé davá, jone pyné pe péskire muiá i drieván strahádyne. I podgíia Isúso i čiladiá len, phení: “Uštén i na andyršan.” I syr jone ĥazdyné péskire jakhá, i na dykhné nikonés, apríč Isusóste Kokoreste. I syr jone džánas telé bergátyr, Isúso dyjá priphenybén lénge: “Ni konéske na rakirén pal davá dykhibén, paka Čhavó Manušéskiro otdžidjola.” I Léskire sykliaibnýtka phučné Léstyr, phení: “Sóske tedy lylvarítka rakiréna, so Ilíia bangó te javél pérvo?” I Jov otphendiá lénge, rakirí: “Ilíia, čačes, javéla angledýr i keréla saró. Ne Me rakiráva tuménge, so Ilíia uže javdiá, i jone na ĥalyné les, i kerdé lésa dová, so sys pir iló. I adiáke Čhavó Manušéskiro javéla te stradynel léndyr.” Tedy sykliaibnýtka ĥalyné, so Jov phendiá lénge pal Ianoste Boldeipnariste. I kiéli jone javné ke manušá, jekh léndyr podgíia ke Jov, i pyjá pe čangá angíl Léste, i phendiá: “Rajo Dévla! Potangine miré čhavés, jov bengvaljol pe nevó čhon, i fujes léske; pal-dová so jov častes čhurdelape dre jag i častes dro paní. I me jandjom les ke Tyré sykliaibnýtka, ne jone na mogindlé les te vysastiakiren.” Isúso phendiá dro otphenybén: “Tumé san napatiaibnaskiro i pharé-manušéngiro ródo, kicý Me te javav tuménca? Kicý Me javáva te vyrikirav tumen? Janén les adarík.” I Isúso priphendiá zoralés rakloreske, i gijá javrí léstyr nálačho dúho (fáno), i jekhátyr terné-beršengiro jaciá sastó. Tén'ci podginé jekh sykliaibnýtka ke Isúso i phendlé: “Sóske ame na mogindiam te tradas javrí les?” I rakiréla Jov lénge: “Pal-dová so tumaró patiaibén isyn nazoralo; paldová, čačes, Me rakiráva tuménge: kóli javéla tumaró patiaibén syr garčyčno ziárka, tedy phenéna bergake ‘te džal odothýr adarík ‘i džála; i tumé moginénas saró. Kadavá tradelape javrí jekhe mangipnasa i postosa.” Kiéli jone džánas khetané dre Galiliéia, Isúso phendiá lénge: “Čhavó Manušéskiro javéla zdyno dre manušéngire vastá; i jone zamarena Les; i pe tríto dyvés Jov otdžidjola.” I jone jačné drieván smentna (skučna). I kiéli jone javné dro Kapiernaumo, podginé ke Pétri skedyibnarja pe didrahmy i phendlé: “Tumaro Sykliakiribnáskiro pleskirela vaš Khangirí myto?” Jov rakiréla: “Čačó.” I kiéli jov gijá dro kher, Isúso angíl phendiá léske, rakirí: “So tu duminesa, Simonie? Králja pe phuv, konéstyr léna myto (taksa): péskire manušéndyr ci čužonendyr?” Pétri ž rakiréla Léske: “Čužonendyr.” Isúso phendiá léske: “Tedy péskire manušá na pleskirena. Ne, sob (kaj) lénge te na kerás fuipén pal kadavá primiéro (sykaibén), džá pe mórjo (derjáv), začhurde vendka, i pervoné mačheste, savó poperlape, otker léskiro muj i lathesa odój statiro; tyrde les javrí i de lénge pal péste i pal Mánde.” Dre dová-pac' mardó (štúnda) podginé sykliaibnýtka ke Isúso, phení: “Kon isyn baredýr dro Kralipén dro Bolybnáskiro Rajo?” I vykhari angíl bijatós (čhavores), Jov čhudiá les maškír lénde, i phendiá: “Čačes, Me rakiráva tuménge: kóli tumé na parudjona i na jačéna syr bijaty, tumé nikieli na zadžána dro Kralipén dro Bolybnáskiro Rajo. Paldová, kon tykniakirela pes syr odová javéla bijáto, javéla naj baredýr dro Kralipén dro Bolybnáskiro Rajo, i kon priléla adasavé bijatós vaš Miro lav, priléla Man. I kóli vari-kon otriskirela mek jekhe adasaves tyknendyr, kon patiála dre Mánde, tedy fedýr javélas kadasavé manušéske, kóli léske ur'jenas siavitko (miel'nicytko) bar (beledin) pe men, i tasadiakirenas les dro morjoskiro (derjavéskiro) xoripén. Bida svetoske zlydžaibnendyr! Pal-dová so ame na dživasa bi léngiro, ne bída kodolé manušéske, savó javirén tyrdela ke grého! Dykh ža, kóli vast tyró ci ĥerój tyrí zlydžala tut, otčingir len i čhurde len péstyr; fedýr túke jekhe vastésa ci ĥerjasa te zadžas dro džiibén viéčno, syr duje vasténca i duje ĥerénca te javes čhurdynó dro viéčno jag. I kóli tyrí jakh zlydžala tut, kuš javrí la i čhurde péstyr: fedýr túke jekhe jakhasa te zadžas dro džiibén viéčno, syr duje jakhénca te javes čhurdynó dre viéčno jag. Dykhén, na dykhén vučipnástyr ni pe konéste kadalé tyknendyr: pal-dová so léngire Jangóly, savé isyn dro bolybena, dykhéna kažno mólo Dadés Mires, Savó isyn dro Bolybnáskiro Rajo. Paldavá so Čhavó Manušéngiro javdiá te lathel, i te zrakhél xasibnytkonen. Syr tuménge zdelape? Kóli vari-savé manušéste javélas šel bakriá, i jekh léndyr zablendyndiape, tedy so jov na jačkirelas jeniadeša jeniá (bijekhéskiro šel) bakriá dre bérgi, i na džálas te rodél kodolia, saví zablendyndiape? I kóli vydžála léske te lathel la, jov radynélape pal láte butedýr, syr pal jeniadeša jeniende, savé na xasiné. Davá značynéla, so nane pe davá tumaré Dadéskiri vólia, Savó isyn dro Bolybnáskiro Rajo, sob (kaj) te xasjol jekh kadalé tyknendyr. Kóli ž keréla grého tyró pšal angíl túte, džá, sykáv léskiri bang léske jekh pe jekh. Kóli jov kandéla tut, tedy jov javéla tyró pšal nevéstyr. Ne kóli na javéla te kandel pšal tyró, le pésa iščo (inké) jekhés ci dujén, sob (kaj) kažno lav, savésa tu bangiakiresa Les, te čhuvén zor adalé duj ci trin jakhítka. Ne kóli jov otphenelape te kandel len, tedy phen dre Khangirí; i kóli na zakaméla Khangirí te kandel, mek te javél jov túke syr Najudo i mytoskiro skedyibnari. Čačes, Me rakiráva tuménge, so tumé priphenena pe phuv te na kerén, javéla priphendlo dro Bolybnáskiro Rajo; i so tumé domekena pe phuv, javéla domekno dro Bolybnáskiro Rajo. Iščo Me phenáva čačipén tuménge, so, kóli dujdžiné tuméndyr javéna dre khetaný godý pe phuv te mangén pal vari-so, javéla dynó lénge Miré Dadéstyr, Savó isyn dro Bolybnáskiro Rajo. Pal-dová so, kaj duj ci trin javné khetané vaš Miro lav, odój Me som maškír lénde.” Tén'ci podgíia Pétri i phendiá: “Rajo Dévla, kicý móly mánge trej te primangav pšaléske, kóli jov javéla te kerél grého angíl mánde? Ke eftá (ke bitrinéngiro deš) móly?” Isúso rakiréla Léske: “Me na rakiráva túke eftá móly, ne ke eftadešá eftá móly. Pal-dová so Bolybnáskiro Rajo, kaj Devél javéla Králi, isyn syr králi, savó zakamdiá te rozginelpe péskire pishar'jénca. I kiéli jov lyjá te ginel, jandlé ke jov jekhe manušés, savó sys vužlo léske deš tysjoncy talánty. I syr léste na sys sósa te pleskirel, tedy králi priphendiá te biknel les, i romniá i čhavorén, i saró, so léste sys, sob (kaj) te zapleskirel vužlypén. Tedy dynári pyjá pe čangá i lyjá te mangél les, rakirí: “Rajo! ‘Užakir miro vužlypén, i me saró vypleskirava túke.” I králi, kodolé pishariskiro, potangindia i mekciá les i primangdia léske vužlypén. Ne adova pishári, syr gijá odothýr, lathiá jekhe péskire males pir butý, savó sys vužlo léske šel dinarii. I uhtyldia les i lyjá te tasavel les, rakirí: ‘Zapleskir saró, so tu san vužlo.’ Ne drúgo (mal) léskiro pyjá pe čangá i lyjá te mangél les, rakirí: ‘Užakir miro vužlypén i me vypleskirava túke.’ Ne odová na zakamdiá, ne gijá i zdyja les dro štaribén, angíl, syr jov vypleskirela kodová, so sys vužlo. Ne kiéli malá léskire dykhné, so kerdiápe, drieván pyné dro dúho (fáno), javné i rosphendlé sarí zan (zvies'), so kerdiápe, kralíske. Tén'ci léskiro králi khardiá les ke pe i rakiréla: ‘Tu san zlydnia pishári, Me primangdjom túke dová vužlypén, syr tu mangdian man; naúšto na treindiá ž i túke te potangines drugós (malés) péskires, syr i me túke primangdjom?’ I syr xoliásyja králi, i zdyja les katenge, angíl, syr jov vypleskirela saró péskiro vužlypén. Adiáke-pac' i keréla tuménge Dad Miro Bolybnáskiro, kóli kažno tuméndyr na primangela iléstyr péskire pšaléske.” I sys adiáke: kiéli Isúso pirijaciá te rakirél dalé lavá, Jov gijá krig Galilejatyr i javdiá pe štéty Judejákire pe javír Iordanoskire – rekakiri (leniakiri) rig pe Iordáno; i but manušá giné pal Léste, i Jov vysastiakirdiá len. I podginé ke Jov Farisiéi i propatiakirenas Les i phučenas: “Ci pal kažno réndo (diélo) saštý (možna) manušéske te rozlydžalpe péskire romniasia? I Jov otphendiá, rakirí: “Naúšto na gindlé tumé, so Devél dro anglypén (načalo) svetoskiro sozdyjá len muršesa i džuvliása? I phendiá: ‘Paldavá mekéla manúš dadés i da i prijačela ke péskiri romný, i javéna jone syr jekh loč (plot'); adiáke so jone uže na dujdžiné, a jekh loč? So Devél čhudiá khetané, mek manúš te na rozlydžal.” Jone rakiréna Léske: “Sóske ž Mójza priphendiá te čhinel lyl pal rozgiiben te otmekél romniá.” Jov rakiréla lénge: “Mójza dyjá vólia tuménge te otmeken romniá pal tumaré xoliamé ile; ne angíl davá adiáke na sys. Ne, Me phenáva tuménge: kóli vari-kon mekéla peskirjá romniá na pal bléndo i léla javirja, odová keréla biladžaipén.” Phenéna Léske sykliaibnýtka: “Ne kóli dasavo patiaibén isyn maškír romeste i romniáte, fedýr te na lespe sarésa.” Jov ža phendiá lénge: “Na saré ĥaljona dalé lavá, ne jekh kodolé, konéske dynó; pal-dová so isyn skopcy, savé isyn dasavé dákire bijanypnastyr; ne isyn kodolé, savén manušá kerdé dasavenca; i isyn muršá, savé na lenape vaš Kralipén, Savó isyn dro Bolybnáskiro Rajo. Kon moginéla te ĥaljol, mek te ĥaljol.” Tén'ci jandlé bijatén ke Jov, sob (kaj) Jov te čhuvél vastá pe šeró lénge i te pomangelpe; ne sykliaibnýtka na mekenas len. Ne Isúso phendiá: “Mekén bijatén i na terdjon pe drom lénde te javén ke Me; pal-dová so Kralipén dro Bolybnáskiro Rajo javéla vaš adasavé manušénge, savé isyn syr kadalé bijaty (čhavoré)”, i syr Jov čhudiá vastá pe šeró lénge bahtiakiribnasa, to gijá odothýr. I, ake, podgíia vari-savó manúš ke Jov i phendiá: “Sykliakiribnáskiro! Savó lačhipén mánge trej te keráv, sob (kaj) te del Devél mánge viéčno džiibén?” I Jov phendiá léske: “Sóske tu phučesa Mándyr pal lačhipén? Jekh Devél isyn lačhó. Ne kóli túke isyn drógo viéčno džiibén Devléstyr, tedy ker pir priphenybená.” Jov rakiréla Léske: “Save?” I Isúso phendiá: “Na zamar (na umar), na ker biladžaipén, na čor, na de xohanó dophenybén, kutiakir péskire dadés i da; i sykáv patýv péskire pašatuné manušéske, syr kokoró péske.” Rakírla Léske tyrno manúš: “Davá saró me kerdjom; so iščo (inké) na uhtýlla (nádosi) mánge?” Isúso phendiá léske: “Kóli túke isyn pir iló te javes bidošakiro, džá, bikin saró, so isyn túte, i rozde bogenge, sob (kaj) te javél túte kučipén dro Bolybnáskiro Rajo; jav’ i džá Mánca.” Ne kiéli tyrno manúš šundiá davá, jov gijá krig pharipnasa pe iló, pal-dová so léste sys baró barvalypén. I phendiá Isúso Péskire sykliaibnytkonénge: “Čačes, Me rakiráva tuménge: pharó javéla barvaleske te zadžál dro Kralipén dro Bolybnáskiro Rajo; i iščo (inké) Me phenáva tuménge: lokhedýr javéla vierbliudoske te prodžal pir suvjakiro kanoro, syr barvaleske te zadžál dro Kralipén dro Bolybnáskiro Rajo.” I kiéli sykliaibnýtka šundlé davá, jone drieván divindlépe, phení: “Kon tedy moginéla te zrakhelpe?” I syr Isúso podykhciá pe lénde, tedy phendiá: “Manušá na moginéna kokoré te zrakhen pes; jekhe Devléste isyn zor pe saró.” Tén'ci Pétri otphendiá i phendiá: “Gada, ame saró jačkirdiam i gijam Túsa, so javéla aménge?” I Isúso phendiá lénge: “Čačes, Me rakiráva tuménge: tumé, savé giné Mánca dro nevó svéto, savó Devél keréla, kiéli bešéla Čhavó Manušéskiro pe slavútno priestolo, tedy bešena adiáke-pac' i tumé pe dešudúj trony, sob (kaj) te sendinén dešudúj ródy Izrailjoskire. I kažno, kon mekciá kherá ci pšalén, ci phenien ci da, ci romniá, ci čhavorén, ci féldy vaš Miro lav, doreséla dre šel móly butýr i léske javéla dynó viéčno džiibén. But ža anglatuné javéna palatuné, a palatuné javéna anglatuné. Pal-dová so Kralipén dro Bolybnáskiro Rajo isyn sýrby felatiniakiro xulái, savó gijá javrí pe zlóko te kharel butiarnen dro péskiro vinagrádniko (drakhin). I kiéli jov dorakirdiape butiarnenca pir dinarijo pal dyvés, tedy jov bičhadiá len dro péskiro vinagrádniko. I gijá javrí jov dre tríto mardó (štúnda) i dykhciá javire manušén, savé sys terdé pe targoskiro štéto bi butiakiro; i jov phendiá lénge: ‘Džán i tumé dro miro vinagrádniko, i so, čačes, javéla mol, me pleskirava tuménge.’ I giné jone. I nevéstyr gijá javrí jov pašé šóvto i jeniáto (bijekhéskiro déšto), i kerdiá adia-pac'. I gijá javrí jov pašé dešujékh mardé (štundy), lathiá javirén, savé sys terdé bi butiakiro, i rakírla lénge: ‘So da tumé terdé saró dyvés bi butiakiro?’ Jone rakirna léske: ‘Pal-dová so nikón amen na lyjá pe butý.’ Jov rakírla lénge: ‘Džán i tumé dro miro vinagrádniko, i so, čačes, javéla mol, me pleskirava tuménge.’ Syr javdiá bel'vél', rakírla felatiniakiro xuláj péskire barydyréske pe vinagrádniko: ‘Khar butiarnen i pleskir lénge, le kodolén, savé javné palatuné i ke dolé, savé javné pérva.’ I kodolé, savé javné pašé dešujekh mardó (štúnda), doresné kažno pir dinarijo. I kodolé, savé javné pe butý pérva, dumindle, so jone doreséna butýr, ne doresné adiáke-pac' pir dinarijo. I kiéli jone doresné (dolyne), tedy lyné te rakirén xoliása tel nakh pe xulaste, rakirí: ‘Kadalé, savé javné palatuné, kerdé butý jekh mardó (štúnda), i tu adákicy pleskirdian lénge, syr aménge, savé pirilydžijam pharipén i dyvesýtko xačkiribén.’ Ne Jov otphendiá jekhéske léndyr: ‘More, me na keráva túke xohaibén; tu ž dorakirdianpe mánca pal dinarijo? Le péskiro i džá. Me ž kamám te dav adákicy palatuneske, syr túke: so ž naštý mánge te keráv, so isyn miro, syr me kamám? Ci jakh tyrí kaméla butýr, pal-dová so me som lačhó?’ Adiáke javéla, so palatuné javéna anglatuné, a anglatuné javéna palatuné: paldavá so but isyn manušá, savén khardé, ne nábut vykedyné.” I syr Isúso skedyjape te džal dro Jerusalimo, Jov khardiá dre rig dešudujen sykliaibnytkonén i phendiá lénge pir drom: “Ake, ame zadžasa dro Jerusalimo, i Čhavó Manušéskiro javéla zdyno rašángire barydyrénge i lylvaritkonenge, i jone zasendinena Les pe meribén; i zdena Les Najudénge pe saben i maribén čupniasa i primariben pe trušúl i pe tríto dyvés Jov otdžidjola.” Tén'ci gijá pašyledýr ke Jov Zaviediejoskire-čhavengiri daj péskire čhavénca, i klonindiape i pomangdia vari-so Léstyr. Jov ža phendiá láke: “So tu kamésa?” Joj ža rakiréla Léske: “Phen, sob (kaj) te bešén kadalé duj miré čhavé jekh pir čačó vast i javír pir zérvo vast dro Tyró Kralipén.” I otphendiá láke Isúso, rakirí: “Tumé kokoré na džinéna, so tumé mangena. Tumé na moginéna te p'jen tahtáj (čaša), savó Me javáva te pjáv?” Jone rakiréna Léske: “Moginasa.” Jov rakiréla lénge: “Tumé javéna te p'jen Miro tahtái, ne bešén pir čačó i zérvo vast Mándyr-davá isyn na dre Mirí zor, dalé štéty isyn kodolénge, konéske Dad Miro prigotovindia” I kiéli javír deš sykliaibnýtka šundlé pal davá, jone zoralés xoliasyne pe dujende. Ne Isúso khardiá len sarén ke Pe i phendiá: “Tumé džinéna, so Najudengire-theméskire barydyrá rikirna zor pe lénde, i léngire barydyrá xulainena pe lénde. Mek te na javél adiáke maškír tuménde, ne kon kaméla te javél naj baredýr manúš maškír tuménde, mek te javél dynári (sluga) tuménge; i kon kaméla te javél pérvo maškír tuménde; mek te javél sluga (dynári) tuménge; adiáke syr Čhavó Manušéskiro javdiá na vaš dová, sob (kaj) Léske te dynarinél, ne sob (kaj) Jov te dynarinél i te otdél Péskiro džiibén, syr vykinybén pal butende.” I syr jone džánas krig Jerihonostyr, but manušá džánas pal Léste. I, ake, duj kororé manušá, savé sys bešté pašýl drom, syr šundlé, so Isúso džála pašé lénde, lyné te den gódla: “Potangine (požalin) amen, Rajo Dévla, Čhavó Davidóskiro.” Ne manušá priphendle lénge, sob (kaj) jone te javén štyl, ne jone zoraledýr dénas gódla: “Rajo Dévla, potangine amen, Čhavó Davidóskiro.” Isúso terdijá, khardiá len i phendiá: “So tumé kaména, sob (kaj) Me te keráv tuménge?” Jone rakiréna Léske: “Rajo Dévla, sob (kaj) te otkerenpe amaré jakhá” I potangindia len Isúso, čiladiá léngire jakhá; i jekhátyr (srázu) jone lyné te dykhén i giné Lésa syr sykliaibnýtka. Syr jone podginé pašyledýr ke Jerusalimo, i javné dre Vifagija pašýl Olivítko (Jelieonoskiri) bérga, Isúso bičhadiá dujén sykliaibnytkonén, phení lénge: “Džán dro gav, savó isyn angíl tuménde, i jekhátyr tumé lathéna oslicá (miegaricá), saví isyn priphandly, i osljonko isyn lása; otphanden len i janén len adarík. I kóli vari-kon phučela tuméndyr vari-so, tumé phenén: ‘Jone trej Ráske-Devléske,’ jov jekhátyr (srázu) bičhavéla len.” Davá isyn, sob (kaj) te kerélpe dová, so phendiá proróko: “Phenén džuvliáke Sionóstyr: ‘Áke, Králi tyró tradéla ke tu, tiho, Savó isyn beštó pe oslicate i osljonkoste, lákire tyknoreste.’” Sykliaibnýtka giné i kerdé adiáke, syr priphendiá Isúso, iandlé oslica i osljonkos, i čhudé upré uribén péskiro, i Jov besciá pe lénde. I but manušá čhuvénas péskiro uribén pe drom, i javír sčhinenas randiá (vétki) kaštendyr i čhurdenas pe drom. I manušá, savé džánas angíl i palál Isusóste, dénas gódla radymása: “Asanna, Čhavéske Davidoskireske: te javél bahtiakirdó, Savó džála vaš lav Devléskiro; asanna dre upratunende!” I kiéli Jov javdiá dro Jerusalimo, baró dívo uhtyldia saró fóro i manušá phučenas: “Kon da isyn Adasavó?” I rakirdé manušá: “Davá isyn proróko Isúso Galilejakire Nazarietostyr.” I Isúso gijá andré Khangirí i tradyjá javrí sarén, savé biknenas i kinenas dre Khangirí i obriskirdia skaminda paruibnar'jengire i štéty kodolengire, savé biknenas golumben. I Jov phendiá lénge: “Isyn čhindló: ‘Miro kher javéla te kharelpe ‘mangipnytko kher’: tumé kerdé léstyr rozmaribnar'jengiri kirčyma.” I kororé i langale manušá podginé ke Jov dre Khangirí, i Jov vysastiakirdiá len. I kiéli rašángire barydyrá i lylvarítka dykhné dívy, savé Jov kerdiá, i bijatén, savé dénas gódla: “Asanna Čhavéske Davidoskireske”, jone xoliasonas, i phendlé Léske: “Tu šunesa, so jone rakiréna?” I Isúso phendiá lénge: “Čačó! Naúšto tumé na gindlé: bijatorengire uštendyr i kolynytkone tyknorendyr Tu kerdián Péske šaribén?’” I Jov mekciá len, i gijá javrí foróstyr ke Vifanija i rat'kirdia odój. Pe zlóko že, risii dro fóro, Jov bokhalyja. I dykhciá Jov inžyritko kašt pašýl drom, podgíia ke jov, i nisó na lathiá pe davá kašt (drévo)-jekh patria (listy), i phendiá pe kašt: “Te na javél nijékhvar barjakirdó (plódo) tútyr!” I inžyritko kašt adáj ža zašutija. I dykhí davá, sykliaibnýtka rakirdé divosa: “Syr da jekhátyr (srázu) inžyritko kašt zašutija?” I Isúso otphendiá lénge: “Čačes, Me rakiráva tuménge: kóli javéla tuménde patiaibén i tumé na kuninenape, to keréna na so jekh inžyritkone kaštesa, so sys lésa, a, kóli phenéna dalé bergake: ‘Džá štetóstyr i čhurdepe dro mórjo (derjáv), i javéla’, i saró, so tumé te na pomangen patiaibnása, tumé doreséna.” I kiéli Jov zagijá andré Khangirí, rašángire barydyrá i godephuré podginé ke Jov, kiéli Jov sykliakirelas i phučné Léstyr: “Save pravosa Tu kerésa saró davá? I kon dyjá Túke dasavo pravo?” I Me phučava tuméndyr pal jekh: “Kóli phenéna Mánge, tedy i Me phenáva, savé pravosa Me keráva: ‘Katýr sys Ianoskiro boldeipen? Bolybnástyr, ci manušéndyr?’” Jone ž pirirakirde maškír péste: “Kóli ame phenása so ‘bolybnástyr’, Jov tedy phenéla: ‘Sóske ake tumé na patiandyné Léske?’ Ne kóli ame phenása: ‘Manušéndyr’, ame darása manušéndyr; pal-dová so saré ginéna Ianos pal prorokoste” I jone phendlé Isusóske dro otphenybén: “Na džinása.” Phendia i Jov adiáke-pac' lénge: “I Me na phenáva, savé pravosa Me keráva davá.” “Ne so tumé duminéna pal dasavo primiéro (sykaibén)? Manušéste sys duj čhavé, i jov javdiá ke pérvo i phendiá: “Čhava miro, džá adadyvés, ker butý dro vinagrádniko.” I odová čhavó otphendiá: “Na kamám”, ne korigedýr (pozžedýr) priĥalyja péskiri bang i gijá. Jov ža otphendiá: “I gijá dad ke javír čhavó i phendiá davá-pac'.” Kon dujendyr kerdiá pir dadéskiri vólia?” Jone rakirna: “Pérvo.” Rakírla lénge Isúso: “Čačes, Me rakiráva tuménge: ‘Mytoskire skedyibnarja i biladžakuné džuvliá zadžána dro Devléskiro Kralipén angledýr tuméndyr. Pal-dová so Iáno javdiá ke tumé te sykavél čačunó drom, i tumé na patiandyné Léske; ne mytoskire skedyibnarja i biladžakuné džuvliá patiandyné léske; tumé ž, syr dykhné, i korigedýr na risiné péskire grehéndyr ke Devél, sob (kaj) te patián Léske.’ Šunén javír sykaibén: ‘Jekh manúš, kheréskiro xulái, čhudiá vinagrádniko i tyno pašýl léste, vyĥanadia ĥanbín te tasavel mol (vino) i kerdiá vučardý (vyška) vaš rakhiben i otdyjá les vinagradar'jenge, a kokoró gijá péske. I syr podgíia časo te keden barjakirdé (plódy), jov bičhadiá peskiren pishar'jén ke vinagradarja te lel péskiri paš aplodostyr I vinagradarja uhtyldé léskire pishar'jén: konés mardé, konés muliakirdé, ne vari-konés šuliakirde barénca. Nevéstyr jov bičhavéla javire pishar'jén butydyr kodolendyr, i vinagradarja kerdé adiáke-pac' lénca. I tedy bičhadiá jov ke jone péskire čhavés, rakirí: ‘Ake, jone na čilavena miré čhavés.’ Ne vinagradarja, syr dykhné čhavés, phendlé jekh jekhéske: ‘Áke, isyn odová, kon doreséla meknó mištypén (nasliedniko), javén, zamarasa les, i zakedasa léskiro meknó mištypén;’ i lyné les, čhurdyné les javrí vinagradnikostyr i zamardé. Pal-dová, kiéli javéla vinagradnikoskiro xulái, so jov javéla te kerél adalenca vinagradar'jenca?” Rakiréna Léske: “Jov domarela xoliames adalen zlydnitkone manušén i vinagrádniko zdela javire vinagradar'jenge, savé javéna te otdén léske barjakirdé (plódy) dro aplodoskiro časo.” Isúso rakiréla lénge: “Ci gindlé tumé vari-kiéli dro Svénto Čhinybén: ‘Bar, savó na prilyné butiarné, savé čhuvénas kherá, jaciá šeralé baresa vaš saró keriben: ake, jaciá saró Devléstyr, i davá isyn divno dre amaré jakhá?’ Paldavá rakiráva tuménge: ‘Kralipén Bolybnáskiro lélape krig tuméndyr i délape manušénge, savé léna te barjakirén patiaibnytka barjakirdé. I kon peréla pe davá bar, rozmarelape pe kokalý, ne pe konéste jov peréla, rostasavela kodolés pe kokalý.’” I kiéli šundlé rašángire barydyrá i Farisiéi primiery (sykaibena), jone ĥalyné, so Jov rakirdiá pal lénde. I jone dumindle te uhtylén Les te muliakirén, ne darándyne manušéndyr, pal-dová so jone ginenas Isusós pal prorokoste. I otphenélas lénge Isúso i rakirdiá sykaibnenca: “Kralipén dro Bolybnáskiro Rajo isyn sýrby králi, savó kerdiá bjav péskire čhavéske, i bičhadiá péskire dynar'jén te kharén odolén, savén khardé pe bjav: i jone na kamlé te javén. Nevéstyr jov bičhadiá javire dynar'jén, rakirí: ‘Phenén odolénge, savén khardé: ake me kerdjom xabén; guruva i thule kherítka murdalá začhindlé, i saró isyn kerdó, javén pe bjav.’ Ne jone na prilyné léskire lavá dre godý, giné, kon pe félda, kon te kofarinel; i sys adasavé, savé uhtyldé léskire dynar'jén, ladžakirdé len i muliakirdé,. I kiéli králi šundiá pal davá, drieván xoliásyja, i jov bičhadiá péskire xaladén i jone muliakirdé kadalé zamaribnar'jen i xačkirdé telé fóro. Tén'ci jov phendiá dynar'jénge: ‘Bjavitko skamínd isyn skedynó, ne savén khardé, na sys mol; džán že pe trušulytka dromá, kaj dromá zdžanape, i kicý manušén tumé lathéna, adákicy kharén pe bjav.’ I giné péske odolé dynárja pe baré dromá i skedyné sarén, konés lathné: i čoren i lačhen; i bjavitko kher sys pherdó manušénca, savé bešenas pašýl. Ne kiéli králi gijá andré, kaj manušá sys bešté, jov dykhciá jekhe manušés, savó na sys uridó, syr trej pe bjav, i jov phendiá léske: ‘More? Syr tu gíian adarík dro uribén, so isyn na vaš bjav?’ I jov sys štyl. Tén'ci králi phendiá dynar'jénge: ‘Phanden léske vastá i ĥerá, i čhurdén les javrí dro ciamlypén (kalypen), odój javéla roibén i dandengiri skriežyma.’ Pal-dová so isyn but, savén khardé, ne isyn nábut, savén vykedyné.” Tén'ci Farisiéi giné i dorakirdepe, syr te uhtylén Les dro lav. I jone bičhadé ke Jov péskire sykliaibnytkonén khetané Irodianenca te phučén Léstyr: “Sykliakiribnáskiro! Ame džinása, so Tu san čačunó i sykliakiresa pal drom ke Devléskiro čačipén, na dykhí pe manušéskiro štéto maškír javire manušénde, i Tu na daresa nikonestyr, so Tu na dykhésa pe léskiro štéto maškír manušénde; tedy phen aménge, syr Tu duminesa: ci isyn pir Zakóno te pleskiras namirja (podat') kiesarjoske ci nad?” Ne Isúso džindiá léngiri dujemuitkima i phendiá: “Sóske tumé Man kaména te propatiakiren, dujemuitka? Sykavén Mánge ĥasprin (kapieika), savjása tumé pleskirena namirja (podat')!” I jone jandlé Léske dinarijo. I Jov rakiréla lénge: “Konéskiro muj i lav isyn vyčhindlé adái?” Jone phendlé: “Kiesarjoskiro.” Tedy Jov rakiréla lénge: “Otdén že kiesarjoskiro Kiesarjoske, a Devléskiro Devléske.” I kiéli jone šundlé davá, dynepe divoske i giné krig Léstyr. Dro dová-pac' dyvés podginé ke Jov Sadukiei, savé rakiréna, so nane otdžidyipen meribnástyr, i phučné Léstyr, rakirí: “Sykliakiribnáskiro! Mójza (Moisiejo) phendiá: ‘Kóli manúš meréla, i na sys léste čhavorén, mek léskiro pšal te lel léskire romniá paloróm, sob (kaj) te riskirél pale mulé-pšaleskiro ródo.’ Ake, sys aménde eftá pšála: phuredýr pšal syr lyjape, myjá bi čhavorengiro i mekciá jov peskirjá romniá péskire pšaléske; i adiáke sys javiresa, tritonesa ke eftáto. Pal lénde sarénde i myjá džuvlý. Syr javéla otdžidyipen meribnástyr, konéskiri romný joj iavéla eftandyr? Pal-dová so joj sys paloróm pal sarénde.” Ne Isúso otphendiá i phendiá lénge: “Tumé denape dukhá, pal-dová so na džinéna ni Svénto Čhinybén, ni zor Devléskiri. Pal-dová so, syr javéla otdžidyipen meribnástyr, na javéna te lenpe i te vydžán paloróm, a javéna syr Jangóly dro Bolybnáskiro Rajo. Ne pal otdžidyipen meribnástyr, naúšto tumé na gindlé, so Devél phendiá tuménge: ‘Me som Avramoskiro Devél, i Isakóskiro Devél, i Jakovóskiro Devél’? Jov isyn Devél džidé-manušéngiro, a na mulengiro.” I kiéli manušá šundlé davá, jone divindlépe pe Léskiro sykliakiribén. I kiéli Farisiéi šundlé, so Jov začhudia Sadukiejen te javén štyl, skedynépe pašýl Léste. I jekh léndyr, Zakonoskiro sykliakiribnari, phuciá Léstyr, sob (kaj) te propatiakiren Les: “Sykliakiribnáskiro, savó isyn naj baredýr priphenybén dro Zakóno?” I Jov phendiá léske: “Rikir syr Drógima Ras-Devlés tyrés saré ilésa peskiresa i saré tyré duhósa, i saré tyré godiása.” Davá isyn naj baredýr i pérvo priphenybén. Javír isyn dasavo syr pérvo: ‘Sykáv patýv péskire pašatuné manušéske syr kokoró péske.’ Pe kadalé duj priphenybená rikirélape saró Zakóno i prorokengiro sykliakiribén.” I kiéli Farisiéi skedynépe, Isúso phuciá léndyr: phení: “So tumé duminéna pal Xristosóste? Konéskiro Čhavó isyn Jov?” Jone rakiréna Léske: “Davidóskiro.” Jov rakiréla lénge: “Syr tedy Davído, syr léske uphendia Dúho (Fáno), khardiá Les’ Rajo Dévla’, rakirí: ‘Phendia Raj Devél Ráske-Devléske miréske: ‘Beš pir čačó vast Mándyr, angíl, syr Me čhuváva vergén tel ĥerá Tyré?’ Kóli tedy Davído khardiá Les ‘Rajo Dévla’, syr ža Jov isyn čhavó léskiro?” I nikón na mogindiá te otphenel Léske ni lav, i dolé dyveséstyr nikoneste butýr na sys muršypen te phučel Léstyr butýr. Tedy Isúso phendiá manušénge i Péskire sykliaibnytkonénge: “Pe Mojzáskiro štéto sykliakiréna lylvarítka i Farisiéi; paldavá saró, so jone phenéna, kandén i kerén saró, a na kerén, syr jone keréna; pal-dová so jone na keréna dová, so jone sykliakiréna, i jone phandena khetané baré pharipena i čhuvéna len pe manušéngire psiké, a kokoré na kaména i anguštesa te den vast lénge. Ne saró, so jone keréna, – davá vaš dová, sob (kaj) len te dykhén manušá: jone buĥliakirena pharty (lienty) pe čikat i pe vast mangipnytkone lavénca i barjakirena bryndy (fal'bonki), i vykedena naj fededýr štéty pal khardé skaminda i anglatuné štéty dre sinagogi, sob (kaj) manušá te den ‘paklono’ lénge pe targitka štéty i te kharén len ‘Ravvi’; ne mek nikón te na kharel tumen ‘Ravvi’; pal-dová so aménde isyn jekh Sykliakiribnáskiro, tumé ž san pšála maškír péste. I nikonés pe phuv te na kharén ‘dadésa’, pal-dová so tuménde isyn jekh Dad, Savó isyn dro Bolybnáskiro Rajo. I te na kharén tut ‘sykliakiribnáskiro’; pal-dová so isyn jekh tuménde Sykliakiribnáskiro Xristóso. I kon baredýr tuméndyr pir štéto maškír manušénde, mek te javél dynári tuménge. Ne dová, kon ĥazdéla pes, les Devél čhuvéla teledýr, a kon čhuvéla pes teledýr, kodolés Devél ĥazdéla vučedýr. Bida tuménge, dujemuitka lylvarítka i Farisiéi, savé začhakirena vudará dro Kralipén dro Bolybnáskiro Rajo angíl manušénde; pal-dová so tumé kokoré na zadžána, i tumé san terdé pe drom odolénde, savé kaména te zadžán. Bida tuménge, dujemuitka lylvarítka i Farisiéi, so tumé obhana pivliengire (udovengire) kherá i pefromi ĥará (dlúges) mangénape Devléske: pal davá tuménge javéla pharí kára. Bida tuménge, dujemuitka lylvarítka i Farisiéi, so tumé prodžána mórjo (derjáv) i phuv, sob (kaj) te riskirén jekhe manušés te patial Najudendyr: i kiéli jov priléla lav, tedy keréna léstyr kadasaves, savó dre duj móly isyn butýr mol te džal dro liúno (ado), syr tumé san. Bida tuménge, kororé lydžaibnáskire, savé rakiréna: ‘Kon sovlahala khangirjasa, davá isyn nisó; ne kon sovlahala khangirjákire suvnakása, kodová manúš isyn bangó te kerél pir lav.’ Tumé san bigodiakire i kororé, so isyn kučedyr: suvnakáj ci khangirí, saví svenciakirela suvnakái? I, ‘kon sovlahala altarjosa nisó, ne kon sovlahala sventoné dyibnasa, kodová isyn bangó te kerél saró.’ Tumé san kororé manušá! So ž isyn kučedyr: svénto dyibén ci altárjo, kaj svénto dyibén svenciakirelape vaš Devléske? Paldavá, kon sovlahala altarjosa, sovlahala sarésa, so manušá čhudé pe altárjo; I kon sovlahala khangirjasa, sovlahala lása i Kodolesa, Kon dživéla dre khangirí. I kon sovlahala Bolybnáskire Rajosa, sovlahala Devléskire štetosa, kaj Devél xulainela, i Lésa, Savó isyn beštó pe davá štéto. Bida tuménge, dujemuitka lylvarítka i Farisiéi: pal-dová so tumé déna déšto miéra miatatyr, ukropostyr, kminostyr, ne tumé na kutiakirena dová, so butýr trej dro Zakóno: čačunó séndo i tangipén i patiaibén: davá treindiá te kerén i adiáke-pac' te na bistren pal javír. Tumé san kororé lydžaipnarja, savé piricedinena dzyndzaris (komaros), ne nakhavena vierbliudos! Bida tuménge, dujemuitka lylvarítka i Farisiéi: pal-dová so tumé žužakirena tahtáj (čaša) i čaró javriestyr, ne andrál jone sykavéna tumarí bokh ke čúžo mištypén i skvapnyma. Tu san kororó Farisiejo! Angíl vyžužakir andrál tahtáj i čaró, sob (kaj) te javén žužé javriestyr. Bida tuménge, dujemuitka lylvarítka i Farisiéi: pal-dová so tumé san syr koplicy, savé isyn parniakirde i savé isyn goža javriestyr, ne andrál jone isyn pherdé kokalenca mulé manušéndyr i saré džungalypnasa (brydkimasa). Adiáke-pac' tumé javriestyr sykadjona syr patiaibnytka manušá manušénge, ne andrál tumé san dujemuitka i drieván grehítka. Bida tuménge, dujemuitka lylvarítka i Farisiéi, pal-dová so keréna koplicy prorokenge i gožakirena pomniki patiaibnytkonenge, i rakiréna: ‘Kóli ame dživasas dre amaré dadengíre dyvesá, ame na javasas malá odolénge, savé muliakirenas prorokén.’ Pir daja pričyna tumé dophenena pe péste, so tumé san kodolengire čhavé, savé muliakirenas prorokén: tedy končynen davá, so tumaré prapapy lyné te kerén. Tumé san sapa, ródo sapitko, syr tuménge te našén sendostyr dro liúno (ado)? Ake, paldavá Me bičhaváva ke tumé prorokén i god'varé manušén i lylvaritkonen; vari-savén léndyr tumé muliakirena i primarena pe trušúl, i javirén javéna te šuliakiren dre sinagogi i tradén štetóstyr pe štéto; paldavá mek te ginelpe pal tuménde saró rat patiaibnytkone manušéngiro, so tumé pročhude pe phuv: Avieljoskire patiaibnytkone ratestyr ke Zaharijoskiro rat, Varahijoskire čhavéskiro, konés tumé muliakirdé, maškír Khangirí i altárjo. Čačes, Me rakiráva tuménge: kadaj sarí kára javéla pe davá ródo. Jerusalime! Jerusalime! Dro savó muliakirenas prorokén i šuliakirenas barénca kodolén, savén bičhadé ke tu. Kicý móly Me kamám te skedav čhavorén tyrén, syr čirikly skedéla čirikloren tel phak i tumé na kamlé! Ake, kher tumaró mekelape čhučó (pusto) tuménge. Paldavá Me rakiráva tuménge: tumé na javéna te dykhén Man kadalé dyveséstyr angíl dová, syr tumé phenéna: ‘Bahtiakirdó isyn Odová, Savó džála vaš Devléskiro lav.’” I kiéli Isúso vygijá Khangirjátyr i kedelaspe te džal Péske, podginé ke Jov Léskire sykliaibnýtka, sob (kaj) te sykavén Léske saró keriben Khangirjákiro. Jov rakiréla lénge adiáke: “Dykhéna davá saró? Čačes, Me rakiráva tuménge: na jačélape adáj ni jekh bar pe bar, savó te na javél phagirdó.” I kiéli Jov sys beštó pe Olivítko bérga, podginé Léskire sykliaibnýtka ke Jov jekhdžine i phučné: “Phen aménge, kiéli davá saró javéla, i saví ĥiertýk (znamiénijo) javéla angíl, syr Tu javésa i vaš svetoskiro kónco (jagóro)?” I otphendiá Isúso i phendiá lénge: “Rakhénpe, sob (kaj) nikón te na xohavél tumen. Pal-dová, so but javéna Miré lavésa, rakirí: ‘Me som Xristóso,’ i xohavena but manušén. I tumé javéna te šunén pal maribén i rakiribena pal maribena. Dykhén, na strahadjon; saró davá trej te javél, ne davá iščo (inké) na kónco (na jagóro). Pal-dová so ĥazdénape manušá pe manušénde i kralipén pe kralipén, i bokha javéna, i meribnytka fránsy i phuv javéla te trinskirelpe pir štéty. Saró kadavá javéla angíl sýrby dukhá, dre savó nevó svéto bijandjola. Tedy javéna te zden tumen pe mén'ki i muliakirena tumen, i javéna te na sykavén patýv tuménge pal Miro lav. I but tuméndyr mekéna te patián, i javéna te zden jekh jekhés, i javéna te na sykavén patýv jekh jekhéske; i javéna but xohané proróki i xohavena but manušén; i pal-dová so javéla butýr čoripén, but manušá mekéna te sykavén patýv jekh jekhéske. Ne kon vyrikiréla saró ke kónco (ke jagóro), kodová zrakhélape. I javéla te phenelpe bahtalý zan (zvies') pal Devléskiro Kralipén pir saró svéto syr dophenybén vaš saré nácyi; i tedy javéla kónco (jagóro)! Paldavá, kiéli tumé dykhéna golotyniakiro džungalypén (brytkima), savó javéla te terdjol pe svénto štéto, so rakirdiá proróko Danijéljo, (kon ginéla, mek te ĥaljol), tedy kodolé, savé isyn dre Judéia, mek te našén dre bérgi; i kon isyn pe kherítko stréha (čhakín), mek te na džal telé te lel vari-so kheréskire mištypnástyr, i kon isyn pe félda, mek te na risjol pale te lel péskiro uribén. Mén'ki javéna tedy perale džuvlienge, i džuvlienge, savé čaravena kolynesa tykné bijatén dre dolé dyvesá. Mangénpe Devléske, sob (kaj) te na javél trej te našén ivanta(tes)kiro (zimakiro) ci savatoné (subotoné): pal-dová so tedy javéla dasaví bibáht, saví na sys svetóskire anglypnástyr, i so butýr na javéla nijékhvar; I kóli dalé dyvesá te na javénas krotkedyr, nikón džidendyr na zrakhelaspe; ne vaš manušénge, savén Devél vykedyjá, javéna krotkedyr dalé dyvesá. Tén'ci, kóli vari-kon phenéla tuménge: ‘Ake, isyn Xristóso’ ci ‘odój’, na patián. Pal-dová so javéna xohané xristosy, xohané proróki i jone sykavéna baré ĥiertyká i keréna dívy, sob (kaj) te xohaven až kodolén, savén Devél vykedyjá, kóli saštý javéla. Ake, Me tuménge angilphendjom. Paldová, kóli jone phenéna tuménge: ‘Áke, Jov isyn pe čhučé prahi’, na džán javrí; kóli jone phenéna: ‘Áke, Jov isyn dro andratuný štúba’, na patián. Pal-dová so, syr bliskavica džála vastokóstyr i jasnedyr javéla ke zapado, adiáke javéla Čhavó. Kaj javéla trúpo, odój skedénape orly (kidy). I jekhátyr (srázu) paló daja pharí bída dre dolé dyvesá kham murdjola, čhon na javéla te svencynel, i čergeniá peréna bolybnástyr, i bolybnáskire zorja javéna triinskirde I tedy sykadjola ĥiertýk pe bolybén, saví déla manušénge džinybén, so javéla Čhavó Manušéskiro, i tén'či saré manušýtka ródy javéna to rovén pharés i dykhéna Čhavés Manušeskires, Savó javéla te džal telé dre óbloki baré zorjása i jarkone Devléskire slavása. I bičhavéla Jov Péskire Jangolen baré rogosa (trubasa), i skedéla khetané, konés Jov vykedyjá, štaré rigéndyr i jekhe bolybnytkone jagoróstyr (krajostyr) ke javír. Sykljon sykaibén (primiéro) inžyritkone kaštéstyr: kiéli léskire randiá (vétki) jačénape kovlé i mekéna patria (listy), džinén, so syg javéla lynaj. Adiáke-pac' i tumé, syr javéna te dykhén, so saró davá kerélape, džinén, so Jov isyn nádur, pašýl vudará. Čačes, Me rakiráva tuménge: na prodžála davá manušýtko ródo angíl dová, syr saró davá kerélape. Bolybén i phuv prodžána, a lavá Miré na prodžána. Ne nikón na džinéla ni dyvés, ni mardó, kiéli saró davá javéla, ni bolybnáskire Jangóly, ni Čhavó, a jekh Dad džinéla. I, syr sys dre dolé dyvesá, kiéli sys Nojo, adiáke-pac' javéla Čhavó Manušéskiro. Paldavá so, syr angíl potopo manušá xané i piné, lynepe i džánas paloróm angíl dová dyvés, dro savó Nojo zagijá dro kovčego, i na ĥaljonas, paka jaciá patopo i na lydžyja pésa len sarén, adiáke-pac' javéla Čhavó Manušéskiro. Tedy javéna duj manušá pe félda: jekhés Raj Devél léla, javirés jačkiréla, ci duj džuvliá, so mielinena žernovone barénca (beledinienca): jekha Raj Devél léla, javirja jačkiréla. Rakhénpe, pal-dová so na džinéna, kiéli javéla tumaró Raj Devél. Tumé ž džinén davá, so, kóli kheréskiro xuláj džinelas, kiéli ratý javéla čor, jov na javélas sutó i na délas, sob (kaj) čor te pod'ganavelpe tel léskiro kher. Paldavá javén tumé adiáke-pac' skedyné, pal-dová so Čhavó Manušéskiro javéla dre dasavo mardó (štúnda), so tumé na duminéna. Kon tedy isyn patiaibnýtko i god'varó pishári, konéske léskiro xuláj dyjá zor pe léskire butiarnende, sob (kaj) te del te xal lénge dro časo, savó trej? Bahtaló isyn kodová pishári, konéskiro xulái, syr javéla, lathéla, so jov keréla adiáke, syr isyn uphendló léske. Čačes, Me rakiráva tuménge: jov déla léske zor pe saró léskiro mištypén. Ne kóli adavá fuj pishári phenéla péske: ‘Miro raj zarikirelape’, i léla te šuliakirel péskire malen-pishar'jén, i xal i te p'jel matybnar'jenca, tedy javéla pishariskiro xuláj dro dová-pac' mardó (štúnda), pal savó jov na džinéla, i rosčingirela xuláj les pe paš i déla léske dasavo taláno, syr dujémuitkonenge: odój javéla roibén i dandengiri skriežyma. Tedy Kralipén dro Bolybnáskiro Rajo javéla sýrby deš patyvalé terné džuvliá, savé lyné ksilytka lampy i giné angle te streninen (te pirilen) Ternes. Pandž léndyr sys god'varé, pandž sys dylynin'ka. Dylynin'ka ža lyné péskire lampy, ne na lyné ksil pésa; Ne god'varé lyné ksil dre khoré khetané lampenca. Ne syr Ternó na javélas ĥará (dlúges), saré jone dyné lindra (zadriemindle) i zasutne. Ne dre paš rat sys godlyma: ‘Ĥáda, Ternó, džán javrí te streninen!’ Tén'ci saré patyvalé džuvliá uštine i podpravindle péskire lampy. Dylynin'ka ž phendlé god'varenge: ‘Den aménge nábut ksil tumaró, pal-dová so amaré lampy murdjona syg.’ Ne god'varé otphendlé, rakirí: ‘Nad, sob (kaj) te na uhtylel (nádosi) ksil aménde i tuménde. Džán fedýr ke bikiibnarja te kinen péske!’ I paka jone psirenas te kinen, javdiá Ternó, i kodolé, savé isyn skedyné, zaginé lésa khetané pe bjav; i vudará zaphandlepe. Korigedýr (pozžedýr) javénas javír patyvalé džuvliá, savé jačnépe, rakirí: ‘Rajo Dévla! Psirav (otphande) aménge: ne Jov otphenéla lavénca: ‘Čačes, Me rakiráva tuménge, Me na džinóm tumen.’ Paldavá javén pe stréga, na soven, syr tumé na džinéna ni dyvés, ni mardó (štúnda).” I Kralipén dro Bolybnáskiro Rajo javéla sýrby manúš, savó tradelas krig, i savó khardiá péskire pishar'jén i zdyja lénge pe patýv péskiro mištypén. I jekhéske jov dyjá pandž talánty, javireske duj, iščo (inké) jekhéske jekh, kažnonéske pir léskiri zor, i tradyjá kheréstyr. I gijá jekhátyr kodová, savó doresciá pandž talánty i kofarindia lénca i zakerdia iščo (inké) pandž talánty. Adiáke-pac' kodová, savó doresciá duj talánty, zakerdia iščo (inké) duj talánty. Ne kodová, savó doresciá jekh, gijá i zaĥanadia dre phuv i garadia léskire xuláskire lové. I pir but dyvesá, javélas xuláj kadalé pishar'jengiro i trebinela léndyr otphenybén pal lové. I podgíia pishári, kon doresciá pandž talánty, jandiá javír pandž talánty, i phendiá: ‘Rajo, tu mánge dopatiandyjan pandž talánty; ake, javír pandž talánty, so me zakerdjom!’ Léskiro xuláj phendiá léske: ‘Mištó, tu san lačhó i patiaibnýtko pishári, tu sánas patiaibnýtko nabaré lovenca; me dopatiava túke baré lové; jav i rádynpe khetané tyré xulása!’ Podgíia i pishári, kon doresciá duj talánty i phendiá: ‘Rajo, tu mánge dopatiandyjan duj talánty: ake, javír duj talánty, so me zakerdjom. Léskiro xuláj phendiá léske: “Mištó, tu san lačhó i patiaibnýtko pishári, tu sánas patiaibnýtko nabaré lovenca; me dopatiava túke baré lové: jav i rádynpe khetané tyré xulása.” Podgíia i pishári, kon doresciá jekh talanto i phendiá: ‘Rajo, me džináv, so tu san pharó manúš: sčhinesa odój, kaj na čhudián dre phuv, i skedesa odój, kaj na rosčhudian, i paldová me poddarandyjom i garadjom talanto dre phuv; ake, tyré lové.’ I otphendiá léske xulái: ‘Tu san bibahtaló i kirne-maséngiro pishári; tu džindian, so me sčhinava, kaj na čhudjom dre phuv, i skedáva, kaj na rosčhudjom? Paldová treindiá túke te des miro rup tel kófo kofar'jenge, i syr me risijom, me doresavas péskiro kofosa. Paldavá len léstyr talanto i den kodoléske, konéste isyn deš talánty: pal-dová so kažnonéske, savéste isyn, javéla butýr dynó, i léste javéla butýr, syr trej; ne kodolestyr, savéste nane, lélape léstyr dová, so isyn léste. I čhurdén javrí zlydnia pisharís dro ciamlypén javriestyr; odój javéla roibén i dandengiri skriežyma’ I kiéli javéla Čhavó Manušéskiro kralitkone slavása i saré Léskire Jangolenca, tedy Jov bešéla pe Léskiro slavútno trono; i angíl Léste skedénape saré nácyi, i Jov čhuvéla dre rigá jekhe javirendyr, syr čhupnári (pastuho) čhuvéla dre rigá bakrén buzniendyr, i Jov čhuvéla bakrén pir čačí rig, buznien pir zérvo (liévo) rig. Tedy phenéla Králi odolénge, savé isyn pir čačí rig Léstyr: ‘Javén tumé, savén Miro Dad bahtiakirdiá, javén i prilén Kralipén dro Bolybnáskiro Rajo, savó Jov skedyjá tuménge angíl, syr Jov sozdyjá svéto. Pal-dová so, kiéli Me sómas bokhalo, i tumé čaliakirde Man; kamdjom te pjáv i tumé dyné te pjáv, Me sómas čúžo manúš, i tumé prilyné Man, Me sómas bi uribnaskiro i tumé uridé Man; sómas nasvaló i tumé zaginé ke Me, sómas beštó i tumé javné te dykhenpe Mánca.’ Tedy patiaibnytka otphenena Léske, phení: ‘Rajo Dévla, kiéli ame dykhciam, so Tu sánas bokhalo, i čaradiam? Ci, syr Túte sys trébima te p'jes, i dyjam te p'jes? I kiéli ž dykhciam, so Tu sánas čúžo manúš, tedy ž prilyjam tut? Ci bi uribnaskiro, i uridiam že Tut? I kiéli ž dykhciam, so Tu sánas nasvaló, ci dro štaribén i javdiám že te dykhaspe Túsa?’ I otphenéla lénge Králi: ‘Čačes, rakiráva tuménge: ‘Dová, so tumé kerdé davá Miré pšalénge, savénde nane dasaví zor, tumé, xaj, kerdé Mánge.’ Tén'ci Jov phenéla kodolénge, savé isyn pe zérvo (liévo) vast Léstyr: ‘Džán krig Mándyr, prokošne, dre jag viéčno, so isyn skedyny vaš nalačheske i léskire Jangolenge: pal-dová, kiéli Me sómas bokhalo, i tumé na čarade Man, trebindia mánge te pjáv, i tumé na dyné te pjáv; Me sómas čúžo manúš i tumé na prilyné Man, Sómas bi uribnaskiro, i tumé na uridé Man, Sómas nasvaló i dro štaribén i tumé na javné te dykhenpe Mánca.’ Tedy otphenena i jone: ‘Rajo Dévla, kiéli ame dykhciam Tut, so Tu sánas bokhalo, ci syr túte sys trébima te p'jes, ci Tu sánas čúžo manúš, ci bi uribnaskiro, ci nasvaló ci dro štaribén i na dyjam vast Túke?’ Tedy Jov otphenéla lénge, phení: ‘Čačes, Me rakiráva tuménge: ‘Syr tumé na kerdé davá Miré pšalénge, savénde nane dasaví zor, tumé na kerdé i Mánge.’ I jone džána péske dre viéčna mén'ki, a patiaibnytka džána péske dro džiibén viéčno.” I sys adiáke: kiéli končyndia Isúso dalé lavá, Jov phendiá Péskire sykliaibnytkonénge: “Tumé džinéna, so javéla Patradí pir duj dyvesá i Čhavó Manušéskiro javéla zdyno pe primariben pe trušúl.” Tedy skedynépe rašángire barydyrá i godephuré dre rašángire barydyreskiri gréda (dvóro), savés khardé Kaiáfa, i khetané zrakirdepe te uhtylén Isusós frotymasa, i te muliakirén Les; ne jone rakirénas: “Naštý davá te kerás dro svénko, sob (kaj) te na ĥazdén manušá šumo godlenca.” Kiéli ž Isúso sys dre Vifanija dro kher Simonoskiro Prokazytkoneskiro, to podgíia ke Jov džuvlý, savjate sys alavastrytko khoró kučipnaskire mirósa i joj čhuvelas Léske pe šeró, syr Jov sys beštó pašýl skamínd. Ne kiéli sykliaibnýtka dykhné davá, jone xoliasyne, phení: “Vaš so davá te xasiakirél? Naúšto sys naštý te biknen davá pal baré lové i te rozden lové bogenge.” Ne Isúso džindiá, so jone rakirénas, i phendiá lénge: “Sóske tumé keréna pharó adalé džuvliáke? Joj kerdiá lačhó réndo (diélo) vaš Mánge. Paldová so bógi ŭsády (sak) isyn pašýl tuménde, ne Me na javáva ŭsády (sak) tuménca. Pal-dová so, kóli joj čhudiá davá miro pe masá Miré, joj kerdiá davá vaš Miro garaiben. Čačes, Me rakiráva tuménge: kaj by te na javél te phenelpe bahtalý zvies' pir saró svéto, javéla phendló pal dová, so joj kerdiá, syr ripiribén pal láte.” Tén'ci jekh dešudujendyr, savés khardé Juda Iskarioto, gijá ke rašángire barydyrá, i phendiá: “So tumé dénas mánge, kóli me zdava Les tuménge?” I jone vypleskirde léske trijánda rupune saste. I kodolé dyveséstyr Juda lyjá te rodél vakancyja (slučajo), sob (kaj) te zdel Les. Dro pérvo ž dyvés apriesnokengiro svénko giné sykliaibnýtka ke Isúso, rakirí: “Kaj Tu kamésa, sob (kaj) ame te kerás Túke Patraditko xabén?” Jov ža phendiá: “Džán dro fóro ke manúš i phenén léske: ‘Sykliakiribnáskiro rakiréla: Miro časo podgíia, Túte Me svenkinava Patradí Miré sykliaibnytkonénca.’” I sykliaibnýtka kerdé, syr Isúso priphendiá lénge, i kerdé Patradí. Kiéli javdiá bel'vél', Isúso besciá pal skamínd Péskire dešudujé sykliabnytkonenca. I kiéli jone xanas, Jov phendiá: “Čačes, Me rakiráva tuménge: Jekh tuméndyr zdela Man.” I jone pyné dro dúho (fáno), i lyné te rakirén Léske jekh pal jekhéste: “Čačes, davá na me, Rajo Dévla?” Jov ža otphendiá: “Kon čhudiá vast Mánca dro čaró, kodová zdela Man. Čačes, Čhavó Manušéskiro džála, syr isyn čhindló pal Léste, ne bída kodolé manušéske, savó zdela Čhavés Manušeskires; fedýr javélas vaš léske te na bijandjol.” I Juda, savó zdelas Les, otphendiá: “Ci davá na me, Ravvi?” Jov phendiá Léske: “Tu ž phendián!” I kiéli jone xanas, Isúso lyjá maró i bahtiakirdiá les i rosphagirdiá les i, syr dyjá sykliaibnytkonénge, phendiá: “Len, xan, davá isyn Miré masá.” I kiéli Jov lyjá tahtáj (čaša) i phendiá parikiriben Devléske, Jov dyjá Les sykliaibnytkonénge, phení: “P'jen Léstyr saré. Pal-dová so davá isyn Miro Rat zavietóskiro, savó isyn pročhudo pal butende vaš grehengiro otmekiben. I Me phenáva tuménge: Me na javáva dalé dyveséstyr butýr te pjáv aplodo dalé vinagradytkone xrustostyr ke/žýko dová dyvés, kiéli Me javáva te pjáv tuménca neví mol (vino) dre Miré-Dadéskiro Kralipén’” I kiéli jony bagandle šardytko gilý Devléske, to tedy giné pe Olivítko (Jelieonoskiri) bérga. Tén'ci rakiréla lénge Isúso: “Saré tumé Man mekéna dre daja rat. Pal-dová so isyn čhindló: ‘Me xasiakiráva Čhupnaris i rosprastanape bakré;’ ne paló davá, kiéli Me otdžidjovava, Me sygedýr tuméndyr javáva dre Galiliéia.” Ne Pétri otphendiá Léske dasavé lavénca: “Kóli i saré tumé mekéna Tut, me nikieli davá na keráva.” Phendia léske Isúso: “Čačes, Me rakiráva túke: adadyvés bel'veliakiro, angíl dová, syr bašno probagala, tu trin móly otphenesape Mándyr.” Rakiréla Léske Pétri: “I kóli Mánge javéla trej te merav Túsa, me na otphenavape Tútyr.” Adiáke-pac' phendlé i javír sykliaibnýtka. Tén'ci džálas Isúso lénca pe štéto, so khardé Giefsimanija, i rakirélas Péskire sykliaibnytkonénge: “Bešén kadaj, angíl dová, syr Me džáva te mangavpe Devléske odój.” I lyjá Jov Pésa Petris i dujén čhavén Zaviediejoskiren, i obuhtyldia Les bari túga i traš (dar). Tedy Jov rakiréla lénge: “Miro iló isyn pherdó meribnytkone tugasa (skorbiasa), javén adáj Mánca, na soven.” I Jov odgija nábut angíl, pyjá mósa pe phuv, mangdiápe Devléske i rakirdiá: “Dádo Míro, kóli saštý, mek prodžal davá tahtáj dre rig Mándyr; ne na adiáke, syr Mánge trej, a syr Túke trej.” I javélas Jov ke sykliaibnýtka i lathelas, so jone sys suté, i rakirélas Petriske: “Naúšto na mogindlé tumé i jekh mardó (štúnda) te rakhénpe, te javén Mánca? Rakhénpe i mangénpe Devléske, sob (kaj) tumé te na poperen dro propatiakiriben; dúho (fáno) isyn sastó, ne loč (plot') isyn bizorjakiri.” Nevéstyr javír mólo, Jov odgija dre rig i mangdiápe Devléske dasavé lavénca: “Dádo Miro, kóli saštý, sob (kaj) davá tahtáj te prodžal dre rig Mándyr, paka Me na vypjava les, mek te kerélpe vólia Tyrí!” I nevéstyr Jov risijá pale i lathiá, so jone sys suté, pal-dová so léngire jakhá sys začhakirde. I Jov mekciá len nevéstyr i gijá krig, i mangdiápe Devléske tríto mólo, phení dasavo-pac' lav. Tén'ci Jov javélas ke Péskire sykliaibnýtka i rakirélas lénge: “Tumé usá san suté i otkhinjona? Ake, mardó (štúnda) podgíia i Čhavés Manušeskires zdena dre grehengire vastá. Uštén, džása, ake, uže sarésa isyn pašýl kodová, kon zdela Man.” I syr Jov iščo (inké) rakirdiá, ake, Juda podgíia, jekh dešudujendyr sykliaibnytkonendyr, i sys lésa but manušá kurtalenca i kilenca, rašángire barydyrendyr i godephurendyr. Zdyibnari dyjá lénge špéra (znako); phení: “Kadavá, Konés me čamudava, isyn Jov: zakeden Les.” I jekhátyr podgíia jov ke Isúso i phendiá: “Dobridim, Ravvi!” I čamudia Les. Isúso že phendiá Léske: “More, ake, vaš so tu san adái!” Tedy jone giné pašyledýr, čhudé vastá pe Léste i uhtyldé Les. I, ake, jekh, savó sys Isusósa, dyjape vastésa i vytyrdyja kurtála péskiri, i čingirdia lása pisharís, rašángire barydyreskires, i otčingirdia léske kan. Ne rakiréla léske Isúso: “Čhuv pale péskiri kurtála pe lákiro štéto; pal-dová so, kon léla kurtála, kurtalátyr xasjola. Na duminesa tu, so Me na moginavas te mangav Mires, Dadés, i Jov na délas Mánge dešudúj Jangoléngire liegiony? Syr tedy spolninelaspe Svénto Čhinybén, so davá trej te javél?” Dre dová-pac' mardó (štúnda) Isúso phendiá manušénge: “Syr pe rozmaribnariste tumé vyginé kurtalenca i kilenca te len Man? Me kažno dyvés sómas beštó tuménca i sykliakirdjom dre Khangirí, i tumé na lenas Man. Ne davá saró kerdiápe, sob (kaj) te kerenpe ke kónco/iagóro (te spolninenpe) prorokéngire lavá dro Svénto Čhinybén.” I kodolé, savé lyné Isusós, jandlé Les ke Kaiáfa, pérvo rašángiro barydyró, kaj skedynépe lylvarítka i godephuré. Pétri ž džálas pal Léste duripnastyr ke pérvo rašangireskiri gréda (dvóro), i syr zagijá andré, sys beštó javire stregar'jenca, sob (kaj) te dykhél kónco (jagóro). Rašaja i saró Siniedriono saré manušénca rodyne xohanó dophenybén pe Isusóste, sob (kaj) te muliakirén Les. I na lathné nisó, na dykhí, so but xohané jakhítka (svidietieli) javénas angíl Siniedriono. Ne korigedýr (pozžedýr) podginé duj, i phendlé: “Kadavá manúš phendiá: ‘Me mogináva te rosphagirav Devléskiri naj bari Khangirí, i te ĥazdav la nevéstyr pal trin dyvesá.’” I uštyjá pérvo rašángiro barydyró i phendiá: “Tu nisó na otphenesa? So da dasavo isyn, so jone dophenena pe Túte?” Ne Isúso sys štyl. I pérvo rašáj phendiá Léske: “Zasovlahava Tut Devlésa Džidesa: phen aménge, ci Tu san Xristóso, Čhavó Devléskiro?” Isúso phendiá Léske: “Adiáke, syr Tu phendián; ne Me phenáva tuménge: Adadyvesatune dyveséstyr tumé dykhéna Čhavés Manušéskire, Savó javéla te bešél pe óbloki bolybnáskire pir čačí (pravo) rig Devléskire Zorjakiri.” Tedy pérvo rašáj roskuscia péskire uribená, i phendiá: “Jov teliakirdia Devlés. Saví aménge iščo (inké) trébima te dophenen? Tumé šundlé ž teliakiriben pe Devléste. So tumé duminéna?” Jone ž otphendlé: “Isyn bangó, sob (kaj) te muliakirén Les.” Tedy čungardyne Léske dro muj, i mardé Les; javír pekavenas Les pir muj, rakirí: “Uĥaljov syr proróko, Xristóso, kon pekadiá Tut?” Pétri ž sys beštó javriestyr dre gréda, i podgíia ke jov jekh dynárica (služanka) i phendiá: “I tu sánas Isusósa Galilejaninosa.” Ne jov dyjape pale angíl sarénde, rakirí: “Me na džinóm (na džináv), so tu rakirésa.” I kiéli jov podgíia ke pórta, les dykhciá javír dynárica, i phendiá manušénge, savé sys terdé pašýl: “Kadavá manúš sys Isusósa Nazariejosa.” I nevéstyr jov dyjape pale sovlahasa: “Me na džinóm Kadalé Manušés.” I nábut korigedýr podginé ke jov manušá, savé sys terdé pašýl, i phendlé Petriske: “Čačó, i tu san léndyr, pal-dová so tyró vyrakiriben sykavéla.” Tedy jov lyjá te prokošel i te sovlahal: “Me na džinóm (na džináv) Kadalé Manušés” I adáj že probagandia bašno. I priripirdia Pétri Isusóskiro lav; syr Jov phendiá: “Angíl, syr probagala bašno, tu trin móly otphenesape Mándyr” I gii javrí, jov rondiá kirkes. Kiéli jaciá dyvés, pe zlóko, saré rašángire barydyrá i theméskire godephuré, zrakirdepe pe Isusóste, sob (kaj) te muliakirén Les; I, kiéli phandle Les, lydžiné Les i zdyne Pilatoske, theméskire barydyreskireske (pravitieljoske). Tedy Juda, kon zdyja Les, dykhí, so Isusós sendindle, priĥalyja péskiri bang i dyjá pale trijánda rupuvé lové rašángire barydyrénge i godephurenge, phení: “Me kerdjom grého, pal-dová so zdyjom Manušés, Savéste isyn bibangipnaskiro rat.” Ne jone phendlé: “So aménge? Davá isyn tyró réndo.” I jov čhurdyjá rupuvé lové dre Khangirí, gijá javrí i ubladyja. Ne rašángire barydyrá ĥazdyné rupuvé lové i phendlé “Naštý te čhuvas len dre Khangirjákiri piralý (tyknori), pal-dová so davá isyn ratvalé lové.” I zrakirdepe i kindle pe dalé lové félda piritkonestyr (goršečnikostyr), sob (kaj) te garaven čužoné manušén. Paldová i kharlape daja félda ‘Ratvaly félda’ ke adadyvesatuno dyvés. Tedy kerdiápe kodová, so phendiá proróko Jeriemiéjo: “I jone lyné trijánda rupuvé lové, timín Jekheskiri, Savéske dyné timín Izrailjoskire čhavé, i dyné dalé lové pal piritkoneskiri félda, syr Devél priphendiá Mánge.” Ne Isúso sys terdó angíl Pilatoste, theméskire barydyreste; i phuciá Léstyr: “Tu san Judéngiro Králi?” I phendiá Isúso: “Adiáke, syr tu phendián.” I kiéli bangiakirenas Les rašángire barydyrá i godephuré, Jov na phendiá nisó. Tedy phendiá Léske Piláto: “Tu na šunesa, syr but jone pe Túte dophenena?” I Jov na otphendiá Léske ni jekh lav, paldavá themeskiro barydyró drieván zdivindiape. Ne pe svénko themeskiro barydyró prisyklyja te otmekél jekhe manušés štaribnastyr pir manušéngiro vykedyben, kon sys pir iló lénge. Tedy sys lénde slavútno štaribnari pir lav Varava. Paldavá, kiéli skedynépe khetané, Piláto phendiá lénge: “Konés tumé kaména, sob (kaj) me te otmekav tuménge: Varavas ci Isusós, savés kharna Xristóso?” Pal-dová so jov džindiá, so jone zdyne Les zevlynypnastyr. Kiéli Piláto sys beštó pe sendariskiro štéto, léskiri romný bičhadiá léske lav, phení: “Na ker nisó Kadaleske Patiaibnytkone Manušéske; me but piridživdjom dro sunó (suné) pal Léste.” Ne rašángire barydyrá i godephuré patiakirde manušén, sob (kaj) te mangén Varavas, ne te muliakirén Isusós. Tedy barydyró phuciá léndyr, phení: “Konés kaména tumé dujendyr te otmekav me?” Jone phendlé: “Varavas.” Rakiréla lénge Piláto: “So mánge to keráv Isusósa, Saves kharéna Xristóso?” I jone phendlé: “Te primaren Les pe trušúl.” Ne jov phendiá: “Savó ž čoripén Jov kerdiá?” Ne jone dénas gódla butýr: “Te primaren Les pe trušúl!” I kiéli Piláto dykhciá, so nisó na pomoginela, ne, xaj, šumo godlenca ke búnto ĥazdélape, jov lyjá paní i vymordia vastá angíl manušénde, rakirí: “Me na som bangó pal adalé Manušéskiro rat, tumé ž dykhén!” Ne saré otphendlé: “Mek te javél davá bangipen pal Léskiro rat pe aménde i amaré čhavorende!” Tén'ci jov otmekciá lénge Varavas, ne Isusós paló dová, syr Les mardé čupniasa, zdyja pe trušúl te primaren. Tén'ci theméskire-barydyreskire xaladé lyné Isusós dre prietorija, khardé khetané pherdó xaladéngiro polko, i rosčhude Les i uridé pe Léste tjomnone-loló plaščo, i kiéli skhude viánka phusadytkone xrustostyr syr koróna, uridé Léske pe šeró, čhudé Léske triščynytko destó dro čačó (pravo) vast, i terdjonas pe čangá angíl Léste, prosanas Les, phení: “Jav džidó, Králi Judéngiro!” I čungardenas pe Léste, i lyné destó i mardé lésa Les pir šeró. I korigedýr (pozžedýr), syr jone sandlepe xoliames (zdiekindlepe pe Léste), jone zlyne Léstyr loló plaščo, uridé pe Léste Léskiro uribén, i lydžiné pe trušúl te primaren. I syr jone džánas, odothýr strenindle manušés Kirinejatyr, savés khardé Símono; i začhude les te lydžál Xristosóskiro trušúl. I kiéli jone javné pe štéto, savó kharlape ‘Ĥolgofa’, so značynéla: ‘Čeriepnytko štéto,’ jone dyné Léske te p'jel mol (vino) khetané želučosa i korigedýr, syr Jov koštyndia, Jov na kamdiá te p'jel butýr. I kiéli jone primarde Les pe trušúl, jone roskerde uribén Léskiro, čhurdyi žriébijo, I bešyndoj, rakhenas Les odój. I jone kerdé uprál Léskire šerestyr Léskiro začhinyben, dro so Jov sys bangó: “Davá isyn Isúso, Králi Judéngiro.” Tén'ci jone primarde pe trušúl pašýl Léste duje rozmaribnar'jen: jekhés čačé rigátyr, javirés zervone (lievone) rigátyr. I kodolé, savé prodžanas pašýl Léste, kaliakirenas Les, kuniny šerenca; i rakirí: “Tu ž kadavá san, Savó rosphagirelas Khangirí i pir trin dyvesá ĥazdesas la nevéstyr. Zrákh Kokoró Pes. Kóli Tu san Čhavó Devléskiro, džá telé trušulestyr.” Adiáke-pac' rašángire barydyrá, khetané lylvaritkonenca i godephurenca sandlepe xoliames Léstyr, rakirí: “Javirén Jov zrakhelas; ne Jov na moginéla te zrakhél Pes, Jov ž králi Judéngiro: mek kakaná te džal trušulestyr, i ame javása te patias dre Léste. Jov patiála zoralés dre Devléste, mek Devél zrakhéla Les, kóli kaméla. Pal-dová so Jov ža phendiá: ‘Me som Čhavó Devléskiro.’” Adiáke-pac' i rozmaribnarja, savé sys primarde khetané Lésa, ladžakirenas Les. Šovtone (dešudujtone) mardestyr (štundatyr) jaciá kalypén pir sarí phuv i rikirdiape ke/žýko jeniáto (bijekhéskiro déšto) mardó; pašé ž jeniáto (bijekhéskiro déšto) mardó Isúso dyjá gódla zoralés Judytkes: “Eli, Eli, lama sabakthani?” Davá isyn Romanes: ‘Miro Dévla, Miro Dévla, sóske Tu mekcian Man?’ I vari-savé kodolendyr, savé sys terdé adái, kiéli jone šundlé davá, lyné te rakirén: “Adavá manúš kharéla Ilijas.” I jekhátyr jekh léndyr podprastandyja, lyjá gubka, kind'kirdia la dro šutly mol, čhudiá la pe destoskiri (kašteskiri) vostrima, i podyja te p'jel Léske. Ne javír phendlé: “Užakiren! Dykhasa, syr javéla Ilíia te zrakhél Les.” I Isúso nevéstyr dyjá gódla zoralé zaniása i myjá. I, ake, šýrma dre Khangirí roskusciape pe duj pašá, upralestyr ke phuv; i phuv triinskirdiape, i baruné bérgi pharadyne; i koplicy otphandlepe, i but manušýtka trúpy, savén Devél vykedyjá i savé myné, otdžidyne, i vyginé koplicendyr korigedýr (pozžedýr), syr Isúso otdžidyjá, giné jone dro svénto fóro i sykadyne butenge. I šelengire-xaladéngiro barydyró i xaladé, savé khetané rakhenas Isusós, syr dykhné phuvjákiro triinskriben i saró, so kerdiápe, strahádyne zoralés, rakirí: “Čačes, davá sys Čhavó Devléskiro.” I but džuvliá dykhenas duripnastyr, savé džánas pal Isusóste Galilejatyr, i savé dynarindlé Léske, maškír savénde sys Maríia Magdalina, i Maríia, daj Jakovoskiri i Jozaskiri, Zaviediejoskiri romný, daj léskire čhavénge. Kiéli javdiá bel'vél', javdiá barvaló manúš Arimafejatyr pir lav Joza (Iosifo), savó kokoró adiáke-pac' sys Isusóskiro sykliaibnýtko. Adavá manúš podgíia ke Piláto i mangdiá Isusóskiro trúpo. Tén'ci Piláto priphendiá te otdén Isusóskiro trúpo. I Joza lyjá trúpo, zakrencyndia Les dro žužó (čysto) pohtan, i čhudiá Les dre péskiri neví koplíca, saví jov vyčingirdia dre skála; i kiéli priradia baró bar ke zagiibén dre koplíca, gijá krig. I sys odój Maríia Magdalina i javír Maríia, savé sys bešté angíl koplíca. Pe javír dyvés, savó sys sávato (subóta), skedynépe rašángire barydyrá i Farisiéi ke Piláto, phení: “Rajo, ame ripirasa, so xohaibnari, syr sys iščo (inké) džidó, phendiá: ‘Pir trin dyvesá Me otdžidjovava.’ Paldavá priphen te rakhén magila ke/žýko tríto dyvés, sob (kaj) sykliaibnýtka te na čoren Les, kóli javéna i te na phenén manušénge ‘uštyjá muléndyr,’ i javéla palatunó xohaibén fujedýr Pervonestyr.” Phendia lénge Piláto: “Tuménde isyn xaladé-rakhibnárja: mek jone te džán, te rakhén, syr tumé džinéna.” I jone giné, i čhudé xaladén te rakhén koplíca, čhuvi čergenorí (piečat') ke bar. Pe zlóko, dro pérvo kurkitko dyvés paló sávato, javné Maríia Magdalina i javír Maríia te dykhén maĥila dre koplíca. I ake, kerdiápe baró phuvjákiro trinskiriben; pal-dová so Devléskiro Jangólo gijá telé bolybnástyr, i podgii, riskirdiá bar i sys beštó pe léste. Léskiro vydykhiben sys syr bliskavica, i léskiro uribén sys parnó syr iv. I rakhibnárja izdranas darátyr angíl léste, i kerdépe, xaj, jone sys mulé. I lyjá te rakirél Jangólo, phení džuvlienge: “Na andyršan; me džinóm (džináv), so tumé rodéna Isusós, Saves primarde pe trušúl; Les (Jov) nane adái, pal-dová so Jov otdžidyjá, syr Jov i phendiá. Javén, podykhen štéto, kaj Jov sys paštó; i džán sygedýr, phenén Léskire sykliaibnytkonénge, so Jov otdžidyjá meribnástyr i Jov džála angíl tuménde dre Galiliéia, odój tumé Les dykhéna, ake, me phendjom tuménge.” I vygii sýges koplicatyr, jone prastándyne darása i baré radymása te rosphenén Léskire sykliaibnytkonénge. I, ake, Isúso pirilyja len, rakirí: “Radynénpe!” I jone, syr podginé, oblyne ĥerá Léskire i poklonindlepe Léske. Tedy rakiréla lénge Isúso: “Na andyršan; džán, i phenén Miré pšalénge, sob (kaj) te džán dre Galiliéia; i odój jone dykhéna Man.” Syr jone džánas, tedy vari-savé xaladéngire rakhibnar'jendyr javné dro fóro i rosphendlé rašángire barydyrénge saró, so kerdiápe. I kiéli jone skedynépe khetané godephurenca, zrakirdepe maškír péste; jone dyné but rupuvé lové xaladenge, rakirí: “Phenén: ‘Léskire sykliaibnýtka javné ratý, čorde Les, kiéli ame sámas suté.’ I kóli davá javéla džindló theméskire barydyréske, ame patiakirása les i zrakhasa tumen piridživipnastyr.” I jone lyné rupuvé lové i kerdé, syr len sykliakirdé. I kadaja mavlýn (malva) rozgijápe maškír Judénde ke/žýko adadyvesatuno dyvés. Dešujekh ža sykliaibnýtka giné dre Galiliéia pe bérga, karik phendiá lénge Isúso. I kiéli jone dykhné Les, poklonindlepe Léske; ne vari-savé na patianas. Na Isúso javdiá i phendiá lénge; “Saró pravo dynó Mánge, syr pe bolybén, adiáke pe phuv. Paldavá džán, sykliakirén saré nácyi, bolen len dro lav Dadéskiro, Čhavéskiro i Sventoné Duhoskiro (Fanoskiro); sykliakirén len te kerén saró, so Me priphendjom tuménge. I, ake, Me som tuménca ke viekoskiro kónco (jagóro).” Davá isyn Jevangielijakiro anglypén (načalo) Isusóskiro Xristosóskiro, Devléskire Čhavéskiro. Syr isyn čhindló dre Isajoskire-prorokoskiri lylvarí: “Ake, Me bičhaváva Miré vykedyné manušés angíl Túte, savó keréla drom Túke: Ake, isyn zan, saví déla gódla pe čhučí (pusto) phuv: ‘Kerén drom Ráske-Devléske, čhuvén Léske mamúj (roŭno) drom.’” Iáno Boldeipnari javdiá pe čhučí phuv, sykliakiri len te riskirén péskiro džiibén ke Devél vaš dová, sob (kaj) Jov te otmekél gréhi angíl boldeipen. I džánas ke jov but manušá Judejákire phuvjátyr i Jerusalimóstyr, jone priĥaljonas péskire gréhi, i jov boldia len dre reka (len') Iordáno. Iáno sys uridó dro uribén vierbliudytkone balendyr, pe léste sys trusciál (vokrug) trušúl cypitko kustýk, jov xaja saranča i avgín (meda) vešytkone berliniendyr (pčolendyr). Dre léskire-phenybnaskiro lav jov rakirdiá: “Pal mánde džála Odová, Kon isyn zoraledýr mándyr, me na som mol až te rosphandav simirja Léskire ĥeritkonendyr. Me bolava tumen paniésa, a Jov javéla te bolel tumen Sventoné Duhósa.” I sys adiáke dre dolé dyvesá: javdiá Isúso Galilejakire Nazarietostyr, i boldia Les Iáno dre reka (len') Iordáno. I jekhátyr (srázu), syr Isúso vydžálas paniéstyr, Iáno dykhciá, syr otčhakirdiape bolybén, i Dúho (Fáno), savó džálas telé pe Léste syr golumbo; i zan rozdyjape bolybnástyr: “Tu san Miro drógo Čhavó! Dre Túte isyn Mirí bari rádyma!” I jekhátyr Dúho (Fáno) lydžijá Les pe čhučí phuv. I sys Jov štardešá dyvesá pe čhučí phuv, Les propatiakirelas nálačho; Jov sys riskiribnáskire murdalénca (zvierienca) i Jangóly dynarinénas (služynénas) Léske. Paló dová, syr Iáno sys zakedyno, javdiá Isúso dre Galiliéia, rospheni lav pal Jevangielijakiro bahtalypén pal Devléste, i rakirdiá: “Podgíia časo (cýro) i Devléskiro Kralipén javdiá pašyledýr; riskirén péskiro džiibén ke Devél i patián dre Jevángielija.” I syr Jov gijá pašýl Galilejakiro mórjo (derjáv), dykhciá Simonos i léskire pšalés Jendris; jone sys mačharja (mačhibnarja) i dro davá časo jone čhurdenas khudia (sieti) dro mórjo (derjáv). I phendiá lénge Isúso: “Džán pal Mánde, Me keráva tuméndyr manušéngire staribnar'jen.” I jone jekhátyr (srázu) jačkirdé khudia i giné pal Léste. Progii nábut duredýr, Jov dykhciá Jakovós i Ianos, čhavén Zieviediejoskiren, jone sys bešté dre bárka (lodka) i kerénas khudia; Jov jekhátyr khardiá len; i jone giné Lésa, jačkiri dre bárka péskire Dadés Zaviediejos i butiarnen. I kiéli jone javné dro Kapiernaumo, Isúso jekhátyr (srázu), dro pérvo sávato (subóta), gijá dre sinagoga te sykliakirél. Léskiro rakiribén divindia manušén, Jov sykliakirdiá len adiáke, syr Léste sys baró pravo, ne na adiáke, syr lylvarítka (knížniki). Dre sinagoga sys manúš, dre savéste sys nálačho dúho (fáno), i jekhátyr (srázu) jov dyjá gódla: “So Túke trej améndyr, Isúsie Nazarietostyr? Tu javdián te xasiakires amen? Me džinóm (džináv), kon Tu adasavó san, Tu san Svénto Devléskiro!” “Štyljov, – zorjása priphendiá Isúso, – “vydža léstyr!” Nálačho dúho (fáno) trinskirdia zoralés manušés i godlása vygijá léstyr. I saré strahádyne i phučenas jekh jekhestyr: “So da dasavo isyn? Nevó sykliakiribén i dasavé zorjása! Jov až priphenela nalačhé duhenge (fanenge) i dolé kandéna Les!” Sýges pal Léste rozgijápe zan (zvies') pir sarí Galiliéia. I jekhátyr (srázu), vygii sinagogatyr, jone javné dro kher Simonoskiro i Jendriskiro, Jakovosa i Ianosa. Simonoskiri sasuj sys nasvaly i pašty, láte sys baró xačkiribén, i jekhátyr Isusóske phendlé pal láte. Jov podgíia ke joi, lyjá la pal vast, pomogindia te ĥazdelpe; xačkiribén lákiro progijá, i joj lyjá te dynarinél lénge. Bel'velié, syr zagijá kham, ke Isúso lyné te janén nasvalen i odolén, konéste sys nálačho dúho (fáno); i saró fóro skedyjape pašýl vudár. Dro dová dyvés Isúso sastiakirdia drieván but samone pharé nasvalypnendyr i Jov tradelas javri nalačhé dúhi, i priphenelas Jov lénge te na rakirén, pal-dová so jone džindlé, so Jov sys Xristóso. Pe javír zlóko (ránko), uštyi angíl dyvés, Isúso gijá odorík, kaj nikonés nane, i mangdiápe Devléske odój. Símono že i javír, kon sys Lésa, lyné Les te rodén, I lathné Les i lyné te rakirén Léske: “Saré Tut rodéna!” Jov lénge rakiréla: “Javén, džása dre pašatuné gavá, sob (kaj) Mánge i odój te phenáv lav. Me ž i javdjom vaš dová.” I Jov phenelas lav pal Devléste dre sinagogi pir sarí Galiliéia, i tradelas javrí nalačhé dúhi (fany). Ke Isúso javéla manúš, savó sys nasvaló prokazasa: jov pyjá pe čangá angíl Léste, i mangdiá: “Vysastiakir Man, kóli Túke isyn pir iló.” Isusóske jaciá tango (žalko) les: “Mánge isyn pir iló, jav sastó”, – phendiá Jov, protyrdyi vast, i čiladiá les. I jekhátyr, sarí dukh gijá krig léstyr i jov jaciá sastó. Isúso adáj že jekhátyr (srázu) otbičhadia les, paló dová, syr priphendiá šylales Léske, i rakiréla Léske: “Nikonéske pal davá na rosphen; ne džá; sykáv pes rašáske, i jan svénto dyibén pal sastiakiriben, syr davá trej pir Mojzáskiro Zakóno, davá javéla tyró dophenybén manušénge.” Ne jov, vygii, jekhátyr lyjá te rosphenel sarénge pal péskiro sastiakiriben, pal-dová uže Isusóske sys naštý te sykadjol dro fóro, i Jov jačelaspe pe dová štéto, kaj nikonés na sys pal foritko kustýk (granica), i manušá skedenaspe ke Jov saré šteténdyr. I pir vari-kicý dyvesá Isúso nevéstyr javdiá dro Kapiernaumo, i progijá šunybén, so Jov sys kheré. I skedynépe but manušá, so butýr na sys štéto, až pašýl vudár i Jov rakirdiá lav lénge. I jone javné ke Jov; štar manušá jandlé nasvales, savéste sys praličo. I pal-dová, so pal manušénde jone na mogindlé te janén les ke Jov, jone roskedyne kheréskiri stréha (čhakín) dro štéto, kaj Isúso sys terdó telál, i kerdé bu'glo progiiben, i odój jone zmekne matraco, pe savó sys paštó praličytko. Isúso, dykhí léngiro patiaibén, rakiréla nasvaleske: “Čháva, otmekenape gréhi tyré.” Vari-kon lylvaritkonendyr, savé sys bešté odój, rakirénas dre péste: “So Jov rakiréla adiáke? Jov teliakirela Devlés. Kon apríč Devléste rikiréla zor te otmekél gréhi?” Isúso sýges ĥalyjá léngiro rakiribén. “So tumé adiáke pal davá duminéna dre tumaré ile?” – rakiréla Jov lénge. So lokhedýr te phenés nasvaleske: “Otmekenape túke gréhi tyré”, ci “Uštý, le matraco péskiro i psir?” Adiáke, sob (kaj) tumé te džinén, so Čhavéste Manušeskireste isyn zor pe phuv te otmekél gréhi.” Tedy rakiréla Jov praličytkoneske: “Túke rakiráva: “Uštý, le matraco péskiro i džá dro péskiro kher.” I jov jekhátyr (srázu), pe jakhá sarénde, uštyjá, skedyjá péskiro matraco i gijá javrí. Davá divinelas sarén, i manušá slavinenas Devlés i rakirénas: “Dasavo ame nijékhvar na dykhciam!” I Isúso gijá nevéstyr ke mórjo (derjáv), i pašýl Léste skedynépe but manušá i Jov sykliakirdiá len. Progii duredýr, Jov dykhciá Lievijos, Alfiejoskire čhavés. Odová sys beštó dro mytytko kher. “Jav Mánca”, – rakiréla Léske Isúso. Lievijo uštyjá i gijá pal Léste. I sys adiáke: kiéli Isúso sys beštó dro Alfiejoskiro kher, bešenas pal skamínd Lésa i Léskire sykliaibnytkonénca but mytoskire skedyibnarja i grehengire; sys but len, i jone džánas Lésa. I kiéli vari-savé Farisijendyr dykhné, so Jov xalas grehengirenca i mytoskire skedyibnar'jenca, jone rakirdé Léskire sykliaibnytkonénge: “Sóske Jov xála mytoskire skedyibnar'jenca i grehengirenca?” Isúso šundiá davá i phendiá: “Na saste manušénge trej sastypnari (doktoro), a nasvalenge. Me javdjom te prikharav na patiaibnytkonen, a grehengiren.” Sykliaibnýtka Ianoskire Boldeipnariskire i Farisiéi postinenaspe. Vari-savé poddžanas ke Isúso i phučenas: “Sóske Ianoskire sykliaibnýtka i Farisijengire postinenape, a Tyré sykliaibnýtka-nad?” Isúso otphendiá lénge: “Ci moginéna drúgi (malá) Terneskire te otphenenpe xabnastyr, kóli jone isyn pe Léskiro bjav? Paka Ternó isyn lénca, palsó lénge te postinenpe? Ne javéna dyvesá, kiéli Ternó javéla lynó krig léndyr, tedy jone javéna te postinenpe dro dová dyvés. Nikón na čhuvéla pe phuranó uribén nevó pohtanytko kotér. Pal-dová so ljoha (dirka) butýr javéla. Nikón na čhuvéla neví mol (vino) dro phurané cypitka goné, joj riskiréla len i mol vythadela i goné xasjona. Terný mol čhuvéna dre neve cypitka goné.” Jekhvar dro sávato (subóta) Isusóske prigijape te džal givitkone feldasa. Sykliaibnýtka Léskire bokhalyne i lyné te zriskiren kolosy. I Farisiéi rakiréna Léske: “Dykh, sóske jone keréna dová, so naštý te kerén dro sávato? I jov rakiréla lénge: “Naúšto tumé na gindlé dro Svénto Čhinybén, so kerdiá králi Davído, kiéli jov i léskire malá bokhalyne: davá sys tedy, kiéli rašángiro barydyró sys Aviafaro; syr Davído zagijá dre Khangirí i xaja odój dyibnytko maró, savó sys naštý te xal nikonéske apríč rašande! Jov xaja, i dyjá péskire malenge.” I rakirdiá lénge: “Sávato (subóta) isyn vaš manušéske, a na manúš isyn vaš sávato; pal-dová so Čhavó Manušéskiro isyn Xuláj i pe sávato.” Isúso nevéstyr zagijá dre sinagoga, i sys odój manúš šuké vastésa. Dre sinagoga dykhenas rakhibnýtkes pal Léste, sob (kaj) te bangiakiren Isusós, ci na sastiakirelas Jov adales manušés dro sávato. I Jov rakiréla manušéske šuké vastésa: “Uštý i terdjov maškirál.” Tén'ci Jov rakiréla lénge: “So saštý [pir Zakóno-ju.o.] te kerés dro sávato: lačhipén ci fuipén, te rakhés džiibén ci te xasiakires?” Jone sys štyl. Tedy Isúso oblydžija len xoliamé dykhibnasa, i tugindia pal léngire pharé ile, i phendiá kaliekaske: “Protyrde tyró vast!” Jov protyrdyjá, i vast léskiro jaciá sastó sarésa.” Farisiéi vyginé, i khetané Irodianenca lyné te kerén zrakiribén te muliakirén Les. Isúso sykliaibnytkonénca giné ke mórjo (derjáv); i pal lénde giné but manušá Galilejatyr, Judejatyr, Jerusalimóstyr, Idumejatyr, pale Iordanostyr, šteténdyr Tirostyr i Sidonostyr. Šunybena pal dívy, savé kerélas Isúso, rozlydžinepe, i manušá zdžanaspe ke Jov. Jov phendiá sykliaibnytkonénge te skedén bárka (lodka) Léske, kóli manušá javéna te tasavenpe ke Jov. Pal-dová, so Jov vysastiakirdiá but manušén, saré, savénde sys nasvalypena (fránsy), čhurdenaspe ke Jov, sob (kaj) te čilaven Les. Savénde sys nálačho dúho (fáno), dykhí Les, perenas angíl Léste pe phuv i dénas gódla: “Tu san Devléskiro Čhavó!” Ne Jov zorjása priphenelas nalačhé duhenge te na rakirén pal Léste. Isúso ĥazdyjápe pe bérga i khardiá ke pe manušén, savén Jov Kokoró vykedyjá, i jone javné ke Jov. I Jov vykedyjá dešudujen, savén Jov khardiá Apostolenca, sob (kaj) te javén Lésa, sob (kaj) te bičhavel len te phenén Léskiro lav, sob (kaj) lénde te javél zor te tradén nalačhé dúhi: ĥáda, isyn lavá adalé dešudujengire: Símono (les Isúso khardiá “Pétri”), Jakovo i Ioano, Zieviediejoskire čhavé, len Isúso khardiá ĥromoskire čhavé. Jendri (Andriejo), Filipo, Varfalamiejo, Matfiejo, Jakovo (čhavé Alfiejoskire) Fadiejo, Símono Kananito i Juda Iskarioto, savó i bikindia Isusós. Isúso risijá dro kher; i skedynépe adakicyk but manušá, so Léske sykliaibnytkonénca sys naštý až te xan maró. Kiéli Isusoskiri seménca šundlé pal davá, jone javné te len Les, pal-dová so manušá rakirdé: “Jov isyn na dre Péskiri godý.” Lylvarítka (knížniki), savé javné Jerusalimóstyr, dophenenas: “Dre Léste isyn Viel'zevulo. Jov tradéla javrí nalačhé dúhi nalačhé zorjása.” Tedy Isúso otkhardia len, jaciá primierenca (sykaibnenca) te dophenel lénge: “Syr nálačho moginéla te vytradel nalačhés? Kóli kralipén roskerdo (ulado) pe paš, jov na javéla terdó. Kóli dre sém'ia (irí), saví dživéla dro kher, nane lado (miro), dasavo kher na javéla terdó. Kóli nálačho džála maribnása proti péste, tedy syr jov moginéla te pirizorjakirel, pal-dová so léske xasibén javdiá. I nikón na moginéla te javél ke zoralé-xulaskiro kher felatin i te občorel les, kóli angíl na phandela zoralé xulás, i korigedýr (pozžedýr) čorela saró léskire kheréstyr. Čačes, Me rakiráva tuménge: ‘Saré gréhi i čoré lavá otmekenape manušéske, savé jov na’ phenelas; ne košybén pe Svénto Dúho (Fáno) na otmekelape nikieli, grého davá jačélape pe dalé manušéste pe saré beršá.’” Davá phendiá Jov, pal-dová so jone rakirdé: “Léste isyn nálačho dúho (fáno).” Javné daj i pšála Isusóskire i, terdii javrí, bičhadé te kharén Les. Pašýl Léste sys bešté but manušá i phendlé Isusóske: “Tyrí daj i pšála rodéna tut javrí.” “Kon isyn Mánge daj i pšála?” phuciá, – Isúso Jov oblydžija jakhénca sarén, kon sys bešté pašýl Léste i rakiréla: “Davá isyn daj Mirí i pšála Miré; Pal-dová so, kon keréla saró pir vólia Devléskiri, odová isyn Mánge pšal, i phen i daj.” Isúso nevéstyr (nevés) sykliakirelas pe morjoskiro (derjavéskiro) brégo; pašýl Léste skedynépe adákicy manušá, so Jov besciá dre bárka, sob (kaj) te javél dro mórjo (derjáv), a, sob (kaj) saré manušá te jačénpe pe phuv pe brégo. Isúso sykliakirelas len buté primierenca (sykaibnenca), rakirí: “Šunén! Jekh gavitko vygijá pe félda te sieinel i sys adiáke: kiéli jov rosčhurdelas ziárki, tedy vari-savé ziárki pyné pašýl drom. Privurniandyne čirikliá i xané len. Javír ziárki pyné pe baruno štéto, kaj sys nábut phuv; jone barine upré sýges, syr na sys xor dre phuv; a kóli jaciá xačkiribén khamestyr, rostki (ščuki) murdalyne (zvianindle) i zašutine, pal-dová so kórni (rukhá) lénde na xor sys. Javír ziárki pyné dre dylyny čar, dylyné čarjá barine upré i zamardé len, i jone na dyné pribaripen. A javír ziárki pyné pe lačhí phuv, dyné pribaripen dre trijánda i dešušovdeša i šel móly!” I Isúso rakirdiá lénge: “Konéste isyn kaná, mek te šunél.” Kiéli manušá rozginepe i Isusósa jačnépe dešudúj i javír manušá, savé šundlé Les, jone phučné Léstyr, so značynena dalé primiery (sykaibena)? I Jov rakirdiá lénge: “Garadé čačipená Devléskire Kralipnaskire dyné tuménge. Ne kon isyn durál Kralipnastyr, odolénge rakirelape primierenca (sykaibnenca). Jone dykhéna jakhénca, i na dykhéna, jone šunéna, i na ĥaljona; a kóli jone riskirenas péskiro džiibén ke Devél, tedy jone javénas primangne.” Duredýr rakiréla Jov: “Naúšto i tumé na ĥaljona davá primiéro (sykaibén)? Syr tumé tedy ĥaljona saré primiery (sykaibena)? Sieinybnaskiro čhuvéla dre phuv Devléskiro lav. Isyn manušá, savé isyn sýrby daja ziárka pašýl drom. Syr féni (tóka) jone šunéna lav, to javéla nálačho i čorela les léndyr. Isyn adasavé manušá, savé isyn sýrby daja ziárka, saví posieindly pe baruno štéto: jone šunéna lav i jekhátyr (srázu), ake, priléna les radymása. A adiáke, syr kórni (rukhá) xor lénde nane, tedy jone sys sarésa nadlenga. Kóli pal prilyno lav jone dykhéna tradypen i pharipén, jone mekéna lav jekhátyr. Javír ziárki, savé počhude dre dylyny čar, isyn sýrby manušá, savé šunéna lav: ne kažno dyvesýtko košybén, xohaibén pal barvalypén, javír mysli pe iló javéna i murdiakirena dre lénde lav i keréna les bibarjakirdoneskiresa. Ziárki, savé počhude pe lačhí phuv, isyn sýrby manušá, savé šunéna lav, priléna les i déna pribaripen dre trijánda i dre šovdešá i dre šel móly.” Isúso phendiá lénge: “Kóli zahačkirena momoly, na čhuvéna la tel piriskirdy pirí ci tel čhuibén? Naúšto na čhuvéna la dro šandalo (podsviečniko)? Pal-dová so nisó nane čorahano; sob (kaj) te na javél bicialó (dyc'lo), nisó nane sčhakirdo, sob (kaj) te na vydžál pe dud (svéto), pe jakhá manušénge. Konéste isyn kaná, mek te šunél!” I rakirdiá lénge: “Ripiren mištó davá, so tumé kakaná šunéna: savjása mierasa tumé mierinena, adiáke tumen javéna te mierinen i iščo (inké) butýr. A konéste isyn, odoléske iščo (inké) javéla dynó, a konéste nane, odoléstyr javéla otlyno i dová nábut, so isyn.” Isúso rakirdiá duredýr: “Devléskiro Kralipén isyn sýrby jekh manúš, savó sieinela félda; i ratý manúš isyn sutó, pe zlóko (pe ránko) uštéla, i prodžána (nakhena) dyvesá, ziárki ĥazdénape i barjona, a manúš kokoró na džinéla, syr davá saró kerélape. A phuv kokori barjakiréla. Angíl sykadjola rostko (ščuko), tén'či koloso, koloso pherdjola ziarkasa. Kóli ziárka vyspiainela, javéla sčhinyben, tedy gavitko javéla sierposa (čhindlesa) te čhinel.” Isúso rakirélas duredýr: “Sósa saštý (možna) te roŭninas Devléskiro Kralipén? Save primierosa (sykaibnasa) saštý les te sykavas? Jov isyn syr garčyčno ziárka, saví isyn naj tyknedýr saré ziarkendyr pe phuv, i manúš čhuvéla la dre phuv, Ne kiéli joj vybyrjola, tén'či javéla baredýr javirendyr barjakirdone raslinendyr. Tel lákire baré randiá čirikliá moginéna te khuven gniázdy (kúfy) dre randiengiri zer (tienjo).” Adiáke primierenca (sykaibnenca) Isúso sykliakirdiá manušén pe adákicy, pe kici jone mogindlé te ĥaljon; bi primierengiro Jov sarésa na sykliakirdiá, ne kiéli Jov jačelaspe jekhdžinó péskire sykliaibnytkonénca, Jov saró piriphenelas lénge. Dro dová dyvés, bel'velié, Isúso phendiá Ppeskire sykliaibnytkonénge: “Piridžasa pe javír rig.” I kiéli jone otmekne manušén, jone lyné Les pésa dre daja-pac' bárka, kaj Isúso sys; i javír barki sys Lésa. I, ake, pe mórjo (derjáv) ĥazdyjápe zoralý balvál. Pani marelas zoralés pir barkakiro borto i začhuvelas la. Isúso dro dová časo sys sutó pe korma, čhuvi šeranduny tel šeró. Sykliaibnýtka džangavenas Les, i phendlé Léske: “Sykliakiribnáskiro! Túke so, usajékh isyn, so ame xasjovasa?” Isúso uštyjá, priphendiá balvaliake te na phurdel i phendiá valnenge: “Štyl! Pirijačen!” I balvál štylyja i jaciá divno štylypen. “Ne, so tumé strahádyne? – phendiá Jov lénge, – kaj isyn tumaró patiaibén?” Piristrahade sykliaibnýtka phučenas jekh jekhestyr: “Ne kon Jov isyn adasavó, so i balvál i mórjo (derjáv) Les kandéna?” Isúso i Léskire sykliaibnýtka javné pe javír morjoskiri rig pe štéto Gadarino. Syr Isúso vygijá barkatyr pe brégo, adáj že angíl Léste maĥilytkone koplicendyr vygijá manúš, savéste sys nálačho dúho (fáno). Adavá manúš dživdiá maškír koplicy. I nikón na moginelas te phandel les až zandir'jenca (cepenca) Pal-dová so but móly les phandenas pir vastá i ĥerá zandir'jenca i vastytkone sastyrenca, i kažno mólo jov rozriskirelas len. Jov sys adasavó zoraló, sob (kaj) te zrikiren les. Dyvesé i ratý, jov psirelas pir koplicy i bérgi, i godlása marelas pes pir bará. Jov durál dykhciá Isusós, podprastandyja ke Jov i pyjá pe čangá angíl Léste; i dyjá gódla zoralés: “So Túke trej mándyr, Isúsie, Naj Vučedyreskiro Devléskiro Čhavó! Sovlahá Devlésa, so na menčynesa Tu man?” Pal-dová so Isúso priphendiá nalačhé duhoske: “Džá javrí adalé manušéstyr, nálačho dúho (fáno)!” Isúso phuciá: “Syr tut kharéna?” “Liegiono – phendiá odová, – pal-dová so amen isyn but.” Jov lyjá drieván te mangél Isusós te na vytradel nalačhé dúhi dalé štetóstyr. Pašýl bérga dro davá časo čaradepe but balyče, nalačhé dúhi pomangne Isusós: “Mek amen te zadžas dre balyčende.” Isúso jekhátyr (totčas) domekcia, sob (kaj) nalačhé dúhi (fany) te vydžán adalé manušéstyr i te zadžán andré dre balyčende. Saré pašé duj bará (tysjoncy) šeré jekhátyr (srázu) čhurdynepe bregoskire krutymatyr dro paní i tasadyne. Balyčengire čaraibnarja tedy poprastandyne pir štetytka gavá te rosphenén pal dová, so kerdiápe. E manušá giné te dykhén, so kerdiápe. I javéna ke Isúso i dykhéna, so manúš, savés rikirdia nálačho dúho (fáno), sys beštó dro uribén, dre péskiri godý; kodová-pac', dre savéste sys but nalačhé dúhi. Jone saré piristrahadyne. I manušá, savé dykhné davá saró, rosphenenas, syr saró sys duhenca i balyčenca. I jone lyné te mangén Isusós, sob (kaj) Jov te džal krig léngire štetóstyr. Kiéli Isúso bešelas dre bárka, tedy manúš, savéstyr sys vytradyné nalačhé dúhi, mangelas Isusós te lel les Pésa. Ne Isúso na dyjá léske te džal pal Léste. “Džá kheré – rakiréla Jov léske”, – i rosphen sarénge, so túsa kerdiá Raj Devél, savó lačhipén Jov túke kerdiá i syr potangindia tut.’” I jov gijá i jaciá te rosphenel dre Dešuforja, so kerdiá léske Isúso. Saré divindlépe. Kiéli Isúso risijá pale pe javír rig dre bárka, ke Jov skedynépe but manušá. Jov jaciápe pe brégo. I javélas Iairo, jekh barydyró sinagogatyr, i, syr dykhciá Isusós, to pyjá ke Léskire ĥerá, i jaciá te mangél Les: “Mirí čhaj meréla, jav i čhuv upré vastá pe láte, sob (kaj) joj te vysastjol i te dživél!” I Jov (Isúso) gijá lésa; pal Léste giné but manušá, tasavi Les. I sys džuvlý, saví dešudúj berš sys nasvaly ratvalypnasa, joj vyrikirdia but, pal-dová so sastiakirelaspe butende sastypnar'jende (doktorende), rozdyja pe sastiakiriben but lové, a zamiést fedyripen, lákiro nasvalypen jaciá fujedýr. Kiéli joj šundiá pal Isusóste, joj podgíia ke Jov palalestyr maškír manušénde i čiladiá Léskiro uribén; “Kóli Mánge jekh uribén Léskiro te čilavav, tedy me vysastjovavas”, – rakirdiá joi; i adáj že lákiro rat pirijaciá te džal, i joj šundiá dro péskire masá, so joj sastija péskire nasvalypnastyr. Isúso jekhátyr ĥalyjá, so Léstyr vygijá zor, Jov risija i phuciá: “Kon čiladiá Miro uribén?” I Léskire sykliaibnýtka rakirdé Léske: “Trusciál (krugom) Túte isyn adákicy manušá i Tu phučesa, kon Tut čiladiá?” Isúso oblydžija manušén dykhibnasa, sob (kaj) te dykhél, kon davá kerdiá. A džuvlý, syr ĥalyjá, so sys lása i triinskiri darátyr, podgíia, pyjá ke Léskire ĥerá i rosphendiá saró čačipén. Jov phendiá láke: “Čháie Mirí! Patiaibén tyró zrakhciá tut! Džá bahtiasa, jav sasty tyré nasvalypnastyr.” Paka Isúso rakirdiá džuvliása, javné sinagogakire-barydyreskire Iairoskire kheréstyr manušá, savén bičhadé, i rakiréna Léske: “Čhaj Tyrí myjá, palsó iščo (inké) te pharjakires Sykliakiribnaskires?” Ne Isúso, syr šundiá dová, so rakirdé, phendiá sinagogakire barydyréske: “Na andyrša, féni (tóka) patia!” I Jov na domekcia nikonés te džal Lésa, apríč Petriste, Jakovoste i léskire pšaléste Ianoste. I, ake, jone javné dro Iairoskiro kher i odój dykhné pherdó manušén, maškír savénde sys šumo godlenca; jone godlenas, i rondlé jasvénca. Syr Jov zagijá dro kher, to phendiá lénge: “Palsó tumé keréna šumo i rovena; patyvalý terný džuvlý na myjá, joj isyn suty.” I jone sandlepe Léstyr. Isúso phendiá sarénge te džán javrí, ne Kokoró Jov patyvalé-terné-džuvliakire dadénca i triné sykliaibnytkonénca zagijá dre štúba, kaj patyvalý terný džuvlý sys pašty. Lyi la pal vast, Isúso phendiá patyvalé terné džuvliáke: “Talita kumi!” (So značynéla Romanes: “Terný Džuvlíje, Túke rakiráva, uštý!”). Patyvalý terný džuvlý jekhátyr uštyjá i jaciá te psirél; láke sys dešudúj berš. I saré jekhátyr jačné štyl divostyr. Isúso šylales priphendiá lénge nikonéske te na rakirén pal davá, so sys; a patyvalia-ternia-džuvliá phendiá te čaliakiren. I Isúso gijá odothýr i javdiá pale dro péskiro fóro, katýr Jov sys rodosa; i Léskire sykliaibnýtka giné pal Léste. Kiéli javdiá sávato (subóta), Jov lyjá te sykliakirél dre sinagoga; saré šundlé Les i divindlépe: “Katýr Léste saró davá isyn? Katýr isyn dasaví bari godý? Syr Jov keréla dasavé dívy Péskire vasténca! Ci davá na Jov isyn skamindári, Marjakiro čhavó, a pšála Léste Jakovo, Joza, Juda i Símono? I pheniá Léskire isyn adái.” Davá xoliakirdia len. I Isúso phendiá lénge: “Manušá kutiakirena (patyvakirena) prorokén na pe péskiri phuv, dro péskiro kher i maškír péskire semencende” Na Jov na mogindiá te kerél odój baré dívy pal léngiro napatiaiben, na giny nábut nasvalen, pe savénde Jov čhuvelas upré vastá i vysastiakirdiá len. Jov divindiape doléstyr, so dre lénde nane patiaibén. I Jov jaciá te psirél pir pašatuné gavá te sykliakirél. Jov khardiá khetané Dešudujen sykliaibnytkonén i bičhadiá len pir dujende; dyi lénge zor te tradén javrí nalačhé dúhi; i dyjá lénge, ake, savó priphenybén: “Na len pésa nisó, apríč destó; ni xabén, ni gonó, ni lové pal kustýk, a te ur'jen curúli (cendali), i na len pésa duj gada. I Jov rakirdiá duredýr lénge: “Karik tumé te na zadžanas dro kher, jačénpe odój, paka tumé džána krig dolé foróstyr; i kóli tumen na priléna, ci na zakamena te šunén, tedy džán javrí, strinskiren bláta tumaré ĥerendyr syr dophenybén vaš lénge.” I jone giné i jačné te phenén lav manušénge pal risiben grehéndyr ke Devél. I jone tradenas javri nalačhé dúhi i sastiakirenas buté nasvalen, čhuvi olivítko dzet pe lénde. I šundiá králi Irodo pal davá, pal-dová so Isusóskiro lav jaciá džindló; i manušá rakirdé: “Iáno Boldeipnari otdžidyjá muléndyr, i paldavá léste isyn dasaví zor. A javír rakirdé; “Davá isyn Ilíia.” A trita rakirdé: “Adavá isyn jekh ĥaratuné prorokendyr.” Kiéli Irodo šundiá dalé rakiribena, jov phendiá: “Iáno, savéske me otčingirdjom šeró, otdžidyjá muléndyr.” Pal-dová so Irodo kokoró priphendiá te len Ianos i te čhuvén les dro štaribén pal Irodiadate, léskire-pšaléskire Filiposkire romniáte, konés jov lyjá paloróm. Pal-dová so Iáno rakirdiá Irodoske: “Túke naštý te lespe péskire-pšaléskire romniása.” Irodiada rikirdia xolý pe Ianoste i rodelas saštypen (vozmožnost') te xasiakirél les, ne joj na mogindiá, pal-dová so Irodo dardiape Ianóstyr i rakhelas les; Irodo džindiá, so Iáno sys čačunó i svénto manúš; but daléstyr, so rakirdiá Iáno, začhuvelas Irodos te zaduminelpe, i Irodo usajékh mangdiá te šunél les. Ne syg, ake, dasavo dyvés javdiá, kiéli Irodoste sys bijanypnytko dyvés, jov khardiá pe svénko péskire barvalé pašatuné ran, tysjoncengire-xaladytkone barydyrén i samone patyvalé manušén dre Galiliéia, tedy Irodiadakiri čhaj zagijá i adiáke kheldia, so kokoró Irodo i léskire gosti javné dre bari rádyma; i králi phendiá raklorjake: “Phuč, so túke isyn pir iló? Saró túke me dáva!” I jov sovlahadiá láke: “Mang mándyr dová, so túke isyn pir iló, saró túke otdáva! Až ke paš miro kralipén!” Joj vygijá ke daj te phučel, so te mangél. “Mang Ianoskire-Boldeipnariskiro šeró”, – sýges phendiá odoia. I adáj že rakly risija murškanés ke králi i mangdiá: “Mangav, sob (kaj) tu kakaná mánge te des Ianoskire-Boldeipnariskiro šeró pe čaró.” Králi zoralés lyjá dro šeró péske, ne te otphenel láke na zakamdiá, adiáke syr jov dyjá sovláh angíl sarénde, kon sys pal skamínd. I jekhátyr (srázu) králi bičhadiá katos i priphendiá léske te janel Ianoskiro šeró. I jov gijá i otčingirdia šeró léske dro štaribén, i jandiá Léskiro šeró pe čaró i otdyjá les raklorjake; a raklori péskire dáke. Kiéli Ianoskire sykliaibnýtka uĥalyne pal davá, jone javné, zakedyne léskiro trúpo i ĥaradé les. Apóstoly skedynépe ke Isúso, i rosphendlé Léske saró, so jone kerdé, pal so jone sykliakirenas manušén. I Jov phendiá lénge: “Džán pe bimanušengiro štéto, tuménge trej te javén jekhdžine i te otkhinjon.” Pal-dová, so sys odój but manušá, savé javénas i džánas, lénde na sys až časo te xan. I jone otplyvindle (dyné plíma duredyr) pe bárka (lodka) pe štéto, kaj nikonés na sys. Ne manušá dykhné, so jone durjonas, i but udžindlé pal davá i prastanas odorík saré for'jéndyr i javné angíl lénde. Kiéli Isúso vygijá pe brégo i dykhciá but manušén, Jov potangindia len, pal-dová so jone sys syr bakriá bi čhupnariskiro; i Jov jaciá len te sykliakirél. Syr javdiá bel'vél', sykliaibnýtka podginé ke Isúso i rakiréna: “Ĥáda, uže baró časo i štéto adáj isyn bimanušengiro. Otmek manušén, mek jone te džán dre pašatuné gavá, sob (kaj) te kinen péske vari-so xabnastyr.” Ne Isúso otphendiá: “Tumé den lénge te xan.” Sykliaibnýtka ĥazdynépe: “Naúšto Tu myslinesa dro iló, sob (kaj) ame te zakinas maró pe dujšelá dinarii te das te xan adalé manušénge?” “Kicý tuménde isyn laby maró?, – phučela Isúso, džán, dykhén.” Jone giné, uĥalyne, i rakiréna: “Pandž maré i duj mačhé.” Isúso phendiá te bešliakiren manušén riadenca pe zeleno čar. Saré bešné dre riady pir pandždešá i pir šel manušá. Isúso lyjá pandž maré i duj mačhé, ĥazdyjá jakhá pe bolybén i bahtiakirdiá xabén, i phagirdiá laby maró i lyjá te piridel sykliaibnytkonénge i odolé rozdenas manušénge; i roskerdiá Jov duj mačhé pe sarénde. Saré xané i čalyne. I jone skedyné dešudúj korzíny (khudé) marésa i mačhenca koterendyr (kuskendyr), so jačnépe. I sys pandž tysjoncy muršá, savé xané laby maró. Jekhátyr (srázu) paló davá Isúso priphendiá Péskire sykliaibnytkonénge te bešén dre bárka te piriplyvinen (dénas plíma pirdal) pe javír rig ke Vifsaida, paka Jov otmekéla manušén. I kiéli Jov roziaciape i otmekciá manušén, to gijá upré pe bérga te mangélpe Devléske. I kiéli javdiá bel'vél', bárka sys maškirál mórjo (derjáv), a Isúso sys jekhdžinó pe brégo. I syr Jov dykhciá, so jone griebinenas vjoslenca (rovlienca) pir zor, pal-dová so balvál sys pe lénde – sys maškír tríto i štárto mardó (štúnda) ratiákiro, ĥáda, Jov lyjá te džal ke jone, štavindoj pir mórjo (derjáv); i Jov myslindia dro iló te prodžal pašé lénde duredýr, ne kiéli jone dykhné, so Jov džála pir mórjo (derjáv), jone dumindle (dyné gody peske), so davá sys zdanki i zadyne gódla. Pal-dová so jone saré dykhné Les i strahádyne; a Isúso jekhátyr lyjá te rakirél lénca: “Rikirenpe murškanés, davá som Me. Na andyršan!” I Jov zagijá andré ke jone dre bárka, i balvál štylyja. Jone sys drieván zdivindle; pal-dová so jone iščo (inké) na ĥalyné dívo marésa, léngire ile sys pharé te ĥaljon. I kiéli jone piriplyvindle (dénas plíma pirdal) pe javír rig pe Gienisarietoskiri phuv, jone terdiné ke brégo. Syr jone giné javrí barkatyr, manušá jekhátyr uĥalyne Isusós; jone prastandoj obgine pir saré štéty i syg ke Isúso lyné te janén nasvalen pe matracy odorík, kaj jone šundlé, so Isúso sys. I kaj Jov te na javélas dre fórja ci dre gavá, manušá čhuvénas nasvalen pe štéty javrí [targitka štéty-ju.o.] i mangenas Les te mekel len i mek féni (xoc') te čilaven Léskiro uribén; saré, kon čilavenas, odolé vysastjonas. Jekhvar javné Farisiéi i vari-savé lylvaritkonendyr, savé javné Jerusalimóstyr, i skedynépe pašýl Léste. I dykhné, so vari-savé Léskire sykliaibnýtka xána “melale vasténca”, so značynéla, “na móri vastá.” Réndo (diélo) dro dová, so saré Farisiéi i saré Judy pririkirenpe ke phurengire-šeralengire prisykliaibena: jone na bešena te xan, paka na vymorna vastá, i kiéli jone javéna targostyr, jone na bešena te xan, paka na vymorena vastá; sys i but javír priphenybená te rakhén: te moren tahtaja (čašy), musera (stakany) i xarkuné (miedítka) pirja; paldová Farisiéi i lylvarítka phučné Isusóstyr: “Sóske Tyré sykliaibnýtka na keréna pir ĥaratuné-manušéngire prisykliaibena? Sóske jone xána maró namorde vasténca?” I Jov phendiá lénge: “Čačipén phendiá proróko Isajo, syr jov rakirdiá pal tuménde, dujemuitkonende: ‘Adalé manušá kutiakirena man pe lavá, a čačunés ile léngire isyn dur Mándyr; léngiro kutiakiriben Mánge nisó na mol. Jone sykliakiréna dová, so manušá pridumindle.’” Tumé jačkirdé priphenybená Devléskire i keréna féni (tóka) pir manušýtka prisykliaibena. Tumé šukár moginéna te otparuven Devléskire priphenybená pe péskire prisykliaibena”, – rakirdiá Isúso. Mójza ž phendiá: “Kutiakir dadés péskires i peskirjá da”, i, “Kon rakiréla našukar pe dadéste peskireste ci date, te merél adavá manúš. Ne tumé sykliakiréna, so kóli manušéste isyn vari-so te pomoginel léskire dáke ci dadéske i jov phenéla: ‘Davá isyn Korbano (davá značynéla, so davá isyn dáro Devléske)’, tedy tumé dalésa samonesa sykliakiréna manušén te na kerén butýr nisó vaš péskire dadénge, tumé otparuvena dalésa Devléskiro lav péskire prisykliaibnenca, i dasavé primiery (sykaibena) saštý te javén te dav but.” I Isúso nevéstyr khardiá ke Pe manušén i phendiá: “Šunén Man i saré pričhuvén zor te ĥaljon: Nisó daléstyr, so džála andré javrestyr dre manušéste, na moginéla te kerél manušés nažužesa; nažužesa manušés butedýr keréla dová, so džála javrí léstyr.” [Konéste isyn kaná, mek te šunél!-ju.o.] I kiéli Jov mekciá len i gijá dro kher, Léskire sykliaibnýtka phučné Léstyr pal primiéro (sykaibén). I Jov phendiá lénge: “Naúšto i tumé iščo (inké) na ĥaljona? Nisó, so džála andré javriestyr dre manušéste, na moginéla te kerél les nažužesa, pal-dová so, davá džála andré na dro iló Manušéskiro, a dre léskiro kužum i džála javrí léstyr.” (Dalé lavénca Isúso rakiréla, so kažno xabén isyn žužó). I Jov rakirdiá: “Dová, so vydžála manušéstyr, kodová keréla manušés nažužesa; pal-dová so manušéskire iléstyr vydžána nalačhé dúmy, napatiaiben dre sém'ia (irí), čoriben, zamariben, bléndo, skvapnyma, frotyma, xolý, ladžave réndy, jakhalo, phut'kiribén, dylnypén. Saró davá fuipén džála javrí manušéstyr, i keréla les melalesa.” I uštyi, Isúso gijá odothýr dre Tironoskire štéty. I kiéli zagijá Jov dro kher, Jov na myslindia dro iló, sob (kaj) vari-kon te džinél, so Jov odój sys; ne Jov na mogindiá te ĥaradjol. Mavlýn (malva), so javdiá Isúso, rozgijápe sýges, i ke Jov javdiá džuvlý, savjakire čhate sys nálačho dúho (fáno). Joj iavdiá i pyjá ke Léskire ĥerá; adáia džuvlý sys griečanka (balamica) Sirofinijankakire rodóstyr i jaciá te mangél Isusós te vytradel nálačho dúho (fáno) čhatyr. I Jov rakirdiá láke: “Mek angledýr te čaliakiren čalés bijatén, pal-dová so na šukár te las krig maró bijatendyr i te čhurdas džuklenge.” Ne joj otphendiá i phendiá Léske: “Čačó, Rajo Dévla, ne i džukela tel skamínd xána bijatengire koterá, so bijaty mekéna.” I Jov phendiá láke: “Pal davá lav, džá; vygijá nálačho dúho (fáno) tyré čhatyr.” Joj risijá kheré, i čhaj lákiri sys pašty dro čhuibén, nálačho dúho (fáno) vygijá látyr. I nevéstyr Isúso vygijá Tironoskire šteténdyr pirdál Sidono ke Galilejakiro mórjo (derjáv) pe Dešufor'jengiri phuv. Odój ke Isúso jandlé kašukes i, savó rakirélas pharés i mangné Les te čhuvél vastá pe léste. Isúso lydžijá les dre rig, čhudiá andré péskire angušta (pal'cy) léske dre kaná. Tén'ci Jov čungardyja i čiladiá léskiri čib, i ĥazdyjá jov jakhá ke bolybén, pharés dyjá ĥondiá (dykhnindia dre péste) i phendiá manušéske: “Jeffata!” (So značynéla: “Otkerpe”). I léskire kaná otkerdepe, i léskiri čib lyjá šukár i jasnes te rakirél. Isúso priphendiá lénge te na rosphenén pal davá nikonéske. Ne, so butýr Jov priphenelas, adiáke jone butýr rozlydžanas mavlýn. I jone zoralés divindlépe i rakirdé: “Saró šukár, so Jov kerdiá, Jov až kašuken i bičibitkonen vysastiakirdiá.” Dre dola dyvesá, kiéli nevéstyr sys but manušá, i manušénge adalenge na sys nisó te xan, Isúso khardiá sykliaibnytkonén i phendiá: “Mánge isyn tango (žalko) adalen manušén, jone trin dyvesá isyn Mánca i lénde na jaciápe xabén; kóli Me rozmekava krig len pir kherá bokhalenca, jone pir drom vymarenape zorjátyr, pal-dová so but léndyr javné durál.” “A syr ame adáj pe dasavo štéto, kaj nisó nane, lathasa adákicy maró, sob (kaj) sarén te čaliakiras?” – otphendlé sykliaibnýtka. “Kicý tuménde isyn laby maró?”, – phuciá tedy Isúso. “Eftá (bitrinéngiro deš)”, – phendlé sykliaibnýtka. Tedy Isúso phendiá sarénge te bešén pe phuv, lyjá eftá laby, parikirdia Devléske pal davá, phagirdiá maró i lyjá te piridel len sykliaibnytkonénge, a odolé rozdenas maró manušénge. Lathnepe lénde i nabutka mačhé; Isúso parikirdia Devléske pal lénde i phendiá sykliaibnytkonénge te rozden len. Saré xané i čalyne i koterá, savé jačnépe, jone skedyné dre eftá korzíny (khudé). Sarén, kon xaja, sys štar tysjoncy manušén. Tén'ci Isúso rozmekcia manušén, I jekhátyr Jov besciá dre bárka i khetané sykliaibnytkonénca javdiá ke Dalmanufakire štéty. Odój ke Isúso podginé Farisiéi i lyné te dophenen Léske. Lénge treindiá te uhtylén Les dro lav i jone trebindle Léstyr ĥiertýk (znamiénijo), sob (kaj) te sprobinen Les. Isúso xor dyjá ĥondiá i phendiá: “Palsó adalé manušá trebinena dívy? Rakiráva tuménge čačipén: ni saví ĥiertýk tuménge na javéla.” Jov jačkirdiá len, nevéstyr besciá dre bárka i dyjape pe javír rig. I sykliaibnýtka bistyrde te len pésa maró, lénde dre bárka sys jekh marikly. Pir drom Isúso lénge priphendiá: “Dykhén, rakhénpe Farisiejengire roščynatyr (zakvaskatyr) i kralískire Irodoskire roščynatyr.” I lyné jone te rozduminen maškír péste: “Palsó da Jov rakiréla pal droždžy? Naúšto paldová, so ame na lyjam peso maró?” Isúso udžindiá davá, phendiá lénge: “Rakiribén na pal dová, so tumé na lyné maró. Naúšto usajékh tumé kakaná na dykhéna, i na ĥaljona? Naúšto ile tumaré sarésa zašutine? Naúšto, kóli tuménde isyn jakhá, tumé usajékh na dykhéna? Isyn kaná, tumé usajékh na šunéna? A syr ža tumé na ripirena. Kóli Me phagirdjom pandž maré pe pandž tysjoncy manušénde, kicý pherdé korzíny (khudé) koterenca tumé skedyné?” “Dešudúi”, – rakiréna Léske. “Ne kóli Me eftá (bitrinéngiro deš) labenca čaliakirdjom štar tysjoncy manušén, kicý pherdé khudé koterenca tumé skedyné?” “Eftá”, – phendlé jone Léske. Isúso phendiá: “Ne syr ža tumé usajékh na ĥaljona?” Jone javné dre Vifsaida; ke Isúso jandlé korores, i mangné Les, sob (kaj) Jov te čilavel les. Isúso lyjá korores pal vast, lydžijá gavestyr, čungardia pe léskire jakhá, čhudiá vastá upré pe léste i phuciá: “Dykhésa vari-so?” Odová podykhciá trusciál (krugom) i rakiréla: “Dykháva manušén; jone psiréna sýrby kaštá (drevy).” Isúso iščo (inké) jékhvar čhudiá vastá léske pe jakhá, odová manúš podykhciá kučes i sastija, jov jaciá te dykhél saró jasnes i šukár! Isúso bičhadiá les kheré priphenybnasa: “Ne džá pale dro gav i na rákir ni konesa odój.” Isúso sykliaibnytkonénca giné Galilejatyr dre gavá Kiesarijakire Filiposkire. Pir drom Isúso phuciá Péskire sykliaibnytkonendyr: “Pal konéste Man priléna manušá?” Sykliaibnýtka otphendlé Léske: “Jekh rakiréna, so Tu san Iáno Boldeipnari; javír rakiréna, so Tu san Ilíia; trita, so Tu san jekh ĥaratuné prorokendyr.” “A tumé pal konéste Man ginéna?” I Pétri otphenéla Léske: “Tu san Xristóso.” I Isúso priphendiá šylales lénge te na rakirén ni konéske pal davá. I Isúso lyjá te sykliakirél len, so Manušéskire Čhavéske javéna darane mén'ki, so Les na priĥaljona godephuré i rašángire barydyrá, so Jov javéla muliakirdo, i pir trin dyvesá Jov otdžidjola. Jov mamúj (priames) rakirélas pal davá. I Pétri khardiá Les dre rig i lyjá te vyrakirel Les. Isúso risijá i dykhciá Péskire sykliaibnytkonén i priphendiá šylales Petriske: “Krig Mándyr, nálačho! Tu duminesa pal manušýtko, a na pal Devlýtko.” I Jov khardiá manušén i Péskire sykliaibnytkonén i phendiá lénge: “Konéste isyn pe iló te džal pal Mánde, mek te otphenelpe péstyr, mek te lel trušúl péskiro i te džal pal Mánde. Pal-dová so, kon myslinela dro iló džiibén péskiro te zrakhél, odová xasiakiréla les, i kon otdéla džiibén péskiro pal Mánde i pal Jevángielija – odová zrakhéla les. Ne savó lačhipén javéla manušéske, kóli léste javéla saró, so léske trej dalé svetóstyr, a jov xasiakiréla péskiro viéčno džiibén. Naúšto saštý (moginéla) te javél pe svéto vari-so, so isyn kučedyr péskire viečnone džiibnastyr? Kon kadavá grehitkoné i biladžaipnytkone rodóstyr ladžala Mándyr i lavéndyr Mirendyr, odoléstyr i Čhavó Manušéskiro ladžala, kiéli javéla dre Dadéskire – Péskiri jarko sláva sventoné Jangolenca.” I Jov rakirdiá lénge: “Čačes, Me rakiráva tuménge: adáj isyn terdé vari-savé, savé na meréna, paka jone dykhéna, syr javéla Devléskiro Kralipén dre sarí Léskiri zor.” Pir šov dyvesá Isúso lyjá Pésa Petris, Jakovós i Ianos i jandiá len pe vučí bérga. Odój pe jakhá sykliaibnytkonende Jov parudyja: Léskiro uribén jaciá drieván parnó, parnedyr kažnoné parnypnastyr dro svéto, so moribnaskiro (suknovalo) moginéla te kerél. Tén'ci sykadyne Ilíia i Mójza, i jačné te rakirén Isusósa. Pétri phendiá Isusóske: “Ravvi, aménge adáj isyn adiáke šukár! Kerása adáj trin šátry: jekh Túke, jekh Mojzáske i jekh Ilijaske.” Darátyr jov kokoró na džindiá, so rakirdiá, pal-dová so jone sys dre bari dar. Ne adáj ža sykadyjá óbloko, čhakirdia len i oblokostyr rozdyjape zan!: “Kadavá isyn Miro drógo Čhavó, Les šunén!” I saré jekhátyr obdykhne pašýl i na dykhné nikonés, apríč jekhe Isusóste lénca. Kiéli jone džánas telé bergátyr, Isúso angilpriphendia lénge, sob (kaj) jone ni konéske te na rakirén, so jone dykhné, paka Čhavó Manušéskiro na otdžidjola muléndyr. Jone rakhne davá dre péste, a maškír péste but móly rakirdé pal davá, syr te ĥaljon Léskire lavá ‘otdžidjola muléndyr’. I phučenas Léstyr, rakirí: “Sóske ž lylvarítka (knížniki) rakiréna, so Ilíia angledýr sys bangó (musindia) te javél?” I Jov otphendiá lénge: “Čačó, so Ilíia angledýr sys bangó te javél i te kerél saró nevéstyr, syr i isyn čhindló pal Čhavéste Manušeskireste, so prijavelape Léske but te pirilydžal mén'ki, i so Jov javéla ladžakirdó? Ne Me rakiráva tuménge, so Ilíia uže javdiá, i manušá kerdé Lésa, so sys pe iló lénde, syr davá i sys čhindló pal léste.” Kiéli jone javné pale ke sykliaibnýtka, tén'či dykhné pašýl lénde but manušén i lylvaritkonen, savé dophenenas lénge. I jekhátyr (srázu), kiéli saré manušá dykhné Les, jone divindlépe zoralés, lyné te podprastan ke Jov te den “dobridim” Léske. “Pal so tumé dophenena jekh jekhéske?” – phuciá Isúso léndyr. I jekh manúš otphendiá Léske: “Sykliakiribnariskiro, me jandjom ke Tu miré čhavés, dre léste zagijá nálačho dúho (fáno) i čhavó na rakiréla. I kaj nálačho dúho (fáno) les te na uhtylel, to jov ravela les telé, adavá manúš mekéla piena móstyr, jov skriežytynela dandenca i jačélape syr kašt. I adiáke me rakirdjom Tyré sykliaibnytkonénge, sob (kaj) jone te vytraden davá nálačho dúho (fáno) javrí, ne jone na dyné ráda. Isúso otphendiá kadasavé lavénca: “O, napatiaibnytko ródo! Kicý Mánge te javav tuménca? Ci but Mánge te vyrikirav tumen? Janén les ke Me!” Tén'ci jone jandlé les ke Jov. I kiéli jov dykhciá Les, jekhátyr nálačho dúho (fáno) zoralés trinskirdia les, i jov pyjá pe phuv i radiape, i mekelas piena móstyr. I phuciá Isúso léskire dadéstyr: “Syr ĥará (dlúges) davá kerélape lésa?” I jov phendiá: “Tyknybnastyr. I častes dúho čhurdelas les dre jag i dro paní te xasiakirél les. Ne kóli tu désa ráda te kerés vari-so, mek te javél túke pe iló te des vast aménge.” O Isúso phendiá Léske: “Kóli tu moginésa te patias nábut, saró moginéla te javél kodoléske, kon patiála. Jekhátyr (srázu) terné-beršengiro dad dyjá gódla i phendiá jasvénca: “Rajo Dévla! Me patiáva, pomogin Miré napatiaibnaske!” Kiéli Isúso dykhciá, so manušá lyné te prastan ke davá štéto, jov štyliakirdia nálačho dúho (fáno), phení léske: “Dúho (Fáno) kašuko i muto (niemo), me priphenava túke, te džas krig léstyr, i, sob (kaj) butýr te na zadžas!” Tén'ci nálačho dúho (fáno) dyjá gódla, trinskirdia zoralés les i gijá krig léstyr. I adavá manúš jaciá sýrby muló, paldavá but manušá phendlé: “Jov isyn muló.” Ne Isúso lyjá terné-beršengires paló vast, pomogindia (dyjá vast) te ĥazdelpe i odová uštyjá pe ĥerá. Kiéli Isúso zagijá dro kher, Léskire sykliaibnýtka jekh pe jekh phučné Léstyr: “Sóske ame na mogindiam te vytradas nálačho dúho (fáno)?” I Jov phendiá lénge: “Dasavo dúho (fáno) vytradelape féni (tóka) mangipnasa i postosa. Isúso i sykliaibnýtka giné péske dalé štetóstyr i giné pirdál Galiliéia. Isúso pričhudia zor te kerél adiáke, sob (kaj) manušá te na džinén, kaj Jov sys. Pal-dová so Jov sykliakirdiá Péskire sykliaibnytkonén, i phendiá lénge: “Čhavés Manušeskires zdena dre manušéngire vastá, i jone muliakirena Les; i muliakirdo Jov otdžidjola pir trin dyvesá.” Ne jone usajékh na ĥalyné dalé lavá, a te phučén Léstyr darándyne. I jone javné dro Kapiernaumo. Kiéli Isúso sys dro kher, Jov phučelaspe léndyr: “Phenén, pal so tumé dénas duma pir drom?” Jone ž sys štyl; pal-dová so pir drom rakirdé jekh jekhésa, kon isyn naj baredýr maškír lénde? Isúso besciá, skedyjá len trusciál (vokrug) Péste i rakiréla: “Kon vykedéla te javél anglatunó, odová mek te javél palatunó i butiarno vaš sarénge.” Jov lyjá tykné bijatós (čhavores) pe vastá, oblyja les, čhudiá les maškirál i phendiá lénge: “Kon priléla ke pe jekhés adasavé bijatós vaš Miro lav, odová i Man priléla, a kon priléla Man, odová priléla Odolés, Kon bičhadiá Man?” Iáno phendiá Isusóske: “Sykliakiribnáskiro! Ame dykhciam manušés, savó Tyré lavésa vytradela nalačhé dúhi (fany) i ame léske phendiam te pirijačel, pal-dová so jov na sys aménca.” “Na zaphenen Léske, – phendiá lénge Isúso, – kon Miré lavésa keréla dívo, odová na moginéla te phenél čoripén pe Mánde. Kon isyn pal aménde, odová nane proti aménde. Kóli vari-kon déla tuménge tahtáj (čaša) šylale paniésa, vaš Miro lav, pal-dová so tumé san Xristosóskire, čačes Me rakiráva tuménge: jov na xasiakiréla otdyibén Devléstyr. I kon zlydžala ke grého adasaven tyknen, savé patiána dre Mánde, tedy fedýr javélas léske te ur'jel siavitko (miel'nično) bar pe men i te čhurdén les dro morjoskiro (derjavéskiro) xoripén. Kóli tyró čačó vast zlydžala ke grého tut, čingir krig les. Fedýr javélas túke te zadžas dro džiibén jekhe vastésa, syr duje vasténca te zadžas dro liúno (ado), dre jag, so nijékhvar na murdjola. I kóli tyrí ĥerój zlydžala ke grého tut, čingir krig la. Fedýr javélas túke te zadžas dro džiibén langalesa, syr duje 'gerenca te čhurdén tut dro liúno. I kóli tyrí jakh zlydžala ke grého tut, vyle la. Fedýr javélas túke te zadžas dro Devléskiro Kralipén jekhe jakhasa, syr dujo jakhénca te čhurdén tut dro liúno, kaj isyn kirmo, savó xála len, savo na muljola, i jag, saví xačkiréla len, so na murdjola. Kažno manúš javéla žužakirdo i sýrby londiakirdo jagása. Lond isyn kuč, ne kóli lond jačéla bi londypnaskiro, sósa londiakiresa lond pale? Te javél lond dre tuménde, i te javén tumé dro ramánjo (miro) jekh jekhésa!” I uštyi, Isúso gijá krig dolé šteténdyr, i javdiá pal Iordáno dre Judéia; i nevéstyr ke Isúso skedynépe manušá, i Jov sykliakirdiá len pir Péskiro sykliaiben. I javné ke Jov Farisiéi te propatiakiren Les, i phučné Léstyr: “Phen aménge, ci saštý (možna) muršeske te mekel péskire romniá?” I Jov otphendiá lénge i phendiá: “So Mójza (Moisiejo) priphendiá tuménge?” I jone phendlé: “Mójza délas vólia muršeske te čhinel lyl pal rozgiiben i te mekel la.” Ne Isúso phendiá lénge: “Jov čhindiá davá priphenybén pal tumaré xoliamé ile. A dro anglypén (načalo), syr Devél sozdelas svéto, Jov sozdyjá muršés i džuvliá. Paldavá mekéla manúš péskire dadés i da, i jov javéla te dživél péskire romniása; i javéna jone syr jekh loč (plot'); pal-dová so jone isyn kakaná na duj, a jekh loč. Pal-dová so Devél čhudiá khetané, mek adavá manúš te na rozmarel.” I dro kher sykliaibnýtka nevéstyr phučné Léstyr pal davá. I phendiá Jov lénge: “Kóli kon mekéla péskire romniá i léla javirja, odová keréla biladžaipén pervoné romniake; i kóli joj kokori rozdžalape péskire romesa i vydžála paloróm pal javiréste, tedy joj keréla biladžaipén.” I jone janénas ke Isúso tykné bijatén, sob (kaj) Jov te čilavel len; a sykliaibnýtka košle len [na domekenas-r.s.] Ne kiéli Isúso dykhciá davá, Jov xoliásyja i phendiá: “Mekén čhavorén ke Me; i na terdjon pe drom lénde, pal-dová so Kralipén dro Bolybnáskiro Rajo javéla léngiro. Čačes, rakiráva tuménge: kon na priléla Kralipén dro Devléskiro Rajo, adiáke syr davá bijáto, odová na zadžála dro Kralipén.’” I Jov oblyja bijatén, čhudiá upré vastá pe lénde, i bahtiakirdiá len. Ne kiéli Isúso vydžálas dro drom, ke Jov podprastandyja manúš, pyjá pe čangá angíl Léste i phuciá: “Drógo Sykliakiribnáskiro! So mánge te keráv, sob (kaj) te doresav paš dro viéčno džiibén?” “Palsó tu kharesa man ‘Drógo?’” – phendiá Isúso. ‘Drógo isyn jekh Devél. Tu džinésa priphenybená: ‘Na zamar, na ker biladžaipén, na čor, na sovlahá xohanés (pefromi), na xohav, kutiakir dadés i da.’” “Sykliakiribnáskiro, – otphendiá i phendiá pe davá manúš, – saró davá me zrakhcjom čhavoripnastyr.” Isúso laskasa podykhciá pe léste i rakiréla: “Túke jekh na uhtýlla (nádosi): džá, rozbikin saró péskiro barvalypén, i rozde lové čororenge, tedy túte javéla kučipén pe bolybén; tén'či jav, džá pal Mánde.” Manúš jaciá smentno (skučno) dalé lavéndyr, i gijá dre rig pharé minasa: pal-dová, so Jov sys drieván barvaló. Isúso lydžijá trusciál i phendiá Péskire sykliaibnytkonénge: “Syr pharó javéla barvaleske te zadžál dro Kralipén dro Devléskiro Rajo.” Sykliaibnýtka strahádyne Léskire lavéndyr, a Isúso nevéstyr otphendiá lénge, rakirí: “Čhavorale! Syr isyn pharó te zadžán dro Kralipén dro Devléskiro Rajo odolénge, kon patiála zoralés dro barvalypén. Davá lokhedýr vierbliudoske te prodžal pir suvjakiro kan, syr barvaleske te zadžál dro Kralipén dro Devléskiro Kralipén.” Sykliaibnýtka iščo (inké) butýr divindlépe i lyné te phučén jekh jekhestyr: “Kon da moginéla tedy te zrakhelpe?” Isúso podykhciá pe lénde i phendiá: “Manušénge davá naštý apríč Devléste. Devléske saró saštý.” Pétri tedy lyjá te rakirél Léske: “Ame saró jačkirdiam i gijam pal Túte.” Isúso phendiá: “Čačes, Me rakiráva tuménge: Nane nikonés, kon jačkirdiá kher, ci pšalén, ci phenien, ci dadés, ci da, ci čhavorén, ci féldy vaš Mánge i vaš Jevángielija, konéste na javélas dre šel móly butýr doléstyr, so lénde isyn dro davá džiibén: kherá, pšalén, phenien, dajen, čhavorén, féldy, ne khetané sarésa i tradypena, a dro anglatunó džiibén jone doreséna (dolena) viéčno džiibén. A but anglatuné, javéna palatuné, a palatuné – anglatuné.’” Jone sys dro drom ke Jerusalimo; Isúso gijá angíl sykliaibnytkonende, savé džánas dre dar, adiáke-pac' syr i manušá, savé džánas pal Léste. Jov khardiá dre rig Peskiren dešudujen sykliaibnytkonén i lyjá te rakirél lénge pal dová, so treindiá Lésa te javél: “Ame džása pašyledýr ke Jerusalimo, i Čhavó Manušéskiro javéla zdyno rašángire barydyrénge i lylvaritkonenge: jone zasendinena Les pe maribén i zdena Les Najudénge; jone javéna te sanpe xoliames, i te čungarden pe Léste, te marén Les čupniasa i muliakirena Les, ne pir trin dyvesá Jov otdžidjola.” I džána pašyledýr ke Isúso Jakovo i Iáno, duj Zaviediejoskire čhavé, i rakiréna Léske: “Sykliakiribnáskiro, ame myslinasa dro iló, sob (kaj) Tu te kerés vaš aménge dová, pal so ame mangasa Tut.” Jov phendiá lénge: “So isyn tuménge pir iló, sob (kaj) Me te keráv vaš tuménge?” “De vólia aménge dro Tyró Kralipén te bešas jekhéske pir čačó i javireske pir zérvo (liévo) vast Tútyr”, – phendlé jone Léske. “Tumé kokoré na džinéna, so tumé mangena”, – phendiá lénge Isúso. “Naúšto tumé moginéna te p'jen davá tahtái, savó Me pjava, i te bolenpe boldeipnasa, savésa Me bolavape?” “Moginasa”, – otphendlé jone Léske. Tedy Isúso phendiá lénge: “Te p'jen tahtáj (čaša), savó Me pjava, i te bolenpe boldeipnasa, savésa Me som boldo, tumé javéna; ne te dav vólia tuménge te bešén pir čačó i pir zérvo vast Mándyr, – davá isyn na dre Mirí zor; dalé štéty isyn kodolénge, konéske jone isyn prigotovindle.” Kiéli javír deš sykliaibnýtka šundlé pal davá, jone xoliasyne pe Jakovoste i Ianoste. Isúso khardiá len i rakiréla: “Tumé džinéna, so kodolé, savén ginéna pal baré rande pe Najudénde, rikirna zor te xulainen pe lénde, i léngire baré raja xulainena pe lénde: ne mek davá te na javél maškír tuménde. Odová, kon kaméla te javél naj baredýr maškír tuménde, mek te javél dynári tuménge, i kon kaméla te javél pérvo maškír tuménde, mek te javél pishári sarénge. Adiáke i Čhavó Manušéskiro javdiá na vaš dová, sob (kaj) Léske te dynarinén (te služynen), ne sob (kaj) Jov kokoró te dynarinél i te otdél Péskiro džiibén, syr vykinybén pal butende.” I jone javné dro Jerihóno. Kiéli Isúso vydžálas Jerihonostyr Péskire sykliaibnytkonénca i buté manušénca, kororó bógo Vartimiejo, Timiejoskiro čhavó, sys beštó pašýl drom. I, syr Jov šundiá, so davá sys Isúso Nazarianino, jov lyjá te del gódla: “Isúsie, Čhavó Davidóskiro! Potangine (požalin) man!” I but manušá lyné te rakirén xoliása Léske, sob (kaj) jov te javél štyl, ne jov délas gódla iščo (inké) zoraledýr: “Čhavó Davidóskiro! Potangine man!” Isúso terdijá i phendiá: “Kharén les.” I jone khardé korores, rakirí Léske: “Jav muršesa, uštý, Jov kharéla tut.” Vartimiejo čhurdyjá krig péstyr upratuno uribén, uhtia i podgíia ke Isúso. “So tŭke trej, sob (kaj) Me te keráv túke?” – phuciá Isúso. Kororó phendiá Léske: “Ravvuni, sob (kaj) te otkerenpe Miré jakhá.” “Džá, – phendiá Léske Isúso, – tyró patiaibén vysastiakirdiá tut.” Kororó adáj ža lyjá te dykhél i gijá pir drom pal Isusóste. Kiéli Isúso sykliaibnytkonénca podginé pašyledýr ke Jerusalimo ke gavá Vifagija i Vifanija, savé sys pe Olivitkone – bergákiro sklono, Isúso bičhadiá dujén Péskire sykliaibnytkonendyr, i phendiá lénge: “Džán dro gav, savó isyn angíl tuménde, i kiéli tumé odorík zadžána, tumé dykhéna priphandle ternin'kone osljonkos (miegarorís), pe savéste nikón na sys beštó. Otphanden les i janén adarík. Kóli kon phučela tuméndyr, so tumé keréna, phenén léske: ‘Osljonko trej Ráske-Devléske’, i ‘So Jov syg riskiréla les pale.’” Sykliaibnýtka giné, i lathné osljonkos, savó sys priphandlo javrí pašýl kherítko pórta i otphandle les. Vari-savé manušá, savé sys terdé odój, rakirdé lénge: “So tumé keréna? Palsó tumé otphandena osljonkos?” Sykliaibnýtka otphendlé lénge adiáke, syr phendiá Isúso, i manušá mekné len te džán. I jone jandlé osljonkos ke Isúso i čhudé upré pe léste péskire uribená, i Jov besciá pe léste. I but manušá čhuvénas péskiro uribén pir drom, javír čhurdenas pe drom zelena randiá, savé jone sčhindle feldendyr. I manušá, savé giné angíl i palál Isusóste, dénas gódla radymása: – “Asanna! Bahtiakirdó, Savó džála vaš lav Devléskiro! Bahtiakirdó, Savó džála dro Kralipén Dadéskire amareskiro Davidóskiro! – “Asanna dre upratunende!” I kiéli Jov javdiá dro Jerusalimo, zagijá dre Khangirí; obdykhcia pašýl Péste saró i vygijá. Syr sys uže koríg (poznes), to Jov gijá dešudujé sykliaibnytkonénca dre Vifanija. I pe javír dyvés, kiéli jone vyginé Vifanijatyr, Isúso bokhalyja; i Jov dykhciá durál inžyritko kašt (drévo), savó sys čhakirdo patrienca (listenca) i podgíia pašyledýr te dykhél, ci isyn pe léste barjakirdé (plódy). Ne barjakirdé pe kašt na sys, jekh patria, pal-dová, so časo vaš múri na javdiá. I phendiá Jov pe davá kašt: “Mek nikón te na xal barjakirdó tútyr nijékhvar.” I sykliaibnýtka Léskire šundlé davá. I javné jone dro Jerusalimo. I Jov zagijá dre Khangirí i lyjá te tradel javrí odolén, savé biknenas i kinenas dre Khangirí; i Jov obriskirdia odolengire skaminda, savé paruvenas lové i prilavki odolengire, savé biknenas golumben: i Jov na délas vólia te lydžán nisó tovarostyr (arcikulendyr) pirdál Khangirí; i Jov sykliakirdiá i phendiá lénge: “Saré manuše javéna te kharén Miro kher ‘Mangipnytko kher’ vaš saré nácyi, syr isyn čhindló?’ A tumé kerdé léstyr rozmaribnar'jengiri kirčyma.” I rašángire barydyrá i lylvarítka šundlé davá i rodenas, syr te muliakirén Les; pal-dová so jone darándyne Léstyr, pal-dová so saré manušá divindlépe pe Léskiro sykliakiribén. I kiéli javdiá bel'vél', Isúso sykliaibnytkonénca giné foróstyr. Tasiárles (ránes) pe javír dyvés, syr jone džánas pašýl, jone dykhné, so inžyro zašutija ke phuv. Pétri priripirdia i phendiá Léske: “Ravvi! Dykh, inžyro zašutija, savó Tu prokostian!” I Isúso phendiá lénge: “Patián dre Devléste!” Čačes rakiráva tuménge: “Kóli kon priphenela daliake bergake: ‘Ĥazdepe i čhurdepe dro paní’ i, kóli tumé na javéna te kuninenpe dro tumaró iló, i javéna te patián, so javéla dová, so jov rakiréla, tedy Devél spolninela vaš adalé manušéske. Paldavá Me rakiráva tuménge: saró, pal so tumé mangénape i mangena, patián, so tumé doresné (dolyne), i javéla dynó tuménge. I kóli tumé mangénape, tedy primangen sarénge, pe konéste rikiréna xolý, sob (kaj) i tuménge tumaró Dad, Savó isyn dro Bolybnáskiro Rajo, te otmekél tumaré gréhi.” Isúso sykliaibnytkonénca javné nevéstyr dro Jerusalimo. I kiéli Isúso sys dre Khangirí, ke Jov podginé rašángire barydyrá, lylvarítka i godephuré. I jačné te rakirén Léske: “Save zorjása Tu kerésa saró davá? I kon dyjá Túke dasaví zor te kerés davá?” Isúso ž phendiá Lénge: “Me phučava tuméndyr jekh lav i otphenen Mánge, i tedy Me phenáva tuménge, savé zorjása Me keráva saró davá. Ianoskiro boldeipen isyn bolybnástyr ci manušéndyr? Otphenen Mánge.” Jone rakirdé maškír péste: ‘Kóli phenása, so bolybnástyr’, Jov tedy phučela: ‘Sóske tumé na patiandyné Léske?’ Ne kóli ame phenása: ‘Manušéndyr’ – jone darándyne manušéndyr, savé sys odój, pal-dová so saré gindlé Ianos pal Devléskire prorokoste. I jone phendlé Isusóske dro otphenybén: “Na džinása.” I Isúso phendiá lénge: “I Me na phenáva tuménge, savé zorjása Me keráva davá.” I Isúso lyjá te rakirél manušénge primierenca (sykaibnenca): “Jekh manúš čhudiá vinagrádniko, i tyno pašýl léste, vy ĥanadia ĥanbín (jama) te tasavel mol (vino) i kerdiá vučardý (vyška) te rakhén, i zdyja les vinagradar'jenge dro najmo i kokoró tradyjá. Ne kiéli javdiá časo, jov bičhadiá ke vinagradarja jekhe péskire pishar'jendyr te lel péskiri paš aplodostyr, ne vinagradarja uhtyldé les, mardé i otbičhade les krig nisosa. Tedy jov bičhadiá nevéstyr ke jone javire pisharís, ne i léske pharade šeró barénca i ladžakirdé les. I bičhadiá tritone dynarís; a les vinagradarja sarésa zamardé; konés xuláj na bičhavelas, jone sarén marenas ci zamarenas. Léste butýr ni konés na jačelaspe te bičhavel apríč péskire jekhe drogoné čhavéste. “Ne, ĥáda, jone na čilavena miré čhavés”, – dumindia jov i bičhadiá les dro kónco (dro jagóro). I vinagradarja phendlé jekh jekhéske: “'Gada, isyn nasliedniko (prilyibnaskiro pe mištypén): javén, zamarasa les i vinagrádniko javéla amaró.” Jone lyné les, zamardé i čhurdyné javrí les vinagradnikostyr. So javéla te kerél vinagradnikoskiro xulái? Jov javéla, muliakiréla vinagradar'jen, a vinagrádniko zdela javirénge. Ci na gindlé tumé dro Čhinybén: ‘Bar, savó na prilyné butiarné, jaciá šeralé baresa pe venglo vaš kher. Davá isyn Devléstyr i isyn divno dro amaré jakhá’” I jone rodenas saštypen te uhtylel Les, ne darándyne manušéndyr, pal-dová so jone ĥalyné, so Jov rakirdiá davá primiéro (sykaibén) pal lénde; jone mekné Les i giné krig. I jone bičhadé ke Isúso vari-savé Farisiejendyr i Irodianendyr, sob (kaj) te uhtylén Les dro lav. Kodolé manušá javné ke Isúso i phučné: “Sykliakiribnáskiro! Ame džinása, so Tu san čačunó i sykliakiresa Devléskire čačipnenge, na dykhí pe manušéskiro štéto maškír javire manušénde, Tu na daresa nikonestyr; phen aménge čačunés: ci pir Zakóno te pleskiras myto kiesarjoske? Te pleskiras aménge ci nad?” Isúso džindiá léngiri frotyma i phendiá lénge: “Sóske tumé kaména te propatiakiren Man?” – phuciá Jov. “Janén Mánge dinarijo te dykháv.” Léske jandlé ĥasprin (kapieika) i Jov phuciá léndyr: “Konéskiro muj i lav isyn vyčhindlé adái?” “Kiesarjoskiro”, – phendlé jone Léske. Tedy Isúso phendiá lénge: “Otdén kiesarjoskiro kiesarjoske, a Devléskiro Devléske.” Jone drieván divindlépe Léstyr. I javné vari-savé Sadukiei ke Isúso. Sadukiei rakirdé, so nane otdžidyipen meribnástyr. Jone jačné te phučén Léstyr: “Sykliakiribnáskiro! Mójza čhindiá vaš aménge: kóli vari-konéste pšal meréla i jačkiréla džuvliá bi čhavorengiro, mek léskiro pšal te lel adalia džuvliá paloróm, sob (kaj) te riskirél pale ródo mulé pšaleskiro. Sys eftá bitrinéngiro deš pšála; i pérvo pšal lyjá romniá, i myjá, na jačkirdiá péske ródo; i javír lyjá la i myjá, na jačkirdiá péske ródo: i tríto pšal adiáke-pac'; i saré eftá na jačkirdé čhavorén. Syg pal sarénde i džuvlý myjá. Dro otdžidyipen, kiéli jone uštena meribnástyr, konéskiri romný javéla kadaja džuvlý? Pal-dová so saré eftá pšála sys lákire romá.” Isúso phendiá lénge: “Tumé xohavenape, pal-dová so tumé na džinéna ni Čhinybén, ni zor Devléskiri? Save otdžidjona meribnástyr, na javéna te vydžán paloróm; i na javéna te lenpe; a jone javéna syr Jangóly dro Bolybnáskiro Rajo. Kakaná, rakirí pal otdžidyipen muléndyr: ci na gindlé tumé dre Mojzáskire lylvaria pal dová, syr Devél phendiá Léske Péskiro lav xrustostyr, savó xačolas jagása: ‘Me som Devél Avraamóskiro, Devél Isaakoskiro i Devél Jakovóskiro?’” Jov isyn Devél na mulenge, Jov isyn Devél džidé-manušéngiro! Tumé drieván xohavenape.” Jekh lylvaritkonendyr šundiá, syr jone dophenenas Léske, to pri'galyja, syr mištés Isúso otphendiá lénge i phuciá Léstyr: “Savó priphenybén isyn baredýr saréndyr?” Isúso otphendiá: “Ĥáda, isyn baredýr saréndyr: ‘Šun Izrailjo! Raj Devél amaró isyn jekh Devél; rikir dro péste syr Drógima Ras-Devlés tyrés saré ilésa peskiresa i saré Duhósa tyresa i saré godiása tyrjasa i saré zorjása tyrjasa’. Javír priphenybén isyn syr pérvo: ‘Rikir dro iló pašatunes tyrés, syr kokoró pes’. Nane priphenybená baredýr dalendyr.” “Mištó! Čačipén Tu phendián, Sykliakiribnáskiro, – phendiá Léske lylvarítko, – “Devél isyn Jekh i javír butýr nane apríč Léste; i te rikires syr Drógima Les saré ilésa, saré godiása, saré zorjása, te rikires dro iló pašatunes péskires, syr kokoró pes-butýr, syr celoné-xačkiribnaskire dyibená i svénta dyibená.” Isúso dykhciá, so lylvarítko god'vares otphendiá i phendiá Léske: “Nadur tu san Devléskire Kralipnastyr.” Dolé molostyr nikoneste butýr na sys muršypen te zadel Isusóske butýr phučibena. I, kiéli nevéstyr Isúso sykliakirdiá dre Khangirí, Jov otphenélas: “Syr adalé lylvarítka rakiréna, so Xristóso isyn Čhavó Davidóskiro?” Davído ža Kokoró phendiá Sventoné Duhósa: “Phendia Raj Devél Ráske-Devléske miréske: beš pe čačó (pravo) vast Mándyr, paka Me čhuváva vergén Tyrén tel ĥerá tyré.” Davído ž Kokoró khardiá Les “Raj Devél”, katýr ža Jov isyn Čhavó Léskiro?” I but manušá šundlé Les radymása. I rakirdiá Isúso duredýr dro Péskiro sykliakiribén: “Rakhénpe lylvaritkonendyr, savénge pir iló te psirén dre dlenge uribená i lénge trej, sob (kaj) te patyvakiren len pe targitka štéty; savé vykedena te bešén pe anglatuné štéty dre sinagogi i pal khardé skaminda, savé obhana pivliengire (udovengire) kherá i mangénape ĥará (dlúges), sob (kaj) len te dykhén; adasaven manušén užakiréla pharó sendiakiriben.” I Isúso besciá angíl Khangirjákire-lovitko piralý (tyknori) i dykhciá, syr manušá čhuvénas lové dre piralý. But barvalé manušá čhuvénas baré kicypena lové. Ne ĥáda, podgíia čorori pivly (udova), i čhudiá duj xarkuné ĥaspria (miedítka gaspria), so isyn syr jekh kodranto. Jov khardiá Péskire Sykliaibnytkonén i phendiá: “Čačes, Me rakiráva tuménge: adáia čorori pivly čhudiá butýr saréndyr, savé čhuvénas dre tyknori, pal-dová so jone čhuvénas péskire balvalypnastyr, a joj péskire čororipnastyr dyjá saró, so láte sys, saró so sys láte te dživél.” Kiéli Isúso vydžálas Khangirjátyr, jekh sykliaibnytkonendyr rakiréla Léske: “Dykh, Sykliakiribnariskiro! Save bará! Save uprekeribena!” “Tu dykhésa saré dalé baré kherá?”, – phendiá Léske Isúso. “Na jačélape adáj bar pe bar, savó na javélas čhurdynó telé.” Kiéli Isúso sys beštó pe Olivitkone-bergákiro sklono angíl Khangirí, sykliaibnýtka Pétri, Jakovo, Iáno i Jendri phučenas Léstyr jekh pe jekh javirendyr: “Phen aménge, kiéli davá saró javéla i saví špéra (znako) javéla angíl, syr saró davá kerélape?” Isúso otphendiá Lénge: “Rakhénpe, sob (kaj) nikón te na xohavél tumen. But javéna ke tumé Miré lavésa i javéna te rakirén: ‘Me som’, i buten xohavena. Kiéli tumé šunena pal maribén i mavlynia (malvy) pal maribena, na andyršan. Saró davá trej te javél, ne davá iščo (inké) na saró. Pal-dová so ĥazdénape manušá pe manušénde i kralipén pe kralipén. Dre rázna štéty javéla te trinskirelpe phuv i javéla bokh. Saró davá javéla angíl sýrby dukhá, dre savé nevó manúš bijandjola, Dykhén ža pal péste; tumen javéna te sendinén, i javéna te marén dre sinagogi. Pal Mánde tumen javéna te tyrden angíl rande i kral'jénde, i tumé javéna te dophenen lénge pal Mánde. Ne angledýr saréstyr trej te phenelpe lav Jevangielijatyr vaš saré nácyi. Kiéli tumen lydžána te zden, na piridživen angíl, so tuménge te rakirén; rakirén dová, so tuménge javéla dynó dre dová-pac' mardó (štúnda) te rakirén; pal-dová so na tumé kokoré javéna te rakirén, a Svénto Dúho (Fáno). Pšal javéla te biknel pe meribén pšalés i dad javéla te biknel péskires bijatós; čhavoré javéna te biknen péskire daden, sob (kaj) te muliakirén len. Saré javéna te na den patýv zoralés tuménge pal Miro lav; a odová, savó vyrikiréla saró davá, javéla zrakhno. Kiéli tumé dykhéna golotyniakiro/ zamekibnaskiro džungalypén (brytkima), odój, kaj láke na treindiá te javél (mek te ĥaljol odová, kon ginéla), ĥáda, mek odolé, savé isyn dre Judéia, te našén dre bérgi; kon isyn pe kherítko bérga, mek te na zdžal telé, i te na džal tele dro kher te lel vari-so kheréskire mištypnástyr. Kon isyn dre félda, mek te na risjol pale te lel péskiro uribén. Men'ka javéla tedy perale džuvlienge i džuvlienge, savé čaravena kolynesa tyknoren dre dolé dyvesá! Mangénpe Devléske, sob (kaj) davá te na javél ivantakiro/ivendeskiro (zimakiro). Tedy javéla dasaví pharí bída, saví na sys svetóskire anglypnástyr, savó Devél kerdiá, ke adadyvés, i so butýr na javéla nijékhvar. I kóli Devél te na tykniakirelas dalé dyvesá, tedy nikón na vydživelas. A vaš manušénge, savén Jov Kokoró vykedyjá, Jov tykniakirdia dalé dyvesá. Tén'ci kóli vari-kon phenéla tuménge: ‘Ĥáda, isyn Xristóso!’ Ci ‘Jov isyn odój’, – na patián, iavéna xohané Xristosy, xohané proróki; jone sykavéna baré ĥertyka (znamiénii) i keréna dívy, sob (kaj) te xohaven až kodolén manušén, savén Devél vykedyjá, kóli javéla saštý. Rakhénpe. Me tuménge saró angíl phendjom. A dro dolé dyvesá, syr prodžála (nakhela) daja pharí bída, kham murdjola, i čhon na javéla te svencynel péskire svetosa (losasa), i čergeniá peréna bolybnástyr, i bolybnáskire zorja javéna trinskirde. Tedy manušá dykhéna Manušéskire Čhavés, Savó javéla te džal dre óbloki baré zorjása i dre sláva. I tedy bičhavéla Jov Péskire Jangolen i skedéla khetané, konés Jov vykedyjá štaré rigéndyr, phuvjákire jagoróstyr (krajostyr) ke Bolybnáskiro jagóro. Sykljon primiéro (sykaibén) inžyritkone kaštéstyr: kiéli léskire randiá jačéna kovlé i mekéna patria (listy), to tumé džinén, so syg javéla lynaj (nilaj) adiáke i tumé, syr dykhéna, so davá saró adiáke kerlape, džinén, so Jov isyn nádur, pašýl vudará. Čačes, Me rakiráva tuménge: na prodžála davá manušýtko ródo, paka saró davá kerélape ke kónco/ke jagóro (spolninelape). Bolybén i phuv prodžána, a lavá Miré na prodžána. Nikón na džinéla ni dyvés, ni mardó (štúnda), kiéli davá saró javéla, ni bolybnáskire Jangóly, ni Čhavó – a jekh Dad džinéla. Dykhén, i rakhénpe i mangénpe Devléske: pal-dová so tumé na džinéna, kiéli dasavo časo javéla. Davá saštý (možna) te primierines manušésa, savó gijá dro daratuno drom. Jov jačkiréla péskiro kher, sob (kaj) te pridykhen pishárja. Kažnonéske pisharíske jov déla zadyiben, a odoléske, savó sys terdó pašýl pórta, priphendiá te dykhél rakhunes (pil'nes). Adiáke i tumé: “Dykhén, na soven!” Pal-dová so tumé na džinéna, kiéli risjola kheréskiro xulái: moginéla dre paš rat, ci syr probagala bašno, ci pe zlóko; sob (kaj), kiéli jov javéla, te na zauhtylel tumen, so tumé san suté. I dová, so Me rakiráva tuménge, rakiráva sarénge: rakhénpe!” Pir duj dyvesá javélas svénko Patradí i Apriesnokengiro; rašángire barydyrá i lylvarítka dykhné rakhibnýtkes, syr te uhtylén Isusós frentymasa i te muliakirén Les. “Ne pe svénko Patradí davá naštý te kerás nisyr, – rakirdé jone maškír péste, – manušá moginéna te ĥazdén búnto.” Kiéli Isúso sys dre Vifanija, Jov sys beštó pal skamínd dro kher ke Símono Prokazytkoneskiro, i dro kher zagijá džuvlý alibastrytkone khoresa (žbanosa) kučoné makhibnasa, savó sys kerdó čačuné nardanostyr. Joj rozmardiá khoró i lyjá te čhuvél pe šeró Isusóske. Vari-savé sykliaibnýtka xoliasyne, rakirí: “Palsó dasavo makhibnaskiro xasiakiriben! Naúšto (uželi) sys naštý te biknel davá makhiben butýr syr pal trinšelá dinarii i te rozden lové bogenge.” I jone rakirdé xoliása láke. Ne Isúso phendiá: “Mekén la, so tumé keréna pharó láke. Joj kerdiá lačhó réndo vaš Mánge. Bogi isyn ŭsády (sak) pašýl tuménde i tumé moginéna te dzn vast lénge, kóli tuménge isyn pir iló, a Me na javáva ŭsády (sak) tuménca. Joj kerdiá, so sys saštý dre lákiri zor, joj angledýr pomakhcia Miré masá ke garaiben. Čačes, Me rakiráva tuménge: kaj by te na javél te phenelpe lav dalé Jevangielijatyr pir saró svéto, dro ripiribén pal adaliate džuvliáte javéna te rakirén pal dová, so joj kerdiá.” I Juda Iskarioto, jekh dešudujendyr sykliaibnytkonendyr, gijá tedy ke rašángire barydyrá te zdel Isusós. I kiéli jone šundlé davá, jone adiáke obradyndlepe i dyné lav te den lové léske. I jov lyjá te rodél vakancyja (slučajo), sob (kaj) te zdel Isusós. Dro pérvo ž dyvés Apriesnokengiro Svénko, kiéli čhinenas Patraditkone bakrores, sykliaibnýtka rakiréna Léske: “Kaj Túke isyn pir iló, sob (kaj) ame te džas i te kerás Túke patraditko skamínd?” Isúso bičhavéla dujén léndyr i rakiréla: “Džán dro fóro; i tumé dykhéna manušés pirjasa paniésa, džán pal léste, i zadžán dro kher, dro savó jov zadžála, i phenén kheritkoné xuláske: “Sykliakiribnáskiro phučela: kaj javéla štúba, sob (kaj) Me Péskire sykliaibnytkonénca te xav Patradí?” Jov tuménge sykavéla upratuny bari šukár štúba; odój kerén skamínd vaš aménge”.” Sykliaibnýtka Léskire giné, javné dro fóro; saró sys adiáke, syr phendiá lénge Isúso, i jone kerdé patraditko skamínd. I kiéli jaciá bel'vél', Jov javdiá dešudujé sykliaibnytkonénca. I kiéli jone sys bešté pal skamínd i xanas, Isúso phendiá: “Čačes, Me rakiráva tuménge: jekh tuméndyr zdela Man, savó xála Mánca.” Sykliaibnýtka pyné dro dúho (fáno), i lyné te phučén jekh pale jekhéste: “Čačes, davá na me, Rajo Dévla?” “Jekh dešudujendyr”, – phendiá Isúso, – “odová, kon khetané Mánca makinela dro čaró. Čhavéske Manušeskireske prodžalape te menčynelepe, syr davá sys angíl phendló, a bída kodolé manušéske, savó zdela Čhavés Manušeskires! Fedýr javélas vaš léske te na bijandjol.” Kiéli jone xanas, Isúso lyjá maró, parikirdia Devléske pal léste, phagirdiá les, dyjá lénge, rakirí: “Len, xan; ake, isyn Miré masá.” I kiéli Jov lyjá tahtáj (čaša), phendiá parikiriben Devléske, dyjá lénge i jone saré piné léstyr. “Ake, isyn Miro rat zavietóskiro, savó pročhudo pal butende”, – phendiá Jov lénge. “Čačes, Me rakiráva tuménge: Me na javáva te pjáv butýr aplodo vinagradoskire xrustostyr angíl dová dyvés, kiéli Me javáva te pjáv neví mol (vino) dro Devléskiro Kralipén.” I kiéli jone zbagandle šardytko gilý Devléske, tedy giné pe Olivítko Bérga. “Saré tumé Mándyr otperena”, – rakiréla lénge Isúso, – paldavá isyn čhindló: ‘Me xasiakiráva Čhupnaris i rosprastanape bakriá;’ ne paló davá, kiéli Me otdžidjovava, Me sygedýr tuméndyr javáva dre Galiliéia.’” Ne Pétri ža phendiá Léske: “I kóli saré Tútyr otperena-me nikieli davá na keráva.” Tedy rakiréla Léske Isúso: “Čačes, Me rakiráva Túke, so adadyvés bel'veliakiro, angíl dová, syr bašno probagala duj móly, tu trin móly otphenesape Mándyr.” A Pétri iščo (inké) butýr patiakirelas: “I kóli mánge javéla trej te merav Túsa, me na otphenavape Tútyr.” I saré sykliaibnýtka rakirdé dová-pac'. I jone javné pe štéto, savó kharélape Giefsimanija i Isúso phendiá sykliaibnytkonénge: “Bešén kadaj, paka Me džáva te mangavpe Devléske.” I lyjá Jov pésa Petris, Jakovós i Ianos, i obuhtyldia Les bari dar i smentnyma. “Miro iló isyn pherdó meribnytkone darása”, – rakiréla Jov lénge, – “iavén adái, i rakhénpe [na soven-r.s.].” I Jov otgijá nábut angíl, i pyjá mósa pe phuv, mangdiápe Devléske, sob (kaj), kóli saštý (možna), te prodžal (nakhel) dre rig Léstyr davá mardó (štúnda); i Jov rakirdiá: “Avva, Dádo! Tu saró moginésa. Lýdža davá tahtáj (čaša) dre rig Mándyr; a mek te na javél adiáke, syr Mánge isyn pir iló, a syr isyn Túke pir iló.” I Isúso javéla pale i lathéla, so jone isyn suté, i rakiréla Petriske: “Simonie, tu san sutó? Naúšto tu na mogindian jekh mardó te rakhespe [te na soves-r.s.]? Rakhénpe (na soven) i mangénpe Devléske, sob (kaj) te na poddenpe dro propatakiriben; dúho (fáno) isyn sastó, a masá isyn bizorjákire.” Isúso gijá i iščo (inké) mólo mangdiápe Devléske dolé-pac' mangipnasa (patierjasa). I nevéstyr Jov risijá i lathiá, so jone sys suté, pal-dová so léngire jakhá sys začhakirde i jone na džindlé, so Léske te otphenen. Risii ke jone dro tríto mólo, Jov phendiá lénge: “Tumé usá san suté i otkhinjona. Uhtýlla (dósi)! Mardó javdiá: dykhén, Čhavés Manušeskires zdena dre grehitkoné-manušéngire vastá. Uštén, džása! Ake, uže sarésa pašýl isyn kodová, kon zdela Man!” I paka Jov iščo (inké) rakirdiá, javélas Juda, jekh dešudujendyr, i sys lésa but manušá kurtalenca i kilenca, savén bičhadé rašángire barydyrá, lylvarítka i godephuré. Zdyibnari dorakirdiape lénca pal špéra (znako): “Kadavá, Konés me čamudava, isyn Jov; zakeden Les i lydžán tel rakhiben.” I jekhátyr podgíia jov ke Isúso, rakirí: “Dobridim, Ravvi!” I čamudia Les. I jone čhudé vastá pe Léste i uhtyldé Les. Jekh manušéndyr, savó sys terdó adái, vyuhtyldia kurtála péskiri i čingirdia lása rašángire barydyreskire pisharís i otčingirdia léske kan. Isúso otphendiá lénge: “Syr pe rozmaribnariste tumé vyginé kurtalenca i kilenca te len Man? Me kažno dyvés sómas beštó tuménca i sykliakirdjom dre Khangirí i tumé na lyné Man; ne mek te spolninélpe Čhinybén.” I saré sykliaibnýtka mekné Les i našné krig. A jekh ternó manúš sataki džálas pal Léste: pe léste sys jekh cérga pe psiké i jone uhtyldé les. Ne jov vyriskirdiape léndyr krig i nascia odothýr nango (dre jekh cérga). I jandlé Isusós ke pérvo rašángiro barydyró: i skedynépe saré rašángire barydyrá, godephuré i lylvarítka. I Pétri džálas durál pal Léste duripnastyr ke pervoné-rašángire barydyreskiri gréda (dvóro); i jov besciá slugénca (dynar'jénca) i tatjolas pašýl jag. Rašaja i saró Siniedriono rodyne dophenybén pe Isusóste, sob (kaj) te muliakirén Les, ne jone na mogindlé nisó te lathén. But jakhítka (svidietieli) rakirdé xohanés pe Léste, ne léngiro dophenybén na zdžalaspe dro čačipén. I vari-savé uštenas i dophenenas xohanés pe Léste, rakirí: “Ame šundiám, syr Jov rakirdiá: ‘Me rosphagirava daja Khangirí, saví kerdé manušá, i pale trin dyvesá ĥazdáva javír khangirí bi manušéngire vastengiro?’” Ne i dasavo léngiro dophenybén na zdžalaspe dro čačipén. Tén'ci pérvo rašángiro barydyró uštyjá i phuciá Isusóstyr: “Tu so na otphenesa nisó? So adalé manušá dophenena pe Túte!” Ne Isúso sys štyl. Pérvo rašángiro barydyró nevéstyr phuciá Léstyr: “Ci, čačó, Tu san Xristóso, Čhavó Bahtiakirde Devléskiro?” “Me som”, – otphendiá Isúso, – i tumé dykhéna Čhavés Manušeskires, syr Jov javéla te bešél pir čačó vast zorjátyr, kiéli Jov javéla pe bolybnáskire óbloki.” Tedy pérvo rašángiro barydyró roskuscia péskire uribená i phendiá: “Save aménge iščo (inké) akaná trej jakhítka? Tumé ž šundlé teliakiriben pe Devléste? So tumé pe davá phenéna?” Saré priĥalyne, so Isúso sys bangó, sob (kaj) te muliakirén Les. Tén'ci vari-savé lyné te čungarden pe Léste; Isusóske zaphandle jakhá, lyné te marén pir šeró burnykenca (ladoškenca) i rakirdé: “Uĥaljov!”; i slúgi (dynárja) mardé Les pir muj. Kiéli Pétri sys telál pe gréda (pe dvóro), podgíia pašyledýr jekh pervoné-rašángire barydyreskire dynaricendyr. Joj dykhciá Petris, syr jov tatjolas pašýl jag, rakhibnýtkes dykhciá pe léste i phendiá: “Tu ža sánas adalesa Isusósa Nazarietostyr?” Ne Jov otphendiape: “Me sarésa na džinóm (na džináv), pal so tu rakirésa”, – phendiá jov i gijá javrí ke pórta; i bašno probagandia. Džuvlý-dynárica nevéstyr lyjá te rakirél manušénge, savé sys terdé: “Kadavá isyn jekh léndyr.” Ne Pétri nevéstyr otphendiape. Nábut korigedýr (pozžedýr) manušá, savé sys terdé odój, phendlé Petriske: “Ne, usajékh, tu ž san léndyr, tu ž adia-pac' san Galilejanino.” Pétri lyjá te košel pes, i te sovlahal: “Nad, me na džinóm kadalé Manušés, pal Savéste tumé rakiréna.” Ake, tedy bašno probagandia javír mólo, i Pétri priripirdia Isusóskire lavá: “Angledýr, syr probagala bašno duj móly, tu trin móly otphenesape Mándyr.” I jov lyjá te rovel. I jekhátyr (srázu) pe zlóko, syr jaciá dyvés, rašángire barydyrá godephurenca i lylvaritkonenca i saró Siniedriono pirirakirde davá réndo, phandle Isusós i lydžiné Les ke Piláto. Piláto phuciá Léstyr: “Tu san Králi Judéngiro?” Isúso otphendiá, – “adiáke, syr tu rakirésa.” Rašángire barydyrá bangiakirenas zoralés Isusós. Piláto nevéstyr phuciá Léstyr: “Sóske Tu nisó na otphenesa? Ne, šun, syr but bangipena jone rakiréna pe Túte?” Ne Isúso usajékh nisó pe davá na phendiá, i davá drieván divindia Pilatos. Pe svénko Piláto otmekelas jekhe manušés štaribnastyr (bešybnastyr) pir manušéngiro mangipén. Dro štaribén dro dová časo sys beštó Varava javire manušénca, savé ĥazdyné búnto i zamardé manušés. I manušá giné upré i lyné te mangén Pilatos pal davá, so jov saró mólo kerélas vaš lénge. I Piláto otphendiá lénge, rakirí: “Kóli tuménge isyn pir iló, to me otmekáva tuménge Kralís Judengires? Piláto ž džindiá, so rašaja zdyne Isusós léske zevlynypnastyr. Ne rašángire barydyrá podrakirde manušén te mangén Pilatostyr te otmekél lénge fedýr Varavas. Ne Piláto nevéstyr otphendiá lénge: “So ž Mánge te keráv Adalesa, Konés tumé kharéna “Králi Judéngiro?” “Primar Les pe trušúl!”, – zadyne gódla nevéstyr jone. Ne Piláto phendiá lénge: “Savó ž čoripén Jov kerdiá?” A jone iščo (inké) zoraledýr dyné gódla: “Primar Les pe trušúl!” Piláto ž vaš dová, sob (kaj) te kerél manušénge pir iló, otmekciá Varavas, a Isusós otdyjá te marén čupniasa, tén'či te primaren pe trušúl. Haladé lydžiné Isusós dre prietorija i khardé khetané pherdó xaladéngiro polko. Jone uridé Les dre purpurno mantija, skhude phusadytkone ciernovnikostyr viánka i uridé pe Léskiro šeró. I jone lyné te den gódla: “Jav džidó, Králjo Judéngiro!” Jone mardé Les trascinitkone destesa pir šeró i čungardyne pe Léste, perenas pe čangá angíl Léste i kloninenaspe. I kiéli jone vysandle xoliames Les, jone zlyne Léstyr purpurno mantija, uridé Les dro Léskiro uribén, i lydžiné Les pe trušúl te primaren. I jone začhude vari-savé Simonos Kirijaninos, Rufoskire i Lieksandroskire dadés, savó džálas feldatyr, te lydžál Léskiro trušúl. I jone jandlé Isusós pe štéto, savó kharélape “Golgofa”, so značynéla “Čeriepo.” Jone dénas Léske te p'jel mol (vino), zmiešyndly mirósa, ne Jov otphendiape. Kiéli jone primarde Les pe trušúl, jone roskerde (rosčhude) uribén Léskiro maškír péste pir žriébijo, konéske so te lel. Sys tríto mardó (štúnda), kiéli jone primarde Les. Pe phal, kaj čhinena bangipen, sys čhindló: “Králi Judéngiro.” I jone primarde pe trušúl pašýl Léste duje rozmaribnar'jen, jekhés čačé rigátyr, javirés zervone (lievone) rigátyr. I manušá, savé prodžanas pašýl Léste, kuninenas šerenca i rakirdé nalačhé lavá: “Tu ž kadavá san, Savó rosphagirelas Khangirí i pir trin dyvesá ĥazdesas la nevéstyr! Rakh Kokoró Pes, džá telé trušulestyr.” Adiáke-pac' rašángire barydyrá, khetané lylvaritkonenca, sandlepe xoliames Léstyr, rakirí: “Javirén Jov zrakhelas, a Jov na moginéla Kokoró Pes te zrakhél! Mek davá Xristóso, Králi Judéngiro, te džal telé trušulestyr, sob (kaj) aménge te dykhas, i te upatias dre Léste.” I rozmaribnarja, savé sys primarde Isusósa, adiáke-pac' ladžakirenas Les. I dro šóvto mardó (štúnda) jaciá kalypén pir sarí phuv i rikirdiape ke jeniáto (bijekhéskiro déšto) mardó (štúnda). Dro jeniáto mardó dyvesé Isúso dyjá gódla zoralés Judytkes: “Eloi, lama savaktani?” So značynéla Romanes: “Dévla Miro, Dévla Miro, sóske Tu mekcian Man?” I vari-savé kodolé manušéndyr, savé sys terdé adái, kiéli jone šundlé davá, lyné te rakirén: “Šunén, Jov kharéla Ilijas.” Ne jekh léndyr podprastandyja pašyledýr, kindiakirdia gupka dro molitko uksuso, uridia la pe kašt i podyja te p'jel Isusóske; rakirí: “Užakiren. Dykhasa, syr javéla Ilíia te zlel Les.” Isúso ž, dyjá gódla zoralés i myjá. Šýrma dre Khangirí rozriskirdiape samone upralestyr ke phuv. A šelengiro barydyró, savó sys terdó angíl Isusóste, šundiá Léskiri godlyma i dykhciá, syr Jov myjá, phendiá: “Adavá manúš, čačes, sys Devléskiro Čhavó!” Dre rig sys terdé džuvliá i dykhenas duripnastyr: maškír lénde sys Maríia Magdalina, Maríia, daj Tyknedyreskiri Jakovoskiri i Iosijaskiri, Salomija, davá sys adalé džuvliá, savé džánas pal Isusóste dre Galiliéia i dynarindlé Léske; odój sys but javír džuvliá, savé javné khetané Lésa dro Jerusalimo. I syr javdiá bel'vél', davá sys parastivín (piatnica) – davá dyvés, savó džála angíl sávato (subóta), iavdiá Joza Arimafejatyr. Jov sys patyvalo manúš dro séndo, savó užakirdia Kralipén Devléskiro. Jov murškanés podgíia ke Piláto i mangdiá te del léske Isusóskiro trúpo. Piláto zdivindiape, so Isúso uže myjá, khardiá šelengire barydyrés, phuciá léstyr: “Ci ĥará Jov myjá?” Syr Piláto udžindiá šelengire baredyrestyr, tedy otdyjá trúpo Jozáske. Joza kindia pohtan, zlyjá Isusóskiro trúpo; obkrencyndia Les žužé pohtanesa i čhudiá dre koplíca, vyčingirdy dre skála, i priradia bar ke zagiibén dre koplíca. Maríia Magdalina i Maríia, daj Iosijaskiri, dykhné, karik Isusós čhudé. A kiéli progijá sávato (subóta), Maríia Magdalina, Maríia daj Jakovoskiri i Salomija, kindle aromatytka čarjá, sob (kaj) te džán te makhen Isusóskiro trúpo. Pe zlóko, dro pérvo kurkeskiro dyvés, syr uštyjá kham, jone giné ke maĥila. Pir drom jone rakirdé maškír péste: “Kon da aménge otriskirela krig bar pašýl zagiibén dre koplíca? A kiéli jone pridykhnepe, dykhéna, so bar otriskirdo krig, a bar sys drieván baró. Jone giné andré i dykhné terné manušés, savó sys uridó dro saró parnypen; jov sys beštó pir čačí rig vudarendyr, i jone strahádyne. “Na andyršan”, – rakiréla jov lénge. “Tumé rodéna Isusós Nazarietostyr, Saves primarde pe trušúl. Jov otdžidyjá! Les adáj nane, davá isyn štéto, kaj Les čhudé. Kakaná džán i phenén Léskire sykliaibnytkonénge i Petriske: “Jov džála angíl tuménde dre Galiliéia, odój tumé Les i dykhéna, syr Jov i phendiá tuménge.” Jone vyginé i dynepe te prastan maĥilatyr, syr pyjá pe lénde bari dar i izdrany; jone nikonéske nisó na phendlé, pal-dová so jone darándyne. Otdžidyi dro pérvo kurkeskiro dyvés, Isúso sykadyjá angíl Marijake Magdalinake, savjátyr Jov vytradyjá eftá nalačhé dúhi (fany). Joj gijá i rosphendiá davá odolénge, kon sys Lésa i savé rovenas pal Léste i piridživenas; kiéli jone šundlé pal dová, so Isúso isyn džidó i, so joj dykhciá Les, jone na patiandyné. Tén'ci Isúso sykadyjá dro javír dykhibén dujenge léndyr pir drom, kiéli jone giné pal fóro. Kadalé duj manušá risiné i rosphendlé javirénge, ne jone i lénge na patiandyné. Tén'ci Isúso sykadyjá dešujekhe sykliaibnytkonénge, savé xanas pal skamínd. Jov vyrakirdia lénge, so na uhtýlla (nádosi) lénde patiaibén i léngiro iló isyn pharó dro dová, so lénge sys na pir iló te patián odolénge, savé dykhné Les korigedýr (pozžedýr), syr Jov otdžidyjá. Isúso phendiá lénge: “Džán pir saró svéto (lot) i phenén lav Jevangielijatyr kažnoné džidé sozdyibnaske. Odolé, savé patiána i javéna te bolenpe, javéna zrakhné. Ne odolé, savé na javéna te patián-javéna sendindle. Patiaibnaskire javéna te sykavén dasavé dívy: jone javéna Miré lavésa te tradén nalačhé dúhi, jone javéna te rakirén pe neve čibá (čibjá); jone javéna te len sapen vasténca ci te p'jen truta (otrava) i ni savó čoripén na javéla lénge, jone javéna te čhuvén vastá péskire pe nasvalende, i kodolé javéna te sastjon.” I kiéli Raj Devél Isúso phendiá lénge saró, tedy Jov sys ĥazdynó pe bolybén i besciá pe čačó vast Devléste Dadéste. I jone vyginé i rosphendlé lav usiendie (viezdie), Raj Devél sys pašýl léngire réndy i Jov dophenelas léngire lavengiro čačipén znamienijénca (ĥiertykénca), savé džánas adáj že pal léngire lavá. Pal-dová so, syr but manušá uže lynepe te čhinen rosphenyben pal dová, so sys maškír aménde i, so isyn drieván džindló tuménge, jone udžindlé manušéndyr, savé pérva dykhné dová péskire jakhénca i služyndle (dynarindlé) vaš Devléskiro lav, adiáke jone piriphendle aménge. Paldavá zdyjape i mánge, so javéla mištó te čhinav túke, baró Tieofilie, paló dová, syr me lačhés rozĥalyjom davá saró anglypnástyr, sob (kaj) tu te džinés čačipén pal dová, dro so tut sykliakirdé. Dro dolé dyvesá, kiéli Irodo sys králi pir Judéia, dživdiá jekh rašáj pir lav Zahárija Avijaskire rašángire rodóstyr, péskire romniása, Aronoskire rodóstyr pir lav Jelizavieta. Jone ž sys dujdžiné čačuné angíl Devléste, rikirdepe ke Devléskire priphenybená i Zakóno. Lénde na sys čhavoré, pal-dová so Jelizavieta na mogindiá te bijanél, jone dujdžiné sys phuré pir beršá. I sys adiáke: jékhvar, kiéli Zahárija kerdiá péskiri butý syr rašáj angíl Devléste, syr sys prilyno péskire rodóstyr, pal rašángiro dorakiribén pir žriébijo léske treindiá te zadžál dre Khangirí i te thuvliakirel gudlé smolenca ladanostyr, i saré manušá mangnepe Devléske javrí dro davá časo, kiéli sys thuvliakiriben gudlé smolasa. I sykadyjá Zaharijaske Devléskiro Jangólo, savó sys terdó pir čačí (pravo) rig thuvitkone (kadilytkone) altarjostyr. Zahárija strahadyja, kiéli dykhciá les, i dar pyjá pe léste. Ne Jangólo phendiá Léske: “Na andyrša, Zahárija, pal-dová so Devél šundiá tyró mangipén, i tyrí romný bijanéla čhavés, i tu désa lav Léske Iáno. I javéla túke bari rádyma i viesjolyma (loš), i but manušá javéna te radynénpe léskire bijanypnastyr. Pal-dová so jov javéla baró angíl Raste-Devléste, i jov na javéla te p'jel mol (vino) i zoralé pibena, i Svénto Dúho (Fáno) javéla dre léste adáj že, syr jov bijandjola, i jov riskiréla pale ke Léngiro Raj Devél buten Izrailjoskire čhavén. I jov javéla angíl Raste-Devléste, zorjása i duhósa syr Ilíia, i jov keréla ramánie (miro) maškír dadende i čhavénde, riskiréla pe čačunó drom kodolén, savé na kandéna Devlés, sob (kaj) te skedel manušén vaš Ráske-Devléske.” I Zahárija phendiá Jangoloske: “Syr mánge te džináv, so adiáke javéla? Me som phuró, i mirí romný isyn uže dre beršá.” I Jangólo otphendiá Léske: “Me som Gavriilo, me som terdó pašýl Devléste. Jov bičhadiá man te phenáv túke i te janav túke davá bahtaló lav, i, ĥáda, tu javésa štyl i tu na désa ráda (na zmoginesa) te rakirés angíl dová dyvés, kiéli saró davá kerélape, pal-dová so tu na patiandyjan Miré lavenge, savé kerénape ke kónco / jagóro dro péskiro časo. I manušá užakirde Zaharijas i divindlépe pe davá, so jov ĥará (dlúges) na džálas javrí Khangirjátyr. Kiéli jov vygijá javrí, jov na dyjá ráda te rakirél, i jone ĥalyné, so sys léste dykhibén dro Khangirí; i jov sykavelas vasténca i jov jaciápe niemo (muto). I kiéli dyvesá končyndlepe, dre savé jov lydžijá mangipén Devléske, jov risijá kheré. I paló kadalé dyvesá e Jelizavieta, romný léskiri jaciá pharí, i garadiape pandž čhoná manušéndyr, rakirí péske: “Adiáke, Raj Devél kerdiá vaš mánge”, – phendiá joi, – “Jov, ĥáda, kerdiá lačhipén mánge, sob (kaj) Jov te lel krig mándyr ladž angíl manušénde.” Dro šóvto čhon Devél bičhadiá Jangolós Gavriilos ke Galilejakiro fóro Nazarieto. Ke Patyvalý Terný Džuvlý, saví sys angrustiakirdy (dorakirdy) te džal paloróm pal muršeste pir lav Iosifo (Joza), savó sys Davidóskire rodóstyr; Patyvalia Ternia Džuvliá khardé Maríia. I Jangólo zagijá ke joi, i phendiá láke: “Dobridim! Tu san bahtalý Devléstyr! Devél isyn Túsa!” Joj ža strahadyja dalé rakiribnastyr, i Joj dyjá godý péske (dumindia) pal dová; “So ž dalé lavá značynena?” I Jangólo phendiá láke: “Na andyrša, Maríia, pal-dová so Tu lathian bahtalypén Devléste. I Tu javésa pharí, i bijanesa Čhavés, i Tu désa lav Léske Isúso. Jov javéla baró, i Les léna te kharén Čhavésa Naj Vučedyreskiresa, i Raj Devél déla Léske Davidóskiro trono, Léskire Dadéskiro; i Jov javéla králi pe Jakovóskire manušénde pe saré viéki; i Léskiro Kralipén na končynelape.” Ne Maríia phendiá Jangoloske: “Syr davá saštý (moginéla) te javél, kóli me na džináv romes?” I otphendiá láke Jangólo, pheny: “Svénto Dúho (Fáno) zdžála pe Túte, i zor Sarevučedyreskiri učhakiréla Tut; pal-dová so Svénto Čhavó, Savó bijandjola, javéla te kharelpe Devléskiro Čhavó. I iščo (inké), seménca Tyrí, Jelizavieta, jaciá pharí dre lákire phuré beršá; i joi, savjá džindlé syr bičhavorengirja, kakaná isyn pharí šóvto čhon, pal-dová so Devléste nane nisó, sob (kaj) Jov na délas by ráda (moginelas) te kerél. I phendiá Maríia: “Ĥáda, me som Devléskiri pisharica; mek te javél Mánge pir Tyró lav.” I Jangólo gijá krig látyr. Dre dalé dyvesá Maríia uštyjá i gijá sýges pir bergitko phuv ke fóro dre Judéia, i joj zagijá dro Zaharijaskiro kher i dyjá “dobridim” Jelizavietake. I sys adiáke: kiéli Jelizavieta šundiá, syr Maríia dyjá “dobridim” láke, tyknó bijáto trinskirdiape upré jekh mólo dro lákiro per, i tedy Svénto Dúho (Fáno) pherdiakirdiá la, obradyndia pes i joj zoralés dyjá gódla i phendiá: “Tu san bahtiakirdy maškír džuvliende, i bahtiakirdó javéla bijáto, savés Tu bijanesa! I katýr davá javdiá mánge, so Ráskire-Devléskiri Daj javdiá ke Me? Pal-dová, kiéli me šundjom, syr Tu dyján “dobridim” mánge, miro tyknó bijáto obradyndiape radymátyr dro miro per, so bahtalý isyn Kodoia, Saví upatiandyja dro dová, so davá javéla čačunés, syr Raj Devél phendiá láke.” I phendiá Maríia: “Miro iló barjakiréla patýv Ráske-Devléske, i Miro dúho (fáno) radynélape pal Devléste, Miré Zrakhibnariste. So Jov podykhciá laskasa pe Péskire pisharicate, saví isyn kanduny, pal-dová so dalé dyveséstyr saré ródy javéna te kharén Man “bahtiakirdy”; pal baripén, savó so kerdiá Mánge Zoralypnaskiro Devél, mek te javél svénto Léskiro lav, I Léskiro tangipén javéla pe saré ródy, kon daréla Léstyr. Jov kerdiá baré butiá Péskire myščasa (vastésa), rostradyja odolén, savé isyn phut'kirdé i but kaména dre péskire ile; Jov radia telé zoralen léngire tronendyr i ĥazdyjá upré kandune manušén; Jov čaliakirdia čalés bokhalen, i mekciá krig barvalen čhučé vasténca, Jov dyjá vast (pomogindia) Izrailjoske, Léskire dynaríske, sob (kaj) te ripirel Léskiro tangipén, syr Jov dyjá lav i kerdiá amaré dadénge, Avraamostyr ke Léskiro ródo dre viéki.” Maríia sys ke joj pašé trin čhoná, i tén'či Joj risijá dro Péskiro Kher. Kiéli Jelizavietake javdiá časo te bijanél, joj bijandiá čhavés. I šundlé lákire susiédy (kotárja) i semency, so Devél sys lačhó ke joi, i radyndlepe khetané lása. I sys adiáke: kiéli bijatoske (muršoreske) sys ohtó (bidujéngiro deš) dyvesá, jone javné te občhinen les, i jone kamlé te kharén čhavés “Zahárija” pir dadéste, ne Jelizavieta, daj léskiri, phendiá: “Nad, Léskiro lav javéla Iáno.” Jone phendlé láke: “Nane nikonés dro saró tyró ródo, savéste isyn dasavo lav.” Jone phučné vasténca léskire dadéstyr, syr jov kamdiá te kharel čhavores. Jov mangdiá phalori te čhinel, i čhindiá “Iáno” léske lav i saré ž divindlépe pe davá. I jekhátyr Zaharijaskiro muj otkerdiape, léskiri čib otphandiape, i jov lyjá te rakirél, i te šarel Devlés. Manušá, savé dživdé pašýl odój, strahádyne, i sarí bergitko phuv Judéia rakirdiá pal davá. I sarénge, kon šundiá davá, zapyja dro iló i jone rakirdé: “So da javéla dolé bijatostyr?” Pal-dová so Devléskiro vast sys pe léste. Svénto Dúho (Fáno) pherdiakirdiá Zaharijas, léskire dadés, Savó lyjá te angilphenel, rakirí: “Bahtaló isyn Raj Devél, Izrailjoskiro Devél, Savó javdiá te dykhél Péskire manušén i te vyrakhel len, Jov dyjá aménge zoralé Zrakhibnaris, savó isyn Dynári Davidóskire rodóstyr, Syr Devél i dyjá lav but berš pale pir Péskire Sventoné prorokénde, savé phendlé, so Jov zrakhéla amen amaré vergéndyr i kodolengire vasténdyr, savé drieván na vyrikirena amen, i Jov potanginela (požalinela) amaré daden i ripirela Péskiro Svénto Zavieto. So pe davá Jov déla sovláh aménge, syr Jov dyjá amaré prapapuske Avraamóske, te zrakhél amen vasténdyr amaré vergéndyr, sob (kaj) ame te dynarinás bi darákiro Léske, pir sventyma i patiaibén angíl Léste pir saré amaré dyvesá. I tut, čhavoró, javéna te kharén prorokosa Naj Vučedyreskiresa, pal-dová so tu javésa te džas angíl Raste-Devléste te skedes drom Léske, sob (kaj) te rosphenes manušénge pal dová, so jone zrakhenape, pal-davá so Devél otmekéla léngire gréhi, pal-dová so, syr amaró Devél tanginela, i amen sam dróga Léske, i začhuvela kham te uštel vyčipnastyr, te svencynel pe odolénde, savé dživéna dro kalypén (ciamlypén) i dre dar meribnástyr, sob (kaj) te džán amaré ĥerá pir drom ke ramánjo (miro).” O bijáto barjolas i jačelaspe zoraledýr dro dúho (fáno); jov dživdiá pe čhučí phuv angíl dyvés, syr te sykadiel Izrailjoskire manušénge. Dre dolé dyvesá Rimoskiro khieningo (kiesarjo) Aŭgusto dyjá uphenybén te piriginen saré manušén, savé sys pir sarí phuv. Davá sys pérvo piriginybén i les kerénas dro dová časo, kiéli o Kviriniejo sys Sirijakire-themeskiro barydyró. Kažnonéske treindiá te javél dro péskiro fóro vaš piriginybén. I Joza (Iosifo) adiáke-pac' gijá Nazarietostyr, savó isyn dre Galiliéia ke Judéia dro fóro Viflieemo, savó kharlape adiáke-pac' “Davidóskiro fóro”, pal-dová so jov sys Davidóskire manušéndyr i rodóstyr, te začhinelpe Marijasa, Saví gindiape léske syr romný, i Saví sys pharí. I sys adiáke: paka jone sys odój, javdiá Láke dyvés te bijanél, i Joj bijandiá Péskire Pervoné Čhavés, i pat'kirdia Les dre pherne, i čhudiá Les dre jasla (khurly), pal-dová so na sys lénge štéto dro zatradypnytko kher (gostinica). Sys čhupnárja (pastuhi) pe kodoia rig pe félda, i rakhenas ratý péskiro gurto. I jekhátyr (srázu) Devléskiro Jangólo javdiá angíl lénde, i Devléskiri sláva syr jaguno dud (svéto) zasvencyndia pašýl lénde; i pyjá pe lénde bari dar. I Jangólo phendiá lénge: “Na darén, me phenáva tuménge lačhó nevipen pal bari rádyma vaš saré manušénge. Adadyvés dro Davidóskiro fóro bijándyja tuménge Zrakhibnari, savó isyn Xristóso, Raj Devél. I, ĥáda, tuménge znako (špéra): tumé lathéna Tykné Bijatos pat'kirdes dre pherne, i Jov javéla dre jasla.” I jekhátyr sykadyne but bolybnýtka xaladybena (Jangóly) khetané dalé Jangolosa; jone šarenas Devlés i rakirénas: “Te slavinelpe Devél dre upratune bolybena, i te javél ramánjo (miro) pe phuv maškír manušénde, savéndyr Devél radynélape.” I sys adiáke: kiéli Jangóly giné krig léndyr pe bolybén, to čhupnárja phendlé jekh jekhéske: “Javén dro Vifliejémo te dykhas, so odój kerdiápe, pal so sys davá nevipen Rástyr-Devléstyr amarestyr.” I jone sýges javné, i lathné Maríia i Jozas (Iosifos) i Tykné Bijatos, Savó sys paštó dre jasla (khurly). Kiéli jone dykhné davá, jone rosphendlé pal dová, so sys phendló lénge pal dalé Tykné Bijatoste. I saré, kon šundlé davá, divindlépe pe dová, so lénge čhupnárja phendlé. Ne Maríia ripirelas saré dalé lavá, i duminelas pal lénde xor dro Péskiro iló. I čhupnárja risiné pale šarenas i parikirenas Devléske pal saró, so jone šundlé i dykhné adiáke, syr lénge sys phendló. I kiéli proginé ohtó (bidujéngiro deš) dyvesá, sob (kaj) te občhinen Tykné Bijatos, dyné Léske lav Isúso, lav, savó dyjá Jangólo angíl davá, syr Léskiri Daj jaciá pharí Lésa. I kiéli proginé (nakhle) dyvesá, savé sys na žužé pir Mojzáskiro Zakóno, jone jandlé les te svenciakiren (te sykavén i te čhuvén dre rig Les) angíl Devléste, syr isyn čhindló dro Devléskiro Zakóno: “Kažno muršoro, savó vydžála dákire ločoviátyr (utrobatyr), te javél svenciakirdo vaš Devléske”, sob (kaj) te janén svénto dyibén, syr isyn phendló dro Devléskiro Zakóno, dujén golumbicen ci dujén golumbengire tyknoren. I, ĥáda, sys manúš, savés khardé Simieono; jov sys čačunó manúš i darelas Devléstyr; jov užakirelas, kiéli javéla Izrailjoskiro Zrakhibnari, i Dúho (Fáno) Svénto sys pe léste. I Dúho (Fáno) Svénto otkerdia džinybén Léske, so jov na meréla, paka jov dykhéla Devléskire Xristosós. Dúho (Fáno) lydžijá les i jandiá dre Khangirí. I kiéli dad i daj jandlé Bijatos Isusós, sob (kaj) te kerén vaš Léske dová, so trej pir Zakóno, to Simieono lyjá Les pe vastá, parikirdia Devléske i phendiá: “Kakaná, Rajo, Tu otmekesa Péskire pisharís, pir Lav Tyró ramanjosa (mirósa). Pal-dová so Miré jakhá dykhné Tyró zrakhibén, Savó Tu prigotovindian angíl saré manušénde, Jov javéla syr Dud (Svéto) te otkerel Tyrí vólia vaš Najudénge. Jov janéla sláva Tyré manušénge, Izrailjoske.” Ne o Joza, i Bijatoskiri Daj divindlépe pe dová, so sys phendló pal Léste. Simieono bahtiakirdiá len i phendiá Marijake, Dake Leskirjake: “Pal Léste but manušá Izrailjostyr peréna i ĥazdénape syr bahtalé, Jov javéla sýrby ĥiertýk (znako) Devléstyr, pal Konéste manušá javéna te rakirén xoliása; i kurtála (miečo) promarela tyró iló, sob (kaj) te otkerenpe ĥaradé dúmy.” Adáj sys adiáke-pac' Anna, proročica, Fanuiloskiri čhaj, Asiroskire rodóstyr, saví dodživdia ke phurané beršá i dživdiá péskire romesa féni eftá berš, syr joj gijá paloróm. Dalé pivliake (udovake) sys ohtodešá štar berš; joj na džálas Khangirjátyr i dynarindiá Devléske postosa i mangipnasa Devléske. Dre dová-pac' mardó (štúnda) joj podgíia i slavindia Devlés, i rakirdiá pal Čhavoreste sarénge, kon užakirdia vyrakhiben dro Izrailjo. I kiéli Joza i Maríia kerdé saró pir Devléskiro Zakóno, jone risiné dro léngiro fóro Nazarieto dre Galiliéia. Bijáto barjolas i zoraljolas, jačelaspe ŭsa god'varedyr; i Devléskiro bahtylen sys pe Léste. So berš dad i daj Léskire džánas ke Jerusalimo pe Svénko Patradí. I kiéli Léske sys dešudúj berš, jone javné pe svénko, syr len sykliakirdé. Kiéli svenkoskire dyvesá končyndlepe, jone risjonas kheré, ne Terné-Beršengiro Isúso jaciápe dro Jerusalimo, a Léskire dadá na dykhné davá; a jone dumindle, so Jov džála javirenca, ne syr jone proginé (nakhle) dyveseskiro drom, lyné te rodén Les maškír semencende i džindlende (pindžkirdende), i pal-dová so jone na lathné Les, to jone risiné dro Jerusalimo te rodél Les. Pe tríto dyvés jone lathné Les dre Khangirí, kaj Jov sys beštó maškír sykliakirdende: Jov šunelas len i phučelas Léndyr. Saré, kon šundiá Les, divindlépe pe Léskiri godý i pe dová, syr Jov otphenélas. Kiéli Léskire dadá dykhné Les, jone zdivindlepe, i Léskiri Daj phendiá Léske: “Mro Čhávoro! So Tu kerdián aménge? Ĥáda, Tyró dad i Me baré dukhasa rodyjam Tut.” Jov phendiá lénge: “Vaš so tuménge treindiá te rodén Man? Ci na džinenas tumé, so Mánge trej te javav te keráv Miré-Dadéskiro réndo.” Ne jone na ĥalyné lavá, so Jov phendiá lénge. I Isúso gijá lénca i javdiá dro Nazarieto, i Jov zoralés kandelas len. A Léskiri Daj ripirdia saré kadalé lavá dro Péskiro iló. I Isúso jačelaspe god'varedyr i barjolas dro láska Devléstyr i manušéndyr. Dro dešupandžto berš, kiéli Tivierijo sys khieningo (kiesarjo), a Pontijo Piláto sys balunitko (pravitieljo) pe Judéia, a Irodo sys xuláj pe Galiliéia, Léskiro pšal Filipo sys xuláj pe Itureja i Trahonitoskiri phuv, a Lisanijo xulaindia pe Avilineja; i kiéli Anna i Kaiáfa sys rašángire barydyrá, javdiá Devléskiro lav Ianoske, Zaharijeskire čhavéske pe čhučí phuv. I jov javdiá pe phuv pašýl reka (len') Iordáno, sykliakiri manušén te bolenpe te sykavén, so jone riskirdé péskiro džiibén ke Devél, sob (kaj) Jov te otmekél gréhi. Syr isyn čhindló dre Isajoskire-prorokoskiri lylvarí, savó rakírla: “Ĥáda, isyn zan, saví déla gódla pe čhučí phuv: ‘Kerén drom Ráske-Devléske, čhuvén Léske mamúj drom; kažno dólo te javél pherdó, kažno bérga i bérgica te javén teledýr, kažno bangipen te javél roŭno i bangé dromá te javén gladka; kažno loč te udžinel pal Devléskiro zrakhibén.’” Iáno ž rakirdiá buté manušénge, savé javénas te bolenpe ke jov: tumé san sapitko ródo! Kon sykliakirdiá tumen te našén Devléskire xoliátyr, so javéla syg? Kerén vari-so, sob (kaj) te javél mol, so tumé mekné te kerén gréhi i riskirdé péskiro džiibén ke Devél, i na duminen te rakirén péske: ‘Avraámo isyn dad amaró’, pal-dová so me rakiráva tuménge, so Devél moginéla dalendyr barendyr te ĥazdén čhavorén Avraamóske; ĥáda, uže tover isyn paštó pašýl kašteskiro kornjo (rukh), kažno kašt, so na déla lačhó barjakirdó (plódo), čingirena telé i čhurdena dre jag.” Manušá phučné Léstyr: “So ž aménge te kerás?” I Iáno otphendiá lénge: “Konéste isyn duj ĥáda, te del jekh odoléske, konéste nane; i konéste isyn xabén, te kerél adiáke-pac'.” I mytoskire skedyibnarja javné te bolenpe i phendlé Léske: “Sykliakiribnáskiro! So aménge te kerás?” “Na len butedýr lové, syr tuménge saštý (domekno) te len pir Zakóno.” Vari-savé xaladé adiáke-pac' phučné Léstyr: “A so ž aménge te kerás?” Jov phendiá xaladenge: “Na otlen zorjása nikonestyr, i na bangiakiren nikonés xohanés. Javén ráda daleske, so tuménge pleskirena.” Ne pal-dová so manušá užakirde i dumindle dro péskiro iló, so, xobi, Iáno isyn Kokoró Xristóso, Iáno tedy otphendiá sarénge: “Me bolava tumen paniésa, ne pal mánde džála Odová, Kon isyn zoraledýr mándyr, so me na som mol až te rosphandav simirja Léskire ĥeritkonendyr, Jov javéla te bolel tumen Sventoné Duhósa i jagása; Léskiro ĥanadytko (lopata) isyn dro Léskiro vast, i Jov žužakirela Péskiri šúrna i skedéla parnó giv dre Péskiri piralý, a phus xačkiréla jagása, saví na murdjola.” I but javír jov sykliakirdiá manušén, i rosphendiá bahtalý zan (zvies'). Jov, Iáno, adiáke-pac' vyrakirdia Irodoske, savó sys balunitko (tietrarho) pe doiá phuv, pal-dová so Irodo lyjá paloróm Irodiada, péskire-pšaléskire romniá i pal javír nalačhé léskire réndy; a Irodo iščo (inké) butýr kerdiá čoripén: jov čhudiá Ianos dro štaribén. I sys adiáke: kiéli saré manušá boldepe, i Isúso tež boldiape i mangdiápe, bolybén otčhakirdiape, i Svénto Dúho (Fáno) zgija pe Léste dro dyc'ly patrín (óbrazo) syr golumbo, i sys zan bolybnástyr, saví rakirdiá: “Tu san Miro drógo Čhavó, dre Túte isyn bari Mirí rádyma!” Kiéli Isúso lyjá te kerél Devléskiri butý, Léske sys trijánda berš; i, syr manušá dumindle, Jov sys Jozaskiro (Iosifoskiro) Čhavó, a Joza sys Ilijaskiro čhavó, Ilíia sys Matfatoskiro čhavó, Matfato sys Lievijoskiro čhavó, Lievijo sys Mielhijoskiro čhavó; Mielhijo sys Ianajoskire čhavó; Ianajo sys Jozaskiro čhavó; Joza sys Matafijoskiro čhavó, Matafijo sys Amososkiro čhavó, Amoso sys Naumoskiro čhavó; Naumo sys Jeslimoskiro čhavó; Jeslimo sys Nagiejoskiro čhavó; Nagiejo sys Maafoskiro čhavó; Maafo sys Matafijeskiro čhavó; Matafijo sys Siemieinoskiro čhavó; Siemieino sys Jozaskiro čhavó; Joza sys Judáskiro čhavó; Juda sys Joananoskiro čhavó; Joanano sys Risajoskiro čhavó; Risajo sys Zorovavieljoskiro čhavó; Zorovavieljo sys Salafiiljoskiro čhavó; Salafiiljo sys Nirijoskiro čhavó; Nirijo sys Mielhijoskiro čhavó; Mielhijo sys Adijoskiro čhavó; Adijo sys Kasamoskiro čhavó; Kasamo sys Jelmadoskiro čhavó; Jelmado sys Iroskiro čhavó; Iro sys Iosijáskiro čhavó; Iosija sys Jelijezeroskiro čhavó; Jelijezero sys Iorimoskiro čhavó; Iorimo sys Matfatoskiro čhavó; Matfato sys Lievijoskiro čhavó; Lievijo sys Simieonoskiro čhavó; Simieono sys Judáskiro čhavó; Juda sys Jozaskiro (Iosifoskiro) čhavó; Joza sys Jonanoskiro čhavó; Jonano sys Jelmakimoskiro čhavó; Jeliakimo sys Mielieajoskiro čhavó; Mielieajo sys Mainanoskiro čhavó; Mainano sys Matafijoskiro čhavó; Matafijo sys Nafanoskiro čhavó; Nafano sys Davidóskiro čhavó; Davído sys Jesiejoskiro čhavó; Jesiejo sys Avidóskiro čhavó; Avido sys Vaozóskiro čhavó; Vaózo sys Salmonóskiro čhavó; Salmano sys Naasonóskiro čhavó; Naasóno sys Aminadavóskiro čhavó; Aminadávo sys Adminoskiro čhavó; Admino sys Arnijoskiro čhavó; Arnijo sys Esromóskiro čhavó; Esrómo sys Fariesóskiro čhavó; Fariéso sys Judáskiro čhavó; Juda sys Jakovóskiro čhavó; Jakovo sys Avraamóskiro čhavó; Avraámo sys Farijoskiro čhavó; Farijo sys Nahoroskiro čhavó; Nahoro sys Sieruhoskiro čhavó; Sieruho sys Ragavoskiro čhavó; Ragavo sys Faliekoskiro čhavó; Falieko sys Jevieroskiro čhavó; Jeviero sys Salijoskiro čhavó; Salijo sys Kainanoskiro čhavó; Kainano sys Arfaksadoskiro čhavó; Arfakieado sys Simoskiro čhavó; Simo sys Nojoskiro čhavó; Nojo sys Lamiehoskiro čhavó; Lamieho sys Mafusailoskiro čhavó; Mafusailo sys Jenohoskiro čhavó; Jenoho sys Iariedoskiro čhavó; Iariedo sys Malielieiloskiro čhavó; Malielieilo sys Kainoskiro čhavó; Kaino sys Jenososkiro čhavó; Jenoso sys Sifoskiro čhavó; Sifo sys Adamoskiro čhavó; Adamo sys Devléskiro čhavó. Isúso sys pherdó Sventoné Duhósa i risijá Iordanostyr i Dúho (Fáno) lydžijá Les pe čhučí phuv, kaj nálačho propatiakirelas Les štardešá dyvesá i Isúso nisó na xaja dre dolé dyvesá; a kiéli dalé dyvesá proginé, Jov zakamdiá te xal. I phendiá Léske nálačho: “Kóli Tu san Devléskiro Čhavó, phen, sob (kaj) dalé bará te jačen marésa.” A Isúso otphendiá Léske: “Isyn čhindló: ‘Na marésa jekhésa dživéla manúš, a kažnoné lavésa, so vydžála Devléskire uštendyr.’” Tedy lydžijá Les nálačho pe vučí bérga, i sykadiá Léske sýges pal menta (minuta) saré svetóskire kralipená. I nálačho phendiá Léske: “Me dáva Túke pravo pe saré dalé kralipená, i léngiri sláva, pal-dová so joj isyn dyný mánge, i me dáva la odoléske, konéske me kamám; ĥáda, saró javéla Tyró, kóli Tu pokloninesape mánge.” Isúso otphendiá Léske: “Isyn čhindló: ‘Devléske tyréske kloninpe i Léske jekhéske dynarin (služyn)’” Tedy nálačho lydžijá Les dro Jerusalimo, i čhudiá Les pe Khangirjákiri stréha (čhakín), i phendiá Léske: “Kóli Tu san Devléskiro Čhavó, uhty, Kokoró, adathýr telé”, pal-dová so isyn čhindló: “Jov déla priphenybén Jangolenge Peskirenge te zrakhél Tut; i pe vastá jone lydžána Tut, sob (kaj) Tu te na obštavespe pir bar ĥerjasa Peskirjasa.” Isúso otphendiá Léske: “Isyn phendló: ‘Na propatiakir Ras-Devlés péskires.’” Kiéli nálačho končyndia saré propatiakiribena, jov gijá krig Isusóstyr, užakiri javír časo. Odothýr Isúso risijá dre Galiliéia. Jov sys pherdó Duhósa (Sventoné Duhósa); i mavlýn (malva) pal Léste rozgijápe pir sarí phuv, kaj Jov sys. Jov sykliakirdiá dre sinagogi, i saré šarde Les. Tén'ci Isúso javdiá dro Nazarieto, kaj Jov barija, i zagijá dre sinagoga dro sávato (subóta) pir Péskiro prisykliaiben, i lyjá te ginel prorokoskire-Isajoskiri lylvarí, saví Léske podyne; i Jov otkerdia lylvarí, tedy lathiá štéto, kaj sys čhindló: “Devléskire–Ráskiro Dúho (Fáno) isyn pe mánde; pal-dová so Jov vykedyjá Man te rosphenav bahtalý zan (zvies') bogenge i bičhadiá Man te phenáv vólia odolénge, savé isyn dro pliéno, te dykhén svéto kororenge; te otmekav pe vólia i te dzn vast odolénge, savén vérgi pritasade, te rosphenav manušénge pal lačhó berš, dro savó Devél sykavéla Péskiri láska i tangipén (žalima) ke manušá.” Isúso zakerdia lylvarí, i kiéli Jov otdyjá pale rašáske, besciá; i saré, kon sys dre Khangirí, lyné rakhunes te dykhén pe Léste, i ĥáda, Jov phendiá lénge: “Adadyvés kerdiápe ke kónco/iagóro (spolnindiape) Svénto Čhinybén, kiéli tumé šundlé les péskire kanenca.” I jone saré prilyné davá Léstyr i divindepe pe bahtalypén lavéndyr, savé Isúso rakirdiá i jone rakirdé: “Ci na Jov isyn Jozaskiro Čhavó?” Jov phendiá lénge: “Me (džinóm) džináv, so tumé Mánge phenéna: ‘Sastypnárie, vysastiakir Kokoró Pes! Ker davá-pac' adái, pe Péskiri phuv dová, so Tu kerdián dro Kapiernaumo, syr ame šundiám.’” I Isúso phendiá lénge: “Čačes, Me rakiráva tuménge: Manušá na kutiakirena ni savé prorokós pe péskiri phuv, čačipnása Me phenáva tuménge: But sys pivlia (udovy), kiéli Ilíia dživdiá, syr bolybén sys zakerdo pe trin berš i šov čhoná, i na sys bryšýnd trin pašésa berš i jaciá bari bokh pe doiá phuv; i ni ke jekh pivliendyr na sys bičhadó Ilíia, a ke jekh pivly dre Sidonoskiri Sarienta; adiáke-pac', sys but nasvale prokazaza dro Izrailjo, kiéli Jelisiejo dživdiá, i ni jekh léndyr na vysastija, apríč Nemanoste Sirijatyr.” Kiéli manušá dre sinagoga šundlé davá, jone saré drieván xoliasyne; i ĥazdynépe i vytradyné Isusós foróstyr, i lydžiné Les pe bergakiri krutyma, sob (kaj) te čhurdén telé Les bergátyr, ne Jov progijá maškír manušénde i durija léndyr. I Isúso javdiá teledýr dro Kapiernaumo, Galilejakiro fóro, i sykliakirdiá len dro sávato. Léskiro sykliakiribén divindia manušén, pal-dová so Léskire lavéstyr sys bari zor. I sys jekh manúš dre sinagoga, konéste sys nálačho dúho (fáno), i jov zadyja gódla zoralés: “So Tu kamésa améndyr, Isúsie Nazarietostyr? Tu javdián te xasiakires amen? My džináv, kon Tu dasavo-Tu san Svénto Devléskiro!” Isúso zoralés priphendiá Léske lavénca: “Jav štyl i vydža léstyr.” I nálačho dúho (fáno) radia manušés maškirál dre sinagoga, vygijá léstyr, i ni savó čoripén na kerdiá Léske. I jone saré zoralés divindlépe i rakirdé jekh jekhéske: “So davá značynéla, so Jov priphenela nalačhé duhenge zorjása i pravosa, i dúhi (fany) vydžána?” I rozgijápe mavlýn (malva) pal Léste pir sarí phuv i štéty, so sys pašýl. Isúso uštyjá i gijá sinagogatyr i javdiá dro Simonoskiro kher; Simonoskiri sasuj (tjošča) sys pašty xačkiribnasa; i jone mangné Les pal láte. Jov podgíia ke joj i priphendiá xačkiribnaske te mekel džuvliá; i dukh mekciá la; i džuvlý adáj že uštyjá i dynarindiá Isusóske. Kiéli zagijá kham, saré, konéste sys nasvale raznone dukhenca, janénas len ke Isúso; i Jov čhuvelas upré vastá pe kažnonéste, i vysastiakirelas len; i but nalačhé dúhi adiáke-pac' vydžánas buté manušéndyr godlása i rakirdé: “Tu san Xristóso, Devléskiro Čhavó.” A Jov priphendiá lénge te na rakirén, so jone džinéna, so Jov isyn Xristóso. Kiéli jaciá dyvés, Isúso vygijá foróstyr i gijá pe štéto, kaj manušá na sys, a manušá rodyne Les; i kiéli jone lathné Les, jone kamlé te rikirén Les, sob (kaj) Jov te na džal léndyr. Ne Jov phendiá lénge: “Mánge trej i javire for'jenge te mištophenav pal Devléskiro Kralipén, vaš dová Me i som bičhadó.” I Jov rosphenelas Devléskiro lav dre saré Galilejakire sinagogi. Jekhvar Isúso sys terdó pe brégo pašýl Gienisarietoskiro ziero (oziero), a manušá tasavenaspe, sob (kaj) te javén pašyledýr ke Jov i ke Devléskiro lav; i Jov dykhciá duj barki (lodki) pašýl ziero (oziero); a mačhibnarja vyginé léndyr i xal'kirenas khudia (sieti). Isúso zagijá dre jekh bárka, saví sys Simonoskiri, i mangdiá Les te plyvinel (te del plima) krig nábut duredýr bregostyr; i kiéli Jov besciá, lyjá te sykliakirél manušén. A kiéli Isúso končyndia te sykliakirél, tedy phendiá Simonoske: “Otplyvin (de plima duredyr), kaj isyn xor i začhurde péskire khudia, sob (kaj) vari-so te staren.” I Símono otphendiá Léske: “Sykliakiribnáskiro! Ame kerdiám butý sarí rat, i nisó ame na uhtyldiam; ne pal-dová, syr Tu rakirésa, me keráva adiáke.” I jone začhurdyne khudia i uhtyldé adákicy but mačhé, so léngire khudia lyné te kušen. I jone lyné te sykavén vasténca péskire malenge (drugenge) javire barkatyr, sob (kaj) te javén i te dzn vast lénge; kodolé javné i pherdiakirde adiáke duj barki, so jone lyné lyné te tasadjon. Kiéli Símono dykhciá davá, jov pyjá pe angíl Isusóste pe čangá i phendiá: “Mek man, Rajo Dévla, me som grehítko manúš!” Símono i javír manušá, savé sys Lésa, divindlépe darása pe dasavo mačhengiro uhtylyben; Jakovo i Iáno, Zaviediejoskire čhavé, malá Simonoske, divindlépe adiáke-pac'. Tén'ci Isúso phendiá Simonoske: “Na, andyrša, Simonie, Me keráva adiáke, so tu javésa te stares manušén.” I kiéli jone vytyrdyne duj barki pe brégo, to jone jačkirdé saró, i giné pal Léste. Jekhvar Isúso sys dro jekh fóro; sys odój jekh manúš, savó sys saró dre prokáza i, kiéli jov dykhciá Isusós, to jov pyjá pe phuv mósa, i lyjá te mangél Les, rakirí: “Rajo Dévla, kóli Tu kamésa, moginésa te vysastiakires man.” Isúso protyrdyjá vast, čiladiá les i phendiá: “Kamám, tu kakaná san žužó (čysto).” I adáj že jov sys vysastiakirdo prokazatyr. I Jov priphendiá Léske nikonéske te na sykadjol, a te džal te sykavél pes rašáske i te janel svénto dyibén pal péskiro vysastiakiriben, so priphendiá Mójza, syr dophenybén manušénge. Ne mavlýn pal Isusóste rozdžalape usá butýr, i butýr, i but but manušá javénas te šunén Les, te sastiakirenpe Léste péskire nasvalypnendyr. I Jov džálas pir štéty, kaj na sys manušá, i mangdiápe Devléske. Jekhvar, kiéli Jov sykliakirelas i sys bešté odój Farisiéi i Zakonóskire sykliakiribnarja, savé javné saré šteténdyr Galilejatyr i Judejátyr i Jerusalimóstyr, a Devléskiri zor sys Isusóste te vysastiakirel nasvalen, ĥáda, vari-savé manušá jandlé nasvale manušés pe matraco i pričhude zor (starindlepe) te zalydžan les dro kher i te čhuvén angíl Isusóste; i, syr jone na lathné, kaj te prolydžan les pal buté manušénde, to jone zaresne pe kheréskiri bérga i zmekne les matracosa pir (skroz') stréha (čhakín) maškirál angíl Isusóste. Kiéli Isúso dykhciá léngiro patiaibén, phendiá kodolé manušéske: “Otmekenape gréhi tyré!” Lylvarítka i Farisiéi lyné te rakirén maškír péste: “Kon da dasavo isyn, Savó teliakirela Devlés? Kon da saštý (moginéla) te otmekél gréhi apríč jekhe Devléste?” Isúso ĥalyjá léngire dúmy i otphendiá lénge: “So tumé adiáke pal davá duminéna? So lokhedýr te phenáv: ‘Otmekenape gréhi tyré’, ci te phenáv: ‘Uštý i psir?’ Ne, sob (kaj) tumé te džinén, so Čhavéste Manušeskireste isyn pravo pe phuv te otmekél gréhi”, i Isúso phendiá praličytkoneske: “Túke rakiráva: Uštý, le matraco péskiro i džá dro péskiro kher.” I jov jekhátyr (srázu) uštyjá angíl lénde, lyjá dová, pe so sys paštó, i gijá dro péskiro kher, šarindoj Devlés. I jone saré strahádyne i slavindle Devlés: i sys dre dar, i rakirdé: “Save baré dívy ame dykhciam adadyvés.” Paló davá Isúso vygijá i dykhciá mytytkone (taksytkone) skedyibnaris pir lav Lievijo, savó sys beštó dro mytytko kher, i rakírla léske: “Jav Mánca”, Lievijo uštyjá, mekciá saró i gijá pal Léste. I Lievijo kerdiá baró svenkitko skamínd vaš Léske dro péskiro kher: i odój sys but mytoskire skedyibnarja i javír manušá, savé sys bešté pal skamínd lénca. Vari-savé Farisiéi i léngire lylvarítka rakirdé xoliames Isusóskire sykliaibnytkonénge: “Vaš so tumé xána i p'jena mytoskire skedyibnar'jenca i grehengirenca?” Isúso otphendiá lénge: “Na saste manušénge trej sastypnari (doktoro), a nasvalenge.” Me javdjom te kharav te risjon ke Devél na patiaibnytkonen, a grehengiren.” Jone phendlé Isusóske: “Sóske Ianoskire sykliaibnýtka but móly postinenape i mangénape Devléske; adiáke-pac' keréna i Farisiejengire sykliaibnýtka, a Tyré sykliaibnýtka xána i p'jena? Jov phendiá lénge: “Ci moginéna (saštý) tumé te začhuven Terneskire malen (drugen) te otphenenpe xabnastyr, kóli jone isyn pe Léskiro bjav, kiéli Ternó (Ženiho) isyn lénca? Ne javéna dyvesá, kiéli Ternó javéla lynó krig léndyr, tedy jone javéna te postinen dre dolé dyvesá.” I Jov phendiá lénge primiéro (sykaibén): “Nikón na čhuvéla pe phuranó uribén pohtanytko kotér (lapiko), savó jov otkošela nevoné uribnastyr; kóli jov keréla adiáke, jov roskošela nevó uribén, i nevó pohtanytko kotér na poddžála ke phuranó uribén. I nikón na čhuvéla neví mol dre phurané cypitka goné: pal-dová so neví mol (vino) prokošela goné i kokori mol vythadela, i goné xasjona. Ne neví mol trej te čhuvél dre neve goné, tedy zrakhélape i mol, i goné. I nikón, kon vyp'jela phurany mol, adáj že na zakaméla te p'jel neví mol; pal-dová so jov rakírla: “Phurany mol isyn fedýr”. I sys adiáke: pe javír dyvés dro pérvo sávato, pe javír Patradiakiro dyvés Isusóske prigijape te džal pir givitko félda, i Léskire sykliaibnýtka bokhalyne, i lyné te riskirenas kolosy i xan len, khosyi len vasténca. Vari-savé Farisiéi phendlé lénge: “Vaš so tumé keréna dová, so naštý te kerén dro sávato?” Isúso otphendiá lénge: “Naúšto tumé na gindlé dro Svénto Čhinybén, so kerdiá králi Davído, kiéli jov i léskire malá bokhalyne? syr jov zagijá dro Devléskiro Kher, i jov i manušá léskire xané svénto maró, savó sys naštý te xal nikonéske, a jekhe rašange? I phendiá Isúso lénge: “Čhavó Manušéskiro isyn Xuláj i pe sávato.” I sys adiáke: Isusóske prigijape dro javír sávato te zadžál dre sinagoga i te sykliakirél. I sys odój jekh manúš, savéste čačó (pravo) vast sys šuko. Lylvarítka i Farisiéi dykhenas rakhibnýtkes pal Léste, ci na sastiakirelas Jov dro sávato, sob (kaj) te lathén bangipen pe Isusóste. Ne Isúso džindiá, so jone dumindle, i phendiá manušéske šuké vastésa: “Uštý i terdjov maškirál.” I jov uštyjá i terdijá. Tén'ci phendiá lénge Isúso: “Me phučava tuméndyr: so trej te kerés dro sávato: lačhipén ci fuipén, te rakhés džiibén ci te xasiakires?” Jone sys štyl. Jov podykhciá pe lénde sarénde, i phendiá kodolé manušéske: “Protyrde tyró vast.” Jov protyrdyjá, i nasvaló léskiro vast jaciá sastó, syr i javír vast. Jone našade pes tedy xoliátyr i rakirdé maškír péste, so lénge te kerén Isusósa? I sys adiáke: dre dolé dyvesá Isúso gijá pe bérga te mangélpe Devléske i mangdiápe sarí rat. Kiéli jaciá dyvés, Jov khardiá Péskire sykliaibnytkonén i vykedyjá dešudujen, savén Jov khardiá Apostolenca: Simonos, savés Jov khardiá “Pétri”, i Jendris (Andriejos), léskire pšalés, Jakovones i Ianos, Filipos i Varfalamiejos, Matfiejos i Fomas, Jakovós, Alfiejoskires i Simonos, savés kharenas Ziloto (Aktivisto), Judas Jakovoskires i Judas Iskariotos, savó i jaciá Léskire zdyibnarisa (Léskiro zdyibnari). Kiéli Isúso zmekciape bergátyr khetané Apostolenca, Jov terdijá pe roŭno (vórto) štéto khetané Léskire sykliaibnytkonénca; i sys but manušá Judejátyr i Jerusalimóstyr, Tiroskire i Sidonoskire šteténdyr, savé sys pašýl mórjo (derjáv): jone javné te šunén Les i te vysastiakirenpe péskire dukhendyr; sys manuše, savé menčyndlepe nalačhé dukhendyr, i jone vysastjonas. Saré manušá kamlé te čilaven Les, pal-dová so Léstyr vydžálas zor i Jov sastiakirelas sarén. I Jov ĥazdyjá péskire jakhá pe Léskire sykliaibnytkonende i lyjá te rakirél: “Bahtalé isyn tumé, savé isyn čororé dro dúho, pal-dová so tumaró isyn Kralipén dro Bolybnáskiro Rajo. Bahtalé isyn tumé, konéskiro iló isyn bokhalo pal Devléskiro lav, pal-dová so Devél pherdiakirela tumaró iló. Bahtalé isyn tumé, savé rovena, pal-dová so tumé javéna te radynénpe. Bahtalé isyn tumé, kiéli manušá javéna drieván te bidykhen tumen i, kiéli jone vytradena tumen i javéna te obkharen tumen nalačhé lavénca i kaliakirena tumaró lav pal Manušéskire Čhavéste. Javén bahtalé i radynénpe dro dová dyvés, pal-dová so bari mazúri (nagrada) Devléstyr užakiréla tumen dro Bolybnáskiro Rajo. Adiáke léngire dadá kerdé prorokenca. Bida tuménge, kon isyn barvalé! Pal-dová so tuménde uže isyn lokho džiibén! Bida tuménge, konéste isyn saró, so tumé kaména; tumé javéna bokhalé. Bida tuménge, kon salape kakaná; pal-dová so tuménge javéla bari túga i tumé javéna te rovén. Bida tuménge, kiéli saré manušá javéna te rakirén lačhipén pal tuménde. Pal-dová so adiáke kerdé xohané prorokenca dadá léngire. Ne Me phenáva tuménge, kon šunéla man: sykáv patýv péskire vergénge, kerén lačhipén odolénge, savé keréna čoripén tuménge, mangénpe pal odolénde, savé košena tumen i mangénpe pal odolénde, savé našukar otlydžanape ke tumé. Kon pekavela tut dre čam (ščoka), rískir ke jov javír, kon otlela tútyr upratuno uribén, otdé léske i gad. Kon mangéla tútyr, de, i kon isyn bangó túke, na phuč léstyr pale. Kerén dová javirénge, so tumé kaména, sob (kaj) javír manušá te kerén tuménge. I kóli tumé sykavéna patýv odolénge, savé sykavéna patýv tuménge, savó parikiriben tuménge? Pal-dová so i grehítka sykavéna patýv odolénge, savé sykavéna patýv lénge. I kóli tumé keréna lačhipén odolénge, savé keréna lačhipén tuménge, savó tuménge parikiriben pal dová? Pal-dová so i grehítka keréna do-pac'. I kóli tumé déna dro vužlypén (dlugo) odolénge, savéndyr tumé užakiréna te len pale, savó parikiriben tuménge? Pal-dová so i grehítka déna dro vužlypén, sob (kaj) te len pale adakicyk. Ne tumé sykavén patýv tumaré vergénge, kerén lénge lačhipén i javéla tuménge bari mazúri (nagrada) Devléstyr, i tumé javéna Naj Vučedyreskire Devléskire čhavé; pal-dová so Jov isyn lačhó i vaš odolénge, savé na parikirena i vaš nalačhenge. Paldavá javén tangipnýtka (žalinybnytka), syr tangipnýtko isyn tumaró Dad. Na sendinén, i tumé na javéna sendindle; na bangiakiren, i tumé na javéna bangiakirde; primangen i tuménge javéla primanglo. Den i javéna te den tuménge: javéna te den tuménge pherdý miéra, i pritasado saró te javél, bi tangipnaskiro (žalimakiro), javéna te čhuvén tuménge pal breg adákicy, kicý tumé zmoginena te lydžán; savé mierasa tumé mierinena, dasavé-pac' mierasa tumen javéna te mierinen.” Isúso phendiá lénge davá primiéro: “Ci moginéla kororó manúš te lydžál javire korores? Kóli adiáke, dujdžiné peréna dre ĥanbín (jama)?” Sykliaibnýtko isyn na baredýr sykliakiribnaskirestyr; ne kiéli sykliaibnýtko vysykljola saró, jov javéla syr sykliakiribnáskiro. Sóske tu dykhésa pe tykny phusinka dre jakh tyré pšaleskiri, a baró berno na dykhésa dre péskiri jakh? Ci syr tu moginésa te phenés péskire pšaléske: ‘Pšála, miro! De, me vylava phusinka tyré jakhatyr,’ kiéli tu kokoró na dykhésa berno dre tyrí jakh? Dujemuítko, vyle angledýr berno péskire jakhatyr, tedy dykhésa, syr te vyles phusinka léskire jakhatyr. Nane lačhó kašt (drévo), sob (kaj) te del nalačhé barjakirdé (plódy); i nane nálačho kašt, sob (kaj) te del lačhé barjakirdé. Pal-dová so kažno kašt udžinena pir léskire barjakirdé, tumé na skedéna inžyro xrustostyr suv'jenca, i vinagrado xrustostyr. Lačhó manúš vylydžala lačhipén léskire–iléskire kučipnastyr, nálačho manúš vylydžala fuipén léskire-iléskire fuipnastyr; pal-dová, so isyn dro iló, dová uštá rakiréna. So tumé kharén Man, ‘Rajo Dévla! Rajo Dévla,’ a tumé kokoré na keréna dová, so Me rakiráva? Kažno, kon javéla ke Me i šunéla Miré lavá, i keréla ke kónco/iagóro (spolninela) len, isyn sýrby: kodová manúš, savó ĥazdéla kher; i jov ĥanadia xor te čhuvél fundámiento pe bar. I kiéli jaciá potopo, i paní pekadiá dro do kher, kher jaciápe te terdjol, pal-dová so léskiro fundámiento sys pe bar. A odová, kon šunéla Miré lavá i na keréla pir lénde, isyn sýrby kodová manúš, savó ĥazdyjá kher bi fundamientoskiro; kiéli pekadiá paní dro léste, kher adáj že pyjá, i rospyjape sarésa.” Kiéli Isúso končyndia davá saró rakiribén manušénge, Jov javdiá dro Kapiernaumo. Odój jekhe šelengire-xaladytkone barydyreste sys nasvaló léskiro dynári, savó sys léste dre patýv, i jov sys nasvaló ke meribén. Kiéli barydyró šundiá pal Isusóste, jov bičhadiá ke Jov Judéngire godephuren te mangén Les te javél, i te vysastiakirel šelengire dynarís. I godephuré javné ke Isúso i drieván mangné Les, rakirí: “Kadavá manúš isyn mol, sob (kaj) Tu te pomogines Léske. Pal-dová so léske isyn dróga amaré manušá i jov čhudiá sinagoga vaš aménge.” I gijá Isúso lénca; ne, kiéli Jov sys nádur léskire kheréstyr, to bičhadiá péskire malen te phenén Léske: “Rajo Dévla! Na menčyn Pes; pal-dová so me na som mol, sob (kaj) Tu te zadžas dro Miro kher; i me ginava, so me na som mol te javav ke Tu; ne Tu phen lav, i javéla miro dynári nevéstyr sastó. I me adiáke-pac' som manúš, pe konéste isyn barydyró, i mánde isyn xaladé, savé kandéna man, i me phenáva jekhéske: ‘Džá’ i džála; i javireske: ‘Jav’ i javéla, i kadaleske dynaríske miréske: ‘Ker davá,’ i keréla.” I syr Isúso šundiá davá, divindiape léstyr i phendiá manušénge, savé giné pal Léste: “Čačó, Me phenáva tuménge: Me na lathjom dasavo patiaibén i dro Izrailjo.” I odolé manušá, savén barydyró šelengiro bičhadiá, risiné i dykhné, so dynári sys sastó. I sys adiáke: paló davá Isúso javdiá dro fóro Naino i but Léskire sykliaibnýtka i javír manušá javné Lésa khetané. Kiéli Isúso podgíia pašyledýr ke foróskiri pórta, adáj vylydžanas mulé manušés te garaven, savó sys jekhdžinó péskire date; but manušá džánas lása. Kiéli Raj Devél dykhciá la, Léske jaciá tango (žalko) la i Jov phendiá láke: “Na rov” I Jov podgíia i čiladiá nasilki (tragáčy), i manušá, savé lydžiné, terdiné. Isúso phendiá: “Ternó manúš, uštý, Me túke rakiráva.” Mulo manúš besciá i lyjá te rakirél; i Isúso otdyjá les léskire dáke. Pe lénde sarénde bari dar pyjá i jone slavindle Devlés, rakirí: “Baró proróko javdiá te javél aménca, Devél pomoginela Péskire manušénge.” Adaja zan (zvies') gijá pal Isusóste pir sarí Judejakiri phuv i saré pašatuné štéty. I Ianoskire Boldeipnariskire sykliaibnýtka rosphendlé léske saró pal dová. Iáno khardiá dujén péskire sykliaibnytkonendyr i bičhadiá len ke Isúso te phučén: “Tu san Kodová, Savéske trej te javél, ci javirés aménge te užakiras?” Jone javné ke Isúso i phendlé Léske: “Iáno Boldeipnari bičhadiá amen ke tu te phučas: ‘Tu san Kodová, Savéske treindiá te javél, ci javirés aménge te užakiras?’” Dro dová časo Isúso vysastiakirelas buté manušén nasvalypnendyr i dukhendyr i nalačhé dukhendyr i Jov vysastiakirdiá jakhá butende kororende. I otphendiá Isúso lénge: “Džán i piriphenen Ianoske, so tumé dykhné i šundlé: kororé manušá dykhéna nevéstyr i langale psiréna: prokazytka jačéna žužé, i kašuke manušá šunéna, mulé otdžidjona, i bógi rosphenena bahtalý zan (zvies'); i bahtaló isyn kodová, kon na xasiakiréla patiaibén dre Mánde.” Kiéli Ianoskire bičhadé manušá giné, Isúso lyjá te rakirél manušénge pal Ianoste: “So psirdé tumé pe čhučí phuv te dykhén? Syr trastinitko kašt trinskirlape balvaliatyr? Vaš so tumé psirdé odorík te dykhén? Manušés, savó sys uridó dre šukár ídia? Nad, manušá, savé uridé dre šukár ídia, dživéna dre kralitka baré felatiniá (kolova). Ne, so ž tumé tedy psirdé te dykhén? Prorokós? Čačó, rakiráva tuménge: ‘Jov isyn baredýr prorokostyr.’ Jov isyn kodová, pal savéste isyn čhindló: “Gada, Me bičhaváva Miré vykedyné manušés angíl Túte, savó prigotovinela drom Tyró angíl Túte.’” Paldavá Me rakiráva tuménge: nane baredýr prorokós Ianóstyr Boldeipnaristyr maškír odolénde, savén džuvliá bijanena, ne naj tyknedýr dro Bolybnáskiro Rajo isyn baredýr Ianóstyr.” I saré manušá, savé šundlé Les, i mytoskire skedyibnarja priĥalyne Devléskiro čačipén i boldepe Ianoste Boldeipnariste. A Farisiéi i Zakonóskire sykliakiribnarja otphendlepe Devléskire lavéstyr; jone na boldepe Ianoste Boldeipnariste. I iščo (inké) phendiá Isúso: “Ke kon Mánge te priparuvav (te roŭninav) adalé-rodoskire manušén? Pe konéste zdžana (poddžana) kadalé manušá? Jone isyn sýrby čhavoré, savé isyn bešté pašýl targi i déna gódla jekh jekhéske, rakirí: “Ame bašadiam tuménge pe svirol'ka, a tumé na khelde; ame bagandiam roibnytka giliá, a tumé na rondlé.” I Iáno javdiá, na xála, na p'jela mol (vino), i tumé rakiréna: “Léste isyn nálačho dúho (fáno).” Javdiá i Čhavó Manušéskiro, xála, i p'jela, i tumé rakiréna: “Gada, manúš, savó kaméla te xal, te p'jel, isyn drúgo (mal) mytoskire skedyibnar'jenge i grehengirenge’. Ne Devléskiro god'varipen sykavéla Péskiro čačipén manušéngire rendénca (dielenca), sarénca, kon priléla davá čačipén.” Jekh manúš Farisiejendyr mangdiá Isusós te xal Lésa; i Isúso zagijá dro kher i besciá ke skamínd: i, ĥáda, jekh džuvlý dolé foróstyr, saví dživdiá syr grehítko džuvlý, jandiá alibastrytko khoró (žbanko) kučipnaskire – khandypnytkone makhibnasa, kiéli joj udžindiá, so Isúso xalas dro Farisiejoskiro kher; i joj terdijá palál pal Isusóste pašýl Léskire ĥerá i lyjá te rovel i te kindiakirel Léskire ĥerá jasvénca i te khosel ĥerá lákire balenca; i joj čamudia Isusóskire ĥerá i makhcia len dalé makhibnasa. Kiéli Farisiejo, savó khardiá Isusós ke pe, dykhciá davá, jov phendiá péske: “Kóli te javél Jov proróko, Jov džinelas, kon, i saví džuvlý čilavéla Les; joj ža isyn grehítko džuvlý.” A Isúso otphendiá Léske: “Símono, Mánge trej te phenáv túke vari-so.” “Rákir, Sykliakiribnáskiro”, – rakírla Símonie. Isúso phendiá: “Jekhe manušéste, kon délas lové dro vužlypén (dlugo), sys duj manušá, savé sys vužle; jekh sys vužlo pandžšelá dinarii, javír pandždešá; a pal-dová so lénde na sys sósa te otdén pale lové, davá manúš primangdia lénge dujenge. Phen mánge: “Kon léndyr butýr javéla te sykavél patýv léske?” I otphendiá Símono: “Me duminava, so kodová, konéske jov butýr primangdia.” Isúso phendiá Léske: “Čačes tu phendián.” Tén'ci Isúso porisija ke džuvlý i phendiá Simonoske: “Tu dykhésa adalia džuvliá? Me javdjom dro tyró kher, i tu na dyján paní mánge vaš ĥerá, a joj mordia Miré ĥerá jasvénca i khoscia len péskire balenca. Tu na čamudian Man, a joj na pirijaciá te čamudel Miré ĥerá dolé časostyr, kiéli Me javdjom. Tu na makhcia Miro šeró olivitkone dzetesa, a joj makhcian Miré ĥerá kučipnaskire-khandypnytkone makhibnasa. I paldavá Me phenáva túke: lákire but gréhi otmekenape pal dová, so joj sykadiá bari láska ke Me; a konéske nábut primangena, kodoleste nábut isyn láska.” Tedy Isúso phendiá džuvliáke: “Tyré gréhi isyn otmekne.” I odolé manušá, savé sys bešté pal skamínd Lésa, lyné te rakirén maškír péste: “Kon da dasavo isyn, Kon i gréhi otmekéla?” Tedy Isúso phendiá džuvliáke: “Tyró patiaibén zrakhciá tut, džá ramanjosa (mirósa).” Paló (poslie) davá Isúso psirdiá foróstyr dro javír fóro, gavestyr dro javír gav; Jov phenelas lav i mištophenelas manušénge pal Kralipén dro Devléskiro Rajo; sys Lésa dešudúj sykliaibnýtka; i sys Lésa džuvlý, konés Jov vysastiakirdiá nalačhé duhéndyr i nasvalypnendyr: Maríia, savjá khardé Magdalina, savjátyr eftá (bitrinéngiro deš) nalačhé dúhi vyginé; Iana, Xuzaskiri romný, savó sys Irodoskire-kheréskiro barydyró; i Susanna, i but javír džuvliá, savé pomoginenas Isusóske péskire mištypnástyr. Kiéli but manušá skedynépe pašýl Isusóste, pal-dová so javné manušá saré for'jéndyr, Jov lyjá te rakirél sykliaibnytkone primierosa (sykaibnasa): “Sieinybnaskiro vygijá te počhuvel péskiri ziárka, i, kiéli jov rosčhurdelas ziárki, vari-savé ziárki pyné pašé drom i len zaštakirde ĥerénca, i bolybnýtka čirikliá pohane len; iavír ziárki pyné pe baruno štéto, i kiéli jone ŭzgine, to zašutine, pal-dová so na sys paní dro phuv; iavír ziárki pyné maškír dylyny čar, i dylyny čar vybarija i zamardiá len. A javír ziárki pyné pe lačhí phuv, i ŭzgine i dyné pribaripen dre šel móly.” I kiéli Isúso phendiá dalé lavá, Jov vyphendia zoralé zaniása: “Konéste isyn kaná, mek te šunél.” Isusóskire sykliaibnýtka phučné Léstyr, so davá primiéro (sykaibén) značynéla? Jov phendiá: “Tuménge isyn dynó te džinén čorahanyben (garadó čačipén) pal Devléskiro Kralipén dro Bolybnáskiro Rajo, ne vaš javire manušénge rakirlape primierenca (sykaibnenca); jone dykhéna jakhénca, i na dykhéna, jone šunéna kanenca, i na ĥaljona.” Ĥáda, so davá sykaibén značynéla: Ziárka isyn Devléskiro lav. Ziárki, savé pyné pašýl drom, isyn sýrby manušá, savé šunéna, i ke savé korigedýr (pozže) javéla nálačho i léla krig davá lav léngire ilendyr, sob (kaj) jone te na upatian i te na zrakhenpe; a ziárki, savé pyné pe baruno štéto, isyn sýrby manušá, savé šunéna lav i priléna les radymása; ne lénde lav na zadžála xor dro iló, jone patiána naĥara (dlúges), kiéli javéla propatiakiriben pal lav, jone mekéna te patián; a ziárki, savé pyné maškír dylyny čar, isyn sýrby manušá, savé šunéna lav, ne džiibnáskiri sujéta, barvalypén i džiibnytko lačhipén zamarena davá lav dro léngiro iló, a barjakirdó nikieli na dodžála ke spialyma; a ziárki, savé pyné pe lačhí phuv, isyn sýrby manušá, savé šunéna lav i rikiréna les dro lačhó i kanduno iló i jone vyrikirena, paka davá lav déla barjakirdó (plódo).” Syr phendiá Jov davá, to rakirdiá: “Konéste isyn kaná, mek jov te šunél!” “Nikón, kon zahačkirela momoly, na čhuvéla la tel pirí ci tel čhuibén, a čhuvéla la dro šandalo (podsviečniko), sob (kaj) manušá te dykhén jag, kon javéla javriestyr, pal-dová so nisó nane čorahano, sob (kaj) te na javél šundlo; ni čhakirdo, sob (kaj) te na javél džindló i sarénge te na vydžál pe jakhá. Dykhén ža, syr tumé šunéna, pal-dová so kodoléske, savéste isyn, javéla dynó, a konéste nane, léstyr lélape krig dová nábut, so isyn léste.” I javné ke Isúso daj Léskiri i pšála Léskire i jone na mogindlé te poddžan ke Jov, pal-dová so but manušá sys pašýl Léste. I Léske phendlé: “Tyrí daj i Tyré pšála isyn terdé javrí, i jone kaména te dykhén Tut.” Ne Jov otphendiá lénge: “Mirí daj i Miré pšála isyn odolé, kon šunéla Devléskiro lav i spolninela les.” Jekh dyvés, Isúso zagijá dre bárka Péskire sykliaibnytkonénca i phendiá Lénge: “Piriplyvinasa (dása plíma) pe javír zieroskiri rig.” I jone lyné te piriplyvinen. Kiéli jone piriplyvinenas, Isúso zasutia. Bari balvál pyjá pe ziero i valny začhuvenas len paniésa, jone sýrby uže tasadjonas; i sykliaibnýtka podginé ke Isúso, džangade Les i phendlé: “Sykliakiribnáskiro! Sykliakiribnáskiro! Ame xasjovasa” Ne Jov uštyjá, priphendiá balvaliake te na phurdel i panieske te na kuninelpe; jone pirijačne i jaciá štylypen. Tedy Isúso phendiá lénge: “Kaj isyn tumaró patiaibén?” Jone sys dre dar i dívo i rakirdé jekh jekhéske: “Ne Kon Jov isyn adasavó, so Jov priphenela balvaliake i valnenge, i odolé kandenas Les.” Isúso i Léskire sykliaibnýtka priplyvindle pe javír zieroskiri rig pe phuv Gadarino, so isyn pe javír rig Galilejatyr. Kiéli Isúso vygijá pe brégo, pirilyja Les jekh manúš foróstyr, savéste ĥará sys nalačhé dúhi (fany); jov psirdiá bi idiengiro, dživdiá na dro kher, a dre maĥilytka koplicy. Kiéli jov dykhciá Isusós, zadyja gódla, pyjá angíl Léste i phendiá zoralé zaniása: “So Tu kamésa mándyr, Isúsie, Naj Vučedyreskire-Devléskiro Čhavó! Mangáva drieván Tut, na menčyn man.” Pal-dová so Isúso priphendiá nalačhé duhoske (fanoske) te vydžál dalé manušéstyr; nálačho dúho (fáno) ĥará menčyndia les adiáke, so les phandenas cepénca (zandir'jénca) i sastyrenca pe ĥerá; i nálačho dúho (fáno) tradelas les pe čhučí phuv.” Isúso phuciá léstyr: “Syr tut kharéna?” Jov phendiá: “Liegiono”, – paldová so but nalačhé dúhi (fany) zaginé dre léste. Nalačhé dúhi lyné te mangén Isusós, sob (kaj) Jov te na priphenel lénge te džán dro liúno (ado). Adáj že pe bérga čaradepe but balyče i nalačhé dúhi mangné Isusós, sob (kaj) Jov te del vólia lénge te zadžán dre balyčende. Jov mekciá len. Nalačhé dúhi vyginé manušéstyr, zaginé dre balyčende; i balyčengiro gurto čhurdyjape bregoskire krutymatyr dro ziero i tasadyja. Balyčengire čhupnárja dykhné dová, našné i rosphendlé pir fóro i pir gavá. Manušá vyginé te dykhén, so kerdiápe i javné ke Isúso, jone lathné manušés, savéste sys nalačhé dúhi (fany), i savó sys beštó ke Isusóskire ĥerá uridó i dre lačhí godý; manušá strahádyne. Kodolé, savé dykhné davá, rosphendlé kadalé manušénge, syr adavá manúš vysastiakirdiape. I saré manušá Gadarinoskire phuvjátyr lyné te mangén Isusós te durjol léndyr, pal-dová so jone sys piristrahade. Isúso zagijá dre bárka i risijá pale. A manúš, savéstyr vyginé nalačhé dúhi (fany), mangdiá Isusós te javél Lésa. Ne Isúso bičhadiá les i phendiá: “Risjov pale dro péskiro kher i rosphen, so Túsa kerdiá Devél.” Adavá manúš gijá i rosphendiá pir fóro, so Isúso kerdiá Léske. Kiéli Isúso risijá pale, manušá prilyné Les radymása, pal-dová so saré užakirde Les. I, ĥáda, javdiá manúš, savés khardé Iairo, jov sys sinagogakiro barydyró. I pyjá jov ke Isusóskire ĥerá, mangdiá Les te zadžál ke jov dro kher; pal-dová so léste sys jekh čhaj, dešudúj berš, saví sys nasvaly ke meribén. Kiéli Isusós džálas, manušá tasadynepe ke Jov. I sys džuvlý, saví dešudúj berš sys nasvaly thadune ratvalypnasa i, saví rozmekcia saró mištypén pe sastypnar'jende, ne ni jekh sastypnari (doktoro) na vysastiakirdiá la. Joj podgíia ke Isúso palalestyr maškír manušénde i čiladiá Léskiro uribén, i adáj že ratvalypen pirijaciá. Isúso phendiá: “Kon čiladiá Man?” Kiéli saré otphenenaspe, Pétri i léskire manušá phendlé: “Sykliakiribnáskiro! Manušá isyn trusciál (krugom) Túte, i jone tasavenaspe ke Tu, a Tu phučesa: ‘Kon čiladiá Man?’” Ne Isúso phendiá: “Vari-kon čiladiá Man; pal-dová so Me čuindjom, syr zor gija krig Mándyr.” Džuvlý ž, syr ĥalyjá, so joj na garadiape, so kerdiá, lyjá te izdral i pyjá ke Isusóskire ĥerá i rosphendiá angíl saré manušénde, sóske joj čiladiá Les i syr joj vysastija adáj že. Isúso phendiá láke: “Mirí Čháie! Patiaibén tyró zrakhciá tut! Džá bahtiasa!” Kiéli Isúso rakirdiá davá, javdiá bičhadó manúš sinagogakire-barydyreskire kheréstyr: “Čhaj tyrí myjá, palsó iščo (inké) te pharjakires Sykliakiribnaskires?” Ne Isúso šundiá davá i phendiá Iairoske: “Na andyrša, féni patia, i joj iavely zrakhny.” Kiéli Jov javdiá dro kher, tedy jov na domekcia nikonés te džal Lésa apríč Petriste, Ianoste i Jakovoste, patyvalé-terné džuvliakire dadéste i date. Saré rovenas i dénas gódla jasvénca. Ne Isúso phendiá: “Na rovén; joj na myjá, joj isyn suty.” I jone sandlepe Léstyr, pal-dová so džindlé, so terný patyvalý džuvlý myjá. Ne Isúso ž phendiá sarénge te džán javrí, lyjá ternia patyvalia džuvliá pal vast i phendiá zoralé zaniása: “Patyvalý-Terný-Džuvlíje! Uštý!” Lákiro džiibnytko dúho (fáno) risijá pale dre láte; joj iekhátyr (srázu) uštyjá; Isúso priphendiá te den láke te xal. Lákire dadá zdivindlepe, ne Isúso priphendiá lénge ni konéske te na rakirén pal dová, so sys. Isúso khardiá khetané dešudujen Apostolen i dyjá lénge zoralypén i zor pe saré nalačhé dúhi i te sastiakiren manušén nasvalypnendyr, i bičhadiá len te phenén lav pal Devléskiro Kralipén dro Bolybnáskiro Rajo; i phendiá lénge: “Na len pésa nisó pe drom: ni destó, ni sakva, ni maró, ni rup i na len duj gada; i dro vari-savó kher tumé zadžanas, jačénpe odój i odothýr tumé javéna te džán péske; a kóli vari-kaj tumen na priléna, to tedy vydžán javrí, trinskiren bláta tumaré ĥerendyr, syr dophenybén pe lénde.” Sykliaibnýtka giné pir saré gavá, jone mištophenenas bahtalý zan (zvies'), vysastiakirenas usiendie (viezdie). Kiéli Irodo, savó sys xuláj pe štárto paš (tietrarho) Judéngire Kralipnastyr, šundiá pal saró, so Isúso kerdiá, jov na džindiá, so te duminel: pal-dová so jekh rakirdé, so davá sys Iáno, savó otdžidyjá muléndyr; a javír rakirdé, so davá Ilíia javdiá; a trita rakirdé, so davá sys jekh ĥaratuné prorokendyr otdžidyjá. I Irodo phendiá: “Me otčingirdjom šeró Ianoske; a kon isyn ža Adavá, pal Konéste me šunava dasavo?” I jov rodyja te dykhél Isusós. Apóstoly javné pale i rosphendlé Isusóske pal saró, so jone kerdé. Jov lyjá Pésa len i jone durine pe čhučó štéto, pašýl fóro, savó khardiape Vifsaida. Kiéli manušá šundlé pal davá, jone giné pal Léste, i Isúso prilyjá len i rakirdiá lénca pal Devléskiro Kralipén dro Bolybnáskiro Rajo i vysastiakirelas kodolén, savénge sastiakiriben treindiá. Ne dyvés gijá ke bel'vél', i dešudúj sykliaibnýtka javné i phendlé Isusóske: “Otmek manušén, mek jone te džán dre pašatuné gavá i gavore te rat'kiren i te lathén te xan; pal-dová so ame sam adáj pe čhučó štéto.” Ne Isúso phendiá lénge: “Den tumé te xan lénge.” I jone phendlé: “Aménde butýr nane, syr pandž maré i duj mačhé, ci aménge te džas te kinas xabén vaš saré adalé manušénde?” Pal-dová so sys len pašé pandž tysjoncy manušá. Ne Isúso phendiá Péskire sykliaibnytkonénge: “Bešliakiren len riadenca pir pandždešá manušá.” I jone kerdé adiáke, i bešliakirde sarén. A Isúso ž lyjá pandž maré i duj mačhé, ĥazdyjá jakhá pe bolybén, bahtiakirdiá len, phagirdiá i dyjá sykliaibnytkonénge, sob (kaj) jone te rozden manušénge. I xané i saré čalyne; i jačnépe dešudúj korzíny (khudé) koterenca, dre savé jone skedyné. Jekhvar, kiéli Isúso sys jekhdžinó i mangdiápe Devléske, a Léskire sykliaibnýtka sys Lésa, Jov phuciá léndyr: “Pal konéste manušá ginéna Man?” Jone otphendlé: “Pal Ianoste Boldeipnariste, javír-pal Ilijaste; javír rakiréna, so jekh ĥaratuné prorokendyr otdžidyjá.” Jov phuciá léndyr: “Ne tumé pal konéste Man ginéna?” Pétri otphendiá: “Pal Devléskire Xristosóste.” Ne Isúso priphendiá šylales ni konéske te na rakirén pal davá. I Jov adiáke-pac' phendiá, so Manušéskire Čhavéske trej te piridživel but mén'ki, so Les na priĥaljona godephuré i rašángire barydyrá i lylvarítka, so Jov javéla zamardo, i so pal trin dyvesá Jov otdžidjola. I Jov phendiá lénge sarénge: “Kóli vari-kon kaméla te džal pal Mánde, mek te na duminel butýr pal péste, mek te lel trušúl péskiro i te džal pal Mánde; pal-dová so, kon kaméla péskiro džiibén te zrakhél, odová xasiakiréla les, i kon otdéla péskiro džiibén pal Mánde, odová zrakhéla les, ne savó lačhipén manušéske, kóli léste javéla saró, so Jov kaméla dalé svetóstyr, a kokoró pes jov xasiakiréla, ci keréla péske čoripén? Pal-dová so kon ladžala Mándyr i Miré lavéndyr, odoléstyr i Čhavó Manušéskiro javéla te ladžal, kiéli javéla dre Péskire-Dadéskiri jarko sláva sventoné Jangolenca, Čačes, Me rakiráva tuménge: adáj isyn vari-savé manušá, savé na meréna, kóli jone na dykhéna Devléskiro Kralipén dro Bolybnáskiro Rajo.” Proginé vari-savé ohtó (bidujéngiro deš) dyvesá, syr Isúso phendiá dalé lavá, i Jov lyjá Pésa Petris, Ianos i Jakovós i ĥazdyjápe pe bérga te mangélpe Devléske. Paka Jov mangdiápe Devléske, Léskiro muj i mina parudyne, Léskiro muj jaciá te ziainel i parnjol. I, ĥáda, duj muršá rakirdé Lésa, savé sys Mójza (Moisiejo) i Ilíia; i savé sykadyne bolybnáskire ziainybnasa; jone rakirdé Isusósa pal Léskiro meribén, pir savó Léske treindiá te prodžal dro Jerusalimo. Ne Pétri i léskire malá sys pharés suté; ne kiéli jone džangadyne, tedy dykhné jone Isusós dro ziainyben i duje muršén, savé sys Lésa. Kiéli adalé muršá otdžanas Isusóstyr, Pétri phendiá Isusóske: “Sykliakiribnáskiro! Syr šukár aménge te javas adái; kerása trin šátry; jekh Túke, jekh Mojzáske, jekh Ilijaske – jov na džindiá, so rakirdiá. Paka jov iščo (inké) rakirdiá davá, sykadyjá óbloko i učhakirdiá len; i jone strahádyne, kiéli óbloko garadia Mojzás i Ilijas. I sys šundly zan oblokostyr, saví rakirdiá: “Kadavá isyn Miro drógo Čhavó, Les šunén.” Kiéli zan pirijaciá, Isúso jaciápe jekhdžinó. Sykliaibnýtka sys štyl i na rakirdé ni konéske dre dolé dyvesá, so jone dykhné. Pe javír dyvés, kiéli Isúso sykliaibnytkonénca giné telé bergátyr, but manušá pirilyne Isusós. I, gada, vari-kon manušéndyr, dyjá gódla: “Sykliakiribnariskiro! Me drieván mangáva Tut te dykhén miré čhavéste, jov isyn jekh mánde; nálačho dúho (fáno) uhtyléla les, i jov adáj že déla gódla i dúho (fáno) menčynela les ke piena móstyr; i dúho (fáno) pe nábut otmekéla les, kiéli zmenčynela zoralés les; me mangdjom Tyré sykliaibnytkonén te vytradel dúho (fáno), ne jone na mogindlé te dyn ráda.” Isúso otphendiá: “O, tumé san napatiaibnaskiro i pharé-manušéngiro ródo! Kicý Me javáva tuménca i kicý Me javáva te vyrikirav tumen? Jan péskire čhavés adarík!” Kiéli terné-beršentiro džálas, nálačho dúho (fáno) radia les i lyjá te izdraliakirel les; ne Isúso priphendiá nálačho duhoske; Jov vysastiakirdiá terné-beršengires i otdyjá pale les dadéske. I saré manušá divindlépe pe Devléskiro rajkano baripén. Kiéli saré denaspe divoske, so kerdiá Isúso, Jov phendiá Péskire sykliaibnytkonénge: “Ripiren lačhés dalé lavá: ‘Čhavó Manušéskiro javéla otdynó dre manušéngire vastá.’” Ne sykliaibnýtka na ĥalyné dalé lavá; léngiro smyslo sys ĥarado léndyr adiáke, so jone na džindlé, pal so Isúso rakirdiá, a te phučén Léstyr pal davá lav jone darándyne. Dasavo phučiben sys pe iló sykliaibnytkonende: “Kon isyn baredýr maškír aménde?” Isúso džindiá, so jone dumindle, lyjá bijatós, čhudiá les angíl Péste, i phendiá lénge: “Kon priléla ke pe jekhés adasavé bijatós vaš Miro lav, odová i Man priléla, a kon priléla Man, odová priléla Odolés, Kon bičhadiá Man, kon isyn tyknedýr maškír tuménde, mek te javél jov sámo baredýr.” Iáno tedy phendiá: “Sykliakiribnáskiro! Ame dykhciam manušés, savó Tyré lavésa vytradela nalačhé dúhi (fany) i ame priphendiam Léske te pirijačel, pal-dová so jov na psiréla aménca.” Isúso phendiá léske: “Na priphenen léske; pal-dová so kon isyn na proti tuménde, odová isyn pal tuménde.” Kiéli javné pašyledýr dyvesá, dre savé Isusóske treindiá te ĥazdelpe pe bolybén dalé svetóstyr, jov zakamdiá te džal dro Jerusalimo, i Jov bičhadiá vykedyné manušén angíl Péste; i jone giné i zaginé dro jekh Samarijakiro gav, sob (kaj) te keden vaš Léske štéto te otkhinjol, ne manušá odój na prilyné Les, pal-dová so Jov vydykhcia, syr o manúš, savó džálas pir drom dro Jerusalimo. Kiéli Léskire sykliaibnýtka Jakovo i Iáno dykhné davá, jone phendlé: “Rajo Dévla! Kóli Tu kamésa, ame phenása, sob (kaj) te javél jag bolybnástyr i te xačkirel len?” Ne Isúso porisija i vyrakirdia lénge, phení: “Tumé na džinéna, savó dúho (fáno) isyn tuménde. Pal-dová so Čhavó Manušéskiro javdiá te na xasiakirél manušéngiro džiibén, a te zrakhél.” I jone giné dro javír gav. I sys adiáke: kiéli jone džánas dromésa, vari-kon phendiá Isusóske: “Rajo Dévla! Me džáva Túsa, karik i Tu džása.” Isúso phendiá Léske: “Lokhniénde (lisendy) isyn nory, bolybnáskire čirikliende gniázdy (kúfy), a Manušéskire Čhavéske nane, kaj šeró te čhuvél.” Jov phendiá javire manušéske: “Jav Mánca!” Odová ž phendiá: “Rajo Dévla! Mek man angíl te garavav Miré dadés.” Ne Isúso phendiá Léske: “Mek mulé te garaven péskire mulen; a tu, jav, rosphen bahtalý zan (zvies') pal Devléskiro Kralipén dro Bolybnáskiro Rajo.” I iščo (inké) javír manúš phendiá: “Me džáva pal Túte, Rajo Dévla! Ne mek man angíl te roziačavpe miré semencasa.” Ne Isúso phendiá Léske: “Nijékh, kon čhuvéla péskiro vast pe plugo (pharady) i obdykhelape pale, isyn na lačhó vaš Devléskiro Kralipén dro Bolybnáskiro Rajo.” Paló davá Raj Devel vykedyjá javír eftadešá sykliaibnytkonén i bičhadiá len pir dujende angíl Péste dro kažno fóro i gav, karik Jov Kokoró kamdiá te džal. Jov phendiá lénge: “Ubijandypen isyn barvaló, a butiarné isyn nábut; mangén pal davá Ras-Devlés, Kon isyn Xuláj pe féldy, sob (kaj) Jov te bičhavel butiarnen pe Péskiro ubijandypen. Džán! Me bičhaváva tumen, syr bakrén maškír ruvende. Na len pésa ni mujengiro (košel'ko), ni sakva, ni ĥeritka, i nikonéske na den ‘dobridim’. I kiéli tumé zadžána dro vari-savó kher, angledýr phenén: “Te javél ramánjo (miro) tumaré kheréske.” I kóli odój javéla manúš, savó kaméla ramánjo (miro), mek te jačélpe tumaró lav “ramanjosa” pe lénde, kiéli tumé dyné ‘dobridim’ lénge; a kóli na adiáke, mek te risjol pale ke tumé tumaró lav mangipnasa Devléske; i jačénpe dro dová kher, xan i p'jen dová, so isyn lénde: pal-dová so butiarno isyn mol pleskiribnaske pal péskiri butý. Na psirén kheréstyr dro kher. I kóli tumé javéna dro vari-savó fóro i tumen priléna, xan, so tuménge čhuvéna pe skamínd; sastiakiren nasvalen, savé isyn dro kher, i rakirén lénge: ‘Devléskiro Kralipén javdiá pašyledýr ke tumé’. A kóli tumé zadžána dro vari-savó fóro, i tumen na priléna, tedy, syr tumé vydžána javrí, phenén: ‘Phuv, so jačiape pe amaré ĥerá, tumaré foróstyr ame trinskirasa tuménge; ne džinén, so Devléskiro Kralipén javdiá pašyledýr ke tumé.’” Me rakiráva tuménge, so javéla lokhedýr dro sendoskiro dyvés Sodomoske, syr tumaré foroske. Bida túke, Xorazino! Bida túke, Vifsaida! Pal-dová so, kóli dasavé dívy, so sys kerdé dre tuménde, te javén kerdé dro Tíro i Sidono, jone ĥará riskirenas péskiro džiibén ke Devél dro uribén balytkone gonestyr i dro pieplo; a Tiroske i Sidonoske javéla lokhedýr dro sendoskiro dyvés, syr javéla tuménge; i tu, Kapiernaúmie, ke bolybén ĥazdesape! Ke liúno (ado) tu javésa čhurdynó telé. Kon šunéla tumen, odová šunéla Man, i kon na priléla tumen, odová na priléla Man; a kon na priléla Man, odová na priléla Odolés, Kon bičhadiá Man.” I eftadešá sykliaibnýtka javné pale baré radymása, rakirí: “Rajo Dévla! Kokoré nalačhé dúhi (fany) kandyné amen, kiéli ame rakirdiam Tyré lavésa.” Isúso otphendiá lénge: “Me dykhcjom nalačhés, savó pyjá bolybnástyr syr bliskavica; ake, šunén: Me dáva tuménge zor te terdjon pe sapende i skorpionende i te pirizorjakiren sarí vergoskiri zor i nisavó čoripén na javéla tuménge; i tumé na radynénpe, so nalačhé dúhi (fany) kandéna tumen, a tumé radynénpe doléstyr, so tumaré lavá isyn začhindlé dro bolybén.” Dre dová-pac' mardó (štúnda) Isúso jaciá drieván rado Sventoné Duhóstyr i phendiá: “Me barjakirava Tut, Dádo, Raj Devél Bolybnáskiro i phuvjákiro, so Tu ĥaradian davá god'varendyr i sykliakirdendyr i otkerdian davá tykné čhavorenge. Lačhés, Dádo, mek te javél adiáke, syr Tu kamdian. Miro Dad piridyja Mánge saré dalé keribena; i kon isyn Čhavó, nijékh na džinéla, jekh Dad, i kon isyn Dad, nijékh na džinéla, jekh Čhavó, i odolé, konéske Čhavó kaméla te rosphenel.” Tén'ci Isúso risijá ke sykliaibnýtka i phendiá féni vaš lénge: “Bahtalé isyn tumaré jakhá te dykhén dová, so tumé dykhéna! Me phenáva tuménge, so but proróki i králja kamlé te dykhén dová, so tumé dykhéna, ne jone na dykhné; i te šunén dová, so tumé šundlé, ne jone na šundlé.” I, ĥáda, jekh Zakonoskiro sykliakiribnari, uštyjá i kami te propatiakirel Isusós, phendiá: “Sykliakiribnariskiro! So mánge te keráv, sob (kaj) te doresav viéčno džiibén?” Isúso otphendiá Léske: “So isyn čhindló dro Zakóno? So tu ginesa?” Manúš otphendiá: “Rikir dre péste syr Drógima Ras-Devlés tyrés saré ilésa peskiresa, i saré tyré duhósa (fanosa), i saré tyré zorjása i saré tyré godiása, i sykáv patýv péskire pašatuné manušéske, syr kokoró péske.” Isúso phendiá Léske: “Tu čačunés otphendian, ker adiáke, i tu javésa te dživés.” Ne Zakonoskiro sykliakiribnari, kami te sykavél pes čačunesa, phuciá Isusóstyr: “Kon isyn miro pašatuno manúš?” Isúso ž otphendiá: “Jekh manúš gijá Jerusalimóstyr dro Jerihóno i pyné pe léste rozmaribnarja; jone zlyne léstyr uribén, domardé les i giné; i mekné les pašdžides. I sys adiáke, so jekh rašáj gijá dolé dromésa i, kiéli dykhciá les, gijá duredýr. I Lievito adiáke-pac' sys pe dová štéto, podgíia, podykhciá i gijá durydyr. Ne jekh samarianino, savó tradyjá dolé dromésa, lathiá les, kiéli dykhciá les, jaciá léske tango (žalko) dalé manušés; i jov podgíia ke davá manúš, piriphandia léskire fránsy (rany), čhudiá dzet (oliejo) i mol (vino) pe rany; tén'či jov ĥazdyjá dalé manušés pe osloste, jandiá les dro zatradypnytko kher (gostinica) i dykhciá pal léste. I pe javír dyvés, kiéli jov tradelas péske, jov vytyrdyja duj dinarii, dyjá xuláske zatradypnytkone kheréstyr i phendiá léske: ‘Dykh pal léste; i, kóli túte udžana butýr lové, to me vypleskirava túke, kiéli javáva pale.’ Kon dalé trinendyr, tu duminesa, isyn pašyledýr kodoléske, pe konéste pyné rozmaribnarja?” Zakonoskiro sykliakiribnari otphendiá: “Kodová, kon jaciápe pašýl adalé manušéste.” Tedy Isúso phendiá Léske: “Džá i tu ker adiáke-pac'.” Kiéli Isúso i Léskire sykliaibnýtka iščo (inké) giné dromésa, Isúso zagijá dro jekh gav; odój sys jekh džuvlý, savjá khardé Marfa, joj prilyjá Les radymása dro péskiro kher. Láte sys phen, savjá khardé Maríia, joj besciá ke Isusóskire ĥerá i šundiá Léskire lavá. A Marfa sys drieván zalyny (zalymi) butiasa pir kher, i joj podgíia i phendiá: “Rajo Dévla! So Tu duminesa pal dová, so phen mekciá man jekhdžinia te keráv sarí kherítko butý? Phen láke te dzn vast mánge!” Isúso otphendiá láke: “Marfie! Marfie! Tu duminesa i kerésa pharó pe iló péske pal but butiá, ne jekh trej. Maríia vykedyjá čačuný paš, saví nikón na otlela látyr.” I sys adiáke: kiéli Isúso mangdiápe Devléske dro jekh štéto i, syr pirijaciá, tedy jekh sykliaibnytkonendyr phendiá Léske: “Rajo Dévla! Sykliákir amen te mangaspe Devléske adiáke-pac', syr i Iáno sykliakirdiá léskire sykliaibnytkonén.” Isúso phendiá lénge: “Kiéli tumé mangénape Devléske, tedy rakirén: ‘Dad amaró Bolybnáskiro! Mek te slavinelpe Tyró svénto lav; Mek te javél Tyró Kralipén, Mek te spolninélpe, Tyrí vólia syr pe phuv, adiáke pe bolybén; Pode aménge maró pe kažno dyvés; I primang aménge gréhi amaré, Syr ame primangasa odolénge, Save isyn vužle aménge; I na domek amen ke propatiakiriben; Ne zrákh amen nalačhestyr’” I Jov phendiá lénge: “Konéste tuméndyr isyn drúgo (mal), i kiéli tumé javéna ke jov dre pašrat i phenéna léske: ‘Pšála, de dro vužlypén (dlugo) mánge trin laby maró, pal-dová so miro mal droméstyr zagijá ke me i mánge nane so te dav léske; i kadavá mal otphenéla tuménge: ‘De mánge te otkhinjovav! Vudár isyn phandlo i miré čhavoré isyn kakaná suté mánca; me na mogináva te uštav i te psiravav (te otphandav) túke?’” Me phenáva tuménge, so mek (xoc') jov na uštéla i na déla tuménge, pal-dová so tumé san léskiro mal, ne vaš dová, sob (kaj) tumé te na ladžakiren les mangipnasa, jov uštéla i déla tuménge adákicy, kicý tumé kaména. I Me rakiráva tuménge: mangén, i javéla dynó tuménge; rodén, i lathéna; marén dro vudár, i psiravena tuménge. Pal-dová so kažno, kon mangéla, doreséla péskiro; kažno, kon rodéla, lathéla; kažnonéske, kon marela dro vudár, javéla psirado. Ne, ci isyn vari-kon tuméndyr syr dad, so, kóli léskiro čhavó mangéla léstyr maró, te del čhavéske bar? Ci, kiéli mangéla mačhes, te del léske sapes? Ci, kiéli mangéla parnoro, te del léske skorpionos? Kóli tumé san nalačhé i džinéna te kerén lačhipén péskire čhavénge, pe kicý butýr tuméndyr tumaró Bolybnáskiro Dad déla Svénto Dúho (Fáno) odolénge, savé mangena Léstyr!” Jekhvar Isúso vytradelas nálačho dúho (fáno) niemone (muto) manušéstyr. Kiéli nálačho dúho (fáno) vygijá léstyr, niemo manúš lyjá te rakirél. I manušá divindlépe. Ne vari-savé léndyr rakirdé: “Jov vytradela nalačhé dúhi (fany) Viel'zevuloskire zorjása, savó isyn xuláj pe nalačhé dúhi.” A javír manušá propatiakirenas Les, trebinenas Léstyr, sob (kaj) te javél ĥiertýk (znamiénijo) bolybnástyr. Ne Isúso džindiá, so jone dumindle i phendiá lénge: “Kažno Kralipén, kaj nane jekhipén andrál, javéla syr šukí phuv; kažno kher, kaj nane jekhipén andrál, na javéla te terdjol; i kóli nalačheste nane jekhipén andrál, syr léskiro kralipén javéla te terdjol? A tumé ž rakiréna, so Me vytradava nalačhé dúhi Viel'zevuloskire zorjása. Ne kóli Me vytradava nalačhé dúhi Viel'zevulosa, tedy tumaré čhavé, savé zorjása vytradena? Paldavá jone javéna sendárja tuménge, so tumé rakiréna načačipén. A kóli Me vytradava nalačhé dúhi Devléskire zorjása, tedy Devléskiro Kralipén javdiá ke tumé. Kiéli zoraló manúš rakhéla péskiro kher karedyniasa, léskiro mištypén nikón na čilavéla; ne kiéli manúš zoraledýr léstyr peréla pe léste, i pirizorjakirela xulás, jov zakedela saró léskiro mardýtko (oružyjo), pal savé xuláj rikirdiape, i rozdela léskiro čordo mištypén. Kon isyn na Mánca, odová isyn proti Mánde, i kon na skedéla Mánca, odová rosčhurdela. Kiéli nálačho dúho (fáno) vydžála manušéstyr, tedy jov lodela pir bipanieskire štéty, rodéla otkhinyben i na lathéla, i tén'či rakírla: ‘Risievava me dro miro kher, katýr me javdjom.’ I kiéli jov javéla, lathéla, so kher nane zalyno, vyšulado i ukedyno; tén'či jov džála i léla pésa eftá (bitrinéngiro deš) javír dúhi, so isyn fujedýr léstyr, i jone zadžána i dživéna odój; i jačélape vaš dalé manušéske fujedýr, syr sys angíl davá.” I sys adiáke: kiéli Isúso phendiá davá, vari-saví džuvlý, saví sys maškír manušénde, otkhardiape zoralé zaniása i phendiá Léske: “Bahtalý isyn džuvlý, saví bijandiá i čaradia kolynesa Tut.” A Isúso otphendiá: “Čačó, bahtalé isyn kodolé, savé šunéna Devléskiro lav i kandéna les.” Kiéli manušá skedynépe khetané, Isúso lyjá te rakirél: “Ĥáda, isyn nálačho i napatiaibnytko ródo, savó rodéla ĥiertýk (znamiénijo); na javéla lénge ĥiertýk apríč Ionaskiri ĥiertýk. Adiáke, syr Iona sys ĥiertýk vaš manušénge Ninievijatyr, adiáke-pac' Čhavó Manušéskiro javéla vaš davá ródo. Paš-Dyveseskiri (Tate-Rigakiri) Králica ĥazdélape te sendinelpe manušénca dalé rodóstyr i dophenéla pe lénde: pal-dová so joj iavélas phuvjákire jagoróstyr (krajostyr) te šunél Solomonóskiro god'varipen; i adáj isyn Jekh, Savó isyn baredýr Solomonostyr. Ninievijakire manušá ĥazdénape te sendinenpe dalé rodosa i jone dophenena pe lénde, pal-dová so jone na risiné grehéndyr ke Devél, kiéli Iona phendiá lav; i adáj isyn Jekh, Savó isyn baredýr Ionastyr. I kiéli zahačkirena momoly, na garavena la ci čhuvéna la tel pirí, a dro šandalo (podsviečniko), sob (kaj) te dykhén manušá, savé džána andré dro kher. Momolytko (svietíl'niko) vaš masá isyn jag. Paldavá, kóli jakh tyrí javéla žužy, to kokoré masá javéna žužé; kóli jakh tyrí na javéla žužy, tedy tu kokoró javésa dro ciamlypén (kalypén). Dykh ža, sob (kaj) dud (svéto), savó isyn dre túte, te na javél ciamlo. Pal-dová so, kóli saré tyré masá isyn sviatla syr jag, a nane pe léste ni jekh ciamlo štetyco, tedy tu javésa te ziaines dudesa syr momolytkonestyr (svietil'nikostyr), savó zahačkirdo.” Kiéli Isúso rakirdiá, jekh Farisiejo khardiá Les ke xal léste; Jov zagijá i besciá pal skamínd. Farisiéi divindepe, kiéli dykhné, so Isúso na mordia vastá angíl xabén. Ne Raj Devél phendiá Léske: “Tumé, Farisiéi, kakaná morena tahtaja (čašy) i čaré javriestyr, a andrál, dro tumaró iló isyn pherdó bokh ke čúžo mištypén i nalačhé dúmy. Tumé san bigodiakire! Ci da na Devél, Kon kerdiá davá saró javriestyr i andrestyr. Ne tumé fedýr otdén dyibén iléstyr doléstyr, so tuménde isyn dre tahtaja, i tumé javéna žužé. Bida tuménge, Farisiéi; pal-dová so tumé déna déšto miéra miatatyr, rutatyr i kažnoné čarjatyr, ne tumé na duminéna pal séndo i Devléskiri láska; davá treindiá te kerén i adiáke-pac' te na bistren pal javír. Bida tuménge, Farisiéi: pal-dová so tumé kaména naj fededýr štéty dre sinagogi i, sob (kaj) manušá te den ‘paklono’ tuménge pe targitka štéty. Bida tuménge: pal-dová so tumé san sýrby nadyc'le maĥily, so manušá psiréna pir lénde i na džinéna len.” I jekh lylvaritkonendyr otphendiá Isusóske: “Sykliakiribnariskiro! Kóli Tu rakirésa adiáke, Tu ladžakiresa adiáke-pac' amen!” I phendiá Isúso: “Bida tuménge, lylvarítka: pal-dová so tumé čhuvéna baré pharipena dro džiibén pe manušénde, a kokoré na kaména anguštesa te čilaven len. Bida tuménge; pal-dová so tumé keréna koplicy prorokenge, savén tumaré dadá zamardé. Adiáke tumé dophenena ž pe tumaré dadende, i podrikirena len dro dová, so jone kerdé; pal davá, so jone zamarenas prorokén, a tumé lénge keréna koplicy. Vaš davá i Devléskire godiása isyn phendló: ‘Me bičhaváva lénge prorokén i Apostolen; jone zamarena jekhen, a javirén jone vytradena syr džuklen’, mek te javél séndo pe davá ródo pal prorokéngire rata, savé pročhude svetóskire anglypnástyr Avieljoskire ratestyr ke Zaharijoskiro rat, savés zamardé maškír altárjo i Khangirjákiri paš; čačes, Me, rakiráva tuménge: javéla phučno, syr trej dalé rodóstyr. Bida tuménge, lylvarítka: pal-dová so tumé garavena klydyna vudarendyr dro džinybnaskiro kher; tumé ž kokoré na zaginé i na mekné javirén.” I kiéli Isúso phendiá saró davá lénge, lylvarítka i Farisiéi lyné te resen ke Jov xoliása, sob (kaj) Jov te otphenel pe but phučybena; a kokoré užakirde čorahanés te uhtylén Les dro lav, i sob (kaj) jone moginénas te bangiakiren Les. Dre dová-pac' mardó (štúnda) adákicy but manušá skedynépe khetané, so jone lyné te tasaven jekh jekhés, i Isúso lyjá te rakirél angledýr Léskire sykliaibnytkonénge: “Rakhénpe Farisijengire roščynatyr: rakhénpe léngire dujemuitkimatyr; ne nane nisó učhakirdo, sob (kaj) te na vydžál pe jakhá i garadó, sob (kaj) te na javél džindló; pal-dová so saró, so tumé phenéna dre kaly (ciamly) rat, dová javéna te šunén dro sviatlo dyvés, i dová, so tumé phendlé štylés (tihes) pe kan, dová javéna te rakirén pe kherítka strehi. Ne Me rakiráva tuménge, Miré drúgi (malá): “Na andyršan kodolendyr, savé muliakirena tumen, ne savé na moginéna butýr nisó te kerén. Ne Me sykaváva tuménge, konéstyr trej te darén: darén kodolestyr, konéste isyn zoralypén te čhurdel tumen dro giejena. Čačó, Me phenáva tuménge: darenpe léstyr! Haj, na duj špaki biknenape pal jekh asarije? I ni jekh léndyr nane bistyrdo Devléste. Tuménde až i balá pe šeró saré gindlé. Na andyršan ža: tumé san kučydyr, syr kadalé but špaki. Ne Me phenáva tuménge: kažnones, kon priĥaljola Man i rosphenéla pal Mánde angíl manušéste, kodolés Me priĥaljovava angíl Devléskire Jangolende; i vari-savó, kon otphenelape Mándyr angíl manušénde, kodolestyr otphenavape i Me angíl Devléskire Jangolende; i kóli vari-kon phenéla lav pe Čhavéste Manušeskireste, léske grého javéla otmekno, ne kodová, savó phenéla lav pe Svénto Dúho (Fáno), léskiro grého na javéla otmekno ni dro davá viéko, ni dro viéko, savó javéla. Kiéli jone javéna te lydžán tumen dre sinagogi i ke barydyrá i pe sendy, na piridživen, syr i so tumé javéna te otphenen, ci so te phenén; pal-dová so Svénto Dúho (Fáno) javéla te sykliakirél tumen dre dová-pac' mardó, so trej te phenén. Tedy vari-kon manušéndyr phendiá: “Sykliakiribnariskiro! Phen Miré pšaléske, sob (kaj) jov te rosčhuvel pir pašá (te ulavél) mánca meknó mištypén, so dad jačkirdiá aménge.” Ne Isúso otphendiá Léske: “Mro manúš, kon čhudiá man te sendiakirav, ci te rosčhuvav pir pašá (ulavav) mankiruiut tuménde?” I Jov iščo (inké) phendiá lénge sarénge: “Rakhénpe i na tradenpe tumé pal barvalypén, pal-dová so čačunó Manušéskiro džiibén na dro dová, so ci but barvalypena isyn léste.” I Isúso rosphendiá lénge dasavo primiéro: “Jekhe-barvaleskire manušeskiri phuv délas lačhó aplodo: i jov duminelas péske: ‘So te keráv mánge? Mánde isyn nábut štéto, sob (kaj) te čhuvav miro giv.’ I jov duredýr phendiá péske: ĥáda, so me keráva? Rosphagirava mirí šúrna i čhuváva neví šúrna baredýr, i odój me kedava saró miro giv i miro mištypén: Tedy me phenáva péske: ‘Barvaló me som pe but berš: otkhinjov, xa, pi, dživ, syr kamésa.’ Ne Devél phendiá léske: ‘Dylynó tu san! Dre daja rat léna tútyr tyró džiibén; konéske davá saró jačélape, so tu skedyjan?’ Adiáke džála kodolende, savé skedéna kučipén péske, a na skedéna dová, so isyn mištó angíl Devléste.” I phendiá Isúso Péskire sykliaibnytkonénge: “Paldavá Me rakiráva tuménge: na piridživen pal tumaró džiibén, so tuménge te xan, ci pal tumaré masá, so tuménge te ur'jen: naúšto džiibén isyn na butýr xabnastyr, naúšto masá isyn na butýr uribnastyr? Dykhén pe korakende (voronende), jone na čhuvéna dre phuv i na sčhinena; lénde nane ni piralý, ni šúrna; i Devél čaliakirela len. Pe kicý fedydyr tumé san čirikliendyr? Ne kon tuméndyr piridživi pal džiibén, moginéla te barjakirel pe nábut péskiro baripén? I kóli tumé na moginéna te kerén až dasavo tyknó rendoro, sóske piridživena tumé pal javír keribena? Dykhén pe lilii, syr jone barjona: jone na keréna butý, na khuvena thava; ne Me phenáva tuménge, so i Solomóno péskire barvalypnasa na ur'jelaspe adiáke, syr kažno léndyr. Kóli ž dasavo uribén Devél déla feldytkone čarjake, saví adadyvés isyn pe félda, ne atasiá javéla čhurdyny dro bov, tedy pe kicý fedýr Jov déla tuménge uribén, tumé ž san nabaré – patiaibnaskire manušá? Na rikirén jekh dro šeró, so tuménge te xan ci te p'jen, i tumé na piridživen; pal-dová so saré nácyi dalé svetóstyr rodéna davá, i tumaró Dad džinéla, so tuménde isyn trébima dro davá saró; a rodén Léskiro Kralipén, i dová saró javéla dynó tuménge. Na andyršan, so tumé san na baró manušéngiro ĥurto, pal-dová so tumaró Dad déla laskasa tuménge Kralipén. Biknen, so tuménde isyn i rozden lové bogenge; kerén péske mujéngire (košel'ki), savé na jačéna phurané, keden péske kučipén, savó na tyknjola dro Bolybnáskiro Rajo, karik čor na podganavelape, i mol' (mel') na xasiakiréla. Paldová, kaj tumaró kučipén isyn, odój javéla tumaró iló. Javén skedyné ke saró, mek te xačon tumaré jaga; tumé san syr manušá, savé užakiréna péskire xulás, kon isyn pe bjav, kiéli jov džála pale svenkostyr, kiéli jov javéla kheré i marela dro vudár, sob (kaj) tumé tedy jekhátyr te otčhakiren léske. Bahtalé isyn odolé dynárja, konés xuláj lathéla, so jone na suté; čačes, Me phenáva tuménge, so xuláj prigotovinelape i bešliakirela len pal skamínd te otkhinjon; i džála ke jone i jačéla te podel lénge. I, kóli jov javéla dre pašrat, i javéla korigedýr (pozžedýr), i lathéla, so jone adiáke-pac' isyn na suté, javéna bahtalé kadalé manušá. Ne tumé zoralés džinén, so, kóli kheréskiro xuláj džinelas, kiéli ratý javéla čor, jov javéla te rakhelpe i na délas, sob (kaj) čor te podĥanavelpe tel léskiro kher. Paldavá javén skedyné, pal-dová so Čhavó Manušéskiro javéla dre dasavo mardó (štúnda), so tumé na duminéna.” Tedy Pétri phendiá Léske: “Rajo Dévla! Tu rakirésa davá primiéro (sykaibén) aménge ci sarénge?” I phendiá Raj Devél: “Kon tedy isyn patiaibnýtko i god'varó pishári, konéske léskiro xuláj dyjá zor pe léskire butiarnende, sob (kaj) te del lénge léngiri paš marestyr dro časo, savó trej? Bahtaló isyn kodová pishári, konéskiro xuláj syr javéla, lathéla, so jov keréla adiáke, syr uphendló léske; čačes, Me rakiráva tuménge: jov déla léske pravo pe saró léskiro mištypén, so isyn léste. Ne kóli davá pishári phenéla péske: ‘Miro raj zarikirelape;’ i jov léla te marel dynar'jén i dynaricen, te xal i te p'jel, i te matjol, tedy javéla pishariskiro xuláj dro dová-pac' dyvés, dro savó jov na užakiréla: i dro dová-pac' mardó, pal savó jov na džinéla i xuláj rosčingirela les pe paš i déla léske dasaví sud'ba, syr napatiaibnaskire manušénge. I odová pishári, kon džindiá léskire xulaskiri vólia, a na sys skedynó i na kerdiá pir xulaskiri vólia, javéla zoralés mardó čupniasa, a kodová pishári, kon na džindiá, ne kerdiá adiáke, pal so jov isyn bangó, javéla mardó čhupniasa tyknedýr. Kažnonestyr, konéske but dynó, phučena but; i kažnoné manušéstyr, konéske isyn but dopatiandlo, léstyr phučena butýr. Me javdjom te janav jag pe daja phuv; i syr Me kamám, sob (kaj) joj te xačol kakaná? Mánge trej te bolavpe, i syr Me piridživava, paka davá saró spolninelape! Na duminen, so Me javdjom te janav ramánjo (miro) pe phuv? Nad, Me phenáva tuménge, so na ramánjo (miro), a Me javdjom te rosčhuvav manušén: adadyvesatune dyveséstyr semia pandžine manušéndyr rosčhuvenape pe pašá: trindžine javéna te rosčhuvenape pe pašá dujdžinenca, dujdžiné javéna te rosčhuvenpe pe pašá trindžinenca: dad javéla proti čhavéste, i čhavó javéla proti dadéste; daj javéla proti čhate, i čhaj javéla proti borjate, i bori javéla proti sasiate.” I phendiá Isúso adiáke-pac' manušénge: “Kiéli tumé javéna te dykhén óbloko, savó ĥazdélape zapadostyr (pal-paniendyr), tedy tumé ŭraz rakiréna: ‘Bryšýnd javéla; i adiáke jov javéla.’ I kiéli tumé čuinena (šunéna), so paš-dyvesýtko balvál phurdela, tedy tumé phenéna: ‘Hačkiribén javéla;’ i adiáke jov javéla. Dujemuitka, tumé san! Tumé džinéna, syr te uĥaljon, so isyn pe phuv i pe bolybén; a syr da tumé na ĥaljona časo, dro savó tumé dživéna. A sóske tumé na roskedenape vaš péske, so isyn čačipén? Kiéli tu džása ke sendoskiro barydyró manušésa, savésa tu san dre xolý, tedy sprobin te urakires les pir drom, sob (kaj) manúš te na zatyrdel tut ke sendári, a sendári te na otdél tut fandaríske (istiazatieljoske), i odová te na čhurdel tut dro štaribén. Me phenáva tuménge: tu na vydžasa odothýr, paka tu otdesa ke naj tyknedýr xarkuny ĥasprin.” Dro dová-pac' časo javné manušá i rosphendlé Isusóske pal manušénde Galilejatyr, syr Piláto zmiešyndia khetané léngire rata ratenca, savé sys syr svénto dyibén Devléske. I kiéli Jov otphenélas lénge pe davá, to phendiá adiáke: “So tumé duminéna, so kadalé Galilejakire manušá sys baredýr grehítka, syr saré javír Galilejakire manušá, so jone adákicy menčyndlepe? Nad, Me phenáva tuménge, so, kóli tumé na riskirena péskiro džiibén ke Devél, tedy tumé adiáke-pac' xasjona. Ci tumé duminéna, so kodolé dešuohto (bidujéngiro biš) manušore, pe konéste pyjá Silaamoskiri vučardý (bašnia) i primardia len, sys butýr bangé, syr saré javír manušá, savé dživéna ke Jerusalimo? Nad, Me phenáva tuménge, so, kóli tumé na riskirena péskiro džiibén grehéndyr ke Devél, tedy tumé adiáke-pac' xasjona.” I phendiá Isúso dasavo primiéro (sykaibén): “Vari-savé manušéste sys inžyritko kašt (drévo), savó sys čhudo dro vinagrádniko, i jov javdiá te rodél barjakirdé (plódy) pe léste i na lathelas ni jekh. I jov phendiá sadovnikoske (barjakireske): ‘Dykh, Me uže tríto berš, syr me javáva te rodav barjakirdé pe davá inžyritko kašt i na lathava nisó: čingir davá kašt telé; sóske jov ivjá (darmes) zalela phuv?’ Ne barjakireskiro otphendiá xuláske: ‘Rajo, mek les iščo (inké) pe berš, paka Me obĥanavava les i čhuváva upré gnejo (mesta), i, kóli kašt déla fedýr barjakirdó; a kóli nad, tedy tu moginésa te čingires telé.’” I Jov sykliakirdiá dre jekh sinagoga dro sávato. Odój sys jekh džuvlý, saví sys bizorjakiri dešuohto berš nalačhé duhóstyr (fanostyr); joj sys band'kirdy i na mogindiá te rozbandjol. I kiéli Isúso dykhciá la, Jov khardiá la ke Pe i phendiá: “Džuvlije, jav sasty tyré bizorjakiribnastyr.” I Jov čhudiá upré Léskire vastá pe láte; i adáj že joj iaciá roŭno i slavindia parikiribnasa Devlés. Ne sinagogakiro barydyró xoliásyja, so Isúso vysastiakirdiá dro sávato, i paldavá jov phendiá manušénge: “Isyn šov dyvesá, kiéli saštý (možna) te kerén butý; javén dre dalé dyvesá i sastjon, a na dro sávato.” Pal davá Raj Devél otphendiá léske adiáke: “Dujemuitko, tu san! Ci kažno tuméndyr na piriphandela péskire guruvés ci oslós katuhostyr i na lydžales les te paniakirel? I kadaja džuvlý, saví isyn Avraamoskiri pračhaj, savjá nálačho sphandia pe dešuohto berš, so ž, ci na treindiá la te otmekav dalé phandypnastyr savatoné (subotoné)?” I kiéli Jov phendiá davá, saré Léskire vérgi ladžandyne; i saré manušá radyndlepe Léskire slavnone butiendyr, savé Jov kerdiá. Isúso ž phendiá: “Pe so zdžála (podžala) Devléskiro Kralipén dro Bolybnáskiro Rajo. Sósa Me mogináva te priparuvav (te priroŭninav) les? Jov isyn sýrby garčyčno ziárka, saví manúš čhudiá dre phuv pe péskiri bar; i joj vybarija i jaciá syr baró kašt (drévo), kaj čirikliá bolybnýtka garadjonas dre léskire randiá.” I nevéstyr Jov phendiá: “Sósa Me mogináva te priparuvav (te priroŭninav) Devléskiro Kralipén dro Bolybnáskiro Rajo? Devléskiro Kralipén dro Bolybnáskiro Rajo isyn sýrby droždžy (roščyna), savé džuvlý lyjá i zamiešyndia dre trin miery jaržó, paka saró xumer (ciasto) na jaciá šutlo.” I džálas Isúso pir fórja i gavá i sykliakirelas manušén, kiéli Jov džálas dro Jerusalimo. Vari-kon phendiá Léske: “Rajo Dévla!” Naúšto isyn nábut adasavé manušá, savé zrakhenape?” Isúso otphendiá lénge: “Sprobinen zoralés te zadžán pir ciasno vudár, pal-dová so but manušá, Me phenáva tuménge, javéna te rodén, sob (kaj) te zadžán andré, i jone na déna ráda (zmoginena). Paló davá, kiéli kheréskiro xuláj uštéla i zaphandela vudár, tedy tumé javéna te terdjon javrí i javéna te marén dro vudár, rakirí: ‘Rajo Dévla! Rajo Dévla.” Psirav (otphande) vudár aménge,” a Jov otphenéla tuménge: “Me na džinóm (na džináv) tumen, katýr tumé san?’ tedy tumé phenéna: ‘Ame xajam i pijam Túsa, i Tu sykliakirdian pir amaré vulícy (gásy);’ ne Jov phenéla: ‘Me na džinóm tumen, katýr tumé san; džán Mándyr krig tumé saré, kon keréla čoripén.’ Odój javéla roibén i dandengiri skriežyma, kiéli dykhéna tumé Avraamos, Isajos i Jakovós i saré prorokén dro Devléskiro Kralipén dro Bolybnáskiro Rajo, a tumen kokoren vytradena javrí. I javéna manušá vastokóstyr i zapadostyr, paš-ratitkoné i paš-dyvesytkoné rigéndyr, i jone javéna te bešén pal skamínd dro Devléskiro Kralipén dro Bolybnáskiro Rajo. I, ĥáda, isyn palatuné, savé javéna anglatuné; a isyn anglatuné, savé javéna palatuné.” Dre dová dyvés javné Farisiéi ke Isúso i phendlé Léske: “Džá adathýr i džá (péske), pal-dová so Irodo kaméla te muliakirél Tut.” Isúso otphendiá lénge: “Džán i phenén dalé lokhniake (lisake); ĥáda, Me tradava krig nalačhé dúhi (fany) i vysastiakirava adadyvés, atasiá i pe tríto dyvés Me končynava mirí butý; ne Mánge trej te psirav adadyvés i atasiá i javír dyvés, pal-dová so naštý te javél, sob (kaj) proróko te xasjol javrí Jerusalimóstyr. Jerusalimo! Jerusalimo! Dro savó muliakirenas prorokén i šuliakirenas barénca kodolén, savén bičhadiá ke tu. Kicý móly Mánge isyn pe iló te skedav čhavorén tyrén, syr čirikly skedéla čirikloren tel phak i tumé na kamlé! Ĥáda, kher tumaró javéla meknó čhučó tuménge; i Me rakiráva tuménge: tumé na javéna te dykhén Man kadalé dyveséstyr, paka tumé na phenéna: “Bahtiakirdó isyn Odová, Savó džála vaš Devléskiro lav.” I sys adiáke: Isúso zagijá dro kher ke jekh Farisiejoskiro barydyró te xal maró savatoné (subotoné), a jone dykhné dre saré jakhá pal Léste. I jekh manúš, konéste rosšulyne ĥerá i vastá, podgíia ke Isúso. I phuciá Isúso lylvaritkonendyr i Farisiejendyr: “Ci saštý te vysastiakirav dro sávato?” Ne jone sys štyl. Isúso lyjá manušés, vysastiakirdiá les i otmekciá les te džal. I Jov phendiá lénge: “Kon tuméndyr, konéste óslo (miegári) ci guruv pyjá dre ĥanýng, uraz na vytyrdela les upré dro sávato?” Ne jone nisó na mogindlé te otphenen Léske. Isúso phendiá pritča odolé manušénge, savén khardé pal skamínd, pal-dová so Isúso dykhciá, syr jone vykedenas anglatuné štéty: “Kóli vari-kon kharéla tut pe bjav, na beš pe anglatunó štéto, sob (kaj) te na javél vari-kon patyvaledyr tútyr, savés adiáke-pac' khardé, i xulái, kon khardiá tut i les, sob (kaj) te na poddžál i te na phenél túke: ‘De štéto léske,’ a túke prijavelape ladžasa te bešél palál. Ne kiéli kharéna tut, tedy beš pe palatunó štéto, sob (kaj) kodová, kon khardiá tut, moginelas te poddžál ke tu i te phenél: ‘More! Piribeš pe štéto angledýr: odój túke javéla patýv angíl sarénde, savé isyn bešté pal skamínd túsa; pal-dová so kažno, kon ĥazdéla pes, les Devél čhuvéla teledýr, a kon čhuvéla pes teledýr, kodolés Devél ĥazdéla vučedýr.’” Tén'ci Isúso adiáke-pac' phendiá kodoléske, savó khardiá Les: “Kiéli tu kerésa baró skamínd, na khar ni malen, ni pšalén, ni semencen peskiren, ni barvalé susieden (kotar'jén), sob (kaj) i jone te na kharén pale tut vari-kiéli, i sob (kaj) te na otpleskiren pale túke. Kiéli tu kerésa svénko, khar čororen, kalieken, langalen, kororen, i tu javésa bahtiakirdó: pal-dová so lénde nane sósa te otpleskiren pale túke; a túke, javéla otpleskirdo pale, kiéli čačuné manušá otdžidjona meribnástyr. I jekh manúš, kon sys beštó Lésa pal skamínd i otkhinjolas, kiéli šundiá davá, to phendiá Isusóske: “Bahtaló isyn odová manúš, kon javéla te xal maró, pal skamínd dro Devléskiro Kralipén dro Bolybnáskiro Rajo.” Isúso phendiá Léske: “Vari-savó manúš kerdiá baró skamínd i khardiá buté manušén. I bičhadiá jov péskire pisharís dre dová-pac' mardó te phenél kodolénge: ‘Javén, saró uže isyn skedynó’. Ne khardé manušá, jekh pal jekhéste, lyné te otphenenpe. Pérvo manúš phendiá pisharíske: ‘Me kindjom phuv, i mánge trej te džav i te dykháv la; mangav tut te primanges mánge’. I javír manúš phendiá: ‘Me kindjom pandž pary guruvén te den andré, i me džáva te sprobinav len; mangav tut te primanges mánge’. I tríto phendiá: ‘Me lyjom romniá, i paldavá mánge naštý te javav.” I javdiá pishári kheré i piriphendia saré lavá xuláske. Tedy kheréskiro xuláj phendiá dre xolý pisharíske: ‘Džán pir baré vulícy (gásy) i gasycy, i jan adarík čororen, kalieken, langalen i kororen’. I phendiá pishári: ‘Rajo, kerdó, syr tu phendián zorjása, i isyn iščo (inké) štéto’. I xuláj phendiá pisharíske: ‘Džá pir baré dromá i pašé týny (izgorodi) i rákir pir iló lénge te javén, sob (kaj) te javél pherdó miro kher; paldavá Me phenáva túke, so nijékh odoléndyr, savén khardé, na pokoštynela (na sprobinela) miro xabén.’” I but but manušá džánas Isusósa i Jov porisija ke jone i phendiá lénge: “Kóli vari-kon javéla ke Me i na jačkiréla péskire dadés i da, i romniá, i čhavorén, i pšalén, i phenien, i adiáke-pac' na javéla te rakhél péskiro džiibén; kodová na moginéla te javél Miro sykliaibnýtko; i vari-kon, kon na léla trušúl péskiro i na džála Mánca, kodová na moginéla te javél Miro sykliaibnýtko. Pal-dová so, kon tuméndyr, savó kaméla te čhuvél kher, angledýr na bešéla i na rozginela lové, so javéla mol davá, ci uhtýlla (dósi) lové léste te dokončynel butý; sob (kaj), kiéli jov čhuvéla fundámiento i kóli na moginéla te dokončynel, sob (kaj) saré, kon dykhéla davá, te na len te sanpe léstyr; rakirí: ‘Kadavá manúš lyjá te čhuvél kher i na dyjá ráda (zmogindia) te dokončynel butý?’ Ci, syr králi, savó kedelape te džal te marélpe javire kralísa, ci na bešéla jov i na obrakirela angledýr, ci moginéla jov deše tysjoncenca te terdjol proti javire kralíste, savó džála pe léste bišé tysjoncenca? I kiéli na adiáke, tedy paka odová králi isyn dur, jov bičhavéla ke javír králi vykedyné manušén te mangén, syr te kerél ramánjo (mirinelpe) dolé kralísa. Paldavá kažno tuméndyr, kon na otphenelape saréstyr, so léste isyn, na moginéla te javél Miro sykliaibnýtko. Lond isyn lačhó, ne kiéli jov našavela péskiro londypen, sósa saštý te kerés, sob (kaj) nevéstyr lond te javél londo? Les butýr ni karik na čhuvésa: ni dre phuv, ni pe gnejo; les vyčhurdena. Konéste isyn kaná, mek te šunél.” I džánas pašyledýr ke Isúso mytoskire skedybnarja i grehítka manušá te šunén Les: i Farisiéi i lylvarítka rakirdé xoliása adiáke: “Kadavá manúš priléla grehitkoné manušén i xála lénca.” I Jov phendiá lénge dasavo primiéro (sykaibén): ‘Kon tuméndyr, konéste isyn šel bakriá, i kóli jov našavela jekha, na jačkiréla jeniadeša pe čhučí phuv i na džála te rodél kodolia, saví xasijá, paka lathéla la. A kiéli jov lathéla la, jov čhuvéla la pe psiké radymása; a syr jov javéla kheré, kharéla ke pe péskire drugen (malén) i susiedén (kotar'jén) i phenéla lénge: “Radynénpe Mánca, pal-dová so Me lathjom bakriá, saví xasijá.” Čačes, Me phenáva túke: adiáke-pac' javéla butýr rádyma dro bolybén pal jekhe grehitkoné manušéste, savó riskirdiá péskiro džiibén grehéndyr ke Devél, syr pal jeniadeša jeniá čačipnytkonende, konéske na trej te kerél davá. Ci kóli jekh džuvlý, konéste sys deš rupuvé ĥaspria (kopieiki) i joj našavela jekh léndyr; so joj na zahačkirela momolia i na jačéla te šulavel dre štúba i te rodél rakhibnýtkes, paka joj lathéla daja ĥasprin? A kiéli joj lathéla lové, tedy kharéla ke pe podrugén (malnién) i susiedken (kotarken) i phenéla: ‘Radynénpe tumé Mánca, me lathjom ĥasprin, saví našadjom.’” Me phenáva tuménge: adiáke-pac' i radynénape Devléskire Jangóly pal jekhe grehitkoné manušéste, savó riskiréla péskiro džiibén grehéndyr ke Devél.” I iščo (inké) Isúso phendiá: “Sys jekh manúš, konéste sys duj čhavé; i phendiá ternedyr čhavó dadéske: ‘Dádo, de mánge kakaná mirí paš mištypnástyr’. I rosčhudiá dad mištypén maškír léskire duje čhavénde. Syg paló saró davá, tyrnedyr čhavó skedyjá saró i gijá pe duratuny phuv i odój jov rozmekcia péskire lové dro rozmekno džiibén. Kiéli jov rozmekcia saró, so sys léste, ĥáda, bari bokh jaciá pir doiá phuv; jov lyjá te bokhaljol; tedy jov gijá i terdijá pe butý khetané javirenca ke jekh xuláj pe doiá phuv, a kodová manúš bičhadiá les pe péskiri félda te čaravel balyčen; i jov javélas rado te xal čalés balyčane roški, so balyče xané, ne nikón na dyjá léske. Tedy jov dogijá ke péskiri godý i phendiá: ‘Miré dadéste isyn adákicy butiarné, savé xána čalés maró, a me adáj meráva bokhátyr! Uštava me i džáva ke péskiro dad, phenáva léske: ‘Dádo! Me kerdjom grého angíl Devléste i angíl túte. Me butýr na som mol, sob (kaj) tu te khares man čhavésa; le man ke pe syr péskire butiarnes.’ Uštyjá jov i gijá ke péskiro dad. Kiéli jov sys iščo (inké) dur péskire kheréstyr, dad dykhciá les; dadéskire ileske jaciá tango les i dad prastándyja, obuhtyldia čhavés vasténca i občamudia les. ‘Dádo, – phendiá čhavó, – me kerdjom grého angíl Devléste i angíl túte. Me butýr na som mol, sob (kaj) tu te khares man čhavésa.’ Ne dad khardiá péskire pishar'jén: ‘Janén sygedýr naj fededýr uribén i urjaven pe léste. Urjaven angrusty léske pe vast i triviki pe ĥerá. Janén thule cieliantos, čhinen les i javása te xas i te radynaspe, pal-dová so kadavá miro čhavó sýrby myjá vaš mánge i kakaná otdžidyjá, xasijá i lathiape’. I jone lyné te viesielinenpe (te lošaljon). A phuredýr léskiro čhavó sys pe félda: i kiéli jov džálas pale i džálas pašýl ke kher, tedy šundiá bagaiben i khelyben. Jov dyjá gódla jekhe dynarís i phuciá, so doj dasavo sys? A dynári otphendiá: ‘Tyró pšal javdiá i tyró dad začhindiá thule cieliantos, pal-dová so tyró pšal javdiá sastó’. Jov xoliásyja i na kamdiá te zadžál dro kher. Ne dad léskiro vygijá i khardiá les. Ne phuredýr čhavó otphendiá dadéske: ‘Me adákicy berš keráva butý pe túte i nijékhvar na phendjom lav proti tyré uphenybená. Ne tu nijékhvar na dyján mánge xoc' buznores (kozljonkos), sob (kaj) me te viesielinavpe (te lošaljovav) péskire malénca; a kadavá tyró čhavó kakaná javdiá, kiéli rozmekcia saró péskiro mištypén nalačhé džuvliénca; ne tu ž začhindiá thule cieliantos vaš léske’. Dad otphendiá: ‘Mo čhavoró! Tu san so dyvés Mánca, i saró, so mánde isyn, isyn tyró; ne paldavá trej te viesielinaspe (te lošaljovas), so kadavá tyró pšal sys sýrby muló vaš aménge i kakaná otdžidyjá, xasijá i lathiape.’” I phendiá Isúso ž i Péskire sykliaibnytkonénge: “Sys jekh barvaló manúš, konéste sys kheréskiro barydyró, savés manušá bangiakirenas xuláske, so jov rozmekelas xulaskiro mištypén. I adavá barvaló manúš vykhardia les i phendiá: ‘So da me šunava pal túte? Pode mánge rozginybnytko papiria, syr tu xulaindian miré mištypnasa, pal-dová so butýr túke naštý te jačespe kheréskire barydyrésa.’ Ne kheréskiro barydyró phendiá péske: ‘So mánge te keráv, kiéli Miro raj otlela mándyr butý pir kherítko mištypén? Me na mogináva te ĥanavav, ladžava te mangav. Me džinóm (džináv), so me javáva te keráv; sob (kaj) manušá te prilén man dre péskire kherá, kiéli man zlena butiátyr pir kherítko mištypén.’ I jov vykhardia pir jekhéste ke pe kažnoné manušés, kon sys vužlo léskire ráske, i phendiá pervoneske: ‘Kicý tu san vužlo miré ráske?’ I odová otphendiá: ‘Šel cebry (miery) dzet’ (jeliejo). I kheréskiro barydyró phendiá Léske: ‘Le tyró rosčhinybnytko, beš sýges i čhin pandždešá’. Tén'ci jov phuciá javirestyr: ‘A kicý tu san vužlo miré ráske?’ I jov otphendiá: ‘Šel goné (miery) parnó giv.’ I kheréskiro barydyró phendiá léske: ‘Le tyró rosčhinybnytko i čhin ohtodešá’. I šardia ž raj péskire načačune kheréskire barydyrés, so jov adiáke god'vares kerdiá. Pal-davá so manušá, savénge isyn drógo jekh davá svéto, isyn godedyr manušéndyr, savénge isyn drógo duhovno (fanoskiro) svéto. I Me phenáva tuménge: malynenpe barvalypnasa dalé svetóstyr, savó moginéla te javél bibáht adiáke, syr isyn lačhó Devléske, sob (kaj), kiéli davá barvalypén končynelape, tumé te javén prilyné dro viéčno kher.’” Kodová, kon isyn patiaibnýtko dro nabaró réndo, javéla čačunó dro baró réndo; a kodová, kon isyn načačuno dro nabaró réndo, javéla adiáke-pac' načačuno dro baró réndo. I kóli tumé na sánas čačuné dro dalé svetoskiro barvalypén, kon tuménge dopatiala Bolybnáskiro čačunó barvalypén? I kóli tumé na sánas čačuné dro čúžo barvalypén, kon tuménge déla péskiro mištypén? Nijékh dynári (sluga) na moginéla te dynar'jel duje range, ci jekhés te javéla te na kamel, ne javirés te kamel, ci javéla čačunó ke jekh, a pe javiréste javéla te dykhél vučipnástyr. Tuménge naštý te dynarinén Devléske i barvalypnaske.” Šundlé saró davá i Farisiéi, savé zoralés tradynepe pal barvalypén i jone lyné te sanpe Isusóstyr. Jov phendiá lénge: “Tumé sykavéna pes, so tumé san čačuné manušénca angíl manušénde, ne Devél džinéla tumaró iló; so manušá ginéna pal bari patýv, isyn džungalypén (brytkima) angíl Devléste. Mojzáskiro Zakóno i prorokéngire začhinybena sys angíl Ianoste Boldeipnariste: dalé časostyr bahtalý zan (zvies') pal Devléskiro Kralipén dro Bolybnáskiro Rajo mištophenelape, i kažno manúš zorjása zadžála andré. Ne sygedýr bolybén i phuv prodžána, syr jekh tykny bukvica (literka) Zakonóstyr našadjola. Kažno manúš, kon mekéla peskirjá romniá i léla javirja, odová keréla biladžaipén; i kažno manúš, kon léla javirja, savjá rom mekciá, odová keréla biladžaipén’. “Gada, sys jekh barvaló manúš i jov ur'jelaspe dre porfiritko i naj fedydyr ídia, xaja i pija so fededýr so dyvés. I sys jekh čororó manúš, pir lav Lazarjo, kon sys paštó pašýl barvaleskiri pórta i léskire masá sys dre fránsy, a adavá bógo sys rado te čaljol koterenca, so perenas barvalé – manušéskire skamindestyr, i džukela, kiéli javénas, čarenas léskire fránsy. I sys adiáke: kiéli myjá bógo Lazarjo, tedy Jangóly zalydžine les te javél pašýl Avraamoste. I barvaló manúš adiáke-pac' myjá i garadé les. I jov menčyndiape drieván dro liúno (ado) i, kiéli jov ĥazdyjá jakhá, tedy dykhciá durál Avramos i Lazarjos, savó sys pašýl Léste. I jov dyjá gódla zoralés: ‘Dádo, Avraamie, potangine man i bičháv Lazarjos, sob (kaj) jov te kindiakirel angúšt dro paní i te kindiakirel mirí čib, so me adiáke menčynavape dre daja xačkirdy jag’. Ne Avrámo phendiá: ‘Čháva, priripir, so túte sys lačhó džiibén, kiéli tu sánas džidó, a Lazarjoste sys pharó džiibén. A kakaná jov adáj radynélape, a tu menčynesape. I apríč davá saró, maškír aménde isyn bidugnoskiro properiben, so odolé, kon kaméla te piridžal adathýr ke tumé, naštý te piridžan ke ame.’ Tedy barvaló manúš phendiá: ‘Me mangav tut, Dádo, te bičhavel Lazarjos ke Miré-dadéskiro kher; odój mánde pandž pšála, a jov te patiakirel len te na javén pe davá štéto te menčynenpe.’ Ne Avraámo phendiá léske: ‘Lénde isyn Mójza i proróki: mek te šunén len’. A barvaló manúš phendiá: ‘Nad, Dádo Avraamie! Ne kóli vari-kon muléndyr te javél ke jone, jone riskirenas péskiro džiibén ke Devél’. Ne Avraámo phendiá léske: ‘Kóli jone na kandéna Mojzás i prorokén, tedy xoc' i vari-kon otdžidjolas muléndyr, jone na upatianas.’” I phendiá Isúso Péskire sykliaibnytkonénge: “Davá na moginéla te javél, sob (kaj) te na javél vaš manušéske dová, so zlydžala les dro grého, ne bída odoléske, pir konéste grého javéla! Fedýr javélas adasavé manušéske, kóli léske ur'jenas siavitko (miel'nicytko) bar pe men i čhurdenas les dro mórjo (derjáv), a na, sob (kaj) jov te zlydžal dro grého jekhe adasavé tyknendyr. Dykhén pal péste. Kóli keréla grého tyró pšal angíl túte, sykáv léske léskiri bang; i kóli jov priĥaljola bang, primang léske. I kóli jov keréla grého angíl túte eftá (bitrinéngiro deš) móly dro dyvés i priĥaljola bang eftá móly i phenéla: ‘Me priĥaljova bang,’ trej túke te primanges léske.” I phendlé Apóstoly Ráske-Devléske: “Ker, sob (kaj) te javél zoraledýr amaró patiaibén.” Ne Raj Devél otphendiá: “Kóli tuménde javélas adákicy patiaibén syr daja garčycytko ziárka, tumé phenenas pe davá inžyritko kašt: ‘Vytyrdepe saré korniénca (rukhénca) i pirisodinpe dro mórjo (derjáv)!’ – i jov pokandelas tumen. Ne kon tuméndyr, konéste isyn pishári, savó pharavelas (pašynelas) phuv ci čaravelas pe félda, kiéli jov javéla kheré feldatyr, sob (kaj) te phenéla: ‘Jav i ŭraz beš pal skamínd?’ A tumé phenéna léske: ‘Ker mánge xabén, i uri janguny (fartuha) i pode mánge pe skamínd te xav i te pjáv; a tén'či kokoró xa i pi?’ Ci parikirela davá xuláj péskire pisharíske pal dová, so jov kerdiá saró, syr léske sys priphendlo? Me na duminava. Adiáke-pac' isyn tuménca: kiéli tumé keréna saró, syr sys priphendlo tuménge, so ž tumé phenéna: ‘Ame sam pishárja syr saré; ame kerdiám, so sys priphendlo aménge.’” I sys adiáke: kiéli Isúso džálas dro Jerusalimo, Jov gijá pir kustýk (granica) maškír Samárija i Galiliéia. I kiéli Jov zadžalas dro jekh gav, deš manušá nasvale prokazasa pirilyne Les, i jone terdiné duripnastyr. Jone dénas gódla zoralé zaniása: “Isúsie! Rajo Dévla, potangine amen.” Isúso dykhciá len i phendiá lénge: “Džán, sykavén pes rašáske.” I kiéli jone džánas, tedy jačné žužé. Tedy jekh léndyr, dykhí, so jov jaciá sastó, risijá pale i slavindia parikiribnasa Devlés zoralé zaniása, i jov pyjá mósa ke Isusóskire ĥerá i parikirdia Léske; jov sys Samarianino. I phendiá Isúso: ‘Ci na deš jačné žužé (čysta)? Ne kaj že jone isyn jeniá (bijekhéskiro deš)? Jone na risiné pale te parikirén Devlés apríč adalé čužoné manušéste. I Jov phendiá adalé manušéske: “Uštý i džá, tyró patiaibén zrakhciá tut.” Farisiéi phučné Isusóstyr, kiéli javéla Devléskiro Kralipén dro Bolybnáskiro Rajo. Jov otphendiá lénge: “Nijékh manúš na moginéla te phenél pir biciale špery (primiety), kiéli javéla Devléskiro Kralipén dro Bolybnáskiro Rajo; i nikón na phenéla: ‘Ĥáda, adái,’ ci ‘ĥáda, odój,’ pal-dová so Devléskiro Kralipén uže isyn dro tumaró iló.” Tedy Isúso iščo (inké) phendiá sykliaibnytkonénge: “Javéna dyvesá, kiéli tumé drieván zakamena xoc' pe jekh dyvés te dykhén Čhavés Manušeskires, kiéli Jov sykadjola, ne tumé na dykhéna; i phenéna tuménge: ‘Ĥáda, adái,’ ci ‘ĥáda, odój,’ – na psirén i na rodén; pal-dová so, syr bliskavica zahačola jekhe-bolybnáskire jagoróstyr (krajostyr) i ziainela duredýr ke javír Bolybnáskiro jagóro (kónco), adiáke javéla Čhavó Manušéskiro dro Péskiro dyvés. Ne angíl trej Léske but mén'ki te piridživel i Léstyr otphenenape manušá dalé rodóstyr, I, syr sys dre dolé dyvesá, kiéli sys Nojo, adiáke-pac' dre dyvesá javéla Čhavó Manušéskiro: manušá xané, piné, lynepe, vydžánas paloróm angíl dová dyvés, dro savó Nojo zagijá dro kovčego, i jaciá potopo i xasiakirdiá sarén; adiáke-pac' syr sys, kiéli sys Loto: xané, piné, kinenas, biknenas, čhuvénas dre phuv, ĥazdenas kherá; ne dro dová dyvés, kiéli Loto vygijá Sodomostyr, jagitko i dzevelikanó (sierno) bryšýnd gijá bolybnástyr i xasiakirdiá sarén; Adiáke javéla i dro dová dyvés, kiéli Čhavó Manušéskiro javéla. Dro dová dyvés, kon javéla pe kherítko stréha (čhakín), a Léskiro mištypén kheré, mek te na zdžal telé te lel vari-so kheréskire mištypnástyr i kon javéla pe félda, mek te na risjol pale. Ripiren Lotoskirja romniá. I vari-kon, kon zakaméla te rakhél péskiro džiibén, odová xasiakiréla les, a kon xasiakiréla les, odová zrakhéla džiibén. Me phenáva tuménge: dre doiá rat duj manušá javéna te pasjon pe jekh čhuibén: jekhés léna, javirés jačkirena; duj džuvliá javéna te siavinen (te mielinen) žernovone barénca; jekha léna, javirja jačkirena, duj muršá javéna pe félda: jekhés léna, javirés jačkirena. Sykliaibnýtka phučné Léstyr: “Kaj, Rajo Dévla?” Isúso otphendiá lénge: “Kaj javéla muló trúpo, odój skedénape órly (kídy).” I Isúso rosphendiá lénge primiéro (sykaibén) vaš dová, sob (kaj) jone te mangénpe Devléske i te na obmeken šeré: “Dro jekh fóro sys jekh sendári, savó na darandyja Devléstyr i na kutiakirdia manušén; dro dová-pac' fóro sys jekh pivly (udova), saví javélas ke sendári i rakirdiá: ‘Zaterdjov pal mánde Miré vergéndyr!’ Ne sendári ĥará (dlúges) na kerdiá nisó, ne korigedýr (pozžedýr) phendiá péske: ‘Mek me i na darava Devléstyr i na kutiakirava manušén, ne pal-dová so adáia pivly dohaia mánge, me zatyrdjovava pal láte, sob (kaj) joj te na zamenčynel sarésa man!’ I phendiá Raj Devél: “Šunén ža, so načačuno sendári rakírla. I so ž, naúšto Devél na zatyrdjola pal odolénde, konés Jov vykedyjá, savé javéna te mangénpe roibnasa Léske dyvés i rat, i Jov javéla te tyrdel otphenybnasa? Me phenáva tuménge, so Jov sýges zaterdjola pal lénde. A kiéli Čhavó Manušéskiro javéla, ci lathéla Jov patiaibén pe phuv?” I Isúso rosphendiá davá primiéro (sykaibén) adiáke-pac' odolénge, savé dumindle zoralés, so jone sys lačhé i, savé dykhné phut'kiribnasa pe javirende: “Duj manušá javné dre khangirí te mangénpe Devléske; jekh sys Farisiejo, javír mytoskiro skedyibnari. Farisieje uštyjá i mangdiápe Devléske: ‘Dévla, parikiráv Túke, so me na som adasavó, syr javír manušá: rozmaribnarja; manušá, savé keréna bibáht javirénge; manušá, savé keréna biladžaipén; ci syr kadavá mytoskiro skedyibnari. Me postinava duj móly dro kurko, me dáva déšto paš doléstyr, so me zakerava dro čhon.’ Ne mytoskiro skedyibnari sys terdó duredýr i jov na mogindiá až te ĥazdel jakhá péskire ke bolybén, a mardia pes dro kolýn i rakirdiá: ‘Dévla! Potangine man, grehitkoné manušés’. Me phenáva tuménge, jov gijá kheré butýr čačunesa, pal-dová so Devél butýr otmekciá léskire gréhi, syr kodová Farisiejo. Pal-dová so kažno manúš, kon ĥazdéla pes kokoró, Devél čhuvéla les teledýr, a kon čhuvéla pes kokoró teledýr, kodolés Devél ĥazdéla vučedýr.” I manušá lydžánas ke Isúso tykné bijatén, sob (kaj) Jov te čilavel (te dotkninel) len; ne sykliaibnýtka, kiéli dykhné dová, na domekenas bijatén ke Jov. Ne Isúso khardiá bijatén ke Pe i phendiá: “Mekén bijatén te javén ke Me, i na obrikiren len, pal-dová so Kralipén dro Devléskiro Rajo javéla vaš adasavé manušénge, savé sys syr kadalé bijaty. Čačes, Me rakiráva tuménge: kon na priléla Kralipén dro Bolybnáskiro Rajo adiáke, syr adavá bijáto, odová na zadžála dro Kralipén.” I vari-savó barydyró phuciá Isusóstyr: “Lačhó Sykliakiribnáskiro! So mánge te keráv, sob (kaj) te doresav viéčno džiibén?” Ne Isúso phendiá Léske: “Palsó tu kharesa man ‘Lačhó?’ Nikón isyn lačhó. Lačhó isyn jekh Devél. Tu džinésa priphenybená: ‘Na ker biladžaipén, na zamar, na čor, na sovlahá xohanés; kutiakir péskire dadés i péskire da.’ Manúš phendiá: “Saró davá me zrakhcjom čhavoripnastyr.” I kiéli Isúso šundiá davá, Jov phendiá: “Jekh túke na uhtýlla (nádosi): džá, rozbikin saró péskiro barvalypén, i rozde lové bogenge, tedy túte javéla kučipén pe bolybén; tén'či jav, džá pal Mánde.” Kiéli manúš šundiá davá, jov jaciá drieván smentno, pal-dová so jov sys drieván barvaló. A kiéli Isúso dykhciá, so manúš jaciá drieván smentno, jov phendiá: “Syr pharó javéla barvaleske te zadžál dro Kralipén dro Devléskiro Rajo; pal-dová so lokhedýr vierbliudoske te džal pir suvjakiro kan, syr barvaleske te zadžál dro Kralipén dro Bolybnáskiro Rajo.” I manušá, kon šundlé Les, phučné: “Kon da moginéla tedy te zrakhelpe?” Ne Isúso phendiá: “So manušénge naštý, odová saštý Devléske.” I Pétri phendiá: “Ame saró jačkirdiam i gijam pal Túte.” I phendiá Isúso: “Čačes, Me rakiráva tuménge: nane nikonés (nane nikón), kon jačkirdiá kher, ci dadés, ci da, ci čhavorén, ci romniá vaš Devléske, sob (kaj) léste te na javél but móly butedýr dro davá džiibén, i dro viéčno džiibén, savó javéla.” Isúso khardiá dre rig Péskire dešudujé sykliaibnytkonén i phendiá lénge: “Dykhén, ame zadžasa dro Jerusalimo, i saró, so proróki čhindlé pal Manušéskire Čhavéste, kerélape ke kónco/iagóro (spolninelape); Les déna dro vastá (zdena) Najudénge; i jone javéna te sanpe xoliames Léstyr, i te ladžakiren, i te čungarden pe Léste. I kiéli jone domarena Les, tedy jone muliakirena Les; i pe tríto dyvés Jov otdžidjola.” Ne jone na ĥalyné ni jekh lav daléstyr. Dalé-lavengiro smyslo sys ĥarado léndyr, i jone na džindlé, pal so Isúso rakirdiá. I sys adiáke: kiéli Isúso džálas pašyledýr ke Jerihóno, vari-savó kororó bógo sys beštó pašýl drom i mangdiá bogitko dyibén. I kiéli jov šundiá šumo manušéndyr, savé džánas pašýl, jov phuciá, so davá moginel te javél? Jone phendlé Léske: “Isúso Nazarietostyr džála.” I jov dyjá gódla: “Isúsie, Čhavó Davidóskiro! Potangine (požalin) man!” Manušá, savé sys angíl léste, lyné te rakirén léske xoliása, sob (kaj) jov te javél štyl, ne jov délas gódla iščo (inké) zoraledýr: “Čhavó Davidóskiro! Potangine man!” Isúso terdijá i phendiá te janén les. I kiéli jov podgíia pašyledýr ke Isúso, Isúso phuciá léstyr: “So tu kamésa, sob (kaj) Me te keráv túke?” Jov otphendiá: “Rajo Dévla, sob (kaj) me moginavas te dykháv.” Isúso phendiá Léske: “Dykh ža: tyró patiaibén vysastiakirdiá tut.” Kororó adáj že lyjá te dykhél i gijá pal Léste, i šardia Devlés. I saré manušá, kiéli dykhné davá, slavindle parikiribnasa Devlés. I zagijá Isúso dro Jerihóno i džálas pir davá fóro. I, ĥáda, jekh manúš, pir lav Zakhiejo, kon sys barydyró pe mytytko (taksytko) kher i sys drieván barvaló, jov kamdiá te dykhél Isusós, Savó Jov isyn, ne jov na mogindiá pal manušénde, pal-dová so jov sys tyknó baripnasa. Jov zaprastandyja angíl, zarescia pe kašt-sikamoro te dykhél Isusós, pal-dová so Isusóske treindiá te džal dalé dromésa. Kiéli Isúso podgíia ke dová štéto, Jov dykhciá upré, dykhciá Zakhiejos i phendiá Léske: “Zakhieje! Res telé sygedýr, pal-dová so adadyvés Mánge trej te jačavpe dro tyró kher.” I Zakhiejo sýges rescia telé i prilyjá Les ke pe radymása. I saré, kon dykhné davá, rakirdé xoliames: “Jov zagijá te jačélpe ke grehítko manúš.” Ne Zakhiejo uštyjá i phendiá Ráske-Devléske “Rajo Dévla! Me otdáva bogenge paš saré Miré mištypnástyr i, kóli me lyjom xohaibnasa butýr vari-savé manušéstyr, me dáva pale štar móly butýr.” I Isúso phendiá Léske: “Adadyvés zrakhibén javdiá dro davá kher, pal-dová so adavá manúš adiáke-pac' isyn Avraamóskiro čhavó; Čhavó Manušéskiro javdiá te rodél i te zrakhél odolén, savé xasiné i otrisine Devléstyr.” Kiéli manušá šunenas Isusós, Jov phendiá lénge iščo (inké) jekh primiéro (sykaibén), pal-dová so Jov sys nádur Jerusalimóstyr i jone dumindle, so jone syg javéna te dykhén Kralipén, kaj Devél javéla te xulainél. Jov ž phendiá lénge: “Vari-savó manúš baré rodóstyr gijá baré dromésa, sob (kaj) te jačél kralísa pe doiá phuv i te javél pale. Jov khardiá ke pe péskire deše pishar'jén i dyjá deš miny kažnonéske, i phendiá lénge: ‘Kofarinen lénca (mekén len dro réndo), paka me javáva’. Ne léskire manušénge sys drieván na pir iló, i bičhadé manušén pal léste, sob (kaj) jone te phenén: ‘Ame na kamasa, sob (kaj) jov te javél amaró králi’. I kiéli adavá manúš javdiá pale, jov priphendiá te vykharel pishar'jén, savénge jov dyjá lové, sob (kaj) te džinél, kon so zakerdia. I pérvo pishári podgíia i phendiá: ‘Rajo! Me zakerdjom deš miny tyré minasa’. I manúš phendiá léske: ‘Mištó, tu san lačhó pishári; pal-dová so tu sánas patiaibnýtko nabaré lovenca, me keráva tut barydyrésa pe deš fórja’. Javír pishári podgíia i phendiá: ‘Rajo! Me zakerdjom pandž miny tyré minasa’. Manúš phendiá adiáke-pac' i léske: ‘Me keráva tut barydyrésa pe pandž fórja’. Tríto pishári podgíia i phendiá: ‘Rajo! Ĥáda, tyré lové, savé me rakhcjom dro pohtan. Me darandyjom tútyr, pal-dová so tu san pharó manúš: sčhinesa odój, kaj na sieindian, i skedesa odój, kaj na rosčhudian’. Raj phendiá léske: ‘Tu san zlydnia dynári, tyré lavénca me javáva te sendinav tut: tu džindian, so me som pharó manúš i so me skedáva, kaj na rosčhudjom i sčinava, kaj na sieindjom. Sóske tu na čhudián miro rup dro banko, sob (kaj) me, syr risijom, te lav pale péskire lové kofosa’. I tedy jov phendiá odolénge, savé sys terdé pašýl: ‘Len léstyr mina i den kodoléske, konéste isyn deš miny’. Ne jone phendlé léske: ‘Rajo! Léste isyn deš miny’. “Ne me phenáva tuménge, so kažnonéske, savéste isyn, javéla butýr dynó, ne kodolestyr, savéste nane, lélape léstyr dová, so isyn léste.” A adalé vergén, savé na kamlé, sob (kaj) me te javav králi pe lénde, janén len adarík i domaren angíl mánde.’” Isúso phendiá davá i gijá angíl lénde duredýr ke Jerusalimo. I kiéli Jov sys pašýl gavá Vifagija i Vifanija, angíl bérga, savjá khardé Olivítko (Jelieonoskiri), Jov bičhadiá dujén Péskire sykliaibnytkonendyr i phendiá: “Džán dro gav, savó isyn angíl tuménde, i kiéli tumé zadžána odorík, tumé dykhéna priphandle terné oslós (miegarís), pe savéste nikón na sys beštó, otphanden les i janén adarík. Kóli vari-kon phučela tuméndyr, ‘So tumé keréna’, phenén adiáke léske: ‘Jov trej Ráske-Devléske’. Bičhadé sykliaibnýtka giné i lathné saró, syr Isúso phendiá lénge. I kiéli jone otphandenas osljonkos, léskire xulaja phučné léndyr: ‘Sóske tumé otphandena osljonkos’. Jone otphendlé: “Jov trej Ráske-Devléske”, i otlydžine osljonkos ke Isúso; i čhudé upré pe léste péskire uribená, i bešliakirde Isusós pe osljonkoste. I syr Jov tradelas, manušá čhuvénas péskiro uribén pe drom. Kiéli Isúso podtradyja ke Olivitkone-Bergakiro sklono, saré sykliaibnýtka lyné te slavinén parikiribnasa Devlés radymása, zoralé zanienca pal saré Léskire dívna butiá, savé jone dykhné; jone rakirdé: “Te javél bahtiakirdó Králi, Savó džála vaš lav Devléskiro! Te javél ramánjo (miro) pe bolybén i sláva dre upratunende.” Tedy vari-savé Farisijendyr, kon sys maškír manušénde, phendlé Isusóske: “Sykliakiribnariskiro! Priphen sykliaibnytkonénge te javén štyl!” I Isúso otphendiá lénge: “Me phenáva tuménge, so kóli jone javéna štyl, tedy bará javéna te den gódla.” I kiéli Jov javdiá pašyledýr ke fóro, dykhciá pe léste i zarondia, i phendiá: “Kóli tu xoc' adadyvés džinesas, so túke trej vaš tyró ramánjo (miro)! Ne davá iščo (inké) garadó jakhéndyr”; pal-dová so javéna dyvesá pe túte, so tyré vérgi ĥazdéna barikady trusciál túte i oblena tut saré rigéndyr; i stasavena tut saré rigéndyr, i rosphagirena saró pe phuv i zamarena tyré čhavorén: i na jačéla bar pe bar, pal-dová so tu na udžindian časo, kiéli Devél javdiá te zrakhél tut.” I zagijá Isúso dre Khangirí i lyjá te tradel javrí sarén, savé biknenas i kinenas, i rakirdiá lénge: “Isyn čhindló: ‘Miro kher javéla te kharelpe ‘mangipnytko kher,’ a tumé kerdé léstyr rozmaribnar'jengiri kirčyma.’” I Jov sykliakirdiá len so dyvés; rašángire barydyrá i lylvarítka i godephuré dumindle, syr te xasiakirén Les, i na pridumindle nisó, so te kerén Lésa, pal-dová so manušá tyrdynepe ke Jov te šunén. Dro jekh dasavo dyvés, kiéli Isúso sykliakirdiá dre Khangirí i phendiá bahtaló lav, rašángire barydyrá i lylvarítka khetané godephurenca javné i phendlé Léske: “Phen aménge, savé pravosa Tu kerésa saró davá? Ci kon dyjá Túke dasavo pravo?” I Isúso otphendiá lénge: “I Me phučava tuméndyr pal jekh, i phenén mánge: ‘Ianoskiro boldeipen sys bolybnástyr ci manušéndyr?’ Jone ž rakirdé maškír péste: ‘Kóli phenása, so bolybnástyr’, Jov tedy phenéla: ‘Sóske ada tumé na patiandyné léske?’ ne kóli phenása: ‘Manušéndyr,’ tedy saré manušá javéna te marén barénca, pal-dová so jone džinéna mištés, so Iáno sys proróko!” I jone otphendlé: “Ame na džinása, katýr jov sys.” I Isúso phendiá lénge: “I Me na phenáva tuménge, savé pravosa Me keráva davá.” I Isúso lyjá te rakirél manušénge dasavo primiéro (sykaibén): “Jekh manúš čhudiá vinagrádniko i dyjá les dro najmo vinagradar'jenge, i kokoró tradyjá pe baró časo. I dro péskiro časo jov bičhadiá pisharís ke vinagradarja, sob (kaj) jone te den léske barjakirdé (plódy) vinagradnikostyr; ne vinagradarja uhtyldé les, mardé i otbičhade les krig nisosa. I nevéstyr jov bičhadiá javire pisharís: ne jone adiáke-pac' mardé les, ladžakirdé i otbičhade les krig nisosa. I nevéstyr jov bičhadiá tritone pisharís; ne jone domardé les ke rat, i tradyne javrí les. I tedy vinagradnikoskiro xuláj phendiá: ‘So te keráv mánge? Me bičhaváva Miré drogoné čhavés. So kiéli jone dykhéna les, xaj, jone javéna te ladžan, sob (kaj) te čilaven les.’ Ne kiéli vinagradarja dykhné les, phendlé jekh jekhéske: ‘Ĥáda, javéla xuláj mištypnaskiro – javén, zamarasa les i léskiro mištypén javéla aménge’. I jone zorjása lydžiné les javrí i zamardé. So javéla te kerél vinagradoskiro xuláj lénca? Jov javéla i muliakiréla adalé vinagradar'jen i vinagrádniko déla dro najmo javirénge.” I kiéli jone šundlé davá, tedy phendlé: “Mek te na javél!” Ne Isúso dykhí pe lénde, phendiá: “So davá čhinybén značynéla: ‘Bar, savó na prilyné butiarné, jaciá šeralé baresa vaš uprečhuiben kheréskiro.’” I kažno manúš, kon peréla pe davá bar, rozmarelape pe kokalý, ne pe konéste jov peréla, rostasavela kodolés pe kokalý.” I rašángire barydyrá i lylvarítka dyné godý péske (dumindle) dre dová-pac' mardó (štúnda) te uhtylén Les, ne jone darándyne manušéndyr, pal-dová so jone ĥalyné, so Jov rakirdiá davá primiéro (sykaibén) pal lénde. I jone dykhné rakhibnýtkes pal Isusóste, podbičhade čorahane manušén, savé pričhudepe čačuné manušénca, sob (kaj) te uhtylén Les dro lav te zden Les Rimóskire balunitkoneske (pravitieljoske), konéste sys zor i pravo te sendinel. I podbičhade manušá phučné Léstyr: “Sykliakiribnáskiro! Ame džinása, so Tu rakirésa i sykliakiresa čačipén, na dykhí, savó adavá manúš isyn: Ci isyn pir Zakóno te pleskiras myto kiesarjoske ci nad?” Ne Isúso džindiá léngiri dujemuitkima i phendiá: “Sóske tumé Man propatiakirena? Sykavén Mánge dinarijo: konéskiro muj i lav isyn vyčhindlé adái?” Jone otphendlé “Kiesarjoskire.” Tedy Isúso phendiá lénge: “Otdén kiesarjoskiro Kiesarjoske, a Devléskiro Devléske.” I jone na mogindlé te uhtylén Isusós dro lav angíl manušénde, a divindlépe pe Léskiro otphenybén i jačné štyl. I javné vari-savé Sadukiei, savé rakirénas, so nane otdžidyipen meribnástyr, javné ke Isúso i phučné: “Sykliakiribnáskiro! Mójza čhindiá aménge, so kóli meréla pšal manušéste, jačkiréla romniá bi čhavorengiro, mek léskiro pšal te lel dalia romniá paloróm, sob (kaj) te riskirél pale ródo mulé pšaleskiro. Sys eftá (bitrinéngiro deš) pšála, i pérvo pšal lyjá romniá i myjá bi bijatengiro; i javír pšal lyjá la paloróm i myjá bi bijatengiro; i tríto pšal lyjá la; i saré eftá pšála adiáke-pac', i myné, i na jačkirdé čhavorén; syg pal sarénde i džuvlý myjá. Dro otdžidyipen meribnástyr, konéskiri romný javéla kadaja džuvlý? Pal-dová so saré eftá pšála sys lákire romá.” Isúso phendiá lénge: “Manušá, savé lathéna drógima dro jekh davá svéto, lenape i vydžána paloróm; ne manušá, savé isyn lačhé te dživén pe dová svéto i te otdžidjon meribnástyr, na javéna te lenpe i te vydžán paloróm; jone na javéna te merén, pal-dová so jone javéna šerá (rávnes) Jangolenge; i jone javéna Devléskire čhavoré, pal-dová so jone javéna sýrby čhavoré, savé otdžidine meribnástyr. Ne syr mulé otdžidjona, Mójza sykadiá dre péskiri lylvarí pal xrústo, savó xačolas jagása, kiéli jov kharéla Ras-Devlés Devlésa Avraamoskiresa i Devlésa Isaakoskiresa i Devlésa Jakovoskiresa; ne Jov isyn na Devél mulenge, a Jov isyn Devél džidé manušéngiro; saré isyn džidé vaš Léske.” Vari-savé lylvarítka phendlé: “Sykliakiribnáskiro! Tu lačhés otphendian!” I lénde butýr na sys muršypen te phučel Isusóstyr, pal vari-so Jov ža phendiá lénge: “Syr davá rakiréna, so Xristóso isyn Čhavó Davidóskiro, Davído ž kokoró phendiá dre Psalmengiri Lylvarí: ‘Phendia Raj Devél, Miré Ráske-Devléske: ‘Beš pe čačó vast Mándyr, paka Me čhuváva vergén Tyrén tel ĥerá tyré’. Davído ž Kokoró khardiá Les ‘Raj Devél”, katýr ža Jov isyn čhavó Léskiro?’” I kiéli saré manušá šundlé Isusós, Jov phendiá Péskire sykliaibnytkonénge: “Rakhénpe lylvaritkonendyr, savé kaména te psirén dre dind'kirde uribená i kaména, sob (kaj) manušá te den ‘paklono’ lénge pe targitka štéty; savé kaména te bešén pe anglatuné štéty dre sinagogi i pal khardé skaminda; savé obhana pivliengire kherá i mangénape Devléske ĥará (dlúges), sob (kaj) len te dykhén. Adasaven manušén užakiréla pharó sendiakiriben.” Isúso dykhciá, syr barvalé manušá čhuvénas lové dre Khangirjákiri piralý (tyknori); i Jov dykhciá adiáke-pac', syr vari-saví čorori pivly (udova) čhudiá duj xarkuné (miedítka) ‘gaspria (liepty). I phendiá Isúso: “Čačes, Me rakiráva tuménge: adáia čorori pivly čhudiá butýr saréndyr; pal-dová so jone čhuvénas dyibén Devléske péskire barvalypnastyr; a joj péskire čororipnastyr dyjá saró, so láte sys; saró so sys láte te dživél.” Kiéli vari-savé Léskire sykliaibnýtka rakirdé pal Khangirí, so joj sys šukár drogoné barénca i darenca, Isúso phendiá: “Javéna dyvesá, kiéli daléstyr, so tumé dykhéna, na jačélape bar pe bar; savó te na javél phagirdó.” Jone phučné: “Sykliakiribnáskiro! Phen aménge, kiéli davá saró javéla i saví špéra (primieta) javéla angíl, syr saró davá kerélape?” I phendiá Isúso: “Rakhénpe, sob (kaj) nikón te na xohavél tumen, pal-dová so but javéna ke tumé Miré lavésa i javéna te rakirén: ‘Me som Jov,’ i ‘Časo javdiá;’ na džán pal lénde. I kiéli tumé šunéna pal maribena i bunty, na andyršan; pal-dová so saró davá trej te javél; ne davá na javéla iščo (inké) kónco (jagóro).” Tedy Jov phendiá lénge: “Ĥazdenape manušá pe manušénde i kralipén pe kralipén; phuv javéla te trinskirelpe dre rázna štéty, javéna baré bokha i meribnytka fránsy, i javéna darane sykaibena i baré znamiénii (ĥiertyká) bolybnástyr. Ne angíl saró davá manušá javéna te zakeden tumen i te tradén tumen, javéna te zden tumen dre sinagogi i štaribena; i javéna te lydžán tumen angíl kral'jénde i balunitkonende pal Miro lav; ne davá javéla saštypen vaš tuménge te rosphenén pal patiaibén dre Mánde. Javén murškané dro tumaró iló te na obduminen angíl, so tuménge te otphenen te zaterdjon pal péste; pal-dová so Me dáva tuménge lavá i godý, so tumaré vérgi na zmarena tumen dro lav, i jone adiáke-pac' na déna ráda (na zmoginena) te bangiakiren tumen dro dová, so tumé otphenena. I až dadá i pšála javéna te zden tumen, i semency i drúgi (malá), i vari-konés tuméndyr zamarena; i kažno manúš javéla te na sykavél patýv zoralés tuménge pal Miro lav. Ne nijékh bal na xasjola tumaré šerestyr. Ne tumaré vyrikiribnasa tumé zrakhena dúho (fáno) vaš čačunó džiibén. Ne kiéli tumé dykhéna, so xaladé obdžana Jerusalimo rigéndyr, tedy džinén, so syg javéla golotýnia. Tedy odolé, kon isyn dre Judéia, mek te našén dre bérgi, i kon isyn dro fóro, mek te vydžán foróstyr; i kon isyn dro gav, mek te na zadžál dro fóro: pal-dová so davá javéla kára pe manušénde dre dolé dyvesá, sob (kaj) te spolninélpe, so isyn čhindló dro Svénto Čhinybén. Men'ka javéla tedy perale džuvlienge i džuvlienge, savé čaravena kolynesa bijatén dre dolé dyvesá; pal-dová so javéla bari bída pe phuv i javéla Devléskiri kára pe manušénde. I jone peréna kurtalátyr i vari-savén léndyr lydžána dro pliéno ke javír nácyi; i Náiudy javéna te štakiren Jerusalimo, paka jone javéna te rikirén zor. I korigedýr (pozže) daléstyr vari-savé znamiénii (ĥiertyká) javéna te kerenpe pe kham, pe čhon i pe čergeniá, a manušénde pe phuv javéla dukh pe iló, morjoskire (derjavéskire) rjovostyr i valnendyr, savé javéna daranes te ĥazdénpe; i manušéngire ile javéna te roskošenpe darátyr i užakiribnastyr, so javéla duredýr pir saró svéto, pal-dová so bolybnáskire zorja javéna trinskirde. I tedy manušá javéna te dykhén Manušéskire Čhavés, Savó javéla te džal telé dre óbloki zorjása i jarkone Devléskire slavása. A kiéli saró davá javéla te spolninélpe, tedy pridykhenpe i ĥazdén šeré, pal-dová so tumarí vólia javdiá pašyledýr.’” I phendiá Isúso lénge primiéro (sykaibén): “Dykhén pe inžyritko kašt i javír kaštá; kiéli jone rozmekena patria (listy), tedy tumé džinéna, so lynaj (milaj) javéla syg. Adiáke-pac' i tumé, kiéli tumé dykhéna, so davá saró adiáke kerlape, džinén, so Devléskiro Kralipén dro Bolybnáskiro Rajo javdiá pašyledýr. Čačes, Me rakiráva tuménge: na prodžála (nakhela) davá manušýtko ródo, paka saró davá kerélape ke kónco/iagóro (spolninelape). Bolybén i phuv prodžána, a lavá Miré na prodžána (nakhena). Ne rakhénpe kokoré pibnastyr i xabnastyr bi mierakiro, sob (kaj) tumaró iló te na javél pherdó tradypnasa pal barvalypén i džiibnytkone pharipnasa, i, sob (kaj) davá dyvés te na javél čorahanés pe tuménde; pal-dová so jov javéla sýrby felý (sietka) pe sarénde, kon isyn dro davá svéto. Vaš davá dykhén i na soven i mangénpe Devléske kažno časo, sob (kaj) tumé te javén mol te zrakhenpe saréstyr daléstyr, so trej te javél, i te terdjon angíl Manušéskire Čhavéste.” I Isúso sykliakirelas so dyvés dre Khangirí, i tel rat Jov džálas javrí, kaj sys Jov pe bérga, saví khardé “Olivítko Bérga”; i saré manušá kažno zlóko (ránko) javénas ke Jov dre Khangirí te šunén Les. Javélas syg Svénko Apriesnokengiro, savó khardé Patradí, i rašángire barydyrá i lylvarítka dumindle, syr te muliakirén Isusós čorahanés, pal-dová so jone darándyne manušéndyr. Tén'ci nálačho (satana) zagijá dro Judáskiro iló, savés khardé Iskarioto i jov sys jekh dešudujé sykliaibnytkonendyr. I jov gijá i rakirdiá rašángire barydyrénca i xaladytkone barydyrénca, syr te del Isusós dre vastá lénge. I jone obradyndlepe i dyné lav te den léske lové. Juda dyjá lav te kerél davá i lyjá te rodél lačhí vakancyja (slučajo), sob (kaj) te zdel Isusós na angíl manušénde. Javdiá Apriesnokengiro Dyvés, kiéli treindiá te čhinen Patraditkone bakrores (Patradí). I bičhadiá Isúso Petris i Ianos, phení: “Džán i kerén Patraditko Xabén vaš aménge, sob (kaj) ame te xas les.” Ne jone phučné: “Kaj kamésa, sob (kaj) ame te kerás?” Isúso ž phendiá lénge: “Ĥáda, kiéli tumé javéna te zadžán dro fóro, tedy tumen pirilela manúš, savó javéla te lydžál pirí paniésa; džán pal léste dro kher, dro savó jov zadžála, i tumé phenén kheritkoné xuláske: ‘Sykliakiribnáskiro rakírla túke: ‘Kaj javéla štúba, sob (kaj) Me Péskire sykliaibnytkonénca te xav Patradí?’ I jov sykavéla upratuny bari štúba; odój kerén skamínd vaš aménge.’” I giné sykliaibnýtka i lathné, syr lénge Isúso phendiá i kerdé Patraditko Xabén. I kiéli javdiá mardó (časo), Isúso besciá pal skamínd khetané dešudujé Apostolenca. I phendiá Jov lénge: “Me drieván kamdjom te xav davá Patraditko Xabén tuménca angíl dová, syr Mánge te vyrikirav mén'ki. I Me phenáva tuménge, so korigedýr (pozžedýr) daléstyr Me butýr na javáva te xav davá xabén, paka davá čačunó smyslo vaš Patradí kerélape ke kónco / jagóro (spolninelape) dro Devléskiro Kralipén dro Bolybnáskiro Rajo.” Tén'ci Isúso lyjá tahtái, phendiá parikiriben Devléske i phendiá: “Len davá i rosčhuven maškír péste. I Me phenáva tuménge: Me na javáva sarésa te pjáv aplodo vinagradoskire xrustostyr, paka javéla Devléskiro Kralipén dro Bolybnáskiro Rajo.” Tén'ci Isúso lyjá maró, parikirdia Devlés (Devléske), phagirdiá les, i dyjá lénge; rakirí: ‘Ĥáda, isyn Miré Masá, savé otdenape pal tuménde; davá adiáke i tumé kerén te ripirén pal Mánde.” Adiáke-pac' i tahtáj (čaša) korigedýr, syr jone xané maró, Isúso dyjá lénge, phení: “Kadavá tahtáj isyn nevó zavieto dro Miro rat, savó čhuvélape pal tuménde. I dykhén: adáj isyn vast kodoleskiro, kon isyn Mánca pal skamínd, i savó biknela Man; i Čhavó Manušéskiro džála pe meribén, syr Devléske isyn lačhó, ne bída kodolé manušéske, savó zdela Les.” I jone lyné te dophučen jekh jekhestyr, kon davá moginéla léndyr te javél, sob (kaj) te kerél davá. I sys phučiben maškír lénde, konéske léndyr trej te ginelpe syr naj baredýr. I Isúso phendiá lénge: “Najudengire kral'jénde isyn pravo pe lénde, i léngire baré raja, savé xulainena, rakiréna, so jone keréna lačhipén manušénge. Ne te na javén adiáke maškír tuménde: savó isyn baredýr tuméndyr, te javél ternedyr; i savó isyn šeraló, te javél dynári (sluga). Pal-dová so, kon isyn baredýr; kodová, savó isyn beštó pal skamínd, ci kodová, savó podela pe skamínd? Kodová, savó isyn beštó pal skamínd. A Me som maškír tuménde, syr kodová, savó podela pe skamínd. Ne tumé vyterdine Mánca khetané dre Miré pharipena. I Me piridava tuménge kralítko pravo, syr Miro Dad piridyja mánge, sob (kaj) tumé te xan i te p'jen pal skamínd dro Miro Kralipén, i te bešén pe trony te sendinén dešudúj Izrailjoskire ródy.” [I phendiá Raj Devél r.s.]: “Simonie, Simonie! Dykh ža, nálačho drieván zakamdiá te propatiakirel tumen sýrby te prosieinel tumen pir sito (porizen), syr prosieinena parnó giv, ne Me mangdjompe Devléske pal túte, sob (kaj) tyró patiaibén te na tyknjol, i tu, kiéli risjosa pale ke Me, tedy podrikiresa tyré pšalén.” I Pétri otphendiá Léske: “Rajo Dévla! Me som skedynó te džav Túsa i dre štaribén, i pe meribén.” I phendiá Isúso: “Me rakiráva túke, Pétri: bašno na probagala adadyvés angíl dová, syr tu trin móly otphenesape Mándyr.” Tén'ci Isúso phendiá lénge: “Kiéli Me bičhadjom tumen bi mujéngiro (kapšukoskiro), bi sakvakiro i bi ĥeritkonengiro, ci sys trej tuménge vari-so?” Jone otphendlé: “Nad.” Tedy Isúso i phendiá lénge: “Ne kakaná konéste isyn mujengiro (kapšuko), mek te lel les: adiáke-pac' i sakva, konéste nane kurtála, mek te biknel péskiro uribén i te kinel kurtála, paldavá Me phenáva tuménge, so dová, so isyn čhindló, trej te spolninélpe Mánca: “Jov sys čhudo maškír rozmaribnar'jende”: pal-dová so saró, so isyn pal Mánde, syg končynelape.” Sykliaibnýtka phendlé: “Rajo Dévla! Adáj isyn duj kurtaly (sabli).” Isúso otphendiá lénge: “Uhtýlla (dósi).” I gijá Isúso foróstyr i syr Jov prisyklyja, gijá pe Olivítko bérga, i Léskire sykliaibnýtka adiáke-pac' giné pal Léste. I kiéli Jov javdiá pe štéto, tedy phendiá lénge: “Mangénpe Devléske, sob (kaj) tumé te na perén dro propatiakiriben.” I Jov otgijá léndyr pe adákicy, pe kicý dočhurdesa bar, i terdijá pe čangá, i mangdiápe Devléske dasavé lavénca: “Dádo! Kóli te javél Tyrí vólia, lýdža davá tahtáj dre rig Mándyr; – ne te javél na Mirí, a Tyrí vólia.” I Jangólo bolybnástyr sykadyjá Léske i zorjakirdia Les. Isusóste sys pharó pe iló i Jov zoralés mangdiápe Devléske. Léskiri khamlyn (poto) sys, syr rateskire kapli (čolynia), so perenas pe phuv I kiéli Jov uštyjá mangipnastyr, tedy Jov javdiá pale ke sykliaibnýtka; i lathiá, so jone sys suté péskire tugatyr I phendiá Isúso lénge: “So tumé san suté? Uštén i mangénpe Devléske, sob (kaj) tumé te na perén dro propatiakiriben.” I kiéli Isúso iščo (inké) rakirdiá, ĥáda, sykadyne but manušá, i ake, jov, savés khardé Juda, jekh dešudujedyr sykliaibnytkonendyr, džálas angíl lénde, i jov podgíia ke Isúso te čamudel Les. Isúso phendiá Léske: “Júde! Tu biknesa Manušéskire Čhavés čamudypnasa?” I sykliaibnýtka, savé sys pašýl Léste, kiéli dykhné, ke so davá dogijá, phučné Léstyr: “Rajo Dévla! Te čhinas aménge kurtalenca?” I jekh léndyr čingirdia pisharís rašángire barydyreskires i otčingirdia léske čačó (pravo) kan. Ne Isúso phendiá: “Mekén, uhtýlla (dósi)!”, – i Jov čiladiá léskiro kan i vysastiakirdiá les. I phendiá tedy Isúso rašángire barydyrénge i khangirjákire-xaladytkone barydyrénge, godephurenge, savé javné pe Léste: “Syr pe rozmaribnariste tumé vyginé kurtalenca i kilenca (konkenca)? Kiéli Me sómas so dyvés tuménca dre Khangirí, tedy tumé naĥazdyne vastá pe Mánde; a kakaná – tumaró mardó (štúnda) javdiá i nalačhi zor léla te xulainél dro kalypén (ciamlypén).” I jone lyné Isusós, lydžiné les krig i jandlé dro pervoné-rašángire barydyreskiro kher. I Pétri ž džálas duripnastyr. I jone kerdé jag maškír gréda (dvóro) i bešné khetané; Pétri ž besciá maškír lénde. I jekh dynárica, kiéli dykhciá les pašýl jag, pridykhciape rakhunes pe léste i phendiá: “I kadavá manúš sys Lésa.” Ne Pétri otphendiape Léstyr, phení: “Džuvlije, me na džinóm Les.” I syg javír manúš, syr dykhciá Petris, phendiá: “I tu san jekh léndyr.” Ne Pétri otphendiá: “More, me na som.” I kiéli progijá (nakhcia) pašé mardó, iščo (inké) vari-kon lyjá zorjása te dophenel: “Čačó, kadavá manúš adiáke-pac' sys Lésa, pal-dová so jov isyn adiáke-pac' Galilejanino.” Ne Pétri otphendiá: “More, me na džinóm, so tu rakirésa.” I adáj že, paka jov rakirdiá, probagandia bašno. I Raj Devél riskirdiá šeró, podykhciá pe Petriste; i priripirdia Pétri Isusóskiro lav, syr Jov phendiá Léske: “Angíl, syr probagala bašno, tu trin móly otphenesape Mándyr.” I Pétri, vygii javrí, rondiá kirkes. I manušá, kon rikirdia Isusós, kerdé bipatyvakiro saben (zdiekindlepe) pe Léste i mardé Les; i jone phandenas Léskire jakhá, phučné Léstyr, phení: “Uĥaljov, proróko, kon pekadiá Tut?” I jone phendlé but košybnytka lavá pe Léste. I kiéli jaciá dyvés, godephuré manušéndyr, rašángire barydyrá i lylvarítka skedynépe, i lydžiné Isusós angíl péskiro Siniedriono i phendlé: “Kóli Tu san Xristóso, phen aménge.” Jov phendiá lénge: “Kóli Me phenáva tuménge, tumé na patiána; i kóli Me phučava tuméndyr, tumé na javéna te otphenen Mánge, i na otmekena Man; ne korigedýr daléstyr Čhavó Manušéskiro javéla te bešél pir čačó vast Devléstyr.” I jone saré phendlé: “Tu, xaj, san Čhavó Devléskiro?” I jov otphendiá lénge: “Tumé rakiréna mištés, so Me som?” I jone phendlé: “Save aménge iščo (inké) akaná trej jakhítka, pal-dová so ame kokoré šundiám davá Léskire móstyr?” [Saré adalé manušá uštyné i lydžiné Isusós ke Piláto]. I jone lyné te bangiakiren Isusós, rakirí: “Ame pridžindiam, so adavá manúš lydžála krig amarí nacyja čačuné droméstyr i priphenela te na pleskiren myto Kiesarjoske; Jov dophenéla, so Jov Kokoró isyn Xristóso Králi. I Piláto šylales phuciá Léstyr: “Tu san Králi Judéngiro?” I Jov otphendiá: “Adiáke, syr tu rakirésa.” Tedy Piláto phendiá rašángire barydyrénge i manušénge: “Me na lathjom ni saví bang dre kadalé manušéste.” Ne jone terdiné pe péskiro bangiakiriben, rakirí duredýr pe Isusóste: “Jov podmarela manušén pe búnto i sykliakiréla adiáke pir sarí Judéia, Galilejatyr až ke adarík.” Ne kiéli Piláto šundiá pal Galiliéia, phuciá šylales, ci sys adavá manúš Galilejatyr; i syr jov udžindiá, so Isúso sys phuvjátyr, kaj Irodo xulaindia, bičhadiá Les ke Irodo, savó sys dro Jerusalimo dre dolé dyvesá. I kiéli Irodo dykhciá Isusós, jov drieván obradyndiape, pal-dová so jov ĥará kamdiá te dykhél Les: jov šundiá but pal Léste, i jov užakirdia te dykhél Isusóstyr vari-savé dívy; i Irodo vyphučelape but Isusóstyr, ne Jov nisó na otphendiá. Rašángire barydyrá i lylvarítka uštenas i zoralés bangiakirenas Les. Irodo péskire xaladenca kerdé bipatyvakiriben Léske i sandlepe xoliames Léstyr, urjakirde pe Léste parnó kralítko uribén i bičhadiá pale Les ke Piláto. A dro dová dyvés Piláto i Irodo jačné drúgi (malá) maškír péste, ne ĥaredyr jone sys xoliamé jekh pe jekhéste. I Piláto khardiá khetané ke pe rašángire barydyrén, i šeralen, i adiáke manušén, i phendiá lénge: “Tumé jandlé adalé Manušés ke me sýrby Jov podmarelas manušén ke búnto; i, gada, me dophucjom Les angíl tuménde i me na lathjom ni saví bang dro dová, dro so tumé bangiakirena Les.” I Irodo phendiá: “Me ž bičhavavas Les ke jov, i, ĥaljon, nisó na lathné dre Léste, sob (kaj) Jov te javél bangó ke meribén. Paldavá me kamám, sob (kaj) Les te marén čhupniasa syr kára, i me otmekáva Les.” Jov sys bangó te otmekél jekhe manušés štaribnastyr pe svénko. Ne jone zadyne gódla khetané: “Meribén Léske! Otmek Varavas aménge!” – adavá sys jekh manúš, savés čhudé dro štaribén pal búnto, so sys dro fóro, i pal zamariben. A Piláto kamdiá te otmekél Isusós i nevéstyr rakirdiá lénca. Ne jone zadyne gódla dro otphenybén: “Primar Les pe trušúl, primar!” Jov phendiá lénge tríto mólo: “Savó ž čoripén Jov kerdiá? Me na lathjom ni saví bang dre Léste ke meribén: me čhuváva kára pe Léste i otmekáva Les.” Ne jone duredýr dénas gódla so isyn zor, sob (kaj) te primaren Isusós ke trušúl. I sataki jone pirizorjakirde péskire zanienca (glosienca). I Piláto prisendindia Isusós adiáke, syr jone mangné. Jov otmekciá lénge odolés, savó sys beštó pal búnto i zamariben, pal savéste jone mangné les, a Isusós dyjá dre vastá lénge pir vykedyiben. I syr xaladé lydžiné Les krig, zauhtylde vari-savé Simonos, Kirienejatyr, savó džálas feldatyr, i čhudé pe léste trušúl te lydžál pal Isusóste. But manušá džánas pal Léste, i džuvliá, savé rondlé i rakirdé jasvénca pal Léste. Isúso riskirdiá šeró i phendiá: “Džuvliale Jerusalimóstyr! Na rovén pal Mánde, a rovén pal péste i péskire čhavorende; ĥáda, javéna dyvesá, kiéli tumé phenéna: ‘Bahtalé isyn kodolé, savé na moginéna te bijanen, i džuvliá, savé na bijanenas, i džuvliá, savé na čarade kolynesa’. Tedy jone javéna te rakirén bergenge: ‘Peren pe aménde’, i bergicenge: Ĥaraven amen;’” Kóli jone dasavo keréna zelene kaštesa, so tedy javéla šuké kaštesa?” I duje javire manušén, rozmaribnar'jen, adiáke-pac' lydžiné Isusósa te primaren pe trušúl. I kiéli jone javné pe štéto, savó kharelpe “Čieriepnytko”, odój jone primarde Les pe trušúl i rozmaribnar'jen jekhés pir čačy rig, javirés pir zérvo rig. Isúso phendiá: “Dádo! Darin (primang) lénge, pal-dová so jone na džinéna, so keréna.” Jone ž rosčhuvenas pe pašá Léskire uribená, čhurdyi žriébijo. Manušá sys terdé i putravenas péskire jakhá. A léngire barydyrá khetané lénca sandlepe Léstyr, rakirí: “Javirén Jov zrakhelas; mek te zrakhél Kokoró Pes, kóli Jov isyn Xristóso, Saves Devél vykedyjá.” Adiáke-pac' i xaladé sandlepe bipatyvakires Léstyr: jone poddžanas i podlydžanas šutlo (uksuso), i rakirdé: “Kóli Tu san králi Judéngiro, zrákh Kokoró Pes.” I upré Léskire šerestyr sys začhinyben, savó sys pir griekítko i judýtko čibá (čibjá): “Ĥáda, isyn králi Judéngiro.” Jekh rozmaribnar'jendyr, savó sys primardo, sandiape xoliames Isusóstyr: “Ci na san Tu Xristóso? Zrákh Pes i amen.” Ne javír vyrakirdia Léske, phení: “Tu adiáke-pac' na daresa Devléstyr, kóli tu kokoró prisendindlo pe davá-pac'? Aménge ž sys čačunó séndo, so ame sam mol pal dová, so kerdiám; ne Jov ž ni savó čoripén na kerdiá.” I jov phendiá Isusóske: “Priripir pal mánde, Isúsie, kiéli Tu javésa syr Králi te xulaines?” Isúso phendiá Léske: “Čačes, Me rakiráva túke: adadyvés tu javésa Mánca dro Bolybnáskiro Rajo.” Davá sys pašé šov mardé (štundy), i jaciá kalypén pir sarí phuv ke jeniáto (bijekhéskiro déšto) mardó. Kham jaciá ciamlo i šýrma dre Khangirí roskusciape dro maškirál. I Isúso dyjá gódla zoralé zaniása i phendiá: “Dádo! Me otdáva Péskiro dúho (fáno) dro Tyré vastá!” I kiéli Jov phendiá davá, myjá. A xaladéngiro barydyró, dykhí davá, phendiá: “Dro kadavá Manúš, so myjá, sys čačipén”, – i jov slavindia Devlés. Kiéli saré manušá, savé javné pe davá dykhibén, dykhné davá, jone pale lyné te risjon pir kherá i marenas pes dro kolýn. A odolé saré, savé džindlé Isusós i džuvliá sys terdé nádur i, savé džánas pal Léste Galilejatyr i dykhné davá saró. I ĥáda, jekh lačhó i patiaibnýtko manúš pir lav Joza (Iosifo), savó sys adiáke-pac' jekh raj barydyrendyr dro séndo (sovieto), i kon na podrikirdia séndo i léngiro prirakiriben Isusóske. Jov sys Arimafejatyr, Judytkone foróstyr i užakirdia kokoró Devléskiro Kralipén dro Bolybnáskiro Rajo; jov gijá ke Piláto te mangél Isusóskiro trúpo. I kiéli Joza zlyjá les, zakrencyndia trúpo dro žužó pohtan i čhudiá les dre koplíca vyčingirdy dre skála, kaj iščo (inké) na sys paštó ni jekh manúš. Davá sys parastivín (piatnica), [dyvés vaš prigotovinyben-ju.o.], i ĥáda, sygo treindiá te javél sávato. I džuvliá, kon giné pal Isusóste Galilejatyr, giné Jozasa i podykhne koplíca i, syr čhudé Léskiro trúpo. I kiéli jone javné pale, tedy jone kedyne aromatytka čarjá i gudlé draba te khosen; i jone jačnépe štyl savatoné (subotoné), syr trej pir priphenybén dro Zakóno. Pe zlóko, dro pérvo kurkeskiro dyvés, jone javné ke koplíca i jandlé aromatytka čarjá te makhen (te khosen), savé jone kedyne. I jone dykhné, so bar sys riskirdo krig koplicatyr. I kiéli jone zaginé dre koplíca, jone na lathné Ráskire-Devléskiro trúpo. I jone sys terdé dre dar; i ĥáda, javné duj muršá dre gada, savé ziaindle. Kiéli jone darátyr poklonindlepe mujenca ke phuv, muršá phendlé lénge: “So tumé rodéna Džides, kaj mulé isyn pašté?” Les nane adái, Jov otdžidyjá: ripirén, so Jov rakirdiá tuménge, kiéli Jov sys iščo (inké) dre Galiliéia: so Jov phendiá: ‘Treindiá Čhavéske Manušeskireske, sob (kaj) Jov te javél zdyno dre grehitkoné-manušéngire vastá, te javél primardo pe trušúl, i te otdžidjol pe tríto dyvés.’” I jone priripirde Léskire lavá; i jone javné pale koplicatyr i rosphendlé saró davá dešujekhenge i sarénge javire manušénge. Odój sys Maríia Magdalina i Iana i Maríia, Jakovoskiri daj; ĥáda, jone i javír džuvliá, savé sys lénca, rosphendlé saró davá Apostolenge. Ne dalé-džuvliengire lavá zdynepe Apostolenge sýrby paramýsia (skazka), i jone na patiandyné lénge. Ne Pétri uštyjá i gijá ke koplíca; jov bandija telé i dykhciá jekh pohtan, savó sys paštó i gijá pale kheré zdivindlo pe dová, so kerdiápe. I, ĥáda, dro dová-pac' dyvés duj Isusóskire sykliaibnytkonendyr džánas dro gav, Jemauso, so sys pašýl dešujekh kilomietry (eftá versty) Jerusalimóstyr; i jone rakirdé maškír péste pal dová, so kerdiápe. I sys adiáke: kiéli jone rakirdé i obduminenas jekh jekhésa, ĥáda, Kokoró Isúso podgíia pašyledýr ke jone i gijá lénca; ne léngire jakhá sys sýrby zaphandle, sob (kaj) te ĥaljon Les. I Jov phendiá lénge: “Save tuménde rakiribena, so tumé lydžána pir drom? Sóske tumé san smentna?” I jekh léndyr pir lav Klieopa phuciá Léstyr: “Ci tu san jekh dasavo manúš, so javdiá dro Jerusalimo, i tu na džinésa, so kerdiápe dro fóro dre dalé dyvesá?” Jov phuciá: “So ž sys?” I jone phendlé Léske: “Dová, so sys Isusósa Nazarietostyr. Jov sys proróko, Savó kerdiá saró i rakirdiá baré zorjása angíl Devléste i manušénde; syr amaré rašángire barydyrá i baré raja zdyne Les pe meribnytko séndo i primarde Les pe trušúl. Ne ame drieván patiása, so Jov isyn Kodová, Savó zrakhéla Izrailie; a ke saró davá, ĥáda, kakaná tríto dyvés, syr davá saró kerdiápe. I vari-savé amaré džuvliá divindle amen, kiéli jone sys pe zlóko ke koplíca, i jone na lathné Léskiro trúpo, i, kiéli javné, rosphendlé, so jone dykhné, syr Jangóly sykadyne, savé phendlé, so Jov isyn džidó. A vari-savé améndyr giné ke koplíca, i na lathné adiáke, syr džuvliá phendlé, ne jone na dykhné Les.” I phendiá tedy Isúso lénge: “Ne, tumé san bigodiakire i pharé-iléskire manušá, sob (kaj) te upatian dro dová, so proróki phendlé! Ci na treindiá adiáke te vyrikirel Xristosóske dalé mén'ki, sob (kaj) te zadžál dro Péskiro viéčno Kralipén.” I Isúso lyjá te rosphenel lénge saré lylvaria Sventoné Čhinybnástyr Mojzastyr ke prorokéngire začhinybena, so sys phendló pal Léste. I jone podginé pašyledýr ke gav, karik jone giné; i Isúso sykadiá, so Jov, xaj, kedelape te džal duredýr; Ne jone zarikirde Les, phení: “Jačpe aménca, syg javéla bel'vél' i dyvés uže končyndiape.” Isúso zagijá i jaciápe lénca. I sys adiáke: kiéli Isúso sys pal skamínd lénca, Jov lyjá maró, bahtiakirdiá i, kiéli phagirdiá, dyjá lénge. I otkerdepe léngire jakhá, i jone ĥalyné Les. I Isúso sýrby xasijá léngire jakhéndyr. Jone phendlé jekh jekhéske: “Ci na xačija amaró iló, kiéli Jov rakirdiá aménca pir drom i, kiéli Jov piriphenelas Svénto Čhinybén aménge?” I jone uštyné dre dová-pac' mardó (časo) i risiné pale ke Jerusalimo. I jone lathné dešujekhe Apostolen, savé skedynépe khetané javire manušénca, savé rakirdé: “Raj Devél čačunés otdžidyjá meribnástyr i sykadyjá Simonoske.” I odolé duj manušá piriphendle, so sys pir drom, i syr jone ĥalyné Les, kiéli Jov phagirdiá maró. I kiéli jone iščo (inké) rakirdé saró davá, Isúso Kokoró jekhátyr (srázu) terdijá, maškír lénde i phendiá lénge: ““Ramánjo (miro), tuménge.” Ne jone zoralés strahádyne i divindlépe darása, pal-dová so jone dumindle, so davá sys duhóskire zdanki lénge. Ne Jov phendiá lénge: “Sóske tumé strahádyne? Sóske tumaré ile adiáke kuninenape?” Ake, Miré vastá i Miré gera, dykhén, ĥáda Me som. Čilaven Man i rozdykhen, pal-dová so dro dúho (fáno) nane ni loč, ni kokalý, savé Mánde isyn, syr tumé dykhéna.” Isúso phendiá davá i sykadiá lénge Léskire vastá i ĥerá. Kiéli jone iščo (inké) na patiandyné radymátyr i divindlépe, Jov phuciá léndyr: “Ci isyn adáj vari-so te xas?” I jone dyné Léske kotér pekno mačho, i avgín sotendyr. I lyjá Isúso i xaja angíl lénde. I phendiá Jov lénge: “Ĥáda, isyn dolé lavá, savé Me phendjom tuménge, paka Me iščo (inké) sómas tuménca: so saró, so isyn čhindló dro Mojzáskiro Zakóno i dre prorokéngire začhinybena i dre psalmy pal Mánde, trej te spolninélpe (te kerélpe ke kónco/iagóro).” Tedy Jov dyjá lénge godý te ĥaljol Svénto Čhinybén, i phendiá lénge: “Adiáke isyn čhindló i adiáke trej Xristosóske te vyrikirel mén'ki, i te otdžidjol meribnástyr pe tríto dyvés; i, sob (kaj) te phenelpe lav vaš Léskire-Manušéskiro risiben grehéndyr ke Devél, sob (kaj) Jov te otmekél gréhi maškír saré nácyi, lyi te kerél davá Jerusalimóstyr. I tumé san jakhítka (svidietieli) pal davá. I, ĥáda, Me bičhaváva tuménge dová, pal so Miro Dad dyjá lav; ne tumé jačénpe dro fóro, paka tumé léna zor upralestyr.” I Jov vylydžijá len foróstyr ke Vifanija, ĥazdyjá Péskire jakhá i bahtiakirdiá len. I sys adiáke: kiéli Jov iščo (inké) bahtiakirelas len, Jov lyjá te durjol léndyr i lyjá te ĥazdelpe ke bolybén. A jone poklonindlepe Léske i javné pale dro Jerusalimo baré radymása, i jone sys saró časo dre Khangirí, slavindle i šarde parikiribnasa Devlés. Amín'. Angledýr saréstyr sys Lav, i Lav Kokoró sys Devlésa, i Lav sys Devél. Jov (Lav) angledýr saréstyr sys Devlésa. Saró, so isyn, jaciá pir Léste, i bi Léskiro saró so isyn, na javélas. Dre Léste sys džiibén i davá džiibén sys Dud (Svéto) vaš manušénge. Dud svencynela dro kalypén (ciemnyma/ciamlypén), i kalypén na murdiakirdia les. Devél bičhadiá manušés, léskiro lav sys Iáno. Jov javdiá vaš dová, sob (kaj) te dophenel pal Xristosóste syr pal Dud (Svéto), sob (kaj) pir Léste saré te patián. Kokoró Iáno na sys Dud, a sys bičhadó Devléstyr, sob (kaj) te dophenel pal Xristosóste syr pal Dud. Davá sys čačunó Dud, Savó déla džinybén kažnoné manušéske, savó javéla pe svéto (lot). Jov sys dro svéto, savó pir Léste sys sozdynó, a svéto na priĥalyja Les. Jov javdiá ke Léskire, i Léskire na prilyné Les. Ne sarénge, kon prilyjá Les, savé patiandyné dre Léskiro lav, Jov dyjá pravo te javén Devléskire čhavénca. Davá sys kadalé čhavé, savé bijándyne na ratestyr i na pir ločakiro kamiben na pir manušeskiri vólia, a Devléstyr sys bijandle. I Lav jaciá manušésa dre loč (plot') i dživdiá aménca; i ame dykhciam Léskiro jarko šukaripén i zor, saví sys Léste syr Jekhebijanypnytkone Čhavéste, Savó isyn Dadéste, i Savó isyn pherdó bahtalypnasa i čačipnása. Iáno dophenéla pal Léste i rakiréla radymása: “Jov isyn Odová, pal Savéste me phendjom: ‘Savó džála pal Mánde, isyn baredýr Mándyr, pal-dová so jov sys angledýr Mándyr’” Léste saró sys pherdó i pir Léskiro pherdypen ame saré doresciam jekh bahtalypén pal jekh. Pal-dová so Devél dyjá Zakóno pir Mojzaste (Moisiejoste), a bahtalypén i čačipén javné pir Isusóste Xristosóste. Nikón nikieli na dykhciá Devlés: Jekh Jekhebijanypnytko Čhavó, Savó isyn usady/sak (vsiegda) khetané Dadésa, Jov sykadiá Les aménge. Ĥáda, isyn Ianoskiro dophenybén, kiéli Judy Jerusalimóstyr pribičhade rašán i Lievitén te phučén Léstyr: “Kon tu san?” Jov phendiá mamúj dro jakhá angíl sarénde: “Me na som Xristóso.” Jone phučné léstyr: “So ž? Tu so san Ilíia?” Iáno otphendiá: “Nad.” “Ci na Proróko?” I Jov phendiá: “Nad.” Tedy phendlé léske: “Kon tu dasavo san? Sob (kaj) ame te rosphenas manušénge, savé bičhadé amen, konesa tu kokoró pes ginesa?” Iáno phendiá lénge: “Me som zan, saví déla gódla pe čhučí phuv: ‘Čhuvén mamúj (priámo) drom Ráske-Devléske’ syr phendiá proróko Isajo.’” Manušá, savé sys bičhadé phučibnasa ke Iáno, sys Farisiejendyr. Jone phučné léstyr: “So (kóli) tu na san Xristóso, na san Ilíia, na san Proróko, tedy sóske tu bolesa manušén?” Iáno otphendiá lénge lavénca: “Me bolava paniésa; ne maškirál tuménde isyn terdó Vari-Kon, Saves tumé na džinéna. Davá isyn Jov, Savó džála pal mánde, Savó jaciá angíl mánde, Savéske me na som mol te rosphandav simiri pe Léskire ĥeritka (obuv).” Davá saró sys dre Vifanija pe dová Iordanoskiro brégo, odój, kaj Iáno boldia. Pe javír dyvés Iáno dykhéla Isusós, Savó džála ke jov i rakiréla: “Ĥáda, isyn Devléskiro Svénto Bakroró, Savó léla pe Péste svetoskiro grého. Ĥáda, isyn Jov, pal Konéste me rakirdjom: “Pal mánde džála Murš, Savó jaciá angíl mánde, pal-dová, so Jov sys ĥaredyr Mándyr.” Me Les na džindjom, a me javdjom vaš dová te bolav dre paní, sob (kaj) Izrailjo te udžinel pal Léste.” Iáno dophenelas, rakirí: “Me dykhcjom Dúho (Fáno), savó zdžalas bolybnástyr syr golumbo, i Jov jaciápe pe Léste. Me na džindjom Les: ne Odová, Kon bičhadiá man te bolav dro paní, phendiá mánge: “Pe Konéste dykhésa Dúho (Fáno), Savó javéla te džal telé bolybnástyr i jačélape pe Léste, Jov isyn Kodová, Kon javéla te bolel Sventoné Duhósa.” Me dykhcjom davá i dophenava, so Jov isyn Devléskiro Čhavó” Pe javír dyvés Iáno nevéstyr (nevés) sys terdó duje Péskire sykliaibnytkonénca. Dykhí Isusós, Savó džálas pašýl, jov phendiá: “Ĥáda, isyn Svénto Bakroró Devléskiro.” Duj Ianoskire sykliaibnýtka šundlé dalé lavá i giné pal Isusóste. Jov obrisija i dykhciá, so jone džána pal Léste, i rakiréla lénge: “So tumé kaména?” Jone phendlé Léske: “Ravvi! (so značynéla Sykliakiribnáskiro), kaj Tu dživesa?” Jov rakírla lénge: “Džán i dykhén.” Jone giné Lésa i dykhné, kaj Jov dživéla, i jone sys ke Jov dová dyvés. Sys pašé deš mardé (štundy). Jekh léndyr, savó šundiá Ianóstyr pal Isusóste i savó gijá pal Léste sys o Jendri, Simonoskire-Petriskiro pšal. Angledýr jov lathiá Simonos, péskire pšalés i phendiá léske: “Ame lathiam Miesijas” /so značynéla Xristosós/. Jov jandiá les ke Isúso. Isúso, podykhi pe léste, phendiá: “Tu san Símono, Ianoskiro Čhavó; tut javéna te kharén “Kifa” – davá značynéla: bar (Pétri). Pe javír dyvés Isúso kedyjape te džal ke Galiliéia. Odój Jov strenindia (pirilyja) Filipos i rakiréla léske “Džá pal Mánde.” Filipo sys Vifsaidatyr, jekhe foróstyr Jendrisa i Petrisa. Filipo lathiá Nafanailos i phendiá léske: “Ame lathiam Odolés, pal Konéste Mójza čhindiá dro Zakóno i proróki – Isusós, Jozáskire čhavés Nazarietostyr.” Nafanailo phendiá léske: “Nazarietostyr? Ci saštý (moginéla) te javél vari-so lačhó Nazarietostyr? Jav i dykh kokoró”, – rakiréla léske Filipo. Isúso dykhciá, so Nafanailo džála ke Jov, i phendiá pal léste: “Ĥáda, isyn čačunó Izrail'tianino, savó isyn bi xohaibnaskiro.” Nafanailo rakiréla Léske: “Tu katýr džinésa man?” “Angíl davá, syr Filipo khardiá tut, Me dykhcjom tut tel inžyritko kašt (drévo)”, – otphendiá léske Isúso. Tedy Nafanailo otphendiá Léske: “Ravvi! Tu san Devléskiro Čhavó, Tu san Králi Izrailjoskiro!” Isúso phendiá léske: “Pal-dová so Me túke phendjom: ‘Me dykhcjom tut tel inžyritko kašt’, tu patiása? Tu javésa te dykhés butýr daléstyr.” I Jov phendiá léske: “Čačes, čačes, Me rakiráva tuménge: tumé dykhéna otčhakirdo (psirado) bolybén i Devléskire Jangolen, savé javéna te ĥazdénpe ke Manušéskiro Čhavó i te džán telé ke Jov!” Pe tríto dyvés sys bjav dre Kaná, saví sys dre Galiliéia, i Isusoskiri Daj sys odój. Isúso adiáke-pac' sys khardo Péskire sykliaibnytkonénca pe bjav. I syr na jaciá butýr mol (vino), to Isusoskiri Daj rakiréla Léske: “Lénde nane butýr mol” I rakiréla láke Isúso: “Vaš so Tu rakirésa davá Mánge, Drógo Džuvlije? Miro mardó (štúnda) te keráv Devléskire-Dadéskiri vólia iščo (inké) na javdiá. Léskiri Daj phendiá dynar'jénge: “So Jov phenéla tuménge, kerén dová.” Sys odój šov vučé baruné khoré (žbany), savé sys terdé vaš panitko obmoriben pir Judengiri maniera, dre savé zadžanas ke šel te biš litry paní. Isúso rakiréla lénge: “Čhuvén paní dre vučé khoré.” Dynárja čhudé paní dre khoré ke bregi. “Kakaná pheren i lydžán ke bjavitko phuredýr”, – rakiréla Isúso. I lydžiné. Kiéli bjavitko phuredýr pokoštyndia paní, savó jaciá syr mol, /ne jov na džindiá, katýr daja mol lyjape, jekh dynárja (služytieli) džindlé, savé ž čhudé dre vučé pirja paní/, Jov kharéla Ternes ke pe, i rakiréla léske: “Saré manušá déna anglydyr lačhí mol, a syr matjona, korigedýr (pozžedýr) čhuvéna fujedýr; tu ž lačhí mol rakhcian ke davá časo.” Adiáke Isúso sykadiá pérvo dívo pe bjav dre Kaná. Jov sykadiá Péskiri zor i sláva dalésa, i Léskire sykliaibnýtka (učeniki) patiandyné dre Léste. Paló davá javdiá Jov dro Kapiernaumo, i Lésa sys Daj, pšála i Léskire sykliaibnýtka i jone javné odój nábut dyvesá. Kiéli javélas pir časo Judýtko Patradí, Isúso javdiá dro Jerusalimo. Jov lathiá dre Khangirí manušén, savé biknenas guruvén, bakrén i golumben; javír sys bešté i paruvenas lové; i kerdiá Isúso čhupny šolendyr, tradyjá len javrí sarén Khangirjátyr khetané bakrenca i guruvenca i obriskirdia lovengire-paruibnar'jengire skaminda i rosčhudiá léngire lové. I phendiá Isúso manušénge, savé biknenas golumben: “Zakeden len adathýr! Na kerén targo Miré-Dadéskire Kheréstyr.” Léskire sykliaibnýtka priripirde, so sys čhindló dre Svénto Čhinybén: “Zevlynyben (Rievnost') ke Tyró Kher javéla te xačkirel Man syr jag.” Judy lyné te trebinen Léstyr otphenybén: “Sósa Tu dophenesa aménge, so túte isyn pravo te kerés adiáke?” Isúso phendiá lénge dre otphenybén: “Rosphagiren daja Khangirí, i Me pal trin dyvesá ĥazdáva la nevéstyr.” Tedy Judy rakiréna Léske: “Štardešá šov berš kerdé daja Khangirí i Tu pal trin dyvesá ĥazdesa la nevéstyr?” Isúso ž rakirdiá na pal baruny Khangirí, a Léste pe godý sys Léskire masá, Save isyn Khangirí. Kiéli Jov otdžidyjá muléndyr, Léskire sykliaibnýtka priripirde davá, i patiandyné Sventoné Čhinybnaske i lavéske, savó Isúso phendiá. Dro dová časo, kiéli Isúso sys pe Patraditko svénko dro Jerusalimo, but manušá, savé dykhné dívy, savé Jov kerdiá, patiandyné dre Léskiro lav. Isúso Kokoró nikonéske léndyr na dopatialas Pes, pal-dová so Jov džindiá len sarén. Léske na treindiá te phučel pal manušéste, Jov Kokoró džindiá saró, so sys andrál manušéste. Sys manúš Farisiejendyr, jekh Judéngire-theméskire barydyrendyr, les khardé Nikadimo, savó javdiá ratý ke Isúso i phendiá Léske: “Ravvi! Ame džinása, so Tu san bičhadó Devléstyr syr Sykliakiribnáskiro, pal-dová so dasavé dívy, savé Tu kerésa, nikón na moginéla te kerél, kóli te na javél lésa Devél.” Isúso dro otphenybén phendiá léske: “Čačes, čačes Me rakiráva túke: kon na bijandjola nevéstyr, na dykhéla Kralipén dro Devléskiro Rajo.” Nikadimo phučela Léstyr: “Syr davá baró (stalo) manúš moginéla te bijandjol nevéstyr? Ci moginéla Jov nevéstyr te zadžál pale dre léskire-dakiri ločoví (utroba) i te bijandjol javír mólo?” Isúso otphendiá: “Čačes, čačes, Me rakiráva túke: kóli kon na bijandjola paniéstyr i Duhóstyr (Fanostyr), jov naštý te zadžál dro Kralipén dro Devléskiro Rajo. Kodová, so isyn bijandlo manušytkoné ločatyr, isyn manušýtka masá dre loč; kodová, so isyn bijandlo Duhóstyr, isyn dúho (fáno). Na divinenpe pe davá, so Me phendjom, so tuménge trej te bijandjon nevéstyr. Dúho (Fáno) phurdela, karik trej léske. Tu šunesa lákiri zan, i na džinésa, katýr joj lélape i karik joj kerlape. Adiáke isyn kažnoné manušésa, kon isyn bijandlo Duhóstyr.” Nikadimo phendiá i phuciá Léstyr: “Ci saštý (možna) dasavo te javél?” Isúso otphendiá léske: “Tu san Izrailjoskiro Sykliakiribnáskiro i tu na džinésa davá? Čačes, Me čačes rakiráva túke: ame rakirasa pal dová, so ame džinása, i dophenasa pal dová, so ame dykhciam; a tumé manušá, so na priĥaljona amaró dophenybén. Kóli Me phendjom tuménge pal džiibén pe phuv, i tumé na patiána, syr tumé javéna te patián, kóli Me javáva te rakiráv tuménge pal džiibén dro Bolybnáskiro Rajo? Nikón na sys pe bolybén apríč Odoléste, kon gijá telé bolybnástyr, davá isyn Čhavó Manušéskiro, Savó dživéla dro Bolybnáskiro Rajo. Syr Mójza (Moisiejo) ĥazdyjá sapes pe čhučí phuv, adiáke Čhavéske Manušeskireske treindiá te javél ĥazdynó, sob (kaj) kažno, kon patiála dre Léste, te na xasjol, a te javél léste viéčno džiibén. Devléske adiáke jaciá drógo svéto, so Jov otdyjá Péskire Jekhebijanypnytkone Čhavés, sob (kaj) kažno, kon javéla te patial dre Léste, te na xasjol, a te javél léste viéčno džiibén. Devél na bičhadiá Péskire Čhavés dro svéto, sob (kaj) te sendiakirél svéto, a sob (kaj) pir Léste svéto te javél zrakhno. Odová, kon patiála dre Léste, sendiakirdo na javéla, a kon na patiála, isyn sendiakirdo, pal-dová so jov na patiandyja dre Jekhebijanypnytkone Devléskire-Čhavéskiro lav. Séndo isyn dre dová, so dud javdiá dro svéto, a manušénge butýr pir iló jaciá kalypén (cjomnyma), syr dud, pal-dová so léngire réndy (diély) sys nalačhé. Kažno, kon keréla fuipén, léske isyn na pir iló dud (svéto), i jov na džála ke dud, pal-dová, sob (kaj) te jačen džindlé nalačhé réndy léskire. Ne odová, kon dživéla pir čačipén, džála ke dud, sob (kaj) te javén biciale léskire réndy, savé jov keréla pir Devléskiro lav.” Paló davá javdiá Isúso Péskire sykliaibnytkonénca pe Judejakiri phuv i odój jaciápe lénca i boldia manušén. Iáno dre dová-sámo časo boldia dro Jenono, so isyn pašýl Salimo, kaj sys but paní, i manušá javénas i jov boldia len. Davá sys angíl, syr Ianos čhudé dro štaribén. Jekhvar Ianoskire syklytkonende vygijá čingárd Judenca pal obmoriben pir Judýtko maniera. Sykliaibnýtka javné ke Iáno i phendlé léske: “Ravvi! Odová manúš, Savó sys túsa pe Iordáno i pal Savéste tu dophenesas, ĥáda, Jov bolela, i saré džána ke jov.” Iáno otphendiá i phendiá lénge: “Manúš naštý nisó te kerél kokoró péstyr, kóli na javéla dynó léske bolybnástyr. Tumé kokoré san jakhítka Mánge dro dová, so me phendjom: ‘Me na som Xristóso, me sómas bičhadó angíl Léste’. Terný isyn vaš Terneske, a Terneskiro drúgo (mal), savó isyn terdó pašýl, šunéla les i radynélape, kiéli šunéla, so jov rakiréla. Kadaja mirí baht javdiá sarésa ke me. Léske trej te barjol, a mánge te tyknjovav. Kodová, Kon javdiá vučipnástyr, isyn vučedýr saréndyr; a kon bijándyja pe phuv isyn phuvitko, i rakiréla syr manúš, savó dživéla pe phuv. Kodová, Kon javdiá Bolybnáskire Rajostyr, isyn vučedýr saréndyr. Jov dophenéla dová, so Jov kokoró dykhciá i šundiá, a nikón na priĥaljola Léskiro dophenybén. Ne kon priĥaljola Léskiro dophenybén, odová dophenéla, so Devél isyn čačunó. Pal-dová so Kodová, Konés bičhadiá Devél, rakiréla lavá Devléskire, pal-dová so Devél déla Péskiro Dúho (Fáno) Léske bi mierakiro. Dadéske isyn drógo léskiro Čhavó i Jov saró otdyjá dre Léskire vastá. Odová, kon patiála dre Devléskire Čhavéste, léste javéla viéčno džiibén; a kon na patiála dre Devléskire Čhavéste, odová na dykhéla džiibén, a Devléskiri xolý javéla pe léste saró viéko.” Isúso udžindiá, so Farisiéi šundlé, so Léste isyn butýr sykliaibnýtka, i so Jov bolela butedýr manušén, syr Iáno. Kokoró Isúso na boldia, Léskire sykliaibnýtka kerdé davá. Syr Jov udžindiá davá saró, tedy mekciá Judejakiri phuv i risijá pale dre Galiliéia. I trebindia Léske te džal pir Samárija. Ĥáda, Jov javdiá dre Samarijakiro fóro, savó khardé Sihar', pašýl félda, saví dyjá Jakovo péskire čhavéske Jozáske. Odój sys Jakovoskiri ĥanýng (kolodco). Isúso khinyja droméstyr i besciá te otkinjol pašýl ĥanýng; ĥáda, sys pašé šov mardé (štundy). Javdiá te pherel paní džuvlý Samarijatyr. ‘De Mánge te pjáv paní”, – rakiréla Isúso láke. Paldavá so Léskire sykliaibnýtka giné dro fóro te kinen xabén. Samarianka rakiréla Léske: “Syr? Tu san Judo, mangesa mándyr, Samariankatyr te p'jes? Réndo (diélo) dre dová, so Judy na piné jekhe kučikatyr Samarianenca. Isúso phendiá dro otphenybén láke: “Kóli tu džinesas, so Devél déla i Kon odová isyn, Savó rakiréla túke: “De Mánge te pjáv,’ tedy tu kokori mangesas Léstyr, i Jov délas túke džidó paní.” Džuvlý rakiréla Léske: “Mro Rajo! Túte nane sósa te pheres paní i ĥanýng isyn xor: Katýr Túke te les džidó paní?” Tu, xaj, na san baredýr amaré dadéstyr Jakovostyr, savó dyjá daja ĥanýng aménge, pija jov kokoró, i čhavé léskire, i kherítka murdalá léskire (skoto)?” Isúso otphendiá láke: “Odová, kon p'jela davá paní, javéla te kamel nevéstyr te p'jel. Ne kon javéla te p'jel paní, savó Me dáva léske, odová na javéla te kamel te p'jel saró viéko; a paní, savó Me dáva léske, jačéla andrál manušéste ĥanyngasa vaš dasavo paní, savó lydžála dro viéčno džiibén.” Džuvlý rakiréla Léske: “Rajo! De mánge dasavo paní, sob (kaj) mánge te na javav te kamám butýr te pjáv i te na psirav adarík te pherav paní.” Isúso rakiréla láke: “Džá, khar péskire romes i jav adarík.” Džuvlý otphendiá i phendiá Léske: “Mánde nane rom.” Isúso rakiréla láke: “Čačipén tu phendián, so túte nane rom; túte sys pandž romá, a odová manúš, savésa tu kakaná dživesa, jov isyn na rom túke; davá čačipén tu phendián.” Džuvlý rakiréla Léske “Rajo! Me dykháva, so Tu san proróko. Amaré dadá mangnepe Devléske pe daja bérga, ne tumé rakiréna, so štéto, kaj trej te mangespe Devléske, isyn dro Jerusalimo.” Isúso rakiréla láke: “Patia Mánge, džuvlý, so javéla časo (cýro), kiéli na pe daja bérga i na dro Jerusalimo javéna te mangénpe Dadéske. Tumé na džinéna, konéske tumé mangénape: ne ame džinása, konéske mangasape, pal-dová so zrakhibén javéla Judendyr. Ne javéla, i akaná javdiá časo, kiéli čačuné devlýtka javéna te den patýv pir dúho (fáno) i čačipén, pal-dová so adasaven devlytkonen rodéla Péske Devél Dad. Devél isyn dúho (fáno), i kon mangelape Léske, trej te mangélpe, syr podphenela Léskiro Dúho (Fáno) dro čačipén.” Džuvlý rakiréla Léske: “Me džinóm (džináv), so javéla Miesija, ĥáda, isyn Xristóso; kiéli Jov javéla, tedy Jov saró rosphenéla aménge.” Isúso rakiréla láke: “Ĥáda, Me som Kodová, Kon rakiréla túsa.” Dro davá časo (cýro) javné Léskire sykliaibnýtka i divindlépe, so Jov rakirdiá džuvliása; ne usajékh nikón na phuciá Léstyr: “So Tu phučesa?” Ci: “Pal so Tu rakirésa lása?” Tedy džuvlý jačkirdiá péskiro khoró vaš paní, i gijá dro fóro, i phendiá manušénge: “Džán, dykhén Manušés, Savó phendiá mánge saró, so me kerdjom, ci na Jov isyn Xristóso?” I jone giné foróstyr i giné ke Isúso. Dro dová časo sykliaibnýtka mangné Les, rakirí: “Ravvi, xa vari-so!” Ne Jov phendiá lénge: “Mánde isyn xabén, pal savó tumé na džinéna.” Sykliaibnýtka lyné te rakirén maškír péste: “Ci moginéla te javél, so vari-kon jandiá Léske te xal?” Isúso rakiréla lénge: “Miro xabén isyn te keráv vólia Odoleskiri, Kon bičhadiá Man, i te keráv Léskiro réndo. Ci na tumé rakiréna, so pir štar čhoná javéla giveskiro čhinybén? Ne, ĥáda, Me rakiráva tuménge: ĥazdén péskire jakhá i dykhén pe féldy, syr Jone jačné parné ke sčhinyben. Kon čhinela, léla pleskiriben i skedéla barjakirdó (plódo) dro viéčno džiibén i odová, kon sieinela i čhinela, javéna khetané te radynénpe. Pal-dová so dro davá isyn čačunó phenybén: ‘Jekh sieinela, javír sčhinela’. Me bičhadjom tumen te čhinen dová, so tumé na sieindle: javír odój sieindle, a tumé léna pleskiriben léngire butiátyr.” But ž manušá Samarijatyr patiandyné dre Isusóste pir džuvliákiro lav, saví rosphenelas, so Jov phendiá láke saró, so joj kerdiá. I kiéli Samariani javné ke Jov, jone lyné te mangén Les te jačélpe lénde, i Jov jaciápe odój pe duj dyvesá. Kiéli Jov rakirdiá lénca, but manušá patiandyné dre Léste pir Léskiro lav. Jone phendlé odolé džuvliáke: “Kakaná ame patiása na jekhe tyré lavenge, so tu aménge rosphendian. Ame šundiám kokoré Les i džinása, so Jov isyn čačunó svetoskiro Zrakhibnari.” Pir duj dyvesá Isúso gijá Péske odothýr dre Galiliéia, paldavá, so Jov kokoró dophenelas, so prorokós na kutiakirena pe léskiri phuv. Ne kiéli Jov javdiá dre Galiliéia, Galilejakire manušá prilyné Les ilésa. Jone kokoré sys pe Svénko Patradí dro Jerusalimo i dykhné saró, so Jov odój kerdiá pe svénko. Adiáke Isúso nevéstyr javdiá dre Galilejakiri Kaná, kaj Jov paniéstyr kerdiá mol (vino). Odój sys vari-savó kralískiro manúš, savéste dre Kapiernaumo sys nasvaló čhavó. Kiéli adavá manúš šundiá, so Isúso risijá Judejátyr dre Galiliéia, to jov javdiá ke Jov i jaciá te mangél Les, sob (kaj) Jov te sastiakirel Léskire čhavés, savó sys nasvaló ke meribén. Isúso phendiá léske: “Tumé manušá na moginéna te patián, paka tumé dykhéna znamiénii (ĥiertyká) i dívy.” Kralískire-kheréskiro barydyró rakiréla Léske: “Rajo Dévla! Jav, paka miro čhavoró na myjá. Isúso rakiréla léske: “Džá kheré, tyró čhavó javéla te dživél”, i adavá manúš patiandyja Isusóskire lavenge i gijá. Jov sys iščo (inké) dro drom, Léskire pishárja pirilyne les i phendlé: “Tyró čhavó isyn džidó.” Jov phuciá léndyr, dro savó mardó (časo) léske jaciá lokhedýr. Jone phendlé: “Atasiá dro eftáto (bitrinéngiro déšto) mardó xačkiribén pyjá. I dad udžindiá, so davá sys dre dová-pac' časo, kiéli Isúso phendiá léske: “Tyró čhavó javéla te dživél”, i jov kokoró, i saré Léskire kheréstyr upatiándyne. Davá sys javír dívo, savó kerdiá Isúso, kiéli Jov javdiá Judejátyr dre Galiliéia. Paló saró davá sys Judýtko svénko, i Isúso gijá dro Jerusalimo. Dro Jerusalimo, nádur Bakritkone portatyr, sys venderi (prudo), savó pir Judýtko čib kharélape “Vifiezda”, paš saví sys trémo (koridoro) pandžine progiibnenca. Odój sys pašté but nasvale: kororé, langale, šuké, /jone užakirenas panieskiro kunipen/. Pal-dová so Devléskiro Jangólo pir dová-pac' časo džálas telé i kuniakirelas paní, i kon angledýr zadžalas dre venderín (prudo), odová vysastjola, savjása dukhasa jov te na javél. Odój sys jekh manúš, savó sys nasvaló trijandaohto berš. Isúso dykhciá les, so jov sys paštó i džiný, so jov isyn nasvaló adiáke ĥará (dlúges), phuciá léstyr: “Ci kamésa tu te vysastjos?” Nasvalo manúš otphenélas Léske: “Rajo! Mánde nane manúš, savó čhuvelas man dre venderín, syr paní kuniakirelape; a kiéli me javáva pašyledýr, tedy vari-kon javír zmekelape angledýr mándyr.” Isúso rakiréla léske: “Uštý, le péskiro čhuibén i psir.” Kadavá manúš dre davá-pac' momiento vysastija, lyjá péskiro čhuibén i gijá. Adavá dyvés sys sávato (subóta). Paldavá Judy rakirdé vysastiakirdeske: “Adadyvés isyn sávato; túke naštý te les čhuibén.” Jov otphenélas lénge: “Odová, Kon man vysastiakirdiá, phendiá mánge: ‘Le péskiro čhuibén i psir’” Jone phučné Léstyr paldavá: “Kon isyn Odová Manúš, Savó phendiá túke: ‘Le péskiro čhuibén i psir?’” Ne manúš, savó vysastija, na džindiá kokoró, kon Jov adasavó sys, pal-dová so Isúso syg garadyja dro manušéngiro skedyibén, savó sys pe dová štéto. Korigedýr (pozže) Isúso strenindia les dre Khangirí i phendiá léske: “Ĥáda, tu kakaná san sastó: na griešyn butýr, sob (kaj) te na kerélpe túsa vari-so fujedýr.” Kadavá manúš gijá ke Judy i rosphendiá lénge, so manúš, Savó vysastiakirdiá les, isyn Isúso. I paldavá Judy jačné te tradén Isusós pal dová, kamí te zamarén Les, so Jov kerdiá dasavé réndy (diély) dro sávato. Ne Isúso otphendiá lénge: “Miro Dad ke kakaná keréla lačhé réndy i Me adiáke-pac' keráva.” Tedy Judy iščo (inké) butedýr lyné te rodén Les, sob (kaj) te zamarén Les, pal-dová, so Jov féni na svenkindia sávato, ne i khardiá Devlés Péskire Dadésa, sýrby Jov gindia Pes adiáke-pac' Devlésa. Ne Isúso phendiá lénge: “Čačes, čačes, Me rakiráva tuménge: Čhavó nisó naštý te kerél Kokoró Péstyr, kóli Jov te na dykhél, so keréla Dad, pal-dová so dová, so Dad keréla, dová-pac' keréla i Čhavó. Pal-dová so Dadéske isyn drógo Léskiro Čhavó i Jov sykavéla Léske saró, so keréla Kokoró; Jov sykavéla Léske naj butýr réndy dalendyr, so tumé javéna te divinenpe. Pal-dová so, syr Bolybnáskiro Dad ĥazdéla mulen i otdžidiakirela len, adiáke-pac' i Čhavó otdžidiakirela odolén, konés isyn Léske pir iló. Dad nikonés na sendinela, ne Jov dopatiandyja saró séndo Čhavéske; sob (kaj) saré te kutiakiren Čhavés, syr kutiakirena Dadés. Kon na kutiakirela Čhavés, odová na kutiakirela i Dadés, Savó bičhadiá Les. Čačes, čačes Me rakiráva tuménge: odová, kon šunéla Miro Lav i patiála Kodoléske, Kon bičhadiá Man, léste isyn viéčno džiibén i jov pe séndo na javéla, jov kakaná pirigija meribnástyr dro džiibén. Čačes, čačes Me rakiráva tuménge: javéla časo i jov akaná javdiá, kóli mulé javéna te šunén Devléskire-Čhaveskiri zan (glos), i, kon šunéla, otdžidjola. Pal-dová so, syr Dad rikiréla džiibén Kokoró dre Péste, pal-dová so Jov sys Kokoró džiibnáskiri ĥanýng, adiáke-pac' i Čhavéske Jov dyjá zor te rikirél džiibén dre Kokoreste Péste; i Jov dyjá Čhavéske pravo te sendinel, pal-dová so Jov isyn Manušéskiro Čhavó. Na divinenpe pe davá, pal-dová so javéla dasavo časo, dre savó saré mulé, javéna te šunén Devléskire-Čhaveskiri zan; i džána javrí maĥilendyr (kuléndyr): odolé, savé kerdé lačhipén, otdžidjona-vaš džiibnytko Kralipén; a odolé, savé kerdé nalačhipen, otdžidjona vaš dová, sob (kaj) te javén sendindle. Me naštý (na mogináva) nisó te keráv Kokoró Péstyr, Me sendinava adiáke, syr Mánge isyn phendló te sendinav, i Miro séndo isyn čačunó, pal-dová so Me na keráva pir Péskiri vólia, a pir Miré-Dadéskiri vólia, Savó Man bičhadiá. Kóli Me dophenava Kokoró pal Péste, to dophenybén Miro isyn na čačunó. Isyn Mánde javír jakhítko (svidietieljo), savó dophenéla pal Mánde, i Me džinóm, so saró, so Jov rakiréla pal Mánde, isyn čačipén. Tumé bičhavenas manušén ke Iáno i léskiro dophenybén isyn čačunó. Mánge na trej manušéngiro dophenybén, a Me rakiráva vaš dová, sob (kaj) tumé te zrakhenpe. Iáno sys momolýtko (svietíl'niko), savó xačolas i délas jag i tumé vari-savó časo radyndlepe paš léskiri jag. A Mánde isyn dophenybén baredýr Ianoskirestyr; odolé réndy, savé Dad dyjá Mánge te keráv, i savé Me keráva, davá isyn dophenybén, so bičhadiá Man Miro Dad. Pal Mánde dophenéla Kokoró Miro Dad, Savó bičhadiá Man, tumé nijékhvar na šundlé Léskiri zan, i na dykhné Les I tumé na rakhena Léskiro lav dre péskire ile, paldová so tumé na patiána Odoléske, Saves Jov bičhadiá. Tumé sykliakiréna mištés Svénto Čhinybén, pal-dová so tumé dena gody peske duminéna, so pir léste tuménde javéla viéčno džiibén; a Svénto Čhinybén dophenéla pal Mánde, ne tumé usajékh na kaména te javén ke Me, sob (kaj) te javél tuménde viéčno džiibén. Mánge na trej, sob (kaj) manušá te šarén Man. Me džinóm (džináv) mištés tumen, tumé na rikirén syr Drógima Devlés dro tumaró iló. Me javdjom ke tumé vaš Miré-Dadéskiro lav, i tumé Man na priĥaljona, ne kiéli vari-kon javír javéla ke tumé kokoró péstyr, tumé priĥaljonas les. Syr tumé moginéna te upatian, kiéli tumé priléna manušýtko šaribén jekh jekhestyr, a na rodéna šaribén jekhe Devléstyr? Ná den godý péske (ná duminen), so Me javáva te bangiakirav tumen angíl Dadéste: Mójza javéla te bangiakirel tumen, pe savéste tumé rozginena. Kóli tumé patianas Mojzáske, tumé i Mánge patianas, pal-dová so jov čhindiá pal Mánde. Ne syr tumé na patiána doléske, so čhindiá Mójza, syr javéna te patián doléske, so Me rakiráva tuménge?” Paló davá Isúso gijá pe javír Galilejakire ci Tivieriadaskire-morjoskiri rig. I but manušá giné pal Léste, pal-dová so jone dykhné dívy, savé Jov kerdiá, kiéli sastiakirdia nasvalen. Isúso gijá upré pe bérga i odój besciá Péskire sykliaibnytkonénca. Javélas sýges Judýtko svénko, Patradí. Isúso ĥazdyjá jakhá i dykhciá, so but manušá džána ke Jov, rakiréla Filiposke: “Kaj aménge te kinas maró, sob (kaj) te čaliakiras len?” Jov rakirdiá davá vaš dová, sob (kaj) te propatiakirel Filipos: Jov kokoró džindiá, so Jov javéla te kerél. Filipo otphendiá Léske: “Duj šelá dinarja na uhtýlla (nádosi) lénge pe maró, sob (kaj) kažnonéske léndyr te das pir kotér (kusko).” Jekh Léskire sykliaibnytkonendyr, ĥáda, sys Jendri (Andriejo), pšal Simonoskire Petriskiro, rakiréla Isusóske: “Adáj iekhe rakloreste isyn pandž ĥerstytka (jačmienitka) maré i duj mačhore; ne so davá vaš adákicy manušénge?” Isúso phendiá: “Phenén lénge te bešén.” Dre dová štéto sys ĥensto čar. I manušén, savé bešné pe čar, sys pašé pandž tysjoncy. Isúso lyjá maró i parikirdia dre mangipén Devléske, rozdyja sykliaibnytkonénge i sykliaibnýtka dyné manušénge, savé sys bešté, i dová-pac' Jov kerdiá i mačhenca i dyjá kažnonéske, ci but, kon kamdiá. Kiéli saré manušá čalyne, Isúso phendiá Péskire sykliaibnytkonénge: “Keden koterá (kuski), savé jačnépe, sob (kaj) nisó te na xasjol.” Jone kedyne dešudúj pherdé korzíny (khudé) koterenca, savé jačnépe paló (poslie) odolénde, kon xaja pandžendyr ĥerstytkone marendyr. Manušá dykhné, savó dívo Jov kerdiá i jone phendlé: “Davá isyn kodová čačunó Proróko, Savéske Trej bangó te javél dro svéto.” Isúso ĥalyjá, so jone kaména te javén i te začhuven Les zorjása te javél kralísa; Jov nevéstyr gijá léndyr jekhdžinó pe bérga. Kiéli javdiá bel'vél', Léskire sykliaibnýtka giné ke mórjo (derjáv). I jone bešné dre bárka, i tradyne pe javír morjoskiri rig, dro Kapiernaumo. Jaciá kaló (cjomno), a Isúso na džálas ke jone. Phurdelas zoralý balvál, i mórjo (derjáv) kuninelaspe. Kiéli jone otplyvindle (dyne plíma duredyr) pe trin ci štar versty, tedy jone dykhné, so Isúso džálas pir mórjo (derjáv) ke bárka, i jone strahádyne. Ne Jov phendiá lénge: “Ĥáda, Me som, na andyršan” Jone kamlé te len Les dre bárka, ne dre dová-pac' momiento bárka podtradyja ke brégo, odorík, karik jone plyvindle. Pe javír dyvés manušá, savé sys terdé pe doiá morjoskiri rig, dykhné, so odój apríč jekh bárka, dre saví Léskire sykliaibnýtka bešné, javír na sys, i so Isúso na tradyjá dre doiá bárka Léskire sykliaibnytkonénca, i so Léskire sykliaibnýtka tradyne jekhdžine. Tedy ke brégo podtradyne i javír barki Tivieriadatyr ke dová štéto, kaj jone xané maró, savó Isúso bahtiakirdiá dro Devléskiro mangipén. I kiéli manušá dykhné, so nane adáj ni Isusós, ni Léskire sykliaibnytkonén, jone bešné dre barki i tradyne dro Kapiernaumo te rodén Les. Jone lathné Les pe javír morjoskiri rig i phendlé Léske: “Sykliakiribnáskiro! Kiéli Tu javdián adarík?” Isúso phendiá lénge dro otphenybén: “Čačes, Me rakiráva tuménge: tumé rodéna Man na paldová, so dykhné dívy, a pal-dová, so tumé xané maró i čalyne. Na kerén butý pal xabén, savó pe jekh mólo, a rodén dová xabén, savó javéla dre viéčno džiibén; davá xabén kaméla Manušéskiro Čhavó te del tuménge, – pal-dová so pe Léste čhudiá Devél Dad Péskiri čergenorí, so Jov bahtiakiréla davá.” Jone phučné Léstyr: “So aménge trej te kerás vaš dová, sob (kaj) amaré réndy (diély) te javén lačhé vaš Devléske?” Isúso phendiá lénge dro otphenybén: “Ĥáda, isyn tumaró réndo vaš Devléske, sob (kaj) tumé te patián dre Odoléste, Konés Jov bičhadiá.” Jone phučné Léstyr: “Saví ĥiertýk (znamiénijo) Tu sykavesa aménge, sob (kaj) aménge te dykhas la i te patias Túke? So Tu kerésa? Amaré dadá xané mannovo khurmi pe čhučí phuv, syr pal davá isyn čhindló dro Svénto Čhinybén: ‘Jov dyjá maró bolybnástyr te xan.’” Isúso phendiá lénge: “Čačes, Me rakiráva tuménge: davá isyn na Mójza (Moisiejo) dyjá maró tuménge Bolybnástyr, a Miro Dad déla tuménge čačunó maró bolybnástyr. Pal-dová so Devléskiro maró isyn Odová, Savó javéla (džála telé) bolybnástyr i déla džiibén svetoske.” Tedy jone phendlé Léske: “Rajo Dévla! De aménge ŭsády (sak) davá maró.” Isúso phendiá lénge: “Me kokoró som džiibnáskiro maró; odová, kon javéla ke Me, na javéla nijékhvar bokhalo, i odová, kon patiála dre Mánde, nijékhvar na javéla te kamel te p'jel. Ne syr Me rakirdjom, so tumé dykhné Man, i usajékh tumé na patiána. Saró, so déla Mánge Dad, javéla ke Me, i odolés, kon ke Me javéla, Me na tradava javrí. Pal-dová so Me javdjom bolybnástyr na vaš davá, sob (kaj) te keráv dová, so Me kokoró kamám, ne, sob (kaj) te keráv pir Miré-Dadéskiri vólia, Savó bičhadiá Man. A vólia Miré Dadéskiri, Savó bičhadiá Man, isyn dasaví, sob (kaj) nisó odoléstyr, so Jov dyjá Mánge te na xasiakiráv, ne saró dová te otdžidiakirav dro palatunó (posliednjo) dyvés. A vólia Miré Dadéskiri, Kon bičhadiá Man, isyn dasaví, sob (kaj) kažno, kon dykhéla Čhavés i patiála dre Léste, te javél léste viéčno džiibén; i Me les otdžidiakirava dro palatunó (posliednjo) dyvés.” E Judy rakirdé xoliames pe Léste pal dová, so Jov phendiá: “Me som maró, savó javdiá bolybnástyr.” Jone rakirdé: “Ci davá Isúso isyn čhavó Jozaskiro (Iosifoskiro), Saveskires Dadés i Da ame džinása? Syr Jov moginéla te rakirél: “Me javdiem bolybnástyr?” Isúso phendiá lénge dro otphenybén: “Na rakirén xoliames maškír péste. Nikón na moginéla te javél ke Me, kóli na priterdela les ke Pe Dad, Savó bičhadiá Man; i Me otdžidiakirava les dro palatunó dyvés. Ake, isyn čhindló: ‘Javéna saré sykliakirdé Devléstyr’. Kažno, kon šundiá Dadés i syklyja Léstyr, javéla ke Me; nikón i na dykhciá Dadés, apríč Odoléste, Kon javdiá Devléstyr, jekh Jov dykhciá Dadés. Čačes, čačes Me rakiráva tuménge: odová, kon patiála dre Mánde, kodoléske délape viéčno džiibén’. Me som džiibnáskiro maró. Maro, savó javéla bolybnástyr, isyn dasavo, so kon xála les, odová na meréla. Tumaré dadá xané khurmi pe čhučí phuv i myné. Me som džidó maró, savó javdiá bolybnástyr; kon javéla te xal Miro maró, odolé manušéske délape viéčno džiibén; maró, savó Me dáva, isyn Mirí loč (masá), savé Me otdáva, sob (kaj) svéto te dživél.” Tedy Judy jačné te čingardenpe maškír péste, i jone rakirdé: “Syr da Jov moginéla te del te xas aménge Léskiri loč (plot')?” Isúso phendiá lénge: “Čačes, čačes Me rakiráva tuménge: kóli tumé na javéna te xan Manušéskire-Čhaveskiri loč i na javéna te p'jen Léskiro rat, tedy tuménde na javéla džiibén dre péste. Odová, kon xála Mirí Loč i p'jela Miro Rat, odoléske délape viéčno džiibén, i Me otdžidiakirava les dro palatunó dyvés; pal-dová so Loč Mirí isyn čačunó xabén, i Rat Miro isyn čačunó pibén; kon xála Mirí Loč i p'jela Miro Rat, odová dživéla dre Mánde, i Me jačavape dre léste. Adiáke-pac', syr Džidó Devél Dad bičhadiá Man, i Me dživáva pal Dadéste, adiáke-pac' i odová, kon xála Mirí loč, javéla te dživél pal Mánde. Kadavá isyn maró, savó javdiá bolybnástyr, jov isyn na dasavo, syr maró, savó xané tumaré dadá i myné: ne odová, kon xála davá maró, javéla te dživél viéčnes.” Davá Jov rakirdiá dre sinagoga, kiéli sykliakirdiá dro Kapiernaumo. But Léskire sykliaibnytkonendyr, syr šundlé Les, rakirdé: “Savó pharó isyn sykliakiribén! Kon moginéla davá te šunél?” Isúso džindiá, so Léskire lavá xoliakirde sykliaibnytkonén, i Jov phendiá lénge: “Ci davá začhuvela tumen te mekén Man?” Ne so javéla, kiéli tumé javéna te dykhén, syr Čhavó Manušéskiro ĥazdélape odorík, kaj Jov sys angledýr? Dúho (Fáno) déla džiibén, a dro manušýtko loč (plot') nane ni saví zor. Lavá, savé Me rakiráva tuménge, isyn dúho (fáno) i džiibén. Ne isyn maškír tuménde i adasavé, savé na patiána.” Pal-dová so Isúso džindiá angledýr, kon dre Léste na patiála i kon biknela Les. I Jov rakirdiá: “Vaš davá i Me rakiráva tuménge, so nikón na javéla ke Me, kóli davá na javéla dynó léske Miré Dadéstyr.” Pal davá but Léskire sykliaibnýtka mekné Les i jone butýr na psirdé Lésa. Tedy Isúso phendiá dešudujenge: “Ci na kaména i tumé te džán péske?” Símono Pétri Léske otphendiá: “Rajo Dévla! Ke kon aménge te džas? Túte isyn lavá, savé déna viéčno džiibén. Ame akaná džinása i patiása, so Tu san Xristóso, Svénto Devléskiro Čhavó.” Isúso otphendiá lénge: “Ci na Me vykedyjom dešudujen tumen, ne jekh tuméndyr isyn nálačho.” Jov rakirdiá pal Judaste, Simonoskire-Iskariotoskire čhavéste, savó sys jekh dešudujendyr, pal-dová, so jov kedelaspe te biknel Les. Paló davá Isúso psirdiá pir Galiliéia, ne Jov na kamdiá te džal dre Judéia, pal-dová so Judy rodyne te zamarén Les. Džálas Judýtko Svénko, kiéli jone čhuvénas búdy (kuščy). Léskire pšála phendlé Léske: “Džá dalé štetóstyr i džá dre Judeja, sob (kaj) i Tyré sykliaibnýtka te dykhén réndy, savé Tu kerésa; pal-dová so nikón na ĥaravela péskire réndy, kažno kaméla, sob (kaj) manušá te džinén pal léste; kóli Tu kerésa dasavé réndy, adiáke mek saró svéto te džinél pal Túte” (Pal-dová so Léskire pšála adiáke-pac' na patiandyné dre Léste). Isúso pe davá phendiá lénge: “Miro časo iščo (inké) na javdiá, ne vaš tuménge kažno časo poddžála. Svéto na moginéla te bidykhel tumen (te nienavidinel), a svéto bidykhela Man, pal-dová so Me dophenava pal léste, so léskire réndy isyn nalačhé. Tumé džán pe davá svénko, ne Me pe svénko na džáva, pal-dová so Miro časo iščo (inké) na javdiá.” Adiáke phení lénge, Isúso jaciápe dre Galiliéia. Ne paló davá, syr Léskire pšála giné pe svénko, tedy i Jov gijá odorík, ne na biciales, a adiáke, sýrby čorahanés. Judy rodenas Les pe svénko i phučenas: “Kaj isyn adavá manúš.” But čingardá sys pal Léste maškír manušénde: “Jov isyn lačhó manúš,” – rakirdé jekh, a javír rakirdé: “Jov xohavela manušén.” Ne nikón na rakirdiá pal Léste mamúi, pal-dová so darándyne Judéngire randyr. Ne dro maškirál svénko Isúso gijá andré Khangirí i jaciá te sykliakirél. Judy divindlépe, rakirí: “Katýr Jov džinéla Svénto Čhinybén, kóli Jov nikaj na syklyja?” Isúso phendiá lénge: “Miro sykliakiribén isyn na Mándyr, ne isyn Odoléstyr, Kon bičhadiá Man. Kon kaméla te kerél Léskiri vólia, odová javéla te džinél pal davá sykliakiribén, ci jov isyn Devléstyr, ci Me rakiráva Kokoró Péstyr. Odová, savó rakiréla kokoró péstyr, mangéla péske sláva; ne kon rodéla sláva Odoléske, kon bičhadiá Les, Odová syn čačunó, i xohaibén nane dre Léste. Ci Mójza na dyjá tuménge Zakóno? I nikón tuméndyr na keréla pir Zakóno. Pal so ž tumé kaména te muliakirén Man?” Manušá phendlé dro otphenybén: “Ci davá nálačho Dúho (Fáno) isyn dre Túte? Kon kaméla te muliakirél Tut?” Isúso rakirí duredýr, phendiá lénge: “Me kerdjom jekh réndo, i saré tumé divinenape. Mójza ž tuménge phendiá te občhinen čhavén (čačó, davá na Mojzastyr javdiá, a dadendyr), i dro sávato (subóta) tumé občhinena manušés. Kóli dro sávato tumé občhinena manušés, sob (kaj) te na javél parudo Mojzáskiro Zakóno, sóske ž tumé xoliasona pe Mánde, pal-dová, so Me jekhe manušés vysastiakirdjom dro sávato? Na sendinén manušés pir muj, a sendinén čačuné sendosa.” Adáj vari-savé manušá Jerusalimóstyr lyné te rakirén: “Ci Adavá isyn Manúš, Saves rodéna te zamarén? Ĥáda, Jov rakiréla murškanés, i nikón na rakiréla Léske ničý. Ci na uĥalyne barydyrá, so Jov isyn čačunó Xristóso? Ne ame džinása pal adalé manušéste, katýr Jov isyn. Ne kiéli javéla Xristóso, nikón na javéla te džinél, katýr Jov javdiá.” Tedy Isúso, sykliakiri dre Khangirí, phendiá zoralé zaniása: “I tumé džinéna Man i tumé džinéna, katýr Me som; i Me javdjom na Kokoró Péstyr. Ne Odová, Kon bičhadiá Man, isyn čačunó, Saves tumé na džinéna. Ne Me džinóm Les, pal-dová so Me javdjom Léstyr, i Jov bičhadiá Man.” I jone kamlé Les te uhtylén, ne nikón na čiladiá Les vastésa, pal-dová so Léskiro časo na javdiá. But manušéndyr upatiándyne dre Léste i rakirdé: “Kiéli javéla Xristóso, naúšto Jov keréla butýr dívy, syr Adavá Manúš kerdiá? Farisiéi šundlé, so manušá rakirdé xoliása maškír péste pal Isusóste, i bičhadé Khangirjákire stregar'jen (stražniken), sob (kaj) te uhtylén Les. Ne Isúso: “Iščo nagara jaciápe Mánge te javav tuménca, i Me džáva ke Odová phendiá, Kon bičhadiá Man. Tumé javéna te rodén Man, i na lathéna; i kaj Me javáva, odorík tumé na moginéna te javén.” Tedy Judy lyné te rakirén maškír péste: “Karik da Jov kaméla te džal adiáke, so ame na lathasa Les? Ci na kaméla Jov te džal pe Elinengiro štéto i te sykliakirél Jelinen (Griekén / Balamén)? So značynena dalé lavá, savé Jov phendiá: “Tumé javéna te rodén Man, i na lathéna: i kaj Me javáva, odorík tumé na moginéna te javén.” Dro palatunó (posliednjo) i sámo glavno svenkitko dyvés, Isúso terdijá i phendiá zoralé zaniása: “Odová, kon kaméla te p'jel, mek te javél ke Me. Kon patiála dre Mánde, – syr isyn phendló dro Svénto Čhinybén, – ‘Léskire iléstyr javéna te thaden réki (leniá) džidé paniésa.’” Isúso adiáke rakirdiá pal Dúho (Fáno), savó javéla te odolénde, kon javéla te patial dre Léste; pal-dová so na sys pe lénde Svénto Dúho (Fáno), pal-dová so Isúso iščo (inké) na sys slavindlo. But manušéndyr, savé šundlé Léskire lavá, rakirdé: “Jov isyn čačunó Proróko.” Javír rakirdé: “Davá isyn Xristóso”, ne vari-savé rakirdé: “Naúšto Galilejatyr javéla Xristóso? Ci na phendló dre Svénto Čhinybén, so Xristóso javéla Davidóskire rodóstyr, i so Jov bijandjola dro fóro Vifliejémo, odolé štetóstyr, katýr sys Davído?” Adiáke vygijá pal Léste košybén maškír manušénde. Vari-savé léndyr kamlé te uhtylén Les; ne nikón Les na čiladiá. Adiáke Khangirjákire stregarja risiné ke rašángire barydyrá i Farisiéi, i adalé phučné léndyr: “Sóske tumé na jandlé Les?” E stregarja otphendlé adiáke: “Adavá manúš adiáke rakirdiá, so nikón nijékhvar na rakirdiá.” Farisiéi phendlé lénge: “So ž i tumen Jov zalydžijá dro bléndo? Ci upatiandyja dre Léste vari-kon theméskire barydyrendyr ci Farisiejendyr? Jekh adalé manušá, savé na roskedenape dro Zakóno, Devél prokošela len.” Nikadimo, savó javélas ke Jov ratý, sys jekh léndyr i rakiréla lénge: “Ci sendinela amaró Zakóno manušés, kóli angledýr na vyšunena les i na udžinena, so jov kerdiá?” Pe davá phendlé léske: “Ci na san i tu Galilijatyr? Rozdykh i tu kokoró ĥaljosa, so proróko na moginéla te javél Galilejatyr.” I saré jone giné péske pir kherá. Isúso gijá pe Olivítko bérga. I pe zlóko Jov javdiá dre Khangirí, i saré manušá giné ke Jov; i Jov besciá i sykliakirdiá len. Lylvarítka i Farisiéi jandlé ke Jov džuvliá, savjá uhtyldé dro biladžaipén, čhudé la angíl sarénde, i phendlé Léske: “Sykliakiribnáskiro! Adaja džuvlý isyn uhtyldy dro biladžaipén; kiéli joj kerdiá ladžaipén péskire romeske. Mójza dre Zakóno priphenelas aménge, sob (kaj) ame te zamaras džuvlién barénca; ne so Tu phenésa?” Jone rakirdé adiáke, sob (kaj) te propatiakiren Les, sob (kaj) te lathén vari-so te bangiakiren Les. Ne Isúso bandija ke phuv, čhindiá anguštesa pe phuv? Kiéli nevéstyr Jone phučenas Léstyr, Jov ĥazdyjá šeró, phendiá lénge: “Kon tuméndyr nijékhvar na kerdiá grého, čhurde pérvo pe láte bar.” I nevéstyr Jov bandija telé i čhinelas pe phuv. I kiéli jone šundlé davá, jone lyné te rozdžanpe jekh pal jekhéste, angledýr giné phurydyrá; i jaciápe jekh Isúso i džuvlý, saví sys terdy maškirál. Isúso ĥazdyjá šeró, i Jov ni konés na dykhciá apríč džuvliáte; Jov phuciá látyr: “Džuvlije! Kaj isyn jone saré? Nikón na sendindia tut?” Joj otphendiá: “Nikón, Rajo!” Isúso phendiá láke: “I Me tut na sendinava; džá i na ker gréhi butýr.” Nevéstyr Isúso rakirdiá manušénca i phendiá lénge: “Me som dud dro davá svéto: odová, kon džála pal Mánde, na javéla te psirél dro kalypén, a javéla léste džiibnáskiro dud.” Tedy Farisiéi phendlé Léske: “Tu Kokoró pal Péste dophenesa, i dophenybén Tyró isyn na čačunó.” Isúso otphendiá lénge: “Kóli Me Kokoró pal Péste dophenava, to Miré lavá isyn čačuné, pal-dová so Me džinóm, katýr Me javdjom i karik Me džáva; a tumé na džinéna, katýr Me javdjom i karik Me džáva. Tumé sendinena pir dová, so tumé dykhéna dre manušéste, ne Me na sendinava nikonés. A kóli Me i sendinava, Miro séndo isyn čačunó, pal-dová so Me na som jekhdžinó; Mánca isyn Miro Dad, Savó bičhadiá Man. Ne i dro tumaró Zakóno isyn čhindló, so dujengire-manušéngiro dophenybén isyn čačunó: Me Kokoró dophenava pal Péste, i dophenéla pal Mánde Dad, Savó bičhadiá Man.” Tedy phučné jone: “Kaj isyn Tyró Dad?” Isúso otphendiá: “Tumé na džinéna ni Man, ni Miré Dadés; kóli tumé te džinén Man, tedy tumé i džinenas Miré Dadés.” Kadalé lavá Isúso rakirdiá pašýl Khangirjákiri piralý (tyknorí), kiéli Jov sykliakirdiá dre Khangirí; i nikón Les na čiladiá, pal-dová so Léskiro časo na javdiá. Jov nevéstyr phendiá lénge: “Me džáva, i tumé javéna te rodén Man, i meréna dre tumaró grého; karik Me džáva, odorík tumé na moginéna te javén.” Paldavá Judy rakirdé: “Jov so, ci na kaméla Kokoró Pes te zamarél, so rakiréla: ‘Karik Me džáva, tuménge odorík naštý te javén?’” Jov phendiá lénge: “Tumé san dalé svetóstyr, savó isyn telál; Me som vučipnástyr; tumé san dalé svetóstyr, Me na som dalé svetóstyr; paldová Me i phendjom tuménge, so tumé meréna dre tumaré gréhi; kóli tumé na upatiana, so davá som Me, to tumé saré meréna dre gréhi!” Tedy phendlé Léske: “Kon Tu san? Isúso phendiá lénge: “Odová, Konesa Me ŭsády (sak) som, syr Me phendjom anglypnástyr; Me but mogináva te rakiráv pal tuménde i te sendinav tumen; ne Odová, Kon bičhadiá Man, isyn čačunó i dová, so Me šundjom Léstyr, Me rakiráva svetoske.” Jone na ĥalyné, so Jov rakirdiá lénge pal Dadéste. Adiáke Isúso phendiá lénge: “Kiéli ĥazdéna Čhavés Manušeskires, tedy tumé uĥaljona, so davá som Me, i so Me nisó na keráva Péstyr; ne, syr sykliakirdiá Man Miro Dad, adiáke i Me rakiráva. Kon bičhadiá Man, isyn Mánca; Dad na jačkirdiá Man jekhés, pal-dová so Me ŭsády (sak) keráva dová, so Léske isyn lahčo.” Kiéli Jov rakirdiá davá, but manušá upatiándyne dre Léste. Tedy Isúso phendiá odolé Judénge, savé upatiándyne dre Léste: “Kóli tuménde javéla Miro Lav dre péste, tumé, čačes, san Miré sykliaibnýtka; i tumé udžinena čačipén, i čačipén keréla tumen vol'nonenca. Jone Léske otphendlé: “Ame sam Avraamóskire rodóstyr i nijékhvar nikonéske na sámas slúgi (dynárja); syr Tu rakirésa davá, so ame jačasa vol'na?” Isúso otphendiá lénge: “Čačes, čačes, Me rakiráva tuménge: kažno, kon keréla grého, odová kokoró isyn dynári grehoske. Ne dynári na saró časo javéla te dživél dro kher; a čhavó dživéla viéčnes. Kóli Čhavó keréla tumen vol'nonenca, tedy, čačes, tumé javéna vol'na. Me džinóm (džináv), so tumé san Avraamóskire rodóstyr: i usajékh tumé rodéna Man te zamarén, pal-dová so Miro lav na jaciápe dro tumaró iló. Me rakiráva tuménge dová, so Me dykhcjom Miré Dadéste: ne tumé keréna dová, so tumé dykhné péskire dadéste.” Jone phendlé Léske dro otphenybén: “Amaró dad isyn Avraámo.” Isúso rakiréla lénge: “Kóli tumé te javén Avraamóskire čhavé, tedy tumé kerénas Avraamóskire réndy; ne kakaná tumé rodéna te zamarén Man, Manušés, Savó phendiá tuménge čačipén, Savó Me šundjom Devléstyr; Avraámo na kerdiá davá. Tumé keréna dová, so kerdiá tumaró dad.” Jone phendlé Léske: “Ame na bijandyjam blendostyr; aménde isyn jekh Dad: Devél.” Isúso phendiá lénge: “Kóli Devél te javél tumaró Dad, tedy tuménge javavas by drógo Me, pal-dová so Me i javdjom Devléstyr i Me javdjom na Kokoró Péstyr, ne Jov Man bičhadiá. Sóske tumé na ĥaljona Miro rakiribén? Pal-dová so tumé na moginéna te šunén Miro lav. Tumaro dad isyn nálačho i tumé kaména te kerén pir tumaré-dadéskiri láska. Ne jov saró džiibén sys manušéngiro zamaribnari, i jov na dživdiá dro čačipén, pal-dová so nane čačipén dre léste; kiéli jov rakiréla xohaibén, rakiréla péskiro, pal-dová so jov isyn xohaibnari i xohaibnaskiro dad. Ne kiéli Me rakiráva tuménge čačipén, tumé na patiána Mánge. Kon tuméndyr bangiakirela Man dro grého? Kóli Me rakiráva tuménge čačipén, sóske tumé na patiána Mánge? Odová, kon isyn Devléstyr, odová šunéla Devléskire lavá; tumé paldavá na šunéna, pal-dová so tumé san na Devléstyr.” Pe davá Judy phendlé Léske: “Ci na čačipén ame rakirasa, so Tu san Samarianino i nálačho dúho (fáno) isyn beštó dre Túte?” Isúso otphendiá: “Dre Mánde nane nálačho dúho (fáno), ne Me kutiakirava Miré Dadés, a tumé kaliakirena Man. Ne Me na rodava Péske sláva: isyn javír, Odová, Kon rodéla i Jov javéla te sendinel. Čačes, Čačes Me rakiráva tuménge: kon zrakhéla Miro lav, odová na dykhéla meribén nijékhvar.” A Judy phendlé Léske: “Kakaná ame uĥalyjam, so nálačho dúho (fáno) isyn beštó dre Túte; Avraámo myjá, myné i proróki, a Tu rakirésa: ‘Kon zrakhéla lav Miro, odová na meréla nijékhvar’. Naúšto Tu san baredýr dadéstyr amarestyr Avraamostyr, savó myjá i saré proróki myné: pal konéste Tu Pes ginesa?” Isúso otphendiá: “Kóli Me Kokoró Pes slavinava, tedy sláva Mirí nisó na mol: ne Miro Dad slavinela Man, pal Savéste tumé rakiréna, so Jov isyn tumaró Devél. Tumé na džindlé Les, ne Me džinóm (džináv) Les; i kóli Me phenáva, so na džinóm Les, tedy Me javáva adasavó-pac' xohaibnari, syr i tumé san. Ne Me džinóm Les i Me rakhava Léskiro lav. Avraámo, dad tumaró, sys rado te dykhél Miro dyvés: i dykhciá, i obradyndiape.” Pe davá phendlé Léske Judy: “Túke nane i pandždešá berš, i Tu dykhcián Avraamos?” Isúso phendiá lénge: “Čačes, čačes Me rakiráva tuménge: angledýr, syr bijándyja Avraámo, Me sómas.” Tedy jone uhtyldé bará, sob (kaj) te marén Les; ne Isúso sčhakirdiape i gijá javrí Khangirjátyr, gijá maškír lénde, i gijá duredýr. Kiéli Isúso gijá piró drom, Jov dykhciá manušés, savó sys kororó bijanypnastyr. Léskire sykliaibnýtka phučné Léstyr: “Ravvi! Kon léndyr kerdiá grého, jov kokoró, ci dadá léskire, so jov bijándyja kororó?” Isúso otphendiá: “Ni jov, ni léskire dadá na kerdé grého, ne davá isyn vaš dová, sob (kaj) te javél pe léste bicialy (dyc'ly) Devléskiri zor. Paka na progijá dyvés, Mánge trej te keráv Odoleskire réndy, Kon bičhadiá Man; syg javéla rat, kiéli nikón naštý nisó te kerél. Dro davá časo, syr Me som dro svéto, Me som dud (svéto) dalé svetoske” Kiéli Jov phendiá davá, čungardyja pe phuv, kerdiá saliatyr (slinatyr) makhiben i makcia jakhá kororeske, I phendiá léske: “Džá, obmorpe dre Siloamoskiri venderín (prudo)” /so značinela “bičhadó!”/. Jov gijá, obmordiape i jaciá te dykhél. Léskire pašatuné i javír manušá, savé dykhné, so jov angledýr sys kororó beštó i mangdiá dyibén, phendlé: “Ci da isyn na odová manúš, savó sys beštó i mangdiá dyibén?” Vari-savé rakirdé: “Davá jov isyn.” Ne javír rakirdé: “Nad, jov zdela (poddžála) pe léste.” Jov ž rakirdiá: “Čačes, me som.” Tedy phučné léstyr: “Syr tu jacián te dykhés?” Jov otphendiá lénge: “Jekh Manúš, Saves kharéna Isúso, kerdiá makhiben, makcia miré jakhá i phendiá mánge: ‘Džá dro Siloamoskiro kompinytko i obmorpe’. Me gijom, obmordjompe i jacjom te dykháv.” Tedy phučné léstyr: “Kaj Jov isyn?” Jov otphendiá: “Na džinóm (na džináv).” Adales manušés, savó sys ĥaredyr kororó, lydžiné ke Farisiéi. Davá sys sávato, dyvés, dro savó Isúso kerdiá pomakhiben i vysastiakirdiá les kororipnastyr. Adiáke-pac' i Farisiéi lyné te phučén Léstyr, syr jov jaciá te dykhél. Jov phendiá lénge: “Jov čhudiá makhiben mánge pe miré jakhá i me obmordjompe, i me kakaná dykháva.” Tedy vari-savé Farisiejendyr rakirdé: “Adavá manúš na moginéla te javél Devléstyr, pal-dová so Jov na rakhéla sávato.” Javír rakirdé: “Syr moginéla grehítko manúš te kerél dasavé dívy?” – I jaciá košybén maškír lénde. Jone nevéstyr rakiréna kororeske: “So tu phenésa pal Léste, pal-dová so Jov otčhakirdiá túke jakhá? Kon Jov isyn pir tyró?” Jov phendiá: “Jov isyn proróko.” Judy usajékh na patiandyné, so manúš sys kororó i jaciá te dykhél, angíl dová, syr jone khardé léskire daden. I phučné léndyr: “Ci davá isyn tumaró čhavó, pal savéste tumé rakiréna, so jov bijándyja kororó? Syr jov kakaná jaciá te dykhél?” E dadá léskire otphendlé lénge: “Ame džinása, so jov isyn amaró čhavó i jov bijándyja kororó; a syr davá jov kakaná dykhéla i, kon otčhakirdiá léske jakhá, davá ame na džinása; jov kokoró isyn dre stala beršá, phučén léstyr kokorestyr, mek jov kokoró te rosphenel pal péste.” Léskire dadá adiáke otphendlé, pal-dová so jone darándyne Judendyr, so jone uže zrakirdepe, so kóli vari-kon priĥaljola Les pal Xristosóste, odolés te tradén krig Khangirjátyr. Paldavá léskire dadá i phendlé: “Jov isyn dre stala beršá, phučén léstyr kokorestyr.” I ĥáda, javír mólo jone khardé manušés, savó sys kororó, i phendlé léske: “De lav angíl Devléste, so tu phenésa čačipén: ame džinása, so Odová Manúš isyn grehítko.” Jov otphendiá lénge: “Ci grehítko Jov isyn, davá me na džinóm; jekh me džinóm (džináv), so me sómas kororó, ne kakaná me jacjom te dykháv.” Jone nevéstyr phučné léstyr: “So kerdiá Jov túsa? Syr tu jacián te dykhés?” Jov otphenélas lénge: “Me rakirdjom uže tuménge, tumé na šundlé: so tumé kaména nevéstyr te šunén? Ci tumé kaména te jačen Léskire sykliaibnytkonénca?” Jone zadyne gódla pe léste i phendlé: “Tu san Léskiro sykliaibnýtko, ne ame sam Mojzáskire sykliaibnýtka. Ame džinása, so Devél rakirdiá Mojzasa, ne pal adalé manušéste ame na džinása, katýr Jov isyn?” Manúš, savó jaciá te dykhél, phendiá lénge: “Davá isyn baró dívo, so tumé na džinéna, katýr Jov isyn, ne Jov otčhakirdiá jakhá mánge. Ne ame džinása, so, kon keréla grého, kodolén Devél na šunéla, ne jekhe kodolén, savé slavinena Devlés i keréna, so Léske isyn lačhó, kodolés Jov šunéla. Nijékhvar dro džiibén na sys šundlo, sob (kaj) vari-kon manušéske, savó bijándyja kororó, te otčhakirel jakhá. Kóli Jov te na javél Devléstyr, Jov nisó na moginelas te kerél.” Jone zadyne gódla pe léste: “Tu saró bijandyjan dre gréhi, i ci na tu sykliakiresa amen?” I tradyne les javrí. Isúso udžindiá pal davá, so les tradyne javrí, i lathiá les i phuciá léstyr: “Ci patiása tu dre Devléskire Čhavéste?” Jov otphendiá i phuciá: “Ne kon Jov isyn, miro Raj Devél, phen mánge, sob (kaj) me te upatiav dre Léste?” Isúso phendiá léske: “Tu dykhcián Les, Jov isyn Odová, Kon rakiréla túsa.” Tedy manúš phendiá: “Me patiáva, Rajo Dévla!” I jov dyjá patýv Léske. I phendiá Isúso: “Me javdjom pe séndo dre davá svéto, sob (kaj) odolé, savé na dykhéna, te dykhén, ne savé dykhéna, sob (kaj) te jačen kororé.” Vari-savé Farisiéi, savé sys terdé pašýl Isusóste, syr šundlé davá, phendlé Léske: “Naúšto i ame sam kororé?” Isúso phendiá lénge: “Kóli tumé te javén, čačes, kororé, tedy tuménge na javéla grého; ne kóli tumé rakiréna, so tumé dykhéna, tedy grého jačélape pe tuménde.” “Čačes, čačes, Me rakiráva tuménge: odová, kon zadžála dre bakrany gréda (dvóro) na pir vudár, a zadžála javire dromésa, kodová isyn čor i rozmaribnari; a odová, savó zadžála dro vudár, isyn čhupnári bakrenge; Rakhibnari otčhakirela vudará léske, i bakré šunéna léskiri zan, jov kharéla piró lav péskire bakrén i lydžála len javrí. I kiéli jov vylydžala sarén péskire bakrén, jov džála angíl lénde; bakré pal léste džána, pal-dová so bakré džinéna léskiri zan. Pal čužoneste jone na džána, našéna léstyr, pal-dová so jone na džinéna javír zan.” Isúso rosphendiá lénge dasavo primiéro (sykaibén), ne jone na ĥalyné, so dasavo Jov rakirdiá lénge. I Isúso nevéstyr phendiá lénge: “Čačes, čačes Me rakiráva tuménge, so Me som vudár vaš bakrenge. Saré, ci but len sys angíl Mánde, isyn čora i rozmaribnarja, i bakré na kandyné len. Me som dasavo vudár: kon zadžála pir Mánde, odová javéla zrakhno, jov zadžála pir vudár i vydžála, i lathéla lačhó čaraiben. Čor javéla vaš jekh, sob (kaj) te čorel, te zamarél i te rosphagirel: Me javdjom vaš davá, sob (kaj) te dav lénge džiibén pherdés dro saró. Me som lačhó čhupnári: lačhó čhupnári otdéla péskiro džiibén pal bakrende: a manúš, savó isyn dorakirdo pe butý pal lové, jov isyn na čhupnári, pal-dová so dalé bakré isyn na léskire, jov dykhéla, syr ruv poddžála i mekéla bakrén i kokoró našela, i ruv čorela bakrén i rostradela len. Jov isyn na čhupnári, ne jov isyn dorakirdo pe butý pal lové, i jov našela, i jov na duminéla pal bakrende Me som lačhó Čhupnári, i Me džinóm Miré bakrén, i Miré bakré džinéna Man. I syr Man Dad džinéla, adiáke i Me džinóm (džináv) Dadés, i Me otdáva péskiro džiibén pal bakrende. Isyn Mánde i javír bakré, savé na dalé gredatyr, i odolén trej Mánge te janav: i jone javéna te šunén Mirí zan, i javéla jekh skedyibén i jekh Čhupnári. Paldavá Me som drógo Dadéske, so Me otdáva Miro džiibén, sob (kaj) nevéstyr te prilav les. Nikón Miro džiibén na otlela, ne Me Kokoró otdáva les: Mánde isyn zor te otdav džiibén i pale te prilav; pal-dová so davá priphenybén Me dorescjom Miré Dadéstyr.” Dalé lavéndyr nevéstyr vygijá maškír Judénde košybén. But léndyr rakirdé: “Jov zgija godiatyr i aby-so rakiréla; so tumé Les šunéna?” Javír rakirdé: “Ĥáda, lavá isyn na nalačheskire; ci nálačho dúho (fáno) moginéla te otčhakurel jakhá kororenge?” Davá sys ivante/ivende (zimakiro), kiéli javdiá dro Jerusalimo žužakiribnaskiro svénko (Xanukka) vaš Khangirí. I psirdiá Isúso dre Khangirí, pir Solomonóskiro trémo. Judy terdiné trusciál Léste i lyné te rakirén Léske: “Ci ĥará (dlúges) Tu javésa te rikires amen dro nadžinyben? Kóli Tu san Xristóso, phen aménge mamúj (priames)!” Isúso otphendiá lénge: “Me phendjom tuménge, ne tumé Mánge na patiána; réndy, savé Me keráva vaš Miré-Dadéskiro lav, – jone dophenena pal Mánde; Ne tumé na patiána Mánge, pal-dová so tumé na san Miré bakréndyr, syr Me phendjom tuménge. Miré bakré šunéna zan Mirí, i Me džinóm (džináv) len, i jone džána pal Mánde; i Me dáva lénge viéčno džiibén, jone na xasjona nijékhvar, i nikón na čorela len Miré vastéstyr. Dad Miro, Savó Mánge dyjá len, isyn naj baredýr saréndyr, i nikón na moginéla te otlel len Miré-Dadéskire vastéstyr: Me i Dad sam Jekh.” Nevéstyr Judy uhtyldé bará, sob (kaj) te marén Les. Isúso otphendiá lénge: “But lačhé réndy sykadjom Me tuménge Miré Dadéstyr; pal savó ž réndo léndyr tumé kaména te marén Man barénca?” Judy phendlé Léske: “Na pal lačhó réndo ame kamasa te maras Tut barénca, ne pal dová, so Tu teliakiresa Devlés i pal dová, so Tu san manúš, a kerésa Pes Devlésa.” Isúso otphendiá lénge: “Ci nane čhindló dre tumaró Zakóno: “Me phendjom: ‘Tumé san develá?’” Kóli Jov khardiá devlenca odolén, ke savé sys Devléskiro lav, a Svénto Čhinybén na moginéla te parudjol, to ci rakiréna tumé Odoléske, Saves Dad svencyndia i bičhadiá pir svéto: ‘Tu teliakiresa Devlés,’ pal-dová so Me phendjom: ‘Me som Devléskiro Čhavó?’ Kóli Me na keráva Miré Dadéskire réndy, tedy na patián Mánge; ne kóli Me keráva len, tumé moginéna Mánge te na patián, a patián tedy dre Miré réndy, sob (kaj) tumé te džinén i te ĥaljon, so Miro Dad isyn dre Mánde, i Me som dre Léste.” Jone nevéstyr rodyne te uhtylén Les, ne Jov vyrisija léngire vasténdyr, i Jov nevéstyr gijá pal Iordáno, pe dová štéto, kaj ĥaredyr Iáno boldia, i jaciápe odój. Ke Jov javénas but manušá i rakirdé, so Iáno na kerdiá nisavó dívo; ne saró, so phendiá Iáno pal Léste, sys čačipén. I but manušá upatiándyne dre Léste odój. Sys nasvaló jekh manúš Lazarjo Vifanijatyr, gavestyr, kaj dživdiá Maríia péskire pheniasa Marfasa. Maríia, savjakiro pšal Lazarjo sys nasvaló, sys odoia-pac' džuvlý, saví makcia Ras-Devlés mirósa i vykhoscia Léskire ĥerá péskire balenca. Paldová pheniá bičhadé te phenén Léske: “Rajo Dévla! Ĥáda, kon isyn drógo Túke, isyn nasvaló” Kiéli Isúso šundiá pal davá, Jov phendiá: “Daja dukh isyn na ke meribén, joj isyn vaš Devléskiri sláva, sob (kaj) Čhavó Devléskiro te slavinelpe pir láte.” Marfa sys drógo Isusóske, lákiri phen i Lazarjo. Kiéli Isúso udžindiá pal Lazarjoskiri dukh, Jov zarikirdiape pe duj dyvesá pe dová-pac' štéto, kaj Jov sys. Korigedýr (pozžedýr) Jov phendiá Léskire sykliaibnytkonénge: “Javén, džása pale dre Judéia.” Sykliaibnýtka phendlé Léske: “Ravvi! Ci ĥará davá sys, syr Judy kamlé te marén barénca Tut, i Tu usajékh džása odorík?” Isúso phendiá lénge: “Ci na dešudúj mardé (štundy) isyn dro dyvés? Kon psiréla dyvesé, odová na obštavelape, pal-dová so jov dykhéla dud dalé svetoskiro; ne kóli jov psiréla ratý, tedy obštavelape, pal-dová so nane dud lésa.” Jov phendiá davá, i korigedýr (pozžedýr) iščo (inké) rakiréla lénge: “Amaró drúgo (mal) Lazarjo zasutia, ne Me džáva te džangavav les.” Sykliaibnýtka Léskire rakiréna: “Rajo Dévla! Kóli jov zasutia, tedy jov vysastjola.” Isúso kamdiá te phenél dalésa, so Lazarjo myjá; ne jone dumindle, so Jov rakiréla pal čačunó soiben.” Tedy Isúso phendiá lénge mamúi: “Lazarjo myjá. I Me radynavape pal tuménde, so Me na sómas odój, sob (kaj) tumé te upatian. Ne javén, džása ke jov.” Tedy Fama, Saves pe javír kharéna ‘Blizniato,’ phendiá sykliaibnytkonénge: “Javén i ame merasa lésa khetané.” Kiéli Isúso javdiá, Jov udžindiá, so Lazarjo, ĥáda, štar dyvesá, syr jov isyn paštó muló dre koplíca. Vifanija sys nádur Jerusalimóstyr, pašé duj versty odothýr, i but manušá Judendyr javné ke Marfa i ke Maríia, sob (kaj) te štyliakiren len dro piridživiben pal léngire pšaléste. Marfa, syr šundiá, so Isúso džála ke jone, gijá te streninel Les; a Maríia sys bešty kheré. Tedy Marfa phendiá Isusóske: “Rajo Dévla! Kóli Tu te javes adái, tedy na merelas by miro pšal; Ne i kakaná, me džinóm (džináv), so Devél déla Túke saró, pal so Tu Les pomangesa.” Isúso rakiréla láke: “Tyró pšal otdžidjola.” Marfa phendiá Léske: “Me džinóm (džináv), so jov otdžidjola dro palatunó (posliednjo) dyvés.” Isúso phendiá láke: “Me som otdžidiakiriben i džiibén; odová, kon patiála dre Mánde, kóli i meréla, usajékh otdžidjola; I kažno, kon isyn džidó i patiála dre Mánde, na meréla nijékhvar. Ci patiása tu dro davá?” Joj rakiréla Léske: “Adiáke, Rajo Dévla! Me patiáva, so Tu san Xristóso, Čhavó Devléskiro, savó džála dro svéto.” I kiéli Marfa phendiá davá, joj čorahanés gijá i khardiá peskirjá pheniá Maríia, rakirí láke: “Sykliakiribnáskiro isyn adái, Jov kharéla tut.” Kiéli joj šundiá davá, joj sýges uštyjá i gijá ke Jov. Isúso na zagijá dro gav, ne Jov jaciápe pe dová štéto, kaj Marfa strenindia (pirilyja) Les. Judy, savé sys lása khetané dro kher i štyliakirenas la, dykhí, so Maríia sýges uštyjá i gijá javrí, giné pal láte, i jone dumindle, so joj gijá te rovel pe maĥila odój. Ne Maríia, syr javdiá odorík, kaj sys Isúso, i dykhciá Les, pyjá ke Léskire ĥerá i phendiá Léske: “Rajo Dévla! Kóli Tu javesas adái, na merelas miro pšal.” Kiéli Isúso dykhciá, so joj rovela i, so Judy adiáke-pac' rovena, savé javné lása, Jov Kokoró pyjá dro dúho i Jov piridživelas. I Jov phuciá: “Kaj tumé garadé les?” Rakiréna Léske: “Rajo Dévla! Džá i dykh adarík.” Isúso zarondia. Judy tedy rakirdé: “Dykhén, syr jov isyn drógo Léske!” Ne javír léndyr phendlé: “Jov kerdiá, so i kororó jaciá te dykhél, ci na moginéla jov te kerél adiáke, sob (kaj) i Lazarjo te na merél?” Isúso, nevéstyr piridživi andrál, javdiá ke koplíca. Davá sys ĥiebár (pieščera) dre bérga, i bar sys paštó pe láte. Isúso rakiréla: “Ukeden bar.” Phen muleskiri, Marfa, rakiréla Léske: “Rajo Dévla! Odothýr džála khan; pal-dová so, ĥáda, štar dyvesá, syr jov isyn dre koplíca.” Isúso rakiréla láke: “Ci Me na rakirdjom túke, so kóli javésa te patias, dykhésa Devléskiri sláva?” I, ĥáda, ukedyne bar odolé štetóstyr, kaj muló sys paštó. Isúso ĥazdyjá upré jakhá i phendiá: “Dádo! Parikirava Túke, so Tu kandyjan Man; Me džindjom, so Tu ŭsády (sak) šunesa Man; ne Me phendjom davá vaš manušénge, savé sys terdé adái, mek te patián jone, so Tu bičhadian Man.” I kiéli Jov phendiá davá, Jov dyjá gódla zoralé zaniása: “Lazarie! Vydža javrí.” I vygijá muló, ĥerá i vastá léste sys sphandle garaibnytkone thanesa, i muj léskiro sys phandlo dyhlesa. Isúso phendiá lénge: “Rosphanden les, mek jov te džal.” But Judy javné ke Maríia, syr jone dykhné, so kerdiá Isúso, patiandyné dre Léste; Ne vari-savé léndyr giné ke Farisiéi, i rosphendlé lénge pal dová, so kerdiá Isúso. Tedy rašángire barydyrá i Farisiéi khardé skedyibén i rakirdé: “So aménge te kerás? Adavá Manúš keréla but dívy. Kóli ame domekasa, sob (kaj) Jov te kerél duredýr adiáke, tedy saré upatiana dre Léste, i javéna Rimliani i xasiakirena amarí phuv i saré manušén.” Jekh léndyr, vari-savó Kaiáfa, savó sys dre dová berš pérvo rašángiro barydyró, phendiá lénge: “Tumé na džinéna nisó. Naúšto na ĥaljona tumé, so vaš aménge javéla fedýr, kóli jekh manúš te merél pal saré manušénde, a sob (kaj) saré manušá te na xasjon.” Davá jov phendiá na kokoró péstyr, ne pal-dová so jov sys pérvo rašáj pe dová berš, jov angilphendia, so Isúso meréla pal manušénde, I na pal jekhe adalé manušénde, ne i vaš dová, sob (kaj) te skedén khetané sarén Devleskiren čhavén, savé isyn rosčhurdyne pir phuv. I adalé dyvestyr jone jačné te duminen, syr te muliakirén Isusós. I paldavá Isúso na javélas muj pe muj maškír Judénde, a Jov gijá odothýr dro fóro, savó kharéna Jefraimo, nádur pašýl čhučí phuv, i Jov jaciápe odój Péskire sykliaibnytkonénca. Javélas syg Judýtko Patradí, i but manušá adalé rigátyr javné dro Jerusalimo angíl Patradí, sob (kaj) te obžužakirenpe (te občystinenpe). Manušá rodyne Isusós i rakirdé maškír péste, syr jone skedynépe dre Khangirí: “Syr tumé duminéna? Naúšto Jov sarésa na javéla pe svénko?” Rašángire barydyrá i Farisiéi dyné uphenybén, so kažno, kon udžinela, kaj Jov isyn, tedy mek te phenél pal davá, sob (kaj) Jone te moginen te len Les. Pe šov dyvesá angíl Patradí Isúso javdiá dre Vifanija, dro dová-pac' gav, kaj dživdiá Lazarjo, Saves Jov otdžidiakirdiá muléndyr. Jone kerdé xabén vaš Léske, i Marfa podelas xabén pe skamínd, a Lazarjo sys beštó pal skamínd khetané Isusósa. Maríia dro dová časo (cýro), lyjá khoró drieván drogoné mirósa žužé nardostyr, vymakhcia lésa Isusóskire ĥerá i vykostia Léskire ĥerá péskire balenca; i saró kher pherdija lačhesungeskire khandypnasa mirostyr. Tedy jekh Léskire sykliaibnytkonendyr, Juda Iskarioto, odová-pac', savó kamdiá Les te zdel, phendiá: “Sóske sys te na biknas davá miro pal trin šelá dinarii i te na rozdas bogenge?” Jov phendiá davá na pal-dová, so jov dumindia dro iló pal bogénde, ne pal-dová, so jov sys čor. Jov lydžalas pésa lové dre tyknori, savé manušá skedéna i but móly lelas odothýr vaš péske. Isúso phendiá: “Na čilaven la; joj davá rakhciá pe Miro garaibnytko dyvés; Pal-dová so bógi ŭsády (sak) javéna tuménca, ne Me na javáva ŭsády (sak) tuménca.” But Judendyr udžindlé, so Jov sys odój, i javné odorík na vaš jekhe Isusóske, ne sob (kaj) te dykhén Lazarjos, savés Jov otdžidiakirdiá muléndyr. Tedy rašángire barydyrá skedynépe te muliakirén i Lazarjos. Pal-dová so pal léste but Judy javénas ke Isúso i patiandyné. Pe javír dyvés but manušá, savé javné pe svénko, syr udžindlé, so Isúso džála dro Jerusalimo, lyné pal'matyr randiá i vyginé angíl Léste i godlenas: “Asanna! Mek te javél bahtiakirdó, Savó džála vaš Devléskiro lav, Králi Izrailjoskiro!” Isúso, lathiá terné oslós, besciá pe léste, syr adiáke i isyn čhindló dro Svénto Čhinybén: “Na andyršan, Sionoskire manušále! Ake, tyró Králi tradéla ke tu, uklisté pe terné osloste.” Léskire sykliaibnýtka na ĥalyné davá; ne, kiéli Isúso sys slavindlo, tedy jone ripirde, so adiáke sys čhindló pal Léste dro Svénto Čhinybén, i adiáke jone kerdé Léske. Manušá, angíl savénde Isúso ĥazdyjá Lazarjos maĥilatyr i otdžidiakirdiá muléndyr, dophenelas pal davá; paldová i vyginé te streninen (te pirilen) Les manušá, syr jone šundlé, so Jov kerdiá dasavo dívo. Farisiéi ž rakirdé maškír péste: “Ci dykhéna tumé, so tumé san bizorjákire vari-so te kerén; saró svéto džála pal Léste.” Maškir odolénde, savé javné pe svénko te mangénpe Devléske, sys i Griéki (Balamé); jone podginé ke Filipo, savó sys odolé štetóstyr Vifsaidatyr, so isyn dre Galiliéia, i mangné les, rakirí: “Rajo! Ame kamas te dykhas Isusós.” Filipo gijá i phendiá pal davá Jendriske; i jone, Jendri i Filipo, giné dujdžiné i phendlé Isusóske pal davá. Isúso otphendiá lénge: “Javdiá mardó vaš davá, sob (kaj) te slavinelpe Manušéskiro Čhavó. Čačes, čačes Me rakiráva tuménge: kóli mareskiri ziárka, so pyjá dre phuv, na meréla, tedy joj iačélape jekh; ne kóli meréla, tedy janéla but barjakirdé (plódy). Odová, konéske isyn na drógo péskiro džiibén, xasiakiréla les; ne konéske na drógo péskiro džiibén dro davá svéto, odová les rakhéla vaš viéčno džiibén. Odová, savó Mánge dynarinela, mek te džal pal Mánde, i kaj Me som odój i dynári Miro javéla; i odoléske, kon Mánge javéla te dynarinél, odolés Miro Dad slavinela. Miro Dúho (Fáno) pyjá kakaná; i so Mánge te phenáv? Dádo! Zrákh Man dalé mardestyr (štundatyr)! Ne Me vaš davá i javdjom ke davá mardó. Dádo, proslavin Tyró lav.” I bolybnástyr rozdyjape zan: “I Me proslavindjom, i iščo (inké) Me javáva te slavinav.” Manušá, savé sys terdé odój i šundlé zan, jekh rakirdé, so davá gromo grukindia. Ne javír rakirdé: “Davá Jangólo rakirdiá Lésa.” Isúso phendiá pe davá: “Na vaš Mánge sys kadaja zan, joj sys vaš tuménge, manušénge; kakaná javdiá séndo kadalé svetoske; i Králi adalé svetoskiro javéla tradyno javrí; Ne kiéli Me javáva ĥazdynó phuvjátyr, tedy Me láva sarén manušén ke Pe.” Davá Jov rakirdiá, sob (kaj) jone te ĥaljon, savé meribnasa Jov meréla. Manušá otphendlé Léske: “Ame udžindiam Zakonóstyr; so Xristóso na meréla nijékhvar; syr Tu rakirésa, so Čhavó Manušéskiro javéla ĥazdynó? I kon adavá isyn Manušéskiro Čhavó?” Tedy Isúso phendiá lénge: “Sarésa pe nábut časo dud (svéto) isyn tuménca. Psirén, paka isyn dud, sob (kaj) te na čhakirel tumen kalypén (cjomnyma). Ne odová, kon psiréla dro kalypén, odová na džinéla, karik jov džála. Ne paka dud svencynela tuménge, patián dre dud, i tumé javéna dudeskire čhavé.” Dalé lavénca Isúso gijá i nikón na džindiá, kaj Jov sys. Xoc' Jov kerdiá adákicy but dívy angíl lénde, jone usajékh na patiandyné dre Léste, mek te spolninélpe Isajoskire-prorokoskiro lav: “Rajo Dévla! Kon patiandyja zaniake (zviesiake), saví šundlé améndyr, i konéske otčhakirdiape Devléskiri zor?” I paldavá jone na mogindlé te patián, so i phendiá nevéstyr Isajo: “Adalé manušá jačné kororé i léngire ile jačné baruné adiáke, so jone na dykhéna péskire jakhénca i na ĥaljona godiása, i na javéna, sob (kaj) Me te vysastiakirav len.” Kadavá phendiá Isajo, pal-dová so jov dykhciá Isusoskiri sláva, jov davá rakirdiá pal Isusóste. Adiáke-pac' but baré randyr upatiándyne dre Isusóste, ne jone darándyne Farisiejendyr te priĥaljon davá, sob (kaj) kodolé te na tradén len javrí Khangirjátyr; pal-dová so manušýtko sláva sys vaš lénge drogedyr, syr sláva Devléstyr. Isúso zoralés dyjá gódla i phendiá: “Odová, kon dre Mánde patiála, jov na dre Mánde patiála, ne jov patiála dre Odoléste, Kon bičhadiá Man; odová, kon dykhéla Man, dykhéla i Odolés, kon bičhadiá Man. Me javdjom syr dud dro svéto, sob (kaj) kažno, kon patiála dre Mánde, te na jačélpe dro kalypén (cjomnyma). I kon šunéla lavá Miré i na javéla te patial, na Me javáva léske sendári, pal-dová so Me javdjom na vaš davá, sob (kaj) te sendinav svéto, a Me javdjom vaš dová, sob (kaj) te zrakhav les. Odová, kon Man na priĥaljola i na kaméla te prilel Miro Lav, pe dasaveste isyn sendári: Lav, savó Me rakirdjom, jov javéla te sendinel les dro palatunó (posliednjo) dyvés. Pal-dová so Me na Kokoró Péstyr rakirdjom, a Miro Dad, Kon bičhadiá Man, Jov dyjá priphenybén Mánge, so te rakiráv i syr; i Me džinóm (džináv), so Léskiro priphenybén isyn viéčno džiibén. Me rakiráva dová, so Dad phendiá Mánge te rakiráv.” Angíl svénko Patradí Isúso, syr džindiá, so javdiá pašyledýr mardó (štúnda) vaš Léske te mekel davá svéto i te risjol ke Dad, Léske jačné drieván dróga odolé, savé dživdé Lésa pe davá svéto, i kakaná Jov sykadiá sarí zor Péskire laskasa ke jone. Bel'velié, kiéli jone xanas, nálačho čhudiá myslia dro iló Judáske, Simonoskire čhavéske Iskariotoskireske te zdel Isusós. Isúso džindiá, so Dad saró otdyjá dre Léskire vastá, i so Jov javdiá Devléstyr i risjola ke Devél. Isúso uštyjá skamindestyr, zlyjá Péstyr upratuno uribén, lyjá rušnika (khosno) i podphandiape lása. Paló (poslie) Jov čhudiá paní dro moribnaskiro čaró i lyjá te morel ĥerá sykliaibnytkonénge i te khosel rušnikasa, savjása Jov sys podphandlo. Kiéli Jov podgíia ke Símono Pétri, odová rakiréla Léske: “Rajo Dévla! Tu javésa te mores ĥerá mánge? Isúso otphendiá léske: “So Me keráva, kakaná tu na ĥaljosa, ne saró tu ĥaljosa korigedýr.” Pétri rakiréla Léske: “Tu nijékhvar na vymoresa ĥerá miré.” Isúso otphendiá léske: “Kóli Me na vymorava túke ĥerá, tedy tu na san Mánca khetané dre paš.” Tedy Pétri rakiréla Léske: “Rajo Dévla! Mor, na jekh ĥerá i vastá miré, ne i šeró.” Isúso rakiréla Léske: “Žužé (čystone) manušéske trej jekh ĥerá te vymorel, pal-dová so jov isyn žužó; i tumé san žužé, ne na saré. Pal-dová so Jov džindiá Péskires zdyibnaris, paldavá adiáke i phendiá, so na saré jone sys žužé. Ne kiéli Isúso vymordia lénge ĥerá i uridia Péskiro uribén, Jov besciá pe Péskiro štéto i phendiá lénge: “Ci tumé na džinéna, so Me kerdjom vaš tuménge? Tumé Man kharéna “Sykliakiribnáskiro” i “Devél”, i mištó keréna, pal-dová so Me adasavó i Som. I kóli Me, Devél i Sykliakiribnáskiro vymordjom tuménge ĥerá, adiáke-pac' i tuménge trej te moren ĥerá jekh jekhéske. Me dyjom tuménge primiéro (sykaibén), sob (kaj) i tumé te kerén adiáke-pac', so Me kerdjom tuménge. Čačes, čačes Me rakiráva tuménge: dynári isyn na baredýr péskire Rástyr, i odová, kon bičhadó, nane baredýr odoléstyr, Kon bičhadiá les. Kóli tumé džinéna davá, tumé javéna bahtalé, kóli i javéna te kerén adiáke-pac'. Me na pal sarénde tuménge rakiráva. Me džinóm (džináv) odolén, savén Me vykedyjom; ne mek te spolninélpe Svénto Čhinybén: Odová, kon xála maró khetané Mánca, ĥazdyjá ĥerój pe Mánde. Kakaná Me rakiráva tuménge: angíl, syr davá spolninelape, sob (kaj) tumé te patián, so davá som Me. Čačes, čačes Me rakiráva tuménge: kon priléla odolés, konés Me bičhaváva, priléla Man; ne kon priléla Man, priléla Odolés, Kon bičhadiá Man.” Kiéli Isúso phendiá davá, Jov drieván piridživelas dro iló i dosykadia i vyphendia: “Čačes, čačes Me rakiráva tuménge, so jekh tuméndyr zdela Man.” Tedy sykliaibnýtka, dykhí jekh pe jekhéste, na džindlé, pal konéste Jov rakirdiá. Jekh Léskire sykliaibnytkonendyr, savó sys drógo Isusóske, sys paštó pašýl Isusóskiro kolýn. Símono Pétri podphendia šperása (znakosa) léske, sob (kaj) odová te phučel Léstyr, pal konéste Jov rakiréla. I sykliaibnýtko, syr priklonindiape ke Isusóskiro kolýn, phendiá Léske: “Rajo Dévla! Kon adavá isyn?” Isúso otphendiá: “Odová, konéske Me bolavava kotér maró i podava”, i Jov podyja kotér maró Judáske, Simonoskire-Iskariotoskire čhavéske. I tedy paló davá kotér, nálačho zagijá dre léste. Tedy Isúso phendiá léske: “So kerésa, ker sygedýr.” Ne nikón, kon sys beštó odój, na ĥalyjá, ke so Jov phendiá davá léske. Vari-savé léndyr dumindle, so, syr Judaste sys lovitko tyknori, paldavá Isúso rakirdiá léske: “Kin, so aménge trej ke svénko, ci sob (kaj) te das vari-so bogenge.” Juda lyjá kotér maró, i adáj že gijá javrí; i davá sys rat. Kiéli jov gijá, Isúso phendiá: “Kakaná Čhavó Manušéskiro slavindiape i Devél slavindiape dre Léste. Kóli Devél slavindiape dre Léste, tedy i Devél proslavinela Les dre Péste, i syg proslavinela Les. Čhavale Miré! Nábut Mánge jaciápe te javav tuménca. Tumé javéna te rodén Man, i syr Me phendjom Judénge: Karik Me džáva, tumé na moginéna te javén, adiáke Me i tuménge rakiráva. Me dáva tuménge nevó priphenybén: javén dróga jekh vaš jekhéske; syr Mánge, adiáke-pac' i tumé javén dróga jekh vaš jekhéske. Pir davá udžinena saré, so tumé san Miré sykliaibnýtka, kóli javéla láska maškír tuménde.” Símono Pétri phendiá Léske: “Rajo Dévla! Karik Tu džása?” Isúso rakiréla léske: “Karik Me džáva, túke naštý (na moginésa) te džas kakaná pal Mánde, ne korigedýr džása pal Mánde.” Pétri phendiá Léske: “Rajo Dévla! Sóske Mánge naštý te džav pal Túte kakaná? Me čhuváva péskiro iló pal Túte.” Isúso otphendiá léske: “Čhuvésa iló péskiro pal Mánde? Čačes, čačes Me rakiráva túke: na probagala bašno, syr tu trin móly otphenesape Mándyr.” “Mek iló tumaró te na strahadjol; patián dre Devléste i patián dre Mánde. Dre Miré-Dadéskiro kher isyn but štéty; ne kóli te na javél adiáke, Me phenavas tuménge: Me džáva te kedav štéto tuménge?” I kiéli Me džáva i kedava štéto tuménge, Me javáva nevéstyr i lavá tumen ke Pe; sob (kaj) i tumé te javén odój, kaj Me javáva. A karik Me džáva, tumé džinéna i drom odorík isyn džindló tuménge.” Fama phendiá Léske: “Rajo Dévla! Ame na džinása, karik Tu džása; syr ame moginasa te džinas drom odorík?” Isúso phendiá léske: “Me som drom i čačipén i džiibén; nikón na javéla ke Dad, syr jekh pir Mánde. Kóli tumé te džinén Man, tedy tumé džinenas i Miré Dadés; i kakaná tumé džinéna Les i dykhné Les.” Filipo phendiá Léske: “Rajo Dévla! Sykáv aménge Dadés, i butýr aménge nisó na trej.” Isúso phendiá léske: “Ci na ĥará” (dlúges) Me som tuménca, i tu na džinésa Man, Filipo? Odová, kon dykhciá Man, dykhciá i Dadés; syr tu rakirésa: ‘Sykáv aménge Dadés?’ Ci tu na patiása, so Me som dre Dadéste i Dad isyn dre Mánde? Lavá, savé Me rakiráva tuménge, Me rakiráva na Péstyr; adavá Dad, Savó isyn dre Mánde, Jov keréla Péskire réndy. Patián Mánge, so Me som dre Dadéste i Dad isyn dre Mánde; ne kóli na patiána Mánge, tedy patián pir kokoré Miré réndy. Čačes, čačes Me rakiráva tuménge: Odová, kon patiála dre Mánde, javéla te kerél dasavé-pac' réndy, so i Me keráva i butýr odolé rendéndyr jov keréla; pal-dová so Me džáva ke Miro Dad. I so tumé te na pomangen Dadéstyr Miré lavéstyr, Me saró keráva dová, i Dad sykavéla Péskiri sláva pir Čhavéste. Kóli so te ná mangen Miré lavéstyr, Me dová keráva. Kóli tumé rikiréna Man syr Drógima dro iló, to kerén dová, so Me priphendjom tuménge. I Me pomangava Dadés, i Jov déla tuménge javire Obradypnáskires (Utiešytieljos), savó ŭsády (sak) javéla tuménca; davá isyn Dúho (Fáno) čačipnáskiro, Saves svéto naštý te prilel, pal-dová so jov na dykhéla Les i na džinéla; ne tumé Les džinéna, pal-dová so Jov isyn tuménca i javéla dre tuménde. Me na jačkirava tumen pirotenca (sirotenca), Me javáva ke tumé. Sarésa nábut, i svéto Man na javéla te dykhél, ne tumé dykhéna Man, pal-dová so Me dživáva, i tumé javéna te dživén. Dre dová dyvés tumé javéna te džinén, so Me som dre Miré Dadéste, i tumé san dre Mánde, i Me som dre tuménde. Odová, konéste isyn Miré priphenybená, i kon rakhéla len, odová rikiréla Man syr Drógima dro iló, i Dad Miro sykavéla patýv léske, i Me adiáke-pac' javáva te sykavav patýv léske, i Me sykadjovava Kokoró Pes léske.” Juda, savó na sys Iskarioto, rakiréla Léske: “Rajo Dévla! Syr da Tu skedesape te sykadjos aménge, a na svetoske?” Isúso otphendiá léske: “Kóli vari-konéske som drógo Me, odová manúš zrakhéla Miro lav; i tedy Miré Dadéske javéla drógo jov, i ame javása ke jov i ame javása te dživás ke jov. Odová, konéske na drógo som Me, odová manúš na rakhéla Miré lavá; ne lav, savó tumé šunéna, davá isyn na Miro, a Dadéskiro, Savó bičhadiá Man. Me phendjom tuménge davá, kiéli Me sómas khetané tuménca. Obradypnaskiro, Savó isyn Dúho (Fáno) Svénto, Savó bičhavéla Dad vaš Miro lav, vysykliakirela tumen sareske i saró čhuvéla dre tumarí godý, pal so Me rakirdjom tuménge. Me jačkirava ramánjo (miro) tuménge, Miro ramánjo Me dáva tuménge: ne na adiáke, syr svéto déla, Me dáva tuménge, i mek te na strahadjol tumaró iló, i te na darel. Tumé šundlé, so Me phendjom tuménge: ‘Me džáva krig tuméndyr i javáva ke tumé. Kóli tuménge Me javavas drógo, tumé javénas ráda, so Me džáva ke Dad; pal-dová so Miro Dad isyn baredýr Mándyr’. I, ĥáda, Me phendjom tuménge saró angledýr doléstyr, syr davá kerélape vaš dová, sob (kaj) tumé te patián, kiéli davá kerélape. Me kakaná na javáva but te rakiráv tuménca, pal-dová so džála dalé-svetoskiro xulái, ne jov isyn na xuláj pe Mánde. Ne, sob (kaj) svéto te džinél, so Mánge isyn drógo Dad i, syr phendiá Mánge Dad, adiáke Me saró keráva: ‘Uštén, džása adathýr.’” Me som čačunó vinagradoskiro Kašt (Loza), i Miro Dad isyn vinagradnikoskiro Xulái. Kažno rand' (vetka), saví isyn dre Mánde, i saví na déla barjakirdó (plódo), Jov občingirela; i kažno rand', saví déla barjakirdó, Jov žužakirela (čystinela), sob (kaj) joj butedýr te del barjakirdó. Tumé kakaná san žužé Miré lavéndyr, savé Me rakirdjom tuménge. Jačénpe dre Mánde, syr Me som dre tuménde. Syr rand' kokori péstyr na moginéla te del barjakirdó, kóli joj na javéla te barjol kaštéstyr: adiáke-pac' i tumé na moginéna, kóli tumé na jačénape dre Mánde. Me som Kašt, ne tumé san Miré randiá: odová, kon isyn na dre Mánde, syr i Me som dre léste, odová déla but barjakirdé; pal-dová so bi Miro tumé na moginéna nisó te kerén. Ne, kon na dre Mánde, odová isyn syr rand', saví čhurdelape javrí, saví zašutjola; ne adasavé randiá skedéna i čhurdena dre jag, i odój jone shačona. Ne kóli tumé jačénape dre Mánde i Miré lavá jačénape dre tuménde, tedy mangén, so tuménge trej, i tuménge javéla dynó. Dalésa Miro Dad slavinelape, kóli tumé déna but barjakirdé, i tumé javéna Miré sykliaibnýtka. I syr jacjom drógo Me Miré Dadéske, adiáke-pac' i Mánge jačné dróga tumé; jačénpe dro Mirí láska. Kóli tumé javéna te rakhén Miré priphenybená, to tumé javéna te jačénpe dro Mirí láska, adiáke-pac', syr i Me rakhcjom Miré-Dadéskire priphenybená, i Me dživáva dro Léskiri láska. Davá Me phendjom tuménge, sob (kaj) Mirí rádyma te jačél tuménca, i, sob (kaj) tumarí rádyma te javél pherdý. Ĥáda, isyn Miro priphenybén tuménge: javén dróga jekh jekhéske, adiáke-pac' syr Me jacjom drógo tuménge. Nane baredýr dolé laskatyr, kóli vari-kon otdéla péskiro džiibén pal malende. Tumé san Miré drúgi (malá), kóli tumé keréna dová, so Me priphendjom tuménge. Me kakaná na kharáva tumen dynar'jénca, pal-dová so dynári na džinéla, so keréla léskiro xulái; ne Me kharáva tumen Péskire drugenca (malenca), pal-dová so Me phendjom tuménge saró, so šundjom Miré Dadéstyr. Na tumé vykedyné Man, ne davá Me tumen vykedyjom, sob (kaj) tumé te džán i den barjakirdó i, sob (kaj) barjakirdó tumaró te barjol i tedy, pal so tumé na pomangenas Miré Dadés Miré lavéstyr, Jov déla tuménge. Ĥáda, so Me priphenava tuménge: sykavén patýv jekh jekhéske. Kóli svéto na déla patýv tuménge, džinén, so jov Man angledýr tuméndyr svéto na délas patýv. Kóli tumé te javén dalé svetóstyr, tedy léske javénas dróga tumé, syr péskire; ne adiáke, syr tumé na san dalé svetóstyr, ne Me vykedyjom tumen dalé svetóstyr, paldavá tumé san na dróga svetoske. Ripiren lav, savó Me phendjom tuménge: dynári isyn na baredýr péskire xulastyr. Kóli jone Man tradyne, i tumen javéna te tradén; kóli jone Miro lav kandenas, jone javéna te kandén i tumaró lav. Ne saró davá jone javéna te kerén tuménge pal Miro lav, pal-dová so jone na džinéna Odolés, Kon bičhadiá Man. Kóli Me te na javav i te na rakiráv lénge, tedy lénde na javélas grého; ne kakaná lénge nane otmekiben dre léngiro grého. Odová, konéske na drógo Me som, odoléske isyn na drógo i Miro Dad. Kóli Me te na keráv angíl lénde réndy, savé javír nikón na kerdiá, tedy lénde na javélas grého; ne kakaná ž jone dykhné len i usajékh bidykhena (na déna patýv) Man i Miré Dadés. Ne mek te kerélpe lav, savó isyn čhindló dro léngiro Zakóno: ‘Jone bidykhena Man ni palsó’. Kiéli javéla Obradypnaskiro (Utiešytielie) ke tumé, savés Me bičhaváva tuménge Miré Dadéstyr, jov isyn čačunó Dúho (Fáno), Jov džála Dadéstyr, Jov Kokoró javéla te dophenel pal Mánde. Ne adiáke-pac' i tumé javéna te dophenen, pal-dová so tumé sánas Mánca samone anglypnástyr. Me phendjom davá tuménge, sob (kaj) tumé te na otperen. Tumen tradéna javrí khangir'jendyr; i javéla dasavo časo (cýro), kiéli odová manúš, savó zamarela tumen, javéla te duminel, so jov dalésa dynarinela Devléske. Jone javéna te kerén adiáke, pal-dová so adalé manušá na džindlé ni Dadés, ni Man. Ne Me phendjom tuménge davá vaš dová, sob (kaj) tumé, kiéli javéla odová časo, te ripirén, so Me rakirdjom tuménge pal davá; Me angledýr na rakirdjom tuménge pal davá, pal-dová so Me sómas tuménca. Ne kakaná Me džáva ke Odová, Kon bičhadiá Man, ne nikón tuméndyr na phučela Mándyr: ‘Karik Tu džása?’ Ne doléstyr, so Me phendjom dová tuménge, tumaró iló jaciá te piridživel. Ne Me, čačes, rakiráva tuménge: fedýr vaš tuménge, sob (kaj) Me te džav; kóli Me na džáva, tedy Obradypnaskiro na javéla ke tumé, ne kóli Me džáva, tedy Me bičhaváva Les ke tumé. I, kiéli Jov javéla, bangiakirela svéto pal grého, i pal čačipén, i pal séndo: pal grého, savó isyn dre dová, so manušá na patiána dre Mánde; pal čačipén, so Me džáva ke Miro Dad, i tumé butýr na dykhéna Man; pal séndo, so kadalé svetoskiro králi javéla sendindlo. Kakaná but so isyn te phenáv tuménge, ne tumé akaná na moginéna te ĥaljon. Kiéli javéla Jov, čačipnáskiro Dúho (Fáno), tedy sykavéla tuménge čačunó drom dro džiibén; pal-dová so Jov javéla te rakirél na Kokoró Péstyr, ne Jov phenéla tuménge odová, so šunéla, i Jov phenéla, so javéla angíl. Jov slavinela Man, pal-dová so saró, so Jov phenéla, Jov udžinela Mándyr i rosphenéla tuménge. Saró, so isyn Dadéste, isyn Miro. Paldavá Me phendjom tuménge, so Jov Mándyr udžinela i rosphenéla tuménge. Syg tumé na dykhéna Man, ne syg tumé nevéstyr javéna te dykhén Man; pal-dová so Me džáva ke Dad.” Adáj vari-savé Léskire sykliaibnýtka phendlé jekh jekhéske: “So davá Jov rakiréla aménge: ‘Syg tumé na javéna te dykhén Man’, a syg tumé nevés dykhéna Man, i: ‘Me džáva ke Dad’?” I adiáke jone rakirdé: “So da dasavo Jov rakiréla: ‘Syg?’ Ame na ĥaljovasa, so Jov rakiréla.” Isúso ĥalyjá, pal so jone kaména te phučén Léstyr, i phendiá lénge: “Ci pal dová tumé phučena jekh jekhestyr, so Me phendjom: ‘So syg tumé na javéna te dykhén Man, ne nevéstyr syg tumé dykhéna Man?’ Čačes, čačes rakiráva Me tuménge: tumé javéna te rovén i te piridživen, ne svéto javéla te radynélpe; tumé javéna te smentninen (te tuginen), ne tumarí smentnyma jačéla radymása. Džuvlý, kiéli bijanéla, menčynelape, pal-dová so javdiá lákiro mardó (štúnda); ne kiéli joj bijanéla tyknores, bistrela radymátyr pal mén'ki, pal-dová so bijándyja manúš pe svéto. Adiáke-pac' i tumé kakaná san smentna; ne Me javáva te dykháv nevéstyr tumen, i iló tumaró javéla pherdó radymása, daja rádyma tuméndyr nikón na otlela. I dro odová dyvés tumé na phučena Mándyr ni pal so. Čačes, čačes Me rakiráva tuménge: pal so tumé te na mangén Dadés Miré lavéstyr, Jov déla tuménge. Ke davá časo tumé nisó na mangné Miré lavésa, mangén, i doreséna, sob (kaj) rádyma dro tumaró iló te javél pherdý. Ke davá časo Me rakirdjom tuménge pritčenca, ne syg javéla časo, kiéli Me na javáva te rakiráv tuménge pritčy, ne mamúj (priames) Me phenáva tuménge pal Dadéste. Dre odová dyvés tumé javéna te mangén Miré lavéstyr i Me na rakiráva tuménge, so Me javáva te mangav pal tuménde Dadés: pal-dová so Kokoreske Dadéske tumé san dróga, pal tumarí láska ke Me i pal patiaibén, so Me javdjom Devléstyr. Me javdjom Dadéstyr dro davá svéto; i nevéstyr Me mekava svéto i džáva ke Dad.” Léskire sykliaibnýtka phendlé Léske: “Ĥáda, kakaná Tu rakirésa mamúi, i Tu na rakirésa nisave pritčy!” Kakaná ame dykhasa, so Tu saró džinésa angledýr, i na trej, sob (kaj) vari-kon te phučel Tútyr; paldavá ame patiása, so Tu javdián Devléstyr.” Isúso otphendiá lénge: “Kakaná tumé patiána? Ĥáda, syg poddžála mardó (štúnda), i podgíia kakaná, so tumé rosprastanape kažno dre péskiri rig i Man tumé jačkirena Jekhés; ne Me na som Jekhdžinó, pal-dová so Dad isyn Mánca; ĥáda, Me phendjom tuménge, sob (kaj) tumé te javén dro ramánjo Mánca. Dro svéto mén'ki tumen užakiréna; ne rikirenpe murškanés: Me zbierdyndjom (pirizorjakirdjom) davá svéto” Paló dalé lavá Isúso ĥazdyjá péskire jakhá pe bolybén i phendiá: “Dádo! Miro mardó (časo) javdiá: slavin Péskire Čhavés, sob (kaj) Čhavó te slavinel Tut, adiáke-pac', syr Tu dyján Léske pravo pe kažno loč (plot'), adiáke-pac' i Jov déla viéčno džiibén odolénge, konés Tu dyján Léske. A viéčno džiibén isyn dro dová, sob (kaj) te džinén Tut, Jekhés Čačipnaskire Devlés, i Isusós Xristosós, Saves Tu bičhadian. Me slavindjom Tut pe phuv, kerdjom butý, saví Tu dopatiandyjan Mánge te keráv. I kakaná, Dádo, slavin Man slavása, saví sys Mánde, kiéli Me sómas Túte angíl, syr svéto sys sozdynó. Me otčhakirdjom lav Tyró manušénge, savén Tu dyján Mánge svetóstyr. Adalé manušá sys Tyré, i Tu Mánge dyján len, i jone rakhne Tyró lav. Kakaná jone ĥalyné, so saró, so Tu dyján Mánge, isyn Tútyr; pal-dová so lav, savó Tu Mánge dyján, Me dyjom lénge, i jone prilyné les i čačunés ĥalyné, so Me javdjom Tútyr, i jone patiána, so Tu bičhadian Man. Ake, Me mangáva pal lénde: Na pal saró svéto mangáva, a pal odolénde, savén Tu dyján Mánge, pal-dová so jone isyn Tyré. Pal-dová so saró, so isyn Mánde-Tyró, i Miro saró, so isyn Túte, i dre lénde Me proslavindjompe. Me na som butýr dro svéto, a jone isyn dro svéto. Me džáva ke Tu, ne jone jačénape dro svéto. Svénto Dádo! Zrákh len Tyré lavésa, odolén, savén Tu dyján Mánge, sob (kaj) jone te javén pal jekh, syr i Ame sam Túsa. Kiéli Me sómas lénca dro svéto, Me prirakhavas len Tyré lavésa; odolén, savén Tu dyján Mánge, Me prirakhcjom, i nikón léndyr na xasijá apríč čhavéste, savéske trej te xasjol, mek te spolninélpe Svénto Čhinybén. Kakaná Me džáva ke Tu, i davá Me rakiráva, paka Me som dro svéto, sob (kaj) lénde te javél Mirí pherdý rádyma dre péste. Me piridyjom lav Tyró lénge, i svetoske sys drieván na pir iló, pal-davá so jone nane dalé svetóstyr, syr i Me na som dalé svetóstyr. Me na mangáva, sob (kaj) Tu te les len svetóstyr, ne sob (kaj) Tu te prirakhes len čoripnástyr; jone isyn na dalé svetóstyr, syr i Me na som dalé svetóstyr. Ker len sventonenca Tyré čačipnása. Tyró lav isyn čačipén. Syr Tu bičhadian Man dre svéto, adiáke-pac' i Me bičhadjom len dro davá svéto. Me otdyjom pes Túke pal lénde, sob (kaj) i jone te otdén pes Túke pir čačipén. Ne Me mangáva na pal jekhende lénde, ne i pal odolénde, savé patiána dre Mánde pir léngiro lav; sob (kaj) jone te javén saré syr jekh, syr Tu, Dádo, san dre Mánde, i Me som dre Túte, adiáke-pac' Me i jone te javén dre Aménde, mek te upatial svéto, so Tu bičhadian Man. I bari patýv, saví Tu dyján Mánge, Me dyjom lénge: mek te javén jone pal jekh, syr Ame sam Túsa jekh. Me som dre lénde, i Tu san dre Mánde; mek jone te javén skedyné dro jekh, i mek svéto te džinél, so Tu bičhadian Man, i so Túke jone isyn dróga, adiáke-pac', syr i jone jačné dróga Mánge. Dádo! Savén Tu dyján Mánge, jone jačné dróga Mánge, sob (kaj) jone te javén odój khetané Mánca, kaj i Me; mek jone te dykhén Mirí bari patýv, saví Tu dyján Mánge, pal-dová so Túke Me jacjom drógo angíl, syr svéto sys sozdynó. Čačunó Miro Dádo! I svéto na udžindiá Tut: a Me udžindjom Tut, i jone udžindlé, so Tu bičhadian Man; i Me sykadjom lénge Tyró lav i Me javáva te sykavav, sob (kaj) doiá láska, saví isyn Túte ke Me, te javél dre lénde, syr i Me som dre lénde.” Kiéli Isúso mekciá te rakirél, Jov gijá Péskire sykliaibnytkonénca pal Kiedronoskiri sýgno rékica (lenorí) pe dová štéto, kaj sys únta (sado), dre saví zagijá Jov Kokoró i Léskire sykliaibnýtka. O Juda, Léskiro zdyibnari, džindiá davá štéto, pal-dová so Isúso skedelaspe but móly Péskire sykliaibnytkonénca odój. I, ĥáda, Juda lyjá xievra xaladén i dynar'jén, rašángire barydyrendyr i Farisijendyr, i jone javné odorík zahačkirde jagenca, jagengirenca i kurtalenca. Isúso džindiá saró, so javéla Lésa, vygijá ke jone i phuciá léndyr: “Konés tumé rodéna?” Léske otphendlé: “Isusós Nazariejos.” Isúso phendiá lénge: “Ĥáda, som Me.” O Juda, Léskiro zdyibnari, sys terdó khetané lénca. I kiéli Isúso phendiá lénge: “Ĥáda, Me som”, jone dynepe pale i pyné pe phuv. Nevéstyr Jov phuciá léndyr: “Konés tumé rodéna?” Jone phendlé: “Isusós Nazariejos.” Isúso otphendiá: “Me phendjom tuménge, so davá som Me; kóli tumé rodéna Man, mek te džán adalé manušá, mek te kerélpe lav, savó Jov phendiá: “Odoléndyr, savén Tu Mánge dyján, Me ni jekhés na xasiakirdjom”.” Símono (Simieono), adavá-pac' Pétri, savéste sys kurtála, vytyrdyja la i čingirdia lása dynarís rašángire barydyreskires i otčingirdia léske čačó kan. Adalé dynarís khardé Malho. Ne Isúso phendiá Petriske: “Čhuv pale kurtála; naúšto Mánge te na pjáv davá tahtái, savó Dad dyjá Mánge?” Tedy xaladé i léngire-tysjoncengiro barydyrá i Judéngire dynárja lyné Isusós, i phandle Les: angledýr jone lydžiné Les ke Anna; jov sys Kaiafaske sastro, savó sys pérvo rašángiro barydyró dro dová berš. Davá sys odová Kaiáfa, savó podphendia Judénge, so javéla fedýr, kóli jekh manúš xasjola pal saré manušénde. Pal Isusóste giné Símono Pétri i javír Léskiro sykliaibnýtko. Ne odová sykliaibnýtko sys džindló (pindžkirdo) rašángire barydyréske i jov gijá khetané Isusósa dre rašángire-barydyreskiri gréda (dvóro). Pétri ž jaciápe javrí pašýl pórta. Korigedýr (pozžedýr) javír sykliaibnýtko, savó sys džindló rašángire barydyréske, vygijá i pirirakirdia vudarengire rakhibnaskirjasa i zalydžijá Petris andré. Adáj vudarengiri rakhibnaskiri rakiréla Petriske: “Ci na san tu jekh kadalé Manušéskire sykliaibnytkonendyr? Jov phendiá: “Nad.” Sys šylalo, slúgi (dynárja) i dynaricy, kerdé jag i lyné te tatjon; Pétri adiáke-pac' sys terdó khetané lénca i tatija. Rašángiro barydyró phuciá Isusóstyr pal Léskire sykliaibnytkonende i pal Léskiro sykliakiribén. Isúso otphenélas léske: “Me rakirdjom mamúj (priames) angíl sarénde; Me ŭsády (sak) sykliakirdjom dre sinagoga i dre Khangirí, odój, kaj saré Judy skedénape, i Me čorahanés nisó na rakirdjom; so tu phučesa Mándyr? Phuč fedýr odoléndyr, savé šundlé, so Me rakirdjom lénge: jone džinéna, so Me rakirdjom.” Kiéli Jov phendiá davá, jekh stregar'jendyr, savó sys terdó pašýl, pekadiá Isusós pir čam (ščoka), rakirí: “Syr Tu otphenesa rašángire barydyréske?” Isúso otphendiá léske: “Kóli Me phendjom savó čoripén, sykáv Mánge dre so isyn čoripén; ne kóli saró lačhipén, sóske tu marésa Man?” Anna bičhadiá phandles Les ke pérvo rašángiro barydyró Kaiáfa. Símono (Pétri) sys terdó pašýl jag i tatija. Adáj phendlé léske: “Ci na san i Tu Léskire sykliaibnytkonendyr? Jov na priĥalyjape i phendiá: “Nad.” Jekh rašángire-barydyreskiro dynári, seménca odoléske, savéske Pétri otčingirdia kan, rakiréla: “Ci na tut me dykhcjom khetané Lésa dre únta (sado)?” Pétri nevéstyr na priĥalyjape; i dre dová-pac' časo probagandia bašno. Kaiafastyr lydžiné Isusós dre Rimoskiri prietorija; davá sys zlóko (ránko). I jone na giné dro kher, sob (kaj) te na magirenpe, tedy jone na moginénas te svenkinen Patradí. Paldavá Piláto gijá ke jone i phuciá: “Dro so tumé bangiakirena Adalé Manušés, Saves tumé jandlé ke me?” Jone otphendlé léske: “Kóli (so) Jov te na javél bangó, ame na janasas Les ke tu pe séndo.” Piláto phendiá lénge: “Len Les tumé kokoré i sendinén Les pir péskiro Zakóno.” Judy rakiréna léske: “Aménge naštý te muliakiras nikonés”; mek te spolninélpe Isusóskiro lav, savó phendiá Jov, savé Jov délas te ĥaljon, savé meribnasa Jov meréla. Tedy Piláto risijá dre prietorija, khardiá Isusós i phuciá Léstyr: “Tu san Judéngiro Králi?” Isúso otphenélas léske: “Ci Tu Kokoró péstyr davá rakirésa, ci manušá phendlé túke pal Mánde?” Piláto otphenélas: “So Me som Judo? Tyré manušá i rašángire barydyrá jandlé Tut ke me; so Tu dasavo kerdián?” Isúso rakiréla: “Miro Kralipén isyn na dalé svetóstyr: kóli Miro Kralipén te javél dalé svetóstyr, tedy Miré dynárja javénas te marénpe pal Mánde; sob (kaj) Man te na zden Judénge; ne dykhén, Miro Kralipén isyn na dalé svetoskiro.” Piláto rakiréla Léske: “Ake, adiáke Tu san Králi?” Isúso otphenéla: “Tu ž rakirésa, so Me som Králi. Me vaš davá bijandyjom i vaš davá javdjom pe svéto, sob (kaj) te dophenav pal čačipén; kažno, konéske isyn pir iló čačipén, šunéla zan Mirí” Piláto rakiréla Léske: “So da dasavo isyn čačipén?” I phení davá, Piláto vygijá ke Judy i phendiá lénge: “Me nisaví bang na lathjom dre Léste. Tuménde isyn prisykliaiben, sob (kaj) me te otmekav jekhe bešybnaris tuménge pe Patradí; ci kaména tumé te otmekav Judéngire Kralís tuménge?” Tedy jone jačné te den gódla saré, rakirí: “Na Les, a Varavas.” Adavá Varava sys rozmaribnari. Tedy Piláto lyjá Isusós i phendiá, sob (kaj) Les te marén čupniasa. I xaladé skhude viánka phusadytkone xrustostyr Léske pe šeró, i uridé pe Léste loló plaščo. I jone rakirdé: “Jav džidó, Králi Judéngiro!” – i mardé Les pir čama (ščoki). Piláto nevéstyr vygijá ke manušá i phendiá lénge: “Ĥáda, me vylydžava Les ke tumé, sob (kaj) tumé te džinén, so me na lathjom nisaví bang dre Léste.” I tedy Isúso vygijá dre viánka phusadytkone xrustostyr i dro loló plaščo. I Piláto phendiá lénge: “Ĥáda, isyn kadavá Manúš!” Kiéli baré rašaja i Khangirjákire dynárja dykhné Isusós, jone zadyne gódla: “Primar, primar Les pe trušúl!” Piláto phendiá lénge: “Tumé len Les i kokoré primaren, pal-dová so me nisaví bang na lathava dre Léste.” Judy otphendlé léske: “Aménde isyn Zakóno, i pir amaró Zakóno Jov isyn bangó te merél, pal-dová so Jov kerdiá Pes Devléskire Čhavésa.” Syr Piláto šundiá davá, jov butýr strahadyja, i jov nevéstyr gijá dro sendariskiro kher, i phendiá Isusóske: “Katýr Tu san?” Ne Isúso nisó léske na otphendiá. Tedy Piláto rakiréla Léske: “Ci na kamésa Tu mánca te rakirés? Ci na džinésa Tu, so mánde isyn pravo te otmekav Tut, i te primaren Tut pe trušúl?” Isúso otphendiá. “Túte na javélas pe Mánde ni savó pravo, kóli (so) te na javél túke dynó Devléstyr. Pal-dová so baredýr grého isyn pe odoléste, kon zdyja Man ke tu.” Dalé momientostyr Piláto rodelas, syr saštý te otmekél Les, ne Judy zadyne gódla: “Kóli (so) tu otmekesa Les, tu na san drúgo (mal) Kiesarjoske. Kažno manúš, savó keréla pes kralísa, odová isyn proti Kiesarjoste.” Kiéli Piláto šundiá dalé lavá, jov vylydžijá Isusós i besciá pe sendariskiro štéto, so značynéla pir judýtko čib “ĥavafa”; sys parastivín (piatnica) angíl Patradí, davá sys pašdyves. I phendiá Piláto Judénge: “Ĥáda, tumaró Králi isyn!” Ne jone zadyne gódla: “Le, le, primar Les pe trušúl!” Piláto rakiréla lénge: “Mánge te muliakirav tumaré Kralís?” Rašángire barydyrá otphendlé: “Aménde nane nisavó Králi apríč Kiesarjoste.” Tedy sataki Piláto zdyja Isusós te primaren pe trušúl. Rimóskire xaladé lyné Isusós i lydžiné, i Isúso lydžijá Péskiro trušúl i gijá ke dová štéto, savó kharélape “Čeriepnytko štéto”, pir judýtko čib “Golgofa”; Odój jone primarde Les pe trušúl, i khetané Lésa duje manušén, jekhés pir jekh rig i javirés pir javír rig Léstyr, a Isusós maškirál. Piláto kerdiá podčhinyben i čhudiá pe trušúl i odój sys čhindló: “Isúso Nazariejo, Judéngiro Králi.” Adavá nadčhinyben but Judy gindlé, pal-dová so štéto, kaj Isúso sys primardo pe trušúl, sys nádur foróstyr, i sys čhindló pir judýtko, pir griekítko (balamítko), pir rimóskire čibá (čibjá). Judéngire baré rašaja phendlé Pilatoske: “Na čhin ‘Králi Judéngiro,’ čhin, so kadavá Manúš kharelas Pes ‘Judéngire Kralísa.’ Ne Piláto otphendiá lénge: “So me čhindjom, mek dová te javél čhindló.” Kiéli xaladé primarde Isusós pe trušúl, jone lyné Léskire rizy i rosčhude pe štar pašá, kažnonéske xaladeske pir jekh paš; jone lyné i xitono, ne xitono na sys sudo, a jov sys khudo upralestyr. “Ame na javása te kušas les, – phendlé jone jekh jekhéske, – a fedýr čhurdasa kokalkico, syr žriébijo.” Mek te spolninenpe lavá, savé isyn čhindlé dro Svénto Čhinybén: “Jone roskerde Miré rizy maškír péste i čhurdenas žriébijo i pal Miro uribén.” Adiáke i kerdé xaladé. Pašýl trušúl, pe savó sys primardo Isúso, sys terdé Léskiri daj, i dakiri phen Maríia, xulany Klieopaskiri, i Maríia Magdalina. Isúso dykcia Peskirjá da i sykliaibnytkones, savó sys terdó pašýl, savó sys drógo Léske, i rakiréla Péskire dáke: “Drógo Džuvlije! Ĥáda, isyn tyró čhavó.” Tén'ci Isúso rakiréla sykliaibnytkoneske: “Ĥáda, isyn tyrí daj!” I odolé momientostyr adavá sykliaibnýtko lyjá la ke pe. Isúso džindiá, so saró kakaná kerdiápe, sob (kaj) te kerélpe saró pir Svénto Čhinybén, i phendiá Jov: “Me kamám te pjáv.” Adáj sys terdó khoró (žbano), pherdó šutle moliasa (vinosa). Xaladé kindiakirde gubka dre šutly mol i čhudé la pe isoposkire – destoskiri rand', i podlydžine ke Léskire uštá. Kiéli Isúso koštyndia šutly mol, Jov phendiá: “Kerdiápe!” Jov obmekcia Péskiro šeró, vyphurdyja Péskiro dúho (fáno) i myjá. Ne syr davá sys parastivín (piatnica), i Judy na kamlé, sob (kaj) trúpy te javén ublade dro sávato (subóta), paldavá so dro dová Sávato sys baró svénko, jone mangné Pilatos, sob (kaj) te pirimaren lénge ĥerá i te zlen len trušulendyr. Paldavá javné xaladé, pirimarde ĥerá jekhéske i javireske, savé sys ublade khetané Lésa; ne kiéli jone podginé ke Isúso, jone dykhné, so Jov myjá, i jone na lyné te pirimaren Léske ĥerá, a jekh xaladendyr phusadia čhurdypnytkone bustiasa (kop'josa) Léske dro pašvaro, i adáj že thadyja rat i paní. I davá dosykadia manúš, savó dykhciá, léskiro dophenybén isyn čačunó; jov džinelas, so rakirdiá čačipén, sob (kaj) i tumé te patián. Pal-dová so saró davá sys, sob (kaj) te spolninélpe Svénto Čhinybén: “Ni jekh Léskiro kokalo na javéla phagirdó. Adiáke-pac' i dro javír štéto Svénto Čhinybén rakiréla: “I jone javéna te dykhén pe Odoléste, Konés jone phusadé čhurdybnytkone bustiasa.” Paló saró davá Joza Arimafejatyr, Isusóskiro sykliaibnýtko, čorahanés mangdiá Pilatos, pal-dová so jov darandyja Judendyr, sob (kaj) te zlen Isusóskiro trúpo: i Piláto dyjá vólia. I gijá Joza i lyjá Isusóskiro trúpo. I javdiá adiáke-pac' Nikadimo, savó ĥaredyr javélas ke Isúso ratý, i jandiá pašé šel funty lačhé-khandypnytko sostavo (dzet), dro savó sys zmiešyndlo miro alojosa. Jone lyné Isusóskiro trúpo i zakrencindle Les pothanesa, savó sys pomakhno aromatytkone čar'jenca adiáke, syr Judy sarén garavenas. Pe dová štéto, kaj Jov sys primardo pe trušúl, sys únta (sado), i dre doiá únta sys neví koplíca, dre saví nikón angledýr na sys garadó. Adiáke, syr davá sys dre Judengiri parastivín angíl Sávato i koplíca sys pašýl, jone odorík i čhudé Isusós. Dro pérvo kurkeskiro dyvés, pe zlóko, kiéli sys iščo (inké) kaló (cjomno), Maríia Magdalina javdiá ke koplíca, i dykhéla, so bar sys riskirdo zagiibnastyr dre koplíca. Joj adáj že prastyndoj javdiá ke Símono Pétri i ke javír Léskiro sykliaibnýtko, savó sys drógo Isusóske, i rakiréla lénge: “Jone lydžiné Ras-Devlés koplicatyr krig, i ame na džinása, karik jone čhudé Les.” Pétri i javír sykliaibnýtko giné ke koplíca. Jone prastándyne dujdžiné; ne javír sykliaibnýtko prastándyja sygedýr Petristyr i jov angledýr javdiá ke koplíca. I jov bandija i dykhciá pašté pohtana, ne jov na zagijá andré dre koplíca. Palál pal léste priprastandyja Símono Pétri, i zagijá dre koplíca, i dykhéla, so pohtana sys pašté, i garaibnytko dykhlo, savésa sys obphandlo Léskiro šeró, i savó na sys khetané paštó garaibnytkone pohtanesa, ne sys skrencyndlo pe javír štéto. Tedy i javír sykliaibnýtko zagijá, savó angíl priprastandyja ke koplíca, jov dykhciá, i upatiandyja; pal-dová so jone ješče na džindlé Sventoné Čhinybnástyr, so Léske treindiá te otdžidjol muléndyr. Tedy Léskire sykliaibnýtka risiné kheré. Ne Maríia sys terdy pašýl koplíca i rondiá. I kiéli joj rondiá, joj bandija i zadykhcia dre koplíca, i joj dykhciá dujén Jangolen, savé sys bešté dre parny ídia pe dová štéto, kaj sys paštó Isusóskiro trúpo, jekh dre šeró, javír pašýl ĥerá. I jone rakiréna láke: “Džuvlije! Sóske tu rovesa?” Joj rakiréla lénge: “Jone lydžiné krig miré Ras-Devlés, i me na džinóm, karik jone čhudé Les.” Syr joj phendiá davá, joj obrisija pale i dykhciá Isusós, Savó sys terdó angíl láte; ne joj na ĥalyjá, so davá sys Isúso. Isúso rakiréla láke: “Džuvlije! Sóske tu rovesa? Konés tu rodesa?” Joj dumindia, so davá isyn butiarno, savó keréla butý dre bar, i rakiréla Léske: “Hulájo! Kóli (so) tu vylydžijan Les, phen mánge, kaj tu čhudián Les, i me láva Les.” Isúso rakiréla láke: “Marije!” Joj obrisija i phendiá Léske judytkes: “Ravvuni!” (so značynéla “Sykliakiribnáskiro!”) Isúso rakiréla: “Na čilav Man, pal-dová so Me na risijom ke Miro Dad; džá ke Miré pšála i phen lénge: “Me risjováva ke Miro Dad i tumaró Dad i ke Miro Devél i ke tumaró Devél”.” Maríia Magdalina gijá ke sykliaibnýtka i phendiá lénge, so joj dykhciá Ras-Devlés i joj rosphendiá lénge dová, so Isúso phendiá láke. Dre doiá pérvo kurkeskiri bel'vél', kaj Léskire sykliaibnýtka sys khetané bešté pale zaphandle vudará darátyr Judendyr, javdiá Isúso, i terdijá maškirál, i rakiréla lénge: “Ramánjo (miro) tuménge!” Kiéli Jov phendiá davá, Jov sykadiá lénge vastá i Péskire pašvare. Sykliaibnýtka drieván obradyndlepe, kiéli dykhné Ras-Devlés. Isúso phendiá lénge javír mólo: “Ramánjo tuménge! Syr Dad bičhadiá Man, adiáke i Me bičhaváva tumen.” Kiéli Jov phendiá davá, Jov phurdyja pe lénde i phendiá lénge: “Prilén Svénto Dúho (Fáno): konéske tumé javéna te primangen gréhi, odolénge javéna primangle, ne pe konéste tumé jačkirena, pe odolénde jone jačénape.” O Famá, jekh dešedujendyr sykliaibnytkonendyr, savés khardé “Blizniako”, na sys lénca, kiéli Isúso javdiá. Javír sykliaibnýtka phendlé léske: “Ame dykhciam Ras-Devlés.” Ne jov otphendiá lénge: “Kóli (so) me na dykháva špéra gvozdendyr (karfinendyr) pe Léskire vastá, i me na čhuváva miro angúšt dro štéto, kaj sys gvozdy (karfina), i me na čhuváva miro vast dre Léskire pašvare, Me na upatiava.” Pir ohtó (bidujéngiro deš) dyvesá Léskire sykliaibnýtka nevéstyr saré khetané skedynépe dro kher, i Fama sys lénca. Javdiá Isúso, kiéli vudará sys zaphandle, terdijá maškír lénde, i phendiá: “Ramánjo tuménge!” Tén'ci jov rakiréla Famaske: “De angúšt (pal'co) tyró adarík i podykh Miré vastá; de vast tyró i čhuv dre Miré pašvare; i pirijač te kuninespe, a patia.” Fama phendiá Léske dro otphenybén: “Rajo Dévla miro i Devél miro!” Isúso rakiréla léske: “Tu patiandyjan, pal-dová so tu dykhcián Man: ne bahtalé isyn kodolé, savé na dykhné Man, a jone upatiándyne.” But javír znamiénii (ĥiertyká) kerdiá Isúso angíl Péskire sykliaibnytkonende, pal savé nane čhindló dre daja lylvarí; ne saró, so sys čhindló dre daja lylvarí, isyn vaš tuménge, sob (kaj) tumé te patián, so Isúso isyn Xristóso, Devléskiro Čhavó, i pir patiaibén dre Léste, tumé te dživén Léskire lavéstyr. Paló davá Isúso nevéstyr sykadiá Pes Péskire sykliaibnytkonénge pašýl Tivieriadoskiro mórjo (derjáv). Ake, syr davá sys: Símono Pétri sys khetané Famasa, Saves kharenas “Blizniako”, Nafanailo Kanatyr Galilejakirjatyr, i Zieviediejoskire čhavé, i duj javír Léskire sykliaibnýtka. Símono Pétri rakiréla lénge: “Me džáva te starav mačhen.” “I ame khetané džása túsa”, – jone rakiréna léske. Jone giné i bešné dre bárka, ne jone nisó na starde dre doiá rat. Ne kiéli sys tasiarla, Isúso sys terdó pe brégo; ne sykliaibnýtka na ĥalyné, so davá sys Isúso. Isúso rakiréla lénge: “Terné Manušále! Ci isyn tuménde vari-savó xabén?” Jone otphendlé Léske: “Nad.” Jov rakiréla lénge: “Začhurden khudý (sietka) pir čačí rig barkakiri i tumé uhtylena.” Jone začhurdyne khudý, i na mogindlé te vytyrden la, pal-dová so odój sys adákicy but mačhé. Tedy jekh sykliaibnýtko, savó sys drógo Isusóske, rakiréla Petriske: “Ĥáda, Raj Devél.” Símono Pétri, kiéli šundiá, so adavá sys Raj Devél, jov podphandiape idiasa, pal-dová so jov sys nango, i čhurdyjape dro paní; a javire sykliaibnýtka priplyvindle (dyne plima adarík) dre bárka, tyrdyi pal péste khudý pherdý mačhenca. Jone sys nádur bregostyr pašé šel mietry. Kiéli jone vyginé pe brégo, jone dykhné xačkirdé vangara, i pe lénde sys pašté mačhé i maró. Isúso rakiréla lénge: “Janén mačhé, savé tumé kakaná starde.” Símono Pétri vygijá i vytyrdyja pe phuv khudý (sietka), so sys pherdý baré mačhenca, savén sys šel pandždešá trin; i na dykhí pe davá, so sys adákicy but mačhé, khudý na prokusciape. Isúso rakiréla lénge: “Javén te xan.” Nikoneste sykliaibnytkonendyr na sys murškipen te phučel Léstyr: “Kon Tu san?” Jone džindlé, so adavá sys Raj Devél. Isúso javélas pašedyr, lelas maró i délas sykliaibnytkonénge, adiáke-pac' i mačhé. Ĥáda, akaná tríto mólo Isúso sykadiá Pes Péskire sykliaibnytkonénge, korigedýr (pozžedýr) Léskire otdžidyipnastyr muléndyr. Kiéli jone xané, Isúso rakirélas Simonoske Petriske: “Simonie, Ianoskiro Čhavó! Ci som Me drógo túke butedýr léndyr?” Pétri rakiréla Léske: “Adiáke, Rajo Dévla! Tu džinésa, so Tu san drógo Mánge.” Isúso rakiréla léske: “Čaráv Miré sventoné bakrorén.” I javír mólo nevéstyr Isúso rakiréla léske: “Simonie, Ianoskiro Čhavó! Ci som Me drógo túke?” Pétri rakiréla Léske: “Adiáke, Rajo Dévla!” Tu džinésa, so me Tu san drógo mánge.” Isúso rakiréla léske: “Čaráv Miré bakrén.” I tríto mólo rakiréla léske Isúso: “Simonie, Ianoskiro čhavó! Ci som Me drógo Túke?” Pétri jaciá smentno, so dro tríto mólo Isúso phendiá léske: “Ci som Me drógo túke?”, i jov phendiá Isusóske: “Rajo Dévla! Tu saró džinésa; Tu džinésa, so Tu san drógo mánge.” Isúso rakiréla léske: “Čaráv Miré bakrén. Čačes, čačes Me rakiráva túke: kiéli tu sánas ternó, tu kokoró urjavesaspe i psirdian, karik tu kamdian; ne kiéli tu jačesa phuranó, tedy protyrdesa péskire vastá, i javír manúš urjavela tut i lydžála, karik tu na kamésa.” I phení davá, Isúso dyjá léske te ĥaljol, savé meribnasa Pétri proslavinela Devlés. Tén'ci Isúso rakiréla léske: “Džá pal Mánde.” Pétri porisija i dykhéla, so pal léste džála sykliaibnýtko, savéske Isúso sykadiá i savó, kiéli jone xané, čhudiá šeró ke Isusóskiro kolýn i phuciá: “Rajo Dévla! Kon zdela Tut?” Pétri dykhciá les i rakiréla Isusóske: “Rajo Dévla! Ne so javéla lésa? Isúso rakiréla léske: “Kiéli Me kamám, sob (kaj) jov te javél džidó paka Me javáva, so túke ke davá? Tu džá pal Mánde.” I gijá davá lav maškír pšalénde, so odová sykliaibnýtko na meréla. Ne Isúso na phendiá léske, so jov na meréla, ne “Kóli Me kamám, sob (kaj) jov te javél džidó, paka Me javáva, so túke ke davá?” Kadavá-pac' kokoró sykliaibnýtko, savó i dophendia pal davá, i saró davá začhindiá: i ame džinása, so léskiro dophenybén isyn čačunó. But sys adiáke-pac' i javír réndy (diély), so Isúso kerdiá: ne, kóli sys te čhinen jekh pal davá, tedy pir saró svéto na uhtylelas (nádosi) štéto vaš adákicy lylvaria. Amín'. Dro pérvo lylvarí ke tu, Fieofílie (Tieofílie), me čhindjom pal saró, so Isúso kerdiá samone anglypnástyr, i pal so Jov sykliakirdiá, ke/žýko dová dyvés, dro savó Jov ĥazdyjápe pe bolybén i dyjá priphenybén pir Svénto Dúho (Fáno) odolé Apostolenge, savén Jov Kokoró vykedyjá, i ke savé adiáke-pac' pale pal Péskire mén'ki, savé Jov pirilydžija i otdživdia meribnástyr, javélas Isúso ke jone čačuné dophenybnasa, i Jov štardešá dyvesá psirdiá ke jone i rakirdiá lénge pal Devléskiro Kralipén. Jekhvar, kiéli Isúso xaja khetané Leskire sykliaibnytkonénca, Jov priphendiá lénge: “Te na džán tumé Jerusalimóstyr, a te užakiren, kiéli javéla Svénto Dúho (Fáno), pal savó dyjá lav tuménge Dad, i pal savó tumé šundlé Mándyr; pal-dová so Iáno boldia tumen paniésa, ne korigedýr (pozžedýr) daléstyr pir vari-kicý časo Svénto Dúho (Fáno) javéla te bolel tumen.” Paldavá, kiéli sykliaibnýtka skedynépe khetané, jone phučné Léstyr: “Rájo Dévla! Ci na jaciá davá časo, sob (kaj) Tu te kerés nevéstyr Izrailjoskiro Kralipén?” I Jov otphendiá lénge: “Na tumaró réndo (diélo) te džinén časo ci dyvesá, savé Dad vykedyjá Leskire pravosa; ne tuménde javéla zor, kiéli Svénto Dúho (Fáno) džal telé pe tuménde, i tumé javéna Miré jakhítka (svidietieli) dro Jerusalimo i pe sarí Judéia i Samárija i adiáke-pac' pir sarí phuv.” I kiéli Jov phendiá davá, Jov ĥazdyjápe pe bolybén angíl léngire jakhá, i óbloko čhakirdia Les léngire jakhéndyr. I kiéli sykliaibnýtka iščo (inké) dykhné pe bolybén, syr Isúso ĥazdelaspe, ake, vari-katýr angíl lénde terdiné duj manušá, savé sys uridé dro parnypen, i savé phendlé: “Ĥalilejakire Manušále! So tumé san terdé i dykhéna pe bolybén? Kadavá Isúso, Savó sys ĥazdynó tuméndyr pe bolybén, adiáke-pac' i javéla, syr tumé dykhné, syr Jov ĥazdelaspe pe bolybén.” Paló davá Apóstoly javné pale dro Jerusalimo, syr giné telé Olivitkone (Jelieonoskire) bergátyr; dromésa dolé bergátyr saštý (možna) te dodžas ke Jerusalimo pal sávato (subóta). I kiéli jone javné dro fóro, jone skedynépe dre bari štúba (komnata), kaj sys: Pétri (Pjotr) i Jakovo, Varfalamiejo i Matfiejo, Iáno i Jendri (Andriejo), Filipo i Fama, Jakovo Alfiejoskiro i Símono Ziloto, i pšal Jakovóskiro, Juda. Jone khetané skedenaspe te mangénpe Devléske; sys lénca vari-kicý džuvliá i Maríia, Isusoskiri Daj, i Léskire pšála. I dre dolé dyvesá o Pétri, terdijá maškír sykliaibnytkonende (sys skedyibén, pe savó javné pašýl šel te biš manušá) i phendiá: “Manušále – Pšalále! Treindiá te spolninélpe dová, so sys angíl phendló dro Svénto Čhinybén, dro savó Svénto Dúho (Fáno) angilphendia pir Davidóste pal Judáste, savó sys lydžaibnaskiro (voždjo) odolénge, savé bikindle Isusós. Jov sys gindlo khetané aménca, i adiáke-pac' phenelas dová, so i ame. Jov kindia péske phuv pal lové, savé jov doresciá pal Isusóskiro zdyiben, pe daja phuv kokoró i xasijá, i léskiro trúpo lathné roskušne perésa i vypyné vindyr'jénca. I pal davá saré manušá, savé dživdé ke Jerusalimo, džindlé, so doiá phuv khardé pe léngiri čib Akieldama, ci “ratvaly phuv.” Pal-davá so isyn čhindló dre Psalmy: “Mek te javél davá kher čhučó, i mek nikón odój te na dživél, i mek te kerél léskiri butý javír.” Paldavá aménge trej te vykedas pe léskiro štéto manušés, savó psirdiá khetané aménca saró časo, kiéli dživdiá maškír aménde Raj Devél Isúso, giny Ianoskire boldeipnastyr ke/žýko dová dyvés, kiéli Isúso sys ĥazdynó améndyr, adalé manušéske treindiá te javél khetané aménca syr jakhítko pal Isusóskiro otdžidyiben meribnástyr, I jone vykedyné dujén: Jozas (Iosifos), savés khardé Varsava, i prokharde Iustosa, i Matfiejos. I jone mangnepe Devléske i phendlé: “Dévla! Tu džinésa sarengiro iló, sykáv jekhés kadalé dujendyr, savés Tu vykedyjan, sob (kaj) te zalel štéto, syr Apostolo te dynarinél zamiést Judaste, savó gijá odorík, karik léske treindiá te džal péske.” I jone čhurdyné žriébijo, i žriébijo pyjá pe Matfiejoste; i jov sys prilyno ke dešujekh Apóstoly. Kiéli javdiá Duhóskire-svenkitko dyvés (Dúho), saré sykliaibnýtka skedynépe khetané. I jekhátyr (srázu) bolybnástyr jaciá šundlo ĥlumo, savó sys sýrby zoralý balvál, so zoralés phurdela, i pherdiakirdiá saró kher, kaj jone sys. I sykadyne sykliaibnytkonénge čibá (čibjá), savé xačine jagása, jone rosčhudepe i zgine pir jekh pe kažnonéste léndyr. I Svénto Dúho (Fáno) pherdiakirdiá sarén i jone lyné te rakirén pe javír čibá (čibjá), syr Dúho (Fáno) dyjá vólia lénge. Ke Jerusalimo dživdé Judy, savé sys devlýtka manušá; jone javné kažnoné rigéndyr saré parné svetóstyr. Kiéli mavlýn (malva) progijá (nakhciá) pal davá, skedynépe but manušá, i saré jačné dro na ĥalyibén, pal-dová so kažno manúš léndyr šundiá, syr vari-kon devlytkonendyr rakirdiá pe léngiri čib. Saré manušá sys kokoré, syr na dre péste dalé divostyr, i rakirdé maškír péste: “Adalé manušá, savé rakiréna, so jone isyn na Galilejani? Syr da kažno améndyr manúš šunéla, syr jone rakiréna pe každoneskiri améndyr rodno čib. Maškir aménde isyn adáj Parfiani, i Midiani, i Jelamity, manušá, savé dživéna ke Miesopotamija; Judejátyr i Kapadokijatyr, Pontijatyr i Asijatyr, Frigijatyr i Pamfilijatyr, Jegiptóstyr, adiáke-pac' sys manušá Livijakire štetóstyr, savó sys nádur Kirinijatyr, javné manušá Rimostyr, Judy i prozielity. Kritiani i Araby i ame saré šunasa len, syr jone rakiréna pal baré Devléskire réndy pe kažnoné – manušéngire čibá (čibjá)?” I divindlépe saré, i na ĥalyné nisó i rakirdé jekh jekhéske: “So dasavo saštý (moginéla) te javél?” Ne javír rakirdé saindoj: “Jone vypine but gudly mol (vino).” Ne Pétri uštyjá khetané péskire dešudujenca Apostolenca ĥazdyjá péskiri zan, i zoralé zaniása phendiá lénge: “Judy i saré manušá, kon dživéla dro Jerusalimo! Mek te javél davá džindló tuménge, i rakhibnýtkes šunén miré lavá. Kadalé manušá isyn na mate, syr davá tuménge zdelape, pal-dová so kakaná jeniá (bijekhéskiro deš) mardé (štundy) dyvesé. Ne davá isyn dová, so phendiá proróko Ioiljo: “I dre palatuné (posliednia) dyvesá, – rakiréla Devél, – Me čhuváva Miro Dúho (Fáno) pe kažno loč (plot'), tumaré čhavé i čhaja javéna te angilphenen i terné manušá javéna te dykhén dová, so Devél déla lénge, a phuré manušá javéna te dykhén suné; i pe Miré pishar'jende, syr pe muršende adiáke-pac' i pe džuvliende, Me čhuváva Miro Dúho (Fáno) dre dolé dyvesá, i jone javéna te angilphenen. I Me sykaváva dívy uprál pe bolybén i znamiénii (ĥiertyká) telál pe phuv, rat, jag i óbloko thuvesa. Kham kerélape dro kalypén, i čhon dro rat, angíl syr javéla Devléskiro dyvés, bahtaló i lačhó. I javéla adiáke: kažno, kon kharéla Devléskiro lav, zrakhélape. Isusóskire réndy dophenena, so Jov isyn Devél. Manušále Izrailjoskire! Šunén adalé lavá: Isusóskire Nazariejoskire, Manušés, Saves Devél vykedyjá vaš tuménge, i dophendia tuménge baré Léskire rendénca (dielenca), ĥiertykénca maškír tuménde, savé tumé kokoré džinéna, i davá sys angíl tumaré jakhá. Isúso sys otdynó dre tumaré vastá pe mén'ki pir Devléskiro zaduminyben, i tumé grehitkoné vasténca muliakirdé Les i primarde pe trušúl; ne Devél otdžidiakirdiá Les meribnástyr, i otlyja zor meribnástyr, pal-dová so jov na mogindiá Les te rikirél. Pal-dová so Davído rakiréla pal Léste: “Me ŭsády (sak) dykhcjom angíl péste Ras-Devlés, Jov isyn pir čačí (pravo) rig mándyr, sob (kaj) me te na kuninavpe; daléstyr obradyndiape miro iló, mirí čib kažno mólo šarela Tut i dre miré masá isyn nadiéia. Pal-dová so Tu na jačkiresa miro dúho (fáno) dre liúno (ado), i Tu na désa sventoné Tyréske te dykhél meribén; Tu dyján mánge džiibnytko drom; i me javáva te radynavpe angíl Túte.” Manušále-Pšalále! Mek te javél mánge saštypen (vozmožnost') te phenáv tuménge pal dadéste Davidóste, so jov myjá i sys garadó, i léskiri koplíca isyn aménde ke/žýko davá dyvés. Jov sys proróko i džindiá pal dová, so Devél sovlahadiá léske, so jekhe manušés léskire rodóstyr čhuvéla pe léskiro trono, jov ž, Davído, angledýr phendiá pal Xristosóskiro otdžidyiben, so i Jov na sys jačkirdo dro liúno i trúpo Léskiro na kirnjola. Devél otdžidiakirdiá Isusós meribnástyr, i ame saré sam jakhítka daleske. Devél ĥazdyjá Les Péskire naj zoraledýr vastésa, i Jov prilyjá Léstyr Svénto Dúho (Fáno), pal savó dyjá lav Dad; Devél kerdiá dová, so tumé kakaná šunéna i dykhéna. Davído na ĥazdyjápe pe bolybén; ne jov kokoró rakiréla: ‘Phendia Devél miréske Devléske, beš pir čačí rig Mándyr. Paka Me čhuváva vergén Tyrén ke ĥerá’. I paldavá džin mištés, saró kher Izrailjoskiro, so Devél kerdiá Kadalé Isusósa, Rása-Devlésa i Xristosósa, Saves tumé primarde pe trušúl.” Kiéli manušá šundlé saró davá, jone ĥalyné péskire ilenca bang i phendlé Petriske i javire Apostolenge: “So aménge te kerás, Manušále-Pšalále?” Pétri phendiá lénge: “Riskirén péskiro džiibén ke Devél, mek kažno manúš tuméndyr te bolelpe dro Isusóskiro Xristosóskiro lav, sob (kaj) te otmekenpe tumaré gréhi, i tuménge javéla otdyibén Devléstyr-Svénto Dúho (Fáno). Pal-dová so pal davá grehengiro otmekiben ĥará sys dynó lav tuménge, čhavénge tumarenge i sarénge, adiáke-pac' i odolénge, kon dživéla dur tuméndyr, konés kharéla ke Pe Raj Devél amaró.” I buté javire lavénca Pétri dophenelas i mangdiá len, rakirí: “Rakhénpe adalé rozmekne manušytkoné rodóstyr.” I odolé, kon ilésa prilelas léskiro lav, boldepe, i dro dová dyvés upatiándyne pašé trin tysjoncy manušá. I jone ŭsády (sak) javénas khetané pir Apostolengiro sykliakiribén te rakirén jekh jekhésa, te phagiren maró i te mangénpe Devléske. Sys dar kažnoné manušéste angíl Devléste; i but dívy i ĥiertyká kerdé Apóstoly dro Jerusalimo. I saré, kon patiandyja, sys khetané, i saró, so lénde sys, sys pe sarénde; jone biknenas felatiniá i saró péskiro barvalypén, so lénde sys, i rozdenas sarénge pir dová, kon so trebindia. I kažno dyvés jone kedenaspe khetané dre Khangirí, phagirenas maró i xanas khetané radymása i čačipnása dro iló, i jone šarenas Devlés i saré manušá sykade patýv lénge; i Raj Devél kažno dyvés janelas zrakhné manušén dre Khangirí. Pétri i Iáno jékhvar giné khetané dre Khangirí pe bel'velitko mangipén: i sys odój jekh manúš, savó sys langalo bijanypnastyr, savés so dyvés janénas i čhuvénas te bešél pašýl Khangirjákiri pórta, saví kharéna Loly, sob (kaj) jov te mangél dyibén manušéndyr, savé zadžanas dre Khangirí; kiéli adavá manúš dykhciá Petris Ianosa angíl zagiibén dre Khangirí, jov lyjá te mangél léndyr. I Pétri rakhunes dykhciá Ianosa pe léste i phendiá: “Dykh po aménde.” I jov lyjá rakhunes te dykhél pe lénde, užakiri, so jone déna vari-so léske. Ne Pétri phendiá: “Suvnakáj i rup mánde nane; ne dová, so mánde isyn, me dáva túke: vaš lav Isusóskiro Xristosóskiro Nazarietostyr, uštý i psir.” I jov lyjá les pal čačó vast i ĥazdyjá; i dre dová-pac' časo langaleskire ĥerá vysastine. Manúš uhtia pe ĥerá i lyjá te psirél, i khetané lénca gijá dre Khangirí, jov psirdiá i uhtia i šardia Devlés. I saré manušá dykhné les, syr jov psirelas i šarelas Devlés; i jone ĥalyné les, so jov sys dová-pac' manúš, savó sys beštó pašýl Khangirjákiri Loly pórta i mangelas dyibén; dar i dívo oblyne len, so kerdiápe adalé manušésa. Ne paldová, so langalo, savó vysastija, na otdžalas Petristyr Ianosa, saré manušá prastandynepe odorík ke jone, pe dová štéto, savó kharéna Solomonóskiro trémo. I kiéli Pétri dykhciá davá, jov phendiá manušénge: “Manušále Izrailjoskire! So tumé divinenape pe davá? Sóske tumé dykhéna adiáke pe aménde, sýrby, ake, ame péskire zorjása ci džiibnasa dre dar angíl Devléste kerdiám adiáke, so adavá manúš lyjá te psirél? Devél Avraamóskiro i Isakóskiro i Jakovóskiro, Devél amaré dadéngiro, proslavindia Péskire Čhavés Isusós, Saves tumé zdyne i Savéstyr otphendlepe angíl Pilatoste, kiéli Piláto otsendindia te otmekél Les pe vólia. Ne tumé Sventonestyr i Čačunestyr otphendlepe, a vymangne, sob (kaj) tuménge te otmeken rozmaribnaris; ne tumé muliakirdé džiibnáskire Šere Ras, Konés Devél otdžidiakirdiá meribnástyr i ame sam jakhítka dro davá. I patiaibnása dro Léskiro lav kerdiá zoraledýr adales, savés tumé dykhéna i džinéna, i patiaibén, savó isyn Léstyr, vysastiakirdiá les angíl tuménde sarénde. Pšalále! Kakaná me džinóm (džináv), so tumé i tumaré rajo, kerdé davá pir nadžinyben; ne Devél saró kerdiá ke kónco/iagóro (spolnindia), so rakirdé Léskire proróki, so Léskire Xristosóske javéna baré mén'ki. Riskirén péskiro džiibén i risjon ke Devél, sob (kaj) tumaré gréhi te javén khosle tuméndyr; sob (kaj) te bičhavel Raj Devél tuménge javír lačhó časo te podrikirél tumen, sob (kaj) Jov moginelas te bičhavel Isusós Xristosós, Savó sys uže vykedyno tuménge; Saves bolybén sys bangó te prilel ke/žýko davá časo, paka Devél keréla saró, i pal Konéste angledýr rakirdiá pir Péskire sventoné prorokénde svetóskire anglypnástyr. Mójza ž phendiá: “Tumaro Raj Devél čhuvéla tumaré pšaléndyr Prorokós, syr i man; kandén Les dro saró, so Jov javéla te rakirél tuménge. I javéla adiáke, so kažno manúš, kon na javéla te kandel odolé Prorokós, lélape krig manušéndyr te xasjol.” Saré proróki, Samuilostyr i savé sys korigedýr (pozže) léste, saré rakirdé, uphendle pe dalé dyvesá. Tumé san prorokéngire čhavé i zavietoskire, pal savénde Devél dyjá lav tumaré dadénge; Jov rakirdiá Avraamóske: ‘Saré manušá tyré rodóstyr pe phuv javéna bahtiakirde Devléstyr’. Ke tumé pérva, Devél otdžidiakirdiá meribnástyr Péskire Čhavés i bičhadiá Les ke tumé, sob (kaj) te bahtiakirél tumen, sob (kaj) kažnones tuméndyr te otriskirel nalačhé tumaré rendéndyr.” Kiéli Pétri i Iáno rakirdé manušénge, ke jone podginé rašaja i rakhibnar'jengire barydyrá pir Khangirí i Sadukiei, lénge sys pharó pe iló, so Apóstoly sykliakirenas manušén, i phenenas lav pal otdžidiakiriben meribnástyr, syr sys Isusósa; i jone zakedyne Petris i Ianos, i pal-dová so davá sys bel'velié, jone čhudé len dro štaribén ke javír dyvés. But manušá, savé šundlé léngiro phenybén, upatiándyne; i manušén, savé lyné te patián, jaciá butýr, syr pandž tysjoncy. I pe javír dyvés skedynépe dro Jerusalimo léngire barydyrá, godephuré i lylvarítka (knížniki), odój sys pérvo rašángiro barydyró Anna, i Kaiáfa, i Iáno, i Lieksandro (Alieksandro) i javír pervoné-rašaskiri semencatyr; jone jandlé Petris Ianosa, čhudé len maškirál, i lyné te dophučen léndyr: “Save zorjása ci savé lavésa tumé keréna saró davá?” Tedy Pétri, savó sys pherdó Sventoné Duhósa, phendiá lénge: “Barydyrale theméskire i Izrailjoskire godephuré! Kóli tumé phučena améndyr pal lačhó réndo vaš nasvaleske, syr jov sys vysastiakirdo, mek te javél džindló tuménge sarénge i saré Izrailjoskire manušénge, so Isusóskire-Xristosóskire lavésa, Savó sys Nazariejo, i Saves tumé primarde pe trušúl, Saves Devél otdžidiakirdiá meribnástyr, ĥáda, adavá manúš isyn terdó sastó angíl tuménde. Isúso isyn sýrby ‘dová Bar, savó na prilyné butitka pe kher, savó jaciá vengloskire šeralé Baresa.’ I nane butýr ni dre konéste javiréste zrakhibén, nane tel bolybén javír lav, savó dynó manušénge, savésa ame moginasas te zrakhaspe.” Judéngire-Siniedrionoskire šeralé divindlépe pe Petriskiro Ianosa muršypen, i ĥalyné, so Pétri i Iáno sys nasykle manušá, savé nikaj na syklyne, i jone ĥalyné, so jone sys khetané Isusósa. I dykhí, so vysastiakirdo manúš sys terdó khetané lénca, jone nisó na mogindlé te phenén proti lénde; ne jone priphendle Apostolenge te džán javrí Siniedrionostyr, a kokoré lyné te obrakiren maškír péste, i rakirdé: “So aménge te kerás adalé manušénca? Pal-dová so saré manušá džinéna, so jone kerdé dívo, i ame na moginasa davá te na priĥaljovas. Ne sob (kaj) butedýr te na rozdžalpe maškír javirende manušénde pal davá, trašavasa len, sob (kaj) jone te na rakirén nikonesa manušéndyr pal Isusóskiro lav.” Jone nevéstyr khardé Apostolen i šylales priphendle lénge, sob (kaj) jone sarésa te na rakirén i te na sykliakirén pal Isusóskiro lav. Ne Pétri i Iáno otphendlé lénge: “Ne den godý peské (poduminen) kokoré, ci čačunés davá javéla angíl Devléste, te kandes tumen butedýr Devléstyr? Aménge naštý te na rakiras pal dová, so ame kokoré dykhciam i šundiám.” Siniedrionoskire šeralé šylales priphendle Apostolenge, i otmekne len; jone na džindlé, saví kára te čhuvén pe Apostolende, pal-dová so saré manušá slavindle Devlés pal kaliekaskiro vysastiakiriben; pal-dová so butýr, syr štardešá berš sys odolé manušéske, pe savéste kerdiápe davá divno vysastiakiriben. Kiéli otmekne Petris i Ianos, jone javné ke péskire manušá i rosphendlé lénge pal saró, so lénge rakirdé rašángire barydyrá i godephuré. I kiéli jone vyšundle pal saró davá, tedy lyné te mangénpe zoralé zaniása saré khetané Devléske i phendlé: “Rajo Dévla! Tu san Xuláj pe sarénde, Tu, Savó sozdyjan bolybén i phuv i paniá i saró, so isyn dre lénde: Tu, Savó rakirdian Duhósa Sventonesa pir Tyré pishariste i amaré dadéste Davidóste: ‘Sóske Náiudy dynepe šumosa te xoliason i manušá zadumindle nalačhipen? Phuvitka králja ĥazdynépe i thagárja (kniázi) skedynépe khetané pe Devléste i pe Léskire Xristosóste.’ Irodo i Pontijo Piláto Najudenca i Izrailjoskire manušénca skedynépe khetané dro davá fóro, sob (kaj) te kerén zrakiribén proti Sventoné Čhavéste Isusóste. Sob (kaj) te spolninel dová, te javél pir Tyró vast i vólia. I kakaná, Rajo Dévla, Tu dykhésa, so jone amen strahakirena i de aménge, pishar'jénge, muršypen te na daras te phenas Tyró lav; sob (kaj) Tu te protyrdes Tyró vast te sastiakiren, vaš ĥiertyká i dívy Isusóskire lavésa, Sventoné Čhavésa.” I kiéli jone pirijačne te mangénpe Devléske, tedy dová štéto, kaj jone skedynépe, zatrinskirdiape, i gijá pe sarénde lénde Sventoné-Duhoskiri zor i jone phendlé Devléskiro lav muršypnasa. Patiaibnaskire manušá sys khetané ilésa i godiása; i nikón nisó péskire mištypnástyr na gindia pal péskiro, a saró, so lénde sys, sys pe sarénde; a Apóstoly baré zorjása dophenenas pal Devléskiro, Isusóskire-Xristosóskiro otdžidiakiriben muléndyr; i baró bahtiakiribén Devléstyr sys pe lénde sarénde. Na sys nikonés maškír lénde; sob (kaj) léske treindiá vari-so, pal-dová so saré, konéste sys pes-kiri phuv ci kherá, biknenas len i janénas saré lové, i čhuvénas len ke Apostolengire ĥerá; i dénas lové kažnonéske, dykhí ci but léske trej. I, ĥáda, Joza (Iosifo), savés Apóstoly prokharde “Varnava”, so značynéla: ‘Tangipnariskiro čhavó’, Lievito, savó bijándyja pe Kipro, i savéste sys péskiri phuv, bikindia la, jandiá lové i čhudiá ke Apostolengire ĥerá. Jekh manúš, savés khardé Ananija, péskire romniása Sapfirasa, bikindia felatin, i ĥaradia péske baredýr paš lové, i léskiri romný džindiá pal davá, a paš, saví jaciápe, jov jandiá i čhudiá ke Apostolengire ĥerá. Ne Pétri phendiá: “Ananije! Vaš so tu domekcian nalačhés te xulainél, so tu xohadian Sventoné Duhoske i ĥaradian péske paš lové, savé tu dorescian pal bikindly phuv? Ci na sys phuv ke dová časo, syr tu la bikindian, tyrí, i lové, savé tu lyjan pal láte, ci na adiáke-pac' sys tyré, syr ža tu gíian pe dasavo réndo? Tu xohadian na manušénge, a Devléske!” Ananijo, syr šundiá dalé lavá, pyjá muló; i bari dar lyjá sarén manušén, savé sys odój i šundlé davá. I podginé terné manušá, zakrencyndle léskiro trúpo, lydžiné javrí les i ĥaradé. Pir mardé (štundy) trin korigedýr (pozžedýr) javdiá i léskiri romný, joj nisó na džindiá pal dová, so kerdiápe. Pétri phuciá látyr: “Ci pal dasaví timín tumé romesa bikindle péskiri phuv?” “Adiáke, – phendiá joi, – pal dasaví timín.” Ne Pétri phendiá láke: “Syr da tumé mogindlé te zrakirenpe i te xohaven Devléskire Duhoske? Ĥáda, pašýl vudará isyn ĥerá odolé-manušéngire ĥerá, savé ĥaradé tyré romes: jone i tut lydžána javrí.” I dro dová-pac' časo joj pyjá muly ke léngire ĥerá. I kiéli terné manušá zaginé, jone lathné la mulia, i lydžiné javrí la, i ĥaradé pašýl lákire romeste. I bari dar oblyja sarí Khangirí i saré manušén, savé šundlé pal davá. Apóstoly kerdé but znamiénii (ĥiertyká) i dívy péskire vasténca maškír manušénde; i saré skedenaspe khetané dro Solomonóskiro trémo, ne nikoneste javiréste na sys muršypen te poddžál ke jone, ne manušá kutiakirenas i barjakirenas patýv lénge; i usá butýr jačenas manušá, savé lyné te patián dre Raste-Devléste syr muršén, adiáke i džuvlién, syr manušá vylydžanas nasvalen pe vulíca (gása) i čhuvénas len pe pasindlia (postieli) i čhuibena, sob (kaj) kiéli Pétri javéla te džal mamúi, te perél Léskiri zer (tienjo) pe vari-konéste léndyr. But manušá javénas javire for'jéndyr, savé sys pašýl Jerusalimo, jone janénas nasvale manušén i adasaven, dre savénde sys beštó nálačho dúho (fáno), savé saré vysastjonas. Pérvo rašángiro barydyró uštyjá, i saré, kon sys khetané lésa Sadukiejengire skedyibnástyr lyné te zevlynen, i zakedyne Apostolen, i čhudé len dro štaribén. Ne Devléskiro Jangólo ratiákiro psiradia vudará dro štaribén i vylydžijá len, phení: “Džán dre Khangirí, terdjon i rosphenén saré manušénge pal davá nevó džiibén.” Syr Apóstoly šundlé davá, jone pe zlóko (ránko) javné dre Khangirí i sykliakirdé. Ne, kiéli pérvo rašángiro barydyró khetané péskire manušénca javné, jone kedyne Siniedriono i saré godephuren Izrailjoskire čhavéndyr i bičhadiá xaladén dro štaribén, sob (kaj) te janén len. Kiéli xaladéngire barydyrá javné dro štaribén, jone nikonés odój na lathné, risiné pale i rosphendlé pal davá, phení: “Štaribén isyn phandlo zoralés, i rakhibnárja isyn terdé pašýl vudará, ne, kiéli ame zagijam andré, odój na lathiam nikonés. Ne kiéli šundlé dalé lavá, – pérvo rašángiro barydyró, rakhibnar'jengiro barydyró i javír rašángire barydyrá, jone na mogindlé nisó te ĥaljon, syr davá saró mogindiá te javél? Ne vari-savó manúš javdiá i phendiá lénge: “Ĥáda, odolé manušá, savén tumé čhudé dro štaribén, isyn terdé dre Khangirí i sykliakiréna manušén.” Tedy rakhibnar'jéngiro barydyró péskire xaladenca gijá i lačhipnása jandlé pale len, pal-dová so darándyne manušéndyr, sob (kaj) te na domaren len barénca. I jone jandlé len i čhudé angíl Siniedriono. O pérvo rašángiro barydyró phuciá léndyr, rakirí: “Ci na šylales ame priphendiam tuménge te na sykliakirén pal Adalé-Manušéskiro lav? Ne tumé usajékh rozlydžine sykliakiribén pir saró Jerusalimo, i ke saró tumé kaména te čhuvén pe aménde bang pal Adalé-Manušéskiro rat.” Ne Pétri i Apóstoly otphendlé: “Ame sam bangé (musinasa) te kandas Devlés, a na manušén. Amaré-dadéngiro Devél otdžidiakirdiá Isusós meribnástyr, savés tumé muliakirdé, ublavi Les pe kašt. Ne Devél ĥazdyjá Les Péskire čačé vastésa, syr Šere Ras i Zrakhibnaris, sob (kaj) Izrailjo pir Léste te riskirél péskiro džiibén ke Devél, i sob (kaj) te otmekenpe gréhi. I ame sam jakhítka daleske sareske i Svénto Dúho (Fáno), Saves Devél dyjá odolénge, kon kandéla Les.” Ne kiéli jone šundlé davá saró, len lelas bari xolý i jone kamenas te zamarén Apostolen. Maškir lénde sys jekh Farisiejo, sykliakiribnari pir Zakóno, savéste sys patýv angíl manušénde, khardé les Gamaliilo’, jov uštyjá angíl Siniedriono i priphendiá te lydžán javrí Apostolen pe vari-savó časo, a lénge phendiá: “Manušále Izrailjoskire! Mištés den godý péske (poduminen) pal dová, so tumé kaména te kerén adalé manušénca; sarésa naĥara javdiá adarík vari-savó Fievda, savó vydyja pes pal baré manušéste, i pal léste giné pašé štar šelá tysjoncy manušá; jov sys zamardo, i saré, kon gijá pal léste, roznašnepe i xasiné. Paló (poslie) léste ĥazdyjápe Juda Galilejatyr, jov javdiá dre davá časo, kiéli sys manušéngiro piričhinyben, jov zlydžija pal péste but manušén, i les adiáke-pac' zamardé i saré, kon sys lésa, roznašnepe. A kakaná me rakiráva tuménge: otiačen adalé manušéndyr i mekén len; kóli dalé dúmy i butý manušéndyr, to davá saró xasjola; a kóli Devléstyr, tedy tumé na déna ráda te pirizorjakiren len; rakhénpe, sob (kaj) i tumé te na terdjon maribnása proti Devléste.” Jone kandyné les i khardé Apostolen, i jone mardé len; i kiéli jone priphendle lénge te na rakirén pal Isusóskiro lav, otmekne len. Paldavá Apóstoly giné Siniedrionostyr radymása, pal-dová so lénge prijavdiape te pirilydžan dasavo ladžaipén vaš Devléskire-Isusóskiro lav. I so dyvés dre Khangirí i pir kherá, jone na mekenas te sykliakirén i te rosphenén bahtaló lav pal Isusóste Xristosóste. Ne dre dolé dyvesá, kiéli sykliaibnýtka jačné butýr, vygijá Jelinistendyr xoliamó rakiribén pe Judénde, so jone bistrena pal léngire pivliende (udovende), kiéli rozdena kažnoné-dyvesýtko xabén. Tedy dešudúj Apóstoly kedyne khetané sarén sykliaibnytkonén i phendlé: “Namišto aménge te jačkiras Devléskiro lav, a te zalaspe skamindesa. Paldavá, pšalále, vykeden tuméndyr eftá džindlé manušén, savé te javén pherdé Sventoné Duhósa i godiása, sob (kaj) lénge i te dykhén pal daja butý; ame kokoré javása butýr časo te otdas mangipnaske Devléske i te rosphenas Léskiro lav.” Dasavo rakiribén sys sarénge pir iló; i jone vykedyné Stiehvanos (Stiefanos), manušés, savó sys pherdó Sventoné Duhósa i patiaibnása i Filipos, i Prohoros, i Nikanoros, i Timonos, i Parmienos, i Mikalajos (Nikolajos), nevoné-patiaibnaskires, Najudos Antiohiiatyr, i savén čhudé angíl Apostolende, i kiéli jone mangnepe Devléske, tedy jone čhudé vastá upré pe lénde. I Devléskiro lav rozdžalaspe butýr, i sykliaibnýtka dro Jerusalimo jačné drieván but, adiáke-pac' i but rašaja upatiándyne. Stiehvano (Stiefano), savéste sys pherdó bahtiakiribén Devléstyr i zor, kerdiá baré dívy i znamiénii (ĥiertyká) maškír manušénde. Ne vari-savé manušá Libiertiicynengire sinagogatyr, i Kirinieicynengirjatyr i Alieksandriicynengirjatyr, i odolé, savé sys Kilikijatyr i Asijatyr, lyné te dophenen Stiehvanoske. Adalé manušá sys bizorjákire angíl Duhoskiri zor i godý, savjása rakirdiá Stiehvano. Tedy jone podrakirde manušén te phenén: “Ame šundiám, syr jov rakirdiá nalačhé lavá pe Mojzaste i pe Devléste.” Lénge udyjape xohaibnasa te podrakiren manušén i godephuren i lylvaritkonen. Odolé pyné i uhtyldé Stiehvanos, i lydžiné les angíl Siniedriono. I jone jandlé xohané jakhitkonen, savé dophenenas: “Adavá manúš usá rakiréla proti Svénto Khangirí i Zakóno; ame, xaj, šundiám, syr jov rakirdiá, so Isúso Nazarietostyr rosphagirela Khangirí i paruvela prisykliaiben, savó aménge dyjá Mójza.” Saré, kon sys beštó dre Siniedriono, rakhunes dykhné pe Stiehvanoste, i dykhné, so muj léskiro ziainela sýrby muj Jangoloste. Tedy pérvo rašángiro barydyró phuciá Stiehvanostyr: “Ci saró davá isyn čačipén, dre so jone tut bangiakirena?” I jov otphendiá: “Pšalále miré, dadole! Vyšunen man. Slavútno Devél sykadyjá amaré dadéske Avraamóske dre Miesopatamija angíl léskiro piritradypen dro Xarano, i phendiá léske: ‘Mek péskiri phuv i péskiro ródo, i džá dre doiá rig, saví Me túke sykaváva’. Tedy Avraámo mekciá Xaldiejengiri phuv i piritradyja dro Xarano; korigedýr, syr léskiro dad myjá, Devél pirikhardia les pe daja phuv, pe saví tumé kakaná dživéna. Jov na dyjá léske meknó mištypén ni pe jekh piró (stopa) gerjakiro baripnasa, ne Jov dyjá lav léske te del daja phuv syr léskiri i so léskire-čhavéngire rodóske čhavé javéna xulaja pe adáia phuv, kiéli dro dová časo Avraamoste sarésa na sys čhavorén. I ĥáda, Devél phendiá léske: ‘So léskire-čhavéngiro ródo javéla čúžo pe kodoia phuv i léndyr skerena pishar'jén i javéna te pritasaven štaršelá berš; ne Me, – phendiá Devél, – javáva te sendiakirav pharés odolé – nacyjakire manušén, vaš konéske jone javéna pishárja; i pale davá jone vydžána dolé phuvjátyr i javéna te dynarinén Mánge pe davá štéto. I Devél kerdiá Zavieto Avraamosa te občhinenpe; i adiáke Avraámo jaciá dadésa Isaakóske i jov občhindia les pe eftáto dyvés; a Isaáko jaciá dadésa Jakovóske, i Jakovo jaciá dadésa dešudujenge patriarhenge. I patriarhi pir zevlynypén bikindle Jozas syr pisharís dro Jegípto; ne Devél sys lésa, i pomoginelas léske dre saré léskire pharipena, i dyjá léske godý i Faraonóskire-Jegiptóskire kralískiri patýv, savó i čhudiá les balunitkonesa pe Jegípto i pe saró léskiro kher. Ne bokh pyjá pe sarí Jegiptóskiri i Xanaanóskiri phuv, i sys bari bída; i amaré dadá na lathenas péske xabén. Ne kiéli Jakovo šundiá pal dová, so dre Jegípto isyn maró, jov bičhadiá odorík jekh mólo amaré daden; a kiéli jone javné javír mólo, Joza (Iosifo) priĥalyjape péskire pšalénge, i Faraóno udžindiá, savé rodóstyr sys Joza. Paló davá Joza bičhadiá pal peskireste dadéste Jakovoste i pal sarí péskiri semencate, a sys len eftadešá pandždžine. Jakovo javdiá dre Jegípto, kaj jov myjá kokoró i adiáke-pac' amaré dadá; i pirilydžine léngire trúpy dro Sihiemo i čhudé dre koplíca, saví kindia Avraámo dro Sihiemo Jemorengire čhavéndyr pal rup. Kiéli lyjá te poddžál davá časo te kerélpe phendló lav, pal savó dyjá lav Devél Avraamóske, i Judy barjonas dro Jegípto i jačné butydyr, paka javír králi javdiá, savó na džindiá Jozas. Jov xohaibnasa otlydžalaspe ke amaré manušá i jov na délas džiibén amaré dadénge; jov začhuvelas len te vyčhurden peskiren tykné bijatén, sob (kaj) odolé te na dživén. Dro dasavo časo bijándyja o Mójza (Moisiejo), savéste sys šukaripén Devléstyr, trin čhoná les barjakirdé dre léskire-dadéskiro kher. Ne kiéli les tyknin'kones čhurdyné javrí, Faraonoskiri čhaj i lyjá les ke pe i barjakirdia les, syr péskires čhavés. I Mójza sys sykliakirdo dro saró Jegiptóskiro god'varipen, i jov sys zoraló dre lavá i pir réndy. I kiéli léske jaciá štardešá berš, jov zakamdiá te dykhén péskire pšalén, Izrailjoskire čhavén; i, dykhí, syr jekhéske léndyr kerdé fuipén, jov zaterdija pal léste i othaja pale (otomstindia) pal léste, so pekadiá Jegiptianinos i zamardiá les. Jov dumindia, so léskire pšála ĥaljona, so Devél léskire vastésa déla lénge zrakhibén; ne jone na ĥalyné. Kiéli pe javír dyvés jov dykhciá, syr duj Izrail'tiáni čingardepe maškír péste, jov kamdiá te ramaniakirél (zmirinel) len, phení lénge: “Tumé san pšála, palsó tumé keréna fuipén jekh jekhéske? Ne jekh léndyr špuldia (pihnindia) Mojzás dre rig i phendiá: “Kon čhudiá tut sendarisa i rása pe aménde?” Ci na kamésa tu te zamares i man adiáke-pac', syr tu zamardian atasiá Jegiptianinos?” Kiéli Mójza šundiá davá otphenybén, jov nascia ke Midija, i jaciá odój te dživél syr čúžo manúš, kaj bijándyne léste duj čhavé. Kiéli progijá (nakhciá) štardešá berš, Mojzáske sykadyjá Devléskiro Jangólo xrustostyr, savó xačija jagása pe čhučí phuv, nádur bergátyr, saví khardé “Sinajo.” Mójza sys drieván divindlo, kiéli jov dykhciá davá, Jov podgíia pašyledýr te rozdykhel, i šundiá Ráskire-Devléskiri zan: “Me som Devél tyré dadéngiro, Devél Avraamóskiro, Isaakoskiro i Jakovóskiro.” Mójza izdrandyja darátyr i léste na sys muršypen te ĥazdel jakhá. I Raj Devél phendiá léske: “Suri ĥerá, pal-dová so štéto, pe savó tu san terdó, isyn svénto phuv. Me dykhcjom dro Jegípto, syr pritasade Miré manušén i Me šundjom, syr jone pharés déna ĥondiá i Me javdjom te mekav pe vólia len: džá, kakaná, Me bičhaváva tut pale dro Jegípto.” Adalé samone Mojzás, savés jone na prilyné i phendlé léske: “Kon čhudiá tut sendarisa i rása?” Kokoró Devél bičhadiá les, sob (kaj) jov te jačél sendarisa i vyrakhibnarisa Jangoloskire vastésa, savó sykadyjá léske dro xrústo. Adavá Mójza vylydžijá manušén Jegiptóstyr, jov kerdiá dívy i ĥiertyká dro Jegípto pašýl Loló mórjo (derjáv), i štardešá berš pe čhučí phuv. Ĥáda, odová-pac' Mójza, savó phendiá Izrailjoskire čhavénge: “Devél tumaró bičhavéla tuménge Prorokós, tumaré pšaléndyr, syr Jov bičhadiá man; kandén Les.” Ake, jov rosphenelas manušénge, savé sys kedyne pe čhučí phuv pal dová, so Jangólo léske rakirdiá pe bérga Sinajo, i jov sys amaré dadénca; jov isyn odová-pac', savó lyjá džidé lavá, sob (kaj) te piridel len tuménge; Saves amaré dadá na zakamle te kandén, i na prilyné les, a risiné péskire ilenca ke Jegípto, i phendlé Aronoske: “Ker aménge devlen, savé lydžánas amen, pal-dová so Mójza, savó vylydžijá amen Jegiptóskire phuvjátyr, ame na džinása, so lésa kerdiápe.” I kerdé jone guruvóres dre dolé dyvesá, jone jandlé svénta dyibená idoloske, i radyndlepe pašýl péskire-vastengire butiá. I Devél otrisija léndyr i jačkirdiá len te mangénpe bolybnáskire čergenienge, syr pal davá isyn čhindló dre prorokengiri lylvarí: “Manušále Izrailjoskire! Ci janénas tumé mánge čhindlé murdalén i svénta dyibená pal dalé štardešá berš pe čhučí phuv. Tumé lydžánas pésa tumaré – devleskiri Molohoskiri šátra, Riemfanoskiri čergen i ídoly, savén tumé kerdé, sob (kaj) te mangénpe lénge; i Me bičhaváva tumen duredýr Vavilonóstyr.” Daja šátra sys tumaré dadende pe čhučí phuv sýrby dorakiribén, so phendiá Devél Mojzáske, te čhuvél dasaví šátra, saví jov dykhciá; saví amaré dadá khetané Isusósa (Johošuasa) lyné Pésa šátra dre daja rig, saví jone zauhtylde i savjátyr Devél vytradyjá amaré dadengíre jakhéndyr manušén, savé dživdé odój ke Davidóskire dyvesá; adavá Davído jaciá drógo Devléske i jov mangdiá Léstyr te kerél šátra Jakovóskire Devléske; ne Solomóno čhudiá Léske Kher. Ne Sámo Vučedýr Devél na dživéla dre kherá, savé kerdé manušýtka vastá, adiáke, syr rakiréla pal davá proróko: “Bolybén isyn Miro trono, i phuv isyn tel Miré ĥerá: savó kher tumé moginéna Mánge te kerén? – rakiréla Devél, – ci kaj moginéla te javél štéto Mánge vaš otkhinyben? Ci na Miré vastésa kerdó davá saró?” Tumé san pharé-ilytka manušá, savé šunéna Devléskiro lav, a sýrby kašuke usajékh keréna pir péskiro! Tumé san adasavé-pac', syr i tumaré dadá, tumé ŭsády (sak) (usiegda) sánas proti Svénto Dúho (Fáno). Konés prorokendyr na tradyne tumaré dadá? Jone zamardé (umarde) odolén, kon angíl rakirdiá pal Xristosóskiro javiben, ne tumé kakaná jačné Léskire zdyibnarja i zamaribnarja! Tumé, savé doresné (lyné) jangolendyr Zakóno, i savé na zrakhné les.” Kiéli jone šundlé davá, léngire ile pharadyne xoliátyr i jone skriežyndle dandenca pe léste. Ne Stiehvano, savó sys pherdó Sventoné Duhósa, dykhcia upré pe bolybén i dykhciá Devléskiri sláva i Isusós, savó sys terdó pir čačí rig Devléstyr, I phendiá jov: “Dykhén! Me dykháva otčhakirdo bolybén i Manušéskire Čhavés, Savó sys terdó pir čačí rig Devléstyr.” Ne jone zadyne gódla i zakerde péskire kaná, i saré khetané čhurdynepe pe léste; i jone tyrdyne les pal fóro i domardé les barénca. A jakhítka čhudé péskire ídi pašýl terné-manušéskire ĥerá, savés khardé Savlo. Jone iščo (inké) mardé Stiehvanos barénca, a Stiehvano mangdiápe Devléske i rakirdiá: “Rajo Dévla, Isúsie! Prilé miro dúho (fáno).” I jov pyjá pe čangá i zoralé zaniása phendiá: “Rajo Dévla! Na gin davá grého pal lénde.” I dalé lavénca Stiehvano myjá. Savlo sys odój i podrikirelas Stiehvanoskiro zamariben. Dro dolé dyvesá sys baró tradypen pe Khangirí dro Jerusalimo, i saré, apríč Apostolende, rozginepe pir kažno Judejákire i Samarijakire štéty. Devlytka manušá garadé Stiehvanos i drieván rondlé pal léste. Ne Savlo kerdiá bipatyv pe khangirí, jov psirdiá pir kherá, zakedelas muršén i džuvlién, i čhuvelas len dro štaribén. Devlytka manušá, savén tradyne péskire šteténdyr, psirdé pir saré rigá i rosphenenas bahtalý zan (zvies'). Filipo javdiá dro Samarijakiro fóro, i rosphenéla lénge pal Xristosóste; a saré manušá rakhunes šundlé, so rakirdiá Filipo, i dykhné, savé jov kerdiá dívy i znamiénii (ĥiertyká). Pal-dová so buté manušénde sys bešté benglane dúhi, savé džánas javrí baré godlása; manušá, savéndyr sys praličo i savé na psirdé, vysastine. I manušénge, savé dživdé ke dová fóro, sys bari rádyma. Dre davá fóro dživdiá jekh manúš, savó zalelaspe čovahanybnasa, i les khardé Símono i jov divindia saré Samarijakire manušén péskire rendénca, sykavi pes vari-savé baré manušésa. I saré pe léste divindlépe, tyknestyr ke baró i rakirdé: “Adalé manušéste isyn bari zor Devléstyr.” Manušá patiandyné léske, pal-dová so jov baró časo divindia len péskire čovahanybnasa. Ne, kiéli manušá upatiándyne Filiposke, savó rosphenelas pal Devléskiro Kralipén i pal Isusóskiro Xristosóskiro lav, but muršá i džuvliá boldepe. Patiandyja i kokoró Símono i boldiape, jov nikarik na otdžalas Filipostyr: jov divindiape pe baré dívy i ĥiertyká, savé Filipo kerdiá. I Apóstoly, savé sys dro Jerusalimo, šundlé, so Samariani prilyné Devléskiro lav i bičhadiá ke jone Petris i Ianos, savé javné i mangnepe Devléske pal lénde, sob (kaj) jone te prilén Svénto Dúho (Fáno); pal-dová so ni pe konéste léndyr Dúho (Fáno) na zdžalas, jone jekh so sys bolde vaš Ráskire-Devléskiro Isusóskiro lav. Tedy Pétri i Iáno čhudé vastá upré pe lénde, i jone prilyné Svénto Dúho (Fáno). Kiéli Símono dykhciá, so Svénto Dúho (Fáno) délape pir Apostolengire-vastengiro čhuibén, tedy jov jandiá lové lénge, phení: “Den i mánge dasaví zor, mangdiá jov, sob (kaj) odová, pe konéste me čhuváva vastá, te prilel Svénto Dúho (Fáno).” Ne Pétri phendiá léske: “Mek tyré lové te javén dro xasibén túke, pal-dová so tu zakamdian Devléskiro taláno te kines pal lové. Nane túke paš i dólia te kerés dová, so ame kerása, pal-dová so tyró iló isyn na čačunó angíl Devléste. Rískir pes dalé grehostyr i mangpe Devléske; sob (kaj) Jov te primangen túke dová, so sys dro tyró iló; pal-dová so me dykháva, so tu san pherdó kirkipnasa i načačipnasa.” I Símono otphendiá, phení: “Mangénpe Devléske tumé pal mánde, sob (kaj) mánca nisó te na kerélpe doléstyr, pal so tumé rakirdé.” Apóstoly ž dophenenas i rosphenenas Devléskiro lav i giné pale dro Jerusalimo, a pir drom dre but Samarijakire gavá jone rosphenenas bahtalý zan (zvies'). Devléskiro Jangólo phendiá Filiposke: “Uštý i džá pe paš-dyvesýtko (južno) rig pir drom, savó Jerusalimóstyr džála dre Gaza, davá drom isyn čhučó.” I Filipo uštyjá i gijá pir drom, strenindia (pirilyja) Efiopijakire jevnuhos, savó sys barydyró pe Kandakijakiro kher, Efiopijakire kralicakiro, savéske sys dopatiandlo saró lákiro kučipén; jov javelas dro Jerusalimo te mangélpe Devléske, i jov kakaná tradelas pale i sys beštó pe péskiri brička: jov gindia Isajoskire-prorokoskiri lylvarí. I phendiá Dúho (Fáno) Filiposke: “Dža pašýl ke daja brička i terdjov pašýl láte.” Filipo podgíia ke brička i šundiá, so jov ginéla pal prorokoste Isajoste, phuciá: “Ci ĥaljosa tu dová, so tu ginesa?” Jov otphendiá: “Syr me mogináva te ĥaljovav, kóli vari-kon te na rosphenéla mánge?” I pomangdia Filipos te ĥazdelpe i te bešél khetané lésa. A štéto, savó jov gindia Sventoné Čhinybnástyr, sys dasavo: “Syr bakrés jandlé Les pe zamariben, i syr bakroró angíl manušéste, savó les občhinela, Jov na otčhakirdiá Péskire uštá. Jov sys ladžakirdó i sendindlo, mek Léste na sys nisaví bang, kon moginéla te rosphenel pal Léskiro ródo? Pal-dová so džiibén Léskiro lélape phuvjátyr. Jevnuho rakiréla Filiposke: “Me mangáva tut, phen mánge: pal konéste adáj rakiréla proróko? Pal péste, ci pal Konéste javiréste?” Tedy Filipo lyjá léske te piriphenel dolé Sventoné-Čhinybnaskire štetóstyr, savó dová gindia, i rosphenelas bahtalý zan léske pal Isusóste. Jone giné pir drom i javné ke paní i jevnuho phendiá: “Ĥáda, isyn paní, sóske mánge te na bolavpe?” Filipo phendiá léske: “Kóli (so) tu patiása saré iléstyr, saštý.” Jov phendiá: “Me patiáva, so Isúso Xristóso isyn Devléskiro Čhavó.” Jov priphendiá te terdiakiren brička. I jone zaginé dujdžiné dro paní i Filipo boldia les. A kiéli jone giné krig paniéstyr, Svénto Dúho (Fáno) gijá telé pe jevnuhoste; a Devléskiro Jangólo odothýr lydžijá Filipos, i jevnuho na dykhciá les butýr, i jov radymása tradyjá duredýr. Filipo sys ke Azoto i gii pir saré fórja, jov rosphenelas bahtalý zan, angíl dová, syr jov javdiá dre Kiesarija. Ne Pávli usá butedýr strahakirdia i kamdiá te muliakirél Isusóskire sykliaibnytkonén i javdiá ke pérvo rašángiro barydyró. I vymangdia léstyr lylá vaš Damaskoskire sinagogi, so kóli jov lathéla odój manušén, savé sykliakiréna Isusóskiro lav, muršén ci džuvlién, jov mogindiá len te zakedel i te janel dro Jerusalimo. Kiéli jov sys pir drom i džálas ke Damásko, pe léste jekhátyr (srázu) zasvencyndia baró dud (svéto) bolybnástyr, i, syr jov pyjá pe phuv, šundiá zan, saví rakirdiá léske: “Sávlie, Sávlie! Sóske tu Man tradesa?” Jov phuciá: “Kon Tu san, Rajo Dévla?” “Me som Isúso, Saves tu tradesa”, – otphendiá zan, “Uštý i džá dro fóro, i javéla phendló túke, so trej te kerés.” A manušá, savé sys khetané lésa, na mogindlé nisó te ĥaljon; jone šundlé zan, ne nikonés na dykhné. Savlo uštyjá phuvjátyr i, kiéli léskire jakhá otčhakirdepe, jov nisó sarésa na dykhciá; i lydžiné les pal vast dro Damásko. I jov sys odój trin dyvesá na dykhí; i nisó na xaja, i na pija Sys jekh sykliaibnýtko dro Damásko, savés khardé Ananija. Devél dro dykhibén phendiá léske: “Ananije! Jov otphendiá: “Ĥáda, me som Rajo Dévla.” I Raj Devél phendiá léske: “Uštý i džá pe vulíca (gása), saví kharéna “Mamuítko (Priámo)” i zadžá dro Judáskiro kher, phuč Tarsianinostyr, savés kharéna “Savlo”; jov kakaná mangelape Devléske, i jov dykhciá dro dykhibén manušés, savés khardé “Ananija”, savó sýrby javdiá ke jov i čhudiá péskire vastá pe léskire jakhá, sob (kaj) jov te dykhél. I Ananija otphendiá: “Rajo Dévla! Me butendyr manušéndyr šundjom pal léste, syr but fuipén jov kerdiá sventonenge dro Jerusalimo; i adarík jov javdiá pravosa pervoné-rašángire barydyrestyr te zakedel sarén, kon javéla te rakirél pal Tyró lav. I Raj Devél phendiá léske: “Džá, pal-dová so Me vykedyjom les, sob (kaj) jov te lydžál Miro lav angíl manušénde Najudénde, i Izrailjoskire kral'jénde čhavénde: pal-dová so Me sykaváva léske, ci but jov javéla te menčynelpe pal Miro lav.” I gijá Ananija i zagijá dro dová kher, i čhudiá vastá pe léste, phení: “Pšála, Sávlie! Raj Devél Isúso bičhadiá man, Savó sykadyjá túke pe drom, Savésa tu gíian adarík, sob (kaj) tu nevéstyr te les te dykhés i te javes pherdó Sventoné Duhósa.” Dre dová-pac' časo, sýrby šulupa pyjá telé léskire jakhéndyr, i jov jaciá te dykhél: i, syr jov uštyjá, boldiape; i korigedýr (pozžedýr), syr léske dyné xabén, ke jov risijá zor. I Pávli jaciápe vari-kicý dyvesá dro Damásko. I jov jekhátyr lyjá te phenél lav pal Isusóste dre sinagogi, so Jov isyn Devléskiro Čhavó. I saré, kon šundiá les, divindlépe i rakirdé: “Ci davá isyn na odová-pac' manúš, savó xasiakirelas dro Jerusalimo odolé manušén, kon mangdiápe Isusóske, i adarík jov javdiá vaš dová, sob (kaj) te zakedel len i te janel len sphandlenca ke rašángire barydyrá?” Ne Savlo usá butydyr barija dre zor, i Judy, savé dživdé ke Damásko, na mogindlé nisó proti léste te phenén, kiéli jov dophenelas, so davá isyn Xristóso. Kiéli proginé (nakhle) but dyvesá, Judy zrakirdepe te zamarén les. Ne Savlo uĥalyja pal léngiro zrakiribén. Jone rat i dyvés dykhné rakhibnýtkes les pašýl pórta, sob (kaj) te zamarén les; ne léskire sykliaibnýtka ratiákiro mekné telé les dro khudo (korzina) pir vánta. I kiéli Savlo javdiá dro Jerusalimo, jov kamdiá te javél khetané Isusóskire sykliaibnytkonénca; ne jone darándyne léstyr, i na patiandyné, so jov isyn sykliaibnýtko. Ne Varnava lyjá les i jandiá ke Apóstoly i rosphendiá lénge, syr Savlo pir drom dykhciá Ras-Devlés, i so Raj Devél rakirdiá léske, i syr Savlo phendiá murškanés Isusóskiro lav dro Damásko. I sys Savlo khetané lénca i psirdiá pir Jerusalimo i murškanés rosphenelas Ráskire-Devléskiro lav. I jov rakirdiá i dophenelas lénge; a jone dyné godý peské te zamarén les. Kiéli pšála udžindlé pal davá, jone lyné Savlos i otlydžine dre Kiesarija i odothýr otbičhade les dro Tarso. I sys ramánjo (miro) dre khangirja pir sarí Judéia, Galiliéia i Samárija, jone podrikirenas pes dro patiaibén i darándyne Devléstyr pir Sventoné Duhoskiro tangipén i podrikiribén. Sys adiáke; kiéli Pétri obdžalas sarén, zagijá jov i ke svénta, savé dživdé ke Lida. I jov lathiá odój jekhe manušés, savés kharéna Eneja, savó ohtó berš sys paštó pe čhuibén; sys léste praličo. Pétri phendiá léske: “Eniejo! Isúso Xristóso sastiakirela tut: uštý i ker péskiro čhuibén” I jov davá-pac' momiento uštyjá. I saré manušá, savé dživdé ke Lida i ke Sarono, kiéli jone dykhné, so jov sys sastó, to i prilyné jone Ras-Devlés Dre Iopija (Jopija) sys jekh sykliaibnýtko džuvlý, savjá khardé “Tavifa”, so značynéla: “Sierna.” Joj usady (sak) kerélas lačhipén i pomoginelas (délas vast) čororé manušénge. I dro dolé dyvesá joj zanasvalyja i myjá; kiéli la obmorde, čhudé dre upratuny štúba. Ne syr Lida sys nádur Iopijatyr, i, kiéli sykliaibnýtka šundlé pal dová, so Pétri isyn dre Lida, jone bičhadiá ke jov duje manušén te mangén les, sob (kaj) jov sygedýr te javél ke jone. Pétri uštyjá i gijá lénca. Kiéli jone javné, les lydžiné dre upratuny štúba; saré pivlia (udovy) kedynepe pašýl léste, jone rondlé i sykavenas léske gada i javír ídia, saví “Sierna” sudia lénge, syr joj dživdiá lénca. A Pétri tradyjá javrí sarén štubatyr, terdijá pe čangá i lyjá te mangélpe Devléske; tedy jov porisija ke muly i phendiá: “Tavifije, uštý!” I joj otčhakirdiá jakhá, dykhciá Petris i besciá. Jov dyjá péskiro vast láke i pomogindia te terdjol pe ĥerá i khardiá sventonen i pivlien (udoven), i čhudiá la džidiasa angíl lénde. Davá kerdiápe džindló pir sarí Iopija (Jopija), i but manušá patiandyné dre Raste-Devléste. I sys adiáke: Pétri but dyvesá sys dre Iopija ke Símono, savó vykerelas cýpi. Ke Kiesarija dživdiá jekh manúš, savés khardé Kornilijo, jov sys pe Italiiskone (Italijakiro) polko šelengiro barydyró, jov sys devlýtko manúš, saré péskire sem'iasa (irjasa) patiandyja Devléske i darandyja Léstyr, jov but pomoginelas čororenge manušénge i ŭsády (sak) mangdiápe Devléske, iékhvar dyvesé, pašé jeniáto mardó (štúnda), ke jov javdiá Devléskiro Jangólo, savés jov kuč dykhciá, i savó i phendiá léske: “Kornilije.” Jov dykhcia sýges pe léste i piristrahadyi, phuciá: “Rajo Dévla?” Jangólo otphendiá léske: “Tyró mangipén i dová, so tu désa vast čororé manušénge, javné Devléske pe ripiribén. I kakaná bičháv manušén ke Iopija, sob (kaj) jone te kharén Simonos, savés kharéna Pétri. Jov isyn gostjo dro Simonoskiro kher, savó isyn terdó pašýl mórjo (derjáv), i adavá manúš vykerela cypi. Kiéli Jangólo, savó rakirdiá Kornilijosa, otgijá, tedy jov khardiá ke pe duje péskire dynar'jéndyr (slugéndyr) i jekhe xalades, savó sys devlýtko i ŭsády (sak) khetané lésa; i, kiéli jov rosphendiá lénge saró, tedy bičhadiá len dre Iopija. Pe javír dyvés, kiéli jone podginé pašyledýr ke fóro, Pétri pašé šóvto mardó (štúnda) gijá upré pe kher te mangélpe Devléske. I jov bokhalyja i zakamdiá te xal. Ne paka jone keravenas xabén, léske javdiá dykhibén i jov izdrandyja. I dykhéla jov: bolybén isyn otčhakirdo, i vari-so, so poddžála pe bari cérga, saví sys priphandly pal štar véngly, mekelaspe telé pe phuv; i odój sys saré štarĥeritka murdalá (žyvotna), savé psiréna pir phuv, i savé polzynena, i bolybnýtka čirikliá. I zan phendiá léske: “Petrije! Uštý, čhin adalé murdalén i xa” Ne Pétri phendiá: “Nad, Rajo Dévla! Me nijékhvar na xajom nisó džungalypnastyr (brytkimatyr) i so isyn nažužo.” I sys javír mólo zan, saví phendiá léske: “So Devél kerdiá žužesa (čystonesa), dová tu na gin pal nažužeste.” I adiáke sys trin móly i korigedýr (pozže) cérga nevéstyr ĥazdyjápe pe bolybén. Kiéli Pétri piriduminelas kokoró péske, so davá saró značynéla, so léske sykadyjá bolybnástyr, jov dykhciá; ĥáda, adalé manušá, savén bičhadiá Kornilijo, lathné Simonoskiro kher, podginé ke pórta, i zoralé zaniása phučné: “Ci isyn adáj Símono, Saves kharéna Pétri?” Paka Pétri dumindia pal dová, so jov dykhciá, Dúho (Fáno) phendiá léske: “Ĥáda, trin manušá, savé rodéna tut; uštý i džá telé i džá khetané lénca ni palsó na piridumin; pal-dová so davá me len bičhadjom ke tu.” Pétri gijá telé ke manušá, savé sys pribičhade ke jov Kornilijostyr i phendiá: “Me som odová, konés tumé rodéna; pal savó réndo (diélo) tumé javné?” Jone otphendlé léske: “Kornilijo bičhadiá amen, šelengiro barydyró, manúš čačunó i savó daréla Devléstyr i saré Judy les šunéna, a svénto Jangólo phendiá léske te kharel tut dro léskiro kher i te šunél tyré lavá.” Tedy Pétri khardiá len dro kher i dyjá te xal. Pe javír dyvés Pétri i vari-kicý pšála Iopijatyr giné lésa khetané. Pe atasiá jone javné dre Kiesarija. A Kornilijo užakirdia len, i khardiá ke pe sarí péskiri seménca i pašatuné malen (drugen). Kiéli Pétri zadžalas dro kher, Kornilijo pirilyja les, pyjá ke léskire ĥerá i kerdiá šerésa (poklonindiape) léske. Ne Pétri ĥazdyjá les, phení: “Uštý! I me som adasavó-pac' manúš.” I kiéli Pétri rakirdiá duredýr Kornilijosa, jov zagijá dro kher i lathiá but manušén, savé kedynepe. I jov phendiá lénge: “Tumé džinéna, so pir amaró Zakóno naštý Judoske te rakirél Najudenca, ci te javél khetané lénca; ne Devél sykadiá mánge, te na kharav nijékhvar manušés nalačhesa ci nažužesa. Paldavá, syr man khardé, me javdjom bi lovengiro; i kakaná me tuméndyr phučava: “Vaš savó réndo tumé bičhadé pal mánde?” Kornilijo phendiá: “Štar dyvesá pale me postindjompe ke/žýko kadavá momiento, dre davá-pac' časo me mangdjompe Devléske dre miro kher, sys jeniá (bijekhéskiro deš) mardé; i ĥáda, angíl mánde terdijá manúš dre ziaindly ídia, i phendiá: “Kornílije! Devél šundiá tyró mangipén i dová, so tu désa vast čororé manušénge. Bičháv paldová manušén dre Iopija pal Simonoste, savés kharéna “Pétri”; jov isyn syr gostjo dro Simonoskiro kher, savó isyn terdó pašýl paní i adavá manúš vykerela cypi; jov javéla i phenéla túke. Paldavá me dre davá-pac' časo bičhadjom manušén pal túte i tu kuč kerdián, so javdián. Kakaná ame saré adáj sam angíl Devléste te šunas saró, so Devél phendiá túke, sob (kaj) tu te phenés aménge.” Pétri lyjá te rakirél: “Kakaná me ĥaljovava, so Devél kutiakirela šerá (rávnes) sarén manušén; i Jov priléla manušén saré nacyiéndyr, kóli adalé manušá daréna Léstyr i keréna pir čačipén. Jov bičhadiá lav Izrailjoskire čhavénge, savó rosphenéla pal “ramánjo” pir Isusóste Xristosóste, Jov isyn Raj Devél pir saró svéto. Tumé džinéna i pal dová, so sys paló (poslie) boldeipen, savó phendiá Iáno pir sarí Judéia až Galilejatyr, pal Isusóste Nazarietostyr: syr Devél dyjá Svénto Dúho (Fáno) Léske i zor, i, syr Jov psirdiá pir sarí phuv, kerdiá lačhipén i sastiakirdia sarén, savénde sys nalačheskiri zor, pal-dová so Devél sys Lésa. Ame sam jakhítka dalé sareske, so Isúso kerdiá pe Judejakiri phuv i dro Jerusalimo, jone zamardé Les i ublade Les pe trušúl. Ne Devél pe tríto dyvés otdžidiakirdiá Les meribnástyr i dyjá Léske saštypen, sob (kaj) manušá te dykhén Les. Ne na saré manušá, a ame, savén Devél vykedyjá syr jakhitkonen, dykhciam, ame, savé xajam i pijam khetané Lésa paló dová, syr Jov otdžidyjá meribnástyr. I Jov priphendiá aménge te phenas lav manušénge i te dophenas pal dová, so Jov isyn Odová, Saves Devél vykedyjá te javél Sendarisa pe mulé i džidé manušénde. Saré proróki dophenena pal Léste, so odoléske, kon patiála dre Léste, javéna otmekne gréhi Léskire lavésa.” Kiéli Pétri rakirdiá dalé lavá, Svénto Dúho (Fáno) gijá telé pe sarénde, kon šundiá lav. I Judytka devlýtka, savé javné Petrisa, divindlépe, so Svénto Dúho (Fáno) gijá telé i pe Najudénde; pal-dová so jone šundlé, syr odolé rakirdé pe javír čibá/čibjá, i jone barjakirenas patýv Devléske. Tedy Pétri phendiá: “Kon moginéla (saštý) te zaphenel te bolenpe paniésa, odolénge, savé prilyné Svénto Dúho (Fáno), adiáke-pac', syr i ame?” I phendiá lénge te bolenpe dro Isusóskiro Xristosóskiro lav. Korigedýr (pozže) jone mangné Petris te javél lénca vari-kicý dyvesá. Apóstoly i pšála, savé dživdé ke Judéia, šundlé, so i Náiudy prilyné Devléskiro lav; i kiéli Pétri javdiá dro Jerusalimo, devlýtka Judy, savé sys občhindlé, lyné te vyrakiren léske, phení: “Tu psirdian ke manušá, savé isyn naobčhindle i xajan lénca.” I Pétri lyjá te rosphenel lénge saró, syr sys: “Dro fóro Iopija me mangdjompe Devléske i dre mangipén sýrby dre suné me dykhcjom dykhibén i izdrandyjom: me dykhcjom, syr bolybnástyr zmekelape vari-so, so poddžála pe bari cérga, saví pal štar véngly zmekelape bolybnástyr mamúj (priames) odorík, kaj me sómas: me zadykhcjom rakhunes andré i dykhcjom štaré phuvitkone – ĥeritkone murdalén (zvierien), savé psiréna pirí phuv i savé polzynena, i bolybnytkone čiriklien. I šundjom me zan, saví phendiá mánge: “Pétrie! Uštý, zamar dalé murdalén i xa.” Ne Me phendjom: “Nad, Rajo Dévla! Me nijékhvar na xajom nisó džungaló (brytko) ci nažužo.” I phendiá mánge zan bolybnástyr javír mólo: “So Devél kerdiá žužesa, dová tu na gin pal nažužo.” I sys adiáke trin móly, i korigedýr (pozžedýr) cérga nevéstyr ĥazdyjápe pe bolybén; i ĥáda, dro dová-pac' časo, trin manušá podginé ke kher, dre savó me sómas, jone sys bičhadé Kiesarijatyr ke me. I Dúho phendiá mánge, sob (kaj) me te džav lénca, nikicy na duminy. I adalé šov pšála giné khetané mánca i ame javdiám dro odolé-manušéskiro kher, savó khardiá man. Jov rosphendiá aménge, syr jov dykhciá dro péskiro kher sventoné Jangolós, savó i phendiá léske: bičháv ke Iopija manušén i vykhar Simonos, savés kharéna Pétri; jov phenéla túke lavá, savénca tu zrakhesape i saró tyró kher.” Kiéli me lyjom te rakiráv, Svénto Dúho (Fáno) zgija pe lénde, adiáke-pac', syr angledýr jov zgija i pe aménde. I Me priripirdjom Ráskire-Devléskiro lav, syr Jov rakirdiá: ‘Iáno boldia paniésa, a tumé javéna bolde Sventoné Duhósa’. Kóli tedy Devél dyjá lénge dasavo-pac' taláno, syr i aménge, savé patiána dre Raste-Devléste, Isusóste Xristosóste, tedy, kon me som adasavó, sob (kaj) te keráv vari-so proti Devléste?” Kiéli jone šundlé saró davá, jačné štyl i lyné te slavinén Devlés, rakirí: “Bicialó, so i Najudénge Devél dyjá vólia te riskirén péskiro džiibén ke Devél i te dživén.” A manušá, savé mekné péskire štéty pal bída, saví kerdiápe Stiehvanosa, doginé ke Finikija, Kipro i Antióhiia, jone nikonéske na rakirdé Devléskiro lav, apríč jekhe Judénde. A sys maškír lénde Kipriani i Kirinieicy, savé, kiéli javné dre Antióhiia, lyné te rakirén i Elinenge (Griekénge/Balaménge), kiéli jone mištophenenas pal Raste-Devléste Isusóste. I sys Devléskiro vast lénca, i but manušá patiandyné i risiné ke Devél. I udžindlé pal davá dre Jerusalimóskiri Khangirí, i odothýr bičhadé Varnavas dre Antióhiia: savó, kiéli javdiá, dykhciá Devléskiro bahtalypén, i jov drieván obradyndiape i podrikirelas sarén, sob (kaj) jone te javén dro patiaibén dre Raste-Devléste saré péskire ilésa; pal-dová so Varnava sys lačhó manúš, pherdó patiaibnása i Sventoné Duhósa, i pir léste drieván but manušá riskirdé péskiro iló ke Devél. Korigedýr Varnava gijá dro Tarso te rodél Savlos. I kiéli jov lathiá les, to jandiá dre Antióhiia. I saró berš Varnava Savlosa kedenaspe dre Khangirí i sykliakirdé buté manušén: i sykliaibnýtka dre Antióhiia sys pérva te kharenpe Devlytkonénca (Xristianénca). I dro dová časo proróki Jerusalimóstyr javné dre Antióhiia; i jekh léndyr, savés khardé “Agavo”, uštyjá i Sventoné Duhósa angilphendia, so javéla bari bokh pir sarí phuv, i, ĥáda, bokh jaciá, kiéli Klavdijo sys khieningo (kiesarjo). I sykliaibnýtka dorakirdepe, sob (kaj) kažno léndyr, kicý kon moginéla, te pomoginel pšalénge, savé dživéna ke Judéia, I jone kerdé dová, kiéli jone bičhadé lové phurepšalenge (priesvitierenge), so skedyné Varnava i Savlo.” Dre dová časo králi Irodo nevéstyr lyjá te tradel devlytkonen i zakedyja vari-kicý manušén léngire khangirjátyr, sob (kaj) te kerél fuipén lénge, I muliakirdiá Jakovós, Ianoskire pšalés kurtalása. Kiéli jov dykhciá, so davá isyn pir iló Judénge, jov zakamdiá te zakedel apríč dová i Petris; a sys davá pe Judýtko svénko, kiéli xána bi roščynakiro (droždžengiro) maró. I Jov zakedyja Petris, i čhudiá les dro štaribén, i priphendiá xaladenge te terdjon dre štar riady pe štar manušén dre kažno riado i te rakhén les; Irodo kedelaspe paló Patradí te lydžál Petris pe manušýtko séndo. I adiáke Petris rakhne dro štaribén; a manušá Khangirjátyr drieván mangnepe Devléske pal léste. Ratiákiro, angíl dová, kiéli Irodo kedyjape te vylydžal les pe manušýtko séndo, Pétri sys sutó maškirál duje xaladénde, phandlo dujenca zandir'jenca, i xaladé sys terdé pašýl vudará i rakhne štaribén. I, ĥáda, javdiá Devléskiro Jangólo, terdijá pašýl, i jag zaziaindia dro štaribén; Jangólo pekadiá Petris dro pašvaro, džangadia les, phení: “Uštý sygedýr.” I zandirjá (cépi) pyné léskire vasténdyr. I Jangólo phendiá léske: “Podphandepe i uri ĥerá.” I jov kerdiá adiáke. Korigedýr rakiréla léske: “Uri tyrí ídia i džá pal mánde.” I syr Pétri vygijá štaribnastyr, jov gijá pal Jangoloste, na džiný, so saró davá, so Jangólo kerdiá, isyn dro čačipén, a léske zdyjape, so jov dykhéla dykhibén sýrby dre suné. Jone proginé mamúj iekhende i javire rakhibnar'jende i podginé ke sastruny pórta, saví lydžála dro fóro, vudará otčhakirdepe angíl lénde kokoré péstyr; jone vyginé, i proginé jekh vulíca (gása), i adáj že Jangólo mekciá Petris. Kiéli Pétri javdiá dre péste, jov phendiá: “Me kakaná, čačes, dykháva, so Devél bičhadiá Péskire Jangolós i rakhciá man Irodoskire vasténdyr i saréstyr, so kamlé Judejákire manušá te kerén.” Kiéli Pétri kokoró saró ĥalyjá, jov javdiá ke Marijakiro kher, joj sys Ianoskiri daj, savés khardé adiáke-pac' Marko, kaj but skedynépe manušá i mangnepe Devléske. Kiéli Pétri pekadiá dre vudará, dynárica vygijá te udžinel, savjá khardé Roda; i kiéli joj udžindiá Petris pirí zan, joj radymátyr bistyrdia te otčhakirel vudará, a prastándyja pale i phendiá, so Pétri sys terdó angíl vudará. I jone phendlé láke: “Ci dre péskiri godý tu san? Ne joj saroiekh rakirdiá péskiro, so davá isyn čačó.” Jone rakirdé: “Davá isyn léskiro Jangólo.” Ne Pétri ŭsa pekavelas dre vudará: kiéli otčhakirde vudará, tedy dykhné les i divindlépe. Jov sykadiá vastésa, sob (kaj) te na rakirén, rosphendiá lénge, syr Devél vylydžijá les štaribnastyr i phendiá: “Piridén daja zan Jakovóske i javire pšalénge.” Jov gijá i gijá odothýr pe javír štéto. A kiéli jaciá dyvés, sys bari godlyma maškír xaladénde pal dová, so kerdiápe Petrisa. A Irodo rodyja Petris i nikaj na lathiá, a kiéli jov dophucia xaladendyr, tedy priphendiá te muliakirén len. Tén'ci jov gijá Judejátyr dre Kiesarija i odój jaciápe. Irodo sys drieván xoliamó pe Tiranoskire i Sidonoskire manušénde; ne jone javné ke jov vaš dová, sob (kaj) jov len te prilel i podrakirde pe péskiri rig Vlastos, savó sys kralískiro štubatuno (phuredýr) i pomangne “ramánjo (miro)”, pal-dová so léngiri rig čaradiape kralískire rigátyr. Pe vykedyno dyvés Irodo uridia pe péste kralítko ídia, besciá pe trono i rakirdiá angíl sarénde. I manušá dénas gódla: “Davá isyn zan Devléskiri, a na manušeskiri.” Ne dro dová-pac' momiento Devléskiro Jangólo muliakirdiá Irodos, pal-dová so Irodo na slavindia Devlés, les džides xané kirme, i jov myjá. Ne Devléskiro lav usá butýr šundjolas i rozdžalas maškír manušénde. Varnava i Savlo kerdé, so lénge sys phendló i javné pale Jerusalimóstyr dre Antióhiia; jone lyné Pésa Ianos, savés khardé “Marko.” Dre Antióhiia, dre štetýtko khangirí sys proróki i sykliakiribnaskire: Varnava, i Simieono, savés khardé Nigiero, i Lucyjo Kirinejanino, i Manailo, savó barija khetané Iradosa tietrarhosa i Savlo. Jekhvar, kiéli jone mangnepe Ráske-Devléske i postindle, Svénto Dúho (Fáno) phendiá lénge: “Otdén Mánge Varnavas i Savlos pe réndo (diélo), vaš savó Me len khardjom.” I jone, paló posto i mangipén, čhudé upré vastá pe lénde, i otbičhade len. Varnava i Savlo, savén bičhadiá Svénto Dúho (Fáno), javné dre Sielievkija, a odothýr otplyvindle (dyné plíma krig) pe Kipro. Kiéli jone javné dro Salamino, odój jone rosphenenas Devléskiro lav dre Judejákire sinagogi. Iáno sys khetané lénca i délas vast lénge. Jone giné pir saró óstrovo (džip) i javné dro Pafoso, odój strenindle manušés, savó sys čovahano, xohanó proróko Judo, les khardé Variisuso, jov sys mal (drúgo) Rimóskire balunitkoneske Sier'gaske Pavliske, god'varé manušéske. Balunitko khardiá Varnavas i Savlos, pal-dová so kamdiá te šunél Devléskiro lav. Ne Jelimo, čovahano (lav léskiro značynéla “čovahano”), saró kerdiá proti lénde; jov kamdiá te otriskirel Rimóskire balunitkones patiaibnastyr. Ne Savlo, savés adiáke-pac' khardé Pávli, saré Sventoné Duhóskire zorjása, dykhcia mamúj pe léste, i phendiá: “Tu, san nalačheskiro čhavó i vérgo saré čačipnaske: tu san pherdó xohaibnasa i kalé rendénca; ci pirijačesa tu te zlydžas manušén čačuné Ráskire-Devléskire droméstyr? I kakaná, ĥáda, Devléskiro vast isyn pe túte: Tu javésa kororó i tu na javésa te dykhés kham ke savó trej časo.” I jekhátyr zgija pe léste kalypén, i jov lyjá te čhurdelpe pir saré rigá, rodyi vari-konés te lydžál les pal vast. Kiéli balunítko (konsulo) dykhciá, so kerdiápe, jov lyjá te patial, i jov divindiape pe Ráskire-Devléskiro sykliakiribén. Pávli i léskire malá otplyvindle (dyné plíma krig) Pafostyr i javné dre Piergija i Pamfilija; ne Iáno mekciá len odój i kokoró risijá dro Jerusalimo. A jone proginé Piergijatyr i javné dre Pisidijakiri Antióhiia, savatoné (subotoné) jone javné dre sinagoga i bešné. Paló (poslie) ginybén Mojzáskire Zakonóstyr i prorokéngire sykliakiribnastyr, sinagogakire barydyrá bičhadé lav lénge: “Manušále-Pšalále! Kóli tuménde isyn lav vaš sykliakiribén te phenén manušénge, to rakirén. Pávli uštyjá i sykadiá vastésa, sob (kaj) jone te šunén, phení: “Manušále Izrailjoskire! Lačhé javír manušá, savé kutiakirena Devlés, vyšunen man: Devél Izrailjoskire manušéngiro vykedyjá amaré daden, Jov kerdiá léndyr bari i patyvalý nacyja, kiéli jone sys dro Jegípto, i Jov baré-zorjakire vastésa lydžijá len odolé rigátyr, I pašé štardešá berš Jov dykhciá pal lénde pe čhučí phuv. Devél pe Xanaanóskiri phuv xasiakirdiá ohtó (bidujéngiro deš) nácyi i otdyjá léngiri phuv, syr meknó mištypén. I paló davá, pašé štaršelá pandždešá berš, ke/žýko proróko Samuílo, Devél délas lénge sendar'jen. Korigedýr (pozže) jone lyné te mangén péske Kralís, i Devél dyjá lénge Saulos, Kisaskire čhavés, Vieniaminóskire rodóstyr pe štardešá berš. Devél zlyjá Saulos kralipnastyr i čhudiá lénge Davidós syr kralís, pal savéste i phendiá dro dophenybén: “Me lathjom Davidós, Jesiejoskire čhavés, adavá manúš Mánge isyn pir iló, savó keréla saró pir Mirí vólia. I Davidóskire rodóstyr Devél, syr Jov dyjá lav, jandiá Izrailjoske Isusós Zrakhibnaskires; angíl davá, syr Isúso javdiá, Iáno phenelas lav te riskirén péskiro džiibén ke Devél vaš boldyipen saré Izrailjoskire manušénge.” Dro palatunó (posliednjo) péskiro phenybnytko lav, Iáno rakirdiá: “Pal konéste tumé man ginéna? Me na som odová; ne ĥáda, džála pal mánde Odová, Savéske me na som mol te rosphandav Léskire ĥeritka.” Manušále-Pšalále, Čhavé Avraamóskire, i maškír tuménde isyn Náiudy, savé kutiakirena Devlés! Davá zrakhibnaskiro lav sys bičhadó aménge: so manušá, savé dživdé ke Jerusalimo i léngire barydyrá, na udžindlé Isusós, jone sendindle pharés Les i dalésa-pac' kerdé dová, so rakirdé proróki, dalé lavá ame ginasa kažno savatoné (subotoné), sýrby sendinasa Les. Jone na lathné dre Léste nisaví bang vaš meribén, i usajékh mangné Pilatos te muliakirén Les. Kiéli jone kerdé saró, so sys čhindló pal Léste, jone lyné Les trušulestyr, čhudé Les dre maĥilytko koplíca. Ne Devél otdžidiakirdiá Les meribnástyr; I but dyvesá Isúso sykadjolas ke odolé manušá, savé khetané Lésa javné Galilejatyr dro Jerusalimo, savé kakaná isyn Léskire jakhítka angíl manušénde. I ame piridasa kadaja bahtalý zan (zvies') tuménge, syr Devél dyjá lav amaré dadénge, Jov kerdiá davá vaš aménge, léngire čhavénge, kiéli otdžidiakirdiá Isusós, syr davá isyn čhindló dro javír psálmo: “Tu san Miro Čhavó: Me adadyvés bijandjom Tut.” Devél otdžidiakirdiá Les meribnástyr adiáke, sob (kaj) Jov butýr te na kirnjol dre maĥila, pal davá Jov phendiá adiáke: “Me dáva Túke svénto i čačunó bahtiakiribén, savó sys dynó Davidóske.” Paldavá Jov rakiréla i javír štéto: “Tu na désa Sventoneske te dykhél meribén.” Ne Davído kerdiá saró dro péskiro časo, syr léske phendiá Devél, jov myjá, i les garadé léskire dadénca i trúpo léskiro kirnyja. Ne Odová, Konés Devél otdžidiakirdiá, na kirnyja. Paldavá, Manušále-Pšalále, me kamám, sob (kaj) tumé te džinén, so tuménge phenélape lav pal grehengiro otmekiben pir Isusóste Xristosóste, i dre saró, dre so tumé na mogindlé te javén zrakhné Mojzáskire Zakonosa, kažno manúš, kon patiála, jačéla čačipnáskiro pir Isusóste Xristosóste. Dykhén, sob (kaj) i tuménge te na javél adiáke, syr rakirdé proróki: “Rakhénpe tumé, kon dykhéla bipatyvakires pe javír manušénde, tumé zdivinenape i xasjona; pal-dová so Me keráva dasavo réndo vaš tuménde dre tumaré dyvesá, savéske tumé nijékhvar na patiána, kóli vari-kon rosphenéla tuménge pal davá.” Kiéli Pávli i Varnava džánas javire sinagogatyr, len khardé, sob (kaj) jone te javén dro javír sávato i te rakirén dová-pac'. Kiéli manušá, savé sys pe skedyibén, lyné te rozdžanpe, tedy but Judy i javír, savé prilyné Judýtko sykliakiribén, giné pal Pavliste Varnavasa, savé rakirdé lénca i mangenas, upatiakirenas len te javén duredýr dro Devléskiro bahtalypén. Dro javír sávato saré manušá foróstyr javné te šunén Devléskiro lav. Kiéli Judy dykhné, so skedynépe adákicy but manušá, jone lyné te zevlynen i rakirdé drieván nalačhé lavá pe saró dová, so rakirdiá Pávli. A Pávli i Varnava rakirdé murškanés i bidarakires phendlé: “Aménge trej angledýr saréndyr tuménge te rosphenas Devléskiro lav: ne syr tumé na priĥaljona les, tumé dalésa sendinena kokoré pes, so tuménde na javéla viéčno džiibén, paldavá ame kakaná riskirasa Devléskiro lav Najudénge; paldavá, so adiáke aménge rakirdiá Raj Devél, syr Jov phendiá: “Me keráva Tut, sob (kaj) tu te javes dud Najudénge, sob (kaj) pir Túte manušá te javén zrakhné pir sarí phuv.” Náiudy, kiéli šundlé davá, radyndlepe i slavindle Devléskiro lav, i upatiándyne saré, savé sys vykedyné ke viéčno džiibén; I Devléskiro lav rozdžalaspe pir sarí doiá rig. Ne Judy, podrakirde devlytkoné i barvalé rodóstyr džuvlién i foróskire barydyrén, i ĥazdyné manušén proti Pavliste i Varnavaste, i tradyne krig len péskire rigátyr. Tedy Apóstoly trinskirde pe lénde práho péskire ĥerendyr i giné dre Ikonija. Sykliaibnýtka sys pherdé radymása i Sventoné Duhósa. Dre Ikonija Pávli Varnavasa zaginé dre Judengiri sinagoga i rakirdé adiáke, so drieván but Judy i Náiudy patiandyné. Ne Judy, savé na patiandyné, ĥazdynépe i podrakirde Najuden proti pšalénde. Pávli i Varnava sys odój drieván but časo, jone rakirdé murškanés pal Devléste, Savó dophenelas pal Péskire-laveskiro bahtiakiribén dolesa, so délas Apostolenge zor te kerén znamiénii (ĥiertyká) i dívy. Dre fóro maškír manušénde vygijá košybén i jone rozginepe pe duj rigá, jekh manušá sys pe Judengiri rig, a javír manušá pe Apostolengiri rig. Kiéli Náiudy i Judy khetané péskire barydyrénca dorakirdepe; sob (kaj) te ladžakiren i te marén Apostolen barénca, jone udžindlé pal davá i giné dre Likaonoskire [Likonijakire-ju.o.] fórja Listra i Dervija i pe pašatuné léngire štéty; i odój jone duredýr rosphenenas bahtalý zan (zvies'). Ke Listra dživdiá jekh manúš, savéste sys nasvale ĥerá, jov sys kalieka bijanypnastyr i jov nijékhvar na psirdiá. Jov šundiá, syr rakirdiá Pávli, savó dykhcia syges mamúj pe léste i dykhciá, so manušéste isyn patiaibén, sob (kaj) te javél vysastiakirdo, i phendiá zoralé zaniása: “Uštý pe ĥerá mamúj (rovnes).” I jov uhtia i lyjá te psirél. Kiéli manušá dykhné, so kerdiá Pávli, jone zoralé zaniása lyné te rakirén pe Likaonytko čib: “Develá, savé podžana (zdžana) pe manušénde, giné telé bolybnástyr ke ame!” I jone khardé Varnavos Zievsosa, a Pavlís Jermijosa, pal-dová so jov butýr rakirdiá. Angíl fóro sys khangirori Zievsoske i léngiro rašáj iandiá guruvén i vianki ke foróskiri pórta, jov kamdiá khetané manušénca te čhinen murdalén, syr svénto dyibén vaš lénge. Ne Apóstoly Varnava i Pávli, kiéli šundlé pal davá, to jone roskušne péskire ídi i godlása čhurdynepe dre manušénde, rakirí: “Manušále! So tumé keréna? Ame sam dasavé-pac' manušá, syr i tumé, i rosphenasa bahtalý zan tuménge, i ame kamasa, sob (kaj) tumé te mekén kadalé xohané ídoly i te prilén džidé Devlés, Savó sozdyjá bolybén i phuv i paní, i saró, so isyn dre lénde; Savó dre ĥaratuné beršá, délas vólia saré nacyienge te psirén péskire droménca. Ne Jov jačkirdiá pal Péste dophenybén i sykavéla Péskiro lačhipén dre dová, so bičhavéla aménge bolybnástyr bryšýnd dro aplodoskiro časo; Jov déla aménge xabén i pherdiakirela amaré ile radymása” I rakirí davá, jone pir bari zor patiakirdé manušén te na janén lénge svénto dyibén. Ne javné Judy Antiohiiatyr i Ikonijatyr i, kiéli Apóstoly mamúj (priames) phendlé lav, jone patiakirdé manušén te otdžan léndyr, rakirí, so jone na rakiréna nisavó čačipén, a saró xohavena. I podrakirde manušén i lyné lofo pe lénde: jone domardé Pavlís barénca i vytyrdyne les pal fóro, syr jone gindlé les pal muleste. A kiéli sykliaibnýtka skedynépe pašýl léste, jov uštyjá i gijá dre fóro; a pe javír dyvés jov gijá krig Varnavasa dre Dervija. I kiéli jone rosphendlé bahtalý zan (zvies') dre davá fóro i lénde jačné sykliaibnýtka drieván butýr, jone risiné pale dre Listra, Ikonija i Antióhiia, i jone podrikirenas sykliaibnytkonén i patiakirenas len, sob (kaj) jone te javén zoralé dro patiaibén i rakirdé: “Aménge javéla trej but te piridživas angíl davá, sob (kaj) te zadžas dro Devléskiro Kralipén.” Pávli Varnavasa dre kažno khangirí čhudé godephuren pir postinyben i mangipén i otdyné len Ráske-Devléske, dre Savéste jone patiandyné. I kiéli Apóstoly giné pir Pisidija, jone javné dre Pamfilija. I korigedýr, syr jone phendlé Devléskiro lav dre Piergija, to giné duredýr dre Atalija, Atalijatyr jone otplyvindle (dyné plíma krig) pale dre Antióhiia, odój jone kerdé sarí péskiri butý, vaš saví jone sys bičhadé i bahtiakirde. Kiéli Apóstoly risiné pale dre Antióhiia, jone skedyné khangirí, i pal saró rosphendlé, so Devél kerdiá pir lénde, i syr Jov Najudénge psiradia vudará vaš patiaibén. I jačnépe jone odój khetané sykliaibnytkonénca but časo. A vari-savé manušá javné Judejátyr dre Antióhiia, savé lyné te sykliakirén pšalén: “Kóli (so) tumé na javéna te občhinenpe pir Mojzáskiro Zakóno, tumé na moginéna te zrakhenpe.” Pal-dová so, kiéli vygijá Pavliste Varnavasa bari čingárd i pirirakiriben lénca, jone phendlé Pavliske Varnavasa te džán javire devlytkonenca pir davá phučiben ke Apóstoly i godephuré (phuré) dro Jerusalimo. I adiáke khangirí bičhadiá len dre drom, i kiéli jone džánas pir Finikija i Samárija, odój jone rosphenenas pal davá, so Náiudy adiáke-pac' lyné te patián dre Isusóste, davá nevipen jandiá bari rádyma pšalénge. I kiéli jone javné dro Jerusalimo, len prilyjá Khangiri, Apóstoly i godephuré, i Pávli Varnavasa rosphendlé lénge pal saró, so Devél kerdiá lénca. Tedy uštyné manušá Farisiejengire siektatyr i phendlé: “Kakaná Najudénge trej te občhinenge i trej te začhuves len, sob (kaj) jone te kerén pir Mojzáskiro Zakóno.” Apóstoly i godephuré skedynépe, sob (kaj) te pirirakiren pal davá réndo. Paló (poslie) dlengo pirirakiriben uštyjá Pétri i phendiá lénge: “Manušále-Pšalále! Tumé džinéna, so Devél anglatuné dyveséndyr vykedyjá man vaš dová, sob (kaj) mándyr Náiudy te šunén lav bahtalé zaniatyr, sob (kaj) jone te patián. Devél, Savó džinéla manušéngiro iló, dophendia, so priléla Najuden dolesa, so dyjá lénge Svénto Dúho (Fáno) adiáke-pac', syr i aménge, i Jov na kerdiá nisavó vykedyiben maškír aménde i lénde, pal-dová so Jov patiaibnása vyžužakirdiá léngire ile. Tedy sóske ž tumé kakaná propatiakirena Devlés, čhuvi sykliaibnytkonénge pe men ĥámo, savó na mogindlé te lydžán ni amaré dadá, ni ame? Ne ame patiása dre dová, so ame zrakhasape pir bahtalypén amaré Ráskire-Devléskiro, Isusóskiro adiáke-pac', syr i jone.” Tedy saró skedyibén jaciá štyl i jone šundlé Varavas i Pavlís, savé Devél kerdiá ĥiertyká i dívy pir lénde maškír Najudénge. Paló (poslie) dová, syr jone pirijačne te rakirén, Jakovo otphendiá: “Manušále-Pšalále! Vyšunen kakaná man: Símono rosphendiá aménge pal davá, syr Devél angledýr sykadiá péskiri láska vaš Najudénge, so Jov vykedyjá léndyr manušén vaš Péskiro lav. Adiáke, syr isyn čhindló, zdžanape prorokéngire lavá: Paló davá Me risjováva i keráva rosphagirdy Davidoskiri šátra vaš Devléske, i so isyn dre láte rosphagno, me podkerava, i keráva la, syr neví, sob (kaj) te rodén Devlés i javír manušá i saré Náiudy, maškír savéndyr javéla džindló Miro lav. Adiáke rakiréla Devél, savó kerdiá saró davá. Viekostyr isyn džindlé Devléske saré Léskire réndy. Me paldavá duminava, so na trej te kerés pharipén vaš Najudénge, savé kaména te javén ke Devél; ne te čhinas lénge lyl, sob (kaj) jone te na xan xabén, savó janéna syr svénto dyibén idolénge i te na kerén biladžaipén i te na xan mas zatasade murdalestyr, i te na p'jen rat. Pal-dová so Mojzáskiro Zakonóstyr ĥaratuné beršéndyr pir saré fórja rašaja rosphenena i ginéna davá Zakóno dre sinagogi savatoné (subotoné).” Tedy Apóstoly i godephuré pirirakirde manušénca péskire Khangirjátyr i vykedyné vari-kicý péskire manušén vaš dová, sob (kaj) len te bičhaven dre Antióhiia Pavlisa i Varnavasa: Judas, savés khardé Varsavas, i Silas, savé sys lydžaibnáskire (šeré manušá) (voždi) maškír pšalénde, i jone čhindlé dasavo lyl lénge: “Apostolendyr, khangirjákire godephurendyr, pšalénge Najudendyr, savé isyn dre Antióhiia, Sirija i Kilikija: te javél ramánjo (miro) tuménge. Adiáke, syr ame šundiám, so ke tumé javné vari-savé manušá améndyr, savé strahakirde tumen péskire lavénca i dalésa-pac' jone jandlé tuménge but piridživiben, kiéli jone rakirdé: ‘Tuménge trej te občhinenpe i te rakhén Mojzáskiro Zakóno,’ savén ame na bičhadiam davá te rakirén; paldavá ame skedyjampe saré khetané i vykedyjam améndyr vari-kicý manušén te bičhavas len ke tumé khetané amaré drogoné Varnavasa i Pavlisa, adalé manušénca, savé otdenas péskiro džiibén pal lav amaré Ráskire-Devléskiro, Isusóskiro Xristosóskiro. I paldavá ame bičhadiam ke tumé Judas i Silas, savé piridena tuménge lavénca dová, so ame čhindiam. Pal-dová so Svénto Dúho (Fáno) i ame na javása te čhuvas pe tuménde butýr nisavó pharipén apríč davá, savó trej. Na xan dová xabén, savó janéna idolénge syr svénto dyibén i na p'jen rat, na kerén biladžaipén, i na xan mas zatasade murdalestyr, i na kerén javirénge dová, so tumé na kaména péske; kóli tumé javéna te rakhén pes saré daléstyr, tumé keréna šukár. Jačénpe Devlésa.” I kiéli vykedyné manušá sys bičhadiá dro drom, jone javné dre Antióhiia, i skedyné khangirí, i otdyné lyl. I kiéli manušá gindlé zoralés davá lyl, jone obradyndlepe dalé nevipnastyr. Juda i Sila kokoré sys proróki i jone sykliakirdé pšalén péskire lavénca i patiakirenas lénca len. Kiéli jone sys odój vari-savó časo, pšála otmekne len ramanjosa (mirósa) ke Apóstoly. Ne Sila zakamdiá te jačélpe odój, a Juda risijá dro Jerusalimo: Pávli i Varnava adiáke-pac' jačnépe dre Antióhiia, odój jone khetané buté javirenca sykliakirdé i phenenas Devléskiro lav. Ne pir vari-kicý dyvesá Pávli phendiá Varnavaske: “Javén, dykhasa amaré pšalén pir saré fórja, dre savé ame rosphenasas Devléskiro lav, syr jone dživéna.” Varnava kamdiá te lel pésa i Ianos, savés khardé Marko. Ne Pávli sys proti te lel les pésa, pal-dová so jov mekciá len dre Pamfilija i na gijá lénca pe réndo, pe savó jone sys bičhadé. Paldavá maškír lénde vygijá bari čingárd, so jone roziačnepe jekh jekhésa; i Varnava lyjá Markos i otplyvindia (dyjá plimá krig) dro Kipro; a Pávli, vykedyjá péske Silas, pšála bahtiakirde les i jov gijá dre drom. Pávli gijá pir Sirija i Kilikija i jov patiakirelas khangirja. Pávli dogijá ke Dervija i Listra: odój dživdiá vari-savó sykliaibnýtko, savés khardé Xima (Timofiejo), léskiri daj sys devlýtko Judyca, a dad sys Griéko (Balamó), pal Ximaste šukár rakirdé pšála, savé sys dre Listra i Ikonija. Pávli zakamdiá te lel Ximas pésa dro drom, i paldavá občhindia les, jov kerdiá davá vaš Judénge, savé dživdé pe dolé štéty, pal-dová so saré džindlé, so Ximaskiro dad sys Griéko (Balamó). Kiéli jone psirdé pir fórja, jone rakirdé devlytkonenge te rikirenpe priphenybnenge, savé prilyné Apóstoly i godephuré dro Jerusalimo. I khangirja jačenas zoraledýr dro patiaibén i manušén, savé lyné te patián kažnoné dyvesesa, jačelas butedýr. Jone giné pir Frigija i Galatijakiri rig, pal-dová so Svénto Dúho (Fáno) na domekcia len te rakirén Devléskiro lav dre Asija. Kiéli podginé ke Misija, jone kedynepe te džán dre Vifinija, a Isusóskiro Dúho (Fáno) na domekcia len, i jone promekne Misija i javné dre Troada. I ratiákiro sys dykhibén dro suné Pavliske: sykadyjá manúš Makiedonijatyr, jov sys terdó i mangdiá les: “Jav dre Makiedonija i pomogin (dé vast) aménge.” I korigedýr daléstyr, syr jov davá dykhciá, dre dová-pac' časo ame kedyjampe te džas dre Makiedonija, syr ame dumindiam, so Devél khardiá amen te rosphenas lénge bahtalý zan (zvies'). Troadatyr ame plyvindiam (dyjám plíma) mamúj ke Samofrakija, i odothýr pe javír dyvés ke Nieapoljo, a Nieapoljostyr ame gijam dre Filipy: davá anglatunó fóro dre doiá Makiedonijakiri paš, savó sys Rimoskiri kolonija. Ame sámas dro davá fóro vari-kicý dyvesá. Dro sávato (subóta) ame gijam javrí pal pórta ke reka (len'), kaj usady (sak) devlýtka kedenaspe vaš mangipén Devléske; ame besciam i lyjam te rakiras džuvliénca, savé odój kedynepe. I sys jekh džuvlý, savjá khardé Lidija, joj biknelas loló than (matierija) dre Fiatira, adáia džuvlý sys devlýtko, i Devél otčhakirdiá lákiro iló te ĥaljol, so rakirdiá Pávli. Paló (poslie) davá, syr joj i lákire kherítka boldepe, joj pomangdia: “Kóli tumé ginéna man syr devlytkona, to zadžán dre miro kher i dživén odój.” I joj urakirdia amen. Jekhvar, kiéli ame gijam te mangaspe Devléske, pir drom aménge strenindiape džuvlý-pisharica, savjate sys čovahano dúho (fáno) te rakirél angíl, so javéla, joj péskire angilphenybnasa janelas péskire xulange baré lové. Joj džálas pal Pavliste i pal aménde, i godlelas: “Adalé manušá isyn dynárja Naj Vučydyreskire Devléskire, savé rosphenena tuménge pal dová, syr tumé moginéna te zrakhenpe.” I joj adiáke kerdiá but dyvesá. A Pávli, syr xoliásyja, risijá i phendiá nalačhé duhoske: “Isusóskire Xristosóskire lavésa Me priphenava túke: vydža látyr.” I dúho (fáno) dro dová-pac' časo vygijá. Kiéli lákire xulaja ĥalyné, so léngiri nadiéia vaš kófo (pribyl') gijá krig, jone uhtyldé Pavlís i Silas i lydžiné len pe foruný (plóšča) ke barydyrá; jone jandlé len ke Rimóskire sendárja i phendlé: “Adalé manušá isyn Judy, i jone keréna dro amaró fóro bizlado (biesporiadko), i lydžána pésa péskire sykliaibena, savé aménge Rimlianenge na pir Zakóno ni te prilas, ni te kerás.” Manušá adiáke-pac' ĥazdynépe proti Pavliste i Silaste; i sendárja riskirdé léndyr ídi, phendlé te marén len kaštenca. I kiéli jone pekade len but móly, jone čhurdyné len dro štaribén, i priphendle rakhibnariske rakhunes te rakhél len: kodová, syr doresciá dasavo priphenybén, čhurdyjá len dre andratuný štúba i zamardiá léngire ĥerá dre kalodki. Dre pašrat Pávli i Sila mangnepe Devléske i bagandle šardytka giliá Devléske, i štaribnarja šundlé len. Ne jekhátyr (srázu) jaciá phuv adiáke te trinskirelpe, so štaribén lyjá te kuninelpe; dre dová-pac' časo otčhakirdepe saré vudará, i saré štaribnar'jende pyne (telé) sastyrá ĥerendyr. Kiéli štaribnaskiro rakhibnari džangádyja i dykhciá, so saré vudará dro štaribén sys otphandle (psiradé), jov uhtyldia kurtála i kamdiá te zamarél kokoró pes, syr jov dumindia, so saré štaribnarja našné. Ne Pávli zoralés zadyja gódla: “Na ker péske nisavó fuipén, pal-dová so ame sam saré adái.” Tedy jov mangdiá te zahačkiren jag, zaprastandyja andré dre bari dar i pyjá pe čangá angíl Pavliste i Silaste. I kiéli lydžijá len javrí, phuciá: “Rajale! So mánge te keráv, sob (kaj) te zrakhavpe?” Jone phendlé léske: “Patia dre Raste-Devléste, Isusóste Xristosóste, zrakhesape tu i tyró kher.” I jone rosphendlé Devléskiro lav léske i sarénge, kon sys dro léskiro kher. I jov dre doiá-pac' rat obmordia lénge ratvalé štéty, savé sys lénde maribnastyr, i jov i saré léskire kherítka boldepe. I jov jandiá len ke pe kheré, i čhudiá lénge te xan i obradyndiape saré péskire kheresa pal dová, so patiandyja dre Devléste. Kiéli jaciá dyvés, sendárja bičhadé provincyjakire baré ran, sob (kaj) te vymeken štaribnastyr odolén manušén. Rakhibnari phendiá dalé lavá Pavliske: “Sendarja phendlé te vymeken tumen štaribnastyr: i adiáke, vydžán kakaná i džán péske Devlésa.” Ne Pávli phendiá lénge: “Jone bi sendoskiro ni pal so domardé amen angíl sarénde manušénde i čhurdyné dro štaribén, na dykhí pe dová, so ame sam Rimóskire džiibnárja, i kakaná čorahanés amen vymekena? Adiáke lénde na vydžála! Mek jone kokoré te javén i te lydžán krig amen adathýr.” Haladé piridyne kadalé lavá sendar'jenge, i kodolé strahádyne, kiéli udžindlé, so adalé manušá isyn Rimóskire džiibnárja. Jone javné i primangne len, vylydžiné len štaribnastyr, i mangné, sob (kaj) jone te džán krig foróstyr. Kiéli jone giné javrí štaribnastyr, to javné ke Lidija, odój jone strenindlepe (dykhnepe) pšalénca, sykliakirdé len i giné durydyr dro drom. Kiéli Pávli i Sila proginé pir Amfipoljo i Apolonija, tedy javné jone dre Fiesalonika, kaj sys Judengiri sinagoga. Pávli, syr jov prisyklyja te kerél, zagijá dre sinagoga i trin sávaty (suboty) rakirdiá lénca Sventoné Čhinybnástyr, jov obrakirelas i dophenelas lénge, so Xristosóske treindiá adiáke te javél, sob (kaj) Jov te pirilydžal saré mén'ki i te otdžidjol muléndyr, i so: “Kadavá-pac' Xristóso isyn Isúso, pal Savéste me rosphenava tuménge.” I vari-savé léndyr patiandyné i javné ke Pávli Silasa, i but devlytkoné Griekéndyr (Balaméndyr) i adiáke-pac' but džuvliá barvalendyr javné. Ne Judy, savé na patiandyné, xoliasyne i lyné javriestyr vari-savé pirangačen foruniátyr (ploščátyr) i kedynepe saré khetané i ĥazdyné saré manušén dro fóro: i jone giné pe Jasonoskiro kher, sob (kaj) te vylydžan len ke manušá; a kiéli odój jone na lathné Pavlís Silasa, tedy lydžiné zorjása Jasonos i javire pšalén ke foritka barydyrá, dyi gódla: “Kadalé manušá keréna bizlado pir saró svéto, a kakaná javné i adarík; a Jasono prilyjá len dro péskiro kher; i saré jone isyn proti khieningoskire uphenybená i rakiréna, so isyn javír králi, Isúso.” Manušá i foritka baré raja, kiéli šundlé saró davá, xoliasyne. Jone lyné Jasonostyr i javirendyr symadý (zalogo) i otmekne len. Pšála dre dová-pac' časo (momiento) ratiákiro otbičhade Pavlís i Silas dre Vierija, a odolé, syr javné odorík, giné dre Judengiri sinagoga. Adalé manušá sys patyvaledyr Fiesalonikiicendyr, jone baré jakhénca šundlé phenybnytko lav, kažno dyvés jone roskedenas Svénto Čhinybén, sob (kaj) te džinén, ci čačipén Pávli rakirdiá. I but Judendyr patiandyné; adiáke-pac' patiandyné barvalé Griekítka (Balamítka) džuvliá i muršá. Ne kiéli Judy Fiesalonikatyr udžindlé, so i dre Vierija Pávli rosphenelas Devléskiro lav, jone javné i odorík te podrakiren manušén. I tedy pšála dre dová-pac' časo (momiento) bičhadé Pavlís dre rig ke morjoskiro (derjavéskiro) brégo; a Sila i Xima jačnépe odój. A manušá, savé lydžánas Pavlís, doginé lésa ke Afiny, i Pávli dyjá priphenybén lénge vaš Silaske i Ximoske, syr saštý (možna) sygedýr te javén ke jov. I paka Pávli užakirdia len dre Afiny, jov divindiape i piridživelas, dykhí, so dro fóro sys pherdó ídoly. Paldavá jov rakirdiá Judenca dre sinagogi i Najudenca (devlytkoné manušénca), i pe foruný (plóšča), kažno dyvés rakirdiá manušénca, savén jov streninelas (pirilelas). A vari-savé Epikurieine i Stoikone filosofendyr giné te xanpe lésa dro rakiribén. I vari-savé phučné: “So davá balvalitko manúš kaméla te phenél?” A javír rakirdé: “Jov, zdelape, rosphenéla pal čužoné naamare devlende?” – pal-dová so Pávli rosphenelas lénge bahtalý zan (zvies') pal Xristosóste i Léskiro otdžidyiben muléndyr I jone jandlé Pavlís dro Arieopago i phendlé: “Ci saštý (možna) te džinas aménge, savó davá isyn dasavo nevó sykliakiribén, so tu rosphenesa? Pal-dová so dová, so tu rakirésa, ame nijékhvar na šundiám; i ame kamasa te džinas, so davá saró značynéla?” Saré Afiniani i manušá, savé dživdé odój javire rigéndyr, nisosa na zalenaspe dre péskiro vól'no časo, apríč dová, so rakirénas, ci šunenas vari-savé nevipená. I, ĥáda, Pávli uštyjá maškirál Arieopago i phendiá: “Afinianiále! Pir saró me dykháva, so tumé drieván kutiakirena péskire devlen: kiéli me psirdjom i dykhcjom tumaré svénta štéty, me lathjom altárjo, pe savó sys čhindló: “Nadžindle Devléske.” Pal Adaleste, Saves tumé na džiný, priĥaljona, me i kamám tuménge te rosphenav. Devél, Savó sozdyjá svéto i saró, so isyn dre léste, Jov, Savó isyn Devél bolybnaske i phuvjake; Jov na dživéla dre khangirja, savé kerdé manušýtka vastá. Léske na trej, sob (kaj) manušá te dynarinén (te služynen) Léske péskire vasténca; Jov Kokoró déla sarénge džiibén i saró; i Jov kerdiá saró manušýtko ródo jekhe manušéstyr, sob (kaj) manušá te dživén pir sarí phuv; Devél vykedyjá vaš saré manušénge časo i štéto vaš džiibén pe phuv, sob (kaj) manušá te rodén, te kamen te javén pašyledýr ke Jov i te lathén Les, pal-dová so Jov isyn nádur améndyr: so ame dre Léste dživasa i psirasa i ame sam, syr vari-savé i tumaré poety phendlé: ‘Ame adiáke-pac' bijandyjam Léstyr’. I kóli ame bijandyjam Léstyr, tedy aménge na trej te duminas, so davá isyn Devél, ci savó isyn kerdó suvnakástyr ci rupéstyr, ci barestyr, savó isyn kerdó manušytkoné vasténca i pir manušýtko godý. Paldavá Devél promekcia dová časo, kiéli ame na džindiam čačipén, a Devél kakaná rakiréla saré manušénge pir saró svéto, sob (kaj) jone te riskirén péskiro džiibén ke Devél, pal-dová so Jov vykedyjá dyvés, kiéli Jov javéla te sendiakirél svéto čačuné sendosa pir Manušéste, Saves Jov vykedyjá, Jov sykadiá davá vykedyiben saré manušénge, kiéli otdžidiakirdiá Les muléndyr.” I kiéli jone šundlé pal otdžidiakiriben muléndyr, vari-savé léndyr sandlepe, a javír phendlé: “Ame javása te šunas pal davá tut javír mólo.” I Pávli gijá krig léngire skedyibnástyr. A vari-savé manušá piriginé pe Pavliskiri rig i patiandyné; maškír lénde sys Dionisijo, Arieopagoskiro barydyró, i džuvlý, savjá khardé Damar', i javír manušá. Paló davá Pávli gijá Afinendyr, i javdiá dro Korinfo; kaj jov strenindia (pirilyja) Judos, savés khardé Akila, i savó bijándyja dre Pontija, i jov naĥara javdiá Italijatyr péskire romniása Priskilasa (pal-dová so Klavdio priphendiá saré Judénge te džán Rimostyr); ke jone i javdiá Pávli, a syr lénde sys jekh butý Pavlisa, jone sude šátry, i paldavá Pávli jaciápe lésa te kerél butý. I kažno sávato (subóta) jov rakirdiá dre sinagoga i dophenelas, syr Judénge, adiáke i Griekénge (Balaménge). Ne kiéli Sila i Xima javné Makiedonijatyr, Pávli otdyjá saró péskiro časo, sob (kaj) te dophenel Judénge, so Isúso isyn Xristóso. Ne pal-dová so jone sys proti i košne les, tedy jov trinskirdia péskire ídi i phendiá lénge: “Rat tumaró mek te javél pe tumaré šeré: me som žužó; i kakaná me džáva ke Náiudy.” I Pávli gijá odothýr i javdiá dro devlytkoné – manušéskiro kher, savés khardé Justa, kon dživdiá pašýl sinagoga. A Krispo, sinagogakiro barydyró, patiandyja dre Devléste sarénca péskire kheritkonenca; i but Korinfiani, savé šundlé Pavlís, patiandyné i boldepe. iékhvar ratý dre dykhibén Raj Devél phendiá Pavliske: “Na andyrša, a rákir, i na jav štyl te rakirés, paldová so Me som túsa, i nikón na keréla túke čoripén; Mánde isyn but čačuné manušá dre davá fóro.” I Pávli sys odój berš i šov čhoná, sykliakiri Devléskiro lav lénge. Kiéli dre Ahaia sys balunitko (prokonsulo) Galiono, Judy ĥazdynépe proti Pavliste i jandlé les pe séndo, rakirí: “Adavá manúš sykliakiréla te patián Devléske na pir Zakóno.” Kiéli Pávli kedyjape te otkerel muj, tedy Galiono phendiá Judénge: “Kóli kadavá manúš te kerél vari-savó sendytko proštaviben (priestuplienijo) ci čoripén, tedy, Judy, me vyšunavas tumen; a, kóli maškír tuménde džála košybén pal lavá i kharibena i pal tumaró Zakóno, tedy roskedenpe kokoré, me na kamám te javav sendári dro davá réndo.” I jov tradyjá len krig sendostyr. I saré uhtyldé Sosfienos, sinagogakires barydyrés, i mardé les angíl séndo. Galionoske ž na sys ke davá nisavó réndo. Pávli sys but dyvesá dro Korinfo, tén'či jov roziaciape pšalénca i tradyjá ke Sirija, a khetané lésa giné Priskila i Akila, ne angíl tradypen Pávli občhindia balá dre Kienhreja, sob (kaj) te kerél pir sovláh; tedy jone javné dre Jefieso, odój Pávli jačkirdiá Priskila i Akilas. Jov kokoró ž gijá dre sinagoga i lyjá te rakirél Judenca. Jone mangné les, sob (kaj) jov butýr te jačélpe khetané lénca, ne jov otphendiape, a roziaciape lénca i phendiá: “Mánge trej te javav pe svénko, savó syg javéla, dro Jerusalimo; me risjováva ke tumé, kóli pe davá javéla Devléskiro vólia, i kokoró tradyjá Jefiesostyr.” Kiéli Pávli javdiá dre Kiesarija, jov zagijá dro Jerusalimo, phendiá “ramánjo” devlytkonenge dre štetýtko khangirí, i gijá dre Antióhiia. Jov sys vari-savó časo dre Antióhiia, i gijá odothýr pir sarí Galatijakiri rig i Firgija, i podrikirelas patiaibnaskiren. Dre dová časo javdiá dro Jefieso jekh Judo, Alieksandrijatyr i les khardé Apoloso, jov mištó rakirdiá i mištó džindiá Svénto Čhinybén. Jov džindiá Ráskire-Devléskiro Drom i rakirdiá baré Duhóskire patyvása, jov rosphenelas i sykliakirdiá saró čačipén pal Isusóste, a kokoró jov džindiá jekh Ianoskiro boldeipen. Apoloso murškanés lyjá te rakirél dre sinagoga. Kiéli Akila i Priskila šundlé les, jone khardé les ke pe, i piridyne fededýr lav dro lav Devléskiro Drom. I kiéli jov kedyjape te džal dre Ahaiia, pšála bičhadé lyl dolé štetoskire sykliaibnytnytkonenge, sob (kaj) jone les te prilén; kiéli Apoloso javdiá odorík, jov pomogindia (dyja vast) but odolénge, kon patiandyja pir Devléskiro bahtalypén. Pal-dová so jov baré zorjása i angíl sarénde patiakirelas Judén i dophenelas Sventoné Čhinybnástyr, so Isúso isyn Xristóso (Miesija). I sys adiáke: dro dová časo (cýro), kiéli Apoloso sys dro Korinfo, Pávli, progii bergitka štéty, javdiá dre Jefieso, i kiéli jov lathiá odój vari-kicý sykliaibnytkonén, to phendiá lénge: “Ci prilyné tumé Svénto Dúho (Fáno), kiéli tumé upatiandle?” Ne jone otphendlé léske: “Ame i na šundiám, so isyn Svénto Dúho (Fáno).” Tedy Pávli phuciá léndyr: “Dro savó boldeipen tumé boldepe?” Jone otphende: “Dro Ianoskiro boldeipen.” I phendiá Pávli: “Iáno boldia boldeipnasa vaš riskiriben ke Devél, jov rakirdiá manušénge te patián dre Odoléste, Kon bangó te javél pal léste, dre Isusóste Xristosóste.” Kiéli jone šundlé pal davá, jone boldepe dro Devléskire-Isusóskiro lav. I kiéli Pávli čhudiá vastá upré pe lénde, pe lénde gijá telé Svénto Dúho (Fáno), i jone lyné te rakirén pe javír čibá (čibjá) i te rakirén, so javéla angíl. Jone saré sys manušá pašé dešudúj manušá. I kiéli Pavlija zagijá dre sinagoga, jov trin čhoná murškanés rakirdiá, dophenelas manušénge i patiakirelas len dre čačipén pal Devléskiro Kralipén. Ne kiéli vari-savé manušá lyné te xoliason i na patiandyné, a košne angíl saré manušénde Devléskiro Drom, tedy Pávli jačkirdiá len, skedyjá sykliaibnytkonén i kažno dyvés rakirdiá pe Tiranoskire-sykliadiakiro štéto. Sys adiáke duj berš, so saré manušá, savé dživdé ke Asija, šundlé Devléskiro lav syr Judy, adiáke i Griéki (Balamé). Devél kerdiá pir Pavliste baré dívy, so pe nasvalende čhuvénas dykhle i ídi léskire maséndyr, i nasvalende pirijačenas dukhá i nalačhé dúhi džánas krig léndyr. Vari-savé Judéngire čovahane adiáke-pac' psirdé i tradyne nalačhé dúhi Devléskire-Isusóskire lavésa, rakirí: “Zasovlahava tut Isusósa, pal Savéste lav phenéla Pávli.” Davá sys Judéngire – rašángire barydyreskire Skievaskire ohtó (bidujéngiro deš) čhavé. Ne nálačho dúho (fáno) phendiá lénge: “Isusós me džinóm, i Pávli mánge džindló, a tumé kon san?” I čhurdyjape pe lénde manúš, dre savéste sys nálačho dúho (fáno) i domardiá adiáke len, so jone nange i saré dro rat našné dolé kheréstyr. Pal davá udžindlé saré Judy i Náiudy, savé dživdé ke Jefieso i bari dar oblyja sarén len, i Devléskire-Isusóskire lavéske barjakirdé patýv. I but manušá, savé upatiándyne, javénas, i priĥaljonaspe angíl sarénde dre péskire réndy. Ne but manušá, savé angledýr sys čovahane, jandlé péskire lylvaria, i xačkirdé len angíl sarénde. I jone podgindle, ci but lové sys mol dalé saré lylvaria; i vygijá, so dalé lylvaria sys mol pandžšelá tysjoncy (bará) rupuvé lové. Dasavé zorjása usá butedýr manušá udžinenas i piridenas Devléskiro lav. Kiéli saró davá kerdiápe, Pávli skedyjape pir Svénto Dúho (Fáno) te džal dro Jerusalimo, progii Makiedonija i Ahaija, i phendiá: “Korigedýr (pozže) doléstyr, syr me javáva dro Jerusalimo, mánge trej adiáke-pac' te dykháv Rimo.” I kiéli jov bičhadiá ke Makiedonija péskire duje manušén, savé léske dénas vast, Ximas i Jerastos, jov kokoró pe vari-savó časo jaciápe dre Asija. Dre odová časo but manušá ĥazdynépe proti Ráskire-Devléskiro Drom. Paldová so jekh rupunari, savés khardé Mitra (Dmitrijo), kerdiá rupune mangipnytka kherá Artiemidake i dalésa jov délas butý manušénge te zakeren lové, savén jov skedyjá javire dasavé butiakire manušénca i phendiá: “Malále, tumé džinéna, so dalé butiátyr ame zakerasa lačhé lové; i tumé ž dykhéna i šunéna, so na dre jekh Jefiesija, a adiáke-pac' pir sarí Asija, syr adavá Pávli patiakirdia i otriskirdia buté manušén dro péskiro patiaibén i so develá, savé kerdé manušýtka vastá, isyn na develá. I davá isyn dar vaš aménge na dro jekh davá, so amarí butý na javéna te kutiakiren, ne i vaš khangirí baré-develniakiri Artiemidakiri na javéla te ginelpe ni dro so, i kokori develny, savjake manušá mangénape dre Asija i pir saró svéto xasiakiréla péskiro rajkano baripén.” I kiéli jone šundlé saró davá, jone saré lyné te den gódla baré xoliása: “Bari isyn Artiemida Jefiesakiri.” I pir saró jaciá konfuzo, manušá uhtyldé Gajos i Aristarhos, savé khetané Pavlisa javné Makiedonijatyr, i tyrdyne len dro tijatro. Ne Pávli kamdiá te vyštavel angíl manušénde, ne léskire sykliaibnýtka na domekne les; adiáke-pac' vari-savé barydyrá dalé rigátyr, savé sys Pavliskire drúgi (malá), bičhadiá te mangén les, sob (kaj) jov te na sykadjol dro tijatro. But manušá na džindlé, palsó jone javné adarík, i paldavá dre skedyibén sys bizlado i kon péske dyjá gódla. Judy lyné te trebinen, sob (kaj) Lieksandro te vydžál ke manušá, savés jone vykedyné i te vyštavel. Lieksandro sykadiá vastésa, sob (kaj) manušá te šunén les, pal-dová so jov kamdiá te phenél lav pal péste angíl manušénde. Ne kiéli jone ĥalyné, so jov sys Judo, tedy lyné saré te den gódla dre jekh zan, i pašé duj mardé (štundy) godlenas: “Bari isyn Artiemida Jefiesoskiri!” Tedy foróskiro barydyró štyliakirdia len i phendiá: “Jefiesianijale, kon manušéndyr na džinéla, so amaró fóro rakhéla khangirí baré-devlyniakiri Artiemidakiri i patrín (óbrazo). Kóli naštý te phenáv vari-so proti saró davá, tumé san bangé (musinena) te javén štyl i nisavó fuipén te na kerén. Tumé jandlé adalé manušén, savé na občorde amarí khangirí i savé na košne tumarja develnia. Kóli Mitraste (Dmitrijoste) i léskire malende isyn pir butý pe vari-konéste réndo proti vari-konéste léndyr, tedy aménde vaš davá isyn sendy, i isyn balunitka (prokonsuly) dre sendy: mek te džán odorík i te žalinenpe jekh pe jekhéste. Ne kóli tumé rodéna vari-so javír, tedy dalé réndy javéna te rozdykhenpe pe manušýtko skedyibena. Pal-dová so ame moginasa te javas bangé pal adadyvesatuno košybén, i aménge nane, dre so te dophenas péskiro nabangipen.” I dalé lavénca jov rozmekcia skedyibén. Kiéli košybén štylyja, Pávli khardiá sykliaibnytkonén, oblyja len, a kokoró gijá dre Makiedonija. I kiéli jov progijá pir dalé štéty, jov podrikirdia len buté lavénca, i javdiá dre Griécyja (Balámija). Pávli sys odój trin čhoná angíl léskiro tradypen ke Sirija, kiéli Judy zrakirdepe proti léste, i jov piridumindia te risjol pale pir Makiedonija. Les lydžánas Sosipatro, Piroskiro čhavó, Vierijanino, a Aristarho i Siekundo Fiesalonikiicendyr, i Gajo Diervianino i Xima (Timofiejo), Tihiko Trafimosa Asijatyr. Jone proginé angíl i užakirde amen dre Troada; ne ame korigedýr (pozžedýr) Apriesnokengire Svenkostyr vytradyjam Filipinendyr, i pir pandž dyvesá javdiám ke jone dre Troada, kaj sámas ohtó (bidujéngiro deš) dyvesá. Dro pérvo kurkitko dyvés, kiéli ame skedyjampe te phagiras maró, Pávli rakirdiá lénca, a pe javír dyvés jov kedelaspe te džal dro drom. I jov rakirdiá duredýr ke pašrat. Dre upratuny štúba, kaj ame skedyjampe, xačine but jaga. Pe fenštra sys beštó ternó manúš, savés khardé o Jevtiho, adiáke syr Pavlískiro rakiribén sys dléngo (gará), Jevtiho zasucia i pyjá telé pe phuv tritone vučypnastyr (etažostyr), i les ĥazdyné phuvjátyr mules. Pávli gijá telé, bandija pašýl léste i oblyja les, phení: “Na piridživen, pal-dová so léskiro dúho (fáno) isyn dre léste.” I kiéli Pávli ĥazdyjápe upré, jov phagirdiá maró, xaja, i rakirdiá lénca sarí rat ke/žýko zlóko (ránko), a tedy gijá duredýr. A terné manušés jandlé džides, i jone saré sys drieván ráda. Ame gijam angíl pe párma (korablie) i plyvindiam (dyjam plíma) dro Aso, sob (kaj) te las odothýr Pavlís: pal-dová so jov kokoró adiáke kamdiá, jov kedyjape odothýr te džal pezal. Kiéli jov strenindiape (dykhciape) aménca dro Aso, tedy ame lyjam les ke pe i javdiám dre Mitilina, I odothýr pe javír dyvés ame tradyjam duredýr i javdiám dro Xioso, a pe javír dyvés dogijam ke Samoso, i pir javír dyvés pritradyjam dro Milieto: pal-dová so Pávli zadumindia te na zatradel dro Jefieso, sob (kaj) léske te na zarikirelpe dre Asija, pal-dová so jov kamdiá, syr saštý sygedýr te perél odorík angíl Duhoskiro Svénko dúho dro Jerusalimo. Milietostyr jov bičhadiá manušén, sob (kaj) odolé te kharén khangirjákire godephuren. I kiéli jone javné ke jov, jov phendiá lénge: “Tumé džinéna, syr me anglatuné dyveséstyr, kiéli javdjom dre Asija, saró davá časo sómas tuménca, i me kandyjom sareske, i me kerdjom butý jasvénca vaš Devléske, na dykhí pe saró, so mánge prigijape te piridživav pal Judéngiro zrakiribén proti mánde; i syr me na promekcjom nisó te phenáv lav pal Isusóste tuménge, so tuménge javéla trej, i rakirdjom angíl sarénde i psirdjom pir kherá, me i syr rakirdjom Judénge i Griekénge (Balaménge), so jone sys bangé (musindle) te riskirén péskiro džiibén ke Devél i te patián dre Raste-Devléste, amaré Isusóste Xristosóste. I, ĥáda, kakaná me, syr Dúho (Fáno) lydžála man, me džáva ne Jerusalimo, i me na džinóm, so odój mánca javéla; a jekh Svénto Dúho (Fáno) pir saré fórja phenéla mánge pal dová, so man užakiréna mén'ki i štaribén. Ne me ni pe so davá na dykháva, i me na darava pal péskiro džiibén, jekh mánge trej te prodžav miro drom i te keráv réndo (diélo), savó dyjá mánge Raj Devél, Isúso Xristóso, te lydžav bahtalý zan (zvies') manušénge pal Devléskiro bahtalypén. I kakaná, ĥáda, me džinóm, so butýr tumé na dykhéna man saré, konesa me sómas khetané i konéske me phendjom lav pal Devléskiro Kralipén. Paldavá me i rakiráva tuménge davá adadyvés, so nane mirí bang pal rat, kóli kon tuméndyr xasjola, pal-dová so me nisó na promekcjom te rosphenav tuménge pal Devléskiri vólia. I adiáke rakhén pes i saré devlytkoné manušén, savén Svénto Dúho (Fáno) čhudiá te javén khangirjákire barydyrénca (dykhibnaskirenca), sob (kaj) te rakhén Devléskiri Khangirí, saví Jov doresciá Péske Léskire-Čhavéskire Ratésa. Me džinóm, so kiéli man na javéla, ke tumé javéna xoliamé manušá, syr ruvá, savé na javéna te tanginen (žalinen) devlytkonen; adiáke-pac' i maškír tuménde javéna manušá, savé javéna te rakirén xohanó sykliaiben, sob (kaj) te zlydžan pal péste sykliaibnytkonén. Paldavá dykhén i rakhénpe i ripirén, so me na pirijačavas te sykliakirav kažnones tuméndyr saré trin berš a ratý i dyvesé jasvénca. I kakaná, me piridava tumen Devléske i Léskire bahtiakiribnaskire lavéske, savó javéla te zorjakirel tumen i déla džiibén khetané sventonenca. Me nikonestyr na kamdjom te lav ni rup, ni suvnakái, ni ídia. Tumé kokoré džinéna, so me péskire vasténca zakeravas pe džiibén péske i odolé manušénge, savé sys mánca. Dro saró, so me te na keráv, me sykadjom tuménge, so amarí butý isyn dro dová, sob (kaj) te pomoginas čororenge, i te ripiras Ráskire-Devléskire Isusóskire lavá; savé Jov Kokoró phendiá, so manúš, savó déla, javéla bahtaledyr odoléstyr, savó léla. Kiéli Pávli phendiá davá, jov terdijá pe čangá khetané sarénca i mangdiápe Devléske sarénca. I jone saré rondlé, oblenas les i občamudenas, i jone drieván piridživenas pal léskire lavá, savé jov phendiá, so jone butýr nijékhvar na dykhéna les. I jone lydžiné les pe párma (korabljo). I kiéli ame roziaciampe lénca, tedy ame otplyvindiam (dyjám plíma kríg) i mamúj iavdiám dro Koso, i pe javír dyvés ame sámas ke Rodoso, i odothýr dyjampe ke Patara. Odój ame lathiam párma (korabljo), saví gijá dre Finikija, besciam pe láte i tradyjam pe láte duredýr. Ame protradyjam (nakhciám) Kipro, i jačkirdiam la pir zérvo (liévo) rig, i duredýr tradyjam dre Sirija i dre Tíro podtradyjam ke brégo, pal-dová so adáj treindiá te zlel parmátyr pharipén (gruzo). I kiéli odój ame lathiam sykliaibnytkonén, tedy jaciampe lénca ohtó (bidujéngiro deš) dyvesá, a jone, pir Duhoskiro uphenybén, rakirdé Pavliske, sob (kaj) jov te na džal dro Jerusalimo. Ne kiéli amaré dyvesá končyndlepe, ame tradyjam duredýr, i saré sykliaibnýtka péskire romniénca i čhavénca lydžiné amen pal fóro. A pe brégo ame terdijam pe čangá i mangdiampe Devléske. Ame roziaciampe jekh jekhésa i besciam pe párma, a jone risiné ke pe kheré. Tirostyr ame javdiám dre Ptoliemaida, odój ame phendiam “ramánjo” (miro) i dykhciampe pšalénca i sámas lénde jekh dyvés. Pe javír dyvés ame javdiám dre Kiesarija, i zagijam dre Filiposkire – jevangielistoskiro kher, jekhe eftá djakonendyr, i jaciampe léste. Léste sys napaloromitka patyvalé štar čhaja, savé angilphenenas. Ame odój sámas but dyvesá, i dre dová časo Judejátyr javdiá proróko, savés khardé Agavo, i jov podgíia ke ame i lyjá Pavliskiri kustýk, phandia péske ĥerá i vastá i phendiá: “Adiáke rakiréla Svénto Dúho (Fáno)”, – manušés, konéskiri isyn daja kustýk, adiáke phandena Judy les dro Jerusalimo i otdena les dre vastá Najudénge.” Kiéli ame šundiám davá, tedy ame, i saré štetytka, lyjam te mangas Pavlís te na džal dro Jerusalimo. Ne Pávli otphendiá: “So tumé keréna? Sóske tumé rovena i kušena miro iló? Me kamám te javav na so phandlo, ne i te merav dro Jerusalimo pal Devléskire-Isusóskiro lav. Kiéli ame ĥalyjam, so na moginasa les te otrakiras, ame pirijaciam les te otrakiras i phendiam: “Mek dro saró te javél Devléskiri vólia.” Paló davá časo, savó ame sámas lénde, ame kedyjampe i gijam dro Jerusalimo. Aménca giné vari-savé sykliaibnýtka Kiesarijatyr, jone jandlé amen dro kher ke Mnasono Kiprianino, jov sys jekh ĥaratuné sykliaibnytkonendyr. Kiéli ame javdiám dre Jerusalimo, pšála prilyné amen radymása. Pe javír dyvés ame Pavlisa javdiám ke Jakovo, odój skedynépe saré khangir'jengire godephuré. Pal davá, syr Pávli dyjá “dobridim” lénge, jov lyjá te rosphenel saró pal dová, so Devél kerdiá maškír Najudénde pir léskiro dynaribén. Kiéli jone vyšundle les, jone proslavindle Devlés, ne korigedýr (pozže) jone phendlé Pavliske: “Tu dykhésa, pšála, so but tysjoncy Judy lyné te patián, i saré jone šylales rakhena Mojzáskiro Zakóno; lénge rosphendlé pal dová, so tu sykliakiresa sarén Judén, savé dživéna maškír Najudénde, te otdžan Mojzáskire Zakonóstyr, sob (kaj) jone butýr te na občhinen péskire čhavorén i te na dživén pir amaró sykliaiben. So aménge te kerás? Davá trej te džinés, so kedenape but manušá, syr šunéna pal dová, so tu javdián. Paldavá, ker dová, so ame túke phenása: isyn aménde štar manušá, savéndyr isyn pe péste sovláh; le len, i prilé khetané lénca žužakiriben i zapleskir pal lénde, sob (kaj) jone te obmuraven péske šeró, tedy saré udžinena, so saró, so rakirdé pal túte, na čačipén, i so tu kokoró dživesa pir Zakóno. A pal devlytkoné Najudénde ame lénge čhindiam, so lénge sys naštý te na xan dová xabén, savó janéna syr svénto dyibén idolénge, i rat, adiáke-pac' i mas murdaléndyr, savó isyn zatasado i te na kerén biladžaipén.” Tedy Pávli lyjá odolén manušén i khetané lénca prilyjá žužakiriben, ne pe javír dyvés jov zagijá dre Khangirí i phendiá, kiéli prodžána (nakhéna) žužakiribnaskire dyvesá i pal kažnonéste léndyr javéla jandlo svénto dyibén. Kiéli dalé eftá dyvesá končyndlepe, Judy Asijatyr dykhné les dre Khangirí, i ĥazdyné manušén i uhtyldé les, i lyné te den gódla: “Izrailjoskire Muršále! Den vast! Davá isyn kadavá manúš, savó sarén i pir saró svéto sykliakiréla proti amaré manušénde, proti Zakóno, i proti davá štéto; apríč saró jov i Griekén (Balamén) jandiá dre Khangirí i magirdia davá svénto štéto.” Pal-dová so jone angledýr dykhné Trafimos Jefiesianinos khetané Pavlisa dre fóro: jone dumindle, so Pávli jandiá les dre Khangirí. Dre fóro ĥazdyjápe bizlado i skedynépe but manušá; i jone uhtyldé Pavlís, tyrdyne javrí Khangirjátyr, i dre dová-pac' časo čhakirde vudará. Jone kamlé te zamarén les, kiéli xaladéngire – tysjoncengire barydyréske piridyne zan (zvies') pal dová, so pir saró fóro manušá keréna bizlado. Jov dro dová-pac' časo, lyjá xaladengiren barydyrén i xaladén i gijá pe lénde. Kiéli jone dykhné tysjoncengire barydyrés i xaladén, to pirijačne te marén Pavlís. Tedy barydyró podgíia, zakedyja les i priphendiá te phanden les duje zandir'jenca, jov phuciá manušéndyr, kon jov sys i so jov kerdiá? Manušá, kon péske dyné gódla, i adiáke, syr pir dasaví gódla, jov nisó na mogindiá te udžinel, priphendiá te lydžán les dre kazarma. Kiéli jov sys pe 'gerunia (stupien'ki), xaladenge prijavdiape te lydžán Pavlís, manušá na dénas lénge te prodžan. Pal-dová so but manušá giné palál, i dyné gódla: “Meribén léske!” Angíl dová, syr te zadžál dre tvárdyma (diz), Pávli rakiréla tysjoncengire barydyréske: “Ci saštý (možna) mánge te phenáv vari-so túke?” I odová phendiá: “Tu džinésa Griekítko (Balamítko) čib?” Adiáke, so tu na san odová Jegiptianino, savó naĥara gazdyja i lydžijá pésa pe čhučí phuv štar tysjoncy rozmaribnar'jen?” Ne Pávli otphendiá: “Me som Judo, Tarsianino, manúš Kilikijakire baré foróstyr; i me mangáva tut te des vólia mánge te phenáv manušénge.” Kiéli tysjoncengiro barydyró dyjá vólia léske te rakirél, Pávli terdijá pe stylba (liesvica), sykadiá vastésa manušénge, sob (kaj) jone te šunén; i, kiéli saré jačné štyl, jov lyjá lénge te rakirél pe Judýtko čib, rakirí: “Muršále, pšalále, dadole! Šunén kakaná miro lav te čačakirav (te opradynav) pes angíl tuménde.” Kiéli manušá šundlé, so jov lyjá te rakirél lénca Judytkes, jone lyné te javén štyledyr. I jov phendiá: “Me som Judo, bijandyjom dro Kilikijakiro Tarso, a vybarijom me dre davá fóro, me som lačhés vysykliakirdo dre amaré dadéngiro i vystalindjompe pašýl Gamaliiloste dro Zakóno, i adiáke-pac' me patiáva dre Devléste, syr i saré tumé adadyvés; me kerdjom bipatyv (zdiekindjompe) pe manušénde, savé giné dalé dromésa, phandavas i čhuvavas dre štaribén muršén i džuvlién; davá sareske isyn jakhítka, pérvo rašángiro barydyró, saró phurydyrengiro skedyibén, savéndyr me dorescjom (lyjom) lyl pšalénge, savé dživéna ke Damásko, me gijom odorík vaš dová, sob (kaj) te zakedav kodolén manušén dre sastyrá i te janav len dro Jerusalimo pe mén'ki. I sys davá saró adiáke: kiéli me gijom pir drom odorík i pašýl podgijom ke Damásko, sys davá dro pašdyves, syr bolybnástyr zaziaindia pašýl mánde baró dud (svéto). Me pyjom pe phuv i šundjom zan, saví rakirdiá mánge: “Sávlie, Sávlie! Sóske tu Man tradesa?” I me otphendjom: “Kon Tu san, Rajo Dévla?” I Jov otphendiá mánge: “Me som Isúso Nazariejo, Saves tu tradesa.” Manušá, savé sys mánca, dykhné svéto, ne jone na šundlé zan Odoleskiri, Kon mánge rakirdiá. I me phendjom: “Rajo Dévla! So mánge te keráv?” Raj Devél phendiá mánge: “Uštý i džá dro Damásko i odój túke phenéna saró, so javéla trej túke te kerés.” Ne syr me odolé jarkone dudéstyr kororijom, tedy manušá, savé sys mánca, jandlé pal vast man dro Damásko. I odój sys jekh manúš, savés khardé Ananija, jov darelas Devléstyr pir Zakóno, a saré Judy, savé dživdé odój, kutiakirde les, i jov javdiá ke me i phendiá mánge: “Sávlie, Pšála, dykh!” I dre dová-pac' časo (momiento), me jacjom te dykháv i dykhcjom les. I jov phendiá mánge: “Devél amaré dadéngiro vykedyjá tut, sob (kaj) tu te udžines Léskiri vólia i te dykhés čačunés i te šunés lavá, savé Jov kokoró túke phenéla, pal-dová so tu javésa jakhítko Léske angíl saré manušénde pal dová, so tu dykhcián i šundián. I so tu kakaná užakiresa? Uštý, džá te priles boldeipen, i sob (kaj) te morenpe krig gréhi tyré, kiéli pomangesape Devléske vaš Ráskire-Devléskiro, Isusóskiro lav.” I kiéli me risijom dro Jerusalimo i mangdjompe dre Khangirí, me javdjom dro divno piridživiben i mánge sys dykhibén, kiéli me dykhcjom Ras-Devlés, Savó phendiá mánge: “Sygedýr džá krig Jerusalimóstyr, pal-dová so adáj na priléna tyró dophenybén pal Mánde.” I me phendjom: “Rajo Dévla! Adalé manušá džinéna, so me čhudjom dro štaribén i mardjom dre sinagogi odolén, kon patiála dre Túte; i kiéli čhuvelaspe rat tyré-jakhitkoneskire Stiehvanoskiro, me kokoró odój sómas terdó, i podrikiravas léskiro maribén, me adiáke-pac' rakhcjom léskire – umaribnar'jengire ídi.” I Jov phendiá mánge: “Džá, pal-dová so Me bičhaváva tut dur ke Náiudy.” Ke davá lav manušá šundlé Pavlís, ne syr jov adiáke phendiá, jone lyné te godlen: “Les trej te zlydžas svetóstyr, adasaveske naštý te dživél.” I kiéli jone dénas gódla, jone trinskirde péskire idienca i čhurdenas upré práho dro fáno (vozduho). I tysjoncengiro barydyró phendiá te lydžán Pavlís dro štaribén i priphendiá te marén les čhupniasa, sob (kaj) te džinén, sóske manušá adiáke pe léste isyn xoliamé. Kiéli les priphandenas, sob (kaj) te marén, Pávli phendiá šelengire barydyréske, savó sys terdó pašýl: “Ci saštý tuménge te marén Rimóskire manušés bi sendoskiro?” Kiéli davá šundiá šelengiro barydyró, jov gijá i rosphendiá tysjoncengire barydyréske, phení: “So tu kedesape te kerés? Kadavá isyn Rimoskiro manúš.” Tedy tysjoncengiro barydyró vygijá ke Pávli i phuciá léstyr: “Phen mánge, ci čačó, so tu san Rimoskiro manúš?” Jov phendiá: “Čačó.” I tysjoncengiro barydyró phendiá: “Sob (kaj) te jačav Rimóskire manušésa, mánge prijavdiape te pleskirav baré lové.” Pávli otphendiá: “A me bijandyjom Rimóskire manušésa.” Tedy odolé manušá, savé kedynepe te dophučen léstyr, uraz giné; a tysjoncengiro barydyró strahadyja, syr udžindiá, so jov zaphandia dre sastyrá kodolés, savó sys Rimoskiro manúš. I pe javír dyvés, jov zakamdiá te džinél, dre so Judy bangiakirenas les i jov zlyjá léstyr sastyrá i priphendiá vaš davá saré rašángire barylyrenge i sendar'jenge (Siniedrionoske) te skedénpe, i kiéli jandiá Pavlís, čhudiá les angíl lénde. Pávli dykhcia mamúj pe manušénde, savé kedynepe, i phendiá: “Muršále, pšalále, dadole! Me lačhé i čačuné ilésa dživdjom péskiro džiibén angíl Devléste ke/žýko adadyvesatuno dyvés.” Ne rašángiro barydyró Ananija priphendiá manušénge, savé sys terdé pašýl Pavliste te marén les pir uštá. Tedy Pávli phendiá léske: “Devél javéla te marel tut, vánta podmakny tu san! I beštó tu san odój, vaš dová, sob (kaj) te sendiakires man pir Zakóno, a kokoró tu kerésa na pir Zakóno, kóli priphenesa te marén man?” Odolé, kon sys terdó pašýl Pavliste, phendlé léske: “Tu košesa Devléskire-rašángire barydyrés.” I Pávli otphendiá: “Me na džindjom, pšalále, so jov isyn rašángiro barydyró, pal-dová so dro Svénto Čhinybén rakirelape: ‘Na koš manušéngire barydyrés.’” Ne Pávli džindiá, so jekh paš léndyr sys Sadukiei, a javír paš Farisiéi, paldavá jov lyjá zoralés te rakirél Siniedrionoske (sendoskire skedyibnaske): “Pšalále miré! Me som Farisiejo, čhavó Farisiejoskiro; i sendinena man pal miro lačhó užakiribén dro otdžidyiben muléndyr.” Kiéli jov phendiá davá, maškír Farisiejende i Sadukiejende vygijá košybén, i manušá Skedyibnastyr rozginepe pe duj rigá. Pal-dová so Sadukiei rakiréna, so nane otdžidyiben muléndyr, ni Jangolen, ni dúho (fáno); a Farisiéi patiána dre saró davá. I ĥazdyjápe bari gódla, i uštyné lylvarítka Farisiejengire rigátyr i lyné te rakirén: “Ame nisavó čoripén na lathiam dre adalé manušéste; kóli dúho (fáno) ci Jangólo rakirdiá léske?” Ne adiáke, syr košybén jaciá baredýr, tedy tysjoncengiro barydyró strahadyja, sob (kaj) jone te na roskušen Pavlís, i priphendiá xaladenge te džán i te len les odothýr zorjása i te otlydžan dro štaribén. Dre javír rat ke jov javdiá Raj Devél i phendiá: “Jav murškanó; pal-dová so syr tu sánas Miro jakhítko dro Jerusalimo, adiáke-pac' tu javésa jakhítko i dro Rimo.” Kiéli jaciá dyvés, Judy zrakirdepe maškirál péste i dyné sovláh, te na xan i te na p'jen, paka jone zamarena Pavlís. Dro davá zrakiribén sys butýr, syr štardešá manušá; i jone javné ke rašángire barydyrá i ke godephuré i phendlé: “Ame dyjam péske sovláh te na xas nisó, paka ame zamarasa Pavlís. Tumé i sendoskiro skedyibén mangén tysjoncengiro barydyrés, sob (kaj) te janén les ke tumé, sýrby vaš dová, sob (kaj) fededýr te rozdykhes léskiro réndo, a me javása te terdjovas pe stréga i dása muló (muliakirasa) les angledýr, syr jov dodžála adarík.” Kiéli pal davá zrakiribén šundiá Pavliskire – pheniakiro čhavó, jov javdiá dro štaribén i rosphendiá léske i pal davá. Tedy Pávli khardiá jekhe šelengire barydyrés i phendiá léske: “Lýdža kadales terné manušés ke tysjoncengiro barydyró, pal-dová so jov kaméla vari-so te phenél léske.” Odová lydžijá les ke tysiencengiro barydyró i rakiréla: “Štaribnaskiro Pávli, khardiá man i mangdiá te janav ke tu kadalé terné manušés, savó kaméla vari-so te phenél túke.” Tysjoncengiro barydyró lyjá les pal vast, lydžijá les dre rig i phuciá: “So tu dasavo kamésa mánge te phenés?” Jov phendiá: “Judy skedynépe te mangén tut, sob (kaj) atasiá tu te janes Pavlís pe skedyibén, sýrby vaš dová, so jone kaména fededýr te roskedenpe dre léskiro réndo. Ne tumé na patián lénge, pal-dová so les podrakhena butýr, syr štardešá manušá, savé dyné sovláh te na xan i te na p'jen, paka jone zamarena les; i jone kakaná isyn terdé pe stréga i užakiréna tyró uphenybén.” Tysjoncengiro otmekciá terné manušés, i priphendiá léske: “Nikonéske na rákir pal davá, so tu rosphendian mánge.” I kiéli jov vykhardia dujén péskire barydyrén i priphendiá lénge: “Keden dujšelá xaladén te džán ke Kiesarija, ohtodešá uklisté pe grénde i dujšelá xaladé lukenca pir trin mardé korigedýr (pozžedýr) doléstyr, syr kaljola javrí dre jeniá (bijekhéskiro deš) mardé (časy). I den Pavliske oslós, sob (kaj) jov te bešél uklisto/e pe léste i te janén džides les ke balunitko (pravitieljo) Fielikso, I jov čhindiá adasavó lyl: “Klavdijostyr Lisijostyr Naj Fedydyreske balunitkoneske Fieliksoske, lačhó dyvés! Kadalé manušés uhtyldé Judy i kedynepe te muliakirén; me javdjom xaladenca i zrakhcjom les, adiáke syr me udžindjom, so jov bijándyja dro Rimo. Pal-dová so me zakamdjom te udžinav, dre so isyn léskiri bang angíl lénde, me jandjom les angíl léngiro sendoskiro skedyibén; i me ĥalyjom, so bang léskiri isyn sphandly léngire Zakonosa, i so nane dre léste nisaví bang, sob (kaj) jov te javél mol meribnáske ci te čhuvés les dro štaribén. A syr me udžindjom, so Judy zrakirdepe te muliakirén adalé manušés, me dre dová-pac' časo bičhadjom les ke tu i priphendjom manušénge, savé bangiakirena les, te rakirén proti léste angíl túte. Jav sastó.” Paldavá xaladé pir uphenybén, savó lénge sys dynó, lyné Pavlís i giné ratý khetané lésa dre Ancipatrida, i pe javír dyvés, jone bičhadé xaladén, savé tradyne uklisté pe grénde, te lydžán Pavlís, a kokoré risiné dre kazarma. I odolé, kiéli javné dre Kiesarija, piridyne balunitkoneske lyl i adiáke-pac' čhudé Pavlís angíl léste. Balunitko gindia lyl i phuciá Pavlístyr, savé jov sys štetóstyr, i kiéli jov udžindiá, so jov sys Kilikijatyr, tedy phendiá: “Me vyšunava tut pherdés, kiéli adarík javéna manušá, savé bangiakirena tut.” I jov priphendiá xaladenge te rikirén les pe Irodoskiri gréda (dvóro). Pir pandž dyvesá rašángiro barydyró Ananija javdiá godephurénca, i vari-savé slavutnone pharé-lavéskirésa (oratorosa/ritorosa) Tiertulosa, i jone phendlé pal Pavliskiri bang angíl balunitkoneste Fieliksoste. Kiéli jone jandlé Pavlís, o Tiertulo lyjá te dophenel Pavliskiri bang, rakirí: “Parikirasa túke, so, syr tu jacián balunitkonesa, amarí rig jaciá ramanjonó (mirnoo) i jaciá mištó te dživél i amaré-manušéngiro džiibén jaciá fededýr, pir tyré paruibena. Save ame prilasa, Naj Fedydyr Fielikso, dro saró i pir saró svéto saré parikiribnasa. Ne, sob (kaj) tut ĥará (dlúges) te na khiniakiras, me mangáva Tut te vyšunes nabaró mangipén pir tyró kovlo iló. Ame džinása, so adavá manúš isyn sýrby fránso i jov ĥazdéla búnto maškír saré Judénde i pir saró svéto, jov isyn šeraló pir Nazariejoskiri siekta; jov kamdiá te magirel amarí Khangirí, paldavá ame les zarikirdiam i kedyjampe te sendiakiras pir amaró Zakóno; ne tysjoncengiro barydyró Liso javdiá i otlyja zorjása les amaré vasténdyr i bičhadiá ke tu, i jov priphendiá aménge te džas i angíl túte te dophenas léskiri bang, a kiéli tu dophučesa léstyr, tu kokoró javésa te džinés, so amaró dophenybén pe léste isyn čačunó” I Judy podrikirde léngiro dophenybén, rakirí, so saró davá, so jone rakirdé pe léste, sys čačipén. Kiéli balunitko sykadiá vastésa Pavliske te rakirél, jov otphendiá: “Pal-dová so Me džinóm, so tu san sendári but berš pe adalé manušénde, me ginava davá pal bari baht i drieván som rado, so mánge saštý te otphenav angíl túte pal miro réndo (diélo). Syr tu moginésa davá saró te propatias, dešudúj dyvesá pale me javdjom vaš mangipén Devléske dro Jerusalimo, i adalé manušá, savé angíl túte dophenena mirí bang, jone nijékhvar man na dykhné ni dre Khangirí ni dre sinagoga, sob (kaj) me vari-konesa te lydžav čingárd, ci te ĥazdav manušén pe búnto dro fóro, adiáke-pac' jone na moginéna te dophenen mirí bang pir réndo, dro savó jone kakaná bangiakirena man. Ne me dre jekh mogináva te priĥaljovavpe túke, so me dynarinava amaré-dadengíre Devléske i džáva pir davá Drom, savó jone kharéna “ieries' (siekta),” me patiáva sareske, so isyn čhindló dro Zakóno i Proróki; i mánde isyn lačhó užakiribén Devléstyr, so javéla otdžidiakiriben muléndyr, syr čačunen, adiáke-pac' i načačune manušén, dová-pac' jone i kokoré užakiréna. Vaš davá me kokoró dykháva pal dová, sob (kaj) mánde ŭsády (sak) te javél žužy patýv angíl Devléste i manušénde. Korigedýr (pozže), syr giné beršá, me javdjom dro Jerusalimo, vaš dová, sob (kaj) te otdav skedyibnytko dyibén miré manušénge, i sob (kaj) te janav svénto dyibén Devléske; tedy jone i lathné man, kiéli me kerdjom žužakiriben pir Zakóno dre Khangirí, i na sys manušá pašýl mánde, na sys ni savó búnto. Ne adáj ža treindiá te javén Judénge Asijatyr, te javén ke tu i te dophenen mirí bang, kóli vari-so isyn lénde proti mánde; ci mek jone kokoré te phenén, dre so jone lathné mirí bang, kiéli me javdjom angíl sendoskiro skedyibén, a sys jekh davá lav, savó me zoralés phendjom, kiéli me sómas terdó maškír lénde: “Pal otdžidiakiriben muléndyr tumé sendinena adadyvés man!” I Fielikso, savó mištés džindiá davá Drom, otčhudia Pavlískiro réndo i phendiá: “Kiéli javéla tysjoncengiro barydyró Liso, me rozdykhava tyró réndo”; i priphendiá šelengire barydyréske te rakhén Pavlís, ne te del léske butýr vólia, i te na zaphenel nikonéske léskire pašatunendyr te dynarinén léske. Pir vari-kicý dyvesá Fielikso javdiá péskire romniása Judycasa, savjá khardé Druzila, i jov bičhadiá pal Pavliste, sob (kaj) te džinén butýr pal léskiro patiaibén dre Isusóste Xristosóste. I pal-dová so Pávli rakirdiá pal čačipén, i pal-dová, sob (kaj) te obrikirel pes dro džiibén angíl séndo, savó angíl javéla, o Fielikso strahadyja i phendiá: “Kakaná džá, ne syr javéla mánde časo, me kharáva tut”; léste sys lačhó užakiribén, so Pávli déla léske lové: pal-dová jov bičhavelas adiáke-pac' pal léste butýr i jov rakirdiá lésa. Ne proginé (nakhle) duj beršá, i Porcyjo Fiesto parudia Fieliksos, a Fielikso zakamdiá te javél kuč Judenca, paldavá mekciá Pavlís dro štaribén. I paldavá, kiéli Fielikso javdiá pe daja rig, jov pir trin dyvesá gijá Kiesarijatyr dro Jerusalimo. Dro Jerusalimo rašángire barydyrá i Judéngire šeralé javné bangiakiribnasa pe Pavliste ke jov i mangné les, sob (kaj) jov te otphenel pe léngiro mangipén i te vykharel Pavlís dro Jerusalimo; a kokoré jone kamlé te podrakhen les pir drom i te zamarén. Ne Fiesto otphendiá lénge, so Pávli sys beštó dro štaribén dre Kiesarija, i so jov syg kokoró džála odorík. “Paldavá, – phendiá jov, – kon tuméndyr isyn barydyrá, mek te džán khetané mánca, i te dophenen odój léskiri bang, kóli jov kerdiá savó fuipén.” Jov jaciápe maškír lénde eftá (bitrinéngiro deš) ci deš dyvesá, a tedy risijá dre Kiesarija, i pe javír dyvés besciá pe sendariskiro štéto i phendiá te janén Pavlís. Kiéli Pávli javdiá, Judy, savé javné Jerusalimóstyr, terdiné trusciál léste i lyné te čhuvén pe Pavliste drieván bari bang, ne te dophenen la jone na mogindlé. Tedy Pávli otphendiá pal péskiro čačipén: “Me na kerdjom ni savó čoripén ni proti Judýtko Zakóno, ni proti Khangirí, ni proti khieningóste (kiesarjoste).” O Fiesto kamdiá te zadžál dre patýv Judénge, i paldavá phuciá Pavlístyr: “Ci tu kamésa te džas dro Jerusalimo, sob (kaj) me odój te sendinav tut dre dová, dre so tut bangiakirena?” Ne Pávli phendiá: “Me som terdó angíl khieningoskiro séndo, i adáj man isyn bangé te sendinén; me na kerdjom nisavó čoripén Judénge, syr i tu kokoró šukár džinésa mištó davá. Tedy, kóli me som bangó i kerdjom vari-so, pal so me som mol meribnáske, tedy me na davape pale meribnástyr; ne kóli nisó davá nane, dre so jone bangiakirena man, tedy nikón na moginéla te vydel man lénge. Me trebinava khieningoskiro séndo.” Tedy Fiesto pirirakirdia péskire manušénca skedyibnástyr i otphendiá: “Tu mangdian, sob (kaj) tut te sendinel khieningo, ke khieningo tu i džása.” Pir vari-kicý dyvesá králi Agrípa i Vierienika javné dre Kiesarija te den “paklono” Fiestoske. I adiáke, syr jone sys odój but dyvesá, Fiesto rosphendiá pal Pavlískiro réndo kralíske: “Adáj isyn jekh manúš, savés Fielikso čhudiá dro štaribén, pe savéste, kiéli me sómas dro Jerusalimo rašángire barydyrá i Judéngire godephuré javné bangiakiribnasa pe léste; jone mangné, sob (kaj) me les te sendinav: a me otphendjom lénge, so Rimlianende adiáke na lydžalape, sob (kaj) te vydes vari-savé manušés pe meribén; ke/žýko dová časo, paka léske javéla dophendly léskiri bang muj ke muj i javéla saštý (možno), sob (kaj) jov te rakirél pal péskiro čačipén. I kiéli jone javné adarík khetané mánca, i me tedy na otčhudjom, ne pe javír dyvés, bescjom pe sendariskiro štéto i phendjom te janén adalé manušés: les obštade manušá, savé javné te bangiakiren les i nikón léndyr na dophendia dre dolé nalačhé réndy, pal savé me dumindjom; a lénde sys phučibena ke jov pal léngire patiaibnaskiri štáma (svódo), i pal vari-savé Isusóste, savó myjá, ne pal Savéste Pávli dophenelas, so Jov isyn džidó. Me na džindjom, syr mánge roskedavpe dre davá réndo, me phucjom léstyr, ci kaméla jov te džal dro Jerusalimo i te javél sendindlo odój? Ne adiáke, syr Pávli mangdiá, sob (kaj) les i léskiro réndo jačkirav pe Avgustoskiro rozdykhiben, me priphendjom te rikirén les dre štaribén, paka mánge javéla saštý te bičhavav les ke khieningo.” Agrípa phendiá Fiestoske: “Me i kokoró kamám te šunav kadalé manušés.” Odová otphendiá: “Atasiá šunesa les.” Pe javír dyvés, kiéli Agrípa i Vierienika baré phut'kiribnasa giné andré sendoskiro kher khetané tysjoncengire barydyrénca i patyvalé manušénca, pir Fiestoskiro priphenybén jandlé Pavlís. I Fiesto lyjá te rakirél: “Králjo Agrípa! Saré manušá, kon isyn khetané aménca, tumé dykhéna kadalé manušés, pal savéste but Judy javénas ke me dro Jerusalimo i adáj godlása i mangipnasa, so kadavá manúš na mol butýr te dživél. Ne me roskedyjompe, so jov na kerdiá nisó dasavo, sob (kaj) te javél mol meribnáske, i syr jov kokoró mangdiá Avgustoskiro séndo, me kedyjompe te bičhavav les ke jov; ne me na dykháva nisó dasavo, so te čhinav pal adalé manušéste miré Ráske. Paldavá me jandjom les ke tumé, ne butýr saréstyr ke tu, králjo Agrípa, sob (kaj) korigedýr (pozže), syr tu léstyr dophučesa, mánge te džináv, so mánge te čhinav. Mánge zdelape, so naštý te bičhaves štaribnaskires, kóli me te na uphenav pe léskiri bang.” I phendiá Agrípa Pavliske: “Túke saštý te rakirés pal péste.” Tedy Pávli ĥazdyjá vast i lyjá te rakirél, sob (kaj) te zaterdjol pal péste: “Králjo Agrípa! Me ginava pal baht, so me adadyvés mogináva te terdjovav angíl túte i te rakiráv pal saró, dre so Judy bangiakirena man, paldavá fedýr saréndyr dová, so tu džinésa saró Judéngiro sykliaiben i phučybena, pir savé jone čingardenape; paldavá Me mangáva tut te vyšunes man dro saró. Miro džiibén terné beršéndyr, savó angledýr me dživdjom, sys maškír miré manušénde dro Jerusalimo, i saré Judy džinéna; jone, savé ĥará džinéna man, i moginéna te javén jakhítka, so me dživdjom, syr Farisiejo pir sarí amarí patiaibnaskiri strogima. I kakaná me som terdó angíl séndo pal lačhó užakiribén (nadieinyben), pal savó Devél dyjá lav amaré dadénge, i vaš daja nadiéia, amaré dešudúj manušéngire ródy, dyvés i rat dynarinena Devléske, i pal daja nadiéia, králjo Agrípa, Judy man bangiakirena. Sóske tumé adiáke na patiána dro davá, so Devél otdžidiakirela mulen? Me, čačó, adiáke-pac' dumindjom, so proti Isusóskire Nazariejoskiro lav mánge trej but so te keráv. Me i kerdjom davá-pac' dro Jerusalimo; pir rašángire – barydyrengiro uphenybén, me buten devlytkoné manušén čhudjom dro štaribén; a kiéli len zamarenas, me rakirdjom miro lav pal davá. Me but móly menčyndjom len pir saré sinagogi, i me začhuvavas len te teliakiren Isusós. Mánde sys bari xolý pe lénde, me psirdjom vaš davá dre javír duratuné fórja. I kiéli me dorescjom (lyjom) pravo i uphenybén rašángire barydyrendyr, me gijom dro Damásko. Pir drom dro pašdyves, králjo Agrípa, me dykhcjom dud (svéto) bolybnástyr, savó xačija zoraledýr khamestyr, dová dud oziaindia man i manušén, savé giné mánca. I kiéli ame saré pyjam pe phuv, i me šundjom zan, saví rakirdiá mánge pe Judýtko čib: “Sávlie, Sávlie! So tu Man tradesa? Pharó isyn túke te džas proti Devléste. Me phucjom: “Kon Tu san, Rajo Dévla?” Raj Devél phendiá: “Me som Isúso, Saves tu tradesa: ne tu ĥazdepe i uštý pe ĥerá, Me paldavá javdjom, sob (kaj) te keráv tut dynarisa i jakhitkonesa doléske, so tu dykhcián Man, i dro dová, so Me túke butýr sykaváva, Me zrakháva tut – manušéngire vasténdyr i Najudendyr, ke savé Me kakaná bičhaváva tut, te otčhakires léngire jakhá, sob (kaj) jone te risjon kalypnástyr ke dud i nalačheskire zorjátyr ke Devél, sob (kaj) te javén otmekne gréhi léngire, i sob (kaj) jone adiáke-pac' te javén maškír odolénde, konés Me kerdjom sventonenca pir léngiro patiaibén dre Mánde.” Paldavá, králjo Agrípa, me na mogindjom te na kandav dová, so me dykhcjom bolybnástyr; a angledýr manušénge, savé dživdé ke Damásko i ke Jerusalimo, korigedýr pir sarí Judejakiri phuv i Najudénge me phenavas lav, sob (kaj) jone te riskirén péskiro džiibén ke Devél i, sob (kaj) léngiro riskiriben te javél mol pir léngire lačhé réndy. Pal davá Judy i uhtyldé man dre Khangirí i kamlé te zamarén. Ne Devél ke/žýko adadyvesatuno dyvés pomoginela mánge, i, ĥáda, me som terdó adáj i dophenava sarénge, tyknenge i barenge, me nisó butýr na rakiráva, apríč dová, pal so proróki i Mójza rakirdé pal dová, so javéla, so Xristosóske treindiá te pirilydžal saré mén'ki i anglatuneske te otdžidjol muléndyr, i so Jov džála pir svéto i rosphenéla pal dud vaš zrakhibén Péskire manušénge i Najudénge.” Kiéli Pávlie adiáke rakirdiá te zaterdjol pal péste, o Fiesto zoralé zaniása phendiá: “Tu zgijan godiatyr, Pávli! Baró sykliaiben dolydžija tut, so tu zdylnandyjan.” “Nad, Naj Drogedyr Fiesto, – phendiá Pávli, – me na zdylnandyjom, me som dre péskiri godý i lavá, savé me rakiráva, isyn čačuné. Králi džinéla saró pal davá, angíl savéste i me rakiráva murškanés. Me na patiáva, sob (kaj) so te na javél i pal davá te na džinél králi; pal-dová so davá na sys kerdó dro venglo. Ci patiása tu, králjo Agrípa, prorokenge? Me džinóm (džináv), so tu patiása.” Agrípa phendiá Pavliske: “Sarésa nábut, i tu patiakiresa man, sob (kaj) me te jačav xristijaninosa.” I Pávli otphendiá: “Me mangáva Devlés, sob (kaj) ci nábut, ci but, ne na jekh tu, a saré, kon šunéla man adadyvés, te jačen dasavé, syr me som, sob (kaj) féni jone te na javén dre zandirjá (cépi), syr me.” Kiéli Pávli phendiá davá, králi i balunitko i Vierienika uštyné, i saré, kon sys bešté, khetané lénca, i jone giné dre rig, i rakirdé maškír péste: “Adavá manúš na kerdiá nisó dasavo, sob (kaj) te javél mol meribnáske ci te javél dre zandirjá (cépi).” Agrípa phendiá Fiestoske: “Adalé manušés saštý (možna) javélas te mekas pe vólia, kóli jov te na mangél khieningoskiro séndo.” Kiéli sys prilyno te plyvinas (das plíma) dre Italija, tedy Pavlís i javirén štaribnaskiren zdyne tysiencengire-xaladéngire barydyréske, savés khardé Julijo, jov isyn Augustoskire polkostyr. Ame besciam pe Adramitoskiri párma (korabljo), savéske treindiá te tradel pašýl Azijakire štéty i tradyjam, aménca sys Aristarho, Makiedonianino Fiesalonikendyr. I pe javír dyvés ame pritradyjam dro Sidono. Julijo otlydžalaspe ilésa ke Pávli, délas vólia léske te psirél ke drúgi (malá), sob (kaj) jone te dykhén pal léste. I tradyi odothýr, ame tradyjam pašýl Kipro balvaliakire rigátyr, pal-dová so jaciá bari balvál mamúj (priames) dre amarí rig. Kiéli ame piriplyvindiam (dyjam plima) mórjo (derjáv) Kilikijakire i Pamfilijakire bregostyr, ame pritradyjam dre Likijakire Miry: odój xaladéngiro barydyró, lathiá Alieksandrijakiri párma, saví tradyjá ke Italija, i čhudiá amen pe láte te tradas. Ame but dyvesá i pe nábut plyvinasas (dasas plima), i pir bari zor ame dogijam ke Knido adiáke, so pir bari balvál ame na mogindiam te plyvinas duredýr, i ame podtradyjam ke Krito Salmonoskire rigátyr. I baré pharipnasa ame tradasas pašýl Kiproskiro brégo, i javdiám ke jekh štéto, savó kharenas Lačhé Pristani (Zatoki), nádur odothýr sys fóro Laseja. Ne adiáke, syr progijá drieván but časo, i te plyvines sys darano, pal-dová so i posto progijá, tedy Pávli lyjá te patiakirel len, i jov rakirdiá lénge: “Muršále! Me dykháva, so davá plyvinyben javéla bidasa i baré xasiakiribnasa na jekh vaš jekh pharipen (gruzo) i párma, ne i vaš manušéngiro džiibén.” Ne xaladéngiro barydyró butedýr patiandyja manušéske, savó lydžalas párma i léskire xuláske, a na Pavliskire lavenge. I pal-dová so, syr kadavá zatoko na poddžalas, sob (kaj) odój te javas saró/í ivant (zima), i but manušá sys pal dová, sob (kaj) te tradas krig odothýr, i, kóli te javél saštypen te dokedaspe ke Finika i odój te dživás ivante (zimakiro), Finika sys Kritoskiro porto, karik mogindlé te zadžán pármy, i sys začhakirdo balvaliatyr paš-dyvesytkoné-zapadnonengire i paš-ratitkoné-zapadnone rigéndyr. I kiéli jaciá nabari balvál paš-dyvesytkoné rigátyr, jone podumindle, so jone doresné dová, so lénge trej, ĥazdyné jakorjo te plyvinen (te den plima) nádur bregostyr pašýl Krito. Ne syg ĥazdyjápe pe Krito baró štormo, savó kharélape Jevroklidono. I pal-dová, so amarí párma poduhtyldia balvál, joj na mogindiá te plyvinel (te del plima) duredýr proti balvál, ame mekciam párma te plyvinel (del plíma) balvaliasa i amen čhurdelas dre saré rigá. A kiéli ame sýrby piriurniandyjam mamúj nabaró kotér phuv, savó kharéna Klavda, odój ame baré pharipnasa pirizorjakirdiam (zbierdyndiam) te rikiras parmakiri bárka (lodka), savjá ĥazdyné pe párma, kiéli protyrdyne šole trusciál i tel párma i obphandlé la; jone darándyne, sob (kaj) te na javén vyčhurdyne balvaliasa pe práho dre Sirto, paldavá jone zmekne balvaluné (párusy) i duredýr jone adiáke tradenas. Ne pal baró štormo, savó zoralés čhurdelas amarí párma dre saré rigá, pe javír dyvés ame lyjam te vyčhurdas pharipén (gruzo) dro paní, a pe tríto dyvés jone péskire vasténca vyčhurdyne saró parmakiro mištypén (osnaščenijo) dro paní. I syr but dyvesá na sys bicialó ni kham, ni čergeniá, i štormo na pirijačelas te štyljol; ame xasiakirdiam kažno nadiéia te zrakhaspe. Paldavá so drieván ĥará na xané nisó, jone xasiakirdé zor, to Pávli terdijá maškirál lénde, i phendiá: “Tuménge treindiá te kandén man: te na tradas Kritostyr, tedy ame na piridživasas dasaví bída i xasibén. Kakaná Me mangáva tumen, te na darén, pal-dová so ni jekh manúš tuméndyr na xasjola apríč párma. Paldová so dre daja-pac' rat Devléskiro Jangólo javdiá ke me, Konéskiro me som i Konéske me dynarinava, i phendiá: “Na andyrša, Pavlie! Tu javésa te terdjos pe séndo angíl khieningóste (kiesarjoste); i, ĥáda, Devél darinela džiibén sarénge, kon plyvinela (dela plima) túsa.” Paldavá na darén, pal-dová so me patiáva Devléske, so saró javéla adiáke, syr Jov phendiá mánge. Ame sam bangé te javas vyčhurdyne pe vari-savó óstrovo (džip).” Ne kiéli jaciá dešuštarto rat, syr amen tradelas balvál pir Adriatikoskiro (Adriatičiesko) mórjo (derjáv), pašýl pašrat manušá lyné te ĥaljon, so syg jone džánas pašyledýr ke vari-saví phuv, jone i lyné te sprobinen, ci xor sys paní, i vygijá, so panieskiro xoripén sys pašé štardešá ohtó mietry, tedy jone nádur zmierindle i lathné, so xoripén sys pašé trijánda mietry; jone darándyne, sob (kaj) te na poperen pe baruné štéty, i mekné telé parmátyr štar jakori, i jone užakirenas, kiéli jačéla dyvés. Kiéli matrosy skedynépe te našén parmátyr i jone mekné telé bárka pe paní, pefromi, so jone sýrby kaména te mekén telé parmakire nakhestyr jakorjo, ne Pávli phendiá tysjoncengire barydyréske i xaladenge: “Kóli adalé manušá na jačénape pe párma, tedy i tumé na moginéna te zrakhenpe.” Tedy xaladé piričingirde šele, savé rikirde bárka, i joj pyjá dro paní. Angíl sámo dyvés, Pávli lyjá te kharel sarén manušén te xan i phendiá: “Adadyvés dešuštarto dyvés, syr tumé užakiréna, tumé sarésa nisó na xána. Paldavá me mangáva tumen te len te xan; davá trej tuménge vaš dová, sob (kaj) tumé te javén džidé; ni konéste tuméndyr ni jekh bal na xasjola tumaré šerestyr.” Phení davá, Pávli lyjá maró, parikirdia pal léste Devléske angíl sarénde, rosphagirdiá i jaciá te xal. Tedy saré manušá pirijačne te darén i lyné te xan. Sarén amen sys pe párma dujšelá ohtodešá šov manušá. Kiéli manušá xané čalés, jone lyné te kerén lokhedýr párma, vyčhurdyi giv dro mórjo (derjáv). Ne kiéli jaciá dyvés, jone na ĥalyné phuv, a dykhné jekh prahitko brégo, savó sys začhudo paniésa, ke savó jone i skedynépe, kóli javéla saštý (možno), te tradén pašyledýr parmasa. I jone ĥazdyné jakori, mekné telé len dro paní, dre dová-pac' časo jone rosphandle šole ruliendyr i, kiéli ĥazdyné upratuno balvaluno (paruso) pir balvál, jone tradyne ke brégo. Párma popyja pe prahitko štéto, jone čhudé les odój. Nakh zagijá pharés dro práho i párma terdijá, a korma phadjolas valnengire zorjátyr. Haladé kedynepe te zamarén sarén štaribnaskiren, sob (kaj) nikón léndyr te na vyplyvinel (te na del plima peske krig) i te na našél. Ne tysjoncengiro barydyró kamdiá te zrakhél Pavlís i na domekcia len te kerén davá i priphendiá odolénge, kon džinéla te plyvinel, te uhten dro paní i te vydžán pe phuv, a kodolénge, so jačnépe, te vykedenpe ke párma, konéske pe phalia, a konéske pe dová, so jaciápe parmátyr, i adiáke vygijá, so saré zrakhnepe paniéstyr pe phuv. I kiéli ame zrakhciampe i gijam pe brégo, tedy ame udžindiam, so davá štéto khardiape Mielita. A čúža štetytka manušá sykade aménge drieván bari pšalýtko patýv: jone kerdé bari jag i prilyné amen, pal-dová so sys šylalo i gijá baró bryšýnd. I kiéli Pávli skedyjá but xrústy (kusty) i čhudiá pe jag, tedy vyuhtia sap jagatyr i uhtyldiape pal léskiro vast. Kiéli adalé štetytka manušá dykhné, so pe Pavlískiro vast sys ublado sap, jone lyné te rakirén jekh jekhéske: “Čačó, kadavá manúš isyn rozmaribnari, paló davá, syr jov zrakhciape morjostyr (derjavestyr), Devléskiro séndo na déla léske te dživél.” Ne jov strinskirdia pestyr sapes dre jag, i jov na kerdiá léske nisavó fuipén. A jone užakirde, so jov javéla te šuljol ci syg peréla muló; ne adiáke, syr jone užakirde ĥará i dykhné, so nisavó fuipén na kerdiápe lésa, tedy jone pirijačne fujes te duminen pal léste, i lyné te rakirén, so jov sys Devél. Pašýl dová štéto sys felatiniá jekhe barydyreste, savó sys xuláj pir davá óstrovo (džip), konés khardé Publijo; jov prilyjá amen i ame dykhciam léskiro lačhó iló. Léskiro dad sys paštó dro čhuibén nasvaló, léste sys xačkiribén i dukhandyne vindyrja; a Pávli gijá ke jov, pomagdiape Devléske, čhudiá vastá pe léste i vysastiakirdiá les. Paló (poslie) dová, syr davá kerdiápe, saré nasvale dalé štetóstyr javénas i sys vysastiakirde: jone sykade bari patýv aménge, i kiéli ame skedyjampe te tradas durydyr, jone dyné aménge pésa dro drom saró, so aménge treindiá. I pir trin čhoná ame tradyjam pe Alieksandrijakiri párma, saví sys terdy odój ivante (zimakiro) i saví khardé Diaskury. Ame javdiám dre Sirakuzy, i jaciampe odój trin dyvesá. Odothýr ame plyvindiam (dyjám plíma) trusciál i dre Rigija, i pal-dová so, syr pir dyvés ĥazdyjápe paš-dyvesýtko balvál, ame pe javír dyvés zatradyjam dre Putieoly, kaj ame lathiam pšalén, i jone mangné amen te javas pašýl lénde eftá dyvesá. Tén'ci ame gijam dro Rimo. I kiéli pšála dro Rimo šundlé pal aménde, jone giné amen te streninen ke Apijoskiro Forumo i ke Trin Kirčymy, a kiéli Pávli dykhciá len, jov parikirdia Devléske i jaciá murškanedyr. Kiéli ame javdiám dro Rimo, tedy tysjoncengiro barydyró dyjá vólia Pavliske te dživél péske khetané bahtaledyr péskire xaladesa-rakhibnarisa. Pir trin dyvesá Pávli khardiá khetané patyvalé Judén, i, kiéli jone skedynépe, jov phendiá lénge: “Manušále-Pšalále! Me sómas zakedyno dro Jerusalimo i otdynó dre Rimlianengire vastá, xoc' me nisavó čoripén na kerdjom proti amaré manušénde ci amaré dadengíre sykliaibena; savé dophučne mándyr i kamlé te otmeken, pal-dová so jone na lathné pal mánde nisaví bang, sob (kaj) me te javav mol meribnáske. Ne paldová, syr Judy rakirdé pe mánde, mánge butýr ničý na jačelaspe, syr te mangav séndo, i me kerdjom davá na vaš dová, sob (kaj) te bangiakirav miré manušén. Paldavá me i khardjom tumen, sob (kaj) te dykháv i te rakiráv tuménca; pal-dová so pal Izrailjoskiri nadiéia kadalé zandirjá (cépi) isyn pe mánde adadyvés.” I jone phendlé léske: “Ame nisave lylá na doresciam pal túte Judejátyr, i nikón pšaléndyr, savé javénas ke ame, na rakirdiá nisavó čoripén pal túte. Ne ame kamasa kokoré tútyr te šunas, syr tu duminesa, pal-dová so ame šundiám pal dová sykliaiben, pal savó maškír butende manušender džána čingardá.” Jone dorakirdepe Pavlisa pal dyvés, i drieván but manušá javné ke jov kheré; jov zlokostyr ke/žýko bel'vél' rakirdiá lénge pal Devléskiro Kralipén, i dophenelas lénge pal Isusóste Mojzáskire Zakonóstyr, i prorokéngire čhinybnastyr. Pávli upatiakirdia vari-savén manušén dro dová, so isyn phendló, a javír na patiandyné. Jone na sys dre jekh godý maškír péste, i lyné te džán péske korigedýr doléstyr, syr Pávli phendiá lénge jekh lav: “Čačipén phendiá Svénto Dúho (Fáno) tumaré dadénge pir prorokoste Isajoste, rakirí: “I džá ke adalé manušá i phen: ‘Tumé javéna kanenca te šunén i na ĥaljona, i tumé javéna te dykhén i nisó na dykhéna. Pal-dová so kadalé manušéngiro iló jaciá pharó te ĥaljol, i jone nábut šunéna kanenca, i jone začhakirde jakhá péskire, sob (kaj) te na dykhén jakhénca i te na šunén kanenca, i jone na ĥaljona ilésa i na javéna ke Me, sob (kaj) Me te vysastiakirav len’. Paldavá me kamám, sob (kaj) tumé te džinén, so Devléskiro zrakhibén sys bičhadó Najudénge; jone i ušunena.” Kiéli Pávli phendiá dalé lavá, Judy lyné te džán péske, i jone drieván košnepe jekh jekhésa. Pávli dživdiá ke Rimo duj berš dro kher, savó jov zlyjá, prilelas sarén, kon javélas ke jov, i jov murškanés i psirés (otkerdés) phenelas lav pal Devléskiro Kralipén i sykliakirdiá manušén, rakirí lénge pal Raste-Devléste, Isusóste Xristosóste. Pávli, Isusóskiro Xristosóskiro pishári (rabo), savés Devél khardiá ke Pe te javél Apostolosa i vykedyjá te rosphenel Devléskiri bahtalý zan (zvies'), pal savéste Devél angledýr dyjá lav pir Péskire prorokénde dre Svénta Čhinybena, pal Péskire Čhavéste, Savó pir Péskiro manušýtko bijanypén jaciá Davidóskire rodóstyr, otdžidyjá muléndyr, amaró Raj Devél Isúso Xristóso, Savó sys svénto bijanypnastyr i dophendia baré zorjása, so Jov isyn Devléskiro Čhavó; pir Léste ame doresciam (dolyjam) Devléskiro bahtalypén te javas Apostolénca, sob (kaj) dre Léskiro lav te sykliakiras patiaibnáske i kandypnáske saré nácyi, maškír savénde i tumé san, konés khardiá Isúso Xristóso: sarénge, kon dživéla ke Rimo, savé jačné dróga Devléske i savé isyn khardé te javén Léskire sventonenca: bahtalypén i ramánjo (miro) tuménge Devléstyr Dadéstyr amarestyr, i Rástyr-Devléstyr, Isusóstyr Xristosostyr. Anglydyr saréstyr me parikirava Devléske Miréske pir Isusóste Xristosóste pal sarénde tuménde, pal-dová so patiaibén tumaró isyn džindló saré svetoske. Pal-dová so Devél isyn jakhítko (svidietieljo) mánge, Savéske me dynarináva (služynáva) miré duhósa i rosphenava bahtalý zvies' pal Léskire Čhavéste, so me saró časo dre péskiro mangipén Devléske ripirava pal tuménde, me ŭsády (sak) mangavape, sob (kaj) te javél Devléskiri vólia, vari-kiéli te javav ke tumé. Pal-dová so me drieván kamám te dykháv tumen, i te podrikirav tumen Duhósa i rozdielinav tuménca duhovno taláno: javén zoraledýr dre patiaibén; sob (kaj) fedýr saréstyr ame te pomoginas i te podrikiras jekh jekhés dro amaró patiaibén. Ne me kamám, miré pšála, sob (kaj) tumé te džinén, so me but móly skedavaspe te javav ke tumé, ne vari-so man na domekelas, sob (kaj) mánge te dykháv mištypén miré butiátyr i maškír tuménde, adiáke-pac' syr i maškír javír nácyi. Me som bangó syr Elinenge (Griekénge), adiáke-pac' i nasykle manušénge, savé na šundlé, adiáke-pac' god'varenge i bigodiakirenge: adiáke-pac' i me užakirava, kóli saštý, sob (kaj) te rosphenav bahtalý zan (zvies') i tuménge, kon dživéla ke Rimo. Me na ladžava te rosphenav bahtalý zan (zvies'), pal-dová so joj isyn Devléskiri zor vaš zrakhibén kažnonéske devlytkoneske: angledýr Judénge, ne korigedýr (tén'či) Elinénge (Griekénge/Balaménge): pal-dová so dre Jevángielija otčhakirelape Devléskiro čačipén patiaibnastyr dro patiaibén: syr pal davá isyn čhindló: “Manúš čačuné patiaibnása javéla te dživél.” Pal-dová so bolybnástyr zdžála Devléskiri xolý pe kažno bidevlytkima i pe manušéngiro xohaibén, savé péskire načačipnasa xasiakirena čačipén. Saró, so saštý džindló te džinén pal Devléste, jone džinéna, pal-dová so Devél sykadiá davá lénge. Pal-dová, syr Devél sozdyjá svéto, Léskiri viekoskiri zor i Devlytkima biciale dre Léskire réndy (diély), kiéli manúš šukár duminéla pal davá; adiáke so manušénge nane primangipen, kóli jone rakirna, so jone na džinéna Devlés. Jone džindlé Devlés, ne jone na slavindle Les, syr Devlés, i na parikirenas Léske: jone jačné te košenpe, kiéli pirirakirenas, i léngire nagod'vare ile tasadyne dro kalypén: kiéli jone gindlé pes god'varenca, ne syr vygijá, jačné dylynenca, i jone parude bimeribnaskiri Devléskiri sláva pe manušýtko óbrazo, savó meréla, i čiriklytko, i murdalytko i odolengiro, savé polzynena. Paldavá Devél otdyjá len pir léngire-grehengiro kamiben dro iló i jone lyné te magirén péskire masá jekh jekhésa: kadalé manušá parude Devléskiro čačipén xohaibnasa, jone mangénape i dynarinena (služynena) odoléske, konés jone vydumindle kokoré, butýr syr Kodoléske, Savó kerdiá davá saró, Savó isyn mol viečnone slavake. Amín'. Paldavá Devél otdyjá len biladžaipnytkone kamibnaske: i léngire džuvliá parudyne te dživén péskire romenca adiáke, syr natrej; adiáke-pac' i muršá, pirijačne te dživén džuvliénca, syr trej, a jone xačonas kamibnasa jekh pe jekhéste, i lyné te kerén magiripén murš muršesa, i jone doreséna (dolena) kokoré dre péste kára pal péskiro bléndo. I pal-dová, syr jone na kamlé te džinén pal Devléste, tedy Devél i mekciá len, sob (kaj) jone te kerén pir nalačhi godý, ne so lénge kamelape; i jone isyn pherdé kažnoné načačipnasa, zlydnimasa, bokhasa ke lové, čoripnasa, zevlynypnasa, rozmaribnasa, vyprobinena jekh jekhés, obrakiribnasa, pljotkenca; jone xohavena jekh jekhés, i jone na rikiréna syr Drógima Devlés dro péskiro iló; biladžaipnytka, phut'kirdé, šaribnytka; jone usá keréna nevó fuipén, na kandéna peskiren daden. Jone isyn bigodiakire, naštý lénge te patias, nane lénde ni láska, ni tangipén; jone džinéna čačunó Devlýtko séndo, so manušá, savé keréna dasavé réndy isyn mol meribnáske, ne jone na, so kokoré duredýr keréna grého, ne jone i šarena javirén, kon keréla dová-pac'. Nane túke primangipen, kažno manúš, savó sendinela javirés, odolé-pac' sendosa tu kokoró javésa sendindlo, pal-dová so, kóli tu sendinesa javire manušés, tu kerésa dová-pac' kokoró péske. Ne ame džinása, so pe adalé manušénde, kon keréla dasavo-pac', isyn čačunó Devléskiro séndo. Manúš, tu so duminesa, so obdžala Devléskiro séndo, kiéli tu sendinesa manušén, savé keréna dasavé réndy i kokoró dová-pac' kerésa? Ci tu na ginesa Devléskiro lačhipén, vyrikiriben i užakiribén, i, xaj, tu na ĥaljosa, so Devléske trej, sob (kaj) tu te riskires péskiro džiibén ke Jov? A pir tyró nakandypen i naporiskirdo ke Jov iló, tu kokoró péske kedesa butýr xolý pe dyvés vaš Devléskiri xolý, kiéli Jov otkerela Péskiro séndo, kiéli Devél otdéla kažnoné manušéske phenéla pal léskire réndy: odolénge, kon saró časo keréla lačhé réndy i pir davá rodéla sláva, čačipén i bimeribnaskiro kónco (jagóro), Jov déla viéčno džiibén. Ne odolén, kon keréla pir péskiri godý i na priĥaljola čačipén, a keréla fuipén, kodolés užakiréla xolý i xoliamipen Devléstyr, túga i kalypén javéna kažnoné (svakone) manušéskire ileske, savó keréla fuipén, angledýr Judénge, i adiáke-pac' i Elinénge (Griekénge/Balaménge): a sláva i patýv, i ramánjo kažnoné manušéske, savó keréla lačhipén, angledýr Judénge, i adiáke-pac' i Elinenge (Griekénge): Pal-dová so Devél kutiakirela šerá (rávnes) saré manušén. Odolé manušá, savé na džindlé Zakóno i kerdé gréhi, jone na pir Zakóno i xasjona; ne odolé, savé džindlé Zakóno i kerdé gréhi, jone pir Zakóno i javéna sendindle; pal-dová so, na odolé manušá isyn čačuné angíl Devléste, savé šunéna Zakóno, a kodolé, savé keréna pir Zakóno, jone javéna zrakhné. Pal-dová so, kiéli Najudénde nane Zakóno, jone keréna kokoré péstyr, sýrby pir Zakóno, tedy jone, savénde nane Zakóno, isyn Zakóno kokoré péske; jone i sykavéna, so Zakóno isyn sýrby čhindló dre léngiro iló, léngiri patýv i godý dophenéla pal davá, jekh mólo jone zaterdjona jekh pal jekhéste, a javír mólo bangiakirena jekh jekhés; dro dová-pac' dyvés, kiéli Devél pir bahtalý zan (zvies'), saví me rosphendjom, javéla te sendiakirél saré čorahane manušéngire réndy pir Isusóste Xristosóste. Kóli tu pes ginesa Judosa i rozginesa pe Zakóno, i šaresape Devlésa, i džinésa Léskiri vólia, i ĥaljosa, so isyn fededýr, syklyi Zakonóstyr; i tu san tvardo, so tu san lydžaibnaskiro kororenge i tu san dud vaš odolé manušénge, savé psiréna dro kalypén (ciamlypén); tu san sykliari (nastavniko) vaš dylynenge i sykliakiribnáskiro bijatorenge, konéste isyn dro Zakóno saró, so dasavo isyn džinybén i čačipén: Syr tu sykliakiresa javire manušén, a angledýr tu kokoró na sykljosa? Tu rakirésa te na kerén biladžaipén, a tu kokoró kerésa biladžaipén? Túke, xaj, drieván na pir iló ídoly, a kokoró tu občoresa léngire khangirja? Tu, savó šaresape, so tu džinésa Zakóno, a kokoró kerésa na pir Zakóno, – dalésa tu ladžakiresa Devlés? Paldavá isyn čhindló: “Pal tuménde Náiudy javéna te teliakiren Devléskiro lav.” Paldavá občhinyben janéla túke lačhipén, kóli tu rakhesa Zakóno: ne kóli tu kerésa na pir Zakóno, tedy tyró občhinyben nisó na mol. I kóli manúš, savó isyn naobčhindlo, keréla saró, so isyn čhindló dro Zakóno, ci na javéla léskiro naobčhinyben te ginelpe léske dro občhinyben? I manušá, savé bijanypnastyr na sys občhindlé, a keréna pir Zakóno, ci jone javéna te sendinén tut, savó na keréla pir Zakóno i džinéla Svénto Čhinybén? Pal-dová so, na odová isyn Judo, kon isyn Judo javriestyr, i na dová občhinyben, savó isyn kerdó pe masá javriestyr; ne odová isyn čačunó Judo, savó andrál isyn dasavo, i dová isyn občhinyben, savó isyn dro iló, pir dúho (fáno), a na pir Zakóno, dasaveske manušéske javéla šaribén na manušéndyr, a Devléstyr. Tedy, saví l'góta (prieimuščestvo) isyn Judénde javire manušéndyr, ci savó lačhipén isyn občhinybnastyr? Judénde isyn bari l'góta dro saró: butýr saréstyr dre dová, so lénge sys dopatiakirdo Devléskiro lav. I so ž? Kóli but léndyr na upatiándyne dre Devléste, tedy ci moginéla léngiro načačipén te xasiakirél Devléskiro čačipén? Nad, nisyr. Devél isyn čačunó, a kažno manúš isyn xohanó, syr isyn čhindló: “Čačuné isyn Tyré lavá, i dro séndo Tyró isyn čačipén.” Ne kóli amaró načačipén sykavéla Devléskiro čačipén, tedy so ame phenása? Naúšto javéla Devél načačuno pe aménde dre Péskiri xolý? Me rakiráva pir manušýtko godý. Nad, kóli adiáke davá te javél, tedy syr Devél javéla te sendiakirél svéto? Kóli miro načačipén keréla bicialedyr Devléskiro čačipén i dalésa keréla baredýr Léskiri sláva, tedy pal so iščo (inké) man te sendinén, syr grehitkoné manušés? Sóske aménge tedy duredýr te na kerás fuipén, sob (kaj) butýr te barjol lačhipén, syr vari-savé manušá košena amen i rakiréna, so ame adiáke sykliakirasa? Čačunó séndo javéla pe kadasavé manušénde. So ž tedy? Ci isyn aménde vari-saví l'góta angíl javire manušénde? Nisaví; paldová so ame kakaná dophendiam, so syr Judy, adiáke-pac' i Elíny (Griéki/Balamé), ame saré sam tel grehítko zor: syr i isyn čhindló: “Nane nijékh čačunó manúš; nane nikón, sob (kaj) te ĥaljol i te rodél Devlés. Saré mardépe dre rig droméstyr, i so ke jekh isyn xasibnýtka, nane ni jekh manúš, kon keréla lačhipén; nane nikón: léngiro kirlo isyn otčhakirdy maĥila, jone péskire čibása (čibjasa) rakiréna jekh xohaibén; sapitko truta (jado) isyn pe léngire uštá: léngire lavéndyr isyn jekh košybén i kirkipen; léngire ĥerá lydžána sýges te pročhuven manušéngiro rat; bizlado i xasibén odój, kaj jone giné, jone na ĥalyné drom ke ramánjo (miro). I jone na kutiakirena i na darna Devléstyr.” Ne ame džinása, so dová, so vari-kiéli Zakóno rakiréla, jov rakiréla odolé manušénge, savé isyn tel Zakóno adiáke, sob (kaj) kažna lavá te zaphenen te rakirén, i saró svéto te javél bangó angíl Devléste. Kon keréla pir Zakóno, usajékh nijékh na pridžinelape čačunesa angíl Devléste, pal-dová so Zakóno déla aménge te džinas, so da dasavo isyn grého. Ne kakaná Devél otčhakirela Péskiro čačipén manušénge, savé isyn vol'na Zakonóstyr, a davá džála čačipnastyr, pal savó dophenena Zakóno i Proróki; davá Devléskiro čačipén isyn pir patiaibén dre Isusóste Xristosóste, savó délape saré manušénge bi vykedyibnaskiro, kon patiála. Pal-dová so saré manušá kerdé grého i jone durine Devléskire slavatyr. Ne léngire gréhi otmekenape pir Devléskiro bahtalypén, pir vykinybén Isusóskire Xristosóskire ratésa; Saves Devél čhudiá angíl syr svénto dyibén vaš tangipén pir patiaibén dro Léskiro rat, kon patiála, adiáke Devél sykadiá péskiro čačipén i primangdia gréhi manušénge, savé jone kerdé angledýr; péskire ĥaratuné (dlugone) vyrikiribnasa saró davá časo, sob (kaj) Jov kakaná te sykavél péskiro čačipén, i so Jov kokoró isyn čačunó, i pridžinela čačunenca sarén, kon patiála dre Isusóste. Sósa aménge kakaná te šaraspe? Nane sósa. Kóli jekhe Zakonosa? Nad, a patiaibnása pir Zakóno; pal-dová so ame ginasa, so manúš pridžinelape čačunesa pir patiaibén, na dykhí, syr jov rakhéla Zakóno. Naúšto Devél isyn jekh vaš Judénge? Ci nane Jov Devél i Najudénge? Jov isyn Devél adiáke-pac' vaš saré manušénge pe svéto: pal-dová so isyn jekh Devél, Savó pridžinela čačunenca odolén, kon kerdiá občhinyben pir patiaibén i kodolén, savé patiána, ne savé isyn naobčindle. Ci davá na značynéla, so ame xasiakirasa Zakóno patiaibnása? Sarésa nad, ame kerása Zakóno zoraledýr. So ame phenása, pal amaré pradadeste pir loč (plot') Avraamoste, so ž léste sys, syr jov isys džidó. Pal-dová so, kóli Avraámo isys pridžindlo čačunesa rendénca (dielenca), jov mogindiá te šarelpe angíl manušénde, ne na angíl Devléste; paldavá so rakiréla Svénto Čhinybén? “Avraámo upatiandyja dre Devléste, i pir davá Devél zlyjá saré léskire gréhi, i léskiro upatiaiben zagindiape dro čačipén léske.” Devléskiro pridžindlypen čačunesa na zaginelape odolé manušéske, savó keréla lačhé réndy na pir bahtalypén, a pir vužlypén; a odoléske, kon na keréla lačhé réndy, a kon patiála dre Odoléste, Kon pridžinela čačunenca grehitkoné manušén, léskiro patiaibén javéla zagindlo léske dre čačipén. Adiáke-pac', syr i Davído rakiréla pal bahtiakiribén, savó doreséla (dolela) manúš, savés Devél ginéla čačunesa, na dykhí pe léskire réndy: “Bahtalé isyn odolé, koneskire nalačhé réndy isyn primangne i konéske gréhi isyn čhakirde; bahtaló isyn odová manúš, konéske Devél na zaginela grého.” Ci otlydžalape davá bahtiakiribén ke občhindlé manušá, ci ke naobčhindle manušá? Ame ž rakirasa pal dová, so Avraamóske sys zagindlo patiaibén dro čačipén. Syr tedy davá sys zagindlo? Angíl občhinyben ci paló (poslie) občhinyben, ne na korigedýr (pozže) občhinybnastyr, a angíl občhinyben. I jov doresciá (dolyja) občhinybnaskiri špéra (znako) syr dophenybén doléske, so jov sys čačunó patiaibnáske angíl léskiro občhinyben, sob (kaj) jov te javél dad vaš saré patiaibnáskirénge, savé isyn dasavé bi občhinybnaskire, sob (kaj) i lénge te javél zagindlo léngiro patiaibén dro čačipén; i sob (kaj) te javél dad i vaš občhindlenge, ne féni, savé isyn občhindlé, ne i odolénge, savé džána patiaibnáskiré dromésa, savésa gijá amaró dad Avraámo angíl, syr jov na sys občhindlo. Paldová so na pir Zakóno Avraámo i léskiro ródo doresciá (dolyja) Devléstyr lav te javél svetóskire xulása, a pirdál patiaibnaskiro čačipén. Kóli te javén svetóskire xulanca odolé, kon dživéla pir Zakóno, tedy patiaibén javéla čhučó (pusto) i lav nisó na javéla mol. Pal-dová so pir Zakóno javéla Devléskiri xolý, kaj nane Zakóno, odój i nane grého. Patiaibén vaš dová trej, sob (kaj) aménge Devél te primangel pir tangipén, i sob (kaj) dynó lav te javél jekh vaš saré Avraamóskire rodóske, a vaš jekhe odolénge, kon otlydžalape ke jone pir Zakóno, ne i vaš sarénge, kon isyn Avramoskire čhavé pir patiaibén i savó isyn dad aménge sarénge, i syr isyn čhindló: “Me čhudjom tut dadésa vaš buté-manušéngire nácyi” angíl Devléste, dre Savéste Avraámo upatiandyja, Savó otdžidiakirela mulen, i rakiréla pal dolé réndy, so kakaná nane, ne adiáke sýrby jone isyn; kiéli na sys nisaví nadiéia Avraamóske, usajékh jov na xas'kirdia nadieinyben i patiandyja, paldavá jov i jaciá dadésa buté manušéngire nacyiénge, syr léske sys phendló: “Adiáke javéla baró tyró ródo.” I léskiro patiaibén na tyknyja, xoc' jov džindiá, so dre léskire masá nane ni saví džiibnytko zor, pal-dová so léske isys pašýl šel berš i romný léskiri Sara sys drieván phuri vaš davá, sob (kaj) te bijanél, i jov na kunindiape dre Devléskiro dynó lav, a jov sys tvardo dro patiaibén i slavindia Devlés, Jov drieván patiandyja, so Devléste isyn zor, i jov keréla dová, pal so Jov dyjá lav; davá i sys zagindlo léske dro čačipén. A lavá, savé isys čhindlé pal léste, otlydžanape na ke jekh Avraámo. Ne jone adiáke-pac' otlydžanape i ke ame, savénge javéla zagindlo čačipén, kon patiála dre Odoléste, Kon otdžidiakirdiá muléndyr, amaré Ras-Devlés, Isusós, Savó sys zdyno pal amaré gréhi i Savó otdžidyjá, sob (kaj) te pridžinel amen čačunenca bangipnastyr angíl Devléste. I pal-dová so amen priĥalyne pal čačunende pir patiaibén, aménde isyn ramánjo (miro) Devlésa pir amaré Raste-Devléste, Isusóste Xristosóste, pir Savéste ame sam domekne pir patiaibén ke davá bahtiakiribén, dre savó ame kakaná dživasa, i ame radynasape, so aménde isyn nadiéia pe Devléskiri sláva. Ne na dre jekh davá isyn amarí rádyma, a ame adiáke-pac' radynasape dre amaré pharipena, pal-dová so ame džinása, so pir pharipén barjola amaró vyrikiriben. Pir vyrikiriben ame jačasape tvardedyr dro xaraktiero, a xaraktiero duredýr déla nadiéia. I amarí nadiéia na podlydžala amen, pal-dová so Devléskiri láska pir Svénto Dúho (Fáno) pherdiakirdiá amaré ile laskasa, saví dyný aménge: pal-dová so Xristóso, kiéli ame sámas grehítka, dro časo, Savó Devél uphendia, myjá pal nadevlytkonende. Ci meréla vari-kon pal čačuné manušéste? Saštý (moginéla) te javél, so pal vari-savé lačheste, vari-kon i skedéla muršypen te merél, ne Devél dophenéla Péskire laskasa ke ame, so Xristóso myjá pal aménde, kiéli ame iščo (inké) sámas grehítka. Paldavá kakaná, kiéli ame sam pridžindle čačunenca Léskire ratésa, ame butýr patiása dre dová, so ame zrakhasape pir Léste Devléskire xoliátyr. Kóli angledýr ame sámas vérgi Devléske i kakaná ame jaciám dro ramánjo (miro) Lésa pir Léskire Čhavéskiro meribén, tedy butýr saréstyr kakaná, syr ame jaciám dro ramánjo, ame nadieinasape te zrakhaspe Léskire džiibnasa. I na jekh davá, ne ame i radynasape pir amaré Raste-Devléste, Isusóste Xristosóste, pir Savéste ame doresciam (dolyjam) kakaná ramánjo Devlésa. Paldavá, syr pir jekhe manušéste grého zagijá dro svéto, i pal davá grého jaciá meribén, adiáke meribén jaciá pe saré manušénde, pal-dová so saré kerdé grého: pal-dová so grého sys dro svéto angledýr Zakonóstyr, ne grého na ginelape, kóli nane Zakóno; ne meribén rikirdia zor pe manušénde Adamostyr ke Mójza, adiáke-pac' i pe odolénde, kon na kerdiá dasavo grého, syr Adamo, savó sys, syr óbrazo Odoléske, Konéske treindiá te javél. Ne Devléskiro taláno pir bahtalypén, davá nane ž dová-pac', syr Adamoskiro grého? Pal-dová so, kóli pir jekhe-manušéskiro proštaviben but manušá myné, tedy ci pe but butýr manušá doreséna Devléskiro bahtalypén i taláno pir bahtalypén jekhe Manušéstyr Isusóstyr Xristosostyr délape vaš sarénge. Ne Devléskiro taláno isyn na sýrby séndo pal jekhe manušéste, savó kerdiá grého; pal-dová so grého, savó kerdiá jekh manúš, lydžála ke séndo, ne Devléskiro taláno pir bahtalypén isyn sýrby čačipnáskiro pridžinyben pal buténgire-manušéngire gréhi? A kóli pir jekhé-manušéskiro proštaviben meribén lyjá te rikirél lofo (zor), tedy ci pe but butedýr vól'no čačipnáskiro dáro i but but bahtalypén javéna te kralinen dro odolengiro džiibén, savé priléna len pir Jekhéste Isusóste Xristosóste: paldavá, syr jekheskiro manušéskiro grého jandiá séndo saré manušénge, adiáke-pac' jekhe Manušéskiro čačunó réndo pridžinela saré manušén čačunenca vaš džiibén, savó déla džiibén sarénge. Pal-dová so, syr pal jekhe manušéskiro nakandypen kerdépe but manušá grehitkonenca, adiáke-pac' i pal Jekhe Manušéskiro kandypen but manušá jačénape čačunenca. A Zakóno sys dynó, sob (kaj) te javél butýr i bicialedyr grehoskiro ĥalyibén; ne odój, kaj sys butýr grého, odój sys i butýr bahtalypén; pal-dová so, syr grého rikirdia zor pe meribén, adiáke-pac' i bahtalypén javéla te lydžál te rikirél lófo (zor) pe čačipén, savó janéla ke viéčno džiibén pir Isusóste Xristosóste, amaré Raste-Devléste. So ž ame phenása? Ci te jačaspe aménge dro grého, sob (kaj) te barjol Devléskiro bahtalypén? Nad. Ame myjam vaš grého, syr ame moginasa duredýr te dživás dre léste? Ci tumé na džinéna, so saré ame, kon boldiape dre Isusóste Xristosóste, dre Léskiro meribén boldiampe? I adiáke ame myjam khetané Lésa pir boldyipen dre meribén, sob (kaj), syr Xristóso sys otdžidiakirdo muléndyr Devléskire slavása, adiáke i aménge te dživás dre nevó džiibén. Pal-dová so, kóli ame khetaniakirdiampe Lésa dro Léskiro meribén, tedy ame sam bangé (musinasa) te javas adasavé-pac', syr jekh Lésa i dro Léskiro otdžidyiben, i ame džinása, so manúš, savó angledýr sýrby dživdiá dre aménde, sys primardo pe trušúl Lésa vaš dová, sob (kaj) amaré grehítka masá te xasiakirén péskiri zor vaš čoripén, i sob (kaj) ame te na javas butýr dynárja grehóske. Pal-dová so, kon myjá, butýr na moginéla te kerél grého. Kóli ame myjam Xristosósa, tedy ame patiása, so i te dživás javása Lésa, i ame džinása, so Xristóso otdžidyjá muléndyr, i kakaná butýr meribén na rikiréla zor pe Léste. Pal-dová so, kiéli Jov myjá, tedy Jov myjá jékhvar vaš grého, ne Jov kakaná dživéla vaš Devléske. Adiáke-pac' i tumé ginen pes mulénca vaš grého, ne tumé ginen pes džidénca vaš Devléske dre Isusóste Xristosóste. Pal-dová so, mek te na dživél grého dre tumaré masá, savó dživéla na viéčnes, sob (kaj) tuménge te na poddenpe léskire tyrdypnaske. I na otdén tumaré masá grehóske sýrby dre vastá vaš načačipén, a tumé otdén fedýr pes Devléske, syr tumé sýrby otdžidyne muléndyr dre džiibén, i otdén tumaré masá dre Devléskire vastá vaš čačipén. Pal-dová so grého na javéla butýr pe tuménde te xulainél: pal-dová so tumé kakaná san na tel Zakóno, a tel bahtalypén. I tedy, ci javása ame te kerás grého, pal-dová so kakaná ame sam na tel Zakóno, a tel bahtalypén? Nad. Ci na džinéna tumé, so konéske tumé otdena pes syr dynári dre kandypen, tumé san i dynárja odoléske, konés tumé kandéna: ci te javél davá grého, savó lydžála ke meribén, ci te javél davá grého pir kandypen, savó lydžála ke čačipén? Ne parikirasa Devléske, so tumé ž sánas angledýr butiarné vaš grého, a tumé kakaná lyné te šunén saré iléstyr dová sykliaiben, savéske tumé otdyné pes. A kiéli tumé giné krig grehostyr, i tedy tumé jačné pisharjonca vaš čačipén. Me rakiráva tuménge pal davá manušytkoné lavénca, vaš dová, sob (kaj) tumé te ĥaljon. Adiáke, syr tumé angledýr otdenas tumaré ločakire masá dre magirdó pishariben i proti Zakóno, to kakaná otdén tumaré masá dre pishariben čačipnaske pe svénta réndy. Pal-dová so, kóli tumé i sánas grehoskire pishárja, tedy tumé sánas vol'na čačipnastyr. Save lačhé réndy tumé tedy kerdé? Dolé, savéndyr tumé kakaná kokoré ladžana, pal-dová so léngiro kónco (jagóro) isys meribén. Ne kakaná, kiéli tumé san vol'na grehostyr i jačné Devléskire pishar'jénca, tuménde isyn svénto otdyibén Léstyr i tuménde isyn kónco (jagóro) pe davá, savó isyn viéčno džiibén. Pal-dová so pleskiriben pal grého isyn meribén, a Devléskiro taláno pir bahtalypén isyn viéčno džiibén dre Isusóste Xristosóste, amaré Raste-Devléste. Ci na džinéna tumé, pšalále, so (me rakiráva odolénge, kon džinéla Zakóno): Zakóno rikiréla zor pe manušéste, paka jov isyn džidó? Pal-dová so paloromitko džuvlý isyn sphandly Zakonosa džidé romesa; ne, kóli lákiro rom meréla, joj iačéla vól'no paloromitkone Zakonóstyr. Kiéli džuvlý vydžála paloróm pal javiréste, kóli lákiro rom isyn džidó, la javéna te kharén biladžakuniása; ne kóli lákiro rom meréla, tedy joj isyn vól'no Zakonóstyr, i joj na javéla te ginelpe biladžakuniasa, kiéli joj vydžála paloróm pal javiréste. Adiáke i tumé, pšála miré, tumé na san tel Zakonoskiri zor, pal-dová so tumé san paš Xristosóskire maséndyr, sob (kaj) tumé te javén trej Javiréske, Savó otdžidyjá muléndyr, i sob (kaj) ame te janas vari-savó lačhó dyibén Devléske. Pal-dová so, kiéli ame dživdiam pir ločakiro tyrdypén, tedy Zakóno džangavelas aménde grehítka kamibena, savé sys dre amaré masengire pašá i dalésa ame janasas dyibén meribnáske; a kakaná, ame jaciám vol'na Zakonóstyr, kiéli ame myjam vaš davá Zakóno, savésa ame sámas sphandle, sob (kaj) te dynarinás aménge Devléske pir nevó Dúho (Fáno), a na pir phuranó Zakonoskiro čhinybén. So ž ame phenása? Naúšto Zakóno isyn grého? Nisyr nad! Ne me na džinavas, so davá dasavo isyn grého, kóli te na javél Zakóno: me na som Zakonoskiro, so davá isyn dasavo te pričhuves iló ke dová, so na trej, kóli Zakóno te na rakirél: “Na kam.” Ne grého lathiá saštypen pir zaphenyben i podmardia dre mánde kažno tyrdypén, savó na trej, pal-dová so bi Zakonoskiro grého isyn muló. Me vari-kiéli dživdjom bi Zakonoskiro: a kiéli javdiá zaphenyben, tedy i grého otdžidyjá, a me myjom. I vygijá, so zaphenyben, savó isyn dynó vaš džiibén, jandiá mánge meribén: pal-dová so grého pir zaphenyben xohadia man i muliakirdiá lésa man. Paldavá Zakóno isyn svénto, i zaphenyben isyn svénto, i čačunó i lačhó. Ci adiáke vygijá, so lačhipén jaciá vaš mánge meribnasa? Nad. Ne grého, sob (kaj) te javél bicialó syr grého, jov jandiá mánge meribén pir lačhipén, sob (kaj) grého pir zaphenyben te javél daranes grehitkedyr, so isyn butýr. Ame džinása, so Zakóno isyn svénto, a ame sam grehítka, i amaré masá isyn bikindlo grehoske dro dynaribén. Me kokoró na ĥaljovava, so me keráva; pal-dová so me kamám, me dová na keráva, ne so me drieván na kamám, me dová keráva. A kóli me keráva dová, so mánge na pir iló, tedy me som dro jekhipén Zakonosa, so jov isyn lačhó. Paldavá, ake na me kokoró keráva, a davá grého keréla, savó dživéla dre mánde. Paldová me džinóm, so nisavó lačhipén na dživéla andrál mánde; pal-dová so me kamám te keráv lačhipén, ne me na mogináva. Pal-dová so me keráva na dová lačhipén, savó me kamám, a čoripén, savó me na kamám, a me dová keráva. Kóli me keráva dová, so me na kamám, tedy davá na me keráva, a grého, savó dživéla dre mánde. I adiáke me ĥalyjom, so dasavo isyn Zakóno, kóli me kamám te keráv lačhipén, a mánde vydžála čoripén. Paldavá me radynavpe Devléskire Zakonóstyr, savó dživéla dre manušéste: ne dre miré masengire pašá, me dykháva javír Zakóno, savó isyn proti Zakóno miré godiákiro i savó keréla man grehoskire pisharisa, savó isyn dre miré-masengire pašá. Savó bedo me som manúš! Kon te zrakhelas man dalé meribnaskire maséndyr? Parikirava Devléske pir Isusóste Xristosóste, amaré Raste-Devléste. I ĥáda, me kokoró godiása dynarináva Devléskire Zakonóske, ne masenca me dynarináva (služynava) grehóskire Zakonóske. Tedy, nane kakaná nisavó obrakiriben vaš odolénge, savé dživéna dre Isusóste Xristosóste na pir loč (plot'), a pir Dúho (Fáno). Pal-dová so džiibnáskiro Duhoskiro Zakóno pir Isusóste Xristosóste kerdiá man vol'nonesa grehoskire Zakonóstyr i meribnástyr. Pal-dová so, syr Zakóno na mogindiá te pirizorjakirel manušeskiri loč, i xasiakirdiá péskiri zor, tedy Devél bičhadiá Péskires Čhavés, Savó sys dre loč (plot'), syr grehítko manúš, sob (kaj) Jov te javél syr svénto dyibén (žértva) pal grého i te sendiakirél grého dre manušéste, vaš dová, sob (kaj) dová čačipén, savó Zakóno trebinela, te spolninélpe pherdés dre manušénde, savé dživéna na pir loč, a pir Dúho (Fáno). Pal-dová so, kon dživéla pir ločákiro tyrdypén, odová i duminéla pal loč, a kon dživéla pir Dúho (Fáno), odová duminéla i pal Dúho (Fáno). Pal-dová so ločákire-grehóskire Manušéskiro tyrdypén lydžála ke meribén, a Duhoskiro tyrdypén déla džiibén i ramánjo (miro). Pal-dová so ločakire-grehoskire-manušéskiro tyrdypén isyn proti Devléste: jone ž na kandéna Devléskiro Zakóno, i jone na moginéna te kandén; i kodolé, kon dživéla pir péskire-grehoskiro tyrdypén, na moginéna te javén lačhé Devléske. Ne kóli tumé dživéna na pir ločákire-grehóskiro tyrdypén, tedy, čačes, Devléskiro Dúho (Fáno) dživéla dre tuménde; a, kóli vari-konéste nane Xristosóskiro Dúho (Fáno), odová isyn na Léskiro: kóli Xristóso dživéla dre tuménde, to tumarí loč isyn muly vaš grého, ne Dúho (Fáno) isyn džidó pirdál čačipén. A kóli Odoleskiro Dúho (Fáno), Kon otdžidiakirdiá muléndyr Isusós, dživéla dre tuménde, tedy Odová, Kon otdžidiakirdiá Xristosós muléndyr, otdžidiakirela i tumaré masá, savé isyn na viečna, Péskire Duhósa, savó dživéla dre tuménde. I tedy, pšalále, ame na sam bangé grehóskire ločáke, sob (kaj) te dživás pir ločakiro tyrdypén; pal-dová, so kóli tumé dživéna pir ločakiro tyrdypén, tedy tumé ž meréna, ne kóli tumé muliakirena tumaré svetytka réndy Duhósa, tumé javéna te dživén: pal-dová so saré, kon keréla pir Devléskiro Dúho (Fáno), isyn čačuné Devléskire Čhavé. Paldová so tumé na prilyné Dúho (Fáno), Savó keréla tumen pishar'jénca, sob (kaj) nevéstyr te dživén dre dar, a tumé prilyné Dúho (Fáno), Savó kerdiá tumen péskire čhavénca, savésa ame kharasa Devlés: “Avva, Dádo!” Devléskiro Dúho (Fáno) dophenéla khetané amaré duhósa pal dová, so ame sam Devléskire čhavé. Ne kóli ame sam Léskire čhavé, tedy aménde isyn paš dro meknó mištypén Devléskiro i paš dro Xristosóskiro meknó mištypén, kóli ame čačunés Lésa menčynasape, sob (kaj) khetané Lésa adiáke-pac' te proslavinaspe. Paldavá me duminava, so adadyvesatuno amaró piridživiben nisó na mol angíl daja sláva, saví otčhakirelape aménge. Paldavá kažno džidó sozdyiben pe phuv, baré nadejasa užakiréla, kiéli Devléskire čhavé javéna xulaja pir svéto: pal-dová so saró džidó sozdyiben pe phuv gijá tel bizladoskiri zor na pir péskiro vykedyiben, ne pir Odoleskiro vykedyiben, Kon kerdiá adiáke i dre Savéste isyn nadiéia pe davá, so davá saró džidó sozdyiben kokoró javéla vól'no mulykane pisharibnastyr, vaš dová, sob (kaj) te javél dová-pac' slavútno vol'nyma, saví isyn Devléskire čhavénde. Paldavá ame džinása, so saró davá džidó sozdyiben ke davá časo déla gódla dre mén'ki, sýrby angíl dová, syr čhavoró bijandjola. I na jekh jone, ne i ame kokoré, savé udžindiam angledýr javirendyr Duhoskiro taláno, adiáke-pac' ame andrál péste užakirasa i pharés dasa ĥondiá (uzdyhinasa), sob (kaj) Devél te prilel amen pal péskire čhavénde, kiéli amaré masá javéna vykindle meribnástyr. Paldavá ame sámas zrakhné nadejasa; ne nadiéia, kiéli isyn bicialy, davá nane nadiéia: pal-dová so, kóli kon vari-so dykhéla, sóske léske adiáke-pac' te nadieinelpe? Ne kiéli ame nadieinasape pe dová, so ame na dykhasa, tedy ame ĥará (dlúges) užakirasa. Adiáke-pac' i Dúho (Fáno) podrikiréla amen dre amaró bizorjakiriben; ame na džinása, pal so i syr trej te mangaspe Devléske, ne Dúho kokoró mangéla Devlés pal dová, so amaré lavá isyn na dre zor te piridel. A Odová, Kon probinela ile, džinéla, pal so Dúho (Fáno) mangéla, pal-dová so Jov mangelape pal sventonende pir Devléskiri vólia. Ne ame džinása, so kon rikiréla syr Drógima Devlés dro péskiro iló i konés khardé pir Léskiro uphenybén, odolén Devél lydžála sarén ke baht. Paldová so, konés Jov kokoró angledýr vykedyjá, odolén i osvencyndia te kerén, sob (kaj) jone te poddžan pe Léskire Čhavéste, adiáke, sob (kaj) Jov te javél anglatunó maškír butende pšalénde. A konés Devél osvencyndia angledýr, odolén Jov i khardiá, ne konés Jov khardiá, odolén i pridžindia pal čačunende, i barjakirdia. So ame tedy phenása pe davá? Kóli Devél isyn pal aménde, tedy kon isyn proti aménde? Odová, Kon na tangindia Péskire Čhavés, ne Jov otdyjá Les pal sarénde aménde, ci na darinela Jov adiáke-pac' aménge khetané Lésa saró? Kon moginéla te bangiakirel odolén, konés Devél vykedyjá? Devél pridžinela len čačunenca: kon javéla te sendiakirél? Isúso Xristóso, Savó myjá, ne i Savó otdžidyjá muléndyr? Jov, Savó kakaná isyn pir čačuný Devléskiri rig? Jov i mangéla pal aménde. Kon terdjola maškír aménde i Xristososkiri láska? Piridživiben, ci pharipén, ci tradypen, ci nangipén, ci dar, ci meribén? Syr isyn čhindló: “Pal Túte ame sam terdé kažno dyvés muj pe muj meribnasa; i dykhéna pe aménde, syr pe bakrende, savén syg čhinena.” Ne saró davá ame pirizorjakirasa Odoleskire zorjása, Konéske adiáke drieván ame jaciám dróga. I me mištés džinóm, so ni meribén, ni džiibén, ni Jangóly, ni anglypyna, ni dová, so isyn kakaná, ni dová, so javéla angíl; ni vučipén, ni xoripén, nisó javír, so isyn džidó pe saró parnó svéto, na moginéla te terdjol maškír aménde i Devléskiri láska dre Isusóste Xristosóste, amaré Raste-Devléste. Me rakiráva čačipén dre Xristosóste i me na xohavava, mirí patýv dophenéla pal davá Sventoné Duhósa; so isyn mánde baró piridživiben, i na pirijačéla te dukhal miro iló; pal-dová so me kamamas kokoró te javav tel Devléskiri prokošybena (armaniá), sob (kaj) man te čhuvén dre rig Xristosostyr pal miré pšalénde, savé isyn seménca mánge pir rat; ĥáda, jone isyn Izrailjoskire manušá, lénge sys dynó te jačen Devléskire čhavénca te prilén mištypén, isyn dynó i sláva i zavieto, i Zakóno te prilén, i mangipén Devléske, i lav angíl; jone isyn čhavé péskire dadengíre, savéndyr pir loč i vygijá Xristóso, Jov isyn Devél pe saré manušénde, Jov isyn bahtiakirdó pe saré beršá. Amín'. Ne adiáke davá na moginéla te javél, sob (kaj) Devléskiro lav te xasiakirél zor; pal-dová so na saré manušá, savé dživéna ke Izrailjo, isyn Devléskire manušá; i na saré Avraamóskire čhavé, savé isyn bijandle Avraamóskire rodóstyr, jekh davá na keréla len Avraamóskire čhavénca; a syr isyn čhindló: “Isaakostyr délape túke ródo!” Javire lavénca, na saré kadalé čhavé, savé bijandle Avraamóskire rodóstyr, isyn Devléskire čhavé: ne kodolé isyn čhavé, pal savénde Jov dyjá lav. Ne lav, savó Devél dyjá, isys dasavo: “Dro dasavo časo (momiento) Me javáva i javéla čhavó Sarate.” I na jekh davá; ne adiáke-pac' sys i Rieviekasa, kiéli joj pharija dro jekh časo blizniatenca Isaakostyr, amaré dadéstyr, i angíl léngiro bijanypén, kiéli jone iščo (inké) na kerdé nisavó lačhipén ci fuipén, Devél kerdiá péskiro vykedyiben, i davá na sys sphandlo rendénca, a saró keréla Odová, Kon prikhardia, tedy Rieviekake sys phendló: “Phuredýr pšal javéla te dynarinél tyknedyreske”: i, syr isyn čhindló pal davá: “Mánge jaciá drógo Jakovo, a Isavos Me drieván na kamdjom te dykháv.” So ame tedy phenása pe davá? Naúšto načačipén isyn Devléste? Nad. Devél rakiréla Mojzáske: “Me primangava odolénge, konés trej te primangav, i konés trej te tanginav, Me potanginava.” Tedy džinén, so primangipen manušéske na pir léskiro iló ci starinyben, a pir Devléskiro tangipén. Svénto ž Čhinybén rakiréla Faraonóske: “Vaš dová Me tut i čhudjom rása, sob (kaj) te sykavav pe túte Mirí zor, i sob (kaj) te javél džindló Miro lav pir sarí phuv.” Tedy džinén, so Devél tanginela odolés, konés Jov kokoró vykedéla, i Jov pharjakirela iló odoléske, kon isyn drógo Léske. Vari-kon tuméndyr moginéla te phenél mánge tedy: “Pal so, Devél bangiakirela amen? Pal-dová so, kon moginéla te javél proti Léskiri vólia?” A kon tu san adasavó manúš? Sob (kaj) túte te javél otphenybén Devléske? Ci moginéla dová, so isyn kerdó, te phenél odoléske, kon kerdiá les: “Sóske tu kerdián man dasavesa?” Ci nane pravo odolé manušéste, savó keréla pirja ĥlejátyr (glinátyr), sob (kaj) jekhe zamiesostyr te kerél pirí vaš svenkitko dyvés, i javír vaš kažno dyvés? I kóli Devél kaméla te kerél čačunó séndo i te sykavél Péskiri zor, Jov tanginela ĥará manušén, savé isyn sozdyne vaš xasibén; sob (kaj) ty sykavél Péskiro barvalypén dre sláva tangipnasa pe manušénde, savén Jov vykedyjá vaš sláva, i pe aménde, savén Jov adiáke-pac' khardiá na jekhe Judendyr, ne i Najudendyr? I Jov adiáke-pac' phendiá Osijaske: “Na Miré manušén Me javáva te kharav Miré manušénca, i odolja, savjá Me na pokerdjom (saví na jaciá pir iló Mánge), Me javáva te kharav ‘miré drogonasa.’ I javéla pe dová štéto, kaj sys phendló lénge: ‘Tumé san na Miré manušá, odój jone javéna te kharenpe džidé Devléskire čhavénca.’” Isajo rakiréla roibnasa pal Izrailjo: “Mek Izrailjoskire čhavé te javén adákicy but, kicý isyn morjoskiro (derjavéskiro) práho, a usajékh nabari paš léndyr zrakhélape: pal-dová so Devél zrikirela Péskiro lav ke kónco (ke jagóro); Jov keréla dalé phuvjása dová, so Jov phendiá.” Syr i angledýr Isajo phendiá pal davá: “Kóli bolybnáskire-jangoléngiro Raj Devél te na jačkirel aménge ródo, to aménca javéla dová-pac', so jaciá Sodomóskire i Gomorakire manušénca.” So ame tedy kakaná phenása? Náiudy, savé na kamlé te rodén čačipén, doresné (dolyne) čačipén pir péskiro patiaibén. A Izrailjo, savó rodyja Zakóno pir čačipén, adiáke jov na dogijá ke Zakóno. Sóske? Paldová so jone na dykhné pe patiaibén, a pe Zakonóskire réndy. Jone obštadepe pal bar, savó len na domekela, syr i isyn čhindló pal davá: “Ĥáda, Me čhuváva pe Sióno bar, pal savó but manušá obštavenape i peréna: i kažno, kon patiála dre Léste, odová nijékhvar na javéla te ladžal.” Pšalále! Šuk miré ileskiri i mangipén ke Devél isyn pal dová, sob (kaj) Izrailjo te javél zrakhno. Me som léngiro jakhítko (svidietiéljo), so jone zoralés rikiréna syr Drógima Devlés dro péskiro iló ke zevlynypén, ne na pir džinybén. Pal-dová so jone na udžindlé Devléskiro čačipén, i čhuvénas zorjása jone péskiro čačipén, pal-dová jone na čhudé pes tel Devléskiro čačipén. Zakóno končyndiape Xristosósa, sob (kaj) kažno, kon patiála, te javél pridžindlo čačunesa. Mójza (Moisiejo) čhinela pal čačipén pir Zakóno: “So manúš, savó javéla te kerél pir Zakóno, javéla te dživél Lésa.” A čačipén, savó isyn patiaibnastyr, rakiréla adiáke: “Na rákir dro péskiro iló: ‘Kon džála upré pe bolybén?’” (Sob (kaj) odothýr te janel telé Xristosós upralypnastyr) ci ‘Kon moginéla te zmekelpe tel phuv?’ (Sob (kaj) te ĥazdel Xristosós muléndyr). So rakiréla Svénto Čhinybén? “Lav isyn dynó túke, jov isyn dre tyré uštá i dre tyró iló”, ĥáda, isyn dová lav, savésa ame phenása lav, pal-dová so, kóli tu priĥaljosa tyré ušténca i javésa te rakirés sarénge, so ‘Isúso isyn Devél’ i javésa te patias tyré ilésa, so Devél otdžidiakirdiá Les muléndyr, tedy tu zrakhesape. Pal-dová so, kon patiála ilésa, davá patiaibén lydžála ke čačipén, a kon priĥaljola ušténca, davá lydžála ke zrakhibén. Paldavá Svénto Čhinybén rakiréla: “Kon patiála dre Léste, odoléske na javéla ladžavo.” Pal-dová so nane nisavó vykedyiben maškír Judénde i Elinénge (Griekénge/Balaménge); pal-dová so jekh Odová-pac' Devél isyn vaš sarénge, i Savó bahtiakiréla barvales sarén, kon prikharela Les. Pal-dová so so jekh manúš, kon prikharela Devléskiro lav, zrakhélape. Ne syr saštý te prikhares Odolés, dre Konéste jone na upatiándyne? I syr lénge te upatian dre Odoléste, pal Konéste jone nisó na šundlé? I syr jone moginéna te šunén, kóli nikón na javéla te phenél lav lénge? Ne syr vari-kon javéla te phenél lav lénge, kóli jov na javéla bičhadó? Syr isyn čhindló pal davá: “Save bahtalé isyn ĥerá odolé manušéngire, savé psiréna pir svéto i rosphenena bahtalý zan pal ramánjo, pal Léskire lačhé réndy.” Ne na saré Judy prilyné bahtalý zan (zvies'). Paldavá Isajo rakiréla: “Rajo Dévla! Kon patiandyja dre amarí bahtalý zan (zvies').” Patiaibén javéla šunybnastyr, a šunybén javéla Devléskire lavéndyr. Ne me phučava: “Naúšto (nieuželi) jone na šundlé? Šundlé, čačes; léngiri zan progijá pir sarí phuv, i léngire lavá sys šundlé pe svetóskire jagóry (krái).” Ne me nevéstyr rakiráva: “Ci moginéla adiáke te javél, sob (kaj) Izrailjo te na džinél davá? Mójza pérvo rakirdiá: ‘Me džangavava tumen, sob (kaj) tumé te zevlynen pir odolé manušénde, savé na ginenape pal nacyja: me ĥazdáva dre tuménde xolý pir manušénde, savé na džinéna Man.’” Isajo murškanés rakiréla: “Man lathné odolé, savé na rodyne Man; Me sykadjom pes odolénge, savé na phučné pal Mánde.” A Izrailjoske Jov rakiréla: “Saró dyvés Me protyrdavas miré vastá ke adalé manušá, savé na kandéna i keréna proti Mánde.” Paldavá me phučava: “Ci Devél mekciá Péskire manušén?” Nad. Me kokoró som Izrail'tianino, Avraamóskire rodóstyr, Vieniaminóskire rigátyr. Devél na mogindiá te mekel Péskire manušén, savén Jov angledýr pridžindia. Ci tumé na džinéna, so rakiréla Svénto Čhinybén pal Ilijaste, syr jov tanginelape (žalinelape) pe Izrailjo angíl Devléste? “Rajo Dévla! Jone zamardé (umarde) Tyré prorokén, rosphagirdé Tyré Sventoné-dyibnytka štéty i me jacjompe jekhdžinó, i jone rodéna te zamarén man.” Ne so rakiréla Devlykano otphenybén? “Me rakhcjom Péske eftá tysjoncy manušén, savé na terdiné pe čangá angíl Vaaloste.” Adiáke-pac' i dro amaró časo pir Devléskiro vykedyiben pir bahtalypén isyn vykedyny paš. Kóli pir bahtalypén-davá nane butýr pal réndy, to bahtalypén pirijačelas te javél bahtalypnasa, syr Devléskiro dyibén. Ne so ž tedy? So Izrailjo rodyja, odová jov na lathja (lastia), ne odolé, savé sys vykedyné, lathné, a javír sýrby kororine xoliátyr. Syr i sys čhindló pal davá: “Devél dyjá lénge dasavo dúho (fáno), so léngiri godý isyn suty, léngire jakhá na dykhéna i kaná na šunéna ke adadyvesatuno dyvés.” I Davído rakiréla: “Mek te javél skamindengiro pibén lénge syr khudý (siet'), syr mirieža, syr felý (pietlia) te poperenpe i pharó otdyibén vaš lénge: mek te korjon léngire jakhá, sob (kaj) jone te na dykhén, i mek te javén zband'kirde léngire dume pe saró džiibén.” Tedy me phučava: Naúšto jone obštadepe, sob (kaj) sarésa te perén? Sarésa nad: Dová, so jone pyné, jandiá Najudénge zrakhibén, sob (kaj) te vykharen zevlynypén dro Izrailjo. Kóli davá, so jone pyné, janéla svetoske barvaló bahtiakiribén, i kóli léngiro xasiakiriben janéla barvaló bahtiakiribén Najudénge, tedy ci pe but butýr Judénge kokorende javéla barvaló bahtiakiribén pe kónco (pe jagóro). Paldavá me rakiráva, tuménge, Najudénge: syr me som tumaró Apostolo, me drieván kutiakirava miro dynaribén (služenijo); ci na ĥazdáva me zevlynypén dre miré pšalénde, savé isyn mánge pir rat, sob (kaj) te zrakhav vari-savé léndyr? Kóli léngiro otgiiben janéla svetoske ramánjo (miro) Devlésa, tedy so ž javéla, kiéli Devél priléla len nevéstyr? A davá javéla sýrby otdžidyiben muléndyr. Kóli isyn svénto anglatunó xumer (tiasto), tedy svénto javéla i saró maró. Kóli isyn svénto kokoró kašt (drévo), tedy svénta javéna i léskire randiá (vétki). A kóli vari-savé randiá otphadine, a tut syr xrustengiri maslina pribarjakirdy pe léngiro štéto, i kakaná adiáke-pac', syr i jone, tu čaravésaspe (xahavésaspe) javire randiénca thulé-olivitkoné kaštéstyr, to na šarpe angíl javír randiá; a kóli tu šaresape, tedy na bistyr, so na tu čaravesa (xahavésa) kašt, a jov xahavela tut. Tu moginésa te phenés kakaná: “Randiá otphadine vaš dová, sob (kaj) man te pribarjakiren.” Mištó: jone otphadine pal péskiro napatiaiben, a tu rikiresape pal péskiro patiaibén. Rakh kokori pes, ne dar: pal-dová so, kóli Devél na potangindia randien, savé vybarine kadalé kaštéstyr, tedy dykh, Jov na javéla te tanginél i tut. I adiáke, dykh Devléskiro tangipén i strogima: ke odolé, kon otpyja, – strogima, ne ke tu – Devléskiro bahtaló lačhipén, kóli tu javésa te dživés Léskire bahtalé lačhipnása, pal-dová so, kóli na adiáke, tedy i tu javésa čingirdo krig. Ne i adiáke-pac' odolé, savé na javéna te dživén duredýr péskire patiaibnása, javéna nevéstyr pribarjakirde; pal-dová so Devléste isyn zor nevéstyr te pribarjakirel len. Paldavá so, kóli tu sánas čingirdo krig olivitkoné kaštéstyr pir bijanypén, i na pir péskiro bijanypén, i tut pribarjakirde ke lačhí olivítko raslina, to fedýr saréstyr pribarjona dolé randiá ke péskiro olivítko kašt (drévo), savéstyr jone sys otčingirde. Paldavá me na kamám, pšalále, te jačkirav tumen dre nadžinyben pal čorahanyben, sob (kaj) tumé te na duminen vučés pal péste, vari-savé Judy jačné phareilytka i davá javéla ke odová časo, paka, kicý trej Najuden, risjona ke Devél; i adiáke saró Izrailjo zrakhélape. I syr isyn čhindló pal davá: “Zrakhibnari javéla Sionóstyr; i Jov otriskirela bidevlytkima Jakovostyr. I davá Mándyr lénge dorakiribén, kiéli Me zlava gréhi léndyr.” Dro otlydžaiben ke bahtalý zan (zvies'), jone jačné vergenca vaš tuménge; ne so otlydžalape ke vykedyiben, jone isyn Devléskire naj drogedyr manušá pir léngire dadende. Devléskire talany i Léskiro prikhariben na parudjona. Paldavá adiáke-pac', syr i tumé vari-kiéli na kandyné Devlés, ne kakaná Devél potangindia tumen, pir dová so Judy na lyné te kandén, adiáke-pac' i jone kakaná na kandyné vaš dová, sob (kaj) i lénge te javél láska pir Devléskiro tangipén, savó adiáke-pac' sys dynó tuménge. Devél prolydžija sarén manušén pir nakandypen, sob (kaj) te sykavél Péskiro tangipén pe lénde. Ake, savó baró barvalypén i godý, i džinybén Devléste! Syr naštý te ĥaljos, syr Jov sendinela i naštý te džinés Léskire dromá! Kon udžindiá, so Devél duminéla? Ci mogindiá vari-kon Léske te radinel? Ci dyjá vari-kon pérvo Léske dro vužlypén, sob (kaj) jov te moginel te doresel (te dolel) pale? Pal-dová so saró džála Léstyr i pir Léste i vaš Léske. Mek te javél sláva Léske dre viéki! Amín'. Paldavá, pšalále, me mangáva tumen Devléskire tangipnasa, te otdén pes sarésa syr svénto džidó otdyibén i savó trej Devléske vaš tumaró god'varó dynaribén (služenije) Léske godiása i ilésa. Na dživén adiáke, syr adalé-viekoskire manušá dživéna, ne paruven pes, neviakiren tumarí godý, sob (kaj) tuménge te džinén, so Devléskiri vólia isyn lačhí, bidošengiri i čačuný. Paldavá me rakiráva kažnonéske tuméndyr: na duminen pal péste butedýr, syr trej te dumines; ne duminen god'vares pir tumaró patiaibén, savó Devél dyjá kažnonéske tuméndyr. Paldavá, syr manušéste isyn jekh masá i but pašá dre léste, ne na saré pašá, so ke jekh, keréna dová-pac'; adiáke-pac' i ame saré khetané sam sýrby jekh masá dre Xristosóste, a kóli ame na sam khetané, tedy ame sam pašá jekh jekhéske. Ne paldová, syr aménde isyn rázna talany pir bahtalypén, savó isyn dynó aménge, tedy javása te dynarinás Devléske lénca, konéske isyn dynó taláno: te javél proróko, mek te rakirél pir patiaibén, savó isyn léste: kóli vari-konéske dynó te pomoginel javirénge, mek odová manúš te pomoginel; ci, kóli vari-konéske dynó te javél sykliakiribnáskiro, mek odová manúš te sykliakirél. Ci, kóli vari-konéske dynó te podrikirél manušén, mek odová manúš te podrikirél; kóli vari-konéske dynó te rozdel čororenge, mek odová manúš te na tanginél, mek te del saré iléstyr; ci kóli vari-konéske dynó te javél rása, mek odová manúš te kerél mištés péskiri butý. Kóli vari-konéske dynó te dykhél pal javirende, mek odová manúš te kerél davá radymása. Mek te javél čačuný tumarí pšalýtko patýv; risjon krig fuipnastyr i kerén lačhipén: sykavén patýv jekh jekhéske pšalytkone patyvása i tanginen jekh jekhés: kutiakiren (važynen) jekh jekhés; na javén kirné-maséngire, xačon duhósa, kiéli tumé dynarinena Devléske. Radynénpe dro tumarí nadiéia: javén zoralé (tvarda) dro piridživipen; ŭsády (sak) mangénpe Devléske; pomoginen (poden vast) Devlytkoné manušénge, kiéli lénde isyn trébima, dykhén ilésa pal odolé manušénde, savé javéna ke tumé. Bahtiakiren odolé manušén, savé tradéna tumen; bahtiakiren, a na košen. Radynénpe khetané odolé manušénca, savé radynénape, i rovén khetané odolé manušénca, savé rovena. Dživén syr malá (drúgi) maškír péste; na phutjon, a javén kandune; na duminen pal péste, so tumé san drieván god'varé: na kerén čoripén pale pal xolý nikonéske, kerén lačhipén saré manušénge; kóli davá saštý tumaré rigátyr, dživén dro ramánjo (miro) saré manušénca. Miré malá, na kerén nisavó čoripén nikonéske pal péste, pšála miré, fedýr jačkiren štéto vaš Devléskiri xolý; pal-dová so, syr isyn čhindló: “Jačkiren davá Mánge, Me keráva”, – rakiréla Raj Devél. I kóli tyró vérgo (vrogo) isyn bokhalo, čarav les; kóli jov kaméla te p'jel, de te p'jel léske; pal-dová so, kóli tu kerésa adiáke, tu kedesa léske pe šeró xačkirdé vangara. Na domek, sob (kaj) xolý te lel lófo (zor) pe túte, ne kokoró pirizorjakir xolý lačhipnása. Kažno manúš isyn bangó (musinela) te kandel theméskire barydyrén, pal-dová so nane davá, sob (kaj) te na javén jone Devléstyr, i sarén barydyrén, savénde isyn pravo pe manušénde, čhudiá Devél. Paldavá odová, kon isyn proti barydyrende, isyn proti odoléste, savés čhudiá Devél; i kon adiáke keréla, odová kokoró janéla séndo pe péste. Pal-dová so barydyrá isyn darane na vaš odolénge, kon keréla lačhipén, na vaš odolénge, kon keréla fuipén. Ci kamésa tu te na dares barydyrendyr? Ker lačhipén i túke javéla léngiro šaribén; pal-dová so barydyró isyn Devléskiro dynári vaš dová, sob (kaj) túke te javél lačhipén. A kóli tu kerésa fuipén, tedy dáro, pal-dová so léste na ivjá (na naprásnes) isyn kurtála; pal-dová so jov isyn Devléskiro dynári, savés Devél čhudiá vaš kára odolé manušéske, savó keréla fuipén. Paldavá trej te kandes na pal jekh dar angíl kára, ne i pal patýv. Paldavá tumé i pleskirena namirja (podati): pal-dová so jone isyn Devléskire dynárja, i ĥáda, isyn léngiri butý. Paldavá otdén kažnonéske dová, so léske trej: konéske trej namirja (podati), otdén odoléske namirja; konéstyr trej myto (obroko), otdén odoléske myto; konéstyr trej te darén, darén odoléstyr; konéske trej kutiakiriben, kutiakiren odolés. Na javén dro vužlypén ni konéste apríč syr vužlypén te sykavén patýv jekh jekhéske: pal-dová so, kon sykavéla patýv péskire pašatuné manušéske, odová spolninela Zakóno. Pal-dová so priphenybená: “Na ker marki (biladžaipén), na zamar, na čor, na xohav, na zevlyn,” i, kóli isyn vari-savó javír priphenybén, to léskiro smyslo dre dalé lavá: “Sykáv patýv péskire pašatuné manušéske, syr kokoró péske.” Kon sykavéla patýv, odová na keréla čoripén pašatuné manušéske, pal-dová so, kon sykavéla patýv, odová spolninela Zakóno. Kerén adiáke, syr tumé te džinén časo, so kakaná javdiá mardó (štúnda) tuménge te uštén soibnastyr; pal-dová so kakaná isyn pašedyr amaró zrakhibén, syr tedy, kiéli ame lyjam te patias. Rat džála krig syg i dyvés jačéla, paldavá mekasa kalé réndy i urjasape dro parnypen. Syr i dyvesé, javása te lydžas pes šukár, na javása te xas na pir miéra, i na javása te matjovas, na javása te kerás marki i te kerás ladžave réndy, na javása te vyprobinas jekh jekhés i te zevlynas. Dživén i kerén saró pir Isusóskiro Xristosóskiro čačipén, amaré Ráskire-Devléskiro, na otdén kokoré pes vaš tumarí loč i lákiro tyrdypén. Manušés, savéste nane zoraló patiaibén, prilén bi phučibnaskiro. Pal-dová so jekheskiro patiaibén déla vólia léske saró te xal, a manúš, savéste nane zoraló patiaibén, mek féni jov te xal šaha (ovoščy). Odová, kon xála, na sendiakir odolés, kon na xála; i kon na xála, na sendiakir odolés, kon xála, pal-dová so Devél prilyjá i les. Kon tu adasavó san, so tu sendiakiresa javire – xuláskire pisharís? Jov isyn terdó ci peréla angíl péskire xulaste. I jov nevéstyr uštéla, pal-dová so Devél moginéla te čhuvél les, sob (kaj) jov te javél terdó. Jekh manúš ginéla, so jekh dyvés isyn butýr svénto, syr javír, a javír manúš ginéla jekh dyvés adiáke-pac', syr i javír. Mek kažno manúš te kerél saró pir péskiro patiaibén. Odová, kon ginéla, so jekh dyvés isyn glavnedyr javirestyr, ginéla vaš Devléske. I odová, kon xála, xála vaš Devléske, pal-dová so jov parikirela Devléske pal davá; i odová, kon na xála, jov keréla davá vaš Devléske, i parikirela Devléske. Pal-dová so nikón améndyr na dživéla vaš péske i nikón na meréla vaš péske. Paldavá, kóli ame dživasa, ame dživasa vaš Devléske; a kóli ame merasa, ame merasa vaš Devléske: a paldavá, ci ame merasa, ame ŭsády (sak) sam Devléskire. Vaš davá i myjá Xristóso, i otdžidyjá, sob (kaj) Léske te javél Rása-Devlésa i pe džidende i pe mulende. Ne so tu sendiakiresa péskire pšalés? Ci i tu, so tu obrakiresa péskire pšalés? Pal-dová so ame saré javása te terdjovas angíl Devléskiro séndo. Paldavá isyn čhindló: “Me dživáva, – rakiréla Raj Devél, – angíl Mánde terdjona pe čangá manušá kažnoné rodóstyr i manušá pe kažna čibá (čibjá) pridžinena, so Me som Devél.” Tedy kažno améndyr javéla te otphenel kokoró pal péste angíl Devléste. Na javása butýr te sendiakiras jekh jekhés; ne fedýr javása te duminas pal dová, syr te na domekas pšaléske te zmarelpe droméstyr, te na zlydžas pšalés ke grého. Me džinóm i patiáva dre Raste-Devléste Isusóste, so nane nisó, sob (kaj) te javél nažužo kokoró pir péste; ne kóli manúš ginéla vari-so nažužesa, tedy vaš léste dová isyn nažužo. Kóli tyró pšal xoliasóla pal xabén, tedy tu kerésa na pir iló. Na xasiakir tyré xabnasa odolés, pal konéste Xristóso myjá. Mek manušá te na rakirén čoripén pal tumaró lačhipén; pal-dová so Devléskiro Kralipén-davá isyn na xabén i pibén, a čačipén, ramánjo i rádyma pir Svénto Dúho (Fáno). Pal-dová so, kon adiáke dynarinela Xristosóske, odová isyn dre rádyma Devléske i jov isyn mol šaribnaske manušéndyr. Tedy javása te pričhuvas zor te kerás dová, so lydžála ke ramánjo (miro) i ke jekh jekheskiro ĥalyibén. Na xasiakir Devléskire réndy vaš xabén. Saró xabén isyn žužó (čysto); ne fujes odolé manušéske, kon xála i dalésa lydžála javire manušés ke grého. Fedýr te na xas mas, i te na p'jes mol i te na kerés nisó dasavo, sóstyr tyró pšal moginéla te zmarelpe droméstyr, sob (kaj) te na zlydžas pšalés, ci te na kerás dová, sóstyr jov na moginéla te zrikirelpe. Patiaibén, savó isyn túte, isyn vaš péske angíl Devléste. Bahtaló isyn odová manúš, kon na sendiakiréla pes pal dová, so jov vykedyjá. Ne odová, kon piriduminela, kóli jov xála, javéla sendiakirdo, pal-dová so jov keréla na pir patiaibén; a saró, so na pir patiaibén, isyn grého. [ A Devléske, savó déla zor tuménge te patias pir mirí bahtalý zan (zvies') i pir phenybén pal Isusóste Xristosóste pir čorahanybnaskiro otkeriben, Savó sys garadó ĥaratuné beršéndyr, ne Savó akaná dynó tuménge pir prorokengiro čhinybén i pir Devléskiro viéčno uphenybén i sys rosphendly saré nacyiénge, sob (kaj) saré mogindlé te upatian i te kandén, Jekhdžinéske i Naj God'varedyre Devléske, pir Isusóste Xristosóste te javél sláva pe saré viéki. Amín'.-r.s.] Ame, savé sam zoraledýr, sam bangé (musinasa) te primangas doša odolé manušénge, savénde nane zor, a na te kerás jekh so pir péskiro iló. Kažnoné améndyr trej te duminel pal péskire pašatuné manušéste vaš dová, sob (kaj) jov te barjol dre dúho (fáno). Paldavá i Xristóso na kerdiá jekh so pir Léskiro iló, ne, syr isyn čhindló: “Odolé-manušéngiro košybén, savé košena Tut, pyné pe Mánde.” Paldavá saró, so isys čhindló angledýr, sys čhindló vaš aménge, sob (kaj) ame te sykljovas, sob (kaj) aménde te javél nadiéia vyrikiribnasa i podrikiribnasa Sventoné Čhinybnástyr. Mek Devél, savó déla vyrikiriben i podrikiribén, te del tuménge, sob (kaj) tumé te javén khetané dro dúho (fáno) maškír péste pir Isusóskire-Xristosóskiro sykliaiben, sob (kaj) tumé saré khetané jekhe ušténca te slavinén Devlés i amaré Ráskire-Devléskire Dadés. Paldavá, prilén jekh jekhés, syr i Xristóso prilyjá tumen, vaš sláva Devléskiri. Paldavá me rakiráva, so Isúso Xristóso jaciá dynári (slúga) občhindlenge vaš Devléskiro čačipén, sob (kaj) Léske te spolninel dynó lav, savó Jov dyjá dadénge; i sob (kaj) Náiudy te slavinén Devlés pal Léskiro tangipén, syr isyn čhindló: “Pal davá me javáva te slavinav Tut maškír Najudénde, i me javáva te bagáv giliá Tyré lavéske!” I nevéstyr Isajo rakiréla: “Radynénpe Náiudy khetané Léskire manušénca.” I nevéstyr phendló: “Šarén Ras-Devlés, saré Náiudy i mek saré manušá te šarén Les.” I nevéstyr Isajo rakiréla: “Jov javéla Jesiejoskiro rodóstyr i Jov javéla te xulainél manušénca: pe Léste Náiudy javéna te rozginen.” Devél, Savó déla nadiéia, – mek te pherdiakirel tumen kažnoné radymása i ramanjosa dro tumaró patiaibén, sob (kaj) nadiéia te barjol Sventoné Duhóskire zorjása dre tuménde. Me kokoró džinóm pal tuménde, miré pšála, so tumaré ile isyn pherdé lačhipnása, i tumaró džinybén déla saštypen tuménge te sykliakirén jekh jekhés. Ne me čhindjom tuménge murškanedyr pal vari-savé réndy, sob (kaj) tumé te ripirén pal bahtalypén, savó Devél dyjá mánge, te javav Isusóskire-Xristosóskiro dynári vaš Najudénge i syr rašáske te sykliakirav Devléskiri bahtalý zan, sob (kaj) davá Najudengiro svénto dyibén te janel Devléske rádyma i te javél posvencyndlo Sventoné Duhósa. I paldavá pir Isusóste Xristosóste me mogináva te šaravpe miré dynaribnasa angíl Devléste. Pal-dová so mánde nane muršypen te rakiráv pal vari-so, so na kerdiá Xristóso pir mánde, vaš dová, sob (kaj) te janel Najuden ke patiaibén, lavésa i rendosa, savé Jov kerdiá, ĥertykakire zorjása i divenca, Devléskire Duhóskire zorjása adiáke, so me pherdés rosphendjom Xristososkiri bahtalý zan (zvies') Jerusalimóstyr i pašýl davá fóro ke Ilirika; i me pričhudjom zor (starindjompe) te rakiráv na odój, kaj sys phendló Xristosóskiro lav, sob (kaj) te na čhuvav pe davá fundámiento, savó kerdé angíl mánde; ne syr isyn čhindló: “Odolé, konéske na sys rosphendlo pal Léste, odolé kokoré dykhéna, i odolé, savé na šundlé, udžinena.” Paldavá mánde sys but terdó pe drom, so na délas mánge saštypen te javav ke tumé. Ne kakaná, mánde nane butýr réndy pe dalé phuvjá, ne syr mánde ĥaratuné beršéndyr sys bari láska te javav ke tumé, kakaná, kiéli me javáva te tradav dre Ispanija, me zatradava ke tumé, pal-dová so mánde isyn nadiéia te dykháv tumen, i so tumé man prolydžana dre drom korigedýr (pozžedýr) doléstyr, syr Me čaljovava radymása te rakiráv tuménca, ne kakaná me džáva dro Jerusalimo te dynarinav sventonenge; pal-dová so Makiedonija i Ahiia zakamle te skedén te den lové iléstyr sventonenge Jerusalimóstyr. Jone kokoré zakamle davá, pal-dová so jone isyn vužle angíl lénde, kóli Náiudy jačné khetané Judenca dro Duhoskiro bahtiakiribén, tedy lénge trej te pomoginen lénge i pe džiibén. Syr me keráva davá, me otdáva lénge, so skedynó, tedy me džáva pirdál tumaré štéty dre Ispanija. Me džinóm, so kiéli me javáva ke tumé, me javáva dro pherdó Xristosóskiro bahtiakiribén. Ne, akaná me mangáva tumen, pšála, amaré Rása-Devlésa, Isusósa Xristosósa i Duhóskire patyvása te javén mánca dro xor mangipén pal mánde ke Devél; sob (kaj) mánge te zrakhavpe Judendyr, savé na patiána dre Isusóste i, sob (kaj) miro dynaribén dro Jerusalimo te javél šukár prilyno sventonenca; sob (kaj) mánge dre rádyma, kóli Devléske davá javéla trej, te javav ke tumé i khetané tuménca te otkinjovav. Mek Devél, Savó déla ramánjo, te javél sarénca tuménca. Amín'. Me kamám te phenáv tuménge lav pal amarjate pheniate Fivate, joj isyn diakonisa dre Kienhriejengiri khangirí; sob (kaj) tumé te prilén la syr Devléskirja manušniá, syr trej te priles sventonen, i pomoginen láke, dre so joj iavéla te mangél tumen, pal-dová so joj kokori pomoginelas butenge, adiáke-pac' i mánge. Piridén “ramánjo” (miro) Priskiloske i Akiloske, adiáke-pac' miré manušénge, savé khetané mánca kerdé butý vaš Isusóske Xristosóske, savé pal miro džiibén otdenas kokoré péskiro šeró; me parikirava lénge najekhdžino ne i saré Najudengire khangirja, adiáke-pac' piridén “ramánjo” i khangirjake, saví skedelape dre léngiro kher. Piridén “ramánjo” Jepienietoske, adiáke-pac' miré drogoné maléske, savó angledýr saréndyr upatiandyja dre Xristosóste dre Asija. Piridén “ramánjo” Marijake, saví kerdiá adiáke but lačhipén vaš tuménge. Piridén “ramánjo” Andronikoske i Junijoske, miré semencake, savé sys bešté khetané mánca dro štaribén; jone isyn džindlé maškír Apostolende i angledýr mándyr upatiándyne dre Xristosóste. Piridén “ramánjo” Amplijaske, savó isyn drieván drógo mánge syr pšal pir patiaibén dre Raste-Devléste. Piridén “ramánjo” Urbanoske, savó khetané aménca keréla butý vaš Xristosóske, i miré drogoné maléske Stahijoske. Piridén “ramánjo” Apieliesoske, savó sykadiá, so jov čačunó patiaibnaskiro dre Xristosóste, sarénge Aristovuloskire kheréstyr. Piridén “ramánjo” Irodionoske, miré semencake, “ramánjo” patiaibnaskirenge dre Raste-Devléste Narkisoskire kheréstyr. Piridén “ramánjo” Trifienake i Trifosake, savé keréna butý vaš Devléske. “Ramánjo” drogoné Piersidake, saví but kerdiá vaš Devléske. Piridén “ramánjo” Rufaske, savés Devél vykedyjá, i léskire dáke, saví sys syr daj i vaš mánge. Piridén “ramánjo” Asinkritoske, Fligontoske, Jermaske, Patrovoske, Jermijaske i javire pšalénge, savé isyn khetané lésa. Piridén “ramánjo” Filologoske i Julijaske, Niriejoske i léskire pheniake, i Olimpanoske i saré devlytkonenge, savé isyn khetané Lésa. Den “dobridim” jekh jekhéske Sventoné čamudypnasa. Saré Xristosóskire khangirja piridena “ramánjo” tuménge. Ne me mangáva tumen, pšalále, te rakhénpe odolé manušéndyr, savé keréna dre khangirja roskeribena i pharipena, i kaména te lydžán krig tumen dalé sykliaibnastyr, savéske tumé vysyklyne. Paldavá adasavé manušá dynarinena na amaré Ráske-Devléske, Isusóske Xristosóske, a péskire nalačhé kamibnaske; jone xahavéna (déna dukhá) lačhé-ilytkone manušén gudlé i xohané lavénca. Tumaro kandypen patiaibnaske isyn džindló sarénge; paldavá me som drieván rado pal tuménde, me kamám, sob (kaj) tumé te javén god'varé dro lačhipén i te na javén bangé dro fuipén. Ne Devél, Savó déla ramánjo, xasiakiréla nalačhés tel tumaré ĥerá. Mek te javél bahtalypén amaré Ráskire-Devléskire, Isusóskiro Xristosóskiro tuménca! Amín'. Piridela “ramánjo” tuménge Xima (Timofiejo), savó keréla butý khetané mánca, i Lucyjo, Iasono, i Sosipatro, mirí seménca. Me, Cercyjo, savó čhindjom davá lyl, piridava “ramánjo” tuménge, syr pšal pir patiaibén dre Raste-Devléste. Piridela “ramánjo” tuménge Gajo, savó prilyjá man i sarí khangirí. Piridela “ramánjo” tuménge Jerasto, rakhibnári pe forítko tyknorí (sokroviščýtko) i pšal Kvarto. Mek bahtalypén Ráskire-Devléskire, amaré Isusóskire Xristosóskiro te javél sarénca tuménca. Amín'. Pavlístyr, savés Devél prikhardia te javél Isusóskire Xristosóskire Apostolosa pir Péskiri vólia, i amaré pšalestyr Sosifanostyr, Devléskire khangirjake, so isyn dro Korinfo, saré sventoné manušénge, savé isyn prikharde te jačen i te javén Devléskire manušénca pir patiaibén dre Isusóste Xristosóste; sarénge, kon mangelape Isusóskire Xristosóskire lavésa pir saré štéty, Savó isyn léngiro i amaró Raj Devél: Mek Devél Dad amaró i Raj Devél, Isúso Xristóso, te den tuménge bahtalypén i ramánjo (miro). Me ŭsády (sak) parikirava Devléske pal tuménde pal bahtalypén, savó isyn dynó tuménge pir Isusóste Xristosóste. Pal-dová so pal Léste tumé barvalyne kažnoné lavésa i džinybnasa, i pal-dová syr amaró dophenybén pal Xristosóste jaciá dasavo tvardo dre tuménde, paldavá tuménde nane ni savó nauhtylyben ni dro vari-savó taláno (darovanijo), kiéli tumé užakiréna zoralés Xristosós te javél, Jov adiáke-pac' podrikiréla tumaró zoraló patiaibén ke kónco (ke jagóro), sob (kaj) tumé te javén bidošakire dro dyvés, kiéli amaró Raj Devél, Isúso Xristóso, javéla javír mólo. Devléske, Savó prikhardia tumen dro khetanyben Léskire Čhavésa, Isusósa Xristosósa, Amaré Rása, trej te patián sarésa. Me drieván mangáva tumen, miré pšalále, Isusóskire Xristosóskire lavésa, amaré Ráskire-Devléskire, te rakirén jekh, i te na javél tuménde rakiribena jekh proti javiréste, sob (kaj) tumé te javén khetané dro jekh dúho (fáno) i dre jekh godý. Pal-dová so me udžindjom Xloiakire sem'iatyr, pšalále miré, so maškír tuménde isyn košybena. Me phenáva pal davá adiáke, so tumé rakiréna: “Me som Pavlískiro”, “me som Apolososkiro”, “me som Kifaskiro”, ne “me som Xristosóskiro”; so ci rospyjape Xristóso pe grupy? Ci Pávli sys primardo pe trušúl pal tuménde? Ci tumé boldepe dro Pavlískiro lav? Me parikirava Devléske pal dová, so me na boldjom nikonés tuméndyr apríč Krisposte i Gajoste, sob (kaj) nijékh manúš te na phenél, so me boldjom tumen dro miro lav (miré lavésa). Me boldjom adiáke-pac' Stiehvanos (Stiefanos) i léskire sém'ia (irí), ne ci me boldjom iščo (inké) vari-konés, me na džinóm (na džináv). Hristóso na bičhadiá man te bolav. Jov bičhadiá man te rosphenav bahtalý zan (zvies'), i te rosphenav pal davá nazbit god'varé lavénca, sob (kaj) Xristosóskiro meribén pe trušúl te na xasiakirél péskiri zor. Pal-dová so lav (sykliakiribén) pal Xristosóskiro meribén pe trušúl isyn dylnypén vaš odolénge, kon isyn xasibnýtko, a aménge, kon isyn zrakhno, davá déla Devléskiri zor. Dro Svénto Čhinybén rakirlape: “Me xasiakiráva god'varipen god'varengiro i Me otčhuvava dre rig ĥalyibén sykliakirdengiro.” Kaj isyn god'variuko? Kaj isyn lylvarítko (knížniko)? Kaj isyn dophenybnari (sporščyko) dro davá viéko? A Devél pirikerdia dalé svetoskiro god'varipen pe dylnypén. Paldavá Devél pir Péskiro godypén kerdiá adiáke, sob (kaj) manušá te na ĥaljon Devlés péskire godiása bi patiaibnaskiro; Devléske sys lačhó te zrakhél odolén, savé patiána, pir phenybnytko lav, savó isyn sýrby dylnypén. Paldavá Judy phučena pal špéry (znáki), i Griéki (Balamé) rodéna god'varipen; ne ame rosphenása pal Xristosóste, Saves primarde pe trušúl; davá phenybén isyn sýrby bar pe drom, savó propatiakirela Judén i isyn sýrby dylnypén vaš Najudénge, ne Xristóso isyn Devléskiri zor i Devléskiro godypén odolénge, savé isyn prikharde: syr vaš Judénge, adiáke-pac' i vaš Griekénge (Balaménge). Pal-dová so Devléskiro nagodypen isyn god'varedyr manušytkoné god'varipnastyr i Devléskiro nazoralypen isyn zoraledýr manušytkoné zoralypnastyr. Paldavá ripirén, pšalále, kon tumé sánas angíl dová, syr Devél prikhardia tumen: nábut tuméndyr sánas god'varé pir manušýtko godý, nábut tuméndyr sánas baré manušá, nábut tuméndyr sánas slavutnone rodóstyr; ne Devél vykedyjá pefromi dová, so svéto ginéla pal dylnypén, sob (kaj) te ladžakirel god'varen, i dová, so svéto ginéla pal nazoralypen, sob (kaj) te ladžakirel zoralypén, i Devél vykedyjá butýr dová, so svéto ginéla pal nadžindlypen i dykhéla vučipnástyr i ginéla ni palsó, te čhuvél telé svetoskiro raipen, sob (kaj) nijékh manúš te na šarelpe angíl Devléste. Ne adavá Devél čhudiá tumen dro khetanypen Isusósa Xristosósa amaresa i Jov kerdiá Xristosós syr amaró godypén, čačipén; pal Léste ame jaciám Devléskire sventoné i vol'none manušénca, sob (kaj) te javél adiáke, syr isyn čhindló: “Mek odová, kon šarelape, te šarelpe Devlésa.” Syr me sómas ke tumé, pšalále, me javdjom na vaš dová, sob (kaj) te rosphenav Devléskiro čorahano čačipén phut'kirdé lavénca ci baré god'varipnasa. Paldavá mánde pe godý sys te na džináv nisó, apríč Isusóste Xristosóste, Saves primarde pe trušúl. I kiéli me sómas tuménca, mánde na sys zor, me darandyiem i izdrandyjom; dre mirí zan i phenybén na sys god'varé lavá, ne jone sys syr dophenybén pal Devléskire-Duhoskiri zor; sob (kaj) tumaró patiaibén te na rikirelpe pe manušýtko god'varipen, a pe Devléskiri zor. Ne ame rakirasa pal god'varipen maškír bidošakire patiaibnaskirende, ne na adiáke, syr davá svéto ginéla, ci, syr theméskire barydyrá dalé svetóstyr ĥaljona god'varipen, savé syg končynenape. A ame rakirasa pal Devléskiro čorahano godypén, savó Devél garadia i vykedyjá vaš amarí sláva angíl, syr svéto sys sozdynó (kerdó): nijékh adalé svetóskire baré randyr na ĥalyjá davá, pal-dová so, kóli jone te ĥaljon, tedy jone na primarenas Ras-Devlés, Savó isyn pherdó slavása, ne syr isyn čhindló: “Kodová na dykhciá jakh, na šundiá kan, na sys pe iló manušéste, so Devél kedyja odolénge, konéske jaciá drógo Jov; ne Devél otkerdia davá Péskire Duhósa, pal-dová so Dúho (Fáno) dodžála ke saró, až ke dúmy Devléskire, so isyn ĥaradé manušytkoné godiatyr.” Paldavá, kon manušéndyr džinéla, so isyn dre javire manušéste, jekh davá manušýtko Dúho (Fáno), savó dživéla dre manušéste? Adiáke-pac' i jekh Devléskiro Dúho (Fáno) džinéla jekh pal Devléste. Ne ame prilyjam dúho (fáno) na kadalé svetóstyr, a ame prilyjam Dúho (Fáno), Savó Devél bičhadiá, sob (kaj) aménge te ĥaljovas saró dová, so Devél adiáke dyjá aménge: pal so ame rakirasa lavénca, savé na manušytkoné-god'varipnastyr, a lavénca, savé svénto Dúho (Fáno) sykliakirdiá, kiéli ame piriphenasa Duhoskiro odolénge, konéste isyn Dúho (Fáno). Manúš, savéste nane Dúho (Fáno), na priléla ilésa talany Devléskire Duhóstyr, pal-dová so jov ginéla len pal dylnypén; i jov na moginéla te ĥaljol len, pal-dová so lénge déna čol (timín) manušá, konéste isyn Dúho (Fáno); ne manúš, savéste isyn Dúho (Fáno), déla čol sareske, ne léske nijékh na moginéla te del čol. Pal-dová so, kon ĥalyjá Devléskiri godý, sob (kaj) te sykliakirél Les? A aménde isyn Xristososkiri godý. Pšalále, me na mogindjom te rakiráv tuménca syr manušénca, konéste isyn Dúho (Fáno), a syr odolenca, savé dživéna pir ločakiro (plotiakiro) tyrdypén, syr bijatorenca (čhavorenca) pir patiaibén dre Xristosóste. Me čaliakirdjom tumen thudésa, a na masésa, pal-dová so tumé sánas bizorjákire, i kakaná iščo (inké) tuménde nane zor; pal-dová so tumé san iščo (inké) manušá, savé dživéna pir ločakiro tyrdypén. Paldavá, kóli maškír tuménde isyn zevlynypén, i košybén, tedy, ci na san tumé manušá, savé dživéna pir ločakiro (plotiakiro) tyrdypén; i savé lydžána pes syr manušá kadalé svetóstyr? Pal-dová so, kiéli vari-kon phenéla: “Me som Pavlískiro”, ci javír: “Me som Apolososkiro”, tedy, ci na san tumé manušá, savé dživéna pir ločakiro tyrdypén? Kon tedy isyn Pávli? Kon isyn Apoloso? Jone ž isyn jekh Devléskire slúgi (dynárja), pir konéste tumé upatiándyne, syr i dyjá Devél butý kažnonéske (svakoneske). Me čhudjom dre phuv, o Apoloso paniakirdia, ne Devél dyjá pribaripen. Paldavá, kon čhudiá dre phuv, kon paniakirdia, davá nisó na mol, a saró džála Devléstyr, Kon dyjá pribaripen. Ne kon čhudiá dre phuv, i kon paniakirdia-davá usajékh, a kažno doreséla (dolela) otdyibén pir péskiri butý. Pal-dová so ame khetané kerása butý vaš Devléske, a tumé, san Devléskiri félda, Devléskiro Kher. Me čhudjom fundámiento pir taláno (darovanijo) bahtalypnastyr, savó Devél dyjá mánge syr god'varó arhitiektoro, a javír manúš keréla kher pe davá fundámiento. Ne kažno dykh, syr jov keréla kher. Paldavá nijékh manúš na moginéla te čhuvél javír duhovno fundámiento apríč odoléste, savó isyn Isúso Xristóso vaš khangirí pir saró svéto. A kóli vari-kon keréla kher pe davá fundámiento suvnakástyr, rupéstyr, drogoné barendyr, kaštéstyr, čarjatyr, phusestyr, tedy kažno manušeskiri butý sykadjola dro Xristosóskiro dyvés, pal-dová so jag sykavéla saró, i jag sprobinela kažno butý, saví joj isyn. Kóli vari-konéskiri butý, saví jov kerdiá pe davá fundámiento, vyterdjola, tedy adavá manúš doresciá otdyibén. A kóli vari-konéskiri butý shačola, tedy adavá manúš xasiakiréla péskiro otdyibén, ne jov zrakhélape sýrby odová, kon progijá pir jag. Tumé džinéna, so tumé san Devléskiri Khangirí, i so Devléskiro Dúho (Fáno) dživéla dre tuménde. Kóli vari-kon xasiakiréla Devléskire-khangirjákiro skedyibén keribnasa, savó nane lačhó Devléske, tedy odolés xasiakiréla Devél; pal-dová so Devléskire-khangirjákiro skedyibén isyn svénto i tumé patiaibnaskire, san dasavé. Mek nijékh te na xohavél kokoró pes; kóli vari-kon duminéla péske, so jov isyn god'varó maškír tuménde pir davá svetoskiro god'varipen, tedy mek adavá manúš te jačél dylynesa, sob (kaj) jov moginelas te javél god'varesa. Pal-dová so god'varipen kadalé svetoskiro isyn dylnypén angíl Devléste; paldavá isyn čhindló: “Jov uhtyléla god'varen dro léngiri frotyma.” I nevéstyr: “Raj Devél džinéla saró, so god'varé duminéna, i so dre lénde nane ni saví l'góta.” Mek nikón te na šarelpe manušénca; pal-dová so saró-isyn tumaró. Ci Pávli, ci Apoloso, ci Kifa, ci davá svéto, ci džiibén, ci meribén, ci saró, so aménde isyn kakaná; ci saró, so javéla aménca angíl, saró-isyn tumaró: i tumé san Xristosóskire, a Xristóso isyn Devléskiro. Tedy mek manušá te ĥaljon amen syr Xristosóskire dynar'jén i kheritkoné barydyrén pir Devléskire čorahane čačipená. Jekh so trej vaš kheritkoné barydyréske, sob (kaj) jov te javél patiaibnýtko pir saró. A vaš mánge davá isyn nabaró réndo, syr tumé déna čol (timín) mánge, ci manušýtko séndo déla. Ne me adiáke-pac' na davá čol péske. Pal-dová so ni savó čoripén nane pal mánde; ne davá na dophenéla, so me na som bangó: davá Raj Devél, Savó déla čol mánge. Tedy na sendiakiren angíl dová, syr Raj Devél javéla, Savó dudvaliakirela (obsvencynela) i kalé (cjomna) čorahanybena i otkerela pe jakhá adiáke-pac' ĥaradé mysli dro manušýtko iló; i tedy sváko (kažno) manúš doreséla (dolela) šaribén Devléstyr. Ĥáda, davá saró, otlydžalape ke me i ke Apoloso vaš tumaró mištypén, sob (kaj) tumé te sykljon améndyr te na duminen vučydyr kodolestyr, so isyn čhindló, i te na phutjon jekh angíl jekhéste. Paldavá, kon ža vykedéla tut javirendyr? I so isyn túte, so na sys dynó túke? Tedy sóske tu šaresape, sýrby tu na dorescian (na dolyjan) davá syr taláno? Tumé uže čalyne, tumé akaná jačné barvalé, tumé uže jačné kral'jenca bi amaró; i me kamám, sob (kaj) tumé čačunés te kralinen, i aménge adiáke-pac' te kralinav tuménca. Paldavá me duminava, so Devél čhudiá amen te javas Apostolenca pe sámo kónco (jagóro) palatunendyr, savén Jov vykedyjá te meras, syr i Xristóso myjá. Paldavá ame jaciám sýrby ladžakirdó sykaibén (primiéro) pe svetóskire jakhá i Jangolenge, adiáke-pac' i manušénge. Ame sam dylyné pal Xristosóste, a tumé san god'varé dro jekhipén Xristosósa; ame sam bizorjákire, a tumé san zoralé; tumen slavinena, a ame sam dre ladž. Ke davá-pac' mardó (štúnda) me iščo (inké) sam bokhalé i aménde isyn smega (truš) i ame sam dre patave i domardé, i ame psirasa syr bikherítka, ne ame kerása butý pharés péskire vasténca. Amen košena, a ame bahtiakirasa; amen tradéna, a ame pirilydžasa; amen košena, a ame otphenasa lačhé lavénca, ame sam syr dalé-svetoskiro gnejo (mesta), ame jaciám syr bláta dalé phuvjákiri ke/žýko kakaná. Me na čhináva davá, sob (kaj) te ladžakirav tumen, a sob (kaj) te dav godý tuménge, syr miré drogoné pšalénge. Paldavá, kóli tuménde isyn deš tysjoncy sykliar'jen (nastavniken) pir patiaibén dre Xristosóste, ne usajékh tuménde isyn jekh dad; pal-dová so me jacjom sýrby dad vaš tuménge pir bahtaló lav, so me jandjom. Paldavá me mangáva tumen, te kerén adiáke, syr me keráva. Pal-dová me bičhadjom ke tumé Timofiejos (Ximas), miré drogoné i patiaibnytkone sýrby čhavés pir patiaibén dre Raste-Devléste, savó dolydžala ke tumarí godý miro džiibén dro jekhipén Xristosósa, adiáke syr me i sykliakirava dre khangirja. I pal-dová so me kakaná na džáva ke tumé, to vari-savé tuméndyr phutine. Ne me syg javáva ke tumé, kóli Raj Devél déla, i me udžinava vaš péske na dová, so adalé phut'kirdé manušá rakiréna, a Duhoskiri zor, saví isyn lénde. Pal-dová so Devléskiro Kralipén rikirélape na lavénca, a Duhóskire zorjása. So ž tedy tumé kaména? Ci mánge te javav ke tumé destesa ci laskasa i tihone Duhósa? Isyn mavlýn (malva), so maškír tuménde isyn biladžaipén i dasavo biladžaipén, savó až na sys džindló maškír Najudénde, so jekh manúš rikiréla léskire-dadéskire romniá pal romniáte. I tumé iščo (inké) phutjona, zamiést dová, sob (kaj) te rovén pal davá, i sob (kaj) te džal krig tuméndyr odová manúš, kon kerdiá dasavo réndo (diélo). Mek me na som tuménca, ne me sýrby duminava pal tuménde i pridumindjom xas' (kára) odoléske, kon kerdiá dasavo réndo, vaš Ráskire-Devléskiro lav, kiéli tumé skedénape khetané dre khangirí i sýrby pir miro dúho (fáno) i Ráskire-Devléskire zorjása amaré Isusóskire Xristososkirjasa, te otdén adasavé manušés nalačheske te menčynel les léskiri loč (plot'), saví isyn dro grého, sob (kaj) te zrakhen léskiro dúho (fáno) dro Ráskire-Devléskiro dyvés, amaré Isusóskiro Xristosóskiro. Davá isyn našukar, so tumé šarenape. Ci tumena džinéna, so tykné roščynatyr šutljola saró xumer (ciasto)? Paldavá vyžužakiren phurané-grehoskiri roščyna, sob (kaj) tumé te javén nevoné xumeresa, pal-dová so tumé ž san žužó xumer, bi roščynakiro, pal-dová so amaró Xristóso, Patraditko Bakroró, sys muliakirdo syr svénto dyibén pal aménde. Paldavá javása te svenkinas svénko na phurané roščynasa, savé sys pherdý grehosa i pies'cjonymasa, a bi roščynakire marésa, savó isyn pherdó žužypnasa (čystotasa) i čačipnása. Me čhindjom tuménge dro miro lyl, sob (kaj) tuménde te na javél nisó khetané manušénca, savé dživéna džuvliénca bi sevlakiro. Ne na napatiaibnaskirenca, savé isyn svetóstyr, i, savé dživéna džuvliénca bi sevlakiro, ci skvamnymar'jenca ci prahar'jenca, ci idole-mangipnaskirenca, pal-dová so tuménge treindiá te džán dalé svetóstyr. Ne kakaná me čhindjom tuménge te na kerén nisó khetané odolé manušésa, savó kharélape pšalesa, a kokoró duredýr dživéla džuvliénca bi sevlakiro, ci jačélape skvamnymarisa, ci idole-mangipnaskiresa, ci košybnarisa, ci matymarisa, ci praharisa; kadasavesa i te na bešén te xan khetané. So ž mánge te sendinav (te sendiakirav) odolén, savé nane khangirjátyr? Ci na trej tuménge te sendinén, savé isyn khangirjátyr? Ne odolén, savé isyn na khangirjátyr, Devél sendiakiréla! Paldavá tradén krig tumaré khangirjákire skedyibnástyr došale manušés. Syr davá nane ladžavo, kóli vari-kon tuméndyr, kiéli léste isyn xolý pe javiréste, tedy te džal pe séndo angíl napatiaibnaskire manušénde (Najudénde), zamiést dová, sob (kaj) te džal ke svénta? Ci tumé na džinéna, so svénta javéna te sendinén saró svéto? Kóli tuménge te sendinén svéto, tedy so ž tumé na san mol, sob (kaj) te sendinén nabaré rendoré (diélycy)? Ci tumé na džinéna, so aménge te sendinas Jangolen? Tedy so tumé na moginéna te roskedenpe dre dalé džiibnáskire réndy? A kiéli tuménde isyn dalé džiibnáskire rendoré, tedy sóske tumé čhuvéna péskire sendar'jenca dasavé manušén, savén na kutiakirena manušá khangirjátyr. Me phenáva te ladžakirav tumen. Ci nane nijekhes god'varé manušés maškír tuménde, sob (kaj) jov moginelas te roskedelpe dro réndo maškír tuménde? Dykhén: pšal sendinelape pšalesa, i davá isyn angíl napatiaibnaskirende! I davá isyn butýr blatuno réndo vaš tuménge, so tumé sendinenape jekh jekhésa. Sóske tuménge te na pirilydžas pharipén ni pal so? Tuménge fedýr te denpe dukhá? Ne tumé ž kokoré keréna čoripén i xohavena javirén, i ke tumarí ladž, xohavena tumaré pšalén. Ci tumé na džinéna, so načačunenge na javéla paš dro Kralipén dro Bolybnáskiro Rajo? Na xohavenpe: ni odolé, savé keréna bléndo, ni idole-mangipnaskire, ni odolé, savé keréna marki, ni odolé muršá, savé isyn sýrby džuvliá, ni odolé, savé dživéna muršenca syr džuvliénca, ni čorá, ni skvapnymárja, ni matymárja, ni košybnárja, ni prahárja-lénge na javéla paš dro Kralipén dro Bolybnáskiro Rajo. Vari-savé tuméndyr sánas adasavé. Ne tumé san obmorde, osvencyndle, ne tumé san pridžindle syr čačuné amaré Ráskire-Devléskire lavésa, Isusóskire Xristososkiresa i amaré Devléskire Duhósa. Mánge saró saštý, ne l'góta (pol'za) isyn na saréstyr; mánge saró saštý, ne naštý, sob (kaj) vari-so te lel upralypén pe mánde. Habén isyn vaš per, i per isyn vaš xabén, ne Devél xasiakiréla i jekh, i javír: ne masá isyn dyné na vaš biladžaipén, a masá isyn dyné vaš Ráske-Devléske i Raj Devél isyn vaš masá. Devél otdžidiakirdiá Ras-Devlés, i Jov adiáke-pac' otdžidiakirela amen Péskire zorjása. Ci tumé na džinéna, so tumaré masá isyn sýrby pašá Isusóskire maséndyr? So ž, tedy, me otlava paš Xristosostyr, sob (kaj) te keráv dalé pašatyr pašá biladžakuné džuvliáke? Te na javél adiáke. Ci tumé na džinéna, so odová, kon isyn khetané biladžakuné džuvliása, jačélape lása syr jekh masá? Paldavá ž, isyn phendló: “Dujdžiné javéna syr jekh loč.” Ne odová, kon isyn khetané Devlésa, isyn sýrby dro jekh dúho (fáno) Rása-Devlésa. Našén biladžakuné rendéndyr. Kažno manúš, kon keréla javír grého, keréla sýrby na vaš péske, ne odová, kon dživéla džuvliénca bi sevlakiro, keréla grého péskire masenge. Ci tumé na džinéna, so tumaré masá isyn sýrby khangirí vaš Svénto Dúho (Fáno), Savó dživéla dre tuménde i isyn Devléstyr; i so ž tumé na san xulaja péskire masenge? Tumé san kindle pal bari timín (kimin); paldavá slavinén tumé Devlés péskire masenca i Duhósa, savé isyn Devléskire. Pal dová, so tumé čhindlé mánge: manušéske fedýr te na čilavel (te na džinél) džuvliá; ne paldová, sob (kaj) te na javél biladžaipén, mek kažno manúš te lel péske romniá, mek kažnoné (svakone) džuvliáte te javél jekh rom. Romeske trej te javél lačhó i tangipnýtko vaš péskire romniake; adiáke-pac' i romniake vaš romeske. Romný isyn na xulany pe péskire masá, ne isyn lákiro rom; adiáke-pac' i rom isyn na xuláj pe péskire masá, a romný. Na otphenenpe jekh jekhestyr, kóli féni (tóka) jekh pir dorakiribén jekh jekhésa pe vari-savó časo, sob (kaj) tén'či te otdén pes postoske i patierjake (molitvake) Devléske vaš dová, sob (kaj) nálačho te na zlydžal tumen pal dová, so tumé na rikiréna pes dre vastá. Ne me phenáva davá tuménge na syr priphenybén, a tumé ž kokoré dykhén. Me kamám, sob (kaj) saré manušá te javén adiáke, syr me som: ne kažnoné (svakone) manušéste isyn péskiro taláno Devléstyr, jekh isyn dasavo, javír nane dasavo. Ne me phenáva napaloromitkoné džuvliénge i pivlienge (udovenge): davá isyn šukár vaš lénge te jačénpe adiáke, syr me som. Ne kóli jone na rikiréna pes dre vastá, mek te kerén bjava; pal-dová so fedýr te kerén bjava, syr te menčynelpe kamibnástyr te džal paloróm, ci te lelpe. Ne odolénge, konéste isyn romný ci rom, me na priphenava, a Raj Devél; romniake te na rozdžalpe romesa; a kóli ž joj rozdžalape, tedy mek joj te jačélpe biromeskirjasa, ci mek joj te risjol ke péskiro rom; i mek rom te na mekel péskire romniá. Ne me rakiráva javirénge, a na Raj Devél: kóli vari-savé pšaléste pir patiaibén dre Xristosóste isyn napatiaibnaskiri romný, i joj kaméla te dživél lésa, tedy mek jov te na mekel la. I džuvlý, savjate isyn napatiaibnaskiro rom, i jov kaméla te dživél lása, tedy mek joj te na mekel les. Pal-dová so napatiaibnaskiro rom sýrby osvencynelape vaš Devléske pir Léskire romniáte, i napatiaibnaskiri romný sýrby osvencynelape vaš Devléske pir lákire romeste; a kóli te na javél adiáke, tedy tumaré čhavoré javénas sýrby idole-mangipnar'jengire; ne jone ž kakaná osvencyndle vaš Devléske. Ne kóli vari-savó napatiaibnaskiro udžala, mek jov (joi) te džal péske, pšal ci phen pir Raste-Devléste isyn na sphandle dre dasavé vakancyi (slučai), a Devél khardiá amen te dživás dro ramánjo (miro). Paldavá, tu, so džinésa, romnije, so tu zrakhésa tyré romes? Ci, tu, so džinésa, romá, so tu zrakhésa tyré romniá? Ne mek kažno (sváko) manúš te dživél, syr Devél dyjá kažnoné manušéske, a syr Raj Devél prikhardia kažnoné manušés: adiáke-pac' me sykliakirdjom pir saré khangirja. Ci sys vari-kon prikhardo, savó sys občhindlo? Mek jov te na ukedel občhinybnaskiri špéra: ci sys vari-kon prikhardo, kiéli sys naobčhindlo? Mek jov te na občhinelpe. Občhinyben na mol nisó, i naobčhinyben na mol nisó; ne bari znáčyma isyn te rakhés Devléskire priphenybená (zapoviedi). Mek kažno manúš te jačélpe pe péskiro štéto maškír manušénde, savéstyr jov sys khardo. Ci sánas tu khardo pisharisa, na ladža zoralés, a kóli te moginésa te jačes vol'none manušésa, tedy ker davá. Paldavá pishári, savés Raj Devél khardiá ke Pe, isyn vól'no manúš angíl Raste-Devléste; adiáke-pac' i vól'no manúš, savés Raj Devél khardiá ke Pe, isyn Xristosóskiro pishári. Tumen kindle pal Xristososkiri timín; na javén manušytkoné pishar'jénca. Pšalále, mek kažno manúš, syr jov sys khardo ke, adiáke te jačélpe angíl Devléste. A so pal patyvalé čhajende, mánde nane ni savó priphenybén Devléstyr; ne davá me rakiráva pir péskiri godý syr manúš, savéske Devél dyjá patýv pir Péskiro tangipén. Me duminava, so pal davá pharó džiibén, so isyn kakaná, fedýr vaš manušéske te jačélpe adiáke, syr jov isyn. Isyn túte romný? Na róde, sob (kaj) te rozdžaspe. Nane túte romniá? Na róde péske romniá. A kóli tu lesape, adiáke-pac' na kerésa grého, i kóli čhaj vydžála paloróm, joj adiáke-pac' na keréla grého: ne kadasavende javéna mén'ki dro paloromitko džiibén, paldavá me angíl prirakhava tumen. Ne me phenáva, pšalále, so časo nane but. Pal javirende ž; konéste isyn romný, javén sýrby tumé san biromniengire; i odolé, kon rovela, javén sýrby tumé na rovena; i odolé, kon radynélape, javén sýrby na radynénape; i odolé, kon kinela, javén sýrby lénde nane ničý; i odolé, kon léla vari-so dalé svetóskire džiibnastyr, javén sýrby jone na zalyne pherdés dalésa; pal-dová so davá svéto, savó jov isyn kakaná, džála krig sýges. Me kamám, sob (kaj) tumé te javén vol'na piridživipnastyr. A naromanduno manúš pekelape (zabotisola) pal dová, so isyn Ráskiro-Devléskiro, syr te javél lačhó Ráske-Devléske; ne odová, kon isyn romanduno, pekelape pal dalé-svetóskire džiibnytka réndy, syr te javél lačhó péskire romniake. Isyn rozn' maškír paloromitkonate i patyvalé čhate. Napaloromitko pekelape pal dová, so isyn Ráskiro-Devléskiro, sob (kaj) te otdelpe Devléske Duhósa i masenca; a paloromitko pekelape pal dalé-svetóskire džiibnytka réndy, syr te javél lačhó péskire romeske. Ne me phenáva davá vaš tumaró mištypén, sob (kaj) te na čhuvav felý (pietlia) angíl tuménde, sob (kaj) tumé te otdén pes butiake vaš Ráske-Devléske i te na udžan dre rig. Ne kóli vari-kon duminéla, so jov našukar otlydžalape ke péskiri patyvalý čhaj, kiéli joj isyn dre beršá i nane paloróm; mek jov te kerél, syr kaméla-davá nane grého, mek jov te otdél la paloróm. A odová, kon isyn tvardo dro péskiro iló i léste nane trébima, a pir péskiri vólia jov kedyjape dro péskiro iló te rakhél péskire čha, jov šukár keréla. Paldavá odová, kon otdéla péskire čha paloróm, keréla šukár; a kon na otdéla, odová keréla fededýr. Romný isyn sys sphandly péskire romesa pe adákicy, paka lákiro rom isyn džidó; ne kóli jov meréla, tedy joj isyn vól'no te džal paloróm, pal konéste joj kaméla, ne féni pal patiaibnaskireste dre Raste-Devléste. Ne joj isyn bahtaledyr, kóli joj adiáke jačélape bi romeskiro pir mirí godý; ne me duminava, so me radinava (me dáva godý) davá pir Devléskiro Dúho (Fáno), savó adiáke-pac' isyn dre mánde. Pal dová, so xabén janéna syr svénto dyibén idolénge, ame džinása (aménde sarénde isyn džinybén): ne džinybén phut'kirela, a láska (patýv) ke javír manušá podrikiréla dro patiaibén. Kóli vari-kon duminéla, so jov džinéla vari-so, jov na džinéla ničý adiáke, syr treindiá léske te javél. A kóli vari-kon rikiréla syr Drógima Devlés dro péskiro iló, to Devél džinéla les: pal xabén, savó janéna syr svénto dyibén idolénge, ame džinása, so idolo davá isyn xohanó devloro dro svéto, so Devél féni Jekh isyn, i javír nane. Paldavá, kóli isyn iščo (inké) vari-savé xohané devloré, so kharenape “devlenca”, ci dro bolybén, ci pe phuv (paldová so isyn but devloré i isyn but rajo), ne aménde ž isyn jekh Devél Dad, Savó sozdyjá saró i vaš Savéske ame dživasa; i isyn jekh Raj Devél, Isúso Xristóso, pir Savéste saró jaciá i pir Savéste ame dživasa. Ne dasavo džinybén nane sarénde: vari-savé manušénde dalé ídoly adiáke isyn bešté dre léngiri godý, so jone xána žertvienno xabén sýrby svénto dyibén idolénge; a léngiri godý, saví iščo (inké) isyn bizorjakiri, sýrby magirelape xabnastyr. Ne mas na čhuvéla amen pašyledýr ke Devél; ci xasa ame les, ci ame na xasiakirasa ničý, ci na xasa ame les, nane ni saví l'góta aménde. Ne rakhénpe, sob (kaj) tumaró pravo te xan te na javél sýrby bar pe drom odolénde, savénde isyn nazoralo patiaibén. Paldavá, kóli vari-kon dykhéla tut, konéste isyn džinybén, so tu san beštó pal skamínd dro idolengire-mangipnytko kher, so ž tedy, ci na podphenela godý odolé manušéske, savéste nane zoraló patiaibén, te xal davá žertvienno xabén sýrby svénto dyibén idolénge? I xasjola tyró pšal dro dúho (fáno), savéste nane zoraló patiaibén pal tyró džinybén. Ne kiéli tumé keréna grého proti pšaléste pir Raste-Devléste dalésa, so tumé sýrby dylniakirena léskiri bizorjakiri godý, tedy tumé keréna grého proti Xristosóste. Paldavá, kóli mas isyn sýrby felý vaš grého pe drom miré pšaléske, tedy me nijékhvar butýr na javáva te xav mas, sob (kaj) mánge te na javav sýrby felý ke grého pe drom miré pšaléske. Ci na som me vól'no? Ci na som me Apostolo? Ci na dykhcjom me Isusós Xristosós, amaré Ras-Devlés? Ci tumé na san sýrby otdyibén miré butiátyr vaš Ráske-Devléske? Kóli me na som Apostolo vaš javirénge, ne me som Apostolo vaš tuménge; pal-dová so tumé, savé isyn dro jekhipén Isusósa Xristosósa, tumé san sýrby dophenybén pal mirí Apostoloskiri butý. Me zaterdjovava pal péste vaš odolénge, savé propatiakirena man dro davá: “Ci nane aménde pravo te xas i te pjas? Ci nane aménde pravo te las paloróm patiaibnaskirja pheniá pir Raste-Devléste syr romniá, adiáke-pac' syr javír Apóstoly kerdé, miré pšála, pir Raste-Devléste, i Kifa? Ci mánde kokoreste i Varnavaste nane pravo te na kerás butý? Savó xalado (ruldo) lydžála maribén pal péskire lové? Kon isyn, savó čhudiá vinagrádniko, sob (kaj) te na xal múri? Kon isyn, savó čaravela gurto, sob (kaj) te na p'jel thud léndyr? Ci me rakiráva pir manušýtko godý? Ci na dová rakiréla i Zakóno? Ci nane adiáke začhindló dro Mojzáskiro (Moisiejoskiro) Zakóno: “Na zaker muj butiarné guruveske pe giv.” Ci pal guruvende adiáke duminéla Devél? Ci adiáke-pac' Devél na rakiréla vaš amaró lačhipén? Paldavá isyn phendló vaš amaró lačhipén, so odová, kon pahinela (pharavela) phuv, mek jov te pahinel lačhé užakiribnasa, i odová, kon marela giv, mek te marel lačhé užakiribnasa te lel péskiri paš daléstyr. Kóli ame čhudiam Duhoskiri ziárka dro tumaró iló, ci baró isyn davá réndo (diélo), kóli ame skedasa tuméndyr dová, so isyn trej vaš džidé masá? Kóli javirende isyn pravo pe tuménde vaš davá, ci nane aménde butýr pravy? Ne ame na lyjam nisó pir davá pravo, a ame pirilydžasa saró, sob (kaj) aménge te na kerás vari-saví vánta angíl rosphenyben pal Xristososkiri bahtalý zan (zvies'). Ci tumé na džinéna, so odolé, kon keréla svénto butý, čaliakirenape daléstyr, so isyn jandlo syr svénto dyibén dre Khangirí; odolé, savé dynarinena pašýl altárjo, léna péskiri paš doléstyr, so janelape pe altárjo. I adiáke-pac' Devél dyjá uphenybén odolénge, kon rosphenéla bahtalý zan (zvies'), te dživén dalé butiátyr, so jone keréna. Ne me ná lávas nisó dasavo. Ĥáda, me čhindjom davá na vaš dová, sob (kaj) adiáke te javél mánca; pal-dová so fedýr by sys vaš mánge te merav, sob (kaj) vari-kon te na šarel man, so me kerdjom davá bi lovengiro. Paldavá, kóli me rosphenava bahtalý zan (zvies'), mánde nane sósa te šaravpe; pal-dová so davá isyn mirí trébima; davá javélas pharipén mánge, kiéli me te na rosphenav bahtalý zan (zvies'). Pal-dová so, kóli me keráva davá pir péskiri vólia, mánge isyn otdyibén, a kóli na pir péskiri vólia, tedy me keráva dophendly mánge butý. Savó ž tedy mánge mazúri (nagrada)? Dro dová, so kiéli me rosphenava bahtalý zan (zvies'), tedy me džindliakirava bahtalé zaniása bi lovengiro, me na lavá l'góta miré pravendyr rosphenybnastyr. Paldavá, kiéli me som vól'no saréndyr, me kerdjom pes pisharisa vaš sarénge, sob (kaj) mánge te kedav len so butýr vaš Xristosóske. I me jacjom Judosa vaš Judénge vaš dová, sob (kaj) mánge te kedav len vaš Xristosóske: vaš odolénge, kon isyn tel Mojzáskiro Zakóno, me sómas sýrby tel Mojzáskiro (Moisiejoskiro) Zakóno, sob (kaj) mánge te kedav tel-Zakonoskiren vaš Xristosóske: vaš odolénge, konéste nane Zakóno, me sómas sýrby bi Zakonoskiro (ne me na gijom telé Devléskiro Zakonóstyr, a me som pir čačipén tel Xristosóskiro Zakóno) vaš dová, sob (kaj) mánge te kedav kodolén, konéste nane Mojzáskiro Zakóno. Me jacjom sýrby bizorjákiro dro patiaibén vaš odolénge, konéste nane zoraló patiaibén vaš odová, sob (kaj) mánge te kedav odolén, konéste nane zoraló patiaibén. Vaš saré manušénge me kerdjompe sýrby kažnonesa léndyr vaš dová, sob (kaj) mánge te zrakhav vari-konés, syr féni saštý. I me keráva davá saró vaš bahtalé-zaniakiro lačhipén, sob (kaj) mánge te javav butiarnesa pir mirí paš lénca. Ci džinéna tumé, so saré, kon prastala pe stadiono, prastána so isyn sygedýr jekh angíl jekhéste, ne féni jekh léla prizo. Paldavá, prastan saré, sob (kaj) tuménge te vybašaven prizo. Ne kažno manúš, kon marelape pal prizo, obrikirlape saréstyr, so isyn namišto vaš léskiro prastaiben: kodolé manušá vaš dová, sob (kaj) lénge te len viánka (koróna), saví kirnjola, a ame vaš kodoia viánka, saví na kirnjola. I paldová me prastava na sýrby manúš, konéske nane smyslo, paldavá me maravpe pal prizo na syr manúš, savó pekavela pir fáno (vozduho). Ne me khiniakirava miré masá i rikirava les dre vastá, sob (kaj) kiéli me javáva te rosphenav bahtalý zan javirénge, mánge te na jačavpe nalačhesa vaš prastaiben. Me na kamám, pšalále, te jačkirav tumen dro nadžinyben, so saré amaré dadá sys tel óbloko (sinepo), i saré proginé pir mórjo (derjáv); i saré boldepe syr Mojzáskire sykliaibnýtka dro óbloko i dro mórjo (derjáv); i saré xané jekh Duhoskiro maró, i saré piné jekh Duhoskiro pibén, pal-dová so saré piné jekhe Duhóskire bergátyr: daja bérga sys Xristóso; ne na saré sys lačhé Devléske, paldavá léngire trúpy sys rosčhurdyne pir čhučí phuv. Ne aménge trej te sykljovas saréstyr daléstyr, sob (kaj) ame te na javas ĥalka (žadna) pe nalačhé réndy, syr jone sys. Adiáke-pac' tumé te na mangénpe idolénge, syr vari-savé léndyr; syr isyn čhindló: “Manušá bešné te xan i te p'jen, i uštyné te khelen.” I na javása te kerás biladžaipén, syr vari-savé léndyr kerdé, i biš te trin tysjoncy len xasiné pal jekh dyvés. I na javása te propatiakiras Ras-Devlés, syr vari-savé léndyr kerdé, i jone xasiné sapendyr. I na rakirén xoliása, syr vari-savé léndyr kerdé, i jone xasiné Maribnytkoné Jangolostyr. Davá saró sys lénca, sob (kaj) manušá te sykljon, i davá sys čhindló syr prirakhiben vaš aménge, savé dživéna dro palatunó časo. Kon duminéla, so jov isyn terdó tvardes, mek te rakhelpe, sob (kaj) léske te na perél dro grého. Tumé pyné tel dasavo propatiakiriben syr i saré manušá; ne Devél isyn patiaibnýtko, i Jov na domekela, sob (kaj) tumen te propatiakiren butýr tumaré zorjátyr te pirilydžan; a kiéli javéla propatiakiriben, Devél déla zor tuménge, sob (kaj) tumé mogindlé te pirilydžan les. Paldavá, miré dróga pšalále, našén krig mangipnastyr idolénge. Me rakiráva tuménge, god'varé manušénge; tumé ž kokoré sendinén, palsó me adiáke rakiráva. Bahtiakirdó tahtáj (čaša), pal savó ame parikirasa Devléske, ci davá nane čačipén; so ame khetaniakirasape pašenca Xristosóskire Ratésa? Maro, savó ame phagirasa, ci davá nane čačipén, so ame khetaniakirasape pašenca Xristosóskire Masenca. Pal-dová so ame sam but, ne ame sam sýrby jekh labo maró, sýrby jekh masá; pal-dová so isyn jekh labo maró, savéstyr ame saré lása péskire pašá. Dykhén pe Izrailjoskiro manušénde: ci nane jone odolé manušá, kon xála svénto dyibén, i savó léla péskiri paš altarjostyr? So tedy me phenáva? Ci dová, so idolo isyn mol vari-so? Ci svénto dyibén idoloske isyn mol vari-so? Nad. A dová, so kiéli Náiudy janéna léngire svénta dyibená, jone janéna len nalačhé duhenge, a na Devléske. Ne me kamám, sob (kaj) tumé te na khetaniakirenpe pašenca nalačhé duhenca. Tumé na moginéna te p'jen Ráskire-Devléskiro tahtái, i nalačhé-duhengiro tahtái: tumé na moginéna te len pašá Ráskire-Devléskire skamindestyr i nalačhé-duhengire skamindestyr. Naúšto ame javása te murškinaspe te xoliakiras Devlés? Naúšto ame sam zoraledýr Léstyr? Saró saštý (možna), ne na saró ke lačhipén aménge; saró saštý, ne na saró ke podrikiribén dro patiaibén. Mek nijékh manúš te na rodél baht jekh péske, a mek kažno manúš te rodél baht vaš javireske. Saró, so manušá biknena pe targi, saštý te xan, na phučén nisó, i na izdran ladžatyr. Pal-dová so phuv isyn Devléskiri i saró, so isyn pe phuv, isyn Devléskiro. Ne kóli vari-savó napatiaibnaskiro kharéla tumen ke pe, i tumé kaména te džán, xan saró, so isyn čhudo angíl tuménde, na phučén nisó i na izdran ladžatyr. Ne kóli vari-kon phenéla tuménge: ĥáda, isyn jandlo syr svénto dyibén, na xan vaš odolé manušéske, savó phendiá davá lav tuménge, sob (kaj) adalé manušeskiri ladž te javél štyl; me rakiráva davá na pal tumarí ladž, a pal daja manušeskiri ladž: sóske javire manušeskiri ladž javéla te sendiakirél mirí vol'nyma? Kóli me láva xabén parikiribnasa, palsó te rakirén čoripén pal mánde, pal dová so me parikirava. Paldavá, kóli tumé vari-so xána, ci p'jena, ci keréna vari-so, saró davá kerén adiáke, sob (kaj) te barjakirén ke vučipén Devlés. Na čhuvén bar pe drom syr Judénge, adiáke-pac' i Griekénge (Balaménge), i Devléskire khangirjake. Adiáke-pac' syr i me keráva, so isyn zor, te javav lačhó sarénge dro saró; i me na rodava l'góta péske, a lačhipén sarénge, sob (kaj) jone te zrakhenpe. Kerén adiáke-pac', syr i me, pal-dová so me keráva adiáke-pac', syr Xristóso. Me šarava tumen, pšalále, so tumé ripirena pal mánde; i pal dová, so tumé rikiréna dalé uphenybená, syr me i sykliakirdjom tumen. Ne me kamám, sob (kaj) tumé te džinén, so Xristóso isyn Šeraló pe saré muršende, a rom isyn šeraló pe romniáte, i Devél Dad isyn Šeraló pe Xristosóste. Murš, savó mangelape Devléske, ci angilphenela zaphandle vari-sósa šerésa, sýrby podčhuvela léskiro šeró vaš Xristosóskiro ladžaipén. Ne džuvlý, saví mangelape Devléske, ci angilphenela nazaphandle nisosa šerésa sýrby podčhuvela péskiro šeró vaš Xristosóskiro ladžaipén; pal-dová so kadavá isyn adiáke, sýrby joj te javél muradé šerésa. Paldavá, kóli džuvlý na zaphandela nisosa péskiro šeró, mek lákire balá te javén občhindlé. A kóli isyn ladžavo džuvliáke, sob (kaj) lákire balá te javén občhindlé ci te javén muradé, mek joj te zaphandel vari-sósa šeró. Paldavá muršeske na trej te zaphandel šeró, pal-dová so murš isyn sýrby Devléskiri patrín (óbrazo) dre manušéste, i murš sýrby ziainela Devléskire jarkone slavása, a džuvlý sýrby ziainela lákire-romeskire slavása. Pal-dová so murš nane sozdynó džuvliatyr, a džuvlý isyn muršestyr. I murš nane sozdynó vaš džuvliáke, a džuvlý isyn sozdyný vaš muršéske. Paldavá džuvliáke trej te lydžál špéra (znako) pe šeró, so joj isyn vari-konéskiri vaš Jangolenge. Ne usajékh romný nane vól'no romestyr, ni rom isyn vól'no romniatyr dro džiibén, savó isyn dro khetanypen Isusósa. Paldavá, syr romný isyn romestyr, adiáke-pac' rom pir romniáte, ne usajékh saró isyn Devléstyr. Sendinen kokoré: ci davá isyn šukár džuvliáke te mangélpe Devléske nazaphandlé šerésa? Ci svéto kokoró na sykliakiréla tumen so, kóli rom barjakiréla balá, davá isyn ladž léske? Ne džuvlý, kóli barjakiréla balá, davá isyn sláva láke; pal-dová so dlenge balá isyn sýrby dykhlo. A kóli vari-kon kaméla te čingardelpe, aménde nane dasavo prisykliaiben, adiáke-pac' i pe Devléskire skedyibena. Ne, syr me dáva uphenybén tuménge, me na šarava tumen; pal-dová so tumé kedenape na vaš lačhipén, a sýrby butýr vaš čoripén. Paldavá, dro pérvo, kiéli tumé javéna pe skedyibén, tumé rosperenape pir grupy te čingardespe, syr me šundjom, i me nábut patiáva dro davá. Vaš davá trej, sob (kaj) te javén rázna grupy maškír tuménde, sob (kaj) te sykavén pes odolé manušá, kon isyn terdé pe čačunó drom maškír tuménde. Kiéli tumé kedenape dro jekh štéto, davá na poddžála, sob (kaj) tumé te xan Ráskire-Devléskiri viečéria. Paldová – so kažno manúš kaméla sygedýr te xal péskiro xabén angledýr javirendyr i jekh manúš isyn bokhalo, a javír isyn mato. Naúšto nane tuménde kherá te xan i te p'jen? Ci tumé dykhéna vučipnástyr pe Khangirjákiro skedyibén, so tumé ladžakirena čororé manušén. So mánge te phenáv tuménge? Te šaráv mánge tumen? Nad, me na šarava tumen. Pal-dová so me Kokorestyr Rástyr-Devléstyr prilyjom dová sykliakiribén, savó me piridava tuménge, so Raj Devél dre kodoia rat, kiéli Jov sys zdyno, lyjá maró, parikirdia Devléske, phagirdiá les i phendiá: “Davá isyn Miré Masá, savé isyn otdyné vaš tuménge: kerén adiáke te ripirén Man.” Adiáke-pac' i tahtáj paló viečeria i phendiá: “Davá tahtáj isyn nevó Devléskiro zavieto pir miro rat: kerén davá adákicy móly, kicý móly tumé javéna te p'jen léstyr (látyr), sob (kaj) te ripirén Man.” Pal-dová so adákicy móly, kicý móly tumé javéna te xan davá maró i te p'jen davá tahtái, tumé piriphenena čačipén pal Ráskire-Devléskiro meribén, paka Jov javéla. Paldavá, kóli vari-kon xála maró ci p'jela Ráskire-Devléskiro tahtáj bi patyvákiro (bi darákiro) angíl Léste, odová manúš javéla bangó, so jov na kutiakirela Ráskire-Devléskire masá i rat. A mek kažno manúš te propatiakirel pes i pir davá xála maró i p'jela tahtastyr. Paldavá, kon xála i p'jela tahtastyr bi darákiro angíl Devléste, odová manúš sýrby xála i p'jela Devléskiro séndo pe péste, i sýrby otlydžalape bi patyvákiro ke Xristosóskire Masá. Paldavá but tuméndyr isyn bizorjákire i nasvale, i but myné. Paldavá, kóli ame sendinasas pes, tedy amen na sendinenas. Ne Devél sendiakiréla i čhuvéla xas' (kára) pe aménde, sob (kaj) amen te na sendinén khetané svetosa. Paldavá, pšalále miré, kiéli tumé skedénape te xan viečeria, užakiren jekh jekhés. Kóli vari-kon isyn bokhalo, mek jov te xal kheré, sob (kaj) tumé te na skedénpe pe Devléskiro séndo. A saró javír me keráva, syr trej, kiéli me javáva ke tumé. Me na kamám te jačkirav, pšalále, tumen dro nadžinyben pal talany, savé isyn Sventoné Duhóstyr. Tumé džinéna, so angíl dová, syr tumé jačné te patián Xristosóske, tumé psirdé jekhé niemoné idolóstyr ke javír, savé sýrby lydžiné tumen. Paldavá me uphenava tuménge, so nijékh, kon rakiréla Devléskire Duhósa, na phenéla košybén pe Xristosóste; adiáke-pac' i nijékh na phenéla “Raj Devél Isúso”, kóli jov na keréla davá Sventoné Duhóskire zorjása. Ne isyn rázna Duhóskire talany (darovanii), a isyn jekh Svénto Dúho (Fáno), Savó déla dalé talany; isyn rázna služénii (dynaribená) Devléske, a isyn jekh Raj Devél; isyn rázna saštypena (vozmožnosti) te dynarinén, a isyn kadavá-pac' jekh Devél, Savó xulainela pir saró i pe sarénde. Ne Dúho (Fáno) sykavéla pes raznes pir kažnoné manušéste vaš sarengiri l'góta. Jekhe manušéske Dúho (Fáno) déla taláno te phenél god'varó lav, i davá-pac' Dúho (Fáno) déla javire manušéske te džinél lav. A javire manušéske délape dalé-pac' Duhósa patiaibén, a javire manušéske Dúho (Fáno) déla taláno te vysastiakirel; a javire manušéske te kerél dívy, javire-manušéske te angilphenen, javire manušéske te ĥaljol rozn' maškír lačhé i nalačhé dúhi, javire manušéske taláno te rakirél pe nadžindle čibá (čibjá), i javire manušéske taláno te piriphenel, so rakirlape pe čibá (čibjá). Davá isyn jekh i davá-pac' Dúho (Fáno) keréla saró davá; Jov déla razno taláno kažnoné manušéske, syr Jov Kokoró vykedéla. Paldavá, syr isyn jekh manúš, léste isyn rázna pašá, ne saré pašá isyn jekhe manušéskire, mek len isyn but, i jone kedenape dro jekh masá, – adiáke-pac' Xristóso isyn sýrby Jekh. Pal-dová so ame boldiampe jekhe Duhósa dro jekh masá, – Judy ci Griéki (Balamé), – pishárja ci vol'na manušá, i sarénge aménge sys dynó te prilas jekh Dúho (Fáno). Masá isyn na jekhe pašatyr (pašestyr), a butendyr. Kóli ĥerój phenéla: “Me na som dalé maséndyr, pal-dová so me na som vast”; tén'či naúšto joj nane masengiri paš? I kóli kan phenéla: “Me na som dalé maséndyr, pal-dová so me na som jakh”, tén'či, naúšto jov nane masengiri paš? Kóli saré masá isyn sýrby jekh jakh, kaj ža isyn šunybén? Kóli saré masá isyn sýrby jekh šunybén, kaj ža isyn sungipen (obonianijo)? Dykhén, syr Devél rosčhudiá kažno razno paš pe masá pe péskiro štéto, syr Léske treindiá. Kóli ame javasas sýrby jekh paš, savé by javélas céla tedy masá? Ne kakaná isyn but pašá, a isyn jekh manušá. Jakh na moginéla te phenél vasteske: “Tu na trej mánge”; ci adiáke-pac' šeró ĥerenge: “Tumé na trej mánge.” Davá isyn na adiáke: masengire pašá, savé sykadjona sýrby bizorjákire, butýr trej; i dolé masengiri pašá, savé ame kutiakirasa butýr, pal lénde ame dykhasa butýr; i nágoža amaré pašá ame začhakirasa butýr len, sob (kaj) jone te na javén biciale; a amaré gožone pašenge davá na trej. No Devél adiáke čhudiá khetané masá, sob (kaj) ame te dykhas butýr pal dolé pašá, savénge davá trej; sob (kaj) te jačélpe jekhipén dre masá, i, sob (kaj) saré pašá te dykhén jekh pal jekhéste, adiáke-pac', syr pal péste. I kóli jekh paš menčynelape, saré pašá menčynenape khetané lása; i kóli šarena jekh paš, saré pašá radynénape lása. Kažno tuméndyr khetané isyn Xristosóskire Masá i kažno tuméndyr isyn paš dalé Masengiri. I Devél čhudiá sarén pe péskiro štéto dre khangirí: Apostolen pe pérvo štéto, prorokén pe javír štéto, sykliakiribnaskiren pe tríto štéto; tedy Jov dyjá zor javirénge te kerén dívy; adiáke-pac' talany te sastiakiren, te pomoginen; te xulainen; te rakirén pe nadžindle čibá (čibjá). Ci saré jone isyn apostoly, ci proróki, ci sykliakiribnaskire na saré moginéna te kerén dívy; ci te sastiakiren, ci te rakirén pe nadžindle čibá (čibjá), ci te piriphenen, so davá rakirlape pe dalé čibá (čibjá)? Otdén péskiro iló vaš baré talany, i me sykaváva tuménge naj fedydyr drom ke davá. Kóli me rakiráva manušytkoné, ci Jangolytkone čibenca (čib'jenca), ne mánde nane pšalýtko patýv ke javír manušá, tedy miro rakiribén isyn sýrby xarkóma (mied'), so kuduniakirela (zvieninela), ci kimvalo, so déla zan. I kóli mánde isyn taláno te angilphenav, i me džinóm saré čorahanybena i mánde sys džinybén i dasavo patiaibén, so me moginav te pirikharáv (piričhuváv) bérgi, a mánde nane pšalýtko patýv, tedy me som nikón. I kóli me rozdava saró miro mištypén i otdáva miré masá pe jag, a mánde nane pšalýtko patýv – nane mánge ni savó lačhipén daléstyr. Pšalýtko patýv but vyrikiréla i isyn lačhó; pšalýtko patýv na déla jakhalo; pšalýtko patýv na zadelape i na phutjola; Pšalýtko patýv na xalape, na rodéla l'góta péske, na xoliasóla, na duminéla fuipén; pšalýtko patýv na radynélape načačipastyr, a radynélape pal čačipén; saró pirilydžala, patiála sareske, užakiréla lačhipén dro saró, zaterdjola pal saró. Pšalýtko patýv isyn viéčno, mek angilphenybén te končynelpe, mek čibá (čibjá) te javén štyl (ciha), mek džinybén te prodžal. Pal-dová so ame nábut džinása i nábut angilphenasa: a kiéli dová, so isyn bidošakiro javéla, tedy kodová, so isyn nábut, pirijačéla te javél. Kiéli me sómas bijáto, me rakirdjom syr bijáto, me dumindjom péske syr bijáto, me ĥaljovavas syr bijáto; kiéli me jacjom baré manušésa, me butýr na som bijáto ni dro so. Pal-dová so ame kakaná dykhasa sýrby pir nálačho gindalo, a tedy ame javása te dykhas muj ke muj; kakaná me džinóm nábut, tedy me javáva te džináv adákicy, pe kicý Raj Devél džinéla man. Kakaná jačénape trin čačipená: patiaibén, lačhó užakiribén, pšalýtko patýv (láska); i pšalýtko patýv isyn naj baredýr saréstyr. Mek tumarí pšalýtko patýv ke manušá te pirizorjakirel saró, i otdén péskiro iló zevlynypnytkes (rievnosnes) vaš Duhóskire talany, ne butýr pal dová, sob (kaj) tuménge te angilphenen. Pal-dová so odová manúš, kon rakiréla pe nadžindly čib, jov rakiréla na manušénge, a Devléske, pal-dová so nijékh na ĥaljola les, jov rakiréla pal čorahane čačipená Duhóskire zorjása. Ne odová, kon rosphenéla Devléskiro lav, odová manúš podrikiréla manušén dro patiaibén, déla lénge tvárdyma dro iló, déla ramánjo (miro) manušéskire Duhoske. Odová, kon rakiréla pe nadžindly čib, podrikiréla pes dro patiaibén; a odová, kon rosphenéla Devléskiro lav, podrikiréla Khangirjákiro skedyibén. Me kamám, sob (kaj) tumé te rakirén pe nadžindle čibá (čibjá), ne butýr, sob (kaj) tumé te angilphenen (te rosphenén) Devléskiro lav. Manúš, kon angilphenela (proročynela) Devléskiro lav, janéla butýr lačhipén manušénge, syr kodová, savó rakiréla pe nadžindle čibá, kóli jov na piriphenela, so sys phendló, sob (kaj) te podrikirél Khangirjákiro skedyibén dro patiaibén. I, ĥáda, pšála, kóli me javáva ke tumé i javáva te rakiráv pe nadžindle čibá (čibjá), savó lačhipén javéla tuménge, kóli me na rosphenava tuménge sykadyiben Devléstyr, ci džinybén, ci rosphenava Devléskiro lav/sykliakiribén? Až bašaibnytka strumiénty, ci davá isyn svirol', ci davá isyn arfa, savénde nane džiibnáskiro dúho (fáno), kóli jone na javéna te den jásnes tóno, kon da ĥaljola, so jone bašavena? Paldavá adiáke-pac' isyn rogosa (trubasa); kóli joj bašavela, so nikón na ĥaljola, tedy kon xaladendyr (ruldendyr) javéla te kedelpe pe maribén? Tedy adiáke-pac' isyn nadžindle čibása (čibjasa): kóli tumé na phenéna adiáke, sob (kaj) manušá te ĥaljon, tedy kon ĥaljola, so isyn phendló pe nadžindlý čib? Davá tumé javéna te rakirén sýrby pe balvalia. Ĥáda, kicý isyn but manušýtka lavá dro svéto, i so dro jekh lav isyn péskiro ĥalyibén. Paldavá, kóli me na ĥaljovavas čibakire lavá; pe saví rakiréna, tedy me som javiré-phuvjákiro manúš vaš kodolé manušéske, savó rakiréla, i jov adiáke-pac' isyn sýrby javiré-phuvjákiro manúš vaš mánge. Pal-dová so tumé adiáke-pac' otdena péskiro iló Devléskire talanénge, sob (kaj) tumé te len lačhipén léndyr te podrikirél Khangirjákiro skedyibén. Paldavá odová manúš, kon rakiréla pe nadžindly čib, mek jov te mangélpe Devléske pal taláno te piriphenel. Pal-dová so, kóli me mangavape Devléske pe nadžindly čib, miro dúho (fáno) mangelape, ne tedy mirí godý jačélape bi butiakiro. So ž tedy? Me javáva te mangavpe Devléske Sventoné Duhósa, ne me adiáke-pac' javáva te mangavpe Devléske godiása; me javáva te bagáv Sventoné Duhósa, ne me adiáke-pac' javáva te bagáv godiása. Tedy, kóli tu javésa te barjakires Devlés Duhósa, syr prosto manúš, konéste nane taláno i savó isyn terdó pe skedyibén, phenéla “amín'” pe tyró bahtiakiribén, pal-dová so jov na ĥaljola, so tu rakirésa? Paldavá, mek tu i bahtiakiresa Devlés lačhés, ne tu na podrikiresa javire manušén dro patiaibén. Me parikirava Devléske, so me rakiráva pe nadžindle čibá (čibjá) butýr, syr kažno tuméndyr: ne pe Khangirjákiro skedyibén me kamám te phenáv pandž lavá miré godiása te sykliakirav adiáke-pac' javire manušén, syr me phenáva deš tysjoncy lavá pe nadžindle čibá (čibjá). Pšalále! Na javén čhavorénca pir péskiri godý, a javén čhavorenca pe xolý: ne javén baré manušénca dre péskiri godý. Isyn čhindló dro Zakóno: “Me javáva te rakiráv adalé manušénca pe javír čibá (čibjá) i javire ušténca, ne i tedy jone na javéna te kandén Man, rakiréla Raj Devél.” Paldavá, taláno te rakirén pe javire čibá (čibjá) davá isyn dophenybén na patiaibnaskirenge, a odolénge, kon na patiála; ne angilphenybén Devléskiro isyn na vaš napatiaibnaskirenge, a odolénge, kon patiála. Kóli tedy saró Khangirjákiro skedyibén skedelape khetané pe jekh štéto i saré javéna te rakirén nadžindle čibenca (čib'jenca), i zadžána prosta manušá, napatiaibnaskire, ci na phenéna jone, so tumé zdylnandyne. Ne kóli tumé saré angilphenena Devléskiro lav, i zadžála prosto manúš ci napatiaibnaskiro, tedy saré manušá sýrby sykavéna i sendinena léskiro grého; i léskire-iléskire garadé dúmy otkerenape pe jakhá, i jov peréla telé mósa, i phenéla mamúj “Čačes, isyn Devél tuménca.” So ž tedy, pšalále? Kiéli tumé moginéna te skedénpe khetané, kažnoné manušéste isyn, ci péskiro psálmo, ci sykliakiribén, ci sykadyipen (otkeriben) Devléstyr, ci te piriphenel dová, so isyn phendló pe nadžindly čib, mek saró davá te javél, sob (kaj) te podrikiren patiaibnaskiren dro patiaibén. Kóli vari-kon rakiréla pe nadžindly čib, mek dujdžiné te rakirén, a trindžine uže but, ne kažno manúš pir jekh, a javír manúš te pirilydžal (te piričhuvel); a kóli nane pirilydžaibnaskiro, to te bešél odová manúš štyl pe Khangirjákiro skedyibén, i te rakirél péske i Devléske. Mek proróki te rakirén duj ci trin, a mek javír manušá te roskedenpe, so jone rakiréna. A kóli javire manušéste, kon isyn beštó pe skedyibén, javéla sykadyipen te phenél lav Devléstyr, tedy odová, savó rakiréla, mek jov te bešél štyl. Paldavá tumé saré moginéna te angilphenen vaš dová, sob (kaj) tumé saré te sykljon i te doresen podrikiribén dro patiaibén. I prorokéngire dúhi kandéna prorokén. Pal-dová so Devél na priléla bizlado, a priléla ramánjo (miro), syr davá isyn pir saré Khangirjákire skedyibena. Mek tumaré džuvliá te javén štyl pe Khangirjákiro skedyibén, pal-dová so naštý te rakirén lénge, pal-dová so lénge trej te kandén péskire romen, adiáke syr isyn phendló dro Zakóno. A kóli jone kaména te sykljon, tedy mek jone te phučén péskire romendyr kheré; pal-dová so davá ladžaipén vaš džuvliáke te rakirél pe Khangirjákiro skedyibén. Ci vygijá tuméndyr Devléskiro lav, ci jov dogijá féni (tóka) ke tumé? Kóli vari-kon ginéla pes pal prorokoste, ci léste isyn vari-savó Duhoskiro taláno, mek jov te ĥaljol, so dová, so me čhináva tuménge, isyn Ráskire-Devléskire priphenybená. A kóli vari-kon len na priléla, mek jov te na ĥaljol. Paldavá, pšalále, otdén péskiro iló vaš dová, sob (kaj) te angilphenen Devléskiro lav, ne na zaphenen te rakirén nadžindle čibenca (čib'jenca). Ne mek saró te javél patyvales i adiáke-pac' syr isyn prilyno, te javél pe Khangirjákiro skedyibén. Ne tumé ripirén, pšalále, bahtalý zan (zvies'), saví me rosphendjom tuménge, saví tumé adiáke-pac' prilyné, pe saví tumaró patiaibén adiáke-pac' rikirlape; daja Jevángielija isyn Ráskiro-Devléskiro lav, so me rosphendjom tuménge, pir savó ame zrakhasape, kiéli tumé rikiréna zoralés davá čačipén, i kóli tumé féni na ivjá (na naprásnes) upatiándyne. Paldavá me rosphendjom tuménge angledýr saréstyr dová, so me adiáke-pac' prilyjom, so Xristóso myjá pal amaré gréhi, syr isyn pir Svénto Čhinybén; i dová, so Jov sys ĥarado, i so Jov otdžidyjá pe tríto dyvés, syr isyn pir Svénto Čhinybén; i so Jov sykadiá pes Kifaske, tén'či dešudujé Apostolenge. Tén'ci Jov sykadiá pes butýr, syr pandžšelá pšalénge dro jekh-pac' časo savéndyr butedýr paš isyn džidé ke adadyvés, a vari-savé uže myné. Tén'ci Jov sykadiá Pes Jakovóske, tén'či i saré Apostolenge; i korigedýr (pozžedýr) saréndyr Jov sykadiá Pes mánge, manušéske, savó sýrby bijándyja na dro péskiro časo. Paldavá me som naj tyknedýr mol saré javire Apostolendyr, i me na som lačhó te kharavpe Apostolosa, pal-dová so me tradavas Devléskiro skedyibén. Pir Devléskiro bahtalypén me som adasavó, syr isyn, i bahtalypén, savó Jov dyjá mánge, na sys ivjá; ne me kerdjom butý butýr léndyr saréndyr; ne davá na adiáke sys mirí butý, a syr Devléskiro bahtalypén, so sys mánca. Paldavá, ci da mirí butý, ci da léngiri, davá isyn usajékh, ne glavnyma isyn dro dová, so ame phenása lav pal davá, i tumé adiáke upatiándyne. Ne kóli phenélape lav, so Xristóso otdžidyjá meribnástyr, syr tedy vari-savé tuméndyr rakiréna, so nane otdžidyipen meribnástyr. A kóli nane otdžidyipen meribnástyr, tedy i Xristóso na otdžidyjá meribnástyr: ne kóli Xristóso na otdžidyjá meribnástyr, tedy, čačes, amaró phenybnytko lav isyn čhučó (pusto), i čhučó isyn tumaró patiaibén. I ame tedy javasas adiáke-pac' xohané jakhítka pal Devléste, pal-dová so ame dophenasas pal Devléste, so Jov otdžidiakirdiá Xristosós, Devél sýrby na otdžidiakirelas, kóli davá isyn čačipén, so mulé, xači, na otdžidjona. Paldavá kóli mulé na otdžidjona, tedy i Xristóso na otdžidyjá; a kóli Xristóso na otdžidyjá, tumaró patiaibén isyn čhučó; tumé sýrby iščo (inké) san tel xas' (kára) pal péskire gréhi (tumé iščo (inké) san dre péskire gréhi). Paldavá davá isyn dová-pac', so patiaibnaskire dre Xristosóste, savé myné, isyn adiáke-pac' sýrby tel séndo pal péskire gréhi. Kóli amaró lačhó užakiribén pe Xristosóste isyn lačhó féni vaš davá džiibén, tedy ame sam naj bibahtaledyr saré manušéndyr. Ne Xristóso otdžidyjá meribnástyr, sámo pérvo odoléndyr, kon myjá. Paldavá, kóli meribén javdiá pe svéto pir jekhe manušéste, adiáke-pac' i otdžidyipen muléndyr javéla pir jekhe manušéste. Paldavá, syr saré manušá meréna pal dová, so jone isyn dro jekhipén Adamosa, adiáke-pac' saré otdžidjona pal dová, so jone isyn dro jekhipén Xristosósa. Ne kažno manúš pir péskiro štéto: angledýr Xristóso, tén'či Xristosóskire, kiéli Jov javéla. Tedy javéla kónco (jagóro), kiéli Xristóso zdela saró kralipén Devléske Dadéske; tedy, kiéli, syr Xristóso čhuvéla saró telé: ran, pravo i zor. Paldavá Xristosóske trej te kralinél, paka Devél Dad na čhuvéla saré vergén tel Xristosóskire ĥerá, Palatunó (posliednjo) vérgo, savó xasjola, javéla meribén. Pal-dová so Devél Dad čhuvéla telé saró tel Xristosóskire ĥerá (piré), kiéli Jov rakiréla, so “saró Jov čhuvéla telé tel Léskire ĥerá”, davá značynéla, so davá saró apríč Kokoreste Devléste Dadéstyr, Savó čhudiá telé saró. Ne kiéli saró javéla čhudo telé tel Xristosóskiro kralipén, tedy i Čhavó Kokoró čhuvéla telé Pes angíl Devléste Dadéste, Savó čhudiá telé saró angíl Léste, vaš dová, sob (kaj) Devél Dad te kralinél pherdés pe saró. So ž tedy keréna adalé manušá, savé bolenape pal mulénde? Kóli mulé manušá na otdžidjona sarésa, sóske ž jone tedy dalé manušá bolenape pal mulénde? Sóske ž ame so dyvés perasa tel dar? Me so dyvés meráva: me sovlahava, so davá čačipén šaribnasa, so isyn mánde, pal tumaró patiaibén dre Isusóste Xristosóste, amaré Raste-Devléste. Kóli me pir manušýtko godý mierindjompe zorjása riskiribnáskire murdalénca dro Jefieso, tedy saví isyn l'góta (kófo) mánge, kóli mulé manušá na otdžidjona? A kóli isyn adiáke, so ž tedy džása te xas i te pjas, pal-dová so usajékh ame merasa atasiá. Na xohavenpe: nalačhé kampanii rozmekena lačhé xaraktiery. Lenpe pal godý, syr isyn trej i na kerén gréhi; me phenáva te ladžakirav tumen, so vari-savé tuméndyr na džinéna Devlés. Ne vari-kon phenéla syr mulé manušá otdžidjona? Save masá javéna lénde? Bigodiakiro tu san: odová, so tu čhuvésa dre phuv, na otdžidjola, paka na meréla. I dová, so tu čhuvésa dre phuv, nane čačuný ziárka, a daja isyn nangi ziárka: ci davá te javél džov, ci davá te javél parnó giv, ci te javél vari-saví javír ziárka: i Devél déla láke forma, syr Jov Kokoró kaméla, i dre kažno ziárka isyn péskiri forma. Ločá (plóti) isyn rázna: manušéste isyn jekh loč (masá), murdalénde isyn javír loč, čirikliende iščo (inké) isyn javír loč, i mačhende isyn javír loč. I isyn bolybnýtka formy i isyn phuvitka formy, a rázna isyn bolybnytkoné-forméngiri góžyma i phuvitkoné-forméngiri góžyma: khamestyr isyn péskiri gožyma, čhonestyr-javír gožyma, čergeniendyr-javír gožyma: jekh čergeniatyr nane dasaví gožyma, syr javirjatyr. Adiáke-pac' javéla, syr mulé javéna te otdžidjon. Trúpo čhuvélape dre phuv te kirnjol, kiéli jov otdžidjola, to javéla te dživél viéčnes. Kiéli trúpo čhuvélape dre phuv, jov isyn džungaló (brydko) i bizorjákiro, kiéli otdžidjola, javéla šukár i zoraló. Čačunó trúpo čhuvélape dre phuv, a kiéli otdžidjola, jov javéla sýrby devlykano i Duhoskiro. Adiáke, syr isyn čhindló: “Pérvo manúš Adamo sys sozdynó syr džidó di, palatunó Adamo jaciá otdžidiakiribnytkone duhósa.” Ne angíl na Dúho, a čačunó manúš, a Dúho korigedýr (pozže): pérvo manúš sys sozdynó phuvjákire prahostyr, a javír manúš isyn Raj Devél, Bolybnáskire Rajostyr. Savó isyn pérvo phuvjákiro manúš, dasavé-pac' isyn phuvjákire manušá, savó isyn Bolybnáskiro Manúš, dasavé-pac' isyn Bolybnáskire manušá. I, syr aménde sarénde isyn phuvjákire-manušeskiri patrín (óbrazo), adiáke-pac' aménde javéla Bolybnáskire-Manušeskiri patrín (óbrazo). Ne me phenáva tuménge, pšalále, dová, so isyn ločátyr i ratéstyr, na zadžála dro Devléskiro Kralipén dro Bolybnáskiro Rajo; i amaré masá, savé kirnjona, na javéna te dživén viéčnes. Ĥáda, me phenáva čorahanyben tuménge: ame na saré merasa, ne saré parudjovasa, Jekhátyr, syr féni jakh marela, kiéli bašavela palatunó rógo (gorno), mulé otdžidjona, sob (kaj) nijékhvar butýr te na merén, a ame saré parudjovasa. Pal-dová so dová, so kirnjola, isyn bangó (musinela) te parudjol dro dová, so na kirnjola, i davá, so meréla, bangó te parudjol dro dová, so na meréla. A kiéli davá, so kirnjola, parudjola dro dová, so na kirnjola; i davá, so meréla, parudjola dro dová, so na meréla, tedy kerélape ke kónco/iagóro (spolninelape) začhindló lav: “Zbierdyma (pobieda) pirizorjakirela meribén.” Kaj isyn tyrí dukh, meribén? Meribén, kaj isyn tyrí zbierdyma? Meribén léla dukh grehostyr, a grého léla zor Zakonóstyr; ne parik Devléske, Savó dyjá zbierdyma aménge pir amaré Raste-Devléste, Isusóste Xristosóste. Adiáke, miré dróga pšalále, javén zoralé dro dúho (fáno) tumaró, na kuninenpe, usady (sak) (vsiegda) kerén mištés Ráskire Devléskiri butý, pal-dová so tumé džinéna, so tumarí butý na ivjá (naprásnes). Pal dová, syr te keden lové vaš sventonenge, kerén adiáke, syr me uphendjom pir Galatijakire khangirja. Dro pérvo kurkitko dyvés mek kažno tuméndyr te otčhuvel dre rig i te rakhél adákicy lové, pe kicý léskiro mištypén vybarjola, sob (kaj) tumé te na keden lové, kiéli me javáva ke tumé. I kiéli me javáva, tedy kodolé manušén, savén tumé vykedyné, me bičhaváva lylenca te lydžán tumaré lové, so isyn skedyné pir tumarí lačhé-ilýtkima dro Jerusalimo: i kóli davá javéla kuč, sob (kaj) adiáke-pac' i mánge te javav, tedy jone moginéna te džán mánca. Ne me javáva ke tumé, kiéli me prodžava pir Makiedonija; pal-dová so me džáva pir Makiedonija. Ne mánge zdelape, so me javáva te dživáva nábut (kutý) ke tumé, ci až jačavpe pe ivant (zima), i tedy tumé prolydžana man, karik mánge trej te džav. Pal-dová so me na kamám te dykhavpe tuménca sýrby pir drom, pal-dová so me užakirava lačhipén te jačavpe ke tumé pe vari-savó časo, kóli javéla pe davá Ráskire-Devléskiri vólia. Ne me jačavpe ke Efieso ke Duhoskiro svénko. Pal-dová so baró i buglo vudár sýrby psiradyja vaš mirí butý, a isyn but vérgi. Kóli Xima (Timofiejo) javéla ke tumé, kerén, syr isyn fedýr, sob (kaj) jov te javél bi darákiro ke tumé, pal-dová so jov keréla butý vaš Ráske-Devléske, adiáke-pac', syr i me. Mek nikón te na dykhél pe léste baré minasa, a bičhaven les ramanjosa, sob (kaj) jov te javél ke me; pal-dová so me užakirava les pšalénca. Ĥáda, pal pšaléste Apolososte, me but mangavas les te džal pšalénca ke tumé, ne jov iščo (inké) nane skedynó dro dúho (fáno) te džal, a javéla tedy, kiéli léste javéla lačhí vakancyja (slučajo). Rakhénpe, rikirén patiaibén; javén murškané, javén zoralé. Mek saró te kerélpe tuménde laskása i patyvása. Me mangáva tumen, pšalále, tumé ž džinéna Stehfanoskiri sém'ia (irí), savé isyn pérva patiaibnaskire dre Ahaiia, i so jone otdyné pes, sob (kaj) te dynarinén sventonenge; sob (kaj) tumé te kandén len i kažnoné manušés léndyr, kon lénca keréla butý i dynarinela. Me radynavpe, so javné Stiehvano, Fartunato i Ahaiko; pal-dová so jone sýrby parude tumen, kiéli na sys tumen. Pal-dová so jone podrikirde syr miro adiáke-pac' i tumaró dúho (fáno): kutiakiren (patyvakiren) kadasaven. Piridena “ramánjo” tuménge khangirjákire skedyibena Lieijatyr. Akila i Priskila piridena “ramánjo” saré iléstyr Rása-Devlésa léngire kheritkoné skedyibnasa. Saré pšála piridena “ramánjo” tuménge. Piridén “ramánjo” jekh jekhéske sventoné čamudypnasa. Me čhindjom péskire vastésa “ramánjo” tuménge mándyr. Kóli vari-kon na rikiréla syr Drógima Ras-Devlés dro péskiro iló, Isusós Xristosós, te javél léske Anafiema (Mara-Tafa). Mek bahtalypén amaré Ráskire-Devléskire, Isusóskire Xristosóskiro te javél tuménca. Mek mirí patýv ke javír manušá pir Xristosóste Isusóste te javél sarénca tuménca. Amín'. Pavlístyr, Isusóskire Xristosóskire Apostolóstyr pir Devléskiri vólia, i Ximástyr (Timofiejostyr), pšaléstyr, Devléskire khangirjáke, so isyn dro Korinfo, saré sventonénca pir sarí Ahaia. Mek Devél Dad amaró i Raj Devél Isúso Xristóso te den tuménge bahtalypén i ramánjo (miro). Te javél bahtiakirdó Devél i amaré Ráskire-Devléskiro Dad, Savó déla tangipnýtko (žalosno) iló; Devél, Savó podrikiréla dro saró; Savó podrikiréla amen dre saré amaré piridživipena vaš dová, sob (kaj) ame moginasas te podrikiras odolén, dro savó pharipén jone te na javén, podrikiribnasa, savó ame kokoré doresciam Devléstyr: Pal-dová so, syr ame butýr menčynasape pal Xristosóste, adiáke-pac' ame butýr doresasa podrikiribén Léstyr. Kóli ame piridživasa, ame piridživasa vaš tumaró podrikiribén i zrakhibén; kóli Devél podrikiréla amen, tedy i ame podrikirasa tumen, kiéli tumé pirilydžana dasavé-pac' mén'ki, savé ame vyrikirasa, i amaró lačhó užakiribén pal tuménde isyn zoraló: kóli Devél podrikiréla amen, davá isyn vaš tumaró podrikiribén i zrakhibén: ame džinása, kóli tumé pirilydžana dasavé-pac' mén'ki, syr i ame, tedy Devél podrikiréla tumen, adiáke-pac' syr i amen. Paldavá ame kamasa, sob (kaj) tumé te džinén, pšalále, so ame piridživdiam dre Asija, kaj aménge sys odój adiáke pharó na pir zor, so ame xasiakirdiam lačhó užakiribén te jačaspe džidénca. A ame čuindiam pes sýrby ame sam prirakirde ke meribén, sob (kaj) ame te na rozginas pe kokorende, a pe Devléste, Savó otdžidiakirela mulen, Savó zrakhciá amen meribnytkoné darátyr (darjatyr), i Kon zrakhéla; pe Léste ame čhudiam amaró lačhó užakiribén, so Jov iščo (inké) adiáke-pac' zrakhéla; pal-dová so tumé adiáke-pac' mangénape Devléske vaš dová, sob (kaj) but manušá parikirenas Devléske pal amaró bahtiakirdó zrakhibén pir patierja (molitvy) Devléske buté manušéndyr. Pal-dová so ame radynasape daléstyr, kiéli amarí ladž patiakirela amen, so ame sventymasa i Devlytkoné čačipnása na pir manušýtko godý, a pir Devléskiro bahtalypén dživdiam pe davá svéto, i butýr saréstyr, syr ame otlydžijampe ke tumé. Paldavá ame čhinasa jekh davá, so tumé džinéna i ĥaljona; i me užakirava lačhipén, so tumé ĥaljona xor; i adiáke-pac', syr tumé sýrby ĥalyné paš, so tumé moginéna te radynénpe pal aménde, adiáke-pac', syr i ame radynasape pal tuménde dro dyvés, kiéli Raj Devél Isúso javéla nevéstyr. Paldavá mánde sys dasavo zoraló patiaibén te javav ĥaredyr ke tumé, sob (kaj) tumé mogindlé te prilén bahtalypén javír mólo; sob (kaj) me te džav ke Makiedonija pir tumaré štéty, i nevéstyr Makiedonijatyr te javav ke tumé, i sob (kaj) tumé te lydžán man duredýr ke Judéia. Paldavá, kóli me adiáke kamamas te keráv, ci me lydžijom pes balvalítkes? Ci dová, so me skedavpe te keráv, me keráva kokoró péstyr sýrby me rakiráva usajékh “ne, ne”, i “nad, nad”? Ne Devél isyn patiaibnýtko, amaró lav “ne”, isyn na dová-pac', so lav “nad.” Pal-dová so Devléskiro Čhavó, Isúso Xristóso, pal Konéste ame phenasas lav tuménge – me, Siluano, Timofiejo (Xíma) – na sys Odová, Konéste lav “ne” isyn dová-pac', so i lav “nad”; a Léste sys lav “ne”: Jov keréla ke kónco/iagóro (spolninelas) saró, so Jov rakirdiá. Pal-dová so Devléskire dyné lavá spolninenape pir Léskiro “ne”, pir Léste ame rakirasa “amín'” vaš Devléskiri sláva. Davá isyn Kokoró Devél, Kon čhuvéla zoralypén maškír aménde dro jekhipén Xristosósa i Kon svenciakirela amen, davá isyn Devél, Kon sýrby čhudiá čergenorí (piečat'), so ame sam Léskire, i dyjá Dúho (Fáno) aménge sýrby symadý. Ne me javáva te kharav Devlés te dophenel, so isyn pe miro iló, so me vaš tumaró mištypén na psirdjom dro Korinfo. Ame na rikirasa upralypén pe tumaró patiaibén, ne ame kerása butý khetané vaš tumarí rádyma, pal-davá so tumaró patiaibén isyn zoraló. Paldavá me rossendindjom péske te na džav ke tumé nevéstyr baré piridživipnasa. Kóli me janáva tuménge baró piridživipen, kon ža isyn odová, kon adiáke-pac' i obradynela man, kóli na odová-pac', konéske me janáva baró piridživipen? I me čhindjom davá-pac' tuménge darátyr (darjatyr), so kiéli me javáva, tedy, sob (kaj) mánge te na piridživav pal odolénde, konéske trej te radynel man, me zoralés patiáva dre tuménde, so mirí rádyma isyn rádyma vaš saré tuménge. Pal baró piridživipen i dukhano iló me čhindjom tuménge baré jasvénca na vaš dová, sob (kaj) tumé te piridživen, a sob (kaj) tumé te udžinén mirí bari pšalýtko patýv ke tumé. Ne kóli vari-kon jandiá piridživipen vari-konéske, jov jandiá piridživipen na vaš mánge, a na rakirí but, sarénge tuménge. Vaš kadasavé manušéske uhtýlla (dósi) vyrakiriben, so sys léske butendyr tuméndyr; sob (kaj) tumé pe proti fedýr te primangen léske i te podrikiren les, sob (kaj) jov te na javél stasadó piridživipnása. Paldavá me mangáva tumen te prilén les laskasa. Pal-dová so me čhindjom, sob (kaj) te propatiakirav tumen, ci kandéna tumé dro saró. A vari-konéske tumé primangena i me adiáke-pac' primangava; pal-dová so, kóli me primangdjom vari-so, me primangdjom davá pal tuménde pir Xristosóskiro pravo; sob (kaj) nálačho te na pirizorjakirel amen, pal-dová so ame džinása, so jov kaméla. Kiéli me javdjom dre Troada te rosphenav Xristososkiri bahtalý zan (zvies'), kiéli Devél psiradia vudár vaš mirí butý, mánge sys pharó dúho (fáno) pe iló, kiéli me na lathjom Titos, miré pšalés, paldavá me roziacjompe lénca i gijom duredýr ke Makiedonija. Ne parik Devléske, Savó ŭsády (sak) lydžála vučés amen dro jekhipén Xristosósa i piridela pir aménde džinybén pal Xristosóste, savó ame sungasa (sungavasa) syr gudló khandypen. Pal-dová so ame sam sýrby gudló thuv (dymo), so Xristóso janéla Devléske vaš odolénge, savé isyn zrakhné i vaš odolénge, savé xasjona; vaš jekhe manušénge davá isyn meribnaskiro khandypen, vaš javire manušénge davá isyn džiibnáskiri sung. Kon ža, tedy, isyn lačhó pe davá? Pal-dová so ame na janasa doš Devléskire lavéske, syr but manušá adiáke keréna, ne ame saré iléstyr, Kokoré Devléstyr rakirasa Xristosóskire zorjása angíl Devléskire jakhá. Ci nevéstyr ame javása te šaras pes, savé ame sam? Ci aménge trej dophenybnýtka (riekomiendýtka) lylá ke tumé ci tuméndyr? Tumé san kokoré sýrby amaró lyl, začhindló dro amaró iló, sob (kaj) saré manušá te udžinén i te ginen davá lyl; tumé sykavéna pes, so tumé san Xristosóskiro lyl, savó ame bičhadiam; davá lyl isyn čhindló na černilasa, a Džidé Devleskiresa Duhósa, i na pe baruné plity, a pe manušýtka ile, dre savé ame zoralés patiása. Ame zoralés patiása dre Devléste pir Xristosóste: pal-dová so ame kokoré na mogindiam te duminas davá kokoré péstyr, ne amaró taláno isyn Devléstyr; Savó dyjá aménge taláno te služynas (te dynarinás) rosphenybnása Nevoné Zavietóske, ne na mamúj (priames), syr bukva rakiréla, a syr Dúho (Fáno); pal-dová so bukva Zakonóstyr janéla meribén, a Dúho (Fáno) déla džiibén. A kóli te dynarinén (te služynén) bukvénge, savé sys vyčhindlé pe baruné plity, i savé janénas meribén, sys podyne adiáke Devléskire slavása, so Izrailjoskire čhavé na mogindlé te dykhén pe Izrailjoskiro muj pal Mojzáskire-moskiri jarkima, savó džálas ke kónco (ke jagóro), to ci pe but butýr javéla sláva Duhóskire butiátyr! Kóli te dynarinén skedyibnáske sys slavútno, tedy dynaribén (služenijo) te pridžinel manušén čačunenca javéla butýr slavútno. Pal-dová so sláva, so isyn kakaná, baredýr dolé slavatyr i paldavá joj isyn jarkedyr dolé slavatyr. Pal-dová so, kóli dová, so sys pe krotko časo, isyn dre sláva, tedy butýr dre sláva dová, so jačélape viéčnes. Paldavá ame rakirasa murškanés pal dasavo lačhó užakiribén, so isyn aménde: ame na sam dasavé syr Mójza sys, kon učhakirdiá péskiro muj, sob (kaj) Izrailjoskire čhavé te na dykhén syr slavákiri járkima murdjolas. Ne léngiri godý štylyja, pal-dová so ke adadyvés dová-pac' pohtan na zlelape, kiéli jone ginéna Phuranó Zavieto, pal-dová so jekh manúš, savó patiála dre Xristosóste, moginéla te zlel davá pohtan. Ne ke/žýko adadyvesatuno dyvés, kiéli jone ginéna Mojzáskiro Zakóno, pohtan sýrby začhakirela léngiro iló. Ne kóli vari-kon risjola ke Raj Devél, tén'či dová pohtan (učhakiriben) pe šeró zlelape. Raj Devél isyn Dúho (Fáno). Kaj isyn Ráskire-Devléskiro Dúho (Fáno), odój isyn vol'nyma. Ne ame saré otkerde mujénca sýrby dro gindalo (zierkalo) piridasa Ráskire-Devléskiri sláva i parudjovása dre Léskiri patrín (óbrazo) jekhé slavátyr dro javír pir Dúho (Fáno), Savó džála Ráskire-Devléskire, Duhóstyr. Kóli Devél sykadiá Péskiro lačhipén ke ame i dyjá dasaví butý aménge, tedy ame na perasa ilésa. Ne ame durjovasa ĥaradé ladžaipnytkone rendéndyr, ame na mendrinasa, na pirikerasa Devléskiro lav, a ame rakirasa čačipén i sykavasa pes, syr ame sam, pe manušýtka jakhá angíl Devléste. A kóli amarí Jevángielija isyn garady, tedy joj isyn ĥarady vaš odolénge, savé isyn xasibnýtka, pal-dová so lénde, napatiaibnaskirende, davá svetoskiro xohanó devloro štyliakirdia léngiri godý, sob (kaj) jone te na dykhén dud (svéto) i te na ĥaljon rosphenyben pal bahtalý zan (zvies') pal Xristososkiri jarko sláva, a Xristóso isyn Devléskiri patrín (óbrazo). Pal-dová so ame na rosphenasa pal péste, a pal Xristosóste, amaré Raste-Devléste, i ame sam Xristosóskire pishárja. Adavá isyn Devél, Savó phendiá: “Te ziainel dud (svéto) ciamlypnastyr”, isyn dová-pac' Devél, Kon začhudia davá dud te ziainel dro amaró iló, sob (kaj) ame te ĥaljovas Devléskiri jarko sláva, saví ziainela Isusóstyr Xristosostyr. A davá kučipén ame rikirasa dre ĥlejána (glinýtka) pirja, sob (kaj) te sykavas zorjakiro baripén, savó isyn Devléstyr, a na améndyr: amen tasavena saré rigéndyr, ne aménge nane ciasno (tango); ame kuninasape, ne ame na perasa Duhósa; amen tradéna, ne ame na sam bistyrde; amen vyčhurdena javrí, ne ame na xasjovasa. Ame dre masá ŭsády (sak) lydžása Xristosóskiro meribén dre péste, syr Isúso myjá vaš dová, sob (kaj) te javél bicialó Isusóskiro džiibén pir dúho (fáno) dre aménde. Amen džiden ŭsády (sak) zdena pe meribén pal Xristosóste, sob (kaj) te sykadjol Xristosóskiro džiibén pir amarí loč (plot'), saví meréla. Meribén, čačes, keréla butý dre tuménde, a džiibén dre aménde. Ne aménde isyn dasavo-pac' patiaibnaskiro dúho (fáno), syr isyn čhindló: “Me upatiandyjom, paldavá me rakirdjom” i ame adiáke patiása, paldavá ame adiáke-pac' i rakirasa, i ame džinása, so Odová, Kon otdžidiakirdiá Ras-Devlés, Isusós Xristosós, adiáke-pac' otdžidiakirela i amen pir Isusóste Xristosóste i čhuvéla amen tuménca khetané angíl Péste. Pal-dová so saró davá isyn vaš tumaró lačhipén vaš dová, sob (kaj) Devléskiro bahtalypén, savó dodžála ke but-but manušýtka ile, te janel parikiriben vaš Devléskiri sláva. Paldavá ame nijékhvar na perasa dro iló. Ne xoc' amaré masá javriestyr xasiakirena zor, to amaré-Duhoskiri andratuný paš so dyvés zoraljola. Pal-dová so amaré krótka i lokhé piridživibena janéna but-but baredýr viéčno sláva, i ame duminasa na pal dová, so isyn bicialó, a pal dová, so nane bicialó; pal-dová so saró bicialó isyn pe naboro (krotko) časo, a nabicialo isyn viéčno. Pal-dová so ame džinása, so, kiéli daja šátra – so isyn amaró kher pe phuv, phadjola, to Devél déla kher dro Bolybnáskiro Rajo te dživás aménge, davá kher isyn viéčno, i na manušá čhudé les. Paldavá ame, čačes, pharés dasa ĥondiá (uzdyhinasa) dro davá Kher pe phuv, pal-dová so ame drieván kamasa te doresas (te dolas) kher Bolybnáskire Rajostyr, sob (kaj) sýrby te urjavas les pe péste; kóli ame, čačes, urjavasa len, tedy ame na javása nange. Paldová so, kiéli ame dživasa dre daja phuvitko šátra, ame dasa ĥondiá (uzdyhinasa) pharipnastyr; davá na značynéla, so ame kamasa te vydžas pe vólia amaré čačuné maséndyr, ne ame kamasa, sob (kaj) te javél bolybnáskiri fórma pe aménde, sob (kaj) amaré masá, savé isyn xasibnýtka, te parudjon dro viéčno džiibnýtko paló (poslie) otdžidiakiriben. Davá Devél, Kon skedyjá amen vaš davá parudyiben i dyjá adiáke-pac' aménge Péskiro Dúho (Fáno) syr symadý (zalogo). Paldavá ame ŭsády (sak) zoralés patiása i ame džinása, so paka ame sam kheré dre čačuné masá, ame sam dur Ráskire-Devléskire Kheréstyr, pal-dová so ame dživasa pir patiaibén, a na pir dová, so ame dykhasa, i ame zoralés patiása i ame fedýr kamasas te mekas amaró kher vaš masá i te javas kheré Devlésa. Pal davá ame drieván kamasas te kerás dová, so isyn lačhó Devléske, ci, kiéli ame sam dro amaró kher adái, ci, syr ame javása odój. Pal-dová so aménge sarénge trej te sykavas pes angíl Xristosóskiro sendarítko štéto, sob (kaj) ame moginasa te doresas (te dolas) pal dová, so ame kerdiám pal péskiro džiibén dre masá: lačhipén ci fuipén. Paldavá, syr ame džinása, so davá značynéla te daras Devléstyr, to ame patiakirása javire manušén dro davá čačipén; Devél džinéla amen sarésa, i mánde isyn lačhó užakiribén, so i tumé džinéna saró pal aménde. Ame na šarasa pes nevéstyr angíl tuménde, ne ame dása saštypén (vozmožnost') tuménge te šarén amen, sob (kaj) tumé moginénas te otphenen odolénge, kon šarelape savó manušytkoné javrituné lačhipnása, a na léskire xaraktierosa. Kóli ame sam sýrby bigodiakire, davá isyn vaš dová, sob (kaj) te slavinas Devlés, a kóli ame sam dre péskiri godý, davá isyn vaš tuménge. Pal-dová so Xristososkiri láska propatiakirela amen, savé pridžinena davá, so; kóli Jekh myjá pal sarénde, tedy saré myné vaš phuranó džiibén; Jov myjá pal sarénde, sob (kaj) džidé manušá te na dživén vaš péske, ne vaš Léske, Kon myjá pal lénde i otdžidyjá vaš léngiro lačhipén. Paldavá kakaná ame na sendinas manušén pir dalé-svetoskiro manušýtko; a kóli ame i sendindiam Xristosós, syr saré sendinena, tedy ame butýr na kerása adiáke. Paldavá, kon isyn dro jekhipén Xristosósa, kodová jačélape sýrby nevó manúš: phuranó dúho (fáno) léstyr gijá, nevó zagijá: saró davá isyn Devléstyr, Savó zmirindia (kerdiá rahmanonénca) amen Pésa pir Xristosóste i dyjá zadyiben aménge te primirinas javirén: pal-dová so Devél pir Xristosóste primirindia svéto Pésa i primangdia léngire gréhi, i Jov čhudiá dro amaró iló lav, sob (kaj) ame te jačas Léske rahmanone manušénca. I ame sam bičhadé manušá Xristosostyr sýrby Devél rakiréla Léskiro lav pir aménde, i ame mangasa vaš Xristosóste: jačénpe rahmana (javén khetané) Devlésa. Pe Xristosóste, Savéste na sys grého, Devél čhudiá saré amaré gréhi syr svénto otdyibén, sob (kaj) ame te jačaspe čačunenca angíl Devléste pir Xristosóste. Syr ame kerása butý khetané Devlésa, ame mangása tumen te na bistren pal Devléskiro bahtalypén, so tumé prilyné les na ivjá (na naprásnes): i, ĥáda, Devél rakiréla: “Kiéli lačhó časo javdiá, me šundjom tumen: i kiéli javdiá dyvés te zrakhav tumen, Me dyjom vast (pomogindjom) túke.” Ĥáda, isyn lačhó mardó (štúnda); ĥáda, isyn dyvés te zrakhespe: ame na čhuvasa bar pe drom nijekhéske, sob (kaj) nikón te na bangiakirel amarí butý; ne dro saró ame sykavasa pes syr Devléskire butiarné: zoraló vyrikiriben dro piridživiben, dre trébima, dro pharipén; kiéli marena amen čupniasa, čhuvéna dro štaribén, ĥazdéna manušén pe aménde, kiéli kerása butý pharés, bi soibnaskiro, bokhalé; dro žužypen, dro džinybén, dro dlengo vyrikiriben, dro lačhipén pir Svénto Dúho (Fáno), pir čačuný pšalýtko patýv; pir čačipnáskiro lav, Devléskire zorjása, čačipnáskire mardytkonésa dro čačó i dro zérvo (liévo) vast; slavása i ladžakiribnasa, pir nálačho lav i šaribén; amen ginéna pal xohané manušénde, ne ame rakirasa čačipén; ame sam sýrby nadžindle i sam džindlé sarénge, sýrby manušá ke meribén, ne ĥáda, ame sam džidé; čhuvéna xas' (kára) pe aménde, na iščo (inké) na muliakirdé; ame sam sýrby smentna (skučna), ne ame ŭsády (sak) radynasape; ame sam sýrby bógi, ne ame kerása but manušén barvalenca; aménde nane ničý, ne adiáke-pac' aménde sýrby saró isyn. Amaré uštá rakiréna čačipén tuménge. Korinfiniále, amaró iló isyn otkerdo. Amaré rigátyr ame sam saré iléstyr ke tumé, a tumé sýrby zaphandle péskiro iló améndyr, ne otlydžanpe adiáke-pac' ke ame (me dáva rakiráva syr čhavénge): otphanden péskiro iló buĥles, syr i ame. Na kerén butý khetané napatiaibnaskirenca; pal-dová so savó isyn khetanypen maškír čačipén i grého? So isyn khetané maškír dud (svéto) i kalypén? I savó dorakiribén isyn maškír Xristosóste i Vieliaróste? Ci savó khetanypen isyn maškír patiaibnaskireste i napatiaibnaskireste? Savó khetanypen isyn maškír Devléskiri khangirí i idoléngire – mangipnýtko kher? Pal-dová so tumé san khangirí džidé Devléskiri, syr Devél Kokoró phendiá: “Me javáva te dživáv maškír lénde i Me javáva te psirav maškír lénde. I Me javáva léngiro Devél, i jone javéna Miré manušá.” “Paldavá mekén adalé manušén i javén dre rig, – rakiréla Raj Devél, – i te na javél tuménde ničý khetané nažužesa, i Me prilava tumen; i Me javáva vaš tuménge i tumé javéna miré čhavé i čhaja, – rakiréla Raj Devél Sarezorjákiro.” Paldavá, kóli aménge sys dyné dasavé lavá, miré dróga, žužakirasa pes saréstyr, so meliakirela amarí loč (plot') i dúho (fáno) i javása te dživás sarésa sventones dro dar angíl Devléste. Otkeren péskiro iló vaš aménge: ame nijekhés na xoliakirdiam, ame nikonéske na kerdiám čoripén, ame nikonestyr na lyjam kófo (procento) vaš péske. Me na rakiráva davá, sob (kaj) te sendinav tumen; pal-dová so tumé san dróga amaré ileske, syr me ĥaredyr phendjom, sob (kaj) te dživás i te meras khetané. Me zoralés patiáva tuménge; me zoralés šarava tumen; me čuinava lačhó podrikiribén; me drieván radynavpe, na dykhí pe saré amaré piridživipena. Pal-dová so, čačes, kiéli ame javdiám dre Makiedonija, amarí loč (masá) na otkhinyja, a amen tasavenas saré rigéndyr: čingardá javriestyr, dar dro iló andrál. Ne Devél, Savó podrikiréla manušén, savé isyn sýrby pritasade, podrikirdia amen i bičhadiá Titos aménge; ne na adákicy, so Tito javdiá, a butýr pir dová, so jov podrikirdia amen i rosphendiá aménge, so tumé drieván kaména te dykhén amen; syr tumé rondlé, syr tumé san terdé pal mánde, so daléstyr me butýr obradyndjompe. Pal-dová so me xoc' i jandjom smentnyma (piečal') tuménge miré lylesa, me ná dávape pale; kóli me i dávaspe pale, so miro lyl jandiá smentnyma, féni (tóka) pe nabaró časo. Ne kakaná me radynavape na pir dová, so tumé sánas dre smentnyma, a pir davá, so tumarí smentnyma začhudia tumen te paruven péskiro džiibén (te riskirén tumaró džiibén ke Devél), pal-dová so tumarí smentnyma sys pal Devléste, adiáke so na sys ni savó čoripén aménge. Pal-dová so sméntnyma (túga) pal Devléste lydžála manušés, sob (kaj) jov te zrakhelpe, a smentnyma, saví isyn pir godý dro davá svéto, lydžála ke meribén. Dykhén! Daja-pac' smentnyma pal Devléste, – so jandiá tuménge? Savó iléskiro xačkiribén te risjon grehostyr! Savó iléskiro dophenybén pal péste! Saví xolý! Saví dar! Saví láska iléstyr! Savó zevlynypén! Savó sendiakiriben! Tumé sykade, so tumé san nabange dro davá. Paldavá, kóli me čhindjom tuménge, davá na sys sýrby manušéstyr, savó kerdiá bibáht, ci odolé manušéstyr, savéske kerdé bibáht; ne vaš dová, sob (kaj) tumé te dykhén angíl Devléste, syr ame xačkirdé ilésa otlydžasape ke tumé. Pal davá aménge sys lačhó podrikiribén. Ne ame butýr radynasape Titoskire radymátyr, pal-dová so saré tumé podrikirde léskiro dúho (fáno). Pal-dová so kóli me šardjom tumen léske, me na sómas ladžakirdó, ne, syr ame phendiam tuménge saró čačipén, tedy adiáke-pac' i amaró šaribén angíl Titoste sys čačunó: i léskiro iló butýr pherdjola laskasa, kiéli jov priripirela, syr tumé kandyné léskiro lav, syr tumé darenas i izdranas, kiéli tumé prilyné les. Paldavá me radynavpe, so me zoralés patiáva dre tuménde pir saró. Me kamám, sob (kaj) tumé te džinén, pšalále, pal Devléskiro bahtalypén, so dynó khangirjákire skedyibnenge dre Makiedonija, syr jone proginé zoraló propatiakiriben pharé piridživibnása, ne jone sys drieván ráda, so kiéli jone otdyné saró saré iléstyr, xoc' jone isyn drieván čororé, paldavá me sovlahava, so jone dyné adákicy, kicý mogindlé, i butýr daléstyr, jone iščo (inké) dyné pir péskiri vólia, i jone drieván mangné amen, sob (kaj) ame te prilas léngiri paš te pomoginen (te poden vast) sventonenge te kerén Devléskiri butý. Ne jone kerdé fedýr, syr ame užakirdiam lačhipén; jone angíl otdyné pes Ráske-Devléske, a korigedýr aménge pir Devléskiri vólia. Paldavá ame mangdiam Titos, savó lyjá te kerél daja butý, sob (kaj) jov adiáke-pac' te končynel davá lačhó réndo te pomoginen javirénge maškír tuménde; i sob (kaj) tumé, syr tumé san lačhé i barvalé pir taláno (darovanijo): dro patiaibén, dro lav, dro džinybén i dro kažno iléskiro xačkiribén i dre láska i patýv, savé isyn ke ame tuméndyr, adiáke-pac' te javén lačhé i pir davá lačhó réndo te dien vast javirénge. Me na rakiráva davá syr priphenybén, ne pir iléskiro xačkiribén ke davá réndo, savó isyn javire manušénde, me propatiakirava, savé čačuné isyn tumaré láska i patýv. Tumé džinéna bahtalypén amaré Rástyr-Devléstyr, savó isyn Isusóskiro Xristosóskiro, Savó sys barvaló, ne jaciá čororó, sob (kaj) tumé te javén barvalé Léskire čororipnastyr. I me duminava, so fedýr vaš tuménge te končynen davá, so tumé lyné te kerén berš pale, pal-dová so tumé sánas pérva na féni so pir butý, ne adiáke-pac' i pir tyrdypén te den vast. Kakaná končynen daja butý: sob (kaj) tumé adiáke-pac' syr tumé sánas skedyné te len te kerén dová, adiáke-pac' tumé i te končynen davá réndo, dykhí pir dová, so isyn tuménde. Kóli isyn dasaví mýslia pe godý te del, Devél priléla tumaró dáro pir dová, so isyn tuménge, a na pir dová, so nane tuménde. Paldavá so davá isyn na pir čačipén, kóli davá kerlape adiáke, sob (kaj) lénge te javél lokhedýr, a tuménge pharedyr, ne sob (kaj) te javél sarénge roŭnia, sob (kaj) kakaná tumarí paš mištypnástyr te del vast lénge, konéste kakaná nane, a korigedýr, sob (kaj) léngiri paš mištypnástyr te del vast tuménge vaš dová, sob (kaj) te javél sarénge šerá (rávnes). Syr isyn čhindló: “Odoléste, kon skedyjá but, na javéla nisó lišnjo; i kodoleste, kon skedyjá nábut, na javéla na uhtylel (na javéla nádosi).” Ame parikirasa Devléske pal dová, so Jov dyjá dasavo iléskiro xačkiribén Titoske te del vast tuménge. Pal-dová so jov na féni prilyjá ke iló amaró mangipén (pros'ba), ne iščo (inké) butýr pir péskiro iléskiro xačkiribén, jov gijá ke tumé kokoró péstyr; ne ame bičhadiam lésa pšalés, savés šarena pal dová, syr jov rosphenéla bahtalý zan, i na jekh pal dová, a adiáke-pac' i pal davá, so khangirjákire skedyibena vykedyné les te džal khetané aménca pir davá lačhó réndo, savó ame kerása vaš Ráskire-Devléskiri sláva; i, sob (kaj) te sykavas amaró xačkiribén te das vast; i ame kamasa te na peras tel vari-konéskiro vyrakiriben pal dasavo barvaló dáro, so ame skedyjam; pal-dová so ame kerása butý, so isyn zor, sob (kaj) saró te javél pir čačipén na so jekh angíl Devléste, ne adiáke-pac' i angíl manušénde. I ame bičhadiam lénca amaré pšalés, konéskiro iléskiro xačkiribén ame propatiakirasas dre but réndy, a kakaná jov iščo (inké) zoraledýr pir iléskiro xačkiribén pal tumaró tvardo patiaibén. Kóli te phenáv pal Titoste, adavá isyn miro mal, kon keréla butý khetané mánca maškír tuménde; i jone isyn bičhadé manušá khangir'jendyr, kon janéla sláva Xristosóske. Paldavá sykavén péskiro iló ke jone angíl khangirjákire skedyibena syr dophenybén, so ame pir čačipén šarasa tumen. Me duminava, so na trej te čhinav pal dynaribén (služenijo) te den vast sventonenge; pal-dová so me džinóm tumaró xačkiribén te pomoginen (te den vast), sósa me šardjom tumen manušénge dre Makiedonija, pal dová, so Ahaija sys skedynó berš pale i tumaró iléskiro xačkiribén te den vast sýrby ĥazdyjá buté-manušéngiro iló. Ne me bičhadjom pšalén ke tumé, sob (kaj) amaró šaribén pal tuménde te na javél čhučó (pusto), sob (kaj), syr me phendjom, tumé te javén skedyné, a so, kiéli manušá Makiedonijatyr javéna mánca i dykhéna, so tumé na san skedyné, savó ž ladžaipén javéla aménge (na rakirí pal tuménde) pal amaró tvardo šaribén. Paldavá me pridumindjom te mangav pšalén, sob (kaj) jone te džán angledýr ke tumé i te dokončynen te skedén lové vaš bahtiakirdó dáro, pal so sys dynó lav, sob (kaj) jov te javél bahtiakirdó dáro iléstyr, a na sýrby tyrdena zorjása. Davá isyn čačipén, so, kon čhuvéla giv nábut, odová i kedela aplodo nábut, a kon čhuvéla giv but, odová i kedela aplodo but: mek kažno manúš te del adákicy, kicý isyn léske pir iló, a na pir zor; pal-dová so Devléske isyn drógo kodová manúš, kon déla radymása. Paldová so Devél moginéla te bahtiakirél tumen adákicy dro saró, sob (kaj) tuménde te uhtylel (te javél dósi) saró, so trej tuménge, i upredyr daléstyr, sob (kaj) tumé te javén skedyné pe kažno lačhó réndo: syr isyn čhindló: “Jov rozdyja saró, dyjá bogenge, Léskiro čačipén javéla pe saré beršá.” I Devél, Savó déla ziárki te čhuvén dre phuv i maró te xan, déla tuménge saró i barjakiréla saró i javéla barvaló aplodo tumaré čačipnastyr: Devél keréla tumen barvalé ilénca pe saré lačhé réndy, so but manušá javéna te parikirén Devléske pal tumaré dáry, savé jone doreséna (dolena) améndyr. Pal-dová so dasavo lačhó dynaribén na so féni pomoginela sventonenge dre léngiri trébima, ne iščo (inké) butedýr vykharela léndyr baró parikiriben Devléske; i jone slavinena Devlés, dykhí pe dasavo lačhó dynaribén, pal-dová so, syr tumé pridžinena, adiáke-pac' i tumé keréna saré iléstyr pir Xristososkiri bahtalý zan (zvies'); i pal tumaré ilýtka dáry lénge i javirénge, i jone dre péskire patierja (molitvy) Devléske tyrdenape ilésa ke tumé pal barvaló Devléskiro bahtalypén, savó Jov sykadiá pir tuménde. Parikirasa Devléske saré godiatyr i iléstyr pal Léskiro taláno, savó naštý te vyphenas. A me, Pávli, kokoró, mangáva tumen pir naphuvitko kovlypen Xristosóskiro, me, savó som kovlé-ilýtko tuménca, ne savó som murškanó, kiéli me na som tuménca; me mangáva tumen, kiéli me javáva, sob (kaj) mánge te sykavav muršypen dasavé-pac' zorjása, savjása me duminava péske te sykavav vari-savé manušénge, kon rakiréla, so ame, xači, kerása pir dalé svetóskire-manušýtko godý. Pal-dová so ame dživasa pe davá svéto, ne ame na marasape dalé-svetóskire godiása. I amaró mardýtko (oružyjo), savésa ame marasape, isyn na dalé svetóskire-manušytkoné godiatyr, ne ame sam zoralé Devléskire zoralypnasa, savjása ame phagirasa foróskire rikiribena; hohané dophenybena i saró, so phutjola proti Devléskiro dynaribén; ame phandasa kažno godiákiri mýslia, sob (kaj) te javél kanduny Xristosóske; i ame sam skedyné te čhuvas xas' (kára) pe kažno nakandypen paló (poslie) dová, kiéli tumé dophenena péskiro kandypen. Ci dykhéna tumé pe manušýtko muj? Kóli vari-kon zoralés patiála dro dová, so jov isyn Xristosóskiro, mek jov nevéstyr te piriduminel pal dová; léske trej te ĥaljol, so ame dasavé-pac' sam Xristosóskire. Ne, kóli me butýr javáva te šaravpe péskire pravosa, savó Devél dyjá te dav vast, sob (kaj) te barjol tumaró patiaibén, a na vaš dová, sob (kaj) te čhuvav telé tumen, tedy mánge na javéla ladžavo; mek davá te na zdelpe tuménge, so me kamdjom te darjakirav (te strahakirav) tumen lylénca: vari-savé rakiréna, so miré lylá isyn stroga i zorjakirena dúho (fáno), ne kiéli jov isyn aménca, ne léste masá isyn bizorjákire i léskiro lav isyn nadžindlo. Mek dasavo manúš te duminel péske, so, savé ame sam dre lylá, syr ame čhindiam dur tuméndyr, adasavé-pac' ame sam pir réndo, kiéli ame sam tuménca. Paldavá aménde nane muršypen te das čol (timín) péske ci te priparuvas (te zroŭninás) pes vari-savé javire manušénca; ne kon déla čol i priparuvela pes kokoró pésa, isyn bigodiakiro manúš. I ame na javása te šaraspe bi mierakiro, ne pir miéra butiakiri, saví Devél vykedyjá vaš aménge i saví dodžála ke tumé. Ame na vydžasa zorjátyr, so ame sýrby na dogijam ke tumé, pal-dová so ame dogijam ke tumé Xristosóskire bahtalé zaniása (zviesiasa); i ame na šarasape butýr mierátyr javiré-manušéngire butiasa, ne aménde isyn lačhó užakiribén, so, kóli tumaró patiaibén vybarjola, to i ame moginasa te kerás butý butýr maškír tuménde, ne ame na piridžasa miéra, saví Devél vykedyjá vaš aménge, tedy, sob (kaj) aménge te rosphenas bahtalý zan (zvies') pir rigá, savé isyn dur pal tuménde, pal-dová so ame na kamasa te šaraspe butiasa, saví uže kerdy pir javír rigá. A odová, kon šarelape, mek jov te šarelpe dolesa, so Raj Devél kerdiá. Pal-dová so na kodová manúš isyn lačhó, kon šarela pes, a kodová, konés Raj Devél šarela. Me kamamas, sob (kaj) tumé mek nábut te vyrikiren miro bigodiakiriben; tedy vyrikiren i man. Pal-dová so mánde sys iléskiro xačkiribén pal tuménde Devléskire xačkiribnasa, pal-dová so me dyjom lav (angrustiakirdjom tumen) Jekhé Manušéske, Xristosóske, sob (kaj) tumé te javén angíl Léste sýrby patyvalý ternorí. Ne me darava, so, syr sap xohadia Jeva péskire frotymása, adiáke-pac', sob (kaj) i tumarí godý te na poškodinelpe i, sob (kaj) tumé te na otrisjon prostone patiaibnastyr dre Xristosóste. Pal-dová so, kóli vari-kon javír, čačes, javélas ke tumé i rosphenelas pal sýrby javiré Xristóste, konés ame na rosphendiam, ci kóli tumé prilyné javír Dúho (Fáno), Saves tumé ĥarydyr na prilenas; i tumé prilenas javír bahtalý zan (zvies'), saví tumé ĥaredyr na pridžinenas, – dykhén: syr tumé lokhes prilenas dasavé manušés! I me ginava, so me ni dro so na som teledýr kadalé baré Apostolendyr I kóli miro rakiribén isyn nagožo, ne mánde isyn džinybén dro dová, so me rakiráva: tumé ž kokoré dykhné davá pir saró. Naúšto kerdjom me grého, kóli me čhudjom pes teledýr, sob (kaj) te čhuvav tumen vučedýr, kiéli me rosphenavas Devléskiri bahtalý zan (zvies') i me na lavas lové léndyr? Me obkedyjom javire-khangirjákire skedyibena, so me lavas lové léndyr pal péskiri butý, sob (kaj) te dynarinav tuménge. I kiéli me sómas tuménca i mánde sys trébima dro vari-so, mándyr na sys ni savó pharipén tuménge, pal-dová so pšála Makiedonijatyr dyné mánge saró, dro so mánde sys trébima, i me pričhudjom zor dro saró i me duredýr javáva te pričhuvav zor, sob (kaj) te na javél ni savó pharipén mándyr tuménde. I pir Xristosóskiro čačipén, savó isyn dre mánde, me ná pirijačáva te šaravpe syr bilovengiro dynári pir Ahaiakire rigá. Sóske adiáke? Ci tumé na san dróga mánge? Devél džinéla, so me keráva. A so me keráva, me duredýr javáva te keráv, sob (kaj) mánge te na dav saštypen (vozmožnost'/vakancyja) odolénge, savé šarena pes, so jone keréna adiáke-pac', syr i ame. Pal-dová so kadalé manušá isyn xohané Apóstoly, načačune butiarné, savé vydena pes pal Xristosóskire Apostolende. I davá nane baró dívo, pal-dová so nálačho kokoró vydela pes pal Jangoloste dudéstyr (svetóstyr). Davá isyn nabaró réndo, kóli léskire butiarné vydena pes pal dynar'jénde pir čačipén; ne jone doreséna péskiro pir léngiri butý dro kónco (dro jagóro). Nevéstyr me phenáva: mek nikón te na duminel pal mánde syr pal dylyneste, prilén man adasavesa, savó me som – sýrby dylynesa, sob (kaj) mánge nábut te šaravpe. A dová, so me kakaná rakiráva, davá isyn na pir Devléskiro čačipén, a sýrby pir dylynó muršypen. Pal-dová so but manušá šarenape pir dalé-svetóskire manušýtko godý, tedy i me adiáke-pac' javáva te šaravpe. A tumé ž san god'varé manušá, i tumé lokhes vyšunena dylynen. Ci vyrikirena tumé, kiéli vari-kon léla upralypén pe tuménde, ci dživéla pal tumaré lové, ci občorela tumen, ci phutjola, ci marela tumen pir muj? I me rakiráva davá ke mirí ladž, so na uhtyldia aménde zor vaš davá; a kóli vari-konéste isyn muršypen pe davá, to adiáke-pac' isyn muršypen i mánde na pir bari godý. Isyn jone Judy? Me adiáke-pac' som. Isyn jone Izrailjoskire? Me adiáke-pac' som. Isyn jone Avraamóskire rodóstyr? Me adiáke-pac' som. Isyn jone Xristosóskire dynárja? Pir miro bigodiakiriben phenáva, so me butýr som dasavo: butýr dre pharí butý, dre fránsy (rány) bi mierakiro, me butýr sómas dro štaribén, i častes me som dre dar ke meribén. Judy mardé man pandž móly pir štardešá pekaibena bi jekheskiro. Trin móly man mardé kaštenca, jékhvar man šuliakirde barénca, trin móly me tasadjovavas pe phagirdý párma (korabljo), me sómas dyvés i rat pe sámo tenibén (dno) dro morjoskiri paní: me sómas but móly dre dromá, dre dar pe reka (len'), dre rozmaribnengire vastá, dre dar péskire manušéndyr, dre dar Judendyr, dre dar Najudendyr: dre dar dro fóro, pe čhučí phuv, dre dar pe mórjo (derjáv), dre dar xohané pšaléndyr; me but kerdjom butý i sómas zalyno (zalymo) pharé butiasa, sómas bisoibnaskiro, bokhalo. Mánde sys truš (smega); me postindjom pir šyl i bi idiakiro. Apríč dalé saré piridživibena rigátyr, mánde so dyvés sys pherdó manušá i me pharés duminavas pal khangirjákire skedyibena. Kóli vari-kon isyn bigodiakiro, tedy i me som bigodiakiro; kiéli vari-kon keréla grého, tedy i miro iló xačola piridživipnastyr. Kóli mánge trej te šaravpe vari-sósa, me javáva te šaravpe dolesa, dro so me som bizorjákiro. Devél i Dad amaré Ráskire-Devléskiro, Isusóskire Xristosóskiro – ĥáda, Jov, te javél bahtiakirdó, te javél Léskiro lav pe saré beršá, džinéla, so me na xohavava. Dro Damásko Kralískire Arietaskiro rikirelas stréga pir Damásko, kamí te zaphandel man; [davá stiho nane dre-r.s.], i pir fenštra dro khudó (korzina) man zmekne upraléstyr i adiáke me nascjom léngire vasténdyr. Ĥáda, nane ni saví l'góta mánge te šaravpe. Ne me rosphenava pal dykhibena i sykadyipena mánge Rástyr-Devléstyr. Me džinóm jekhé patiaibnaskires dre Xristosóste (dešuštar berš pale, ci jov sys dro péskire masá, me na džinóm, ci dová sys léskiro dúho (fáno), me na džinóm, Devél džinéla); adasavó manúš sys ĥazdynó ke tríto bolybén. I me džinóm (džináv) dasavé manušés, (ci jov sys dro péskire masá, ci dová sys léskiro dúho (fáno) me na džinóm, Devél džinéla:) so jov sys ĥazdynó dro Bolybnáskiro Rajo, i šundiá dasavo, so naštý te piridel lavénca, savé manušytkoné ušténca fedýr te na vyphenen. Kadasavé manušésa me javáva te šaravpe, ne na pésa kokoresa, a jekh so jekhé miré bizoralypnása. Pal-dová so, kóli me kamamas te šaravpe, tedy me na javáva dylynesa. Pal-dová so me phenáva čačipén, sob (kaj) nijékh manúš te na poduminel kučedyr pal mánde daléstyr, so jov dykhéla dre mánde i šunéla pal mánde. Sob (kaj) mánge te na phutjovav divoskire dykhibnasa, mánge isyn dyný phusadý bust (koliučka) dre loč sýrby dynári (slúga) nalačhéstyr, sob (kaj) jov te menčynel man vaš dová, sob (kaj) mánge te na phutjovav. Paldavá me i mangdjom patýv Rástyr-Devléstyr trin móly, sob (kaj) Jov te durjakirel bust mándyr. I Jov phendiá mánge: “Uhtýlla (dósi) vaš túke Miro bahtalypén, savó sykavelape so naj fededýr, kiéli me som bizorjákiro!” Paldavá mánge butýr pir iló te šaravpe miré bizoralypnasa, sob (kaj) Xristososkiri zor te zadžál dre mánde. Paldavá me radynavpe péskire bizoralypnastyr, so man ladžakirena; trebimatyr, tradypnastyr, pharé džiibnastyr vaš Xristosóske, pal-dová so, kiéli me som bizorjákiro, tedy me som zoraló. Me jacjom dylynó, tumé začhude man: pal-dová so tuménge treindiá te šarén man; me na som ni dro so fujedýr kadalé baré Apostolendyr, xoc' me i adiáke-pac' na som mol ničý. Čačes, ĥertyka (znamiénii), savé dophenena, so me som Apostolo, sykade pes baré vyrikiribnasa, divenca i zorjása pir dívna butiá. Syr ža tedy ke tumé te otlydžavpe fujedýr javire khangir'jendyr, apríč dová, so me na jandjom pharipén tuménge. Primangen mánge, so me vyphendjom dasaví xolý. Ĥáda, me skedyjompe te džav ke tumé tríto mólo. I me na janáva pharipén dre lové tuménge, pal-dová so me na rodava vari-saví l'góta tuméndyr, a tumé kokoré trej mánge. I na čhavé skedéna lové vaš dadénge, a dadá vaš čhavénge. Kakaná me fedýr javáva te rozmekav péskiro i te otdav pes pal tumaró iló. Kóli me kamám tumen butedýr, naúšto tumé javéna te sykavén patýv mánge kutedyr (nabutedyr)? A kóli te javél adiáke, ci me jandjom pharipén tuménge? Ne vari-kon phenéla, so me som mendro, i me, xaj, lyjom vari-so tuméndyr xohaibnasa? Ci lyjom me vari-so tuméndyr pir vari-konéste, konés me bičhadjom ke tumé? Me mangdjom Titos i bičhadjom pšalés lésa: ci lyjá Tito vari-so tuméndyr? Ci na kerdiám ame dro jekh dúho (fáno)? Ci na psirdiam ame jekhe dromésa? Ci duminéna tumé, so ame, xači, zaterdjovasa pal péste? Davá ame rakirasa angíl Devléste dro jekhipén Xristosósa pir saré réndy vaš tumaró podrikiribén. Pal-dová so me darava, so, kiéli me nevéstyr javáva, me mogináva te lathav tumen adasavenca, syr me na kamám, i tumé moginéna te lathén man adasavesa, syr me na kamám: me darava, so moginéna te javén košybena, zevlynypena, xoliakiribena, rosperibena pe grupki, gundiakiribena, phut'kiribena, bizlady; sob (kaj) miro Devél te ná čhuvél telé man pal tuménde, kiéli me javáva nevéstyr, i, sob (kaj) mánge te na rováv pal buténde tuménde, savé kerdé grého i na otrisine nažužypnastyr, biladžaipnastyr, ladžave rendéndyr, savénca jone zalenaspe. Davá javéla tríto mólo me džáva ke tumé. “Trej duj ci trin jakhítka (svidiétieli), sob (kaj) te čhuvén zor (tvárdyma) pe lav pir davá réndo.” Me phendjom tuménge ĥaredyr i me phenáva angíl kakaná (adiáke-pac', syr me rakirdjom, kiéli me sómas ke tumé javír mólo, kakaná me na som tuménca čačunés) odolénge, kon kerdiá grého angíl i saré javire manušénge, so kiéli me javáva nevéstyr, me na potanginava (na požalinava) len. Ci rodéna tumé dophenybén, so Xristóso rakiréla pir mánde? Jov isyn na bizorjákiro vaš tuménge, a Jov sykavéla Péskiri zor maškír tuménde; pal-dová so Jov sys primardo pe trušúl Péskire bizoralypnasa, ne Jov isyn džidó Devléskire zorjátyr; pal-dová so ame, čačes, sam bizorjákire dro jekhipén Lésa; ne ame javása te dživás Lésa pir Devléskiri zor, saví isyn dyný tuménge; propatiakiren pes, ci dživéna tumé pir patiaibén; otphenen kokoré péske: ci džinéna tumé kokoré, so tumé san Xristosóskire? Kóli na adiáke, tedy tumé na san lačhé. Mánde isyn lačhó užakiribén, sob (kaj) tumé te džinén, so tumé san lačhé. Ne me mangavpe Devléske, sob (kaj) tumé te na kerén čoripén na vaš dová, sob (kaj) aménge te sykavas, so ame progijam propatiakiriben, ne sob (kaj) tumé te kerén pir čačipén, – ničý, kóli ame i na javása pridžindle syr lačhé. Pal-dová so aménde nane zor proti čačipén, a pal čačipén. Paldavá ame radynasape, kiéli ame sam bizorjákire, a tumé san zoralé. I ame adiáke-pac' mangasape Devléske, sob (kaj) tumé te javén bidošakire. Paldavá me čhindjom davá, so, paka me na som tuménca; a kiéli me javáva ke tumé, mánge te na otlydžavpe strogimasa tuménca pir pravo, savó Raj Devél dyjá mánge te podrikirav tumen, a nad, sob (kaj) te xas tumaró iló. Palatunó lav, pšalále: radynénpe, javén bidošákire, podrikirén jekh jekhés, javén jekhé-godiákire, javén dro ramánjo (miro) jekh jekhésa. Piridén “ramánjo” jekh jekhéske sventoné čamudypnasa. Saré svénta piridena “ramánjo” tuménge. Mek bahtalypén amaré Ráskire-Devléskiro, Isusóskire-Xristosóskiro, Devléskiri láska i patýv i Sventoné Duhóskiro khetanypén te javén tuménca. Amín'. Apostolostyr Pavlístyr, savó sys vykedyno na pir manušénde i na pir manušýtko godý, a pir Isusóste Xristosóste i Devléste Dadéste, Savó ĥazdyjá Les muléndyr, i saré pšaléndyr, kon isyn mánca, Galatijakire khangirjake. Te javél bahtalypén i ramánjo (miro) tuménge Devléstyr Dadéstyr i amaré Rástyr-Devléstyr, Isusóstyr Xristosostyr, Savó otdyjá Pes Kokoró pal amaré gréhi, sob (kaj) te zrakhél amen dalé xohané svetóstyr pir Devléskire-Dadéskiri vólia, te javél sláva Devléske Dadéske pe saré beršá i viéki. Amín'. Me divinavape, so tumé adiáke sýges risjona Léstyr, Savó khardiá tumen pir Xristosóskiro bahtalypén ke javír bahtalý zan (zvies'), saví nane javír Jevángielija, a davá isyn vari-savé javír manušá, savé dylniakirena tumen i kaména te piririskiren Xristososkiri Jevángielija. Ne kóli ame, ci až Jangólo Bolybnástyr javélas i javélas te rosphenel javír bahtalý zan (zvies'), ne na dasaví, so ame rosphendiam; mek jov te javél prokošnó. A syr ame phendiam angledýr, adiáke-pac' i me kakaná phenáva: kóli vari-kon rosphenéla vari-saví javír bahtalý zan (zvies'), i na dasaví, so ame rosphendiam, mek jov te javél prokošnó. Naúšto me patiakirava manušén ci Devlés? Ci me rodava vari-so, sob (kaj) me te javav lačhó manušénge? Pal-dová, so kóli me te javav lačhó manušénge, tedy me na javáva Xristosóskiro pishári. Ne sob (kaj) tumé te džinén, pšalále, so bahtalý zan (zvies'), saví me rosphenava tuménge, isyn sčhudy na pir manušýtko godý. Pal-dová so i me na prilyjom la manušéndyr, i nijékh manúš na sykliakirdiá man pal bahtalý zan (zvies'), a Jekh Isúso Xristóso sykadiá mánge, so te phenáv. Tumé, xači, šundlé pal dová, syr me dživdjom pir Judýtko sykliakiribén, syr me phagirdjom miéra, kiéli me tradavas Devléskire khangirjákire manušén i pričhudjom zor te xasiakiráv len; i me sómas slavutnedyr javire terné Judendyr miré beršesa pir Judýtko sykliakiribén, mánde sys butýr iléskiro xačkiribén pal amaré-dadéngiro prisykliaiben. A kiéli sys lačhó Devléske, Savó vykedyjá man tedy, kiéli me iščo (inké) sómas dre dakiri ločoví (utroba); i Savó prikhardia man pir Péskiro bahtalypén, i otkerdia Péskire Čhavés dre mánde, sob (kaj) me moginavas te rosphenav bahtalý zan Najudénge, i tedy me na lyjom te radinavpe manušénca, i me na gijom dro Jerusalimo ke odolé manušá, savé jačné Apóstoly (Apostolenca) angledýr mándyr, a me gijom dre Aravija, i tedy javdjom pale dro Damásko. Tén'ci, paló (poslie) trin berš me gijom dro Jerusalimo te dykhavpe Petrisa, i me jacjompe lésa dešupandž dyvesá; ne me na dykhcjom ni savé javire Apostolos, jekhe Jakovós, Ráskire-Devléskire pšalés. A dová, so me čhináva tuménge, ĥáda, – angíl Devléste, me na xohavava. Tén'ci me gijom pir Sirijakire i Kilijakire phuvjá. Ne patiaibnaskire dre Xristosóste khangirjákire skedyibnástyr dre Judéia na džindlé man dro muj; iekh, so jone šundlé pal mánde, sys dová, so odová manúš, kon tradelas len vari-kiéli, rosphenéla bahtalý zan (zvies'), saví jov, xači, ĥaredyr xasiakirelas: i jone saré slavindle Devlés pal mánde. Tén'ci paló dešuštar berš me nevéstyr gijom dro Jerusalimo Varnavasa, i lyjom adiáke-pac' mánca Titos; i me gijom odorík pir Devléskiro uphenybén i piriphendjom bahtalý zan (zvies'), saví me rosphenavas angíl Najudénde, ne jekh pe jekh kodolénge, kon sys dre patýv maškír manušénde, pal-dová so, ci na ivjá (naprásnes) me sykliakiravas manušén i ĥaredyr sykliakirdjom; ne až Tito, kon sys mánca, savó sys Griéko (Balamó), na sys začhudo te občhinelpe; davá sys pal xohané pšalénde, savé javné čorahanés te udžinén pal amarí vol'nyma, so aménde isyn pir jekhipén Isusósa Xristosósa vaš dová, sob (kaj) te kerén amen pishar'jénca; a lénge ame na poddyjampe, ni pe jekh mardoro (štundyca), sob (kaj) bahtalé-zaniakiro (zviesiakiro) čačipén te jačélpe vaš tuménge. I kodolé, savé sys dre patýv, – savé jone te na javén, – vaš mánge jone saré isyn syr jekh – Devél na dykhéla pe manušýtko muj, – na phendlé ni savó nevó lav ke miro rosphenyben; a pefromi (xromi), kiéli jone dykhné, so Devél dyjá butý mánge te rosphenav bahtalý zan (zvies') Najudénge, adiáke-pac' syr i Petriske Judénge; pal-dová so Devél čhudiá Péskire zorjása man Apostolosa Najudénge, adiáke-pac' syr Petris Apostolosa vaš Judénge, i kiéli Jakovo, Pétri i Iáno, konés gindlé pal šeralende, šundlé, so mánge sys dynó bahtalypén pe dasaví butý, jone podyne vast vaš khetanypen mánge i Varnavaske, sob (kaj) ame te džas ke Náiudy, a jone te džán ke Judy; ne jekh jone pomangne amen, sob (kaj) ame te na bistras pal čororende, so me adiáke-pac' i pričhudjom zor te keráv. A kiéli Pétri javdiá dre Antióhiia, me vyštadjom mamúj (proti) léste, syr jov sys bangó: pal-dová so angíl dová, syr javné manušá Jakovostyr, jov xalas Najudenca; a kiéli jone javné, jov dyjape pale i rikirdia pes dro rig, pal-dová so jov darandyja Judendyr; i javír Judy adiáke-pac' sys khetané lésa dre dujemuitkima, so až i Varnava upatiandyja dre léngiri frentyma. Ne kiéli me dykhcjom, so jone keréna na syr trej pir čačipén bahtalé zaniatyr (zviesiatyr), me phendjom Petriske angíl sarénde: “Kóli tu san Judo, sóske tu dživesa syr Najudo, a na syr Judo; sóske tu začhuvesa Najuden te dživén syr Judén?” Ame sam Judy pir rat, a ame na sam grehítka Náiudy, ne ame džinása, so Devél priĥaljola čačunesa manušés na pir Zakonóskire butiá, a pir patiaibén dre Isusóste Xristosóste; ame adiáke-pac' upatiandyjam dre Isusóste Xristosóste, so ame moginasa, sob (kaj) Devél te priĥaljol čačunenca amen pir patiaibén dre Xristosóste, a na pir Zakonóskire butiá, pal-dová so pir Zakonóskire butiá Devél na priĥaljola čačunesa pir loč (plot') ni jekhe manušés. Ne kóli ame rodasa saštypen (vozmožnost'/vakancyja), sob (kaj) Devél te priĥaljol čačunenca amen pir Xristosóste, ne vydžála, so ame sam grehítka manušá, to naúšto Xristóso dynarinela grehoske? Mek nijékhvar davá te na javél! Pal-dová so, kiéli me nevéstyr pirikerava Zakonoskiro sykliakiribén, so me rosphagirdjom, me sykaváva pes, so me som proštavibnari (priestupniko). Me sýrby myjom pir Zakonoskiro sykliakiribén, sob (kaj) te dživáv duredýr pir Zakóno, sob (kaj) mánge te dživáv Devlésa. Me sómas primardo pe trušúl Xristosósa, i me butýr sýrby na dživáva, ne davá Xristóso dživéla dre mánde; ne dová, so me dživáva dre loč (plot'), me dživáva pir patiaibén dre Devléskire Čhavéste, Savéske jacjom drógo me, i Savó otdyjá Pes pal mánde. Me na otphenavape Devléskire bahtalypnastyr, ne, kóli Devél priĥaljola amen čačunenca pir dová, so ame rakhasa Zakóno, tedy ivjá (naprásnes) myjá Xristóso. Ne, Galaty, savé tumé bigodiakire san! Kon davá čovahaniakirdia tumen, sob (kaj) tumé te na kandén patiaibén; angíl ža tumaré jakhá Xristóso sys sýrby sykado primardo pe trušúl? Jekh réndo (diélo), so me kamám te udžinav tuméndyr: ci tumé doresné (dolyne) Dúho (Fáno) pir Zakonóskire butiá? Ci šunybnastyr pir patiaibén? Save tumé san bigodiakire! Tumé lyné te dživén nevéstyr pir Dúho (Fáno), a kakaná tumé končynena pir péskire-ločakiri zor. Ci tumé pirilydžine adákicy ivjá (naprásnes)? Kóli te javél davá čačunés ivjá? Devél dyjá Dúho (Fáno) tuménge i kerdiá dívy maškír tuménde, ci sys davá pir Zakonóskire butiá, ci šunybnastyr pir patiaibén? Adiáke Avraámo patiandyja Devléske i Devél prilyjá les čačunesa pal léskiro patiaibén. Paldavá, džinén, so odolé, kon isyn patiaibnastyr, jone isyn Avraamóskire čhavé. I Svénto Čhinybén angíl dykhciá, so Devél pridžinela čačunenca Najuden pir patiaibén, i angíl rosphendiá bahtalý zan (zvies') Avraamóske: “Devél bahtiakiréla saré manušén pir túte.” Paldavá, saré, kon isyn patiaibnaskire, isyn bahtiakirde, syr Jov sys. A saré, kon rozginela pe Zakonóskire butiá, isyn prokošne, pal-dová so isyn čhindló: “Kažno manúš, kon na rikirlape sareske, sob (kaj) saró te kerél, so isyn čhindló dre Sventoné-Čhinybnaskiri lylvarí, sob (kaj) te javél prokošnó!” a ni jekhe manušés Devél na pridžinela čačunesa angíl Léste, pal-dová so: “Čačunó manúš dživéla pir patiaibén.” Dro Zakóno nane ni savó khetanypen patiaibnása, jekh so dová: “Kon spolninela saró Zakóno, odová javéla te dživél.” Hristóso vykindia amen Zakonóskire prokošybnastyr, kiéli Jov lyjá Zakonoskiro prokošybén pe Péste, syr isyn čhindló dro Zakóno: “Kažno manúš, kon isyn ublado pe kašt, te javél tel Devléskiro prokošybén”, sob (kaj) Avraamóskiro bahtiakiribén te javél pe Najudénde pir patiaibén dre Isusóste Xristosóste vaš dová, sob (kaj) ame moginasas te doresas (te dolas) Dúho (Fáno), pal Savó Devél dyjá lav pir patiaibén. Pšalále! Me rakiráva pir manušýtko godý: nijékh manúš dujendyr na otparuvela ci dočhuvela vari-so ke podčhindlo zavieto, savó angíl sys sčhudo maškír dujende. Ne Devél dyjá Léskiro lav Avraamóske i léskire-čhavéngire čhavénge: dro Svénto Čhinybén rakirlape na pal “semencende” sýrby pal buté manušénde, a pal jekhe “semencate”, pal Xristosóste. Me phenáva kakaná: Zakóno, savó sys dynó štaršelá trijánda berš korigedýr (pozžedýr), na otparuvela zavieto, savó Devél dudvaliakirdia (utvierdindia), i léskiro dynó lav na xasiakiréla zor. Kóli meknó mištypén isyn pir Zakóno, tedy nane butýr pir dynó lav, a Devél dyjá les Avraamóske pir dynó lav. Vaš so tedy sys dynó Zakóno? Jov sys dočhudo, sob (kaj) te sykavél, so dasavo čoripén isyn, paka na javéla Avraamóskire-rodoskiri seménca, vaš konéske sys dynó lav; Jangóly piridyne Zakóno pir maškiratuneste (posriednikoste) – Mojzaste. Ne Devléske na treindiá maškiratuno, kiéli Jov dyjá lav Avraamóske jekh pe jekh. So ž tedy Zakóno isyn proti Devléskire dyné lavá? Sarésa nad! Pal-dová so, kóli te javél dasavo Zakóno, savó moginelas te del viéčno džiibén, tedy ame moginasas te doresas čačipén Zakonóstyr; ne Svénto Čhinybén rakiréla, so saré manušá isyn tel grehoskiri zor, paldavá bahtalypén, pal savó Devél dyjá lav, pir patiaibén dre Isusóste Xristosóste, te javél dynó odolénge, savé patiána. Ne angíl patiaibén dre Isusóste Xristosóste, ame sámas sýrby zaphandle tel Zakonoskiro rakhiben vaš dová, sob (kaj) te užakiras, kiéli otkerelape patiaibén. Paldavá Zakóno dykhciá pal aménde i sys sýrby sykliaibnari (vospitatieljo), savó lydžijá amen ke Xristóso vaš dová, sob (kaj) Devél te pridžinel amen čačunenca pir patiaibén. A kiéli javdiá Xristóso, aménge kakaná butýr na trej sykliaibnari te dykhél pal aménde; pal-dová so ame saré sam Devléskire čhavé pir patiaibén, dro jekhipén Isusósa Xristosósa. I saré tumé, savé boldepe dro jekhipén Isusósa Xristosósa, tumé sýrby khetaniakirdepe Xristosósa pir Svénto Dúho (Fáno). Nane ni Judos, ni Griekos; nane ni pisharís, ni vol'none manušés; nane ni muršés, ni džuvliá; pal-dová so tumé saré san jekh dro jekhipén Isusósa Xristosósa. A kóli tumé san Xristosóskire, tedy tumé san Avraamóskire rodóstyr; manušá, savé doreséna dová, pal so Devél dyjá lav. I me iščo (inké) phenáva: paka dadéskiro čhavó, savéske dad mekéla péskiro mištypén, isyn tyknó, ke jov otlydžanape adiáke-pac' syr i ke dadéskiro pishári, mek jov isyn sýrby xuláj pe saró mištypén; ne paka jov barjola, pašýl léste psiréna rázna xulaibnytka i kheréskire barydyrá ke/žýko ke dolé beršá, savé dad uphenela. Adiáke-pac' i ame sam, kiéli ame sámas sýrby bijatore pir patiaibén, tedy ame sámas syr pishárja angíl dalé svetóskire – duhoskiri zor; a kiéli javdiá časo, savó Devél vykedyjá, Jov bičhadiá Péskire Jekhe Čhavés, Saves džuvlý bijandiá i Savó dživdiá tel Judýtko Zakóno, vaš dová, sob (kaj) Jov moginelas te vykinel odolén, savé isyn pishárja angíl Zakóno, sob (kaj) ame moginasas te jačas Devléskire čhavénca. Ne pal-dová, so tumé san Léskire čhavé, Devél bičhadiá Léskire-Čhavéskiro Dúho (Fáno) dro amaró iló, Savó déla gódla: “Avva! Dádo!” Paldavá tu na san kakaná butýr pishári, a čhavó, a kóli čhavó, tedy Devél déla túke saró, so isyn Léste vaš čhavénge. A tedy, ĥaredyr (vagedyr), kiéli tumé na džindlé Devlés, tumé sánas pishárja angíl odolé devlorende, savé sarésa nane naturale develá; a kakaná tumé pridžindle Devlés, a fedýr te phenas, so Devél pridžindia tumen; syr davá tumé nevéstyr risiné ke bizorjákire i beda dúhi, savénge svéto pokloninelape, sýrby tumé kaména te jačen nevéstyr pishar'jénca angíl kadalé dúhi. Tumé rakhunes (dre duj jakhá) pridykhenape ke dyvesá, čhoná, časy i beršá. Me darava, so ci na ivjá (naprásnes) me kerdjom butý maškír tuménde. Pšalále! Me mangáva tumen, sob (kaj) tumé te javén dasavé, syr me som, pal-dová so me som dasavo, syr tumé san: tumé na kerdé mánge ni savó čoripén. Ne tumé džinéna, so me sómas nasvaló, kiéli me rosphendjom bahtalý zan (zvies') tuménge dro pérvo mólo, a tumé na gindlé man fujedýr péstyr, na risiné mándyr, kiéli dykhné miro bizoralypen, a tumé prilyné man syr Devléskire Jangolós, syr Isusós Xristosós. Save ž bahtalé tumé sánas! I me phenáva syr jakhítko (svidietieljo), so kóli te javél trébima, tumé vylenas péskire jakhá i otdenas len mánge. So ž, ci me jacjom vergosa tuménge, kóli me phendjom čačipén tuménge? Lénde isyn iléskiro xačkiribén pal tuménde, ne davá jone keréna na saré iléstyr, a jone kaména te pirityrden tumen ke pe, sob (kaj) tuménde te javél dasavo iléskiro xačkiribén pal lénde. Davá isyn mištó ŭsády (sak), sob (kaj) te javél iléskiro xačkiribén pal čačipén, a na féni tedy, kiéli me som tuménca, miré čhavorenca, vaš konéske me kerdjom butý dasavé dukhenca, so isyn džuvliáte, kiéli joj bijanéla tyknores, paka dro tumaró džiibén na javéla bicialó Xristosóskiro bahtiakiribén: me kamamas te javav ke tumé i te paruvav mirí zan, pal-dová so me na džindjom, so sys tuménca. Phenén tumé mánge, savé drieván kaména te kandén Zakóno: ci šunéna tumé, so Zakóno rakiréla? Pal-dová so isyn čhindló, so Avraamoste sys duj čhavé, jekh pisharicate, jekh vol'none džuvliáte. Ne odová, savó sys pisharicate, bijándyja, syr i saré bijandjona, a kodová, savó sys vol'none džuvliáte, bijándyja pir Devléskiro dynó lav. Kadalé duj čačipená isyn sýrby sykaibén: pal-dová so isyn duj zaviety – jekh pe Bérga Sinajo, pir savó bijandjona pishárja i savó uphenela pe Agarjate. Paldavá Agar' značinela Bérga Sinajo dre Aravija i isyn sýrby akanatuno Jerusalimo, savó isyn dro pishariben péskire manušénca, a Jerusalimo, savó isyn dro Bolybnáskiro Rajo isyn vól'no, – davá fóro isyn amarí daj. Pal-dová so isyn čhindló: “Rádynpe, džuvlije bičhavengiri, konéste na sys nikieli čhavoré; de gódla radymása i vyphen lošales (viesjoles), saví na džinéla bijanypnytka dukhá; pal-dová so džuvliáte, savjá rom mekciá, javéna butedýr čhavoré, syr kodoliate džuvliáte, savjate isyn rom.” Ne tumé, pšalále, adiáke-pac' syr i ame sam, san Devléskire čhavoré pir dynó lav, adiáke-pac' syr i Isaáko sys. Syr sys i tedy, kiéli čhavoró, savó bijándyja pir ločakiro kamiben, tradyjá javrí odolés, savó bijándyja Devléskire Duhóstyr. Ne so rakiréla Svénto Čhinybén? “Vytrade pisharica lákire čhavésa, pal-dová so pisharicakire čhavéske na javéla paš Dadéskire mekné mištypnástyr khetané vol'none – džuvliakire čhavésa.” Paldavá, pšalále, ame na sam pisharicakire čhavoré, a ame sam vol'none-džuvliakire čhavoré. Tedy, rikirenpe zoralés syr vol'na manušá, pal-dová so Xristóso mekciá pe vólia amen i, sob (kaj) tumé nevéstyr te na ur'jen pishariskiro ĥámo. Šunén! Me, som Pávli, phenáva tuménge, so, kóli tumé občhinenape, na javéla ni savó lačhipén tuménge Xristosostyr. I me dophenava kažnoné manušéske, so jov isyn bangó (musinela) te rikirél saró Zakóno. Tumé durine Xristosóskire lačhipnastyr, kóli kaména te javén pridžindle čačunenca angíl Devléste pir Zakóno; tumé ž otpyne bahtalypnastyr. Pal-dová so ame pir Svénto Dúho (Fáno) užakirasa zoralés, kiéli Devél pridžindia amen čačunenca pir patiaibén. Pal-dová so, kiéli ame sam dro jekhipén Isusósa Xristosósa, ni občhinyben, ni naobčhynyben na mol ničý, a saró smyslo isyn dro patiaibén, savó sykavéla pes pir patýv ke javír manušá. Tumé kerdé adiáke šukár sýrby prastándyne čačipnása pir stadiono! Kon otriskirdia tumen, sob (kaj) tumé te na kandén čačipén. Kadasavó otriskiriben nane Devléstyr, Savó prikhardia tumen. Tykny droždža (roščyna) ĥazdéla saró xumer (tiasto). Me džinóm zoralés, so tumé adiáke duminéna, kon isyn dro jekhipén Xristosósa, i kodoléske, kon ladžakirela tumen, javéla kára, na dykhí, kon by jov te na javél. Ne palsó ž manušá tradéna man, pšalále, kóli me rosphenava lav pal občhinyben? Tedy bar, so isyn paštó pe drom angíl manušénde, te patián dro zrakhibén pir Xristosóskiro trušúl, isyn kedyno krig. Me kamám, sob (kaj) manušá, savé ladžakirena tumen, až te počhinen péske masá. Tumé, pšalále, sánas khardé te javén vol'na. Jekh so, sob (kaj) tumarí vol'nyma te na del saštypen te kerén pir ločakire-nalačhé kamibena. I saró Zakóno rikirlape pe jekh priphenybén: “Sykáv patýv péskire pašatuné manušéske, syr kokoró péske.” A kóli tumé košenape i xanape maškír péste, tedy rakhénpe, sob (kaj) tumé te na xasiakirén jekh jekhés. Ne me phenáva, dživén pir Svénto Dúho (Fáno), i tumé na javéna te kerén pir nalačhé-ločakiro kamiben. Pal-dová so ločake na trej dová, so Duhoske trej, i Duhoske (Fanoske) trej na dová, so ločake trej: kadalé duj kamibena isyn vérgi jekh jekhéske; paldavá tumé na keréna dová, so tumen tyrdela, ne kóli Svénto Dúho (Fáno) lydžála tumen, to tumé na san tel Zakóno. Ĥáda, so keréna manušá pir ločakire kamibena: jone keréna biladžaipén, dživéna džuvliénca bi sevlakiro, lydžána pes syr murdalá (žyvotna); mangénape idolénge, čovahaniakirena, na sykavéna patýv javire manušénge, košenape, zevlynena, zamarena manušén, pričhuvena zor te javén fededýr javire manušéndyr, rospernape xoliása pe grupy, kandéna xohané sykliakiribena, žalinena lačhipén javirénge, p'jena syr matybnarja, gulinena biripiribnaskires i but javír; pal kadasavende me phenáva angíl, syr i rakirdjom angledýr, so, kon adiáke keréla, na doreséla paš dro Devléskiro Kralipén. A pir Svénto Dúho (Fáno) manušá dživéna patyvása ke javír manušá, radymása, spokojnymasa, dlugone vyrikiribnasa, lačhé-ilytkimasa, lačhipnása, čačipnása; jone isyn štyl (tiha), obrikirena pes, – kadasavé manušén prityrdela ke pe Zakóno. I adalé manušá, savé isyn Xristosóskire, primarde péskiri manušýtko grehítko natura pe trušúl péskire nalačhé kamibnasa i grehoskire tyrdypnasa. Kóli ame dživasa pir Svénto Dúho (Fáno), aménge trej i te kerás pir Svénto Dúho (Fáno). Na javása te rikiras vučés nakh, na javása te das zor xoliake jekh pe jekhéste, sob (kaj) te na das jakhalo jekh jekhés. Pšalále, kóli manúš isyn uhtyldo dro vari-savó nálačho réndo (diélo), tedy tumé, savé dživéna pir dúho (fáno), poden vast (pomoginen) léske te terdjol pale pe čačunó drom kovlé ilésa, i dykhén pal péste, sob (kaj) tumé kokoré te na perén pe propatiakiriben. Pomoginen jekh jekhéske te lydžán pharipén, i dalésa tedy tumé spolninena Xristosóskiro Zakóno. A kóli vari-savó manúš ginéla pes vari-konesa, kiéli jov kokoró ničý na mol péstyr, tedy jov xohavela pes; ne mek kažno manúš te del čol (te sprobinel pes) péske, tedy jov javéla te radynélpe kokoró péskire keribnastyr, a na javire manušéndyr. Pal-dová so kažno manúš lydžála péskire džiibnáskiro pharipén. Mek manúš, savó sykljola, te del paš péskire mištypnástyr kodoléske, kon sykliakiréla les. Na denpe dukhá: Devlés naštý te xohavél; dová, so manúš čhuvéla dre phuv, dová-pac' jov i skedéla. I kon čhuvéla dre phuv vaš péskiri loč (plot'), odová čhinela krig aplodostyr Duhoskiro meribén, a kon čhuvéla dre phuv vaš Dúho (Fáno), kodová sčhinela aplodostyr viéčno džiibén Sventoné Duhóstyr: kiéli ame kerása šukár, tedy aménge te na khinjovas, pal-dová so ame javása te skedas aplodo dro péskiro časo, kóli ame na perasa dro dúho (fáno). Paldavá, kóli isyn časo/saštypen, to javása te kerás lačhipén sarénge, i drieván fedýr kodolénge, savé isyn pšála pir patiaibén. Dykhén, savé baré bukvenca me čhindjom tuménge miré vastésa. A odolé, savé kaména te sykavén pes pir loč manušénge, začhuvena tumen te občhinenpe, jekh vaš dová, sob (kaj) len te na tradén pal Xristosóskiro trušúl. I jone kokoré, savé isyn občhindlé, na rikiréna Zakóno, ne jone kaména, sob (kaj) tumé te občhinenpe vaš dová, sob (kaj) te šarenpe, so jone kerdé občhinyben pe tuménde. Ne mánge te na šaravpe nisosa, jekh amaré Ráskire-Devléskire, Isusóskire Xristosóskire trušulesa, pir Konéste svéto isyn primardo pe trušúl vaš mánge, i me adiáke-pac' vaš davá svéto. Pal-dová so, kon isyn dro jekhipén Xristosósa, na značinela nisó: ni občhinyben, ni naobčhinyben, a nevó manúš. I kodolénge, kon dživéla pir davá uphenybén, te javél pe lénde ramánjo (miro) i tangipén (láska) i pe saré Devléskire manušénde. Paldavá adiáke: mek nikón te na pharjakirel man, pal-dová so mánde isyn Isusóskiro šramy (morima) pe masá. Mek bahtalypén amaré Ráskire-Devléskire, Isusóskire Xristosóskiro te javél tumaré Duhósa, pšála. Amín'! Pavlístyr, Isusóskire Xristosóskire Apostolostyr, savés Kokoró Devél vykedyjá, Sventoné manušénge, savé dživéna ke Efiéso, i patiána dre Isusóste Xristosóste: Mek te javél bahtalypén i ramánjo (miro) tuménge Devléstyr Dadéstyr amarestyr, i Rástyr-Devléstyr, Isusóstyr Xristosostyr. Mek te javél bahtiakirdó Devél i Dad amaré Devléskiro Isusóskiro Xristosóskiro, Savó bahtiakirdiá amen dro jekhipén Xristosa kažnoné Duhóskire bahtiakiribnása dro Bolybnáskiro svéto Jov vykedyjá amen dre Léste angledýr, syr sozdyjá svéto, sob (kaj) ame te javas svénta pir jekhipén Xristosósa i bidošakire angíl Léste pir patýv ke javír manušá; Jov vykedyjá amen pir Isusóste Xristosóste, sob (kaj) ame te javas Léskire čhavé pir Péskiro vykedyiben i vólia, sob (kaj) te slavinas Léskiro šukár bahtalypén, savó Jov dyjá aménge pir Péskire Drogoné Čhavéste: dre Savéste i pir Saveskiro Rat ame sam vykindle (vyrakhne), amaré gréhi isyn otmekne pir Léskiro barvaló bahtalypén; Savó Jov bi tangipnaskiro dyjá aménge saré godiása i džinybnasa, pir Péskiro celjo/res (čačipén) Devél otčhakirdiá aménge Léskire-voliákiro čorahanyben, savó Jov ĥaredyr zadumindia te kerél pir Xristosóste, vaš dová, kiéli javéla pherdó časo, sob (kaj) te khetaniakirel saró, so isyn pe bolybén i pe phuv, pir Xristosóste, pir jekhipén Lésa i ame jaciám Devléskire manušénca pir Léskiri myslia, kiéli Jov vykedyjá amen i Savó keréla saró dro svéto pir Péskiri vólia samone anglypnástyr, sob (kaj) ame, savé pérva doresciam (dolyjam) lačhó užakiribén Xristosostyr, te šaras Devléskiri sláva; dre Léste i tumé adiáke-pac' šundlé čačunó lav, bahtalý zan (zvies') pal tumaró zrakhibén, syr tumé upatiándyne dre Léste. Tuménde isyn jakhítko (piečat'), savó sys Sventoné Duhóstyr, Saves tumé ĥará užakirde, Savó déla lav syr symadý (zalogo) pal amaró anglatunó džiibén i Devléskire-manušéngiro vyrakhiben vaš Devléskiri sláva. Paldavá i me adiáke-pac', kiéli ame šundjom pal tumaró patiaibén dre Isusóste i pal láska ke saré svénta, nijékhvar me na pirijačava te parikiráv Devléske pal tuménde, i me ripirava tumen, kiéli me mangavape Devléske pal tuménde, sob (kaj) Devél amaré Ráskire-Devléskiro, Isusóskiro Xristosóskiro, slavútno Dad, te del tuménge pir Dúho (Fáno) godý i te sykavél, sob (kaj) tumé fedýr te udžinén Les, i sob (kaj) Devél te kovliakirel tumaré ile i te otčhakirel tuménge jakhá, sob (kaj) tumé te udžinén dová lačhó užakiribén, ke savó Jov tumen khardiá, i savó barvaló isyn meknó mištypén pir dynó lav, Léskire slavakiro, vaš sventonenge, i savó bimierakiro isyn Léskiro baripén zoralypnaskiro vaš aménge, savó Jov déla saré sventonenge, savé patiána dro Léskire-zoralypnaskiro keriben, Savó Jov sykadiá dre Xristosóste, kiéli Jov otdžidiakirdiá Les muléndyr i čhudiá pir čačuný rig Péstyr dro Bolybnáskiro Rajo, vučedýr baré randyr, saré zor'jendyr i kažnoné zorjátyr dro davá svéto i kažnoné lavéstyr, so isyn na jekh dro davá viéko, ne i dro viéko, savó angíl javéla; i Devél čhudiá saró telé tel Isusóskire ĥerá, i čhudiá Léske zor te javél Šeré Xulása pe saró, Šeralesa vaš Khangirí. Saví isyn Léskire masá, Léskiro pherdypen, Savó pherdiakirela Pésa saró. I tumen, savé sánas mulé pal tumaré nalačhé réndy i gréhi, dre savé tumé angledýr adiáke dživdé, pir davá svetoskiro viéko, pir khieningoskiro uphenybén, savó sys xuláj dro fáno (vozduho), pir dúho (fáno), savó xulainela sarénca, kon na kandéla Devlés: ame adiáke-pac' saré vari-kiéli i sámas kadasavé i dživdiam pir nálačho ločakiro (plotiakiro) tyrdypén i kerdiám dová, so aménge podphenela nálačho kamiben i so javéla pe godý, i ame sámas pir bijanypén sýrby čhavé, pe konéste peréla Devléskiri xolý, syr i javír manušá: ne Devél, Savó isyn barvaló tangipnasa, i Savó pir bari Péskiri láska, savjása Jov prityrdyja amen, amen, savé sys mulé pal amaré nalačhé réndy, Jov otdžidiakirdiá dro jekhipén Xristosósa, pir bahtiakiribén, savésa tumé san zrakhné, i Jov otdžidiakirdiá amen pir amaró jekhipén Xristosósa i dyjá aménge štéto dro Bolybnáskiro Rajo Isusósa Xristosósa, sob (kaj) te sykavél dre viéki, savé angíl javéna, naj baredýr barvalypén Péskire bahtiakiribnastyr pir tangipén ke ame dre Xristosóste Isusóste. Paldavá so tumé san zrakhné bahtalypnasa pir patiaibén, i davá isyn na doléstyr, so tumé pričhuvena zor, davá tuménge isyn dynó Devléstyr; zrakhibén déla Devél na pal réndy (diély), pal-dová, sob (kaj) nikón te na moginel te šarelpe. Pal-dová so ame sam kadasavé, savénca Devél sozdyjá amen dro amaró jekhipén Isusósa Xristosósa vaš dová, sob (kaj) ame te kerás lačhé réndy, savé Devél ĥaredyr vykedyjá vaš aménge. Paldavá ripirén, so tumé pir bijanypén san Náiudy, savén khardé naobčhindlenca odolé, savé isyn občhindlé manušytkoné občhinybnasa, savó kerélape vasténca; tumé i sánas dro dová časo bi Xristosóskiro, tumé na sánas khetané Izrailjoskire manušénca, tuménde na sys paš dro Zavieto, tuménde na sys lačhó užakiribén, tumé sánas bi Devléskiro dro svéto: ne kakaná tumé san dro jekhipén Xristosósa Isusósa, tumé, savé ĥaredyr sánas dur, jačné pašýl, pir Xristosóskiro Rat, savó sys pročhudo pal tuménde. Pal-dová so Jov isyn amaró ramánjo (miro), Savó kerdiá dujendyr jekh i roskedyja vánta, saví sys terdy maškirál aménde. I Jov Péskire meribnasa pe trušúl parudia Zakonóskire uphenybená sykliakiribnasa vaš dová, sob (kaj) dujendyr te kerél dre Kokoré Péste jekhe nevoné manušés, i dalésa te janel manušénge ramánjo (miro), sob (kaj) dujén (Judén i Najuden) dro jekh masá te primirinel Devlésa pir trušúl, xasiakiri kažno vergima pe Léste, i kiéli Xristóso javdiá, Jov rosphendiá bahtalý zan (zvies') pal ramánjo (miro) sarénge tuménge, na dykhí pe dová, kon sys Léstyr dur ci pašýl, pal-dová so pir Léste ame Judy i Náiudy sam domekne dro jekh Dúho (Fáno) ke Dad. Paldavá tumé na san butýr čúža, i tumé na san manušá, savé na ĥará javné, ne tumé san pal jekh Sventoné manušénca, i tumé san jekh Devléskiri sém'ia(irí), savén čhudé pe Apostolengiro i prorokengiro sykliakiribén, i savénde Kokoró Isúso Xristóso isyn venglytko bar vaš davá fundámiento, Savó sýrby rikirla saró kher khetané, barjola dre svénto khangirí Ráskire-Devléskiri, dro jekhipén Lésa i tumé javéna khetané javirenca te dživén dro Devléskiro Kher pir Svénto Dúho (Fáno). Vaš davá me, Pávli, som Isusóskiro Xristosóskiro manúš dro štaribén vaš tuménge, Najudénge. Kóli tumé šundlé pal Devléskire-bahtiakiribnaskiri butý, saví sys dyný mánge vaš tuménge, syr kheritkoné barydyréske, pal-dová so mánge otčhakirdiape čorahanyben, pal so me angledýr čhindjom nábut tuménge, tedy, kiéli tumé javéna te ginen davá, tumé moginénas te ĥaljon, so me džináv Xristosóskire čorahanybena, savé na sys angledýr džindlé ni jekhé manušytkoné rodóske adiáke, syr jone kakaná isyn otčhakirde Léskire Sventoné Apostolenge i prorokenge pir Svénto Dúho (Fáno), sob (kaj) i Najudénge te javén khetané Judenca dro Devléskiro bahtiakiribén i, sob (kaj) jone te jačen pašénca jekhe maséndyr, adiáke-pac' i dynó lav otlydžalape lénge, savó sys dynó dro Isusóste Xristosóste pir bahtalý zan. I me jacjom dynári (služýtieljo) vaš daja bahtalý zan pir Devléskiro bahtiakiribén, savó sys dynó mánge Léskire zorjása. Mánge, kon isyn naj tyknedýr saré devlytkonendyr, sys dynó davá bahtiakiribén te rosphenav Najudénge pal Xristosóskiro barvalypén, savó nijékhvar na xasjola. I te rosphenav sarénge, pal davá čorahano keriben, savó sys čhakirdo viekendyr dre Devléste, Savó saró kerdiá pir Isusóste Xristosóste. Sob (kaj) kakaná te javél džindly pir Khangirí barydyrénge i xulánge dro Bolybnáskiro Rajo bari Devléskiri godý, adiáke, syr Devél zadumindia angledýr svetóskire sozdyibnastyr, savó Jov sozdyjá dre Isusóste Xristosóste, amaré Raste-Devléste, dro jekhipén Savésa aménde isyn muršypen i nadiéia te javas pašyledýr ke Devél pir patiaibén dre Léste. Paldavá me mangáva tumen, te na perén ilésa pal miré pharipena pal tuménde, savé isyn vaš tumarí sláva. Vaš davá me i som terdó pe čangá angíl amaré Ráskire-Devléskire, Isusóskire Xristosóskire Dadéste, Savéstyr kažno ródo dro Bolybnáskiro Rajo i pe phuv doreséla péskiro lav, mek te del Devél tuménge pir Léskire-slavakiro barvalypén, te jačen zoraledýr Léskire Duhóskire zorjása dre andratuné manušéste, sob (kaj) te dživél Xristóso pir patiaibén dre tumaré ile, i sob (kaj) tumé te javén zoralé dre patýv jekh ke jekh, i sob (kaj) tumé mogindlé te udžinén saré sventonénca, so dasavo isyn buĥlypén i dlengipén, i xoripén, i vučipén, i te ĥaljon, so isyn baredýr saréstyr pe svéto Xristososkiri láska vaš dová, sob (kaj) Devél te javél saré péskire pherdypnasa dro tumaró džiibén. Ne Odoléske, Konéskiri zor isyn dre aménde, i saví moginéla te kerél butedýr doléstyr, pal so ame mangasa, ci ame duminasa, te javél Léske sláva dre Khangirí i dre Isusóste Xristosóste saré rodénge dre saré viéki. Amín'. Me, savó som phandlo manúš pal Raste – Devléste, mangáva tumen te dživén čačuné (mol'noné) džiibnasa, savésa Devél khardiá tumen, te javén tumé štyl (tiha) i kandypnýtka i kovlé-ilýtka, te otlydžanpe jekh ke jekh dlugone vyrikiribnasa i patyvása, te pričhuvén zor te zrakhen jekhipén, savó Dúho (Fáno) déla pir ramánjo (miro), so khetaniakirela tumen. Isyn jekh masá i jekh Dúho (Fáno), syr isyn i jekh nadiéia, ke saví Devél khardiá tumen; isyn jekh Raj Devél, jekh patiaibén, jekh boldyipen. Isyn jekh Devél i Dad sarénge, Savó isyn vučedýr saréndyr i pir sarénde i dre aménde sarénde. Sarénge aménge sys dynó bahtiakiribén adákicy, ci but Xristóso Kokoró vykedyjá te del kažnonéske améndyr, paldavá Svénto Čhinybén rakiréla: “Jov ĥazdyjápe pe vučypen, otmekciá plienonen i dyjá bahtiakiribén manušénge”, ne dová, so Jov “ĥazdyjápe”, naúšto značynéla na dová, so Jov angledýr gijá telé dre liunoskire (adoskire)-phuvjákire pašá. Paldavá Jov, Savó gijá telé, isyn Odová-Pac', Kon i ĥazdyjápe vučedýr saré Bolybnáskire Rajostyr, sob (kaj) te pherdiakirel saró; i Jov čhudiá vari-konés Apostolenca, vari-konés prorokenca, vari-konés te rosphenén manušénge bahtalý zan, vari-konés Devlytkoné-manušéngire rakhibnar'jénca i vari-konés sykliakiribnaskirénca, sob (kaj) te fedyrjakiren Devlytkoné manušén te rosphenén Devléskiro lav te zoraliakiren Khangirí, Saví isyn Xristosóskire-duhóskire masá; paka ame saré javása dro jekhipén ke jekh patiaibén i ame udžinasa Devléskire Čhavés, i ame jačasa baré (stala) murša i dodžasa ke naj staledyr (sama stala) Xristosóskire beršá; vaš dová, sob (kaj) ame te na javas butýr syr bijatoré (tyknoré), savé kuninenape i moginéna te zmarenpe čačuné droméstyr manušytkoné mendripnasa i xohaibnasa; a sob (kaj) aménge te rikiras čačipén dre patýv jekh ke jekh, pir saró te barjovas te zdžas (te poddžas) pe Xristosóste, Savó isyn Xuláj pe saró: Léstyr saré Duhóskire masá (Khangirí) isyn sphandlé i khetaniakirdé maškír péste džidé sphandypnasa i pir dová, so saré pašá podrikirena jekh jekhés i kažno paš keréla péskiri butý, i saré masá barjona i jačénape zoraledýr pir patýv ke javír manušá. Paldavá me rakiráva, i mangáva angíl Raste – Devléste, sob (kaj) butýr tumé te na kerén, syr keréna nácyi pir péskiri krótko godý, léngiri godý kalyja, jone xasiakirdé Devléskiro džiibén pir péskiro biladžaipén i xolynakiro iló, léngiri godý kaštalyja, jone lyné te zalenpe našukaroné rendénca adiáke, so keréna kažno magiripén bokhalypnasa. Ne tumé na adiáke vysyklyne Xristosostyr, a tumé šundlé pal Léste i giné pal Léste, pal-dová so čačipén isyn dre Isusóste Xristosóste. Mekén péskiro phuranó džiibén i na poddenpe grehóske, ke savó zlydžala grehítko tyrdypén; ne len te duminen nevoné-manušéskire-godiása dro Dúho (Fáno); i piriparudjon dre nevoné manušéste, savés Devél sozdyjá pir Péskiro dro patiaibén i svénto čačipén. Paldavá mekén xohaibén, kažno tuméndyr te rakirél čačipén péskire pašatunéske, pal-dová so ame sam jekhé maséngire pašá jekh jekhéske. Kóli tumé xoliasona, na kerén grého: na javén xolynakire saró dyvés, i na den štéto bengéske dro tumaró džiibén. Kon čordia, mek butýr te na čorel, ne mek fedýr te kerél butý, keri péskire vasténca lačhipén, sob (kaj) te javél sóstyr te del odolé manušénge, savé isyn čororé. Na rakirén nisave kirne lavá, a jekh lačhé lavá, vaš podrikiribén dro patiaibén, sob (kaj) davá te janel bahtiakiribén odolénge, kon šunéla. I na kerén fuipén Devléskire Sventoné Duhóske, Savó čhudiá čergenorí pe tuménde dro vykinybnaskiro dyvés. Mek kažno kirkipen, xolý, čingárd, i gódla i nalačhé lavá te otdžan tuméndyr khetané saré tumaré fuipnasa. Javén lačhé jekh ke jekh, tangipnýtka (žalosna), primangen jekh jekhéske, syr i Devél pir Xristosóste primangdia tuménge. I paldavá pričhuvén zor te kerén, syr Devél keréla, syr čhavé, savé isyn Léske drieván dróga, dživén dre patýv ke javír manušá, syr i Xristóso sykadiá patýv aménge i otdyjá Pes pal aménde, syr gudló khandypen i svénto dyibén, savó isyn lačhó Devléske. Ne biladžaipén, ci javír vari-savó magiripén, ci bokhalypen, mek kadaleske te na javél štéto maškír tuménde, syr isyn maškír sventonénde; i adiáke-pac' bedýtka lavá i čhučó rakiribén i dylynó saben na džála vaš tuménge, fedýr otdén péskiro časo te parikirén Devléske. Džinén dová, so ni jekh biladžaipnári, ci magirdó, ci bokhaló ke javír fuj réndy (diély), savó isyn sýrby idolóskiro dynári (sluga), léste na javéla paš dro Xristosóskiro Devléskiro kralipén. Mek nikón te na xohavél tumen čhučé (pustone) lavénca, pal davá javéla Devléskiri xolý pe čhavénde, savé na kandéna. Na javén khetané adasavé manušénca; Vari-kiéli tumé sánas dro kalypén (tjomnyma), a kakaná tumé san dud dre Raste-Devléste: dživén syr dudéskire (svetóskire) čhavé, pal-dová so Duhoskiro barjakirdó (plódo) isyn dro kažno lačhipén, čačipén i patiaibén, udžinén, so trej Devléske; sob (kaj) te na javél tuménde nisó khetané dre čhučé kalé (tjomna) réndy, ne fedýr sykavén bang, pal-dová so, so adasavé manušá keréna čorahanés, ladžavo-isyn te rakiras. Ne saró davá javéla dyc'lo angíl dud (svéto), pal-dová so dud sykavéla saró, so isyn dyc'lo. Paldavá isyn phendló: “Uštý, kon isyn sutó, i otdžidjov, i javéla te svencynel túke Xristóso.” I paldavá rakhén lačhés, dživén na syr bigodiakire, ne syr god'varé manušá. Rakhén časo (cýro), pal-davá so dalé dyvesá isyn xohané. I na javén dylyné, a fedýr pričhuvén zor te ĥaljon, so Devél užakiréla améndyr. I na p'jen ke matyben mol, savjátyr džála nálačho džiibén, ne fedýr pherdiakiren pes Duhósa, sykliakirén jekh jekhés psalmenca, bahtalé lavénca i Devlytkoné gilienca, bagán i slavinén Ras-Devlés saré iléstyr, usady (sak) parikirén pal saró Devléske i Dadéske, vaš amaré Ráskire-Devléskire, Isusóskiro Xristosóskiro lav, kandén jekh jekhés pir dar angíl Devléste. Džuvliale, kandén peskiren romen syr Ras-Devlés, pal-dová so rom isyn xuláj romniake, syr i Xristóso isyn Khangirjákiro xulái. Jov isyn Zrakhibnari vaš Khangirí pir masá dro dúho (fáno). Ne, syr Khangirí kandéla Xristosós, adiáke-pac' i romnienge trej te kandén dro saró péskire romen. Muršále, sykavén patýv péskire romniénge adiáke, syr Xristóso sykadiá patýv Khangirjake i otdyjá Pes pe meribén pal láte, sob (kaj) te kerél Khangirí sventonasa, te vyžužakirel la paniésa i Devléskire lavésa, sob (kaj) Léske te čhuvél angíl Péste Khangirí dro slavno gožyma, dre saví nane ni savó makhipen, ni saví doš, a sob (kaj) joj te javél svénto i bidošengiri. Adiáke-pac' i romá isyn bangé te sykavén patýv peskiren romniénge syr péskire masénge: konéske isyn drógo péskiri romný, kodolé manušéske isyn drógo kokoró jov. Pal-dová so nijekheske nijékhvar na sys džungaló (brytko) vaš péskiri loč (plot'), ne jov čaravela i tat'kirela les syr i Xristóso Khangirí: pal-dová so ame sam pašá Léskire maséndyr; ame sam Léskire ločátyr i Léskire kokalendyr. “Paldavá mekéla manúš péskire dadés i da, i javéla te dživél péskire romniása, i jone duj javéna sýrby jekh loč.” Kadavá garadó čačipén Sventoné Čhinybnástyr isyn baró; me rakiráva, so davá adiáke-pac' otlydžalape ke Xristóso, syr i ke Khangirí. Ne i adiáke-pac' mek kažno améndyr te sykavél patýv péskire romniáke, syr kokoró péske; i mek džuvlý te darel péskire romestyr. Čhavorále, kandén peskiren daden, savé isyn Rástyr-Devléstyr, pal-dová so dro davá isyn čačipén. “Kutiákir (de patýv) péskires dadés i da”, davá isyn anglatunó zaphenyben dyné lavésa, sob (kaj) tu javes bahtaló i te dživés ĥará pe phuv. I tumé, dadá, na xan péskire čhavorén, ne barjakirén len pir Ráskire-Devléskiro sykliakiribén i prirakhiben. Pisharjále(raby), kandén péskire xulan pe phuv pir loč, kutiakiribnása (vagása) i darása saré tumaré iléstyr, syr Xristosós; na kerén davá vaš sykaibén, vaš manušéngiro šaribén, ne syr Xristosóskire pishárja, savé saré péskire iléstyr keréna pir Devléskiri vólia, dynarinén ilésa saré iléstyr, syr Ráske-Devléske, a na, syr manušénge; džinén tumé, so kažno manúš, kóli savó keréla lačhipén, to jov davá-pac' i doreséla pale Rástyr-Devléstyr, mek jov te javél pishári ci vól'no. I tumé, xulajale, adiáke-pac' otlydžanpe šukár ke péskire pishárja i na strahakiren len, džinén, so dro Bolybnáskiro Rajo isyn Xuláj vaš lénge i vaš tuménge i Jov kutiakirela šerá (rávnes) saré manušén. I dro kónco (dro jagóro) miré pšála, me kamám te phenáv tuménge, javén zoraledýr dro jekhipén Rása-Devlésa i Léskire baré zorjátyr. Ur'jen pe péste saré Devléskire mardýtko, sob (kaj) tumé mogindlé te terdjon proti nalačheskire frenta rendore (dielycy): pal-dová so ame sam na proti manušénde, a proti barydyrende i svetóskire thagar'jénde (kniaz'jende), savé xulainena pe davá ciamló (tjómno) svéto, proti benglané dúhi, savé isyn dro Bolybnáskiro svéto. Paldavá ur'jen saré Devléskire mardytka, sob (kaj), kiéli javéla nálačho dyvés, tumé mogindlé te terdjon proti, i saró te pirizorjakiren i te vyrikiren. I paldavá terdjon saré zorjátyr, podphandenpe simirísa čačipnastyr i ophandén pes patiaibnása syr sastruné ščytosa, i ur'jen péskire ĥerá, sob (kaj) te javén skedyné te džán i te rosphenén bahtalý zan pal ramánjo (miro): Ne fedýr saréstyr, len pésa ščýto patiaibnastyr, savésa tumé moginéna te murdiakiren saré nalačheskire xačkirdé maribnýtka bustiá (striély). I len adiáke-pac' zrakhibnaskiro šliemo, i Duhoskiri kurtála, so isyn Devléskiro lav, i dro kažno časo mangénpe dro Dúho (Fáno) kažnoné patierjasa (molitvasa), adiáke-pac' saró časo mangénpe Devléske pal saré devlytkonene; adiáke-pac' mangénpe Devléske i pal mánde, sob (kaj) mánge te javén dyné lavá, savé trej te rakiráv murškanés garadó čačipén pal bahtalý zan, vaš davá me i som bičhadó dre sastyrá, sob (kaj) me te rakiráv murškanés, syr i trej mánge te rakiráv. Ne sob (kaj) i tumé adiáke-pac' te džinén pal davá, so otlydžalape ke me i pal miré réndy, dová rosphenéla tuménge pal saró Tihiko, amaró drógo pšal i čačunó Ráskire-Devléskiro dynári; savés me i bičhadjom ke tumé vaš dová-pac', sob (kaj) tumé te udžinén pal aménde, i, sob (kaj) jov te podrikirél tumaré ile. Mek te javél ramánjo (miro) pšalénge i patýv ke javír manušá patiaibnása Devléstyr Dadéstyr i Rástyr-Devléstyr, Isusóstyr Xristosóstyr. Mek te javél bahtalypén sarénge, kon saré iléstyr rikiréla syr Drógima amaré Ras-Devlés, Isusós Xristosós dro péskiro iló. Amín'. Pavlístyr i Ximastyr (Timafiejostyr), Isusóskire Xristosóskire pishar'jendyr, ke saré svénta manušá dre Filipy, kon patiála dre Isusóste Xristosóste saré jepiskopenca (khangirjákire barydyrénca) i diakonenca; mek te javél bahtalypén i ramánjo (miro) tuménge amaré Devléstyr Dadéstyr i Rástyr-Devléstyr, Isusóstyr Xristosostyr. Me parikirava miré Devléske, kiéli kažno mólo ripirava pal tuménde, saró časo dro miro mangipén Devléske, baré radymása me mangavape Devléske pal tuménde, pal-dová so tumé rosphenenas bahtalý zan (zvies') pervoné dyveséstyr i adiáke-pac' ke adadyvesatuno dyvés, me patiáva zoralés dro dová, so Devél, Kon lyjá te kerél dre tuménde davá lačhó réndo, javéla te kerél ke/žýko dová Dyvés, kiéli nevéstyr javéla Isúso Xristóso: čačes, davá trej mánge te myslinav pal sarénde tuménde, pal-dová so tumé san dro miro iló i kakaná dro štaribén (bešyben), adiáke-pac', kiéli me zaterdjovava pal sarénde tuménde i dophenava patiaibén pal bahtalý zan (zvies'), sarén tuménde, savé san khetané mánca dro Devléskiro bahtalypén. Devél isyn jakhítko mánge, so tumé san drieván dróga mánge saré tumé, Isusóskire Xristosóskire laskasa. I me mangavape Devléske pal dová, sob (kaj) tumarí patýv ke javír manušá usá butýr i butýr te barjol pir džinybén i kažno xor ĥalyibén, sob (kaj) tumé moginénas te rozlen (te rozgaljon), so isyn fedýr vaš tuménge, sob (kaj) tumé te javén žužé i bibangipnaskire dro Dyvés, kiéli Xristóso javéla, sob (kaj) tumaró džiibén te javél pherdó čačipnása, savó isyn pir Isusóste Xristosóste, vaš Devléskiri sláva i šaribén. Pšalále, me kamám, sob (kaj) tumé te džinén, so saró, so kerdiápe mánca, i so pomogindia mánge mištó te rosphenav bahtalý zan, adiáke, so jaciá džindló xaladenge dre prietorija i javirénge, so me som beštó dro štaribén pal patiaibén dro Isusóste Xristosóste, so baredýr paš pšaléndyr pir Raste-Devléste, pir davá, so me som beštó dro štaribén pal patiaibén, jačné zoraledýr dro patiaibén dre amaré Raste-Devléste i te rakirén Devléskiro lav bi darákiro. Čačó, so vari-savé léndyr rosphenena Xristosóskiro lav pir zevlynypén i pir dová, so vyprobinena jekh jekhés, ne javír rosphenena lav pal Xristosóste patyvása. Jekh manušá rosphenena Xristosóskiro lav daléstyr, so jone sprobinena zorja dro lav jekh jekhésa, a na iléstyr, jone kaména te kerén, sob (kaj) te javél mánge pharedyr dro štaribén. Ne javír manušá rosphenena lav pir láska; jone džinéna, so me som čhudo te zaterdjovav pal bahtalý zan. Ne so isyn daléstyr? Sýrby te na rosphenén Xristosóskiro lav dujemuitkes (pritvornes) ci saré iléstyr, me i daleske som rado i me adiáke-pac' javáva te radynavpe; pal-dová so me džinóm, so davá javéla mánge dynó vaš zrakhibén pir tumaró mangipén i podrikiribén Isusóskire-Xristosóskire Duhóstyr. Me džinóm zoralés i me patiáva, so mánge ni dro so na javéla ladžavo, a me, syr ĥaredyr, adiáke-pac' i kakaná bi darákiro, javáva te barjakirav patýv Xristosóske miré džiibnasa, ci javáva me džidó, ci muló. Paldavá so džiibén vaš mánge isyn Xristóso, i meribén davá isyn butýr džiibén Xristosósa; ne kóli mánge te dživáv dre loč (plot'), dová déla rádyma pal mirí butý, tedy me na džinóm, so fedýr mánge te vykedav. Man tyrdela i jekh i javír: mánde isyn vykedyiben te roziačavpe džiibnasa i te javav khetané Xristosósa, pal-dová so davá isyn fedýr saréstyr, ne te jačavpe džidó, davá isyn butýr trej vaš tuménge; i me čačes, džinóm davá, so me jačavape i me javáva sarénca tuménca khetané vaš tumarí baht i rádyma dro patiaibén; sob (kaj) tumaró šaribén dro jekhipén Xristosósa te barjol pir mánde, kiéli me javáva javír mólo ke tumé. Dživén gožes adiáke, sob (kaj) te javén lačhé Xristosóskire – bahtalé zaniake (zviesiake), sob (kaj) me, kiéli javáva i dykháva tumen, ci na javáva, ne sob (kaj) te šunav tuménde, so tumé san terdé zoralés dro jekh dúho (fáno), so tumé marenape khetané pal patiaibén dre bahtalý zan (zvies'), i sob (kaj) tumé te na darén ni dro so manušéndyr, savé isyn scial (proti) tuménde, davá vaš lénge isyn dynó sykaibén ke xasibén, a vaš tuménge ke zrakhibén, i davá saró isyn Devléstyr; pal-dová so tuménge sys dynó vaš Xristosóske na so te patián dre Léste, ne i te piridživen mén'ki pal Léste, dasavé-pac' pharipnasa, savó tumé vari-kiéli dykhné dre mánde, i kakaná tumé šunéna pal mánde. I kóli vaš tuménge isyn vari-savó podrikiribén dre Isusóste, kóli isyn vari-saví baht tumaré patyvatyr ke javír manušá, kóli isyn vari-savó iléskiro khetanypen pir Dúho, kóli isyn vari-savó tangipén i žalima, tedy pherdiakiren mirí rádyma, sob (kaj) tumé te javén khetané, te javén tuménde jekh dová-pac' vykedyiben, i dživén jekh jekhésa dro lado, i te kerén réndy (diély) pir jekh res (celjo); i te na kerén ničí pir xolý, ci pir péskiro šaribén, a te kandén jekh jekhés, te ginen javire manušén fedýr péstyr; na jekh pal péste kažno manúš isyn bangó te dykhél, ne i pal javirende. Paldavá trej, sob (kaj) te javél tuménde doiá-pac' godý, saví isyn dre Isusóste Xristosóste; Savéste sys andratuno khetanypen Devlésa, ne Jov na gindia Pes te sykavél adasavesa-pac', syr Devél, a Jov čhudiá dre rig Péskiri Devlytkima, Jov jaciá syr pishári, savó zdžála pe manušénde, i pir dykhibén – Jov jaciá syr manúš; Jov čhudiá Pes teledýr, kandyjá ke meribén, i meribén pe trušúl. Paldavá adiáke-pac' i Devél ĥazdyjá Les i dyjá Léske lav vučedýr saré lavéndyr, sob (kaj) vaš Isusóskiro lav, saró, so isyn pe bolybén, pe phuv, i tel phuv, te bandjol pe čangá, i, sob (kaj) kažno čib te rakirél, so Raj Devél, Isúso Xristóso, isyn Raj Devél vaš Devléskire-Dadéskiri sláva. I paldavá, miré dróga, syr tumé saró časo, kiéli me som tuménca, ne butýr saréstyr kakaná dro davá časo, kiéli man nane tuménca, pričhuvén zor darása i izdranypnasa te kerén butý vaš péskiro zrakhibén, pal-dová so adavá isyn Devél, Savó vykharela dre tuménde vólia i réndy pir Péskiro vykedyiben. Saró kerén bi xoliamé rakiribnaskiro i bi kunipnaskiro, sob (kaj) tuménge ni dro so te na javél bang i, sob (kaj) tumé te javén žužé (čysta) Devléskire čhavé i bidošakire maškír manušénde, savé isyn biladžaipnytka i rozmekne, kaj tumé ziainena syr čergeniá dro svéto, kiéli rakhena džiibnáskiro lav vaš miro šaribén dro Xristosóskiro dyvés, so me na ivjá (na naprásnes) psirdjom i kerdjom butý. Ne kóli mánge prijavelape te otdav péskiro džiibén syr svénto dyibén pal tumaró patiaibén, to me som rado, i me javáva te radynavpe khetané sarénca tuménca. I adiáke-pac' tumé radynénpe, i radynénpe mánca. Ne me radynava pes dre Raste – Devléste Isusóste te bičhavav syg ke tumé Ximas, sob (kaj) i me, syr me udžinava nevipen pal tuménde, te javav adiáke-pac' podrikirdo dro dúho (fáno). Pal-dová so mánde nane nikonés adasaves (nikón adasavó), syr jov isyn, kon saré iléstyr pekelape (dela tugi) pal tumaré réndy (diély). Saré pekenape (zabotisona) pal péste, a na pal dová, so trej Isusóske Xristosóske. Ne syr jov (Xima) pes sykadiá, tumé kokoré džinéna, pal-dová so jov sys khetané mánca, syr čhavó dadésa, dynarindiá vaš bahtalý zan (zvies'). Paldavá me kamám te bičhavav les ke tumé, syr me javáva te džináv, so javéla duredýr mánca: ne me drieván patiáva dre Raste-Devléste, so me i kokoró javáva ke tumé; ne me vykedyjom, so trej te bičhavav ke tumé Jepafroditos, pšalés i miré males (drugos) pir butý, savés tumé bičhadé te pekelpe pal mánde; pal-dová so jov drieván mangdiá te dykhél sarén tumen i pharés piridživelas pal dová, so tumé šundlé pal léskiro nasvalypen; a jov drieván sys nasvaló, gin ke meribén, ne Devél potangindia les, i na jekhe les, ne adiáke-pac' i man, sob (kaj) te na javél mánde túga pe túga. I paldavá me sygedýr bičhadjom les ke tumé, sob (kaj), kiéli tumé les nevéstyr dykhéna, te obradynenpe, i me javáva nábut te tuginav. Prilén les paldavá radymása dro jekhipén Rása-Devlésa i kerén patýv adasavé manušénge, syr jov isyn; pal-dová so jov na tangindia péskiro džiibén ke meribén i kerdiá butý bi darákiro vaš Xristosóske, sob (kaj) te del vast mánge, syr tumé na mogindlé davá te kerén. Kakaná, pšalále miré, radynénpe dro jekhipén Rása-Devlésa: mánge nane pharó te čhinav tuménge pal davá-pac', ne vaš tuménge davá isyn sykliaiben. Rakhénpe manušéndyr, savé keréna bibáht, syr džukela, rakhénpe xoliamé manušéndyr, rakhénpe xohané občhinybnastyr. Pal-dová so občhinyben davá isyn ame tuménca, savé mangénape Devléske Léskire Duhósa, i šarasape dro jekhipén Isusósa Xristosósa, i ame na drieván patiása dre loč (plot'), mek i me adiáke-pac' drieván patiáva dre loč; a kóli vari-kon javír kaméla te patial drieván dre loč, tedy mánde isyn butýr saštypen: me sómas občhindlo pe ohtóto (bidujéngiro déšto) dyvés, syr bijandyjom, me som Izrailjoskire rodóstyr, i me som Vieniaminóskire rodycóstyr, Judo Judendyr, i me som Farisiejo pir sykliakiribén; me sómas baró vérgo i xačkirdé ilésa tradyjom Xristososkiri Khangirí i pir Zakonoskiro čačipén me som bidošakiro; ne so vaš mánge sys l'góta, me lyjom te ginav pal xasibén vaš Xristosóske. I me ginava saró javír pal xasibén vaš dová, sob (kaj) butedýr te udžinav miré Ras-Devlés, Isusós Xristosós, vaš Léske me saréstyr otphendjompe, me saró ginava pal šuma (smieti), sob (kaj) mánge jekh te javav dro jekhipén Xristosósa; i te javav sarésa dro jekhipén Lésa na péskire čačipnása; savó isyn Zakonóstyr, ne čačipnása, savó isyn pir patiaibén dro Xristosóste, čačipnása, savó isyn Devléstyr pir patiaibén, sob (kaj) te udžinav Les i Léskire otdžidiakiribnaskiri zor, i te javav khetané dre Léskire mén'ki, i te merav, syr Jov. Sob (kaj) féni (tóka) te doresav otdžidiakiriben muléndyr ke džiibén. Ne pal-dová, so me ničý saró davá na dorescjom, i me na som kakaná bidošakiro, ne me pričhuvava zor te lathav, ci na lathava i me dová, pal so i lathiá man Isúso Xristóso vaš Péske. Pšalále, me ginava, so kokoró me na lathjom, ne jekh, so me bistrava dová, so jaciápe pale, i me džáva angíl, me prastava ke celjo, ke naj vučedýr patýv, vaš saví Devél khardiá man pir Xristosóste Isusóste. I adákicy, pe kicý améndyr isyn bidošakire manušá, lénge adiáke trej te duminen, a kóli tumé pal davá pe javír duminéna, to i davá Devél otčhakirela tuménge. Ne dová, so ame prilyjam, adiáke i ame javása te duminas i te dživás. Pšalále, pričhuvén zor te kerén adiáke-pac' syr me, i dykhén pe odolé manušénde, savé keréna dová-pac', syr i tumé duminéna pal aménde; pal-dová so but manušá, pal savénde me častes rakirdjom tuménge, a kakaná i jasvénca me rakiráva, keréna syr vérgi Xristosóskire meribnáske pe trušúl: jone isyn terdé pe drom ke xasibén, léngiro devel isyn kužum (želudko), i léngiri sláva isyn dre ladž, jone duminéna jekh pal dalé svetóskire réndy: pal-dová so ame sam džiibnarja themestyr (štetóstyr), savó isyn dro Bolybnáskiro Rajo, odothýr ame užakirasa i amaré Zrakhibnaris Ras-Devlés, Isusós Xristosós, Savó paruvela amaré xasibnýtka masá adiáke, so jov javéla te zdžal pe Léskire masá zorjása, savjása Jov čhudiá telé saró angíl Péste. I adiáke, miré dróga, savén me kamám te dykháv, tumé san mirí rádyma i baht, terdjon zoralés dro péskiro džiibén dre Raste – Devléste. Mangáva Jevodija, i Sintihiias te duminen adiáke-pac' dre Raste-Devléste; i me mangáva i tut, miro čačunó mal pir butý, te des vast lénge, adalé džuvlienge, savé lynepe te rosphenén bahtalý zan (zvies') khetané mánca, i Klimientosa i javire miré malenca pir butý, savengire lavá isyn dre Devléskire-džiibnáskiri lylvarí. Radynénpe ŭsády (sak) dro tumaró jekhipén Rása-Devlésa: i me nevéstyr phenáva: “Radynénpe.” Mek saré manušá te džinén tumaré-iléskiro kovlypen, Raj Devél isyn sarésa pašýl. Na phagiren šeró péske ni pal so, ne kažno mólo, kiéli tumé mangénape Devléske, mangénpe parikiribnasa te otčhakiren péskire patierja (molitvy) angíl Devléste; i Devléskiro ramánjo (miro), savó isyn vučedýr kažnoné amaré džinybnastyr, javéla te rakhél tumaré ile i godý dro jekhipén Isusósa Xristosósa. I ake, pšalále miré, saró, so isyn čačunó, so nane xohanó, so isyn patiaibnýtko, so isyn žužó, so isyn mol te sykavél patýv, so isyn patyvalo, kóli isyn vari-savó lačhipén i vari-savó šaribén, jekh pal davá tumé duminen. Saró, so tumé vysyklyne, i so prilyné i šundlé, ci so tumé dykhné dre mánde, dová i kerén, i Devléskiro ramánjo (miro) javéla tuménca. Me drieván obradyndjompe dro jekhipén Rása-Devlésa, so tumé kakaná lyné te pekenpe (te zabotison) pal mánde, tumé i angledýr peknepe, ne tuménge na sys saštypen (vozmožnost'/vakancyja). Me rakiráva davá na paldová, so mánge vari-so trej; ne paldová so me prisyklyjom te javav rado sareske, so mánde isyn. Me džináv te dživáv i dro čororipen i dro mištypén, me vysyklyjom sareske i dro saró, te javav čalo i te vyrikirav bokh, te javav dro mištypén i te javav dro nauhtylyben. Me saró mogináva te vyrikirav zorjása, saví Xristóso déla mánge. Ne tumé šukár kerdé, so dyné vast, kiéli mánde sys bída. Ne i tumé džinéna, Filipiicale, so syr me lyjom te rosphenav bahtalý zan (zvies'), kiéli me vygijom Makiedonijatyr, ni jekh khangirí na sys khetané mánca i na pomogindia mánge lovenca pšaléndyr i na prilyjá man apríč jekhe tuménde; Tumé adiáke-pac' i dre Fiesalonika na jekh mólo bičhavenas mánge pe džiibén. Me rakiráva davá na vaš dová, so me rodyjom lové pšaléndyr, ne me kamám, sob (kaj) tumé te kerén dová, so janéla tuménge lačhipén. Me dorescjom butýr, syr mánge trej, me som rado, kiéli dorescjom Jepafoditostyr saró, so tumé bičhadé mánge sýrby gudló aromato, syr drógo svénto dyibén, savó isyn lačhó Devléske. Ne mek miro Devél te pherdiakirel saró, so tuménge trej pir Péskiro barvalypén dre sláva pir Isusóste Xristosóste. Mek te javél sláva amaré Devléske i Dadéske pe saré viéki. Amín'. Piridén “ramánjo” saré Isusóskire Xristosóskire sventonenge. Adiáke-pac' saró piridena ‘ramánjo’ tuménge saré pšála, savé isyn khetané mánca, piridena “ramanie” tuménge. Piridena “ramánjo” tuménge saré svénta, ne naj butýr khieningoskire (kiesarjoskire) kheréstyr. Mek bahtalypén amaré Ráskire-Devléskiro, Isusóskire Xristosóskiro te javél sarénca tuménca. Amín'. Pavlístyr, Isusóskire Xristosóskire Apostolostyr, savés vykedyjá Devél, i pšalestyr Ximastyr (Timofiejostyr), sventoné i patiaibnytkone pšalénge pir jekhipén dre Isusóste Xristosóste, savé isyn ke Kolosy. Mek te javél bahtalypén i ramánjo (miro) tuménge amaré Devléstyr-Dadéstyr; Rástyr-Devléstyr, Isusóstyr Xristosostyr. Ame parikirasa Devléske, amaré Ráskire-Devléskire, Isusóskire Xristosóskire Dadés, kažno mólo, kiéli ame mangasape Devléske pal tuménde, ame šundiám pal tumaró patiaibén dre Isusóste Xristosóste i pal patýv ke javír manušá, saví tuménde isyn ke saré svénta manušá, vaš nadiéia, so užakiréla tumen dro Bolybnáskiro Rajo, pal so tumé angledýr šundlé dre čačuné lavá bahtalé zaniatyr (zviesiatyr), saví javdiá i ke tumé i saví rozdžalape pir saró svéto i janéla bahtiakiribén i barjola, syr i maškír tuménde, dolé-pac' dyveséstyr, kiéli tumé šundlé i udžindlé Devléskiro bahtalypén, savó isyn dro čačipén; syr tumé vysyklyne Jepafrasostyr, amaré drogoné malestyr-pisharistyr pir butý, savó isyn čačunó Xristosóskiro dynári (služytieljo) vaš tuménge, savó i rosphendiá aménge pal patýv ke javír manušá, saví Dúho (Fáno) dyjá tuménge. Paldavá i ame dolé dyveséstyr, syr šundiám pal davá, saró časo mangasape Devléske pal tuménde, i ame mangasa, sob (kaj) Devél te del tuménge te udžinel Léskire vólia, godý i ĥalyibén, so déla Svénto Dúho (Fáno). Sob (kaj) tumé te dživén, syr isyn lačhó Devléske, i dro saró te kerén kučes Léske, i te kerén lačhipén dre saré réndy i te udžines butýr pal Devléste, sob (kaj) Léskiri bari zor te del tuménge i te kerél tumen zoralenca, voliakirenca i bahtalenca, parikirí Dadéske, Savó khardiá tumen ke dud khetané saré sventoné manušénca, Savó zrakhciá amen kamlypnaskire (ciamlypnaskire) zorjátyr i jandiá dro Léskire-Drogoné Čhavéskiro Kralipén: Savó vykindia (vyrakhcia) amen Péskire Ratésa i otmekciá amaré gréhi; Hristóso isyn Devléskiri patrín (óbrazo). Jov sykavéla Péskire andratuné čačipnása nabiciale Devlés. Xristóso sys bijandlo angledýr saréstyr, so sys sozdynó; pir Léste Devél sozdyjá saró pe bolybén i pe phuv, saró, so isyn dyc'lo (bicialó) i dová, so nane dyc'lo, ci trony, kaj králja isyn bešté, ci khieningi, ci baré raja, ci svetoskiro zoralypén; saró pir Léste i vaš Léske isyn sozdynó. I Jov Kokoró sys angledýr saréstyr, syr saró, so sys sozdynó, isyn dro jekhipén Lésa i pir Léste saró rikirélape. Jov isyn Khangirjákire – Duhoskiro Šeró, Jov isyn Anglatunó, Jekh, Savó otdžidyjá, sob (kaj) Léske te rikirél upralypén dro saró: pal-dová so davá sys lačhó Dadéske, sob (kaj) dre Čhavéste te javél saró Devléskiro pherdypen, i sob (kaj) pir Léste te kerél ramánjo (miro) Pésa dro saró, so isyn pe phuv, i dová, so isyn pe bolybén, Léskire-Čhavéskire ratésa, savó Jov pročhudia pe trušúl. I tumen, savé sánas vari-kiéli dur Devléstyr i vérgi Devléske, kiéli tyrdyja tumen te kerén bedytka réndy. Ne kakaná Devél kerdiá ramánjo (miro) tuménca, kiéli Xristóso Péskire masengire ločasa progijá pir meribén, sob (kaj) te čhuvén tumen angíl Léste sventonenca, i bibangiakirenca i bidošakirenca, kóli tumé san zoralé dro dúho (fáno) te dživén pir patiaibén i na otdžana dre nadiéia bahtalé zaniatyr (zviesiatyr), saví tumé šundlé, i saví rosphenelape pir saró džidó, so sys sozdynó tel bolybén, saví Me, Pávli, lyjom te rosphenav. Kakaná me radynavape dre miré mén'ki pal tuménde, kóli Xristosóskire mén'ki na uhtyldé mánge, tedy len me dočhuvava miré ločasa vaš Léskire mén'ki Léskire Masenge, Save isyn Khangirí. Me jacjom Devléskire-khangirjákiro dynarisa pir Devléskiro zadyiben, savó Jov dyjá mánge vaš tuménge, sob (kaj) me te keráv saró pir Léskiro lav; davá isyn garadó čačipén, savó sys nadžindlo manušénge saré rodendyr i viekendyr, ne kakaná Devél sykadiá Péskire manušénge; savénge kamdiá Devél te piridel džinybén, savó isyn slavakiro barvalypén maškír Najudénde dro kadavá garadó čačipén, savó isyn Xristóso dre tuménde, Jov isyn tumarí nadiéia dre sláva: Saveskiro lav ame rosphenasa, ame dasa godý kažnoné manušéske i sykliakirasa kažnoné džinybnaske, sob (kaj) ame te čhuvas kažnoné stalone patiaibnaskires dro jekhipén Xristosósa. Vaš davá i me adiáke-pac' keráva butý i keráva Léskire zorjása, saví isyn mánde Léstyr, i saví keréla butý dre mánde. Me kamám, sob (kaj) tumé te džinén, syr me maravpe pal tuménde i pal odolénde, savé dživéna ke Laodikija i pal sarénde, savé na dykhné man, savó me som, sob (kaj) léngire ile te javén podrikirde, sob (kaj) jone te javén khetané dre patýv ke javír manušá vaš kažno barvalypén, te udžinén pherdés Devléskiro garadó čačipén pal Xristosóste, dre Savéste isyn garadó saró kučipén pir god'varipen i pir džinybén. I me phenáva davá vaš dová, sob (kaj) nikón te na xohavél tumen péskire xohané lavénca. Mek me na som tuménca kakaná, ne me som tuménca miré duhósa. Paldavá, syr tumé udžindlé Isusós Xristosós syr Ras-Devlés, adiáke tumé i dživén dro jekhipén Lésa, Javén bi kunipnaskire (tvarda) dre Léste i barjon pir patiaibén dre Léste, syr tumen sykliakirdé, jačénpe dre patiaibén parikiribnasa. Dykhén kučes, sob (kaj) nijékh te na zlydžal tumen patiaibnastyr filosofijasa i xohaibnasa, savé pridumindle manušá, i savé sčhude pe svetóskire dúmy, a na pe Xristosóskiro sykliakiribén. Pal-dová so dre Léste dživéla Devlýtko pherdypen dre manušýtka masá pir dúho (fáno), i tuménde isyn pherdó džiibén dro jekhipén Lésa, Savó isyn Šeraló pe saré baré rande i svetoskiro zoralypén, dro jekhipén Lésa tumé sánas občhindlé na manušytkoné vasténca, kiéli lenape krig grehoskire ločakire masá občhinybnasa, a Xristosóskire-duhóskire občhinybnasa; kiéli tumé boldepe, to tumé sýrby myné khetané Lésa, dre Léste tumé i otdžidyne pir patiaibén dre Devléskiri zor, Savó otdžidiakirdiá Xristosós muléndyr. I tumen, savé sys mulé dre tumaré gréhi i dre tumaré-ločakiro občhinyben, Devél otdžidiakirdiá khetané Lésa i otmekciá amaré saré gréhi; Jov otparudia sykliaibnasa saré priphenybená Zakonóstyr, so sys čhindlé vastésa, savé sys proti aménde, i Jov ukedyja davá saró, i primardia les ke trušúl; Hristóso otkedyja zor baré randyr i svetóskire zoralypnastyr i otdyjá len pe manušýtko ladž, i trušuleskire zorjása lyjá zor pe lénde. Mek nikón te na sendinel tumen pal xabén ci pal pibén, ci pal vari-savó svénko, ci sávato (subóta), Saró davá isyn sýrby zer (tienjo) doléstyr, so javéla angíl, ne čačipén isyn dre Xristosóskire Masá. Mek nijékh te na zlydžal tumen péskire xohané kandypnasa i mangipnasa Jangolenge, i savó patiála dro dová, so jov na dykhciá, – dasavé manušá phutjona ivjá (darmes) péskire manušytkoné god'varipnasa, i jone na rikirenape pal Xristosóste, Savó isyn Šeró sarénge, Savó rikirlape i čaliakirelape Péskire džidé sphandypnasa i pašenca, i, Savó barjola adiáke, syr trej Devléske. Kóli tumé myné khetané Xristosósa vaš dalé svetóskire-džiibnytka prisykliaibena, tedy sóske tumé usajékh adiáke-pac' sphandena pes manušytkoné priphenybnenca? “Na ker, na xa, na le”, saró davá kokoró péstyr xasiakiréla zor: pal-dová so saró davá isyn pir manušýtko priphenybén i sykliakiribén, Davá lénde isyn jekh dyc'lo god'varipen dro manušéngiro vydumindlo dynaribén, dro xohanó kandypen i péskire-masengire mén'ki, ne jone isyn ničý na mol te obrikiren léngire-ločakiro vykedyiben. I adiáke, kóli tumé otdžidyne muléndyr Xristosósa, tedy pričhuvén zor te dživén pir čačipén, savó isyn dro Bolybnáskiro Rajo, kaj Xristóso isyn beštó pir čačó (pravo) vast Devléstyr Dadéstyr. Duminen (den godý péske) pal dová, so isyn dro Bolybnáskiro Rajo, ne na pal dová, so isyn pe phuv. Pal-dová so tumé myné vaš davá svetoskiro džiibén i kakaná tumaró džiibén isyn garadó Xristosósa dre Devléste. Kiéli javéla Xristóso, dre Savéste isyn tumaró džiibén, tedy i tumé javéna khetané Lésa dre sláva. Muliakirén tumaré nalačhé phuvitka réndy: džiibén dro bléndo, magiripén, tyrdypén ke grého, nalačhé mysli i zevlynypén, saró davá isyn dynaribén idolénge. Paldavá i javéla Devléskiri xolý pe odolé manušénde, savé Les na kandéna. Vari-kiéli i tumé adiáke-pac' kerdé, kiéli tumé dživdé dre kadalé gréhi. Ne kakaná tumé mekén saró: xoliakiribén, mižehipen (jaros'), obrakiriben, ladžaipnytka lavá te na phenén tumaré uštá. Na xohaven jekh jekhéske, pal-dová so tumé otphendlepe phurané péskire džiibnastyr saré léskire rendénca. Tumé pirikerde péskiro phuranó džiibén pe nevó, savó jačélape nevó pir džinybén pal Kodoleste, Savó sozdyjá les pir Péskiri patrín (óbrazo); paldavá nane butýr ni Jelinos (Balames), ni Judos, ni občhinyben, ni naobčhinyben, ni bedone-nacyjakire manušés, ni Skifos, ni dynarís, ni vol'none manušés, ne saró i dro saró isyn Xristóso. I paldavá pirikeren pes dre manušénde, savén Devél vykedyjá: javén svénta, dróga, javén tangipnýtka i lačhé-ilytka, bišaribnaskire, kovlé-ilýtka, dlugone vyrikiribnasa; iavén kovlé jekh ke jekh i primangen jekh jekhéske, kóli vari-kon pe vari-konéste rikiréla xolý; to syr Xristóso primangdia tuménge, adiáke-pac' i tumé kerén. Ke saró davá dočhuven patýv ke javír manušá, saví isyn fundámiento vaš čačunó sarengiro khetaniakiriben. I mek te javél dre tumaré ile Devléskiro ramánjo (miro), ke savó tumé sánas khardé syr pašá Jekhe Masendyr, parikirén pal davá. Mek te dživél dre tuménde saré barvalypnasa Xristosóskiro lav, kiéli tumé sykliakiréna i déna godý jekh jekhéske psalmenca, lačhé lavénca, devlytkoné gilienca, bagán Devléske parikiribnasa dre tumaré ile. I saró, sob (kaj) tumé te na kerén, lavésa ci rendosa, saró kerén vaš Ráskiro-Devléskiro, Isusóskire Xristosóskiro lav, parikirén Devléske Dadéske pir Léste. Džuvliale, kandén Peskiren romen, syr davá trej te javél dre Raste – Devléste. Muršále, javén lačhé ke Péskire romniá, i na javén pharé lénca. Čhavé, kandén péskire daden dro saró, pal-dová so davá trej Ráske Devléske. Dadole, na ĥazdén xolý dre péskire čhavénde, sob (kaj) jone te na perén dro dúho (fáno). Pisharjale, kandén dro saró péskire phuvjákire xulan dre loč, dynarinén (služynen) lénge, na vaš dová, sob (kaj) te šarén manušá, ne kerén davá saré iléstyr. I saró, so tumé keréna, kerén saré iléstyr, syr vaš Ráske-Devléske, ne na, syr vaš manušénge, i džinén, so Raj Devél otdéla lačhipnása tuménge, so Jov skedyjá vaš Péskire manušénge; pal-dová so tumé dynarinena Ráske-Devléske Xristosóske. Paldová so, kon keréla fuipén, doreséla kára pal fuipén, so jov kerdiá, na dykhí pe davá, kon adavá manúš isyn. Rajale, javén čačuné ke pishárja (raby), ripirén pal dová, so i tuménde isyn Xuláj dro Bolybnáskiro Rajo. Mangénpe Devléske saró časo, javén pe stréga parikiribnasa; mangénpe Devléske khetané adiáke-pac' pal aménde, sob (kaj) Devél te psiravel (te otphandel) aménge vudár vaš lav te rosphenas Xristosóskiro garadó čačipén, pal savó me som beštó dro štaribén, sob (kaj) me te moginav te rakiráv manušénge, adiáke syr trej. Dživén i lydžán pes god'vares napatiaibnaskirenca, pričhuvén iló ke kažno vakancyja (slučajo). Mek te javél tumaró lav saró časo bahtalypnasa i pričhude londesa, sob (kaj) tumé te džinén, syr kažnoné manušéske te otphenen. Pal mánde saró rosphenéla tuménge Tihiko, drógo pšal i patiaibnýtko khangirjákiro dynári i drúgo (mal) pir butý dre Raste-Devléste, savés me bičhadjom ke tumé vaš dová, sob (kaj) jov te udžinel pal tumaré réndy (diély) i, sob (kaj) te podrikirél tumaré ile, jov javéla ke tumé khetané Anisimosa, amaré patiaibnytkone i drogoné pšalesa, savó isyn tuméndyr: jone rosphenena tuménge pal saró, syr ame adáj sam. Piridela “ramanie” tuménge Aristarho, savó isyn beštó khetané mánca, i Marko Varnavaskiro plimieniko (bano), pal savéste me tuménge čhindjom; kóli jov javéla ke tumé, prilén les, i Isúso, savés prokharde Iusto, jone trindžine isyn Judendyr maškír butende malende pir butý, savé kerdé butý vaš Devléskiro Kralipén, i savé podrikirenas man. Piridela “ramánjo” tuménge tumaró Jepafraso, Isusóskire-Xristosóskiro pishári, savó saró časo mangelape Devléske zoralés pal tuménde, sob (kaj) tumé te javén tvarda i zoralé dro patiaibén i te kerén saró pir Devléskiri vólia. Paldavá me dophenava pal léste, so jov keréla drieván pharí butý pal tuménde i pal odolénde, savé dživéna ke Laodikija i ke Iierapoljo, piridela “ramánjo” tuménge Luka, amaró drógo sastypnari (vračo), i adiáke-pac' Dimaso. Piridén “ramánjo” i miré pšalénge dre Laodikija, i Nimfanoske, i léskire kheritkoné khangirjake, kiéli javéna te ginen davá lyl tuménde, mek te proginen les i dre khangirí Laodikiicenge, a dová lyl, savó Laodikijatyr, proginen i tumé. I phenén Arhiposke, mek jov te kerél syr trej dynaribén, savó jov prilyjá dre Raste-Devléste. Davá piridyiben “ramánjo” isyn čhindló miré, Pavliskire vastésa. Ripiren, so me som beštó dro štaribén. Mek te javél bahtalypén sarénca tuménca. Amín'. Pavlístyr i Siluanostyr i Ximastyr, Fiesalonikiicengire-khangirjákire skedyibnaske, savó isyn Devléskire Dadéskiro i Ráskire-Devléskiro, Isusóskiro Xristosóskiro: mek te javél bahtalypén tuménge i ramánjo (miro). Ame ŭsády (sak) parikirasa Devléske pal sarénde tuménde, i ripirasa tumen dro amaró mangipén Devléske, kiéli ame ripirasa tumen angíl amaré Devléste Dadéste pal tumarí butý pir tumaró patiaibén i patýv ke javír manušá, ame džinása pal tumaró vyrikiriben te užakiras lačhipén amaré Rástyr-Devléstyr, Isusóstyr Xristosostyr angíl amaré Devléste-Dadéste, ame džinása, miré dróga, so Devléske jačné dróga tumé, i Jov vykedyjá tumen, pal-dová so amaró rosphenyben pal bahtalý zan (zvies') sys tuménde na so jekhe lavénca, ne i zorjása i Sventoné Duhósa buté dophenybnasa, syr tumé kokoré džinéna, savé ame sámas vaš tuménge. I tumé lyné te kerén adiáke, syr i ame, i syr Raj Devél, i prilyné Devléskiro lav buté pharipnenca i radymása, savó dyjá tuménge Svénto Dúho (Fáno), adiáke, so tumé jačné primierosa (sykaibnasa) vaš saré patiaibnaskirenge ke Makiedonija i ke Ahaija. Pal-dová so tuméndyr jaciá džindló manušénge Devléskiro lav na dre jekh Makiedonija i Ahaija, ne tumaró patiaibén dre Devléste jaciá džindló pir saré štéty, pal-dová so aménge ni palsó na trej te rosphenén; pal-dová so jone kokoré rosphendlé pal aménde, syr tumé prilyné amen, kiéli ame javdiám ke tumé: i syr tumé risiné ke Devél idolendyr, sob (kaj) te kerén svénto butý džidé i čačuné Devléske, i te užakiren Léskire Čhavés, savó javéla Bolybnáskire Rajostyr, Saves Jov otdžidiakirdiá muléndyr, Isusós, Savó zrakhéla amen Devléskire xoliátyr, saví javéla. Pšalále, tumé džinéna, kokoré, so amaró javiben ke tumé na sys ivjá (naprásnes), a syr tumé džinéna, so angíl davá aménge prigijape but te piridživas mén'ki i ladžaipén dre Filipy, ne Devél dyjá aménge zor te rosphenas Léskiri bahtalý zan, na dykhí pe saró pharipén proti aménde. Pal-dová so dro amaró sykliakiribén nane nisaví doš, ni nisaví nažužy myslia, ni xohaibén, ne, syr Devél vykedyjá amen vaš davá, sob (kaj) te rosphenas bahtalý zan (zvies'), adiáke ame i rakirasa na vaš manušéngiro iló, ne syr trej Devléske, Savó propatiakirela amaré ile. Tumé džinéna, so ame nijékhvar na sámas angíl tuménde xohané rakiribnasa, ci vari-savé bokhasa ke lové vaš péske: Devél isyn jakhítko (svidietieljo) dalé sareske. Ame na rodasa manušýtko šaribén, ni tuméndyr, ni javirendyr, ame mogindiam te javas ke tumé minasa syr Xristosóskire Apóstoly, ne ame sámas štyl (tiha) maškír tuménde, adiáke syr daj laskasa otlydžalape péskire čhavénca, adiáke ame, baré tyrdypnastyr ke tumé, zakamdiam te piridas tuménge na jekh so Devléskiri bahtalý zan (zvies'), ne i amaró džiibén, adiáke tumé san dróga aménge. Pal-dová so tumé ripirena amarí butý i khinypen: ame kerdiám butý ratý i dyvesé, sob (kaj) te na javas dro pharipén tuménge, ame rosphenasas Devléskiri bahtalý zan tuménge. Tumé i Devél san jakhítka aménge, so syr ame sámas maškír tuménde, saró kerdiám syr svénta i čačuné i bidošengire. Pal-dová so tumé džinéna, kiéli ame otlydžasaspe tuménca, syr dad džinéla péskire čhavén: ame sykliakirdiam kažnoné tuméndyr i podrikirdiam i mangdiam tumen; sob (kaj) tumé te dživén, syr trej Devléske, Savó khardiá tumen dre Léskiro Kralipén i sláva. Paldavá i ame adiáke-pac' ŭsády (sak) parikirasa Devléske, so tumé prilyné Devléskiro lav, savó ame rospendiam, tumé prilyné les na sýrby manušéngiro lav, ne syr Devléskiro lav, pir čačipén, savó keréla butý dre tuménde patiaibnaskirende. Paldavá so tuménca, pšalále, kerdiápe dová-pac', so i Devléskire khangir'jenca, savé isyn ke Judéia dre Isusóste Xristosóste, adiáke-pac' i péskire manušá menčyndle tumen, syr i len Judy, kadalé manušá zamardé (muliakirdé) i Ras-Devlés, Isusós i prorokén, i amen, jone nane lačhé Devléske, i isyn vérgi (vrogi) saré manušénge, savé sys terdé pe drom te rakiras Najudénge pal zrakhibén, i pir davá saró keréna baredýr péskire gréhi: ne kakaná Devléskiri xolý javdiá pe lénde. Ne ame, pšalále, syr roziaciampe tuménca pe nabaró časo (cýro) mósa, ne na ilésa, ame pričhudiam zor, i kerasas saró, sob (kaj) te dykhaspe tuménca; paldavá me drieván kamdjom te javas ke tumé, až me, Pávli, jekh javír mólo skedavaspe te javav ke tumé, ne nálačho na mekciá amen. Kon moginéla te javél amaré lačhé užakiribnasa, ci radymása, ci šaribnytkone viankasa (koronasa)? Ci davá isyn na tumé angíl amaré Raste – Devléste, Isusóste Xristosóste, syr Jov javéla. Tumé san amarí sláva i rádyma. Pal-dová so ame na mogindiam butýr te vyrikiras, ame zakamdiam te jačaspe ke Afiny jekhdžine, i bičhadiam Ximas, amaré pšalés i males pir butý te rosphenel Xristososkiri bahtalý zan (zvies'), sob (kaj) jov te podrikirél zoraledýr tumen i te podrikirél tumaró dúho (fáno) dro patiaibén, sob (kaj) nijékh tuméndyr te na kuninelpe dre dalé bidy: pal-dová so tumé kokoré džinéna, so aménge adiáke treindiá te javél pir Devléskiri vólia; pal-dová so, kiéli ame sámas ke tumé, zaĥaredyr rakirdiam tuménge, so aménde javéla bari bída, syr i vygijá, i tumé kokoré džinéna pal davá. Pal-dová i me adiáke-pac' na mogindjom te vyrikirav butýr i bičhadjom Ximas te udžinel pal tumaró patiaibén, sob (kaj) te na zlydžal tumen nálačho i sarí amarí butý vaš Devléske te na javél ivjá (naprásnes). Ne kakaná, kiéli Xima javdiá tuméndyr ke ame, jov rosphendiá aménge lačhó nevipen pal tumaró patiaibén i patýv ke javír manušá, i so tumé saró časo ripirena pal aménde, i adiáke-pac' nevéstyr kaména te dykhén amen, syr i ame tumen, Tedy, pšalále, ame sámas drieván podrikirde pir tumaró patiaibén dre amarí bída i pharó džiibén, Paldavá ame kakaná sam čačunés džidé, kóli tumé san tvardes terdé dro tumaró patiaibén dre Raste-Devléste. Pal-dová so, syr kakaná ame moginasa te parikiras Devléske pal tuménde, pal sarí rádyma, savjása ame radynasape pal tuménde angíl amaré Devléste, rat i dyvés ame mangasape Devléske pal-dová, sob (kaj) nevéstyr te dykhaspe tuménca i butýr te das dová, so na uhtýlla tumaré patiaibnaske. Ne mek amaró Devél i Dad Kokoró i amaró Raj Devél, Isúso Xristóso te čhuvél drom aménge ke tumé. Ne mek Raj Devél te pherdiakirel tumaró iló jekh ke jekh i ke saré manušá iščo (inké) baredýr laskasa, saví aménde isyn ke tumé, sob (kaj) te podrikirél tumaré ile te javén tumé bidošakire i svénta angíl amaré Devléste i Dadéste, kiéli javéla amaró Raj Devél, Isúso Xristóso saré Péskire sventonenca. Amín'. Pšalále, kakaná ame mangasa i primangasa tumen vaš Isusóske Xristosóske, so dová, so kakaná tumé vysyklyne améndyr, syr trej te dživén i te kerén pir čačipén Devléske, sob (kaj) adiáke i duredýr te dživén. Tumé džinéna, savé priphenybená ame dyjam tuménge amaré Rástyr-Devléstyr Isusóstyr. Devél vykedéla, sob (kaj) tumé te javén svénta i te rakhénpe džiibnastyr bi sovlakiro; sob (kaj) kažno manúš tuméndyr te džinél, syr te zrikirel péskiro khoró nalačhé tyrdypnastyr dre svyntyma i žužypen (čystota), i te na poddenpe grehitkoné tyrdypnaske, syr davá keréna Náiudy, savé na džinéna Devlés, sob (kaj) nijékh tuméndyr te na kerél čoripén péskire pšaléske i te na barvaljol pal léskiro dopatiaiben, pal dalé gréhi Devél čhuvéla kára, syr angledýr ame rakirdiam tuménge i dophenasas. Devél khardiá amen na ke nažužo džiibén, ne ke čačunó. I kóli vari-kon na priléla davá sykliakiribén, jov priléla na, so manušés, a Devlés, Savó i dyjá tuménge Péskiro Svénto Dúho (Fáno). Me ginava, so pal pšalengiri patýv na trej tuménge butýr te čhinav, pal-dová so Devél sykliakirdiá tumen kokoren te sykavén patýv jekh jekhéske. Tumé adiáke-pac' i keréna sarénge péskire pšalénge pir sarí Makiedonija; ne ame primangasa tumen, pšalále, te kerén adiáke butedýr; i te pričhuvén zor te dživén štylés, te dykhén kažno péskiro réndo, i te kerén butý péskire vasténca, syr ame rakirdiam tuménge angledýr; te dživén patyvales adiáke, sob (kaj) manušá, savé isyn nadevlytka, te kutiakiren tumen, i sob (kaj) tumé te na javén vužle ni dro so javire manušénge. Pšalále, me kamám, sob (kaj) tumé te džinén saró čačipén, pal manušénde, savé myné, sob (kaj) tumé na tuginen, syr javír manušá, savénde nane nadiéia pal viéčno džiibén. Ne kóli ame patiása, so Isúso myjá i otdžidyjá muléndyr, tedy i manušén, savé myné patiaibnása dre Isusóste, Devél janéla pale khetané Lésa. Ame rakirasa davá tuménge Ráskire-Devléskire lavésa, so ame, savé javása džidé ke / žýko Xristosóskiro javiben, usajékh na javása angledýr odoléndyr, kon myjá; pal-dová so Raj Devél Kokoró javéla Bolybnáskire Rajostyr i Léskiro javiben sykavéla sarénge te šunén Arhangieloskiri zan, zoralý syr Devléskiro rógo (truba), i kon pérvo myjá patiaibnása dre Xristosóste, otdžidjola muléndyr; tén'či ame, seve javéna džidé dro dová časo, javása ĥazdyné phuvjátyr, khetané lénca pe óbloki te streninas (te pirilas) Ras-Devlés i ame saró časo javása khetané Lésa. Podrikiren jekh jekhés dalé lavénca. Pšalále, aménge na trej te čhinas tuménge, kiéli i dro savó časo davá javéla, pal-dová so tumé lačhés džinéna, so dyvés, kiéli javéla Xristóso, nikón na džinéla, Jov javéla syr čor ratiákiro. Kiéli manušá javéna te rakirén: “Ramánjo isyn i na trej te dares ni sóstyr”, syr jekhátyr (srázu) javéla pe lénde xasibén, syr dukhá džuvliáte, saví menčynelape, kiéli bijanéla tykné bijatós, i nikón léndyr na mieninela xasibén. Ne tumé, pšalále, na san dro kalypén (ciamlypén), sob (kaj) Dyvés te na uhtylel tumen syr čor: pal-dová so tumé saré san dudeskire i dyveseskire čhavé, ame na sam ratiakire i ciamlypnaskire čhavé. I adiáke, javása te rakhaspe, syr javír manušá davá keréna, rakhénpe i javén pe stréga, pal-dová so odolé, savé isyn suté, jone isyn suté ratiákiro, i odolé, kon p'jela, matjona ratiákiro; Ne ame, savé sam dyveseskire čhavé, javása te javas pe stréga, i javása te urjavas pe péste bron' patiaibnastyr i patyvatyr i, syr šljomo urjavasa pe šeró lačhó užakiribén pal zrakhibén; pal-dová so Devél na vykedyjá amen vaš xolý, ne sob (kaj) aménde te javél zrakhibén pir amaré Raste-Devléste, Isusóste Xristosóste, Savó myjá pal aménde, sob (kaj) te dživás khetané Lésa, ci javása ame te rakhaspe, ci javása suté. Paldavá podrikiren i sykliakirén jekh jekhés, syr tumé adiáke i keréna. Pšalále, ame mangasa tumen, kutiakiren (patyvakiren) odolé manušén, savé keréna butý tuménde, i kon isyn šeraló pe khangirí, i sykliakiréla tumen, kutiakiren len baré kovlypnasa pal lengira butý, saví jone keréna. Malynénpe (družynen) maškír péste. Ame primangasa tumen, pšalále, sykliakirén odolé manušén, savé na kaména te kerén butý, podrikiren dúho (fáno) odolénge, savé na zoralés patiána, den vast odolénge, savénde nane zor, vyrikiren sarén. Dykhén, sob (kaj) nikón te na kerél nikonéske čoripén pale pal čoripén, ne ŭsády (sak) kerén lačhipén jekh jekhéske i saré manušénge, tumé usady (sak) radynénpe; Mangénpe Devléske saró časo; parikirén Devléske pal saró, pal-dová so davá isyn Devléskiri vólia pal tuménde, saví isyn dro jekhipén; na mud'kiren Sventoné-Duhoskiri jag, na dykhén vučipnástyr pe prorokengiro lav; ne sprobinen saró, rikirén zoralés ke lačhipén. Rakhénpe kažnoné fuipnastyr. Mek Devél, Savó déla ramánjo, te kerél tumen sventonenca dro saró, sob (kaj) tumaró dúho (fáno), iló i masá te javén bidošakire, kiéli javéla amaró Raj Devél, Isúso Xristóso. Odová, Kon kharéla tumen, isyn patiaibnýtko i keréla dová. Pšalále, mangénpe Devléske pal aménde. Piridén “dobridim” i “ramánjo” saré pšalénge sventoné čamudypnasa. Me sovlahava tumen Rása-Devlésa te proginen kadavá lyl saré sventoné pšalénge. Mek bahtalypén amaré Ráskire-Devléskiro, Isusóskire Xristosóskiro te javél tuménca. Pavlístyr, Siluanostyr i Ximastyr (Timofiejostyr) Fiesalonikiicengire-khangirjákire patiaibnaskirenge, savé isyn Devléskire, amaré Dadéskire i Ráskire-Devléskire, Isusóskire Xristosóskire manušá. Mek bahtalypén i ramánjo Devléstyr amaré Dadéstyr i Rástyr-Devléstyr, Isusóstyr Xristosostyr te javél tuménca. Pšalále, aménge trej saró časo te parikiras Devléske pal tuménde pir čačipén, pal-dová so tumarí patýv ke javír manušá barjola i tumarí patýv jekh ke jekh jačéla butedýr; adiáke, so ame kokoré šarasape tuménca pir Devléskire khangirja tumaré vyrikiribnasa i patiaibnása dre saré tradypena i bidy, savé tumé piridživde; davá isyn dophenybén doléske, so javéla čačunó Devléskiro séndo, sob (kaj) tumé te javén mol te zadžán dro Devléskiro Kralipén, vaš savó tumé i menčynenape; Devél isyn čačunó, i Jov čhuvéla bída pe odolé manušénde, savé kerdé bída tuménge; i tuménge, savé piridživde bída pal patiaibén, Devél déla ramánjo (miro) khetané aménca, kiéli javéla Raj Devél, Isúso Bolybnáskire Rajostyr, Léskire zorjakire Jangolenca, iagása, saví javéla te xačol, Jov otdéla pale sendosa odolé manušénge, savé na prilyné Devlés i na kandyné amaré Ráskire-Devléskiri, Isusóskire Xristososkiri bahtalý zan (zvies'); pe lénde javéla kára Devléstyr viečnone xasibnasa i ugiibnasa Rástyr-Devléstyr i Léskire slavakire zorjátyr: dro dová dyvés, kiéli Jov javéla, sob (kaj) Jov te javél slavindlo maškír Péskire sventonende i maškír sarénde, kon upatiandyja, pal-dová so tumé upatiándyne amaré dophenybnaske. Vaš davá ame saró časo i mangasape Devléske pal tuménde, sob (kaj) amaró Devél te kerél tumen te javén mol dalé džiibnaske, vaš savó Jov prikhardia tumen i te kerél Péskire zorjása pir Péskiri láska kažno lačhó réndo pir patiaibén dre Léste, sob (kaj) te javél slavindlo amaré Ráskire-Devléskiro Isusóskiro lav dre tuménde, adiáke-pac' i tumé dre Léste pir bahtalypén amaré Devléskiro i Ráskire-Devléskiro, Isusóskire Xristosóskiro. Ame drieván mangasa tumen, pšalále, te na kuninenpe dro dová, so amaró Raj-Devél, Isúso Xristóso javéla, sob (kaj) te skedel amen ke Pe. I sob (kaj) tumé te na sygnjon te zdžan godiatyr ci i te na piridživen pal duhoskiro sykaibén, ni lavéstyr, ni lylestyr, sýrby davá ame bičhadiam, savé vyphenena, so Ráskire-Devléskiro dyvés kakaná javdiá. Dykhén, sob (kaj) nijékh te na xohavél tumen: pal-dová so kadavá dyvés na javéla ke / žýko dová časo, paka javéla otgiiben Devléstyr i javéla sykado grehengiro manúš, savéske trej te xasjol; jov javéla te džal proti saró svénto, so kharéna Devlésa ci sventymasa, adiáke, so jov bešéla dre Devléskiri Khangirí sýrby Devél i javéla te vydel pes pal Devléste. Naúšto tumé na ripirena, so me, kiéli sómas ke tumé, rakirdjom tuménge pal davá? I kakaná tumé džinéna, so na domekela les te sykavél pes dro léskiro časo. Pal-dová so čorahany bizladoskiri zor kakaná keréla butý, i jekh paka obrikirela saró davá, i jov javéla te kerél davá ke/žýko dová časo, paka léna les krig. I tedy bi zakonoskiro grehengiro manúš sykavéla pes, savés Raj Devél Isúso zamarela (muliakiréla) Péskire ušténca, kiéli javéla. Bizakonoskiro manúš javéla nalačheskire zorjása, jov javéla te sykavél bari zor, i xohané znamiénii (ĥiertyká) i dívy, jov javéla saré xohaibnasa vaš manušénge, savé xasjona pal dová, so jone na prilyné čačuný patýv vaš péskiro zrakhibén. I pal davá Devél bičhavéla zor lénge, sob (kaj) jone te perén tel došvale sykliakiribén i te patián xohaibnaske. Mek te javén sendindle saré, kon na zakamdiá te patial čačipnaske, ne vykedyjá načačipén. Ne aménge trej, pšalále, saró časo te parikiras Devléske pal tuménde, savén Raj Devél vykedyjá, pal-dová so Jov angledýr vykedyjá tumen vaš zrakhibén pir Duhoskiri zor i patiaibén dro čačipén; ke savó Jov i khardiá tumen pir amaró rosphenyben pal bahtalý zan (zvies'), sob (kaj) tuménde te javén paš dre sláva amaré Ráskire-Devléskiri, Isusóskire Xristososkiri. I paldavá, pšalále, javén zoralé pir dúho (fáno) i rikirenpe uphenybnaske, savéske tumé sánas vysykliakirde, ci pir lav, ci pir amaró lyl. Mek Kokoró amaró Raj Devél, Isúso Xristóso, i Devél amaró Dad, Savéske jaciám dróga ame i dyjá pir bahtalypén viéčno podrikiribén i lačhí nadiéia, te podrikirél tumaré ile i te kerél zoraledýr tumen dro kažno lav i lačhó réndo. Kakaná, ame mangasa tumen, pšalále, te mangénpe Devléske pal aménde, sob (kaj) Ráskire-Devléskiro lav te rozdžalpe sýges i te slavinelpe adiáke-pac', syr i tuménde; i sob (kaj) ame te javas zrakhné nalačhé i xohané manušéndyr, pal-dová so na dre sarénde isyn patiaibén. Ne patiaibnýtko isyn Raj Devél, Savó déla tuménge zor i zrakhéla nalačhestyr. Ame bi kunipnaskiro (tvardes) džinása pir patiaibén dre Raste – Devléste, so tumé keréna i duredýr javéna te kerén dová, so ame phendiam tuménge. Mek Raj Devél te otčhakirel tumaré ile ke Devléskiri láska i ke Xristosóskiro vyrikiriben. Pšalále, ame priphenasa tuménge, amaré Ráskire-Devléskire, Isusóskire Xristosóskire lavésa, sob (kaj) tumé te rikirenpe krig adasavé pšalestyr, savó dživéla na keri butý, a na pir sykliakiribén, savó tumé prilyné améndyr. Pal-dová so tumé kokoré džinéna, so tuménge trej te dživén adiáke, syr i ame, pal-dová so ame na sámas kirne-masengire, kiéli ame dživdiam ke tumé; ame na xajam nikoneskiro maró, a kerdiám pharí butý rat i dyvés, sob (kaj) te na javas dro pharipén nikonéske tuméndyr: ame na dykhciam pe davá, so aménde sys zor te las lové tuméndyr, ne ame kamdiam te sykavas primiéro (sykaibén) tuménge, sob (kaj) i tumé adiáke-pac' te kerén duredýr. Pal-dová so, kiéli ame sámas ke tumé, ame rakirdiam tuménge davá: “Kóli vari-kon na kaméla te kerél butý, mek i te na xal.” Ne ame šunasa, so vari-savé manušá maškír tuménde dživéna biladžaipnytkes dro búnto proti Devléste: jone na keréna nisaví butý, a jekh so dykhéna, so javír manušá keréna. Ame priphenasa kadasavé manušénge i prirakhasa amaré Ráskire-Devléskire, Isusóskire Xristosóskire lavésa, sob (kaj) jone te kerén butý štylés i te xan péskiro maró. A tumé, pšalále, na khinjon te kerén lačhipén. Kóli vari-kon na javéla te kandel amaró lav, savó isyn čhindló dro davá lyl, odolés manušés zaripiren, na malynenpe (na družynen) lésa, sob (kaj) léske te javél ladžavo; Ne i te na ginen les pal vergoste, a sykliakirén les syr pšalés. Mek Raj Devél Kokoró, te del tuménge ramánjo (miro) ŭsády (sak) dro saró. Mek te javél Raj Devél sarénca tuménca. Me som Pávli, me čhináva i piridava “ramánjo” miré vastésa, adiáke-pac', syr me keráva dre saré miré lylá syr špéra (znako), so kadavá lyl isyn mándyr, me adiáke čhináva: Mek te javél bahtalypén amaré Ráskire-Devléskiro, Isusóskire Xristosóskiro sarénca tuménca. Amín'. Pavlístyr, Isusóskire-Xristosóskire Apostolostyr, savés vykedyjá Devél, amaró Zrakhibnari (Spasitieljo) i Raj Devél, Isúso Xristóso, pe savéste me nadieinasape, Himaske, čačuné čhavéske dro patiaibén: mek te del bahtalypén, tangipén i ramánjo túke, amaró Devél Dad i amaró Raj Devél, Isúso Xristóso. Kiéli me skedavaspe te tradav ke Makiedonija, me zoralés mangdjom tut te jačespe dre Jefiesija i te priphenes odolé manušénge te na sykliakirén javír sykliakiribén, i te na šunén léngire paramysítka i rosphenybena pal vari-konéskiro ródo bi koncoskiro (bi jagoroskiro), savé keréna butýr čingárd, syr sykliakiréna pal Devléskiro patiaibén. Davá priphenybnaskiro čačipén isyn dro patýv ke javír manušá žužé iléstyr i lačhé patyvatyr i čačuné patiaibnastyr, vari-savé manušá durine dalé droméstyr, i lyné te zalenpe čhučé (pustone) rakiribnasa, jone zakamle te javén Zakonóskire sykliakirdé, ne jone kokoré na džinéna ni dová, pal so jone rakiréna, ni dová, so jone dophenena. Ne ame džinása, so Zakóno isyn lačhó, kóli vari-kon keréla pir Zakóno, ame džinása, so Zakóny isyn sčhude na vaš patiaibnytkone manušéske, a vaš odolénge, savé keréna na pir Zakóno, i savé na kandéna, i savé na patiána Devléske, i savé keréna gréhi, i savé isyn bidevlytkarja, i savé isyn magirdé, i savé ĥazdéna vast pe péskire dadéste ci date, i savé muliakirena manušén, savé dživéna džuvliénca bi sevlakiro, savé dživéna muršenca syr džuvliénca, savé čorena manušén, savé isyn xohaibnarja, savé sovlahana xohanés syr jakhítka. Adiáke uphenela pe lénde slavútno bahtalý zan amaré bahtiakirde Devléskiri, saví sys dopatiandly mánge te rosphenav. I me parikirava miré Ráske-Devléske, Isusóske Xristosóske, Savó dyjá mánge zor, so Jov priĥalyja man patiaibnytkonesa i dyjá mánge te dynarinav Léske, mánge, savó angledýr teliakirdia Devlés, i tradyjá devlytkoné manušén, i kerdjom čoripén lénge: ne Devél primangdia mánge, pal-dová so adiáke kerdjom pir nadžinyben i pir napatiaiben. Ne bahtalypén amaré Ráskiro-Devléskiro sys sykado ke me dro saró lákiro barvalypén, vykedyibnasa i ilésa dre Isusóste Xristosóste. Kadavá lav isyn patiaibnýtko, so Isúso Xristóso javdiá dro svéto te zrakhél griehitkonén, savéndyr me som naj fujedýr. Ne vaš davá mánge sys primangne gréhi, sob (kaj) Isúso Xristóso te sykavél dre mánde pervoneste saró dlugo vyrikiriben, sob (kaj) te dykhén odolé, savé javéna te patián dre Léste ke viéčno džiibén. Viečnone Kralíske, savó nijékhvar na meréla i dživéla dre saré viéki, Nabicialeske i Jekhdžineske Devléske, mek te javél patýv i sláva dre saré viéki. Me dáva túke davá uphenybén, čháva miro Xima, syr angíl sys phendló pal túte, sob (kaj) te rikirespe ke dalé lavá i te mogines te lydžas svénto maribén, i te rakhés patiaibén i lačhí patýv, saví vari-savé manušá xasiakirdé, i léngiro patiaibén rospyjape, maškír lénde sys Imieniejo i Lieksandro (Alieksandro), savén me otdyjom nalačheske, sob (kaj) jone te na teliakiren Devlés. Angledýr saréstyr, me drieván mangáva tumen, saró časo te mangénpe Devléske, te mangén i te mangénpe Devléske pal javirende te parikirén Léske pal saré manušénde, pal kral'jénde i pal saré manušéngire baré rande, sob (kaj) aménge te javél saštypen (vozmožnost'/vakancyja) te dživás štylés i ramanjonés (mirnes) saré devlytkimasa i te lydžán pes pir čačipén; pal-dová so davá isyn lačhó i lačhó Zrakhibnariske, amaré Devléske, Savó kaméla, sob (kaj) saré manušá te zrakhenpe i te džinén čačipén. Pal-dová so Devél isyn Jekh, i jekh isyn maškiratuno (posriedniko) maškír Devléste i manušénde, adavá manúš isyn Isúso Xristóso, Savó otdyjá Kokoró Pes, syr vykinybén pal saré manušénde, Jov sys Devléskiro dophenybén svetoske, savó sys dynó dro péskiro časo; vaš davá me sómas čhudo syr Devléskiro phenybnaskiro i Apostolo, – me rakiráva tuménge čačipén, me na xohavava, i me som sykliakiribnari pir patiaibén i čačipén Najudénge. Me paldavá kamám, sob (kaj) muršá te mangénpe Devléske pe kažno štéto, i sob (kaj) te ĥazdén svénta, otdyné Devléske vastá bi xolynakiro i bi kuninypnaskiro. I adiáke-pac' mek džuvliá te ur'jenpe patyvales, i lénde te javén ladž, te na phutjon jekh angíl jekhate drogoné idiasa, suvnakása, ci kučoné barénca, ci balengire gožymasa, ne sob (kaj) jone fedýr te kerén lačhé réndy, savé i trej te kerél džuvliáke, saví otdyjá pes Devléske. Mek te sykljol džuvlý štylés, i te kandel; ne te sykliakirél džuvliáke me na davá vólia, ci te xulainél romesa, ne te javél joj štyl dre khangirí; pal-dová so angledýr sys sozdynó Adamo, a korigedýr (pozže) Jeva. I sys xohado na Adamo, a džuvlý, pal-dová so joj poddyjape xohaibnaske i pirigija Devléskiro Zakóno. Ne joj iavéla zrakhny pir davá, so joj bijanéla čhavorén, kóli joj iavéla duredýr dro patiaibén i dre patýv ke javír manušá i dre patýv lačhé rendénca (dielenca). Čačunó isyn lav, kóli kon zoralés kaméla te javél khangirjákiro barydyró (jepiskopo), adavá manúš mangéla te kerél lačhí butý. Ne khangirjákire barydyréske trej te javél bidošakireske, jekhe – romniakiro rom, savó džinél pes te rikirél dre vastá, god'varó, te javél léste patýv ke pe, savó priléla manušén ilésa, i te javél lačhó sykliakiribnáskiro (učitieljo); te na javél matymari, te na javél zahalo, ne te javél kovlé-ilytko, te javél ramanjono (mírno), te na javél ĥálko ke lové, savó isyn xuláj pe péskiro kher, konés čhavé kandéna, lydžána pes pir čačipén; pal-dová so, kóli vari-kon nane xuláj dro péskiro kher, syr adavá manúš javéla te dykhél pal Devléskiri Khangirí? Te na javél khangirjákiro barydyró odolé manušéndyr, savé naĥara upatiándyne dre Devléste, kadavá savó manúš moginéla te zaphutjol, i te perél tel séndo syr nálačho. Léste trej te javél lačhó dophenybén maškír manušénde, savé nane khangirjátyr, sob (kaj) léske te na poperel tel xoliamó saben i dre nalačheskiri felý. Khangirjákire butiarnenge (diakonenge) adiáke-pac' trej te javén čačuné, te na javén jone dujemuitka, te na p'jen but mol, i te na javén ĥalka (žadna) ke lové, vaš dová, sob (kaj) jone te rakhén sykado patiaibnaskiro garadó čačipén žužé patyvása, savó sys sykado. I adasavé manušén adiáke-pac' angledýr trej te propatiakires, i kóli lénde nane nisaví doš, tedy jone moginéna te dynarinén (te služynen). Adiáke-pac' i léngire džuvlienge trej te lydžán pes pir čačipén, te na bangiakiren nikonés xohanés, te na p'jen, i te javén patiaibnytka dro saró. Khangirjákire butiarneske trej, sob (kaj) jov te javél jekhe-romniakiro rom, savó isyn lačhó xuláj péskire čhavénge i kheréske: pal-dová so odolé manušá, savé šukár dynarinena, ke jone isyn baró kutiakiriben i jone murškanés rakiréna pal patiaibén dre Isusóste Xristosóste. Kadavá lyl me čhináva túke, i duminava, so me syg javáva ke tu; ne kóli me zarikiravpe, sob (kaj) tu te džinés, syr trej te lydžas pes dre Devléskiro Kher, savó isyn džidé – Devléskiri Khangirí, saví isyn šeraló bar i fundámiento vaš čačipén. I saré priĥalyne, so baró garadó čačipén isyn dro amaró devlytkimakiro patiaibén: Devél javdiá dre manušýtko loč (plot'), Dúho (Fáno) priĥalyja Les čačunesa, sykadiá Pes Jangolenge, pal Léste rosphendlé maškír saré manušénde, dre Léste upatiandyja svéto i Jov sys lynó upré dre sláva pe bolybén. Dúho (Fáno) mamúj rakiréla, so dro palatunó (posliednjo) časo but manušá mekéna te patián, léna te kandén xohané dúhi i te šunén benglane-duhengiro sykliakiribén; kadavá sykliakiribén rosphenena dujemuitka xohaibnarja, savé xasiakirdé sarí ladž, sýrby vari-kon shačkirdiá la, i adalé manušá zaphenena te lenpe, i te na xan saró, so sozdyjá Devél vaš dová, sob (kaj) patiaibnaskirenge, i kon udžindiá čačipén, te xan saró parikiribnasa. Pal-dová so saró, so sozdyjá Devél, isyn lačhó i saštý saró te xas, kóli ame parikirasa pal xabén, pal-dová so saró xabén jačéla žužó pir Devléskiro lav i mangipén. Kóli tu javésa te sykliakires kadavá uphenybén pšalénge, tu javésa lačhó khangirjákiro dynári Isusóske Xristosóske, i tu javésa čarado patiaibnaskire lavénca i sykliakiribnasa, savó tu pherdés kerdián ke kónco/iagóro (spolnindian). Rakhpe magirdé rakiribnendyr, i phuré-džuvliengire paramysiendyr, ne sykljov te dživés darása angíl Devléste. Pal-dová so, kon zalelape péskire muskulenca i masenca, davá léske zorjakirela léskire masá-davá isyn nabaró lačhipén, ne kon dživéla darása angíl Devléste, odová janéla lačhipén pir saró i déla nadiéia dro davá svéto i dre dová, so javéla angíl. Kadavá lav isyn patiaibnýtko, jov isyn mol te prilel les, vaš davá ame i kerása daja butý i sýrby marasape, so ame čhuvasa nadiéia pe džidé Devléste, Savó isyn sarengire-manušéngiro Zrakhibnari, ne butýr kodolénge, kon patiála dre Léste. Phen zoralés davá manušénge i sykliákir len. Mek nijékh te na dykhél vučipnástyr pe túte pal tyró ternypen; ne sykáv pes devlytkonesa patiaibnaskirenge dro lav, dro džiibén, dre patýv ke javír manušá, dro dúho (fáno), dro patiaibén, dre žužyma. Gin Svénto Čhinybén, podrikir manušén, i sykliákir len ke davá časo, paka me javáva. Prilé ilésa taláno, so isyn dre túte, savó sys dynó túke prorokendyr, pir savó kerdé rašaja, kiéli jone čhudé upré vastá pe túte. Dykh pal davá, otdé pes pherdés daleske, sob (kaj) te javél bicialy tyrí butý vaš sarénge. Dykh ciamkes pal péskiro džiibén i sykliakiribén, ker davá saró časo, kóli tu adiáke javésa te kerés, zrakhésa pes i kodolé manušén, savé šunéna tut. Na sykáv bang phuré manušéske, ne otlydžape ke jov, syr ke péskiro dad, a ke terné otlydžape, syr ke péskire pšála, otlydžape ke phuri džuvlý, syr ke daj, ke terné džuvliá otlydžape, syr ke pheniá saré žužymasa. Kutiakir (uvažyn) pivlién (udoven), savé jačnépe bi romengiro čačunés; kóli vari-savjate pivliate isyn čhavé ci ŭnuki, to mek jone angledýr te sykljon te sykavén devlytkima ke péskiri sém'ia (irí) i ke dadá, davá isyn lačhó Devléske. A čačuný pivly i saví isyn jekhdžiny, užakiréla lačhipén Devléstyr i mangelape Devléske i mangéla Devlés dyvés i rat. Ne, odoia, saví dživéla vaš péskiro kamiben, isyn sýrby muly, na dykhí, so joj isyn džidy. I davá phen zorjása manušénge, sob (kaj) jone te javén bidošengire. A kóli vari-kon pal péskire manušénde i butýr saréstyr pal kheritkonende na dykhéla, odová manúš otphendiape patiaibnastyr i jov isyn fujedýr odoléstyr, savó na patiála. Mek ni jekh pivly te na začhinelpe dre khangirjákiri lylvarí te pomoginen láke, paka láke nane šovdešá berš, sob (kaj) láte te javél jekh rom, savjá džinéna pir lákire lačhé réndy, kóli joj vybarjakirdia lačhenca péskire čhavén, kóli joj prilelas čužoné manušén, savénde na sys, kaj te dživén, mordia ĥerá sventonenge, i pomoginelas odolénge, konéste sys bída, i kóli joj kakaná keréla duredýr lačhé réndy. Na prilé terné pivlien dre khangirjákiri lylvarí te pomoginen lénge dre khangirí, pal-dová so, kiéli léngire-maséngiro kamiben jačéla zoraledýr tyrdypnastyr ke Xristóso, jone nevéstyr kaména te džán paloróm. Jone kokoré jačénape bangé, so jone mekné anglatunó patiaibén i dynó lav. I jone adiáke-pac' na keréna nisó, a psiréna pir kherá, zlydžana pljotki, resena na dre péskire réndy te rakirén dová, so nalačhés te rakirén. I paldavá me kamám, sob (kaj) terné pivlia, te džán paloróm te bijanen čhavorén, i te lydžán kherítko xulaiben, te na den nisavó saštypen tumaré vergoske, sob (kaj) te rakirél fuipén. Pal-dová so vari-savé léndyr zmardepe patiaibnaskire droméstyr i giné pal nalačheste. Kóli vari-savé patiaibnaskire džuvliáte isyn pivlia (udovy) kheré, mek joj te del vast lénge, i mek joj te na čhuvél pharipén pe khangirí, sob (kaj) joj del vast čačuné pivlienge. Mek godephuré (phuredýr pšála), savé šukár dynarinena vaš Devléske, te javén dre bari patýv, butýr saréstyr odolé, savé rosphenena Xristosóskiro lav i sykliakirén; pal-dová so dre svénto čhinybén isyn phendló: “Na zaker muj butiarné guruveske pe giv, i butiarno isyn mol te lel pleskiriben pal péskiri butý.” Na prilé bangiakiriben pe godephureste (phuredyre pšaléste) ni dro so, syr angíl dujende ci trinende jakhitkonende/ jakhalende (svidietieliende). Manušén, savé kerdé grého, bangiakir mamúj angíl sarénde, sob (kaj) javír te darén. Me zasovlahava tut angíl Devléste i Raste – Devléste, Isusóste Xristosóste i Jangolende, savén vykedyné, te zrakhes dalé uphenybená i adiáke nisó te na paruves vaš vari-konéske, sob (kaj) ničý te na kerés pir péskiro iló. Na sygnjov (na jav sýgno) te čhuvés upré vastá ni pe konéste, sob (kaj) tumé te na javes khetané manušénca, savé keréna grého i na čhuv upré vastá pe manušéste, savó naĥara lyjá te patial, rakh pes nabangesa (žužesa) Duredýr na pi jekh paní, ne vypi nábut mol (vino) vaš tyró kužum i tyró často nasvalypen. Vari-savé manušéngire gréhi isyn adiáke biciale, so jone janéna pe péste séndo angledýr odolé časostyr, savó javéla, ne javír manušéngire gréhi paka isyn nabiciale, jone džána lésa, karik i jov džála. Adiáke-pac' i lačhé réndy isyn biciale; kóli jone nane dasavé, na moginen te javén ĥaradé. Mek pishárja, savé isyn sýrby tel ĥámo, te kutiakiren pherdés péskire xulan, sob (kaj) Devléskiro lav i Léskiro sykliakiribén te na kaliakiren. I odolé, savénde isyn patiaibnaskire xulaja, mek jone te na dykhén vučipnástyr pe lénde, pal-dová so jone isyn léngire pšála, ne mek jone fededýr te dynarinén lénge syr pishárja, pal-dová so čačuné i dróga isyn odolé, savénge isyn léndyr lačhipén. Sykliákir i phen zorjása manušénge pal davá. Kóli vari-kon sykliakiréla javír i na patiála dre čačuné amaré Ráskire-Devléskire, Isusóskire Xristosóskire lavá, sob (kaj) dro sykliakiribén te darel Devléstyr, to odová manúš isyn phut'kirdo, jov nisó na džinéla, léste isyn nalačhi myslia but te rozduminel i te lydžál sýrby maribén pal lavá, savéndyr džála zevlynypén, košybén, kaliakiriben, nadopatiaiben, i čhučé rakiribena maškír manušénde, savénde nane bari godý, i, savé darnape čačipnastyr, jone duminéna, so dar angíl Devléste-davá isyn drom te barvaljon. Ne isyn bari l'góta, kóli manušéste isyn dar angíl Devléste i jov isyn drieván rado saréstyr, so isyn léste. Pal-dová so ame nisó na jandiam dro davá svéto: davá čačó, so ame nisó na moginasa te las léstyr. Ne kóli ame sam čale i uridé, aménge trej i pal davá te parikiras Devléske. A manušá, savé kaména te rozbarvaljon, poddenape pe propatiakiriben i peréna dre felý, i dre but dylyné i grehítka tyrdypena, savé lydžána len ke bedytko periben i ke xasibén. Pal-dová so zoraló tyrdypén ke lové-davá isyn pérvo drom, so janéla kažno fuipén, isyn but manušá, savé pir bari ĥalkima ke lové otrisine patiaibnastyr i otdyné pes pe bari bída. Tu san Devlýtko manúš, naš dalé saréstyr, róde čačipén, róde te kerés lačhipén, jav dro patiaibén, jav dre patýv ke javír manušá, jav vyrikiribnytko i kovlé-ilytko. Marpe pal lačhó patiaibén i viéčno džiibén, ke savó tut Devél khardiá, i pal savó tu patyvales priĥalyjan angíl buté jakhitkonende (svidietieliende). Me uphenava túke angíl Devléste, Savó déla sareske džiibén, i angíl Isusóste Xristosóste, Savó lačhés priĥalyja Léskiro patiaibén angíl Pontijoste Pilatoste, te rakhés priphenybén bibangiakiro i bidošéngiro angíl dová, syr amaró Raj Devél, Isúso Xristóso javéla, davá javéla dro dová dyvés, savó uphendia Léske Devél Dad, Bahtiakirdó i Jekhdžinó, sarengire-kral'jengiro Králi i Raj Devél pe saré rande, Savó isyn Jekhdžinó, Kon na meréla nijékhvar, Savó dživéla dro dud (svéto), karik nijékh na javéla, Saves nikón manušéndyr na dykhciá i te dykhél na moginéla. Mek te javél Léske viéčno patýv i viéčno zor. Amín'. Uphen dalé svetóskire barvalenge, sob (kaj) jone te na ĥazdén pes i te na patián dro péskiro barvalypén, ne fedýr te patial dre džidé Devléste, Savó pherdés déla saró, so trej vaš amarí baht, sob (kaj) jone te kerén lačhipén, te barvaljon lačhé rendénca, te den vast iléstyr javirénge te dielinenpe péskire barvalypnasa javire manušénca, skedyi péske kučipén; davá isyn lačhó fundámiento i te skedén vaš časo, so javéla vaš dová, sob (kaj) lénde te javél viéčno džiibén. Hime, zrákh, so sys dopatiandlo túke, durjov magirdé rakiribnendyr i čhučé rakiribnendyr, i zahale lavéndyr, savé vydžána džinybnastyr, savó ginéna pal čačunó, i savó vari-savé manušá priĥalyne les i paldavá jone otginé patiaibnastyr. Mek te javél Devléskiro bahtalypén túsa. Amín'. Pavlístyr, Isusóskire Xristosóskire Apostolostyr, savés Devél vykedyjá pir Péskiri vólia te rosphenel pal phendló džiibén dro jekhipén Isusósa Xristosósa. Himaske, miré drogoné čhavéske: mek te javél bahtalypén, tangipén, ramánjo Devléstyr Dadéstyr i amarestyr Rástyr-Devléstyr, Isusóstyr Xristosostyr. Me parikirava Devléske, Savéske me dynarinava (služynava) adiáke, syr davá kerdé i miré-dadengíre dadá saré žužé patyvása, paldavá me ripirava pal túte dro miro mangipén Devléske ratý i dyvesé, drieván kami te dykháv tut i me ripirava tyré jasva, sob (kaj) mánge te javél daléstyr bari rádyma; me ripirava pal tyró čačunó patiaibén; adiáke patiandyja tyré-dakiri daj Loida i tyrí daj Jevnika, me džinóm, so dasavo patiaibén isyn adiáke-pac' i dre túte. Pir daja pričyna me phenáva túke te ripires i te rikires dre péste Devléskiro taláno, savó túke dyjá Devél, kiéli me čhudjom upré vastá pe túte. Pal-dová so Devél dyjá aménge dúho (fáno) te na daras, a sob (kaj) te zoraljovas, i patýv ke javír manušá, i godý. I paldavá na ladža te dophenes pal amaré Raste-Devléste, ni mándyr, so me som dro štaribén pal Léste, ne jav khetané mánca dre mén'ki pal bahtalý zan, pal-dová so Devél dyjá zor pe davá, Jov, Savó zrakhciá i khardiá amen ke svénto džiibén na pir amaré réndy, a pir Péskiri duma i bahtalypén, savó sys dynó aménge pir Isusóste Xristosóste angíl, syr svéto jaciá, Savó sykadiá pes kakaná aménge pir davá bahtalypén, syr javdiá pe phuv amaró Zrakhibnari, Isúso Xristóso, Savó xasiakirdiá meribén i otčhakirdiá dud (svéto) i dyjá viéčno džiibén pir bahtalý zan (zvies'); vaš saví Devél čhudiá man te javav Apostolosa i sykliakiribnaskiresa te rosphenav bahtalý zan vaš Najudénge. Pal davá me i menčynavape kakaná adiáke; ne me na ladžava daléstyr, pal-dová so me džinóm dre Konéste me upatiandyjom i me zoralés (tvardes) džinóm, so Jov moginéla te zrakhél dová, so jov mánge dopatiandyja angíl dová Dyvés, kiéli Jov javéla. Rikir syr primiéro (sykaibén) čačuné lavá, savénge me sykliakirdjom tut, vykedyibnasa i patiaibnása dro jekhipén Isusósa Xristosósa. Rakh dová kučipén, savó dopatiandyja túke Svénto Dúho (Fáno), Savó dživéla dre aménde. Tu džinésa, so saré manušá Asijatyr mekné man, i khetané lénca Figielo i Jermagieno. Mek Raj Devél te tanginél Anisiforoskiro kher, pal-dová so jov but móly prilelas man, i na ladžalas, so me som dro štaribén; a kiéli jov sys ke Rimo, odój drieván rodyja man i lathiá man; mek Raj Devél te tanginél les dro Péskiro Dyvés, syr Jov javéla; tu fedýr džinésa, ci but jov dynarindiá mánge dro Jefieso. Míro čhávo, barjov butedýr dro bahtalypén, savó isyn dynó aménge dro jekhipén Isusósa Xristosósa, dová sykliakiribén, so tu šundián mándyr angíl butende jakhitkonenge, rosphen patiaibnytkone manušénge, savé javéna te sykliakirén adiáke-pac' javirén. I paldavá pirilydža péskiri dólia dre mén'ki, syr lačhó Isusóskiro Xristosóskiro xalado. Nisavó xalado na sphandela pes džiibnytkone rendénca, pal-dová so léske trej javéla te javél lačhó kodoléske, savéste jov dynarinela. I kóli adiáke-pac' vari-kon i lélape te marélpe dre atlietika, usajékh jov na vybašavela (na vykhelela) viánka, kóli jov javéla te kerél na pir uphenybén. Gavitkone manušéske, savó keréla butý pe félda, trej angledýr saréndyr te xal barjakirdó (plódo), so jov kokoró vybarjakirdia. De gody peske (podumin) pal dová, so me phenáva, i Raj Devél déla ĥalyibén túke dro saró. Rípir Isusós Xristosós, Davidóskire rodóstyr, Savó otdžidyjá muléndyr, syr isyn čhindló dre Jevángielija, saví me rosphenava, pal davá me i menčynavape, i pal davá me až som dre sastyrá syr rozmaribnari: ne Devléskiro lav isyn na zaphandlo dre sastyrá. Paldavá me saró vyrikirava vaš manušénge, savén vykedyjá Devél, sob (kaj) i jone te doresen zrakhibén, savó javéla pir Isusóste Xristosóste viečnone slavása. Patiaibnýtko isyn kadavá lav: “Kóli ame myjam Lésa, tedy ame adiáke-pac' javása i te dživás khetané Lésa; kóli ame vyrikirasa mén'ki, tedy ame adiáke javása te kralinas khetané Lésa, a kóli otphenasape Léstyr, tedy i Jov otphenelape améndyr; kóli ame na sam patiaibnytka, Jov jačélpe patiaibnýtko, pal-dová so Jov na moginéla te otphenelpe Kokoró Péstyr.” Phen sarénge te ripirén pal davá; sovlahá angíl Devléste, sob (kaj) te na lydžán sýrby maribén pal lavá, so na so jekh na jandela nisavó lačhipén, a čhuvéla telé odolén, kon šunéla. Pričhúv zor, sob (kaj) tu te javes lačhó angíl Devléste, i te javes lačhó butiarno, savéske na trej te ladžal, savó čačunés sykliakiréla manušén pal Devléskiro lav. A dylyné i čhučé lavéndyr džá krig, pal-dová so kadasavé manušá usá duredýr otdžana Devléstyr, i léngiro lav, syr kirmo (rako), javéla te rozdžalpe butedýr, maškír lénde isyn Imieniejo, i Filito; savé durine celjostyr (resátyr) ke čačipén i rakiréna, so otdžidiakiriben muléndyr uže sys, i dalésa jone sýrby phagirena patiaibnaskiro fundámiento dre vari-savé manušéngire ile. Ne usajékh zoraló čačypnaskiro fundámiento, so Devél čhudiá angíl, isyn terdó, pe léste isyn čhudý čergenorí čhindlé lavénca: “Raj Devél džinéla Peskiren manušén, kažno, kon ripirela Ráskire-Devléskiro lav, mek te durjol načačipnastyr.” Dre baró kher isyn khoré na so jekhe suvnakástyr i rupéstyr, ne adiáke-pac' isyn i kaštéstyr i ĥlejatyr (glinatyr); i jekh čaré vaš svénko, a javír vaš kažno dyvés, kóli vari-kon vyžužakiréla pes kadalé grehéndyr, jov javéla syr čaró, savó léna vaš svénko i savó trej léskire Ráske pe kažno lačhó réndo. Naš péskire – ternengire grehitkoné tyrdypnastyr, a róde čačipén, ríkirpe patiaibnaske, patyváke ke javír manušá i mek te javél ramanie manušénca, savé kharéna Devléskiro lav saré iléstyr. Naš dylyné i čhučé sprečkendyr, tu ž džinésa, so daléstyr džála čingárd. A Ráskire-Devléskiro pisharíske naštý nikonesa te marélpe pal lavá, a léske trej te javél štyl (tiho) saré manušénca, te džinél te sykliakirél i te javél rahmano (biholynakiro); te sykliakirél pal patiaibén kovlé ilésa odolé manušén, savé isyn proti léskiro sykliakiribén, pal-dová so davá saštý te javél, so Devél déla saštypen (vozmožnost'/vakancyja) lénge te priĥaljon léngire gréhi i te udžinén čačipén, sob (kaj) jone te vydžán nalačheskire feliatyr, savó uhtyldia len, i začhuvela len te kerén pir léskiri vólia. Džin, so javéla pharó časo dre palatuné (posliednia) dyvesá. Manušá na javéna te sykavén patýv jekh jekhéske, javéna te tradenpe pal barvalypén, javéna šaribnytka, phut'kirdé, javéna te kaliakiren jekh jekhés, i na javéna te kandén péskire khangirjákire phurydyren, léndyr na šunesa parikiriben, jone javéna magirdé bidevlytkarja; lénde na javéla patýv ke javír manušá, jone javéna zahalé, javéna te bangiakiren javire manušén xohanés, javéna te na zrikiren pes, xolynakire, na javéla pir iló lénge lačhipén; jone javéna bikibnarja, nahrata, javéna te ĥazdén nakh baripnasa, jone javéna te ríkiren syr drógima pes butýr Devléstyr; jone javéna te sykavén angíl manušénde, so daréna Devléstyr, ne jone denape pale Léskire zorjátyr. Džá adasavé manušéndyr krig. Pal-dová so ke adasavé manušá otlydžanape kodolé, savé zadžána dro kher xohaibnasa i zlydžana džuvlién, savé isyn saré dro grého, i savén tyrdena grehítka kamibena, Kadalé džuvliá saró časo sykljona i jone nijékhvar na moginéna te udžinén čačipén. Syr Janijo (Iannijo) i Jamvrijo (Iamvrijo) sys proti Mojzaste, adiáke-pac' i jone isyn proti čačipén, nabaré-godiakire jone isyn manušá, savé risiné dumésa pe patiaibén dre Xristosóste. Ne lénge jaciápe nábut časo adiáke te dživén, pal-dová so léngiro dylnypén javéla bicialó sarénge, syr davá sys odolé manušénca, savé sys proti Mojzaste: Janijosa i Jamvrijosa Tu gíian pir miro drom dro sykliakiribén, dro džiibén, dro čačipén, dro patiaibén, dro dlengo vyrikiriben, dre patýv ke javír manušá, dre zor pir dúho (fáno), dro tradypen, mén'ki, sys savé mánge dre Antióhiia, dre Ikonija, dre Listra, savé tradypena me vyrikirdjom, i saréstyr Devél zrakhciá man. I saré, kon kaméla te dživél darása angíl Devléste pir patiaibén dro jekhipén Isusósa Xristosósa, kadasaven javéna te tradén. A fuj manušá i xohané sykliakiribnarja javéna butýr te xohaven i te zalydžan dro xohaibén javire manušén i te xohaven kokoré pes. Ne tu jav duredýr dro dová, dro so tut sykliakirdé i dro dová, so isyn dopatiandlo túke, pal-dová so tu džinésa, kon tut sykliakirdiá. Tu tyknoral (dietstvostyr) džinésa Svénto Čhinybén, savó déla túke godý i lydžála tut ke zrakhibén pir patiaibén dre Isusóste Xristosóste. Saró Svénto Čhinybén isyn pir Devléskiro Dúho (Fáno) i déla lačhipén vaš sykliaiben, vaš vyrikiriben – kon délape dukhá, sykliakiréla te udžinel čačipén. Mek Devléskiro manúš te javél skedynó, i te džinél ke kerél kažno lačhó réndo. I paldavá me zoralés mangáva tut angíl Devléste i Isusóste Xristosóste, Savó javéla te sendiakirél džiden i mulen, kiéli Jov javéla te xulainél syr Králi, rosphen Devléskiro lav manušénge, dro kažno časo i kiéli nane časo, vyrakir došá, sykáv bang, prirakh saré dlenge vyrikiribnasa i sykliakiribnasa. Paldavá so javéla časo, kiéli manušá na javéna te pirilydžan čačunó sykliakiribén, jone kokoré javéna te vykeden péske sykliakiribnaskiren pir péskiri godý, savé javene te rakirén lénge kodová, so jone kokoré kaména te šunén. Jone otriskirena péskire kaná te šunén čačipén, a jone riskirena kaná te šunén manušéngire paramysi. Ne tu jav rakhunó dro saró, pirilydža saró čoripén, rosphen bahtalý zan (zvies'), ker pherdés péskiro dynaribén. Pal-dová so kakaná miro rat pročhuvela, syr mol vaš svénto dyibén Ráske-Devléske i javdiá miro časo te udžav kadalé svetóstyr. Me mardjompe lačhés pal čačipén vaš Ráske-Devléske, me končindjom džiibnytko drom, i me zrakhcjom patiaibén. A kakaná man užakiréla viánka čačipnytko, saví Raj Devél déla mánge, čačunó Sendári dro Dyvés, savó Jov vykedyjá, ne na jekhe mánge, ne i odolé manušénge, kon užakiréla otkerde ilésa, kiéli Jov javéla. Ker saró šukár, pričhúv zor, sob (kaj) te javes ke me sýges; pal-dová so Dimaso mekciá man, léske jaciá drógo kadalé – viekoskiro džiibén, i jov gijá dre Fiesalonika, Kriskiento gijá dre Galatija, a Tito dre Dalmatija. Jekh Luka jaciápe mánca. Le Markos i jan pésa, pal-dová so jov mánge trej vaš dynaribén Devléske. A Tihikos me bičhadjom ke Jefieso. Kiéli tu javésa te džas ke me, jan miro bušlato, savó me jačkirdjom ke Troada Kaproste, i lylvaria, butýr saréstyr kodolé, savé isyn pe cýpa. Lieksandro, fairnari pir xarkóma (miedniko), kerdiá but čoripén, mek Devél te otdél léske pal léskire réndy (diély). Rakhpe i tu léstyr, pal-dová so jov sys drieván proti amaré phenybnaskire lavá. Kiéli me pérvo mólo zaterdjovavas pal péste, nijékh na sys pašýl mánde, a saré mekné man. Mek davá te na javél lénge zagindlo dre bang. Ne Raj Devél sys pašýl mánde, Jov dyjá mánge zor, sob (kaj) pir mánde te jačél phenybén pal Devléste zoraledýr i sob (kaj) man te šunén saré manušá, savé isyn Náiudy, i sob (kaj) mánge te zrakhavpe ščeréskire (lievóskire) dandendyr. I Raj Devél zrakhéla man kažnoné fuipnastyr i janéla man bidošakires dro Léskiro Kralipén dro Bolybnáskiro Rajo. Te javél Léske sláva pe saré viéki. Amín'. Piride “ramánjo” Priskilake i Akiloske i Anisiforoskire semiake. Jerasto jaciápe dro Korinfo, a Trofimos me jačkirdjom nasvales dre Milita. Pričhúv zor te javes sygedýr adarík angíl ivant (zima). Jevulo piridela túke “ramánjo”, i Pudo, i Lino, i Klavdijo, i saré javír pšála. Mek te javél Raj Devél Isúso Xristóso tyré duhósa. Mek te javél Devléskiro bahtalypén sarénca tuménca. Amín'. Pavlístyr, Devléskire pisharistyr i Isusóskire Xristosóskire Apostolostyr. Me sómas bičhadó te rozlydžav manušéngiro patiaibén, savén Devél vykedyjá, i te janav len ke čačipén, sob (kaj) jone te dživén darása angíl Devléste; davá čačipén déla nadiéia pe viéčno džiibén, pal savó Devél dyjá lav aménge angíl, syr svéto sys sozdynó, a Devél nijékhvar na xohavela, a, kiéli javdiá Léskiro časo, Jov sykadiá Léskiro lav dro phendló lav, savó sys dopatiandlo mánge pir Devléskiro uphenybén, amaré Zrakhibnariskiro Devléskiro, – Titoske, miré čačuné čhavéske pir patiaibén, savó sys jekh khetané mánca, te javél bahtalypén láska i ramánjo Devléstyr – Dadéstyr i Rástyr-Devléstyr, Isusóstyr Xristosostyr amaré Zrakhibnaristyr. Me jačkirdjom tut pe Krito vaš dová, sob (kaj) tu duredýr te dokeres butý, saví tu na kerdián ke kónco (ke jagor) i te čhuvés phuredýr pšalén dro kažno fóro, syr me túke priphendjom: sob (kaj) kadasavó manúš te javél bidošakiro, jekhe-romniakiro rom, sob (kaj) te javén léste čhavé, savé patiána Devléske, savé isyn narozmekne, i savé kandéna. Pal-dová so phurydyré pšaléske trej te javél bidošakireske, syr Devléskire-kheritkoné barydyréske, sob (kaj) jov te na ginel pes drieván god'varesa, te na javél xolynakiro, matymari, phut'kirdo, rozmaribnari, te na javél jov ĥálko ke barvalypén; a te prilel manušén ilésa, savénde nane péskiro kher i te javél drógo léske lačhipén, te džinél te rikirél pes dre vastá, te javél jov čačunó, savó obrikirela pes, savó rikirelpe patiaibnytkone lavéske, syr les sykliakirdé, sob (kaj) jov moginelas te sykliakirél javire manušén čačuné sykliakiribnaske, i te sykavél kadalé manušén, savé isyn proti čačunó sykliakiribén. Pal-dová so isyn but manušá Judendyr, savé rakiréna čhučé lavá i xohavena javirén, trej, sob (kaj) tumé te zaphanden muj lénge, savé zmarena čačuné droméstyr but sem'i (irjá), a vaš péskiro biladžaipnytko tyrdypén ke lové jone sykliakiréna odová, so na trej. Jekh léndyr léngiro proróko phendiá: “Kritiani isyn ŭsády (sak) xohaniúki, fuj, búsa (dika) murdalá i kirne-masengire manušá, savé xanas, syr na dre péste.” Kadavá dophenybén isyn čačunó; pir davá bangiakir šylales len, sob (kaj) léngiro patiaibén te javél čačunó, te na šunén Judéngire paramysí (skazki) i manušéngire priphenybená, savé durjona čačipnastyr. Vaš žužé manušénge – saró isyn žužó, ne vaš manušénge, savé isyn nažužé pir grého, i savé na patiána Devléske, vaš lénge nisó nane žužó, pal-dová so léngiri godý i ladž isyn nažužé. Jone rakiréna, so jone džinéna Devlés, ne péskire rendénca jone sykavéna, so jone otphenenape Léstyr, jone isyn džungalé i na kandéna, jone nane lačhé ni ke savó lačhé réndo. A tu rákir dová, so trej vaš čačunó sykliakiribén; sob (kaj) phuré muršá te javén rakhune, sob (kaj) jone te džinén, syr trej pes te lydžán, te javén god'varé i zoralé dro patiaibén, dre patýv ke javír manušá, dro vyrikiriben; sob (kaj) phuré džuvliá adiáke-pac' te ladžan pes patyvales, syr trej sventonenge, te na zlydžan pljotki, i te na p'jen but mol, a te sykliakirén lačhipnaske javire manušén; sob (kaj) jone moginénas te sykliakirén terné džuvlién te sykavén patýv péskire romenge, i te sykavén patýv péskire čhavénge; sob (kaj) jone te javén svénta, žužé, te rikirén lačhés kherítko xulaiben; te javén lačhé, te kandén péskire romen, sob (kaj) te na javél košno Devléskiro lav. Terné manušén sykliákir adiáke-pac', sob (kaj) jone te obrikiren pes: sykáv pes kokoró pir saré lačhé réndy, sob (kaj) javír manušá te dykhén i adiáke-pac' te kerén lačhipén, sykliákir žužypnaske dro iló, patyvalypnaske; rákir čačuné lavá, sob (kaj) adalé manušénge, savé isyn vérgi tumaré, te javél lénge ladžavo, i jone te na moginen te phenén nisavó čoripén pal aménde: sob (kaj) pishárja te kandén péskire xulan dro saró, te kerén pir iló i te na obrakiren len palál; te na čoren nisó péskire xulandyr, a te sykavén lačhó patiaibén i te javén patiaibnytka dro saró, mek jone te kerén adiáke, sob (kaj) saré te kutiakiren amaré Zrakhibnariskire-Devléskiro sykliakiribén. Pal-dová so javdiá Devléskiro bahtalypén, savó zrakhéla saré manušén; savó sykliakiréla amen, sob (kaj) ame te na kerás magiripén i te durjovas svetóskire tyrdypnastyr, te dživás dre davá viéko pir čačipén i darása angíl Devléste, i te užakiras lačhí nadiéia, kiéli javéla baró Devél slavása i amaró Zrakhibnari, Isúso Xristóso, Savó otdyjá Pes pal aménde, sob (kaj) Jov te zrakhél amen saré načačune rendéndyr, te kerél amen žužé manušénca, sob (kaj) ame te javas jekh Léskire manušénca, savé drieván tyrdenape te kerén lačhipén. Sykliákir davá i sykáv manušénge léngiri bang saré pravosa, sob (kaj) nikón te na dykhél vučipnástyr pe túte. Phen iščo (inké) manušénge pal dová, sob (kaj) jone te kandén ran i barydyrén, i te javén skedyné te kerén kažno lačhó réndo (diélo); te na kaliakiren nikonés, a te javén ramanjonesa (mirnonesa), te javén štyl (tiha), kovlé-ilýtka ke saré manušá. Pal-dová so i ame sámas vari-kiéli bigodiakire, na kandyjam i amen; ame sámas pishárja péskire-masengire tyrdypnaske, ame dživdiam dro xolý i zevlynypén, drieván bidykhciam jekh jekhés. A kiéli amaró Devél, Zrakhibnari, sykadiá Péskiri lačhé-ilýtkima i láska, na pal čačuné réndy, savé ame kerasas, a pal Péskiro tangipén, tedy Jov zrakhciá amen pir panieskiro boldeipen ke nevó džiibén i neviakirdia amarí godý Sventoné Duhósa, Savó Jov pherdés dyjá aménge pir Isusóste Xristosóste, amaré Zrakhibnariste, sob (kaj) Devél te priĥaljol amen čačunenca pir Péskiro bahtalypén te jačas Léskire čhavénca dro viéčno džiibén, vaš savó aménde isyn nadiéia. Davá lav isyn patiaibnýtko, i me kamám, sob (kaj) tu te rakirés pal davá saré zorjása dro dúho (fáno) vaš dová, sob (kaj) odolé, savé upatiándyne dre Devléste, pričhuvén zor te kerén lačhé réndy. Davá saró isyn lačhipén i trej manušénge. Džá krig (durjov) duredýr dylyné phučibnendyr i rosphenybnendyr pal vari-konéskiro ródo, ci sprečkendyr ci maribnendyr pal lavá Zakonóstyr; pal-dová so davá na trej ni konéske i dasavo rakiribén isyn krotkone godiatyr. Risjov krig manušéstyr, savó pričhuvela zor te rozčhuvel patiaibnaskiren pe grupy paló (poslie) davá, syr tu sykliakiresa les jekh ci duj móly, tu džinésa so adasavó manúš isyn rozmekno i keréla gréhi, kadalesa jov sendiakiréla kokoró pes. Kiéli me bičhaváva ke tu Artjomos ci Tihikos, prilé zor syr sygedýr te javes ke me dro Nikapoljo, pal-dová so me skedyjompe te javav odój saró ivant (zima). Zinas, savó isyn sykliakirdo pir Zakóno, i Apolos, bičháv dro drom syr trej, sob (kaj) lénge saró te uhtylel; i mek amaré manušá adiáke-pac' te sykljon te kerén lačhé réndy, sob (kaj) te sykljon te den ráda pe davá, so trej aménge, sob (kaj) léngiro džiibén te na javél čhučó. Piridena “paklono” túke saré, kon isyn mánca. Piride “paklono” sarénge, konéske sam dróga ame dro patiaibén. Te javél bahtalypén sarénca tuménca. Amín'. Pavlístyr, savó isyn dro štaribén pal patiaibén dre Isusóste Xristosóste i pšalestyr Ximastyr, Filimonóske, amaré maléske pir butý, i pheniáke pir patiaibén Amfijáke, i Arhimóske, savó isyn amaró mal – xaladó pir butý, i khangirjáke, saví skedelape dro tyró kher. Mek te javél bahtalypén i ramánjo (miro) tuménge amaré Devléstyr Dadéstyr i Rástyr-Devléstyr, Isusóstyr Xristosostyr. Me parikirava Devléske Miréske každo mólo, kiéli me ripirava tut, syr me mangavape Devléske, pal-dová so me šundjom, syr tu zoralés sykavesa patýv saré devlytkoné manušénge i patiása dre Raste-Devléste Xristosóste. Me mangavape Devléske, sob (kaj) tyró patiaibén, savó khetaniakirela amen, te del saró lačhipén, kiéli ame dživasa dre jekhipén Isusósa Xristosósa. Pal-dová so tyrí patýv ke javír manušá, míro pšál, drieván obradyndia i podrikirdia man; tu zorjakirdian devlytkonengire ilé. Paldavá, mek mánde isyn bari vólia dre Xristosóste te priphenav túke, so trej te kerés, ne me fedýr mangáva tut ilésa, me, Pávli, som phuró, i kakaná som dro štaribén pal patiaibén dre Isusóste Xristosóste. Me drieván mangáva tut saré iléstyr pal Anisimoste, miré čhavéste pir patiaibén, savéske me jacjom sýrby dad, adái, dre sastyrá, savó ĥaredyr na sys trej túke, a kakaná jov trej túke i mánge: me i bičhaváva les pale ke tu: jov isyn drógo vaš mánge, syr miro iló: savés me drieván kamdjom (mangdjom) te jačkirav les paš péste, sob (kaj) jov zamiést túte te pomoginel mánge, paka me som dre sastyrá, pal-dová, so me rosphenavas bahtalý zan (zvies'); ne me na kamdjom te keráv davá bi tyré-laveskiro, sob (kaj) te javél tyró lačhipén na pir dová, so tut začhuvena, a pir iló; paldavá moginéla te javél, so jov vaš davá na sys túsa vari-savó časo, sob (kaj) tu te priles les nevéstyr pe saró džiibén; ne na butýr syr jekhé dynarís (slugas), a baredýr dynarístyr, syr péskire drogoné pšalés, jov isyn drieván drógo mánge, ne butýr túke, syr manúš i syr pšal pir patiaibén dre Raste-Devléste. I paldavá, kóli tu ginesa man pal péskire maléste (drugoste), tedy prilé les adiáke, syr tu prilesas man: i, kóli jov vari-sósa dukhadia tut ci jaciápe vužlo lové, čhuv saró pe mánde. Me, kokoró Pávli, čhindjom davá miré vastésa, me pleskirava túke saró: mánge trej te phenáv túke pal dová, so tu i kokoró san bangó mánge pal tyró nevó džiibén, kiéli tu upatiandyjan dre Xristosóste. Paldavá, pšála, mánge trej tyrí rádyma vaš Raste-Devléste; zorjakir miro iló, syr pšal pir patiaibén dre Xristosóste. Me zoralés patiáva, so tu kandesa man, i čhináva túke, so me džinóm, so tu kerésa butýr, syr me mangáva tut. A pal jekh lath štúba (kamóra) mánge, pal-dová so me drieván patiáva, so pir tumaró mangipén Devél otmekéla man štaribnastyr ke tumé. Jepafraso piridéla “paklono” túke, savó isyn beštó khetané mánca pal patiaibén dre Isusóste Xristosóste: adiáke-pac' Marko, Aristarho, Dimaso, Luka – miré malá pir butý. Mek te javél bahtalypén amaré Ráskire-Devléskiro, Isusóskire Xristosóskiro tumaré duhósa. Amín'. Devél na jékhvar i pir saró ĥarým-ĥará (vágo) rakirdiá amaré pradadenge pir prorokénde, a dre dalé palatuné (posliednia) dyvesá Jov rakirdiá aménge pir Péskire Čhavéste, Saves čhudiá xulása te prilel Léstyr saró, i pir Savéste Jov sozdyjá svéto (lot): a Čhavó, Savó ziainela Dadéskire slavása, sykavéla Pésa čačipén pal Devléste, i rikiréla Péskire zoralé lavésa saró svéto, i kiéli Jov vyžužakirdiá saré amaré gréhi, tedy besciá pir čačí rig Devléskire Baripnastyr dro Bolybnáskiro Rajo. Jov jaciá pe adákicy fedýr Jangolendyr, pe kicý lav, savó Jov prilyjá Dadéstyr, isyn naj fededýr lengirendyr. Pal-dová so nikonéske iščo (inké) Jangolendyr na phendiá Devél: “Tu san Miro Čhavó, adadyvés me jacjom Tyré Dadésa (Tyró Dad).” Ci: “Me javáva Léske Dad, i Jov javéla Čhavó Mánge”? adiáke-pac', kiéli Jov nevéstyr (nevés) janelas Péskire Pervoné Čhavés, so lathiape pe svéto, Devél rakirélas: “I mek saré Devléskire Jangóly te kloninenpe (te keren šerésa) patyvása Léske.” Pal Jangolende Jov rakiréla: “Jov kerdiá Péskire Jangolen te javén syr balvál i Péskire devlytkoné dynar'jén (slugen) te javén syr jag, so xačola”, a pal Čhavéste: “Dévla, Tyró trono, isyn pe saré viéki i Tu kralinesa čačipnýtkes. Túke pir iló čačipén i Túke isyn na pir iló dová, so isyn proti Zakóno, pal-dová so Devél, Tyró Devél dyjá patýv i rádyma Túke butýr, syr Tyré malénge (drugénge).” I iščo (inké) phendiá Jov pal Čhavéste: “Tu, Rajo Dévla, angledýr saréstyr sozdyjan phuv, i bolybén, davá kerdé vastá Tyré. Jone xasjona, a Tu javésa te dživés, jone saré phurjona, syr upratuno uribén; i syr baró dykhlo Tu skrencynesa les i paruvesa pe nevó, ne Tu javésa adasavó-pac' i Tyré beršenge na javéla nijékhvar kónco (jagóro).” Kiéli konéske Jangolendyr Devél phendiá: “Beš pe čačó vast Mándyr, paka Me čhuváva vergén tyrén tel ĥerá tyré.” Ci jone isyn na saré dúhi, kadalé Jangóly, savé dynarinena (služynena) odolénge, kon doreséla péskiri paš dro zrakhibén. Paldavá aménge trej te rikiraspe drieván rakhunes ke dová, so rakiréna, sob (kaj) te na džan krig čačuné droméstyr. Pal-dová so, kóli lav, savó Jangóly phendlé, isyn spolnindlo (kerdó ke kónco (ke jagóro)), i manušá doreséna kára pal dová, so jone kerdé proti Zakóno i pal dová, so jone na kandyné, ne syr tedy ame mieninasa kára, kóli ame na prilasa ilésa dasavo baró zrakhibén, savó angledýr phendiá Devél, i dophendle aménge odolé, kon kokoró šundiá Léstyr; so Devél i dophendia Péskire znamienijénca (ĥiertykénca), i divénca i kažnoné zor'jénca, i Sventoné Duhóskire talanenca, savó Jov délas manušénge pir Péskiri vólia. Pal-dová so Devél na čhudiá Jangolenge telé tel ĥerá svéto, savó javéla, pal savó ame rakirasa: ne vari-kon dophenelas vari-kate: “Kon adavá manúš isyn, so Tu ripiresa les? Ci so da dasavo manušéskiro čhavó isyn, so Tu dykhésa pal léste? Tu les nábut tykniakirdian angíl Jangolende, tu proslavindian i kutiakirdian les, Tu čhudián xulása les pe dová, so Tyré vastá kerdé, Tu čhudián saró telé tel léskire ĥerá. Kiéli Tu čhudián saró telé tel Léskire ĥerá te xulainél, tedy ničý na jaciápe, sob (kaj) te na javél léskiro. Ne ame iščo (inké) na dykhasa, sob (kaj) saró te javél léskiro”, ne ame dykhasa Isusós, Saves Devél nábut tykniakirdia angíl Jangolende, i Savó isyn proslavindlo i kutiakirdo, pal-dová so Jov piridživdia mén'ki i meribén; Jov piridživdia meribén pal saré manušénde pir Devléskiro bahtalypén. Pal-dová so, čačes, treindiá, sob (kaj) Devél, Savó sozdyjá saró i duredýr rakhéla, te spolninel saró pir Léste pir Léskire mén'ki, Savó isyn Lydžaibnaskiro, sob (kaj) te janel sarén te zrakhenpe. Pal-dová so Odová, Kon otmekéla manušéngire gréhi, i odolé, savénge Jov otmekciá gréhi, saré isyn Dadéskire čhavé, paldavá Isusóske nane ladžavo te kharel len pšalénca; i Jov rakiréla: “Me javáva te phenáv zan pal Tyró lav Miré pšalénge, i Me javáva te bagáv šardýtko gilý Túke maškír sarénde dre Khangirí.” I iščo (inké): “Me javáva te patiav zoralés dre Léste. I iščo (inké): “Ĥáda, Miré čhavé isyn, savén Devél dyjá Mánge.” Pal-dová, so syr saré-manušéngire čhavénde isyn rat i loč (plot'), adiáke-pac' i Jov prilyjá saró, syr manúš, kiéli bijándyja, sob (kaj) pir Péskiro meribén Jov mogindiá te xasiakirél nalačheskiri zor pe meribén; i te del vólia sarénge kodolénge, savé darándyne meribnástyr i sys pishárja angíl meribén saró péskiro džiibén. Pal-dová so isyn bicialó, so Jov pomoginela na Jangolenge, a Avraamóskire rodóske. Vaš davá Xristosóske treindiá te javél adasavó-pac', syr Léskire pšála, sob (kaj) jov te javél lačhé-iléskiro i čačunó Anglatunó Rašáj te dynarinél angíl Devléste, sob (kaj) Jov te otmekél manušéngire gréhi; pal-dová so, syr Jov kokoró menčindiape i nálačho propatiakirelas Les, to Jov kakaná moginéla te pomoginel odolénge, konés propatiakirena. Paldavá, pšalále svénta, savén Devél adiáke-pac' prikhardia, dykhén pe Isusóste, Saves Devél bičhadiá te javél anglatuné Rašása pir amaró patiaibén, Savó isyn patiaibnýtko Odoléske, Kon čhudiá Les pe daja butý, syr i Mójza adiáke-pac' pir saró Devléskiro Kher. Pal-dová so Léste sys baredýr sláva, syr Mojzaste, adiáke-pac' syr manušéste, savó čhudiá kher, kutiakirena (déna patýv) butýr, syr kokoró kher. Pal-dová so kažno kher vari-savó manúš čhuvéla, a Kodová, Kon čhudiá saró, isyn Devél. I Mójza sys čačunó dynári pir saró Devléskiro Kher vaš dophenybén pal dová, so trej te javél angíl; a Xristóso syr Devléskiro Čhavó, sys Xuláj pir Léskiro kher; ame sam kokoré manušá Léskire kheréskire, kóli zoraló patiaibén i nadiéia, savjása ame šarasape, javéla aménde ke kónco (ke jagóro). Paldavá Svénto Dúho (Fáno) rakiréla: “Kóli adadyvés tumé šunéna Léskiri zan, na otriskiren péskiro iló, syr da tumé ĥazdynépe pe Devléste, kiéli tumé sánas pe čhučí phuv; kaj tumaré dadá propatiakirenas Man, mek jone i dykhné, so Me kerdjom štardešá berš. Paldavá Me i xoliasyjom pe adalé manušénde i phendjom: ‘Saró časo jone xohavena pes dro péskiro iló, i jone na džinéna Miro drom’; paldavá Me sovlahadjom dre xolý: ‘Jone nijékhvar na zadžána dro Miro štéto te otkhinjon Mánca’. Pšalále, dykhén, sob (kaj) te na javél phut'kirdo iló ni dre konéste tuméndyr, savó na kandéla Devlés, sob (kaj) tumé te na otdžan džidé Devléstyr. A podrikiren jekh jekhés so dyvés ke/žýko dová časo, paka saštý te rakirés “adadyvés”, sob (kaj) grého te na xohavél tumen i te na otriskirel tumaró iló. Pal-dová so ame jačasape khetané Xristosósa, kóli zrakhasa dová zoraló patiaibén ke kónco (ke jagóro), so aménde sys angledýr. Paldavá isyn phendló: “Kóli tumé adadyvés šunéna Léskiri zan, na otriskiren péskiro iló, syr tumaré dadá davá kerdé, kiéli ĥazdynépe pe Devléste”; kon sys odolé manušá, so, kiéli šundlé, ĥazdynépe pe Devléste? Naúšto na saré léndyr vyginé Jegiptóstyr Mojzasa? i pe konéste Devél sys xoliamó štardešá berš? Ci na pe odolénde, savé kerdé gréhi, i koneskire kokalý jačnépe te pasjon pe čhučí phuv? I konéske Jov sovlahadiá, so jone na zadžána pe štéto te otkhinjon Lésa, naúšto na odolénge, kon na kandyjá Les? I ame dykhasa, so jone na mogindlé te zadžán pe Léskiro štéto te otkhinjon, pal-dová so jone na patiandyné. Paldavá, paka phendló lav aménge te zadžán pe doiá phuv te otkhinjon Lésa, na xasijá, tedy javása te rakhaspe, sob (kaj) te na javél adiáke, so vari-kon javdiá drieván koríg (póznes). Bahtalý zan (zvies') sys phendly aménge, adiáke-pac' syr i lénge, ne lénge doiá zan, saví jone šundlé, na jandiá ni savó lačhipén, pal-dová so jone na prilyné davá phenybén patiaibnása. Ne ame, savé patiása, zadžasa pe doiá phuv te otkhinjovas Lésa, adiáke, syr Devél phendiá: “Me sovlahadjom dre Mirí xolý: “Jone nijékhvar na zadžána te otkhinjon Mánca’”, na dykhí pe dová, so Léskire butiá sys saré kerdé angíl dová, syr Jov sozdyjá svéto. Paldavá Devél phendiá vari-kate dro Svénto Čhinybén pal eftáto (bitrinéngiro déšto) dyvés adiáke: “I otkhinyja Devél pe eftáto dyvés saré Péskire butiendyr”: i nevéstyr isyn phendló: “Jone nijékhvar na zadžána te otkhinjon Mánca.” Ne Devléskiro lav, savó Jov dyjá, jačélape, i vari-savé manušá zadžána te otkhinjon Lésa; a kodolé, savénge sys phendló lav pal Xristosóste, na zadžána, pal-dová so jone na kandyné, so phendiá Devél, i Jov vykedéla nevó dyvés, savó Jov khardiá “adadyvés.” Paló (poslie) dová, syr progijá (nakhcia) but berš, Devél phendiá Davidóskire ušténca adiáke, syr Jov rakirdiá ĥaredyr: “Adadyvés, kiéli tumé šunéna Léskiri zan (glos), na pharjakiren péskire ile.” Paldavá, kóli Isúso-Navino délas Devléskire manušénge te otkhinjon Devlésa, tedy Devél na rakirélas korigedýr (pozžedýr) pal javír dyvés. Paldavá sávato (subóta) jačélape vaš Devléskire manušénge te otkhinjon. Kóli vari-kon zadžála te otkhinjol Lésa, jov adiáke-pac' otkhinjola péskire butiátyr, syr Devél otkhinyja Péskire butiátyr. I paldavá javása ame te pričhuvas zor te kerás butýr, sob (kaj) aménge te zadžas te otkhinjovas Lésa, sob (kaj) pir dová-pac' primiéro (sykaibén) ame te na peras, syr odolé manušá, savé na kandyné. Devléskiro lav isyn džidó i pherdó zorjása, vostredyr (čolaledýr) liubone kurtalátyr, saví čhinela pe duj rigá, Devléskiro lav zadžála xor maškír iló i dúho (fáno), maškír kokalý i trušúl, kaj isyn dumo, i sendinela manušéngire réndy i mysli pe iló. Nisó dro svéto, so Devél sozdyjá, nane ĥarado Devléstyr; ne saró isyn nango i bicialó angíl Léskire jakhá, angíl Konéste ame javása te otphenas pal saró. Pal-dová so aménde isyn sámo baredýr Anglatunó Rašáj Isúso, Devléskiro Čhavó, Savó progijá bolybén ke Devél, ame javása te rikiraspe zoralés pal amaró patiaibén. Aménde isyn na adasavó anglatunó rašái, savó na moginéla te pomoginel (te podel vast) aménge dro amaró bizorjakiriben, ne Adasavó Anglatunó Rašái, Savó sys propatiakirdo dro saró, ne syr i ame, ne Savó na kerdiá grého. Paldavá ame javása te džas pašyledýr muršypnasa ke Devléskiro trono, Kon déla bahtalypén, sob (kaj) te doresas tangipén i bahtalypén te pomoginas (te podas vast) jekh jekhéske. Pal-dová so kažno anglatunó rašáj lélape manušéndyr i čhuvélape vaš manušénge, sob (kaj) te dynarinél Devléske: te janel svénto dyibén i dáry pe altárjo vaš grehengiro otmekiben; a pal-dová, so adasavó rašáj kokoró nane zoraló pir saró, Jov moginéla te sykavél kovlypen ke manušá, savé na džinéna i odolé, savé zmardepe čačuné droméstyr, i pal léskiro bizorjakiriben léske trej te janel svénta dyibená, syr pal péskire, adiáke-pac' i pal manušéngire gréhi. I nijékh na moginéla (na dela ráda) te lel patýv te kerél daja butý vaš Devléske kokoró péstyr, a kodová, konés Devél čhudiá, adiáke-pac', syr i Aronos (Aaronós). Adiáke-pac' i Xristóso na Kokoró Péske dyjá daja sláva te jačél Anglatuné Rašása, ne davá kerdiá Devél, Kon phendiá Léske: “Tu san Miro Čhavó, Me jacjom adadyvés Tyré Dadésa (Tyró Dad).” Jov adiáke-pac' rakiréla dro javír štéto: “Tu javésa Rašáj pe saré viéki, adasavó-pac' pir rašaipen, syr Mielhisedeko sys.” Kiéli Xristóso dživdiá pe phuv, Jov baré godlása i jasvénca mangdiá i mangdiápe Devléske, Kon mogindiá te zrakhél Les meribnástyr. Devél šundiá Les pal Léskiri dar angíl Léste; mek Jov sys Devléskiro Čhavó, Jov vysyklyja te kandel pir Péskire mén'ki; i kiéli Xristóso kerdiá ke kónco / jagóro (spolnindia) davá saró, Jov jaciá i te zrakhél manušén pe saré viéki, savé kandéna Les, i Devél priĥalyja Les Anglatuné Rašása adasavesa-pac', syr sys prilyno pir rašaipen Mielhisedeko. Aménge trej te rakiras but pal davá, ne davá isyn pharó te piriphenas tuménge, pal-dová so tumé ĥaljona povólin'kes (nasyges). Pal-dová so tuménge pal davá časo treindiá kokorenge te sykliakirén manušén; ne tumen nevéstyr trej te sykliakiras pal anglatuné čačipená pal Devléskiro lav, i tuménge iščo (inké) trej thud te p'jen, a te na xas čačunó xabén, pal-dová so tumé san sýrby čhavoré. Kažno, kon dživéla pe thud, na ĥaljola sykliakiribén pal čačunó lav, pal-dová so kadasavó manúš isyn sýrby bijáto (čhavoró), ne stala manušá moginéna te xan čačunó xabén, pal-dová so jone vysyklyne džiibnastyr i pir godý te phenén rozn', kaj isyn lačhipén i kaj isyn fuipén. Paldavá mekasa ame pérva lavá pal Xristosóste i javása te piridžas te pričhuvas zor ke dasavo sykliakiribén, savó trej vaš stalone devlytkonenge; ne ame na javása nevéstyr te sykliakiras pal dasavo džiibén, so janéla manušén ke meribén, a pal patiaibén dre Devléste; pal boldeipen, pal vastengiro čhuibén upré pe manušéste, pal otdžidiakiriben muléndyr i pal viéčno séndo. I ame kerása davá, kóli javéla pe davá Devléskiri vólia. Davá na moginéla (šašty) te javél vaš odolénge, konéske sys rosphendlo čačipén pal Devléste, i savé udžindlé Bolybnáskiro taláno (dáro), i doresné (dolyne) péskiri paš javire manušénca Sventoné Duhóstyr; i savé udžindlé lačhipén Devléskire lavéstyr i viekoskiri zor, saví javéla angíl, kiéli Devél javéla te xulainél; i savé mekné te patián; kadasaven manušén naštý nevéstyr te sykliakiras, sob (kaj) jone te riskirén péskiro džiibén ke Devél, pal-dová so jone sýrby nevéstyr primarena ke trušúl Devléskire Čhavés i otdena Les pe saben manušénge. Devél bahtiakiréla dasaví phuv, saví léla paní bryšyndestyr i savjátyr giv barjola vaš odolé manušénge, kon keréla butý pe láte; a kóli jekh xrústo suv'jénca (dylyny čar) i phusadýtko xrústo (ĥar') barjona pe daja phuv, tedy joj isyn nalačhi ni ke so, i Devél moginéla te prokošel la, a jag shačkiréla daja čar dro kónco (dro jagóro). Dróga amaré, na dykhí pe davá, so ame rakirasa adiáke, ame patiása dre tuménde, so tumé san fedýr i pašyledýr ke dová, sob (kaj) Devél te zrakhél tumen. Pal-dová so Devél nane napatiaibnaskiro i Jov na bistrela tumarí butý i patýv ke javír manušá, savé tumé kerdé vaš Léskiro lav, kiéli tumé pomoginenas (dénas vastá) i kakaná pomoginena devlytkonenge. Ame kamasa, sob (kaj) kažno manúš tuméndyr te patial xačkirdé ilésa ke kónco (ke jagóro), sob (kaj) tumé te na javén kirne-maséngiro, a tumé te kerén adiáke-pac', syr kodolé manušá, savé péskire patiaibnása i dlugone užakiribnasa doreséna dová, pal so Devél dyjá lav lénge. Kiéli Devél dyjá lav Avraamóske, pal-dová so Jov na mogindiá ni pe konéste vučedýr Péstyr te sovlahal, tedy Jov sovlahadiá Kokoró pe Péste, i phendiá: “Me, čačes, bahtiakirava Tut i Me dáva but but čhavén túke”; a Avraámo užakirdia ĥará (dlúges) i doresciá dová, pal so Devél dyjá lav léske. Manušá sovlahana pe vari-konéste, kon isyn baredýr léndyr i sovláh isyn sýrby dophenybén, so léske trej te spolninel i te čhuvél kónco (jagóro) pe saré léngire čingardá. Paldavá Devél vykedyjá zoraledýr te sykavél Péskiri naparuibnýtko vólia te kerél ke kónco (ke jagóro) lav, so Jov dyjá odolé manušénge, savé prilyné Léskiro phendló lav, i Jov dophendia sovlahasa. Devél kerdiá adiáke pir duj čačipená: Devél na paruvela phendló lav i na xohavela. Aménge, savé čhurdyjampe ke Jov te uhtylaspe pal nadiéia, so sys dyný aménge, javéla zoraló podyno vast (pomošš) te zrakhaspe. Kadaja nadiéia podrikiréla amaró iló dre zor bidarakires i isyn sýrby jakrjo vaš di, savó rikiréla amen, i joj zadžála dro naj sventedyr štéto pal šýrma, dro Bolybnáskiro Rajo, odorík zagijá Isúso angíl aménde, i jaciá Anglatuné Rašása pe saré viéki, pir dasavo-pac' titulo, syr i Mielhisedeko. Pal-dová so Mielhisedéko sys Salimoskiro králi, rašáj Naj Vučedyreskire Devléskiro, odová, kon strenindia (pirilyja) Avraamos i bahtiakirdiá les, kiéli odová risjolas pale, syr muliakirdiá kral'jén; i konéske Avraámo adiáke-pac' otdyjá déšto paš saréstyr, pal-dová so lav Mielhisedeko značynéla “čačipnáskiro Králi”, i pal-dová so jov sys Salimoskiro králi, léskiro lav adiáke-pac' značynéla “Ramanjoskiro (Miroskiro) Králi”; jov sys bidadeskiro, bidakiro, nikón na džindiá pal léskiro ródo; davá isyn nadžindlo adiáke-pac', kiéli jov bijándyja i kiéli myjá, Jov isyn sýrby Devléskiro Čhavó i rašáj pe saré viéki. Dykhén, savó baró manúš sys Mielhisedeko, konéske až baró rašáj Avraámo dyjá déšto paš péskire mištypnástyr, savó jov jandiá maribnastyr. A kodolé Lievijoskire čhavé, savé jačénape rašanca pir Zakóno, i jone skedéna déšto paš Izrailjoskire manušéndyr, léngire pšaléndyr; mek jone isyn Avraamóskire rodóstyr. Kadavá manúš nane Lievijoskire rodóstyr, ne jov lyjá déšto paš Avraamostyr i bahtiakirdiá les, manušés, savó ĥaredyr doresciá lav Devléstyr. Davá isyn čačipén, so kodová manúš bahtiakiréla, kon isyn baredýr odoléstyr, savés jov bahtiakiréla. Rašaja, savé léna déšto paš, meréna, a pal Mielhisedekoste isyn phendló, so jov léla déšto paš, i dživéla. Saštý (možna) te phenas, so až kokoró Lievijo, kon léla déšto paš, pleskirdia déšto paš Mielhisedekoste pir Avraamoste. Pal-dová so, kiéli Mielhisedeko strenindia (pirilyja) Avraamos, tedy Lievijo na sys iščo (inké) pe svéto Avraamoste. Kóli moginénas Lieviténgire rašaja te kerén ke kónco (ke jagóro) péskiri butý, syr rašaja angíl Devléste, pal-dová so pir daja butý Zakóno sys dynó manušénge, tedy vaš so treindiá te javél javír Rašáj dasavo-pac' syr Mielhisedeko, a na dasavo-pac', sob (kaj) te kharelpe, so jov pir Aronoskiro rašaipen (titulo). Pal-dová so, kóli paruvena rašán, tedy trej i te paruven Zakóno. Amaró Raj Devél, pal Konéste ame rakirasa kakaná, sys javire rodóstyr, savéstyr nikón i nijékhvar na dynarindiá pašýl altárjo. Ame džinása, so amaró Raj Devél sys Judáskire rodóstyr, pal Savéste Mójza (Moisiejo) nisó na phendiá pal rašande kadalé rodóstyr. Kakaná ame butýr džinása, so isyn javír rašái, savó isyn adasavó-pac' syr Mielhisedéko, Savó jaciá rašása na pir manušéngiro uphenyben, syr dadá, a pir džiibnáskiri zor, saví naštý te muliakires. Pal-dová so Svénto Čhinybén rakiréla: “Tu san Rašáj pe saré viéki, kadasavó-pac', syr i Mielhisedeko sys.” Paldavá adiáke isyn, so phurané-manušéngiro priphenybén otparuvena, pal-dová so jov isyn nálačho i léstyr nane nisavó kučipén. Pal-dová so Mojzáskiro Zakono na kerdiá nisó, sob (kaj) vari-so te javél bidošakiro; i, ĥáda, aménde isyn fededýr nadiéia, pir saví ame javása pašyledýr ke Devél. Adavá saró isyn pir Devléskiri sovláh, pal-dová so saré javír rašaja jačné te kerén Devléskiri butý bi sovlahakiro, a Xristóso jaciá Rašása (jaciá Rašái) pir Devléskiri sovláh, pal-dová so pal Léste isyn phendló: “Raj Devél sovlahadiá, i Jov na délape pale: “Tu san rašáj pe saré viéki””, paldavá Isúso isyn sýrby dudvaló (poručytieljo), so nevó zavieto isyn fedýr. I kadasavé rašaja sys but ĥaredyr pir phuranó zavieto, jone merenas i jone na moginénas te jačénpe pe péskiri butý. Ne Isúso jačélape Rašása pe saré viéki, i Léskiri butý na piridelape ni konéske. Paldavá Isúso moginéla te zrakhél saré manušén, savé javéna pašyledýr ke Devél pir Léste; Jov isyn ŭsády (sak) džidó te mangél Devlés pal lénde. Pal-dová so adasavó Anglatunó Rašáj i trej aménge: svénto, lačhé-ilýtko, na magirdó grehosa; Devél čhudiá Les dre rig grehitkoné manušéndyr i ĥazdyjá Les vučés dro Bolybnáskiro Rajo. Léske na trej te janel svénto dyibén kažno dyvés, syr javír rašaja keréna adiáke, savé ĥaredyr janénas svénta dyibená pal péskire gréhi, i pale pal manušéngire gréhi. Xristóso kerdiá davá jékhvar, kiéli otdyjá Kokoró Pes syr svénto dyibén pal amaré gréhi. Pir Mojzáskiro Zakóno čhuvéna anglatuné rašanca manušén, savé isyn grehítka; ne Devél čhudiá Péskire Čhavés pir sovláh, so sys paló (poslie) Zakóno, Les, Savó isyn bidošakiro pe saré viéki. Glavnymá isyn dro dová, pal so ame rakirasa, isyn dasaví: aménde isyn adasavó Anglatunó Rašái, Savó isyn beštó pe bolybén pir čačó vast Devléskire naj vyčedyréskire tronostyr; Jov isyn Rašáj pe Svénto Štéto, saví isyn čačuný šátra te mangénpe Devléske, saví sčhudia khetané Devél, a na manušá. Kažno rašáj isyn čhudo vaš dová, sob (kaj) te janel svénto dyibén i dáro, pal-dová so treindiá, sob (kaj) i kadalé Rašaste te javél vari-so te janel. Kóli Xristóso te jačelaspe te dživél pe phuv, Jov na javélas Rašása, pal-dová so isyn adáj kadasavé rašaja, savé iščo (inké) janéna svénta dyibená pir Mojzáskiro Zakóno; savé keréna Devléskiri butý pir patrín (óbrazo) i sýrby pir zer (tienjo), savé isyn čačunés dro Bolybnáskiro Rajo. Kiéli Mójza lyjá te končynel butý pe šátra, to Devél phendiá léske: “Dykh, ker saró, sob (kaj) te javél dasavo-pac', syr sys sykado túke pe bérga.” Ne kakaná Xristóso doresciá fededýr butý syr Anglatunó Rašái, saví isyn pe but fededýr kadalé-rašángire butiátyr, adiáke-pac', syr fedýr isyn i Zavieto, savó Jov piridyja Devléstyr manušénge, syr Maškiratuno, pal-dová so dro Zavieto isyn fedýr dyné davá. Kóli te javél pérvo zavieto bidošakiro, tedy na treindiá te rodén štéto vaš javír. Ne Devél bangiakirela Péskire manušén, kiéli Jov rakiréla pir prorokoste: “Ĥáda, javéna dyvesá”, – rakiréla Devél, – “kiéli Me keráva Nevó Zavieto Izrailjoskire i Judáskire manušénca; ne nane dasavo zavieto, savó Me kerdjom léngire dadénca dro dová časo, kiéli Me lyjom pal vast len, sob (kaj) te vylydžav Jegiptóskire phuvjátyr. Jone na jačnépe zoralé dro patiaibén i Me na prilyjom ilésa len. Adavá isyn Zavieto, savó Me keráva pe dalé dyvesá Izrailjoskire manušénca, – rakiréla Devél. ‘Me piridava Miré Zakóny dre léngiri godý i Me čhináva len pe léngire ile, i Me javáva léngiro Devél, a jone javéna Miré manušá. I nikón na javéla butýr te sykliakirél javirés i pšal na javéla te sykliakirél pšalés i te rakirél léske: “Udžin Devlés”, pal-dová so saré manušá tyknendyr ke baré, javéna te džinén Man. Pal-dová so Me primangava lénge dová, so jone sys proti Zakóno, paldavá Me nijékhvar na priripirava butýr lénge.” Devél rakirélas dová pal Nevó Zavieto, pir davá Jov priĥalyja so pérvo zavieto isyn phuranó. A dová, so isyn phuranó i nane ke džiibén, sýges otparuvelape. Dro pérvo zavieto sys phendló, syr treindiá te mangélpe Devléske, i pal svénto štéto, savó kerélas manúš pe daja phuv. Sys čhudý Svénto Šátra: dre pérvo paš sys momolýtko (svietíl'niko) i skamínd svencononé marésa, davá štéto khardiape Svénto Štéto. Pal javír šýrma sys javír paš dre Svénto Šátra, davá štéto khardiape Naj Sventedyr Štéto. Odój sys suvnakunó altárjo, kaj xačkirenas lačhé-khandypnáskiri smóla, i Kovčegóskiro Mohtó/Mohtén (Jaščyko) zavietósa, savó sys občhudo suvnakása saré rigéndyr. Dro davá Svénto Mohtó sys suvnakunó čaró mannasa, Aronoskiro destó, savó vylienindia. I sys odój adiáke-pac' baruné tablicy, kaj sys vyčingirde zavietoskire priphenybená. A uprál pe Kovčegóskiro Mohtó sys terdé slavákire xieruvimy. Jone začhakirenas péskire phakenca štéto, kaj gréhi otmekenaspe; ne kakaná nane dová časo te rakiras butýr pal davá. Davá adiáke saró sys sčhudo: rašaja kažno mólo zadžanas dre pérvo Svénto Šátra te mangénpe Devléske, syr treindiá butý pir Zakóno, a dre javír Svénto Šátra, saví sys andrál, zadžalas jekh Anglatunó Rašái, jékhvar dro berš, ratésa i sventoné dyibnasa pal manušéngire gréhi, savé jone kerdé pir péskiro nadžinyben. Svénto Dúho (Fáno) sykavéla dalésa, so paka isyn pérvo Svénto Šátra, drom nane otčhakirdo dro Naj Sventedyr Štéto; kadaja pérvo Svénto Šátra isyn sýrby primiéro (sykaibén), so kerélape dro amaró časo, dro savó janéna dáry, i svénta dyibená, savé na moginéna te kerén bidošakiresa kodolés, kon mangelape Devléske, syr trej pir Zakóno, pal-dová so jone otlydžanaspe ke uphenybená, so saštý te xas, i so te p'jes, syr so te mores (te xalaves), ke amarí loč (plot'), lénde isyn zor ke/ žýko davá časo, paka Devél keréla nevó lado (poriadko). Ne Xristóso javdiá, syr Anglatunó Rašáj vaš lačhipén, savó javéla angíl barydyršone i fedydyršone šatrasa, saví kerdé na manušéngire vastá, i saví nane dalé svetoskiri, so isyn kerdó, i na buznéngire (kozlengire) i cielianténgire ratésa, a Péskire ratésa Jov zagijá jékhvar dro Naj Sventedyr Štéto, i doresciá viéčno vykinybén pal amaré gréhi. Pal-dová so, kóli buznéngiro ci cielianténgiro rat i terné-recákiri (tjolkakiri) práska (pieplo), so kropinelape pe manušénde, savé isyn nažužo te kloninenpe patyvása Devléske, keréla žužása (čystonasa) léngiri loč, to ci pe but butedýr vyžužakiréla amen Xristosóskiro rat, Savó pir viéčno Dúho (Fáno) jandiá Pes bidošákires, sob (kaj) te vyžužakirel amarí patýv mulé rendéndyr te dynarinás džidé Devléske? I paldavá Xristóso jandiá Nevó Zavieto, sob (kaj) odolé manušá, savén Devél khardia ke Pe prikhardia, mogindlé te doresen viéčno štéto dro Bolybnáskiro Rajo, pal so Jov i dyjá lav. Léskiro meribén isyn sýrby vykinybén pal gréhi, savé kerdé manušá, kiéli phuranó zavieto rikirdia zor. Kóli isyn zavieto, savó manúš jačkiréla javirénge paló (poslie) péskiro meribén, trej te dophenen, so kodová manúš myjá. Pal-dová so zavieto féni javéla te rikirél zor paló (poslie) meribén, i davá zavieto nisó nane mol, paka isyn džidó manúš, savó sčhudia les. Adiáke-pac' i pérvo zavieto na prilyjá zor bi ratéskiro. I paldavá, kiéli Mójza phendiá saré priphenybená Zakonóstyr saré manušénge, jov lyjá cieliantengire i buznengiro (kozlengiro) rat paniésa, lolé balenca i isoposkire randienca, i kropindia lénca syr kokori lylvarí-svítko, adiáke-pac' i saré manušén. I phendiá: “Davá isyn rat zavietóskiro, ke savó Devél priphendiá tuménge te rikirenpe.” I adiáke-pac' jov kropindia ratésa i šátra i saré khoré (sosudy), so trej te len, kiéli mangénape Devléske. I nábut so na saró žužakirelape grehostyr ratésa, i bi rateskiro pročhuiben na otmekelape grého. Treindiá, sob (kaj) dová, so sys sozdynó pe phuv pir bolybnáskiri patrín (óbrazo), adiáke te žužakirelpe, a dová, so isyn Bolybnáskiro čačunés, trebinela fedýr svénta dyibená, syr kodolé. Pal-dová so Xristóso zagijá na dre Svénto Štéto, savó kerdé manušéngire vastá, i savó isyn patrín (kopija) dolé Štetoskiro, so isyn dro Bolybnáskiro Rajo. Jov zagijá dro Bolybnáskiro Rajo, sob (kaj) te terdjol pal aménde angíl Devléste: na vaš dová, sob (kaj) te janel Pes but móly, syr Judéngiro anglatunó rašáj zadžála dro Naj Sventedyr Štéto na péskire ratésa; tedy Xristosóske treindiá te menčynelpe kažno mólo, syr svéto sys sozdynó. Ne kakaná, jékhvar pe viekoskiro kónco (jagóro), Jov sykadiá Pes i otdyjá Pes syr svénto dyibén, sob (kaj) te otparuvel gréhi. I syr užakiréla manušés jékhvar te merél, a paló davá séndo; adiáke-pac' i Xristóso sys jékhvar jandlo syr svénto dyibén pal buté-manušéngire gréhi. Ne Jov javéla javír mólo ke odolé, savé drieván užakiréna Les te zrakhél len, ne na vaš dová, sob (kaj) te otmekél gréhi. Judéngiro Zakóno isyn sýrby zer (tienjo) pal dová čačipén, savó javéla angíl, davá nane kokori patrín (óbrazo). Paldová so Zakóno kokoró na keréla manušén bidošakirenca, savé javéna te mangénpe Devléske, kiéli jone so berš janéna dasavé-pac' svénta dyibená pe altárjo. I manušá pirijačenas te janén svénta dyibená (žertvy), kóli jone, kiéli mangénape Devléske syr trej pir Zakóno, javénas vyžužakirde grehostyr jekh mólo i pe saró džiibén, i grého na jačelaspe dre léngiri godý.” Ne ame so berš ripirasa pal gréhi, kiéli janasa svénta dyibená pe altárjo. Pal-dová so naštý, sob (kaj) cieliantengiro i buznengiro (kozlengiro) rat te otmekél grého manušéstyr. Paldavá, kiéli Xristóso javdiá pe svéto, Jov phendiá Devléske: “Túke isyn na pir iló ni dáry, ni svénta dyibená; ne Tu prigotovindian masá (loč) vaš Mánge. A celoné-xačkiribnaskire janybená i svénta dyibená pal grého nane túke dre rádyma. Tedy Me phendjom: “Gada, Me džáva, syr isyn čhindló angíl dre lylvarí pal mánde; sob (kaj) te spolninav, Dévla, vólia Tyrí.” Angledýr Xristóso phendiá: “Tu na mangdian ni dáro, ni svénto dyibén, ni celoné-xačkiribnaskire janybená, ni dáry pal gréhi, savé janéna pir Zakóno.” Tén'ci Jov phendiá: Ĥáda, Me javdjom, sob (kaj) te spolninav Tyrí vólia.” Jov čhuvéla krig anglatunó mangipén (pátieri) Devléske, sob (kaj) te čhuvél i podrikirél javír; i pir Devléskiri vólia ame sam svencyndle Isusóskire Xristosóskire men'kendyr dre masá, savé sys jandlé syr dáro jékhvar, pal sarénde. I kažno (sváko) rašáj dyvés dro dyvés keréla Devléskiri butý i janéla but móly odolé-pac' svénta dyibená, savé nijékhvar na moginéna te zlen gréhi, a Jov, Xristóso, otdyjá Pes jékhvar dro svénto dyibén pal gréhi i besciá pe saró časo pir čačí (pravo) rig Devléstyr, kaj kakaná Jov užakiréla, kiéli Léskire vérgi javéna čhudé tel Léskire ĥerá. Pal-dová so Jov jekhe sventoné janybnasa kerdiá bidošakirenca pe saró časo odolén, savé isyn vyžužakirde grehéndyr. I Svénto Dúho (Fáno) dophenéla aménge: paló (poslie) dová, syr Devél phendiá: “Ĥáda, isyn davá zavieto, savó Me keráva lénca paló odolé dyvesá, – rakiréla Raj Devél: – Me piridava Miré Zakóny dre léngire ilé i Me čhináva len pe léngiri godý”; i léngire gréhi i dová, so jone kerdé proti Zakóno, Me na priripirava ni jekh mólo. A kiéli grého isyn otmekno, tedy na trej butýr nisó te janén syr svénto dyibén pal lénde. Paldavá, pšalále, ame moginasa murškanés te zadžas pe Svénto Štéto, pal-dová so Isúso pročhudia Péskiro rat; Jov dyjá zor aménge te prodžas pir šýrma nevoné i džidé dromésa, savó isyn pir Léskiri loč (plot'); Jov isyn amaró Baró Rašáj pe Devléskiro Kher, savó isyn dro Bolybnáskiro Rajo; paldavá javén pašyledýr ke Devél čačuné ilésa, pherdé patiaibnása, sob (kaj) te javén amaré ile vyžužakirde grehéndyr i te na čuinas fujes, so ame sam bangé; te javén amaré masá obmorde žužé paniésa. Javása te rikiraspe zoralés pal nadiéia, saví ame pridžindiam bi kunipnáskiro, pal-dová so Devél, Kon dyjá lav, isyn patiaibnýtko; iavén te dykhas jekh pe jekhéste, sob (kaj) te sykavén patýv jekh jekhéske i te kerén lačhipén jekh jekhéske; i na javása te mekas te skedaspe dre khangirí, syr davá prisyklyne javír manušá, a javása te sykliakiras jekh jekhés butedýr, kóli tumé dykhéna, so Ráskire-Devléskiro Dyvés javéla syg. Pal-dová so, kóli ame udžindiam čačipén, ne usajékh kerása grého kokoré péstyr, tedy nane butýr nisavó svénto dyibén te zlel dalé gréhi, ne aménge jačélape baré darása te užakiras séndo i jag, saví xačkiréla saré Devléskire vergén. Kóli kažno manúš, kon na déla patýv Mojzáskire Zakonóske, meréla bitangipnaskiro pir lavá dujé ci triné jakhitkonengiro (svidietieliengiro): to, syr tumé duminéna, ci pe but pharedyr javéla kára pe odolé manušéste, savó sýrby štakirela ĥerénca Devléskire Čhavés i na ginéla pal svénto zavietóskiro rat, savésa jone kokoró sys svencyndlo, i rakiréla nalačhé lavá pe Dúho (Fáno), Savéstyr ame lyjam bahtalypén? Ame džinása Odolés, Kon phendiá: “Me otháva palé (Me otomstinava), i Me javáva te čhuvav bída” – rakiréla Raj Devél.” I nevéstyr: “Raj Devél javéla te sendiakirél Péskire manušén.” Davá isyn darano te perén dre džidé Devléskire vastá. Priripiren tumaré pérva dyvesá, kiéli tumé udžindlé i patiandyné dre Xristosóste, tumé sánas zoralé pir dúho (fáno) dre pharé mén'ki; iekhe rigátyr, manušá xoliames sandlepe tuméndyr angíl manušénde, kerdé bída tuménge; javire rigátyr, tumé kokoré sánas khetané javire manušénca, savé adiáke-pac' dživénas i menčynenaspe. Tumé piridživenas khetané manušénca, savé sys bešté dro štaribén, i kiéli lyné zorjása tumaró mištypén, tumé davá prilyné radymása, pal-dová so tumé džinéna, so tuménde isyn dro Bolybnáskiro Rajo fededýr mištypén, savó jačélape viéčnes. Na mekén tumaró patiaibén, pal so tumé doreséna baró otdyibén Devléstyr. Tuménge trej te vyrikiren, sob (kaj) te kerén saró pir Devléskiri vólia i te doresen dová, pal so Jov dyjá lav tuménge. Pal-dová so sarésa nábut jaciápe te užakiras, i Odová, Kon džála, na zarikirelape. Miré čačuné manušá javéna te dživén pir péskiro patiaibén, ne kóli vari-kon délape palé, tedy odová manúš nane lačhó Miré ileske. Ne ame na sam odolé manušéndyr, savé denape pale péskire patiaibnastyr i džána ke xasibén; ne ame patiása, so Devél zrakhéla amen. Patiaibén – davá isyn zoraló (tvardo) džinybén dro dová, pe so aménde isyn nadiéia, so odová kerélape pherdés, i zoraló patiaibén dro dová, so isyn vari-savé čačipená pe svéto, mek ame na dykhasa len, pir davá patiaibén Devél pridžindia dophenybén amaré godé-phuréngiro. Jekhé patiaibnása ame ĥaljovasa, so saró svéto isyn sozdynó Devléskire lavésa, i so saró, so ame dykhasa, sys kerdó doléstyr, so nane bicialó. Patiaibnása Avieljo jandiá Devléske fededýr svénto dyibén, syr Kaino; pir patiaibén jov doresciá dophenybén Devléstyr, so jov isyn čačunó manúš, kiéli Devél rakirdiá pal léskiro svénto dyibén i pir Péskiro patiaibén, syr i angledýr, Avieljo rakiréla aménge, mek jov uže myjá. Patiaibnása Jenoho sys lynó pe bolybén, i jov na dykhciá meribén, i les nikón na mogindiá te lathel, pal-dová so Devél lyjá les. Ne angíl, syr Devél lyjá les, jov doresciá dophenybén, so jov kerdiá kučes Devléske. Ne naštý te kerés kučes Devléske bi patiaibnaskiro, pal-dová so trej, sob (kaj) manúš, savó javdiá ke Devél te patial, so Jov i vaš odolénge, kon rodéla Les, Devél otdéla lačhipnása. Patiaibnása Nojo doresciá podrakhiben pal dová, so na sys džindló ni konéske; jov sventoné darása kerdiá kovčego i zrakhciá péskiri sém'ia (irí). Patiaibnása jov sendindia svéto, i Devél priĥalyja les čačipnaskire čhavésa pal léskiro patiaibén. Patiaibnása Avraámo, savó sys khardo te kandel i sys bičhadó te džal pe dová štéto, pal savó sys léske dynó lav te doresel paš; jov gijá i na džindiá, karik jov džálas. Patiaibnása jov lyjá te lodel syr javire – rigakiro manúš pir phuv, pal saví Devél dyjá lav léske; i jov dživdiá šatrénca Isaakosa i Jakovosa, savénge adiáke-pac' sys dynó lav te doresen paš khetané; jov užakirdia fóro, savó sys bangó (musindia) te javél pe zoraló fundámiento, saveskiro Devél Kokoró javéla arhitiektoro i javéla te kerél les. Patiaibnása Saara, savjate na sys čhavoré, saví adiáke-pac' doresciá sastypen, sob (kaj) te javén čhavoré láte, bijandiá tel phuripen, pal dová so joj dopatiandyja Odoléske, Kon dyjá lav. Paldavá jekhé kadalé Avraamostyr, savó sys phuró ke meribén te javél dadésa, bijándyne adákicy but manušá, adákicy ci but isyn čergeniá pe bolybén i syr naštý te gines saro práho pe morjoskiro (derjavéskiro) brégo. Saré kadalé manušá myné patiaibnása, jone na doresné dová, pal so Devél dyjá lav lénge, jone dykhné saró davá durál i phendlé “ramánjo” (miro) doléske i pridžindlepe, so jone sys čúža manušá i lodena pir doiá phuv. Pal-dová, so odolé manušá, savé rakiréna adiáke, sykavéna, so jone rodéna péskiro them (otiečestvo). I kóli jone priripirenas péske pal dová them, savéstyr jone vyginé, lénde javélas časo odorík te risjon; ne jone kakaná zoralés mangena fededýr them, savó isyn dro Bolybnáskiro Rajo, paldavá Devléske nane ladžavo, kiéli jone kharéna Les péskire Devlésa; pal-dová so Jov prigotovindia fóro vaš lénge. Patiaibnása Avraámo jandiá Isaakos dro svénto dyibén, kiéli Devél propatiakirelas les; Devél dyjá lav i jov skedyjape te janel dro svénto dyibén péskire jekhore čhavés; pal savéste sys phendló: “Isaakostyr javéla te džal duredyr tyró ródo”; jov dumindia péske, so Devléste isyn zor i muléndyr te otdžidiakirel léskire čhavés, i sýrby Avraámo doresciá les pale. Patiaibnása Isaáko bahtiakirdiá Jakovós i Isavos. Patiaibnása Jakovo angíl, syr te merél, bahtiakirdiá Jozáskire (Iosifóskire) čhavén, terdijá pe čangá i pomangdiape Devléske, kiéli rikirdiape pal péskiro destó. Patiaibnása, so javéla angíl, Joza angíl péskiro meribén priripirelas Izrailjoskire čhavénge pal vygiiben Jegiptóstyr i priphendiá, so te kerén léskire kokalenca. Patiaibnása Mojzáskire dadá garavenas les trin čhoná paló léskiro bijanypén, pal-dová so jone dykhné, so jov sys šukár, i jone na darándyne kralískiro priphenybnastyr. Patiaibnása Mójza, kiéli jaciá baró, otphendiape te kharelpe Faraonóskire-čhakire čhavésa; i vykedyjá fededýr te pirilydžal mén'ki (muki) Devléskire manušénca, syr léste te javél baht pe nabaró časo grehosa, i xoliamó saben pal/pe Miesijáste (Xristosóste), savo pyja pe Leste korigedýr (pozžedýr), jov gindia vaš péske drogedyr saré Jegiptóskire kučipnástyr, pal-dová so jov dykhciá nadejása, so les užakiréla otdyibén Devléstyr. Patiaibnása jov gijá Jegiptóstyr i na darandyja kralískire xoliátyr; jov vyrikirelas duredýr saró, pal-dová so jov dykhciá angíl péste Odolés, Kon na sys bicialó. Patiaibnása jov svenkindia Patradí i obmakhcia ratésa vudarengire kasiaki, sob (kaj) Meribnytko jangólo, savó muliakirelas pervoné bijatén, te na čilavel len. Patiaibnása jone piriginé Loló mórjo (derjáv), syr pir šukí phuv; i kiéli Jegiptóskire manušá sprobindle adiáke-pac' te piridžan mórjo (derjáv), jone tasadyne. Patiaibnása pyné Jerihonoskire vánty paló (poslie) dová, syr manušá obdžanas trusciál fóro pal eftá dyvesá. Patiaibnása Raav (Rahab), biladžakuny džuvlý, na myjá khetané odolé manušénca, savé na kandyné Devlés, pal-dová so joj prilyjá Izrailjoskire poddykhibnaskiren (čorahanen), syr péskire malen. I so me mogináva butýr te phenáv? Na uhtyléla (nádosi) mánge časo, kóli me javáva te rakiráv pal Giedieonoste, Varakoste, Salosonoste, Jefajoste i Davidóste i Samuiloste i pal javire prorokénde: savé péskire patiaibnása pirizorjakirenas javír kralipená, kerénas pir čačipén, doresenas dová, pal so Devél dyjá lav lénge, phandenas muiá ščerénge (lievenge), murdiakirenas baré-zorjakiri jag, zrakhenaspe kurtalakire vojstrimátyr (čolypnastyr); léngiro bizorjakiriben kerdiá len zoralenca, jone mardépe zoralés pe meribén i vytradenas čužoné xaladén, savé javénas maribnása pe lénde javire rigéndyr. Džuvliá lenas pale péskire mulen, savé sys otdžidiakirde; javír manušá, savé na zakamle, sob (kaj) len te otmeken ke vólia, sys zamenčindle pe meribén, sob (kaj) te doresen fededýr otdžidiakiribena, pe javire manušénde sys xoliamó saben, len mardé čhupniása, len phandenas dre sastyrá i čhuvénas dro štaribén. Len domarenas barénca, propatiakirenas pe mén'ki te pirilydžan, len pilinenas (rizilinénas) pe duj pašá; jone merenas kurtalátyr, psirenas dre bakrané i buznýtka (kozýtka) cýpi, jone dživdé dro nauhtylyben, dre mén'ki; stradyndle manušéndyr, adasavé manušá, savén saró svéto na sys mol, dživdé pe čhučé prahi, dre bérgi, pir ĥiebará (pieščery), pir loščyny pe phuv. I sarénge lénge isyn lačhó dophenybén pal léngiro patiaibén, ne nijékh léndyr na doresciá dová, pal so Devél dyjá lav lénge. Pal-dová so Devél pridumindia angíl te kerél vaš aménge vari-so fededýr, sob (kaj) jone khetané aménca te jačen bidošakirenca. Pal-dová so trusciál aménde adiáke-pac' isyn adákicy but jakhítka/iakhalé (svidietieli), javén čhurdasa péstyr liubo ĥámo pharipnasa i grého, savó priphandelape ke ame syr felý (sietka) i javása so isyn zor te vyrikiras, javása te pričhuvas zor te džas pir amaró džiibnytko drom, savó isyn angíl aménde; i javása te dykhas pe Isusóste, Savéstyr isyn amaró patiaibén, i Savó keréla amen bidošakirenca, Savó zamiést rádyma, saví javélas vaš Léske, i Savó vyrikiribnasa piridživdia trušulyben ke meribén, na dykhí pe ladž, i besciá pir čačó (pravo) vast Devléstyr. Obduminen xor pal Isusóste, Savó pirilydžija vergitko bipatyvakiro saben grehitkonendyr, davá saró déla vast tuménge te na xasiakirén zor dro dúho (fáno) i te na zden zorjása. Tumé iščo (inké) na mardépe ke rat, kiéli tumé sánas terdé proti grého. I tumé bistyrde lavá, savé Devél rakirdiá te podrikirél tumen, syr Péskire čhavén: “Čhavoa miro, na le pe ilo lokhes, kiéli Devél sykliakiréla tut, i na zdepe duhósa, kiéli Jov phenéla zorjása bang túke; Devél sykliakiréla odolé manušés, konés Jov vykedéla, i marela kažnoné manušés, savés Jov priléla, syr Péskire čhavés.” Javén vyrikirde, kiéli Devél sykliakiréla tumen, davá sykavéla, so Devél dykhéla pe tuménde, syr pe Péskire čhavorende. Ci isyn vari-kaj adasavó čhavó, savés léskiro dad na sykliakiréla? Kóli tumen na sykliakiréna, syr trej vaš saré čhavorenge, tedy tumé san khelby, a na čačuné Devléskire čhavé. I iščo (inké): kiéli aménde sys dadá pir amaró rat, savé sykliakirdé amen, i paldavá ame kutiakirdiam len, tedy ci pe but butýr aménge trej te kandas amaré Dadés pe dúho (fáno), sob (kaj) te dživás? Amaré dadá sykliakirdé amen nábut dyvesá, ne Devél sykliakiréla vaš amaró mištypén, sob (kaj) aménge te javél paš khetané Lésa dre Léskiri sventyma. Kažno sykliakiribén dro akakanatuno časo isyn vaš aménge na dre rádyma, a dro piridživiben, ne paló (poslie) dová, kon vysyklyja dalé sykliakiribnástyr, doreséla pale ramánjo (miro) čačipnáskire džiibnastyr. Rikirén mamúj (priames) péskire vastá i terdjon syr trej pe péskire ĥerá, savé khinyne. Psirén tumaré ĥerénca pir mamúj (priama) dromore, sob (kaj) odolé manušéske, savó isyn langalo, te na zmarelpe ĥerendyr, a sob (kaj) jov te džal mamúj (priames). Pričhuvén zor, sob (kaj) tuménge te javén dro ramánjo (miro) sarénca i dre sventyma, bi saveskiro nikón na dykhéla Ras-Devlés. Dykhén mištés, sob (kaj) nikón tuméndyr te na xasiakirél Devléskiro bahtiakiribén, sob (kaj) te na javél maškír tuménde kirkó rukh (kornjo), savó moginéla te janel fuipén, i sob (kaj) lésa te na javén magirdé but javír manušá; sob (kaj) maškír tuménde te na javél manúš, savó dživéla džuvliénca bi sevlakiro, ci bidevlytkari, syr Isávo, savó pal jekh čaró xabnasa bikindia péskiri l'góta, saví isyn pervoné bijatoste. I tumé ž džinéna, so paló (poslie) dová jov myslindia, sob (kaj) dad te bahtiakirél les, ne kodová na priĥalyja les, pal-dová so jov na mogindiá te riskirél pale dová, so kerdiá. Tumé na javné pašyledýr ke bérga Sinajo, saví saštý (možna) te čilaven vastésa, i saví xačola baré jagása, i na ke kalypén (t'ma), na ke mígla (mrako), na ke xoliami balvál, tumé na javné pe rogóskiro (trubakiro) bašaiben, i pe zan, saví rakiréla dasavé lavá, so manušá, savé šunéna len, mangena pal dová, sob (kaj) lénge butýr dalé lavá te na šunén; pal-dová so jone na mogindlé te šunén dová, so lénge sys phendló: “Kóli i savó riskiribnáskiro murdál (zvierjo) dočilavelape ke daja bérga, jov javéla zamardo (muliakirdo) barénca”; pe saró davá sys adiáke darano te dykhés, so Mójza phendiá: “Me drieván izdrava darátyr; a tumé javné ke bérga Sióno, ke Bolybnáskiro Jerusalimo, ke džidé-Devléskiro fóro, kaj isyn Jangóly, Save skedynépe khetané, tumé javné pašyledýr ke Khangirí, kaj skedynépe radymása čhavoré, savé pérva bijandjona, koneskire lavá isyn začhindlé dro Bolybnáskiro Rajo, i ke Devél, Savó isyn Sendári pe sarénde i ke manušéngire dúhi, so jačné bidošakirenca; i ke Isúso, Savó piridyja aménge Nevó Zavieto Devlésa i ke drógo rat, so sys pročhudo, savó isyn zoraledýr Avieljoskire ratestyr. Dykhén, na otrisjon krig Odoléstyr, Savó rakiréla tuménge. Kóli odolé manušá, savé otrisine krig te šunén Les, Savó rakirdiá lénge Bolybnástyr pe phuv, na mienindle kára, tedy butýr saréstyr i ame na mieninasa la, savénge Jov rakiréla Bolybnástyr: Konéskiri zan zatrinskirdiá sarí phuv, i Kon dyjá lav kakaná: “Me iščo (inké) mólo triinskirava na jekh phuv, ne i bolybén. Ne lav “iščo (inké) mólo” sykavéla pe dová, so Devél kerdiá, i so moginéla te xasjol, sob (kaj) te jačélpe dová, so nijékhvar na trinskirlape. Pal-dová so ame prilasa kralipén, savó nijékhvar na triinskirelape, javása te rakhas bahtalypén, savésa ame moginasa te kerás butý vaš Devléske darása angíl Léste i vorohósa (baré darása). Pal-dová so amaró Devél isyn jag, saví saró xačkiréla. Sykavén patýv duredýr jekh jekhéske, syr pšála. Prilén ilésa manušén, savé javéna ke tumé, pir davá tumé khardé dro kher Jangolen, mek jone na džindlé len. Ripiren manušén, savé xane men'ki, sýrby i tumé khetané lénca sánas dro štaribén; manušén, savé stradyndle, sýrby i tumé kokoré stradynenas masenca. Mek te javél romandunó (suprúžesko) džiibén dre patýv pir saró, i čačipén maškír lénde te na javél magirdó; Devél javéla te sendiakirél biladžakuné manušén i manušén, savé dživéna džuvliénca syr romá bi sovlakiro. Na javén ĥálka (žadna) ke lové, parikirén Devléske pal saró, pal-dová so Jov phendiá: “Me na jačkirava i na mekava tut.” Paldavá ame zoralés rakirasa: “Devél pomoginela mánge, i mánge nane sóstyr te darav, so moginéla te kerél mánge manúš?” Ripiren péskire sykliakiribnar'jen (nastavniken), savé lydžiné tumen i sykliakirdé tumen Devléskire lavéske, dykhén pe léngiro džiibén ke kónco (ke jagóro); javén dasavé-pac' dro patiaibén, syr jone isyn. Isúso Xristóso isyn Adasavó-pac' atasiá, adadyvés i pe saré viéki. I na denpe, sob (kaj) javír nadžindle sykliakiribena te zmaren droméstyr tumen, pal-dová so fedýr saréstyr, sob (kaj) te podrikirél tumaró iló Devléskiro bahtalypén, a na xabena, savé na jandlé nisavó šukaripén odolénge, savé zalenape dalésa. Aménde isyn altárjo, savéstyr na moginéna te xan odolé manušá, savé keréna butý vaš Devléske dre šátra; pal-dová so riskiribnáskire-murdalengire trúpy, savengiro rat Anglatunó Judéngiro Rašáj ianéla dro Svénto Štéto syr svénto dyibén pal grého, xačkirena pal davá stáno (lod), paldavá i Isúso, sob (kaj) te svencynel manušén grehéndyr Péskire ratésa, menčyndiape pe meribén pal fóro: i paldavá vydžasa ke Jov pal fóro, sob (kaj) i aménge te lydžas pe péste dasavo xoliamó saben manušéndyr, syr Jov: pal-dová so aménde pe daja phuv nane stalo fóro, i ame rodasa fóro, savó javéla viéčno dro Bolybnáskiro Rajo. Paldavá javása saró časo pir Isusóste te slavinas Devlés lavéngire-sventoné dyibnasa, – davá isyn amaré lavá, kiéli ame pridžinasa, so Jov isyn amaró Raj Devél. Na bistren te kerén lačhipén javire manušénge i te dielinenpe (te ulavenpe) (te den kotér (kusko) iléstyr) javire manušénca, pal-dová so dasavé lačhé réndy, sýrby svénto dyibén isyn lačhó Devléske. Kandén péskire sykliakiribnar'jen, savé lydžána tumen, kerén saró, so jone phenéna tuménge; pal-dová so jone saró časo pekenape (zabotisona) pal tumaró dúho (fáno), jone isyn sýrby manušá, savé javéna te otphenen angíl Léste, sob (kaj) jone te kerén radymása davá, a na te den ĥondiá (na te ŭzdyhinen), tedy na javéla fededýr tuménge. Mangénpe pal aménde: ame zoralés patiása, so ame saró kerása žužé patyvása i dživasa pir čačipén. Me drieván mangáva tumen te mangénpe, sob (kaj) me mogindjom sygedýr te risjovav ke tumé. Devél, Savó déla ramánjo (miro), Savó otdžidiakirdiá muléndyr amaré Ras-Devlés, Isusós Xristosós, Baré Čhupnaris pir rat viečnone Zavietostyr, mek te del Jov zor tuménge te kerén butý lačhés, sob (kaj) te kerén saró tumé pir Léskiri vólia. Mek Jov pir Isusóste Xristosóste te kerél dová dre aménde, so isyn lačhó Léske, Savéske te javél sláva pe saré viéki’. Amín'. Me drieván mangáva tumen, pšalále, te prilén miro lav syr podrikiribén, me nábut i čhindjom tuménge. Džinén, so amaré pšalés Ximás vymekne štaribnastyr; kóli jov javéla syg adarík, me javáva khetané lésa ke tumé. Piridén “paklono” tumaré sykliakiribnar'jenge, savé lydžána tumen, i saré sventoné manušénge. Piridena “paklono” tuménge manušá Italijatyr. Mek te javél bahtalypén sarénca tuménca. Amín'. Jakovo, savó isyn Devléskiro i Ráskire-Devléskiro, Isusóskire Xristosóskiro pishári (rabo), bičhavéla miro (ramánjo) Judéngire dešudujé rodénge, savé isyn rosčhurdyne pir svéto maškirál Najudénde. Pšalále miré, ginen pal bari rádyma, kiéli tumen propatiakirena pir javír (raznes), i džinén tumé, so propatiakiriben keréla tumaró patiaibén zoraledýr. Tumaro zoraló patiaibén te vyrikirel keréla bidošakiro réndo (diélo), sob (kaj) tumé te javén lačhé i bidošakire pir saró, sob (kaj) te na javél ni savó nauhtylyben tuménde. Kóli vari-konéste tuméndyr na uhtylel (nádosi) godý, to mek jov te mangél Devléstyr, Savó déla sarénge, kon kaméla, i Savó na vyrakirela, a déla léske: ne mek jov te mangél patiaibnása; mek jov te na kuninelape. Pal-dová so kon nane zoralés terdó dro péskiro patiaibén, odová isyn sýrby morjoskiri valna (velna), saví balvál ĥazdéla, i nevéstyr čhurdéla pale: mek te na duminel adasavó manúš, so jov doreséla vari-so Rástyr-Devléstyr; adasavó manúš isyn balvalitko i čhurdelape pe duj rigá, nane zoraló pir dúho (fáno) dre saré péskire dromá. A pšal, savó isyn pritasado, mek te šarelpe jov dolesa, so isyn léske dynó vučipnástyr, i barvaló manúš, mek jov te šarelpe, kiéli manušá ladžakirena les, pal-dová so javéla časo i léskiro barvalypén xasjola, syr feldýtka luludiá (cvety) pir čar. Pal-dová so uštéla kham i šut'kirela čar péskire xačkiribnasa, i lákire luludiá (cvety) peréna, i saró šukariben xasjola, adiáke-pac' i xasjola barvaló manúš sarésa, so jov kerdiá. Bahtaló isyn odová manúš, savó zoralés vyrikiréla propatiakiriben, pal-dová so, kóli jov vyrikirdia propatiakiriben, jov doreséla džiibnáskiri viánka, pal saví Devél dyjá lav saré manušénge, konéske isyn drógo Jov. Kiéli propatiakirena tumen, mek nikón te na rakirél: “Adavá Devél propatiakirela man”, pal-dová so xolý na moginéla te propatiakirel Devlés, a Devél Kokoró na propatiakirela nikonés. Ne kažno manúš propatiakirela pes péskire masengire tyrdypnasa, savó na trej, i savó zatyrdela les dre felý; paló davá zlydžaiben, savó na trej, i savó lydžála ke grého, savó javéla kerdó i savó lydžála ke meribén. Dróga miré pšalále, dykhén, sob (kaj) nikón tumen te na del dukhá (te na xohavél): kažno lačhipén i kažno bidošakiro taláno bičhadé aménge vučipnástyr, dudengire (svetengire) Dadéstyr, Savó na parudjola, i na pirikerelape. Jov vykedyjá pir Péskiri vólia te del džiibén aménge čačuné lavésa, sob (kaj) aménge te javas Léskire pervonenca, savén Jov sozdyjá. Džinén, miré dróga pšalále: mek kažno manúš butýr te šunél liéntes/povolin'kes (nasyges) te rakirél, liéntes te xoliasol. Pal-dová so manušeskiri xolý na keréla manušés čačunedyr, syr davá trej Devléske. Vaš davá otčhuven péstyr saré ladžave ke magiripén réndy i pies'cjonyma, savé iščo (inké) jačnépe andré tuménde i prilén lav kovlé ilésa, savó mekciá kornjo (rukh) dro tumaró iló i moginéla te zrakhél tumen. Kerén saró pir Devléskiro patiaibén, i, kóli tumé féni šunéna, a na keréna adiáke, tedy tumé xohavena kokoré pes. Pal-dová so, kóli vari-kon šunéla lav i na keréla saró, syr isyn phendló, odová isyn sýrby manúš, savó rozdykhela péskire-moskiri gožyma dro gindalo, a adasavó manúš rozdykhela pes i džála krig i adái-pac' bistrela, savó jov sys. Ne manúš, savó lačhés sykliakiréla Zakóno, savó isyn bidošakiro, i savó déla vólia; kadavá manúš keréla pir Zakóno, i na bistrela, so jov šundiá, i javéla bahtaló dro dová, so jov keréla. Kóli vari-kon tuméndyr ginéla pes, so jov isyn zorjása patiaibnaskiro, a na phandela péskiri čib, jov xohavela kokoró pes, i kadasaveskire-manušeskiri strogima na trej ni konéske. Žužé-patiaibnaskiri i namagirdy strogima angíl Devléste Dadéste isyn dro dová, sob (kaj) tumé te džán te dykhén pal pirotende (sirotende) i pivliende (udovende), kiéli jone pharés piridživena i te zrakhen pes bidošakirenca dalé svetóstyr. Pšalále miré! Kóli tuménde isyn patiaibén dre Isusóste Xristosóste slavutnone Raste-Devléste, sendinén šerá (rávnes) sarén: pal-dová so, kóli dre tumarí sinagoga zadžála manúš suvnakuné angrustiasa i uridó dro ziaindlo uribén, i adiáke-pac' zadžála čororó manúš dro kušno uribén, i tumé dykhéna patyvása pe manušéste, savó isyn uridó dro ziaindlo uribén i phenéna léske: “Túke javéla kuč te bešes adái, a čororeske phenéna “Tu terdjov odój”, ci “Beš adáj pašýl miré ĥerá”: tedy tumé sýrby kokoré sendinena manušén, dalésa-pac' tumé jačéna nalačhé sendar'jenca? Šunén, miré dróga pšalále: Ci na vykedyjá Devél odolé manušén, savé isyn čororé dro davá svéto te kerél barvalenca len dro patiaibén i kralipnaskire čhavénca, pal savó Jov dyjá lav saré manušénge, konéske drógo isyn Jov? A tumé ladžakirdé čorores. Ci na san tumé tel barvalengiri zor, i ci na jone tyrdena tumen tel séndo? Ci na košena jone lačhó lav, savésa kharéna tumen? Kóli tumé san patiaibnytka kralískire Zakonoske, savó isyn čhindló dro Svénto Čhinybén: “Rikir syr drógima dro iló manušés, savó isyn pašýl túte, syr kokoró pes, tedy tumé keréna mištés.” Ne kóli tumé sendinena manušén na šerá (rávnes), tedy tumé keréna grého i tumé san bangé angíl Zakóno. Pal-dová so, kóli vari-kon rakhéla saró Zakóno i obštavelape dro vari-so jekh, so isyn na pir Zakóno, odová manúš javéla bangó dro saró. Pal-dová so Odová, Kon phendiá: “Na ker biladžaipén”, adiáke-pac' phendiá: “Na zamar.” Kóli tu na kerésa biladžaipén, a zamaresa, tedy tu adiáke-pac' san bangó angíl saró Zakóno. I rakirén i kerén adiáke sýrby manušá, savén moginéna te sendinén pir Zakóno, savó déla vólia; pal-dová so vaš odolé manušénge, kon na sykadiá tangipén (žalima) ke javír manušá, séndo javéla bi tangipnaskiro adiáke-pac' ke jov, ne tangipén isyn vučedýr sendostyr. Pšalále miré, savó isyn proko (l'góta) adalestyr, kóli manúš rakiréla, so jov patiála, ne ni savé lačhé réndy jov na keréla? Ci moginéla dasavo patiaibén te zrakhél les? Ake, kóli tumaró pšal ci phen isyn nange i bokhalé, a vari-kon tuméndyr phenéla lénge: “Džán ramanjosa (mirósa) i kokoré urjavenpe i čaravenpe” i tumé na déna lénge ničý vaš dová, so isyn trej vaš lénge, tedy savó proko javéla kadasavé patiaibnastyr? Adiáke-pac' isyn i patiaibén, kóli nane nisavó réndo léstyr, tedy dasavo patiaibén isyn muló kokoró pir péste. Ne vari-kon phenéla tuméndyr: “Túte isyn patiaibén, a mánde isyn réndy (diély).” Sykáv mánge tyró patiaibén bi rendengiro, a me sykaváva miro patiaibén miré rendéndyr. Tu patiása, so Devél isyn jekh. Tu kerésa mištés. I až nalačhé dúhi patiána i izdrana. Ci kamésa tu te džinés, nagodo manúš, so patiaibén bi rendengiro isyn čhučó (pusto)? Ci na pir réndy Devél pridžindia čačunesa dadés amares Avraamos, kiéli jov jandiá syr svénto dyibén péskire čhavés Isaakos pe altárjo? Ci dykhésa tu, so patiaibén isyn khetané léskire rendénca i pir réndy léskiro patiaibén jaciá bidošakiro. I lav, savó isyn čhindló dro Svénto Čhinybén, kerdiápe pherdés (spolnindiape): “Avraámo patiandyja Devléske, pal davá Devél pridžindia les čačunesa”, i jov sys khardo Devléskiro Mal. Ci dykhésa tu, so Devél pridžinela čačunesa manušés pir réndy, ne na pir jekh patiaibén? Adiáke-pac' i Raháv, saví sys biladžakuny džuvlý, ci na pal lákire réndy Devél pridžindia čačuniasa la, kiéli joj prilyjá Izrailjoskire poddykhibnaskiren i bičhadiá len javire dromésa. Pal-dová so, syr džidé masá bi duhoskiro isyn mulé, adiáke-pac' i patiaibén isyn muló bi rendoskiro. Pšalále miré! Mek tumé te na saré ginen pes sykliakiribnaskirenca, pal-dová so tedy amen javéna te sendinén baré strogimasa. Pal-dová so ame saré častes obštavasape pir grého. Kóli vari-kon na keréla grého lavésa, odová manúš isyn bidošakiro, savó moginéla te phandel sýrby cuglienca saré péskire masá. Ĥáda, ame čhuvasa cugli (udily) dre muiá grenge, sob (kaj) jone te kandén amen, i tedy ame rikirasa zor pe saré léngire masá. Adiáke-pac' i pármy (korabli), savé jone te na javén baré i saví zoralý balvál len te na tradel, len lydžála nabaré ruljosa (sterosa) parmakiro steritko (rulitko), karik jov zakaméla. Adiáke-pac' i čib isyn, xaj, nabari paš amaré masengiri, ne but šarelape. Dykh, saví isyn nabari jag, ne syr baró veš joj xačkiréla. Čib-davá isyn sýrby doiá-pac' jag, savjátyr moginéla te javél but fuipén; čib isyn maškirál amaré masengire pašá, so kaliakirela saró i moginéla te shačkirel saró amaró džiibén jagása, saví džála liunostyr (adostyr). Pal-dová so sarén murdalén i čiriklien, sarén džidalen, savé isyn pe phuv i dro paní, manúš léla zor pe lénde, sob (kaj) jone te kandén les. Ne čib nikón manušéndyr na moginéla te phandel; davá isyn čoripén, savó naštý te urikires, joj isyn pherdý meribnytkone trutasa (jadosa). Čibasa (čibjasa) barjakirasa ame Devlés-Dadés, i košasa manušén, savén Devél sozdyjá pir Péskiro dykhibén. I kadalé-pac' uštendyr džála lavengiri bari patýv i košybén. Pšalále miré, na trej, sob (kaj) adiáke te javél. Ci moginéla te thadel jekhe ĥanyngatyr gudló i kirko paní. Pšalále miré, na moginéla inžyritko kašt te bijanél masliny, ci vinagradoskiri rand' inžyro? Adiáke-pac' i jekhe ĥanyngatyr na moginéla te thadel londo i gudló paní. Kon isyn tuméndyr te javél god'varó i te džinél saró; mek jov te sykavél davá pe réndo péskire lačhé džiibnasa i kovlé-ilytkone godypnasa; ne kóli dro tumaró iló tuménde isyn kirko zevlynypén i tumé keréna pir xolý, tedy na šarenpe vučés i na xohaven pe čačipén. Davá nane godypén, savó džála bolybnástyr, jov isyn phuvjákiro, biduhoskiro i džála nalačhestyr. A kaj isyn zevlenypen i xolý, odój javéla syr búnto maškír manušénde i saró čoripén. Ne godypén, savó džála bolybnástyr, angledýr saréstyr jov isyn žužó grehostyr, ramanjono, štyl (tiho), vyrikiréla but, na phandela manušés, isyn pherdó tangipnasa i lačhé rendénca, sendinela šerá (rávnes) manušén, nane dujemitko. A čačipén déla aplodo odolé manušénge, savé kokoré keréna ramánjo (miro) i pričhuvena zor vaš davá. Katýr javéla maribén pal lavá i čingardá maškír tuménde? Ci davá na tumaré masengire tyrdypnastyr, savó marelape andré tuménde? Tumé kaména vari-so, ne tumé na doreséna davá, i tumé zamarena (muliakirena) jekh jekhés pir dová, so tumé déna jakhalo i tumé na moginéna te doresen ni savó lačhipén, tumé čingardenape i marenape pal lavá i ničý tuménde nane, pal-dová so tumé na mangena Devlés. Mangena i na doreséna, pal-dová so tumé mangena na pe lačhé réndy, ne vaš dová, sob (kaj) te rozmeken vaš péskire masá. Napatiaibnytka muršá i džuvliá! Ci na džinéna tumé, so malypen (družba) grehitkoné manušénca svetóstyr isyn proti Devléste? I adiáke, kon vykedéla péske malés (drugós) adalé svetóstyr, odová javéla proti Devléste. So tumé duminéna, xaj, Svénto Čhinybén rakiréla ivjá lavá: “Dúho (Fáno), Savó dživéla dre aménde, keréla péske, sob (kaj) ame féni te javas Léskire?” Ne Devél déla baredýr bahtiakiribén. Pal-dová so i isyn phendló: “Devléske isyn na dróga phut'kirdé, a Jov bahtiakiréla naphut'kirde manušén.” I paldavá otdén pes Devléske, javén proti nalačheste i Jov našela krig tuméndyr. Javén pašyledýr ke Devél, i Jov javéla pašyledýr ke tumé. Vyžužakiren grehítka, tumaré vastá. Vyžužakiren tumaró džiibén, tumé san dujemitka. Piridživen ke xasibén, tuginen zoralés i rovén, mek tumaró saben te risjol ke tumé dre jasva, tumarí rádyma dre tuča. Čhuvén pes teledýr angíl Devléste, i Jov ĥazdéla vučés tumen. Pšalále, na rakirén čoripén jekh pe jekhéste. Manúš, savó rakiréla čoripén pe péskire pšaléste, ci sendinela péskire pšalés, odová manúš rakiréla čoripén pe Zakóno i sendinela Zakóno. Ne kóli tu sendinesa Zakóno, tedy tu na kerésa pir Zakóno, a tu san sendári. Isyn Jekh, Kon dyjá Zakóno i isyn Sendári, Savó moginéla te zrakhél i te xasiakirél: ne kon ža tu san adasavó, sob (kaj) te sendines pharés javire manušés? Kakaná šunén tumé, savé rakiréna: “Adadyvés ci atasiá tradasa ke dasavo fóro, i javása te dživás odój jekh berš, i javása te kofarinas i javéla aménde saró; a tumé ž na džinéna, so javéla atasiá, i so davá isyn tumaró džiibén? Jov isyn sýrby thuv, savó javéla pe nabaró časo, ne korigedýr (pozže) xasjola; zamiést dová, sob (kaj) te phenén tuménge: “Kóli te javél pe davá Devléskiri vólia, i, kóli ame javása džidé, tedy kerása davá i javír.” A tumé šarenape péskire phut'kiribnastyr: saró dasavo šaribén isyn fuipén. I paldavá, kon džinéla te kerél lačhipén i na keréla, odolé manušéske javéla grého. Kakaná šunén tumé, barvalé manušále, rovén i godlen zoralés angíl xasibén, savó javéla pe tuménde. Barvalypén tumaró kirnyja, i uribén xaja mel' (mol') Pe tumaró suvnakáj i rup irža lyjá upralypén, daja irža javéla syr dophenybén pe tuménde, i shala tumaré masá syr jag. Tumé skedyné péske kučipén pe palatuné dyvesá. Ĥáda, isyn mazúri (nagrada), saví tumé na dopleskirde butiarnenge, savé ukedenas maró tumaré feldatyr, dalé lové déna ĥodla jasvénca i léngiri gódla dogijá ke bolybnáskire-jangoléngiro Raj Devél. Tumé dživdé dro barvalypén pe phuv vaš péskire-maséngiro kamiben; tumé čaliakirde tumaró per pe xasiakiriben; tumé sendindle i muliakirde manušén, savoe sys čačunoe; jone na sys proti tuménde. Pšalále, vyrikiren ĥará (dlúges), paka javéla Raj Devél. Ĥáda, ĥavitko manúš užakiréla aplodo phuvjátyr i vaš leske jov užakiréla ĥará (dlúges), paka javéla tasiarluno (rannjo) i koriguno (pozdnjo) bryšýnd. Tumé adiáke-pac' vyrikiren ĥará (dlúges): javén zoraledýr péskire ilenca dro patiaibén, pal-dová so Devél javéla syg pašyledýr. Pšalále, na den ĥondiá (na uzdyhinen) xoliása jekh pe jekhéste, sob (kaj) tumé te na javén sendindle. Ĥáda, isyn terdó Sendári pašýl vudár. Pšalále miré, sykljon prorokendyr, syr jone stradyndle i syr ĥará jone užakirde, savé rakirdé Devléskire lavéstyr. Ĥáda, ame ginasa bahtalenca odolé manušén, savé sys zoralés terdé dre mén'ki. Tumé šundlé pal Iovaskiri tvárdyma dre mén'ki i dykhné, so jov doresciá dro kónco (dro jagóro) Devléstyr, pal-dová so Devél drieván tanginela i žalinela manušén. Angíl saréstyr, miré pšalále, na sovlahan ni bolybnasa, ni phuvjása, i nisave javire sovlahasa; ne mek te javél tumaró lav “ny, ai”, syr “ny, ai”, a tumaró lav “nad” syr “nad”, i tumé na javéna tel séndo. Ci vari-kon tuméndyr menčynelape? Mek jov te mangélpe Devléske. Ci isyn vari-kon rado tuméndyr? Mek jov te bagal psalmy. Ci isyn vari-kon nasvaló tuméndyr? Mek jov te kharel ke pe godephuren Khangirjátyr, i mek jone te mangénpe Devléske pe léste, i mek jone te makhen les olivitkone dzetesa vaš Devléskiro lav; i mangipén Devléske patiaibnása vysastiakirela nasvales i Devél keréla zoralesa les; a kóli jov kerdiá gréhi, tedy saró javéla otmekno léske. Pridžinen péskire gréhi jekh angíl jekhéste, sob (kaj) tumé te vysastjon: čačuné manušéskiro mangipén keréla bari butý. Proróko Ilíia sys adasavó-pac' manúš, syr i ame sam, ne jov saré iléstyr mangdiápe Devléske, sob (kaj) te na javél bryšýnd; i na sys bryšýnd pe phuv trin berš i šov čhoná, i nevéstyr mangdiápe Devléske jov, i bolybén dyjá bryšýnd, i phuv nevéstyr lyjá te del aplodo. Pšalále miré, kóli vari-kon tuméndyr zmarelape čačuné droméstyr, ne javír manúš riskiréla les pale ke Devél, mek te džinél odová manúš, so kodová manúš, kon riskirelas pale ke Devél grehitkoné manušés, jov zrakhéla les meribnástyr, i but léskire gréhi javéna garadé. Petristyr, Isusóskire Xristosóskire Apostolostyr, manušénge, konés Devél vykedyjá, savé lodena i isyn rosčhurdyne pir svéto, dro Ponto, Galatija, Kapadokija, Asija i Vifinija, pir Devléskire-Dadéskiro zaduminyben vaš dová, sob (kaj) te kandén Isusós Xristosós, Savó otmekciá gréhi Léskire Duhósa, sob (kaj) tumé te javén pomakhne Léskire Ratésa: mek bahtiakiribén i ramánjo (miro) te javén but but tuménge. Mek te javél bahtiakirdó Devél Dad amaré Ráskire-Devléskiro, Isusóskire Xristosóskiro, Savó pir Péskiro baró tangipén dyjá aménge javír džiibén, kiéli otdžidiakirdiá Isusós Xristosós muléndyr, sob (kaj) aménde te javél džidy nadiéia, sob (kaj) te javél aménde paš dro nevó džiibén dro Bolybnáskiro Rajo, savó isyn viéčno, namagirdo, bigrehengiro, savó Devél rakhéla vaš tuménge. Pal savénde Devél Péskire zorjása javéla te dykhél vaš zrakhibén, savó isyn prigotovindlo aménge i javéla sykado dro palatunó časo. Pal davá radynénpe kakaná, mek vari-savó časo tuménge pridžalape te piridžives mén'ki i tumen javéna te propatiakiren raznone rigéndyr, sob (kaj) davá propatiakiriben te dophenel, so tumaró patiaibén isyn čačunó i drogedyr suvnakástyr, savó usajékh isyn xasibnýtko, mek jov te javél propatiakirdo jagása, tedy tumaró patiaibén janéla tuménge šaribén i sláva, kiéli javéla nevéstyr Isúso Xristóso: Saves tumé nijékhvar na dykhné, ne Jov isyn drógo tuménge, i Saves ke davá časo na dykhné, ne tumé usajékh patiána dre Léste i pir davá tumé adiáke drieván radynénape, so naštý te phenas lavénca, i Saves tumé proslavindle, pal-dová so tumé zrakhena péskiro dúho (fáno) pal tumaró patiaibén. Kadavá zrakhibén rodenas pharés i sykliakirenas lačhés proróki, savé angledýr phenenas tuménge pal bahtiakiribén, savó javéla dynó tuménge. Jone sykliakirdé mištés te udžinén, kiéli i pe savó časo (cýro) uphendia Xristosóskiro Dúho (Fáno), kiéli Jov angilphenelas pal Xristosóskire mén'ki i pal Léskiri sláva, saví javéla korigedýr (pozže). Lénge sys sykado, so jone dynarinénas (služynénas) na péske, a tuménge, pal-dová so tuménge rosphendlé bahtalý zan (zvies') Duhóskire zorjása, a pal davá až Jangóly sykliakirenas mištés. Vaš davá riskirén péskiri godý te kerén lačhipén, na soven, rikirén pherdés nadiéia pe bahtiakiribén, savó javéla dynó tuménge, kiéli javéla Isúso Xristóso; iavén syr čhavé, savé kandéna péskire daden, i na dživén pir péskire-maséngiro tyrdypén, savó sys ĥaredyr dre tuménde, kiéli tumé na džindlé syr te dživén; ne pal-dová so Jov isyn Svénto, Savó khardiá tumen, javén kokoré svénta dro saró, so tumé keréna; pal-dová so isyn čhindló: “Javén svénta, pal-dová so Me som Svénto.” I kóli tumé kharéna Dadésa Kodolés, Savó šerá (rávnes) sendiakiréla saré manušén, na dykhí, kon manúš isyn, tedy dživén darása angíl Léste davá časo, paka tumé dživéna pe phuv; džiný, so na rupésa ci suvnakása, savé usajékh nane važnedyr saréstyr, tumé san vykindle čhučé (pustone) džiibnastyr, savó tumé doresné péskire dadendyr; a tumé san vykindle drogoné Xristosóskire Ratésa, Savó sys syr Svénto Bakroró, Konéste na sys bang i doš. Hristóso sys vykedyno angledýr, syr jaciá svéto i Savó javdiá dro palatunó časo vaš tuménge; pir Léste tumé lyné te patián dre Léste, Savó otdžidiakirdiá Les muléndyr i dyjá sláva Léske, sob (kaj) tuménde te javél patiaibén i nadiéia pe Devléste. Syr tumé lyné te kandén čačipén, tedy tumé vyžužakirde péskire dijá vaš čačuný pšalýtko patýv, paldavá sykavén patýv jekh jekhéske saré iléstyr. Tumé san nevéstyr bijandle, na tumaré dadendyr, a Devléskire lavéstyr, savó isyn džidó, i savó viéčnes zrakhélape. Pal-dová so “kažno manúš isyn sýrby čar, i léngiri sláva isyn sýrby feldýtka luludiá (cvety), čar zašutjola i lákire luludiá otperena. Ne Devléskiro lav jačélape pe saré viéki.” Adavá isyn dová lav, savó phendiape tuménge. Tedy mekén kažno xolý, frentyma, dujemuitkima, zevlynypén i kažna xohané lavá, a javén tumé sýrby bijaty, savé féni so bijándyne, i tumé tyrdenpe ke lavitko thud (Devléskiro lav), sob (kaj) te čaliakirenpe lésa i te barjon ke zrakhibén, pal-dová so tumé udžindlé, so Devél isyn lačhó. Javén pašyledýr ke Jov, Savó isyn sýrby džidó bar, Saves manušá na prilyné, a Saves Devél vykedyjá syr Drogones Léske, i kokoré tumé, savé san sýrby džidé bará, kerén péstyr duhovno kher te mangélpe Devléske, sob (kaj) tumé te javén svénta rašaja, sob (kaj) te janén svénto dyibén, savéske javéla rado Devél pir Isusóste Xristosóste. Paldavá isyn phendló dro Svénto Čhinybén: “Ĥáda, me čhuváva venglytko bar pe Sióno, Savó Me vykedyjom i Jov isyn drógo Mánge: odová manúš, savó javéla te patial dre Léste, na javéla te ladžal: i adiáke Jov isyn drógo vaš tuménge, kon patiála, a vaš odolénge, kon na patiála, Jov isyn bar, savó butiarné na prilyné, ne savó jaciá šeralé baresa, pal savó manušá obštavenape i peréna; pal savó manušá obštavenape, pal-dová so jone na kandéna Devléskiro lav, pal-dová so adiáke lénge sys zadumindlo. Ne tumé san vykedyné bijanypnastyr, kralitka rašaja, svénta manušá Devléskire mištypnástyr, sob (kaj) te vyphenen lačhipén pal Léste, Savó khardiá tumen kalypnástyr dro divno Léskiro dud (svéto); tumen, savé na sys Léskire manušá, a kakaná tumé jačné Léskire manušénca, ĥaredyr tumen na tangindle (na žalindle), akaná isyn Devléskiro tangipén ke tumé. Dróga miré! Me drieván mangáva tumen, syr manušén, savé naĥara javné pe daja phuv i savé lodena pir davá svéto: durjon tumaré ločakire kamibnastyr, savó isyn proti tumaró di; i dživén pir čačipén maškír Najudénde, sob (kaj) odolé, kon rakiréla čoripén pe tuménde, so tumé san fuj, te dykhén tumaré lačhé réndy i te slavinén Devlés, kiéli Jov javéla. Kandén kažnoné ran manušéndyr vaš Ráske-Devléske: ci kralís syr naj upratunedyr zorjake, ci balunitkones (pravitieljos), savés králi bičhadiá te čhuvél kára pe odolé manušénde, savé keréna fuipén, i te šarén odolén, savé keréna lačhipén. Pal-dová so pe davá isyn Devléskiri vólia, sob (kaj) te kerás lačhipén i pir davá te javén štyl uštá dylyné manušéngire, kiéli jone javénas te rakirén grehítka lavá. Dživén syr vol'na manušá; ne te na javél daja vólia vaš dová, sob (kaj) te priučhakiren grého, a dživén syr Devléskire pishárja. Den patýv sarénge, sykavén patýv pšalénge i phenén pir patiaibén dre Devléste, darén Devléstyr i kutiakiren kralís. Dynarjále, kandén i darén péskire xulandyr, na so jekhe lačhen i kovlé-ilytkonen, ne adiáke-pac' i kodolén, savé biilytkes (šylales) otlydžanape ke tumé. Pal-dová so davá isyn lačhó Devléske, kóli vari-kon pir péskiri patýv vaš Devléske piridživela mén'ki, pharipén na pir čačipén. Pal-dová so, pal so te šaras tumen ke sláva, kóli tumé menčynenape, kiéli tumen marena pal tumaré gréhi? A kiéli tumé keréna lačhipén i stradynena pal davá, tedy tuménge javéla bahtiakiribén Devléstyr. Pal-dová so tumé sánas khardé vaš davá, pal-dová so i Xristóso adiáke-pac' stradyndia pal tuménde, Jov jačkirdiá sykaibén (primiéro) aménge, syr trej te kerás, sob (kaj) ame te džas pir Léskiri špéra (sliado): “Jov na kerdiá nisavó grého, i na sys nisavó xohaibén dre Léskire lavá”, pe Léste rakirdé fuipén, ne Jov ni pe konéste na phendiá fuj lav, i kiéli Jov stradynelas, Jov na strahakirdia vari-konés, a Jov saró dopatiakirdia Kodoléske, Kon isyn Čačunó Sendári; Hristóso Kokoró Péskire Masenca ĥazdyjá amaré gréhi pe trušúl, sob (kaj) ame te javas mulé vaš grého i te dživás pir čačipén: Léskire fránsy (rany) vysastiakirde tumen. Pal-dová so tumé sánas xasibnýtka bakré, savé blendynenas, ne kakaná tumé risiné ke tumaró Čhupnári (Pastyrjo) i ke Khangirjákiro Dykhibnaskiro (Bliustitieljo), Savó rakhéla tumaró di. Adiáke-pac' i džuvliále, kandén péskire romen, so kóli vari-kon léndyr na patiála Devléskire lavéske, tedy tumé péskire džiibnasa sýrby pirikerena len, so jone bi laveskiro javéna te patián Devléske, i kiéli romá javéna te dykhén tumaró devlýtko džiibén, i dová, so tumé déna patýv lénge i darén Devléstyr; mek te javél tumaró šukaripén na dro balengiro zakhuviben i na dro suvnakái, so isyn pe tuménde i na dro barvaló uribén; a mek te javél tumaró šukaripén dro tumaró iló, savó isyn nadyc'lo (nabicialo), péskire štyloné i kovlé-iléskire šukaribnása, savó na kirnjola i isyn drieván šukár angíl Devléste. Pal-dová so adiáke-pac' vari-kiéli i svénta džuvliá, savénde sys nadiéia pe Devléste, šukár prikedenas pes, ne angledýr saréstyr jone kandenas péskire romen; adiáke-pac' i Sara kandelas Avraamos i khardiá les péskire xulása, a tumé ž san lákire čhaja, kóli tumé keréna lačhipén, tedy tumé na darén nisave trašaibnastyr. Adiáke-pac' i tumé, muršale, dživén i ĥaljon péskire romnien, pal-dová so džuvliende isyn tyknedýr zor i otlydžanpe adiáke ke jone, syr ke bizorjákire, kutiakirén (uvažynen) len, pal-dová so jone léna paš dro viéčno džiibén Devléstyr, syr i tumé. Kerén adiáke, tedy ni saví vánta (sciana) na javéla pe drom tuménde te mangénpe Devléske. Javén dre jekh godý jekh jekhésa, poden vastá jekh jekhéske dro pharipén, tanginén (žalinen) jekh jekhés, syr pšála, malynenpe (družynen) i javén kovlé-ilýtka, na otdén pale fuipnasa pal fuipén, ci fuj rakiribnasa pal dová, so rakiréna fuipén pe tuménde: a pe javír mangénpe Devléske, pal-dová so tumé sánas khardé, sob (kaj) te doresen Devléskiro bahtiakiribén. Paldová so: “Konéske isyn drógo džiibén i te dykhél lačhé dyvesá, odová manúš mek te obrikirel péskiri čib fujé lavéndyr i péskire uštá xohané lavéndyr, mek jov te rakhél pes te kerél fuipén, a mek jov te kerél lačhipén; mek jov te rodél ramánjo (miro) i te pričhuvel zor te lathel les; pal-dová so Devél dykhéla čačuné manušén i šunéla léngiro mangipén Léske; ne Devél isyn proti odolénde, kon keréla fuipén.” I kon dukhavela tumen, kóli tumaró iló xačola te kerén lačhipén? Ne kóli tumé zlydžana pharipén pal čačipén, tedy tumé san bahtalé, na darén, mek nisó te na trašakirel tumen; a rikirén dro iló Xristosós syr Sventyma i den patýv Léske, syr Ráske-Devléske dre tumaré ile, usády / sak (vsiegda) javén skedyné te zaterdjon lavésa, kiéli vari-kon javéla te phučel tuméndyr pal tumarí nadiéia, ne kerén davá kovlé ilésa i darása; te javél tuménde lačhí patýv, sob (kaj) odolé manušá, savé rakiréna proti tuménde, te javén ladžakirdé, kiéli jone našukar otlydžanape ke tumé pal tumaró lačhó džiibén dre Xristosóste. Pal-dová so, kóli pe davá isyn Devléskiri vólia, fedýr te lydžas pharipén pal lačhipén, syr pal dová, kiéli ame kerása fuipén; pal-dová so i Xristóso, sob (kaj) te janel amen ke Devél, jékhvar myjá pal amaré gréhi, čačunó pal načačunende, Léskire Masá sys otdyné pe meribén, a Léskiro Dúho (Fáno) sys riskirdo ke džiibén; kadalé Duhósa Xristóso gijá i phendiá lav odolé duhenge, savé sys dro štaribén; savé vari-kiéli na kandyné Devlés, i savén Devél vyrikiribnasa užakirdia saró davá časo, paka Nojo kerélas kovčego (mohtó), dro savó zaginé nábut manušá, ohtodžine (bidujéngiro deš), savé zrakhnepe paniéstyr: davá paní isyn sýrby kopija doléske, kiéli ame bolasape i so zrakhéla amen. Davá nane melalé-ločákiro obmoriben, a tumé déna lav lačhé patyvása Devléske pir Isusóskire-Xristosóskiro otdžidyipen, Savó ĥazdyjápe dro Bolybnáskiro Rajo i isyn pir čačó vast Devléstyr, i Léske dynarinena saré Jangóly, Léste isyn saré pravy i saré zorja. I paldavá, syr Xristóso pirilydžalas pharipén dre loč, adiáke-pac' i tuménge prijavelape te lydžán pharipén; pal-dová so kon zlydžala pharipén ločasa, odová manúš mekéla te kerél gréhi, sob (kaj) palatunó (posliednjo) časo, savó jaciápe léske te dživél dre masá, te dživél adavá manúš na pir péskire-ločakiro tyrdypén, a pir Devléskiri vólia. Pal-dová so uhtýlla (dósi) dová, so tumé angledýr kerénas, syr Náiudy, savé kaména te kerén: kiéli tumé rikirde pes dre nágoža réndy (diély), dro nálačho kamiben dre masá, dro pibén magiribnasa, dro dylynó xabén i pibén bi mierakiro, dro biladžakuno mangipén idolénge. Paldavá ž adalé Náiudy divinena, so tumé butýr na prastána khetané lénca pe nágoža réndy, i kaliakirena tumen, ne lénge trej javéla te den otphenybén angíl Odoléste, Kon javéla syg te sendiakirél džiden i mulen. Vaš davá i mulenge sys phendló pal bahtalý zan (zvies'), sob (kaj) jone, savé sys sendindle, kiéli jone dživdé dro manušýtko loč, sob (kaj) jone te dživén dro dúho (fáno), syr Devléske isyn lačhó. Ne syg sareske javéla kónco (jagóro): paldavá rakhénpe i dživén god'vares, kiéli tumé mangénape Devléske; a butýr saréstyr sykavén patýv jekh jekhéske saré iléstyr, pal-dová so patýv začhakirela but gréhi; prilén manušén saré iléstyr, savé javéna ke tumé bi xoliamé rakiribnaskiro; dynarinén jekh jekhéske dolé talanosa, savó tumé doresné Devléstyr sýrby lačhé kherítka barydyrá te piridén manušénge rázna Devléskire bahtiakiribena. Kóli vari-savó manúš rakiréla, mek jov te rakirél Devléskire lavénca; odová kon dynarinela, mek jov te dynarinél pir zor, saví Devél déla léske, sob (kaj) te barjakirelpe Devél dro saró pir Isusóste Xristosóste, Savéske te javél sláva i zor pe saré viéki. Amín'. Miré dróga! Na dur'jen jagitkoné propatiakiribnastyr te propatiakirel tumaró patiaibén, dro davá nane nisavó dívo; a syr tumé pirilydžana pharipén, syr i Xristóso, radynénpe, pal-dová so tumé but butýr obradynenape, kiéli otčhakirelape Léskiri sláva. Kóli obrakirena tumen pal Xristosóskiro lav, tedy tumé san bahtalé, pal-dová so Devléskire-slavakiro Dúho (Fáno) zgija pe tuménde: (odolé manušá kaliakirena Les, a tumé slavinena). Sob (kaj) nijékh tuméndyr te na zlydžal pharipén syr zamaribnari (umaribnari), ci čor, ci manúš, savó keréla fuipén; ci syr manúš, savó isyn ĥálko ke čúžo mištypén; a kóli tumé pirilydžana pharipén syr Xristiani, tedy na ladžan, a slavinén Devlés, pal-dová so tumen kharéna adiáke. Pal-dová so podgíia časo, so javéna te sendinén manušén dro Devléskiro Kher, i kóli ame javása pérva manušá pe séndo, tedy, so javéla odolé manušénge, savé na kandéna Devléskiri bahtalý zan (zvies')? I kóli čačuné manušéske drieván pharó javéla te zrakhelpe, tedy, so javéla nadevlytkonenca, i grehitkoné manušésa? I paldavá manušá, savé pirilydžana pharipén pir Devléskiri vólia, mek jone te otdén péskiro di Léske, Kon isyn čačunó, i Kon sozdyjá len, i mek jone duredýr te kerén lačhipén. Me, kokoró som godephuró i pastyrjo (čhupnári), mangáva tumaré khangirjákire godephuren i pastyrien, pal-dová so me som jakhítko, syr Xristóso pirilydžija pharipén, adiáke-pac' mánde isyn paš dre sláva, saví javéla sykady: rakhén Devléskire manušén, savé isyn maškír tuménde, kerén davá na pir trébima, a syr trej Devléske i na pal dová, so tumé sorby san bokhalé ke lové, a pal-dová so tumé kaména davá iléstyr; i na xulainen pe odolé manušénde, savén Devél dopatiandyja tuménge, a sykavén pes lačhé rigátyr. I kiéli javéla Sámo Baredýr Pastyrjo (Čhupnári), Xristóso, tedy tumé doreséna slavakiri koróna, saví javéla te ziainel viéčnes. Adiáke-pac', terné manušále, kandén péskire godephuren, javén kovlé-ilýtka jekh ke jekh, na šarén pes jekh angíl javiréste, pal-dová so Devél isyn proti odolénde, kon ginéla pes vučedýr javirendyr, a odolénge, kon na šarela pes, Jov déla vast. Kandén i bandjon tel zoraló Devléskiro vast, sob (kaj) Jov te ĥazdel vučés tumen dro Péskiro časo; čhuvén upré saré péskire pharé dúmy pe Léste, pal-dová so Jov dykhéla pal tuménde. Javén triezva (nýrna), rakhénpe. Tumaro vérgo, nálačho, psiréla syr ščer (liévo), savó rykinela i rodéla, konés te xal. Terdjon proti léste zoralé patiaibnása, džinén, so adiáke-pac' piristradyndle tumaré pšála, savé dživéna pir svéto. Ne Devél, Savó bahtiakiréla, i Savó khardiá tumen dre viečna Péskiri sláva, kóli tuménge i prijavelape nabaró časo te stradynel, Jov Kokoró keréla tumen zoraledýr i déla zor, sob (kaj) tumé te na kuninenpe dro péskiro patiaibén; mek te javél Léske sláva i zor pe saré viéki. Amín'. Me čhindjom davá nabaró lyl tuménge pir Siluanoste, savó isyn čačunó tumaró pšal, syr me duminava, sob (kaj) te podrikirav tumen, ripiri te dophenav, so davá isyn čačunó Devléskiro bahtiakiribén, dro savó tumé zoralés san terdé. Piridela “paklono” tuménge khangirí, so isyn dro Vavilóno, Saví vykedyjá Devél, adiáke-pac', syr tumen. Adiáke-pac' piridela “paklono” miro čhavó Marko. Piridén “paklono” i čamuden jekh jekhés Xristosóskire laskasa. Mek te javél ramánjo (miro) tuménge sarénge, savé isyn Xristosóskire. Amín'. Simonostyr Petristyr, Isusóskire Xristosóskire pisharistyr i Apostolostyr, saré manušénge, kon prilyjá dasavo-pac' drógo patiaibén khetané aménca pir čačipén amaré Devléskiro i Zrakhibnariskiro, Isusóskire Xristosóskiro, mek baht i ramánjo (miro) te javél dynó but butýr tuménge, syr tumé udžindlé Devlés i Isusós, amaré Ras-Devlés, Devél, Léskire Devléskire zorjása dyjá saró aménge, so trej vaš devlýtko džiibén, sob (kaj) te udžinas Devlés, Savó khardiá amen ke Pe slavása i lačhipnása, savénca Jov dyjá naj baredýr i drogedyr lav, sob (kaj) pir davá tumé te jačen pašasa (pašésa) Devlytkoné duhóstyr i te džán krig Duhóskire xasibnastyr, savó džála nalačhé mysliatyr dro svéto sob (kaj) pir davá tumé te dživén syr trej Devléske. Ne paldavá tumé adiáke-pac' pričhuvén zor, sob (kaj) te sykavén tumaré patiaibnastyr lačhipén, a lačhipnastyr džinybén, džinybnastyr sykljon te obrikiren pes, obrikiribnastyr javén vyrikirde (trivala), kiéli ame vyrikirasa, tedy jačasape devlytkonenca, devlytkimatyr sykavén pšalýtko patýv jekh jekhéske: i kóli saró davá isyn dre tuménde i barjola butedýr, tedy tumé na jačénpe čhučé vasténca i bi rendoskiro, kóli tumé javéna te pričhuvén zor te udžinén amaré Ras – Devlés, Isusós Xristosós; a kóli dre konéste saró davá nane, odová manúš isyn kororó i jov začhakirdia péskire jakhá, bistyrdia pal dová, so Devél otmekciá léskire ĥaratuné gréhi. Paldavá, pšalále, pričhuvén zor usá butýr te kerén zoraledýr tumaró Devléskiro khariben i vykedyiben; kóli tumé adiáke javéna te kerén, tedy tumé nijékhvar na obštavenape; i paldavá tuménge délape pherdó pravo te zadžán dro viéčno kralipén amaré Devléskire i Zrakhibnariskire, Isusóskiro Xristosóskiro. Vaš davá me nijékhvar na pirijačava te ripirav iščo (inké) tuménge pal davá, na dykhí pe dová, so davá tumé mištés džinén, i tumé zoralés rikirenape pal čačipén akaná. Ne me čhináva pal čačipén, paka me som džidó sýrby dre šátra te džangavav tumen dalé ripiribnasa, pal-dová so me džinóm (džináv), so me syg/sýges jačkirava daja šátra, kiéli me meráva syr amaró Raj Devél, Isúso Xristóso sykadiá mánge; ne me javáva te pričhuvav zor, sob (kaj) tumé i korigedýr (pozže), kiéli me džáva tuméndyr, te rikirén davá pe godý saró časo. Ame rosphenasas tuménge džinybén pal zor, i so syg javéla amaró Raj Devél, Isúso Xristóso na paramysienca, so manušá sčhude godes, ne ame kokoré sam jakhítka pal Léskiro baró rajkanypen. Pal-dová so Jov prilyjá Devléstyr Dadéstyr patýv i sláva, kiéli dogijá ke Jov rajkane slavatyr zan: “Davá isyn Miro Čhavó, Savó Mánge jaciá Drógo, dre Savéste isyn Mirí rádyma”, i kadaja zan, saví ame kokoré šundiám Bolybnáskire Rajostyr, kiéli ame sámas khetané Lésa pe svénto bérga. I apríč dová, saró aménde isyn naj čačunedyr prorokengiro lav, i tumé mištés keréna, so tumé rakhibnýtkes šunéna davá lav, savó isyn sýrby davá dud (svéto), so xačola dro ciamlo štéto, paka na javéla palatunó zlóko (ránko) i ĥazdélape zlokoskiri čergen dre tumaré ile, i angledýr saréstyr džinén dová, so nisavó angilphenybén dro Svénto Čhinybén na sys čhindló pir prorokengiro džinybén, pal-dová so manušá nijékhvar vagedyr (ĥaredyr) na angilphenenas pir péskiri vólia, a davá rakirdé svénta Devléskire manušá, kiéli Svénto Dúho (Fáno) lydžijá len. Ne syr sys xohané proróki maškír manušénde, adiáke-pac' javéna i xohané sykliakiribnaskire maškír tuménde, savé javéna čorahanés te rakirén xasibnýtka sykliakiribena péskire kampanijendyr i na javéna te priĥaljon Ras-Devlés, Savó vykindia len, dalé rakiribnasa jone janéna kokoré péske sýgno xasibén; i but manušá džána palál pal lénde pir nágoža réndy (diély), i pal kadalé manušénde drom, savó isyn čačunó, javéla kaliakirdo. I kadalé xohané sykliakiribnarja pal péskiri skempima javéna te barvaljon tuméndyr péskire frentone lavénca, séndo ĥará užakiréla len i léngiro xasibén isyn nasuto. Pal-dová so kóli Devél na potangindia Jangolen, savé kerdé gréhi, a otdyjá len dro liúno (ado), i bešliakirdia len sastyrenca dro ciamlypén, kaj jone užakiréna sendoskiro dyvés; i Jov na potangindia (na požalindia) anglatunó svéto, a zrakhciá ohtó (bidujéngiro deš) manušén i maškír lénde Nojos, savó rosphenelas angíl sarénge čačipén i Devél jandiá potopo pe adalé nadevlytkone manušénde; i Jov sendiakirdia Sodomóskire i Gomorakire fórja ke xasibén, kiéli xačkirdiá len ke práska (pieplo). Kadalesa Devél sykadiá manušénge, so javéla nadevlytkone manušénca; i Jov zrakhciá Lotos, savó sys čačunó manúš i drieván zmenčyndlo dalé nagožone rendéndyr, so kodolé manušá kerdé, pal-dová so kadavá čačunó manúš, savó dykhciá saró i dživdiá maškír lénde, menčyndiape so dyvés péskire čačuné duhósa, kiéli jov dykhciá i šundiá léngire réndy, so sys proti Zakóno. I jekh Devél džinéla, syr te zrakhél devlytkoné manušén, kiéli propatiakirena len, i Jov rakhéla kadalé načačune manušén ke / žýko sendoskiro dyvés, sob (kaj) te čhuvél kára pe lénde; i davá butýr saréstyr čilavéla odolé manušén, savé džána pir nálačho ločakiro kamiben i phagirena Devléskiro pravo. Kadasavé xohané sykliakiribnaskire xasiakirdé ladž, jone keréna, so isyn pir godý lénge i na daréna te kaliakiren dúhi, savé isyn dro Bolybnáskiro Rajo. A Jangóly, savé isyn pe but zoraledýr kadalé duhéndyr i lénde isyn butýr pravo, na rakiréna proti i na kaliakirena dalé zorja angíl Devléste. A kadalé manušá isyn sýrby bigodiakire murdalá, savé na rakiréna, savé bijándyne, sob (kaj) len te uhtylén i te zamarén; jone kaliakirena dová, so kokoré na džinéna, i adiáke-pac' sýrby murdalá, jone i xasjona, jone javéna te pirilydžan pharipén pal načačipén, pal dová so jone dživéna pherdés pir péskiro nálačho kamiben so dyvés. Jone isyn zamakhne i domagirde manušá; jone zalenape bitukoskiro péskire xohaibnasa, kiéli svenkinena pal skamínd tuménca; a léngire jakhá isyn pherdé biladžaipnasa i jone na pirijačena te kerén gréhi, a zaterdena dre felý ke grého manušén, konéskiro dúho (fáno) isyn nazoralo dro péskiro patiaibén, a léngiro iló isyn prisykliakirdo ke skempima, i Devél prokostia kadalé čhavén; jone mekné čačunó drom, jone jačné xasibnýtka; jone giné palál pir Valamoskiro, Vasoroskire-čhavéskiro drom, savó tyrdyjape ke lové pal dová, so jov kerdiá načačunes, a léske sys vyrakirdo pal dová, so jov kerdiá na pir Zakóno, kiéli oslica vyphendia bang (pinindia) léske manušytkoné zaniása, joj i terdiakirdia prorokós dro léskiro bigodiakiriben. Kadalé manušá isyn sýrby ĥanyngá bipanieskire i sýrby migly i óbloki, savé tradéla balvál, Devél rakhéla štéto vaš lénge dro kaló ciamlypén. Paldavá so jone péskire vučés-šardune lavénca zaterdena sýrby dre felý pir nálačho ločakiro kamiben i ke nágoža réndy odolé manušén, savé baré pharipnasa giné krig odolé manušéndyr, savé dživéna dro grého; jone déna lav lénge pal vólia, a kokoré jone isyn sýrby pishárja xasibnytkone prisykliaibnaske, pal-dová so manúš isyn pishári odoléske, kon čhudiá les teledýr. Pal-dová so, kóli odolé manušá, savé vari-kiéli giné magiripnastyr, savó kerélape dro svéto, pir dová, so jone udžindlé Ras-Devlés i amaré Zrakhibnaris Isusós Xristosós, nevéstyr sphandenape magiripnasa i poddenape magiripnaske, to kadasavé manušénge kakaná javéla fujedýr, syr sys angledýr. Pal-dová so lénge javélas fedýr te na džinén čačunó drom, syr jone udžindlé i risiné pale sventoné priphenybnastyr, savó sys dynó lénge. Ne lénca kerdiápe dová, so syr rakiréna manušá: “Džukel risjola ke péskiro čadypen”, i “vymordy balyšny džála nevéstyr te katynelpe dre bláta.” Dróga miré! Ĥáda, javír lyl me čhináva tuménge. Me sýrby džangavava dalé lylenca te ripirén čačipén i tumarí žužy godý, sob (kaj) tumé te ripirén lavá, savé angledýr svénta proróki phendlé i pal priphenybén amaré Ráskire – Devléskiro i Zrakhibnariskiro, so dyné tumaré Apóstoly. Ne angledýr saréstyr džinén, so dre palatuné (posliednia) dyvesá javéna nahrata manušá, savé javéna te sanpe xoliames tuméndyr, a kokoré jone javéna te kerén duredýr, so lénge pir godý pir nalačhé-péskire maséngiro tyrdypén, i jone javéna te rakirén: “I kaj ža Léskiro lav, so Jov dyjá, kiéli Jov javéla? Pal-dová so dolé poratyr, kiéli myné amaré dadá nisó na parudyja, syr sys sozdynó svéto.” Kadasavé manušá duminena i sýrby na džinéna dová, so ĥará Devél priphendiá i kerdépe bolybén i phuv paniéstyr i paniésa, paldavá i ĥaratuno svéto sys začhudo paniésa ke xasibén. Ke davá bolybén i phuv, so isyn kakaná, rakhenape Devléskire lavésa vaš jag ke/žýko sendoskiro dyvés i ke xasibén vaš nadevlytkone manušénge. Ne jekh dyvés na moginéla te javél garadó tuméndyr, dróga miré, so Devléste jekh dyvés isyn syr bar (tysjonco) berš, i bar berš isyn, syr jekh dyvés. Devél na zarikirelape te kerél dová, pal so Jov dyjá lav, syr vari-savé manušá ginéna, so davá javéla na syg, ne Jov ĥará vyrikiréla tumen, i na kaméla, sob (kaj) vari-kon te xasjol, ne sob (kaj) saré te risjon ke Devél. Ne Devléskiro dyvés javéla syr čor ratý, i tedy bolybén grukimasa džála krig jakhéndyr i saré bolybnýtka koterá shačona, i phuv i saró, so isyn pe láte, javéna čhučé (pusta). Pal-dová so kóli saré častyra (priedmiety) javéna bilade, to tedy tuménge triej te dživén sventes i te otdén pes Devléske; i te užakiren i te tyrdenpe zoralés, sob (kaj) sygedýr te javél dová dyvés, kiéli javéla Devél, dyvés, dro savó bolybén javéla shačkirdo i saré koterá, so isyn pe bolybén, javéna rozbilade jagása. Ne pir Devléskiro dynó lav ame užakirasa nevó bolybén i neví phuv, kaj javéla te dživél čačipén. Paldavá, dróga miré, kóli užakiréna tumé saró davá, pričhuvén zor te javén angíl Léste bibangiakire i bidošengire i te javén dro ramánjo; i prilén dre godý dová, so Raj Devél ĥará vyrikiréla amen i déla saštypen te zrakhaspe, syr dová-pac' i amaró drógo pšal Pávli, savéske dyjá godý Devél, čhindiá tuménge pal davá, adiáke-pac' Pávli rakiréla pal davá dre saré péskire lylá; dre lénde isyn vari-so, so isyn pharó te ĥaljos, i manušá, savé isyn tempa i nane zoralé dro patiaibén, but piririskirena, so jov čhindiá dre lylá, syr i dre javír pašá Čhinybnástyr. Kadasavé manušá sýrby kokoré pe péste lydžána xasibén. I paldavá tumé, dróga miré, syr tumé akaná angledýr džinén davá, rakhénpe, sob (kaj) tumé te na kerén grého i te na patián dre frentyma khetané kadalé manušénca i te na otperen xorale patiaibnastyr a te barjon dro bahtiakiribén i te udžinén fedýr amaré Ras-Devlés, i Zrakhibnaris (Spasitieljos) Isusós Xristosós. Te javél Léske sláva kakaná i pe saré viéki. Amín'. Pal dová, so sys anglypnástyr, pal dová, so ame šundiám, so dykhciam péskire jakhénca, so ame rozdykhasas, i so čilavenas amaré vastá, dová i ame phenasas pal Džiibnáskiro lav, – davá džiibén sys sykado, i ame dykhciam davá i ame sam jakhítka i ame phenása tuménge pal davá viéčno džiibén, savó sys Dadésa, i savó sys sykado aménge, ake, dová-pac', so ame dykhciam i šundiám, i phenása tuménge, sob (kaj) tuménde te javén khetanypen aménca, a amaró khetanypen isyn Dadésa, i Léskire čhavésa, Isusósa Xristosósa. I davá ame čhinasa tuménge, sob (kaj) tumarí rádyma te javél pherdý. I, ĥáda, pal so isyn mavlýn (malva), saví ame šundiám Čhavestyr i phenása tuménge: Devél isyn dud (svéto) i nane nisavó kalypén dre Léste. Kóli ame rakirasa, so aménde isyn khetanypen Lésa, a kokoré psirasa dro kalypén, tedy ame xohavasa i na psirasa pir čačipén. A kóli ame psirasa dro Devléskiro dud, adiáke-pac' syr Xristóso isyn dud, tedy aménde isyn khetanypen jekh jekhésa, i Isusóskiro Xristosóskiro rat, Léskire čhavéskiro, žužakirela (čystinela) amen kažnoné grehéndyr. Kóli ame rakirasa, so aménde nane grého, tedy ame xohavasa kokoré pes, i nane aménde čačipén. Kóli ame priĥaljovasa amaré gréhi angíl Devléste, tedy Jov vyžužakiréla amaró načačipén, pal-dová so Jov isyn patiaibnýtko, i čačunó. Kóli ame rakirasa, so ame na kerdiám gréhi, tedy ame kerása Léstyr Xohaibnaris, i nane Léskiro lav aménde. Čhavorale miré! Me čhináva davá tuménge, sob (kaj) tumé te na kerén grého, i kóli vari-kon keréla grého, aménde isyn Jekh te terdjol pal aménde angíl Dadéste-Isúso Xristóso, Čačipnáskiro; i Jov isyn Kodová, Kon pirilydžija pharipén ke meribén Péskire ratésa pal amaré gréhi sýrby svénto dyibén, i na féni (tóka) pal amaré, a adiáke-pac' pal gréhi saré svetóskire. I adiáke ame udžinasa, so ame džinása Les, kóli ame rakhasa Léskire priphenybená. Kon rakiréla: “Me udžindjom Les” i na rakhéla Léskire priphenybená, odová manúš isyn xohaibnari, i nane nisavó čačipén dre léste; a kon rakhéla Léskiro lav, kodoleste isyn bidošakiry patýv ke Devél. Adiáke ame udžinasa, so ame sam dro khetanypen Devlésa. Kon rakiréla, so jov dživéla dro jekhipén Devlésa, kodoléske trej adiáke-pac' te dživél syr Xristóso dživdiá. Dróga miré! Me čhináva na nevó priphenybén tuménge, a phuranó priphenybén, savó isyn tuménde anglypnástyr. Phuranó priphenybén isyn lav, savó tumé šundlé anglypnástyr. Ne davá isyn davá-pac' i nevó priphenybén, so me čhináva tuménge, pal-dová so davá čačipén sys bicialó i dre Xristosóste i dre tuménde: pal-dová so kalypén prodžála i čačunó dud kakaná xačola. Kon rakiréla, so jov isyn dro dud, a léske isyn nadrogo péskiro pšal, odová isyn iščo (inké) dro kalypén. Konéske isyn drógo léskiro pšal, odová jačélape dro dud, i nane bar pe drom léste, sob (kaj) jov te perél dro grého; a konéske isyn nadrogo péskiro pšal, odová isyn dro kalypén, i psiréla dro kalypén, i jov na džinéla, karik jov džála, pal-dová so kalypén korjakirdia jakhá léske. Me čhináva tuménge, čhavoré, pal-dová so otmekne tumaré gréhi pir Xristosóskiro lav. Me čhináva tuménge, dadá, pal-dová so tumé prilyné Odolés, Savó isyn anglypnástyr. Me čhináva tuménge, terné manušále, pal-dová so tumé pirizorjakirde nalačhés. Me čhináva tuménge, bijatale, pal-dová so tumé pridžindle Dadés. Me čhindjom tuménge, dadole, pal-dová so tumé udžindlé Odolés, Kon isyn usady (sak) anglypnástyr [Dadéste-ju.o.]. Me čhindjom tuménge, terné manušále, pal-dová so tumé san zoralé; i Devléskiro lav jačélape dre tuménde i tumé pirizorjakirde nalačhés. Na den patýv svetoske, i dová, so isyn dro svéto: kon déla patýv svetoske, kodolé manušéske isyn nadrogo Dad: pal-dová so saró, so isyn dro svéto: ločakiro tyrdypén ke grého, grehoskiro kamiben dre jakhá, phut'kiribén péskire džiibnasa, davá saró nane Dadéstyr, a džála svetóstyr. Svéto prodžála i adiáke-pac' i grehoskire kamibena, ne odová, kon keréla pir Devléskiri vólia, javéla te dživél viéčnes. Terné manušále! Davá isyn palatunó (posliednjo) časo. I pal-dová so tumé šundlé, so javéla antihristo i kakaná javné pe jakhá but antihristy, ame džinása daléstyr, so javdiá palatunó časo. Jone vyginé améndyr, ne jone na sys amaré; pal-dová so, kóli jone te javén amaré, tedy jone jačenas aménca, ne jone vyginé améndyr vaš dová, sob (kaj) te javél sykado, so nijékh léndyr nane amaró. Ne tumé doresné Svénto Dúho (Fáno) Xristosostyr, i tumé džinéna saró čačipén. Me čhindjom tuménge na paldová so tumé na džinéna čačipén, ne pal-dová so tumé džinéna les, adiáke-pac' syr i dová, so kažno xohaibén nane čačipnastyr. Kon xohavela? Adavá isyn odová manúš, kon na priĥaljola, so Isúso isyn Xristóso? Davá isyn antihristo, savó na priĥaljola ni Dadés, ni Čhavés. Kažno manúš, kon na priĥaljola Čhavés, léste nane i Dadés, a kon priĥaljola Čhavés, odolé manušéste isyn i Dad. Tedy tumé, so tumé šundlé anglypnástyr, mek dová te javél dre tuménde; kóli javéla dre tuménde, dová, so tumé šundlé anglypnástyr, tedy tumé javéna dro jekhipén Čhavésa i Dadésa. I, ake, isyn dová, pal so Xristóso Kokoró dyjá lav, davá isyn viéčno džiibén. Davá čhindjom me tuménge pal odolénde, savé kaména te lydžán tumen dro bléndo: ne pomakhiben, Svénto Dúho (Fáno), Savó tumé doresné Xristosostyr, jačélape dre tuménde, i tuménde nane trébima, sob (kaj) vari-kon te sykliakirél tumen. I davá Svénto Dúho (Fáno) sykliakiréla tumen, i Jov sys čačunó i nane xohanó. I syr Svénto Dúho (Fáno) vysykliakirdia tumen, jačénpe dro jekhipén Xristosósa. Ĥáda, bijaty, jačénpe dro jekhipén Xristosósa, sob (kaj) Jov, kiéli sykadjola, te javél aménde zoraló patiaibén i te na javél ladžavo angíl Léste, kiéli Jov javéla. I kóli tumé džinéna, so Xristóso isyn čačunó, džinén i dová, so kažno manúš, kon keréla pir čačipén, isyn Devléskiro čhavó. Dykhén! Saví bari rádyma dyjá aménge Dad, sob (kaj) te kharén amen Devléskire čhavorenca. Paldavá svéto na džinéla tumen, pal-dová so na priĥalyja Les. Dróga miré! Ame sam kakaná Devléskire čhavé, ne iščo (inké) na sykadyjá aménge, savé ame javása angíl. Ame jekh džinása, so kiéli Xristóso sykadjola, ame jačasape kadasavé-pac', syr Jov isyn, pal-dová so ame javása te dykhas, savó Jov javéla. I kažno manúš, konéste isyn nadiéia pe Léste, vyžužakiréla (vyčystinela) pes, pal-dová so Xristóso isyn žužó. Kažno (sváko) manúš, kon keréla gréhi, keréla proti Devléskiro Zakóno; i grého isyn dová, kiéli phagirena Zakóno. I tumé džinéna, so Jov javdiá vaš dová, sob (kaj) te lel amaré gréhi, i so nane grého dre Léste. Kažno manúš, kon dživéla dro jekhipén Isusósa, na keréla gréhi, a kažno, kon keréla gréhi, kodová manúš na dykhciá Les i na priĥalyja Les. Bijatorale! Mek nikón te na lydžál tumen dro bléndo. Kon keréla pir čačipén, odová isyn kadasavó čačunó, syr Jov isyn čačunó. Kodová, kon keréla gréhi, isyn nalačhestyr, pal-dová so nálačho kerdiá gréhi anglypnástyr. Vaš davá i javdiá Devléskiro Čhavó, sob (kaj) te pharavel nalačheskire butiá. Kažno manúš, savó jaciá Devléskire čhavésa, na keréla butýr gréhi, pal-dová so Devléskiri ziárka isyn dre Léste, i jov na moginéla te kerél gréhi, pal-dová so Devél jaciá léskire Dadésa. Ĥáda, syr Devléskire čhavé i nalačheskire čhavé isyn biciale: kažno (sváko), kon keréla na pir čačipén, odová nane Devléstyr i adiáke-pac', syr kodová, kon na keréla patýv péskire pšaléske. Paldavá dasaví isyn mavlýn (malva), saví ame šundiám anglypnástyr, sob (kaj) ame te das patýv jekh jekhéske, ne na adiáke, syr Kaino, savó sys nalačhestyr i savó zamardiá (muliakirdiá) péskire pšalés. Pal so ž jov zamardiá les? Pal-dová so léskire réndy sys fuj, a léskire-pšaléskire réndy sys čačuné. Na divinen, pšála miré, kóli manušá svetóstyr javéna te bidykhen (te nienavidinen) tumen. Ame džinása, so ame pirigijam meribnástyr dro džiibén, pal-dová so ame dasa patýv pšalénge. Kon na déla patýv pšaléske, kodová isyn iščo (inké) tel meribnaskiri zor. Kažno (sváko) manúš, kon na déla patýv péskire pšaléske, isyn zamaribnari (umaribnari), a tumé džinéna, so ni jekhe zamaribnariske na javéla viéčno džiibén. Ame udžinasa pšalýtko patýv dro davá, so Xristóso otdyjá Péskiro džiibén pal aménde; i ame sam bangé te otdas péskiro džiibén pal pšalénde. A kóli vari-konéste isyn saró, so trej vaš džiibén dro davá svéto, a jov dykhéla, so léskire pšaléske trej vari-so vaš džiibén i jov začhakirela péskiro iló léstyr, tedy saví ža isyn Devléskiri láska dre Léste? Bijatale, javása te das patýv na lavésa ci čibása, a rendosa (dielosa) i čačipnása. I pir davá, syr ame kerása, ame udžinasa, so ame sam čačipnaskire i štyliakirasa amaré ile angíl Léste; pal-dová so, kóli amaró iló rakiréla mamúj proti aménde, tedy Devél džinéla saró, pal-dová so Jov isyn butedýr iléstyr, i Jov džinéla saró. Dróga miré! Kóli amaró iló na rakiréla mamúj proti aménde, tedy aménde isyn muršypen te risjovas ke Devél. I so ame te na pomangas Léstyr, javéla dynó aménge, pal-dová so ame rakhasa Léskire priphenybená i kerása dová, so isyn pir iló Devléske. A priphenybén Léskiro isyn dasavo: sob (kaj) ame te patias dro lav Léskire-Čhavéskire, Isusóskire Xristosóskiro, i sob (kaj) te das patýv jekh jekhéske, syr Jov priphendiá aménge. I kon rakhéla Léskire priphenybená, odová dživéla dro jekhipén Lésa, i Devél isyn dro jekhipén Lésa. I dová, so Devél dživéla dro jekhipén Lésa, ame udžinasa pir Dúho (Fáno), Savó Jov dyjá aménge. Dróga miré! Na patián kažnoné duhoske, a sprobinen (propatiakiren) dúhi, ci Devléstyr isyn jone, pal-dová so but xohané proróki javéna dro svéto. Tumé udžinena Devléskiro dúho (fáno) adiáke: kažno dúho (fáno), savó priĥaljola Isusós Xristosós, so Jov javdiá dro manušýtko loč (plot'), isyn Devléstyr; a kažno dúho (fáno), savó na priĥaljola Isusós Xristosós, so Jov javdiá dro manušýtko loč, nane Devléstyr, davá isyn antihristoskiro dúho (fáno), pal savéste tumé šundlé, so jov javéla i kakaná Jov uže isyn dro svéto. Bijatale (čhavoré)! Tumé san Devléskire i pirizorjakirde len, pal-dová so Dúho (Fáno), Savó dživéla dre tuménde, isyn zoraledýr duhóstyr, savó isyn dro svéto. Kadalé xohané proróki isyn svetóstyr: jone i rakiréna pal svetóskire réndy, i svéto šunéla len. Ame sam Devléskire: kon džinéla Devlés, odová šunéla amen; kon na Devléskiro, odová na šunéla amen. Pir davá ame udžinasa čačunó dúho (fáno) i xohanó dúho (fáno). Dróga miré! Javása ame te das patýv jekh jekhéske, pal-dová so pšalýtko patýv isyn Devléstyr i kažno (sváko), kon isyn lačhó ke javír, isyn Devléskiro čhavó i džinéla Devlés. Odová, kon isyn nálačho ke javír manúš, na džinéla Devlés, pal-dová so Devél isyn pšalýtko patýv. Devléskiri láska ke ame sys sykady dro dová, so Devél bičhadiá dro svéto Léskire Jekhore Čhavés, sob (kaj) ame te doresas (te dolas) viéčno džiibén pir Léste. Ake, dro so pšalýtko patýv isyn: davá nane, so aménge jaciá drógo Devél, a davá isyn, so Léske jaciám dróga ame i Jov bičhadiá Péskire Čhavés te stradynel (te pirilydžal pharipén) ke meribén pal amaré gréhi. Dróga miré! Kóli Devléske jaciám dróga ame, tedy aménge adiáke-pac' trej te das patýv jekh jekhéske. Nijékh manúš nijékhvar na dykhciá Devlés. Kóli ame sam lačhé jekh ke jekh, tedy Devél dživéla dro jekhipén aménca, i Léskiri láska isyn pherdý dre aménde. Pir davá ame udžinasa, so ame dživasa dro jekhipén Lésa, i so Jov isyn dre aménde, pal-dová so Jov dyjá aménge Péskiro Dúho (Fáno). I ame dykhciam i sam jakhítka (jakhale), so Dad bičhadiá Čhavés te zrakhél svéto. Kon priĥaljola, so Isúso isyn Devléskiro Čhavó, kodová manúš dživéla dro jekhipén Devlésa, i Devél isyn dro jekhipén lésa. I ame udžindiam láska i upatiandyjam, saví láska isyn Devléste ke ame. Devél isyn dre pšalýtko patýv ke javír manušá, i odová manúš, kon isyn lačhó ke javír, dživéla dro jekhipén Devlésa i Devél isyn dro jekhipén lésa. Pir davá jekhipén Devlésa pšalýtko patýv jačélape pherdó dre aménde, sob (kaj) aménde te javél muršypen dro dyvés, kiéli javéla séndo, pal-dová so ame dživasa dro davá svéto adiáke, syr Xristóso dživdiá. Kóli ame sam lačhé ke javír manušá i ame na darása ni konéstyr, pal-dová so pherdý patýv vytradela dar, a kon daréla, kodová sýrby užakiréla kára. A kodová, kon daréla, dre léste nane pherdý patýv. Ame sam lačhé jekh ke jekh, pal-dová so Devléske angledýr jaciám dróga ame. Kóli vari-kon phenéla: “Mánge isyn drógo Devél”, a kokoró nane lačhó ke péskiro pšal, odová isyn xohaibnari; pal-dová so kon nane lačhó ke péskiro pšal, savés jov dykhciá, na moginéla te del patýv Devléske, Saves jov na dykhciá? I davá isyn dasavo priphenybén, savó aménde isyn Xristosostyr, so odová manúš, konéske drógo isyn Devél, isyn bangó (musinela) adiáke-pac' te javél lačhó ke péskiro pšal. Kažno (sváko) manúš, kon patiála, so Isúso isyn Xristóso (Miesija), isyn Devléskiro čhavó, i kažno manúš, konéske isyn drógo Dad, léske adiáke-pac' isyn drógo Léskiro Čhavó. Pir davá ame udžinasa, so aménge isyn dróga Devléskire čhavé: kóli ame rikirasa syr Drógima dro iló Devlés i kerása pir Léskire priphenybená. I amarí patýv i iló ke Devél isyn kadasavé; sob (kaj) ame te rakhas Léskiro priphenybén. I Léskire priphenybená isyn naphare. Pal-dová so kažno manúš, kon isyn Devléskiro čhavó, pirizorjakirela svéto. I ame pirizorjakirasa davá svéto amaré patiaibnása. Kon isyn kodová, savó pirizorjakirela svéto: ĥáda (ake), isyn odová, kon patiála, so Isúso isyn Devléskiro Čhavó. Davá isyn Jov, Isúso Xristóso, Savó javdiá paniésa, kiéli Jov boldiape: i ratésa, kiéli Jov myjá. Jov javdiá na féni (tóka) paniésa, ne paniésa i ratésa. I Dúho (Fáno) Kokoró dophenéla pal davá, pal-dová so Dúho (Fáno) isyn čačipén. Paldavá isyn trin jakhítka pe bolybén: Dad, Lav i Svénto Dúho (Fáno), i adalé trin isyn syr jekh dophenybén. I kóli ame prilasa manušýtko dophenybén, tedy Devléskiro dophenybén isyn zoraledýr, pal-dová so Devél dophenéla pal Péskire Čhavéste. Kon patiála dre Devléskire Čhavéste, kodoleste isyn dophenybén dro péskiro iló. A kon na patiála Devléske, odová kerdiá Les Xohaibnarisa, pal-dová so jov na upatiandyja dro dophenybén, savésa Devél dophenéla pal Péskire Čhavéste. Davá dophenybén isyn dro dová, so Devél dyjá aménge viéčno džiibén i daja džiibnáskiri ĥanyngori isyn dre Léskire Čhavéste. Konéste isyn Čhavó, kodoleste isyn davá džiibén; konéste nane Devléskire Čhavés, kodoleste nane džiibén. Dalé čačipená me čhindjom tuménge, kon patiála dro Devléskire-Čhavéskiro lav, sob (kaj) tumé te džinén, so tuménde isyn viéčno džiibén. I ĥáda, isyn muršypen, savó isyn aménde dre Devléste, so kóli ame mangasa vari-so pir Léskiri vólia, Jov šunéla amen. I kóli ame džinása, so Jov šunéla amen, pal so ame mangasa, ame džinása i dová, so Jov kandéla amaró mangipén, kiéli ame mangdiam Les. Kóli vari-kon bidykhela péskire pšalés, savó keréla grého na ke meribén, mek jov te mangélpe Devléske, i Jov déla odoléske džiibén. Davá isyn vaš odolénge, kon na keréla grého ke meribén. Ne isyn grého ke meribén: i me na rakiráva pal davá, sob (kaj) jov te mangélpe Devléske pal dasavo grého. Kažno xohaibén isyn grého, ne isyn grého, savó isyn na ke meribén. Ame džinása, so kažno manúš, kon isyn Devléskiro čhavó, na keréla gréhi, ne kon isyn Devléskiro čhavó, kodová rakhéla pes, i nálačho na čilavéla les. Ame džinása, so ame sam Devléskire, i so saró svéto isyn tel nalačheskiri zor. Ame džinása, so Devléskiro Čhavó javdiá i dyjá aménge godý, sob (kaj) ame te udžinas, kon isyn čačunó Devél, i sob (kaj) aménge te javas dro jekhipén čačuné Devlésa, Léskire Čhavésa, Isusósa Xristosósa. Davá isyn čačunó Devél i viéčno džiibén. Čhavorale! Rakhén pes idolendyr. Amín'. Phurestyr, – Raniake, Savja Devél vykedyjá, i Lákire čhavénge, savé isyn dróga mánge čačunés, ne na so me jekh, a saré, savé udžindlé čačipén, pal davá čačipén, savó isyn dre aménde i javéla aménca pe viéki: mek te javél bahtiakiribén, tangipén, i ramánjo tuménca Devléstyr Dadéstyr i Rástyr-Devléstyr, Isusóstyr Xristosostyr dro čačipén i láska. Me sómas drieván rado, kiéli Me lathjom maškír Tyré čhavénde kadasaven, savé dživéna dro čačipén pir davá, syr Devél Dad priphendiá aménge. I kakaná Me drieván mangáva Tut, drógo Ranori; javása te javas lačhé jekh ke jekh. Me čhináva davá na nevó priphenybén, a davá priphenybén sys aménge anglypnástyr. Daja pšalýtko patýv značinela dová, sob (kaj) ame te dživás adiáke, syr Devél priphendiá aménge. Davá isyn dová-pac' priphenybén, savó tumé šundlé anglypnástyr, sob (kaj) ame te dživás pir davá priphenybén. Pal-dová so but xohaibnarja zaginé dro svéto, savé na priĥaljona, so Isúso Xristóso javdiá dro manušýtko loč. Kadasavó manúš isyn xohaibnari i vérgo (vrogo) Xristosóske. Dykhén pal péste, sob (kaj) ame te na našavas dová, vaš so ame kerdiám butý, a sob (kaj) tumé te doresen pherdý mazúri (nagrada) Rástyr-Devléstyr. Kažno manúš, kon piridžala Xristosóskiro sykliakiribén i na jačélape dro davá sykliakiribén, kadasavé manušéste nane Devél. Kon jačélape dro Xristosóskiro sykliakiribén, kadasavé manušéste isyn i Dad i Čhavó. Kóli vari-kon javéla ke tumé i na janéla dová, so Xristóso sykliakirdiá, tumé te na prilén les dro tumaró kher i te na den ‘dobridim’ léske. Pal-dová so, kon déla ‘dobridim’ léske, odová manúš isyn pal jekh lésa dre léskire fuj réndy. Mánde isyn but, so trej te čhinav túke, ne me na kamám te keráv davá, pe papira černilasa. Aménde isyn nadiéia te javav tuménca te rakiráv muj ke muj, sob (kaj) amarí rádyma te javél pherdý. Čhavoré tyré-pheniakire, savjá adiáke-pac' Devél vykedyjá, piridena “paklono” túke. Phurestyr, miré drogoné Gajoske, kon isyn drógo mánge čačipnása. Drógo miro! Me mangavape Devléske, sob (kaj) te javél kófo (pol'za) pe saró, so tu kerésa, sob (kaj) te javes tu sastó, adiáke-pac' syr tyró dúho (fáno) barjola. Pal-dová so me drieván obradyndjompe, kiéli devlýtka pšála javné i dophendle pal tyró čačipén, syr tu i dživesa pir čačipén. Vaš mánge nane baredýr rádyma, syr te šunav, so miré čhavoré dživéna pir čačipén. Drógo miro! Tu kerésa patiaibnytkes saró, so kerésa vaš devlytkoné pšalénge i čužoné manušénge, savé dophenenas angíl khangirí pal tyrí pšalýtko patýv, kiéli tu bičhavesas len dro drom, syr trej i, syr isyn lačhó Devléske, tedy tu kerésa lačhés; pal-dová so jone giné pal Xristosóskiro lav, jone na lyné nisó Najudendyr. Paldavá aménge trej te prilas šukár adasavé manušén, sob (kaj) ame moginasas te kerás butý khetané vaš čačipén. Me čhindjom khangirjake, ne Diatriefo, savéske javdiá pe godý te javél léngire šeralesa, na priléla dová, so me čhináva. Paldavá, kiéli me javáva, me dáva léske te ripirel pal dová, so jov keréla, syr jov zlydžala pljotki pe aménde. Ne jov adiáke isyn ĥálko ke davá, so jov i kokoró na priléla devlytkoné pšalén, i adiáke-pac' keréla proti odolénde, kon kaméla te prilel i iščo (inké) jov tradéla javrí len khangirjátyr. Miro drógo! Na jav tu adasavó, sob (kaj) te kerés čoripén, a jav adasavó, sob (kaj) te kerés lačhipén. Kon keréla lačhipén, odová isyn Devléstyr, a kon keréla čoripén, odová na dykhciá Devlés. Saré dophenena lačhipén pal Dmitrijoste (Mitraste), i čačipén adiáke-pac' pal léste; ame adiáke-pac' dočhuvasa amaró dophenybén i tumé džinéna, so amaró dophenybén isyn čačunó. Mánde but treindiá te čhinav tuménge, ne me na kamám te keráv davá černilasá i porésa; ne me patiáva, so syg me dykhavo tumen, i ame javása te rakiras muj ke muj. Te javél ramánjo (miro) túke. Piridena “paklono” túke malá. Piride “paklono” malenge (drugenge), kažnonéske pir lav. Amín'. Judastyr, Isusóskire Xristosóskire pisharistyr, Jakovóskire pšalestyr, manušénge, savé jačné dróga Devléske Dadéske, i savén Jov prikhardia, i savén zrakhciá Isúso Xristóso: mek tangipén, i ramánjo (miro), i pšalýtko patýv te javél dynó but butýr tuménge. Dróga miré! Me kamdjom xačkirdé ilésa te čhinav tuménge pal amaró khetano zrakhibén, me gindjom, so treindiá te čhinav tuménge, sob (kaj) te podrikirav tumen te terdjon pal patiaibén, savó jékhvar i vaš sarénge Devél dyjá sventoné manušénge. Pal-dová so vari-savé manušá čorahanés popyne maškír tuménde, savé ĥará sys otdyné pe séndo. Jone isyn bidevlytkarja, jone piririskirde Devléskiro bahtiakiribén dro vol'nyma te kerén, so kaména, i jone na priĥaljona Jekhe Ras-Bares, amaré Ras-Devlés, Isusós Xristosós. Me kamám te rakiráv, sob (kaj) tumé te ripirén, mek tumé jékhvar džindlé saró davá, so Raj Devél zrakhciá manušén Jegiptóskire phuvjátyr, a korigedýr (pozže) odolén, savé na patiandyné, Jov muliakirdiá. I Jangolen, savé na zrakhné péskiro anglatunó pravo dre patýv, a jačkirdé péskiro štéto te dživén, Jov rakhéla len dro kalypén dre viečna sastyrá pe baró Dyvés, kiéli len javéla Jov pharés te sendiakirél; adiáke syr Sodómo i Gomóra i pašatuné foricy, savé adiáke-pac', syr odolé Jangóly otdyné pes pe bléndo i vaš tyrdypén ke javír manušýtko loč: dalé fórja sys shačkirdé viečnone jagása syr primiéro (sykaibén) tuménge. Ne adiáke-pac' javéla kadalé manušénca, savé dykhéna suné i magirena péskiri loč; jone na priĥaljona Devléskiro pravo i kaliakirena zorja, so isyn dro Bolybnáskiro Rajo. Ne Mihailo Arhangielo vyrakirdia nalačheske, kiéli jone rakirénas jekh jekhésa pal Mojzáskire masá, Mihailo na sys murškanó te kaliakirel nalačhés, ne phendiá: “Mek Devél te priphenel Túke.” A kadalé manušá kaliakirena dová, so jone na džinéna, i dová, so jone ĥaljona féni syr bilavengire murdalá; dro dová jone poddenape grehoske. Bida lénge! Pal-dová so jone giné Kainoskire dromésa i pal barvalypén jone kokoré otdyné pes grehoske, syr Valamo i jone meréna dro búnto, syr Kariejo. Kadalé manušá sýrby makhena tumaré devlykane svénki: jone svenkinena tuménca bi darákiro i čaliakirena féni kokoré pes. Jone isyn sýrby óbloki bipanieskire, savé balvál tradéla. Jone isyn sýrby vosieniakire kaštá bibarjakirdeskire, savén vykošne i, savé mulyne duj móly; jone isyn sýrby morjoskire (derjavéskire) xoliamé valny (velny), učhakirde pienasa péskire ladžaipnytkone rendéndyr (dielendyr); jone isyn sýrby čergeniá, savé na džinéna drom, savénge isyn rakhno kalypén (ciamlypén) pe viéki. I Jenoho, eftáto Adamostyr, angilphendia pal lénde: ĥáda, Raj Devél džála tysjoncengire dešytkonenca Péskire sventonendyr, te kerél séndo pe saré manušénde i te bangiakirel sarén nadevlytkonen maškír lénde pal léngire nadevlytka réndy, savé jone kerdé i pal saré pharé nalačhé lavá, savé kadalé bidevlytkarja-grehítka manušá rakirdé proti Devléste. Jone isyn xoliamé rakiribnarja, savé rikiréna xolý pe sarénde, jone keréna pir péskiro grehítko tyrdypén; jone javéna vučés te marén pes lavénca, jone javéna gudles te divinenpe pe manušénde vaš péskiri l'góta. Ne tumé, dróga miré, ripirén lavá, savé ĥaredyr rakirdé Apóstoly amaré Ráskire – Devléskire, Isusóskire Xristosóskire, so jone phendlé tuménge: “Javéna manušá dro palatunó časo, so javéna te sanpe xoliames tuméndyr, savé javéna pir péskiro grehítko tyrdypén.” Adalé isyn manušá, savé keréna grupy maškír manušénde proti jekh jekhéste, jone keréna pir péskiri godý, lénde nane Dúho (Fáno). Ne tumé, miré dróga, barjon dro péskiro svénto patiaibén, mangénpe Devléske Sventoné Duhósa, rakhén pes dro Devléskiri láska, užakiren amaré Ráskiro – Devléskiro tangipén te del tuménge viéčno džiibén. Tanginen manušén, savé kuninenape dro patiaibén, ne zrakhen javirén darása, kiéli tumé léna te vytyrden len syr len sýrby jagatyr, ne ladžan (brydinen) léngire uribnastyr, savó isyn magirdó ločasa (plotiasa). I kakaná Jekhéske, Léske, Kon moginéla te zrakhél tumen, sob (kaj) tumé te na perén dro grého, i kon moginéla te čhuvél tumen angíl Péskiri sláva bidošengirenca i dre bari rádyma, Jekhéske Devléske, amaré Zrakhibnariske pir Xristosóste, amaré Ráske-Devléske te javél sláva, baripén, zoralypén i pravo adadyvés i pe saré viéki. Amín'. Sykadyipén (ob'iavlienijo) Isusóstyr Xristosostyr, Savó Devél dyjá Léske te sykavél Péskire pishar'jénge (rabénge), so trej syg te javél. I Xristóso phendiá zorjása davá, kiéli Jov bičhadiá Péskire Jangolós ke Péskiro pishári Iáno (Ioano), savó phenelas zorjása Devléskiro lav i Isusóskiro Xristosóskiro dophenybén i dová saró, so Iáno dykhciá. Bahtaló isyn odová, kon ginéla i šunéla lavá kadalé angilphenybnástyr i rikirélape doléske, so isyn čhindló dro daja lylvarí, pal-dová so časo javéla syg, kiéli saré dalé čačipená kerénape. Ianóstyr eftá (bitrinengire deše) khangir'jénge, savé isyn dre Azija: Mek bahtalypén i ramánjo (miro) te javél tuménge Odoléstyr, Savó isyn, Savó sys, i Savó javéla, i eftá duhéndyr, savé isyn angíl Léskiro trono; i Isusóstyr Xristosostyr, Savó isyn patiaibnýtko Jakhítko (Svidietieljo), Savó isyn Pérvo, kon uštyjá muléndyr i Savó isyn Barydyró pe kral'jénde pir phuv. Léske, Savéske jaciám dróga ame, Jov otmekciá amaré gréhi Péskire ratésa, Savó sozdyjá améndyr rašángiro Kralipén te dynarinél Léskire Devléske i Dadéske, mek sláva i zoralypén te javél pe saré viéki. Amín'. Ake, Jov javéla oblokénca, i kažno (sváko) manúš udykhéla Les, i kodolé, savé phusadé Les čhurdybnytkone bustiasa (kopjosa) i saré phuvjákire ródy javéna te den gódla jasvénca angíl Léste. Mek adiáke te javél. Amín'.” “Me som Al'fa i Omiega, Anglypén i Kónco (Jagóro), rakiréla Raj Devél, Sarezorjákiro.” Me som Iáno, tumaró pšal, i mal (drúgo), kon isyn khetané tuménca dre bída i dro kralipén i khetané vyrikiréla pal Isusóste Xristosóste. Me sómas pe óstrovo (džip), savó kharélape “Patmoso” pal Devléskiro lav i pal dová, so me dophenávas manušénge pal Isusóste Xristosóste. Dro Ráskire-Devléskiro dyvés Dúho (Fáno) lyjá upralypén pe mánde i me šundjom palál zoralý zan, saví sýrby rogóstyr (trubátyr) rakirdiá: “Me som Al'fa i Omiega, Anglypén i Kónco (Jagóro), dová, so tu dykhésa, čhin dre lylvarí i bičháv eftá khangir'jénge, savé isyn [ke Asija-r.s.]: dro Jefieso, dre Smirna, dro Piergamo, dre Fiatira, dro Sardiso, dre Filadel'fija i dre Laodikija.” Me risijom pale te dykháv, kon rakirdiá mánca, i dykhcjom eftá suvnakuné momolytka (svietil'niki), i maškír eftá momolytka sys vari-kon, Savó zdelaspe (sys pohožo) pe Manušéste, Savó sys dro dlengo uribén ke ĥerá, i sys suvnakuný kustýk trusciál (krugom) Léste: šeró i balá Léskire sys parné syr sámo parnó than ci syr iv, i Léskire jakhá ziaindle syr jag; i Léskire ĥerá sys syr xarkóma (mied'), saví sys probindly dro bov, i Léskiri zan sys syr buté-paniengire šolia; i sys Léste eftá čergeniá dro Léskiro čačó vast, i Léskire móstyr vydžálas vostro (čolalý) dujé-rigéngiri kurtála (miečo), i Léskiro muj ziainelas sýrby kham saré péskire zorjátyr. I kiéli me dykhcjom Les, me pyjom angíl Léskire ĥerá syr muló. Jov čhudiá Péskiro čačó (právo) vast pe mánde, i phendiá: “Na dar! Me som Pérvo i Palatunó (Posliednjo), Me som džidó: i Me sómas muló, i, ĥáda, Me javáva te dživáv pe saré beršá, Mánde isyn klydyna meribnaskire liunostyr (adostyr). Paldavá čhin (rande), so tu dykhcián, so isyn kakaná, i kodová, so javéla te kerélpe paló davá, ake, isyn garady znáčyma pal dová, so tu dykhésa dro miro čačó vast i pal eftá suvnakuné momolytka: eftá čergeniá-davá isyn Jangóly eftá khangir'jendyr, i eftá momolytka-davá isyn eftá khangirja. Čhin Jangoloske Efiesoskire khangirjátyr: “Davá isyn lavá Odoléstyr, Kon rikiréla eftá čergienia dro Léskiro čačó (pravo) vast, Kon psiréla maškír eftá suvnakuné momolytka: “Me džinóm (džináv) Tyrí butý i syr but tu kerdián butý, i tyró vyrikiriben, i dová, so tu na moginésa te pirilydžas čoré manušén, i so tu propatiakirdian kodolén, savé phenéna pe péste “Apóstoly” i savé nane, so tu lathian, so jone isyn xohaibnarja; i so tu vyrikirdian, i so tu pirizorjakirdian mén'ki pal Miro lav i na ivjá (na darmes) kerdián davá: ne Me bangiakirava tut pal dová, so túke nane drógo butýr, so sys túke sámo drógo ĥaredýr. Tedy rípir dová lačhipén, savó tu mekcian; priĥaljov bang, i ker dová, so tu kerdián angil dová. Kóli tu na priĥaljosa bang, tedy Me javáva ke tu i Me láva tyró momolýtko (svietíl'niko) léskire štetóstyr, paka tu priĥaljosa bang. Jekh, lačhipen so isyn dre túte isyn, dová, so túke drieván isyn na pir iló dová, so Nikalaity keréna, dová i Mánge adiáke-pac' drieván na pir iló. Konéste isyn kaná, mek jov te šunél dová, so Dúho (Fáno) phenéla khangir'jénge. Odoléste, kon léla upralypén, Me dáva léske pravo te xal džiibnáskire kaštéstyr (drevostyr), so barjola dro Devléskiro Rajo.” I čhin Jangoloske Smirnakire khangirjátyr: “Davá rakiréla Pérvo i Palatunó, Kon isyn muló i Kon otdžidyjá: Me džinóm (džináv) tyré réndy (diély), tyró kalypén (túga), ne tu san barvaló i Me džinóm (džináv), syr kaliakirde tut odolé, savé rakiréna, so jone isyn Judy i savé nane, a jone isyn nalačheskire skedyniatyr (skiedyibnastyr). Na dar nisostyr, pal so túke prijavelape te menčynespe. Ĥáda, nálačho javéla te čhurdel vari-savén tuméndyr dro štaribén (bešyben); sob (kaj) tumen te propatiakiren i tuménde javéla pharipén deš dyvesá. Jav patiaibnýtko ke meribén, i Me dáva túke džiibnáskiri viánka (koróna). Konéste isyn kaná, mek jov te šunél dová, so Dúho (Fáno) phenéla khangir'jénge: Odoléske, kon pirizorjakirela (zbierdynela), javír meribén na keréla bibáht.” I čhin Jangoloske Piergamoskire khangirjátyr: “Davá rakiréla Odová, Konéste isyn vostro (čolaló) duje-rigengiri kurtála (miečo): Me džinóm tyrí butý, i, kaj tu dživesa, odój, kaj nálačho isyn beštó pe péskiro trono. Tu rikiresape pal Miro lav i tu na otphendianpe péskire patiaibnastyr dre Mánde až dre dolé dyvesá, kiéli Antipo, miro patiaibnaskiro jakhítko, sys zamardo maškír tuménde odój, kaj nálačho dživéla. Ne mánde isyn vari-so proti túte; túte isyn kadasavé manušá, savé rikirenape pal Valaamoskiro sykliakiribén, savó sykliakirdiá Valakos te čhurdel bar pe drom te obštavelpe angíl Izrailjoskire čhavénde, sob (kaj) jone te xan svénto dyibén idolénge i te dživén džuvliénca bi sevlakiro. I tuménde adiáke-pac' isyn manušá, savé rikirenape pal Nikalaitengiro sykliakiribén [savó me bidykhava-r.s.]. Paldavá priĥaljov péskiro grého: kóli tu na priĥaljosa, tedy Me javáva ke tu syg, i Me javáva te maravpe tuménca kurtalása, so vydžála Miré móstyr. Konéste isyn kaná, mek jov te šunél dová, so Dúho (Fáno) phenéla khangir'jénge. Odoléske, kon pirizorjakela, Me dáva vari-kicý manka, saví isyn garady. Me adiáke-pac' davá léske parnó bar, pe savó javéla čhindló nevó lav, savó nikón na džinéla, apríč kodoleste, kon doreséla davá bar.” I čhin Jangoloske Fiatirakire khangirjátyr: “Davá rakiréla Devléskiro Čhavó, Konéste jakhá isyn sýrby jagakiri čib, i Léskire ĥerá isyn sýrby ziaindly xarkóma (mied'): Me džinóm tyrí butý, tyró lačhipén ke javír manušá, i tyró patiaibén i tyrí butý vaš Devléske, i tyró vyrikiriben. Tyrí butý kakaná isyn butýr kodoliatyr, saví sys ĥaredyr (vagedýr). Ne Mánde isyn vari-so proti túte: pal-dová so tu domekesa, so adáia džuvlý Jezaviel', saví kharéla pes proročica, sykliakiréla i zatyrdela sýrby dre felý (pietlia) miré pishar'jén te dživén džuvliénca bi sevlakiro, i te xan svénto dyibén (žértva) idolénge. I Me dyjom láke časo te priĥaljol lákiro biladžaipén, ne joj na kaméla te priĥaljol péskire gréhi. Adiáke Me čhurdava la pe čhuibén, kaj joj kerdiá nágoža réndy javire manušénca, sob (kaj) jone te stradynen, paka jone priĥaljona grého, savó sys lénde lása, i Me muliakirava lákire čhavén, sob (kaj) saré khangirja te džinén, so Me som Odová, Kon džinéla, so manúš duminéla, i so jov mangéla, Me dáva pale kažnonéske tuméndyr pir dová, saví butý tumé kerdé. A kadalé manušénge tuméndyr dre Fiatira, savé na rikirenape pal davá sykliakiribén i, savé na džinéna xoripén, so kharélape “nalačheskiri zor”, Me phenáva: Me na čhuváva pe tuménde javír pharipén; a tumé rikirenpe pal dová, so isyn tuménde, paka me javáva. Odoléske, kon pirizorjakirela i rakhéla dová, so Me keráva ke kónco (ke jagóro), Me dáva léske zor pe Najudénde, i jov javéla te xulainél pe lénde sastruné destesa: jone pharadjona pe koterá syr glejana (glinytka) pirja, i léskiri zor pe lénde javéla dasaví-pac', saví me dorescjom (dolyjom) Miré Dadéstyr, i Me dáva léske zlokoskiri čergen. Konéste isyn kaná, mek jov te šunél, so Dúho (Fáno) rakiréla khangir'jénge.” I čhin Jangoloske Sardisoskire khangirjátyr: “Davá rakiréla Odová, Konéste isyn eftá Devléskire dúhi i eftá čergeniá: “Me džinóm (džináv) tyrí butý, i so manušá den godý péske (duminéna), so tu san džidó, ne tu san muló. Rakhpe i zoraliakir dová, so jaciápe túte i so meréla syg, pal-dová so Me na lathjom, sob (kaj) tyrí butý te javél pherdý angíl Miré Devléskire jakhá. Paldavá priripir dová, so tu sykliakirdian, so tu šundián, rakh dáva i rískir péskiro džiibén ke Devél. Kóli tu na javésa te rakhespe, tedy Me javáva pe túte syr čor, i tu na javésa te džinés, kiéli me javáva. Ne isyn nábut manušá túte dro Sardiso, savé na meliakirde péskire uribená grehénca, i jone javéna te psirén Mánca dre parné uribená, pal-dová so jone isyn lačhé. Kon léla upralypén, odová ur'jela parné rizy, i Me na khosava krig léskiro lav džiibnytkone lylvarjatyr (knigatyr), i me priĥaljovava léskiro lav angíl miré Dadéste i angíl Léskire Jangolende, Konéste isyn kaná, mek jov te šunél, so Dúho (Fáno) rakiréla khangir'jénge!” I čhin Jangoloske Filadel'fijakire khangirjátyr: “Davá rakiréla Odová, Kon isyn Svénto, Čačunó. Léste isyn Davidóskiro klydyn i Jov psiravela (otphandela) vudár, i nikón na phandela, i kiéli Jov phandela, nijékh na psiravela. Me džinóm tyrí butý. Dykh: Me čhudjom angíl túte psirado vudár i nikonéske naštý te phandel davá vudár. Túte isyn nábut zor, i tu zrakhcián Miro lav i tu na otphendianpe Mándyr. Ake, me dáva túke odolén, savé isyn nalačheskire skedyibnástyr, savé rakiréna, so jone isyn Judy, a davá nane čačipén, jone isyn xohaibnarja; ĥáda, Me keráva adiáke, sob (kaj) jone te den “paklono” patyvása angíl tyré ĥerá, te džinén, so Mánge jacián tu drógo. Paldavá so tu rakhcian lav te vyrikires, to i Me adiáke-pac' rakhava tut mardestyr (štundatyr), kiéli javéna te propatiakiren saró svéto, sob (kaj) te propatiakiren kažnoné manušés, kon dživéla pe phuv. Dykh, Me sýges javáva. Rikir, so isyn túte, sob (kaj) vari-kon te na lel tútyr tyrí viánka (koróna), kiéli tu lyjan upralypén. Kon léla upralypén, kodolestyr Me keráva važno stýlbo dre Miré-Devléskiri Khangirí, i jov butýr na vydžála javrí. I Me čhináva pe davá stýlbo Miré Devléskiro lav, i Miré-Devléskire foróskiro lav “Nevó Jerusalimo.” Davá nevó Jerusalimo javéla te džal telé Bolybnáskire Rajostyr, Miré Devléstyr. I Me čhináva pe léste Miro nevó lav. Konéste isyn kaná, mek jov te šunél, so Dúho (Fáno) rakiréla khangir'jénge.” I čhin Jangoloske Laodikijakire khangirjátyr: “Davá rakiréla “Amín'”, patiaibnýtko i čačunó Jakhítko, Savó isyn anglypén sareske, sóstyr Devél sozdyjá svéto: Me džinóm (džináv) tyrí butý, so tu na san šylalo, i so tu na san xačkirdo. Fedýr javélas, sob (kaj) tu te javes xačkirdo ci šylalo. Paldavá so tu san tato, a tu na san šylalo ci xačkirdo, me čungardava tut Miré móstyr. Pal-dová so tu rakirésa: ‘Me som barvaló i me barvalyjom i mánge na trej ničý, ne tu na džinésa, so tu san bedo i bibahtaló; čororó, kororó i nango;’ paldavá me podphenava túke te kines suvnakáj Mándyr, savó sys probindlo jagása. Kin adiáke-pac' parny ídia te ur'jespe, sob (kaj) te sykaves ladž péskire nangipnaskiri; i pomakh péskire jakhá jakhitkone makhluniasa (maziasa), sob (kaj) te dykhés. Sarénge, kon isyn drógo Mánge, Me phenáva zorjása léngiri bang i sykliakirava len ke dukhá. Paldavá jav xačkirdé ilésa ke Devél i rískir péskiro džiibén ke Jov. Dykh! Me som terdó pašýl vudár i marava dre léste; kóli vari-kon šunéla Mirí zan i psiravela (otphandela) vudár, tedy Me zadžava andré ke jov i javáva te xav bel'veliakiro xabén lésa i jov Mánca. Odolés, kon léla upralypén, Me bešliakirava les te bešél Mánca pe trono, syr i Me, kiéli Me lyjom upralypén i bescjom Miré Dadésa pe Léskiro trono. Konéste isyn kaná, mek jov te šunél, so Dúho (Fáno) rakiréla khangir'jénge.” Paló (poslie) davá me dykhcjom, – ĥáda, so vudár isyn psirado (otphandlo) dro Bolybnáskiro Rajo. I doiá-pac' zan, so ĥaredyr me šundjom, xaj, rogoskiri (trubakiri), saví rakirdiá mánca, phendiá: “Jav upré adarík, i Me sykaváva túke, so syg javéla paló davá. Jekhátyr Dúho (Fáno) lyjá upralypén pe mánde. I, ake, sys trono dro Bolybnáskiro Rajo, i pe davá trono sys beštó Vari-Kon. I Odová, Kon sys beštó, ziaindia syr bar jaspiso i sardiso, i sys bryšyndeskiri bangi (raduga) trusciál trono sýrby smaragdo. I trusciál kadavá trono sys biš te štar javír trony i biš te štar godephuré sys bešté pe kadalé trony dre parné uribená i pe šeré sys lénde suvnakuné vianki (korony). I tronostyr džánas bliskavícy, i zaniá, i grómy i eftá šandale (podsviečniki) xačonas angíl trono, savé isyn eftá Devléskire dúhi. Angíl trono sys stjoklýtko (balunaló) mórjo (derjáv) syr kristalo, i maškirál i trusciál trono sys štar džidale (žyvotna), savénde sys pherdó jakhá palál i angíl; i pérvo džidalo sys syr ščer (liévo), javír džidalo sys syr guruvoro, i tritoneste džidaleste sys manušýtko muj, i štárto džidalo sys syr vurniaibnytko órlo (kído). I kažnoné džidaleste sys šov phaká (kryly) pe saré rigá, i andré sys pherdó jakhá i dyvesé i ratý jone rakirénas: “Svénto, Svénto, Svénto isyn Raj Devél, Sarezorjákiro, Savó sys isyn, i Savó trej isyn te javél.” I kiéli štar džidale (žyvotna) slavinena, déna patýv i parikirena Odoléske, Kon isyn beštó pe trono i Savó dživéla viéčnes pe saré viéki, tedy dešuštar godephuré kloninenape patyvása angíl Kadaleste, Kon isyn beštó pe trono, i Savó dživéla viéčnes pe saré viéki. Jone čhurdena péskire vianki (korony) angíl trono, phení: “Amaró Raj Devél i Devél! Tu san mol te priles sláva, patýv i zor, pal-dová so Tu sozdyjan saró i pir Tyrí vólia saró sys sozdynó i dživéla.” I Me dykhcjom skrencyndlo svítko dro čačó (pravo) vast Odoléste, Kon sys beštó pe trono, dre savó sys začhinybena javrí i andré. Jov sys zaphandlo pe eftá čergenorja (piečati). I me dykhcjom zoralé Jangolós, savó phenelas angíl sarénde zoralé zaniása: “Kon isyn mol te otphandel lylvarí i te phagirel čergenorja?” I na sys nikón ni dro Bolybnáskiro Rajo, ni pe phuv, ci tel phuv, konéske sys mol te otphandel svítko i te dykhél andré dre léste. I me rondjom kirkes but, so na sys nikón, savó sys mol te otphandel svítko i te dykhél andré dre láte. I jekh godephurendyr phendiá mánge: “Na rov! Dykh! O Ščer (Liévo) Judáskire rodóstyr, Davidóskire ratestyr, seménca, lyjá upralypén, sob (kaj)/jov te del ráda te otphandel svítko i léskire eftá čergenorja.” I me dykhcjom Sventoné Bakrores, Savó sys sýrby nagara začhindló maškír trono i štar džidalende i godephurende. Sventoné Bakroreste sys eftá šyngá (rógi) i eftá jakhá, savé isyn eftá Devléskire Dúhi i sys bičhadé pir sarí phuv. Svénto Bakroró podgíia i lyjá svítko čačé vastéstyr Odoléstyr, Kon sys beštó pe trono. I kiéli Jov lyjá svítko, štar džidale (žyvotna) i biš te štar godephuré pyné pe čangá angíl Sventoné Bakroreste. Kažnonéste léndyr sys gusli i suvnakuné tahtaja (čašy), savé sys pherdé fimiamosa drogoné-smolakire thuvipnasa (fimiamosa), so isyn patierja (molitvy), kiéli svénta mangénape Devléske. I jone bagandle neví gilý, phení: “Tu san mol te priles kadavá svítko i te otphandes čergenorja (piečati), pal-dová so Tu sánas začhindló i Tu vykindian manušén vaš Devléske Péskire ratésa kažnoné jekhé-čibákire irjátyr (sem'iátyr) i kažnoné rodycóstyr, i manušytkoné nacyjátyr i kheritkoné rodóstyr. I Tu kerdián léndyr rašángiro Kralipén, savé javéna te kralinen pe phuv.” I nevéstyr me dykhcjom i šundjom zaniá buté-Jangoléngire, savé sys miliony pašýl trono i štaré džidalende i biš te štar godephurende, i jone rakirdé zoralé zaniása: “Svénto Bakroró isyn mol, Savó sys muliakirdo te prilel zoralypén i barvalypén i zor, i patýv, i sláva i manušéngiro šaribén.” I me šundjom, syr kažno džidalo, savés Devél sozdyjá, savó isyn dro Bolybnáskiro Rajo, pe phuv i tel phuv, i pe mórjo (derjáv), i saró, isyn andrál dre lénde, phenenas: “Odoléske, Savó isyn pe trono, i Sventoné Bakroreske, mek te javél šaribén, i patýv, i sláva i zoralypén pe viečna viéki.” I štar džidale (žyvotna), savén Devél sozdyjá, phendlé: “Amín'!” I godephuré pyné pe čangá i poklonindlepe patyvása. I me dykhcjom, kiéli Svénto Bakroró otphandia pérvo čergenorí eftá (eftane) čergenor'jendyr i me šundjom syr jekh štaré džidalendyr phendiá dasavé zaniása syr gromo: “Jav i dykh!” I me dykhcjom, i, ake, parnó graj. I kon sys uklisto pe léste, rikirdia lúko i viánka (koróna) sys dyný léske. Jov tradelas javrí, syr kodová, kon léla upralypén, sob (kaj) te lel upralypén. I kiéli Svénto Bakroró otphandia javír čergenorí, me šundjom, syr javír džidalo phendiá: “Jav i dykh!” I vygijá javír graj, loló. Kodoléske, kon sys beštó uklistó/é, sys dyný zor te lel ramánjo (miro) phuvjátyr, sob (kaj) manušá te muliakirén jekh jekhés i sys dyný léske bari kurtála (sablia). I kiéli Svénto Bakroró otphandia tríto čergenorí, me šundjom, syr tríto džidalo phendiá: “Jav i dykh!” I me dykhcjom, ake, kalé gres i jekhés, kon sys beštó uklistó/é pe léste, savéste sys ubladýtka (viesy) dre vast. I me šundjom zan štaré džidalendyr, so phendiá: “Litra parnó giv pal dynarijo i trin litry ĥersto (jačmienjo) pal dinarijo. I na xasiakir olivítko dzet (jeliejo) i mol. I kiéli Svénto Bakroró otphandia štárto čergenorí, me šundjom, syr štárto džidalo phendiá: “Jav i dykh!” I me dykhcjom: Ake! Syvo graj i odová, kon sys beštó uklistó/é ne léste, kharélaspe meribén, i liúno (ado) gijá pal léste. Lénge sys dyný zor pe štárto phuvjákiri paš te muliakirén kurtalása i bokhasa, meribnasa i riskiribnáskire murdalénca, savé isyn pe phuv. I kiéli Svénto Bakroró otphandia pándžto čergenorí, me dykhcjom tel altárjo manušéngire dijá, savé sys muliakirdé pal Devléskiro lav i pal dová, so jone patiaibnytkes dophenenas pal Xristosóste; i jone dénas gódla zoralé zaniása: “Rajo, Svénto i Čačunó! Ci but aménge te užakiras, paka Tu javésa te sendiakires i te čhuvés kára pal amaró rat pe manušénde pir phuv?” Kažnonéske léndyr sys dynó parnó uribén i sys phendló lénge, sob (kaj) jone iščo (inké) nábut te otkhinjon, paka léngire malá (drúgi) pir butý i léngire pšála javéna muliakirdé, syr i jone, sob (kaj) te javél pherdó kicypen (količestvo). I kiéli me dykhcjom, syr Svénto Bakroró otphandia šóvto čergenorí, tedy jaciá phuvjákiro trinskiriben, i kham jaciá kaló syr gonó balendyr, i čhon jaciá loló syr rat; i bolybnáskire čergeniá pyné telé pe phuv syr inžyritko kašt čhurdéla telé naspiala barjakirdé (plódy), kiéli bari balvál trinskirela len. I bolybén xasijá, rozgijápe syr skrencyndlo svítko, kažno bérga i óstrovo (džip) khardepe (dvigindlepe) krig péskire šteténdyr. I králja phuvjákire, i baré raja, i tysjoncengire-xaladéngire barydyrá, barvaliuki, i zoralé manušá, i kažno pishári, i kažno vól'no manúš ĥaradyne dre ĥiebará (pieščery) i maškír bergitka štéty, i jone rakirénas bergenge i skalenge: “Peren pe aménde i garaven amen jakhéndyr Odoléstyr, Savó isyn beštó pe trono, i Sventoné Bakroreskire xoliátyr, pal-dová so javdiá važno dyvés vaš Léskiri xolý i konéske isyn pir zor te terdjol murškanés angíl davá?” Paló davá me dykhcjom štaré Jangolen, Save sys terdé pe štar véngly pe phuv i rikirenas štar balvalia, sob (kaj) te na phurdel ni saví balvál ni pir phuv, ni pir mórjo (derjáv), ni pir vari-savó kašt (drévo). I me dykhcjom javire Jangolós, Savó džálas dolé rigátyr, kaj kham uštéla i savéste sys Džidé-Devléskiri čergenorí. Jov dyjá gódla zoralé zaniása štaré Jangolenge, konéske Devél dyjá zor te kerél čoripén pe phuv i pe mórjo (derjáv) i phendiá: “Na kerén čoripén ni pe phuv, ni pe mórjo (derjáv), angíl dová, syr ame čhuvasa čergenorí pe čekat pishar'jénge Amaré Devléskire.” I me šundjom odolengire-manušéngiro kicypen (količestvo), konéske čhudé čergenorí: 144000 manušá, savé sys saré Izrailjoskire-čhavéngire rodendyr (čangéndyr): 12 tysjoncy Judáskire rodóstyr, 12 tysjoncy Ruvimóskire rodóstyr, 12 tysjoncy Gadóskire rodóstyr (čangéndyr); 12 tysjoncy Asiroskire rodóstyr, 12 tysjoncy Niefalimoskire rodóstyr, 12 tysjoncy Manasijakire rodóstyr; 12 tysjoncy Simjoonoskire (Siemjonoskire) rodóstyr, 12 tysjoncy Lievijoskire rodóstyr, 12 tysjoncy Izaharoskire rodóstyr; 12 tysjoncy Zavulonoskire rodóstyr, 12 tysjoncy Jozáskire (Iosifóskire) rodóstyr, 12 tysjoncy Vieniaminóskire rodóstyr. Paló davá saró me dykhcjom, i, ĥáda, isyn but but manušá, so nikonéske na sys pir zor te ginel len, saré kheritkoné rodendyr, saré rodendyr, saré manušytkoné nacyiéndyr, saré jekhe-čibakire ir'jéndyr (sem'iéndyr/čibéndyr/čib'jéndyr), savé sys terdé angíl trono i angíl Sventoné Bakroreste. Jone sys uridé dre parné uribená, i dre vastá sys lénde pal'mitka randiá (vétki). I jone dénas gódla zoralé zaniása i phenenas: “Zrakhibén javéla amaré Devléstyr, Savó isyn beštó pe trono i Sventoné Bakrorestyr.” I saré Jangóly, so sys terdé trusciál trono, i godephuré i štar džidalé (žyvotna) pyné péskire mujénca angíl trono i poklonindlepe patyvása (kerdé šerésa) Devléske, i phenenas: “Amín'! Mek manušéngiro šaribén, i sláva, i godypén, i parikiriben, i patýv, i zoralypén, i zor te javél amaré Devléske pe saré viéki. Amín'.” Jekh godephurendyr otphendiá mánge, phení: “Kon isyn kadalé manušá, savénde isyn parné uribená, katýr jone isyn?” I me phendjom léske: “Rajo Miro, Tu ž džinésa.” I jov phendiá mánge: “Davá isyn kodolé manušá, so javné baré stradicostyr (bidatyr), vymorde péskire uribená i parniakirde len Sventoné Bakroreskire ratésa. Vaš davá jone isyn angíl Devléskiro trono i dynarinénas (služynénas) Léske dyvesé i ratý dre Léskiri Khangirí. Odová, Kon isyn beštó pe trono, rosčhuvela péskiri šátra pe lénde sýrby zrakhéla len. Jone na javéna butýr te bokhaljon, na javéna te tyrdenpe te p'jen: kham i vari-savó xačkiribén na peréla pe lénde; syr Svénto Bakroró, Savó isyn maškirál trono, javéla te čaliakirel len i te lydžál ke ĥanyngorja džidé-panieskire. I Devél vykhosela kažno jasvin léngire jakhéndyr.” Kiéli Svénto Bakroró otphandia eftáto (bitrinentiro déšto) čergenorí, tedy jaciá štylypen pe bolybén pe paš mardó (štúnda). I me dykhcjom eftá Jangolen, savé sys terdé angíl Devléste, i lénge sys dyné eftá rógi (truby). I javdiá javír Jangólo i terdijá angíl altárjo. Léske sys dyný thuvengiri tyknori (kadila), kaj sys but fimiámo sob (kaj), kaj jov te čhuvél khetané mangipnenca sventoné manušéndyr pe suvnakunó altárjo, so sys terdó angíl trono. I fimiámo ĥazdyjápe khetané mangipnenca Devléske sventoné manušéndyr angíl Devléste Jangoloskire vastéstyr. I Jangólo lyjá thuvengiri tyknori (kadila), pherdiakirdiá la jagása altarjostyr i čhurdyjá la pe phuv: i sys zaniá i grómy, i bliskavícy, i phuvjákiro trinskiriben. I eftá Jangóly eftá (eftane) rogénca (trubenca) skedynépe te phurdén dre rógi. I pérvo Jangólo phurdyja dro péskiro rógo; jaciá ĥrado i jag, savé sys zmiešyndle ratésa i sys čhurdyné pe phuv. Tríto paš phuvjátyr xačija i tríto paš kaštendyr (drevendyr) xačija, i kažno zeleny čar xačija. I javír Jangólo phurdyja dre péskiri rógo i vari-savó dová, so sys sýrby bari bérga jagása, so xačolas, sys čhurdynó dro mórjo (derjáv). Tríto morjoskiri paš kerdiápe ratésa; i myjá tríto paš džidalendyr, savé dživéna dro mórjo (derjáv), i tríto paš parmendyr (korabliendyr) phadija. I tríto Jangólo phurdyja dre péskiro rógo: i bari čergen pyjá telé bolybnástyr, saví xačolas syr momolýtko (svietíl'niko), i pyjá pe tríto paš rekendyr (lenor'jendyr) i panieskire ĥanyngor'jendyr. Adalé-čergeniakiro lav isyn Polýno (Vérmulia); i tríto paniengiri paš jaciá kirke čarjasa, i but manušá myné paniendyr, pal-dová so jone jačné kirke. I štárto Jangólo phurdyja dre péskiri rógo: i tríto paš khameskiri sys otmardy, i tríto paš čhoneskiri, i tríto paš čergeniengiri, so kalyne; na sys dud (svéto) ni dro tríto paš dyvesýtko, ni adiáke-pac' ratítko. I me dykhcjom i šundjom jekhe orlós (kidós), savó vurnialas vučés dro bolybén, rakirí: “Bida, bída, bída odolénge, kon dživéla pe phuv, syr javír trin Jangóly javéna te phurdén dre rógi.” I pándžto Jangólo phurdyja dre péskiro rógo; i me dykhcjom čergen, so pyjá bolybnástyr pe phuv, i láke sys dynó klydyn liunoskire ganyngatyr (bieznatyr). I čergen psiradia (otphandia) liunoskiri ĥanýng i thuv (dymo) vygijá ĥanyngatyr, syr thuv baré bovestyr: kham i fáno (vozduho) kalyne ĥanyngakire thuvestyr. I phakitka skočki (saranča) vyginé pe phuv thuvestyr i sys dyný lénge zor, saví isyn phuvitkone skorpionende. Lénge sys phendló te na kerén čoripén ni phuvitkone čarjake, ni savé zelene raslinake, ni savé kašteske (drevoske), a jekh manušénge, savénde na sys Devléskiro távro pe léngire čekata: i phakitkone skočkenge sys dynó te na muliakirén len, a te menčynen manušén pandž čhoná; i léngiri men'ka sys syr skorpiono menčynela, kiéli dukhavela manušés. I dre dolé dyvesá manušá javéna te rodén meribén, ne jone na lathéna; jone javéna te mangén, sob (kaj) te merén, ne meribén našela léndyr. Kadalé phakitka skočki (saranča) sys syr graja, savé kedynepe pe meribén; i pe léngire šeré sys vianki (korony) sýrby suvnakástyr, i léngire muiá sys sýrby muiá manušýtka. I léngire balá sys sýrby balá džuvlikané, i léngire dandá sys sýrby ščerende (lievende), i sys lénde sastruné kolyna syr sastruné pancyri, i lopotymo léngire phakendyr sys syr lopotymo ĥaratuné vurdenendyr, kiéli graja prastána pe meribén; i sys lénde porja syr skorpionengire žaly i dre kadalé porja sys zor te dukhaven manušén pe pandž čhoná. Liunoskiro (Adoskiro) Jangólo sys králi pe lénde. Léskiro lav pir Judýtko čib sys “Abaddon”, a grekítkes (balamítkes) “Appolion.” Pérvo bída gijá krig, ake, iščo (inké) duj bidy, so džána pal pervonate. I šóvto Jangólo phurdyja dre péskiro rógo i me šundjom zan štartone venglendyr suvnakuné altarjostyr, so sys angíl Devléste, ĥáda, zan phenelas šovtone Jangoloske, savéste sys rógo: “Rosphande štaré Jangolen, savé isyn phandle pašýl reka (len') Jevfrato.” I štar Jangóly sys rosphandle, savé sys skedyné vaš štúnda i dyvés, i čhon, i berš te muliakirén tríto paš manušéndyr; i sys duj miliony xaladén pe grénde i me šundjom léngiro kicypen (količestvo). I, ĥáda, me dykhcjom gren sýrby dre suné i odolén, savé sys bešté uklisté pe lénde; lénde sys sastruné pancyri, lolé syr jag, cjomna-sine syr giacynto, žylta syr siéra (dzevélia). Grengire šeré sys syr ščerengire (lievengire) šeré, i léngire móstyr džálas jag, thuv i siéra (dzevélia). Tríto paš manušypnastyr sys muliakirdy dalé triné franséndyr: jagása, thuvesa i dzeveliasa, so džánas javrí grengire mujendyr. Pal-dová so grengiri zor sys dre muiá i porja léngire: i léngire porja sys syr sapa šerenca, savénca jone dukhavenas. I javír manúš, savé na sys muliakirdé kadalé fransenca, až na riskirdé pale doléstyr, so jone kerdé péskire vasténca. Jone na pirijačne te bandiakiren šeré nalačhé duhenge, xohané devlenge suvnakástyr, rupéstyr i xarkomátyr, baréstyr i kaštéstyr, savé na moginéna ni te dykhén, ni te šunén, ni te psirén. I jone na pridžindle péskiri bang dre meribena, ni dre čovahanypena, ni dre biladžakuné réndy, ni dre čoribena. I me dykhcjom javire zoralé Jangolós, Savó džálas telé bolybnástyr i Savó sys sýrby uridó dro óbloko. Pe léskiro šeró sys bryšyndytko bangi (raduga) i léskiro muj sys sýrby kham i léskire piré (podešvy) sys sýrby jagakire stýlby, i léste sys dro vast tyknó svítko, savó sys otphandló. I jov čhudiá péskiri čačí (pravo) ĥerój pe mórjo (derjáv), a zérvo (liévo) ĥerój ža pe phuv, i jov dyjá gódla adiáke zoralés, syr ščer (liévo) rykinela. I kiéli jov dyjá gódla, tedy eftá grómy phendlé péskire zanienca (glosienca). I kiéli eftá grome phendlé, tedy me skedyjompe te čhinav. I me šundjom zan bolybnástyr, so phendiá: “Garáv davá pe čergenorí, saví phendlé eftá grómy i na začhin davá.” I Jangólo, Saves me dykhcjom, terdindoj pe morie (derjáv) i pe phuv, ĥazdyjá péskiro čačó vast ke bolybén, i sovlahadiá Odolesa, Kon dživéla pe saré viéki, Savó sozdyjá bolybén i dová, so isyn dro Bolybnáskiro Rajo, i phuv i dová, so isyn pe phuv; i mórjo (derjáv) i dová, so isyn dro mórjo (derjáv). I phendiá davá Jangólo, so butýr na javéla te otčhuvelpe dyvés, kiéli dre dyvesá, syr eftáto Jangólo phurdela dre péskiro rógo, tedy Devél keréla pir Leskiro ĥarado zaduminyben. Davá saró javéla adiáke, syr Jov mištó phendiá péskire pishar'jénge, prorokenge. I zan, saví me šundjom bolybnástyr, nevéstyr rakirdiá mánca i phendiá: “Džá, le svítko, so isyn otphandló dro Jangoloskiro vast, savó isyn terdó pe mórjo (derjáv) i pe phuv.” I me gijom ke Jangólo, rakirí léske te del mánge tyknó svítko. I jov phendiá mánge: “Le i xa les. Joj iavéla kirko dro tyró kužum (želudko), a dro tyró muj jov javéla gudló syr avgín.” I me lyjom davá tyknó svítko Jangoloskire vastéstyr i xajom les. Jov sys gudló syr avgín dro miro muj. I kiéli me nakhadjom les, jov jaciá kirko dro miro kužúm (želudko). I sys phendló mánge: “Túke trej nevéstyr te angilphenes angíl manušýtka rásy, kherítka ródy (pliémi), jekhé-čibákire irjá (čibá/ čibjá), angíl kral'jénde.” I sys dynó mánge triščynitko kašt (trost') syr destó te mierinav, i sys phendló: “Uštý i vymierin Devléskiri Khangirí i altárjo i odolén manušén, savé kloninenape patyvása odój. A gréda (dvóro), saví isyn javriestyr pal Khangirí, mek la i na mierin la. Joj sys dyný Najudénge. Jone javéna te štakiren ĥerénca Svénto Fóro štardešá duj čhoná. I me dáva zor miré duje Jakhitkonenge i jone javéna te angilphenen tysjonco duj šelá šovdešá dyvesá, savé javéna uridé dre goné balendyr.” Dalé duj Jakhítka isyn olivitka kaštá i duj momolytka (svietil'niki), savé isyn terdé angíl Devléste pir phuv. I kóli vari-kon vykedéla te kerél čoripén lénge, tedy jag vydžála léngire móstyr i xasiakiréla léngire vergén. I kóli vari-kon zakaméla te kerél čoripén lénge, tedy adiáke-pac' odoléske trej te merél. Adalé Jakhitkonende isyn zor te phanden bolybén, sob (kaj) te na džal bryšýnd, kiéli jone javéna te angilphenen (te proročynen). I jone rikiréna zor, sob (kaj) paniá te pirikerenpe dro rat i te muliakirén len fransenca adákicy but móly, kicý jone vykedena. I kiéli jone končyndle péskiro dophenybén, tedy drakono, savó vydžála liunostyr, javéla te marélpe lénca, i léla upralypén pe lénde i muliakiréla len. I javéna léngire trúpy pe baré-foróskire vulícy (gásy). Davá fóro pir dúho (fáno) javéla te kharelpe Sodómo i Jegípto, kaj adiáke-pac' amaró Raj Devél sys primardo pe trušúl. I manušá manušytkoné nacyiéndyr, jekhe-čibakire ir'jéndyr (sem'iéndyr), kheritkoné rodendyr i javire manušéndyr javéna te dykhén pe duj dalé trúpy trin pašésa dyvesá i na domekena te zaganaven len dre phuv. I odolé, savé javéna te dživén pe phuv, javéna te radynénpe léngire meribnástyr. Jone javéna te radyneppe zoralés i te bičhaven dáry jekh jekhéske, pal-dová so kodolé duj proróki drieván menčyndle manušén. I paló trin pašésa dyvesá džiibnáskiro dúho (fáno) Devléstyr zagijá dre lénde. Jone terdiné pe péskire ĥerá i bari dar pyjá pe odolénde, savé dykhné pe lénde. I jone šundlé zoralý zan bolybnástyr, so rakirdiá lénge: “Džán upré adarík.” I adalé duj proróki giné upré pe bolybén dro óbloko, i léngire vérgi dykhné pe lénde. I dro dova-pac' mardó (štúnda) kerdiápe drieván baró phuvjákiro trinskiriben i déšto foróskiri paš pyjá, i eftá tysjoncy manušén sys zamardé. I odolé, savé jačnépe, strahádyne i slavindle Devlés, Savó isyn dro Bolybnáskiro Rajo. Javír bída gijá krig: dykh, tríto bída džála sýges. I eftáto (bitrinentiro déšto) Jangólo phurdyja dre péskiro rógo (truba): i sys zoralé zaniá pe bolybén, so rakirdé: “Svetytko Kralipén amaré Ráskire-Devléskiro i Léskire Xristosóskiro javdiá i Jov javéla te kralinen pe saré viéki.” I biš te štar godephuré, savé sys bešté pal péskire trony angíl Devléste pyné pe péskire muiá i poklonindlepe patyvása Devléske, phení: “Ame parikirasa Túke, Baró Rajo Dévla, Sarezorjákiro, Jekh, Kon isyn i Kon sys, pal-dová so Tu lyjan Tyró zoralypén i jacián te kralines. Náiudy xoliasyne doléske, so javdiá Tyrí xolý dro časo te sendiakires mulen, i te otdes pale Péskire pishar'jénge, prorokenge, i sventonenge i odolénge, savé daréna Tyré lavéstyr, barenge i tyknenge. Te muliakires odolén, savé xasiakirena phuv.” I psiradyja (otphandiápe) Devléskiri Khangirí, saví isyn dro Bolybnáskiro Rajo i Kovčégo (Mohtó) Devléskire zavietósa sys dyc'lo dre Khangirí. I jačné bliskavícy, i zaniá (glosiá), i grómy, i phuvjákiro triinskiriben i baró ĥrádo. I sys dyc'ly/bicialy drieván bari ĥiertýk (znamiénijo) pe bolybén: sys džuvlý sýrby uridy dro kham i čhon sys tel lákire ĥerá, i viánka (koróna), saví sys čhudý khetané dešudujé čergeniendyr, sys pe lákiro šeró. Adaja džuvlý sys pharí: joj délas gódla dukhendyr i joj menčyndiape syr džuvlý, saví bijanéla. I sys javír ĥiertýk dyc'ly/bicialy pe bolybén: i, ake, baró loló drakono eftá (eftane) šerenca i dešenca šyngenca i pe dalé šeré sys eftá diademy; i léskiri pori tyrdela tríto paš bolybnáskire čergeniendyr i jov čhurdyjá telé len pe phuv. I drakono terdijá angíl džiuvliate, savjake treindiá te bijanél, sob (kaj), syr joj bijanéla, jov mogindiá te xal tyknorés. I joj bijandiá muršores, savó javéla te xulainél pe saré manušýtka ródy sastruné destesa. A lákiro tyknoro sys čhudo vaš Devléske i Léskiro trono. Džuvlý nascia pe čhučí phuv pe štéto, savó Devél prigotovindia láke, sob (kaj) jone te čaliakiren la jekh bar i dujšelá šovdešá dyvesá. I kerdiápe maribén dro Bolybnáskiro Rajo. Mihailo i léskire Jangóly mardépe drakonosa. A drakono i léskire Jangóly mardépe pale i lénca: i jone na pirimarde, i na lathiape až štéto vaš lénge dro Bolybnáskiro Rajo. I baró drakono sys čhurdynó telé, phuranó sap, savés kharéna nálačho ci beng, savó xohavelas saró svéto. Jov sys čhurdynó telé pe phuv i léskire Jangóly sys čhurdyné telé. I me šundjom zoralý zan bolybnástyr, so rakirdiá: “Kakaná javdiá zrakhibén i zor i Kralipén Devléstyr Dadéstyr. Kakaná isyn Léskire-Xristososkiri zor, pal-dová so bangiakiribnaskiro pe amaré pšalénde, savó bangiakirelas len angíl Devléste dyvesé i ratý, sys čhurdynó telé. I amaré pšála lyné upralypén pe léste sventoné Bakroréskire ratésa i lavésa léngire dophenybnendyr i jone na dénas čol (cenindle) péskiro džiibén butýr meribnástyr. Paldavá rádynpe, Bolybnáskiro Rajo! Radynénpe odolé, kon dživéla odój! Ne bída pe phuv i pe mórjo (derjáv), pal-dová so nálačho gijá telé darane xoliása, džinindoj, so jaciápe léske nábut časo. I kiéli drakono dykhciá, so les čhurdyné telé pe phuv, tedy jov lyjá te tradel džuvliá, saví bijandiá muršores. I láke sys dyné baré-orlóskire (kidóskire) duj phaká (kryly), sob (kaj) joj te vurnial pe čhučí phuv pe péskiro štéto, kaj la čaravenas trin pašésa berš krig sapestyr. I mekciá sap móstyr paní syr reka (len'), sob (kaj) rekakiri (leniakiri) paní te lydžál krig la. Ne phuv pomogindia džuvliáke i psiradia (otphandia) phuv péskiro andrypen sýrby muj i zatyrdyja rekakiro (leniakiro) paní, savó drakono mekciá móstyr. A drakono zoralés xoliásyja pe džuvliáte i gijá pe maribén javire lákire bijatenca, savé jačnépe lákire rodóstyr, kon prirakhelas Devléskire priphenybená i rikirelas Xristosóskire lavá. I me sómas terdó pe morjoskiro (derjavéskiro) práho. I me dykhcjom riskiribnáskire murdales (zvierjos), savó ĥazdelaspe morjostyr (derjavestyr), savéste sys eftá šeré i deš šyngá (rógi). Pe kažno léskiro šyng sys diadema, a pe kažno šeró sys lav te kaliakiren Devlés. I riskiribnáskiro murdál, savés me dykhcjom, sys sýrby lieopardo, a ĥerá (piré) sys léste sýrby ričeskire ĥerá, a muj léskiro sys sýrby muj ščereste (lievoste). I drakono dyjá léske péskiri zor i trono i bari zor. I jekh šeró riskiribnáskire – murdaleskire šerendyr sys xasiakirdo ke meribén, ne davá meribnytko fránso (rana) sys sastiakirdo. I sarí phuv divindiape i gijá pal riskiribnáskire murdaléste. I jone klonindlepe drakonoske, savó dyjá zor riskiribnáskire murdaleske. I jone klonindlepe patyvása riskiribnáskire murdaleske, rakirí: “Kon isyn adasavó, syr davá riskiribnáskiro murdál? Kon moginéla (saštynela) te marélpe lésa?” I murdaleskire moske sys dyný vólia te phenél phut'kirdé lavá te kaliakirel Devlés, i léske sys dyný zor te kerél péskiri butý štardešá duj čhoná. I jov otphandia péskiro muj te kaliakirel Devlés i te kaliakirel Léskiro lav i štéto, kaj Jov dživéla i odolén, savé dživéna dro Bolybnáskiro Rajo. I léske sys dynó te džal maribnása pe sventonende i te lel upralypén pe lénde, i léske sys dynó pravo pe kažno ródyco (kolieno) i pe manušýtko nacyja (narodo), i pe kažno jekhé-čibákiri irí/sém'ia (čib), i pe kažno kherítko ródo (pliemjo). I saré, kon dživéla pe phuv, javéna te kloninenpe patyvása dalé riskiribnáskire murdaleske, kon isyn na začhindló dre džiibnáskiri lylvarí, saví isyn Sventoné Bakroreste, Savó sys muliakirdo svetóskire anglypnástyr. Konéste isyn kaná, mek jov te šunél. Konéske trej te lydžál dro pliéno, odová kokoró džála dro pliéno. Kon zamarela kurtalása, odová kokoró javéla zamardo kurtalátyr. Adáj trej vyrikiriben i patiaibén Devléskire manušénge.” I me dykhcjom javire riskiribnáskire murdalés, savó džálas javrí phuvjátyr. Léste sys duj šyngá syr bakroreste i jov rakirdiá syr drakono. I jov kerélas saró pervoné-murdaléskire pravósa. Jov začhuvelas sarí phuv i odolén, savé dživéna pe joi, te kloninenpe patyvása pervoné riskiribnáskire murdaleske, savéste meribnytko fránso sys sastiakirdo. I jov kerélas baré znamiénii (ĥiertyká), so až lydžalas telé jag bolybnástyr pe phuv angíl manušénde. I jov xohavelas odolén, savé dživéna pe phuv kodolenca ĥiertykénca, so léske sys dynó te kerél angíl pervoné-riskiribnáskire murdaléste, rakirí sarénge, kon dživéla pe phuv, te kerén daja partín (óbrazo) adalé murdaleskiri, savéste sys fránso kurtalátyr i savó dživdiá. Adalé javire-riskiribnáskire murdaleske sys dyný zor te del džidó dúho (fáno) dre daja patrín (óbrazo) pervoné murdaleskiri adiáke, sob (kaj) daja patrín (óbrazo) te lel te rakirél i sozdyjá adiáke, sob (kaj) saré, kon na kloninenape patyvása murdaleskire patriniake (obrazoske), te javén muliakirdé. I kadavá javír riskiribnáskiro murdál kerélas adiáke, sob (kaj) saré manušénge, tyknenge i barenge, barvalenge i bogenge, vol'none i pishar'jénge te doresen špéra (znako) pe čačó (pravo) vast ci pe léngiro čekat; sob (kaj) nikón na moginelas te kinel, te biknel apríč odoléste, savéste isyn špéra; ci murdaleskire lavésa ci léskire-lavéskire ginésa (čyslosa). Adáj isyn godypén. Konéste isyn péskiri godý, mek jov te vyginel murdaleskiro gin (čyslo): davá isyn manušýtko gin (čyslo), léskiro gin (čyslo) isyn šovšelá šovdešá šov. I me dykhcjom i, ake, Svénto Bakroró isyn terdó pe bérga Sióno, i sys Lésa šel te štardešá štar tysjoncy manušén, savénde Léskiro lav i Léskire-Dadéskiro lav sys čhindlé pe čekat. I me šundjom zan bolybnástyr, syr buté-paniéngire šoliá i syr baró gromo. I me šundjom, syr bašaibnaskire bašavenas pe péskire gusli. I jone baganas neví gilý angíl trono i angíl štaré džidalende (žyvotnonende) angíl godephurende. I nikón na mogindiá te sykljol daja gilý apríč kadalé šel te štardešá-štar-šelá tysjoncy manušénde, savén Xristóso vykindia saré manušéndyr pe phuv. Davá isyn manušá, savé na magirdé pes džuvliénca; jone sys náromandune muršá. Jone džánas palál pal Sventoné Bakroréste, karik na džálas Jov. Jone sys vykindle maškír manušénde, i jone isyn pérva manušá phuvjátyr vaš Devléske i Sventoné Bakroreske. I na sys lathno xohaibén dro léngiro muj, jone sys bidošákire. I me dykhcjom javire Jangolós, savó vurnialas vučés dro fáno (vozduho), maškirál bolybén, konéste sys viéčno Jevángielija, sob (kaj) te mištophenel odolénge, savé dživénas pe phuv, kažnoné kheritkoné rodóske i rodycóske i jekhé-čibákire irjáke/sem'iáke (čibake/ čibjake) i kažnoné-manušytkoné nacyjáke. Jov phendiá zoralé zaniása: “Darén Devléstyr, vyphenen sláva Léske! Léskiro mardó (štúnda) te sendiakirél javdiá. Pokloninenpe patyvása Odoléske, Kon sozdyjá bolybén i phuv, i mórjo (derjáv) i paniéngire ĥanyngorjá.” I javír Jangólo, savó džálas palál pal Pervoneste, phendiá: “Pyjá telé, bari Vavilonija, pyjá telé! Joj paniakirdia saré nácyi péskire-kamibnáskire moliása (vinosa) te kerén zoralés biladžaipén.” I tríto Jangólo, savó džálas palál pal lénde, phendiá zoralé zaniása: “Kon kloninelape patyvása riskiribnáskire murdaléske i léskire patriniáke (obrazóske), i priléla špéra pe péskiro čekat ci vast, kodová javéla te p'jel Devléskire-xoliakiri mol, so isyn narozlydžimi paniésa dre kučik Léskire zorjakiri! Kon sozdyjá davá, javéla te menčynelape dre jag i dre siéra (dzevélia) angíl sventoné Jangolende i angíl Sventoné Bakroreste. Thuv (dymo) léngire men'katyr ĥazdélape pe saré viéki. Na javéla ni dyvés, ni rat te otkhinjon odolénge, savé kloninenape patyvása angíl riskiribnáskire murdaléste ci angíl léskiri patrín (óbrazo), i kažnonéske (svakoneske), kon prilyjá špéra léskire lavésa. Ĥáda, trej vyrikiriben sventonenge, savé prirakhena Devléskire priphenybená i patiaibén dre Isusóste. I me šundjom zan bolybnástyr, saví phendiá: “Začhin: ‘Bahtalé isyn odolé, savé meréna dro jekhipén Devlésa adadyvesestyr!’” “Čačó”, – rakiréla Dúho. “Jone déna ráda te otkinjon pharé butiátyr i léngire réndy džána palál!” I me dykhcjom, ake, parnó óbloko, i vari-kon sys beštó sýrby Čhavó Manušéskiro. Pe Léskiro šeró sys suvnakuný viánka (koróna) i dro Léskiro vast sys vostro (čolaló) sierpo (čhindló). I javír Jangólo vygijá Khangirjátyr i dyjá gódla zoralé zaniása odoléske, kon sys beštó pe óbloko: “Bičháv peskro vostro (čolaló) sierpo i čhin, pal-dová so mardó (štúnda) te sčhines, javdiá, givá pe phuv isyn spiala.” I Odová, Kon sys beštó pe óbloko, čhindiá čhurdypnasa pir phuv i aplodo pe phuv sys sčhindlo. I javír Jangólo vygijá Khangirjátyr dro Bolybnáskiro Rajo, savéste sys adiáke-pac' vostro (čolaló) sierpo. I javír Jangólo vygijá altarjostyr, savéste sys zor pe jag, i, savó rakirdiá zoralé zaniása odolé Jangoloske, konéste sys vostro (čolaló) sierpo, i phendiá: “Bičháv peskro vostro (čolaló) sierpo i skéde vinagradoskire randiá pe phuv, pal-dová so vinagradýtka múri jačné spiala.” I Jangólo uhtyldia peskro sierpo i skedyjá vinagrado (drakh) pe phuv i čhurdyjá tel baró prieso Devléskire xoliátyr: i sys štakirde (stopčyndle) múri dro prieso, paló fóro, i rat thadyja priesostyr ke gréngire švarjá ručajosa pe trin šelá kilomietry (versty) dlengipnása i pašýl duj šelá metry dro xoripén. I me dykhcjom javír bari i divno ĥiertýk (znamiénijo) pe bolybén: sys eftá Jangóly eftá (efte) palatuné fransenca, savénca Devléskiri xolý končyndiape. Tedy me dykhcjom vari-so sýrby stjoklýtko (balunaló) mórjo (derjáv), savó sys zmiešyndlo jagása. I sys terdé pe mórjo (derjáv) kodolé, savé lyné upralypén pe riskiribnáskire murdaléste, pe léskiri patrín (óbrazo) i léskire-laveskiro čyslo (gin). Jone rikirde Devléskire gusli. I jone baganas Mojzaskiri gilý, Devléskire pishariskiri, i Sventoné Bakroreskiri gilý, phení: “Save baré i dívna tyré butiá, Rajo Dévla, Sarezorjákiro! Tyré dromá isyn čačuné i čačipnaskire, Králi manušéngiro! Kon isyn odová, savo na daréla Tútyr, Rajo Dévla, I kon na slavinela Tyró Lav? Pal-dová so Tu san Jekh Svénto, pal-dová so saré manušá javéna, i jone pokloninenape patyvása angíl Túte pal-dová, so Tu čačunés pridžinesa manušén angíl bangipen!” I paló (poslie) saró davá me dykhcjom Svénto Šátra, dre Saví psiradiape Khangirí. I vyginé eftá Jangóly dalé Khangirjátyr, savénde sys eftá fránsy, i savé sys uridé dre žužé, parné, pohtanytka uribená i jone sys piriphandle ke kolýn suvnakuné kustykenca. I jekh štaré džidalendyr (žyvotnonendyr) dyjá eftá Jangolenge eftá suvnakuné kučika, so sys pherdé Devléskire xoliása, so javéla te dživél pe saré viéki. I Khangirí jaciá pherdý thuvesa Devléskire slavatyr i zoralypnastyr i nikonéske sys naštý te zadžál dre Khangirí, paka končynenape eftá fránsy Jangoléngire. I me šundjom zoralý zan Khangirjátyr, saví phendiá eftá (efte) Jangolenge: “Džán i vyčhuven pe phuv eftá tahtáia (čašy) Devléskire xoliása.” I pérvo Jangólo vygijá i vyčhudiá péskiro tahtáj pe phuv: čoré i fuj fránsy (rány) jačné pe manušénde, pe savénde sys riskiribnáskire-murdaleskire (zvierjoskire) špery, i, savé poklonindlepe patyvása angíl léskiri patrín (óbrazo). I javír Jangólo vygijá i vyčhudiá péskiro tahtáj dro mórjo (derjáv): i paní kerdiápe sýrby mulé-manušéskiro rat i kažno džidó di (sozdyiben) myjá dro mórjo (derjáv). I tríto Jangólo vyčhudiá péskiro tahtáj dre réki (leniá) i paniengire ĥanyngorja: i jone kerdépe ratésa. I me šundjom Jangolós, savó rikirdia zor pe paní, phení: “Čačunó san Tu, Savó san i Savó sánas, Svénto san Tu, so Tu sendiakiresa adiáke”, Pal-dová so jone pročhude rat Tre sventonengire i prorokengiro, I paldavá Tu dyján lénge rat te p'jen, syr jone isyn mol davá. I me šundjom zan altarjostyr, so phendiá: “Čačó, Rajo Dévla, Sarezorjákiro Devél, čačuné i čačipnaskire isyn Tyré sendy!” I štárto Jangólo vyčhudiá péskiro tahtáj pe kham: i sys dynó khameske te xačkirel manušén jagása. I manušá sys xačkirdé baré xačkiribnasa i jone kaliakirenas Devléskiro lav, Savó rikirdia zor pe dalé fránsy. Ne jone na riskirdé péskiro džiibén grehéndyr ke Devél i na vyphendle sláva Léske. I pándžto Jangólo vyčhudiá péskiro tahtáj pe riskiribnáskire-murdaleskiro (zvierjoskiro) altárjo: i kalypén čhakirdia riskiribnáskire-murdaleskiro kralipén i manušá dandyrenas pes pal péskire čibá (čibjá) dukhendyr; i jone kaliakirenas Bolybnáskire Devlés pal péskire dukhá i fránsy. Ne jone na riskirdé péskiro džiibén grehéndyr ke Devél doléstyr, so jone kerdé. I šóvto Jangólo vyčhudiá péskiro tahtáj dre bari reka (len') Jevfrato: reka (len') vyšutija, sob (kaj) te javél skedynó drom kral'jenge dolé rigátyr, kaj kham uštéla. I me dykhcjom trin beda dúhi, savé sys syr capnia (žamby). Jone džánas javrí móstyr drakonostyr, riskiribnáskire murdalestyr i xohané prorokostyr. I dalé benglane dúhi, so keréna ĥiertyká (znamiénii), džána angle ke králja pe davá saró svéto, kaj isyn manušá, sob (kaj) te kedenpe khetané maribnása pe Devléste Sarezorjakireste pe baró Dyvés. “Ake, me džáva syr čor. Bahtaló isyn odová, kon isyn nasuto i rakhéla péskiro uribén, sob (kaj) te na psirél nango i, sob (kaj) te na dykhél léskiri ladž!” I kadalé benglane dúhi kedyne khetané kral'jén pe štéto, so kharélape Judytkes “Armagiedono.” I eftáto Jangólo vyčhudiá péskiro tahtáj pe fáno (vozduho): zoralý zan javdiá tronostyr, savó sys dre Khangirí, saví phendiá: “Davá kerdiápe.” I sys bliskavícy, grómy i zaniá, i jaciá baró phuvjákiro trinskiriben, so na sys angíl dová, syr manúš lyjá te dživél pe phuv-dasavo zoraló sys phuvjákiro trinskiriben. I baró fóro rospyjape pe trin pašá, i fórja, kaj napatiaibnaskire, pyné. Devél ripirdia bari phuv Bari Vavilonija i dyjá láke te p'jel mol Léskire tahtastyr – mol (vino) Léskire xoliása, kiéli Jov drieván xoliasóla. I kažno óstrovo (džip) xasijá, i bérgi na sys dyc'le. Baré-gradóskire ĥirilá, savé sys pašé pandždešá kilo pharipnasa, pyné bolybnástyr pe manušénde, savé kaliakirenas Devlés pal fránsy gradostyr, pal-dová so drieván darano sys davá fránso. I vygijá jekh eftá (eftane) Jangolendyr, savéste sys eftá tahtaja, i rakirdiá mánca i phendiá: “Jav, me sykaváva túke syr barja rozmekne džuvliá javéna te sendinén, saví sys bešty pir but paniá, savjása králja pe phuv kerdé biladžaipén i manušá phuvjátyr matjonas moliátyr lákire biladžaipnastyr.” I Dúho (Fáno) lydžijá man pe čhučí phuv. I me dykhcjom džuvliá, saví sys bešty pe lolé-riskiribnáskire murdaléste. Davá murdál sys saró, sýrby sčhindlo lavénca, savé kaliakirenas Devlés. Léste sys eftá šeré i deš šyngá (rógi). I džuvlý sys uridy dro slivitko (khilavitko) i jarko loló than, so ziainelas suvnakása, kučoné barénca i mutinasa (žemčugosa). Joj rikirdia dro péskiro vast suvnakunó tahtái, savó sys pherdó džungalypnasa (brytkimasa) i nažužypnasa lákire biladžaipnastyr. I pe lákiro čekat sys čhindló lav, so značyndia čorahanés: “Bari Vavilonija – isyn daj rozmekne džuvlienge i kažnoné džungalypnaske pe phuv.” I me dykhcjom, so adáia džuvlý sys maty sventoné-manušéngire ratestyr i men'kengire-jakhitkonengire ratestyr, savén zamardé pal Xristosóste. I kiéli me dykhcjom la, me drieván divindjompe. I Jangólo phendiá mánge: “Sóske tu divinesape? Me phenáva túke kadalia-džuvliákiro i dalé-riskiribnáskire-murdaleskiro čorahanyben, savó lydžála la i savéste sys eftá šeré i deš šyngá (rógi). Riskiribnáskiro murdál, savés tu dykhcián, sys i butýr nane les, i jov vydžála liunostyr (adostyr) i džála pe xasiakiriben. I manušá, savé dživéna pe phuv, savengire lavá nane začhindlé dre džiibnáskiri lylvarí svetóskire anglypnástyr, javéna te divinenpe, syr dykhéna, so riskiribnáskiro murdál sys, i nane les, ne jov nevéstyr javéla. Vaš davá trej bari godý i godypén. Jefta šeré isyn eftá bérgi, pe savé džuvlý isyn bešty. Dalé eftá šeré adiáke-pac' isyn sýrby eftá králja, pandž králja pyné zorjátyr, jekh králi isyn, javír králi iščo (inké) na javdiá; kiéli jov javéla, tedy nábut časo léske te javél. I riskiribnánskiro murdál, savó sys i savés butýr nane, isyn ohtóto (bidujéngiro déšto) králi, kon isyn jekh kadalé eftá (efte) kral'jendyr, i kon džála pe xasiakiriben. I deš šyngá, so tu dykhcián, davá isyn deš králja, savénde iščo (inké) nane kralipén, ne jone doreséna zor pe jekh mardó (štúnda), syr králja riskiribnáskire murdalesa. Kadalé deše kral'jénde isyn jekh mýslia, i jone piridena péskiri zor i pravo riskiribnáskire murdaléske. Jone javéna te marénpe proti Sventoné Bakroreste i Svénto Bakroró léla upralypén pe lénde, pal-dová so Jov isyn Králi Kral'jéndyr, Raj Devél rándyr, khetané péskire vykedyné i patiaibnytkone manušénca, savé isyn pašýl Léste. I Jangólo phendiá mánge: “Paniá, so tu dykhésa, pe savé rozmekny džuvlý isyn bešty, davá – manušýtka ródy, i manušýtka nácyi (narody), kherítka ródy (pliémi) i jekhé-čibákire irjá (jazyki). I deš šyngá, savé tu dykhcián pe riskiribnáskire murdaléste, javéna drieván te na sykavén patýv rozmekne džuvliáke: jone léna sarí zor látyr i mekéna la nangiasa i xána sarésa lákiri loč (plot') i xačkirena la jagása. Pal-dová so Devél dyjá léngire ilenge te kerén pir Léskiri godý, te kerén jekh zaduminyben i te den léngiro Kralipén riskiribnáskire murdaleske, paka spolninenape Devléskire lavá. I džuvlý, savjá tu dykhcián, isyn sýrby baró fóro, savó kralinela pe kral'jénde pe phuv.” Paló (poslie) davá me dykhcjom javire Jangolós, savó džálas telé bolybnástyr. Léste sys bari zor i phuv ziainelas syr dud (svéto) léskire jarkone slavatyr. Jov délas gódla zoralé zaniása, phení: “Pyjá, bari Vavilonija, pyjá bari biladžakuny, i jaciá džiibnytkone štetosa bede duhenge i bešybnasa kažnoné benglane duhoske, i štaribnaskire klietkasa kažnoné džungalé (gidkoné) čirikléske; doléske so saré nácyi piné lákiri mol, zoraló matyben lákire blendostyr. Králja pe phuv kerdé ladžaipén lása i kúpcy (tylgárja) pir phuv barvalyne lákire zoralé-bimierakire barvalypnastyr.” I me šundjom javír zan bolybnástyr, saví phendiá: “Vydžán látyr miré manušále; sob (kaj) te na javén khetané dre léngire gréhi, sob (kaj) tumé te na doresen lákire fránsy: pal-dová so skedynépe khetané lákire gréhi ke bolybén i Devél ripirela lákiri bang. Kerén pale láke adiáke, syr joj sozdyjá tuménge. Otdén pale láke dre duj móly butýr pir lákiri butý. Zmiešynen láke duj móly matedyr mol dre lákiro tahtái; pe kicý joj pes slavinelas i sys dro bimierakiro barvalypén, pe adákicy den láke mén'ki i kaly smentnyma. Pal-dová so joj šarela pes phenybnasa: “Me bešava syr králica. Me na som pivly (udova). Me nijékhvar na javáva dre kaly smentnyma”: paldavá fránsy, meribén, smentnyma roibnasa i bari bokh javéna dro jekh dyvés pe láte. Jag xačkiréla sarésa la, pal-dová so Raj Devél isyn zoraló, Savó sendiakiréla la. Králja pir phuv, savé sys khetané lása dro bléndo i dživénas bimierakiro barvales lása, kiéli dykhéna thuv jagatyr, so xačkirelas la, tedy jone javéna te rovén pharés i te den gódla jasvénca pal láte. Terdindoj dur lákire jagatyr, pal-dová so jone darándyne lákire men'katyr, jone phenenas: “Bida, bída túke, bari i zoralý Vavilonija! Ake, pal mardó (štúnda) javdiá séndo pe túte.” I kúpcy (tylgárja) pe phuv adiáke-pac' javéna te rovén pharés i te den gódla jasvénca pal láte, pal-dová so nikón butýr na javéla te kinel léngiro tovaro (arcikulo), ni arcikulo suvnakástyr, ni rupéstyr, ni kučoné barendyr, ni mutiniatyr, ni bisierostyr visonytkone thanestyr, ni slivitkone (khilavitkone) thanestyr, ni kežestyr, ni jarkone lolé thanestyr, ni kažno tovaro (arcikulo) šukarone-khandypnaskire kaštéstyr, ni kažno tovaro (arcikulo) slonytkone kokalestyr, ni kažno tovaro (arcikulo) kučoné kaštéstyr, ni xarkomátyr, ni sastyrestyr, ni mramorostyr; ni bahestyr (koricatyr), ni aromatnone indiitkone rukhendyr (korniendyr), ni fimiamostyr, ni mirostyr, ni ladanostyr, ni moliátyr, ni olivitkone dzetestyr, ni jaržestyr, ni parné givestyr, ni kheritkoné murdaléndyr (žyvjolátyr), ni bakréndyr, ni grendyr, ni vurdenendyr, ni pishar'jendyr, ni manušytkoné dijéndyr. I barjakirdé (plódy), ke savé tyró di adiáke tyrdyjape ĥalkimasa, džála krig tútyr, sarí tyrí šuk i ziaindlo mištypén xasiné tútyr, i tu butýr len na lathesa. Tylgarja (kúpcy) pir davá, savé barvalyne dalé foróstyr, javéna te terdjon dur, pal-dová so jone daréna lákire men'katyr. Jone javéna te rovén pharés i te den ĥodla jasvénca, i phenéna: “Bida, bída, baré foroske! Tu prisyklyjan te ur'jespe dre visonytko than, slivitko (khilavitko) i jasno loly ídia i gožakires pes suvnakása, i kučoné barénca, i mutinasa (žemčugósa)! Pal-dovo so dre jekh mardó dasavo mištypén xasijá.” I kažno parmákiro (korabljóskiro) lydžaipnari (kormčo) i kažno manúš, kon plyvindia (dyjá plíma) pe pármy (korabli), i moriaki, i saré butiarné pe mórjo (derjáv), terdiné durál; i jone dénas gódla, kiéli dykhné thuv foróskire xačkiribnastyr, phení: “Nijékhvar na sys dasavo baró fóro, syr kadavá.” I jone čhurdenas pylo pe lengre šeré, dénas gódla, rovenas i dénas gódla jasvénca, phení: “Bida, bída, baré foroske! Dro savó saré barvalyne, konéste sys pármy (korabli) pe mórjo (derjáv), foróskire kučipnastyr! Pal-dová so dro jekh mardó (štúnda) dasavo mištypén xasijá.” Rádynpe foróskire phagipnastyr, Bolybnáskiro Rajo, svénta, Apóstoly i proróki! Doleske, so Devél sendiakirdia la pal tuménde. Tedy jekh zoraló Jangólo ĥazdyjá baró bar baripnasa, syr žernovo bar (beledín) siavéstyr/phurtéstyr (miel'nicatyr) i čhurdyjá les dro mórjo (derjáv), phení: “Adiáke zoralés baré-foritko Vavilonija javéla čhurdyny dro mórjo (derjáv), i sarésa na javéla butýr la. Butýr na javéna te šunén dre túte gusliengiro bašaiben i bagaibnaskire (muzykantengire) zaniá, i odolén, kon bašavela pe sviról'ki i rógi (truby) nijékhvar. Na javéla butýr ni savó spieco pir vari-saví butý (grafári/hudožniko) dre túte. Na javéla butýr šundlo parmákiro lopotýmo dro siav/phurt (miel'nica) dre túte. Butýr na javéla te ziainel momolytkoneskiro (lampakiro) dud dre túte, i butýr na javéna šundlé ternéskire i terniákire zaniá dre túte. Tyré kúpcy (tylgárja) sys naj baredýr pe phuv, pal-dová so tyré čovahanypnasa jone xohavenas saré manušýtka nácyi (narody).” I dre Vavilonija lathné rat prorokengiro i sventoné-Devléskire manušéndyr i saré manušéndyr, konés muliakirdé pe phuv. Paló davá me šundjom zan, sýrby buté-manušéngiro narodo (rása) bolybnástyr, saví phenelas: “Alliluia! Te javél zrakhibén i sláva, patýv i zor amaré Devléske.” Čačuné i čačipnaskire isyn Léskire sendy. Jov sendiakirdia barjá rozmekná džuvliá, saví kaliakirdia phuv péskire blendósa. Devél čhudiá xas' (kára) pale pe láte pal rat Léskire pishar'jengiro lákire vastéstyr.” I javír mólo jone phendlé: “Alliluia! Thuv, so ĥazdélape látyr, syr joj xačolas, javéla pe saré viéki.” Tedy biš te štar godephuré i štar džidalé (žyvotna) pyné i klonindlepe patyvása Devléske, Savó sys beštó pe trono i phenelas: “Amín'! Alliluia!” I zan tronostyr javdiá, phení: “Šarén amaré Devlés! Saré tumé-Léskire pishárja i tumé, baré i tykné, savé daréna Léstyr.” I me šundjom zan sýrby buté-manušéngire narodóstyr, sýrby buré-paniéngire šoliá (šumo), sýrby baré gromengiro, so phenenas: “Alliluia! Pal-dová so amaró Raj Devél, Sarezorjákiro kralinela! Javén te radynaspe i javása drieván ráda; barjakirasa Les slavása, pal-dová so javdiá Sventoné-Bakroreskiro bjav, i Léskiri džuvlý prigotovindia pes!” Láke sys dynó jarko, žužó visonytko than te ur'jel: “pal-dová so visonytko than sykavéla sventoné-Devléskire manušéngiro čačipén.” I Jangólo phendiá mánge: “Začhin: ‘Bahtalé isyn odolé, savén khardé pe Sventoné-Bakroréskiro bjav.’” I Jov iščo (inké) dophendia: “Ĥáda, isyn čačuné Devléskire lavá.” I me pyjom angíl léskire ĥerá te pokloninavpe patyvása léske. Ne jov phendiá mánge: “Dykh ža, ná ker davá. Me som dasavo-pac' pishári, syr tu san, i me som khetané tyré pšalénca te dosykavav pal Xristosóste. De patýv Devléske, pal-dová so dophenybén pal Xristosóste isyn Xristosóskiro lav.” I me dykhcjom psirado (otphandlo) Bolybnáskiro Rajo i, ake, sys parnó graj. Pe léste sys beštó uklistó/é Kodová, Kon kharélape Čačunó i Patiaibnýtko, Savó sendiakiréla čačunés i marelape pal čačipén. Léskire jakh sys syr jagángiri čiborí i but diademy sys pe Léskiro šeró. Léste isyn začhindló titulo (lav), so nikón na džindiá apríč Léste, i Jov isyn uridó dro uribén, savó sys makhno ratésa. Léskiro titulo isyn “Devléskiro Lav.” I xaladé bolybnýtka džánas pal Léste, savé sys pe parné grénde i uridé dro parnó i žužó visonytko than. I Léskire móstyr džála javrí vostro (čolalý) kurtála i Jov javéla te muliakirél rasy (narody). Jov javéla te čaliakirel len sastruné destésa, i Jov javéla te štakirel moliákiro (vinoskiro) prieso baré xoliátyr, kiéli Sarezorjákiro Devél drieván xoliasóla. Pe Léskiro uribén i pe Léskiri statia (stjogny) sys začhindló titulo: “Králi kral'jéngiro, Raj rajéngiro.” I me dykhcjom javire Jangolós, savó sys terdó pe kham. Jov délas gódla zoralé zaniása saré čiriklenge, savé vurniana maškír fáno (vozduho) dro bolybén: “Javén, skedénpe pe bel'veliakiro xabén baré Devléskiro, sob (kaj) tuménge saštý te xan kral'jengire-trupengiro mas, i kapitanengire, i tysjoncengire-xaladéngire barydyrengire, i loč zoralé manušéngire, i grastanó mas i trupóskiro mas odoléngiro, savé isyn bešté pe grénde, i saré-manušéngiri trúpy: vol'none manušéngire i adiáke-pac' pishar'jengire, tyknengire i barengire.” I me dykhcjom riskiribnáskire murdales i kral'jén pe phuv léngire xaladybnenca, savé skedynépe pe maribén angíl Odoléste, Kon isyn beštó pe greste i angíl Léskiro xaladybén. I riskiribnáskiro murdál sys lynó i khetané lésa xohanó proróko, savó kerdiá dívy angíl léste, savénca jov xohavelas manušén, savé doresné riskiribnáskire-murdaléskiro špéra syr klieimo i klonindlepe patyvása murdaléskire patriniáke (obrazóske). Jone sys čhurdyné džidenca dro ziero (oziero) jagása, so xačolas dzeveliasa (sierasa). A léngire javire manušén, savé jačnépe, zamardiá Odoleskiro, Savó sys beštó uklistó/é pe greste kurtalása; saví džálas javrí Léskire móstyr i saré čirikliá/é čalyne léngire trupendyr. I me dykhcjom Jangolós, Savó džálas telé Bolybnástyr Rajostyr i Savéste sys klydýn liunostyr (adostyr), i sys bari zan'dír (cepo) dro Léskiro vast. Jov uhtyldia drakonos, phurané sapes, kon isyn nálačho ci satana i phandia les pe bar (tysjonco) berš; i Jangólo čhurdyjá les dro liúno i phandia les pe čergenorí (piečat') pe léste, sob (kaj) jov butýr te na xohavél manušén paka končynelape tysjonco (bar) berš. Paló davá jov javéla otphandlo pe nabaró časo. I me dykhcjom trony i odolén, savé bešenas pal skamínd, savénge sys dynó te sendiakiren. I me dykhcjom dijá odolengire, konéske čingirde šeré, paldová so jone dophenenas pal Xristosóste i pal Devléskiro lav. Jone na klonindlepe patyvása angíl riskiribnáskire murdaléste ci angíl léskiri patrín (óbrazo), jone na prilyné klieimoskiri špéra pe čekát ci pe léngiro vast. I jone otdžidyne i kralindle Xristosósa bar berš. Javír dijá muléndyr na otdžidyne, paka bar berš končynelape. Davá isyn pérvo otdžidyipen meribnástyr. Bahtalé i svénta isyn odolé, savénge javéla štéto dro pérvo otdžidyipen meribnástyr. Javír meribén na javéla te rikirél zor pe lénde, a jone javéna rašaja Devléske i Xristosóske, i jone javéna te kralinen Lésa bar berš. I kiéli bar (tysjonco) berš končynelape, tedy satanas (nalačhés) otphandena léskire štaribnastyr, i jov džála angíl te xohavél manušýtka nácyi (narody), savé isyn pe štar phuvjákire véngly, Goga i Magoga. Nálačho javéla te kedel khetané len pe maribén, léngiro kicypen (količestvo) javéla baró-syr morjoskiro (derjavéskiro) práho. I jag pyjá bolybnástyr i xaja len. I jone giné sarésa pir phuvjákiro buĥlypén i oblyne sventoné Devléskiro fóro, so sys drógo Devléske. I nálačho, kon xohadia len, sys čhurdynó dro ziero (oziero) jagása i dzeveliása (sierasa), kaj sys adiáke-pac' riskiribnáskiro murdál i xohané proróki. I jone javéna te menčynenpe ratý i dyvesé pe saré viéki. I me dykhcjom baró parnó trono i Jekhés, Kon sys beštó pe léste. Phuv i bolybén našenas krig Léskire móstyr i štéto na sys lathno lénge. I me dykhcjom mulen, baren i ternen, savé sys terdé angíl trono i lylvaria svitkostyr sys otphandle. Javír lylvarí sys otphandly, saví sys džiibnáskiri lylvarí, i mulé sys sendindle pir dová, so jone kerdé pal péskiro džiibén, i so sys začhindló dre lylvaria. I mórjo (derjáv) otdyjá péskire mulen, so sys dre léste. Meribnaskiro štéto i liúno (ado), so isyn tel phuv, dyné pale péskre mulen, savé sys dre lénde. Len sendindle so jekhés pir dová, so jone kerdé. Meribnaskiro štéto i liúno (ado) sys čhurdyné dro ziero jagása. Davá isyn javír meribén-ziero jagása. I kóli vari-kon na sys lathno dre džiibnaskri lylvarí, jov sys čhurdynó dro ziero (oziero) jagása. I me dykhcjom nevó bolybén i neví phuv. Pérvo bolybén i pérvo phuv xasiné i mórjo (derjáv) butýr nane. I me, Iáno, dykhcjom Svénto Fóro, nevó Jerusalimo, savó džálas telé Devléstyr bolybnástyr. Fóro sys skedynó i šukar uridó sýrby terný vaš lákire roméske. I me šundjom zoralý zan tronostyr, so phendiá: “Ake, isyn Devléskiri šátra khetané manušénca! Jov javéla te dživél lénca, i jone javéna Léskire manušá. Kokoró Devél javéla lénca i Jov javéla léngiro Devél. I Devél vykhosela kažno jasvin léngire jakhéndyr. Meribén butýr na javéla, ni túga, ni roibén, ni dukh. Pal-dová so saró, so sys angíl, xasijá.” I, Kodová, Kon sys beštó pe trono, phendiá: “Ake, me keráva saró nevó.” I adiáke-pac' phenéla mánge: “Začhin, pal-dová so kadalé lavá isyn čačuné i patiaibnytka.” I Jov phendiá mánge: “Kerdiápe ke kónco (jagóro) (spolnindiape). Me som Al'fa i Omiega, Anglypén i Kónco (Jagóro). Odoléske, konéste isyn smega (žažda), Me dáva te p'jel džiibnáskire-panjóskire ĥanyngorjatyr bi lovengiro. Odová, kon léla upralypén, priléla davá meknó mištypén Mándyr: Me javáva léske Devél, i jov javéla Miro Čhavó. A darandúki, napatiaibnáskire, magirdé dro vari-so, zamaribnárja; odolé, kon kerdiá biladžaipén, čovahané, kon klonindiape patyvása (kerde šerésa) idolénge, xohaibnárja-léngiri paš javéla khetané dro ziero (oziero), so xačola jagása i dzeveliása (sierasa); davá isyn-javír meribén.” I ĥáda, jekh eftá (efte) Jangoléndyr, savénde sys eftá tahtaja (čašy), so sys pherdé eftá palatuné fransénca, podgíia ke, me i phendiá: “Jav! Me sykaváva túke terniá Sventoné-Bakroréskirja romniá!” Me sómas dro dúho (fáno) i Jangólo ĥazdyjá man pe bari i vučí bérga i sykadiá mánge svénto fóro, Jerusalimo, so džálas telé bolybnástyr, Devléstyr. Davá fóro ziaindia Devléskire jarkoné slavása. Léskiro dud, savo ziaindia, sys sýrby drieván kuč bar, so ziainela, syr bar jaspiso, dyc'lo syr kristalo. Dro davá fóro sys bari i vučí vánta dešudujé portenca (vratenca) i dešudúj Jangóly sys pašýl dalé pórty, a pe dalé pórty sys začhindlé dešudúj lavá, so isyn dešudúj títuly-dešudujé Izrailjoskire rodéndyr. Pe čačí rig sys trin pórty, trin pórty pe západno paš-ratítko (sievierno) rig, trin pórty pe paš-dyvesýtko (južno) rig, trin pórty pe pal-panitko (západno) rig. Foróskiro týno rikirdiape pe dešudúj telatuné bará, pe savé sys dešudúj lavá Sventoné-Bakroréskire Apostoléndyr. I Jangoloste, savó rakirdiá mánca, sys suvnakunó destó te mierinel fóro, pórta (vráty), léskiro tyno (vánta). I fóro sys syr kvadrato: léskiro dlengipén sys dasavo-pac' syr buĥlypén. I Jangólo zmierindia fóro destesa: duj bará štar šelá kilomietry (versty), dlengipén, i buĥlypén, i vučipén isyn dasavé-pac'. I jov mierindia foróskiri bar: šovdešá metry štar šelá pir manušéngiri miéra, davá isyn i Jangoloskiri miéra. Foroskiri vánta (bar) sys kerdy jaspisostyr, a fóro sys žužé suvnakástyr syr žužó stjoklo (balún). I telatuné bará, pe savé sys foróskiri vánta, sys gožakirde kažnoné kuč barénca: pérvo telatuno bar sys jaspisostyr, javír – sapfirostyr, tríto – xalkidonostyr, štárto – zumrudostyr; pándžto – sardoniksostyr, šóvto – sardisostyr, eftáto-xrizolitostyr, ohtóto – birilostyr, jeniáto – topazostyr, déšto – xristoprazostyr, dešupervo – giacyntostyr, dešudujto – amietistostyr. I dešudúj pórty sys kerdé dešudujé mutinéndyr (žemčugendyr), kažno pórta jekhe mutinatyr. Foróskire vulícy (gásy) sys žužé suvnakástyr syr prozračno stjoklo (balun). Ne me na dykhcjom Khangirí dro davá fóro, pal-dová, so Raj Devél, Sarezorjákiro, i Svénto Bakroró Kokoró isyn daja Khangirí. Foroske na trej ni kham, ni čhon te del dud (svéto), sob (kaj) te ziainel dro léste. Devléskiri jarko sláva ziainela dudésa dro fóro i Bakroró isyn sýrby momolýtko (svietíl'niko). I manušýtka narody javéna te psirén foróskire dudéstyr, a králja pe phuv janéna péskiro mištypén. I foróskiri pórta na zaphandélape ni dyvesé, pal-dová so rat na javéla odój. I manušýtka rasy (narody) janéna dro fóro sláva i patýv. Ni savó magirdó, i kodová, kon keréla džungalypén (brytkima) i xohavela naštý te zadžál dro davá fóro, a jekh odová, kon isyn začhindló dre džiibnáskiri lylvarí Bakroreste. I Jangólo sykadiá mánge reka (len') džiibnáskire paniésa, saví sys žužy, syr kristalo. Joj thadelas Devléskire i Bakroréskire tronóstyr. Maškir foróskiri ĥasa (vulíca), pe jekh i pe javír rekakiri (leniakiri) rig sys džiibnáskiro kašt (drévo), so délas dešudúj barjakirdé (plódy), kažno čhon péskiro barjakirdó. I kaštéskire patriá (listy) sys te sastiakiren manušýtka nácyi (narody). I butýr na javéla nisó prokošnó. I Devléskiro i Sventoné-Bakroreskiro trono javéna dro davá fóro i Léskire pishárja javéna te dynarinén Léske, i jone javéna te dykhén Léskiro muj. I Léskiro titulo javéla pe léngire čekata. I rat na javéla butýr i lénge na javéla trej lampakiro dud (svéto) i dud khamestyr, pal-dová so Raj Devél javéla te del lénge dud. I jone javéna te kralinen pe saré viéki. I Jangólo phendiá mánge: “Kadalé lavá isyn patiaibnytka i čačuné. I Raj Devél, Kon délas dúho (fáno) prorokenge [sventoné-r.s.], bičhadiá Léskire Jangolós te sykavél Léskire pishar'jénge dová, so trej te javél syg. I, ake, Me javáva syges”, – rakiréla Xristóso. “Bahtaló isyn kodová, kon rakhéla proročytka lavá lylvarjakire phenybnastyr pal dová, so javéla angíl.” Me som, Iáno, savó dykhciá i šundiá kadavá. I kiéli me šundjom i dykhcjom, tedy me pyjom mósa te pokloninavpe patyvása angíl Jangoloskire ĥerá, Savó sykavelas mánge saré dalé réndy. Ne jov phendiá mánge: “Dykh! Na ker davá! Me som dasavo-pac' pishári, syr tu san. Me adiáke-pac' som pishári, syr i tyré pšála, proróki, savé rakhena lavá dalé lylvarjakire svitkostyr: “Ker šerésa (kloninpe) patyvása Devléske!” I jov phendiá mánge: “Ná čhuv čergenorí pe lavá phenybnastyr pal dová, so javéla angíl (so isyn dro lylvarjakiro svítko), pal-dová so časo isyn pašýl. Mek načačuno duredýr te kerél načačipén, mek ladžakirdó ke magiriben duredýr te kerél ladžaipén. Mek čačunó duredýr te kerél čačipén; mek svénto duredýr te javél Sventonesa.” “Ake, Me javáva sýges (rakiréla Xristóso), – sob (kaj) Me te otdav pale kažnonéske pir dová, so jov kerdiá. Me som Al'fa i Omiega, Pérvo i Palatunó, Anglypén i Kónco (Jagóro). Bahtalé isyn odolé, savé rikirenape ke Léskire priphenybená, sob (kaj) lénde te javél pravo ke džiibnáskiro kašt (drévo), i sob (kaj) te zadžál dro fóro pir pórta. A javrí pal fóro isyn džukela, čovahane, i kon dživdiá džuvliénca syr romniása bi sevlakiro, zamaribnarja, i kon mangdiápe idolénge, i saré javír, konéske davá sys pir iló te rakirél xohaibén. Me som, Isúso, bičhadjom Miré Jangolós te dophenav tuménge davá pir khangirja. Me som Davidóskire ratestyr i léskire-čhavéngiro čhavó, jarko Zlokoskiri Čergen.” Dúho (Fáno) i terný phenéna: “Jav!” I mek o odová, kon šunéla, te phenél: “Jav!” I mek odová, konéste isyn sméga, te p'jel džiibnáskiro paní bi lovengiro. Me dophenava kažnonéske, kon šunéla lavá dalé lylvarjakire phenybnastyr pal dová, so javéla angíl, so isyn dro svítko te rakhelpe: kóli vari-kon phenéla lišnima ke davá phenybén, so javéla angíl, tedy Devél bičhavéla fránsy pe kodoleste, pal so isyn čhindló dro davá lylvarjakiro svítko. I kóli vari-kon otlela vari-so dalé lylvarjákire phenybnástyr, so javéla angíl, tedy Devél otlela léskiro štéto džiibnáskire kaštéstyr (drevostyr) dro svénto fóro, pal so isyn čhindló dro davá lylvarjákiro svítko. Odová, Kon dophenéla saró kadavá, rakiréla: “Čačó. Me javáva syg.” Amín'. Jav, Rajo Dévla, Isúso. Mek bahtalypén Ráskire-Devléskire, Isusóskiro Xristosóskiro te javél tuménca.